๕. นันทาเถริยาปทาน เล่ม ๓๓

๑๖๕|๑๖๕.๑๖๖| ปทุมุตฺตโร นาม ชิโน สพฺพธมฺมาน ปารคู อิโต สตสหสฺสมฺหิ กปฺเป อุปฺปชฺชิ นายโก ฯ |๑๖๕.๑๖๗| โอวาทโก วิญฺญาปโก ตารโก สพฺพปาณินํ เทสนากุสโล พุทฺโธ ตาเรสิ ชนตํ พหุํ ฯ |๑๖๕.๑๖๘| อนุกมฺปโก การุณิโก หิเตสี สพฺพปาณินํ สมฺปตฺเต ติตฺถิเย สพฺเพ ปญฺจสีเล ปติฏฺฐหิ ฯ |๑๖๕.๑๖๙| เอวํ นิรากุลํ อาสิ สุญฺญตํ ติตฺถิเยหิ จ วิจิตฺตํ อรหนฺเตหิ วสีภูเตหิ ตาทิภิ ฯ |๑๖๕.๑๗๐| รตนานฏฺฐปญฺญาสํ อุคฺคโต โส มหามุนิ กญฺจนคฺฆิยสงฺกาโส ทฺวตฺตึสวรลกฺขโณ ฯ |๑๖๕.๑๗๑| วสฺสสตสหสฺสานิ อายุ วิชฺชติ ตาวเท ตาวตา ติฏฺฐมาโน โส ตาเรสิ ชนตํ พหุํ ฯ |๑๖๕.๑๗๒| ตทาหํ หํสวติยํ ชาตา เสฏฺฐิกุเล อหุ นานารตนปชฺโชเต มหาสุขสมปฺปิตา ฯ |๑๖๕.๑๗๓| อุเปตฺวา ตํ มหาวีรํ อสฺโสสึ ธมฺมเทสนํ อมตํ ปรมสฺสาทํ ปรมตฺถํ นิเวทกํ ฯ |๑๖๕.๑๗๔| ตทา นิมนฺตยิตฺวาน สสงฺฆํ โลกนายกํ ทตฺวา ตสฺส มหาทานํ ปสนฺนา เสหิ ปาณิภิ ฯ |๑๖๕.๑๗๕| ฌายินีนํ ภิกฺขุนีนํ อคฺคฏฺฐานํ อปตฺถยึ นิปจฺจ สิรสา วีรํ สสงฺฆํ โลกนายกํ ฯ |๑๖๕.๑๗๖| ตทา อทนฺตทมโก ติโลกสรโณ ปภู พฺยากาสิ นรสุนฺธโร ลจฺฉเสตํ สุปตฺถิตํ ฯ |๑๖๕.๑๗๗| สตสหสฺเส อิโต กปฺเป โอกฺกากกุลสมฺภโว โคตโม นาม นาเมน สตฺถา โลเก ภวิสฺสติ ฯ |๑๖๕.๑๗๘| ตสฺส ธมฺเมสุ ทายาทา โอรสา ธมฺมนิมฺมิตา นนฺทาติ นาม นาเมน เหสฺสติ สตฺถุสาวิกา ฯ |๑๖๕.๑๗๙| ตํ สุตฺวา มุทิตา หุตฺวา ยาวชีวํ ตทา ชินํ เมตฺตจิตฺตา ปริจรึ ปจฺจเยหิ วินายกํ ฯ |๑๖๕.๑๘๐| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๑๖๕.๑๘๑| ตโต จุตา ยามมคํ ตโตหํ ตุสิตํ คตา ตโต จ นิมฺมานรตึ วสวตฺติปุรํ คตา ฯ |๑๖๕.๑๘๒| ยตฺถ ยตฺถูปปชฺชามิ ตสฺส กมฺมสฺส วาหสา ตตฺถ ตตฺเถว ราชูนํ มเหสิตฺตมการยึ ฯ |๑๖๕.๑๘๓| ตโต จุตา มนุสฺสตฺเต ราชูนํ จกฺกวตฺตินํ มณฺฑลีนญฺจ ราชูนํ มเหสิตฺตมการยึ ฯ |๑๖๕.