འཕགས་པ་སྙིང་རྗེ་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ

Sanskrit title (Tibetan script, as in the text) ཨཱརྱ་ཀ་རུ་ཎཱ་པུཎྜ་རཱི་ཀ་ནཱ་མ་མ་ཧཱ་ཡཱ་ན་སཱུ་ཏྲ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 50 · folio 242b

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཟླ་བ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཐེག་པ་ཆེན་པོའི་གཏམ་འབའ་ཞིག་གིས་ཆོས་སྟོན་

ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་ཏོག་དང་། ཟླ་བའི་ཏོག་ཅེས་བྱ་བའི་བྱང་ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་རིན་ཆེན་ཟླ་བ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་དེ་བཞིན་གཤེགས་པ་རིན་ཆེན་

ཟླ་བ་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འཇིག་རྟེན་དུ་ས་ཆེན་པོ་གཡོས་ཤིང་མེ་ཏོག་གི་ཆར་ཆེན་པོ་དག་རབ་ཏུ་བབ་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས། དེ་བཞིན་གཤེགས་པ་རིན་ཆེན་ཟླ་བས་བཀའ་སྩལ་པ། རིགས་ཀྱི་བུ་དག་ནུབ་

ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་གཅིག་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་ཡང་དག་རྟོག་ཅེས་བྱ་བ་ཞིག་ཡོད་དེ། སངས་རྒྱས་ཀྱི་ཞིང་ཡང་དག་རྟོག་དེ་ན་དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བ་སངས་

རྒྱས་བཅོམ་ལྡན་འདས་ཀྱི་བར་ཞིག་བཞུགས་ཏེ་འཚོ་ཞིང་གཞེས་ལ་བྱང་ཆུབ་སེམས་དཔའི་ཡུལ་ཡང་དག་པར་སྟོན་པའི་སྨོན་ལམ་བཀོད་པའི་ཏིང་ངེ་འཛིན་གྱི་ཡུལ་དང་། གཟུངས་ཀྱི་སྒོ་བཀོད་པའི་ཆོས་ཀྱི་རྣམ་གྲངས་འཆད་ཅིང་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་བླ་

ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་གཅིག་ཅིག་ཡོད་པ་དེས་སྨོན་ལམ་འདི་ལྟ་བུ་བཏབ་ཅིང་སྙིང་རྗེ་ཆེན་པོ་ཡོངས་སུ་བསྒོམས་པའི་ཚིག་བརྗོད་དེ། བྱང་ཆུབ་སེམས་དཔའ་རྣམས་བླ་ན་

མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་བཤད་པ་དང་། སྲོག་ཆགས་བྱེ་བ་ཕྲག་མང་པོ་དག་གིས་བྱང་ཆུབ་ཏུ་སྨོན་ལམ་བཏབ་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཀྱང་ཡོངས་སུ་བཟུང་བ་དང་། འདུལ་བའི་སེམས་ཅན་རྣམས་ཀྱང་ཡོངས་སུ་འདུལ་

Vol. 50 · folio 243a

བའི་བར་གྱི་སྨོན་ལམ་དེ་ལྟ་བུ་དག་ཀྱང་བརྗོད་པས་ན་གང་གིས་ཐམས་ཅད་དང་ལྡན་པའི་འཁོར་དེ་ཟིལ་གྱིས་མནན་ཅིང་རྩོད་པའི་དུས་ཀྱི་སངས་རྒྱས་ཀྱི་ཞིང་ཉོན་མོངས་པ་ཅན་སྙིགས་མ་ལྔ་དང་ལྡན་ཞིང་ཉོན་མོངས་པའི་སྒྲིབ་པ་ཅན་དང་། མཚམས་མེད་པ་བྱེད་ཅིང་མི་

དགེ་བའི་རྩ་བའི་བར་དག་དང་འགྲོགས་ལ་སེམས་ཀྱི་རྒྱུད་ཚིག་པའི་འདུལ་བ་ཐམས་ཅད་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཅིག་པུ་རྣམ་པ་ཐམས་ཅད་དུ་སྙིང་རྗེ་ཆེན་པོ་དང་ལྡན་པ་ཡིན་ཏེ། ཐམས་ཅད་དང་ལྡན་པའི་འཁོར་དེ་དང་། ལྷ་དང་།

མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་གྱིས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་དེ་སྤངས་ནས་སྙིང་རྗེ་ཆེན་པོ་དང་ལྡན་པའི་ཕྱི་མ་དེ་ལ་མཆོད་པ་བྱ་བའི་ཕྱིར་བརྩོན་ཞིང་ཡན་ལག་ལྔས་ཕྱག་བྱས་ཏེ་ཐལ་མོ་སྦྱར་ཞིང་འདུག་ནས་དེའི་བསྔགས་པ་ཡང་

རྗོད་པར་བྱེད་དོ། །སེམས་ཅན་ཆེན་པོ་དེ་ཡང་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་ཅིང་ལུང་བསྟན་པ་ཉན་ཏོ། །གང་གི་ཚེ་སེམས་ཅན་ཆེན་པོ་དེས་བཅོམ་ལྡན་འདས་དེའི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་

པར་གྱུར་པ་དེའི་ཚེ་བཅོམ་ལྡན་འདས་དེས་འདི་ལྟ་སྟེ། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གཡོས་ཤིང་མེ་ཏོག་གི་ཆར་དག་ཀྱང་མངོན་པར་རབ་ཏུ་བབ་པར་གྱུར་པ་དེ་ལྟ་བུའི་འཛུམ་པ་མཛད་དོ། །སངས་རྒྱས་ཀྱི་ཞིང་དེ་

དག་ཐམས་ཅད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རབ་ཏུ་སད་པར་བྱ་བ་དང་། སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའི་སྨོན་ལམ་གྱི་སྤྱོད་པ་ངེས་པ་བསྟན་པར་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཞིང་

སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གི་ཕྱོགས་ནས་བསྡུ་བར་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་བཤད་པར་བྱ་བའི་ཕྱིར་དེ་བཞིན་གཤེགས་པ་དེས་

Vol. 50 · folio 243b

དེ་ལྟ་བུའི་ཆོ་འཕྲུལ་དག་བསྟན་ཏོ། །རིགས་ཀྱི་བུ་དེ་བཞིན་གཤེགས་པ་རིན་ཆེན་ཟླ་བ་ལ་བྱང་ཆུབ་སེམས་དཔའ་དེ་གཉིས་ཀྱིས་ཡོངས་སུ་ཞུས་པ། བཙུན་པ་བཅོམ་ལྡན་འདས་གང་གིས་སྙིགས་མ་ལྔ་དང་ལྡན་པའི་འཇིག་རྟེན་དུ་ཉོན་མོངས་པ་དང་། འཁྲུག་པ་བདོ་ཞིང་རྩོད་པའི་

དུས་ལ་བབ་པའི་དུས་ཡོངས་སུ་བཟུང་སྟེ། མཚམས་མ་མཆིས་པ་བགྱིད་པ་དང་། མི་དགེ་བའི་རྩ་བའི་བར་དང་འགྲོགས་པར་གྱུར་ཅིང་། སེམས་ཀྱི་རྒྱུད་ཚིག་པའི་འདུལ་བའི་སེམས་ཅན་རྣམས་ཀྱང་ཡོངས་སུ་བཟུང་བར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་

པོ་སྙིང་རྗེ་ཆེན་པོ་དང་ལྡན་པ་དེས་ཡུན་རིང་པོ་ཇི་སྲིད་ཅིག་ནས་བྱང་ཆུབ་ཏུ་སེམས་བསྐྱེད་ཅིང་། ཡུན་རིང་པོ་ཇི་སྲིད་ཅིག་ཏུ་བྱང་ཆུབ་ཀྱི་སྤྱད་པ་སྤྱོད་པ་ལགས། དེ་བཞིན་གཤེགས་པ་རིན་ཆེན་ཟླ་བས་བཀའ་སྩལ་པ། རིགས་ཀྱི་བུ་དག་སྙིང་རྗེ་ཆེན་པོ་དང་ལྡན་པ་དེས་ནི་ད་

གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་དོ། །རིགས་ཀྱི་བུ་དག་ཁྱེད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་

སངས་རྒྱས་ཀྱི་ཞིང་ཡང་དག་རྟོག་དེར་དེང་ལ། ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེ་ཡང་ཉོན་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ལ་ངའི་ཚིག་གིས་དྲིས་ལ་འདི་སྐད་དུ་དེ་བཞིན་གཤེགས་

པ་རིན་ཆེན་ཟླ་བ་སྐྱེས་བུ་དམ་པ་ཁྱོད་ལ་འདྲི་བ་མཛད་དེ། མེ་ཏོག་ཟླ་བ་མདོག་མཛེས་དྲི་མ་མེད་པ་འདི་ཡང་བསྐུར་ཞིང་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་ཀྱིས་དེ་ལྟར་སེམས་དང་པོ་བསྐྱེད་པ་ནས་སྙིང་རྗེ་ཆེན་པོ་བརྗོད་པས་ཕྱོགས་བཅུའི་འཇིག་རྟེན་གྱི་ཁམས་

སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་རྣམས་སུ་སྒྲས་གང་བར་གྱུར་ཏེ། དེས་ན་ཁྱོད་ཀྱིས་ཐམས་ཅད་དུ་སྙིང་རྗེ་ཆེན་པོ་དང་ལྡན་པ་ཞེས་བྱ་བའི་མིང་རབ་ཏུ་ཐོབ་པ་ཡིན་ནོ། །སྐྱེས་བུ་དམ་པ་དེའི་ཕྱིར་ཁྱོད་ནི་བྱང་ཆུབ་སེམས་དཔའ་སེམས་

Vol. 50 · folio 244a

དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ཕྱི་མ་རྣམས་ལ་ཡང་སྙིང་རྗེ་ཆེན་པོ་བརྗོད་པའི་སྨོན་ལམ་གྱིས་ཡང་དང་ཡང་དུ་བྱམས་པའི་རྒྱལ་མཚན་ལེགས་པར་འཛུགས་པར་འགྱུར་ཏེ། སྐྱེས་བུ་དམ་པ་དེའི་ཕྱིར་མ་འོངས་པའི་བསྐལ་པ་གྲངས་མེད་པ་སངས་རྒྱས་ཀྱི་

ཞིང་གི་རྡུལ་ཕྲ་རབ་ཀྱི་རྡུལ་སྙེད་ན་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་ཡང་། ཡང་དང་ཡང་དུ་ཁྱོད་ཀྱི་སྙན་པ་དང་གྲགས་པའི་སྒྲས་ཀུན་ཏུ་གང་བར་འགྱུར་རོ། །གང་ཁྱོད་ཀྱིས་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་

གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས་བཅོམ་ལྡན་འདས་ལ་ཕུལ་བ་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་པར་གྱུར་ཏེ། དེ་ལ་ཁ་ཅིག་སྨོན་

ལམ་གྱིས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཡོངས་སུ་འཛིན་པར་འགྱུར་བ་གང་ཡིན་པ་དག་ནི་ཕྱིས་ལུང་བསྟན་པ་ཐོབ་པར་འགྱུར་རོ། །གང་དག་ཁྱོད་ཀྱིས་བྱང་ཆུབ་ཡང་དག་པར་འཛིན་དུ་བཅུག་པ་དེ་དག་ཐམས་ཅད་ཀྱང་ཕྱིས་བསྐལ་པ་གྲངས་མེད་པ་སངས་རྒྱས་ཀྱི་ཞིང་

གི་རྡུལ་ཕྲ་རབ་ཀྱི་རྡུལ་སྙེད་ཀྱི་བར་དག་གིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་པོ་གཞན་དག་ཏུ་སངས་རྒྱས་ཉིད་ཐོབ་ཅིང་ཆོས་ཀྱི་འཁོར་ལོ་བསྐོར་ནས། དེ་དག་ཁྱོད་ལས་བརྩམས་ནས་བསྔགས་པ་བརྗོད་པར་འགྱུར་ཏེ། རྒྱུ་གསུམ་

པོ་དེས་ན་སྐྱེས་བུ་དམ་པ་ཁྱོད་ལེགས་སོ་ཞེས་ཀྱང་སྨྲོས་ཤིག །ཡང་དེའི་ཚེ་བྱང་ཆུབ་སེམས་དཔའ་དུང་ཕྱུར་ཕྲག་དགུ་དང་། བྱེ་བ་ཕྲག་གཉིས་ཀྱིས་ཚིག་འཐུན་པར་གསོལ་པ། བཙུན་པ་བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་

རྫོགས་པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བགྱི་བ་དང་། དེ་བཞིན་གཤེགས་པས་གང་ལ་ཡན་ལག་གསུམ་གྱིས་ལེགས་སོ་ཞེས་བགྱི་བ་སྤྲིང་ཞིང་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་བསྐུར་བའི་སྐྱེས་བུ་དམ་པ་དེ་

Vol. 50 · folio 244b

ཡང་བལྟ་བའི་སླད་དུ་སངས་རྒྱས་ཀྱི་ཞིང་ཡང་དག་རྟོག་དེར་མཆི་ལགས་སོ། །རིགས་ཀྱི་བུ་དེ་བཞིན་གཤེགས་པ་རིན་ཆེན་ཟླ་བ་དེས་བཀའ་སྩལ་པ། རིགས་ཀྱི་བུ་དག་དེའི་དུས་ལ་དབབ་པར་ཤེས་ན་དེང་ལ། དེར་དེ་བཞིན་གཤེགས་པ་རིན་པོ་ཆེའི་སྙིང་པོ་ལས་ཏིང་ངེ་འཛིན་

གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེ་ཡང་ཉོན་ཅིག །རིགས་ཀྱི་བུ་དེ་ནས་རིན་པོ་ཆེའི་ཏོག་དང་། ཟླ་བའི་ཏོག་གཉིས་ཀྱིས་དེ་བཞིན་གཤེགས་པ་རིན་ཆེན་ཟླ་བ་ལས་མེ་ཏོག་ཟླ་བ་མདོག་མཛེས་དྲི་མ་མེད་པ་བླངས་ཏེ་བྱང་ཆུབ་སེམས་དཔའ་དུང་ཕྱུར་

ཕྲག་དགུ་དང་། བྱེ་བ་ཕྲག་གཉིས་པོ་དག་དང་ལྷན་ཅིག་ཏུ་འཇིག་རྟེན་གྱི་ཁམས་རིན་ཆེན་བསྩགས་པ་ནས་འཕགས་ནས། འདི་ལྟ་སྟེ་དཔེར་ན་གློག་བཞིན་དུ་བྱང་ཆུབ་སེམས་དཔའི་འཁོར་དེ་དང་། སངས་རྒྱས་ཀྱི་ཞིང་རིན་ཆེན་བསྩགས་པ་དེ་ནས་མི་སྣང་བར་གྱུར་ཏེ་

སངས་རྒྱས་ཀྱི་ཞིང་ཡང་དག་རྟོག་གི་འཛམ་བུའི་ཚལ་གྱི་སྐྱེད་མོས་ཚལ་འདིར་ལྷགས་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་དོང་སྟེ་ཕྱིན་པ་དང་། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་འཚལ་ཏེ། བྱང་ཆུབ་སེམས་

དཔའི་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་མཆོད་པ་བྱས་ནས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་བྲམ་ཟེ་ལ་ཐམས་ཅད་དང་ལྡན་པའི་བྱང་ཆུབ་སེམས་དཔའི་འཁོར་རྣམས་ཀྱིས་ཐལ་མོ་སྦྱར་ཅིང་བསྔགས་བརྗོད་པ་མཐོང་བ་དང་། བྱང་ཆུབ་

སེམས་དཔའ་དེ་གཉིས་འདི་སྙམ་དུ་སེམས་ཏེ་དེ་བཞིན་གཤེགས་པ་རིན་ཆེན་ཟླ་བས་གང་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་བསྐུར་བའི་སྙིང་རྗེ་ཆེན་པོ་དང་ལྡན་པ་དེ་ནི་འདི་ཡིན་པ་བལྟ་སྙམ་མོ། །དེ་ནས་བྱང་ཆུབ་སེམས་དཔའ་དེ་གཉིས་བཅོམ་ལྡན་འདས་ཀྱི་

དྲུང་དུ་ཕྱིར་ཕྱོགས་ཏེ། བྲམ་ཟེ་ལ་མེ་ཏོག་ཕུལ་ནས་འདི་སྐད་ཅེས་སྨྲས་སོ། །སྐྱེས་བུ་དམ་པ་དེ་བཞིན་གཤེགས་པ་རིན་ཆེན་ཟླ་བས་ཁྱོད་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ཀྱང་བསྐུར་ཏེ། སྐྱེས་བུ་དམ་པ་ཁྱོད་ལ་ལེགས་སོ་ཞེས་བྱ་བ་ཡང་སྤྲིང་

Vol. 50 · folio 245a

ངོ་ཞེས་བྱ་བའི་བར་དུ་ཇི་ལྟར་སྔར་སྨོས་པ་བཞིན་ནོ། །དེ་བཞིན་དུ་སྦྱར་ཏེ། ཤར་ཕྱོགས་ཀྱི་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་པ་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མེ་ཏོག་ཟླ་བ་མདོག་མཛེས་དྲི་མ་མེད་པ་དག་ཐོགས་

ཏེ་སངས་རྒྱས་ཀྱི་ཞིང་ཡང་དག་རྟོག་ཏུ་ལྷགས་པ་དང་། བྲམ་ཟེ་ལ་མེ་ཏོག་བསྐུར་བ་དང་། ཡན་ལག་གསུམ་གྱིས་ལེགས་སོ་ཞེས་བྱ་བ་སྤྲིང་བ་ཡང་ཇི་ལྟར་སྔར་སྨོས་པ་བཞིན་ནོ། །དེ་བཞིན་དུ་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བྱེ་བ་ཁྲག་

ཁྲིག་འབུམ་ཕྲག་དགུ་བཅུ་རྩ་བདུན་འདས་པ་དེ་ན་འཇིག་རྟེན་གྱི་ཁམས་བ་གམ་གྱིས་བསྒྱིངས་པ་ཞེས་བྱ་བ་ཞིག་ཡོད་དེ། སངས་རྒྱས་ཀྱི་ཞིང་བ་གམ་གྱིས་བསྒྱིངས་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེ་ལྟར་བསྒྱིངས་པའི་དབང་

ཕྱུག་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་དག་ལ་ཐེག་པ་ཆེན་པོའི་གཏམ་འབའ་ཞིག་གི་ཆོས་སྟོན་ཏོ། །འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་ལ་གཅིག་ནི་ཡེ་ཤེས་རྡོ་རྗེའི་ཏོག་

ཅེས་བྱ། ཅིག་ཤོས་ནི་སེང་གེ་རྡོ་རྗེའི་ཏོག་ཅེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཉིས་ཀྱིས་དེ་བཞིན་གཤེགས་པ་སེང་གེ་ལྟར་བསྒྱིངས་པའི་དབང་ཕྱུག་རྒྱལ་པོ་ལ་ཡོངས་སུ་ཞུས་པ། བཙུན་པ་བཅོམ་ལྡན་འདས་འཇིག་རྟེན་དུ་ས་ཆེར་གཡོས་

ཤིང་མེ་ཏོག་གི་ཆར་ཆེན་པོ་བབ་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས་ཞེས་བྱ་བའི་བར་དུ་ཇི་ལྟར་སྔར་སྨོས་པ་བཞིན་ནོ། །དེ་བཞིན་དུ་སྦྱར་ཏེ་ལྷོ་ཕྱོགས་ཀྱི་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་པ་གཞན་དང་གཞན་དག་ནས་བྱང་ཆུབ་སེམས་དཔའ་

སེམས་དཔའ་ཆེན་པོ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་སངས་རྒྱས་ཀྱི་ཞིང་ཡང་དག་རྟོག་ཏུ་ལྷགས་པའི་བར་དུ་ཡང་ཇི་ལྟར་སྔར་སྨོས་པ་བཞིན་ནོ། །ཡང་དེའི་ཚེ་ན་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བྱེ་བ་

Vol. 50 · folio 245b

ཁྲག་ཁྲིག་འབུམ་ཕྲག་དགུ་བཅུ་རྩ་གཅིག་འདས་པའི་སངས་རྒྱས་ཀྱི་ཞིང་དེ་ན། སངས་རྒྱས་ཀྱི་ཞིང་རྒྱལ་བ་ཅན་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དབང་པོ་ཐུལ་བ་ཡངས་པའི་སྤྱན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་དག་ལ་ཐེག་

པ་གསུམ་གྱིས་ཆོས་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བྱེད་བཟང་པོ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་པ་སེང་གེ་ལྟར་བསྒྱིངས་པ་ཞེས་བྱ་བ་ཞིག་ཡོད་དེ། སྐྱེས་བུ་དམ་པ་དེ་གཉིས་ཀྱིས་

དེ་བཞིན་གཤེགས་པ་དབང་པོ་ཐུལ་བ་ཡངས་པའི་སྤྱན་ལ་ས་ཆེར་གཡོས་ཤིང་མེ་ཏོག་གི་ཆར་ཆེན་པོ་བབ་པ་ཅི་ལས་གྱུར་ཅེས་དོན་དེ་ཡོངས་སུ་ཞུས་པའི་བར་དུ་ཡང་ཇི་ལྟར་སྔར་སྨོས་པ་བཞིན་ནོ། །ཡང་དེའི་ཚེ་ན་བྱང་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་

རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དགུ་བཅུ་འདས་པ་དེ་ན་འཇིག་རྟེན་གྱི་ཁམས་ངུར་སྨྲིག་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་ཞིག་ཐེག་པ་ཆེན་པོ་ལ་ཡང་དག་པར་ཞུགས་

པའི་བྱང་ཆུབ་སེམས་དཔའ་འབའ་ཞིག་དག་ལ་ཐེག་པ་ཆེན་པོའི་གཏམ་འབའ་ཞིག་གི་ཆོས་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་ལ་གཅིག་ནི་མི་གཡོ་བརྟན་པ་ཞེས་བྱ། ཅིག་ཤོས་ནི་ཤེས་རབ་འཛིན་ཅེས་བྱ་སྟེ། དེ་གཉིས་ཀྱིས་དེ་བཞིན་

གཤེགས་པ་འཇིག་རྟེན་དབང་ཕྱུག་རྒྱལ་པོ་ལ་བཙུན་པ་བཅོམ་ལྡན་འདས་འཇིག་རྟེན་དུ་ས་ཆེར་གཡོས་ཤིང་མེ་ཏོག་གི་ཆར་ཆེན་པོ་བབ་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས་ཞེས་ཡོངས་སུ་ཞུས་པའི་བར་དུ་ཡང་ཇི་ལྟར་སྔར་སྨོས་པ་བཞིན་ནོ། །ཡང་དེའི་ཚེ་ན་འོག་གི་

ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཁྲག་ཁྲིག་ཕྲག་དགུ་བཅུ་རྩ་བརྒྱད་འདས་པ་དེ་ན་འཇིག་རྟེན་གྱི་ཁམས་གཏི་མུག་མུན་བྲལ་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་ཀུན་ནས་ལྡང་བའི་འཇིགས་པ་དང་བྲལ་བའི་དབྱངས་ཞེས་བྱ་བ་

Vol. 50 · folio 246a

བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་དག་ལ་ཐེག་པ་གསུམ་གྱིས་ཆོས་སྟོན་ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་གཉིས་ལ་གཅིག་ནི་རྣམ་པར་སྣང་བྱེད་རྡུལ་བྲལ་ཞེས་བྱ། ཅིག་ཤོས་ནི་རྣམ་པར་སྣང་བྱེད་ཉི་མ་ཞེས་བྱ་བའི་བར་དུ་ཇི་ལྟར་

སྔར་སྨོས་པ་བཞིན་ནོ། །ཡང་དེའི་ཚེ་ན་སྟེང་གི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཉི་འབུམ་འདས་པ་དེ་ན་འཇིག་རྟེན་གྱི་ཁམས་མེ་ཏོག་ཀུན་ཏུ་རྒྱས་པ་ཞེས་བྱ་བ་ཞིག་ཡོད་དེ། སངས་རྒྱས་ཀྱི་ཞིང་མེ་ཏོག་ཀུན་ཏུ་རྒྱས་པ་དེ་ན། དེ་བཞིན་གཤེགས་

པ་རྣམ་པར་སྣང་མཛད་མེ་ཏོག་རབ་རྒྱས་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་ཞིག་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་དག་ལ་ཐེག་པ་གསུམ་གྱིས་ཆོས་སྟོན་ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་ཤིག་འཁོད་པ་ལ་

གཅིག་ནི་རང་གིས་རྣམ་པར་འབྱེད་པས་ཡུལ་ཡང་དག་པར་འཁྲུག་པ་ཞེས་བྱ། ཅིག་ཤོས་ནི་བྱང་ཆུབ་སེམས་དཔའ་གཟུངས་ཀྱིས་ཡང་དག་པར་རབ་ཏུ་དགའ་བ་རྣམ་པར་འཁྲུགས་པ་ཞེས་བྱ་སྟེ། སྐྱེས་བུ་དམ་པ་དེ་གཉིས་ཀྱིས་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་

རབ་རྒྱས་ལ་བཙུན་པ་བཅོམ་ལྡན་འདས་འཇིག་རྟེན་དུ་ས་ཆེར་གཡོས་ཤིང་མེ་ཏོག་གི་ཆར་ཆེན་པོ་བབ་པར་གྱུར་པའི་རྒྱུ་གང་ལགས། རྐྱེན་ནི་གང་ལགས་ཞེས་ཞུས་པ་དང་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཀྱིས་བཀའ་སྩལ་པ། རིགས་ཀྱི་བུ་དག་འདི་ནས་

འོག་གི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཉི་འབུམ་འདས་པ་དེ་ན་འཇིག་རྟེན་གྱི་ཁམས་ཡང་དག་རྟོག་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་ཞིག་བཞུགས་ཏེ་འཚོ་

ཞིང་གཞེས་ལ། བྱང་ཆུབ་སེམས་དཔའི་ཡུལ་དང་ཞིང་ཡང་དག་པར་སྟོན་པའི་སྨོན་ལམ་གྱི་ཡུལ་བཀོད་པའི་ཏིང་ངེ་འཛིན་གྱི་ཡུལ་དང་། གཟུངས་ཀྱི་སྒོ་བཀོད་པའི་ཆོས་ཀྱི་རྣམ་གྲངས་འཆད་ཅིང་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་

Vol. 50 · folio 246b

པའི་བྱང་ཆུབ་ཏུ་ལུང་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་གཅིག་ཅིག་ཡོད་པ་དེས་སྨོན་ལམ་འདི་ལྟ་བུ་བཏབ་ཅིང་སྙིང་རྗེ་ཆེན་པོ་ཡོངས་སུ་བསྒོམས་པའི་ཚིག་བརྗོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་

རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་བཤད་པ་དང་། ཅི་ནས་ཀྱང་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་གིས་སངས་རྒྱས་ཀྱི་ཞིང་གི་སྨོན་ལམ་བཏབ་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དང་། འདུལ་བའི་སེམས་ཅན་

རྣམས་ཀྱང་ཡོངས་སུ་བཟུང་བའི་སྨོན་ལམ་དེ་ལྟ་བུ་དག་ཀྱང་བརྗོད་པས་ན། གང་གིས་ཐམས་ཅད་དང་ལྡན་པའི་འཁོར་དེ་ཟིལ་གྱིས་མནན་ཅིང་རྩོད་པའི་དུས་ཀྱི་སངས་རྒྱས་ཀྱི་ཞིང་ཉོན་མོངས་པ་ཅན་སྙིགས་མ་ལྔ་དང་ལྡན་ཞིང་ཉོན་མོངས་པའི་སྒྲིབ་པ་ཅན་དང་། མཚམས་མེད་པ་བྱེད་

ཅིང་མི་དགེ་བའི་རྩ་བའི་བར་དང་འགྲོགས་ལ་སེམས་ཀྱི་རྒྱུད་ཚིག་པའི་འདུལ་བ་ཐམས་ཅད་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཅིག་པུ་རྣམ་པ་ཐམས་ཅད་དུ་སྙིང་རྗེ་ཆེན་པོ་དང་ལྡན་པ་ཡིན་ཏེ། ཐམས་ཅད་དང་ལྡན་པའི་འཁོར་དེ་དང་། ལྷ་དང་།

མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་གྱིས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་མཆོད་པ་བྱ་བ་སྤངས་ནས་སྙིང་རྗེ་ཆེན་པོ་དང་ལྡན་པ་ཕྱི་མ་དེ་ལ་མཆོད་པ་བྱ་བའི་ཕྱིར་བརྩོན་ཞིང་ཡན་ལག་ལྔས་ཕྱག་བྱས་ཏེ་ཐལ་མོ་སྦྱར་ཅིང་འདུག་ནས་དེའི་བསྔགས་

པ་ཡང་རྗོད་པར་བྱེད་དོ། །སེམས་ཅན་ཆེན་པོ་དེ་ཡང་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་འདུག་ཅིང་ལུང་བསྟན་པ་ཉན་ཏོ། །གང་གི་ཚེ་སེམས་ཅན་ཆེན་པོ་དེས་བཅོམ་ལྡན་འདས་དེའི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་པར་གྱུར་

པ་དེའི་ཚེ་བཅོམ་ལྡན་འདས་དེས་འདི་ལྟ་སྟེ། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གི་ས་ཆེན་པོ་དག་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་ཤིང་འགུལ་བ་དང་། མེ་ཏོག་གི་ཆར་དག་ཀྱང་མངོན་པར་རབ་

Vol. 50 · folio 247a

ཏུ་བབ་པར་གྱུར་པ་དེ་ལྟ་བུའི་འཛུམ་པ་མཛད་དོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རབ་ཏུ་སད་པར་བྱ་བ་དང་། སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའི་སྨོན་ལམ་གྱི་སྤྱོད་པ་ངེས་པར་

བསྟན་པར་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གི་ཕྱོགས་ནས་བསྡུ་བར་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཏིང་ངེ་འཛིན་གྱི་སྒོ་བསྟན་པའི་སྤྱོད་

པ་འཇིགས་པ་མེད་པའི་ཆོས་ཀྱི་རྣམ་གྲངས་བཤད་པར་བྱ་བའི་ཕྱིར་དེ་བཞིན་གཤེགས་པ་དེས་དེ་ལྟ་བུའི་ཆོ་འཕྲུལ་བསྟན་ཏོ།། །།བམ་པོ་བཅུ་གཉིས་པ། རིགས་ཀྱི་བུ་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་དེ་ལ་བྱང་ཆུབ་སེམས་

དཔའ་སེམས་དཔའ་ཆེན་པོ་རང་གི་ས་རྣམ་པར་འབྱེད་པས་ཡུལ་ཡང་དག་པར་འཁྲུགས་པ་དང་། གཟུངས་ཀྱིས་ཡང་དག་པར་རབ་ཏུ་དགའ་བ་རྣམ་པར་འཁྲུགས་པ་ཞེས་བྱ་བའི་རིགས་ཀྱི་བུ་དེ་གཉིས་ཀྱིས་ཡོངས་སུ་ཞུས་པ། བཙུན་པ་བཅོམ་ལྡན་འདས་གང་གིས་

སྙིགས་མ་ལྔ་དང་ལྡན་པའི་འཇིག་རྟེན་དུ་ཉོན་མོངས་པ་དང་འཁྲུག་པ་བདོ་ཞིང་རྩོད་པའི་དུས་ལ་བབ་པའི་དུས་ཡོངས་སུ་བཟུང་ཞིང་མཚམས་མ་མཆིས་པ་བགྱིད་པ་དང་། མི་དགེ་བའི་རྩ་བའི་བར་དང་འགྲོགས་པར་གྱུར་ཅིང་། སེམས་ཀྱི་རྒྱུད་ཚིག་པའི་འདུལ་བའི་སེམས་

ཅན་རྣམས་ཀྱང་ཡོངས་སུ་བཟུང་བར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཡུན་རིང་པོ་ཇི་སྲིད་ཅིག་ནས་བྱང་ཆུབ་ཏུ་སེམས་བསྐྱེད་ཅིང་། ཡུན་རིང་པོ་ཇི་སྲིད་ཅིག་ཏུ་བྱང་ཆུབ་ཀྱི་སྤྱོད་པ་སྤྱད་ལགས། དེ་བཞིན་གཤེགས་པ་

རྣམ་པར་སྣང་མཛད་མེ་ཏོག་རབ་རྒྱས་ཀྱིས་བཀའ་སྩལ་པ། རིགས་ཀྱི་བུ་དག་སྙིང་རྗེ་ཆེན་པོ་དང་ལྡན་པ་དེས་ནི་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རིགས་ཀྱི་བུ་དག་ཁྱེད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

Vol. 50 · folio 247b

པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེ་ཡང་མཉན་པའི་ཕྱིར་འཇིག་རྟེན་གྱི་ཁམས་ཡང་དག་རྟོག་དེར་དོང་ལ་བྱང་ཆུབ་སེམས་དཔའ་

སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ལ་ངའི་ཚིག་གིས་དྲིས་ལ་འདི་སྐད་དུ་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་སྐྱེས་བུ་དམ་པ་ཁྱོད་ལ་དྲི་བར་མཛད་དེ། མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ཀྱང་བསྐུར་ཞིང་ལེགས་སོ་ཞེས་བྱ་

བ་ཡང་བྱིན་ཏེ། སྐྱེས་བུ་དམ་པ་ཁྱོད་ཀྱིས་དེ་ལྟར་སེམས་དང་པོ་བསྐྱེད་པ་ནས་སྙིང་རྗེ་ཆེན་པོ་བརྗོད་པས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་སྒྲས་གང་བར་གྱུར་ཅིང་། སྙིང་རྗེ་ཆེན་པོའི་སྒྲ་ཡང་རབ་ཏུ་ཐོབ་པ་ཡིན་ནོ། །སྐྱེས་བུ་

དམ་པ་དེའི་ཕྱིར་ན་ཁྱོད་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པའི་ཕྱི་མ་རྣམས་ལ་ཡང་སྙིང་རྗེ་ཆེན་པོ་བརྗོད་པའི་སྨོན་ལམ་གྱིས་ཡང་དང་ཡང་དུ་བྱམས་པའི་རྒྱལ་མཚན་ལེགས་པར་འཛུགས་པར་འགྱུར་ཏེ།

སྐྱེས་བུ་དམ་པ་དེའི་ཕྱིར་མ་འོངས་པའི་བསྐལ་པ་གྲངས་མེད་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ན་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་ཡང་དང་ཡང་དུ་ཁྱོད་ཀྱི་སྙན་པ་དང་། གྲགས་པའི་སྒྲས་ཀུན་ཏུ་གང་བར་

འགྱུར་རོ། །སྐྱེས་བུ་དམ་པ་དེའི་ཕྱིར་ཁྱོད་ཀྱིས་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས། བཅོམ་ལྡན་འདས་ལ་ཕུལ་བ་རྣམས་ཀྱང་བླ་ན་

མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ལ་བཀོད་པར་གྱུར་ཏེ་དེ་ལ་ཁ་ཅིག་གིས་བཅོམ་ལྡན་འདས་ཀྱི་ཐད་ནས་སྨོན་ལམ་གྱིས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཡོངས་སུ་བཟུང་བ་དག་དང་། འདུལ་བའི་སེམས་ཅན་རྣམས་ཀྱང་སྙིང་

Vol. 50 · folio 248a

རྗེའི་འོད་ཟེར་དག་གིས་ཀུན་ཏུ་བཀབ་པར་གྱུར་ཏོ། །གང་དག་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ནས་ལུང་བསྟན་པ་མ་ཐོབ་པ་དེ་དག་ཀྱང་ཕྱིས་ལུང་བསྟན་པ་ཐོབ་པར་འགྱུར་ཏེ། དེ་དག་ཐམས་ཅད་

ཀྱང་ཕྱིས་བསྐལ་པ་གྲངས་མེད་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་བར་དག་གིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་པོ་གཞན་དག་ཏུ་སངས་རྒྱས་ཉིད་ཐོབ་ཅིང་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ནས་

ཁྱོད་ཉིད་ལས་བརྩམས་ཤིང་བསྔགས་པ་རྗོད་པར་འགྱུར་ཏེ། རྒྱུ་གསུམ་པོ་དེས་ན་སྐྱེས་བུ་དམ་པ་ཁྱོད་ལེགས་སོ་ཞེས་ཀྱང་སྨྲོས་ཤིག །ཡང་དེའི་ཚེ་ན་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་གིས་ཀྱང་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་

ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། དེ་བཞིན་གཤེགས་པས་གང་ལ་ཡན་ལག་གསུམ་གྱིས་ལེགས་སོ་ཞེས་བགྱི་བ་སྤྲིང་ཞིང་། མེ་ཏོག་

ཟླ་བ་མདོག་མཛེས་དྲི་མ་མེད་པ་འདི་དག་བསྐུར་བའི་སྐྱེས་བུ་དམ་པ་དེ་ཡང་བལྟ་བའི་སླད་དུ་སངས་རྒྱས་ཀྱི་ཞིང་ཡང་དག་རྟོག་དེར་མཆི་ལགས་སོ། །རིགས་ཀྱི་བུ་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་དེས་བཀའ་སྩལ་པ། རིགས་ཀྱི་བུ་དག་དེའི་དུས་

ལ་དབབ་པར་ཤེས་ན་ཁྱེད་ཅག་དེང་ལ་དེར་དེ་བཞིན་གཤེགས་པ་རིན་པོ་ཆེའི་སྙིང་པོ་ལས་ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེ་ཡང་ཉོན་ཅིག །རིགས་ཀྱི་བུ་དེ་ནས་བྱང་ཆུབ་སེམས་དཔའ་རང་གིས་རྣམ་པར་འབྱེད་པས་ཡུལ་ཡང་

དག་པར་འཁྲུགས་པ་དང་། གཟུངས་ཀྱིས་ཡང་དག་པར་རབ་ཏུ་དགའ་བ་རྣམ་པར་འཁྲུགས་པ་ཞེས་བྱ་བ་དེ་གཉིས་ཀྱིས་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་དེ་ལས་མེ་ཏོག་ཟླ་བ་མདོག་མཛེས་དྲི་མ་མེད་པ་དག་བླངས་ནས་བྱང་ཆུབ་སེམས་དཔའ་བྱེ་

Vol. 50 · folio 248b

བ་ཕྲག་མང་པོ་དང་ལྷན་ཅིག་ཏུ་སངས་རྒྱས་ཀྱི་ཞིང་གི་མེ་ཏོག་ཀུན་ཏུ་རྒྱས་པ་ནས་འཕགས་ཏེ་སྐད་ཅིག་གཅིག་གིས་སངས་རྒྱས་ཀྱི་ཞིང་འདིའི་འཛམ་བུའི་ཚལ་གྱི་སྐྱེད་མོས་ཚལ་དུ་ལྷགས་ཏེ་ཕྱིན་པ་དང་། དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་དོང་ངོ་། །ཡང་

དེའི་ཚེ་ན་ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཡང་དག་རྟོག་ཐེག་པ་ཆེན་པོ་པའི་བྱང་ཆུབ་སེམས་དཔའ་རྣམས་དང་། རང་སངས་རྒྱས་ཀྱི་ཐེག་པ་པ་དང་། ཉན་ཐོས་ཀྱི་ཐེག་པ་པའི་རིགས་ཀྱི་བུ་དག་དང་། ལྷ་རྣམས་དང་། ལྟོ་འཕྱེ་ཆེན་པོའི་བར་དག་གིས་འདི་ལྟར་

ཡོངས་སུ་གང་བར་གྱུར་ཏེ། འདི་ལྟ་སྟེ་དཔེར་ན། བུ་རམ་ཤིང་གི་ཚལ་ལམ། འདམ་བུའི་ཚལ་ལམ། ཏིལ་གྱི་ཞིང་ངམ། འབྲས་ཀྱི་ཞིང་རྒྱས་པས་ཀུན་ཏུ་ཁྱབ་པར་གྱུར་པ་དེ་བཞིན་དུ། དེའི་ཚེ་ན་སངས་རྒྱས་ཀྱི་ཞིང་ཡང་དག་རྟོག་ཀྱང་ཐེག་པ་ཆེན་པོའི་རིགས་ཀྱི་བུ་

རྣམས་དང་། ལྟོ་འཕྱེ་ཆེན་པོའི་བར་དག་གིས་ཡོངས་སུ་གང་ཞིང་ཁྱབ་པར་གྱུར་ཏོ། །བྱང་ཆུབ་སེམས་དཔའ་དེ་དག་གིས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་འཚལ་ཏེ། ཏིང་ངེ་འཛིན་གྱི་སྟོབས་དང་། བྱང་ཆུབ་སེམས་དཔའི་

རྣམ་པར་འཕྲུལ་པ་རྣམ་པ་སྣ་ཚོགས་དག་གིས་མཆོད་པ་བྱས་ནས། དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་བྲམ་ཟེ་ལ་ཐམས་ཅད་དང་ལྡན་པའི་འཁོར་རྣམས་ཐལ་མོ་སྦྱར་ཏེ་བསྔགས་པ་བརྗོད་ཅིང་འཁོད་པ་མཐོང་བ་དང་། བྱང་ཆུབ་སེམས་དཔའ་དེ་དག་འདི་

སྙམ་དུ་སེམས་ཏེ། དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཀྱིས་གང་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་བསྐུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ནི་འདི་ཡིན་པ་ལྟ་སྙམ་ནས། བྱང་ཆུབ་སེམས་

དཔའ་དེ་དག་བཅོམ་ལྡན་འདས་ཀྱི་དྲུང་ནས་ཕྱིར་ཕྱོགས་ཏེ། བྲམ་ཟེ་དེ་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་དེ་དག་ཕུལ་ནས་སྨྲས་པ། སྐྱེས་བུ་དམ་པ་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཀྱིས་ཁྱོད་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་

Vol. 50 · folio 249a

བསྐུར་ཞིང་སྐྱེས་བུ་དམ་པ་ཁྱོད་ལ་ལེགས་སོ་ཞེས་བྱ་བ་ཡང་བྱིན་ཏེ། ཡན་ལག་གསུམ་གྱིས་ལེགས་སོ་ཞེས་བྱ་བ་བརྗོད་པའི་བར་དུ་ཡང་ཇི་ལྟར་སྔར་སྨོས་པ་བཞིན་ནོ། །མེ་ཏོག་གང་ཡིན་པ་དེ་དག་སངས་རྒྱས་ཀྱི་ཞིང་སྟོང་པ་དག་ཏུ་ཆར་བཞིན་དུ་རབ་ཏུ་

འབབ་པ་སངས་རྒྱས་ཀྱི་ཞིང་དེ་དག་ཏུ་དགེ་བའི་སྒྲ་རྣམ་པ་སྣ་ཚོགས་དག་གིས་ཀྱང་ཀུན་གྱིས་གང་བར་གྱུར་ཏེ། འདི་ལྟ་སྟེ་སངས་རྒྱས་ཀྱི་སྒྲ་དང་། ཆོས་ཀྱི་སྒྲ་དང་། དགེ་འདུན་གྱི་སྒྲ་དང་། སྣང་བའི་སྒྲ་དང་། ཕ་རོལ་ཏུ་ཕྱིན་པའི་སྒྲ་དང་། སྟོབས་ཀྱི་སྒྲ་དང་། མི་འཇིགས་པའི་

སྒྲ་དང་། མངོན་པར་ཤེས་པའི་སྒྲ་དང་། མངོན་པར་འདུ་བྱ་བ་མེད་པའི་སྒྲ་དང་། སྐྱེ་བ་མེད་པའི་སྒྲ་དང་། འགག་པ་མེད་པའི་སྒྲ་དང་། ཞི་བའི་སྒྲ་དང་། ཉེ་བར་ཞི་བའི་སྒྲ་དང་། རབ་ཏུ་ཞི་བའི་སྒྲ་དང་། བྱམས་པ་ཆེན་པོའི་སྒྲ་དང་། སྙིང་རྗེ་ཆེན་པོའི་སྒྲ་དང་། མི་སྐྱེ་བའི་ཆོས་ཀྱི་

སྒྲ་དང་། དབང་བསྐུར་བའི་ས་ཐོབ་པའི་སྒྲ་དང་། ཐེག་པ་ཆེན་པོའི་གཏམ་འབའ་ཞིག་གི་སྒྲ་སྟེ། མེ་ཏོག་གི་ཆར་ཆེན་པོ་དེ་དག་གིས་དགེ་བའི་སྒྲ་དེ་ལྟ་བུས་སངས་རྒྱས་ཀྱི་ཞིང་དེ་དག་བཀང་སྟེ་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྫུ་འཕྲུལ་ཆེ་བ། མཐུ་ཆེ་

བ། ཆོས་ཟབ་མོ་ལ་དབང་ཐོབ་པ། གང་དག་འདུལ་བའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྨོན་ལམ་གྱི་དབང་གིས་སངས་རྒྱས་ཀྱི་ཞིང་སྟོང་པ་དེ་དག་ཏུ་ལྷགས་པ་དེ་དག་གིས་སྒྲ་དེ་ཐོས་ནས་སངས་རྒྱས་ཀྱི་མཐུ་དང་། སྨོན་ལམ་གྱི་དབང་དང་། ཏིང་ངེ་འཛིན་གྱི་

སྟོབས་ཀྱིས། དེ་དག་དེ་ནས་རྫུ་འཕྲུལ་གྱིས་འདི་ལྟར་མགྱོགས་པར་དོང་སྟེ། འདི་ལྟ་སྟེ་དཔེར་ན། སྐྱེས་བུ་སྟོབས་དང་ལྡན་པ་ལག་པ་བརྐྱང་བ་དེ་བཞིན་དུ། བྱང་ཆུབ་སེམས་དཔའ་དེ་དག་ཀྱང་། སངས་རྒྱས་ཀྱི་ཞིང་སྟོང་པ་དེ་དག་ནས་དོང་

སྟེ། སངས་རྒྱས་ཀྱི་ཞིང་ཡང་དག་རྟོག་འདིར་ལྷགས་ནས། བྱང་ཆུབ་སེམས་དཔའ་དེ་དག་གིས་བྱང་ཆུབ་སེམས་དཔའ་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་མཆོད་པ་བྱས་ཤིང་ཐམས་ཅད་དང་ལྡན་པའི་འཁོར་དེ་ལ་ཡང་

Vol. 50 · folio 249b

མཆོད་པ་བྱས་ནས་ཆོས་ཉན་པའི་ཕྱིར་གནས་ཇི་ལྟ་བུ་ཐོབ་པར་འཁོད་དོ། །རིགས་ཀྱི་བུ་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་དེས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་དེ་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་དེ་དག་གིས་མཆོད་པ་བྱས་ཏེ་གསོལ་པ།

བཙུན་པ་བཅོམ་ལྡན་འདས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། རིགས་ཀྱི་བུ་དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ཏིང་ངེ་འཛིན་གློག་གི་སྒྲོན་མ་ཞེས་བྱ་བ་ལ་སྙོམས་པར་ཞུགས་ཏེ། ཏིང་ངེ་འཛིན་དེས་ཐམས་ཅད་དང་ལྡན་

པའི་སངས་རྒྱས་ཀྱི་ཞིང་ཡང་དག་རྟོག་རིན་པོ་ཆེ་སྣ་བདུན་གྱི་རང་བཞིན་དུ་གནས་པར་གྱུར་ནས་རི་དང་། ཤིང་ལྗོན་པ་རྣམས་དང་། རྩྭ་དང་། ཤིང་དང་། ས་གཞི་ཐམས་ཅད་ཀྱང་རིན་པོ་ཆེ་སྣ་བདུན་གྱི་རང་བཞིན་དུ་ཀུན་ཏུ་སྣང་ངོ་། །སེམས་ཅན་གང་དག་ཆོས་མཉན་

པའི་ཕྱིར་དེ་ན་འཁོད་པ་དེ་དག་ཀྱང་དགེ་བའི་ཕྱོགས་ཇི་ལྟ་བུ་ཡིད་ལ་བྱེད་པ་དེ་ལྟ་བུའི་ལུས་སུ་ཁ་ཅིག་ནི་སེར་པོ། ཁ་ཅིག་ནི་དཀར་པོ། ཁ་ཅིག་ནི་བཙོད་ཁ། ཁ་ཅིག་ནི་དམར་པོ། ཁ་ཅིག་ནི་ནག་པོ། ཁ་ཅིག་ནི་སྐྱ་བོར་གནས་ཏེ། ཁ་ཅིག་གི་ནི་ལུས་ནི་རླུང་ལྟ་བུར་ཀུན་ཏུ་

སྣང་། ཁ་ཅིག་ནི་མེ་ལྟ་བུར། ཁ་ཅིག་ནི་ནམ་མཁའ་ལྟ་བུར། ཁ་ཅིག་ནི་སྨིག་རྒྱུ་ལྟ་བུར། ཁ་ཅིག་ནི་ཆུ་ལྟ་བུར། ཁ་ཅིག་ནི་རི་ལྟ་བུར། ཁ་ཅིག་ནི་ཚངས་པ་ལྟ་བུར། ཁ་ཅིག་ནི་བརྒྱ་བྱིན་ལྟ་བུར། ཁ་ཅིག་ནི་མེ་ཏོག་ལྟ་བུར། ཁ་ཅིག་ནི་ནམ་མཁའ་ལྡིང་ལྟ་བུར། ཁ་

ཅིག་ནི་སེང་གེ་ལྟ་བུར། ཁ་ཅིག་ནི་ཉི་མ་ལྟ་བུར། ཁ་ཅིག་ནི་ཟླ་བ་ལྟ་བུར། ཁ་ཅིག་ནི་སྐར་མ་ལྟ་བུར། ཁ་ཅིག་ནི་བྱ་རྒོད་ལྟ་བུ་དང་། ཁ་ཅིག་ནི་ཝ་ལྟ་བུ་དག་ཏུ་ཀུན་ཏུ་སྣང་སྟེ། ཆོས་མཉན་པའི་ཕྱིར་དེ་ན་འཁོད་པའི་སེམས་ཅན་དེ་དག་དགེ་བའི་ཕྱོགས་ཇི་ལྟ་བུ་ཡིད་

ལ་བྱེད་པ་དེ་ལྟ་བུའི་ལུས་སུ་ཀུན་ཏུ་སྣང་ངོ་། །རིགས་ཀྱི་བུ་དེ་ན་སེམས་ཅན་གང་དག་གིས་རང་རང་གི་ལུས་ཇི་ལྟ་བུར་མཐོང་བ་དེ་ལྟ་བུར་སེམས་ཅན་དེ་དག་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྐུ་ཡང་མཐོང་ངོ་། །རིགས་ཀྱི་བུ་མདུན་ན་འདོན་གྱི་གཙོ་བོ་

Vol. 50 · folio 250a

བྲམ་ཟེ་རྒྱ་མཚོའི་རྡུལ་དེས་ཀྱང་མདུན་ན་དེ་བཞིན་གཤེགས་པ་རིན་པོ་ཆེའི་སྙིང་པོ་རིན་པོ་ཆེ་སྣ་བདུན་གྱིས་པད་མ་འདབ་མ་སྟོང་དང་ལྡན་པའི་ཟེ་བ་ལ་བཞུགས་པར་མཐོང་ངོ་། །རིགས་ཀྱི་བུ་དེ་ན་སེམས་ཅན་གང་དག་ས་དང་ནམ་མཁའ་ལ་འདུག་པའམ།

འགྲེང་བའི་སེམས་ཅན་རེ་རེས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོའི་སྐུ་ཡང་དེ་ལྟར་མཐོང་སྟེ། བདག་ནི་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་འདུག་སྟེ། ཐུགས་ཐམས་ཅད་ཀྱིས་དགོངས་ཤིང་བདག་གཅིག་པུ་ལས་བརྩམས་ཏེ་ཆོས་སྟོན་ཏོ་སྙམ་མོ། །

རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་བྲམ་ཟེ་རྒྱ་མཚོའི་རྡུལ་དེ་ལ་ལེགས་སོ་ཞེས་བྱ་བ་བྱིན་ཏེ། བྲམ་ཟེ་ཆེན་པོ་སྙིང་རྗེ་ཆེན་པོ་དང་ལྡན་པ་ཁྱོད་སེམས་ཅན་བགྲང་བ་ལས་ཡང་དག་པར་འདས་པ་རྣམས་ལ་

ཕན་པ་བྱེད་པ་དང་། འཇིག་རྟེན་ལ་སྣང་བ་བྱེད་པར་གྱུར་པ་ནི་སྙིང་རྗེ་དང་ལྡན་པ་ཡིན་ཏེ་ལེགས་སོ་ལེགས་སོ། །བྲམ་ཟེ་འདི་ལྟ་སྟེ་དཔེར་ན་མེ་ཏོག་གི་ཞིང་ཕུན་སུམ་ཚོགས་པ་ཞིག་ལ་ཁ་དོག་སྣ་ཚོགས་དང་། དྲི་སྣ་ཚོགས་དང་། རེག་པ་སྣ་ཚོགས་དང་། འདབ་མ་

