འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ཞེས་བྱ་བ་ཐེག་པ་ཆེན་པོའི་མདོ

Sanskrit title (Tibetan script, as in the text) ཨཱརྱ་ཨཥྚ་ད་ཤ་སཱ་ཧ་སྲི་ཀཱ་པྲཛྙཱ་པཱ་ར་མི་ཏཱ་ནཱ་མ་མཧཱ་ཡཱ་ན་སཱུ་ཏྲ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 31 · folio 112a

དང་། འདུ་བྱེད་རྣམས་དང་། རྣམ་པར་ཤེས་པ་ལ་ཇི་ལྟར་བྱིས་པ་སོ་སོའི་སྐྱེ་བོ་མངོན་པར་ཞེན་པར་གྱུར་པ་ལྟ་བུའི་དངོས་པོ་ཡོད་པར་གྱུར་ཏམ་ཡོད་པར་འགྱུར་རམ། དེ་བཞིན་དུ་སྦྱར་ཏེ་ཤཱ་རིའི་བུ་འདི་ཇི་སྙམ་དུ་སེམས། སངས་རྒྱས་ཀྱི་ཆོས་

ཐམས་ཅད་ཀྱི་བར་དག་ལ་ཇི་ལྟར་བྱིས་པ་སོ་སོའི་སྐྱེ་བོ་མངོན་པར་ཞེན་པར་གྱུར་པ་དེ་ལྟ་བུའི་དངོས་པོ་ཡོད་པར་གྱུར་ཏམ། ཡོད་པར་འགྱུར་རམ། གསོལ་པ། བཅོམ་ལྡན་འདས་སོ་སོའི་སྐྱེ་བོ་བསླད་པའི་སེམས་ཀྱིས་རྣམ་པར་ཤེས་པའི་བར་དག་དང་། སངས་རྒྱས་

ཀྱི་ཆོས་ཐམས་ཅད་ཀྱི་བར་དག་ལ་དངོས་པོར་རྟོག་པ་མ་གཏོགས་པར་དེ་ནི་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་དེ་བཞིན་ནོ། །དེ་དེ་བཞིན་ཏེ། སོ་སོའི་སྐྱེ་བོ་ནི་བསླད་པའི་སེམས་ཀྱིས་དངོས་པོ་མེད་པའི་སེམས་ཀྱིས་

དངོས་པོ་མེད་པའི་ཆོས་རྣམས་ལ་དངོས་པོར་རྟོག་སྟེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ཐབས་ལ་མཁས་པས་ཆོས་དེ་དག་ཐམས་ཅད་དངོས་པོ་མེད་པར་མཐོང་ནས་བླ་ན་མེད་པ་ཡང་དག་པར་རྫོགས་པའི་

བྱང་ཆུབ་ལ་ཞུགས་སོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐབས་ལ་མཁས་པ་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་དངོས་པོ་མ་མཆིས་པར་

ཡང་དག་པར་རྗེས་སུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་དེ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་

བཀའ་སྩལ་ཏོ། །ཤཱ་རིའི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། དངོས་པོ་གང་ལ་ཁོང་ཁྲོ་བར་འགྱུར་བ་དང་། གང་ལ་ཁོང་ཁྲོ་བས་ཞུམ་པར་འགྱུར་བ་དང་། ཞུམ་ནས་ཀྱང་སྒྱིད་ལུག་པར་འགྱུར་བ་དང་། སྒྱིད་

Vol. 31 · folio 112b

ལུག་ནས་ལེ་ལོར་འགྱུར་བའི་ཆོས་ཀྱི་དངོས་པོ་གང་ཡང་ཡང་དག་པར་རྗེས་སུ་མི་མཐོང་སྟེ། ཤཱ་རིའི་བུ་འདི་ལྟར་སེམས་ཅན་བདག་ཏུ་རྨོངས་པ་དག་ཕུང་པོ་རྣམས་ཞེས་བྱ་བའམ། ཁམས་རྣམས་ཞེས་བྱ་བའམ། སྐྱེ་མཆེད་རྣམས་ཞེས་བྱ་བར་མངོན་པར་ཞེན་པ་མ་གཏོགས་

པར་ཆོས་ཐམས་ཅད་ནི་དངོས་པོ་མེད་པ་དང་། སྲོག་མེད་པ་དང་། སྲོག་དང་བྲལ་བ་དང་། དངོས་པོ་མེད་པའི་ངོ་བོ་ཉིད་དང་། རང་བཞིན་གྱིས་སྟོང་པ་དང་། རང་གི་མཚན་ཉིད་སྟོང་པ་ཉིད་ཡིན་ཏེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་

ཕ་རོལ་ཏུ་ཕྱིན་པ་ལ་སྤྱོད་པ། ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དང་། རང་བཞིན་གྱིས་སྟོང་པ་དང་། རང་གི་མཚན་ཉིད་སྟོང་པ་ཉིད་དུ་ཡང་དག་པར་རྗེས་སུ་མཐོང་ནས་ལུས་སྒྱུ་མ་མཁན་ལྟ་བུར་བྱིན་གྱིས་བརླབས་ཤིང་། སེམས་ཅན་རྣམས་ལ་ཆོས་སྟོན་

པར་བྱེད་དེ། སེམས་ཅན་གང་དག་སེར་སྣ་དང་ལྡན་པ་དེ་དག་ལ་ནི་སྦྱིན་པའི་གཏམ་བྱེད་དོ། །སེམས་ཅན་ཚུལ་ཁྲིམས་འཆལ་པ་རྣམས་ལ་ནི་ཚུལ་ཁྲིམས་ཀྱི་གཏམ་བྱེད་དོ། །སེམས་ཅན་གནོད་སེམས་ཀྱི་སེམས་དང་ལྡན་པ་རྣམས་ལ་ནི་བཟོད་པའི་གཏམ་བྱེད་དོ། །སེམས་

ཅན་ལེ་ལོ་ཅན་རྣམས་ལ་ནི་བརྩོན་འགྲུས་ཀྱི་གཏམ་བྱེད་དོ། །སེམས་ཅན་སེམས་རྣམ་པར་གཡེངས་པ་རྣམས་ལ་ནི་ཏིང་ངེ་འཛིན་གྱི་གཏམ་བྱེད་དོ། །སེམས་ཅན་ཤེས་རབ་འཆལ་པ་རྣམས་ལ་ནི་ཤེས་རབ་ཀྱི་གཏམ་བྱེད་དོ། །དེས་གང་གི་ཚེ་སེམས་ཅན་རྣམས་སྦྱིན་པ་ལ་བཀོད་

པར་གྱུར་པ་དང་། ཤེས་རབ་ཀྱི་བར་ལ་བཀོད་པར་གྱུར་པ་དེའི་ཚེ་སེམས་ཅན་དེ་དག་ལ་གཏམ་གང་གིས་རྒྱུན་ཏུ་ཞུགས་པའི་འབྲས་བུ་ཐོབ་པར་འགྱུར་བ་དང་། དགྲ་བཅོམ་པ་ཉིད་ཀྱི་བར་དག་ཐོབ་པར་འགྱུར་བ་དང་། རང་བྱང་ཆུབ་ཐོབ་པར་འགྱུར་བ་དང་། རྣམ་པ་ཐམས་ཅད་

མཁྱེན་པ་ཉིད་ཀྱི་བར་དག་ཐོབ་པར་འགྱུར་བའི་གཏམ་འཕགས་ཤིང་ངེས་པར་འབྱིན་པ་དག་ཀྱང་བྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་

Vol. 31 · folio 113a

ཕ་རོལ་ཏུ་ཕྱིན་པ་ལ་སྤྱོད་པ་གང་གིས་སེམས་ཅན་མ་མཆིས་ཤིང་མཆིས་པ་མ་ལགས་པ་དག་སྦྱིན་པ་ལ་རབ་ཏུ་འགོད་པར་བགྱིད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ལ་རབ་ཏུ་འགོད་པར་བགྱིད་ཀྱི་སྟེང་དུ་བཀའ་མཆིད་གང་གིས་རྒྱུན་ཏུ་ཞུགས་

པའི་འབྲས་བུ་འཐོབ་པ་དང་། རྣམ་པ་ཐམས་ཅད་མཁྱེན་པ་ཉིད་ཀྱི་བར་དག་འཐོབ་པར་འགྱུར་བའི་བཀའ་མཆིད་འཕགས་ཤིང་ངེས་པར་འབྱིན་པ་དག་བགྱིད་ན། ཇི་ལྟར་དམིགས་པ་མ་མཆིས་པར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་

ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལ་ནི་དམིགས་པ་འགའ་ཡང་མེད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་

པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེས་ནི་ཀུན་རྫོབ་ཀྱི་བརྡས་ཐ་སྙད་འདོགས་པ་མ་གཏོགས་པར་སེམས་ཅན་གང་ཡང་མི་དམིགས་པའི་ཕྱིར་རོ། །ཤཱ་རིའི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདེན་པ་གཉིས་ལ་གནས་ཏེ། སེམས་ཅན་རྣམས་ལ་ཆོས་

སྟོན་པར་བྱེད་ཀྱང་། ཤཱ་རིའི་བུ་བདེན་པ་གཉིས་པོ་དག་ལ་ནི་སེམས་ཅན་དམིགས་པ་ཡང་མེད་སེམས་ཅན་དུ་གདགས་པ་ཡང་མེད་མོད་ཀྱི། འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་སེམས་ཅན་

རྣམས་ལ་ཆོས་སྟོན་ཅིང་། དེས་སེམས་ཅན་དེ་དག་ཀྱང་ཚེ་འདི་ཉིད་ལ་བདག་ཏུ་ཡང་མི་དམིགས་ན་གང་འཐོབ་པར་འགྱུར་བ་དང་། གང་གིས་ཐོབ་པར་འགྱུར་བ་དག་ལྟ་སྨོས་ཀྱང་ཅི་དགོས་ཏེ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་

ཕྱིན་པ་ལ་སྤྱོད་པ་ནི་དེ་ལྟར་ཐབས་ལ་མཁས་པས་སེམས་ཅན་རྣམས་ལ་ཆོས་སྟོན་པར་བྱེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཨ་ལ་ལ་འདི་ལྟ་སྟེ། བྱང་ཆུབ་སེམས་

Vol. 31 · folio 113b

དཔའ་སེམས་དཔའ་ཆེན་པོས་ཆོས་གང་ཡང་གཅིག་པའམ། ཐ་དད་པའམ། སོ་སོ་བར་ཡང་མི་དམིགས་ལ། གོ་ཆ་གང་འཚལ་བས་འདོད་པའི་ཁམས་ན་ཡང་མི་གདའ། གཟུགས་ཀྱི་ཁམས་ན་ཡང་མི་གདའ། གཟུགས་མ་མཆིས་པའི་ཁམས་ན་ཡང་མི་གདའ། འདུས་

བྱས་ཀྱི་ཁམས་ན་ཡང་མི་གདའ། འདུས་མ་བྱས་ཀྱི་ཁམས་ན་ཡང་མི་གདའ་ལ། སེམས་ཅན་རྣམས་ཁམས་གསུམ་ནས་ཡོངས་སུ་ཐར་བར་བགྱིད་ཀྱང་སེམས་ཅན་དང་། སེམས་ཅན་དུ་གདགས་པ་ཡང་མི་དམིགས་པ་དེ་ལྟ་བུའི་གོ་ཆ་འཚལ་བ་དེ་ནི། བཅོམ་ལྡན་

འདས་སྤྲོ་བ་ཆེ་བ་ལགས་སོ། །སེམས་ཅན་དུ་གདགས་པ་མ་མཆིས་པས་སེམས་ཅན་མ་བཅིངས་མ་གྲོལ་ལ། སེམས་ཅན་མ་བཅིངས་མ་གྲོལ་བས། ཀུན་ནས་ཉོན་མོངས་པ་མ་མཆིས་ཤིང་། རྣམ་པར་བྱང་བ་མ་མཆིས་ལགས་སོ། །ཀུན་ནས་ཉོན་མོངས་པ་མ་

མཆིས་ལ། རྣམ་པར་བྱང་བ་མ་མཆིས་པས་འགྲོ་བའི་བྱེ་བྲག་ཀྱང་མ་མཆིས་ལགས་སོ། །འགྲོ་བའི་བྱེ་བྲག་མ་མཆིས་པ་ལ་ནི་ལས་ཀྱང་མ་མཆིས། ཉོན་མོངས་པ་རྣམས་ཀྱང་མ་མཆིས་ལགས་སོ། །ལས་མ་མཆིས་ཤིང་ཉོན་མོངས་པ་མ་མཆིས་པ་ལ་ནི་རྣམ་པར་སྨིན་པ་

གང་གིས་བདག་གམ། སེམས་ཅན་དག་འགྲོ་བ་ལྔའི་འཁོར་བ་ན་གདའ་བར་འགྱུར་བའི་རྣམ་པར་སྨིན་པ་མཆིས་པར་ཡང་ག་ལ་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །

ཤཱ་རིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཤཱ་རིའི་བུ་གལ་ཏེ་སེམས་ཅན་ཞིག་སྔོན་ཡོད་པར་གྱུར་ལ། ཕྱིས་མེད་པར་གྱུར་ན་ནི་དེའི་ཕྱིར་དེ་ལྟར་སྔོན་ཡོད་པར་གྱུར་ལ། ཕྱིས་མེད་པར་འགྱུར་རོ་ཞེས་བྱང་ཆུབ་སེམས་དཔའ་དང་། དེ་བཞིན་

གཤེགས་པ་ལ་ཡང་སྐྱོན་དུ་འགྱུར་ཞིང་། འགྲོ་བ་ལྔའི་འཁོར་བ་ཡང་སྔོན་དངོས་པོ་ཡོད་པར་གྱུར་ལ། ཕྱིས་དངོས་པོ་མེད་པར་གྱུར་ན། དེ་ཡང་སྐྱོན་དུ་འགྱུར་བ་ཞིག་ན། ཤཱ་རིའི་བུ་འདི་ལྟར་དེ་བཞིན་གཤེགས་པ་རྣམས་བྱུང་ཡང་རུང་། དེ་བཞིན་གཤེགས་

Vol. 31 · folio 114a

པ་རྣམས་མ་བྱུང་ཡང་རུང་སྟེ། ཆོས་རྣམས་ཀྱི་ཆོས་ཉིད་དང་། དེ་བཞིན་ཉིད་དང་། མ་ནོར་བ་དེ་བཞིན་ཉིད་འདི་ནི་གནས་པ་སྟེ། དེ་ལ་བདག་ཀྱང་མེད། སེམས་ཅན་ཡང་མེད། སྲོག་ཀྱང་མེད་གང་ཟག་ཀྱང་མེད། བྱེད་པ་པོ་ཡང་མེད། བྱེད་དུ་འཇུག་པ་

པོ་ཡང་མེད་ན། དེ་ལ་གཟུགས་ལྟ་ག་ལ་ཡོད། ཚོར་བ་དང་། འདུ་ཤེས་དང་། འདུ་བྱེད་རྣམས་ལྟ་ཡང་ག་ལ་ཡོད། རྣམ་པར་ཤེས་པ་ལྟ་ཡང་ག་ལ་ཡོད་དེ། མེད་ཅིང་ཡོད་པ་མ་ཡིན་པའི་ཆོས་དེ་དག་ལ་གང་ལས། སེམས་ཅན་རྣམས་ཡོངས་སུ་ཐར་བར་བྱ་བའི་འགྲོ་

བ་ལྔའི་འཁོར་བ་ལྟ་ཡང་ཡོད་པར་ག་ལ་འགྱུར་ཏེ། ཤཱ་རིའི་བུ་དེའི་ཕྱིར་ཆོས་འདི་དག་ནི་དེ་ལྟར་རང་བཞིན་གྱིས་སྟོང་པ་ཉིད་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་

ལས་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཞུགས་ཏེ་གང་ལ་བྱིས་པ་སོ་སོའི་སྐྱེ་བོ་ཕྱིན་ཅི་ལོག་གིས་རྨོངས་པར་གྱུར་པ་རྣམས་མངོན་པར་ཞེན་པ་མ་གཏོགས་པར་གང་ལ་མོས་པར་ནུས་པའི་ཆོས་ཀྱི་ངོ་བོ་ཉིད་གང་ཡང་དམིགས་སུ་མེད་དོ། །བྱང་ཆུབ་སེམས་

དཔའ་སེམས་དཔའ་ཆེན་པོ་ནི་དེ་ལྟར་གོ་ཆ་གང་བགོས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དང་། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བར་མི་བྱའི། བདག་གིས་ནི་བླ་ན་མེད་པ་

ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་པ་དང་། མངོན་པར་རྫོགས་པར་སངས་རྒྱས་ནས་ཀྱང་དོན་གང་གིས་སེམས་ཅན་རྣམས་ཕྱིན་ཅི་ལོག་ལས་ཡོངས་སུ་ཐར་བར་འགྱུར་བ་དེ་ལྟ་བུའི་ཆོས་ཀྱིས་སེམས་ཅན་རྣམས་ཀྱི་དོན་བྱའོ་ཞེས་དེ་ལྟ་

བུའི་གོ་ཆ་བགོས་པ་ཡིན་ནོ། །ཤཱ་རིའི་བུ་འདི་ལྟ་སྟེ་དཔེར་ན། སྒྱུ་མ་མཁན་གྱིས་སྤྲུལ་པའི་མི་ཞིག་གིས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་ཅིག་སྤྲུལ་ནས། དེ་སྤྲུལ་པ་དེ་དག་ལ་བཟའ་བ་དང་། བཅའ་བ་ཉམས་སུ་བསོད་པ་མང་པོ་དག་སྟོབས་ཤིང་ཚིམ་པར་བྱེད་

Vol. 31 · folio 114b

དེ། བསྟབས་ཤིང་ཚིམ་པར་བྱས་ནས་ཀྱང་། བདག་གིས་ནི་བསོད་ནམས་མང་དུ་སྤེལ་ཏོ། །ཞེས་ཆེད་དུ་བརྗོད་པ་ཆེད་དུ་རྗོད་པར་བྱེད་ན། ཤཱ་རིའི་བུ་འདི་ཇི་སྙམ་དུ་སེམས། དེ་ལ་བསྟབས་ཤིང་ཚིམ་པར་བྱས་པ་གང་ཡང་ཡོད་སྙམ་འམ། གསོལ་པ། བཅོམ་ལྡན་འདས་དེ་

ནི་མ་ལགས་སོ། །བཀའ་སྩལ་པ། ཤཱ་རིའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སེམས་དང་པོ་བསྐྱེད་པ་ནས་བཟུང་སྟེ། ཕ་རོལ་ཏུ་ཕྱིན་པ་དྲུག་ལ་སྤྱོད་པ་དང་། བསམ་གཏན་བཞི་ལ་སྤྱོད་པ་དང་། ཚད་མེད་པ་བཞི་ལ་སྤྱོད་པ་དང་། གཟུགས་

མེད་པའི་སྙོམས་པར་འཇུག་པ་བཞི་ལ་སྤྱོད་པ་དང་། དྲན་པ་ཉེ་བར་གཞག་པ་བཞི་ལ་སྤྱོད་པ་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་

ལག་བརྒྱད་པ་ལ་སྤྱོད་པ་དང་། སྟོང་པ་ཉིད་བཅུ་བཞི་དང་། མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་དང་། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་

པ་བཅྭ་བརྒྱད་ལ་སྤྱོད་ཅིང་། བྱང་ཆུབ་ཀྱི་ལམ་ཡོངས་སུ་སྦྱོང་བ་ན་སངས་རྒྱས་ཀྱི་ཞིང་ཡོངས་སུ་དག་པར་བྱེད་ཅིང་། སེམས་ཅན་རྣམས་ཡོངས་སུ་སྨིན་པར་བྱེད་ཀྱང་གང་དམིགས་ནས་གདུལ་བར་བྱ་བའི་སེམས་ཅན་གང་ཡང་མི་དམིགས་སོ།། །།ཤེས་རབ་

ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ། བམ་པོ་ལྔ་བཅུ་རྩ་བཞི་པ། དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་གང་ལ་སྤྱད་དེ། སེམས་ཅན་རྣམས་ཡོངས་སུ་སྨིན་པར་

བགྱི་བ་དང་། སངས་རྒྱས་ཀྱི་ཞིང་ཡོངས་སུ་དག་པར་བགྱི་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་ལམ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ལ་བྱང་ཆུབ་

Vol. 31 · folio 115a

སེམས་དཔའ་སེམས་དཔའ་ཆེན་པོ་ནི་སེམས་དང་པོ་བསྐྱེད་པ་ནས་བཟུང་སྟེ། སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པར་བྱེད། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་

གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དག་ལ་སྤྱོད་པར་བྱེད་ཅིང་སེམས་ཅན་རྣམས་ཀྱང་ཡོངས་སུ་སྨིན་པར་བྱེད། སངས་རྒྱས་ཀྱི་ཞིང་ཡང་ཡོངས་སུ་དག་པར་བྱེད་དོ། །གསོལ་པ།

བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་སེམས་ཅན་རྣམས་ཡོངས་སུ་སྨིན་པར་བགྱིད་པ་ལགས། བཀའ་སྩལ་པ། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་

ལ་སྤྱོད་པ་སེམས་ཅན་རྣམས་ལ་སྦྱིན་པ་སྦྱིན་པར་བྱེད་དེ། སྦྱིན་པ་བྱིན་ནས་ཀྱང་འདི་ལྟར་འདོམས་ཤིང་རྗེས་སུ་སྟོན་ཏེ། རིགས་ཀྱི་བུ་དག་འདི་ལ་སྦྱིན་པ་ལ་སྦྱིན་པར་འཛིན་པས་འཛིན་པར་མ་བྱེད་ཅིག །སྦྱིན་པ་ལ་སྦྱིན་པར་འཛིན་པས་ལུས་གང་མངོན་པར་གྲུབ་པས་སྡུག་

བསྔལ་མང་པོ་ཉམས་སུ་མྱོང་བར་འགྱུར་བའི་ལུས་དག་མངོན་པར་འགྲུབ་པར་མ་བྱེད་ཅིག །རིགས་ཀྱི་བུ་དག་འདི་ལ་དོན་དམ་པར་ན་སྦྱིན་པ་ཡང་མེད། སྦྱིན་བདག་ཀྱང་མེད་ལེན་པ་པོ་ཡང་མེད་དེ། ཆོས་དེ་གསུམ་ནི་རང་བཞིན་གྱིས་སྟོང་པས་ན་རང་བཞིན་གྱིས་སྟོང་

པའི་ཆོས་ནི་ལེན་པར་མི་བྱེད་ལ་རང་བཞིན་གྱིས་སྟོང་པ་ཉིད་ལ་ནི་གཟུང་བ་ཡང་མེད་དོ། །ཞེས་རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ཅིང་། དེ་ལྟར་སེམས་ཅན་རྣམས་ལ་སྦྱིན་པ་སྦྱིན་པར་བྱེད་ཀྱང་དེ་ལ་སྦྱིན་པ་ཡང་མི་དམིགས་

སྦྱིན་བདག་ཀྱང་མི་དམིགས་ལེན་པ་པོ་ཡང་མི་དམིགས་སོ། །དེ་ནི་མི་དམིགས་པའི་ཕ་རོལ་ཏུ་ཕྱིན་པ་སྟེ། འདི་ལྟར་སྦྱིན་པའི་ཕ་རོལ་ཏུ་ཕྱིན་པའོ། །དེ་ཆོས་གསུམ་པོ་དེ་དག་ཐམས་ཅད་མི་དམིགས་པས་རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་

Vol. 31 · folio 115b

ཕྱིན་པ་ལ་སྤྱོད་ཅིང་། སེམས་ཅན་རྣམས་ཡོངས་སུ་སྨིན་པར་བྱེད་དེ། སེམས་ཅན་རྣམས་རྒྱུན་དུ་ཞུགས་པའི་འབྲས་བུ་ལ་སྦྱོར་བར་བྱེད་དོ། །དེ་བཞིན་དུ་སྦྱར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དག་ལ་སྦྱོར་བར་བྱེད་དེ། རབ་འབྱོར་བྱང་ཆུབ་སེམས་

དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ཅིང་སེམས་ཅན་རྣམས་ཡོངས་སུ་སྨིན་པར་བྱེད་དེ། དེ་བདག་ཀྱང་སྦྱིན་པ་སྦྱིན་པར་བྱེད་ལ་གཞན་དག་ཀྱང་སྦྱིན་པ་ཡང་དག་པར་འཛིན་དུ་འཇུག་ཅིང་སྦྱིན་པའི་བསྔགས་པ་ཡང་རྗོད་ལ་གཞན་གང་དག་སྦྱིན་པ་སྦྱིན་པར་

བྱེད་པ་དེ་དག་གི་བསྔགས་པ་ཡང་རྗོད་ཅིང་རྗེས་སུ་དགའ་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་དེ་ལྟ་བུ་བྱིན་ནས། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དག་དང་སྐལ་བ་མཉམ་པར་སྐྱེའོ། །བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དག་དང་སྐལ་བ་

