དཔལ་ནག་པོ་ཆེན་པོའི་རྒྱུད

Sanskrit title (Tibetan script, as in the text) ཤྲཱི་མ་ཧཱ་ཀཱ་ལ་ཏནྟྲ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 91 · folio 199a

༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་ལ་ཏནྟྲ། བོད་སྐད་དུ། དཔལ་ནག་པོ་ཆེན་པོའི་རྒྱུད། དབང་གི་རྟ་མཆོག་སྐུ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། ཤར་ལྷོའི་དུར་ཁྲོད་ཆེན་པོ་ཧ་ཧ་དྲག་ཏུ་རྒོད་པའི་གནས་ཤིང་ཙནྡན་གྱི་

ནགས་ཚལ་རབ་ཏུ་དགའ་བའི་མིང་ཞེས་བྱ་བ་མི་མ་ཡིན་ཕོ་མོ་མང་པོ་འདུས་པའི་ཕོ་བྲང་དུ། དཔལ་ནག་པོ་ཆེན་པོ་ཞེས་བྱ་བ་བི་ནཱ་ཡ་ཀ་ལ་སོགས་ཏེ། དེའི་ཚེ་འཁོར་གདུག་པ་ཅན་རྣམས་ཀྱི་དབུས་ན། སྐྱེ་འགྲོ་སེམས་ཅན་རྣམས་ཀྱི་སྲོག་དབུགས་ལ་དབང་བྱེད་པའི་

Vol. 91 · folio 199b

ནག་པོ་ཆེན་པོ་ཞེས་བྱ་བ་ཅིག་ཡོད་དེ། དེའི་ཚེ་དེའི་དུས་ན་ནུབ་ཕྱོགས་ཀྱི་འཇིག་རྟེན་གྱི་ཁམས་ན། མཐར་བྱེད་རྟའི་རྒྱལ་པོ་ཞེས་བྱ་བ། རྒྱལ་པོ་ཆེན་པོ་བཞི་ལ་སོགས་པའི་འཁོར་གྱིས་བསྐོར་ཏེ། དྲེགས་པ་ཅན་འདུལ་བའི་ཏིང་ངེ་འཛིན་ལ་སྙོམས་པར་ཞུགས་

ནས་ལྕགས་ཀྱུའི་ཕྱག་རྒྱ་བཅས་ནས། ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧཱུྃ་ཧུ་ལུ་ཧུ་ལུ་ཧཱུྃ་བྃ་ཞེས་བརྗོད་པས་དུར་ཁྲོད་ཧ་ཧ་དྲག་ཏུ་རྒོད་པའི་གནས་ནག་པོ་ཆེན་པོ། རང་དབང་མེད་པར་མཐར་བྱེད་རྟའི་རྒྱལ་པོའི་མངོན་དུ་བྱུང་སྟེ་ལས་ཅི་བྱ་ཟེར་ཞིང་རང་རྟགས་སྲོག་གི་སྙིང་པོ་འདི་

མདོངས་གསོལ་དུ་ཕུལ་བ། ཨོྃ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣ་ན་བི་ནཱ་ཡ་ཀ་ཧཱུྃ་ཧཱུྃ་ཕཊ་ཅེས་ཕུལ་ལོ། །དཔལ་ནག་པོ་ཆེན་པོའི་རྒྱུད་ལས་གླེང་གཞིའི་ལེའུ་སྟེ་དང་པོའོ།། །།དེ་ནས་རྒྱལ་པོ་མིག་མི་བཟང་གིས་མཐར་བྱེད་རྟའི་རྒྱལ་པོ་ལ་འདི་སྐད་ཅེས་གསོལ་

ཏོ། །ཨེ་མ་པདྨ་ཁྲོས་པའི་བདག །ནག་པོ་ཆེན་པོ་དྲག་ཤུལ་ཅན། །གསང་བའི་སྒྲུབ་པ་བཤད་དུ་གསོལ། །མགོན་པོ་སྒྲུབ་པར་བྱ་བ་གང་། །བསད་ཅིང་ལུས་སྲོག་དབྱེ་བ་དང་། །མ་གྲུབ་ཤི་ས་བསྟན་པ་དང་། །མགོན་པོའི་རྟགས་དང་སེར་བ་རྣམས། །རྟ་

