འཕགས་པ་ལག་ན་རྡོ་རྗེ་དབང་བསྐུར་བའི་རྒྱུད་ཆེན་པོ

Sanskrit title (Tibetan script, as in the text) ཨཱརྱ་བཛྲ་པཱ་ཎི་ཨ་བྷི་ཥེ་ཀ་མ་ཧཱ་ཏནྟྲ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 87 · folio 57b

ནས་ཀླུ་གང་ཡང་རུང་བ་མངོན་དུ་ཕྱོགས་ཏེ་མཆི་བར་མཐོང་ངམ་མཚོ་འཁྲུགས་ཏེ་དེ་ལ་མི་འཇིགས་པར་བགྱིས་ན་འགྲུབ་པར་འགྱུར་རོ། །ཐ་མར་སེང་ལྡེང་གི་ཡམ་སྲེག་ཤིང་ཡུངས་ཀར་གྱི་འབྲུ་མར་ལ་སྨྱུགས་པས་ལན་ཁྲི་བཟླས་བརྗོད་བགྱིས་ཏེ་དེ་ལྟ་ན་ཡང་འགྲུབ་བོ། །དེ་འགྲོ་

བའམ་མི་འགྲོ་བའི་དུག་རྣམས་ཀྱང་བསམས་པ་ཙམ་གྱིས་སེལ་བར་འགྱུར། སྒྲུབ་པ་པོའི་ལས་རྣམ་པ་སྣ་ཚོགས་གཞན་ཡང་བསམས་པ་ཙམ་གྱིས་བགྱིད་པར་འགྱུར་རོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་རྣམ་ཐོས་ཀྱི་བུས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་

སྐད་ཅེས་སྨྲས་སོ། །བཅོམ་ལྡན་འདས་བདག་ཀྱང་དཀྱིལ་འཁོར་ཆེན་པོ་རིམ་པར་ཕྱེ་བ་མང་པོ་འདིར་སྒྲུབ་པ་པོ་རྣམས་ཀྱི་ཕུན་སུམ་ཚོགས་པ་ཐམས་ཅད་སྩོལ་བར་བགྱིད་པའི་རང་གི་སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཡཀྵ་ཤ་ར། ཀིཉྩི་

རཱ་ཡ་སི། ས་མ་ཡ་མ་ནུ་སྨ་ར། དེ་བྷཱི་མེ། བཻ་ཤྲ་བ་ཎ་པྲི་ཡ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་བསྒྲུབ་པ་དེས་རིང་བསྲེལ་དང་བཅས་པའི་མཆོད་རྟེན་གྱི་དྲུང་དུ་གཅིག་པུ་མཆིས་ཏེ། སྙིང་པོ་འདི་ལན་ལྔ་འབུམ་བཟླས་བརྗོད་བགྱིའོ། །ཐ་མར་ཅི་འབྱོར་པས་

མཆོད་པར་བགྱིས་ལ་མཚན་ཐོག་ཐག་ཏུ་ཏིལ་ནག་པོ་ཞོ་དང་སྦྲང་རྩི་དང་མར་དང་བསྲེས་པས་ལན་སུམ་ཁྲི་སྦྱིན་སྲེག་བགྱིས་ན་གང་འཚལ་བ་དེ་སྩོལ་བར་འགྱུར་རོ། །ཟས་མི་འཚལ་བར་ལྐོག་ཏུ་དབེན་པར་གནོད་སྦྱིན་མོ་ཡིད་ལ་བགྱིས་ཏེ། ཉིན་ཞག་བདུན་དུ་ལན་ཁྲི་བཟླས་བརྗོད་

བགྱིས་ན་གནོད་སྦྱིན་མོ་སྩོལ་བར་འགྱུར་རོ། །ལོ་གཅིག་གི་བར་དུ་ཉིན་རེ་ཞིང་དྲན་པར་བགྱིས་ན་གཏེར་ཅིག་སྩོལ་བར་བགྱིད་དོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་འབྲོག་གནས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བདག་ཀྱང་དཀྱིལ་འཁོར་

རིམ་པར་ཕྱེ་བ་མང་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཁི་མི་སི་རི་སྨ་ཤྲི། པ་རི་པཱུ་ར་ཡ་ན་པྲ་ཏི་ཛྙཱ་མནྟ་ཀེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་གི་སྙིང་པོ་འདི་རྟག་ཏུ་དྲན་པར་བགྱིད་ན་དེའི་སླད་བཞིན་དུ་བདག་རྟག་

Vol. 87 · folio 58a

ཏུ་འབྲང་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་རིའི་རྩེ་མོར་མཆིས་ལ་ལན་སུམ་འབུམ་བཟླས་བརྗོད་བགྱི་ཞིང་ཡུངས་ཀར་དང་། ཞོ་དང་། སྦྲང་རྩི་དང་མར་བསྲེས་ལ་ལན་འབུམ་སྦྱིན་སྲེག་བགྱིས་ན་གང་འཚལ་བ་དེ་སྩོལ་ཏོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཡུལ་

འཁོར་སྲུང་གིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བི་དྷ་ར་དྷ་རི། གནྡྷ་རི་རི་སི་སྭཱ་ཧཱ། བཅོམ་ལྡན་འདས་གང་ལ་ལ་ཞིག་

སྙིང་པོ་འདི་དྲན་པར་བགྱིད་པ་དེ་ལ་དུས་མ་ལགས་པར་འགུམ་པར་མི་འབྱུང་ངོ་། །རྟག་ཏུ་དཔལ་གྱིས་འཁོར་བར་འགྱུར་རོ། །ཅི་སྟེ་བསྒྲུབ་པར་འཚལ་བ་དེས་ཟླ་བ་ཚེས་ནས་བཟུང་སྟེ་ཉའི་བར་དུ་ཉིན་གཅིག་བཞིན་མེ་ཏོག་གི་སྲེག་བླུགས་ལ་ལན་ཁྲི་སྦྱིན་སྲེག་བགྱིའོ། །དེ་ནས་ཉའི་གདུགས་ལ་ཅི་འབྱོར་

པས་མཆོད་པ་བགྱིས་ལ་མཚན་ཐོག་ཐག་འབྲས་ཀྱི་འོ་ཐུག་སྦྱིན་སྲེག་བགྱིས་ན་གྲུབ་པར་འགྱུར་ཏེ་གང་འཚལ་བ་དེ་སྩོལ་ཏོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་མིག་མི་བཟང་གིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཀྱང་བསམ་པ་ཐམས་ཅད་

ཡོངས་སུ་བཀང་བའི་སླད་དུ་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཤྲཱི་དྷི་དྷ་ར་ཡ་བི་རཱུ་པཱཀྵ་སྭཱ་ཧཱ། བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་བདག་གི་སྙིང་པོ་འདི་རྟག་ཏུ་དྲན་པར་བགྱིད་པ་དེའི་སླད་བཞིན་བདག་རྟག་

ཏུ་འབྲང་བར་བགྱིའོ། །བསམ་པ་ཐམས་ཅད་ཡོངས་སུ་རྫོགས་པར་བགྱིའོ། །ཅི་སྟེ་བསྒྲུབ་པར་འཚལ་ན་དེས་རིའི་རྩེ་མོར་མཆིས་ལ་ལན་སུམ་འབུམ་བཟླས་བརྗོད་བགྱིའོ། །དེ་ནས་ཉའི་གདུགས་ལ་ཅི་འབྱོར་པས་མཆོད་པ་བགྱིས་ལ་མཚན་ཐོག་ཐག་ཏུ་གུ་གུལ་ཤིང་གི་ཡམ་སྲེག་སྦྲང་རྩི་དང་མར་

ལ་སྨྱུགས་ལ་ལན་ཁྲི་སྦྱིན་སྲེག་བགྱིས་ན་འགྲུབ་པར་འགྱུར་ཏེ་གང་འཚལ་བ་དེ་སྩོལ་ཏོ། །མ་གྲུབ་ན་ཡང་ཡུལ་གྲུ་བཟང་པོ་ལྔ་སྩོལ་ཏོ། །དེ་ནས་ཆུ་དབང་རྨུགས་བྱེད་འཛིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཀྱང་དཀྱིལ་འཁོར་ཆེན་པོ་འདིར་སྒྲུབ་པ་པོ་

Vol. 87 · folio 58b

རྣམས་ཀྱི་དོན་ཐམས་ཅད་གྲུབ་པ་མཆོག་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀུ་རུ་ཙུ་རུ་མུ་རུ་ཛཾ་བྷ་ཛ་ལོད་བྷ་བ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་གི་སྙིང་པོ་འདི་རྟག་ཏུ་བཟླས་བརྗོད་བགྱིད་པ་དེ་ལ་ཅི་འཚལ་བ་དེ་བསྒྲུབ་པར་བགྱིའོ། །ཅི་སྟེ་བསྒྲུབ་པར་འཚལ་ན་

ཉི་མ་འགྱུར་བའི་ཚེ་རིའི་རྩེ་མོར་མཆིས་ལ་ལན་ས་ཡ་བཟླས་བརྗོད་བགྱིས་ན་རྒྱལ་སྲིད་དམ་གཏེར་ཆེན་པོ་སྩོལ་ཏོ། །གི་ཝང་ལ་ལན་ཅིག་བསྔགས་ཏེ་མིག་བསྐུས་ན་གང་ལ་བལྟས་བ་དེ་དབང་དུ་འགྱུར་རོ། །མཚན་མོ་གདོང་ལ་བསྔགས་ཏེ་བསམས་ནས་ཉལ་ན་ཅི་བསམས་པ་དེ་རྨི་ལམ་དུ་མཐོང་ངོ་། །

གོས་འདོད་ན་མེ་ཏོག་ཁ་དོག་ཅི་འདྲ་བ་ཆུར་བོར་བ་ཁ་དོག་དེ་འདྲ་བའི་གོས་དེ་དག་རྙེད་པར་འགྱུར་རོ། །ཕྱུགས་ཆུང་འདོད་ན་ཞག་བདུན་གསུམ་དུ་ཉི་མའི་གཟུགས་བརྙན་ལ་སྔགས་ལན་ཅིག་བཏབ་པའི་མེ་ཏོག་ཕོག་པར་བོར་ན་རྙེད་པར་འགྱུར་རོ། །རྟག་ཏུ་བཟླས་བརྗོད་བྱས་ན་དཔལ་ཆེ་བར་འགྱུར་རོ། །

དེ་ནས་ལག་བརྒྱད་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་འདི་ལྟ་སྟེ། འདོད་པ་ཐམས་ཅད་ཡོངས་སུ་བསྐང་བའི་སླད་དུ་བདག་ཀྱང་དཀྱིལ་འཁོར་ཆེན་པོ་མང་པོ་འདིར་རང་གི་སྙིང་པོ་དབུལ་བར་བགྱིའོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་

བྷྱཿ སརྦ་ཐཱ་ཙ་ཀྲ་དྭ་དྭ་བཱ་ཧུ་རཱ་ཛ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་གི་སྙིང་པོ་འདི་བསྒྲུབ་པར་བགྱིད་པ་དེས་བསྲུང་བར་བགྱིས་ལ་སྐྱེད་མོས་ཚལ་གྱི་ཕྱོགས་གཙང་མར་ཤིང་མྱ་ངན་འཚང་གི་འོག་ཏུ་ལན་སུམ་འབུམ་བཟླས་བརྗོད་བགྱིའོ། །ཐ་མར་གཞོན་ནུ་ལ་ཅི་འབྱོར་བས་མཆོད་དེ་

མཚན་ཐོག་ཐག་ཨ་ཀ་རུའི་བདུག་པ་བསྲེགས་ལ་བཟླས་བརྗོད་བགྱིས་ན་ནམ་ཕྱེད་དམ་ནང་པར་དེ་ལ་བདག་བསྟན་པར་བགྱིའོ། །དམ་པ་གང་འཚལ་བ་སྩོལ་ཏེ། ཟས་མི་ཟ་བར་ལན་འབུམ་བཟླས་བརྗོད་བགྱིས་ན་དེ་ཉིད་དུ་གནོད་སྦྱིན་མོ་མཆིའོ། །གང་འཚལ་བ་དེ་སྩོལ་ཏོ། །ཅི་སྟེ་མི་མཆི་ན་

འགུམ་པར་འགྱུར་རོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་གྱིས་བཏུད་ནས། བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཀྱང་སྒྲུབ་པ་པོ་གསང་སྔགས་བསྒྲུབ་པ་ལ་བརྩོན་པ་རྣམས་ལ་བསྲུང་བ་དང་། བསྐྱབ་པ་དང་། སྦ་བའི་སླད་

Vol. 87 · folio 59a

དུ་དཀྱིལ་འཁོར་ཆེན་པོ་འདིར་རང་གི་སྙིང་པོ་དབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་པཉྩ་ལ་པཉྩ་མུ་ཁ་པཉྩི་ཁ་ཧྲཱིཾ་ཧྲཱིཾཿརཀྵ་རཀྵ་སྭཱ་ཧཱ། བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་དཀྱིལ་འཁོར་ཆེན་པོ་འདིར་དམ་ཚིག་ཐོབ་སྟེ་

གསང་སྔགས་བསྒྲུབ་པར་འཚལ་ན་དེས་ཐོག་མ་ཁོ་ནར་བདག་གི་སྙིང་པོ་འདི་ལན་ཅིག་བརྗོད་པར་བགྱིའོ། །དེ་ལ་བསྲུང་བ་དང་བསྐྱབ་པ་དང་སྦ་བའི་སླད་དུ་བུ་ལྔ་བརྒྱའི་འཁོར་ཅན་བདག་དེའི་དྲུང་དུ་མཆི་བར་བགྱིའོ། །བདག་མཆི་བའི་སྔ་ལྟས་ནི་སྒྲུབ་པ་པོ་དེའི་ལུས་ལ་ལྷའི་སྤོས་དྲི་ཞིམ་པོའི་ངད་འབབ་

པར་འགྱུར། སྤྲོ་བའི་སྟོབས་ཕུན་སུམ་ཚོགས་པར་འགྱུར། བགེགས་ཐམས་ཅད་མ་མཆིས་པར་ཚེགས་ཆུང་ངུས་དེས་དངོས་གྲུབ་ཐོབ་པར་འགྱུར་རོ། །ཅི་སྟེ་བདག་གི་སྙིང་པོ་འདི་བསྒྲུབ་པར་འཚལ་ན་དེས་སངས་རྒྱས་བཅོམ་ལྡན་འདས་ཀྱི་སྤྱན་སྔར་ལན་སུམ་འབུམ་བཟླས་བརྗོད་བགྱིའོ། །

ཐ་མར་བ་དམར་སེར་གྱི་མར་ཟངས་ཀྱི་སྣོད་ཀྱི་ནང་དུ་བཞག་སྟེ་དུ་བ་འཐུལ་བའམ་འབར་གྱི་བར་དུ་བཟླས་བརྗོད་བགྱིས་ལ་དེ་འཐུངས་ན་གྱེན་དུ་འཕགས་པར་འགྱུར་རོ། །དུ་བ་འཐུལ་ན་ཐོས་པ་འཛིན་པར་འགྱུར་རོ། །ཅི་སྟེ་མ་གྲུབ་ན་ཡང་སྐྱེ་བོ་ཐམས་ཅད་དགའ་བར་འགྱུར་རོ། །རྟག་ཏུ་

བཟླས་བརྗོད་བགྱིས་ན་ནོར་འདུ་བར་འགྱུར་རོ། །བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་བགྱིས་ལ་བཅོམ་ལྡན་འདས་ཀྱི་སྤྱན་སྔར་བསམས་ནས་ལན་བརྒྱ་སྟོང་བཟླས་བརྗོད་བགྱིས་ན་འགྲུབ་པར་འགྱུར་ཏེ་གཞན་དུ་མི་འགྱུར་རོ། །དེ་ནས་ཐགས་བཟངས་རིས་ལ་སོགས་པ་

ལྷ་མ་ཡིན་གྱི་རྒྱལ་པོ་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་མང་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཏྲཾ་གི་ནི་བོ་དེ་དེ་མཱ་ལི་ནི་ཛ་ཏི་མི་ཧཱུཾ་སྭཱ་ཧཱ། བཅོམ་

ལྡན་འདས་གང་ལ་ལ་བདག་གི་སྙིང་པོ་མཆོག་ཏུ་གསང་ཆེན་དྲག་པོ་དམ་པ་འདི་བསྒྲུབ་པར་བགྱིད་པ་དེས་དཔལ་གྱི་སྒོ་མོའི་སྒོར་མཆིས་ལ་སྙིང་པོ་འདི་ལན་དྲུག་འབུམ་བཟླས་བརྗོད་བགྱིའོ། །ཐ་མར་དུག་དུག་དང་ཁྲག་དང་སྐེ་ཚེའི་འབྲུ་བསྲེས་པ་ལན་འབུམ་སྦྱིན་སྲེག་བགྱིས་ན་ལྷ་མ་ཡིན་གྱི་གནས་

Vol. 87 · folio 59b

ཐམས་ཅད་གཏན་པ་མ་མཆིས་ཤིང་འཁྲུལ་འཁོར་མ་མཆིས་བར་འགྱུར་རོ། །དེ་ནས་བདག་ཅག་གིས་རིམ་གྲོ་ཆར་བགྱིས་ཏེ་རིགས་ཀྱི་བུ་དེ་བཞུགས་པར་བགྱིའོ། །ཡོ་བྱད་ཐམས་ཅད་ཀྱང་སྩོལ་བར་བགྱིའོ། །དངུལ་ཆུ་དང་སྨན་བཅུད་ཀྱིས་ལེན་ཐམས་ཅད་ཀྱང་སྩལ་བར་བགྱིའོ། །

དེ་ནས་སྣ་ཚོགས་ཕྲེང་བ་ཅན་ལ་སོགས་པ་དྲི་ཟའི་རྒྱལ་པོ་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་མ་དྟ་

མ་ཏཾ་གི་སྭཱ་ཧཱ། འདི་ནི་བདག་ཅག་གི་སྙིང་པོ་ལགས་ཏེ་འདིས་དངོས་གྲུབ་སྩལ་བར་བགྱིའོ། །འདིས་བདག་ཅག་དྲི་ཟའི་རྒྱལ་པོ་ཞེས་བགྱིའོ། །ལྷའི་བདེ་བ་སྣ་ཚོགས་མྱོང་ངོ་། །མདོར་ན་བགྱི་བ་བགྱིད་པ་ཐམས་ཅད་ནུས་སོ། །མི་དང་མི་མ་ཡིན་པའི་གནས་ཐམས་ཅད་ན་མཆིས་སོ། །

ཅི་སྟེ་གང་ལ་ལ་ཞིག་བསྒྲུབ་པར་འཚལ་ན་དེས་ཐོག་མར་རི་ཕུག་ཏུ་ཅི་འབྱོར་པས་མཆོད་པ་བགྱིས་ལ་སྙིང་པོ་འདི་འབུམ་བཟླས་བརྗོད་བགྱིས་ན་དེ་ནས་འགྲུབ་པར་འགྱུར་རོ། །ཐ་མར་དུ་རུ་སྐའི་འབྲུ་མར་གྱི་མེ་བུས་ལ་ཨ་ག་རུའི་ཡམ་སྲེག་ཤིང་ཁྲི་སྦྱིན་སྲེག་བགྱིས་ན་དེ་ནས་དེའི་བསམ་པ་ཡོངས་

སུ་རྫོགས་པར་བགྱིའོ། །གི་ཝང་ལ་སྔགས་ཀྱིས་བཏབ་སྟེ་དཔྲལ་བར་ཐིག་ལེ་བགྱིས་ན་སྐྱེ་བོ་ཐམས་ཅད་དགའ་བར་འགྱུར་རོ། །ལག་མཐིལ་ལ་སྔགས་ཀྱིས་བཏབ་སྟེ་གདོང་ལ་བྱ་བས་ན་སྐྱེ་བོ་ཐམས་ཅད་དགའ་བར་འགྱུར་རོ། །དེ་ནས་མི་འམ་ཅིའི་རྒྱལ་པོ་ལྗོན་པ་ལ་སོགས་པ་མིའམ་

ཅིའི་རྒྱལ་པོ་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཏི་ཏི་ལི་ཕུ་སྭཱ་ཧཱ། བཅོམ་ལྡན་འདས་འདི་

ནི་བདག་ཅག་གི་སྙིང་པོ་ལགས་ཏེ་འདིས་བདག་ཅག་མིའམ་ཅིའི་རྒྱལ་པོ་ཞེས་བགྱིའོ། །སིལ་སྙན་དང་ཕེག་རྡོབ་པ་དང་རོལ་མོའི་སྒྲ་འབྱིན་ཅིང་ཐམས་ཅད་དུ་འཇིག་རྟེན་གྱི་ཁམས་ཀུན་དུ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་མཆིའོ། །ལྷ་དང་ཀླུའི་གནས་ཐམས་ཅད་

Vol. 87 · folio 60a

དུ་ཀུན་གྱིས་ཀྱང་བཀུར་ཏོ། །སྙིང་པོ་འདིས་ཅི་ལ་ཡང་མི་བརྗེད་དོ། །ཅི་སྟེ་གང་ལ་ལ་ཞིག་བསྒྲུབ་པར་འཚལ་ན་དེས་གཅིག་པུ་དགོན་པར་སློང་མོའི་ཟས་འཚལ་ཞིང་སྙིང་པོ་འདི་ལན་ཉིས་འབུམ་བཟླས་བརྗོད་བགྱིའོ། །ཐ་མར་བ་ལང་གི་ལྕི་བ་ས་ལ་མ་ལྷུང་བའི་སྣ་ལྔ་དང་བསྲེས་

པས་དཀྱིལ་འཁོར་བསྐུས་ལ་ཅི་འབྱོར་པས་མཆོད་དེ། གུར་གུམ་གྱི་སྲེག་བླུགས་ལན་ཁྲི་སྦྱིན་སྲེག་བགྱིས་ན་དེ་ནས་འགྲུབ་པར་འགྱུར་ཏེ་མིའམ་ཅིའི་གནས་ཐམས་ཅད་དུ་ཀུན་གྱིས་བཀུར་ཅིང་གང་འདོད་པ་དེ་བགྱིད་དོ། །དེ་ནས་རྣམ་པར་བདུད་ཀྱི་བུ་ལ་སོགས་པ་ནམ་མཁའ་ལྡིང་གི་རྒྱལ་པོ་

ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ར་ངྐཱ་རི་བི་ཥ་རི་བི་ཥེ་ཥ་ཎི་ཀྲྀནྟ་ནི་ཀུ་མཱ་རི་ཀེ་ཧ་སྭཱ་ཧཱ། ཕུ་ཕུ་སྭཱ་ཧཱ།

བདག་ཅག་གི་སྙིང་པོ་འདིས་ཀླུ་ཐམས་ཅད་རང་གི་དམ་ཚིག་ལ་དགོད་པར་བགྱིའོ། །སྙིང་པོ་འདིའི་མིང་ཐོས་པ་ཙམ་གྱིས་ཀླུ་ཐམས་ཅད་བདག་ཅག་གི་ཕྱག་བརྙན་དུ་འགྱུར་ཏེ་འཇིགས་ཤིང་ཞུམ་པ་དང་འདར་བ་དང་རེ་བ་ཆད་པར་འགྱུར། དུག་མ་མཆིས་ཤིང་ཕྱོགས་ཕྱོགས་སུ་འབྲོས་པར་འགྱུར་རོ། །

བཅོམ་ལྡན་འདས་ཇི་སྟེ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་སྙིང་པོ་འདི་བསྒྲུབ་པར་འཚལ་ན་དེས་མཚོ་ཆེན་པོར་ཞུགས་ལ་མིད་པ་ཙམ་ནུབ་པར་འགྲེང་སྟེ། སྙིང་པོ་འདི་ལན་འབུམ་བཟླས་བརྗོད་བགྱིས་ན་དེ་ནས་མཚོ་དེ་ཉིད་ཉིན་གཅིག་བཞིན་སྐམ་མོ། །ཀླུའི་གནས་ཐམས་ཅད་ཀྱང་འབར་

བར་འགྱུར་རོ། །རང་གི་གཟུགས་ཀྱང་སྟོན་ཏོ། །བགེགས་གཞན་བརྒྱ་དག་ཀྱང་བགྱིད་དེ་དེ་ལ་འཇིགས་པར་མི་བགྱིའོ། །དེ་ནས་མཚན་མ་དེ་དག་བྱུང་ནས་ཐ་མར་བ་ལང་གི་ལྕི་བ་ས་ལ་མ་ལྷུང་བ་དེ་ཉིད་ཀྱིས་རྒྱ་མཚོའི་ངོགས་སུ་དཀྱིལ་འཁོར་བསྐུས་ལ་བཅོམ་ལྡན་འདས་ལག་ན་རྡོ་རྗེ་ལ་ཅི་འབྱོར་པས་

མཆོད་དེ་དུག་དང་ཉེ་བའི་དུག་ཐམས་ཅད་ལས་ཀླུའི་རྒྱལ་པོ་བརྒྱད་བགྱིས་ལ་དེ་ནས་སྐེ་ཚེའི་འབྲུ་རེ་རེ་ནས་ཁྲག་གིས་བསྐུས་ཏེ་སྦྱིན་སྲེག་བགྱིའོ། །དེ་ནས་ཀླུ་ཐམས་ཅད་ལྷགས་ནས་དམ་པ་ལོང་ཤིག་ཅེས་མཆིས་ན་སྐྲག་པར་མི་བགྱིའོ། །འདི་སྐད་དུ་ཕྱག་བརྙན་དག་ཏུ་གྱུར་ཅིག་ཅེས་བརྗོད་

Vol. 87 · folio 60b

པར་བགྱིའོ། །དེ་བཞིན་དུ་གྱུར་ཅིག་ཅེས་སྨྲས་ནས་མི་སྣང་བར་འགྱུར་ཏེ་དེ་སླན་ཆད་ཅི་འཚལ་བ་དེ་བགྱིད་དོ། །དེ་ནས་འཇིགས་སུ་རུང་བ་ལ་སོགས་པ་སྲིན་པོའི་རྒྱལ་པོ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་

ཆེན་པོ་འདིར་རང་གི་སྙིང་པོ་དབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀཱཾ་འ་རི་ཎི་ལུཎྜི་ནི་སྭཱ་ཧཱ། བདག་ཅག་གི་སྙིང་པོ་འདིས་མི་ཐམས་ཅད་ཀྱི་གཟི་བརྗིད་དང་སྟོབས་འཕྲོག་པར་བགྱིའོ། །སེམས་ཅན་ཐམས་ཅད་གདུལ་བར་བགྱིའོ། །བཅོམ་ལྡན་འདས་མདོར་ན་

རྒྱུ་བ་དང་མི་རྒྱུ་བ་དང་བཅས་པའི་འཇིག་རྟེན་གསུམ་པོ་དག་ན་ཅི་ཡང་དཀོན་པ་མ་མཆིས་སོ། །བཅོམ་ལྡན་འདས་གང་ལ་ལ་ཞིག་འདི་བསྒྲུབ་པར་འཚལ་ན་དེས་དུར་ཁྲོད་དུ་དུ་བ་འཐུལ་བར་ཟས་སུ་ཤ་འཚལ་ཞིང་གོས་སྔོན་པོ་བགོས་ལ་ལག་ཏུ་རལ་གྲི་ཐོགས་ལ་སྙིང་པོ་འདི་ལན་འབུམ་བཟླས་བརྗོད་

བགྱིའོ། །ཐ་མར་འབྱུང་པོ་ཐམས་ཅད་པའི་གཏོར་མ་བགྱིའོ། །ཅི་འབྱོར་པས་མཆོད་པར་བགྱིས་ལ་ནམ་ཕྱེད་ཀྱི་བར་དུ་བཟླས་བརྗོད་བགྱིའོ། །དེ་ནས་སྲིན་པོའི་བདག་པོ་གང་ཡང་རུང་བ་ཞིག་མཆི་བར་འགྱུར་ཏེ་དེ་ལ་འཇིགས་པར་མི་བགྱི་བར་མཆོད་ཡོན་སྩལ་ན། བདག་ལ་འདོད་

པའི་གཟུགས་ཅན་གྱི་དངོས་གྲུབ་བྱིན་ཅིག་ཅེས་བརྗོད་པར་བགྱིའོ། །དེས་རལ་གྲི་དེ་བླངས་ནས་སྩོལ་བར་འགྱུར་ཏེ། དེ་ནས་ལྷའི་འགྲོ་བ་ཅན་དུ་འགྱུར། ངོ་མཚར་གྱི་ལས་རྣམ་པ་སྣ་ཚོགས་བགྱིད་པར་འགྱུར་རོ། །དེ་ནས་དྲང་སྲོང་ཆེན་པོ་མེས་བྱང་ཆུབ་སེམས་དཔའ་ལག་ན་རྡོ་རྗེ་

ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་སྒྲུབ་པ་པོ་རྣམས་ལ་སྨན་པའི་སླད་དུ་དཀྱིལ་འཁོར་ཆེན་པོ་འདིར་རང་གི་སྙིང་པོ་འདི་དབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀ་པཱི་ལ་ཛྱོ་ཏི་ནི་ར་ཎ་ད་བིངྒ་ལ་ལོ་ཙ་ན་སྭཱ་ཧཱ། བདག་གི་སྙིང་པོ་འདི་ནི་རེ་བ་

ཐམས་ཅད་ཡོངས་སུ་རྫོགས་པར་བགྱིད་པ་ལགས་ཏེ། འདིས་བདག་ཀྱང་བཀུག་སྟེ་དབང་དུ་མཆིའོ། །དཔལ་བསྐྱེད་པར་བགྱིའོ། །ནོར་སྩལ་བར་བགྱིའོ། །རྟག་ཏུ་བཟླས་བརྗོད་བགྱིས་ན་ནོར་འདུ་བར་འགྱུར་རོ། །སྙིང་པོ་འདིས་རྟག་ཏུ་བཟའ་བའི་སྦྱིན་སྲེག་བགྱིས་ན་བཟའ་བ་