མཉམ་པར་སྐྱེའོ། །ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་དག་དང་སྐལ་བ་མཉམ་པར་སྐྱེའོ། །ཁམས་ཀྱི་རྒྱལ་པོར་འགྱུར་བའམ། འཁོར་ལོས་སྒྱུར་བའི་རྒྱལ་པོར་འགྱུར་བའམ། འཁོར་ལོས་སྒྱུར་བའི་རྒྱལ་སྲིད་ཐོབ་ནས་ཀྱང་དེས་སེམས་ཅན་རྣམས་བསྡུ་བའི་དངོས་པོ་

བཞིས་སྡུད་པར་བྱེད་དེ། བཞི་གང་ཞེ་ན། སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་འཐུན་པ་དག་གིས་སྡུད་པར་བྱེད་དོ། །དེས་སེམས་ཅན་དེ་དག་སྦྱིན་པས་བསྡུས་ནས་རིམ་གྱིས་ཚུལ་ཁྲིམས་ལ་འགོད་པར་བྱེད་དོ། །ཏིང་ངེ་འཛིན་དང་ཤེས་རབ་དང་བསམ་

གཏན་བཞི་དང་། ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། དྲན་པ་ཉེ་བར་གཞག་པ་བཞི་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་བར་དག་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་ལ་

འགོད་པར་བྱེད་དོ། །ཡང་དག་པ་ཉིད་ཀྱི་སྐྱོན་མེད་པ་ལ་འཇུག་པར་བྱེད་དོ། །དགྲ་བཅོམ་པ་ཉིད་དང་། རང་བྱང་ཆུབ་ཀྱི་བར་དག་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དག་ཡང་དག་པར་འཛིན་དུ་འཇུག་གོ། །ཀྱེ་སྐྱེས་བུ་དག་བླ་ན་མེད་པ་ཡང་དག་པར་རྫོགས་

Vol. 31 · folio 116a

པའི་བྱང་ཆུབ་ནི་མངོན་པར་རྫོགས་པར་འཚང་རྒྱ་བར་མི་དཀའ་སྟེ། ཕྱིན་ཅི་ལོག་གིས་རྨོངས་པའི་སེམས་ཀྱིས་མ་རྟོགས་པ་མ་གཏོགས་པར་གང་ལ་སེམས་ཅན་རྣམས་ཆགས་པའི་ཆོས་གང་ཡང་ངོ་བོ་ཉིད་ཀྱིས་ཡོད་པ་མ་ཡིན་གྱིས། དེའི་ཕྱིར་ཁྱེད་ཅག་གིས་ཕྱིན་ཅི་

ལོག་ཏུ་འཛིན་པ་ཐམས་ཅད་སྤོངས་ལ། བདག་ཀྱང་འཁོར་བ་ལས་ཐར་བར་གྱིས་ཤིག །གཞན་དག་ཀྱང་ཐར་བར་གྱིས་ཤིག །དེ་ལྟར་ཁྱེད་ཅག་གིས་བདག་ཅག་ཀྱང་དོན་ཆེ་བར་གྱིས་ལ། གཞན་དག་ཀྱང་དོན་ཆེན་པོ་ལ་སྦྱོར་བར་གྱིས་ཤིག་ཅེས། རབ་འབྱོར་དེ་ལྟར་བྱང་ཆུབ་

སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱད་པར་བྱ་སྟེ། དེ་ལྟར་སྤྱོད་པའི་ཚེ་སེམས་དང་པོ་བསྐྱེད་པ་ནས་བཟུང་སྟེ། གཞན་ཡང་ངན་སོང་དུ་མི་ལྟུང་བ་དང་། ནམ་ཡང་འཁོར་ལོས་སྒྱུར་བའི་རྒྱལ་པོ་མི་བྱེད་པར་མི་འགྱུར་བ་དེ་ལྟར་སྤྱོད་དོ། །དེ་ཅིའི་

ཕྱིར་ཞེ་ན། ས་བོན་ཅི་འདྲ་བ་འབྲས་བུ་ཡང་དེ་འདྲ་བའི་ཕྱིར་རོ། །འཁོར་ལོས་སྒྱུར་བ་དེའི་དྲུང་དུ་སློངས་མོ་པ་གང་དག་ལྷགས་ན། འཁོར་ལོས་སྒྱུར་བའི་རྒྱལ་པོ་དེ་འདི་སྙམ་དུ་སེམས་ཏེ། བདག་གིས་འཁོར་ལོས་སྒྱུར་བའི་རྒྱལ་སྲིད་ཡོངས་སུ་བཟུང་བ་ནི་སེམས་ཅན་

རྣམས་ཀྱི་དོན་མ་གཏོགས་པར་གཞན་གྱི་ཕྱིར་མ་ཡིན་ནོ་སྙམ་ནས། དེ་འདི་སྐད་དུ་གང་ཅི་འདོད་པ་དེ་དག་ཁྱེད་ཅག་ལ་བྱིན་ཟིན་གྱིས། དེའི་ཕྱིར་འདི་ནི་ཁྱེད་ཀྱི་ཡིན་གྱི་ངའི་མ་ཡིན་ནོ། །ང་ནི་ནང་གི་གཟུགས་འདི་ཡང་དོན་དུ་གཉེར་བ་མ་ཡིན་ན་གཞན་དག་ལྟ་ཅི་སྨོས་ཏེ།

ངས་སེམས་ཅན་ཐམས་ཅད་ཀྱི་དོན་དུ་འཁོར་བ་ཡོངས་སུ་བཟུང་བ་མ་གཏོགས་པར། ང་ནི་འཁོར་བ་དོན་དུ་གཉེར་བ་མ་ཡིན་ནོ་ཞེས་ཟེར་ཏེ། དེ་སྙིང་རྗེ་བས་སྙིང་རྗེ་ཆེན་པོ་ཡོངས་སུ་རྫོགས་པར་བྱས་ནས། ཇི་ཙམ་དུ་སྙིང་རྗེ་ཆེན་པོ་ཡོངས་སུ་རྫོགས་པར་བྱས་ཤིང་། སེམས་ཅན་

རྣམས་ཀྱི་དོན་བྱེད་ཀྱང་མིང་དང་བཏགས་པ་དང་། བརྡས་ཐ་སྙད་འདོགས་པ་མ་གཏོགས་པར་གང་དག་ཡོངས་སུ་གྲུབ་པར་འགྱུར་བ་དེ་ལྟ་བུའི་སེམས་ཅན་དག་མི་དམིགས་ཏེ། ཐ་སྙད་དེ་ཡང་བྲག་ཅ་ལྟ་བུར་ཐ་སྙད་མེད་པར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་སེམས་

Vol. 31 · folio 116b

དཔའ་ཆེན་པོས་ཇི་ལྟར་སྤྱད་པས་སེམས་ཅན་རྣམས་ལ་རྫས་ཡོངས་སུ་མི་གཏོང་བར་མི་འགྱུར་བ་ཅི་ཡང་མེད་དེ། ཆེར་ན་བདག་གི་ཤ་དག་ཀྱང་ཡོངས་སུ་གཏོང་བར་བྱེད་ན། ཡོ་བྱད་གང་དག་གིས་སེམས་ཅན་རྣམས་འཁོར་བ་ལས་ཡོངས་སུ་ཐར་བར་བྱ་བའི་ཕྱིར་ཕྱི་རོལ་གྱི་ཡོ་

བྱད་དག་ལྟ་སྨོས་ཀྱང་ཅི་དགོས་པ། དེ་ལྟར་སྦྱིན་པའི་ཕ་རོལ་ཏུ་ཕྱིན་པ་ལ་སྤྱད་པར་བྱའོ། །གསོལ་པ། བཅོམ་ལྡན་འདས་ཡོ་བྱད་དེ་དག་གང་ལགས། བཀའ་སྩལ་པ། རབ་འབྱོར་ཡོ་བྱད་དེ་དག་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་ནི་ཡོ་བྱད་དོ། །ཚུལ་

ཁྲིམས་ཀྱི་ཕ་རོལ་ཏུ་ཕྱིན་པ་ནི་ཡོ་བྱད་དོ། །བཟོད་པའི་ཕ་རོལ་ཏུ་ཕྱིན་པ་ནི་ཡོ་བྱད་དོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་ཡོ་བྱད་དོ། །བསམ་གཏན་གྱི་ཕ་རོལ་ཏུ་ཕྱིན་པ་ནི་ཡོ་བྱད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཡོ་བྱད་དོ། །སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་

ཀྱི་བར་དག་ནི་ཡོ་བྱད་དོ། །དེ་དག་ནི་ཡོ་བྱད་ཡིན་ཏེ། ཡོ་བྱད་དེ་དག་གིས་ཕན་བཏགས་པའི་སེམས་ཅན་རྣམས་ནི་འཁོར་བ་ལས་ཡོངས་སུ་ཐར་བར་འགྱུར་རོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་གནས་ནས་

སེམས་ཅན་རྣམས་ལ་སྦྱིན་པ་སྦྱིན་པར་བྱེད་པ་དེའི་ཚེ། ཚིག་འདི་སྐད་ཅེས་བརྗོད་དེ། རིགས་ཀྱི་བུ་དག་ཚུར་ཤོག །ངས་ཁྱེད་ཅག་ཟས་དང་། སྐོམ་དང་། གོས་དང་། ཡོ་བྱད་གང་ཡང་རུང་བའི་བར་དག་གིས་བྲེལ་བ་མེད་པར་བྱས། ཁྱེད་ཅག་ཚུལ་ཁྲིམས་

སྲུངས་ཤིག །ཁྱེད་ཅག་ཟས་སམ། སྐོམ་འམ། རིན་པོ་ཆེ་སྣ་བདུན་གྱི་བར་དག་གམ། གང་གིས་ཕོངས་ནས་ཚུལ་ཁྲིམས་འཆལ་པར་བྱེད་པ་དེ་དག་ངས་བྲེལ་བ་མེད་པར་བྱས། ཁྱེད་ཅག་ཇི་ནས་ཀྱང་ཚུལ་ཁྲིམས་ཀྱི་སྡོམ་པ་ལ་གནས་ནས་ཐེག་པ་གསུམ་པོ་ཉན་ཐོས་ཀྱི་

ཐེག་པའམ། རང་སངས་རྒྱས་ཀྱི་ཐེག་པའམ། རྣམ་པ་ཐམས་ཅད་མཁྱེན་པ་ཉིད་ཀྱི་ཐེག་པ་ཆེན་པོ་གང་ཡང་རུང་བས་རིམ་གྱིས་སྡུག་བསྔལ་གྱི་མཐར་ཕྱིན་པར་གྱིས་ཤིག་ཅེས། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་

Vol. 31 · folio 117a

ལ་གནས་ནས། དེ་ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་སེམས་ཅན་རྣམས་སྡུད་པར་བྱེད་དོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་གནས་ནས། སེམས་ཅན་གང་དག་འཁྲུག་པ་དང་།

གནོད་སེམས་ཀྱི་སེམས་དང་ལྡན་པའི་སེམས་ཅན་དེ་དག་ལ་ཚིག་འདི་སྐད་ཅེས་བརྗོད་དེ། རིགས་ཀྱི་བུ་དག་ཁྱེད་ཅག་རྒྱུ་གང་གིས་ཕོངས་ནས། འཁྲུག་པར་བྱེད་པའམ། གནོད་སེམས་སུ་བྱེད་པའམ། སྐྱོན་འདོགས་པར་བྱེད་པའི་ཟས་སམ། སྐོམ་འམ། ཡོ་

བྱད་གང་ཡང་རུང་བའི་བར་དག་ང་ལས་ལོང་ཤིག་དང་། ངས་ཁྱེད་ཅག་ཕོངས་པ་མེད་པར་བྱས། དེའི་ཕྱིར་ཁྱེད་ཅག་འཁྲུག་པ་དང་། གནོད་སེམས་སུ་མ་བྱེད་ཅིག །ང་ཡང་ཁྱེད་ཀྱི་ཡིན་ལ་ཁྱེད་ཀྱང་ངའི་ཡིན་ཏེ། ང་ལ་ཅི་བདོག་པ་དེ་ཡང་ཁྱེད་ཀྱི་ཡིན་གྱིས་

སུ་ལ་ཅི་དགོས་པ་དག་ལོང་ཤིག་དང་། ངས་ཁྱེད་ཅག་ཟས་དང་སྐོམ་དང་། གོས་དང་ཡོ་བྱད་གང་ཡང་རུང་བའི་བར་དག་གིས་ཕོངས་པ་མེད་པར་བྱས། ཅི་ནས་ཀྱང་ཁྱེད་ཅག་ཁྲོ་བ་དང་། གནོད་སེམས་ཀྱི་དབང་དུ་མི་འགྱུར་བར་གྱིས་ཤིག་ཅེས་དེ་ལྟར་བྱང་

ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་གནས་ནས། སེམས་ཅན་དེ་དག་བཟོད་པ་ལ་སྦྱོར་བར་བྱེད་དེ། ཁྱེད་ཅག་གང་གི་ཕྱིར་ཁྲོ་བ་སྐྱེ་བར་འགྱུར་བ་དེ་ནི་སྙིང་པོ་མེད་པ་སྟེ། དེ་ལ་ནི་དངོས་པོ་གང་ཡང་མེད་དོ། །ཁྲོ་བ་དེ་ནི་ཡང་དག་

པ་མ་ཡིན་པར་ཡོངས་སུ་བརྟགས་པས་ཁྱེད་ཅག་གང་གི་ཕྱིར་མངོན་པར་ཆགས་པ་དང་། འཁྲུག་པ་དང་། གནོད་སེམས་སུ་བྱེད་ཅིང་། མངོན་པར་ཆགས་པ་དང་། འཁྲུག་པ་དང་། གནོད་སེམས་སུ་གྱུར་ནས་ཀྱང་དབྱིག་པས་རྡེག་པ་དང་། མཚོན་གྱིས་འདེབས་

ཤིང་། གཅིག་གིས་གཅིག་སྲོག་དང་འབྲལ་བར་བྱེད་པ་དེ་ལ་ནི་དངོས་པོ་གང་ཡང་མེད་དོ། །དེའི་ཕྱིར་ཁྱེད་ཅག་ཡང་དག་པ་མ་ཡིན་པའི་ཀུན་ཏུ་རྟོག་པས་འཁྲུགས་པར་གྱུར་ན་སེམས་ཅན་དམྱལ་བར་ལྟུང་བར་འགྱུར་བའམ། དུད་འགྲོའི་སྐྱེ་གནས་སམ། གཤིན་རྗེའི་

Vol. 31 · folio 117b

འཇིག་རྟེན་ནམ། དེ་ལས་གཞན་པའི་ངན་འགྲོ་དག་ཏུ་ལྟུང་བར་འགྱུར་ཏེ། དེར་ཁྱེད་ཅག་སྡུག་བསྔལ་མི་བཟད་པ། རྩུབ་པ། ཚ་བ་དག་གི་ཚོར་བ་མྱོང་བར་འགྱུར་གྱིས། ཀྱེ་སྐྱེས་བུ་དག་ལས་གང་ཡོངས་སུ་བཟུང་བས་མིར་སྐྱེ་བ་ཡང་ཐོབ་པར་མི་འགྱུར་ན། སངས་རྒྱས་

འབྱུང་བ་དང་ཕྲད་པར་འགྱུར་བ་ལྟ་སྨོས་སུ་ཡང་མེད་པ་དེ་ལྟ་བུའི་དངོས་པོ་མེད་པའི་ཆོས་རྣམས་ཀྱི་དོན་གྱི་ལས་ཡོངས་སུ་མ་འཛིན་ཅིག །ཀྱེ་སྐྱེས་བུ་དག་སངས་རྒྱས་འབྱུང་བ་ནི་རྙེད་པར་དཀའོ། །མིར་སྐྱེ་བ་ཡང་རྙེད་པར་དཀའ་བས། དལ་བ་འདི་ཆུད་གཟན་པར་མ་བྱེད་ཅིག་

མི་ཁོམ་པར་གྱུར་ཅིང་། གསོར་མི་རུང་བར་གྱུར་ཏ་རེ་ཞེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བདག་ཀྱང་བཟོད་པ་སྒྲུབ་པར་བྱེད་ལ། གཞན་དག་ཀྱང་བཟོད་པ་ལ་སྦྱོར་བར་བྱེད་ཅིང་བཟོད་པའི་བསྔགས་པ་ཡང་བརྗོད་ལ། གཞན་གང་དག་བཟོད་པ་སྒོམ་

པ་དེ་དག་གི་བསྔགས་པ་ཡང་རྗོད་ཅིང་རྗེས་སུ་དགའ་བར་བྱེད་དོ། །དེས་སེམས་ཅན་དེ་དག་བཟོད་པ་ལ་སྦྱར་ཅིང་བཟོད་པ་ལ་བཀོད་ནས། ཐེག་པ་གསུམ་གྱིས་རིམ་གྱིས་ཡོངས་སུ་མྱ་ངན་ལས་འདའ་བར་བྱེད་དེ། རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་

པའི་ཕ་རོལ་ཏུ་ཕྱིན་པ་ལ་གནས་ནས། སེམས་ཅན་རྣམས་བཟོད་པ་ལ་སྦྱོར་བ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ཅིང་སེམས་ཅན་རྣམས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྦྱོར་བར་བྱེད་ཅེ་ན། རབ་

འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ལེ་ལོ་ཅན་དག་མཐོང་ན། འདི་སྐད་དུ་སེམས་ཅན་ཁྱེད་ཅག་ཅིའི་ཕྱིར་ལེ་ལོ་བྱེད་ཅེས་འདོམས་པར་བྱེད་དོ། །དེ་དག་འདི་སྐད་དུ་རྐྱེན་དང་མི་ལྡན་པའི་ཕྱིར་རོ་ཞེས་ཟེར་ན། བྱང་ཆུབ་སེམས་དཔའ་སེམས་

དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ། སེམས་ཅན་དེ་དག་ལ་འདི་སྐད་དུ། ཀྱེ་སྐྱེས་བུ་དག་ངས་གང་ཁྱེད་ཅག་ལ་སྦྱིན་པའི་རྐྱེན་ཏམ། ཚུལ་ཁྲིམས་ཀྱི་རྐྱེན་ཏམ། བཟོད་པའི་རྐྱེན་ཏམ། རྣམ་པ་གཞན་གང་དག་གིས་བརྩོན་འགྲུས་རྩོམ་པར་འགྱུར་བ་དེ་དག་

Vol. 31 · folio 118a

ཐམས་ཅད་ཉེ་བར་བསྒྲུབ་པར་བྱས། ཁྱེད་ཅག་བརྩོན་འགྲུས་རྩོམས་ཤིག་ཅེས་ཟེར་ཏེ། དེར་སེམས་ཅན་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ཡོ་བྱད་དེ་དག་གིས་ལུས་དང་སེམས་ཀྱི་བརྩོན་འགྲུས་རྩོམ་པར་བྱེད་དེ། དེ་དག་ལུས་

དང་སེམས་ཀྱི་བརྩོན་འགྲུས་དང་ལྡན་པས། དགེ་བའི་ཆོས་ཐམས་ཅད་ཡོངས་སུ་རྫོགས་པར་བྱེད་དོ། །དགེ་བའི་ཆོས་དེ་དག་གིས་འཕགས་པ་ཟག་པ་མེད་པའི་ཆོས་ཐམས་ཅད་སྒོམ་པར་བྱེད་དོ། །དེ་དག་བསྒོམས་པས་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་རོ། །

ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་ཐོབ་པར་འགྱུར་རོ། །རང་བྱང་ཆུབ་ཐོབ་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། རབ་འབྱོར་དེ་ལྟར་བྱང་

ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ། སེམས་ཅན་རྣམས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྦྱོར་བ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ། སེམས་

ཅན་རྣམས་བསམ་གཏན་གྱི་ཕ་རོལ་ཏུ་ཕྱིན་པ་ལ་སྦྱོར་བར་བྱེད་པ་ཡིན་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་སེམས་རྣམ་པར་གཡེངས་པ་དག་མཐོང་ན། འདི་སྐད་དུ། ཀྱེ་སྐྱེས་བུ་དག་ཁྱེད་ཅག་ཅིའི་ཕྱིར་བསམ་གཏན་གྱི་ཕ་རོལ་

ཏུ་ཕྱིན་པ་ལ་སྙོམས་པར་མི་འཇུག་ཅེས་འདོམས་པར་བྱེད་དོ། །དེ་དག་འདི་སྐད་དུ་རྐྱེན་དང་མི་ལྡན་པའི་ཕྱིར་རོ་ཞེས་ཟེར་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་སེམས་ཅན་དེ་དག་ལ་འདི་སྐད་དུ། ཀྱེ་སྐྱེས་བུ་དག་ངས་ཁྱེད་ཅག་རྐྱེན་

གང་དག་གིས་འདི་ནི་ནང་ངོ་། །འདི་ནི་ཕྱི་རོལ་ལོ། །འདི་ནི་ནང་དང་ཕྱི་རོལ་ལོ། །ཞེས་རྣམ་པར་རྟོག་པར་མི་འགྱུར་བ་དེ་ལྟ་བུའི་རྐྱེན་དག་ཉེ་བར་བསྒྲུབ་པར་བྱའོ་ཞེས་ཟེར་ཏེ། དེར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་སེམས་ཅན་དེ་དག་ལ་རྐྱེན་གང་དང་གང་དག་

Vol. 31 · folio 118b

གིས་རྣམ་པར་རྟོག་པར་མི་འགྱུར་བ་དེ་ལྟ་བུའི་རྐྱེན་དག་ཉེ་བར་སྒྲུབ་པར་བྱེད་དོ། །དེས་སེམས་ཅན་དེ་དག་རྣམ་པར་རྟོག་པའི་རྒྱུན་ཆད་ནས་བསམ་གཏན་དང་པོ་བསྒྲུབས་ཏེ་གནས་སོ། །བསམ་གཏན་གཉིས་པ་དང་། གསུམ་པ་དང་། བཞི་པ་བསྒྲུབས་ཏེ་གནས་སོ། །

བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དག་ལ་སྙོམས་པར་འཇུག་གོ། །དེ་དག་བསམ་གཏན་དེ་དག་དང་། ཚད་མེད་པ་དེ་དག་གིས་འཕགས་པའི་ལམ་ཡན་ལག་བརྒྱད་པའི་བར་དག་སྒོམ་པར་བྱེད་དོ། །དེ་དག་བསྒོམས་ནས་ཐེག་པ་གསུམ་

པོ་དག་གིས་རིམ་གྱིས་ཡོངས་སུ་མྱ་ངན་ལས་འདའ་བར་འགྱུར་རོ། །དེ་དག་ལས་ཁ་ཅིག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ། བྱང་ཆུབ་ཀྱི་ལམ་ལས་ཡོངས་སུ་མི་ཉམས་ཏེ། རབ་འབྱོར་དེ་ལྟར་བྱང་ཆུབ་སེམས་

དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ། སེམས་ཅན་རྣམས་ཏིང་ངེ་འཛིན་གྱི་ཕ་རོལ་ཏུ་ཕྱིན་པ་ལ་སྦྱོར་བར་བྱེད་པ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ། སེམས་ཅན་

རྣམས་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་སྡུད་པ་ཡིན་ཞེ་ན། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཤེས་རབ་འཆལ་བ་དག་མཐོང་ན། འདི་སྐད་དུ་ཀྱེ་སེམས་ཅན་དག་ཁྱེད་ཅག་ཅིའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་

མི་བྱེད་ཅེས་འདོམས་ཤིང་རྗེས་སུ་སྟོན་པར་བྱེད་དོ། །དེ་དག་འདི་སྐད་དུ། རྐྱེན་དང་མི་ལྡན་པའི་ཕྱིར་རོ་ཞེས་ཟེར་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་གནས་ནས། སེམས་ཅན་དེ་དག་ལ་འདི་སྐད་དུ། ཀྱེ་སེམས་ཅན་དག་ང་ལས་

ཡོ་བྱད་དག་ལོང་ཤིག །ང་ལས་ཡོ་བྱད་དག་བླངས་ནས་ཀྱང་སྦྱིན་པ་བྱིན་ཅིག །ཚུལ་ཁྲིམས་སྲུངས་ཤིག །བཟོད་པ་སྒྲུབས་ཤིག །བརྩོན་འགྲུས་རྩོམས་ཤིག །བསམ་གཏན་སྒོམས་ཤིག །རྣམ་པ་དེ་དག་ཡོངས་སུ་རྫོགས་ནས་ཀྱང་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་

Vol. 31 · folio 119a

སྒོམ་པ་ལ། བདག་གམ་སེམས་ཅན་ནམ་སྲོག་གམ། གསོ་བའམ། གང་ཟག་གམ། ཤེས་པ་པོ་དང་མཐོང་བ་པོ་དང་། བྱེད་པ་པོའི་བར་དག་གམ། འདོད་པའི་ཁམས་སམ། གཟུགས་ཀྱི་ཁམས་སམ། གཟུགས་མེད་པའི་ཁམས་སམ།

