འཕགས་པ་ཁྱེའུ་སྣང་བ་བསམ་གྱིས་མི་ཁྱབ་པས་བསྟན་པ་ཞེས་བྱ་བའི་ཆོས་ཀྱི་རྣམ་གྲངས
Sanskrit title (Tibetan script, as in the text) ཨཱརྱཱ་ཙིན་ཏྱ་པྲ་བྷཱས་ནིར་ད་ཤོ་ནཱ་མ་དྷརྨ་པརྱཱ་ཡ
No translation — Tibetan only: there is no translation we are licensed to publish (84000’s translations are no-derivatives, non-commercial)
Vol. 48 · folio 275a
༄༅༅། །རྒྱ་གར་སྐད་དུ། ཨཱརྱཱ་ཙིན་ཏྱ་པྲ་བྷཱས་ནིར་ད་ཤོ་ནཱ་མ་དྷརྨ་པརྱཱ་ཡ། བོད་སྐད་དུ། འཕགས་པ་ཁྱེའུ་སྣང་བ་བསམ་གྱིས་མི་ཁྱབ་པས་བསྟན་པ་ཞེས་བྱ་བའི་ཆོས་ཀྱི་རྣམ་གྲངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ལྔ་བརྒྱ་ཙམ་དང་། ཐབས་ཅིག་ཏུ་བཞུགས་སོ། །
དེ་ནས་བཅོམ་ལྡན་འདས་མཉན་ཡོད་ཀྱི་གྲོང་ཁྱེར་ཆེན་པོར་གནས་ནས་བཞུགས་ཏེ། རྒྱལ་པོ་དང་། བློན་པོ་ཆེན་པོ་དང་། བྲམ་ཟེ་དང་། ཁྱིམ་བདག་དང་། གྲོང་རྡལ་གྱི་མི་དང་། ནང་མི་རྣམས་ཀྱིས་བསྟི་སྟང་དུ་བྱས། བཙུན་པར་བྱས། རི་མོར་བྱས། མཆོད་པ་བྱས་ཏེ། བཅོམ་ལྡན་འདས་
ཀྱིས་བཟའ་བ་དང་། བཅའ་བ་དང་། བྱོག་པ་དང་། མྱང་བ་བཟང་པོ་མང་པོ་བརྙེས་སོ། །འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ།
སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེ་རིགས་ཕུན་སུམ་ཚོགས་པ། གདུང་ཕུན་སུམ་ཚོགས་པ། ཆོ་རིགས་ཕུན་སུམ་ཚོགས་པ། ཚུལ་ཁྲིམས་ཕུན་སུམ་ཚོགས་པ། ཏིང་ངེ་འཛིན་ཕུན་སུམ་ཚོགས་
པ། ཤེས་རབ་ཕུན་སུམ་ཚོགས་པ། རྣམ་པར་གྲོལ་བ་ཕུན་སུམ་ཚོགས་པ། རྣམ་པར་གྲོལ་བའི་ཡེ་ཤེས་གཟིགས་པ་ཕུན་སུམ་ཚོགས་པའོ་ཞེས། བཅོམ་ལྡན་འདས་ཀྱི་གྲགས་པའི་སྒྲ་དང་། སྙན་པ་འཇིག་རྟེན་དུ་རྒྱ་ཆེར་མངོན་དུ་བྱུང་བར་གྱུར་ཏོ། །བདེ་བར་གཤེགས་པ། འཇིག་
རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཆོས་ཀྱང་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ།
Vol. 48 · folio 275b
ཡོངས་སུ་དག་པ། ཡོངས་སུ་བྱང་བ། ཡང་དག་པར་རབ་ཏུ་སྟོན་ཏོ། །སྤྱན་ལྔ་དང་ཡང་ལྡན་ཏེ། ཤའི་སྤྱན་དང་། ལྷའི་སྤྱན་དང་། ཆོས་ཀྱི་སྤྱན་དང་། ཤེས་རབ་ཀྱི་སྤྱན་དང་། སངས་རྒྱས་ཀྱི་སྤྱན་དང་ལྡན་ནོ། །བཅོམ་ལྡན་འདས་ཀྱིས་གཞན་མུ་སྟེགས་ཅན་སྤྱོད་པ་པ་
དང་། ཀུན་ཏུ་རྒྱུ་དང་། གཅེར་བུ་པ་གཉེན་གྱི་བུ་རྣམས་ནི་ཚར་བཅད་དོ། །བཅོམ་ལྡན་འདས་ཀྱི་བསྟན་པ་འདི་ལྷ་དང་མི་རྣམས་ཀྱིས་ཡང་དག་པར་བཟུང་ཞིང་འབར་རོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་མནབས་ཏེ། ལྷུང་བཟེད་བསྣམས་ནས་དགེ་
སློང་གི་ཚོགས་དགེ་སློང་གི་དགེ་འདུན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ། མདུན་དུ་གཟིགས་པ་དང་། གཡས་གཡོན་དུ་གཟིགས་པ་མཛེས་པ་དང་། བསྐུམ་པ་དང་། བརྐྱང་བ་མཛེས་པ་དང་། ཆོས་གོས་སྣམ་སྦྱར་
དང་། བསིལ་ཟན་དང་། ན་བཟའི་ཚགས་དང་། ལྷུང་བཟེད་བསྣམས་པ་མཛེས་པ་དང་། སྐུ་མདོག་གསེར་གྱི་ཁ་དོག་ལྟ་བུ་དང་། འོད་འདོམ་གང་བས་མཚན་མོ་མུན་པ་མུན་ནག་གི་ནང་ན་མེའི་ཕུང་པོ་ལྟ་བུ་དང་། ཚེས་བཅོ་ལྔའི་ཟླ་བ་ཉ་བ་ལྟ་བུ་དང་། ཉི་མ་ཤར་བ་ལྟ་བུར་ཕྱོགས་སུ་སྣང་
ཞིང་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ནི་ལྡན་ཏེ། གྲོང་ཁྱེར་ཆེན་པོར་མཉན་ཡོད་དུ་བསོད་སྙོམས་ཀྱི་ཕྱིར་གཤེགས་ནས། བཅོམ་ལྡན་འདས་ཀྱིས་སྒོའི་ཐེམ་པ་ལ་ཞབས་བཞག་མ་ཐག་ཏུ། དེ་ནས་མཉན་ཡོད་ཀྱི་གྲོང་ཁྱེར་ཆེན་པོར་གྲོང་ཁྱེར་དུ་གཤེགས་པ་ན། ཆོ་འཕྲུལ་ངོ་མཚར་རྨད་
དུ་བྱུང་བ་ཆོས་རྣམ་པ་འདི་དག་བྱུང་སྟེ། སྐྱེས་བུ་དམ་པ་འདྲེན་པ་དེ་གཤེགས་པའི་ཚེ། དེར་ཆོ་འཕྲུལ་རྨད་དུ་བྱུང་བ་ཆེན་པོ་གང་དག་བྱུང་བ་དེ་དག་བརྗོད་པར་བྱ། ཤིན་ཏུ་དད་པའི་སེམས་ཀྱིས་ཉོན་ཅིག །ལོང་བ་རྣམས་ཀྱིས་ནི་མཐོང་ངོ་། །འོན་པ་རྣམས་ཀྱིས་ནི་ཐོས་སོ། །གཅེར་བུ་རྣམས་ཀྱིས་ནི་གོས་རྙེད་
དོ། །སྨྱོན་པ་རྣམས་ཀྱིས་ནི་དྲན་པ་ཐོབ་པོ། །གྲོང་ཁྱེར་གྱི་སྐྱེ་བོ་ཐམས་ཅད་ནི་ཐལ་མོ་སྦྱར་ཏེ། བདེ་བར་གཤེགས་པ་ལ་ཕྱག་འཚལ་ལོ། །རྔ་བོ་ཆེ་དང་རྫ་རྔ་དང་ཁར་རྔ་དང་། སྒྲ་སྙན་དག་ནི་མ་བརྡུངས་པར་སྒྲ་འབྱུང་ངོ་། །ངང་པ་དང་། ངུར་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། ཁུ་བྱུག་དག་
Vol. 48 · folio 276a
ཀྱང་ཡིད་དུ་འོང་བའི་སྒྲ་འབྱིན་ཏོ། །གང་དག་གཏེར་སྟོར་བ་དེ་དག་གིས་ནི་གཏེར་རྣམས་རྙེད་པར་གྱུར་ཏོ། །གསེར་དང་དངུལ་ལས་བྱས་པའི་སྣོད་རྣམས་ཀྱང་མ་དཀྲོལ་བར་སྒྲ་བྱུང་ངོ་། །ས་ཡང་རྣམ་པ་དྲུག་ཏུ་གཡོས་ཤིང་འགུལ་ཏེ། སེམས་ཅན་རྣམས་སྐྱབས་མེད་
པར་ཡང་མ་གྱུར་ཅིག །ཡིད་དང་བ་རབ་ཏུ་ཐོབ་བོ། །སྨྲ་བའི་མཆོག་དམ་པ་སངས་རྒྱས་ཀྱིས་གང་དང་གང་དུ་ཞབས་ཀྱིས་གོམ་པ་བོར་བ་དེ་དང་དེར་པད་མ་དྲི་མ་མེད་ཅིང་། ལེགས་པར་གནས་པ་རྣམས་བྱུང་ངོ་། །དུད་འགྲོའི་སྐྱེ་གནས་སུ་སོང་བའི་སེམས་ཅན་གང་དག་གིས་མཐོང་བ་དེ་དག་
ཐམས་ཅད་ཀྱང་བདེ་བ་རྙེད་ནས་མཐོ་རིས་སུ་སྐྱེ་བར་འགྱུར་རོ། །བུད་མེད་གང་དག་སྦྲུམ་པ་དེ་དག་ཀྱང་མི་བདེ་བ་མེད་པ་ཉིད་དུ་གཟུགས་བཟང་ཞིང་བལྟ་ན་སྡུག་པ་དག་བཙས་སོ། །སེམས་ཅན་རྣམས་ལ་ཡང་འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱིས་གནོད་པར་གྱུར་པ་
མེད་དོ། །རབ་ཏུ་སྡང་བའི་སེམས་མེད་པར་ཕན་ཚུན་དུ་སྨྲ་སྟེ། དཔེར་ན་ཕའམ་མ་ཞིག་བུ་གཅིག་པ་ལ་སྨྲ་བ་བཞིན་ནོ། །སྲང་གི་གཡས་གཡོན་རྣམས་ཀྱང་ལེགས་པར་བརྒྱན་པར་གྱུར་ཏོ། །ནམ་མཁའ་ལ་གནས་པའི་ལྷའི་ཚོགས་ཐམས་ཅད་ཀྱིས་ཀྱང་མེ་ཏོག་སིལ་མ་དག་མངོན་པར་གཏོར་
