No title in the text — opening words: སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 36 · folio 128a

ཞིང་འདུ་ཤེས་ཐམས་ཅད་རྣམ་པར་སྤངས་པའི་ཡིད་དང་། ཆགས་པ་ཐམས་ཅད་རྣམ་པར་ཟློག་པའི་སེམས་དང་། བསྒྲིབས་པ་ཐམས་ཅད་རབ་ཏུ་སྤངས་པའི་ཡིད་ཀྱིས་ཡང་དག་པར་རྟོགས་པ་དང་ལྡན་ཞིང་། དེ་བཞིན་གཤེགས་པ་ཐམས་ཅད་

ཀྱིས་ཡོངས་སུ་གསལ་བར་བྱས་པའི་ཡེ་ཤེས་དང་། སངས་རྒྱས་ཀྱི་ཆོས་ཐམས་ཅད་ཀྱིས་མངོན་པར་བརླན་པའི་དགེ་བའི་རྩ་བ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་ལ་ཡང་དག་པར་གནས་པའི་ལུས་དང་། ཆོས་དཀར་པོ་ཐམས་ཅད་ཡོངས་སུ་གཟུང་

བ་དང་། ཡང་དག་པར་རྫོགས་པའི་སངས་རྒྱས་ཀྱི་སྤྱོད་པའི་ཕ་རོལ་ཏུ་ཕྱིན་པ་ཐོབ་པ་ཤིན་ཏུ་བསླབས་པ། སེམས་ཅན་ཐམས་ཅད་ཀྱི་གཙོ་བོ་ཀུན་ཏུ་བཟང་པོའི་སྤྱད་པ་སྤྱོད་པས་དབང་བསྐུར་བའི་སྨོན་ལམ་དང་ལྡན་པས། སེམས་ཀྱི་སྐད་ཅིག་གཅིག་ལ་འཇུག་

པས་ཤེས་པར་གྱུར་ཅིག །མཐོང་བར་གྱུར་ཅིག །རབ་ཏུ་ཤེས་པར་གྱུར་ཅིག །ཞུགས་པར་གྱུར་ཅིག །ཤིན་ཏུ་སྒྲུབ་པར་གྱུར་ཅིག །ཡོངས་སུ་རྒྱས་པར་བྱེད་པར་གྱུར་ཅིག །ཡོངས་སུ་ཤེས་པར་གྱུར་ཅིག །རབ་ཏུ་རྟོགས་པར་གྱུར་ཅིག །རྗེས་སུ་ཐོབ་

བར་གྱུར་ཅིག །རབ་ཏུ་འཕེལ་བར་བྱེད་པར་གྱུར་ཅིག །བྱིན་གྱིས་རློབ་པར་བྱེད་པར་གྱུར་ཅིག །དགེ་བའི་རྩ་བ་འདིས་འགྲོ་བ་ཐམས་ཅད་ལ་རྣམ་པ་བཟང་པོའི་སྤྱོད་པའི་ཡེ་ཤེས་རིན་པོ་ཆེ་དང་། ཀུན་ཏུ་བཟང་པོའི་འབྱུང་བ་རྩོམ་པ་རླབས་པོ་ཆེ་དང་། ཆགས་པ་མེད་པ་

དང་གྲོལ་ཞིང་བཅིངས་པ་མྱེད་པའི་སེམས་རེ་རེ་ལ་སེམས་ཚད་མྱེད་པ་ཡོངས་སུ་འཛུད་པར་བྱེད་ཅིང་ཡང་དག་པར་རྟེན་པ་དང་། རྣམ་པར་རྟོག་པར་གྱུར་པ་དང་། རྣམ་པ་སྣ་ཚོགས་སུ་གྱུར་པ་དང་། མངོན་པར་འདུ་བྱ་བ་རྣམ་པ་སྣ་ཚོགས་ཀྱི་ལས་དང་། ཚད་མེད་

པའི་ལས་དང་། མཚན་ཉིད་ཐ་དད་པའི་ལས་དང་། སེམས་རྣམ་པ་སྣ་ཚོགས་དང་། བསམ་པ་རྣམ་པ་ཐ་དད་པས་བྱུང་ཞིང་ཡང་དག་པར་གཞོལ་བར་གྱུར་པས་རབ་ཏུ་ཤེས་པར་གྱུར་ཅིག །དགེ་བའི་རྩ་བ་འདིས་ཀུན་ཏུ་བཟང་པོའི་སྨོན་ལམ་དང་། ཡེ་ཤེས་

Vol. 36 · folio 128b

རིན་པོ་ཆེ་དང་། ཆགས་པ་མེད་པ་དང་། གྲོལ་ཞིང་བཅིངས་པ་མེད་པའི་སེམས་སུ་སྐྱེ་མཆེད་རེ་རེ་ཞིང་། བརྗོད་དུ་མེད་པའི་སྐྱེ་མཆེད་རབ་ཏུ་གཟུང་བ་དང་། དེ་བཞིན་དུ་སྐྱེ་མཆེད་འབྱམ་ཀླས་པ་ལ་རབ་ཏུ་འཇུག་པ་ཤེས་པར་གྱུར་ཅིག །རབ་ཏུ་ཤེས་པར་གྱུར་

ཅིག །ཁོང་དུ་ཆུད་པར་གྱུར་ཅིག །ཤིན་ཏུ་རྟོགས་པར་གྱུར་ཅིག །དགེ་བའི་རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་ལས་ལ་རབ་ཏུ་བརྩོན་པའི་ཡེ་ཤེས་ཀྱིས་དང་། ཆགས་པ་མེད་པ་དང་གྲོལ་ཞིང་བཅིངས་པ་མྱེད་པའི་སེམས་

སུ་ལས་འབྱམ་ཀླས་པ་རེ་རེ་ལ་ལས་མངོན་པར་འདུ་བྱ་བ་བརྗོད་དུ་མེད་པའི་ཡང་བརྗོད་དུ་མེད་པ་རྐྱེན་སྣ་ཚོགས་ཀྱིས་མངོན་པར་འདུ་བྱས་པ་རྣམས་ཡང་དག་པར་གཟུང་བ་དང་། ལས་འབྱམ་ཀླས་པ་གཅིག་ལ་ཇི་ལྟ་བ་དེ་བཞིན་དུ་ལས་ཀྱི་མངོན་པར་འདུ་བྱ་བ་ཐམས་

ཅད་ཀྱིས་ལས་ཀྱི་ཡུལ་སྣ་ཚོགས་སུ་དམིགས་པ་ལ་བརྩོན་པར་བྱེད་པ་ཤེས་བར་གྱུར་ཅིག །རབ་ཏུ་ཤེས་པར་གྱུར་ཅིག །ཡེ་ཤེས་ཤིན་ཏུ་ཐོབ་པར་གྱུར་ཅིག །ཡོངས་སུ་རྫོགས་པར་བྱེད་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་

བཅིངས་པ་མྱེད་པའི་སེམས་སུ་ཆོས་རེ་རེ་ལ་བརྗོད་དུ་མེད་པའི་ཡང་བརྗོད་དུ་མེད་པའི་ཆོས་ཡང་དག་པར་གཟུང་པ་རབ་ཏུ་ཤེས་པར་གྱུར་ཅིག །ཆོས་གཅིག་པོ་དེ་ཡང་ཆོས་ཐམས་ཅད་དུ་ཡང་དག་པར་གཟུད་པ་རབ་ཏུ་ཤེས་པར་གྱུར་ཅིག །ཆོས་རྣམ་པར་ཕྱེ་

བ་ཡང་རབ་ཏུ་ཤེས་པར་གྱུར་ཅིག །མ་ཆགས་པ་དང་འགལ་བ་མེད་པར་ཡང་ཆུད་པར་གྱུར་ཅིག །དགེ་བའི་རྩ་བ་འདིས། བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོའི་ཆགས་པ་མེད་པའི་རྒྱུད་དུ་གྱུར་པ་ལ་གནས་

ཤིང་། ཐམས་ཅད་ཤེས་པས་ཆགས་པ་མེད་པ་དང་། གྲོལ་ཞིང་བཅིངས་པ་མེད་པའི་སེམས་སུ་ཆོས་བསྟན་པ་རེ་རེ་ལ། ཆོས་བསྟན་པ་རྣམ་པར་ཕྱེ་བ་འབྱམ་ཀླས་པ་བརྗོད་དུ་མེད་པའི་ཡང་

Vol. 36 · folio 129a

བརྗོད་དུ་མེད་པ་གཞན་དང་། གཞན་ཡོངས་སུ་སྨྱིན་པར་བྱ་བས། ཡང་དག་པར་བསྡུས་པ་འདུལ་བ་བསམ་གྱིས་མྱི་ཁྱབ་པས་ཡང་དག་པར་བསྡུས་པ་མཐའ་དང་དབུས་མྱེད་པའི་དུས་སུ་ཡང་དག་པར་བཤད་པ།

དུས་ཐམས་ཅད་དུ་སེམས་ཅན་གྱི་དབང་པོ་དང་མོས་པ་ཇི་ལྟ་བ་བཞིན་དུ་གོ་བར་བྱེད་པ། སེམས་ཅན་གྱི་མཐུ་ཇི་བཞིན་དུ་སངས་རྒྱས་ཀྱི་གསུང་གི་དབྱངས་ཀྱིས་རྣམ་པར་རིག་པར་བྱེད་པ། སངས་རྒྱས་ཀྱི་གསུང་གཅིག་གིས་བརྗོད་དུ་མྱེད་པའི་འཁོར་གྱི་དཀྱིལ་འཁོར་གྱི་སེམས་

ཅན་འབྱམ་ཀླས་པ་རྣམ་པ་ཐ་དད་པ་མངོན་པར་དགའ་བར་བྱེད་པ། ཆོས་ཀྱི་དབྱིངས་ཐམས་ཅད་དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་དུ་གྱུར་པའི་བྱང་ཆུབ་སེམས་དཔའི་བསམ་པ་རྒྱ་ཆེར་བྱེད་པ། མཐའ་དང་དབུས་མེད་པའི་སྤྱོད་པའི་དཀྱིལ་འཁོར་

ལ་རབ་ཏུ་གནས་ཤིང་ཀུན་ཏུ་བཟང་པོའི་ས་ལ་རབ་ཏུ་ཞུགས་པའི་སེམས་ཀྱིས་ཡོངས་སུ་ཤེས་པར་གྱུར་ཅིག །རབ་ཏུ་ཤེས་པར་གྱུར་ཅིག །ཁོང་དུ་ཆུད་པར་གྱུར་ཅིག །སེམས་སྐད་ཅིག་སེམས་སྐད་ཅིག་ཅིང་ཁོང་དུ་ཆུད་པའི་ཡེ་ཤེས་ཀྱིས་ཇི་སྐད་དུ་བརྗོད་པའི་

ཆོས་འབྱམ་ཀླས་པ་ལ་འཇུག་པས་ཁོང་དུ་ཆུད་པར་གྱུར་ཅིག །སེམས་ཀྱི་སྐད་ཅིག་བརྗོད་དུ་མྱེད་པས་རྣམ་པར་སྤེལ་བའི་ཡེ་ཤེས་ཀྱི་ཕུང་པོ་ཆེན་པོས་ཕྱི་མའི་མཐའི་བསྐལ་པ་མཐའ་དང་དབུས་མྱེད་པའི་མུར་ཕྱིན་པར་ཞིང་འབྱམ་ཀླས་པ་ཐམས་ཅད་སྤྱོད་ཅིང་སྟོན་པར་གྱུར་

ཅིག །ཀུན་ཏུ་བཟང་པོའི་དམྱིགས་པ་ཡེ་ཤེས་ཆེན་པོ་ལ་བརྩོན་པ་དང་། སྤྱོད་པ་བརྩོམས་པ་ཐམས་ཅད་ལ་རབ་ཏུ་འགྲུབ་པར་བྱེད་པའི་ཀུན་ཏུ་བཟང་པོའི་སས་ནམ་མཁའི་དབྱིངས་ཐམས་ཅད་སྤྱོད་པ་ལ་འཇུག་པ་བྲལ་བ་མྱེད་པས་ཡོངས་སུ་རྒྱས་པར་བྱེད་པར་གྱུར་ཅིག །དགེ་བའི་

རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་སྒོ་ལ་རབ་ཏུ་བརྩོན་པའི་དབང་པོས་ཆགས་པ་མྱེད་པ་དང་། གྲོལ་ཞིང་བཅིངས་པ་མྱེད་པའི་སེམས་སུ་བྱང་ཆུབ་སེམས་དཔའི་སྤྱོད་པའི་རྒྱལ་པོ་རབ་ཏུ་ཐོབ་ཅིང་བསམ་པ་བརྗོད་དུ་མྱེད་པའི་ཡང་བརྗོད་དུ་མྱེད་པ་རྣམ་པར་

Vol. 36 · folio 129b

ཕྱེ་བ་ལ་གནས་པ་དང་། དམྱིགས་པ་བསམ་གྱིས་མྱི་ཁྱབ་པ་དང་། སྤྱོད་པ་དགེ་བས་བྱུང་བས་དབང་པོ་རེ་རེ་ལ་དབང་པོ་བརྗོད་དུ་མྱེད་པའི་ཡང་བརྗོད་དུ་མྱེད་པར་ཡང་དག་པར་གཟུང་བ་ཡོངས་སུ་ཤེས་པར་གྱུར་ཅིག །རབ་ཏུ་ཤེས་པར་གྱུར་ཅིག །ཤིན་ཏུ་རྟོགས་པར་གྱུར་ཅིག །

ཁོང་དུ་ཆུད་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་དང་། འཇིགས་པ་མྱེད་པའི་སེམས་དང་། རྨོངས་པ་མྱེད་པའི་སེམས་དང་། འཁྲུགས་པ་མྱེད་པའི་སེམས་དང་། རྣམ་པར་འཁྲུགས་པ་མྱེད་པའི་

སེམས་དང་། བསླད་པ་མྱེད་པའི་སེམས་དང་། དབང་པོ་མྱི་དམའ་བའི་སེམས་དང་། རྩེ་གཅིག་པའི་སེམས་དང་། ཤིན་ཏུ་མཉམ་པར་བཞག་པའི་སེམས་དང་། ཆོས་ཤིན་ཏུ་རྣམ་པར་ཕྱེ་བའི་སེམས་དང་། ཡེ་ཤེས་ཤིན་ཏུ་བརྟེན་པའི་

སེམས་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། ཡོངས་སུ་བསྔོ་བའི་རྗེས་སུ་སོང་བའི་སེམས་ཀྱིས་གཟུགས་ཤེས་པ་ཤིན་ཏུ་ཕྲ་བ་དང་། ལུས་ཤེས་པ་ཤིན་ཏུ་ཕྲ་བ་དང་། ཞིང་ཤེས་པ་ཤིན་ཏུ་ཕྲ་བ་དང་། བསྐལ་པ་ཤེས་པ་ཤིན་

ཏུ་ཕྲ་བ་དང་། འཇིག་རྟེན་ཤེས་པ་ཤིན་ཏུ་བྲ་བ་དང་། ཡུལ་ཤེས་པ་ཤིན་ཏུ་ཕྲ་བ་དང་། དུས་ཤེས་པ་ཤིན་ཏུ་ཕྲ་བ་དང་། ཆོས་ཀྱི་གྲངས་ཤེས་པ་ཤིན་ཏུ་ཕྲ་བ་དང་། ལས་ཀྱི་རྣམ་པར་སྨྱིན་པ་ཤེས་པ་ཤིན་ཏུ་ཕྲ་བ་དང་། རྣམ་པར་དག་པ་ཤེས་པ་ཤིན་ཏུ་ཕྲ་བ་དང་།

ཤིན་ཏུ་ཕྲ་བ་འདི་དག་ཐམས་ཅད་སེམས་ཀྱི་སྐད་ཅིག་གཅིག་ཏུ་བརྐྱང་བའི་ཡེ་ཤེས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་རྗེས་སུ་སོང་བས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་གྱུར་ཅིག །ཤིན་ཏུ་རྟོགས་པར་གྱུར་ཅིག །ཁོང་དུ་ཆུད་པར་གྱུར་ཅིག །དགེ་བའི་

རྩ་བ་འདིས་ཆགས་པ་མྱེད་པ་དང་། གྲོལ་ཞིང་བཅིངས་པ་མྱེད་པའི་སེམས་སུ་རག་ལས་པ་མྱེད་པར་བྱང་ཆུབ་སེམས་དཔའི་སྤྱོད་པ་ལ་རབ་ཏུ་གནས་ཤིང་ཀུན་ཏུ་བཟང་པོའི་སྤྱོད་པ་ལ་བརྩོན་པའི་སྤྱོད་པ་ཆེན་པོ་ལ་དུབ་པ་མྱེད་པར་གནས་ཤིང་སེམས་ཅན་གྱི་རྒྱུད་ཤིན་ཏུ་

Vol. 36 · folio 130a

ཕྲ་བ་དང་། སེམས་ཅན་གྱི་ཤི་འཕོ་ཤིན་ཏུ་ཕྲ་བ་དང་། སེམས་ཅན་སྐྱེ་བ་ཤིན་ཏུ་ཕྲ་བ་དང་། སེམས་ཅན་གྱི་གནས་ཤིན་ཏུ་ཕྲ་བ་དང་། སེམས་ཅན་གྱི་རྟེན་ཤིན་ཏུ་ཕྲ་བ་དང་། སེམས་ཅན་མཐའ་དང་དབུས་མེད་པའི་རིགས་ཤིན་

ཏུ་ཕྲ་བ་དང་། སེམས་ཅན་གྱི་ཁམས་ཐམས་ཅད་ཀྱི་ཡུལ་ཤིན་ཏུ་ཕྲ་བ་དང་། སེམས་ཅན་གྱི་འདུ་བྱེད་ཤིན་ཏུ་ཕྲ་བ་དང་། སེམས་ཅན་བསྟན་པ་ཤིན་ཏུ་ཕྲ་བ་དང་། སེམས་ཅན་དམྱིགས་པ་ཤིན་ཏུ་ཕྲ་བའི་ཤིན་ཏུ་ཕྲ་བ་འདི་དག་དང་། ཤིན་ཏུ་ཕྲ་བ་

ལ་འཇུག་པ་ཇི་སྙེད་གང་ཡང་རུང་སྟེ། དེ་དག་ཐམས་ཅད་སེམས་གཅིག་བརྐྱང་བའི་སྤྱོད་པའི་ཡེ་ཤེས་ཀྱིས་ཤེས་པར་གྱུར་ཅིག །ཁོང་དུ་ཆུད་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་སུ་བྱང་ཆུབ་

སེམས་དཔའ་ཀུན་ཏུ་བཟང་པོའི་སྤྱོད་པ་ལ་རབ་ཏུ་བརྩོན་པའི་ལྷག་པའི་བསམ་པས་བྱང་ཆུབ་སེམས་དཔའ་རྣམས་ཀྱི་ཐོག་མ་སེམས་བསྐྱེད་པ་ནས་ཉེ་བར་བཟུང་བའི་བྱང་ཆུབ་སེམས་དཔའི་སྤྱོད་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་གནས་ཤིན་ཏུ་ཕྲ་བ་དང་།

བྱང་ཆུབ་སེམས་དཔའི་རྣམ་པར་འཕྲུལ་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་སངས་རྒྱས་ཀྱི་ཞིང་ཚད་མྱེད་པར་འགྲོ་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཆོས་སྣང་བ་རབ་ཏུ་ཐོབ་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་མིག་

རྣམ་པར་དག་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ལྷག་པའི་བསམ་པ་ཡོངས་སུ་གྲུབ་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འགྲོ་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་གཟུངས་

ཀྱི་སྒོ་ཤེས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་འཇིགས་པ་མྱེད་པའི་ས་མཐའ་དང་དབུས་མྱེད་པ་དང་། ཐ་དད་པ་ཡང་དག་པར་ཤེས་པ་ཐམས་ཅད་ཀྱི་མཛོད་ཀྱི་འོད་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཏིང་ངེ་འཛིན་མཐའ་དང་དབུས་

Vol. 36 · folio 130b

མྱེད་པའི་མཚན་མ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་སངས་རྒྱས་ཐམས་ཅད་མཐོང་བའི་ཏིང་ངེ་འཛིན་རབ་ཏུ་ཐོབ་པའི་ཤེས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཟབ་མོ་མངོན་པར་བསྒྲུབས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཏིང་

ངེ་འཛིན་རྒྱ་ཆེན་པོའི་རྒྱན་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཆོས་ཀྱི་དབྱིངས་ཀྱི་ཏིང་ངེ་འཛིན་གྱི་ཡེ་ཤེས་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བ་ཆེན་པོའི་རྣམ་པར་འཕྲུལ་བ་དང་། ཏིང་ངེ་འཛིན་མངོན་པར་བསྒྲུབས་པའི་ཡེ་ཤེས་

ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཕྱི་མའི་མཐའི་མུར་སྤྱོད་པ་ཡང་དག་པར་གཟུང་བའི་ཏིང་ངེ་འཛིན་གྱི་ཡེ་ཤེས་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཏིང་ངེ་འཛིན་རྣམ་པར་དབྱེ་བ་མཐའ་དང་དབུས་མྱེད་པ་ཐམས་ཅད་མངོན་པར་བསྒྲུབས་པའི་ཡེ་ཤེས་ཤིན་

ཏུ་ཕྲ་བ་དང་། བྱང་ཆུབ་སེམས་དཔའི་སངས་རྒྱས་ཐམས་ཅད་དང་མངོན་སུམ་དུ་ཞབས་ཀྱི་དྲུང་ན་འདུག་ཀྱང་སངས་རྒྱས་གཅིག་དང་ཡང་བྲལ་བ་མྱེད་པའི་ཏིང་ངེ་འཛིན་མངོན་པར་བསྒྲུབས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་རྒྱ་ཆེ་ཞིང་།

ཡངས་པ་དང་། ཟབ་ཅིང་བསྒྲིབས་པ་མྱེད་པ་དང་། ཆགས་པ་མྱེད་པ་ལ་རབ་ཏུ་བརྩོན་པས་ཐམས་ཅད་མཁྱེན་པ་ཉིད་ཀྱི་མཐར་ཐུག་པར་སྤྱོད་པ་ཡང་དག་པར་གཟུང་བའི་མཛོད་ཤེས་པའི་ས་ཁོང་དུ་ཆུད་པ་དང་། མངོན་པར་ཤེས་པའི་ས་རབ་ཏུ་ཐོབ་པ་དང་། དོན་གྱིས་

ཤིན་ཏུ་རྟོགས་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་བསྒྲིབས་པ་མེད་པའི་ཡེ་ཤེས་ཤིན་ཏུ་ཕྲ་བ་ཐམས་ཅད་ཤེས་པར་གྱུར་ཅིག །རབ་ཏུ་རྟོགས་པར་གྱུར་ཅིག །དགེ་བའི་རྩ་བ་འདིས་ཆགས་པ་མེད་པ་དང་། གྲོལ་ཞིང་བཅིངས་པ་མེད་པའི་

སེམས་ཀྱིས་བྱང་ཆུབ་སེམས་དཔའ་ཐམས་ཅད་ཀྱི་བྱང་ཆུབ་སེམས་དཔའ་རྣམ་པར་དགོད་པའི་ཡེ་ཤེས་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ས་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་སྤྱོད་པ་རྣམ་པ་ཐ་དད་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་

Vol. 36 · folio 131a

ཡོངས་སུ་བསྔོ་བ་མངོན་པར་བསྒྲུབས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་སངས་རྒྱས་ཐམས་ཅད་ཀྱི་གཏེར་རབ་ཏུ་ཐོབ་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཡེ་ཤེས་རྣམ་པར་དཔྱད་པ་ཤིན་ཏུ་ཕྲ་བ་དང་། བྱང་ཆུབ་སེམས་

དཔའི་སྨོན་ལམ་རྣམ་པར་འཕྲུལ་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་སྙོམས་པར་འཇུག་པ་བསྟན་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་རྫུ་འཕྲུལ་གྱི་ཚུལ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཕྱག་རྒྱ་ཤིན་ཏུ་ཕྲ་བ་དང་། བྱང་ཆུབ་

སེམས་དཔའི་ཚེ་གཅིག་གིས་ཐོབ་པ་ལ་ཡང་དབང་སྒྱུར་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་དགའ་ལྡན་གྱི་གནས་སུ་སྐྱེས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ལྷའི་ཕོ་བྲང་གི་གནས་ན་འདུག་པ་ཤིན་ཏུ་ཕྲ་བ་དང་། བྱང་ཆུབ་སེམས་

དཔའི་སངས་རྒྱས་ཀྱི་ཞིང་ཡོངས་སུ་དག་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་མྱིའི་འཇིག་རྟེན་ན་དགའ་བར་གནས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་འོད་གཟེར་གྱི་དྲ་བ་དགྱེ་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་རིགས་རྣམ་པར་དབྱེ་བ་ཤིན་

ཏུ་ཕྲ་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྣམ་པར་དབྱེ་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་འཇིག་རྟེན་གྱི་ཁམས་ཐམས་ཅད་དུ་རྒྱས་པར་སྐྱེ་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ལུས་གཅིག་གིས་ཤི་འཕོ་བ་རྣམ་པ་ཐ་

དད་པ་བསྟན་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་མའི་མངལ་ཏུ་འགྲོ་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་མངལ་ཏུ་སོང་ནས་གནས་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་མའི་མངལ་ན་རྣམ་པར་འཕྲུལ་པས་ཆོས་ཀྱི་དབྱིངས་ཐམས་

ཅད་འཁོར་གྱི་དཀྱིལ་འཁོར་གཅིག་པར་མའི་ལྟོར་ཤོང་བའི་ཡེ་ཤེས་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་མའི་མངལ་ན་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ཐམས་ཅད་ཡང་དག་པར་བསྟན་པའི་ཡེ་ཤེས་ཤིན་ཏུ་ཕྲ་བ་དང་། བྱང་ཆུབ་སེམས་དཔའི་ཚེ་ཤིན་ཏུ་ཕྲ་བ་དང་།

Vol. 36 · folio 131b

བྱང་ཆུབ་སེམས་དཔའ་གོམ་པ་བདུན་དུ་སེང་གེའི་སྟབས་སུ་འགྲོ་བའི་ཡེ་ཤེས་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་ཐབས་མཁས་པ་ཡང་དག་པར་སྟོན་པའི་ཡེ་ཤེས་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་མངོན་པར་འབྱུང་བའི་ཚུལ་དང་། སྤྱོད་པ་

རབ་ཏུ་སྦྱོར་བ་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་དུ་འདུག་པ་ཤིན་ཏུ་ཕྲ་བ་དང་། བྱང་ཆུབ་སེམས་དཔའ་བདུད་ཀྱི་སྡེ་རབ་ཏུ་ཕམ་པར་བྱས་ཏེ། བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་འཚང་རྒྱ་བ་ཤིན་ཏུ་ཕྲ་བ་དང་། དེ་བཞིན་གཤེགས་

པའི་བྱང་ཆུབ་ཀྱི་གདན་ལ་འདུག་སྟེ། འཇིག་རྟེན་གྱི་ཁམས་ཐམས་ཅད་དུ་འོད་གཟེར་གྱི་དྲ་བ་རབ་ཏུ་དགྱེ་བ་ཤིན་ཏུ་ཕྲ་བ་དང་། དེ་བཞིན་གཤེགས་པའི་རྣམ་པར་འཕྲུལ་པ་ཡང་དག་པར་བསྟན་པ་ཤིན་ཏུ་ཕྲ་བ་དང་། དེ་བཞིན་གཤེགས་པའི་སེང་གེའི་ང་རོ་ཕྱུང་བའི་མྱ་ངན་ལས་

འདས་པ་ཆེན་པོ་ཤིན་ཏུ་ཕྲ་བ་དང་། དེ་བཞིན་གཤེགས་པ་སེམས་ཅན་ཐམས་ཅད་གདུལ་བའི་འཁོར་དུ་ཐོགས་པ་མྱེད་པ་ཤིན་ཏུ་ཕྲ་བ་དང་། དེ་བཞིན་གཤེགས་པའི་རྣམ་པར་འཕྲུལ་པ་བསམ་གྱིས་མྱི་ཁྱབ་པ་ལ་བྱང་ཆུབ་ཀྱི་སེམས་རྡོ་རྗེ་ལྟ་བུ་ཡོངས་སུ་ཤེས་པ་ཤིན་ཏུ་ཕྲ་བ་