ཕ་རོལ་ཏུ་ཕྱིན་པ་དྲུག་གམ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནམ། རྒྱུན་དུ་ཞུགས་པའི་འབྲས་བུའམ། ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུའམ། དགྲ་བཅོམ་པ་ཉིད་དམ། རང་བྱང་ཆུབ་བམ། བླ་ན་མེད་པ་ཡང་དག་པར་

རྫོགས་པའི་བྱང་ཆུབ་བམ། གང་དམིགས་པར་འགྱུར་བའི་ཆོས་གང་ཡང་ཡོད་དམ། ཚོལ་ཅིག་ཅེས་འདོམས་ཤིང་རྗེས་སུ་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི་གང་ལ་དམིགས་ཤིང་མངོན་པར་ཞེན་པར་

འགྱུར་བའི་ཆོས་གང་ཡང་མི་དམིགས་སོ། །དེ་མངོན་པར་ཞེན་པ་མེད་པས་ཆོས་གང་ཡང་སྐྱེ་བའམ། འགག་པའམ་ཀུན་ནས་ཉོན་མོངས་པའམ། རྣམ་པར་བྱང་བར་ཡང་དག་པར་རྗེས་སུ་མི་མཐོང་ངོ་། །དེས་དེ་དག་ཡང་དག་པར་རྗེས་སུ་མ་མཐོང་བས་འདི་ནི་

སེམས་ཅན་དམྱལ་བའོ། །འདི་ནི་དུད་འགྲོའི་སྐྱེ་གནས་པའོ། །འདི་ནི་གཤིན་རྗེའི་འཇིག་རྟེན་པའོ། །འདི་ནི་ལྷ་མ་ཡིན་གྱི་རིས་སོ། །འདི་ནི་ལྷའོ། །འདི་ནི་མིའོ། །འདི་ནི་ཚུལ་ཁྲིམས་དང་ལྡན་པའོ། །འདི་ནི་ཚུལ་ཁྲིམས་འཆལ་པའོ། །འདི་ནི་རྒྱུན་དུ་ཞུགས་པའོ། །འདི་ནི་

ལན་ཅིག་ཕྱིར་འོང་བའོ། །འདི་ནི་ཕྱིར་མི་འོང་བའོ། །འདི་ནི་དགྲ་བཅོམ་པའོ། །འདི་ནི་རང་སངས་རྒྱས་སོ། །འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ། །ཞེས་བྱ་བར་རྣམ་པར་མི་རྟོག་སྟེ། རབ་འབྱོར་དེ་ལྟར་བྱང་ཆུབ་སེམས་

དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་སེམས་ཅན་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡོངས་སུ་སྡུད་པར་བྱེད་པ་ཡིན་ནོ། །རབ་འབྱོར་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་གནས། ཚུལ་ཁྲིམས་ཀྱི་

Vol. 31 · folio 119b

ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ནས། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་བར་དག་ཡོངས་སུ་འཛིན་

པར་བྱེད་ཅེ་ན། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་རྣམས་ལ་ཡོ་བྱད་དག་སྦྱིན་པར་བྱེད་དེ། ཡོ་བྱད་དེ་དག་གིས་ཡོངས་སུ་བསྡུས་པའི་སེམས་ཅན་རྣམས་ནི་དྲན་པ་ཉེ་བར་གཞག་པ་བཞི་སྒོམ་པར་བྱེད་དོ། །ཡང་དག་པར་སྤོང་

བ་བཞི་སྒོམ་པར་བྱེད་དོ། །རྫུ་འཕྲུལ་གྱི་རྐང་པ་བཞི་སྒོམ་པར་བྱེད་དོ། །དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དག་སྒོམ་པར་བྱེད་དོ། །ལམ་དེས་ཡོངས་སུ་ཟིན་པར་གྱུར་པ་ནི། འཁོར་བ་ཇི་སྙེད་

པ་ལས་ཡོངས་སུ་ཐར་བར་འགྱུར་ཏེ། རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ཟག་པ་མེད་པའི་ཆོས་རྣམས་ཀྱིས་སེམས་ཅན་རྣམས་ཡོངས་སུ་འཛིན་པར་བྱེད་པ་ཡིན་ནོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་

ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ། སེམས་ཅན་མགོན་མེད་པ་སྡུག་བསྔལ་བ། ཟས་དང་སྐོམ་གྱིས་ཕོངས་པ་དག་མཐོང་ན། འདི་ལྟར་ཡོངས་སུ་སྨིན་པར་བྱེད་དེ། རིགས་ཀྱི་བུ་དག་ཚུར་ཤོག །ཁྱེད་ཅག་ང་ལས་ཟས་དང་། སྐོམ་དང་། གོས་དང་བཞོན་

པ་དང་། མལ་ཆ་དང་། སྟན་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། རིན་པོ་ཆེ་སྣ་བདུན་དང་། ཡོ་བྱད་གང་ཡང་རུང་བའི་བར་དག་ལོང་ལ། སེམས་ཅན་རྣམས་ལ་ཕན་ཐོགས་ཤིག་དང་། དེ་ནི་ཁྱེད་ཅག་ལ་ཡུན་རིང་པོའི་དོན་དང་། ཕན་པ་དང་བདེ་བར་

འགྱུར་རོ། །འདི་ནི་ངའི་དོན་ཡིན་གྱི། ཁྱེད་ཅག་གི་མ་ཡིན་ནོ། །སྙམ་དུ་བསམ་པར་མི་བྱ་བར་འདི་ནི་བདག་གིས་ཡུན་རིང་པོ་ནས་སེམས་ཅན་རྣམས་ཀྱི་དོན་དུ་བསྒྲུབས་པ་ཡིན་ནོ་སྙམ་དུ་དེ་ལྟར་ཁྱེད་ཀྱིས་བདག་རང་གི་ཡིན་ནོ་སྙམ་དུ་སེམས་ལ་སེམས་ཅན་རྣམས་ལ་སྦྱིན་པ་

Vol. 31 · folio 120a

བྱིན་ཅིག །སྦྱིན་པ་དེས་ཀྱང་ཚུལ་ཁྲིམས་ལ་སྦྱོར་ཅིག །བཟོད་པ་ལ་སྦྱོར་ཅིག །བརྩོན་འགྲུས་ལ་སྦྱོར་ཅིག །ཏིང་ངེ་འཛིན་ལ་སྦྱོར་ཅིག །བསམ་གཏན་ལ་སྦྱོར་ཅིག །ཤེས་རབ་ལ་སྦྱོར་ཅིག །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་བར་

དག་ལ་སྦྱོར་ཅིག །དེ་ཙམ་གྱིས་ཆོག་པར་མི་འཛིན་པར་གོང་དུ་འཕགས་པའི་ཆོས་ཟག་པ་མེད་པ་རྣམས་ལ་ཡང་ཁོད་ཅིག །རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་

བྱང་ཆུབ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཁོད་ཅིག་ཅེས་རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས། ཇི་ལྟར་ཡོངས་སུ་སྨིན་པར་བྱས་པས་སེམས་ཅན་རྣམས་ངན་སོང་གསུམ་པོ་དག་

ལས་ཡོངས་སུ་ཐར་བར་འགྱུར་བ་དང་འཁོར་བ་ཐམས་ཅད་ཀྱི་བར་དག་ལས་ཡོངས་སུ་ཐར་བར་འགྱུར་བ་དེ་ལྟར་སེམས་ཅན་རྣམས་ཡོངས་སུ་སྨིན་པར་བྱའོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་

གནས་ཏེ། འདི་ལྟར་སེམས་ཅན་རྣམས་ཡོངས་སུ་སྨིན་པར་བྱའོ། །རིགས་ཀྱི་བུ་དག་ཚུར་ཤོག །ཁྱེད་ཅག་ཟས་སམ། སྐོམ་འམ། མིའི་ཡོ་བྱད་གང་ཡང་རུང་བའི་བར་དག་གིས་ཕོངས་ནས་ཚུལ་ཁྲིམས་འཆལ་བར་བྱེད་པའི་ཡོ་བྱད་དེ་དག་ངས་ཉེ་བར་བསྒྲུབ་པར་

བྱའོ། །ཞེས་དེས་སེམས་ཅན་དེ་དག་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བཀོད་ནས་ཀྱང་ཕན་གདགས་པ་ཇི་ལྟ་བུས་ཕན་བཏགས་པས་དགེ་བ་བཅུའི་ལས་ཀྱི་ལམ་ཡང་དག་པར་ལེན་པར་འགྱུར་ཞིང་ཚུལ་ཁྲིམས་མ་རལ་བ་དང་། ཚུལ་ཁྲིམས་ནག་ནོག་མེད་པར་གྱུར་པ་དེ་

དག་ཚུལ་ཁྲིམས་ཀྱི་སྡོམ་པ་ལ་གནས་པར་འགྱུར་བ་དེ་ལྟ་བུའི་ཕན་གདགས་པས་ཕན་འདོགས་པར་བྱེད་དེ། ཕ་རོལ་ཏུ་ཕྱིན་པ་དྲུག་གི་བར་དག་ལ་ཡང་དེ་བཞིན་དུ་སྦྱར་བར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། སེམས་ཅན་ཡོངས་སུ་སྨིན་པར་བྱ་བའི་

Vol. 31 · folio 120b

གོ་ཆའི་ལེའུ་ཞེས་བྱ་སྟེ། བདུན་ཅུ་རྩ་དྲུག་པའོ།། །།དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། གང་ལ་གནས་ནས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟ་བུའི་གོ་ཆ་བགོ་བར་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་ལམ་

དེ་གང་ཡིན་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་གྱི་སེམས་ཀྱི་ཡོངས་སུ་རྟོགས་པ་ཐུགས་ཀྱིས་མཁྱེན་ནས། ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་ཕ་རོལ་ཏུ་ཕྱིན་པ་དྲུག་ནི་བྱང་ཆུབ་སེམས་དཔའ་སེམས་

དཔའ་ཆེན་པོའི་ལམ་མོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ལམ་མོ། །སྟོང་པ་ཉིད་བཅུ་བཞི་དང་། མཐར་གྱིས་གནས་པའི་སྙོམས་པར་འཇུག་པ་དགུ་དང་། རྣམ་པར་ཐར་པ་བརྒྱད་དང་། དེ་བཞིན་གཤེགས་

པའི་སྟོབས་བཅུ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ལམ་མོ། །རབ་འབྱོར་གཞན་ཡང་ཆོས་ཐམས་ཅད་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ལམ་ཡིན་ནོ། །རབ་འབྱོར་འདི་ཇི་སྙམ་དུ་སེམས།

གང་ལ་བྱང་ཆུབ་སེམས་དཔའ་སེམས་དཔའ་ཆེན་པོས་བསླབ་པར་མི་བྱ་བ་དང་། གང་ལ་མ་བསླབས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་ཆོས་འགའ་ཞིག་ཡོད་སྙམ་ན། རབ་འབྱོར་གང་ལ་བྱང་ཆུབ་སེམས་དཔའ་

སེམས་དཔའ་ཆེན་པོས་བསླབ་པར་མི་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ལ་མ་བསླབས་པར་རྣམ་པ་ཐམས་ཅད་མཁྱེན་པ་ཉིད་ཐོབ་པར་ནུས་པའི་ཆོས་ནི་གང་ཡང་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་

གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་སྟོང་པ་ལགས་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ལ་ཇི་ལྟར་བསླབ་པར་བགྱི་སྟེ། བཅོམ་ལྡན་འདས་འདི་སྙེད་ཅིག་གོ་ཞེའམ། འདི་དག་གོ་ཞེའམ། ཆོས་

Vol. 31 · folio 121a

འདི་དག་ནི་འཇིག་རྟེན་པའམ། འཇིག་རྟེན་ལས་འདས་པའམ། ཟག་པ་དང་བཅས་པའམ། ཟག་པ་མེད་པའམ། འདུས་བྱས་སམ། འདུས་མ་བྱས་སམ། སོ་སོའི་སྐྱེ་བོའི་ཆོས་སམ། དགྲ་བཅོམ་པའི་ཆོས་སམ། རང་སངས་རྒྱས་ཀྱི་ཆོས་ལགས་སོ་

ཞེས་བགྱིས་ན། མ་སྤྲོས་པ་སྤྲོས་པར་བགྱིད་པའམ་གཅིག་ཏུ་མི་འགྱུར་ལགས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་དེ་དེ་བཞིན་ནོ། །དེ་དེ་བཞིན་ཏེ། ཆོས་ཐམས་ཅད་ནི་སྟོང་

པ་ཡིན་ནོ། །རབ་འབྱོར་གལ་ཏེ་ཆོས་ཐམས་ཅད་སྟོང་པ་མ་ཡིན་དུ་ཟིན་ན་ནི། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་བ་ཞིག་ན། རབ་འབྱོར་འདི་ལྟར་ཆོས་ཐམས་ཅད་ནི་སྟོང་པ་ཡིན་

ཏེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །རབ་འབྱོར་ཡང་གང་ཁྱོད་འདི་སྐད་དུ། གལ་ཏེ་ཆོས་ཐམས་ཅད་སྟོང་པ་ལགས་ན། ཇི་ལྟར་བྱང་ཆུབ་སེམས་

དཔའ་སེམས་དཔའ་ཆེན་པོས་འདི་སྙེད་ཅིག་གོ་ཞེའམ། འདི་དག་གོ་ཞེའམ། སོ་སོའི་སྐྱེ་བོའི་ཆོས་སམ། དགྲ་བཅོམ་པའི་ཆོས་སམ། རང་སངས་རྒྱས་ཀྱི་ཆོས་ཞེས་བགྱི་བའི་བར་དུ་ཇི་ལྟར་ཆོས་རྣམས་ཐ་དད་དུ་བགྱིད་ཅེས་ཟེར་བ་ནི། རབ་འབྱོར་ཅི་སེམས་ཅན་འདི་དག་གིས་

ཆོས་ཐམས་ཅད་སྟོང་པའོ་ཞེས་བྱ་བར་ཤེས་སམ། གལ་ཏེ་དེ་ལྟར་ཤེས་ན་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཆོས་ཐམས་ཅད་ལ་བསླབས་ནས། རྣམ་པ་ཐམས་ཅད་མཁྱེན་པ་ཉིད་འཐོབ་པར་མི་འགྱུར་བ་ཞིག་ན། རབ་འབྱོར་འདི་ལྟར་སེམས་ཅན་འདི་དག་

གིས་ཆོས་ཐམས་ཅད་སྟོང་པའོ་ཞེས་བྱ་བར་མི་ཤེས་ཏེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཆོས་ཐམས་ཅད་རྣམ་པར་གཞག་པར་བྱས་ཤིང་། སེམས་ཅན་རྣམས་ལ་

Vol. 31 · folio 121b

ཆོས་སྟོན་པར་བྱེད་དོ། །རབ་འབྱོར་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ལམ་ལ་སྤྱོད་པས། ཐོག་མ་ཉིད་ནས་འདི་ལྟར་འདི་ལ་མངོན་པར་འདུ་བྱེད་པ་མ་གཏོགས་པར་གང་རང་གི་ངོ་བོ་ཉིད་ཀྱིས་དམིགས་པར་འགྱུར་བའི་ཆོས་གང་ཡང་མེད་དོ་སྙམ་དུ་ཉེ་བར་

བརྟག་པར་བྱའོ། །དེ་ལྟར་ཆོས་དེ་དག་གི་རང་བཞིན་ལ་ཉེ་བར་རྟོག་པ་ན། ཕ་རོལ་ཏུ་ཕྱིན་པ་རྣམས་སམ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནམ། རྒྱུན་ཏུ་ཞུགས་པའི་འབྲས་བུའམ། ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུའམ། དགྲ་

བཅོམ་པ་ཉིད་དམ། རང་བྱང་ཆུབ་འམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འམ། ཆོས་གང་ལ་ཡང་མངོན་པར་ཞེན་པ་མེད་དོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་ཆོས་ཐམས་ཅད་ཀྱི་ངོ་བོ་ཉིད་ཀྱིས་སྟོང་ལ། སྟོང་པ་ཉིད་ནི་སྟོང་པ་ཉིད་ལ་མངོན་

པར་ཞེན་པར་མི་བྱེད་དེ། སྟོང་པ་ཉིད་ཀྱང་དམིགས་སུ་མེད་ན། སྟོང་པ་ཉིད་ཀྱིས་སྟོང་པ་ཉིད་ལ་མངོན་པར་ཞེན་པ་ལྟ་སྨོས་ཀྱང་ཅི་དགོས་པའི་ཕྱིར་ཏེ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་ཆོས་ཐམས་ཅད་ལ་མངོན་པར་ཞེན་པ་མེད་པར་གནས་སོ། །

དེ་བསླབ་པ་དེ་ལ་གནས་ནས་ཀྱང་། སེམས་ཅན་འདི་དག་ཅི་ལ་སྤྱོད་ཅེས་སེམས་ཅན་ཐམས་ཅད་ཀྱི་སྤྱོད་པ་ལ་རྣམ་པར་ལྟ་ཞིང་མེད་པ་ལ་འཛིན་པ་ཡིན་ནོ་སྙམ་ནས། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ་སེམས་ཏེ། ཀྱེ་མ་བདག་གིས་སེམས་ཅན་འདི་

དག་ཡོད་པ་མ་ཡིན་པ་ལ་འཛིན་པ་ལས་ལེགས་པར་ཐར་བར་བྱའོ་སྙམ་ནས། དེ་ཐབས་ལ་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཤིང་། འདི་སྐད་དུ་སེམས་ཅན་དག་ཚུར་ཤོག །ཁྱེད་ཅག་སྦྱིན་པ་བྱིན་ཅིག་དང་། དེས་ཁྱེད་ཅག་ལོངས་སྤྱོད་དག་གིས་མི་བྲེལ་

བར་འགྱུར་རོ། །ལོངས་སྤྱོད་དེ་དག་གིས་ཀྱང་རློམ་སེམས་སུ་མ་བྱེད་ཅིག །དེ་ལ་སྙིང་པོ་གང་ཡང་མེད་དོ་ཞེས་འདོམས་པར་བྱེད་དོ། །དེ་བཞིན་དུ་ཚུལ་ཁྲིམས་སྲུངས་ལ། ཚུལ་ཁྲིམས་དེས་ཀྱང་རློམ་སེམས་སུ་མ་བྱེད་ཅིག །དེ་ལ་སྙིང་པོ་གང་ཡང་མེད་དོ་ཞེས་ཚུལ་ཁྲིམས་

Vol. 31 · folio 122a

ལ་འདོམས་པར་བྱེད་དོ། །དེ་བཞིན་དུ་བཟོད་པ་དང་། དེ་བཞིན་དུ་བརྩོན་འགྲུས་དང་། དེ་བཞིན་དུ་ཏིང་ངེ་འཛིན་ལ་སྙོམས་པར་ཞུགས་ཤིག །དེ་བཞིན་དུ་ཤེས་རབ་སྒོམས་ཤིག །ཤེས་རབ་དེས་ཀྱང་རློམ་སེམས་སུ་མ་བྱེད་ཅིག །དེ་ལ་སྙིང་

པོ་གང་ཡང་མེད་དོ་ཞེས་འདོམས་པར་བྱེད་དོ། །དེ་བཞིན་དུ་རྒྱུན་དུ་ཞུགས་པའི་འབྲས་བུ་དང་། དེ་བཞིན་དུ་ལན་ཅིག་ཕྱིར་འོང་བའི་འབྲས་བུ་དང་། དེ་བཞིན་དུ་ཕྱིར་མི་འོང་བའི་འབྲས་བུ་དང་། དེ་བཞིན་དུ་དགྲ་བཅོམ་པ་ཉིད་དང་། དེ་བཞིན་དུ་རང་བྱང་ཆུབ་དང་། དེ་བཞིན་

དུ་སངས་རྒྱས་ཀྱི་ཆོས་ཐམས་ཅད་ཀྱི་བར་དག་སྒོམས་ལ། ཆོས་དེ་དག་གིས་ཀྱང་རློམ་སེམས་སུ་མ་བྱེད་ཅིག །དེ་ལ་སྙིང་པོ་གང་ཡང་མེད་དོ་ཞེས་འདོམས་པར་བྱེད་དེ། དེ་ལྟར་འདོམས་ཤིང་རྗེས་སུ་སྟོན་པར་བྱེད་པས་བྱང་ཆུབ་ཀྱི་ལམ་ལ་སྤྱོད་ཀྱང་། ཆོས་གང་ལ་ཡང་

མངོན་པར་ཞེན་པ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་མངོན་པར་ཞེན་པ་མེད་པ་སྟེ། སྟོང་པ་ཉིད་ཀྱི་རང་བཞིན་ཉེ་བར་བཟུང་ན། དེ་ལ་གང་གིས་མངོན་པར་ཞེན་པར་འགྱུར་བ་དེ་ལྟ་བུའི་ངོ་བོ་ཉིད་མེད་པའི་ཕྱིར་རོ། །རབ་འབྱོར་དེ་ལྟར་བྱང་ཆུབ་སེམས་དཔའ་

སེམས་དཔའ་ཆེན་པོ་བྱང་ཆུབ་ཀྱི་ལམ་ལ་སྤྱོད་ཀྱང་། གང་ལ་ཡང་མི་གནས་ཏེ། དེ་གནས་པ་མེད་པའི་ཚུལ་གྱིས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ཀྱང་དེ་ལ་མི་གནས་སོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱོད་ཀྱང་དེ་ལ་མི་གནས་སོ། །བཟོད་པའི་ཕ་རོལ་ཏུ་ཕྱིན་

པ་ལ་སྤྱོད་ཀྱང་དེ་ལ་མི་གནས་སོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་ཀྱང་དེ་ལ་མི་གནས་སོ། །བསམ་གཏན་གྱི་ཕ་རོལ་ཏུ་ཕྱིན་པ་ལ་སྤྱོད་ཀྱང་དེ་ལ་མི་གནས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཀྱང་དེ་ལ་མི་གནས་སོ། །དེ་བསམ་གཏན་དང་པོ་ལ་སྙོམས་པར་

འཇུག་ཀྱང་དེ་ལ་མི་གནས་སོ། །དེ་ཅིའི་ཕྱིར་ཞེ་ན། འདི་ལྟར་བསམ་གཏན་དང་པོ་ནི་བསམ་གཏན་གྱི་ངོ་བོ་ཉིད་ཀྱིས་སྟོང་ལ། གང་སྙོམས་པར་འཇུག་པ་དེ་ཡང་སྟོང་ཞིང་རྣམ་པ་གང་དག་གིས་སྙོམས་པར་འཇུག་པའི་རྣམ་པ་དེ་དག་ཀྱང་སྟོང་པའི་ཕྱིར་རོ། །དེ་བཞིན་དུ་

Vol. 31 · folio 122b

བསམ་གཏན་གཉིས་པ་དང་། བསམ་གཏན་གསུམ་པ་དང་། བསམ་གཏན་བཞི་པའི་བར་དང་དེ་བཞིན་དུ་བྱམས་པ་དང་། སྙིང་རྗེ་དང་དགའ་བ་དང་། བཏང་སྙོམས་དང་། གཟུགས་མེད་པའི་སྙོམས་པར་འཇུག་པའི་བར་དག་དང་། རྣམ་པར་ཐར་པ་བརྒྱད་དང་། མཐར་

གྱིས་གནས་པའི་སྙོམས་པར་འཇུག་པ་དགུ་དང་། རྒྱུན་དུ་ཞུགས་པའི་འབྲས་བུ་ཐོབ་ཀྱང་དེ་ལ་མི་གནས་སོ། །ལན་ཅིག་ཕྱིར་འོང་བའི་འབྲས་བུ་ཐོབ་ཀྱང་དེ་ལ་མི་གནས་སོ། །ཕྱིར་མི་འོང་བའི་འབྲས་བུ་ཐོབ་ཀྱང་དེ་ལ་མི་གནས་སོ། །དགྲ་བཅོམ་པ་ཉིད་ཐོབ་ཀྱང་དེ་ལ་མི་

གནས་སོ། །རང་སངས་རྒྱས་ཀྱི་ས་ཐོབ་ཀྱང་དེ་ལ་མི་གནས་སོ། །རབ་འབྱོར་གྱིས་གསོལ་པ། བཅོམ་ལྡན་འདས་ཅིའི་སླད་དུ་མི་གནས་ལགས། བཀའ་སྩལ་པ། རབ་འབྱོར་རྣམ་པ་གཉིས་ཀྱིས་མི་གནས་ཏེ། གཉིས་གང་ཞེ་ན། འབྲས་བུ་དེ་དག་ལ་གང་

ལ་གནས་པར་འགྱུར་བ་དང་། གང་གིས་གནས་པར་འགྱུར་བ་དང་། གང་གནས་པར་འགྱུར་བའི་ངོ་བོ་ཉིད་མེད་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་དེ་ཙམ་གྱིས་ཆོག་པར་མི་འཛིན་པར་བདག་གིས་

