རལ་པ་གྱེན་བརྫེས་ཀྱི་རྟོག་པ་ཆེན་པོ

Sanskrit title (Tibetan script, as in the text) ཨཱུརྡྷ་ཛ་ཊཱ་མ་ཧཱ་ཀལྤ་མ་ཧཱ་བོ་དྷི་སཏྭ་བི་ཀུརྦྦ་ཎ་པ་ཊ་ལ་བི་ས་རཱད་བྷ་ག་བ་ཏཱ་ཨཱརྱ་ཏཱ་རཱ་མཱུ་ལ་ཀལྤ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 94 · folio 85b

པར་ལྡན་པ་རྣམས་ཀྱིས་དུ་བ་དང་སོལ་བ་ལ་སྟོང་ཕྲག་བརྒྱད་བཟླས་ན་རྒྱལ་པོའི་བཙུན་མོའམ། བློན་པོ་འམ། མིང་ནས་སྨོས་པ་དེ་དབང་དུ་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་དྲི་དང་། མེ་ཏོག་དང་བདུག་ཕུལ་ནས་བཅོམ་ལྡན་འདས་མ་ལ་མཆོད་པ་བྱ་

སྟེ། སྣ་མའི་མེ་ཏོག་དང་། ཨུཏྤལ་སྔོན་པོའམ། གཞན་པའི་མེ་ཏོག་རྣམས་གང་གི་མིང་ནས་སྨོས་ཏེ་སྦྱིན་སྲེག་བྱས་པ་དེ་དབང་དུ་འགྱུར་རོ། །གྲུབ་པའི་འདོད་མ་དབང་དུ་བྱེད་པ་ལ་ཏིལ་ནག་པོ་བཙུན་མོའི་མཆོག་དབང་དུ་བྱེད་པ་ལ་པྲི་ཡང་ཀུ། སེམས་ཅན་ཐམས་ཅད་དབང་དུ་བྱེད་པ་

ལ་སཱ་ལུ་དམར་པོ་གང་གི་མིང་ནས་སྨོས་ཏེ་སྦྱིན་སྲེག་བྱས་ན་དབང་དུ་འགྱུར་རོ། །གཞོན་ནུ་མའི་མིང་ནས་སྨོས་ཏེ་མེ་ཏོག་གེ་སར་གྱིས་སྦྱིན་སྲེག་བྱས་ན་དབང་དུ་འགྱུར་རོ། །འོ་མ་དང་འོ་ཐུག་དང་མར་དང་སྦྲང་རྩིས་བཅོམ་ལྡན་འདས་ཀྱི་སྤྱན་སྔར་སྟོང་ཕྲག་བརྒྱད་སྦྱིན་སྲེག་བྱས་ན་གང་གི་

མིང་ནས་འབོད་པ་དེ་རྒྱས་པ་ཅན་གྱི་ལས་སོ། །དཀར་པོའི་ཚེས་གཅིག་ནས་བརྩམས་ཏེ་རིང་བསྲེལ་ཅན་གྱི་མཆོད་རྟེན་ནམ། སྐུ་གཟུགས་སམ། རས་རིས་ཞལ་ནུབ་ཏུ་ཕྱོགས་པའི་རས་རིས་ཀྱི་སྤྱན་སྔར་རོ། །སྔོན་གྱི་མཐའ་མ་རིའི་རྩེ་མོར་ཀུ་ཤ་དང་བིལ་བའི་ཡམ་ཤིང་གིས་མེ་

སྦར་ནས་ཞོ་དང་སྦྲང་རྩི་དང་མར་གྱིས་བཏགས་པའི་པདྨ་ཁ་རྒྱས་པར་བྱེ་བའི་སྦྱིན་སྲེག་སྟོང་ཕྲག་བརྒྱད་བྱ། ཨ་ག་རུ་དང་། ཀུན་ཏུ་རུ་ཀ་དང་། ཤྲི་བེཥྚ་ཀ་རྣམས་ཀྱི་བདུག་སྤོས་དང་། འོ་མ་དང་ཞོའི་གཏོར་མ་དབུལ་བར་བྱ་ཞིང་རྣམ་པ་གཞན་དུ་བགེགས་རྣམས་ལ་འབྱུང་པོ་ཐམས་

ཅད་པའི་གཏོར་མ་སྦྱིན་ནོ། །དེ་ནས་བརྒྱད་པ་ལ་མངའ་བདག་ཏུ་འགྱུར་རོ། །འོ་མ་དང་ནས་ཟན་ཟ་བས་པདྨ་དཀར་པོ་ཁ་རྣམ་པར་རྒྱལ་བའི་སྦྱིན་སྲེག་བྱས་ན་གཏེར་ཆེན་པོའམ་ཡུལ་རྙེད་དོ། །མེ་ཏོག་སེར་པོ་ལ་ཞོ་དང་། སྦྲང་རྩི་དང་། མར་གྱིས་བཏགས་པས་མེ་ལ་སྦྱིན་

སྲེག་བྱའོ། །ཡུལ་གྱི་རྗེ་པོར་འགྱུར་རོ། །མཚན་མོ་གསུམ་དུ་ཕྱེ་ཟ་བར་མཚན་མོ་གསུམ་དུ་སྦྱིན་སྲེག་བྱའོ། །དེ་བཞིན་དུ་སྟོང་ཕྲག་བདུན་བརྒྱས་མཚམས་མེད་པ་བྱས་པས་ཀྱང་འགྲུབ་པར་འགྱུར་རོ། །ཡམ་ཤིང་དེ་ཉིད་ལ་ཞོ་དང་། སྦྲང་རྩི་དང་། མར་གྱིས་བཏགས་

