No title in the text — opening words: འདུལ་བ་གཞི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 4 · folio 254b

འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་

ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་རྣམས་འགག་པར་འགྱུར་ཏེ། སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དགེ་སློང་དག་དེ་ལྟ་བས་ན་བདག་གི་དོན་དང་། གཞན་གྱི་དོན་དང་།

གཉི་གའི་དོན་ལ་རྗེས་སུ་ལྟ་བ་རྣམས་ཀྱིས་ནི་འདི་ལ་རབ་ཏུ་བསླབ་པར་བྱ་སྟེ། ཅི་ནས་ཀྱང་རབ་ཏུ་བྱུང་བ་དོན་ཡོད་པ་དང་། འབྲས་བུ་དང་བཅས་པ་དང་། བདེ་བ་སྐྱེད་པ་དང་། རྣམ་པར་སྨིན་པ་བདེ་བ་དང་། གང་དག་གིས་ཆོས་གོས་དང་། བསོད་སྙོམས་དང་། གནས་མལ་དང་།

ནད་ཀྱི་རྐྱེན་སྨན་གྱི་ཡོ་བྱད་རྣམས་ཡོངས་སུ་ལོངས་སྤྱོད་པ་དེ་དག་ལ་ཅི་ནས་ཀྱང་དེ་དག་གིས་ཕན་བཏགས་པའི་འབྲས་བུ་ཤིན་ཏུ་ཆེ་བ་དང་། ཕན་ཡོན་ཆེ་བ་དང་། གཟི་བརྗིད་ཆེ་བ་དང་། ཡངས་ཤིང་རྒྱ་ཆེ་བར་འགྱུར་བ་དེ་ལྟར་དགེ་སློང་དག་ཁྱེད་ཀྱིས་བསླབ་པར་བྱའོ། །གང་གི་ཚེ་བཅོམ་ལྡན་

འདས་ཀྱིས་དགེ་སློང་དེ་རྣམས་འོངས་པ་ལེགས་སོ་ཞེས་བྱ་བ་དང་རབ་ཏུ་བྱུང་བ་ལེགས་སོ་ཞེས་བྱ་བ་གསུངས་པ་དེའི་ཚེ་དེ་རྣམས་ཀྱི་ཞུམ་པ་དང་། མི་དགའ་བ་དང་། འགྱོད་པ་དང་། རྣམ་པར་འགྱོད་པ་དང་། ཡིད་ལ་གཅགས་པ་གང་ཡིན་པ་དེ་དག་ཐམས་ཅད་ཀྱི་ཐམས་ཅད་དུ་བྲལ་བར་གྱུར་ཏོ། །དེ་

ནས་དགེ་སློང་གཞན་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པས་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་བྱེ་བར་གྱུར་ལགས། བཅོམ་ལྡན་

འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ཕྲིན་ལས་བྱས་ཤིང་བསགས་པ་དང་ཚོགས་རྙེད་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་

Vol. 4 · folio 255a

བསྟི་གནས་རྩ་བ་དང་། ལོ་མ་དང་། མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ། ཤིང་སྣ་ཚོགས་ཀྱིས་མཛེས་པར་བྱས་པ། བྱའི་ཚོགས་དུ་མས་བསྟེན་པ་གཞན་ཞིག་ན་དྲང་སྲོང་ལྔ་བརྒྱའི་གཙོ་བོ་དྲང་སྲོང་ཞིག་གནས་སོ། །ཇི་ཙམ་ན་དྲང་སྲོང་གཞན་ཞིག་ལྗོངས་

རྒྱུ་ཞིང་སོང་བ་ན་བསྟི་གནས་དེར་ཕྱིན་ན་དྲང་སྲོང་དེས་དེ་ལ་བཀུར་སྟི་ལེགས་པར་མ་བྱས་པས་དེ་མི་བཟོད་པ་སྐྱེས་ནས་དེའི་འཁོར་འབྱེད་པར་བྱེད་དེ། དྲང་སྲོང་སྡིག་པ་འདོད་པ་འདི་ཅུང་ཟད་ཀྱང་མི་ཤེས་ན་ཅི་སྟེ་དེའི་དྲུང་དུ་འདུག །ཚུར་ཁོ་བོ་དང་ལྷན་ཅིག་འདོང་ཁོ་བོས་ཁྱེད་མངོན་པར་ཤེས་པ་ལྔ་

རྣམས་ལ་རབ་ཏུ་དགོད་དོ་ཞེས་དེས་དེ་རྣམས་ལ་ཕྱེ་བས་དྲང་སྲོང་དེའི་གདམས་ངག་ཉན་དུ་མི་བཏུབ་བོ། །དྲང་སྲོང་དེས་བསམས་པ། སྡིག་པ་བྱེད་པ་འདིས་བདག་གི་དྲང་སྲོང་འདི་རྣམས་ཕྱེའོ་སྙམ་ནས། དེས་དེ་ལ་བཞམས་ཏེ་སྨྲ་བར་བརྩམས་པ། ཚེ་དང་ལྡན་པ་འཁོར་འབྱེད་པར་མ་བྱེད་

ཅིག །འདི་ནི་དྲང་སྲོང་གི་ཆོས་མ་ཡིན་ནོ། །འོན་ཀྱང་དེ་འབྱེད་བཞིན་ཏེ་འདུག་ཏུ་མ་བཏུབ་ནས་དྲང་སྲོང་དེ་ཡིད་མི་བདེ་ཞིང་ཐབས་ཅིག་སེམས་ཤིང་གནས་སོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་

གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་རྣམས་འབྱུང་བར་འགྱུར་པས། དེ་ནས་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན་དྲང་སྲོང་དེའི་བསྟི་གནས་སུ་ཕྱིན་པ་དང་། དྲང་སྲོང་དེས་དེའི་ལུས་མཛེས་པ་དང་སྤྱོད་ལམ་ཞི་བ་མཐོང་ངོ་། །མཐོང་ནས་དེས་དེ་ལ་

དད་པ་བསྐྱེད་ནས་དེས་དེ་ལ་བྱ་བ་བྱས་ཏེ་སྨོན་ལམ་ལོག་པར་བཏབ་པ། དྲང་སྲོང་སྡིག་ཅན་གང་ཡིན་པ་འདིས་བདག་གི་འཁོར་ཕྱེ་བས་བདག་གིས་འདི་ཤེས་བྱ་ཐམས་ཅད་ལ་དབང་ཐོབ་པ་ན་ཡང་འཁོར་འབྱེད་པར་བྱེད་པར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་

དེའི་དུས་ཀྱི་ལྗོངས་ཀྱི་དྲང་སྲོང་གང་གིས་དེའི་འཁོར་ཕྱེ་བ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་གཉུག་མར་གནས་པའི་དྲང་སྲོང་གང་ཡིན་པ་དེ་ནི་ལྷ་སྦྱིན་ཡིན་ཏེ། ངས་དེའི་འཁོར་ཕྱེ་བའི་ལས་ཀྱི་རྣམ་པར་སྨིན་པ་གང་ཡིན་པ་དེས་ན་སྨོན་ལམ་ལོག་པར་བཏབ་པས་འདིས་ངའི་དགེ་འདུན་ཕྱེ་བ་

Vol. 4 · folio 255b

ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ཞེས་བྱ་བ་ནས། དགེ་སློང་དག་ཁྱོད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་

པ་ལྷ་སྦྱིན་གྱིས་ཕྱི་པ་དག་ནི་ནང་པར་བགྱིས། ནང་པ་དག་ནི་ཕྱི་པར་བགྱིས་པས་འཁོར་ཕྲོགས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་དུ་མ་ཟད་དེ། ཇི་ལྟར་འདས་པའི་དུས་ན་ཡང་འདིས་ཕྱི་བ་དག་ནི་ནང་པར་བྱས། ནང་པ་དག་ནི་

ཕྱི་པར་བྱས་པས་འཁོར་ཕྲོགས་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་ཤིག་ན་སྲོག་ཆགས་ཝ་ཞིག་གནས་ཏེ་དེ་ཤིན་ཏུ་བརྐམ་ཆགས་ཅན་ཞིག་པས་དགོན་པར་ཡང་རྒྱུ་གྲོང་འདབ་ཏུ་ཡང་རྒྱུའོ། །དེ་མཐར་གྱིས་རྒྱུ་བ་ན་རིམ་གྱིས་བཙོ་བླག་མཁན་ཞིག་གི་ཁྱིམ་དུ་ཞུགས་པ་ལས་རམས་ཀྱི་རྫ་

མར་ལྷུང་ནས་དེ་སྐྱུག་བྲོ་བར་གྱུར་ཏེ་དེ་དང་ཧ་ཅང་ཡང་མི་རིང་བ་ན་ཚྭ་སྒོའི་ཕུང་པོ་ཞིག་འདུག་པ་དེ་ལ་ཉལ་ནས་གློས་འགྲེས་པ་ལས་དེ་བས་ཀྱང་ལྷག་པར་ལུས་མ་རུང་བར་གྱུར་ཏེ། ཆུའི་ནང་དུ་ཞུགས་ནས་ལངས་ཏེ་སོང་བ་དང་ཉི་མའི་ཟེར་གྱིས་ཕོག་པས་ནོར་བུ་གཟིའི་ཁ་དོག་ལྟར་གྱུར་པ་ཇི་ཙམ་ན་ཝ་རྣམས་

ཀྱིས་མཐོང་ནས། དེ་རྣམས་ཕྱོགས་ཕྱོགས་སུ་བྲོས་ཏེ་རྒྱང་རིང་པོར་འཁོད་ནས་སྨྲས་པ། ཁྱོད་སུ་ཞིག་གང་ནས་འདིར་འོངས། དེས་སྨྲས་པ། ཁོ་བོ་ནི་བརྒྱར་འགྲོ་ཞེས་བྱ་སྟེ། ལྷ་རྣམས་ཀྱི་དབང་པོ་བརྒྱ་བྱིན་གྱིས་རྐང་བཞི་པ་རྣམས་ཀྱི་རྒྱལ་པོར་དབང་བསྐུར་ཏོ། །ཝ་རྣམས་ཀྱིས་བསམས་

པ། །འདིའི་ལུས་ཀྱི་ཁ་དོག་སྔོན་མ་མཐོང་བ་ལས་ན་གདོན་མི་ཟ་བར་དེ་ཁོ་ན་ཡིན་ནོ་སྙམ་ནས། ཝ་རྣམས་ཀྱིས་རྐང་བཞི་པ་ཐམས་ཅད་ལ་རིག་པར་བྱས་སོ། །སེང་གེ་རྣམས་ཀྱིས་བསམས་པ། བདག་ཅག་ལས་ཁྱད་པར་དུ་འཕགས་པ་སུ་ཞིག་ཡོད་ན་དེ་རྐང་བཞི་པ་རྣམས་ཀྱི་རྒྱལ་པོར་གྱུར་

རེ་ཞིག་དོང་ལ་རང་གི་ཚོགས་ཀྱི་དཔོན་པོ་ལ་རིག་པར་བྱའོ་སྙམ་ནས། དེ་རྣམས་ཀྱི་ཚོགས་ཀྱི་དཔོན་པོ་རལ་པ་ཅན་ཞིག་རིའི་ཕྱོགས་ཞིག་ན་གནས་པ་དེ་ལ་དེ་རྣམས་ཀྱིས་སྨྲས་པ་དང་། དེས་རྐང་བཞི་པ་གཞན་ཞིག་ལ་བསྒོ་བ། སོང་ལ་རྐང་བཞི་པའི་དཔོན་པོ་དེ་རྐང་བཞི་པ་འགའ་

Vol. 4 · folio 256a

ཞིག་གིས་མཐོང་ངམ། མ་མཐོང་རྟོགས་ཤིག །དེ་དེའི་དྲུང་དུ་སོང་སྟེ་བརྟགས་ན་སྔོན་མ་མཐོང་བ་ཡིན་ཞིང་སེང་གེ་རྣམས་མ་གཏོགས་པར་རྐང་བཞི་པ་ཐམས་ཅད་ཀྱིས་ཡོངས་སུ་བསྐོར་བར་གྱུར་ནས་དེ་དེའི་དྲུང་དུ་སོང་སྟེ་ཇི་ལྟར་མཐོང་བ་དག་སྨྲས་པ་དེས་ཐོས་

ནས་སེང་གེའི་ཚོགས་ཀྱིས་ཡོངས་སུ་བསྐོར་ཏེ་དེའི་དྲུང་དུ་དོང་ངོ་། །དེ་ནི་རྐང་བཞི་པ་དུ་མས་ཡོངས་སུ་བསྐོར་ཅིང་གླང་པོ་ཆེ་ལ་ཞོན་ནས་རྒྱུ་བ་ན་དེ་སེང་གེ་རྣམས་ཀྱིས་ཡོངས་སུ་བསྐོར་ཅིང་། དེ་ནས་ནི་སྟག་རྣམས་སོ། །དེ་ནས་ནི་རྐང་བཞི་པ་རྣམས་སོ། །དེ་རྣམས་ཀྱི་ཕྱི་རིམ་རྒྱང་རིང་

པོ་ནས་ནི་ཝ་རྣམས་འདོང་ངོ་། །དེའི་མ་རི་སུལ་ཞིག་ན་གནས་པ་དེ་ལ་དེས་ཝ་ཞིག་མངགས་ཏེ་བུས་རྒྱལ་སྲིད་ཉམས་སུ་མྱོང་གིས་ཚུར་སྤྱོན་ཅིག་ཅེས་སྤྲིང་བ་དང་། དེས་སྨྲས་པ། དེའི་འཁོར་ཅི་འདྲ་བ་ཞིག་དེས་སྨྲས་པ། དེའི་འཁོར་ནང་པ་ནི་སེང་གེ་དང་། སྟག་དང་། གླང་

པོ་ཆེ་དག་ཡིན་ནོ། །ཕྱི་པ་ནི་བདག་ཅག་ཉིད་ཡིན་ནོ། །དེས་སྨྲས་པ། མ་རུང་ཟིན་གྱིས་སོང་ཤིག །དེས་ཚིགས་སུ་བཅད་པས་ཀྱང་སྨྲས་པ། བདག་ནི་རི་འདིའི་སུལ་ན་བདེར་གནས་ཤིང་། །བསིལ་བའི་ཆུ་ལ་བསོད་ཉམས་འཐུང་བར་བྱེད། །དེ་ནི་ཇི་སྲིད་ཝ་སྒྲ་མི་གྲག་པ། །

དེ་སྲིད་གླང་པོ་ཆེ་ཡིས་བདེར་འགྲོ་འགྱུར། །དེ་སོང་སྟེ་དེས་ཝ་རྣམས་ལ་སྨྲས་པ། རྐང་བཞི་པ་རྣམས་ཀྱི་རྒྱལ་པོ་འདི་ནི་ཝ་ཁོ་ན་ཡིན་ཏེ། བདག་གིས་དེའི་མ་རི་སུལ་ག་གེ་མོ་ཞེས་བྱ་བ་ན་འདུག་པ་མཐོང་ངོ་། །དེ་རྣམས་ཀྱིས་སྨྲས་པ། གལ་ཏེ་དེ་ལྟ་ན་དེ་ཝ་ཡིན་ནམ་མ་ཡིན་

པ་བདག་ཅག་གིས་བརྟག་གོ། །ཆོས་ཉིད་ཀྱིས་ཝ་རྣམས་ནི་གང་ཞིག་གིས་ཝ་སྐད་ཐོས་ནས་སྐད་མ་བྱུང་ན་དེའི་སྤུ་རྣམས་འབྱི་བར་འགྱུར་བས་ཝ་སྐད་དབྱུང་བར་བརྩམས་ནས་དེས་བསམས་པ། གལ་ཏེ་བདག་གིས་སྐད་མ་ཕྱུང་ན་ནི་གདོན་མི་ཟ་བར་བདག་གི་སྤུ་རྣམས་འབྱི་

བར་འགྱུར་ལ། གལ་ཏེ་གླང་པོ་ཆེ་ལས་བབས་ནས་སྐད་ཕྱུང་ན་ནི་འདིས་བདག་བསད་དུ་འོང་གིས་འདི་ཉིད་དུ་སྐད་དབྱུང་ངོ་སྙམ་ནས་དེས་གླང་པོ་ཆེ་ལ་ཞོན་བཞིན་སྐད་དབྱུང་བར་བརྩམས་པ་དང་། གླང་པོ་ཆེས་ཤེས་ནས་ཝས་བདག་ལ་བཞོན་ནམ་ཞེས་དེས་དེ་བོར་ཏེ་རྐང་པས་

Vol. 4 · folio 256b

བརྫིས་སོ། །ལྷས་ཚིགས་སུ་བཅད་དེ་སྨྲས་པ། གང་དག་ནང་པ་ཕྱི་པ་དང་། །ཕྱི་བ་ནང་པར་བྱེད་དེ་དག །འདི་འདྲ་བར་ནི་བརླག་འགྱུར་ཏེ། །གླང་པོ་ཆེ་ཡིས་ཝ་བཞིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། །དེ་ན་

ཡང་འདིས་ནང་པ་དག་ནི་ཕྱི་རོལ་པར་བྱས། ཕྱི་རོལ་པ་དག་ནི་ནང་པར་བྱས་པས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་འདིས་ནང་པ་དག་ནི་ཕྱི་རོལ་པར་བྱས། ཕྱི་རོལ་པ་དག་ནི་ནང་པར་བྱས་པས་འཁོར་རྣམས་ཕྲོགས་པར་གྱུར་ཏོ། །གང་གི་ཚེ་ཚེ་དང་ལྡན་པ་

ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ལྷ་སྦྱིན་གྱི་འཁོར་ཕྲོགས་པ་དེའི་ཚེ། ལྷ་སྦྱིན་གྱིས་ཀོ་ཀ་ལི་ཀ་དང་། ཁཎ་ཌ་དྲབ་བྱ་དང་། ཁྱེད་གཉིས་ཀྱིས་ངའི་འཁོར་འཕྲོག་ཏུ་བཅུག་གོ་ཞེས་བརྡེགས་སོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་

རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གྱི་འཁོར་ནི་གཞན་གྱིས་ཕྲོགས་ལ། གཞན་ལ་འདིས་སྡུག་བསྔལ་བསྐྱེད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་

ཡང་འདིའི་ཆུང་མ་གཞན་གྱིས་ཕྲོགས་ལ་གཞན་དག་ལ་ཚུལ་མ་ཡིན་པའི་སྡུག་བསྔལ་བསྐྱེད་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་གཞན་ཞིག་ན་གླང་པོ་ཆེའི་ཚོགས་ཤིག་གནས་སོ། །དེ་ན་གླང་པོ་ཆེ་ཞིག་བལ་གླང་མོ་ཞིག་ལ་སྡུག་པར་འཛིན་པ་དང་། དེ་ནི་གླང་པོ་ཆེའི་ཕྲུ་

གུ་གཞན་ཞིག་ཡོད་པ་ལ་ལྷག་པར་ཆགས་ནས་དེས་གླང་པོ་ཆེའི་ཕྲུ་གུ་དེ་ལ་སྨྲས་པ། ཚོར་དུ་འོང་གིས་བདག་ཅག་འབྲོས་སམ་དེ་ནས་གླང་པོ་ཆེའི་ཕྲུ་གུ་དེས་སྨྲས་པ། གང་གིས་ན་བདག་ཅག་འབྲོས་པའི་ཐབས་ཅི་ཡོད། །དེས་སྨྲས་པ། བདག་གིས་ཐབས་ཤིག་ཤེས་སོ་ཞེས་

དེས་གླང་པོ་ཆེ་དེ་ལ་སྨྲས་པ། ཁྲུས་བྱ་བའི་ཕྱིར་རྫིང་དུ་འཇུག་པར་བྱའོ། །དེ་ཞུགས་པ་དང་དེས་སྨྲས་པ། བདག་ཅག་ལས་སུ་ཡུན་རིང་དུ་ནུབ་པར་འདུག་པར་བལྟའོ་བླུན་པོའི་ཕུང་པོ་ཅན་དེ་དེ་དང་ལྷན་ཅིག་ཆུ་ནང་དུ་ནུབ་པར་འདུག་པ་ན་དེ་ལངས་ཏེ་གླང་པོ་ཆེའི་ཕྲུ་གུ་དང་ལྷན་ཅིག་

Vol. 4 · folio 257a

བྲོས་སོ། །གླང་པོ་ཆེ་རིང་ཞིག་འདུག་ནས་ལངས་ན་མི་སྣང་ནས་དེས་བསམས་པ། བདག་ཕམ་པར་འགྱུར་དུ་འོང་གིས་སླར་ཡང་ནུབ་པར་བྱའོ་སྙམ་ནས། དེ་སླར་ཡང་ནུབ་པར་བྱས་ནས་མཆེ་བ་ས་ལ་བཙུགས་ཏེ་འདུག་གོ། །དེ་རིང་ཞིག་ལོན་ནས་དབུགས་དོ་ཆད་

དེ་ལངས་ནས་གླང་པོ་ཆེ་མོ་དེ་མ་མཐོང་ནས་དེས་རྫིང་བུ་དེ་ཕན་ཚུན་དུ་དཀྲུག་པར་བརྩམས་པ་དང་། དེས་དེར་ཉ་དང་། རུས་སྦལ་དང་། སྦལ་པ་ལ་སོགས་པ་སྲོག་ཆགས་མང་པོ་ཚུལ་མ་ཡིན་པས་སྡུག་བསྔལ་བར་བྱས་སོ། །ལྷས་ཚིགས་སུ་བཅད་པས་སྨྲས་པ། ཀྱེ་མའོ་ཤ་ཡི་ཕུང་པོ་

