འཕགས་པ་གོ་ཆའི་བཀོད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ

Sanskrit title (Tibetan script, as in the text) ཨཱརྱ་ཝརྨ་བྱཱུ་ཧ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 40 · folio 70b

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་བ་ལས་ལེའུ་བདུན་པ་སྟེ་གོ་ཆའི་བཀོད་པ་བསྟན་པ། བམ་པོ་དང་པོ། །རྒྱ་གར་སྐད་དུ། ཨཱརྱ་ཝརྨ་བྱཱུ་ཧ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གོ་ཆའི་བཀོད་པ་བསྟན་པ་ཞེས་བྱ་བ་

ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་ཀ་ལན་ད་ཀའི་གནས་འོད་མའི་ཚལ་ན་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་

དཔའ་ཆེན་པོ་སངས་རྒྱས་ཀྱི་ཞིང་སྣ་ཚོགས་ནས་འདུས་པ་ཤ་སྟག་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ལ་འཁོར་མང་པོ་བརྒྱ་སྟོང་ཚད་མེད་པས་ཡོངས་སུ་བསྐོར་ཅིང་གུས་པས་རིམ་གྲོ་དང་། བཀུར་སྟི་བྱས་པར་གྱུར་ཏོ། །དེའི་ཚེ་འཁོར་འདུས་པ་དེར་བྱང་ཆུབ་སེམས་དཔའ་སེམས་

དཔའ་ཆེན་པོ་བློ་གྲོས་མཐའ་ཡས་ཞེས་བྱ་བ་འདུས་པར་གྱུར་བ་དེ་འདུག་པའི་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་སྤྱི་བོ་བཏུད་དེ་ཕྱག་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ། བཅོམ་ལྡན་འདས་བདག་ལ་ཐེ་

ཚོམ་ཅུང་ཟད་ཅིག་མཆིས་ཏེ། དེ་བཞིན་གཤེགས་པ་ལ་ཞུ་བར་འཚལ་ན་ཐུགས་རྗེས་གནང་བར་མཛད་ཅིང་བདག་ལ་བཤད་དུ་གསོལ། དེ་སྐད་ཅེས་གསོལ་པ་དང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ། དཔའ་ཆེན་སྐྱེས་བུ་

ཆེན་པོ་སྟེ། །འཇིག་རྟེན་དག་ན་མཚུངས་མ་མཆིས། །བདག་ནི་སེམས་ཅན་དག་གི་སླད། །ཐེ་ཚོམ་ཅུང་ཟད་ཞུ་བ་ལགས། །སེང་གེའི་གདན་ལས་མ་བཞེངས་པར། །སྐུ་ནི་ཕྱོགས་བཅུ་ཀུན་ཏུ་ཁྱབ། །ཐ་དད་སྨྲ་བ་ཐམས་ཅད་ཀྱིས། །གང་ཡང་བསྒུལ་བར་མི་འགྱུར་བར། །མཁྱེན་པའི་གཏེར་ནི་

མཐའ་མི་མངའ། །སྟོབས་རྣམས་ཀྱང་ནི་ཚད་མ་མཆིས། །བཅོམ་ལྡན་སྟོབས་ནི་རེ་རེས་ཀྱང་། །འཇིག་རྟེན་མ་ལུས་སྒྲོལ་བར་མཛད། །ཐམས་ཅད་མཁྱེན་ལ་རབ་གནས་ཤིང་། །སྟོབས་བཅུ་ལ་ནི་གང་གནས་པ། །མི་འཇིགས་སེང་གེ་ཆེན་པོ་སྟེ། །རྒྱལ་བ་བླ་ན་མེད་པའི་གཙོ། །མ་འདྲེས་ཆོས་ནི་

Vol. 40 · folio 71a

བཅྭ་བརྒྱད་དག །དེ་བཞིན་གཤེགས་ལ་མངའ་བས་ན། །འཇིག་རྟེན་རྣམས་ནི་གསལ་མཛད་ཅིང་། །མུ་སྟེགས་རྣམས་ནི་ཕམ་པར་མཛད། །ཆོས་རྣམས་ཐམས་ཅད་རབ་མཁྱེན་པས། །དེ་སླད་མཐའ་མེད་མཆོག་ཅེས་བགྱི། །ཉམས་པ་མི་མངའི་འདྲེན་པ་ལ། །བདག་ནི་ཐེ་

ཚོམ་ཞུ་བ་ལགས། །དྲི་མེད་མཁྱེན་པ་མཐའ་མེད་པ། །མཁྱེན་པ་མི་གཡོ་རྒྱ་མཚོ་བཞིན། །མཁྱེན་པ་ཡུལ་ལ་ཐོགས་མི་མངའ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་ལེགས་པར་བསྒོམས་པས་ན། །ལམ་ལ་ཐེ་ཚོམ་ཡོང་མི་མངའ། །བདེར་གནས་འདྲེན་པ་ཆེན་པོ་ལ། །བདག་ནི་ཐེ་ཚོམ་

ཞུ་བ་ལགས། །ཆུ་བོ་དག་ནི་རབ་རྒལ་ཅིང་། །མཚམས་སྦྱོར་འཆིང་བ་ཡོངས་བཅད་པ། །གདུག་པའི་ཟུག་རྔུ་འབྱིན་པ་ལ། །བདག་ནི་ཐེ་ཚོམ་ཞུ་བ་ལགས། །མ་རིག་སྒོ་ངའི་སྦུབས་བཅོམ་ཞིང་། །ཉོན་མོངས་གདུང་བ་ཉེར་ཞི་བ། །ཤིན་ཏུ་བསིལ་ལ་རབ་གནས་ལ། །བདག་ནི་ཐེ་ཚོམ་ཞུ་བ་ལགས། །

འཇིགས་མེད་ཡེ་ཤེས་བླ་མེད་དང་། །ཡེ་ཤེས་ཆགས་དང་ཐོགས་མེད་པ། །ཆོས་ཀྱི་རྒྱ་མཚོའི་མཁྱེན་པ་རྣམས། །དེ་བཞིན་གཤེགས་པས་མངོན་སུམ་བརྙེས། །སངས་རྒྱས་ཡོན་ཏན་ཚད་མེད་པས། །མངོན་སུམ་མཁྱེན་པ་ཡོངས་སུ་རྫོགས། །ཟག་པ་ཐམས་ཅད་ཟད་གྱུར་ཅིང་། །ཉོན་མོངས་ལྟ་བ་རབ་

བཅོམ་པ། །བཅོམ་ལྡན་ཡོན་ཏན་ཚད་མེད་པ། །མང་པོ་དག་ནི་རབ་ཏུ་བསགས། །བསམ་གྱིས་མི་ཁྱབ་ཆོས་རྗེ་ལ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་མཆོག་གི་མཁྱེན་པ་ཡིས། །འཇིག་རྟེན་ཀུན་ནི་གསལ་བར་མཛད། །ཆོས་ཀྱི་སྣང་བ་སྟོན་མཛད་པས། །ཡོན་ཏན་རྒྱ་མཚོ་མཐའ་

མི་མངའ། །འདྲེན་པའི་ཆོས་ཀྱི་འོད་ཟེར་གྱིས། །འཇིག་རྟེན་ཀུན་ཏུ་གསལ་བར་མཛད། །དེ་སླད་འཇིག་རྟེན་སངས་རྒྱས་ཀྱི། །ཆོས་ཀྱི་འོད་ཟེར་སྣང་བ་ལགས། །ཆོས་ཀྱི་རྒྱ་མཚོ་ཐམས་ཅད་མཁྱེན། །སྤོབས་པ་དག་ནི་བླ་ན་མེད། །བརྩོན་འགྲུས་བསམ་གྱིས་མི་ཁྱབ་ཅིང་། །རྣམ་དག་ལྟ་བ་རབ་སྤངས་པ། །

སངས་རྒྱས་སྤྱན་ནི་མཐའ་མེད་པས། །མཁྱེན་པའི་ཡུལ་ལ་མཐའ་མི་མངའ། །འཇིག་རྟེན་མཚུངས་མེད་གཙོ་བོ་ལ། །བདག་ནི་ཐེ་ཚོམ་ཞུ་བ་ལགས། །ཆོས་རྒྱལ་ཐུབ་པ་ཆེན་པོ་ཡིས། །སེམས་ཅན་ཐེ་ཚོམ་གཅོད་པར་མཛད། །འདྲེན་པ་ལ་ནི་བདག་ཞུ་ན། །མོས་པ་ཇི་བཞིན་བཀས་བཤད་

Vol. 40 · folio 71b

གསོལ། །ལྷ་དང་མི་ཡི་འཇིག་རྟེན་ཀུན། །ཐམས་ཅད་བདག་གིས་རབ་བརྟགས་ན། །དེ་བཞིན་གཤེགས་དང་མཚུངས་མེད་པས། །ཐམས་ཅད་མ་ལུས་གསལ་བར་མཛད། །ཡོན་ཏན་རྣམས་ལ་རབ་གནས་ཤིང་། །རྒྱན་དང་ལྡན་པའི་སྐྱེས་ཆེན་ལགས། །བསམ་གྱིས་མི་ཁྱབ་ཆོས་ཀྱི་རྒྱལ། །དྲང་

སྲོང་ནང་ན་གསལ་བ་པོ། །དཔེར་ན་གངས་རི་ཆེན་པོ་ནི། །རིན་ཆེན་ཀུན་གྱིས་བཀོད་པའི་གནས། །བཅོམ་ལྡན་ཆོས་གདན་བཞུགས་པ་ཡི། །བཀོད་པ་དག་ཀྱང་དེ་བཞིན་ནོ། །རབ་ཡངས་བརྩོན་འགྲུས་ཆེན་པོ་ཡིས། །ཡིད་འོང་སྒྲ་ནི་སྟོན་མཛད་པས། །སེམས་ཅན་གང་དག་ཐོས་གྱུར་ན། །དགེ་

བའི་རྩ་བ་རྣམ་དག་འགྱུར། །བཅོམ་ལྡན་མི་གཡོ་མཆོག་ལགས་པས། །ཆོས་ཀྱི་སྣང་བ་སྟོན་པར་མཛད། །དེས་ནི་སེམས་ཅན་ཐམས་ཅད་ཀྱི། །ཡིད་བཞིན་བློ་ནི་བདེ་བར་འགྱུར། །དུས་དང་འཁོར་ནི་རབ་མཁྱེན་ཅིང་། །གང་ཟག་མཁྱེན་པ་འདྲེན་པ་ཡིས། །ཆོས་ཀྱི་སྣང་བ་སྟོན་མཛད་པས། །

དུས་མཁྱེན་པ་ཡི་བློ་ལྡན་ལགས། །ཚངས་སྐད་བརྩོན་འགྲུས་ཆེན་པོ་ཡིས། །རྣམ་དག་གསུང་ནི་བཀས་བཤད་གསོལ། །ཆར་ཆེན་ས་ལ་བབས་པ་ལྟར། །ཆོས་ཀྱི་རླན་གྱིས་ཁྱབ་པར་མཛོད། །བཅོམ་ལྡན་འཁོར་འདུས་ནང་བཞུགས་ཏེ། །ཀུན་ཏུ་ཆོས་ཀྱི་ཆར་ཕབ་ནས། །ཆོས་འདི་

ལ་ནི་གང་རེ་བ། །སེམས་ཅན་རྣམས་ནི་ཚིམ་པར་མཛོད། །མཆོག་ཏུ་བདེ་ལ་རབ་གནས་པས། །རྒྱལ་པོ་རི་རབ་ཇི་ལྟ་བཞིན། །སེམས་ཅན་རྣམས་ལ་སྦྱིན་མཛད་ཅིང་། །མང་པོ་རྣམས་ནི་དགའ་བར་མཛོད། །དཔའ་ཆེན་རྐང་གཉིས་གཙོ་དག་ནི། །སྤྱོད་ཡུལ་བསམ་གྱིས་མི་ཁྱབ་པས། །

སེམས་ཅན་དག་ནི་ཐམས་ཅད་ཀྱིས། །གང་ཡང་འཚལ་བར་མི་འགྱུར་རོ། །སྐྱེས་བུ་ཆེན་པོ་ཚད་མ་མཆིས། །འཁོར་འདུས་འཐུན་པར་གྱུར་བ་དག །ཐུབ་པ་ཆེ་ལ་བརྟེན་ནས་ནི། །སངས་རྒྱས་སྤྱོད་ཡུལ་ཚོལ་བ་ལགས། །བདག་ནི་སངས་རྒྱས་སྤྱོད་ཡུལ་ལ། །གཞོལ་བའི་སླད་དུ་འདིར་མཆིས་

ན། །འདྲེན་པ་མཁྱེན་པ་ཐོགས་མི་མངའ། །ཇི་ལྟར་མྱུར་དུ་དབྱེ་མི་མཛད། །བདག་ནི་དེ་ཡི་མོས་པ་བཞིན། །ཞལ་དུ་བལྟས་ནས་ཞུ་ལགས་ན། །བཅོམ་ལྡན་ཐུགས་རྗེས་རབ་ཕྱེ་ནས། །ཐེ་ཚོམ་རྣམས་ནི་བཅད་དུ་གསོལ། །བླ་མེད་ཆོས་ནི་ཐོས་གྱུར་ན། །སེམས་ནི་རབ་ཏུ་དགའ་བར་འགྱུར། །ལུས་

Vol. 40 · folio 72a

ནི་དགའ་བས་ཁྱབ་གྱུར་ནས། །ཐེ་ཚོམ་དྲ་བ་ཆད་པར་འགྱུར། །ཆོས་ཀྱི་རྒྱལ་པོ་བླ་མེད་གཙོ། །ཐམས་ཅད་མཁྱེན་པ་འཇིགས་མི་མངའ། །ཐམས་ཅད་མཁྱེན་ཅིང་གཟིགས་པ་ལ། །བདག་ནི་ཐེ་ཚོམ་ཞུ་བ་ལགས། །སངས་རྒྱས་ཆོས་ནི་ཐམས་ཅད་ལ། །ཐེ་ཚོམ་ཅུང་ཟད་ཡོང་མི་

མངའ། །རབ་བརྩོན་འདྲེན་པ་ཆེན་པོ་ལ། །བདག་ནི་ཐེ་ཚོམ་ཞུ་བ་ལགས། །བླ་མེད་ཐེ་ཚོམ་ཆད་པ་པོ། །ཆོས་ལ་ཐེ་ཚོམ་མི་མངའ་བ། །ཡོན་ཏན་རྒྱ་མཚོ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །སྣང་བ་ཆེན་པོ་དཔག་མེད་དང་། །ཡོན་ཏན་ཆེན་པོ་དཔག་མེད་དང་། །རྣམ་དག་མཁྱེན་

པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བརྩོན་འགྲུས་མཁྱེན་པ་དཔག་མེད་དང་། །སྤྱོད་ཡུལ་མཁྱེན་པ་དཔག་མེད་དང་། །ཕན་འདོགས་མཁྱེན་པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་མཁྱེན་པ་མཐའ་མེད་ཀྱང་། །མཐའ་དང་མཐའ་མེད་རབ་ཏུ་སྤངས། །

ཐེ་ཚོམ་ཐམས་ཅད་གཅོད་པ་ལ། །བདག་ནི་ཐེ་ཚོམ་ཞུ་བ་ལགས། །བསམ་གྱིས་མི་ཁྱབ་ཆོས་ཀྱི་རྒྱལ། །ཐུགས་རྗེས་ཞུ་བ་གསན་དུ་གསོལ། །གནང་བར་མཛད་ན་བདག་ཞུ་ན། །ཐུབ་པ་ཆེན་པོས་བཤད་དུ་གསོལ། །ཐམས་ཅད་མཁྱེན་པ་ཤཱཀྱའི་གཙོ། །གྲགས་ཆེན་ལ་ནི་ཞུ་བ་ལགས། །

གལ་ཏེ་ཐུགས་རྗེས་གནང་གྱུར་ན། །ཐེ་ཚོམ་དྲ་བ་གཅད་དུ་གསོལ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་དེང་ཁྱོད་ཀྱིས་ངའི་ཞལ་དུ་བལྟས་ནས་སེམས་རྩེ་གཅིག་ཏུ་གསོལ་བ་འདེབས་པ་འདིས་དེ་

བཞིན་གཤེགས་པ་ལ་ཞུ་བ་དུ་ཞིག་ཞུ་བར་སེམས། །གལ་ཏེ་ཞུ་བ་ཡོད་ན་ངས་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བློ་གྲོས་མཐའ་ཡས་ཁྱོད་ཀྱིས་ནི། །ང་ལ་ཅི་ཞིག་འདྲི་བར་སེམས། །དེ་བཞིན་

དུ་ནི་ཞུས་ཤིག་དང་། །ངས་ནི་རབ་ཏུ་བཤད་པར་བྱ། །ཁྱོད་ཀྱིས་ཇི་སྐད་དྲིས་པ་བཞིན། །རེ་རེ་ནས་ནི་གསལ་ཕྱེ་ནས། །ཇི་ལྟར་མོས་དང་འདུན་པ་བཞིན་དུ། །མྱུར་དུ་ཕྱེ་སྟེ་རབ་བཤད་དོ། །ངས་ནི་ཁྱོད་ལ་རབ་བཤད་ཀྱིས། །ཐམས་ཅད་ཐེ་ཚོམ་མེད་པར་བྱོས། །ཇི་ལྟར་ཁྱོད་ཀྱི་འདོད་པ་བཞིན། །

Vol. 40 · folio 72b

ཁྱོད་ཀྱིས་ཞུས་དང་འཚམ་པར་བཤད། །དེང་ཁྱོད་དུས་བཞིན་ཞུ་བར་གྱིས། །དུས་དང་དོན་ནི་ཇི་ལྟ་བཞིན། །དུས་བཞིན་དུ་ནི་ཞུས་པའི་ཕྱིར། །ངས་ནི་ངེས་པར་རབ་བཤད་དོ། །ཇི་ལྟར་ཁྱོད་ཀྱི་མོས་པ་བཞིན། །ཞུ་བ་དག་ནི་ཞུས་ཤིག་དང་། །ངས་ནི་ཐམས་ཅད་རྗེས་འཐུན་པར། །ཁྱོད་ལ་རབ་

ཏུ་བཤད་པར་བྱ། །དེང་ཁྱོད་དུས་སུ་ཞུས་ཤིག་དང་། །ངས་ཀྱང་དུས་བཞིན་བཤད་པར་བྱ། །ཐེ་ཚོམ་དྲ་བ་བཅད་པས་ན། །ཐེ་ཚོམ་མེད་པ་འཐོབ་པར་འགྱུར། །ང་ནི་ཆོས་ཀྱི་རྗེར་གྱུར་པས། །དོན་ནི་མཐར་ཕྱིན་ཐུགས་སུ་ཆུད། །ཆོས་རྣམས་ཐམས་ཅད་དག་ལ་ཡང་། །ཐེ་ཚོམ་མེད་པ་

བརྙེས་པ་ཡིན། །ང་ནི་ཆོས་རྣམས་ཐམས་ཅད་ལས། །མངོན་སངས་རྒྱས་པས་བསམ་དཀའ་ཡིན། །སེམས་ཅན་མོས་པ་ཇི་བཞིན་དུ། །ཞུས་པ་དག་ནི་སྟོང་པར་མཛད། །ང་ནི་ཆོས་རྣམས་ཐམས་ཅད་ལ། །ཐོགས་པ་དག་ནི་མི་མངའ་བས། །དུས་བཞིན་དུ་ནི་ཞུས་པ་ལ། །མྱུར་དུ་

བཤད་པ་མཛད་པ་ཡིན། །ངས་ནི་དུས་བཞིན་རབ་བཤད་ཅིང་། །ཐེ་ཚོམ་དག་ནི་མི་མངའ་བས། །དེ་ཡི་མོས་པ་ཇི་ལྟ་བར། །དེ་ཡི་ཐེ་ཚོམ་གཅོད་པར་མཛད། །ང་ནི་རྟག་ཏུ་དུས་རྣམས་དང་། །འཁོར་འདུས་པ་ཡི་བསམ་པ་དང་། །སེམས་ཅན་དག་ནི་ཐམས་ཅད་ཀྱི། །བསམ་པ་ཐ་དད་

མཁྱེན་པ་ཡིན། །རྟག་ཏུ་སེམས་ཅན་ཐམས་ཅད་ཀྱི། །འདོད་པ་དང་ནི་འདོད་མེད་པ། །སོ་སོར་རབ་ཏུ་བརྟགས་ནས་ནི། །དེ་དག་གསལ་བར་གཟིགས་པ་ཡིན། །གལ་ཏེ་བློ་དང་ལྡན་པ་རྣམས། །ལེགས་པ་ཉིད་དུ་སྒྲུབ་བྱེད་ན། །ང་ཡི་དུས་དང་སྦྱར་ནས་ནི། །ཡང་དག་ཆོས་སྟོན་གོ་བར་མཛད། །

བློ་དང་མི་ལྡན་དེ་དག་ནི། །གཏི་མུག་དག་གིས་རྨོངས་དཀྲུགས་ཤིང་། །དེ་དག་ཤེས་རབ་སྣང་མེད་པས། །ཡང་དག་ཆོས་ལ་གུས་མི་འགྱུར། །གལ་ཏེ་གུས་པ་མེད་གྱུར་ན། །ཡང་དག་ཆོས་ནི་ཚོལ་མི་བྱེད། །ཆོས་འདི་ཐོས་པར་གྱུར་ཀྱང་ནི། །སྣང་བ་ཆེན་པོའི་ཤེས་མི་སྐྱེ། །གང་ཞིག་

ཆོས་ལ་མཁས་གྱུར་པ། །ཆོས་ལ་མོས་ཤིང་ཚོལ་བར་བྱེད། །གལ་ཏེ་ཆོས་འདི་ཐོས་གྱུར་ན། །རབ་སྣང་ཡེ་ཤེས་ཐོབ་པར་འགྱུར། །ཐེག་ཆེན་དག་ལ་མོས་པ་ནི། །མི་ཡི་གཙོ་བོ་ཚོལ་བྱེད་པས། །རབ་སྣང་ཡེ་ཤེས་ཐོབ་པར་འགྱུར། །བསམ་གྱིས་མི་ཁྱབ་གཉེར་བ་དག །བསམ་གྱིས་མི་

Vol. 40 · folio 73a

ཁྱབ་ཡེ་ཤེས་ལ། །གཞོལ་བ་གང་ཡིན་དེ་དག་ནི། །ཐོས་པས་ཡོངས་སུ་རྫོགས་པར་འགྱུར། །དཔག་མེད་ཡེ་ཤེས་ལ་མོས་དང་། །བསམ་གྱིས་མི་ཁྱབ་གཉེར་བ་དག །དེས་ནི་ཆོས་འདི་ཐོས་གྱུར་ན། །བླ་མེད་ཡེ་ཤེས་ཐོབ་པར་འགྱུར། །སེམས་ཅན་དག་ནི་ལ་ལ་

ཞིག །བྱང་ཆུབ་སྙིང་པོ་ཚོལ་བ་དང་། །བླ་མེད་འཁོར་ལོ་བསྐོར་འདོད་པས། །ཆོས་འདི་ཐོས་ནས་དགའ་བར་འགྱུར། །མོས་ཤིང་རབ་ཏུ་བརྩོན་པ་དང་། །ཆོས་ལ་གཙོ་བོར་གང་འཛིན་པ། །དྲི་མེད་ཆོས་ནི་ཐོས་གྱུར་ན། །མོས་ཤིང་རབ་ཏུ་དགའ་བར་འགྱུར། །གལ་ཏེ་སེམས་ཅན་ལ་ལ་དག །

ལེགས་པར་བསྒྲུབ་པར་མོས་གྱུར་པ། །ཆོས་ཀྱི་འོད་ཟེར་སྣང་བ་ཡི། །བླ་མེད་ཆོས་འདི་བསྟན་པར་བྱ། །ཁུར་ལྕི་རྣམས་ནི་ཁྱེར་བ་དང་། །ནན་ཏན་བསྒྲུབ་པ་ལ་མོས་པ། །དེས་ནི་ཆོས་འདི་ཐོས་གྱུར་ན། །དགའ་བས་ཀུན་ཏུ་ཁྱབ་པར་འགྱུར། །གང་ཞིག་རབ་ཏུ་མོས་པ་ཡིས། །དགེ་བའི་ཆོས་ནི་

སེམས་བྱེད་ན། །དེ་ལ་སྙིང་བརྩེ་བསམ་བཞག་ནས། །རབ་ཏུ་ཕྱེ་ནས་བསྟན་པར་བྱ། །ཁྱོད་ལ་སོགས་ལ་ཐུགས་བརྩེའི་ཕྱིར། །ཁྱོད་ཀྱིས་ཇི་སྐད་ཞུས་པ་བཞིན། །ངས་ཀྱང་ཡང་དག་ངེས་པར་ནི། །ཁྱོད་ཀྱི་ཐེ་ཚོམ་གཅད་པར་བྱ། །ངས་ནི་ལོ་མང་སྟོང་ཕྲག་ཏུ། །ཐབས་མཁས་དག་ནི་རབ་

བསྒོམས་ཤིང་། །ཐེ་ཚོམ་དག་ནི་བསལ་བས་ན། །ཁྱོད་ཀྱི་མོས་པ་རབ་ཏུ་མཁྱེན། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ཁྱོད་ལ་རབ་ཏུ་བསྟན་པས་ན། །ཐེ་ཚོམ་རྣམས་ནི་གཅད་པར་བྱ། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །

ཇི་ལྟར་མོས་པ་བཞིན་དུ་ནི། །ངས་ནི་རབ་ཏུ་བཤད་པར་བྱ། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ང་ནི་ཆོས་ལ་རབ་གནས་པས། །གཡོ་བ་མེད་པ་བརྙེས་པ་ཡིན། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་

ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་བྱང་ཆུབ་སེམས་དཔའི་ཐེག་པ་ལ་ཐེ་ཚོམ་ཅུང་ཟད་ཅིག་མཆིས་པ་དེང་ཞུ་བ་ལགས་ན། ཇི་ལྟར་ན་སྐྱེས་བུ་དམ་པ་འཇིགས་པ་སྤངས་ནས་ཡང་དག་པར་

Vol. 40 · folio 73b

སེམས་རྩེ་གཅིག་ཏུ་སེམས་ཅན་རྣམས་ཀྱི་སླད་དུ་གོ་ཆ་ཆེན་པོ་བགོས་ནས་གོ་ཆ་ཆེན་པོས་རབ་ཏུ་བརྒྱན་པ་དང་། མོས་པ་ཆེན་པོ་བསྐྱེད་ནས་གུས་པར་བགྱིད་པ་དང་། བག་ཡོད་པ་དང་བཅས་པས་ཐེག་པ་ཆེན་པོ་འདི་ལ་འཚལ་ནས་ཤིན་ཏུ་རྣམ་པར་དག་པ་ཆེན་པོ་མཉམ་པ་ཉིད་ཀྱི་ཤུལ་མཐོ་

དམན་དང་། གྱོ་མོ་དང་། གསེག་མ་དང་། ཚེར་མ་དང་། མི་གཙང་བ་རྣམ་པ་སྣ་ཚོགས་ཀྱི་ལྟ་བའི་ཐིབས་པོ་རྣམས་མ་མཆིས་པ། ཟུག་རྔུ་གདུག་པའི་སྡུག་བསྔལ་དང་། ཉོན་མོངས་པའི་གཡང་ས་མ་མཆིས་པ། འཆི་བ་དང་། འཇིགས་ཤིང་སྐྲག་པ་དང་། བར་ཆད་མ་མཆིས་པ། དྲང་ཞིང་

གྱ་གྱུ་མ་མཆིས་པ་དང་། དེ་ཁོ་ན་ཉིད་ཀྱི་མཉམ་པ་ཉིད་ཀྱི་ཤུལ་དང་། ཐོགས་པ་མ་མཆིས་པའི་ཤུལ་དུ་ཞུགས་ནས་ལྟ་བའི་ཐིབས་པོ་རྣམས་བཅད་པ་དང་། དྲ་བ་ཐམས་ཅད་དྲལ་བ་དང་། མུན་ནག་རྣམས་བསལ་བ་དང་། སྲིད་པའི་མངོན་པར་ཞེན་པ་རྣམས་སྤང་བ་དང་། འདུ་འཕྲོ་བ་རྣམས་

སྤང་བའི་སླད་དུ་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བ་ལགས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདིའི་སླད་དུ་ཞུ་བ་གསོལ་བ་ལགས་སོ། །སྐྱེས་བུ་དམ་པ་ཇི་ལྟ་བུས་གོ་ཆ་ཆེན་པོ་ཇི་ལྟ་བུ་

བགོས་ན་གོ་ཆ་ཆེན་པོ་བགོས་པ་དེས་ཐེག་པ་ཆེན་པོ་ལ་འཚལ་ནས་ལམ་ཆེན་པོ་འདིས་གཞོལ་ཞིང་ཡང་དག་པར་འཇུག་པར་འགྱུར་བ་ལགས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གོ་ཆའི་བཀོད་པ་གང་ལགས་པ་དང་། ལམ་གང་ལ་གནས་པ་

དང་། ཆོས་རྣམས་ཀྱི་ཚུལ་ལ་མཁས་པ་ལ་གནས་པ་གང་ལགས་པ་བཀས་བཤད་དུ་གསོལ། ཆོས་ཀྱི་ཚུལ་ལ་མཁས་པ་ལ་རབ་ཏུ་གནས་པས་ནི་ཆོས་རྣམས་ཀྱི་ཚུལ་ལ་མཁས་པའི་སྣང་བ་སྐྱེད་པར་འགྱུར་ལ། ཆོས་ཀྱི་སྣང་བའི་དབང་གིས་ནི་གོ་ཆ་མི་སྤོང་བར་ཐེག་པ་ཆེན་པོ་ལ་འཚལ་

