འཕགས་པ་དམ་པའི་ཆོས་དྲན་པ་ཉེ་བར་གཞག་པ

Sanskrit title (Tibetan script, as in the text) ཨཱརྱ་སད་དྷརྨ་སྨྲྀ་ཏྱུ་པ་སྠཱ་ན

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 70 · folio 86a

ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་ལྷ་རྣམས་སུ་སྐྱེའོ། །དེ་དེ་ལྟར་རང་བཞིན་གྱིས་ཀྱང་མ་བསྡམས་པར་གྱུར་ཅིང་གཞན་རྣམས་ཀྱིས་ཀྱང་རྣམ་པར་སྨད་པ་རྣམས་ནི་ཕལ་ཆེ་བར་ཡང་འཇིག་རྟེན་ལས་འདས་པའི་ལས་བློ་གཡོ་བ་དང་བཅས་པའི་བློ་

གར་ཡང་གནས་པུ་མེད་པ་ལས་དང་འབྲས་བུའི་རྣམ་པར་སྨིན་པ་རྣམས་ལ་ལྡོངས་པ་རྣམས་ནི་སྡོམ་པ་མེད་པའི་ཁྱིམ་རྣམས་སུ་སྐྱེ་བར་འགྱུར་བའམ་དེ་ཡང་ན་རྐྱེན་དེས་སྡོམ་པ་གཅིག་ཀྱང་མེད་པར་གྱུར་ལ། ཇི་ལྟར་དགེ་སློང་གི་ཆ་བྱད་འབའ་ཞིག་ཙམ་འཛིན་པ་དུང་གི་སྒྲ་དང་མཚུངས་

པར་ཀུན་ན་སྤྱོད་པ། སྡོམ་པ་ལ་བསྙད་ནས་སྦྱིན་པ་པོ་དང་སྦྱིན་བདག་རྣམས་སླུ་བར་བྱེད་དོ། །སངས་རྒྱས་བཅོམ་ལྡན་འདས་ཀྱི་སྡོམ་པ་ཇི་ལྟ་བར་བདག་འཛིན་པ་ཡིན་ཟེར་ལ། དེ་སྡོམ་པ་འཛིན་པ་ཡང་མ་ཡིན་ནོ། །དེའི་ལུས་ཚུལ་ཁྲིམས་དང་ཡང་དག་པར་ལྡན་པ་ཡང་

མ་ཡིན་ནོ། །དེ་ནི་སླུ་བ་པོ་དང་། རྐུན་མ་ལྷ་དང་བཅས་པའི་འཇིག་རྟེན་དང་། བདུད་དང་བཅས་པའི་འཇིག་རྟེན་དང་། དགེ་སྦྱོང་དང་བྲམ་ཟེར་བཅས་པའི་རིགས་ཀྱི་སྐྱེ་དགུ་དང་། ལྷ་དང་མི་དང་། ལྷ་མ་ཡིན་དང་བཅས་པའི་འཇིག་རྟེན་པ་རྣམས་སླུ་བར་བྱེད་པ་པོ་ཡིན་ཏེ་གཞན་

རྣམས་སླུ་བ་པོ་ཇི་ལྟར་ཤེས་པར་གྱུར་པ་དེ་ལྟར་སྒྲུབ་པར་མི་བྱེད་པ་དེ་ནི་དེ་ལྟར་སྟོང་པ། ནང་ན་ཅི་ཡང་མེད་པ། སྙིང་པོ་མེད་པ། དབུ་བའི་ཕུང་པོ་དང་འདྲ་བར་ཇི་སྐད་དུ་སྨྲ་བ་དེ་ལྟར་མི་བྱེད་པའི་སྐྱེ་བོ་ཐམས་ཅད་སླུ་བ་པོ། གཡོ་ཆེ་བའི་མཆོག་ཏུ་གྱུར་པ། ཚུལ་འཆོས་འབའ་ཞིག་

པ་དེ་རབ་ཏུ་ཕལ་ཆེ་བའི་གནས་མལ་དང་། ནད་ཀྱི་རྐྱེན་སྨན་རྣམས་གཞན་གྱིས་བྱིན་པས་འཁོར་བར་རྟག་ཏུ་བྱིང་ཞིང་ནུབ་པར་འགྱུར་རོ། །དམྱལ་བ་རྣམས་ནས་དམྱལ་བ་རྣམས་སུ་སྟེ། གཞན་རྣམས་སུ་ཡང་སྡིག་པས་བགྲོད་པ་ཡིན་ནོ། །ཚུལ་ཁྲིམས་འཆལ་པ་སྡིག་

པ་ཅན་མི་ཤིས་པའི་སྐལ་བ་ཅན་དེ་ལ་འོས་མ་ཡིན་པར་གྱུར་པས་གང་དག་དགེ་འདུན་དབང་བར་གྱུར་པའི་ས་གཞི་རྣམས་ཀྱིས་ཀྱང་བར་ཆད་འགྱུར་བ་ནི། ཚུལ་ཁྲིམས་དང་ལྡན་པའི་དགེ་སློང་རྣམས་ཀྱིར་ས་དེ་དག་སྦྱིན་པ་པོ་སྦྱིན་བདག་རྣམས་ཀྱིས་ཉེ་བར་སྤེལ་བའི་རྒྱུ་གང་དག་གི་ཕྱིར་ཏེ།

Vol. 70 · folio 86b

སྡོམ་པ་དང་མི་ལྡན་པ་རྣམས་ཀྱིས་ཀྱང་མ་ཡིན་ན་ཚུལ་ཁྲིམས་འཆལ་པའི་སྡིག་པ་ཅན་དེ་དག་རྣམས་ཀྱིས་ནི་གོམ་པ་འབོར་བ་དང་ཀུན་འདྲེ་བར་བྱེད་པ་ཙམ་གྱིས་ཀྱང་བརྒྱ་ཕྲག་ཏུ་ཡང་བར་ཆད་དུ་འགྱུར་ཞིང་ཡང་ལུས་ཀྱིས་གནས་མལ་དང་། ནད་ཀྱི་རྐྱེན་སྨན་དང་། ལོངས་སྤྱོད་གཞན་

རྣམས་ལྟ་སྨོས་ཀྱང་ཅི་དགོས། དེ་ནས་དེའི་དུས་ན་བཅོམ་ལྡན་འདས་ཀྱིས་ཚིགས་སུ་བཅད་པ་གསུངས་པ། ཇི་ལྟར། གང་འདི་དགེ་སློང་མ་བསྡམས་པ། །རྐུན་མ་རྣམས་ལས་འདི་རྐུན་མཆོག །ནང་ནས་རྣག་གི་ཁུ་བ་འབབ། །ཆོས་གོས་ཀྱིས་ནི་ཕྱི་རོལ་བསྡམས། །

སྙིང་པོ་ཐམས་ཅད་དང་བྲལ་བ། །དབུ་བའི་ཕུང་པོའི་རང་བཞིན་ལྟར། །དེ་བཞིན་འཁོར་བ་ཆང་སྟོང་འདི། །དེ་བཞིན་ལོག་པར་དགེ་སློང་སྨྲ། །དགེ་འདུན་དཀོན་མཆོག་ཕྱིར་བྱས་ནས། །ཚུལ་འཆལ་དེ་ནི་དམྱལ་བར་སྐྱེ། །ལུས་ཞིག་ནས་ནི་དམྱལ་རྣམས་སུ། །འཁྲིད་པ་སེམས་

ཀྱིས་བསླུས་པ་ཡིན། །ཆོས་འདུལ་བ་ནི་བསླུ་བྱས་ནས། །ལྟུང་བར་རང་གི་ལས་ཀྱིས་ཡིན། །དྲི་མའི་མུན་པ་རྣམ་དཀྲིགས་ནས། །སྡུག་བསྔལ་སྐལ་བ་ཅན་དུ་འགྱུར། །དགེ་བའི་ལས་ཀྱིས་གོས་མེད་པའི། །གཅེར་བུ་ལ་ནི་བཟང་སྐྱུག་བྲོ། །ཇི་ལྟར་ཆོས་ནི་ཕྱིར་བྱས་ནས། །

དམྱལ་བ་འཇིགས་པར་འཁྲིད་པར་བྱེད། །མཛེས་པ་མིན་པའི་དམྱལ་རྣམས་ཀྱིས། །སྡུག་བསྔལ་སྒོ་ནི་མ་བསྡམས་པ། །འཁོར་བའི་འཆིང་བ་མི་བཟད་པ། །ཚུལ་འཆལ་ཞེས་བྱ་འདི་ལ་རྗོད། །གང་གིས་མ་བསྡམས་པ་བསྲེགས་ན། །དེ་ནི་མེ་ཡིས་ཤིན་ཏུ་བསྲེགས། །སྤྱོད་པ་

ཉམས་པ་དེ་ཡི་ནི། །ལོག་པར་ལྟུང་བ་རྟག་པར་གནས། །ཡིད་རྣམས་བསྡམས་པ་མེད་གནས་པས། །དེ་སྲིད་དུ་ནི་སྤྱོད་སྡོམ་པ། །དེ་ནི་རྨོངས་པ་སྤྱོད་ཚུལ་འཆོས། །དམྱལ་བ་རྣམས་སུ་ཉེ་བར་འོངས། །དེ་ནི་ཉིན་མཚན་ཐམས་ཅད་དུ། །མི་དགེ་བ་རྣམས་འཕེལ་བར་བྱེད། །

གང་ཡང་ཚུལ་ཁྲིམས་རིན་ཆེན་འདི། །ཚུལ་ཁྲིམས་འཆལ་པས་ངེས་པར་ལྷུང་། །སྟོང་པའི་ཆོས་ལ་ཆགས་པ་དང་། །མུན་པས་ཀྱང་ནི་ཀུན་བསྒྲིབས་པ། །སྣ་ཚོགས་བསམ་པས་ནང་རྟོག་པའི། །དེ་ལ་སྐབས་ནི་དམིགས་མ་ཡིན། །བསྡམས་མིན་རང་བཞིན་ཞགས་པ་

Vol. 70 · folio 87a

ཡིས། །དྲི་མ་མཁས་པས་ནམ་སྤངས་པ། །ཚུལ་ཁྲིམས་འཆལ་པ་སྡིག་པ་ཅན། །ཚུལ་ཁྲིམས་སྤངས་པས་འདྲེན་པར་བྱེད། །བསྡམས་པ་མེད་པར་ཚུལ་འཆལ་བ། །སྡིག་པ་དང་ནི་ལྷན་ཅིག་འགྲོགས། །འདོད་པ་རྣམས་ནི་སྟེན་པ་ཡང་། །འདི་

དག་དམྱལ་བའི་ཕོ་ཉ་ཡིན། །མ་བསྡམས་པ་དང་རྨོངས་པ་དང་། །རྩབ་ཧྲལ་གྱི་ནི་ཁྱད་པར་གྱིས། །སྡིག་པའི་ལས་དང་མངོན་ལྡན་པ། །དམྱལ་བ་ཤིན་ཏུ་རིང་བ་མིན། །ལས་རྣམས་ཅི་འདྲའི་འབྲས་ཡིན་ན། །ཅི་ཡི་ཕྱིར་ན་དེར་མི་འགྲོ། །བདག་ཉིད་འཇོམས་བྱེད་ཀུན་

རྨོངས་པ། །གང་ལ་དགའ་བས་རྣམ་པར་རྨོངས། །སྡིག་པའི་ཆུ་བོ་བཟོད་དཀའ་བ། །ཉིན་དང་མཚན་དུ་འཕེལ་བ་ཡིན། །སྡུག་བསྔལ་རླབས་ཕྲེང་རྦ་རླབས་ཅན། །དེས་ཀྱང་རང་གི་སྐྱེ་བོ་འཕྲོག །གང་དག་གིས་ནི་ཆོས་བསླུས་པའི། །དེ་རྣམས་ཡིད་ནི་བདེ་མ་ཡིན། །སྡོམ་

པ་མེད་གནས་སྐྱེས་བུ་ནི། །དགེ་བའི་ཆོས་རྣམས་རྣམ་པར་སྤངས། །དགེ་བའི་ལམ་འདི་བདེ་ལེགས་ཡིན། །ཆོས་གང་གོ་འཕང་བདག་ཉིད་ཅན། །གོ་འཕང་དེ་ཐོབ་རྗེས་སྐྱེས་པ། །འགྱུར་མེད་གོ་འཕང་རབ་ཏུ་འགྲོ། །རང་འབྱུང་བསྙེན་གནས་བསམ་གཏན་དང་། །གང་ཞིག་དམ་

པའི་སྤྱོད་མངོན་དགའ། །སྡོམ་པ་ལ་གནས་རྟག་ཏུ་དུལ། །དེ་རྣམས་ལ་ནི་སྡུག་བསྔལ་མེད། །སྡོམ་མིན་དྲི་མ་འདི་དག་གིས། །དྲི་མ་བྱེད་པའི་མི་གང་ནི། །བསླབ་པའི་གཞི་ལས་ཡོངས་ཉམས་པ། །དེ་ནི་དམྱལ་བའི་སྐལ་ལྡན་ཡིན། །དེ་ལྟར་རྟོགས་ནས་མི་རྣམས་ཀྱིས། །

སྡོམ་པ་ཐམས་ཅད་རབ་ཏུ་སྒྲུབས། །སྲིད་པའི་རྒྱ་མཚོ་ཐམས་ཅད་དུ། །གང་ཕྱིར་སྡོམ་དེ་ཉམས་མྱོང་འགྱུར། །དེ་ལྟར་མི་རྣམས་ཐམས་ཅད་ལ་མ་བསྡམས་པས་འཇིག་རྟེན་ལས་འདས་པའི་ལམ་ལ་བར་ཆད་བྱེད་པར་འགྱུར་རོ། །ཇི་ལྟར་སྡོམ་པ་མ་ཡིན་པས་ལྷ་རྣམས་ཀྱི་བར་

ཆད་བྱེད་པར་འགྱུར་ན། འདི་ན་ལས་དང་འབྲས་བུའི་ས་པའི་འཇིག་རྟེན་འདིར་ཚུལ་ཁྲིམས་རྣམ་པ་བདུན་པོ་རྣམས་ཀྱིས་ཉེ་བར་བསྐྱེད་པའི་བདེ་བ་གང་ཡིན་པ་དེ་མཐོ་རིས་འདིར་བག་མེད་པར་གནས་པས་ཟད་པར་བྱེད་དོ། །དེ་དག་རྣམས་ཀྱི་དེ་ཟད་པ་དང་སླར་ཡང་མི་འབྱུང་སྟེ། ཇི་

Vol. 70 · folio 87b

ལྟར་མར་མེའི་སྣུམ་དང་སྡོང་བུ་ཟད་པས་འོད་ཟེར་ཟད་པར་འགྱུར་རོ། །དེ་བཞིན་དུ་ཇི་ལྟར་སྡོམ་པ་མེད་པ་འཇིག་རྟེན་ལས་འདས་པའི་ལམ་གྱི་བར་ཆད་བྱེད་པར་འགྱུར་ན་འདི་ལྟ་སྟེ། ཚུལ་ཁྲིམས་ལ་སྤྱད་པའི་སྐྱེས་བུ་རྣམས་ནི་མཐོ་རིས་སུ་སྐྱེ་བར་འགྱུར་རོ། །དེར་སྐྱེས་པ་ན་

འདི་ལྟར་སེམས་པར་བྱེད་དེ། ཇི་ལྟར་བདག་མི་རྣམས་སུ་སྡོམ་པ་རྣམ་པ་བདུན་གྱིས་འདིར་སྐྱེས་པ་ལྷ་རྣམས་དང་མཉམ་པའི་ནང་དུ་སྐྱེས་པར་གྱུར་ཏོ། །དེ་ལ་ལྷ་དེ་ནི་སྡོམ་པ་གང་ལ་རྩེ་གཅིག་ཏུ་སྤྱོད་པར་བྱེད་དེ། ལས་དང་འབྲས་བུ་རྣམས་མཐོང་བ་དང་སྟོན་པར་ཡང་བྱེད་དོ། །

ཇི་ལྟར་འདིར་སྐྱེས་པ་ཐམས་ཅད་ནི་སྡོམ་པ་ལས་རབ་ཏུ་བྱུང་ངོ་ཞེས་བྱ་བ་སྟེ། དེ་རྩབ་ཧྲལ་ཅན་དུ་གྱུར་པའི་ཡིད་དང་ཡུལ་རྣམས་དགའ་བར་གྱུར་པས་ཀྱང་ཕྲོགས་པའི་བློས་ཐོས་པར་མི་འགྱུར་རོ། །རབ་ཏུ་སྒྲུབ་པར་མི་བྱེད་དོ། །སྡོམ་པ་ལ་དད་པ་སྐྱེ་བ་མ་ཡིན། ལས་དང་འབྲས་

བུའི་རྣམ་པར་སྨིན་པ་རྣམས་ལའང་སྟེ། ཡུལ་རྣམས་ལ་རྒོད་པ་དང་ལྡན་པའི་བློར་གྱུར་པས་དེས་སྡོམ་པ་དེ་དག་རྣམས་ཉེ་བར་འཇོམས་པ་དང་། ཆོས་རྣམས་ལ་ཡང་སྤྱོད་པར་མི་འགྱུར་རོ། །དེ་དགེ་བ་ལས་ཉམས་པས་ངེས་པར་ལྟུང་སྟེ། རྣམ་པ་དེ་ལྟ་བུའི་ངང་ཚུལ་གྱིས་མཐོ་

རིས་སུ་སྐྱེ་བར་མི་འགྱུར་རོ། །འཇིག་རྟེན་པ་དང་འཇིག་རྟེན་ལས་འདས་པ་ཡང་མ་ཡིན་ནོ། །དེ་ལྟར་ཆོས་གསུམ་པ་སྡོམ་པ་མེད་པ་ཞེས་བྱ་བ་བར་ཆད་བྱེད་པར་འགྱུར་བ་ཡིན་ནོ། །དེ་ལ་ལྷ་རྣམས་ཀྱི་ཆོས་བཞི་པ་གང་དག་གིས་ལྷ་དང་མི་རྣམས་ཀྱི་བར་ཆད་བྱེད་པར་འགྱུར་ན་འདི་

ལྟ་སྟེ། ལེ་ལོའོ། །ལེ་ལོ་ལ་མངོན་པར་དགའ་བ་རྣམས་ཀྱང་དེ་ཁོ་ན་བཞིན་དུ་མི་རྣམས་ལ་ཐམས་ཅད་དང་། རྣམ་པ་ཐམས་ཅད་འཇིག་རྟེན་པའི་ཆོས་ཐམས་ཅད་མི་འབྱུང་ངོ་། །ལེ་ལོ་ལ་དགའ་བ་དེ་ཆོས་བདུན་དང་ཡོངས་སུ་འབྲལ་ཏེ། བདུན་གང་ཞེ་ན། ཇི་ལྟར་ཀུན་ནས་ང་

རྒྱལ་བས་ལེ་ལོས་བརྩོན་འགྲུས་མི་རྩོམ་མོ། །གང་དབང་བྱེད་པ་དང་མི་ལྡན་པས་ཡོངས་སུ་ཉམས་སོ། །ཀུན་ནས་ང་རྒྱལ་བ་ལས་ཀྱང་ཡོངས་སུ་ཉམས་པར་འགྱུར་རོ། །ལོངས་སྤྱོད་རྣམས་ལས་ཡོངས་སུ་ཉམས་པར་འགྱུར་རོ། །ཡུལ་ཤེས་པ་ལས་ཡོངས་སུ་ཉམས་པར་

Vol. 70 · folio 88a

འགྱུར་རོ། །འཇིག་རྟེན་པའི་ཐམས་ཅད་ལས་དེ་ཉམས་པར་འགྱུར་རོ། །སྐྱེས་བུ་དམ་པ་ལ་བསྟེན་པ་དང་འཇིག་རྟེན་པའི་གཏམ་དང་འབྲེལ་བ་ལས་ཀྱང་ཡོངས་སུ་ཉམས་སོ། །དེ་འཇིག་རྟེན་པའི་དོན་ཐམས་ཅད་ལས་ཡོངས་སུ་ཉམས་པས་ཀུན་ཏུ་རྨོངས་

པར་འགྱུར་རོ། །དོན་ལྷག་མ་དུ་མ་ཆུད་ཟོས་པར་འགྱུར་རོ། །དེ་ལྟར་མི་རྣམས་ཀྱི་འཇིག་རྟེན་པའི་དོན་ཐམས་ཅད་ཀྱི་བར་དུ་གཅོད་པར་འགྱུར་རོ། །ལེ་ལོ་ཇི་ལྟར་མི་རྣམས་ཀྱི་འཇིག་རྟེན་ལས་འདས་པའི་ཆོས་རྣམས་ཀྱི་བར་ཆད་བྱེད་པར་འགྱུར་ན། འདི་ན་ལེ་ལོས་ལེ་ལོར་གྱུར་

པའི་སྐྱེས་བུ་རྣམས་ནི་ཤ་ཤིས་ཁྱིམ་གྱི་ལས་ཀྱིས་འཇིགས་པས་རབ་ཏུ་འབྱུང་སྟེ། ཇི་ལྟར་བདག་རབ་ཏུ་བྱུང་ལ་རབ་ཏུ་མང་བའི་གནས་མལ་དང་། ནད་ཀྱི་རྐྱེན་གྱི་ཡོ་བྱད་རྣམས་ལ་ལོངས་སྤྱོད་པར་བྱའོ། །བདག་ནུབ་མོ་ཡང་ལས་བྱ་མི་དགོས་ལ་ཉིན་མོ་ཡང་མ་ཡིན་ཏེ། སྒྱུ་སྙོམ་

དེས་རབ་ཏུ་འབྱུང་ངོ་། །རབ་ཏུ་བྱུང་བ་དེ་དམ་པར་བྱས་ཏེ་གསོལ་བ་འདེབས་པར་མི་བྱེད། དོན་དང་བྱ་བ་མི་བྱེད། བསམ་གཏན་ལ་མངོན་པར་བརྩོན་པའི་རང་བཞིན་ཅན་མ་ཡིན་ནོ། །མཐར་ཐུག་པ་ཉིད་ནི་མ་ཡིན་གྱི་ལེ་ལོའི་སྐྱོན་གྱིས་ཉམས་སྨད་པ་ཡིན་ནོ། །གང་གི་ཚེ་བརྒྱ་ལ་

རབ་ཏུ་མང་བའི་རྙེད་པ་དང་བཀུར་སྟི་ལ་ཉེ་བར་ལོངས་སྤྱོད་དོ། །ཚུལ་ཁྲིམས་དང་ཤེས་རབ་ལ་མངོན་པར་དགའ་བར་མི་འགྱུར་རོ། །བློ་དམན་པ་དེ་སྐྱོན་དེས་ལུས་ཞིག་པ་ན་ཐབས་མ་ཡིན་པ་ལོག་པར་ལྟུང་བ་དམྱལ་བར་སྐྱེའོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་

ཚིགས་སུ་བཅད་པ་གསུངས་པ། ཇི་ལྟར། ལེ་ལོ་ལས་ནི་སྐལ་བ་ཆུང་། །གཏི་མུག་གིས་ནི་བཅོམ་པའི་སེམས། །སྐྱེ་བོ་སྙོམ་ལས་ཅན་ཐམས་ཅད། །ཤིས་པའི་སྐྱེ་བ་ཡོད་མ་ཡིན། །སྒྱུ་སྙོམ་སྡིག་པ་ཅན་གྱི་ཆོས། །རྨུགས་དང་གཉིད་ཀྱང་དེ་བཞིན་ཏེ། །ཐར་པའི་སྒོ་ནི་རྣམ་

འཇོམས་པར། །འགྱུར་བ་འདི་ནི་འབྲས་བུ་ཆེ། །ཁྲེལ་མེད་ངོ་ཚ་མེད་པ་དང་། །སྡིག་པའི་གྲོགས་དང་རྒོད་པ་ནི། །སྡུག་བསྔལ་གྱི་ནི་རྒྱུ་དེ་དག །དེ་ལ་ཆགས་མེད་མཁས་པ་ཡིན། །ལོག་པའི་ང་རྒྱལ་མངོན་ང་རྒྱལ། །ང་སྙམ་ང་རྒྱལ་ང་ཐམས་ཅད། །སྡུག་བསྔལ་གྱི་ནི་ལྗོན་

Vol. 70 · folio 88b

ཤིང་རྒྱུ། །དེ་དག་རྟག་ཏུ་ཡོངས་སུ་སྤོངས། །ལེ་ལོ་ཡི་ནི་དབང་གྱུར་ནས། །ལྷ་ཡི་འགྲོ་གང་དམྱལ་བར་རྩོམ། །དབུགས་རྒྱུ་ཡང་ནི་ཤི་བ་ཡིན། །དེ་དག་གསོན་དོན་ཡང་འབྲས་མེད། །ལེ་ལོས་ཉེ་བར་བཅོམ་པའི་མི། །གསོན་པ་ན་ཡང་གསོན་པ་མིན། །རོ་ལས་ཀྱང་ནི་ལྷག་དེ་

དག །འདི་ནི་སྒྱུ་སྙོམ་ཡིན་པར་ཤེས། །ལེ་ལོའི་འདམ་དུ་བྱིང་བ་གང་། །དེ་ནི་སྡུག་བསྔལ་རྒྱ་མཚོར་བྱིང་། །གང་ལ་བརྩོན་འགྲུས་བརྩམས་ཡོད་པ། །སྲིད་པའི་རྒྱ་མཚོ་ལས་དེ་རྒལ། །ལེ་ལོ་བརྩོན་འགྲུས་དམན་པ་གང་། །ཟས་ལ་རྟག་ཏུ་དགའ་བ་ཕྱུགས། །དེ་ནི་གསོན་

ཡང་ཤི་བ་ཡིན། །ཤི་ནས་ཀྱང་ནི་དམྱལ་བར་འགྲོ། །མི་གང་སྡུག་བསྔལ་སྐལ་ལྡན་པའི། །མི་དེ་ཕྱུགས་དང་མཚུངས་པ་ཡིན། །གཞན་གྱི་གོང་བུ་ཟ་བའི་ལྷ། །དེ་ཡི་རྒྱུ་ནི་ལེ་ལོ་ཡིན། །ཕལ་ཆེར་ལེ་ལོ་ཅན་རྣམས་ནི། །གཞན་གྱི་བུ་མོས་ཉེ་བར་འཚོ། །རོ་ལ་ལྷག་པར་

ཆགས་པ་དང་། །འཁྲིག་པ་ལ་ཡང་རྟག་ཏུ་དགའ། །དེ་ནི་དེ་ཉིད་དཔྱོད་བྲལ་ནས། །ཟས་འབའ་ཞིག་ལ་ཆེད་དུ་བྱེད། །འཆི་བའི་དུས་ནི་བྱུང་བ་ན། །རང་གི་སེམས་ནི་སྲེག་པར་བྱེད། །ཇི་སྲིད་ཚ་གྲང་ལྷན་ཅིག་དང་། །དེ་བཞིན་བཀྲེས་སྐོམ་ལྷན་ཅིག་ཏུ། །དེ་སྲིད་ལུས་

ཀྱིས་བྱ་བ་གྱིས། །གང་ཕྱིར་རྟག་ཏུ་མཚུངས་གྱུར་པ། །ལེ་ལོའི་བློ་ནི་བྱ་མིན་ཏེ། །ལེ་ལོ་སྙོམ་པའི་བདག་ཉིད་ཅན། །རྟག་ཏུ་འཁོར་བར་དེ་ལུས་གནས། །སྡུག་བསྔལ་ལས་ཀྱང་ལེགས་གྲོལ་མིན། །བརྒྱ་ཡི་ནང་ན་ཁ་ཉེན་ཞིང་། །ལེ་ལོ་ཅན་དེ་འཇིག་རྟེན་འབྲེང་། །ཐ་

མར་ཡང་ནི་ཅོ་འབྲུར་འགྱུར། །ལེགས་པའི་བློ་ཡང་ཡོད་མ་ཡིན། །སྐྱོན་ནི་དེ་དག་རྣམས་དང་ཡང་། །གཞན་རྣམས་དང་ཡང་ཡང་དག་ལྡན། །འཇིག་རྟེན་འདས་པའི་ལམ་ལས་ནི། །ཕྱི་རོལ་ཉིད་དང་བྲལ་བ་ཡིན། །ལེ་ལོ་ཅན་གྱི་སྐྱེས་བུ་ནི། །འཇིག་རྟེན་

འདས་ལས་ཡོངས་ཉམས་འགྱུར། །ལྷ་རྣམས་ཇི་ལྟར་ན་འཇིག་རྟེན་པ་དང་འཇིག་རྟེན་ལས་འདས་པའི་ཆོས་འདུལ་བ་ལས་ཉམས་པར་འགྱུར་ཞིང་། ཇི་ལྟར་ལྷ་རྣམས་ཀྱི་བར་ཆད་དུ་འགྱུར་ན་འདི་ན་ལེ་ལོ་ཅན་འཇིག་རྟེན་པའི་ལམ་གྱིས་གལ་ཏེ་ན་ལན་གྲངས་གཞན་ལ་མྱོང་

Vol. 70 · folio 89a

བར་འགྱུར་བའི་ལས་ཀྱིས་སམ། གལ་ཏེ་ལེགས་པར་བྱས་པ་རྣམས་ལ་དམིགས་པར་གྱུར་པས་སམ། གལ་ཏེ་དེ་ལྟར་སྐྱེས་པར་གྱུར་ལ་དེ་ལེ་ལོ་དེ་ཉིད་ཀྱིས་ཉེ་བར་བཅོམ་པས་ཐམས་ཅད་དུ་འདོད་པའི་སྒྲ་དང་། རོ་དང་། རེག་བྱ་དང་། གཟུགས་དང་། དྲི་

རྣམས་ལ་ཡང་ཀུན་དགའ་བར་མི་འགྱུར་རོ། །སྐྱེད་མོས་ཚལ་དགའ་བར་གྱུར་པ་རྣམས་དང་། རྒྱུག་པ་དང་སྙོང་བའི་རང་བཞིན་ཅན་དུ་མི་འགྱུར་རོ། །གླུའི་སྒྲའི་རང་བཞིན་ལ་མི་དགའོ། །གླུ་ལེན་པར་མི་བྱེད་དོ། །ནམ་མཁའི་དཀྱིལ་དུ་འཕགས་པར་མི་བྱེད་དོ། །རིའི་རྩེ་མོ་

ནས་རིའི་རྩེ་མོར་མི་འགྲོའོ། །རླབས་ཀྱི་ཕྲེང་བ་ནས་རླབས་ཀྱི་ཕྲེང་བ་རྣམས་ལ་བྱའི་རྒྱབ་ཏུ་ཞོན་ནས་རྩེ་བར་མི་བྱེད་དོ། །བདེ་བ་དེ་ཉིད་ཀྱིས་ཉེ་བར་བཅོམ་པ་དེའི་དྲུང་དུ་ཡང་འཐབ་བྲལ་གྱི་བདག་པོ་འགྲོ་བར་འགྱུར་ལ། དེས་ཡུལ་ཐམས་ཅད་ལས་ཀྱང་ལེགས་པར་སྦྱོར་བར་

མི་བྱེད་དོ། །དེ་ལ་ཡུལ་དེ་དག་ཐམས་ཅད་དགྲའི་ཚོགས་སུ་གྱུར་པའི་ལེ་ལོ་འཇིག་རྟེན་པ་རྣམས་ཡིན་ནོ། །ཇི་ལྟར་འཇིག་རྟེན་ལས་འདས་པའི་ལམ་གྱི་བར་ཆད་ཡིན་ན། ལེ་ལོ་ཅན་རྣམས་འདི་ན་ལྷ་གཞན་གང་དག་དམ་པའི་ཆོས་ཉན་པའི་རང་བཞིན་ཅན་དུ་གྱུར་པ་རྣམས་

དང་། དེ་དམ་པའི་ཆོས་ལ་དགའ་བར་གྱུར་པ་རྣམས་ལ་ཡང་དེ་དག་ལེགས་པར་སྟེན་པར་མི་བྱེད་དོ། །དེ་དམ་པའི་ཆོས་ལ་ཁ་ཕྱིར་ཕྱོགས་པར་འགྱུར་རོ། །དེས་མ་ཐོས་པའི་ཆོས་རྣམས་མི་ཉན་ནོ། །ཐོས་པ་རྣམས་ཀྱང་འཛིན་པར་མི་བྱེད་དོ། །གོམས་པར་ཡང་མི་བྱེད་

དོ། །བླ་མ་ལ་ཉེ་བར་སྟེན་པར་མི་བྱེད་དོ། །ཤེས་པ་དང་རྣམ་པར་ཤེས་པ་དང་ལྡན་པའི་རང་བཞིན་ཅན་མ་ཡིན་ནོ། །དེ་དམ་པའི་ཆོས་ལས་ཕྱི་རོལ་ཏུ་གྱུར་པ་དགེ་བ་ཐམས་ཅད་དང་རྣམ་པར་བྲལ་བ། འཁོར་བ་ན་རྟག་ཏུ་ཡང་འཁོར་བར་གྱུར་པ་སྟེ། རྟག་ཏུ་ཡང་སྡུག་བསྔལ་གྱི་སྐལ་

བ་ཅན་དུ་འགྱུར་རོ། །དེ་ཅིའི་ཕྱིར་ཞེ་ན། ཡང་དག་པའི་ལམ་དང་བྲལ་བའི་ཕྱིར་ན་མི་རྟོགས་ཤིང་ཡོངས་སུ་མི་འགྲོལ་ལོ། །དེ་ལེ་ལོས་ཉེ་བར་ཉམས་པས་དམྱལ་བ་དང་། ཡི་དགས་དང་། དུད་འགྲོ་དང་། མི་རྣམས་སུ་སྐྱེ་བར་འགྱུར་རོ། །དེ་རྒ་བ་དང་འཆི་བའི་ཁོག་ཙེས་