Vol. 87 · folio 61a

འབྱུང་བར་འགྱུར་རོ། །མདོར་ན་རྫས་གང་གིས་སྦྱིན་སྲེག་བགྱིས་པའི་རྫས་དེ་འབྱུང་བར་འགྱུར་རོ། །ཅི་སྟེ་བསྒྲུབ་པར་འཚལ་ན་རིའི་རྩེ་མོར་མཆིས་ལ་སློང་མོའི་ཟས་འཚལ་ཞིང་སྙིང་པོ་འདི་ལན་སུམ་འབུམ་བཟླས་བརྗོད་བགྱིའོ། །ཐ་མར་ཅི་འབྱོར་པས་མཆོད་དེ་མེ་ཐབ་བགྱིས་

ལ་རྒྱ་ཤུག་གི་ཡམ་སྲེག་ཤིང་ཞོ་དང་སྦྲང་རྩི་དང་མར་སྨྱུགས་ལ་ལན་ཁྲི་སྦྱིན་སྲེག་བགྱིའོ། །དེ་ནས་གྲུབ་པར་འགྱུར་ཏེ་དགའ་མགུར་ལས་རྣམས་བགྱིད་དོ། །དེ་ནས་སྤྲིན་གྱི་ཕྲེང་བ་ཅན་ལ་སོགས་པ་རླུང་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་

སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །སྒྲུབ་པ་པོ་དངོས་གྲུབ་བསྒྲུབ་པར་འཚལ་པ་རྣམས་ཀྱི་བསམ་པ་ཐམས་ཅད་ཡོངས་སུ་རྫོགས་པར་བགྱིའོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བྷྲ་མ་ར་བྷྲ་མ་རེ། ཙ་པ་ལི་

ཙ་པ་ལི་ཀེ། ཧེ་རམ་བི་ནི་སྭཱ་ཧཱ། འདི་ནི་བདག་ཅག་གི་སྙིང་པོ་མཆོག་ལགས་ཏེ་འདིས་བདག་ཅག་དེ་བཞིན་གཤེགས་པའི་བཀའ་བཞིན་བགྱིད་དོ། །བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་ལུང་དང་མི་འགལ་བར་བགྱིའོ། །ཕན་པ་དང་

བདེ་བ་བསྒྲུབ་པར་བགྱིའོ། །བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པ་དེས་ཐོག་མར་སྙིང་པོ་འདི་ལན་སུམ་འབུམ་བཟླས་བརྗོད་བགྱིས་ན་དེ་ནས་བདག་ཅག་གིས་དེའི་བགྱི་བ་ཐམས་ཅད་གནང་བར་བགྱིའོ། །ཅི་སྟེ་གང་ལ་ལ་ཞིག་བསྒྲུབ་པར་འཚལ་ན་དེས་ཟས་མི་བཟའ་བར་ལན་ཁྲི་

བཟླས་བརྗོད་བགྱིའོ། །ཐ་མར་ཅི་འབྱོར་པས་མཆོད་དེ་བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་ལྔ་བགྱིའོ། །ཁ་དོག་སྣ་ཚོགས་ཀྱི་བ་དན་བདུན་བཞག་གོ། །དེ་ནས་བ་དན་འགུལ་གྱི་བར་དུ་བཟླས་བརྗོད་བགྱིས་ན་དེ་ནས་འགྲུབ་པར་འགྱུར་ཏེ་བསྐྱེད་པ་དང་དགག་པ་ལ་སོགས་པ་ལས་རྣམས་དགའ་

མགུར་བགྱིད་དོ། །དེ་ནས་སྐར་མའི་རྒྱལ་པོ་ཟླ་བས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་གདུང་བ་ཐམས་ཅད་རབ་ཏུ་ཞི་བར་བགྱིད་པ། དཔལ་ཡང་དག་པར་འཇོག་པར་བགྱིད་པ་དབུལ་ལོ། །

Vol. 87 · folio 61b

ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཙནྡྲ་ཀཱ་ན་ཏི་བི་ཤུད་དྷ་ཧཾ་ག་སྭཱ་ཧཱ། བཅོམ་ལྡན་འདས་བདག་ཅག་གི་སྙིང་པོ་འདི་ནི་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པ་རྣམས་ཀྱི་གདུང་བ་ཐམས་ཅད་རབ་ཏུ་ཞི་བར་བགྱིད་པ་ལགས་སོ། །རྟག་ཏུ་བཟླས་བརྗོད་བགྱིས་ན་བཀྲ་མི་ཤིས་པ་

རྣམས་སེལ་ཏོ། །དཔལ་སྐྱེད་དོ། །རྟག་ཏུ་སྐལ་བ་བཟང་པོ་སྩོལ་ཏོ། །ཅི་སྟེ་བསྒྲུབ་པར་འཚལ་ན་དེས་ཟས་སུ་འོ་མ་འཐུང་ཞིང་པདྨའི་རྫིང་དུ་ཞུགས་ལ་སྙིང་པོ་འདི་ལན་འབུམ་བཟླས་བརྗོད་བགྱིའོ། །ཐ་མར་ཟླ་བ་ཉལ་ཤེལ་ལམ་མར་སར་ལས་ཟླ་བ་བགྱིས་ལ་པདྨའི་འདབ་མའི་ཕྲག་ཏུ་སྩོལ་ཏེ་མཚན་ཐོག་

ཐག་བཟླས་བརྗོད་བགྱིས་ན་ནམ་ཕྱེད་དམ་ཉི་མ་འཆར་བའི་ཚེ་འོད་ཟེར་འབྱུང་སྟེ་བྱུང་ནས་ཀྱང་སྒྲུབ་པ་པོའི་ཁར་འཇུག་གོ། །དེ་ནས་འཁོར་ལོ་བཞིན་དུ་འཁོར་འཁོར་ནས་ཀུན་ནས་འཁོད་པར་གྱུར་ཏེ་འདུག་གོ། །དེ་ནས་གྲུབ་པར་འགྱུར་ཏེ་གདུང་བ་མ་མཆིས་པ་དང་ནམ་མཁའ་ལ་མཆི་བར་འགྱུར་ཏེ། བདག་

གི་གཞལ་མེད་ཁང་དུ་བསྐལ་པར་གནས་ཤིང་ལྷའི་བདེ་བ་དང་ལྡན་པར་གནས་པར་འགྱུར་རོ། །དཔལ་ཡང་མཆིས་པར་འགྱུར་ཏེ་རྒྱལ་སྲིད་ལ་སོགས་པ་གང་འདོད་པ་སྩོལ་ཏོ། །དེ་ནས་ཉི་མ་ལ་སོགས་པ་གཟའ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་

ལྡན་འདས་བདག་ཅག་གི་སྙིང་པོ་གཟི་བརྗིད་དང་སྟོབས་ཐམས་ཅད་པ་ཞེས་བགྱི་བ་མཆིས་ཏེ། སྒྲུབ་པ་པོ་རྣམས་ལ་ཕན་པ་དང་བདེ་བ་དང་ཚེ་རིང་བ་དང་ནད་མེད་པར་བགྱི་བའི་སླད་དུ་དེ་དཀྱིལ་འཁོར་ཆེན་པོ་འདིར་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་སིདྡྷ་བེདྱོ་ད་ན་སྭཱ་ཧཱ།

བཅོམ་ལྡན་འདས་སྒྲུབ་པ་པོ་གང་ལ་ལས་སྙིང་པོ་འདི་བཟླས་བརྗོད་བགྱིས་ན་དེ་ལ་ནད་ཐམས་ཅད་མི་འབྱུང་ངོ་། །རྟག་ཏུ་བཟླས་བརྗོད་བགྱིས་ན་གཟི་བརྗིད་ཅན་དུ་འགྱུར་རོ། །ཅི་སྟེ་བསྒྲུབ་པར་འཚལ་ན་དེས་འབབ་ཆུའི་འགྲམ་གྱི་བྱེ་མ་ལ་མར་མེ་ཁ་ལྔ་བུས་ལ་སྙིང་པོ་འདི་ལན་འབུམ་བཟླས་བརྗོད་བགྱིའོ།།

དེ་ནས་མེར་སྦྱིན་སྲེག་བགྱིས་ལ་ཉི་མ་ནུབ་ཀྱི་བར་དུ་བཟླས་བརྗོད་བགྱིའོ། །དེ་ནས་ཉི་མ་གང་ཡང་རུང་བ་ཞིག་མཆི་བར་འགྱུར་ཏེ། དེ་ལ་མཆོད་ཡོན་ལ་སོགས་པ་འཚལ་ལ་གང་འདོད་པ་དེ་བླངས་ལ་དེ་བཞིན་དུ་གྱུར་ཅིག་ཅེས་སྨྲས་ནས་མཆི་བར་འགྱུར་ཏེ་གང་འདོད་པ་དེ་བགྱིད་དོ། །གཞལ་མེད་ཁང་

Vol. 87 · folio 62a

གང་ཡང་རུང་བར་མཆིས་སོ། །དེ་ནས་ཀླུའི་རྒྱལ་པོ་ཆུ་ལྷ་ཀླུའི་རྒྱལ་པོ་དུ་མ་དང་ལྷན་ཅིག་ཏུ་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་འདིར་རང་གི་སྙིང་པོ་འབུལ་ལོ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་

ཐཱ་ཨ་པ་མ་པ་ཏི་བི་ར་ཛ་སྭཱ་ཧཱ། གང་ལ་ལ་ཞིག་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པ་དེས་སྙིང་པོ་འདི་བཟླས་བརྗོད་བགྱིས་ན་དེ་རང་བཞིན་གྱིས་ཡོངས་སུ་དག་པར་འགྱུར་རོ། །སྤྱོད་པ་གཙང་མ་ཐམས་ཅད་ལ་བློ་མངོན་སུམ་དུ་འགྱུར་རོ། །ཅི་སྟེ་བསྒྲུབ་པར་འཚལ་ན་རྒྱ་མཚོ་ཆེན་པོར་

མིད་པ་ནུབ་ཙམ་དུ་ཞུགས་ལ་སྙིང་པོ་འདི་ལན་འབུམ་ཕྲག་བཅུ་གཉིས་བཟླས་བརྗོད་བགྱིའོ། །དེ་ནས་ཐ་མར་རིན་པོ་ཆེ་སྣ་བཞི་ལས་ཀླུ་བགྱིས་ལ་ཅི་འབྱོར་པས་མཆོད་དེ་ཀླུའི་རྒྱལ་པོ་གང་ཡང་རུང་བ་ཞིག་གནས་ཀྱི་བར་དུ་བཟླས་བརྗོད་བགྱིས་ལ་མཆོད་ཡོན་སྩལ་ཏེ་ཅི་ལྟར་འདོད་པ་བཞིན་དུ་བྱིན་ཅིག་ཅེས་བརྗོད་

པར་བགྱིའོ། །དེ་ཕན་ཆད་གང་བསྒོ་བ་དེ་བགྱིད་དོ། །དེ་ཉིད་དུ་ཞུགས་ནས་ལོ་མང་པོར་གནས་སོ། །དེ་ནས་ཁྱབ་འཇུག་གིས་བྱང་ཆུབ་སེམས་དཔའ་ལག་ན་རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་

སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨེ་ཀ་ཨེ་ཀ །བ་ར་བ་ར། ཛྭཱ་ལ་ཛྭཱ་ལ། བིཥྞ་བེ་སྭཱ་ཧཱ། བཅོམ་ལྡན་འདས་བདག་གི་སྙིང་པོ་ནི་འདི་ལགས་ཏེ་འདིས་སྡང་བ་ཐམས་ཅད་བཟློག་པར་བགྱིའོ། །ཕུང་བར་བགྱིའོ། །ཡམས་ཀྱི་ནད་དང་གནོད་

པ་ཐམས་ཅད་མ་མཆིས་པར་བགྱིའོ། །གང་ལ་ལ་ཞིག་རྟག་ཏུ་དྲན་པར་བགྱིད་ན་དེའི་བློ་ཉམས་པར་མི་འགྱུར་རོ། །ཅི་སྟེ་སྙིང་པོ་འདི་བསྒྲུབ་པར་འཚལ་ན་རིའི་རྩེ་མོར་མཆིས་ལ་ལན་ལྔ་འབུམ་བཟླས་བརྗོད་བགྱིའོ། །ཐ་མར་གྲོག་མཁར་གྱི་རྩེ་མོའི་ས་དང་བའི་རྣམ་ལྔ་བསྲེས་པས་ཁྱབ་འཇུག་གི་གཟུགས་

ལག་པ་བཞི་པ་བགྱིས་ཏེ་ལག་པ་གཡོན་པ་གཅིག་ན་འཁོར་ལོ། །གཡས་པ་གཅིག་ན་དབྱུག་ཏོ། །གཡོན་པ་གཅིག་ན་དུང་། གཡས་པ་གཅིག་ན་དམ་པ་སྦྱིན་པར་བགྱིས་ལ་བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་བགྱིས་ཏེ་ཅི་འབྱོར་པས་མཆོད་ལ་ཁ་ནུབ་ཕྱོགས་སུ་བལྟས་ཏེ་མཆིས་ལ་

Vol. 87 · folio 62b

ཁྱབ་འཇུག་གི་གཟུགས་འགུལ་བའམ་དུང་སྒྲ་འབྱུང་གི་བར་དུ་བཟླས་བརྗོད་བགྱིས་ན་འགྲུབ་པར་འགྱུར་ཏེ་དགོས་པ་གང་བསམས་པ་དེ་ཐམས་ཅད་བགྱིད་དོ། །དེ་ནས་ཡི་དགས་ཀྱི་རྒྱལ་པོ་དྲག་པོས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ལ་

མཆོག་ཏུ་གསང་བའི་སྙིང་པོ་མཆིས་ཏེ་དེས་ན་བདག་ལས་དྲག་པོ་བགྱིད་པའི་སླད་དུ་སེམས་ཅན་ཐམས་ཅད་ཀྱིས་དྲག་པོ་ཞེས་བགྱི་བར་འཚལ་ལོ། །བཅོམ་ལྡན་འདས་སྙིང་པོ་འདིས་བདག་རྒྱུ་བ་དང་མི་རྒྱུ་བ་དང་བཅས་པའི་འཇིག་རྟེན་གསུམ་མ་རུང་བར་བགྱིད་དོ། །དབང་དུ་བགྱིད་དོ། །བཅོམ་ལྡན་

འདས་བདག་གི་སྙིང་པོ་འདི་དཀྱིལ་འཁོར་ཆེན་པོ་འདིར་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧཱུཾ་ཕཊ། བཅོམ་ལྡན་འདས་བདག་གི་སྙིང་པོ་འདི་ནི་ཐམས་ཅད་པའི་ནོར་ལགས་སོ། །བྱང་ཆུབ་སེམས་དཔའི་སྤྱོད་པ་གསང་སྔགས་ཀྱི་སྒོ་སྤྱོད་པ་གང་ལ་དྲན་པར་བགྱིད་

ན་བདག་རྟག་ཏུ་དེའི་སླད་བཞིན་དུ་འབྲང་བར་བགྱིའོ། །ཡི་དགས་ཀྱི་ཚོགས་ཐམས་ཅད་དང་ལྷན་ཅིག་བཀའ་བཞིན་དུ་བགྱིད་དོ། །འཇིག་རྟེན་གསུམ་ཡང་དབང་དུ་འགྱུར་རོ། །ཅི་སྟེ་བསྒྲུབ་པར་འཚལ་ན་དེས་དུར་ཁྲོད་དུ་ལུས་ཐལ་བས་བྱུགས་ལ་མི་མགོའི་ཐོད་པའི་ཕྲེང་བའི་རྒྱན་ཐོགས་ཤིང་

ལག་ན་མདུང་རྩེ་གསུམ་པ་ཐོགས་ཏེ་ཁྲིའི་ཟུར་ཤིང་ཁྱེར་ལ་སྟག་ལྤགས་ཀྱི་ཤམ་ཐབས་འཚལ་ཞིང་སློང་མོའི་ཟས་བབ་བབ་དུ་འཚལ་ལ་སྙིང་པོ་འདི་ལན་བཞི་འབུམ་བཟླས་བརྗོད་བགྱིའོ། །དེ་ནས་དུ་བ་འཐུལ་བའི་དུར་ཁྲོད་དུ་བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་བགྱིས་ཏེ་མདུང་རྩེ་

གསུམ་པ་དང་ཁྲིའི་ཟུར་ཤིང་བཞག་ལ་ཅི་འབྱོར་པའི་མཆོད་པ་བགྱིས་ནས་མི་ཤའི་བདུག་པ་བསྲེག་ཅིང་མཚན་ཐོག་ཐག་བརྗོད་པར་གྱིས་ན་དྲག་པོ་ཉིད་ཡི་དགས་མང་པོས་བསྐོར་ནས་འཇིགས་འཇིགས་ལྟ་ཆེན་པོའི་གཟུགས་ཅན་དུ་མཆི་བར་འགྱུར་ཏེ་དེ་ལ་མི་འཇིགས་པར་བགྱི་ཞིང་མཆོད་ཡོན་སྩོལ་ཏོ། །

དེ་ནས་འགྲུབ་པར་འགྱུར་རོ། །དགོས་པ་ཐམས་ཅད་ཀྱང་བགྱིད་དོ། །དེའི་སླད་དུ་འབྲང་ཞིང་བཀའ་སྡོད་པ་ལྷུར་ལེན་ཏོ། །དེ་ནས་འབྱུང་པོའི་བདག་པོ་དབང་ལྡན་གྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཀྱང་དཀྱིལ་འཁོར་ཆེན་

Vol. 87 · folio 63a

པོ་འདིར་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་པོ་ནྣེ་ཏེ་དཏྟ་བྷཱུ་ཏ་ཨ་དྷི་པ་ཏི་སྭཱ་ཧཱ། བཅོམ་ལྡན་འདས་བདག་གི་སྙིང་པོ་འདི་ནི་ཕུན་སུམ་ཚོགས་པ་ཐམས་ཅད་སྩོལ་བར་བགྱིད་པ་སྟེ། རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་སྙིང་པོ་འདི་རྟག་

ཏུ་དྲན་པར་བགྱིད་ན་བདག་རྟག་ཏུ་དེའི་སླད་བཞིན་དུ་འབྲང་བར་བགྱིའོ། །བསྲུང་བར་བགྱི། དཔལ་བསྐྱེད་པར་བགྱིའོ། །ཅི་སྟེ་བསྒྲུབ་པར་འཚལ་ན་དེས་སྐྱེད་མོས་ཚལ་དབེན་པའི་གནས་སུ་ཟས་ནུབ་མོ་འཚལ་ཞིང་སྙིང་པོ་འདི་ལན་འབུམ་བཟླས་བརྗོད་བགྱིའོ། །ཐ་མར་ཅི་འབྱོར་པས་མཆོད་པ་

བགྱིས་ཏེ་ཙནྡན་གྱི་བདུག་པ་བསྲེག་ཅིང་གཏོར་མ་རྒྱ་ཆེན་པོ་ཡང་ཕུལ། མར་གྱི་མར་མེ་བརྒྱད་ཀྱང་ཕུལ་ལ་ཉི་མ་ནུབ་པ་ནས་བརྩམས་ཏེ་ནམ་ཕྱེད་ཀྱི་བར་དུ་བརྗོད་པར་བགྱིའོ། །དེ་ནས་འགྲུབ་པར་འགྱུར་རོ། །དགོས་པ་ཐམས་ཅད་ཀྱང་བསྒྲུབ་པར་འགྱུར་རོ། །སྨན་བཅུད་ཀྱིས་ལེན་ཀྱང་སྩོལ་

ཏོ། །དེ་ནས་ལྷ་མོ་དཀའ་ཐུབ་ཟློག་གིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨུ་མ་ཡེ་སྭཱ་ཧཱ། བཅོམ་

ལྡན་འདས་བདག་གི་སྙིང་པོ་འདི་ནི་སྐལ་བ་བཟང་པོ་ཐམས་ཅད་བགྱིད་པ་སྟེ། མེ་ཏོག་གམ། སྤོས་སམ། ལིག་བུ་མིག་གམ། གི་ཝང་ལ་སྔགས་ལན་ཅིག་བཏབ་སྟེ་བཟླས་བརྗོད་བགྱིའོ། །རྟག་ཏུ་བཟླས་བརྗོད་བགྱིས་ན་སྐལ་བ་བཟང་པོར་འགྱུར་རོ། །ཅི་སྟེ་བསྒྲུབ་པར་འཚལ་ན་

དེས་བཟང་ལྡན་གྱི་སྙིང་པོ་ལ་ས་ཆོ་ག་རྒྱས་པར་ཉིས་འགྱུར་དུ་སྦྱར་ཏེ་བསྒྲུབ་པར་བགྱིའོ། །དེ་ནས་གཟའ་ཆེན་པོ་སྨིན་དྲུག་གི་བུས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཀྱང་དཀྱིལ་འཁོར་ཆེན་པོ་འདིར་ཡིད་རབ་ཏུ་དགའ་ཞིང་རང་གི་སྙིང་པོ་

འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧེ་ཀུ་མཱ་ར་ཛྭ་ལི་ཏ་མཱུ་རྟི་ཙ་རུ་ཙི་ཏྲ་མ་བ་ར་སྭཱ་ཧཱ། བདག་གི་སྙིང་པོ་འདི་ནི་ཐམས་ཅད་ཀུན་དུ་སྐྲག་པར་བགྱིད་པ་སྟེ་གང་ལ་ལ་ཞིག་རྟག་ཏུ་དྲན་པར་བགྱིད་ན་དེ་ལ་འཇིགས་པ་ཐམས་ཅད་མི་འབྱུང་ངོ་། །གླགས་ཚོལ་བའི་གདོན་ཐམས་

Vol. 87 · folio 63b

ཅད་ཀྱིས་གླགས་མི་ཐོད་དོ། །རྨ་བྱའི་མཇུག་མ་ལ་སྔགས་ཀྱིས་བཏབ་སྟེ་གདོན་གྱིས་བཏབ་པ་ལ་བྱ་བ་པ་བགྱི་ཞིང་དེའི་བདུག་པ་ཡང་བསྲེགས་ན་སོས་པར་འགྱུར་རོ། །ཅི་སྟེ་བསྒྲུབ་པར་འཚལ་ན་དེས་ཐོག་མར་བྱིས་པ་ཁྱེའུ་བརྒྱད་བཀུར་སྟི་ཆེར་བགྱིས་ཏེ་འཚལ་མ་སྩལ་ལ་དེ་དག་ཟས་གང་

ལ་སྲེད་པ་དེ་སྩོལ་ཏོ། །དེ་ནས་མ་མོའི་ཁྱིམ་དུ་ལག་ན་མདུང་ཐུང་ཐོགས་ལ་གཞོན་ནུའི་གཟུགས་ཅན་གྱིས་སྙིང་པོ་འདི་ལན་འབུམ་བཟླས་བརྗོད་བགྱིའོ། །ཐ་མར་མ་མོའི་དཀྱིལ་འཁོར་དེ་ཉིད་དུ་མཆོད་པ་ཅི་འབྱོར་པས་མཆོད་པ་བགྱིས་ཏེ་འབབ་ཆུའི་འགྲམ་གཉིས་ཀྱི་འཇིམ་པ་ལས་གཟུགས་

བརྙན་བགྱིས་ལ། སྙིང་གར་མདུང་ཐུང་བཙུགས་ཏེ་ཇི་སྲིད་ཤིའོ་ཞེའམ་རྒྱབ་ཆག་གོ་ཞེས་ས་སྒྲ་གྲག་གི་བར་དུ་བཟླས་བརྗོད་བགྱིས་ན་གྲུབ་པར་འགྱུར་རོ། །དེ་སླན་ཆད་ཅི་འཚལ་བ་དེ་བགྱིད་དོ། །དེ་ནས་ལྷའི་བུ་སྤྲིན་དཀར་སྤྲིན་གྱི་ལྷའི་བུ་ཐམས་ཅད་དང་ལྷན་ཅིག་ཏུ་བྱང་ཆུབ་སེམས་དཔའ་ལག་ན་

རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་གུ་ལུ་གུ་ལུ། གརྫ་གརྫ། མ་ཧཱ་སྦུད་བྷ་བ། བ་ར་བིནྡུ་ཏུཏྨཱ་

ལ། དར་དར། པུ་ར་པུ་ར། ཀ་ས་ཀ་ས་སྭཱ་ཧཱ། བདག་ཅག་གི་སྙིང་པོ་འདི་ནི་འགྲོ་བ་ཐམས་ཅད་ལ་སྨན་པར་བགྱིད་པ་སྟེ། འདིས་ནི་བདག་ཅག་རྒྱ་ཆེ་ཞིང་སྟུག་པའི་སྤྲིན་གྱི་དྲ་བས་ནམ་མཁའི་དཀྱིལ་ཁེབས་པར་བྱིན་གྱིས་བརླབས་ནས་ལོ་ཏོག་ཐམས་ཅད་སྒྲུབ་པར་བགྱིད་དོ། །ས་ཆེན་

པོ་འདི་ཡང་ཆར་པའི་རྒྱུན་ཆེན་པོས་ཚིམ་པར་བགྱིད་དོ། །བཅོམ་ལྡན་འདས་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་གང་ལ་ལ་ཞིག་རྟག་ཏུ་དྲན་པར་བགྱིད་ན་དེ་ལ་ཆུས་ཕོངས་པའི་འཇིགས་པ་མི་འབྱུང་ངོ་། །ལུས་ལ་ནད་ཐམས་ཅད་མི་འབྱུང་ངོ་། །

དེའི་བསམ་པ་ཐམས་ཅད་ཀྱང་ཡོངས་སུ་རྫོགས་པར་མཆིའོ། །ཅི་སྟེ་བསྒྲུབ་པར་འཚལ་ན་དེས་བྱམས་པ་དང་ལྡན་པས་ཟླ་བ་དྲུག་ཏུ་ཟླ་བ་ཤར་བ་ནས་བརྩམས་ཏེ་ཟླ་བ་ཤར་བའི་བར་དུ་བཟླས་བརྗོད་བགྱིའོ། །ཟླ་བ་དྲུག་ཚང་ནས་ཅི་འབྱོར་བས་མཆོད་པ་བགྱིས་ཏེ་རྒྱ་མཚོ་ཆེན་པོ་བཞི་

Vol. 87 · folio 64a

ལས་ཆུ་བླངས་ལ། བུམ་པ་ཞབས་ནག་པོ་མེད་པ་བཀང་སྟེ་སྤོས་དང་། མེ་ཏོག་དང་། བདུག་པས་མཆོད་ལ། ནམ་ཆུ་ལས་དབུ་བ་འབྱུང་ཞིང་གྱེན་དུ་འཐོར་བ་དང་སྒྲ་འབུག་འབུག་པོའམ་འབྲུག་གི་སྒྲ་གྲག་གི་བར་དུ་བཟླས་བརྗོད་བགྱིས་ན། ལྷའི་བུ་ཆར་སྤྲིན་གང་ཡང་

རུང་བ་ཞིག་མཆིས་ནས་ཆུ་བར་སྣང་ལ་འཐོར་རོ། །དེ་ནས་གྲུབ་པར་འགྱུར་ཏེ་འདོད་པ་བཞིན་དགོས་པ་ཐམས་ཅད་བགྱིད་དོ། །དེ་ནས་གློག་སྤྲིན་འཇོམས་པ་དང་། གློག་གཟི་བརྗིད་དང་། གློག་འོད་སྣང་དང་། གློག་ཕྲེང་བཟང་ཞེས་བྱ་བ་རྣམས་ཀྱིས། བྱང་ཆུབ་སེམས་དཔའ་ལག་ན་

རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །བཅོམ་ལྡན་འདས་གནོད་པ་ཐམས་ཅད་ཞི་བར་བགྱི་བའི་སླད་དུ་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་དྷཱ་ར་ཡ་དྷཱ་ར་ཡ། སྥུ་ར་

སརྦ་མ་ཧཱ་པྲི་ཏི་ཀ་ར་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་དྲན་པར་བགྱིད་ན་དེ་ལ་བདག་ཅག་གིས་བསྲུང་བར་བགྱིའོ། །ཡོངས་སུ་བསྐྱབ་པ་དང་སྦ་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་ཕྱོགས་བཞིར་སྒྲོན་མེ་བུས་ཤིང་ཕྱོགས་བཞིར་བདུག་པས་བདུགས་ལ་ཅི་

འབྱོར་པའི་མཆོད་པ་བགྱིས་ཏེ། ཕྱོགས་བཞིར་ཁ་དོག་ཅི་ལྟ་བ་བཞིན་དུ་བུམ་པ་བཞི་བཞག་པ་ལ་མཚན་ཐོག་ཐག་བཟླས་བརྗོད་བགྱིའོ། །དེ་ནས་ཕྱོགས་བཞིར་གློག་བྱུང་བ་ལ་འཇིགས་པར་མི་བགྱིད་པར་ཐམས་ཅད་ལ་མཆོད་ཡོན་སྩལ་ན་འགྲུབ་པར་འགྱུར་ཏེ། རང་གི་གནས་སུ་ཁྲིད་

ནས་བསྲུང་བར་བགྱིད། ཡིད་ཀྱིས་བསམས་པ་རྣམས་སྒྲུབ་པར་བགྱིད་དོ། །གང་འདོད་པའི་དམ་པ་དེ་སྩོལ་ཏོ། །དེ་ནས་རིའི་རྒྱལ་པོ་རི་རབ་ལ་སོགས་པ་རིའི་རྒྱལ་པོ་ཆེན་པོ་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །

བཅོམ་ལྡན་འདས་བདག་ཅག་ཀྱང་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་དོན་གྱི་སླད་དུ་དཀྱིལ་འཁོར་ཆེན་པོ་འདིར་རང་གི་སྙིང་པོ་དབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿསརྦ་ཐཱ་ཙ་ལ་ཙ་ལ། མ་ཧཱི་དྷ་ར། རཏྣ་