ཆེ། །འདི་ལ་ཤེས་རབ་ཡོད་མ་ཡིན། །གཞན་གྱིས་ཆུང་མ་ཕྲོགས་གྱུར་ན། །གཞན་ལ་སྡུག་བསྔལ་སྟེན་པར་བྱེད། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ན་གླང་པོ་ཆེ་དམ་པ་གང་ཡིན་པ་དེ་ནི་ལྷ་སྦྱིན་ཡིན་ཏེ། དེ་ན་ཡང་ཆུང་མ་གཞན་གྱིས་ཕྲོགས་ལ་གཞན་ལ་

ཚུལ་མ་ཡིན་པའི་སྡུག་བསྔལ་བསྐྱེད་དོ། །ད་ལྟར་ཡང་འཁོར་གཞན་གྱིས་ཕྲོགས་ལ་གཞན་ལ་ཚུལ་མ་ཡིན་པའི་སྡུག་བསྔལ་བསྐྱེད་དོ།། །།སྡོམ་ནི། གླགས་དང་མཐོང་བ་ཉིད་དང་ནི། །ཨུཏྤལ་མདོག་ནི་བསད་པ་དང་། །རིལ་བ་དང་གསུམ་འོ་མ་དང་། །ས་འཚོ་མ་དང་བཟོད་

གསོལ་དང་། །གླང་དང་སེམས་པ་ཉིད་དང་ནི། །བྱ་དང་ཐ་མ་བཞི་ཡིན་ནོ། །དགེ་སློང་དག་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ལྷ་སྦྱིན་ལ་གླགས་

བཙལ་བ་ལས་གླགས་རྙེད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ལྷ་སྦྱིན་ལ་གླགས་བཙལ་བ་ལས་གླགས་རྙེད་པ་

དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་འཕོང་གི་སློབ་དཔོན་ཞིག་གནས་ཏེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་

Vol. 4 · folio 257b

པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་ན་བུ་མོ་ཞིག་བཙས་ཏེ་བཙས་ནས་ཞག་བདུན་གསུམ་ཉི་ཤུ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས་རིགས་དང་མཐུན་པའི་མིང་བཏགས་ཏེ་དེ་བསྐྱེད་

བསྲིངས་ནས་ཆེན་མོར་གྱུར་ཏོ། །འཕོང་གི་སློབ་དཔོན་གྱིས་བསམས་པ། བུ་མོ་འདི་ནི་བདག་གིས་གཟུགས་དང་ལྡན་པའམ། ཚུལ་ཁྲིམས་དང་ལྡན་པའམ། ནོར་ཅན་སུ་ལ་ཡང་སྦྱིན་པར་མི་བྱ་སྟེ། འོན་ཀྱང་བདག་ལས་གནས་ལྔ་བསླབས་ཏེ་བྱང་བར་གྱུར་པ་གང་ཡིན་པ་

དེ་ལ་བདག་གིས་འདི་སྦྱིན་ནོ་སྙམ་མོ། །དེ་ལས་བྲམ་ཟེའི་ཁྱེའུ་གཉིས་ཤིག་འཕོང་བསླབས་པ་ལས། དེ་ན་གཅིག་ནི་གནས་ལྔ་ལ་བྱང་བར་གྱུར་ཏོ། །ཅིག་ཤོས་ཀྱིས་ནི་གཅོད་པ་ལ་བྱང་བར་གྱུར་ཏོ། །དེ་གཉིས་ལས་གནས་ལྔ་ལ་བྱང་བར་གྱུར་པ་གང་ཡིན་པ་དེ་ལ་དེས་བུ་མོ་

བྱིན་པ་དང་ཅིག་ཤོས་པོ་དེ་མི་བཟོད་པ་སྐྱེས་ནས་ཆོམ་རྐུན་པ་རྣམས་ཀྱི་ནང་དུ་ཞུགས་ཏེ། ཆོམ་རྐུན་ལྔ་བརྒྱའི་སྡེ་དཔོན་དུ་གྱུར་ནས་དེ་ཕྱོགས་གཅིག་ན་ལམ་བཅད་ནས་འཁོད་དོ། །སྔ་མ་པོ་དེས་བུ་མོ་དེ་བག་མར་བླངས་ནས་མདའ་ལྔ་བརྒྱ་ཤོང་བའི་དོང་པ་གཉིས་ཐོགས་ཏེ་ཤིང་

རྟར་ཞུགས་ནས་རང་གི་ཁྱིམ་དུ་དོང་ངོ་། །ཇི་ཙམ་ན་ཚོང་པ་ཆོམ་རྐུན་གྱིས་འཇིགས་པ་མདུན་དུ་དོང་བ་སྡོད་པ་དང་དེས་སྨྲས་པ། ཤེས་ལྡན་དག་དེང་ཤིག་ཅི་སྡོད། དེ་རྣམས་ཀྱིས་སྨྲས་པ། ཆོམ་རྐུན་པ་རྣམས་ཀྱིས་ལམ་བཅད་དོ། །དེས་སྨྲས་པ། ཚུར་ཅི་ཞིག་བྱར་

ཡོད་ཅེས་དེ་ཆས་པ་དང་ཚོང་པ་རྣམས་ཀྱིས་སྨྲས་པ། ཤེས་ལྡན་དག་རེ་ཞིག་སྡོད་ཅིག །འདི་ནི་འགྲོ་ལ་རག་སྟེ་འདི་བདག་ཉིད་འཆི་བ་དང་། ཆུང་མ་ཕྲོགས་པར་གྱུར་པའི་གནས་གང་ཡིན་པ་དེ་ཡོད་དོ། །རྐུན་པོ་རྣམས་ཤིང་ལྗོན་པ་ཞིག་ལ་འཛེགས་ནས་ཕྱོགས་སུ་ལྟ་

བར་བྱེད་ཅིང་འདུག་པ་དང་། དེ་རྣམས་ཀྱིས་དེ་ཤིང་རྟར་ཞུགས་པ་མཐོང་ནས་དེ་རྣམས་ཀྱིས་སྨྲས་པ། ཤེས་ལྡན་དག་མི་ཞིག་ཤིང་རྟར་ཞུགས་ནས་སོང་ངོ་། ཆོམ་རྐུན་པའི་སྡེ་དཔོན་གྱིས་དེ་ལ་ཕོ་ཉ་ཞིག་བཏང་སྟེ་ཤིང་རྟ་སླར་བཟློག་པ་དང་། དེས་སྨྲས་པ། ཤེས་

Vol. 4 · folio 258a

ལྡན་དཔའ་བོ་ལ་དཔའ་བོའི་ལན་བྱིན་ཅིག །དེ་རྣམས་ཀྱིས་སྨྲས་པ། བདག་ཅག་ཀྱང་དཔའ་བོ་ཡིན་ནོ་ཞེས་སྡེ་དཔོན་གྱིས་མི་རྒོད་ལྔ་བརྒྱ་བཏང་བ་དང་དེས་དེ་རྣམས་བསད་དོ། །དེ་བཞིན་དུ་ཉི་ཤུ་ཞིག་འོངས་པ་དེ་དེ་རྣམས་ཀྱང་བསད་དེ། ཇི་ཙམ་ན་ཐམས་

ཅད་བསད་ནས་ཆོམ་རྐུན་པའི་སྡེ་དཔོན་འབའ་ཞིག་ལུས་པ་དང་དེས་རལ་གྲི་བླངས་ཏེ་མདུན་དུ་བསྡད་དོ། །དེས་མདའ་འཕངས་པར་བརྩམས་པ་ན་དེའི་རལ་གྲིས་གཏུབས་སོ། །ཇི་ཙམ་ན་དེས་མདའ་ལྔ་བརྒྱ་འཕངས་པ་དེ་དག་ཐམས་ཅད་དེས་གཏུབས་ནས་མདའ་གཅིག་ཅིག་ལུས་ཏེ་

དེས་དེ་མ་འཕངས་པ་དང་། དེ་ནས་བུ་མོ་དེས་སྨྲས་པ། མདའ་བཞག་སྟེ་ཅི་བགྱི་འཕོངས་ཤིག །དེས་སྨྲས་པ། མདའ་འདི་འབའ་ཞིག་ལུས་ཏེ་འདི་འཕངས་ན་ཁོ་བོ་བསད་ནས་ཁྱོད་ཀྱང་ཕྲོགས་པར་འགྱུར་རོ། །དེ་ནས་བུ་མོ་དེས་ལུས་ཀྱི་སྒྱུར་སྟངས་ཀྱིས་ལན་བུ་བཅོས་

པར་བརྩམས་པ་ན། དེ་ལ་ཆོམ་རྐུན་པའི་སྡེ་དཔོན་རྟོག་པར་བྱེད་པ་ན་དེས་དེའི་གནད་དུ་མདས་བསྣུན་པ་དང་། དེ་འཆི་ཀ་ན་ཚིགས་སུ་བཅད་དེ་སྨྲས་པ། ཤིང་རྟ་ཅན་གྱིས་བདག་མ་བསད། །འདོད་ཆགས་སྡིག་པའི་སེམས་ཀྱིས་ནི། །བདག་ནི་གཡུལ་གྱི་དབུས་ཞུགས་

ནས། །བག་མེད་བཞིན་ལ་ལྟ་བས་བསད། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཤིང་རྟ་ཅན་གང་ཡིན་པ་དེ་ནི་ཤཱ་རིའི་བུ་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བུ་མོ་གང་ཡིན་པ་དེ་ནི་མཽད་གལ་གྱི་བུ་ཡིན་ནོ། །དེའི་ཚེ་དེའི་དུས་ཀྱི་ཆོམ་རྐུན་པའི་སྡེ་དཔོན་གང་

ཡིན་པ་དེ་ནི་ལྷ་སྦྱིན་ཡིན་ཏེ། དེ་ན་ཡང་འདི་གཉིས་ཀྱིས་དེ་ལ་གླགས་བཙལ་བ་ལས་གླགས་རྙེད་དོ། །ད་ལྟར་ཡང་འདི་གཉིས་ཀྱིས་དེ་ལ་གླགས་བཙལ་བ་ལས་གླགས་རྙེད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འཚོ་བྱེད་གཞོན་ནུས་བསྐྱེད་ཀྱི་ཨ་མྲའི་

ཚལ་ན་དབྱར་བཞུགས་པར་ཞལ་གྱིས་བཞེས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་དབྱར་ཉེ་བར་སྒྲུབ་པར་དབྱར་ཟླ་འབྲིང་པོའི་ཉ་དབུ་མ་དེ་ཉིད་ཀྱི་མཚན་མོ་ཡིན་པར་ཤེས་ཤིང་མངོན་པའི་ཟླ་ཉི་མོ་ལ་བློན་པོའི་ཚོགས་ཀྱིས་ཡོངས་སུ་བསྐོར་ཏེ་

Vol. 4 · folio 258b

སྟེང་གི་ཁང་བཟངས་ཀྱི་གཞིར་སོང་ནས་བློན་པོ་རྣམས་ལ་སྨྲས་པ། ཀྱེ་གྲོགས་པོ་དག་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མ་དེ་ཉིད་ཀྱི་མཚན་མོ་ཡིན་པར་ཤེས་ཤིང་མངོན་པའི་ཟླ་ཉི་མོ་འདི་ལྟ་བུ་ལ་ངས་ཅི་ཞིག་བྱ། དེ་ནས་ཕོ་བྲང་སླས་ཀྱི་བུད་མེད་ཅིག་གིས་ལུས་

འཕགས་མའི་བུ་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ་ལྷ་འདོད་པའི་ཡོན་ཏན་ལྔ་འབྱོར་ཅིང་ལྡན་པས་རོལ་པར་མཛད། དགྱེས་པར་མཛད།

དགྱེས་དགུར་སྤྱོད་པར་མཛད་ན་ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །དེ་ནས་ཕོ་བྲང་སླས་གཞན་ཞིག་གིས་ཡང་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་

བུ་ལ་ལྷ་འདོད་པའི་ཡོན་ཏན་ལྔ་འབྱོར་ཅིང་ལྡན་པས་རྒྱལ་པོའི་ཁབ་ཀྱི་གྲོང་ཁྱེར་གྱི་ཉེ་འཁོར་གྱི་ཤུལ་ཕྲ་མོ་རྣམས་བྱུལ་ཞིང་རོལ་པར་མཛད། དགྱེས་པར་མཛད། དགྱེས་མགུར་སྤྱད་པར་མཛད་ན་ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །གཞོན་ནུ་འཆར་

བྱེད་བཟང་པོས་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ་ལྷ་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་།

དཔུང་བུ་ཆུང་གི་ཚོགས་གོ་བསྐོན་ནས། གཞན་གྱི་ཡུལ་འཁོར་དང་། གཞན་གྱི་ཡུལ་དུ་གཤེགས་ཏེ། གཡུལ་ཆེན་པོའི་གཡུལ་སྤྲད་ནས་གཡུལ་ལས་རྒྱལ་བར་བགྱིས་ཏེ། རྒྱལ་ནས་གཡུལ་དེ་ཉིད་ལས་པགས་ཏེ་བཞུགས་ན་ལྷའི་བགྱི་བ་ནི་དེ་ལགས་པ་སྙམ་

བདག་སེམས་ལགས་སོ། །དེ་ནས་བློན་པོ་རྒན་པོ་གཞན་ཞིག་གིས་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ་ལྷ་འོད་སྲུང་རྫོགས་བྱེད་འདུས་པ་ཅན། ཚོགས་ཅན།

Vol. 4 · folio 259a

ཚོགས་ཀྱི་སློབ་དཔོན། སྐྱེ་བོ་མང་པོས་གཟུགས་བཟང་པོར་བཀུར་བ། སྐྱེ་བོ་མང་པོས་མདུན་གྱིས་བལྟས་པ། ཀུན་ཏུ་འཚོ་ལྔ་བརྒྱའི་གཙོ་བོ་དེ་རྒྱལ་པོའི་ཁབ་ཏུ་དབྱར་གནས་པར་དམ་བཅས་པ་དེ་ལ་ལྷ་བསྙེན་བཀུར་མཛོད་ཅིག །ལྷའི་བགྱི་བ་ནི་དེ་ལགས་

པ་སྙམ་བདག་སེམས་ལགས་སོ། །ཡང་བློན་པོ་རྒན་པོ་གཞན་ཞིག་གིས་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལྷ་ཀུན་དུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་

མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། །ཀ་ཏྱའི་བུ་ནོག་ཅན་དང་། ལྷ་གཅེར་བུ་པ་གཉེན་གྱི་བུ་འདུས་པ་ཅན། ཚོགས་ཅན། ཚོགས་ཀྱི་སློབ་དཔོན། སྐྱེ་བོ་མང་པོས་གཟུགས་བཟང་པོར་བཀུར་བ། ཚོགས་ཆེན་པོའི་མདུན་གྱིས་བལྟས་པ་ཞིག་མཆིས་ཏེ། དེ་རྒྱལ་པོའི་

ཁབ་འདི་ཉིད་དུ་དབྱར་གནས་པར་དམ་བཅས་པ་དེ་ལ་ལྷ་བསྙེན་བཀུར་མཛོད་ཅིག །ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །དེའི་ཚེ་འཚོ་བྱེད་གཞོན་ནུས་བསྐྱེད་འཁོར་དེ་ཉིད་ཀྱི་ནང་ན་འདུས་ཤིང་འདུག་པར་གྱུར་ཏོ། །དེ་ནས་ལུས་འཕགས་མའི་བུ་མ་

ག་དྷཱའི་རྒྱལ་པོ་མ་སྐྱེས་དགྲས་འཚོ་བྱེད་གཞོན་ནུས་བསྐྱེད་ལ་སྨྲས་པ་ཀྭའི་ནང་རྗེ་འཚོ་བྱེད་ཅིའི་ཕྱིར་ཅང་མི་སྨྲ། ཅི་ཅུང་ཟད་མི་སྨྲ་འམ། ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ། ལྷ་བཅོམ་ལྡན་འདས་

འདུས་པ་ཅན། ཚོགས་ཆེན་ཚོགས་ཀྱི་སློབ་དཔོན། སྐྱེ་བོ་མང་པོས་གཟུགས་བཟང་པོར་བཀུར་བ། ཚོགས་ཆེན་པོས་མདུན་གྱིས་བལྟས་པ་དེ་རྒྱལ་པོའི་ཁབ་འདི་ཉིད་ཀྱི་བདག་གི་ཨ་མྲའི་ཚལ་ན་དབྱར་བཞུགས་པར་ཞལ་གྱིས་བཞེས་པ་དེ་ལ་ལྷ་བསྙེན་བཀུར་མཛོད་ཅིག །

ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །དེའི་ཚེ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་ལ་སེམས་གཞོལ་བར་གྱུར། བཅོམ་ལྡན་འདས་ལ་འབབ་པར་གྱུར། བཅོམ་ལྡན་འདས་ལ་བབ་པར་གྱུར་ཏོ། །དེ་ནས་ལུས་

Vol. 4 · folio 259b

འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་འཚོ་བྱེད་གཞོན་ནུས་བསྐྱེད་ལ་འདི་སྐད་ཅེས་སྨྲས་སོ། །འཚོ་བྱེད་སོང་ལ་གླང་པོ་ཆེའི་དམ་པ་ཆེན་པོ་སྟོད་ཅིག་དང་། དེ་ལ་ཁོ་བོ་ཞོན་ནས་བཅོམ་ལྡན་འདས་བལྟ་བའི་ཕྱིར་འགྲོའོ། །ལྷ་བཀའ་བཞིན་འཚལ་ཞེས་འཚོ་བྱེད་གཞོན་ནུས་བསྐྱེད་

ཀྱིས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ལས་མཉན་ནས་གླང་པོ་ཆེ་དམ་པ་ཆེན་པོ་དེ་དང་བལ་གླང་མོ་ལྔ་བརྒྱ་ཙམ་གཏད་ནས་ཕོ་བྲང་སླས་ལག་ན་སྒྲོན་མ་ཐོགས་པ་ལྔ་བརྒྱ་ཙམ་བལ་གླང་མོ་རེ་རེ་ཞོན་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་

གང་ན་བ་དེར་སོང་སྟེ་ཕྱིན་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་གླང་པོ་ཆེའི་དམ་པ་ཆེན་པོ་བསྒྲོན་ལགས་ཏེ། ལྷ་ད་དེའི་དུས་ལ་བབ་པར་མཁྱེན་པར་མཛད་དུ་གསོལ། དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་

སྐྱེས་དགྲ་གླང་པོ་ཆེ་དམ་པ་ཆེན་པོ་ལ་ཞོན་ནས་ཕོ་བྲང་སླས་ལག་ན་སྒྲོན་མ་ཐོགས་པ་ལྔ་བརྒྱ་ཙམ་བལ་གླང་མོ་རེ་རེ་ཞོན་པས་མདུན་དུ་བདར་ནས་རྒྱལ་པོའི་ཁབ་ནས་བྱུང་སྟེ་བཅོམ་ལྡན་འདས་བལྟ་བ་དང་བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་སོང་ངོ་། །

དེའི་ཚེ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ཡུལ་སྤོང་བྱེད་པ་རྣམས་དང་མི་མཐུན་པར་གྱུར་ཏོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་རྒྱལ་པོའི་ཁབ་ནས་བྱུང་མ་ཐག་ཁོ་ནར་བདག་འཚོ་བྱེད་གཞོན་ནུས་བསྐྱེད་འདིས་བསད་པར་འདོད་

པའམ། བསླུ་བར་འདོད་པའམ། ཁས་ལེན་དུ་གཞུག་པར་འདོད་པའམ། གཤེད་མའམ། ཕྱིར་རྒོལ་བའམ། མི་མཛའ་བ་དག་ལ་གཏད་པར་མི་འདོད་གྲང་སྙམ་དུ་བསམས་ནས་སྐྲག་པར་གྱུར། བག་ཚ་བར་གྱུར། སྤུ་ཟིང་ཞེས་བྱེད་པར་གྱུར་ནས་འཚོ་བྱེད་གཞོན་

ནུས་བསྐྱེད་ལ་འདི་སྐད་ཅེས་སྨྲས་སོ། །འཚོ་བྱེད་ཁྱོད་ཁོ་བོ་ལ་གསོད་པར་འདོད་པའམ། བསླུ་བར་འདོད་པའམ། ཁས་ལེན་དུ་གཞུག་པར་འདོད་པའམ། གཤེད་མ་པའམ། ཕྱིར་རྒོལ་བའམ། མི་མཛའ་བ་དག་ལ་གཏད་པར་མི་འདོད་གྲང་། དེས་འདི་སྐད་ཅེས་

Vol. 4 · folio 260a

སྨྲས་སོ། །ལྷ་ཁྱོད་ལ་བདག་དགྲོངས་པར་འཚལ་བའམ། བསླུ་བར་འཚལ་བའམ། སྨྲར་གཞུག་པར་འཚལ་བའམ། གཤེད་མ་པའམ། ཕྱིར་རྒོལ་བའམ། མི་མཛའ་བ་དག་ལ་གཏད་པར་འཚལ་བ་མ་ལགས་སོ། །དེ་ནས་ལུས་འཕགས་

མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་འཚོ་བྱེད་གཞོན་ནུས་བསྐྱེད་ལ་འདི་སྐད་ཅེས་སྨྲས་སོ། །འཚོ་བྱེད་བཅོམ་ལྡན་འདས་དེ་ལ་འཁོར་ཇི་སྙེད་ཡོད། དགེ་སློང་སྟོང་ཉིས་བརྒྱ་ལྔ་བཅུ་ལྷག་ཙམ་མོ། །ཨེ་མའོ་འཚོ་བྱེད་ཁྱོད་ཀྱིས་ང་ཇི་ལྟར་བསད་པར་མི་འདོད། བསླུ་བར་

