No title in the text — opening words: སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 35 · folio 139b

ཆེའི་ཡན་ལག་དམ་པས་རྣམ་པར་བརྒྱན་པ་ཞེས་བྱ་བ་ཡོད་དེ། དེ་ལ་འཇིག་རྟེན་གྱི་ཁམས་ཀྱི་རྒྱུད་ཞིང་གི་གཞི་རྣམ་པར་དམིགས་པ་ཞེས་བྱ་བ་རབ་ཏུ་གནས་སོ། །དེ་ལ་སྩོགས་པ་སྤོས་ཆུའི་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕྱི་

རོལ་འཁོར་ཡུག་གི་མཚམས་ན། སྤོས་ཆུའི་རྒྱ་མཚོ་མི་ཕྱེད་པར་བརྟན་པ་དང་ལྡན་པ་ཞེས་བྱ་བ་ཡོད་དེ། དེ་ན་འཇིག་རྟེན་གྱི་ཁམས་ཀྱི་རྒྱུད་པད་མའི་དཀྱིལ་འཁོར་ཤིན་ཏུ་རྣམ་པར་ཕྱེ་བའི་འཁོར་ལོ་ཞེས་བྱ་བ་སངས་རྒྱས་ཐམས་ཅད་ཀྱི་སྟོབས་ལ་འཇུག་པ་ཤིན་ཏུ་སྒྲོག་པའི་ལྷུན་ཅན་

རབ་ཏུ་གནས་ཏེ། དེ་དག་ཐམས་ཅད་ཀྱི་འོག་ན་འཇིག་རྟེན་གྱི་ཁམས་སྤོས་ཤིན་ཏུ་ཞིམ་པའི་རྒྱ་མཚོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་འོད་དང་སྤྲུལ་པ་ཚད་མེད་པའི་རྒྱལ་པོ་ཞེས་བྱ་བ་བཞུགས་སོ། །འཇིག་རྟེན་གྱི་ཁམས་ཀྱི་རྒྱུད་དེའི་དབུས་ན་འཇིག་རྟེན་གྱི་ཁམས་

རྡོ་རྗེའི་རྒྱལ་མཚན་ཞེས་བྱ་བ་གཞི་མཉམ་པ་ཡོད་པ་དེ་ན་འཇིག་རྟེན་གྱི་ཁམས་རྒྱན་དང་ཚུལ་གྱི་སྒོ་བསམ་གྱིས་མི་ཁྱབ་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡེ་ཤེས་ཚད་མེད་པའི་ཚངས་པ་ཞེས་བྱ་བ་བཞུགས་སོ། །དེའི་སྟེང་ན་འཇིག་རྟེན་གྱི་ཁམས་མི་

མཇེད་ཅེས་བྱ་བ་གཞི་མཉམ་པ་ཡོད་པ་དེ་ན། འཇིག་རྟེན་གྱི་ཁམས་སྣང་བའི་ཕྱོགས་མེ་ཏོག་གི་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སེང་གེའི་སྤྱན་འོད་འཕྲོ་བའི་སྤྲིན་ཅེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་ཀྱི་རྒྱུད་ཐོག་

མ་ལ་འཇིག་རྟེན་གྱི་ཁམས་རྒྱ་མཚོའི་དབྱངས་ཤེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཆུའི་ལྷ་འོད་འཕྲོ་བའི་སྒོ་ཞེས་བྱ་བ་བཞུགས་སོ། །སྤོས་ཆུའི་རྒྱ་མཚོ་ལྷའི་གྲོང་ཁྱེར་དང་ནོར་བུའི་ཤིང་ཏོག་གིས་བརྒྱན་པ་ཞེས་བྱ་བ་དེ་དང་འདབ་ཆགས་སུ་སྤོས་ཆུའི་རྒྱ་མཚོ་

སྣང་བའི་འཁོར་ལོས་རྣམ་པར་གསལ་བ་ཞེས་བྱ་བ་ཡོད་དེ། དེ་ལ་འཇིག་རྟེན་གྱི་ཁམས་ཀྱི་རྒྱུད་བརྗོད་དུ་མེད་པའི་ཕྱོགས་ཀྱི་གནས་ཀྱིས་བརྒྱན་པ་ཞེས་བྱ་བ་རབ་ཏུ་གནས་སོ། །དེ་དང་འདབ་ཆགས་སུ་སྤོས་ཆུའི་རྒྱ་མཚོ་རིན་པོ་ཆེའི་ཚོན་གྱི་སྲང་རྣམ་པ་སྣ་ཚོགས་ཤེས་

Vol. 35 · folio 140a

བྱ་བ་ཡོད་དེ། དེ་ན་འཇིག་རྟེན་གྱི་ཁམས་ཀྱི་རྒྱུད་བརྒྱུད་པ་དུ་མས་འཇུག་པ་ཞེས་བྱ་བ་རབ་ཏུ་གནས་སོ། །དེ་དང་འདབ་ཆགས་སུ་སྤོས་ཆུའི་རྒྱ་མཚོ་རྒྱན་ཐམས་ཅད་ཀྱིས་ཀུན་ཏུ་གང་བ་ཞེས་བྱ་བ་ཡོད་དེ། དེ་ལ་འཇིག་རྟེན་གྱི་ཁམས་ཀྱི་རྒྱུད་

རིན་པོ་ཆེ་རྣམ་པར་སྣང་བ་ཞེས་བྱ་བ་རབ་ཏུ་གནས་སོ། །དེ་དང་འདབ་ཆགས་སུ་སྤོས་ཆུའི་རྒྱ་མཚོ་རིན་པོ་ཆེའི་དྲ་བ་རྣམ་པར་ཕྱེ་བ་ཀུན་ཏུ་འབྱུང་བ་ཞེས་བྱ་བ་ཡོད་དེ། དེ་ལ་འཇིག་རྟེན་གྱི་ཁམས་ཀྱི་རྒྱུད་ཚུལ་གྱི་མཚམས་སྦྱོར་བ་འབྱུང་བ་ཞེས་བྱ་བ་རབ་ཏུ་གནས་སོ། །དེ་

དང་འདབ་ཆགས་སུ་སྤོས་ཆུའི་རྒྱ་མཚོ་རྒྱལ་མཚན་དམ་པའི་རྒྱན་ཅེས་བྱ་བ་ཡོད་དེ། དེ་ན་འཇིག་རྟེན་གྱི་ཁམས་ཀྱི་རྒྱུད་འཇིག་རྟེན་གྱི་ཁམས་རྣམ་པར་དམིགས་པ་རྒྱ་མཚོའི་སྒྲ་ཞེས་བྱ་བ་རབ་ཏུ་གནས་སོ། །དེ་དང་འདབ་ཆགས་སུ་སྤོས་ཆུའི་རྒྱ་མཚོ་ཉི་མའི་གནས་ཡོངས་