དང་། འཇིག་རྟེན་ཐམས་ཅད་རྒྱས་པར་འགེངས་པའི་དེ་བཞིན་གཤེགས་པའི་བྱིན་གྱི་རླབས་ཡོངས་སུ་བསྟན་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་པའི་སངས་རྒྱས་ཀྱི་མཛད་པ་ཕྱི་མའི་མཐའི་མུར་ཐུག་པར་རྒྱུན་མྱི་ཆད་པ་ཤིན་ཏུ་

ཕྲ་བ་དང་། དེ་བཞིན་གཤེགས་པའི་བྱིན་གྱི་རླབས་ཆོས་ཀྱི་དབྱིངས་ཀྱི་མཐར་ཐུག་པར་ཐོགས་པ་མེད་པ་ཤིན་ཏུ་ཕྲ་བ་དང་། ནམ་མཁའི་དབྱིངས་ཀྱི་མཐས་གཏུགས་པའི་ཞིང་གི་ཡུལ་ཐམས་ཅད་དུ་སེམས་ཅན་འདུལ་བར་སངས་རྒྱས་སྐྱེ་བ་བསྟན་པ་ཤིན་ཏུ་ཕྲ་བ་དང་།

སངས་རྒྱས་ཀྱི་སྐུ་གཅིག་སངས་རྒྱས་ཀྱི་སྐུ་ཐ་དད་པར་རབ་ཏུ་སྤྲོ་བའི་ཤེས་པ་ཤིན་ཏུ་ཕྲ་བ་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་དུས་གསུམ་དུ་གཤེགས་པའི་དེ་བཞིན་གཤེགས་པ་གང་ཇི་སྙེད་པའི་དཀྱིལ་འཁོར་གྱི་ཁྱུ་མཆོག་གི་མཐུ་དབྱུང་བའི་ཡེ་ཤེས་

Vol. 36 · folio 132a

ཤིན་ཏུ་ཕྲ་བ་གང་ཇི་སྙེད་པ་དེ་དག་ཐམས་ཅད་སེམས་ཀྱི་སྐད་ཅིག་རེ་རེ་ཞིང་རྣམ་པར་འཕེལ་བའི་ཡེ་ཤེས་ཀྱི་དཀྱིལ་འཁོར་དང་། བྱང་ཆུབ་སེམས་དཔའི་སྤྱོད་པ་སྦྱོར་བ་ཕྱིར་མྱི་ལྡོག་ཅིང་རྒྱུན་མྱི་འཆད་པ་དང་། ཀུན་ཏུ་བཟང་བོར་རབ་ཏུ་འཕྲོས་པའི་ཡོངས་

སུ་བསྔོ་བའི་ས་དང་། དེ་བཞིན་གཤེགས་པ་ཐམས་ཅད་ཁོང་ན་ཡང་དག་པར་འཛིན་པའི་བྱང་ཆུབ་སེམས་དཔའི་སྤྱོད་པ་དང་། འདོད་ཆགས་དང་བྲལ་བ་མྱེད་པས་བྱུང་བའི་བྱང་ཆུབ་སེམས་དཔའི་སྒོའི་དཀྱིལ་འཁོར་དང་། སྤྱོད་པ་འབྱམ་ཀླས་བ་ལ་བརྩོན་པ་

ཤིན་ཏུ་རྣམ་པར་སྦྱངས་པ་དང་། བྱང་ཆུབ་སེམས་དཔའི་སྤྱོད་པ་ལ་དམྱིགས་པ་འགྲོ་བ་ཐམས་ཅད་བདེ་བར་བྱ་བ་དང་། བྱང་ཆུབ་སེམས་དཔའི་སེམས་དང་བསམ་པས་ཆེན་པོར་བསྒྲུབས་པ་དང་། ཆོས་ཀྱི་དབྱིངས་ཐམས་ཅད་དུ་འདལ་བའི་དམྱིགས་པའི་

མཛོད་ཀྱི་ཡོངས་སུ་བསྔོ་བའི་སྒོ་རྡོ་རྗེའི་རྒྱལ་མཚན་དང་། བྱང་ཆུབ་སེམས་དཔའ་འཇུག་པའི་སྒོ་དེ་བཞིན་གཤེགས་པས་དགོངས་པ་དང་། ཆོས་བསྟན་པ་འགལ་བ་མྱེད་པའི་ཚུལ་གྱིས་ཆོས་ཐམས་ཅད་ཀྱི་དོན་རབ་ཏུ་བསྟན་པ་དང་། འགྲོ་བ་ཐམས་ཅད་ཀྱིས་མི་སྒུལ་བའི་

དམ་བཅས་པ་ཤིན་ཏུ་རྒྱ་ཆེ་བ་དང་། སེམས་སྐད་ཅིག་གིས་མཐར་ཕྱིན་པའི་འཇུག་པ་དང་། དམྱིགས་པའི་མཛོད་སེམས་དང་སེམས་མ་ཡིན་པའི་ས་ཐམས་ཅད་རབ་ཏུ་རྟོགས་པ་དང་། ཡང་དག་པར་བསྟན་པའི་སྒོ་སེམས་མ་ཡིན་པའི་སེམས་ཀྱིས་མངོན་པར་

བསྒྲུབས་པ་དང་། ཡེ་ཤེས་ཀྱིས་ཚིག་གི་ལམ་ཐམས་ཅད་ལས་གྱེན་དུ་འཕགས་པ་དང་། སྤྱོད་པས་མངོན་པར་འཚང་རྒྱ་བའི་བྱིན་གྱི་རླབས་བྱང་ཆུབ་སེམས་དཔའ་ཐམས་ཅད་དང་། རྒྱུད་གྱི་ཚུལ་གཅིག་ཏུ་གྱུར་པ་དང་། ཀུན་ཏུ་བཟང་པོའི་སྤྱོད་པའི་དཀྱིལ་འཁོར་

ཕྱི་མའི་མཐའི་མུར་རྒྱུན་མི་འཆད་པ་དང་། སྤྱོད་པ་རྒྱུན་མྱི་འཆད་པ་དང་། འཇིག་རྟེན་ཐམས་ཅད་ཀྱི་འགྲོ་བའི་རྟོག་པ་དང་། འདུ་ཤེས་ཀྱི་རྣམ་པ་དང་། ཚིག་གི་ལམ་དུ་གདགས་པས་གཏུགས་པའི་བྱིན་གྱི་རླབས་ཁྱད་པར་གྱི་སྨོན་ལམ་ཆེན་པོས་རྣམ་པར་འཕྲུལ་

Vol. 36 · folio 132b

པས་ཁོང་དུ་ཆུད་པར་གྱུར་ཅིག །རབ་ཏུ་ཤེས་པར་གྱུར་ཅིག །ཤིན་ཏུ་བསྒྲུབས་པར་གྱུར་ཅིག །རྣམ་པར་སྤྱོད་པར་གྱུར་ཅིག །འགྲོ་བ་ཀུན་ཏུ་ཡང་དག་པར་སྟོན་པར་གྱུར་ཅིག །དགེ་བའི་རྩ་བ་འདིས་

ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་སེམས་སུ་སེམས་ཅན་གྱི་ཁམས་ཐམས་ཅད་ལ་འཇུག་པ་ཤེས་པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་རྣམ་པར་དབྱེ་བ་ཤེས་པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་སྣ་ཚོགས་རྟོགས་པར་བསྟན་པ་ཤེས་

པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་དུ་མའི་མངོན་པར་ཞེན་པ་ཤེས་པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་ཀྱི་བྱེ་བྲག་ཐ་དད་པ་ཤེས་པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་སྐལ་བ་མཉམ་པ་ཤེས་པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་

མཐའ་དང་དབུས་མྱེད་པའི་ལམ་གྱི་རྒྱུད་ཤེས་པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་བསམ་གྱིས་མྱི་ཁྱབ་པ་མངོན་པར་འདུ་བྱ་བ་སྣ་ཚོགས་རྣམ་པར་རྟོག་པར་གྱུར་པ་ཤེས་པ་ཤིན་ཏུ་ཕྲ་བ་དང་། སེམས་ཅན་མཐའ་ཡས་པའི་ཀུན་ནས་ཉོན་མོངས་པ་ཤེས་

པ་ཤིན་ཏུ་ཕྲ་བ་དང་། སེམས་ཅན་གྲངས་མྱེད་པའི་རྣམ་པར་བྱང་བ་ཤེས་པ་ཤིན་ཏུ་ཕྲ་བ་དང་། སེམས་ཅན་གྱི་ཁམས་ཀྱི་ཡུལ་ཤེས་པ་ཤིན་ཏུ་ཕྲ་བ་འདི་དག་དང་། ཤེས་པ་ཤིན་ཏུ་ཕྲ་བ་གང་ཇི་སྙེད་པ་དེ་དག་ཐམས་ཅད་སེམས་སྐད་ཅིག་དང་

ལྡན་པའི་ཡེ་ཤེས་ཀྱི་ཕུང་པོ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་བྱིན་གྱི་རླབས་དང་། དུས་ཇི་ལྟ་བ་བཞིན་དུ་བསྟན་པས་འདུལ་བ་ཡོངས་སུ་བཟུང་བ་དང་། དུས་ཐམས་ཅད་དུ་ཆོས་ཀྱི་སྒོ་བརྗོད་དུ་མྱེད་པ་རབ་ཏུ་བསྟན་ཅིང་ཆོས་ཀྱི་འཁོར་ལོ་

བསྐོར་བའི་བྱིན་གྱི་རླབས་དང་། བྱང་ཆུབ་སེམས་དཔའི་སྤྱོད་པ་ལ་རབ་ཏུ་བརྩོན་པའི་ཡེ་ཤེས་འབྱམ་ཀླས་པ་དང་། འགྲོ་བ་ཐམས་ཅད་རབ་ཏུ་དགའ་བའི་གནས་སུ་གྱུར་པའི་ལུས་བརྗོད་དུ་མྱེད་པའི་བྱིན་གྱི་རླབས་ཀྱི་ཁྱུ་མཆོག་གི་མཐུ་ཕྱུང་བ་དང་།

Vol. 36 · folio 133a

བྱང་ཆུབ་སེམས་དཔའི་སེམས་ལ་ཞུགས་པ་ཡེ་ཤེས་ཀྱི་ཉི་མས་སྣང་བར་བྱས་པ་དང་། བྱང་ཆུབ་སེམས་དཔའི་སེམས་མངོན་པར་རྫོགས་པའི་བྱིན་གྱི་རླབས་བྱང་ཆུབ་སེམས་དཔའི་ཡེ་ཤེས་ཀྱི་ཁྱུ་མཆོག་གི་མཐུ་ཕྱུང་བ་དང་། ཡེ་

ཤེས་ཆེན་པོ་འབྱམ་ཀླས་པ་དང་། ཀུན་ཏུ་བཟང་པོའི་སྤྱོད་པ་ལ་རབ་ཏུ་བརྩོན་པའི་འཇུག་པས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་གྱུར་ཅིག །རབ་ཏུ་ཤེས་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་ཕའི་

སེམས་སུ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ་ནམ་མཁའི་མཐས་གཏུགས་པ་ཐམས་ཅད་ཤེས་པ་ཤིན་ཏུ་ཕྲ་བ་འདི་ལྟ་སྟེ། འཇིག་རྟེན་གྱི་ཁམས་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཆེར་གྱུར་པ་ཤེས་པ་ཤིན་ཏུ་ཕྲ་བ་དང་།

འཇིག་རྟེན་གྱི་ཁམས་ཀུན་ནས་ཉོན་མོངས་པ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་རྣམ་པར་དག་པ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་རྒྱ་ཆེན་པོ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་སྣ་ཚོགས་ཤེས་པ་ཤིན་ཏུ་ཕྲ་བ་དང་།

འཇིག་རྟེན་གྱི་ཁམས་ཡངས་པ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་དོག་པ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་བསྒྲིབས་པ་མེད་པའི་རྒྱན་གྱིས་རབ་ཏུ་བརྒྱན་པ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་མ་

ལུས་པར་སངས་རྒྱས་སྐྱེ་བས་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་མ་ལུས་པར་རབ་ཏུ་སྣང་བར་བྱ་བ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་མ་ལུས་པར་ལུས་ཀྱིས་རྒྱས་པར་དགང་བ་ཤེས་པ་

ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་མ་ལུས་པར་འོད་གཟེར་རབ་ཏུ་དགྱེ་བས་སྣང་བར་བྱ་བ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་མ་ལུས་པར་སངས་རྒྱས་ཐམས་ཅད་ཀྱི་བྱིན་གྱི་རླབས་དང་སངས་རྒྱས་ཐམས་ཅད་ཀྱི་རྣམ་པར་

Vol. 36 · folio 133b

འཕྲུལ་བ་དང་། ཁྱུ་མཆོག་གི་མཐུ་ཕྱུང་བ་ཡང་དག་པར་བསྟན་པ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་མ་ལུས་པར་དབྱངས་གཅིག་གིས་དབྱངས་ཐམས་ཅད་དུ་རྣམ་པར་བསྟན་ཅིང་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་

ཁམས་ཐམས་ཅད་མ་ལུས་པའི་འཁོར་གྱི་དཀྱིལ་འཁོར་གྱིས་སངས་རྒྱས་ཀྱི་སྐུ་ཀུན་ནས་བསྐོར་བར་སངས་རྒྱས་ཀྱི་ཞིང་ཐམས་ཅད་ལ་འཇུག་པ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཐམས་ཅད་མ་ལུས་པར་སངས་རྒྱས་ཀྱི་ཞིང་གཅིག་ཏུ་བྱིན་གྱིས་

བརླབས་པ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཐམས་ཅད་མ་ལུས་པའི་སངས་རྒྱས་ཀྱི་ཞིང་གཅིག་སངས་རྒྱས་ཀྱི་ཞིང་ཐམས་ཅད་དུ་བྱིན་གྱིས་བརླབས་པ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཐམས་ཅད་མ་ལུས་པར་རྨི་ལམ་ལྟ་བུར་འཇུག་པ་ཤེས་པ་ཤིན་ཏུ་ཕྲ་

བ་དང་། འཇིག་རྟེན་གྱི་ཁམས་ཐམས་ཅད་མ་ལུས་པར་མྱིག་ཡོར་ལྟ་བུར་རྣམ་པར་དམྱིགས་པས་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང་། འཇིག་རྟེན་གྱི་ཁམས་ཤེས་པ་ཤིན་ཏུ་ཕྲ་བ་འདི་དག་དང་ཤེས་པ་ཤིན་ཏུ་ཕྲ་བ་དེ་དག་ཐམས་ཅད་བྱང་ཆུབ་སེམས་

དཔའི་སྤྱོད་པ་སྒྱུ་མ་ལྟ་བུའི་རྣམ་པ་མངོན་པར་བསྒྲུབ་པ་ལ་ཞུགས་ཤིང་ཁོང་དུ་ཆུད་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། རྣམ་པར་འཕྲུལ་བ་དང་། ཡེ་ཤེས་ཁོང་དུ་ཆུད་པས་བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མི་

ཆད་པ་ཀུན་ཏུ་བཟང་པོ་སྒྱུ་མ་ལྟ་བུར་མཐོང་བ་དང་། སངས་རྒྱས་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་དང་། རྣམ་པར་འཕྲུལ་པ་བྱང་ཆུབ་ཀྱི་སེམས་ཀྱིས་ཡང་དག་པར་བསྐྱེད་པ་དང་། ལུས་ལ་ཆགས་པ་མྱེད་པར་བརྩོན་པའི་ཡང་དག་པར་ལྟ་བ་དང་། དགེ་བའི་

རྩ་བ་ཆགས་པ་མྱེད་པའི་ཡེ་ཤེས་དང་མ་བྲལ་བ་དང་། མངོན་པར་ཆགས་པ་མྱེད་པའི་ཆོས་ཉིད་དང་། སེམས་ཀྱི་རྒྱུད་དམྱིགས་པ་མྱེད་པས་ཡང་དག་པར་འཇུག་པ་དང་། མཚན་མ་ལ་འཇུག་པ་མཚན་མ་ཐམས་ཅད་ལས་གྱེན་དུ་འཕགས་པ་དང་། བྱང་ཆུབ་

Vol. 36 · folio 134a

སེམས་དཔའི་སྤྱོད་པའི་མཚན་མ་ཡོངས་སུ་སྦྱངས་པ་དང་། འདུ་ཤེས་ཀྱི་རྣམ་པ་ཐམས་ཅད་དང་བྲལ་བའི་ཏིང་ངེ་འཛིན་ཐམས་ཅད་ཀྱི་རྒྱན་དང་། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་རྣམ་པར་དགོད་པ། ཁམས་ཐམས་ཅད་དང་

ཤེས་པ་དང་ལྡན་པས་རབ་ཏུ་ཤེས་པར་གྱུར་ཅིག །ཁོང་དུ་ཆུད་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་སུ་ཆོས་ཀྱི་དབྱིངས་མཐའ་ཡས་པ་ལ་འཇུག་པ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཤིན་ཏུ་བསྟན་པ་

ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཡངས་པ་ལ་འཇུག་པ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་བསམ་གྱིས་མི་ཁྱབ་པ་རྣམ་པར་དབྱེ་བ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཐམས་ཅད་རྣམ་པར་དབྱེ་བ་ཤེས་པ་ཤིན་ཏུ་ཕྲ་བ་དང་། ཆོས་

ཀྱི་དབྱིངས་ཐམས་ཅད་སེམས་གཅིག་གིས་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཐམས་ཅད་ལ་ཡང་དག་པར་གཞོལ་བ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཐམས་ཅད་དམྱིགས་སུ་མྱེད་པའི་སྤྱོད་ཡུལ་དུ་ཤེས་པ་ཤིན་ཏུ་ཕྲ་བ་དང་།

ཆོས་ཀྱི་དབྱིངས་ཐམས་ཅད་དུ་ཆགས་པ་མྱེད་པར་རྣམ་པར་བརྟག་པ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཐམས་ཅད་སྐྱེ་བ་མེད་པར་ཡོངས་སུ་རིག་པ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་ཐམས་ཅད་དུ་བྱིན་གྱི་

རླབས་ཀྱི་ལུས་ཀྱི་རྣམ་པར་འཕྲུལ་པ་ཤེས་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་འབྱམ་ཀླས་པ་ཤེས་པ་ཤིན་ཏུ་ཕྲ་བ་འདི་དག་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་བྱིན་གྱི་རླབས་ཀྱིས་ཡེ་ཤེས་དང་།

ཆོས་ལ་དབང་སྒྱུར་བ་རབ་ཏུ་ཐོབ་པ་འགྲོ་བ་ཐམས་ཅད་ཚིམ་པར་བྱེད་པ་ལ་བརྩོན་པ། དོན་གྱི་ལུས་ཡོངས་སུ་མྱི་གཏོང་ཞིང་ཆོས་ཀྱི་ལུས་བལྟ་བ་ལ་བསྒྲིབས་པ་མེད་པའི་ཡེ་ཤེས་མཉམ་པ་མྱེད་པ་མངོན་པར་བསྒྲུབ་པའི་རྣམ་པ་རབ་ཏུ་ཐོབ་པ།

Vol. 36 · folio 134b

ཆོས་ཐམས་ཅད་ལ་མྱི་གནས་པའི་རང་བཞིན་ལས་མ་གཡོས་པ། ཡང་དག་པ་ཇི་ལྟ་བ་བཞིན་ནམ་མཁའ་ལྟར་གོས་པ་མྱེད་པའི་ཚིག་གི་ལམ་རྣམ་པར་བརྗོད་པའི་སྤྱོད་པ་དང་ལྡན་པ་རྣམ་པར་བཀོད་པའི་དོན་གྱི་རང་བཞིན་ཤིན་ཏུ་རྟོགས་པ། རང་བཞིན་གྱིས་ཞི་བ་ཡོངས་

སུ་རིག་པའི་ཡེ་ཤེས་ཀྱིས་མྱི་གནས་པའི་ཡིད་ཀྱི་ཡང་དག་པར་རྟོག་པ་དང་ལྡན་པ། དམྱིགས་པའི་ཚུལ་ལ་རྟེན་པ་མྱེད་པར་གནས་པ་ཆོས་ཀྱི་དབྱིངས་ཐམས་ཅད་ཀྱི་ཚུལ་ཡངས་པ་ཁོང་དུ་ཆུད་པ་འཇིག་རྟེན་ཐམས་ཅད་དུ་མྱི་གཉིས་པས་ཡང་དག་པར་རྒྱུ་བ་ཆོས་ཐམས་

ཅད་ལ་མྱི་དམྱིགས་པ། གནས་ཐམས་ཅད་ཡང་དག་པར་བཅོམ་པས་ཀུན་ཏུ་བཟང་པོའི་སྤྱོད་པའི་སྒོ་འདི་དག་ལ་ཞུགས་པའི་ཡེ་ཤེས་ཀྱིས་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་གྲོལ་ཞིང་བཅིངས་པ་

མྱེད་པའི་སེམས་སུ་བསྐལ་པ་གང་ཇི་སྙེད་པ་ཐམས་ཅད་ཤེས་པ་མངོན་པར་བསྒྲུབ་པ་འདི་ལྟ་སྟེ། བརྗོད་དུ་མྱེད་པའི་བསྐལ་པ་སེམས་ཀྱི་སྐད་ཅིག་གཅིག་ཏུ་བྱིན་གྱིས་རློབ་པ་ཤེས་པ་ཤིན་ཏུ་ཕྲ་བ་དང་། སེམས་ཀྱི་སྐད་ཅིག་གཅིག་ལ་བརྗོད་དུ་མྱེད་པའི་

བསྐལ་པ་ཡང་དག་པར་བསྟན་པ་ཤེས་པ་ཤིན་ཏུ་ཕྲ་བ་དང་། གྲངས་མྱེད་པའི་བསྐལ་པ་ལ་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་དང་། བསྐལ་པ་གཅིག་གྲངས་མྱེད་པའི་བསྐལ་པར་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་དང་། བསྐལ་པ་རིང་

པོ་བསྐལ་པ་ཐུང་ངུར་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་དང་། བསྐལ་པ་ཐུང་ངུ་བསྐལ་པ་རིང་པོར་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་དང་། སངས་རྒྱས་དང་བཅས་པའི་བསྐལ་པ་སངས་རྒྱས་མི་བཞུགས་པའི་བསྐལ་པར་འཇུག་པ་ཤེས་པ་ཤིན་ཏུ་ཕྲ་བ་དང་།

བསྐལ་པ་ཐམས་ཅད་མ་ལུས་པའི་གྲངས་ཤེས་པ་ཤིན་ཏུ་ཕྲ་བ་དང་། བསྐལ་པ་ཐམས་ཅད་མ་ལུས་པར་བསྐལ་པ་མ་ཡིན་པར་ཤིན་ཏུ་བརྟག་པ་ཤེས་པ་ཤིན་ཏུ་ཕྲ་བ་དང་། སྔོན་གྱི་མཐའི་མུར་ཐུག་པའི་བསྐལ་པ་དང་། ཕྱི་མའི་མཐའི་མུར་ཐུག་པའི་བསྐལ་པ་དང་།

Vol. 36 · folio 135a

ད་ལྟར་བྱུང་བའི་མུ་ལ་ཡོད་པའི་བསྐལ་པ་དང་། དུས་གསུམ་གྱི་བསྐལ་པ་ཐམས་ཅད་མ་ལུས་པར་སེམས་ཀྱི་སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་ཤེས་པ་ཤིན་ཏུ་ཕྲ་བ་དང་། བསྐལ་པ་ཤེས་པ་ཤིན་ཏུ་ཕྲ་བ་འདི་དག་

དང་། བསྐལ་པ་མ་ལུས་པའི་གྲངས་དེ་བཞིན་གཤེགས་པའི་ཡེ་ཤེས་ཀྱིས་ཐུགས་སུ་ཆུད་པ་ཤེས་པ་ཤིན་ཏུ་ཕྲ་བ་དེ་དག་ཐམས་ཅད་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་དཀྱིལ་འཁོར་གྱི་རྒྱལ་པོ་རབ་ཏུ་ཐོབ་པའི་སེམས་དང་ལྡན་པ་ཀུན་ཏུ་བཟང་པོའི་སྤྱོད་པ་ལ་

རབ་ཏུ་ཞུགས་པའི་སེམས་དང་ལྡན་པ། རྟོག་པ་དང་རྣམ་པར་རྟོག་པའི་སྤྲོས་པ་ཐམས་ཅད་རབ་ཏུ་བསྩལ་བའི་སེམས་དང་ལྡན་པ། སྐྱོ་བ་མྱེད་པའི་སྨོན་ལམ་ཆེན་པོས་རྩོམ་པ་རྒྱུན་མི་ཆད་པའི་སེམས་དང་ལྡན་པ། མཐའ་དང་དབུས་མྱེད་པའི་འཇིག་རྟེན་

མང་པོར་སངས་རྒྱས་མང་པོ་ཡང་དག་པར་བསྟན་པས་ཡོངས་སུ་རྒྱས་པར་འགེངས་པའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བ་བྱང་ཆུབ་སེམས་དཔའི་སྤྱོད་པའི་རིགས་ཡང་དག་པར་གཟུང་བའི་སེམས་དང་ལྡན་པ། སེམས་ཅན་

ཐམས་ཅད་ཤིན་ཏུ་བག་དྲོ་བར་བྱེད་པའི་སྤྱོད་པའི་རིགས་དང་རྣམ་པར་འདྲེས་པའི་སེམས་དང་ལྡན་པ། བསྐལ་པའི་གྲངས་ཐམས་ཅད་དུ་མངོན་པར་རྫོགས་པར་འཚང་རྒྱ་བ་ཡང་དག་པར་བསྟན་པའི་སེམས་དང་ལྡན་པ། འཇིག་རྟེན་གྱི་ཁམས་རེ་རེ་ནས་ཕྱི་མའི་མཐའི་མུར་

མྱི་གཡོ་བར་སྤྱོད་པ་རྒྱུན་མི་གཅོད་པའི་སེམས་དང་ལྡན་པ། འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པའི་སྐུའི་འཕྲིན་ལས་བྱང་ཆུབ་སེམས་དཔའི་ལུས་ཀྱིས་ཡོངས་སུ་རྒྱས་པར་འགེངས་པའི་སེམས་དང་ལྡན་པས་སེམས་ཀྱི་རྒྱུ་བ་གཅིག་

གི་གནས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་གྱུར་ཅིག །ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་གྱུར་ཅིག །དགེ་བའི་རྩ་བ་འདིས་ཆགས་པ་མྱེད་པ་དང་། གྲོལ་ཞིང་བཅིངས་པ་མེད་པའི་སེམས་སུ་ཆོས་ཤིན་ཏུ་ཕྲ་བ་ཤེས་

Vol. 36 · folio 135b

པ་འདི་ལྟ་སྟེ། ཟབ་མོའི་ཆོས་ཤིན་ཏུ་ཕྲ་བ་དང་། ཡངས་པའི་ཆོས་ཤིན་ཏུ་ཕྲ་བ་དང་། སྣ་ཚོགས་ཀྱི་ཆོས་ཤིན་ཏུ་ཕྲ་བ་དང་། རྒྱན་རྣམ་པར་དབྱེ་བའི་ཆོས་ཤིན་ཏུ་ཕྲ་བ་དང་། མཐའ་དང་དབུས་མྱེད་པའི་བསྐལ་པ་ཐམས་ཅད་དུ་བསྟན་པ་ཤིན་ཏུ་ཕྲ་བ་དང་།

ཆོས་ཐམས་ཅད་ཆོས་གཅིག་ཏུ་ཡང་དག་པར་འཇུག་པ་ཤིན་ཏུ་ཕྲ་བ་དང་། ཆོས་གཅིག་ཆོས་ཐམས་ཅད་དུ་ཡང་དག་པར་འཇུག་པ་ཤིན་ཏུ་ཕྲ་བ་དང་ཆོས་ཐམས་ཅད་ཆོས་མ་ཡིན་པར་འཇུག་པ་ཤིན་ཏུ་ཕྲ་བ་དང་། ཆོས་མ་ཡིན་པར་ཤེས་པ་ཆོས་རྣམ་པར་དགོད་པ་ཐམས་ཅད་དང་།

