ལྷ་མོ་བཞིས་ཡོངས་སུ་ཞུས་པ

Sanskrit title (Tibetan script, as in the text) ཙ་ཏུརྡེ་བཱི་པ་རི་པྲྀཙྪ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 81 · folio 277b

༄༅། །རྒྱ་གར་སྐད་དུ། ཙ་ཏུརྡེ་བཱི་པ་རི་པྲྀཙྪ། བོད་སྐད་དུ། ལྷ་མོ་བཞིས་ཡོངས་སུ་ཞུས་པ།

དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ལྷ་མོ་བཞི་དང་མཉམ་ལྡན་ཞིང་། །སངས་རྒྱས་གཟུགས་ཀྱིས་ཉེར་བརྒྱན་པ། །ཤིན་ཏུ་དགའ་བའི་སྦྱོར་ཆེན་ལ། །རྡོ་རྗེ་སེམས་དཔའ་ཆེར་བཞུགས་ཏེ། །འོད་ཟེར་འཆང་ཞིང་འཁྲིགས་པ་ཡི། །གསང་ཆེན་ཆོས་ཀྱི་འབྱུང་

གནས་ལ། །བྱང་ཆུབ་སེམས་ནི་འཕྲོས་ནས་སུ། །ཆོས་ཀྱི་དབྱིངས་ནས་ཞུ་མཛད་དོ། །ཞུ་བའི་དངོས་པོ་དེ་མཐོང་ནས། །ལྷ་མོ་སྤྱན་མས་ཡོངས་ཞུས་པ། །བཅོམ་ལྡན་རྡོ་རྗེ་སེམས་དཔའ་ལ། །ཚིག་འདི་དག་ནི་གསོལ་པ་སྟེ། །ཆོས་ཀྱི་དབྱིངས་རྣམས་འཕྲོ་བ་ནི། །

གང་ལས་སྐྱེ་བར་འགྱུར་བ་ལགས། །དང་པོ་ཇི་ལྟར་འོང་བ་ཡིན། །དེ་བཞིན་ཕྱིར་འགྲོ་ཇི་ལྟར་ལགས། །ཡན་ལག་མེད་པ་གང་དེ་ནི། །ཡན་ལག་དང་བཅས་འགྱུར་ནས་སུ། །ལུས་དངོས་འགྱུར་བ་ཇི་ལྟར་ལགས། །མིག་དང་རྣ་བ་སྣ་དང་ནི། །དེ་བཞིན་ལྕེ་དང་ལུས་

དང་ཡིད། །དབང་པོ་ཕུང་པོའི་དངོས་རྣམས་དང་། །ཁམས་རྣམས་སུ་ནི་འཇུག་པ་ཡང་། །མ་རིག་བག་ཆགས་སྲེད་པ་ཡིས། །བཅིངས་པའི་ཉོན་མོངས་འདོད་ཆགས་སོགས། །རྣམ་པར་ཤེས་པ་སྣ་ཚོགས་པ། །ཇི་ལྟར་དངོས་སུ་འདུས་པ་ལགས། །དངོས་པོ་མེད་

Vol. 81 · folio 278a

པ་བསྒོམས་པའི་གཟུགས། །གཟུགས་སོགས་སྤྱོད་ཡུལ་མཚན་ཉིད་རྣམས། །རང་བཞིན་མེད་ཅིང་དམིགས་མེད་ལ། །དམིགས་པ་དང་བཅས་ཇི་ལྟར་ལགས། །དེ་དག་ངོ་མཚར་ཆེན་པོ་ནི། །བདག་གི་ཐེ་ཚོམ་ལྷས་བཀའ་སྩོལ། །དེ་ལྟར་

ཞུས་མ་ཐག་ཏུ་ནི། །བཅོམ་ལྡན་རྡོ་རྗེ་སེམས་དཔས་གསུངས། །ཤེས་རབ་ཟབ་པ་ཟད་མེད་ནི། །ཉོན་ཅིག་སྤྱན་མ་བཤད་པར་བྱ། །དཔྱད་དུ་མེད་ཅིང་ཤེས་བྱ་མིན། །དེ་བཞིན་དཔྱད་མཁན་གྱིས་ཤེས་དཀའ། །སངས་རྒྱས་ཀུན་གྱི་གསང་ཆེན་ནི། །ནམ་

མཁའ་ནམ་མཁའི་སྤྱོད་ཡུལ་ལོ། །མི་ཤེས་མུན་པས་བསྒྲིབས་པས་ན། །ཉན་ཐོས་རྣམས་ཀྱིས་ཤེས་པ་མིན། །སྤྱོད་ཡུལ་བག་ཆགས་ཤེས་མཁན་ནི། །རང་སངས་རྒྱས་སུ་སྤྲུལ་པ་སྟེ། །དེ་དག་ཀུན་གྱིས་ཀྱང་མི་ཤེས། །ཤེས་མེད་སོ་སོའི་སྐྱེ་གནས་དང་། །