Vol. 87 · folio 64b

དྷ་ར་སྭཱ་ཧཱ། བཅོམ་ལྡན་འདས་བདག་ཅག་གི་སྙིང་པོ་འདི་གང་ཞིག་རྟག་ཏུ་དྲན་པར་བགྱིད་ན་དེ་དགོན་པར་མཆིས་པའི་ཚེ། བདག་ཅག་གིས་བསྲུང་བ་དང་། བསྐྱབ་པ་དང་། སྦ་བར་བགྱིའོ། །བདེ་བའི་ཡོ་བྱད་ཐམས་ཅད་ཀྱང་བགྱིའོ། །ཅི་སྟེ་བསྒྲུབ་པར་འཚལ་ན་དེས་རིའི་

རྩེ་མོར་འཛེགས་ལ་སྙིང་པོ་འདི་ལན་འབུམ་བཟླས་བརྗོད་བགྱིའོ། །དེ་ནས་ཅི་འབྱོར་བའི་མཆོད་པ་བགྱིས་ཏེ་འོ་མ་དང་། ཞོ་དང་། སྦྲང་རྩི་དང་། མར་དང་བསྲེས་པའི་སྲེག་བླུགས་ལན་ཁྲི་སྦྱིན་སྲེག་བགྱིའོ། །དེ་ནས་བདག་ཅག་རིའི་རྒྱལ་པོ་གང་ཡང་རུང་བ་ཞིག་མཆིས་ཏེ་འདི་སྐད་ཅེས་

སྨྲའོ། །བུ་ཚུར་ཤེག་ངེད་ཀྱི་གནས་སུ་འདོང་། ཅི་འདོད་པ་དེ་སྦྱིན་ནོ་ཞེས་སྨྲའོ། །དེས་ཀྱང་ནམ་བདག་དགོས་ཏེ་དྲན་པའི་ཚེ་ཚུར་ཤོག་ཅིག་ཅེས་སྨྲས་ནས་དེ་བཞིན་དུ་གྱུར་ཅིག །ཐམས་ཅད་བགྱི་ཡིས་ཁྱོད་སུ་ལ་ཡང་མ་སློང་ཞིག་ཅེས་སྨྲའོ། །དེ་ནས་གཤིན་རྗེ་དང་། མཚན་མོ་ནག་

མོ་དང་། བེ་ཅོན་ནག་པོ་ཅན་དང་། སྐྱེས་བུ་ནག་པོ་དང་། རྣ་ནག་མོ་དང་། དཔལ་སྦྱིན་མ་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་རང་གི་སྙིང་པོ་འབུལ་ལོ། ན་མཿ

སརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བཻ་བྷཱ་ས་ཏྭཱ་ཡ་སྭཱ་ཧཱ། བཅོམ་ལྡན་འདས་བདག་ཅག་གི་སྙིང་པོ་འདི་གང་ལ་ལ་ཞིག་རྟག་ཏུ་དྲན་པར་བགྱིད་ན། བདག་གིས་དེ་གསད་དགུག་གི་སླད་དུ་རང་གི་གཡོག་འཁོར་མི་དགྱེ་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་ཟླ་བ་མར་

གྱི་ངོའི་ཞག་བཅུ་བཞི་པའམ་ཞག་བརྒྱད་ལ་སྨྱུང་བ་བགྱིས་ཏེ། འབྲས་སཱ་ལུ་བཏགས་པའི་ཕྱེ་ལས་གཤིན་རྗེ་སོར་བརྒྱད་དམ་སོར་དྲུག་པ་འཁོར་དང་བཅས་པ་བགྱིས་ལ་མ་ཧེ་དང་བེ་ཅོན་ཡང་ངོས་གཉིས་སུ་བཞག་སྟེ། དེ་ནས་ཅི་འབྱོར་པའི་མཆོད་པ་བགྱིས་ནས་མཚན་ཐོག་ཐག་

བཟླས་བརྗོད་བགྱིས་ན། ནམ་ཕྱེད་དམ། ཉི་མ་ཤར་ཀ་ན་མ་ཧེ་སྒྲ་འབྱིན་ཏམ། བེ་ཅོན་འགུལ་ཏེ་མཆོད་ཡོན་ལ་སོགས་པ་སྩལ་ལ་བྲི་བར་བགྱིའོ། །དེ་ནས་འགྲུབ་པར་འགྱུར་རོ། །འདོད་པའི་ལས་རྣམས་བགྱིད་དོ། །དེ་ནས་མཚན་མོ་ནག་མོས་རང་གི་སྙིང་པོ་སྨྲས་པ།

Vol. 87 · folio 65a

ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བི་ཀ་རཱ་ལེ་རཱ་ཏྲི་མཱ་ཏེ་སྭཱ་ཧཱ། གང་ལ་ལ་རྟག་ཏུ་དྲན་པར་བགྱིད་ན་དེ་བདག་གིས་བསྲུང་བར་བགྱིའོ། །ཅི་སྟེ་བསྒྲུབ་པར་འཚལ་ན་སྔ་མ་བཞིན་ནོ། །བེ་ཅོན་ནག་པོས་ཀྱང་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་

ཁེ་བྷྱཿ། སརྦ་ཐཱ་ཏ་མོ་ད་བྷ་བཱ། ཀཱ་ལ་པཱ་ཤ་ག་སྭཱ་ཧཱ། བཅོམ་ལྡན་འདས་གང་ལ་ལ་ཞིག་རྟག་ཏུ་དྲན་པར་བགྱིད་ན་བདག་དེའི་དྲུང་དུ་མི་མཆིའོ། །ཕན་གདགས་པའང་བསྒྲུབ་པར་བགྱིའོ། །ཅི་སྟེ་བསྒྲུབ་པར་འཚལ་ན་དེས་སྔ་མ་བཞིན་དུ་བསྒྲུབ་པར་བགྱི་སྟེ། བདག་གིས་དེའི་བསམ་

པ་ཐམས་ཅད་ཡོངས་སུ་རྫོགས་པར་བགྱིའོ། །དེ་ནས་སྐྱེས་བུ་ནག་པོས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨུཏྟ་མ་བུ་རུ་ཥ་སྭཱ་ཧཱ། བཅོམ་ལྡན་འདས་བདག་གི་སྙིང་པོ་འདི་གང་ལ་ལ་ཞིག་རྟག་ཏུ་དྲན་པར་བགྱིད་ན། བཅོམ་ལྡན་འདས་བདག་

དེའི་དྲུང་དུ་མི་མཆི་བར་ཕན་གདགས་པར་བགྱིའོ། །ཅི་སྟེ་བསྒྲུབ་པར་འཚལ་ན་སྔ་མ་བཞིན་དུ་བསྒྲུབ་པར་བགྱིའོ། །ཁྱད་པར་ཅུང་ཟད་ནི་འདི་ལྟ་སྟེ། སྐྲའི་ཞགས་པ་ནི་གཉིས་གཞག་པར་བགྱིའོ། །བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །དེ་ནས་འཆི་བདག་གིས་རང་

གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨ་པྲ་ཏི་ཧ་ཏ་ཀ་དེ་ཀརྨྨ་བ་ཤ་ཨ་བུ་ཀེ་དེ་བེ་བ་ར་དེ་སྭཱ་ཧཱ། བཅོམ་ལྡན་འདས་བདག་གི་སྙིང་པོ་འདི་གང་ལ་ལ་ཞིག་རྟག་ཏུ་དྲན་པར་བགྱིད་ན་བདག་དེའི་དྲུང་དུ་མི་མཆི་སྟེ་སྔོན་གྱི་ལས་ནི་མ་གཏོགས་སོ། །ཅི་སྟེ་བསྒྲུབ་པར་

འཚལ་ན་དེས་སྔ་མ་བཞིན་དུ་བསྒྲུབ་པར་བགྱི་སྟེ་དྲིལ་བུ་གཞག་གོ། །དེ་ནས་དཔའ་བྱེད་ཀྱིས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བཱ་ཀྲྀ་ཏི་མ་ཧཱ་ཏྲཻ་ཏྱེ་བྷ་ག་བ་ཏི། མུ་ཏི་མུ་ཁི་སྭཱ་ཧཱ། གང་ལ་ལ་ཞིག་རྟག་ཏུ་དྲན་པར་བགྱིད་ན་བདག་དེའི་དྲུང་དུ་མི་མཆི་སྟེ།

འཕགས་པ་ལ་སྐུར་པ་འདེབས་པ་དང་། དམ་པའི་ཆོས་སྤོང་བ་དང་། བླ་མ་ལ་སྨོད་པ་ནི་མ་གཏོགས་སོ། །ཅི་སྟེ་བསྒྲུབ་པར་འཚལ་ན་དེས་སྔ་མ་བཞིན་དུ་བསྒྲུབ་པར་བགྱིའོ། །འབྲས་ཀྱི་འོ་ཐུག་ལན་ཚྭ་ཅན་གཞག་པར་བགྱི་སྟེ། ཕུན་སུམ་ཚོགས་པ་ཐམས་ཅད་སྩོལ་ཏོ། །དེ་ནས་རྣ་

Vol. 87 · folio 65b

ནག་མོས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀཱ་ལ་ཙ་ཀྲ་ཎི་སྭཱ་ཧཱ། གང་ལ་ལ་ཞིག་རྟག་ཏུ་དྲན་པར་བགྱིད་ན་བདག་དེའི་དྲུང་དུ་མི་མཆི་སྟེ་ཕ་དང་མ་མི་དགའ་བར་བགྱིས་པ་ནི་མ་གཏོགས་སོ། །ཅི་སྟེ་བསྒྲུབ་པར་འཚལ་ན་དེས་སྔ་མ་བཞིན་དུ་བསྒྲུབ་པར་

བགྱིའོ། །བྱེ་བྲག་ཏུ་ནི་ཕུབ་མའི་མེ་དང་བཅས་པའི་མེ་སྣོད་གཞག་པར་བགྱིའོ། །སུ་ཞིག་དེ་ལྟར་བགྱིད་ན་བདག་རྟག་ཏུ་དེའི་སླད་བཞིན་འབྲང་བར་བགྱིའོ། །དེ་ནས་མ་མོ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །

བཅོམ་ལྡན་འདས་མ་མོ་དྲག་མོ་བདག་ཅག་ཀྱང་འཇིག་རྟེན་ལ་ཕན་གདགས་པའི་སླད་དུ། གྲོང་དང་ལྗོངས་ཐམས་ཅད་དུ་གནས་པར་བགྱིའོ། །དཀྱིལ་འཁོར་ཆེན་པོ་འདིར་བདག་ཅག་སོ་སོའི་སྙིང་པོ་འབུལ་བར་བགྱིའོ། །དེ་ནས་ཚངས་པའི་ཆུང་མས་རང་གི་སྙིང་པོ་སྨྲས་པ། ན་མཿ

སརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨོཾ་བྲཧྨ་པ་ཏི་ནི་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་ན་བདག་རྟག་ཏུ་དེའི་སླད་བཞིན་དུ་འབྲང་བར་བགྱིའོ། །མ་མོ་ཐམས་ཅད་ཀྱང་ཡི་རངས་ནས་རྟག་ཏུ་བསྲུང་བར་བགྱིད་དོ། །ཅི་སྟེ་བསྒྲུབ་པར་

འཚལ་ན་དེས་ཨོཾ་ཞེས་བགྱི་བ་སྙིང་གར་བསམས་ལ་ལན་འབུམ་བཟླས་བརྗོད་བགྱིའོ། །དེ་ནས་མ་མོའི་དཀྱིལ་འཁོར་བགྱིས་ལ་ཅི་འབྱོར་པས་མཆོད་དེ་མཚན་ཐོག་ཐག་ཏུ་སྔགས་བགྲང་། ནོར་བུ་དང་རིལ་བ་སྤྱི་བླུགས་ལག་ན་ཐོགས་ལ་ཨོཾ་ཞེས་བགྱི་བའི་སྒྲ་གྲག་གི་བར་དུ་བཟླས་

བརྗོད་བགྱིའོ། །དེ་ནས་གྲུབ་པར་འགྱུར་ཏེ་གང་འཚལ་བའི་ལས་དེ་བགྱིད་དོ། །གང་འཚལ་བ་དེ་སྩོལ་ཏོ། །དེ་ནས་དྲག་པོའི་ཆུང་མས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧྲཱིཿཕཊ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་

གི་སྙིང་པོ་འདི་རྒྱུན་དུ་དྲན་པར་བགྱིད་ན། བདག་རྟག་ཏུ་དེའི་སླད་བཞིན་དུ་འབྲང་ཞིང་བསྒོ་བ་བཞིན་བགྱིའོ། །གང་བསམས་པ་དེ་སྩོལ་ཏོ། །ཅི་སྟེ་བསྒྲུབ་པར་འཚལ་ན་སློང་མོའི་ཟས་བཟའ་ཞིང་དུར་ཁྲོད་ན་མཚན་གཅིག་མཆིས་པར་ལྷ་ཆེན་པོའི་གློ་གཡས་པར་ལན་ཉིས་འབུམ་

Vol. 87 · folio 66a

བཟླས་བརྗོད་བགྱིའོ། །ཐ་མར་ཅི་འབྱོར་པས་མཆོད་དེ་ད་ཏུ་ཀེ་ར་ཀའི་མེ་ཏོག་ཞོ་དང་སྦྲང་རྩི་དང་མར་ལ་སྨྱུགས་པ་བཞི་ཁྲི་དུར་ཁྲོད་ཀྱི་མེར་སྦྱིན་སྲེག་བགྱིའོ། །ནམ་ཕྱེད་ན་ཁྱུ་མཆོག་གི་སྒྲའམ། ཨོཾ་ཞེས་བགྱི་བའི་སྒྲ་གྲག་པར་འགྱུར་ཏེ་དེ་ནས་མ་མོ་ཐམས་ཅད་གྲུབ་

པར་གྱུར་ཏོ། །དེ་ནས་ཁྱབ་འཇུག་གི་ཆུང་མས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ནཱ་ར་ཡ་ནི་ཛ་ག་ད་ཐི་ཧ་རི། བ་ལ་བ་དི་ཛ་ཡེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་ན་བསྲུང་བ་དང་། སྦ་བ་དང་།

བསྐྱབ་པའི་སླད་དུ་བདག་རྟག་ཏུ་དེའི་སླད་བཞིན་དུ་འབྲང་བར་བགྱིའོ། །ཅི་སྟེ་སྙིང་པོ་འདི་བསྒྲུབ་པར་འཚལ་ན་དེས་བསོད་ནམས་འབབ་པར་ལན་ལྔ་ཁྲི་བཟླས་བརྗོད་བགྱིའོ། །ཐ་མར་སྟོན་ཟླ་ཐ་ཆུང་ས་ཚེས་བཅུ་གཉིས་ལ་ཅི་འབྱོར་པས་མཆོད་དེ། མན་དཱ་ར་བའི་མེ་ཏོག་མར་ལ་

སྨྱུགས་པ་ལ་ལན་ཁྲི་སྦྱིན་སྲེག་བགྱིས་ན་འགྲུབ་པར་འགྱུར་ཏེ་གང་འཚལ་བ་དེ་སྩོལ་ཏོ། །མ་མོ་ཐམས་ཅད་ཀྱི་དམ་ཚིག་འཚལ་བར་འགྱུར་རོ། །དེ་ནས་གཞོན་ནུའི་ཆུང་མས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀུ་མཱ་རི། མ་ཡཱུ་ར།

ཙི་ཏྲི་ཀེ་ཏ་ག་དྲེ་ཤཀྟི་དྷཱ་རི་ཎི། བི་ཏྩི་སྭཱ་ཧཱ། ཕུ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་དྲན་པར་བགྱིད་ན་བདག་དེའི་སླད་བཞིན་འབྲང་ཞིང་དགོས་པ་ཐམས་ཅད་བགྱིའོ། །ཅི་སྟེ་སྙིང་པོ་འདི་བསྒྲུབ་པར་འཚལ་ན་དེས་ཁ་ལྷོ་ཕྱོགས་སུ་བལྟས་ཏེ་ལག་པ་གཡོན་

པར་མདུང་ཐུང་ཐོགས་ཤིང་ལན་བཞི་འབུམ་བཟླས་བརྗོད་བགྱིའོ། །དེ་ནས་དེ་བཞིན་དུ་ཅི་འབྱོར་པས་མཆོད་ལ་འབྲུའི་ལ་དུ་རྒྱ་ཤུག་ཙམ་གྱིས་མཚན་ཐོག་ཐག་སྦྱིན་སྲེག་བགྱིའོ། །ནམ་ཕྱེད་དམ་ནང་པར་གཞོན་ནུ་མ་མཆིས་ནས་མདུན་དུ་འགྲེང་སྟེ་དེ་ལ་མཆོད་ཡོན་སྩོལ་ཏོ། །

དེ་ཕྱིན་ཅད་གྲུབ་པར་འགྱུར་ཏེ་གང་འཚལ་བ་དེ་བགྱིད་དོ། །དེ་ནས་ཙ་མུཎྜིས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་རུ་དྷི་ར་བེ་ཏཱ་ལི། ཨཱ་ཀཪྵ་ཎི། མ་ཧཱ་ཀྲྀཏྟེ་ཙྪིནྡ་ཙྪིནྡ། བྷིནྡ་བྷིནྡ་ཙ་མུཎྜི་བི་ཏྩེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་

Vol. 87 · folio 66b

གི་སྙིང་པོ་འདི་དྲན་པར་བགྱིད་ན། བདག་རྟག་ཏུ་དེའི་སླད་བཞིན་འབྲང་ཞིང་ཡིད་ལ་བསམས་པའི་དགོས་པ་ཐམས་ཅད་བགྱིའོ། །ཅི་སྟེ་སྙིང་པོ་འདི་བསྒྲུབ་པར་འཚལ་ན་དེས་གོས་སྔོན་པོ་བགོས་ཏེ་ལག་ན་མི་ཐོད་ཐོགས་ཏེ། ཟླ་བ་གཅིག་ཟས་སུ་ཤ་བཟའ་ཞིང་དུར་ཁྲོད་དམ་མོའི་དཀྱིལ་འཁོར་

དུ་བཟླས་བརྗོད་བགྱིའོ། །ཐ་མར་དེ་ཉིད་དུ་ཅི་འབྱོར་པས་མཆོད་དེ་མི་ཤའི་སྲེག་བླུགས་ཡུངས་ཀར་གྱི་མར་ལ་སྨྱུགས་པ་ལན་ཁྲི་སྦྱིན་སྲེག་བགྱིའོ། །དེ་ནས་ཧ་ཧ་ཞེས་བགྱི་བའི་སྒྲ་འབྱིན་ཏེ། ལྕེའུ་གཉུག་བགྱིད་ལ་ལག་ན་མི་ཐོད་ཐོགས་ཤིང་མཆི་བར་འགྱུར་ཏེ། མི་ཐོད་ཁྲག་གིས་གང་

བའི་མཆོད་ཡོན་སྩོལ་ཏོ། །དེ་ནས་ལེགས་སོ་ཞེས་མཆི་སྟེ་སྒྲུབ་པ་པོ་ལ་བསྐོར་བ་བགྱིས་ཏེ་དེ་ནས་མི་སྣང་བར་འགྱུར་རོ། །དེ་སླན་ཅད་རྟག་ཏུ་སླད་བཞིན་འབྲང་ཞིང་ཅི་འདོད་པ་དེ་བགྱིད་དོ། །དེ་ནས་ཕག་གི་ཆུང་མས་རང་གི་སྙིང་པོ་སྨྲས་པ། ནམཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ།

སརྦ་ཐཱ་བཛྲ་གོ་ཎི་ནི་བཱི་ད་བཛྲོ་ཏི་ར་བཱི་ར་བཱི་ར་ལི་ཧཱུཾ་ཀ་རི་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་དྲན་པར་བགྱིད་ན་བདག་རྟག་ཏུ་དེའི་སླད་བཞིན་འབྲང་ཞིང་དགོས་པ་ཐམས་ཅད་བགྱིའོ། །བཅོམ་ལྡན་འདས་སྙིང་པོ་འདི་བསྒྲུབ་པར་འཚལ་ན་དེས་ལན་འབུམ་བཟླས་བརྗོད་བགྱིའོ། །

ཐ་མར་སྐེ་ཚེའི་འབྲུ་དང་ཆང་བསྲེས་པའི་སྲེག་བླུགས་ལན་འབུམ་མོའི་དཀྱིལ་འཁོར་དུ་སྦྱིན་སྲེག་བགྱིའོ། །དེ་ནས་ནམ་ཕྱེད་ན་ཕག་གི་ཆུང་མ་ཉིད་བྱི་ལ་མོའི་གཟུགས་ཀྱིས་མཆི་བར་འགྱུར་རོ། །ཡང་ན་ལྷའི་སྤོས་ཀྱི་ངད་འབྱུང་ངོ་། །དེ་ནས་གྲུབ་པར་རིག་པར་བགྱི་སྟེ་དེ་ཕྱིན་ཅད་ཅི་

འདོད་པ་བཞིན་དུ་ལས་ཐམས་ཅད་བགྱིད་དོ།། །།འཕགས་པ་ལག་ན་རྡོ་རྗེ་དབང་བསྐུར་བ། བམ་པོ་དྲུག་པ། དེ་ནས་ལུས་ངན་གྱི་ཆུང་མས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཙི་ད་རི་ཎི་ཀུ་ར་བིནྡེ་དཱནྡྲ་པཱ་ཎི་སྭཱ་ཧཱ།

བཅོམ་ལྡན་འདས་གང་ལ་ལ་ཞིག་སྙིང་པོ་འདི་དྲན་པར་བགྱིད་ན་དེ་ལ་རྒྱལ་པོའི་ཆད་པས་འཇིགས་པ་ཐམས་ཅད་མི་འབྱུང་ངོ་། །ཉིན་གཅིག་བཞིན་དུ་ནོར་ཐམས་ཅད་རྣམ་པར་འཕེལ་ལོ། བདག་གི་ཕྱག་བརྙན་བཞི་རྟག་ཏུ་གཡོག་འཁོར་དུ་གནས་པར་འགྱུར་རོ། །ཡིད་ལ་བསམས་

Vol. 87 · folio 67a

པའི་དགོས་པ་ཐམས་ཅད་ཀྱང་སྒྲུབ་པར་འགྱུར་རོ། །ཅི་སྟེ་བསྒྲུབ་པར་འཚལ་ན་དེས་སློང་མོའི་ཟས་བཟའ་ཞིང་ལག་ན་བེ་ཅོན་ཐོགས་ལ། ཤིང་དྲུང་གཅིག་ན་མཆིས་པར་སྙིང་པོ་འདི་ལན་སུམ་ཁྲི་བཟླས་བརྗོད་བགྱིའོ། །ཐ་མར་དེ་ཉིད་དུ་ཅི་འབྱོར་པས་མཆོད་ལ་འབྲས་ཡོས་

ཀྱི་སྲེག་བླུགས་ཞོ་དང་སྦྲང་རྩི་དང་མར་དང་བསྲེས་ལ་ལན་འབུམ་སྦྱིན་སྲེག་བགྱིས་ན་འགྲུབ་པར་འགྱུར་ཏེ། དེ་སླན་ཅད་གང་འཚལ་བ་དེ་བགྱིད་དོ། །དེ་ནས་འཇིགས་འཇིགས་ལྟ་ཆེན་པོའི་ཆུང་མས་བྱང་ཆུབ་སེམས་དཔའ་ལག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་སྨྲས་སོ། །བཅོམ་

ལྡན་འདས་བདག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧེ་ཀུན་ཁི། མ་ཧཱ་ན་ཁི་ཤ་ཀུ་ནི། ཨུ་ལཱུ་ཀ་མུ་ཁི། ཡ་མ་དཱུ་ཏཱི་བི་ཏ་ཙེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་

ན་དེའི་བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །ཅི་སྟེ་བསྒྲུབ་པར་འཚལ་ན་དེས་སློང་མོའི་ཟས་བཟའ་ཞིང་ལམ་གྱི་བཞི་མདོའམ། ཤིང་དྲུང་གཅིག་པར་མཆིས་ལ་སྙིང་པོ་འདི་ལན་འབུམ་བཟླས་བརྗོད་བགྱིའོ། །དེ་ནས་ཅི་འབྱོར་པས་མཆོད་དེ་བུ་བཙས་པའི་ཐལ་བའི་

སྲེག་བླུགས་ལན་འབུམ་སྦྱིན་སྲེག་བགྱིའོ། །དེ་ནས་འཇིགས་འཇིགས་ལྟ་ཆེན་པོའི་ཆུང་མས་སྲུལ་པོའི་གཟུགས་འཛིན་ཅིང་མཆི་བར་འགྱུར་ཏེ། དེ་ལ་འུག་པའི་འདབ་མའི་བདུག་པ་སྩལ་ཏོ། །དེ་ནས་གྲུབ་པར་འགྱུར་ཏེ་གང་འཚལ་བ་དེ་བགྱིད་དོ། །དེ་ནས་ཆུ་ཀླུང་ཆེན་པོ་གང་

ག་ལ་སོགས་པ་ཆུ་ཀླུང་ཆེན་པོ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ཕྱག་འཚལ་ཏེ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་མ་ན་

སི་མ་ནོ་ནུ་གེ་ག་ལི་བི་མ་ལེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་ན་དེ་ལ་ཆུའི་འཇིགས་པ་ཐམས་ཅད་མི་འབྱུང་ངོ་། །ཅི་སྟེ་བསྒྲུབ་པར་འཚལ་ན་ལྐོག་མ་ནུབ་ཙམ་གྱི་ཆུར་ཞུགས་ལ་སྙིང་པོ་འདི་ལན་འབུམ་བཟླས་བརྗོད་བགྱིའོ། །དེ་ནས་ཅི་

Vol. 87 · folio 67b

འབྱོར་པས་མཆོད་དེ་འབྲས་སཱ་ལུ་བཏགས་པའི་ཕྱེ་མ་ཞོ་དང་སྦྲང་རྩིས་སྦྲུས་པ་ལས་སོར་དྲུག་ཚད་ཙམ་གྱི་གཟུགས་བགྱིས་ལ་བརྒྱད་སྟོང་སྦྱིན་སྲེག་བགྱིས་ན་གྲུབ་པར་འགྱུར་ཏེ། དེ་སླན་ཅད་ཆུ་ཀླུང་རྣམས་སུ་ཞུགས་ཀྱང་འཇིགས་པ་མི་འབྱུང་ངོ་། །དེ་དག་ཉིད་དང་ཅི་སྲིད་འདོད་ཀྱི་བར་

དུ་གནས་ཤིང་བུ་བཞིན་དུ་རྗེས་སུ་སྤྱོད་ལ་གང་འཚལ་བ་དེ་སྩོལ་ཏོ། །དེ་ནས་སྣ་ཚོགས་ཕྲེང་བ་ཅན་ལ་སོགས་པ་དྲི་ཟའི་རྒྱལ་པོ་ཐམས་ཅད་ཀྱིས་ཕྱག་ན་རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་

རང་གི་སྙིང་པོ་འདི་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བྷ་ག་བ་ཏེ་གནྡྷ་རྦ་རཱ་ཛ་པྲི་ཡེ་སྭཱ་ཧཱ། གང་ལ་ལ་ཞིག་བདག་ཅག་གི་སྙིང་པོ་འདི་དྲན་པར་བགྱིད་ན། བདག་ཅག་རྟག་ཏུ་དེའི་སླད་བཞིན་འབྲང་བར་བགྱིད་དོ། །དགོས་པ་ཐམས་ཅད་ལ་རབ་ཏུ་

དགའ་བའི་ཡིད་ཀྱིས་གནང་བ་སྩལ་བར་བགྱིད་དོ། །བསྐོར་ནས་གནས་པར་བགྱིད་དོ། །འཆི་བའི་དུས་ཀྱི་ཚེ་ན་ཡང་སིལ་སྙན་དང་ཕེག་རྡོབ་པ་བགྱིད་ཅིང་སྟེང་དུ་བླ་རེས་བཟུང་ལ། སངས་རྒྱས་དང་ཆོས་དང་དགེ་འདུན་རྗེས་སུ་དྲན་པ་སྩལ་བར་བགྱིའོ། །ཇི་སྟེ་བསྒྲུབ་པར་

འཚལ་ན་དེས་ཐོག་མར་དགོན་པ་ཆེན་པོར་ཞུགས་ལ་ཟས་སུ་འབྲས་བུ་བཟའ་ཞིང་སྙིང་པོ་འདི་ལན་ཉིས་འབུམ་བཟླས་བརྗོད་བགྱིའོ། །དེ་ནས་ཅི་འབྱོར་པས་མཆོད་དེ་དུ་རུ་སྐའི་བདུག་པ་བསྲེག་ཅིང་མཚན་ཐོག་ཐག་བཟླས་བརྗོད་བགྱིས་ནས། དྲི་ཟའི་རྒྱལ་པོ་གང་ཡང་རུང་བ་

ཞིག་མཆིས་ནས་མགོ་ལ་མེ་ཏོག་གི་ཕྲེང་བ་སྩོལ་གྱི་བར་དུ་བཟླས་བརྗོད་བགྱིའོ། །དེ་ནས་དྲི་ཟའི་ནང་དུ་ཀུན་གྱིས་བཀུར་བར་འགྱུར་ཏེ་དྲི་ཟའི་གནས་ཐམས་ཅད་དུ་ཞུགས་ནས་ཀྱང་ནམ་ཡང་ཡོངས་སུ་ཉམས་པར་མི་འགྱུར་རོ། །མདོར་ན་གང་འཚལ་བ་དེ་སྩོལ་ཏོ། །དེ་ནས་རིག་

སྔགས་འཆང་གི་རྒྱལ་པོ་ཏོག་ལ་སོགས་པ་རིག་སྔགས་འཆང་གི་རྒྱལ་པོ་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་