མི་འགལ་བ་ཤིན་ཏུ་ཕྲ་བ་དང་འདི་ལྟ་སྟེ། སངས་རྒྱས་ཀྱི་ཆོས་ཀྱི་ཚུལ་ཐམས་ཅད་མ་ལུས་པའི་གྲངས་ལ་འཇུག་པ་ཤེས་པ་ཤིན་ཏུ་ཕྲ་བའི་ཤིན་ཏུ་ཕྲ་བ་འདི་དག་དང་འཇིག་རྟེན་གྱི་ཁམས་ཐམས་ཅད་དུ་ཆོས་ཐམས་ཅད་ཀྱི་གྲངས་རྣམ་པར་བཀོད་པ་དང་། བསྟན་པ་ཤེས་

པ་ཤིན་ཏུ་ཕྲ་བ་དེ་དག་ཐམས་ཅད་ཆགས་པ་མྱེད་པར་ཤེས་པའི་སེམས་སྤྱོད་པ་གཅིག་གིས་ཁྱུ་མཆོག་གི་མཐུ་ཕྱུང་བས་ཡང་དག་པར་བསྐྱེད་པ་དང་། མཐའ་དང་དབུས་མྱེད་པའི་ཆོས་ཀྱི་དབྱིངས་ལ་ཞུགས་པའི་སེམས་དང་སྤྱོད་པའི་བྱིན་གྱི་རླབས་ཀྱིས་ཆོས་

རྣམ་པ་ཐ་དད་པ་ཐམས་ཅད་ཁོང་དུ་ཆུད་པའི་བསམ་པའི་སྟོབས་དང་། ཤུགས་ཆགས་པ་མྱེད་པས་རབ་ཏུ་རྟོགས་པ་དང་། དབང་པོ་ཐམས་ཅད་མཁྱེན་པའི་ཡེ་ཤེས་ཀྱིས་རབ་ཏུ་བརྟེན་པ་དང་། དྲན་པ་དང་ཤེས་པ་དང་ཆོས་ལ་མཁས་པ་སངས་རྒྱས་ཐམས་ཅད་ཀྱི་

ཡེ་ཤེས་ཀྱི་ཁོང་དུ་ཆུད་པ་དང་། སངས་རྒྱས་མང་པོ་ཆོས་ཀྱི་དབྱིངས་ཐམས་ཅད་ཡོངས་སུ་ཁྱབ་པ་དང་། བྱང་ཆུབ་སེམས་དཔའི་ལུས་ཡང་དག་པར་བསྟན་པའི་ལས་དང་། དེ་བཞིན་གཤེགས་པ་ཐམས་ཅད་ཀྱི་སྐུར་གཏོགས་པ་དང་། ཚིག་རྣམ་པར་དགོད་ཅིང་ཤིན་ཏུ་བསྟན་པ་འཇིག་རྟེན་གྱི་ཁམས་

ཐམས་ཅད་དུ་གྲགས་པ་དང་། ཡིད་ཀྱི་ལས་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་ཡང་དག་པར་བཟུང་བ་དང་། ཀུན་ཏུ་བཟང་པོའི་སྤྱོད་པ་མངོན་པར་བསྒྲུབས་པའི་ཡེ་ཤེས་ཆོས་མཐའ་དང་དབུས་མྱེད་པ་རྣམ་པ་ཐ་དད་པའི་གྲངས་དང་ཚུལ་ཐམས་ཅད་མ་ལུས་པའི་ཡེ་ཤེས་ལ་མཁས་པའི་ཐམས་

Vol. 36 · folio 136a

ཅད་མཁྱེན་པ་ཉིད་མངོན་པར་བསྒྲུབས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་གྱུར་ཅིག །ཁོང་དུ་ཆུད་པར་གྱུར་ཅིག། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་བཅུ་གཅིག་པ། དགེ་བའི་རྩ་བ་འདིས་ཆགས་པ་མེད་པ་དང་གྲོལ་

ཞིང་བཅིངས་པ་མེད་པའི་སེམས་སུ་ཞིང་ཐམས་ཅད་མ་ལུས་པར་མངོན་པར་བསྒྲུབ་པ་ཤིན་ཏུ་ཕྲ་བ་དང་། སེམས་ཅན་ཐམས་ཅད་མ་ལུས་པའི་ཡེ་ཤེས་དང་མངོན་པར་ཤེས་པ་མངོན་པ་བསྒྲུབ་པ་ཤིན་ཏུ་ཕྲ་བ་དང་། ལས་ཀྱི་རྣམ་པར་སྨིན་པ་ཐམས་ཅད་མ་ལུས་པར་ཤེས་པ་མངོན་པར་

བསྒྲུབ་པ་ཤིན་ཏུ་ཕྲ་བ་དང་། འགྲོ་བ་ཐམས་ཅད་མ་ལུས་པའི་སེམས་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང་། དུས་ཐམས་ཅད་མ་ལུས་པ་སླེབས་པར་ཆོས་བསྟན་པ་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང་། ཆོས་ཀྱི་དབྱིངས་མཐའ་དང་དབུས་མྱེད་པ་

ཐམས་ཅད་མ་ལུས་པར་རབ་ཏུ་རྟོགས་པའི་ཡེ་ཤེས་མངོན་པར་བསྒྲུབ་པ་ཤིན་ཏུ་ཕྲ་བ་དང་ནམ་མཁའི་དབྱིངས་ཐམས་ཅད་མ་ལུས་པའི་མཐར་ཐུག་པ་དང་། དུས་གསུམ་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང་། ཚིག་དང་ངག་གི་ལམ་ཐམས་ཅད་

མ་ལུས་པར་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང་། འཇིག་རྟེན་པའི་ཆོས་ཐམས་ཅད་མ་ལུས་པར་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང་། འཇིག་རྟེན་ལས་འདས་པའི་སྤྱོད་པ་ཐམས་ཅད་མ་ལུས་པར་ཤེས་པ་མངོན་པར་བསྒྲུབ་པ་ཤིན་

ཏུ་ཕྲ་བ་དང་། ཤེས་པ་མངོན་པར་བསྒྲུབ་པ་འདི་དག་དང་། དེ་བཞིན་གཤེགས་པ་ཐམས་ཅད་ཀྱི་ལམ་དང་། བྱང་ཆུབ་སེམས་དཔའ་ཐམས་ཅད་ཀྱི་ལམ་དང་། འགྲོ་བ་ཐམས་ཅད་ཀྱི་ལམ་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དེ་དག་ཐམས་ཅད་

བྱང་ཆུབ་སེམས་དཔའི་སྤྱོད་པ་དང་ལྡན་ཞིང་ཀུན་ཏུ་བཟང་པོའི་བྱིན་གྱི་རླབས་ཡང་དག་པར་འཛིན་པས་ཆོས་ཇི་ལྟ་བ་བཞིན་དང་། ཡི་གེ་ཇི་ལྟ་བ་བཞིན་དུ་མིག་ཡོར་དང་འདྲ་བའི་ཤེས་པ་མངོན་པར་བསྒྲུབ་པ་དང་། རྨི་ལམ་དང་འདྲ་བའི་ཤེས་པ་མངོན་

Vol. 36 · folio 136b

པར་བསྒྲུབ་པ་དང་། སྒྱུ་མ་དང་འདྲ་བའི་ཤེས་པ་མངོན་པར་བསྒྲུབ་པ་དང་། སྒྲ་བརྙན་དང་འདྲ་བའི་ཤེས་པ་མངོན་པར་བསྒྲུབ་པ་དང་། སྤྲུལ་པ་དང་འདྲ་བའི་ཤེས་པ་མངོན་པར་བསྒྲུབ་པ་དང་། དབེན་པ་དང་མཉམ་པའི་ཤེས་པ་མངོན་པར་བསྒྲུབ་པ་དང་།

ཞི་བ་དང་མཉམ་པའི་ཤེས་པ་མངོན་པར་བསྒྲུབ་པ་དང་། ཆོས་ཀྱི་དབྱིངས་ཐམས་ཅད་ཀྱི་རང་བཞིན་དང་མཉམ་པའི་ཤེས་པ་མངོན་པར་བསྒྲུབ་པ་དང་། གནས་མྱེད་པ་དང་མཉམ་པའི་ཤེས་པ་མངོན་པར་བསྒྲུབ་པ་དང་། སངས་རྒྱས་ཀྱི་ཆོས་ཐམས་ཅད་དང་

མཉམ་པའི་ཤེས་པ་མངོན་པར་བསྒྲུབ་པ་དང་། ཀུན་ཏུ་བཟང་པོའི་སྤྱོད་པ་ཉེ་བར་བླང་བ་ལ་གནས་པར་བརྩོན་པའི་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བས་རབ་ཏུ་ཤེས་པར་གྱུར་ཅིག །ཁོང་དུ་ཆུད་པར་གྱུར་ཅིག་ཅེས་ཏེ་དེ་ཡང་འཇིག་རྟེན་ནམ་འཇིག་རྟེན་གྱི་ཆོས་

ལ་མི་རྟོག་པ་དང་། དེ་ཡང་བྱང་ཆུབ་འམ་བྱང་ཆུབ་སེམས་དཔའ་ལ་མི་རྟོག་པ་དང་། དེ་ཡང་བྱང་ཆུབ་སེམས་དཔའི་སྤྱོད་པ་འམ་འབྱུང་བའི་ལམ་ལ་མི་རྟོག་པ་དང་། དེ་ཡང་སངས་རྒྱས་དང་སངས་རྒྱས་ཀྱི་ཆོས་ཐམས་ཅད་ལ་མི་རྟོག་པ་དང་། དེ་ཡང་སེམས་ཅན་ཐམས་ཅད་གདུལ་

བ་དང་མི་གདུལ་བ་ལ་རྣམ་པར་མི་རྟོག་པ་དང་། དེ་ཡང་དགེ་བའི་རྩ་བ་འམ་ཡོངས་སུ་བསྔོ་བ་ལ་རྣམ་པར་མི་རྟོག་པ་དང་། དེ་ཡང་བདག་གམ་གཞན་ལ་རྣམ་པར་མི་རྟོག་པ་དང་། དེ་ཡང་དངོས་པོ་དང་དམྱིགས་པ་ལ་རྣམ་པར་མྱི་རྟོག་པ་དང་། དེ་ཡང་བྱང་ཆུབ་སེམས་དཔའི་སྤྱོད་

པ་འམ། མངོན་པར་འཚང་རྒྱ་བ་ལ་རྣམ་པར་མི་རྟོག་པ་དང་། དེ་ཡང་ཆོས་ཉིད་དམ་ཡོངས་སུ་ཤེས་པར་བྱ་བ་ལ་རྣམ་པར་མི་རྟོག་པས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་

པའི་སེམས་དང་། ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་ལུས་དང་། ཆགས་པ་མྱེད་པ་དང་གྲོལ་ཞིང་བཅིངས་པ་མེད་པའི་སྒྲ་དང་། ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་ལས་དང་། ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་རྣམ་པར་སྨིན་པ་དང་། ཆགས་པ་མྱེད་པ་དང་གྲོལ་ཞིང་

Vol. 36 · folio 137a

བཅིངས་པ་མྱེད་པའི་འཇིག་རྟེན་དང་། ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་ཞིང་དང་། ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་ཅན་དང་། ཆགས་པ་མྱེད་པ་དང་གྲོལ་ཞིང་བཅིངས་པ་མེད་པའི་

ཆོས་དང་། ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་ཡེ་ཤེས་ཀྱིས་ཡོངས་སུ་བསྔོ་སྟེ། དེ་དེ་ལྟར་ཡོངས་སུ་བསྔོ་བས་འདས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་ཐོབ་པ་ཡིན། མ་བྱོན་པའི་

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་འཐོབ་པ་ཡིན། །ད་ལྟར་བྱུང་བའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་འཐོབ་པ་ཡིན། འདས་པའི་སངས་རྒྱས་ཐམས་ཅད་ཀྱི་ཡོངས་སུ་

བསྔོ་བ་ལ་སློབ་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བ་འགྲུབ་པར་འགྱུར་བ་ཡིན། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བ་ལ་རབ་ཏུ་གནས་པ་ཡིན། འདས་པའི་སངས་

རྒྱས་ཐམས་ཅད་ཀྱི་ཡོངས་སུ་བསྔོ་བའི་ལམ་ལ་གནས་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བའི་ལམ་མྱི་གཏོང་བ་ཡིན། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བའི་ལམ་དང་འགལ་བར་མྱི་བྱེད་པ་

ཡིན། འདས་པའི་སངས་རྒྱས་ཐམས་ཅད་ཀྱི་གདམས་ངག་ལ་ནན་ཏན་དུ་བྱེད་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་གདམས་ངག་ལ་ནན་ཏན་བྱེད་པར་འགྱུར་བ་ཡིན། ད་ལྟར་བྱུང་བའི་སངས་རྒྱས་ཐམས་ཅད་ཀྱི་གདམས་ངག་ཁོང་དུ་ཆུད་པར་བྱེད་པ་ཡིན། འདས་པའི་སངས་

རྒྱས་ཐམས་ཅད་ཀྱི་མཉམ་པ་ཉིད་ཡོངས་སུ་རྫོགས་པར་བྱེད་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་མཉམ་པ་ཉིད་བསྒྲུབ་པར་འགྱུར་བ་ཡིན། ད་ལྟར་བྱུང་བའི་སངས་རྒྱས་ཐམས་ཅད་ཀྱི་མཉམ་པ་ཉིད་ལ་ནན་ཏན་དུ་བྱེད་པ་ཡིན།

Vol. 36 · folio 137b

འདས་པའི་སངས་རྒྱས་ཐམས་ཅད་ཀྱི་ཡུལ་ལ་ཡོངས་སུ་སྤྱོད་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་ཡུལ་ལ་རབ་ཏུ་གནས་པ་ཡིན། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཡུལ་དང་མཉམ་པར་འགྱུར་བ་ཡིན། འདས་པ་དང་མ་བྱོན་པ་དང་ད་ལྟར་བྱུང་བའི་

སངས་རྒྱས་ཐམས་ཅད་དང་དགེ་བའི་རྩ་བའི་མཚན་ཉིད་གཅིག་པ་ཡིན། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཀྱི་རིགས་ཐམས་ཅད་དང་མཉམ་པ་ཉིད་དུ་གནས་པ་ཐོབ་པ་ཡིན། འདས་པ་དང་མ་བྱོན་པ་དང་ད་ལྟར་བྱུང་བའི་དེ་བཞིན་

གཤེགས་པ་ཐམས་ཅད་ཀྱི་སྤྱོད་ཡུལ་དང་། ཚུལ་གྱི་རྒྱུད་གཅིག་ཏུ་གྱུར་པ་ཡིན། འདས་པ་དང་མ་བྱོན་པ་དང་ད་ལྟར་བྱུང་བའི་སེམས་ཅན་གྱི་གཙོ་བོ་ཐམས་ཅད་ཀྱི་ཡུལ་དང་མྱི་འགལ་བ་ཐོབ་པ་ཡིན་ཏེ། ཀྱེ་རྒྱལ་བའི་སྲས་དག་འདི་ནི་བྱང་ཆུབ་སེམས་དཔའ་

སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ཆགས་པ་མྱེད་པ་དང་། གྲོལ་ཞིང་བཅིངས་པ་མྱེད་པའི་སེམས་ཤེས་བྱ་བ་སྟེ་དགུ་པའོ། །ཡོངས་སུ་བསྔོ་བ་དེ་དག་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དགེ་བའི་རྩ་བ་ཐམས་ཅད་དེ་དེ་ལྟར་ཡོངས་

སུ་བསྔོ་སྟེ། དེ་དེ་ལྟར་ཡོངས་སུ་བསྔོ་བས་འཁོར་ཡུག་རྡོ་རྗེའི་རི་ཐམས་ཅད་ཀྱིས་མྱི་ཆོམས་པའི་སྟོབས་དང་ལྡན་པ་ཡིན། འགྲོ་བ་ཐམས་ཅད་ཀྱི་གཟུགས་ཐམས་ཅད་མ་ལུས་པ་དང་ལྡན་ཞིང་ཟིལ་གྱིས་མྱི་ནོན་པ་ཡིན། བདུད་ཀྱི་སྡེ་དང་བདུད་ཀྱི་དཔུང་དང་།

བདུད་ཀྱི་ལས་ཐམས་ཅད་རབ་ཏུ་འཇོམས་པ་ཡིན། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་མ་ལུས་པར་ཡང་དག་པར་བསྟན་པ་ལ་བརྩོན་པ་ཡིན། འགྲོ་བ་ཐམས་ཅད་ལ་གོ་བར་བྱེད་པའི་སངས་རྒྱས་ཀྱི་ཆོས་ཐམས་ཅད་ཀྱི་ཚིག་དབྱེ་བ་ལ་མཁས་

པ་དང་ལྡན་པ་ཡིན། སངས་རྒྱས་ཀྱི་ཆོས་ཐམས་ཅད་ལ་རྨོངས་པ་མྱེད་པའི་ཡེ་ཤེས་འབྱམ་ཀླས་པ་དང་ལྡན་པ་ཡིན། གང་དང་གང་དུ་ཤི་འཕོ་བ་དང་སྐྱེ་བ་དང་འགྲོ་བ་དང་འོང་བ་དང་། གནས་པ་དང་འདུག་པ་ཐམས་ཅད་དུ་མྱི་ཕྱེད་པའི་གཡོག་འཁོར་དང་ལྡན་པ་ཡིན།

Vol. 36 · folio 138a

འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཆོས་བསྟན་པ་དང་། ཆོས་ཀྱི་འབྱུང་གནས་དྲན་པ་ཡང་དག་པར་འཛིན་པ་རྣམ་པར་དག་པ་རབ་ཏུ་ཐོབ་པ་ཡིན། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་གཟུང་

བ་ལ་མྱི་སྐྱོ་བས་ཕྱི་མའི་མཐའི་བསྐལ་པའི་མུར་ཐུག་པར་སྤྱོད་པ་རྒྱུན་མི་ཆད་པ་ཡིན། གནས་ཐམས་ཅད་ཡང་དག་པར་བཅོམ་པ་ཡང་རབ་ཏུ་འཐོབ་པ་ཡིན། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་ཡང་དག་པར་བསྐྱེད་པ་ཡང་འཐོབ་པ་ཡིན།

ཐམས་ཅད་མཁྱེན་པའི་སངས་རྒྱས་ཀྱི་མཛད་པ་དང་བྱིན་གྱི་རླབས་དང་བྱང་ཆུབ་སེམས་དཔའི་སྤྱོད་པ་དང་རྣམ་པར་འཕྲུལ་པ་ཐོབ་པར་བྱ་བ་ཡང་རབ་ཏུ་འཐོབ་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་

ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ཟིལ་གྱིས་མྱི་ནོན་འགྱུར་བྱས་ཤིང་། །འདྲ་མྱེད་དེ་དག་ཕྱོགས་རྣམས་ཐམས་ཅད་དུ། །ལས་རྣམས་ཅི་འདྲར་ཡོངས་སུ་བསགས་བྱས་པ། །དེ་དག་ཀུན་

ལ་བརྙས་པར་ཡོང་མྱི་བྱེད། །བདག་གིས་བྱས་པ་འམ་གཞན་གྱིས་བྱས་པ་ཡི། །དགེ་བ་གང་ལ་འང་བརྙས་པར་མྱི་བྱེད་དེ། །དེ་ལ་ཤིན་ཏུ་མོས་པ་རབ་བསྐྱེད་ཅིང་། །དེ་དག་སེམས་ཅན་ཕན་ཕྱིར་ཡོངས་སུ་བསྔོ། །དེ་དག་སེམས་ལ་མཐོ་བ་

མྱེད་བྱས་ཤིང་། །ཡིད་ལ་དམའ་བའང་འཆང་བ་མྱེད་བྱས་ཏེ། །རྒྱལ་བ་རྣམས་ཀྱི་སྐུ་ཡི་འཕྲིན་ལས་དང་། །གསོལ་བ་གདབ་ལས་ལས་ཡང་གང་འབྱུང་དང་། །གང་ཡང་རྣམ་པ་མང་པོ་བྱེད་གྱུར་ཅིག །སེམས་ཅན་ཀུན་ལ་བདེ་དང་ཕན་སེམས་ཀྱིས། །

བརྟན་པའི་མོས་དང་བསམ་ལས་བྱུང་བ་དག །སྐྱེས་བུ་དབང་པོར་ཅི་ནས་འགྱུར་བར་བསྔོ། །རྣམ་པ་སྣ་ཚོགས་ཇི་སྙེད་གང་ཡོད་ཚུལ། །འགྲོ་བ་འདི་ན་ཐ་དད་མྱི་འདྲ་བ། །རྒྱ་ཆེ་ཡངས་དང་ཕྲ་མོ་ཟབ་མོའི་རྣམས། །དེ་དག་བདག་གི་ཡོངས་བསྩགས་ཤེས་

Vol. 36 · folio 138b

པར་བྱ། །ཇི་སྙེད་འཇིག་རྟེན་ཡངས་པར་འགྲོ་བ་ཡི། །སྣ་ཚོགས་ལུས་རྣམས་ལུས་སུ་གཞོལ་གཟུད་པ། །དེ་དག་ཤེས་བྱས་སྤྱད་པ་སྤྱོད་པའི་ཚེ། །ཡེ་ཤེས་སྒོ་ལས་ཕྱིར་ལྡོག་མ་གྱུར་ཅིག །གང་ཡང་འཇིག་རྟེན་ཞིང་གི་སྒོ་མངའ་བ། །ཕྲ་དང་རྒྱ་

ཆེ་སྤྱིའུ་ཚུགས་སྣེལ་ཞི་དག །སྒྲའི་སྦུབས་སུ་ཀུན་ཀྱང་བསྡུ་བྱས་ཏེ། །ཡེ་ཤེས་སྒོ་ནས་ཐམས་ཅད་ཤེས་གྱུར་ཅིག །གང་ཡང་སེམས་ཀྱི་ཚུལ་མང་གཅིག་མྱིན་པ། །དེ་དག་སེམས་སུ་ཡང་དག་བསྡུ་བྱས་ཏེ། །ཡེ་ཤེས་སྒོ་ནས་དེ་དག་ཤེས་

བྱས་ནས། །སྤྱོད་ལམ་ལྡོག་པ་མྱེད་པར་སྤྱད་པར་བྱ། །འགྲོ་བ་ཀུན་གྱི་དབང་པོ་བསམ་པ་དག །རྒྱ་ཆེ་དེ་བཞིན་ཤིན་ཏུ་ཕྲ་བ་དང་། །ཟབ་མོ་སྣ་ཚོགས་ཇི་སྙེད་བསྡུ་བྱས་ཤིང་། །ཐམས་ཅད་རང་བཞིན་ཇི་བཞིན་ཤེས་གྱུར་ཅིག །གང་ཡང་ལས་ཀྱི་རྣམ་པ་

སྣ་ཚོགས་པ། །རབ་དང་འབྲིང་དང་དེ་བཞིན་ཐ་མ་རྣམས། །ཐམས་ཅད་ཡེ་ཤེས་སྒོ་ནས་ཤེས་བྱས་ཏེ། །བདེ་གཤེགས་སྟོབས་ལ་རབ་ཏུ་འཇུག་གྱུར་ཅིག །བདག་གིས་ལས་གཙང་ཡོངས་སུ་གང་བསྩགས་པས། །འཇིག་རྟེན་བསྐལ་པ་བསམ་

གྱིས་མི་ཁྱབ་པ། །ཇི་སྙེད་དེ་དག་སྐད་ཅིག་སེམས་བཏུད་ཅིང་། །ཕྱོགས་རྣམས་ཀུན་ཏུ་དེ་དག་ཤེས་གྱུར་ཅིག །དུས་རྣམས་སྣྲེལ་ཞིར་དུས་གསུམ་གཟུང་བྱས་ཤིང་། །བསྐལ་པ་མྱི་མཉམ་ཐ་དད་མཚན་ཤེས་ནས། །དེ་དག་མཉམ་ཉིད་དེ་དང་

འགལ་མྱེད་དུ། །སྤྱོད་ཅིང་ཀུན་ཏུ་རྨོངས་པ་མྱེད་གྱུར་ཅིག །འགྲོ་བའི་སྤྱོད་པ་ཇི་སྙེད་གང་ཡང་རུང་། །འཇིག་རྟེན་དག་ན་བརྐྱང་བསྐུམ་མི་གཡོ་བ། །རྣམ་པ་ཐ་དད་ཐམས་ཅད་ཤེས་གྱུར་ཀྱང་། །མཚན་མྱེད་དངོས་ཀྱི་རློམ་སེམས་མྱེད་གྱུར་ཅིག །

ཕྱོགས་རྣམས་ཀུན་ན་སྐྱེས་དབང་ཇི་སྙེད་པ། །སུ་བཞུགས་དེ་དག་རྣམ་པར་འཕྲུལ་མཛད་པ། །ཚུལ་གྱིས་དཀོན་ཞིང་ཤིན་ཏུ་ཡངས་པ་རྣམས། །དེ་དག་ཐམས་ཅད་ཚུལ་བཞིན་ཤེས་གྱུར་ཅིག །དགའ་ལྡན་གནས་ན་རང་བྱུང་གང་བཞུགས་པ། །

Vol. 36 · folio 139a

མི་ཡི་སེང་གེ་འདྲ་མྱེད་ཆེན་པོ་དང་། །ཕྲ་དང་ཡངས་དང་རྣམ་དག་རྒྱ་ཆེ་དག །རང་བཞིན་བཞིན་དུ་ཐམས་ཅད་མཐོང་གྱུར་ཅིག །ཡུམ་གྱི་ཕྱལ་ན་དཔེ་ཟླ་མྱེད་པ་རྣམས། །རྣམ་པར་འཕྲུལ་པ་ཇི་སྙེད་མཛད་པ་དང་། །འཚང་རྒྱ་མྱ་

ངན་འདའ་དང་འཁོར་ལོའི་མཆོག །འགྲོ་བ་ཀུན་ཏུ་ལྡོག་པ་མྱེད་པ་དང་། །མི་ཡི་སེང་གེ་བལྟམས་པར་གྱུར་པའི་ཚེ། །ལྷ་ཡི་མཆོག་དང་ཚངས་པའི་མཆོག་རྣམས་དང་། །ཡེ་ཤེས་མཆོག་དང་ཤེས་ལ་གནས་རྣམས་ཀྱིས། །ལག་པའི་དམ་པས་རིམ་

གྲོར་བླངས་པ་དང་། །དེ་བཞིན་ཆོས་དབྱིངས་མ་ལུས་ཇི་སྙེད་པའི། །ཕྱོགས་ན་གང་ཡོད་ཐམས་ཅད་བསྡུ་བྱས་ཤིང་། །སངས་རྒྱས་རྣམ་འཕྲུལ་གཞི་མཐའ་དབུང་མེད་པ། །དེ་དག་ཐམས་ཅད་མཐོང་ཞིང་ཤེས་གྱུར་ཅིག །སྐྱེས་བུ་ཁྱུ་མཆོག་

འཇིག་རྟེན་བྱུང་གྱུར་ཅིང་། །གཤེགས་ཐབས་བདུན་པོར་གཤེགས་པར་གྱུར་པ་དང་། །དཔེ་ཟླ་མེད་པས་རྣམ་པར་གཟིགས་པ་དག །ཐམས་ཅད་ཆགས་མེད་སྒོ་ནས་ཤེས་གྱུར་ཅིག །གང་ཡང་སྐྱེས་དབང་བཞད་མོ་བཞད་པ་དང་། །སྐྱེ་དགུ་འདི་དག་འདོད་

བྱིངས་གཟིགས་གྱུར་ཅིང་། །སེམས་ཅན་འདི་དག་རབ་རིབ་བསྒྲིབས་མདོངས་པ། །སྲིད་པའི་སྡུག་བསྔལ་ཀུན་ལས་དགྲོལ་བྱ་ཞེས། །སེང་གེའི་ང་རོ་རྣམ་པར་སྒྲོག་མཛད་པ། །བདག་ཅག་འཇིག་རྟེན་འཕགས་པའི་གཙོ་ཡིན་གྱིས། །ཡེ་ཤེས་སྒྲོན་མ་