སྣ་ཚོགས་དང་། སྡོང་བུ་སྣ་ཚོགས་དང་། རྩ་བ་སྣ་ཚོགས་དང་། སྨན་གྱི་ཡོ་བྱད་ཀྱི་གནས་སྣ་ཚོགས་ཡོད་དོ། །དེ་ལ་མེ་ཏོག་ཁ་ཅིག་གི་ཁ་དོག་དང་དྲིས་ནི་དཔག་ཚད་བརྒྱར། ཁ་ཅིག་གིས་ནི་དཔག་ཚད་ཉིས་བརྒྱར། ཁ་ཅིག་གིས་ནི་དཔག་ཚད་སུམ་བརྒྱར་ལྷང་

ངེ་ལྷན་ནེར་བྱེད་ཅིང་དེ་བཞིན་དུ་སྦྱར་ཏེ། དེ་ན་མེ་ཏོག་ཁ་ཅིག་གི་ཁ་དོག་དང་དྲིས་ནི་གླིང་བཞི་པའི་འཇིག་རྟེན་གྱི་ཁམས་ཐམས་ཅད་དུ་ལྷང་ངེ་ལྷན་ནེར་བྱེད་ལ། དེ་ན་སེམས་ཅན་གང་དག་མིག་མེད་པ་དེ་དག་གིས་མེ་ཏོག་དེའི་དྲི་བསྣམས་ན་ནི་མིག་དག་ཐོབ་པར་འགྱུར། འོན་

པ་རྣམས་ཀྱིས་ནི་རྣ་བ་དག་ཐོབ་པར་འགྱུར། ཡན་ལག་ཐམས་ཅད་ཀྱི་བར་དག་ཉམས་པ་རྣམས་ཀྱིས་ནི་ཡན་ལག་ཐམས་ཅད་འཐོབ་པར་འགྱུར་བ་དང་། དེ་ན་སེམས་ཅན་གང་དག་ནད་བཞི་བརྒྱ་རྩ་བཞི་པོ་དག་གིས་གཙེས་པར་གྱུར་པ་དེ་དག་གིས་དྲི་བསྣམས་ན་ནི་ནད་ཐམས་ཅད་ལས་

Vol. 50 · folio 250b

ཡོངས་སུ་ཐར་བར་འགྱུར་བ་དང་དེ་ན་སེམས་ཅན་གང་དག་མྱོས་པ་དང་། བརྒྱལ་བ་དང་། སྨྱོས་པ་དང་། རེངས་པ་དང་། སེམས་རྨུགས་པ་དང་། སེམས་རྣམ་པར་གཡེངས་པ་དང་། དྲན་པ་རབ་ཏུ་ཉམས་པ་རྣམས་ཀྱིས་མེ་ཏོག་དེ་དག་གི་དྲི་བསྣམས་ན་ནི་དྲན་པ་ཐམས་

ཅད་ཐོབ་པར་འགྱུར་བ་ཞིག་ཡོད་ལ། མེ་ཏོག་གི་ཤིང་དེའི་ནང་ནས་པད་མ་དཀར་པོ་མཁྲང་བ་སྲ་བ་རྡོ་རྗེ་ལས་གྲུབ་པ་འཇམ་པ་སྡོང་བུ་ནི་བཻ་དཱུརྱ། འདབ་མ་ནི་གསེར། ཟེ་འབྲུ་ནི་རྡོའི་སྙིང་པོ། ཟེ་བ་ནི་མུ་ཏིག་དམར་པོ། འཕང་དུ་དཔག་ཚད་བརྒྱད་ཁྲི་བཞི་སྟོང་། རྒྱར་ནི་དཔག་

ཚད་འབུམ་ཡོད་པ་གཅིག་ཅིག་སྐྱེས་པར་གྱུར་ལ། པད་མ་དཀར་པོ་དེའི་ཁ་དོག་དང་དྲིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་ཁྱབ་ཅིང་ལྷང་ངེ་ལྷན་ནེར་འགྱུར་ལ། བྲམ་ཟེ་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་

ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་པོ་དེ་དག་ན་སེམས་ཅན་གྱི་ཁམས་གང་དག་ལུས་མི་འཐུན་པ་དང་། ནད་ཀྱིས་ཉེན་པ་དང་། ཡན་ལག་ཉམས་པ་དང་། མྱོས་པ་དང་། བརྒྱལ་བ་དང་། སྨྱོས་པ་དང་། གཉིད་ལོག་པ་དང་། དྲན་པ་རབ་ཏུ་ཉམས་པ་དང་། སེམས་

རྣམ་པར་གཡེངས་པའི་སེམས་ཅན་དེ་དག་གིས་པད་མ་དཀར་པོ་དེའི་འོད་མཐོང་ཞིང་དྲི་བསྣམས་ན་ནད་ཐམས་ཅད་རབ་ཏུ་ཞི་བར་འགྱུར་ཞིང་དྲན་པ་ཡང་ཐོབ་པར་འགྱུར་བ་དང་། སངས་རྒྱས་ཀྱི་ཞིང་དེ་དག་ན་སེམས་ཅན་གང་དག་ཤི་ནས་ཡུན་རིང་པོ་མ་ལོན་ཞིང་ལུས་མ་ཞིག་

པ་དེ་དག་གི་རོ་ལ་པད་མ་དཀར་པོ་དེའི་འོད་ཟེར་དག་གིས་ཕོག་གམ། དྲིས་རེག་ན་རོ་དེ་དག་ཀྱང་སྲོག་གི་དབང་པོ་འཐོབ་པར་འགྱུར་ཞིང་ཡང་ཕྱིས་ལངས་ཏེ་མཛའ་བཤེས་དང་། སྣག་གི་གཉེན་མཚམས་དག་མཐོང་ནས་དེ་དག་ཐམས་ཅད་སྐྱེད་མོས་ཚལ་དུ་ཞུགས་ཏེ། འདོད་

པའི་ཡོན་ཏན་ལྔ་པོ་དག་འབྱོར་ཅིང་ལྡན་པར་འགྱུར་ལ་གནས་པར་འགྱུར་བ་དང་། གང་དག་ཡང་དེ་ནས་ཤི་འཕོས་པར་འགྱུར་བ་དེ་དག་ཀྱང་ཚངས་པའི་གནས་དག་པར་སྐྱེ་བར་འགྱུར་ལ། དེ་དག་དེར་ཚེ་དཔག་ཏུ་མེད་པར་འགྱུར་ཞིང་ཡུན་རིང་པོར་གནས་པར་འགྱུར་

Vol. 50 · folio 251a

བ་དང་། དེ་ནས་ཤི་འཕོས་ནས་ཀྱང་གཞན་དུ་སྐྱེ་བར་མི་འགྱུར་བ་ཞིག་ཡོད་ན། བྲམ་ཟེ་མེ་ཏོག་གི་ཤིང་དེ་ཇི་ལྟ་བར་ཐེག་པ་ཆེན་པོའི་འདུས་པ་འདི་ཡང་དེ་བཞིན་དུ་བལྟ་བར་བྱའོ། །ཇི་ལྟར་ཉི་མ་འཆར་བ་ཉེ་བར་གནས་པའི་དུས་ན་མེ་ཏོག་དེ་དག་ཁ་

ཕྱེ་ཞིང་རབ་ཏུ་རྒྱས་པར་གྱུར་ནས་ལྷང་ངེ་ལྷན་ནེ། ཤིང་ཁ་ཅིག་གི་འཕང་དུ་ནི་དཔག་ཚད་བརྒྱ། ཁ་ཅིག་གི་འཕང་དུ་ནི་དཔག་ཚད་སྟོང་གི་བར་དུ་གྱུར་ནས་སེམས་ཅན་མང་པོ་དེ་དག་གི་ནད་སྣ་ཚོགས་རབ་ཏུ་ཞི་བར་བྱེད་པ་དེ་ལྟར་ནི་འཇིག་རྟེན་དུ་སངས་རྒྱས་ཉི་མ་དེ་བཞིན་གཤེགས་

པ་སྐྱེས་བུ་དམ་པ་བྱུང་བ་ཡིན་ནོ། །ཇི་ལྟར་ཉི་མ་ཤར་བའི་འོད་ཟེར་དག་གིས་མེ་ཏོག་དེ་དག་ཁ་ཕྱེ་ཞིང་ལམ་མེ་ལྷང་ངེ་ལྷན་ནེར་གྱུར་ནས། ནད་སྣ་ཚོགས་ཀྱིས་ཉེན་པའི་སེམས་ཅན་རྣམས་ཀྱི་ནད་ཉེ་བར་ཞི་བར་འགྱུར་བ་དེ་ལྟར་ནི་སྐྱེས་བུ་དམ་པ་ང་འཇིག་རྟེན་དུ་བྱུང་སྟེ། ཐུགས་རྗེའི་

འོད་ཟེར་དག་གིས། སེམས་ཅན་རྣམས་ལ་ཁྱབ་པར་མཛད་ཅིང་ཁ་ཕྱེ་ནས་ཡང་དང་ཡང་དུ་སེམས་ཅན་རྣམས་ཀྱིས་བསོད་ནམས་བྱ་བའི་དངོས་པོ་གསུམ་པོ་དག་ལ་མངོན་པར་སྦྱོར་བར་མཛད་པ་དང་། ཁྱོད་ཀྱིས་ཀྱང་སེམས་ཅན་ཚད་མེད་གྲངས་མེད་པ་དག་བླ་ན་མེད་པ་ཡང་དག་

པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས་ང་ལ་ཕུལ་བ་དེ་དག་ཐམས་ཅད་ཀྱིས་ངའི་དྲུང་དུ་སངས་རྒྱས་ཀྱི་ཞིང་དག་ཡོངས་སུ་བཟུང་སྟེ། ཁ་ཅིག་གིས་ནི་སངས་རྒྱས་ཀྱི་ཞིང་ཡོངས་སུ་དག་པ་དག་ཡོངས་སུ་བཟུང་། ཁ་ཅིག་གིས་ནི་ཡོངས་སུ་

མ་དག་པ་དག་ཡོངས་སུ་བཟུང་ཞིང་རང་རང་གི་སྨོན་ལམ་ཇི་ལྟར་བཏབ་པ་དེ་ལྟར་ངས་ཀྱང་ལུང་བསྟན་པ་ཡིན་ནོ། །སྐྱེས་བུ་དམ་པ་གང་དག་གིས་ངའི་ཐད་ནས་སངས་རྒྱས་ཀྱི་ཞིང་ཡོངས་སུ་དག་པ་དག་ཡོངས་སུ་བཟུང་བ་དེ་དག་གིས་ནི་འདུལ་བའི་སེམས་ཅན་བསམ་པ་

དག་པ། གདུལ་སླ་བ། དགེ་བའི་རྩ་བ་བསྐྱེད་པ་དག་ཡོངས་སུ་བཟུང་བས་ན་དེའི་ཕྱིར་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་མི་བྱ་སྟེ། དེ་དག་ནི་སྐྱེས་བུ་དམ་པ་ཆེན་པོའི་བྱ་བ་བྱེད་པ་མ་ཡིན་ནོ། །དེ་དག་ནི་སྙིང་རྗེ་ཆེན་པོས་སེམས་དང་སེམས་ལས་བྱུང་བ་དག་ལ་

Vol. 50 · folio 251b

འཇུག་པ་མ་ཡིན་ནོ། །བྱང་ཆུབ་སེམས་དཔའ་དེ་དག་ནི་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་ཚོལ་བ་མ་ཡིན་ཏེ། གང་དག་སངས་རྒྱས་ཀྱི་ཞིང་ཡོངས་སུ་དག་པ་དེ་དག་ཡོངས་སུ་འཛིན་པའི་བྱང་ཆུབ་སེམས་དཔའ་

དེ་དག་གིས་ནི་སྙིང་བརྩེ་བ་སྤངས་པ་ཡིན་ནོ། །གང་དག་ཉན་ཐོས་དང་། རང་སངས་རྒྱས་ཀྱི་ཐེག་པ་དག་ཡོངས་སུ་སྤངས་པའི་སངས་རྒྱས་ཀྱི་ཞིང་འདོད་པའི་བྱང་ཆུབ་སེམས་དཔའ་དག་ནི་ཡེ་ཤེས་དང་། བསམ་པ་ལ་མཁས་པར་གྱུར་པ་མ་ཡིན་ནོ། །གང་དག་ཇི་ལྟར་བདག་ཉན་ཐོས་དང་། རང་

སངས་རྒྱས་སྤངས་པ། དགེ་བའི་རྩ་བ་དང་འགྲོགས་པར་གྱུར་པ། བུད་མེད་རྣམ་པར་སྤངས་པ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་རྣམ་པར་སྤངས་པའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་

བར་གྱུར་ཅིག །ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ལ་ཉན་ཐོས་དང་། རང་སངས་རྒྱས་ཀྱིས་ཡོངས་སུ་སྤངས་པ་ཐེག་པ་ཆེན་པོའི་གཏམ་འབའ་ཞིག་གིས་ཆོས་སྟོན་པར་གྱུར་ཅིག །བདག་གིས་བྱང་ཆུབ་ཐོབ་ནས་ཀྱང་ཚེ་རིང་པོར་གྱུར་ཏེ། ཡུན་རིང་

དུ་གནས་ཤིང་བསྐལ་པ་མང་པོར་བསམ་པ་དག་པ་དང་། གདུལ་སླ་བ་དང་། དགེ་བའི་རྩ་བ་དང་འགྲོགས་པར་གྱུར་པ་རྣམས་ལ་ཆོས་སྟོན་པར་གྱུར་ཅིག་ཅེས་སྨོན་ལམ་དེ་ལྟ་བུ་འདེབས་པའི་བྱང་ཆུབ་སེམས་དཔའ་དེ་དག་ནི་དེས་ན་ཡེ་ཤེས་དང་། བསམ་པ་ལ་མཁས་པར་གྱུར་པ་

ཡང་མ་ཡིན་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱའོ། །རིགས་ཀྱི་བུ་དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་དེས་ཕྱག་བརྐྱང་སྟེ། སོར་མོ་ལྔ་ལས་འོད་ཟེར་ཁ་དོག་སྣ་ཚོགས། ཁ་དོག་དུ་མ། ཁ་དོག་འབུམ་ཕྲག་དུ་མ་དང་ལྡན་པ་དག་རབ་ཏུ་བཀྱེའོ། །འོད་

ཟེར་དེ་དག་ཚད་མེད་གྲངས་མེད་དཔག་ཏུ་མེད་པའི་ཕྱོགས་སུ་དོང་སྟེ། སངས་རྒྱས་ཀྱི་ཞིང་རྣམས་སྣང་བར་བྱས་ནས། དེ་ནས་འཇིག་རྟེན་གྱི་ཁམས་མཐེ་བོ་ཅན་ཞེས་བྱ་བ་ཡོད་དེ། འཇིག་རྟེན་གྱི་ཁམས་མཐེ་བོ་ཅན་དེ་ན་མི་རྣམས་ནི་ཚེ་ལོ་བཅུ་པ་མདོག་ངན་པ། མི་སྡུག་པ། མི་དགེ་བའི་

Vol. 50 · folio 252a

རྩ་བ་དང་ལྡན་པ་སྟེ། ཁྲུན་ནི་མཐེ་བོའི་ཚད་ཙམ་མོ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མ་ལ་དགའ་བ་ཞེས་བྱ་བ་བཞུགས་ཏེ། དེ་བཞིན་གཤེགས་པ་དེའི་སྐུའི་ཁྲུན་ཡང་རྩོད་པའི་དུས་ཀྱི་ཚད་ཀྱི་མི་རྣམས་

ཀྱི་ཁྲུ་གང་དང་། མཐེ་བོ་ཙམ་གྱི་མི་རྣམས་ཀྱི་ཁྲུ་གང་དང་། སོར་བདུན་གྱི་ཚད་ཙམ་སྟེ། དེ་བཞིན་གཤེགས་པ་དེ་ཡང་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་རྣམས་ལ་ཐེག་པ་གསུམ་པོ་དག་གིས་ཆོས་སྟོན་ཏོ། །རིགས་ཀྱི་བུ་དེ་ནས་ཐམས་ཅད་དང་ལྡན་པའི་

འཁོར་དེས་སངས་རྒྱས་ཀྱི་ཞིང་དེ་དང་། མི་དེ་དག་དང་། དེ་བཞིན་གཤེགས་པ་དེ་མཐོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་བཀའ་སྩལ་པ། དེ་བཞིན་གཤེགས་པ་སྐར་མ་ལ་དགའ་བ་དེས་ནི་བསྐལ་པ་དཔག་

ཏུ་མེད་གྲངས་མེད་པ་འདས་པ་ན་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པར་སྣང་བའི་སྤྱན་སྔར་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། སྲོག་ཆགས་བྱེ་བ་ཁྲག་ཁྲིག་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་

པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །སེམས་ཅན་དེ་དག་གིས་ཀྱང་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པར་སྣང་བའི་སྤྱན་སྔར་བསམ་པ་ཇི་ལྟ་བ་བཞིན་དུ་སྨོན་ལམ་བཏབ་སྟེ། ཁ་ཅིག་གིས་ནི་སངས་རྒྱས་ཀྱི་ཞིང་གི་

ཡོན་ཏན་བཀོད་པ་ཡོངས་སུ་དག་པ་དག་ཡོངས་སུ་བཟུང་ངོ་། །ཁ་ཅིག་གིས་ནི་ཡོངས་སུ་མ་དག་པ་སྙིགས་མ་ལྔ་དང་ལྡན་པ་དག་པ་ཡོངས་སུ་བཟུང་ངོ་། །དེ་ན་སེམས་ཅན་ཆེན་པོ་དེས་ང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཞག་

སྟེ་རབ་ཏུ་གནས་པར་བྱས་ནས། དེར་ངས་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པར་སྣང་བའི་སྤྱན་སྔར་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་

Vol. 50 · folio 252b

སྨོན་ལམ་བཏབ་བོ། །དེ་བཞིན་གཤེགས་པ་དེས་ཀྱང་ང་ལ་ལེགས་སོ་ཞེས་བྱ་བ་བྱིན་ནས་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ན་གང་གིས་བྱང་ཆུབ་ཡང་དག་པར་འཛིན་དུ་བཅུག་པའི་དགེ་བའི་བཤེས་གཉེན་སྐྱེས་བུ་དམ་པ་དེས་སྙིགས་མ་ལྔ་

ཤིན་ཏུ་བདོ་ཞིང་ཉོན་མོངས་པ་དང་རྩོད་པའི་དུས་ལ་བབ་པའི་ཚེ་ཤིན་ཏུ་ཉོན་མོངས་པའི་སངས་རྒྱས་ཀྱི་ཞིང་ཡོངས་སུ་བཟུང་ཞིང་འདུལ་བའི་སེམས་ཅན་མཚམས་མེད་པ་བྱེད་པ་དང་། མི་དགེ་བའི་རྩ་བ་དང་ལྡན་པ་དང་། སེམས་ཀྱི་རྒྱུད་ཚིག་པ་དང་། འཁོར་བའི་འབྲོག་དགོན་པ་ཉམ་

ང་བར་ཞུགས་པ་དག་སྨོན་ལམ་གྱིས་ཡོངས་སུ་བཟུང་ནས་སྐྱེས་བུ་དམ་པ་དེ་ལ་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་གཞན་དང་གཞན་དག་ན་བཞུགས་ཏེ། འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ལེགས་སོ་ཞེས་ཕོ་ཉ་བཏང་

སྟེ། སྙིང་རྗེ་ཆེན་པོ་རྣམ་པར་སྣང་བྱེད་ཞི་བ་ཞེས་བྱ་བར་མིང་བཏགས་སོ། །ངའི་དགེ་བའི་བཤེས་གཉེན་ཕན་པར་མཛད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་རྣམ་པར་སྣང་བྱེད་ཞི་བ་དེ་ད་ལྟར་འཇིག་རྟེན་གྱི་ཁམས་མཐེ་བོ་ཅན་དུ་མཐེ་བོའི་ཚད་ཙམ་གྱི་མི་རྣམས་

ཀྱི་ནང་དུ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་ཏེ། དེ་བཞིན་གཤེགས་པ་ཁྲུ་གང་ཙམ་པོ་དེས་མཐེ་བོའི་ཚད་ཙམ་གྱི་མི་དེ་དག་ཉིད་ཀྱི་ཁྲུ་གསུམ་གྱི་ཚད་ཙམ་གྱིས་སྐྱེ་དགུ་ཚེ་ལོ་བཅུ་པ་རྣམས་ལ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ཏོ། །དེས་དང་པོ་བླ་ན་མེད་པ་

ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་པའི་སངས་རྒྱས་བཅོམ་ལྡན་འདས་གང་དག་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན་བཞུགས་ཏེ་འཚོ་ཞིང་གཞེས་པ་དེ་དག་གིས་ཀྱང་བྱང་ཆུབ་ཐོབ་པ་དེ་ལ་མཆོད་

པ་བྱ་བའི་ཕྱིར་ཕོ་ཉ་དག་བཏང་ངོ་། །དེས་དང་པོ་གང་དག་སྦྱིན་པའི་ཕ་རོལ་ཏུ་ཕྱིན་པ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་པའི་སངས་རྒྱས་བཅོམ་ལྡན་འདས་སྔོན་གྱི་བྱས་པ་གཟོ་ཞིང་རྗེས་སུ་དགོངས་པ་དེ་

Vol. 50 · folio 253a

དག་གིས་ཀྱང་དེ་བཞིན་གཤེགས་པ་དེ་ལ་མེ་ཏོག་དག་བསྐུར་རོ། །བྲམ་ཟེ་སངས་རྒྱས་བཅོམ་ལྡན་འདས་དེ་དག་ཇི་ལྟར་སངས་རྒྱས་ཀྱི་ཞིང་རབ་ཏུ་དང་བདག་ན་སེམས་ཅན་ཚེ་རིང་བ། བསམ་པ་ཡོངས་སུ་དག་པ། བདེ་བར་གནས་པ་རྣམས་ལ་སངས་

རྒྱས་ཀྱི་མཛད་པ་མཛད་པ་རྣམས་དང་། དེ་བཞིན་གཤེགས་པ་སྐར་མ་ལ་དགའ་བ་དེ་དེ་ལྟར་སངས་རྒྱས་ཀྱི་ཞིང་རབ་ཏུ་ངན་པ་སྙིགས་མ་ལྔ་དང་ལྡན་པ་དེ་ལྟ་བུར་སངས་རྒྱས་ཉིད་ཐོབ་ནས་སེམས་ཅན་མཚམས་མེད་པ་བྱེད་པ་དང་། མི་དགེ་བའི་རྩ་བ་དང་ལྡན་པར་གྱུར་པའི་

བར་དག་ལ་ཚེ་ཐུང་ངུས་སངས་རྒྱས་ཀྱི་མཛད་པ་མང་པོ་ལྷག་པར་མཛད་ཅིང་། ཉན་ཐོས་དང་རང་སངས་རྒྱས་རྣམས་ཀྱང་མ་སྤངས་པར་ཆོས་སྟོན་པ་ལ་ལྟོས། སྐྱེས་བུ་དམ་པ་ཁྱོད་ཀྱིས་ཀྱང་དེ་ལྟར་སངས་རྒྱས་ཀྱི་ཞིང་ཤིན་ཏུ་ངན་ཅིང་སྙིགས་མ་ལྔ་དང་ལྡན་པར་མཚམས་

མེད་པ་བྱེད་པ་དང་། མི་དགེ་བའི་རྩ་བ་དང་ལྡན་པའི་བར་གྱི་འདུལ་བའི་སེམས་ཅན་རྣམས་ཡོངས་སུ་བཟུང་ཞིང་སྨོན་ལམ་ཁྱད་པར་ཅན་བཏབ་པས་ན། བྱང་ཆུབ་སེམས་དཔའི་འཁོར་འདི་དག་ཐམས་ཅད་ཟིལ་གྱིས་མནན་ཏོ། །བྱང་ཆུབ་སེམས་དཔའ་གང་དག་གིས་

སེམས་ཅན་དམྱལ་བ་དང་། དུད་འགྲོའི་སྐྱེ་གནས་ཡོངས་སུ་སྤངས་པ་དང་། ཉན་ཐོས་དང་། རང་སངས་རྒྱས་ཡོངས་སུ་སྤངས་པའི་སངས་རྒྱས་ཀྱི་ཞིང་ཡོངས་སུ་དག་པ་རྣམས་ཡོངས་སུ་བཟུང་ཞིང་འདུལ་བའི་སེམས་ཅན་བསམ་པ་དག་པ་ཤིན་ཏུ་དུལ་བ། དགེ་བའི་རྩ་བ་

བསྐྱེད་པ་དག་ཡོངས་སུ་བཟུང་བའི་སེམས་ཅན་དེ་དག་ནི་མེ་ཏོག་ལྟ་བུ་ཞེས་བྱ་སྟེ། གང་དག་ཤིན་ཏུ་དུལ་བ་དགེ་བའི་རྩ་བ་བསྐྱེད་པ་རྣམས་ཀྱི་ནང་དུ་སངས་རྒྱས་ཀྱི་མཛད་པ་བྱེད་པར་འགྱུར་བ་དེ་དག་ནི་པད་མ་དཀར་པོ་ལྟ་བུའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་མ་

ཡིན་ནོ། །བྲམ་ཟེ་བྱང་ཆུབ་སེམས་དཔའ་རྣམས་ཀྱི་ལེ་ལོའི་དངོས་པོ་ནི་བཞི་སྟེ། བཞི་གང་ཞེ་ན། སངས་རྒྱས་ཀྱི་ཞིང་ཡོངས་སུ་དག་པར་སྨོན་པ་དང་། སེམས་ཅན་བསམ་པ་ཡོངས་སུ་དག་པ་རྣམས་ལ་སངས་རྒྱས་ཀྱི་མཛད་པ་བྱེད་པར་སྨོན་པ་དང་། བྱང་ཆུབ་ཐོབ་

Vol. 50 · folio 253b

ནས་ཉན་ཐོས་དང་རང་སངས་རྒྱས་ཀྱི་ཐེག་པའི་གཏམ་མི་སྟོན་པར་སྨོན་པ་དང་། བྱང་ཆུབ་ཐོབ་ནས་ཚེ་རིང་བར་སྨོན་པ་སྟེ། བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལེ་ལོའི་དངོས་པོ་ཡིན་ཏེ། དེས་ན་བྱང་ཆུབ་སེམས་དཔའ་མེ་ཏོག་ལྟ་བུ་རྣམས་ཞེས་བྱའི། པད་མ་

