32a.1ལ་ལར་སྣོད་དང་བཅུད་དག་དང་། །ལ་ལར་སྔོ་ཞིང་དམར་བ་དང་། །ལ་ལར་དཀར་ཞིང་སེར་བ་དང་། །ལ་ལར་སངས་རྒྱས་རྣམ་སྣང་མཛད། །ལ་ལར་སྒྲོན་མ་གོས་དཀར་མོ། །ལ་ལར་སྤྱན་མ་མཱ་ལ་ཀཱི། །ལ་ལར་ཀུན་ཏུ་ཞི་བར་འགྱུར། །ལ་

32a.2ལར་བྱ་ཡི་མངལ་དུ་འགྲོ། །ནམ་མཁའ་རུ་ནི་འགྲོ་བ་ཉིད། །ལ་ལར་གླང་ཆེན་ང་རྒྱལ་ཏེ། །ལ་ལར་སྨད་འཚོང་མར་ནི་འགྱུར། །ལ་ལར་རྨི་ལམ་མཐོང་བར་འགྱུར། །ལ་ལར་གཉིད་ནི་ལོག་པར་གནས། །ལ་ལར་རླུང་དང་མཁྲིས་པ་དང་། །ལ་ལར་ཁྲག་དང་

32a.3པགས་པ་དྲི། །ལ་ལར་ངུ་ཞིང་མྱ་ངན་བྱེད། །ལ་ལར་མི་རྣམས་ཟ་བ་དང་། །ལ་ལར་བསྐལ་པར་གསུང་བ་དང་། །ཇི་ལྟར་ཀུན་ཏུ་རྣམ་པར་དབྱེ། །ལྷ་ཡིས་ཇི་སྲིད་གསུངས་པ་ཀུན། །གང་དེ་ཐམས་ཅད་བདག་ཉིད་གནས། །དཔའ་བོ་འདི་རྣམས་གསང་ཆེན་པོ། །

32a.4ཕྱི་དང་ནང་དུ་ཡང་དག་གནས། །ཀུན་ལ་ཁྱབ་ཅིང་རྟག་ཏུ་སྟོད། །སྲིད་པ་གཟུང་ཞིང་དྲི་མ་མེད། །རྣལ་འབྱོར་བས་ནི་འདི་ལྟར་བསྒོམ། །གཉིས་མེད་ཡེ་ཤེས་ཉིད་དང་ཡང་། །དེ་དང་འདྲ་བར་སྟོང་པར་འགྱུར། །བདག་ཉིད་ལ་ནི་རྣམ་པར་བསྒོམ། །དེ་ལ་བརྟུལ་ཞུགས་

32a.5བཤད་པ་མེད། །ཕྲེང་བ་དང་ནི་སྔགས་ཀྱང་མེད། །གཟུངས་དང་སྦྱིན་སྲེག་ལས་མེད་དེ། །མི་གཡོ་གོ་ཆའི་བྱ་བ་མེད། །ལག་པ་ཕྱག་རྒྱའི་སྦྱོར་བ་དང་། །གཡོན་བརྐྱང་རྐང་སྟབས་ལ་སོགས་མེད། །དཔའ་བོ་ཆེན་པོས་སྲིད་པ་གཟུང་། །རང་བྱུང་མཆོག་ནི་བྱེད་པའོ། །

32a.6དགག་པ་རུ་ནི་མི་བྱ་སྟེ། །བདག་ཉིད་ངེས་པར་མཆོད་པར་བྱ། །ཟླ་བའི་དབུས་སུ་ཐིག་ལེ་བསྒོམ། །བརྒྱ་ཡི་ཕྱེད་ཀྱིས་རྣམ་པར་བརྒྱན། །དེ་ཡི་དབུས་སུ་རབ་བསམས་ཏེ། །གཞོན་མེད་ཐིག་ལེར་བཅས་པ་ཡིན། །དེ་ཡི་ལུས་ནི་འབྲལ་འགྱུར་ཏེ། །བསྒོམ་དུ་མེད་

32a.7ཅིང་བསམ་དུ་མེད། །དཔལ་ཁྲག་འཐུང་མངོན་པར་འབྱུང་བ་ལས་ཀུན་གྱི་རྣམ་པའི་སྒྱུ་མ་ལྟར་བསྟན་པའི་ལེའུ་ཞེས་བྱ་བ་སྟེ་བཞི་བཅུ་རྩ་གསུམ་པའོ།། །།དེ་ལྟར་སྒྱུ་མའི་ཆོ་ག་དང་། །གོང་གི་ཆ་ནི་རྣམ་པར་སྤངས། །རྟག་ཏུ་སྙིང་གའི་དབུས་ན་གནས། །འདི་ལྟར་