Vol. 94 · folio 86a

པའི་སྦྱིན་སྲེག་སྟོང་ཕྲག་བརྒྱ་བྱས་ན་གསེར་བྱེ་བ་འབྱུང་ངོ་། །སྔ་བར་ལངས་ནས་ཁྲུས་སྔོན་དུ་འགྲོ་བས་ཚངས་པར་སྤྱོད་ཅིང་མེ་རབ་ཏུ་སྦར་ནས་ནཱ་ག་གེ་སར་དང་། པྲི་ཡང་ཀུའི་སྦྱིན་སྲེག་སྟོང་ཕྲག་བརྒྱད་བྱ་སྟེ། ཟླ་བ་གསུམ་གྱི་ནང་དུ་ཁྱད་པར་དུ་འཕགས་པའི་དངོས་

གྲུབ་ཉམས་སུ་མྱོང་བར་འགྱུར་ཞིང་རྫས་མང་པོ་ཡོང་ངོ་། །བ་ལང་གི་ཤ་དང་ཁཎྜ་ཅན་གྱི་སྦྱིན་སྲེག་བྱས་ན་བ་ལང་གི་གནས་རྙེད་དོ། །དེ་བཞིན་དུ་པྲི་ཡང་ཀུ་དང་ནཱ་ག་གེ་སར་གྱི་ཡམ་ཤིང་གིས་སྦྱིན་སྲེག་བྱས་ན་དབང་དུ་འགྱུར་རོ། །དཀར་པོའི་ཚེས་གཅིག་ནས་བརྩམས་ནས་

བིལ་བའི་འོག་ཏུ་མེ་སྦར་ནས་བིལ་བ་དང་། ཨཱ་ཤི་བིལ་བ་རྣམས་ལ་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱ་བྱ་སྟེ། ལྷ་མོ་སྒྲོལ་མ་མཐོང་ངོ་། །གཙང་མར་གྱུར་པས་ཟས་བཞིར་སྨྱུང་བར་གནས་ཏེ། སྟོང་ཕྲག་བཅུར་སྦྱིན་སྲེག་བྱའོ། །གཏེར་ཆེན་པོ་མཐོང་ངོ་། །

དེ་བཞིན་དུ་མཚན་མོ་ཉི་ཤུར་འོ་མ་དང་ནས་ཟན་ཟ་བས་ཡུངས་ཀར་དཀར་པོའི་སྦྱིན་སྲེག་སྟོང་ཕྲག་བརྒྱ་བྱ་སྟེ། ནོར་གྱི་བདག་པོར་འགྱུར་རོ། །སྔོན་སྤྱད་པ་བྱས་པས་ཉིན་མཚན་དུ་ཡུངས་ཀར་དཀར་པོ་ལ་མར་གྱིས་བཏགས་པའི་སྦྱིན་སྲེག་བྱ་སྟེ། ཟླ་བས་ཆར་རྒྱུན་བཟང་

པོ་ལྟུང་བར་བྱེད་དོ། །ཟས་བཞིར་སྨྱུང་བར་གནས་པས་སྟོང་ཕྲག་བཅུར་སྦྱིན་སྲེག་བྱ་སྟེ་ནོར་རྙེད་དོ། །མཁས་པས་དཀར་པོའི་ཕྱོགས་འབྱུང་འགྱུར་ལ་ལྷ་མོའི་རས་རིས་ཀྱི་སྤྱན་སྔར་མཁས་པས་ཐུན་མཚམས་གསུམ་དུ་བསྣུན་པར་བྱའོ། །དཀར་པོའི་ཕྱོགས་ཀྱི་ནང་

དུ་དེ་ལ་ལྟ་མོ་འདི་མཆོག་སྦྱིན་པར་མཛད་དོ། །རིག་པ་འདིས་ཏིལ་གྱི་སྲེག་བླུགས་སྟོང་གི་སྦྱིན་སྲེག་བྱའོ། །བིལ་བའི་ཤིང་གིས་མེ་སྦར་ན་ལྷ་མོ་མཐོང་སྟེ་ནོར་རམ་འབྲུའི་དབང་ཕྱུག་ཏུ་བྱེད་དོ། །བཅོམ་ལྡན་འདས་ལ་མཆོད་པ་རྒྱ་ཆེན་པོ་བྱས་ནས་མེ་ཏོག་བརྒྱ་པའི་

སྦྱིན་སྲེག་སྟོང་ཕྲག་བརྒྱ་བྱས་ན་ནོར་རྙེད་དོ། །རིང་བསྲེལ་དང་བཅས་པའི་མཆོད་རྟེན་གྱི་མདུན་ཕྱོགས་གཙང་མར་ལྷ་ལ་པ་ལཱ་ཤའི་ཡམ་ཤིང་གིས་མེ་སྦར་ནས་ཨུཏྤ་ལའི་སྦྱིན་སྲེག་སྟོང་ཕྲག་བརྒྱ་བྱས་ན་ཡུལ་གྲུ་དབང་དུ་འགྱུར་རོ། །རིག་པ་འདིས་དྲི་ཞིམ་པོའི་བདུག་པ་

Vol. 94 · folio 86b

ཕུལ་ནས་འོ་མ་དང་ནས་ཟན་ཟ་བས་པདྨའི་སྦྱིན་སྲེག་སྟོང་བྱ་སྟེ་གསེར་སྟོང་རྙེད་དོ། །འདིས་མེ་ཏོག་གི་སྦྱིན་སྲེག་སྟོང་ཕྲག་བརྒྱ་བྱས་ན་གང་ཡིད་ལ་སེམས་པ་དེ་སྦྱིན་ནོ། །རས་རིས་ཀྱི་སྤྱན་སྔར་སྦྱིན་སྲེག་སྟོང་བྱས་ན་གཏེར་མཐོང་ངོ་། །པྲི་ཡང་ཀུ་ལ་ཞོ་དང་སྦྲང་རྩི་དང་མར་