རྒྱུན་དུ་ཞུགས་པའི་འབྲས་བུ་ཐོབ་པར་མི་བྱ་བ་མ་ཡིན་ཏེ། བདག་གིས་རྒྱུན་དུ་ཞུགས་པའི་འབྲས་བུ་ཐོབ་ནས་ཀྱང་དེ་ལ་གནས་པར་མི་བྱའོ། །བདག་གིས་རང་སངས་རྒྱས་ཀྱི་སའི་བར་དག་ཐོབ་པར་མི་བྱ་བ་མ་ཡིན་ཏེ། བདག་གིས་རང་སངས་རྒྱས་ཀྱི་ས་ཐོབ་ཀྱང་དེ་

ལ་གནས་པར་མི་བྱའོ། །དེ་ཅིའི་ཕྱིར་ཞེ་ན། འདི་ལྟར་བདག་གིས་སེམས་དང་པོ་བསྐྱེད་ཕྱིན་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་གཏོགས་པར་སེམས་གཞན་མ་བསྐྱེད་དོ་སྙམ་དུ་སེམས་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་

དཔའ་སེམས་དཔའ་ཆེན་པོ་དེས་སེམས་དང་པོ་བསྐྱེད་ཕྱིན་ཆད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་གཏོགས་པར་སེམས་གཞན་མ་བསྐྱེད་ལ། དེ་བཞིན་དུ་བྱང་ཆུབ་སེམས་དཔའི་སྐྱོན་མེད་པ་ལ་ཞུགས་པ་ནས་བཟུང་སྟེ་ས་བཅུའི་བར་དུ་ཡང་སེམས་རྣམ་

Vol. 31 · folio 123a

པར་གཡེང་བ་མེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་གཏོགས་པར་སེམས་གཞན་འགའ་ཡང་མ་བསྐྱེད་པའི་ཕྱིར་རོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཇི་ཙམ་དུ་ལུས་དང་། ངག་དང་ཡིད་ཀྱིས་

རྟུལ་བར་བྱེད་པ་ཡང་བྱང་ཆུབ་ཀྱི་སེམས་ལས་གཞན་མ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སེམས་ལ་གནས་ཤིང་ཡིད་རྣམ་པར་མི་གཡེང་བར་བྱང་ཆུབ་ཀྱི་ལམ་སྐྱེད་པར་བྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་

འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་སྐྱེ་བ་མ་མཆིས་པ་ལགས་ན། བཅོམ་ལྡན་འདས་འོ་ན་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ལམ་སྐྱེད་པར་བགྱིད་ལགས། དེ་སྐད་ཅེས་གསོལ་པ་དང་། བཅོམ་ལྡན་

འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར་ཆོས་ཐམས་ཅད་ནི་མ་སྐྱེས་པ་སྟེ། དེ་ཡང་ཇི་ལྟ་བུ་ཞེ་ན། གང་དག་མངོན་པར་འདུ་མི་བྱེད་པ་དེ་དག་ལ་ནི་ཆོས་ཐམས་ཅད་མ་སྐྱེས་པ་ཡིན་ནོ། །

དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་བྱུང་ཡང་རུང་། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། ཆོས་རྣམས་ཀྱི་ཆོས་གནས་པ་

ཉིད་དེ་ནི་གནས་པ་མ་ལགས་སམ། བཀའ་སྩལ་པ། རབ་འབྱོར་དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་གཤེགས་པ་རྣམས་བྱུང་ཡང་རུང་། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། ཆོས་རྣམས་ཀྱི་ཆོས་གནས་པ་ཉིད་དེ་ནི་གནས་པ་ཡིན་མོད་ཀྱི། གང་

དག་གིས་ཆོས་གནས་པ་ཉིད་དེ་མི་ཤེས་པ་དེ་དག་གི་དོན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ལམ་སྐྱེད་པར་བྱེད་ཅིང་ལམ་དེས་སེམས་ཅན་རྣམས་འཁོར་བ་ལས་ཡོངས་སུ་ཐར་བར་བྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་

Vol. 31 · folio 123b

སྐད་ཅེས་གསོལ་ཏོ། །བཅོམ་ལྡན་འདས་ཅི་སྐྱེས་པར་གྱུར་པའི་ལམ་གྱིས་བྱང་ཆུབ་ཐོབ་པར་འགྱུར་ལགས་སམ། བཀའ་སྩལ་པ། དེ་ནི་མ་ཡིན་ནོ། །གསོལ་པ། བཅོམ་ལྡན་འདས་འོ་ན་མ་སྐྱེས་པར་གྱུར་པའི་ལམ་གྱིས་བྱང་ཆུབ་ཐོབ་པར་འགྱུར་ལགས་སམ། བཀའ་སྩལ་

པ་དེ་ནི་མ་ཡིན་ནོ། །གསོལ་པ། བཅོམ་ལྡན་འདས་འོ་ན་སྐྱེས་ཀྱང་སྐྱེས་ལ། མ་སྐྱེས་ཀྱང་མ་སྐྱེས་པར་གྱུར་པའི་ལམ་གྱིས་བྱང་ཆུབ་ཐོབ་པར་འགྱུར་ལགས་སམ། བཀའ་སྩལ་པ། དེ་ནི་མ་ཡིན་ནོ། །གསོལ་པ། བཅོམ་ལྡན་འདས་འོ་ན་སྐྱེས་པ་ཡང་མ་ལགས། མ་

སྐྱེས་པ་ཡང་མ་ལགས་པར་གྱུར་པའི་ལམ་གྱིས་བྱང་ཆུབ་ཐོབ་པར་འགྱུར་ལགས་སམ། བཀའ་སྩལ་པ། དེ་ནི་མ་ཡིན་ནོ། །གསོལ་པ། བཅོམ་ལྡན་འདས་འོ་ན་ཇི་ལྟར་བྱང་ཆུབ་ཐོབ་པར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་

པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་བྱང་ཆུབ་ནི་ལམ་གྱིས་ཀྱང་མི་འཐོབ་ལ། ལམ་མ་ཡིན་པས་ཀྱང་མ་ཡིན་ཏེ། བྱང་ཆུབ་ཉིད་ཀྱང་ལམ་མོ། །ལམ་ཉིད་ཀྱང་བྱང་ཆུབ་བོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་

རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བྱང་ཆུབ་ཉིད་ཀྱང་ལམ་ལགས་ལ། ལམ་ཉིད་ཀྱང་བྱང་ཆུབ་ལགས་ན། འོ་ན་བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་ཐོབ་ལགས་པ་ཉིད་དུ་མི་འགྱུར་ལགས་སམ། འོ་ན་སྐྱེས་བུ་ཆེན་པོའི་

མཚན་སུམ་ཅུ་རྩ་གཉིས་དང་། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དག་

གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལགས་སོ། །ཞེས་ཀྱང་ཅིའི་སླད་དུ་བསྟན་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ཇི་སྙམ་

Vol. 31 · folio 124a

དུ་སེམས། སངས་རྒྱས་ཀྱིས་བྱང་ཆུབ་ཐོབ་སྙམ་འམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། སངས་རྒྱས་ཉིད་ཀྱང་བྱང་ཆུབ་ལགས་ལ། བྱང་ཆུབ་ཉིད་ཀྱང་སངས་རྒྱས་ལགས་པས། སངས་རྒྱས་ཀྱིས་བྱང་ཆུབ་མི་འཐོབ་ལགས་སོ། །

བཀའ་སྩལ་པ། རབ་འབྱོར་གང་ཡང་ཁྱོད་འདི་སྐད་དུ་འོ་ན། བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་ཐོབ་ལགས་པའམ། གཅིག་ཏུ་མི་འགྱུར་ལགས་སམ་ཞེས་ཟེར་བ་ནི། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕ་རོལ་ཏུ་ཕྱིན་པ་

དྲུག་ཡོངས་སུ་རྫོགས་པར་བྱས་ཤིང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡོངས་སུ་རྫོགས་པར་བྱས་ནས། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་

ཡོངས་སུ་རྫོགས་པར་བྱས་ཏེ། རྡོ་རྗེ་ལྟ་བུའི་ཏིང་ངེ་འཛིན་དང་། སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་

སངས་རྒྱས་ཕྱིན་ཅད། དེ་བཞིན་གཤེགས་པ་ཞེས་བརྗོད་དེ། ཆོས་ཐམས་ཅད་མཁྱེན་ཅིང་། ཆོས་ཐམས་ཅད་གཟིགས་པས་ན། དེའི་ཕྱིར་ཐམས་ཅད་མཁྱེན་པ་ཞེས་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་

ལྡན་འདས་གལ་ཏེ་ཆོས་ཐམས་ཅད་རང་བཞིན་གྱིས་དབེན་པ་ལགས་ན། བཅོམ་ལྡན་འདས་འོ་ན་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པར་བགྱིད་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་

འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དང་པོ་བསྐྱེད་པ་ནས་བཟུང་སྟེ། བདག་དང་གཞན་གྱི་ལུས་ཀྱི་གནས་ངན་ལེན་དང་། ངག་གི་གནས་ངན་ལེན་དང་། ཡིད་ཀྱི་གནས་ངན་ལེན་ཡོངས་སུ་སྦྱོང་བར་བྱེད་ཅིང་

Vol. 31 · folio 124b

ཡོངས་སུ་དག་པའི་ཆོས་དེ་དག་གིས་སངས་རྒྱས་ཀྱི་ཞིང་ཡོངས་སུ་དག་པར་བྱེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོའི་ལུས་

ཀྱི་གནས་ངན་ལེན་ནི་གང་ལགས། ངག་གི་གནས་ངན་ལེན་ནི་གང་ལགས། ཡིད་ཀྱི་གནས་ངན་ལེན་ནི་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་ལུས་ཀྱི་ལས་མི་དགེ་

བ་འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ངག་གི་ལས་མི་དགེ་བ་བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་པར་སྨྲ་བ་དང་། ཡིད་ཀྱི་ལས་མི་དགེ་བ་བརྣབ་སེམས་དང་། གནོད་

སེམས་དང་ལོག་པར་ལྟ་བ་གང་ཡིན་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ལུས་ཀྱི་གནས་ངན་ལེན་ཡིན་ནོ། །དེ་ནི་ངག་གི་གནས་ངན་ལེན་ཡིན་ནོ། །དེ་ནི་ཡིད་ཀྱི་གནས་ངན་ལེན་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདག་དང་གཞན་གྱི་ལུས་

དང་། ངག་དང་ཡིད་ཀྱི་གནས་ངན་ལེན་དེ་དག་ཡོངས་སུ་སྦྱོང་ཞིང་སངས་རྒྱས་ཀྱི་ཞིང་ཡོངས་སུ་དག་པར་བྱེད་དོ། །རབ་འབྱོར་གཞན་ཡང་སེར་སྣའི་སེམས་གང་ཡིན་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡིད་ཀྱི་གནས་ངན་ལེན་ཡིན་ནོ། །འཆལ་བའི་ཚུལ་ཁྲིམས་ཀྱི་

སེམས་དང་། འཁྲུག་པའི་སེམས་དང་། ལེ་ལོའི་སེམས་དང་། རྣམ་པར་གཡེང་བའི་སེམས་དང་། མཉམ་པར་མ་གཞག་པའི་སེམས་དང་། འཆལ་པའི་ཤེས་རབ་ཀྱི་སེམས་གང་ཡིན་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཡིད་ཀྱི་གནས་ངན་ལེན་ཡིན་ནོ། །

རབ་འབྱོར་གཞན་ཡང་ཚུལ་ཁྲིམས་ཡོངས་སུ་མ་དག་པ་གང་ཡིན་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཡིད་ཀྱི་གནས་ངན་ལེན་ཡིན་ནོ། །རབ་འབྱོར་གཞན་ཡང་དྲན་པ་ཉེ་བར་གཞག་པ་བཞི་དང་བྲལ་བ་གང་ཡིན་པ་དེ་ཡང་བྱང་ཆུབ་སེམས་དཔའ་སེམས་དཔའ་

Vol. 31 · folio 125a

ཆེན་པོའི་ཡིད་ཀྱི་གནས་ངན་ལེན་ཡིན་ནོ། །དེ་བཞིན་དུ་ཡང་དག་པའི་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། སྟོང་

པ་ཉིད་ཀྱི་ཏིང་ངེ་འཛིན་དང་། མཚན་མ་མེད་པའི་ཏིང་ངེ་འཛིན་དང་། སྨོན་པ་མེད་པའི་ཏིང་ངེ་འཛིན་དང་བྲལ་བ་གང་ཡིན་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཡིད་ཀྱི་གནས་ངན་ལེན་ཡིན་ནོ། །རབ་འབྱོར་གཞན་ཡང་རྒྱུན་དུ་ཞུགས་པའི་འབྲས་བུ་མངོན་

སུམ་དུ་བྱེད་ཅིང་དེ་ལ་དགའ་བ་གང་ཡིན་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཡིད་ཀྱི་གནས་ངན་ལེན་ཡིན་ནོ། །དགྲ་བཅོམ་པ་ཉིད་དང་། རང་བྱང་ཆུབ་ཀྱི་བར་དག་མངོན་སུམ་དུ་བྱེད་ཅིང་། དེ་ལ་དགའ་བ་གང་ཡིན་པ་དེ་ཡང་བྱང་ཆུབ་སེམས་དཔའ་སེམས་

དཔའ་ཆེན་པོའི་ཡིད་ཀྱི་གནས་ངན་ལེན་ཡིན་ནོ། །རབ་འབྱོར་གཞན་ཡང་གཟུགས་སུ་འདུ་ཤེས་པ་ནི་གནས་ངན་ལེན་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པར་འདུ་ཤེས་པ་ནི་གནས་ངན་ལེན་ཡིན་ནོ། །མིག་ཏུ་འདུ་ཤེས་པ་ནི་

གནས་ངན་ལེན་ཡིན་ནོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་འདུ་ཤེས་པ་ནི་གནས་ངན་ལེན་ཡིན་ནོ། །བུད་མེད་དུ་འདུ་ཤེས་པ་ནི་གནས་ངན་ལེན་ཡིན་ནོ། །སྐྱེས་པར་འདུ་ཤེས་པ་ནི་གནས་ངན་ལེན་ཡིན་ནོ། །འདོད་པའི་ཁམས་སུ་འདུ་ཤེས་པ་དང་།

གཟུགས་ཀྱི་ཁམས་སུ་འདུ་ཤེས་པ་དང་། གཟུགས་མེད་པའི་ཁམས་སུ་འདུ་ཤེས་པ་དང་། དགེ་བར་འདུ་ཤེས་པ་དང་། མི་དགེ་བར་འདུ་ཤེས་པ་དང་། འདུས་བྱས་སུ་འདུ་ཤེས་པ་དང་། འདུས་མ་བྱས་སུ་འདུ་ཤེས་པ་གང་ཡིན་པ་དེ་ཡང་། རབ་འབྱོར་བྱང་ཆུབ་སེམས་

དཔའ་སེམས་དཔའ་ཆེན་པོའི་ལུས་ཀྱི་གནས་ངན་ལེན་ཡིན་ནོ། །ངག་གི་གནས་ངན་ལེན་ཡིན་ནོ། །ཡིད་ཀྱི་གནས་ངན་ལེན་ཡིན་ཏེ། དེས་གནས་ངན་ལེན་དེ་དག་ཐམས་ཅད་རྣམ་པར་སྤངས་ནས་བདག་ཀྱང་སྦྱིན་པ་སྦྱིན་པར་བྱེད་ཅིང་། གཞན་དག་ཀྱང་སྦྱིན་པ་ཡང་

Vol. 31 · folio 125b

དག་པར་འཛིན་དུ་འཇུག་སྟེ། དེ་ཟས་འདོད་པ་རྣམས་ལ་ནི་ཟས་སྦྱིན་པར་བྱེད། སྐོམ་འདོད་པ་རྣམས་ལ་ནི་སྐོམ་སྦྱིན་པར་བྱེད། ཡོ་བྱད་འདོད་པ་རྣམས་ལ་ནི་ཡོ་བྱད་གང་ཡང་རུང་བའི་བར་དག་སྦྱིན་པར་བྱེད་ལ། གཞན་དག་ཀྱང་ཡོ་བྱད་དེ་དག་ཉིད་ལ་རབ་ཏུ་འགོད་ཅིང་། ཡང་

དག་པར་འཛིན་དུ་འཇུག་སྟེ། དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ནས་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་ཡོངས་སུ་སྔོ་བར་བྱེད་དེ། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ལ་

ཡང་དེ་བཞིན་དུ་སྦྱར་བར་བྱའོ། །དེ་བདག་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དཀོན་མཆོག་གསུམ་གྱི་ཕྱིར་སྦྱིན་པ་སྦྱིན་པར་བྱེད་ལ། གཞན་དག་ཀྱང་དེ་ཉིད་ལ་ཡང་དག་པར་འཛིན་དུ་འཇུག་ཅིང་། དགེ་

བའི་རྩ་བ་འདིས་སངས་རྒྱས་ཀྱི་ཞིང་། རིན་པོ་ཆེ་སྣ་བདུན་ལས་གྲུབ་པར་གྱུར་ཅིག་ཅེས་དེ་ལྟར་ཡོངས་སུ་སྔོ་བར་བྱེད་དོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་རྣམས་སམ། སངས་རྒྱས་ཀྱི་མཆོད་རྟེན་གྱི་དྲུང་དུ་ལྷའི་སིལ་སྙན་དག་

དཀྲོལ་བར་བྱེད་ཅིང་། དེ་འདི་ལྟར་དགེ་བའི་རྩ་བ་འདིས་བདག་གི་སངས་རྒྱས་ཀྱི་ཞིང་དུ་ལྷའི་སིལ་སྙན་གྱི་སྒྲ་ཡིད་དུ་འོང་བ་དག་རྟག་ཏུ་རྒྱུན་མི་འཆད་པར་འབྱུང་བར་གྱུར་ཅིག་ཅེས་ཡོངས་སུ་སྔོ་བར་བྱེད་དོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་

ཆེན་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྷའི་སྤོས་ཀྱིས་ཡོངས་སུ་བཀང་སྟེ། སངས་རྒྱས་རྣམས་སམ། སངས་རྒྱས་ཀྱི་མཆོད་རྟེན་དག་ལ་འབུལ་ཞིང་དེ་འདི་ལྟར་དགེ་བའི་རྩ་བ་འདིས་བདག་གི་སངས་རྒྱས་ཀྱི་ཞིང་དེར་ལྷའི་སྤོས་དག་འབྱུང་བར་གྱུར་

ཅིག་ཅེས་ཡོངས་སུ་སྔོ་བར་བྱེད་དོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་རྣམས་དང་། དེ་བཞིན་གཤེགས་པའི་ཉན་ཐོས་རྣམས་ལ་ཞལ་ཟས་རོ་བརྒྱ་དང་ལྡན་པ་དག་འབུལ་ཞིང་དེ་འདི་ལྟར་དགེ་བའི་རྩ་བ་འདིས་

Vol. 31 · folio 126a

བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེའི་ཉན་ཐོས་རྣམས་ཀྱི་ཁ་ཟས་རོ་བརྒྱ་དང་ལྡན་པ་དག་འབྱོར་པར་གྱུར་ཅིག་ཅེས་ཡོངས་སུ་སྔོ་བར་བྱེད་དོ། །རབ་འབྱོར་གཞན་ཡང་བྱང་

ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་རྣམས་དང་། དེ་བཞིན་གཤེགས་པའི་ཉན་ཐོས་རྣམས་དང་། དེ་བཞིན་གཤེགས་པའི་སྐུ་གཟུགས་རྣམས་དང་། དེ་བཞིན་གཤེགས་པའི་མཆོད་རྟེན་དག་ལ་ལྷའི་བྱུག་པ་དག་འབུལ་ཞིང་། དེ་འདི་ལྟར་དགེ་

བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེའི་སེམས་ཅན་རྣམས་ལྷའི་རེག་པ་ཕུན་སུམ་ཚོགས་པ་དང་ལྡན་པར་གྱུར་ཅིག་ཅེས་ཡོངས་སུ་སྔོ་བར་བྱེད་དོ། །རབ་འབྱོར་གཞན་ཡང་བྱང་

ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ་སེམས་ཏེ། ཡིད་ལ་བསམས་པ་ཙམ་ཉིད་ཀྱིས་སངས་རྒྱས་རྣམས་དང་། སངས་རྒྱས་ཀྱི་ཉན་ཐོས་རྣམས་དང་། སེམས་ཅན་ཐམས་ཅད་ལ་འདོད་པའི་ཡོན་ཏན་ལྔ་པོ་གཟུགས་དང་སྒྲ་དང་། དྲི་དང་། རོ་དང་། རེག་

བྱ་ཡིད་དུ་འོང་བ་དག་འབུལ་བར་གྱུར་ཅིག །སྙམ་དུ་སེམས་ཤིང་དེ་དག་ཕུལ་ནས་ཀྱང་། དེ་འདི་ལྟར་དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེའི་ཉན་ཐོས་ཀྱི་དགེ་འདུན་

ཐམས་ཅད་དང་། སེམས་ཅན་ཐམས་ཅད་ཀྱིས་ཡིད་ལ་བསམས་པ་ཙམ་གྱིས་འདོད་པའི་ཡོན་ཏན་ལྔ་པོ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་ཡིད་དུ་འོང་བ་དག་འབྱུང་བར་གྱུར་ཅིག་ཅེས་ཡོངས་སུ་སྔོ་བར་བྱེད་དོ། །རབ་འབྱོར་གཞན་ཡང་བྱང་ཆུབ་

སེམས་དཔའ་སེམས་དཔའ་ཆེན་པོ་བདག་དང་སེམས་ཅན་ཐམས་ཅད་ལྷན་ཅིག་འགྲོགས་ཏེ། སངས་རྒྱས་རྣམས་དང་། སངས་རྒྱས་ཀྱི་ཉན་ཐོས་རྣམས་ལ་འདོད་པའི་ཡོན་ཏན་ལྔ་པོ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་ཡིད་དུ་འོང་བའི་སྦྱིན་པ་དག་འབུལ་བར་

Vol. 31 · folio 126b

བྱེད་དོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་འདི་སྙམ་དུ་སེམས་ཏེ། འདི་ལྟར་བདག་ཀྱང་བསམ་གཏན་དང་པོ་ལ་སྙོམས་པར་འཇུག་པར་བྱའོ། །གཞན་དག་ཀྱང་བསམ་གཏན་དང་པོ་ལ་གཟུད་

པར་བྱའོ། །དེ་བཞིན་དུ་བསམ་གཏན་བཞི་པའི་བར་དག་ལ་ཡང་གཟུད་ཅིང་དགོད་པར་བྱའོ། །བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་བར་དག་ལ་དགོད་པར་བྱའོ་སྙམ་དུ་སེམས་ཤིང་།

དེ་འདི་སྙམ་དུ་དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེའི་སེམས་ཅན་ཐམས་ཅད་སྦྱིན་པ་གཉིས་དང་མི་འབྲལ་བར་གྱུར་ཅིག །བསམ་གཏན་བཞི་དང་མི་འབྲལ་བར་གྱུར་ཅིག །

ཚད་མེད་པ་བཞི་དང་མི་འབྲལ་བར་གྱུར་ཅིག །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་མི་འབྲལ་བར་གྱུར་ཅིག་ཅེས་རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པར་བྱེད་དེ། དེ་ཇི་སྲིད་དུ་བསམ་པ་དེ་དག་ཐམས་ཅད་

ཡོངས་སུ་རྫོགས་པར་མ་གྱུར་པ་དེ་སྲིད་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བྱེད་དེ། དེ་བདག་ཀྱང་དགེ་བའི་ཆོས་ཐམས་ཅད་དང་ལྡན་པ་ཡིན་ལ། སེམས་ཅན་དེ་དག་ཀྱང་དགེ་བའི་ཆོས་རྣམས་དང་ལྡན་པར་བྱེད་དོ། །དེ་

བདག་ཀྱང་གཟུགས་བཟང་བ་ཡིན་ལ། སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཡོངས་སུ་སྨིན་པར་བྱས་པ་དེ་དག་ཀྱང་གཟུགས་བཟང་བ་ཡིན་ཏེ། དེ་དག་འདི་ལྟ་སྟེ། བསོད་ནམས་ཀྱིས་ཡོངས་སུ་ཟིན་པའི་ཕྱིར་གཟུགས་བཟང་བ་དང་། བལྟ་

ན་སྡུག་པ་དང་། མཛེས་པའི་ལུས་དེ་མངོན་པར་སྒྲུབ་པར་བྱེད་དོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་སངས་རྒྱས་ཀྱི་ཞིང་ཡོངས་སུ་དག་པར་བྱེད་དེ། ཇི་ནས་ཀྱང་ངན་སོང་གསུམ་པོ་དག་ཏུ་གདགས་པ་ཡང་འབྱུང་བར་མི་འགྱུར་བ་དང་། ལྟ་བའི་