ཏོ། །སེམས་ཅན་སྡུག་བསྔལ་བར་གྱུར་པ་གང་ཡང་མེད་དོ། །སེམས་ཅན་གང་དག་ན་བར་གྱུར་པ་དེ་དག་ཀྱང་ནད་མེད་པར་གྱུར་ཏེ། བདེ་བ་ཐོབ་བོ། །བདེ་བར་གཤེགས་པ་གཤེགས་པ་ན་སེམས་ཅན་སོ་སོ་ནས་དེ་བཞིན་གཤེགས་པ་ཅི་བདག་ཁོ་ན་ལ་གཟིགས་སོ་སྙམ་དུ་སེམས་སོ། །སོ་སོ་
ནས་བདག་ཉིད་བསོད་སྙོམས་འབུལ་ཞིང་། མིའི་འདྲེན་པ་ལ་བརྟེན་ནས་བདག་ཁོ་ན་བསོད་སྙོམས་ཀྱི་འབྲས་བུ་ལ་སྦྱོར་རོ་སྙམ་དུ་སེམས་ཏེ། དེ་གཤེགས་པ་ཙམ་ཡང་གཞལ་བར་སླ་བ་མ་ཡིན་ནོ། །དེ་ནས་བཅོམ་ལྡན་འདས་གྲོང་ཁྱེར་ཆེན་པོ་མཉན་ཡོད་དུ་མཐར་ཆགས་སུ་བསོད་སྙོམས་བཞེས་ཤིང་
གཤེགས་ནས། བཅོམ་ལྡན་འདས་གྲོང་བར་གྱི་དབུས་ཞིག་ཏུ་གཤེགས་པ་དང་། དེའི་ཚེ་ཁང་སྟོང་ཞིག་ཏུ་ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་བོར་བར་གྱུར་ཏེ། ལག་པ་གཡས་པའི་མཛུབ་མོ་ཁར་བཅུག་ནས། འཇིབ་ཅིང་འདུག་པ་ལ་ཁྱིའམ། ཅེ་སྤྱང་གང་དག་ཁང་སྟོང་དེར་ལྷགས་པ་
Vol. 48 · folio 276b
དེ་དག་ཀྱང་ཁྱེའུ་དེ་ལ་ལྕེའི་དབང་པོས་བལྡགས་ཤིང་འདོང་སྟེ། ཇི་ལྟར་སྔོན་བྱས་པའི་དགེ་བའི་རྩ་བས་ཁྱེའུ་དེ་ལ་འཚེ་བ་མི་བྱེད་དོ། །ཁང་སྟོང་དེར་སྐྱེ་བོ་ཕལ་པོ་ཆེ་དག་ཀྱང་འཇུག་ཅིང་འབྱུང་ངོ་། །བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེ་འཇུག་ཅིང་འབྱུང་བ་གཟིགས་ནས་མཁྱེན་བཞིན་དུ་ཚེ་དང་
ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་དུ་སྐྱེ་བོ་ཕལ་པོ་ཆེ་འདི་དག་འཇུག་ཅིང་འབྱུང་བའི་ཁང་སྟོང་དེ་ན་ཅི་ཡོད་ལྟོས། དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏེ། ཁང་སྟོང་ག་ལ་བ་དེར་སོང་ནས་ཕྱིན་པ་དང་
ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་ལག་པ་གཡས་པའི་མཛུབ་མོ་ཁར་བཅུག་སྟེ། འཇིབ་ཅིང་འདུག་ལ་མིག་གཉིས་མི་འཛུམས་པར་སྐྱེ་བོའི་ཚོགས་ཐམས་ཅད་ལ་ལྟ་བ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་སྟེ་
ཕྱིན་ནས། བཅོམ་ལྡན་འདས་ལ་སྐབས་དེ་གསོལ་པ། བཅོམ་ལྡན་འདས་ཁང་སྟོང་དེ་ན་ཁྱེའུ་བོར་བ་གཟུགས་བཟང་བ། མཛེས་པ། བལྟ་ན་སྡུག་པ། རིན་པོ་ཆེའི་གཟུགས་ལྟར་མཆིས་པ། མིག་མི་འཛུམས་པར་སྐྱེ་བོའི་ཚོགས་ཐམས་ཅད་ལ་ལྟ་བ་ཞིག་མཆིས་སོ། །དེ་ནས་
བཅོམ་ལྡན་འདས་ཀྱིས་ཀྱེ་མ་ཁྱེའུ་འདི་ནི་སྔོན་གྱི་སྦྱོར་བ་ཕུན་སུམ་ཚོགས་པ་སྟེ། ངའི་ལེགས་པར་བཤད་པའི་དོན་ཤེས་པར་ནུས་ཤིང་། སྐལ་བ་ཅན་ནོ་སྙམ་ནས། ཁྱེའུ་དེ་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དགེ་བ་ལ་གཟུད་པའི་ཕྱིར། ཁང་སྟོང་ག་ལ་བ་དེར་གཤེགས་སོ། །
དེ་ནས་བཅོམ་ལྡན་འདས་དེར་གཤེགས་ནས་ཕྱོགས་གཅིག་ཏུ་བཞུགས་ཏེ། ཕྱོགས་གཅིག་ཏུ་བཞུགས་ནས། ཁྱེའུ་དེ་ལ་ཚིགས་སུ་བཅད་དེ་བཀའ་སྩལ་པ། སྦྲུལ་དང་གནོད་སྦྱིན་རྒྱུ་བ་ཡི། །དུར་ཁྲོད་འཇིགས་པ་ཆེ་འདི་ན། །བྱིས་པ་ཇི་ལྟར་མི་འཇིགས་ཤིང་། །ཁྱོད་ད་གཅིག་པུ་འདི་ན་
འདུག །དེ་ནས་ཁྱེའུ་དེས་སངས་རྒྱས་ཀྱི་མཐུ་དང་། རང་གི་སྔོན་གྱི་དགེ་བའི་རྩ་བས། བཅོམ་ལྡན་འདས་ལ་སླར་ཚིགས་སུ་བཅད་དེ་གསོལ་པ། བདག་མ་མཆིས་པའི་ཚོགས་རྣམས་ལ། །ཐུབ་པའི་དབང་ཕྱུག་སུ་ཞིག་འཇིགས། །ཐམས་ཅད་མཁྱེན་པ་སྨྲ་བའི་མཆོག །ཇི་
Vol. 48 · folio 277a
ལྟར་འདིར་མཆིས་ལས་གང་ལགས། །བདག་གཅིག་བདག་གིས་གང་མ་མཆིས། །བདག་ཀྱང་གང་གིའང་མ་ལགས་ཏེ། །བདག་ནི་སུའི་ལགས་དེ་མ་མཐོང་། །བདག་གི་སུ་ལགས་དེ་མ་མཐོང་། །བཅོམ་ལྡན་འདས་ཀྱིས་བཀའ་སྩལ་པ། །སྔོན་ཅད་
སྡིག་པ་བྱས་པའི་ལས། །དེ་ཡི་རྣམ་སྨིན་འདི་འདྲ་སྟེ། །ཁང་པ་སྟོང་པ་འདིར་བོར་ནས། །སྡུག་བསྔལ་ཚོར་བ་མྱོང་བ་ཡིན། །ཁྱེའུས་གསོལ་པ། གཽ་ཏམ་ཁང་སྟོང་སྙམ་པ་ཡི། །འདུ་ཤེས་ད་དུང་མངའ་བ་བལྟ། །བྱང་ཆུབ་སྙིང་པོར་ཁྱོད་བཞུགས་ནས། །འདུ་ཤེས་
ཡོངས་སུ་མ་མཁྱེན་ཏམ། །བཅོམ་ལྡན་འདས་ཀྱིས་བཀའ་སྩལ་པ། །ངས་ནི་འདུ་ཤེས་ཡོངས་ཤེས་ཏེ། །ང་ལ་འདུ་ཤེས་ཡོད་མ་ཡིན། །ཁྱོད་ཉིད་ལ་ནི་སྙིང་བརྩེ་བས། །ཁང་པ་སྟོང་པ་འདིར་འོངས་སོ། །ཁྱེའུས་གསོལ་པ། སེམས་ཅན་དག་ནི་བར་འགའ་ཡང་། །གང་
ཚེ་ཤིན་ཏུ་མི་དམིགས་པ། །དེ་ཚེ་ཐུགས་རྗེ་གང་དུ་བྱུང་། །ཁྱོད་ནི་སུ་ལ་ཐུགས་བརྩེ་མཛད། །བཅོམ་ལྡན་འདས་ཀྱིས་བཀའ་སྩལ་པ། །བདག་མེད་ཞི་བ་སྟོང་པ་ཉིད། །སེམས་ཅན་འདི་དག་མི་ཤེས་ཏེ། །དེ་དག་ཉིད་ལ་སྙིང་བརྩེའི་ཕྱིར། །བསོད་ནམས་སྤྱད་པ་སྤྱོད་པ་
ཡིན། །ཁྱེའུས་གསོལ་པ། སྟོང་པ་ཞི་བར་ཐུགས་ཆུད་ནས། །ཞི་བ་སྟོང་པ་ཉིད་མཁྱེན་ཀྱང་། །དེ་བཞིན་གཤེགས་པ་ད་དུང་དུ། །ཕྱིན་ཅི་ལོག་ཀྱང་མ་སྤངས་སམ། །བཅོམ་ལྡན་འདས་ཀྱིས་བཀའ་སྩལ་པ། །ཞི་བ་སྟོང་པ་ཉིད་རྟོགས་ནས། །སེམས་ཅན་ཡོངས་སུ་
སྨིན་བྱའི་ཕྱིར། །འདྲེན་པ་ཆོས་སྟོན་མཛད་པ་འདི། །སངས་རྒྱས་རྣམས་ཀྱི་ཐུགས་རྗེ་ཡིན། །ཁྱེའུས་གསོལ་པ། དེ་བཞིན་གཤེགས་པ་ད་དུང་དུ། །ཁྱོད་ཀྱིས་ཕྱིན་ཅི་ལོག་མ་སྤངས། །སེམས་ཅན་འདུ་ཤེས་མ་མཆིས་ན། །ཐུགས་རྗེ་གང་དུ་སྐྱེ་བར་འགྱུར། །བཅོམ་ལྡན་
འདས་ཀྱིས་བཀའ་སྩལ་པ། །བྱང་ཆུབ་སེམས་ནི་རབ་བཟུང་ནས། །ཡོད་མིན་སེམས་ཅན་རྣམས་ལ་ཡང་། །མི་མཆོག་རྣམས་ནི་གོ་གྱོན་པ། །རང་བྱུང་རྣམས་ཀྱིས་བྱིན་རླབས་སོ། །ཁྱེའུས་གསོལ་པ། དངོས་པོ་གང་ནའང་མི་དམིགས་པས། །གོ་ཆ་ཐམས་ཅད་བརྫུན་པ་ལགས། །
Vol. 48 · folio 277b
དངོས་པོ་མ་མཆིས་ཆོས་རྣམས་ལ། །གོ་ཆ་དམིགས་པ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། །ཆོས་རྣམས་དངོས་པོ་ཡོད་མིན་ཡང་། །སྲོག་ཆགས་རྣམས་ལ་ཆོས་སྟོན་འདི། །འཇིག་རྟེན་མགོན་པོ་སྐྱོབ་རྣམས་ཀྱི། །ཐུགས་རྗེས་རྣམ་པར་རོལ་པ་ཡིན། །
ཁྱེའུས་གསོལ་པ། ཆོས་ནི་ཡི་གེ་མ་མཆིས་ན། །བཤད་པ་གུད་ན་ག་ལ་མཆིས། །འཇིག་རྟེན་རྣམས་ལ་སླུ་མཛད་དམ། །ཆོས་མ་ལགས་པ་ཆོས་བཤད་དམ། །བཅོམ་ལྡན་འདས་ཀྱིས་བཀའ་སྩལ་པ། །ང་ནི་འཇིག་རྟེན་སླུ་མ་ཡིན། །ཆོས་མ་ཡིན་པའང་ང་མི་སྨྲ། །