སུ་སྦྱོང་བའི་འོད་ཅེས་བྱ་བ་ཡོད་དེ། དེ་ལ་འཇིག་རྟེན་གྱི་ཁམས་ཀྱི་རྒྱུད་མིག་འཕྲུལ་གྱིས་རྒྱས་པར་འཇུག་པ་ཞེས་བྱ་བ་རབ་ཏུ་གནས་སོ། །དེ་དང་འདབ་ཆགས་སུ་སྤོས་ཆུའི་རྒྱ་མཚོ་སིལ་སྙན་ཐམས་ཅད་ཀྱི་སྒྲ་དབྱངས་ཡིད་དུ་འོང་བ་བརྗོད་པ་ཞེས་བྱ་བ་ཡོད་དེ། དེ་ན་

འཇིག་རྟེན་གྱི་ཁམས་ཀྱི་རྒྱུད་གློང་ཐམས་ཅད་ཀྱི་གཏིང་དུ་རབ་ཏུ་འཇུག་པ་ཞེས་བྱ་བ་རབ་ཏུ་གནས་སོ། །དེ་དང་འདབ་ཆགས་སུ་སྤོས་ཆུའི་རྒྱ་མཚོ་རྒྱན་དམ་པས་བསྒྲུབས་པ་རྣམ་པ་སྣ་ཚོགས་ཤེས་བྱ་བ་ཡོད་དེ། དེ་ལ་འཇིག་རྟེན་གྱི་ཁམས་ཀྱི་རྒྱུད་འོད་དྲི་མ་མེད་པའི་སྤྲིན་སྟུག་པོ་

འབར་བ་ཞེས་བྱ་བ་རབ་ཏུ་གནས་སོ། །དེ་དང་འདབ་ཆགས་སུ་སྤོས་ཆུའི་རྒྱ་མཚོ་མར་མེ་འོད་འཕྲོ་བས་ཀུན་ཏུ་རྒྱས་པ་ཞེས་བྱ་བ་ཡོད་དེ། དེ་ན་འཇིག་རྟེན་གྱི་ཁམས་ཀྱི་རྒྱུད་སངས་རྒྱས་ཀྱི་སྨོན་ལམ་གྱི་དབྱིབས་ཐ་དད་པ་བྱིན་གྱིས་རླབས་པ་ཞེས་བྱ་བ་རབ་ཏུ་གནས་སོ། །དེ་དག་ལ་

སྩོགས་པ་སྤོས་ཆུའི་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕྱི་རོལ་ཁོར་ཡུག་གི་མཚམས་ན། སྤོས་ཆུའི་རྒྱ་མཚོ་ཕྲེང་བ་དང་གོས་ཀྱིས་ཤིན་ཏུ་བསྒྲུབས་པ་ཞེས་བྱ་བ་ཡོད་དེ། དེ་ལ་འཇིག་རྟེན་གྱི་ཁམས་ཀྱི་རྒྱུད་ཀུན་ནས་

Vol. 35 · folio 140b

སྣང་བའི་གོས་བཟང་པོ་ཤིན་ཏུ་སྤྲུལ་པ་ཞེས་བྱ་བ། སངས་རྒྱས་འདས་པ་དང་། མ་བྱོན་པ་དང་། ད་ལྟར་བྱུང་བ་ཐམས་ཅད་ཀྱི་མཚན་ཉིད་ཤིན་ཏུ་སྒྲོག་པའི་ལྷུན་ཅན་མངོན་པར་བྱུང་ངོ་། །དེ་ཐམས་ཅད་ཀྱི་འོག་ན་སྤོས་ཆུའི་རྒྱ་མཚོ་དབང་པོའི་མེ་ཏོག་ཟེ་བ་འཁྱིལ་པའི་སྙིང་པོ་ཞེས་

བྱ་བ་ཡོད་དེ། དེ་ན་འཇིག་རྟེན་གྱི་ཁམས་རབ་ཏུ་སྒྲོལ་བས་དགའ་བ་བྱེད་པ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་གཅིག་ཏུ་དག་པ་ཡོད་དེ། དེ་ན་དེ་བཞིན་གཤེགས་པ་རྣམ་པར་སངས་རྒྱས་པའི་ཡེ་ཤེས་ཀྱིས་ཕམ་པ་མེད་

པ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པའི་འཇིག་རྟེན་གྱི་ཁམས་ཀྱི་རྒྱུད་ཀྱི་དབུས་ན། འཇིག་རྟེན་གྱི་ཁམས་རྡོ་རྗེའི་རྒྱལ་མཚན་ཞེས་བྱ་བ་གཞི་མཉམ་པ་ཡོད་པ་དེ་ན། འཇིག་རྟེན་གྱི་ཁམས་

རིན་པོ་ཆེའི་འབྲུའི་དྲ་བས་བརྒྱན་པ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་གཅིག་ཏུ་དག་པ་ཡོད་དེ། དེ་ན་དེ་བཞིན་གཤེགས་པ་སྣང་བ་ཚད་མེད་པས་དགྱེས་པ་ཞེས་བྱ་བ་བཞུགས་སོ། །དེའི་སྟེང་ན་

འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པའི་འཇིག་རྟེན་གྱི་ཁམས་མི་མཇེད་ཅེས་བྱ་བ་གཞི་མཉམ་པ་ཡོད་པ་དེ་ན། འཇིག་རྟེན་གྱི་ཁམས་རིན་པོ་ཆེའི་གདན་པདྨོ་དང་སེང་གེ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་

ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ་ཡོད་དེ། དེ་ན་དེ་བཞིན་གཤེགས་པ་ཤུགས་དྲི་མ་མེད་ཅིང་མཉན་ན་དོན་ཡོད་པ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་བདུན་གྱི་རྡུལ་ཤིན་ཏུ་ཕྲ་བ་

སྙེད་འདས་པའི་འཇིག་རྟེན་གྱི་ཁམས་ཀྱི་རྒྱུད་ཀྱི་སྟེང་ན། འཇིག་རྟེན་གྱི་ཁམས་ཀྱི་རྒྱུད་ཀླུའི་རིན་པོ་ཆེའི་ཁ་དོག་གི་འོད་ཅེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཉི་ཤུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་གཅིག་ཏུ་དག་པ་ཡོད་དེ། དེ་ན་དེ་བཞིན་

Vol. 35 · folio 141a

གཤེགས་པ་ཆོས་ཀྱི་དབྱིངས་ཡོངས་སུ་གསལ་བ་རྣམ་པར་སྣང་བ་ཞེས་བྱ་བ་བཞུགས་སོ། །ཀྱེ་དེ་ལྟར་རྒྱལ་བའི་སྲས་དག་སྤོས་ཆུའི་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་འཇིག་རྟེན་གྱི་ཁམས་

ཀྱི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་གནས་ཏེ། འཇིག་རྟེན་གྱི་ཁམས་ཀྱི་རྒྱུད་དེ་དག་ཐམས་ཅད་ཀྱང་སྤོས་ཆུའི་རྒྱ་མཚོ་དེ་དག་ལ་ནོར་བུའི་རྒྱལ་པོ་བྱང་ཆུབ་སེམས་དཔའི་ལུས་རྣམ་པར་དམིགས་པའི་མྱིག་ཡོར་གྱི་རྒྱལ་མཚན་