དཀར་པོ་ལྟ་བུ་ཡང་མ་ཡིན་ལ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། བྲམ་ཟེ་འདི་ལྟ་སྟེ་དཔེར་ན་བྱང་ཆུབ་སེམས་དཔའི་འཁོར་འདི་མ་གཏོགས་པར་ཁྱབ་འཇུག་རླུང་གིས་གང་གི་ཕྱིར་སངས་རྒྱས་ཀྱི་ཞིང་ཡོངས་སུ་མ་དག་པ་ཡོངས་སུ་བཟུང་ཞིང་འདུལ་བའི་སེམས་ཅན་ཉོན་

མོངས་པས་དཀྲུགས་པ་རྣམས་དང་། བསྐལ་པ་བཟང་པོའི་རིགས་ཀྱི་བུ་ཁ་ཅིག་ཀྱང་ཡོངས་སུ་བཟུང་བ་ལྟ་བུའོ། །བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་བརྩམས་པའི་དངོས་པོ་ནི་བཞི་པོ་འདི་དག་ཡིན་ཏེ། བཞི་གང་ཞེ་ན། སངས་རྒྱས་ཀྱི་ཞིང་ཡོངས་སུ་མ་དག་

པར་སྨོན་པ་དང་། སེམས་ཅན་བསམ་པ་ཡོངས་སུ་མ་དག་པ་རྣམས་ལ་སངས་རྒྱས་ཀྱི་མཛད་པ་བྱེད་པར་སྨོན་པ་དང་། བྱང་ཆུབ་ཐོབ་ནས་ཉན་ཐོས་དང་རང་སངས་རྒྱས་ཀྱི་ཐེག་པའི་གཏམ་སྟོན་པར་སྨོན་པ་དང་། བྱང་ཆུབ་ཐོབ་ནས་ཚེ་ཧ་ཅང་ཡང་མི་རིང་ཧ་ཅང་ཡང་མི་ཐུང་བ་

ཞིག་བར་མར་སྒྲུབ་པར་སྨོན་པ་སྟེ། བཞི་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བརྩོན་འགྲུས་བརྩམས་པའི་དངོས་པོ་ཡིན་ཏེ། དེས་ན་བྱང་ཆུབ་སེམས་དཔའ་པད་མ་དཀར་པོ་ལྟ་བུ་རྣམས་ཞེས་བྱའི་མེ་ཏོག་ལྟ་བུ་རྣམས་ཞེས་མི་བྱ་སྟེ། བྱང་

ཆུབ་སེམས་དཔའ་དེ་དག་ནི་སེམས་དཔའ་ཆེན་པོ་རྣམས་ཞེས་ཀྱང་བྱའོ། །བྲམ་ཟེ་འདི་ལྟ་སྟེ་དཔེར་ན་ཁྱོད་ནི་ད་ལྟར་སྨོན་ལམ་གྱི་དབང་གིས་དེ་བཞིན་གཤེགས་པའི་སྤྱན་སྔར་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་རྣམས་ཀྱི་ནང་དུ་དགེ་བ་ལུང་བསྟན་པའི་ཞིང་དུ་སྙིང་

རྗེ་པད་མ་དཀར་པོ་ལྟ་བུར་སྐྱེས་པ་ཡིན་ནོ། །གང་གི་ཚེ་ཁྱོད་ཀྱིས་སྙིང་རྗེ་ཆེན་པོ་བརྗོད་པས་མཚམས་མེད་པ་བྱེད་པ་དང་། མི་དགེ་བའི་རྩ་བ་དང་ལྡན་པར་གྱུར་པའི་བར་གྱི་འདུལ་བ་རྣམས་ཡོངས་སུ་བཟུང་ཞིང་སྙིགས་མ་ལྔ་བདོ་བའི་སངས་རྒྱས་ཀྱི་ཞིང་ཡོངས་སུ་བཟུང་བའི་

Vol. 50 · folio 254a

ཚེ། ཕྱོགས་བཅུའི་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གིས་ཀྱང་སྐྱེས་བུ་དམ་པ་ཁྱོད་ལ་ལེགས་སོ་ཞེས་བྱ་བ་བྱིན་ཏེ། ཕོ་ཉ་དག་ཀྱང་བཏང་ནས་ཁྱོད་ཀྱི་མིང་སྙིང་རྗེ་ཆེན་པོ་དང་ལྡན་པ་ཞེས་བྱ་བར་བཏགས་སོ། །

འཁོར་འདི་དག་ཐམས་ཅད་ཀྱང་ཁྱོད་ལ་མཆོད་པའི་ལས་བྱ་བའི་ཕྱིར་བརྩོན་པར་གྱུར་ཏོ། །སྙིང་རྗེ་ཆེན་པོ་དང་ལྡན་པ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གང་གཱའི་ཀླུང་གི་བྱེ་མ་སྙེད་གཅིག་འདས་ནས་ལྷག་མ་བསྐལ་པ་གྲངས་མེད་པ་གང་གཱའི་ཀླུང་གི་བྱེ་

མ་སྙེད་གཉིས་པ་ལ་བབ་པ་ན་བསྐལ་པ་བཟང་པོ་ལ་འཇིག་རྟེན་གྱི་ཁམས་མི་མཇེད་དེར་སྐྱེ་དགུའི་ཚེ་ལོ་བརྒྱ་ཉི་ཤུ་ཐུབ་ཅིང་། རྒ་བ་དང་། འཆི་བ་མང་བའི་སངས་རྒྱས་ཀྱི་ཞིང་ན་འཇིག་རྟེན་ལྡོངས་པ། འདྲེན་པ་མེད་པ། མི་དགེ་བའི་རྩ་བ་དང་ལྡན་པར་གྱུར་ཅིང་། སེམས་

ཅན་ལམ་ངན་པས་བཅོམ་པ། ཉམ་ང་བ་ཆེན་པོ་ཐོབ་པ། མཚམས་མེད་པ་བྱེད་པ། འཕགས་པ་ལ་སྐུར་པ་འདེབས་པ། དམ་པའི་ཆོས་སྤོང་བ། ལྟུང་བའི་རྩ་བ་འབྱུང་བ་ནས་ཇི་སྐད་སྔར་སྨོས་པའི་བར་དག་ལྟ་བུས་གང་བའི་འཇིག་རྟེན་དུ་དེ་བཞིན་གཤེགས་པ་རིག་པ་

དང་ཞབས་སུ་ལྡན་པ་ནས་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་ཏེ། འགྲོ་བའི་འཁོར་ལོ་ནི་བཟློག །ཆོས་ཀྱི་འཁོར་ལོ་ནི་བསྐོར། དབང་སྒྱུར་བའི་བདུད་དང་། ཉོན་མོངས་པའི་བདུད་ནི་བཅིལ་ཏེ། ཕྱོགས་བཅུའི་སངས་རྒྱས་ཀྱི་ཞིང་མཐའ་ཡས་མུ་མེད་པ་དག་

ཏུ་སྒྲས་ཁྱབ་པར་བྱས་ནས། ཁྱོད་ཀྱི་ཉན་ཐོས་འདུས་པ་ཆེན་པོ་དག་འབྱུང་བར་འགྱུར་བ་འདི་ལྟ་སྟེ། དགེ་སློང་སྟོང་ཉིས་བརྒྱ་ལྔ་བཅུ་དང་ལྷན་ཅིག་སྨོན་ལམ་ཇི་ལྟར་བཏབ་པ་དེ་བཞིན་དུ། ལོ་བཞི་བཅུ་རྩ་ལྔར་རིམ་གྱིས་སངས་རྒྱས་ཀྱི་མཛད་པ་དེ་ལྟ་བུ་མཐའ་དག་ཡོངས་

སུ་རྫོགས་པར་བྱེད་པར་འགྱུར་རོ། །དེའི་ཚེ་ན་ཇི་ལྟར་རྒྱལ་པོ་ཆེན་པོ་བདུད་རྩི་དག་པ་འདི་འོད་དཔག་མེད་ཅེས་བྱ་བར་འགྱུར་ཞིང་བསྐལ་པ་ཚད་མེད་པ་དག་གིས་སངས་རྒྱས་ཀྱི་མཛད་པ་མཐའ་དག་བྱེད་པར་འགྱུར་བ་དེ་བཞིན་དུ་སྙིང་རྗེ་ཆེན་པོ་དང་ལྡན་པ་ཁྱོད་ཀྱང་བསྐལ་པ་

Vol. 50 · folio 254b

ཆེན་པོ་བཟང་པོ་ལ་འཇིག་རྟེན་གྱི་ཁམས་མི་མཇེད་དེར་སྐྱེ་དགུ་ཚེ་ལོ་བརྒྱ་ཉི་ཤུ་ཐུབ་པ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བར་འགྱུར་ཏེ། ལོ་བཞི་བཅུ་རྩ་ལྔས་སངས་རྒྱས་ཀྱི་མཛད་པ་དེ་ལྟ་བུ་མང་པོ་དག་བྱེད་པར་འགྱུར་རོ། །སྐྱེས་བུ་དམ་པ་ཁྱོད་བླ་ན་མེད་

པའི་ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ལོ་སྟོང་ལྷག་པར་གནས་པར་གྱུར་ཏོ། །སྐྱེས་བུ་དམ་པ་ཁྱོད་ཀྱི་དམ་པའི་ཆོས་ནུབ་ནས་ཀྱང་ལུས་ལས་སྐྱེས་པའི་སྐུ་གདུང་རྣམས་ཀྱང་རང་གིས་སྨོན་ལམ་ཇི་ལྟར་བཏབ་པ་དེ་ལྟར་སངས་རྒྱས་ཀྱི་མཛད་པ་མང་པོ་

མཐའ་དག་བྱེད་པར་འགྱུར་ཏེ། སྔར་ཇི་སྐད་སྨོས་པ་དེ་བཞིན་དུ་ཡུན་རིང་པོར་སེམས་ཅན་རྣམས་འདུལ་བར་འགྱུར་རོ། །རིགས་ཀྱི་བུ་དེའི་ཚེ་ན་གནས་གྲོང་ཞེས་བྱ་བ་ན་བྲམ་ཟེ་ཞིག་ཡོད་པ་དེས་འདི་སྐད་ཅེས་སྨྲས་སོ། །སྐྱེས་བུ་དམ་པ་ཁྱོད་བསྐལ་པ་གྲངས་

མེད་པ་དེ་དང་དེ་དག་ཏུ་བྱང་ཆུབ་ཀྱི་སྤྱད་པ་སྤྱོད་པ་ན། བདག་ཀྱང་རྟག་ཏུ་བསྙེན་བཀུར་བར་འགྱུར་ཞིང་། བྱམས་པ་དང་འཐུན་པའི་ཡོ་བྱད་སྦྱོར་བ་དང་། གྲོགས་བྱེད་པར་གྱུར་ནས་ཁྱོད་ལ་བསྙེན་བཀུར་བྱེད་པར་གྱུར་ཅིག །ཁྱོད་སྲིད་པ་ཐ་མ་པར་གྱུར་པ་ན་བདག་

ཁྱོད་ཀྱི་ཕར་གྱུར་ཅིག །སྐྱེས་བུ་དམ་པ་བདག་ཁྱོད་ཀྱིས་བྱང་ཆུབ་ཐོབ་པའི་སྦྱིན་བདག་གི་མཆོག་ཏུ་འགྱུར་ཞིང་ཁྱོད་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག །གཞན་ཡང་དེ་ན་རྒྱ་མཚོའི་ལྷ་མོ་ཤིན་ཏུ་དུལ་བའི་བློ་ཞེས་བྱ་བ་

དེས་ཀྱང་སྨྲས་པ། བསྐལ་པ་གྲངས་མེད་པ་དེ་དང་དེ་དག་ཅེས་བྱ་བ་ནས་ཁྱོད་སྲིད་པ་ཐ་མ་པའི་བར་དུ་གྱུར་པ་ན་བདག་ཁྱོད་སྐྱེད་པའི་མར་གྱུར་ཅིག །སྙིང་རྗེ་ཆེན་པོ་དང་ལྡན་པ་ཁྱོད་ཀྱིས་བྱང་ཆུབ་ཐོབ་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་

ལུང་སྟོན་པར་གྱུར་ཅིག །རྒྱུ་སྐར་གྱི་ལྷ་མོ་ཆུ་ལྷ་སྤྱོད་ཅེས་བྱ་བ་དེས་ཀྱང་སྨྲས་པ། དེ་དང་དེ་དག་ཅེས་བྱ་བ་ནས་ཁྱོད་སྲིད་པ་ཐ་མ་པའི་བར་དུ་གྱུར་པ་ན་བདག་ཁྱོད་ལ་བསྣུན་པའི་མ་མ་བྱེད་པའི་མར་གྱུར་ཅིག །ཁྱོད་ཀྱིས་བྱང་ཆུབ་ཐོབ་ནས་བདག་བླ་ན་མེད་

Vol. 50 · folio 255a

པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག །བརྒྱ་བྱིན་མུ་ཁྱུད་ཅན་ཞེས་བྱ་བ་དང་། གཞན་ཡང་བརྒྱ་བྱིན་ཕ་རོལ་སེམས་ཤེས་བྱ་བ་དེ་གཉིས་ཀྱིས་ཀྱང་སྨྲས་པ། ཀྱེ་སྙིང་རྗེ་ཆེན་པོ་དང་ལྡན་པ་བདག་ཅག་ཀྱང་དེ་དག་ཅེས་བྱ་བ་ནས།

ཁྱོད་ཀྱིས་བྱང་ཆུབ་ཐོབ་པ་ཞེས་བྱ་བའི་བར་དུ་སྟེ། བདག་ཅག་ཤེས་རབ་དང་ལྡན་པ་དང་། རྫུ་འཕྲུལ་དང་ལྡན་པའི་ཉན་ཐོས་ཟུང་དུ་གྱུར་ཅིག །གཞན་ཡང་བརྒྱ་བྱིན་སྤྱད་སྤྱོད་ལྟ་མཛེས་ཚོགས་ཞེས་བྱ་བ་དེས་འདི་སྐད་ཅེས་སྨྲས་སོ། །སྙིང་རྗེ་ཆེན་པོ་དང་ལྡན་པ་བདག་

ཀྱང་ཁྱོད་དེ་དང་དེ་དག་ཅེས་བྱ་བ་ནས་སྲིད་པ་ཐ་མའི་བར་དུ་གྱུར་པའི་བུར་གྱུར་ཅིག །གཞན་ཡང་རི་རྩེའི་ལྷ་མོ་དེས་པ་ཀིང་ཤུ་ཀ་ཞེས་བྱ་བ་དེས་ཀྱང་སྨྲས་པ། སྙིང་རྗེ་ཆེན་པོ་དང་ལྡན་པ་བདག་ཀྱང་ཚེ་རབས་དེ་དང་དེ་དག་ཏུ་ཁྱོད་ཀྱི་བཙུན་མོར་གྱུར་ཅིང་། ཁྱོད་ཀྱིས་བྱང་ཆུབ་

ཐོབ་ནས་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག །ལྷ་མ་ཡིན་གྱི་དབང་པོ་མཛེས་སྤྱོད་ཅེས་བྱ་བ་དེས་ཀྱང་སྨྲས་པ། སྙིང་རྗེ་ཆེན་པོ་དང་ལྡན་པ་ཁྱོད་བསྐལ་པ་གྲངས་མེད་པ་དེ་དང་དེ་དག་ཏུ་བྱང་ཆུབ་ཀྱི་སྤྱད་པ་སྤྱོད་པ་ན་བདག་ཀྱང་

སྐྱེས་བུ་དམ་པ་ཁྱོད་ལ་བྱམས་པ་དང་འཐུན་པའི་ཡོ་བྱད་ཀྱིས་གྲོགས་བྱེད་པའི་བྲན་ཉིད་དུ་གྱུར་ཏེ། ཁྱོད་ལ་བསྙེན་བཀུར་བྱེད་པར་གྱུར་ཅིག །ཁྱོད་སྲིད་པ་ཐ་མ་པར་གྱུར་པ་ལ་ཡང་བདག་བསྙེན་བཀུར་བྱེད་པར་གྱུར་ཅིག །སྐྱེས་བུ་དམ་པ་ཁྱོད་ཀྱིས་བྱང་ཆུབ་ཐོབ་ནས་ཀྱང་

ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་བའི་ཕྱིར་གསོལ་བ་འདེབས་པར་གྱུར་ཅིག །ཁྱོད་ཀྱིས་ཆོས་བསྟན་པ་བདག་གིས་དང་པོར་འབྲས་བུ་དང་བཅས་པར་བྱེད་པར་གྱུར་ཅིག །ཆོས་ཀྱི་བཅུད་ཀྱང་འཐུང་བར་གྱུར་ཅིག །འཆི་བ་མེད་པ་ཡང་རྟོགས་པར་གྱུར་ཅིག །

ཉོན་མོངས་པ་ཐམས་ཅད་སྤངས་པའི་ཕྱིར་དགྲ་བཅོམ་པ་ཉིད་ཀྱི་བར་ཡང་ཐོབ་པར་གྱུར་ཅིག །དེ་བཞིན་དུ་སྦྱར་ཏེ། དེ་ན་ལྷ་དང་། ཀླུ་དང་། ལྷ་མ་ཡིན་གང་གཱའི་ཀླུང་གི་བྱེ་མ་སྙེད་དག་གིས་ཀྱང་སྙིང་རྗེ་ཆེན་པོ་དང་ལྡན་པ་དེའི་སྤྱོད་པའི་རྗེས་སུ་འཇུག་པའི་ཕྱིར་སྨོན་

Vol. 50 · folio 255b

ལམ་བཏབ་སྟེ་འདུལ་བ་དག་ཀྱང་ཉེ་བར་བཀོད་དོ། །དེ་ན་འཚོ་བ་པ་མི་འགྱུར་འཇིགས་བྱེད་ཅེས་བྱ་བ་གཅིག་ཅིག་འདུག་པ་དེས་སྨྲས་པ། ཀྱེ་བྲམ་ཟེ་ཆེན་པོ་བདག་ཀྱང་ཁྱོད་ལ་ཡོ་བྱད་མང་པོ་དག་གིས་གྲོགས་བྱེད་པར་གྱུར་ཅིག །བདག་བསྐལ་པ་དཔག་ཏུ་མེད་

པ་དག་ཏུ་ཁྱོད་ལ་འབྲས་བུ་དང་བཅས་པར་སྤྱོད་ཅིང་ཉེ་བར་འཚོ་བའི་ཉེ་དུར་གྱུར་ཅིག །རྟག་ཏུ་དངོས་པོ་བསླང་བའི་དོན་དུ་ཁྱོད་ཀྱི་དྲུང་དུ་ཉེ་བར་འགྲོ་བར་གྱུར་ཅིག །མལ་ཆ་དང་། སྟན་དང་། བགོ་བ་དང་། གླང་པོ་ཆེ་དང་། རྟ་དང་། ཤིང་རྟ་དང་། གྲོང་དང་། གྲོང་ཁྱེར་དང་།

གྲོང་རྡལ་དང་། ཁྱིམ་དང་། བུ་དང་། བུ་མོ་དང་། ཤ་དང་། ཁྲག་དང་། པགས་པ་དང་། རུས་པ་དང་། ལག་པ་དང་། རྐང་པ་དང་། ལྕེ་དང་། རྣ་བ་དང་། སྣ་དང་། མིག་དང་། མགོ་དག་སློང་བར་གྱུར་ཅིག །བྲམ་ཟེ་ཆེན་པོ་བདག་དེ་ལྟར་ཁྱོད་ཀྱི་སྦྱིན་པའི་ཕ་རོལ་ཏུ་

ཕྱིན་པའི་གྲོགས་སུ་གྱུར་ཅིག །ཤེས་རབ་ཀྱི་ཕ་རོལ་ཏུ་ཕྱིན་པའི་བར་གྱི་གྲོགས་སུ་ཡང་གྱུར་ཅིག །བྲམ་ཟེ་ཆེན་པོ་བདག་དེ་ལྟར་ཁྱོད་བྱང་ཆུབ་ཀྱི་སྤྱད་པ་སྤྱོད་པའི་ཕ་རོལ་ཏུ་ཕྱིན་པ་དྲུག་གི་གྲོགས་སུ་གྱུར་ཅིག །ནམ་ཁྱོད་ཀྱིས་བྱང་ཆུབ་ཐོབ་པ་ན་བདག་ཀྱང་ཁྱོད་ཀྱི་

ཉན་ཐོས་ཀྱི་གནས་ཐོབ་པར་གྱུར་ཅིག །ཆོས་ཀྱི་ཕུང་པོ་བརྒྱད་ཁྲི་འཛིན་པར་གྱུར་ཅིག །རྗེས་སུ་ཆོས་སྟོན་པར་གྱུར་ཅིག །ཁྱོད་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག །རིགས་ཀྱི་བུ་བྲམ་ཟེ་སྙིང་རྗེ་ཆེན་པོ་དང་ལྡན་

པས་དེ་ཐོས་པ་དང་། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་ནས་འཚོ་བ་མི་འགྱུར་འཇིགས་བྱེད་ལ་བོས་ཏེ་སྨྲས་པ། སྐྱེས་བུ་དམ་པ་ཁྱོད་ངའི་བླ་ན་མེད་པའི་སྤྱོད་པའི་གྲོགས་སུ་འགྱུར་བ་ནི་ལེགས་སོ་ལེགས་སོ། །ཁྱོད་ཚེ་རབས་

ཁྲག་ཁྲིག་འབུམ་ཕྲག་ཚད་མེད་གྲངས་མེད་པའི་བར་དུ་ང་ལ་དངོས་པོ་སློང་བའི་ཕྱིར་ན་མ་འོངས་པ་དེའི་ཚེ་ངས་ཀྱང་སེམས་རབ་ཏུ་དང་བས་སྦྱིན་པར་བྱ་སྟེ། ཁྱོད་ལ་ཡང་བསོད་ནམས་མ་ཡིན་པའི་ཆ་དང་འཐུན་པར་མ་གྱུར་ཅིག །རིགས་ཀྱི་བུ་བྱང་ཆུབ་སེམས་དཔའ་སེམས་

Vol. 50 · folio 256a

དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་ཡང་གསོལ་པ། བཙུན་པ་བཅོམ་ལྡན་འདས་བདག་བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མ་མཆིས་གྲངས་མ་མཆིས་པ་དེ་དང་དེ་དག་ཏུ་བླ་ན་མེད་པ་ཡང་

དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པའི་ཚེ། གལ་ཏེ་བདག་གི་མདུན་དུ་སློངས་མོ་པ་གང་དག་མཆིས་ནས་ཟས་སློང་བར་བགྱིད་ཅིང་ཚིག་འཇམ་པོའམ། ཚིག་རྩུབ་པོའམ། བརྙས་པའི་ཚིག་གམ། ཚིག་གསལ་བས་སློང་བར་གྱུར་ན། བཙུན་པ་བཅོམ་

ལྡན་འདས་གལ་ཏེ་བདག་གིས་སློངས་མོ་པ་ལ་སེམས་ཀྱི་སྐད་ཅིག་གཅིག་ཙམ་ཞིག་ཁྲོ་བ་བསྐྱེད་པར་གྱུར་ཏམ། མ་དད་པའི་སེམས་བསྐྱེད་པར་གྱུར་ཏམ། སྦྱིན་པའི་རྣམ་པར་སྨིན་པའི་འབྲས་བུ་འཚལ་བས་སྦྱིན་པ་སྩོལ་བར་གྱུར་ན། ཕྱོགས་བཅུའི་འཇིག་རྟེན་གྱི་ཁམས་

དཔག་ཏུ་མ་མཆིས་གྲངས་མ་མཆིས་པ་གཞན་དག་ན་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་རྣམས་བདག་གིས་བསླུས་པར་གྱུར་ཅིག །བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་

རྒྱ་བར་མ་གྱུར་ཅིག །བཙུན་པ་བཅོམ་ལྡན་འདས་གལ་ཏེ་བདག་གིས་སློངས་མོ་པ་ལ་སེམས་མ་དད་པས་སྦྱིན་པ་སྩོལ་ཏམ། སྦྱིན་པ་དེ་ཡང་ལེན་པ་པོ་ལ་མ་དད་པས་བྱིན་པར་འགྱུར་ཞིང་ཆུད་ཟ་བར་འགྱུར་རམ། གལ་ཏེ་ཐ་ན་སྐྲའི་རྩེ་མོའི་ཆ་ཤས་ཀྱི་ཚད་ཙམ་ཞིག་དགེ་

བའི་ཆོས་རྣམས་ལ་བར་ཆད་བགྱིད་པར་གྱུར་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་གྱུར་ཅིག །གལ་ཏེ་སྐྲའི་རྩེ་མོའི་ཆ་ཤས་ཀྱི་ཚད་ཙམ་ཞིག་ལེན་པ་པོའི་དགེ་བའི་ཆོས་རྣམས་ལ་བར་ཆད་བགྱིད་པར་གྱུར་ན་བདག་ཀྱང་མནར་མེད་པར་མཆི་བར་གྱུར་ཅིག །

ཟས་ལ་ཇི་ལྟ་བ་དེ་བཞིན་དུ་སློངས་མོ་པ་གང་དག་བདག་ལ་གོས་དང་། མགོའི་བར་དག་སློང་བར་འགྱུར་ཞིང་ཚིག་འཇམ་པོའམ། ཚིག་རྩུབ་པོའམ། བརྙས་ཚིག་གམ། ཚིག་གསལ་བས་མགོའི་བར་དག་སློང་བར་བགྱིད་ན། བཙུན་པ་བཅོམ་ལྡན་འདས་གལ་ཏེ་

Vol. 50 · folio 256b

བདག་གིས་སློངས་མོ་པ་ལ་སེམས་ཀྱི་སྐད་ཅིག་གཅིག་ཙམ་ཞིག་ཁྲོ་བའི་སེམས་བསྐྱེད་པར་གྱུར་ཏམ། མ་དད་པའི་སེམས་བསྐྱེད་པར་གྱུར་ཏམ། སྦྱིན་པའི་རྣམ་པར་སྨིན་པའི་འབྲས་བུ་འཚལ་བས། མགོ་བོའི་བར་དག་ཡོངས་སུ་གཏོང་བར་གྱུར་ན། བདག་གིས་སངས་

རྒྱས་བཅོམ་ལྡན་འདས་རྣམས་བསླུས་པར་འགྱུར་བ་ནས། བདག་མནར་མེད་པར་མཆི་བའི་བར་དུ་གྱུར་ཅིག །སྦྱིན་པ་ལ་ཇི་ལྟ་བ་དེ་བཞིན་དུ། ཚུལ་ཁྲིམས་ནས་ཤེས་རབ་ཀྱི་བར་དག་ཡོངས་སུ་གཏོང་བ་ལ་ཡང་བརྗོད་པར་བགྱིའོ། །རིགས་ཀྱི་བུ་དེ་ནས་དེ་བཞིན་