མཆོག་ཆེན་པོས་བདག་ལ་སྩོལ། །ཞེས་ཞུས་པས། དེ་ནས་པདྨ་ཁྲོས་པ་ཡིས། ནག་པོའི་སྒྲུབ་ཐབས་ཆེད་དུ་བརྗོད། །དམ་ཚིག་ལྡན་པའི་སྔགས་པ་ཡིས། །སངས་རྒྱས་བསྟན་པ་བསྲུང་སླད་དུ། །གཟའ་སྐར་ཚེས་གྲངས་ཤིས་པ་ལ། །དུར་ཁྲོད་ལ་སོགས་

ཤིང་གཅིག་ཏུ། །བསོད་ནམས་ཚོགས་ནི་བསགས་བྱས་ལ། །ནག་པོ་ཆེན་པོ་བསྒྲུབ་པར་བྱ། །ཕུངས་འམ་ས་ནག་དག་ལ་ནི། །སྟེགས་བུ་གྲུ་བཞི་བྱས་ནས་ནི། །དྲི་སྤོས་ཁྲག་གིས་ཆག་ཆག་བྱ། །དབུས་སུ་གྲུ་གསུམ་ཟླ་གམ་ལྡན། །ཕྱི་རོལ་པདྨ་འདབ་བརྒྱད་

བྲི། །དེ་དབུས་ཐོད་ཆེན་ནང་དུ་ནི། །ཤ་ལྔ་སྙིང་སྣས་བརྒྱན་པ་ཡིས། །གཏོར་མ་བཤོས་བུ་ཁྲུ་གང་ཚད། །དེ་ལ་མདའ་གཟུགས་དམར་ནག་དར། །གྲི་སྙིང་ཙ་ཀ་ལི་ཡང་གཟུགས། །དེ་ཉིད་མགོན་པོའི་རྟེན་དུ་བཞག །ཌ་མ་རུ་ཡི་པགས་པའི་ནང་། །མགོན་པོའི་

Vol. 91 · folio 200a

སྲོག་སྔགས་བྲི་བར་བྱ། །ལྡོ་ཡི་ནང་དུ་བླ་རྡོས་དྲིལ། །སྤོས་དང་རྒྱུན་གཏོར་གཏང་བར་བྱ། །དཀོན་མཆོག་སྤྱི་ལ་མཆོད་པ་བཤམ། །དེ་ནས་པདྨར་བདག་བསྒོམས་ལ། །ཐུགས་ཀའི་ཧྲཱིཿལས་འོད་འཕྲོས་པས། །བླ་མ་སངས་རྒྱས་ལ་སོགས་པ། །

རང་གི་མདུན་དུ་བསམ་བྱས་ལ། །མཆོད་པ་རྣམ་ལྔ་དབུལ་བར་བྱ། །རྣམ་དག་བདུན་གྱི་འོག་ཏུ་ནི། །ཚད་མེད་བཞི་པོ་བསྒོམ་པར་བྱ། །བཏང་སྙོམས་ལ་སོགས་པྃ་རྃ་ཏྲི། །པད་སྟེངས་ཡི་གེ་ཧཱུཾ་ལས་ནི། །ནག་པོ་ཞལ་གཅིག་ཕྱག་དྲུག་པ། །གྲི་གུག་ཕྲེང་བ་ཌཱ་མ་རུ། །

ཐོད་པ་མདུང་དང་ཞགས་པ་བསྣམས། །གཡས་གཡོན་རིམ་པས་བསྣམས་པའོ། །སྦྲུལ་དང་རིན་ཆེན་རྒྱན་གྱིས་བརྒྱན། །སྐུ་སྨད་བ་ཏི་ཁྲ་བོ་གསོལ། །སྟག་ལྤགས་ཞིང་གི་ཤམ་ཐབས་ཅན། །གཏུམ་པོ་སྤྱན་གསུམ་མཆེ་བ་གཙིགས། །དཔྲལ་བར་

དྲི་ཡི་ཐིག་ལེས་བརྒྱན། །སྤྱི་གཙུག་མི་བསྐྱོད་སྤྲུལ་སྐུ་བརྟན། །དེ་ལྟར་བདག་མདུན་གསལ་བསྒོམས་ནས། །སྤྱན་དྲངས་མཆོད་དང་བཟླས་པ་བྱ། །གཏོར་མ་པཱུ་ཛ་ལ་སོགས་པས། །ནག་པོ་ཆེ་ལ་སྦྱིན་པར་བྱ། །མགོན་པོའི་ཐུགས་ཀའི་ཧཱུྃ་ལས་ནི། །སྲོག་གི་ཡི་