གྱིས་རབ་ཏུ་བརྒྱན་པ་དང་ལྡན་པའི་པད་མོ་ལ་རབ་ཏུ་གནས་པ་ཤ་སྟག་གོ། །འཇིག་རྟེན་གྱི་ཁམས་ཀྱི་རྒྱུད་གཞན་དང་གཞན་ཅན་མང་པོ་དང་། མཚམས་འདབ་ཆགས་སུ་གནས་པ་ཤ་སྟག་གོ། འོད་རིན་པོ་ཆེ་གཞན་དང་གཞན་གྱི་ཁ་དོག་ཏུ་འགྱེད་པ་ཤ་སྟག་གོ། །

འོད་ཀྱི་དཀྱིལ་འཁོར་གྱི་སྤྲིན་གཞན་དང་གཞན་གྱིས་ཀུན་ནས་ཡོག་པ་ཤ་སྟག་གོ། །རྒྱན་རྣམ་པར་བྲེས་པའི་འོད་གཞན་དང་གཞན་ཅན་ཤ་སྟག་གོ། །བསྐལ་པའི་གྲངས་དང་ཚུལ་གཞན་དང་གཞན་དུ་བསྟན་པ་ཤ་སྟག་གོ །སངས་རྒྱས་གཞན་དང་གཞན་སྐྱེ་ཞིང་

གཤེགས་པ་ཤ་སྟག་གོ། །ཆོས་རྒྱ་མཚོའི་སྒྲ་གཞན་དང་གཞན་རབ་ཏུ་བསྒྲགས་པ་ཤ་སྟག་གོ །སེམས་ཅན་གྱི་ལུས་གཞན་དང་གཞན་གྱིས་ཀུན་ཏུ་ཡོག་པ་ཤ་སྟག་གོ །ཕྱོགས་གཞན་དང་གཞན་ལ་འཇུག་པ་མ་འདྲེས་པ་ཤ་སྟག་གོ །སངས་རྒྱས་ཀྱི་རྣམ་

པར་འཕྲུལ་པ་དང་། དེ་བཞིན་གཤེགས་པའི་བྱིན་གྱི་རླབས་གཞན་དང་གཞན་ཅན་ཤ་སྟག་གོ །འཇིག་རྟེན་གྱི་ཁམས་ཀྱི་རྒྱུད་དེ་དག་རེ་རེའི་འཇིག་རྟེན་གྱི་ཁམས་ཀྱི་མཚམས་ནས་རབ་ཏུ་བྱུང་བའི་འཇིག་རྟེན་གྱི་ཁམས་ཀྱི་དྲ་བ་རྒྱན་སྣ་ཚོགས་ལ་རབ་ཏུ་གནས་པ་ཐམས་

ཅད་ཀྱིས་འཇིག་རྟེན་གྱི་ཁམས་རྣམ་པ་སྣ་ཚོགས་ཀྱི་ཚུལ་དུ་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་ཞེས་བྱ་བ་འདི་ཐམས་ཅད་ཡོངས་སུ་གང་ངོ་། །ཇི་ལྟར་འཇིག་རྟེན་གྱི་ཁམས་གཅིག་གི་རྒྱུད་ནས་བྱུང་བ་དེ་བཞིན་དུ་འཇིག་རྟེན་གྱི་

Vol. 35 · folio 141b

ཁམས་ཀྱི་རྒྱུད་རྣམས་དང་། འཇིག་རྟེན་གྱི་ཁམས་ཀྱི་ས་མཚམས་དང་སྒོ་རྣམ་པ་སྣ་ཚོགས་ཀྱི་རྒྱན་ལ་གནས་པའི་འཇིག་རྟེན་གྱི་ཁམས་ཀྱི་དྲ་བ་སྣ་ཚོགས་ཐམས་ཅད་ལས་བྱུང་བ་ཀུན་གྱིས་ཀྱང་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་

ཐམས་ཅད་ཡོངས་སུ་གང་ངོ་། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་ཀྱི་རྒྱུད་མཐའ་དང་དབུས་མེད་པ་དང་། འཇིག་རྟེན་གྱི་ཁམས་འབྱམ་ཀླས་པའི་ཚུལ་ཤིན་ཏུ་བསྟན་པ་འདི་ཉིད་གསལ་བར་བརྗོད་པའི་ཕྱིར། སངས་རྒྱས་

ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་ཁམས་ནི་རྒྱ་མཚོའི་རྣམས། །ཡངས་དང་མྱི་ཡངས་སྣ་ཚོགས་པ། །ནམ་མཁའ་དག་གི་དབྱིངས་ལ་གནས། །ཆོས་ཀྱི་དབྱིངས་ནི་ཐ་མི་དད། །

འཇིག་རྟེན་ཁམས་འདི་རྒྱ་མཚོ་ན། །ཞིང་གི་རྒྱུད་ནི་བསམ་མི་ཁྱབ། །ཐ་དད་མེད་པར་རྣམ་པར་གནས། །རྣམ་འཕྲུལ་གཞན་དང་གཞན་དག་གོ། །རྣམ་ཕྱེ་སྣ་ཚོགས་ཤིན་ཏུ་གནས། །ཁ་དོག་ཐ་དད་རབ་ཏུ་འདུག །ཞིང་གི་རྒྱུད་དག་རྣམ་ཕྱེ་བ། །འཇིག་རྟེན་ཁམས་

ཀྱི་གང་ཆེན་མཚོ། །ལྷུན་དང་དབྱངས་རྣམས་ཐ་དད་དེ། །སངས་རྒྱས་ཀུན་གྱི་རྣམ་འཕྲུལ་བ། །ཞིང་གཞན་རྒྱུད་རྣམས་རབ་ཏུ་སྣང་། །ལས་ཀྱི་དེ་དག་ཤིན་ཏུ་བྲིས། །རི་རབ་རྒྱ་མཚོའི་དྲ་བ་དང་། །འཁོར་ལོ་ཀློང་གི་དཀྱིལ་འཁོར་དང་། །པདྨོའི་དབྱིབས་འདྲ་འབྱམ་

ཀླས་པ། །དེ་དག་དེ་ཡིས་ཀུན་ནས་བསྐོར། །རྡོ་རྗེའི་རྒྱལ་མཚན་བརྩེགས་པ་དང་། །རྡོ་རྗེ་ཀུན་ནས་འཁོར་གནས་པ། །འབྱམ་ཀླས་བསམ་གྱིས་མི་ཁྱབ་པས། །དེ་དག་རྒྱུད་ནི་ཀུན་ནས་བསྐོར། །འོད་ཀྱི་དྲ་བ་བསམ་མི་ཁྱབ། །མུ་ཏིག་མདོག་ཀྱང་རྒྱ་མཚོ་