མ་འོངས་པ་དང་འདས་པ་དང་། །ད་ལྟར་བྱུང་བའི་དུས་གསུམ་ལ། །བྱོལ་སོང་བག་ཆགས་ལས་བྱུང་བའི། །དུད་འགྲོ་ཡི་དགས་སྐྱེ་བ་རྣམས། །དེ་ཀུན་གྱིས་ཀྱང་མི་ཤེས་ཏེ། །སངས་རྒྱས་སྤྱོད་ཡུལ་གསང་ཆེན་ནོ། །སྙིང་པོ་ཤིན་ཏུ་སྙིང་པོའི་མཆོག །གང་དེ་

ཀུན་བདག་ལ་གནས་པའི། །སངས་རྒྱས་ཀུན་གྱི་གསང་ཆེན་ནི། །ལྷ་མོ་ཁྱོད་ལ་བཤད་པར་བྱ། །བྱང་ཆུབ་སེམས་དག་འོད་གསལ་བ། །ཟླ་བ་ཤེལ་དང་མཉམ་པའི་འོད། །དེ་ཉིད་ཡེ་ཤེས་ལྔ་ཡི་དངོས། །ཡུངས་ཀར་ཆེ་བའི་ཚད་ཙམ་མོ། །དེ་ཡི་དབུས་

སུ་བཞུགས་པའི་ལྷ། །མི་གསལ་གསལ་བའི་གཟུགས་ཅན་ཏེ། །ཕྱེད་ཚད་ཙམ་གྱི་ཕྲ་མོའི་མཆོག །ཡིད་ཀྱི་དངོས་པོའི་ཐིག་ལེའི་གཟུགས། །རྟག་ཏུ་སྙིང་གི་དབུས་གནས་པ། །འོད་ཟེར་ཆེན་པོ་འབར་བ་ཅན། །ཇི་སྙེད་དགུ་བའི་བར་དུ་ནི། །དཔྲལ་བར་ལ་

གནས་རྐང་མཐིལ་བར། །ཐིག་ལེ་དེ་ཁོ་ནར་བསྡུས་ཏེ། །ལྟེ་བའི་དབུས་སུ་རྣམ་པར་གནས། །ཆ་ཤས་ལྔ་པ་ཙམ་ཡིན་ཏེ། །བཅུ་གཉིས་ཀྱི་ནི་ཐ་མ་ལ། །ཆ་ཤས་དྲུག་གིས་མཚན་པ་ཉིད། །ང་རོ་ཐིག་ལེས་བརྒྱན་བྱེད་པ། །རྡོ་རྗེ་ཁོང་ནས་ཕྱུང་ནས་སུ། །ས་

Vol. 81 · folio 278b

བོན་སྐྱེ་གནས་དབུས་བཞག་སྟེ། །ཆོས་ཀྱི་དབྱིངས་ནི་ཞུ་བར་བྱེད། །དེ་ནི་རིམ་པར་སྐྱེད་བྱེད་ན། །སྒོ་དགུ་ལ་ནི་ཀུན་དུ་འགྲོ། །ཁྱབ་ཅིང་ཁྱབ་གནས་འགྲོ་ཀུན་ལ། །མི་གཡོ་ལ་སོགས་གཡོ་དང་བཅས། །ཚངས་སོགས་ལྷ་དང་ལྷ་མིན་གྱི། །གཞི་ནི་དེ་ལས་གྱུར་

བའོ། །གང་ལས་གཙོ་བོར་སྐྱེད་བྱེད་པ། །ས་དང་ནམ་མཁའ་དེ་ཞེས་གསུངས། །ཇི་སྲིད་ལུས་ལ་གནས་པའི་བར། །དེ་ཡིས་ལས་དང་ལས་མིན་བྱེད། །དགེ་དང་མི་དགེ་བསམ་པ་ཡང་། །བྱ་བའི་ལས་ཀུན་བྱེད་པ་ཡིན། །སྦྱོར་བ་རྟག་ཏུ་དེ་གསུངས་ཏེ། །མཆོད་

པ་བསྒོམ་པར་གསུངས་པ་ཡིན། །གང་ཚེ་ལས་ཀྱི་ལུས་ཞིག་ན། །དེ་ཚེ་དེ་ཡི་རང་མཐུ་ཡིས། །དེ་འདྲའི་ལུས་སུ་དེ་འགྱུར་ཏེ། །གང་གིས་གཡོ་དང་མི་གཡོ་ཁྱབ། །ནམ་མཁའ་མཉམ་པ་ཉིད་འདྲ་བ། །དེ་ནི་གནས་པར་ཤེས་པར་བྱ། །བཅུ་ཡི་གཉིས་མཐའ་ཚིག་