གེས་གཡས་ནས་བསྐོར། །ཁོར་ཡུག་དག་གིས་བཟླས་པར་བྱ། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣཱན་བི་ནཱ་ཡ་ཀ་ཧཱུྃ་ཧཱུྃ་ཕཊ། དེ་སྐད་ཅེས་ནི་རབ་བརྗོད་པས། །ནག་པོ་གྲུབ་པའི་རྟགས་རྣམས་འབྱུང་། །དཔལ་ནག་པོ་ཆེན་པོའི་རྒྱུད་ལས་བསྙེན་ཅིང་བསྒྲུབ་པའི་ལེའུ་

སྟེ་གཉིས་པའོ།། །།དེ་ནས་ཡང་དག་བཤད་བྱ་བ། །སངས་རྒྱས་བསྟན་པ་བཤིག་པ་དང་། །རྣལ་འབྱོར་བར་ཆད་བྱེད་པ་རྣམས། །ནག་པོ་ཆེན་པོས་བསྒྲལ་འདོད་ན། །སྟེགས་བུ་གྲུ་བཞི་བྱས་ནས་ཀྱང་། །དྲག་པོ་ཨེ་ཡི་ནང་དུ་ནི། །ཕོ་མོ་རབས་ཆད་

ཐོད་པའི་ནང་། །གཟུགས་ནི་སྤྲ་ཚིལ་དག་ལ་བྱ། །མིང་རུས་དག་ནི་བཀོད་ནས་ཀྱང་། །བསད་དང་ན་བ་སྐབས་དང་སྦྱར། །མགོན་པོའི་སྐུ་དང་དམ་རྫས་རྣམས། །ཁ་དང་ཁ་ལ་དགོད་པར་བྱ། །ཕག་ཐོད་ནང་དུ་ཐུན་རྫས་བླུགས། །རྟ་གཏོར་རྒྱུན་གཏོར་

Vol. 91 · folio 200b

གཡས་དང་གཡོན། །གསང་སྔགས་འདི་ཡིས་གསད་པར་བྱ། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་ཡ་བིགྷྣཱ་ན་བི་ནཱ་ཡ་ཀ་ཧཱུྃ་ཧཱུྃ་ཕཊ། ཨོཾ་མ་ཧཱ་ཀཱ་ལ་ཡ་ཤཱ་ས་ན་ཨུ་པ་ཀ་རི་ཎི་ཨེ་ཥ་ཨ་བཥྩི་མ་ཀཱ་ལོ་ཨ་ཡང་ཨི་དྃ་རཏྣ་ཏྲ་ཡཱ་ཡ་ཨ་པ་ཀཱ་རི་ཎྃ་ཡ་དི་པྲ་ཏི་ཛྙཱ་སྨར་སི་ཏ་དཱ་ཨི་དྃ་དུཥྚན་

ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྷྲྀཧྞ་གྷྲྀཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་མཱ་ར་ཡ་ཧཱུཾ་ཧཱུཾ་ཕཊ་ཕཊ། ཧཱུཾ་བི་ནཱ་ཡ་ཀ་པི་ལས་ཏྲྃ་བི་ཏྲི་ཧཱུྃ་ཛ་སི་མ་བུ་བི་ནཱ་ཡ་ཀ་ཨ་མུ་ཀ་བྲི་སྲོག་ཧུར་ཐུམ་ཛ་མཱ་ར་ཡ་རྦད། དྲག་སྔགས་བཟླས་ཤིང་ཐུན་གྱིས་

བྲབ། །ཞག་བདུན་བར་དུ་སྨྲ་མི་བྱ། །དེ་ལ་རྟགས་རྣམས་རྫོགས་པར་འགྱུར། །དཔལ་ནག་པོ་ཆེན་པོའི་རྒྱུད་ལས་ལུས་སྲོག་དབྱེ་བའི་ལེའུ་སྟེ་གསུམ་པའོ།། །།དེ་ནས་ཡང་དག་བཤད་བྱ་བ། །ལས་མཐའ་སྦྱིན་སྲེག་དག་གིས་བརྟུལ། །གྲུ་གསུམ་