སྟེ། །ཞིང་གི་རྒྱུད་རྣམས་ཀུན་ཀྱང་འབར། །པདྨོ་ལ་ཡང་ཀུན་གནས་སོ། །རེ་རེ་དག་གི་རྒྱུད་ལས་ཀྱང་། །འོད་ཟེར་དྲ་བ་བསམ་མི་ཁྱབ། །འོད་ཟེར་དག་གི་ཞིང་གྱུར་ཅིང་། །རྒྱ་མཚོའི་ཕྱོགས་རྣམས་ཀུན་ཏུ་འགེངས། །ཞིང་གི་རྒྱུད་རྣམས་ཐམས་

Vol. 35 · folio 142a

ཅད་ཀྱི། །དམིགས་པ་ཀུན་གྱི་སྒོ་ནས་ཀྱང་། །ཐམས་ཅད་ཚུལ་ལ་འཇུག་པ་ཡི། །མི་ཟད་ཚུལ་རྣམས་རབ་ཏུ་སྣང་། །ཞིང་གི་རྣམས་ནི་བསམ་མི་ཁྱབ། །རྒྱུད་རྣམས་མི་ཟད་ཤིན་ཏུ་འབྱུང་། །རྒྱན་རྣམས་བསྟན་པ་ཐ་དད་

དེ། །དྲང་སྲོང་ཆེན་པོའི་བྱིན་རླབས་སོ། །ཞིང་གི་རྒྱུད་རྣམས་དེ་དག་ན། །འཇིག་རྟེན་བསམ་གྱིས་མི་ཁྱབ་ཁམས། །ཀུན་ནས་འདུ་ཞིང་རྣམ་པར་འཇིགས། །འབྱུང་ཞིང་འཇིག་པར་དེ་བཞིན་འགྱུར། །ཇི་ལྟར་ཤིང་ལ་ལོ་མ་རྣམས། །འབྱུང་ཞིང་ལྷུང་བར་འགྱུར་བ་ལྟར། །དེ་

བཞིན་ཞིང་གི་རྒྱུད་རྣམས་ན། །འཇིག་རྟེན་ཁམས་ན་འབྱུང་བ་ཡིན། །ཇི་ལྟར་ཤིང་གི་སྐྱེ་གནས་ནས། །ཤིང་ཏོག་སྣ་ཚོགས་འབྱུང་བ་ལྟར། །དེ་བཞིན་ཞིང་གི་རྒྱུད་རྣམས་ན། །སེམས་ཅན་སྣ་ཚོགས་འབྱུང་བ་ཡིན། །ཇི་ལྟར་ས་བོན་ཁྱད་པར་གྱིས། །འབྲས་བུ་སྣ་ཚོགས་

སྣང་བ་ལྟར། །དེ་བཞིན་ལས་ཀྱི་ཁྱད་པར་གྱིས། །སེམས་ཅན་རྣམས་དང་ཞིང་བྱུང་ངོ་། །ཡིད་བཞིན་རིན་ཆེན་རྒྱལ་པོ་རྣམས། །ཁ་དོག་ཀུན་ཏུ་སྣང་བ་ལྟར། །སེམས་ཅན་བསམ་པ་རྣམ་དག་པས། །དེ་བཞིན་ཞིང་རྣམས་རབ་ཏུ་སྣང་། །ཀླུ་ཡི་རྒྱལ་པོའི་སྤྲིན་གྱི་རྣམས། །

ནམ་མཁའི་དབྱིངས་ལ་སྟོན་པ་ལྟར། །དེ་བཞིན་སངས་རྒྱས་སྨོན་ལམ་གྱིས། །ཞིང་གི་རྣམས་ནི་འབྱུང་བ་ཡིན། །སྒྱུ་མའི་མཁན་པོ་སྔགས་དག་གིས། །སྒོ་རྣམས་སྣ་ཚོགས་སྟོན་པ་ལྟར། །དེ་བཞིན་སེམས་ཅན་ལས་རྣམས་ཀྱིས། །བསམ་གྱིས་མི་ཁྱབ་ཞིང་འབྱུང་ངོ་། །

ཇི་ལྟར་རི་མོའི་གཟུགས་ཀྱི་རྣམས། །རི་མོའི་ལས་ཀྱིས་བྲིས་པ་ལྟར། །དེ་བཞིན་ཞིང་རྣམས་འདི་དག་ཀུན། །སེམས་ཀྱིས་རི་མོར་བྲིས་པ་ཡིན། །སེམས་ཅན་ལུས་ཀྱི་རྣམ་པ་དག །ཇི་ལྟར་སེམས་ཀྱིས་བརྟགས་པ་ལྟར། །དེ་བཞིན་ཞིང་གི་རྣམ་པ་ཡང་། །ཐམས་ཅད་ལས་ཀྱིས་

རྣམ་པར་བྲིས། །ཇི་ལྟར་གཞན་དང་གཞན་གཟུགས་སུ། །སེམས་ཅན་རྣམས་ཀྱི་བསམ་པ་བཞིན། །མགོན་པོ་རྣམས་ནི་སྣང་བ་ལྟར། །དེ་བཞིན་ཞིང་རྣམས་སྣང་བའོ། །པདྨོའི་དྲ་བའི་ཕྱི་རོལ་གྱི། །སེམས་ཅན་ཞིང་གི་མཚམས་དག་ན། །དབྱིབས་དང་ཁ་དོག་གཞན་དང་

Vol. 35 · folio 142b

གཞན། །དྲི་མ་མེད་པ་སྣ་ཚོགས་སྣང་། །པད་མོའི་དྲ་བ་དེ་དག་ལ། །ཞིང་གི་དྲ་བ་རབ་ཏུ་གནས། །རྒྱན་དང་བསྟན་པ་སྣ་ཚོགས་ཏེ། །སེམས་ཅན་སྣ་ཚོགས་མང་པོའི་གནས། །ཞིང་གི་དབྱིངས་རྣམས་ལ་ལ་ནི། །ཀུན་ནས་ཉོན་མོངས་རྣམ་པར་གནས། །སེམས་ཅན་རྣམས་ཀྱི་

ཉོན་མོངས་ལས། །ཆོས་ཉིད་དེ་དག་ནང་ན་སྣང་། །ཀུན་ནས་ཉོན་མོངས་རྣམ་དག་ཏུ། །ཞིང་གི་རྒྱུད་ནི་བསམ་མི་ཁྱབ། །སེམས་ཅན་བསམ་པས་རབ་ཏུ་བྱུང་། །བྱང་ཆུབ་སེམས་དཔའ་རྣམས་ཀྱང་འཁོད། །ལ་ལ་རྣམ་དག་ཉོན་མོངས་ཅན། །ཞིང་གི་དབྱིངས་ནི་རྣམ་པ་མང་། །བྱང་ཆུབ་

སེམས་དཔའ་རྣམ་པར་འཕྲུལ། །རྒྱ་མཚོའི་ལས་ལས་བྱུང་བ་ཡིན། །ཞིང་རྣམས་ལ་ལའི་འོད་བཏང་བ། །རིན་ཆེན་རང་བཞིན་དྲི་མ་མེད། །རྣམ་པ་སྣ་ཚོགས་དྲི་མེད་དག །སངས་རྒྱས་རྣམས་ཀྱིས་ཡོངས་སུ་སྦྱངས། །ཞིང་གི་རྒྱུད་རྣམས་ལ་ལ་ན། །བསྐལ་པའི་མྱེ་ནི་བསམ་མི་ཁྱབ། །