གི་དོན། །གང་གིས་རྟག་ཏུ་བསྒོམ་བྱས་ན། །དེས་ནི་དངོས་གྲུབ་རྒྱས་པ་ཡིས། །རྡོ་རྗེ་འཛིན་པར་བདག་ཉིད་འགྱུར། །སོ་དང་མཆུ་དང་རྐན་དང་ལྕེ། །མགུལ་གནས་གང་ལ་ཡོད་པ་ནི། །གང་ལ་དེ་ནི་ཡིག་འབྲུ་ཉིད། །དེ་ནི་ཟད་དང་གནས་ཕྱིར་རོ། །བརྗོད་པ་མེད་

ཅིང་ཐེ་ཚོམ་པ། །སྒྲ་ཡིག་རྣམ་པར་སྤངས་པ་ནི། །རང་གི་ཕྱི་ནང་དེ་བཞིན་ཉིད། །བྱང་ཆུབ་སེམས་ནི་འདིར་གསུངས་སོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་སྤྱན་མས་ཡོངས་སུ་ཞུས་པའི་ལེའུ་སྟེ་དང་པོའོ།། །།དེ་ནས་ལྷ་མོ་མཱ་མ་ཀཱིས། །རྡོ་རྗེ་

ཅན་ལ་འདི་ཞུས་ཏེ། །བྱང་ཆུབ་སེམས་ཀྱི་རིམ་པ་ཡི། །ཁ་སྙིང་ལྟེ་བ་གསང་བ་ལ། །འགྲོ་དང་ཕྱིར་འོང་བསྟན་པ་ནི། །རྡོ་རྗེ་ཆེན་པོས་བཀའ་སྩལ་འཚལ། །ཆ་ཤས་རྣམ་པ་དུ་ཞིག་གསུངས། །གནས་ཀྱི་རྣམ་པ་བསྒྱུར་བ་དུ། །ཁ་དོག་རྣམ་པ་དུ་ཞིག་གསུངས། །

དེ་བཞིན་གདན་ཡང་ཇི་ལྟར་འཚལ། །རྡོ་རྗེ་ཅན་གྱིས་བཀའ་སྩལ་བ། །ཆ་ཤས་བཞི་དང་མཉམ་ལྡན་ཞིང་། །པདྨ་བཞི་ལ་ཡང་དག་གནས། །སྙིང་གའི་པདྨ་ལ་གནས་གནག །ཁ་ཡི་པདྨ་ལ་གནས་དཀར། །ང་རོ་ལྟེ་བའི་པདྨར་གནས། །གསང་བའི་པདྨ་ང་རོ་

Vol. 81 · folio 279a

མཐའ། །སྟབས་ཀྱི་མཐའ་རུ་འགྲོ་བྱེད་པས། །ཐིག་ལེའི་སྦྱོར་བར་རབ་ཏུ་གནས། །སྣོམ་བྱེད་པ་དང་ཐོས་བྱེད་པ། །དེ་ཚེ་མཐོང་བྱེད་ཟ་བྱེད་པ། །རེག་པར་བྱེད་ཀྱང་དེ་ཁོ་ནས། །བདེ་དང་སྡུག་བསྔལ་ཚོར་བྱེད་པའོ། །གང་ལས་བཞད་བྱེད་བཟའ་བྱེད་པ། །

དེ་བཞིན་ཆོ་ངེ་དང་ངུ་བ། །འབྱེད་པ་གཅོད་པ་དེ་ཁོ་ནས། །ཆོ་ག་རྣམ་པ་མང་པོ་ཤེས། །རྒྱལ་བོ་དོན་ཡང་བྱེད་པར་འགྱུར། །དབང་ཕྱུག་དོན་ཡང་བྱེད་པར་འགྱུར། །བྲམ་ཟེ་རྒྱལ་པོ་རྗེའུ་རིགས་དང་། །དམངས་རིགས་སྨད་པའི་རིགས་རྣམས་དང་། །བུད་མེད་དུ་མ་སྤྲུལ་

པར་བྱེད། །དུད་འགྲོ་ཡི་དགས་སྐྱེ་བ་དང་། །གཟུགས་ཅན་རྣམས་དང་གཟུགས་མེད་དང་། །དེ་བཞིན་འདོད་པའི་སྲིད་རྣམས་ལས། །འབྱུང་བ་ཐམས་ཅད་སྐྱེད་བྱེད་མ། །དེ་ཉིད་ཁོ་ན་རྫུ་འཕྲུལ་གནས། །མོ་གཟུགས་དང་ནི་ཕོ་ཡི་གཟུགས། །བདེ་བ་ཆེན་པོ་གོ་འཕང་གནས། །

དེ་ལྟར་དེ་བཞིན་ཉིད་ཤེས་པ། །དམ་པའི་ཡིག་འབྲུ་ཤེས་པ་གང་། །དེས་ནི་གསང་ཆེན་ཤེས་པ་སྟེ། །གང་དེས་བདག་ཉིད་ཀུན་གནས་པ། །ཁ་དོག་མེད་ཅིང་ཁ་དོག་དམར། །ཁ་དོག་དཀར་དང་སེར་བ་ཡི། །ཐིག་ལེའི་གཟུགས་སུ་བསྒྱུར་བ་འདི། །འགྲོ་དང་ཕྱིར་འོང་རྣམ་