དབུས་སུ་གདུག་པའི་ཤིང་། །དབུས་སུ་ནག་པོ་འཁོར་བཅས་བསྐྱེད། །ལིང་ག་གཏོར་མ་དམ་རྫས་རྣམས། །ནག་པོའི་ཞལ་དུ་དབུལ་བར་བྱ། །སྔགས་འདི་བཟླས་ཤིང་བསྲེག་པར་བྱ། །ཨགྣེ་ཛྭ་ལ་རྃ་ལས་རྫོགས། །ཐལ་བ་རླུང་དམར་དག་ལ་བསྐུར། །

ཨ་མུ་ཀ་ནི་མྱུར་དུ་རློག །དཔལ་ནག་པོ་ཆེན་པོའི་རྒྱུད་ལས་མཐའ་བརྟུལ་བའི་ལེའུ་སྟེ་བཞི་པའོ།། །།དེ་ནས་ཡང་དག་བཤད་བྱ་བ། །དེ་ལྟར་བསྒྲུབས་ཀྱང་མ་གྲུབ་ན། །གཅིག་དང་གཉིས་ལ་ནན་ཏན་བསྐྱེད། །དེ་ལྟར་བྱས་ཀྱང་མ་གྲུབ་ན། །ས་གསུམ་

ཁྲག་གསུམ་དུག་གསུམ་ལ། །ཁྲུ་གང་པ་ཡི་གཟུགས་ཀྱི་ཚད། །གྲུ་གསུམ་དབུས་སུ་ནག་པོའི་གཟུགས། །སྤྱི་ཚར་དག་ཏུ་ལྡིང་དུ་གཞུག །བྲིས་སྐུ་དམ་རྫས་བླ་རྡོ་རྣམས། །རང་གི་གྲུ་གསུམ་མལ་གྱི་འོག །དུག་དང་ཚེར་མས་སྟེང་ནས་དགབ། །

ཐུན་རྫས་བྲབ་ཅིང་སྔགས་འདི་བཟླས། །ཨོྃ་བཛྲ་ཀྲོ་དྷ་ཧ་ཡ་གྲི་བ་ཧཱུྃ་ཧུ་ལུ་ཧུ་ལུ་ཧཱུྃ་ཕཊ། ཕཊ་ཧཱུྃ་ཧཱུྃ་ཀ་ཡ་ནཱ་བི་ནཱན་གྷ་བི་ཏྲ་ཀྵེ་ཀྵིཾ་ལ་ཀཱ་ཧཱ་མ་བཛྲ་ཨོཾ། དེ་སྐད་བརྗོད་ཅིང་ཐུན་གྱིས་བྲབ། །དེ་ལ་རྟགས་རྣམས་རྫོགས་པ་དང་། །དེ་ནས་གསོ་བའི་ཆོ་ག་བྱ། །བྲིས་སྐུ་

Vol. 91 · folio 201a

བླ་རྡོ་དམ་རྫས་རྣམས། །སྤོས་ཆུས་བཀྲུ་ཞིང་སྔགས་འདི་བཟླས། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣཱན་བི་ནཱ་ཡ་ཀ་ཧཱུྃ་ཧཱུྃ་ཕཊ་སོས་སོས་སྭཱ་ཧཱ། དེ་སྐད་བྱས་ལ་གནས་སུ་ནི། །མགོན་པོའི་གཟུགས་ཀྱང་སྤོས་ཆུས་བཀྲུ། །གྲུ་གསུམ་དབུས་སུ་བླངས་

བྱས་ལ། །དགྲ་བོའི་མིང་རུས་སྙིང་གར་གཞུག །ཞག་བདུན་བསྒྲུབས་ལ་དགྲ་ལ་བསྐྱལ། །ཨ་མུ་ཀ་ནི་མྱུར་དུ་བརླག །དཔལ་མགོན་པོ་ནག་པོའི་རྒྱུད་ལས་མ་གྲུབ་ན་སྤོགས་པའི་ཆོ་ག་དང་གསོ་བའི་ལེའུ་སྟེ་ལྔ་པའོ།། །།དེ་ནས་ཡང་དག་བཤད་བྱ་བ། །