32b.1གསང་བ་ཆེན་པོའོ། །ལྟེ་བའི་རྩ་བར་པདྨ་གནས། །གེ་སར་བཅས་ཤིང་འོད་དང་ལྡན། །རང་བཞིན་ཀུན་ནི་ཤེལ་དག་ལྟར། །བཅུ་དྲུག་ལ་སོགས་ཀྱིས་ནི་བསྐོར། །ཡི་གེ་མཉམ་པར་སྦྱོར་བ་སྟེ། །ནམ་མཁའ་སྦྱར་བའི་བདག་ཉིད་དོ། །དེ་ཉིད་དབུས་སུ་

32b.2སྟོང་པ་ཆེ། །སྤྲོ་དང་སྡུད་པར་བྱེད་པ་ཡིན། །གང་གིས་མིང་ནི་ཀུན་རང་བཞིན། །གང་གིས་ཡོངས་སུ་གྲགས་པའོ། །ཉི་མ་ཟླ་བ་རྣམ་དག་སྟེ། །འཆར་དང་ནུབ་པར་བསྟན་པ་ཡིན། །སྡིག་པ་ཀུན་ལས་རྣམ་པར་གྲོལ། །བསོད་ནམས་ཐམས་ཅད་རྣམ་པར་

32b.3འཕེལ། །པདྨའི་སྣ་རྩེར་ཡུངས་ཀར་ཙམ། །རྒྱུ་དང་མི་རྒྱུའི་རང་བཞིན་ཀུན། །ཡིད་ཀྱིས་བཟླས་པར་ཡང་དག་ལྡན། །ཕྱི་ཡི་དབྱངས་ནི་རྣམ་པར་སྤངས། །དེ་ཡི་ཡེ་ཤེས་སངས་རྒྱས་ཏེ། །གཞན་གྱིས་སངས་རྒྱས་མི་འགྱུར་རོ། །རྟག་ཏུ་སེམས་དཔའ་དངོས་པོ་

32b.4ཤེས། །ཁྲུས་མེད་དྲི་མ་མེད་པ་སྟེ། །བདེ་བའི་ཆོས་ནི་དེ་བཞིན་གཤེགས། །ལོངས་སྤྱོད་རྫོགས་པའི་སྐུ་རང་བཞིན། །ཐམས་ཅད་མེ་ཡི་རྣམ་པ་རུ། །མཐོང་བ་མཚན་མ་དང་པོའོ། །སྲིན་བུ་མེ་ཁྱེར་རྣམ་པ་ཡི། །མཚན་མ་གཉིས་པར་མཚོན་པ་ནི། །རྡུལ་

32b.5ཕྲན་དཀར་པོའི་རྣམ་པ་རུ། །ཕྱོགས་བཅུར་འཇིག་རྟེན་མཐོང་བ་ཡིན། །ཉོན་མོངས་འདོན་པའི་ལས་རྣམས་ནི། །རྣལ་འབྱོར་པ་ཡི་མཚན་ཉིད་དང་། །འདོད་པ་ལྷ་ཡི་ལོངས་སྤྱོད་མྱང་། །བཞི་པ་མཐོང་བར་བསྟན་པའོ། །ལྷ་གཟུགས་མཐོ་རིས་ལྷ་རྣམས་ནི། །

32b.6གང་ལ་མཐོང་བར་སེམས་པའོ། །དྲུག་པ་འཇིགས་པ་ལོངས་སྤྱོད་དོ། །བདུན་པ་ཆོས་ཀྱི་དབྱིངས་ཉིད་དེ། །བརྒྱད་པར་འདོད་པའི་སངས་རྒྱས་ཉིད། །རྣལ་འབྱོར་རྣམས་ཀྱིས་འབྲས་བུ་འཐོབ། །སྐྲ་ཡི་རྩེ་མོ་བརྒྱར་གཤགས་ཆ། །རྡུལ་ཕྲན་ཤིན་ཏུ་བསམ་པར་བྱ། །སྟོང་པ་ལ་སོགས་

32b.7དམིགས་མི་བྱ། །གཟུགས་ལ་སོགས་པ་མི་བལྟ་སྟེ། །རྡུལ་མེད་ས་བོན་མེད་པ་བཞིན། །གཟུགས་མེད་མཚན་ཉིད་མེད་པའོ། །རྣམ་ཤེས་ཡེ་ཤེས་གཟུང་མ་ཡིན། །རྣམ་ཤེས་དེ་ཡི་རང་བཞིན་ཏེ། །མངོན་ཤེས་བརྒྱད་པོ་ཡང་དག་འཐོབ། །ཀུན་མཁྱེན་ཀུན་བྱེད་གཙོ་བོ་སྟེ། །ཡེ་ཤེས་