ཕྱིན་ཅི་ལོག་གྱུར་སེམས་ཅན་གྱི། །ཉོན་མོངས་སེལ་བར་ང་བྱེད་དོ། །ཁྱེའུས་གསོལ་པ། ཉོན་མོངས་རྩ་བ་མ་མཆིས་ཏེ། །ནང་ངམ་ཕྱི་རོལ་རྣམས་ན་ཡང་། །དེ་དག་རྣམས་ཀྱི་གནས་མ་མཆིས། །ཉོན་མོངས་ཇི་ལྟར་རྣམ་པར་སྦྱང་། །བཅོམ་ལྡན་འདས་ཀྱིས་བཀའ་སྩལ་པ། །
ཕྱིན་ཅི་ལོག་ལས་བྱུང་བ་རྣམས། །ཡོངས་སུ་བརྟགས་ལས་སྐྱེས་པ་སྟེ། །རྟོག་པ་ཐམས་ཅད་སྤང་བའི་ཕྱིར། །སྲོག་ཆགས་རྣམས་ལ་ཆོས་སྟོན་ཏོ། །ཁྱེའུས་གསོལ་པ། རྣམ་བརྟག་མང་པོ་ཅི་འཚལ་ཏེ། །སེམས་ནི་རང་བཞིན་འོད་གསལ་ཞིང་། །དེ་ལ་ཉོན་མོངས་མི་འབྱུང་སྟེ། །
ནམས་ཀྱང་ཉོན་མོངས་དེ་མི་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །ཇི་སྐད་སྨྲས་པ་དེ་བཞིན་ཏེ། །སེམས་ནི་རྟག་ཏུ་འོད་གསལ་ཀྱང་། །བློ་བུར་ཉེ་བའི་ཉོན་མོངས་ཀྱིས། །སོ་སོའི་སྐྱེ་བོ་ཉོན་མོངས་འགྱུར། །ཁྱེའུས་གསོལ་པ། ཉོན་མོངས་དམིགས་སུ་མ་མཆིས་
ཏེ། །དེ་དག་ཕྱོགས་ན་མི་གནས་ན། །བློ་བུར་དུ་ནི་ཇི་ལྟར་འགྱུར། །དེ་ཞུས་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །དཔེར་ན་སྤྲིན་རྣམས་བར་སྣང་ལ། །སྣང་ཡང་དེ་དག་དེ་བཞིན་མིན། །ཉོན་མོངས་འབྱུང་བའང་དེ་འདྲ་སྟེ། །སྣང་ཡང་དེ་དག་
དེ་བཞིན་མིན། །ཁྱེའུས་གསོལ་པ། མ་ནོར་དེ་བཞིན་གང་ལགས་པ། །ཆོས་གནས་ཉིད་དེ་ཆོས་ཉིད་དོ། །མ་ནོར་དེ་བཞིན་ཉིད་ཆོས་ལ། །ནོར་བའི་དེ་བཞིན་ཉིད་མི་དམིགས། །བཅོམ་ལྡན་འདས་ཀྱིས་བཀའ་སྩལ་པ། །བྱིས་པ་འདུ་ཤེས་ལྡན་རྣམས་ཀྱིས། །ལོག་པར་རྣམ་པར་
Vol. 48 · folio 278a
གང་བརྟགས་པ། །བློ་དེ་རྟོགས་པར་བྱ་བའི་ཕྱིར། །དེ་བཞིན་གཤེགས་རྣམས་འབྱུང་བ་ཡིན། །ཁྱེའུས་གསོལ་པ། སྐྱེ་མ་མཆིས་པས་རབ་ཕྱེ་བ། །རྫོགས་པའི་སངས་རྒྱས་གང་ཞིག་བྱུང་། །སྐྱེ་བ་མ་མཆིས་ཆོས་རྣམས་ལ། །སངས་རྒྱས་འབྱུང་བ་
འཐད་མ་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྐྱེ་བ་མེད་པར་སྐྱེ་བ་ནི། །སངས་རྒྱས་འབྱུང་བ་རབ་ཏུ་བསྟན། །ཀུན་རྫོབ་ཐ་སྙད་བཏགས་པ་སྟེ། །དམ་པའི་དོན་དུ་ཡོད་མ་ཡིན། །ཁྱེའུས་གསོལ་པ། ད་དུང་ཁྱོད་ལ་དོན་དམ་དང་། །ཀུན་རྫོབ་འདུ་ཤེས་
གཉིས་མངའ་སྟེ། །ཐེག་པ་གཅིག་ལམ་འགལ་འགྱུར་བ། །གཽ་ཏམ་ཁྱོད་ཀྱིས་བཀའ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། །ང་ནི་ལམ་དང་འགལ་མི་བྱེད། །འགལ་བ་མེད་པར་ང་གནས་ཏེ། །མི་འཐུན་སེམས་ཅན་སྡུམས་ཀྱང་བྱེད། །ཁྱེའུ་ཁྱོད་དེ་
ལྟར་ཤེས་པར་གྱིས། །ཁྱེའུས་གསོལ་པ། སེམས་ཅན་དེ་ནི་མི་དམིགས་ན། །གཽ་ཏ་མ་ཁྱོད་ཅི་སྡུམས་མཛད། །ཆོས་རྣམས་སྔོན་གྱི་མཐའ་ལ་གཟིགས། །གང་གི་ཀུན་ནས་ཉོན་མོངས་སྐྱེ། །བཅོམ་ལྡན་འདས་ཀྱིས་བཀའ་སྩལ་པ། །སྔོན་གྱི་མཐའ་དང་ཕྱི་མཐའ་
དང་། །དེ་བཞིན་ད་ལྟར་བྱུང་བ་དང་། །བྱང་ཆུབ་དམ་པ་རྟོགས་གྱུར་ནས། །སྲོག་ཆགས་རྣམས་ལ་ཆོས་སྟོན་ཏོ། །ཁྱེའུས་གསོལ་པ། རྫོགས་སངས་རྒྱས་ཞེས་སྒྲོགས་མཛད་ཅིང་། །ཉིད་ཀྱི་མཁྱེན་པ་སྒྲོགས་མཛད་དེ། །འདི་ལྟར་བདག་ཏུ་སྒྲོ་འདོགས་པས། །ཁྱོད་ནི་ལྷག་
པའི་ང་རྒྱལ་ཆེ། །བཅོམ་ལྡན་འདས་ཀྱིས་བཀའ་སྩལ་པ། །ང་ནི་བདག་ལ་མི་སྟོད་དེ། །དེ་བཞིན་གཞན་ལ་བརྙས་མི་བྱེད། །དེ་བཞིན་ཉིད་ནི་རབ་ཏུ་སྟོན། །དེས་ན་དེ་བཞིན་གཤེགས་ཞེས་བྱ། །ཁྱེའུས་གསོལ་པ། བརྗོད་དུ་མ་མཆིས་དེ་བཞིན་ཉིད། །དེ་ན་དེ་ཉིད་མ་མཆིས་
ན། །སྒྲ་སྐད་མ་མཆིས་སྒྲ་བཤད་པ། །མཁྱེན་བཞིན་ལོག་པར་བཀའ་མ་སྩལ། །བཅོམ་ལྡན་འདས་ཀྱིས་བཀའ་སྩལ་པ། །ཆོས་དེ་ཐམས་ཅད་ལོག་པ་སྟེ། །དེ་བཞིན་ཉིད་ལས་བྱུང་བ་ཡིན། །དེ་བཞིན་ཉིད་ནི་རྟོགས་པས་ན། །ང་ལ་སྐྱོན་མེད་ཡོན་ཏན་མེད། །ཁྱེའུས་གསོལ་པ།
Vol. 48 · folio 278b
དེ་བཞིན་གཤེགས་པའི་མཐུ་ཡིན་ན། །བདག་གི་སྤོབས་པ་འདི་སྐྱེས་ཏེ། །འདི་འདྲའི་ལན་དག་གང་གསོལ་པ། །རྫོགས་སངས་རྒྱས་ལ་བཟོད་པར་གསོལ། །དེ་ནས་བཅོམ་ལྡན་འདས་ཀྱིས་ཕྱག་གཡས་པ་གསེར་གྱི་ཁ་དོག་ཅན་ཆོས་གོས་ཀྱི་ནང་ནས་ཕྱུང་སྟེ། ཁྱེའུ་དེའི་
ལོགས་སུ་བརྐྱང་བ་དང་། དེ་ནས་ཁྱེའུ་དེས་བཅོམ་ལྡན་འདས་ཀྱི་ཕྱག་གི་སོར་མོ་ལ་བཟུང་སྟེ་ལངས་སོ། །དེ་ནས་བཅོམ་ལྡན་འདས་ཀྱིས་ཁྱེའུ་དེ་ཁང་སྟོང་ནས་བསྣམས་ཏེ། སྲང་དུ་བཞག་པ་དང་། དེ་ན་སྐྱེ་བོ་ཕལ་པོ་ཆེ་དག་འདི་ལྟར་ཁྱེའུ་འདི་འདི་ཁོ་ན་ལྟར་ཉོན་མོངས་པར་གྱུར་ཀྱང་།
བདག་ཉིད་ཆེན་པོའི་ཆོས་འདི་ལྟ་བུའི་ལན་འདེབས་པ་ནི་སངས་རྒྱས་བཅོམ་ལྡན་འདས་རྣམས་ངོ་མཚར་ཏོ་སྙམ་ནས། ངོ་མཚར་དུ་གྱུར་ཏེ། བཅོམ་ལྡན་འདས་ལ་རབ་ཏུ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་ཁྱེའུ་དེ་ལ་འདི་སྐད་ཅེས་བཀའ་སྩལ་ཏོ། །ཁྱེའུ་ཁྱོད་ཀྱི་ལས་
ཀྱི་སྒྲིབ་པ་ཟད་ཀྱིས། སྔོན་གྱི་དགེ་བའི་རྩ་བ་དྲན་པར་གྱིས་ལ་སྐྱེ་བོའི་ཚོགས་ཆེན་པོ་ལ་ཡང་ཤེས་པར་གྱིས་ཏེ། རྫུ་འཕྲུལ་གྱི་ཆོ་འཕྲུལ་ཆེན་པོ་སྟོན་ཅིག །དེ་ནས་ཁྱེའུ་དེ་ས་ལས་མི་བདུན་སྲིད་ཙམ་དུ་འཕགས་ནས་ལུས་ལས་འོད་ཕྱུང་སྟེ། འོད་དེས་མཉན་ཡོད་ཐམས་ཅད་དང་། འཛམ་
བུའི་གླིང་ཐམས་ཅད་སྣང་བ་ཆེན་པོ་རྒྱས་པར་གྱུར་ཏོ། །འོད་དེས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དེ་མ་ཡིན་པ་ལྷ་བརྒྱ་སྟོང་མང་པོ་གཞན་དག་ལ་ཡང་ཡང་དག་པར་བསྐུལ་བར་གྱུར་ནས། སྐད་ཅིག་ཐང་ཅིག་ཡུད་ཙམ་དེ་ལ་བཅོམ་ལྡན་འདས་ག་ལ་བ་དེར་
སོང་སྟེ། ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལྷའི་མེ་ཏོག་དག་གིས་བཅོམ་ལྡན་འདས་ལ་གཏོར་ནས། བཅོམ་ལྡན་འདས་ཀྱེ་མ་བྱང་ཆུབ་སེམས་དཔའ་འདི་ནི་སྣང་བ་བསམ་གྱིས་མི་ཁྱབ་པ་སྟེ། འདི་ལྟར་སངས་རྒྱས་ཀྱི་ཞིང་འདི་འོད་ཀྱིས་སྣང་
བར་བགྱིས་ནས། སེམས་ཅན་དཔག་ཏུ་མ་མཆིས་པ་དག་གི་དོན་བགྱིས་སོ། །ཞེས་ཆེད་དུ་རྗོད་པ་དེ་སྐད་ཆེད་དུ་བརྗོད་དེ། དེ་ལྟར་ཁྱེའུ་དེའི་མིང་སྣང་བ་བསམ་གྱིས་མི་ཁྱབ་པ། སྣང་བ་བསམ་གྱིས་མི་ཁྱབ་པ་ཞེས་བྱ་བར་བཏགས་སོ། །བཅོམ་ལྡན་འདས་ཀྱིས་ཀྱང་ཁྱེའུ་འདི་སྣང་བ་