Vol. 87 · folio 68a

འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ག་ག་ན་སཾ་བྷ་བེ་ག་ག་ན་གཽ་རི། ཨུ་ཏྤཏྟི་ཀེ་ཧི་རི་ཁི་རི་ཁི་རི་ས་ན་ས་ར་བ་ཧཾ་ག་མི་སྭཱ་ཧཱ། བཅོམ་ལྡན་འདས་འདི་ནི་རིག་སྔགས་འཆང་ཐམས་ཅད་ཀྱི་སྙིང་པོ་ལགས་ཏེ། འདིས་བདག་ཅག་རིག་སྔགས་

འཆང་གི་རྒྱལ་པོ་ཞེས་བགྱིའོ། །དེ་བཞིན་གཤེགས་པ་ཐམས་ཅད་ལ་མཆོད་པ་དང་རིམ་གྲོ་བགྱིད་པ་ཞེས་བགྱིའོ། །མདོར་ན་འདོད་པ་ཙམ་གྱིས་དགོས་པ་ཐམས་ཅད་བགྱིད་དོ། །བཅོམ་ལྡན་འདས་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པ་གང་ལ་ལ་ཞིག་སྙིང་པོ་

འདི་རྟག་ཏུ་དྲན་པར་བགྱིད་ན། །བདག་ཅག་དེ་ལ་དངོས་གྲུབ་དང་མཐུ་དང་སྟོབས་བརྟན་པ་ཉེ་བར་བསྒྲུབ་པར་བགྱིའོ། །ཅི་སྟེ་སྙིང་པོ་འདི་ཉེ་བར་སྒྲུབ་པར་བགྱིད་ན། དེས་རིའི་རྩེ་མོར་མཆིས་ལ་ཆོ་ག་སྔ་མ་བཞིན་དུ་ལན་ས་ཡ་བཟླས་བརྗོད་བགྱིའོ། །དེ་ནས་ཅི་འབྱོར་པས་མཆོད་ལ་བ་ལང་གི་

ལྕི་བས་དཀྱིལ་འཁོར་བསྐུས་ཏེ་མར་གྱི་སྲེག་བླུགས་ལན་འབུམ་སྦྱིན་སྲེག་བགྱིས་ན་འགྲུབ་པར་འགྱུར་རོ། །ཐོགས་པ་མེད་པར་འདོད་དགུར་འགྲོ་བར་འགྱུར་རོ། །དེ་ནས་སོ་ཅན་ལ་སོགས་པ་སྲིན་མོ་ཆེན་མོ་ཐམས་ཅད་ཀྱིས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ག་ལ་བ་དེ་

ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀྲེ་ཀ་རི་ཀོ་ཏ་རེ་པི་ཏི་ཀེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་

འདི་རྟག་ཏུ་དྲན་པར་བགྱིད་ན། དེ་དགོན་པ་ཆེན་པོ་ན་མཆིས་ཀྱང་རུང་། དུར་ཁྲོད་ན་མཆིས་ཀྱང་རུང་། ཆུའི་ནང་ན་མཆིས་ཀྱང་རུང་། མེའི་ནང་ན་མཆིས་ཀྱང་རུང་། རྒྱ་མཚོའི་ནང་ན་མཆིས་ཀྱང་རུང་། སྲིན་མོའི་ནང་ན་མཆིས་ཀྱང་རུང་སྟེ་བསྲུང་བར་བགྱིའོ། །ཞི་བ་དང་

བདེ་ལེགས་སུ་འགྱུར་བར་བགྱིའོ། །ཆད་པ་ལ་སོགས་པ་ཡང་ཡོངས་སུ་སྤང་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་ཁང་སྟོང་ངམ་དུར་ཁྲོད་ཆེན་པོར་གཅིག་པུ་བོང་བུ་ཞོན་ཞིང་། བསླངས་པ་མ་ལགས་པའི་ཁ་ཟས་འཚལ་ལ། ལག་ན་གྲི་ཐོགས་ཤིང་ཅེ་སྤྱང་གི་

Vol. 87 · folio 68b

པགས་པའམ་བྱི་ལའི་པགས་པའི་ཤམ་ཐབས་བགོས་ལ་སྙིང་པོ་ལན་འབུམ་བཟླས་བརྗོད་བགྱིའོ། །ཐ་མར་ཉ་ཤ་ལ་སོགས་པ་ཅི་འབྱོར་པས་མཆོད་ལ་བ་ལང་གི་ལྕི་བའི་བདུག་པ་བསྲེག་ཅིང་མཚན་ཐོག་ཐག་བཟླས་བརྗོད་བགྱི་སྟེ། ཕྱོགས་ཕྱོགས་སུ་བྱ་བྷེ་རུ་ཎ་ཊི་ཀ་ཕྱོགས་བཞིར་སྒྲ་

འབྱིན་པའམ། བོང་བུའི་ཁ་ནས་མེ་ལྕེ་འབར་བ་འབྱུང་གི་བར་དུ་བཟླས་བརྗོད་བགྱི་ཞིང་། འཇིགས་པ་མི་བགྱི་བར་ལེགས་པར་འོངས་སོ་ཞེས་བརྗོད་ལ་མཆོད་ཡོན་སྩལ་ཏོ། །ལེགས་སོ་ཞེས་བརྗོད་ནས་མི་སྣང་བར་འགྱུར་རོ། །དེ་ནས་གྲུབ་པར་འགྱུར་ཏེ་གང་འཚལ་བ་དེ་བགྱིད་དོ། །

བོང་བུ་ལ་ཞོན་ཞིང་གང་དགའ་བར་འགྲོ་བར་འགྱུར་རོ། །དེ་ནས་འབྱུང་པོའི་རྒྱལ་པོ་བརྩེགས་པ་ལ་སོགས་པ་འབྱུང་པོའི་རྒྱལ་པོ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་

ཀྱང་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་དོན་དང་ཕན་པའི་སླད་དུ་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧི་སི་ཧི་སི། མི་སི་མི་སི། གི་ལི་གི་ལི།

བྷཱུ་ཏེ་ཤྭ་རི་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་ན་བདག་ཅག་དེས་བསྒོ་བ་བཞིན་དུ་བགྱིའོ། །བྱེ་བྲག་ཏུ་ནི་ཟས་ཀྱི་ཕུད་སྩལ་ལ་དོན་ཐམས་ཅད་བསྒྲུབ་པར་བགྱིའོ། །ཅི་སྟེ་བསྒྲུབ་པར་འཚལ་ན་དེས་ཤིང་པ་ཏིའི་དྲུང་དུ་འབྱུང་པོ་ཐམས་ཅད་

པའི་གཏོར་མ་བགྱིའོ། །ཙནྡན་གྱི་བདུག་པ་བསྲེག་ཅིང་ཁ་ཟས་མི་བཟའ་བར་འབྱུང་པོའི་རྒྱལ་པོ་ཐམས་ཅད་ལྷགས་ནས་གསེར་དང་། ནོར་བུ་དང་། མུ་ཏིག་ལ་སོགས་པ་སྩོལ་གྱི་བར་དུ་བཟླས་བརྗོད་བགྱིའོ། །ཡང་ན་རང་གི་ཁྱིམ་དུ་ཁྲིད་ནས་དངོས་པོ་ཐམས་ཅད་ཀྱིས་འགྲོན་

བགྱིད་དོ། །གང་འཚལ་བ་དེ་སྩལ་ཏོ། །ལས་རྣམ་པ་སྣ་ཚོགས་གཞན་དག་ཀྱང་བགྱིད་དོ། །དེ་ནས་བ་ལང་སྐྱོང་བ་ལ་སོགས་པ་ཤ་ཟ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་

Vol. 87 · folio 69a

ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐ་མི་ཙི་མི་ཙི། ཁི་སི་ཁི་སི་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་དྲན་པར་བགྱིད་ན་བདག་ཅག་རྟག་ཏུ་དེའི་སླད་བཞིན་འབྲང་བར་བགྱིའོ། །

དགོས་པ་ཐམས་ཅད་ལ་གནང་བ་སྩལ་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་ཁང་སྟོང་དུ་སྙིང་པོ་འདི་ལན་སུམ་འབུམ་བཟླས་བརྗོད་བགྱིའོ། །ཐ་མར་ཅི་འབྱོར་པས་མཆོད་དེ། གཟེགས་མའི་སྲེག་བླུགས་སམ། རྒྱ་སྐྱེགས་ཀྱི་སྲེག་བླུགས་ལན་ཁྲི་སྦྱིན་སྲེག་

བགྱིས་ན་ཤ་ཟ་གང་ཡང་རུང་བ་ཞིག་མཆིས་ནས་དམ་པས་འགྲོན་བགྱིད་དོ། །གང་འཚལ་བ་དེ་བསླང་བར་བགྱི་སྟེ་འགྲུབ་པར་འགྱུར་རོ། །གང་འཚལ་བ་དེ་བགྱིད་དོ། །དེ་ནས་གནོན་པོ་འགུལ་པོ་ལ་སོགས་པ་གནོན་པོ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་

འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་གུ་རུ་གུ་རུ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་ན། དེ་ལ་འབྱུང་

པོའི་འཇིགས་པ་ཐམས་ཅད་མི་འབྱུང་ངོ་། །དེ་ནས་རྣམ་པར་འབྱམ་པ་ལ་སོགས་པ་གྲིབ་གནོན་རྣམས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ནམཿསརྦ་

ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་གི་ནི་ཛ་མིཉྫི་སྭ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་ན་དེ་ལ་གྲིབ་གནོན་གྱི་འཇིགས་པ་ཐམས་ཅད་མི་འབྱུང་ངོ་། །དེ་ནས་ཉ་མིད་ལ་སོགས་པ་མདངས་འཕྲོག་པ་ཐམས་ཅད་ཀྱིས་བྱང་ཆུབ་སེམས་དཔའ་

ལག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་གི་ལི་གི་ལི་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་

Vol. 87 · folio 69b

པོ་འདི་དྲན་པར་བགྱིད་ན་བདག་ཅག་དེའི་མདངས་འཕྲོག་པར་མི་བགྱིད་དོ། །དེ་ནས་བཞིན་ངན་ལ་སོགས་པ་ཡི་དགས་ཀྱི་ཚོགས་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་

པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བྷི་མི་རི་བྷི་མི་རི། དུརླ་བྷེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་དྲན་པར་བགྱིད་ན། བདག་ཅག་དེའི་དགོས་པ་ཐམས་ཅད་བསྒོ་བ་བཞིན་བགྱིད་དོ། །དེ་ནས་ལེགས་རྒྱལ་ལ་སོགས་པ་

བདུད་ཀྱི་རིས་ཀྱི་ལྷའི་བུ་ཐམས་ཅད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་བདུད་ཀྱི་སྟོབས་ཐམས་ཅད་པ་ཞེས་བགྱི་བའི་སྙིང་པོ་འབུལ་ལོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ།

སརྦ་ཐཱ་ཏཾ་གི་ར་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྙིང་པོ་འདི་རྟག་ཏུ་དྲན་པར་བགྱིད་ན། བདག་ཅག་དེའི་མདུན་དུ་མི་མཆི་བར་བསྲུང་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་ཐོག་མ་ཁོ་ནར་གཙང་མར་བགྱིས་ཤིང་། གོས་གཙང་མ་བགོས་ལ་སྐྱེད་མོས་ཚལ་ལམ་ལྷ་ཆེན་

ཕོའི་གནས་སུ་གླུ་ལེན་ཅིང་གར་བགྱིད་ཅིང་། རོལ་མོའི་སྒྲ་དབྱངས་འབྱིན་པ་དག་གིས། ཡིད་དགའ་བར་སྙིང་པོ་འདི་ལན་བཞི་འབུམ་བཟླས་བརྗོད་བགྱིའོ། །དེ་ནས་དེ་ཉིད་དུ་ཡོ་བྱད་ཐམས་ཅད་ཀྱིས་རྒྱ་ཆེར་མཆོད་ལ། སྤོས་ཐམས་ཅད་ལས་འདོད་པའི་ལྷའི་གཟུགས་བགྱིས་ཏེ་མར་

གྱི་མར་མེ་བརྒྱ་དབུས་ལ། གླུ་དྲུག་ལྡན་ནམ་འདབ་བརྒྱ་མའི་དབྱངས་ཀྱིས་མཚན་ཐོག་ཐག་ཏུ་བཟླས་བརྗོད་བགྱིས་ན་ནམ་ཕྱེད་ན་དགའ་མ་དང་སྡུག་མ་དང་ལྷན་ཅིག་ཏུ་མཆིས་ཤིང་། དེའི་ཚེ་རིག་སྔགས་འཆང་ཉིད་དམ། མི་སྣང་བར་འགྱུར་བའམ། རྗེས་སུ་རྒྱུ་བ་ཉིད་ཀྱང་རུང་

སྟེ་དམ་པ་སྩོལ་ཏོ། །ཅི་སྟེ་མ་གྲུབ་ན་གྲོང་དམ་པ་བརྒྱད་སྩོལ་ཏོ། །སྐལ་བ་བཟང་པོའི་མཆོག་དང་ལྡན་ཞིང་འདོད་པའི་ལྷ་གཉིས་པ་དང་འདྲ་བར་ས་ལ་རྒྱུ་བར་འགྱུར་རོ། །དེ་ནས་རྒྱལ་མ་ལ་སོགས་པ་སྲིང་མོ་ཆེན་པོ་བཞི་ཕྱོགས་བཞི་ནས་འོངས་ཏེ་འདུག་ནས་དེ་དག་གིས་བྱང་

Vol. 87 · folio 70a

ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །དེ་ནས་རྒྱལ་མས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཙ་ཡེ་ཙ་

ཡོདྦྷ་བེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་གི་སྙིང་པོ་འདི་དྲན་པར་བགྱིད་ན་བདག་རྟག་ཏུ་དེའི་སླད་བཞིན་འབྲང་བར་བགྱིའོ། །བསྲུང་བར་བགྱིའོ། །དཔལ་བསྐྱེད་པར་བགྱིའོ། །བུ་མང་པོར་བགྱིའོ། །སྐལ་པ་བཟང་པོ་སྩལ་བར་བགྱིའོ། །ཅི་སྟེ་བསྒྲུབ་

པར་འཚལ་ན་དེས་རྒྱ་མཚོར་འབབ་པའི་ཆུའི་ཀླུང་དུ་ཞུགས་ཀྱང་རུང་། རིའི་རྩེ་མོར་མཆིས་ཀྱང་རུང་སྙིང་པོ་འདི་ལན་འབུམ་བཟླས་བརྗོད་བགྱིའོ། །ཐ་མར་གཅིག་པུས་ས་ཕྱོགས་གཙང་མ་དབེན་པར་བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་བྱུགས་ལ་བ་སེར་མོའི་མར་གྱི་

མར་མེ་བུས་ཏེ། ནམ་གྱི་གུང་ལ་ཡུངས་ཀར་གྱིས་སྦྱིན་སྲེག་བགྱིས་ན་དེ་ནས་འགྲུབ་པར་འགྱུར་རོ། །སྐྱེ་བོ་ཐམས་ཅད་ཀྱི་སྙིང་དུ་སྡུག་པ་དང་། འདོད་དགུར་འགྲོ་བ་དང་། འདོད་པའི་གཟུགས་འཛིན་པ་དང་དཔལ་དང་ལྡན་པར་འགྱུར་རོ། །དེ་ནས་རྣམ་པར་རྒྱལ་མས་རང་གི་

སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛ་ཡོཏྟ་རེ་ཛ་ཡ་བི་ཛ་ཡ་ནི་ནནྡ་ནི་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་གི་སྙིང་པོ་འདི་དྲན་པར་བགྱིད་ན་བདག་རྟག་ཏུ་དེའི་སླད་བཞིན་དུ་འབྲང་བར་བགྱིའོ། །ཚེ་རིང་བ་དང་ནད་མེད་པ་ཕུན་སུམ་ཚོགས་

པ་སྩལ་བར་བགྱིའོ། །བསྲུང་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་ཡང་སྔ་མ་བཞིན་དུ་ལན་ཉིས་འབུམ་བཟླས་བརྗོད་བགྱིའོ། །ཐ་མར་སྔ་མ་བཞིན་དུ་བསྒྲུབ་པར་བགྱིའོ། །མ་གྲུབ་ན་ཡང་སྐྱེ་བོ་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །ནོར་ཆེན་པོ་དང་ལྡན་པ་དང་

ལན་ཐེབས་པར་འགྱུར་རོ། །དེ་ནས་མི་འཕམ་མས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨནྟ་ཨ་ཛི་ཏེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་བདག་གི་སྙིང་པོ་འདི་རྟག་ཏུ་དྲན་པར་བགྱིད་ན། བདག་དེའི་བསམ་པ་ཐམས་ཅད་ཡོངས་

Vol. 87 · folio 70b

སུ་རྫོགས་པར་བགྱི་བའི་སླད་དུ་རྟག་ཏུ་སླད་བཞིན་དུ་འབྲང་བར་བགྱིའོ། །ཅི་སྟེ་བསྒྲུབ་པར་འཚལ་ན་དེས་སྔ་མ་བཞིན་དུ་སྙིང་པོ་འདི་ལན་སུམ་འབུམ་བཟླས་བརྗོད་བགྱིའོ། །ཐ་མར་ཅི་འབྱོར་བས་མཆོད་དེ་མཚན་ཐོག་ཐག་གུ་གུལ་གྱི་བདུག་པ་བསྲེག་ཅིང་། ཏིལ་ནག་པོས་ནམ་གྱི་

གུང་ལ་སྦྱིན་སྲེག་བགྱིས་ན་དེ་ནས་འགྲུབ་པར་འགྱུར་ཏེ་གང་འཚལ་བ་དེ་བགྱིད་དོ། །དེ་ནས་གཞན་གྱིས་མི་ཐུབ་མས་རང་གི་སྙིང་པོ་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨནྣ་རྫ་བེ་ཨ་ཀུ་ཏི་ལེ་ཨ་པ་རཱ་ཛི་ཏེ་སྭ་ཧཱ། བཅོམ་ལྡན་འདས་གང་ལ་ལ་ཞིག་བདག་གི་སྙིང་

པོ་འདི་དྲན་པར་བགྱིད་ན་བདག་དེ་བསྲུང་བའི་སླད་དུ་རྟག་ཏུ་དེའི་སླད་བཞིན་དུ་འབྲང་བར་བགྱིའོ། །སྙིང་པོ་འདི་བཟླས་བརྗོད་བགྱིས་ན་སྐྱེ་བོ་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །གཟུང་བའི་ཚིག་དང་སྐལ་བ་བཟང་པོར་འགྱུར་རོ། །ཅི་སྟེ་བསྒྲུབ་པར་འཚལ་ན་དེས་སྔ་མ་བཞིན་

དུ་སྙིང་པོ་འདི་ལན་བཞི་འབུམ་བཟླས་བརྗོད་བགྱིའོ། །ཐ་མར་ཅི་འབྱོར་པས་མཆོད་ལ་ཀླུ་ཤིང་གི་མེ་ཏོག་མར་དང་བསྲེས་པས་ལན་འབུམ་སྦྱིན་སྲེག་བགྱིས་ན་དེས་ན་འགྲུབ་པར་འགྱུར་ཏེ། ཚིག་ཙམ་གྱིས་ལས་བགྱིད་དེ་གཞན་དུ་མི་འགྱུར་རོ། །དེ་ནས་ཏམ་བུ་རས་བྱང་ཆུབ་སེམས་

དཔའ་ལག་ན་རྡོ་རྗེ་ལ་ཕྱག་འཚལ་ཏེ་འདི་སྐད་ཅེས་སྨྲས་སོ། །བཅོམ་ལྡན་འདས་བདག་ཅག་ཀྱང་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་དོན་གྱི་སླད་དུ་དཀྱིལ་འཁོར་ཆེན་པོ་འདིར་རང་གི་སྙིང་པོ་འབུལ་ལོ། །ན་མཿསརྦ་

ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ། ཨོཾ་ཧེ་ཛཾ་བེ། ཨོཾ་ཧེ་མོ་ཧེ་སྭཱ་ཧཱ། བཅོམ་ལྡན་འདས་བདག་གི་སྙིང་པོ་འདི་ནི་གདོང་བཞི་པ་ཕྱོགས་བཞི་ནས་བྱུང་བ་སྐྱེ་དགུ་གནས་པ་འབྱོར་པ་འབྱིན་པ་སྡུད་པར་བགྱིད་པ་སྟེ། འབྲུ་དང་བསངས་དང་བཀྲ་ཤིས་དང་། །དཔལ་དང་

རྣམ་པར་འབྱོར་པ་འཕེལ། །ངོ་མཚར་མང་པོ་རྣམས་དང་ལྡན། །འདི་ནི་བཅུད་ཀྱིས་ལེན་གྱི་མཆོག །བཅོམ་ལྡན་འདས་གང་ལ་ལ་ཞིག་སྙིང་པོ་འདི་དུས་ཐམས་ཅད་དུ་ཡིད་ལ་བགྱིད་ན། བདག་འཁོར་དང་བཅས་ཏེ་དེའི་སླད་བཞིན་འབྲང་བར་བགྱིའོ། །ཅི་སྟེ་བསྒྲུབ་

Vol. 87 · folio 71a

པར་འཚལ་ན་དེས་འགྲེང་ཡང་རུང་། འདུག་ཀྱང་རུང་། ཉལ་ཡང་རུང་། ལམ་དུ་འགྲོ་ཡང་རུང་སྟེ། བདག་ལ་རྣམ་པར་ད་གོད་པར་བགྱིས་པ་བཞིན་དུ་སྐྱེས་བུ་བཅིང་བར་བགྱིའོ། །གདོང་བཞི་པ་རྣམ་པར་བཀོད་ལ་ཕྱག་རྒྱ་བཅིང་བར་བགྱིའོ། །དེས་ཚེས་གཅིག་

ནས་བརྩམས་ནས་ཟླ་བ་ཉའི་བར་དུ་བགྱིའོ། །དེ་ནས་ཅི་འབྱོར་པས་མཆོད་དེ་འབྲས་སཱ་ལུའི་ཕྱེ་ལས་པདྨ་འདབ་མ་བརྒྱད་པ་ཟེ་བ་དང་བཅས་པར་བགྱིས་ལ་སྙིང་པོ་ཨོཾ་ཞེས་བགྱི་བ་དང་ཛ་ཞེས་བགྱི་བ་ཤར་ཕྱོགས་སུ་དགོད་དོ། །བཱ་ཞེས་བགྱི་བ་ནུབ་ཕྱོགས་སུ་དགོད་དོ། །མ་ཞེས་བགྱི་བ་བྱང་

ཕྱོགས་སུ་གཞག་གོ། །ཧ་ཞེས་བགྱི་བ་ལྷོ་ཕྱོགས་སུ་གཞག་ལ་དངོས་གྲུབ་འཚལ་བས་རྩྭ་ཀུ་ཤ་སྦམས་པའི་སྟེང་དུ་མཆིས་ཏེ། ནུབ་གཅིག་ལན་ཚྭའི་སྲེག་བླུགས་ལན་ཁྲི་སྦྱིན་སྲེག་བགྱིས་ན། ན་ང་པར་དངོས་གྲུབ་ཅི་འཚལ་བའི་འབྲས་བུ་སྩོལ་ཏོ། །བཟླས་བརྗོད་བགྱིས་ན་ཡི་

གེ་གོ་རིམས་བཞིན་དུ་རིག་པར་བགྱིའོ། །དེ་ནས་ལག་ན་རྡོ་རྗེ་དེའི་ཚེ་ཐམས་ཅད་དང་ལྡན་པའི་འཁོར་དེ་ལ་བལྟས་ནས་ལེགས་སོ་ཞེས་བྱ་བ་བྱིན་ཏེ། གྲོགས་པོ་དག་འདི་ལྟར་ཁྱེད་ཀྱིས་དཀྱིལ་འཁོར་ཆེན་པོ་འདིར་རང་གི་སྙིང་པོ་རྣམས་སྨྲས་ཤིང་ཕུལ་བ་དང་རྗེས་སུ་ཡི་རང་བ་ནི་གྲོགས་པོ་

དག་ལེགས་སོ་ལེགས་སོ། །སྙིང་པོ་འདི་དག་ནི་སྙིང་པོ་མཆོག་གིས་དྲངས་པ་སྟེ། དེས་ན་འདི་དག་ནི་སྙིང་པོ་མཆོག་གིས་ཟིན་པས་དངོས་གྲུབ་སྦྱིན་པར་འགྱུར་རོ། །གང་ལ་ལ་ཞིག་བསྟན་པ་འདི་ལས་འདས་ན་སྙིང་པོ་མཆོག་གིས་རྡོ་རྗེ་འབར་བ་ཀུན་དུ་མཆེད་ཅིང་འབར་བས། དེའི་

མགོ་བོ་འགེམས་པར་འགྱུར་ཏེ་གཞན་དུ་མ་ཡིན་ནོ། །དེ་ནས་ཐམས་ཅད་དང་ལྡན་པའི་འཁོར་དེས་མགྲིན་གཅིག་ཏུ་ཚིག་སྨྲས་པ། བྱང་ཆུབ་སེམས་དཔའ་ཆེན་པོས་བཀའ་སྩལ་པ་དེ་བཞིན་དུ་གྱུར་ཅིག །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་རྡོ་རྗེ་ཡེ་ཤེས་ཆེན་པོའི་

འོད་ཟེར་འཕྲོ་བ་ལས་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ལག་པས་ལག་ན་རྡོ་རྗེ་ལས་རྡོ་རྗེ་བླངས་ཏེ། ཡེ་ཤེས་ལས་བྱུང་བའི་ཨུཏྤ་ལ་དྲི་མ་མེད་པར་བྱས་ནས་ཡེ་ཤེས་ཆེན་པོ་ལས་བྱུང་བའི་ཨུཏྤ་ལ་དེ་ལ་རྡོ་རྗེ་གཞག་གོ། །རྡོ་རྗེ་ཆེན་པོ་དེ་བཞག་མ་ཐག་ཏུ་

Vol. 87 · folio 71b

དེ་ནས་འཇིག་རྟེན་གྱི་ཁམས་རབ་འབྱམ་ཐམས་ཅད་དང་། སངས་རྒྱས་འཁོར་གྱི་དཀྱིལ་འཁོར་ཐམས་ཅད་དུ་ཀྱེ་མ་འཇམ་དཔལ་གཞོན་ནུར་གྱུར་པ་འདི་ནི་དམ་པ་སྦྱིན་པའི་རྡོ་རྗེའོ་ཞེས་སྒྲ་གཅིག་ནས་གཅིག་ཏུ་འུར་ཞེས་གྲགས་སོ། །དེའི་ཚེ་འཇམ་དཔལ་གཞོན་ནུར་གྱུར་པའི་

སྙིང་ག་ནས་མཆོག་ཏུ་གསང་བའི་སྙིང་པོ་བྱུང་ངོ་། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་མཉྫུ་བཛྲ་ཛ་ཡ་ར་ཏི་ཏ་པི་ལ་ས་ཧཱུཾ་ཀྲྀ་ད་ན་ཀུ་མཱ་ར་སྭཱ་ཧཱ། རྡོ་རྗེའི་སྙིང་པོ་ཧཱུཾ་ཞེས་བྱ་བ་མཆོག་དང་ལྡན་པ་བྱུང་མ་ཐག་ཏུ་དེ་ནས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་

པའི་སངས་རྒྱས་བཅོམ་ལྡན་འདས་རྣམས་དེ་ན་བཞུགས་བཞིན་དུ་ཕྱག་གཡས་པ་བརྐྱང་སྟེ། འཇམ་དཔལ་གཞོན་ནུར་གྱུར་པའི་མགོ་ལ་བྱུགས་ནས་བཀའ་སྩལ་པ། རྡོ་རྗེ་ཆེན་པོ་ལེགས་སོ་ལེགས། །སྟོབས་ཆེན་རྡོ་རྗེ་དམ་པ་སྦྱིན། །ལག་ན་རྡོ་རྗེ་དབང་བསྐུར་བར། །དངོས་

གྲུབ་བསྒྲུབ་པ་རྒྱ་ཆེར་ནི། །བསྟན་པ་འདི་ལ་བཤད་པར་གྱིས། །དེ་སྐད་གསུངས་ནས་རྫུ་འཕྲུལ་ཆེ། །སངས་རྒྱས་དེ་དག་དེར་བཞུགས་བཞིན། །འཇམ་དཔལ་གཞོན་ནུའི་སྤྱི་བོ་ནས། །ཕྱག་རྣམས་དེ་དག་སླར་བཀུག་གོ། །དེ་ནས་དེ་བཞིན་གཤེགས་པ་དེ་དག་གིས་

གནང་བས། འཇམ་དཔལ་གཞོན་ནུར་གྱུར་པས་དེའི་ཚེ་དངོས་གྲུབ་བསྒྲུབ་པའི་རིམ་པར་ཕྱེ་བ་སྨྲས་པ། ཐོག་མ་ཉིད་དུ་རིང་བསྲེལ་དང་བཅས་པའི་མཆོད་རྟེན་ན་མ། སྐུ་གཟུགས་སམ། དམ་པའི་ཆོས་ཀྱི་གླེགས་བམ་གྱི་མདུན་དུ་སྙིང་པོ་གང་ཡང་རུང་བ་རྒྱ་ཆེར་བརྗོད་

དེ། སློབ་དཔོན་མགུ་བར་བྱས་ལ་གསོལ་བ་བཏབ་སྟེ། སློབ་དཔོན་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར་བདག་ལ་གསང་སྔགས་སྩལ་དུ་གསོལ་ཞེས་བརྗོད་པར་བྱའོ། །སློབ་དཔོན་ལ་དེ་སྐད་ཅེས་གསོལ་བ་བཏབ་ནས། ཐལ་མོ་སྦྱར་ཏེ་པུས་མོའི་ལྷ་ང་