གཤེགས་པ་རིན་པོ་ཆེའི་སྙིང་པོ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ལ་ལེགས་སོ། །ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་ཀྱིས་སྙིང་རྗེ་ཆེན་པོ་ལ་གནས་པའི་སེམས་ཀྱིས་སྨོན་ལམ་དེ་ལྟ་བུ་བཏབ་པ་ནི། སྐྱེས་བུ་དམ་པ་ལེགས་

སོ་ལེགས་སོ། །རིགས་ཀྱི་བུ་ཐམས་ཅད་དང་ལྡན་པའི་འཁོར་དེ་དང་། ལྷ་དང་། དྲི་ཟ་དང་། མི་དང་། ལྷ་མ་ཡིན་དང་བཅས་པའི་འཇིག་རྟེན་གྱིས་ཀྱང་ཐལ་མོ་སྦྱར་ཏེ་འཁོད་ནས་དེ་ལ་ལེགས་སོ། །ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་ཀྱིས་སྙིང་རྗེ་ཆེན་པོ་ལ་

གནས་པའི་ཡིད་ཀྱིས་སྨོན་ལམ་དེ་ལྟ་བུ་བཏབ་པ་ནི་སྐྱེས་བུ་དམ་པ་ལེགས་སོ་ལེགས་སོ། །ཁྱོད་ནི་སྙིང་པོར་འགྱུར་བ་དང་འཐུན་པའི་ཆོས་དྲུག་གིས་སེམས་ཅན་རྣམས་ཡང་དག་པར་ཚིམ་པར་བྱེད་པར་འགྱུར་རོ། །རིགས་ཀྱི་བུ་ཇི་ལྟར་སྦྱིན་པ་ལེན་པའི་བྱང་ཆུབ་སེམས་དཔའ་འཚོ་

བ་པ་མི་འགྱུར། འཇིགས་བྱེད་དེས་སྨོན་ལམ་བཏབ་པ་དེ་བཞིན་དུ། སྲོག་ཆགས་བརྒྱད་ཁྲི་བཞི་སྟོང་གིས་ཀྱང་སྨོན་ལམ་བཏབ་བོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཇི་ལྟར་འཚོ་བ་པ་མི་འགྱུར་འཇིགས་བྱེད་

ཀྱིས་སྨོན་ལམ་བཏབ་པ་དེ་བཞིན་དུ། སྲོག་ཆགས་བརྒྱད་ཁྲི་བཞི་སྟོང་གིས་ཀྱང་སྨོན་ལམ་དེ་ལྟ་བུ་དག་བཏབ་པ་ཐོས་པ་དང་། དེ་ནས་སྙིང་རྗེ་ཆེན་པོ་དང་ལྡན་པ་དེ་མཆོག་ཏུ་དགའ་བ་དང་། ཡིད་བདེ་བ་སྐྱེས་ནས་ཐལ་མོ་སྦྱར་ཏེ་འདུག་ནས། ཐམས་ཅད་དང་ལྡན་པའི་

Vol. 50 · folio 257a

འཁོར་ལ་བལྟས་ཏེ་མཆོག་ཏུ་དགའ་བའི་ཡིད་ཀྱིས་སྨྲས་པ། ཨ་ལ་ལ་བདག་ཆོས་ཀྱི་མུ་གེ་དང་། ཟད་པའི་དུས་དང་། ཉོན་མོངས་པ་ཆེན་པོས་དཀྲུགས་ཤིང་རྩོད་པའི་དུས་ན་སྙིགས་མ་ལྔ་དང་ལྡན་པའི་འཇིག་རྟེན་གྱི་མགོན་མེད་པའི་དེད་དཔོན་དང་། སྣང་

བ་བྱེད་པ་དང་། སྒྲོན་མ་བྱེད་པ་དང་། བྱིས་པ་སྐྱབས་མེད་པ་དང་། ལྡོངས་པ་རྣམས་ཀྱི་ལམ་སྟོན་པར་འགྱུར་བ་དང་། འདི་ལྟར་བདག་གིས་སེམས་དང་པོ་བསྐྱེད་པས་ཚེ་རབས་གཞན་དག་ཏུ་གང་དག་བདག་གི་མགོ་ལེན་པར་འགྱུར་བ་དང་། མིག་དང་། རྣ་བ་དང་།

སྣ་དང་། ལྕེ་དང་། ལག་པ་དང་། རྐང་པ་དང་། པགས་པ་དང་། རུས་པ་དང་། ཁྲག་དང་། ཁ་ཟས་ཀྱི་བར་དག་ལེན་པར་འགྱུར་ཞིང་། བླ་ན་མེད་པའི་བྱང་ཆུབ་ཀྱིས་སྤྱོད་པའི་གྲོགས་བྱེད་པ་དེ་ལྟ་བུ་དག་རྙེད་པ་ནི་ངོ་མཚར་ཏོ། །རིགས་ཀྱི་བུ་གཞན་ཡང་བྱང་ཆུབ་

སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་སྟེ་གསོལ་པ། བཙུན་པ་བཅོམ་ལྡན་འདས་ཚེ་རབས་གཞན་གྱི་བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མ་མཆིས་གྲངས་མ་མཆིས་

པ་དེ་དང་དེ་དག་ནས་བྱང་ཆུབ་ཀྱི་མཐར་ཐུག་པའི་བར་དུ་བདག་གི་དྲུང་དུ་སློངས་མོ་པ་གང་དག་ཉེ་བར་མཆི་བར་འགྱུར་ཞིང་ཡུན་རིང་པོ་དེ་སྲིད་ཀྱི་བར་དུ་ཟས་སམ། སྐོམ་དག་བླངས་པར་གྱུར་པ་དང་། བདག་གིས་སུག་པ་ནས་ཐ་ན་སྐྲའི་རྩེ་མོའི་ཆ་ཤས་ཀྱི་ཚད་ཙམ་གྱི་སྦྱིན་

པ་བླངས་པར་གྱུར་པའི་སེམས་ཅན་དེ་དག་བཙུན་པ་བཅོམ་ལྡན་འདས་བདག་མངོན་པར་རྫོགས་པར་སངས་རྒྱས་ནས། གལ་ཏེ་འཁོར་བ་ལས་ཡོངས་སུ་ཐར་བར་མི་བགྱིད་དམ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། ཐེག་པ་ཆེན་པོས་ལུང་སྟོན་

པར་མི་བགྱིད་ན། བདག་གིས་གང་དག་ད་ལྟར་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་འགྱུར་བ་ནས་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་

Vol. 50 · folio 257b

པར་རྫོགས་པར་འཚང་རྒྱ་བར་མི་འགྱུར་བའི་བར་དུ་གྱུར་ཅིག །རིགས་ཀྱི་བུ་གཞན་ཡང་དེ་བཞིན་གཤེགས་པ་རིན་པོ་ཆེའི་སྙིང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་ཀྱིས་ཇི་ལྟར་

སྔོན་དེ་བཞིན་གཤེགས་པ་ལྷུན་པོ་རྩེ་འཛིན་གྱིས་དེ་བཞིན་གཤེགས་པ་འཇིག་རྟེན་དབང་ཕྱུག་འོད་ཟེར་གྱི་སྤྱན་སྔར་དང་པོ་བྱང་ཆུབ་ཏུ་སེམས་བསྐྱེད་ནས་བྱང་ཆུབ་སེམས་དཔའི་སྤྱོད་པའི་སྨོན་ལམ་འདི་ལྟ་བུ་བཏབ་སྟེ། སྐྱེས་བུ་དམ་པ་དེས་སྨོན་ལམ་ཇི་ལྟར་བཏབ་པ་དེ་

བཞིན་དུ་བསྐལ་པ་ཆེན་པོ་གང་གཱའི་ཀླུང་གི་བྱེ་མ་སྙེད་ལས་ཤིན་ཏུ་ལྷག་པ་དེ་སྙེད་དུ་བྱང་ཆུབ་སེམས་དཔའི་སྤྱོད་པ་སྤྱད་ནས། འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཕྲག་འབུམ་འདས་པ་ན་འཇིག་རྟེན་གྱི་ཁམས་འོད་ཟེར་སོ་སོར་རྟོག་པ་ཞེས་བྱ་བར་སྐྱེ་དགུའི་

ཚེ་ལོ་བརྒྱ་ཐུབ་པའི་ནང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་མེ་ཏོག་རྡུལ་བྲལ་བྱང་ཆུབ་དབང་ཕྱུག་ཡང་དག་མཐོ་ཞེས་བྱ་བ་སངས་

རྒྱས་བཅོམ་ལྡན་འདས་ཀྱི་བར་དུ་གྱུར་ཅིང་། ལོ་བཞི་བཅུ་རྩ་ལྔར་སངས་རྒྱས་ཀྱི་མཛད་པ་མཛད་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཞུགས་སོ། །སྙིང་རྗེ་ཆེན་པོ་དང་ལྡན་པ་དེ་བཞིན་གཤེགས་པ་ཡེ་ཤེས་མེ་ཏོག་རྡུལ་བྲལ་བྱང་ཆུབ་དབང་ཕྱུག་

ཡང་དག་མཐོ་ཡོངས་སུ་མྱ་ངན་ལས་འདས་ནས་དེའི་དམ་པའི་ཆོས་ཀྱི་ཚུལ་ནི་ལོ་སྟོང་དུ་གནས་པར་གྱུར་ཏོ། །དམ་པའི་ཆོས་ནུབ་ནས་དམ་པའི་ཆོས་ཀྱི་གཟུགས་བརྙན་ཡང་ལོ་སྟོང་དུ་གནས་པར་གྱུར་ཏོ། །སྙིང་རྗེ་ཆེན་པོ་དང་ལྡན་པ་དེ་བཞིན་གཤེགས་པ་ཡེ་ཤེས་

མེ་ཏོག་རྡུལ་བྲལ་བྱང་ཆུབ་དབང་ཕྱུག་ཡང་དག་མཐོ་ཡོངས་སུ་མྱ་ངན་ལས་འདས་པའི་དམ་པའི་ཆོས་ཀྱི་ཚུལ་དང་། དམ་པའི་ཆོས་ཀྱི་གཟུགས་བརྙན་གནས་པ་ན་དགེ་སློང་དང་། དགེ་སློང་མ་གང་དག་ཚུལ་ཁྲིམས་འཆལ་པ། སྡིག་པའི་ཆོས་དང་ལྡན་པ། མི་

Vol. 50 · folio 258a

འཐུན་པར་སྤྱོད་པ། མཆོད་རྟེན་གྱི་ནོར་འཕྲོག་པ། ངོ་ཚ་མེད་པ་རྣམས་དང་། ཆོས་ཀྱི་མཆོད་པ་གཅོད་པར་བྱེད་པ། ངོ་ཚ་མེད་པ་དང་འདྲེས་པ་རྣམས་དང་། ཕྱོགས་བཞིའི་དགེ་འདུན་དང་། མངོན་དུ་གྱུར་པའི་དགེ་འདུན་རྣམས་ཀྱི་གོས་དང་། ཟས་

དང་། མལ་ཆ་དང་། སྟན་དང་། ནད་ཀྱི་གསོས་སྨན་དང་། ཡོ་བྱད་གཅོད་ཅིང་གང་ཟག་གིར་ཡོངས་སུ་བཟུང་སྟེ། བདག་སྤྱོད་པར་བྱེད་པའམ། ཁྱིམ་པ་ལ་སྦྱིན་པར་བྱེད་པ་ཐམས་ཅད་ཀྱང་སྙིང་རྗེ་ཆེན་པོ་དང་ལྡན་པ་དེ་བཞིན་གཤེགས་པ་ཡེ་ཤེས་མེ་ཏོག་རྡུལ་བྲལ་བྱང་ཆུབ་

དབང་ཕྱུག་ཡང་དག་མཐོ་དེས་ཐེག་པ་གསུམ་པོ་དག་གིས་རིམ་གྱིས་ལུང་བསྟན་ཏོ། །སྙིང་རྗེ་ཆེན་པོ་དང་ལྡན་པ་གང་སུ་དག་བཅོམ་ལྡན་འདས་དེའི་བསྟན་པ་ལ་ངུར་སྨྲིག་དམར་པོ་བགོས་པ་ཐམས་ཅད་ཀྱང་ཐེག་པ་གསུམ་པོ་དག་གིས་ཕྱིར་མི་ལྡོག་པར་ལུང་བསྟན་ཏོ། །

དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་སུ་དག་སྔ་མ་ཁོ་ན་བཞིན་དུ་ལྟུང་བའི་རྩ་བ་བྱུང་བར་གྱུར་པ་དེ་དག་ཀྱང་སྟོན་པར་འདུ་ཤེས་པའི་དགེ་བའི་རྩ་བའི་རྣམ་པར་སྨིན་པ་ཡོད་པས་དེ་བཞིན་གཤེགས་པ་དེས་ཐེག་པ་གསུམ་པོ་དག་གིས་ཕྱིར་

མི་ལྡོག་པར་ལུང་བསྟན་པ་དེ་བཞིན་དུ་སྐྱེས་བུ་དམ་པ་ཁྱོད་ཀྱིས་ཀྱང་བྱང་ཆུབ་ཀྱི་སྤྱོད་པའི་སྨོན་ལམ་བཏབ་པ་ལེགས་སོ་ལེགས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་དེ་བཞིན་གཤེགས་པ་རིན་པོ་ཆེའི་

སྙིང་པོའི་སྤྱན་སྔར་གསོལ་པ། བཙུན་པ་བཅོམ་ལྡན་འདས་བདག་གི་སྨོན་ལམ་ནི་འདི་ལྟ་བུ་ལགས་ཏེ། ཇི་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤྱད་པ་སྤྱོད་པ་ནས། བྱང་ཆུབ་ཀྱི་མཐར་ཐུག་པའི་སྤྱད་པ་སྤྱོད་པའི་བར་དུ་བདག་གིས་སེམས་ཅན་

གང་དག་སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་སྦྱོར་བར་འགྱུར་བ་དང་། ཡང་དག་པར་འཛིན་དུ་སྩོལ་བར་འགྱུར་བ་དང་། རབ་ཏུ་འགོད་པར་འགྱུར་བའམ། ཐ་ན་དགེ་བའི་རྩ་བ་སྐྲའི་རྩེ་མོའི་ཆ་ཤས་ཀྱི་ཚད་ཙམ་ལ་སྦྱོར་བར་འགྱུར་བའི་སེམས་ཅན་

Vol. 50 · folio 258b

དེ་དག་ལས་སེམས་ཅན་འགའ་ཙམ་ཞིག་བདག་གིས་ཐེག་པ་གསུམ་པོ་དག་གིས་ཕྱིར་མི་ལྡོག་པའི་ས་ལ་བཀོད་པར་མ་གྱུར་ན། བདག་གིས་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མ་མཆིས་གྲངས་མ་མཆིས་པ་དག་ན་བཞུགས་ཏེ། འཚོ་ཞིང་གཞེས་ལ་ཆོས་ཀྱང་

སྟོན་པའི་སངས་རྒྱས་བཅོམ་ལྡན་འདས་རྣམས་བསླུས་པར་གྱུར་ཅིག །བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག །བཙུན་པ་བཅོམ་ལྡན་འདས་བདག་གིས་བླ་ན་མེད་པའི་ཡེ་ཤེས་ཐོབ་ནས་ཀྱང་སེམས་

ཅན་གང་དག་བདག་གིས་བསྟན་པ་ལ་ཆོས་གོས་ངུར་སྨྲིག་བགོས་པར་གྱུར་པ་ལས་ལྟུང་བའི་རྩ་བ་བྱུང་བར་གྱུར་པའམ། ཉོན་མོངས་པ་ཅན་གྱི་ལྟ་བ་ལ་ཞུགས་པར་གྱུར་པའམ། དཀོན་མཆོག་གསུམ་ལ་འཁྲུལ་པར་གྱུར་ཅིང་། ནོངས་པ་དང་བཅས་པར་གྱུར་

པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་གང་དག་སྐད་ཅིག་གཅིག་ཙམ་བདག་ལ་སྟོན་པའི་འདུ་ཤེས་སམ། གུས་པའི་སེམས་བསྐྱེད་པར་གྱུར་པའི་སེམས་ཅན་དེ་དག་ལས་བཙུན་པ་བཅོམ་ལྡན་འདས་གལ་ཏེ་བདག་གིས་ཐ་ན་སེམས་

ཅན་འགའ་ཙམ་ཞིག་སྤངས་ཤིང་ཐེག་པ་གསུམ་པོ་དག་གིས་ཕྱིར་མི་ལྡོག་པར་ལུང་བསྟན་པར་མ་གྱུར་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་བ་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་

རྒྱ་བར་མི་འགྱུར་བའི་བར་དུ་གྱུར་ཅིག །བཙུན་པ་བཅོམ་ལྡན་འདས་བདག་བྱང་ཆུབ་ཐོབ་པའི་ཆོས་གོས་ངུར་སྨྲིག་དམར་པོ་ལྷ་དང་མི་རྣམས་ཀྱིས་གུས་པར་བགྱིས་པ་དང་། བླ་མར་བགྱིས་པ་དང་། རི་མོར་བགྱིས་པ་དང་། མཆོད་པར་བགྱིས་པར་འགྱུར་བ་མཐོང་

མ་ཐག་ཏུ་ངུར་སྨྲིག་མགུལ་ན་ཐོགས་པར་འགྱུར་བའི་སེམས་ཅན་རྣམས་ཀྱང་ཐེག་པ་གསུམ་པོ་དག་གིས་ཕྱིར་མི་ལྡོག་པར་གྱུར་ཅིག །སེམས་ཅན་གང་དག་བཟའ་བ་དང་། བཏུང་བ་དང་བྲལ་ཞིང་བཀྲེས་པ་དང་། སྐོམ་པས་གནོད་པར་གྱུར་པ་རྣམས་དང་། ཐ་ན་གནོད་

Vol. 50 · folio 259a

སྦྱིན་དབུལ་པོ་རྣམས་དང་། གཤིན་རྗེའི་འཇིག་རྟེན་པའི་སེམས་ཅན་གང་དག་ཐ་ན་ཆོས་གོས་ངུར་སྨྲིག་སོར་བཞི་ཙམ་འཚལ་བར་འགྱུར་བ་དེ་དག་ཐམས་ཅད་ཀྱང་བཟའ་བ་དང་། བཏུང་བ་ཕུན་སུམ་ཚོགས་པར་འགྱུར་ཞིང་བསམ་པ་ཡོངས་སུ་རྫོགས་

པར་གྱུར་ཅིག །ལྷའམ། གནོད་སྦྱིན་ནམ། སྲིན་པོའམ། ཀླུའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། གྲུལ་བུམ་འམ། ཤ་ཟའམ། མིའམ། སེམས་ཅན་གང་དག་ཕན་ཚུན་ཞེ་འགྲས་ཤིང་འཁོན་གཅུགས་

མང་པོར་གྱུར་པ་རྣམས་དང་། ཕན་ཚུན་འགྱེད་ཅིང་གཡུལ་ངོར་ཞུགས་ཏེ། གཡུལ་སྤྲོད་པར་གྱུར་པ་རྣམས་ཀྱིས་ཀྱང་བདག་གི་ཆོས་གོས་ངུར་སྨྲིག་རྗེས་སུ་དྲན་པར་གྱུར་ན། སེམས་ཅན་དེ་དག་སྙིང་རྗེའི་སེམས་དང་། འཇམ་པའི་སེམས་དང་། ཁོ་ན་མེད་པའི་སེམས་དང་

ལས་སུ་རུང་བའི་སེམས་སུ་གྱུར་ཅིག །སེམས་ཅན་གང་དག་གཡུལ་ངོའམ། འགྱེད་པའམ། འཐབ་པའམ། རྩོད་པའི་ནང་དུ་བསྲུང་བ་དང་། མཆོད་པར་བགྱི་བ་དང་། གུས་པར་བགྱི་བའི་སླད་དུ་ངུར་སྨྲིག་གི་དུམ་བུ་འཆང་བར་འགྱུར་བའི་སེམས་ཅན་དེ་དག་ཀྱང་

རྟག་ཏུ་རྒྱལ་བར་འགྱུར་བ་དང་། འཁྲུལ་པ་མ་མཆིས་པ་དང་། རྣམ་པར་འཚེ་བ་མ་མཆིས་པར་གྱུར་ཅིག །གཡུལ་ངོ་དང་། འགྱེད་པ་དང་། ཐབ་མོ་དང་། རྩོད་པ་དེ་དག་ལས་ཀྱང་ལེགས་པར་ཡོངས་སུ་ཐར་བར་གྱུར་ཅིག །བཙུན་པ་བཅོམ་ལྡན་འདས་གལ་ཏེ་བདག་

གི་ཆོས་གོས་ངུར་སྨྲིག་དམར་པོ་འཕགས་པའི་ཡོན་ཏན་ལྔ་པོ་དེ་དག་དང་ལྡན་པར་མ་གྱུར་ན། བདག་གིས་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་བ་ནས། བདག་གིས་སངས་རྒྱས་ཀྱི་མཛད་པ་མཐའ་དག་ཡོངས་སུ་རྫོགས་པར་བགྱིད་པར་

རྔོ་མི་ཐོགས་པ་དང་། བདག་གིས་ཆོས་རྣམས་བསྐྱུད་པར་འགྱུར་བ་དང་། བདག་གིས་གཞན་མུ་སྟེགས་ཅན་རྣམས་ཚར་གཅོད་པར་རྔོ་མི་ཐོགས་པའི་བར་དུ་གྱུར་ཅིག །བཙུན་པ་བཅོམ་ལྡན་འདས་གང་དག་བདག་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་

Vol. 50 · folio 259b

ངན་ལས་འདས་ཀྱི་བར་དུ་དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་ཚིག་ཏུ་བརྗོད་ཅིང་ཕྱག་འཚལ་བར་འགྱུར་བ་དེ་དག་ཐམས་ཅད་ཀྱང་ལས་ཀྱི་སྒྲིབ་པ་བས་པར་འགྱུར་ཞིང་། མཐར་ཡང་སངས་རྒྱས་ཀྱི་ཞིང་ཡོངས་སུ་མྱ་ངན་ལས་འདའ་བ་བླ་ན་མེད་པས་

ཡོངས་སུ་མྱ་ངན་ལས་འདས་པར་འགྱུར་ལགས་སོ། །རིགས་ཀྱི་བུ་དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་དེས་ཕྱག་གཡས་པ་བརྐྱང་སྟེ། ཕྱག་གི་མཐིལ་གྱིས་བྱང་ཆུབ་སེམས་དཔའ་སྙིང་རྗེ་ཆེན་པོ་དང་ལྡན་པའི་མགོ་ལ་བྱུགས་ནས་བཀའ་སྩལ་པ། སྐྱེས་བུ་

དམ་པ་ཁྱོད་ཀྱི་སྨོན་ལམ་ནི་དགེ་བ། བཟང་བ། རབ་ཏུ་གཏན་ལ་བབ་པ་ཡིན་ཏེ་ལེགས་སོ་ལེགས་སོ། །སྐྱེས་བུ་དམ་པ་ཁྱོད་ནི་དེ་བཞིན་དུ་འཕགས་པའི་ཡོན་ཏན་ལྔ་དང་ལྡན་པའི་ངུར་སྨྲིག་དམར་པོས་སེམས་ཅན་རྣམས་ཉེ་བར་འཚོ་བར་བྱེད་པར་འགྱུར་རོ། །ཀྱེ་རིགས་ཀྱི་

བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་དེ་བཞིན་གཤེགས་པས་བསོད་ནམས་ཀྱི་ཕྱག་སོར་རིང་པོས་ཡོངས་སུ་བཀབ་ཅིང་ཕྱག་གཡས་པ་འཇམ་ཞིང་གཞོན་པའི་མཐིལ་གྱིས་བྱུགས་པ་དང་། ལུང་བསྟན་ཅིང་ལེགས་སོ་ཞེས་བྱ་བ་བྱིན་

པ་དེས་མཆོག་ཏུ་དགའ་ཞིང་རབ་ཏུ་དད་པ་སྐྱེས་ནས། ཚེ་ལོ་ཉི་ཤུ་ལོན་པ་ལྟ་བུའི་ཚད་ཙམ་དུ་གཞོན་ནུར་རེད་དོ། །རིགས་ཀྱི་བུ་གཞན་ཡང་ཐམས་ཅད་དང་ལྡན་པའི་འཁོར་དེ་དང་། ལྷ་དང་། དྲི་ཟ་དང་། མི་དང་། ལྷ་མ་ཡིན་དུ་བཅས་པ་རྣམས་དང་། སྙིང་རྗེ་ཆེན་པོ་དང་ལྡན་

པ་ལ་མཆོད་པའི་ལས་བྱ་བའི་ཕྱིར་བརྩོན་པར་གྱུར་ཅིང་། མེ་ཏོག་དང་རོལ་མོའི་སྒྲ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ལ་མཆོད་པ་བྱས་ཏེ། བསྔགས་པ་དང་། ཚིགས་སུ་བཅད་པ་སྣ་ཚོགས་ཀྱིས་བསྟོད་ནས་ཐལ་མོ་སྦྱར་ཏེ་འཁོད་དོ། །

ཐེག་པ་ཆེན་པོའི་མདོ་སྙིང་རྗེ་པད་མ་དཀར་པོ་ལས་ལུང་བསྟན་པའི་ལེའུ་ཞེས་བྱ་སྟེ་བཞི་པའོ།། །།བམ་པོ་བཅུ་གསུམ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཡང་དེ་བཞིན་གཤེགས་པ་རིན་པོ་ཆེའི་སྙིང་

Vol. 50 · folio 260a

པོའི་ཞབས་ལ་ཡན་ལག་ལྔས་ཕྱག་བྱས་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་གུས་པ་དང་བཅས་པས་ཡོངས་སུ་ཞུས་པ། བཙུན་པ་བཅོམ་ལྡན་འདས་བཅོམ་ལྡན་འདས་ཀྱིས་

བྱང་ཆུབ་སེམས་དཔའ་རྣམས་ཀྱི་ལམ་ཏིང་ངེ་འཛིན་གྱི་སྒོ་བསྟན་པ་དང་། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་བསྟན་ལགས་ན། བཙུན་པ་བཅོམ་ལྡན་འདས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ཀྱི་ལམ་ཏིང་ངེ་འཛིན་གྱི་སྒོ་བསྟན་

པ་དང་། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་བསྟན་པ། བཙུན་པ་བཅོམ་ལྡན་འདས་ཇི་ཙམ་གྱིས་ན་ཏིང་ངེ་འཛིན་གྱི་སྒོ་བསྟན་པ་དང་། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་ཡོངས་སུ་རྫོགས་པར་འགྱུར་ལགས། བཙུན་པ་བཅོམ་