Vol. 48 · folio 279a
བསམ་གྱིས་མི་ཁྱབ་པ་ཞེས་བྱ་བར་གྱུར་ཅིག་ཅེས། ཁྱེའུ་དེའི་མིང་ལ་རྗེས་སུ་ཡི་རང་བ་མཛད་དོ། །དེ་ནས་ཁྱེའུ་སྣང་བ་བསམ་གྱིས་མི་ཁྱབ་པ་བར་སྣང་དེ་ལས་བབས་ཏེ། ས་ལ་འདུག་པ་དང་། དེ་སངས་རྒྱས་ཀྱི་མཐུ་དང་། རང་གི་སྔོན་གྱི་དགེ་བའི་རྩ་
བས་འདི་ལྟ་སྟེ་དཔེར་ན། གྲོགས་པོ་ལོ་བརྒྱད་ལོན་པའི་ལུས་གཟུགས་ཡོངས་སུ་གྲུབ་པར་གྱུར་པ་དེ་འདྲ་བར་འདུག་གོ། །དེ་ནས་ལྷའི་དབང་པོ་བརྒྱ་བྱིན་གྱིས་ཁྱེའུ་དེ་ལ་ལྷའི་རས་བཅོས་བུ་ཟུང་ཅིག་བྱིན་ཏེ། ཀྱེ་ཁྱེའུ་ང་ལ་སྙིང་བརྩེ་བའི་ཕྱིར་རས་བཅོས་བུའི་ཟུང་འདི་གྱོན་ལ་གཅེར་བུར་མ་
འདུག་ཤིག །དེ་ནས་ཁྱེའུ་སྣང་བ་བསམ་གྱིས་མི་ཁྱབ་པས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ་བྱང་ཆུབ་སེམས་དཔའ་རྣམས་ནི་གོས་ཀྱི་རྒྱན་བགོས་པས་མཛེས་པ་མ་ཡིན་གྱི། བྱང་ཆུབ་སེམས་དཔའ་རྣམས་ནི་ཆོས་ཀྱི་རྒྱན་ཐོགས་ན་མཛེས་སོ། །ཀཽ་ཤི་ཀ་
དེ་ལྟ་མོད་ཀྱི་འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གོས་ཀྱི་རྒྱན་གང་དག་ཡིན་པ་དེ་དག་ཉོན་ཅིག །བྱང་ཆུབ་ཀྱི་སེམས་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། བྱང་ཆུབ་ཀྱི་སྙིང་པོར་བརྒྱན་པར་འགྱུར་རོ། །ངོ་ཚ་ཤེས་པ་དང་ཁྲེལ་ཡོད་པའི་རྒྱན་ནི་བྱང་ཆུབ་
སེམས་དཔའ་རྣམས་ཀྱི་གོས་ཀྱི་རྒྱན་ཏེ། སེམས་ཅན་ཐམས་ཅད་མངོན་དུ་འཛིན་པར་འགྱུར་རོ། །དམ་བཅས་པ་བརྟེན་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། ཤེས་རབ་ཡོངས་སུ་རྫོགས་པར་འགྱུར་རོ། །བསམ་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་
རྒྱན་ཏེ། སྒྱུ་དང་གཡོ་སེལ་བར་འགྱུར་རོ། །སྦྱོར་བ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །ལྷག་པའི་བསམ་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། ཐམས་ཅད་ལས་ཁྱད་པར་དུ་འགྲོ་བར་འགྱུར་
རོ། །ང་རྒྱལ་མེད་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། ཡེ་ཤེས་ཡོངས་སུ་རྫོགས་པར་འགྱུར་རོ། །ཆོས་དོན་དུ་གཉེར་བ་དང་། ཆོས་འདོད་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། ཤེས་རབ་ཡོངས་སུ་རྫོགས་པར་འགྱུར་རོ། །སློབ་དཔོན་གྱི་དཔེ་མཁྱུད་
Vol. 48 · folio 279b
མེད་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། ཆགས་པ་མེད་པའི་ཡེ་ཤེས་ཡོངས་སུ་རྫོགས་པར་འགྱུར་རོ། །ནོར་ཐམས་ཅད་ཡོངས་སུ་གཏོང་བ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། མཚན་དང་དཔེ་བྱད་བཟང་པོ་ཡོངས་སུ་རྫོགས་པར་འགྱུར་རོ། །ཚུལ་
ཁྲིམས་ཡོངས་སུ་དག་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། སྨོན་ལམ་ཡོངས་སུ་རྫོགས་པར་འགྱུར་རོ། །བཟོད་པ་དང་དེས་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། ཚངས་པའི་དབྱངས་ཀྱི་ང་རོ་དང་སྒྲ་སྐད་ལྟ་བུའི་ཚིག་ཏུ་འགྱུར་རོ། །དམ་བཅས་པ་བརྟན་ཞིང་
སེམས་མི་ཞུམ་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། བྱ་བ་ཐམས་ཅད་ཡོངས་སུ་རྫོགས་པར་འགྱུར་རོ། །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐོབ་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། མངོན་པར་ཤེས་པ་
ཆེན་པོའི་ཡེ་ཤེས་ཡོངས་སུ་རྫོགས་པར་འགྱུར་རོ། །ཚིག་རབ་ཏུ་དབྱེ་བ་ཤེས་པའི་ཤེས་རབ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། བག་ལ་ཉལ་བ་དང་ལྟ་བར་སྨྲ་བ་དང་། ཀུན་ནས་ལྡང་བ་ཐམས་ཅད་རྣམ་པར་སེལ་བར་འགྱུར་རོ། །སྙིང་རྗེ་ཆེན་པོ་ནི་བྱང་ཆུབ་སེམས་དཔའ་
རྣམས་ཀྱི་གོས་ཀྱི་རྒྱན་ཏེ། འཁོར་བ་ན་ཡོངས་སུ་མི་སྐྱོ་བར་འགྱུར་རོ། །སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། བདག་དང་གཞན་གྱི་དོན་ལ་སྐྱོ་བ་མེད་པར་འགྱུར་རོ། །ཟང་ཟིང་མེད་པར་ཆོས་སྟོན་པ་ནི་བྱང་ཆུབ་སེམས་དཔའ་
རྣམས་ཀྱི་གོས་ཀྱི་རྒྱན་ཏེ། ཤེས་རབ་ཀྱིས་བདག་དང་གཞན་སྒྲོལ་བར་འགྱུར་རོ། །ཆོས་སྒྲུབ་པ་ནི་བྱང་ཆུབ་སེམས་དཔའ་རྣམས་ཀྱི་གོས་ཀྱི་རྒྱན་ཏེ། ཉོན་མོངས་པ་ཐམས་ཅད་སྤོང་བར་འགྱུར་རོ། །ཀཽ་ཤི་ཀ་རྣམ་གྲངས་འདིས་འདི་ལྟར་བྱང་ཆུབ་སེམས་དཔའ་གང་ཆོས་ཀྱི་རྒྱན་འདི་ལྟ་བུ་དག་དང་ལྡན་པ་དེ་
ནམ་ཡང་གཅེར་བུ་མ་ཡིན་པར་རིག་པར་བྱའོ། །དེ་ནས་ལྷའི་དབང་པོ་བརྒྱ་བྱིན་གྱིས་ཁྱེའུ་དེ་ལ་ཤིན་ཏུ་དགའ་བ་དང་དད་པ་སྐྱེས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ལ་ཐུགས་བརྩེ་བའི་སླད་དུ་བཅོམ་ལྡན་འདས་ཀྱིས་རས་བཅོས་བུའི་ཟུང་འདི་ལེན་དུ་སྩལ་བར་གསོལ། །དེ་ནས་བཅོམ་ལྡན་
Vol. 48 · folio 280a
འདས་ཀྱིས་ཁྱེའུ་སྣང་བ་བསམ་གྱིས་མི་ཁྱབ་པ་ལ་འདི་སྐད་ཅེས་བཀའ་སྩལ་ཏོ། །ཁྱེའུ་རས་བཅོས་བུའི་ཟུང་འདི་ལོང་ལ་གྱོན་ཅིག །དེ་ནས་ཁྱེའུ་སྣང་བ་བསམ་གྱིས་མི་ཁྱབ་པ་བཅོམ་ལྡན་འདས་ག་ལ་བ་དེར་དོང་སྟེ། པུས་མོ་གཡས་པའི་ལྷ་ང་ས་ལ་བཙུགས་
ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ཀྱི་སྤྱན་སྔར་རས་བཅོས་བུའི་ཟུང་བླངས་ནས་བགོས་སོ། །དེ་ནས་བཅོམ་ལྡན་འདས་གྲོང་ཁྱེར་ཆེན་པོ་མཉན་ཡོད་དུ་བསོད་སྙོམས་ལ་གཤེགས་སོ། །དེ་ན་སྐྱེས་པ་དང་། བུད་མེད་དང་། ཁྱེའུ་དང་།
བུ་མོ་དང་། ཚོང་དཔོན་དང་། བྲམ་ཟེ་དང་། ཁྱིམ་བདག་དང་། རྒྱལ་པོ་དང་། བློན་པོ་ཆེན་པོ་དག་ངོ་མཚར་དུ་གྱུར་ཏེ། ཁྱེའུ་སྣང་བ་བསམ་གྱིས་མི་ཁྱབ་པ་ལ་བལྟ་བ་དང་། བཅོམ་ལྡན་འདས་ལ་ཡང་བལྟ་བ་དང་། ཕྱག་བྱ་བ་དང་། མཆོད་པའི་ཕྱིར་འདུས་པར་གྱུར་ཏོ། །