ས་ལ་བཙུགས་ལ་ལག་པ་སྟོང་པ་མ་ཡིན་པས་སྔགས་གང་འདོད་པ་བླང་བར་བྱ་སྟེ། བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ་འོ་ཞེས་ཚིག་ཏུ་བརྗོད་པར་བྱའོ། །གཞན་དུ་སྔགས་བདག་གིས་བླངས་ན་ནི་གྲུབ་པར་མི་འགྱུར་རོ། །དེ་ནས་སངས་རྒྱས་ཀྱིས་གསུངས་པའི་སྙིང་པོ་

Vol. 87 · folio 72a

འདི་དག་གི་སྤྱིའི་དངོས་གྲུབ་བསྒྲུབ་པ་ནི་འདི་ཡིན་ཏེ། རིའམ། ནགས་ཚལ་ལམ། ཁང་སྟོང་ངམ། ཕུག་གམ། དུར་ཁྲོད་དམ། ཆུ་ཀླུང་ངམ། དབེན་པ་གང་ཡང་རུང་བ་དེར་གནས་ལ། སློང་མོའི་ཟས་ཟ་ཡང་རུང་། བསླངས་པ་མ་ཡིན་པའི་

ཟས་ཟ་ཡང་རུང་། གཙང་མར་བྱས་ཤིང་གོས་གཙང་མ་བགོས་ལ། དུས་གསུམ་དུ་ཁྲུས་བྱས་ཤིང་གོས་ལན་གསུམ་བརྗེས་ཏེ་སྙིང་པོ་གང་ཡང་རུང་བ་ཞིག་ལན་སུམ་འབུམ་བཟླས་བརྗོད་བྱའོ། །དེ་ནས་ལྡོང་རོས་སམ་ལིག་བུ་མིག་གམ། གི་ཝང་ངམ། བའི་རྣམ་ལྔས་

བཀྲུས་ཀྱང་རུང་། བ་ལང་གི་ལྕི་བའི་ཕུང་པོའི་སྟེང་དུ་གཞག་ཀྱང་རུང་སྟེ་ཟླ་བ་ཡར་གྱི་ངོ་ཚེས་ནས་བཟུང་སྟེ་ཉའི་བར་དུ་གཞག་གོ། །བདག་གི་ལྷ་དང་བདག་གི་གཟུགས་ཐ་མི་དད་པར་བྱས་ལ་མཚན་མ་བྱུང་གི་བར་དུ་བཟླས་བརྗོད་བྱའོ། །དེ་ལ་མཚན་མ་ནི་འདི་དག་ཡིན་ཏེ་སྔོན་

མ་བྱུང་བའི་ཆོས་ཐོས་པར་འགྱུར་བ་དང་། སྣང་བ་མཐོང་བར་འགྱུར་བ་དང་། ཡིད་དུ་འོང་བའི་སྒྲ་ཐོས་པར་འགྱུར་བ་དང་། དེ་བཞིན་གཤེགས་པའི་ཕུན་སུམ་ཚོགས་པ་མྱོང་པ་སྙམ་དུ་ཤེས་པ་དང་། བདག་ཉིད་ལ་ཡིད་ཆེས་པར་འགྱུར་བ་ལ་སོགས་པའི་མཚན་མ་འབྱུང་བར་

འགྱུར་རོ། །དེ་ནས་ཟླ་བ་ཉ་ལ་ཅི་འབྱོར་པས་མཆོད་དེ་རྫས་དེ་ལག་པའི་སྙིམ་པར་བཅུག་ལ་མཚན་ཐོག་ཐག་བཟླས་བརྗོད་བྱས་ན་ནམ་ཕྱེད་དམ་ཉི་མ་འཆར་ཀར་རྫས་དེ་འབར་བའམ་དུ་བ་འཐུལ་བའམ་དྲོ་བར་འགྱུར་རོ། །འབར་ན་ནི་ལུས་ལ་བསྐུས་ན་རིག་སྔགས་འཆང་དུ་འགྱུར་ཏེ།

ཉི་མ་ཤར་བ་ལྟ་བུའི་མདོག་ཅན་དང་། བསྐལ་པར་གནས་པ་དང་། ཐོགས་པ་མེད་པར་འགྲོ་བ་དང་། འཇིག་རྟེན་གྱི་ཁམས་གཞན་ཐམས་ཅད་དུ་རྒྱུ་བ་དང་འདོད་ན་མཆི་བར་འགྱུར་རོ། །དུ་བ་འཐུལ་ན་སུམ་རིས་བྱས་ན་མི་སྣང་བར་འགྱུར་རོ། །དྲོ་བར་གྱུར་ན་འགྲོ་བ་ཐམས་ཅད་

ལ་དབང་བྱེད་པར་འགྱུར་རོ། །མ་གྲུབ་ན་ལས་སུ་རུང་བ་དང་བློན་པོ་ཆེན་པོའི་སྲིད་ཐོབ་པར་འགྱུར་རོ། །ཟླ་བ་གཅིག་སངས་རྒྱས་རྗེས་སུ་དྲན་པར་བགྱིད་ཅིང་སྙིང་པོ་གང་ཡང་རུང་བ་ཞིག་བཅོམ་ལྡན་འདས་ཀྱི་སྤྱན་སྔར་ཅི་འབྱོར་པས་མཆོད་ལ། སངས་རྒྱས་ཀྱི་གཟུགས་ལ་བལྟ་

Vol. 87 · folio 72b

ཞིང་མཚན་ཐོག་ཐག་བཟླས་བརྗོད་བྱས་ན་དེའི་གཟུགས་དེ་གྲུབ་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་གང་ཡང་རུང་བའི་མདུན་དུ་བསྒྲུབས་ན་ཡང་དེ་བཞིན་དུ་འགྲུབ་སྟེ་གང་འདོད་པ་དེ་བྱེད་དོ། །སྔར་སྤྱད་པ་མ་བྱས་ཀྱང་གདོན་མི་ཟ་བར་འགྲུབ་པར་འགྱུར་རོ། །དེ་ལ་དབུས་

ཀྱི་ཡུལ་དུ་ནི་འཁོར་ལོས་སྒྱུར་བ་བཅོམ་ལྡན་འདས་དྲག་པོ་ཆེན་པོ་འགྲུབ་བོ། །ལྷོ་ཕྱོགས་ཀྱི་རྒྱུད་དུ་ནི་ལག་ན་རྡོ་རྗེ་དྲག་པོ་འགྲུབ་བོ། །འགྲོ་ལྡིང་བའི་ཡུལ་དུ་ནི་རིག་སྔགས་ཀྱི་རྒྱལ་པོ་འགྲོ་ལྡིང་འགྲུབ་བོ། །བྱང་ཕྱོགས་ཀྱི་རྒྱུད་དུ་ནི་བྱང་ཆུབ་སེམས་དཔའ་ལག་ན་པདྨ་འགྲུབ་བོ། །

ཤར་ཕྱོགས་ཀྱི་ཡུལ་དུ་ནི་དམ་པ་སྦྱིན་པའི་རྡོ་རྗེ་འགྲུབ་བོ། །སྐྱེད་མོས་ཚལ་ཆེན་པོར་ནི་གནོད་སྦྱིན་གྱི་ཚོགས་དང་། གནོད་སྦྱིན་མོ་རྣམས་འགྲུབ་བོ། །ཁང་སྟོང་དུ་ནི་ཤ་ཟ་དང་ཤ་ཟ་མོ་རྣམས་འགྲུབ་བོ། །དུར་ཁྲོད་དུ་ནི་མ་མོ་རྣམས་དང་། མཁའ་འགྲོ་མ་དང་། སྲིན་པོ་

དང་། སྲིན་མོ་ལ་སོགས་པ་འགྲུབ་བོ། །རི་རྣམས་སུ་ནི་རིག་སྔགས་འཆང་རྣམས་དང་མིའམ་ཅི་རྣམས་འགྲུབ་བོ། །དགོན་པ་ཆེན་པོ་རྣམས་སུ་ནི་དྲི་ཟ་རྣམས་འགྲུབ་བོ། །འབབ་ཆུ་རྣམས་སུ་ནི་ཀླུ་རྣམས་འགྲུབ་བོ། །ཁང་པ་ཆེན་པོ་དང་ཤིང་པ་ཏའི་དྲུང་དག་ཏུ་ནི་འབྱུང་

པོ་རྣམས་འགྲུབ་བོ། །བྱང་ཕྱོགས་ཀྱི་རྒྱུད་དུ་ནི་གནོད་སྦྱིན་ཆེན་པོ་དང་ནད་ཀུ་བེ་ར་འགྲུབ་བོ། །རྒྱ་མཚོ་ཆེན་པོར་ནི་སྲིང་མོ་བཞི་དག་འགྲུབ་བོ། །རིགས་ཀྱི་བུ་དག་གཞན་ཡང་གྲོང་ཁྱེར་ཆེན་པོ་རྣམས་སུ་ནི་རིག་སྔགས་ཀྱི་རྒྱལ་མོ་སྒྲོལ་མ་དང་ཁྲོ་གཉེར་ཅན་འགྲུབ་བོ། །ཆུ་འདུས་

སུ་ནི་ཚངས་པ་འགྲུབ་བོ། །དུར་ཁྲོད་དུ་ཝ་དང་བཅས་པར་ནི་དྲག་པོ་འགྲུབ་བོ། །སྐྱེས་བུ་ཆེན་པོའི་གནས་སུ་ནི་ཁྱབ་འཇུག་འགྲུབ་བོ། །བྱང་ཕྱོགས་ཀྱི་རྒྱུད་དུ་ནི་ཉི་མ་འགྲུབ་བོ། །གངས་རི་ལ་ནི་ཟླ་བ་འགྲུབ་བོ། །ལྷོ་ཕྱོགས་ཀྱི་རྒྱུད་དུ་ནི་སྨིན་དྲུག་གི་བུ་འགྲུབ་བོ། །རི་སུལ་

དག་ཏུ་ནི་ལྷ་མ་ཡིན་རྣམས་འགྲུབ་བོ། །རིགས་ཀྱི་བུ་དག་རྒྱ་མཚོ་ཆེན་པོ་རྣམས་སུ་ནི་ལྟོ་འཕྱེ་ཆེན་པོ་རྣམས་འགྲུབ་བོ། །ཡུལ་མ་ག་དྷཱར་ནི་དྲང་སྲོང་ཆེན་པོ་རྣམས་འགྲུབ་བོ། །མྱ་ངམ་དག་ཏུ་ནི་ཡི་དགས་རྣམས་འགྲུབ་བོ། །རིགས་ཀྱི་བུ་དག་གཞན་ཡང་རི་རྣམས་སུ་ནི་རིན་

Vol. 87 · folio 73a

པོ་ཆེ་དག་འགྲུབ་བོ། །འབབ་ཆུ་རྣམས་སུ་ནི་འབབ་ཆུ་ཆེན་པོ་དག་འགྲུབ་བོ། །ཡུལ་ཀ་ལིང་གར་ནི་འབྱུང་པོའི་རྒྱལ་པོ་དབང་ལྡན་འགྲུབ་བོ། །སྟོར་ཁུང་རྣམས་སུ་ནི་གནོན་པོ་དག་འགྲུབ་བོ། །ཁྱིམ་གྱི་བར་རྣམས་སུ་ནི་གྲིབ་གནོན་རྣམས་འགྲུབ་བོ། །རྟེན་དང་

གནས་རྣམས་སུ་ནི་བརྗེད་བྱེད་ཀྱི་གདོན་རྣམས་འགྲུབ་བོ། །རིགས་ཀྱི་བུ་དག་གཞན་ཡང་ཡུལ་ལང་ཀ་དང་། རི་མ་ལ་ཡའི་སྟེང་དུ་ནི་གཤིན་རྗེ་འཁོར་དང་བཅས་པ་འགྲུབ་བོ། །གཞན་ཡང་སྲིན་པོ་ཆེན་པོ་རྣམས་ནི་ཡུལ་ལང་ཀ་དང་རི་མ་ལ་ཡར་འགྲུབ་བོ། །གཞན་ཡང་ནམ་

མཁའ་ལྡིང་གི་དབང་པོ་ཐམས་ཅད་ནི་རྒྱ་མཚོ་ཆེན་པོར་འགྲུབ་བོ། །གངས་ཁྲོད་དུ་ནི་དབྱར་སྤྲིན་གྱི་ལྷའི་བུ་རྣམས་འགྲུབ་བོ། །གཞན་ཡང་རི་རྩེ་བརྒྱད་པའི་རྩེ་མོར་ནི་རླུང་བདུན་འགྲུབ་བོ། །རིགས་ཀྱི་བུ་དག་དེ་ལྟར་ན་སེམས་ཅན་གྱི་བསམ་པ་ཐ་དད་པས་དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཡུལ་གྱི་དབང་ཉེ་བར་བཟུང་སྟེ། དུས་ཀྱི་དབང་གིས་གསང་སྔགས་འགྲུབ་པ་གདགས་པར་མཛད་ཅིང་རྣམ་པར་གཞག་པར་མཛད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་

བློ་གྲོས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དུས་ཞེས་བྱ་བ་འདི་ནི་ཆོས་གང་གི་ཚིག་བླ་དགས་ཡིན། དེ་སྐད་ཅེས་སྨྲས་པ་དང་། འཇམ་དཔལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་

སྨྲས་སོ། །རིགས་ཀྱི་བུ་དུས་ཞེས་བྱ་བ་འདི་ནི་སངས་རྒྱས་འབྱུང་བའི་ཚིག་བླ་དགས་སོ། །དེ་ཅིའི་ཕྱིར་ཞེ་ན། ཅི་སྲིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་ཤིང་འཚོལ་གཞེས་པ་དེ་སྲིད་དུ་གསང་སྔགས་འགྲུབ་པར་ཁོང་དུ་ཆུད་

པར་བྱའོ། །ཞི་བའི་བློ་གྲོས་འདི་ལྟ་སྟེ་དཔེར་ན། རྒྱ་མཚོ་ཆེན་པོ་ན་འགྲོ་བ་ཐམས་ཅད་ཀྱི་བཀོད་པའི་སྙིང་པོ་ཞེས་བྱ་བའི་ནོར་བུ་རིན་པོ་ཆེ་ཆེན་པོ་ཡོད་དེ། ནོར་བུ་རིན་པོ་ཆེ་ཆེན་པོའི་རྒྱལ་པོ་ཆེན་པོ་ཇི་སྲིད་དུ་རྒྱ་མཚོ་ཆེན་པོ་ན་གནས་པ་དེ་སྲིད་དུ་ཆུ་སྐམ་པར་མི་འགྱུར་ཏེ། ནོར་བུ་

Vol. 87 · folio 73b

རིན་པོ་ཆེ་ཆེན་པོ་མང་པོ་དག་འབྱུང་བར་འགྱུར་རོ། །རྒྱ་མཚོ་ཆེན་པོ་དེ་ཡང་སྐམ་ལ་གནས་པ་དང་། ཆུ་ན་གནས་པའི་མི་དང་མི་མ་ཡིན་པ་རྣམས་ཀྱི་འཚོ་བར་འགྱུར་ཏེ། ཁ་ཅིག་ཏུ་ནི་བཏུང་བས། ཁ་ཅིག་ཏུ་ནི་གནས་ཀྱིས། ཁ་ཅིག་ཏུ་ནི་རིན་པོ་ཆེ་རྣམ་པར་འགེང་པ་ནས་རྣམ་པ་

ཐམས་ཅད་ཀྱི་བར་གྱིས་འཚོ་བར་འགྱུར་ཞིང་། ནམ་ཡང་ཉེ་བར་མི་འཚོ་བར་མི་འགྱུར་རོ། །ནོར་བུ་རིན་པོ་ཆེ་ཆེན་པོའི་རྒྱལ་པོ་དེ་མེད་པར་གྱུར་ན་ཆུ་མེད་པ་དང་། དངོས་པོ་ཐམས་ཅད་མེད་པའི་ཕྱིར་རྒྱ་མཚོ་ཆེན་པོ་ཡང་སྲོག་ཆགས་ཐམས་ཅད་ཀྱི་འཚོ་བར་མི་འགྱུར་རོ། །ཞི་བའི་བློ་

གྲོས་དེ་བཞིན་དུ་ཇི་སྲིད་དུ་དེ་བཞིན་གཤེགས་པ་བཞུགས་པ་དེ་སྲིད་དུ་གསང་སྔགས་འགྲུབ་པར་འགྱུར་ཏེ། དེ་བཞིན་གཤེགས་པ་དེ་སེམས་ཅན་ཐམས་ཅད་ཀྱི་བསམ་པ་ཐ་དད་པའི་དབང་ཉེ་བར་བཟུང་ནས་དངོས་གྲུབ་སྦྱིན་པར་མཛད་དོ། །དེ་བཞིན་གཤེགས་པ་དེ་ཡོངས་སུ་མྱ་ངན་

ལས་འདས་ན་དངོས་གྲུབ་དེ་ཡང་ཉེ་བར་འཚོ་བར་མི་འགྱུར་རོ། །ཞི་བའི་བློ་གྲོས་ལྟོས་ཅི་ཙམ་དུ་ཤིང་ཡོད་པ་དེ་ཙམ་དུ་མེ་འབར་ཏེ་ཤིང་མེད་ན་མེ་མི་འབར་རོ། །ཞི་བའི་བློ་གྲོས་དེ་བཞིན་དུ་ཇི་སྲིད་དུ་དེ་བཞིན་གཤེགས་པ་བཞུགས་པ་དེ་སྲིད་དུ་གསང་སྔགས་འགྲུབ་པར་ཁོང་དུ་ཆུད་པར་བྱ་སྟེ། ཞི་

བའི་བློ་གྲོས་འདི་ནི་དུས་ཡིན་ནོ། །ཞི་བའི་བློ་གྲོས་གཞན་ཡང་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྟག་ཏུ་རྒྱུན་མི་འཆད་པར་སངས་རྒྱས་འབྱུང་བར་བརྩོན་པར་བྱའོ། །ཞི་བའི་བློ་གྲོས་དེ་ལ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་

སྒོ་སྤྱོད་པའི་བྱང་ཆུབ་སེམས་དཔའ་གསང་སྔགས་སྔར་སྤྱད་པ་ལ་མཁས་པར་བྱའོ། །རིགས་ཀྱི་བུ་དེ་གསང་སྔགས་སྤྱད་པ་གང་ཞེ་ན་འདི་ལྟ་སྟེ། ཡིད་ཡོངས་སུ་མི་སྐྱོ་བ་དང་། སྤྲོ་བ་དང་། ཡི་དམ་ལ་བརྟན་པར་གསང་སྔགས་ཀྱི་གཞི་རེ་རེ་ནས་སྤྱད་པར་བྱའོ། །ཇི་ཙམ་དུ་འགྲོ་ཡང་

རུང་། འདུག་ཀྱང་རུང་། ཉལ་ཡང་རུང་སྟེ་དེ་སེམས་རྩེ་གཅིག་ཁོ་ནས་འཇུག་སྟེ་གཉིས་སུ་ནི་མ་ཡིན་ནོ། །གཅིག་པུ་གཉིས་སུ་མེད་པར་དབེན་པ་ཉམས་དགའ་བ་འདུ་འཛི་མེད་པར་རང་གི་ཡུལ་ལ་གནས་ཤིང་སྔར་བསྙེན་པ་བྱའོ། །དེ་ནས་ཟླ་བ་ཚེས་ནས་བརྩམས་ཏེ་

Vol. 87 · folio 74a

ཉའི་བར་དུ་བྱའོ། །དེ་ནས་རལ་གྲི་འམ། འཁོར་ལོ་འམ། ལིག་བུ་མིག་གམ། གི་ཝང་ལ་སོགས་པ་གང་ཡང་རུང་བ་ཞིག་བླངས་ལ། བའི་ལྕི་བ་ས་ལ་མ་ལྷུང་བ་དང་བའི་གཅིན་བསྲེས་པས་དཀྱིལ་འཁོར་བྱུགས་ལ་བསྒྲུབ་པའི་དཀྱིལ་འཁོར་བྲི་བར་བྱའོ། །

འཁོར་ལོ་བསྒྲུབ་ན་འཁོར་ལོའོ་རྡོ་རྗེའི་དཀྱིལ་འཁོར་བྲི་བར་བྱའོ། །ཅི་སྟེ་རལ་གྲི་བསྒྲུབ་ན་དེས་རྡོ་རྗེའི་དཀྱིལ་འཁོར་བྲི་བར་བྱའོ། །ཅི་སྟེ་ལིག་བུ་མིག་དང་གི་ཝང་ལ་སོགས་པ་བསྒྲུབ་ན་མདུང་རྩེ་གསུམ་པའི་རྡོ་རྗེའི་དཀྱིལ་འཁོར་བྲི་བར་བྱའོ། །ཅི་འབྱོར་པས་མཆོད་ལ་ཉི་མ་ནུབ་ཀར་

དམར་པོར་གྱུར་པ་ནས་བཟུང་སྟེ་ཉི་མ་ཤར་གྱི་བར་དུ་འོ། །དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། བྱང་ཆུབ་ཀྱི་སེམས་སྔོན་དུ་བྱས་ལ་བསྲུང་བ་བྱས་པ་དང་བྱམས་པའི་སེམས་ཀྱིས་རྫས་དེ་བླངས་ཏེ། མཚན་ཐོག་ཐག་བཟླས་བརྗོད་བྱས་ན་ནམ་ཕྱེད་དམ་ཉི་མ་

འཆར་ཀར་རྫས་དེ་ངེས་པར་འབར་བར་འགྱུར་རོ། །འབར་ན་ཡན་ལག་བཀྲ་ལ་སོགས་པ་རིག་སྔགས་འཆང་ཐམས་ཅད་འོང་ཞིང་དེ་དག་གིས་བསོད་ནམས་ཅི་ལྟ་བ་བཞིན་དུ་དབང་བསྐུར་ནས་རིག་སྔགས་འཆང་གི་རྒྱལ་པོར་འགྱུར་ཏེ་འདོད་ན་མཆིའོ། །དེ་བཞིན་གཤེགས་པ་

ཐམས་ཅད་ལ་མཆོད་པ་བྱེད་པ་དང་། འཇིག་རྟེན་གྱི་ཁམས་གཞན་དུ་མར་རྒྱུ་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་བརྩོན་པའི་ཡིད་དུ་འགྱུར་རོ། །གི་ཝང་ལ་སོགས་པ་ཡང་དེ་བཞིན་དུ་བསྒྲུབ་པར་བྱའོ། །འབར་ན་ནམ་མཁའ་ལ་འགྲོ་བ་དང་། གླིང་

བཞིའི་འཇིག་རྟེན་གྱི་ཁམས་སུ་སྤྱད་པ་སྤྱོད་པ་དང་། བསྐལ་པར་གནས་ཤིང་རྒྱུ་བ་དང་། འདོད་དགུར་ཐགས་ཐོགས་མེད་པར་འགྲོ་བར་འགྱུར་ཏེ། །ཤི་འཕོས་ནས་ཀྱང་རྣམ་པར་དག་པའི་སངས་རྒྱས་ཀྱི་ཞིང་དུ་སྐྱེ་བར་འགྱུར་རོ། །དུ་བ་འཐུལ་ན་མི་སྣང་བ་དང་། འདོད་པའི་

གཟུགས་ཅན་དང་། འདོད་པ་བཞིན་དུ་འཛམ་བུའི་གླིང་དུ་རྒྱུ་བ་དང་། ལོངས་སྤྱོད་ཀྱི་དྲུག་ཆ་འཕྲོག་པར་འགྱུར་ཏེ། ཤི་འཕོས་ནས་ཀྱང་དགའ་ལྡན་གྱི་ལྷའི་ནང་དུ་སྐྱེ་བར་འགྱུར་རོ། །དྲོ་བར་གྱུར་ན་འགྲོ་བ་ཐམས་ཅད་ལ་དབང་བྱེད་པ་དང་། ཐོས་པ་འཛིན་པ་དང་། སྒྱུ་རྩལ་

Vol. 87 · folio 74b

ཐམས་ཅད་ཤེས་པར་འགྱུར་ཏེ། ཤི་འཕོས་ནས་ཀྱང་འཛམ་བུའི་གླིང་འདི་ཉིད་དུ་གནོད་སྦྱིན་གྱི་ཕོ་བྲང་ལྕང་ལོ་ཅན་དུ་སྐྱེ་བར་འགྱུར་ཏེ་གནོད་སྦྱིན་གཞོན་ནུའི་ལུས་ཐོབ་བོ། །ཅི་སྟེ་མ་གྲུབ་ན་ཡང་ངེས་པར་ཡུལ་ཐོབ་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་

སེམས་དཔའ་ཞི་བའི་བློ་གྲོས་ལ་ཡང་འདི་སྐད་ཅེས་སྨྲས་སོ། །རིགས་ཀྱི་བུ་བཅོམ་ལྡན་འདས་འཁོར་ལོས་སྒྱུར་བ་ཆེན་པོ་འཇིག་རྟེན་པ་དང་འཇིག་རྟེན་ལས་འདས་པའི་གསང་སྔགས་ཐམས་ཅད་ཀྱི་གོང་ནས་གོང་དུ་གྱུར་པ་སྟོབས་དང་ཕ་རོལ་གནོན་པ་དཔག་ཏུ་མེད་པ་གསང་

སྔགས་ཀྱི་མགོན་པོའི་སྒྲུབ་པ་ཉོན་ཅིག །ཞི་བའི་བློ་གྲོས་ཐོག་མ་ཉིད་དུ་སྔར་སྤྱད་པ་བྱས་པ་དཀྱིལ་འཁོར་མཐོང་བ། དམ་ཚིག་ཐོབ་པ་གནང་བ་རྡོ་རྗེ་འཁོར་ལོས་སྒྱུར་བ་ཆེན་པོའི་དཀྱིལ་འཁོར་དུ་དབང་བསྐུར་བ་དེས། བཅོམ་ལྡན་འདས་ཀྱི་དཀྱིལ་འཁོར་བྲིས་ལ་རིན་པོ་ཆེ་

དང་སྤོས་དང་སྨན་ཐམས་ཅད་ཀྱིས་བཀང་བའི་བྱ་མ་བུམ་བཅུ་དྲུག་འཁོར་ལོས་སྒྱུར་བ་ཆེན་པོའི་སྔགས་བརྒྱ་རྩ་བརྒྱད་བཟླས་བརྗོད་བྱས་པ་དག་གིས་སྤྱི་བོར་དབང་བསྐུར་བར་བྱའོ། །དུས་ཐམས་ཅད་དུ་ལྷའི་གཟུགས་མཐོང་བར་བྱའོ། །དེ་ནས་རིའི་རྩེ་མོར་སོང་ལ་སློང་

མོའི་ཟས་བཟའ་ཞིང་དུས་གསུམ་དུ་ཁྲུས་བྱ། དུས་གསུམ་དུ་གོ་ས་བརྗེས་ལ་ཤིང་ལྟར་མི་སྨྲ་བར་བྱ་ཞིང་གཙང་སྦྲ་དང་། གཙང་སྦྲ་སྤྱོད་པ་ཕུན་སུམ་ཚོགས་པར་བྱས་ལ་བཅོམ་ལྡན་འདས་འཁོར་ལོས་སྒྱུར་བའི་རྒྱལ་པོ་ཆེན་པོ་ས་ཡ་ཕྲག་འབུམ་བཟླས་བརྗོད་བྱའོ། །དེ་

ནས་རྡོ་རྗེ་དྲག་པོའི་སྙིང་པོ་ལན་བཞི་འབུམ་བཟླས་བརྗོད་བྱའོ། །དེ་ནས་གསེར་མགར་གསོ་སྦྱོང་བཟུང་བས་གསེར་གྱི་འཁོར་ལོ་རྩིབས་བརྒྱད་པའམ་དྲུག་པ་ནོར་བུ་མེ་ཤེལ་གྱི་ལྟེ་བ་ཅན་དང་། འོད་ཟེར་འབར་བས་བསྐོར་བ་བརྡུང་དུ་གཞུག་གོ། །དེ་ནས་སྤོས་ཆུས་

བཀྲུས་ཏེ་མཆོག་སྦྱིན་པའི་རྡོ་རྗེའི་སྔགས་ཀྱིས་གཟི་བརྗིད་བསྐྱེད་པར་བྱའོ། །དེ་ནས་རྡོ་རྗེ་དྲག་པོའི་སྙིང་པོས་བསྐུལ་བར་བྱས་ཏེ། བསྐུལ་ནས་འཁོར་ལོས་སྒྱུར་བའི་སྔགས་ཀྱིས་དཀྱིལ་འཁོར་གྱི་དབུས་ན་ཙནྡན་གྱི་སྒྲོམ་བུ་ཡོད་པའི་ནང་དུ་བཅུག་ལ་གཞག་གོ། །

Vol. 87 · folio 75a

དེ་ནས་བདེ་བར་གཤེགས་པའི་སྐུ་མཐོ་གང་ཚད་ཀྱི་མཆོད་རྟེན་ཁྲི་བྱའོ། །དེ་ནས་ཟླ་བ་ཚེས་ནས་བརྩམས་ཏེ་ཨ་ག་རུའི་བདུག་པ་བསྲེག་ཅིང་ཟླ་བ་ཉའི་བར་དུ་བྱའོ། །བཟླས་བརྗོད་དཔག་ཏུ་མེད་པ་བྱེད་ཅིང་བསླངས་པ་མ་ཡིན་པའི་ཟས་ཟ་བས་ཅི་འབྱོར་པས་མཆོད་པ་བྱས་ལ་

བའི་ལྕི་བ་ས་ལ་མ་ལྷུང་བས་དཀྱིལ་འཁོར་བསྐུས་ཏེ། རྡོ་རྗེའི་དཀྱིལ་འཁོར་གྱི་དབུས་སུ་འཁོར་ལོས་སྒྱུར་བའི་དཀྱིལ་འཁོར་བྲི་བར་བྱའོ། །དེ་ན་འདུག་པའི་འཁོར་ལོ་ལག་པས་བླངས་ལ་འཁོར་ལོ་ལས་འོད་ཟེར་རྣམས་བྱུང་གི་བར་དུ་མཚན་ཐོག་ཐག་བཟླས་བརྗོད་བྱའོ། །དེ་དག་