མི་འདོད། སྨྲར་གཞུག་པར་མི་འདོད། གཤེད་མ་པའམ། ཕྱིར་རྒོལ་བའམ། མི་མཛའ་བ་དག་ལ་གཏོད་པར་མི་འདོད། ད་ལྟར་བཅོམ་ལྡན་འདས་དེ་ལ་འཁོར་དེ་སྙེད་ཡོད་ན་ལུ་བའི་སྒྲ་ཡང་མི་གྲག །སྦྲིད་པའི་སྒྲ་ཡང་མི་གྲག་གོ །ལྷ་བཅོམ་ལྡན་འདས་དེ་ནི་སྒྲ་ཆུང་

བ་བཞེད། སྒྲ་ཆུང་བ་ལ་དགྱེས། སྒྲ་ཆུང་བས་འདུལ། སྒྲ་ཆུང་བའི་བསྔགས་པ་མཛད་པས་འཁོར་ཡང་སྒྲ་ཆུང་བ་ཉིད་དོ། །ལྷ་དེ་ལྟ་བས་ན་མྱུར་བ་མྱུར་བར་གླང་པོ་ཆེ་དམ་པ་ཆེན་པོ་ཐོབ་ཤིག །འདི་ལྟར་འཁོར་གྱི་ཁྱིམ་ན་འབྲུ་མར་གྱི་ཞུགས་མར་གྱི་འོད་གདའོ། །

དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་མྱུར་བ་མྱུར་བར་གླང་པོ་ཆེའི་དམ་པ་ཆེན་པོ་བཏབ་ནས་དེས་ཇི་ཙམ་བཞོན་པས་རུང་བའི་སའི་བར་དུ་བཞོན་པས་སོང་སྟེ་བཞོན་པ་ལས་བབས་ནས་རྐང་པ་ཁོ་ནས་ཀུན་དགའ་ར་བའི་ནང་དུ་ཞུགས་སོ། །དེའི་ཚེ་བཅོམ་

ལྡན་འདས་དགེ་སློང་གི་དགེ་འདུན་གྱི་གུང་ལ་མཚོ་ལྟར་དང་ཞིང་གསལ་ལ་རྙོག་པ་མེད་པས་བཞུགས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་འཁོར་གྱི་ཁྱམས་དང་ཉེ་བར་སོང་ནས་འཚོ་བྱེད་གཞོན་ནུས་བསྐྱེད་ལ་སྨྲས་པ། འཚོ་བྱེད་བཅོམ་ལྡན་

འདས་དེ་གང་ན་བཞུགས། ལྷ་བཅོམ་ལྡན་འདས་དེ་ནི་དགེ་སློང་གི་དགེ་འདུན་གྱི་གུང་ལ་མཚོ་ལྟར་དང་ཞིང་གསལ་ལ་རྙོག་པ་མེད་པར་བཞུགས་པ་ཕ་བི་ཁོ་ན་ལགས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་གང་ན་བ་དེར་སོང་

Vol. 4 · folio 260b

སྟེ་ཕྱིན་ནས་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དགེ་སློང་གི་དགེ་འདུན་དང་

ཐུགས་དུལ་བ་ཉེ་བར་ཞི་བ་ཇི་ལྟ་བུ་དང་ལྡན་པ་དེ་བཞིན་དུ་གཞོན་ནུ་འཆར་བྱེད་བཟང་པོ་ཡང་སེམས་དུལ་བ་དང་། ཉེ་བར་ཞི་བ་དེ་འདྲ་བ་དང་ལྡན་པར་གྱུར་ཅིག །རྒྱལ་པོ་ཆེན་པོ་རང་ཉིད་དགའ་བར་རབ་ཏུ་བསྟན་པ་ལེགས་སོ་ལེགས་སོ། །རྒྱལ་པོ་ཆེན་པོ་རང་གི་སྟན་ལ་

འདུག་ཤིག །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་

སྐྱེས་དགྲས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་གལ་ཏེ་ཞུ་བ་ལུང་བསྟན་པའི་སླད་དུ་སྐབས་ཕྱེ་བ་ལྟ་ན་བདག་ཕྱོགས་འགའ་ཞིག་ཞུ་ལགས་སོ། །རྒྱལ་པོ་ཆེན་པོ་ཅི་དང་ཅི་འདོད་པ་ཞུས་ཤིག །བཙུན་པ་ལས་ཀྱི་གནས་དང་བཟོའི་གནས་ཐ་དད་པ་

གང་དག་ལགས་པ་འདི་ལྟ་སྟེ། །ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་འཚལ་བ་དང་། རྟ་ལ་འཚལ་བ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་།

ཞབས་འབྲིང་བ་བགྱིད་པ་དང་། །གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བགྱིད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་

རྣམས་ཀྱིས་བགྱི་བ་བགྱིད་ཅིང་སྦྱིན་པ་དག་སྩོལ། བསོད་ནམས་དག་བགྱིད་ལ་གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པས་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་པ་དེ་ལྟ་བུ་རྣམས་ལ་ཡང་དག་པར་མཐོང་བའི་

Vol. 4 · folio 261a

དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་ལགས་སམ།། །།འདུལ་བ་གཞི། བམ་པོ་བརྒྱ་རྩ་དྲུག་པ། རྒྱལ་པོ་ཆེན་པོ་ཁྱོད་ཀྱིས་འདི་འདྲ་བའི་ཞུ་བ་འདི་ལས་སྔོན་དགེ་སྦྱོང་དང་བྲམ་ཟེ་གཞན་རྣམས་ལ་དྲིས་པ་དྲན་ནམ།

བཙུན་པ་དྲན་ལགས་ཏེ། བཙུན་པ་དུས་གཅིག་ཅིག་ན་བདག་འོད་སྲུང་རྫོགས་བྱེད་གང་ན་བ་དེར་མཆིས་ཏེ། མཆིས་ནས་འོད་སྲུང་རྫོགས་བྱེད་ལ་བདག་གིས་འདི་སྐད་ཅེས་བཙུན་པ་འོད་སྲུང་ལས་ཀྱི་གནས་དང་བཟོའི་གནས་ཐ་དད་པ་གང་དག་ལགས་པ་འདི་

ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་།

གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་པ་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་

གཏོང་། བསོད་ནམས་དག་བྱེད་ལ། གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་

པ་འཐོབ་བམ་ཞེས་དྲིས་པ་ན་དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་

སྤྱད་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་བརྫུས་ཏེ་སྐྱེ་བ་མེད་དོ། །འཇིག་རྟེན་ན་དགྲ་བཅོམ་པ་ཡང་དག་པར་སོང་བ་ཡང་དག་པར་ཞུགས་པ་གང་དག་ཚེ་

Vol. 4 · folio 261b

འདི་ཉིད་ལ་རང་གི་མངོན་པར་ཤེས་པས་འཇིག་རྟེན་འདི་དང་འཇིག་རྟེན་ཕ་རོལ་མངོན་སུམ་དུ་བྱས་ནས་བསྒྲུབས་ཏེ་བདག་ནི་སྐྱེ་བཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་པ་དག་མེད་དོ། །སྲོག་ནི་འདི་

ཉིད་ལ་འཚོ་ཞིང་དེ་ཕྱིས་ཆད་པར་འགྱུར། ཞིག་པར་འགྱུར་ཏེ་ཤི་བའི་འོག་ཏུ་མི་འབྱུང་ངོ་། །སྐྱེས་བུའི་ལུས་ནི་འབྱུང་བ་ཆེན་པོ་བཞི་ལས་གྱུར་པ་ཡིན་ཏེ། དེ་ནི་གང་གི་ཚེ་ཤི་བ་ན་དེའི་སའི་ལུས་ནི་སའི་བག་ལ་ཞ་ཆུའི་ལུས་ནི་ཆུའི་མེའི་ལུས་ནི་མེའི་རླུང་གི་ལུས་ནི་རླུང་

གི་བག་ལ་ཞ་བར་འགྱུར་རོ། །དབང་པོ་རྣམས་ནི་ནམ་མཁའི་རྗེས་སུ་འགྲོ་བར་འགྱུར་རོ། །སྐྱེས་བུའི་རོ་ནི་ཁྲི་དང་ལྔའི་མི་དག་གིས་ཁྱེར་ཏེ་དུར་ཁྲོད་དུ་འགྲོ་ཞིང་བསྲེགས་ཕན་ཆད་མི་མངོན་པར་འགྱུར་རོ། །བསྲེག་བྱ་དག་ནི་ཐལ་བར་འགྱུར་རོ། །རུས་པ་དག་ནི་ཐི་བའི་མདོག་འདྲ་བར་གནས་སོ།

འདི་ལྟར་རྨོངས་པས་ཉེ་བར་བསྟན་པ་ནི་སྦྱིན་ལ་མཁས་པས་ཉེ་བར་བསྟན་པ་ནི་ལེན་ཏོ། །དེ་ལ་གང་དག་ཡོད་པར་སྨྲ་བ་དེ་དག་ཐམས་ཅད་ནི་གསོག་གསོབ་བརྫུན་དུ་སྨྲ་བ་བརྡོལ་བ་ཡིན་ནོ། །འདི་ལྟར་བྱིས་པ་དང་མཁས་པ་དེ་གཉིས་ནི་ཕྱིས་ཆད་པར་འགྱུར་ཞིག་པར་འགྱུར་ཏེ་ཤི་བའི་

འོག་ཏུ་མི་འབྱུང་ངོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་འོད་སྲུང་རྫོགས་བྱེད་ལ་བདག་གིས་ཡང་དག་པར་

མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་མ་མཆིས་པ་ཉིད་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་མངོན་སུམ་དུ་སྨད་པ་

ནི་བདག་གི་ཆ་མ་ལགས་སོ་སྙམ་ནས། བཙུན་པ་བདག་གིས་འོད་སྲུང་རྫོགས་བྱེད་ཀྱིས་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་བགྱིས། སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་ཀུན་དུ་

Vol. 4 · folio 262a

རྒྱུ་གནག་ལྷས་ཀྱི་བུ་གང་ན་བ་དེར་མཆིས་ཏེ་མཆིས་ནས། ཀུན་དུ་རྒྱུ་གནག་ལྷས་ཀྱི་བུ་ལ་འདི་སྐད་ཅེས་བཙུན་པ་ཀུན་དུ་རྒྱུ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་

པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་

ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་། བསོད་ནམས་དག་བྱེད་ལ་གསོ་བ་རྣམས་གསོ་ཞིང་འདོད་པའི་ཡོན་

ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དྲིས་པས་ན། དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་

སྐད་སྨྲ་སྟེ། སེམས་ཅན་རྣམས་ཀུན་ནས་ཉོན་མོངས་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཀུན་ནས་ཉོན་མོངས་པར་འགྱུར་རོ། །སེམས་ཅན་རྣམས་རྣམ་པར་དག་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་

པར་རྣམ་པར་དག་པར་འགྱུར་རོ། །སེམས་ཅན་རྣམས་ཤེས་པ་མེད་པར་འགྱུར་བ་དང་། མཐོང་བ་མེད་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་མེད་པ་དང་མཐོང་བ་མེད་པར་འགྱུར་རོ། །སེམས་ཅན་རྣམས་ཤེས་པར་འགྱུར་བ་

དང་མཐོང་བར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་དང་མཐོང་བར་འགྱུར་རོ། །སྟོབས་མེད་དོ། །བརྩོན་འགྲུས་མེད་དོ། །སྟོབས་དང་བརྩོན་འགྲུས་མེད་དོ། །སྐྱེས་བུའི་རྩལ་མེད་དོ། །ཕ་རོལ་གནོན་པ་མེད་དོ། །སྐྱེས་བུའི་རྩལ་

Vol. 4 · folio 262b

དང་ཕ་རོལ་གནོན་པ་མེད་དོ། །བདག་གི་རྩལ་མེད་དོ། །གཞན་གྱི་རྩལ་མེད་དོ། །བདག་གི་རྩལ་དང་གཞན་གྱི་རྩལ་མེད་དོ། །སེམས་ཅན་ཐམས་ཅད་དང་སྲོག་ཐམས་ཅད་དང་། འབྱུང་པོ་ཐམས་ཅད་མཐུ་མེད་སྟོབས་མེད་དབང་མེད་བརྩོན་འགྲུས་མེད། ཕ་རོལ་གནོན་པ་མེད་དོ། །འགྲོ་བ་

མཚམས་སྦྱོར་བའི་སྲིད་པ་དག་ངེས་པར་གྱུར་ཏོ། །འདི་ལྟར་འགྲོ་བ་དྲུག་པོ་དག་ཏུ་བདེ་བ་དང་སྡུག་བསྔལ་སོ་སོར་མྱོང་བར་འགྱུར་རོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་

ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་ཀུན་དུ་རྒྱུ་གནག་ལྷས་ཀྱི་བུ་ལ་བདག་གིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་རྒྱུ་མ་མཆིས་པ་ཉིད་དུ་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་

པས་གཟུགས་བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་ད་ཇི་ལྟར་མངོན་སུམ་དུ་སྨད་པར་བྱ་སྙམ་ནས། བདག་གིས་ཀུན་དུ་རྒྱུ་གནག་ལྷས་ཀྱི་བུའི་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་

བགྱིས། སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས། བདག་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་གང་ན་བ་དེར་མཆིས་ཏེ་མཆིས་ནས་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ལ་འདི་སྐད་ཅེས་བཙུན་པ་ཡང་དག་རྒྱལ་བ་ཅན་ལས་ཀྱི་གནས་དང་བཟོའི་

གནས་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་

བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་ཁྲུས་མཁན་དེ་རྣམས་རང་རང་གི་བཟོའི་གནས་དང་ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་།

Vol. 4 · folio 263a

བསོད་ནམས་དག་བྱེད་ལ་གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་དེ་ལྟ་བུ་རྣམས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་

བམ་ཞེས་དྲིས་པ་ན། དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་བལྟ་ཞིང་འདི་སྐད་སྨྲ་སྟེ། བྱེད་པ་དང་། བྱེད་དུ་འཇུག་པ་དང་། གཅོད་པ་དང་། གཅོད་དུ་འཇུག་པ་དང་། སྲེག་པ་དང་། སྲེག་ཏུ་འཇུག་པ་དང་། རྡེག་པ་དང་། རྡེག་ཏུ་འཇུག་པ་དང་། སྲོག་ཆགས་

ལ་འཚེ་བ་དང་། མ་བྱིན་པར་ལེན་པ་དང་། འདོད་པ་དག་ལ་ལོག་པར་སྤྱོད་པ་དང་། ཤེས་བཞིན་དུ་བརྫུན་དུ་སྨྲ་བ་དང་། མྱོས་པར་འགྱུར་བའི་བཏུང་བ་འཐུང་བ་དང་། ཁྱིམ་འབུབས་པ་དང་། མདུད་པ་བཀྲོལ་བ་དང་། རིམ་གྱིས་འཕྲོག་པ་དང་། ལམ་འགོག་ཅིང་

འདུག་པ་དང་། གྲོང་འཇོམས་པར་བྱེད་པ་དང་། གྲོང་ཁྱེར་འཇོམས་པར་བྱེད་པ་དང་། ཡུལ་འཇོམས་པར་བྱེད་པ་དང་། ས་གཞི་ཆེན་པོ་འདི་ལ་སེམས་ཅན་གང་དག་ཡོད་པ་དེ་དག་ཐམས་ཅད་འཁོར་ལོའི་མཐའ་སྤུ་གྲི་ལ་བྱས་པས་དེ་དག་ཐམས་ཅད་ཀུན་དུ་གཅོད་པར་བྱེད། ཀུན་དུ་འཆེག་

པར་བྱེད། ཀུན་དུ་རྡུང་བར་བྱེད། ཀུན་དུ་འབྲལ་བར་བྱེད་ཅིང་དེ་དག་ཐམས་ཅད་ཀུན་དུ་བཅད། ཀུན་དུ་གཤེགས། ཀུན་དུ་བརྡུངས། ཀུན་དུ་དྲལ་ནས་ཤའི་ཐང་མ་གཅིག་ཏུ་བྱེད། ཤའི་ཚོམས་གཅིག་ཏུ་བྱེད། ཤའི་བུངས་གཅིག་ཏུ་བྱེད། ཤའི་ཕུང་པོ་གཅིག་ཏུ་

བྱེད་ཅིང་ཤའི་ཐང་མ་གཅིག་ཏུ་བྱས། ཤའི་ཚོམས་གཅིག་ཏུ་བྱས། ཤའི་བུངས་གཅིག་ཏུ་བྱས། ཤའི་ཕུང་པོ་གཅིག་ཏུ་བྱས་ནས་དེ་ལྟར་ཀུན་དུ་སྒྲུབ་པར་བྱེད་པ་ལས་གཞི་དེ་ལས་སྡིག་པ་ཡང་མེད། གཞི་དེ་ལས་སྡིག་པར་འགྱུར་བ་ཡང་མེད་དོ། །ཆུ་ཀླུང་གང་གཱའི་ལྷོ་

ཕྱོགས་ནས་ཀུན་དུ་གཅོད་པར་བྱེད། ཀུན་དུ་འཆེག་པར་བྱེད། ཀུན་དུ་རྡུང་བར་བྱེད། ཀུན་དུ་འདྲལ་བར་བྱེད་ཅིང་འགྲོ་ལ། ཆུ་ཀླུང་གང་གཱའི་བྱང་ཕྱོགས་ནས་སྦྱིན་པར་བྱེད། མཆོད་སྦྱིན་བྱེད་ཅིང་འགྲོ་བར་གྱུར་ན། གཞི་དེ་ལས་སྡིག་པ་དང་བསོད་ནམས་ཀྱང་མེད། གཞི་

Vol. 4 · folio 263b

དེ་ལས་སྡིག་པ་དང་བསོད་ནམས་སུ་འགྱུར་བ་ཡང་མེད་དོ། །འདི་ལྟར་སྦྱིན་པ་དང་། དུལ་བ་དང་། ཡང་དག་པར་སྡོམ་པ་དང་། དོན་སྤྱོད་པ་དང་། དོན་མཐུན་པས་དེ་ལྟར་བྱེད་པ་ཡང་བསོད་ནམས་མི་བྱེད་པ་ཁོ་ན་ཡིན་ནོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་

རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ལ་བདག་གིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲི་བ་དྲིས་ན་བྱེད་

པ་ཉིད་མ་མཆིས་པར་ལུང་སྟོན་པར་བགྱིད་དོ། །བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་ད་ཇི་ལྟར་མངོན་སུམ་དུ་སྨད་པར་བྱ་སྙམ་ནས། བདག་གིས་སྨྲ་འདོད་

ཀྱི་བུ་མོའི་བུ་ཡང་དག་རྒྱལ་བ་ཅན་ལ་མངོན་པར་བསྟོད་པ་ཡང་མི་བགྱིད་སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་བགྱིས། སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་མི་ཕམ་སྐྲའི་ལ་བ་ཅན་གང་ན་བ་དེར་མཆིས་ཏེ་མཆིས་ནས། མི་ཕམ་སྐྲའི་

ལ་བ་ཅན་ལ་འདི་སྐད་ཅེས་བཙུན་པ་མི་ཕམ་འཇིག་རྟེན་གྱི་ལས་ཀྱི་གནས་དང་བཟོའི་གནས་ཐ་དད་པ་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་

དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་

རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་། བསོད་ནམས་དག་བྱེད་ལ་གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་

Vol. 4 · folio 264a

ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དྲིས་པ་ན་དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་བལྟ་ཞིང་འདི་སྐད་ཅེས་སྨྲ་སྟེ། ལུས་བདུན་པོ་འདི་དག་ནི་མ་བྱས་པ། བྱས་པས་མ་བྱས་པ་མ་སྤྲུལ་པ། སྤྲུལ་

པས་མ་བྱས་པ་གནོད་པར་བྱ་བ་མ་ཡིན་པ་ཐེར་ཟུག་ཏུ་གནས་པ། ཀ་བ་བཞིན་གནས་པ་དག་ཡིན་ཏེ། བདུན་གང་ཞེ་ན། འདི་ལྟ་སྟེ་སའི་ལུས་དང་། ཆུའི་ལུས་དང་། མེའི་ལུས་དང་། རླུང་གི་ལུས་དང་། བདེ་བ་དང་། སྡུག་བསྔལ་བ་དང་། སྲོག་གསོན་པ་ཉིད་ནི་བདུན་པ་སྟེ།

ལུས་བདུན་པོ་དེ་དག་ནི་མ་བྱས་པ། བྱས་པས་མ་བྱས་པ། མ་སྤྲུལ་པ། སྤྲུལ་པས་མ་བྱས་པ། གནོད་པར་བྱ་བ་མ་ཡིན་པ། ཐེར་ཟུག་ཏུ་གནས་པ། ཀ་བ་བཞིན་དུ་གནས་པ་དག་ཡིན་ནོ། །དེ་དག་ནི་འདི་ལྟ་སྟེ། བསོད་ནམས་སུ་འགྱུར་བའི་ཕྱིར་རམ། སྡིག་པར་འགྱུར་

བའི་ཕྱིར་རམ། བསོད་ནམས་དང་སྡིག་པར་འགྱུར་བའི་ཕྱིར་རམ་བདེ་བར་འགྱུར་བའི་ཕྱིར་རམ། སྡུག་བསྔལ་བར་འགྱུར་བའི་ཕྱིར་རམ། བདེ་བ་དང་སྡུག་བསྔལ་བར་འགྱུར་བའི་ཕྱིར་གཡོ་བར་མི་བྱེད། རྣམ་པར་འགྱུར་བར་མི་བྱེད། གཅིག་ལ་གཅིག་གནོད་པར་མི་བྱེད་