གྱིས་བཏགས་པའི་འོ་མ་དང་། ནས་ཟན་ཟ་བས་ཕྱོགས་གཙང་མར་སྦྱིན་སྲེག་སྟོང་ཕྲག་བརྒྱ་བྱས་ན་གསེར་བརྒྱ་རྙེད་དོ། །རྣམ་པ་སྣ་ཚོགས་པའི་ཕྲེང་བའོ། །དེ་ནས་མཚན་མོ་གསུམ་དུ་གཡུལ་དུ་སྨྱུང་བར་གནས་པས་ཨ་ག་རུའི་ཡམ་ཤིང་གིས་ཐུན་མཚམས་གསུམ་དུ་སྦྱིན་སྲེག་

སྟོང་ཕྲག་བརྒྱད་བྱའོ། །དེ་ནས་མཚན་ཐོག་ཐག་ཏུ་བཟླས་པས་རས་རིས་རབ་ཏུ་འགུལ་བའམ་ཕྲེང་བའི་ཆུན་པོ་གཡོ་བར་གྱུར་ན་དེ་ནས་འགྲུབ་པར་འགྱུར་ཏེ་རྒྱལ་སྲིད་སྦྱིན་པར་བྱེད་དོ། །གང་ཡིད་ལ་སེམས་པར་བྱེད་པ་དེ་སྟེར་བར་བྱེད་དེ། ནད་ཐམས་ཅད་གསོ་བ་དང་། ཤི་བ་དང་

འཆིང་བ་གྲོལ་བ་དང་། སེལ་བ་དང་། དཀྱིལ་འཁོར་བཅིང་བའོ། །འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་མེ་ཏོག་གིས་སྦྱིན་སྲེག་སྟོང་བྱའོ། །དབང་དུ་བྱེད་དོ། །ཡང་ན་རས་རིས་གཅིག་བྱང་ཆུབ་ཀྱི་རྩ་བར་བཞག་ནས་ཆོ་ག་འདི་ཉིད་ཀྱིས་ནས་ཟན་ཟ་

བས་བཟླས་པ་སྟོང་ཕྲག་བརྒྱ་བྱ། ཟས་གཅིག་པས་ཡན་ལག་བརྒྱད་པའི་གསོ་སྦྱོང་ལ་གནས་པས་འཕགས་པ་སྤྱན་རས་གཟིགས་དབང་ཕྱུག་གི་ཟས་ཀྱི་ལས་རྣམས་འགྲུབ་པར་འགྱུར་རོ། །ཡང་ན་ཟླ་བ་དང་ཉི་མ་གཟས་བཟུང་བའི་དུས་སུ་འཕགས་པ་སྤྱན་རས་གཟིགས་

དབང་ཕྱུག་སྟོན་ཀའི་སྤྲིན་ལྟར་དཀར་བ་བླ་གོས་དཀར་པོ་མནབས་པ་འདྲིར་གཞུག་པར་བྱའོ། །གཞོགས་གཅིག་ཏུ་ལྷ་མོ་སྒྲོལ་མ་གསེར་མདོག་པདྨ་ལ་གནས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ་སྒྲུབ་པ་པོ་ལ་ཀུན་ནས་གཟིགས་པར་བྱེད་པ་འདྲིར་གཞུག་པར་བྱའོ། །

དྲི་དང་། མེ་ཏོག་དང་། བདུག་པ་དང་། གཏོར་མའི་མཆོད་པ་རྒྱ་ཆེན་པོ་བྱས་ནས་ཟླ་བ་ལ་མིག་ལྟ་བར་ཇི་སྲིད་ཟླ་བ་གྲོལ་གྱི་བར་དུ་བཟླས་པ་དབུལ་བར་བྱའོ། །ལྷ་མོ་སྒྲོལ་མ་རང་གི་གཟུགས་ཀྱིས་འབར་བ་ཉི་མ་འཆར་ཀའི་མདོག་ལྟ་བུ་པདྨ་ཁ་བྱེ་བ་ཕྱག་ན་བསྣམས་པ། འབྱོན་

Vol. 94 · folio 87a

པར་འགྱུར་རོ། །མཆོད་ཡོན་ཕུལ་ནས་མཆོག་ཞུ་བར་བྱའོ། །དཀར་པོའི་ཚེས་གཅིག་ནས་བརྩམས་ནས་འོ་མ་དང་ཟན་ཟ་བས་བསྒྲུབ་པར་བྱའོ། །ཡན་ལག་བརྒྱད་པའི་གསོ་སྦྱོང་ཅན་གྱིས་མེ་དང་ལན་ཚྭ་ཟོས་པས་རས་རིས་ཀྱི་སྤྱན་སྔར་གུ་གུལ་གྱིས་སྦྱིན་

སྲེག་སྟོང་ཕྲག་བརྒྱད་བྱའོ། །དོང་ཙེ་བརྒྱད་རྙེད་དོ། །ཀུན་ཏུ་རུ་ཀའི་ལས་འདིའོ། །བིལ་བའི་ཡང་ལས་འདིའོ། །དེ་བ་དཱ་རུས་གྲུབ་པའི་དོན་དུ་རབ་ཏུ་སྦྱར་བར་བྱའོ། །འདི་ནི་རྩ་བའི་རིག་པས་ཨ་ག་རུའི་སྦྱིན་སྲེག་སྟོང་ཕྲག་བརྒྱད་བྱའོ། །འོ་མ་དང་བཅས་པའི་ཤིང་གིས་