Vol. 70 · folio 89b

བཅིངས་པས་ཤིན་ཏུ་སྡུག་བསྔལ་བས་ཡོངས་སུ་འཁྱམ་མོ། །དེ་ལ་ལེ་ལོ་གཅིག་པོ་དེ་ཉིད་ཀྱིས་དོན་མ་ཡིན་པར་བྱེད་པ་ངན་འགྲོ་ཐམས་ཅད་ཀྱི་རྩ་བ་འཁོར་བ་ཐམས་ཅད་ཀྱི་ས་བོན་དུ་གྱུར་པ་རབ་ཏུ་འབྱུང་བ་ཡིན་ནོ། །དེའི་ཕྱིར་ན་གང་དག་འཁོར་བ་ལས་ལྡོག་པར་འདོད་པ་དེས་རབ་ཏུ་

བརྩོན་པས་ལེ་ལོ་ཡོངས་སུ་སྤང་བར་གྱིས་དང་། དེའི་རྩ་བ་ལས་གྱུར་པ་མ་ཡིན་པའི་རི་རྒལ་བར་མི་ནུས་སོ། །སྐྱོན་གཅིག་གིས་གོས་པས་སྡུག་བསྔལ་གྱི་རྒྱ་མཚོ་ལས་རྒལ་བར་ཡང་མི་ནུས་སོ། །གཞན་ཡང་སྐྱོན་བཞི་པ་ལས་ཤིན་ཏུ་འདས་ནས་གཞན་ཆོས་ལྔ་པ་ལྷ་དང་མི་

རྣམས་ཀྱི་བར་དུ་གཅོད་པར་འགྱུར་བ་རྣམས་གང་ཞེ་ན། འཇིག་རྟེན་པ་དང་འཇིག་རྟེན་ལས་འདས་པའི་ལམ་ནི་འདི་ལྟ་སྟེ། མི་བཟད་པའི་འདོད་པ་ནི་ལྷ་དང་མི་རྣམས་ཀྱི་འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་ཀྱི་བར་དུ་གཅོད་པར་བྱེད་པར་འགྱུར་རོ། །ཇི་ལྟར་

ལྷ་དང་མི་རྣམས་ཀྱི་འཇིག་རྟེན་པའི་ལམ་ལ་རྣམ་པར་སྨད་པར་བྱ་བ་མི་བཟད་པའི་འདོད་པ་ཡིན་ན་འདི་ལྟ་སྟེ། ཁྱིམ་ལ་གནས་ནས་སྐྱེས་བུ་འདོད་པས་ཟིལ་གྱིས་གནོན་པར་འགྱུར་ཏེ། དེ་ནི་ཆོས་ལ་ངེས་པར་མི་དགའ་བ། རྟག་ཏུ་ཡང་ནོར་ལ་ཆེད་ཆེར་བྱེད་པ་ཡིན་ཏེ། གཞི་དེས་

ཉིན་མཚན་མེད་པར་ཡང་ནོར་རྣམས་ཀྱི་སྲེད་པ་སྙིང་ལ་འཇུག་པར་བྱེད་དོ། །དེ་ཇི་ལྟ་ཇི་ལྟར་རྫས་རྣམས་འབྱུང་བ་དེ་ལྟ་དེ་ལྟར་ཕྱིར་ཞིང་ཡུལ་གཞན་རྣམས་འདོད་པ་སྙིང་ལ་འཇུག་གོ། །དེ་ནི་འདི་ལྟར་འགྱུར་ཏེ། བདག་གིས་སྒྱུས་ཉེ་བར་འཚོ་བའི་རྣམ་གྲངས་གང་གིས་གཞན་བསླུ་

བར་བྱ་ཞེས་ཏེ། རྟག་ཏུ་ཡང་གྱ་གྱུའི་དཔྱད་ར་བར་འགྱུར་རོ། །དེས་གཞན་རྣམས་ལ་ཡང་དེ་བཞིན་དུ་ཡུལ་དེ་དག་ལ་འདོད་པ་སྐྱེད་པར་བྱེད་དོ། །གཡོ་སྒྱུ་རྣམས་ཉེ་བར་སྟེན་ཏོ། །ཆོས་མ་ཡིན་པ་ཕལ་པོ་ཆེས་གནས་པར་འགྱུར་བའི་ལས་ཀྱི་བྱ་བ་རྣམས་ལ་འཇུག་པར་བྱེད་དོ། །

དེ་དག་དེ་བཞིན་དུ་བརྣབ་སེམས་མང་བར་འགྱུར་རོ། །ཇི་ལྟར་གང་དག་གཞན་གྱི་རྫས་ཡིན་པ་དེ་རྣམས་ངའི་ཡིན་པར་གྱུར་ན་ཞེས་དེས་དེ་ལྟར་ཡིད་ཀྱིས་བསམས་ནས་ཀྱང་གཞན་རྣམས་ལ་ཡང་དེ་བཞིན་དུ་དགའ་བར་བྱས་ནས་དེས་གཞན་རྣམས་དང་ཡང་ལྷན་ཅིག་ཏུ་གཡོ་སྒྱུ་

Vol. 70 · folio 90a

བྱས་པས་གཞན་རྣམས་སླུ་བར་བྱེད་དོ། །བསླུས་ནས་ཀྱང་རབ་ཏུ་དགའ་བར་འགྱུར་རོ། །ཇི་ལྟ་བུའི་ལེགས་པ་ཅིག་བདག་གིས་བྱ་སྟེ། ཡུལ་དེའི་ཉོ་ཚོང་གིས་གཡོ་ཟོལ་དང་ལྡན་པས་གཞན་རྣམས་ཀྱང་བསླུས་ནས་ནོར་ཕྲོགས་པས་བདག་ལ་འདི་

སྙེད་ཅིག་འཕེལ་བ་ཞེས་དེ་ལྟར་དེ་རོ་མྱོང་བར་བྱེད་དོ། །སྒོམ་པར་བྱེད་དོ། །ལན་མང་དུ་བྱེད་དོ། །གཞན་རྣམས་ཀྱང་དེས་སྡུག་བསྔལ་བར་བྱེད་པར་འགྱུར་རོ། །འདོད་པ་མི་བཟད་པས་ཟིལ་གྱིས་མནན་ནས་དེ་ཡུལ་ལྗོངས་རྣམས་འཇོམས་པར་བྱེད་པར་འགྱུར་རོ། །གྲོང་ཁྱེར་

རྣམས་དང་ཡུལ་ལྗོངས་རྣམས་ཕུང་བར་བྱེད་པ་པོར་འགྱུར་རོ། །སྐྱེ་བོ་ཐམས་ཅད་ཀྱིས་ཡོངས་སུ་སྤངས་པ་པོར་འགྱུར་རོ། །དེ་བཟང་པོ་རྣམས་ཐམས་ཅད་ཀྱིས་རྣམ་པར་གཤེས་པ་དང་ཡོངས་སུ་སྤངས་པར་ཡང་འགྱུར་ཏེ། ཡུལ་གྱི་ཚེར་མ། གྲོང་གི་ཚེར་མ། གྲོང་ཁྱེར་གྱི་

ཚེར་མ། ཡུལ་འཇོམས་པ་པོ་དང་། གྲོང་འཇོམས་པ་པོ་དང་། ཁྱིམ་འཇོམས་པ་པོ་དང་། རིགས་འཇོམས་པ་པོ་དང་ཡང་རྟག་ཏུ་ཡང་དག་པར་ལྡན་པ་གཞན་རྣམས་ལ་གནོད་པར་བྱེད་པ་པོ་ལུས་ཞིག་པ་དང་། ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེ་

ལྟར་འཇིག་རྟེན་པའི་ཡུལ་རྣམས་ལ་འདོད་པ་དང་ལྡན་པས་ནི་མི་རྣམས་ཀྱི་བར་དུ་གཅོད་པར་གྱུར་ཏོ། །འདོད་པ་མི་བཟད་པ་གོམས་པར་བྱས་པ་ནི་སླར་ཡང་རབ་ཏུ་འཕེལ་བར་འགྱུར་ཏེ། ཇི་ལྟར་མེ་རྣམས་ལ་ཤིང་བསྣན་པ་དེ་ལྟ་དེ་ལྟར་རྣམ་པར་འཕེལ་ལོ། །དེ་ཁོ་ན་བཞིན་མི་བཟད་

པའི་འདོད་པ་ཇི་ལྟ་ཇི་ལྟར་རྫས་རྣམས་རྙེད་པ་དེ་ལྟ་དེ་ལྟར་ཕྱིར་ཞིང་རབ་ཏུ་འཕེལ་ཏེ། བརྣབ་སེམས་པར་གྱུར་པ་དང་ལྷན་ཅིག་ཏུ་སྤྱོད་པའི་ཕྱིར་རོ། །དེའི་ཕྱིར་ན་སྐྱེས་བུ་ཆོས་བྱེད་པ་རྣམས་ཀྱིས་རབ་ཏུ་བརྩོན་པས་ཀྱང་འདོད་པ་མི་བཟད་པ་རྣམས་རབ་ཏུ་གཞོམ་པར་བྱའོ། །རྒྱུ་གང་

གིས་འདོད་པ་འདི་དྲི་མ་རྣམས་ཀྱི་མཆོག་ཡིན་པ་ནི་འདི་ལྟ་སྟེ། ནོར་སྐྱེད་པའི་དྲི་མ་རྣམས་སོ། །དྲི་མ་དེ་དག་གིས་ཉེ་བར་བཅོམ་པའི་སྐྱེས་བུ་རྣམས་ཀྱང་དམྱལ་བར་ཉེ་བར་རྒྱུག་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་ཚིགས་སུ་བཅད་པ་གསུངས་པ།

Vol. 70 · folio 90b

ཇི་ལྟར། གཡོ་སྐྱེད་པ་ཡི་ཉོ་ཚོང་གིས། །གང་ཞིག་གཞན་གྱི་ནོར་འཕྲོག་པ། །དེ་ནི་བརྣབ་སེམས་མང་འགྱུར་ནས། །རྟག་ཏུ་གནོད་པ་བྱ་བར་སེམས། །ཉིན་མཚན་མེད་པར་དེ་དག་གིས། །སྙིང་ནི་བདེ་བར་གནས་མ་ཡིན། །ཡིད་ནི་འདོད་པའི་དབང་གྱུར་ནས། །གཞན་གྱི་ནོར་

ལ་འདོད་བྱེད་པ། །མི་བཟད་རྣམས་ཀྱི་རང་བཞིན་ནི། །དེ་དག་མེ་དང་འགྲོགས་པར་རུང་། །མི་རྣམས་ཐམས་ཅད་རྣམ་འཇིགས་པ། །མི་བཟད་དུག་ཅན་སྦྲུལ་བཞིན་ནོ། །འདོད་གང་མི་བཟད་པ་འདི་ཡིས། །དབང་དུ་བསྡུས་པའི་མི་རྣམས་ནི། །དེ་ཤི་ནས་ནི་དམྱལ་བར་

འགྲོ། །ཡི་དགས་སྐྱེ་གནས་དེ་བཞིན་ཏེ། །དེ་ལས་ཀྱང་ནི་རྣམ་གྲོལ་ནས། །དམྱལ་བའི་མེས་ནི་ཀུན་གང་བར། །སྐྱེ་བ་ལྔ་བརྒྱ་རྣམས་སུ་ནི། །གཞན་གྱི་འདོད་པ་དེར་འགྲོའོ། །ཉི་མ་རྒྱ་ཆེའི་བཞིན་རྣམས་ནི། །རྟག་ཏུ་སྡུག་བསྔལ་སྐལ་ལྡན་ཡིན། །སེམས་ནི་འདོད་པས་

ཉེར་བཅོམ་པར། །མི་རྣམས་ཐམས་ཅད་གྱུར་པ་ཡིན། །རྒྱུད་གང་འདོད་པ་རབ་སྤངས་པ། །རྟག་ཏུ་ཡེ་ཤེས་ལ་དགའ་བ། །རྫུ་འཕྲུལ་དང་ལྡན་རྟག་ཏུ་ཞི། །དེ་ནི་འགྲོ་བའི་མཆོག་ཏུ་འགྲོ། །མི་བཟད་སྦྲུལ་གྱི་བཞིན་འདྲ་བ། །ངེས་པར་སྙིང་ལ་འདོད་པས་གང་། །འདོད་

པ་མཐོང་བ་དུག་ཅན་སྦྲུལ། །ལོག་པར་ལྟུང་ལ་རྟག་ཏུ་གནས། །འདོད་པ་རྟག་ཏུ་བྱས་གྱུར་ན། །དེ་དག་ཡང་དང་ཡང་དུ་འཕེལ། །ཤིང་སྐམ་དང་ནི་ལེགས་ཕྲད་ནས། །མེ་ནི་རབ་ཏུ་འཕེལ་བ་ལྟར། །སྐྱེས་བུ་ནོར་གྱིས་སྲེད་གདུངས་པ། །ནོར་སྐྱེད་པ་ལ་ཆེད་ཆེར་བྱེད། །ངེས་

པར་འཆི་བའི་དུས་བྱུང་ན། །དབང་བྱར་མེད་པར་ནོར་རྣམས་གཏོང་། །གང་ཕྱིར་དེ་འབྱུང་གཞོམ་པ་ནི། །འཕེལ་བར་འགྱུར་བས་རྣམ་པར་འཇིག །གང་ཕྱིར་འདོད་དེས་བདག་བཅིངས་པས། །མི་ནི་དམྱལ་བར་ཁྲིད་པ་ཡིན། །ནོར་དེ་གཞན་གྱི་ཟ་བ་ཡིན། །དེ་ནི་སྡིག་གིས་

གོས་པ་ཡིན། །དོན་མིན་དོན་གྱི་གཟུགས་ཀྱིས་དང་། །བདེ་བའི་གཟུགས་ཀྱིས་བདེ་མིན་ཡང་། །དགྲ་བོ་གྲོགས་པོའི་གཟུགས་ཀྱིས་ཀྱང་། །འདོད་པ་སྙིང་ལ་འཇུག་པ་ཡིན། །འདོད་གོམས་མ་བྱེད་ཤེས་རབ་ཅན། །འདོད་པའི་མེ་ཡིས་རྟག་ཏུ་སྲེག །དེ་ཡིས་སྐྱེས་བུ་རབ་

Vol. 70 · folio 91a

བསྲེགས་པས། །ཕྱི་ནས་དམྱལ་བར་འགྲོ་བ་ཡིན། །འདོད་པ་མཚུངས་པ་གང་ཕྱིར་འདི། །མི་རྟག་རི་ཡི་འཇིག་པ་ཡིན། །བློ་གྲོས་ངན་པས་སྡིག་བྱས་པ། །དེ་དག་དོན་ནི་ག་ལ་ཡོད། །དེ་ལྟར་འདོད་པ་མི་བཟད་པ་རྣམ་པ་ཐམས་ཅད་དུ་དོན་མ་ཡིན་ཞིང་དགོས་

པ་རྣམས་མི་སྒྲུབ་པའོ། །དེ་ལྟར་འཇིག་རྟེན་པའི་མི་བཟད་པའི་འདོད་པ་རྣམས་ཀྱིས་མི་རྣམས་ལ་བར་དུ་གཅོད་པར་འགྱུར་ཏེ། མི་བཟད་པའི་འདོད་པ་གོམས་པར་བྱས་པའི་ཕྱིར་རོ། །གཞན་ཡང་རབ་ཏུ་འཕེལ་བ་ཉིད་དེ། ཇི་ལྟར་མེ་ཤིང་དང་ཕྲད་པ་དེ་ལྟ་དེ་ལྟར་རྣམ་པར་

འཕེལ་བ་ཡིན་ལ་དེ་ཁོ་ན་བཞིན་དུ་འདོད་པ་མི་བཟད་པ་ཇི་ལྟ་ཇི་ལྟར་ནོར་རྣམས་རྙེད་པ་དེ་ལྟ་དེ་ལྟར་ཕྱིར་ཞིང་རབ་ཏུ་འཕེལ་ཏེ། བརྣབ་སེམས་དང་ཡང་ལྷན་ཅིག་ཏུ་སྤྱོད་པར་འགྱུར་བས་ན་དེའི་ཕྱིར་ན་སྐྱེས་བུ་ཆོས་བྱེད་པ་རྣམས་ཀྱི་རབ་ཏུ་བརྩོན་པ་དུ་མས་ཀྱང་མི་བཟད་པའི་

འདོད་པ་རྣམས་རབ་ཏུ་གཞོམ་པར་བྱའོ། །ལྷ་དག་འདི་ན་སྐྱེས་བུ་གང་ཞིག་སྦྱིན་པ་ལ་མངོན་པར་དགའ་བས་ཚོང་པར་གྱུར་ཏེ། དེ་དག་དགེ་སྦྱོང་དང་བྲམ་ཟེ་རྣམས་ལ་རིན་ཆུང་དུན་གྱིས་ཟས་དང་སྐོམ་དག་བླངས་ནས། སྦྱིན་པའི་སྙད་ཀྱི་ཚོང་གིས་ཡིད་རབ་ཏུ་དྲང་བས་

ཚོང་བྱེད་དོ། །ཡོན་ཏན་གྱི་ཁྱད་པར་གྱི་གང་གིས་རིན་ཐང་མེད་པ་འཚོང་ངོ་། །དེ་ཡང་བཞི་ལོག་གམ་བརྒྱད་ལོག་ཏུ་བྱེད་དོ། །སྔར་ལས་ལྷག་པར་བཅུ་ལོག་ཏུ་ཡང་བྱེད་དེ། འདི་ནི་འདོད་པ་མི་བཟད་པ་སྨད་པར་བྱ་བ་རྣམས་ལས་གཅིག་ཡིན་ནོ། །གཞན་

ཡང་མི་བཟད་པའི་འདོད་པ་ནི་འདི་ལྟ་སྟེ། ཆོས་སྨྲ་བ་པོ་རྣམས་ཀྱིས་ཆོས་བསྟན་ནས་རྫས་ལེན་ནོ། །ནོར་དེ་ཡང་དཀོན་མཆོག་གསུམ་ལ་སྔོ་བར་མི་བྱེད་དོ། །གཞན་ཡང་རྣམ་པར་སྨད་པར་བྱ་བའི་འདོད་པ་ནི་གང་དག་ཡེ་ཤེས་ལ་གོམས་པ་བསྐྱེད་པར་གྱུར་ནས་ཀྱང་

རིག་པ་ལྷག་པ་གསུམ་པོ་རྣམས་འཛིན་པར་བྱེད་པ་སྟེ། རབ་ཏུ་བྱུང་བར་གྱུར་ཅིང་རེ་བ་མེད་པ་དང་། ཀུན་ནས་དགའ་བ་མེད་པར་གྱུར་པ་དེ་དག་རྣམས་ཉིད་ཀྱི་འདོད་པ་འདི་ནི་རྣམ་པར་སྨད་པར་བྱ་བ་ཡིན་ནོ། །ཡང་རྣམ་པར་སྨད་པར་བྱ་བའི་འདོད་པ་གཞན་ནི་འདི་ལྟ་སྟེ། གང་ཞིག་

Vol. 70 · folio 91b

རབ་ཏུ་བྱུང་བར་གྱུར་ནས་ཀྱང་། ས་ལས་བྱས་པའམ། བ་སོ་ལས་བྱས་པའམ། ཤིང་ལས་བྱས་པའམ། དངུལ་ལས་བྱས་པའི་བཅོམ་ལྡན་འདས་ཀྱི་སྐུ་གཟུགས་འཚོང་བར་བྱེད་པའོ། །དེ་དག་རྣམས་ཀྱི་འདོད་པ་འདི་ནི་རྣམ་པར་སྨད་པར་བྱ་བའོ། །ནོར་དེ་ཡང་

ཆོས་ལ་སྔོ་བར་མི་བྱེད་དོ། །དེ་ལྟར་མི་རྣམས་ཀྱི་ཡང་འཇིག་རྟེན་ལས་འདས་པའི་ཆོས་རྣམས་ཐོབ་པ་ལ་འདོད་པ་མི་བཟད་པ་རྣམ་པར་སྨད་པར་བྱ་བ་སྐྱུག་བྲོ་བར་གྱུར་པ་རྟག་པར་རྒྱུན་དུ་མཛེས་པར་གྱུར་པ་མ་ཡིན་ནོ། །ཇི་ལྟར་ལྷ་རྣམས་ཀྱི་འདོད་པ་ཡིན་ན་དེ་དག་གི་རྣམ་པ་སྣ་

ཚོགས་པའི་བདེ་བ་རྣམས་ཀྱིས་རྣམ་པར་རྒྱུ་བ་རྣམས་ཡིན་ཏེ། དེ་ཡང་དེ་ལྟར་ཁྱེད་རྣམས་འདོད་པ་མི་བཟད་པ་མངོན་སུམ་ཉིད་དུ་གྱུར་པ་ནི་ཇི་ལྟར་གསེར་དང་། དངུལ་དང་། བཻ་ཌཱུརྱ་དང་། ཨིན་དྲ་ནཱི་ལ་དང་། མ་ཧཱ་ནཱི་ལ་དང་། ཤེལ་གྱི་རང་བཞིན་རྣམས་ཀྱི་རི་གང་དག་ཡིན་པ་དེ་དག་ལ་

རྩེད་མོ་ཉམས་སུ་མྱོང་བར་བྱེད་དོ། །དེ་ལ་རི་གཅིག་ལས་རི་གཞན་རྣམས་ལ་རྩེད་མོ་ལ་འགྲོ་བ་རྣམས་ཕོས་མོས་ཀྱི་ཚོགས་ཀྱིས་ཡོངས་སུ་བསྐོར་བ་དེ་དག་ཐམས་ཅད་ནི་འདོད་པས་བྱས་ཀྱི་གཞན་གྱིས་ནི་མ་བྱས་ལ། ལྷ་ཁྱེད་རྣམས་ཡུལ་གྱི་སྲེད་པ་དང་ལྷན་ཅིག་ཏུ་འདོད་པ་གང་ཡིན་

པ་དེ་དག་གིས་བཅིངས་ནས་རྣམ་པར་ལྷུང་བ་ཡང་རྟོགས་པར་མི་བྱེད་ཅིང་ངན་འགྲོའི་འཇིགས་པ་རྣམས་མ་ཡིན་ལ། མི་འདོད་པ་ཡིད་དུ་མི་འོང་བ་ཡུལ་ལྗོངས་དང་བྲལ་བའི་འཇིགས་པ་ཡང་མེད་པ་དང་། ནད་ཀྱིས་བྱས་པའི་འཆི་བའི་དུས་ཀྱི་སྡུག་བསྔལ་གྱི་འཇིགས་པ་

རྣམས་ཀྱང་རྟོགས་པར་གྱུར་ཏ་རེ། ལྷ་ཁྱེད་རྣམས་ཀྱང་འདོད་པས་ཟིལ་གྱིས་མནན་པའི་ཡིད་དེ་དང་། སྤྱོད་པ་དེ་དག་ཉིད་ཀྱིས་རབ་ཏུ་བཟོད་དཀའ་བའི་རིས་རྣམ་པར་འཇོམས་པར་འགྱུར་རོ། །དེ་ལྟར་ལྷ་དེ་དག་རྣམས་རྣམ་པར་འབྲལ་བ་དང་། ནད་ཀྱི་འཇིགས་པ་ཡང་མེད་པར་

འཆི་འཕོ་བར་གྱུར་པ་ན་ཡང་འདོད་པ་རྣམས་ཀྱིས་ཡིད་མི་ཚིམ་མོ། །དེ་ལྟར་ལྷ་རྣམས་ཀྱིས་འཇིག་རྟེན་པའི་ལམ་ལ་ཡང་མི་བཟོད་པའི་འདོད་པ་རྣམས་ཀྱིས་བར་དུ་གཅོད་པར་བྱེད་པར་འགྱུར་རོ། །ཇི་ལྟར་འཇིག་རྟེན་ལས་འདས་པའི་ལམ་གྱིས་ལྷའི་འཇིག་རྟེན་པ་རྣམས་ཀྱི་བར་ཆད་

Vol. 70 · folio 92a

བྱེད་པར་འགྱུར་ན། འདི་ན་འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་ལ་རབ་ཏུ་འཇུག་པར་བྱེད་པ་སྤྱོད་པ་དམ་པ་མ་ཡིན་པ་ལ་མངོན་པར་དགའ་བར་འགྱུར་རོ། །འདོད་པ་ཅན་གྱི་ལྷ་རྣམས་ནི་ལྷ་གཞན་འདོད་པ་ཆུང་བར་གྱུར་པ་ཆོས་འདུལ་བ་

ལ་ཕྱིང་བ་པར་རྗེས་སུ་སློབ་པ་རྣམས་ལ་ཐོས་པས་དགའ་བར་བྱས་པའི་ཡིད་ཅན་མ་ཡིན་ནོ། །རྩ་བ་ལ་ཆུ་ལྡུགས་པ་བཞིན་དུ་དགེ་བའི་ཆོས་རྣམས་ཐམས་ཅད་ལ་ཡང་འདི་ལྟ་སྟེ། ཆོས་ཀྱི་རྟོགས་པའོ། །ཆོས་ཀྱི་རྟོགས་པ་དེ་ཡང་ཐོས་པ་མེད་པར་མི་འགྱུར་རོ། །དེ་ཁོ་ན་ཉིད་

ཐོས་པ་ཡང་ཇི་ལྟར་རྟོགས་པར་མི་འགྱུར་བ་དང་། བག་མེད་པས་བག་མེད་པ་དེ་ཡང་ཅིའི་རྩ་བ་ལས་ཡིན། གང་གི་ཕྱིར་འདོད་པའི་རྩ་བ་ལས་ཡིན། གང་གི་ཕྱིར་འདོད་པའི་རྩ་བའོ། །དེའི་ཕྱིར་ན་འདོད་པ་སྤོང་བ་པོ་གང་ཡིན་པ་དེ་ཐམས་ཅད་མྱ་ངན་ལས་འདས་པའི་གྲོང་ཁྱེར་

དུ་འཇུག་པ་ཡིན་ནོ། །གང་ཡང་འདོད་པས་བཙིར་བའི་ཡིད་ཅན་དེ་དག་རྣམས་ཐམས་ཅད་འཁོར་བའི་ལམ་ལ་རྒྱུ་བ་ཡིན་ནོ། །དེ་ལྟར་ན་ལྷ་རྣམས་འཇིག་རྟེན་ལས་འདས་པའི་ལམ་ལ་ཡང་ལྷ་དང་མི་རྣམས་ཀྱིས་བར་ཆད་བྱེད་པར་འགྱུར་རོ། །དེའི་ཕྱིར་བློ་དང་ལྡན་པར་གྱུར་པས་རབ་ཏུ་

བརྩོན་པས་འདོད་པ་མི་བཟད་པ་རྣམས་སྤང་བར་བྱའོ། །འདི་ནས་ཐམས་ཅད་ཟང་ཟིང་གི་སྦྱིན་པ་ལ་རབ་ཏུ་བརྩོན་པ་དེའི་རྒྱུ་འཐུན་པའི་འབྲས་བུའོ། །སྦྱིན་པའི་ལམ་དེ་དག་རྣམས་ཉིད་ནི་ལྷ་རྣམས་ཀྱིས་བྱ་བར་མི་ནུས་པར་འདོད་དེ། མི་གཟི་བརྗིད་ཆེ་བ་རྣམས་ཀྱིས་བྱས་ཀྱི་

ལྷས་ནི་མ་ཡིན་ནོ། །ལྷ་དེ་མིར་གྱུར་པ་ན་རབ་ཏུ་རྙེད་དཀའ་བའི་སྦྱིན་པ་གང་ཡིན་པ་ལ་མངོན་པར་དགའ་བ་དེ་གཞན་གྱིས་བསླུས་པར་གྱུར་པ་སྟེ། རིན་པོ་ཆེའི་གླིང་ལས་ཉམས་པའི་ཚོང་པ་ངན་པ་བཞིན་ཏེ། འདི་ལྟར་ཡང་ཟང་ཟིང་གི་སྦྱིན་པ་རྣམ་པ་དུ་མ་ཡོད་དོ། །དེ་ལ་མི་

འཇིགས་པའི་སྦྱིན་པ་གང་ཞེ་ན། རྣམ་པ་ཡང་དུ་ཞིག་མི་འཇིགས་པའི་སྦྱིན་པ་ཡིན་ཞེ་ན། མི་འཇིགས་པའི་སྦྱིན་པ་རྣམ་པ་གསུམ་ཡིན་ཏེ། སྲོག་ཡོངས་སུ་སྐྱོབ་པ་དང་། ནོར་འཕྲོག་པ་རྣམས་ཡོངས་སུ་སྐྱོབ་པ་དང་། དེ་བཞིན་དུ་གཞན་གྱི་བུ་དང་བུ་མོ་འཕྲོག་པ་ཡོངས་

Vol. 70 · folio 92b

སུ་སྐྱོབ་པར་བྱེད་པའོ། །དེ་ལ་སྲོག་བྱིན་པས་ནི་ལྷ་དང་མི་རྣམས་སུ་ཚེ་རིང་བར་འགྱུར་རོ། །ནོར་འཕྲོག་པ་རྣམས་ཡོངས་སུ་བསྐྱབས་པ་ལས་རྐུན་མ་ལས་ལེགས་པར་བསྲུངས་པར་འགྱུར་རོ། །ནོར་རྣམས་དང་ཡང་ལྡན་པར་ཡང་འགྱུར་རོ། །རྒྱལ་པོ་དང་། རྐུན་མ་

དང་། ཆུ་ལ་སོགས་པས་འདིའི་ནམ་ཡང་རྫས་རྣམས་འཕྲོག་པར་མི་འགྱུར་རོ། །རྒྱལ་པོར་འགྱུར་བ་དང་། རྒྱལ་པོའི་བློན་པོ་རྣམས་སུ་འགྱུར་བ་དང་། ལས་དེའི་འབྲས་བུས་རྫུ་འཕྲུལ་ཆེ་བར་འགྱུར་བ་དང་། དབང་ཆེ་བ་དང་། སྐྱེ་བ་གཞན་ཐམས་ཅད་དུ་ཡང་ནོར་དང་

ལྡན་པར་འགྱུར་རོ། །བུ་དང་བུ་མོ་རྣམས་ཀྱི་མི་འཇིགས་པ་བྱིན་པས་ནི་བུ་དང་བུ་མོ་རྣམས་ལེགས་པར་བཟུང་བར་འགྱུར་རོ། །ལྷ་དང་མི་རྣམས་སུ་འཆི་འཕོ་བའི་དུས་ཀྱི་ཚེ་ན་ཡང་དེ་ལྟར་རྣམ་པར་མི་སྤོང་ངོ་། །ལྷ་དག་དེ་ལ་ཆོས་ཀྱི་སྦྱིན་པ་གང་ཞེ་ན། དེ་ལ་རྣམ་

པ་གཉིས་ཏེ། འཇིག་རྟེན་པ་དང་། འཇིག་རྟེན་ལས་འདས་པའོ། །དེ་ལ་འཇིག་རྟེན་པ་ནི་བསམ་གཏན་བཞིར་ཉེ་བར་འགྲོ་བའི་འཇིག་རྟེན་པའི་ཤེས་པ་དང་ཡང་དག་པར་ལྡན་པ་བྱིན་པས་ལྷ་དང་མི་རྣམས་སུ་བདེ་བར་འགྱུར་ཏེ། ལྷ་དང་མི་རྣམས་ཀྱི་ནང་དུ་སྟེ། གལ་

ཏེ་ལོག་པར་ལྟ་བར་མ་གྱུར་ནའོ། །འཇིག་རྟེན་ལས་འདས་པའི་ཆོས་ཀྱི་སྦྱིན་པ་རྣམས་བཏང་བས་རྣམ་པར་བྱང་བའི་ལྷར་འདོད་པ་ན་སྤྱོད་པ་རྣམས་སམ། གཟུགས་ན་སྤྱོད་པ་རྣམས་སུའོ། །དེ་གལ་ཏེ་འདོད་པ་ན་སྤྱོད་པར་སྐྱེས་ན་དེ་དགུ་བཅུ་རྩ་བརྒྱད་ཀྱི་ས་ལ་སྤྱོད་པའི་

འདོད་པ་ན་སྤྱོད་པའི་ལྷའི་རིས་དྲུག་ཇི་ལྟ་བའི་གཙོ་བོ་རྣམས་སུ་སྐྱེའོ། །གཟུགས་ན་སྤྱོད་པ་རྣམས་སུ་ཡང་སྐྱེ་སྟེ། མྱ་ངན་ལས་འདས་པ་རྟོགས་པར་ཡང་འགྱུར་རོ། །འབྲས་བུའི་ཁྱད་པར་ཆེ་བ་རྣམས་ནི་བློའི་ཁྱད་པར་རྣམས་ཀྱིས་མྱ་ངན་ལས་འདས་པ་ལྷག་པར་རྟོགས་པར་

འགྱུར་རོ། །གནས་གཙང་མའི་རྣམས་སུ་ཡང་སྐྱེའོ། །ཡོངས་སུ་བསྔོ་བའི་ཁྱད་པར་གྱིས་རྒྱལ་པོར་ཡང་འགྱུར་ཏེ། འཁོར་ལོས་གླིང་བཞི་ལ་སྒྱུར་བ་གསེར་གྱི་འཁོར་ལོ་ཅན་རིན་པོ་ཆེ་དང་ཉེ་བ་བཅུ་བཞི་དང་ཡང་ཡང་དག་པར་ལྡན་པའོ། །ཡོངས་སུ་བསྔོ་བའི་ཁྱད་