ལྡན་འདས་རིགས་ཀྱི་བུའམ། རིགས་ཀྱི་བུ་མོ་ཚོགས་ཇི་ལྟ་བུ་དང་ལྡན་ན་བསྟན་པར་གནས་པ་ལགས། ཏིང་ངེ་འཛིན་གྱི་སྒོ་བསྟན་པ་ཇི་ལྟ་བུས་ནི་བརྒྱན་པ་ལགས། རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་

ཆེའི་སྙིང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ལ་འདི་སྐད་ཅེས་བཀའ་སྩལ་ཏོ། །སྙིང་རྗེ་ཆེན་པོ་དང་ལྡན་པ་ཁྱོད་ཀྱི་ཞུ་བ་བཟང་པོ་སྤོབས་པ་དགེ་སྟེ། སྙིང་རྗེ་ཆེན་པོ་དང་ལྡན་པ་ཁྱོད་དེ་ལྟར་དེ་བཞིན་གཤེགས་པ་ལ་དོན་དེ་ལྟ་བུ་ཡོངས་

སུ་ཞུ་བར་སེམས་པ་ནི་སྙིང་རྗེ་ཆེན་པོ་དང་ལྡན་པ་ཁྱོད་སེམས་ཅན་དཔག་ཏུ་མེད་གྲངས་མེད་པ་རྣམས་ལ་ཕན་པ་བྱེད་པ་དང་། གཅེས་སྤྲས་བྱེད་པ་རྒྱ་ཆེན་པོ་སྐྱེས་པ་ཡིན་ཏེ། ལེགས་སོ་ལེགས་སོ། །སྙིང་རྗེ་ཆེན་པོ་དང་ལྡན་པ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་

ཟུང་ཤིག་དང་ངས་ཁྱོད་ལ་བཤད་པར་བྱའོ། །སྙིང་རྗེ་ཆེན་པོ་དང་ལྡན་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་དཔའ་བར་འགྲོ་བ་ཞེས་བྱ་བ་ཡོད་དོ། །བྱང་ཆུབ་སེམས་དཔའི་ཏིང་ངེ་འཛིན་དེ་ལ་གནས་པ་ནི་ཏིང་ངེ་འཛིན་ཐམས་ཅད་

Vol. 50 · folio 260b

ལ་རྗེས་སུ་ཞུགས་པ་ཡིན་ནོ། །རིན་ཆེན་ཕྱག་རྒྱ་ཞེས་བྱ་བའི་ཏིང་ངེ་འཛིན་ཡོད་དེ། དེས་ནི་ཏིང་ངེ་འཛིན་ཐམས་ཅད་ལ་ཕྱག་རྒྱས་འདེབས་པར་བྱེད་དོ། །སེང་གེ་རྣམ་པར་རྩེ་བ་ཞེས་བྱ་བའི་ཏིང་ངེ་འཛིན་ཡོད་དེ། དེ་ལ་གནས་ནས་ཏིང་ངེ་འཛིན་ཐམས་ཅད་ཀྱིས་རྣམ་པར་

རྩེ་བར་བྱེད་དོ། །ཟླ་བ་བཟང་པོ་ཞེས་བྱ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་སྣང་བར་བྱེད་དོ། །ཟླ་བའི་རྒྱལ་མཚན་ཏོག་ཅེས་བྱ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་རྒྱལ་མཚན་འཛིན་པར་བྱེད་དོ། །ཆོས་ཐམས་ཅད་ལས་མངོན་པར་འཕགས་པའི་

ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཁོང་དུ་ཆུད་པར་བྱེད་དོ། །ཕྱག་རྒྱ་རྣམ་པར་ལྟ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་སྤྱི་གཙུག་རྣམ་པར་ལྟ་བར་བྱེད་དོ། །ཆོས་ཀྱི་དབྱིངས་སུ་རྣམ་པར་སོང་བའི་ཏིང་ངེ་འཛིན་གྱིས་ནི་བྱང་ཆུབ་སེམས་དཔའ་ཆོས་

ཀྱི་དབྱིངས་ཐམས་ཅད་རྣམ་པར་ངེས་པར་འགྲོ་བར་བྱེད་དོ། །ངེས་པའི་རྒྱལ་མཚན་ཏོག་གི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་རྒྱལ་མཚན་འཛིན་པར་བྱེད་དོ། །རྡོ་རྗེའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་མི་ཕྱེད་པར་བྱེད་དོ། །ཆོས་ལ་འཇུག་པའི་

ཕྱག་རྒྱའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཕྱག་རྒྱས་འདེབས་པར་བྱེད་དོ། །ཏིང་ངེ་འཛིན་གྱི་རྒྱལ་པོ་ཤིན་ཏུ་བརྟན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རྒྱལ་པོ་ཉིད་དུ་རབ་ཏུ་གནས་པར་བྱེད་དོ། །འོད་ཟེར་འགྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་

ཐམས་ཅད་ལ་འོད་ཟེར་འགྱེད་པར་བྱེད་དོ། །སྟོབས་ཀྱི་བརྩོན་འགྲུས་ཀྱི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྟོབས་དང་བརྩོན་འགྲུས་སུ་བྱེད་དོ། །ཡང་དག་པར་འཕགས་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལས་གྱེན་དུ་འཕགས་པར་བྱེད་དོ། །ངེས་པའི་ཚིག་

སྟོན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཚིག་ལ་འཇུག་པར་བྱེད་དོ། །ཚིག་བླ་དགས་ལ་འཇུག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་མིང་གི་རྗེས་སུ་འཇུག་པར་བྱེད་དོ། །ཕྱོགས་ལ་རྣམ་པར་ལྟ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་

Vol. 50 · folio 261a

ཅད་ལ་རྣམ་པར་ལྟ་བར་བྱེད་དོ། །ཆོས་ཐམས་ཅད་རབ་ཏུ་འབྱེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱིས་རབ་ཏུ་དབྱེ་བ་རྗེས་སུ་རྟོགས་པར་བྱེད་དོ། །ཕྱག་རྒྱ་ཡོངས་སུ་འཛིན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཕྱག་རྒྱ་འཛིན་པར་བྱེད་

དོ། །ཆོས་ཐམས་ཅད་ལ་དབེན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལས་དབེན་པའི་ཆོས་ཉིད་ལ་རྗེས་སུ་འཇུག་པར་བྱེད་དོ། །བརྗེད་པ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་མི་བརྗེད་པར་བྱེད་དོ། །ཆོས་ཐམས་ཅད་ལས་མི་གཡོ་བའི་ཏིང་ངེ་

འཛིན་གྱིས་ནི་ཏིང་ངེ་འཛིན་ཐམས་ཅད་ལ་མི་གཡོ་བ་ཉིད་དུ་གནས་པར་བྱེད་དོ། །ཆོས་ཐམས་ཅད་ཡང་དག་པར་འདུ་བ་རྒྱ་མཚོའི་ཕྱག་རྒྱའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་སྡུད་ཅིང་ཡང་དག་པར་འདུ་བར་བྱེད་དོ། །ཆོས་ཐམས་ཅད་ལ་རློམ་སེམས་མེད་པའི་ཏིང་

ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་འབྱུང་བ་དང་། འཇུག་པའི་རློམ་སེམས་མེད་པར་བྱེད་དོ། །ནམ་མཁའ་ཁྱབ་པར་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ནམ་མཁའ་ལྟར་ཁྱབ་པར་བྱེད་དོ། །ཆོས་ཐམས་ཅད་རྒྱུན་མི་གཅོད་པའི་ཏིང་ངེ་

འཛིན་གྱིས་ནི་ཏིང་ངེ་འཛིན་ཐམས་ཅད་རྒྱུན་མི་འཆད་པར་བྱེད་དོ། །རྡོ་རྗེའི་དཀྱིལ་འཁོར་གྱི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་དཀྱིལ་འཁོར་འཛིན་པར་བྱེད་དོ། །ཆོས་ཐམས་ཅད་རོ་གཅིག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་བཅུད་

འཛིན་པར་བྱེད་དོ། །རིན་ཆེན་རྒྱལ་བའི་ཏིང་ངེ་འཛིན་གྱིས་ནི་ཡོ་བྱད་ཀྱི་ཉོན་མོངས་པ་ཐམས་ཅད་སྤོང་བར་བྱེད་དོ། །ཆོས་ཐམས་ཅད་སྐྱེ་བ་མེད་པ་དང་། པའི་ཏིང་ངེ་འཛིན་གྱིས་ནི་ཆོས་ཐམས་ཅད་སྐྱེ་བ་མེད་པ་དང་། འགག་པ་མེད་པར་སྟོན་པར་བྱེད་དོ། །རྣམ་པར་སྣང་བའི་ཏིང་ངེ་འཛིན་

གྱིས་ནི་ཏིང་ངེ་འཛིན་ཐམས་ཅད་ལམ་མེ་ལྷན་ནེ་ལྷང་ངེར་བྱེད་དོ། །ཆོས་ཐམས་ཅད་འགག་པ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་རྣམ་པར་འབྱེད་པར་བྱེད་དོ། །ཚོལ་བ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཏིང་ངེ་འཛིན་གྱི་ཆོས་

Vol. 50 · folio 261b

རྣམས་ནམ་ཡང་ཚོལ་བར་མི་བྱེད་དོ། །གནས་ལ་རྟེན་པ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་གནས་པའི་ཆོས་ནམ་ཡང་ཡང་དག་པར་རྗེས་སུ་མི་མཐོང་བར་བྱེད་དོ། །ནམ་མཁའ་ལྟ་བུའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ནམ་མཁའི་ངོ་

བོ་ཉིད་ལྟ་བུར་སྙིང་པོ་མེད་པ་ཉིད་དུ་ཡང་དག་པར་རྗེས་སུ་མཐོང་བར་བྱེད་དོ། །སེམས་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སེམས་དང་སེམས་ལས་བྱུང་བའི་ཆོས་རྣམས་སྤོང་བར་བྱེད་དོ། །གཟུགས་མུ་མེད་པའི་ཏིང་ངེ་འཛིན་གྱིས་ནི་གཟུགས་ཀུན་ཏུ་སྣང་

བར་བྱེད་དོ། །དྲི་མ་མེད་པའི་སྒྲོན་མའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྒྲོན་མ་བཞིན་དུ་བྱེད་དོ། །ཆོས་ཐམས་ཅད་མུ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཡེ་ཤེས་མུ་མེད་པར་སྟོན་པར་བྱེད་དོ། །གློག་ལྟ་བུའི་ཏིང་ངེ་འཛིན་གྱིས་ནི་ཏིང་ངེ་

འཛིན་ཐམས་ཅད་ལ་ཤེས་པ་མུ་མེད་པ་སྟོན་པར་བྱེད་དོ། །འོད་ཐམས་ཅད་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་འོད་བྱེད་པའི་སྒོ་ཉེ་བར་སྟོན་པར་བྱེད་དོ། །ཁམས་ཀྱི་མཐའི་ཏིང་ངེ་འཛིན་གྱིས་ནི་ཏིང་ངེ་འཛིན་མཐའ་མེད་པ་ཐམས་ཅད་རྣམ་པར་ཤེས་པར་བྱ་

བའི་ཕྱིར་ཉེ་བར་སྟོན་པར་བྱེད་དོ། །ཏིང་ངེ་འཛིན་དག་པ་དམ་པའི་ཏིང་ངེ་འཛིན་གྱིས་ནི་ཏིང་ངེ་འཛིན་གྱི་ཆོས་རྣམས་ལས་སྟོང་པ་ཉིད་རྗེས་སུ་ཐོབ་པར་བྱེད་དོ། །ལྷུན་པོ་ལྟར་བཀྲ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་གསོག་ཉིད་དུ་ཀུན་ཏུ་སྟོན་པར་བྱེད་དོ། །འོད་དྲི་མ་མེད་

པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་དྲི་མ་སེལ་བར་བྱེད་དོ། །ཆོས་ཐམས་ཅད་ཀྱི་བརྡའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་མ་འདྲེས་པ་ཉིད་དུ་ཡང་དག་པར་སྟོན་པར་བྱེད་དོ། །དགའ་བ་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་དགའ་

བ་རབ་ཏུ་ཐོབ་པར་བྱེད་དོ། །ཆོས་ཐམས་ཅད་ཀྱི་ངོ་བོ་ཉིད་ལ་རྣམ་པར་རྩེ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ངོ་བོ་ཉིད་མི་དམིགས་པ་སྟོན་པར་བྱེད་དོ། །གློག་འགྱུར་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་མི་ཟད་པ་ཉིད་སྟོན་པར་བྱེད་དོ། །ཆོས་

Vol. 50 · folio 262a

ཐམས་ཅད་ལ་རྣམ་པར་གཡེང་བ་མེད་ཅིང་རྡུལ་དང་བྲལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཤེས་པ་རྡུལ་དང་བྲལ་བ་ཉེ་བར་སྟོན་པར་བྱེད་དོ། །མི་ཟད་པ་དང་ལྡན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཟད་པ་མེད་པ་དང་། ཟད་

པ་མེད་པ་མ་ཡིན་པ་ཡང་དག་པར་སྟོན་པར་བྱེད་དོ། །ཆོས་ཐམས་ཅད་བསམ་གྱིས་མི་ཁྱབ་ཅིང་རྣམ་པར་དག་པའི་ཏིང་ངེ་འཛིན་གྱིས་ནི་ཆོས་ཐམས་ཅད་མིག་ཡོར་ལྟ་བུར་སྟོན་པར་བྱེད་དོ། །གཟི་བརྗིད་ཡོད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཡེ་ཤེས་

འབར་བར་བྱེད་དོ། །ཟད་པ་དང་བྲལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཟད་པ་མེད་པ་དང་། ཉམས་པ་མེད་པར་སྟོན་པར་བྱེད་དོ། །མི་གཡོ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གཡོ་བར་མི་བྱེད། འགུལ་བར་མི་བྱེད། འཕྲོ་བར་མི་བྱེད་དོ། །

རྣམ་པར་འཕེལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་ལ་ཤེས་བྱ་རྣམ་པར་འཕེལ་བར་ཡང་དག་པར་རྗེས་སུ་མཐོང་བར་བྱེད་དོ། །ཉི་མའི་སྒྲོན་མའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་འོད་ཟེར་གྱི་སྒོ་དག་འགྱེད་པར་བྱེད་དོ། །ཟླ་བ་

དྲི་མ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྣང་བར་བྱེད་དོ། །སྣང་བ་དག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སོ་སོ་ཡང་དག་པར་རིག་པ་བཞི་རབ་ཏུ་ཐོབ་པར་བྱེད་དོ། །བྱ་བ་དང་མི་བྱ་བའི་ཏིང་ངེ་འཛིན་གྱིས་ནི་བྱ་བ་དང་མི་བྱ་བའི་བྱ་བ་བྱེད་ཅིང་

ཡེ་ཤེས་རྟོགས་ཀྱང་ཡང་དག་པར་རྗེས་སུ་མཐོང་བར་བྱེད་དོ། །རྡོ་རྗེ་ལྟ་བུའི་ཏིང་ངེ་འཛིན་གྱིས་ནི་ཆོས་ཐམས་ཅད་ངེས་པར་འབྱེད་པར་བྱེད་ཅིང་གང་ལ་འབྱེད་པ་ཡང་ཡང་དག་པར་རྗེས་སུ་མི་མཐོང་བར་བྱེད་དོ། །སེམས་གནས་པའི་ཏིང་ངེ་འཛིན་གྱིས་ནི་སེམས་གཡོ་བར་མི་

བྱེད། འགུལ་བར་མི་བྱེད། སྣང་བར་མི་བྱེད་ཅིང་གནོད་པར་འགྱུར་བ་ཡང་མེད་ལ། དེ་འདི་སྙམ་དུ་འདི་ནི་སེམས་ཡིན་ནོ་སྙམ་དུ་ཡང་མི་སེམས་པར་བྱེད་དོ། །ཀུན་ཏུ་སྣང་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྣང་བ་ཡང་དག་པར་རྗེས་སུ་མཐོང་བར་

Vol. 50 · folio 262b

བྱེད་དོ། །རབ་ཏུ་གནས་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རབ་ཏུ་གནས་པ་ཉིད་ཀྱིས་རབ་ཏུ་གནས་པར་བྱེད་དོ། །རིན་ཆེན་བརྩེགས་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རིན་པོ་ཆེ་བརྩེགས་པ་ལྟ་བུར་ཀུན་ཏུ་སྣང་བར་བྱེད་དོ། །ཆོས་དམ་པའི་

ཕྱག་རྒྱའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཕྱག་རྒྱ་འདེབས་པར་བྱེད་ཅིང་ཆོས་ཐམས་ཅད་མཉམ་པ་ཉིད་ཀྱི་ཕྱིར་མཉམ་པ་ཉིད་མ་གཏོགས་པའི་ཆོས་འགའ་ཡང་ཡང་དག་པར་རྗེས་སུ་མི་མཐོང་བར་བྱེད་དོ། །དགའ་བ་སྤོང་བའི་ཏིང་ངེ་འཛིན་གྱིས་ནི་ཆོས་ཐམས་ཅད་

ལ་དགའ་བ་སྤོང་བར་བྱེད་དོ། །ཆོས་ཀྱི་སྒྲོན་མའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཡི་གེ་མི་མཉམ་པ་ཉིད་རབ་ཏུ་འཐོབ་པར་བྱེད་དོ། །ཡི་གེ་དང་བྲལ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཡི་གེ་གཅིག་ཀྱང་མི་དམིགས་པར་བྱེད་དོ། །དམིགས་པ་གཅོད་

པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་དམིགས་པ་རྣམ་པར་གཅོད་པར་བྱེད་དོ། །འགྱུར་བ་མེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་འགྱུར་བ་མི་དམིགས་པར་བྱེད་དོ། །རང་བཞིན་རྣམ་པར་དག་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཕན་འདོགས་

པ་མི་དམིགས་པར་བྱེད་དོ། །གནས་མེད་པར་རྒྱུ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གནས་མི་དམིགས་པར་བྱེད་དོ། །རབ་རིབ་དང་བྲལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་སྤྱོད་པ་ཡང་དག་པར་རྗེས་སུ་མི་མཐོང་ཞིང་མུན་པའི་ཡུལ་ལས་

ཡང་དག་པར་འདའ་བར་བྱེད་དོ། །ཡོན་ཏན་ཐམས་ཅད་ཀྱི་ཚོགས་སུ་གྱུར་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་བསྩགས་པ་སྤོང་བར་བྱེད་དོ། །སེམས་མེད་པར་གནས་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་སེམས་ཞེས་བྱ་བ་མི་དམིགས་པར་བྱེད་དོ། །

བྱང་ཆུབ་ཀྱི་ཡན་ལག་ཡོད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་རྟོགས་པར་བྱེད་དོ། །དྲན་པ་རྣམ་པར་འཕྲོ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་སྤོབས་པ་གྲངས་མེད་པ་ཐོབ་པར་བྱེད་དོ། །དེ་བྱེད་པའི་ཤེས་པ་རྣམ་པར་དག་པའི་ཏིང་ངེ་འཛིན་གྱིས་ནི་ཆོས་ཐམས་

Vol. 50 · folio 263a

ཅད་ལ་མི་མཉམ་པ་དང་མཉམ་པ་ཉིད་རབ་ཏུ་ཐོབ་པར་བྱེད་དོ། །ཡེ་ཤེས་ཏོག་གི་ཏིང་ངེ་འཛིན་གྱིས་ནི་ཁམས་གསུམ་ཐམས་ཅད་ལས་ཡང་དག་པར་འདའ་བར་བྱེད་དོ། །ཤེས་པ་ཉེ་བར་གཅོད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་རྣམ་པར་གཅོད་

པ་ཡང་དག་པར་རྗེས་སུ་མཐོང་བར་བྱེད་དོ། །ཡེ་ཤེས་རྣམ་པར་འཕྲོ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱི་རྣམ་པར་འཕྲོ་བ་ཉིད་རྗེས་སུ་ཐོབ་པར་བྱེད་དོ། །གནས་མེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་གནས་སུ་གྱུར་པ་མེད་པ་ཉིད་དུ་ཡང་དག་པར་རྗེས་སུ་

མཐོང་བར་བྱེད་དོ། །བཀོད་པ་གཅིག་པའི་ཏིང་ངེ་འཛིན་གྱིས་ནི་ཆོས་འགའ་ཡང་གཉིས་སུ་ཡང་དག་པར་རྗེས་སུ་མི་མཐོང་བར་བྱེད་དོ། །རྣམ་པར་སྒྲུབ་པ་དང་ལྡན་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱི་རྣམ་པར་བསྒྲུབ་པར་ཡང་དག་པར་རྗེས་སུ་མཐོང་བར་བྱེད་དོ། །

སྲིད་པའི་གཞི་ཐམས་ཅད་རྣམ་པར་སེལ་བ་ཐམས་ཅད་དུ་གཏོགས་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ངེས་པར་འབྱེད་པའི་ཡེ་ཤེས་འཇུག་ཅིང་གང་ལ་འཇུག་པ་འགའ་ཡང་མི་རྙེད་པར་བྱེད་དོ། །བརྡ་དང་སྒྲ་ལ་འཇུག་པའི་ཏིང་ངེ་འཛིན་གྱིས་ནི་སྒྲ་དང་བརྡ་ཐམས་ཅད་

ཀྱི་རྗེས་སུ་འཇུག་པར་བྱེད་དོ། །སྒྲ་དབྱངས་ཀྱི་ཡི་གེ་དང་བྲལ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ཡི་གེ་དང་བྲལ་བར་ཡང་དག་པར་རྗེས་སུ་མཐོང་བར་བྱེད་དོ། །ཡེ་ཤེས་ཀྱི་སྒྲོན་མ་དང་ལྡན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་གཟི་བརྗིད་ཀྱིས་ལམ་མེ་

ལྷན་ནེ་ལྷང་ངེར་བྱེད་དོ། །ཡེ་ཤེས་མཆོག་གི་མཚན་ཉིད་རྣམ་པར་བསྒྱིངས་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཡོངས་སུ་དག་པའི་མཚན་ཉིད་སྟོན་པར་བྱེད་དོ། །མངོན་པར་ཤེས་པ་མེད་པའི་མཚན་ཉིད་དང་ལྡན་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་

མངོན་པར་རིག་པ་མེད་པར་ཡང་དག་པར་རྗེས་སུ་མཐོང་བར་བྱེད་དོ། །རྣམ་པ་ཐམས་ཅད་ཀྱི་མཆོག་དང་ལྡན་པའི་ཏིང་ངེ་འཛིན་གྱིས་ནི་ཆོས་དང་ཏིང་ངེ་འཛིན་ཐམས་ཅད་ལ་རྣམ་པ་ཐམས་ཅད་ཀྱི་མཆོག་དང་ལྡན་པར་བྱེད་དོ། །སྡུག་བསྔལ་ཐམས་ཅད་ཤིན་ཏུ་སྤོང་

Vol. 50 · folio 263b

བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གནས་པ་མེད་པ་ཡང་དག་པར་རྗེས་སུ་མཐོང་བར་བྱེད་དོ། །བྱེད་རྒྱུ་མི་ཟད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཟད་པར་ཡང་དག་པར་རྗེས་སུ་མི་མཐོང་བར་བྱེད་དོ། །གཟུངས་ཀྱི་གཞིའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་

ཅད་དང་། ཆོས་ཐམས་ཅད་འཛིན་ཅིང་ཡང་དག་པ་ཉིད་དང་། ལོག་པ་ཉིད་ཡང་དག་པར་རྗེས་སུ་མི་མཐོང་བར་བྱེད་དོ། །འགག་པ་དང་འགལ་བ་རབ་ཏུ་ཞི་བའི་ཏིང་ངེ་འཛིན་གྱིས་ནི་ཆོས་ཐམས་ཅད་དང་འཐུན་པ་དང་འགལ་བ་ཡང་དག་པར་རྗེས་སུ་མི་མཐོང་བར་བྱེད་དོ། །

འོད་དྲི་མ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་འདུས་བྱས་ཀྱི་དྲི་མ་དང་བྲལ་བ་ཡང་དག་པར་རྗེས་སུ་མི་མཐོང་བར་བྱེད་དོ། །སྙིང་པོ་དང་ལྡན་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་སྙིང་པོ་མེད་པ་མི་དམིགས་པར་བྱེད་དོ། །ཟླ་བ་ཉ་བ་དྲི་མ་མེད་པའི་

ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཡོན་ཏན་ཡོངས་སུ་རྫོགས་པར་བྱེད་དོ། །བཀོད་པ་ཆེན་པོའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་བཀོད་པ་ཆེན་པོ་དང་ལྡན་པར་བྱེད་དོ། །སྣང་བ་ཐམས་ཅད་རབ་ཏུ་འབྱེད་པའི་ཏིང་ངེ་འཛིན་གྱིས་ནི། ཆོས་ཐམས་

ཅད་ལ་ཡེ་ཤེས་ཀྱིས་སྣང་བར་བྱེད་དོ། །མཉམ་པ་ཉིད་རྣམ་པར་སྣང་བར་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རྩེ་གཅིག་པ་ཉིད་རབ་ཏུ་ཐོབ་པར་བྱེད་དོ། །ཉོན་མོངས་པ་མེད་པ་དང་ཉོན་མོངས་པ་དང་བཅས་པ་ཐམས་ཅད་ཡང་དག་པར་འདུ་བའི་ཏིང་ངེ་

འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཉོན་མོངས་པ་མེད་པར་བྱེད་དོ། །རླུང་གི་གནས་ཀྱི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གནས་པར་མི་བྱེད་དོ། །དེ་བཞིན་ཉིད་ལ་གནས་ཤིང་སེམས་མེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱི་དེ་བཞིན་ཉིད་ལས་ཕྱིར་མི་ལྡོག་པར་བྱེད་

དོ། །ལུས་ཀྱི་སྐྱོན་ཡང་དག་པར་སེལ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་འཇིག་ཚོགས་མི་དམིགས་པར་བྱེད་དོ། །དག་གི་སྐྱོན་རྣམ་པར་འཇིག་པས་ནམ་མཁའ་ལྟར་གྱུར་པའི་ཏིང་ངེ་འཛིན་གྱིས་ནི་བྱང་ཆུབ་སེམས་དཔའ་ཆོས་ཐམས་ཅད་ལ་ངག་གི་ལས་མི་དམིགས་པར་བྱེད་