དེ་ནས་བཅོམ་ལྡན་འདས་མཐར་གྱིས་བསོད་སྙོམས་བཞེས་ཏེ། ཁྱེའུ་སྣང་བ་བསམ་གྱིས་མི་ཁྱབ་པའི་མའི་ཁྱིམ་ག་ལ་བ་དེར་གཤེགས་སོ། །གཤེགས་ནས་ཀྱང་ཅང་མི་གསུང་བར་ཕྱོགས་གཅིག་ཏུ་བཞུགས་སོ། །དེ་ནས་ཁྱེའུ་སྣང་བ་བསམ་གྱིས་མི་ཁྱབ་པའི་མ་ངོ་ཚ་ནས། བཅོམ་ལྡན་འདས་
ལ་བལྟ་བའི་ཕྱིར་སྒོར་མ་བྱུང་ངོ་། །དེ་ནས་ཁྱེའུ་སྣང་བ་བསམ་གྱིས་མི་ཁྱབ་པ་རང་གི་ཁྱིམ་དུ་སོང་ནས། མ་ལ་ཚིགས་སུ་བཅད་དེ་སྨྲས་པ། བདག་གི་སྔོན་གྱི་ནོངས་པ་ཡིས། །ཁྱོད་ཀྱི་མངལ་དུ་བདག་མཆིས་ཏེ། །ཡུམ་གྱིས་ནོངས་པ་མ་ལགས་ཀྱིས། །འོ་ལྟར་གནོད་པར་མ་མཛད་
ཅིག །ཐུགས་བརྩེ་ལྡན་ཏེ་བསྐྱེད་པས་ན། །བདག་གི་སྦྱིན་གནས་ཁྱོད་ལགས་སོ། །ཞལ་ཚ་མ་མཛད་མ་འཛེམ་པར། །དེ་བཞིན་གཤེགས་པའི་དྲུང་དུ་བཞུད། །དེ་ལྟར་ཁྱོད་མངལ་བདག་མཆིས་པ། །ཁྱོད་ཀྱིས་བརྙེས་པ་ལེགས་པར་བརྙེས། །ལུས་ཀྱི་དགེ་བའི་ལས་
རྣམས་ཀྱང་། །རྣམ་པར་འདྲེན་ལ་ཞུ་བ་མཛོད། །དེ་ནས་ཁྱེའུ་སྣང་བ་བསམ་གྱིས་མི་ཁྱབ་པས། ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ་ལྷའི་མེ་ཏོག་མན་དཱ་ར་བ་དག་དང་། ལྷའི་སྤོས་དག་དང་། ལྷའི་གོས་དག་བདག་ལ་སྩོལ་ཅིག །དེ་དག་བདག་གི་སྐྱེད་པའི་མ་འདི་ལ་སྩལ་ཏོ། །
Vol. 48 · folio 280b
འདིས་དེ་དག་གིས་བཅོམ་ལྡན་འདས་ལ་མཆོད་པ་བགྱིས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་འགྱུར་རོ། །དེ་ནས་ལྷའི་དབང་པོ་བརྒྱ་བྱིན་གྱིས། ཁྱེའུ་དེ་ལ་ལྷའི་མེ་ཏོག་མན་དཱ་ར་བ་དག་དང་། ལྷའི་སྤོས་དག་དང་། ལྷའི་གོས་དག་བྱིན་ནོ། །དེ་
ནས་ཁྱེའུ་སྣང་བ་བསམ་གྱིས་མི་ཁྱབ་པས་མ་ལ་ཚིགས་སུ་བཅད་དེ་སྨྲས་པ། ཡུམ་ཅིག་ལྷ་ཡི་མེ་ཏོག་མན་དཱ་ར། །བལྟ་སྡུག་མཛེས་ཤིང་ཡིད་དུ་འོང་བ་དང་། །སྤོས་དང་ན་བཟའ་འདི་དག་བླང་མཛོད་ལ། །མི་མཆོག་སངས་རྒྱས་དེ་ལ་དབུལ་བ་མཛོད། །འཇིག་རྟེན་དག་ན་ཕ་མ་
ཟས་སྐོམ་དང་། །ནོར་དང་གོས་ཀྱིས་མཆོད་པ་མཆོད་མ་ལགས། །གཞན་དུ་གང་དག་ཆོས་ལ་སྦྱོར་བགྱིད་པ། །དེས་ན་དེ་དག་མཆོད་པ་བགྱིས་པར་འགྱུར། །རྐང་གཉིས་དམ་པ་དེ་ལ་མཆོད་མཛོད་ལ། །བྱང་ཆུབ་མཆོག་ཏུ་སྨོན་ལམ་བརྟན་པར་མཛོད། །བདག་ནི་
དུས་དུས་ཁྱོད་ཀྱི་དྲུང་མཆིས་ཏེ། །ཡུན་རིང་དུས་ནས་སྐུལ་བ་བགྱིད་པ་ལགས། །གནོང་ཞིང་ཞུམ་པའི་སེམས་སུ་མ་མཛད་པར། །རངས་པའི་སེམས་དང་དགའ་བ་ཐོབ་མཛོད་ལ། །རང་བྱུང་རྒྱལ་བ་བཞུགས་པ་དེར་བཞུད་དེ། །སྐྱེས་བུ་མཆོག་གི་ཞབས་ལ་ཕྱག་མཛོད་ལ། །
མགོན་པོ་དེ་ལ་མེ་ཏོག་སྤོས་རྣམས་དང་། །དེ་བཞིན་ན་བཟའ་རྣམས་ཀྱང་གཏོར་ནས་སུ། །རྒྱལ་བ་དེ་ལས་དགེ་བའི་རྩ་བསྐྱེད་དེ། །བྱང་ཆུབ་མཆོག་ཏུ་སེམས་ཀྱང་བསྐྱེད་པ་མཛོད། །བྱང་ཆུབ་མཆོག་ཏུ་སེམས་ནི་བརྟན་གྱུར་ནས། །གང་དག་དད་པས་རྒྱལ་ལ་གུས་བགྱིས་པ། །
དེ་དག་རྣམ་སྨིན་འཇིག་མགོན་བཀའ་སྩལ་ཅེས། །རང་བྱུང་རྒྱལ་བ་དེ་ལ་ཞུ་བ་མཛོད། །དེ་ནས་བུད་མེད་དེས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་མཆོད་པ་བྱས་ནས། ཞུ་བ་ཇི་སྐད་བསྟན་
པ་བཞིན་དུ་གུས་པ་དང་བཅས་པར་ཡོངས་སུ་ཞུས་སོ། །ཞུ་བ་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་བའི་རྩ་བ་བསྒྲུབས་པ་འདིས། །ངན་འགྲོའམ་མི་ཁོམ་འགྲོ་མི་འགྱུར། །སངས་རྒྱས་བྱེ་མང་མཉེས་བྱས་ནས། །མི་ཡི་དམ་པ་སངས་རྒྱས་འགྱུར། །
Vol. 48 · folio 281a
དེ་ནས་བཅོམ་ལྡན་འདས་ཀྱིས་གྲོང་ཁྱེར་ཆེན་པོ་མཉན་ཡོད་དུ་བསོད་སྙོམས་བཞེས་ནས། ཁྱེའུ་སྣང་བ་བསམ་གྱིས་མི་ཁྱབ་པ་དང་། སྐྱེ་བོ་ཕལ་པོ་ཆེ་གཞན་དག་དང་ཡང་ཐབས་ཅིག་ཏུ་གྲོང་ཁྱེར་ནས་བྱུང་སྟེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་
གྱི་ཀུན་དགའ་ར་བ་ག་ལ་བ་དེར་གཤེགས་སོ། །དེ་ནས་བཅོམ་ལྡན་འདས་ཀྱིས་ཟས་ཀྱི་བྱ་བ་མཛད་དེ། ནང་དུ་ཡང་དག་འཇོག་ལས་བཞེངས་ནས་ཆོས་ཉན་དུ་གཞུག་པའི་ཕྱིར་བཞུགས་སོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་དཔུང་གི་ཚོགས་ཡན་ལག་བཞི་པ་དང་ལྷན་
ཅིག་ཏུ་རྒྱལ་བུ་རྒྱལ་བྱེད་ཀྱི་ཚལ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས། ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ངོ་མཚར་རྨད་དུ་བྱུང་བའི་ཆོས་རྣམ་པ་དེ་ལྟ་བུ་དག་དང་ལྡན་པའི་ཁྱེའུ་སྣང་བ་བསམ་གྱིས་མི་ཁྱབ་པ་དེ་ག་ལ་མཆིས། དེ་ནས་བཅོམ་ལྡན་འདས་ཀྱིས་ཁྱེའུ་སྣང་བ་བསམ་གྱིས་མི་ཁྱབ་པ་བསྟན་ནས་མཐོང་སྟེ། རྒྱལ་པོ་
གསལ་རྒྱལ་གྱིས་ཁྱེའུ་དེའི་ལུས་གཟུགས་ཡོངས་སུ་གྲུབ་པ་ལྷ་ལས་འདས་པའི་མདོག་དང་། མི་འཇིགས་པ་དང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱིས་བརྒྱན་པ་མཐོང་ནས་འདི་སྙམ་དུ་སེམས་ཏེ། སྔོན་ལས་བྱས་ཤིང་བསགས་པ་ཇི་ལྟ་བུ་ཞིག་གིས་འདི་ལྟར་འདིའི་
ལུས་ཡོངས་སུ་དག་པར་གྱུར་སྙམ་མོ། །དེ་ནས་ཁྱེའུ་སྣང་བ་བསམ་གྱིས་མི་ཁྱབ་པས་སངས་རྒྱས་ཀྱི་མཐུ་དང་། རང་གི་སྔོན་གྱི་དགེ་བའི་རྩ་བས་རྒྱལ་པོ་གསལ་རྒྱལ་གྱི་སེམས་ཀྱི་ཡོངས་སུ་རྟོགས་པ་སེམས་ཀྱིས་ཤེས་ནས་ཚིགས་སུ་བཅད་དེ་སྨྲས་པ། གང་དག་རྟག་ཏུ་བྱམས་སེམས་དག་
སེམས་ལྡན། །གང་དག་མི་བརླང་མཉེན་ཞིང་དྲན་ལྡན་ལ། །ལེགས་པར་བསྡམས་ཤིང་དྲང་ལ་ཚངས་སྤྱོད་པ། །དེ་དག་ལུས་ནི་རྣམ་པར་དག་པར་འགྱུར། །གང་དག་སྡིག་པ་སྤོང་ཞིང་མི་སྤྱོད་ལ། །རྟག་ཏུ་དགེ་བ་མི་ཆུང་རྣམ་སྤེལ་ཞིང་། །གནོད་པར་སེམས་དང་ཁྲོ་བ་རྣམ་སྤོང་བ། །
Vol. 48 · folio 281b
དེ་དག་ལུས་ནི་རྣམ་པར་དག་པར་འགྱུར། །གང་དག་སངས་རྒྱས་ཆོས་དང་ཚོགས་མཆོག་ལ། །གུས་དང་བཅས་པར་རྟག་ཏུ་མཆོད་བྱེད་ཅིང་། །གཞན་ལ་རྡེག་འདོད་སྡིགས་མོ་མི་བྱེད་པ། །དེ་དག་ལུས་ནི་རྣམ་པར་དག་པར་འགྱུར། །གང་དག་གཞན་ལ་ཕྲག་དོག་སེར་