ནས་ནུར་བ་མ་མཆིས་པའི་བརྩོན་འགྲུས་ཀྱི་སྟོབས་དང་། བརྗེད་ངས་པ་མ་མཆིས་པའི་དབང་པོ་དང་། རྒྱུན་ཆགས་པ་མ་མཆིས་པའི་ཤེས་རབ་ཀྱི་སྟོབས་ཀྱིས་མྱུར་དུ་ཆོས་ཀྱི་དབྱིངས་ཀྱི་ཚུལ་ལ་གསལ་བར་མཁས་པ་མངོན་པར་བསྒྲུབས་ནས། བྱང་ཆུབ་ཀྱི་སྙིང་པོར་བགྲོད་པ་དང་།

Vol. 40 · folio 74a

ཆོས་ཀྱི་འཁོར་ལོ་བསྐོར་ནས་སེམས་ཅན་རྣམས་ལ་ཡང་དག་པར་ཆོས་སྟོན་པའི་སླད་དུ་སེམས་ཅན་ཐམས་ཅད་ཇི་ལྟར་མོས་པ་དང་། ཇི་ལྟར་གཞོལ་བ་བཞིན་དུ་མ་གྲོལ་བ་ལས་རྣམ་པར་གྲོལ་བར་འགྱུར་ལགས་སོ། །བཅོམ་ལྡན་འདས་ཐེག་པ་ཆེན་པོ་འདིས་སེམས་

ཅན་རྣམས་ལ་སྨན་པ་དང་། བདེ་བར་བགྱི་བའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདི་ཞུ་ལགས་སོ། །བཅོམ་ལྡན་འདས་དེ་བཞིན་གཤེགས་པ་ནི་ཐམས་ཅད་མཁྱེན་པ་ཐམས་ཅད་གཟིགས་པ་ལགས་ན་ཆོས་གང་གིས་བྱང་

ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་མངོན་པར་བསྒྲུབས་པ་དང་། ཏིང་ངེ་འཛིན་ཐོབ་པའི་དབང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་མངོན་

པར་རྫོགས་པར་སངས་མ་རྒྱས་ཀྱི་བར་དུ་ཕྱིར་ལྡོག་པར་མི་འགྱུར་བ་གང་ལགས་པ་བཀས་བཤད་དུ་གསོལ། བཅོམ་ལྡན་འདས་དེ་བཞིན་གཤེགས་པའི་མཁྱེན་པ་དང་། གཟིགས་པ་ནི་ངོ་མཚར་རྨད་དུ་བྱུང་བའི་ཆོས་ཡོངས་སུ་རྫོགས་ཤིང་སེམས་ཅན་རྣམས་ཀྱི་ཤེས་རབ་ཀྱི་སྨན་

རབ་ཏུ་མཁྱེན་པ་ལགས་པས་དེའི་སླད་དུ་བདག་ཞུ་བ་གསོལ་ལགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ། བྱང་ཆུབ་སེམས་དཔའ་རྣམས་ཀྱི་སླད། །སངས་རྒྱས་ཆོས་དོན་ཟབ་མོ་དག །ཐམས་ཅད་

མཁྱེན་ཅིང་གཟིགས་པ་པོ། །རྐང་གཉིས་གཙོ་ལ་བདག་ཞུ་ལགས། །ཐེག་པ་ཆེན་པོའི་རྣལ་འབྱོར་པ། །ཏིང་འཛིན་གང་གིས་གཞོལ་གྱུར་པ། །སེམས་ཅན་རྣམས་ལ་སྨན་སླད་དུ། །དེ་དག་ཞུ་བ་གསོལ་བ་ལགས། །ཇི་ལྟར་སྐྱེས་བུ་དམ་པ་ཡིས། །གོ་ཆ་དཔག་མེད་བགོ་

བར་འགྱུར། །དེ་ལྟར་གོ་ཆ་བགོས་ནས་ཀྱང་། །ཇི་ལྟར་རབ་ཏུ་གཞོལ་བར་འགྱུར། །ཇི་ལྟར་འདུན་པ་སློང་བར་འགྱུར། །ཇི་ལྟར་དེ་ལ་སྲེད་པར་འགྱུར། །ཇི་ལྟར་བརྩོན་འགྲུས་ཆེན་པོར་འགྱུར། །ཇི་ལྟར་བག་ཡོད་ལྡན་པར་འགྱུར། །ཇི་ལྟར་བྱང་ཆུབ་སེམས་དཔའ་རྣམས། །

Vol. 40 · folio 74b

ཐེག་ཆེན་འདི་ལ་གཞོལ་བར་བགྱི། །དེ་ལ་འཚལ་ནས་ཅི་བགྱིད་པ། །དངོས་པོ་འདི་ཡང་བཀས་བཤད་གསོལ། །ཇི་ལྟར་ཐེག་ཆེན་བཏེག་ནས་ནི། །བྱང་ཆུབ་སེམས་ལ་གཞོལ་གྱུར་པ། །འཇིག་རྟེན་འདྲེན་པའི་ཐུགས་རྗེ་ཡིས། །མྱུར་དུ་བདག་ལ་བཀས་བཤད་གསོལ། །

ཇི་ལྟར་ཡང་དག་མཉམ་ལམ་གྱིས། །མཉམ་པ་ཉིད་དུ་གཞོལ་བར་འགྱུར། །ལྟ་བ་རྣམས་ཀྱི་ཐིབས་པོ་དག །གཅོད་པར་བགྱིད་ལ་སྐྱོན་མེད་འགྱུར། །སྤྱོད་ཡུལ་དག་ནི་ཐམས་ཅད་ལས། །ཇི་ལྟར་བགྱིས་ན་འདའ་བར་འགྱུར། །ཇི་ལྟར་མཉམ་པ་ཉིད་དག་གིས། །འདོད་

ཆགས་དྲ་བ་དྲལ་བར་འགྱུར། །ཇི་ལྟར་མུན་ནག་རབ་བསལ་ནས། །ཡེ་ཤེས་སྣང་ཆེན་ཐོབ་པར་འགྱུར། །བྱང་ཆུབ་སེམས་དཔའ་དེ་དག་གིས། །ཇི་ལྟར་བགྱིས་ན་གཞོལ་བར་འགྱུར། །ཇི་ལྟར་སོ་སོར་རབ་བརྟགས་པས། །འཆིང་བ་མང་པོ་སྤོང་བར་འགྱུར། །ཇི་ལྟར་

བྱང་ཆུབ་སེམས་དཔའ་རྣམས། །འཆིང་བ་སྤངས་ནས་བདེ་བར་གནས། །ཇི་ལྟར་བྱང་ཆུབ་སེམས་དཔའ་རྣམས། །འཇིགས་པ་ཆེ་ལས་འདའ་བར་འགྱུར། །ཆོས་ཀྱི་དོན་ལ་མཁས་གྱུར་ནས། །བླ་མེད་ལ་ནི་གཞོལ་བར་འགྱུར། །བྱང་ཆུབ་སེམས་དཔའ་ཇི་ལྟ་བུའི། །

དཔག་མེད་གོ་ཆ་བགོ་བར་བགྱིད། །གོ་ཆ་དེ་དག་བགོས་ནས་ཀྱང་། །ཐེག་ཆེན་ལ་ནི་འཚལ་བར་བགྱིད། །ཇི་ལྟར་བྱང་ཆུབ་སེམས་དཔའ་རྣམས། །མཉམ་ཉིད་ལམ་ལ་གཞོལ་བར་བགྱིད། །བདག་གིས་དེང་འདིར་ཞུས་པ་འདི། །བཅོམ་ལྡན་འདས་ཀྱིས་བཀས་

བཤད་གསོལ། །བྱང་ཆུབ་སེམས་དཔའ་ཇི་ལྟ་བུར། །གོ་ཆ་བཀོད་པ་ཐོབ་འགྱུར་དང་། །བླ་མེད་ཐེག་པ་རབ་བརྒྱན་པ། །བཅོམ་ལྡན་འདས་ཀྱིས་བཀས་བཤད་གསོལ། །ལམ་འདི་ལ་ནི་གནས་པ་དང་། །ལམ་དེའི་བཀོད་པ་གང་ལགས་དང་། །ཆོས་རྣམས་ལ་ནི་མཁས་

གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཆོས་ཀྱི་དབྱིངས་ཀྱི་ཚུལ་རྣམས་དང་། །ཆོས་ལ་མཁས་པའི་སྣང་བ་དག །ཇི་ལྟ་བུར་ནི་རྟོག་གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་དེ་ཐོས་

Vol. 40 · folio 75a

ནས། །ཆོས་རྣམས་ཐམས་ཅད་མཐར་ཕྱིན་པ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་ཐོབ་གྱུར་ནས། །གོ་ཆ་ཆེན་པོ་མི་སྤོང་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་

སེམས་དཔའ་རྣམས། །ཐེག་ཆེན་འདི་ལ་འཚལ་ནས་ནི། །བརྩོན་འགྲུས་ལྡོག་པར་མི་འགྱུར་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་སེམས་དཔའ་རྣམས། །བསམ་པ་དག་ནི་རབ་བརྟན་ཞིང་། །འདི་ལྟར་ཤེས་རབ་སྟོབས་དག་གིས། །ཤིན་ཏུ་

འདུལ་བ་ཐོབ་འགྱུར་ལགས། །ཇི་ལྟར་ཆོས་ཀྱི་དབྱིངས་རྣམས་ཀྱི། །ཚུལ་ལ་མཁས་པས་ཐོབ་པར་འགྱུར། །ཆོས་ཀྱི་རྒྱལ་པོ་བསམ་མི་ཁྱབ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་མྱུར་བ་ཁོ་ནར་ནི། །བྱང་ཆུབ་སྙིང་པོར་བགྲོད་གྱུར་ནས། །སུ་ཡང་སྐོར་བར་མི་འགྱུར་

བ། །ཚངས་པའི་འཁོར་ལོ་སྐོར་འགྱུར་ལགས། །ཇི་ལྟར་གཡོ་བ་མ་མཆིས་པར། །སྔོན་གྱི་སྨོན་ལམ་ཇི་ལྟ་བཞིན། །སེམས་ཅན་ཐམས་ཅད་ཀུན་ལ་ནི། །ཆོས་རྣམས་ཡང་དག་སྟོན་འགྱུར་ལགས། །ཆོས་རྣམས་ཡང་དག་བསྟན་པས་ན། །འཁོར་བ་ལས་ནི་གྲོལ་འགྱུར་ལགས། །ཇི་ལྟར་བགྱིས་ན་སེམས་ཅན་

རྣམས། །གཏན་དུ་བདེ་བ་འཐོབ་འགྱུར་ལགས། །སེམས་ཅན་རྣམས་ལ་སྨན་སླད་དུ། །འཇིག་རྟེན་འདྲེན་ལ་བདག་ཞུ་ན། །ཐམས་ཅད་མཁྱེན་ཅིང་གཟིགས་པ་པོའི། །ཐུགས་རྗེས་བདག་ལ་བཀས་བཤད་གསོལ། །ཆོས་ནི་གང་དང་གང་དག་གིས། །བྱང་ཆུབ་སེམས་དཔའ་སྨིན་བགྱིད་པ། །

ཆོས་ཀྱི་རྒྱ་མཚོ་ཐམས་ཅད་ཀྱིས། །ཏིང་འཛིན་ཕྱག་རྒྱ་མཛད་དུ་གསོལ། །སངས་རྒྱས་ཆོས་ལ་རབ་མོས་ཤིང་། །བྱང་ཆུབ་ཆེ་ལ་གང་ལྟ་བ། །ཆོས་ཀྱི་སྒྲ་འདི་ཐོས་གྱུར་ན། །ལུས་ཀུན་ཁྱབ་པར་དགའ་བར་འགྱུར། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་

བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་ཁྱོད་ཀྱིས་སྔོན་སངས་རྒྱས་ཚད་མེད་པ་རྣམས་ལ་མཆོད་ཅིང་རིམ་གྲོ་བྱས་པ་དང་། དགེ་བའི་རྩ་བ་རྣམས་བསྐྱེད་ཅིང་ཡོན་ཏན་གཞལ་དུ་མེད་པ་བསགས་པས་ན་ཆོས་ཟབ་མོ་འདི་ལ་རབ་ཏུ་གདུང་བས་མོས་པར་གྱུར་པ་དང་། བསམ་པ་རྒྱ་ཆེན་པོས་

Vol. 40 · folio 75b

སེམས་ཅན་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོ་བསྐྱེད་ནས་དེ་བཞིན་གཤེགས་པ་ལ་ཞུ་བ་ཞུས་པ་ལེགས་སོ་ལེགས་སོ། །ཁྱོད་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། ངས་ཁྱོད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་མངོན་པར་བསྒྲུབ་པ་དང་། ཇི་ལྟར་བླ་

ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་འགྱུར་བ་ཡང་དག་པར་བཤད་པར་བྱའོ། །བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་

སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་གོ་ཆ་ཆེན་པོ་བགོས་པ་དེས་སེམས་ཅན་རྣམས་ཡོངས་སུ་བསྡུ་བའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་སྦྱིན་པ་རྣམ་པར་དག་པ་ལ་དགོད་པའི་ཕྱིར་གོ་ཆ་

ཆེན་པོ་བགོ་བར་བྱའོ། །སེམས་ཅན་རྣམས་ཚུལ་ཁྲིམས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བཟོད་པ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བརྩོན་འགྲུས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་

བགོ་བར་བྱའོ། །སེམས་ཅན་རྣམས་བསམ་གཏན་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་ཤེས་རབ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བདེ་བ་ཐོབ་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །

སེམས་ཅན་རྣམས་ལ་ཕན་གདགས་པའི་དངོས་པོ་དང་མཚུངས་པར་ལྡན་པའི་སེམས་བསྐྱེད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ནད་ཀྱི་གཉེན་པོར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །ཡོན་ཏན་ཆེན་པོ་མངོན་པར་བསྒྲུབ་

པ་ལ་མཁས་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །བླ་ན་མེད་པའི་ཡེ་ཤེས་ལེགས་པར་ཡོངས་སུ་རྫོགས་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་འཁོར་བའི་འཇིགས་པ་ལས་ཡོངས་སུ་བསྐྱབ་པའི་ཕྱིར་གོ་ཆ་ཆེན་པོ་བགོ་བར་བྱའོ། །མཚུངས་པ་མེད་པའི་ཡེ་

Vol. 40 · folio 76a

ཤེས་ལེགས་པར་ཡོངས་སུ་རྫོགས་པར་རབ་ཏུ་བསྟན་པར་འདོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདུད་དང་། བདུད་ཀྱི་འཁོར་དང་། བདུད་ཀྱི་ཕོ་ཉ་དང་། བདུད་ཀྱི་ལས་ལ་གནས་པ་དང་། ལྟ་བ་རྣམས་ཀྱི་ཐིབས་པོ་

དང་། ལམ་ཡ་ང་བར་ཞུགས་པའི་མུ་སྟེགས་ཅན་གྱི་བསྟན་པ་ལས་རབ་ཏུ་བྱུང་བ་ཐམས་ཅད་དང་། འཇིག་རྟེན་རྒྱང་པན་དང་། མུ་སྟེགས་ཅན་དང་འཐུན་པ་ཇི་སྙེད་པ་དག་དང་འཐབ་པའི་ཕྱིར་གོ་ཆ་ཆེན་པོ་བགོ་བར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་གོ་ཆ་ཆེན་

པོ་བགོ་ཞིང་། གོ་ཆ་མི་སྤོང་བར་བརྩོན་འགྲུས་ཆེན་པོ་བསྐྱེད་ནས་སེམས་ཅན་གྱི་ཁམས་ཐམས་ཅད་དུ་ཞུགས་ཏེ། བཟོད་པ་ལ་གནས་ནས་འཇིགས་པ་རྣམས་སྤངས་ཏེ། མི་སྐྲག་མི་དངང་། མི་གཡོ་མི་འཁྲུག་པར་བྱས་ནས་གོ་ཆ་དཔག་ཏུ་མེད་པ་དག་བགོ་བར་བྱའོ། །དེ་འདི་ལྟ་སྟེ།

སེམས་ཅན་ཐམས་ཅད་ཡོངས་སུ་སྐྱོབ་པའི་གོ་ཆ་དང་། ལྟ་བའི་ཐིབས་པོ་ཐམས་ཅད་གཅོད་པའི་གོ་ཆ་དང་། བདུད་ཀྱི་དཔུང་རྣམས་རྣམ་པར་འཇིག་པར་བྱེད་པའི་གོ་ཆ་དང་། ཤེས་རབ་ཡང་དག་པར་ལེན་པའི་གོ་ཆ་དང་། ཚོགས་དཔག་ཏུ་མེད་པ་སོགས་པའི་གོ་ཆ་དང་། ཁུར་ལྕི་བ་རྣམས་སྒྲོལ་བའི་

གོ་ཆ་དང་། མངོན་པར་ཡིད་ཆེས་པ་འཕེལ་བར་བྱེད་པའི་གོ་ཆ་དང་། ཚུལ་ཁྲིམས་ལ་གནས་པའི་གོ་ཆ་དང་། ལས་ཀྱི་ཀུན་གཞི་ཡོངས་སུ་སྦྱོང་བའི་གོ་ཆ་དང་། ཐམས་ཅད་རྣམ་པར་དག་པར་བྱེད་པའི་སྟོབས་ཀྱི་གཏེར་གྱི་གོ་ཆ་དང་། ཐབས་མཁས་པའི་གཏེར་གྱི་གོ་ཆ་དང་། མངོན་པར་ཞེན་པ་ཐམས་

ཅད་ཡོངས་སུ་སྤོང་བའི་གོ་ཆ་དང་། ལྡོག་པ་དང་། འགྱེད་པ་མེད་པའི་ཤེས་རབ་ཀྱི་གོ་ཆ་གང་ཡིན་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཆེན་པོ་དེ་ལྟ་བུ་བགོས་ནས་འཁོར་བའི་མཐའ་ཇི་སྲིད་པ་དེའི་བར་དུ་ཤིན་ཏུ་བརྟན་པའི་བརྩོན་འགྲུས་ཀྱི་སྟོབས་གཡོ་བ་མེད་པ་མི་སྤོང་བར་

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་བྱའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་སེམས་ཅན་རྣམས། །བསྡུ་ཕྱིར་གོ་ཆ་བགོ་བར་བྱ། །སེམས་ཅན་རྣམས་ནི་ཚད་མེད་ཕྱིར། །གོ་ཆ་བགོས་པ་ཚད་མེད་དོ། །སྦྱིན་

Vol. 40 · folio 76b

པ་རྣམ་པར་དག་པའི་ཕྱིར། །ཐམས་ཅད་རབ་ཏུ་དགའ་བར་བྱེད། །སེམས་ཅན་ལ་ནི་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །ཚུལ་ཁྲིམས་རྣམ་པར་དག་པའི་ཕྱིར། །གོ་ཆ་འདི་ནི་བགོ་བར་བྱ། །འཇིག་རྟེན་ལ་ནི་ཕན་འདོགས་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་

འདི་ནི་བགོ་བར་བྱ། །བཟོད་པ་རྣམ་པར་དག་པའི་ཕྱིར། །དར་ཞིང་བདེ་བར་གནས་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །བརྩོན་འགྲུས་རྣམ་པར་དག་པའི་ཕྱིར། །ཕྱིར་མི་ལྡོག་པར་འགྲུབ་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །

གོ་ཆ་འདི་ནི་བགོ་བར་བྱ། །བསམ་གཏན་རྣམ་པར་དག་པའི་ཕྱིར། །སྤྱོད་ཡུལ་དག་ཀྱང་དེ་བཞིན་ནོ། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །ཤེས་རབ་རྣམ་པར་དག་པའི་ཕྱིར། །ཟག་མེད་བླ་ན་མེད་པ་ཡིན། །སེམས་ཅན་རྣམས་ལ་ཕན་གདགས་ཕྱིར། །

གོ་ཆ་འདི་ནི་བགོ་བར་བྱ། །སེམས་ཅན་དག་ནི་ཐམས་ཅད་ལ། །བདེ་བའི་ཡོ་བྱད་སྦྱིན་དགོས་པས། །དོན་དེ་ལེགས་པར་ཤེས་པའི་ཕྱིར། །གོ་ཆ་འདི་ནི་བགོ་བར་བྱ། །བྱང་ཆུབ་སེམས་དཔའ་སེམས་ཅན་རྣམས། །ཕན་པའི་དངོས་པོ་བྱ་དགོས་པས། །བསྡུ་བ་རྣམ་དག་བཞི་པོ་ཡིས། །སྲིད་པ་ཀུན་

ཏུ་འཇུག་པར་བྱེད། །འདོད་ཆགས་ཞེ་སྡང་གཏི་མུག་ནད། །གཉེན་པོ་དག་ནི་བསྟེན་པའི་ཕྱིར། །སེམས་ཅན་ལ་ནི་སྨན་གཏོང་བས། །ནད་རྣམས་རབ་ཏུ་སེལ་བར་བྱེད། །དེས་ན་བྱང་ཆུབ་སེམས་དཔའ་རྣམས། །གོ་ཆ་ལེགས་པར་བགོས་ནས་ནི། །ཡོན་ཏན་རྣམས་ཀྱི་ཚོགས་དག་ན། །མཁས་

བ་དཔག་མེད་ཐོབ་པ་ཡིན། །སེམས་ཅན་འཁོར་བའི་སྡུག་བསྔལ་གྱི། །ཉམས་ཐག་ཤིན་ཏུ་མི་བདེ་བས། །བདག་གིས་ཡོངས་སུ་བསྐྱབ་སྙམ་ནས། །གོ་ཆ་དཔག་མེད་བགོ་བར་བྱ། །འཁོར་བའི་སྡུག་བསྔལ་ཚད་མེད་རྣམས། །བདག་གིས་རྣམ་པར་དགྲོལ་སྙམ་ནས། །སྲིད་ལྟའི་དྲ་བས་ཀླགས་

པ་དག །ཐམས་ཅད་ཡོངས་སུ་གཅད་པར་བྱ། །གང་གིས་ཉོན་མོངས་དྲ་བ་འདི། །ཐམས་ཅད་གཅོད་པར་གང་ནུས་པ། །བརྟན་པའི་བརྩོན་འགྲུས་སྟོབས་དག་གིས། །དཔའ་བོའི་གོ་ཆ་བགོ་བ་ཡིན། །སེམས་ཅན་དག་ནི་ཐམས་ཅད་ཀུན། །བདེ་བའི་ལམ་ལ་རབ་བཀོད་ཅིང་། །མྱ་ངན་འདས་

Vol. 40 · folio 77a

ལ་གཞོལ་བ་དང་། །བླ་མེད་བདེ་ལ་དགོད་པར་བྱ། །གང་ཞིག་བརྩོན་འགྲུས་ཆེན་པོའི་སྟོབས། །གོ་ཆ་འདི་ནི་བགོ་བར་བྱེད་པ། །བདུད་རྣམས་ཐམས་ཅད་དག་དང་ནི། །རྟག་ཏུ་འཐབ་ཀྱང་ངལ་མི་འགྱུར། །གང་ཞིག་ལྟ་ལ་རབ་གནས་ནས། །ཐིབས་པོ་དག་ཏུ་གང་ཞུགས་དང་། །

འཇིག་རྟེན་རྒྱང་པན་བ་དག་ལ། །གོ་ཆ་བགོས་ནས་ཕན་གདགས་བྱ། །གཞན་ཡང་འཁོར་ནི་ཚད་མེད་པ། །ལམ་གོལ་དག་ཏུ་ཞུགས་པ་རྣམས། །དེ་དག་ལ་ནི་ཕན་གདགས་ཕྱིར། །གོ་ཆ་དཔག་མེད་བགོ་བར་བྱ། །དེ་ལྟར་གོ་ཆ་བགོས་ནས་ནི། །གོ་ཆ་ཆེན་པོ་མི་སྤོང་བར། །བརྩོན་འགྲུས་ཆེན་

པོའི་སྟོབས་བསྐྱེད་ན། །གོ་བགོས་རབ་བརྟགས་ཁྱད་པར་འཕགས། །སེམས་ཅན་ཁམས་ལ་རབ་ཞུགས་ཏེ། །བཟོད་པ་ལ་ནི་གནས་གྱུར་ནས། །བརྟན་པའི་བཟོད་པ་སྒྲུབ་བྱེད་པ། །གོ་བགོས་གོང་ན་མེད་པ་ཡིན། །འཇིགས་པ་དག་ནི་རབ་སྤངས་ཤིང་། །སྐྲག་པ་དག་ནི་མེད་པར་ཡང་། །

གོ་ཆ་དཔག་མེད་བགོས་ནས་ནི། །ཐམས་ཅད་རབ་བརྩོན་འགྲུས་པར་བྱ། །གང་ཞིག་གོ་ཆ་རབ་གནས་པ། །རྟག་ཏུ་ཡང་དག་རྟོགས་གྱུར་ཅིང་། །རབ་དབེན་གཡོ་བ་མེད་པས་ན། །མི་འཁྲུགས་ལྡོག་པར་མི་འགྱུར་རོ། །དེ་ལྟའི་གོ་ཆ་རབ་བགོས་ནས། །བློ་དང་ལྡན་པས་གཞན་ཡང་ནི། །

སེམས་ཅན་སྐྱོབ་པའི་གོ་བགོས་ཏེ། །བདུད་ཀྱི་གོ་ཆ་གཞོམ་པར་བྱ། །ཡོན་ཏན་དཔག་མེད་གོ་ཆ་དག །ཐམས་ཅད་རབ་ཏུ་བགོ་བར་བྱ། །དབང་པོ་ཤེས་མཆོག་གང་ཟག་གིས། །བགོས་ནས་བདེ་བ་ཐོབ་པར་འགྱུར། །ཁུར་ལྕི་རབ་ཏུ་སྤང་བའི་ཕྱིར། །བླ་མེད་གོ་ཆ་བགོས་ནས་སུ། །སེམས་

ཅན་ཐམས་ཅད་ཡོངས་བཟླས་ནས། །སྡུག་བསྔལ་ཁུར་ལས་ཐར་བར་བྱ། །རྣམ་དག་དད་པ་འཕེལ་བྱེད་ཅིང་། །དབང་པོ་དྲུག་ནི་རབ་སྡོམ་པ། །ཚུལ་ཁྲིམས་གང་དག་ལྡན་པ་ནི། །གོ་བགོས་གོང་ན་མེད་པ་ཡིན། །དཔའ་བོ་ཡེ་ཤེས་བསྒྲུབ་པ་ལ། །བྱང་ཆུབ་སེམས་དཔའ་རབ་

གནས་པས། །སྤྱོད་ལ་ཚུལ་ཁྲིམས་ལྡན་པས་ན། །གོ་བགོས་གཡོ་བ་མེད་པ་ཡིན། །སྔོན་གྱི་རྒྱལ་བ་མང་པོ་ལས། །རྣམ་དག་ལས་ནི་བསྒྲུབས་པས་ན། །དེ་ཕྱིར་གོ་ཆ་རབ་བགོས་ནས། །རྟག་ཏུ་འཇིགས་པ་མེད་པ་ཡིན། །སེམས་ཅན་ལ་ནི་སྲེད་པའི་བློས། །འཇིག་རྟེན་ལ་ནི་ཕན་

Vol. 40 · folio 77b

འདོགས་པས། །ཐབས་ནི་རབ་ཏུ་རྟོགས་པས་ན། །གོ་བགོས་ལེགས་པར་གནས་པ་ཡིན། །ཐབས་མཁས་ཡེ་ཤེས་གང་ཡིན་པ། །བྱང་ཆུབ་སེམས་དཔས་རབ་རྟོགས་པས། །དེ་ལྟར་གོ་ཆ་བགོས་ནས་ནི། །འཆིང་བ་མཐའ་དག་གཅོད་པར་བྱེད། །མངོན་ཞེན་ཐམས་ཅད་རབ་སྤོང་ཞིང་། །

ཡིད་ཆེས་རྒྱབ་ཀྱིས་མི་ཕྱོགས་པ། །གོ་བགོས་བློ་དང་ལྡན་པ་ནི། །བླ་མེད་བྱང་ཆུབ་བགྲོད་པར་འགྱུར། །བྱང་ཆུབ་སེམས་དཔའ་ངེས་པར་ནི། །བདག་དང་གཞན་ལ་ཕན་འདོགས་གང་། །བརྩོན་འགྲུས་སྟོབས་ལ་རབ་གནས་པ། །བརྟན་ཞིང་ཕྱིར་ལྡོག་མི་འགྱུར་རོ།། །།བམ་པོ་གཉིས་པ།

གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྐལ་པ་ཚད་མེད་པ་ནས་ཁུར་ཆེན་པོ་ཁྱེར་ཞིང་གོ་ཆ་ཆེན་པོ་བགོས་པའི་གོ་ཆ་དེ་ལྟ་བུ་དེ་ནི་བདུད་དམ། །བདུད་ཀྱི་འཁོར་རམ། བདུད་ཀྱི་ཕོ་ཉ་འམ། ལོག་པར་ལྟ་བའི་ཐིབས་པོ་དགོན་དུང་མ་རུངས་པར་ཞུགས་པའི་