Vol. 70 · folio 93a

པར་གྱིས་ཁ་དོག་དང་ལྡན་པར་འགྱུར་རོ། །ཡོངས་སུ་བསྔོ་བའི་ཁྱད་པར་གྱིས་ཟག་པ་རྣམས་ཟད་པ་དང་། རང་སངས་རྒྱས་དང་། བརྩོན་འགྲུས་དང་ལྡན་པར་ཡང་སེམས་ཀྱི་བསྔོ་བའི་ཁྱད་པར་གྱིས་འགྱུར་རོ། །སངས་རྒྱས་བཅོམ་ལྡན་འདས་དགྲ་བཅོམ་

པ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་ཡང་ཆོས་ཀྱི་སྦྱིན་པ་དེའི་ཁྱད་པར་གྱིས་འགྱུར་རོ། །དེ་ལ་ལྷ་དེ་རྣམས་ནི་སྦྱིན་

པ་རྣམ་པ་གསུམ་པོ་འདི་དག་རྣམས་དང་བྲལ་བ་ཡིན་ནོ། །དེ་ལྟར་བྱས་པས་ལྷ་རྣམས་ཀྱི་དྲུང་ན་མི་རྣམས་ལྷག་པ་ཡིན་ནོ། །ལྷ་རྣམས་ནི་རྣམ་པར་སྨིན་པའི་ས་པ་ཡིན་ནོ། །ལས་ཀྱི་ས་པ་ནི་མི་རྣམས་ཡིན་ཏེ། ལས་རྒྱ་ཆེ་བ་ལས་འབྲས་བུ་རྒྱ་ཆེ་བ་ཡིན་པའི་ཕྱིར་ན་ལྷ་དང་མི་དེ་

རྣམས་ཡིན་ནོ། །ལས་དང་འབྲས་བུའི་ཁྱད་པར་འདིས་མི་རྣམས་ཀྱི་དྲུང་ན་ལྷ་རྣམས་ཆུང་བར་གྱུར་པ་ཡིན་ནོ། །གཞན་ཡང་ལས་ཀྱི་རྣམ་པར་དབྱེ་བས་སྐྱེ་བར་གྱུར་པ་རྣམས་ནི་གང་དག་སྦྱིན་པ་དང་བྲལ་བ་འབའ་ཞིག་གི་ཚུལ་ཁྲིམས་འབའ་ཞིག་ལ་སྒྲུབ་པར་བྱེད་པ་དེ་དག་ནི་ཡོན་ཏན་

གཅིག་པུ་ཞིག་དང་ལྡན་པས་ནི་འདོད་པའི་ཡོན་ཏན་ལྔ་ཤིན་ཏུ་ཆུང་བར་འགྱུར་རོ། །དེ་ལ་ལས་ཀྱི་རྐྱེན་བསྟན་པ་འདིས་ནི་མི་མཆོག་རྣམས་སུ་འགྱུར་གྱི་ལྷ་རྣམས་སུ་ནི་མ་ཡིན་ནོ། །དེ་ནས་དེའི་ཚེ་ན་བཅོམ་ལྡན་འདས་རྣམ་པར་གཟིགས་དེས་ཚིགས་སུ་བཅད་པ་གསུངས་པ། ཇི་ལྟར།

མི་ཡི་ས་ལ་སྐྱེས་བྱིན་འདིས། །དགེ་བའི་འགྲོ་བར་འགྲོ་བ་ཡིན། །ལྷ་རྣམས་དགའ་བ་མིན་པར་འདོད། །གང་ཕྱིར་འབྲས་བུའི་ས་འདིར་འདོད། །ལས་ཀྱི་སར་ནི་མི་རྣམས་ཡིན། །འབྲས་བུའི་ས་ནི་ལྷ་ཡི་གནས། །འབྲས་ཀུན་ལས་ཀྱི་ལམ་ལས་ཡིན། །འབྲས་བུ་ཟད་

པས་རྒྱུ་མེད་ཡིན། །སྐད་ཅིག་དབང་གིས་མྱུར་བར་ཡང་། །སྲོག་ནི་བཟློག་པར་ནུས་མ་ཡིན། །ལས་རྣམས་ཀྱང་ནི་ཟད་པར་གྱུར། །དེ་ཕྱིར་ཡིད་ནི་ལེགས་པར་གྱིས། །སེམས་ཀྱི་ཤུགས་ནི་མཚུངས་པར་ཀུན། །གསོན་པ་རྣམས་ནི་འགོད་པ་ཡིན། །དེ་ཕྱིར་གསོན་པའི་

Vol. 70 · folio 93b

དོན་དུ་ནི། །མཁས་པས་སྡིག་པ་མ་བྱེད་ཅིག །མ་འོངས་པ་ཡི་སྡུག་བསྔལ་ནི། །སྐྱེ་བོའི་ཚོགས་ཀྱིས་མི་རྟོགས་སོ། །འདི་ན་འཇིག་རྟེན་འཚེད་པ་རྣམས། །གཏི་མུག་ཕྱུགས་ཀྱི་ཚོགས་རྣམས་ཡིན། །སྦྱིན་དང་ཚུལ་ཁྲིམས་དཀའ་ཐུབ་ནི། །རིན་ཆེན་གང་དག་སྙིང་

ལ་སྟེན། །ལྷ་འམ་ཡང་ན་མི་ཡང་རུང་། །དེ་ནི་འགྲོ་བའི་མཆོག་ཏུ་འགྲོ། །སྐྱེ་དང་གནས་དང་འཇིག་པ་ནི། །འདུས་བྱས་ཐམས་ཅད་ཡིན་པར་བརྗོད། །འདུས་བྱས་ཐམས་ཅད་བདེ་བ་མིན། །དེ་དག་འཇིག་པ་ཁོ་ན་ཡིན། །འཇིག་པར་འགྱུར་དང་རྣམ་ཉམས་དང་། །

འབྲལ་དང་སྐད་ཅིག་དེ་ལྟ་བུ། །གསོན་པ་ཀུན་གྱི་བདེ་བ་ཡིན། །དེ་ཕྱིར་དེ་ནི་སྤང་བར་གྱིས། །དེ་ལྟར་འདུས་བྱས་དེ་དག་ཐམས་ཅད་མི་རྟག་པ། སྡུག་བསྔལ་བ། སྟོང་པ། བདག་མེད་པ་སྟེ། སྐྱེ་བོ་དག་སྡུག་བསྔལ་རྣམ་པ་དུ་མའི་ཁུར་གྱིས་ནོན་པ། འཆིང་བ་ལྔས་

བཅིངས་ཀྱང་སྐྱོ་བར་མི་འགྱུར་བར་ལྷ་དང་མི་རྣམས་གཏི་མུག་གིས་ཟུམ་པའི་མིག་དང་། འདོད་ཆགས་སྙིང་ལ་སེམས་པའི་ཡང་དག་པ་མ་ཡིན་པའི་འཆིང་བས་བཅིངས་པ། གཅིག་ཏུ་ན་དོན་དམ་པའི་དོན་དུ་ཀུན་ནས་མངོན་པར་ཞེན་པའི་ཡིད་ཅན་ནི་བྱིས་པ་སོ་སོའི་སྐྱེ་བོ་

ཐམས་ཅད་ཡིན་ཏེ། ཕན་ཚུན་དུ་སྲེད་པ་བརྒྱུད་པས་བཅིངས་པའི་བྱ་བཞིན་དུ་འཁོར་བར་འཁོར་བ་དེ་རྣམས་ལ་ལྷའམ་མི་རྣམས་ཀྱིས་ཀྱང་བདེ་བ་རྟག་པའི་བློ་ནི་མི་བྱའི་འཇིག་རྟེན་འདི་ཐམས་ཅད་ནི་རྣམ་པ་མང་པོ་དང་། རྣམ་པར་རྟོག་པ་དུ་མས་མི་རྟག་པར་ཐམས་

ཅད་དུ་འགྱུར་རོ། །གང་ཡང་སྦྱིན་པ་ཡོན་ཏན་བཅུ་གཉིས་དང་ལྡན་པའི་སྦྱིན་པ་གང་ཡིན་པ་ནི་ལྷ་རྣམས་ལ་མི་དམིགས་ཏེ། འབྲས་བུ་འབའ་ཞིག་གིས་འཚོ་བ་རྣམས་གང་གི་ཚེ་འབྲས་བུ་ཟད་པར་འགྱུར་བ་དང་། རུལ་པར་འགྱུར་བ་དང་། རྣགས་པར་གྱུར་པ་དེའི་ཚེ་

ལྷའི་རིས་དེ་རྣམས་ལས་ལྟུང་བར་འགྱུར་ཏེ། དེ་དག་གང་གི་ཚེ་བསོད་ནམས་ཟད་པར་གྱུར་པ་ན་ངེས་པར་ལྟུང་བར་ཡང་འགྱུར་རོ། །དེ་ལ་ཡོན་ཏན་བཅུ་གཉིས་དང་ལྡན་པའི་སྦྱིན་པ་རྣམས་གང་ཞེ་ན། འདི་ལྟ་སྟེ། ཡུལ་ཕུན་སུམ་ཚོགས་པ་དང་། དུས་ཕུན་སུམ་

Vol. 70 · folio 94a

ཚོགས་པ་དང་། ཡོན་ཏན་ཕུན་སུམ་ཚོགས་པ་དང་། དགའ་བ་ཕུན་སུམ་ཚོགས་པ་གང་ལ་དགའ་བར་འགྱུར་བར་དེ་རབ་ཏུ་སྟེར་བ་དང་། ཞིང་ཕུན་སུམ་ཚོགས་པར་གྱུར་པ་དང་། བཀྲེས་པ་དང་། སྐོམ་པས་འོངས་པ་རྣམས་ལ་གང་དག་སྟེར་བ་དང་། དད་པ་དང་གུས་པས་རབ་ཏུ་སྟེར་བ་

དང་། ཉོན་མོངས་པ་མེད་པ་ཡོན་ཏན་ཕུན་སུམ་ཚོགས་པ་ལ་རབ་ཏུ་སྟེར་བ་དང་། རྒྱ་ཆེན་པོས་རབ་ཏུ་བསྒྲགས་པས་སྟེར་བ་དང་། གུས་པས་དང་གང་ཟག་མ་ཡིན་པའི་ཚོགས་ལ་རབ་ཏུ་སྟེར་བ་དང་། ཕྲག་དོག་དང་བྲལ་བས་

རབ་ཏུ་སྟེར་བ་དང་། ཉམས་པ་མེད་པར་གུས་པའི་བཀུར་སྟིས་སྟེར་བ་སྟེ་དེ་ལ་ཡོན་ཏན་བཅུ་གཉིས་པོ་དེ་དག་དང་ལྡན་པའི་སྦྱིན་པ་བྱིན་ལ་ཚུལ་ཁྲིམས་ཕུན་སུམ་ཚོགས་ན་ལྷ་རྣམས་སུ་སྐྱེའོ། །ལྷ་ནི་དེ་དག་ཟད་ནས་ངེས་པར་ལྟུང་བར་འགྱུར་རོ། །དེའི་ཕྱིར་ན་ལྷ་དག་གིས་བག་

མེད་པར་གནས་པར་མི་བྱའོ། །ཕྱི་མ་ཡང་དྲི་མ་བཅུ་གཉིས་དང་རྣམ་པར་བྲལ་བར་བྱས་ནས་སྦྱིན་པ་བྱིན་པར་གྱུར་ན་ནི་ཆེན་པོ་ལ་འོས་པར་འགྱུར་ཏེ། འཁོར་ལོས་སྒྱུར་བའི་རྒྱལ་པོའམ། ལྷ་རྣམས་སམ། ལྷ་གཞན་རྣམས་ལས་ལྷག་པར་ཡང་འགྱུར་རོ། །དྲི་མ་བཅུ་གཉིས་

པོ་རྣམས་ནི་འདི་ལྟ་སྟེ། གཅིག་གི་ནང་དུ་གཏོགས་པ་རྣམས་དགེ་འདུན་གྱི་གཏོགས་པ་རྣམས་དང་། བསླབ་པ་མཚུངས་པ་རྣམས་དང་། ཤེས་རབ་དང་། ཡོན་ཏན་ཕུན་སུམ་ཚོགས་པ་རྣམས་ལ་མཉམ་པོར་སྦྱིན་པ་བྱིན་པ་ནི་དྲི་མ་མི་བཟད་པའི་སྦྱིན་པ་དེ་དག་རྣམས་

ཀྱི་འབྲས་བུ་ནི་ཆུང་བར་འགྱུར་རོ། །འདོད་ཆགས་ཀྱིས་སྟེར་བར་གྱུར་པ་གང་ལ་འདོད་ཆགས་པར་གྱུར་པ་བུད་མེད་དམ་སྐྱེས་པར་གྱུར་པ་ལ་ཡང་རུང་སྟེ་དེ་ལ་སྟེར་བའོ། །དེ་ལ་དེ་དག་ནི་དྲི་མ་ཡིན་ནོ། །དགེ་སྦྱོང་ངམ་བྲམ་ཟེ་གང་དག་རྒྱལ་པོས་མཆོད་པར་བྱེད་པ་དེ་ལ་

དང་སྦྱིན་པ་པོ་རབ་ཏུ་མང་པོ་ཅན་རྣམས་ལ་སྦྱིན་པ་དང་། ཇི་ལྟར་སྡུག་བསྔལ་འདི་དག་ལས་འདིས་ཡོངས་སུ་སྐྱོང་སྙམ་པ་དང་། སེམས་ཀྱིས་བསྒོམས་པ་ཡང་མ་ཡིན་པ་དང་། དེ་ལ་དགོས་པ་དེ་དག་རྣམས་ཀྱི་རྒྱུ་མཚན་གྱིས་སྦྱིན་པ་དྲི་མ་ཅན་དུ་འགྱུར་རོ། །གང་དག་

Vol. 70 · folio 94b

གིས་དེ་ལས་བཟློག་པར་སྦྱིན་པར་བྱའོ། །གཞན་ཡང་སྦྱིན་པ་དྲི་མ་ཅན་རྣམས་ཡོད་དོ། །དེ་དག་གང་ཞེ་ན། འདི་ལྟ་སྟེ། གཏི་མུག་གིས་སྦྱིན་པ་དང་། གྱ་གྱུ་ལ་སོགས་པས་སོ། །གཞན་ཡང་སྦྱིན་པ་དྲི་མ་ཅན་རྣམས་ཡོད་དོ། །མཆོད་པས་ཀྱང་མཆོད་པ་པོ་ཞེས་བྱ་

བ་གང་གིས་ཚུལ་ཁྲིམས་དང་ཤེས་རབ་དང་རབ་ཏུ་ཞི་བའི་བསམ་གཏན་རྣམས་ནི་མི་སྒོམ་གྱི་གཞན་མཆོད་པ་འབའ་ཞིག་བྱེད་དེ། དེ་ནི་གཞན་གྱི་རྐྱེན་གྱིས་འདིར་ཀུན་མཆོད་པར་བྱེད་དེ། དེ་སེམས་པ་དང་ཡང་བྲལ་བ་ཡིན་ནོ། །དེའི་ཚེ་འདི་དག་ཡང་དྲི་མ་ཅན་ཡིན་ནོ། །གཞན་

ཡང་སྦྱིན་པ་དྲི་མ་ཅན་རྣམས་ཡོད་དེ། འདི་ལྟར་ངོར་བྱས་ནས་སྟེར་བར་བྱེད་པའོ། །དེ་ལ་འདི་དག་ཀྱང་དྲི་མ་ཅན་ཡིན་ནོ། །གཞན་ཡང་སྦྱིན་པ་དྲི་མ་ཅན་རྣམས་ཡོད་དེ། ནོར་གྱི་ཐབས་ཀྱི་དབང་དུ་བྱས་ནས་སྟེར་བའོ། །ཇི་ལྟར་སྦྱིན་པ་དེས་བདག་གི་ནོར་གྱི་ཐབས་ཀྱིས་

ནོར་ཉེ་བར་འཛིན་ཏེ། འདི་ཡིད་ཆེས་པ་བསྐྱེད་ལ་བདག་གིས་གཞོམ་པར་བྱའོ། །དེ་ལ་འདི་ཡང་སྦྱིན་པའི་དྲི་མ་ཡིན་ནོ། །གཞན་ཡང་སྦྱིན་པ་དྲི་མ་ཅན་ཡོད་དེ། འདི་ལྟ་སྟེ། དབྱེ་བའི་དོན་དུ་སྟེར་བའོ། །ཇི་ལྟར་འདི་ན་བདག་གི་བུད་མེད་དུ་བྱས་པས་དེ་དང་དེའི་རྩ་ལག་

ཏུ་སྔོན་གྱུར་པ་ཞེས་བྱས་ལ་དེ་གཞོམ་པར་བྱའོ་སྙམ་པའོ། །དེ་ལ་འབྱེད་པར་བྱེད་པ་དེ་དག་རྣམས་ནི་དྲི་མའི་དབང་དུ་གྱུར་པར་མཐོང་བ་ཡིན་ནོ། །གཞན་ཡང་དྲི་མས་ཉེ་བར་བཅོམ་པར་གྱུར་པའི་སྦྱིན་པ་ཡོད་དེ། འདི་ལྟ་སྟེ། འབྲེལ་པའི་དོན་གྱི་སྦྱིན་པ་བུད་མེད་གང་དག་

སྐྱེས་པའི་དོན་དུ་འབྲེལ་བར་བྱེད་པས་སྐྱེས་པས་སྐྱེས་པ་རྣམས་ལ་སྦྱིན་པར་བྱེད་དོ། །དེ་ལ་དེ་དག་ནི་དྲི་མས་ཉེ་བར་བཅོམ་པའི་སྦྱིན་པ་ཡིན་ནོ། །གཞན་ཡང་དྲི་མས་ཉེ་བར་བཅོམ་པར་གྱུར་པའི་སྦྱིན་པ་རྣམས་ནི་དཔེར་ན་གང་དག་ཚོང་གི་རྒྱུ་མཚན་གྱིས་གཞན་དུ་ཡང་ཟས་འཛིན་

ནམ། རྒྱུ་མཚན་གཞན་དུ་ཡང་ཟས་འཛིན་ནམ། རྒྱུ་མཚན་གཞན་ལོ་ལྔ་པར་ཡང་རུང་སྟེ། ཟས་དེ་དག་རྣམས་ཉིད་ཀྱང་གོང་ཆེན་པོས་སྟེར་བར་བྱེད་དེ། བསྡུ་བའི་དོན་དུའོ། །དེ་དག་རྣམས་ལ་ཉེ་བར་བྱིན་ནས་ཀྱང་རྫས་ཀྱིས་ཁྱིམ་བྱེད་དོ། །དེ་ལས་དེ་དག་རྣམས་སོག་པའི་

Vol. 70 · folio 95a

ཚོང་གི་སྦྱིན་པ་དྲི་མས་ཉེ་བར་བསླད་པ་ཡིན་ནོ། །གཞན་ཡང་དྲི་མས་ཉེ་བར་བསླད་པའི་སྦྱིན་པ་ཡོད་དེ། དཔེར་ན་གྲགས་པའི་སྦྱིན་པ་རྣམས་སོ། །བུ་དང་། རང་གི་སྐྱེ་བོ་དང་། གཉེན་འབྲེལ་རྣམས་སྡུག་ཕོངས་སུ་གྱུར་པ་རྣམས་ལ་སྟེ། དེ་ཡང་འདི་

དག་རྣམས་ལ་སེམས་པ་དང་བྲལ་བ། དྲེགས་པ་ཁོ་ནས་སྦྱིན་པ་གཏོང་བས་ན་གྲགས་པའི་སྦྱིན་པ་དེ་ནི་དྲི་མས་ཉེ་བར་བཅོམ་པ་ཡིན་ནོ། །དེ་དག་རྣམས་ཐམས་ཅད་ཀྱང་གལ་ཏེ་སེམས་དང་བྲལ་བར་གྱུར་ན་དེ་དང་འདྲ་བར་འགྱུར་རོ། །གལ་ཏེ་སེམས་ཁྱད་དུ་འཕགས་པ་ལས་

ཀྱང་དྲི་མ་དང་བྲལ་བར་འགྱུར་རོ། །དཔེར་ན་གོས་དྲི་མ་ཅན་རྣམས་ཐལ་བས་དྲི་མ་མེད་པར་བྱེད་པ་དེ་བཞིན་དུ་སེམས་ཀྱིས་བསྒོམས་པར་འགྱུར་བས་སོ། །ཡང་དེའི་ཚེ་བཅོམ་ལྡན་འདས་རྣམ་པར་གཟིགས་ཀྱིས་ཚིགས་སུ་བཅད་པ་གསུངས་པ། ཇི་ལྟར། ཡོན་ཏན་བཅུ་གཉིས་

ཡང་དག་ལྡན། །དྲི་མ་བཅུ་གཉིས་དང་བྲལ་བ། །སྦྱིན་པ་ཡོངས་སུ་དག་པར་འགྱུར། །དེ་ལས་བཟློག་པའི་ཀུན་རྟོག་པ། །ལྷ་རྣམས་གང་དག་སྐྱེས་བུ་ཡིན། །སྦྱིན་པའི་འབྲས་བུ་བླ་མེད་མིན། །སྦྱིན་པ་དང་ནི་བྲལ་སྡིག་གིས། །སྐྱེས་བུ་ཐ་ཆད་ལྟུང་བ་ཡིན། །འདོད་

པ་སེར་སྣའི་དྲི་མ་དང་། །བུ་དང་བུ་མོའི་དབང་གིས་འགྲོ། །ཟས་འབའ་ཞིག་ལ་འདོད་པ་ཡི། །མི་ནི་འཆི་བར་འགྲོ་བ་ཡིན། །འདོད་པའི་མདུད་པས་གྲོལ་མིན་དང་། །ཡིད་ཀྱི་ལྗོན་ཤིང་ཟད་པ་ཡིན། །མུན་པའི་ཚོགས་ནི་འཇོམས་བྱེད་པ། །རབ་སྦྱིན་འདིར་ནི་སྦྱིན་བྱེད་པ། །མཆོག་

ལ་སྤྱོད་པ་སྦྱིན་པ་དང་། །སྦྱིན་པ་པོ་ཡང་དེ་རྗེས་ལ། །སྦྱིན་པ་ལེགས་པའི་ལམ་སྟོན་པོ། །འཇིག་རྟེན་ཕ་རོལ་དུ་འགྲོའོ། །སྦྱིན་པའི་ཆུ་ཡིས་བཀྲུས་པའི་མི། །ཚུལ་ཁྲིམས་རླབས་ཀྱིས་ཡོངས་བསྒོས་པ། །ཤེས་རབ་རྒྱ་ཆེན་དྲི་མེད་པ། །སྦྱིན་པས་སྡུག་བསྔལ་ཟད་པར་

བྱེད། །སྐྱེས་བུ་ཕན་པར་འདོད་པ་ཡིས། །མར་མེ་གསུམ་ནི་སྤང་བར་བྱ། །སྦྱིན་དང་ཚུལ་ཁྲིམས་དེ་བཞིན་ཤེས། །དེ་དག་སྐྱོན་རྣམས་འཇོམས་བྱེད་ཡིན། །སྲེད་པ་རྒྱ་ཆེའི་ངན་སོང་ནི། །རྣམ་རྟོག་རླབས་ཀྱིས་ཀུན་ཏུ་གང་། །སྡུག་བསྔལ་རྒྱ་མཚོའི་གཞིར་གྱུར་ཏེ། །ཤེས་

Vol. 70 · folio 95b

དང་ཚུལ་ཁྲིམས་ཀྱིས་བསྲུངས་ཡིན། །སྨྱོ་བ་དང་ནི་ཉུང་བའི་ཡང་། །གང་དང་དེ་ལ་ངེས་པར་ལྟུང་། །སེམས་ཀྱི་འཆིང་བ་དེ་དག་རྣམས། །སྦྱིན་ཚུལ་གཉིས་ཀྱིས་ལེགས་པར་བསྲུངས། །ཉོན་མོངས་ནད་ནི་ངེས་འཇོམས་པོ། །གསུམ་པོ་འདི་ནི་སྨད་དུ་གནས། །སྦྱིན་དང་ཚུལ་

ཁྲིམས་དེ་བཞིན་ཤེས། །དེ་དག་རྟག་ཏུ་བདེ་བར་འགྲོ། །བག་མེད་མི་བཟད་པ་ཡི་སེམས། །ཀུན་རྟོག་གྱ་གྱུ་མྱུར་འཇུག་པ། །ཤེས་རབ་ལ་སོགས་གསུམ་པོ་འདིས། །མི་ཡི་འཆིང་བ་འཇིགས་པར་བྱེད། །སྐྱོན་གང་མེར་ཡང་མ་མཐོང་བས། །གང་གིས་འཇིག་རྟེན་

འདི་བསྲེག་གོ། །མེ་དེ་ཡེ་ཤེས་ཆུ་ཡིས་ནི། །བཅོམ་ནས་མྱ་ངན་འདས་པར་འགྲོ། །དེ་ལྟར་བཅོམ་ལྡན་འདས་རྣམ་པར་གཟིགས་དེས་མཆོད་རྟེན་དེ་ལ་ཚིགས་སུ་བཅད་པའི་མདོ་མངོན་པར་བྲིས་སོ། །དེ་ལ་སྦྱིན་པ་དེ་དག་ནི་ལྷ་རྣམས་ཀྱི་མ་ཡིན་གྱི་མི་རྣམས་ཀྱིའོ། །རྒྱུ་མཚན་

འདིས་ནི་ཆེས་མཆོག་ཏུ་གྱུར་པ་ནི་མིའི་ཡིན་གྱི་ལྷ་རྣམས་ཀྱིས་ནི་མ་ཡིན་ནོ། །དེ་ལ་སྦྱིན་པ་དེ་དག་ཉེ་བར་གོ་བར་གྱིས་ལ་ཐམས་ཅད་ཀྱིས་ཡུལ་ཐམས་ཅད་བཀྱིགས་ཏེ་རྟག་ཏུ་ཐབས་མེད་པའི་སེམས་ལེགས་པར་གཟུང་བར་བྱའོ། །གང་གི་ཕྱིར་དེ་བཟུང་བས་ཀྱང་ཤིང་ཆེན་པོ་

འདི་འགག་པར་འགྱུར་རོ། །ཡེ་ཤེས་ཀྱི་མེ་རྣམས་ཀྱིས་སྲེག་པར་བྱེད་དོ། །དེ་བསྲེགས་པས་མཆོག་ཏུ་དགའ་བའི་བག་མེད་པའི་འཆིང་བ་མེད་པ་འཛད་པ་མེད་པའི་གོ་འཕང་ཐོབ་པར་འགྱུར་གྱིས། དེའི་ཕྱིར་ན་བག་མེད་པ་རབ་ཏུ་བརྩོན་པས་ཀྱང་དགྲ་བོ་བཞིན་དུ་རབ་

ཏུ་སྤང་བར་གྱིས་ཤིག །གཞན་ཡང་ཆོས་བརྒྱད་པོ་ལྷ་རྣམས་ལ་སྤང་བར་བྱ་བ་མཆོག་ཏུ་ངོ་ཚ་བར་བྱེད་པའོ། །འདི་ཡང་གང་ཞེ་ན། འདི་ལྟ་སྟེ། ལས་རྣམས་རབ་ཏུ་བསྟན་པས་རབ་ཏུ་སྟོན་ན་ཡང་ཟས་ཀྱི་དུས་ན་ཡང་ངོ་ཚ་བར་འགྱུར་བ་སྟེ། ལས་རྣམས་རྣམ་

པ་གསུམ་པོ་ཆུང་ངུ་དང་བར་མ་དང་ཆེན་པོ་རྣམས་ཀྱི་ཆུང་ངུ་དང་བར་མ་དང་ཆེན་པོར་འགྱུར་རོ། །དེ་ལ་གཞན་ཡང་ཆུང་ཟད་ཀྱང་སྦྱིན་པར་ལྷ་རྣམས་ཀྱིས་མི་ནུས་སོ། །ལས་རྣམས་ལ་འཕོ་བ་ཡང་ཡོད་པ་མ་ཡིན་ནོ། །དེ་ལ་གང་གི་ཚེ་ལྷ་རྣམས་ཟས་ཀྱི་བྱ་བའི་ལས་

Vol. 70 · folio 96a

བྱེད་པ་དེའི་ཚེ་གང་གིས་རྣམ་པ་ཇི་ལྟ་བུའི་སྦྱིན་པ་དག་བྱིན་པར་གྱུར་པ་དང་། ཚུལ་ཁྲིམས་བསྲུངས་པར་གྱུར་པ་དེའི་རྣམ་པ་དེ་ལྟ་བུ་ཉིད་ཁོ་ནའི་ཟས་རབ་ཏུ་འབྱུང་ངོ་། །དེས་གཞན་གྱི་ཟས་ཆེས་ལྷག་པ་དྲི་དང་། རོ་དང་། རེག་བྱ་ཕུན་སུམ་ཚོགས་པ་དེ་མཐོང་

ནས་མཆོག་ཏུ་ངོ་ཚ་བ་སྙིང་ལ་འོང་ངོ་། །གང་གི་ཚེ་ནགས་དང་། ཉེ་བའི་ནགས་དང་། རྫིང་བུ་དང་། པད་མའི་ཚང་ཚིང་དུ་རྩེ་བར་བྱེད་པ་དེའི་ཚེ་བདེ་བ་དེ་དག་ཐམས་ཅད་ལས་ཅི་འདྲ་བར་སོ་སོར་ཉེ་བར་གནས་སོ། །དེ་ལ་ལྷ་གཞན་རྣམས་ལྷ་གཞན་རྣམས་ཀྱི་ཆེས་ལྷག་པའི་བདེ་བ་

མངོན་པར་མཐོང་ནས་མཆོག་ཏུ་ངོ་ཚ་བ་དང་ལྡན་པར་གྱུར་ཏེ། རང་གི་ལུས་ལ་ཞུམ་པར་འགྱུར་རོ། །ལྷ་རྣམས་ཀྱི་ལྔ་པོ་འདི་རྣམས་ནི་ངོ་ཚ་བའི་རྒྱུ་ཡིན་ཏེ། ལྔ་གང་དག་ཅེ་ན། འདི་ན་ཟས་ཀྱི་དུས་ན་ལྷ་གཞན་དག་གི་བདུད་རྩི་དྲི་མ་མེད་པ་རྣམས་མངོན་པར་མཐོང་ལ་རང་གི་ཡང་དྲི་

མ་ཅན་དང་དམན་པར་ཡང་གྱུར་པ་ཀུན་ནས་ཉེ་བ་ན་གནས་ནས་ཟ་བར་བྱེད་པ་ན་མཆོག་ཏུ་ངོ་ཚ་བ་ལྟ་བུ་སྐྱེའོ། །འདི་ནི་ལྷ་རྣམས་ཀྱི་ངོ་ཚ་བའི་རྒྱུ་དང་པོ་ཡིན་ནོ། །གཟུགས་ཤིན་ཏུ་བཟང་བ་རྒྱན་དང་ཆ་བྱད་མཆོག་ཏུ་བཟང་བ་མང་བ་ལྷ་གཟུགས་བཟང་བའི་ལྷ་གཞན་ཉེ་བར་

གནས་པ་དེ་དག་མངོན་པར་མཐོང་ནས། ལྷ་གཞན་རྣམས་ངོ་ཚ་བར་འགྱུར་རོ། །འདི་ནི་ངོ་ཚ་བའི་རྒྱུ་གཉིས་པའོ། །གཞན་ཡང་ངོ་ཚ་བའི་རྒྱུ་གསུམ་པ་ནི་གང་གི་ཚེ། ནམ་མཁའ་ལ་པད་མའི་ནགས་དང་། ཉེ་བའི་ནགས་དང་། རིའི་རྩེ་མོ་གསེར་དང་། བཻ་

ཌཱུརྱའི་རང་བཞིན་རྣམས་ལ་རྩེད་མོ་རྩེ་བའི་དོན་དུ་ལྷ་རྣམས་གང་དག་འགྲོ་བར་བྱེད་པ་དེའི་ཚེ་ལས་ཀྱི་ཁྱད་པར་གྱིས་ཤིན་ཏུ་མྱུར་བར་འགྲོ་བར་འགྱུར་རོ། །ལྷ་གང་དག་ལས་ཤིན་ཏུ་ཆུང་བ་དེ་འགྲོ་བ་བུལ་བར་འགྱུར་རོ། །དེ་ཤུགས་དང་ལྡན་པར་འགྲོས་ཀྱིས་རྗེས་སུ་

འགྲོ་བ་ཡང་མ་ཡིན་ནོ། །དེ་རང་གི་གནས་ཀྱི་ལྷ་མོའི་ཚོགས་དེ་རྣམས་ཀྱི་མདུན་དུ་ངོ་ཚ་བར་འགྱུར་རོ། །གཞན་ཡང་ངོ་ཚ་བའི་རྒྱུ་བཞི་པ་དཔེར་ན་གང་གི་ཚེ་ལྷ་པད་མའི་རྫིང་བུ་ལ་སྟེན་པ་དེའི་ཚེ་ལྷ་གང་གིས་རྣམ་པ་ཇི་སྲིད་ཀྱི་ལས་བྱས་པར་གྱུར་པ་དེའི་རྣམ་པ་དེ་སྲིད་ཀྱི་པད་མ་འབྱུང་བར་

Vol. 70 · folio 96b

འགྱུར་རོ། །ཁ་དོག་དང་། དྲི་དང་། རེག་བྱ་ཤིན་ཏུ་ཆེ་བ་དེ་དག་རྣམས་མངོན་དུ་ལེགས་པར་མཐོང་ནས་ཀྱང་ཇི་ལྟར་འཁོར་གྱི་ནང་དུ་འཇུག་པ་ན་གཙོ་བོར་གྱུར་པའི་ལྷ་རྣམས་ཤིན་ཏུ་ངོ་ཚ་བར་འགྱུར་རོ། །གཞན་ཡང་ངོ་ཚ་བའི་རྒྱུ་ལྔ་པ་ནི་ལྷ་རྣམས་སོ་སོ་ལ་ངོ་ཚ་བར་འགྱུར་