ཀུན་ནས་ཉོན་མོངས་རྣམས་ལ་སྟོན། །ཞིང་གི་དཀྱིལ་འཁོར་ཤིན་ཏུ་སྲ། །རླུང་གི་ཕུང་པོ་སྨོན་ལམ་དང་། །ཆུ་ཡི་ཕུང་ལ་རབ་ཏུ་གནས། །ཞིང་གི་རྣམ་པ་ཤིན་ཏུ་མང་། །སེམས་ཅན་ལས་ཀྱིས་བསགས་པ་ཡིན། །ཞིང་ན་གཞན་དང་གཞན་དག་གི །ཞིང་གི་ཆོས་ཉིད་སྣང་ལ་

ལྟོས། །དེ་དག་འབྱུང་བ་གང་ཡང་མེད། །དེ་དག་ལ་ནི་འཇིག་པའང་མེད། །སྐད་ཅིག་སྐད་ཅིག་སེམས་ཀུན་ལ། །སངས་རྒྱས་རྣམས་ཀྱི་བྱིན་རླབས་ཀྱིས། །ཞིང་རྣམས་རབ་ཏུ་འབྱུང་བ་རྣམས། །ཤིན་ཏུ་དྲི་མེད་དག་ལ་ལྟོས། །ཞིང་རྣམས་ལ་ལ་ས་ཡི་དངོས། །སྲ་བར་དེ་

དག་བྱུང་གྱུར་ཅིང་། །སྣང་བ་མེད་ཅིང་འོང་བའང་མེད། །སྡིག་པའི་ལས་ཀྱི་གནས་ཡིན་ནོ། །ཞིང་རྣམས་ལ་ལ་རྡོ་རྗེའི་དངོས། །ཀུན་ནས་ཉོན་མོངས་འཇིགས་པ་ཆེ། །བདེ་བ་ཆུང་ཞིང་སྡུག་བསྔལ་མང་། །བསོད་ནམས་ཆུང་བའི་གནས་ཀྱང་ཡིན། །ཞིང་རྣམས་ལ་ལ་ལྕགས་

ཀྱི་དངོས། །ལ་ལ་ཟངས་ཀྱི་དངོས་སུ་གནས། །སྡིག་པའི་ལས་ཀྱིས་ཀུན་ཏུ་གང་། །རི་དང་བྲག་གིས་མཉམ་པ་མེད། །འཇིག་རྟེན་དེ་ན་དམྱལ་བ་ཡི། །སེམས་ཅན་སྡུག་བསྔལ་སྐྱབས་མེད་པ། །མུན་པ་རྗེས་སུ་རྙེད་གྱུར་ཅིང་། །མྱེ་ལྕེ་རྒྱ་མཚོའི་ནང་ན་འབར། །འོན་ཀྱང་བྱོལ་

Vol. 35 · folio 143a

སོང་སྐྱེ་གནས་སུ། །ལུས་ནི་མངོན་པར་འབྱུང་འགྱུར་ཏེ། །བདག་གི་ལས་ཀྱི་ཉེས་པ་ཡིས། །སྡུག་བསྔལ་ཚོར་བ་རབ་ཏུ་མྱོང་། །གཤིན་རྗེའི་འཇིག་རྟེན་རྣམས་ནའང་སྣང་། །སྐོམ་དང་བཀྲེས་པས་རབ་ཏུ་མནར། །མྱེ་ཡི་རི་ཡི་གདུང་བ་ཡིས། །

སྡུག་བསྔལ་ཚོར་བའང་མྱོང་བར་འགྱུར། །ལ་ལ་རིན་ཆེན་བདུན་ལས་བྱུང་། །ལ་ལ་སྣ་ཚོགས་གཟུགས་སུ་གནས། །དགེ་བའི་ལས་ཀྱིས་བྱུང་བ་སྟེ། །སྣ་ཚོགས་ཁྱིམ་གྱིས་རབ་ཏུ་བརྒྱན། །མི་དང་ལྷ་རྣམས་ལ་ལ་ནི། །མཐོ་རིས་དག་གི་འཇིག་རྟེན་ན། །དགེ་བའི་བསོད་ནམས་

འབྲས་བུར་ལྡན། །དགའ་བདེ་མྱོང་བ་དེ་དག་ལྟོས། །སྤུའི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པ་གང་ཡང་མེད། །རང་རང་སོ་སོའི་ལས་ཀྱིས་ན། །སེམས་ཅན་ཁམས་རྣམས་བསམ་མི་ཁྱབ། །འདུ་

ཤེས་སྣ་ཚོགས་འཛིན་པ་རྣམས། །བདེ་དང་སྡུག་བསྔལ་ཉམས་སུ་མྱོང་། །ཞིང་རྣམས་ལ་ལ་མཐའ་ཡས་འོད། །སེམས་ཅན་མང་དོན་ཀུན་ནས་གནས། །ཡོངས་འབྱུང་རྡོ་རྗེ་ཨུཏྤ་ལ། །སྣ་ཚོགས་རྣམ་དག་དྲི་མ་མེད། །ཞིང་རྣམས་ལ་ལ་འོད་ཟེར་དངོས། །འོད་ཀྱི་འཁོར་ལ་ཀུན་

ནས་གནས། །ཙན་དན་གསེར་ལས་ཡོངས་སུ་བྱུང་། །འོད་འཕྲོ་སྤྲིན་གྱི་མདོག་དང་མཉམ། །ཞིང་རྣམས་ལ་ལ་ཉི་ཟླའི་དངོས། །སྤོས་ཀྱི་གོས་ཀྱིས་ཀུན་ནས་ཡོག །ལ་ལ་པད་མོ་གཅིག་ལ་སྟེ། །བྱང་ཆུབ་སེམས་དཔས་ཡོངས་སུ་རྒྱས། །ལ་ལ་མཚན་གྱི་མདོག་དང་འོད། །

ཞིང་རྣམས་རིན་ཆེན་དྲི་མ་མེད། །མིག་འཕྲུལ་འོད་ཀྱང་རབ་ཏུ་འགྱེད། །འོད་ཟེར་དྲ་བས་སྣང་བར་བྱས། །ཞིང་རྣམས་ལ་ལ་རྡོ་རྗེ་དང་། །པད་མོའི་དངོས་སུ་སྤོས་ལ་གནས། །ལ་ལ་ནོར་བུའི་འོད་ཀྱང་ཡིན། །ཞིང་རྣམས་ཡོངས་སུ་དག་ལ་ལྟོས། །མེ་ཏོག་གློང་ལས་ལ་

ལ་བྱུང་། །བསམ་གྱིས་མི་ཁྱབ་ཞིང་ལ་ལྟོས། །སངས་རྒྱས་སྤྲུལ་པས་ཀུན་ཏུ་ཁྱབ། །བྱང་ཆུབ་སེམས་དཔའི་འོད་དང་མཉམ། །ལ་ལ་མེ་ཏོག་ཤིང་རྣམས་དང་། །ལོ་མའི་དཀྱིལ་འཁོར་སྣ་ཚོགས་ཏེ། །ནོར་བུའི་སྤྲིན་གྱིས་ཀུན་ཏུ་ཁྱབ། །ཞིང་གི་དཀྱིལ་འཁོར་རྣམ་པར་