ཤིན་ཏུ་འདིར་བསྟན་ཅིང་། །འགྲོ་བ་ཀུན་གྱི་སྐྱེ་བ་དགག་པར་བྱ། །གང་ཡང་འོད་གཟེར་བརྒྱ་ཕྲག་མཐའ་ཡས་པ། །མི་ཡི་སེང་གེ་སྐྱེ་ཚེ་རབ་འཕྲོ་བས། །ངན་སོང་ཐམས་ཅད་ཞི་བར་གྱུར་པ་དང་། །འགྲོ་བ་ཀུན་གྱི་སྡུག་བསྔལ་ཞི་གྱུར་དང་། །གང་ཡང་

བཙུན་མོའི་འཁོར་གྱི་ཁྲོད་བཞུགས་ཤིང་། །མི་ཡི་སེང་གེ་རྣམ་པར་འཕྲུལ་མཛད་དང་། །འགྲོ་བ་ཀུན་ལ་ཕན་དང་བདེ་ཐུགས་ཀྱིས། །འཇིག་རྟེན་སྒྲོན་མ་མངོན་པར་བྱུང་བ་དང་། །འགྲོ་རྒྱུད་འདི་ལས་ཤིན་ཏུ་བྱུང་གྱུར་ཅིང་། །བྱང་ཆུབ་ཤིང་དྲུང་སྐྱེས་དབང་བཞུགས་

Vol. 36 · folio 139b

གྱུར་ནས། །ས་རྣམས་བསྐྱོད་བྱས་དཔེ་ཟླ་མེད་པ་ཡི། །འོད་སྣང་ཕྱོགས་བཅུ་ཀུན་ཏུ་བཀྱེ་གྱུར་ཅིང་། །བདུད་ཀྱི་ཁྱིམ་རྣམས་རབ་ཏུ་ལྡེག་མཛད་དེ། །ཕྱོགས་བཅུའི་འཇིག་རྟེན་ཐམས་ཅད་སྐུལ་མཛད་དང་། །སྔོན་སྤྱོད་གང་རྣམས་ཡོངས་སུ་སྨིན་མཛད་ཅིང་། །

གང་ནོན་སྐྱེས་དབང་རྣམ་པར་འཚང་རྒྱ་བ། །མ་ལུས་སྐྲ་ཡི་སྦུབས་སུ་བསྡུ་བྱས་ཤིང་། །ཕྱོགས་རྣམས་ཞིང་རྒྱུད་དེ་བཞིན་བསྡུ་བྱས་ཏེ། །སེམས་ཅན་མཐའ་ཡས་རྒྱུད་ཀྱང་ཡོངས་བསྡུས་ཤིང་། །རྒྱལ་བ་རྣམས་ཀྱི་རྣམ་འཕྲུལ་གྲུབ་གྱུར་ཅིག །ཚུལ་རྣམས་འདི་

དག་མ་ལུས་ཤེས་བྱས་ཏེ། །འཇིག་རྟེན་མཁྱེན་པའི་ཡོན་ཏན་བརྗོད་པ་དང་། །ཡེ་ཤེས་མཁྱེན་པའི་ཡོན་ཏན་མ་བརྗོད་པ། །ཐམས་ཅད་སྤྱོད་ལ་གནས་ཏེ་ཤེས་གྱུར་ཅིག །ཇི་སྙེད་བདུད་ཀྱི་དཀྲུགས་མ་མང་པོ་དག །དེ་དག་དཔུང་གིས་སྟོང་གསུམ་ཁྱབ་གྱུར་

ཅིང་། །བདུད་རྣམས་ཕྱིན་ཅི་ལོག་གཏོང་མང་པོ་དག །ཐམས་ཅད་ཆགས་མྱེད་སྒོ་ནས་ཐུལ་གྱུར་ཅིག །ཞིང་ན་མི་ཡི་སེང་གེ་གང་བཞུགས་དང་། །བརྒྱ་བྱིན་གནས་ན་སྐྱེས་དབང་གང་བཞུགས་དང་། །ཚངས་པའི་གནས་ན་རང་བྱུང་གང་བཞུགས་པ། །ཆགས་མྱེད་

ཐམས་ཅད་མ་ལུས་མཐོང་གྱུར་ཅིག །གང་རྣམས་ཆོས་ཀྱི་འཁོར་ལོ་བསྐོར་བ་དང་། །མྱི་ཡི་གཙོ་བོའི་སྐུ་ཚུལ་མཐའ་ཡས་པ། །དུས་ཀྱི་དུས་གསུམ་བསྐལ་པ་ཇི་སྙེད་པར། །གང་རྣམས་རྒྱལ་བས་མཐའ་མ་མ་བརྙེས་དང་། །དཔེ་ཟླ་མྱེད་པའི་གདན་དུ་གྱུར་པ་

རྣམས། །མཐའ་ཡས་ཕྱོགས་རྣམས་གང་གིས་ཁྱབ་གྱུར་པ། །མཚན་ཉིད་ཐ་དད་རྒྱན་གྱིས་དག་པ་རྣམས། །ཀུན་ན་རྒྱལ་བ་བསམ་ཡས་བཞུགས་པ་དག །དེ་དག་རྒྱལ་སྲས་མང་པོས་ཡོངས་བསྐོར་ཅིང་། །ཆོས་དབྱིངས་མ་ལུས་ཀུན་ཏུ་ཁྱབ་མཛད་ནས། །

གང་གིས་སངས་རྒྱས་མ་ལུས་བྱུང་གྱུར་པའི། །བྱང་ཆུབ་སྤྱོད་པ་ཀུན་ཏུ་སྟོན་མཛད་ཅིང་། །ཡེ་ཤེས་མཁྱེན་པ་རྣམས་ཀྱི་ཚུལ་གཅིག་གིས། །སངས་རྒྱས་མ་ལུས་ཐམས་ཅད་སྡུད་མཛད་ཅིང་། །རྒྱལ་བའི་རྒྱན་ཚུལ་རྣམ་པ་སྣ་ཚོགས་ཀྱིས། གང་གིས་ཆོས་

Vol. 36 · folio 140a

ཀྱི་ཆོས་ཉིད་ཡོངས་ཁྱབ་པ། །དཔེ་ཟླ་མྱེད་པའི་རྣམ་འཕྲུལ་ཇི་སྙེད་དང་། །རྒྱལ་བ་རྣམས་ཀྱི་སྐུ་ཚུལ་ཇི་སྙེད་དང་། །གང་ཡང་སྐུ་ཚེ་བཟུང་སྟེ་སྐྱེས་གྱུར་དང་། །གང་ཡང་བཙུན་མོའི་འཁོར་གྱིས་བསྐོར་བ་དང་། །གང་ཡང་མངོན་པར་འབྱུང་བ་

བསྟན་པ་དང་། །མཁས་པས་དབང་པོ་ཤིན་ཏུ་ཕྲ་མཁྱེན་དང་། །མྱ་ངན་འདས་ནས་རིང་བསྲེལ་ཀུན་བསྡུས་ཏེ། །བགོས་ཤིང་རྒྱལ་བའི་མཆོད་རྟེན་བྱས་པའི་བར། །འཇིག་རྟེན་དག་ན་ཚད་མྱེད་མ་ལུས་པའི། །སྤྱོད་པ་མཐའ་ཡས་དེ་དག་རབ་སྤྱོད་ཅིང་། །རྒྱལ་

བའི་སྤྱོད་པ་ཡོངས་སུ་གང་བརྗོད་པ། །དེ་དག་ཀུན་ལ་སྤྱོད་ཡངས་འཇུག་གྱུར་ཅིག །དེ་ལྟར་ཚུལ་རྣམས་ཀུན་ལ་ཡོངས་བསྔོ་སྟེ། །དགེ་བ་དེ་དག་ཡོངས་སུ་བསྔོ་བས་ན། །བྱང་ཆུབ་སྤྱོད་པ་དེ་དག་རབ་ཏུ་ཤེས། །སྤྱོད་པས་སྐྱོ་བར་ནམ་ཡང་མི་འགྱུར་རོ། །

དེ་དག་རྣམ་པར་འཕྲུལ་པ་ཇི་སྙེད་པ། །རྒྱལ་བ་རྣམས་ཀྱི་བརྗོད་པ་གང་ཡང་རུང་། །འགྲོ་བ་འདི་ན་འཇིག་རྟེན་མཁྱེན་པ་ཡི། །གང་ཡོད་ཐམས་ཅད་མ་ལུས་རྟོགས་པར་ཤེས། །དེ་ལྟར་སྐྱེས་དབང་ཐམས་ཅད་མ་ལུས་པར། །རང་འབྱུང་ཡུལ་རྣམས་རྗེས་སུ་ཐོབ་གྱུར་ཏེ།

དེ་དག་སྐད་ཅིག་གཅིག་གིས་རྟོགས་གྱུར་ཀྱང་། །བྱང་ཆུབ་སྤྱོད་ལས་རྣམ་པར་ཕྱིར་མི་ལྡོག །གང་ཡང་རྒྱལ་བའི་སྤྱོད་ཡུལ་ཕྲ་མོ་རྣམས། །ཞིང་དང་ཆོས་ཀྱི་རྒྱུད་རྣམས་ཐམས་ཅད་ཀུན། །དེ་དག་སྤྱོད་པ་མཆོག་གིས་ཤེས་གྱུར་ཏེ། །ཡོངས་སུ་བསྔོ་བའི་ཕ་རོལ་

ཕྱིན་པ་ཐོབ། །བསྐལ་པ་ཤིན་ཏུ་ཕྲ་ལ་འཇུག་པ་གང་། །སྐད་ཅིག་གཅིག་ལ་གྲངས་དང་གྲངས་མྱེད་ཚུལ། །དེ་དག་བྱང་ཆུབ་ཤེས་པས་རྟོགས་གྱུར་ཀྱང་། །སྤྱོད་པའི་དམ་པ་དེ་ལས་ཕྱིར་མྱི་ལྡོག །གང་ཡང་འགྲོ་བ་རྣམས་ཀྱི་ཞིང་ཆེན་དང་། །ཀུན་ནས་ཉོན་

མོངས་དེ་བཞིན་རྣམ་དག་རྣམས། །ཀུན་ཀྱང་ཡེ་ཤེས་སྤྱོད་པས་ཤེས་བྱས་ཤིང་། །དེ་ལ་ཡིད་གཞུངས་སེམས་ཅན་དམ་པ་འཁོད། །དུས་ཀྱི་ཚུལ་རྣམས་རྗེས་སུ་སེམས་བྱེད་ཅིང་། །སྐད་ཅིག་སེམས་ཀྱིས་བསམ་ཡས་བསྐལ་པ་དང་། །དེ་བཞིན་དུས་གསུམ་

Vol. 36 · folio 140b

མ་ལུས་ཐམས་ཅད་ཀྱང་། །སྤྱོད་པའི་མཆོག་ལ་གནས་ཤིང་རབ་ཏུ་ཤེས། །སེམས་ལ་ཡང་དག་གཞོལ་ཞིང་འཇུག་པ་དང་། །ཆོས་ལ་ཡང་དག་འཇུག་པའི་ཚུལ་རྣམས་དང་། །ཞིང་ལ་ཡང་དག་འཇུག་པ་མཁའ་འདི་ལ། །ཀུན་ཀྱང་སྤྱོད་པ་དམ་པས་རབ་ཏུ་

ཤེས། །ཡེ་ཤེས་མངོན་པར་བསྒྲུབ་པ་གང་ཡོད་དང་། །སེམས་ཅན་བསྒྲུབ་དང་དེ་བཞིན་ཆོས་བསྒྲུབ་དང་། །རྣམ་པར་འཕྲུལ་ཐོབ་བྱང་ཆུབ་བསྒྲུབ་པ་རྣམས། །མཐའ་དབུས་གཞི་མྱེད་ཐམས་ཅད་མ་ལུས་པ། །འཇུག་པ་ཤིན་ཏུ་ཕྲ་བ་མཐའ་དག་བསྡུ་བྱས་

ཤིང་། །རྣམ་པར་ཕྱེ་བ་ཇི་སྙེད་ཡོད་པ་རྣམས། །བསྐལ་པ་མི་མཐུན་ཐ་དད་མཚན་ལྡན་པ། །དེ་དག་ཐམས་ཅད་སྤྱོད་པ་ཡངས་པས་ཤེས། །ཕྱོགས་ཀྱི་རྒྱུད་ན་ཞིང་རྣམས་གཅིག་མྱིན་པ། །འགྲོ་བ་རྣམས་ན་སྣ་ཚོགས་གང་ཡོད་དང་། །སེམས་ཅན་

འགྲོ་རྒྱུད་སྣ་ཚོགས་ཐ་དད་པ། །སྤྱོད་པའི་སྟོབས་ལ་གནས་ཤིང་ཤེས་པར་བྱེད། །གང་གིས་ཡོངས་སུ་བསྔོ་བ་འདི་ཤེས་པ། །དེ་ནི་ཇི་སྙེད་འདས་པའི་སངས་རྒྱས་དང་། །གང་རྣམས་མ་བྱོན་གང་དག་བཞུགས་པ་རྣམས། །དེ་དག་སྤྱོད་དང་མཉམ་པ་ཉིད་

ཐོབ་བོ། །རྒྱལ་བ་ཀུན་གྱི་བསོད་ནམས་ཐོབ་པར་འགྱུར། །རྒྱལ་བ་ཀུན་གྱི་ཡེ་ཤེས་ཐོབ་པར་འགྱུར། །རྒྱལ་བ་ཀུན་གྱི་སྤྱོད་པའི་རྗེས་བསླབས་ཤིང་། །ཡོངས་སུ་བསྔོ་བ་འདི་དག་ཐོབ་པར་འགྱུར། །འགྲོ་བ་ཀུན་གྱིས་ཐུབ་པར་དཀར་གྱུར་ཅིང་། །འཇུག་པ་ཀུན་

ཏུ་བསླབ་བྱ་བསླབས་པ་དག །རྒྱལ་བ་ཀུན་གྱི་རྗེས་སུ་སེམས་པ་རྣམས། །ཐམས་ཅད་འཇིག་རྟེན་སྒྲོན་མ་མཐོང་བར་འགྱུར། །དེ་ཡི་སྤྱོད་ལ་ཚད་གདབ་མི་ནུས་ཏེ། །ཡོན་ཏན་རྣམས་ལ་འང་ཚད་ཀྱིས་གཞལ་མི་ནུས། །དཔེ་མྱེད་དེ་དག་སྤྱོད་ལ་གནས་

བཅས་ཤིང་། །རྒྱལ་བ་ཀུན་གྱི་རྣམ་འཕྲུལ་རབ་ཏུ་ཤེས། །ཆགས་པ་མྱེད་པ་དང་གྲོལ་ཞིང་བཅིངས་པ་མྱེད་པའི་སེམས་ཤེས་བྱ་བ་སྟེ། །ཡོངས་སུ་བསྔོ་བ་དགུ་པའོ། །ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་

Vol. 36 · folio 141a

སུ་བསྔོ་བ་ཆོས་ཀྱི་དབྱིངས་ཚད་མྱེད་པ་ཞེས་བྱ་བ་བཅུ་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྨྲ་བ་ཆེན་པོར་གྱུར་པས་དྲི་མ་མེད་པའི་གོ་འཕང་ཐོབ་པ། ཆོས་ཀྱི་མཛོད་

ཀྱི་སྦྱིན་པ་རབ་ཏུ་བྱིན་ཞིང་། སྙིང་རྗེ་ཆེན་པོ་དང་ལྡན་པས་བྱམས་པ་ཆེན་པོ་ཐོབ་ཅིང་། བྱང་ཆུབ་ཀྱི་སེམས་ལ་སེམས་ཅན་རབ་ཏུ་དགོད་པར་བརྩོན་པ། སེམས་ཅན་གྱི་དོན་ལ་ཞུགས་པས་བྱང་ཆུབ་ཀྱི་སེམས་རྒྱུན་མི་ཆད་པར་དགེ་བའི་རྩ་བ་ཉེ་བར་སྩོགས་པ་

སེམས་ཅན་ཐམས་ཅད་ཀྱི་ཁ་ལོ་སྒྱུར་བས་འགྲོ་བ་ཐམས་ཅད་ལ་ཐམས་ཅད་མཁྱེན་པའི་ལམ་ཡང་དག་པར་སྟོན་པ། འགྲོ་བ་ཐམས་ཅད་ལ་ཆོས་ཀྱི་ཉི་མ་དམ་པར་གྱུར་པས་དགེ་བའི་རྩ་བ་ཚད་མྱེད་པས་འཇིག་རྟེན་ཐམས་ཅད་སྣང་བར་བྱེད་པ།

འགྲོ་བ་ཐམས་ཅད་ལ་སེམས་རབ་ཏུ་མཉམ་པས་སེམས་ཅན་ཐམས་ཅད་ཀྱི་དགེ་བའི་རྩ་བ་མངོན་པར་འདུ་བྱེད་པ་རྒྱུན་མི་གཅོད་པ། ཡེ་ཤེས་ལ་དབང་སྒྱུར་ཞིང་སེམས་རྣམ་པར་དག་པས་དགེ་བའི་རྩ་བའི་ལས་ཐམས་ཅད་ཉམས་པ་མེད་པར་སྒྲུབ་

པ། ཡེ་ཤེས་ཆེན་པོས་འགྲོ་བ་ཐམས་ཅད་ཀྱི་དེད་དཔོན་ཏུ་གྱུར་པས། སེམས་ཅན་ཐམས་ཅད་ལ་བདེ་བའི་ལམ་ཡང་དག་པར་སྟོན་པ། དགེ་བའི་རྩ་བའི་ཆོས་བསྐྱེད་པ་ཐམས་ཅད་ལ་སེམས་ཅན་ཐམས་ཅད་ཀྱི་སྔུན་འདྲེན་པ། སེམས་ཅན་ཐམས་ཅད་ཀྱི་དགེ་

བའི་རྩ་བ་དབྱེར་མི་ཕྱེད་པར་གྱུར་པས་འགྲོ་བ་ཐམས་ཅད་ཀྱི་དགེ་བའི་རྩ་བ་སྤེལ་བ་ལ་ཞུགས་པ། །དམ་པའི་ཆོས་སྦྱིན་པ་སྔོན་དུ་གཏོང་བས་ཆོས་དཀར་པོ་ཐམས་ཅད་ཡང་དག་པར་རྩོམ་པ་ཐམས་ཅད་མཁྱེན་པ་ཉིད་དུ་སེམས་བསྐྱེད་པས་ཡོངས་སུ་བཟུང་བའི་ལྷག་པའི་

བསམ་པས་སྟོབས་དང་ཤུགས་ཀྱི་ཕ་རོལ་ཏུ་ཕྱིན་པ་ཐོབ་པ། །ལྷག་པའི་བསམ་པ་ཤིན་ཏུ་བརྟན་པ་ལས་བྱུང་བའི་བྱང་ཆུབ་ཀྱི་སེམས་བསྐྱེད་པ་ཡང་དག་པར་བསྒྲུབ་པས་ཉེ་བར་སྟོན་པའི་སྤྱོད་པ་མཐུ་ཆེན་པོའི་སེམས་དང་ལྡན་པས་བྱང་ཆུབ་ཏུ་སེམས་བསྐྱེད་པ་ལ་

Vol. 36 · folio 141b

མོས་ཤིང་དགེ་བའི་བཤེས་གཉེན་ལ་རྟེན་པའི་སྤྱོད་པ་དང་ལྡན་པ། སྒྱུ་མེད་པར་བྱང་ཆུབ་ཏུ་སེམས་བསྐྱེད་པའི་ལྷག་པའི་བསམ་པ་ཡང་དག་པར་བསྒྲུབས་པས། ཐམས་ཅད་མཁྱེན་པའི་སྒོའི་དམྱིགས་པ་མཐའ་དང་དབུས་མེད་པ་ལ་སེམས་པ། དགེ་བའི་རྩ་

བ་ལ་དམྱིགས་ཤིང་ཡོངས་སུ་བསྔོ་བ་རྒྱ་ཆེན་པོས་བསྒྲིབས་པ་མེད་པའི་ཡུལ་ཐམས་ཅད་ཡང་དག་པར་བསྡུ་བ་ལ་ཞུགས་ཤིང་རབ་ཏུ་བསྒྲུབ་པ་དེ་ཆུང་ངུ་ན་སངས་རྒྱས་ཀྱི་གསུང་ལས་ཚིག་དང་། ཡི་གེ་གཅིག་ཐོས་སམ། སྟོན་ཏམ་ཡང་དག་པར་འཛིན་ཀྱང་རུང་སྟེ། སངས་རྒྱས་

ཐམས་ཅད་མངོན་དུ་གྱུར་པའི་འཇིག་རྟེན་གྱི་ཁམས་འབྱམ་ཀླས་པ་དེ་དག་ན་སངས་རྒྱས་བཅོམ་ལྡན་འདས་གང་བཞུགས་ཤིང་འཚོ་སྐྱོང་བ་དེ་དག་དྲན་པས་དམྱིགས་ཏེ། འདས་པའི་སངས་རྒྱས་རྣམས་ཀྱང་ཡིད་ལ་བྱེད། མ་བྱོན་པའི་སངས་རྒྱས་རྣམས་ཀྱང་ཡིད་ལ་

བྱེད། ད་ལྟར་བྱུང་བའི་སངས་རྒྱས་རྣམས་ཀྱང་ཡིད་ལ་བྱེད། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱང་ཡིད་ལ་བྱེད་ཅིང་། བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་

བསྔོ་སྟེ། དགེ་བའི་རྩ་བ་འདིས་སངས་རྒྱས་དེ་དག་ཐམས་ཅད་ཀྱིས་ཡང་དག་པར་དགོངས་ཏེ། འཇིག་རྟེན་གྱི་ཁམས་གཅིག་ཏུ་བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག །འཇིག་རྟེན་གྱི་ཁམས་གཅིག་ཏུ་ཇི་ལྟ་བ་བཞིན་དུ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་

ཀླས་པ། ནམ་མཁའི་མཐས་གཏུགས་པ་མ་ལུས་པ་ཐམས་ཅད་དུ་ཡང་བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ཅིག །ཕྱི་མའི་མཐའི་མུར་ཐུག་པའི་བསྐལ་པར་སེམས་ཅན་གཅིག་གི་དོན་དུ་བྱང་ཆུབ་སེམས་དཔའི་སྤྱད་པ་ཡང་དག་པར་སྤྱོད་པར་གྱུར་ཅིག །

སེམས་ཅན་གཅིག་གི་དོན་དུ་ཇི་ལྟ་བ་དེ་བཞིན་དུ་སེམས་ཅན་ཀྱི་ཁམས་མཐའ་དག་མ་ལུས་པ་ལྷག་མ་མ་ལུས་པ་ཐམས་ཅད་ཀྱི་དོན་དུ་སེམས་ཅན་གཅིག་གི་ཕྱིར་ཡོང་ཕྱི་མའི་མཐའི་བསྐལ་པའི་མུར་ཐུག་པར་གོ་ཅ་བགོས་ཏེ། སེམས་ཅན་གཅིག་གི་ཕྱིར་ཇི་ལྟ་བ་དེ་བཞིན་དུ་སེམས་

Vol. 36 · folio 142a

ཅན་ཐམས་ཅད་ཀྱི་ཕྱིར་ཡང་གོ་ཅ་བགོས་ཏེ། བྱང་ཆུབ་སེམས་དཔའི་སྤྱད་པ་ཡང་དག་པར་སྤྱོད་པར་གྱུར་ཅིག །དགེ་བའི་རྩ་བ་འདིས་ནམ་ཡང་སངས་རྒྱས་དང་འབྲལ་བའི་འདུ་ཤེས་དང་དགེ་བའི་བཤེས་གཉེན་དང་འབྲལ་བའི་

འདུ་ཤེས་སྐྱེ་བར་མ་གྱུར་ཅིག །འདི་ལྟར་ཡང་སངས་རྒྱས་ཐམས་ཅད་མངོན་དུ་གྱུར་ཏེ། སངས་རྒྱས་སྐྱེ་བ་གཅིག་དང་ཡང་མི་འབྲལ་ཞིང་སངས་རྒྱས་ཐམས་ཅད་ཀྱིས་བྱང་ཆུབ་སེམས་དཔའི་ཚངས་པར་སྤྱོད་པ་ཡང་དག་པར་བསྟན་པ་དང་བརྗོད་པ་དང་བསྔགས་

པ་དེ་ལ་སྤྱོད་པར་གྱུར་ཅིག །དེ་དག་ཡོངས་སུ་རྫོགས་པར་བྱེད་པར་གྱུར་ཅིག །ཚངས་པའི་སྤྱོད་པ་མ་གོད་པར་སྤྱོད་པར་གྱུར་ཅིག །ཚངས་པའི་སྤྱོད་པ་མཉམས་པར་ཡོངས་སུ་རྫོགས་པར་བྱེད་པར་གྱུར་ཅིག །ཚངས་པའི་སྤྱོད་པ་མ་འདྲེས་པར་

ཡོངས་སུ་སྤྱོད་པར་གྱུར་ཅིག །ཚངས་པའི་སྤྱོད་པ་རྙོག་པ་མེད་པ་ལ་གནས་པར་གྱུར་ཅིག །ལྟུང་བ་མེད་པའི་ཚངས་པའི་སྤྱོད་པ་ལ་གནས་པར་གྱུར་ཅིག །ཟིལ་གྱིས་མི་ནོན་པའི་ཚངས་པའི་སྤྱོད་པ་ཡོངས་སུ་སྤྱོད་པར་གྱུར་ཅིག །སངས་

རྒྱས་ཀྱིས་བསྔགས་པའི་ཚངས་པའི་སྤྱོད་པ་ལ་ནན་ཏན་དུ་སྤྱོད་པར་གྱུར་ཅིག །མི་གནས་པའི་ཚངས་པའི་སྤྱོད་པ་རབ་ཏུ་སྒྲུབ་པར་གྱུར་ཅིག །མི་དམྱིགས་ཤིང་བྱང་ཆུབ་ཀྱི་སེམས་ལ་གནས་པའི་ཚངས་པའི་སྤྱོད་པ་རྣམ་པར་སྤྱོད་

པར་གྱུར་ཅིག །འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱིས་སྤྱད་པའི་རྗེས་སུ་སྤྱོད་པའི་ཚངས་པའི་སྤྱོད་པ་ཁོང་དུ་ཆུད་པར་གྱུར་ཅིག །ཇི་ལྟར་བདག་ཚངས་པའི་སྤྱོད་པ་དེ་ལ་ནན་ཏན་དུ་བྱེད་པ་དེ་བཞིན་དུ་ཚངས་

པར་སྤྱོད་པ་ཆགས་པ་མེད་པ་དང་། ཚངས་པར་སྤྱོད་པ་གནས་མེད་པ་དང་། ཚངས་པར་སྤྱོད་པ་ཉོན་མོངས་པ་མེད་པ་དང་། ཚངས་པར་སྤྱོད་པ་ཉམས་པ་མེད་པ་དང་། ཚངས་པར་སྤྱོད་པ་བསྒྲིབས་པ་མེད་པ་དང་། ཚངས་པར་སྤྱོད་པ་བརྟན་པ་དང་།

Vol. 36 · folio 142b

ཚངས་པར་སྤྱོད་པ་གཞན་གྱི་དྲིང་མི་འཇོག་པ་དང་། ཚངས་པར་སྤྱོད་པ་མི་སྒུལ་བ་དང་། ཚངས་པར་སྤྱོད་པ་མི་གཡོ་བ་དང་། ཚངས་པར་སྤྱོད་པ་མི་འཁྲུགས་པ་དེ་ལ་སེམས་ཅན་ཐམས་ཅད་ཀྱང་རབ་ཏུ་འགོད་དོ། །སེམས་ཅན་ཐམས་ཅད་རབ་ཏུ་

