འཕགས་པ་ཐམས་ཅད་ལ་མི་འཇིགས་པ་རབ་ཏུ་སྦྱིན་པ་ཞེས་བྱ་བའི་གཟུངས

Sanskrit title (Tibetan script, as in the text) ཨཱརྱ་སརྦ་ཨ་བྷ་ཡ་པྲ་དཱ་ནཱ་མ་དྷཱ་ར་ཎཱི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 91 · folio 41b

༄༅། །རྒྱ་གར་སྐད་དུ། ཨཱརྱ་སརྦ་ཨ་བྷ་ཡ་པྲ་དཱ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ཐམས་ཅད་ལ་མི་འཇིགས་པ་རབ་ཏུ་སྦྱིན་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་

གཅིག་ན། བཅོམ་ལྡན་འདས་ཡུལ་མ་ག་དྷཱ་ནས་ཡུལ་རྒྱུ་ཞིང་ཨ་མྲའི་ཚལ་དུ་གཤེགས་ཏེ་བྱོན་ནས། ཨ་མྲའི་ཚལ་ལུས་འཕགས་རིའི་དབང་པོའི་བྲག་ཕུག་ན་བཞུགས་སོ། །དེ་ནས་ལྷའི་དབང་པོ་བརྒྱ་བྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་

Vol. 91 · folio 42a

འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་མ་ཡིན་རྣམས་ནི་རབ་ཏུ་གནོད་པ་བགྱིད་པ་སྟེ། བཅོམ་

ལྡན་འདས་ལྷ་མ་ཡིན་རྣམས་ནི་བདག་ལ་ཡུན་རིང་པོར་ཕྱིར་རྒོལ་བའི་དགྲ་ལགས་ན། དེ་ནས་བཅོམ་ལྡན་འདས་ཀྱིས་བདག་ལ་ཆོས་བསྟན་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ལྷའི་དབང་བོ་ཁྱོད་ཀྱིས་

ཐམས་ཅད་ལ་མི་འཇིགས་པ་སྦྱིན་པའི་རིག་སྔགས་དོན་ཐམས་ཅད་བྱེད་པ། འཇིགས་པ་ཐམས་ཅད་རབ་ཏུ་ཞི་བར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། དུག་ཐམས་ཅད་འཇིལ་བ། མཚོན་ཐམས་ཅད་རེངས་པར་བྱེད་པ། རྐང་མེད་དང་། རྐང་གཉིས་དང་། རྐང་བཞི་པ་ཐམས་ཅད་

རེངས་པར་བྱེད་པ། དགྲ་ཐམས་ཅད་ཕུང་བར་བྱེད་པ། ལྷ་དང་། ནམ་མཁའ་ལྡིང་དང་། སྦྱིན་བྱེད་མའི་བུ་དང་། ཤ་ཟ་དང་། བརྗེད་བྱེད་དང་། སྨྱོ་བྱེད་དང་། བྲམ་ཟེའི་སྲིན་པོ་དང་། འབྱུང་པོ་དང་། རོ་ལངས་དང་། བྱའི་གདོན་དང་། སྲུལ་པོ་དང་། ནམ་གྲུ་དང་། གནོན་པོའི་

གདོན་དང་། གནོན་པོ་དང་། བརྗེད་བྱེད་ཀྱི་གདོན་དང་། ལྷའི་གདོན་དང་། ཀླུའི་གདོན་དང་། གནོད་སྦྱིན་གྱི་གདོན་དང་། དྲི་ཟའི་གདོན་དང་། མིའམ་ཅིའི་གདོན་དང་། ལོག་འདྲེན་གྱི་གདོན་དང་། མ་མོའི་གདོན་ཕུང་བར་བྱེད་པ། མདངས་འཕྲོག་པ་དང་། ཟས་སུ་ཕྲེང་བ་ཟ་

བ་དང་། ཟས་སུ་སྤོས་ཟ་བ་དང་། ཟས་སུ་མེ་ཏོག་ཟ་བ་དང་། ཟས་སུ་བདུག་པ་ཟ་བ་དང་། ཟས་སུ་ཁྲག་འཐུང་བ་དང་། ཟས་སུ་རྣག་འཐུང་བ་དང་། ཟས་སུ་མི་གཙང་བ་ཟ་བ་དང་། ཟས་སུ་གཅིན་འཐུང་བ་རབ་ཏུ་ཕུང་བར་བྱེད་པ། རིམས་ནད་ཐམས་ཅད་དང་། རླུང་ལས་གྱུར་

པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། འགྲོ་བ་དྲག་ཤུལ་སྤྱོད་པ་རབ་ཏུ་འཇིགས་པར་བྱེད་པ། འཐབ་པ་དང་། རྩོད་པ་དང་། འགྱེད་པ་དང་། མཚང་འདྲུ་བ་ཐམས་ཅད་རབ་ཏུ་ཞི་བར་བྱེད་པ་འདི་ཟུང་ཤིག །ཐམས་