པར་བསྟན། །གང་དེ་རིག་པ་རྫུ་འཕྲུལ་ཆེ། །མཐའ་ཡས་བཅས་པ་སྣ་ཚོགས་གཟུགས། །སྐྱེ་དང་བསྡུས་དང་འཇིག་པ་ལ། །ཐིག་ལེའི་གཟུགས་སུ་རབ་གནས་སོ། །གང་གི་བརྒྱད་ཁྲི་རྩ་བཞིའི་ཆོས། །སྟོང་ཕྲག་བརྒྱ་རུ་ཤེས་ན་ཡང་། །དེ་ཡིས་དེ་ཉིད་མི་ཤེས་ཏེ། །དེ་དག་

ཀུན་ཀྱང་འབྲས་མེད་དོ། །བཅུ་གཉིས་ལྔ་ཡི་ལྔ་པ་ཡང་། །བརྒྱད་ཀྱི་མཐའ་རུ་འབྱུང་བ་འདུས། །སྒྲ་ཡིག་དང་པོ་ཡི་གེ་ཨ། །ལྔ་པ་ཡིས་ནི་ཡང་དག་བརྒྱན། །སྙིང་རྗེ་ཆེན་པོ་ལས་བྱུང་བ། །ཁ་མར་བལྟས་པའི་དྲུག་པས་བཏགས། །གདོད་མ་མཐའ་མ་མེད་པའི་ལྷ། །དེ་

ནི་སྤྱི་བོར་བསྟན་པ་ཡིན། །དེ་དག་གསང་ཆེན་དམ་པ་ཡིན། །ལྷ་མོ་བདག་གིས་རབ་བསྟན་ཏོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་མཱ་མ་ཀཱིས་ཞུས་པ་སྟེ་ལེའུ་གཉིས་པའོ།། །།དེ་ནས་ལྷ་མོ་གོས་དཀར་མོས། །ཡན་ལག་ཀུན་གྱིས་བཏུད་ནས་སུ། །ཐལ་

Vol. 81 · folio 279b

མོ་སྙིང་གར་སྦྱར་བྱས་ཏེ། །རྡོ་རྗེ་སེམས་དཔའ་ལ་གསོལ་པ། །ཆོས་ཀྱི་དབྱིངས་ཀྱི་བསྡུ་བ་དང་། །སྐུ་གསུང་ཐུགས་ཀྱི་རྡོ་རྗེ་ཡི། །རང་བཞིན་ཉིད་ནི་ཇི་ལྟར་ལགས། །ལྷ་ཡི་དབང་ཕྱུག་ཁྱོད་ལ་ཞུ། །གང་གིས་འོད་ཀྱི་གོང་བུར་བསྡུ། །རྡོ་རྗེ་སེམས་དཔའ་ཇི་ལྟར་

ལགས། །གསུངས་ཤིག་དེ་ཉིད་ཡིག་འབྲུའི་ཚིག །འདུས་པ་གསུངས་པ་ཇི་ལྟར་ལགས། །ཆུ་ཁམས་དང་ནི་མེ་ཡི་ཁམས། །ཇི་ལྟར་རོ་ནི་མཉམ་པོར་འགྱུར། །མ་ལས་སྐྱེ་བ་གསུམ་ཙམ་དང་། །དེ་བཞིན་ཕ་ལས་སྐྱེ་བ་གསུམ། །དེ་དག་དྲུག་སོགས་གོང་བུ་ལས། །

ཇི་ལྟར་མི་རྣམས་སྐྱེ་བ་ལགས། །སངས་རྒྱས་གཟུགས་ནི་བདག་མི་འཚལ། །ཐུབ་པ་ཆེན་པོས་བཀའ་སྩལ་མཛོད། །རྡོ་རྗེ་ཅན་གྱིས་བཀའ་སྩལ་པ། །གསང་བ་ཤིན་ཏུ་གསང་གྱུར་པ། །ཉོན་ཅིག་ལྷ་མོ་བཤད་པར་བྱ། །སྐྱེ་གནས་དབུས་སུ་རྩ་གཉིས་ནི། །གཡོན་

དང་དེ་བཞིན་གཡས་པ་སྟེ། །གཡོན་དུ་བྱང་ཆུབ་སེམས་ཞེས་བྱ། །གཡས་སུ་དེ་བཞིན་རཀྟའོ། །དེ་གཉིས་ཕྲད་ནས་གཅིག་འགྱུར་བ། །ཆོས་ཀྱི་དབྱིངས་ནི་འདུས་པ་ཡིན། །མུན་པ་སྐུ་སྟེ་རྡུལ་གསུང་གཟུགས། །ཐུགས་ཀྱི་རང་བཞིན་སྙིང་སྟོབས་ཏེ། །རྔུལ་ནི་རཀྟ་བྱང་