མེ་རབ་ཏུ་སྦར་ན་ནོར་ཐམས་ཅད་སྦྱིན་པར་བྱེད་དོ། །རིང་བསྲེལ་དང་བཅས་པའི་མཆོད་རྟེན་ལ་དྲི་དང་མེ་ཏོག་དང་བདུག་པས་མཆོད་པ་བྱས་ནས་སྔ་བར་ལངས་ཏེ། བླུགས་གཟར་དང་ལྡན་པས་མེ་རབ་ཏུ་སྦར་ནས་ནཱ་ག་གེ་སར་དང་པྲི་ཡང་ཀུའི་སྦྱིན་སྲེག་བརྒྱད་བརྒྱ་བྱ་སྟེ་ཟླ་བའི་ནང་

དུ་བལྟ་བར་བྱ་བར་འགྱུར་རོ། །བེ་ཀངྐ་ཏའི་ཡམ་ཤིང་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱ་བྱའོ། །གཙང་མའི་སྔར་གྱི་ལས་ཀྱི་ཕྱོགས་སུ་པ་ལཱ་ཤའི་ཡམ་ཤིང་གིས་མེ་རབ་ཏུ་སྦར་ནས་བཅོམ་ལྡན་འདས་ལ་མཆོད་པ་བྱས་ན་གསེར་བརྒྱ་རྙེད་

དོ། །རིག་པ་འདིས་པྲི་ཡང་ཀུའི་ཡམ་ཤིང་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱ་སྟེ་གསེར་སྟོང་རྙེད་དོ། །རིག་པ་འདིས་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་དྲི་དང་མེ་ཏོག་དང་བདུག་པ་ཕུལ་ནས་ཨུ་དུམ་བཱ་རའི་ཡམ་ཤིང་

གིས་མེ་རབ་ཏུ་སྦར་ཏེ་སྦྱིན་སྲེག་སྟོང་ཕྲག་བརྒྱ་བྱའོ། །འདོད་པ་ཐམས་ཅད་མཆོག་དང་ལྷན་ཅིག་བྱེད་དོ། །མྱ་ངན་མེད་པའི་ཤིང་གིས་མེ་སྦར་ནས་ཡུངས་ཀར་དཀར་པོའི་སྦྱིན་སྲེག་བརྒྱ་བྱའོ། །མངོན་སུམ་དུ་གཟུགས་ཀྱིས་འོང་བར་བྱེད་དོ། །བདུག་པ་ལ་ལན་སྟོང་ཕྲག་

བརྒྱ་བཟླས་ནས། གཙང་མས་གོས་གཙང་མ་གོན་ཏེ་འོ་མ་དང་ནས་ཟན་ཟ་ཞིང་རྟག་ཏུ་བཟླས་པས་འདོད་ཅིང་འདོད་པ་རྣམས་ཀུན་ཏུ་ཐོབ་སྟེ་འདོད་པ་ཐམས་ཅད་སྦྱིན་པར་བྱེད་དོ། །སྔོན་སྤྱད་པ་བྱས་པས་མཚན་མོ་ལྔར་འོ་མ་དང་ནས་ཟན་ཟ་བའམ་འོ་མ་འཐུངས་པས་སྟོང་

Vol. 94 · folio 87b

ཕྲག་བརྒྱར་བཟླས་པར་བྱའོ། །མཐར་མཚན་མོ་གསུམ་དུ་སྨྱུང་བར་གནས་པས་ཟླ་བ་ཉ་ལ་དྲི་དང་མེ་ཏོག་དང་བདུག་པ་དང་ལྡན་པ་རྣམས་ཀྱིས་མངོན་པར་མཆོད་ན་ལྷ་མོ་རང་གི་གཟུགས་སུ་མཐོང་ངོ་། །འོ་མ་དང་ནས་ཟན་ཟ་ཞིང་ཡུངས་ཀར་དཀར་པོའི་སྦྱིན་སྲེག་སྟོང་ཕྲག་བརྒྱ་བྱའོ།

ཞག་ཉི་ཤུ་རྩ་གཅིག་ཏུ་འོ་མ་འཐུངས་པས་ཨ་པཱ་མརྒའི་ཡམ་ཤིང་གིས་མེ་རབ་ཏུ་སྦར་ནས་ཞོ་དང་སྦྲང་རྩི་དང་མར་གྱིས་བཏགས་པའི་ཡུངས་ཀར་དཀར་པོའི་སྦྱིན་སྲེག་སྟོང་བྱའོ། །འོ་མ་དང་བཅས་པའི་ཡམ་ཤིང་གིས་མེ་རབ་ཏུ་སྦར་ན་དེས་ངེས་པ་ཉིད་དུ་གཏེར་མཐོང་ངོ་། །རིག་པ་

འདིས་འོ་མ་དང་ནས་ཟན་ཟ་ཞིང་བིལ་བའི་ཤིང་གིས་མེ་སྦར་ནས་ཞོ་དང་སྦྲང་རྩི་དང་མར་གྱིས་བཏགས་པའི་ཏིལ་གྱིས་སྦྱིན་སྲེག་སྟོང་ཕྲག་བརྒྱ་བྱས་ན་རང་གི་གཟུགས་ཀྱིས་ལྷ་མོ་མཐོང་ངོ་། །འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་དྲི་དང་མེ་ཏོག་དང་བདུག་པ་ཕུལ་

ནས་ཞོ་དང་སྦྲང་རྩི་དང་། མར་གྱིས་བཏགས་པའི་ཨུ་དུམ་བཱ་རའི་ཤིང་གིས་མེ་རབ་ཏུ་སྦར་ནས། ཨརྒའི་ཡམ་ཤིང་གིས་སྦྱིན་སྲེག་སྟོང་ཕྲག་བརྒྱ་བྱ་སྟེ་དོན་དུ་མ་གཉེར་བར་ནོར་དང་འབྲུ་རྙེད་དོ། །ལྷའི་ཤིང་གིས་མེ་རབ་ཏུ་སྦར་ནས་དེ་བ་དཱ་རུའི་སྦྱིན་སྲེག་སྟོང་བྱའོ། །རང་གི་གཟུགས་