བའོ། །གང་དག་ཞེ་ན། འདི་ལྟ་སྟེ། སྟན་རྣམས་ནི་གང་དག་གིས་རྣམ་པ་ཇི་ལྟ་བུ་དག་གི་ལས་བྱས་པར་གྱུར་པའི་ལྷ་དེ་དང་དེ་དག་གི་རྣམ་པ་དེ་ལྟ་བུ་རྣམས་སུ་སྟེ། རྣམ་པ་དེ་ལྟ་བུ་ཁོ་ནའི་སྟན་རྣམས་འབྱུང་བར་འགྱུར་རོ། །དེ་ལ་གང་གིས་ཤིན་ཏུ་ལེགས་པར་བྱས་པའི་ལས་བྱས་པར་གྱུར་

པ་དེ་དག་རྣམས་ལ་ནི་བཻ་ཌཱུརྱའི་རང་བཞིན་དང་། ཨིན་དྲ་ནཱི་ལའི་རང་བཞིན་ནམ། པད་མ་རཱ་གའི་རང་བཞིན་གྱི་སྟན་རྣམས་རབ་ཏུ་འབྱུང་བར་འགྱུར་རོ། །སྟན་དེ་དག་ལ་ལྷ་གཞན་གང་དག་འདུག་པར་བྱེད་པ་ན་ལས་རྣམས་ཉུང་བའི་ཕྱིར་ན་དེའི་ཚེ་ན་སྟན་དེ་ཡང་གསེར་དུ་འགྱུར་བའམ།

དེ་ཡང་ན་དངུལ་གྱི་རང་བཞིན་དུ་འགྱུར་བའམ། དེ་ཡང་ན་ཤེལ་གྱི་རང་བཞིན་དུ་འགྱུར་རོ། །དེའི་ཚེ་སྟན་རྣམ་པར་གྱུར་པ་དེ་མངོན་པར་མཐོང་ནས་ལས་ལྕི་མོ་དང་ཡང་མོ་རྣམ་པ་སྣ་ཚོགས་པ་ཡིན་པ་ཁོ་ནས་ལྷ་དེ་དག་ཀུན་ནས་ཤིན་ཏུ་ངོ་ཚ་བར་འགྱུར་རོ། །དེ་རྣམས་ངོ་ཚ་བས་གཟི་བརྗིད་

རྣམས་ཡོངས་སུ་ཉམས་པར་འགྱུར་རོ། །དེ་དག་དེ་ལྟར་ཀུན་ནས་ཉམས་པས་བཞིན་གྱི་མདངས་ཡོངས་སུ་ཉམས་པར་འགྱུར་བ་དང་། གཞན་ཡང་ཤིན་ཏུ་རབ་ཀྱི་སྟོབས་དང་ལྡན་པ་དང་། ཆེས་ལྷག་པའི་ལྷ་རྣམས་མངོན་པར་མཐོང་ནས་ལྷ་ལས་རྣམས་ཤིན་ཏུ་དམན་

པའི་ལྷ་དེ་དག་ལྷ་མོ་རྣམས་ཀྱིས་ཡོངས་སུ་སྤོང་ངོ་། །ལྷ་མོ་དེས་ལྷ་དེ་དག་ཡོངས་སུ་སྤངས་ནས་ལྷ་གཞན་རྣམས་ལ་རྟེན་ནོ། །ལུགས་གཅིག་ཏུ་ངེས་པའི་ལྷ་མོ་དེ་དག་རྣམས་ཐམས་ཅད་ཀྱང་ལྷ་གཞན་དག་རྣམས་ལ་ཀུན་ནས་འཕོས་ནས་ཁྱད་པར་དུ་འཕགས་པའི་ལྷ་མོ་དག་

དགའ་བར་བྱེད་དོ། །ལས་དམན་པའི་ལྷ་དེ་རྣམས་མཆོག་ཏུ་ངོ་ཚ་བ་ཐོབ་པར་འགྱུར་རོ། །འདི་ནི་ལྷ་རྣམས་ཀྱི་རྒྱུ་ལྔ་པ་ཡིན་ནོ། །འཁོར་གྱི་ནང་དུ་འགྲོ་བ་ན་ངོ་ཚ་བར་བྱེད་པ་ཡིན་པ་དེའི་ཕྱིར་ན་རྣམ་པར་འཇིག་པར་འགྱུར་བའི་ཆོས་ཅན་གྱི་འདུས་བྱས་ཀྱི་ཆོས་རྣམས་ཐམས་ཅད་

Vol. 70 · folio 97a

ལ་ཤིན་ཏུ་མྱུར་བ་མྱུར་བར་ཏེ། གང་ལ་རྣམ་པ་དེ་ལྟ་བུ་ཁོ་ནའི་མངར་བ་དང་འདྲེས་ཤིང་བཅས་པའི་ལོ་མ་མེད་པའི་རོས་ཀྱང་སྡུག་བསྔལ་སྐྱེད་དེ། བདེ་བར་མངོན་པར་ང་རྒྱལ་བ་སྡུག་བསྔལ་དང་འདྲེས་པ་ཡིན་ན། སྐྱེ་བ་གཞན་རྣམས་སུ་དེ་སྐྱེས་

པའི་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་བ་རྣམས་སུ་སོ་སོར་ངེས་པར་སྡུག་བསྔལ་ཆེན་པོ་རྣམ་པ་དུ་མ་རབ་ཏུ་ཕལ་ཆེ་བ་སྐྱེ་བ་རྣམས་ལ་སྨོས་ཀྱང་ཅི་དགོས། དཔེར་ན་རྒྱ་མཚོར་རྣམ་པ་སྣ་ཚོགས་པ་རྣམ་པ་དུ་མའི་ཆུ་ཀླུང་རྣམས་འབབ་པའོ། །དེ་བཞིན་

དུ་སེམས་ཅན་རྣམས་ཀྱི་སེམས་ཀྱི་རྒྱུད་ཀྱི་འཇུག་ངོགས་རྣམས་ལ་ཡང་རྣམ་པ་སྣ་ཚོགས་པའི་རྒྱུད་རྣམས་ཀྱིས་ཉེ་བར་བཞག་པའི་སྡུག་བསྔལ་དུ་མ་རབ་ཏུ་དྲག་པ་རྣམས་སྐྱེ་བའོ། །ལྷ་རྣམས་དེ་དག་ལ་རྗེས་སུ་དཔགས་པ་འདིས་ནི་སྡུག་བསྔལ་གཞན་རྣམས་ཀྱང་བསྟན་ནོ། །

འདི་དག་ཐམས་ཅད་ཉིད་དང་། ཐམས་ཅད་དུ་རྣམ་པ་ཐམས་ཅད་ཀྱིས་ཀྱང་དུས་གསུམ་དང་ལྡན་པར་སྡུག་བསྔལ་རྣམ་པ་གསུམ་གྱིས་གང་བར་གྱུར་པ་ཡིན་ནོ། །སྡུག་བསྔལ་རྣམས་འཇོམས་པར་བྱེད་པ་རྣམ་པར་འཇིག་པར་བྱེད་པ་པོ་རྣམས་ནི་ཤེས་རབ་དང་།

ཚུལ་ཁྲིམས་དང་། སྦྱིན་པ་དང་གསུམ་ཡིན་ནོ། །དེ་ནས་དེའི་དུས་ན་བཅོམ་ལྡན་འདས་དེས་ཚིགས་སུ་བཅད་པ་གསུངས་པ། ཇི་ལྟར། སྦྱིན་དང་ཤེས་རབ་ཚུལ་ཁྲིམས་ལ། །གང་དག་བློ་ནི་ལེགས་མི་རྟེན། །སེམས་ཅན་དེ་ནི་རྟག་སྡུག་བསྔལ། །བདེ་བ་དེ་དག་

རྣམས་ལ་མེད། །རྣམ་པ་སྣ་ཚོགས་རྒྱུ་རྣམས་ཀྱིས། །གང་ཚེའང་གང་གང་ཇི་ཇི་ལྟར། །ལས་རྣམས་བྱེད་པའི་སྐྱེ་དེ་དག །འབྲས་བུའང་རྣམ་པ་དེ་འདྲ་ཡིན། །འདི་དག་ཐམས་ཅད་རྒྱུ་ལྡན་ཡིན། །འདི་ལ་རྒྱུ་ནི་ཡོད་མིན་པའི། །གང་ཕྱིར་འདུས་བྱས་མི་

འཇིག་པའི། །རྒྱུ་ནི་མཐོང་བ་མ་ཡིན་ནོ། །ཐོག་མེད་དུས་ནས་ངོ་ཚའི་བཞིན། །སེམས་ཀྱི་སྐྱོན་གྱིས་བསླུས་པ་ཡིན། །མཐོ་རིས་བློ་གྲོས་དམན་གྱུར་པས། །དེ་ཕྱིར་སྦྱིན་པ་མཛེས་པ་ཡིན། །སྦྱིན་པ་ཁྱད་པར་འགྲོ་རིམ་ལྡན། །སེར་སྣའི་དྲི་མ་སྤངས་པ་རྣམས། །

Vol. 70 · folio 97b

རྩེད་མོའི་ཆེད་དུ་བྱེད་པའི་ལྷ། །ཆུད་ཟོས་ཡིད་ཀྱིས་ཟད་བྱས་ནས། །མི་གང་བཀྲེས་སྐོམ་རང་བཞིན་གྱི། །ཡི་དགས་རྣམས་སུ་རྒྱུག་པ་ཡིན། །སེར་སྣའི་འབྲས་བུ་དེ་དག་ཀུན། །དེ་ཉིད་གཟིགས་པས་གསུངས་པ་ཡིན། །གང་དག་བདེ་བའི་དོན་དུ་སྟེ། །

དེས་ནི་ངེས་པར་བདེ་བར་འགྲོ། །གཅིག་ཏུ་སྦྱིན་པས་བདེ་བར་འགྱུར། །དེ་ཕྱིར་སྦྱིན་པ་བསྔགས་པ་ཡིན། །སྦྱིན་པ་འཇིག་རྟེན་འཇིག་རྟེན་གཞན། །འགྲོ་ཞིང་རྗེས་སུ་འགྲོ་བ་ཡིན། །དེ་ལ་སྦྱིན་པས་སོང་ནས་ཀྱང་། །རྒྱས་བྱེད་བཞིན་དུ་ལྷ་མཆོད་དོ། །སླུ་བ་

མེད་པའི་གནས་དེ་དག །དེ་བཞིན་གཤེགས་པས་གསུངས་པ་ཡིན། །སླུ་བ་མེད་པ་ཡིན་ཕྱིར་ཡང་། །རྟེན་དུ་སྦྱིན་པ་ཆེད་ཆེར་གྱིས། །སེར་སྣའི་དགྲ་ལས་རྣམ་རྒྱལ་དང་། །སེམས་ཀྱང་ལེགས་པར་སྒོམ་པར་གྱིས། །གང་ཞིག་རྟག་ཏུ་སྦྱིན་པ་གཏོང་། །དེ་ནི་སྲིད་པའི་

མཚོ་ལས་རྒལ། །ཡུལ་ལས་ཀྱང་ནི་སྦྱིན་རྣམ་གསུམ། །རྣམ་གསུམ་བློ་གསུམ་ལས་སྐྱེས་དང་། །དུས་དང་ནམ་ཟླ་ངེས་པ་དེའི། །འབྲས་བུ་གཟིགས་པ་སྤྱན་གསུམ་པ། །སྦྱིན་འདི་དང་པོ་རྟག་ཏུ་བཏང་། །ཚུལ་ཁྲིམས་རབ་ཏུ་བརྩོན་པས་བསྲུངས། །སྲེད་པ་

ཡེ་ཤེས་ཀྱིས་གཞོམ་བྱ། །ལམ་འདི་རྣམས་ལས་བདེ་བ་འབྱུང་། །མི་རྟག་སྦྱིན་བྱེད་སྲེད་པ་ནི། །འཇིག་རྟེན་ཕན་མི་བྱེད་པ་ཡིན། །མཐར་ཐུག་བླ་ན་མེད་པ་ཡི། །གོ་འཕང་མཆོག་ཀྱང་འཐོབ་ནུས་མིན། །འདི་ཡིད་ཀྱི་ལུས་ཀྱིས་ནི། །རྟག་ཏུ་སྦྱིན་ལ་དགའ་བར་

བྱ། །སྦྱིན་པ་མེད་ན་བཀྲེས་སྐོམ་གྱིས། །ཡི་དགས་ས་ལ་སྲེག་པར་བྱེད། །ལྷ་དང་དྲི་ཟའི་ས་རྣམས་ལ། །སྦྱིན་པས་ལོངས་སྤྱོད་ལྡན་པར་འགྱུར། །སྦྱིན་པ་ཡིས་ནི་རྒྱལ་པོར་འགྱུར། །ལེགས་པར་ཆོས་བྱེད་འཁོར་ལོས་སྒྱུར། །སྦྱིན་པའི་ས་ལ་ལེགས་བརྟེན་

ནས། །མཁས་པ་ཡིས་ནི་ཚུལ་ཁྲིམས་སྲུངས། །ཚུལ་ཁྲིམས་ལྡན་པས་དུས་ཤེས་ཤིང་། །ཤེས་རབ་ཀྱིས་ནི་ཡོངས་སུ་གྲོལ། །སྡུག་བསྔལ་ལས་ནི་ངེས་འབྱུང་ལམ། །ཐུབ་པ་སྐྱེས་མཆོག་གིས་འདི་བསྔགས། །དེ་ནི་བརྟན་པས་རྟག་བརྩོན་པར། །རྒྱུན་དུ་

Vol. 70 · folio 98a

སྦྱིན་ལ་དགའ་བར་གྱིས། །སྦྱིན་པ་མེད་པར་ལྷར་ཡང་ནི། །ལྷ་རྣམས་བདེ་བ་དམན་པར་འདོད། །མི་གང་བདག་ཉིད་སྦྱིན་པ་ནི། །བདེ་བའི་སྐལ་ལྡན་འགྱུར་བ་ཡིན། །གང་ཕྱིར་སྦྱིན་པའི་འབྲས་བུ་དེ། །ཐམས་ཅད་སེམས་ཀྱིས་ཟིན་པའི་

ཕྱིར། །དུད་འགྲོ་རྣམས་སུ་སྐྱེས་ན་ཡང་། །བདེ་བའི་སྐལ་ལྡན་འགྱུར་བ་ཡིན། །སྦྱིན་པ་ལས་སྐྱེས་བདེ་དེ་ཀུན། །མཁས་པ་ཡིས་ནི་གསུངས་པ་ཡིན། །ཡི་དགས་སྲིད་ན་ཡི་དགས་གང་། །ཟས་རྣམས་ཟ་བར་འགྱུར་བ་ཡིན། །ཚེར་མ་མེད་པའི་ཤིང་རྣམས་ཀྱི། །

འབྲས་བུ་དེ་དང་འདྲ་བར་འགྱུར། །དམྱལ་བར་བཀྲེས་དང་སྐོམ་རབ་ཀྱིས། །ལུས་ཅན་གང་ཞིག་མི་སྲེག་པ། །དེ་དག་ཐམས་ཅད་སྦྱིན་དཀའ་ཐུབ། །འབྲས་བཅས་གྱུར་པ་དེ་འདྲ་ཡིན། །སེམས་ཅན་རང་གི་ལས་རྣམས་ཀྱིས། །འགྲོ་བའི་འདམ་དུ་བྱིང་རྣམས་ལ། །

སྦྱིན་པས་རྟག་ཏུ་བདེ་འབབ་པ། །ཕ་བཞིན་དང་ནི་མ་བཞིན་མཐོང་། །ས་དེ་རྣམས་ཀྱི་གནས་སྐབས་སུ། །རྟག་ཏུ་སྦྱིན་ལ་དགའ་བར་གྱིས། །སྦྱིན་དང་ཚུལ་ཁྲིམས་ལ་དགའ་བ། །ངམ་གྲོག་ཀུན་ལས་རྟག་ཏུ་གྲོལ། །དེ་ལྟར་མུ་སུ་ལུན་དྷས་བག་མེད་པ་སྤྱོད་

པའི་ལྷ་དེ་དག་རྣམས་ལ་ལེགས་པར་བསྟན་ནོ། །དེ་རིག་ནས་ཀྱང་ལྷ་དེ་དག་རྣམས་དད་པས་མངོན་སུམ་དུ་དམིགས་ནས། །སྦྱིན་པ་དང་ཚུལ་ཁྲིམས་ཀྱི་འབྲས་བུ་ངེས་པར་རྟོགས་སོ། །གཞན་ཡང་ལྷ་རྣམས་ཀྱི་དབང་ཆུང་བའི་གནས་ཡོད་དོ། །འདི་ལྟ་སྟེ། ལས་

རྣམས་ཀྱིས་སོ་སོར་བསྟན་པའི་ངོ་ཚ་བར་འགྱུར་བའི་ཟས་རྣམས་སོ། །གང་གི་ནགས་དང་། སྐྱེད་མོས་ཚལ་དང་། རྫིང་བུ་དང་། ཆུ་མིག་དང་། པད་མའི་ནགས་ཀྱི་གསེབ་ཏུ་རྒྱུ་བ་ན་རབ་ཏུ་མང་བའི་བུད་མེད་ཀྱི་ཚོགས་ཀྱིས་ཡོངས་སུ་བསྐོར་བ་རྣམས་རྔ་དང་། རོལ་

མོ་སྣ་ཚོགས་རྣམས་ཀུན་ཏུ་སྒྲོགས་པའི་ནགས་ཀྱི་ས་རྣམས་ལ་རྣམ་པར་རྒྱུ་སྟེ། ཡུལ་རྣམ་པ་སྣ་ཚོགས་པ་ལ་རྣམ་པར་ཆགས་པའི་ཡིད་ཅན་རྣམས་མཆོག་ཏུ་རྒྱ་ཆེ་བའི་བདེ་བ་དཔེ་མེད་པ་དག་དང་ཡང་དག་པར་ལྡན་པས་རྒྱུ་བར་གྱུར་པ་ལས་དེའི་ཚེ་ན་ཟས་དང་སྐོམ་གྱི་ས་

Vol. 70 · folio 98b

ཕྱོགས་སུ་ཉེ་བར་ལེགས་པར་འགྲོའོ། །དེ་དག་རྣམས་ཉེ་བར་ལེགས་པར་སོང་བ་ན་ཡང་རྒྱན་དང་། ཆ་བྱད་མཆོག་དང་ལྡན་པར་གྱུར་པའི་ལྷ་མོ་རྣམས་རྗེས་སུ་སོང་སྟེ། སྣ་ཚོགས་པའི་གཟུགས་རྒྱན་དང་ཆ་བྱད་ཅན་དེ་རྣམས་ཀྱིས་ལྷ་དགའ་བར་བྱས་ནས། བསྙེན་ནས་

ལེགས་པར་གནས་ཞིང་ཡང་གར་བྱེད། དགོད་པར་བྱེད། འགྱིང་བར་བྱེད། གླུ་ལེན་པར་བྱེད་དེ། རྔ་སྐད་ཡན་ལག་ལྔ་དང་ལྡན་པའི་ཆགས་པས་དང་། མཚུངས་པས་དང་། སྙན་པ་དང་བཅས་པ་དེ་ལྟར་ན་ཡང་ལྷ་རྣམས་ཀྱི་རྣ་བའི་རྣམ་པར་ཤེས་པ་ངོམས་

པ་མེད་པའོ། །སྲེད་པའི་ཡུལ་གྱིས་རྣམ་པར་རྒྱུ་བས་མནར་བ་རྣམས་ངོམས་པར་མ་གྱུར་པས་གཞན་ཡང་ལྷ་རྣམས་རྣམ་པ་སྣ་ཚོགས་པའི་གཟུགས་རྣམས་ལ་ལྟ་བར་བྱེད་པར་གྱུར་པ་རྣམས་ལ་དགའ་བར་གྱུར་པ་དང་། མཐོང་ན་སྡུག་པ་དང་། ཇི་ལྟར་འདོད་པས་

འགྲོ་བ་རྣམས་རྟག་ཏུ་ཡིད་འཇོམས་པར་བྱེད་པ་རྣམ་པ་སྣ་ཚོགས་པ་དང་། རྒྱ་ཆེ་བའི་འོད་འབར་བ་རྣམས་ཁ་དོག་དང་། དབྱིབས་དུ་མ་ཅན་དང་། རྒྱང་རིང་བ་དང་། ཐག་ཉེ་བ་ན་གནས་པ་རྣམས་ཏེ། དེ་ལ་གལ་ཏེ་ལྷ་རྣམས་འདི་སྙམ་དུ་སེམས་པར་གྱུར་ཏེ། ཇི་ལྟར་

གཟུགས་གང་དག་ཡིན་པ་དེ་དག་རིང་བ་ན་གནས་པ་དེ་དག་རྣམས་ཐག་ཉེ་བར་འགྲོ་བར་བྱ་ན། དེའི་སེམས་བསྐྱེད་པ་ཙམ་ཉིད་ན་གཟུགས་མཆོག་ཏུ་དགའ་བར་གྱུར་པ་དེ་རྣམས་ཐག་ཉེ་བར་གནས་པར་འགྱུར་རོ། །བདུད་རྩིར་གྱུར་པ་ལ་ཡང་ཇི་ལྟར་འདོད་པ་དེ་ལྟར་འགྱུར་

རོ། །གལ་ཏེ་ཡང་ཉེ་བར་གྱུར་པར་འདོད་ན་དེ་དག་རྣམས་ཉེ་བར་རོ། །གལ་ཏེ་ཡང་རིང་བར་འདོད་ན་ཡང་དེ་ཡང་རིང་བར་འགྱུར་རོ། །ལས་ཀྱི་འབྲས་བུའི་ཁྱད་པར་རྣམས་ཀྱིས་འགྱུར་ཏེ། དམན་པ་དང་། བར་མ་དང་། མཆོག་རྣམས་རྒྱུ་དང་བཅས་

པ་ཡིན་ནོ། །དེ་བཞིན་དུ་ཡང་སྲེད་པའི་སྦྲུལ་མཐོང་བ་དུག་ཅན་གྱིས་བལྟས་པའི་ལྷ་རྣམས་ལ་ངོམས་པ་སྐྱེ་བ་མ་ཡིན་ནོ། །བུད་ཤིང་རྣམས་བཅུག་པར་གྱུར་པའི་མེ་བཞིན་དུ་སྲེད་པ་དང་བཅས་པ་རྣམས་དགའ་བར་གྱུར་པའི་ཡུལ་རྣམས་ཀྱིས་མཐར་ཐུག་པ་སྐྱེ་བ་

Vol. 70 · folio 99a

མེད་དོ། །དེ་བཞིན་དུ་ལྷ་རྣམས་ནི་ཚུལ་དུ་མར་ཡང་ངོམས་པ་མེད་དོ། །གཞན་ཡང་ལྷ་དེ་དག་རྣམས་ཉིད་དྲི་ལ་དྲིའི་རྣམ་པར་ཤེས་པ་གཏོད་པར་བྱེད་དོ། །དེ་དག་རྣམས་ཀྱིས་རྣམ་པ་མང་པོར་སྒོ་བར་བྱེད་པའི་དྲི་རྣམས་ལ་འདི་ལྟ་སྟེ། ནགས་དང་ནགས་

སུ་གྱུར་པའི་མེ་ཏོག་རྣམས་སོ། །མེ་ཏོག་དེ་དག་རྣམས་ཀྱང་འཁྲི་ཤིང་དང་ཚང་ཚིང་ལས་སྐྱེས་པ་དང་། ཤིང་ལས་སྐྱེས་པ་དང་། ས་ཕྱོགས་ཀྱི་ཆ་ཀུན་ལས་སྐྱེས་པའི་མདོག་དང་། དབྱིབས་རྣམ་པ་དུ་མ་རྣམས་དང་། རྣམ་པ་སྣ་ཚོགས་པའི་ཆ་ཤས་རྣམ་པར་བཀྲ་བ་རྣམས་ཏེ།

ཐམས་ཅད་ཀྱང་དུས་དུས་སུ་ཁ་བྱེ་བ་རྣམས་ལ་ལྷའི་བུ་མོ་རྣམས་འོངས་ནས་སྟེན་པའི་དོན་དུ་འགའ་ཞིག་ལ་སྣོམ་པར་བྱེད་དོ། །མེ་ཏོག་རྣམས་འགའ་ཞིག་ལ་ནི་རླུང་དང་ཉེ་བ་ལ་བརྟེན་ནས་དྲི་རྣམས་སྣོམ་པར་བྱེད་དོ། །མཚུངས་པར་འདོད་པའི་ཡོན་ཏན་ཕུན་སུམ་ཚོགས་པའི་

དྲི་མ་རྣམས་ལ་ཡང་ལྷ་རྣམས་སྣོམ་པར་བྱེད་དོ། །དེ་དག་བསྣམས་ནས་གཞན་ཡང་གང་གི་ཚེ་ལྷག་མར་གྱུར་པ་རྣམས་ལ་ལུས་ལ་རྣམ་པ་ཇི་སྲིད་ཀྱི་རྒྱན་དུ་གྱུར་པ་ལས་མཐོ་རིས་དང་རྗེས་སུ་འཐུན་པའི་རྣ་གདུབ་དང་དཔུང་རྒྱན་ལ་སོགས་པ་རྣམས་ལྷ་འདོད་པ་དེ་རྣམས་ཀྱི་སེམས་

བསྐྱེད་པ་ཙམ་ཉིད་ན་རང་འབྱུང་ངོ་། །ལུས་ལ་གོས་བགོས་པ་རྣམས་ནི་ཁ་དོག་རྣམ་པ་སྣ་ཚོགས་པར་བཙོས་པ་རྣམ་པ་སྣ་ཚོགས་པར་དྲི་དང་ལྡན་པའི་མ་བཏགས་པའི་ཚད་མཆོག་དང་ལྡན་པ་དེ་དག་རྣམས་ཀྱིས་ལྷ་སྲེད་པ་དང་བཅས་པ་རྣམས་ངོམས་པར་མི་འགྱུར་རོ། །

གཞན་ཡང་ལྷ་རྣམས་ཡིད་ཀྱིས་དོན་འདི་དག་དཔྱོད་པར་བྱེད་པ་ན་དེ་དང་དེ་རང་གི་ལས་དང་འདྲ་བར་ཕུན་སུམ་ཚོགས་པར་འགྱུར་ཏེ། མཆོག་ཏུ་དགའ་བས་ཇི་ལྟར་ཟས་དང་བཏུང་བའི་ས་རྣམས་ལ་སོང་ནས་ལྷ་བདུད་རྩི་ཟ་བར་བྱེད་དོ། །དེ་དག་གིས་ཟོས་པ་དེ་དག་རྣམས་ནི་སྦྱིན་

པ་རྣམས་དང་འདྲ་བར་དམན་པ་དང་། བར་མ་དང་། མཆོག་ཏུ་གྱུར་པའི་ཟས་རྣམས་འབྱུང་ངོ་། །ལྷ་རྣམས་ཀྱང་རྣམ་པ་སྣ་ཚོགས་པའི་བཏུང་བ་དག་འཐུང་བར་བྱེད་པ་དེ་དག་རྣམས་ཀྱང་དམན་པ་དང་། བར་མའི་བཏུང་བ་དང་། བཟའ་བ་རྣམས་ཀྱང་འབྱུང་སྟེ།

Vol. 70 · folio 99b

རང་གི་ལས་ཀྱི་རྒྱའི་རྗེས་དང་འདྲ་བའི་ཕྱིར་རོ། །ཇི་ལྟར་གང་དག་གིས་ལུས་ཀྱི་ཚད་ཀྱི་རྣམ་པ་ཇི་སྲིད་དུ་འགྱུར་བའི་རྣམ་པ་དེ་སྲིད་ཁོ་ནར་སྐྱེས་བུ་དེའི་གྲིབ་མ་ཉི་མ་རང་བཞིན་དུ་གནས་པ་ན་འབྱུང་བར་འགྱུར་རོ། །དེ་ཁོ་ན་བཞིན་དུ་ལྷ་རྣམས་ཀྱི་ཡང་གང་གིས་ཇི་སྲིད་ཀྱི་རྣམ་པའི་

ལས་རྣམས་བྱས་པར་འགྱུར་བ་དེ་དག་གི་རྣམ་པ་དེ་སྲིད་ཁོ་ནའི་ཟས་ཀྱི་རིགས་རྣམས་སྐྱེའོ། །དེ་ཟ་བར་བྱེད་པ་ན་ཡང་ལྷ་དེ་དག་རྣམས་ཚོགས་པ་ན་ཟ་བར་བྱེད་པས་དེ་དག་མཆོག་ཏུ་ངོ་ཚ་བ་སྐྱེའོ། །དེ་ལ་ལྷ་རྣམས་རྒྱུ་བའི་དུས་སུ་ཉེ་བར་གནས་པ་རྣམས་ཤིན་ཏུ་རྒྱ་ཆེ་བའི་སྡུག་

བསྔལ་ཆེན་པོ་དང་ལྡན་པར་འགྱུར་རོ། །ཁྱད་པར་དུ་ཡང་ལྷ་མོའི་ཚོགས་ཀྱི་མདུན་དུ་ངོ་ཚ་བར་གྱུར་པའི་སྡུག་བསྔལ་གྱི་མཆོག་དེ་འདྲ་བ་ནི་སྲིད་པ་གཞན་ན་ཆུང་ཟད་ཀྱང་མེད་དོ། །སླུ་བ་མེད་པ་པོའི་བདེ་བར་གྱུར་པའི་དེ་ལྟར་སོ་སོར་བསྟན་པ་དེ་དག་རྣམས་ཀྱིས་ཀྱང་ཇི་ལྟར་

གཞན་དུ་ཡང་འཁོར་བ་ཐམས་ཅད་དུ་དེས་འགྲོ་བར་བྱ་དགོས་སོ། །གཞན་ཡང་ལྷ་རྣམས་ཀྱི་ཐ་མའི་དུས་ལེགས་པར་བྱས་པ་ཟད་ནས་འཆི་འཕོ་བའི་དུས་ན་སྡུག་བསྔལ་རྣམས་སྐྱེ་བར་འགྱུར་ཏེ། གང་གི་ཚེ་བག་མེད་པར་སྤྱོད་པའི་ལྷ་རྣམས་རྟག་ཏུ་འདོད་པ་ལ་རྣམ་པར་ཆགས་

པ་ལས་གང་གི་ཚེ་འཆི་འཕོ་བར་འགྱུར་ལ། འཆི་འཕོ་བ་དེའི་ཚེ་ཡང་འདོད་པ་སྡུག་པ་ཡིད་དུ་འོང་བར་གྱུར་པ་གང་དག་རྣམས་དང་བྲལ་བར་འགྱུར་བ་ནི་སྣུམ་ཟད་པའི་དབང་གིས་མར་མེ་བཞིན་དུ་འགག་པར་གྱུར་པ་ན་འགྲོ་བ་གཞན་གང་ཡིན་པ་དང་འདྲ་བའི་རྟགས་རྣམས་

སྔོན་བྱུང་བར་གྱུར་པ་དང་། འཆི་འཕོ་བའི་དུས་ཀྱི་སྡུག་བསྔལ་དེ་དག་རྣམས་ཀྱིས་ལུས་དང་ཡིད་མངོན་པར་བཅོམ་པར་གྱུར་པའི་རྣམས་ལ་སྡུག་བསྔལ་གང་དག་སྐྱེ་བར་གྱུར་པ་དེ་ནི་དཔེར་བརྗོད་པར་སླ་བ་ཡང་མ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་

བཅད་པ་གསུངས་པ། ཇི་ལྟར། སྣ་ཚོགས་བདེ་དང་བག་མེད་དང་། །ཡུལ་རྣམས་ཀྱིས་ཀྱང་བསླུས་པས་ཀྱང་། །ཚེ་ཟད་འཆི་བའི་དུས་སུ་ནི། །ལྷན་ཅིག་གནས་པ་ཡོད་མ་ཡིན། །སྔོན་ཆད་བག་མེད་སྤྱད་པ་ཡི། །སྦྱིན་ལ་སོགས་ལ་མི་འཇུག་གོ། །ཕྱི་ནས་

Vol. 70 · folio 100a

འཆི་བའི་དུས་ན་དེ། །རང་གི་སེམས་ནི་སྲེག་པ་ཡིན། །དང་པོ་བར་དང་དེ་བཞིན་མཐར། །ལེགས་པའི་ཡིད་ནི་བྱ་བ་ཡིན། །ལེགས་པར་སྤྱོད་དང་རྟག་ཏུ་དུལ། །འཆི་བའི་དུས་ན་ཞུམ་པ་མེད། །ངེས་པར་འགྱུར་བ་འཆི་བ་སྟེ། །སྡུག་པ་དང་ཡང་བྲལ་བ་ཡིན། །ཡུལ་

རྣམས་ཀྱིས་ནི་རབ་བཅོམ་པས། །བྱིས་པ་རྣམས་ནི་སྤྱོད་པའང་མེད། །དེ་ནི་རིམ་གྱིས་རྟོགས་འགྱུར་གྱི། །འདི་ནི་ཁོང་དུ་ཆུད་པ་མིན། །ཡུལ་གྱིས་རྣམ་པར་ཉམས་པའི་ལྷ། །འདོད་པ་ལ་ནི་རྣམ་ཞེན་བློ། །འདུས་བྲལ་སྡུག་བསྔལ་གང་སྐྱེས་པའི། །ལྷ་གང་གང་དུ་སྐྱེ་བ་ཡིན། །

ཡུད་ཙམ་ཅིག་ཀྱང་དེ་དག་ལ། །བློ་ནི་གནས་པར་མི་བྱའོ། །མི་རྟག་པ་དང་འཇིགས་དང་བཅས། །འདོད་པས་རྟག་ཏུ་འཁོལ་བྱེད་པོ། །དེ་ལྟ་ན་ཡང་རྨོངས་པས་བྱིས། །ཕྱིར་ཞིང་དེ་ཉིད་སྟེན་པར་བྱེད། །འདོད་ཆགས་མེ་ཡིས་རྟག་ཏུ་སྲེག །ལྷ་ནི་རྣམ་པར་རྨོངས་པ་ཡིན། །བསྲེགས་