བྱ་ནག་འཕུར་ཞིང་ལྡིང་བ་དང་། །མོན་པ་ཨ་ཙ་ར་དང་ནི། །དགེ་བཤེས་བནྡེ་སློབ་དཔོན་དང་། །འོད་དང་སྒྲ་དང་ཁང་པ་འཚེག །མགོན་པོའི་སྐུ་དག་དངོས་སུ་མཐོང་། །དགྲ་ལ་དམག་དྲངས་སེམས་ཅན་བསད། །མི་ནག་བདག་ལ་སྙིང་སྟོབས་དང་། །

མཛེ་པོ་དང་ནི་སྤྲང་པོ་དང་། །བྱ་ནག་ཐང་ལ་ལྷུང་བ་འབྱུང་། །དཔལ་མགོན་པོ་ནག་པོ་ནག་པོའི་རྒྱུད་ལས་རྟགས་ཀྱི་རིམ་པའི་ལེའུ་སྟེ་དྲུག་པའོ།། །།དེ་ནས་ཡང་དག་བཤད་བྱ་བ། །སེར་བ་དབབ་པའི་ལས་བྱ་ན། །མོན་ནམ་མཛེ་ཅན་ཐོད་པ་རུ། །

འཁོར་ལོ་རྩིབས་བཞི་བྲིས་ནས་ཀྱང་། །རིགས་ལྔ་ཀླུ་ཡི་ས་བོན་དགོད། །རྩིབས་ཆེན་སེར་སྲུང་མིང་རུས་དང་། །ཡུལ་དུ་ཕོབ་ཅིས་བྱ་བ་བྲིས། །དེ་མཐར་འཁོར་ལོ་རྩིབས་དགུ་ལ། །དྲེགས་པའི་སྔགས་དག་བྲི་བར་བྱ། །རྒྱབ་ཏུ་གང་ཡིན་ཡུལ་མིང་དང་། །རླུང་

གི་སྙིང་པོ་བྲི་བར་བྱ། །བདག་ཉིད་པདྨ་ཁྲོས་པར་བསྒོམ། །གསང་སྔགས་འདི་ཡིས་གནད་ལ་བོར། །ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣཱྃ་བི་ནཱ་ཡ་ཀ་ཧཱུྃ་ཧཱུྃ་ཕཊ། ནཱ་ག་སྙིང་གཟིར། ཕུ་ཧུར་ཐུམ་ཛ་ཁྲོ་ཤར་ཧྲིལ་བྷྱོ། །དེ་སྐད་ཅེས་ནི་རབ་བརྗོད་ལ། །ཡུངས་ཀར་

ཡུངས་ནག་སྐེ་ཚེ་དང་། །ཁྲག་དང་དུག་གིས་ཐོད་པར་བྲབ། །ལོ་འབྲས་རླུང་ཁྱེར་རྟགས་བྱུང་ན། །དགྲ་ཡི་ཡུལ་དུ་དབབ་པར་བྱ། །གལ་ཏེ་འཇིག་རྟེན་ཕུང་བའོ། །དཔལ་མགོན་པོ་ནག་པོའི་རྒྱུད་ལས་སེར་བ་དབབ་པའི་ལེའུ་སྟེ་བདུན་པའོ།། །།

Vol. 91 · folio 201b

དེ་ནས་ཡང་དག་ངེས་གསུངས་པ། །ཨེ་མ་འཁོར་འདུས་ངོ་མཚར་ཅན། །མ་འོངས་དམ་ཅན་སྒྲུབ་བྱེད་ན། །དམ་ཚིག་ལ་གནས་སྡོམ་པ་གཟུང་། །གཏོར་མ་དག་ལ་བརྩོན་པར་བྱ། །དམ་རྫས་བླ་རྡོ་ལུས་ལ་བསྲེལ། །ཞེས་གསུངས་པས་རྒྱལ་པོ་མིག་

མི་བཟང་ལ་སོགས་པའི་འཁོར་རྣམས་ཡི་རངས་ནས། ནག་པོ་ཆེན་པོས་བསྟན་པ་སྲུང་བར་ཁས་བླངས་ནས་མི་སྣང་བར་གྱུར་ཏོ། །དཔལ་ནག་པོ་ཆེན་པོའི་རྒྱུད་ལས་ལེའུ་བརྒྱད་པ་རྫོགས་སོ།། །།རྒྱ་གར་གྱི་མཁན་པོ་ཨ་མོ་གྷ་བཛྲ་དང་། བོད་ཀྱི་

ལོ་ཙྪ་བ་ཕུར་བུ་འོད་ཀྱིས་བསྒྱུར་བའོ།།

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words