སེམས་ཅན་རྣམས་ཀྱིས་མཐོང་བར་མི་འགྱུར་རོ། །དེ་ཅིའི་ཕྱིར་ཞེ་ན། གཟུགས་མེད་ཅིང་བསྟན་དུ་མེད་པ་དང་། ལྟོས་པ་མེད་ཅིང་མཚན་མ་མེད་པ་དང་། མཚན་མ་སྤངས་པས་མཚན་མ་དང་བྲལ་བ་དང་། མིང་དང་ཡི་གེ་མེད་པའི་ཕྱིར་རོ། །བློ་གྲོས་མཐའ་ཡས་གལ་ཏེ་ལ་ལ་ཞིག་མདའི་

ཚད་རི་རབ་ཙམ་ཤ་སྟག་འཕངས་ན་ཡང་ཕོག་པར་མི་འགྱུར་ལ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་ཐམས་ཅད་བདུད་ཀྱི་རྒྱལ་པོར་གྱུར་ལ། རེ་རེ་ལ་ཡང་བདུད་ཀྱི་དམག་རྣམ་པ་སྣ་ཚོགས་འཁོར་དང་བཅས་པར་གྱུར་པ་དེ་དག་དུས་གཅིག་ཏུ་མདའ་རྣོན་

པོ་ཚད་རི་རབ་ཙམ་ཤ་སྟག་འཕངས་ན་ཡང་ནམ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་བུའི་གོ་ཆ་བགོས་པ་ལ་རྣམ་པར་གཞིགས་པ་འམ། ཐ་ན་སྤུ་ཉག་མ་གཅིག་ཙམ་ཡང་ཉམས་པར་བྱེད་པར་མི་ནུས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སེམས་ཀྱིས་

ཀྱང་ཐ་དད་པའི་འདུ་ཤེས་སྐྱེད་པར་མི་ནུས་ན་ལུས་ཀྱིས་གནོད་པ་བྱ་བ་ལྟ་སྨོས་ཀྱང་ཅི་དགོས། བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་རྩེ་གཅིག་ཏུ་དེ་དག་འདུལ་བར་བྱེད་པ་གང་ཡིན་པ་དེ་དག་ནི་བདུད་མང་པོ་ཕམ་པར་བྱེད་ཅིང་ཉེ་བར་ཞི་བར་ཡང་བྱེད་ལ། གོ་ཆ་དེ་ལྟ་བུ་ལ་གནས་

Vol. 40 · folio 78a

ཤིང་གཡོ་བ་མེད་པས་སེམས་ཅན་ཐམས་ཅད་ཀྱིས་ཀྱང་རྣམ་པར་འཇིག་པར་བྱེད་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་མཚན་མ་མེད་པའི་ཕྱིར་དང་། སེམས་ཅན་རྣམས་ཀྱིས་བལྟ་བར་བྱ་བའི་སྤྱོད་ཡུལ་མ་ཡིན་པའི་ཕྱིར་སེམས་ཅན་ཐམས་ཅད་ཀྱིས་མཐོང་ཞིང་ཤེས་པར་

མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་རྟོགས་པའི་ཕྱིར་ཡང་དག་པ་ཇི་ལྟ་བ་བཞིན་དུ་གོ་ཆ་ཆེན་པོ་བགོས་པ་དེ་དག་ཤེས་ཤིང་མཐོང་ངོ་། །སེམས་ཅན་རྣམས་ཡོངས་སུ་བསྐྱབ་པའི་ཕྱིར་ཆོས་ཐམས་ཅད་ལ་ཡང་མངོན་པར་ཞེན་པར་མི་བྱེད་དོ། །

སེམས་ཅན་རྣམས་ལ་ཕན་གདགས་པའི་ཕྱིར་ཆོས་ཐམས་ཅད་ལ་ཡང་དམིགས་པར་མི་བྱེད་དེ། དེ་ལྟ་བས་ན་སེམས་ཅན་རྣམས་ཀྱིས་མཐོང་ཞིང་ཤེས་པར་མི་ནུས་སོ། །གོ་ཆ་དེ་ལྟ་བུ་བགོས་པ་དེ་དག་ལ་ནི་ཁ་དོག་གི་མཚན་མ་མེད་ཅིང་བསྟན་དུ་མེད་པ་དང་། ཚིག་གི་བརྗོད་པ་མེད་པའི་

ཕྱིར་གཟུགས་དང་ཡང་མཚུངས་པར་ལྡན་པར་མི་འགྱུར་ལ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་ཡང་མཚུངས་པར་ལྡན་པར་མི་འགྱུར་རོ། །ནང་དང་མཚུངས་པར་ལྡན་པར་མི་འགྱུར། ཕྱི་རོལ་དང་ཡང་མཚུངས་པར་ལྡན་པར་མི་འགྱུར། ནང་

དང་ཕྱི་རོལ་གཉིས་ཀ་དང་མཚུངས་པར་ལྡན་པར་མི་འགྱུར། ནང་ཡང་མ་ཡིན་ཕྱི་རོལ་ཡང་མ་ཡིན་པ་དང་མཚུངས་པར་ལྡན་པར་མི་འགྱུར། ཁམས་དང་ཡང་མཚུངས་པར་ལྡན་པར་མི་འགྱུར། སྐྱེ་མཆེད་དང་ཡང་མཚུངས་པར་ལྡན་པར་མི་འགྱུར། སའི་ཁམས་དང་ཡང་མཚུངས་

པར་ལྡན་པར་མི་འགྱུར། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པའི་ཁམས་དང་ཡང་མཚུངས་པར་ལྡན་པར་མི་འགྱུར། འདོད་པའི་ཁམས་དང་ཡང་མཚུངས་པར་ལྡན་པར་མི་འགྱུར། གཟུགས་དང་གཟུགས་མེད་པའི་ཁམས་དང་ཡང་མཚུངས་པར་

ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་མེད་པ་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པ་དང་ཡང་མཚུངས་པར་ལྡན་པར་

Vol. 40 · folio 78b

མི་འགྱུར། མངོན་པར་འདུ་བྱེད་པ་དང་བཅས་པ་ཡང་མ་ཡིན། མངོན་པར་འདུ་བྱེད་པ་མེད་པ་ཡང་མ་ཡིན་པ་དང་ཡང་མཚུངས་པར་ལྡན་པར་མི་འགྱུར། ཉན་ཐོས་ཀྱི་ས་དང་ཡང་མཚུངས་པར་ལྡན་པར་མི་འགྱུར། རང་སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར།

སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར། ཚིག་གི་ལམ་དང་ཡང་མཚུངས་པར་ལྡན་པར་མི་འགྱུར། གཟུགས་ཀྱི་རྒྱུ་དང་ཡང་མཚུངས་པར་ལྡན་པར་མི་འགྱུར། གཟུགས་ཀྱི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་

བྱེད་དང་། རྣམ་པར་ཤེས་པའི་རྒྱུ་དང་ཡང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། མཚན་ཉིད་དང་། མཚན་ཉིད་མ་ཡིན་པ་དང་ཡང་མཚུངས་བར་ལྡན་པར་མི་འགྱུར། ཆོས་

ཐམས་ཅད་དང་མཚུངས་བར་ལྡན་པར་ཡང་མི་འགྱུར། མཚུངས་པར་ལྡན་པར་མི་འགྱུར་བ་ཡང་མ་ཡིན་ཏེ། འཆིང་བ་མེད་པ། གྲོལ་བ་མེད་པ་བགྲང་བ་དང་། དཔེ་དག་གིས་ཤེས་པར་བྱ་བ་མ་ཡིན་པ་སྟེ། འདི་ལྟར་ཆོས་ཐམས་ཅད་ནི་བགྲང་བ་ལས་ཡང་དག་པར་འདས་པའི་ཕྱིར་རོ། །དེ་ལྟ་བུའི་གོ་

ཆ་དང་ལྡན་པ་དེ་དག་ནི་ཆོས་ཐམས་ཅད་དུ་ལྟ་བ་ཡང་དག་པར་མི་དམིགས་ཏེ། གཟུགས་སུ་ལྟ་བ་ཡང་དག་པར་མི་དམིགས་སོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་ལྟ་བར་ཡང་དག་པར་མི་དམིགས་སོ། །ཐ་ན་ཆོས་ཅུང་ཟད་ཙམ་དུ་ལྟ་བ་ཡང་དག་པར་མི་དམིགས་

སོ། །དེ་བཞིན་དུ་གོ་ཆ་དེ་ལྟ་བུ་བགོས་པ་དེ་དག་ནི་ཆོས་ཐམས་ཅད་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ནོ། །གཟུགས་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་དང་།

རྣམ་པར་ཤེས་པ་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ཏེ། ཆོས་ཐམས་ཅད་ཀྱི་མཚུངས་པར་ལྡན་པ་དང་། མཚུངས་པར་མི་ལྡན་པ་དེ་དག་ཐག་བསྲིངས་པ་ཡིན་ནོ། །དེ་བཞིན་དུ་གོ་ཆ་དེ་ལྟ་བུ་བགོས་པ་དེ་དག་ལ་ནི་མངོན་པར་འདུ་བྱ་བ་མེད་དེ། བྱེད་པ་མེད་

Vol. 40 · folio 79a

པའི་ཕྱིར་རོ། །མཚན་མ་ཡང་མེད་དེ། མཚན་མ་ཉིད་ཡོད་པ་མ་ཡིན་པའི་ཕྱིར་རོ། །གནས་ཀྱི་མཚན་མ་མེད་པ། འདུས་པའི་མཚན་མ་མེད་པ། རྣམ་པར་རྟོག་པ་མེད་པ། གཡོ་བ་མེད་པ། དམིགས་པ་མེད་པ། ངོ་བོ་ཉིད་དུ་བལྟ་བ་མེད་པ་སྟེ། གོ་ཆ་བགོས་བ་ཉིད་ཀྱང་

དམིགས་སུ་མེད་པའོ། །དེ་བཞིན་དུ་གོ་ཆ་བགོས་པ་ཉིད་ཀྱང་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཡང་དག་པར་བགོས་པ་ན་གང་གིས་གོ་ཆ་བགོས་པ་དང་། གང་དུ་གོ་ཆ་བགོས་པ་དང་། གང་ལས་གོ་ཆ་བགོས་པ་

ཡང་དག་པར་རྗེས་སུ་མི་མཐོང་བ་དང་། བདག་གིས་གོ་ཆ་བགོས་པ་དང་། བདག་གིས་གོ་ཆ་བགོས་པར་ཡང་ཡང་དག་པར་རྗེས་སུ་མི་མཐོང་བ་དང་། འདིར་གོ་ཆ་བགོས་པ་དང་། གཞན་དུ་གོ་ཆ་བགོས་པ་ཡང་ཡང་དག་པར་རྗེས་སུ་མི་མཐོང་བ་དང་། གོ་ཆ་དེ་ལྟ་བུ་བགོས་པའི་སེམས་ཅན་

ཡང་ཡང་དག་པར་རྗེས་སུ་མི་མཐོང་སྟེ། ཆོས་ཐམས་ཅད་མངོན་པར་འདུ་བྱ་བ་མེད་པའི་ཕྱིར་དང་ཡོད་པ་མ་ཡིན་པའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་དེ་ལྟ་བུ་བགོས་པ་དེ་དག་ནི་དེ་བཞིན་གཤེགས་པའི་གོ་ཆ་བགོས་པ་ཡིན་པས་ལུས་ཀྱང་མི་དམིགས། ངག་ཀྱང་

མི་དམིགས། ཡིད་ཀྱང་མི་དམིགས་ཏེ་དམིགས་སུ་མེད་པའི་ཕྱིར་རྣམ་པར་རྟོག་པ་རབ་ཏུ་སྤངས་པ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གལ་ཏེ་ཆོས་ཅུང་ཟད་ཙམ་ལ་གནས་པར་གྱུར་ཏམ། གལ་ཏེ་ཆོས་ཅུང་ཟད་ཙམ་ལ་དམིགས་ནས་གོ་ཆ་བགོས་སམ། གོ་ཆ་བགོ་

འམ། གོ་ཆ་བགོ་བར་འགྱུར་བ་དེ་དག་ནི་གོ་ཆ་ཆེན་པོ་བགོས་པ་ཞེས་མི་བྱ་སྟེ། གལ་ཏེ་སེམས་དེ་དག་ལས་ཡང་དག་པར་འདས་པར་གྱུར་པ་ན་གདོད་བསམ་གྱིས་མི་ཁྱབ་པའི་གོ་ཆ་ཆེན་པོ་བགོས་པ་ཞེས་བརྗོད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་འགའ་

ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན། བསྐལ་པ་གཅིག་གི་སེམས་ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན། བསྐལ་པ་བརྒྱ་སྟོང་དང་བསྐལ་པ་བྱེ་བ་བརྒྱ་སྟོང་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་སེམས་ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན་གྱི།

Vol. 40 · folio 79b

བསྐལ་པ་ཚད་མེད་པ་གྲངས་མེད་པའི་སེམས་ཅན་གྱི་ཕྱིར་གོ་ཆ་ཆེན་པོ་བགོས་པ་ཡིན་པས་དེའི་ཕྱིར་གོ་ཆ་ཆེན་པོ་ཚད་མེད་པ་བགོས་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཡང་དག་པར་བགོས་པ་ན་སེམས་ཅན་གྱི་འདུ་ཤེས་ལ་མི་གནས་པའི་གོ་ཆ་གྱོན་

པར་བྱེད་དོ། །སེམས་ཅན་གྱི་འདུ་ཤེས་མི་སྐྱེད་པའི་གོ་ཆ་དང་། སེམས་ཅན་གྱི་འདུ་ཤེས་སྤོང་བའི་གོ་ཆ་དང་། བདག་གི་འདུ་ཤེས་ཟློག་པའི་གོ་ཆ་དང་། སེམས་ཅན་གྱི་ངོ་བོ་ཉིད་ཤེས་པའི་གོ་ཆ་དང་། བདག་གི་ངོ་བོ་ཉིད་ཤེས་པའི་གོ་ཆ་དང་། འདུ་ཤེས་དང་། ཚོར་བ་ལས་ཡང་དག་པར་

འདས་པའི་གོ་ཆ་དང་། ཆོས་ཐམས་ཅད་ལ་བྱེད་པའི་འདུ་ཤེས་མེད་པར་ཤེས་པའི་གོ་ཆ་དང་། མཚན་མའི་གོ་ཆ་དང་། མཚན་མ་མེད་པའི་མཚན་ཉིད་ཀྱི་གོ་ཆ་དང་། སྨོན་པ་མེད་པའི་མཚན་ཉིད་ཀྱི་གོ་ཆ་དང་། ཆོས་ཐམས་ཅད་སྐྱེ་བ་མེད་པའི་མཚན་ཉིད་ཤེས་པའི་གོ་ཆ་དང་། འགག་པ་

མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་བྱེ་བྲག་གི་ངོ་བོ་ཉིད་ཀྱི་མཚན་ཉིད་ཤེས་པའི་གོ་ཆ་དང་བྱེ་བྲག་གི་ངོ་བོ་ཉིད་མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་དངོས་པོའི་མཚན་ཉིད་ཤེས་པའི་གོ་ཆ་དང་། དངོས་པོ་མེད་པའི་མཚན་ཉིད་ཀྱི་གོ་ཆ་གྱོན་པར་བྱེད་དོ། །

བློ་གྲོས་མཐའ་ཡས་གལ་ཏེ་དངོས་པོ་མེད་པ་ལ་གནས་ནས་གོ་ཆ་གྱོན་པར་བྱེད་ལ་གོ་ཆ་ཆེན་པོ་བགོས་པ་ཞེས་མི་བྱ་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དངོས་པོ་ལ་མི་གནས་པར་ཡེ་ཤེས་ཆེན་པོ་ཡོངས་སུ་ཚོལ་བ་ཡིན་པས་དེའི་ཕྱིར་གོ་ཆ་ཆེན་པོ་བགོས་པ་ཞེས་བརྗོད་པ་

ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བསྐལ་པ་སྟོང་ཕྲག་ཚད་མེད་དུ། གོ་ཆ་དཔག་མེད་བགོས་ནས་ནི། །སེམས་ཅན་དག་ནི་ཐམས་ཅད་ཀུན། །སྡུག་བསྔལ་རྣམས་ལས་གྲོལ་བར་བྱེད། །དེ་ལྟའི་གོ་ཆ་ཆེ་བགོས་པ། །བདུད་དམ་བདུད་ཀྱི་

མངགས་པ་དང་། །བདུད་ཀྱི་ལས་རྣམས་བྱེད་པ་དག །མིག་གིས་མཐོང་བར་མི་འགྱུར་རོ། །དེ་ལས་གཞན་པའི་སེམས་ཅན་གང་། །ལྟ་བའི་ཐིབས་པོར་ཞུགས་པ་དག །བསམ་གྱིས་མི་ཁྱབ་གོ་ཆ་འདི། །དེས་ཀྱང་ཐོབ་པར་འགྱུར་མ་ཡིན། །གཟུགས་མེད་ཅིང་ནི་ཁ་དོག་མེད། །བསྟན་

Vol. 40 · folio 80a

དུ་མེད་ཅིང་ལྟོས་མེད་པ། །གོ་ཆ་བསམ་གྱིས་མི་ཁྱབ་པ། །དེ་ཕྱིར་མིག་གིས་བལྟ་བྱ་མིན། །མིང་མེད་མཚན་མ་མེད་པ་དང་། །མཚན་མ་ཐམས་ཅད་སྤངས་པས་ན། །གོ་ཆ་བགོས་པ་དཔག་ཏུ་མེད། །དེ་ཕྱིར་ཕན་ཚུན་མཐོང་བ་མེད། །གལ་ཏེ་མདའ་ནི་རི་རབ་ཚད། །ཤིན་ཏུ་

རྣོན་པོ་འཕངས་ན་ཡང་། །བསམ་གྱིས་མི་ཁྱབ་གོ་བགོས་པས། །མདའ་ནི་རང་ཉིད་ཆག་པར་འགྱུར། །འཇིག་རྟེན་བདུད་ནི་ཇི་སྙེད་པས། །རི་རབ་ཚད་ནི་མདའ་རྣམས་ཀྱིས། །གོ་ཆ་ཆེན་པོ་བགོས་པ་ལ། །དུས་གཅིག་འོངས་ཏེ་འཕངས་ན་ཡང་། །གོ་ཆ་ཆེན་པོ་བགོས་པ་ཡི། །སྤུ་ཉག་

གཅིག་ནི་ཉམས་མི་འགྱུར། །བསམ་གྱིས་མི་ཁྱབ་གོ་བགོས་པས། །གང་ཡང་ཕམ་བྱེད་གཞིག་མི་ནུས། །དེས་ན་བྱང་ཆུབ་སེམས་དཔའ་རྣམས། །ལུས་དང་སེམས་ནི་འགྱུར་བ་མེད། །བསམ་གྱིས་མི་ཁྱབ་གོ་བགོས་ལ། །སུ་ཞིག་བསྒུལ་ཞིང་གཡོ་བར་ནུས། །སེམས་བསྐྱེད་ཐང་ཅིག་ཙམ་

གྱིས་ཀྱང་། །བདུད་ནི་མང་པོ་ཕམ་བྱེད་པས། །བྱང་ཆུབ་སེམས་དཔའ་བསམ་མི་ཁྱབ། །བདུད་དཔུང་དག་ནི་འཇིལ་བར་བྱེད། །དེ་ལྟའི་གོ་ཆ་ཆེ་བགོས་པ། །ནམས་ཀྱང་གཡོ་བར་མི་འགྱུར་བས། །སེམས་ཅན་དག་ནི་ཐམས་ཅད་ཀྱིས། །མཐོང་བར་ནུས་པ་གང་ཡང་མེད། །སེམས་ཅན་

དག་ནི་ཐམས་ཅད་ཀྱིས། །གོ་ཆ་མཚན་ཉིད་མི་ཤེས་པས། །དེ་ཕྱིར་སེམས་ཅན་ཐམས་ཅད་ཀྱིས། །མིག་གིས་མཐོང་བར་མི་ནུས་སོ། །བྱང་ཆུབ་སེམས་དཔའ་སྐྱབས་བྱེད་ཅིང་། །ཆོས་རྣམས་ཐམས་ཅད་ཤེས་པས་ནི། །རྡོ་རྗེ་མཆོག་དང་འདྲ་བས་ན། །དེ་ནི་ལེགས་པར་གོ་བགོས་ཡིན། །

ཆོས་རྣམས་ཐམས་ཅད་མི་ལེན་ཅིང་། །སེམས་ཅན་རྣམས་ནི་སྐྱོབ་བྱེད་པས། །སངས་རྒྱས་ཆོས་ཀྱི་རྗེས་འབྲང་ཕྱིར། །དེ་ནི་ལེགས་པར་གོ་བགོས་ཡིན། །གོ་ཆར་འཛིན་པ་མེད་པ་ནི། །ཆོས་རྣམས་ཀུན་གྱི་རྗེས་འབྲང་བ། །བསམ་གྱིས་མི་ཁྱབ་གོ་བགོས་པས། །དེ་ནི་ལེགས་པར་

གོ་བགོས་ཡིན། །གོ་ཆ་བསྟན་པ་མེད་པར་ཡང་། །ཆོས་ནི་ཐམས་ཅད་གང་སྦྱོང་བ། །ཆོས་རྣམས་ཚིག་དང་བྲལ་བས་ན། །སྟོན་པར་ནུས་པ་གང་ཡང་མེད། །གཟུགས་དང་མཚུངས་པར་མི་ལྡན་ཞིང་། །ཚོར་བ་དང་ཡང་མཚུངས་མི་ལྡན། །འདུ་ཤེས་འདུ་བྱེད་རྣམ་ཤེས་དང་། །

Vol. 40 · folio 80b

མཚུངས་ལྡན་འདུས་པ་ཡང་མ་ཡིན། །ནང་དུ་མཚུངས་པར་མི་ལྡན་ཞིང་། །ཕྱི་རོལ་དུ་ཡང་མཚུངས་ལྡན་མིན། །ནང་དང་ཕྱི་རོལ་གཉི་གར་ཡང་། །མཚུངས་ལྡན་འདུས་པ་ཡང་མ་ཡིན། །ཁམས་དང་མཚུངས་པར་མི་ལྡན་ཞིང་། །སྐྱེ་མཆེད་དང་ཡང་མཚུངས་ལྡན་མིན། །ཁམས་

དང་སྐྱེ་མཆེད་དག་དང་ཡང་། །འདུས་པར་གྱུར་པར་ཡོད་མ་ཡིན། །ས་དང་མཚུངས་པར་མི་ལྡན་ཞིང་། །ཆུ་དང་མཚུངས་པར་ལྡན་པ་མིན། །མེ་རླུང་ནམ་མཁའ་རྣམ་ཤེས་དང་། །མཚུངས་ལྡན་འདུས་པ་ཡང་མ་ཡིན། །འདོད་དང་མཚུངས་པར་མི་ལྡན་ཞིང་། །གཟུགས་དང་

མཚུངས་པར་ལྡན་པའང་མིན། །གཟུགས་མེད་པ་ཡི་ཁམས་རྣམས་དང་། །མཚུངས་ལྡན་འདུས་པ་ཡང་མ་ཡིན། །ཐམས་ཅད་དམིགས་སུ་མེད་པས་ན། །མངོན་པར་འདུས་བྱས་རྣམས་དང་ནི། །མངོན་པར་འདུས་བྱས་མེད་པ་དང་། །མཚུངས་ལྡན་འདུས་པ་ཡང་མ་ཡིན། །བསམ་

གྱིས་མི་ཁྱབ་གོ་བགོས་པས། །གནས་པ་མེད་ཅིང་འདུས་པ་མེད། །འཆིང་བ་མེད་ཅིང་གྲོལ་བ་མེད། །མཚུངས་པར་མི་ལྡན་ཡོད་མ་ཡིན། །གོ་ཆ་མཐའ་ནི་དཔག་མེད་པས། །ཉན་ཐོས་དག་གི་ས་དག་དང་། །རང་སངས་རྒྱས་ཀྱི་ས་དང་ཡང་། །མཚུངས་ལྡན་འདུས་པ་ཡང་མ་ཡིན། །

སངས་རྒྱས་ཀྱི་ནི་ས་རྣམས་དང་། །ཆོས་རྣམས་ཐམས་ཅད་ཀུན་དང་ནི། །ཐམས་ཅད་མཚུངས་པར་མི་ལྡན་ཞིང་། །ཐམས་ཅད་འདུས་པར་གྱུར་མ་ཡིན། །ཚིག་གི་ལམ་ནི་སྣ་ཚོགས་ཀྱིས། །གང་ཡང་རེག་པར་མི་འགྱུར་བས། །དཔག་ཏུ་མེད་པའི་གོ་ཆ་འདི། །ངོ་བོ་མེད་ཅིང་བསམ་དཀའ་

ཡིན། །ཆོས་རྣམས་ཐམས་ཅད་བདག་དང་ནི། །མཚུངས་ལྡན་མཚུངས་མིན་ལྡན་མིན་པས། །བསམ་གྱིས་མི་ཁྱབ་གོ་ཆ་ནི། །བགྲང་བ་ཀུན་ལས་འདས་པ་ཡིན། །གོ་ཆ་བླ་ན་མེད་པས་ན། །འཆིང་བ་མེད་ཅིང་གྲོལ་བ་མེད། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་ཤེས་

མཚན་ཉིད་མེད། །དེ་དག་གི་ནི་མཚན་ཉིད་དང་། །མཚུངས་ལྡན་འདུས་པ་ཡང་མ་ཡིན། །ཆོས་རྣམས་ཀུན་གྱི་མཚན་ཉིད་དང་། །མཚུངས་ལྡན་མཚུངས་མིན་ལྡན་པའང་མིན། །མཚན་མ་མེད་པ་དག་དང་ཡང་། །མཚུངས་ལྡན་འདུས་པ་ཡང་མ་ཡིན། །གོ་ཆ་བླ་ན་མེད་པས་ནི། །འཆིང་བ་

Vol. 40 · folio 81a

མེད་ཅིང་གྲོལ་བ་མེད། །ཆོས་རྣམས་དག་ནི་ཐམས་ཅད་ལས། །ཆོས་གཅིག་གྲངས་སུའང་བགྲང་བ་མེད། །ཆོས་རྣམས་ཐམས་ཅད་དག་ལས་ནི། །གོ་ཆ་དམིགས་པར་མི་འགྱུར་བས། །དེ་ཕྱིར་བླ་ན་མེད་འགྱུར་ཞིང་། །བསམ་གྱིས་མི་ཁྱབ་པ་ཞེས་བརྗོད། །གོ་

ཆ་ལ་ནི་གཟུགས་མེད་ཅིང་། །ཚོར་བ་འདུ་ཤེས་ཡོད་མ་ཡིན། །འདུ་བྱེད་མེད་ཅིང་རྣམ་ཤེས་མེད། །ཕུང་པོ་རྣམས་ཀྱིས་བསྡུས་པའང་མིན། །དེ་ལྟའི་དཔའ་བོ་གང་དག་གིས། །གོ་ཆ་ཆེན་པོ་འདི་བགོས་པས། །ལུས་དང་སེམས་ནི་མི་དམིགས་པས། །ཆོས་ནི་ཅུང་ཟད་མཐོང་མི་འགྱུར། །

བསམ་པ་རྣམས་ལས་འདས་པའི་ཕྱིར། །རྣམ་དག་སེམས་ལ་རབ་གནས་ཤིང་། །རྟག་ཏུ་ཞུམ་པ་མེད་པས་ན། །བསམ་གྱིས་མི་ཁྱབ་པ་ཞེས་བརྗོད། །ཤིན་ཏུ་བརྟན་པས་གོ་བགོས་པ། །དེ་ཡི་སེམས་ནི་མི་སྒུལ་ཞིང་། །བསྐལ་པའི་ཚད་ནི་མི་འཛིན་པས། །བསམ་གྱིས་མི་ཁྱབ་པ་ཞེས་

བརྗོད། །གོ་ཆ་ལ་ནི་ཚད་མེད་ཅིང་། །ཆོས་དང་ཆོས་མིན་མི་ལེན་པས། །དུས་ཀྱི་ཚད་ནི་མེད་པའི་ཕྱིར། །གཞལ་དུ་མེད་པ་ཞེས་བྱའོ། །སེམས་ཅན་འདུ་ཤེས་མི་སྐྱེད་ཅིང་། །བདག་གི་འདུ་ཤེས་ཡོད་མ་ཡིན། །འདུ་ཤེས་འདི་ནི་ཤེས་པའི་ཕྱིར། །འདུ་ཤེས་ཐམས་ཅད་སྐྱེ་མི་འགྱུར། །

ཆོས་རྣམས་ཐམས་ཅད་ཤེས་ཀྱང་ནི། །ཆོས་དེའི་འདུ་ཤེས་སྐྱེ་མི་འགྱུར། །དེ་ལྟར་གོ་ཆ་གང་བགོས་པས། །བསམ་གྱིས་མི་ཁྱབ་པ་ཞེས་བརྗོད། །གཞན་ཡང་བློ་གྲོས་མཐའ་ཡས་གོ་ཆ་ཆེན་པོ་འདི་ནི་ཆོས་གྱ་ནོམ་པའི་བཀོད་པའི་ཡོ་བྱད་ཅེས་ཀྱང་བྱ། །མཆོག་ཏུ་གྱུར་པ་ཞེས་ཀྱང་བྱ་