ཀྱིས་འོང་བར་བྱེད་དོ། །མར་གྱི་སྦྱིན་སྲེག་གིས་ཞི་བའོ། །དཱུར་བའི་སྦྱིན་སྲེག་གིས་རྒྱས་པ་ཅན་ནོ། །ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱས་པས་དེ་བཞིན་དུ་འདིའི་ནོར་ཐམས་ཅད་རྙེད་པར་འགྱུར་རོ། །གཞོན་ནུ་མས་བཀལ་བའི་སྐུད་པ་ལ་

མདུད་པ་ཉི་ཤུ་རྩ་གཅིག་བྱས་ཏེ། བུ་མོ་བག་མར་གཏོང་བར་བྱེད་དོ། །ནུབ་མོ་ཉལ་བར་འདོད་པས་རིག་པ་དཔག་ཏུ་མེད་པ་བཟླ་བར་བྱ་སྟེ། རྨི་ལམ་ངན་པ་མི་མཐོང་ངོ་། །ཏིལ་ནག་པོའི་གཟུགས་བརྙན་གྱི་མདུན་དུ་བརྒྱད་བརྒྱར་བཟླས་ན། གང་གི་མིང་བསམས་པར་གྱུར་པ་དེ་

དབང་དུ་འགྱུར་རོ། །འབྲུ་ནག་པོ་ལ་བརྒྱད་བརྒྱར་བཟླས་ན་གང་གི་མིང་ནས་བརྗོད་པ་དེ་དབང་དུ་འགྱུར་རོ། །དབང་དུ་བྱེད་པ་ལ་རས་རིས་ཀྱི་སྤྱན་སྔར་ཨ་པཱ་མརྒའི་ཡམ་ཤིང་གི་མེ་ལ་པདྨའི་སྦྱིན་སྲེག་བྱའོ། །བིལ་བའི་ཤིང་གི་ཡམ་ཤིང་ངམ་འོ་མ་དང་བཅས་པའི་ཡམ་ཤིང་གིས་

Vol. 94 · folio 88a

མེ་རབ་ཏུ་སྦར་ནས་པདྨ་སྟོང་ཕྲག་བརྒྱ་སྦྱིན་སྲེག་བྱ་སྟེ་སྟོབས་ཀྱི་འཁོར་ལོས་སྒྱུར་བར་འགྱུར་རོ། །སླར་ཡང་པདྨ་སྟོང་ཕྲག་བཅུས་རྒྱལ་སྲིད་རྙེད་དོ། །པདྨ་སྟོང་ཕྲག་བརྒྱའི་སྦྱིན་སྲེག་གིས་ལོངས་སྤྱོད་ཆེན་པོ་རྙེད་དོ། །སྦྱིན་སྲེག་འདི་རྣམས་ཐམས་ཅད་ལ་དྲི་དང་མེ་ཏོག་

དང་བདུག་པས་མཆོད་པ་བྱས་ནས་འོ་མ་དང་ནས་ཟན་ཟ་བས་སྣ་མའི་མེ་ཏོག་གིས་གང་གི་མིང་ནས་འབོད་པ་དེ་དབང་དུ་འགྱུར་རོ། །བིལ་བའི་ཡམ་ཤིང་གིས་བརྒྱད་བརྒྱས་མེ་རབ་ཏུ་སྦར་ནས་པདྨ་སྟོང་ཕྲག་བརྒྱ་སྦྱིན་སྲེག་བྱའོ། །གང་གི་མིང་ནས་འབོད་པ་དེ་དབང་དུ་འགྱུར་རོ། །གི་

ཝང་གི་བྱུག་པ་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་མགོ་བོ་ལ་བྱུག་པར་བྱའོ། །ཡང་ན་གདོང་ལ་ཐིག་ལེ་བྱའོ། །སྐྱེ་བོ་ཐམས་ཅད་དགའ་བར་འགྱུར་རོ། །པདྨའི་ས་བོན་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱའོ། །མིང་སྨོས་པ་དེ་

དབང་དུ་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་དྲིན་ལས་གཞན་དུ་འགྱུར་རོ། །པདྨ་མ་རྙེད་ན་ཨུཏྤལ་སྔོན་པོ་སྟོང་ཕྲག་བརྒྱད་ཀྱི་སྦྱིན་སྲེག་བྱའོ། །དྲིའམ་མེ་ཏོག་གི་སྦྱིན་སྲེག་བྱ་སྟེ་འབུམ་ཕྲག་གཅིག་གིས་ལྷ་རྣམས་གྲུབ་པར་འགྱུར་རོ། །ཁྲུས་

ལ་སྨན་ཐམས་ཅད་དང་། ས་བོན་ཐམས་ཅད་རྩ་བ་ནག་པོ་མེད་པའི་བུམ་པར་བཅུག་ནས་སྟོང་ཕྲག་བརྒྱད་མངོན་པར་བསྔགས་པའི་ཆུས་ཁྲུས་བྱའོ། །བགེགས་ཀྱིས་བཏབ་པ་འམ་བདག་ཉིད་ཞི་བར་འགྱུར་རོ། །ཨུཏྤ་ལ་དང་། རུ་རྟ་དང་། ཨ་ག་རུའི་ཆ་དང་། སྟག་སེན།

རྒྱ་སྤོས་བཞི་འགྱུར་གྱི་ཆ་རྣམས་རས་རིས་ཀྱི་སྤྱན་སྔར་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་རྒྱ་ཆེན་པོ་བྱས་ཏེ་བའི་མར་མེ་རབ་ཏུ་སྦར་ནས་རྫས་རྣམས་ཐམས་ཅད་མེ་ཏོག་གིས་སྦྱོར་བས་དུས་མ་ཡིན་པ་གང་གི་རྒྱལ་པོ་འམ། རྒྱལ་པོའི་བློན་པོའམ། རྒྱལ་པོའི་