ཆུབ་སེམས། །མུན་པ་དེ་བཞིན་སྐྱེད་པ་ཡིན། །རྡོ་རྗེ་པདྨ་མཉམ་སྦྱར་ནས། །རང་བཞིན་མཉམ་པའི་རོར་འགྱུར་རོ། །དྲི་ཆེན་ཆུ་དང་ཤེལ་མེ་ཏོག །དེ་བཞིན་ལྔ་བ་བྱང་ཆུབ་སེམས། །བདུད་རྩི་ལྔ་དངོས་གོང་བུར་བསྡུས། །དེ་ལས་རྡོ་རྗེ་འདིར་གསུངས་སོ། །ཆ་ཤས་

གཉིས་པ་དང་ལྡན་པ། །དེ་བཞིན་དགུ་པ་ཡང་ཡིན་ནོ། །དེ་སྐད་གསུངས་པ་དེ་ལ་ནི། །སུམ་ཅུ་དང་ནི་བཅུ་དང་ནི། །དེ་བཞིན་ལྔ་པའི་ས་བོན་ཏེ། །ཆ་ཤས་གཉིས་པ་ལྔ་ཡིས་ནི། །དྲུག་གིས་བཏགས་པ་དེས་བྱུང་བ། །དེ་ནི་ཐིག་ལེར་གསུངས་པའོ། །ཆོས་ཀྱི་

དབྱིངས་ཀྱི་ཡིག་འབྲུ་བྲུྃ། །སྐྱེ་གནས་པདྨ་ལ་གནས་པ། །དེ་ཉིད་ས་བོན་སྭཱ་ཧཱཾ་མཐའ། །འདུས་པ་ལ་ནི་ཤེས་པར་བྱ། །ཆུ་ཁམས་ཕ་ལས་སྐྱེ་ཞེས་བྱ། །མེ་ཡི་ཁམས་ནི་མ་ལས་སྐྱེས། །ཤ་དང་ཁྲག་དང་པགས་བ་ཡང་། །མ་ལས་སྐྱེས་པ་ཞེས་བཤད་དོ། །ཚིལ་

Vol. 81 · folio 280a

དང་རྐང་དང་ཁུ་བ་ནི། །ཕ་ལས་སྐྱེས་ཞེས་བཤད་པ་ཡིན། །གོང་བུར་ཡང་དག་འདུས་པ་ནི། །དེ་དག་ཙམ་དུ་བཤད་པ་ཡིན། །གཟུགས་དང་ཚོར་བ་འདུ་ཤེས་དང་། །དེ་བཞིན་འདུ་བྱེད་རྣམ་ཤེས་རྣམས། །སངས་རྒྱས་དངོས་པོ་ལྔ་ཡི་གཟུགས། །ཕུང་

པོ་ཞེས་བྱར་བཤད་པའོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་ན་བཟའ་དཀར་མོས་ཞུས་པ་སྟེ་ལེའུ་གསུམ་བའོ།། །།དེ་ནས་བཞད་པའི་ཞལ་འགྱུར་ཏེ། །ལྷ་མོ་སྒྲོལ་མ་བཅོམ་ལྡན་མས། །རྡོ་རྗེ་སེམས་དཔའ་ལ་ཞུས་པ། །ཆོས་ཀྱི་དབྱིངས་

ཀྱི་སྒྲུབ་པ་ནི། །གསུངས་ཤིག་རྡོ་རྗེ་ཅན་ཆེན་པོ། །རྫས་རྣམས་སྒྲུབ་པར་བཀའ་སྩལ་འཚལ། །དེ་བཞིན་རིག་པའི་སྔགས་རྣམས་ཀྱང་། །དཀྱིལ་འཁོར་རྣམས་ནི་བརྟག་པ་དང་། །སྦྱིན་སྲེག་སོ་སོར་བྱ་བ་དང་། །དེ་བཞིན་མཆོད་པའི་ཆོག་ཡང་། །ཁྱད་པར་དུ་

ཡང་བཀའ་སྩལ་འཚལ། །དེ་ལྟར་ལྷ་མོས་ཞུས་མ་ཐག །རྡོ་རྗེ་སེམས་དཔས་བཀའ་སྩལ་པ། །ཆོས་ཀྱི་དབྱིངས་ཀྱི་སྒྲུབ་ཐབས་ནི། །ཉོན་ཅིག་ལྷ་མོ་བཤད་པར་བྱ། །གཟུགས་དང་སྒྲ་དང་དྲི་དང་ནི། །དེ་བཞིན་རོ་དང་རེག་ལ་སོགས། །ཁམས་བཅྭ་བརྒྱད་པོ་

དེ་དག་ཀྱང་། །ཆོས་ཀྱི་དབྱིངས་ཞེས་བྱ་བའོ། །དེ་དག་ཉིད་ལས་བྱུང་བ་ནི། །བྱང་ཆུབ་སེམས་ཞེས་ཤེས་པར་བྱ། །བྱང་ཆུབ་སེམས་ལས་གོང་བུ་སྐྱེ། །གོང་བུ་ལས་ཀྱང་ཡིད་སྐྱེད་དོ། །ཡིད་ལས་ནམ་མཁའི་ཁམས་ཀྱང་ནི། །ཁམས་རྣམས་དང་ནི་སྐྱེ་མཆེད་