པར་གྱུར་ནས་ཕྱིས་ཀྱང་དེ། །ཡང་དང་ཡང་དུ་བསྔགས་པར་བྱེད། །ཡུལ་རྣམས་ལ་ནི་ཆགས་མེད་པར། །རྒྱུ་གང་དེ་ཉིད་ལ་གཞོལ་བ། །གང་ཡང་དེ་ནི་རབ་བསྔགས་པ། །དེ་དག་སྡུག་བསྔལ་རྟག་པར་གནས། །ཁམས་གསུམ་འདི་དག་ཐམས་ཅད་ནི། །ཟོ་ཆུན་ཁོར་མོ་བཞིན་དུ་འཁོར། །

ལས་ཀྱི་ཞགས་པས་ཀུན་བཟུང་ཡང་། །དེ་ཉིད་མཐོང་བ་ཡང་མ་ཡིན། །སྐྱེ་བ་དང་ནི་འཆི་བ་རྣམས། །སྐྱེ་དང་སྐྱེ་བར་ཡང་ཡང་ངོ་། །སེམས་ཅན་རྣམ་པར་རྨོངས་དགའ་བ། །རྟག་ཏུ་སྡུག་བསྔལ་སྐལ་ལྡན་ཡིན། །གློག་དང་ཟོ་ཆུན་འཁོར་ལོ་དང་། །མཚུངས་པར་འདོད་པ་རབ་ཏུ་བསྒྲགས། །

རྨི་ལམ་དྲི་ཟའི་གྲོང་ཁྱེར་ལྟར། །རབ་ཏུ་རྣམ་པར་འཇིག་པ་ཡིན། །རྣམ་པ་དེ་ལྟའི་འདོད་པ་རྣམས། །ཁྱད་པར་འཇིགས་དང་བཅས་པ་ཡིན། །མི་རྟག་སྡུག་བསྔལ་སྟོང་པའི་ཕྱིར། །བདག་གི་བློ་ནི་མི་བྱའོ། །རྒ་དང་འཆི་བའི་འཁོར་ལོ་འདི། །རབ་ཏུ་མི་བཟད་བཟོད་མི་ནུས། །ངེས་

པར་ཐམས་ཅད་ལྟུང་བ་ཡང་། །མིག་མེད་པས་ན་མཐོང་བའང་མེད། །འདོད་པ་ལྔ་ནི་ཐུབ་མཆོག་གིས། །སྟོང་པའི་ངོ་བོར་རབ་ཏུ་གསུངས། །འདོད་ཆགས་ཁྱིམ་གྱི་རང་བཞིན་ནི། །མི་རྟག་པ་དང་སྡུག་བསྔལ་མང་། །གཞན་དུ་མིན་པར་རྟོགས་ལྡན་པས། །གང་གང་འདོད་པ་ལ་མི་ཆགས། །

Vol. 70 · folio 100b

དེ་ནི་ཕ་རོལ་འགྲོ་རྟག་ཞི། །མྱ་ངན་འདས་པའི་མཐའ་ལ་གནས། །འཆི་འཕོ་འབྱུང་བའི་ལྷ་ཡི་ནི། །དབང་པོ་བརླབས་པར་གྱུར་པའི་སེམས། །སྡུག་བསྔལ་བརྗོད་པར་སླ་མིན་གང་། །དེ་ལ་འདི་ན་དཔེ་ཡོད་མིན། །ཇི་ལྟ་ཇི་ལྟར་བདེ་ཆེན་པོ། །སེམས་ནི་སྲེད་པས་ཉེར་བཅོམ་པ། །དེ་ལྟ་དེ་ལྟར་འཆི་

འཕོ་བའི། །སྡུག་བསྔལ་ཆེན་པོ་བཟོད་པར་དཀའ། །ལེགས་བྱས་ལས་ནི་མ་བྱས་དང་། །ལས་ཀྱི་གནས་ལུགས་མི་ཤེས་པ། །སྡུག་བསྔལ་ཆེན་པོ་ཀུན་འབྱུང་བས། །ཕྱིས་ནི་གདུང་བས་སྲེག་པར་བྱེད། །ཇི་སྲིད་འཆི་བ་མ་འོངས་དང་། །ཇི་སྲིད་དལ་འབྱོར་ཕུན་སུམ་ཚོགས། །དེ་སྲིད་

རང་ལ་ཕན་པར་མནོས། །ལམ་འདི་རྣམས་ནི་བདེ་བ་འབྱུང་། །ལྷ་ཡི་འཇིག་རྟེན་རྣམས་འཆི་འཕོ། །འཆི་བ་མི་ཡི་ས་རྣམས་ལ། །རིག་ནས་ཉེ་བར་འཚེ་བཅས་པའི། །སྲིད་ན་སྐྱེས་བུ་སུ་གནས་བྱེད། །དེ་ལྟར་ཡང་འཆི་འཕོ་བར་གྱུར་པའི་ལྷ་རྣམས་ལས་ཀྱི་ཐག་པས་

དྲངས་པར་གྱུར་པ་སོ་སོར་ཉེ་བར་བསྟན་པས་འཇིགས་པ་ཆེན་པོ་དང་བཅས་པ་རབ་ཏུ་སྐྱེའོ། །དེའི་ཕྱིར་ན་ལྷ་དེ་དག་དུད་འགྲོ་དང་འདྲ་བར་གྱུར་པ་ཡིན་ཏེ། གང་དག་ཡུལ་རྣམས་ལ་རྣམ་པར་འཆུམས་པའི་ཡིད་ཀྱིས་རང་ཉིད་ལ་ལེགས་པར་མི་བྱེད་དོ། །དེ་ལྟ་བས་ན་བག་

མེད་པར་ཡང་མ་བྱེད་ཕྱི་ནས་འགྱོད་པར་འགྱུར་བར་མ་བྱེད་ཅིག །དེ་ལྟར་ལྷ་མུ་སུ་ལུན་དྷས་ཚོགས་པ་རྒྱུ་བ་ན་རྣམ་པར་རྒྱུ་བའི་ལྷ་རྣམས་ལ་རྣམ་པར་གཟིགས་ཀྱིས་མཛད་པའི་མཆོད་རྟེན་མཐོང་བར་བྱས་ནས་དེ་ལ་རྗེས་སུ་བསྔགས་པར་བྱེད་དོ། །ངེས་པར་ལེགས་པ་ལ་སྦྱོར་བར་བྱེད་དོ། །འདོད་པ་རྣམས་ཀྱི་

ཉེས་དམིགས་རྣམས་ཀྱང་རབ་ཏུ་སྟོན་པར་བྱེད་དོ། །རྣམ་པར་སྨད་པར་བྱ་བའི་ཕྱིན་ཅི་ལོག་བཞི་ཡང་དག་པར་སྟོན་པར་བྱེད་དོ། །འཆི་བའི་དུས་མ་འོངས་པ་ཡང་ལེགས་པར་སྟོན་པར་བྱེད་དོ། །ཀུན་ཏུ་སྐྲག་པར་བྱེད་དོ། །དེའི་ཕྱིར་འཇིགས་སུ་རུང་བའི་འཆི་བ་ལས་སྡུག་བསྔལ་དུ་མས་ཚང་

ཚིང་དུ་གྱུར་པའི་ལམ་ལྷ་དེ་དག་རྣམས་ལ་བསྟན་པར་གྱུར་པ་ན། དེས་རབ་ཏུ་དང་བས་ཡིད་འཕྲོག་པར་བྱེད་པའི་བདེ་བ་སྐྱེད་པར་བྱེད་པའི་ཕྱིར་ན་ལྷ་རྣམས་ལ་རྗེས་སུ་སྟོན་ཏོ། །མདོ་དྲུག་པ་ལས་རྣམ་པར་གཟིགས་ཀྱིས་མཛད་པའི་མདོ་སྡེ་གཉིས་པ་རྫོགས་སོ།། །།

Vol. 70 · folio 101a

འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་རྩ་དགུ་པ། གཞན་ཡང་མུ་སུ་ལུན་དྷ་དེ་ཉིད་ཀྱིས་ལྷ་དེ་དག་རྣམས་ཉིད་ཁྲིད་དེ་ཚོགས་པ་རྒྱུ་བའི་ས་ལ་གནས་པའི་གང་དག་སེམས་བསྒོམས་པར་གྱུར་པ་དང་། གང་ཡང་ཡིད་བསྒོམས་པར་

གྱུར་པ་དང་། རྒྱུད་བསྒོམས་པར་གྱུར་པ་དེ་དག་རྣམས་ཁྲིད་ནས་གཞན་ལ་ཕན་པར་བྱེད་པ་དང་། གཞན་ལ་ཕན་པ་སྦྱོར་བ་ལ་བརྩོན་པས་ལྷ་དེ་དག་རྣམས་ཀྱི་གཞན་ཡང་བག་མེད་པ་དེ་དག་གཞོམ་པར་འདོད་པས་ཀྱང་ལས་དང་འབྲས་བུའི་དེ་ཁོ་ན་ཉིད་མཐོང་བ་དང་དྲན་པར་ཡང་བྱས་ལ།

སེམས་ཀྱི་རྒྱུད་དང་བར་ཡང་བྱས་ཤིང་གཞན་ཡང་དེ་དག་རྣམས་ཀྱི་རྒྱུད་ཤིན་ཏུ་རབ་ཀྱི་མཆོག་ལ་སྦྱོར་བས་འདོད་པ་རྣམས་ཀྱི་ཉེས་དམིགས་རྣམས་ཀྱང་ལེགས་པར་བསྟན་ཅིང་གསོན་པ་རྣམས་ཀྱང་མི་རྟག་པ་ཉིད་ཀྱི་རྟོགས་པ་འཕངས་ཤིང་འཁོར་བའི་རྒུད་པ་རྣམས་ཀྱང་བརྗོད་ནས་ལྷ་དེ་དག་

རྣམས་ལ་འདི་སྐད་ཅེས་བརྗོད་དོ། །ལྷ་ཁྱེད་རྣམས་ལྟོས་དང་མཆོད་རྟེན་གསུམ་པ་གང་དེ་ཁོ་ན་མཐོང་བ་དེ་ནི་ཐུབ་པ་ཆེན་པོ་གཞན་འཁོར་བ་འཇིག་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ།

སྟོན་པའི་ཡིན་ཏེ། རིན་པོ་ཆེ་རྣམས་ཀྱིས་ལེགས་པར་གང་བ་འོད་ཟེར་གྱི་ཕྲེང་བ་གསེར་དང་ནོར་བུའི་སྟེགས་སུ་ནམ་མཁའ་འབུགས་པ་བཞིན་དུ་ཤིན་ཏུ་མཐོ་བར་གནས་པ་སྐྱེ་བོ་ཐམས་ཅད་རབ་ཏུ་དགའ་བ་འཐབ་བྲལ་གྱི་འཇིག་རྟེན་འདི་དག་ཐམས་ཅད་ཟིལ་གྱིས་མནན་ནས་ངེས་པར་

གནས་པ་མཆོག་ཏུ་ཞི་བར་གྱུར་པ་དང་། མཆོག་ཏུ་དགའ་བར་གྱུར་པ་སེམས་ཀྱི་རྒྱུད་རླན་པ་བཞིན་དུ་ལྷ་རྣམས་ཐམས་ཅད་ཀྱི་ལྷའི་འཇིག་རྟེན་འདིའི་རྒྱལ་མཚན་དུ་གྱུར་པ། སྙིང་པོར་གྱུར་པ། བསམ་གཏན་དང་ལྡན་པ་བཞིན་དུ་རྣམ་པར་གནས་སོ། །རྣམ་པར་བཀྲ་བ་དགེ་བ་རིན་

པོ་ཆེ་ཤིན་ཏུ་འབར་བ་རིན་པོ་ཆེའི་འོད་ལྷམ་མེ་བར་གྱུར་པ་དམ་པའི་ཆོས་སྟོན་པར་མཛད་པ་བཞིན་དུ་མཆོག་ཏུ་རྒྱ་ཆེ་བ་དགའ་བར་གྱུར་པར་མཐོང་བ་འདི་ལ་བདག་ཅག་གིས་ཁྲུས་གསོལ་བར་བྱའོ། །བདག་ཅག་གིས་མཆོད་པར་བྱའོ། །ཙན་དན་ཡང་བདག་གིས་དབུལ་བར་བྱའོ། །

Vol. 70 · folio 101b

མེ་ཏོག་དང་སྤོས་ལ་སོགས་པ་རྣམས་ཀྱིས་མཆོད་ནས་རིམ་གྱིས་བདག་གིས་བལྟ་བར་བྱའོ། །ཅི་འདིར་དྲང་སྲོང་ཆེན་པོར་གྱུར་པ་དེ་ཤིན་ཏུ་ངོ་མཚར་བར་གྱུར་པ་འདིས་ཅི་ཞིག་ཉེ་བར་མཚོན་པ་མཛད་ན། གང་གིས་བདག་ཅག་རྣམས་ངེས་པར་ལེགས་པ་དང་། མཐར་ཕྱིན་པ་

དང་། ཕན་པ་དང་བདེ་བར་ཡང་འགྱུར་བ་སྟེ། རྒྱུ་གང་གི་ཕྱིར་སེམས་ཅན་རྣམས་ཐམས་ཅད་ལ་ཕན་པར་མི་འགྱུར་བ་དང་། བདེ་བར་མི་འགྱུར་བའི་བཅོམ་ལྡན་འདས་ཀྱི་མཛད་པ་ནི་གང་ཅུང་ཟད་ཀྱང་མི་མངའ་བའི་ཕྱིར་ཏེ། བདག་ཉིད་ལ་ཕན་པའི་དོན་ཉིད་ཀྱིས་ནི་འདི་དག་

ཏུ་བྱོན་པ་ཡང་མ་ཡིན་ནོ། །དེ་ནས་ལྷ་དེ་དག་རྣམས་ཀྱིས་ལྷའི་བདག་པོ་དེའི་ཚིག་ཉེ་བར་བཟུང་ནས་དགེ་བར་བྱས་པའི་ཡིད་ཀྱིས་འདི་སྐད་ཅེས་སྨྲས་སོ། །མཆོད་པའི་དོན་དུ་བདག་ཅག་རྣམས་མཆི་བར་བགྱི་ཞིང་བདག་ཉིད་རྗེས་སུ་གཟུང་བའི་དོན་དུ་དང་། བདག་ཉིད་ལ་ཕན་

པའི་དོན་དུ་བདག་ཅག་རྣམས་འགྲོ་བར་བྱའོ། །དེ་ནས་ཚོགས་པ་རྒྱུ་བའི་ས་ན་གནས་པའི་ལྷ་དེ་དག་རྣམས་ཀྱིས་ལྷའི་བདག་པོ་མུ་སུ་ལུན་དྷ་སྔོན་དུ་བྱས་ནས་གང་ན་བཅོམ་ལྡན་འདས་དྲང་སྲོང་གི་མཆོག་དེའི་མཆོད་རྟེན་ཡོད་པ་དེར་ཉེ་བར་ལེགས་པར་འགྲོའོ། །སོང་ནས་ཀྱང་བཅོམ་

ལྡན་འདས་འཁོར་བ་འཇིག་གི་མཆོད་རྟེན་ལ་གུས་པ་དང་བཅས་པའི་ཡིད་ཀྱིས་ཕྱག་འཚལ་བར་བྱེད་དེ། གཡས་ཕྱོགས་ནས་སྐོར་བར་ཡང་བྱེད་དོ། །དེ་ནས་དེའི་ཚེ་མཆོད་རྟེན་གྱི་ནང་ན་རིན་པོ་ཆེའི་འོད་ཤིན་ཏུ་འབར་བ་རིན་པོ་ཆེ་དེ་དག་རྣམས་གང་གི་ཁྱད་པར་གྱིས་ནི་ཉི་མའི་འོད་

ཟེར་ཡང་། སྲིན་བུ་མེ་ཁྱེར་གྱི་འོད་དང་འདྲ་བར་འགྱུར་རོ། །མཆོད་རྟེན་དེའི་ནང་ན་ཡང་གསེར་གྱི་རང་བཞིན་གྱི་བྱང་བུ་ལ་བྲིས་ནས་ནམ་མཁའ་ལ་འཕྱང་བ་ཡིན་ཏེ། རབ་ཏུ་འབར་བའི་ཡི་གེར་མངོན་པར་བྲིས་པའི་མདོ་ཡིན་ནོ། །དེ་ཡང་རྫུ་འཕྲུལ་མཛད་པའི་ཆོ་འཕྲུལ་

གྱིས་རླག་པར་མི་འགྱུར་ཞིང་ཉེ་བར་རླག་པར་མི་འགྱུར་ཏེ། དེ་རྒྱུ་གང་གིས་ལྷ་དང་མི་རྣམས་ལ་ཕན་པའི་དོན་དུ་མདོ་དེ་བསྟན་པའི་ཕྱིར་རོ། །ཐུབ་པ་བཅོམ་ལྡན་འདས་འཁོར་བ་འཇིག་དེས་ལྷ་དང་མི་རྣམས་ལ་ཆོས་སྟོན་པར་མཛད་པ་ནི་འདི་ལྟ་སྟེ། རྒྱུ་གང་གིས་ལྷ་

Vol. 70 · folio 102a

རྣམས་འགྲོ་བ་དྲུག་ནས་དང་། མི་རྣམས་མི་རྣམས་ནས་འཆི་འཕོ་བ་དང་། ལྷ་རྣམས་ལྷ་ཡུལ་དུ་སྟེ། དེ་ལྟར་ཕན་ཚུན་དུ་འགྲོ་བ་དྲུག་པོ་རྣམས་ཕན་ཚུན་དུ་དཔུང་གཉེན་དུ་གྱུར་པ་ཡིན་ལ། དེ་ལ་ལྷ་དང་མི་རྣམས་ཀྱང་ཚུལ་ཁྲིམས་ཀྱིས་མཐོ་རིས་སུ་སྐྱེ་

བ་ནི་སླུ་བ་མེད་པའི་གནས་ཡིན་ནོ། །དེ་ལ་ཚུལ་ཁྲིམས་དེ་ནི་རྣམ་པ་གཉིས་ཡིན་ཏེ། སྡོམ་པ་སྔར་བྱས་པ་དང་ཐར་བར་བྱས་པའོ། །དེ་ལ་དོན་ཡོད་པ་ཞེས་བྱ་བའི་ཚུལ་ཁྲིམས་གང་ཞིག་དོན་ཡོད་པ་འབའ་ཞིག་ཁོ་ནས་འཇུག་པའི་རབ་ཏུ་དང་བས་སེམས་རབ་ཏུ་དང་བའི་དབང་

གིས་སངས་རྒྱས་ལ་སོགས་པ་རྣམས་ལ་རབ་ཏུ་དང་བར་འགྱུར་རོ། །ལུས་ཀྱི་ལེགས་པར་སྤྱོད་པ་དང་། ངག་གི་ལེགས་པར་སྤྱོད་པ་དང་། ཡིད་ཀྱི་ལེགས་པར་སྤྱོད་པ་རྣམས་བྱེད་པར་འགྱུར་རོ། །ལོག་པར་ལྟ་བ་ཅན་དུ་ཡང་མི་འགྱུར་རོ། །ཇི་སྲིད་འཚོའི་བར་དུ་ཡང་ལས་

དང་འབྲས་བུ་རྣམས་ལ་རྒྱུད་དད་པ་དང་ལྡན་པར་འགྱུར་རོ། །ཆོས་དང་ལྡན་པའི་ལོངས་སྤྱོད་རྣམས་ཀྱང་ཆོས་ཀྱིས་ལོངས་སྤྱོད་པར་བྱེད་ཀྱི། གཞན་རྣམས་གདུང་བར་བྱེད་པ་ནི་མ་ཡིན་ནོ། །མ་དང་ཕ་ལ་གུས་པར་འགྱུར་རོ། །དགེ་སྦྱོང་དང་བྲམ་ཟེ་རྣམས་ཉེ་བར་འོང་བའི་རང་

བཞིན་ཅན་དུ་འགྱུར་རོ། །དམ་པའི་ཆོས་ཉན་པའི་རང་བཞིན་དུ་འགྱུར་རོ། །འཐུན་པས་འགྲོ་བའི་རང་བཞིན་ཅན་དུ་འགྱུར་རོ། །ཡོངས་སུ་འདྲི་བའི་རང་བཞིན་ཅན་དུ་འགྱུར་ཏེ། དེ་ལྟར་དོན་དང་ལྡན་པ་འབའ་ཞིག་པ་ཁོ་ནས་རབ་ཏུ་དང་བ་དང་ཡང་དག་པར་ལྡན་པར་འགྱུར་རོ། །

དོན་དང་ལྡན་པ་ཐམས་ཅད་ལེགས་པར་གང་བར་སྤྱོད་པ་ཡིན་ཏེ། ལུས་ཀྱི་ལེགས་པར་སྤྱད་པ་རྣམས་སྤྱོད་པར་བྱེད། ཡིད་ཀྱིས་ལེགས་པར་སྤྱད་པ་རྣམས་སྤྱོད་པར་བྱེད་ཀྱི་སྡོམ་པ་འཛིན་པ་ནི་མ་ཡིན་ཡང་དེ་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྟེ། སེམས་ཀྱི་

སྤྱོད་པ་ཉམས་སུ་མྱོང་བའི་དབང་གིས་དགེ་བས་གལ་ཏེ་འཐབ་བྲལ་གྱི་ལྷ་རྣམས་སུ་སྐྱེའོ། །དེ་ལྷ་གཞན་རྣམས་ཀྱི་ཁྱད་པར་གྱིས་གཟུགས་དང་། ཆ་བྱད་དང་། རྒྱན་དང་། བུད་མེད་དང་། ཡུལ་ལྗོངས་དང་། ཟས་དམན་པ་རྣམས་ལ་སྤྱོད་པར་འགྱུར་རོ། །དེ་ཟས་ལ་ལོངས་སྤྱོད་

Vol. 70 · folio 102b

པའི་དུས་ན་ངོ་ཚ་བར་འགྱུར་རོ། །འདིའི་འོད་རྣམས་ཤིན་ཏུ་དམན་པར་ཡང་འགྱུར། འདོད་པའི་ལོངས་སྤྱོད་ཕུན་སུམ་ཚོགས་པ་རྣམས་ཐམས་ཅད་ཀྱང་ཤིན་ཏུ་དམན་པར་འགྱུར་རོ། །དོན་ཡོད་པ་དེ་ལེགས་པར་ཡོངས་སུ་རྫོགས་པའི་ཚུལ་ཁྲིམས་ཀྱི་འབྲས་བུ་དང་། གཞན་སྡོམ་

པ་ལ་གནས་པའི་ཚུལ་ཁྲིམས་འཛིན་པའི་ལྷ་རྣམས་ཀྱི་ཁྱད་པར་རོ། །གཞན་ཡང་དོན་ཡོད་པར་གྱུར་པའི་ཚུལ་ཁྲིམས་སུ་གྱུར་པ་ནི་སངས་རྒྱས་ལ་སོགས་པ་ལ་རབ་ཏུ་དང་བ་དང་ལྡན་ལ་སྡོམ་པ་ནི་ཉི་མ་གཅིག་ཀྱང་ངེས་པར་འཛིན་པར་མི་བྱེད་དེ། ལུས་ཀྱི་ལེགས་པར་སྤྱོད་པ་དང་

ཡང་དག་པར་ལྡན་པར་འགྱུར་ལ། ངག་གི་ལེགས་པར་སྤྱོད་པ་དང་ཡང་ཡང་དག་པར་ལྡན་པར་འགྱུར་རོ། །མ་ལུས་པ་མ་ཡིན་པར་རོ། །གང་ཞེ་ན། མ་ལུས་པ་མ་ཡིན་པས་ལུས་ཀྱི་ལེགས་པར་སྤྱོད་པས་སྲོག་གཅོད་པ་དང་། འདོད་པ་ལ་ལོག་པར་སྤྱོད་པ་གཉིས་རབ་ཏུ་སྤོང་

བར་བྱེད་ལ། ཡང་མ་བྱིན་པར་ལེན་པ་རྣམས་ནི་མ་ཡིན་ནོ། །དེ་དག་ནི་མ་ལུས་པར་ལེགས་པར་སྤྱོད་པར་བྱེད་པས་སྤྱོད་པ་ནི་མ་ཡིན་ནོ། །ངག་གི་ལེགས་པར་སྤྱོད་པ་རྣམས་ཀྱང་ཐམས་ཅད་དུ་ལེགས་པར་སྤྱད་པ་སྤྱོད་པ་མ་ཡིན་ཏེ། བརྫུན་འབའ་ཞིག་ཙམ་སྨྲ་བར་མི་བྱེད་ལ་

ངག་གི་དྲི་མ་རྣམས་ནི་མི་སྤོང་ངོ་། །དེ་ཡང་དོན་ཡོད་པ་གཅིག་ལེགས་པར་སྤྱད་པ་སྤྱོད་དོ། །གལ་ཏེ་དེ་སྲིད་པ་ཐ་མའི་སེམས་རབ་ཏུ་དང་བའི་དབང་གིས་ལན་གྲངས་གཞན་ལ་མྱོང་བར་འགྱུར་བའི་ལེགས་པར་བྱས་པའི་ལས་རྣམས་ཀྱི་རྐྱེན་གྱིས་འཐབ་བྲལ་བ་རྣམས་སུ་སྐྱེ་ལ་ཤིན་

ཏུ་དམན་པར་ཡང་མི་འགྱུར་ཏེ། སྔར་གྱི་དོན་ཡོད་པར་ལེགས་པར་སྤྱད་པ་སྤྱོད་པ་དེའི་དྲུང་ན་ཚད་དང་། མདོག་དང་། གཟུགས་དང་། ཆ་བྱད་རྒྱན་དང་། ཟས་དང་། སྤྱོད་པས་གནས་པ་རྣམས་དང་། འདོད་པའི་བུད་མེད་དང་། ཡུལ་ལྗོངས་རྣམས་ལ་རིམ་གྱིས་སྒྲ་

རེག་རོ་གཟུགས་དྲི་རྣམས་ལ་ཡང་སྟེ། སྡོམ་པ་དགེ་བ་སྤྱད་པའི་ཁྱད་པར་ཅན་གྱི་ལྷ་གཞན་རྣམས་ཀྱི་ཁྱད་པར་གྱིས་ནི་དེས་རང་ཉིད་དམན་པར་མངོན་པར་མཐོང་ནས་ངོ་ཚ་བར་འགྱུར་རོ། །གཞན་ཡང་དོན་ཡོད་པར་གྱུར་པའི་ཚུལ་ཁྲིམས་དང་ཡང་དག་པར་ལྡན་པ་ཡོད་

Vol. 70 · folio 103a

དེ། ཡང་དག་པའི་ལྟ་བ་ཅན་དུ་གྱུར་པ་དང་། ཐོས་པའི་རིགས་དང་ལྡན་པ་དང་། སངས་རྒྱས་ལ་སོགས་པ་ལ་གུས་པའི་རིགས་ཅན་དུ་འགྱུར་བའོ། །སྡོམ་པ་ནི་གཅིག་ཀྱང་འཛིན་པ་ཡང་མ་ཡིན་ནོ། །འོན་ཀྱང་ཚུལ་ཁྲིམས་འཆལ་པའི་ཐ་སྙད་ཀྱིས་

འཇིགས་ནས་མ་བྱིན་པར་ལེན་པར་མི་བྱེད་དོ། །སངས་རྒྱས་ཉིད་ཀྱིས་གསུངས་པའི་རྒྱུ་འཐུན་པའི་འབྲས་བུས་དབུལ་པོ་སྒྲུབ་པར་བྱེད་པ་དང་། མ་བྱིན་པར་ལེན་པས་དམྱལ་བ་རྣམས་སུ་ཡང་སྐྱེ་བར་འགྱུར་བ་ཐོས་པས་ཀྱང་སྐྱེ། འདོད་པ་ཅན་ཡིན་ཡང་འཇིགས་པ་ལ་

སོགས་པས་ལུས་ཀྱིས་རྟག་ཏུ་མ་བྱིན་པར་ལེན་པ་མི་ལེན་ཏོ། །ངག་གི་ལས་ཀྱང་ཕྲ་མ་བྱེད་པའི་རང་བཞིན་ཅན་མ་ཡིན་ནོ། །ཕན་ཚུན་དུ་འབྱེད་པར་མི་བྱེད་པ་དང་། བྱེ་བའི་སེམས་ཅན་རྣམས་ཀྱང་འབྱེད་པར་མི་བྱེད་དོ། །ལེགས་པར་འཛིན་པར་ཡང་བྱེད་དེ། ངང་ཚུལ་

ངན་པའི་འཇིགས་པ་དང་། སངས་རྒྱས་དང་སངས་རྒྱས་མ་ཡིན་པའི་གསུང་ཡང་ཉན་པར་བྱེད་དོ། །ཇི་ལྟར་ཕྲ་མའི་རྒྱུ་འཐུན་པའི་འབྲས་བུ་ནི་གྲོགས་པོ་དང་། བྲན་ཕོ་དང་། བྲན་མོ་དང་། ཆུང་མ་རྣམས་དང་འབྱེ་བར་འགྱུར་རོ། །ལུས་ཞིག་ནས་ཀྱང་ངན་སོང་ལོག་པར་ལྟུང་

བར་དམྱལ་བར་སྐྱེ་བར་འགྱུར་ཞེས་སངས་རྒྱས་དང་སངས་རྒྱས་མ་ཡིན་པ་རྣམས་ཀྱི་ཚིག་ཐོས་པ་དང་། རྒྱུ་གཉིས་པོ་འདི་དག་གིས་དེ་ཕྲ་མ་བྱེད་པའི་ངང་ཚུལ་ཅན་མ་ཡིན་ནོ། །དེ་ལུས་ཞི་གནས་སེམས་ཐ་མའི་དབང་གིས་དང་། ལས་ལན་གྲངས་གཞན་ལ་ལེགས་པར་

བྱས་པའི་དབང་གིས་ཀྱང་རུང་གལ་ཏེ་བརྒྱ་ལ་ན་ཞིང་ལ་རབ་ཏུ་དང་བ་མེད་པར་ཡང་བརྒྱ་ལ་ན་འཐབ་བྲལ་གྱི་ལྷ་རྣམས་ཀྱི་ནང་དུ་སྐྱེས་ན་དེ་ཆེས་དམན་པའི་ཚད་དང་། ཁ་དོག་དང་། དབྱིབས་སུ་འགྱུར་རོ། །བུད་མེད་དང་། ཡུལ་ལྗོངས་དང་། ཟས་དམན་པ་རྣམས་ལ་སྤྱོད་པར་

འགྱུར་རོ། །སྒྲ་དང་། རེག་བྱ་དང་། གཟུགས་དང་། རོ་དང་། དྲི་རྣམས་དམན་པར་འགྱུར་རོ། །ཚེ་ཤིན་ཏུ་དམན་པར་འགྱུར་རོ། །འོད་དམན་པར་འགྱུར་རོ། །ལྷ་གཞན་རྣམས་ཀྱི་དྲུང་དུ་ཤིན་ཏུ་ཡང་ངོ་ཚ་བ་འབྱུང་བར་འགྱུར་རོ། །དོན་ཡོད་པ་དེ་དག་གི་རབ་ཏུ་དང་བའི་དབང་

Vol. 70 · folio 103b

གིས་ལྷའི་སྐྱེ་བ་གསུམ་དུ་འགྱུར་ཏེ། སངས་རྒྱས་ལ་སོགས་པ་ལ་རབ་ཏུ་དང་བ་འབའ་ཞིག་གིས་དང་། དེ་ལྟར་སེམས་ཀྱི་ཡོན་ཏན་གྱི་ཁྱད་པར་རྣམས་ཀྱིས་སམ། སེམས་འཇམ་པོར་གྱུར་པའི་ཁྱད་པར་གྱིས་སམ། ཡང་དག་པའི་ལྟ་བ་ལ་རབ་ཏུ་དང་བའི་ཁྱད་པར་

གྱིས་སམ། བསམ་པ་ཉེ་བར་སྐྱེས་པའི་སེམས་ཀྱི་ཁྱད་པར་རྣམས་ཀྱང་འདི་ལྟ་སྟེ། མ་དང་ཕ་ལ་ཤིན་ཏུ་གུས་པ་དང་། ལེགས་པར་ཉན་པའམ། ཡོན་ཏན་གྱི་ཁྱད་པར་དག་གིས་སམ། སྨོན་ལམ་གྱི་ཁྱད་པར་དག་གིས་ཀྱང་སྟེ། ཇི་ལྟར་དེའི་སེམས་ཀྱི་རྒྱུད་དང་།

ཞིང་ལ་རབ་ཏུ་དང་བའི་དབང་གི་སེམས་ཀྱི་ཡོན་ཏན་དམན་པ་དང་། བར་མ་དང་། ཁྱད་པར་འཕགས་པའི་ལས་ཀྱི་ཁྱད་པར་གྱིས་རྣམ་པ་དེ་ལྟ་བུ་ཉིད་དུ་སྐྱེ་བར་འགྱུར་རོ། །གང་གི་ཕྱིར་དོན་དང་ལྡན་པའི་ཚུལ་ཁྲིམས་སླུ་བ་མེད་པའི་འབྲས་བུ་ཡང་ལས་རྣམས་དང་འདྲ་བ་ཡིན་ན་