Vol. 35 · folio 143b

དག །ཞིང་རྣམས་ལ་ལ་པདྨོའི་དངོས། །སྣང་བ་བཟང་པོས་རྣམ་པར་མཛེས། །སངས་རྒྱས་སྤྲུལ་པའི་གསུང་ཡང་ཡིན། །ཞིང་གི་དྲ་བ་བསམ་མི་ཁྱབ། །རིན་ཆེན་ཅོད་པན་སྣ་ཚོགས་དང་། །བྱང་ཆུབ་སེམས་དཔའི་རྒྱན་རྣམས་དང་། །གདན་ལས་དེ་བཞིན་ལ་ལ་བྱུང་། །འོད་

དང་སྤྲུལ་པའང་རབ་ཏུ་འགྱེད། །ཙན་དན་ཕྱེ་མ་སྣ་ཚོགས་དང་། །མཛོད་སྤུའི་རྣམ་པར་སྣང་བའི་འོད། །སངས་རྒྱས་སྤྲིན་གྱི་འོད་ཟེར་རྣམས། །ཞིང་རྣམས་འབྱུང་བ་རབ་ཏུ་བརྗོད། །ལ་ལ་རྒྱན་དང་འོད་གཅིག་པར། །ཞིང་རྣམས་དྲི་མ་མེད་པ་སྣང་། །ལ་ལ་རྒྱན་རྣམས་ཐམས་

ཅད་ཀྱིས། །རྣམ་པ་སྣ་ཚོགས་རབ་ཏུ་བརྒྱན། །ལ་ལ་ཞིང་རྣམས་བཅུ་དག་གི །རྒྱན་གྱིས་མངོན་པར་རབ་ཏུ་བརྒྱན། །ལ་ལ་ཞིང་རྣམས་སྟོང་དག་ཀྱང་། །རྣམ་པར་བརྒྱན་ཅིང་རབ་ཏུ་གནས། །ཞིང་གི་རྒྱན་མང་བྱ་བ་ཡིས། །ཞིང་རྣམས་ལ་ལ་རྣམ་པར་བྲེས། །རྒྱན་དང་ཚུལ་

རྣམས་ཐ་དད་པར། །སྣ་ཚོགས་མིག་ཡོར་ལྟ་བུར་སྣང་། །བརྗོད་དུ་མེད་པའི་ཞིང་གི་རྣམས། །རྒྱན་གཅིག་ལ་ཡང་རབ་ཏུ་སྣང་། །འོད་ནི་གཞན་དང་གཞན་བཀྱེ་བ། །སངས་རྒྱས་སྨོན་ལམ་མཐུ་ལས་བྱུང་། །སྨོན་ལམ་རྒྱ་མཚོ་རྣམས་མང་བས། །ཞིང་རྣམས་ལ་ལ་རྣམ་

པར་སྦྱངས། །དེ་དག་རྒྱན་མང་ཐམས་ཅད་དུ། །ཞིང་གི་རྒྱ་མཚོ་ཤིན་ཏུ་སྣང་། །ཀུན་ཏུ་བཟང་པོའི་སྨོན་ལམ་གྱིས། །ཞིང་རྣམས་ཡོངས་སུ་གང་སྦྱངས་པ། །དེ་དག་ཀུན་ལ་དུས་གསུམ་གྱི། །ཞིང་གི་རྒྱན་རྣམས་ཀུན་ཀྱང་སྣང་། །ཞིང་གི་རྒྱུད་ཀྱི་རྣམ་སྤྲུལ་པ། །

ཀྱེ་མ་རྒྱལ་སྲས་ཁྱེད་ནི་ལྟོས། །མ་འོངས་པ་ཡི་ཞིང་རྣམས་ཀྱང་། །རྨི་ལམ་བཞིན་དུ་དེ་དག་སྣང་། །ཇི་སྙེད་ཕྱོགས་བཅུའི་འཇིག་རྟེན་གྱི། །འདས་པའི་ཞིང་རྣམས་རྒྱ་མཚོ་ཡང་། །ཞིང་གཅིག་ནང་ན་ཐམས་ཅད་སྣང་། །མིག་ཡོར་བཞིན་དུ་སྤྲུལ་པ་ཡིན། །དུས་

གསུམ་སངས་རྒྱས་ཐམས་ཅད་ཀྱི། །རྣམ་སྤྲུལ་ཞིང་རྣམས་གང་ཡོད་པ། །ཞིང་གི་རྒྱུད་ནི་འདི་ལ་སྣང་། །ཀུན་ཀྱང་ནང་ན་ཡོད་པར་གནས། །ཞིང་གི་རྡུལ་གྱི་རྩེ་མོ་ལ། །སངས་རྒྱས་ཐམས་ཅད་རྣམ་འཕྲུལ་པ། །ཤོང་བ་དེ་དག་ཀུན་ནས་སྣང་།

Vol. 35 · folio 144a

མིག་ཡོར་མཚན་ཉིད་མེད་པའོ། །ལ་ལ་རྒྱ་མཚོའི་དབྱིབས་སུ་འདུག །ཞིང་བརྒྱ་མང་པོ་དེ་དག་ལྟོས། །རི་རབ་རི་ཡི་དབྱིབས་འདྲ་དང་། །འཇིག་རྟེན་ཁམས་ནི་བསམ་མི་ཁྱབ། །ཞིང་རྣམས་ལ་ལ་རྣམ་པར་བྲིས། །མྱིག་ཡོར་

དབྱིབས་སུ་གནས་པ་སྟེ། །སྣ་ཚོགས་ཤིང་གི་དབྱིབས་སུ་གནས། །སངས་རྒྱས་ཀྱིས་ཀྱང་ཀུན་ཏུ་ཁྱབ། །ཞིང་རྣམས་ནོར་བུ་འཁོར་ལོའི་དབྱིབས། །ལ་ལ་པད་མའི་དབྱིབས་སུ་གནས། །ཡན་ལག་བརྒྱད་པ་སྣ་ཚོགས་མང་། །སྣ་ཚོགས་ཁ་དོག་དྲི་མ་

མེད། །ལ་ལ་ཁྲི་ཡི་དབྱིབས་ལྟ་བུ། །གྲྭ་ཡི་དབྱིབས་དང་ཁྱད་ཁྱུད་དེ། །ལ་ལ་གྲོང་ཁྱེར་དབྱིབས་སུ་འདུག །ཚངས་པའི་ལུས་སུ་རབ་ཏུ་གནས། །ལྷ་ཡི་དབང་པོའི་གཙུག་ཕུད་དབྱིབས། །ཟླ་བ་ཁམ་ལྟར་ལ་ལ་གནས། །ནོར་བུའི་རི་ཡི་