རྣམས། །དབང་པོ་ཕུང་པོ་འབྱུང་བ་རྣམས། །དེ་ལྟར་དབྱིངས་སུ་བསྡུས་པ་སྟེ། །བསྡུ་བ་དེ་ནི་བསྟན་བྱས་པ། །ཆོས་ཀྱི་དབྱིངས་ཀྱི་སྒྲུབ་པ་ཡིན། །དེ་བས་ནན་ཏན་ཐམས་ཅད་ཀྱིས། །སྒྲུབ་པ་ཡང་དག་སྤྱད་པར་བྱ། །ཇི་ལྟར་ཀ་ལ་པ་ཞེས་དངོས་ཀྱིས། །བསྒྲུབ་

པར་བྱ་བ་རབ་ཏུ་བརྟག །ཆོས་དབྱིངས་སྒྲུབ་པ་བཤད་ནས་སུ། །རྫས་བརྒྱད་ཡན་ལག་སྒྲུབ་པ་བཤད། །རིལ་བུ་མིག་སྨན་དངོས་གྲུབ་དང་། །ས་འོག་རལ་གྲིའི་དངོས་གྲུབ་དང་། །ནམ་མཁར་འཕུར་དང་མིག་སྨན་དང་། །འཆི་བ་མེད་དང་ནད་འཇོམས་དང་། །

Vol. 81 · folio 280b

མི་དང་གླང་པོ་ཆེ་དང་རྟ། །གླང་དང་ཁྱི་དང་བོང་བུ་དང་། །རྔ་མོ་མ་ཧེ་སྤྱང་གི་རྣམས། །ཆ་ནི་མཉམ་པོར་བྱ་བའོ། །མཐེ་བོང་ཚིགས་ཚད་ཙམ་དུ་ནི། །ཤིན་ཏུ་མཉམ་པར་བཞག་ནས་སྦྱར། །དྲི་ཆེན་ཆུ་དང་རཀྟ་དང་། །བྱང་ཆུབ་སེམས་ནས་ཚད་ཙམ་ནི། །སྔགས་

བཟླས་ནས་ནི་སྦྱར་བྱས་ཏེ། །བྱིན་གྱིས་བརླབས་ཀྱང་བྱ་བའོ། །ཕྱག་འཚལ་དང་ནི་ཡི་གེ་ཨཱཿ། །དབུས་སུ་དེ་བཞིན་ཧཱུྃ་བྱས་ཏེ། །འབར་བའི་ཧཱུྃ་ཡིག་འབར་བྱེད་པ། །དགུ་པོ་དེ་ནི་རབ་ཏུ་བསྒྲུབ། །ལན་ནི་ཉི་ཤུ་རྩ་གཅིག་ཏུ། །སྔགས་བཟླས་ནས་ནི་བྱེ་མར་བཏགས། །

ཡུངས་ཀར་ལྔ་ཡི་ཚད་ཙམ་དུ། །ལྔ་དང་ལྔ་ནི་འབྱོར་པར་བྱ། །ཚེས་བརྒྱད་དང་ནི་བཅུ་བཞི་ལ། །རིལ་བུ་རྣམས་ནི་བྱས་ནས་སུ། །པདྨའི་སྣོད་ལ་བཞག་བྱས་ཏེ། །སྟོང་ཕྲག་བརྒྱར་ནི་བཟླ་བར་བྱ། །མཚམས་བཞི་ལ་ནི་བསྒོམ་བྱས་ནས། །ཉིན་དང་མཚན་དུ་བཟའ་

བར་བྱ། །དེ་ནས་བསྐལ་པའི་མཐའ་བར་ཡང་། །དངོས་གྲུབ་རྒྱས་པར་འགྲོ་བ་སྟེ། །གཟི་བརྗིད་མདངས་དང་སྟོབས་བརྩོན་འགྲུས། །ལྔ་པ་ལ་ནི་སྨོན་ལམ་ཡང་། །མངོན་པར་ཤེས་པ་ལྔ་ཐོབ་པ། །རིལ་བུ་ཆེན་པོ་ཟོས་ཕྱིར་རོ། །རྫས་ཀྱི་སྒྲུབ་པ་རྣམས་

རྫོགས་ནས། །རིག་པའི་སྔགས་རྣམས་བདག་ལ་སྩོལ། །ཡི་གེ་ཨེ་དང་བྃ་ཡིག་དང་། །ལྃ་ཡིག་དབུས་སུ་ཡང་དག་གནས། །དང་པོའི་མདོག་ནི་དམར་པོ་སྟེ། །གཉིས་པ་ཡི་ནི་མདོག་དཀར་བ། །གསུམ་པ་ཁ་དོག་སེར་བ་རྣམས། །བྷ་གའི་དབུས་སུ་