སྟེ། རྣམ་པར་གཞིག་པར་མི་ནུས་པའི་ཕྱིར་རོ། །ཆོས་ཐམས་ཅད་དབྱེར་མེད་པ་ཞེས་བྱ་སྟེ། ཆོས་ཅུང་ཟད་ཙམ་ལ་ཡང་བྱེ་བྲག་ཏུ་འབྱེད་པ་མེད་པའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གོ་ཆ་འདི་ལྟ་བུ་བགོས་པ་དེ་ནི་ཤེས་རབ་ཆེན་པོའི་སྟོབས་འཛིན་ཅིང་

ཐེག་པ་ཆེན་པོ་དང་ཐེག་པ་མཆོག་དང་མཚུངས་པ་མེད་པའི་ཐེག་པ་དང་། ཡོངས་སུ་སྡུད་པ་ཆེན་པོའི་ཐེག་པ་དང་དཔག་ཏུ་མེད་པ་སྡུད་པའི་ཐེག་པ་ལ་ཞོན་ནས་སེམས་ཅན་ཐམས་ཅད་ཐེག་པ་འདིས་འདེགས་པར་བྱེད་ཀྱང་ཐེག་པ་འདི་ལ་མི་ཤོང་བ་གང་ཡང་མེད་ལ། ཐེག་པ་དེ་ཡང་

Vol. 40 · folio 81b

འཕེལ་བ་མེད་ཅིང་འགྲིབ་པ་མེད་པར་སེམས་ཅན་རྣམས་བདེ་བ་ལ་དགོད་པར་བྱེད་ཅིང་སེམས་ཅན་རྣམས་བདེ་བར་ངེས་པར་བྱུང་བར་བྱེད་དོ། །སེམས་ཅན་གང་ངེས་པར་བདེ་བར་བྱེད་པའི་ཐེག་པ་འདི་ལ་ཞོན་པ་གང་ཡིན་པ་དེ་དག་ལ་ནི་ལུས་དང་སེམས་ངལ་ཞིང་ཉོན་མོངས་པར་གྱུར་པ་ཡོད་པར་མི་འགྱུར་

རོ། །བློ་གྲོས་མཐའ་ཡས་ཐེག་པ་འདི་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་དང་། ཉན་ཐོས་དང་། རང་སངས་རྒྱས་དང་། ཐེག་པ་གཞན་གྱིས་ངེས་པར་འབྱུང་བར་བྱེད་པ་ཐམས་ཅད་ཟིལ་གྱིས་གནོན་པར་བྱེད་དོ། །ཐེག་པ་འདི་ནི་འགྲོ་བ་མེད་པ་འོང་བ་མེད་པ་

གནས་པ་མེད་པ་བལྟར་མེད་པ་ཤེས་པ་མེད་པ་སྔོན་གྱི་མཐའ་མི་དམིགས་པ་ཕྱི་མའི་མཐའ་མི་དམིགས་པ་དབུས་ཀྱི་མཐའ་མི་དམིགས་པ། དུས་གསུམ་མཉམ་པ་ཉིད་དུ་གྱུར་ཅིང་། ནམ་མཁའ་དང་མཚུངས་པ། ཀུན་ནས་ཉོན་མོངས་པའི་རྡུལ་མི་གོས་པ། བལྟས་པ་མེད་པ། ཐོགས་པ་མེད་པ་མངོན་པར་ཞེན་པ་མེད་པ་

ཡིན་པས། ཐེག་པ་འདིས་ངེས་པར་འབྱུང་བར་བྱའོ། །ཐེག་པ་འདི་ནི་ཚད་མེད་པ་ཡིན་ཏེ་གཞལ་དུ་མེད་པའི་ཕྱིར་རོ། །རང་བཞིན་གྱིས་ཐོགས་པའི་མཚན་མ་མེད་པ་ཡང་ཡིན་ཏེ། མཚན་མ་ལ་མི་གནས་པའི་ཕྱིར་རོ། །ཐེག་པ་མཆོག་འདི་ལ་ཞོན་པ་གང་ཡིན་པ་དེ་དག་ནི་སེམས་ལ་ཞུམ་པ་མེད་

པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་ཞིང་འཇུག་པར་འགྱུར་རོ། །བློ་གྲོས་མཐའ་ཡས་འདི་ལྟ་སྟེ། དཔེར་ན་མར་མེ་དང་ཉི་མ་དང་ཟླ་བའི་དཀྱིལ་འཁོར་ནི་སེམས་ཅན་རྣམས་ཀྱི་སྣང་བ་ཆེན་པོར་བྱེད་དོ། །དེ་བཞིན་དུ་ཐེག་པ་ཆེན་པོ་འདི་ཡང་འོད་ཟེར་གྱིས་སྟོང་གསུམ་གྱི་

སྟོང་ཆེན་པོའི་འཇིག་རྟེན་གྱི་ཁམས་གསལ་བར་བྱེད་ཅིང་གང་གིས་ཀྱང་ཟིལ་གྱིས་གནོན་པ་འམ་བར་ཆད་བྱེད་མི་ནུས་པས་ཡོན་ཏན་ཆེན་པོའི་རྒྱ་མཚོ་དཔག་ཏུ་མེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་འགྱུར་རོ། །བློ་གྲོས་མཐའ་ཡས་ཐེག་པ་འདི་ནི་མུན་གནག་སྤོང་བར་བྱེད་ཅིང་འཇིག་

རྟེན་གྱི་ནད་ཐམས་ཅད་རབ་ཏུ་སེལ་བ་དང་། འཇིག་རྟེན་པའི་ཆོས་ཐམས་ཅད་ལས་ཡང་དག་པར་འདས་ཤིང་སེམས་ཅན་ཆེན་པོ་ཡོངས་སུ་སྡུད་པ་ཡིན་པས་དམན་པ་རྣམས་ཀྱིས་བཞོན་པར་བྱ་བ་མ་ཡིན་ཏེ། གོ་ཆ་ཆེན་པོ་བགོས་པ་ནི་མ་གཏོགས་སོ། །ངས་ཇི་སྐད་དུ་འདི་ནི་བསྐལ་པ་ཚད་མེད་པ་

Vol. 40 · folio 82a

ནས་སེམས་ཅན་རྣམས་ཡོངས་སུ་བསྐྱབས་པ། སངས་རྒྱས་མང་པོ་ལ་མཆོད་ཅིང་རིམ་གྲོ་བྱས་པ། དགེ་བའི་རྩ་བ་རྣམས་བསྐྱེད་པ། ཚོགས་ཡོངས་སུ་དག་པ་རྣམས་ཀྱིས་བཞོན་པར་བྱ་བ་ཡིན་གྱི། ཉན་ཐོས་དང་། རང་སངས་རྒྱས་དང་དེ་ལས་གཞན་པ་འཇིག་རྟེན་གྱིས་

བཅིངས་པ་འཇིག་རྟེན་དང་མཚུངས་པར་ལྡན་པ་དང་། མངོན་པའི་ང་རྒྱལ་ཅན་དང་། མུ་སྟེགས་ཅན་ལ་མངོན་པར་ཡིད་ཆེས་པར་བྱེད་པ་དམན་པ་ཐམས་ཅད་ཐེག་པ་འདིའི་མིང་ཐོས་པར་ཡང་མི་འདོད་ན་ཐེག་པ་འདི་ལ་བཞོན་པར་བྱ་བ་ལྟ་སྨོས་ཀྱང་ཅི་དགོས་ཞེས་གསུངས་པ་ལྟ་བུའོ། །གལ་ཏེ་སེམས་ཅན་

གང་ལ་ལ་ཞིག་བསམ་གྱིས་མི་ཁྱབ་པའི་སྤྱོད་ཡུལ་ལ་རྣམ་པར་རྩེན་ཅིང་ཐེག་པ་འདི་ལ་ཞོན་པར་བྱེད་ན་སྨོན་ལམ་ཁྱད་པར་དུ་འཕགས་པ་ཇི་ལྟ་བ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་འགྱུར་རོ། །བློ་གྲོས་མཐའ་ཡས་ཐེག་པ་འདི་ནི་མཐའ་མེད་དེ། སྔོན་དང་།

དབུས་དང་། ཐ་མའི་མཐའ་རྟོགས་པར་མི་ནུས་སོ། །ཐེག་པ་འདི་ནི་མཐའ་ཡོངས་སུ་ཆད་པ་ཡིན་ཏེ། མཐའ་མི་དམིགས་པས་མཐའ་དཔག་ཏུ་མེད་དོ། །ཐེག་པ་འདིའི་མཐའ་ནི་ཚད་མེད་པའི་མཐའ་ཡིན་ནོ། །བློ་གྲོས་མཐའ་ཡས་ཐེག་པ་འདི་ལ་ནི་མཐའ་དཔག་ཏུ་མེད་པས་དབུས་ཀྱི་

མཐའ་ཡང་མེད་ལ་སྤང་བར་བྱ་བའི་མཐའ་ཅུང་ཟད་ཙམ་ཡང་ཡོད་པ་མ་ཡིན་ནོ། །དེ་ལ་མཐའ་སྤངས་པ་ཞེས་བྱ་བ་ནི་མཐའ་ཞེས་བྱ་བ་ཅུང་ཟད་ཀྱང་མེད་པས་མཐའ་སྤངས་པ་ཞེས་བཤད་དོ། །རྣམ་པར་མི་རྟོག་པའི་མཐའ་ལ་མཐའ་སྤངས་པ་ཞེས་བཤད་དེ། དེ་ནི་ཐེག་པ་འདིའི་མཐའ་

སྤངས་པ་ཞེས་བྱའོ། །མཐའ་ཡོད་པ་མ་ཡིན་པས་དབུས་ཀྱི་མཐའ་ཞེས་བྱའོ། །མཐའ་ཡོད་པ་མ་ཡིན་པས་མཐའི་མཐའ་ཞེས་བྱའོ། །མཐའ་ཡོད་པ་མ་ཡིན་པས་མཐའ་ཞེས་བཤད་དོ། །མཐའ་དེ་ལ་ནི་མཐའ་དམིགས་སུ་མེད་དོ། །དམིགས་སུ་མེད་པའི་ཕྱིར་མཐའི་མཐའ་དང་།

དབུས་ཀྱི་མཐའ་དང་། མཐའ་མེད་པས་རྒྱུན་མི་ཆད་པར་མཐའི་སྒོར་འཇུག་པར་འགྱུར་རོ། །མཐའི་སྒོར་ཞུགས་པའི་ཕྱིར་ཐེག་པ་འདི་དེ་ལས་ཡང་དག་པར་འདས་པ་ཡིན་ཡང་ཡང་དག་པར་འདས་པ་ཉིད་དམིགས་སུ་མེད་དོ། །བློ་གྲོས་མཐའ་ཡས་མཐའ་ཉིད་གང་ཞེ་ན། འདི་ལྟ་སྟེ།

Vol. 40 · folio 82b

ཆད་པ་དང་། རྟག་པའི་མཐའ་གང་ཡིན་པའོ། །ཚིག་གི་རྗེས་སུ་ཞུགས་པའི་ཕྱིར་མཐའ་ཉིད་མཐའ་མ་ཡིན་ནོ། །དེས་རྟག་པའི་མཐའ་སྤངས་ན་མཐའི་མཐའ་ཡང་ཡོད་པར་མི་འགྱུར་ཏེ། མཐའ་དེའི་མཚན་ཉིད་མཐའ་མེད་པའི་ཕྱིར་རོ། །དེ་ལ་མཐའ་ཞེས་བྱ་བ་ནི་རྣམ་པར་རྟོག་པ་མེད་

ཅིང་རྣམ་པར་རྟོག་པ་ཆད་པའི་ཕྱིར་མཐའ་ལས་ཡང་དག་པར་འདས་ཤིང་ཆད་པ་དང་། རྟག་པར་རབ་ཏུ་སྤངས་པ་ཡིན་ནོ། །བློ་གྲོས་མཐའ་ཡས་གང་འཇིག་ཚོགས་ལ་ལྟ་བ་དང་བཅས་པ་དེ་ནི་མཐའི་སྒོ་ལ་གནས་པར་བྱེད་ཀྱི། གང་འཇིག་ཚོགས་ལ་བལྟ་བ་མེད་པ་དེ་དག་ནི་མཐའི་སྒོ་ལ་

མངོན་པར་ཞེན་པར་མི་བྱེད་དོ། །མངོན་པར་ཞེན་པ་མེད་པའི་ཕྱིར་ཆད་པ་དང་། རྟག་པའི་མཐའ་ལས་ཡང་དག་པར་འདས་པ་ཡིན་ནོ། །བློ་གྲོས་མཐའ་ཡས་ཆད་པ་དང་། རྟག་པའི་མཐའ་དེ་དག་ནི་ཡང་དག་པར་ཡོད་པ་མ་ཡིན་གྱི་སླུ་བའི་ཚིག་སྲིད་པ་གསུམ་པོ་དག་ན་མཐའ་རྣམ་པ་

གཉིས་སུ་རྣམ་པར་རྟོག་པར་བྱེད་པ་ཡིན་པས་མཐའ་གཉིས་པོ་དེ་དག་གིས་ཡོངས་སུ་བསྡུས་ཤིང་མཚུངས་པར་ལྡན་པར་མ་གྱུར་ན་ཡང་དག་པར་འདས་ཤིང་འཇིག་ཚོགས་ལ་ལྟ་བ་སྤང་བའི་ཕྱིར་མཐའ་གཉིས་ཀྱི་སྒོ་ལ་མངོན་པར་ཞེན་པར་མི་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་

དཔའ་སེམས་དཔའ་ཆེན་པོ་གང་འཇིག་ཚོགས་ལ་ལྟ་བ་ད་དུང་མ་སྤངས་པ་གང་ཡིན་པ་དེ་དག་ནི་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་པ་ཞེས་མི་བྱ་སྟེ། མཐའི་སྒོ་དེ་དག་ལ་མངོན་པར་ཞེན་པར་གྱུར་པས་གལ་ཏེ་མཐའ་སྤོང་བར་འདོད་པར་གྱུར་ན་ཡང་མཐའ་སྤོང་བའི་འདུ་ཤེས་སྐྱེད་པར་བྱེད་

པས་སྔོན་དང་ཕྱི་མའི་མཐའ་ལ་རྣམ་པར་རྟོག་པར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཇིག་ཚོགས་ལ་ལྟ་བ་སྤངས་པ་གང་ཡིན་པ་དེ་དག་ནི་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་བཞོན་པ་ཞེས་བྱ་སྟེ། མཐའི་སྒོ་དེ་དག་ལ་མངོན་པར་ཞེན་པ་མེད་པས་མཐའ་

གཉིས་པོ་དག་ལས་ཡང་དག་པར་འདས་ནས་རབ་ཏུ་བདེ་བའི་ཐེག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་བློ་གྲོས་ཆེན་པོའི་སྟོབས་ཀྱིས་མཐའི་ཆོས་ལ་གནས་པ་

Vol. 40 · folio 83a

ཐམས་ཅད་མི་སྤོང་མི་གཞིག་པའི་ཐབས་ལ་མཁས་པས་ཞི་གནས་དང་། ལྷག་མཐོང་ཡོངས་སུ་བསྡུས་ནས་མཚན་མ་མེད་པ་མངོན་པར་བསྒྲུབས་ཏེ། མཚན་མ་མེད་པ་མངོན་སུམ་དུ་གྱུར་ན་སངས་རྒྱས་རྣམས་ཀྱིས་ཆོས་ཀྱི་སྣང་བ་སྦྱིན་པར་འགྱུར་ལ། ཆོས་ཀྱི་སྣང་བ་ཐོབ་པའི་

དབང་གིས་མཐའ་ཐམས་ཅད་ཡོངས་སུ་སྤོང་ཞིང་མཐའ་སྤོང་བ་དེ་དག་ལ་ཡང་མངོན་པར་ཞེན་པ་མེད་པས་མཐའ་ཅུང་ཟད་ཙམ་ལ་ཡང་མཐའི་སྒོ་དེ་དག་དང་མཚུངས་པར་ལྡན་པ་འམ། མཚུངས་པར་མི་ལྡན་པ་འམ། ཡིད་ལ་བྱེད་པ་འམ། ཡིད་ལ་མི་བྱེད་པ་ཡང་མེད་པར་ཆོས་ཐམས་ཅད་ལ་

ཐབས་མཁས་པས་ཞི་གནས་དང་། ལྷག་མཐོང་དེ་ལ་རབ་ཏུ་གནས་ཤིང་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་འཐོབ་པར་འགྱུར་རོ། །ཆོས་ཀྱི་སྣང་བ་ཐོབ་པའི་ཕྱིར་ནི་མུན་ནག་དང་། སྤུ་ཟིང་ཞེས་བྱེད་པའི་འཇིགས་པ་དག་ཡོངས་སུ་སྤངས་ནས་ཆོས་ཀྱི་རྒྱལ་མཚན་ཆེན་པོ་བསྒྲེང་བ་

དང་། ཚངས་པའི་སྒྲ་ཆེན་པོ་འབྱིན་པ་དང་། སེང་གེའི་སྒྲ་ཆེན་པོ་བསྒྲགས་ནས་སེམས་ཅན་རྣམས་ལ་འདི་སྐད་དུ་ཀྱེ་ཁྱེད་རྣམས་མྱུར་དུ་འདིར་ཤོག་ལ་ཐེག་པ་ཆེན་པོ་རབ་ཏུ་བདེ་བའི་ཐེག་པ་དང་། ཁ་ལོ་སྒྱུར་བ་ཆེན་པོའི་ཐེག་པ་དང་། རབ་ཏུ་གཞོལ་བ་ཆེན་པོའི་ཐེག་པ་འདིས་བླ་ན་མེད་

པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ནས་སེམས་ཅན་རྣམས་ལ་ཆོས་ཀྱི་སྣང་བ་རབ་ཏུ་སྟོན་ལ། ཆོས་ཀྱི་སྣང་བའི་དབང་གིས་སེམས་ཅན་རྣམས་གོ་ཆ་ཆེན་པོ་བགོས་ནས་ཐེག་པ་ཆེན་པོ་བཞོན་པ་ལ་དགོད་པར་བྱའོ། །ཞེས་སྒྲོགས་པར་བྱེད་དོ། །བློ་གྲོས་མཐའ་

ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཐེག་པ་ཆེན་པོ་འདི་དང་། གོ་ཆ་ཆེན་པོ་འདི་ལ་སེར་སྣ་མི་སྐྱེད་པར་སེམས་ཅན་རྣམས་ལ་བྱང་ཆུབ་ཏུ་སེམས་བསྐྱེད་དེ། གོ་ཆ་འདི་བགོས་ནས་ཐེག་པ་ཆེན་པོ་འདི་ལ་ཞོན་པར་གྱུར་ཅིག་ཅེས་སྨོན་ལམ་གདབ་པར་བྱའོ། །

ཐེག་པ་ཆེན་པོ་འདི་དང་གོ་ཆ་ཆེན་པོ་འདི་ལ་སེར་སྣ་མི་བྱ་བར་སེམས་ཅན་རྣམས་ལ་བརྒྱུད་ཅིང་སྤེལ་བར་བྱའོ། །གཞན་ཡང་སེམས་ཅན་རྣམས་གོ་ཆ་འདི་བགོས་ནས་ཐེག་པ་ཆེན་པོ་འདི་ལ་ཞོན་ཏེ་ངེས་པར་འབྱུང་བར་གྱུར་ཅིག་ཅེས་སྨོན་ལམ་གདབ་པར་བྱའོ། །བྱང་ཆུབ་སེམས་

Vol. 40 · folio 83b

དཔའ་སེམས་དཔའ་ཆེན་པོ་རྣམས་སྤྱོད་པ་འདི་ལྟ་བུ་ལ་གནས་པའི་ཚེ་སངས་རྒྱས་ཀྱི་ཞིང་ཡོངས་སུ་དག་པ་ཡང་ཡོངས་སུ་སྡུད་པར་བྱེད་ལ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་ཡོན་ཏན་ཡོངས་སུ་རྫོགས་པར་ཡང་སྡུད་པར་འགྱུར་བས་ཡོན་ཏན་གྱི་རྒྱ་

མཚོ་ཆེན་པོ་དཔག་ཏུ་མེད་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། །བློ་གྲོས་མཐའ་ཡས་ཐེག་པ་ཆེན་པོ་འདི་ནི་ཆོས་ཀྱི་དབྱིངས་དང་མཉམ་པས་ཚུ་རོལ་གྱི་འགྲམ་དང་། ཕ་རོལ་གྱི་འགྲམ་དམིགས་སུ་མེད་མོད་ཀྱི། འོན་ཀྱང་རང་གི་ངང་གིས་

སེམས་ཅན་ཐམས་ཅད་བཏེག་སྟེ། འདི་ནས་ཆོས་ཀྱི་དབྱིངས་སུ་ཕྱིན་པར་བྱེད་པས་གནས་པ་མེད་པའི་རྗེས་སུ་འཐུན་པ་དང་། ཆོས་ཀྱི་དབྱིངས་ཀྱི་རྗེས་སུ་འཐུན་པ་དང་། གོ་ཆའི་རྗེས་སུ་འཐུན་པར་འགྱུར་རོ། །གང་གིས་ཐེག་པ་ཆེན་པོའི་ཆོས་ཀྱི་དབྱིངས་དང་མཉམ་པ་འདི་ལ་ནན་ཏན་

གྱིས་སྒྲུབ་པར་བྱེད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་རབ་ཏུ་ཞུགས་པ་ཡིན་ནོ། །བློ་གྲོས་མཐའ་ཡས་འདི་ལྟ་སྟེ། དཔེར་ན་ཆོས་ཀྱི་དབྱིངས་ནི་རྡུལ་གྱིས་གོས་པ་མེད་པས་གང་གིས་ཀྱང་རྣམ་པར་གཞིག་པའམ་གོས་པར་བྱར་མེད་དོ། །ཐེག་པ་ཆེན་

པོ་འདི་ཡང་དེ་བཞིན་དུ་རྣམ་པར་འཇིག་པ་མེད་ཅིང་གོས་པ་མེད་དེ། རྣམ་པར་འཇིག་པ་དང་། གོས་པ་མེད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བར་འགྱུར་ཏེ། དེའི་ཕྱིར་ཐེག་པ་འདི་ནི་ཐེག་པ་ཆེན་པོ་ཞེས་བྱའོ། །ཐེག་པ་འདི་ནི་ཐོགས་པ་མེད་པས་ལྷ་དང་། མི་དང་

ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་གང་གིས་ཀྱང་བསྐོར་མི་ནུས་ཤིང་མངོན་པར་ཞེན་པ་མེད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བ་ཡིན་པས་དེའི་ཕྱིར་ཐེག་པ་འདི་ནི་ཐེག་པ་ཆེན་པོ་ཞེས་བྱའོ། །དེ་ལ་ཐེག་པ་ཆེན་པོ་ཞེས་བྱ་བ་ནི་བཀོད་པ་ཆེན་པོ་གང་ཡིན་པ་སྟེ། བཀོད་པ་

ཐམས་ཅད་གང་ཡང་ཐེག་པ་ཆེན་པོ་འདིར་མི་འཇུག་པ་མེད་པས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐེག་པ་འདི་ལ་ཡང་འདུས་བྱས་ཀྱི་བཀོད་པ་ཞེས་བགྱི་བ་ལྟ་ཅི་མཆིས་ལགས་སམ། དེ་ནས་

Vol. 40 · folio 84a

བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་དེ་དེ་བཞིན་ནོ། །དེ་དེ་བཞིན་ཏེ། ང་ནི་འཇིག་རྟེན་པའི་རྗེས་སུ་ཐེག་པ་འདིར་ཡང་འདུས་བྱས་ཀྱི་བཀོད་པ་ཐམས་ཅད་རབ་ཏུ་སྟོན་པར་མཛད་དོ། །

བློ་གྲོས་མཐའ་ཡས་འཁོར་ལོས་སྒྱུར་བའི་རྒྱལ་པོ་འམ། ལྷའི་དབང་པོ་བརྒྱ་བྱིན་ནམ། ཚངས་པའི་རྒྱལ་པོ་ཡང་རུང་སྟེ། དེ་དག་ཐམས་ཅད་ནི་ཐེག་པ་ཆེན་པོ་འདི་ལས་བྱུང་ངོ་། །འབྱུང་ངོ་། །འབྱུང་བར་འགྱུར་ཏེ། འཁོར་ལོས་སྒྱུར་བ་དང་། བརྒྱ་བྱིན་དང་། ཚངས་པའི་འབྱོར་པའི་ས་ལ་

གནས་པར་བྱེད་ཀྱང་འཁོར་བའི་ཉོན་མོངས་པའི་སྐྱོན་རྣམས་ཀྱིས་གོས་པར་མི་འགྱུར་བས་འདོད་པ་རྣམས་ཀྱི་ཉེས་དམིགས་རེ་རེ་ནས་འཇལ་བར་བྱེད་ཅིང་གཞལ་ནས་ཀྱང་ཡོངས་སུ་སྐྱོ་བར་གྱུར་པས་ངེས་པར་འབྱུང་བའི་ལམ་རབ་ཏུ་རྟོགས་པར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་

དཔའ་སེམས་དཔའ་ཆེན་པོ་གང་ཐེག་པ་འདི་ལ་ཞོན་པར་བྱེད་པ་གང་ཡིན་པ་དེ་དག་ནི་འཁོར་བ་ལེན་པར་བྱེད་ཀྱང་གནས་ཐམས་ཅད་དུ་སྐྱོན་གྱིས་གོས་པར་མི་འགྱུར་ཞིང་ཉེས་དམིགས་ཀྱང་མཐོང་ལ་ངེས་པར་འབྱུང་བ་ཡང་རབ་ཏུ་ཤེས་པས་ངས་འདིར་མ་བསྟན་པའི་ཆོས་རྣམས་དང་། བཀོད་

པ་གང་ཡིན་པ་དེ་དག་ཀྱང་ཐེག་པ་འདིའི་མཚན་ཉིད་ཀྱི་དབང་གིས་ཆོས་དེ་དག་དང་། བཀོད་པ་དེ་དག་ཀྱང་རབ་ཏུ་རྟོགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཐེག་

ཆེན་བླ་ན་མེད་པའི་ཐེག །ཐེག་པ་འདི་ནི་བསམ་མི་ཁྱབ། །གང་ཞིག་ཐེག་པ་འདི་ཞོན་པ། །དེ་དག་ངེས་པར་འབྱུང་བར་འགྱུར། །བརྟེན་པའི་གནས་ཆེན་ཡིན་པས་ན། །ཐེག་པ་འདི་ནི་བསམ་མི་ཁྱབ། །མཐའ་ནི་དཔག་མེད་ཚད་མེད་པས། །དེ་ཕྱིར་ཐེག་ཆེན་ཞེས་བྱའོ། །སེམས་

ཅན་དག་ནི་ཐམས་ཅད་ཀྱིས། །ཐེག་པ་འདི་ལ་གཞོལ་བྱེད་ཀྱང་། །ཐེག་པ་འདི་ལ་འགྲིབ་པ་མེད། །འཕེལ་བར་ཡང་ནི་མི་འགྱུར་རོ། །སེམས་ཅན་དག་ནི་ཐམས་ཅད་ལས། །གང་ཞིག་ཐེག་པ་འདི་ཞོན་པ། །བདེ་བར་གཞོལ་བ་འགྱུར་བས་ན། །དེ་ན་སྡུག་བསྔལ་ཅི་ཡང་མེད། །

Vol. 40 · folio 84b

གལ་ཏེ་བྱང་ཆུབ་སེམས་དཔའ་རྣམས། །ཐེག་པ་འདི་ལ་གཞོལ་བྱེད་ན། །དྲང་པོར་འགྲོ་ཞིང་གཞན་སྤྱོད་མེད། །ལུས་དང་སེམས་ནི་ངལ་མི་འགྱུར། །འཇིག་རྟེན་རྣམས་ནི་གསལ་བྱེད་པས། །ལྷ་མི་ལྷ་མ་ཡིན་རྣམས་ཀྱི། །ཐེག་ཆེན་བླ་མེད་འདི་ལ་ནི། །སེམས་བསྐྱེད་རབ་

ཏུ་གཞོལ་བར་བྱ། །རང་སངས་རྒྱས་དང་ཉན་ཐོས་ཀྱི། །ཐེག་པ་ཟིལ་གནོན་གང་འདོད་པ། །ཐེག་ཆེན་བླ་མེད་འདི་ལ་ནི། །སེམས་བསྐྱེད་རབ་ཏུ་གཞོལ་བར་བྱ། །འགྲོ་བ་མེད་ཅིང་འོང་བ་མེད། །གནས་པ་མེད་ཅིང་སྔོན་མཐའ་མེད། །ཕྱི་དང་དབུས་ཀྱི་མཐའ་ཡང་མེད། །ཐོབ་

མེད་མཐོང་བ་མེད་པས་ན། །དུས་གསུམ་དག་ནི་མཉམ་པ་ཉིད། །ཇི་ལྟར་ནམ་མཁའ་དག་པ་ལྟར། །ཐེག་པ་འདི་ཡང་དེ་བཞིན་ཏེ། །ཉོན་མོངས་དག་ནི་རབ་ཏུ་སྤངས། །ཐེག་པ་འདི་ནི་ལྟོས་པ་མེད། །སྒྲིབ་མེད་ཐོགས་པ་མེད་པས་ན། །ཐམས་ཅད་ཡོངས་སུ་སྐྱོབ་པར་ནུས། །