བཙུན་མོའམ། སྒྲུབ་པ་པོའམ། ཚེ་སོང་བ་རྣམས་འཁྲུར་གཞུག་པར་བྱའོ། །ཚེ་རིང་བར་འགྱུར་རོ། །སྐལ་བ་བཟང་པོ་བགེགས་ཀྱིས་བཏབ་པ་རྣམས་བགེགས་ལས་གྲོལ་བར་བྱེད་དོ། །འཕགས་པ་སྤྱན་རས་གཟིགས་དབང་ཕྱུག་གི་དྲུང་དུ་ཉིན་མཚན་དུ་སྨྱུང་བར་གནས་

Vol. 94 · folio 88b

པས། བྲཧྨ་དཱ་རིའམ་ཛི་ཏེནྟྲ་ཡ་དང་། ཨ་ག་རུ་དང་། ཏུ་རུཥྐ་འབུམ་ཕྲག་གཅིག་སྦྱིན་སྲེག་བྱ་སྟེ་དེ་བཞིན་དུ་ཡང་འགྲུབ་པར་འགྱུར་རོ། །ཏིལ་ནག་པོ་ལ་ཞོ་དང་། སྦྲང་རྩི་དང་། མར་གྱིས་བཏགས་པ་དང་། ཙནྡན་གྱི་ཕྱེ་མ་འམ་ཞོགས་མ་དང་བསྲེས་པའི་སྦྱིན་སྲེག་སྟོང་ཕྲག་བརྒྱད་

བྱ་སྟེ་གྲུབ་པར་འགྱུར་རོ། །ཆོ་ག་གཞན་ནི་ཙནྡན་གྱི་ཡམ་ཤིང་སོར་བཞི་པའི་ཚད་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་འབུམ་བྱས་ཏེ་གྲུབ་པར་འགྱུར་རོ། །དཀར་པོའི་ཚེས་གཅིག་ནས་བརྩམས་ཏེ་བིལ་བའི་ཤིང་གི་འོག་ཏུ་མེ་ཉེ་བར་སྦར་ནས་བིལ་བའི་འབྲས་བུ་ལ་ཞོ་

དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་འབུམ་ཕྲག་བརྒྱད་ཅུ་བྱ་སྟེ། རང་གི་གཟུགས་ཀྱིས་ལྷ་མོ་མཐོང་ཞིང་རྒྱལ་སྲིད་ཆེན་པོ་གནང་བར་བྱེད་ཅིང་གཞན་ཡང་གང་ཞུས་པ་དེ་གནང་བར་བྱེད་དོ། །འབྱུང་པོའི་གདོན་གྲོལ་བར་བྱེད་པ་ལ་པདྨའི་ཕྱག་རྒྱས་རེག་པར་བྱ་སྟེ་འབྲོས་

པར་བྱེད་དོ། །བསྒྲུབ་པར་བྱ་བཞིན་པ་མ་ཡིན་པའི་འོ་མའི་ཤིང་གིས་མེ་སྦར་ནས་ཞོ་དང་སྦྲང་རྩི་དང་། མར་གྱིས་བཏགས་པའི་པདྨའི་སྦྱིན་སྲེག་སྟོང་ཕྲག་བརྒྱ་བྱའོ། །དེ་བཞིན་དུ་ཨུཏྤལ་དམར་པོ་དང་། སྔོན་པོ་འབུམ་ཕྲག་གཅིག་སྦྱིན་སྲེག་བྱ་ཞིང་ཡང་ན་སྣ་མའི་མེ་ཏོག་གིས་

སྦྱིན་སྲེག་གོ། །རས་རིས་ཀྱི་སྤྱན་སྔར་འོ་མ་དང་ནས་ཟན་ཟ་ཞིང་འཕེལ་བཞིན་པའི་མཆོད་པ་བྱ་སྟེ་སློང་མོའི་ཟས་བཟའ་བར་བྱའོ། །དྲི་དང་མེ་ཏོག་དང་བདུག་པས་མཆོད་པ་རྒྱ་ཆེན་པོ་བྱས་ནས་ཉིན་མཚན་དུ་སྨྱུང་བར་གནས་པའི་མཐར་དྲི་ཞིམ་པོའི་མེ་ཏོག་གིས་སྦྱིན་སྲེག་བྱའོ། །སྒྲུབ་

བཞིན་པ་མ་ཡིན་པ་འདིས་ས་རྣམས་ཚུལ་ཁྲིམས་མཆོག་ཏུ་འཆལ་པས་ཀྱང་གྲུབ་པར་བྱེད་དོ། །ཡང་ན་ཡུངས་ཀར་ཏིལ་ནག་པོ་དང་བསྲེས་པ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱ་བྱའོ། །དེ་བཞིན་དུ་འགྲུབ་པར་འགྱུར་རོ། །ནོར་འདོད་པས་ཨ་པཱ་

མརྒའི་ཡམ་ཤིང་གིས་ཡུངས་ཀར་རྒྱལ་པོ་འམ་སྐེ་ཚེའི་སྦྱིན་སྲེག་གོ། །ཡང་ན་བློན་པོ་དབང་དུ་བྱེད་པ་ལ་ཏིལ་མར་གྱིས་སྦྱིན་སྲེག་སྟེ། ལས་ཐམས་ཅད་ལ་ཡང་སྦྱར་བར་བྱའོ། །བུ་མོ་དབང་དུ་བྱེད་པ་ལ་སྔར་གྱི་སྦྱིན་སྲེག་ཞོ་དང་། སྦྲང་རྩི་དང་། མར་གྱིས་བཏགས་པས་སོ། །རྒྱལ་