๑๘๔| สมฺปตฺตึ อนุโภตฺวาน เทเวสุ มนุเชสุ จ สพฺพตฺถ สุขิตา หุตฺวา เนกกปฺเปสุ สํสรึ ฯ |๑๖๕.๑๘๕| ปจฺฉิเม ภวสมฺปตฺเต ปุรสฺมึ กปิลวฺหเย รญฺโญ สุทฺโธทนสฺสาหํ ธีตา อาสึ อนินฺทิตา ฯ |๑๖๕.๑๘๖| รํสิริว รูปินึ ทิสฺวา นนฺทิตํ อาสิ ตํ กุลํ เตน นนฺทาติ เม นามํ สุนฺทรา ปวรา อหํ ฯ |๑๖๕.๑๘๗| ยุวตีนญฺจ สพฺพาสํ กลฺยาณีติ จ วิสฺสุตา ตสฺมึปิ นคเร รมฺเม ฐเปตฺวา ตํ ยโสธรํ ฯ |๑๖๕.๑๘๘| เชฏฺโฐ ภาตา ติโลกคฺโค ปจฺฉิโม อรหา ตถา เอกกินี คหฏฺฐาหํ มาตุยา ปริโจทิตา ฯ |๑๖๕.๑๘๙| สากิยมฺหิ กุเล ชาตา ปุตฺเต พุทฺธานุชา ตุวํ นนฺเทนปิ วินา ภูตา อคาเร กึ นุ ลจฺฉสิ ฯ |๑๖๕.๑๙๐| ชราวสานํ โยพฺพญฺญํ รูปํ อสุจิสมฺมตํ โรคนฺตมปิจาโรคฺยํ ชีวิตํ มรณนฺติกํ ฯ |๑๖๕.๑๙๑| อิทํปิ เต สุภํ รูปํ สสิกนฺตํ มโนหรํ ภูสนานํ อลงฺการํ สิริสงฺเกตสนฺนิภํ ฯ |๑๖๕.๑๙๒| ปูชิตํ โลกสารํว นยนานํ รสายนํ ปุญฺญานํ กิตฺติชนนํ โอกฺกากกุลนนฺทนํ ฯ |๑๖๕.๑๙๓| น จิเรเนว กาเลน ชรา สมภิโภสฺสติ ปหาย เคหํ คารยฺหํ จร ธมฺมมนินฺทิเต ฯ |๑๖๕.๑๙๔| สุตฺวาหํ มาตุ วจนํ ปพฺพชึ อนคาริยํ เทเหน น ตุ จิตฺเตน รูปโยพฺพนโลลิตา ฯ |๑๖๕.๑๙๕| มหตา จ ปยตฺเตน ฌานชฺเฌน สรํ มมํ กาตุญฺจ วทเต มาตา น จาหํ ตตฺถ อุสฺสุกา ฯ |๑๖๕.๑๙๖| ตโต มหาการุณิโก ทิสฺวา มํ กมลานนํ นิพฺพินฺทนตฺถํ รูปสฺมึ มม จกฺขุปเถ ชิโน ฯ |๑๖๕.๑๙๗| สเกน อานุภาเวน อิตฺถึ มาเปสิ โสภนํ ทสฺสนียํ สุรุจิรํ มมโตปิ สุรูปินึ ฯ |๑๖๕.๑๙๘| ตมหํ วิมฺหิตา ทิสฺวา อติวิมฺหิตเทหินึ จินฺตยึ สผลํ เมติ เนตฺตลาภญฺจ มานุสํ ฯ |๑๖๕.๑๙๙| ตมหํ เอหิ สุภเณ เยนตฺโถ ตํ วเทหิ เม กุลนฺเต นามโคตฺตญฺจ วท เม ยทิ เต ปิยํ ฯ |๑๖๕.๒๐๐| น ปญฺหกาโล สุภเณ อุจฺฉงฺเค มํ นิเวสย สีทนฺติว มมงฺคานิ ปสุปฺปย มุหุตฺตกํ ฯ |๑๖๕.๒๐๑| ตโต สีสํ มมงฺเก สา กตฺวา สยิ สุโสภณา ตสฺสา ลลาเต ปติตา ลุทฺธา ปรมทารุณา ฯ |๑๖๕.