གཞོལ་བར་བྱེད་ཀྱང་མངོན་ཞེན་མེད། །ཐེག་པ་འདི་ནི་ཚད་མེད་པས། །མཚན་མ་ཐམས་ཅད་ཡོད་མ་ཡིན། །རང་བཞིན་དག་ནི་མི་དམིགས་པར། །འཇིགས་མེད་བསམ་གྱིས་མི་ཁྱབ་ཡིན། །གང་ཞིག་ཐེག་པ་འདི་ཞོན་ནས། །འཇིགས་པ་མེད་པ་ཐོབ་པས་ནི། །དེ་ཡིས་

སངས་རྒྱས་ཆོས་དག་ལ། །སྒྲིབ་མེད་ཐོགས་པ་མེད་པར་འགྱུར། །ཐེག་པ་འདི་ལ་གང་ཞོན་པ། །འཇིག་རྟེན་ཀུན་ནི་སྣང་བྱེད་པར། །ཉི་མའི་འོད་ཟེར་བརྒྱ་སྟོང་ལྟར། །ཐམས་ཅད་དུ་ནི་གསལ་བར་བྱེད། །ཐེག་པ་འདི་ནི་མི་འཇིགས་ཤིང་། །ཟིལ་གྱིས་གནོན་པ་མེད་པས་

ན། །ཡོན་ཏན་ཚོགས་ནི་དཔག་མེད་ལྡན། །བླ་མེད་འདི་ལ་གཞོལ་བར་བྱ། །ཐེག་པ་འདི་ནི་འཇིག་རྟེན་འདས། །ཁམས་དང་ལས་ནི་ངེས་པར་འབྱུང་། །མུན་ནག་དག་ནི་རབ་ཏུ་སྤངས། །ཟག་པ་མེད་ལ་གཞོལ་བར་བྱེད། །ཐེག་འདི་བྱང་ཆུབ་སེམས་དཔའ་རྣམས། །འབའ་ཞིག་

ཡོངས་སུ་འཛིན་པས་ན། །དེ་ལས་གཞན་པའི་སེམས་ཅན་རྣམས། །དེར་ནི་ཤོང་བར་མི་འགྱུར་རོ། །བློ་དང་ལྡན་པ་གང་ཞིག་གིས། །བསྐལ་པ་སྟོང་ཕྲག་ཚད་མེད་དུ། །ཐབས་མཁས་ནན་ཏན་སྒྲུབ་བྱེད་པ། །དེས་གདོད་ཐེག་པ་འདི་བཞོན་འགྱུར། །ཉན་ཐོས་ཀྱི་ནི་ཚོགས་རྣམས་དང་། །

Vol. 40 · folio 85a

རང་རྒྱལ་དག་གི་ཚོགས་དག་དང་། །མུ་སྟེགས་དག་ནི་ཐམས་ཅད་ཀྱིས། །ཐེག་པ་འདི་ལ་གཞོལ་མི་ནུས། །གལ་ཏེ་སེམས་ཅན་གང་ཞིག་གིས། །བསམ་གྱིས་མི་ཁྱབ་ཆོས་འདི་ལ། །ཐབས་མཁས་རྣམ་པར་གང་རྩེན་པ། །ཐེག་པ་འདི་ལ་གནས་པར་འགྱུར། །

མོས་པ་དག་ནི་ཇི་ལྟ་བཞིན། །ཁྱབ་པའི་སྨོན་ལམ་རྣམ་གཞག་ནས། །ཡང་དག་ལམ་ལ་རབ་གནས་ཤིང་། །བླ་མེད་འདི་ལ་གཞོལ་བར་བྱ། །ཐེག་པ་འདི་ནི་མཐའ་མེད་པས། །དབུས་ཀྱི་མཐའ་ཡང་ཡོད་མ་ཡིན། །མཐའ་ཡི་མཐའ་དང་དབུས་ཀྱི་མཐའ། །ཐམས་ཅད་

དམིགས་པར་མི་འགྱུར་རོ། །མཐའ་ནི་དམིགས་སུ་མེད་པས་ན། །ཐེག་པ་ཆེ་ལ་མཐའ་ཡོད་མིན། །མཐའ་ནི་ཐམས་ཅད་སྤངས་པའི་ཕྱིར། །བདེ་བར་ཡང་དག་གཞོལ་བར་བྱ། །ཐེག་མཐའ་དག་ནི་དཔག་མེད་པས། །དཔག་མེད་གང་ཡིན་ཐེག་མཐའ་ཡིན། །ཐེག་འདི་མཐའ་ནི་

ཚད་མེད་པས། །ཚད་མེད་གང་ཡིན་ཐེག་མཐའ་ཡིན། །ཐེག་འདི་མཐའ་སྤངས་མེད་པས་ན། །མཐའ་མེད་གང་ཡིན་སྤོང་མཐའ་ཡིན། །མཐའ་ནི་གང་ཞིག་མི་རྟོག་ན། །སྤོང་བ་ཡང་ནི་དམིགས་མི་འགྱུར། །ཐེག་པའི་མཐའ་ནི་དཔག་མེད་པས། །དབུས་ཀྱི་མཐའ་ཡང་ཡོད་མ་ཡིན། །

མཐའ་མེད་མཐའ་ནི་མེད་པས་ན། །མཐའ་ཡི་ངོ་བོ་ཅི་ཡང་མེད། །མཐའ་དང་མཐའ་མེད་མཚན་ཉིད་ནི། །མཐའ་མིན་མཐའ་ཡི་མཚན་ཉིད་མིན། །མཐའ་རྣམས་དེ་དག་ལ་ཡང་ནི། །མཐའ་ཡི་མཚན་ཉིད་ཅི་ཡང་མེད། །མཐའ་མིན་ལ་ནི་མཐའ་སྒོར་བཤད། །ཐེག་པ་འདི་ནི་ཡང་དག་འདས། །

དེ་ཡི་ཚད་ལས་འདས་པས་ན། །མཚུངས་པར་ལྡན་པར་དམིགས་སུ་མེད། །ངས་ནི་རྟག་དང་ཆད་པའི་མཐའ། །མཐའ་རྣམས་དེ་དག་ཐམས་ཅད་ནི། །མཐའ་མིན་པར་ཡང་རབ་ཏུ་བསྟན། །མཐའ་ནི་ཐམས་ཅད་མཐའ་མེད་པས། །མཐའ་ཡི་མཚན་ཉིད་ཡོད་མ་ཡིན། །རང་བཞིན་ངོ་བོ་

ཐམས་ཅད་ནི། །དེ་ན་རྟོག་པ་ཅི་ཡང་མེད། །མཐའ་རྣམས་དེ་དག་ཐམས་ཅད་ལ། །རྣམ་པར་རྟོག་པ་གང་སྤངས་པ། །མཐའ་ཡོད་དང་ནི་མཐའ་མེད་རྣམས། །ཐམས་ཅད་རབ་ཏུ་སྤོང་བར་འགྱུར། །གང་ཞིག་འཇིག་རྟེན་ལྟ་ལྡན་པ། །དེས་ནི་མཐའ་སྒོ་རབ་སྟོན་ཅིང་། །མཐའ་རྣམས་ལ་

Vol. 40 · folio 85b

ནི་རབ་ཞེན་པས། །སྐྱབས་མེད་པར་ནི་གྱུར་པ་ཡིན། །གང་ཞིག་འཇིག་ཚོགས་ལྟ་མིན་ལྡན། །མཐའ་སྒོ་རྣམས་ལ་མ་ཆགས་པ། །མཐའ་རྣམས་ཐམས་ཅད་མི་འཛིན་པས། །སྣང་བ་དག་ནི་བྱེད་པར་འགྱུར། །ཐམས་ཅད་མཐའ་ནི་མཐའ་མིན་པས། །མཐའ་རྣམས་ཡང་དག་ཡོད་

མ་ཡིན། །མཐའ་ཡི་མཚན་ཉིད་ཐམས་ཅད་ནི། །དེ་དག་ཡོད་པར་མི་འགྱུར་རོ། །མཐའ་རྣམས་ཐམས་ཅད་མི་ལེན་ཅིང་། །མཐའ་དག་ལས་ནི་གང་འདས་པ། །མཐའ་སྒོ་དག་ལ་ཆགས་མེད་པས། །འཇིག་ཚོགས་ལྟ་བཅས་སྤོང་བར་བྱེད། །གང་ཞིག་འཇིག་ཚོགས་ལྟ་བ་དག །

མི་གཅོད་སྤོང་བར་མི་བྱེད་པ། །གོ་ཆ་ཆེན་པོ་མ་བགོས་པས། །ཐེག་ཆེན་ལ་ནི་མོས་མི་འགྱུར། །མཐའ་རྣམས་དག་ནི་ལེན་བྱེད་ཅིང་། །མཐའ་ཡི་མཚན་ཉིད་སྔོན་གྱི་མཐའ། །ཕྱི་མའི་མཐའ་ནི་གང་རྟོགས་པ། །དེ་དག་ཐམས་ཅད་རྣམ་རྟོག་ཡིན། །གང་ཞིག་འཇིག་ཚོགས་ལྟ་

བ་དག །ཐམས་ཅད་རབ་ཏུ་གང་སྤངས་པ། །གོ་ཆ་དཔག་མེད་བགོས་ནས་ནི། །བླ་མེད་ཐེག་པ་ཞོན་པ་ཡིན། །མཐའ་སྒོ་རྣམས་ལ་མ་ཆགས་པས། །འཇིག་རྟེན་བློར་ནི་གྱུར་པས་ན། །མཐའ་རྣམས་སྣ་ཚོགས་དག་ལ་ནི། །ཐམས་ཅད་ཡང་དག་འདས་པར་འགྱུར། །དེས་ན་

སངས་རྒྱས་ཆོས་རྣམས་ལ། །བདེ་བར་ཡང་དག་ཞུགས་པ་ཡིན། །བྱང་ཆུབ་སེམས་དཔའ་རབ་བརྟགས་ན། །ཤེས་རབ་ཆེན་པོ་སྟོབས་དག་གིས། །ཆོས་འགའ་ཡང་ནི་མི་དམིགས་པས། །སྤང་ཞིང་བསལ་དུ་ཅི་ཡང་མེད། །རྟག་ཏུ་ཐབས་ལ་མཁས་པ་ཡིས། །ཞི་གནས་

ལྷག་མཐོང་ལེགས་བསྡུས་པ། །མཚན་ཉིད་གཅིག་ཏུ་རྟོགས་པའི་ཕྱིར། །མཚན་ཉིད་རྣམས་ནི་རབ་ཏུ་རྟོགས། །ཡང་དག་ཆོས་ལ་རབ་གནས་ཤིང་། །ཆོས་ཀྱི་སྣང་ཆེན་ཐོབ་པས་ན། །ཆོས་ཀྱི་སྣང་བ་དེ་ཡིས་ནི། །མཐའ་རྣམས་དེ་དག་ཁོང་དུ་ཆུད། །མཐའ་ནི་ཅུང་ཟད་ཙམ་

དག་དང་། །མཐའ་དང་མཐའ་མིན་དེ་དག་ནི། །མཚུངས་པར་ལྡན་པར་མི་མཐོང་བས། །ཐམས་ཅད་ལ་ནི་ཆགས་པ་མེད། །སེམས་ཅན་སྡུག་བསྔལ་མཐོང་འགྱུར་ན། །སྤྲོ་བསྐྱེད་ཚིག་ནི་འདི་སྐད་དུ། །ཁྱེད་འདིར་ཤོག་ལ་ཐེག་འདི་ལ། །ངེས་པར་འབྱུང་བར་གྱིས་ཤེས་

Vol. 40 · folio 86a

སྨྲོས། །སྐྱེ་བ་ལེན་པ་ཐམས་ཅད་དུ། །ཆོས་ཀྱི་སྣང་བ་བྱེད་པར་འགྱུར། །གོ་བགོས་ཐེག་ཆེན་ཞོན་ནས་ནི། །འདི་ཉིད་རབ་ཏུ་བསྟན་པར་བྱ། །ཐེག་པ་འདི་དང་གོ་ཆ་འདི། །དེ་དག་ལ་ནི་ཕངས་མི་བྱ། །སེམས་ཅན་རྣམས་ནི་ཐམས་ཅད་ཀྱིས། །གོ་བགོས་ཐེག་པ་

ཆེན་པོ་དང་། །རབ་བདེ་ཐེག་པ་འདི་ཞོན་ནས། །བླ་མེད་བགྲོད་ལ་དགོད་པར་བྱ། །བྱང་ཆུབ་སེམས་དཔའ་དེ་དག་ནི། །རྣལ་འབྱོར་འདི་ལ་གནས་གྱུར་ནས། །སངས་རྒྱས་ཀྱི་ནི་ཆོས་དག་ལ། །མྱུར་བ་ཁོ་ནར་གཞོལ་བར་འགྱུར། །སངས་རྒྱས་ཞིང་ནི་རྣམ་དག་དང་། །

ཉན་ཐོས་བྱང་ཆུབ་སེམས་དཔའ་ཡི། །ཡོན་ཏན་བཀོད་པ་གང་ཡིན་པ། །དངོས་པོ་དེ་དག་འཛིན་པར་འགྱུར།། །།བམ་པོ་གསུམ་པ། གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གོ་ཆ་འདི་ལྟ་བུ་

བགོས་ཤིང་ཐེག་པ་ཆེན་པོ་འདི་ལྟ་བུ་ལ་ཞོན་པས་ན་མཐའ་རྣམས་ལས་ཡང་དག་པར་འདས་ཤིང་མུན་པ་རྣམས་རབ་ཏུ་བསལ་བ་དང་། འཇིགས་པ་རྣམས་རབ་ཏུ་བསྐྱབས་ཤིང་བརྩོན་འགྲུས་ཆེན་པོས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་དག་ལས་བྱང་ཆུབ་སེམས་དཔའ་སེམས་

དཔའ་ཆེན་པོའི་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་འདི་ཐོས་པས་རབ་ཏུ་དགའ་བར་གྱུར་ཏེ། ཆོས་འདི་སྒོམ་པ་ན་སངས་རྒྱས་བཅོམ་ལྡན་འདས་དེ་དག་ལ་གུས་པས་རིམ་གྲོ་དང་། བཀུར་སྟི་བྱེད་ཀྱང་འདི་སྙམ་དུ་བདག་ནི་གོ་ཆ་འདི་ལྟ་བུ་བགོས་པའོ། །བདག་ནི་གོ་ཆ་

འདི་ལྟ་བུ་དང་ལྡན་པའོ། །བདག་ནི་ཆོས་འདི་ལྟ་བུ་ཐོབ་པ་ཡིན་ནོ། །བདག་ནི་ཆོས་འདི་ལྟ་བུ་དང་ལྡན་པ་ཡིན་ནོ། །བདག་ནི་ཆོས་ཀྱི་རྣམ་པ་འདི་ལྟ་བུ་དང་ལྡན་པ་ཡིན་ནོ་སྙམ་པའི་བསམ་པ་མ་བྱུང་ངོ་། །ང་ལ་དེའི་ཚེ་བདག་ཏུ་འདུ་ཤེས་པ་མེད་པས་འཇིག་ཚོགས་ལ་ལྟ་བ་སྤངས་ཤིང་།

བདག་ཏུ་ང་རྒྱལ་བ་ཡང་སྤངས་སོ། །སེམས་ལ་མཐོ་དམན་མེད་ཅིང་རྣམ་པར་རྟོག་པ་ཡང་མེད་པར་གྱུར་ཏོ། །སེམས་ཅན་ཐམས་ཅད་བསྡུ་བ་དང་། དེ་བཞིན་གཤེགས་པ་རྣམས་ཀྱི་ཆོས་ཀྱི་སྡེ་སྣོད་རབ་ཏུ་བསྲུང་བ་དང་། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་རྣམས་ཡོངས་སུ་

Vol. 40 · folio 86b

སྨིན་པར་བྱ་བའི་ཕྱིར་སྐད་ཅིག་ཙམ་དུ་ཡང་སེམས་ཡོངས་སུ་སྐྱོ་ཞིང་ངལ་བར་མ་གྱུར་ཏོ། །ང་དེའི་ཚེ་གོ་ཆ་མ་སྤངས་ཤིང་ཐེག་པ་དཔག་ཏུ་མེད་པ་ལ་ཞོན་པར་གྱུར་པས་ཚེ་རབས་ཐམས་ཅད་དུ་བདུད་ཀྱི་དཔུང་དང་། བདུད་ཀྱི་འཁོར་དང་། བདུད་ཀྱི་དམག་རྣམས་བཅོམ་ཞིང་ཕམ་པར་བྱས་

སོ། །ལམ་ཐ་དད་པར་གྱུར་བ་ཙ་ར་ཀ་དང་། འཇིག་རྟེན་རྒྱང་ཕན་པ་དང་། པ་རི་པ་ར་ཙ་ཀ་རྣམ་པར་གཡེང་བར་གྱུར་པ་ཐམས་ཅད་དང་། གཞན་ཡང་མུ་སྟེགས་ཅན་འདི་དང་འདྲ་བ་རྣམས་ངས་རབ་ཏུ་བཏུལ་ཏེ་བདེ་བ་ལ་བཀོད་དོ། །ཐ་དད་པར་སྨྲ་བ་ཐམས་ཅད་ཚར་བཅད་དོ། །མུ་

སྟེགས་ཅན་ཐམས་ཅད་རབ་ཏུ་བཏུལ་ཏོ། །ལོག་པར་སོང་བའི་སེམས་ཅན་རྣམས་ཐེག་པ་འདིའི་དབང་གིས་དགེ་བའི་སྡོམ་པ་སྣ་ཚོགས་ལ་གནས་པར་བྱས་སོ། །སེམས་ཅན་རྣམས་ལ་གོ་ཆ་དང་གོ་ཆའི་བཀོད་པ་རྣམ་པར་ཕྱེ་སྟེ་བསྟན་ཏོ། །སེམས་ཅན་རྣམས་ལ་རབ་ཏུ་བདེ་བ་ཐེག་པ་

ཆེན་པོའི་ཆོས་ཀྱི་རྣམ་པ་དེ་ལྟ་བུ་དག་བསྟན་པས། གང་ཐེག་པ་འདི་ལ་གནས་པར་གྱུར་པ་དེ་དག་བདེ་བའི་ཡོ་བྱད་ཐམས་ཅད་ཐོབ་པར་བྱས་ཏེ། འདི་ལྟ་སྟེ། འདུས་བྱས་ཀྱི་བདེ་བའི་ཡོ་བྱད་འཁོར་ལོས་སྒྱུར་བའི་རྒྱལ་པོའི་བདེ་བའི་ཡོ་བྱད་དང་། བརྒྱ་བྱིན་དང་། ཚངས་པའི་རྒྱལ་

པོའི་བདེ་བའི་ཡོ་བྱད་དང་། འདུས་མ་བྱས་ཀྱི་བདེ་བའི་ཡོ་བྱད་ཐོབ་པར་བྱས་པ་གང་ཡིན་པའོ། །སེམས་ཅན་རྣམས་ལ་ཆོས་འདི་བསྟན་པར་གྱུར་བ་ན་དེ་དག་ཆོས་འདི་ལ་ཡང་དག་པར་ཞུགས་པས། འཕགས་པའི་རིགས་སུ་སྐྱེས་པས། ཆོས་ཀྱི་རྒྱལ་མཚན་ཆེན་པོ་བསྒྲེང་ཞིང་སེང་

གེའི་སྒྲ་བསྒྲགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་བར་གྱུར་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་དེ་ལྟ་བུ་བགོས་ནས་ཚུལ་བཞིན་དུ་སོ་སོར་བརྟགས་ཤིང་རབ་ཏུ་རྣམ་པར་འབྱེད་པར་བྱེད་པ་དེ་

དག་ནི་ཆོས་གང་གིས་རབ་ཏུ་གཞོལ་བར་འགྱུར་བའི་ཆོས་དེ་དག་ཐམས་ཅད་མ་ལུས་པར་ཤེས་ཤིང་མཐོང་བར་གྱུར་ཀྱང་རྣམ་པར་རྟོག་པར་མི་བྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ལམ་ཡང་དག་པ་ལ་གནས་པས་ཚུལ་བཞིན་དུ་ཤེས་པར་

Vol. 40 · folio 87a

གྱུར་པའི་ཕྱིར་དང་། ཡང་དག་པའི་ལམ་ལ་རབ་ཏུ་ཞུགས་པས་ཚུལ་བཞིན་དུ་མཐོང་བའི་ཕྱིར་རོ། །ཚུལ་བཞིན་དུ་རྣམ་པར་དག་པར་གྱུར་པ་གང་ཡིན་པ་དེ་ནི་རྣམ་པར་རྟོག་པ་ཡང་མ་ཡིན་རྣམ་པར་མི་རྟོག་པ་ཡང་མ་ཡིན་པས་རྣམ་པར་རྟོག་པ་དང་། རྣམ་པར་མི་རྟོག་

པ་དག་མཉམ་པ་ཉིད་དུ་ཤེས་ཤིང་མཐོང་བར་འགྱུར་རོ། །གང་གིས་ཆོས་རྣམས་བཙལ་ཞིང་གཉེར་དུ་ཡོད་པར་མཐོང་བ་དེ་དག་ནི་མཉམ་པ་ཉིད་མ་ཡིན་པས་ཚུལ་བཞིན་དུ་རྣམ་པར་དག་པའི་ཤེས་པ་དང་། མཐོང་བ་ལ་གནས་པར་མི་འགྱུར་རོ། །རྣམ་པར་རྟོག་པ་དང་། རྣམ་པར་

མི་རྟོག་པ་མེད་པ་གང་ཡིན་པ་དེ་དག་ནི་རྣམ་པར་རྟོག་པ་དང་། རྣམ་པར་མི་རྟོག་པ་དེ་དག་ལ་མངོན་པར་ཞེན་ཅིང་འཛིན་པར་མི་བྱེད་ལ། མངོན་པར་ཞེན་ཅིང་འཛིན་པ་མེད་པས་རྣམ་པར་རྟོག་པ་དང་། རྣམ་པར་མི་རྟོག་པ་ཡང་ཡོངས་སུ་སྤོང་བར་བྱེད་དོ། །ལམ་འདི་ལ་ནི་སྙིང་བརྩེ་བ་

ཡང་མེད། མངོན་པར་འདུ་བྱེད་པ་ཡང་མེད། སྒྲོ་འདོགས་པ་ཡང་མེད། བླང་ཞིང་དོར་བ་ཡང་མེད་དོ། །མཉམ་པ་ཉིད་ཀྱི་ལམ་ཡང་དག་པ་ལ་གནས་པ་ནི་འདས་པ་དང་། ད་ལྟར་བྱུང་བ་དང་། མ་འོངས་པ་ལ་རྣམ་པར་རྟོག་པར་མི་བྱེད་པས་རྣམ་པར་རྟོག་པ་ཐམས་ཅད་དང་། བག་ལ་ཉལ་ཇི་སྙེད་པ་དག་

མ་ལུས་པར་ཁོང་དུ་ཆུད་ཅིང་ཆོས་ཐམས་ཅད་ཀྱི་མཉམ་པ་ཉིད་ཀྱི་ཕྱིན་ཅི་མ་ལོག་པའི་དོན་ལ་རབ་ཏུ་གནས་པར་བྱེད་པས་ལམ་ཡང་དག་པ་ལ་གནས་པ་ཞེས་བྱའོ། །བློ་གྲོས་མཐའ་ཡས་ལམ་དང་། རྣམ་པར་དག་པའི་ལམ་གང་ཞེ་ན། འཕགས་པའི་ལམ་ཡན་ལག་བརྒྱད་པ་གང་ཡིན་པ་

སྟེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །ཡང་དག་པའི་ལྟ་བས་ནི་འཇིག་ཚོགས་ལ་ལྟ་བ་སྤོང་

ཞིང་ལྟ་བར་གྱུར་པའི་སྤྱོད་ཡུལ་ཐམས་ཅད་ལས་ཡང་དག་པར་འདའ་བར་བྱེད་པས་ལྟ་བ་ཐམས་ཅད་གནས་དང་། དུས་ཐམས་ཅད་དུ་ཤིན་ཏུ་རྣམ་པར་དག་པ་ཡང་འཐོབ་པར་འགྱུར་ལ། རྣམ་པར་རྟོག་པ་དང་ཁྱད་པར་དུ་རྣམ་པར་རྟོག་པ་དང་། ཀུན་ཏུ་རྣམ་པར་རྟོག་པ་ཐམས་ཅད་རབ་ཏུ་

Vol. 40 · folio 87b

རྟོགས་པས་རྣམ་པར་རྟོག་པ་དང་། ཁྱད་པར་དུ་རྣམ་པར་རྟོག་པ་དང་། ཀུན་ཏུ་རྣམ་པར་རྟོག་པ་ཡང་མེད་པར་འགྱུར་རོ། །ལོག་པར་རྟོག་པ་ལ་མི་གནས་ཤིང་ལོག་པར་རྟོག་པ་རབ་ཏུ་སྤངས་པས་ཡང་དག་པའི་འཚོ་བ་དང་། ཡང་དག་པའི་འཚོ་བའི་འདུ་ཤེས་ཀྱང་འཐོབ་པར་འགྱུར་རོ། །འཚོ་བ་

རྣམ་པར་དག་པ་མཐོང་ཞིང་འཚོ་བ་རྣམ་པར་དག་པ་ལ་གནས་པས་ལུས་ཀྱི་ལས་རྣམ་པར་དག་པ་དང་། ངག་གི་ལས་རྣམ་པར་དག་པ་དང་། ཡིད་ཀྱི་ལས་རྣམ་པར་དག་པ་མཐོང་ཞིང་ཡང་དག་པའི་ལས་ཀྱི་མཐའ་ལ་གནས་པར་འགྱུར་རོ། །ཡང་དག་པའི་ལྟ་བའི་ངག་གི་ལས་ཀྱིས་ནི་ཚིག་དང་།

སྨྲ་བ་མང་པོ་དག་རབ་ཏུ་ཤེས་ཤིང་མཐོང་བས་ཡང་དག་པའི་ངག་ལ་གནས་ནས་མི་འཐུན་པའི་ཕྱོགས་ཡོངས་སུ་དག་པར་བྱེད་དོ། །ཡང་དག་པའི་རྩོལ་བའི་ལྟ་བས་ནི་བརྩོན་འགྲུས་རབ་ཏུ་སྡུད་ཅིང་། ཡང་དག་པའི་བརྩོན་འགྲུས་ལ་གནས་པར་བྱེད་དོ། །ཡང་དག་པའི་ལྟ་བའི་དྲན་པས་ནི་

རྗེས་སུ་དྲན་པ་ཡང་མེད། ཡིད་ལ་བྱེད་པ་ཡང་མེད། འཛིན་པ་ཡང་མེད་པར་རྣམ་པར་དག་པའི་དྲན་པས་ཡང་དག་པའི་དྲན་པ་ལ་གནས་པར་བྱེད་དོ། །ཡང་དག་པའི་ལྟ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ལ་གནས་པ་མེད་པར་ཏིང་ངེ་འཛིན་དུ་ལྟ་བ་རབ་ཏུ་སྦྱངས་ནས་ཡང་དག་པའི་ཏིང་ངེ་

འཛིན་ལ་རབ་ཏུ་གནས་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་མཐོང་བའི་ཚེ་ཐམས་ཅད་དུ་རྣམ་པར་དག་པའི་ཡང་དག་པའི་ལྟ་བ་ཐོབ་པས་ཤིན་ཏུ་རྣམ་པར་དག་པའི་ལམ་ལ་གནས་པར་འགྱུར་ཏེ། ཤིན་ཏུ་རྣམ་པར་དག་པའི་ལམ་

འདི་ནི་སྐྱེས་བུ་དམ་པ་རྣམས་ཀྱིས་བསྒོམ་པར་བྱ་བ། བློ་དང་ལྡན་པ་རྣམས་ཀྱིས་བཀུར་བར་བྱ་བ། འཕགས་པ་རྣམས་དགའ་བར་བྱེད་པ། དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས་པ་ཡིན་པས། བདུད་དང་། བདུད་ཀྱི་འཁོར་དང་། བདུད་ཀྱི་མངག་པ་དང་། བདུད་ཀྱི་

རིས་ཀྱི་ལྷ་ཐམས་ཅད་ཀྱི་བགྲོད་པར་བྱ་བའི་གནས་མ་ཡིན་ནོ། །ཕྱི་རོལ་པའི་ལམ་ལ་སྲེད་ཅིང་མངོན་པར་ཞེན་པ་ཐམས་ཅད་དང་། རྩོད་པའི་སྨྲ་བ་ལ་གནས་པ་དང་། ལྟ་བའི་ཐིབས་པོར་ཞུགས་པ་དང་། ལམ་མ་ཡིན་པར་སོང་བ་དང་། འཇིག་རྟེན་རྒྱང་པན་པ་ལ་སོགས་པས་བགྲོད་

Vol. 40 · folio 88a

པར་བྱ་བའི་སྤྱོད་ཡུལ་ཡང་མ་ཡིན་ནོ། །མྱ་ངན་ལས་འདས་པ་ལ་སྲེད་པ་ཐམས་ཅད་ཀྱིས་བགྲོད་པར་བྱ་བའི་སྤྱོད་ཡུལ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདུས་མ་བྱས་ལ་གནས་པ་གང་ཡིན་པ་དེ་དག་ནི་མྱ་ངན་ལས་འདས་པར་རྣམ་པར་རྟོག་པ་དང་བཅས་པས་ན།