བསྒོམ་པར་བྱ། །འཁོར་ལོ་ལྟར་ནི་བསྐོར་བ་ནི། །ཉིན་ཕྱེད་དང་ནི་མཚན་བྱེད་ལ། །རིག་པ་དེ་ནི་རབ་འབྱོར་ན། །དེ་ནི་སྐད་ཅིག་ཁོ་ནར་འགྲུབ། །ལྷ་མོ་ལྷ་མིན་བུ་མོ་དང་། །མི་ཡི་བུ་མོ་རྣམ་པ་བཞི། །ས་ཡི་དཀྱིལ་འཁོར་ཀུན་དུ་ནི། །སྔགས་ཀྱིས་

བཀུག་ནས་སྤྱད་པར་བྱ། །བསྒོམ་པ་དེ་བཞིན་རིག་པའི་སྔགས། །བདག་གིས་བཤད་པ་ཟིན་བྱས་ཏེ། །དཀྱིལ་འཁོར་རྣམས་ནི་བཤད་པར་བྱ། །དགའ་མ་སེམས་ཀྱིས་རྩེ་གཅིག་ཉོན། །དཀྱིལ་འཁོར་ལུས་ཞེས་གསུངས་པ་སྟེ། །དཀྱིལ་འཁོར་བྷ་གར་བསྟན་

Vol. 81 · folio 281a

པ་ཡིན། །དཀྱིལ་འཁོར་བྱང་ཆུབ་སེམས་དང་ནི། །དཀྱིལ་འཁོར་གསུམ་དུ་བཏགས་པ་ཡིན། །བཏགས་པ་རྣམས་ཀྱང་འདུས་པ་སྟེ། །གང་དུ་གཙོ་བོ་སྐྱེད་བར་བྱེད། །ཕུང་པོ་རྣམས་ནི་སངས་རྒྱས་གསུངས། །འབྱུང་བ་རིག་མར་

བཏགས་པའོ། །ཆགས་པ་ལྕགས་ཀྱུ་ཁོ་ན་སྟེ། །ཞགས་པ་པདྨར་ཆུད་བྱེད་པ། །ཁ་ཕྲད་པ་ནི་སྒྲོག་ཡིན་པར། །སྒྲ་བསྒྲགས་པ་ནི་དྲིལ་བུར་བཤད། །སྤོས་ནི་དྲི་ཆེན་ཞེས་གསུངས་ཏེ། །མེ་ཏོག་རཀྟ་ཞེས་འདོད་དོ། །མར་མེ་ཤ་རྣམས་ཁོ་ན་ཡིན། །

དྲི་ནི་བྱང་ཆུབ་སེམས་ཞེས་འདོད། །སྒེག་མོ་ལིངྒར་བསྟན་པ་སྟེ། །ཕྲེང་བ་བྷ་ག་ཁོ་ན་ཡིན། །དབྱངས་མ་དབུགས་སུ་བསྟན་པ་དང་། །གར་མཁན་མ་ནི་རྣལ་འབྱོར་ཏེ། །བཅོམ་ལྡན་འདས་ཀྱིས་བཟང་པོར་གསུངས། །དེ་རྟོགས་བ་ནི་སྐལ་བཟང་ཡིན། །

རྟོགས་པ་དེ་རྣམས་བྱམས་པ་སོགས། །དེ་ལྟར་ནང་གི་བདག་ཉིད་གསུངས། །དཀྱིལ་འཁོར་གཞན་ནི་སྔོན་བཤད་ཟིན། །སྦྱིན་སྲེག་ལས་ནི་བཤད་པར་བྱ། །ཉོན་ཅིག་སྦྱིན་སྲེག་རྣམ་པ་བཞི། །སྦྱིན་སྲེག་ཕྱི་དང་ནང་གསུངས་ཏེ། །ཕྱི་ནི་སྔོན་དུ་བསྟན་པ་

ཡིན། །ཉོན་ཅིག་ཁྱོད་ཀྱིས་ནང་གི་ནི། །པདྨ་བཞི་རྣམས་འབྱོར་པ་ནི། །ལུས་ཀྱི་དབུས་སུ་ཉེ་བར་གནས། །མེ་དང་དེ་བཞིན་རླུང་དང་ནི། །དབང་ཆེན་དང་ནི་ཆུ་དེ་བཞིན། །རླུང་གིས་མེ་ནི་འབར་བྱས་ཏེ། །ཆུ་ཡིས་ཡོངས་སུ་སྨིན་པར་བྱེད། །དབང་ཆེན་

དཀྱིལ་འཁོར་ལས་བྱུང་བ། །གང་དུ་མེ་ནི་བསྐྱོད་པའོ། །ར་ཡིག་མངོན་སྤྱོད་ཡི་གེ་སྟེ། །ཡ་ཡིག་དབང་གི་ལས་ཁོ་ན། །ལ་ཡིག་རྒྱས་པར་འགྱུར་བ་སྟེ། །བ་ཡིག་ཞི་བ་ཞེས་གསུངས་སོ། །གང་ཞིག་ཟས་དང་བཏུང་བ་ནི། །དེ་དག་ཐམས་ཅད་ཆུ་