དོ། །སྐྱེས་བུ་གང་གིས་སྐྱེས་བུའི་མགོ་གཅོད་པར་བྱེད་པ་དེས་ཀྱང་འཇིག་རྟེན་ན་གཡོ་བའམ་གནས་པ་ལ་གནོད་པ་ཅུང་ཟད་ཀྱང་མི་བྱེད་དེ། ལུས་བདུན་པོ་དག་ལ་བར་མེད་པར་མཚོན་ཐལ་བྱུང་དུ་འགྲོ་ཞིང་དེར་སྲོག་ལ་གནོད་པ་ཡང་མེད་དོ། །དེ་ལ་གསོད་པར་བྱེད་པའམ།

གསོད་དུ་བཅུག་པའམ། དྲན་པར་བྱེད་པའམ། དྲན་པར་བྱེད་དུ་བཅུག་པའམ། སྐུལ་བར་བྱེད་པའམ། སྐུལ་དུ་བཅུག་པའམ། རྣམ་པར་རིག་པར་བྱེད་པའམ། རྣམ་པར་རིག་པར་བྱེད་དུ་བཅུག་པ་འགའ་ཡང་མེད་དོ། །བྱིས་པའམ་མཁས་པ་གང་དག་ཡིན་པ་དག་ནི་སྐྱེ་

གནས་གཙོ་བོ་དང་ལྡན་པ་ཁྲི་བཞི་སྟོང་དང་། རྟོག་པ་ཆེན་པོ་དྲུག་ཁྲི་དང་དྲུག་བརྒྱ་དང་། ལས་ལྔ་དང་། ལས་གསུམ་དང་། ལས་གཉིས་དང་ལས་དང་ལས་ཕྱེད་དང་། ལས་དྲུག་བཅུ་རྩ་གཉིས་དང་། རྟོག་པ་བར་མ་དྲུག་བཅུ་རྩ་གཉིས་དང་། འདུ་ཤེས་བདུན་དང་། སེམས་

Vol. 4 · folio 264b

ཅན་དམྱལ་བ་བརྒྱ་ཉི་ཤུ་དང་། དབང་པོ་བརྒྱ་སུམ་བཅུ་དང་། རྡུལ་གྱི་ཁམས་སུམ་བཅུ་རྩ་དྲུག་དང་། ཀླུའི་རིགས་བཞི་ཁྲི་དགུ་སྟོང་དང་། ནམ་མཁའ་ལྡིང་གི་རིགས་བཞི་ཁྲི་དགུ་སྟོང་དང་། ཀུན་ཏུ་རྒྱུའི་རིགས་བཞི་ཁྲི་དགུ་སྟོང་དང་། ཀུན་ཏུ་འཚོའི་རིགས་བཞི་ཁྲི་དགུ་སྟོང་

དང་། གཅེར་བུ་པའི་རིགས་བཞི་ཁྲི་དགུ་སྟོང་དང་། འདུ་ཤེས་ཅན་གྱི་གནས་བདུན་དང་། འདུ་ཤེས་མེད་པའི་གནས་བདུན་དང་། ལྷ་མ་ཡིན་བདུན་དང་། ཤ་ཟ་བདུན་དང་། ལྷ་བདུན་དང་། མི་བདུན་དང་། མཚོ་བདུན་དང་། མཚོ་བདུན་བརྒྱ་དང་། འབྲི་བ་བདུན་

དང་། འབྲི་བ་བདུན་བརྒྱ་དང་། རྨི་ལམ་བདུན་དང་། རྨི་ལམ་བདུན་བརྒྱ་དང་། སད་པ་བདུན་དང་། སད་པ་བདུན་བརྒྱ་དང་། གཡང་ས་བདུན་དང་། གཡང་ས་བདུན་བརྒྱ་དང་། རིགས་བཙུན་པ་དྲུག་དང་། མངོན་པར་མཐོ་བ་བཅུ་དང་། སྐྱེས་བུ་ཆེན་པོའི་ས་བརྒྱད་པོ་དེ་དག་

ཏུ་བསྐལ་པ་ཆེན་པོ་བརྒྱད་ཁྲི་བཞི་སྟོང་དུ་མཚམས་སྦྱོར་ཅིང་འཁོར་ནས་སྡུག་བསྔལ་མཐར་བྱེད་དོ། །འདི་ལྟ་སྟེ། དཔེར་ན། སྐུད་པའི་དྲུ་བུ་ཡང་བ་སྟེང་གི་ནམ་མཁའ་ལས་འཕངས་པ་གཟངས་པ་ན་ས་ལ་འབབ་པ་དེ་བཞིན་དུ་བྱིས་པའམ། མཁས་པ་གང་དག་ཡིན་པ་དག་

ཀྱང་དེ་དག་བསྐལ་པ་ཆེན་པོ་བརྒྱད་ཁྲི་བཞི་སྟོང་དུ་མཚམས་སྦྱོར་ཅིང་འཁོར་ནས་སྡུག་བསྔལ་མཐར་བྱེད་དོ། །དེ་ལ་དགེ་སྦྱོང་དང་བྲམ་ཟེ་གང་དག་འདི་སྐད་ཅེས་བདག་ཚུལ་ཁྲིམས་སམ། བརྟུལ་ཞུགས་སམ། དཀའ་ཐུབ་བམ། ཚངས་པར་སྤྱོད་པ་ལ་གནས་པ་འདིས་ལས་

ཡོངས་སུ་མ་སྨིན་པ་ནི་ཡོངས་སུ་སྨིན་པར་བྱ་ཞིང་ཡོངས་སུ་སྨིན་པ་ནི་རེག་པར་བྱས་ནས་བྱང་བར་བྱའོ་ཞེས་ཟེར་བ་འགའ་ཡང་མེད་དོ། །བདེ་བ་དང་སྡུག་བསྔལ་འདི་ངེས་པ་ཡིན་ནོ། །ཡར་སྐྱེ་བ་དང་མར་འགྲིབ་པ་ནི་མི་སྲིད་དོ། །འདི་ལྟ་བུ་འདི་ཉིད་དང་གཞན་མ་ཡིན་པས་འཁོར་བ་གཞལ་

ལོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་མི་ཕམ་སྐྲའི་ལ་བ་ཅན་ལ་བདག་གིས་ཡང་དག་པར་མཐོང་

Vol. 4 · folio 265a

བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་འཁོར་བ་དག་ཉིད་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་མཛེས་པར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་ད་ཇི་

ལྟར་མངོན་སུམ་དུ་སྨད་པར་བྱ་སྙམ་ནས་མི་ཕམ་སྐྲའི་ལ་བ་ཅན་གྱིས་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་བགྱིས་སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་གཅེར་བུ་པ་གཉེན་གྱི་བུ་གང་ན་བ་དེར་

མཆིས་ནས། གཅེར་བུ་པ་གཉེན་གྱི་བུ་ལ་འདི་སྐད་ཅེས་བཙུན་པ་གཉེན་གྱི་བུ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་

པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་

ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་། བསོད་ནམས་དག་བྱེད་ལ། གསོ་བ་ནི་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་

བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དྲིས་པ་ན། དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྐྱེས་བུ་གང་ཟག་འདིས་སོ་སོར་མྱོང་བ་གང་ཡིན་པ་ཅི་ཡང་རུང་སྟེ། དེ་ཐམས་ཅད་

སྔོན་བྱས་པའི་རྒྱུ་ལས་བྱུང་བ་ཡིན་ནོ། །ལས་རྙིང་པ་རྣམས་ནི་དཀའ་ཐུབ་ཀྱིས་འབྱང་བར་འགྱུར་ལ། ལས་སར་པ་རྣམས་ནི་མི་བྱ་བའི་ཆུ་ལོན་གྱིས་བཟློག་པར་བྱའོ། །དེ་ལྟ་ན་ཕྱིན་ཆད་ཟག་པ་མེད་དོ། །ཟག་པ་མེད་ན་ལས་ཟད་དོ། །ལས་ཟད་ན་སྡུག་བསྔལ་ཟད་དོ། །

Vol. 4 · folio 265b

སྡུག་བསྔལ་ཟད་ན་སྡུག་བསྔལ་མཐར་བྱེད་པར་འགྱུར་རོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་སུ་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་

བཞིན་དུ་གཅེར་བུ་པ་གཉེན་གྱི་བུ་ལ་བདག་གིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་སྔོན་བགྱིས་པའི་རྒྱུ་ལས་བྱུང་བ་ཉིད་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་

བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་མངོན་སུམ་དུ་སྨད་པ་ནི་བདག་གི་ཆ་མ་ལགས་སོ་སྙམ་ནས། བདག་གིས་གཅེར་བུ་པ་གཉེན་གྱི་བུའི་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པར་ཡང་མི་བགྱིད་དེ། མངོན་པར་བསྟོད་

པ་ཡང་མ་བགྱིས་སྨད་པར་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་ཀ་ཏྱའི་བུ་ནོག་ཅན་གང་ན་བ་དེར་མཆིས་ཏེ། མཆིས་ནས་ཀ་ཏྱའི་བུ་ནོག་ཅན་ལ་འདི་སྐད་ཅེས། བཙུན་པ་ཀ་ཏྱའི་བུ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ཡིན་པ་

འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་

དང་། །གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་ཁྱབ་བྱེད་ཅིང་སྦྱིན་པ་དག་གཏོང་། བསོད་

ནམས་དག་བྱེད་ལ། གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དེ་སྐད་དྲིས་

Vol. 4 · folio 266a

པ་དང་། ཀ་ཏྱའི་བུ་ནོག་ཅན་བདག་ལ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་སྐད་ཅེས་སྨྲ་སྟེ། གལ་ཏེ་འགའ་ཞིག་བདག་གི་གན་དུ་མཆིས་ཏེ་འདི་སྐད་ཅེས་འཇིག་རྟེན་ཕ་རོལ་ཡོད་དམ་ཞེས་འདྲི་ན། དེ་ལ་བདག་འཇིག་རྟེན་ཕ་རོལ་ཡོད་དོ་ཞེས་དྲི་བ་

དྲིས་པའི་ལན་འདེབས་སོ། །འཇིག་རྟེན་ཕ་རོལ་མེད་པ་དང་། འཇིག་རྟེན་ཕ་རོལ་ཡོད་པ་དང་མེད་པ་དང་། ཡོད་པ་ཡང་མ་ཡིན་མེད་པ་ཡང་མ་ཡིན་པ་དང་། དེ་བཞིན་དུ་འཇིག་རྟེན་ཕ་རོལ་འདི་ལྟ་བུ་ཉིད་དང་། འདི་ལྟ་བུ་ཉིད་མ་ཡིན་པ་དང་། གཞན་ཉིད་དང་གཞན་ཉིད་མ་ཡིན་པ་དང་།

འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཉིད་མ་ཡིན་པ་ཡིན་ནམ་ཞེས་འདྲི་ན་དེ་ལ་བདག་འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཉིད་མ་ཡིན་ནོ་ཞེས་དྲིས་པའི་ལན་འདེབས་སོ་ཞེས་མཆི་ནས་བདག་དེ་ལ་འདི་སྙམ་དུ་སེམས་ཏེ། རྒྱལ་པོའི་ཁབ་

འདི་ན་རབ་ཏུ་བྱུང་བར་གྱུར་པ་ཇི་སྙེད་གནས་པ་དེ་རྣམས་ཀྱི་ནང་ན་ལྷག་པར་བླུན་པ། ལྷག་པར་གླེན་པ། ལྷག་པར་སླུ་བར་བྱེད་པ་ནི་འདི་ལྟ་སྟེ། ཀ་ཏྱའི་བུ་ནོག་ཅན་འདི་ཡིན་ནོ་སྙམ་པ་ལས་དེ་ལ་ཡང་བདག་འདི་སྙམ་དུ་སེམས་ཏེ། གཟུགས་བཟང་པོར་བཀུར་བ་ཡུལ་ན་གཉུག་མར་

གནས་པའི་དགེ་སྦྱོང་ངམ་བྲམ་ཟེ་ལ་མངོན་སུམ་དུ་སྨད་པ་ནི་བདག་གི་ཆ་མ་ལགས་སོ་སྙམ་ནས་བདག་གིས་ཀ་ཏྱའི་བུ་ནོག་ཅན་གྱིས་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ་མངོན་པར་བསྟོད་པ་ཡང་མ་བགྱིས། སྨད་པ་ཡང་མ་བགྱིས་པར་སྟན་ལས་

ལངས་ཏེ་མཆིས་ལགས་ཏེ། བཅོམ་ལྡན་འདས་ལ་བདག་དོན་དེ་ཁོ་ན་ཞུ་ལགས་ན། བཙུན་པ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ལགས་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་།

གླང་པོ་ཆེ་ལ་འཚལ་བ་དང་། རྟ་ལ་འཚལ་བ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བགྱིད་པ་དང་། གོ་རེ་ལོང་དང་། བྲོ་ག་ལེན་པ་དང་རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་

Vol. 4 · folio 266b

བགྱིད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བགྱི་བ་བགྱིད་ཅིང་སྦྱིན་པ་དག་སྩོལ། བསོད་ནམས་དག་བགྱིད་ལ་གསོ་བ་དག་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བགྱིད། དགའ་

བར་བགྱིད། དགའ་མགུར་སྤྱོད་པར་བགྱིད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་ལགས་སམ། རྒྱལ་པོ་ཆེན་པོ་དེའི་ཕྱིར་ཁྱོད་ཉིད་ལ་དྲི་ཡིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་དེ་ལུང་སྟོན་ཅིག །རྒྱལ་པོ་ཆེན་པོ་དཔེར་ན་འདི་ན་ཁྱོད་

ཀྱི་བྲན་མངག་གཞུག་པ་གོ་རེ་ལོང་རང་དབང་མེད་ལ་དགའ་མགུར་བྱར་མེད་པ་ཞིག་ཡོད་པ་དེས་ཁྱོད་སྟེང་གི་ཁང་བཟངས་ཀྱི་གཞི་ལ་འདུག་སྟེ་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་

པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ལུས་འཕགས་མའི་བུ་མ་ག་ངྷཱའི་རྒྱལ་པོ་མ་སྐྱེས་དགྲ་འདི་ཡང་མི་ཡིན་ལ་བདག་ཀྱང་མི་ཡིན་པ་ལས་གཞན་དུ་ན་ལུས་འཕགས་མའི་བུ་མ་ག་ངྷཱའི་བུ་མ་སྐྱེས་དགྲས་སྔོན་བསོད་ནམས་དག་བྱས་ཤིང་བསགས་པ་དེས་ན་ད་ལྟར་

སྟེང་གི་ཁང་བཟངས་ཀྱི་གཞི་ལ་འདུག་ནས་སྐྱེས་པ་མེད་པའི་རོལ་མོས་རྩེ་བར་བྱེད། དགའ་བར་བྱེད་དགའ་མགུར་སྤྱོད་པར་བྱེད་ཀྱིས། མ་ལ་བདག་གིས་ཀྱང་དགེ་བའི་ཆོས་ཅུང་ཟད་ཡང་དག་པར་བླངས་ཏེ་གནས་པར་བྱའོ་སྙམ་ཞིང་བདག་གིས་དགེ་བའི་ཆོས་ཅི་ཞིག་ཡང་དག་པར་བླངས་

ཏེ་གནས་པར་བྱ་སྙམ་པ་ལས། མ་ལ་བདག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་ནས་དེས་དེ་ལྟར་ཐག་བཅད་དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་

ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་།

Vol. 4 · folio 267a

གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་པར་གྱུར་པ་དེ་ཁྱོད་ཀྱི་ཞོ་ཤས་འཚོ་བ་རྣམས་ལྗོངས་སུ་འཁྱམ་ཞིང་དོང་བས་མཐོང་ངོ་། །མཐོང་ནས་ཀྱང་དེ་རྣམས་འདི་སྙམ་དུ་སེམས་ཏེ། འདི་ནི་ལུས་འཕགས་མའི་བུ་མ་ག་དྷཱའི་

རྒྱལ་པོ་མ་སྐྱེས་དགྲའི་འབངས་མངག་གཞུག་པ་གོ་རེ་ལོང་རང་དབང་མེད་པ་དགའ་མགུར་བྱར་མེད་པ་ཡིན་ན། དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནར་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་

པ་ལས་སླར་ལོག་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་ནས་ཡང་དག་པའི་ལྟ་བ་དང་

ལྡན་གྱིས། མ་ལ་བདག་ཅག་རྒྱལ་པོའི་སྤྱན་སྔར་དོང་ལ་སྙན་དུ་གསོལ་ལོ་ཞེས་དེ་རྣམས་ཁྱོད་ཀྱི་དྲུང་དུ་འོངས་ནས་སྨྲས་པ། ལྷ་མཁྱེན་པར་མཛད་དུ་གསོལ། ལྷའི་འབངས་མངག་གཞུག་པ་གོ་རེ་ལོང་རང་དབང་མ་མཆིས་པ་དགའ་མགུར་བགྱིར་མ་མཆིས་པ་ཞིག་མཆིས་པ་དེ་སྐྲ་

དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་

དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་སྟེ། ཡང་དག་པའི་ལྟ་བ་དང་ལྡན་ལགས་སོ་ཞེས་སྨྲས་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། ཇི་ག་ཁྱོད་

ཀྱིས་དེ་སྐད་སྨྲ་བ་ལ་ཤེས་ལྡན་དག་དེང་ལ་མི་དེ་ཁུག་ཤིག་དང་སླར་ཡང་ངའི་བྲན་མངག་གཞུག་པ་གོ་རེ་ལོང་རང་དབང་མེད་པར་འགྱུར་རོ་ཞེས་སྨྲ་བར་འགྱུར་རམ། བཙུན་པ་མ་ལགས་སོ། །གཞན་དུ་ན་བདག་དེ་ལ་ལྟ་བའི་སླད་དུ་མཆི་སྟེ། དེས་སྔོན་བདག་ལ་མངོན་དུ་སྨྲ་བ་དང་།

Vol. 4 · folio 267b

ཕྱག་འཚལ་བ་དང་། ལྡང་བ་དང་། ཐལ་མོ་སྦྱར་བ་དང་། འདུད་པའི་ལས་གང་ལགས་པ་བགྱིད་ལགས་པས་དེ་ཉིད་ལ་བདག་གིས་དེ་དག་བགྱི་ཞིང་། ཇི་སྲིད་འཚོའི་བར་དུ་དེ་ལ་འདི་ལྟ་སྟེ་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་

རྣམས་ཀྱིས་བསྟབ་པར་བགྱིའོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟར་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་

འབྲས་བུ་བསྟན་ལགས་སོ། །རྒྱལ་པོ་ཆེན་པོ་དཔེར་ན་ཁྱོད་ཀྱི་ཡུལ་འདི་ན་ཁྱིམ་བདག་ཞིང་པ་སྐྲུན་པ་སྐྱེད་པ་རྒྱལ་པོའི་བང་མཛོད་འཕེལ་བར་བྱེད་པ་ཞིག་ཡོད་པ་དེས་ཁྱོད་སྟེང་གི་ཁང་བཟངས་ཀྱི་གཞི་ལ་འདུག་ནས་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་

སྤྱོད་པར་བྱེད་པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་འདི་ཡང་མི་ཡིན་ལ། བདག་ཀྱང་མི་ཡིན་པ་ལས་གཞན་དུ་ན་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་སྔོན་བསོད་ནམས་དག་བྱས་ཤིང་བསགས་པ་དེས་ནད་

ལྟར་སྟེང་གི་ཁང་བཟངས་ཀྱི་གཞིར་སོང་ནས་སྐྱེས་པ་མེད་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱིས། མ་ལ་བདག་གིས་ཀྱང་དགེ་བ་ཅུང་ཟད་ཡང་དག་པར་བླངས་ཏེ་གནས་པར་བྱའོ་སྙམ་ཞིང་བདག་གིས་དགེ་བའི་ཆོས་ཅི་ཞིག་ཡང་དག་པར་བླངས་ཏེ་

གནས་པར་བྱ་སྙམ་པ་ལས། མ་ལ་བདག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་ནས། དེས་དེ་ལྟར་ཐག་བཅད་དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་

ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་

Vol. 4 · folio 268a

དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་པར་གྱུར་པ་དེ་ཁྱོད་ཀྱི་ཞོ་ཤས་འཚོ་བ་རྣམས་ལྗོངས་སུ་འཁྱམ་ཞིང་དོང་བས་མཐོང་ངོ་། །མཐོང་ནས་ཀྱང་དེ་དག་འདི་སྙམ་དུ་སེམས་ཏེ། འདི་ནི་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་

དགྲའི་ཁྱིམ་བདག་ཞིང་བསྐྲུན་པ་སྐྱེད་པའི་བང་མཛོད་འཕེལ་བར་བྱེད་པ་ཡིན་ན། དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས། དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག །

མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ། ལོག་པར་ལྟ་བ་ལས་སླར་ལོག་ནས་ཡང་དག་པའི་ལྟ་བ་དང་ལྡན་

གྱིས། མ་ལ་བདག་ཅག་རྒྱལ་པོའི་སྤྱན་སྔར་དོང་ལ་སྙན་དུ་གསོལ་ལོ་ཞེས་དེ་རྣམས་ཁྱོད་ཀྱི་དྲུང་དུ་འོངས་ནས་སྨྲས་པ། ལྷ་མཁྱེན་པར་མཛད་དུ་གསོལ། ལྷའི་ཁྱིམ་བདག་ཞིང་པ་སྐྲུན་པ་སྐྱེད་པ་རྒྱལ་པོའི་བང་མཛོད་འཕེལ་བར་བགྱིད་པ་ཞིག་མཆིས་པ་དེ་སྐྲ་དང་ཁ་སྤུ་བྲེགས་ཏེ་གོས་

ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་

ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་སྟེ། ཡང་དག་པའི་ལྟ་བ་དང་ལྡན་ལགས་སོ་ཞེས་སྨྲ་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། ཇི་ག་ཁྱོད་ཀྱིས་དེ་སྐད་སྨྲ་བ་ལ་ཤེས་ལྡན་དག་དེང་ལ་མི་དེ་ཁུག་

ཤིག་དང་སླར་ཡང་ངའི་ཞིང་པ་སྐྲུན་པ་སྐྱེད་པ་རྒྱལ་པོའི་བང་མཛོད་འཕེལ་བར་འགྱུར་རོ་ཞེས་སྨྲ་བར་འགྱུར་རམ། བཙུན་པ་མ་ལགས་སོ། །གཞན་དུ་ན་བདག་དེ་ལ་བལྟ་བའི་སླད་དུ་མཆི་སྟེ། དེས་སྔོན་བདག་ལ་མངོན་དུ་སྨྲ་བ་དང་། ཕྱག་འཚལ་བ་དང་། ལྡང་བ་དང་།

Vol. 4 · folio 268b

ཐལ་མོ་སྦྱར་བ་དང་། འདུད་པའི་ལས་གང་དག་ལགས་པ་བགྱིས་ལགས་པས་དེ་ཉིད་ལ་བདག་གིས་དེ་དག་བགྱི་ཞིང་ཇི་སྲིད་འཚོའི་བར་དུ་དེ་ལ་ཡང་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བསྟབ་པར་

བགྱིའོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །རྒྱལ་

པོ་ཆེན་པོ་འདི་ལ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་

འདས་འཇིག་རྟེན་དུ་བྱུང་སྟེ། དེས་ཆོས་བཤད་པ་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་རྣམ་པར་བྱང་བ། ཚངས་པར་སྤྱོད་པ་རབ་ཏུ་སྟོན་ཏེ། ཆོས་དེ་ཁྱིམ་བདག་གམ། ཁྱིམ་བདག་གི་

བུས་མཉན་ཏེ། དེ་ཆོས་དེ་ཐོས་ནས་གནས་གསུམ་པོ་འདི་ལྟ་སྟེ། ཆགས་པའི་ཆོས་དང་། ཞེ་སྡང་གི་ཆོས་དང་། གཏི་མུག་གི་ཆོས་ལ་སྟོན་པའི་རྣམ་པར་དག་པ་ཚོལ་བར་བྱེད་དེ། ཅི་ཚེ་དང་ལྡན་པ་འདི་ལ་ཆགས་པ་གང་གིས་ཟིལ་གྱིས་གནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་

ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་། བན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་ཆགས་པ་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་

དང་། མ་བསལ་བའི་ཆགས་པ་དེ་ཡོད་དམ། འོན་ཏེ་ཚེ་དང་ལྡན་པ་འདི་ལ་ཆགས་པ་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་།

Vol. 4 · folio 269a

ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་ཆགས་པ་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་ཆགས་པ་དེ་མེད་སྙམ་ན། དེ་འདི་སྙམ་དུ་སེམས་ཏེ། ཚེ་དང་ལྡན་པ་འདི་ལ་

ཆགས་པ་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་

སྟོན་པའི་ཆགས་པ་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་ཆགས་པ་དེ་མེད་དོ། །དེ་ཅིའི་ཕྱིར་ཞེ་ན། མ་ཆགས་པའི་ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་གང་དག་ཡིན་པ་དེ་དག་ཚེ་དང་ལྡན་པ་འདི་ལ་ཡོད་

ལ། འདི་ཆོས་གང་མདོར་བསྡུས་པའམ། རྒྱས་པར་འཆད་ཀྱང་རུང་འདིའི་ཆོས་ནི་ཞི་བ་གྱ་ནོམ་པ། ཟབ་པ་ཟབ་པར་སྣང་བ། མཐོང་བར་དཀའ་བ། རྟོགས་པར་དཀའ་བ། བརྟག་པར་བྱ་བ་མ་ཡིན་པ། རྟོག་གེའི་སྤྱོད་ཡུལ་མ་ཡིན་པ། ཞིབ་མོ་བརྟགས་པའི་མཁས་

པ་དང་མཛངས་པས་རིག་པར་བྱ་བ་ཡིན་ན། དེ་ཡང་འདི་ལྟར་ཚེ་དང་ལྡན་པ་འདི་གཅིག་ཏུ་ཆགས་པས་ཤེས་པར་སླ་བ་མ་ཡིན་པས་ཚེ་དང་ལྡན་པ་འདི་མ་ཆགས་པ་ཡིན་ཏེ། ཚེ་དང་ལྡན་པ་འདི་ནི་ཆགས་པ་མ་ཡིན་ནོ་སྙམ་མོ། །གང་གི་ཚེ་འདི་དང་པོ་ཆགས་པའི་ཆོས་ལ་

རྣམ་པར་དག་པར་མཐོང་ནས་དེའི་འོག་ཏུ་གཉིས་པ་ཞེ་སྡང་གི་ཆོས་དང་། གསུམ་པ་གཏི་མུག་གི་ཆོས་ལ་ཚོལ་བར་བྱེད་དེ། ཅི་ཚེ་དང་ལྡན་པ་འདི་ལ་གཏི་མུག་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་

ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་གཏི་མུག་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་གཏི་མུག་

Vol. 4 · folio 269b

དེ་ཡོད་དམ། འོན་ཏེ་ཚེ་དང་ལྡན་པ་འདི་ལ་གཏི་མུག་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དག་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་

པ་དང་། སྡུག་བསྔལ་བར་གྱུར་པ་དེ་ལྟ་དེ་ལྟར་སྟོན་པའི་གཏི་མུག་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་གཏི་མུག་དེ་མེད་སྙམ་ན། དེ་འདི་སྙམ་དུ་སེམས་ཏེ། ཚེ་དང་ལྡན་པ་འདི་ལ་གཏི་མུག་གང་གིས་ཟིལ་གྱིས་ནོན་ཅིང་སེམས་ལ་

ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དག་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་གཏི་མུག་མ་སྤངས་པ་དང་། ཡོངས་

སུ་མ་ཤེས་པ་དང་། མ་བཀག་པ་དང་། མ་བསལ་བའི་གཏི་མུག་དེ་མེད་དོ། །དེ་ཅིའི་ཕྱིར་ཞེ་ན། གཏི་མུག་མེད་པའི་ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་གང་དག་ཡིན་པ་དེ་དག་ཚེ་དང་ལྡན་པ་འདི་ལ་ཡོད་ལ། འདི་ཆོས་གང་མདོར་བསྡུས་

པའམ། རྒྱས་པར་འཆད་ཀྱང་རུང་། འདིའི་ཆོས་ནི་ཞི་བ། གྱ་ནོམ་པ། ཟབ་པ་ཟབ་པར་སྣང་བ། མཐོང་བར་དཀའ་བ། རྟོགས་པར་དཀའ་བ། བརྟག་པར་བྱ་བ་མ་ཡིན་པ། རྟོག་གེའི་སྤྱོད་ཡུལ་མ་ཡིན་པ། ཞིབ་མོ་བརྟགས་པའི་མཁས་པ་དང་མཛངས་པས་

རིག་པར་བྱ་བ་ཡིན་ན། དེ་ཡང་འདི་ལྟར་ཚེ་དང་ལྡན་པ་འདི་གཅིག་པུ་གཏི་མུག་པས་ནི་ཤེས་པར་སླ་བ་མ་ཡིན་པས་ཚེ་དང་ལྡན་པ་འདི་གཏི་མུག་པ་མ་ཡིན་ཏེ། ཚེ་དང་ལྡན་པ་འདི་ནི་གཏི་མུག་མེད་པ་ཡིན་ནོ་སྙམ་མོ། །གང་གི་ཚེ་འདི་གསུམ་པ་གཏི་མུག་གི་ཆོས་ལ་རྣམ་པར་

དག་པར་མཐོང་ནས་དེའི་འོག་ཏུ་འདི་ལ་རྣམ་པ་དང་ལྡན་པའི་དད་པ་སྐྱེད་པར་བྱེད་དོ། །དད་པ་སྐྱེས་ནས་འདི་ལྟར་སློབ་པར་བྱེད་དེ། ཁྱིམ་ན་གནས་པ་ནི་གནོད་པ་ཅན་དང་། རྡུལ་ཁྲོད་ན་གནས་པ་ཡིན་ལ། རབ་ཏུ་བྱུང་བ་ནི་མངོན་པར་སྐབས་ཡོད་པ་ཡིན་ཏེ། ཁྱིམ་པ་

Vol. 4 · folio 270a

ཁྱིམ་ན་གནས་པས་ནི་ཇི་སྲིད་འཚོའི་བར་དུ་གཅིག་ཏུ་སལ་གྱིས་དག་པར་ཚངས་པར་སྤྱོད་པ་ཡོངས་སུ་རྫོགས་པ། ཡོངས་སུ་དག་པ་རྣམ་པར་བྱང་བ་འབའ་ཞིག་པོ་འདི་ལ་སྤྱད་པར་སླ་བ་མ་ཡིན་པས། མ་ལ་བདག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་

དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་སྟེ། དེས་དེ་ལྟར་ཐག་བཅད་ནས་ནོར་གྱི་ཚོགས་མང་པོའམ། ཉུང་ངུ་སྤངས་ཏེ་ཉེ་དུའི་འཁོར་མང་པོའམ་ཉུང་ངུ་སྤངས་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་

ཁྱིམ་མེད་པར་རབ་ཏུ་བྱུང་ངོ་། །དེ་དེ་བཞིན་དུ་རབ་ཏུ་བྱུང་ནས་དེ་ཚུལ་ཁྲིམས་དང་ལྡན་པ་ལ་གནས་པ་ཡིན། སོ་སོར་ཐར་པའི་སྡོམ་པས་བསྡམས་པ་ཡིན། སྤྱོད་པ་དང་། སྤྱོད་ཡུལ་ཕུན་སུམ་ཚོགས་པ་ཡིན། ཐ་ན་ཁ་ན་མ་ཐོ་བ་ཕྲ་མོ་ལ་ཡང་འཇིགས་པར་ལྟ་བ་ཡིན།

བསླབ་པའི་གཞི་རྣམས་བླངས་ཏེ་སློབ་པ་ཡིན་ནོ། །དེ་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལོག་པ་ཡིན་ཏེ། ཆད་པ་སྤངས་པ་ཡིན། མཚོན་ཆ་སྤངས་པ་ཡིན། འཛེམ་པ་དང་། སྙིང་རྗེར་ལྡན་པ་ཡིན། སེམས་ཅན་སྲོག་ཆགས་སུ་གྱུར་པ་ཐམས་ཅད་ལ་ཆུང་

ངུ་ན་སྲོག་ཆགས་གྲོག་སྦུར་ཡན་ཆད་སྲོག་གཅོད་པ་ལས་སླར་ལོག་པ་ཡིན་ནོ། །དེ་མ་བྱིན་པར་ལེན་པ་སྤངས་ནས་མ་བྱིན་པར་ལེན་པ་ལས་སླར་ལོག་པ་ཡིན་ཏེ། བྱིན་པ་ལེན་པ་ཡིན། བྱིན་པ་ལ་དགའ་བ་ཡིན་བྱིན་པ་ལྷུག་པར་བཏང་བ་ལ་དགའ་བ་ཡིན་ཏེ། རྐུན་མ་མ་ཡིན།

བརྐམ་ཆགས་མ་ཡིན། གཙང་མ་ཡིན། དག་པ་ཡིན། བདག་ཉིད་ཁ་ན་མ་ཐོ་བ་མེད་པར་སྲུང་ཞིང་མ་བྱིན་པར་ལེན་པ་ལས་སླར་ལོག་པ་ཡིན་ནོ། །དེ་མི་ཚངས་པར་སྤྱོད་པ་སྤངས་ནས་མི་ཚངས་པར་སྤྱོད་པ་ལས་སླར་ལོག་པ་ཡིན་ཏེ། ཚངས་པར་སྤྱོད་པ་ཡིན། སྤྱོད་པ་ངན་

པ་སྤངས་པས་དག་པ་ཡིན། གཙང་བ་ཡིན། དྲི་ང་བ་མེད་པ་ཡིན། འཁྲིག་པ་དང་བྲལ་བ་ཡིན། སྨད་རིམ་གྱི་ཆོས་དང་བྲལ་བ་ཡིན། མི་ཚངས་པར་སྤྱོད་པ་ལས་སླར་ལོག་པ་ཡིན་ནོ། །དེ་བརྫུན་དུ་སྨྲ་བ་སྤངས་ནས་བརྫུན་དུ་སྨྲ་བ་ལས་སླར་ལོག་པ་ཡིན་ཏེ། བདེན་པར་

Vol. 4 · folio 270b

སྨྲ་བ་ཡིན་བདེན་པ་ལ་དགའ་བ་ཡིན། མཉན་པར་འོས་པ་ཡིན། ཡིད་ཆེས་པ་ཡིན། བརྟན་པ་ཡིན། འཇིག་རྟེན་ལ་མི་བསླུ་བ་ཡིན་ཏེ། བརྫུན་དུ་སྨྲ་བ་ལས་སླར་ལོག་པ་ཡིན་ནོ། །དེ་ཕྲ་མའི་ཚིག་སྤངས་ནས་ཕྲ་མ་ལས་སླར་ལོག་པ་ཡིན་ཏེ། དེ་ཚུ་བི་དག་ལས་

ཐོས་ཏེ་དེ་དག་དབྱེ་བའི་ཕྱིར་ཕ་བི་དག་ལ་སྨྲ་བ་མ་ཡིན། ཕ་བི་དག་ལས་ཐོས་ཏེ་དེ་དག་དབྱེ་བའི་ཕྱིར་ཚུ་བི་དག་ལ་སྨྲ་བ་མ་ཡིན། བྱེ་བ་རྣམས་སྡུམས་བྱེད་པ་ཡིན། མཐུན་པ་རྣམས་ལ་གཟེངས་བསྟོད་པ་ཡིན། མཐུན་པ་ལ་དགའ་བ་ཡིན། མཐུན་པ་ལ་མགུ་བ་ཡིན།

མཐུན་པར་བྱེད་པའི་ཚིག་སྨྲ་བ་ཡིན་ཏེ། ཕྲ་མ་ལས་སླར་ལོག་པ་ཡིན་ནོ། །དེ་ཚིག་རྩུབ་པོ་སྤངས་ནས་ཚིག་རྩུབ་པོ་ལས་སླར་ལོག་པ་ཡིན་ཏེ། དེ་གང་ཡང་ཚིག་གདུག་པ་དང་། རྩུབ་པ་དང་། ཕ་རོལ་ལ་མི་སྙན་པ་དང་། ཕ་རོལ་སྤ་འགོང་བར་བྱེད་པ་དང་། སྐྱེ་བོ་མང་

པོའི་ཡིད་ལ་མི་འཐད་པ་དང་། སྐྱེ་བོ་མང་པོའི་སྙིང་དུ་མི་སྡུག་པ་དང་། སྐྱེ་བོ་མང་པོ་མི་དགའ་བ་དང་། སྐྱེ་བོ་མང་པོའི་ཡིད་དུ་མི་འོང་བ་དང་། མཉམ་པར་གཞག་པ་མ་ཡིན་པ་དང་། མཉམ་པར་འཇོག་པར་འགྱུར་བ་མ་ཡིན་པ་དེ་ལྟ་བུའི་ཚིག་སྤངས་ནས་གང་ཡང་མི་

ཚུགས་པ་དང་། རྣར་སྙན་པ་དང་། སྙིང་ལ་འབབ་པ་དང་། དགའ་བར་བྱེད་པ་དང་། གྲོང་ཁྱེར་པ་དང་། སྙན་ཅིང་འཇེབས་པ་དང་། རྣམ་པར་གསལ་བ་དང་། རྣམ་པར་རིག་པར་བྱེད་པ་དང་། མཉན་པར་འོས་པ་དང་། མི་རྟེན་པ་དང་། འགལ་བ་མ་ཡིན་པ་

དང་། ཐུབ་པ་མེད་པ་དང་། སྐྱེ་བོ་མང་པོ་ལ་སྡུག་པ་དང་། སྐྱེ་བོ་མང་པོ་མགུ་བ་དང་། སྐྱེ་བོ་མང་པོ་ལ་དགའ་བ་དང་། སྐྱེ་བོ་མང་པོའི་ཡིད་དུ་འོང་བ་དང་། མཉམ་པར་གཞག་པ་དང་། མཉམ་པར་འཇོག་པར་འགྱུར་བ་དེ་ལྟ་བུའི་ཚིག་སྨྲ་བས། ཚིག་རྩུབ་པོ་

ལས་སླར་ལོག་པ་ཡིན་ནོ། །དེ་ཚིག་ཀྱལ་པ་སྤངས་ནས་ཚིག་ཀྱལ་བ་ལས་སླར་ལོག་པ་ཡིན་ཏེ། དེ་དུས་སུ་སྨྲ་བ་ཡིན། ཡང་དག་པར་སྨྲ་བ་ཡིན། དེ་ཁོ་ན་ཉིད་སྨྲ་བ་ཡིན། དོན་སྨྲ་བ་ཡིན། ཆོས་སྨྲ་བ་ཡིན། རྟོགས་པ་སྨྲ་བ་ཡིན། ཁོང་དུ་ཆུད་པར་བྱེད་པའི་

Vol. 4 · folio 271a

ཚིག་སྨྲ་བ་ཡིན་ཏེ། དུས་སུ་དང་། འདྲེན་མ་མ་ཡིན་པ་དང་། གླེང་གཞི་དང་བཅས་པ་དང་། དན་རྟགས་དང་བཅས་པ་དང་། ཆོས་དང་དོན་དང་ལྡན་པ་ཡིན་ཏེ་ཚིག་ཀྱལ་པ་ལས་སླར་ལོག་པ་ཡིན་ནོ། །དེ་ཉོ་ཚོང་སྤངས་ནས་དེ་ཉོ་ཚོང་ལས་སླར་ལོག་པ་ཡིན་

ཏེ། དེ་གཞལ་བླུགས་ལ་གཡོ་བྱེད་པ་དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་སྤངས་ནས་གཞལ་བླུགས་ལ་གཡོ་བྱེད་པ་དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་ལས་སླར་ལོག་པ་ཡིན་ནོ། །དེ་གསུག་ལེན་པ་དང་། འབྲིད་པ་དང་།

བསྡིགས་ནས་རང་གིར་བྱེད་པ་སྤངས་ནས་གསུག་ལེན་པ་དང་། འབྲིད་པ་དང་། བསྡིགས་ནས་རང་གིར་བྱེད་པ་ལས་སླར་ལོག་པ་ཡིན་ནོ། །དེ་བསད་པ་དང་། བཅིངས་པ་དང་། གཅད་པ་དང་། དབུག་པ་དང་། བརྡེག་པའི་བསམ་པ་སྤངས་ནས་གསོད་པ་དང་།

འཆིང་བ་དང་། གཅོད་པ་དང་། འབིགས་པ་དང་། རྡེག་པ་ཉམས་སུ་མྱོང་བར་བྱེད་པ་ལས་སླར་ལོག་པ་ཡིན་ནོ། །དེ་འོད་དང་བུད་མེད་དང་ལྷན་ཅིག་ཉལ་བ་སྤངས་ནས། འོད་དང་བུད་མེད་དང་ལྷན་ཅིག་ཉལ་བ་ལས་སླར་ལོག་པ་ཡིན་ནོ། །དེ་ཞིང་གི་གཞི་དང་། ཁྱིམ་

གྱི་གཞི་དང་། ཚོང་ཁང་གི་གཞི་ལེན་པ་སྤངས་ནས་ཞིང་གི་གཞི་དང་། ཁྱིམ་གྱི་གཞི་དང་། ཚོང་ཁང་གི་གཞི་ལེན་པ་ལས་སླར་ལོག་པ་ཡིན་ནོ། དེ་གླང་པོ་ཆེ་དང་། རྟ་དང་། བ་ལང་དང་། ལུག་དང་། བྱ་གག་དང་། ཕག་ལེན་པ་སྤངས་ནས་གླང་པོ་ཆེ་དང་། རྟ་དང་། བ་ལང་

དང་། ལུག་དང་། བྱ་གག་དང་། ཕག་ལེན་པ་ལས་སླར་ལོག་པ་ཡིན་ནོ། །དེ་བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལེན་པ་སྤངས་ནས་བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལེན་པ་ལས་སླར་ལོག་པ་ཡིན་ནོ། །དེ་བུད་

མེད་དང་། སྐྱེས་པ་དང་། ཁྱེའུ་དང་། བུ་མོ་ལེན་པ་སྤངས་ནས་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་ལེན་པ་ལས་སླར་ལོག་པ་ཡིན་ནོ། །དེ་གསེར་དང་། དངུལ་ལེན་པ་སྤངས་ནས་གསེར་དང་། དངུལ་ལེན་པ་ལས་སླར་ལོག་པ་ཡིན་ནོ། །དེ་འབྲུ་རྗེན་པ་ལེན་པ་སྤངས་

Vol. 4 · folio 271b

ནས་འབྲུ་རྗེན་པ་ལེན་པ་ལས་སླར་ལོག་པ་ཡིན་ནོ། །དེ་ཟ་མ་གཅིག་པ་ཡིན་ཏེ། ནུབ་མོའི་སྤངས་ཤིང་དུས་མ་ཡིན་པའི་ཁ་ཟས་སྤངས་པ་ཡིན། དུས་སུ་རྒྱུ་ཞིང་དུས་སུ་སྤྱོད་པས་སྦྱོར་བ་ལ་བརྩོན་པ་ཡིན། དེ་ལུས་འཚོ་བ་ཙམ་གྱི་ཆོས་གོས་ཀྱིས་ཆོག་ཤེས་ཤིང་ཚོད་ཟིན་པ་ཡིན།

བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པ་ཡིན་ནོ། །དེ་ལུས་འཚོ་བ་ཙམ་གྱི་ཆོས་གོས་ཀྱིས་ཆོག་ཤེས་ཤིང་ཚོད་ཟིན། བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པས་གང་དང་གང་དུ་འགྲོ་བ་ན་ལྷུང་བཟེད་དང་བཅས་ཆོས་གོས་དང་བཅས་པས་

འགྲོའོ། །དཔེར་ན་འདབ་ཆགས་བྱ་གང་དང་གང་དུ་ལྡིང་བ་དེར་འདབ་མ་དང་ཆས་གཤོག་པ་དང་ཆས་ཏེ་ལྡིང་བ་དེ་བཞིན་དུ་དེ་ལུས་འཚོ་བ་ཙམ་གྱི་ཆོས་གོས་ཀྱིས་ཆོག་ཤེས་ཤིང་ཚོད་ཟིན། བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པས་གང་དང་གང་དུ་འགྲོ་བ་ན་ལྷུང་བཟེད་

དང་བཅས། ཆོས་གོས་དང་བཅས་པས་འགྲོའོ།། །།འདུལ་བ་གཞི། བམ་པོ་བརྒྱ་རྩ་བདུན་པ། རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ས་བོན་གྱི་ཚོགས་དང་། འབྱུང་པོའི་ཚོགས་སྣ་ཚོགས་རྩོམ་པ་

ལ་སྦྱོར་བར་བརྩོན་པས་གནས་པ་འདི་ལྟ་སྟེ། རྩ་བའི་ས་བོན་དང་། སྡོང་བུའི་ས་བོན་དང་། ཐོར་ཏོའི་ས་བོན་དང་། འགས་པའི་ས་བོན་དང་། ལྔ་བ་ས་བོན་གྱི་ས་བོན་ཉིད་དེ། དགེ་སྦྱོང་ནི་ས་བོན་གྱི་ཚོགས་དང་། འབྱུང་པོའི་ཚོགས་སྣ་ཚོགས་རྩོམ་པ་ལ་སྦྱོར་བར་བརྩོན་

པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་གསོག་འཇོག་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། ཟས་ཀྱི་གསོག་འཇོག་དང་། སྐོམ་གྱི་གསོག་འཇོག་དང་། གོས་

ཀྱི་གསོག་འཇོག་དང་། དྲིའི་གསོག་འཇོག་དང་། མེ་ཏོག་ཕྲེང་གི་གསོག་འཇོག་དང་། ལོ་མའི་གསོག་འཇོག་དང་། མེ་ཏོག་གི་གསོག་འཇོག་དང་། འབྲས་བུའི་གསོག་འཇོག་སྟེ། དགེ་སྦྱོང་གི་གསོག་འཇོག་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་

Vol. 4 · folio 272a

ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་གནས་མལ་མཐོན་པོ་དང་། གནས་མལ་ཆེན་པོ་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པར་བྱེད་པ་འདི་ལྟ་སྟེ་སྟན་དང་། ཁྲི་དང་། ཁྲི་སྣམ་བུ་ཅན་

དང་། རས་ཀྱི་སྣམ་བུ་ཅན་དང་། བེའུ་རས་ཀྱིས་གཡོགས་པ་དང་། རས་ཡུག་ཆེན་གྱིས་གཡོགས་པ་དང་། རས་ཁྲ་བོས་གཡོགས་པ་དང་། པ་ལེ་ལའི་རས་ཀྱིས་གཡོགས་པ་དང་། གླང་པོ་ཆེའི་འཐབ་སྟན་དང་། རྟའི་འཐབ་སྟན་དང་། ངོས་གཅིག་པ་ལ་ལས་བྱས་

པ་དང་། ངོས་གཉིས་ཀ་བལ་ལས་བྱས་པ་དང་། སྟོད་པ་ལ་ལས་བྱས་པ་དང་། རྒྱབ་བལ་ལས་བྱས་པ་དང་། ཀ་ལིང་ཀའི་གོས་ཀྱིས་སྟེང་གཡོགས་དང་བཅས་པའི་གོས་དང་། ཕྱོགས་གཉིས་སུ་སྔས་དམར་པོ་བཅུག་པ་སྟེ། དགེ་སྦྱོང་ནི་གནས་མལ་མཐོན་པོ་དང་།

གནས་མལ་ཆེན་པོ་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཆབ་དང་། གཞག་པ་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། མཉེ་བ་དང་། བཀྲུ་

བ་དང་། དྲིལ་ཕྱི་དང་། མེ་ཏོག་གི་ཕྲེང་བ་དང་། དྲི་དང་བྱུག་པ་དང་། ཁ་དོག་འཆང་བ་དང་། སེན་མོའི་ཁ་དོག་བསྒྱུར་བ་དང་། སོ་བྱི་དོར་བྱེད་པ་དང་། ཁར་ཕྱེ་མ་འདེབས་པ་དང་། གདོང་གི་བྱི་དོར་དང་། གདོང་མེ་ལོང་ལ་བལྟ་བ་དང་། གཙུག་ཕུད་འཆིང་བ་དང་།

གདུགས་ཀྱི་རྩ་བ་སྦུ་བུ་ཅན་དང་། རལ་གྲི་དང་། རྔ་ཡབ་ནོར་བུའི་ཡུ་བ་ཅན་དང་། མཆིལ་ལྷམ་ཁྲ་བོ་དང་། གོས་སར་པ་དང་། རས་སར་པ་ཁ་ཚར་ཅན་འཆང་བའི་རང་བཞིན་དག་སྟེ། དགེ་སྦྱོང་ནི་གཞག་པ་དང་ཆ་བ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་

ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ལྟད་མོ་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། གླང་པོ་ཆེས་འགྱེད་པ་དང་། རྟས་འགྱེད་པ་དང་། ཤིང་རྟས་འགྱེད་པ་དང་།

Vol. 4 · folio 272b

དཔུང་བུ་ཆུང་གིས་འགྱེད་པ་དང་། དབྱུག་པས་འགྱེད་པ་དང་། ཁུ་ཚུར་གྱིས་འགྱེད་པ་དང་། ཁྱུ་མཆོག་གིས་འགྱེད་པ་དང་། མ་ཧེས་འགྱེད་པ་དང་། ར་འགྱེད་པ་དང་། ལུག་འགྱེད་པ་དང་། བྱ་གག་འཐབ་པ་དང་། མཆིལ་པ་འཐབ་པ་དང་། འུར་བ་འཐབ་པ་དང་།

བྱ་གག་དང་། མཆིལ་བ་དང་། འུར་བར་འཐབ་པ་དང་། བུད་མེད་འཐབ་པ་དང་། སྐྱེས་པ་འཐབ་པ་དང་། གཞོན་ནུ་འཐབ་པ་དང་། གཞོན་ནུ་མ་འཐབ་པ་དང་། ཤིང་འཇོག་པ་དང་། བྲོ་གར་གྱི་ཚོགས་དང་། ཕྲག་པ་ནས་འགོང་བ་དང་། རྒྱལ་མཚན་གྱི་རྩེ་མོ་དང་། དཔུང་

གི་ཚོགས་དང་། གཡུལ་བཤམས་པ་དང་། དམག་གི་ཚོགས་ལ་ལྟ་བ་དང་། འདུན་ཕལ་ཆེན་པོ་ལ་ལྟ་བར་འདོད་པ་སྟེ། དགེ་སྦྱོང་ནི་ལྟད་མོ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་

དད་པས་བྱིན་པ་དག་སྤྱད་ནས་སྒྲ་སྣ་ཚོགས་ཉན་པ་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། གླང་པོ་ཆེའི་སྐད་དང་། རྟའི་སྐད་དང་། ཤིང་རྟའི་སྒྲ་དང་། དཔུང་བུ་ཆུང་གི་སྒྲ་དང་། རྔ་པ་ཊ་ཧའི་སྒྲ་དང་། དུང་གི་སྒྲ་དང་། རྔ་བོ་ཆེའི་སྒྲ་དང་། རོལ་མོའི་ཚོགས་པའི་

སྒྲ་དང་། གར་མཁན་གྱི་སྒྲ་དང་། གླུའི་སྒྲ་དང་། སྨྲ་བའི་སྒྲ་དང་། སེ་གོལ་གྱི་སྒྲ་དང་། ཐལ་མོའི་སྒྲ་དང་། བུམ་པའི་སྒྲ་དང་། རང་བཟོ་དང་། སྙན་དངགས་དང་། ཚིག་དང་ཡི་གེ་སྣ་ཚོགས་དང་། འཇིག་རྟེན་རྒྱང་བ་ན་དང་ལྡན་པ་དང་། གྲགས་པའི་གཏམ་ཉན་འདོད་

པ་དག་སྟེ། དགེ་སྦྱོང་ནི་སྒྲ་སྣ་ཚོགས་ཉན་པ་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས། ཨུག་ཤུད་དང་། ཁྲས་དང་། རྒྱན་པོ་རྩོམ་པ་ལ་སྦྱོར་བར་བརྩོན་པར་

གནས་པ་འདི་ལྟ་སྟེ། མིག་བརྒྱད་པ་དང་། མིག་བཅུ་པ་དང་། ན་ཡའི་མིག་དང་། ཕྱོགས་ཕྱོགས་ནས་འགྱེད་པ་དང་། བུམ་པས་རྩེ་བ་དང་། ཙ་ལེ་དང་། སུ་ཁ་ལེ་དང་། ཕེག་གིས་རྩེ་བ་དང་། གུལ་ཙ་བ་དང་། ཐུར་མ་དང་། ལག་རྒྱན་དང་། སྐུགས་ཇི་ལྟ་བར་

Vol. 4 · folio 273a

འགྱེད་པ་སྟེ། དགེ་སྦྱོང་ནི་ཨུག་ཤུད་དང་། ཁྲས་དང་། རྒྱན་པོ་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་གཏམ་སྣ་ཚོགས་རྩོམ་པ་ལ་སྦྱོར་བར་བརྩོན་པས་

གནས་པ་འདི་ལྟ་སྟེ། རྒྱལ་པོའི་གཏམ་དང་། ཆོམ་རྐུན་གྱི་གཏམ་དང་། དམག་གི་གཏམ་དང་། ཟས་ཀྱི་གཏམ་དང་། སྐོམ་གྱི་གཏམ་དང་། གོས་ཀྱི་གཏམ་དང་། ཚོང་དུས་ཀྱི་གཏམ་དང་། སྨད་འཚོང་གི་གཏམ་དང་། ལས་ངན་པ་བརྗོད་པའི་གཏམ་དང་། རྒྱ་མཚོ་

ཆེན་པོ་བརྗོད་པའི་གཏམ་དང་། འཇིག་རྟེན་བརྗོད་པའི་གཏམ་དང་། ལྗོངས་དང་། སྣ་ཆེན་པོ་ལ་གཏོགས་པ་བརྗོད་པའི་གཏམ་སྟེ། དགེ་སྦྱོང་ནི་གཏམ་སྣ་ཚོགས་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་

ཅིག་དད་པས་བྱིན་པ་དག་སྤྱད་ནས་རྩོད་པའི་གཏམ་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། ཇི་ལྟར་ཁོ་བོས་ཆོས་འདུལ་བ་འདི་ཀུན་ཤེས་པ་དེ་བཞིན་དུ་ཁྱོད་ཀྱིས་ཀྱང་ཆོས་འདུལ་བ་འདི་ཀུན་ཤེས་མོད་ཀྱི་ངའི་ནི་རིགས་པ་དང་ལྡན་ལ་ཁྱོད་ཀྱི་ནི་རིགས་པ་དང་མི་ལྡན་ནོ། །ངའི་

ནི་འབྲེལ་ལ་ཁྱོད་ཀྱི་ནི་མི་འབྲེལ་ཏེ་སྔར་སྨྲ་བར་བྱ་བ་ནི་ཕྱིས་སྨྲས། ཕྱིས་སྨྲ་བར་བྱ་བ་ནི་སྔར་སྨྲ་ལ། ཁྱོད་ཀྱིས་ཧ་ཅང་མྱུར་བར་སྨྲས་པ་མི་གསལ་ལོ། །བརྩད་པས་མཇུག་བརྟུལ་གྱིས། ཁྱོད་ཀྱིས་རྩད་པའི་དོན་དུ་སྨྲས་པའི་ཚིག་དེ་ཐོང་ཤིག །ཚར་བཅད་ཟིན་ཏོ། །གལ་ཏེ་སྤོགས་

ནུས་ན་དྲིས་དང་། སྨྲོས་ཤིག་ཅེས་བྱ་བ་སྟེ། དགེ་སྦྱོང་ནི་རྩོད་པ་སྣ་ཚོགས་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་དང་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཕོ་ཉར་འགྲོ་བ་དང་། གཏོང་བ་ལོག་པའི་འཚོ་བས་འཚོ་བར་བྱེད་

པ་འདི་ལྟ་སྟེ། དེ་དག་རྒྱལ་པོའི་འམ། བློན་པོ་ཆེན་པོ་རྣམས་ཀྱིའམ། བྲམ་ཟེ་རྣམས་ཀྱིའམ། གྲོང་མི་རྣམས་ཀྱིའམ། ཡུལ་མི་རྣམས་ཀྱིའམ། ནོར་ཅན་རྣམས་ཀྱིའམ། ཚོང་དཔོན་རྣམས་ཀྱིའམ། དེད་དཔོན་རྣམས་ཀྱི་ཕོ་ཉ་ཚུ་བི་ནས་ཁྲིད་དེ་ཕ་བིར་སྣ་འདྲེན་པར་བྱེད་པ་དང་། ཕ་བི་ནས་ཕོ་ཉ་

Vol. 4 · folio 273b

ཁྲིད་དེ་ཚུ་བིར་སྣ་འདྲེན་པར་བྱེད་པ་སྟེ། དགེ་སྦྱོང་ནི་ཕོ་ཉར་འགྲོ་བ་དང་། གཏོང་བ་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཚུལ་འཆོས་པ་དང་། ཁ་གསག་དང་། གཞོགས་སློང་

དང་། ཐོབ་ཀྱིས་འཇལ་བ་དང་། རྙེད་པས་རྙེད་པ་སྒྲུབ་པར་བྱེད་དེ་དགེ་སྦྱོང་ནི་ཚུལ་འཆོས་པ་དང་། ཁ་གསག་དང་། གཞོགས་སློང་དང་། ཐོབ་ཀྱིས་འཇལ་བ་དང་། རྙེད་པས་རྙེད་པ་སྒྲུབ་པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་

དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། གནམ་འགྲུམ་པ་དང་། རྨ་མཚན་དང་། རྨི་ལམ་གྱི་མཚན་མ་དང་། མེས་ཚིག་པ་དང་། ཆུས་རེག་པ་དང་། བྱི་བས་ཟོས་པ་དང་། འབེབས་པ་དང་། སྐད་ཉན་པ་དང་། འབྱུང་པོ་

ཐམས་ཅད་ཀྱི་སྐད་དང་། ལུས་ཀྱི་དཔྱད་དང་། ཁྱིམ་སའི་དཔྱད་དང་། ནེ་ཙོའི་དཔྱད་དང་། བྱའི་དཔྱད་དང་། ཁ་ཅིག་མཐེ་བོའི་དཔྱད་ལ་སྦྱོར་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་

བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། རྒྱུ་སྐར་རྣམས་ལ་རབ་ཏུ་སྦྱོར་བ་དང་། ཡུད་ཙམ་དང་ལྡང་བ་དང་། རོ་བརྟག་པ་དང་། སྔགས་ཀྱི་ལས་དང་། ཞི་བའི་ལས་དང་། འབྱུང་པོའི་ལས་དང་།

རྒྱས་པའི་ལས་དང་། དབང་དུ་བྱ་བའི་ལས་དང་། ཡི་གེ་འདྲི་བའི་ལས་དང་། བསང་གཏོར་བའི་ལས་དང་། གྲངས་དང་། ཁ་ཅིག་མེ་ལོང་གི་དཔྱད་ལ་སྦྱོར་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་

ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་བདག་སྤྱད་ནས་ཡོན་པོའི་དཔྱད་ཀྱིས་ལོག་པར་འཚོ་བས་འཚོ་བར་བྱེད་པ་འདི་ལྟ་སྟེ། ལུས་ཀྱི་དཔྱད། རྩ་བའི་སྨན། མིག་སྨན་སྦྱིན་པ་དང་། སྣུམ་བག་གི་རོ་སྦྱིན་པ་དང་། སྨན་སྦྱིན་པ་དང་། བུད་མེད་ཀྱི་དཔྱད་དང་། སྐྱེས་པའི་

Vol. 4 · folio 274a

དཔྱད་དང་། གཞོན་ནུའི་དཔྱད་དང་། གཞོན་ནུ་མའི་དཔྱད་དང་། སྨན་ལ་སྦྱོར་བར་བྱེད་པ་སྟེ། དགེ་སློང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་

བྱིན་པ་དག་དཔྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ནོར་བུའི་མཚན་ཉིད་དང་། དབྱུག་པའི་མཚན་ཉིད་དང་། རལ་གྲིའི་མཚན་ཉིད་དང་། མདའི་མཚན་ཉིད་དང་། གླང་པོ་ཆེའི་མཚན་ཉིད་དང་། རྟའི་མཚན་ཉིད་དང་། མཚོན་ཆའི་མཚན་ཉིད་དང་།

མ་ཧེའི་མཚན་ཉིད་དང་། ཁྱུ་མཆོག་གི་མཚན་ཉིད་དང་། རའི་མཚན་ཉིད་དང་། ལུག་གི་མཚན་ཉིད་དང་། བྱ་གག་གི་མཚན་ཉིད་དང་། མཆིལ་པའི་མཚན་ཉིད་དང་། འུར་བའི་མཚན་ཉིད་དང་། བུད་མེད་ཀྱི་མཚན་ཉིད་དང་། སྐྱེས་པའི་མཚན་ཉིད་དང་། གཞོན་ནུའི་མཚན་

ཉིད་དང་། གཞོན་ནུ་མའི་མཚན་ཉིད་དང་། ཚེ་ཐུང་བའི་རྟགས་དང་། ཚེ་རིང་བའི་རྟགས་དང་། སྐལ་བ་ཆུང་བའི་རྟགས་དང་། སྐལ་བ་ཆེ་བའི་རྟགས་དང་། བསོད་ནམས་ཆུང་བའི་རྟགས་དང་། བསོད་ནམས་ཆེ་བའི་རྟགས་དང་། མཐུ་ཆུང་བའི་རྟགས་དང་། མཐུ་ཆེ་བའི་

རྟགས་དང་། ཇོ་བོའི་མཚན་ཉིད་དང་། བྲན་གྱི་མཚན་ཉིད་དག་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་

འཚོ་བར་བྱེད་པ་འདི་ལྟ་སྟེ། སྨན་མས་ཅིག་ཅར་གཏོང་བ་དང་། སྦྲེངས་ཏེ་གཏོང་བ་དང་། སྐྱུག་པ་དང་། འཁྲུ་བ་དང་། སྣར་བླུགས་པ་དང་། དུ་བ་བརྔུབ་པ་དང་། དུགས་ཀྱི་ལས་དང་། བད་ཀན་གྱི་དཔྱད་དང་། ཕོ་བའི་དཔྱད་དང་། སྨེ་བའི་དཔྱད་དང་། ཕོལ་མིག་གི་དཔྱད་དང་། རི་

དགས་འཁྱིལ་བ་དང་། བྱ་རོག་འཁྱིལ་བ་དང་། མཁུར་བ་འགུལ་བ་དང་། ལྕེ་སོས་ཆོད་པ་དང་། རོ་ལངས་དང་། རོ་ལངས་ཕྱེད་ཀྱི་སྦྱོར་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་

Vol. 4 · folio 274b

བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། དགུག་པ་དང་། ཀུན་དུ་དགུག་པ་དང་། རྣམ་པར་དགུག་པ་དང་། ཀུན་དུ་རྨོངས་པ་དང་། རྣམ་པར་རྨོངས་པ་དང་། རྣམ་པར་འཐོར་བ་དང་། རྣམ་པར་

འཇོམས་པའི་ཆོས་དང་། བདེ་བར་བྱེད་པ་དང་། སྡུག་བསྔལ་བར་བྱེད་པ་དང་། བུ་འཆགས་པར་བྱེད་པ་དང་། ཏིལ་གྱི་སྦྱིན་སྲེག་དང་། འབྲས་ཀྱི་སྦྱིན་སྲེག་དང་། ནོར་གྱི་སྦྱིན་སྲེག་དང་། འབྲུའི་སྦྱིན་སྲེག་དང་། མོན་སྲན་སྡེའུ་ཡི་སྦྱིན་སྲེག་དང་། མོན་སྲན་ན་གུའི་

སྦྱིན་སྲེག་དང་། རྫས་ཀྱི་སྦྱིན་སྲེག་དང་། སྲེག་བླུགས་ཀྱི་སྦྱིན་སྲེག་དང་། ཉི་མ་ལ་བཀུར་སྟི་བྱེད་པ་དང་། རྒྱུ་སྐར་ལ་བཀུར་སྟི་བྱེད་པ་དང་། ལྷ་ལ་བཀུར་སྟི་བྱེད་པ་དང་། ཁ་ཅིག་དམག་མང་པོ་འདྲེན་པ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་

སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། འཇིགས་པར་འགྱུར་བ་དང་། ཞི་བར་འགྱུར་བ་དང་། ལོ་ཉེས་པར་འགྱུར་བ་དང་། ལོ་