སྣ་དང་། །དེ་བཞིན་ང་རྒྱལ་དག་ཀྱང་མི་བྱེད་ལ། །གཞན་གྱི་ཉེས་པ་བྱུང་བ་མི་རྗོད་པ། །དེ་དག་ལུས་ནི་རྣམ་པར་དག་པར་འགྱུར། །གཞན་ལ་ཅོ་དྲི་བ་དང་སྨད་པ་དང་། །བཤུང་བ་དག་ནི་ནམ་ཡང་མི་བྱེད་ཅིང་། །གཞན་ལ་འཁྲུལ་པའི་གླགས་ལྟ་མི་བྱེད་པ། །དེ་དག་
ལུས་ནི་རྣམ་པར་དག་པར་འགྱུར། །དེ་ནས་བཅོམ་ལྡན་འདས་ལ་རྒྱལ་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྱེའུ་སྣང་བ་བསམ་གྱིས་མི་ཁྱབ་པ་འདི་ཆོས་ཆེན་པོ་དང་ལྡན་པ་ལགས་ན། བཅོམ་ལྡན་འདས་ལས་ཀྱི་སྒྲིབ་པ་གང་ཞིག་གིས། ཁྱེའུ་
འདི་བུད་མེད་ཁྱིམ་ཐབ་མ་མཆིས་པའི་མངལ་དུ་སྐྱེས་ལ། དེར་ཡང་ཁང་སྟོང་དུ་བོར་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན། འདི་ནས་བསྐལ་པ་དགུ་བཅུ་རྩ་གཅིག་འདས་པ། དེའི་ཚེ་དེའི་དུས་ན། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྣམ་པར་གཟིགས་ཞེས་བྱ་བ་འཇིག་རྟེན་དུ་
བྱུང་ངོ་། །རྒྱལ་པོ་ཆེན་པོ་དེའི་ཚེ་དེའི་དུས་ན། བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་དེའི་གསུང་རབ་ལ་བྱང་ཆུབ་སེམས་དཔའ་གཉིས་ཤིག་བྱུང་སྟེ། ལྷ་བཟང་ཞེས་བྱ་བ་དང་། ས་ཞེས་བྱ་བའོ། །དེ་ལ་བྱང་ཆུབ་སེམས་དཔའ་ལྷ་བཟང་ཞེས་བྱ་བར་གྱུར་པ་གང་ཡིན་
པ་དེ་ནི་ཕྱིར་མི་ལྡོག་པར་གྱུར་ཅིང་། །དོན་དུ་ཉུང་བ། བྱ་བ་ཉུང་བ། དབེན་པ་ལ་དགའ་བ། བསམ་གཏན་དང་། མངོན་པར་ཤེས་པས་རྣམ་པར་བརྩེ་བར་གྱུར་ཏོ། །དེ་ལ་བྱང་ཆུབ་སེམས་དཔའ་ས་ཞེས་བྱ་བར་གྱུར་པ་གང་ཡིན་པ་དེ་ནི་ཆོས་རྒྱ་ཆེན་པོ་དང་ལྡན་པར་མ་གྱུར་ཏེ། ལྷ་བཟང་གི་
Vol. 48 · folio 282a
གཡོག་བྱེད་དོ། །དེ་ཧ་ཅང་གྲོང་དང་། གྲོང་རྡལ་དང་། ཡུལ་འཁོར་དང་། ཕོ་བྲང་འཁོར་དག་ཏུ་འཇུག་སྟེ། ཞུགས་ནས་ཀྱང་བྱ་བ་མང་ཞིང་བྱེད་པ་མང་བར་གྱུར་ནས། བྱང་ཆུབ་སེམས་དཔའ་ལྷ་བཟང་དེས་དེ་ལ་ཁྱོད་ཅིའི་ཕྱིར་རྣལ་འབྱོར་དང་སྤོང་བ་ལ་བརྩོན་པར་མི་
བྱེད་པར་ཧ་ཅང་བྱ་བ་མང་ཞིང་ཧ་ཅང་བྱེད་པ་མང་ཞེས་བསྒོ་ཞིང་བསྟན་ཏོ། །དེས་དེ་ལ་ཡང་དང་ཡང་བསྐུལ་བས་དེ་ཁྲོས་ཤིང་འཁྲུགས་ཏེ་ཡིད་མ་རངས་ནས། གནོད་སེམས་སུ་གྱུར་པ་དེས་ལུས་དང་སེམས་མ་རུང་བར་བྱས་ཏེ། ངན་དུ་བསམས་ནས་ཚིག་རྩུབ་པོ་སྨྲས་པ། ནལ་གྱི་བུ།
སྦྱར་མའི་བུ། སྐྱེས་པ་གཞན་ལས་གྲུབ་པ་ཁྱོད་ཀྱི་ཕ་མ་ཡང་མེད་ན། ཁྱོད་ལ་ཤེས་རབ་བམ། ཚུལ་ཁྲིམས་ལྟ་ག་ལ་ཡོད་ཅེས་དེས་ངན་དུ་བསམས་ཏེ། ཚིག་རྩུབ་པོ་སྨྲས་པ། མི་མཐོལ་མི་འཆགས་མི་འདོར་གྱི། ཞེ་ལ་འཛིན་ཏེ། དེ་བྱང་ཆུབ་སེམས་དཔའ་ལྷ་བཟང་དེ་ལ་རྟག་
ཏུ་ངན་སེམས་དང་ལྡན་ཞིང་བྱམས་པའི་སེམས་མེད་པར་གྱུར་ཏོ། །བྱང་ཆུབ་སེམས་དཔའ་ལྷ་བཟང་གིས་ཀྱང་དེ་སྣོད་མ་ཡིན་ནོ་སྙམ་ནས་བཀྱེད་པ་དང་། དེ་དེ་བས་ཀྱང་བྱང་ཆུབ་སེམས་དཔའ་ལྷ་བཟང་ལ་ངན་དུ་སེམས་ཤིང་བསྔགས་པ་མ་ཡིན་པ་བརྗོད་དེ། སྙན་པ་མ་ཡིན་པ་དང་། གྲགས་
པ་མ་ཡིན་པ་དང་། ཚིགས་སུ་བཅད་པ་མ་ཡིན་པ་བརྗོད་དོ། །དེ་ལས་བསགས་ཤིང་ཚོགས་སུ་བྱས་པ་དེས་ལུས་ཞིག་སྟེ། ཤི་བའི་འོག་ཏུ་བུད་མེད་ཁྱིམ་ཐབ་མེད་པའི་མངལ་དུ་སྐྱེས་སོ། །བྱང་ཆུབ་ཀྱི་སེམས་བསྲུངས་པས་དེས་ན་སེམས་ཅན་དམྱལ་བར་ནི་མ་སྐྱེས་སོ། །དེ་བཙས་མ་ཐག་ཏུ་
བུད་མེད་དེས་ལམ་སྲང་ཆེན་པོར་བོར་ཏེ། དེར་དེ་ཁྱི་དང་། སྤྱང་ཀི་དང་། ཅེ་སྤྱང་རྣམས་ཀྱིས་ཟོས་སོ། །རྒྱལ་པོ་ཆེན་པོ་ཚུལ་འདི་འདྲ་བར་འདི་བསྐལ་པ་དགུ་བཅུར་སྡུག་བསྔལ་འདི་ལྟ་བུ་དང་། ཉམ་ཐག་པ་འདི་ལྟ་བུས་འཆི་བའི་དུས་བྱས་ཤིང་བཙས་པ་བཙས་པ་ན་ཡང་བོར་བར་གྱུར་ཏེ། ཡང་
སྐྱེ་བོ་ཕལ་པོ་ཆེ་འདི་སྐད་དུ་ནལ་གྱི་བུ་སྦྱར་མའི་བུ་འདི་ལ་ཁྱི་དང་སྤྱང་ཀི་དང་། ཅེ་སྤྱང་རྣམས་ཟའོ་ཞེས་འཛེར་ཏོ། །རྒྱལ་པོ་ཆེན་པོ་དེའི་ཚེ་དེའི་དུས་ན། བྱང་ཆུབ་སེམས་དཔའ་ས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་ཟ་བར་གྱུར་ན་རྒྱལ་པོ་ཆེན་པོ་ཁྱོད་ཀྱིས་
Vol. 48 · folio 282b
དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁྱེའུ་སྣང་བ་བསམ་གྱིས་མི་ཁྱབ་པ་འདི་དེའི་ཚེ་དེའི་དུས་ན་བྱང་ཆུབ་སེམས་དཔའ་ས་ཞེས་བྱ་བར་གྱུར་ཏོ། །རྒྱལ་པོ་ཆེན་པོ་འདིའི་ལས་ཀྱི་སྒྲིབ་པ་ནི་ཟད། ཀུན་ནས་ཉོན་མོངས་པའི་སེམས་ནི་རྣམ་པར་སྦྱངས། དེ་བཞིན་གཤེགས་པ་ནི་མཉེས་པར་
བྱས། ངན་འགྲོ་ཐམས་ཅད་ནི་བཅད་ནས། ཁྱེའུ་སྣང་བ་བསམ་གྱིས་མི་ཁྱབ་པ་འདིས་སངས་རྒྱས་བྱེ་བ་ཕྲག་དྲུག་ཅུ་རྩ་བཞི་མཉེས་པར་བྱས་ཤིང་། བསྟི་སྟང་དུ་བྱས། རི་མོ་བྱས། མཆོད་པ་བྱས་ནས། སངས་རྒྱས་བཅོམ་ལྡན་འདས་དེ་དག་གི་དྲུང་དུ་ཚངས་པར་སྤྱོད་པ་སྤྱད་དོ། །
ཆོས་ཡོངས་སུ་བཙལ་བ་ལ་ཡང་བརྩོན་པར་གྱུར་ཏོ། །རྒྱལ་པོ་ཆེན་པོ་དེ་སྔོན་གྱི་དགེ་བའི་རྩ་བ་འདིས་བདག་ཉིད་ཆེན་པོ་འདི་ཐོབ་བོ། །རྒྱལ་པོ་ཆེན་པོ་དེ་ལྟར་ན་ལས་ནག་པོ་དང་། དཀར་པོ་དག་ཆུད་ཟ་བར་འགྱུར་བ་མེད་དོ། །རྒྱལ་པོ་ཆེན་པོ་དེ་ལྟ་བས་ན་མཁས་པས་ལུས་ཀྱི་ལས་དང་།
ངག་གི་ལས་དང་། ཡིད་ཀྱི་ལས་བསྡམ་པར་བྱ་སྟེ། སྲོག་གི་ཕྱིར་ཡང་སྡིག་པའི་ལས་མི་བྱའོ། །དེ་ནས་བཅོམ་ལྡན་འདས་ལ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ལྷ་བཟང་ཞེས་བགྱི་བར་གྱུར་པ་དེས།
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ལགས་སམ། འོན་ཏེ་ད་དུང་དུ་ཡང་བྱང་ཆུབ་སེམས་དཔའི་སྤྱད་པ་སྤྱོད་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷ་བཟང་དེ་ནི་དེ་བཞིན་གཤེགས་པ་མི་འཁྲུགས་
པའི་སངས་རྒྱས་ཀྱི་ཞིང་ན་ཚངས་པར་སྤྱད་པ་སྤྱོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་འབྱུང་ཞེས་བྱའོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོས་གུས་པར་
བགྱིས་ཏེ། དགེ་བའི་བཤེས་གཉེན་རྣམས་ལ་བསྙེན་པར་བགྱིའོ། །བསྟེན་པར་བགྱིའོ། །བསྙེན་བཀུར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དགེ་བའི་བཤེས་གཉེན་ལ་བསྙེན་ཅིང་བསྟེན་ཏེ། བསྙེན་བཀུར་བགྱིས་ན་དགེ་བའི་ཆོས་ཐོབ་པར་འགྱུར་རོ། །དགེ་བའི་