སྦྱོར་རོ། སེམས་ཅན་ཐམས་ཅད་ཤིན་ཏུ་སྒྲུབ་བོ། །སེམས་ཅན་ཐམས་ཅད་རྣམ་པར་སྦྱོང་ངོ་། །སེམས་ཅན་ཐམས་ཅད་དྲི་མ་མེད་པར་བྱའོ། །སེམས་ཅན་ཐམས་ཅད་རྣམ་པར་སྣང་བར་བྱའོ། །སེམས་ཅན་ཐམས་ཅད་

རྡུལ་མེད་པར་བྱའོ། །སེམས་ཅན་ཐམས་ཅད་རབ་རིབ་མེད་པར་བྱའོ། །སེམས་ཅན་ཐམས་ཅད་ཡོངས་སུ་གདུང་བ་མེད་པར་བྱའོ། །སེམས་ཅན་ཐམས་ཅད་འབྱུང་བ་ལ་གནས་པར་བྱའོ། །སེམས་ཅན་ཐམས་ཅད་

འགྱོད་པ་ཐམས་ཅད་དང་བྲལ་ཞིང་གནོད་སེམས་དང་རྣམ་པར་བྲལ་བའི་ཕ་རོལ་ཏུ་ཕྱིན་པ་ཐོབ་པར་བྱའོ། །དེ་ཅི་འི་ཕྱིར་ཞེ་ན། བྱང་ཆུབ་སེམས་དཔའི་ཚངས་པར་སྤྱོད་པ་རྣམ་པར་མ་དག་པས་གཞན་གྱི་ཚངས་པར་སྤྱོད་པ་རྣམ་པར་དག་པར་བྱ་བར་མི་ནུས་སོ། །

བྱང་ཆུབ་སེམས་དཔའ་ཚངས་པར་སྤྱོད་པ་ལས་ཕྱིར་ལོག་པས་ཕ་རོལ་བྱང་ཆུབ་སེམས་དཔའི་ཚངས་པར་སྤྱོད་པ་བསྒྲུབ་པར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་རྒྱུན་ཆད་པས་གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་

རྣམ་པར་དག་པར་བྱ་བར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་དང་བྲལ་བས་གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་ནན་ཏན་དུ་བྱེད་དུ་གཞུག་པར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལས་ཉམས་པས་གཞན་བྱང་ཆུབ་

སེམས་དཔའི་ཚངས་པར་སྤྱོད་པ་ལ་སྦྱར་བར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལ་མོས་པ་མེད་པས། གཞན་བྱང་ཆུབ་སེམས་དཔའ་ཚངས་པར་སྤྱོད་པ་ལ་མོས་པར་བྱ་བར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལ་

Vol. 36 · folio 143a

རྣམ་པར་མི་གནས་པས་གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་གནས་པར་གཞག་པར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལ་མ་ཞུགས་པས་གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་གཞུག་པར་

མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལས་གཡོས་པས་གཞན་བྱང་ཆུབ་སེམས་དཔའི་ཚངས་པར་སྤྱོད་པ་མྱི་གཡོ་བ་ལ་གཞག་པར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་མ་སྤྱད་པས་གཞན་བྱང་ཆུབ་སེམས་དཔའི་ཚངས་པར་སྤྱོད་པས་

ཡང་དག་པར་གཟུང་བར་མི་ནུས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ཇི་སྐད་སྨྲ་བ་དེ་ལྟར་བྱེད་པ་ཡིན། བྱང་ཆུབ་སེམས་དཔའ་ནི་མ་ནོར་བ་ལ་གནས་ཤིང་མ་ནོར་བར་སྨྲ་བ་ཡིན། བྱང་ཆུབ་སེམས་དཔའ་ནི་བདེན་པར་སྨྲ་ཞིང་དེ་བཞིན་དུ་བྱེད་པ་ལ་གནས་

པ་ཡིན། བྱང་ཆུབ་སེམས་དཔའ་ནི་ལུས་ཀྱི་ལས་དང་ངག་གི་ལས་དང་། ཡིད་ཀྱི་ལས་ཡོངས་སུ་དག་ཅིང་ཉོན་མོངས་པ་ཐམས་ཅད་བསྩལ་བ་ཡིན། བྱང་ཆུབ་སེམས་དཔའ་ནི་སྒྲིབ་པ་ཐམས་ཅད་རྣམ་པར་འཐོར་ཞིང་བསྒྲིབས་པ་མེད་པའི་སྤྱོད་ཡུལ་ལ་ཞུགས་པ་ཡིན།

བྱང་ཆུབ་སེམས་དཔའ་ནི་ལྷག་པའི་བསམ་པ་དང་ལྡན་ཞིང་གཞན་ལ་ལྷག་པའི་བསམ་པ་དག་པས་ཆོས་སྟོན་པ་ཡིན། བྱང་ཆུབ་སེམས་དཔའ་ནི་དྲང་པོའི་ཚུལ་གྱིས་དགེ་བའི་རྩ་བ་ལ་འཇམ་པའི་སེམས་དང་ལྡན་ཞིང་གཞན་དྲང་པོ་ལ་བཞག་པ་ཡིན།

བྱང་ཆུབ་སེམས་དཔའ་ནི་འགྱོད་པ་དང་བྲལ་བར་བྱས་ཤིང་གཞན་འགྱོད་པ་ལས་རྣམ་པར་སློང་བ་ཡིན། བྱང་ཆུབ་སེམས་དཔའ་ནི་ཡིད་དང་བར་གྱུར་ཅིང་གཞན་སེམས་དང་བར་དབྱེར་མེད་པ་ཡང་དག་པར་སྒྲུབ་པ་ཡིན། བྱང་ཆུབ་སེམས་དཔའ་ནི་ཆོས་ཡང་དག་པར་

བརྗོད་པར་གྱུར་ཅིང་གཞན་ཆོས་ལ་ཉེ་བར་སྟོབས་པ་ཡིན་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྦྱིན་པ་ལ་བརྩོན་པ་དགེ་བའི་རྩ་བ་

Vol. 36 · folio 143b

དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་ཆོས་ཐམས་ཅད་ཀྱི་སྒོ་མི་ཟད་པ་རབ་ཏུ་ཐོབ་པར་གྱུར་ཅིག །ཆོས་ཐམས་ཅད་ཤིན་ཏུ་བསྟན་པའི་སྒོ་འགྲོ་བ་ཐམས་ཅད་ཚིམ་པར་བྱེད་པ། གཞན་གྱིས་བརྒལ་བ་ཐམས་ཅད་ལས་རྣམ་པར་འདས་པ།

དོར་བ་དང་གཞག་པ་རབ་ཏུ་འགག་པ་ཐོབ་པར་གྱུར་ཅིག །དགེ་བའི་རྩ་བ་འདིས་འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཆོས་རྒྱ་མཚོ་ཤིན་ཏུ་སྟོན་པར་གྱུར་ཅིག །ཆོས་ཀྱི་སྐྱེ་གནས་རེ་རེ་དང་ཆོས་ཀྱི་ཚུལ་རེ་རེ་དང་ཆོས་རྣམ་པར་བརྗོད་པ་རེ་རེ་དང་།

ཆོས་སུ་གདགས་པ་རེ་རེ་དང་། ཆོས་སུ་སྨོས་པ་རེ་རེ་དང་། ཆོས་སུ་བརྗོད་པ་རེ་རེ་དང་། ཆོས་ཀྱི་སྒོ་རེ་རེ་དང་། ཆོས་ལ་འཇུག་པ་རེ་རེ་དང་། ཆོས་བསྐྱེད་པ་རེ་རེ་དང་། ཆོས་རྣམ་པར་དགོང་པ་རེ་རེ་ལས་ཆོས་མི་ཟད་པ། མཐའ་དང་དབུས་མེད་

པའི་མི་འཇིགས་པ་ལ་རབ་ཏུ་བརྩོན་པ་ཐོབ་སྟེ། ཐ་དད་པ་ཡང་དག་པར་ཤེས་པ་ལ་ཞུགས་པས་སྟོན་ཅིང་འགྲོ་བ་ཐམས་ཅད་ཀྱིས་ཕྱི་མའི་མཐར་ཐུག་པ་མི་བདེ་བ་དང་ལྡན་པ་དང་། སེམས་ཅན་ཐམས་ཅད་ལ་ལྷག་པའི་བསམ་པས་བསྟན་པར་ཡང་དག་པར་

བསྒྲུབ་པའི་ཚིག་ཆགས་པ་མེད་པས་བྱུང་བ་དང་། འཁྲུལ་པ་མེད་པའི་སྤོབས་པས་འགྲོ་བ་ཐམས་ཅད་དགའ་བར་བྱེད་པའི་ཆོས་ཤིན་ཏུ་སྟོན་པ་དང་། འགྲོ་བ་ཐམས་ཅད་དུ་རྗེས་སུ་བསྒྲགས་པའི་ཆོས་ཀྱི་ཚིག་གི་ཚུལ་དང་ལྡན་པ་དང་། ཆོས་ཐམས་ཅད་ཀྱི་སྣང་བ་མཐའ་

ཡས་པའི་རྒྱུན་མི་འཆད་པའི་དགའ་བའི་ཤུགས་ཡང་དག་པར་བསྐྱེད་པ་དང་། སེམས་ཅན་ཐམས་ཅད་དགའ་བ་དང་། མོས་པས་ཐམས་ཅད་མཁྱེན་པ་ཉིད་ལ་རབ་ཏུ་བཞག་པར་རྨོངས་པ་མེད་པ་དང་། ཆོས་སྣང་བའི་སྤོབས་པ་དང་ལྡན་པ་དང་།

ཚིག་ཐམས་ཅད་ཡང་དག་པར་གཟུང་བའི་བྱིན་གྱི་རླབས་ཀྱིས། འཇིག་རྟེན་གྱི་ཁམས་ཐམས་ཅད་དུ་རབ་ཏུ་བརྩོན་པ་དང་། ཆོས་ཀྱི་དབྱིངས་སུ་ལུས་ཚད་མེད་པས་བྱིན་གྱིས་རློབ་པ་དང་། ཆོས་ཀྱི་དབྱིངས་སེམས་ཡངས་པ་ཚད་མེད་པས་རྒྱས་པར་འགེངས་པ་

Vol. 36 · folio 144a

དང་། ཆོས་ཀྱི་དབྱིངས་སུ་དབྱངས་ཐམས་ཅད་རྣམ་པར་དག་པ་ཚད་མེད་པས་གྲགས་པར་བྱེད་པ་དང་། ཆོས་ཀྱི་དབྱིངས་སུ་ཚད་མེད་པའི་འཁོར་གྱི་དཀྱིལ་འཁོར་ཡང་དག་པར་སྟོན་པ་དང་། ཆོས་ཀྱི་དབྱིངས་ཀྱི་བྱང་ཆུབ་སེམས་དཔའི་ལས་ཚད་མེད་པ་ལ་

བརྩོན་པ་དང་། ཆོས་ཀྱི་དབྱིངས་ཀྱི་བྱང་ཆུབ་སེམས་དཔའི་སྤྱོད་པ་ཚད་མེད་པ་རབ་ཏུ་ཐོབ་པ་དང་། ཆོས་ཀྱི་དབྱིངས་ལ་ཡང་དག་པར་འཇུག་པ་ཚད་མེད་པར་རབ་ཏུ་རྟོགས་པ་དང་། ཆོས་ཀྱི་དབྱིངས་སུ་ཆོས་ཚད་མེད་པར་མངོན་པར་བསྒྲུབ་པ་ལ་བསླབས་པ་དང་།

ཆོས་ཀྱི་དབྱིངས་སུ་བྱང་ཆུབ་སེམས་དཔའི་སྤྱོད་པ་ཚད་མེད་པ་ཡང་དག་པར་སྤྱོད་པ་ལ་གནས་པ་དང་། ཆོས་ཀྱི་དབྱིངས་ཚད་མེད་པའི་བྱང་ཆུབ་སེམས་དཔའི་སྤྱོད་པའི་ཁོངས་སུ་ཆུད་པས་སེམས་ཅན་ཐམས་ཅད་ཀྱི་གཙོ་བོས་ཡང་དག་པར་བསྟན་པ་རབ་ཏུ་ཐོབ་པར་གྱུར་

ཅིག་ཅེས། དེ་ལྟར་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་རབ་ཏུ་དགོད་པ་ཤིན་ཏུ་བསྒྲུབ་པའི་ཕྱིར་བྱང་ཆུབ་སེམས་དཔའི་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་

བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། ཆོས་ཀྱི་དབྱིངས་ཚད་མེད་པའི་སངས་རྒྱས་མཐོང་བ་དང་། ཆོས་ཀྱི་དབྱིངས་ཚད་མེད་པའི་སེམས་ཅན་གདུལ་བ་དང་། ཆོས་ཀྱི་དབྱིངས་ཚད་མེད་པའི་སངས་རྒྱས་ཀྱི་ཞིང་བྱིན་གྱིས་བརླབ་པ་དང་། ཆོས་ཀྱི་

དབྱིངས་ཚད་མེད་པའི་བྱང་ཆུབ་སེམས་དཔའི་ཡེ་ཤེས་ཁོང་དུ་ཆུད་པར་བྱ་བ་དང་། ཆོས་ཀྱི་དབྱིངས་ཚད་མེད་པའི་མི་འཇིགས་པ་རབ་ཏུ་ཐོབ་པར་བྱ་བ་དང་། ཆོས་ཀྱི་དབྱིངས་ཚད་མེད་པའི་ཐ་དད་པ་ཡང་དག་པར་ཤེས་པ་རབ་ཏུ་ཐོབ་པར་བྱ་བ་དང་། ཆོས་ཀྱི་

དབྱིངས་ཚད་མེད་པའི་བྱང་ཆུབ་སེམས་དཔའི་གཟུངས་རབ་ཏུ་ཐོབ་པར་བྱ་བ་དང་། ཆོས་ཀྱི་དབྱིངས་ཚད་མེད་པའི་བྱང་ཆུབ་སེམས་དཔའི་གནས་བསམ་གྱིས་མི་ཁྱབ་པ་རབ་ཏུ་ཐོབ་པར་བྱ་བ་དང་། ཆོས་ཀྱི་དབྱིངས་ཚད་མེད་པའི་བསོད་ནམས་བསྩགས་པ་

Vol. 36 · folio 144b

ཡོངས་སུ་གྲུབ་པར་བྱ་བ་དང་། ཆོས་ཀྱི་དབྱིངས་ཚད་མེད་པའི་སེམས་ཅན་གྱི་དོན་གྱི་དགེ་བའི་རྩ་བ་ཡོངས་སུ་རྫོགས་པར་བྱ་བ་ཐོབ་པར་གྱུར་ཅིག །དགེ་བའི་རྩ་བ་དེས་ཆོས་འདི་དག་ཡོངས་སུ་རྫོགས་པར་གྱུར་ཅིག །ཇི་ལྟར་བདག་གིས་ཐོབ་པར་གྱུར་པ་དེ་བཞིན་དུ་སེམས་ཅན་ཐམས་

ཅད་ཀྱིས་ཀྱང་ཐོབ་པར་གྱུར་ཅིག །ཐོབ་པ་འདི་དང་། མཉམ་པ་ཉིད་འདི་དང་། ཡོངས་སུ་རྫོགས་པ་འདིས་སེམས་ཅན་ཐམས་ཅད་བདག་དང་སྤྱོད་པ་མཉམ་པར་གྱུར་ཅིག །བསོད་ནམས་མཉམ་པ་དང་ཡེ་ཤེས་མཉམ་པ་དང་། སྟོབས་མཉམ་པ་དང་།

མི་འཇིགས་པ་མཉམ་པ་དང་། རྣམ་པར་དག་པ་མཉམ་པ་དང་། རྣམ་པར་འཕྲུལ་བ་མཉམ་པ་དང་། མངོན་པར་བྱང་ཆུབ་པ་མཉམ་པ་དང་། ཆོས་བསྟན་པ་མཉམ་པ་དང་། དོན་མཉམ་པ་དང་རྣམ་པར་ངེས་པ་མཉམ་པ་དང་། མངོན་

པར་ཤེས་པ་ཐམས་ཅད་མཉམ་པས་མཉམ་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་

བ་དེ་དག་འདི་ལྟར་ཡོངས་སུ་བསྔོ་སྟེ། ཇི་ལྟར་ཆོས་ཀྱི་དབྱིངས་ཚད་མེད་པ་དེ་བཞིན་དུ་དགེ་བའི་རྩ་བ་དེ་དག་ཚད་མེད་པའི་ཡེ་ཤེས་ཡོངས་སུ་བསྒྲུབ་པའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་མཐའ་དང་དབུས་མེད་པ་དེ་བཞིན་

དུ་དགེ་བའི་རྩ་བ་དེ་དག་སངས་རྒྱས་མཐའ་དང་དབུས་མེད་པ་ཐམས་ཅད་མཐོང་བ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ལ་མུས་གཅད་པ་མེད་པ་དེ་བཞིན་དུ་དགེ་བའི་རྩ་བ་དེ་དག་སངས་རྒྱས་ཀྱི་

ཞིང་མུས་གཅད་པ་མེད་པ་ཐམས་ཅད་དུ་འགྲོ་བར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ས་མཚམས་མེད་པ་དེ་བཞིན་དུ་དགེ་བའི་རྩ་བ་དེ་དག་འཇིག་རྟེན་གྱི་ཁམས་ས་མཚམས་མེད་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་སྤྱད་པར་

Vol. 36 · folio 145a

ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ལ་རིས་སུ་ཆད་པ་མེད་པ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་ཐམས་ཅད་མཁྱེན་པའི་ཡེ་ཤེས་རིས་སུ་ཆད་པ་མེད་པར་བྱ་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་

ཀྱི་དབྱིངས་རྒྱུད་ཀྱི་ཚུལ་གཅིག་པར་གྱུར་པ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ཅད་ཡེ་ཤེས་ཀྱི་རྒྱུད་ཀྱི་ཚུལ་གཅིག་ཏུ་འགྱུར་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་རང་བཞིན་ཡོངས་སུ་དག་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་

ཐམས་ཅད་ཤིན་ཏུ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་འགྲོ་བ་ཐམས་ཅད་ཀྱི་རྗེས་སུ་སོང་བ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ཡང་དག་པར་བསྡུ་བའི་

ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་འགྲོ་བ་ཐམས་ཅད་ཀྱི་རྒྱན་ཏུ་གྱུར་པ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་ཀུན་ཏུ་བཟང་པོའི་སྤྱོད་པའི་རྒྱན་རྣམ་པར་དག་པར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ལ་འཇིག་པ་མེད་

པ་དེ་བཞིན་དུ་དགེ་བའི་རྩ་བ་དེ་དག་བྱང་ཆུབ་སེམས་དཔའི་སྤྱོད་པ་ཐམས་ཅད་འཇིག་པ་མེད་པའི་ཕྱིར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། །གང་གིས་ཐམས་ཅད་མཁྱེན་པ་

ཉིད་དུ་འགྱུར་བ་དེར་དགེ་བའི་རྩ་བ་དེ་དག་ཡོངས་སུ་བསྔོའོ། །ཐམས་ཅད་མཁྱེན་པ་ཉིད་ནི་ཐམས་ཅད་དུ་འགྲོ་བས་ན་ཐམས་ཅད་དུ་འགྲོ་བའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་འགྲོ་བ་ཐམས་ཅད་དུ་ཤིན་ཏུ་སྣང་བར་གྱུར་པ་དེ་ལྟར་དགེ་བའི་རྩ་བ་དེ་དག་

ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་དང་སངས་རྒྱས་ཀྱི་མཛད་པ་ཡོངས་སུ་ཐོབ་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་དང་། སངས་རྒྱས་ཀྱི་མཛད་པ་ཐོགས་པ་མེད་པར་འགྱུར་བ་དེ་ལྟར་

Vol. 36 · folio 145b

དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་སེམས་ཅན་ཐམས་ཅད་རྣམ་པར་དག་པར་བྱ་བ་ལས་ཕྱིར་མི་ལྡོག་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་ཡོངས་སུ་ཤེས་ཤིང་

རབ་ཏུ་འཕེལ་བར་བྱེད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་གནས་སུ་མི་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་ཆགས་པ་མེད་པར་ཁོང་དུ་ཆུད་པར་འགྱུར་བ་དེ་ལྟར་དགེ་

བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་ཞིང་ཀུན་ཏུ་བཟང་པོའི་སྤྱོད་པ་ཡང་དག་པར་འགྲུབ་པར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་ཞིང་མངོན་སུམ་དུ་བལྟ་བ་རྒྱུན་མི་འཆད་པ་དེ་ལྟར་

དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བས་བྱང་ཆུབ་སེམས་དཔའི་སྟོབས་དང་ཤུགས་སྐྱེ་བར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་ཞིང་དངོས་པོ་ཉམས་པར་འགྱུར་བ་

ཐམས་ཅད་ལས་འཕགས་པར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །འདི་ལྟར་ཡང་ཆོས་ཀྱི་དབྱིངས་བྱེད་པ་མེད་པ་དང་། ཆོས་ཀྱི་དབྱིངས་ཀྱི་རང་བཞིན་དང་། ཆོས་ཀྱི་དབྱིངས་ཀྱི་ངོ་བོ་ཉིད་དང་། ཆོས་ཀྱི་དབྱིངས་གནས་མེད་པ་དང་། ཆོས་

ཀྱི་དབྱིངས་ཉམས་པ་མེད་པ་དང་། ཆོས་ཀྱི་དབྱིངས་དབེན་པ་དང་། ཆོས་ཀྱི་དབྱིངས་ཞི་བ་དང་། ཆོས་ཀྱི་དབྱིངས་གནས་པ་དང་ཆོས་ཀྱི་དབྱིངས་མི་འཕོ་བ་དང་ཆོས་ཀྱི་དབྱིངས་ཐ་དད་པ་མེད་པ་དེ་བཞིན་དུ་འགྱུར་བར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་

སེམས་དཔའ་ཆེན་པོ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་ཆོས་བསྟན་ཅིང་བརྗོད་པས་ཡང་དག་པར་བཟུང་བ་དང་། ཆོས་བསྟན་པར་བསྐུལ་བ་དང་། དེ་ལ་དམྱིགས་པ་ལ་བརྩོན་པར་བྱས་པའི་དགེ་བའི་རྩ་བ་དང་དེ་དག་ལ་སོགས་

Vol. 36 · folio 146a

པ་དགེ་བ་བརྩམས་པ་གཞན་དང་གཞན་གྱིས་སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་བྱིན་གྱིས་བརླབས་ཤིང་བྱང་ཆུབ་སེམས་དཔར་གྱུར་ཏེ། ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཀྱི་ཐམས་ཅད་མཁྱེན་པའི་

ཡེ་ཤེས་ལ་སེམས་ཅན་ཐམས་ཅད་དགོད་པའི་ཚུལ་གྱིས་བླ་ན་མེད་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་འཇིག་རྟེན་ཀུན་གྱིས་ཆོས་ཡོངས་སུ་དྲིས་པས་ཟད་པར་མི་འགྱུར་བས་མི་འཕྲོགས་པའི་ཆོས་སྨྲ་བར་གྱུར་ཅིག །སེམས་ཅན་ཐམས་

ཅད་ཆོས་ཀྱི་སྣང་བ་བསྒྲིབས་པ་མེད་པ་ཐོབ་པའི་ཕྱིར་ཆགས་པ་མེད་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ཀྱི་ཚིག་དང་ཡི་གེ་བརྗོད་པ་ལ་མཁས་ཤིང་ཡེ་ཤེས་ཀྱི་སྙིང་པོའི་ཆོས་སྨྲ་བར་གྱུར་ཅིག །སེམས་

ཅན་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་སྟོན་པ་ལ་མཁས་ཤིང་སངས་རྒྱས་ཀྱི་བྱིན་གྱིས་བརླབས་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་གཞན་གྱིས་དྲིང་མི་འཇོག་ཅིང་ཡང་དག་པ་ཇི་ལྟ་བ་བཞིན་དུ་ཆོས་སྟོན་པས་

མིག་དང་འདྲ་བའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་རིག་པས་བཟུང་བའི་ཚིག་དང་ཡི་གེ་ཆུད་མ་ཟོས་པར་ཤིན་ཏུ་སྟོན་པས་སངས་རྒྱས་ཀྱིས་ཆོས་ཐམས་ཅད་དྲན་པས་ཡང་དག་པར་འཛིན་པའི་ཆོས་སྨྲ་བར་གྱུར་ཅིག །སེམས་ཅན་

ཐམས་ཅད་མཚན་གྱིས་ཤིན་ཏུ་བརྒྱན་པའི་ལུས་དང་ལྡན་ཞིང་འོད་མཐའ་ཡས་པར་འཕྲོ་བའི་ཆོས་ཡང་དག་པར་དཔྱད་པ་ལ་མཁས་པས་ཉེ་བར་མི་དམྱིགས་པའི་ལམ་དུ་ཞུགས་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་རྒྱུན་མི་

འཆད་པ་ལ་གནས་ཤིང་། །སངས་རྒྱས་ཀྱི་ཆོས་ཐམས་ཅད་ཀྱི་ཆར་བསམ་པ་ཐག་པས་དབབ་པའི་བྱིན་གྱི་རླབས་ཀྱིས་ཆོས་ཀྱི་སྤྲིན་རབ་ཏུ་སྟོན་ཅིང་། སངས་རྒྱས་ཀྱི་ཞིང་བརྗོད་དུ་མེད་པ་ལུས་ཀྱིས་རྒྱས་པར་འགེངས་པའི་ཆོས་སྨྲ་བར་

Vol. 36 · folio 146b

གྱུར་ཅིག །སེམས་ཅན་ཐམས་ཅད་གཞན་གྱིས་ཕམ་པར་མི་ནུས་པའི་རྒྱལ་མཚན་དང་ལྡན་པའི་ཆོས་སྨྲ་བའི་མཛོད་བདོག་པས་ཆོས་རྒྱ་མཚོ་ཐམས་ཅད་དང་། སངས་རྒྱས་ཀྱི་ཆོས་ཆུད་མི་གསོན་པའི་ཆོས་སྨྲ་བར་གྱུར་ཅིག །སེམས་ཅན་

ཐམས་ཅད་སངས་རྒྱས་ཀྱི་སྤོབས་པ་ལ་བརྩོན་ཞིང་ཆོས་ཐམས་ཅད་ཡང་དག་པར་བརྗོད་པ་ལ་མཁས་པས་ཆོས་ཐམས་ཅད་ཀྱི་དཀྱིལ་འཁོར་གྱི་ཉི་མའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་མཐའ་ཡས་པ་ཤིན་ཏུ་བསྟན་

པའི་ཆོས་ཀྱི་འབྱུང་གནས་དང་མཛོད་རབ་ཏུ་ཐོབ་ཅིང་ཆོས་ཀྱི་འབྱུང་གནས་དང་། རིགས་ཀྱི་ཚུལ་དང་ལྡན་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་མཛོད་རྣམ་པར་ཕྱེ་བའི་ཡེ་ཤེས་མངོན་པར་ཤེས་པ་དང་ལྡན་ཞིང་ཆོས་ཀྱི་སྤྱོད་པའི་

ཕ་རོལ་ཏུ་ཕྱིན་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པས་ཤིན་ཏུ་བསྟན་པའི་ཕ་རོལ་ཏུ་ཕྱིན་པའི་ཡེ་ཤེས་དང་ལྡན་ཞིང་དབྱེ་བ་མེད་པ་དང་། གནས་པ་མེད་པའི་ཆོས་ལ་གནས་པ་རབ་ཏུ་ཐོབ་པའི་ཆོས་སྨྲ་བར་

གྱུར་ཅིག །སེམས་ཅན་ཐམས་ཅད་ཡོན་ཏན་དང་བསྔགས་པ་མུ་མེད་ཅིང་ཟད་མི་ཤེས་པ་དང་ལྡན་ཏེ། ཆོས་ཐམས་ཅད་ཁོང་དུ་ཆུད་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་བདེན་པའི་མཐའི་ཚུལ་གྱི་རྗེས་སུ་ཞུགས་པས་འགྲོ་བ་

ཐམས་ཅད་ལ་མི་བསླུ་བའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་བདུད་ཀྱི་ལས་ཐམས་ཅད་ཁོང་དུ་ཆུད་པའི་ཡེ་ཤེས་དང་ལྡན་ཞིང་བདུད་ཐམས་ཅད་རྣམ་པར་འཐོར་བའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་བདག་གི་