གིས་སྒྲུབ་པ་པོ་སྣང་བར་བྱས་ནས་ལུས་འགྱུར་རོ། །ནམ་ཕྱེད་དམ་ཉི་མ་འཆར་ཀར་ས་གཡོ་བར་འགྱུར་རོ། །ལྷའི་རོལ་མོའི་སྒྲ་འབྱུང་ངོ་། །ལྷའི་སྤོས་ཆུ་དང་འདྲེས་པའི་མེ་ཏོག་གི་ཆར་བར་སྣང་ལས་འབབ་པར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་རིག་

སྔགས་འཆང་ཐམས་ཅད་འདུས་ཏེ། དེ་དག་གིས་དབང་བསྐུར་ནས་ལྷའི་རིན་པོ་ཆེའི་གཞལ་མེད་ཁང་ཆེན་པོ་འབྱུང་བར་འགྱུར་རོ། །གང་དག་མཐོང་བ་དང་། གང་དག་གིས་མཐོང་བ་དེ་དག་དང་ལྷན་ཅིག་ཏུ་གྱེན་དུ་འཕགས་སོ། །ཉི་མ་སྟོང་བས་ལྷག་པའི་གཟི་བརྗིད་དང་ལྡན་

ཞིང་ཡིད་མགྱོགས་པའི་ཤུགས་འཆང་ལ། །དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པ་འཁོར་ལོས་སྒྱུར་བ་ཆེན་པོའི་སྐལ་བ་དང་ལྡན་པ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་

དང་། ལྟོ་འཕྱེ་ཆེན་པོ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་གོང་ནས་གོང་དུ་འགྱུར་བའི་རིག་སྔགས་འཆང་དང་ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་དུ་མའི་གཡོག་འཁོར་ཅན། ལྷའི་སིལ་སྙན་དང་ཕེག་རྡོབ་པ་སྙན་ཅིང་ཡིད་དུ་འོང་བའི་སྒྲ་འབྱིན་པ་དག་གིས་

མངོན་པར་བསྟོད་པར་གྱུར་ནས་འདི་ལྟ་སྟེ། དེ་བཞིན་གཤེགས་པ་ལ་མཆོད་པ་ཆེན་པོ་བྱ་བ་བླ་ན་མེད་པ་ཐོབ་པར་བྱ་བའི་ཕྱིར་འཁོར་ལོ་དེ་ལ་ཞོན་ཏེ་འགྲོ་ཞིང་། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་རྣམས་སུ་མཆོད་པའི་དོན་དུ་སྐད་ཅིག་རེ་རེ་ལ་ཡང་མེ་ཏོག་ཐམས་

Vol. 87 · folio 75b

ཅད་དང་། སྤོས་ཐམས་ཅད་དང་། ཕྲེང་བ་ཐམས་ཅད་དང་། བདུག་པ་ཐམས་ཅད་དང་། རས་ཐམས་ཅད་དང་། གོས་ཐམས་ཅད་དང་། ཕྱེ་མ་ཐམས་ཅད་དང་། རྟ་དང་། གླང་པོ་ཆེ་དང་། ཤིང་རྟ་དང་། གཞལ་མེད་ཁང་ཐམས་ཅད་དང་། རོལ་མོའི་སྒྲ་ཡིད་དུ་འོང་

བ་ཐམས་ཅད་དང་། བཟའ་བ་དང་། བཅའ་བ་དང་། ཟས་དང་སྐོམ་ཐམས་ཅད་དང་། ལྷའི་བུ་མོ་ཐམས་ཅད་དང་། ལྷའི་དཔག་བསམ་གྱི་ཤིང་ལྗོན་པ་རྣམས་དང་། ལྷའི་སྨན་གྱི་ཤིང་ལྗོན་པ་རྣམས་དང་། གསེར་དང་། ནོར་བུ་དང་། མུ་ཏིག་གི་ཕྲེང་བ་ཐམས་ཅད་དང་། དུས་

ཐམས་ཅད་དུ་ལྷའི་ཁང་བུ་བརྩེགས་པ་རྣམས་འབུལ་ལོ། །ཡི་དགས་རྣམས་ཀྱི་ནང་དུ་ནི་བཟའ་བ་དང་། གོས་དང་རྒྱན་དག་གི་སྤྲིན་མངོན་པར་སྤྲུལ་པ་བྱེད་དོ། །འདོད་ན་མཆིའོ། །རྒྱལ་བའི་སྲས་མོས་པས་སྤྱོད་པ་གཞལ་དུ་མེད་པའི་ས་ཐོབ་པ་ཡིན་ནོ། །གྲགས་པ་ཆེན་པོ་

དང་ལྡན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་བསྐྱེད་པ་ཐོབ་པ་རྣམས་མ་གཏོགས་པར་གཟི་བརྗིད་དམ། སྟོབས་སམ། ཡེ་ཤེས་སམ། བཀོད་པའམ། རྫུ་

འཕྲུལ་ལམ། འཕྲུལ་པའམ། གཟུགས་སམ། དཔལ་ལམ། སྤོབས་པ་དེ་དང་མཉམ་པའམ་ལྷག་པ་གང་ཡང་མེད་དོ། །ཞི་བའི་བློ་གྲོས་ཀྱིས་སྨྲས་པ། འཇམ་དཔལ་འཁོར་ལོས་སྒྱུར་བ་ཆེན་པོ་འདི་ཅི་ལྟར་བཀོད་པ་དང་། རྫུ་འཕྲུལ་མངོན་པར་གྲུབ་པ་

དང་། བསམ་གཏན་དང་། བསམ་པ་ཟད་མི་ཤེས་པས་རེ་བ་ཐམས་ཅད་ཡོངས་སུ་རྫོགས་པར་མཛད། བཅོམ་ལྡན་འདས་གསང་སྔགས་ཀྱི་འཁོར་ལོས་སྒྱུར་བ་ཆེན་པོ་འདི་ཅི་ཙམ་དུ་མི་མཉམ་པ་དང་མཉམ་པ་ནི་ངོ་མཚར་ཏོ། །འཇམ་དཔལ་གང་དག་རྫུ་འཕྲུལ་

ཆེན་པོ་རྟག་ཏུ་རྗེས་སུ་དྲན་པ་དེ་དག་ཀྱང་ཡོན་ཏན་གྱི་ཚོགས་དཔག་ཏུ་མེད་པ་དང་ལྡན་པར་འགྱུར་རོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་

Vol. 87 · folio 76a

གྲོས་དེ་དེ་བཞིན་ནོ། །དེ་དེ་བཞིན་ཏེ། ཅི་སྐད་སྨྲས་པ་དེ་བཞིན་ནོ། །བཅོམ་ལྡན་འདས་འཁོར་ལོས་སྒྱུར་བ་ཆེན་པོ་ནི་ཡོན་ཏན་གྱི་ཚོགས་དཔག་ཏུ་མེད་པ་དང་ལྡན་ནོ། །ཞི་བའི་བློ་གྲོས་འདི་ལྟ་སྟེ་དཔེར་ན། ས་ཆེན་པོ་འདི་ནི་སེམས་ཅན་ཐམས་ཅད་ཉེ་བར་

འཚོ་ཡངས་ཆེན་པོ་འདི་ནི་མི་རྟོག་རྣམ་པར་མི་རྟོག་གོ། །དེ་བཞིན་དུ་བཅོམ་ལྡན་འདས་འཁོར་ལོས་སྒྱུར་བ་ཆེན་པོ་ཡང་མི་རྟོག་རྣམ་པར་མི་རྟོག་གོ། །དེ་ཅིའི་ཕྱིར་ཞེ་ན། ས་ཆེན་པོ་ནི་རྣམ་པར་མི་རྟོག་པའི་ཕྱིར་རོ། །ཞི་བའི་བློ་གྲོས་འདི་ལྟ་སྟེ་དཔེར་ན། ས་ཆེན་པོ་འདི་ནི་ལོ་ཏོག་

ཐམས་ཅད་སྐྱེད་དོ། །སེམས་ཅན་ཐམས་ཅད་ཀྱི་རེ་བ་ཐམས་ཅད་ཡོངས་སུ་རྫོགས་པར་བྱེད་དོ། །ཞི་བའི་བློ་གྲོས་དེ་བཞིན་དུ་བཅོམ་ལྡན་འདས་འཁོར་ལོས་སྒྱུར་བ་ཆེན་པོ་ཡང་ཐོས་པ་དང་། བསམས་པ་དང་། བསམ་གཏན་དང་། བཟླས་བརྗོད་བྱེད་པ་དང་། བསྒྲུབས་

པས་ཀྱང་རྣམ་པ་ཐམས་ཅད་དུ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པ་རྣམས་ཀྱི་བསམ་པ་ཐམས་ཅད་ཡོངས་སུ་རྫོགས་པར་མཛད་དོ། །ཞི་བའི་བློ་གྲོས་འདི་ལྟ་སྟེ། དེ་བཞིན་གཤེགས་པ་བསམ་གྱིས་མི་ཁྱབ་པ་ཉིད་དོ། །ཀླུ་བསམ་གྱིས་མི་ཁྱབ་

པ་ཉིད་དོ། །བསམ་གཏན་བསམ་གྱིས་མི་ཁྱབ་པ་ཉིད་དོ། །བདུད་བསམ་གྱིས་མི་ཁྱབ་པ་ཉིད་དོ། །ལས་བསམ་གྱིས་མི་ཁྱབ་པ་ཉིད་དོ་ཞེས་གང་དག་ཡང་དག་པར་སྨྲ་བས་སྨྲས་པ་དེ་དག་ནི་འཁོར་ལོས་སྒྱུར་བ་ཆེན་པོ་འདི་ཉིད་ལ་ཡང་དག་པར་སྨྲ་བས་སྨྲ་བ་ཡིན་ནོ། །དེ་

ཅིའི་ཕྱིར་ཞེ་ན། བསམ་གྱིས་མི་ཁྱབ་པ་ཉིད་དེ་དག་ཐམས་ཅད་ནི་འདི་ལས་འབྱུང་བའི་ཕྱིར་རོ། །ཞི་བའི་བློ་གྲོས་འཇིག་རྟེན་པའམ་འཇིག་རྟེན་ལས་འདས་པའི་བསམ་གཏན་ཁ་ཅིག། བསམ་གཏན་བསྒྲུབ་པའམ། བདུད་དམ། འདོད་པའི་ཁམས་ཀྱི་དབང་ཕྱུག་

གམ། ཀླུའམ་སངས་རྒྱས་བཅོམ་ལྡན་འདས་བསམ་གྱིས་མི་ཁྱབ་པའི་ཆོས་དང་ལྡན་པར་གྱུར་པ་རྣམས་ཀྱང་། བཅོམ་ལྡན་འདས་འཁོར་ལོས་སྒྱུར་བ་ཆེན་པོ་འདི་ཉིད་ཀྱིས་བྱིན་གྱིས་བརླབས་པ་ཡིན་ནོ། །རྫུ་འཕྲུལ་རྣམ་པར་འཕྲུལ་པ་སྣ་ཚོགས་ཀྱང་སྟོན་ཏོ། །ཞི་བའི་བློ་

Vol. 87 · folio 76b

གྲོས་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར་བཅོམ་ལྡན་འདས་འཁོར་ལོས་སྒྱུར་བ་ཆེན་པོ་འདི། ཇི་ལྟར་གསང་སྔགས་ཐམས་ཅད་ཀྱི་བདག་པོ་དང་། གཙོ་བོ་དང་། མངའ་མཛད་པ་དང་། འདི་ལས་གཞན་པའི་གོ་འཕང་མཆོག་གཞན་ལ་མེད་པར་རིག་པར་བྱའོ། །

འཁོར་ལོ་ལ་ཇི་ལྟ་བ་བཞིན་དུ་རལ་གྲི་དང་། མདུང་རྩེ་གསུམ་པ་དང་། མདུང་རྩེ་གསུམ་པ་གདེངས་པ་དང་། མདུང་ཐུང་དང་། ལྕགས་ཀྱུ་དང་། དགྲ་སྟ་དང་། མཚོན་རྩེ་གཅིག་དང་། ཐོང་གཤོལ་དང་། ཞགས་པ་དང་། ཀ་ན་ཡ་དང་། ལྕགས་མདའ་དང་།

ལྕགས་ཐག་དང་། གཞུ་དང་། བེ་ཅོན་དང་། མདུང་དང་། གཏུན་ཤིང་རྐེད་ཉག་དང་། དབྱུག་ཏོ་རྣམ་པ་སྣ་ཚོགས་བསྒྲུབ་པར་བྱའོ། །ལིག་བུ་མིག་དང་། གི་ཝང་དང་། ལྡོང་རོས་ལ་སོགས་པ་རྣམ་པ་སྣ་ཚོགས་ཀྱང་བསྒྲུབ་པར་བྱ་སྟེ། དེ་དག་གི་དངོས་གྲུབ་ཀྱང་

དེ་བཞིན་དུ་རྣམ་པ་གསུམ་མོ། །ཅི་སྟེ་རིལ་བུ་བསྒྲུབ་པར་འདོད་ན་བཅོམ་ལྡན་འདས་འཁོར་ལོས་སྒྱུར་བའི་རྒྱལ་པོའི་སྔགས་ལན་སུམ་འབུམ་བཟླས་བརྗོད་བྱའོ། །དེ་ནས་ལྡོང་རོས་དང་། ལིག་བུ་མིག་དང་། །ཨ་དམ་གུཔྟའི་རྩ་བ་དང་། ཨནྡྷ་པུཥྤི་ཀའི་རྩ་བ་རྣམས་ཆ་

མཉམ་སྟེ་གཅིག་ཏུ་བསྲེས་ལ་རིལ་བུ་རྒྱ་ཤུག་གི་ཚིག་གུའི་ཚད་ཙམ་དུ་བྱས་ཏེ་ལྕགས་རྣམ་པ་གསུམ་གྱིས་བསྐོར་ལ། འཁོར་ལོ་ལག་ན་ཐོགས་སམ། རལ་གྲི་ལག་ན་ཐོགས་ཤིང་རིང་བསྲེལ་དང་བཅས་པའི་མཆོད་རྟེན་ནམ་སྐུ་གཟུགས་ཀྱི་མདུན་དུ་ཟས་མི་བཟའ་

བར་དེ་ཁར་བཅུག་ལ་ནུབ་ཀ་དམར་ཐག་ཆད་ནས་བཟུང་སྟེ་འཁོར་ལོ་དང་རལ་གྲི་ལས་སྔོན་པོའམ། སེར་པོར་སྣང་བའི་འོད་ཟེར་བྱུང་བའི་བར་དུ་བཟླས་བརྗོད་བྱས་ན་སྒྲུབ་པ་པོ་སྣང་བར་བྱེད་ཅིང་གྲུབ་པར་འགྱུར་ཏེ། ཉི་མ་ཤར་བའི་མདོག་ཅན་དང་། རླུང་ལྟར་འགྲོ་བ་

དང་། བསྐལ་པར་གནས་པ་དང་། མི་སྣང་བར་འགྱུར་བ་དང་། འདོད་པའི་གཟུགས་ཅན་དུ་གྱུར་པ་དེ་ཤི་འཕོས་ནས་ཀྱང་རྒྱལ་པོ་དབང་སྒྱུར་གྱི་གནས་སུ་སྐྱེ་བར་འགྱུར་རོ། །རི་མོའི་སྐུ་གཟུགས་དང་། སྐུ་གཟུགས་མེད་པར་བགྱི་ན་བསྒྲུབས་ཀྱང་དངོས་གྲུབ་

Vol. 87 · folio 77a

སྦྱིན་པར་མཛད་དོ། །ཅི་སྟེ་རི་མོའི་སྐུ་གཟུགས་བསྒྲུབ་པར་འདོད་ན་བྲམ་ཟེའམ། རྒྱལ་རིགས་ཀྱི་བུ་མོ་གཟུགས་བཟང་བ་ཡན་ལག་ཐམས་ཅད་ཡོངས་སུ་རྫོགས་པ་གསོ་སྦྱོང་གཟུང་བ་ཞིག་ལ་རིན་ལ་མ་བརྩེགས་པར་ཉོས་པའི་ཤིང་བལ་འཁལ་དུ་བཅུག་ལ། ཚེས་

གྲངས་དང་། བྱེད་པ་དང་། ཡུད་ཙམ་བཟང་པོ་ལ་ཡན་ལག་ཐམས་ཅད་ཡོངས་སུ་རྫོགས་པའི་ཐ་ག་པ་འཐག་ཏུ་བཅུག་སྟེ། བའི་ལྕི་བ་ས་ལ་མ་ལྷུང་བས་དཀྱིལ་འཁོར་བསྐུས་ལ་སྦོས་དང་། མེ་ཏོག་དང་། བདུག་པ་ལ་སོགས་པས་མཆོད་དོ། །སྐྲ་མེད་པ་དང་མཉམ་པ་

དང་འཇམ་པར་བྱའོ། །ཐ་ག་པའི་ཐགས་ཆ་རྣམས་ཀྱང་བའི་སྣ་ལྔ་དང་སྤོས་ཆུས་བཀྲུའོ། །ཞི་བའི་བློ་གྲོས་ཐམས་ཅད་ཀྱང་རྡོ་རྗེ་དྲག་པོའི་སྙིང་པོས་ལུས་བསྲུང་བར་བྱའོ། །རི་མོ་མཁན་གསོ་སྦྱོང་གཟུང་བ་དང་། མཁས་པ་དང་། དད་པ་དང་སྙིང་རྗེ་དང་ལྡན་པ། སེར་

སྣ་མེད་པ་ཡན་ལག་ཐམས་ཅད་ཡོངས་སུ་རྫོགས་པ་ཞིག །ས་ཕྱོགས་དབེན་ཞིང་དུགས་མེད་པ། གཙང་མ་མེ་ཏོག་བཀྲམ་པར་ཨ་ག་རུའི་བདུག་པ་བསྲེག་ཅིང་། ཚོན་རྩི་སར་པ་སྦྱིན་དང་མ་འདྲེས་པའི་ཚོན་གྱིས་འདྲིར་གཞུག་གོ། །ཞི་བའི་བློ་གྲོས་ཡང་ན་སྒྲུབ་པ་པོ་བདག་

ཉིད་ཀྱིས་བྲི་བར་བྱའོ། །གདུགས་དང་། རྒྱལ་མཚན་དང་། བ་དན་བསྒྲེང་ཞིང་སིལ་སྙན་དང་། དགའ་བར་འགྱུར་བའི་སྒྲ་མང་པོ་དང་། ཤིས་པ་རྒྱ་ཆེན་པོ་དང་། བཀྲ་ཤིས་པ་བརྗོད་པ་རྣམས་ཀྱིས་མཆོད་པར་བྱའོ། །ཞི་བའི་བློ་གྲོས་སྒྲུབ་པ་པོ་བྱམས་པའི་སེམས་

དང་ལྡན་པ་ཐོད་ཟེའུ་ཀ་བཅིངས་པ་སྔགས་བགྲང་ནོར་བུ་འཕྱང་བ་དང་བཅས་པར་རི་མོ་མཁན་གྱི་རྒྱབ་ན་འདུག་ཅིང་། བཅོམ་ལྡན་འདས་འཁོར་ལོས་སྒྱུར་བ་ཆེན་པོའི་གཟུགས་དང་ཁ་དོག་བསམ་པར་བྱའོ། །ཕྱག་རྒྱ་དང་ཡི་གེ་རྣམས་ཀྱང་བསམ་ཞིང་བཅོམ་ལྡན་འདས་

འཁོར་ལོས་སྒྱུར་བ་ཆེན་པོ་བྲི་བར་བྱ་སྟེ། པདྨ་དཀར་པོ་ལ་བཞུགས་པ་གསེར་གྱི་ཁ་དོག་གི་མདོག་ཅན་མེ་ལྕེ་འབར་བ་ལང་ལོང་དུ་གྱུར་པ། ཐོར་ཚུགས་ཅན་དར་རམ་རས་ཀྱི་ཤམ་ཐབས་མནབས་པ། ན་བཟའ་བླ་གོས་དར་ལ་མནབས་པ། ཏིང་ངེ་འཛིན་དུ་སྙོམས་པར་

Vol. 87 · folio 77b

ཞུགས་པ། ཞལ་ཡིད་ཙམ་འཛུམ་པ། མཚན་ཐམས་ཅད་དང་ལྡན་པ་བྲིའོ། །དེའི་གཡས་རོལ་དུ་དམ་པ་སྦྱིན་པའི་རྡོ་རྗེ་གུར་གུམ་གྱི་མདོག་ཅན་ཕུད་པུ་ལྔ་པ། རྡོ་རྗེ་དང་བཅས་པའི་ཨུཏྤལ་སྔོན་པོ་ལག་པ་གཡོན་པ་ན་ཐོགས་པ། རྒྱན་ཐམས་ཅད་ཀྱིས་རྣམ་པར་

བརྒྱན་པ། དར་རམ་རས་ཀྱི་སྨད་གཡོགས་བགོས་པ། བླ་གོས་དར་ལ་གྱོན་པ། མེ་ལྕེ་འབར་བ་དང་བཅས་པ་པདྨ་དཀར་པོ་ལ་འདུག་པ་བཞིན་འཛུམ་པ་བྲིའོ། །བཅོམ་ལྡན་འདས་འཁོར་ལོས་སྒྱུར་བ་ཆེན་པོའི་གཡོན་རོལ་དུ་ཧ་ཅང་ཡང་མི་རིང་བར་དེའི་ཞལ་དུ་བལྟ་བར་

བརྩོན་པ་བྱང་ཆུབ་སེམས་དཔའ་ལག་ན་རྡོ་རྗེ་རྒྱན་ཐམས་ཅད་ཀྱིས་རྣམ་པར་བརྒྱན་པ་ཅོད་པན་ཐོགས་ཤིང་ཅོད་པན་འགུལ་བ། གོས་ཚིག་གུ་གྱོན་པ་པུས་མོ་བཙུགས་པ། རྡོ་རྗེ་དང་བཅས་པའི་ཐལ་མོ་སྦྱོར་བ་བཀའ་ནོད་པ་བྲིའོ། །དེའི་མདུན་དུ་སྔ་མ་བཞིན་དུ་ལན་ས་ཡ་

བཟླས་བརྗོད་བྱའོ། །ཐ་མར་ཅི་འབྱོར་པས་མཆོད་དེ་ལག་ན་རལ་གྲིའམ་ལག་ན་འཁོར་ལོ་ཐོགས་ཤིང་མཚན་ཐོག་ཐག་ཨ་ག་རུའི་ཡམ་སྲེག་ཤིང་ཞོ་དང་སྦྲང་རྩི་དང་མར་ལ་སྨྱུགས་པས་སྦྱིན་སྲེག་བྱས་ན་ནམ་ཕྱེད་དམ་ཉི་མ་ཤར་ཀར་ངེས་པར་རི་མོའི་གཟུགས་ལས་འོད་ཟེར་དག་བྱུང་སྟེ།

དེ་དག་གིས་སྣང་བར་བྱས་ནས་གྲུབ་པར་འགྱུར་ཏེ། སྔ་མ་བཞིན་དུ་གར་དགའ་བ་དེར་འགྲོའོ། །རི་མོའི་གཟུགས་དེ་མཐོང་བ་ཙམ་གྱིས་ཀྱང་སྡིག་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །རི་མོ་མཐོང་བའི་མཐུ་ཡིས་ནི། །མཚམས་མེད་ལྔ་ལ་སོགས་པའི་ལས། །

སྡིག་པ་སྔོན་ཆད་གང་བྱས་པ། །དེ་དག་ཐམས་ཅད་བྱང་བར་འགྱུར། །འཁོར་ལོས་སྒྱུར་བ་གཟི་བོ་ཆེ། །མགོན་པོ་དྲན་པར་འདོད་པ་བཞིན། །འཇིག་རྟེན་ཀུན་གྱི་དོན་བསྒྲུབ་པའི། །འཕྲིན་ལས་མཛད་པ་སྨོས་ཅི་དགོས། །སྔགས་པས་རི་མོའི་གཟུགས་མདུན་དུ། །

པདྨའི་སྦྱིན་སྲེག་འབུམ་བྱས་ན། །འདོད་བཞིན་དངོས་གྲུབ་མཆོག་སྦྱིན་པ། །དཔལ་ནི་མངོན་སུམ་མཐོང་བར་འགྱུར། །སྔགས་པས་གང་ཡང་རུང་བར་ནི། །ཟད་མི་ཤེས་པའི་གཏེར་མཐོང་ཞིང་། །ནམ་མཁའ་ལ་ཡང་འགྲོ་བར་འགྱུར། །བསམ་པ་བཞིན་དུ་

Vol. 87 · folio 78a

འདོད་པ་རྙེད། །གི་ཝང་དང་ནི་ལྡོང་རོས་དང་། །ལིག་བུ་མིག་ཀྱང་དེ་བཞིན་ནོ། །ཁ་ཟས་མི་བཟའ་གཙང་བྱས་ལ། །མཁས་པས་ལན་འབུམ་བཟླས་བརྗོད་བྱ། །སྔར་བསྙེན་བྱ་བ་མེད་པར་ཡང་། །སྔགས་པས་འགྲུབ་འགྱུར་ཐེ་ཙོམ་མེད། །འཇིག་

རྟེན་གསུམ་ན་མི་སྣང་ཞིང་། །སྐྱེ་བོ་ཀུན་གྱིས་ཐུབ་མི་འགྱུར། །རི་དང་ནགས་ཚལ་བཅས་པ་ཡིས། །ས་རྣམས་ཀུན་དུ་རྣམ་པར་རྒྱུ། །བསྐལ་པར་གནས་ཤིང་གཟི་བརྗིད་ཆེ། །རྒ་དང་འཆི་བ་རྣམ་པར་སྤངས། །ཞི་བའི་བློ་གྲོས་གཞན་ཡང་དྲག་པོ་ཆེན་པོ་ལག་ན་

རྡོ་རྗེའི་སྒྲུབ་པ་ནི་འདི་ཡིན་ཏེ། རང་གི་ཡུལ་ན་གནས་ཤིང་གཙང་བར་བྱས་ལ་བྱང་ཆུབ་ཀྱི་སེམས་དང་ལྡན་པའི་ཡིད་དུ་བྱས་ཏེ། རིའི་རྩེ་མོར་སོང་ལ་སློང་མོའི་ཟས་བཟའ་ཞིང་གོས་ལན་གསུམ་བརྗེས་ལ་དུས་གསུམ་དུ་ཁྲུས་བྱ་ཞིང་བྱང་ཆུབ་སེམས་དཔའི་སྡོམ་པས་བསྡམས་

ཏེ། གུས་ཤིང་དེ་དང་མཐུན་པའི་ཆ་བྱད་དུ་བྱས་ལ་མི་སྨྲ་བར་ས་ཡ་གཅིག་འབུམ་བཟླས་བརྗོད་བྱའོ། །དེའི་འོག་ཏུ་རལ་གྲིའམ། འཁོར་ལོའམ། བེ་ཅོན་ནམ། ཞགས་པའམ། དགྲ་སྟའམ། གཏུན་ཤིང་རྐེད་ཉག་གམ། ཐོ་བའམ། མདུང་ཐུང་བླངས་ལ།

བའི་རྣམ་ལྔས་བཀྲུས་ཤིང་སྤོས་ཆུས་ཀྱང་བཀྲུས་ལ་ཤུབས་དང་བཅས་པར་ལག་ན་ཐོགས་ཏེ། འགྲེང་ངམ་འདུག་ཀྱང་རུང་འགྲོ་ཡང་རུང་ཟླ་བ་གཅིག་བཟླས་བརྗོད་བྱའོ། །ཉལ་ན་ཡང་འཁོར་ལོས་སྒྱུར་བ་ཆེན་པོས་བསྲུང་བར་བྱའོ། །དེ་ནས་ཟླ་བ་ཕྱི་མ་ལ་ཚེས་ནས་བརྩམས་

ཏེ་ཉའི་བར་དུ་བདོག་པ་ཐམས་ཅད་ཡོངས་སུ་གཏང་བར་བྱའོ། །དེ་ནས་ཟླ་བ་ཉ་ལ་ཅི་འབྱོར་པས་མཆོད་དེ། །བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་བསྐུས་ལ་རིའི་རྩེ་མོ་དེ་ཉིད་དུ་རིང་བསྲེལ་དང་བཅས་པའི་མཆོད་རྟེན་གྱི་དྲུང་དུ། བདེ་བར་གཤེགས་པའི་མཐོ་གང་གི་ཚད་

ཀྱི་སྐུ་གཟུགས་གཞག་ལ་མཆོད་པ་བྱས་ཏེ། ཕྱོགས་གཅིག་ཏུ་བསྒྲུབ་པའི་དཀྱིལ་འཁོར་བྲིའོ། །དེ་ལ་ཤར་ཕྱོགས་སུ་ནི་རིག་སྔགས་འཆང་གི་རྒྱལ་པོ་ཡན་ལག་བཀྲས་བྱིན་གཞག་གོ། །ལྷོ་ཕྱོགས་སུ་ནི་རིག་སྔགས་འཆང་གི་རྒྱལ་པོ་སྣ་ཚོགས་སྡེ་གཞག་གོ །ནུབ་

Vol. 87 · folio 78b

ཕྱོགས་སུ་ནི་རིག་སྔགས་འཆང་གི་རྒྱལ་པོ་ཏོག་ལྡན་གཞག་གོ། །བྱང་ཕྱོགས་སུ་ནི་རིག་སྔགས་འཆང་གི་རྒྱལ་པོ་ཀཱི་ལི་ཀི་ལ་གཞག་གོ། །གྲྭ་བཞིར་ནི་ཚོན་སྣ་བཞི་པའི་རྡོ་རྗེ་རྩེ་གསུམ་པ་མེ་ལྕེ་འབར་བ་དང་བཅས་པ་གཞག་གོ། །དབུས་སུ་ནི་པདྨ་འདབ་མ་བརྒྱད་པ་ཟེ་བ་