ལེགས་པར་འགྱུར་བ་དང་། ཆར་མི་འབབ་པར་འགྱུར་བ་དང་། ཆར་ལེགས་པར་འབབ་པར་འགྱུར་བ་དང་། ཡམས་ཀྱི་ནད་འབྱུང་བར་འགྱུར་བ་དང་། ཡམས་ཀྱི་ནད་འབྱུང་བར་མི་འགྱུར་རོ་ཞེས་བྱ་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་

སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ཟུན་རྣམས་ཀྱི་རྒྱལ་པོ་རྒྱལ་བར་འགྱུར་ཞིང་ཕྱི་རོལ་པ་རྣམས་ཀྱི་རྒྱལ་པོ་ཕམ་པར་འགྱུར་བ་

དང་། ཕྱི་རོལ་པ་རྣམས་ཀྱི་རྒྱལ་པོ་རྒྱལ་བར་འགྱུར་ཞིང་ཟུན་རྣམས་ཀྱི་རྒྱལ་པོ་ཕམ་པར་འགྱུར་བ་དང་། ཟུན་རྣམས་ཀྱི་རྒྱལ་པོ་གཡུལ་དུ་འཇུག་པར་འགྱུར་ཞིང་ཕྱི་རོལ་པ་རྣམས་ཀྱི་རྒྱལ་པོ་འབྱུང་བར་འགྱུར་བ་དང་། ཕྱི་རོལ་པ་རྣམས་ཀྱི་རྒྱལ་པོ་གཡུལ་དུ་འཇུག་པར་འགྱུར་

Vol. 4 · folio 275a

ཞིང་ཟུན་རྣམས་ཀྱི་རྒྱལ་པོ་འབྱུང་བར་འགྱུར་རོ། །ཞེས་བྱ་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་

དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ཉི་མ་དང་ཟླ་བ་དག་ལམ་དུ་འགྲོ་ན་འདི་ལྟར་འགྱུར་རོ། །ཉི་མ་དང་ཟླ་བ་དག་ལམ་གོལ་བར་འགྲོ་ན་འདི་ལྟར་འགྱུར་རོ། །ཉི་མ་གཟས་ཟིན་པ་དང་། ཟླ་བ་གཟས་ཟིན་པ་དང་། སྐར་མདའ་ལྷུང་བ་དང་། ཕྱོགས་དམར་

པོར་གྱུར་པ་དང་། བར་སྣང་ལས་སྒྲ་འབྱུང་བ་དང་། ལམ་གོལ་བར་ཉི་མ་གཟས་ཟིན་པ་དང་། ཟླ་བ་གཟས་ཟིན་པ་དང་། སྐར་མདའ་ལྷུང་བ་དང་། ཕྱོགས་དམར་པོར་འགྱུར་བ་དང་། བར་སྣང་ལས་སྒྲ་འབྱུང་བ་དང་། ཉི་མ་དང་ཟླ་བ་འདི་གཉིས་འདི་ལྟར་རྫུ་

འཕྲུལ་ཆེ་ཞིང་འདི་ལྟར་མཐུ་ཆེ་བ་འཆར་བ་དང་། ནུབ་པ་དང་། བསྒྲིབས་པ་དང་། མ་བསྒྲིབས་པ་དང་། འདི་ལྟ་སྟེ་ལམ་དང་། ལམ་གོལ་བའི་གནས་དག་མི་མངོན་ན་འདི་ལྟར་འགྱུར་རོ་ཞེས་བྱ་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་

ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ཉི་མ་དང་ཟླ་བ་དག་ལམ་དུ་འགྲོ་ན་འབྲས་བུ་འདི་ལྟ་བུར་འགྱུར་བ་དང་། ཉི་མ་དང་ཟླ་བ་དག་ལམ་གོལ་

བར་འགྲོ་ན་འབྲས་བུ་འདི་ལྟ་བུར་འགྱུར་བ་དང་། ལམ་དུ་ཉི་མ་གཟས་ཟིན་པ་དང་། ཟླ་བ་གཟས་ཟིན་པ་དང་། སྐར་མདའ་ལྟུང་བ་དང་། ཕྱོགས་དམར་པོར་གྱུར་པ་དང་། བར་སྣང་ལས་སྒྲ་བྱུང་ན་འབྲས་བུ་འདི་ལྟ་བུར་འགྱུར་བ་དང་། ལམ་གོལ་བར་ཉི་མ་གཟས་ཟིན་པ་

དང་། ཟླ་བ་གཟས་ཟིན་པ་དང་། སྐར་མདའ་ལྟུང་བ་དང་། ཕྱོགས་དམར་པོར་གྱུར་བ་དང་། བར་སྣང་ལས་སྒྲ་བྱུང་ན་འབྲས་བུ་འདི་ལྟ་བུར་འགྱུར་བ་དང་། ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་འཆར་བ་དང་ནུབ་པ་དང་། བསྒྲིབས་པ་དང་།

Vol. 4 · folio 275b

མ་བསྒྲིབས་པ་དང་། འདི་ལྟ་སྟེ་ལམ་དང་། ལམ་གོལ་བ་མངོན་ན་འབྲས་བུ་འདི་ལྟ་བུར་འགྱུར་བ་སྟོན་པ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་ལྡན་པས་ནང་གི་བདེ་བ་ཁ་ན་མ་ཐོ་བ་

མེད་པ་ཉམས་སུ་མྱོང་བར་བྱེད་ཅིང་དེ་དབང་པོ་རྣམས་ཀྱི་སྒོ་བསྡམས་པ་དང་། ཀུན་དུ་བསྲུངས་པའི་དྲན་པ་དང་། འགྲུས་སྐྱོང་གི་དྲན་པ་དང་། ཡིད་དྲན་པས་བསྲུངས་པས་གནས་སྐབས་མཉམ་པར་སྤྱོད་པ་ཡིན་ཏེ། དེ་མིག་གིས་གཟུགས་རྣམས་མཐོང་ན་ཡིད་བདེ་བར་མི་

འགྱུར། ཡིད་མི་བདེ་བར་མི་འགྱུར། མཚན་མར་མི་འཛིན་མངོན་རྟགས་སུ་མི་འཛིན་ནོ། །གཞི་གང་གི་ཕྱིར་ཞེ་ན། མིག་གི་དབང་པོའི་སྡོམ་པས་མ་བསྡམས་པར་གནས་པ་ནི་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དག་འབྱུང་བས་སྡིག་པ་མི་དགེ་བའི་ཆོས་

རྣམས་སེམས་ཀྱི་རྗེས་སུ་འབྲང་བར་འགྱུར་རོ། །དེ་རྣམས་བསྡམ་པའི་ཕྱིར་སྒྲུབ་ཅིང་བསྲུང་བར་མིག་གི་དབང་པོས་མིག་གི་དབང་པོ་སྡོམ་པར་བྱེད་དོ། །རྣ་བས་སྒྲ་དང་། སྣས་དྲི་དང་། ལྕེས་རོ་དང་། ལུས་ཀྱིས་རེག་བྱ་དང་། ཡིད་ཀྱིས་ཆོས་རྣམས་ཤེས་ནས་ཡིད་བདེ་

བར་མི་འགྱུར། ཡིད་མི་བདེ་བར་མི་འགྱུར། མཚན་མར་མི་འཛིན། མངོན་རྟགས་སུ་མི་འཛིན་ནོ། །གཞི་གང་གི་ཕྱིར་ཞེ་ན། ཡིད་ཀྱི་དབང་པོའི་སྡོམ་པས་མ་བསྡམས་པར་གནས་པ་ནི་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དག་འབྱུང་བས་སྡིག་པ་

མི་དགེ་བའི་ཆོས་རྣམས་སེམས་ཀྱི་རྗེས་སུ་འབྲང་བར་འགྱུར་རོ། །དེ་རྣམས་བསྡམས་པའི་ཕྱིར་སྒྲུབ་ཅིང་བསྲུང་བར་ཡིད་ཀྱི་དབང་པོས་ཡིད་ཀྱི་དབང་པོ་སྡོམ་པར་བྱེད་དོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་། དབང་པོའི་སྒོ་བསྡམས་པ་དེ་དང་ལྡན་པས་ནང་

གི་བདེ་བ་གནོད་པ་མེད་པ་ཉམས་སུ་མྱོང་ཞིང་དེ་འགྲོ་བ་དང་ལྡོག་པ་ལ་ཤེས་བཞིན་དུ་གནས་པ་ཡིན་ནོ། །དེ་ལྟ་བ་དང་། རྣམ་པར་ལྟ་བ་དང་། བསྐུམ་པ་དང་། བརྐྱང་བ་དང་། སྣམ་སྦྱར་དང་། ཆོས་གོས་དང་། ལྷུང་བཟེད་ལེན་པ་དང་། འགྲོ་བ་དང་། འགྲེང་བ་དང་།

Vol. 4 · folio 276a

འདུག་པ་དང་། ཉལ་བ་དང་། མི་ཉལ་བ་དང་། སྨྲ་བ་དང་། མི་སྨྲ་བ་དང་། གཉིད་ཀྱིས་དུབ་པ་སེལ་བ་ལ་ཡང་ཤེས་བཞིན་དུ་གནས་པ་ཡིན་ནོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་ལྡན་ཞིང་དབང་པོའི་སྒོ་བསྡམས་པ་དེ་དང་། དྲན་པ་

དང་ཤེས་བཞིན་མཆོག་དེ་དང་ལྡན་པས་ནང་གི་བདེ་བ་ཁ་ན་མ་ཐོ་བ་མེད་པ་ཉམས་སུ་མྱོང་བ་ཡིན་ནོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་ལྡན་ཞིང་དབང་པོའི་སྒོ་བསྡམས་པ་དེ་དང་། དྲན་པ་དང་ཤེས་བཞིན་མཆོག་དེ་དང་ལྡན་པས་གནས་མལ་དབེན་པ་དགོན་པ་

དང་། ཤིང་དྲུང་དང་། ཁང་སྟོང་དག་ཏུ་གནས་པ་ཡིན་ཏེ། དེ་དགོན་པར་སོན་ཀྱང་རུང་། ཤིང་དྲུང་དུ་སོན་ཀྱང་རུང་། ཁང་སྟོང་དུ་སོན་ཀྱང་རུང་། འདུག་སྟེ་སྐྱིལ་མོ་ཀྲུང་བཅས་ཤིང་ལུས་དྲང་པོར་བསྲང་ནས་དྲན་པ་མངོན་དུ་བཞག་སྟེ། དེ་འཇིག་རྟེན་ལ་བརྣབ་

སེམས་སྤངས་ཏེ། བརྣབ་སེམས་དང་བྲལ་བའི་སེམས་ཀྱིས་ལན་མང་དུ་གནས་ཤིང་བརྣབ་སེམས་ཡོངས་སུ་སྦྱོང་བ་ཡིན་ནོ། །འཇིག་རྟེན་ལ་གནོད་སེམས་དང་། རྨུགས་པ་དང་། གཉིད་དང་། རྒོད་པ་དང་། འགྱོད་པ་དང་། ཐེ་ཚོམ་སྤངས་ཏེ་ཡིད་གཉིས་ལས་

རྒལ་བ་ཡིན། ཐེ་ཚོམ་དང་སོམ་ཉི་ལས་རྒལ་བ་ཡིན་ཞིང་དགེ་བའི་ཆོས་རྣམས་ལ་ཐེ་ཚོམ་ཡོངས་སུ་སྦྱོང་བ་ཡིན་ནོ། །རྒྱལ་པོ་ཆེན་པོ་དཔེར་ན་མི་ཞིག་གིས་སྐྱིན་པོ་ཞིག་བླངས་ནས་ཞིང་བླས་ཀྱི་མཐའ་རྣམས་ལ་བརྩོན་པར་བྱས་ཏེ། དེའི་ལས་ཀྱི་མཐའ་དེ་རྣམས་ཆུད་

མ་ཟོས་ཤིང་གྲུབ་ནས་དེས་དེ་ལས་བུ་ལོན་དེ་ཡང་གཞལ་ལ་དེ་ལ་ཆུང་མ་གསོ་བ་ཆོག་ཙམ་ཞིག་ཀྱང་བདོག་ནས་དེ་འདི་སྙམ་དུ་སེམས་ཏེ། བདག་གིས་སྐྱིན་པོ་བླངས་ནས་ལས་ཀྱི་མཐའ་རྣམས་ལ་བརྩོན་པར་བྱས་ཏེ། བདག་གི་ལས་ཀྱི་མཐའ་དེ་རྣམས་ཆུད་མ་ཟོས་ཤིང་གྲུབ་ནས་

བདག་གིས་དེ་ལ་བུ་ལོན་དེ་ཡང་གཞལ། བདག་ལ་ཆུང་མ་གསོ་བ་ཆོག་ཙམ་ཞིག་ཀྱང་བདོག་གོ་སྙམ་སྟེ། དེ་གཞི་དེས་བདེ་བར་གྱུར་ཡིད་བདེ་བར་གྱུར་པ་དང་། དཔེར་ན་མི་ན་བ་ནད་ཚབས་ཆེ་བ་སྡུག་བསྔལ་བ་ཞིག་ཡོད་ལ། དེ་ཟས་ཟོས་པ་ནི་ལུས་ལ་འཇུར་མི་བཏུབ། སྐོམ་

Vol. 4 · folio 276b

འཐུངས་པ་ནི་ཁོང་དུ་གནོད་པར་གྱུར་པ་ལས་དེ་དུས་གཞན་ཞིག་ན་ནད་མེད་ཅིང་མཐུ་དང་ལྡན་པར་གྱུར་ནས་དེ་འདི་སྙམ་དུ་སེམས་ཏེ། བདག་སྔོན་ན་བ་ན་ནད་ཚབས་ཆེ་བ་སྡུག་བསྔལ་བར་གྱུར་པ་ན། བདག་གིས་ཁ་ཟས་ཟོས་པ་ནི་ལུས་ལ་འཇུར་མི་བཏུབ། སྐོམ་འཐུངས་པ་ནི་ཁོང་དུ་

གནོད་པར་གྱུར་པ་ལས་ད་ནི་བདག་ནད་མེད་ཅིང་མཐུ་དང་ལྡན་པས་བདེ་སྟེ་བདག་གིས་ཟས་ཟོས་པ་ནི་ལུས་ལ་འཇུར་བཏུབ། སྐོམ་འཐུངས་པ་ནི་ཁོང་དུ་གནོད་པར་མ་གྱུར་ཏོ་སྙམ་སྟེ། གཞི་དེས་དགའ་བ་དང་། རབ་ཏུ་དགའ་བར་གྱུར་པ་དང་། དཔེར་ན་མི་ཞིག་བྲན་དུ་གྱུར་ཏེ། མངག་

གཞུག་པ་གོ་རེ་ལོང་ལྟོ་ཁོ ལ་རང་དབང་མེད་པར་གྱུར་པ་ལས་དེ་དུས་གཞན་ཞིག་ན་བྲན་མི་བྱེད་པར་གྱུར་ཏེ་མངག་གཞུག་པ་མི་བྱེད། གོ་རེ་ལོང་མི་བྱེད། ལྟོ་ཁོལ་མི་བྱེད་དེ། རང་དབང་ཡོད་ནས་དེ་འདི་སྙམ་དུ་སེམས་ཏེ། བདག་སྔོན་བྲན་དུ་གྱུར་པ་ན་མངག་གཞུག་པ་དང་། གོ་རེ་ལོང་

དང་། ལྟོ་ཁོལ་དང་། རང་དབང་མེད་པ་ལས་ད་ནི་བདག་བྲན་མི་བྱེད་པས་མངག་གཞུག་མི་བྱེད། གོ་རེ་ལོང་མི་བྱེད། ལྟོ་ཁོལ་མི་བྱེད་དེ། རང་དབང་ཡོད་དོ་སྙམ་ནས། དེ་གཞི་དེས་བདེ་བར་གྱུར། ཡིད་བདེ་བར་གྱུར་པ་དང་། དཔེར་ན་མི་ཞིག་བཙོན་དུ་བཟུང་སྟེ། ཕྱིན་ཀ་ལོག་ཏུ་དམ་

དུ་བཅིངས་པ་ལས་དེ་དེ་ལས་ནོར་གཞལ་བ་མེད་པར་བདེ་བར་ལེགས་པར་ཐར་པར་གྱུར་པ་དང་། དེ་འདི་སྙམ་དུ་སེམས་ཏེ། བདག་སྔོན་བཙོན་དུ་བཟུང་ནས་ཕྱིན་ཀ་ལོག་ཏུ་དམ་དུ་བཅིངས་པར་གྱུར་པ་ལས་ད་ནི་དེ་ལས་ནོར་གཞལ་མི་དགོས་པར་བདེ་བར་ལེགས་པར་ཐར་ཏོ་སྙམ་ནས།

དེ་གཞི་དེས་བདེ་བར་གྱུར། ཡིད་བདེ་བར་གྱུར་པ་དང་། དཔེར་ན་མི་ཞིག་སྐྲག་པར་གྱུར་པ་ལས་བདེ་བ་དང་། ལོ་ཉེས་པ་ལས་ལོ་ལེགས་པར་གྱུར་ནས། དེ་འདི་སྙམ་དུ་སེམས་ཏེ། བདག་སྐྲག་པ་ལས་བདེ་བར་གྱུར་ཅིང་། ལོ་ཉེས་པ་ལས་ལོ་ལེགས་པར་གྱུར་ཏོ་སྙམ་སྟེ། དེ་

གཞི་དེས་བདེ་བར་གྱུར། ཡིད་བདེ་བར་གྱུར་པ་དེ་བཞིན་དུ་རྒྱལ་པོ་ཆེན་པོ་དེས་བདག་ཉིད་ཀྱི་སྒྲིབ་པ་ལྔ་པོ་འདི་དག་སྐྱིན་པོ་ཇི་ལྟ་བ་དང་། ནད་ཇི་ལྟ་བ་དང་། བྲན་ཇི་ལྟ་བ་དང་། བཙོན་ཇི་ལྟ་བ་དང་། འཇིག་པ་ཇི་ལྟ་བ་བཞིན་དུ་སྤངས་པ་ཡང་དག་པར་རྗེས་སུ་མཐོང་ངོ་། དེ་སྒྲིབ་

Vol. 4 · folio 277a

པ་ལྔ་པོ་སེམས་ཉེ་བའི་ཉོན་མོངས་པར་བྱེད་པ། ཤེས་རབ་ཉམ་ཆུང་བར་བྱེད་པ། མི་མཐུན་པའི་ཕྱོགས་དང་མཐུན་པ། མྱ་ངན་ལས་འདས་པར་མི་འགྱུར་བ་དག་སྤངས་ནས། དེ་འདོད་པ་རྣམས་ལས་དབེན། སྡིག་པ་མི་དགེ་བའི་ཆོས་རྣམས་ལས་

དབེན། རྟོག་པ་དང་བཅས། དཔྱོད་པ་དང་བཅས། དབེན་པ་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་དང་པོ་རྫོགས་པར་བྱས་ནས་གནས་སོ། །དེས་ལུས་དེ་ཉིད་དབེན་པ་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་

བྱེད། ཡོངས་སུ་ཚིམ་པར་བྱེད་ཡོངས་སུ་ཁྱབ་པར་བྱེད་དེ་དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དཔེར་ན་ཁྲུས་མཁན་ནམ་ཁྲུས་མཁན་གྱི་སློབ་མ་མཁས་པ་ཞིག་

ཁ་ཕོར་རམ། གཞོང་བུ་འམ། ཉ་ཕྱིས་ཀྱི་ནང་དུ་འདག་ཆལ་གྱི་ཕྱེ་མ་ཞིབ་མོ་བླུགས་ཏེ་ཆུས་བཏབ་སྟེ་བདས་ན་འདག་ཆལ་གྱི་གོང་བུ་དེ་གཤེར་དང་ལྡན། གཤེར་གྱིས་ཞེན་ཏེ། གཤེར་གྱིས་ཕྱི་ནང་ཁྱབ་པས་འབོ་བར་མི་འགྱུར། འཛག་པར་མི་འགྱུར་བ་དེ་བཞིན་

དུ་དེས་ལུས་དེ་ཉིད་དབེན་པ་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དོ། །དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་

པར་མ་གྱུར་པ་ཅུང་ཟད་ཀྱང་མེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་

བུ་བསྟན་ལགས་སོ། །དེ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དངས་ཏེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ནས་གནས་ཤིང་། དེས་ལུས་དེ་ཉིད་

Vol. 4 · folio 277b

ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་པར་མ་གྱུར་

པ་ཅུང་ཟད་ཀྱང་མེད་དོ། །དཔེར་ན་རིའི་རྩེ་མོའི་ཕྱོགས་ཤིག་ན་བཀོད་མའི་མཚོ་བྲན་ཞིག་ཡོད་པར་གྱུར་ལ། དེར་ནི་ཤར་ཕྱོགས་ནས་ཀྱང་ཆུ་མི་འབབ་པར་གྱུར་ལ། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན་ཞིང་། བྱང་ཕྱོགས་ནས་ཀྱང་ཆུ་མི་འབབ་ལ། དེར་ལྷས་ཀྱང་དུས་དུས་

སུ་ཆར་གྱི་རྒྱུན་མི་འབེབས་ཏེ། གཞན་དུ་ན་བཀོད་མའི་མཚོ་བྲན་དེ་ཉིད་ནས་བཀོད་མའི་ཆུའམ། བཀོད་མའི་ཆུ་ཆེན་པོ་ལུད་ནས་བཀོད་མའི་མཚོ་བྲན་དེ་ཐམས་ཅད་ཆུ་བསིལ་བས་གང་བར་བྱེད། ཡོངས་སུ་གང་བར་བྱེད། ཤིན་ཏུ་གང་བར་བྱེད། ཡོངས་སུ་ཁྱབ་པར་བྱེད་དེ།