Vol. 31 · folio 127a

རྣམ་པར་གདགས་པ་ཡང་འབྱུང་བར་མི་འགྱུར་བ་དང་། འདོད་ཆགས་དང་། ཞེ་སྡང་དང་། གཏི་མུག་ཏུ་གདགས་པ་ཡང་འབྱུང་བར་མི་འགྱུར་བ་དང་། སྐྱེས་པ་དང་བུད་མེད་ཅེས་བྱ་བའི་མིང་ཡང་འབྱུང་བར་མི་འགྱུར་བ་དང་། ཐེག་པ་གཉིས་པོ་དག་གིས་

མིང་ཡང་འབྱུང་བར་མི་འགྱུར་བ་དང་། མི་རྟག་པ་དང་། སྡུག་བསྔལ་བ་དང་། བདག་ཏུ་གདགས་པ་ཡང་འབྱུང་བར་མི་འགྱུར་བ་དང་། ཡོངས་སུ་འཛིན་པར་གདགས་པ་ཡང་འབྱུང་བར་མི་འགྱུར་བ་དང་། ངར་འཛིན་པ་དང་། ང་ཡིར་འཛིན་པར་

གདགས་པ་ཡང་འབྱུང་བར་མི་འགྱུར་བ་དང་། རྗེས་སུ་ཆགས་པ་དང་། ཀུན་ནས་ལྡང་བར་གདགས་པ་ཡང་འབྱུང་བར་མི་འགྱུར་བ་དང་། ཕྱིན་ཅི་ལོག་ཏུ་གདགས་པ་ཡང་འབྱུང་བར་མི་འགྱུར་བ་དང་། འབྲས་བུ་རྣམ་པར་གཞག་པར་གདགས་པ་ཡང་འབྱུང་བར་མི་

འགྱུར་ཞིང་གཞན་དུ་ན་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་གྱི་སྒྲ་འབྱུང་བ་དང་། སེམས་ཅན་དེ་དག་འདི་ལྟར་ཕྱི་དང་ནང་གི་དངོས་པོ་རྣམས་གཏོང་འདོད་པའི་སྒྲ་འབྱུང་བར་འགྱུར་བ་དང་། ཤིང་རླུང་གིས་བསྐྱོད་པ་དག་དང་།

ཕྱི་དང་ནང་གི་ཆོས་རྣམས་ལས་འདི་ལྟ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་སྒྲ་འབྱུང་བར་འགྱུར་བ་དང་། སྐྱེ་བ་མེད་པ་དང་། འགག་པ་མེད་པའི་སྒྲ་འབྱུང་བར་འགྱུར་བ་དང་། ཆོས་དེ་དག་གི་ངོ་བོ་ཉིད་ཇི་ལྟ་བ་དེ་ལྟ་བུའི་སྒྲ་འབྱུང་བར་འགྱུར་བ་

དང་། ཆོས་ཐམས་ཅད་ཆོས་ཐམས་ཅད་ཀྱིས་སྟོང་ཞེས་བྱ་བ་དང་། ཆོས་དེ་དག་གི་ངོ་བོ་ཉིད་ཇི་ལྟ་བ་དེ་ལྟ་བུའི་སྒྲ་འབྱུང་བར་འགྱུར་བ་དང་། དེ་བཞིན་གཤེགས་པ་རྣམས་བྱུང་ཡང་རུང་། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། ཆོས་ཐམས་ཅད་ནི་ཆོས་

ཐམས་ཅད་ཀྱིས་སྟོང་པའོ། །གང་སྟོང་པ་དེ་ལ་ནི་མཚན་མ་མེད་དོ། །གང་མཚན་མ་མེད་པ་དེ་ལ་ནི་སྨོན་པ་མེད་དོ་ཞེས་བྱ་བར་ཆོས་སྟོན་པའི་སྒྲ་འབྱུང་བར་འགྱུར་བ་དང་། ཉིན་པར་རམ། མཚན་མོའམ། འགྲེང་ངམ། འདུག་གམ། ཉལ་ལམ་འཆག་ཀྱང་རུང་སྟེ། དེ་ལྟ་

Vol. 31 · folio 127b

བུའི་ཆོས་བསྟན་པའི་སྒྲ་འབྱུང་བར་འགྱུར་བ་དེ་ལྟར་སངས་རྒྱས་ཀྱི་ཞིང་ཡོངས་སུ་དག་པར་བྱེད་དོ། །སངས་རྒྱས་ཀྱི་ཞིང་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་

རྒྱས་དེ་ལ་ནི་ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་བཅོམ་ལྡན་འདས་གང་ཇི་སྙེད་པ་དེ་དག་ཐམས་ཅད་ཀྱང་བསྔགས་པ་རྗོད་པར་འགྱུར་རོ། །སེམས་ཅན་གང་དག་གིས་དེ་བཞིན་གཤེགས་པའི་བསྔགས་པ་དང་། མཚན་ཐོས་པ་དེ་དག་

ཐམས་ཅད་ཀྱང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་ཆོས་བསྟན་པ་དེ་ལ་སེམས་ཅན་འགའ་ཡང་འདི་ཆོས་ཡིན་ནམ། འདི་ཆོས་མ་ཡིན་

ནོ་སྙམ་དུ་ཐེ་ཚོམ་ཟ་བར་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་ཆོས་ཉིད་གང་ཡིན་པ་དེ་ལ་ནི་ཆོས་མ་ཡིན་པ་གང་ཡང་མེད་དེ། དེ་དག་ཐམས་ཅད་ནི་ཆོས་ཡིན་པའི་ཕྱིར་རོ། །དེ་ལ་སེམས་ཅན་གང་དག་མི་དགེ་བའི་རྩ་བས་ཟིན་ཅིང་། སངས་རྒྱས་

རྣམས་དང་། སངས་རྒྱས་ཀྱི་ཉན་ཐོས་རྣམས་ལ་དགེ་བའི་རྩ་བ་མ་བསྐྱེད་ལ། མི་དགེ་བའི་གྲོགས་པོས་ཡོངས་སུ་ཟིན་པ་བདག་ཏུ་ལྟ་བ་ཀུན་ཏུ་འཛིན་པ་དང་། ལྟ་བར་གྱུར་པ་ཐམས་ཅད་ཀྱི་བར་དག་ཀུན་ཏུ་འཛིན་པ་དང་། རྟག་པ་དང་ཆད་པའི་མཐའ་དག་ལ་གནས་པ་

དང་། ལོག་པར་འཛིན་པས་ཟིན་པ་དང་། ཡང་དག་པར་རྫོགས་པའི་སངས་རྒྱས་མ་ཡིན་པ་ལ་ནི་ཡང་དག་པར་རྫོགས་པའི་སངས་རྒྱས་སུ་འདུ་ཤེས་ལ། ཡང་དག་པར་རྫོགས་པའི་སངས་རྒྱས་ལ་ནི་ཡང་དག་པར་རྫོགས་པའི་སངས་རྒྱས་མ་ཡིན་པར་འདུ་ཤེས་པ་དེ་དག་ནི་ཆོས་མ་

ཡིན་པ་ལ་ནི་ཆོས་སུ་སྨྲ། ཆོས་ལ་ནི་ཆོས་མ་ཡིན་པར་སྨྲ་ཞིང་དེ་དག་ཆོས་སྤོང་བར་བྱེད་དོ། །དེ་དག་གིས་ཆོས་སྤངས་ནས་ལུས་ཞིག་སྟེ། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་བར་འགྱུར་ཏེ། དེ་ལ་སངས་རྒྱས་བཅོམ་ལྡན་འདས་དེ་དག་བླ་

Vol. 31 · folio 128a

ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཁོར་བར་གཏོགས་པའི་སེམས་ཅན་དེ་དག་ངན་སོང་དང་ལྟ་བར་གྱུར་པ་དེ་དག་ལས་གྲོལ་བར་མཛད་དོ། །བཀྲོལ་ནས་ཀྱང་ངེས་པའི་ཕུང་པོ་ལ་འགོད་པར་

མཛད་དེ། དེར་བཀོད་པ་དེ་དག་ཕྱིན་ཅད་ངན་སོང་རྣམས་སུ་སྐྱེ་བར་མི་འགྱུར་རོ། །རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པར་བྱེད་དེ། ཡོངས་སུ་དག་པའི་སེམས་ཅན་རྣམས་ནི་འཇིག་རྟེན་པའི་ཆོས་རྣམས་སམ། འཇིག་

རྟེན་ལས་འདས་པའི་ཆོས་རྣམས་སམ། ཟག་པ་དང་བཅས་པའི་ཆོས་རྣམས་སམ། ཟག་པ་མེད་པའི་ཆོས་རྣམས་སམ། འདུས་བྱས་ཀྱི་ཆོས་རྣམས་སམ། འདུས་མ་བྱས་ཀྱི་ཆོས་གང་ལ་ཡང་གནས་པར་མི་འགྱུར་ཏེ། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་

ཆུབ་ཀྱི་བར་དུ་ངེས་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། སངས་རྒྱས་ཀྱི་ཞིང་ཡོངས་སུ་དག་པ་བསྟན་པའི་ལེའུ་ཞེས་བྱ་སྟེ། བདུན་ཅུ་རྩ་བདུན་པའོ།། །།ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ། བམ་པོ་ལྔ་བཅུ་རྩ་

ལྔ་པ། དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ངེས་པ་ཞེས་བགྱིའམ། འོན་ཏེ་མ་ངེས་པ་ཞེས་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་

བྱང་ཆུབ་སེམས་དཔའ་སེམས་དཔའ་ཆེན་པོ་ནི་ངེས་པ་ཡིན་ཏེ། མ་ངེས་པ་མ་ཡིན་ནོ། །གསོལ་པ། བཅོམ་ལྡན་འདས་ཉན་ཐོས་ཀྱི་ཕུང་པོའམ། རང་སངས་རྒྱས་ཀྱི་ཕུང་པོའམ། ཕུང་པོ་གང་དུ་ངེས་པ་ལགས། བཀའ་སྩལ་པ། རབ་འབྱོར་བྱང་ཆུབ་སེམས་དཔའ་

སེམས་དཔའ་ཆེན་པོ་ནི་ཉན་ཐོས་ཀྱི་ཕུང་པོའམ། རང་སངས་རྒྱས་ཀྱི་ཕུང་པོར་ངེས་པ་མ་ཡིན་གྱི། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སངས་རྒྱས་ཀྱི་ཕུང་པོར་ངེས་པ་ཡིན་ནོ། །གསོལ་པ། བཅོམ་ལྡན་འདས་ཇི་བྱང་ཆུབ་སེམས་དཔའ་སེམས་དཔའ་ཆེན་

Vol. 31 · folio 128b

པོ་སེམས་དང་པོ་བསྐྱེད་པ་ངེས་པ་ལགས་སམ། འོན་ཏེ་ཕྱིར་མི་ལྡོག་པའམ། འོན་ཏེ་སྲིད་པ་ཐ་མ་པ་ངེས་པ་ཞེས་བགྱི་ལགས། བཀའ་སྩལ་པ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དང་པོ་བསྐྱེད་པ་ཡང་ངེས་པ་ཡིན་ནོ། །ཕྱིར་མི་ལྡོག་པ་ཡང་ངེས་

པ་ཡིན་ནོ། །སྲིད་པ་ཐ་མ་པ་ཡང་ངེས་པ་ཡིན་ནོ། །གསོལ་པ། བཅོམ་ལྡན་འདས་ཇི་བྱང་ཆུབ་སེམས་དཔའ་སེམས་དཔའ་ཆེན་པོ་ངེས་པར་གྱུར་པ་ངན་སོང་རྣམས་སུ་སྐྱེ་བར་འགྱུར་ལགས་སམ། བཀའ་སྩལ་པ། རབ་འབྱོར་དེ་ནི་མ་ཡིན་ཏེ། རབ་འབྱོར་བྱང་ཆུབ་

སེམས་དཔའ་སེམས་དཔའ་ཆེན་པོ་ངེས་པར་གྱུར་པ་ནི་ངན་སོང་རྣམས་སུ་སྐྱེ་བར་མི་འགྱུར་རོ། །རབ་འབྱོར་འདི་ཇི་སྙམ་དུ་སེམས། བརྒྱད་པའམ། རྒྱུན་ཏུ་ཞུགས་པའམ། ལན་ཅིག་ཕྱིར་འོང་བའམ། ཕྱིར་མི་འོང་བའམ། དགྲ་བཅོམ་པའམ། རང་སངས་རྒྱས་ངན་སོང་རྣམས་

སུ་སྐྱེ་བར་འགྱུར་སྙམ་འམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ངེས་པར་གྱུར་པ་ཡང་ངན་སོང་རྣམས་སུ་སྐྱེ་བར་མི་འགྱུར་ཏེ། རབ་འབྱོར་བྱང་ཆུབ་སེམས་དཔའ་སེམས་

དཔའ་ཆེན་པོ་གང་སེམས་དང་པོ་བསྐྱེད་པ་ནས་བཟུང་སྟེ། སྦྱིན་པ་སྦྱིན་པ་དང་། ཚུལ་ཁྲིམས་སྲུང་བ་དང་། བཟོད་པ་སྒྲུབ་པ་དང་། བརྩོན་འགྲུས་རྩོམ་པ་དང་། བསམ་གཏན་ལ་སྙོམས་པར་འཇུག་པ་དང་། ཤེས་རབ་སྒོམ་པ་དང་། སེམས་ཅན་ཐམས་ཅད་ལ་བྱམས་པ་དང་།

སྙིང་རྗེ་དང་། དགའ་བ་དང་། བཏང་སྙོམས་སྒོམ་ཞིང་། མི་དགེ་བའི་ཆོས་ཐམས་ཅད་སྤོང་བའི་དོན་དུ་གནས་པ་དེ་ངན་སོང་རྣམས་སུ་སྐྱེ་བར་འགྱུར་བ་དེ་ནི་གནས་མེད་དོ། །ལྷ་ཚེ་རིངས་པོ་རྣམས་ཀྱི་ནང་དུ་སྐྱེ་བར་འགྱུར་བ་དེ་ནི་གནས་མེད་དོ། །གང་ན་དགེ་བའི་ཆོས་རྣམས་མི་སྤྱོད་

པ་དང་། ལུག་ལྟར་ལྐུགས་པར་འགྱུར་བའི་ལུས་རྣམས་སུ་སྐྱེ་བར་འགྱུར་བ་དེ་ནི་གནས་མེད་དོ། །ཆོམ་རྐུན་པ་དང་། ཀླ་ཀློ་དང་། ཡུལ་མཐའ་འཁོབ་དག་ཏུ་སྐྱེ་བར་འགྱུར་བ་དེ་ནི་གནས་མེད་དོ། །ལོག་པར་ལྟ་བའི་ཁྱིམ་དག་ཏུ་སྐྱེ་བར་འགྱུར་བ་དེ་ནི་གནས་མེད་དོ། །གང་ན་སངས་

Vol. 31 · folio 129a

རྒྱས་ཀྱི་སྒྲ་མེད་པ་དང་། ཆོས་ཀྱི་སྒྲ་མེད་པ་དང་། དགེ་འདུན་གྱི་སྒྲ་མེད་པ་དེ་ལྟ་བུར་སྐྱེ་བར་འགྱུར་བ་དེ་ནི་གནས་མེད་དོ། །བྱེད་པ་མེད་པའི་ལྟ་བ་རྣམས་ལ་འདུན་པར་འགྱུར་བ་དེ་ནི་གནས་མེད་དོ། །རབ་འབྱོར་ཡང་བྱང་ཆུབ་སེམས་དཔའ་སེམས་དཔའ་ཆེན་

པོ་སེམས་དང་པོ་བསྐྱེད་པ་ནས་བཟུང་སྟེ། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཞུགས་པ་མི་དགེ་བ་བཅུའི་ལས་ཀྱི་ལམ་ལ་སྤྱོད་པར་འགྱུར་བ་དེ་ནི་གནས་མེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་

རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ངེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་ལྟ་བུ་དང་ལྡན་པ་ཡང་འདི་ལྟ་སྟེ། མི་འཐུན་པའི་གནས་རྣམས་སུ་སྐྱེ་བར་མི་འགྱུར་བ་ལགས་ན། གང་དེ་བཞིན་གཤེགས་པ་ཉིད་ཀྱིས་

དུད་འགྲོའི་འགྲོ་བར་སྐྱེས་པའི་རབས་བསྟན་ན། དེའི་ཚེ་དགེ་བའི་རྩ་བ་དེ་དག་གང་དུ་མཆིས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་

པོ་ནི་མི་དགེ་བའི་ལས་ཀྱིས་དུད་འགྲོའི་འགྲོ་བར་སྐྱེ་བ་མ་ཡིན་མོད་ཀྱི། ལུས་གང་དང་གང་གིས་སེམས་ཅན་རྣམས་ཀྱི་དོན་དུ་འགྱུར་བ་དེ་ལྟ་བུའི་ལུས་ཐབས་ལ་མཁས་པས་བསམས་བཞིན་དུ་སེམས་ཅན་རྣམས་ཀྱི་དོན་དུ་ཡོངས་སུ་འཛིན་པར་བྱེད་དོ། །རབ་འབྱོར་ཐབས་ལ་མཁས་པ་

གང་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་དུད་འགྲོའི་སྐྱེ་གནས་སུ་སྐྱེས་ཤིང་། གང་དག་དེ་གསད་པའི་ཕྱིར་རྟུལ་བར་བྱེད་ན། དེ་དག་བླ་ན་མེད་པའི་བཟོད་པ་ཡང་དག་པར་འཛིན་དུ་འཇུག་པ་དང་། འདུལ་ཞིང་འགོད་པར་བྱེད་དེ། དེ་སེམས་ཅན་དེ་དག་ཉིད་ཀྱི་དོན་དུ་

བདག་གི་ལུས་ཡོངས་སུ་གཏོང་ཞིང་། སེམས་ཅན་དེ་དག་ལ་རྣམ་པར་ཐོ་འཚམ་པ་མི་བྱེད་པ་དེ་ལྟ་བུའི་ཐབས་ལ་མཁས་པ་དགྲ་བཅོམ་པ་དག་དང་། རང་སངས་རྒྱས་དག་ལ་ཡོད་དམ། རབ་འབྱོར་རྣམ་གྲངས་དེས་ཀྱང་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་

Vol. 31 · folio 129b

ཅན་རྣམས་ཀྱི་དོན་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་སྙིང་རྗེ་ཆེན་པོ་ཡོངས་སུ་རྫོགས་པར་བྱེད་ཅིང་། དུད་འགྲོའི་སྐྱེ་གནས་སུ་སྐྱེ་བར་བྱེད་ཀྱང་། དུད་འགྲོའི་སྐྱེ་གནས་སུ་འགྲོ་བའི་ཉེས་པས་མི་གོས་པར་རིག་པར་བྱའོ། །དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་ཆོས་གང་དག་ལ་གནས་ཤིང་། དེ་ལྟ་བུའི་ལུས་ཡོངས་སུ་འཛིན་པར་བགྱིད་ལགས། དེ་སྐད་ཅེས་གསོལ་པ་དང་། བཅོམ་

ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་གང་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་རྫོགས་པར་མི་བྱ་བའི་དགེ་བའི་ཆོས་དེ་ལྟ་བུ་ཡང་གང་ཞིག་ཡོད་དེ། དགེ་བའི་ཆོས་ཐམས་ཅད་ཡོངས་སུ་རྫོགས་པ་ནི་བླ་ན་མེད་པ་

ཡང་དག་པར་རྫོགས་པའི་བྱང་ཆུབ་སྟེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་དང་པོ་བསྐྱེད་པ་ནས་བཟུང་སྟེ། བྱང་ཆུབ་ཀྱི་སྙིང་པོ་ལ་འདུག་གི་བར་དུ་ཡོངས་སུ་རྫོགས་པར་མི་བྱ་བའི་དགེ་བའི་ཆོས་གང་ཡང་མེད་དོ། །དགེ་བའི་ཆོས་དེ་དག་ཡོངས་སུ་

རྫོགས་པར་མ་བྱས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་ཏེ། དེ་ནི་གནས་མེད་དོ། །རབ་འབྱོར་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་དང་པོ་བསྐྱེད་ཕྱིན་ཅད་དགེ་བའི་ཆོས་ཐམས་ཅད་

ཡོངས་སུ་རྫོགས་པར་བྱ་བ་ལ་བསླབ་པར་བྱ་སྟེ། དེ་ལ་བསླབས་ན་རྣམ་པ་ཐམས་ཅད་མཁྱེན་པ་ཉིད་རྗེས་སུ་ཐོབ་ཅིང་བག་ཆགས་ཀྱི་མཚམས་སྦྱོར་བ་ཐམས་ཅད་སྤོང་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་

ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དཀར་པོ་དང་ལྡན་པ། འཕགས་པ་ཟག་པ་མ་མཆིས་པའི་ལས་ཀྱིས་ཇི་ལྟར་ངན་སོང་རྣམས་སམ། དུད་འགྲོའི་སྐྱེ་གནས་དག་ཏུ་སྐྱེ་བར་འགྱུར་ལགས། བཀའ་སྩལ་པ། རབ་འབྱོར་ཇི་དེ་བཞིན་གཤེགས་

Vol. 31 · folio 130a

པ་འཕགས་ཤིང་ཟག་པ་མེད་པ་མ་ཡིན་ནམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། དེ་བཞིན་གཤེགས་པ་ནི་འཕགས་ཤིང་ཟག་པ་མི་མངའ་བ་ལགས་སོ། །བཀའ་སྩལ་པ། རབ་འབྱོར་ཇི་དེ་བཞིན་

གཤེགས་པ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་སུ་མངོན་པར་སྤྲུལ་པ་མཛད་ཅིང་། དེར་མངོན་པར་སྤྲུལ་ནས་ཀྱང་། སངས་རྒྱས་ཀྱི་མཛད་པ་མི་མཛད་དམ། གསོལ་པ། བཅོམ་ལྡན་འདས་མཛད་ལགས་སོ། །བཀའ་སྩལ་པ། རབ་འབྱོར་ཇི་འོ་ན་དེ་

བཞིན་གཤེགས་པ་དུད་འགྲོའི་སྐྱེ་གནས་པར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རབ་འབྱོར་ཇི་དེ་བཞིན་གཤེགས་པས་དུད་འགྲོའི་སྐྱེ་གནས་པའི་སྡུག་བསྔལ་ཉམས་སུ་མྱོང་བར་འགྱུར་རམ། གསོལ་པ། བཅོམ་ལྡན་

འདས་དེ་ནི་མ་ལགས་སོ། །བཀའ་སྩལ་པ། རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཕགས་པའི་ཆོས་དཀར་པོ་ཟག་པ་མེད་པ་དང་ལྡན་ཡང་བསམས་བཞིན་དུ་དེ་ལྟ་བུའི་ལུས་ཡོངས་སུ་འཛིན་པར་བྱེད་ཅིང་། ལུས་དེས་ཇི་རིགས་ཇི་

ཚུལ་དུ་སེམས་ཅན་རྣམས་ཡོངས་སུ་སྨིན་པར་བྱེད་དོ། །རབ་འབྱོར་འདི་ཇི་སྙམ་དུ་སེམས། དགྲ་བཅོམ་པས་སྤྲུལ་པ་ཞིག་མངོན་པར་སྤྲུལ་ན། སྤྲུལ་པ་དེ་དགྲ་བཅོམ་པའི་ལས་བྱེད་ཅིང་། ལས་དེས་གཞན་དག་དགའ་བ་སྐྱེ་བར་འགྱུར་སྙམ་འམ། གསོལ་པ། བཅོམ་ལྡན་འདས་

དེ་དེ་ལྟ་ལགས་སོ། །བཀའ་སྩལ་པ། རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཕགས་པའི་ཆོས་དཀར་པོ་ཟག་པ་མེད་པ་དང་ལྡན་ཡང་དེ་ལྟ་བུའི་ལུས་ཡོངས་སུ་འཛིན་ཏེ། ལུས་དེས་སེམས་ཅན་རྣམས་ཀྱི་དོན་བྱེད་ཀྱང་། ལུས་དེ་ལྟ་བུ་དེས་སྡུག་བསྔལ་

བ་ཡང་མེད་ལ། སྡུག་བསྔལ་གྱི་ཚོར་བ་ཉམས་སུ་མྱོང་བར་འགྱུར་བ་ཡང་མེད་དོ། །རབ་འབྱོར་འདི་ཇི་སྙམ་དུ་སེམས། སྒྱུ་མ་མཁན་གྱིས་སྒྱུ་མའི་གླང་པོ་ཆེའི་གཟུགས་སམ། རྟའི་གཟུགས་སམ། བ་ལང་གི་གཟུགས་དག་བསྟན་ཏམ། སྲོག་ཆགས་ཀྱི་གཟུགས་རྣམ་པ་སྣ་ཚོགས་