དང་བཅས་པ་བྲིས་ལ་སྙིང་པོ་སྟེང་དུ་གང་བསྒྲུབ་པ་དེ་བྲིའོ། །དེའི་སྟེང་དུ་རྫས་གང་བསྒྲུབ་པར་བྱ་བ་གང་ཡིན་པ་དེ་ཤིང་ཨ་ཤྭཏྠའི་ལོ་མའི་སྟེང་དུ་གཞག་གོ། །པདྨ་ནས་ཁྲུ་གང་ཙམ་གྱི་ས་གཞི་བོར་ལ། རྡོ་རྗེ་རྒྱ་གྲམ་བྲིས་ཏེ་དེར་འདུག་ལ་བསྲུང་བར་བྱ་སྟེ་འབར་བའི་བར་དུ་བཟླས་

བརྗོད་བྱའོ། །འབར་ནས་གཡོ་བར་འགྱུར་རོ། །ཡང་ན་རྔ་བོ་ཆེའི་སྒྲ་སྒྲོགས་པར་འགྱུར་རོ། །ཡང་ན་མེ་ཏོག་གི་ཆར་འབབ་བོ། །ཞི་བའི་བློ་གྲོས་ཡང་ན་སྣང་བ་ཆེན་པོས་སྒྲུབ་པ་པོ་སྣང་བར་འགྱུར་རོ། །ཡང་ན་མེ་ཏོག་གི་ཕྲེང་བ་འགུལ་བར་འགྱུར་ཏེ། །མཆོད་ཡོན་

བྱིན་ལ་བླངས་ན་འགྲུབ་པར་འགྱུར་རོ། །ཉི་མ་ཤར་བ་ལྟ་བུའི་མདོག་ཅན་དང་། ཡིད་ལྟར་མགྱོགས་པ་དང་། ཁམས་གཞན་དུ་མར་རྒྱུ་བ་དང་། མཆོད་པ་བྱེད་པ་དང་། དེ་བཞིན་གཤེགས་པ་ཐམས་ཅད་ལ་མཆོད་ཅིང་རིམ་གྲོ་བྱ་བ་ལ་མཁས་པ་དང་། དབང་ཕྱུག་

ཐམས་ཅད་ཀྱི་གནས་ཐོབ་པ་དང་འདོད་ན་མཆི་བར་འགྱུར་རོ། །རྟག་ཏུ་རྗེས་སུ་དྲན་པར་བྱེད་ན་མི་མ་ཡིན་པའི་འཇིགས་པ་མི་འབྱུང་ངོ་། །བདག་འཆི་བ་ཤེས་པར་འགྱུར་རོ། །ལག་ན་རྡོ་རྗེ་བདག་ཉིད་སྟོན་པར་བྱེད་དོ། །ཤི་འཕོས་ནས་ཀྱང་ལྕང་ལོ་ཅན་དུ་ལག་ན་རྡོ་རྗེའི་ཁྱིམ་

དུ་གཞོན་ནུའི་ལུས་འཐོབ་པར་འགྱུར་རོ། །ཉིན་གཅིག་བཞིན་དུ་སྙིང་པོ་འདི་ལན་བརྒྱ་རྩ་བརྒྱད་བཟླས་བརྗོད་བྱས་པའི་ཆུ་འཐུངས་ན་ནད་ཐམས་ཅད་མེད་པར་འགྱུར་རོ། །གི་ཝང་ལ་ལན་ཅིག་བསྔགས་ཏེ་མིག་ལ་བསྐུས་ན་གང་མཐོང་བ་དེ་དབང་དུ་འགྱུར་རོ། །སོ་ཤིང་ལ་

སྔགས་ལན་ཅིག་བཏབ་སྟེ་འཆོས་ན་འདོད་པའི་ཟས་རྙེད་དོ། །ཆུའི་ནང་དུ་མེ་ཏོག་ཁ་དོག་ཅི་འདྲ་བ་བོར་བ་དེ་འདྲ་བའི་གོས་རྙེད་པར་འགྱུར་རོ། །ཁ་ལ་སྔགས་ཀྱིས་བཏབ་ན་གང་དང་སྨྲ་བ་དེ་དབང་དུ་འགྱུར་རོ། །ལྕགས་ཀྱུའི་ཕྱག་རྒྱ་བཅིངས་ལ་ཧཱུཾ་ཞེས་བྱ་བས་དུག་སེལ་ཏོ། །

Vol. 87 · folio 79a

ཁྲོས་པ་དང་བཅས་པའི་མཛུབ་མོས་བསྡིགས་ན་བག་འཁུམས་པར་འགྱུར་རོ། །གདོན་གྱིས་ཟིན་པ་ལ་རྡོ་རྗེའི་ཕྱག་རྒྱ་བཅིངས་ལ་ཧཱུཾ་ཞེས་བྱ་བས་བསྡིགས་ཤིང་རཾ་ཞེས་བྱ་བས་འབར་བར་བྱས་པ་ཙམ་གྱིས་འབྲོས་ཏེ་ཐེ་ཙོམ་མེད་དོ། །གདོན་གྱིས་ཟིན་པ་ལ་ལག་

མཐིལ་ལ་ཧ་ཞེས་བྱ་བ་བསམས་ལ་བྱབས་ན་སོས་པར་འགྱུར་རོ། །མེ་ཏོག་གམ། སྤོས་སམ། བདུག་པ་ལ་སྔགས་ཀྱིས་བཏབ་སྟེ་སུ་ལ་བྱིན་པ་དེ་དབང་དུ་འགྱུར་རོ། །གདོན་དྲག་པོ་ཐམས་ཅད་ཀྱང་ཆོ་ག་འདི་ཉིད་ཀྱིས་འབྲོས་པར་འགྱུར་རོ། །སྔགས་པ་དུལ་བའི་སེམས་དང་ལྡན་

པ་སློང་མོའི་ཟས་བཟའ་ཞིང་བསྲུང་བ་བྱས་ལ། ཀླུའི་རྒྱ་མཚོར་ལན་སུམ་འབུམ་བཟླས་བརྗོད་བྱས་ན། ཀླུ་འབྱུང་སྟེ་གང་བསླངས་པ་དེ་སྦྱིན་པར་བྱེད་དོ། །སྐུད་པ་སྔོན་པོ་ལ་སྔགས་ཀྱིས་བཏབ་སྟེ་རིམས་ཀྱིས་བཏབ་པའི་མགུལ་པར་བཅིངས་ན་དེའི་མོད་ལ་རིམས་ལས་ཐར་བར་

འགྱུར་རོ། །མིག་ན་བ་ལ་ཤིང་ཀ་ར་བཱི་རའི་ལྕུག་མ་བླངས་ལ་ལན་ཅིག་སྔགས་ཀྱིས་བཏབ་སྟེ། །ཟངས་ཀྱི་སྣོད་ལ་བྲུད་དེ་མིག་ལ་བསྐུས་ན་དེའི་མོད་ལ་སོས་པར་འགྱུར་རོ། །ཀླད་ནད་ཐམས་ཅད་ལ་ནི་གུ་གུལ་ལ་སྔགས་ཀྱིས་བཏབ་སྟེ་ལུས་ཐམས་ཅད་གཡོགས་ལ་མགོར་གཏུགས་

ན་ཀླད་ནད་མེད་པར་འགྱུར་རོ། །ཟས་མ་ཞུ་བར་གྱུར་ན་ཆུ་ལ་སྔགས་ཀྱིས་བཏབ་པའི་ཁྱོར་ཆུ་ལན་བདུན་འཐུངས་ན་སོས་པར་འགྱུར་རོ། །ལྟོ་ན་བ་ལ་ནི་སྐུད་པ་དམར་པོ་ལྡུམ་བུར་ཏྣ་སུ་ཙིའི་རྩ་བ་དང་བཅས་པ་ལ་སྔགས་ཀྱིས་བཏབ་སྟེ་རྐེད་པར་བཅིངས་ན་ལྟོ་བའི་ནད་སོས་པར་འགྱུར་རོ། །

ཞི་བའི་བློ་གྲོས་ནད་ཐམས་ཅད་ཞི་བར་བྱེད་པ་གདོན་ཐམས་ཅད་སེལ་བའི་བདུག་པའི་རྒྱལ་བོ་འདི་བརྗོད་པར་བྱའོ། །ཞི་བའི་བློ་གྲོས་ཀྱིས་སྨྲས་པ། འཇམ་དཔལ་ཅི་ལས་འདི་དག་གྲུབ་པ་ཡིན་པར་བསྟན་ནམ། འོན་ཏེ་མ་གྲུབ་པ་ཡང་ཡིན་ནམ། འཇམ་དཔལ་གྱིས་

སྨྲས་པ། ཞི་བའི་བློ་གྲོས་རིག་པའི་རྒྱལ་པོ་འདི་ནི་རྟག་ཏུ་གྲུབ་པ་ཡིན་ཏེ། ཞི་བའི་བློ་གྲོས་བྱང་ཆུབ་ཀྱི་སེམས་དང་བྲལ་བ་མ་གཏོགས་པར་སྔར་སྤྱད་པ་བྱ་མི་དགོས། སྔར་བསྙེན་པར་བྱ་མི་དགོས་པར་ཚེ་འདི་ལ་བདེ་བར་གནས་པར་བྱ་བའི་ཕྱིར། བྱང་ཆུབ་སེམས་དཔའ་རང་

Vol. 87 · folio 79b

གི་ལྷའི་རྣལ་འབྱོར་ལ་བརྩོན་པ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པ་ལ་བྱེ་བྲག་ཏུ་བརྗོད་པའི་བསྒྲུབ་པ་རྣམས་བསྟན་ཏོ། །ཤིང་ཨརྒ་དཀར་པོའི་རྩ་བ་དང་། ཀི་རི་ཀ་ར་ནི་ཀ་དཀར་པོའི་རྩ་བ་དང་། ཀ་ར་བཱི་ར་དཀར་པོའི་རྩ་བ་དང་། ཨུ་ཤི་ར་དང་། བ་ལ་ཀ་དང་། ཙནྡན་

དང་། ན་ལེ་ཤམ་དང་། ནི་རྒུན་ཏི་དང་། གུ་གུལ་དང་མར་དུ་བསྲེས་པའི་བདུག་པས་ནི་གདོན་ཐམས་ཅད་ཕུང་བར་བྱེད་དོ། །ནད་ཐམས་ཅད་རབ་ཏུ་ཞི་བར་བྱེད་པའོ། །དཔལ་དང་ལྡན་པ་དང་། ཚེ་དང་སྐལ་བ་བཟང་པོར་བྱེད་པའོ། །ཞི་བའི་བློ་གྲོས་སྔོན་བྱུང་བ་འདས་པའི་དུས་

ན་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་གསུང་རབ་ལས་བྲམ་ཟེ་བློ་གྲོས་ལྡན་ཞེས་བྱ་བ་རིག་བྱེད་རྣམས་ལ་རིག་བྱེད་ཀྱི་དོན་ལ་མཁས་པ། བཟོ་དང་སྒྱུ་རྩལ་ཐམས་ཅད་མངོན་པར་ཤེས་པ། གསང་སྔགས་ཀྱི་དོན་ལ་མཁས་པ་ཞིག་བྱུང་སྟེ། དེ་རི་ཞིག་

གི་རྩེ་མོ་ལ་བརྩོན་འགྲུས་བརྩམས་ནས་རིག་པའི་རྒྱལ་པོ་རྡོ་རྗེ་དྲག་པོ་ཆེན་པོ་འདི་བསྒྲུབས་བསྒྲུབས་པ་ལས། བགེགས་དང་ལོག་འདྲེན་མ་རུངས་པ་དག་གིས་གཙེས་པ་དང་། དེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་

རྣམ་པར་གཟིགས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྲམ་ཟེ་བློ་གྲོས་ལྡན་གྱིས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་དེའི་

ཚུལ་སྨོས་ཏེ་གསོལ་བ། བཅོམ་ལྡན་འདས་བདག་འདི་ན་རི་ཆེ་གེ་མོ་ཞེས་བགྱི་བའི་རྩེ་མོ་ལ་བརྩོན་འགྲུས་བརྩམས་ནས་རིག་པའི་རྒྱལ་པོ་རྡོ་རྗེ་དྲག་པོ་དེ་བསྒྲུབས་བསྒྲུབས་ན། ཡང་བཅོམ་ལྡན་འདས་བདག་གིས་དེའི་དངོས་གྲུབ་མ་རྙེད་མ་ཐོབ་མ་དམིགས་ན་རྫས་སུ་ཅུང་ཟད་ཅིག་བསྒྲུབས་

ན། དེ་ཐམས་ཅད་ཀྱང་བགེགས་རྣམས་ཀྱིས་ཕྲོགས་ན། དེ་ལ་བདག་གིས་ཅི་ལྟར་བསྒྲུབ་པར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས། བྲམ་ཟེ་བློ་གྲོས་ལྡན་ལ་བདུག་སྤོས་འདི་བཀའ་

Vol. 87 · folio 80a

སྩལ་ཅིང་གསང་སྔགས་ཀྱི་ཚིག་འདི་དག་ཀྱང་གསུངས་སོ། །སྱཱ་དྱ་ཐེ་དཾ། རུ་རུ་ལེ་ལེ། བུདྡྷ་མ་ཏཾ་གི །པུཀྐ་སི། ཤ་བ་རི་ཀ །གྲྀཧྞ་ཁཱ་ད་ཡ་སྭཱ་ཧཱ། ཞི་བའི་བློ་གྲོས་དེའི་ཚེ་དེའི་དུས་ན་རིག་པའི་རྒྱལ་པོ་འདི་བསྒྲུབ་པའི་བྲམ་ཟེ་བློ་གྲོས་ལྡན་ཞེས་བྱ་བ་བྱུང་བ་དེ་གཞན་

ཞིག་ཡིན་སྙམ་དུ་ཁྱོད་དོགས་སམ་ཡིད་གཉིས་ཟ་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས་རྡོ་རྗེ་འཆང་སྤྲོས་པ་མེད་པར་གནས་པ་ཞེས་བྱ་བ་འཁོར་གྱི་དཀྱིལ་འཁོར་གྱི་ཁྱམས་འདི་ཉིད་དུ་འདུས་པ་ཡིན་ཏེ། སྤྲོས་པ་རབ་འབྱམ་རྒྱ་ཆེན་པོ་མཐའ་ཡས་པ་ལ་

མཁས་པ་དེས་གསང་སྔགས་འདི་དང་བདུག་པ་ཡང་ད་རྙེད་དེ་བསྒྲུབས་སོ། །ཅི་སྟེ་རི་མོའི་སྐུ་གཟུགས་བསྒྲུབ་པར་འདོད་ན། སྔ་མ་བཞིན་དུ་རི་མོ་མཁན་གསོ་སྦྱོང་བཟུང་བས། ཚོན་རྩི་སྦྱིན་དང་མ་འདྲེས་པ་དག་གིས་རས་ལ་ལག་ན་རྡོ་རྗེ་ཨུཏྤ་ལའི་འདབ་མའི་མདོག་ལྟ་བུ་འམ་པྲི་ཡང་

ཀུའི་ཁ་དོག་ལྟ་བུའི་སྔོ་བསངས་སམ། མརྒད་ཀྱི་ཁ་དོག་ལྟ་བུའི་སྔོ་བསངས་སུ་བྲི་བར་བྱ་སྟེ། བཟུར་ཏེ་ཕྱེད་སྣང་བ་རྒྱན་ཐམས་ཅད་ཀྱིས་བརྒྱན་པ་བཞིན་ཅུང་ཟད་ཁྲོས་པ་དང་བཅས་པ་གོས་ཚིག་གུ་གྱོན་པ། རིན་པོ་ཆེའི་བྲག་ལ་རིན་པོ་ཆེའི་ཕུག་ན་ཚུལ་བཞིན་དུ་ཤིས་ཤིང་

སྐྱིལ་མོ་ཀྲུང་ཕྱེད་བཅས་ཏེ་འདུག་པ། བསྒྱིངས་པ་དང་བཅས་པ་བསྙེམས་པ་དང་བཅས་པ། མེ་ལྕེ་འབར་བའི་ཕྲེང་བ་ཅན། ལག་པ་གཡས་པ་ན་རྡོ་རྗེ་འབར་བ་དང་བཅས་པ་གསོར་བ་བྲི་བར་བྱའོ། །དེའི་མགོ་བོའི་གཡས་རོལ་གྱི་སྟེང་དུ་ཧ་ཅང་ཡང་མི་རིང་བར། དེ་

བཞིན་གཤེགས་པ་དྲི་ཞིམ་སྣང་དཔལ་པདྨ་དཀར་པོ་ལ་སྐྱིལ་མོ་ཀྲུང་དུ་བཞུགས་པ། མཚན་ཐམས་ཅད་དང་ལྡན་པ་རིག་པའི་རྒྱལ་པོ་དབུགས་འབྱིན་པར་མཛད་པར་བྲིའོ། །གཡོན་རོལ་དུ་དེ་བཞིན་གཤེགས་པ་རྡོ་རྗེ་སྲ་བས་རབ་ཏུ་འཇོམས་པ་དབུགས་འབྱིན་པ་སྔ་མ་

བཞིན་ནོ། །ལག་ན་རྡོ་རྗེའི་འོག་གཡས་རོལ་དུ་ཕྱག་བརྙན་སོག་མའི་དུ་བའི་མདོག་ལྟ་བུའི་གོས་དྲི་མ་ཅན་གྱོན་པ། སྐྲ་ཁམ་པ་གྱེན་དུ་འགྲེང་བ། མིག་དམར་བ། དཔྲལ་བ་ཁྲོ་གཉེར་གྱི་རིམ་པ་དང་བཅས་པ། ལག་ན་ཞགས་པ་དང་རལ་གྲི་ཐོགས་པ། བཀའ་ནོད་

Vol. 87 · folio 80b

པ་ལྷུར་ལེན་པ་པུས་མོ་གཉིས་བཙུགས་པ་བྲིའོ། །གཡོན་རོལ་དུ་ཕྱག་བརྙན་མ་པུས་མོ་བཙུགས་པ་མདོག་སྔོ་བ་སངས་རལ་གྲི་སོ་གཅིག་པ་ཡུ་བ་ཅན་དང་། ཞགས་པ་ལག་ན་ཐོགས་པ་སྔ་མ་བཞིན་དུ་བྲི་བར་བྱའོ། །དབེན་པ་དུགས་མེད་པ་དེའི་མདུན་དུ་ཟས་དཀར་གསུམ་བཟའ་

ཞིང་གོས་དུས་གསུམ་དུ་བརྗེས་ལ་ལན་སུམ་འབུམ་བཟླས་བརྗོད་བྱའོ། །ཐ་མར་ཅི་འབྱོར་པས་མཆོད་དེ་ཨ་ག་རུའི་ཡམ་སྲེག་ཤིང་ཞོ་དང་སྦྲང་རྩི་ལ་སྨྱུགས་པས་མཚན་ཐོག་ཐག་སྦྱིན་སྲེག་བྱས་ན། ནམ་ཕྱེད་དམ་ཉི་མ་ཤར་ཀར་རི་མོའི་གཟུགས་ལས་འོད་ཟེར་དག་འབྱུང་ངོ་། །ཡང་ན་རི་

མོའི་གཟུགས་འགུལ་ལོ། །ཡང་ན་མེ་ཏོག་གི་ཕྲེང་བ་འགུལ་ལོ། །སྔ་མ་བཞིན་དུ་གྲུབ་པར་འགྱུར་ཏེ། ལས་ཐམས་ཅད་ཀྱང་བྱེད་དོ། །རྟག་ཏུ་རི་མོའི་གཟུགས་ཀྱི་མདུན་དུ་ལན་བརྒྱ་རྩ་བརྒྱད་བཟླས་བརྗོད་བྱས་ན་སྐལ་བ་བཟང་པོའི་མཆོག་དང་ལྡན་ཞིང་ནད་ཐམས་ཅད་ལས་ཐར་

བ་དང་། འཇིགས་པ་ཐམས་ཅད་རྣམ་པར་སྤངས་པར་འགྱུར་རོ། །ཞི་བའི་བློ་གྲོས་གཞན་ཡང་འཇིག་པའི་མེའི་སྙིང་པོ་ཆེན་པོ་སྟོབས་དང་ཕ་རོལ་གནོན་པ་དཔག་ཏུ་མེད་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་

ཅི་དང་། ལྟོ་འཕྱེ་ཆེན་པོ་དང་། ལྷ་དང་། ལྷ་མ་ཡིན་པས་མཆོད་པ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་བསྒྲུབ་པ་ནི་འདི་ཡིན་ཏེ། ཚེས་གྲངས་དང་སྐར་མ་འདམ་མི་དགོས། སྨྱུང་བ་ཡང་མི་དགོས་པར་རིའི་རྩེ་མོར་སོང་ལ་ལན་སུམ་འབུམ་

བཟླས་བརྗོད་བྱའོ། །ཐ་མར་ཅི་འབྱོར་པས་མཆོད་དེ་སྐེ་ཚེའི་འབྲུའི་སྲེག་བླུགས་དུག་དང་། ཁྲག་དང་། ལན་ཚྭ་དང་བསྲེས་པ་ལན་སུམ་འབུམ་སྦྱིན་སྲེག་བྱས་ན། མཚན་མོ་ཧཱུཾ་ཞེས་བྱ་བའི་སྒྲ་ཆེན་པོ་གྲག་ཅིང་སྔ་མ་བཞིན་དུ་འགྲུབ་པར་འགྱུར་ཏེ། གྲུབ་ནས་ཀྱང་འཇིག་རྟེན་

གྱི་ཁམས་དུ་མར་རྒྱུ་བ་དང་། ཡིད་ལྟར་མགྱོགས་པ་དང་། གཟི་བརྗིད་མཚུངས་པ་མེད་པར་འགྱུར་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་མ་གཏོགས་པར་དེ་ལས་ལྷག་པར་སུ་ཡང་མེད་དོ། །རྟག་ཏུ་བཟླས་བརྗོད་བྱས་ན། འབྱུང་པོ་ཐམས་ཅད་ཀྱིས་མི་ཐུབ་པར་

Vol. 87 · folio 81a

འགྱུར་རོ། །ལྷ་མ་ཡིན་གྱི་ཁུང་གི་སྒོར་སོང་ནས་ཁྲོས་ཏེ་ལན་ཁྲི་བཟླས་བརྗོད་བྱས་ཤིང་སྦྱིན་སྲེག་ཀྱང་སྔ་མ་བཞིན་དུ་བྱས་ན། ལྷ་མ་ཡིན་གྱི་གནས་ཐམས་ཅད་གཏན་མེད་པར་འགྱུར་ཏེ། ཅི་འདོད་པ་བཞིན་དུ་ཡོངས་སུ་སྤྱོད་ཅིང་འདོད་པ་བཞིན་དུ་རང་འབྱུང་བར་

འགྱུར་རོ། །ལས་ཐམས་ཅད་བྱེད་དོ། །ཅི་སྟེ་གཏེར་ཆེན་པོ་འབྱུང་བར་འདོད་ན་ཟས་མི་བཟའ་བར་སྙིང་པོ་འདི་ལན་ཁྲི་བཟླས་བརྗོད་བྱས་ལ་ཐ་མར་ཤིང་ཀ་ར་བཱི་རའི་ལྕུག་མས་ལན་གསུམ་བསྣུན་ན་རང་འབྱུང་ངོ་། །རྟག་ཏུ་རྗེས་སུ་དྲན་པར་བྱེད་ན་སྐྱེ་བོ་ཐམས་ཅད་དགའ་བར་བྱེད་དོ། །

ཁྲོས་པའི་མདུན་དུ་ཕྱག་རྒྱ་བཅིངས་ལ་ལན་ཉི་ཤུ་རྩ་གཅིག་བརྗོད་ན་དང་བར་འགྱུར་རོ། །བྱིས་པ་གདོན་གྱིས་ཟིན་པ་ཐམས་ཅད་ཀྱིས་མཐོང་བ་ཙམ་གྱིས་ཐར་བར་འགྱུར་རོ། །གདོན་ཆེན་པོ་ཐམས་ཅད་ལ་ནི་གཟུགས་བྱས་ལ་རྐང་པ་གཡོན་པས་མནན་ཏེ། ལན་བརྒྱ་རྩ་བརྒྱད་བཟླས་

བརྗོད་བྱས་ན་གདོན་དེ་ཚིག་ཅིང་སྒྲ་འབྱིན་ཅིང་འབྲོས་པར་འགྱུར་རོ། །དྲིས་པ་མྱུར་དུ་སྨྲ་བར་འགྱུར་རོ། །ཅི་སྟེ་ཕ་རོལ་ལ་གནོད་པ་བྱེད་པར་འདོད་ན་བ་རུ་རའི་ཤིང་བུ་སོར་དྲུག་པ་དག་གཅིག་ལ་མིང་ནས་བརྗོད་ཅིང་སྔགས་ལན་བརྒྱ་རྩ་བརྒྱད་བསྔགས་ལ། ནམ་ཕྱེད་ན་ཁང་སྟེང་ངམ་སྒོའི་

ནང་དུ་བཙུགས་ན་ཁྱིམ་དུ་གནོད་པ་ཆེན་པོ་འབྱུང་ངོ་། །ཡམས་ཀྱི་ནད་ཆེན་པོ་ཡང་འབྱུང་ངོ་། །ཡིད་ཀྱིས་ནི་ཞི་བར་བྱེད་དོ། །ཅི་སྟེ་རི་མོའི་སྐུ་གཟུགས་བསྒྲུབ་ན་རས་ལ་བཅོམ་ལྡན་འདས་ལག་ན་རྡོ་རྗེ་འོད་ཀྱི་ཁ་དོག་དབྱར་གྱི་སྤྲིན་འདྲ་བ། རྒྱན་མེད་པ། མིག་དམར་བ། ཁྲོས་པ།

མ་མཆུ་སོས་མནན་པ། དཔྲལ་བ་ཁྲོ་གཉེར་གྱི་རིམ་པ་འཆས་པ། རྐང་པ་གཡོན་པས་ས་མནན་ཏེ་འདུག་པ། རྐང་པ་གཡས་པའི་རྡོག་པས་བསྣུན་པ་ལྟར་འདུག་པ། ལག་པ་གཡོན་པའི་མཛུབ་མོས་བསྡིགས་པ་ལྟར་བྱེད་པ། ལག་པ་གཡས་པ་ཁྲོ་བོའི་རྡོ་རྗེ་མི་བཟད་པ་འཕེན་པ་

ལྟར་འདུག་པ་བྲི་བར་བྱ་སྟེ། བསྲུང་བ་བྱས་པ། རྡོ་རྗེ་གཙུག་ཏོར་གྱི་གཟུགས་སུ་བསྒྱུར་བ། རྟག་ཏུ་མཉམ་པར་གཞག་པ། སྙིང་རྗེ་དང་ལྡན་པ། བྱང་ཆུབ་ཀྱི་སེམས་དང་ལྡན་པའི་ཡིད་དུ་གྱུར་པས་ས་ཕྱོགས་དབེན་པ་དུགས་མེད་པར་མཆོད་པ་རྒྱ་ཆེར་བྱས་ལ་རི་མོ་མཁན་གསོ་

Vol. 87 · folio 81b

སྦྱོང་བཟུང་བ་འདྲིར་གཞུག་གོ། །རྡོ་རྗེའི་དཀྱིལ་འཁོར་ཆེན་པོར་དབང་བསྐུར་བ་དམ་ཚིག་ཐོབ་པ། སྤྲོ་བ་དང་བཅས་པ་འདྲིར་གཞུག་གི །གཞན་ནི་གང་གིས་ཀྱང་མ་ཡིན་ནོ། །ཞི་བའི་བློ་གྲོས་དམ་ཚིག་མི་ཤེས་པ་དཀྱིལ་འཁོར་མ་མཐོང་བ་གང་ལ་ལ་ཞིག་གིས་རི་མོའི་

གཟུགས་མཐོང་ན། དེའི་མོད་ལ་དེ་ནད་རྣམ་པ་གཉིས་ཀྱིས་བཏབ་པར་འགྱུར་རོ། །གཉིས་གང་ཞེ་ན་འདི་ལྟ་སྟེ། རིམས་དྲག་པོ་དང་གཅོང་ཆེན་པོར་འགྱུར་རོ། །ཞི་བའི་བློ་གྲོས་ཀྱིས་སྨྲས་པ། འཇམ་དཔལ་ཀྱེ་མ་གང་གིས་ཡོན་ཏན་གྱི་ཁྱད་པར་འདི་ལྟ་བུ་བསྟན་པའི་

སྙིང་པོ་མཆོག་དོན་ཆེན་པོ་དང་ལྡན་པ། མཐུ་ཆེན་པོ་དང་ལྡན་པ་འདི་ངོ་མཚར་ཏོ། །འཇམ་དཔལ་གྱི་སྙིང་པོ་མཆོག་འདི་ནི། གང་ཞིག་འདིའི་མིང་ཅི་ཞེས་བྱ། འཇམ་དཔལ་གྱིས་སྨྲས་པ། ཞི་བའི་བློ་གྲོས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་སྲ་བའི་ཡོན་

ཏན་རྣམས་དང་མཐུ་ལ་ནི་མཐའ་མེད་དོ། །ཞི་བའི་བློ་གྲོས་ལག་ན་རྡོ་རྗེ་འདི་ནི་དེ་བཞིན་གཤེགས་པ་ཐམས་ཅད་ཀྱི་འཇིགས་པའི་མེ་ལས་བྱུང་བའི་རྡོ་རྗེ་ཞེས་བྱ་སྟེ། མ་དུལ་བ་ཐམས་ཅད་འདུལ་བ། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་