๒๐๒| สห ตสฺสา นิปาเตน ปีฬกา อุปปชฺชถ ปคฺฆรึสุ ปภินฺนา จ กุณปา ปุพฺพโลหิตา ฯ |๑๖๕.๒๐๓| สมฺภินฺนํ วทนญฺจาปิ กุณปปูติคนฺธิกํ อุทฺธุมาตํ วินีลญฺจ สพฺพญฺจาปิ สรีรกํ ฯ |๑๖๕.๒๐๔| สา ปเวธิตสพฺพงฺคี นิสฺสสนฺตี มหุํ มหุํ เวทยนฺตี สกํ ทุกฺขํ กรุณํ ปริเทวยิ ฯ |๑๖๕.๒๐๕| ทุกฺเขน ทุกฺขิตา โหมิ ผุสยนฺตี จ เวทนา มหาทุกฺเข นิมุคฺคมฺหิ สรณํ โหหิ เม สขี ฯ |๑๖๕.๒๐๖| กุหึ วทนโสภนฺเต กุหินฺเต ตุงฺคนาสิกา ตมฺพพิมฺพวโรฏฺฐนฺเต วทนนฺเต กุหึ คตํ ฯ |๑๖๕.๒๐๗| กุหึ สสินิภํ วณฺณํ กมฺพุคิวา กุหึ คตา ทามามาลญฺจ เต กณฺณํ เววณฺณํ สมุปาคตํ ฯ |๑๖๕.๒๐๘| มกุลปทุมาการา กลสาว ปโยธรา ปภินฺนา ปูติกุณปา ทุฏฺฐคนฺธชมาคตา ฯ |๑๖๕.๒๐๙| เวทิมชฺฌา ปุถุสฺโสณิ สุณาว นีตกิพฺพิสา ชาตา อมชฺฌภริตา อโห รูปํ อสสฺสตํ ฯ |๑๖๕.๒๑๐| สพฺพํ สรีรสญฺชาตํ ปูติคนฺธํ ภยานกํ สุสานมิว เชคุจฺฉํ รมนฺเต ยตฺถ พาลิยา ฯ |๑๖๕.๒๑๑| ตทา มหาการุณิโก ภาตา เม โลกนายโก ทิสฺวา สํวิคฺคจิตฺตํ มํ อิมา คาถา อภาสถ ฯ |๑๖๕.๒๑๒| อาตุรํ กุณปํ ปูตึ ปสฺส นนฺเท สมุสฺสยํ อสุภาย จิตฺตํ ภาเวหิ เอกคฺคํ สุสมาหิตํ ฯ |๑๖๕.๒๑๓| ยถา อิทํ ตถา เอตํ ยถา เอตํ ตถา อิทํ ทุคฺคนฺธํ ปูติกํ วาติ พาลานํ อภินนฺทิตํ ฯ |๑๖๕.๒๑๔| เอวเมตํ อเวกฺขนฺติ รตฺตินฺทิวมตนฺทิตา ตโต สกาย ปญฺญาย อภินิพฺพิชฺช ทกฺขสิ ฯ |๑๖๕.๒๑๕| ตโตหํ อาสิ สํวิคฺคา สุตฺวา คาถา สุภาสิตา ตตฺรฏฺฐิตาวหํ สนฺตี อรหตฺตํ อปาปุณึ ฯ |๑๖๕.๒๑๖| ยตฺถ ยตฺถ นิสินฺนาหํ ตทา ฌานปรายนา ชิโน ตสฺมึ คุเณ ตุฏฺโฐ เอตทคฺเค ฐเปสิ มํ ฯ |๑๖๕.๒๑๗| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๖๕.๒๑๘| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๖๕.๒๑๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ นนฺทา ภิกฺขุนี ชนปทกลฺยาณี อิมา คาถาโย อภาสิตฺถาติ ฯ นนฺทาเถริยา อปทานํ สมตฺตํ ฯ