33a.1སྐུ་ནི་དྲི་མ་མེད། །སྐྱེ་བ་འདི་ལ་ཐོབ་པར་འགྱུར། །གཟི་བརྗིད་སྟོབས་དང་ལྡན་པ་ཡིན། །སྡུག་ཅིང་སྐལ་བ་བཟང་པོར་སྟོན། །དཔག་བསམ་ཤིང་ནི་ཡང་དག་བྱུང་། །རྟག་ཏུ་བསྒོམ་ཞིང་བཟླས་པས་ནི། །ཇི་སྲིད་ལུས་ནི་བསྒུལ་བསྐྱོད་དང་། །ངག་གི་སྨྲ་

33a.2བ་ཐམས་ཅད་ནི། །དེ་སྙེད་སྔགས་དང་ཕྱག་རྒྱ་སྟེ། །དཔལ་ལྡན་ཁྲག་འཐུང་གོ་འཕང་གནས། །པདྨ་བཞི་དང་འཁོར་ལོ་ཆེ། །དེ་བཞིན་དངོས་གྲུབ་ཀུན་གྱི་གཞི། །དཔའ་བོ་བྱེ་བ་རྣམས་དང་ནི། །སངས་རྒྱས་བྱེ་བས་ལེགས་པར་གསུངས། །དཔལ་ཁྲག་འཐུང་མངོན་

33a.3པར་འབྱུང་བ་ལས་ཐམས་ཅད་སོ་སོར་གསལ་བའི་མངོན་པར་ཤེས་པ་བརྒྱད་ངེས་པར་བསྟན་པའི་ཆོ་གའི་ལེའུ་ཞེས་བྱ་བ་སྟེ་བཞི་བཅུ་རྩ་བཞི་པའོ།། །།དེ་ནས་གཟུགས་བརྙན་གྱིས་ཞི་བ། །འདི་རུ་ཡིད་ལྡན་དོན་དུ་གསུངས། །གང་གིས་མྱུར་དུ་དེ་འགྲུབ་པ། །ནད་པ་ཞི་

33a.4བར་བྱེད་པ་ནི། །ཕོ་མོ་རྒྱལ་པོ་བྱིས་པ་རྣམས། །སུས་ཀྱང་ཆོ་ག་ཤེས་བྱ་བ། །སྤང་ལེབ་ཁྲི་སོགས་སྟན་རྣམས་ནི། །འབྲས་དང་སྲན་ཆུང་ཡང་དག་བསྲེས། །ཤིན་ཏུ་བཙོས་ནས་བསྣོས་བྱས་ཏེ། །ཉ་དང་ཤ་དང་ཁྲག་གིས་ནི། །གཟུགས་བརྙན་དག་ནི་བཅའ་བ་སྟེ།

33a.5བུ་མོས་བཀལ་བའི་སྐུད་པ་ནི། །སྐྲ་ཡི་ཚད་དུ་བྱ་བ་ཡིན། །སྔགས་ཀྱི་ཡི་གེས་བསྐུལ་བར་བྱ། །དྲུག་དང་བཅུ་གཉིས་ཡི་གེས་སོ། །བླ་རེ་དག་ནི་བྲེ་བ་དང་། །སྣ་ཚོགས་གོས་དང་རྒྱལ་མཚན་མཆོག །དྲི་དང་སྤོས་དང་མེ་ཏོག་སོགས། །གསང་སྔགས་ཀྱིས་ནི་

33a.6བསྐུལ་བར་བྱ། །སྲུང་བ་ཆེན་པོའི་གོས་ཀྱིས་ནི། །སྨད་གཡོགས་དང་ནི་སྟོད་གཡོགས་བྱས། །གང་གིས་ཅུང་ཟད་ནད་པ་ཡི། །སྤྱོད་ལུགས་ཇི་ལྟར་ཡིན་པ་བཞིན། །རོ་རུ་སོང་ནས་བསྐྱལ་བར་བྱ། །རོལ་མོ་སྣ་ཚོགས་གླུ་དབྱངས་དང་། །དེ་བཞིན་གཞུག་པ་བྱ་བ་སྟེ། །

33a.7གཟུགས་བརྙན་ལ་ནི་གདགས་པར་བྱ། །དཔུང་རྒྱན་ལག་གདུབ་མགུལ་རྒྱན་དང་། །གོས་ལ་སོགས་པ་རྣམས་ཀྱིས་བརྒྱན། །རྐེད་པ་ལ་ནི་མཚོན་ཆས་བཅིངས། །ལག་པར་རལ་གྲི་འཛིན་པ་སྟེ། །སྤྱི་བོར་བཅིང་ཞིང་གོ་ཆ་བགོས། །སྙིང་རྗེ་ལ་སོགས་ཕན་པའི་སེམས། །