Vol. 91 · folio 42b

ཅད་ལ་མི་འཇིགས་པ་སྦྱིན་པའི་རིག་སྔགས་བཤད་པར་བྱའོ། །ཏདྱ་ཐཱ། ཨ་ཌེ་མ་ཌེ་པྲ་མ་ཌེ། པྲ་བཾ་མ་དི་རི། གོ་ལེ་མ་བོ་ལི་བོ་སེ། མོད་དེ་བད་དེ། ཁ་རད་ཏེ། ཁ་ར་ནེ། གྲ་ཎ་གྲ་ཎེ། ག་ཎ་པྲ་ག་ཎེ་མོ་ཎེ། པྲ་ཏི་མོ་ཎེ། ཀཱ་ལཱི་པྲ་ཀཱ་ལཱི། ཙཎ་ཌེ་མ་ཧཱ་ཙཎ་ཌེ། པྲ་ཏི་ཙཎ་ཌེ། བེ་གེ་ཨ་

ཏི་བེ་གེ་སོ་ན། གོ་ན། མོ་ཧཱ། པྲ་མོ་ཧཱ། མོ་ཏ་ཏྲ་མོ་ཊཱ། ནཱ་ཤཱ་ནི། པྲ་ནཱ་ཤཱ་ནི། དྷ་བ་ནཱི། པྲ་དྷ་བ་ནཱི། བ་ལ་ག་ནཱི། པྲ་བ་ལ་ནཱི། ནྲིད་ཏྱ་ནཱི། པྲ་ནྲིད་ཏྱ་ནཱི། ཀྲོ་དྷ་ནི། པྲ་ཏི་ཀྲོ་དྷ་ནི། ཧ་ན་ཧ་ན་བི་ཧ་ན་བི་ཧ་ན། སརྦ་ཏུཥྚ་པྲ་དུཥྚ་ན་ནཱ་ཤ་ཡ། སརྦ་ཨ་བྷ་ཡ་པྲ་དེ། བདག་འཁོར་

དང་བཅས་པ་འཇིགས་པ་ཐམས་ཅད་དང་། གདོན་ཐམས་ཅད་དང་། ནད་འགོ་བ་ཐམས་ཅད་ལས་སྲུངས་ཤིག །སྲུངས་ཤིག །གནས་འདིར་བདག་གི་དོན་ཐམས་ཅད་གྲུབ་པར་གྱུར་ཅིག །དེ་ལྟ་བས་ན། ཁི་དི་ཁི་དི། ཙུམ་བྷེ། སརྦ་སཏྭ་ཧི་ཏེ་ར་ཏེ། ན་མཿསརྦ་བུདྡྷཱ་ནཱཾ་

སྭཱ་ཧཱ། ལྷའི་དབང་པོ་ཐམས་ཅད་ལ་མི་འཇིགས་པ་སྦྱིན་པའི་རིག་སྔགས་ཚིག་བཞི་བཅུ་རྩ་གཅིག་པོ་འདི་སྐུད་པ་ལ་མདུད་དེ་བཅིངས་སམ། སྐྲ་ལ་མདུད་པ་བོར་རམ། བཟླས་བརྗོད་བྱས་སམ། ཡུངས་ཀར་རམ། གིའུ་ཝང་ལ་ལན་ཅིག་སྔགས་ཏེ་བསྐུས་སམ། གོ་ཆ་ལ་བསྔགས་ན་

མཚོན་གྱིས་མི་ཚུགས། དུག་གིས་མ་ཡིན། རིམས་ནད་ཀྱིས་མ་ཡིན། ཉིན་གཅིག་པས་མ་ཡིན། ཉིན་གཉིས་པས་མ་ཡིན། ཉིན་གསུམ་པས་མ་ཡིན། ཉིན་བཞི་པས་མ་ཡིན། མེས་མ་ཡིན། གསང་སྔགས་ཀྱིས་མ་ཡིན། རོ་ལངས་ཀྱིས་མ་ཡིན། དུག་གིས་མ་ཡིན། ནད་ཀྱིས་

མ་ཡིན་ཏེ། ཆུས་འཆི་བའི་དུས་བྱེད་པར་མི་འགྱུར་རོ། །རིག་སྔགས་དང་། གསང་སྔགས་དང་། སྦྱོར་བ་སྒྲུབ་པ་ཐམས་ཅད་སྦྱོར་བ་རྣམས་ཀྱིས་མ་གྲུབ་པ་རྣམས་གྲུབ་པར་བྱེད་དོ། །སྦྱར་ཏེ་གྲུབ་པ་རྣམས་གཞན་གྱིས་མི་ཚུགས་པར་བྱེད་དོ། །ཕ་རོལ་གྱིས་བཅིངས་པ་ལས་

གྲོལ་བར་བྱེད་དོ། །གཞན་གྱི་རིག་སྔགས་གཅོད་པར་བྱེད་དོ། །བདག་གི་རིག་སྔགས་འཕེལ་བར་བྱེད་དོ། །གདོན་ཐམས་ཅད་ཕུང་བར་བྱེད་དོ། །གདོན་གང་གིས་མི་གཏོང་ན་ཡང་དེའི་མགོ་ཨརྫ་ཀའི་དོག་པ་བཞིན་དུ་ཚལ་པ་བདུན་དུ་འགས་སོ། །དེ་ནས་ལྷའི་དབང་པོ་

Vol. 91 · folio 43a

བརྒྱ་བྱིན་དེ་ཉིད་དུ་མི་སྣང་བར་གྱུར་ཏེ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལྷའི་དབང་པོ་བརྒྱ་བྱིན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཐམས་ཅད་ལ་རབ་ཏུ་མི་འཇིགས་པ་སྦྱིན་པ་ཞེས་བྱ་བའི་

གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words