མེད་པ་དང་ཡོངས་སུ་འཛིན་པ་མེད་པའི་སེམས་དང་ལྡན་ཞིང་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ཆོས་ཀྱི་སྟོབས་ཀྱི་སྨོན་ལམ་རབ་ཏུ་འཐོབ་ཅིང་འགྲོ་བ།

Vol. 36 · folio 147a

ཐམས་ཅད་བདེ་བར་བྱེད་པའི་ཆོས་སྨྲ་བར་གྱུར་ཅིག །དེ་ཡང་འདི་ལྟར་ཡོངས་སུ་བསྔོ་སྟེ། ཉམས་པ་མེད་པའི་ལས་ཀྱིས་ཡོངས་སུ་བསྔོའོ། །ཉམས་པ་མེད་པའི་རྣམ་པར་སྨིན་པས་ཡོངས་སུ་བསྔོའོ། །ཉམས་

པ་མེད་པའི་སེམས་ཀྱིས་ཡོངས་སུ་བསྔོའོ། །ཉམས་པ་མེད་པའི་ཆོས་ལ་ཡོངས་སུ་བསྔོའོ། །ཉམས་པ་མེད་པའི་དངོས་པོ་ལ་ཡོངས་སུ་བསྔོའོ། །ཉམས་པ་མེད་པའི་རྒྱུ་རྣམས་ཀྱིས་ཡོངས་སུ་བསྔོའོ། །ཉམས་པ་མེད་པའི་ཆོས་ཀྱི་ལམ་

གྱིས་ཡོངས་སུ་བསྔོའོ། །ཉམས་པ་མེད་པའི་མིང་མང་པོ་དང་། ཚིག་མང་པོ་དང་ཡི་གེ་མང་པོའི་ཕྱིར་ཡོངས་སུ་བསྔོའོ། །ཉམས་པ་མེད་པའི་ཡོངས་སུ་བསྔོ་བའི་ཕྱིར་ཡོངས་སུ་བསྔོའོ། །ཉམས་པ་མེད་པའི་སེམས་ཅན་གྱི་དོན་བྱ་བའི་ཕྱིར་

ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་དག་ཡོངས་སུ་བསྔོ་ཡང་། གཟུགས་ཀྱི་ཚུལ་ལ་ཆགས་ཤིང་ཡོངས་སུ་མི་བསྔོའོ། །འདོད་པ་ལ་གནས་པའི་སྒྲའི་དོན་དུ་ཡོངས་སུ་མི་བསྔོའོ། །དྲིའི་ཕྱིར་ཡོངས་སུ་མི་བསྔོའོ། །རོའི་

ཕྱིར་ཡོངས་སུ་མི་བསྔོའོ། །རེག་བྱའི་ཕྱིར་ཡོངས་སུ་མི་བསྔོའོ། །འདོད་པ་ལ་གནས་པའི་ཆོས་རྣམས་ཀྱི་ཕྱིར་ཡང་ཡོངས་སུ་མི་བསྔོའོ། །མཐོ་རིས་སུ་སྐྱེ་བའི་ཕྱིར་ཡང་ཡོངས་སུ་མྱི་བསྔོའོ། །འདོད་པ་ལ་སྤྱོད་པའི་ཕྱིར་ཡང་ཡོངས་སུ་མྱི་བསྔོའོ། །འདོད་པའི་

ཡུལ་ལ་ཆགས་པས་ཀྱང་ཡོངས་སུ་མི་བསྔོའོ། །གཡོག་འཁོར་གྱི་ཕྱིར་ཡང་ཡོངས་སུ་མི་བསྔོའོ། །དབང་ཕྱུག་དོན་དུ་གཉེར་བས་ཡོངས་སུ་མི་བསྔོའོ། །འཁོར་བའི་དགའ་བའི་དོན་དུ་ཡོངས་སུ་མི་བསྔོའོ། །འཆི་འཕོ་དང་སྐྱེ་བ་ལ་གནས་ཤིང་ཡོངས་སུ་མི་

བསྔོའོ། །དངོས་པོ་ལ་མངོན་པར་མོས་ཤིང་ཡོངས་སུ་མི་བསྔོའོ། །འདོད་པ་དང་ལྡན་པར་བྱ་བའི་བསམ་པས་ཡོངས་སུ་མི་བསྔོའོ། །ཀུན་གཞི་ལ་མོས་པས་ཡོངས་སུ་མི་བསྔོའོ། །བསྟེན་པའི་སེམས་ཀྱིས་ཡོངས་སུ་མི་བསྔོའོ། །དགེ་བའི་རྩ་བ་

Vol. 36 · folio 147b

གཞིག་པའི་དོན་དུ་ཡང་ཡོངས་སུ་མྱི་བསྔོའོ། ཁམས་གསུམ་པ་ལ་གནས་པས་ཀྱང་ཡོངས་སུ་མི་བསྔོའོ། །བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པའི་རོ་ལ་ཆགས་པས་ཀྱང་ཡོངས་སུ་མི་བསྔོའོ། །ཉན་ཐོས་

དང་རང་སངས་རྒྱས་ཀྱི་ཐེག་པ་ལ་གནས་ཤིང་ཡོངས་སུ་མི་བསྔོའོ། །འདི་ལྟར་འགྲོ་བ་ཐམས་ཅད་ཡོངས་སུ་སྨྱིན་པར་བྱ་བ་དང་། གདུལ་བའི་དོན་དུ་ཐམས་ཅད་མཁྱེན་པའི་ཡེ་ཤེས་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཆགས་པ་མེད་པའི་ཡེ་

ཤེས་ལ་འཇུག་པའི་ཕྱིར་ཡོངས་སུ་བསྔོའོ། །བསྒྲིབས་པ་མེད་པའི་དགེ་བའི་རྩ་བ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །འགྲོ་བ་ཐམས་ཅད་འཁོར་བ་ནས་རབ་ཏུ་འདོན་པའི་ཡེ་ཤེས་ཆེན་པོ་ཁོང་དུ་ཆུད་པར་བྱ་བའི་ཕྱིར་ཡོངས་སུ་བསྔོའོ། །བྱང་

ཆུབ་ཏུ་སེམས་བསྐྱེད་པ་རྡོ་རྗེ་ལྟ་བུ་དང་། བསམ་པ་བརྟེན་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཡུན་དུ་འཆི་བ་མེད་པའི་ཆོས་བསྒྲུབ་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་རིགས་ཀྱིས་བརྒྱན་པའི་རྒྱན་དུ་མ་དང་ཐམས་ཅད་

མཁྱེན་པའི་སྤྱོད་པས་རྣམ་པར་འཕྲུལ་པ་ཡང་དག་པར་བསྟན་པའི་ཕྱིར་ཡོངས་སུ་བསྔོའོ། །ཆོས་སྣང་བ་ཐམས་ཅད་ཀྱི་ཡེ་ཤེས་ཀྱི་རྫུ་འཕྲུལ་གྱིས་བྱང་ཆུབ་སེམས་དཔའི་རྣམ་པར་འཕྲུལ་པ་གྲུབ་པར་བྱ་བའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་

ཀྱིས་ཀླས་པ་ནམ་མཁའི་མཐས་གཏུགས་པའི་ཞིང་ཐམས་ཅད་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་གཞི་ཡོངས་སུ་རྫོགས་པ་ཐོབ་ཅིང་ཕྱིར་མི་ལྡོག་པ་དང་། རྡོ་རྗེ་ལྟ་བུའི་གོ་ཆ་དོན་ཡོད་པས་སེམས་ཅན་ཐམས་ཅད་ཀུན་ཏུ་བཟང་པོའི་ས་

ལ་རབ་ཏུ་དགོད་པ་ལ་གནས་ཤིང་ཡོངས་སུ་བསྔོའོ། །ཕྱི་མའི་མཐའི་བསྐལ་པའི་མུར་ཐུག་པར་སེམས་ཅན་ཐམས་ཅད་རབ་ཏུ་དགྲོལ་བར་བྱ་བ་རྒྱུན་མྱི་འཆད་པ་དང་། སངས་རྒྱས་ཀྱིས་བསྒྲིབས་པ་མེད་པ་ཐམས་ཅད་འཇིག་རྟེན་དུ་ཡང་དག་པར་

Vol. 36 · folio 148a

བསྟན་པའི་སྤྱོད་པ་རྒྱུན་མི་ཆད་པ་ལ་རབ་ཏུ་གནས་པར་བྱ་བའི་ཕྱིར་ཉེ་བར་གནས་ཤིང་ཡོངས་སུ་བསྔོའོ། །དེ་དེ་ལྟར་ཡོངས་སུ་བསྔོ་བ་ཡང་རང་བཞིན་དང་མཉམ་པའི་སེམས་ཀྱིས་ཡོངས་སུ་བསྔོའོ། །ཆོས་ཉིད་དང་མཉམ་

པའི་སེམས་ཀྱིས་ཡོངས་སུ་བསྔོའོ། །འགྲོ་བ་ཚད་མེད་པ་ཐམས་ཅད་དང་མཉམ་པའི་སེམས་ཀྱིས་ཡོངས་སུ་བསྔོའོ། །ཉོན་མོངས་པ་མེད་པ་དང་མཉམ་པའི་སེམས་ཀྱིས་ཡོངས་སུ་བསྔོའོ། །བྱེད་པ་མེད་པའི་རང་བཞིན་དང་མཉམ་པའི་སེམས་

ཀྱིས་ཡོངས་སུ་བསྔོའོ། །ཆོས་འཁྲུག་པ་མེད་པ་ཡོངས་སུ་ཤེས་པའི་སེམས་ཀྱིས་ཡོངས་སུ་བསྔོའོ། །དུས་གསུམ་མཉམ་པ་ཉིད་དུ་ཞུགས་པའི་སེམས་ཀྱིས་ཡོངས་སུ་བསྔོའོ། །འདས་པ་དང་མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་

པའི་རིགས་སུ་བྱུང་བའི་སེམས་ཀྱིས་ཡོངས་སུ་བསྔོའོ། །མངོན་པར་ཤེས་པ་མཉམས་པ་ཐོབ་པའི་སེམས་ཀྱིས་ཡོངས་སུ་བསྔོའོ། །ཐམས་ཅད་མཁྱེན་པའི་སྤྱོད་པ་ལ་གྲུབ་པའི་སེམས་ཀྱིས་ཡོངས་སུ་བསྔོའོ། །སེམས་ཅན་ཐམས་ཅད་སེམས་ཅན་

དམྱལ་བ་ནས་ཕྱིར་བཟློག་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་བྱོལ་སོང་གི་སྐྱེ་གནས་སུ་མི་དགོད་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་གཤིན་རྗེའི་འཇིག་རྟེན་ན་གནས་བ་དགག་པའི་ཕྱིར་ཡོངས་སུ་བསྔོའོ། །སེམས་

ཅན་ཐམས་ཅད་ཀྱི་སྒྲིབ་པའི་ཆོས་ཐམས་ཅད་སྤང་བའི་ཕྱིར་ཡོངས་སུ་བསྔོའོ། །འགྲོ་བ་ཐམས་ཅད་ཀྱི་སེམས་དགེ་བའི་རྩ་བས་ཤིན་ཏུ་ཚིམ་པར་བྱ་བའི་ཕྱིར་ཡོངས་སུ་བསྔོའོ། །ཆོས་ཀྱི་འཁོར་ལོ་དུས་ལ་བབ་པར་བསྐོར་བས་དགའ་བར་བྱ་བའི་ཕྱིར་ཡོངས་སུ་བསྔོའོ། །

སྟོབས་བཅུའི་འཁོར་ལོ་ལ་སེམས་ཅན་ཐམས་ཅད་གཟུང་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའི་ཆོས་དང་སྨོན་ལམ་མཐའ་དང་དབུས་མེད་པ་འཐོབ་པར་བྱ་བ་དང་རྣམ་པར་དག་པའི་ཆོས་ཅན་དུ་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་ཀྱི་

Vol. 36 · folio 148b

སེམས་ཅང་ཤེས་བསྒོམ་པ་ཡོངས་སུ་རྫོགས་པར་བྱ་བས་དགེ་བའི་བཤེས་གཉེན་གྲངས་མེད་པ་ཐམས་ཅད་དགའ་བར་བྱ་བའི་སེམས་ཀྱིས་ཡོངས་སུ་བསྔོའོ། །སངས་རྒྱས་ཀྱི་ཆོས་ཟབ་མོ་ལ་གནས་པར་བྱ་བའི་ལྷག་པའི་བསམ་པས་སངས་རྒྱས་ཀྱི་

ཆོས་ཐམས་ཅད་ཡང་དག་པར་གཟུང་ཞིང་ཡེ་ཤེས་ཀྱི་སྣང་བ་ཤིན་ཏུ་འཕགས་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའི་སྤྱོད་པ་ལ་བསྒྲིབས་པ་མེད་པར་མངོན་སུམ་དུ་འགྱུར་བར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་ཐམས་

ཅད་མངོན་དུ་ལྟ་བར་མངོན་པར་མོས་པས་ཡོངས་སུ་བསྔོའོ། །ཆོས་སྣང་བ་ཐམས་ཅད་ལ་མངོན་པར་མོས་པས་ཡོངས་སུ་བསྔོའོ། །དོགས་པ་མེད་པའི་བྱང་ཆུབ་ཀྱི་སེམས་ཀྱིས་འཇིགས་པ་མེད་པ་ལ་མངོན་པར་མོས་པས་ཡོངས་སུ་བསྔོའོ། །

བྱང་ཆུབ་སེམས་དཔའི་གནས་བསམ་གྱིས་མྱི་ཁྱབ་པའི་ཡེ་ཤེས་ལ་མངོན་པར་མོས་པས་ཡོངས་སུ་བསྔོའོ། །སེམས་ཅན་ཐམས་ཅད་སྙིང་རྗེ་ཆེན་པོ་རྣམ་པར་དག་པས་ཡོངས་སུ་བསྐྱབ་པ་ལ་མངོན་པར་མོས་པས་ཡོངས་སུ་བསྔོའོ། །སངས་རྒྱས་ཀྱི་

ཞིང་མཐའ་དག་མ་ལུས་པ་ལྷག་མ་མེད་པར་ཐམས་ཅད་རྣམ་པར་དག་པར་བྱ་བ་དང་། བརྗོད་དུ་མེད་པའི་རྒྱན་སྣ་ཚོགས་ཀྱིས་ཐམས་ཅད་བརྒྱན་པར་མངོན་པར་མོས་པས་ཡོངས་སུ་བསྔོའོ། །བདུད་ཀྱི་ལས་དང་། བདུད་ཀྱི་ཞགས་པ་དང་།

བདུད་ཀྱི་དཀྲུགས་མ་ཐམས་ཅད་རྣམ་པར་གཏོར་བ་དང་། རབ་ཏུ་གཞོམ་པར་མངོན་པར་མོས་པས་ཡོངས་སུ་བསྔོའོ། །སངས་རྒྱས་ཀྱི་ཞིང་ཐམས་ཅད་དུ་གནས་མེད་པར་བྱང་ཆུབ་སེམས་དཔའི་སྤྱོད་པ་ལ་གནས་པར་མངོན་པར་མོས་པས་ཡོངས་སུ་བསྔོའོ།

ཐམས་ཅད་མཁྱེན་པའི་སེམས་རྒྱ་ཆེན་པོས་སངས་རྒྱས་ཐམས་ཅད་ཀྱི་ཆོས་ཀྱི་རྒྱུད་ལ་འཇུག་པར་མངོན་པར་མོས་པས་ཡོངས་སུ་བསྔོའོ། །དྲན་པ་རྣམ་པར་སྦྱངས་པས་ཡོངས་སུ་བསྔོའོ། །བློ་གྲོས་རྣམ་པར་ངེས་པས་

Vol. 36 · folio 149a

ཡོངས་སུ་བསྔོའོ། །སངས་རྒྱས་ཀྱི་ཆོས་ཐམས་ཅད་རིག་པས་ཤིན་ཏུ་འཛིན་པའི་མངོན་པར་ཤེས་པས་ཡོངས་སུ་བསྔོའོ། །བློ་མཐའ་དང་དབུས་མེད་ཅིང་ཆགས་པ་མེད་པས་ཡོངས་སུ་བསྔོའོ། །ལྷག་པའི་བསམ་པ་རྣམ་པར་

དག་པས་ཡོངས་སུ་བསྔོའོ། །འགྲོ་བ་ཐམས་ཅད་ལ་བྱམས་པ་ཆེན་པོ་སྤྱོད་པས་ཡོངས་སུ་བསྔོའོ། །སྙིང་རྗེ་ཆེན་པོ་ལ་རབ་ཏུ་བརྩོན་པའི་སེམས་ཀྱིས་ཡོངས་སུ་བསྔོའོ། །དགའ་བའི་སེམས་ཀྱིས་ཡོངས་སུ་བསྔོའོ། །བཏང་སྙོམས་ཀྱིས་

གཉིས་ལ་ཆགས་པ་དང་བྲལ་བའི་དགེ་བའི་རྩ་བ་ལ་དབང་སྒྱུར་བ་ལ་གནས་པས་ཡོངས་སུ་བསྔོའོ། །རྟེན་ཅིང་འབྲེལ་བར་འབྱུང་བའི་ཆོས་བསྔགས་པའི་ལམ་རབ་ཏུ་དབྱེ་བས་ཆོས་རྣམ་པར་དབྱེ་བ་ལ་ཞུགས་པ་དང་། ཆོས་ཉིད་ངེས་པར་གཞོག་པའི་

ཡིད་དང་སེམས་ཀྱིས་ཡོངས་སུ་བསྔོའོ། །དཔའ་བའི་རྒྱལ་མཚན་གྱི་སེམས་ཀྱིས་ཡོངས་སུ་བསྔོའོ། །གཞན་གྱིས་མི་ཐུབ་པའི་རྒྱལ་མཚན་དང་ལྡན་པའི་མཛོད་ཀྱི་སེམས་ཀྱིས་ཡོངས་སུ་བསྔོའོ། །བདུད་ཀྱི་དཀྱིལ་འཁོར་ཐམས་ཅད་རྣམ་པར་

གཏོར་བའི་སེམས་ཀྱིས་ཡོངས་སུ་བསྔོའོ། །རྣམ་པར་དག་པ་དང་ཆགས་པ་མེད་པ་ཐམས་ཅད་རབ་ཏུ་འཐོབ་པར་བྱ་བའི་སེམས་ཀྱིས་ཡོངས་སུ་བསྔོའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱད་པ་ལས་ཕྱིར་མི་ལྡོག་པར་བྱ་བའི་སེམས་ཀྱིས་

ཡོངས་སུ་བསྔོའོ། །ཆོས་དམ་པ་དང་རབ་དང་ཕུལ་ལ་མངོན་པར་མོས་པའི་སེམས་ཀྱིས་ཡོངས་སུ་བསྔོའོ། །ཡོན་ཏན་གྱི་ཆོས་ཐམས་ཅད་ལ་དབང་སྒྱུར་བའི་ཡེ་ཤེས་ཀྱིས་ཁྱད་པར་དུ་འཕགས་པའི་ཐམས་ཅད་མཁྱེན་པ་ལ་མོས་ཤིང་དད་པའི་སེམས་ཀྱིས་

ཡོངས་སུ་བསྔོའོ། །བསམ་པ་ཐམས་ཅད་ཡོངས་སུ་རྫོགས་པར་བྱ་བ་དང་། བདུད་ཀྱི་དཀྲུགས་མ་ཐམས་ཅད་རབ་ཏུ་གཞིག་པ་དང་། ཆགས་པ་མེད་ཅིང་དྲི་མ་མེད་པའི་ཆོས་ཀྱི་གོ་འཕང་ཐོབ་པ་དང་། སངས་རྒྱས་ཀྱི་མངས་འགྲོ་བ་ཐམས་ཅད་ལ་ཆོས་ཀྱི་

Vol. 36 · folio 149b

འཁོར་ལོ་བསྐོར་བ་ལས་ཕྱིར་མི་ལྡོག་པའི་སེམས་ཀྱིས་ཡོངས་སུ་བསྔོའོ། །དེ་བཞིན་གཤེགས་པའི་ཆོས་ཀྱི་ཡེ་ཤེས་ཀྱི་ཉི་མ་རབ་དང་ཕུལ་ཁྱད་པར་དུ་འཕགས་པ་འོད་གཟེར་བརྒྱ་སྟོང་གིས་བརྒྱན་པའི་ཆོས་ཀྱི་དབྱིངས་ཀྱི་ཡེ་ཤེས་ཆེན་པོའི་སྣང་བ་འགྲོ་བ་ཐམས་ཅད་

དུ་རབ་ཏུ་དགྱེ་བའི་སེམས་ཀྱིས་ཡོངས་སུ་བསྔོའོ། །འགྲོ་བ་ཐམས་ཅད་ཡོངས་སུ་སྨིན་པར་བྱ་ཞིང་གདུལ་བ་དང་། བསམ་པ་ཇི་ལྟ་བ་བཞིན་དུ་སེམས་ཀྱི་རྒྱུད་ཤིན་ཏུ་ཚིམ་པར་བྱ་བ་དང་། སྔོན་གྱི་སྨོན་ལམ་ཆེན་པོ་ནུབ་པ་མེད་པས་ཕྱི་མའི་མཐའི་མུར་

སྤྱོད་པ་ཆེན་པོའི་རྒྱུད་རྒྱུན་མི་ཆད་ཅིང་རྣམ་པར་དག་པ་དང་སྣང་བ་དྲི་མ་མེད་པས་རྒྱགས་པ་དང་། དྲེགས་པ་དང་། ང་རྒྱལ་ཤིན་ཏུ་གཅད་པ་དང་། འགྲོ་བ་ཐམས་ཅད་ཀྱི་ཉོན་མོངས་པ་རྣམ་པར་གཏོར་བ་དང་། སྲིད་པའི་དྲ་བ་ཡང་དག་པར་གཏུབ་པ་དང་།

མ་རིག་པའི་མུན་པ་ཐིབས་པོ་བསྩལ་བ་དང་། བསྒྲིབས་པ་མེད་ཅིང་དྲི་མ་དང་བྲལ་ལ་ཆགས་པ་མེད་པའི་ཆོས་ཀྱི། ལོ་ཤིན་ཏུ་ལེགས་པ་དང་། འགྲོ་བ་ཐམས་ཅད་དུ་བསྐལ་པའི་གྲངས་རྣམ་པར་ཆད་པ་མེད་པས་ཐམས་ཅད་མཁྱེན་པའི་ཡེ་ཤེས་རྣམ་པར་འཚང་རྒྱ་བ་

དང་སྤྱོད་པ་རྒྱུད་ལས་ཕྱིར་མི་ལྡོག་པས་སེམས་ཅན་གྱི་ཚོགས་སོ་སོར་ཆགས་པ་མེད་པའི་ཡེ་ཤེས་རབ་དམ་པ་མཆོག་རྣམ་པར་འཚང་རྒྱ་བར་བྱ་བ་དང་། སེམས་ཅན་རེ་རེ་ལ་སངས་རྒྱས་ཀྱི་སྐུ་ཤིན་ཏུ་བསྟན་པའི་རྣམ་པར་འཕྲུལ་པ་ལས་ཕྱིར་མི་ལྡོག་པར་བྱ་བའི་ཕྱིར་

ཡོངས་སུ་བསྔོའོ། །དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་དག་ཡོངས་སུ་བསྔོ་ཡང་འདོད་པའི་ཡུལ་དང་ཁམས་གསུམ་པ་ལ་གནས་ཤིང་ཡོངས་སུ་མི་བསྔོ་སྟེ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ནི་དགེ་བའི་རྩ་བ་རྣམས་

འདོད་མ་ཆགས་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་ཞེ་མི་སྡང་བས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་གཏི་མུག་མེད་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་

Vol. 36 · folio 150a

དཔས་ནི་དགེ་བའི་རྩ་བ་རྣམས་གནོད་པ་མེད་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་ང་རྒྱལ་མེད་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་གཡོ་མེད་པས་

ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་དྲང་པོས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་རིག་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་

མངོན་པར་བརྩོན་པས་ཡོངས་སུ་བསྔོ་བར་བྱ་སྟེ། དེ་དེ་ལྟར་ཡོངས་སུ་བསྔོ་བས་སེམས་རབ་ཏུ་དད་པ་འཐོབ་བོ། །བྱང་ཆུབ་སེམས་དཔའི་སྤྱོད་པ་ལ་གོ་སྐབས་དབྱེ་བ་འཐོབ་བོ། །བྱང་ཆུབ་སེམས་དཔའི་ལམ་རྣམ་པར་དག་པར་འགྱུར་རོ། །དེ་

བཞིན་གཤེགས་པའི་རིགས་སུ་འཇུག་པར་འགྱུར་རོ། །སངས་རྒྱས་ཀྱི་ཡེ་ཤེས་རབ་ཏུ་འགྲུབ་པར་འགྱུར་རོ། །འཇིག་རྟེན་གྱི་ཉེས་པ་ཐམས་ཅད་རབ་ཏུ་སྤོང་ངོ་། །བདུད་ཀྱི་ལས་ཐམས་ཅད་རབ་ཏུ་སྤོང་ངོ་། །དགེ་བའི་གཤེས་གཉེན་ཐམས་ཅད་རབ་ཏུ་

དགའ་བར་བྱེད་དོ། །བདག་གི་སྨོན་ལམ་ཆེན་པོ་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་གཉེར་བ་ཆེན་པོས་ཤིན་ཏུ་འབོད་པ་ཡིན་ནོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྦྱིན་པས་འབྱུང་བ་ལ་སྩོགས་པའི་

དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཀྱིས་ཆོས་ཀྱི་དབྱིངས་རྣམ་པར་དག་པ་ཐོབ་པར་གྱུར་ཅིག །སེམས་ཅན་ཐམས་ཅད་ཀྱིས་དབྱངས་སྙན་པ་དང་། ཡེ་ཤེས་ཀྱི་རྔའི་དབྱངས་དང་། ཐམས་ཅད་དུ་

བསམ་གྱིས་མི་ཁྱབ་ཅིང་འཕགས་པའི་དབྱངས་དང་། ཡིད་དུ་འོང་བའི་དབྱངས་དང་། དག་པའི་དབྱངས་དང་། ཞིང་ཐམས་ཅད་དུ་སྒྲས་རྒྱས་པར་འགེངས་པའི་དབྱངས་དང་། ཡོན་ཏན་བྱེ་བ་བརྒྱ་སྟོང་བརྗོད་དུ་མེད་པའི་རྒྱན་གྱིས་བརྒྱན་པའི་དབྱངས་དང་། སྒྲ་མཐོ་བ་དང་། སྒྲ་ཆེ་བས་རྣམ་པར་འཁྲུག་པ་

Vol. 36 · folio 150b

ཐམས་ཅད་རབ་ཏུ་ཞི་བར་བྱེད་པའི་དབྱངས་དང་། ཆོས་ཀྱི་དབྱིངས་ཐམས་ཅད་སྒྲས་རྒྱས་པར་འགེངས་པའི་དབྱངས་དང་། འགྲོ་བ་ཐམས་ཅད་ཀྱིས་ངག་མཉན་པའི་དབྱངས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཀྱི་སྒྲ་དང་དབྱངས་མཐའ་ཡས་པའི་ཡེ་ཤེས་རབ་ཏུ་ཐོབ་པར་

གྱུར་ཅིག །སྒྲ་དང་དབྱངས་ཐམས་ཅད་རྣམ་པར་དག་པ་རབ་ཏུ་ཐོབ་པར་གྱུར་ཅིག །དབྱངས་ཚད་མེད་པ་དང་ཚིག་གི་ལམ་ཐམས་ཅད་ཤེས་པ་རབ་ཏུ་ཐོབ་པར་གྱུར་ཅིག །དབྱངས་ལ་དབང་སྒྱུར་བ་ཟིལ་གྱིས་མ་ནོན་པའི་དབྱངས་ཐམས་ཅད་ལ་རབ་ཏུ་འཇུག་པའི་ཡེ་ཤེས་རབ་ཏུ་ཐོབ་