མྱ་ངན་ལས་འདས་པར་རྣམ་པར་རྟོག་པ་གང་ཡིན་པ་དེ་ཉིད་འདུ་བྱེད་རྣམས་སུ་རྣམ་པར་རྟོག་པ་ཡིན་པས་སོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པའི་དབྱིངས་སུ་རྣམ་པར་རྟོག་པའི་གཡོ་བ་ཐམས་ཅད་ལས་ཡང་དག་པར་འདས་པ་ཡིན་པས་འདུས་མ་བྱས་ཀྱང་ཡོད་པ་མ་ཡིན་ན།

འདུས་བྱས་ཡོད་པར་མི་འགྱུར་བ་ལྟ་སྨོས་ཀྱང་ཅི་དགོས་ཏེ། ལམ་འདི་ནི་རྣམ་པར་རྟོག་པ་ཐམས་ཅད་ཡོངས་སུ་སྦྱོང་བར་བྱེད་པས་ཐ་ན་འདུས་མ་བྱས་སུ་རྟོག་པ་ཅུང་ཟད་ཙམ་ཡང་མེད་ན། འདུས་བྱས་སུ་རྟོག་པ་ཐམས་ཅད་ལྟ་ཡོད་པར་ག་ལ་འགྱུར། གང་གིས་ཇི་ཙམ་དུ་འཕགས་པའི་ལམ་

ལ་རྣམ་པར་རྟོག་པ་དང་བཅས་པ་དེ་དག་ནི་འཕགས་པའི་ལམ་ལ་གནས་པ་ཞེས་མི་བྱའོ། །གང་གིས་རྣམ་པར་རྟོག་པའི་གཡོ་བ་ཐམས་ཅད་སྤངས་པ་གང་ཡིན་པ་དེ་ནི་འཕགས་པའི་ལམ་ལ་གནས་པ་དང་། འཇིགས་པ་མེད་པའི་ལམ་ལ་གནས་པ་དང་། རབ་ཏུ་ཞི་བའི་ལམ་ལ་

གནས་པ་དང་། རབ་ཏུ་བདེ་བའི་ལམ་ལ་གནས་པ་ཞེས་བྱའོ། །ལམ་འདིས་ནི་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྡུག་བསྔལ་མེད་པའི་གནས་སུ་ཕྱིན་པར་བྱེད་དོ། །ལམ་འདིས་ནི་ངོ་བོ་ཉིད་མེད་པར་ཕྱིན་པར་བྱེད་ཅིང་ངོ་བོ་ཉིད་ཀྱི་གནས་ལས་ཡང་དག་པར་འདའ་བར་

བྱེད་དོ། །ལམ་འདིས་ནི་ངོ་བོ་ཉིད་དང་། ངོ་བོ་ཉིད་མ་ཡིན་པ་ཐམས་ཅད་སྤངས་བའི་གནས་སུ་ཕྱིན་པར་བྱེད་དོ། །ལམ་འདིས་ནི་མཚན་ཉིད་བསྟན་དུ་མེད་པ་དང་། གཟུགས་ཅན་གྱི་མཚན་ཉིད་མ་ཡིན་པའི་གནས་སུ་ཕྱིན་པར་བྱེད་དོ། །ལམ་འདིས་ནི་ནམ་མཁའ་བཞིན་དུ་ཐམས་ཅད་དུ་

ཁྱབ་པས་བླ་ན་མེད་པའི་གཞལ་མེད་ཁང་ཆེན་པོར་ཕྱིན་པར་བྱེད་དེ། དེ་ལྟར་སོང་བ་གང་ཡིན་པ་དེ་དག་ནི་ཕྱིར་ལྡོག་པར་མི་འགྱུར་བས་བདེ་བ་རྣམ་པ་སྣ་ཚོགས་རབ་ཏུ་འཐོབ་པར་འགྱུར་རོ། །གཞལ་མེད་ཁང་ཆེན་པོ་དེ་ཡང་བསྟན་དུ་མེད་ཅིང་དངོས་པོའི་མཚན་མ་ཅི་ཡང་མེད་པས་འདུས་

Vol. 40 · folio 88b

བྱས་ཅུང་ཟད་ཙམ་ཡང་མེད་ལ། འདུས་མ་བྱས་ཅུང་ཟད་ཙམ་ཡང་མེད་དེ། འདུས་བྱས་བཀག་ཅིང་འདུས་མ་བྱས་སྤངས་པ་ཡིན་པས་སེམས་ཅན་རྣམས་ལ་འདུས་བྱས་ཀྱི་བདེ་བ་འམ་འདུས་མ་བྱས་ཀྱི་བདེ་བ་གང་ཡང་སྦྱིན་པར་མི་བྱེད་དོ། །བློ་གྲོས་མཐའ་ཡས་ཇི་ཙམ་དུ་འདུས་བྱས་ཀྱི་མྱ་ངན་

ལས་འདས་པ་ལ་མོས་པ་དེ་དག་ཀྱང་འདུས་བྱས་ཀྱི་བདེ་བ་ཡོངས་སུ་ཚོལ་བར་མི་བྱེད་ན་གཞལ་མེད་ཁང་ཆེན་པོར་ཞུགས་པ་ལྟ་སྨོས་ཀྱང་ཅི་དགོས། གཞལ་མེད་ཁང་ཆེན་པོ་དེ་ནི་མངོན་པར་འདུ་བྱ་བ་མེད་པ་དང་། རབ་ཏུ་བསིལ་ཞིང་དབེན་པར་གྱུར་བའི་ཕྱིར་མྱ་ངན་ལས་འདས་པ་ཞེས་

བྱའོ། །འདོད་ཆགས་དང་། ཞེ་སྡང་དང་། གཏི་མུག་འགོག་པ་དང་། བག་ལ་ཉལ་རྣམས་སྤངས་པ་དང་། སྲིད་པའི་ལྟ་བའི་དྲ་བ་དྲལ་བ་དང་། མ་རིག་པའི་ཆུ་བོ་བསྐམས་པ་དང་། ཟུག་རྔུ་གདུག་པ་རྩ་བ་ནས་བཏོན་པ་དང་། མི་དགེ་བའི་ཆོས་རྣམས་ཟད་པའི་ཕྱིར་མྱ་ངན་ལས་འདས་པ་ཞེས་

བྱའོ། །ང་རྒྱལ་གྱི་ནད་དང་། སྡུག་བསྔལ་མང་པོས་ཉོན་མོངས་པ་ཐམས་ཅད་ཐག་བསྲིངས་པའི་ཕྱིར་མྱ་ངན་ལས་འདས་པ་ཞེས་བྱའོ། །སེམས་དང་། ཡིད་དང་། རྣམ་པར་ཤེས་པའི་སྤྱོད་ཡུལ་མ་ཡིན་པའི་ཕྱིར་མྱ་ངན་ལས་འདས་པ་ཞེས་བྱའོ། །རྩོད་པའི་སྨྲ་བ་རྣམས་དང་། མཚམས་སྦྱོར་

བ་ཐམས་ཅད་ནས་ཆོས་ཀྱི་འདུ་ཤེས་ཀྱི་བར་དུ་ཉེ་བར་ཞི་བར་གྱུར་བའི་ཕྱིར་མྱ་ངན་ལས་འདས་པ་ཞེས་བྱའོ། །ཡིད་ཀྱི་མོས་པ་རྣམས་དང་། ཡིད་ཀྱི་མོས་པས་ཡོངས་སུ་ཚོལ་བ་གཅོད་ཅིང་། རྣམ་པར་བརྟག་པ་དང་། རྣམ་པར་བརྟག་པར་བྱ་བའི་མཚན་མ་མེད་པའི་ཕྱིར་མྱ་ངན་ལས་

འདས་པ་ཞེས་བྱའོ། །བློ་གྲོས་མཐའ་ཡས་འདི་ནི་ཡོངས་སུ་མྱ་ངན་ལས་འདས་པ་ཆེན་པོའི་ངོ་བོ་ཉིད་ཡིན་ཏེ། མྱ་ངན་ལས་འདས་པ་ལ་མཐའ་མེད་པས་བརྗོད་ཀྱིས་མི་ལང་ངོ་། །གལ་ཏེ་བགྲོད་པར་བྱ་བ་དང་བཅས་པར་གྱུར་ན་དེ་ནི་ལམ་མ་ཡིན་ཏེ། ལམ་ལ་ཡང་ཚིག་མེད་པས་

བརྗོད་པར་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདིས་མྱ་ངན་ལས་འདས་པའི་གཞལ་མེད་ཁང་ཆེན་པོར་བགྲོད་པར་གྱུར་པ་ན་སེམས་ཅན་བརྒྱ་སྟོང་ཚད་མེད་པ་རྣམས་ཀྱང་ལམ་འདི་ལ་འགོད་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་

Vol. 40 · folio 89a

དཔའ་སེམས་དཔའ་ཆེན་པོ་རྣམས་ལམ་འདི་ལ་གཞོལ་བར་གྱུར་པའི་ཚེ་ཡོངས་སུ་ངལ་བ་དང་། གདུང་བ་མེད་པར་ཇི་ལྟ་ཇི་ལྟར་ཡོངས་སུ་ཚོལ་བ་དང་། ཇི་ལྟ་ཇི་ལྟར་རབ་ཏུ་བཀོད་པ་དང་། འདུན་པ་དེ་ལྟ་དེ་ལྟར་རབ་ཏུ་བཀོད་ནས་བཀོད་པ་རེ་རེས་ཀྱང་སེམས་ཅན་ཡོངས་སུ་

བསྡུས་ནས་ཆོས་སྟོན་པར་བྱེད་པས་སེམས་ཅན་རྣམས་རབ་ཏུ་དགའ་བར་བྱེད་དོ། །དེ་ཅིའི་ཕྱིར་ཞེ་ན། ལམ་འདི་ནི་མཚུངས་པ་མེད་པས་མི་འཐུན་པའི་ཕྱོགས་ཡོངས་སུ་དག་པར་བྱེད་པ་དང་། བྱ་བ་རྣམས་མཐར་ཕྱིན་པར་བྱེད་པས་སངས་རྒྱས་བཅོམ་ལྡན་འདས་རྣམས་དང་། ཉན་

ཐོས་དང་། རང་སངས་རྒྱས་དག་ཀྱང་ལམ་འདི་ལ་གཞོལ་ཞིང་འགལ་བར་མི་མཛད་པ་དང་། ས་དེ་དག་ཏུ་མ་བྱོན་ཅིང་སྨོན་པ་རྣམས་ཡོངས་སུ་རྫོགས་པར་མ་གྱུར་གྱི་བར་དུ་ནམས་ཀྱང་སྤོང་བར་མི་མཛད་པས་སོ། །དེ་ལས་གང་ཞེ་ན། འདི་ལྟ་སྟེ། མྱ་ངན་ལས་འདས་པའི་ས་དང་།

གཞལ་མེད་ཁང་ཆེན་པོའི་ས་གང་ཡིན་པའོ། །འདི་ལྟ་སྟེ། དཔེར་ན་ནམ་མཁའ་ནི་དཔེར་བྱར་མེད་ཀྱང་ནམ་མཁའ་མ་གཏོགས་པར་དཔེ་གཞན་གྱིས་ནམ་མཁའ་མཚོན་པར་མི་ནུས་པས་ཤིན་ཏུ་ཡངས་ཤིང་རྒྱ་ཆེ་བའི་ནམ་མཁའ་དབེན་པ་ལ་ནམ་མཁའ་ཞེས་བརྗོད་དོ། །མྱ་ངན་ལས་

འདས་པའི་གཞལ་མེད་ཁང་ཡང་དེ་བཞིན་དུ་སྟོང་པ་ཉིད་ཀྱི་དབེན་པ་ཆེན་པོ་བདག་པོ་མེད་པ། བདག་གི་བ་མེད་པ་ཡིན་པས་སེམས་ཅན་ཐམས་ཅད་དེར་ཞུགས་པར་གྱུར་ཀྱང་སྤུ་ཉག་མ་གཅིག་ཙམ་གྱི་ཚད་ཀྱང་ཡོངས་སུ་གཟུང་དུ་མེད་དེ། ཤིན་ཏུ་ཡངས་ཤིང་རྒྱ་ཆེ་བའི་སྟོང་པ་ཉིད་

རབ་ཏུ་དབེན་པ། རྒྱ་ཆེ་ཞིང་ཚད་མེད་པས་མྱ་ངན་ལས་འདས་པ་ཆེན་པོ་ཞེས་ཀྱང་བྱའོ། །གཞལ་མེད་ཁང་ཆེན་པོ་ཞེས་ཀྱང་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལམ་ཁྱད་པར་དུ་འཕགས་པ་འདི་ནི་ཉན་ཐོས་དང་། རང་སངས་རྒྱས་རྣམས་

ལས་ཡོད་པ་མ་ཡིན་ནོ་སྙམ་ནས་ལམ་འདི་ལ་གནས་པ་གང་ཡིན་པ་དེ་དག་ནི་ཡོན་ཏན་གྱི་ཚོགས་ཐམས་ཅད་མངོན་པར་སྒྲུབ་ཅིང་ཕྱིར་མི་ལྡོག་པ་ཐོབ་པར་གྱུར་པས་སེམས་ཅན་རྣམས་ལ་ཕན་འདོགས་པ་ཆེན་པོ་བྱེད་པར་འགྱུར་རོ། །སྤྱོད་པ་ཁྱད་པར་དུ་འཕགས་པས་བཀོད་པ་

Vol. 40 · folio 89b

བྱས་ནས་ལམ་འདིས་སེམས་བསྐྱེད་དེ་གཞོལ་བར་གྱུར་པས་ན་དེའི་བཀོད་པ་དེ་ལྟ་བུ་དེ་ནི་ཉན་ཐོས་དང་། རང་སངས་རྒྱས་རྣམས་ལ་ཡོད་པ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ལམ་འདི་ལ་གནས་པའི་ཚེ་གལ་ཏེ་འཁོར་ལོས་སྒྱུར་བའི་རྒྱལ་པོ་

བྱས་པར་གྱུར་པ་ན་ཡང་ཆགས་ཤིང་ལྟ་བ་མེད་པར་མཐུ་ཆེན་པོ་དང་ལྡན་ཞིང་རྫུ་འཕྲུལ་སྟོན་པར་བྱེད་པ་དང་། འཇིག་རྟེན་དང་འཇིག་རྟེན་ལས་འདས་པ་ཡང་རབ་ཏུ་རྟོགས་པར་འགྱུར་རོ། །གལ་ཏེ་བརྒྱ་བྱིན་དང་། ཚངས་པའི་རྒྱལ་པོ་བྱས་པར་གྱུར་ན་ཡང་ཆགས་ཤིང་ཞེན་པ་

མེད་པས་ང་རྒྱལ་སྤངས་ནས་སངས་རྒྱས་རྣམས་ལ་བལྟ་བར་མོས་པ་དང་། ཡང་དག་པའི་ཆོས་ཉན་པར་དགའ་བ་དང་། ལྷ་བརྒྱ་སྟོང་ཚད་མེད་པ་རྣམས་ཡོངས་སུ་སྨིན་པར་བྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །དེ་ནས་དེའི་ཚེ་བཅོམ་ལྡན་

འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའི་ཁྱད་པར་ལམ། །འཇིག་རྟེན་དག་ན་མཆོག་གྱུར་པས། །འཕགས་པ་ཐེག་པ་པ་གཉིས་དག །ཐམས་ཅད་ལམ་འདིར་འཇུག་པར་འགྱུར། །བྱང་ཆུབ་སེམས་དཔའ་ཐམས་ཅད་གང་། །བྱང་ཆུབ་ཆེན་པོར་

བགྲོད་པ་དང་། །ལམ་གྱི་བཀོད་པ་ཐོབ་འདོད་པ། །ལམ་འདིར་རབ་ཏུ་དབྱེ་བར་བྱ། །གང་ཞིག་ལམ་འདི་དག་ལ་ནི། །བགྲོད་དང་བགྲོད་པར་འགྱུར་བ་དག །དེ་དག་ཡང་དག་ལྟ་བ་ཡིས། །ལམ་འདི་ལ་ནི་གནས་པར་བྱ། །བྱང་ཆུབ་སེམས་དཔའ་ཐམས་ཅད་གང་། །མཉམ་པའི་ལྟ་

ལ་གང་གནས་པ། །ལམ་འདིར་རབ་ཏུ་ཞུགས་ནས་ནི། །བདེ་བས་ངེས་པར་འབྱུང་བར་བྱ། །ལམ་འདི་མཆོག་ཏུ་ཁྱད་པར་འཕགས། །ལམ་འདི་བླ་ན་མེད་པས་ན། །ཡང་དག་ཇི་བཞིན་འདྲེན་བྱེད་ཀྱང་། །གཟུང་བར་བྱ་བ་ཅི་ཡང་མེད། །གང་ཞིག་ལམ་འདིར་གནས་པ་དང་། །ལམ་འདིར་

ཡང་དག་ཞུགས་པ་ཡི། །བློ་ལྡན་གང་ཟག་ཐམས་ཅད་ཀྱི། །སེམས་ནི་གཡོ་བར་མི་འགྱུར་རོ། །ལམ་འདི་ལ་ནི་ཅུང་ཟད་ཀྱང་། །གཡོ་བ་ཡོད་པར་མི་སྟོན་པས། །དེས་ནི་གཡོ་བ་ཡོད་མི་འགྱུར། །གཡོ་བ་དག་ནི་རྟག་ཏུ་སྤོང་། །ང་ཡིས་ལམ་འདི་དག་ལ་ནི། །གཡོ་བ་མེད་ཅིང་བྱེད་པ་

Vol. 40 · folio 90a

མེད། །སྒྲོ་འདོགས་མེད་པར་རབ་བསྟན་པས། །ལམ་འདི་དེ་ཕྱིར་བླ་ན་མེད། །བྱང་ཆུབ་དག་ནི་ཐམས་ཅད་ཀུན། །ལམ་འདི་ལ་ནི་རབ་གནས་ཀྱང་། །ལམ་འདི་ལ་ནི་སྲེད་མེད་ཅིང་། །ཁོང་ཁྲོ་བ་ཡང་ཡོད་པ་མིན། །ལམ་འདི་འདས་པ་མ་ཡིན་ཏེ། །ལམ་འདི་མ་འོངས་

པ་ཡང་མིན། །དེ་ཡིས་རྣམ་རྟོག་རབ་བསལ་ནས། །དེ་བཞིན་དུ་ནི་བསྒོམ་པར་བྱ། །ལམ་འདི་ལ་ནི་ཉོན་མོངས་མེད། །ལམ་འདི་ལ་ནི་རྣམ་རྟོག་མེད། །དོན་དག་དང་ནི་མི་འགལ་བར། །དེ་བཞིན་དུ་ནི་གནས་པར་བྱ། །ལམ་མཆོག་ལ་ནི་གང་གནས་པ། །གནས་པ་མེད་པར་གནས་

པར་བྱ། །ལམ་འདི་ལ་ནི་གང་གནས་པ། །རྣམ་དག་རང་བཞིན་འཐོབ་པར་འགྱུར། །ང་ཡིས་ཡན་ལག་བརྒྱད་པའི་ལམ། །འཕགས་པའི་བགྲོད་པ་ཡིན་པར་བཤད། །ལམ་འདི་ལ་ནི་གང་གནས་པ། །བྱང་ཆུབ་ཐོབ་པ་དཀའ་མི་འགྱུར། །བྱང་ཆུབ་སེམས་དཔའ་མགོན་མེད་པས། །

དེ་བཞིན་ལམ་འདིར་གནས་པར་བྱ། །རྣམ་དག་ལམ་འདི་ཐོབ་གྱུར་ནས། །རེ་རེ་ནས་ནི་བགྲོད་པར་བྱ། །ལམ་རབ་མཆོག་ཏུ་གྱུར་པ་འདི། །སྐྱེས་བུ་དམ་པ་སྒྲུབ་བྱེད་ཅིང་། །དེ་བཞིན་གཤེགས་པས་བསྔགས་པས་ན། །ཡེ་ཤེས་འདི་ནི་བླ་ན་མེད། །བདུད་དང་བདུད་ཀྱི་དམག་རྣམས་

དང་། །བདུད་ཀྱིས་ཡོངས་སུ་བཟུང་བ་དང་། །མུ་སྟེགས་ཅན་ནི་གཞན་རྣམས་ཀྱིས། །བགྲོད་པར་བྱ་བའི་ཡུལ་མ་ཡིན། །མྱ་ངན་འདས་ལ་གང་རྟོག་པ། །ལམ་མཆོག་འདི་ལ་གནས་མི་འགྱུར། །བྱིས་པ་རྣམ་རྟོག་གཙེས་པས་ན། །མྱ་ངན་འདས་ལ་ཕྱོགས་མི་འགྱུར། །རྣམ་རྟོག་

ལས་ནི་གང་འདས་པ། །འདུ་ཤེས་རྣམ་རྟོག་མེད་པས་ན། །ལམ་ནི་ཆེན་པོ་འདི་དག་ལ། །དེས་ན་རབ་ཏུ་ཞུགས་པར་འགྱུར། །འཕགས་པ་རྣམས་ཀྱི་ལམ་མཆོག་འདི། །བྱིས་པ་སྐྱེ་བོ་སྤོང་བར་བྱེད། །ཆོས་འདི་ལ་ནི་གང་ཞུགས་པ། །ལམ་འདི་བླ་ན་མེད་པ་ཡིན། །ཁྱད་པར་འཕགས་

པའི་ལམ་མཆོག་འདི། །བླ་མེད་གནས་སུ་ཕྱིན་པར་བྱེད། །དེ་ནི་གནོད་དང་མྱ་ངན་མེད། །འཇིགས་པ་མེད་ཅིང་བགེགས་ཀྱང་མེད། །བླ་ན་མེད་པའི་ལམ་འདི་ནི། །གཟུགས་མེད་ཁ་དོག་མཚན་ཉིད་མེད། །གཟུགས་ཀྱི་མཚན་ཉིད་དག་གིས་ཀྱང་། །བསྟན་པར་ཡང་ནི་མི་ནུས་སོ། །

Vol. 40 · folio 90b

ཤིན་ཏུ་བདེ་བའི་ལམ་འདི་ནི། །ཡང་དག་ཡིན་པས་འཇིགས་པ་མེད། །ལམ་འདི་ལ་ནི་གང་ཞུགས་པ། །མཐར་ནི་མྱ་ངན་འདའ་བར་འགྱུར། །མཆོག་ཏུ་རྣམ་དག་ལམ་འདི་ནི། །ནམ་མཁའ་སྟོང་པ་འདྲ་བས་ན། །ཐམས་ཅད་དུ་ནི་ཐོགས་པ་མེད། །རྟག་ཏུ་མྱ་ངན་འདས་ལ་

གཞོལ། །གལ་ཏེ་མྱ་ངན་འདས་ཕྱིན་ན། །ཕྱིར་མི་ལྡོག་པར་མི་འགྱུར་བས། །མྱ་ངན་འདས་པ་ཆེན་པོ་འདི། །བླ་མེད་མཆོག་ཏུ་བདེ་བ་ཡིན། །མྱ་ངན་འདས་ཆེན་གཞལ་མེད་ཁང་། །སྟོང་དབེན་ཚད་ནི་གཞལ་དུ་མེད། །དེ་ཕྱིར་མྱ་ངན་འདས་ཆེན་ཡིན། །གཞལ་མེད་ཁང་ཆེན་ཞེས་

ཀྱང་བྱ། །མྱ་ངན་འདས་པ་ཆེན་པོ་འདིར། །དུག་གསུམ་ཉོན་མོངས་རབ་ཏུ་ཞི། །གལ་ཏེ་དེར་ནི་ཕྱིན་གྱུར་ན། །ལྡོག་པ་མེད་ཅིང་སྐྱེ་ལེན་མེད། །མྱ་ངན་འདས་ཆེན་སྟོང་དབེན་འདི། །དཔེར་ན་ནམ་མཁའ་ཇི་ལྟ་བཞིན། །སྟོང་དབེན་རྒྱ་ནི་ཆེ་བའི་ཕྱིར། །དེ་ན་ཐོགས་པ་ཅི་ཡང་མེད། །མྱ་

ངན་འདས་ཆེན་གཞལ་མེད་ཁང་། །སྡུག་བསྔལ་མྱ་ངན་གནས་སྤངས་ཤིང་། །སྤྱོད་ཡུལ་གནས་ནི་དཔག་མེད་པས། །མྱ་ངན་འདས་པ་ཞེས་བརྗོད་དོ། །མྱ་ངན་འདས་ལ་གྲངས་མེད་པས། །གྲངས་ཀྱི་ཚད་ནི་དམིགས་སུ་མེད། །རབ་ཞི་བསིལ་བའི་རང་བཞིན་ལ། །མྱ་ངན་འདས་

པ་ཞེས་བརྗོད་དོ། །མྱ་ངན་འདས་ལ་བྱ་མེད་པས། །ལམ་ཞུགས་པ་ཡང་བླ་ན་མེད། །ཚད་མེད་རྣམ་རྟོག་མེད་པས་ན། །རྣམ་པར་རྟོག་པ་དམིགས་སུ་མེད། །ངས་ནི་བྱང་ཆུབ་སེམས་དཔའི་ཕྱིར། །ལམ་འདི་རབ་ཏུ་བསྟན་པའི་ཕྱིར། །ལམ་འདི་ལ་ནི་གང་གནས་པ། །དེ་ནི་མྱ་ངན་འདས་

དང་ཉེ། །ལམ་འདི་ལ་ནི་གང་གནས་པ། །འཇིག་རྟེན་པ་ཡི་བདེ་བའི་མཆོག །ཐམས་ཅད་རབ་ཏུ་འཐོབ་འགྱུར་བས། །འཇིགས་པ་མེད་པ་ཞེས་བྱའོ། །ལམ་འདི་ལ་ནི་རབ་གནས་ན། །སེམས་ནི་ཉོན་མོངས་མེད་པར་འགྱུར། །དེས་ན་ལམ་ནི་རྣམ་དག་པས། །འཇིགས་པ་མེད་པ་ཞེས་

བྱའོ། །མཉམ་ཉིད་ཡང་དག་ལམ་མཐོང་པས། །ཐམས་ཅད་རྗེས་སུ་རྟོགས་པར་འགྱུར། །འཚོ་བའི་ཡོ་བྱད་ཐམས་ཅད་ལ། །ཐམས་ཅད་དུ་ནི་ཆགས་མི་འགྱུར། །བྱང་ཆུབ་སེམས་དཔའི་གནས་མེད་པ། །ཡང་དག་ཁྱད་པར་འཕགས་པའི་ལམ། །སེམས་ཅན་རྣམས་ལ་ཕན་

Vol. 40 · folio 91a

འདོགས་པ། །རབ་ཏུ་རྩོལ་བས་གཞོལ་བར་བྱ། །བླ་མེད་ལམ་ནི་ཐོབ་གྱུར་ན། །ལམ་མཆོག་བཀོད་པ་འདི་དག་གིས། །འཇིག་རྟེན་རྣམས་ནི་མགུ་བྱེད་པས། །ལམ་འདི་ལ་ནི་གཞོལ་བར་བྱ། །ལམ་འདི་མཆོག་ཏུ་ཁྱད་པར་འཕགས། །ཡིད་ནི་ཡོངས་སུ་དག་པར་

བྱེད། །ཇི་ལྟར་མོས་བཞིན་ཚོལ་བ་དག །ཐམས་ཅད་རབ་ཏུ་གཞོལ་བར་བྱ། །གལ་ཏེ་འཁོར་ལོས་སྒྱུར་བའི་རྒྱལ། །དཔུང་ཆེན་ཐོབ་པར་གྱུར་ན་ཡང་། །རྒྱལ་ཐབས་དག་ནི་རབ་སྤངས་ནས། །རབ་བྱུང་ལམ་ནི་སློབ་པར་བྱེད། །གལ་ཏེ་བརྒྱ་བྱིན་ཚངས་པ་ཡི། །རྒྱལ་ཐབས་ཐོབ་

པར་གྱུར་ན་ཡང་། །དེ་དག་ལ་ནི་ཆགས་མེད་པས། །དེ་ནི་ལེགས་པར་རྗེས་འབྲང་ཡིན། །འཇིག་རྟེན་བསླབ་པའི་གནས་རྣམས་ཀྱང་། །ཐམས་ཅད་གསལ་བར་ཁོང་དུ་ཆུད། །ལམ་འདི་ལ་ནི་གང་གནས་པ། །བདེན་ཚིག་སྨྲ་བ་ཞེས་བྱའོ། །གཞན་ཡང་བློ་གྲོས་མཐའ་ཡས་བྱང་ཆུབ་

སེམས་དཔའ་སེམས་དཔའ་ཆེན་པོ་རྣམས་ལམ་འདི་ལ་ཡང་དག་པར་གཞོལ་བར་གྱུར་པ་ན་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བར་འདོད་པའི་ཕྱིར་ཆོས་གཅིག་མངོན་པར་སྒྲུབ་པར་བྱེད་དེ། འདི་ལྟ་སྟེ། མི་དགེ་བའི་ཆོས་རྣམས་མི་བྱེད་པ་གང་ཡིན་པའོ། །གཞན་ཡང་ཡང་དག་

པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། ནང་དུ་དགེ་བའི་ཆོས་གང་ཡིན་ཞེས་ཚུལ་བཞིན་དུ་སེམས་པ་དང་། ཕྱི་རོལ་དུ་དགེ་བའི་ཆོས་གང་ཡིན་ཞེས་ཚུལ་བཞིན་དུ་འདྲི་བར་བྱེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་

ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། དངོས་པོ་ཇི་ལྟ་བ་བཞིན་དུ་ཆོས་རྣམས་རྟོགས་པར་ཁོང་དུ་ཆུད་པ་དང་། དངོས་པོ་མེད་པ་དང་། རྣམ་པར་རྟོགས་པ་མེད་པར་ཁོང་དུ་ཆུད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་

ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། ནང་དུ་རྟོགས་པའི་རྗེས་སུ་འབྲང་བར་བྱེད་པ་དང་། ཕྱི་རོལ་ལ་མངོན་པར་ཞེན་པ་མེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་

Vol. 40 · folio 91b

མངོན་པར་སྒྲུབ་པར་བྱེད་དེ། རྣམ་པར་རྟོག་པར་བྱ་བ་མེད་པར་བདག་ཉིད་མངོན་པར་ཡིད་ཆེས་པ་དང་། སེམས་ཅན་གང་ད་དུང་མངོན་པར་ཡིད་ཆེས་པར་མ་གྱུར་པ་དེ་དག་བདག་གིས་ལམ་འདི་ལ་དགོད་པར་བྱའོ་སྙམ་དུ་སེམས་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་

བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། ལས་སུ་བྱ་བ་རྣམས་ཡང་དག་པ་ཇི་ལྟ་བ་བཞིན་དུ་ཤེས་ཤིང་མཐོང་བ་དང་། ལས་སུ་བྱ་བ་རྣམས་ལ་མངོན་པར་ཞེན་པ་མེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་

བསྡུ་བའི་ཕྱིར་ཆོས་རྣམ་པ་གསུམ་མངོན་པར་སྒྲུབ་པར་བྱེད་དེ། ཉེ་བར་ལེན་པའི་ཕུང་པོ་སྡུག་བསྔལ་དང་བཅས་པ་རྣམས་རེ་རེ་ནས་རྟོགས་པར་ཁོང་དུ་ཆུད་པར་བྱེད་པ་དང་། ཉེ་བར་ལེན་པའི་ཕུང་པོ་སྡུག་བསྔལ་མེད་པ་རྣམས་ནན་ཏན་གྱིས་ཡོངས་སུ་ཚོལ་ཞིང་མོས་པར་བྱེད་པ་དང་། འདུས་

པའི་ཆོས་རྣམས་ཡོངས་སུ་སྤོང་བར་བརྩོན་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གསུམ་མངོན་པར་སྒྲུབ་པར་བྱེད་དེ། ཆོས་མཆོག་ཏུ་གྱུར་པ་ཡང་དག་པར་སྟོན་པ་ན་ཚིག་འགལ་བ་མེད་པར་ཆོས་ཀྱི་དོན་རྗེས་སུ་འཐུན་པར་

སྟོན་ཅིང་སེམས་ལ་རྩོད་པ་མེད་པ་དང་། ཚིག་འབྲུ་དང་། ཡི་གེ་ཐམས་ཅད་ལ་མངོན་པར་ཞེན་པ་མེད་པ་དང་། ཆོས་ཐམས་ཅད་ཡོངས་སུ་སྡུད་པར་བྱེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་བཞི་མངོན་པར་སྒྲུབ་པར་

བྱེད་དེ། དོན་ལ་ཡང་དག་པར་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་དང་། དོན་ཇི་ལྟ་བ་བཞིན་དུ་རྗེས་སུ་འཐུན་པར་ཡང་དག་པར་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་དང་། ཆོས་ཀྱི་རྗེས་སུ་འཐུན་པའི་སོ་སོར་རྟོག་པ་ལ་ཡང་དག་པར་སྦྱོར་བའི་དངོས་པོ་མངོན་

པར་སྒྲུབ་པར་བྱེད་པ་དང་། ཐམས་ཅད་ལ་མངོན་པར་ཞོན་པ་མི་སྐྱེད་པར་ཡང་དག་པར་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་བཞི་མངོན་པར་སྒྲུབ་པར་བྱེད་དེ། ཤིན་ཏུ་བརྟན་

Vol. 40 · folio 92a

པའི་ཡི་དམ་གྱིས་བདག་ཉིད་སྲུང་ཞིང་ཇི་སྐད་བསྟན་པ་ཁོ་ན་བཞིན་དུ་སྒྲུབ་པར་བྱེད་པ་དང་། དབང་པོ་དྲུག་ལ་མཁས་ཤིང་ལམ་ལ་གཞོལ་བར་བྱེད་པ་དང་། བསམ་པ་རྣམ་པར་དག་པར་བྱེད་པ་དང་། བག་ཡོད་པ་ལ་གནས་པར་བྱེད་པ་གང་ཡིན་པའོ། །བློ་གྲོས་

མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཀྱི་སྤྱོད་པ་འདིས་ལམ་ཡོངས་སུ་སྡུད་པར་བྱེད་པའི་ཕྱིར་ལམ་གྱི་རྗེས་སུ་འབྲང་བ་ཞེས་བྱ་སྟེ། ཆོས་ཐམས་ཅད་ཀྱི་ངོ་བོ་ཉིད་སྟོང་པ་ཉིད་དུ་བལྟ་བའི་ཕྱིར་དང་། མིང་མེད་པའི་ཕྱིར་དང་། མཚན་མ་མེད་པའི་ཕྱིར་དང་།

སྨོན་པ་མེད་པའི་ཕྱིར་དང་། སྐྱེ་བ་མེད་པའི་ཕྱིར་དང་། མངོན་པར་འདུ་བྱ་བ་མེད་པའི་ཕྱིར་དང་། ཡོངས་སུ་སྐྱོ་བར་གྱུར་པའི་ཕྱིར་དང་། སྤངས་པར་གྱུར་པའི་ཕྱིར་དང་། འགགས་པའི་ཕྱིར་དང་། ངེས་པར་འབྱུང་བའི་ཕྱིར་ཆོས་ཀྱི་སྣང་བ་ཐོབ་པ་ཡིན་ནོ། །སྐྱེ་བ་རྣམས་ཟད་པར་སོ་སོར་རྟོག་

པ་ན་ཡང་སྐྱེ་བ་མེད་པ་ལ་ཡང་སྐྱེ་བའི་འདུ་ཤེས་སྐྱེད་པར་མི་བྱེད་པས་དེའི་ཚེ་སྐྱེ་བ་ལས་ཡང་དག་པར་འདས་ནས་ཆོས་མ་ཡིན་པ་ལས་ངེས་པར་འབྱུང་བ་དང་། རྣམ་པར་དག་པའི་ལམ་ཐོབ་ནས་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །ལམ་རྣམ་པར་དག་པར་གྱུར་པའི་ཕྱིར་འདུ་

ཤེས་ཐམས་ཅད་ལས་ཡང་དག་པར་འདས་ནས་འདུ་ཤེས་མེད་པ་ལ་མི་གནས་པ་དང་། ལམ་གྱི་འདུ་ཤེས་བཀག་ནས་ཆོས་ཀྱི་འདུ་ཤེས་སྤོང་བ་དང་། མ་རིག་པའི་དྲ་བ་ལས་ངེས་པར་འབྱུང་ཞིང་རིག་པས་བསྒོམས་པས་འཐོབ་པར་བྱ་བའི་ཆོས་རྣམས་ཀྱང་རབ་ཏུ་འཐོབ་པར་འགྱུར་རོ། །རིག་

པས་བསྒོམས་པས་ཆོས་གང་ཞིག་འཐོབ་པར་འགྱུར་ཞེ་ན། འདི་ལྟ་སྟེ། རིག་པས་བསྒོམས་པས་འདུ་ཤེས་དང་། ཚོར་བ་འགོག་པ་འཐོབ་པ་དང་། ཆོས་ཐམས་ཅད་ལ་ངེས་པར་མཁས་པ་འཐོབ་པ་དང་། གསང་སྟེ་གསུངས་པ་རྟོགས་པས་ཆོས་ཉིད་ཀྱི་རྗེས་སུ་འབྲང་བར་འགྱུར་བ་འཐོབ་པར་འགྱུར་རོ། །བྱང་

ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདིར་ཞུགས་པར་གྱུར་པའི་ཚེ་ཡུལ་ལ་མི་གནས་ཤིང་མཚན་མས་བསྒྲིབས་པར་མི་འགྱུར་ཏེ། ཆོས་ཐམས་ཅད་ནམ་མཁའ་དང་མཚུངས་པ་དང་། སྐྱེ་བ་ནམ་མཁའ་དང་མཚུངས་པ་དང་། སྐྱེ་བའི་ངོ་བོ་ཉིད་ནམ་མཁའི་ངོ་བོ་ཉིད་དང་

Vol. 40 · folio 92b

མཚུངས་པར་ཤེས་པས་མཚན་མ་ཅུང་ཟད་ཙམ་གྱིས་ཀྱང་བར་ཆད་བྱེད་པར་མི་འགྱུར་རོ། །ལམ་འདི་ཤིན་ཏུ་རྣམ་པར་དག་པས་གནོད་པས་འཇིགས་པ་ཡང་མེད་དོ། །གོ་ཆ་ཆེན་པོ་བགོས་པས་འཛིན་པས་འཆིང་བར་ཡང་མི་འགྱུར་ལ། ཐེག་པ་ཆེན་པོ་ལ་ཞོན་པས་རྨོངས་པར་ཡང་མི་

འགྱུར་རོ། །བསྒྲིབས་པ་རྣམས་སྤངས་པས་ནམ་མཁའ་ལྟ་བུར་གྱུར་ནས་འདིར་ཞུགས་ཏེ། སེམས་ཅན་རྣམས་ཀྱི་སྣང་བ་ཆེན་པོ་བྱེད་པར་འགྱུར་རོ། །བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལམ་ཁྱད་པར་དུ་འཕགས་པ་ཡིན་ཏེ། ཉན་

ཐོས་དང་། རང་སངས་རྒྱས་ཀྱི་སྤྱོད་ཡུལ་མ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཡང་དག་ལམ་བརྒྱད་བསྡུ་བའི་ཕྱིར། །ཆོས་སྤྱོད་རྣམས་ནི་སྟོན་པ་ཡི། །ལམ་འདི་ལ་ནི་གང་གནས་པ། །དེ་ནི་བརྩོན་འགྲུས་ཆེན་པོ་ཡིན། །དགེ་བའི་ཆོས་

ཀྱིས་ལམ་བསྒྲུབས་ཤིང་། །དུས་ནི་ཐམས་ཅད་དག་ཏུ་ཡང་། །མི་དགེའི་ཆོས་ནི་མི་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་རྣལ་འབྱོར་པས། །ནང་དུ་ཚུལ་བཞིན་ཡིད་བྱེད་ཅིང་། །ཕྱི་རོལ་དུ་ནི་འདྲི་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་

སེམས་དཔའ་གང་རྟོག་པ། །དངོས་པོ་ཇི་བཞིན་རབ་ཤེས་ཤིང་། །ཚུལ་བཞིན་ཆོས་བཞིན་གང་གནས་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་སྐྱབས་བྱེད་པས། །ནང་དུ་རྗེས་སུ་རྟོག་བྱེད་ཅིང་། །ཕྱི་རོལ་དུ་ནི་ཞེན་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་

ཆུབ་སེམས་དཔའ་འཇིགས་མེད་པས། །བདག་ཉིད་རྟོག་མེད་ཡིད་ཆེས་ཤིང་། །གཞན་དག་ཡིད་ཆེས་གནས་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཡིད་བྱེད་པས། །བྱ་བའི་ལས་རྣམས་དག་བྱེད་ཅིང་། །ལས་རྣམས་ལ་ནི་འཛིན་བྱེད་པ། །སྤྱོད་པ་འདིས་

ནི་ལམ་སྡུད་འགྱུར། །བྱང་ཆུབ་སེམས་དཔའ་འཆིང་མེད་པས། །རྟག་ཏུ་སྡུག་བསྔལ་ཉེར་ལེན་ཤེས། །ཉེར་ལེན་སྡུག་བསྔལ་མེད་ཚོལ་བ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་རབ་ཤེས་པས། །འདུས་པ་སྤྱོད་པ་སྤྱོད་སྒྲུབ་ཅིང་། །འདུ་འཕྲོད་དག་ནི་གང་

Vol. 40 · folio 93a

སྤོང་བ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་དོན་སེམས་པས། །དོན་གྱི་རྗེས་སུ་རབ་རྟོགས་ཤིང་། །རྩོད་པ་མེད་པར་གང་སྟོན་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་བློ་ལྡན་པས། །ཚིག་འབྲུ་ཡི་གེ་ཞེན་མེད་པར། །

ཆོས་རྣམས་ཐམས་ཅད་སྡུད་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཆོས་སྤྱོད་པས། །ཆོས་ཀྱི་རྗེས་སུ་འཐུན་བྱེད་ཅིང་། །དོན་གྱི་རྗེས་སུ་འཐུན་གྱུར་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ལམ་འབྲང་བས། །བརྟན་པའི་ཡི་

དམ་ཡང་དག་གནས། །ཇི་སྐད་བསྟན་བཞིན་གང་སྒྲུབ་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ལམ་དག་པས། །ཡིད་ལ་མོས་པ་རབ་སྦྱངས་ནས། །ཆོས་ལ་གནས་ཤིང་བག་ཡོད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་

ཐམས་ཅད་དུ། །སྤྱོད་པ་འདི་རྣམས་རབ་བསྒྲུབས་ནས། །ལུས་དང་སེམས་ནི་བདེ་ཐོབ་ན། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཡང་དག་དྲན། །རྣམ་དག་ལམ་ལ་གང་གནས་པ། །ཆོས་རྣམས་སྟོང་ཞིང་མཚན་མེད་པར། །ཐམས་ཅད་རབ་ཏུ་རྟོགས་

པར་འགྱུར། །བྱང་ཆུབ་སེམས་དཔའ་རབ་བརྟགས་ན། །སྨོན་ལམ་རྣམ་པར་དག་བྱེད་ཅིང་། །སྨོན་ལམ་མེད་ལ་མི་གནས་པས། །མཚན་མ་རྣམས་ནི་སྤོང་བར་འགྱུར། །བྱང་ཆུབ་སེམས་དཔའ་ཚུལ་བཞིན་དུ། །དོན་ཚུལ་མཉམ་པར་རབ་བརྟགས་ན། །ཆོས་རྣམས་སྐྱེ་བར་མི་

འགྱུར་བས། །ཐེ་ཚོམ་ཅུང་ཟད་ཡོང་མི་འགྱུར། །བྱང་ཆུབ་སེམས་དཔའ་བློ་ལྡན་དག །ཐམས་ཅད་ཆོས་ནི་རབ་བརྟགས་ན། །སྐྱེ་ཞིང་ཞི་བར་འགྱུར་བའི་ཕྱིར། །གསལ་བར་མཐོང་ནས་གཞོལ་བར་འགྱུར། །བྱང་ཆུབ་སེམས་དཔའ་ཆོས་རྟོགས་པས། །ཚུལ་བཞིན་ཆོས་སྐྱེ་མཐོང་བས་

ན། །སྐྱེ་བ་ལས་ནི་སྐྱེ་མི་མཐོང་། །ཟད་པ་ལས་ནི་ཟད་མི་མཐོང་། །བྱང་ཆུབ་སེམས་དཔའ་བརྩོན་འགྲུས་ལྡན། །དེ་ལྟར་སོ་སོར་རྟོག་བྱེད་ན། །ཆོས་མིན་པ་ལས་ངེས་འབྱུང་ཞིང་། །ཡང་དག་གནས་ལ་གནས་པར་འགྱུར། །བྱང་ཆུབ་སེམས་དཔའ་བློ་དམ་པས། །ལམ་འདི་རྣམ་

Vol. 40 · folio 93b

པར་དག་པས་ན། །མྱུར་དུ་བདེ་གནས་ཕྱིན་སེམས་པ། །བླ་མེད་བཟོད་པ་འགྲུབ་པར་འགྱུར། །བྱང་ཆུབ་སེམས་དཔའ་བློ་དམ་པས། །ཚུལ་བཞིན་ཆོས་རྣམས་རྟོག་བྱེད་ཅིང་། །འདུ་ཤེས་རྣམས་ལས་གང་འདས་པ། །འདུ་ཤེས་མེད་ལ་རྟག་གནས་འགྱུར། །བྱང་ཆུབ་སེམས་

དཔའ་བློ་དམ་པས། །ལམ་འདི་རབ་སྦྱོར་འགྱུར་རོ་ཞེས། །ལམ་གྱི་འདུ་ཤེས་གང་སྤོང་བ། །ཆོས་ཀྱི་འདུ་ཤེས་ལ་མི་གནས། །བྱང་ཆུབ་སེམས་དཔའ་བློ་དམ་པས། །ལམ་འདི་རབ་ཏུ་སྤྱོད་པའི་ཕྱིར། །མ་རིག་དྲ་བ་དྲལ་སེམས་པ། །ཆོས་ཀྱི་སྣང་ཆེན་ཐོབ་པར་འགྱུར། །བྱང་ཆུབ་

སེམས་དཔའ་བློ་དམ་པས། །རིག་པས་སྒོམ་པར་བྱེད་པས་ནི། །སེམས་ཅན་རྣམས་ལ་སྟོན་བྱེད་པས། །དེས་ན་རབ་ཏུ་གཞོལ་བར་འགྱུར། །བྱང་ཆུབ་སེམས་དཔའ་རིག་སྒོམ་པ། །ཆོས་རྣམས་ཐམས་ཅད་རབ་རྟོགས་ཕྱིར། །དོན་ཟབ་ལ་ནི་ངེས་འགྱུར་ཞིང་། །ཐབས་མཁས་

ཆེན་པོ་ཐོབ་པར་འགྱུར། །བྱང་ཆུབ་སེམས་དཔའ་རིག་སྒོམ་པ། །ཐབས་ཀྱིས་འདུ་ཤེས་ཀུན་སྤངས་བས། །གསང་བའི་ཆོས་ཀྱི་རྗེས་འབྲང་ཞིང་། །ངེས་པའི་དོན་ནི་རྟོགས་པར་འགྱུར། །བྱང་ཆུབ་སེམས་དཔའ་བློ་དམ་པས། །ཆོས་ཀྱི་སྣང་བ་ཆེན་པོ་ཡིས། །འདུ་ཤེས་ཚོར་བ་འགོག་བྱེད་ན། །དེས་ན་

ཡང་དག་གཞོལ་བར་འགྱུར། །བྱང་ཆུབ་སེམས་དཔའ་བློ་དམ་པས། །ལམ་འདི་ལ་ནི་མི་གནས་ཕྱིར། །ལམ་ལ་ཡང་དག་གཞོལ་བར་འགྱུར། །བྱང་ཆུབ་སེམས་དཔའ་འཇིགས་མེད་པས། །ཆོས་རྣམས་དག་ནི་ཐམས་ཅད་ཀྱང་། །ནམ་མཁའ་དག་པ་ལྟར་ཤེས་པས། །མཚན་མ་རྣམས་ཀྱིས་སྒྲིབ་མི་

འགྱུར། །བྱང་ཆུབ་སེམས་དཔའ་ཆོས་རྣམས་ཀྱི། །རང་བཞིན་ནམ་མཁའ་འདྲར་ཤེས་ཏེ། །ཆོས་རྣམས་ནམ་མཁའ་འདྲ་བའི་ཕྱིར། །རྣམ་དག་དྲི་མ་མེད་པར་ཤེས། །བྱང་ཆུབ་སེམས་དཔའ་དེ་ལྟ་བུར། །གནས་པས་མཚན་མ་སྒྲིབ་པར་འགྱུར། །མྱུར་དུ་སེམས་ཅན་རྣམས་ལ་

ནི། །གདམས་ངག་རྗེས་སུ་སྟོན་པར་འགྱུར། །བྱང་ཆུབ་སེམས་དཔའ་བློ་དམ་པའི། །ལམ་རྣམས་ཐམས་ཅད་རྣམ་དག་པས། །ལམ་ལ་བར་ཆད་ཅི་ཡང་མེད། །ཐོགས་པ་མེད་པར་གཞོལ་བར་འགྱུར། །རྣམ་པར་དག་པའི་ལམ་འདི་ནི། །བྱང་ཆུབ་ཆེན་པོར་མྱུར་དུ་འགྲོ། །འདུས་མ་

Vol. 40 · folio 94a

བྱས་ནི་མངོན་དུ་བྱེད། །མཉམ་པ་ཉིད་དུ་གཞོལ་བར་འགྱུར། །བྱང་ཆུབ་སེམས་དཔའ་གོ་ཆེན་པོ། །ཐེག་ཆེན་ལམ་ནི་ཆེན་པོ་དག །ནམ་མཁའ་འདྲ་བར་ཐོགས་མེད་ཅིང་། །རྣམ་པར་དག་པར་གཞོལ་བར་བྱ། །ཐེག་དང་ལམ་འདི་གང་སྐྱེས་པ། །ནམ་མཁའ་བསྐྱེད་

པ་ལྟ་བུར་ནི། །མཚན་མ་མང་པོ་རབ་སྤངས་ནས། །མཚན་མ་མེད་པས་བགྲོད་པར་བྱ། །ཐེག་པ་ཆེན་པོ་མཉམ་པའི་ཐེག །རྒྱ་ཆེན་ནམ་མཁའ་འདྲ་བས་ན། །ཤིན་ཏུ་རྣམ་དག་ལམ་འདི་ལ། །ཐེག་པ་འདིས་ནི་བགྲོད་པར་བྱ། །བྱང་ཆུབ་སེམས་དཔའ་ཐམས་ཅད་ཀྱང་། །

ཆོས་འདི་ལས་ནི་གུས་བྱེད་པས། །སེམས་ཅན་རྣམས་ནི་ཀུན་གྱི་ཕྱིར། །དཔའ་བོས་རབ་ཏུ་བགྲོད་པར་བྱ། །བྱང་ཆུབ་ཆེན་པོར་བགྲོད་བྱེད་ཅིང་། །ཁྱད་པར་ལམ་འདིར་གང་གནས་པ། །ཐེག་པ་པ་གཉིས་ལ་སོགས་པས། །བགྲོད་པར་བྱ་བའི་ཡུལ་མ་ཡིན། །བྱང་ཆུབ་སེམས་

དཔའ་ཡང་དག་དྲན། །ལམ་འདི་དག་པར་གང་བྱེད་པ། །རྣམ་པར་དག་པའི་ལམ་འདི་ཡིས། །བླ་མེད་མཆོག་ཏུ་བགྲོད་པར་འགྱུར། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དེ་ལྟར་ཡང་དག་པར་ཞུགས་ཤིང་གཞོལ་བར་གྱུར་པའི་ཚེ་དྲན་པ་ཉེ་

བར་གཞག་པ་དང་། ཡང་དག་པར་སྤོང་བ་དང་། །དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། རྫུ་འཕྲུལ་གྱི་རྐང་པ་དང་། །ཞི་གནས་དང་། ལྷག་མཐོང་ཚད་མེད་པ་རྣམས་ཡང་དག་པར་ཁོང་དུ་

ཆུད་པས་ཡོན་ཏན་ཁྱད་པར་དུ་འཕགས་པ་ཚད་མེད་པས་བརྒྱན་ནས་འཇིག་རྟེན་པ་རྣམས་རབ་ཏུ་གདུལ་བའི་ཕྱིར་དང་། གོ་ཆ་ཆེན་པོ་བགོས་ནས་ཁམས་གསུམ་ལས་ངེས་པར་འབྱུང་བར་བྱ་བའི་ཕྱིར་དང་། ཐེག་པ་ཆེན་པོ་ལ་ཞོན་ནས་ལྷ་དང་། མི་དང་། ལྷ་མ་ཡིན་རྣམས་ཡོངས་

སུ་གཟུང་བར་བྱ་བའི་ཕྱིར་ལམ་འདི་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་བགོས་ཏེ། ཐེག་པ་ཆེན་པོ་ལ་ཞོན་ནས་ལམ་འདི་ལ་

Vol. 40 · folio 94b

གནས་པའི་ཚེ་གལ་ཏེ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱིས་སེམས་ཅན་ཀུན་ལ་ཁྱབ་པར་མི་བྱེད་དམ། སེམས་ཅན་རྣམས་ལ་བདག་དང་འདྲ་བར་ཕངས་པར་མི་བྱེད་ན་ནི་དེ་ལྟ་བུའི་གོ་ཆ་དང་། ཐེག་པ་ཆེན་པོའི་ལམ་ཆེན་པོ་འདི་དག་ནི་ས་ཆེན་པོས་ཀྱང་

ཐེག་པར་མི་འགྱུར་ལ། སེམས་ཅན་ཐམས་ཅད་ཀྱིས་ཀྱང་སྟོན་པར་མི་འགྱུར་བ་ཞིག་ན་འདི་ལྟར་སེམས་ཅན་རྣམས་ལ་སྙིང་བརྩེ་ཞིང་ཕན་གདགས་པའི་ཕྱིར་གོ་ཆ་ཆེན་པོ་བགོས་ཏེ། ཐེག་པ་ཆེན་པོ་ལ་ཞོན་ནས་ལམ་འདི་ལ་གནས་པ་ཡིན་པས་གོ་ཆ་དང་། ཐེག་པ་ཆེན་པོའི་ལམ་

ཆེན་པོ་འདི་དག་ཏུ་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་ཀྱིས་ཀྱང་བགྲོད་པར་མི་ནུས་ལ། བྱིས་པ་སོ་སོའི་སྐྱེ་བོ་འཇིག་རྟེན་ལ་མངོན་པར་ཞེན་པ་དང་། འཇིག་རྟེན་ན་གནས་པར་མོས་པ་ཐམས་ཅད་ཀྱིས་ཀྱང་མཐོང་བར་མི་ནུས་པ་ཡིན་ནོ། །གཞན་

ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་གོ་ཆ་ཆེན་པོ་བགོས་པ་ཡིན་པས་འདི་ལྟར་གོ་ཆའི་མཐུས་ས་དང་། ཆུ་དང་། མེ་དང་། རླུང་གི་ཁམས་རྣམས་བྱིན་གྱིས་བརླབས་པས་སའི་ཁམས་འདི་གཡོ་ཞིང་འཁྲུག་པ་མེད་པ་དང་།

སེམས་ཅན་ཐམས་ཅད་འཇིགས་པ་མི་སྐྱེ་བ་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་རྣམས་ཀྱང་དེ་དག་གི་རྗེས་སུ་ཅི་རིགས་པར་བྱ་བ་རྣམས་བྱེད་པ་ཡིན་ནོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་པོ་སེམས་བསྐྱེད་དེ་གོ་ཆ་བགོས་

ནས་དེང་གོ་ཆ་ཆེན་པོ་འདི་བགོས་ཏེ། ཐེག་པ་ཆེན་པོ་འདི་ལ་ཞོན་ནས་རྣམ་པར་དག་པའི་ལམ་གྱིས་སྐྱེ་བ་གཅིག་གིས་ཐོགས་པ་ལ་གཞོལ་ཞིང་བྱང་ཆུབ་ཀྱི་ཤིང་དྲུང་དུ་བགྲོད་པ་དང་། བྱང་ཆུབ་ཀྱི་སྙིང་པོ་ལ་ཞུགས་པར་གྱུར་པའི་བར་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་

རྡོ་རྗེ་ལས་མངོན་པར་གྲུབ་པའི་སའི་དཀྱིལ་འཁོར་ཤིན་ཏུ་བརྟན་པ་འདི་གལ་ཏེ་བྱིན་གྱིས་མ་བརླབས་ན་འཁྲུག་ཅིང་གཡོ་བར་འགྱུར་ཏེ། ཤིན་ཏུ་བརྟན་པའི་རྡོ་རྗེ་ལས་མངོན་པར་གྲུབ་པ་ཡིན་ཡང་གོ་ཆ་ཆེན་པོ་དང་། ཐེག་པ་ཆེན་པོའི་ལམ་ཆེན་པོ་འདི་འདེགས་པའི་འོས་སུ་མི་འགྱུར་རོ། །

Vol. 40 · folio 95a

གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྔོན་གྱི་སྨོན་ལམ་གྱིས་སེམས་ཅན་རྣམས་ལ་བྱམས་པ་དང་། སྙིང་རྗེ་ཆེན་པོ་བསྐྱེད་པ་དང་། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རྣམས་ཐབས་ཅིག་ཏུ་བསྔགས་པ་བརྗོད་ནས་

གལ་ཏེ་རྡོ་རྗེ་ཆེན་པོའི་དཀྱིལ་འཁོར་ཆེན་པོ་དང་། རི་རབ་དང་། རིན་པོ་ཆེའི་རི་ཐམས་ཅད་དང་། དེ་ལས་གཞན་པའི་རིའི་རྒྱལ་པོ་རྣམས་བྱིན་གྱིས་བརླབས་པར་མ་གྱུར་ན་གོ་ཆ་ཆེན་པོ་དང་། ཐེག་པ་ཆེན་པོའི་ལམ་ཆེན་པོ་འདི་དག་འདེགས་པའི་འོས་སུ་མི་འགྱུར་རོ། །གཞན་ཡང་བྱང་

ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྔོན་གྱི་སྨོན་ལམ་གྱི་མཐུའི་ཕྱིར་དང་། དེ་བཞིན་གཤེགས་པ་རྣམས་ཀྱི་སྔོན་གྱི་སྨོན་ལམ་གྱི་མཐུས་བྱིན་གྱིས་བརླབས་པའི་ཕྱིར་དང་། སེམས་ཅན་རྣམས་ལ་རྣམ་པར་མི་འཚེ་བའི་ཕྱིར་དང་། གནོད་པ་མི་བྱེད་པའི་ཕྱིར་དང་། མཉམ་