ཐམས་ཅད་ཀྱི་སྨོན་ལམ་ཡོངས་སུ་རྫོགས་པར་བྱེད་པ། བསྟན་པ་མཆོག་ཏུ་ཀུན་དུ་བསྲུང་བར་སྨོན་ལམ་བཏབ་པ། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོངས་སུ་རྫོགས་པར་བྱེད་པ། འཇིག་རྟེན་གྱི་ཁམས་མཐའ་ཡས་རྒྱ་མཚོ་རབ་འབྱམ་

རྣམས་སུ་དེ་བཞིན་གཤེགས་པ་ཐམས་ཅད་ཀྱི་སྨོན་ལམ་སྒྲོགས་པའི་སྒོ་ལ་འཇུག་པ། ཐམས་ཅད་དུ་སྔོན་དུ་རྒྱུག་པའོ། །དེའི་མདུན་དུ་ཅི་འབྱོར་པས་མཆོད་དེ་གུ་གུལ་གྱི་རིལ་བུ་རྒྱ་ཤུག་གི་ཚིག་གུ་ཙམ་འབུམ་སྦྱིན་སྲེག་བྱས་ན་འགྲུབ་པར་འགྱུར་ཏེ། གང་འདོད་པ་

དེ་བྱེད་དོ། །རིའི་རྩེ་མོའམ་རྒྱ་མཚོའི་ངོགས་སུ་སོང་སྟེ། རི་མོའི་གཟུགས་བྲིས་ལ་སློང་མོའི་ཟས་སམ། བསླངས་པ་མ་ཡིན་པའི་ཟས་བཟའ་ཞིང་། མིད་པ་ནུབ་པ་ཙམ་དུ་ཆུར་ཞུགས་ལ་ལན་སུམ་འབུམ་བཟླས་བརྗོད་བྱའོ། །ཐ་མར་ཅི་འབྱོར་པས་མཆོད་ལ་

Vol. 87 · folio 82a

རལ་གྲིའམ་འཁོར་ལོ་ལག་ན་ཐོགས་ཤིང་། དུག་དང་། ཁྲག་དང་། ཡུངས་ཀར་བསྲེས་པས་ལན་སུམ་ཁྲི་སྦྱིན་སྲེག་བྱས་ན་འགྲུབ་པར་འགྱུར་རོ། །རྒྱ་མཚོ་ལས་སྒྲ་འབྱུང་ཞིང་བསྐམས་པར་འགྱུར་རོ། །རིའང་འགུལ་བའམ་འགྲུམ་པར་འགྱུར་རོ། །

ལས་ཐམས་ཅད་ནུས་པར་འགྱུར་རོ། །རྫི་ཆར་རམ། ལྕེ་འབབ་པ་ལ་ཡང་ལན་ཅིག་བསྡིགས་པ་ཙམ་གྱིས་མེད་པར་འགྱུར་རོ། །འཆིང་བ་ཐམས་ཅད་དང་ནད་འགོ་བ་ཐམས་ཅད་དང་། གནོད་པ་འབྱུང་བ་ཐམས་ཅད་ལ་ལམ་གྱི་བཞི་མདོ་འམ། ཤིང་དྲུང་གཅིག་

ཡོད་པའམ། འབབ་ཆུའི་ངོས་སམ། མཚན་མ་གཅིག་ཡོད་པ་འམ། གྲོང་ཁྱེར་གྱི་སུམ་མདོར་རི་མོའི་གཟུགས་བྲིས་ལ། རྒྱ་ཆེར་མཆོད་ལ་སྤོས་དང་མེ་ཏོག་གིས་མཆོད་པའི་བུམ་པ་ཡུངས་ཀར་གྱིས་བཀང་ལ། འཁོར་ལོས་སྒྱུར་བའི་སྔགས་བཟླས་བརྗོད་བྱས་

ཏེ་སྙིང་པོ་སྙིང་གར་གཞག་ལ་རི་མོའི་གཟུགས་དེ་ལ་ཤིས་པ་སྙན་པ་རྒྱ་ཆེན་པོ་བརྗོད་པས་མངོན་སུམ་དུ་དགའ་བར་བྱ་སྟེ། དབང་བསྐུར་བར་བྱའོ། །ཡུངས་ཀར་དེ་དག་གིས་ནི་གནོད་པ་ཐམས་ཅད་དང་། ནད་འགོ་བ་ཐམས་ཅད་དང་། འཆི་བ་ཐམས་ཅད་སེལ་ཏོ། །

སེམས་ཅན་དཔག་ཚད་ཙམ་ན་འདུག་པ་ཐམས་ཅད་ཀྱིས་རི་མོའི་གཟུགས་དེ་མཐོང་ན་ཡང་དེའི་མོད་ལ་ཞི་བར་འགྱུར་རོ།། །།འཕགས་པ་ལག་ན་རྡོ་རྗེ་དབང་བསྐུར་བ། བམ་པོ་བདུན་པ། དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་

དཔའ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས་རིག་པའི་རྒྱལ་པོ་འདི་དག་གི་སྤྱིའི་བསྒྲུབ་པའི་རིམ་པར་ཕྱེ་བ་ཉོན་ཅིག། ཞི་བའི་བློ་གྲོས་དེ་ལ་སྒྲུབ་པ་པོ་རིག་པའི་རྒྱལ་པོ་གང་ཡང་རུང་བ་བསྒྲུབ་པར་འདོད་པས་རིག་སྔགས་གདོན་པར་བྱ་སྟེ། ཚེས་གྲངས་དང་།

བྱེད་པ་དང་། ཡུད་ཙམ་བཟང་པོ་ལ་སྨྱུང་བ་བྱས་ལ། མར་གྱི་མར་མེ་བུས་ཏེ་ཅི་འབྱོར་པས་མཆོད་པ་བྱས་ལ། རིང་བསྲེལ་དང་བཅས་པའི་མཆོད་རྟེན་ནམ་སྐུ་གཟུགས་ཀྱི་མདུན་དུ་རིག་པའི་རྒྱལ་པོ་འཇིགས་མེད་མཚན་ཐོག་ཐག་བཟླས་བརྗོད་བྱའོ། །ནང་པར་ཁྲུས་བྱས་

Vol. 87 · folio 82b

ལ་དྲི་ཞིམ་པོས་བསྐུས་ཏེ་གོས་གཙང་མ་བགོས་ལ་ཟས་དཀར་གསུམ་ཟོས་ལ་དབང་པོ་གསལ་བ་དང་། ཉམས་ཐ་མལ་བར་གནས་པ་དང་། བྱང་ཆུབ་ཀྱི་སེམས་དང་ལྡན་པའི་ཡིད་དང་། སྙིང་རྗེ་དང་ལྡན་པའི་སློབ་དཔོན་བླ་ན་མེད་པའི་སྦྱིན་གནས་ལ་ཐལ་མོ་སྦྱོར་ཏེ་པུས་མོ་

བཙུགས་ལ་གསོལ་བ་བཏབ་སྟེ། སློབ་དཔོན་བླ་ན་མེད་པའི་ཡེ་ཤེས་ཐོབ་པར་བགྱི་བའི་སླད་དུ་རིག་པའི་རྒྱལ་པོ་བདག་ལ་སྩལ་དུ་གསོལ། བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ་བགྱིའོ་ཞེས་བརྗོད་པར་བྱའོ། །སློབ་དཔོན་གྱིས་ཀྱང་ཐམས་ཅད་དུ་སྙིང་རྗེ་བ་དང་སེར་སྣ་མེད་

པར་བྱས་ལ་སློབ་མ་དེ་ལ་སྦྱིན་པར་བྱའོ། །དེ་ལྟར་རིག་སྔགས་དང་དམ་ཚིག་མནོས་ནས་ཅི་སྐད་བསྟན་པ་ལྟ་བུའི་ས་ཕྱོགས་རྣམས་སུ་དེ་དང་མཐུན་པའི་ཆ་བྱད་དུ་བསྒྱུར་ལ། རིའི་རྩེ་མོའམ། འབབ་ཆུའི་ངོགས་སམ། ནགས་ཁྲོད་དམ། ཆུ་མིག་གི་དངོའམ། ཡིད་དུ་འོང་བ་

དབེན་པ་དེར། ཟས་དཀར་གསུམ་བཟའ་བའམ། འོ་མ་བཏུང་ཞིང་ལན་ས་ཡ་བཟླས་བརྗོད་བྱས་ན་སྔར་སྤྱད་པ་བྱས་པར་འགྱུར་རོ། །དེ་ནས་རལ་གྲིའམ། རྡོ་རྗེའམ། མདུང་ཐུང་ངམ། བེ་ཅོན་ནམ། མདུང་རྩེ་གསུམ་པའམ། ལྕགས་སྣ་གསུམ་གྱི་འཁོར་ལོ་

བླངས་ལ། བའི་རྣམ་ལྔས་བསྐུས་ཏེ་བ་ལང་གི་ལྕི་བའི་ཕུང་པོའི་སྟེང་དུ་གཞག་ལ་རྡོ་རྗེ་དྲག་པོ་ཆེན་པོའི་སྙིང་པོས་བསྲུང་བར་བྱའོ། །དེ་ནས་ཟླ་བ་ཚེས་ནས་བཟུང་སྟེ་ཉའི་བར་དུ་བཟླས་བརྗོད་བྱའོ། །དེ་ནས་གང་ཡང་རུང་བ་ཞིག་བླངས་ལ་སྤོས་ཆུས་བཀྲུས་ཏེ། བ་ལང་གི་

ལྕི་བ་ས་ལ་མ་ལྷུང་བས་དཀྱིལ་འཁོར་བསྐུས་ལ། སྔ་མ་བཞིན་དུ་དཀྱིལ་འཁོར་བྲིས་ཏེ་ཅི་འབྱོར་པས་མཆོད་ལ་ཤིང་ཨ་ཤྭཏྠའི་ལོ་མའི་སྟེང་དུ་གཞག་སྟེ་མཚན་ཐོག་ཐག་བཟླས་བརྗོད་བྱས་ན། ནམ་ཕྱེད་དམ་ཉི་མ་ཤར་ཀར་ངེས་པར་འབར་ཞིང་རིག་སྔགས་འཆང་ཐམས་ཅད་

འདུས་ཏེ་དེ་དག་གི་བསོད་ནམས་ཇི་ལྟ་བ་བཞིན་དུ་དབང་བསྐུར་ནས་རིག་སྔགས་འཆང་དུ་འགྱུར་ཏེ། འདོད་པའི་གཟུགས་འཆང་བ་དང་། འཇིག་རྟེན་གྱི་ཁམས་དུ་མར་རྒྱུ་བ་དང་། དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པར་འགྱུར་རོ། །ཅི་སྟེ་མ་གྲུབ་ལ་བརྟུལ་

Vol. 87 · folio 83a

ཞུགས་མ་ཉམས་ན་དེ་བཞིན་དུ་ལན་གསུམ་དུ་བསྒྲུབ་པ་བྱས་ན་མཚམས་མེད་པ་ལྔ་བྱས་པས་ཀྱང་ངེས་པར་འགྲུབ་བོ། །རྟག་ཏུ་བཟླས་བརྗོད་བྱས་ན་ཚེ་རིང་བར་འགྱུར་རོ། །སྨན་ལ་བཟླས་བརྗོད་བྱས་ལ་འཐུངས་ན་ནད་མེད་པར་འགྱུར་རོ། །མར་ལ་སྔགས་ཀྱིས་

བཏབ་སྟེ་ཟན་ཟ་ཀར་སྔར་འཐུངས་ན་ལོ་ཁྱུད་འཁོར་དུ་ལུས་བརྟན་པར་འགྱུར་རོ། །བཅོམ་ལྡན་འདས་ཀྱི་སྐུ་གཟུགས་ཀྱི་མདུན་དུ་མིག་བཙུམས་ཏེ་ལན་སྟོང་རྩ་བརྒྱད་བཟླས་བརྗོད་བྱས་ན་དེ་བཞིན་གཤེགས་པའི་སྐུའི་གཟུགས་ཀྱིས་དགེ་བ་དང་མི་དགེ་བ་བརྗོད་དོ། །དེ་བཞིན་

དུ་རྣ་བ་བཀབ་སྟེ་བཟླས་བརྗོད་བྱས་ན་ཡང་ཐམས་ཅད་ཐོས་པར་འགྱུར་རོ། །ཉལ་ཀར་མལ་དུ་ཞུགས་ལ་མིག་ལ་ལན་བརྒྱ་རྩ་བརྒྱད་བསྔགས་ཏེ་ཉལ་ན་སྣང་བ་དང་ཐམས་ཅད་མཐོང་བར་འགྱུར་རོ། །ཉིན་ཇི་ལྟ་བར་མཚན་མོ་ཡང་དེ་བཞིན་ནོ། །སོ་ཤིང་ལ་ལན་ཅིག་བསྔགས་

ཏེ་འཆོས་ནམ་བསླངས་པར་ཟས་རྙེད་དོ། །ལིག་བུ་མིག་དང་གི་ཝང་ལ་སྔགས་ལན་ཅིག་བསྔགས་ཏེ་མིག་ལ་བསྐུས་ན་སྐྱེ་བོ་ཐམས་ཅད་དགའ་བར་འགྱུར་རོ། །སྤོས་ལ་བཟླས་བརྗོད་བྱས་ཏེ་བསྐུས་ན་གང་དག་གིས་དྲི་ཚོར་བ་དེ་དག་དབང་དུ་འགྱུར་རོ། །དགྲ་མཐོང་ན་ཕྱག་

རྒྱས་བཅིངས་ལ་ལན་ཅིག་བརྗོད་ན་དགྲ་དང་བྲལ་བར་འགྱུར་རོ། །སྤོས་དང་མེ་ཏོག་ལ་སོགས་པ་ལ་སྔགས་ཀྱིས་ལན་ཅིག་བཏབ་སྟེ་གང་ལ་བྱིན་པ་དེ་དབང་དུ་བྱེད་པར་འགྱུར་རོ། །ཅི་སྟེ་གཡུལ་ངོར་འཇུག་པར་འདོད་ན་སྐྱེས་བུ་བཅིང་བར་བྱས་ལ་གཡུལ་ངོར་ཞུགས་ན་གཡུལ་

རྒྱལ་བར་འགྱུར་རོ། །ཅི་སྟེ་དམག་རེངས་པར་བྱ་བར་འདོད་ན། བེ་ཀངྐ་ཏའི་ཤིང་གི་མེ་ཕུས་ལ་གྲུ་ཚལ་གྱི་ཡམ་སྲེག་ཤིང་གིས་ལན་ཁྲིར་སྦྱིན་སྲེག་བྱས་ན་དམག་རེངས་པར་བྱས་པར་འགྱུར་རོ། །གནོད་པ་ཐམས་ཅད་ལ་མངར་གསུམ་གྱི་སྲེག་བླུགས་ལན་སུམ་ཁྲི་སྦྱིན་སྲེག་

བྱས་ན་ཞི་བར་འགྱུར་རོ། །ཐལ་བས་ནི་རྫི་ཆར་གཅོད་དོ། །ཤིང་བུའམ་ཚོན་གྱིས་ནི་ལྕེ་འབབ་པ་བཟློག་གོ། །སྐུད་པ་སྔོན་པོས་ནི་འབྱུང་པོའི་གདོན་ཞི་བར་བྱེད་དོ། །གཟུགས་བྱས་པ་ཐལ་བའམ་ཤིང་ཀ་ར་བཱི་རའི་ལྕུག་མས་བསྣུན་ན་གཏོང་བར་འགྱུར་རོ། གདོན་ཆེན་པོ་

Vol. 87 · folio 83b

ལ་ཡང་དེ་བཞིན་དུ་བྱའོ། །བྱིས་པ་གདོན་གྱིས་ཟིན་ན་འབྲས་སཱ་ལུ་བཏགས་པ་ལས་གཟུགས་བྱས་ལ་སྐེ་ཚེའི་འབྲུ་དང་ལན་ཚྭ་དང་བསྲེས་ཏེ་ཐུབ་མའི་མེ་བུས་པའི་ནང་དུ་སྦྱིན་སྲེག་བྱས་ན་དུས་ཐམས་ཅད་དུ་མིང་ཙམ་གྱིས་གདོན་ཐམས་ཅད་འབྲོས་པར་འགྱུར་རོ། །རིམས་ཀྱིས་

བཏབ་པ་ལ་ལག་པ་གཡོན་པ་ལ་སྔགས་ཀྱིས་བཏབ་སྟེ་མགོ་ལ་གཞག་ན་རིམས་ནད་སེལ་ཏོ། །ནད་ཐམས་ཅད་བསལ་བར་འདོད་ན་སྨན་ཐམས་ཅད་བསོགས་ལ་བ་རུ་རའི་ཤིང་གི་མེ་བུས་ཏེ། །ལན་ཉི་ཤུ་རྩ་གཅིག་སྲེག་བླུགས་སྦྱིན་སྲེག་བྱས་ན། དེ་ཕྱིན་ཅད་ཐམས་ཅད་

སེལ་བར་བྱེད་དོ། །ཅི་སྟེ་རི་མོའི་གཟུགས་བསྒྲུབ་པར་འདོད་ན་རས་སྐྲ་མེད་པ་མ་དྲས་པ་ལ་སྔ་མ་བཞིན་དུ་རི་མོ་མཁན་གསོ་སྦྱོང་བཟུང་ལ་སྦྱིན་དང་མ་འདྲེས་པའི་ཚོན་རྣམས་ཀྱིས་རིག་པའི་རྒྱལ་པོ་འདྲིར་གཞུག་སྟེ། རྒྱན་ཐམས་ཅད་ཀྱིས་རྣམ་པར་བརྒྱན་པ། ཅོད་པན་

འགུལ་བ་ཐོགས་པ། པདྨ་དཀར་པོ་ལ་འདུག་པ། རྒྱལ་པོ་ཆེན་པོའི་ཆ་བྱད་འཛིན་པ། མེ་ལྕེ་འབར་བའི་ཕྲེང་བ་ཀུན་ནས་ལང་ལོང་དུ་གྱུར་པ། ལག་པ་གཡོན་པ་ན་རྡོ་རྗེ་ཐོགས་པ། གཡས་པ་དམ་པ་སྦྱིན་པ། སྐྱིལ་མོ་ཀྲུང་དུ་བཞུགས་པ། ཞལ་ཅུང་ཟད་

འཛུམ་པ། སྒྲུབ་པ་པོ་ལ་ལྟ་བར་བྲིའོ། །དེའི་འོག་རོལ་དུ་སྒྲུབ་པ་པོ་ལག་ན་པོག་ཕོར་ཐོགས་ཤིང་། དེའི་གདོང་དུ་བལྟ་བ་ལ་བརྩོན་པ། ཚུལ་དང་མཐུན་པའི་ཆ་བྱད་ཅན་པུས་མོ་བཙུགས་པ་བྲིའོ། །དེའི་མདུན་དུ་ལན་ས་ཡ་བཟླས་བརྗོད་བྱས་ན་སྔ་མ་བཞིན་དུ་འགྲུབ་

པར་འགྱུར་རོ། །རིག་པའི་རྒྱལ་པོ་སྤྱིར་བསྒྲུབ་པའོ། །ཞི་བའི་བློ་གྲོས་གཞན་ཡང་ལག་ན་རྡོ་རྗེའི་བུ་མོ་སྨོན་ལམ་ཆེན་པོ་ལ་དབང་ཐོབ་པ། དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དུ་གནས་པ་རྣམས་ཀྱི་སྤྱིའི་བསྒྲུབ་པ་ནི་འདི་ཡིན་ཏེ། སྔ་མ་བཞིན་དུ་འཁོར་ལོས་སྒྱུར་

བ་ཆེན་པོའི་ཆོ་གས་གསང་སྔགས་གང་ཡང་རུང་བ་མནོས་ལ་ཅི་སྐད་བརྗོད་པའི་གནས་ཀྱི་ནང་ནས་རྒྱ་མཚོར་འབབ་པའི་ཆུ་ངོགས་སུ་སོང་ལ་ལན་ས་ཡ་བཟླས་བརྗོད་བྱས་ན་སྔར་སྤྱད་པ་བྱས་པར་འགྱུར་རོ། །དེ་ནས་ཟླ་བ་ཚེས་ནས་བཟུང་སྟེ་རྫས་གང་བསྒྲུབ་པ་དེ་བླངས་ལ་ཟླ་བ་ཉའི་བར་

Vol. 87 · folio 84a

དུ་བཟླས་བརྗོད་བྱའོ། །དེ་ནས་ཅི་འབྱོར་པས་མཆོད་དེ་བ་ལང་གི་ལྕི་བས་ལ་མ་ལྷུང་བས་དཀྱིལ་འཁོར་བསྐུས་ལ་བསྲུང་བར་བྱ་སྟེ། གུ་གུལ་གྱི་ཡམ་སྲེག་ཤིང་ཞོ་དང་སྦྲང་རྩི་དང་མར་ལ་སྨྱུགས་པས་མཚན་ཐོག་ཐག་སྦྱིན་སྲེག་བྱས་ན། ནམ་ཕྱེད་དམ་ཉི་མ་ཤར་ཀར་ངེས་

པར་འགྲུབ་པར་འགྱུར་ཏེ་རྫས་དེ་འབར་བར་འགྱུར་རོ། །དེ་བླངས་ན་རྡོ་རྗེ་རིགས་སུ་རྡོ་རྗེ་གཞོན་ནུའི་ལུས་ཐོབ་བོ། །གཟུངས་ཆེན་པོ་འཐོབ་བོ། །འདོད་ན་མཆིའོ། །ཅི་སྟེ་མ་གྲུབ་ན་ཡང་ལས་ཐམས་ཅད་ནུས་པར་འགྱུར་རོ། །ཤི་འཕོས་ན་ཡང་ལྕང་ལོ་ཅན་ནམ་ལོངས་སྤྱོད་ཆེན་

པོའི་ཁྱིམ་དུ་སྐྱེ་བར་འགྱུར་རོ། །རྟག་ཏུ་བཟླས་བརྗོད་བྱས་ན་སྐྱེ་བོ་ཐམས་ཅད་དགའ་བར་འགྱུར་རོ། །ལག་ན་རྡོ་རྗེ་ལ་བལྟ་ཞིང་བཟླས་བརྗོད་བྱས་ན་སྡིག་པ་ཐམས་ཅད་བྱང་བར་འགྱུར་རོ། །ལུས་ཐམས་ཅད་ལ་བྱབ་པ་བྱས་ཏེ་ཉལ་ན། རྨི་ལམ་ན་སངས་རྒྱས་བཅོམ་ལྡན་འདས་

རྣམས་མཐོང་ཞིང་དེ་ཉིད་དུ་གཟུངས་ཀྱང་འཐོབ་བོ། །ཟླ་བ་སྤྱང་ཀིས་ཟིན་པའི་ཚེ་བ་སེར་མོ་མ་སྨད་སྤུ་མཐུན་གྱི་མར་བླངས་ལ་ཟངས་ཀྱི་སྣོད་དུ་བཅུག་སྟེ། ཙནྡན་གྱི་དཀྱིལ་འཁོར་བྱས་ལ་དེར་གཞག་སྟེ། ཟླ་བ་ལ་མི་བལྟ་བར་དངོས་གྲུབ་རྣམ་གསུམ་བྱུང་གི་བར་དུ་བཟླས་བརྗོད་

བྱས་ལ་དེ་འཐུངས་ན་ཐོས་པ་འཛིན་པར་འགྱུར་རོ། །འབར་ན་ནམ་མཁའ་ལ་འགྲོ་བར་འགྱུར་རོ། །དུ་བ་འཐུལ་ན་མི་སྣང་བར་འགྱུར་རོ། །དྲོ་བར་གྱུར་ན་འགྲོ་བ་ཐམས་ཅད་དབང་དུ་འགྱུར་རོ། །ཅི་སྟེ་རི་མོའི་གཟུགས་བསྒྲུབ་པར་འདོད་ན་ཆོ་ག་སྔ་མ་བཞིན་དུ་རི་མོ་མཁན་བྱང་

ཆུབ་ཏུ་སེམས་བསྐྱེད་པས་སྦྱིན་དང་མ་འདྲེས་པའི་ཚོན་རྣམས་ཀྱིས་སྐྲ་མེད་པའི་རས་ལ་གཞོན་ནུ་གང་ཡང་རུང་བ་ཞིག་འདྲིར་གཞུག་སྟེ། རྒྱན་ཐམས་ཅད་ཀྱིས་བརྒྱན་པ། ཕུད་པུ་གསུམ་གྱིས་མགོ་བརྒྱན་པ། པདྨ་དཀར་པོ་ལ་འདུག་པ། རལ་གྲི་འོད་འབར་བའི་

དབུས་ན་འདུག་པ། ལག་པ་གཡོན་པ་ན་རྡོ་རྗེ་ཐོགས་པ། བཞིན་འཛུམ་པ། ལག་པ་གཡས་པས་སྒྲུབ་པ་པོ་ལ་དབུགས་འབྱིན་པ། གསེར་གྱི་ཁ་དོག་ལྟ་བུའམ། པྲི་ཡང་ཀུའི་ཁ་དོག་ལྟ་བུའི་སྔོ་བསངས་པ་བྲིའོ། །དེའི་མདུན་དུ་མཆོད་པ་ཆེན་པོ་བྱས་ཏེ་བསྒྲུབ་

Vol. 87 · folio 84b

པ་བརྩམས་ན་སྔ་མ་བཞིན་དུ་འགྲུབ་པར་འགྱུར་རོ། །ཞི་བའི་བློ་གྲོས་གཞན་ཡང་གནོད་སྦྱིན་གྱི་དབང་པོའི་བུ་ནད་ཀུ་བེ་ར་ལག་ན་རྡོ་རྗེ་དགའ་བའི་བསྒྲུབ་པ་ནི་འདི་ཡིན་ཏེ། ཚེས་གྲངས་དང་སྐར་མ་འདམ་མི་དགོས། སྨྱུང་བ་བྱ་མི་དགོས་པར་ལག་ན་བེ་ཅོན་ཐོགས་ཤིང་

དགོན་པ་ཆེན་པོར་ཞུགས་ལ། ལམ་མི་བཟུར་མི་སྨྲ་བར་ལུས་ལ་གླང་པོ་ཆེའི་པགས་པ་བགོས་ལ། དེ་དང་མཐུན་པའི་ཆ་བྱད་དུ་བསྒྱུར་ཏེ་ལག་ན་རྡོ་རྗེ་དྲག་པོའི་སྙིང་པོའམ་འཁོར་ལོས་སྒྱུར་བ་ཆེན་པོས་བསྲུང་བ་བྱས་ལ། སློང་མོའི་ཟས་བཟའ་བའམ་ཟས་མི་བཟའ་བར་

ལན་སུམ་འབུམ་བཟླས་བརྗོད་བྱས་ན། ན་ད་ཀུ་བེ་ར་ཉིད་འོང་ཞིང་དམ་པ་སྟོབས་ཏེ། དམ་པ་གང་འདོད་པ་དེ་སྦྱིན་པར་བྱེད་དོ། །ཀླུའི་མཚོར་ཞུགས་ལ་ལན་ཁྲི་བཟླས་བརྗོད་བྱས་ན་ཀླུ་བྱུང་སྟེ་གང་འདོད་པ་དེ་སྦྱིན་པར་བྱེད་དོ། །ལྷ་མ་ཡིན་གྱི་ཁུང་སྒོར་ལན་འབུམ་བཟླས་བརྗོད་

བྱས་ན། ལྷ་མ་ཡིན་གྱི་བུ་མོ་ཉིད་བྱུང་ནས་འཇུག་པར་བྱེད་དེ། སྨན་བཅུད་ཀྱིས་ལེན་ལ་སོགས་པ་གང་འདོད་པ་དེ་སྦྱིན་པར་བྱེད་དོ། །ཅི་སྟེ་མི་འདོད་ན་དེ་ཉིད་དུ་དེ་དག་དང་ལྷན་ཅིག་ཏུ་འདུག་ཅིང་དབང་ཕྱུག་ཐམས་ཅད་ཀྱི་བདེ་བ་ཐོབ་པ་དང་བསྐལ་པར་གནས་པར་འགྱུར་ཏེ། ལུས་དེ་ཉིད་

ཀྱིས་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བ་དང་ཆོས་ཀྱང་ཐོས་པར་འགྱུར་རོ། །ཤི་འཕོས་ནས་ཀྱང་སངས་རྒྱས་ཀྱི་ཞིང་རྣམ་པར་དག་པར་སྐྱེ་བར་འགྱུར་རོ། །རྟག་ཏུ་བཟླས་བརྗོད་བྱས་ན་མཐོང་བ་ཙམ་གྱིས་སྲིན་པོ་དང་ཡི་དགས་དང་ཤ་ཟའི་གདོན་ལ་སོགས་

པ་ཐམས་ཅད་རིང་བ་བས་ཀྱང་ཆེས་རིང་བར་འབྲོས་པར་འགྱུར་རོ། །ཞི་བའི་བློ་གྲོས་མདོར་ན་ཇི་ལྟར་བསྒྲུབས་ཀྱང་རུང་། ཆོ་ག་ཞིབ་མོ་གཞན་ནས་འབྱུང་བས་བསྒྲུབས་ཀྱང་རུང་སྟེ་ངེས་པར་འགྲུབ་པར་འགྱུར་རོ། །དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་བསྒྲུབ་པ་

ཡིན་ཏེ། མཚན་གཅིག་ཡོད་པའམ་དུར་ཁྲོད་དུ་ཐལ་བས་ལུས་བསྐུས་ཏེ། ལག་ན་མདུང་རྩེ་གསུམ་པའམ། རྡོ་རྗེ་ཐོགས་ལ་སློང་མོའི་ཟས་བཟའ་ཞིང་ཡུལ་རྒྱུ་བ་དང་། གནས་མེད་པར་རྒྱུ་བ་དང་། གཙང་བ་དང་། བཟོད་པ་དང་། ནང་གཙང་བར་མངོན་པར་དགའ་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words