33b.1དཔལ་ལྡན་ཁྲག་འཐུང་རྣལ་འབྱོར་ཆེ། །གོ་ཆ་གསུམ་གྱིས་རྣམ་པར་བརྒྱན། །དུར་ཁྲོད་དུ་ནི་འགྲོ་བ་སྟེ། །རྣལ་འབྱོར་མ་དང་དཔའ་བོས་བསྐོར། །འདུ་བྱེད་རྣམས་ནི་དང་པོར་བྱས། །དཀྱིལ་འཁོར་མཛེས་པར་བྲི་བ་སྟེ། །མ་མོ་རྣམས་དང་རྣལ་འབྱོར་མ། །བསྒོམ་

33b.2ཞིང་ཕྱོགས་དང་ཕྱོགས་མཚམས་དགོད། །དེ་རུ་ལྷ་རྣམས་ཡང་དག་གཞག །གཟུགས་བརྙན་ལུས་ནི་ལྷོ་ཕྱོགས་སུ། །སྔགས་པས་མགོ་བོ་བསྟན་པར་བྱ། །ཇི་ལྟར་མཛེས་པས་བསྒྲུབ་བྱ་བསྒོམ། །ནད་རྣམས་ཀུན་ལས་རྣམ་པར་གྲོལ། །གཡས་

33b.3བརྐྱང་གིས་ནི་ཡང་དག་གནས། །རྩ་བའི་སྔགས་སོགས་ཀྱིས་ནི་བསྲུང་། །སྔགས་པས་ཁ་ནི་ཤར་དུ་བལྟས། །ལག་པས་ཤེས་རབ་ཁ་ཊྭཱཾ་ག། །གྲིབ་མ་བགོམ་པར་བྱས་ནས་ནི། །ལྟེ་བའི་ཕྱོགས་སུ་བརྡེག་པར་བྱ། །ཇི་ལྟར་སྡུག་བསྔལ་བར་ནི་

33b.4གཏུབ། །ལྷ་སྦྱིན་ནད་ནི་ཞི་བར་འགྱུར། །དབང་པོ་ལ་སོགས་ཤར་ཕྱོགས་གཞག །སྔགས་ཀྱིས་བསྐུལ་བར་བྱ་བ་སྟེ། །ཇི་ལྟར་ཅུང་ཟད་གཞུག་བར་བྱ། །སློབ་དཔོན་གྱིས་ནི་མཛེས་པར་བརྟག །ཁྱེའུས་ཁྱེའུ་གྲོལ་བ་སྟེ། །བུ་མོས་བུ་

33b.5མོ་གྲོལ་བ་ཡིན། །ཐམས་ཅད་ཁྲུས་དང་གཙང་སྦྲ་དང་། །མཛེས་ཤིང་ཞི་བར་བྱ་བ་སྟེ། །ཕྱི་ནས་སློབ་དཔོན་དགྱེས་པར་བྱ། །གོས་དང་རྒྱན་ལ་སོགས་པ་ཡི། །གཞན་ཀུན་ལ་ཡང་མཆོད་པར་བྱ། །བཟའ་བ་བཏུང་སོགས་གོས་ཀྱིས་སོ། །གསང་བ་ཆེན་པོས་

33b.6ཞི་བར་བྱ། །དཔལ་ཁྲག་འཐུང་མངོན་པར་འབྱུང་བ་ལས་འབུམ་ཕྲག་གསུམ་ལས་བཏུས་པ། བསྟན་བཅོས་ཐམས་ཅད་ཀྱི་རྒྱལ་པོ་དཔལ་ཁྲག་འཐུང་ཆེན་པོ་བཀླགས་པས་འགྲུབ་པ། ཐམས་ཅད་མཁྱེན་པའི་ཡེ་ཤེས་གཞན་ལས་རྒྱལ་བ་དང་པོའི་སྒྲུབ་པའི་རྒྱུད་ཀྱི་ཕྱི་མ། དཔལ་ཁྲག་

33b.7འཐུང་མངོན་པར་འབྱུང་བ་རྣལ་འབྱོར་མའི་རྒྱུད་ཀྱི་རྒྱལ་པོ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ཆེན་པོ་ཨ་དྭ་ཡ་བཛྲ་དང་བོད་ཀྱི་ལོ་ཙྪ་བ་ཆིངས་ཡོན་ཏན་འབར་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།