ལ་སྟེ། །པདྨ་ར་ཀྵཿཡིག་ཁ་མར་ལྟ། །སྙིང་གི་པདྨར་བཙུད་པར་བྱ། །ལྟེ་བའི་པདྨར་འགྲོ་ཕྱི་རོལ། །ཁ་སྦྱོར་ཚུལ་གྱི་སྦྱོར་བ་ཡིས། །གསང་བའི་པདྨར་འགྲོ་མ་ཐག །ཐལ་བར་མཐའ་རུ་རྣམ་པར་བསྟན། །དེ་ལྟར་སྦྱིན་སྲེག་བདག་བཤད་པ། །

Vol. 81 · folio 281b

ཉིན་དང་ཉིན་དུ་བྱ་བ་སྟེ། །རྟག་པར་རྒྱུན་དུ་ཟས་ཟོས་ན། །ཚེ་འདི་ཁོ་ནར་འགྲུབ་པར་འགྱུར། །རྒས་པ་མེད་ཅིང་ནད་ཀྱང་མེད། །འཆི་བ་མེད་ཅིང་འབྲས་རྣམས་མེད། །དེ་ནི་གློ་བུར་འཆི་བ་མེད། །འཚེ་བ་ཐམས་ཅད་ཟད་འགྱུར་ཞིང་། །རྨི་ལམ་ངན་

ཡང་ཞི་བར་འགྱུར། །བཟང་པོ་བསྐལ་པར་གསོན་བ་སྟེ། །སེམས་ཅན་ཐམས་ཅད་དགའ་བར་སྨྲ། །མཐོང་བ་ཙམ་གྱིས་སྐུལ་བྱེད་དོ། །སྦྱིན་སྲེག་ལས་རྣམས་བཤད་བྱས་ནས། །ལྷ་མོ་མཆོད་པ་བསྟན་པར་བྱ། །དྲི་དང་ཕྲེང་སོགས་གོས་རྣམས་དང་། །

སྤོས་མེ་ཟས་དང་ལྷ་བཤོས་ཀྱིས། །དབང་པོ་གཉིས་ནི་རབ་འབྱོར་ནས། །བདག་ལ་མཆོད་པ་རྣམས་ནི་བྱ། །བདག་ནི་ཐམས་ཅད་སངས་རྒྱས་ཉིད། །སངས་རྒྱས་ཀུན་གྱི་གནས་ཡིན་ཏེ། །དེ་བས་ནན་ཏན་ཐམས་ཅད་ཀྱིས། །རྣལ་འབྱོར་པས་ནི་

རྟག་ཏུ་མཆོད། །གང་ཞིག་འགའ་ཡང་བྱ་བའི་ལས། །རྣལ་འབྱོར་པ་ཡིས་མཆོད་པར་བསྒོམ། །ཟས་དང་བཏུང་བ་དེ་བཞིན་གོས། །དེ་བཞིན་དྲི་དང་ཕྲེང་ཁོ་ནས། །རིག་མ་བཞི་ཡིས་རྣམ་བརྒྱན་པའི། །བདག་ནི་ལྷ་ཉིད་བསམ་པར་བྱ། །དེ་ལྟར་

བཤད་ནས་རྡོ་རྗེ་དེ། །ཅང་མི་གསུང་བར་དངོས་པོར་བཞུགས། །དེ་ནས་ལྷ་མོ་བཞི་རྣམས་ཀྱིས། །ཕྱག་གིས་ཐལ་མོ་སྦྱར་གྱུར་ཏེ། །རབ་ཏུ་ཞལ་ནི་རྣམ་བཞད་ནས། །རབ་ཏུ་དང་བའི་སེམས་ཀྱིས་ནི། །རྣམ་པར་མི་རྟོག་པ་ཐོབ་སྟེ། །ཅང་མི་གསུང་

བར་བཞུགས་གྱུར་ཏོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་སྒྲོལ་མས་ཞུས་པའི་ལེའུ་སྟེ་བཞི་པའོ།། །།ཐམས་ཅད་ཀྱི་གསང་བའི་མཆོག་དམ་པ་གསང་ཆེན་ཞེས་བྱ་བའི་རྒྱུད། ལྷ་མོ་བཞིས་ཡོངས་སུ་ཞུས་པ་དཔལ་ཨོ་ཌྱན་གྱི་ཡུལ་ནས་

བྱུང་བ་རྣལ་འབྱོར་མ་ཆེན་མོའི་དེ་ཁོ་ན་ཉིད་རྫོགས་སྷོ།། །།རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཀཱིརྟི་ཉིད་ཀྱིས་བསྒྱུར་ཅིང་ཞུས་ཏེ་བཤད་ནས་གཏན་ལ་ཕབ་པ།། །།

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words