Vol. 48 · folio 283a
ཆོས་ཐོབ་པས་བསམ་པ་དགེ་བར་འགྱུར་རོ། །བསམ་པ་དགེ་བས་སྦྱོར་བ་དགེ་བར་འགྱུར་རོ། །སྦྱོར་བ་དགེ་བས་དགེ་བའི་ལས་བགྱིད་པར་འགྱུར་རོ། །ལས་དགེ་བས་འགྲོ་བ་དགེ་བར་མཆི་བར་འགྱུར་རོ། །འགྲོ་བ་དགེ་བས་དགེ་བའི་གྲོགས་པོ་མགུ་བར་བགྱིད་དོ། །
གྲོགས་པོ་དགེ་བས་སྡིག་པའི་ལས་མི་བགྱིད་དོ། །བགྱིད་པར་མི་འགྱུར་རོ། །སྡིག་པ་མ་བགྱིས་ཤིང་དགེ་བའི་ལས་བགྱིས་པས་བདག་ལ་གདུང་བར་མི་འགྱུར། གཞན་ལ་གདུང་བར་མི་འགྱུར་རོ། །བདག་དང་གཞན་རྗེས་སུ་སྲུང་བས་བྱང་ཆུབ་ཀྱི་ལམ་ཡོངས་སུ་རྫོགས་པར་འགྱུར་རོ། །
བྱང་ཆུབ་ཀྱི་ལམ་ལ་གནས་པས་ལམ་ངན་པར་ཞུགས་པའི་སེམས་ཅན་རྣམས་ཀྱི་དོན་བགྱིད་ནུས་པ་དང་། སྐལ་བ་མཆིས་པ་དང་། མཐུ་དང་ལྡན་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ་ལེགས་སོ། །ཁྱོད་ཀྱིས་ཚིག་འདི་ལེགས་པར་སྨྲས་
སོ། །རྒྱལ་པོ་ཆེན་པོ་དགེ་བའི་བཤེས་གཉེན་ལ་བརྟེན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་གྱི་ཆོས་ཉིད་ཐམས་ཅད་ཡོངས་སུ་རྫོགས་པར་བྱའོ། །དེ་ནས་བཅོམ་ལྡན་འདས་ལ་ཁྱེའུ་སྣང་བ་བསམ་གྱིས་མི་ཁྱབ་པས་འདི་སྐད་ཅེས་གསོལ་ཏོ། །བཅོམ་ལྡན་འདས་
བྱང་ཆུབ་སེམས་དཔའ་ཆོས་དུ་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དང་། ཟབ་མོའི་ཆོས་རྣམས་ལ་ཡང་བཟོད་པ་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་བྱང་ཆུབ་སེམས་དཔའ་ཆོས་བཞི་དང་
ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དང་། ཟབ་མོའི་ཆོས་རྣམས་ལ་ཡང་བཟོད་པ་ཐོབ་པར་འགྱུར་ཏེ། བཞི་གང་ཞེ་ན། རྟེན་ཅིང་འབྲེལ་བར་འབྱུང་བ་ཤེས་པ་ལ་འཇུག་པ་དང་། ཆད་པ་དང་། རྟག་པ་རྣམ་པར་སྤོང་བ་དང་
སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པར་འཇུག་པ་དང་། སྟོང་པ་ཉིད་ལ་མོས་ཤིང་། སྟོང་པ་ཉིད་ལ་སྤྱོད་ཡུལ་བ་སྟེ། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་
Vol. 48 · folio 283b
བ་དང་། ཟབ་མོའི་ཆོས་རྣམས་ལ་ཡང་བཟོད་པ་ཐོབ་པར་འགྱུར་རོ། །ཁྱེའུ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བཞི་གང་ཞེ་ན། སྔོན་གྱི་མཐའ་དབེན་པ་དང་། ཕྱི་མའི་མཐའ་
མི་འཕོ་བ་དང་། ད་ལྟར་བྱུང་བ་འཇིག་པར་ཤེས་པ་དང་། དུས་གསུམ་མཉམ་པ་ཉིད་དེ་བཞི་པོ་དེ་དག་གོ། །གཞན་ཡང་བཞི་སྟེ། བཞི་གང་ཞེ་ན། ལུས་དབེན་པ་དང་། སེམས་དབེན་པ་དང་། ཆོས་དབེན་པ་དང་། ལས་དབེན་པ་སྟེ། བཞི་པོ་དེ་དག་གོ། །གཞན་ཡང་བཞི་སྟེ། བཞི་
གང་ཞེ་ན། སངས་རྒྱས་ལ་ཆོས་ཉིད་དུ་མཐོང་གི་གཟུགས་སུ་མ་ཡིན་པ་དང་། ཆོས་ལ་འདོད་ཆགས་དང་བྲལ་བར་མཐོང་གི་ཡི་གེ་དང་། ངེས་པའི་ཚིག་ཏུ་མ་ཡིན་པ་དང་། དགེ་འདུན་ལ་འདུས་མ་བྱས་སུ་མཐོང་གི་ཚོགས་སུ་མ་ཡིན་པ་དང་། ཤེས་རབ་ཀྱི་མིག་ཡོངས་སུ་དག་པར་འགྱུར་
བ་སྟེ། བཞི་པོ་དེ་དག་གོ། །གཞན་ཡང་བཞི་སྟེ། བཞི་གང་ཞེ་ན། བསྡུ་བའི་དངོས་པོ་མི་གཏོང་བས་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་དང་། ཐབས་དང་ཤེས་རབ་ལ་མཁས་པ་དང་། སེམས་ཅན་མེད་པར་རྣམ་པར་དཔྱོད་པ་དང་སྙིང་རྗེ་ཆེན་པོ་སྟེ། ཁྱེའུ་བྱང་ཆུབ་སེམས་དཔའ་
ཆོས་བཞི་པོ་དེ་དག་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དང་། ཟབ་མོའི་ཆོས་རྣམས་ལ་ཡང་བཟོད་པ་ཐོབ་པར་འགྱུར་རོ། །བཅོམ་ལྡན་འདས་ཀྱིས་བཞི་པ་བསྒྲུབ་པ་བསྟན་པ་འདི་བཤད་པ་ན་ཁྱེའུ་སྣང་བ་བསམ་གྱིས་མི་ཁྱབ་པ་མི་
སྐྱེ་བའི་ཆོས་ལ་བཟོད་པར་ཐོབ་པར་གྱུར་ཏེ། དེ་དགའ་བ་དང་མཆོག་ཏུ་དགའ་བ་དེ་ཉིད་ཀྱིས་ཏ་ལ་བདུན་སྲིད་ཙམ་དུ་སྟེང་གི་བར་སྣང་ལ་མངོན་པར་འཕགས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་
མཛད་པའི་ཆོས་ཉིད་དེ། དེ་ནས་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་འཕྲོ་བ་ཁ་དོག་སྣ་ཚོགས། ཁ་དོག་དུ་མ་བྱུང་བ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། དངུལ་གྱི་ཁ་དོག་ལྟ་བུ་སྟེ། ཁ་དོག་དུ་མ་དེ་དག་གིས་འཇིག་རྟེན་གྱི་ཁམས་
Vol. 48 · folio 284a
མཐའ་ཡས་མུ་མེད་པ་སྣང་བར་བྱས་ཏེ། ཚངས་པའི་འཇིག་རྟེན་གྱི་བར་དུ་མངོན་པར་བྱུང་ནས། ཟླ་བ་དང་ཉི་མ་རྣམས་ཀྱི་འོད་མོག་མོག་པོར་བྱས་ཏེ། སླར་ལོག་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་
གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་དོན་དེ་ཞུས་པ། བལྟ་སྡུག་བལྟར་འོས་གཟུགས་དང་མཚན་རྣམས་དང་། །
དཔེ་བྱད་བཟང་པོ་རྣམས་ཀྱིས་རབ་མཛེས་ཤིང་། །འོད་ཀྱི་དཀྱིལ་འཁོར་འོད་ཀྱིས་འོད་མཛེས་པ། །འཛུམ་པ་མཛད་དེ་བདག་ལ་བསྟན་དུ་གསོལ། །ཚུལ་ཁྲིམས་འཕགས་ཤིང་སྤྱོད་པ་ལེགས་སྤྱད་པ། །ཏིང་འཛིན་ཤེས་རབ་བསགས་པའི་ཡེ་ཤེས་འོད། །རྣམ་གྲོལ་སྙིང་
པོ་སྟོབས་ལྡན་ཡང་དག་གཟིགས། །འཛུམ་པ་མཛད་དེ་བདག་ལ་བསྟན་དུ་གསོལ། །བཟོད་པའི་སྟོབས་ལྡན་སྟོབས་ཀྱི་ཤུགས་མངའ་བ། །བརྩོན་འགྲུས་མངོན་པར་འཕགས་ཏེ་མི་བསྐྱོད་པ། །མིག་ཏུ་སྡུག་ཅིང་བདེན་པ་བཞི་གཟིགས་པ། །འཛུམ་པ་མཛད་དེ་
བདག་ལ་བསྟན་དུ་གསོལ། །རྡོ་རྗེའི་སྐུ་མངའ་སྲ་བརྟན་མི་ཤིགས་པ། །སྲེད་མེད་བུ་མཐུ་སྲེད་མེད་བུ་བས་མཆོག །ཚངས་དབྱངས་སྒྲ་སྙན་འཇམ་པའི་དབྱངས་ལྡན་པ། །འཛུམ་པ་མཛད་དེ་བདག་ལ་བསྟན་དུ་གསོལ། །བཞུགས་ཀྱང་ཚངས་དང་དེ་བཞིན་ལྷ་ཚོགས་
ཀྱིས། །དེ་བཞིན་གཤེགས་པའི་སྤྱི་གཙུག་མ་མཐོང་ལ། །གུས་དང་བཅས་པས་ཀུན་ནས་བལྟ་བགྱིད་པ། །འཛུམ་པ་མཛད་དེ་བདག་ལ་བསྟན་དུ་གསོལ། །ཁྱོད་ཀྱིས་ཆོས་ཀྱི་འཁོར་ལོ་དམ་པ་བསྐོར། །མི་རྟག་སྒྲས་ནི་ལྷ་དང་ལྷ་མིན་དང་། །དེ་བཞིན་ཀླུ་དང་གནོད་