པར་མི་བྱེད་པའི་ཕྱིར་དང་། སྐྲག་པར་མི་བྱེད་པའི་ཕྱིར་དང་། འཁོན་དུ་མི་འཛིན་པའི་ཕྱིར་དང་། མནར་བར་མི་བྱེད་པའི་ཕྱིར་དང་། ཉོན་མོངས་པར་མི་བྱེད་པའི་ཕྱིར་དང་། སེམས་ཅན་རྣམས་བདེ་བ་ཐོབ་པར་བྱ་བའི་ཕྱིར་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་འདི་

ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་བགོས་པ་ན་ཤེས་རབ་ཀྱི་གོ་ཆ་བགོས་ནས་ཤེས་རབ་ཀྱི་མཚོན་ཆ་ཐོགས་ཏེ། ཤེས་རབ་ཆེན་པོས་ཡོངས་

སུ་སྔོ་བར་བྱེད་དོ། །ཡོངས་སུ་སྔོ་བའི་ཐེག་པ་ལ་ཞོན་ནས། ཤེས་རབ་ཀྱི་སྣང་བ་སྐྱེད་པར་བྱེད་དོ། །སྣང་བའི་ལམ་ལ་གནས་ནས་ཤེས་རབ་ཀྱི་སྣང་བའི་མིག་གིས་ཆོས་རྣམས་སོ་སོར་བརྟགས་ཏེ། ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བར་བྱེད་དོ། །ཐམས་ཅད་མཁྱེན་པའི་

ཡེ་ཤེས་དང་། སེམས་ཅན་རྣམས་ཡོངས་སུ་བསྡུ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་རྣམས་སྒོམ་པར་བྱེད་དེ།

Vol. 40 · folio 95b

ཐམས་ཅད་ཀྱང་ཤེས་རབ་སྔོན་དུ་འགྲོ་ཞིང་ཤེས་རབ་ཀྱིས་མངོན་པར་བསྒྲུབ་པ་དང་། ཤེས་རབ་ཀྱིས་ཡོངས་སུ་བསྡུས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་

མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤེས་རབ་རྣམ་པ་སྣ་ཚོགས་ཐམས་ཅད་དུ་ཁྱབ་ཅིང་སངས་རྒྱས་ཀྱི་ཆོས་ཚད་མ་མཆིས་པ་རྣམས་ཡོངས་སུ་སྡུད་ཅིང་མངོན་པར་སྒྲུབ་པར་བགྱིད་པ་ནི་ཤིན་ཏུ་ངོ་

མཚར་ཆེ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་

ཤེས་རབ་རྣམ་པ་སྣ་ཚོགས་ཀྱིས་ཀུན་ཏུ་ཁྱབ་ཅིང་ཆོས་ཐམས་ཅད་ཡོངས་སུ་བསྡུས་ཏེ། གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་ཆེན་པོ་འདི་ལ་གནས་ནས་ཐམས་ཅད་ཀྱང་ཤེས་རབ་སྔོན་དུ་འགྲོ་བས་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་གལ་ཏེ་ཤེས་རབ་དང་ལྡན་

ཡང་ཤེས་རབ་སྔོན་དུ་འགྲོ་བ་མེད་ན་ལམ་འདི་ལ་རབ་ཏུ་གཞོལ་བར་མི་འགྱུར་གྱི། གལ་ཏེ་ཤེས་རབ་དང་ལྡན་ཞིང་ཤེས་རབ་སྔོན་དུ་འགྲོ་བས་ཐམས་ཅད་དུ་ཁྱབ་པར་གྱུར་ན་རྗེས་སུ་འཇུག་པ་དང་། རྗེས་སུ་སྤྱོད་པ་དང་། ཤེས་རབ་ཀྱིས་ཡོངས་སུ་བསྡུས་ཤིང་། ཤེས་རབ་ཀྱིས་རབ་ཏུ་

བསྡམས་པར་གྱུར་ནས་གདོད་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་པ་དང་། ལམ་ཆེན་པོ་འདི་ལ་གནས་པ་ཞེས་བྱ་སྟེ། རབ་ཏུ་བདེ་བའི་ཆོས་ཀྱིས་འཇིག་རྟེན་ལ་ཕན་འདོགས་ཤིང་ཤེས་རབ་ཀྱི་མིག་འབྱེད་པར་བྱེད་དོ། །ཤེས་རབ་ཀྱི་མིག་གིས་སོ་སོར་བརྟགས་ནས་ཤེས་རབ་ཀྱིས་

ལུས་གསལ་བར་གྱུར་པས་འོད་ཟེར་ཆེན་པོ་བཀྱེ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དེ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བགོ་བར་བྱ་བའི་གོ་ཆ་དང་། གོ་ཆའི་བཀོད་པ་དང་། བཞོན་པར་བྱ་བའི་

Vol. 40 · folio 96a

ཐེག་པ་ཆེན་པོ་དང་། ཐེག་པ་ཆེན་པོའི་བཀོད་པ་དང་། བགྲོད་པར་བྱ་བའི་ལམ་ཆེན་པོ་དང་། ལམ་ཆེན་པོའི་བཀོད་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་བ་ཡིན་ནོ། །བློ་གྲོས་མཐའ་ཡས་སྐྱེས་བུ་དམ་པ་གང་གོ་

ཆའི་བཀོད་པ་དང་། ཐེག་པ་ཆེན་པོའི་བཀོད་པ་དང་། ལམ་ཆེན་པོའི་བཀོད་པ་དང་། ཡོན་ཏན་རྣམ་པ་སྣ་ཚོགས་ཐམས་ཅད་ཀྱིས་རབ་ཏུ་བརྒྱན་པར་གྱུར་པ་གང་ཡིན་པ་དེ་དག་ངས་ཡོངས་སུ་རྫོགས་པར་བརྗོད་པར་གྱུར་ན་བསྐལ་པ་ཚད་མེད་པ་རྣམས་སུ་བརྗོད་ཀྱང་མཐར་ཐུག་

པར་མི་འགྱུར་མོད་ཀྱི། འོན་ཀྱང་ཁྱེད་ལ་སོགས་པས་རབ་ཏུ་རྟོགས་པར་བྱ་བའི་ཕྱིར་དང་། མ་འོངས་པའི་སྐྱེས་བུ་དམ་པ་རྣམས་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་དང་། ལམ་ཆེན་པོའི་བཀོད་པ་དང་། ཡོན་ཏན་དཔག་ཏུ་མེད་པའི་ཚོགས་ཀྱི་བཀོད་པ་ཐོབ་

པར་བྱ་བའི་ཕྱིར་ངས་དེང་འདིར་ཕྱོགས་ཅུང་ཟད་ཙམ་ཞིག་མདོར་བསྟན་པར་བྱ་སྟེ། སྐྱེས་བུ་དམ་པ་དེ་དག་གལ་ཏེ་ངས་བསྟན་པའི་ཆོས་ཐོས་པར་གྱུར་ན་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་ཆེན་པོ་འདི་ལ་གནས་པར་འགྱུར་ཞིང་ཡོན་ཏན་གྱིས་རབ་ཏུ་བརྒྱན་ནས་རབ་ཏུ་

གཞོལ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །ངས་ནི་ཡང་དག་སྤོང་བ་དང་། །དྲན་པ་ཉེར་གཞག་རྣམ་བཞི་དང་། །ཐབས་མཁས་ཐམས་ཅད་བཤད་པས་ན། །དེ་ཕྱིར་བག་ཡོད་བཅས་པར་འགྱུར། །ཡང་དག་དྲན་པ་ཕུན་

ཚོགས་ཤིང་། །ཆོས་མཁས་མཚུངས་པར་ལྡན་པ་དང་། །རབ་བརྩོན་ངེས་པར་འབྱུང་བྱེད་པས། །དེ་ཕྱིར་བག་ཡོད་བཅས་པར་འགྱུར། །དབང་པོ་སྟོབས་དང་བྱང་ཆུབ་ཕྱོགས། །གོ་བགོས་ཐེག་ཆེན་བཞོན་བྱས་ཏེ། །འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་

དཔའ་གཞོལ་བར་བྱ། །བསམ་གཏན་ཟིལ་གནོན་རྣམ་ཐར་དང་། །ཏིང་འཛིན་སྙོམས་པར་རབ་ཞུགས་ཏེ། །འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །སྙིང་རྗེ་བྱམས་དང་དགའ་བཏང་སྙོམས། །གོ་བགོས་ཐེག་ཆེན་བཞོན་བྱས་ཏེ། །འདི་

Vol. 40 · folio 96b

ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །ཞི་གནས་ལྷག་མཐོང་རྫུ་འཕྲུལ་རྐང་། །ཆོ་འཕྲུལ་དག་ནི་རྫོགས་བྱས་ཏེ། །འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །ཚད་མེད་ཡོན་ཏན་རྣམས་དང་ནི། །གོ་བགོས་

ཐེག་ཆེན་བཞོན་བྱས་ཏེ། །ལམ་ལ་ངལ་བ་མེད་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །བརྩོན་འགྲུས་དང་ནི་བག་ཡོད་དང་། །གོ་བགོས་ཐེག་ཆེན་བཞོན་བྱས་ཏེ། །དྲན་ནས་དེ་དག་ཤེས་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །སྣང་བ་གོ་ཆ་ཆེན་པོ་

ཡིས། །འཇིག་རྟེན་དག་ནི་རབ་བཏུལ་ཏེ། །གོ་ཆ་འདི་ནི་བགོ་བྱས་པ། །འདི་ནི་བློ་ལྡན་ཞེས་བྱའོ། །ཐམས་ཅད་མཁྱེན་ལ་ཡང་དག་ཕྱོགས། །ཁམས་གསུམ་ལས་ནི་ངེས་འབྱུང་ཕྱིར། །ཐེག་ཆེན་འདི་ལ་གང་ཞོན་པ། །འདི་ནི་བློ་ལྡན་ཞེས་བྱའོ། །ལམ་ཆེན་རྣམ་པར་དག་པའི་ལམ། །

ལྷ་དང་མི་དང་ལྷ་མ་ཡིན། །འཇིག་རྟེན་ཟིལ་གྱིས་མནན་པ་ནི། །ཀུན་ཏུ་གྲགས་པ་ཞེས་བྱའོ། །འདི་འདྲའི་བྱང་ཆུབ་སེམས་དཔའ་ནི། །སེམས་ཅན་རྣམས་ནི་ཀུན་གྱི་ཕྱིར། །དུས་རྣམས་ཐམས་ཅད་དག་ཏུ་ཡང་། །གོ་ཆ་བརྩོན་འགྲུས་བགོ་བར་བྱེད། །གལ་ཏེ་བྱང་ཆུབ་སེམས་དཔའ་

རྣམས། །བྱམས་དང་སྙིང་རྗེ་དགའ་བ་དང་། །བཏང་སྙོམས་ཆེན་པོ་མི་སྒོམ་ན། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་དཔའ་རྣམས། །སེམས་ཅན་རྣམས་ནི་དེ་དག་ལ། །དུས་རིག་ཕན་འདོགས་མི་བྱེད་ན། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་

ཆུབ་སེམས་དཔའ་རྣམས། །སྙིང་རྗེ་ཐེག་ཆེན་མི་ཞོན་ན། །རི་དང་རྒྱ་མཚོ་ཆེན་པོ་རྣམས། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་དཔའ་རྣམས། །བྱམས་པས་སེམས་ཅན་དྲན་བྱེད་ཅིང་། །ཐེག་ཆེན་འདི་ལ་མི་ཞོན་ན། །སེམས་ཅན་གང་ཡང་བསྟེན་མི་འགྱུར། །

གལ་ཏེ་གོ་ཆ་འདི་བགོས་ནས། །བྱམས་འོད་གསལ་བར་མ་བྱས་ན། །གོ་ཆ་ཆེན་པོ་དེ་དག་ལ། །སེམས་ཅན་གང་ཡང་བསྟེན་མི་འགྱུར། །གོ་ཆ་འདི་ནི་རབ་བགོས་ནས། །ཡོན་ཏན་རྒྱ་མཚོ་དཔག་མེད་ཀྱིས། །འབྱུང་ཆེན་ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་

Vol. 40 · folio 97a

ཡིན། །སེམས་ཅན་ཡོངས་སུ་བསྡུ་བའི་ཕྱིར། །སྙིང་རྗེའི་འོད་ཀྱིས་ཀུན་ཁྱབ་ཅིང་། །འབྱུང་ཆེན་ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་ཡིན། །སེམས་ཅན་ཡོངས་སུ་བསྡུ་བའི་ཕྱིར། །བྱང་ཆུབ་ཆེན་པོ་མངོན་བསྒྲུབས་ནས། །འབྱུང་ཆེན་

ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་ཡིན། །སེམས་ཅན་མི་སྨོད་གནོད་མི་བྱེད། །གོ་ཆ་ཆེན་པོ་འདི་བགོས་ནས། །ཐེག་ཆེན་གྱིས་ནི་ངེས་འབྱུང་བ། །འདི་ནི་བློ་ལྡན་ཞེས་བྱའོ། །ཐབས་ལ་མཁས་པ་ཆེན་པོ་ཡིས། །ཐམས་ཅད་བྱིན་གྱིས་རབ་བརླབས་ནས། །

བླ་ན་མེད་པར་ངེས་འབྱུང་བ། །འདི་ནི་བློ་ལྡན་ཞེས་བྱའོ། །དེས་ནས་ནི་ཆེན་པོ་འདི། །མི་འབྱིང་རབ་ཏུ་མི་གཡོ་ཞིང་། །ཆུ་དང་མེ་དང་རླུང་གི་ཁམས། །བྱ་བ་དག་ནི་བྱེད་པ་ཡིན། །བྱང་ཆུབ་སེམས་དཔའ་ཆེན་པོ་རྣམས། །གོ་ཆ་དཔག་མེད་བགོས་ནས་ནི། །ཐེག་ཆེན་འདི་ལ་བཞོན་བྱས་

ནས། །ལམ་གྱིས་རབ་ཏུ་གཞོལ་བར་བྱེད། །ཚེ་གཅིག་ཐོགས་པ་མངོན་བསྒྲུབས་ཏེ། །ཐ་མའི་ལུས་ནི་ཐོབ་གྱུར་ནས། །བྱང་ཆུབ་ཤིང་རྒྱལ་དྲུང་སོང་སྟེ། །རབ་བརྟན་ས་ལ་འདུག་ནས་ནི། །བྱང་ཆུབ་སྙིང་པོ་དེ་དག་ཏུ། །རྡོ་རྗེ་བཞིན་དུ་རབ་གནས་ནས། །ལུས་དང་སེམས་ནི་ངལ་མེད་པར། །

ཐམས་ཅད་མཁྱེན་པ་མངོན་དུ་བྱེད། །བྱང་ཆུབ་སེམས་དཔའ་འཇིགས་མེད་པས། །གལ་ཏེ་བྱིན་གྱིས་མ་བརླབས་ན། །ས་ཆེན་པོ་དག་གཡོ་འགྱུར་ཞིང་། །ཞི་གནས་ཕྱིར་ཡང་ཆགས་མི་འགྱུར། །ས་ཆེན་ཁམས་ནི་ཐམས་ཅད་ཀུན། །གལ་ཏེ་བྱིན་གྱིས་མ་བརླབས་ན། །རྡོ་རྗེ་ལས་ནི་གྲུབ་

གྱུར་ཀྱང་། །མི་གཡོ་མི་འཁྲུག་གང་ཡང་མེད། །བྱང་ཆུབ་སེམས་དཔའ་འདས་པའི་དུས། །སྨོན་ལམ་ཆེན་པོས་རབ་བརྒྱན་པས། །སེམས་ཅན་རྣམས་ནི་དེ་དག་ལ། །བྱམས་པ་ཆེན་པོས་དྲན་པར་བྱེད། །མངོན་སུམ་ཕྱོགས་བཅུའི་ཞིང་ཁམས་ན། །སངས་རྒྱས་དག་ནི་ཐམས་ཅད་

མཁྱེན། །རྐང་གཉིས་གཙོ་བོ་གང་བཞུགས་པ། །ཐམས་ཅད་སྲུང་ཞིང་དགོངས་པར་འགྱུར། །གལ་ཏེ་དེ་ལས་གཞན་པའི་རི། །རི་རབ་རིན་པོ་ཆེ་ཡི་རི། །རྡོ་རྗེའི་དཀྱིལ་འཁོར་ཁོར་ཡུག་རི། །ཤིན་ཏུ་བརྟན་པར་གང་གནས་པ། །བྱང་ཆུབ་སེམས་དཔའ་བློ་ལྡན་དག །གལ་ཏེ་

Vol. 40 · folio 97b

བྱིན་གྱིས་མ་བརླབས་ན། །གོ་ཆ་ཆེན་པོ་འདི་བགོས་པ། །འདེག་པའི་འོས་སུ་མི་འགྱུར་རོ། །སངས་རྒྱས་བྱང་ཆུབ་སེམས་དཔའ་རྣམས། །རྫུ་འཕྲུལ་སྟོབས་ཀྱིས་བྱིན་བརླབས་པ། །སེམས་ཅན་དང་ནི་ས་ཆེན་པོ། །བརྟེན་འདེག་འོས་སུ་གྱུར་པ་ཡིན། །གོ་ཆ་ཆེན་པོ་གང་བགོས་

པ། །སེམས་ཅན་འཚེ་བ་མི་བྱེད་པས། །གོ་ཆ་དག་ནི་གོང་ན་མེད། །ཐེག་པ་དག་གིས་གཞོལ་བར་བྱ། །གོ་ཆ་ཆེན་པོ་གང་བགོས་པ། །སེམས་ཅན་གནོད་པ་མི་བྱེད་པས། །གོ་ཆ་དག་ནི་བསམ་མི་ཁྱབ། །ཐེག་པ་དག་གིས་གཞོལ་བར་བྱ། །གོ་ཆ་ཆེན་པོ་གང་བགོས་པ། །

སེམས་ཅན་དག་ལ་འཁོན་མི་འཛིན། །སེམས་ཅན་ནད་ནི་བསལ་བའི་ཕྱིར། །ཐེག་པ་དག་གིས་གཞོལ་བར་བྱ། །ལམ་མཆོག་དག་ནི་ཕུན་ཚོགས་པ། །བླ་མེད་མཆོག་ཏུ་སྦྱོང་བས་ན། །མི་འཚེ་འཁོན་འཛིན་མེད་པ་དང་། །གནོད་མི་བྱེད་པ་ཡང་དག་གནས། །ཤེས་རབ་ཆེན་

པོའི་གོ་བགོས་ཏེ། །ཤེས་རབ་བསྔོ་བའི་ཐེག་ཞོན་པ། །གོ་ཆ་འཛིན་པར་མི་འགྱུར་བས། །བསྔོ་བའི་ནང་ན་མཆོག་ཏུ་འགྱུར། །བྱང་ཆུབ་སེམས་དཔའ་སྐྱབས་བྱེད་པས། །ཤེས་རབ་སྣང་བ་ལ་གནས་ཏེ། །ཤེས་རབ་ཆོས་རྣམས་རབ་བརྟགས་ནས། །བླ་ན་མེད་པར་གཞོལ་བར་

འགྱུར། །བྱང་ཆུབ་སེམས་དཔའ་ལམ་མཆོག་དང་། །གོ་ཆ་དང་ནི་ཐེག་ཆེན་དག །ཤེས་རབ་འོད་ལས་བྱུང་བས་ན། །དེ་ཕྱིར་སེམས་ནི་རྣམ་པར་དག །ཕ་རོལ་ཕྱིན་ལ་རབ་ཞོན་ནས། །བྱང་ཆུབ་ཆེན་པོར་བགྲོད་བྱེད་ཅིང་། །ཤེས་རབ་ཡོངས་སྡུད་ཤེས་རབ་གཙང་། །ཤེས་

རབ་དག་ནི་སྔོན་དུ་འགྲོ། །ཕ་རོལ་ཕྱིན་པ་ཐམས་ཅད་ཀྱི། །ཤེས་རབ་འདི་ནི་སྔོན་དུ་འགྲོ། །ཤེས་རབ་ཡོངས་སྡུད་ཤེས་རབ་གཙང་། །བླ་མེད་ཡེ་ཤེས་ལེན་པར་བྱེད། །བྱང་ཆུབ་སེམས་དཔའ་བསམ་མི་ཁྱབ། །ཤེས་རབ་སྣང་བ་སྐྱེད་བྱེད་ཅིང་། །ཤེས་རབ་སྒྲོན་ཆེན་

སྦར་བྱེད་པས། །བདེ་བར་རབ་ཏུ་གཞོལ་བར་འགྱུར། །ཤེས་རབ་སྣང་བ་བསྐྱེད་པའི་ཕྱིར། །དེས་ན་ཤེས་རབ་མིག་ཀྱང་འབྱེད། །སངས་རྒྱས་བླ་མེད་ཡེ་ཤེས་དག །གསལ་མཐོང་རབ་ཏུ་གཞོལ་བར་འགྱུར། །བྱང་ཆུབ་སེམས་དཔའ་དཔའ་བོ་དག །གོ་ཆ་དཔག་ཏུ་

Vol. 40 · folio 98a

མེད་པ་ཡིས། །ཚད་མེད་པར་ནི་བརྒྱན་པའི་ཕྱིར། །གོ་ཆ་བགོས་པ་ཞེས་བྱའོ། །བྱང་ཆུབ་སེམས་དཔའ་བློ་ཆེན་དག །ཐེག་ཆེན་རབ་ཏུ་བརྒྱན་པས་ན། །སངས་རྒྱས་ཐམས་ཅད་མཁྱེན་པ་ལ། །གོས་པ་མེད་པར་གཞོལ་བར་བྱེད། །བྱང་ཆུབ་སེམས་

དཔའ་བློ་ཆེན་དག །ལམ་ཆེན་རབ་ཏུ་བརྒྱན་པས་ན། །བསམ་གྱིས་མི་ཁྱབ་མཆོག་དག་ལ། །རྣམ་པར་དག་པས་གཞོལ་བར་བྱེད།། །།བམ་པོ་བཞི་པ། གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་

ཀྱིས་གོ་ཆའི་སྤྱོད་ཡུལ་དཔག་ཏུ་མེད་པ་དང་། ཐེག་པ་ཆེན་པོའི་སྤྱོད་ཡུལ་དཔག་ཏུ་མེད་པ་དང་། ལམ་ཆེན་པོའི་སྤྱོད་ཡུལ་དཔག་ཏུ་མེད་པ་དག་ལ་རབ་ཏུ་གཞོལ་བར་བྱའོ། །དེ་ཅིའི་ཕྱིར་ཞེ་ན། ཐམས་ཅད་དུ་རྗེས་སུ་འཇུག་པར་འགྱུར་བའི་ཕྱིར་རོ། །བྱང་ཆུབ་སེམས་དཔའ་

སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་གོ་ཆ་ཆེན་པོ་བགོ་བར་བྱེད་དོ། །ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ཐེག་པ་ཆེན་པོ་ལ་བཞོན་པར་བྱེད་དོ། །ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ལམ་ཆེན་པོ་ལ་

རབ་ཏུ་གནས་པར་བྱེད་དོ། །ཆོས་ཐམས་ཅད་ལ་མཉམ་པ་ཉིད་རབ་ཏུ་ཐོབ་པར་བྱ་བའི་ཕྱིར་རབ་ཏུ་གཞོལ་བར་བྱེད་དོ། །འོན་ཀྱང་གོ་ཆ་དེས་ཆོས་ཅུང་ཟད་ཙམ་ཡང་ནང་ངམ། ཕྱི་རོལ་ལམ། རགས་པ་འམ། ཕྲ་བ་འམ། ཐག་རིང་བ་འམ། ཐག་ཉེ་བ་འམ། འདས་པ་འམ། ད་ལྟར་

བྱུང་བ་འམ། མ་འོངས་པ་འམ། འདུས་བྱས་སམ། འདུས་མ་བྱས་སམ། གནས་པ་འམ། མི་གནས་པ་ཞེས་བྱ་བ་ཡང་དག་པར་རྗེས་སུ་མི་དམིགས་སོ། །གལ་ཏེ་གོ་ཆ་འདིས་ཆོས་ཐམས་ཅད་རབ་ཏུ་རྣམ་པར་འབྱེད་མི་ནུས་སམ། གཏན་ལ་འབེབས་པར་མི་ནུས་སམ། ཡོངས་

སུ་མི་ཤེས་སམ། རྗེས་སུ་འཇུག་པར་མི་ནུས་སམ། མངོན་སུམ་དུ་བྱེད་མི་ནུས་སམ། ཡང་དག་པར་འདའ་བར་མི་ནུས་ན། གོ་ཆ་ཆེན་པོ་བགོས་པ་ཞེས་མི་བྱའོ། །ཆོས་ཐམས་ཅད་རབ་ཏུ་རྣམ་པར་འབྱེད་པར་བྱེད་དམ། གཏན་ལ་འབེབས་སམ། ཡོངས་སུ་ཤེས་པར་གྱུར་

Vol. 40 · folio 98b

ཏམ། རྗེས་སུ་འཇུག་པར་བྱེད་དམ། མངོན་སུམ་དུ་བྱེད་དམ། ཡང་དག་པར་འདའ་བར་བྱེད་ན་གོ་ཆ་ཆེན་པོ་བགོས་པ་ཞེས་བྱའོ། །ཐེག་པ་ཆེན་པོ་དེས་ཀྱང་ཆོས་འགའ་ཙམ་ཡང་ནང་ངམ་ཕྱི་རོལ་ཞེས་བྱ་བ་ནས་ཐམས་ཅད་མཁྱེན་པའི་ཡེ་ཤེས་སུ་བསྔོ་བ་ཞེས་བྱ་བའི་བར་དུ་ཡང་

དག་པར་མི་དམིགས་ཤིང་ཡོངས་སུ་ཤེས་པ་དང་། རྗེས་སུ་འཇུག་པ་དང་། མངོན་སུམ་དུ་བྱེད་པ་དང་། ཡང་དག་པར་འདའ་བར་བྱེད་པས་དེའི་ཕྱིར་ཐེག་པ་འདི་ནི་ཐེག་པ་ཆེན་པོ་དང་། ཆོས་ལ་རབ་ཏུ་མཁས་པའི་ཐེག་པ་དང་། མྱ་ངན་ལས་འདས་བར་ཕྱིན་པར་བྱེད་པའི་ཐེག་པ་དང་།

གོང་ན་མེད་པའི་ཐེག་པ་དང་། མཚུངས་པ་མེད་པའི་ཐེག་པ་ཞེས་བྱའོ། །ལམ་ཆེན་པོ་དེས་ཀྱང་ཅུང་ཟད་ཙམ་ནང་ངམ་ཕྱི་རོལ་ཞེས་བྱ་བ་ནས་ཆོས་ཐམས་ཅད་མཉམ་པ་ཉིད་ཀྱི་ལམ་ཆེན་པོར་གྱུར་ནས་གཞོལ་བར་བྱེད་པ་ཞེས་བྱ་བའི་བར་དུ་ཡང་དག་པར་མི་དམིགས་ཤིང་མཉམ་པ་ཉིད་

ཀྱི་ལམ་འདིས་ཆོས་འགའ་ཙམ་ཡང་ཡོངས་སུ་མི་ཤེས་པ་མེད་པས་དེའི་ཕྱིར་ལམ་འདི་ནི་བླ་ན་མེད་པའི་ལམ་དང་། གྲངས་དང་། ཚད་མེད་པའི་ལམ་དང་། མཚུངས་པ་མེད་པའི་ལམ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་

པ་ནི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་སྤྱོད་པ་ཀུན་གྱི་རྗེས་སུ་ཡང་དག་པར་འཇུག་པར་བྱེད་དོ། །སེམས་ཅན་ཐམས་ཅད་ཀྱི་ཉོན་མོངས་པའི་ཀུན་ནས་ཉོན་མོངས་པ་སྤོང་ཞིང་ཡོངས་སུ་དག་པར་བྱེད་དོ། །ཐེག་པ་ཆེན་པོ་ལ་ཞོན་ནས་སེམས་ཅན་རྣམས་ཀྱི་དགེ་

བའི་རྩ་བ་ཐམས་ཅད་ཡང་དག་པར་འཕེལ་བར་བྱེད་དོ། །ལམ་ཆེན་པོ་འདི་ལ་གནས་ནས་སེམས་ཅན་རྣམས་དགེ་བའི་རྩ་བ་ཐམས་ཅད་སྒྲུབ་པར་ཡང་དག་པར་སྐུལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་རེ་རེའི་ཕྱིར་

སེམས་ཀྱི་སྤྱོད་པ་རེ་རེའི་ཕྱིར་ཡང་འཁོར་བའི་མཐའ་ཇི་སྲིད་པ་དེ་སྲིད་དུ་ཡུན་རིང་པོར་འཁོར་བ་ན་འཁོར་ཞིང་། ཤེས་རབ་ཀྱི་སྨན་ཡོངས་སུ་ཚོལ་བ་དང་། གོ་ཆ་མི་སྤོང་བར་ཤིན་ཏུ་བརྟན་པར་བྱས་ནས་གོ་ཆ་ཆེན་པོ་དང་། ཚད་མེད་པའི་གོ་ཆ་དང་། བསམ་པར་དཀའ་བའི་གོ་ཆ་དང་། རྣམ་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words