དབྱིབས་སུ་འཁོད། །ཉི་མའི་དཀྱིལ་འཁོར་དབྱིབས་ཀྱང་འདྲ། །སྤོས་ཆུ་མཚོ་ཡི་ཀློང་ལྟ་བུ། །འཇིག་རྟེན་ཁམས་རྣམས་རབ་ཏུ་གནས། །འོད་ཀྱི་དཀྱིལ་འཁོར་དབྱིབས་འདྲ་བ། །སྔོན་གྱི་སངས་རྒྱས་རྣམས་ཀྱིས་སྦྱངས། །འཁོར་ལོ་བཀྲ་ཤིས་

དབྱིབས་ལྟ་བུ། །འཇིག་རྟེན་ལ་ལ་དཀྱིལ་འཁོར་དེ། །མཛོད་སྤུ་སྤྱི་གཙུག་དབྱིབས་ལྟ་བུ། །ལ་ལ་མིག་གི་ཚུལ་ཡང་འདྲ། །སངས་རྒྱས་ཕྱག་གི་དབྱིབས་ལྟ་བུ། །ལ་ལ་རྡོ་རྗེའི་དབྱིབས་སུ་འདུག །འོད་འཕྲོ་རི་ཡི་དབྱིབས་ཀྱང་འདྲ། །བྱང་ཆུབ་

སེམས་དཔས་ཀུན་ཏུ་གང་། །ཞིང་རྣམས་ལ་ལ་སེང་གེའི་དབྱིབས། །ནོར་བུའི་གོ་ཅར་མངོན་པར་བསྒྲུབས། །གཟུགས་དང་དབྱིབས་ནི་དུ་མ་སྟེ། །གཟུགས་རྣམས་ཀུན་གྱིས་རབ་ཏུ་གནས། །ཞིང་གི་རྒྱུད་ནི་གཅིག་ལ་ཡང་། །ཞིང་གི་དབྱིབས་རྣམས་མི་

ཟད་པ། །རབ་ཏུ་གནས་པ་བྱིན་རླབས་དང་། །སངས་རྒྱས་སྨོན་ལམ་རྣམས་ཀྱིས་བྱུང་། །ཞིང་རྣམས་ལ་ལ་བསྐལ་པ་ཙམ། །ལ་ལ་བསྐལ་པ་བཅུ་པ་སྟེ། །ཞིང་རྣམས་ལ་ལ་རྡུལ་མཉམ་པའི། །བསྐལ་པ་བྱེ་བར་བརྗོད་པ་ཡིན། །ལ་ལ་

Vol. 35 · folio 144b

བསྐལ་པ་གཅིག་ལ་ཡང་། །ཞིང་རྣམས་མང་པོ་འབྱུང་བ་སྣང་། །ཚད་མེད་གྲངས་ཀྱང་མེད་པ་སྟེ། །འཇིག་པ་དེ་བཞིན་བསམ་མི་ཁྱབ། །ཞིང་རྣམས་ལ་ལ་སངས་རྒྱས་མེད། །ཞིང་རྣམས་ལ་ལ་སངས་རྒྱས་བཅས། །ལ་ལའི་ཞིང་ན་སངས་རྒྱས་

གཅིག །ལ་ལ་སངས་རྒྱས་མང་པོའོ། །སངས་རྒྱས་མེད་པའི་ཞིང་རྣམས་དང་། །འཇིག་རྟེན་གཞན་གྱི་ཁམས་སུ་ཡང་། །སངས་རྒྱས་སྤྲུལ་པ་གཤེགས་མཛད་ཅིང་། །རྣམ་པར་འཕྲུལ་པ་རབ་ཏུ་སྟོན། །འཕོ་དང་འབྱུང་དང་སྐུ་ཚེ་དང་། །བྱང་ཆུབ་

མངོན་པར་འཚང་རྒྱ་དང་། །བདུད་ཀྱི་སྡེ་དག་འདུལ་བ་དང་། །ཆོས་ཀྱི་འཁོར་ལོ་བསྐོར་བ་སྟོན། །སེམས་ཅན་བསམ་པ་ཇི་བཞིན་དུ། །གཟུགས་རྣམས་སྣ་ཚོགས་ཀུན་ཀྱང་སྟོན། །ཆོས་ཀྱི་འཁོར་ལོ་རབ་བསྐོར་བ། །འཇིག་རྟེན་ཀུན་ན་ཐ་མི་དད། །སངས་

རྒྱས་ཞིང་རྣམས་རེ་རེར་ཡང་། །རྒྱལ་བ་གཅིག་ནི་སྐྱེར་འགྱུར་ཏེ། །ལོ་གྲངས་བྱེ་བ་ཕྲག་སྟོང་དུ། །ཆོས་ཀྱི་དམ་པ་རབ་ཏུ་སྟོན། །སེམས་ཅན་སྣོད་དུ་མ་གྱུར་ལ། །སངས་རྒྱས་སྟོན་པ་མི་མཛད་དོ། །སངས་རྒྱས་བསམ་དང་ལྡན་པས་ནི། །དེ་ཉིད་གཅིག་ཀྱང་

ཀུན་ཏུ་མཐོང་། །སངས་རྒྱས་མང་པོའི་ཞིང་གི་རྣམས། །ཞིང་རྣམས་རེ་རེ་དག་ཏུ་ཡང་། །སངས་རྒྱས་བྱེ་བ་བསམ་མི་ཁྱབ། །རྒྱལ་བ་རྣམས་ནི་རབ་ཏུ་སྐྱེ། །རྒྱལ་བ་སོ་སོ་དེ་དག་ན། །སྤྲུལ་པ་མང་པོ་རབ་འགྱེད་ཅིང་། །ཆོས་ཀྱི་དབྱིངས་ནི་ཁྱབ་མཛད་ནས། །

སེམས་ཅན་རྒྱ་མཚོ་འདུལ་བ་མཛད། །ཞིང་རྣམས་ལ་ལ་འོད་མེད་དེ། །མུན་པ་འཇིགས་པ་ཤིན་ཏུ་ཆེ། །རེག་ན་སྡུག་བསྔལ་སྤུ་གྲི་འདྲ། །བལྟ་ན་མི་བཟད་སྐྱི་ཡང་གཡའ། །ཞིང་རྣམས་ལ་ལ་ལྷ་འོད་ཅན། །ལ་ལ་ཁྱིམ་གྱི་འོད་ཅན་ཏེ། །ལ་ལ་ཉི་ཟླའི་

འོད་དང་ལྡན། །ཞིང་གི་དྲ་བ་བསམ་མི་ཁྱབ། །ཞིང་རྣམས་ལ་ལ་རང་གི་འོད། །ཤིང་གི་འོད་ཅན་དྲི་མ་མེད། །གང་དུ་སྡུག་བསྔལ་མི་མཐོང་བ། །དེ་དག་སེམས་ཅན་དགེ་ལས་བྱུང་། །ལ་ལ་རི་ཡི་འོད་ཅན་ཏེ། །ཞིང་རྣམས་ལ་ལ་ནོར་བུའི་འོད། །ལ་