སྡོམ་པ་འཛིན་པ་བཟུང་བས་མྱ་ངན་ལས་འདས་པའི་མཐར་ཐུག་པར་འགྱུར་བ་དེའི་དེ་ལྟར་འདིར་སྐྱེ་བར་འགྱུར་བ་ལ་ལྟ་སྨོས་ཀྱང་ཅི་དགོས། སྡོམ་པའི་ཚུལ་ཁྲིམས་དེ་དག་ཀྱང་རྣམ་པ་དུ་ཞིག་ཡོད་པ་ཡིན་ཞེ་ན། དེ་ལ་མདོར་བསྡུ་ན་འཁོར་བཞིའི་སྡོམ་པའོ། །དེ་དེར་གཏོགས་

པའི་བཞི་ནི་དགེ་སྦྱོང་དང་། དགེ་སྦྱོང་མ་དང་། དགེ་བསྙེན་དང་། དགེ་བསྙེན་མའི་སྟེ། དེ་དག་ནི་འཁོར་རྣམ་པ་བཞི་ཡིན་ནོ། །དེ་ལ་ཡང་དེ་དག་གི་སྡོམ་པ་ནི་གང་ཡིན། རྣམ་པ་ནི་དུ་ཞིག་ཡོད། དེ་དག་གི་སྡོམ་པ་རྣམས་ཐ་དད་པར་ནི་ཇི་ལྟར་འགྱུར་བ་ཡིན་ན། དེ་

ལ་དགེ་བསྙེན་མདོར་བསྡུ་ན་རྣམ་པ་བཞིའོ། །བཞི་པོ་རྣམས་གང་ཞེ་ན། ཕྱོགས་གཅིག་ལ་སྤྱོད་པར་གྱུར་པ་དང་། མཐར་ཐུག་པར་སྤྱོད་པ་དང་། ཐམས་ཅད་ལ་སྤྱོད་པ་དང་། བསླབ་པའི་གཞི་རྣམས་ལས་སྡོམ་པ་གཅིག་བླངས་པའོ། །མཐར་ཐུག་པར་སྤྱོད་པ་

ནི་བསླབ་པའི་གཞི་སྡོམ་པ་བླངས་པ་ལ་སྤྱོད་པའམ་ཕལ་ཆེར་ལ་གནས་ནས་སྤྱོད་པ་སྟེ། སྡོམ་པའི་གཞི་དེ་ཡང་ཡང་དག་པར་འཛིན་ཏོ། །ཐམས་ཅད་ལ་སྤྱོད་པ་ནི་བསླབ་པའི་གཞི་ལྔ་ཡང་དག་པར་འཛིན་པའོ། །གཞན་ཡང་རྣམ་པ་བཞི་སྟེ། སྔ་ཕྱིར་བསླབ་པའི་

Vol. 70 · folio 104a

གཞི་ལ་སྤྱོད་པ་དང་། ཀུན་ཏུ་ཉམས་པ་མེད་པར་སྤྱོད་པ་དང་། འགྱོད་ནས་སྤྱོད་པ་དང་། ཐམས་ཅད་ཀུན་ཏུ་ཉམས་པར་སྤྱོད་པའོ། །དེ་ལ་དགེ་བསྙེན་བསླབ་པའི་གཞི་ལ་སྔ་ཕྱིར་སྤྱོད་པ་ནི་གང་བསླབ་པའི་གཞི་རྒྱ་མཚོ་ལ་སྔ་ཕྱིར་བགྲོད་པར་བྱེད་པས་སྔ་

ཕྱིར་བགྲོད་པར་བྱེད་དོ། །དེ་དང་པོ་ཁོ་ནར་གསུམ་ལ་སྐྱབས་སུ་འགྲོ་བའི་དགེ་བསྙེན་དུ་འགྱུར་རོ། །ཕྱི་ནས་དུས་སྔ་ཕྱིར་སེམས་ཀྱིས་བསྒོམས་ནས་ཡོན་ཏན་ལེགས་པ་དང་ལྡན་པར་བྱས་ཏེ། བསླབ་པའི་གཞི་གཅིག་ལེགས་པར་འཛིན་ནོ། །དེ་ཡང་མ་ཉམས་པ། མ་ཆད་

པ། མ་ཟགས་པར་འཛིན་པར་བྱེད་དོ། །དེ་ལ་མ་ཉམས་པའི་རྣམ་པ་འདི་ལྟ་བུ་གང་ཡིན། མ་ཆད་པའི་རྣམ་པ་འདི་ལྟ་བུ་གང་ཡིན། མ་ཟགས་པའི་རྣམ་པ་དེ་ལྟ་བུ་གང་ཡིན་ན། མ་ཉམས་པ་ཞེས་བྱ་བ་ཇི་སྲིད་འཚོའི་བར་དུ་བདག་ཉིད་ཀྱིས་འཛིན་པ་སྟེ། སེམས་

ཀྱིས་ཀྱང་སྡོམ་པ་ལས་འདའ་བར་འགྱུར་བ་སེམས་པར་མི་བྱེད་དོ། །གཞན་བྱེད་པ་ན་ཡང་རྗེས་སུ་ཡི་རང་བར་མི་བྱེད་དོ། །བྱེད་པ་ཡང་འགོག་པར་བྱེད་དོ། །དེ་དག་རྣམས་ཆོས་ལ་ཡང་འགོད་པར་བྱེད་དོ། །འདི་ནི་མ་ཉམས་པ་ཞེས་བརྗོད་དོ། །དེ་ལ་མ་ཆད་པ་གང་ཞེ་ན།

དེ་ཉིད་ཀྱིས་འདིར་བརྒྱ་ལ་ན་བསླབ་པའི་གཞི་རྣམས་གཏོང་བར་བྱེད་དོ། །གལ་ཏེ་ན་འཛིན་པར་བྱེད་དོ། །ཡང་དང་ཡང་དུ་བཏང་ནས་སླར་ཡང་ལེན་པར་བྱེད་དོ། །རྣམ་པ་འདི་ལྟ་བུ་ནི་ཆད་པ་ཡིན་ནོ། །དེ་ལ་འདིས་ནི་ཆད་པ་དང་བྲལ་བར་བྱས་ཤིང་འཛིན་པར་བྱེད་དོ། །

ཇི་ལྟར་ན་མ་ཟགས་པ་འཛིན་པ་ཡིན་ཞིང་ཟགས་པ་ཡང་ཇི་ལྟར་ཡིན་ན། འདི་ནི་བསླབ་པའི་གཞི་ལ་དང་པོ་ཉིད་དུ་རབ་ཏུ་དང་བའི་སེམས་ཀྱིས་དགེ་བའི་བཤེས་གཉེན་གྱི་དྲུང་ནས་བཟུང་བ་ལས་དེ་ཕྱི་ནས་འགྱོད་པ་དང་བཅས་པར་གྱུར་ནས་མི་འཛིན་ནོ། །རྣམ་པར་རྟོག་པའི་ཆུ་

བོས་ཁྱེར་རོ། །དེ་སེམས་རྙོག་པ་དང་བཅས་པས་སྤྱོད་པར་བྱེད་དོ། །སེམས་ལ་སྟོབས་མེད་པར་འགྱུར་རོ། །དེ་ཕྱི་ནས་འགྱོད་པའི་མེས་སྲེག་པར་བྱེད་ལ། བསྲེགས་པར་གྱུར་ནས་ཀྱང་ཡོངས་སུ་གཏོང་ངོ་། །ཡོངས་སུ་བཏང་ནས་ཀྱང་ཕྱིར་མི་འཛིན་ཏོ། །འདི་ནི་

Vol. 70 · folio 104b

ཟགས་པ་ཞེས་བརྗོད་དོ། །དེས་འདི་ནི་དེ་བཞིན་དུ་མི་འཛིན་ཏོ། །གཞན་ཡང་སྔ་ཕྱི་བར་སྤྱོད་པའི་དགེ་བསྙེན་དེ་ཉིད་མ་ཉམས་པ་དང་། མ་ཆད་པ་དང་། མ་ཟགས་པར་བསླབ་པའི་གཞི་རྣམས་འཛིན་པར་བྱེད་པ་ལ། ཇི་ལྟར་མ་ཉམས་པ་ཡིན་ན། འདིར་སེམས་ལ་

དྲི་མ་མེད་པ་རྐོ་ཏྲོག་མ་ཡིན་པའི་དགེ་བར་གྱུར་ནས་ཀྱང་མི་དགེ་བར་འགྱུར་རོ། །ཆུ་ཤིང་གི་ལོ་མ་དང་གློག་དང་འདྲ་བར་དེ་རབ་ཏུ་རྔམ་པར་གྱུར་པའི་སེམས་ཀྱིས་དགེ་བའི་སེམས་སུ་གྱུར་ནས་སྡོམ་པ་འདི་འཛིན་པར་བྱེད་ལ། དེ་རབ་ཏུ་དང་བ་དང་། གུས་པ་དང་བཅས་པར་

ཡང་གྱུར་ནས། དེ་ཕྱིས་གལ་ཏེ་ཤེད་ན་མུ་སྟེགས་པའི་གནས་ནས་ཐོས་ན་འགྱོད་པར་གྱུར་ཏེ་རྙོག་པའི་བདག་ཉིད་དུ་གྱུར་ནས་གཏོང་ངོ་། །ཕྱིས་ཡང་དམ་པའི་ཆོས་ཐོས་ནས་འཛིན་པར་བྱེད་དོ། །འདི་ནི་ཉམས་པ་ཡིན་ནོ། །གཞན་ཡང་ཆད་པ་ཇི་ལྟར་ཆད་པར་འགྱུར་བ་

ཡིན། འདི་ནི་དགེ་བསྙེན་དག་གྱ་གྱུས་བསླབ་པའི་གཞི་འཛིན་པས་གལ་ཏེ་ན་ལྷ་རྣམས་མཆོད་པར་བྱེད་པ་ན་གལ་ཏེ་ཇི་ལྟར་སངས་རྒྱས་ཀྱིས་གསུངས་པའི་ཆོས་དེས་དགའ་བར་འགྱུར་བའམ། ཡང་ན་ལྷ་དེའི་ཚིག་གིས་བདག་ལ་བདེ་འགྲོར་འབྱུང་བར་འགྱུར་རོ། །དེ་ལྟ་

བུ་དེས་དོགས་པར་བྱས་ནས་ཆོས་སྤྱོད་པར་བྱེད་དེ་འདི་ནི་ཆད་པ་ཞེས་བརྗོད་དོ། །གཞན་ཡང་ཟགས་པ་གང་ཞེ་ན། འདི་ན་ནང་སྟོང་པར་གྱུར་པ་རྣམས་ཕྱི་རོལ་ན་སེམས་དགེ་བ་བཞིན་དུ་གཞན་རྣམས་ལ་མཚོན་པར་བྱེད་དོ། །དེ་ཡང་ནང་རུལ་བར་གྱུར་ཀྱང་ཡིད་ཆེས་པ་བསྐྱེད་

པའི་དོན་དུ་བསླབ་པའི་གཞི་རྣམས་འཛིན་པར་བྱེད་དོ། །འདི་ནི་ནང་སྟོང་པ་ཡིན་ནོ། །སྔ་ཕྱིར་བསླབ་པའི་གཞི་ལ་སྤྱོད་པའི་དགེ་བསྙེན་དེས་འདི་སྤོང་བར་བྱེད་པ་ཡིན་ནོ། །དེ་ལ་ཇི་ལྟར་ན་ཐུན་ཚགས་སུ་སྤྱོད་པའི་དགེ་བསྙེན་ཡིན་ན་འདི་ལ་བསླབ་པའི་གཞི་གཅིག་བླངས་

ནས་དུས་བར་ཆོད་པར་གྱུར་པ་ན་དེ་རྣམ་པར་དཔྱོད་པ་པོར་གྱུར་ནས་བསླབ་པའི་གཞི་གཞན་འཛིན་པར་བྱེད་དོ། །དེ་ལྟར་སྔ་ཕྱི་རིམ་པས་དེའི་དུས་ཀྱི་སེམས་བསྐྱེད་པ་གཅིག་གིས་བླ་མ་གཅིག་མ་ཡིན་པའི་དྲུང་ནས་དེ་ལྟར་ཐུན་ཚགས་སུ་གྱུར་པའི་བསླབ་པའི་གཞི་རྣམས་སྔ་

Vol. 70 · folio 105a

ཕྱིའི་དུས་སུ་འཛིན་ནོ། །འདི་ནི་སྔ་ཕྱིར་བསླབ་པ་སྤྱོད་པའི་དགེ་བསྙེན་ཞེས་བྱའོ། །གཞན་ཡང་དགེ་བསྙེན་གཉིས་པ་ཡོད་དེ། ཕྱེད་ཉམས་པར་སྤྱོད་པ་ཞེས་བྱའོ། །ཕྱེད་ཉམས་པར་སྤྱོད་པ་གང་ཞེ་ན། འདི་ན་བསླབ་པའི་གཞི་རྣམས་དུས་

གཅིག་ཏུ་ནི་མི་འཛིན་ལ་ཅི་སྟེ་ན་གཉིས་ནི་སྔར་རོ། །དུས་བར་དུ་ཆོད་པར་གྱུར་པས་གསུམ་ནི་ཕྱི་ནས་སོ། །ཇི་སྟེ་ན་གསུམ་ནི་སྔར་རོ། །ཕྱི་ནས་གཉིས་འཛིན་ནོ། །ལེན་པར་ཡང་བྱེད་དོ། །འདི་ལ་ནི་ཕྱེད་ཉམས་པ་སྤྱོད་པ་ཞེས་བྱ་སྟེ། བསླབ་པའི་གཞི་ཕྱེད་

ཉམས་པར་གྱུར་པའི་རྒྱུ་གང་ཡིན་པས་སོ། །ཕྱེད་ཉམས་པ་རྣམ་པར་ཡང་འཛིན་ཏོ། །འདི་ལ་ནི་ཕྱེད་ཉམས་པར་སྤྱོད་པའི་དགེ་བསྙེན་ཞེས་བརྗོད་དེ་གཉིས་པའོ། །འགྱོད་པ་དང་བཅས་ནས་འཛིན་པར་འགྱུར་བའི་དགེ་བསྙེན་གསུམ་པ་གང་ཞེ་ན། སྔར་བསླབ་

པའི་གཞི་འཛིན་པར་མི་བྱེད་ལ་དོན་ཡོད་པའི་རབ་ཏུ་དང་བ་འབའ་ཞིག་གིས་སངས་རྒྱས་ལ་སོགས་པ་ལ་རབ་ཏུ་དང་བར་འགྱུར་རོ། །དེ་གལ་ཏེ་ཤེད་ན་དགེ་སློང་རྣམས་ཀྱི་དྲུང་ནས་སྡོམ་པའི་འབྲས་བུ་མྱ་ངན་ལས་འདས་པའི་མཐར་ཐུག་པར་འགྱུར་བ་ཐོས་པར་འགྱུར་

ལ་འབྲས་བུ་དེ་ཐོས་ནས་ཀྱང་འགྱོད་པའི་མེས་སྲེག་པར་གྱུར་པས་གུས་པ་དང་བཅས་པར་གྱུར་ནས་ཇི་སྲིད་འཚོའི་བར་དུ་བསླབ་པའི་གཞི་རྣམས་འཛིན་པར་བྱེད་དོ། །འགྱོད་པ་དང་བཅས་པའི་དགེ་བསྙེན་ཞེས་བྱ་བ་ནི་འདི་ལ་བརྗོད་པ་ཡིན་ནོ། །གཞན་ཡང་དགེ་བསྙེན་བཞི་པ་ཡོད་

དེ། ཐམས་ཅད་ཀུན་ནས་ཚོགས་པར་སྤྱོད་པའོ། །ཐམས་ཅད་ཀུན་ནས་ཚོགས་པར་སྤྱོད་པར་གྱུར་པའི་དགེ་བསྙེན་གང་ཞེ་ན། འདི་ན་དམ་པའི་ཆོས་རྣམས་ལ་ཐོས་པ་དང་ལྡན་པར་གྱུར་ནས་ཚིག་དང་ཚིག་ཏུ་གྱུར་པ་རྣམས་དང་། གནས་རྣམས་དང་། མདོ་དང་མདོ་

རྣམས་ལས་རྟེན་ཅིང་འབྲེལ་བར་འབྱུང་བའི་ཆོས་རྣམས་ཀྱང་རྟོགས་ནས་སེམས་འཇོག་པར་བྱེད་ཅིང་དད་པ་དང་ལྡན་པར་གྱུར་པ་དང་། དབང་པོ་དུལ་བས་སྡོམ་པ་ཐམས་ཅད་འཛིན་པར་བྱེད་དེ། དུས་འདིར་བསླབ་པའི་གཞི་ལྔ་ཀ་ཡོངས་སུ་རྫོགས་པར་འཛིན་པར་བྱེད་དོ། །

Vol. 70 · folio 105b

ལེགས་པར་འཛིན་པར་བྱེད་དོ། །མ་ཉམས་པ་དང་། མ་ཆད་པ་དང་། མ་ཟགས་པར་ཇི་སྲིད་འཚོའི་བར་དུ་འཛིན་པར་བྱེད་དོ། །དེ་ལ་སྔར་བཤད་པའི་དགེ་བསྙེན་བཞི་པོ་དེ་དག་རྣམས་དང་ཕྱིས་ཀྱི་བཞི་པོ་རྣམས་ཏེ། དེ་ལས་དེ་དག་རྣམས་ཀྱི་དམན་པ་དང་། བར་

མ་དང་། ཁྱད་པར་དུ་འཕགས་པ་ནི་རིམ་པ་ཇི་ལྟ་བ་བཞིན་དུ་སྔར་གྱི་མཆོག་དང་། འདིར་ནི་ཀུན་ནས་ཚོགས་པར་སྤྱོད་པ་ཡིན་ནོ། །ཐམས་ཅད་ལས་ཉུང་བ་ནི་སྔ་ཕྱིར་བསླབ་པའི་གཞི་ལ་སྤྱོད་པའོ། །ཐམས་ཅད་ལས་ཉུང་བར་གྱུར་པའི་དགེ་བསྙེན་སྐད་ཅིག་ཙམ་

སྡོམ་པ་འཛིན་པར་བྱེད་པ་དེའི་ཡང་གཞལ་དུ་མེད་པ་ཡིན་པས་ན་གཞན་ལྷ་རྣམས་དང་བདུད་ལ་སོགས་པ་དང་། དབང་པོ་རྣམས་ཀྱིས་ཀྱང་མཚུངས་པར་འགྱུར་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པས་ཡོངས་སུ་བསྡུས་པའི་ངོ་བོ་ཡིན་པའི་ཕྱིར་རོ། །

ལྷ་དེ་དག་རྣམས་ཐམས་ཅད་ཀྱང་མྱ་ངན་ལས་འདས་པའི་གྲོང་ཁྱེར་དུ་འགྲོ་བ་མ་ཡིན་པའི་ཕྱིར་རོ། །སྡོམ་པ་སྔོན་དུ་འཛིན་པ་ནི་སའི་གནོད་སྦྱིན་གྱིས་སྔོན་ལ། ལེགས་པར་མངོན་པར་མཐོང་ནས་མཆོད་པར་བྱེད་དོ། །ཕྱག་འཚལ་བར་བྱེད་དོ། །བར་སྣང་ལ་རྒྱུ་བའི་

གནོད་སྦྱིན་གྱིས་མངོན་པར་མཐོང་ནས་མཆོད་པར་བྱེད་དོ། །ཕྱག་འཚལ་བར་བྱེད་དོ། །ཆོས་དང་ལྡན་པའི་བསམ་པས་ཀྱང་འདི་ལ་ལྷན་ཅིག་ཞབས་འབྲིང་བྱེད་ཅིང་འགྲོའོ། །ལྷ་རྣམས་ལ་ཡང་གོ་བར་བྱེད་དོ། །མཐོང་བའི་ཆོས་ཀྱི་འབྲས་བུ་ཡང་རྒྱལ་པོ་དང་རྒྱལ་པོའི་

བློན་པོ་རྣམས་ཡུལ་གྱི་བདག་པོ་དག་གིས་ཀྱང་མཆོད་པར་བྱེད་དོ། །དེ་དག་རྣམས་ཀྱིས་ཡང་ལེགས་པར་སྦྱོར་བར་བྱེད་དོ། །གང་ཡང་འདི་ཕྱི་བཞིན་དུ་ལྷ་རྣམས་ཉེ་བར་གནས་པར་གྱུར་པས་དེ་རྫུ་འཕྲུལ་ཆེ་བར་འགྱུར་བ་དང་། སྟོབས་ཆེ་བར་འགྱུར་རོ། །གནོད་སྦྱིན་

ཆོས་བྱེད་པ་མ་ཡིན་པ་གཞན་རྣམས་ཀྱིས་ཀྱང་ཐོ་བཙམ་པར་མི་ནུས་སོ། །གང་གི་ཚེ་སེམས་ཁྲལ་མང་པོ་སྣ་ཚོགས་པ་ཡོད་པར་གྱུར་པ་དེ་དག་རྣམས་ཀྱང་འདིས་བདེ་བར་འགྲུབ་པར་འགྱུར་རོ། །འདིའི་ལས་ཀྱི་མཐའ་རྣམས་ཀྱང་ཚེགས་མེད་པར་འགྲུབ་པར་འགྱུར་

Vol. 70 · folio 106a

རོ། །ནད་རྣམས་ཀྱིས་ཀྱང་ཤིན་ཏུ་བར་ཉོན་མོངས་པར་མི་འགྱུར་རོ། །འདིའི་བཞིན་གྱི་མདངས་ཀྱང་གསལ་བར་འགྱུར་རོ། །བདེ་བར་གཉིད་ལོག་ནས་སད་པར་འགྱུར་རོ། །བུ་དང་། བྲན་ཕོ་དང་། བྲན་མོ་དང་ལས་བྱེད་པ་རྣམས་དང་། ཞོ་ཤས་འཚོ་

བ་རྣམས་ཀྱང་ལེགས་པར་འཛིན་པར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོ་ལྷའི་འཇིག་རྟེན་རྣམས་སུ་སྐྱེའོ། །ལྷ་རྣམས་ཀྱི་ནང་ན་ཡང་ཚད་དང་། མདོག་དང་། དབྱིབས་རྣམས་ཇི་ལྟར་སྡོམ་པ་བཟུང་བ་དེ་ཆེས་གཙོ་བོར་འགྱུར་རོ། །དེ་ལྟར་སྡོམ་པ་བཟུང་

བའི་ལས་ཀྱི་དབང་གིས་འབྲས་བུ་ཤིན་ཏུ་ཆེ་བར་གྱུར་པ་གང་དག་གིས་དགེ་བ་ཉེ་བར་བསྐྱེད་ནས་ཀྱང་བག་མེད་པར་གྱུར་པས་འཐབ་བྲལ་དུ་ཟད་པར་བྱེད་པ་རྣམས་ནི་སེམས་ལས་ཀྱི་དྲ་བས་ཀུན་ནས་ཉེ་བར་བཅིངས་པའི་སེམས་ཅན་རྣམས་ལས་ཀྱི་དབང་གིས་དམྱལ་བ་དང་། ཡི་

དགས་དང་། དུད་འགྲོ་རྣམས་སུ་སྐྱེའོ། །དེའི་ཕྱིར་དེ་ཉིད་ལ་ཇི་སྲིད་དུ་འཕགས་པའི་ཕྱག་རྒྱར་རྒྱུན་མ་ཆད་ཀྱི་བར་དུ་བསམ་པར་བྱའོ། །གང་ཡང་སེམས་ཀྱི་དབང་གིས་བག་མེད་པར་བསྟེན་པའི་ལྷ་རྣམས་ནི་འཆི་འཕོའི་དུས་ན་ཤིན་ཏུ་འགྱོད་པར་འགྱུར་རོ། །དགེ་བའི་ལས་

རྣམས་ཡོངས་སུ་ཟད་ན་དམྱལ་བ་དང་། ཡི་དགས་དང་། དུད་འགྲོ་རྣམས་སུ་འགྲོའོ། །དེའི་ཕྱིར་ན་རིངས་པ་རིངས་པར་བག་མེད་པ་ཉིད་དུ་མ་བྱེད་ཅིག །དགེ་བསྙེན་རྣམས་མཐོང་བའི་ཆོས་ལ་སྐྱོ་བ་བསྐྱེད་པའི་སྡུག་བསྔལ་ནི་བཞི་པའོ། །གང་ཡང་བྱ་བ་རྣམས་ལ་སྤྲོ་

བར་གྱུར་པ་དེ་ནི་མྱ་ངན་ལས་འདས་པའི་མཐར་ཐུག་པར་འགྱུར་རོ། །དེ་ལྟར་འཁོར་རྣམ་པ་གཅིག་ཡིན་ཏེ་སངས་རྒྱས་རྣམས་ཀྱི་དགེ་བསྙེན་གྱི་འཁོར་རོ། །དགེ་བསྙེན་མའི་འཁོར་རྣམས་ནི་གང་ཡིན། དགེ་བསྙེན་མའི་འཁོར་ཡང་རྣམ་པ་ནི་དུ་ཡིན་ན། སངས་རྒྱས་རྣམས་

ཀྱི་དགེ་བསྙེན་མ་ནི་རྣམ་པ་བཞི་སྟེ། དེ་ནི་དད་པ་ཅན་དང་། རིགས་སུ་རིམ་གྱིས་སྐྱེས་པ་དང་། བཏུལ་བ་དང་། གནས་ལྷན་ཅིག་ཏུ་བྱས་པ་དང་རྣམས་སོ། །དེ་ལ་དད་པ་དང་ལྡན་པའི་དགེ་བསྙེན་མ་དེ་གང་ཞེ་ན། དེ་སྐྱེ་བ་གཞན་དུ་ལེགས་པར་བསྒོས་པའི་རྒྱུད་

Vol. 70 · folio 106b

དང་། བསྒོས་པའི་སེམས་དང་། འཇམ་པོར་སེམས་བསྒོམས་པ་དང་། ལེགས་པར་བསྒོས་པའི་རྒྱུད་དང་ལྡན་པས་སངས་རྒྱས་ཀྱི་གསུང་རབ་ཅུང་ཟད་ཙམ་ཡང་ཐོས་ནས་ལེགས་པར་རྟོགས་སོ། །ཡོངས་སུ་རིག་པར་འགྱུར་རོ། །རོ་མྱོང་བར་བྱེད་དོ། །འཇུག་པར་ཡང་བྱེད་

དོ། །དེའི་སེམས་ཆོས་འདུལ་བ་དེ་ལ་ཤིན་ཏུ་ལེགས་པར་གནས་པར་བྱས་ནས་སྡོམ་པ་ལེན་ལ་འཛིན་པར་ཡང་བྱེད་དོ། །བུད་མེད་ཀྱི་སེམས་ཀྱིས་ཀྱང་མི་འཕྲོག་གོ། །གཞན་མུ་སྟེགས་ཅན་གྱི་ཚིག་ཉེ་བར་རྙེད་པས་ཀྱང་སེམས་མི་འཕྲོགས་སོ། །གཞན་མུ་སྟེགས་ཅན་རྣམས་དང་

ལྷན་ཅིག་ཏུ་གླེང་སླངས་ཀྱང་མི་བྱེད་དོ། །སངས་རྒྱས་ལ་སོགས་པ་འབའ་ཞིག་ལ་སེམས་ཤིན་ཏུ་རབ་ཏུ་དང་བར་འགྱུར་རོ། །བསླབ་པའི་གཞི་ལྔ་ཀ་ཡང་དུས་གཅིག་ཉིད་དུ་པུས་མོ་བཙུགས་ནས་ལེན་ནོ། །དགེ་བསྙེན་མ་འདི་ནི་དད་པ་ཅན་ཞེས་བྱའོ། །དེ་ལ་དགེ་བསྙེན་མ་

རིགས་སུ་རིམ་གྱིས་སྐྱེས་པ་གང་ཞེ་ན། འདི་ན་རིགས་སུ་གྱུར་པ་ནི་བཟང་པོ་ཆོས་བྱེད། ཆོས་སྐྱབས་གནས་སུ་བྱེད་པ། ཆོས་སྐྱོབ་པར་བྱེད་པ། ཆོས་དཔུང་གཉེན་དུ་བྱེད་པ། ཆོས་ཀྱི་རིགས་རྒྱུད་ཅན། ཆོས་ལ་སྙིང་པོར་བྱེད་པ། ནེམ་ནུར་མེད་པར་སྤྱོད་པ། རྒོལ་བ་

གཞན་རྣམས་ཀྱིས་ནམ་ཡང་ཉེ་བར་འཇོམས་པར་མི་འགྱུར་བ། རྟག་ཏུ་དགེ་བསྙེན་གྱི་ཁྱིམ་དུ་འགྱུར་བ་དང་། སངས་རྒྱས་ལ་སོགས་པ་རྣམས་ལ་ཡང་ཤིན་ཏུ་བར་རབ་ཏུ་དང་བར་འགྱུར་རོ། །དེ་དག་གི་རིགས་སུ་བུ་མོ་གང་སྐྱེས་པ་དེ་རིགས་སུ་རིམ་གྱིས་སྐྱེས་པ་ནས་

བཟུང་ནས་དེ་སངས་རྒྱས་ཀྱི་གསུང་རྣམས་ཉན་ནོ། །ཉན་པ་ལས་རྙེད་ནས་དེའི་དོན་དུ་གཅིག་ཏུ་དེ་ལ་ཉན་ནོ། །དེ་རྟག་ཏུ་ལུས་བསྒོམས་པར་གྱུར་པའི་རྒྱུད་ཅན་རྒྱུད་ཡོངས་སུ་བསྒོམས་པར་གྱུར་པའི་དགེ་བསྙེན་མའོ། །དེ་ལ་བཏུལ་བ་ཞེས་བྱ་བའི་དགེ་བསྙེན་མ་གང་

ཞེ་ན། གང་དང་པོ་ཉིད་ནས་དད་པ་དང་ལྡན་པར་གྱུར་པ་ལ་སངས་རྒྱས་ལ་སོགས་པ་ལ་ནི་རབ་ཏུ་དད་པར་མ་གྱུར་པའོ། །དེ་གལ་ཏེ་དགེ་བའི་བཤེས་གཉེན་དང་བསྟེན་པས་དད་པ་སྐྱེད་པར་བྱེད་ལ་དེས་དེ་ལ་བསྟེན་པས་བྱས་པའི་ཡོན་ཏན་གྱིས་སྡོམ་པ་ཡང་ཡོངས་སུ་

Vol. 70 · folio 107a

རྫོགས་པའམ། ཕྱོགས་གཅིག་པའམ། སྣ་འགའ་སྤྱོད་པ་རྣམས་ཀྱང་འཛིན་པར་བྱེད་དོ། །དགེ་བསྙེན་མ་བཏུལ་བ་ཞེས་བྱ་བ་ནི་དེ་ཡིན་ནོ། །དེ་ལ་དགེ་བསྙེན་མ་གནས་ལྷན་ཅིག་ཏུ་བྱས་པ་ཞེས་བྱ་བ་དེ་གང་ཡིན་ན། འདི་ན་གང་ཡང་གཞན་མུ་

སྟེགས་ཅན་དང་ལྷན་ཅིག་ཏུ་བརྗོད་པར་གྱུར་ལ་དེ་དག་དང་ཡང་ལྷན་ཅིག་ཏུ་གནས་པར་བྱེད་ལ་དེ་དག་གི་སྤྱོད་ལམ་རྣམས་ཀྱང་ཉེ་བར་འཛིན་པར་བྱེད་དོ། །ཉེ་བར་བཟུང་ནས་ཀྱང་གལ་ཏེ་དགེ་སྦྱོང་ཉེ་བར་འོངས་པར་གྱུར་ན་དེ་དེ་དག་རྣམས་ཀྱི་སྤྱོད་ལམ་ཡང་ཉེ་བར་འཛིན་པར་བྱེད་དོ། །

དེ་ཡང་ཁྱད་པར་དུ་གྱུར་པ་ཁོ་ནའི་དབྱིབས་སུ་གྱུར་པ་དང་། ཟས་ལ་སྤྱོད་པ་དང་། ཆོས་གོས་གྱོན་པ་དང་། འགྲོ་བ་དང་འོང་བའི་ཡོན་ཏན་རྣམས་རབ་ཏུ་ཞི་བའི་སྤྱོད་ལམ་མཐོང་ནས་སྐྱབས་སུ་འགྲོ་བའི་རིམ་གྱིས་གཞན་མུ་སྟེགས་ཅན་རྣམས་དང་། དགེ་སྦྱོང་རྣམས་

ལས་ཁྱད་པར་དུ་འཕགས་པ་ལེགས་པར་གྱུར་པ་སངས་རྒྱས་ལ་སོགས་པ་ལ་རབ་ཏུ་དང་བ་དང་དེས་གདུལ་བ་ཡང་ཡིན་ལ་སྡོམ་པ་ཡང་འཛིན་པར་བྱེད་དོ། །འདི་ནི་གནས་ལྷན་ཅིག་ཏུ་བྱས་པ་ཞེས་བྱ་བའི་དགེ་བསྙེན་མ་ཡིན་ནོ། །དེ་རྣམས་ཀྱང་བཞི་བཞི་དགེ་བསྙེན་

དང་། དགེ་བསྙེན་མ་རྣམས་ཡིན་ལ་དགེ་བསྙེན་མ་བཞི་མདོར་བསྡུས་ནས་ནི་རྣམ་པར་གཞག་པ་ཡིན་ལ། གལ་ཏེ་ཤེད་ན་མོས་པའི་དབང་དང་མོས་པའི་དབང་གིས་དང་། སེམས་ཀྱི་རྒྱུད་ཀྱི་དབང་གིས་དང་། རྐྱེན་གྱི་དབང་གིས་ཀྱང་གང་ཁོ་ན་སྔར་བརྗོད་པའི་