པར་གྱུར་ཅིག །དབྱངས་ཐམས་ཅད་ཀྱིས་བརྒྱན་པའི་དབྱངས་ཀྱི་ཡན་ལག་རྣམ་པར་དག་པའི་དབྱངས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་ཀྱི་མཉན་ན་མི་ངོམས་པའི་དབྱངས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཀྱིས་འགྲོ་བ་ཀུན་མོས་

པར་ཉན་པའི་དབྱངས་ཀྱི་ཕ་རོལ་ཏུ་ཕྱིན་པ་ཐོབ་པར་གྱུར་ཅིག །སེམས་ཅན་ཐམས་ཅད་དད་པར་བྱེད་པའི་དབྱངས་དང་ལྡན་པར་གྱུར་ཅིང་། །སེམས་ཅན་ཐམས་ཅད་སངས་རྒྱས་ཀྱི་དབྱངས་སུ་བརྗོད་པས་སྨྲ་བའི་སེམས་རྣམ་པར་དག་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་

ཀྱི་ཆོས་ཐམས་ཅད་རྣམ་པར་སྒྲོག་པའི་སྒྲ་རབ་རིབ་མེད་པའི་དབྱངས་ཀྱིས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་ཀྱི་གཟུངས་ཀྱི་རྒྱན་གྱིས་ཆོས་ཐམས་ཅད་རྣམ་པ་དུ་མར་སྟོན་པ་དང་། ཆོས་ཀྱི་དབྱིངས་ཚད་མེད་པའི་འཁོར་གྱི་དཀྱིལ་འཁོར་ཐོབ་པ་དང་། བསམ་

གྱིས་མི་ཁྱབ་པའི་ཆོས་རྡོ་རྗེའི་ཚིག་གིས་ཡང་དག་པར་གཟུང་བ་དང་། ཆོས་ཉིད་ཐམས་ཅད་བརྗོད་པ་རབ་ཏུ་དབྱེ་བའི་ཡེ་ཤེས་དང་ལྡན་པ་དང་། ཚིག་དང་ཡི་གེ་བརྗོད་དུ་མེད་པ་བརྗོད་དུ་མེད་པའི་མཛོད་དང་ལྡན་པ་དང་། ཆོས་རྣམ་པ་ཐ་དད་པ་ཐམས་ཅད་ཤིན་ཏུ་བསྟན་པ་ལ་གཞག་པ་དང་། གནས་པར་བྱ་བ་དང་རྒྱུན་མི་ཆད་

པར་བྱ་བ་དང་ཆོས་སྣང་བ་ཐམས་ཅད་ཀྱི་འོད་རབ་ཏུ་འཐོབ་པ་ལ་འཇུག་པ་དང་། འགྲོ་བ་ཐམས་ཅད་ཐམས་ཅད་མཁྱེན་པ་ཉིད་ཀྱི་རྣམ་པར་དག་པའི་མཐར་ཐུག་པར་བྱེད་པ་དང་། ཆོས་ཐམས་ཅད་ཀྱིས་ཡང་དག་པར་བསྡུས་པའི་དོན་དང་ཚིག་དང་ཡི་གེས་རྣམ་པར་འཕྲུལ་པའི་དབྱངས་ཀྱི་བྱིན་གྱི་རླབས་དང་ལྡན་པ་དང་། ཆགས་པ་མེད་པའི་

Vol. 36 · folio 151a

དབྱངས་ལ་དབང་བའི་ཕ་རོལ་ཏུ་ཕྱིན་པ་ཐོབ་པ་དང་། འགྲོ་བ་ཐམས་ཅད་ཀྱི་ཤེས་པའི་དབྱངས་དང་ལྡན་པར་གྱུར་ཅིག །དགེ་བའི་རྩ་བ་འདིས་སེམས་ཅན་ཐམས་ཅད་མི་དམའ་བའི་དབྱངས་དང་། བག་ཚ་བ་མེད་པའི་དབྱངས་དང་།

འདོད་ཆགས་མེད་པའི་ཚིག་གི་དབྱངས་དང་། ངག་སྙན་པའི་དབྱངས་དང་། འཁོར་གྱི་དཀྱིལ་འཁོར་ཐམས་ཅད་མངོན་པར་དགའ་བར་བྱེད་པའི་དབྱངས་དང་། སངས་རྒྱས་ཀྱི་ཆོས་ཐམས་ཅད་བརྗོད་པའི་དབྱངས་དང་། འགྲོ་བ་ཐམས་ཅད་ཀྱི་ཐེ་ཙོམ་

གཅོད་ཅིང་ཁོང་དུ་ཆུད་པར་བྱེད་པའི་དབྱངས་དང་། སྤོབས་པས་ལེགས་པར་སྦྱར་བའི་དབྱངས་དང་། སེམས་ཅན་གཉིས་ཀྱིས་ལོག་པ་ཐམས་ཅད་སད་པར་བྱེད་པའི་དབྱངས་དམ་པ་ཡངས་པ་དང་ལྡན་པར་གྱུར་ཅིག་ཅེས། །དེ་ལྟར་བྱང་ཆུབ་སེམས་དཔའ་སེམས་

དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། །སེམས་ཅན་ཐམས་ཅད་ཀྱི་ལུས་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་བསོད་

ནམས་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་མཚན་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་ལས་དང་རྣམ་པར་སྨིན་པ་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་

ཐམས་ཅད་མཁྱེན་པ་ཉིད་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་བྱང་ཆུབ་ཀྱི་སེམས་ཚད་མེད་པ་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་དབང་བོའི་ཚུལ་རབ་ཏུ་ཤེས་པ་རྣམ་པར་དག་ཅིང་ཁ་ན་མ་ཐོ་བ་མེད་པ་

དང་། སེམས་ཅན་ཐམས་ཅད་ཀྱི་མོས་པ་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་སྤྱོད་པ་ཆགས་པ་མེད་པ་ལ་བརྩོན་པའི་སྨོན་ལམ་རྣམ་པར་དག་ཅིང་ཁ་ན་མ་ཐོ་བ་མེད་པ་དང་། སེམས་ཅན་ཐམས་ཅད་ཀྱི་དྲན་པ་དང་། བློ་གྲོས་དང་།

Vol. 36 · folio 151b

རིག་པ་དང་། བློ་དང་ཡེ་ཤེས་དམ་པ་དང་། སྤོབས་པ་རྣམ་པར་དག་ཅིང་ཁ་ན་མ་ཐོ་བ་མེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོ་སྟེ། སེམས་ཅན་ཐམས་ཅད་ཀྱི་ལུས་རྣམ་པ་དེ་ལྟར་ཡོངས་སུ་དག་ཅིང་ལུས་

ཡོངས་སུ་དག་པ་ཤིན་ཏུ་གསལ་བ་རྙོག་པ་མེད་པ་རྣམ་པར་དང་བ། རྣམ་པར་དག་པ་རྡུལ་མེད་པ་དྲི་མ་དང་བྲལ་བ་འོད་གསལ་ཞིང་དང་བ། ཡིད་དུ་འོང་བ་བསྒྲིབས་པ་མེད་པ་དེ་ལ་འཇིག་རྟེན་གྱི་ཁམས་ཐམས་ཅད་གཟུགས་བརྙན་གྱི་ཚུལ་དུ་སྣང་བར་གྱུར་ཅིག །མིག་ཡོར་གྱི་རྣམ་

པར་དམྱིགས་པས་འགྲོ་བ་ཐམས་ཅད་སྣང་བར་གྱུར་ཅིག །མིག་ཡོར་གྱི་གནས་ཀྱི་རྣམ་པ་ཐམས་ཅད་སྣང་བར་གྱུར་ཅིག །འདི་ལྟ་སྟེ་དཔེར་ན། མེ་ལོང་གི་དཀྱིལ་འཁོར་ཤིན་ཏུ་དག་པ་ལ་ཚིགས་སུ་མི་འགྱུར་བར་གདོང་དུ་དམྱིགས་པ་རྣམ་པར་སྣང་བ་དེ་ལྟ་བུའི་ལུས་

ཡོངས་སུ་དག་པ། སེམས་ཅན་ཐམས་ཅད་ཀྱིས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ཡང་དག་པར་སྟོན་པ་དང་། ཆོས་ཡང་དག་པར་སྟོན་པ་དང་། ཡོན་ཏན་ཡང་དག་པར་སྟོན་པ་དང་། ནན་ཏན་ཡང་དག་

པར་སྟོན་པ་དང་། འགྲུབ་པ་ཡང་དག་པར་སྟོན་པ་དང་། བྱང་ཆུབ་སེམས་དཔའི་སྤྱོད་ཡུལ་དང་། སྨོན་ལམ་ཡང་དག་པར་སྟོན་པ་དང་། འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་ཐམས་ཅད་ཡང་དག་པར་སྟོན་པ་དང་། སངས་རྒྱས་

ཐམས་ཅད་ཀྱི་རྣམ་པར་འཕྲུལ་པ་དང་། ཆོ་འཕྲུལ་ཡང་དག་པར་སྟོན་པ་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་བྱིན་གྱི་རླབས་ཡང་དག་པར་སྟོན་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་ཡོངས་

སུ་རྫོགས་པས་ཐམས་ཅད་མཁྱེན་པ་ཡང་དག་པར་སྟོན་པར་གྱུར་ཅིག །དེ་ལྟར་ཡོངས་སུ་དག་པའི་ལུས་ཀྱི་རྣམ་པས་སེམས་ཅན་ཐམས་ཅད་མ་ལུས་པར་ཡོངས་སུ་བཟུང་སྟེ། ཐམས་ཅད་མཁྱེན་པའི་བསོད་ནམས་ཀྱི་སྐུ་ཡོངས་སུ་དག་པ་དང་ལྡན་པར་

Vol. 36 · folio 152a

གྱུར་ཅིག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྦྱིན་པས་འབྱུང་བ་ལ་སྩོགས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་འཇིག་རྟེན་གྱི་ཁམས་ཐམས་ཅད་དུ་རྗེས་སུ་

སོང་བའི་ལུས་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ཅིག །འགྲོ་བ་ཐམས་ཅད་ཀྱིས་བལྟ་ན་དོན་ཡོད་ཅིང་། བྱང་ཆུབ་ཀྱི་སེམས་ལས་ཕྱིར་མི་ལྡོག་པ་དང་། སེམས་ཅན་ཐམས་ཅད་ལ་མཐུན་པར་གྱུར་པས་བསམ་པ་མི་འཁྲུགས་པ་དང་། བསྐལ་

པ་ཐམས་ཅད་དུ་སྐྱོ་བ་མེད་པར་བྱང་བས། འཇིག་རྟེན་གྱི་ཁམས་ཐམས་ཅད་དུ་མ་འོངས་པའི་དུས་ཀྱི་ཕྱི་མའི་མཐའི་མུར་ཐུག་པར་གནས་པ་དང་། ཆོས་ཀྱི་དབྱིངས་ཚད་མེད་པར་སྙིང་རྗེ་ཆེན་པོ་རྒྱུན་མི་གཅོད་པས། སེམས་ཅན་ཐམས་ཅད་

ལ་དུས་ལ་བབ་པར་ཆོས་སྟོན་པ་མི་གཏོང་བས་དབང་པོ་ཡང་དག་པ་ཇི་ལྟ་བ་བཞིན་དུ་ཤེས་པ་དང་། དགེ་བའི་བཤེས་གཉེན་དྲན་པའི་ཁོངས་སུ་གཏོགས་པའི་སེམས་དང་ལྡན་པས་སེམས་བསྐྱེད་པ་གཅིག་དང་ཡང་མི་འབྲལ་བ་དང་།

སངས་རྒྱས་ཐམས་ཅད་འདོད་ཅིང་ཞལ་ལྟ་བའི་སེམས་ཀྱིས་དེ་བཞིན་གཤེགས་པ་ཡིད་ལ་བྱེད་པ་མི་གཏོང་བ་དང་། དགེ་བའི་རྩ་བ་བརྩམས་པ་ཐམས་ཅད་རྗེས་མེད་པར་མི་བྱེད་ཅིང་སེམས་ཅན་ཐམས་ཅད་ཐམས་ཅད་མཁྱེན་པའི་སེམས་ལ་རབ་ཏུ་

དགོད་པའི་སེམས་ཀྱིས་ཕྱིར་མི་ལྡོག་པའི་འཁོར་ལོ་ཐོབ་པར་བྱ་བའི་ཕྱིར་སངས་རྒྱས་ཀྱི་ཆོས་སྣང་བ་ཐམས་ཅད་ཀྱིས་ཆོས་ཐམས་ཅད་ལ་བལྟ་ཞིང་བྱང་ཆུབ་སེམས་དཔའ་ཡང་དག་པར་ལེན་པས། ཆོས་ཀྱི་སྤྲིན་ཡང་དག་པར་འཛིན་པའི་བྱིན་གྱི་རླབས་

ཀྱིས་བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ཅིག །སེམས་ཅན་ཐམས་ཅད་ལ་འཇུག་པ་དང་། ཞིང་ཐམས་ཅད་ལ་འཇུག་པ་དང་། ཆོས་ཐམས་ཅད་ལ་འཇུག་པ་དང་། འཇིག་རྟེན་དང་དུས་ཐམས་ཅད་ལ་འཇུག་པ་དང་།

Vol. 36 · folio 152b

སེམས་ཅན་ཐམས་ཅད་ཀྱི་ལས་དང་། རྣམ་པར་སྨིན་པ་ཤེས་པ་ལ་འཇུག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཐབས་མཁས་པའི་ཡེ་ཤེས་ལ་འཇུག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་མངོན་པར་

བསྒྲུབས་པའི་ཡེ་ཤེས་ལ་འཇུག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་དག་པའི་སྤྱོད་ཡུལ་གྱི་ཡེ་ཤེས་ལ་འཇུག་པ་དང་། སངས་རྒྱས་ཐམས་ཅད་ཀྱི་བྱིན་གྱི་རླབས་དང་། ཁྱུ་མཆོག་གི་མཐུ་ལ་འཇུག་པ་དང་། ཆོས་ཀྱི་དབྱིངས་

མཐའ་དང་དབུས་མེད་པ་ཐམས་ཅད་ལ་འཇུག་པ་རབ་ཏུ་ཐོབ་པ་ལ་གནས་ཤིང་། བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་བྱང་ཆུབ་

སེམས་དཔའ་སེམས་དཔའ་ཆེན་པོ་དགེ་བའི་ལས་དང་ཆོས་ལ་བརྩོན་པ་དགེ་བའི་རྩ་བ་དེ་དག་ཞིང་ཐམས་ཅད་ཡོངས་སུ་དག་པར་བྱ་བའི་ཕྱིར་ཡོངས་སུ་བསྔོ་སྟེ། སངས་རྒྱས་ཀྱི་ཞིང་གཅིག་ཀྱང་རྒྱན་དང་ལྷབ་ལྷུབ་བརྗོད་དུ་མེད་པའི་ཡང་བརྗོད་དུ་མེད་པ་དང་ལྡན་

ཞིང་ཆོས་ཀྱི་དབྱིངས་ཚད་མེད་པར་ཤིན་ཏུ་ཡངས་པར་གྱུར་ཏེ། སངས་རྒྱས་ཀྱི་ཞིང་གཅིག་ཇི་ལྟ་བ་དེ་བཞིན་དུ་སངས་རྒྱས་ཀྱི་ཞིང་སངས་རྒྱས་ཀྱི་ཡེ་ཤེས་ཀྱིས་མངོན་པར་སངས་རྒྱས་པ་ཐམས་ཅད་མ་ལུས་པར་དེ་ལྟར་རྣམ་པར་དག་ཅིང་འོད་གསལ་བ་དང་།

བཟང་ཞིང་སྒྲིབ་པ་མེད་པར་གྱུར་ཅིག །སངས་རྒྱས་ཀྱི་ཞིང་གཅིག་ཏུ་དམྱིགས་པ་རྣམ་པར་དག་པ་རྣམས་ཇི་ལྟར་གཟུགས་བརྙན་གྱི་ཚུལ་གྱིས་ཡོངས་སུ་སྣང་བ་དེ་བཞིན་དུ་སངས་རྒྱས་ཀྱི་ཞིང་མ་ལུས་པ་ཐམས་ཅད་དུ་ཡང་ཡོངས་སུ་སྣང་བར་གྱུར་ཅིག །སངས་

རྒྱས་ཀྱི་ཞིང་དེ་དག་ཐམས་ཅད་ཀྱང་གཅིག་བཟུང་བས་ཡོངས་སུ་བཟུང་སྟེ། ཆོས་ཀྱི་དབྱིངས་ཚད་མེད་པར་རྟོགས་པའི་རྣམ་པར་དག་པས་རྣམ་པར་དག་པར་གྱུར་ཅིག། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་

Vol. 36 · folio 153a

མདོ། །བམ་པོ་བཅུ་གཉིས་པ། འདི་ལྟ་སྟེ། རིན་པོ་ཆེའི་རྒྱན་གྲངས་མེད་པ་ཀུན་ནས་གནས་པར་གྱུར་ཅིག །གོས་རིན་པོ་ཆེ་ཐམས་ཅད་བཏིང་ཞིང་རིན་པོ་ཆེ་སྣ་ཚོགས་

གྲངས་མེད་པ་ཐམས་ཅད་ཀྱིས་རིན་པོ་ཆེ་རྣམ་པར་དག་པའི་གདན་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་དྲིལ་བུའི་དྲ་བ་དང་ལྡན་ཞིང་རིན་པོ་ཆེའི་བླ་རེ་གྲངས་མེད་པས་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་

ཅད་གཅིག་ནས་གཅིག་ཏུ་བརྒྱུད་པས་ཡོངས་སུ་བཟུང་ཞིང་རིན་པོ་ཆེའི་གདུགས་གྲངས་མེད་པ་ཀུན་ནས་གནས་པར་གྱུར་ཅིག །ནོར་གྱི་དབྱིག་ཐམས་ཅད་ཀྱི་ཆར་རབ་ཏུ་འབབ་པའི་རིན་པོ་ཆེའི་སྤྲིན་གྲངས་མེད་པ་ཀུན་ནས་གནས་པར་གྱུར་ཅིག །བལྟ་ན་ཡིད་དུ་འོང་ལ་རྣམ་པར་

དག་པའི་རིན་པོ་ཆེའི་མེ་ཏོག་གྲངས་མྱེད་པ་ཀུན་ནས་གནས་པར་གྱུར་ཅིག །རིན་པོ་ཆེ་སྣ་ཚོགས་ཀྱིས་སྐར་ཁུང་ཤིན་ཏུ་བརྒྱན་ཅིང་རིན་པོ་ཆེ་ཐམས་ཅད་ཀྱི་སྟེགས་བུ་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཀྱི་དབྱངས་ཡིད་དུ་འོང་བ་

སེམས་ཅན་ཐམས་ཅད་ཀྱི་ཁམས་སུ་སྒྲོག་ཅིང་རིན་པོ་ཆེའི་དྲིལ་བུ་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཀྱི་བྱང་ཆུབ་ཀྱི་ཡོན་ཏན་གྱིས་སེམས་རྒྱས་ཤིང་གསལ་བས་རིན་པོ་ཆེའི་པད་མོ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་

ཐམས་ཅད་ཀྱི་མེ་ཏོག་དང་ལྡན་པའི་རིན་པོ་ཆེའི་ཤིང་གྲངས་མེད་པ་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའ་མང་པོའི་གནས་རིན་པོ་ཆེའི་གཙུག་ལག་ཁང་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཐམས་ཅད་ཀྱི་ཞིང་ཐམས་ཅད་

དུ་ཡིད་དུ་འོང་བར་རྒྱུ་བའི་རིན་པོ་ཆེའི་ཁང་པ་བརྩེགས་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེའི་རྒྱན་ཆེན་པོས་སྤྲས་པའི་རིན་པོ་ཆེའི་བག་མ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་རྣམ་པར་དག་པས་

Vol. 36 · folio 153b

རྣམ་པར་དག་པའི་རིན་པོ་ཆེའི་རྟ་བབས་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་སེ་མོ་དོ་ལས་རབ་ཏུ་བཀྱེ་བའི་རིན་པོ་ཆེའི་འོད་ཟེར་གྱི་སྒོ་གྲངས་མེད་པ་རྣམས་ཀུན་ནས་གནས་པར་གྱུར་ཅིག །རིན་པོ་ཆེ་སྣ་ཚོགས་ཀྱིས་བརྒྱན་པའི་ཤིང་ཏ་ལ་རིན་པོ་

ཆེའི་ཟླ་གམ་གྲངས་མེད་པས་བརྒྱན་པ་ཀུན་ནས་གནས་པར་གྱུར་ཅིག །བསམ་གྱིས་མི་ཁྱབ་པའི་རིན་པོ་ཆེས་རྣམ་པར་དག་པའི་རིན་པོ་ཆེའི་སྐར་ཁུང་རྣམ་པ་སྣ་ཚོགས་གྲངས་མེད་པ་ཀུན་ནས་གནས་པར་གྱུར་ཅིག །དེ་བཞིན་གཤེགས་པའི་འཕྲིན་ལས་ཀྱི་དགེ་བའི་

རྩ་བ་རབ་ཏུ་གྲུབ་པས་རིན་པོ་ཆེའི་རྒྱན་དང་ལྷབ་ལྷུབ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་རྒྱན་དང་ལྡན་པའི་རིན་པོ་ཆེའི་སྙིང་པོ་རབ་ཏུ་བརྒྱན་པ་གྲངས་མེད་པ་ཀུན་ནས་གནས་པར་གྱུར་ཅིག །ཡིད་དུ་འོང་བའི་རིན་པོ་ཆེས་ཤིན་

ཏུ་རྣམ་པར་དག་པའི་རིན་པོ་ཆེའི་རྒྱན་དང་ལྷབ་ལྷུབ་སྣ་ཚོགས་གྲངས་མེད་པ་ཀུན་ནས་གནས་པར་གྱུར་ཅིག །ཆོས་ཐམས་ཅད་ཀྱི་རྒྱུད་ཤིན་ཏུ་རིགས་པར་འབབ་པའི་རིན་པོ་ཆེའི་ཆུ་ཀླུང་གྲངས་མེད་པ་རྣམས་ཀུན་ནས་གནས་པར་གྱུར་ཅིག །ཆོས་རྒྱ་མཚོ་ཐམས་ཅད་དང་

ལྡན་པའི་རིན་པོ་ཆེའི་རྒྱ་མཚོ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་ཐམས་ཅད་ཀྱི་མེ་ཏོག་བུན་ད་རི་ཀ་རྗེས་སུ་སྒྲོགས་པའི་རིན་པོ་ཆེའི་མེ་ཏོག་པུན་ད་རི་ཀ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཀྱི་རི་བོ་ཤིན་ཏུ་འཕགས་ཤིང་རྣམ་

པར་དག་པའི་རིན་པོ་ཆེའི་རི་བོ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་སྲད་བུ་བྲེས་པའི་རིན་པོ་ཆེས་མིག་མངས་རིས་སུ་རྣམ་པར་ཕྱེ་བ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཆེན་པོའི་འོད་གཟེར་གྱིས་ཆོས་

གྱི་དབྱིངས་ཐམས་ཅད་དུ་སྣང་བར་བྱེད་པའི་རིན་པོ་ཆེའི་འོད་ཐོགས་པ་མེད་པར་གསོལ་བ་གྲངས་མེད་པ་ཀུན་ནས་གནས་པར་གྱུར་ཅིག །ཡིད་དུ་འོང་བའི་སྒྲ་སྙན་པར་སྒྲོགས་པའི་རིན་པོ་ཆེའི་དྲིལ་བུ་རབ་ཏུ་དཀྲོལ་བ་གྲངས་མེད་པ་ཀུན་ནས་གནས་པར་གྱུར་ཅིག །

Vol. 36 · folio 154a

བྱང་ཆུབ་ཀྱི་སེམས་རིན་པོ་ཆེ་དང་ལྡན་པས་རིན་པོ་ཆེ་རྣམ་པར་དག་པས་རྣམ་པར་སྦྱངས་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེའི་ཁ་དོག་བསམ་གྱིས་མི་ཁྱབ་ཅིང་རྣམ་པར་དག་པའི་སྣམ་བུ་རིན་པོ་ཆེ་རབ་ཏུ་སྦྱངས་པ་

གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེའི་ཟླ་གམ་གྱི་རྒྱལ་མཚན་གྱིས་རྣམ་པར་མཛེས་པའི་རིན་པོ་ཆེའི་རྒྱལ་མཚན་བསྒྲེང་བ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་བ་དན་གྱི་སྤྲིན་གྱི་ཆར་མངོན་པར་འབབ་

པའི་རིན་པོ་ཆེའི་བ་དན་གྲངས་མེད་པ་ཀུན་ནས་གནས་པར་གྱུར་ཅིག །བར་སྣང་གི་རྒྱན་སྣ་ཚོགས་ཀྱི་སྣམ་བུ་རིན་པོ་ཆེའི་ལྡ་ལྡི་མངོན་པར་བྲེས་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་སྣ་ཚོགས་རེག་ན་བདེ་བའི་རིན་པོ་ཆེའི་

གདིང་བ་ཡོངས་སུ་བཏིང་བ་གྲངས་མེད་པ་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའ་ཐམས་ཅད་ཡང་དག་པར་སྟོན་ཅིང་ཐམས་ཅད་མཁྱེན་པའི་སྤྱན་རྣམ་པར་སྦྱོང་བའི་རིན་པོ་ཆེའི་གློང་གྲངས་མེད་པ་ཀུན་ནས་གནས་པར་གྱུར་ཅིག །

བྱང་ཆུབ་སེམས་དཔའི་ཚོགས་བརྒྱ་སྟོང་ཐམས་ཅད་ཀྱིས་མཛེས་པར་གྱུར་པའི་རིན་པོ་ཆེའི་སེ་མོ་དོ་རབ་ཏུ་སྤྱངས་པ་གྲངས་མེད་པ་ཀུན་ནས་གནས་པར་གྱུར་ཅིག །གནས་པ་དང་མི་གནས་པ་ཐམས་ཅད་ལས་ཤིན་ཏུ་འདས་པས་རིན་པོ་ཆེའི་ཁང་པ་དང་གནས་གྲངས་

མེད་པ་ཀུན་ནས་གནས་པར་གྱུར་ཅིག །རྡོ་རྗེ་རིན་པོ་ཆེས་མཛེས་པར་གྱུར་ཅིང་རིན་པོ་ཆེའི་རྒྱན་གྱིས་རབ་ཏུ་བརྒྱན་པ་གྲངས་མེད་པ་ཀུན་ནས་གནས་པར་གྱུར་ཅིག །གྲངས་མེད་པར་མཐོང་བ་ཐམས་ཅད་རྣམ་པར་དག་ཅིང་རིན་པོ་ཆེ་སྣ་ཚོགས་ཀྱིས་ཤིན་ཏུ་བརྒྱན་

པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཁྱད་པར་དུ་འཕགས་པ་ཐམས་ཅད་དང་ལྡན་ཞིང་རིན་པོ་ཆེ་རྣམ་པར་དག་པས་རྣམ་པར་སྦྱངས་པ་གྲངས་མེད་པ་ཀུན་ནས་གནས་པར་གྱུར་ཅིག །ཆགས་པ་མེད་པའི་ལུས་ཀྱི་ཚུལ་རྣམ་པར་དག་པས་རིན་པོ་ཆེའི་

Vol. 36 · folio 154b

འཁོར་ཡུག་གིས་ཀུན་ནས་བསྐོར་བ་གྲངས་མེད་པ་ཀུན་ནས་གནས་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་དུ་དྲི་ཞིམ་པོ་རྗེས་སུ་སོང་ཞིང་རིན་པོ་ཆེའི་སྤོས་གྲངས་མེད་པ་ཀུན་ནས་གནས་པར་གྱུར་ཅིག །སྤྲུལ་པ་རེ་རེ་ཞིང་ཆོས་ཀྱི་དབྱིངས་ཀྱི་