Vol. 35 · folio 145a

ལ་མར་མེའི་འོད་ཅན་ཏེ། །སེམས་ཅན་རྣམས་ཀྱི་ལས་ཀྱིས་བྱུང་། །ཞིང་རྣམས་ལ་ལ་སངས་རྒྱས་འོད། །བྱང་ཆུབ་སེམས་དཔས་ཀུན་ཏུ་གང་། །ཞིང་རྣམས་ལ་ལ་པད་མོའི་འོད། །འོད་འཕྲོ་འོད་ཅན་རབ་ཏུ་མཛེས། །ཞིང་རྣམས་ལ་ལ་

མེ་ཏོག་འོད། །སྤོས་ཆུའི་འོད་དང་ལྡན་པའང་ཡོད། །སྤོས་དང་བདུག་པ་འོད་འཕྲོ་ཅན། །སྨོན་ལམ་དབང་གིས་རྣམ་པར་སྦྱངས། །ཞིང་རྣམས་ལ་ལ་སྤྲིན་འོད་ཅན། །ནོར་བུའི་གོ་ཅའི་འོད་ཀྱིས་གསལ། །སངས་རྒྱས་བྱིན་གྱི་རླབས་ཀྱིས་སྣང་། །ཡིད་དུ་འོང་བའི་སྒྲ་དབྱངས་

ལྡན། །རིན་ཆེན་ཅོད་པན་འོད་དང་ལྡན། །རྡོ་རྗེ་གསེར་གྱི་འོད་ཀྱིས་སྣང་། །ཡོངས་སུ་དག་པའི་སྒྲ་དབྱངས་ཅན། །དེ་དག་ན་ནི་སྡུག་བསྔལ་མེད། །ཐམས་ཅད་རྒྱན་གྱི་འོད་ཅན་དང་། །ཞིང་རྣམས་ལ་ལ་ནོར་བུའི་འོད། །ལ་ལ་སྙིང་པོ་བྱང་ཆུབ་འོད། །འཁོར་རྣམས་

ཀུན་ཏུ་རབ་ཏུ་སྣང་། །སངས་རྒྱས་སྤྲུལ་པའི་སྣང་བ་ཅན། །སངས་རྒྱས་སྤྲིན་གྱིས་ཀུན་ནས་ཡོག །ཀུན་ཏུ་འོད་ཀྱིས་རབ་ཏུ་སྣང་། །ཆོས་ཀྱི་དབྱིངས་དང་མཉམ་པའི་འོད། །ཞིང་རྣམས་ལ་ལ་མེ་ཡི་འོད། །ཞིང་རྣམས་ལ་ལ་འཇིགས་སྒྲ་ཅན། །མི་ཟད་འཇིགས་

པའི་ང་རོ་ཅན། །རྩུབ་ཅིང་བརླང་བའི་སྒྲ་རྣམས་དང་། །ཡིད་མྱོང་འཇིགས་པ་ཆེན་པོ་སྒྲོག །དམྱལ་བ་བྱོལ་སོང་སྐྱེ་གནས་དང་། །གཤིན་རྗེའི་འཇིག་རྟེན་སྡུག་བསྔལ་རྣམས། །མྱ་ངན་རྒྱ་མཚོའི་ཞིང་གི་རྣམས། །ཉོན་མོངས་ལྡན་པའི་སྒྲ་ཡང་འབྱུང་། །ལ་

ལ་དག་ན་ཡིད་འོང་སྒྲ། །དགའ་བར་བྱེད་ཅིང་སྟོན་འདེམས་པ། །བདེ་བའི་ལས་རྣམས་འབྲས་བུའི་དབྱངས། །ཞིང་གི་འཁོར་ན་རབ་ཏུ་སྒྲོག །ལ་ལ་བརྒྱ་བྱིན་ལྷ་དབང་དབྱངས། །གཞན་དག་ཚངས་པའི་སྒྲ་དབྱངས་ཏེ། །འཇིག་རྟེན་ཀུན་གྱི་དབྱངས་སུ་ཡང་། །

ལ་ལའི་ཞིང་ན་རབ་ཏུ་གྲག །ཞིང་རྣམས་ལ་ལ་སྤྲིན་གྱི་སྒྲ། །རིན་ཆེན་རྒྱ་མཚོ་འོད་ཟེར་དང་། །ནོར་བུར་ཤིང་གི་གཟུགས་སྒྲ་དང་། །རོལ་མོའི་སྒྲ་ཡིས་ཀུན་ཏུ་ཁྱབ། །འོད་ཟེར་ཀློང་གི་སྒྲ་རྣམས་དང་། །སངས་རྒྱས་སྤྲུལ་པ་མི་ཟད་དང་། །བྱང་ཆུབ་སེམས་

Vol. 35 · folio 145b

པའི་སྒྲ་དག་དང་། །འོད་ཟེར་སྒྲ་ནི་སྙན་པ་འབྱུང་། །ཆོས་ཀྱི་འཁོར་ལོའི་སྒྲ་རྣམས་དང་། །ཁ་ཅིག་ཞིང་ན་བསམ་ཡས་པའི། །སྨོན་ལམ་རྒྱ་མཚོའི་ང་རོ་དང་། །སྤྱོད་པའི་སྒྲ་ཡང་སྙན་པར་འབྱུང་། །དུས་གསུམ་གཤེགས་པའི་སངས་རྒྱས་ཀྱི། །མཚན་གྱི་

དཀྱིལ་འཁོར་མང་པོ་དང་། །དེ་དག་ཞིང་རྣམས་འབྱུང་བའི་སྒྲ། །ཟད་པ་མེད་པའི་དབྱངས་སུ་སྒྲོག །སངས་རྒྱས་རྣམས་ཀྱི་སྟོབས་སྒྲ་དང་། །ཚད་མེད་ས་དང་ཕ་རོལ་ཕྱིན། །ཆོས་ཀྱི་རང་བཞིན་སྒྲ་དག་ཀྱང་། །ཁ་ཅིག་ཞིང་ན་རབ་ཏུ་གྲག །ཀུན་ཏུ་བཟང་པོའི་

སྨོན་ལམ་གྱི། །སྒྲ་ནི་ཞིང་རྣམས་བྱེ་བ་འབྱིན། །བསྐལ་པར་གནས་ཤིང་རབ་ཏུ་སྒྲོག །སྒྲ་དབྱངས་འབྱིན་པ་ཟད་མི་ཤེས། །ཞིང་གི་དབྱིངས་རྣམས་ལ་ལ་ན། །སངས་རྒྱས་རྣམ་པར་སྤྲུལ་པ་ཡི། །སྒྲ་ཡིས་ཆོས་ཀྱི་དབྱིངས་བཀང་བ། །དེ་དག་ཀུན་ནས་

རབ་ཏུ་གྲག །འཇིག་རྟེན་གྱི་ཁམས་ཀྱི་རྒྱུད་རྣམ་པར་དགོད་པ་ཤིན་ཏུ་བསྟན་པ་ཞེས་བྱ་བ་སྟེ། ལེའུ་དགུ་པའོ།། །།

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words