Vol. 94 · folio 89a

པོའི་བཙུན་མོ་ལ་ལས་འདིའོ། །བྱང་ཆུབ་ཤིང་གི་མེ་སྦར་ནས་ཡོངས་སུ་སྤྱོད་པའི་སྦྱིན་སྲེག་གོ། །དབང་དུ་བྱེད་པ་ལ་ཡུངས་ཀར་རྒྱལ་པོའི་སྦྱིན་སྲེག་གོ། །དབང་དུ་བྱེད་པ་ལ་ཀམྦོ་ཛི་ཀའི་མེ་ཏོག་གི་ཡམ་ཤིང་གིས་སྟོང་ཕྲག་བརྒྱ་བྱའོ། །ཞོ་དང་སྦྲང་རྩི་དང་མར་

གྱིས་བཏགས་པའི་བྱང་ཆུབ་ཤིང་གི་ཡམ་ཤིང་གིས་མེ་སྦར་ནས་ཐབ་མེད་པའི་མེ་ལ་ལྷ་དང་ལྷ་མོ་ལ་དྲི་དང་མེ་ཏོག་དང་བདུག་པས་མངོན་པར་མཆོད་ཅིང་མཆོད་པ་རྒྱ་ཆེན་པོ་བྱས་ནས་འོ་མ་དང་ནས་ཟན་ཟ་ཞིང་གོས་གཙང་མ་བགོས་ཏེ་གང་བླངས་པ་དེ་སྟེར་བར་བྱེད་དོ། །བ་ཤ་ཀའི་མེ་

ཏོག་ཕྲག་བརྒྱ་སྦྱིན་སྲེག་བྱ་སྟེ་མིང་སྨོས་པ་དེ་དབང་དུ་བྱེད་དོ། །ན་ལེ་ཤམ་གྱི་སྦྱིན་སྲེག་གིས་ལོག་འདྲེན་རྣམ་པར་འཇོམས་པར་བྱེད་དོ། །བྱང་ཆུབ་ཤིང་གི་འོག་ཏུ་དྲི་དང་མེ་ཏོག་གིས་མངོན་པར་མཆོད་ནས་ཟླ་བ་གཟས་བཟུང་བ་ན་ལྡོང་རོས་བླངས་ནས་ཨ་ཤྭཏྠའི་འདབ་མ་

བདུན་གྱི་སྟེང་དུ་བཞག་ནས་ཇི་སྲིད་འབར་བར་གྱུར་གྱི་བར་དུ་བསྒོམ་པར་བྱའོ། །བླངས་པ་དེས་རིག་པ་འཛིན་པར་འགྱུར་ཏེ་ལྷ་ཐམས་ཅད་ཐོགས་པ་མེད་པ་དང་། ལྷའི་གཞལ་ཡས་ཁང་མཆོག་ཏུ་མཛེས་པར་མྱུར་ཞིང་མགྱོགས་པར་འགྲོ་སྟེ་ཉི་མ་འཆར་ཀའི་མདོག་དང་གཟི་བརྗིད་དང་

ལྡན་ཞིང་རིག་པ་འཛིན་པ་ཐམས་ཅད་དང་ལྡན་པར་འགྲོ་སྟེ་ལྷའི་འགྲོ་བ་བརྒྱ་ཕྲག་གིས་ཡོངས་སུ་བསྐོར་བར་འགྱུར་རོ། །རྣ་བའི་མིག་སྨན་ལ་ལས་འདི་ཁོ་ནའོ། །གི་ཝང་སྒྲུབ་པར་འདོད་པས་འོ་མ་དང་ནས་ཟན་ཟ་བས་སྔོན་དུ་སྟོང་ཕྲག་བརྒྱ་བཟླས་པར་བྱའོ། །ཟླ་བ་གཟས་

བཟུང་བའི་དུས་སུ་པི་པི་ལིང་གི་འདབ་མ་བདུན་གྱི་སྟེང་དུ་འམ། རིང་བསྲེལ་ཅན་གྱི་མཆོད་རྟེན་དུ་གི་ཝང་རྣམ་པ་བརྒྱར་བྱ་སྟེ་བཏང་ནས་རིག་པ་ཡོངས་སུ་བསྐོར་བས་ལས་བྱའོ། །ཉེ་བར་སྤྱོད་པ་ལ་སོགས་པ་ཅན་ཏེ་དེས་ཐིག་ལེ་བྱས་ནས་རྒྱན་ཐམས་ཅད་ཀྱིས་རྣམ་པར་བརྒྱན་

པའི་ལུས་འདོད་པའི་གཟུགས་ཅན་གྱི་རིག་པ་འཛིན་པར་འགྱུར་ཏེ་ལོ་སྟོང་དུ་འཚོ་བར་བྱེད་དོ། །དཔའ་བོ་བཟང་པོ་ལས་བྱུང་བའི་མིག་སྨན་གྱི་འདབ་མ་བླངས་ནས་མེ་གདུང་བཟང་པོར་བྱས་ནས་ལན་བརྒྱར་རབ་ཏུ་བཅུག་ནས་ཟླ་བ་གཟས་ཟིན་པ་ན་ཆུར་ཞུགས་ཏེ་ཇི་སྲིད་དུ་གྲུལ་

Vol. 94 · folio 89b

བུམ་དུ་གྱུར་པ་དེ་སྲིད་དུ་བཟླས་པ་བྱའོ། །སྐད་ཅིག་ལ་བཅག་པ་ཙམ་གྱིས་རྣམ་པར་ཞིག་པར་འགྱུར་རོ། །འདི་བྱུགས་པས་གཟི་བརྗིད་དང་ལྡན་ཞིང་ཅོད་པན་དང་རྣ་རྒྱན་འཆང་བ་པདྨའི་ཕྲེང་བས་རྣམ་པར་བརྒྱན་པའི་ལུས་རིག་པ་འཛིན་པ་ཐམས་ཅད་ཀྱི་མཐར་ཐུག་པར་ཡང་རབ་ཏུ་སྨོན་པར་འགྲོའོ། །