Vol. 31 · folio 130b

གཞན་དག་བསྟན་ན། དེ་ལ་གླང་པོ་ཆེར་འགྱུར་བའམ། རྟར་འགྱུར་བའམ། བ་ལང་དུ་འགྱུར་བའམ། སྲོག་ཆགས་ཀྱི་རིགས་རྣམ་པ་སྣ་ཚོགས་གཞན་དག་ཏུ་འགྱུར་བ་ཡོད་སྙམ་འམ། གསོལ་པ། བཅོམ་ལྡན་འདས་དེ་ནི་མ་མཆིས་ལགས་སོ། །བཀའ་སྩལ་པ། རབ་འབྱོར་

དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་ཆོས་དཀར་པོ་ཟག་པ་མེད་པ་དང་ལྡན་ཡང་བསམས་བཞིན་དུ་དེ་ལྟ་བུའི་ལུས་ཉེ་བར་སྟོན་ཏེ། ལུས་དེ་དག་གིས་སེམས་ཅན་རྣམས་ཀྱི་དོན་བྱེད་ཀྱང་། སྡུག་བསྔལ་གྱི་ཚོར་བ་དེ་ལྟ་བུ་ཉམས་སུ་མྱོང་བ་མེད་དོ། །དེ་ནས་

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་འཕགས་པའི་ཡེ་ཤེས་ཟག་པ་མ་མཆིས་པ་དེ་ལྟ་བུ་དང་ལྡན་ཞིང་ལུས་གང་དང་གང་གིས་སེམས་ཅན་རྣམས་ཀྱི་དོན་བགྱིད་པར་

རྡོ་ཐོགས་པ་དེ་དང་དེ་ལྟ་བུའི་ལུས་ཡོངས་སུ་འཛིན་པར་བགྱིད་པ་ནི་ཐབས་ལ་མཁས་པ་ཆེ་བ་ལགས་སོ། །བཅོམ་ལྡན་འདས་དཀར་པོའི་ཕྱོགས་ཀྱི་ཆོས་གང་དག་ལ་གནས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་དེ་ལྟ་བུ་དག་བགྱིད་ཀྱང་ལས་དེ་དང་

དེས་གོས་པར་མི་འགྱུར་བ་ལགས། བཀའ་སྩལ་པ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ནས། ཐབས་ལ་མཁས་པ་དེ་ལྟ་བུ་དང་ལྡན་པ་ཡིན་ཏེ། ཐབས་ལ་མཁས་པ་དེ་དང་ལྡན་པས་ཤར་དང་། ལྷོ་དང་། ནུབ་

དང་། བྱང་དང་། ཕྱོགས་མཚམས་ཀྱི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཏུ་སེམས་ཅན་རྣམས་ཀྱི་དོན་བྱེད་ཀྱང་། དེས་དེ་ལ་རེག་པར་འགྱུར་བ་ཅི་ཡང་མེད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གང་རེག་པར་འགྱུར་

བའམ། གང་གིས་རེག་པར་འགྱུར་བའམ། གང་ལ་རེག་པར་འགྱུར་བའི་ཆོས་དེ་དག་ཐམས་ཅད་མི་དམིགས་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་གསུམ་པོ་དེ་དག་ཐམས་ཅད་ནི་ངོ་བོ་ཉིད་ཀྱིས་སྟོང་པས་ན། སྟོང་པ་ཉིད་ནི་སྟོང་པ་ཉིད་ལ་རེག་པར་མི་བྱེད་ལ། སྟོང་པ་

Vol. 31 · folio 131a

ཉིད་ནི་ཆོས་གང་ལ་ཡང་རེག་པར་མི་བྱེད་ཅིང་། སྟོང་པ་ཉིད་ཀྱང་རེག་པར་བྱ་བ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར་རང་བཞིན་གྱིས་སྟོང་པ་ཉིད་ལ་ནི་སྟོང་པ་ཉིད་དམིགས་སུ་མེད་པའི་ཕྱིར་རོ། །རབ་འབྱོར་དེ་ནི་མི་དམིགས་པ་སྟོང་པ་ཉིད་ཡིན་ཏེ། དེ་ལ་

གནས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །གསོལ་པ། བཅོམ་ལྡན་འདས་ཅི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ན་ལ་གནས་ཀྱི། ཆོས་གཞན་དག་

ལ་མ་ལགས་སམ། བཀའ་སྩལ་པ། རབ་འབྱོར་ཆོས་གང་ཤེས་རབ་ཀྱི་ཕ་རོལ་ཏུ་ཕྱིན་པར་མ་འདུས་པ་དེ་ཡོད་དམ། གསོལ་པ། བཅོམ་ལྡན་འདས་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ངོ་བོ་ཉིད་ཀྱིས་སྟོང་པ་ལགས་ན། ཇི་ལྟར་ཆོས་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པར་འདུས་

པ་ལགས། བཅོམ་ལྡན་འདས་སྟོང་པ་ཉིད་ལ་ནི་འདུས་པ་དང་། མ་འདུས་པའི་ཆོས་གང་ཡང་མ་མཆིས་ལགས་སོ། །བཀའ་སྩལ་པ། རབ་འབྱོར་ཆོས་ཐམས་ཅད་ནི་ཆོས་ཐམས་ཅད་ཀྱིས་སྟོང་པས། སྟོང་པ་ཉིད་དུ་ཆོས་ཐམས་ཅད་མ་འདུས་པ་མེད་དོ། །གསོལ་པ། བཅོམ་ལྡན་

འདས་ཆོས་ཐམས་ཅད་ནི་ཆོས་ཐམས་ཅད་ཀྱིས་སྟོང་པ་ལགས་སོ། །བཀའ་སྩལ་པ། རབ་འབྱོར་གལ་ཏེ་ཆོས་ཐམས་ཅད་ཆོས་ཐམས་ཅད་ཀྱིས་སྟོང་པ་ཡིན་ན། ཆོས་ཐམས་ཅད་སྟོང་པ་ཉིད་དུ་འདུས་པ་མ་ཡིན་ནམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བཀའ་

སྩལ་པ། རབ་འབྱོར་རྣམ་གྲངས་དེས་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ནས། ཐབས་ལ་མཁས་པ་དེ་ལྟ་བུ་འདི་བྱེད་པར་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །

བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ཆོས་ཐམས་ཅད་སྟོང་པ་ཉིད་ལ་གནས་ཏེ། མངོན་པར་ཤེས་པ་གང་ལ་གནས་ན། ཤར་ཕྱོགས་ཀྱི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཏུ་མཆི་ཞིང་འཇིག་

Vol. 31 · folio 131b

རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པ་དེ་དག་ལ་བསྙེན་བཀུར་བགྱིད་ཅིང་ཆོས་ཉན་པ་དང་། དེར་སངས་རྒྱས་བཅོམ་ལྡན་འདས་དེ་དག་ལས་དགེ་བའི་རྩ་བ་བསྐྲུན་པར་འགྱུར་བའི་མངོན་པར་ཤེས་པའི་ཕ་

རོལ་ཏུ་ཕྱིན་པ་མངོན་པར་སྒྲུབ་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ཤར་ཕྱོགས་ཀྱི་

འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་པོ་གང་ཡིན་པ་དེ་དག་ཐམས་ཅད་ཀྱང་ངོ་བོ་ཉིད་ཀྱིས་སྟོང་ལ། དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པའི་སངས་རྒྱས་བཅོམ་ལྡན་འདས་དེ་དག་ཀྱང་ངོ་བོ་ཉིད་ཀྱིས་སྟོང་ཞིང་། མིང་དང་བརྡར་བཏགས་པ་བཟུང་སྟེ།

བསྟན་པ་མ་གཏོགས་པར་བཏགས་པ་ཐམས་ཅད་ཀྱང་ངོ་བོ་ཉིད་ཀྱིས་སྟོང་པར་མཐོང་ངོ་། །གལ་ཏེ་འཇིག་རྟེན་གྱི་ཁམས་དེ་དག་ངོ་བོ་ཉིད་ཀྱིས་སྟོང་པ་མ་ཡིན་ལ། སངས་རྒྱས་བཅོམ་ལྡན་འདས་དེ་དག་ཀྱང་ངོ་བོ་ཉིད་ཀྱིས་སྟོང་པ་མ་ཡིན་ཞིང་། བཏགས་པའི་སྤྱོད་པ་དེ་དག་ཀྱང་ངོ་བོ་ཉིད་ཀྱིས་

སྟོང་པ་མ་ཡིན་ན་ནི། དེ་ལྟ་ན་ཉི་ཚེ་བའི་སྟོང་པ་ཉིད་དུ་འགྱུར་བ་ཞིག་ན། འདི་ལྟར་ཉི་ཚེ་བའི་སྟོང་པ་ཉིད་དམིགས་སུ་མེད་དེ། དེའི་ཕྱིར་ཆོས་ཐམས་ཅད་ནི་ཆོས་ཐམས་ཅད་ཀྱིས་སྟོང་པ་ཡིན་ཏེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པས་ཤེས་རབ་

ཀྱི་ཕ་རོལ་ཏུ་ཕྱིན་པ་ལ་སྤྱོད་པས། མངོན་པར་ཤེས་པའི་ཕ་རོལ་ཏུ་ཕྱིན་པ་མངོན་པར་སྒྲུབ་པར་བྱེད་དེ། མངོན་པར་ཤེས་པ་དེ་ལ་གནས་ནས་ལྷའི་མིག་དང་། ལྷའི་རྣ་བ་དང་། རྫུ་འཕྲུལ་གྱི་བྱ་བ་དང་། ཕ་རོལ་གྱི་སེམས་ཤེས་པ་དང་། སྔོན་གྱི་སྐྱེ་བ་རྗེས་སུ་དྲན་པ་དང་། འཆི་

འཕོ་དང་སྐྱེ་བ་ཤེས་པ་མངོན་པར་སྒྲུབ་པར་བྱེད་དོ། །མངོན་པར་ཤེས་པ་མེད་པར་ནི་བྱང་ཆུབ་སེམས་དཔའ་སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ཏེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་

Vol. 31 · folio 132a

ཆུབ་ནི་མངོན་པར་ཤེས་པའི་ཕ་རོལ་ཏུ་ཕྱིན་པ་འདིར་འདུས་པས། མངོན་པར་ཤེས་པ་དེ་དག་ཉིད་ལས་བྱང་ཆུབ་བཙལ་བར་བྱའོ། །དེ་ཚོལ་བ་ན་ལྷའི་མིག་གིས་བདག་གིས་ཀྱང་དགེ་བའི་ཆོས་ཐམས་ཅད་མཐོང་ལ་གཞན་དག་ཀྱང་དགེ་བའི་ཆོས་ཐམས་ཅད་ལ་སྦྱོར་བར་བྱེད་

ཀྱང་དགེ་བའི་ཆོས་དེ་དག་ལ་དངོས་པོར་མངོན་པར་ཞེན་པ་མེད་དོ། །དེ་ཅིའི་ཕྱིར་ཞེ་ན། འདི་ལྟར་དགེ་བའི་ཆོས་དེ་དག་ཐམས་ཅད་ནི་ངོ་བོ་ཉིད་ཀྱིས་སྟོང་པས་ན། སྟོང་པ་ཉིད་ནི་གང་ལ་ཡང་མངོན་པར་ཞེན་པ་མེད་ལ། སྟོང་པ་ཉིད་ལ་ནི་རོ་མྱང་བར་བྱ་བ་མེད་པས། དེ་ལ་མངོན་པར་ཞེན་པ་མེད་

ཅིང་རོ་མྱང་བར་བྱ་བ་མེད་པའི་ཕྱིར་རོ། །དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ལྷའི་མིག་མངོན་པར་སྒྲུབ་བོ། །ལྷའི་མིག་དེས་ཆོས་ཐམས་ཅད་ཀྱང་སྟོང་པ་ཉིད་དུ་མཐོང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཆོས་ཉིད་

དེ་ལ་གནས་ཤིང་། ལུས་གང་བསྐྱེད་པས་སེམས་ཅན་རྣམས་ལ་ཆོས་སྟོན་པར་འགྱུར་བ་དེ་ལྟ་བུའི་ལུས་སྐྱེད་པར་བྱེད་དེ། སེམས་ཅན་ནམ་སེམས་ཅན་དུ་བཏགས་པ་ཡང་དམིགས་སུ་མེད་དོ། །ཞེས་མི་དམིགས་པའི་ཚུལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་

པའི་ཕ་རོལ་ཏུ་ཕྱིན་པ་མངོན་པར་སྒྲུབ་སྟེ། མངོན་པར་ཤེས་པ་དེ་དག་གིས་མངོན་པར་ཤེས་པས་གང་དག་བྱ་བའི་ཆོས་དེ་དག་བྱེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྷའི་མིག་རྣམ་པར་དག་པ། མིའི་ལས་ཤིན་ཏུ་འདས་པས་ཤར་དང་། ལྷོ་དང་། ནུབ་དང་། བྱང་དང་ཕྱོགས་

མཚམས་རྣམས་དང་། འོག་དང་སྟེང་གི་ཕྱོགས་ཀྱི་འཇིག་རྟེན་གྱི་ཁམས་དག་ཀྱང་མཐོང་ངོ་། །དེ་རྫུ་འཕྲུལ་གྱིས་དེ་དག་ཏུ་སོང་ཞིང་སྦྱིན་པའམ། ཚུལ་ཁྲིམས་སམ། བཟོད་པའམ། བརྩོན་འགྲུས་སམ། བསམ་གཏན་ནམ། ཤེས་རབ་བམ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་

ནམ། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་སམ། ཉན་ཐོས་ཀྱི་ཆོས་རྣམས་སམ། རང་སངས་རྒྱས་ཀྱི་ཆོས་རྣམས་སམ། བྱང་ཆུབ་སེམས་དཔའི་ཆོས་རྣམས་སམ། སངས་རྒྱས་ཀྱི་ཆོས་རྣམས་ཀྱིས་སེམས་ཅན་རྣམས་ཀྱི་དོན་བྱེད་

Vol. 31 · folio 132b

ཅིང་། སེམས་ཅན་དེ་དག་གི་བྱ་བ་བྱེད་དོ། །དེ་ལ་སེམས་ཅན་སེར་སྣ་ཅན་གང་ཡིན་པ་དེ་དག་ལ་འདི་སྐད་དུ་ཆོས་སྟོན་ཏེ། སྦྱིན་པ་བྱིན་ཅིག །དབུལ་བ་ནི་སྡུག་བསྔལ་བ་སྟེ། དབུལ་པོས་ནི་བདག་གི་དོན་ཀྱང་བྱ་བར་མི་ནུས་ན། གཞན་གྱི་དོན་ལྟ་སྨོས་ཀྱང་ཅི་དགོས་ཏེ། དེའི་ཕྱིར་

ཁྱེད་ཅག་སྦྱིན་པ་བྱིན་ལ་བདག་ཀྱང་བདེ་བར་གྱིས་ཤིག །གཞན་ཡང་བདེ་བར་གྱིས་ཤིག །དབུལ་བས་ཟིལ་གྱིས་ནོན་ཅིང་། ཉིང་ཤ་ཉིང་གིས་ཟོས་ཏེ། ངན་སོང་གསུམ་པོ་དག་ལས་མི་ཐར་བར་གྱུར་ཏ་རེ་ཞེས་ཆོས་སྟོན་ཏོ། །སེམས་ཅན་ཚུལ་ཁྲིམས་འཆལ་པ་གང་ཡིན་པ་དེ་དག་ལ་ནི་འདི་

སྐད་དུ་ཆོས་སྟོན་ཏེ། ཀྱེ་སྐྱེས་བུ་དག་ཚུལ་ཁྲིམས་འཆལ་པ་ནི་སྡུག་བསྔལ་བ་སྟེ། ཚུལ་ཁྲིམས་འཆལ་པས་ནི་བདག་གི་དོན་ཀྱང་བྱ་བར་མི་ནུས་ན། གཞན་གྱི་དོན་ལྟ་ཅི་སྨོས་ཏེ། ཚུལ་ཁྲིམས་འཆལ་པའི་རྣམ་པར་སྨིན་པ་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་།

གཤིན་རྗེའི་འཇིག་རྟེན་ཡིན་ཏེ། དེའི་ཕྱིར་ཁྱེད་ཅག་ངན་སོང་གསུམ་པོ་དག་ཏུ་ལྟུང་ན། བདག་ཀྱང་འབྱིན་པར་མི་ནུས་ན། གཞན་དག་ལྟ་ཅི་སྨོས་ཀྱིས། དེའི་ཕྱིར་ཁྱེད་ཅག་གིས་འཆལ་པའི་ཚུལ་ཁྲིམས་ཀྱི་སེམས་འགའ་ཙམ་གྱི་གོ་སྐབས་ཀྱང་མ་དབྱེ་ཤིག །ཕྱིས་འགྱོད་པར་གྱུར་ཏ་

རེ་ཞེས་ཆོས་སྟོན་ཏོ། །སེམས་ཅན་གང་དག་ཕན་ཚུན་འཁྲུག་ཅིང་། གནོད་སེམས་སུ་བྱེད་པ་དེ་དག་ལ་ནི་འདི་སྐད་དུ་ཆོས་སྟོན་ཏེ། ཀྱེ་སྐྱེས་བུ་དག་ཁྱེད་ཅག་གཅིག་ལ་གཅིག་འཁྲུགས་པར་མ་བྱེད་ཅིག །སེམས་འཁྲུགས་པར་གྱུར་པ་ལ་ནི་དགེ་བའི་ཆོས་འགའ་ཡང་འབྱུང་བར་མི་འགྱུར་ཏེ།

དེའི་ཕྱིར་ཁྱེད་ཅག་ཕན་ཚུན་འཁྲུག་ཅིང་གནོད་སེམས་སུ་བྱེད་ན། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་ལྷུང་བའི་གནས་ཡིན་གྱིས། དེ་བས་ན་ཁྱེད་ཅག་གིས་ཁྲོ་བ་དང་། འཁྲུག་པའི་སེམས་དང་གནོད་སེམས་འགའ་ཡང་བསྐྱེད་པར་

མི་བྱ་ན། མི་དགེ་བའི་སེམས་གཞན་དག་གི་གོ་སྐབས་དབྱེ་བ་ལྟ་སྨོས་ཀྱང་ཅི་དགོས་ཞེས་ཆོས་སྟོན་ཏོ། །དེ་བཞིན་དུ་སྦྱར་ཏེ་སེམས་ཅན་ལེ་ལོ་ཅན་གང་ཡིན་པ་དེ་དག་ནི་བརྩོན་འགྲུས་ལ་སྦྱོར་བར་བྱེད་དོ། །སེམས་རྣམ་པར་གཡེངས་པ་གང་ཡིན་པ་དེ་ནི་ཏིང་ངེ་འཛིན་ལ་སྦྱོར་བར་བྱེད་དོ། །ཤེས་

Vol. 31 · folio 133a

རབ་འཆལ་པ་གང་ཡིན་པ་དེ་དག་ནི་ཤེས་རབ་ལ་སྦྱོར་བར་བྱེད་དོ། །འདོད་ཆགས་སྤྱོད་པ་གང་ཡིན་པ་དེ་དག་ནི་མི་སྡུག་པ་སྒོམ་པ་ལ་སྦྱོར་བར་བྱེད་དོ། །ལམ་ངན་པར་ཞུགས་པ་གང་ཡིན་པ་དེ་དག་ནི་ལམ་དུ་འཛུད་པར་བྱེད་དེ། ཉན་ཐོས་ཀྱི་ལམ་འམ། རང་སངས་

རྒྱས་ཀྱི་ལམ་འམ། སངས་རྒྱས་ཀྱི་ལམ་ལ་སྦྱོར་བར་བྱེད་དེ། ཁྱེད་ཅག་གང་ལ་མངོན་པར་ཞེན་པའི་ཆོས་དེ་དག་ཐམས་ཅད་ནི་ངོ་བོ་ཉིད་ཀྱིས་སྟོང་པའོ། །ངོ་བོ་ཉིད་ཀྱིས་སྟོང་པའི་ཆོས་རྣམས་ལ་ནི་མངོན་པར་ཞེན་པར་བྱ་བར་མི་ནུས་ཏེ། སྟོང་པ་ཉིད་ལ་ནི་མངོན་པར་ཞེན་པ་མེད་དོ་ཞེས་

དེ་དག་ལ་དེ་ལྟར་ཆོས་སྟོན་ཏེ། རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། མངོན་པར་ཤེས་པ་རྣམས་ལ་གནས་ཤིང་སེམས་ཅན་རྣམས་ཀྱི་དོན་བྱེད་དོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་མངོན་པར་ཤེས་

པ་རྣམས་ལ་མི་གནས་པར་སེམས་ཅན་རྣམས་ལ་ཆོས་སྟོན་པའམ། ལམ་ལོག་པར་ཞུགས་པའི་སེམས་ཅན་རྣམས་ལམ་དུ་འཛུད་པར་མི་ནུས་ཏེ། དེ་ནི་གནས་མེད་དོ། །རབ་འབྱོར་འདི་ལྟ་སྟེ་དཔེར་ན། བྱ་འདབ་མ་མེད་པས་ནི་ནམ་མཁའ་ལ་འཕུར་མི་ནུས་སོ། །རབ་འབྱོར་དེ་བཞིན་

དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་མངོན་པར་ཤེས་པ་རྣམས་ལ་མ་བརྟེན་པར་སེམས་ཅན་རྣམས་ལ་ཆོས་སྟོན་པར་མི་ནུས་སོ། །རབ་འབྱོར་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས། མངོན་པར་ཤེས་པ་རྣམས་མངོན་པར་

བསྒྲུབ་པར་བྱ་སྟེ། དེ་མངོན་པར་ཤེས་པ་མངོན་པར་བསྒྲུབས་པ་དེ་དག་གིས་སེམས་ཅན་གྱི་དོན་བྱ་བར་འདོད་པ་གང་ཡིན་པ་དེ་དག་བདེ་བླག་ཏུ་བྱེད་དོ། །དེས་ལྷའི་མིག་གིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཀྱང་མཐོང་ངོ་། །དེ་དག་ཏུ་སེམས་ཅན་གང་དག་སྐྱེས་པ་དེ་དག་ཀྱང་མཐོང་

ངོ་། །དེས་དེ་དག་མཐོང་ནས་ཀྱང་རྫུ་འཕྲུལ་གྱིས་དེ་དག་ཏུ་སོང་ནས་སེམས་ཅན་དེ་དག་གི་སེམས་སེམས་ཀྱིས་ཤེས་པར་བྱེད་དོ། །ཤེས་པར་བྱས་ནས་ཀྱང་འདི་ལྟར་སྦྱིན་པའི་གཏམ་འམ། ཚུལ་ཁྲིམས་ཀྱི་གཏམ་འམ། འཕགས་པའི་བདེན་པའི་གཏམ་འམ། ཡོངས་སུ་མྱ་ངན་ལས་འདས་

Vol. 31 · folio 133b

པའི་བར་གྱི་གཏམ་གྱིས་ཆོས་སྟོན་པར་བྱེད་དོ། །དེས་ལྷའི་རྣ་བས་མི་དང་མི་མ་ཡིན་པ་དག་གི་སྒྲ་ཡང་ཐོས་སོ། །ཤར་ཕྱོགས་ཀྱི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ན། སངས་རྒྱས་བཅོམ་ལྡན་འདས་གང་དག་ཆོས་སྟོན་པ་དེ་དག་ཀྱང་ལྷའི་རྣ་བས་ཐོས་སོ། །ཐོས་ནས་ཀྱང་

དེ་བཞིན་ཉིད་དུ་འཛིན་པར་བྱེད་དོ། །དེ་བཞིན་ཉིད་དུ་བཟུང་ནས་ཀྱང་སེམས་ཅན་རྣམས་ལ་སྦྱིན་པའི་གཏམ་འམ། མྱ་ངན་ལས་འདས་པའི་བར་དག་གི་གཏམ་གྱིས་ཆོས་སྟོན་པར་བྱེད་དོ། །དེ་སེམས་ཀྱི་རྣམ་གྲངས་ཤེས་པ་ཤིན་ཏུ་རྣམ་པར་དག་པ་དང་ལྡན་པ་ཡིན་ཏེ། དེ་སེམས་ཀྱི་རྣམ་

གྲངས་ཤེས་པ་དེས་སེམས་ཅན་རྣམས་ཀྱི་སེམས་ཤེས་པར་བྱས་ཤིང་། དེ་དག་ལ་འདི་ལྟར་སྦྱིན་པའི་གཏམ་འམ། ཡོངས་སུ་མྱ་ངན་ལས་འདས་པའི་བར་གྱི་གཏམ་དག་གིས་ཆོས་སྟོན་པར་བྱེད་དོ། །དེ་བདག་དང་གཞན་དག་གི་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། དེ་སྔོན་གྱི་གནས་