ཚད་དང་མཉམ་པས་རིན་པོ་ཆེའི་འཕྲུལ་པ་ཤིན་ཏུ་སྤྲུལ་པ་གྲངས་མེད་པ་ཀུན་ནས་གནས་པར་གྱུར་ཅིག །སྣང་བ་རེ་རེ་ལས་སྣང་བ་ཐམས་ཅད་སྟོན་ཅིང་རིན་པོ་ཆེའི་སྣང་བ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་ཀྱི་ཡེ་ཤེས་ཀྱི་འོད་རྣམ་པར་དག་པའི་

རིན་པོ་ཆེའི་འོད་གྲངས་མེད་པ་ཀུན་ནས་གནས་པར་གྱུར་ཅིག །འོད་གཟེར་རེ་རེས་ཀྱང་ཆོས་ཀྱི་དབྱིངས་ཐམས་ཅད་དུ་ཁྱབ་པར་འགྱུར་བའི་རིན་པོ་ཆེའི་འོད་གཟེར་ཉམས་པ་མེད་པ་གྲངས་མྱེད་པ་ཀུན་ནས་གནས་པར་གྱུར་ཅིག །རིན་པོ་ཆེའི་འབྱུང་གནས་ཐམས་ཅད་དང་ལྡན་

པའི་རིན་པོ་ཆེའི་འབྱུང་བ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་རིན་པོ་ཆེ་དབྱིག་ཐམས་ཅད་སྦྱིན་པའི་རིན་པོ་ཆེའི་མཛོད་གྲངས་མེད་པ་ཀུན་ནས་གནས་པར་གྱུར་ཅིག །དེ་བཞིན་གཤེགས་པའི་རྒྱལ་མཚན་ཤིན་ཏུ་འཕགས་པའི་རིན་པོ་ཆེའི་

དཔལ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་བཟང་པོ་ཆེན་པོ་རྣམ་པར་དག་པའི་རིན་པོ་ཆེ་བཟང་པོ་གྲངས་མེད་པ་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་ལ་དགའ་ཞིང་རྩེ་བའི་རིན་པོ་ཆེའི་བཟའ་ཤིང་

གི་ར་བ་ཤིན་ཏུ་བརྒྱན་པ་གྲངས་མེད་པ་ཀུན་ནས་གནས་པར་གྱུར་ཅིག །དེ་བཞིན་གཤེགས་པའི་དབྱངས་ཀྱིས་འགྲོ་བ་ཐམས་ཅད་རྣམ་པར་སྟོན་པའི་རིན་པོ་ཆེའི་དབྱངས་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་འབྲུ་ལས་ཆོས་ཀྱི་

འོད་ཟེར་རབ་ཏུ་འགྱེད་པའི་རིན་པོ་ཆེའི་གཟུགས་གྲངས་མེད་པ་ཀུན་ནས་གནས་པར་གྱུར་ཅིག །མཚན་ཐམས་ཅད་མཚན་མ་ཡིན་པས་བརྒྱན་པའི་རིན་པོ་ཆེ་འདྲ་བ་མྱེད་པ་གྲངས་མྱེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་རིམ་གྲོ་བྱང་ཆུབ་སེམས་

Vol. 36 · folio 155a

དཔའི་དགའ་བ་བསྐྱེད་པའི་རིན་པོ་ཆེའི་རིམ་གྲོ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱིས་ལྷུན་ལེགས་པར་བརྩིགས་པའི་རིན་པོ་ཆེ་ལས་བསྒྲུབས་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་

ཐམས་ཅད་ཀྱིས་ཤིན་ཏུ་བརྟན་པར་བརྒྱན་པའི་རིན་པོ་ཆེའི་གནས་གྲངས་མེད་པ་རྣམས་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའི་ཏིང་ངེ་འཛིན་གཞལ་དུ་མེད་པའི་གོས་བདེ་བར་བགོ་བ་རབ་ཏུ་ཐོབ་པའི་རིན་པོ་ཆེའི་གོས་དང་ལྡན་པ་གྲངས་མེད་པ་ཀུན་ནས་གནས་

པར་གྱུར་ཅིག །སེམས་བསྐྱེད་མ་ཐག་ཏུ་ཤིན་ཏུ་མཐོང་བའི་གཟུངས་རབ་ཏུ་ཐོབ་ཅིང་ཆོས་གོས་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིག །ལས་རིན་པོ་ཆེ་ཐམས་ཅད་རྣམ་པར་སྨིན་པ་ངེས་པར་རྟོགས་ཤིང་རྣམ་པར་དག་པའི་རིན་པོ་ཆེས་བསྒོས་པ་

གྲངས་མེད་པ་ཀུན་ནས་གནས་པར་གྱུར་ཅིག །མཐོང་མ་ཐག་ཏུ་ཆོས་ཐམས་ཅད་ཀྱི་ཚུལ་ཤེས་པའི་མིག་རྣམ་པར་དག་ཅིང་ཉམས་པ་མེད་པར་བལྟ་བའི་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཀྱི་ཕུང་པོས་གྲུབ་པའི་རིན་པོ་ཆེའི་འོད་ཀྱི་ཕུང་

པོ་གྲངས་མེད་པ་ཀུན་ནས་གནས་པར་གྱུར་ཅིག །དེ་བཞིན་གཤེགས་པའི་སེང་གེའི་གཟིམས་ཀྱི་ང་རོས་རྣམ་པར་དག་པའི་རིན་པོ་ཆེའི་མལ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཀྱི་མར་མེ་ཡོངས་སུ་གྲུབ་པའི་རིན་པོ་ཆེའི་མར་མེ་གྲངས་མེད་པ་མང་པོ་

ཀུན་ནས་གནས་པར་གྱུར་ཅིག །ཤིང་ཏ་ལ་གཅིག་དང་གཉིས་ལ་རིན་པོ་ཆེའི་སྲད་བུས་མིག་མངས་རིས་སུ་དྲེས་པ་ཤིན་ཏུ་རྣམ་པར་དག་པའི་རིན་པོ་ཆེའི་ཤིང་ཏ་ལ་གྲངས་མེད་པ་མང་པོ་ཀུན་ནས་གནས་པར་གྱུར་ཅིག །རིན་པོ་ཆེའི་ཡལ་གས་ཤིན་ཏུ་རྣམ་པར་དག་པའི་རིན་

པོ་ཆེའི་སྡོང་པོ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་སྣ་ཚོགས་ཀྱི་ཡལ་ག་དང་ལྡན་པའི་རིན་པོ་ཆེའི་ཤིང་ལོ་གྲངས་མེད་པ་ཀུན་ནས་གནས་པར་གྱུར་ཅིག །བསམ་གྱིས་མི་ཁྱབ་པའི་བྱ་མང་པོ་ཆོས་ཀྱི་རྒྱུན་སྒྲོགས་པས་བརྒྱན་པའི་རིན་པོ་ཆེའི་

Vol. 36 · folio 155b

ནགས་ཚལ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཀྱི་སྣང་བ་ཀུན་ཏུ་གཏོང་བའི་རིན་པོ་ཆེའི་ལོ་མ་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའ་བསམ་གྱིས་མི་ཁྱབ་པ་མེ་ཏོག་གཅིག་ལ་གནས་ཤིང་ཆོས་ཀྱི་

དབྱིངས་ཐམས་ཅད་དུ་རྒྱུ་བའི་རིན་པོ་ཆེའི་མེ་ཏོག་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིག །ཐམས་ཅད་མཁྱེན་པའི་ཡེ་ཤེས་ཆེན་པོ་ལས་ཕྱིར་མི་ལྡོག་པའི་འབྲས་བུ་རབ་ཏུ་ཐོབ་པའི་རིན་པོ་ཆེའི་འབྲས་བུ་དང་ལྡན་པ་གྲངས་མེད་པ་ཀུན་ནས་གནས་

པར་གྱུར་ཅིག །གྲོང་གི་ཆོས་ཐམས་ཅད་ཡོངས་སུ་སྤངས་པར་གནས་པའི་རིན་པོ་ཆེའི་གྲོང་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱིས་ཡོག་པའི་སེམས་ཅན་གྱིས་གང་ཞིང་རིན་པོ་ཆེའི་འབྱུང་གནས་གྲངས་མེད་པ་ཀུན་ནས་

གནས་པར་གྱུར་ཅིག །མཐུ་བོ་ཆེ་དཔའ་བོ་ཆོས་ཀྱི་གོ་ཆ་བརྟན་པ་བགོས་པས་བྱང་ཆུབ་སེམས་དཔའི་སེམས་ཕྱིར་མི་ལྡོག་པ་དང་ལྡན་པའི་རྒྱལ་པོའི་གནས་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །སེམས་ཀྱི་གནས་ཐམས་ཅད་

ལ་རྣམ་པར་འདས་པས་རབ་ཏུ་གང་བའི་རིན་པོ་ཆེའི་གནས་གྲངས་མེད་པ་ཀུན་ནས་གནས་པར་གྱུར་ཅིག །ཡོངས་སུ་ཤེས་པའི་གོས་ཐམས་ཅད་རབ་ཏུ་བགོ་བའི་གོས་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །ཁྱིམ་མེད་པར་རབ་ཏུ་བྱུང་

བའི་བྱང་ཆུབ་སེམས་དཔས་ཡོངས་སུ་གང་ཞིང་རིན་པོ་ཆེའི་འབྱུང་གནས་ཀྱི་གནས་གྲངས་མེད་པ་ཀུན་ནས་གནས་པར་གྱུར་ཅིག །བལྟ་ན་ཡིད་དུ་འོང་བ་རིན་པོ་ཆེ་དང་ལྡན་པའི་མཐུན་པའི་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །བསམ་

གྱིས་མི་ཁྱབ་པའི་ཡེ་ཤེས་ཀྱི་འོད་འཕྲོ་བ་རབ་ཏུ་གཏོང་བའི་ཆོས་ཀྱི་འཁོར་ལོ་ཤིན་ཏུ་སྤྲུལ་པ་རབ་ཏུ་བསྐོར་བའི་རིན་པོ་ཆེའི་འཁོར་ལོ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་ཤིང་རྣམ་པར་དག་པ་མྱིག་འཕྲུལ་གྱི་རྣམ་པ་

Vol. 36 · folio 156a

ཤིན་ཏུ་དག་པའི་རིན་པོ་ཆེའི་ཤིང་གྲངས་མེད་པ་ཀུན་ནས་གནས་པར་གྱུར་ཅིག །བལྟ་ན་བསམ་གྱིས་མི་ཁྱབ་པའི་རིན་པོ་ཆེ་ཤིན་ཏུ་རྣམ་པར་བཀྲམ་པའི་རིན་པོ་ཆེས་ས་རྣམ་པར་དག་པ་གྲངས་མེད་པ་ཀུན་ནས་གནས་པར་གྱུར་ཅིག །

ཡིད་དུ་འོང་བའི་དབྱངས་ཆོས་ཀྱི་དབྱིངས་ཐམས་ཅད་དུ་སྒྲོག་པའི་རིན་པོ་ཆེའི་རོལ་མོ་བརྡུང་བ་གྲངས་མེད་པ་ཀུན་ནས་གནས་པར་གྱུར་ཅིག །ཕྱི་མའི་མཐའི་བསྐལ་པའི་མུར་བྱིན་གྱི་རླབས་རྒྱུན་མི་འཆད་པའི་རིན་པོ་ཆེའི་རོལ་མོ་དཀྲོལ་བ་གྲངས་མེད་

པ་ཀུན་ནས་གནས་པར་གྱུར་ཅིག །ཆོས་རིན་པོ་ཆེ་རྣམས་ཡོངས་སུ་འཛིན་པའི་སེམས་ཅན་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །བསོད་ནམས་རིན་པོ་ཆེ་དང་ལྡན་པའི་ལུས་རིན་པོ་ཆེ་རྣམ་པར་དག་པ་གྲངས་མེད་པ་ཀུན་ནས་གནས་པར་

གྱུར་ཅིག །ཆོས་རིན་པོ་ཆེ་རབ་ཏུ་བརྗོད་པའི་རྣམ་པར་དག་པའི་ངག་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །ཐམས་ཅད་མཁྱེན་པར་སྨོན་པའི་བསམ་པ་རིན་པོ་ཆེ་རབ་ཏུ་ཐོབ་པའི་སེམས་ཡོངས་སུ་བྱང་བ་རིན་པོ་ཆེ་གྲངས་མེད་པ་

ཀུན་ནས་གནས་པར་གྱུར་ཅིག །ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་སྟོབས་རྨོངས་པ་མེད་པ་ལ་རྟེན་པའི་དྲན་པ་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཐམས་ཅད་ཀྱི་ཆོས་རིན་པོ་ཆེ་བཟུང་བ་

དང་ཡང་དག་པར་བཅད་པའི་བྱིན་གྱི་རླབས་ཡོད་པའི་རིག་པ་རིན་པོ་ཆེ་རྣམ་པར་དག་པ་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཐམས་ཅད་ཀྱི་ཆོས་ཀྱི་མཛོད་ངེས་པར་རྟོགས་པའི་བྱང་ཆུབ་སེམས་དཔའི་བློ་

གྲོས་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །ཐམས་ཅད་མཁྱེན་པ་རིན་པོ་ཆེ་ཤིན་ཏུ་ཡངས་པས་རྒྱས་པར་འགེངས་པའི་བློ་རིན་པོ་ཆེ་ཚད་མེད་པ་གྲངས་མེད་པ་ཀུན་ནས་གནས་པར་གྱུར་ཅིག །སྟོབས་བཅུ་རིན་

Vol. 36 · folio 156b

པོ་ཆེ་ཐམས་ཅད་ཉམས་པ་མེད་པའི་མིག་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་ཀྱི་དབྱིངས་མཐའ་དང་དབུས་མེད་པ་ཐམས་ཅད་དུ་མཉན་པ་རྣམ་པར་དག་པའི་རྣ་བ་རིན་པོ་ཆེ་ཡོངས་སུ་དག་པ་གྲངས་མེད་པ་

ཀུན་ནས་གནས་པར་གྱུར་ཅིག །མཐུན་པའི་དྲི་རིན་པོ་ཆེ་རྣམ་པར་དག་པའི་སྣ་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །མཐའ་དང་དབུས་མེད་པའི་ཚིག་གི་ཚུལ་ཐམས་ཅད་རྣམ་པར་སྟོན་པའི་ལྕེ་ཡངས་པ་རིན་པོ་ཆེ་

གྲངས་མེད་པ་ཀུན་ནས་གནས་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པར་འགྲོ་བའི་ལུས་རིན་པོ་ཆེ་ཡོངས་སུ་དག་བགྲངས་མེད་པ་ཀུན་ནས་གནས་པར་གྱུར་ཅིག །ཀུན་ཏུ་བཟང་པོའི་སྤྱོད་པ་དང་སྨོན་ལམ་ལ་བརྩོན་པའི་ཡིད་རིན་པོ་

ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །དབྱངས་རིན་པོ་ཆེ་རྣམ་པར་དག་པས་འཇིག་རྟེན་གྱི་ཁམས་ཐམས་ཅད་དུ་རྒྱས་པར་འགེངས་པའི་དབྱངས་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །

ཡེ་ཤེས་རིན་པོ་ཆེ་སྔོན་དུ་འགྲོ་བའི་ལུས་ཀྱི་ལས་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་རིན་པོ་ཆེ་བསྒྲིབས་པ་མེད་པ་ལ་བརྩོན་པས་ངག་གི་ལས་རིན་པོ་ཆེ་ཡང་དག་པར་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །

ཆགས་པ་མེད་པའི་ཡེ་ཤེས་རིན་པོ་ཆེའི་མཐར་ཐུག་པའི་ཡིད་ཀྱི་ལས་རིན་པོ་ཆེ་ཡངས་ཤིང་ཡོངས་སུ་དག་པར་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཀྱི་ཞིང་དེ་དག་ཐམས་ཅད་སངས་རྒྱས་ཀྱི་ཞིང་གཅིག་དང་ཡུལ་གཅིག་དང་

ཕྱོགས་གཅིག་དང་། སྐྲའི་མཆོག་མའི་རྩེ་མོ་རེ་རེ་ཞིང་ཡང་དེ་ལྟར་སྐྱེ་མཆེད་ཀྱི་ཡེ་ཤེས་རྣམ་པར་དག་པའི་བྱང་ཆུབ་སེམས་དཔའ་ཚད་མེད་པ་ནས་བྱང་ཆུབ་སེམས་དཔའ་བརྗོད་དུ་མེད་པའི་ཡང་བརྗོད་དུ་མེད་པ་གྲངས་དང་བགྲང་བ་ལས་འདས་པས་ཀུན་ཏུ་གང་བར་གྱུར་ཅིག །

Vol. 36 · folio 157a

ཕྱོགས་གཅིག་ཏུ་ཇི་ལྟ་བ་དེ་བཞིན་དུ་ཆོས་ཀྱི་དབྱིངས་ཀྱི་མཐས་གཏུགས་པ་ནམ་མཁའི་དབྱིངས་ཀྱི་ཁོངས་སུ་གཏོགས་པའི་སངས་རྒྱས་ཀྱི་ཞིང་མ་ལུས་པ་ཐམས་ཅད་ཀྱང་ཡོངས་སུ་གང་བར་གྱུར་ཅིག །དེ་ལྟར་བྱང་ཆུབ་སེམས་དཔའ་དགེ་བའི་

རྩ་བ་དེ་དག་རིན་པོ་ཆེའི་དམིགས་པས་སངས་རྒྱས་ཀྱི་ཞིང་ཡོངས་སུ་དག་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱང་སངས་རྒྱས་ཀྱི་ཞིང་གཅིག་བཟུང་བས་བསྡུས་ཏེ་སྤོས་རྣམ་པ་སྣ་ཚོགས་ཐམས་ཅད་ཀྱི་སྤོས་ཀྱི་རྒྱན་ཚད་མེད་པ་ཀུན་

ནས་གནས་པར་གྱུར་ཅིག །གཞུང་དེ་ལྟར་རིན་པོ་ཆེ་ཇི་ལྟ་བ་དེ་བཞིན་དུ་སྤོས་ཡོངས་སུ་བསྔོ་བ་ཡང་ཁོང་དུ་ཆུད་པར་བྱས་ཏེ། ཡེ་ཤེས་ཀྱི་སྤོས་ཆགས་པ་མེད་པའི་མཐར་ཐུག་པའི་སྤོས་ཀྱི་ཡིད་ཀྱི་ལས་རྒྱ་ཆེན་པོ་ཡོངས་སུ་དག་པ་ཚད་མེད་པའི་བར་དུ་ཀུན་ནས་

གནས་པར་གྱུར་ཅིག །དེ་བཞིན་དུ་མེ་ཏོག་སྣ་ཚོགས་ཐམས་ཅད་ཀྱི་མེ་ཏོག་གི་རྒྱན་བསམ་གྱིས་མི་ཁྱབ་པ་ཀུན་ནས་གནས་པར་གྱུར་ཅིག །ཅེས་བྱ་བ་ནས་ཡེ་ཤེས་ཀྱི་མེ་ཏོག་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་མེ་ཏོག་རྒྱ་ཆེ་ཞིང་ཡོངས་སུ་དག་པ་

བསམ་གྱིས་མི་ཁྱབ་པ་ཀུན་ནས་གནས་པར་གྱུར་ཅིག །ཕྲེང་བ་དང་བྱུག་པ་སྣ་ཚོགས་ཐམས་ཅད་ཀྱི་ཕྲེང་བ་དང་བྱུག་པའི་རྒྱན་མཚུངས་བ་མེད་པ་ཀུན་ནས་གནས་པར་གྱུར་ཅིག །ཅེས་བྱ་བ་ནས་ཡེ་ཤེས་ཀྱི་ཕྲེང་བ་དང་བྱུག་པ་ཆགས་པ་མེད་པའི་མཐར་ཐུག་པའི་ཡིད་

ཀྱི་ལས་ཀྱི་ཕྲེང་བ་དང་བྱུག་པའི་རྒྱན་རྣམ་པར་དག་པ་མཚུངས་པ་མེད་པའི་བར་དུ་ཀུན་ནས་གནས་པར་གྱུར་ཅིག །ཕྱེ་མ་དང་བདུག་པ་སྣ་ཚོགས་ཐམས་ཅད་ཀྱི་ཕྱེ་མ་དང་བདུག་པའི་རྒྱན་ས་མཚམས་མེད་པ་ཀུན་ནས་གནས་པར་གྱུར་ཅིག་ཅེས་བྱ་བ་ནས་ཡེ་ཤེས་ཀྱི་ཕྱེ་མ་

དང་བདུག་པ་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཀྱི་ཕྱེ་མ་དང་བདུག་པ་ཡོངས་སུ་དག་པས་མཚམས་མེད་པའི་བར་དུ་ཀུན་ནས་གནས་པར་གྱུར་ཅིག །གོས་དང་ཆོས་གོས་སྣ་ཚོགས་ཐམས་ཅད་ཀྱི་གོས་དང་ཆོས་གོས་ཀྱི་རྒྱན་མུ་མེད་པ་ཀུན་ནས་གནས་པར་གྱུར་ཅིག །

Vol. 36 · folio 157b

ཅེས་བྱ་བ་ནས་ཡེ་ཤེས་ཀྱི་གོས་དང་ཆོས་གོས་ཀྱི་རྒྱན་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཁྲེལ་ཡོད་པ་དང་། ངོ་ཚ་ཤེས་པའི་གོས་དང་ཆོས་གོས་ཡོངས་སུ་དག་པ་མུ་མེད་པའི་བར་དུ་ཀུན་ནས་གནས་པར་གྱུར་ཅིག །ཞིང་ཐམས་ཅད་དུ་གདུགས་སྣ་ཚོགས་ཡང་

དག་པར་བཙུགས་པའི་གདུགས་ཀྱི་རྒྱན་ས་འཚམས་མེད་པ་ཀུན་ནས་གནས་པར་གྱུར་ཅིག་ཅེས་བྱ་བ་ནས་ཡེ་ཤེས་ཀྱི་གདུགས་ཀྱི་རྒྱན་ཆགས་པ་མྱེད་པའི་མཐར་ཐུག་པའི་ཡིད་ཀྱི་ལས་ཡེ་ཤེས་ཀྱིས་ཡང་དག་པ་ཁྱབ་པ་ཡོངས་སུ་དག་པས་མཚམས་མེད་པའི་བར་དུ་ཀུན་

ནས་གནས་པར་གྱུར་ཅིག །རྒྱལ་མཚན་དང་བ་དན་སྣ་ཚོགས་ཐམས་ཅད་ཀྱི་རྒྱལ་མཚན་དང་། བ་དན་གྱི་རྒྱན་ཚད་མེད་པ་ཀུན་ནས་གནས་པར་གྱུར་ཅིག །ཅེས་བྱ་བ་ནས་ཡེ་ཤེས་ཀྱི་རྒྱལ་མཚན་དང་བ་དན་ཆགས་པ་མེད་པའི་མཐར་ཐུག་

པའི་ཡིད་ཀྱི་ལས་ཀྱི་ཡེ་ཤེས་ཀྱི་རྒྱལ་མཚན་དང་བ་དན་གྱི་རྒྱན་ཡོངས་སུ་དག་པ་ཚད་མེད་པའི་བར་དུ་གནས་པར་གྱུར་ཅིག །ལྷབ་ལྷུབ་སྣ་ཚོགས་ཐམས་ཅད་ཀྱི་ལྷབ་ལྷུབ་ཀྱི་རྒྱན་བརྗོད་དུ་མེད་པའི་ཡང་བརྗོད་དུ་མེད་པ་ཀུན་ནས་གནས་པར་གྱུར་ཅིག་ཅེས་བྱ་བ་ནས། ཡེ་ཤེས་ཀྱི་

ལྷབ་ལྷུབ་ཀྱི་རྒྱན་གྱི་མཐར་ཐུག་པའི་ཡིད་ཀྱི་ལས་ཀྱི་ཡེ་ཤེས་ཀྱི་ལྷབ་ལྷུབ་ཀྱི་རྒྱན་གྱིས་བརྒྱན་པ་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཀུན་ནས་གནས་པར་གྱུར་ཅིག །དེ་ལྟར་ཚུལ་དེ་བཞིན་དུ་ཐམས་ཅད་དུ་ཡང་ཤེས་པར་བྱ་སྟེ། སངས་

རྒྱས་ཀྱི་ཞིང་དེ་དག་ལས་སངས་རྒྱས་ཀྱི་ཞིང་གཅིག་བཟུང་བས་བསྡུས་ཏེ་ནོར་བུ་རིན་པོ་ཆེ་སྣ་ཚོགས་ཐམས་ཅད་ཀྱི་ནོར་བུ་རིན་པོ་ཆེའི་རྒྱན་བརྗོད་དུ་མེད་པའི་ཡང་བརྗོད་དུ་མེད་པ་ཀུན་ནས་གནས་པར་གྱུར་ཅིག །ཅེས་བྱ་བ་ནས་ནོར་བུ་རིན་པོ་ཆེ་ཐམས་ཅད་ཀྱི་ཤིང་ཀུན་ཏུ་

བྲེས་པའི་ནོར་བུ་རིན་པོ་ཆེའི་གདན་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པ་ཀུན་ནས་གནས་པར་གྱུར་ཅིག །དེ་ལྟར་ཚུལ་དེ་བཞིན་དུ་ཀུན་ཏུ་བྱས་ཏེ། དམྱིགས་པ་རེ་རེ་ཞིང་ལན་བརྒྱར་བཟླས་པར་བྱའོ། །ཡེ་ཤེས་ཀྱི་ནོར་བུ་རིན་པོ་ཆེ་

Vol. 36 · folio 158a

ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཀྱི་ཡེ་ཤེས་ཀྱི་ནོར་བུ་རིན་པོ་ཆེ་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་གནས་པར་གྱུར་ཅིག་ཅེས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་

ཆོས་སྦྱིན་པ་ལ་སྩོགས་པའི་དགེ་བའི་རྩ་བ་དེ་དག་དགེ་བའི་རྩ་བ་ཐམས་ཅད་ཀྱིས་བསྒྲུབས་པའི་སངས་རྒྱས་ཀྱི་ཞིང་ཡོངས་སུ་དག་པར་ཡོངས་སུ་བསྔོའོ། །སེམས་ཅན་ཐམས་ཅད་ཡོངས་སུ་དག་པ་མཉམ་པ་ཉིད་ཀྱི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་

མཉམ་པ་ཉིད་མྱི་འཁྲུགས་པ་ཡོངས་སུ་དག་པ་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་སངས་རྒྱས་ཀྱི་ཆོས་ཟབ་མོ་ལ་འཇུག་པ་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་བསོད་ནམས་ཀྱི་སྟོབས་ཐུབ་པ་མྱེད་པ་རྣམ་པར་དག་

པ་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་བསོད་ནམས་ཀྱི་མཚན་ཉིད་རྣམ་པར་དག་པ་ཟིལ་གྱིས་མནོན་པ་བསྟན་པ་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་མི་ཟད་པའི་ཡེ་ཤེས་ཀྱི་སྟོབས་ཀྱིས་སེམས་ཅན་ཐམས་ཅད་སངས་

རྒྱས་ཀྱི་ཆོས་ལ་གཟུད་པ་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་ཚིག་གི་རྣམ་པ་གྲངས་མེད་པ་ཤིན་ཏུ་དག་པའི་དབྱངས་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་ཐོགས་པ་མེད་པའི་མིག་གིས་ཆོས་ཀྱི་དབྱིངས་ཀྱིས་ཀླས་

པ་ནམ་མཁའི་མཐས་གཏུགས་པ་ཤེས་པར་བྱ་བ་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་སྔོན་གྱི་མཐའི་མུར་ཐུག་པའི་བསྐལ་པའི་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རྗེས་སུ་དྲན་པ་རྣམ་པར་དག་པ་དང་། སེམས་ཅན་

ཐམས་ཅད་མཉམ་པ་ཉིད་ཀྱི་ཕྱིར་བསྒྲིབས་པ་མྱེད་པའི་བློ་གྲོས་ཆེན་པོས་ཆོས་ངེས་པར་རྟོགས་པའི་མཛོད་དང་། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་བྱང་ཆུབ་མཐའ་དང་དབུས་མེད་པས་ཆོས་ཀྱི་དབྱིངས་རྒྱས་པར་དགང་བ་ལ་ཆགས་པ་མེད་པར་ཡང་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words