Vol. 50 · folio 264a

དོ། །ནམ་མཁའ་ལྟར་ཆགས་པ་མེད་ལ་རྣམ་པར་གྲོལ་ཞིང་གོས་པ་མེད་པའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ལ་ནམ་མཁའ་ལྟར་ཆགས་པ་མེད་པ་ཉིད་རྗེས་སུ་ཐོབ་པར་འགྱུར་ཏེ། དེ་ནི་ཐེག་པ་ཆེན་པོ་ལ་ཡང་དག་པར་ཞུགས་

པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་གྱི་སྒོ་བསྟན་པ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚོགས་རྣམ་པར་དག་པའི་སྒོ་སྡུད་པའི་ཆོས་ཀྱི་རྣམ་གྲངས་གང་ཞེ་ན། བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཚོགས་ནི་

སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཚོགས་ནི་སྨོན་ལམ་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བཟོད་པའི་ཚོགས་ནི་མཚན་དང་དཔེ་བྱད་བཟང་པོ་ཡོངས་སུ་

རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཚོགས་ནི་དགོས་པ་ཐམས་ཅད་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཚོགས་ནི་ཅང་ཤེས་ཀྱི་སེམས་སུ་བྱེད་པར་འགྱུར་རོ། །བྱང་ཆུབ་

སེམས་དཔའ་རྣམས་ཀྱི་ཤེས་རབ་ཀྱི་ཚོགས་ནི་ཉོན་མོངས་པ་ཐམས་ཅད་ཡོངས་སུ་ཤེས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཐོས་པའི་ཚོགས་ནི་སྤོབས་པ་ཐོགས་པ་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཚོགས་

ནི་སེམས་ཅན་ཐམས་ཅད་ཉེ་བར་འཚོ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཚོགས་ནི་ཤེས་པ་ཐོགས་པ་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཞི་གནས་ཀྱི་ཚོགས་ནི་སེམས་ལས་སུ་རུང་བར་བྱེད་པར་འགྱུར་རོ། །

བྱང་ཆུབ་སེམས་དཔའ་རྣམས་ཀྱི་ལྷག་མཐོང་གི་ཚོགས་ནི་ཐེ་ཙོམ་དང་བྲལ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བྱམས་པའི་ཚོགས་ནི་ཞེ་འགྲས་པའི་སེམས་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེའི་ཚོགས་ནི་སེམས་

Vol. 50 · folio 264b

ཅན་ཡོངས་སུ་སྨིན་པར་བྱ་བ་ལ་སྐྱོ་བ་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དགའ་བའི་ཚོགས་ནི་ཆོས་ཀྱི་ཀུན་དགའ་ལ་དགའ་ཞིང་དགའ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བཏང་སྙོམས་ཀྱི་ཚོགས་ནི་རྗེས་སུ་ཆགས་པ་དང་། ཁོང་

ཁྲོ་བ་སྤོང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཆོས་ཉན་པའི་ཚོགས་ནི་སྒྲིབ་པ་སྤོང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་མངོན་པར་འབྱུང་བའི་ཚོགས་ནི་ཡོངས་སུ་འཛིན་པ་ཐམས་ཅད་སྤོང་བར་བྱེད་པར་འགྱུར་རོ། །བྱང་ཆུབ་སེམས་

དཔའ་རྣམས་ཀྱི་དགོན་པར་གནས་པའི་ཚོགས་ནི་དགེ་བའི་རྩ་བའི་ལས་བྱས་པ་ཆུད་མི་ཟ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དྲན་པའི་ཚོགས་ནི་གཟུངས་ཐོབ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བློ་གྲོས་ཀྱི་ཚོགས་ནི་བློ་རབ་

ཏུ་འབྱེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་རྟོགས་པའི་ཚོགས་ནི་དོན་གྱི་རྣམ་པ་རྗེས་སུ་རྟོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དྲན་པ་ཉེ་བར་གཞག་པའི་ཚོགས་ནི། ལུས་དང་། ཚོར་བ་དང་། སེམས་དང་། ཆོས་རྗེས་

སུ་རྟོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡང་དག་པར་སྤོང་བའི་ཚོགས་ནི་མི་དགེ་བའི་ཆོས་ཐམས་ཅད་སྤོང་བ་དང་དགེ་བའི་ཆོས་ཐམས་ཅད་སྒོམ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་རྐང་པའི་ཚོགས་ནི་ལུས་

དང་སེམས་ཡང་བ་ཉིད་དུ་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དབང་པོའི་ཚོགས་ནི་སེམས་ཅན་ཐམས་ཅད་ཀྱི་དབང་པོ་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཚོགས་ནི་ཉོན་མོངས་པ་ཐམས་ཅད་འཇོམས་པར་

བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཡན་ལག་གི་ཚོགས་ནི་ཆོས་ཀྱི་ངོ་བོ་ཉིད་རྗེས་སུ་རྟོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལམ་གྱི་ཚོགས་ནི་ལམ་ངན་པ་ཐམས་ཅད་ལས་ཡང་དག་པར་འདའ་བར་བྱེད་པར་འགྱུར་

Vol. 50 · folio 265a

རོ། །བྱང་ཆུབ་སེམས་དཔའ་རྣམས་ཀྱི་བདེན་པའི་ཚོགས་ནི་མི་དགེ་བའི་ཆོས་རྣམས་སྤོང་ཞིང་མཐོ་རིས་སུ་སྐྱེ་བ་ཐོབ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སོ་སོ་ཡང་དག་པར་རིག་པའི་ཚོགས་ནི་སེམས་ཅན་ཐམས་ཅད་ཀྱི་ཐེ་ཙོམ་གཅོད་

པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྟོན་པའི་ཚོགས་ནི་ཤེས་པ་གཞན་ལ་རག་མ་ལས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་གྱི་ཚོགས་ནི་ཡོན་ཏན་ཐམས་ཅད་ཀྱི་སྒོ་ཡིན་པར་བྱེད་པར་འགྱུར་རོ། །བྱང་

ཆུབ་སེམས་དཔའ་རྣམས་ཀྱི་བསམ་པའི་ཚོགས་ནི་འཇིག་རྟེན་ཐམས་ཅད་ལ་མི་སླུ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྦྱོར་བའི་ཚོགས་ནི་ཚོགས་ཐམས་ཅད་མཐར་ཕྱིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལྷག་པའི་

བསམ་པའི་ཚོགས་ནི་ཁྱད་པར་དུ་འགྲོ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ནང་དུ་ཡང་དག་འཇོག་པའི་ཚོགས་ནི་ཇི་ལྟར་ཐོས་པའི་ཆོས་སྒྲུབ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསྡུ་བའི་དངོས་པོའི་ཚོགས་ནི་སེམས་ཅན་

ཐམས་ཅད་ཡོངས་སུ་སྨིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དམ་པའི་ཆོས་ཡོངས་སུ་འཛིན་པའི་ཚོགས་ནི་དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བའི་ཆོ་ག་ཤེས་

པ་ལ་མཁས་པའི་ཚོགས་ནི་སངས་རྒྱས་ཀྱི་ཞིང་ཡོངས་སུ་དག་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཚོགས་ནི་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པར་འགྱུར་ཏེ། རིགས་ཀྱི་བུ་དེ་ནི་བྱང་ཆུབ་སེམས་

དཔའ་རྣམས་ཀྱི་ཚོགས་རྣམ་པར་དག་པའི་སྒོ་ཡང་དག་པར་སྡུད་པའི་ཆོས་ཀྱི་རྣམ་གྲངས་ཡིན་ནོ། །རིགས་ཀྱི་བུ་གཞན་ཡང་དེ་བཞིན་གཤེགས་པ་རིན་པོ་ཆེའི་སྙིང་པོས་བྱང་ཆུབ་སེམས་དཔའི་འཁོར་ཆེན་པོ་ལ་རྣམ་པར་གཟིགས་ནས་བྱང་ཆུབ་སེམས་དཔའ་སེམས་དཔའ་

Vol. 50 · folio 265b

ཆེན་པོ་སྙིང་རྗེ་ཆེན་པོ་དང་ལྡན་པ་ལ་བོས་ཏེ་བཀའ་སྩལ་པ། སྙིང་རྗེ་ཆེན་པོ་དང་ལྡན་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཇིགས་པའི་རྒྱན་ཇི་ལྟ་བུས་བརྒྱན་ན་བཟོད་པ་ཡོངས་སུ་རྫོགས་པར་འགྱུར་ཞེ་ན། དོན་དམ་པ་མཐོང་བའི་བྱང་ཆུབ་སེམས་དཔའ་

སེམས་དཔའ་ཆེན་པོའི་འབད་པ་དོན་ཡོད་པ་ཡོངས་སུ་འཛིན་པའི་སེམས་དང་། ཁམས་གསུམ་པ་ཐམས་ཅད་དང་། སེམས་ཅན་ཐམས་ཅད་ལ་ཡོངས་སུ་འཛིན་པ་མེད་པའི་སེམས་གང་ཡིན་པ་དེ་ནི་དགེ་སྦྱོང་གི་ཆོས་མི་འཇིགས་པ་ཆེན་པོ་ཞེས་བྱ་སྟེ། སྙིང་རྗེ་ཆེན་པོ་

དང་ལྡན་པ་གང་གི་སེམས་ཆོས་ཐམས་ཅད་ལ་ནམ་མཁའ་དང་ལག་པར་མཉམ་པ་དེ་ནི་བྱང་ཆུབ་སེམས་དཔའི་མི་འཇིགས་པའི་རྒྱན་ཡིན་ནོ། །ཇི་ལྟར་ན་བཟོད་པ་ཡོངས་སུ་རྫོགས་པར་འགྱུར་ཞེ་ན། འདི་ལྟ་སྟེ། བྱམས་པ་དང་། བདག་མེད་པ་དང་། སྙིང་རྗེ་དང་།

སེམས་ཅན་མེད་པ་ཉིད་དང་། དགའ་བ་དང་། ཡིད་བྱུང་བ་དང་། བཏང་སྙོམས་དང་། གང་ཟག་མེད་པ་ཉིད་དང་། སྦྱིན་པ་དང་། དུལ་བའི་སེམས་ཉིད་དང་། ཚུལ་ཁྲིམས་དང་། ཞི་བའི་སེམས་ཉིད་དང་། བཟོད་པ་དང་། བཟོད་པའི་སེམས་ཉིད་དང་། བརྩོན་

འགྲུས་དང་། དབེན་པའི་སེམས་ཉིད་དང་། བསམ་གཏན་དང་། ངེས་པར་སེམས་པའི་སེམས་ཉིད་དང་། ཤེས་རབ་དང་། རྒྱ་ཆེ་བའི་སེམས་ཉིད་དང་། དྲན་པ་ཉེ་བར་གཞག་པ་དང་། དྲན་པ་མེད་པ་དང་། ཡིད་ལ་བྱེད་པ་མེད་པའི་སེམས་དང་། ཡང་དག་པའི་

སྤོང་བ་དང་། སྐྱེ་བ་མེད་པ་དང་། འགག་པ་མེད་པའི་སེམས་ཉིད་དང་། རྫུ་འཕྲུལ་གྱི་རྐང་པ་དང་། ཆོས་ཐམས་ཅད་འགྲོ་བ་མེད་པའི་སེམས་ཉིད་དང་། དད་པ་དང་། ཐོགས་པ་མེད་པའི་སེམས་ཉིད་དང་། དྲན་པ་དང་། རང་བྱུང་གི་མཚན་ཉིད་དང་། ཏིང་ངེ་འཛིན་དང་།

སྙོམས་པར་འཇུག་པར་བྱེད་པའི་སེམས་ཉིད་དང་། ཤེས་རབ་ཀྱི་དབང་པོ་དང་། དབང་པོ་མེད་པའི་སེམས་ཉིད་དང་། སྟོབས་དང་། མི་རྫི་བའི་སེམས་ཉིད་དང་། བྱང་ཆུབ་ཀྱི་ཡན་ལག་དང་། བློ་རབ་ཏུ་འབྱེད་པའི་སེམས་ཉིད་དང་། ལམ་དང་། སྒོམ་པའི་སེམས་ཉིད་

Vol. 50 · folio 266a

དང་། ཞི་གནས་དང་། ཉེ་བར་ཞི་བའི་སེམས་ཉིད་དང་། ལྷག་མཐོང་དང་། རྨོངས་པ་མེད་པའི་སེམས་ཉིད་དང་། འཕགས་པའི་བདེན་པ་བསྒོམ་པ་དང་། ཤིན་ཏུ་ཡོངས་སུ་ཤེས་པ་བསྒོམ་པའི་སེམས་ཉིད་དང་། སངས་རྒྱས་ཡིད་ལ་བྱེད་པ་དང་། མུན་པ་མེད་

པའི་སེམས་ཉིད་དང་། ཆོས་ཡིད་ལ་བྱེད་པ་དང་། ཆོས་ཀྱི་དབྱིངས་མཉམ་པའི་སེམས་ཉིད་དང་། དགེ་འདུན་ཡིད་ལ་བྱེད་པ་དང་། གནས་པ་མེད་པའི་སེམས་ཉིད་དང་། སེམས་ཅན་ཡོངས་སུ་སྨིན་པར་བྱ་བ་དང་། གདོད་མ་ནས་རྣམ་པར་དག་པའི་སེམས་ཉིད་དང་། དམ་པའི་ཆོས་

ཡོངས་སུ་འཛིན་པ་དང་། ཆོས་ཀྱི་དབྱིངས་དབྱེར་མེད་པའི་སེམས་ཉིད་དང་། ཞིང་ཡོངས་སུ་དག་པར་བྱེད་པ་དང་། ནམ་མཁའ་དང་མཉམ་པའི་སེམས་ཉིད་དང་། མཚན་ཡོངས་སུ་རྫོགས་པར་བྱེད་པ་དང་། མཚན་མ་མེད་པའི་སེམས་ཉིད་དང་། བཟོད་པ་ཐོབ་པ་དང་།

དམིགས་པ་མེད་པའི་སེམས་ཉིད་དང་། ཕྱིར་མི་ལྡོག་པའི་ས་དང་། འཇུག་པ་དང་ལྡོག་པའི་སེམས་ཉིད་དང་། བྱང་ཆུབ་ཀྱི་སྙིང་པོའི་རྒྱན་དང་། ཁམས་གསུམ་གྱི་སྙིང་པོ་ལེན་པའི་སེམས་ཉིད་དང་། སེམས་ཅན་ཐམས་ཅད་ལས་བདུད་ཚར་གཅད་པའི་སེམས་དང་

སེམས་ཅན་ཐམས་ཅད་ལ་ཕན་གདགས་པའི་སེམས་ཉིད་དང་། བྱང་ཆུབ་དང་། ཆོས་ཐམས་ཅད་མཉམ་པ་ཉིད་དུ་རྟོགས་པའི་སེམས་ཉིད་དང་། ཆོས་ཀྱི་འཁོར་ལོ་བསྐོར་བ་དང་། ཆོས་ཐམས་ཅད་བསྐོར་བ་མེད་པའི་སེམས་ཉིད་དང་། ཡོངས་སུ་མྱ་ངན་ལས་འདས་པ་ཆེན་

པོ་ཀུན་ཏུ་སྟོན་པ་དང་། འཁོར་བའི་རང་བཞིན་གྱི་སེམས་ཉིད་ཀྱི་ཆོས་དེ་ལ་གང་རྗེས་སུ་རྟོགས་པར་འགྱུར་བའམ། རབ་ཏུ་རྟོགས་པར་བྱ་བ་ཕྲ་རབ་ཙམ་ཡང་མི་དམིགས་ཤིང་། རྣམ་པར་སྨིན་པ་མེད་པའི་ཆོས་ལ་མོས་པར་བྱེད་པའོ། །ཆོས་ཀྱི་རྣམ་གྲངས་འདི་བཤད་

པ་ན་གང་དག་ཕྱོགས་བཅུ་ནས་སྔོན་གྱི་ཚུལ་གྱི་ཏིང་ངེ་འཛིན་གྱི་སྒོ་བསྟན་པ་དང་། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་ཉན་པའི་ཕྱིར་དེ་བཞིན་གཤེགས་པ་ཤཱཀྱ་ཐུབ་པའི་སྤྱན་སྔར་བྱ་རྒོད་ཀྱི་ཕུང་པོའི་རི་ལ་ལྷགས་པའི་བྱང་ཆུབ་སེམས་དཔའ་ས་ཡ་ཕྲག་དྲུག་དང་

Vol. 50 · folio 266b

བཞི་འབུམ་པོ་དེ་དག་གིས་མི་སྐྱེ་བའི་ཆོས་ལ་བཟོད་པ་ཐོབ་ནས་དེ་བཞིན་གཤེགས་པ་ཤཱཀྱ་ཐུབ་པས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་ཆོས་ཀྱི་རྣམ་གྲངས་འདི་བཤད་པ་ན་བྱང་

ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་བཞི་བཅུ་རྩ་བརྒྱད་ཀྱི་བྱེ་མ་སྙེད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་ཀྱིས་ནི་ཕྱིར་མི་ལྡོག་པའི་ས་ཐོབ་

པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་ཀྱིས་ནི་ཏིང་ངེ་འཛིན་གྱི་སྒོ་བསྟན་པ་དང་། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་འདི་མཐའ་དག་ཡོངས་སུ་རྫོགས་ཤིང་རྣམ་པར་དག་པའི་ཡེ་ཤེས་ཁོང་དུ་ཆུད་པར་

གྱུར་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ཡང་མཆོག་ཏུ་དགའ་བ་དང་རབ་ཏུ་དང་བ་དེས་གཞོན་ནུ་ལོ་ཉི་ཤུ་ལོན་པ་ལྟ་བུར་རེད་ནས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་འབྲིང་དུ་འབྲང་བར་གྱུར་ཏོ། །

རིགས་ཀྱི་བུ་རྒྱལ་པོ་བདུད་རྩི་དག་པ་དེ་ཡང་བུ་སྟོང་དང་། ཁམས་ཀྱི་རྒྱལ་པོ་བརྒྱད་ཁྲི་དང་། གཞན་ཡང་སྲོག་ཆགས་བྱེ་བ་ཕྲག་དགུ་བཅུ་རྩ་གཉིས་དང་ལྷན་ཅིག་འགྲོགས་ཏེ། མངོན་པར་བྱུང་ཞིང་རབ་ཏུ་བྱུང་ནས་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་

དང་། དེས་པ་དག་གིས་མངོན་པར་བརྩོན་པར་བྱས་པར་གྱུར་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོའི་ཐད་ནས་མཐར་གྱིས་ཉན་ཐོས་ཀྱི་ཐེག་པའི་གཏམ་གྱི་ཆོས་

ཀྱི་ཕུང་པོ་བརྒྱད་ཁྲི་བཞི་སྟོང་བཀླགས་ཤིང་ཀུན་ཆུབ་པར་བྱས་སོ། །རང་སངས་རྒྱས་ཀྱི་ཐེག་པའི་གཏམ་གྱི་ཆོས་ཀྱི་ཕུང་པོ་དགུ་ཁྲི་ལུང་མནོས་ཤིང་བཀླགས་ཏེ་ཀུན་ཆུབ་པའི་བར་དུ་བྱས་སོ། །དེ་བཞིན་དུ་བླ་ན་མེད་པའི་ཐེག་པ་ཆེན་པོའི་གཏམ་ལ་ཡང་ལུས་དྲན་པ་ཉེ་བར་

Vol. 50 · folio 267a

གཞག་པའི་གཏམ་འབུམ་ལུང་མནོས་ཤིང་བཀླགས་ཏེ་ཀུན་ཆུབ་པར་བྱས་སོ། །ཚོར་བ་དྲན་པ་ཉེ་བར་གཞག་པའི་གཏམ་འབུམ་དང་། སེམས་དྲན་པ་ཉེ་བར་གཞག་པའི་གཏམ་འབུམ་དང་། ཆོས་དྲན་པ་ཉེ་བར་གཞག་པའི་གཏམ་འབུམ་ཡང་ལུང་མནོས་ཏེ་བཀླགས་

ཤིང་ཀུན་ཆུབ་པར་བྱས་སོ། །ཁམས་ཀྱི་ཚོགས་ཀྱི་གཏམ་འབུམ་དང་། སྐྱེ་མཆེད་ཀྱི་ཚོགས་ཀྱི་གཏམ་འབུམ་དང་། འདོད་ཆགས་ཀྱི་ཀུན་ཏུ་སྦྱོར་བ་སྤོང་བའི་ཚོགས་ཀྱི་གཏམ་འབུམ་དང་། ཞེ་སྡང་གི་ཀུན་ཏུ་སྦྱོར་བ་སྤོང་པའི་ཚོགས་ཀྱི་གཏམ་འབུམ་དང་། གཏི་མུག་གི་ཀུན་

ཏུ་སྦྱོར་བ་སྤོང་བའི་རྟེན་ཅིང་འབྲེལ་བར་འབྱུང་བའི་ཚོགས་ཀྱི་གཏམ་འབུམ་དང་། ཏིང་ངེ་འཛིན་དང་། རྣམ་པར་ཐར་པའི་ཚོགས་ཀྱི་གཏམ་འབུམ་དང་། སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པའི་ཚོགས་ཀྱི་གཏམ་འབུམ་ཡང་ལུང་མནོས་ཤིང་

བཀླགས་ཏེ་ཀུན་ཆུབ་པར་བྱས་སོ། །དེ་བཞིན་གཤེགས་པ་རིན་པོ་ཆེའི་སྙིང་པོའི་ཐད་ནས་ཆོས་ཀྱི་ཕུང་པོ་འབུམ་ཕྲག་བཅུའི་བར་དག་ཀྱང་བཟུང་ཞིང་བཀླགས་ཏེ་ཀུན་ཆུབ་པར་བྱས་སོ། །རིགས་ཀྱི་བུ་ཇི་ཙམ་གྱི་དུས་གཞན་ཞིག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་

རྫོགས་པའི་སངས་རྒྱས་རིན་པོ་ཆེའི་སྙིང་པོ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང་། བྱང་ཆུབ་སེམས་དཔའ་སྙིང་རྗེ་ཆེན་པོ་དང་ལྡན་པ་དེས་རོལ་མོའི་སྒྲ་དང་། མེ་ཏོག་དང་། ཕྱེ་མ་དང་། མེ་ཏོག་ཕྲེང་དང་། སྤོས་

དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། རིན་པོ་ཆེ་རྣམ་པ་སྣ་ཚོགས་དཔག་ཏུ་མེད། གྲངས་མེད་པ་དག་གིས་མཆོད་པ་བྱས་ཤིང་སྤོས་ཆུ་སྣ་ཚོགས་ཀྱིས་བཀྲུས་ནས། སྐུ་གདུང་གཞག་པའི་མཆོད་རྟེན་རིན་པོ་ཆེ་སྣ་བདུན་ལས་བྱས་པ་འཕང་

དུ་དཔག་ཚད་ལྔ་བརྒྱ་རྒྱར་ནི་དཔག་ཚད་ཕྱེད་ཡོད་པ་ཡང་བརྩིགས། དེ་ནས་ཞག་བདུན་གྱི་བར་དུ་རོལ་མོའི་སྒྲ་དང་། མེ་ཏོག་དང་། མེ་ཏོག་ཕྲེང་དང་། སྤོས་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། རིན་པོ་ཆེ་དཔག་ཏུ་མེད་གྲངས་མེད་པ་དག་གིས་

Vol. 50 · folio 267b

མཆོད་པ་བྱས་ནས་དེར་ཡང་སེམས་ཅན་དཔག་ཏུ་མེད། གྲངས་མེད་པ་དག་ཐེག་པ་གསུམ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་ཞག་བདུན་པོ་དེ་དག་འདས་ནས་སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་ཏུ་མངོན་པར་བྱུང་སྟེ། སྐྲ་དང་ཁ་སྤུ་བྲེགས་

ནས་གོས་ངུར་སྨྲིག་དག་བགོས་ཏེ། ཡང་དག་པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ཡོངས་སུ་མྱ་ངན་ལས་འདས་པའི་བསྟན་པ་འབར་བར་བྱས་ཏེ། ལོ་ཁྲིའི་བར་དུ་དམ་པའི་ཆོས་འཛིན་པར་གྱུར་ནས། དེར་ཡང་

སེམས་ཅན་དཔག་ཏུ་མེད་གྲངས་མེད་པ་དག་ཐེག་པ་གསུམ་པོ་དག་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །གསུམ་ལ་སྐྱབས་སུ་འགྲོ་བ་ལ་ཡང་རབ་ཏུ་བཀོད་དོ། །དགེ་བསྙེན་གྱི་སྡོམ་པ་དང་། དགེ་ཚུལ་གྱི་སྡོམ་པ་དང་། བསྙེན་པར་རྫོགས་པ་དགེ་སློང་

གི་དངོས་པོ་ཚངས་པར་སྤྱོད་པའི་སྡོམ་པ་ལ་ཡང་བཙུད་དེ་རབ་ཏུ་བཀོད་དོ། །དེས་ཡང་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་མངོན་པར་ཤེས་པ་དང་། རྫུ་འཕྲུལ་ལ་མཁས་པ་ལ་ངེས་པར་སྦྱར་ཅིང་དེས་པ་དང་། ཚངས་པར་སྤྱོད་པའི་གནས་ལ་ཡང་ངེས་པར་

སྦྱར། ཕུང་པོ་རྣམས་དགྲ་ལྟ་བུར་གྱུར་པར་ཡོངས་སུ་ཤེས་པ་ལ་ཡང་ངེས་པར་སྦྱར། སྐྱེ་མཆེད་རྣམས་གྲོང་སྟོང་པ་ལྟ་བུར་ཡོངས་སུ་ཤེས་པ་ལ་ཡང་ངེས་པར་སྦྱར། ཆོས་ཐམས་ཅད་རྟེན་ཅིང་འབྲེལ་བར་འབྱུང་བའོ་ཞེས་འདུས་བྱས་ཤེས་པ་མཐོང་བ་ཡོངས་སུ་ཤེས་པ་ལ་

ཡང་ངེས་པར་སྦྱར། ཆོས་ཐམས་ཅད་མིག་ཡོར་ལྟ་བུ་དང་། མིག་སྒྱུ་ལྟ་བུ་དང་། ཆུ་ཟླ་ལྟ་བུར་ཡང་བསྟན། སྐྱེ་བ་མེད་པ་དང་། འགག་པ་མེད་པ་དང་། མཚམས་སྦྱོར་བ་མེད་པའི་འགོག་པ་དང་། ཞི་བ་དང་། རབ་ཏུ་ཞི་བ་དང་། ཉེ་བར་ཞི་བ་དང་། མཆོག་དང་། གྱ་ནོམ་