རྗེས་སུ་དྲན་པའི་ཤེས་པ་དེས་འདི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་འདི་ཞེས་བྱ་བ་ཉན་ཐོས་ཀྱི་དགེ་འདུན་དང་བཅས་པ་འདི་སྙེད་ཅིག་བྱུང་ངོ་ཞེས་བྱ་བ་ཡང་རབ་ཏུ་ཤེས་སོ། །དེ་ན་སེམས་ཅན་གང་དག་སྔོན་གྱི་གནས་རྗེས་སུ་དྲན་པ་ལ་མོས་པ་དེ་

དག་ལ་ཡང་འདི་ལྟར་སྦྱིན་པའི་གཏམ་འམ། ཡོངས་སུ་མྱ་ངན་ལས་འདས་པའི་བར་གྱི་གཏམ་དག་གིས་ཆོས་སྟོན་པར་བྱེད་དོ། །དེ་རྫུ་འཕྲུལ་གྱིས་འཇིག་རྟེན་གྱི་ཁམས་རྣམ་པ་དུ་མར་སོང་ནས་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བྱེད་ཅིང་། དེར་སངས་རྒྱས་བཅོམ་ལྡན་

འདས་དེ་དག་ལས་དགེ་བའི་རྩ་བ་སྐྱེད་པར་བྱེད་དོ། །དགེ་བའི་རྩ་བ་བསྐྱེད་ནས་ཀྱང་འཇིག་རྟེན་གྱི་ཁམས་དེ་ཉིད་དུ་ཕྱིར་འོང་བར་བྱེད་དོ། །དེ་ཟག་པ་ཟད་པ་ཤེས་པ་ཤིན་ཏུ་རྣམ་པར་དག་པ་དང་ལྡན་པ་ཡིན་ཏེ། དེ་ཟག་པ་ཟད་པ་མངོན་སུམ་དུ་བྱ་བའི་ཤེས་པ་ཤིན་ཏུ་རྣམ་པར་དག་པ་དེས་སེམས་ཅན་

རྣམས་ལ་འདི་ལྟར་སྦྱིན་པའི་གཏམ་འམ། ཡོངས་སུ་མྱ་ངན་ལས་འདས་པའི་བར་གྱི་གཏམ་གྱིས་ཆོས་སྟོན་པར་བྱེད་དོ། །རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས་མངོན་པར་ཤེས་པ་མངོན་པར་བསྒྲུབ་པར་བྱ་སྟེ། དེ་མངོན་པར་ཤེས་

Vol. 31 · folio 134a

པ་ཤིན་ཏུ་འདྲིས་པ་དེ་དག་གིས་ལུས་གང་དང་གང་འཛིན་པར་འདོད་པའི་ལུས་དེ་དང་དེ་ཡོངས་སུ་འཛིན་པར་བྱེད་ཀྱང་དེ་ལ་བདེ་བའམ། སྡུག་བསྔལ་བའམ། ཡིད་བདེ་བའམ། ཡིད་མི་བདེ་བ་འབྱུང་བར་མི་འགྱུར་ཏེ། རྗེས་སུ་ཆགས་པའམ། ཁོང་ཁྲོ་བར་ཡང་མི་

འགྱུར་རོ། །རབ་འབྱོར་འདི་ལྟ་སྟེ་དཔེར་ན། དེ་བཞིན་གཤེགས་པས་སྤྲུལ་པའི་སྐྱེས་བུ་ནི་བྱ་བ་ཐམས་ཅད་བྱེད་ཀྱང་། དེ་ལ་བདེ་བའམ་སྡུག་བསྔལ་བས་གོས་པར་མི་འགྱུར་རོ། །རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཏེ།

མངོན་པར་ཤེས་པས་རྣམ་པར་རྩེ་ཞིང་། ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཏུ་མོས་པ་ཇི་ལྟ་བ་བཞིན་དུ་ཆོས་སྟོན་ཀྱང་། བདེ་བའམ་སྡུག་བསྔལ་བས་གོས་པར་མི་འགྱུར་རོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་

པས། ཇི་ལྟར་མངོན་པར་ཤེས་པས་རྣམ་པར་རྩེས་ན་སངས་རྒྱས་ཀྱི་ཞིང་ཡོངས་སུ་དག་པར་འགྱུར་བ་དང་། སེམས་ཅན་རྣམས་ཡོངས་སུ་སྨིན་པར་འགྱུར་བ་དེ་ལྟར་མངོན་པར་ཤེས་པས་རྣམ་པར་རྩེ་ཞིང་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་ནི་སངས་རྒྱས་

ཀྱི་ཞིང་ཡོངས་སུ་དག་པར་མ་བྱས། སེམས་ཅན་རྣམས་ཡོངས་སུ་སྨིན་པར་མ་བྱས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །དེ་ཅིའི་ཕྱིར་ཞེ་ན། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་ཀྱི་ཡན་ལག་ཡོངས་

སུ་མ་རྫོགས་པ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མེད་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་གང་དག་ཡོངས་སུ་

རྫོགས་པར་བགྱིས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་ཀྱི་ཡན་ལག་དེ་དག་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་

Vol. 31 · folio 134b

ཅེས་བཀའ་སྩལ་ཏོ། །རབ་འབྱོར་དགེ་བའི་ཆོས་ཐམས་ཅད་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་ཀྱི་ཡན་ལག་ཡིན་ནོ། །གསོལ་པ། བཅོམ་ལྡན་འདས་དགེ་བའི་ཆོས་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་

འགྱུར་བའི་དགེ་བའི་ཆོས་དེ་དག་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་སེམས་དང་པོ་བསྐྱེད་པ་ནས་བཟུང་སྟེ། སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ཀྱང་། དེ་ལ་རྣམ་པར་མི་རྟོག་པ་གང་

ཡིན་པ་དེ་ནི་དགེ་བའི་ཆོས་ཡིན་ནོ། །ཇི་ལྟར་སྦྱིན་པ་ལ་རྣམ་པར་མི་རྟོག་ཅེ་ན། ངོ་བོ་ཉིད་སྟོང་པ་ཉིད་ཀྱི་ཕྱིར། འདི་ནི་སྦྱིན་པའོ་ཞེས་སྦྱིན་པར་རྣམ་པར་མི་རྟག་པ་དང་། འདི་ལ་སྦྱིན་པར་བྱའོ་ཞེས་བྱ་བ་དང་། བདག་གིས་སྦྱིན་པར་བྱའོ་ཞེས་གསུམ་པོ་དེ་དག་ལ་རྣམ་པར་མི་རྟོག་པ་སྟེ།

སྦྱིན་པའི་ཕ་རོལ་ཏུ་ཕྱིན་པ་དེས་བདག་ཀྱང་འཁོར་བ་ལས་སྒྲོལ་ཞིང་གཞན་ཡང་སྒྲོལ་བར་བྱེད་དོ། །རབ་འབྱོར་དགེ་བའི་ཆོས་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་ཡིན་ཏེ། ལམ་དེས་འདས་པ་དང་། མ་འོངས་

པ་དང་། ད་ལྟར་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཁོར་བ་ལས་རྒལ་ཏོ། །རྒལ་ལོ། །རྒལ་བར་འགྱུར་རོ། །དེ་བཞིན་དུ་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བསམ་གཏན་བཞི་དང་།

ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་

བརྒྱད་པ་དང་། རྣམ་པར་ཐར་པའི་སྒོ་གསུམ་དང་། སྟོང་པ་ཉིད་བཅུ་བཞི་དང་། རྣམ་པར་ཐར་པ་བརྒྱད་དང་། མཐར་གྱིས་གནས་པའི་སྙོམས་པར་འཇུག་པ་དགུ་དང་། གཟུངས་ཀྱི་སྒོ་རྣམས་དང་། ཏིང་ངེ་འཛིན་གྱི་སྒོ་རྣམས་དང་། སོ་སོ་ཡང་དག་པར་རིག་པ་རྣམས་དང་། སངས་རྒྱས་ཀྱི་

Vol. 31 · folio 135a

ཆོས་མ་འདྲེས་པ་བཅྭ་བརྒྱད་ཀྱི་བར་དག་དང་། དགེ་བའི་ཆོས་བྱང་ཆུབ་ཀྱི་ལམ་ཇི་སྙེད་པ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་རྫོགས་པར་བྱ་བ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོས་དེ་དག་ཡོངས་སུ་རྫོགས་པར་བྱས་

ནས་རྣམ་པ་ཐམས་ཅད་མཁྱེན་པ་ཉིད་རྗེས་སུ་འཐོབ་ཅིང་དེ་ཐོབ་ནས་ཆོས་ཀྱི་འཁོར་ལོ་སྐོར་བར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཐབས་ལ་མཁས་པ་བསྟན་པ་ཞེས་བྱ་བའི་ལེའུ་སྟེ། བདུན་ཅུ་རྩ་བརྒྱད་

པའོ།། །།དེ་ནས་བཅོམ་ལྡན་འདས་ལ། ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་དེ་དག་བྱང་ཆུབ་སེམས་དཔའི་ཆོས་ལགས་ན། བཅོམ་ལྡན་འདས་འོ་ན་སངས་རྒྱས་ཀྱི་ཆོས་རྣམས་ནི་གང་ལགས། བཅོམ་

ལྡན་འདས་ཀྱིས་བཀའ་སྩལ་པ། རབ་འབྱོར་ཁྱོད་གང་ཡང་འདི་སྐད་དུ་གལ་ཏེ་ཆོས་དེ་དག་བྱང་ཆུབ་སེམས་དཔའི་ཆོས་ལགས་ན། འོ་ན་སངས་རྒྱས་ཀྱི་ཆོས་རྣམས་ནི་གང་ལགས་ཞེས་ཟེར་བ་ནི། རབ་འབྱོར་བྱང་ཆུབ་སེམས་དཔའི་ཆོས་དེ་དག་ཉིད་སངས་རྒྱས་ཀྱི་ཆོས་ཀྱང་ཡིན་ཏེ། གང་

གི་ཚེ་ཆོས་དེ་དག་རྣམ་པ་ཐམས་ཅད་དུ་མངོན་པར་རྫོགས་པར་སངས་རྒྱས་ཤིང་། རྣམ་པ་ཐམས་ཅད་མཁྱེན་པ་ཉིད་ཐོབ་པའི་ཚེ། དེའི་བག་ཆགས་མཚམས་སྦྱོར་བ་ཐམས་ཅད་སྤོང་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་དག་མངོན་པར་རྫོགས་པར་འཚང་རྒྱ་བར་

བྱེད་ཀྱི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ནི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཆོས་ཐམས་ཅད་མངོན་པར་རྫོགས་པར་སངས་རྒྱས་པས། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དང་། དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ནི་ཁྱད་པར་དེ་ཡོད་དོ། །རབ་འབྱོར་འདི་ལྟ་སྟེ་དཔེར་ན། ཞུགས་པ་ཡང་གཞན་ལ་འབྲས་བུ་ལ་གནས་པ་ཡང་གཞན་མོད་ཀྱི། འོན་ཀྱང་དེ་གཉིས་ཀ་ཡང་གང་ཟག་མཆོག་མ་ཡིན་པར་མི་འགྱུར་རོ། །རབ་འབྱོར་དེ་བཞིན་དུ་

Vol. 31 · folio 135b

བྱང་ཆུབ་སེམས་དཔའ་སེམས་དཔའ་ཆེན་པོ་ནི་བར་ཆད་མེད་པའི་ལམ་ལ་གནས་པ་ཡིན་གྱི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཆོས་ཐམས་ཅད་ལ་སྒྲིབ་པ་མེད་པའི་ཡེ་ཤེས་བརྙེས་པ་སྟེ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་

དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཁྱད་པར་ནི་དེ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་རང་གི་མཚན་ཉིད་

ཀྱིས་སྟོང་པ་ལགས་ན། རང་གི་མཚན་ཉིད་ཀྱིས་སྟོང་པའི་ཆོས་རྣམས་ལ་ནི་འདི་ནི་སེམས་ཅན་དམྱལ་བའོ། །འདི་ནི་དུད་འགྲོའི་སྐྱེ་གནས་པའོ། །འདི་ནི་གཤིན་རྗེའི་འཇིག་རྟེན་པའོ། །འདི་ནི་ལྷའོ། །འདི་ནི་མིའོ། །འདི་ནི་རིགས་ཀྱི་སའོ། །འདི་ནི་བརྒྱད་པའོ། །འདི་ནི་རྒྱུན་ཏུ་ཞུགས་པའོ། །

འདི་ནི་ལན་ཅིག་ཕྱིར་འོང་བའོ། །འདི་ནི་ཕྱིར་མི་འོང་བའོ། །འདི་ནི་དགྲ་བཅོམ་པའོ། །འདི་ནི་རང་སངས་རྒྱས་སོ། །འདི་ནི་བྱང་ཆུབ་སེམས་དཔའོ། །འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལགས་སོ། །ཞེས་བགྱི་བའི་བྱེ་བྲག་དང་། ཐ་དད་དུ་བགྱི་བ་

ཇི་ལྟར་དམིགས་པར་འགྱུར་ལགས། བཅོམ་ལྡན་འདས་ཇི་ལྟར་གང་ཟག་དེ་དག་དམིགས་སུ་མ་མཆིས་པ་དེ་བཞིན་དུ་ལས་ཀྱང་དམིགས་སུ་མ་མཆིས་ལ། ཇི་ལྟར་ལས་དམིགས་སུ་མ་མཆིས་པ་དེ་བཞིན་དུ། རྣམ་པར་སྨིན་པ་ཡང་དམིགས་སུ་མ་མཆིས་ལགས་སོ། །དེ་སྐད་ཅེས་

གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། རང་གི་མཚན་ཉིད་ཀྱིས་སྟོང་པའི་ཆོས་ཐམས་ཅད་ལ་ནི་ལས་དང་ལས་ཀྱི་རྣམ་པར་སྨིན་པ་ཡང་དམིགས་སུ་

མེད་དོ། །གང་དག་གིས་ཆོས་རྣམས་རང་གི་མཚན་ཉིད་ཀྱིས་སྟོང་པར་མི་ཤེས་པ་དེ་དག་ནི་ཉེས་པར་སྤྱོད་པའམ། ལེགས་པར་སྤྱོད་པའམ། ཟག་པ་དང་བཅས་པའམ། ཟག་པ་མེད་པའི་ལས་དག་མངོན་པར་འདུ་བྱེད་དོ། །དེ་དག་ཉེས་པར་སྤྱད་པའི་ལས་ཀྱིས་ནི་ངན་སོང་གསུམ་པོ་དག་ཏུ་

Vol. 31 · folio 136a

ལྟུང་ངོ་། །ལེགས་པར་སྤྱད་པའི་ལས་ཀྱིས་ནི་ལྷ་དང་མི་རྣམས་ཀྱི་ནང་དུ་སྐྱེའོ། །དགེ་བའི་ལས་སྐྱོན་མེད་པས་ནི་གཟུགས་ཀྱི་ཁམས་དང་། གཟུགས་མེད་པའི་ཁམས་དག་ཏུ་སྐྱེའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྦྱིན་པའི་ཕ་རོལ་ཏུ་ཕྱིན་པ་ལ་

སྤྱོད་པ་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དག་ལ་སྤྱོད་ཅིང་། སྐྱོན་མེད་པའི་སྤྱོད་པས་བྱང་ཆུབ་སེམས་དཔའི་ཆོས་དེ་དག་སྐྱེད་པར་བྱེད་དོ། །དེ་དག་བསྐྱེད་ནས་ཀྱང་རྡོ་རྗེ་ལྟ་བུའི་ཏིང་ངེ་འཛིན་བྱང་ཆུབ་ཀྱི་ཡན་ལག་གི་འཁོར་དང་ལྡན་པ་ལ་སྙོམས་པར་ཞུགས་ཤིང་། བླ་ན་

མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་རྣམས་ཀྱི་དོན་བྱེད་དོ། །དོན་བྱས་པ་དེས་ཀྱང་ཆུད་ཟ་བར་མི་འགྱུར་ཏེ། ཆུད་ཟ་བར་མི་འགྱུར་བས་ཕྱིན་ཅད་འགྲོ་བ་ལྔའི་འཁོར་བར་སྐྱེ་བར་མི་

འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འགྲོ་བ་ལྔའི་འཁོར་བ་དམིགས་

ལགས་སམ། བཀའ་སྩལ་པ། རབ་འབྱོར་དེ་ནི་མ་ཡིན་ནོ། །གསོལ་པ། བཅོམ་ལྡན་འདས་ཅི་དེ་བཞིན་གཤེགས་པས་ཆོས་ནག་པོའམ། དཀར་པོའམ། དཀར་གནག་གམ། དཀར་པོ་ཡང་མ་ལགས། ནག་པོ་ཡང་མ་ལགས་པ་དག་དམིགས་ལགས་སམ། བཀའ་སྩལ་པ། རབ་

འབྱོར་དེ་ནི་མ་ཡིན་ནོ། །གསོལ་པ། བཅོམ་ལྡན་འདས་གལ་ཏེ་མ་དམིགས་ལགས་ན། འོ་ན་ཇི་ལྟར་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་གདགས་པ་མཛད། ཇི་ལྟར་ལྷ་དང་མི་རྣམས་སུ་གདགས་པ་མཛད། ཇི་ལྟར་རྒྱུན་དུ་ཞུགས་པར་

གདགས་པ་མཛད། ཇི་ལྟར་ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཉིད་དང་། རང་སངས་རྒྱས་སུ་གདགས་པ་མཛད། ཇི་ལྟར་བྱང་ཆུབ་སེམས་དཔར་གདགས་པ་མཛད། ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གདགས་པ་

Vol. 31 · folio 136b

མཛད་ལགས། བཀའ་སྩལ་པ། རབ་འབྱོར་ཅི་སེམས་ཅན་འདི་དག་གིས་ཆོས་རྣམས་རང་གི་མཚན་ཉིད་ཀྱིས་སྟོང་པར་ཤེས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རབ་འབྱོར་གལ་ཏེ་སེམས་ཅན་འདི་དག་གིས་འདི་ལྟར་ཆོས་ཐམས་ཅད་

རང་གི་མཚན་ཉིད་ཀྱིས་སྟོང་ངོ་ཞེས་བྱ་བར་ཤེས་ན་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇུག་པར་མི་འགྱུར་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཞུགས་པར་མ་གྱུར་ན་ནི། སེམས་ཅན་

རྣམས་ཀྱང་ངན་སོང་གསུམ་པོ་དག་དང་འགྲོ་བ་ལྔའི་འཁོར་བའི་བར་ལས་ཐར་བར་མི་བྱེད་པ་ཞིག་ན། རབ་འབྱོར་འདི་ལྟར་སེམས་ཅན་འདི་དག་གིས་ཆོས་ཐམས་ཅད་རང་གི་མཚན་ཉིད་ཀྱིས་སྟོང་པར་མི་ཤེས་ལ། མི་ཤེས་པས་དེ་དག་ངན་སོང་གསུམ་པོ་དག་དང་། འགྲོ་བ་ལྔའི་

བར་གྱི་འཁོར་བ་ལས་མ་ཐར་ཏེ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་སངས་རྒྱས་བཅོམ་ལྡན་འདས་དེ་དག་ལས་ཆོས་ཐམས་ཅད་རང་གི་མཚན་ཉིད་ཀྱིས་སྟོང་ཞེས་བྱ་བར་ཐོས་ནས། སེམས་ཅན་རྣམས་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་

ལ་འཇུག་གོ། །ཆོས་འདི་དག་ནི་ཇི་ལྟར་བྱིས་པ་སོ་སོའི་སྐྱེ་བོ་རྣམས་མངོན་པར་ཞེན་པར་གྱུར་པ་དེ་ལྟར་ཡོད་པ་མ་ཡིན་ན། སེམས་ཅན་འདི་དག་ནི་མེད་ཅིང་ཡོད་པ་མ་ཡིན་པའི་ཆོས་རྣམས་ལ་རང་གིས་བརྟགས་ཤིང་དམིགས་ནས། སེམས་ཅན་མེད་པ་ལ་སེམས་ཅན་དུ་འདུ་ཤེས་སོ། །

གཟུགས་མེད་པ་ལ་གཟུགས་སུ་འདུ་ཤེས་སོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མེད་པ་ལ་རྣམ་པར་ཤེས་པར་འདུ་ཤེས་ཤིང་། འདུས་བྱས་དང་འདུས་མ་བྱས་ཀྱི་ཆོས་རྣམས་ཀྱི་བར་དག་མེད་ཅིང་། ཡོད་པ་མ་ཡིན་པ་ལ་རྣམ་པར་བརྟགས་པས་

ཕྱིན་ཅི་ལོག་རྣམས་ཀྱིས་སེམས་བསླད་པར་གྱུར་པ་དག་ལུས་དང་། ངག་དང་། ཡིད་ཀྱི་ལས་མངོན་པར་འདུ་བྱེད་པས། དེ་དག་འགྲོ་བ་ལྔའི་འཁོར་བ་ལས་ཡོངས་སུ་མི་ཐར་རོ། །དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པར་དགེ་བའི་ཆོས་ཐམས་ཅད་

Vol. 31 · folio 137a

འདུས་པར་བྱས་ནས་སྤྱོད་ཅིང་བྱང་ཆུབ་སེམས་དཔའི་སྤྱད་པ་སྤྱོད་དོ། །དེ་ལ་སྤྱོད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་རྣམས་འགྲོ་བ་ལྔའི་འཁོར་བ་

ལས་ཐར་བར་བྱེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་རང་གི་མཚན་ཉིད་ཀྱིས་སྟོང་པ་ལགས་ན། བཅོམ་ལྡན་འདས་འོ་ན་ཇི་ལྟར་བྱང་ཆུབ་སེམས་དཔའ་

སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་རྣམས་འགྲོ་བ་ལྔའི་འཁོར་བ་ལས་ཡོངས་སུ་ཐར་བར་བགྱིད་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་

ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་རྣམས་ལ་འཕགས་པའི་བདེན་པ་བཞི་པོ་སྡུག་བསྔལ་བ་དང་། སྡུག་བསྔལ་ཀུན་

འབྱུང་བ་དང་། སྡུག་བསྔལ་འགོག་པ་དང་། སྡུག་བསྔལ་འགོག་པར་འགྲོ་བའི་ལམ་དག་སྟོན་ཏོ། །འཆད་དོ། །འགོད་དོ། །འཇོག་གོ། །འཕགས་པའི་བདེན་པ་བཞི་པོ་དེར་ནི་དགེ་བའི་ཆོས་བྱང་ཆུབ་ཀྱི་ཕྱོགས་གང་ཇི་སྙེད་པ་ཐམས་ཅད་འདུས་ཏེ། བྱང་ཆུབ་ཀྱི་ཕྱོགས་ཀྱི་ཆོས་དེ་དག་

གིས་ནི་དཀོན་མཆོག་གསུམ་པོ་དག་ཀྱང་རྣམ་པར་འཇོག་པར་འགྱུར་ཏེ། གསུམ་གང་ཞེ་ན། འདི་ལྟ་སྟེ། སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་གོ། །དཀོན་མཆོག་གསུམ་པོ་དེ་དག་བྱུང་བས་སེམས་ཅན་རྣམས་འགྲོ་བ་ལྔའི་འཁོར་བ་ལས་

ཡོངས་སུ་ཐར་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་སྡུག་བསྔལ་འཚལ་བས་སེམས་ཅན་རྣམས་ཡོངས་སུ་མྱ་ངན་ལས་འདའ་བར་འགྱུར་ལགས་སམ། འོན་ཏེ་སྡུག་བསྔལ་གྱིས་ཡོངས་སུ་མྱ་ངན་

Vol. 31 · folio 137b

ལས་འདའ་བར་འགྱུར་ལགས། སྡུག་བསྔལ་ཀུན་འབྱུང་བ་འཚལ་བས་ཡོངས་སུ་མྱ་ངན་ལས་འདའ་བར་འགྱུར་ལགས་སམ། འོན་ཏེ་སྡུག་བསྔལ་ཀུན་འབྱུང་བས་ཡོངས་སུ་མྱ་ངན་ལས་འདའ་བར་འགྱུར་ལགས། སྡུག་བསྔལ་འགོག་པ་འཚལ་བས་ཡོངས་སུ་མྱ་ངན་ལས་འདའ་བར་འགྱུར་

ལགས་སམ། འོན་ཏེ་སྡུག་བསྔལ་འགོག་པས་ཡོངས་སུ་མྱ་ངན་ལས་འདའ་བར་འགྱུར་ལགས། སྡུག་བསྔལ་འགོག་པར་འགྲོ་བའི་ལམ་འཚལ་བས་ཡོངས་སུ་མྱ་ངན་ལས་འདའ་བར་འགྱུར་ལགས་སམ། འོན་ཏེ་སྡུག་བསྔལ་འགོག་པར་འགྲོ་བའི་ལམ་གྱིས་ཡོངས་སུ་མྱ་ངན་ལས་འདའ་

བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་སྡུག་བསྔལ་ཤེས་པས་ཀྱང་ཡོངས་སུ་མྱ་ངན་ལས་འདའ་བར་མི་འགྱུར་ལ། སྡུག་བསྔལ་གྱིས་ཀྱང་མ་ཡིན་ནོ། །སྡུག་བསྔལ་ཀུན་

འབྱུང་བ་ཤེས་པས་ཀྱང་མ་ཡིན་ལ། སྡུག་བསྔལ་ཀུན་འབྱུང་བས་ཀྱང་མ་ཡིན་ནོ། །སྡུག་བསྔལ་འགོག་པ་ཤེས་པས་ཀྱང་མ་ཡིན་ལ། སྡུག་བསྔལ་འགོག་པས་ཀྱང་མ་ཡིན་ནོ། །སྡུག་བསྔལ་འགོག་པར་འགྲོ་བའི་ལམ་ཤེས་པས་ཀྱང་ཡོངས་སུ་མྱ་ངན་ལས་འདའ་བར་མི་འགྱུར་

ལ། སྡུག་བསྔལ་འགོག་པར་འགྲོ་བའི་ལམ་གྱིས་ཀྱང་མ་ཡིན་ཏེ། རབ་འབྱོར་འཕགས་པའི་བདེན་པ་རྣམས་ཀྱི་མཉམ་པ་ཉིད་གང་ཡིན་པ་དེས་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་ང་སྨྲའི། སྡུག་བསྔལ་ཤེས་པས་ཀྱང་ཡོངས་སུ་མྱ་ངན་ལས་འདའ་བར་མི་འགྱུར་

ལ། སྡུག་བསྔལ་གྱིས་ཀྱང་མ་ཡིན་ནོ། །སྡུག་བསྔལ་ཀུན་འབྱུང་བ་ཤེས་པས་ཀྱང་མ་ཡིན་ལ། སྡུག་བསྔལ་ཀུན་འབྱུང་བས་ཀྱང་མ་ཡིན་ནོ། །སྡུག་བསྔལ་འགོག་པ་ཤེས་པས་ཀྱང་མ་ཡིན་ལ། སྡུག་བསྔལ་འགོག་པས་ཀྱང་མ་ཡིན་ནོ། །སྡུག་བསྔལ་འགོག་པར་འགྲོ་

བའི་ལམ་ཤེས་པས་ཀྱང་མ་ཡིན་ལ། སྡུག་བསྔལ་འགོག་པར་འགྲོ་བའི་ལམ་གྱིས་ཀྱང་མ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཕགས་པའི་བདེན་པ་བཞི་པོ་དག་གི་མཉམ་

Vol. 31 · folio 138a

པ་ཉིད་དེ་གང་ལགས། བཀའ་སྩལ་པ། རབ་འབྱོར་གང་ལ་སྡུག་བསྔལ་ཡང་མེད། སྡུག་བསྔལ་ཤེས་པ་ཡང་མེད་པ་དང་། གང་ལ་ཀུན་འབྱུང་བ་ཡང་མེད། ཀུན་འབྱུང་བ་ཤེས་པ་ཡང་མེད་པ་དང་། གང་ལ་འགོག་པ་ཡང་མེད། འགོག་པ་ཤེས་པ་

ཡང་མེད་པ་དང་། གང་ལ་ལམ་ཡང་མེད། ལམ་ཤེས་པ་ཡང་མེད་པ་ཡིན་ནོ། །རབ་འབྱོར་ཡང་འཕགས་པའི་བདེན་པ་བཞི་པོ་དེ་དག་གི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཆོས་ཉིད་དང་། ཆོས་སྐྱོན་མེད་པ་ཉིད་དང་། ཆོས་

གནས་པ་ཉིད་གང་ཡིན་པ་དེ་ནི་དེ་བཞིན་གཤེགས་པ་རྣམས་བྱུང་ཡང་རུང་། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། ཆོས་ཀྱི་དབྱིངས་ཉིད་དུ་གནས་པ་ཡིན་ལ། འདི་ལྟར་ཆོས་ཀྱི་དབྱིངས་ནི་བསྙེལ་བ་མི་མངའ་བའི་ཆོས་ཉིད་དང་། ཡོངས་སུ་མི་ཉམས་པའི་ཆོས་ཉིད་དུ་འགྱུར་

བ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ཅི་ནས་ཀྱང་བདེན་པ་རྟོགས་པར་བྱ་བའི་དོན་དུ་བདེན་པ་རྟོགས་པར་བྱ་བ་ལ་སྤྱོད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་

འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་སྤྱོད་ན། བདེན་པ་རྟོགས་པའི་དོན་དུ་སྤྱོད་པ་ལགས། ཇི་ལྟར་སྤྱད་ན་ནི་བདེན་པ་རྟོགས་པར་འགྱུར་ལགས། རྟོགས་ནས་ནི་ཇི་ལྟར་དེ་བཞིན་ཉིད་དུ་སྒྲུབ་

པར་འགྱུར་ལགས། ཇི་ལྟར་བསྒྲུབས་ན་ཉན་ཐོས་ཀྱི་སར་མི་ལྟུང་ཞིང་། རང་སངས་རྒྱས་ཀྱི་སར་ཡང་མི་ལྟུང་ལ། བྱང་ཆུབ་སེམས་དཔའི་སྐྱོན་མ་མཆིས་པ་ལ་འཇུག་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་

ཏོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་གང་གི་མཐའ་མི་མཐོང་བའི་ཆོས་དེ་མེད་དོ། །གང་གི་ཚེ་མ་མཐོང་བ་དེའི་ཚེ། ཆོས་གང་ཡང་མི་དམིགས་སོ། །མི་དམིགས་པས་ཆོས་ཐམས་ཅད་སྟོང་པར་མཐོང་སྟེ། གང་དག་བདེན་པར་རྟོགས་པའམ། གང་དག་

Vol. 31 · folio 138b

བདེན་པར་མ་རྟོགས་པའི་ཆོས་དེ་དག་ཐམས་ཅད་ཀྱང་སྟོང་པར་མཐོང་ངོ་། །དེས་དེ་ལྟར་མཐོང་བས་བྱང་ཆུབ་སེམས་དཔའི་སྐྱོན་མེད་པ་ལ་ཞུགས་ཤིང་། རིགས་ཀྱི་ས་ལ་གནས་པ་ཡིན་ནོ། །བྱང་ཆུབ་སེམས་དཔའ་དེ་རིགས་ཀྱི་ས་ལ་གནས་ནས་རྩེ་མོར་ལྟུང་བ་གང་གིས་ཉན་ཐོས་ཀྱི་ས་

འམ། རང་སངས་རྒྱས་ཀྱི་སར་ལྟུང་བར་འགྱུར་བའི་རྩེ་མོར་ལྟུང་བར་མི་འགྱུར་རོ། །བྱང་ཆུབ་སེམས་དཔའ་དེ་རིགས་ཀྱི་ས་དེ་ལ་གནས་ནས་བསམ་གཏན་བཞི་སྐྱེད་པར་བྱེད་དོ། །ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་སྐྱེད་པར་བྱེད་དོ། །དེ་ཞི་གནས་

ཀྱི་ས་དེ་ལ་གནས་ཤིང་ཆོས་ཐམས་ཅད་རབ་ཏུ་རྣམ་པར་འབྱེད་པར་བྱེད་དོ། །འཕགས་པའི་བདེན་པ་བཞི་ཡང་རྟོགས་པར་བྱེད་དོ། །དེ་སྡུག་བསྔལ་ཡོངས་སུ་ཤེས་ཀྱང་སྡུག་བསྔལ་ལ་དམིགས་པའི་སེམས་མི་སྐྱེད་དོ། །ཀུན་འབྱུང་བ་སྤོང་བར་བྱེད་ཀྱང་ཀུན་འབྱུང་བ་ལ་དམིགས་པའི་

སེམས་མི་སྐྱེད་དོ། །འགོག་པ་མངོན་སུམ་དུ་བྱེད་ཀྱང་འགོག་པ་མངོན་སུམ་དུ་བྱ་བ་ལ་དམིགས་པའི་སེམས་མི་སྐྱེད་དོ། །ལམ་སྒོམ་པར་བྱེད་ཀྱང་ལམ་ལ་དམིགས་པའི་སེམས་མི་སྐྱེད་དེ། གཞན་དུ་ན་བྱང་ཆུབ་ལ་གཞོལ་བའི་སེམས་ཀྱིས་ཆོས་ཐམས་ཅད་ཡང་དག་པ་ཇི་ལྟ་བ་བཞིན་

དུ་མཐོང་བར་བྱེད་དོ། །གསོལ་པ། བཅོམ་ལྡན་འདས་ཆོས་ཐམས་ཅད་ཀྱི་ཡང་དག་པ་ཇི་ལྟ་བ་བཞིན་ཞེས་བགྱི་བ་གང་ལགས། བཀའ་སྩལ་པ། རབ་འབྱོར་ཆོས་ཐམས་ཅད་སྟོང་པ་ཉིད་དུ་མཐོང་བའོ། །གསོལ་པ། བཅོམ་ལྡན་འདས་ཇི་ལྟར་ན་ཆོས་ཐམས་ཅད་སྟོང་པ་ཉིད་དུ་མཐོང་

བ་ལགས། བཀའ་སྩལ་པ། རབ་འབྱོར་འདི་ལྟར་ཆོས་ཐམས་ཅད་རང་གི་མཚན་ཉིད་ཀྱིས་སྟོང་པ་ཉིད་དུ་མཐོང་བ་སྟེ། དེས་དེ་ལྟ་བུའི་ལྷག་མཐོང་དེས་ཆོས་ཐམས་ཅད་སྟོང་པའོ་ཞེས་བྱ་བར་རྣམ་པར་ལྟ་ཡང་ངོ་བོ་ཉིད་གང་ལ་གནས་ནས། བྱང་ཆུབ་མངོན་པར་རྫོགས་པར་འཚང་

རྒྱ་བར་འགྱུར་བ་དེ་ལྟ་བུའི་ངོ་བོ་ཉིད་གང་ཡང་ཡང་དག་པར་རྗེས་སུ་མི་མཐོང་ངོ་། །གསོལ་པ། བཅོམ་ལྡན་འདས་དེ་ལྟ་ལགས་ན། དངོས་པོ་མ་མཆིས་པ་ནི་བྱང་ཆུབ་ལགས་པར་འགྱུར་ལགས་སོ། །བཀའ་སྩལ་པ། རབ་འབྱོར་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་

Vol. 31 · folio 139a

བཞིན་ཏེ། རབ་འབྱོར་དངོས་པོ་མེད་པ་ནི་བྱང་ཆུབ་སྟེ། དེ་ནི་སངས་རྒྱས་ཀྱིས་མ་མཛད། རང་སངས་རྒྱས་ཀྱིས་མ་བྱས། དགྲ་བཅོམ་པས་མ་བྱས། གང་དག་བྱང་ཆུབ་འདི་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཀྱང་མ་བྱས་ཏེ། གཞན་དུ་ན་

སེམས་ཅན་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་མི་ཤེས་མི་མཐོང་བས་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ཐབས་ལ་མཁས་པས་སེམས་ཅན་རྣམས་ལ་ཆོས་སྟོན་པར་བྱེད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་

པ་ལས། དངོས་པོ་མེད་པའི་ངོ་བོ་ཉིད་བསྟན་པའི་ལེའུ་སྟེ། བདུན་ཅུ་རྩ་དགུ་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་དངོས་པོ་མ་མཆིས་པའི་ངོ་བོ་ཉིད་ལགས་ཏེ། དེ་

དག་སངས་རྒྱས་ཀྱིས་ཀྱང་མ་མཛད། རང་སངས་རྒྱས་ཀྱིས་ཀྱང་མ་བགྱིས། དགྲ་བཅོམ་པ་དང་། ཕྱིར་མི་འོང་བ་དང་། ལན་ཅིག་ཕྱིར་འོང་བ་དང་། རྒྱུན་དུ་ཞུགས་པས་ཀྱང་མ་བགྱིས། གང་དག་བྱང་ཆུབ་འདིའི་སླད་དུ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་མ་

བགྱིས་པ་ལགས་ན། བཅོམ་ལྡན་འདས་འོ་ན་ཅིའི་སླད་དུ་ཆོས་འདི་དག་ལ་འདི་དག་ནི་སེམས་ཅན་དམྱལ་བ་པའོ། །འདི་དག་ནི་དུད་འགྲོའི་སྐྱེ་གནས་པའོ། །འདི་དག་ནི་གཤིན་རྗེའི་འཇིག་རྟེན་པའོ། །འདི་དག་ནི་ལྷའོ། །འདི་དག་ནི་མིའོ། །ལས་འདིས་ནི་སེམས་ཅན་

དམྱལ་བ་རྣམས་སུ་མཆིའོ། །འདིས་ནི་དུད་འགྲོའི་སྐྱེ་གནས་རྣམས་སུའོ། །འདིས་ནི་གཤིན་རྗེའི་འཇིག་རྟེན་རྣམས་སུའོ། །འདིས་ནི་ལྷ་རྣམས་སུའོ། །འདིས་ནི་མི་རྣམས་སུའོ། །འདིས་ནི་ཚངས་རིས་རྣམས་སུའོ། །འདིས་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་

བའི་བར་གྱི་ལྷ་རྣམས་སུ་མཆིའོ། །ལས་འདིས་ནི་རྒྱུན་དུ་ཞུགས་པ་རྣམས་སུའོ། །ལས་འདིས་ནི་རང་སངས་རྒྱས་ཀྱི་བར་དག་ཏུའོ། །ལས་འདིས་ནི་བྱང་ཆུབ་སེམས་དཔའ་རྣམས་སུའོ། །ལས་འདིས་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་

Vol. 31 · folio 139b

རྣམས་སུ་འགྱུར་རོ། །ཞེས་བགྱི་བར་ཐ་དད་དུ་དབྱེ་བའམ། རྣམ་པར་དགོད་པ་དག་མཆིས་པར་འགྱུར་ལགས། བཅོམ་ལྡན་འདས་དངོས་པོ་མ་མཆིས་པ་ལ་ནི་བགྱི་བ་གང་གིས་སེམས་ཅན་དམྱལ་བར་མཆི་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་

ནམ། མིའམ་ལྷའམ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་དག་ཏུ་མཆི་བར་འགྱུར་བའམ། རྒྱུན་དུ་ཞུགས་པའི་འབྲས་བུ་འཐོབ་པར་འགྱུར་བའམ། ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུའམ། དགྲ་བཅོམ་པ་ཉིད་

དམ། རང་བྱང་ཆུབ་འཐོབ་པར་འགྱུར་བའམ། བྱང་ཆུབ་སེམས་དཔའ་འཐོབ་པའམ། བྱང་ཆུབ་ཀྱི་ལམ་ལ་སྤྱོད་པར་འགྱུར་བའམ། རྣམ་པ་ཐམས་ཅད་མཁྱེན་པ་ཉིད་འཐོབ་པར་འགྱུར་བའམ། དེ་ཐོབ་ནས་ཀྱང་སེམས་ཅན་རྣམས་འཁོར་བ་ལས་ཡོངས་སུ་ཐར་བར་

འགྱུར་བའི་བགྱི་བ་དེ་ལྟ་བུ་གང་ཡང་མ་མཆིས་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། རབ་འབྱོར་དངོས་

པོ་མེད་པ་ལ་ནི་ལས་ཀྱང་མེད། བྱ་བ་ཡང་མེད། འབྲས་བུ་ཡང་མེད་ན། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ། འཕགས་པའི་ཆོས་རྣམས་ལ་མི་མཁས་པ་རྣམས་ཀྱིས་ཆོས་རྣམས་དངོས་པོ་མེད་པའི་ངོ་བོ་ཉིད་དུ་མི་ཤེས་ཏེ། དེ་དག་ཕྱིན་ཅི་ལོག་གིས་ཀུན་

ནས་བསླད་བའི་སེམས་ཀྱིས་ལས་རྣམ་པ་སྣ་ཚོགས་མངོན་པར་འདུ་བྱེད་པས། དེ་དག་གིས་ལུས་འདི་ལྟ་བུ་དག་མངོན་པར་འགྲུབ་སྟེ། སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། ལྷའམ་མིའམ། འདུ་ཤེས་མེད་འདུ་

ཤེས་མེད་མིན་སྐྱེ་མཆེད་དུ་ཉེ་བར་འགྲོ་བའི་བར་གྱི་ལུས་ངག་མངོན་པར་འགྲུབ་བོ། །དངོས་པོ་མེད་པ་ལ་ནི་ལས་ཀྱང་མེད། བྱ་བ་ཡང་མེད། འབྲས་བུ་ཡང་མེད་དེ། དངོས་པོ་མེད་པ་གང་ཡིན་པ་དེ་ནི་དངོས་པོ་མེད་པ་ཉིད་དོ། །རབ་འབྱོར་ཁྱོད་གང་ཡང་འདི་སྐད་དུ་དངོས་པོ་མ་

Vol. 31 · folio 140a

མཆིས་པ་ལ་ནི་བགྱི་བ་གང་གིས་རྒྱུན་དུ་ཞུགས་པའི་འབྲས་བུའི་བར་དག་འཐོབ་པར་འགྱུར་བའམ། དགྲ་བཅོམ་པ་ཉིད་དམ། རང་བྱང་ཆུབ་ཀྱི་བར་དག་འཐོབ་པར་འགྱུར་བའམ། བྱང་ཆུབ་སེམས་དཔའ་སེམས་དཔའ་ཆེན་པོ་ལམ་གྱི་རྣམ་པ་ཤེས་པ་ཉིད་ལ་

སྤྱོད་པར་འགྱུར་བའམ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་རྣམ་པ་ཐམས་ཅད་མཁྱེན་པ་ཉིད་འཐོབ་པར་འགྱུར་བའམ། དེ་ཐོབ་ནས་ཀྱང་སེམས་ཅན་རྣམས་འཁོར་བ་ལས་ཡོངས་སུ་ཐར་བར་འགྱུར་བའི་བགྱི་བ་དེ་ལྟ་བུ་གང་ཡང་མ་

མཆིས་ལགས་སོ། །ཞེས་ཟེར་བ་ནི། རབ་འབྱོར་འདི་ཇི་སྙམ་དུ་སེམས། ལམ་དངོས་པོ་མེད་པ་མ་ཡིན་ནམ། རྒྱུན་དུ་ཞུགས་པའི་འབྲས་བུ་ཡང་དངོས་པོ་མེད་པ་མ་ཡིན་ནམ། ལན་ཅིག་ཕྱིར་འོང་བའི་འབྲས་བུ་ཡང་དངོས་པོ་མེད་པ་མ་ཡིན་ནམ། ཕྱིར་མི་འོང་བའི་འབྲས་བུ་ཡང་

དངོས་པོ་མེད་པ་མ་ཡིན་ནམ། དགྲ་བཅོམ་པ་ཉིད་ཀྱང་དངོས་པོ་མེད་པ་མ་ཡིན་ནམ། རང་བྱང་ཆུབ་ཀྱང་དངོས་པོ་མེད་པ་མ་ཡིན་ནམ། ལམ་གྱི་རྣམ་པ་ཤེས་པ་ཉིད་ཀྱང་དངོས་པོ་མེད་པ་མ་ཡིན་ནམ། རྣམ་པ་ཐམས་ཅད་མཁྱེན་པ་ཉིད་ཀྱི་བར་ཡང་དངོས་པོ་མེད་པ་མ་ཡིན་

སྙམ་འམ། གསོལ་པ། བཅོམ་ལྡན་འདས་ལམ་ནི་དངོས་པོ་མ་མཆིས་པ་ལགས་སོ། །རྣམ་པ་ཐམས་ཅད་མཁྱེན་པ་ཉིད་ཀྱི་བར་དག་ཀྱང་དངོས་པོ་མ་མཆིས་པ་ལགས་སོ། །བཀའ་སྩལ་པ། རབ་འབྱོར་འོ་ན་ཅི་དངོས་པོ་མེད་པའི་ཆོས་ཀྱིས་དངོས་པོ་མེད་པའི་

ཆོས་ཐོབ་པར་འགྱུར་སྙམ་འམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རབ་འབྱོར་དེ་ལྟ་བས་ན་དངོས་པོ་མེད་པ་གང་ཡིན་པ་དང་། ལམ་གང་ཡིན་པའི་ཆོས་དེ་གཉིས་ནི་ལྡན་པ་ཡང་མ་ཡིན་མི་ལྡན་པ་ཡང་མ་ཡིན། །གཟུགས་མེད་པ།

བསྟན་དུ་མེད་པ། ཐོགས་པ་མེད་པ་སྟེ། འདི་ལྟར་མཚན་ཉིད་མེད་པར་མཚན་ཉིད་གཅིག་པའོ། །རབ་འབྱོར་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ཐབས་མཁས་པས་སེམས་ཅན་ཕྱིན་ཅི་ལོག་བཞིས་ཕུང་པོ་དག་ལ་

Vol. 31 · folio 140b

མངོན་པར་ཞེན་ཅིང་། མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་ལ་བདེ་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པ་དང་། མི་སྡུག་པ་ལ་སྡུག་པར་འདུ་ཤེས་ཤིང་། དངོས་པོ་ལ་མངོན་པར་ཞེན་པ་དག་དངོས་པོ་ལས་རྣམ་པར་འབྱེད་པར་བྱེད་དོ། །དེ་སྐད་ཅེས་

བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་བྱིས་པ་སོ་སོའི་སྐྱེ་བོ་རྣམས་གང་ལ་གནས་ནས། དངོས་པོའོ། །ཞེས་མངོན་པར་ཞེན་པར་གྱུར་པའི་དངོས་པོ་བྱུང་བའམ། འབྱུང་བ་དེ་བཞིན་ཉིད་དང་། མ་ནོར་བ་

དེ་བཞིན་ཉིད་ཅེས་བགྱི་བ་དེ་ལྟ་བུ་མཆིས་ལགས་སམ། གལ་ཏེ་མ་མཆིས་ན་ནི་ལས་གང་གིས་འགྲོ་བ་ལྔའི་འཁོར་བ་ལས་ཡོངས་སུ་ཐར་བར་མི་འགྱུར་བ་དེ་ལྟ་བུའི་ལས་ཀྱང་ཇི་ལྟར་མངོན་པར་འདུ་བགྱིད་པར་འགྱུར་ལགས། བཀའ་སྩལ་པ། རབ་འབྱོར་ཕྱིན་ཅི་ལོག་མ་གཏོགས་པར་

གང་ལ་གནས་ནས། བྱིས་པ་སོ་སོའི་སྐྱེ་བོ་རྣམས་ལས་མངོན་པར་འདུ་བྱེད་པའི་དངོས་པོ་ནི་ཐ་ན་སྐྲའི་རྩེ་མོའི་ཆ་ཤས་གཞག་པ་ཙམ་ཡང་མེད་དོ། །རབ་འབྱོར་དེའི་ཕྱིར་ཅི་ནས་ཀྱང་དོན་འདི་ཉིད་རྒྱ་ཆེར་ཡོངས་སུ་རྫོགས་པར་བྱ་བ་དང་། མཁས་པས་ཤེས་པར་བྱ་བའི་ཕྱིར་ཁྱོད་ལ་དཔེས་

བཤད་པར་བྱའོ། །རབ་འབྱོར་འདི་ཇི་སྙམ་དུ་སེམས། རྨི་ལམ་རྨི་བ་གང་ལ་གནས་ནས། འདོད་པ་ལྔའི་ཡོན་ཏན་དག་གིས་དགའ་མགུར་སྤྱོད་པར་འགྱུར་ན། རྨི་ལམ་རྨི་བའི་དངོས་པོ་དེ་ལྟ་བུ་འགའ་ཞིག་ཡོད་སྙམ་འམ། གསོལ་པ། བཅོམ་ལྡན་འདས་རྨི་ལམ་ཉིད་ཀྱང་མ་

མཆིས་ལགས་ན། རྨི་ལམ་རྨི་བ་གང་ལ་གནས་ནས། འདོད་པ་ལྔའི་ཡོན་ཏན་དག་གིས་དགའ་མགུར་སྤྱོད་པར་འགྱུར་བའི་དངོས་པོ་ལྟ་ག་ལ་མཆིས་ལགས། བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། གང་དག་རྨི་ལམ་ལྟ་བུ་མ་ཡིན་པའི་འདུས་བྱས་སམ། འདུས་མ་

བྱས་སམ། ཟག་པ་དང་བཅས་པའམ། ཟག་པ་མེད་པའི་ཆོས་འགའ་ཞིག་ཡོད་སྙམ་འམ། གསོལ་པ། བཅོམ་ལྡན་འདས་གང་དག་རྨི་ལམ་ལྟ་བུ་མ་ལགས་པའི་འདུས་བྱས་སམ། འདུས་མ་བྱས་སམ། ཟག་པ་དང་བཅས་པའམ། ཟག་པ་མ་མཆིས་པའི་ཆོས་ནི་འགའ་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words