སྦྱིན་རབ་བསྐྱོད་པ། །འཛུམ་པ་མཛད་དེ་བདག་ལ་བསྟན་དུ་གསོལ། །སྣང་བ་མཉེས་ཤིང་མུན་པ་རྣམས་བྲལ་བ། །ཀུན་ནས་སྤྱན་མངའ་མཉམ་པ་ཉིད་བཞུགས་པ། །ཡོན་ཏན་མཆོག་མངའ་ཡོན་ཏན་སྙིང་པོ་བསྟན། །འཛུམ་པ་མཛད་དེ་བདག་ལ་བསྟན་དུ་གསོལ། །
Vol. 48 · folio 284b
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱེའུ་སྣང་བ་བསམ་གྱིས་མི་ཁྱབ་པ་ཤིང་ཏ་ལ་བདུན་སྲིད་ཀྱི་སྟེང་གི་བར་སྣང་ལ་འདུག་པ་མཐོང་ངམ། གསོལ་པ། བཅོམ་ལྡན་འདས་མཐོང་
ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བ་བསམ་གྱིས་མི་ཁྱབ་པ་འདི་བསྐལ་པ་གྲངས་མེད་པ་བརྒྱའི་འོག་ཏུ་བསྐལ་པ་ཀུན་ཏུ་སྣང་བྱེད་ཅེས་བྱ་བ་ལ། འཇིག་རྟེན་གྱི་ཁམས་རྣམ་པར་སྤྱོད་པ་ཞེས་བྱ་བར་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་
འདས་སྣང་བ་བསམ་གྱིས་མི་ཁྱབ་པ་ཞེས་བྱ་བ་ཉིད་དུ་འཇིག་རྟེན་དུ་འབྱུང་བར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་རྣམ་པར་སྤྱོད་པ་དེ་ནི་འདི་ལྟ་བུར་ཡོངས་སུ་དག་པར་འགྱུར་ཏེ། དཔེར་ན་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ལོངས་སྤྱོད་དང་། ཡོངས་སུ་སྤྱོད་པ་ལྟ་བུར་
འགྱུར་རོ། །དེ་བཞིན་གཤེགས་པ་དེ་ནི་བར་གྱི་བསྐལ་པ་ཉི་ཤུར་གནས་པར་འགྱུར་རོ། །དེ་ལ་ཉན་ཐོས་བརྒྱད་ཁྲིའི་དགེ་འདུན་ཡོད་པར་འགྱུར་རོ། །བྱང་ཆུབ་སེམས་དཔའ་སུམ་ཁྲི་ཉིས་སྟོང་གི་དགེ་འདུན་ཡོད་པར་འགྱུར་རོ། །ཀུན་དགའ་བོ་ཅིའི་ཕྱིར་འཇིག་རྟེན་གྱི་ཁམས་
དེ་རྣམ་པར་སྤྱོད་པ་ཞེས་བྱ་ཞིང་། བསྐལ་པ་ཀུན་ཏུ་སྣང་བྱེད་ཅེས་བྱ་བར་འགྱུར་ཞེ་ན། ཀུན་དགའ་བོ་བར་གྱི་བསྐལ་པ་བརྒྱ་སྟོང་མང་པོར་སངས་རྒྱས་ཀྱི་ཞིང་དེར་སྔོན་ནམ་ཡང་དེ་བཞིན་གཤེགས་པ་མ་བྱུང་སྟེ། དེར་དེ་བཞིན་གཤེགས་པ་སྣང་བ་བསམ་གྱིས་མི་ཁྱབ་པ་དེ་འབྱུང་བར་
འགྱུར་བ་དེ་ན། གནས་གཙང་མའི་རིས་ཀྱི་ལྷ་རྣམས་འདི་སྐད་དུ་བསྐལ་པ་འདི་ནི་ཀུན་ཏུ་སྣང་བ་མེད་པ་ཀུན་ཏུ་སྣང་བ་མེད་པ་སྟེ། དེ་ལ་དེ་བཞིན་གཤེགས་པ་བྱུང་ངོ་། །ཞེས་ཆེད་དུ་རྗོད་པ་ཆེད་དུ་བརྗོད་པར་འགྱུར་བའི་ཕྱིར་རོ། །བྱང་ཆུབ་སེམས་དཔའ་སྣང་བ་བསམ་གྱིས་མི་ཁྱབ་པ་ལུང་
Vol. 48 · folio 285a
བསྟན་པ་བརྗོད་པ་འདི་བཤད་པ་དང་། ཆོས་ཀྱི་རྣམ་གྲངས་འདི་བཤད་པ་ན། ལྷ་དང་མིའི་སྲོག་ཆགས་སུམ་ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་དྲུག་ཅུ་ནི་མི་སྐྱེ་བའི་ཆོས་ལ་བཟོད་པ་
ཐོབ་པར་གྱུར་ཏོ། །ཉན་ཐོས་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ངའི་དམ་པའི་ཆོས་ཡོངས་སུ་གཟུང་བ་དང་། ད་ལྟར་དང་།
མ་འོངས་པའི་བྱང་ཆུབ་སེམས་དཔའ་རྣམས་ལ་ཕན་གདགས་པའི་ཕྱིར་ཆོས་ཀྱི་རྣམ་གྲངས་འདི་ཟུང་ཤིག །ཀུན་དགའ་བོས་གསོལ་པ། བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་ལགས་ན། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་
གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འདི་ལས་ཀྱི་སྒྲིབ་པ་རྣམ་པར་སྦྱོང་བ་ཞེས་བྱ་བ་དང་། སངས་རྒྱས་རྣམ་པར་རོལ་པ་ཞེས་བྱ་བ་དང་། སྣང་བ་བསམ་གྱིས་མི་ཁྱབ་པས་བསྟན་པ་ཞེས་བྱ་བར་ཟུང་ཤིག །ཀུན་དགའ་བོ་གང་ལ་ལ་ཞིག་གིས་ཇི་
སྲིད་འཚོའི་བར་དུ་དེ་བཞིན་གཤེགས་པ་བཞུགས་པ་ལ་བསྟི་སྟང་བྱེད། བླ་མར་བྱེད། རི་མོར་བྱེད། མཆོད་པར་བྱེད་ཅིང་། མེ་ཏོག་གི་ཕུར་མ་རི་རབ་ཙམ་གཏོར་བ་དང་། སྤོས་དང་། ཕྱེ་མ་དང་། བྱུག་པ་དང་། གོས་དང་། གདུགས་དང་། རྒྱལ་མཚན་དང་།
བ་དན་དང་། ལྷའི་དང་མིའི་མཆོད་པ་རྣམ་པ་མང་པོ་གཞན་དག་གིས་མཆོད་པ་བས། རིགས་ཀྱི་བུའམ། རིགས་ཀྱི་བུ་མོ་གང་ཞིག་སྣང་བ་བསམ་གྱིས་མི་ཁྱབ་པས་བསྟན་པའི་ཆོས་ཀྱི་རྣམ་གྲངས་འདི་འཛིན་ཅིང་ཀློག་ལ། ཀུན་ཆུབ་པར་བྱེད་ཅིང་། གཞན་དག་ལ་ཡང་རྒྱ་ཆེར་
ཡང་དག་པར་སྟོན་ལ། དེ་བཞིན་དུ་ནན་ཏན་དུ་བྱེད་ན་འདི་ནི་བསོད་ནམས་ཀྱི་ཕུང་པོ་དེ་བས་ཆེས་མང་དུ་བསྐྱེད་དོ། །ཀུན་དགའ་བོ་དེ་ལྟ་བས་ན་དེ་བཞིན་གཤེགས་པ་ལ་ཆོས་ཀྱི་མཆོད་པས་མཆོད་པར་འདོད་པ་དང་། ཤེས་རབ་ཀྱི་སྣང་བ་ཆེན་པོ་བྱེད་པར་འདོད་པས་ཆོས་ཀྱི་རྣམ་གྲངས་འདི་གཟུང་
Vol. 48 · folio 285b
བར་བྱ། བཀླག་པར་བྱ། ནན་ཏན་གྱིས་བསྒྲུབ་པར་བྱ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བ་བསམ་
གྱིས་མི་ཁྱབ་པ་དང་། ཡུལ་ཀོ་ས་ལའི་རྒྱལ་པོ་གསལ་རྒྱལ་འཁོར་དང་བཅས་པ་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། འཇིག་རྟེན་སྐྱོང་བ་བཞི་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་།
དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཁྱེའུ་སྣང་བ་བསམ་གྱིས་མི་ཁྱབ་པས་བསྟན་པ་ཞེས་བྱ་བ་ཆོས་ཀྱི་རྣམ་གྲངས་རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་
གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།
Source and licence
Text: Esukhia’s Derge Kangyur e-text (Esukhia/derge-kangyur · commit a582cf47) · public domain
Licence Public Domain · Evidence
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
No translation — Tibetan only: there is no translation we are licensed to publish (84000’s translations are no-derivatives, non-commercial)
- Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
- The Tibetan text is not in the collection search yet — the available tokenizer drops Tibetan vowel signs and would match the wrong words