པའི་འགོག་པ་མྱ་ངན་ལས་འདས་པ་ཡོངས་སུ་ཤེས་པ་ཡང་བསྟན་ཏེ། འཕགས་པའི་ལམ་ཡན་ལག་བརྒྱད་པ་ལ་རབ་ཏུ་བཀོད་ནས་འཆི་བའི་དུས་བྱས་པར་གྱུར་ཏོ། །སེམས་ཅན་དེ་དག་གིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་

Vol. 50 · folio 268a

དགེ་སྦྱོང་ཆེན་པོ་དེའི་རུས་པ་ལ་སྔ་མ་བཞིན་དུ་མཆོད་པ་བྱས་ཏེ། ཇི་ལྟར་འཁོར་ལོས་སྒྱུར་བའི་རྒྱལ་པོའི་རུས་པ་དག་ལ་རུས་པའི་མཆོད་པ་བྱེད་པ་དེ་བཞིན་དུ། དེའི་ཚེ་ན་སེམས་ཅན་དེ་དག་གིས་ཀྱང་སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་དེའི་རུས་པ་དག་

ལ་མཆོད་པ་བྱས་སོ། །གང་གི་ཉིན་མོ་སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་འཆི་བའི་དུས་བྱས་པར་གྱུར་པ་དེའི་ཉིན་མོ་དེ་བཞིན་གཤེགས་པ་རིན་པོ་ཆེའི་སྙིང་པོའི་དམ་པའི་ཆོས་ཀྱང་ནུབ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ནི་སྨོན་ལམ་གྱི་

དབང་གིས་འཇིག་རྟེན་གྱི་ཁམས་གཞན་དག་ཏུ་སྐྱེ་བ་ཡོངས་སུ་བཟུང་སྟེ། ཁ་ཅིག་ནི་སྨོན་ལམ་གྱི་དབང་གིས་དགའ་ལྡན་གྱི་གནས་སུ་སྐྱེས་སོ། །ཁ་ཅིག་ནི་མི་རྣམས་ཀྱི་ནང་དུ། ཁ་ཅིག་ནི་ཀླུ་རྣམས་ཀྱི་ནང་དུ། ཁ་ཅིག་ནི་ལྷ་མ་ཡིན་རྣམས་ཀྱི་ནང་དུ། ཁ་ཅིག་ནི་སྨོན་ལམ་

གྱི་དབང་གིས་དུད་འགྲོའི་སྐྱེ་གནས་སྣ་ཚོགས་དག་ཏུ་སྐྱེས་སོ། །རིགས་ཀྱི་བུ་སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་འཆི་བའི་དུས་བྱས་ནས་ཀྱང་སྨོན་ལམ་གྱི་དབང་གིས་སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་ཁྲི་འདས་པ་དེ་ན་འཇིག་རྟེན་

གྱི་ཁམས་ཡང་དག་འདྲེན་ཅེས་བྱ་བ་ཡོད་དེ། དེ་ན་མི་རྣམས་ནི་ཚེ་ལོ་བརྒྱད་ཅུ་ཐུབ་ལ། མི་དགེ་བའི་རྩ་བ་དང་ལྡན་པ་གཏུམ་པ། ལག་པ་ཁྲག་གིས་གོས་པ། སྡིག་པ་ལ་ཞེན་པ། སེམས་ཅན་ཐམས་ཅད་ལ་བརྩེ་བ་མེད་པར་ཞུགས་པ། མར་མི་འཛིན་པ། ཕར་

མི་འཛིན་པ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་ཤ་སྟག་སྟེ། སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་དེ་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡང་དག་འདྲེན་དེར་གདོལ་པའི་རིགས་སུ་སྐྱེས་པར་གྱུར་ཏེ། དེ་ཡང་ལུས་ཤིན་ཏུ་རིང་བར་གྱུར་ཅིང་།

ཤིན་ཏུ་སྟོབས་དང་ལྡན་པ། ཤིན་ཏུ་ཤུགས་དང་ལྡན་པ། ཤིན་ཏུ་དྲན་པ་དང་ལྡན་པ། ཤིན་ཏུ་སྤོབས་པ་དང་ལྡན་པ། ཤིན་ཏུ་མགྱོགས་པ་དང་ལྡན་པར་གྱུར་ནས། དེས་སྟོབས་ཀྱི་ཤུགས་བརྟན་པས་སེམས་ཅན་དག་བཟུང་སྟེ་སྨྲས་པ། ཀྱེ་སེམས་ཅན་དག་

Vol. 50 · folio 268b

ཁྱེད་ཅག་གལ་ཏེ་སྲོག་གཅོད་པ་སྤོང་བ་དང་། མ་བྱིན་པར་ལེན་པ་སྤོང་བ་དང་། འདོད་པས་ལོག་པར་གཡེམ་པ་དང་། ལོག་པར་ལྟ་བའི་བར་དག་སྤོང་བར་བྱེད་ན་ངས་ཁྱེད་ཅག་གི་སྲོག་སྦྱིན་པར་བྱ་ཞིང་། འཚོ་བའི་ཡོ་བྱད་དག་ཀྱང་སྦྱིན་པར་བྱའོ། །ཀྱེ་གལ་ཏེ་མི་སྤོང་

ན་ངས་སྲོག་དང་ཕྲལ་ཏེ་འགྲོའོ། །དེ་ནས་སེམས་ཅན་དེ་དག་གིས་ཐལ་མོ་སྦྱར་ཏེ་སྨྲས་པ། མགོན་པོ་ཁྱོད་ཀྱི་ཚིག་གིས་བདག་ཅག་ད་དེང་སླན་ཆད་ནས་ཇི་སྲིད་འཚོ་བའི་བར་དུ་སྲོག་གཅོད་པ་དང་མ་བྱིན་པར་ལེན་པ་ནས་ལོག་པར་ལྟ་བའི་བར་དག་སྤོང་བར་བགྱིད་དོ། །གདོལ་

པ་སྟོབས་ཅན་དེ་སོང་ནས་རྒྱལ་པོ་དང་། རྒྱལ་པོས་བཀྲབས་པ་དག་ལ་བསྒོ་བ་ཁོ་བོའི་འཚོ་བའི་ཡོ་བྱད་དུ་ཟས་དང་། སྐོམ་དང་། བཟའ་བ་དང་། བཅའ་བ་དང་། བཏུང་བ་དང་། གོས་དང་། མལ་ཆ་དང་། སྤོས་དང་། འགྲོན་བུ་དང་། གསེར་དང་། ནོར་བུ་དང་། མུ་ཏིག་

དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། དངུལ་དང་། ས་ལེ་སྦྲམ་དག་དགོས་ཀྱིས་འཚོ་བའི་ཡོ་བྱད་མང་པོ་དག་ཁོ་བོ་ལ་ཕུལ་ཅིག །གདོལ་པ་སྟོབས་ཅན་དེས་ཇི་སྲིད་འཚོ་བའི་བར་དུ་སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་རབ་ཏུ་བཀོད་པ་དང་།

དེ་ནས་མི་དེ་དག་ཀྱང་ཚེ་ལོ་ལྔ་བརྒྱ་ཐུབ་པར་གྱུར་ཏོ། །དེ་ན་རྒྱལ་པོ་གང་ཡིན་པ་དེ་འཆི་བའི་དུས་བྱས་པར་གྱུར་པ་དང་། དེ་ནས་རྒྱལ་པོའི་བློན་པོ་དེ་དག་གིས་གདོལ་པ་སྟོབས་ཅན་དེ་རྒྱལ་པོའི་དབང་བསྐུར་བས་དབང་བསྐུར་ཏེ་རྒྱལ་པོར་བཅུག་ནས་རྒྱལ་པོ་བསོད་ནམས་

སྟོབས་ཞེས་བྱ་བར་གྱུར་ཏོ། །རིགས་ཀྱི་བུ་དེ་ནས་རྒྱལ་པོ་བསོད་ནམས་སྟོབས་ཀྱིས་རིང་པོ་མ་ལོན་པར་ཡུལ་དེར་རྗེས་སུ་བསྟན་ཏེ། བརྩོན་འགྲུས་བརྟན་ཞིང་རྟུལ་བས་ཡུལ་གཉིས་པར་ཡང་རྗེས་སུ་བསྟན་ནས་རྒྱལ་པོ་བསོད་ནམས་སྟོབས་རིང་པོ་མ་ལོན་པར་འཛམ་བུའི་

གླིང་ཐམས་ཅད་དུ་སྟོབས་ཀྱི་འཁོར་ལོས་སྒྱུར་བའི་རྒྱལ་པོའི་བར་དུ་གྱུར་ཏོ། །གང་གི་ཚེ་རྒྱལ་པོ་བསོད་ནམས་སྟོབས་ཀྱིས་འཛམ་བུའི་གླིང་ཐམས་ཅད་ཀྱི་རྒྱལ་སྲིད་བཟུང་ནས། དེའི་འོག་ཏུ་སེམས་ཅན་རྣམས་སྲོག་གཅོད་པ་སྤོང་བ་ཡང་དག་པར་འཛིན་དུ་བཅུག་ཅིང་

Vol. 50 · folio 269a

བཙུད་དེ་རབ་ཏུ་བཀོད་དོ། །དེ་བཞིན་དུ་མ་བྱིན་པར་ལེན་པ་དང་། ལོག་པར་ལྟ་བའི་བར་དག་སྤོང་བ་ཡང་དག་པར་འཛིན་དུ་བཅུག་ཅིང་བཙུད་དེ་ཡང་དག་པའི་ལྟ་བའི་བར་དག་ལ་རབ་ཏུ་བཀོད་དོ། །སེམས་ཅན་རྣམས་བསམ་པ་ཇི་ལྟ་བུ་བཞིན་དུ་ཐེག་པ་

གསུམ་པོ་དག་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་ནས་རྒྱལ་པོ་བསོད་ནམས་སྟོབས་ཀྱིས་འཛམ་བུའི་གླིང་གི་སེམས་ཅན་ཐམས་ཅད་དགེ་བ་བཅུའི་ལས་ཀྱི་ལམ་དག་ལ་རབ་ཏུ་བཀོད་ཅིང་ཐེག་པ་གསུམ་པོ་དག་ལ་ངེས་པར་སྦྱར་ནས་འཛམ་བུའི་གླིང་

ཐམས་ཅད་དུ་སྒྲ་དབྱངས་རྗེས་སུ་བསྒྲགས་པ། སློངས་མོ་པ་གང་སུ་དག་ཟས་འདོད་པ་དང་། རིན་པོ་ཆེའི་བར་དག་འདོད་པ་དེ་དག་ཐམས་ཅད་ཚུར་ཤོག་ཤིག་དང་། ངས་ཐམས་ཅད་ལ་སྦྱིན་པ་སྦྱིན་པར་བྱའོ་ཞེས་བསྒྲགས་སོ། །དེ་ནས་དུས་གཞན་ཞིག་གི་ཚེ་ན་འཛམ་

བུའི་གླིང་གི་སེམས་ཅན་ཐམས་ཅད་ལྷགས་ནས་རྒྱལ་པོ་བསོད་ནམས་སྟོབས་ལ་སློངས་མོ་བྱེད་པར་གྱུར་པ་དང་། རྒྱལ་པོ་བསོད་ནམས་སྟོབས་ཀྱིས་ཀྱང་དེ་དག་ལས་བརྩམས་ཏེ་སྦྱིན་པ་རྣམ་པ་སྣ་ཚོགས་དག་བྱིན་ནོ། །དེ་ནས་འཚོ་བ་པ་རྡུལ་དབྱངས་ཞེས་བྱ་བ་ཞིག་རྒྱལ་

པོ་བསོད་ནམས་སྟོབས་ཀྱི་དྲུང་དུ་སོང་སྟེ་སྨྲས་པ། རྒྱལ་པོ་ཆེན་པོ་གལ་ཏེ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཞེད་ཅིང་སྦྱིན་པ་ཆེན་པོ་རྣམ་པ་སྣ་ཚོགས་ཡོངས་སུ་གཏོང་བ་དག་ཡོངས་སུ་གཏོང་བར་མཛད་ལ། རྒྱལ་པོ་ཆེན་པོ་གལ་ཏེ་ཁྱོད་ཀྱིས་

བདག་གི་བསམ་པ་ཡོངས་སུ་རྫོགས་པར་མཛད་པར་འགྱུར་ན་ནི་རྒྱལ་པོ་ཆེན་པོ་ཁྱོད་རྒྱལ་བ་འཇིག་རྟེན་གྱི་སྒྲོན་མར་འགྱུར་ལགས་སོ། །རྒྱལ་པོས་སྨྲས་པ་ཁྱོད་ཅི་ཞིག་འདོད། འཚོ་བ་པ་རྡུལ་དབྱངས་ཀྱིས་སྨྲས་པ། རྒྱལ་པོ་ཆེན་པོ་བདག་ནི་ལྷ་མ་ཡིན་གྱི་གཡུལ་ཆེན་པོར་རབ་ཏུ་

འཇོམས་པའི་རིག་སྔགས་འཆང་ཉིད་འཚལ་ན། ཆོ་ག་ཞིབ་མོ་བསྒྲུབ་པའི་སླད་དུ་མི་གསོན་པོའི་པགས་པ་ཡང་འཚལ། མིག་ཀྱང་འཚལ་ཏེ། དེའི་སླད་དུ་བདག་ཁྱོད་ཀྱི་སྤྱན་སྔར་མཆིས་ནས་གསོལ་བ་བགྱིད་ལགས་སོ། །རིགས་ཀྱི་བུ་དེ་ནས་རྒྱལ་པོ་བསོད་ནམས་སྟོབས་

Vol. 50 · folio 269b

འདི་སྙམ་དུ་སེམས་ཏེ། བདག་གིས་སྟོབས་ཀྱི་འཁོར་ལོས་སྒྱུར་བ་ཉིད་ཐོབ་ནས་སེམས་ཅན་བགྲང་བ་ལས་འདས་པ་དག་ཅིག་དགེ་བ་བཅུའི་ལས་ཀྱི་ལམ་ལ་རབ་ཏུ་བཀོད་ཅིང་། ཐེག་པ་གསུམ་པོ་དག་ལ་ཡང་ངེས་པར་སྦྱར་ཏེ། བདག་གིས་སྦྱིན་པ་ཡང་དཔག་ཏུ་མེད་པ་ཞིག་

བྱིན་ན། ད་ནི་སྙིང་པོ་མེད་པའི་ལུས་ལས་སྙིང་པོ་ལེན་པར་བྱེད་པ་ཞིག་སྟེ། བདག་གི་དགེ་བའི་བཤེས་གཉེན་ཡིན་ནོ་སྙམ་ནས་རྒྱལ་པོས་སྨྲས་པ། ངས་ཁྱོད་ལ་ཤའི་མིག་ཐ་མལ་པ་འདི་སྦྱིན་པར་བྱས་དགའ་བར་གྱིས་ཤིག །དེས་ནི་བདག་གིས་བླ་ན་མེད་པའི་ཆོས་ཀྱི་

སྤྱན་ཐོབ་པར་གྱུར་ཅིག །ངས་ཁྱོད་ལ་རབ་ཏུ་དང་བའི་སེམས་ཀྱིས་རང་གི་པགས་པ་འདི་ཡང་སྦྱིན་པར་བྱས་དེས་ནི་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཅིག །རིགས་ཀྱི་བུ་དེ་ནས་རྒྱལ་པོ་བསོད་ནམས་སྟོབས་ཀྱིས་ལག་པ་གཡས་

པས་རང་གི་མིག་གཉིས་ཕྱུང་སྟེ་འཚོ་བ་པ་ལ་བྱིན་ནས་གདོང་ཁྲག་གིས་ཡོག་བཞིན་དུ་སྨྲས་པ། འདི་ན་གང་དག་འདིར་ལྷགས་པ་དང་། ནམ་མཁའ་ལ་རྒྱུ་བ་དང་། ས་ལ་གནས་པའི་ལྷ་རྣམས་དང་། གནོད་སྦྱིན་མཐུ་ཆེན་པོ་རྣམས་དང་། མིའམ་ཅི་གང་ཡིན་པ་

རྣམས་དང་། ལྷ་མ་ཡིན་གང་ཡིན་པ་རྣམས་དང་། འབྱུང་པོ་གང་ཡིན་པ་རྣམས་དང་། མི་གང་ཡིན་པ་རྣམས་བདག་ལ་ཉོན་ཅིག །བདག་གིས་སྦྱིན་པ་བྱང་ཆུབ་ཏུ་བསྔོས་པའི་དགེ་བས་ཞི་བའི་གོ་འཕང་ཐོབ་པར་གྱུར་ནས། བདག་གིས་སེམས་ཅན་རྣམས་འཁོར་བའི་

རྒྱ་མཚོ་མི་ཟད་པ་ལས་སྒྲོལ་ཞིང་བླ་ན་མེད་པའི་ཞི་བ་མྱ་ངན་ལས་འདས་པ་ལ་འགོད་པར་གྱུར་ཅིག །ཡང་སྨྲས་པ། གལ་ཏེ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བ་ལྟ་ན། ཇི་སྲིད་དུ་འཚོ་བ་པ་འདིའི་རིག་སྔགས་དེ་གྲུབ་པར་མ་གྱུར་པ་དེ་

སྲིད་ཀྱི་བར་དུ་བདག་གི་སྲོག་གི་དབང་པོ་འགག་པར་མ་གྱུར་ཅིག །བདག་གི་དྲན་པ་ཡང་ཉམས་པར་མ་གྱུར་ཅིག །བདག་འགྱོད་པར་ཡང་མ་གྱུར་ཅིག །རིགས་ཀྱི་བུ་རྒྱལ་པོས་པགས་པ་ཡང་ཁྱེར་ཅིག་ཅེས་སྨྲས་པ་དང་། འཚོ་བ་པ་རྡུལ་དབྱངས་དེས་མཚོན་རྣོན་པོ་བླངས་

Vol. 50 · folio 270a

ཏེ། རྒྱལ་པོ་གསོན་པོའི་ལུས་ལས་པགས་པ་བཤུས་ནས་པགས་པ་ཁྱེར་ཏེ་རིག་སྔགས་བསྒྲུབས་སོ། །དེ་ལྟར་ཞག་བདུན་གྱི་བར་དུ་རྒྱལ་པོ་བསོད་ནམས་སྟོབས་ཀྱི་སྲོག་གི་དབང་པོ་ཡང་མ་འགགས་དྲན་པ་ཡང་མ་ཉམས། སྡུག་བསྔལ་གྱི་ཚོར་བ་དེ་ཡང་མ་མྱོང་ལ།

དེ་ལ་སྐད་ཅིག་ཙམ་ཡང་འགྱོད་པ་སྐྱེས་པར་མ་གྱུར་ཏོ། །རིགས་ཀྱི་བུ་འདི་ཇི་སྙམ་དུ་སེམས། དེའི་ཚེ་དེའི་དུས་ན་སྙིང་རྗེ་ཆེན་པོ་དང་ལྡན་པ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་གཞན་དུ་མི་བལྟ་སྟེ། ང་དེའི་ཚེ་དེའི་དུས་ན་དེ་བཞིན་གཤེགས་པ་རིན་པོ་ཆེའི་

སྙིང་པོའི་ཡབ་སྙིང་རྗེ་ཆེན་པོ་དང་ལྡན་པ་ཞེས་བྱ་བ་དེར་གྱུར་ཏོ། །ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པའི་དང་པོ་ནི་དེ་ཡིན་ནོ། །ངས་དང་པོ་སེམས་བསྐྱེད་པས་སེམས་ཅན་བགྲང་བ་ལས་འདས་པ་དག་བླ་ན་མེད་པ་ཡང་དག་པར་རྫོགས་པའི་

བྱང་ཆུབ་ཡང་དག་པར་འཛིན་དུ་བཅུག་སྟེ། ངས་དཔའ་བའི་དངོས་པོ་དང་། དཔའ་བོའི་བྱ་བ་དང་པོ་ནི་དེ་ཡིན་ནོ། །ང་སྨོན་ལམ་གྱི་དབང་གིས་དེ་ནས་ཤི་འཕོས་ནས་སངས་རྒྱས་ཀྱི་ཞིང་ཡང་དག་འདྲེན་དུ་གདོལ་པའི་རིགས་སུ་སྐྱེས་པ་དེའི་ཚེ་ན་ངས་གདོལ་པའི་རིགས་སུ་གནས་ནས་

སེམས་ཅན་རྣམས་དགེ་བ་ལ་སྦྱར་ཅིང་རང་གི་སྟོབས་དང་རྟུལ་བས་སྟོབས་ཀྱི་འཁོར་ལོས་སྒྱུར་བ་ཉིད་ཐོབ་པའི་བར་དང་། འཛམ་བུའི་གླིང་ཐམས་ཅད་དུ་འཐབ་པ་དང་རྩོད་པའི་རྙོག་པ་རྣམས་རབ་ཏུ་ཞི་བར་བྱས་ཤིང་། ཚེ་ཡང་བསྲིངས་ཏེ་ངས་དང་པོ་ལུས་ཡོངས་སུ་བཏང་བ་དེ་ནི་

ངའི་དཔའ་བའི་དངོས་པོ་དང་། དཔའ་བོའི་བྱ་བ་གཉིས་པ་ཡིན་ནོ། །གང་གི་ཚེ་ངས་རང་གི་མིག་དག་ཡོངས་སུ་བཏང་ཞིང་རང་གི་པགས་པ་ཡང་ཡོངས་སུ་བཏང་སྟེ། དེ་ནས་ཤི་འཕོས་ན་ཡང་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡང་དག་འདྲེན་དེ་ཉིད་ཀྱི་གླིང་གཉིས་

པར་གདོལ་པའི་རིགས་སུ་སྐྱེས་ནས་སྔ་མ་བཞིན་དུ་སྦྱར་ཏེ། དེར་ཡང་ངས་བརྩོན་འགྲུས་བརྟན་ཞིང་རྟུལ་བ་དེ་ལྟ་བུས་སེམས་ཅན་རྣམས་དགེ་བའི་ལས་དག་ལ་ངེས་པར་སྦྱར་ནས་སྟོབས་ཀྱི་འཁོར་ལོས་སྒྱུར་བའི་བར་ཡང་ཐོབ་སྟེ། དེར་ཡང་འཐབ་པ་དང་རྩོད་པའི་རྙོག་པ་དང་།

Vol. 50 · folio 270b

འཁོན་པ་དང་། འགྱོད་པ་དག་རབ་ཏུ་ཞི་བར་བྱས་ཏེ་ཚེ་ཡང་བསྲིངས་སོ། །དེར་ཡང་རང་གི་ལུས་ལས་ལྕེ་དང་། རྣ་བ་དག་ཡོངས་སུ་བཏང་བ་ན་སངས་རྒྱས་ཀྱི་ཞིང་ཡང་དག་འདྲེན་གྱི་སྟོང་ཆེན་པོ་དེ་ཀུན་གྱི་གླིང་ཐམས་ཅད་ཀྱི་བར་དུ་ཡང་སྐྱེས་བུའི་རྩལ་དེ་ལྟ་བུ་དག་བྱས་སོ། །སྨོན་

ལམ་དང་བརྩོན་འགྲུས་བརྟན་ཞིང་རྟུལ་བ་རྗེས་སུ་འབྲེལ་བ་དང་། སྨོན་ལམ་གྱི་དབང་གིས་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་ཏུ་ཡང་སེམས་ཅན་རྣམས་དགེ་བའི་རྩ་བ་དེ་དག་ལ་ངེས་པར་སྦྱར་ཅིང་ཐེག་པ་གསུམ་པོ་དག་ཡང་དག་པར་

འཛིན་དུ་བཅུག་སྟེ། འཐབ་པ་དང་རྩོད་པའི་རྙོག་པ་དང་། ཉོན་མོངས་པ་དང་། འཁོན་པ་དང་། འགྱེད་པ་རྣམས་རབ་ཏུ་ཞི་བར་བྱས་ཤིང་སྐྱེས་བུ་ཆེན་པོའི་རྩལ་དེ་ལྟ་བུ་དག་བྱས་སོ། །རིགས་ཀྱི་བུ་སངས་རྒྱས་བཅོམ་ལྡན་འདས་གཞན་དག་གི་སངས་རྒྱས་ཀྱི་ཞིང་ཡོངས་

སུ་དག་པ་ནི་འདིའི་ཕྱིར་ཏེ། གང་གི་ཚེ་སངས་རྒྱས་བཅོམ་ལྡན་འདས་དེ་དག་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤྱད་པ་སྤྱོད་པ་ན་གཞན་གྱི་ལྟུང་བ་གླེང་བར་མི་བྱེད་ཅིང་གཞན་ལ་འཇིགས་པ་སྟོན་པར་མི་བྱེད་ལ། སེམས་ཅན་རྣམས་ཉན་ཐོས་དང་། རང་

སངས་རྒྱས་ཀྱི་ཐེག་པ་ཡང་དག་པར་འཛིན་དུ་མ་བཅུག་པས་ན་དེའི་ཕྱིར་སངས་རྒྱས་བཅོམ་ལྡན་འདས་དགོངས་པ་ཡོངས་སུ་རྫོགས་པ་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པར་གྱུར་ཏེ། སངས་རྒྱས་ཀྱི་ཞིང་དེ་ན་ལྟུང་བའི་མིང་ཡང་མེད་ལ། བསླབ་པ་གཟུང་

བ་ཡང་མེད། ཚིག་རྩུབ་པོ་ཡང་མི་གྲག །མི་དགེ་བའི་སྒྲ་ཡང་མི་གྲག་སྟེ། གཞན་དུ་ན་སངས་རྒྱས་ཀྱི་ཞིང་དེ་ཆོས་ཀྱི་སྒྲ་དང་། ཡིད་དུ་མི་འོང་བ་མེད་པའི་སྒྲས་ཁྱབ་པ་ཡིན་ནོ། །དེ་ན་སེམས་ཅན་རྣམས་ཀྱང་ཇི་ལྟར་འདོད་པ་བཞིན་དུ་བྱེད་པ་ཡིན་ཏེ། དེ་ན་ཉན་ཐོས་དང་

རང་སངས་རྒྱས་ཀྱི་ཐེག་པའི་མིང་དུ་གདགས་པ་ཙམ་ཡང་མི་སྲིད་དོ། །ངས་ནི་གང་གི་ཚེ་བསྐལ་པ་ཆེན་པོ་གང་གཱའི་ཀླུང་གི་བྱེ་མ་སྙེད་དུ་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་སྟོང་པ་གང་གཱའི་ཀླུང་གི་བྱེ་མ་སྙེད་དག་ཏུ་ཚིག་རྩུབ་པོ་དང་འཇིགས་སུ་རུང་བས་སེམས་ཅན་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words