དགེ་བསྙེན་རྣམས་ཀྱིས་དགེ་བསྙེན་མ་ལ་ཡང་འགྱུར་རོ། །ཆོས་འདུལ་བའི་རྐྱེན་གྱིས་དགེ་བསྙེན་མ་ལ་ཡིན་པ་ནི་སྔར་བཤད་པའི་དགེ་བསྙེན་ལ་ཡང་འཇུག་པ་ཡིན་ནོ། །སེམས་ཀྱི་རྒྱུད་ཀྱི་དབང་གིས་དེ་ཡང་འདྲེན་མར་སྤྱོད་པ་ཞེས་བྱའོ། །དགེ་བསྙེན་དང་དགེ་

བསྙེན་མ་དེ་དག་ཐམས་ཅད་ཀྱང་དགེ་བའི་སྐལ་བ་ཅན། ཡང་དག་པའི་ལྟ་བ་ཅན། ཡང་དག་པའི་ལྟ་བ་སྔོན་དུ་བཏང་བ་རྣམས་དམན་པ་དང་། བར་མ་དང་། ཁྱད་པར་དུ་འཕགས་པའི་སེམས་ཀྱིས་རྒྱུད་ཀྱིས་ལུས་ཞིག་པ་ན། མཐོ་རིས་བདེ་འགྲོ་ལྷའི་རིས་རྣམས་

Vol. 70 · folio 107b

ཀྱི་འཇིག་རྟེན་དམན་པ་དང་། བར་མ་དང་། ཁྱད་པར་དུ་འཕགས་པ་རྣམས་སུ་སྐྱེའོ། །དེ་ལ་འགའ་ཞིག་ནི་འཐབ་བྲལ་གྱི་ལྷ་རྣམས་གང་དག་གི་ནང་དུ་སྐྱེ་སྟེ། དེ་ཇི་ལྟར་ཚུལ་ཁྲིམས་ཀུན་ཏུ་སྤྱད་ཅིང་ཉེ་བར་བསགས་པར་གྱུར་པའི་རྣམ་པ་དེ་ལྟ་བུར་འགྱུར་རོ། །དེ་བཞིན་

དུ་ལྷ་རྣམས་ཀྱི་རིས་གཞན་དུ་ཡང་ཚུལ་ཁྲིམས་དགེ་བར་གྱུར་པ་གང་དག་ཁོ་ནས་ཉེ་བར་བསྐྱེད་པར་གྱུར་ནས་ལྷ་རྣམས་བག་མེད་པར་སྤྱོད་པར་འགྱུར་ཏེ། ཅི་སྲིད་ཐ་མར་འཕགས་པའི་ཕྱག་རྒྱ་ཐོབ་པར་གྱུར་པ་དེ་སྲིད་ན་ཕྱིར་ཡང་སྤྱོད་པ་ནི་མ་ཡིན་ནོ། །དེ་དག་རྣམས་བསོད་ནམས་

ཟད་ནས་ཕྱིས་ཡང་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེའོ། །བསོད་ནམས་ཟད་པར་གྱུར་པ་ཡང་བག་མེད་པའི་སྐྱོན་གྱིས་ཡིན་ལ་གང་ཡང་བག་མེད་པས་བག་མེད་པར་སྤྱོད་པ་མ་ཡིན་པ་དེ་ནི་བདེ་བ་ནས་བདེ་བའི་གོ་འཕང་དུ་འགྲོ་སྟེ། དེའི་ཚུལ་ཁྲིམས་

དེ་ལེགས་པར་བསྒོམས་པ་དང་ཤིན་ཏུ་རྣམ་པར་དག་པར་གྱུར་པའི་གཟི་བརྗིད་ཀྱིས་ཡིན་ནོ། །དེའི་ཕྱིར་ན་བག་མེད་པས་ཅུང་ཟད་ཀྱང་མ་གནས་ཤིག །བག་མེད་པ་རྣམས་ནི་དུག་དང་འདྲ་བའོ། །བྱིས་པའི་སྐྱེ་བོ་ཐམས་ཅད་རབ་ཏུ་འཇོམས་པར་བྱེད་པ་དོན་ཐམས་ཅད་

རླག་པར་བྱེད་པ་འཁོར་བ་ཐམས་ཅད་དུ་འཆིང་བར་བྱེད་པ་ཡིན་ནོ། །དེ་ལྟ་བས་ན་བག་མེད་པ་རྣམས་ནི་ལྷའམ་མི་རྣམས་ཀྱིས་ཀྱང་མི་བྱའོ། །གང་ཡང་ལྷ་དང་མི་རྣམས་ཀྱང་རུང་སྟེ། རྣམ་པ་དེ་ལྟ་བུའི་ཚུལ་ཁྲིམས་ཀྱིས་མཛེས་པར་གྱུར་ནས་སྐྱེ་བོ་རྣམས་བག་མེད་པའི་

སྐྱོན་གྱིས་འདའ་བར་བྱེད་པ་དེ་ནི་ཤིན་ཏུ་བསླུས་པའི་རྙེད་པ་ཅན་དུ་འགྱུར་ནས། ངན་འགྲོར་གྱུར་པའི་འཁོར་བར་ཡང་དུས་ཡུན་རིང་དུ་ཡང་འཁོར་བར་ཡོངས་སུ་འཁྱམ་པར་འགྱུར་རོ། །དེ་ལྟར་མུ་སུ་ལུན་དྷ་འདིས་ལྷ་དེ་དག་རྣམས་ལ་སྟོན་པར་བྱེད་དོ། །གང་སེམས་ཅན་རྣམས་

ལ་ཐུགས་བརྩེ་བ་པོ་བཅོམ་ལྡན་འདས་དེས་ལྷ་དང་མི་རྣམས་ལ་ཕན་པའི་དོན་དུ་རྫུ་འཕྲུལ་མཛད་ནས་སྤྲུལ་པའི་མཆོད་རྟེན་ན་བྱང་བུ་ལ་བྲིས་པ་དེ་ཐོས་ནས་ཀྱང་ལྷ་རྣམས་ཤིན་ཏུ་ཡིད་བྱུང་བར་གྱུར་པས་ཀྱང་འཁོར་བ་ལ་སྐྱོ་བ་སྐྱེའོ། །བག་མེད་པ་རྣམས་ཀྱང་དུག་བཞིན་དུ་སྤོང་ངོ་། །

Vol. 70 · folio 108a

དགེ་བསྙེན་དང་དགེ་བསྙེན་མའི་རྣམ་གྲངས་རྣམས་ནི་བཤད་ནས་དགེ་སྦྱོང་གི་འཁོར་རྣམས་ནི་གང་དག་ཡིན། རྣམ་པ་ནི་དུ་ཡོད། ཡོན་ཏན་ནི་ཅི་ཡིན། ཅིས་གནས་པ་ཡིན། སྡོམ་པ་ཇི་ལྟ་བུ་ཡིན། དགེ་སྦྱོང་རྣམས་ཀྱི་སྡོམ་པ་སྐྱེ་བའི་རྣམ་པ་རྣམས་ནི་

དུ་ཞིག་ཡོད་ཅེ་ན། བཅོམ་ལྡན་འདས་ཀྱི་དགེ་སྦྱོང་མ་དང་། དགེ་སྦྱོང་གང་དག་ཀྱང་མྱ་ངན་ལས་འདས་པའི་དོན་དུ་སྤྱོད་པར་བྱེད་པ། ཉིན་དང་མཚན་དུ་བསམ་གཏན་བྱེད་པ་དང་། བརྩོན་འགྲུས་རྩོམ་པས་བདུད་ཀྱི་འཁོར་རྣམས་རྣམ་པར་སྐྲག་པར་བྱེད་པར་གྱུར་པ་དེ་དག་

རྣམས་ལ་དགེ་སྦྱོང་མ་རྣམ་པ་དུ་ཡོད་ན་མཁས་པ་གསལ་བ་དུལ་བ། འཇིགས་པ་མེད་པ་མྱ་ངན་ལས་འདས་པའི་གྲོང་ཁྱེར་དུ་འགྲོ་བ་པོ་དེ་ཁོ་ན་ཉིད་ལ་རྗེས་སུ་དཔྱོད་པར་གྱུར་པ་རྣམས་ཀྱིས་ཀྱང་ཚུལ་ཁྲིམས་དང་ལྡན་པར་གྱུར་ནས་རྗེས་སུ་དཔྱོད་པར་གྱུར་ན་ནི་མྱ་ངན་ལས་

འདས་པའི་གྲོང་ཁྱེར་དུ་འཇུག་པར་ནུས་པ་ཡང་ཡིན་ནོ། །འདི་ན་བུད་མེད་ཡོན་ཏན་ཇི་ལྟ་བུ་རྣམས་དང་ལྡན་པ་ཡིན་ན་སྦྱོར་བ་རྣམས་ཐམས་ཅད་ཉིད་ལ་མཆོག་ཏུ་གྱུར་པ་ཐམས་ཅད་དུ་མུན་པ་རྣམས་སོ། །དེ་བཞིན་དུ་གྱུར་པ་ལས་དང་པོ་ཁོ་ན་ཐམས་ཅད་ཉིད་ནས་དེ་ཁོ་ན་ཉིད་

ལ་སོ་སོར་རྟོག་པར་བྱེད་དེ། སྐྱེས་པ་དང་བདག་ཉིད་ཀྱི་ལུས་ལ་ཡང་སྟེ་དེས་སྐྱེས་པ་ན་སོ་མཉམ་པ་རྣམས་དང་། མཉམ་པ་བས་ལྷག་པ་རྣམས་མཐོང་ནས་སྤུན་དང་བུའི་འདུ་ཤེས་ཀྱིས་སྒོམ་པར་བྱེད་དོ། །དེ་ལ་དེ་དག་རྣམས་ནི་དགེ་སྦྱོང་གི་རྩ་བ་རྣམ་པ་གསུམ་ཡིན་པ་ལ་འདི་

ལྟ་སྟེ། སྦྱོར་བ་ལས་བར་དུ་གཅོད་པར་བྱེད་པའི་བློའོ། །ཉིན་མོ་དང་མཚན་མོར་རམ། གཉིད་ལོག་པ་དང་སད་པ་རྣམས་སམ། དོན་གཞན་ལ་རབ་ཏུ་ཆགས་པའི་བྱིས་པ་རྣམས་སམ། གཞོན་ནུ་རྣམས་སམ། རྒན་པོ་རྣམས་སམ། མཉམ་པར་གནས་པ་རྣམས་སམ།

མི་མཉམ་པར་གནས་པ་རྣམས་སམ། སྐྱིད་པར་གྱུར་པ་རྣམས་སམ། ནད་མེད་པ་རྣམས་སམ། ནད་པ་རྣམས་སམ། འབད་པ་དང་བཅས་པ་རྣམས་སམ། བརྩོན་འགྲུས་དམན་པ་རྣམས་སམ། བསྲུངས་པ་རྣམས་སམ། རིགས་ལ་ལེགས་པར་གནས་པ་རྣམས་

Vol. 70 · folio 108b

སམ། བསྲུངས་པ་དང་རིགས་མཉམ་པ་རྣམས་སམ། གཟུགས་བཟང་བ་རྣམས་སམ། གཟུགས་ངན་པ་རྣམས་སམ། ལམ་ན་གནས་པ་རྣམས་སམ། ཁྱིམ་ན་གནས་པ་རྣམས་སམ། ཡུལ་ལྗོངས་གང་བའི་གསེབ་ཏུ་སོང་བ་རྣམས་སམ། ཁང་པ་སྟོང་པ་ན་

གནས་པ་རྣམས་སམ། ཆ་བྱད་བཟང་བ་རྣམས་སམ། ཆ་བྱད་ངན་པ་རྣམས་སམ། བག་ཡངས་སུ་གནས་པ་རྣམས་སམ། བཙོན་ཁང་ན་བཅིངས་པ་རྣམས་སམ། བདག་པོས་བསྐྱངས་པ་རྣམས་སམ། བྱིས་པ་ནས་བསྐྱངས་པ་རྣམས་སམ། བླ་མ་དང་ཉེ་

བའམ་འོག་མ་རྣམས་དང་ཉེ་བ་ཡང་རུང་དེ་བཞིན་དུ་ན་ཚོད་མཉམ་པས་རྗེས་སུ་འཐུན་པ་རྣམས་དང་། ཉེ་བའམ་ནད་ཀྱིས་ལྷག་པར་གཟིར་བ་རྣམས་ཀྱང་རུང་སྟེ། དེ་དག་རྣམས་ཉིད་ཐམས་ཅད་ལ་ཡང་བུད་མེད་རྣམས་ཉིད་རྟག་ཏུ་བདག་ཉིད་ཐམས་ཅད་ཀྱིས་དང་། དུས་

ཐམས་ཅད་དང་། གནས་སྐབས་ཐམས་ཅད་དུ་རྟག་པ་ཁོ་ནར་འདོད་ཆགས་སྙིང་ལ་ཀུན་ཏུ་བཅིངས་པས་རྗེས་སུ་འཇུག་པར་བྱེད་དོ། །དཔེར་ན་ཉི་མ་ནི་འོད་དང་ལྡན་ལ་མེས་ནི་སྲེག །ས་གཞི་ནི་སྲ། རླུང་ནི་ཡང་ཞིང་གཡོ་བ་ཉིད། ཆུ་ནི་རླན་ཞིང་གཤེར་བར་གྱུར་པ་

རྣམས་ལ་ཡང་ཇི་ལྟར་འབྱུང་བ་ཆེན་པོ་བཞིའི་རང་གི་མཚན་ཉིད་མཐར་ཐུག་པའི་བློ་འབྱུང་བར་འགྱུར་རོ། །དེ་ལྟར་བུད་མེད་རྣམས་ཐམས་ཅད་དུ་ཡང་དུས་ཐམས་ཅད་དུ་རྟག་པར་འདོད་ཆགས་རྗེས་སུ་འབྲེལ་པ་འདོད་ཆགས་ཕྱི་བཞིན་རྗེས་སུ་འབྲང་བ་ཡིན་ནོ། །དེ་ཉིད་ལས་དྲི་

མ་གཞན་གཉིས་འབྱུང་སྟེ། འདི་ལྟར་ཕྲག་དོག་དང་སེར་སྣའོ། །དེ་དག་གཉིས་ལས་རྗེས་སུ་འབྲང་བ་ནི་དྲི་མ་ལྷན་ཅིག་སྐྱེས་པ་གཅིག་ཡིན་ཏེ། འདི་ལྟ་སྟེ། གཡོའོ། །དེའི་རྗེས་སུ་འགྲོ་བ་དྲི་མ་གཞན་འདི་ལྟ་སྟེ། སླུ་བར་བྱེད་པའོ། །དེའི་རྗེས་སུ་འབྲང་བའི་དྲི་མ་གཞན་

རྣམས་ནི་འདི་ལྟ་སྟེ། སྲིད་པ་ལས་མི་འབྲལ་བའོ། །དེའི་རྗེས་སུ་འབྲང་བ་དྲི་མ་གཞན་རྣམས་ནི་དབྱིབས་ལེགས་པ་ལ་རྗེས་སུ་ཆགས་པར་འགྱུར་ཞིང་མི་མཉམ་པར་གནས་པ་རྣམས་སྤོང་བའོ། །དེའི་རྗེས་སུ་འབྲང་བ་དྲི་མ་གཞན་རྣམས་ནི་རྩབ་ཧྲལ་ཅན་ནོ། །དེའི་རྗེས་སུ་

Vol. 70 · folio 109a

འགྲོ་བ་དྲི་མ་གཞན་རྣམས་ནི་རྟག་ཏུ་རང་གི་སྐྱེ་བོ་དང་རྩ་ལག་རྣམས་དང་ལྷན་ཅིག་ཏུ་འཐབ་རྩོད་བྱེད་པའོ། །དེའི་རྗེས་སུ་འགྲོ་བ་དྲི་མ་གཞན་རྣམས་ནི་རྟག་ཏུ་འབྱེད་པའི་སྤྱོད་པ་ལ་ངེས་པར་སྤྲོ་བའོ། །དེའི་རྗེས་སུ་འབྲང་བ་དྲི་མ་གཞན་རྣམས་ནི་རྒྱབ་ཀྱི་ཤ་ཟ་བར་

བྱེད་པའོ། །དེའི་རྗེས་སུ་འགྲོགས་པའི་དྲི་མ་རྣམས་ནི་བགྲོད་པར་བྱ་བ་མ་ཡིན་པ་བགྲོད་པའོ། །དེའི་རྗེས་སུ་འབྲང་བ་དྲི་མ་གཞན་རྣམས་ནི་ཡིད་ཆེས་པ་མི་སྐྱེ་བའོ། །དེའི་རྗེས་སུ་འབྲང་བ་དྲི་མ་གཞན་རྣམས་ནི་བུད་མེད་གཞན་རྣམས་ལ་དབྱེ་བའི་སྤྱོད་པ་སློབ་པར་བྱེད་པའོ། །

དེའི་རྗེས་སུ་སོང་བའི་དྲི་མ་གཞན་རྣམས་ནི་གང་ལ་ཡང་དགའ་བ་མེད་པའོ། །དེའི་རྗེས་སུ་འཇུག་པའི་དྲི་མ་གཞན་རྣམས་ནི་གསུས་པ་བསྐྱོད་པར་བྱེད་པའོ། །དེའི་རྗེས་སུ་འཇུག་པའི་དྲི་མ་གཞན་རྣམས་ནི་ཡུལ་ལྗོངས་རྣམས་འཇིག་པར་བྱེད་པའོ། །དེའི་རྗེས་སུ་འཇུག་པའི་དྲི་

མ་གཞན་རྣམས་ནི་མུན་པ་ནས་མུན་པའི་ཁྲོད་དུ་གྱུར་པ་དམྱལ་བ་རྣམས་ཁོ་ནར་འགྲོ་བ་ཡིན་པའི་ཕྱིར་ན་འཆིང་བ་དང་། དུག་དང་། མཚོན་དང་། གཡང་ས་དང་། མེ་དང་། ངམ་གྲོག་དང་། སྦྲུལ་ལ་སོགས་པ་དང་འདྲ་བ་ནི་བུད་མེད་རྣམས་ཡིན་ནོ། །གལ་ཏེ་ཤེད་ན་དཀོན་

མཆོག་གསུམ་མཐོང་བ་དང་། བསྙད་པ་དང་། སངས་རྒྱས་ཀྱི་ཆོས་བསྒྲགས་པས་ཀྱང་སེམས་འཇམ་པོར་བྱས་པར་གྱུར་ན་དེའི་གཉེན་པོ་རྣམས་ནི་འདིར་ཤིན་ཏུ་ངོ་མཚར་བ་ཡིན་ཏེ། རྣམ་པ་དེ་ལྟ་བུར་མ་བགྲུངས་པའི་སྐྱེ་བོ་རྣམས་ཀྱང་གང་གི་ཕྱིར་ཐབས་ཀྱི་རིམ་པ་རྣམས་ཀྱིས་

རང་གི་རྒྱུད་སྦྱོང་བར་འགྱུར་ཞིང་གཞན་རྣམས་ཀྱི་རྒྱུད་ཀྱང་སྦྱོང་བར་བྱེད་པར་འགྱུར་རོ། །དད་པས་རབ་ཏུ་བྱུང་བས་ལེགས་པར་སྦྲེལ་བར་གྱུར་པས་དགེ་བ་བསྒོམས་པའི་རྒྱུད་ཀྱི་ངོ་བོར་གྱུར་པའམ། དེ་ཡང་ན་དགེ་བའི་བཤེས་གཉེན་རྣམས་ལ་བསྟེན་པས་ཀྱང་རུང་སྟེ། དེ་ཇི་

སྐད་བཤད་པའི་སྐྱོན་གྱི་མུན་པའི་ཚོགས་རྣམས་ཐོག་མ་མེད་པའི་དུས་ནས་སེམས་ཀྱི་རྗེས་སུ་འབྲེལ་པ་རྣམས་རྣམ་པར་འཇིག་པར་འགྱུར་བ་ནི་ཇི་ལྟར་ཉི་མ་ཤར་བར་གྱུར་པ་ན་རིའི་ཕུག་དང་གསེབ་རྣམས་སུ་ཞུགས་པའི་མུན་པའི་ཚོགས་གནས་དུ་མ་རྣམས་ན་གནས་པ་རྣམས་འཇོམས་

Vol. 70 · folio 109b

པར་འགྱུར་རོ། །དེ་བཞིན་དུ་དམ་པའི་ཆོས་ཀྱི་ཉི་མའི་གཏམ་རྣམས་གླེང་སླངས་པར་གྱུར་ན་སྐྱོན་གྱི་རི་བོ་རྣམས་ངེས་པར་རྣམ་པར་འཇིག་པར་འགྱུར་རོ། །དེའི་ཕྱིར་ན་རྣམ་པ་དེ་ལྟ་བུ་རྣམས་རབ་ཏུ་འབྱུང་བར་འདོད་པ་དང་། དགེ་སྦྱོང་མ་རྣམས་ཀྱིས་དང་པོ་ཁོ་ནར་སྐྱེས་བུ་དམ་

པ་མ་ཡིན་པ་རྣམས་ལ་བསྟེན་པར་མི་བྱའོ། །གང་ཇི་སྐད་དུ་བསྟན་པའི་ཡང་དག་པའི་གཉེན་པོར་གྱུར་པ་དེ་དག་རྣམས་ནི་དགེ་བའི་བཤེས་གཉེན་དེས་སྟོན་པ་ཡིན་པའི་རྒྱུའི་ཕྱིར་རོ། །ལམ་དམ་པར་རབ་ཏུ་འཇོག་པར་ཡང་བྱེད་དོ། །སྡུག་བསྔལ་རྣམས་ལས་རྣམ་པར་

གྲོལ་བར་བྱས་ནས་བདེ་བ་ལ་འཇོག་པར་བྱེད་དོ། །ལེགས་པའི་ལམ་ཡང་རབ་ཏུ་སྟོན་པར་བྱེད་དོ། །ཐོག་མ་མེད་པའི་དུས་ནས་འཇུག་པ་ཅན་གྱི་མུན་པ་རྣམས་ཀྱང་འཇོམས་པར་བྱེད་དོ། །དགེ་བའི་ལམ་སྲང་རྣམས་ཀྱང་ཉེ་བར་འདོམས་པར་བྱེད་དོ། །དུས་རིང་པོ་

ནས་རང་ཉིད་དམ་པར་ཟུག་པའི་འདོད་ཆགས་ལ་སོགས་པའི་ཟུག་རྔུ་རྣམས་གཏན་ནས་འདོན་ནོ། །སྲེད་པའི་ངམ་གྲོག་ཏུ་སོང་བ་རྣམས་ལས་ཡོངས་སུ་སྐྱོབ་པར་བྱེད་དོ། །རྟག་པར་རྒ་བ་མེད་པ་འཆི་བ་མེད་པའི་གྲོང་ཁྱེར་གྱི་བདེ་བའི་གོ་འཕང་ཡང་ལེགས་པར་སྟོན་

ནོ། །དེའི་ཕྱིར་ན་དྲི་མ་དེ་དག་རྣམས་ལས་གོ་བཟློག་པའི་ཚིག་དེ་རྣམས་བདག་གིས་བསྟན་པར་བྱའོ། །སྔ་ཕྱིའི་རིམ་པ་ཇི་ལྟ་བ་བཞིན་དུ་ཡོངས་སུ་བསྒྲགས་པ་རྣམས་གོ་རིམས་ཇི་ལྟ་བ་བཞིན་དུ་དྲི་མ་རྣམས་དེ་ལས་བཟློག་པ་རྣམས་ཀྱིས་རབ་ཏུ་འཇོམས་པར་འགྱུར་རོ། །

འདི་དག་རྣམས་ཐམས་ཅད་ནི་དེ་ཁོ་ན་བཞིན་དུ་བུད་མེད་རྣམས་ལ་ཡིན་གྱི་སྐྱེས་པ་རྣམས་ལ་ནི་ཕལ་ཆེར་མ་ཡིན་ན། བུད་མེད་རྣམས་ལ་ནི་ཕྲག་དོག་དང་སེར་སྣ་དག་ཕལ་ཆེ་བ་ཡིན་ནོ། །དེ་དག་རྣམས་ལ་ནི་ལུགས་དང་འཐུན་པ་ལ་ལུགས་ལས་བཟློག་པས་

གཉེན་པོར་འགྱུར་བ་དང་། འཁོར་བ་ལ་ངེས་པར་འབྱིན་པར་ཡང་འགྱུར་རོ། །འདོད་ཆགས་ལྷག་པའི་བུད་མེད་དེ་རྣམས་ལ་མི་སྡུག་པའི་གཉེན་པོས་ཡང་དག་པ་ཇི་ལྟ་བ་བཞིན་དུ་ལུས་ལ་ལྟ་བ་ནི་ནད་ཀྱི་གནས་མི་གཙང་བ་རྣམས་ཀྱི་ཕུང་པོ་ཐམས་ཅད་ཀྱང་

Vol. 70 · folio 110a

བཤང་བའི་གནས་ཀྱི་ཕུང་པོར་གྱུར་པ་དེ་ལ་ལུས་དེ་ཉིད་ལ་རེ་ཞིག་རང་གིའམ་གཞན་གྱི་ཡང་རུང་སྟེ། ལུས་ཀྱི་རང་གི་མཚན་ཉིད་ལ་རབ་ཏུ་དཔྱོད་པར་བྱེད་དེ། ལུས་འདི་ཅི་ལས་བྱུང་བར་འགྱུར་ན་ཁུ་ཆུ་དང་ཁྲག་གཉིས་ཀྱི་མི་གཙང་བའི་ཕུང་པོ་ལས་བསྐྱེད་ཅིང་

ཡོངས་སུ་གྱུར་པ་གཉིས་ཀྱིས་བདག་གི་ལུས་བསྐྱེད་པ་ཡིན་པར་དེས་མཐོང་ངོ་། །དེས་ཀྱང་ལུས་གཟུགས་ངན་པ་དང་མི་གཙང་བ་སྟེ། དེས་ཡང་ལུས་དེ་ཉིད་ལ་སོ་སོར་རྟོག་པར་བྱེད་དོ། །གསོན་པའི་ལུས་འདི་ནི་མི་གཙང་བ་ཡིན་ན་གལ་ཏེ་བདག་ཅག་གི་ལུས་དེ་ལ་གཙང་མར་གྱུར་

པ་ཅུང་ཟད་ཙམ་ཅིག་ཡོད་དམ་བྱ་བར་རོ། །གཞན་ཡང་དེས་དེ་ཁོ་ན་ཉིད་ཚོལ་ཞིང་ལྟ་བར་བྱེད་པ་ན་ལུས་འདི་ནི་རྨ་དགུ་ནས་མི་གཙང་བ་རྣམས་ཡོངས་སུ་འཛག་པ་ཡིན་ནོ། །བུད་མེད་རྣམས་དང་སྐྱེས་པ་རྣམས་ལ་ཡང་དགུ་ཡིན་ནོ། །དགུ་པོ་རྣམས་ཀྱང་གང་ཞེ་ན། ཉེ་བར་འབྱུང་བ་

ལྷག་པར་གྱུར་པ་ནི་བུད་མེད་རྣམས་ཡིན་པ་འདི་ལྟ་སྟེ། ཉེ་བར་གནས་པའི་ནུ་མ་གཉིས་པོ་ལས་སོ། །བཤང་བ་དང་གཅི་བ་དང་སྣའི་བུ་ག་དག་ལས་སྣབས་ཡོངས་སུ་འབབ་བོ། །མིག་གཉིས་ལས་ནི་མཆི་མའོ། །རྣ་བ་གཉིས་ལས་ནི་དྲི་མའོ། །ཁ་ནས་ནི་ཁྲག་དང་

རྣག་གོ། །དྲི་ངན་པ་དང་ལྡན་པ་རླུང་དང་། མཁྲིས་པ་དང་། བད་ཀན་དང་། ཁྲག་དང་། བཤང་བ་རྣམས་དང་དེ་ལྟ་བུ་ལ་སོགས་པ་མི་གཙང་བ་གཞན་ཡང་བརྒྱ་ཕྲག་ལུས་ལས་ཡོངས་སུ་འབབ་པ་རྣམས་དེ་ཁོ་ན་ཉིད་བསྒོམས་པས་ཡང་དག་པ་ཇི་ལྟ་བ་བཞིན་དུ་མཐོང་ངོ་། །

བདག་ཅག་གིས་ལུས་ལ་གཙང་མར་གྱུར་པ་ནི་ཅུང་ཟད་དམ་བག་ཙམ་ཡང་མི་འབབ་ན་དེ་ལ་སུ་ཞིག་ལུས་འདི་ལེགས་པར་འཛིན་པར་བྱེད། གང་ཡང་རྟེན་འདི་དང་ཕྲད་ནས་གཙང་མ་དེ་དག་རྣམས་ཀྱང་ལུས་འདི་མི་གཙང་བའི་དབང་གིས་གཞན་ཉིད་ཁོ་ནར་འགྱུར་བར་དེས་ཡང་དག་

པར་སོ་སོར་རྟོག་པར་བྱེད་པ་ན་གང་དག་རྣམས་ཁོ་ན་ལུས་འདི་དང་འབྲེལ་པར་གྱུར་པ་གཙང་མ་རྣམས་ཐམས་ཅད་ཀྱང་དེ་ཁོ་ན་བཞིན་དུ་མི་གཙང་བར་འགྱུར་བར་མཐོང་ངོ་། །དཔེར་ན་གལ་ཏེ་འདིས་ཟས་དང་སྐོམ་བསོད་པ་རྣམས་ཐམས་ཅད་མེད་པར་གྱུར་ལ། ལུས་དེ་དང་འགྲོགས་

Vol. 70 · folio 110b

པས་ཕྱི་སར་འབྱུང་བར་འགྱུར་རོ། །དེ་བཞིན་དུ་ཟོས་པ་རྣམས་ཀྱང་དེ་ལྟར་ནང་དུ་ཐམས་ཅད་དུ་མི་གཙང་བར་བྱེད་པ་ཡིན་ནོ། །ཕྱི་རོལ་དུ་ཡང་ལུས་འདི་དང་སྤྲད་པ་ལས་གཙང་བ་དེ་རྣམས་འདིས་མི་གཙང་བར་བྱེད་དེ། དཔེར་ན་དྲིས་སྒོ་བར་བྱེད་པའི་དྲི་རྣམས་ཐམས་

ཅད་ཀྱང་ལུས་དང་བརྟེན་པ་ན་རྔུལ་གྱི་སྐྱོན་གྱིས་དྲི་མི་ཞིམ་པར་འགྱུར་རོ། །དེ་བཞིན་དུ་དྲི་ཞིམ་པོའི་མེ་ཏོག་རྣམས་ཐམས་ཅད་ཀྱང་ལུས་དང་བརྟེན་པས་རྙིངས་པ་དང་དྲི་མི་ཞིམ་པར་ཡང་འགྱུར་རོ། །དགེ་སློང་མ་དེ་དེ་ལྟར་གཞན་ཡང་དེ་ཁོ་ན་ལྟར་ལུས་ལ་སོ་སོར་རྟོག་པར་བྱེད་པ་

གང་གིས་ལུས་འདི་ངེས་པར་འཛིན་པ་མའི་ཐ་སྙད་ཀྱིས་ཀྱང་ལུས་འདི་ཡིན་ན་ལུས་འདི་གཙང་ངམ། ཅི་སྟེ་མི་གཙང་བ་ཞིག་ཡིན། དེ་ནས་དགེ་སློང་མ་སོ་སོར་དཔྱད་པར་གྱུར་པ་ན་རིགས་རྒྱུད་རྣམས་ཀྱི་མ་གང་ཡིན་པ་དེ་ཡང་ལུས་སྤྱིར་མི་གཙང་བ་ཡིན་པར་མཐོང་ངོ་། །

གཞན་ཡང་དགེ་སློང་མ་དེས་གང་ལ་ཡང་ལུས་འདི་གནས་པའམ་འདུག་པའི་ས་ཕྱོགས་རྣམས་དང་ཡུལ་ཕྱོགས་དག་ཅི་གཙང་བར་འགྱུར་རམ། མི་གཙང་བ་ཡིན་ཞེས་ལུས་དེ་ཉིད་ལ་སོ་སོར་རྟོག་པར་བྱེད་དོ། །དེས་ཡང་དེ་ལྟར་སོ་སོར་བརྟགས་པར་གྱུར་པ་ན་མཆོག་ཏུ་གཙང་

བ་ཤིན་ཏུ་ཁྱད་པར་དུ་འཕགས་པའི་ཡུལ་ཕྱོགས་གང་དག་ལ་ལུས་འདི་ཤི་བའམ། གསོན་པ་ཡང་རུང་སྟེ་བཞག་པར་གྱུར་པ་ན་སྲིན་བུ་དང་། དྲི་མ་དང་། སྐྲ་དང་། རུས་པ་དང་བཅས་པ་ཡིན་པས་ཡུལ་ཕྱོགས་ཐམས་ཅད་ཀྱང་དྲི་མི་ཞིམ་པར་ལུས་དང་འབྲེལ་པས་

འགྱུར་བར་ཡང་དག་པ་ཇི་ལྟ་བ་བཞིན་དུ་མཐོང་། གཞན་ཡང་ལུས་དེ་ཉིད་ལ་དགེ་སློང་མ་དེས་འདོད་ཆགས་སྤང་བར་བྱ་བའི་ཆེད་དུ་སོ་སོར་རྟོག་པར་བྱེད་དེ། ལུས་འདི་གང་གིས་ཟ་བར་བྱེད་དེ། བྱ་བ་རྣམ་པ་དེ་ལྟ་བུ་དག་གིས་དེ་སོ་སོར་རྟོག་པར་གྱུར་པ་ལས་སྲིན་པོ་དང་

ཤ་ཟ་ལ་སོགས་པ་མི་གཙང་བར་གྱུར་པ་རྣམས་ཉིད་ལས་གཞན་རྣམས་གང་ཞིག་གིས་འདི་ཟ་བར་བྱེད། ངང་པ་དང་། ཀཱ་རཎྜ་བ་དང་། ངང་ངུར་པད་མ་གཙང་མ་ལ་སྟེན་པ་རྣམས་ཀྱིས་ནི་མ་ཡིན་ནོ། །ཞེས་ཡང་དག་པ་ཇི་ལྟ་བ་བཞིན་དུ་མཐོང་ངོ་། །དེ་ཡང་ལུས་