བཀོད་མའི་མཚོ་བྲན་དེ་ཐམས་ཅད་འདི་ལྟ་སྟེ། ཆུ་བསིལ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དེ་བཞིན་དུ་དེས་ལུས་དེ་ཉིད་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད།

ཡོངས་སུ་རྒྱས་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་

འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། དེ་དགའ་བའི་འདོད་ཆགས་དང་བྲལ་བར་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་

ཏེ། བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་རྫོགས་པར་བྱས་ནས་གནས་ཏེ། དེས་ལུས་དེ་ཉིད་དགའ་བ་མེད་པའི་བདེ་བས་མངོན་དུ་རླན་པར་

Vol. 4 · folio 278a

བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། དགའ་བ་མེད་པའི་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། དཔེར་ན་ཨུཏྤལ་འམ། པད་

མའམ། ཀུ་མུ་དའམ། པད་མ་དཀར་པོ་ཆུ་ལས་སྐྱེས་ཤིང་ཆུ་ནས་ཆེན་པོར་གྱུར་པ་རྩེས་བཏགས་ཤིང་འདུག་པ་དེ་དག་གི་རྩ་བ་ནས་རྩེ་མོའི་བར་གྱི་གསབ་གསེབ་འདི་ལྟ་སྟེ། ཆུ་བསིལ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་པ་དེ་བཞིན་དུ་དེས་ལུས་དེ་ཉིད་དགའ་བ་མེད་པའི་

བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། དགའ་བ་མེད་པའི་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །རྒྱལ་པོ་ཆེན་པོ་ཇི་སྙམ་དུ་སེམས།

དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་བདེ་བ་ཡང་སྤངས་ཏེ་སྔ་ནས་སྡུག་བསྔལ་ཡང་

སྤངས་ཤིང་ཡིད་བདེ་བ་དང་། ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་བ་རྫོགས་པར་བྱས་ནས་གནས་ཏེ། དེ་ལུས་དེ་ཉིད་ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་

ལྷག་པར་མོས་ཏེ། ཁྱབ་པར་བྱས་ནས་རྫོགས་པར་བྱས་ཏེ་གནས་པས་དེའི་ལུས་ཐམས་ཅད་ལ་འདི་ལྟ་སྟེ། ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དཔེར་ན་ཁྱིམ་བདག་གམ་ཁྱིམ་བདག་གི་བུས་

རས་ཁྲུ་བརྒྱད་པའམ། དགུ་པས་དེ་མགོ་དང་། ལག་པ་དང་རྐང་པ་གཡོགས་ནས། དེའི་མགོ་དང་ལག་པ་ནས་རྐང་པའི་བར་ལུས་ཐམས་ཅད་འདི་ལྟ་སྟེ། རས་གཙང་མ་ཡོངས་སུ་དག་པས་མ་ཡོག་པའམ། ཡོག་པར་མ་གྱུར་བ་ཅུང་ཟད་ཀྱང་མེད་དོ། །དེ་བཞིན་དུ་དེས་ལུས་དེ་

Vol. 4 · folio 278b

ཉིད་ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་ལྷག་པར་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་པས་དེའི་ལུས་ཐམས་ཅད་ལ་འདི་ལྟ་སྟེ། ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་

དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་

སོ། །རྒྱལ་པོ་ཆེན་པོ་གང་གི་ཚེ་འཕགས་པའི་ཉན་ཐོས་བདེ་བ་ཡང་སྤངས་ཏེ། སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་

པ་རྫོགས་པར་བྱས་ཏེ་གནས་པ་དེའི་ཚེ་དེའི་སེམས་རྒོད་པ་མ་ཡིན་ཞུམ་པ་མ་ཡིན་ནོ། །རྒོད་པ་མེད་ཅིང་ཞུམ་པ་མེད་པས་མི་གཡོ་བར་གནས་པ་ཐོབ་བོ། །དཔེར་ན་ཁང་པ་རྩེག་མའམ། ཁང་པ་རྩེག་མའི་ཁྱམས་སུ་འབྲུ་མར་གྱི་མེ་མར་བུས་པ་དེའི་མེ་ལྕེ་རླུང་ནས་བྱ་དང་མི་

དང་མི་མ་ཡིན་པའི་བར་གྱིས་མ་བསྐྱོད་ཅིང་མ་བསྒུལ་བ་དེའི་མེ་ལྕེ་དེ་རྒོད་པ་མ་ཡིན་ཞུམ་པ་མ་ཡིན་ནོ། །རྒོད་པ་མེད་ཅིང་ཞུམ་པ་མེད་པར་གནས་པས་མི་གཡོ་བར་འབར་བ་དེ་བཞིན་དུ། གང་གི་ཚེ་འཕགས་པའི་ཉན་ཐོས་བདེ་བ་ཡང་སྤངས་ཏེ། སྔ་ནས་སྡུག་བསྔལ་ཡང་སྤངས་

ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་རྫོགས་པར་བྱས་ཏེ་གནས་པ་དེའི་ཚེ་དེའི་སེམས་དེ་རྒོད་པ་མ་ཡིན། ཞུམ་པ་མ་ཡིན་ནོ། །རྒོད་པ་མེད་ཅིང་ཞུམ་པ་མེད་

པས་མི་གཡོ་བར་གནས་པ་ཐོབ་ནས་དེ་འདི་སྙམ་དུ་སེམས་ཏེ། བདག་གི་ལུས་ཀྱི་གཟུགས་འདི་ནི་རགས་པ་འབྱུང་བ་ཆེན་པོ་བཞིའི་རྒྱུ་ལས་བྱུང་བ་ཡིན་ཏེ། འདི་ལ་བདག་གི་རྣམ་པར་ཤེས་པ་རྟེན་ཅིང་འདི་ལ་གནས་ཏེ་འདི་ལ་ཁྱབ་པར་གནས་ཀྱིས། མ་ལ་བདག་གིས་ལུས་འདི་

Vol. 4 · folio 279a

ལས་ཡིད་བསྐྱོད་དེ་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་ཞིག་མངོན་པར་སྤྲུལ་ལོ་སྙམ་ནས། དེ་ལུས་དེ་ལས་ཡིད་བསྐྱོད་དེ་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་

པ་མངོན་པར་སྤྲུལ་པར་བྱེད་དོ། །དཔེར་ན་ནོར་བུ་བཻཌཱུརྱ་བཟང་པོ་རིགས་དང་ལྡན་པ་གསལ་བ་དང་། དང་བ་དང་། དྲི་མ་མེད་པ་ཚོན་སྐུད་སྣ་ལྔ་པ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་ལ་བརྒྱུས་པ་དེ་སྐྱེས་བུ་མིག་དང་ལྡན་པས་

མཐོང་ན་འདི་ནི་སྐུད་པ་ཡིན་ནོ། །འདི་ནི་ནོར་བུ་ཡིན་ཏེ། སྐུད་པ་འདི་ལ་ནོར་བུ་བརྒྱུས་སོ་ཞེས་བྱ་བར་ཤེས་པ་དེ་བཞིན་དུ་དེ་ལུས་དེ་ལས་ཡིད་བསྐྱོད་དེ། ལུས་གཞན་ཞིག་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་མངོན་པར་སྤྲུལ་པར་བྱེད་དོ། །དཔེར་

ན་མི་ཞིག་གིས་རྩྭ་མུན་ཛ་ལས་ཐུར་མ་ཕྱུང་པ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་རྩྭ་མུན་ཛ་ཡིན་ནོ། །འདི་ནི་ཐུར་མ་ཡིན་ཏེ། མུན་ཛ་ལས་ཐུར་མ་ཕྱུང་བ་ཡིན་ནོ་ཞེས་ཤེས་པ་དེ་བཞིན་དུ་དེ་ལུས་དེ་ལས་ཡིད་བསྐྱོད་ནས་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་

བ་མ་ཡིན་ཞིང་དམན་པ་མ་ཡིན་པ་མངོན་པར་སྒྲུབ་པར་བྱེད་དོ། །དཔེར་ན་མི་ཞིག་གིས་ཟ་མ་ཏོག་ནས་སྦྲུལ་ཕྱུང་བ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་ཟ་མ་ཏོག་ཡིན་ནོ། །འདི་ནི་སྦྲུལ་ཡིན་ཏེ། ཟ་མ་ཏོག་ནས་སྦྲུལ་ཕྱུང་བ་ཡིན་ནོ་ཞེས་ཤེས་པ་དེ་བཞིན་དུ་དེ་ལུས་དེ་ལས་

ཡིད་བསྐྱོད་ནས་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་མངོན་པར་སྤྲུལ་པར་བྱེད་དོ། །དཔེར་ན་མི་ཞིག་གིས་རལ་གྲི་ཤུབས་ནས་ཕྱུང་བ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་ཤུབས་ཡིན་ནོ། །འདི་ནི་རལ་གྲི་ཡིན་ཏེ། རལ་གྲི་

ཤུབས་ནས་ཕྱུང་བ་ཡིན་ནོ་ཞེས་ཤེས་པ་དེ་བཞིན་དུ། དེ་ལུས་དེ་ལས་ཡིད་བསྐྱོད་ནས་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་མངོན་པར་སྤྲུལ་པར་བྱེད་དོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་

Vol. 4 · folio 279b

བ་ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་

སུ་མྱོང་བར་བྱེད་དེ། འདི་ལྟ་སྟེ། གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་། སྣང་བར་གྱུར་ཅིང་མི་སྣང་བར་གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། །རི་ལ་ཡང་ཐད་ཀར་འགྲོ། །ར་

བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་བྱེའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །

ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་བྱེད་

དོ། །དཔེར་ན་གསེར་མགར་རམ་གསེར་མགར་གྱི་སློབ་མ་མཁས་པ་ཞིག་གིས་གསེར་ཤིན་ཏུ་ལས་སུ་རུང་བར་བྱས་པར་རིག་ནས་རྡུངས་སུ་བྱ་བའི་རྣམ་པ་ཕོར་བུ་འམ། མགུལ་རྒྱན་ནམ། ལག་རྒྱན་ནམ། རྐང་རྒྱན་ནམ། སོར་གདུབ་རྒྱའམ། གསེར་གྱི་ཕྲེང་བ་གང་དང་གང་

བྱེད་འདོད་པ་དེ་དང་དེ་མྱུར་བ་མྱུར་བར་བྱེད་པ་དེ་བཞིན་དུ། དེ་དེ་ལྟར་མཉམ་པར་བཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་

རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་དེ། འདི་ལྟ་སྟེ་གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་། སྣང་བར་གྱུར་ཅིང་མི་སྣང་བར་

Vol. 4 · folio 280a

གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། །རི་ལ་ཡང་ཐད་ཀར་འགྲོ། །ར་བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་བྱེའུ་

ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་

ཆེ་བ་ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་ཡང་བྱེད་དོ། །དཔེར་ན་རྫ་མཁན་ནམ་རྫ་མཁན་གྱི་སློབ་མ་མཁས་པ་ཞིག་གིས་འཇིམ་པའི་གོང་བུ་ཤིན་ཏུ་ལས་སུ་རུང་བར་བྱས་པར་རིག་ནས་སྣོད་ཀྱི་རྣམ་པ་གང་དང་གང་

དུ་བསྒྲུབ་པར་འདོད་པ་དེ་དང་དེ་ཁོ་ན་མྱུར་བར་མྱུར་བར་སྒྲུབ་པར་བྱེད་པ་དེ་བཞིན་དུ། དེ་དེ་ལྟར་མཉམ་པར་བཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་

ཐོབ་ནས་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་དོ། །འདི་ལྟ་སྟེ་གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་། སྣང་

བར་གྱུར་ཅིང་མི་སྣང་བར་གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། རི་ལ་ཡང་ཐད་ཀར་འགྲོ། །ར་བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་།

བྱེའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་

Vol. 4 · folio 280b

ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་ཡང་བྱེད་དོ། །དཔེར་ན་བ་སོ་མཁན་ནམ་བ་སོ་མཁན་གྱི་སློབ་མ་མཁས་པ་ཞིག་གིས་བསོ་ཤིན་ཏུ་ལས་སུ་རུང་བར་བྱས་པར་རིག་ནས་གཟུགས་ཀྱི་རྣམ་པ་གང་དང་གང་དུ་བསྒྲུབ་

པར་འདོད་པའི་གཟུགས་ཀྱི་རྣམ་པ་དེ་དང་དེ་མྱུར་བ་མྱུར་བར་སྒྲུབ་པར་བྱེད་པ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་

གཡོ་བ་ཐོབ་ནས་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་དེ། འདི་ལྟ་སྟེ་གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་།

སྣང་བར་གྱུར་ཅིང་མི་སྣང་བར་གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། །རི་ལ་ཡང་ཐད་ཀར་འགྲོ། །ར་བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་

འབྱུང་བ་དང་བྱེའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ།

འདི་ལྟར་མཐུ་ཆེ་བ་ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་ཡང་བྱེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ།

བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པ་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ།

Vol. 4 · folio 281a

དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་ལྷའི་རྣ་བ་ཤེས་པའི་མངོན་པར་ཤེས་པ་མངོན་སུམ་དུ་བྱ་བ་ལ་སེམས་མངོན་དུ་གཏོད་པར་བྱེད་ཅིང་། དེ་ལྷའི་རྣ་བ་རྣམ་པར་དག་པ་མིའི་ལས་འདས་ནས་མི་རྣམས་ཀྱིའམ། མི་མ་ཡིན་པ་

རྣམས་ཀྱིའམ། གང་དག་རིང་པོའམ། གང་དག་ཉེ་བའི་སྒྲ་གཉི་ག་ཐོས་པར་བྱེད་དོ། །དཔེར་ན་མི་དུང་འབུད་པ་ཞིག་རི་བྲག་ཆེན་པོའི་ཁར་འཛེགས་ནས་མཚན་ནམ་ཕྱེད་ཀྱི་དུས་སུ་དུང་བུས་ན་དེའི་སྒྲ་དེས་ཕྱོགས་ཐ་དད་པ་ཐོགས་པ་མེད་པར་ཁྱབ་པ་དེ་བཞིན་དུ། དེ་ལྟར་མཉམ་པར་གཞག་

པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་ལྷའི་རྣ་བ་ཤེས་པའི་མངོན་པར་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་

གཏོད་པར་བྱེད་ཅིང་། དེ་ལྷའི་རྣ་བ་རྣམ་པར་དག་པ་མིའི་ལས་འདས་ནས་མི་རྣམས་ཀྱིའམ། མི་མ་ཡིན་པ་རྣམས་ཀྱིའམ། གང་དག་རིང་པོའམ། གང་དག་ཉེ་བའི་སྒྲ་གཉི་ག་ཐོས་པར་བྱེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་

སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་

མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་དེ་སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེའི་ཡིད་ཀྱིས་སེམས་ཅན་གཞན་རྣམས་ཀྱི་

དང་། གང་ཟག་གཞན་རྣམས་ཀྱི་རྣམ་པར་རྟོག་པ་དང་། རྣམ་པར་དཔྱོད་པའི་ཡིད་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་

Vol. 4 · folio 281b

འདོད་ཆགས་དང་བྲལ་བའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། བསྡུས་པ་དང་། རྣམ་པར་གཡེངས་པ་དང་། ཞུམ་པ་དང་། རབ་ཏུ་འཛིན་པ་དང་།

རྒོད་པ་དང་། རྒོད་པ་མ་ཡིན་པ་དང་། ཉེ་བར་ཞི་བ་དང་། ཉེ་བར་ཞི་བ་མ་ཡིན་པ་དང་། མཉམ་པར་གཞག་པ་དང་། མཉམ་པར་གཞག་པ་མ་ཡིན་པ་དང་། བསྒོམས་པ་དང་། བསྒོམས་པ་མ་ཡིན་པ་དང་། རྣམ་པར་གྲོལ་བ་མ་ཡིན་པའི་སེམས་ལ་རྣམ་པར་གྲོལ་བ་མ་ཡིན་པའི་སེམས་ཡིན་ནོ་

ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དཔེར་ན་སྐྱེས་བུ་མིག་དང་ལྡན་པས་མེ་ལོང་གི་དཀྱིལ་འཁོར་ཤིན་ཏུ་ཡོངས་སུ་དག་པ་བླངས་ནས་རང་གི་བཞིན་གྱི་

མཚན་མ་ལ་རྟོག་པར་བྱེད་པ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་སེམས་ཀྱི་རྣམ་གྲངས་ཤེས་པ་མངོན་

སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེའི་ཡིད་ཀྱིས་སེམས་ཅན་གཞན་རྣམས་ཀྱི་དང་། གང་ཟག་གཞན་རྣམས་ཀྱི་རྣམ་པར་རྟོག་པ་དང་རྣམ་པར་དཔྱོད་པའི་ཡིད་ཇི་ལྟ་བ་བཞིན་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་

བཅས་པའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་

མུག་དང་བྲལ་བ་དང་། བསྡུས་པ་དང་། རྣམ་པར་གཡེངས་པ་དང་། ཞུམ་པ་དང་། རབ་ཏུ་འཛིན་པ་དང་། རྒོད་པ་དང་། རྒོད་པ་མ་ཡིན་པ་དང་། ཉེ་བར་ཞི་བ་དང་། ཉེ་བར་ཞི་བ་མ་ཡིན་པ་དང་། མཉམ་པར་གཞག་པ་དང་། མཉམ་པར་གཞག་པ་མ་ཡིན་པ་དང་། བསྒོམས་པ་དང་།

Vol. 4 · folio 282a

བསྒོམས་པ་མ་ཡིན་པ་དང་། རྣམ་པར་གྲོལ་བ་མ་ཡིན་པའི་སེམས་ལ་རྣམ་པར་གྲོལ་བ་མ་ཡིན་པའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་

བཞིན་རབ་ཏུ་ཤེས་སོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་

སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་སྔོན་གྱི་གནས་རྗེས་སུ་དྲན་པ་ཤེས་པ་མངོན་སུམ་དུ་བྱ་བའི་མངོན་པར་

ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེ་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། འདི་ལྟ་སྟེ་སྐྱེ་བ་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་

བཅུ་དང་། ལྔ་བཅུ་དང་། སྐྱེ་བ་བརྒྱ་དང་། སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བརྒྱ་ཕྲག་དུ་མ་དང་། སྐྱེ་བ་སྟོང་ཕྲག་དུ་མ་དང་། སྐྱེ་བ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་

པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་པ་དང་འཆགས་པའི་བསྐལ་པ་དུ་མ་རྗེས་སུ་དྲན་ཏེ། གང་དུ་བདག་སེམས་ཅན་འདི་དག་གི་ནང་དུ་སྐྱེས་པ་ན་མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ། ཁ་ཟས་ནི་འདི་ལྟ་བུ་ཞིག་ཟ་ཟ། བདེ་བ་དང་

སྡུག་བསྔལ་ནི་འདི་ལྟ་བུ་ཞིག་མྱོང་། ཡུན་ནི་འདི་སྲིད་ཅིག་གནས་གནས། ཚེ་ནི་འདི་ཙམ་ཞིག་ཐུབ་བོ། བདག་གནས་དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་ག་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་འདིར་སྐྱེས་སོ་ཞེས་རྣམ་པ་དང་བཅས།

Vol. 4 · folio 282b

ཡུལ་ཕྱོགས་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ།། །།འདུལ་བ་གཞི། བམ་པོ་བརྒྱ་རྩ་བརྒྱད་པ། དཔེར་ན་མི་ཞིག་གྲོང་ནས་གྲོང་དུ་སོང་ལ་དེ་ནས་ཀྱང་གྲོང་གཞན་དུ་སོང་སྟེ། དེ་ནས་ཀྱང་འདིར་འོངས་ནས་དེ་འདི་སྙམ་དུ་སེམས་ཏེ་བདག་གིས་གྲོང་

ཆེ་གེ་མོ་ནས་གྲོང་ཆེ་གེ་མོར་སོན་ཏོ། །དེ་ནས་ཀྱང་གྲོང་ཆེ་གེ་མོར་རོ། །དེ་ནས་ཀྱང་འདིར་འོངས་སོ་སྙམ་པ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ།

མི་གཡོ་བ་ཐོབ་ནས་སྔོན་གྱི་གནས་རྗེས་སུ་དྲན་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེས་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། འདི་ལྟ་སྟེ། སྐྱེ་བ་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་།

བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། སྐྱེ་བ་བརྒྱ་དང་། སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བརྒྱ་ཕྲག་དུ་མ་དང་། སྐྱེ་བ་སྟོང་ཕྲག་དུ་མ་དང་། སྐྱེ་བ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་

དང་། འཆགས་པའི་བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་པ་དང་འཆགས་པའི་བསྐལ་པ་དུ་མ་རྗེས་སུ་དྲན་ཏེ། གང་དུ་བདག་སེམས་ཅན་འདི་དག་གི་ནང་དུ་སྐྱེས་པ་ན་མིང་ནི་འདི་ཞེས་

བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ། ཁ་ཟས་ནི་འདི་ལྟ་བུ་ཞིག་ཟ་ཟ། བདེ་བ་དང་། སྡུག་བསྔལ་ནི་འདི་ལྟ་བུ་ཞིག་མྱོང་། ཡུན་ནི་འདི་སྲིད་ཅིག་གནས་གནས། ཚེ་ནི་འདི་ཙམ་ཞིག་ཐུབ་བོ། །བདག་གནས་དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས། དེ་ནས་ཀྱང་

ཤི་འཕོས་ནས་ག་གེ་མོ་ཞིག་ཏུ་སྐྱེས། དེ་ནས་ཀྱང་ཤི་འཕོས་ནས་འདིར་སྐྱེས་སོ་ཞེས་རྣམ་པ་དང་བཅས། ཡུལ་ཕྱོགས་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words