Vol. 70 · folio 111a

འདི་ཉིད་ལ་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་པ་ན་མཐོང་བ་འདི་ནི་ཡང་དག་པ་མ་ཡིན་པར་འཛིན་པ་འབའ་ཞིག་པ་ཕྱིན་ཅི་ལོག་ཏུ་གྱུར་པའི་རྟོག་པ་ཚུལ་བཞིན་མ་ཡིན་པ་ཡིད་ལ་བྱེད་པས་ལོང་བར་འགྱུར་ཞིང་སྐྱེས་པ་དང་བུད་མེད་ཞེས་བྱ་བའི་མིང་

ཙམ་འདི་ལས་ཀྱང་དེ་བདེན་པ་ཡིན་པར་སྙིང་ལ་སྐྱེ་བར་མཐོང་ངོ་། །དེས་དེ་ལྟར་ངེས་པར་རྟོགས་ནས་ཚུལ་བཞིན་ཡིད་ལ་བྱེད་པས་སོ་སོར་རྟོག་པར་བྱེད་དོ། །དེའི་ཚེ་འདིའི་འདོད་ཆགས་ཐམས་ཅད་ཀྱང་སྤོང་བར་འགྱུར་རོ། །ཆུང་བར་འགྱུར་རོ། །རྩ་བ་ནས་རླག་པར་

འགྱུར་ཏེ། གང་གི་ཕྱིར་འདི་ཐམས་ཅད་ཀྱི་རྩ་བ་ཡང་འདི་ལྟ་སྟེ། བུད་མེད་ཀྱི་འདོད་ཆགས་ཞེས་བྱ་བ་ཡིན་ལ། དྲི་མ་གཞན་རྣམས་དེ་ལས་འབྱུང་བ་སྤོང་བ་ཡང་དེ་སྤངས་པ་གཉེན་པོར་གྱུར་པས་སྤོང་བ་ཡིན་ནོ། །ཉི་མ་འདི་གནས་པར་གྱུར་པའི་དུས་ན་མི་རྣམས་

ཀྱི་འཇིག་རྟེན་གྱི་འོད་རྣམས་ཀྱང་ནུབ་པར་མི་འགྱུར་ལ། དེ་བཞིན་དུ་འདི་ཡང་ཤིན་ཏུ་ལྷག་པར་གྱུར་པའི་རྩ་བ་ཡིན་ཏེ། དྲི་མ་དེ་བཅོམ་པ་ལས་ཀྱང་དྲི་མ་གཞན་རྣམས་ཀྱང་རབ་ཏུ་བཅོམ་པར་འགྱུར་རོ། །དེ་ལ་གང་ཡང་དགེ་སློང་མ་འདིས་ལམ་འདི་ནས་འདོད་ཆགས་རབ་ཏུ་

འཇོམས་པར་བྱེད་དོ། །དེའི་ཚེ་འདིའི་དེ་རབ་ཏུ་བཅོམ་པ་ལས་གཞན་ལྷན་ཅིག་སྐྱེས་པ་རྣམས་རབ་ཏུ་བཅོམ་པ་གང་ཞེ་ན། འདི་ལྟ་སྟེ། ཕྲག་དོག་དང་སེར་སྣའོ། །ཕྲག་དོག་དང་སེར་སྣ་ནི་འདོད་ཆགས་ཅན་ལ་འབྱུང་བ་ཡིན་ནོ། །སྐྱེས་པའམ་བུད་མེད་ཀྱང་རུང་སྟེ། འདོད་

ཆགས་ཀྱི་རྩ་བ་ལས་ཆོས་དེ་དག་གཉིས་སོ། །དེ་ཡང་འདོད་ཆགས་རབ་ཏུ་སྤངས་པའམ་བསྲབས་པར་བྱས་པས་ཀྱང་དེ་དག་གཉིས་ཀྱང་བསྲབས་པར་འགྱུར་རོ། །དེ་དག་གཉིས་ལས་ཀྱང་དྲི་མ་གཞན་ཕྱི་བཞིན་ཁོ་ནར་རྗེས་སུ་འབྲེལ་པ་འདི་ཡང་གང་ཞེ་ན། འདི་ལྟ་སྟེ། གཡོའོ། །

གཡོ་ནི་ཕྲག་དོག་དང་སེར་སྣ་གཉིས་ཀྱི་རྒྱུ་དག་གིས་བསྐྱེད་པ་ཡིན་ཏེ། དེ་དག་མེད་པར་གྱུར་ན་དེ་ཡང་མེད་པར་འགྱུར་རོ། །གཡོའི་སྟེང་དུ་དྲི་མ་གཞན་འདི་ལྟ་སྟེ། སླུ་བར་བྱེད་པའོ། །ཕྲག་དོག་དང་སེར་སྣ་མེད་པར་གྱུར་ན་སླུ་བར་མི་བྱེད་པར་འགྱུར་རོ། །སླུ་བའི་ཕྱི་བཞིན་

Vol. 70 · folio 111b

དུ་དྲི་མ་གཞན་ཡོད་པ་ནི་འདི་ལྟ་སྟེ། སྲེད་པར་གནས་པའོ། །དེ་བཅོམ་པར་གྱུར་ན་མི་འབྱུང་སྟེ། དེ་ལས་སྲེད་པར་གནས་པ་ཉིད་མི་འབྱུང་ངོ་། །དེ་མེད་པར་གྱུར་པས་མཉམ་པར་གནས་པ་རྣམས་འདོད་ཆགས་པར་བྱེད་པ་དང་། མི་མཉམ་པར་གནས་པ་རྣམས་སྤོང་

བར་བྱེད་པ་མི་འབྱུང་ངོ་། །དེ་མེད་པས་གང་གི་ཕྱི་བཞིན་འབྲང་བའི་དྲི་མ་གཞན་དེ་ཡང་མི་འབྱུང་ངོ་། །འདི་ལྟ་སྟེ། རྩབ་ཧྲལ་དུ་གྱུར་པའོ། །རྩབ་ཧྲལ་མེད་པས་མེད་པར་གྱུར་པ་ནི་འདི་ལྟ་སྟེ། རྩོད་པ་དང་རྣམ་པར་འབྱེད་པ་རྣམས་ཏེ། བུད་མེད་རྣམས་ནི་ཕལ་ཆེར་ཡང་

དབྱེན་བྱ་བའི་བསམ་པ་ཅན་རྣམས་ཡིན་ནོ། །བུད་མེད་རྣམས་ཀྱི་དེ་མེད་པས་དྲི་མ་གཞན་ཕྱི་བཞིན་རྗེས་སུ་འབྲང་བ་ཡང་མེད་པར་འགྱུར་རོ། །གང་ཞེ་ན། འདི་ལྟ་སྟེ། རྒྱབ་ཀྱི་ཤ་ཟ་བའོ། །བུད་མེད་རྣམས་ཕྱི་བཞིན་རྣམ་པར་དབྱེ་བའི་བསམ་པ་ཅན་ཡིན་པ་གང་གི་ཕྱིར་

དེ་དག་རྣམས་ཐམས་ཅད་ཀྱིས་ཀྱང་རྒྱབ་ཀྱི་ཤ་ཟ་བར་བྱེད་དོ། །གང་གི་ཚེ་རྣམ་པར་འབྱེད་པ་དེ་སྤངས་པར་གྱུར་པ་དེའི་ཚེ་རྒྱབ་ཀྱི་ཤ་ཟ་བ་སྤངས་པར་འགྱུར་རོ། །དེ་མེད་པར་གྱུར་པས་གཞན་ཕྱིའི་བཞིན་རྗེས་སུ་འབྲེལ་བ་ཡང་མེད་པར་འགྱུར་རོ། །གང་ཞེ་ན། འདི་ལྟ་སྟེ།

གསུས་པ་སྐྱོད་པར་བྱེད་པའོ། །བུད་མེད་རྣམས་ནི་གསུས་པ་འགེངས་པ་དང་། གཉིས་སྦྱོར་བ་ལ་ཆེད་དུ་བྱེད་པར་འགྱུར་རོ། །འདི་ལྟ་སྟེ། གསུས་པ་འགེངས་པའི་དྲི་མ་རབ་ཏུ་ཞི་བར་གྱུར་པ་ན་དེའི་ཚེ་བགྲོད་པར་བྱ་བ་མ་ཡིན་པ་བགྲོད་པའི་དྲི་མ་རབ་ཏུ་སྤངས་པར་

འགྱུར་རོ། །གང་གི་ཕྱིར་གསུས་པ་འགེངས་པའི་སྐྱོན་གྱིས་བུད་མེད་དག་བགྲོད་པར་བྱ་བ་མ་ཡིན་པའི་སྐྱེས་པ་རྣམས་ལ་ཡང་བགྲོད་པར་བྱེད་དོ། །འདི་ལྟ་སྟེ། གསུས་པ་འགེངས་པའི་འདོད་ཆགས་དང་རབ་ཏུ་བྲལ་ན། དེའི་ཚེ་བགྲོད་པར་བྱ་བ་མ་ཡིན་པའི་དྲི་མ་དེ་

ཡང་རབ་ཏུ་ཞི་བར་འགྱུར་རོ། །དེ་མེད་པས་ཀྱང་དྲི་མ་གཞན་ཡང་མེད་པར་འགྱུར་བ་ནི་འདི་ལྟ་སྟེ། ཡིད་ཆེས་པའི་གནས་མ་ཡིན་པའོ། །བགྲོད་པར་བྱ་བ་མ་ཡིན་པ་བགྲོད་པ་གང་གི་ཕྱིར་ན་བུད་མེད་དེ་དག་རྣམས་ལ་ནི་སྐྱེ་བོ་ཐམས་ཅད་དོགས་པ་སྐྱེ་བར་འགྱུར་ཏེ།

Vol. 70 · folio 112a

སྐྱེ་བོ་ཐམས་ཅད་ཀྱང་དགའ་བར་འཛིན་པ་དང་བྲལ་བར་འགྱུར་རོ། །བགྲོད་པར་བྱ་བ་མ་ཡིན་པ་དེའི་རྗེས་སུ་འབྲེལ་པའི་དྲི་མ་ལྷན་ཅིག་སྐྱེས་པར་ཕྱི་བཞིན་རྗེས་སུ་སྦྲེལ་བ་གཞན་ནི་སྤྱོད་པ་འབྱེད་པའོ། །སྤྱོད་པ་འབྱེད་པ་ཡང་གཞན་མེད་པས་མེད་པར་འགྱུར་རོ། །

གང་ཞེ་ན་འདི་ལྟ་སྟེ། རྩོད་པ་ལ་དགའ་བས་སོ། །རྩོད་པ་ལ་དགའ་བ་མེད་པས་དེའི་རྗེས་སུ་འབྲང་བའི་དྲི་མ་གཞན་རྣམས་ཀྱང་མེད་པར་འགྱུར་བ་ནི་འདི་ལྟ་སྟེ། ཡུལ་ལྗོངས་འཇོམས་པའོ། །རྩོད་པ་ལ་དགའ་བ་དང་བྲལ་བས་ཡུལ་ལྗོངས་འཇིག་པ་རྣམས་ཀྱང་དེ་མེད་པས་

མེད་པར་འགྱུར་རོ། །གང་ཡང་ཕན་ཚུན་དུ་ཞེ་འགྲས་པས་མཚོན་ཆས་གཏུབ་པ་ལ་དགའ་བ་དང་། སྐྱེས་པ་རྣམས་ཕན་ཚུན་དུ་རྣམ་པ་སྣ་ཚོགས་པར་གྱུར་པ་དེ་དག་རྣམས་ཀྱང་གང་གི་ཕྱིར་ཕལ་ཆེར་ནི་བུད་མེད་ཀྱི་རྒྱུ་ལས་ཡིན་པའི་ཕྱིར་ཏེ། རྒྱུ་གཞན་རྣམས་ཀྱིས་ནི་མ་ཡིན་ནོ། །

དེའི་ཕྱིར་དེས་དེ་ལྟར་འདོད་ཆགས་རབ་ཏུ་བཅོམ་པའི་ཕྱིར་གཅིག་གི་སྟེང་ན་གཅིག་གནས་པའི་དྲི་མ་དེ་དག་རྣམས་ཐམས་ཅད་ཀྱང་མེད་པར་འགྱུར་རོ། །དེ་དང་རབ་ཏུ་འབྲེལ་པ་དང་། དེས་གང་བར་གྱུར་པ་དེ་ལྟ་བུའི་རང་བཞིན་ཅན་གྱི་བུད་མེད་རྣམས་ཀྱི་སེམས་ནི་དགེ་བའི་བཤེས་གཉེན་

གྱི་ཁ་ནས་ཐོས་པའི་སངས་རྒྱས་ཀྱི་བཀའ་མ་གཏོགས་པ་གཞན་རྣམས་ཀྱིས་ནི་འཇམ་པོར་བྱ་བར་ནུས་པ་ཡང་མ་ཡིན་ཏེ། གཞན་དུ་ནི་བུད་མེད་གང་དག་དེ་བཞིན་དུ་མི་འགྱུར་རོ། །དེའི་ཚེ་ཁྱིམ་གྱི་གནས་ཤིན་ཏུ་སྤང་བར་དཀའ་བ་སྤངས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་

སྟེ། གང་གི་ཚེ་ན་ཟག་པ་རྣམས་ཟད་པར་བྱ་མི་ནུས་པ་ཡང་དེའི་ཚེ་ལེགས་པར་བསྒོམ་པའི་ཚུལ་ཁྲིམས་ངེས་ཏེ། དེ་ལྟར་ཡང་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དང་། ཚིག་རྩུབ་དང་། ཕྲ་མ་དང་། ཀུན་ཏུ་འབྲེལ་པ་མེད་པ་

རྣམས་རྣམ་པར་སྤངས་ཤིང་ལེགས་པར་བསྒོམས་ལ་ཡང་དང་ཡང་དུ་བསྟན་ཅིང་བསྒོམས་ལ་ལན་མང་དུ་བྱས་པའི་བུད་མེད་རྣམས་ནི་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་གྱི་ལྷ་རྣམས་སུ་སྐྱེའོ། །གང་དག་འདོད་པ་རྣམས་ལ་འདོད་ཆགས་དང་བྲལ་བའི་ལམ་མ་ཐོབ་པ་རྣམས་

Vol. 70 · folio 112b

ནི་ལས་དང་སེམས་ཀྱི་དབང་གིས་འདོད་པ་ན་སྤྱོད་པ་རྣམས་ལས་འཐབ་བྲལ་བ་རྣམས་ཀྱི་ནང་གི་ཚོགས་པ་རྒྱུ་བ་ན་རྣམ་པར་སྤྱོད་པ་གང་ཡིན་པའི་སར་སྐྱེའོ། །གང་གི་ཚེ་སྐྱེས་པ་ཉིད་འོངས་པར་གྱུར་ན་དེ་རྣམ་པ་དེ་ལྟ་བུ་མཆོག་ཏུ་ལེགས་པའི་ཚུལ་ཁྲིམས་ཀྱིས་མའི་ཚུལ་དུ་རྗེས་སུ་

གནས་སོ། །དེ་རྣམ་པ་དེ་ལྟ་བུའི་སྐྱེ་བ་ཐོབ་པའི་ལྷ་གང་ཡིན་པ་དེ་ཡང་བག་མེད་པས་བག་མེད་པར་སྤྱོད་པར་འགྱུར་རོ། །དེ་དེ་དག་རྣམས་ཟད་ནས་སླར་ཡང་དམྱལ་བའམ། ཡི་དགས་སམ། དུད་འགྲོ་རྣམས་སུ་སྐྱེའོ། །གཞན་ཡང་ལྷའི་ཚོགས་རྣམས་སུ་གོང་ནས་གོང་དུ་

འཇུག་པར་བྱེད་པས་བུད་མེད་ཀྱི་སྲིད་པ་སྒྲུབ་པར་བྱེད་དོ། །དེ་ནས་དེའི་ཚེ་བཅོམ་ལྡན་འདས་དེས་ཚིགས་སུ་བཅད་པ་གསུངས་པ། ཇི་ལྟར། འདོད་ཆགས་ཕྲག་དོག་གཡོ་རྣམས་ཀྱི། །ས་གཞིའི་སེམས་ནི་ཟོ་ཆུན་གློག །ལྕགས་བསྲེགས་ང་རྒྱལ་སྐྱེ་གནས་རྣམས། །བློ་གཏད་

ནམ་ཡང་ཡོད་མ་ཡིན། །མཚོན་ཆ་མེ་དང་མཚུངས་པར་རྣོ་བ་རྣམས། །གཟུགས་ཀྱི་ཞགས་པས་བདག་དང་གཞན་རྣམས་ཀྱིས། །དོང་དང་གཡང་ས་མི་བཟད་པ་རྣམས་དང་། །ཟབ་པར་མཚུངས་པའི་སེམས་དང་ལྡན་པ་ཡི། །དང་པོ་ཉིད་ནས་གཞན་ལ་དགྲ་ནི་བྱེད་པ་ཡིན། །

སྒྱུ་མ་མིག་འཕྲུལ་དེ་ལ་སོང་བའི་སེམས། །དུས་མིན་འཆི་བདག་དང་ནི་རྡོ་རྗེ་མེ། །དུས་ཀྱི་རི་བོ་དང་མཚུངས་བདག་ཉིད་རྣམས། །སེམས་ནི་རྣམ་པ་དུ་མ་དག་གིས་ཀྱང་། །སྐྱོན་རྣམས་དུ་མ་ཀུན་ཏུ་སྤྱོད་བྱེད་པ། །གལ་ཏེ་བུད་མེད་རྣམས་ནི་འགའ་ཞིག་གིས། །ཚུལ་ཁྲིམས་ཡུད་ཙམ་

ཡིད་ལ་སྒོམ་བྱེད་པ། །དེ་ནི་སངས་རྒྱས་ཉི་མའི་གསུང་རྣམས་ཀྱི། །འོད་ཟེར་རྣམས་ཀྱིས་རྣམ་པར་མཛེས་པ་ཡིན། །དེ་ལྟར་མུ་སུ་ལུན་དྷ་དེས་ལྷ་དེ་དག་རྣམས་ལ་ལྷ་ཁྱེད་རྣམས་མིའི་བུད་མེད་དུ་གྱུར་པ་ན་སྤྱད་པས་འདིར་སྐྱེས་པ་ཡིན་ནོ་ཞེས་དེ་ལྟར་སྐྱེ་བ་གཞན་དུ་སྤྱད་པའི་ཚུལ་

ཁྲིམས་དེ་རབ་ཏུ་སྟོན་པར་བྱེད་དོ། །དེ་གལ་ཏེ་བུད་མེད་ཀྱི་དངོས་པོར་གྱུར་པས་བསྐྱེད་པའི་ཚུལ་ཁྲིམས་གལ་ཏེ་མིར་གྱུར་པའམ། ལྷར་གྱུར་པ་ན་ཡང་བག་མེད་པས་ཟད་པར་བྱེད་པའི་ལྷ་དེ་རྣམས་ནི་ཤིན་ཏུ་བསླུས་པར་གྱུར་པ་ཡིན་ནོ། །དེས་ན་རིངས་པ་རིངས་པར་བག་མེད་པར་

Vol. 70 · folio 113a

མ་བྱེད་ཅེས་བཅོམ་ལྡན་འདས་དེས་ལྷ་རྣམས་ལ་ཕན་པར་བཞེད་པས་དེ་ལྟར་རྗེས་སུ་གདམས་པར་འགྱུར་རོ། །ཡང་དག་པར་རྫོགས་པའི་སངས་རྒྱས་རྣམས་ཐམས་ཅད་ཀྱི་ཡང་འཁོར་རྣམ་པ་བཞིར་འགྱུར་བ་དེ་ཉིད་ཀྱིས་ནི་སྲིང་མོའི་འཁོར་རྣམས་ཀྱི་གཏིང་

དེ་ལ་དགེ་སློང་གི་འཁོར་རྣམས་ཡིན་ནོ། །དེ་ལ་སྔ་ཕྱི་རིམ་པས་དགེ་སློང་གི་སྡོམ་པ་རྣམས་ལ་ཞུགས་པ་མཆོག་ཏུ་རྒྱ་ཆེ་བའི་དགེ་བས་བསྒོས་པའི་རྒྱུད་རང་ལ་ཡང་སྡུག་བསྔལ་འབྱུང་བས་འཇིགས་པར་ལྟ་བ་འཇིག་རྟེན་གཞན་དུ་འགྲོ་བས་སྐྲག་པ་འཁོར་བ་ཐམས་ཅད་ལ་ཡིད་

འབྱུང་བས་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་གཉའ་ཤིང་གང་ཙམ་དུ་ལྟ་བ་སྙིང་ལས་ཆུང་བ་མཆོག་ཏུ་ཟབ་པ་མཆོག་ཏུ་རྒྱ་ཆེ་བའི་དགེ་བ་ཚུལ་ཁྲིམས་དང་སྦྱིན་པ་ལ་རྒྱུད་གོམས་པ། འཕགས་པའི་བདེན་པ་བཞི་ལ་སྤྱོད་པ་ལ་ཆེད་ཆེར་བྱེད་པའི་དགེ་སློང་དེ་

ནི་རྣམ་པ་དུ་ཡོད་པ་དང་། རྣམ་པ་ཡང་དུ་ཡོད་ན་གང་དགེ་སློང་རྣམས་ཀྱིས་འདའ་བར་མི་བྱ་བ་ནི་རྣམ་པ་བཞིའོ། །བཞི་པོ་གང་ཞེ་ན། དེ་ལྟར་གཅིག་པུ་རྒྱུ་བར་བྱེད་པའི་རྣམ་པ་ལས་དགེ་སློང་གཅིག་པུ་ལམ་དུ་འགྲོ་བར་མི་བྱའོ། །དེ་ཅིའི་ཕྱིར་ཞེ་ན། དགེ་སློང་གཅིག་པུ་ཞིག་ལྗོངས་

རྒྱུར་འགྲོ་བ་བྱེད་པ་ན་འཕྱ་བར་འགྱུར་རོ། །རང་དགར་ཡང་འགྱུར་རོ། །རང་དགར་གྱུར་པས་ཀྱང་བསླབ་པའི་གཞི་རྣམས་ལས་འདའ་བར་བྱེད་དོ། །གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་ལྗོངས་སུ་ཡང་འདོད་རྒྱལ་དུ་སྡོམ་པ་གཏོང་བར་བྱེད་པ་སྟེ། དགེ་སློང་གཞན་

ལ་འཇིགས་པ་མེད་པའི་ཕྱིར་རོ། །དེས་ཡུལ་ལྗོངས་ཀྱི་བུད་མེད་དག་མངོན་དུ་མཐོང་ནས་རེག་དོགས་ཀྱི་སེམས་གཡོ་བར་གྱུར་པའི་རང་བཞིན་གྱིས་མིག་གཏོད་པར་བྱེད་དོ། །དེའི་མིག་གིས་བལྟས་པར་གྱུར་པས་མངོན་པར་མཐོང་ནས་ཁྱིམ་པ་དང་ཡུལ་ལྗོངས་པ་རྣམས་ཀྱིས་

དགེ་སློང་དེ་སྨོད་པར་བྱེད་དོ། །དེ་ལ་སྨད་པར་གྱུར་པ་ན་ཀུན་ཏུ་ཞེ་སྡང་བསྐྱེའོ། །དེ་ལས་དགེ་སློང་འདིའི་སྙིང་ལ་སྐྱོན་གཉིས་པ་ཀུན་ཏུ་སྐྱེ་སྟེ་ཞེ་སྡང་ངོ་། །དེ་འདོད་ཆགས་དང་ཞེ་སྡང་གི་དབང་དུ་གྱུར་པས་གཏི་མུག་གིས་ཤིན་ཏུ་བར་རྨོངས་པར་འགྱུར་རོ། །དེ་ལྟར་དགེ་སློང་གཅིག་

Vol. 70 · folio 113b

པུ་ཞིག་ལྗོངས་རྒྱུ་བར་བྱེད་པས་རྒྱུ་བ་ན་སྐྱོན་གསུམ་རབ་ཏུ་འཕེལ་བ་ཡིན་ནོ། །དེའི་ཕྱིར་ན་གཅིག་པུ་ཞིག་གིས་ལྗོངས་རྒྱུ་བར་མི་བྱའོ། །འདི་ནི་རྣམ་པ་གཅིག་ཡིན་ནོ། །རྣམ་པ་གཞན་ཡང་དགེ་སློང་རྣམས་ཀྱིས་རྒལ་བར་མི་བྱ་བ་འདི་ལྟ་སྟེ། ལུས་དྲན་པའི་རྣམ་པའོ། །འདི་

ན་དགེ་སློང་ལམ་དུ་འགྲོ་བ་ན་ལུས་སུ་གཏོགས་པ་ལ་འགྲོ་བའི་དུས་སུ་དྲན་པ་བསྐྱེད་པར་བྱ་སྟེ། དཔེར་ན་བདག་གི་རྐང་པ་འདེགས་པ་ལ་སེམས་དང་སེམས་ལས་བྱུང་བས་ཀུན་ཏུ་རྟོག་ཅིང་ཡིད་ལ་བྱེད་པས་དེ་རྐང་པ་ནས་བཟུང་ནས་ལུས་མ་ལུས་པ་ལ་དཔྱོད་པར་བྱེད་དོ། །དེ་ལ་རྐང་

གཡས་པ་དང་གཡོན་པ་བཏེག་པའི་གཡས་པ་དང་གཡོན་པ་དེ་དག་རྒྱུས་པའི་དྲ་བས་ཀུན་ནས་སྦྲེལ་བ། རུས་པ་ལ་ཚིལ་དང་པགས་པས་གཡོགས་པ་ཚིགས་པ་རྒྱུས་པའི་འབྲེལ་པས་སྦྲེལ་བར་གྱུར་པ་ལས་ཀྱི་རླུང་གིས་རྒྱུ་བའི་སེམས་ཀྱི་བྱ་བའི་རྗེས་སུ་འཇུག་པ། བཏེག་ཅིང་

འདོར་བ་ན་འཁུམ་པ་ལྟར་འགྱུར་བ། གཞི་ལ་བཞག་པ་ན་རྣམ་པར་འབྱེ་བར་འགྱུར་བ། ཆུ་རྒྱུས་ཀྱི་སྟོབས་ཀྱིས་སྦྲེལ་བའི་རྐང་པ་དེ་སོར་མོ་ལྔ་པོ་ཐམས་ཅད་ཀུན་ཏུ་སྦྲེལ་བ། སེན་མོ་དང་ཉེ་བའི་སེན་མོ་རྣམས་ཉེ་བར་སྐྱེས་པ་མངོན་པར་མཐོང་ནས་པུས་མོ་ལ་སོ་སོར་རྟོག་པར་བྱེད་དེ།

གཞོང་པ་རིང་པོ་དང་འདྲ་བར་གྱུར་པ་ཤའི་འདམ་དང་ཤའི་འདམ་རྣམས་ཀྱིས་དེ་ཀུན་ཏུ་བྱུགས་པ། རྒྱུས་པས་ཀུན་ནས་སྦྲེལ་བ། རུས་པའི་སྦུབས་དང་བཅས་པ། ཆུ་རྒྱུས་རིང་པས་ཀུན་ནས་སྦྲེལ་བ། སྔོན་བྱས་པའི་རྒྱུ་རྐྱེན་གྱིས་བསྐྱེད་པ། བ་སྤུའི་ཁུང་བུས་ཡོངས་སུ་ཁྱབ་

པའི་ཕྱི་རོལ་ན་སྦྲང་བུ་རྣམས་འབབ་པ། པགས་པ་འཐུག་པོས་གཡོགས་པ་གང་ཡིན་པའི་པུས་མོ་གཅིག་དེས་ཡང་དག་པ་ཇི་ལྟ་བར་སོ་སོར་ལེགས་པར་རིག་པར་བྱེད་དོ། །དེས་ལུས་འདི་འཆག་པར་གྱུར་པ་ན་རབ་ཏུ་གཡོ་བར་གྱུར་པ་དེ་དག་རྣམས་རིམ་པ་སོ་སོར་རྟོག་པར་

བྱེད་དེ། པུས་མོ་དང་། བརླ་དང་། བྱིན་པར་གཏོགས་པའི་ཆུ་རྒྱུས་དང་། ཁྲག་དང་། ཤ་དང་། ཚིལ་དང་། རུས་པ་ལ་ཡང་སོ་སོར་རྟོག་པར་བྱེད་དོ། །སེམས་དང་སེམས་ལས་བྱུང་བ་རྣམས་ལས་ཀྱི་རླུང་གིས་བསྐྱོད་ནས་འགྲོ་བར་བྱེད་པ་ཡིན་ནོ། །གཞན་ཡང་ལུས་

Vol. 70 · folio 114a

དེ་ཉིད་ཀྱི་འདུ་ཤེས་ཅན་གྱིས་ཇི་སྲིད་དུ་སྟེང་ནས་དམྱལ་བའི་བར་དུ་སོ་སོར་རྟོག་པར་བྱེད་དེ། ཤ་དང་ཆུ་རྒྱུས་ཕན་ཚུན་དུ་སྦྲེལ་བར་གྱུར་པ་ཤའི་བྱུག་པས་ཀུན་ཏུ་བྱུགས་པས་ཆེས་སྦོམ་པར་གྱུར་པ་ཆུ་སེར་ཀུན་ནས་འཛག་པ། ཁྲག་དང་། ཚིལ་རྣམས་

ཀྱིས་གང་བ། མདངས་འབའ་ཞིག་ཙམ་གྱིས་ཡིད་འཕྲོག་པ་རྣམས་དེས་རྣམ་པར་དཔྱོད་པར་གྱུར་པས་རྩ་སྦུབས་གཅིག་ལ་ཡང་དག་པ་ཇི་ལྟ་བར་སོ་སོར་རྟོག་པར་བྱེད་དོ། །བཏེག་པར་གྱུར་པ་ན་གཞན་ཡང་དེ་ཁོ་ན་ལྟར་སོ་སོར་རབ་ཏུ་རིག་པར་བྱེད་དོ། །བསྐུམ་པ་དང་བརྐྱང་

བར་གྱུར་པ་ན་ཡང་ཇི་ལྟ་བུའི་རང་བཞིན་གྱི་རྩ་ཕྲ་བར་གྱུར་པ་རྣམ་པ་དུ་མ་ལ་ཀུན་ཏུ་ལྟ་བར་བྱེད་དོ། །རབ་ཏུ་གཡོ་བར་བྱེད་པ་དང་། འགྲོ་བར་གྱུར་པ་ཡང་རྣམ་པ་དུ་མར་གྱུར་པའི་རླུང་གིས་ཀུན་ནས་གཡོ་བ་དང་དེའི་འབྲེལ་པ་སྟེང་དུ་གཞིར་གྱུར་པ་ཕོ་བའི་ཐ་སྙད་དུ་བྱ་བ་

བཤང་བ་དང་གཅི་བའི་གནས་དེ་རྣམ་པ་ཐམས་ཅད་དུ་མི་གཙང་བའི་སྔར་གྱི་གཞི་ལ་རྒྱུ་བས་རྒྱུ་བའི་ཆ་ཤས་རྣམས་རབ་ཏུ་འབྱུང་བར་གྱུར་པ་ན་ཡང་དག་པ་ཁོ་ནར་ལུས་ཀྱི་རྗེས་སུ་སོང་བའི་དྲན་པ་དགེ་སློང་གིས་ཆེས་སྟེང་ཉིད་དུ་རབ་ཏུ་གཡོ་བར་གྱུར་པའི་རང་གི་ལུས་འགྲོ་བ་

ཉེ་བར་རྟོགས་པར་བྱེད་དོ། །ཇི་ལྟར་ཞེ་ན། བདག་ལམ་དུ་འགྲོ་བར་གྱུར་པ་ན་བདག་གི་རྒྱུ་མ་དང་གཉེ་མ་དག་རབ་ཏུ་གཡོ་བར་གྱུར་པ་རྣམས་ལ་དེས་ལྟ་བ་ནི་རྐང་པ་བཏེག་པ་ན་དབུགས་རྔུབ་པ་དང་ལྷན་ཅིག་ཏུ་འགྲོགས་པ་རབ་ཏུ་གཡོ་བའོ། །བདག་གིས་རྒྱུ་མ་རབ་ཏུ་གཡོ་བ་

དེ་དག་ཐམས་ཅད་གཡོན་ལོགས་ནས་གཡས་ལོགས་སུ་རབ་ཏུ་གཡོ་བར་འགྱུར་ལ་གཡས་ནས་ཀྱང་གཡོན་དུའོ། །རྒྱུ་མ་དེ་དག་རྣམས་རླུང་དང་། མཁྲིས་པ་དང་། བད་ཀན་དང་། བཤང་བ་དང་། གཅི་བ་དང་སྲིན་བུས་རབ་ཏུ་གང་བ་རྣམས་གཡོ་བར་མངོན་པར་མཐོང་ནས་ཇི་ལྟ་

བ་བཞིན་དུ་རྗེས་སུ་ལྟ་བར་བྱེད་དོ། །ལུས་དེའི་རྒྱུ་མ་དང་གཉེ་མ་དང་བཅས་པ་རྣམས་དགེ་སློང་གིས་ཡང་དག་པར་མངོན་པར་མཐོང་ནས་གཞན་ཡང་ཤིན་ཏུ་མཐོང་བར་གྱུར་པའི་ལུས་དག་ལ་རྣམ་པར་ལྟ་བར་བྱེད་དེ། ལོང་ཀར་གྱུར་པ་ལ་རྒྱུས་པའི་འཁྲུལ་འཁོར་གྱིས་ཀུན་ནས་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words