འཁོར་དང་བཅས་པ་ལོ་སྟོང་ཕྲག་ལྔར་འཚོ་བར་བྱེད་དོ། །རླུང་ལྟར་འགྲོ་ཞིང་ཡིད་ལྟར་མགྱོགས་པར་འགྲོ་བའི་རིག་པ་འཛིན་པར་འགྱུར་རོ། །པདྨ་དང་ཨུཏྤ་ལ་སྟོང་ཕྲག་བརྒྱའི་སྦྱིན་སྲེག་གིས་གསེར་སྟོང་རྙེད་དོ། །པ་ལཱ་ཤའི་ལས་ནི་འདི་ཁོ་ནའོ། །ཡང་འདིར་ལས་ཆེན་པོའི་

སྒྲུབ་ཐབས་སུ་འགྱུར་བ་ནི་རྒྱལ་བའི་ཞབས་དྲུང་ངམ། རས་རིས་ཀྱི་སྤྱན་སྔར་རམ། རྟོག་པ་གཞན་ལས་གསུངས་པའི་ཆོ་གས་ཀྱང་རུང་སྟེ། རིག་པ་འདི་རྣམས་ཀྱི་མིང་གསུམ་གསུམ་བརྗོད་པའི་རས་རིས་ཀྱི་ཆོ་ག་དེའམ། རིང་བསྲེལ་དང་བཅས་པའི་མཆོད་རྟེན་གྱི་དྲུང་དུ་ཕྱོགས་གཙང་མར་འོ་

མ་དང་ནས་ཟན་ཟ་བས་དཀར་པོའི་ཚེས་གཅིག་ནས་བརྩམས་ཏེ་མེ་ཏོག་དང་། འབྲས་བུ་དང་། ཙཱ་རུ་དང་། རྩ་བ་དང་། ཞོའི་བཟའ་བའམ། ཆུ་དང་། ཕྱེ་དང་། ཟན་དང་། དྲིའི་བཟའ་བའམ། ཝ་ཀྲའི་བཟའ་བའམ། མར་གྱི་བཟའ་བས་ཀྱང་རུང་སྟེ། ཡང་ན་མི་སྨྲ་བའི་བརྟུལ་

ཞུགས་སྤྱད་པར་བྱའོ། །ཐོག་མར་སྔོན་དུ་བསྙེན་པ་བྱའོ། །ཡན་ལག་བརྒྱད་པའི་གསོ་སྦྱོང་དང་ཡང་དག་པར་ལྡན་པས་ཉི་མ་སོ་སོར་མངོན་པར་བརྗོད་བཞིན་པའི་མཆོད་པ་བྱའོ། །གསུང་རབ་ཇི་ལྟ་བ་བཞིན་དུ་སློང་མོའི་ཟས་བཟའ་བར་བྱའོ། །བྱང་ཆུབ་ཀྱི་སེམས་ཡོངས་སུ་གཟུང་

ཞིང་སྡུག་བསྔལ་གྱིས་གདུངས་པས་བཟའ་བར་བྱའོ། །སྒྲུབ་པ་པོས་དུས་གསུམ་དུ་ཁྲུས་བྱས་པའི་འོག་ཏུ་ཤིས་པའི་ཀུ་ཤའི་ཁྲེས་ལ་འདུག་སྟེ་སྦྱངས་པ་ལས་བྱུང་བའི་གོས་བགོ་ཞིང་འབུམ་ཕྲག་གཅིག་ཏུ་བཟླས་པར་བྱའོ། །མཐར་ཉིན་མཚན་དུ་སྨྱུང་བར་གནས་པས་སེང་ལྡེང་གི་

ཤིང་གིས་མེ་སྦར་ནས་འོ་མ་དང་བཅས་པའི་ཤིང་ངམ། ཨ་ག་རུ་ནག་པོའི་ཡམ་ཤིང་སོར་བཞི་པའི་ཚད་དམ་མཛུབ་མོའི་ཚད་ལ་ཏུ་རུཥྐའི་ཏིལ་མར་གྱིས་བཏགས་པ་དུས་གསུམ་དུ་སྟོང་ཕྲག་བརྒྱད་སྦྱིན་སྲེག་བྱའོ། །དེ་ནས་གྲུབ་པར་འགྱུར་ཏེ་བཅྭ་ལྔ་ལ་ཕྱོགས་བཞི་རས་ལས་བྱུང་བའི་

Vol. 94 · folio 90a

བུམ་པ་བཞི་ཆུ་དང་བཅས་པ་ཨ་མྲའི་ཡལ་འདབ་ཀྱིས་ཁ་གཡོགས་པ། རྩ་བ་དང་ནག་པོ་མེད་པ་གཞག་པར་བྱའོ། །གཡས་ཀྱི་གཞོགས་སུ་ས་ལས་བྱུང་བའམ། གསེར་ལས་བྱུང་བ་རིན་པོ་ཆེ་དང་། ས་བོན་ཐམས་ཅད་ཀྱིས་ཡོངས་སུ་གང་བ། སྨན་ཐམས་

ཅད་དང་། རྩ་བ་དང་། རིན་པོ་ཆེའི་སྙིང་པོ་པདྨ་དྲ་བའི་མེ་ཏོག་གིས་ཁ་གཡོགས་པ། དུ་གུ་ལའི་རས་མ་ཉམས་པས་མགྲིན་པ་བཅིངས་པ། རྣམ་པར་རྒྱལ་བ་ཞེས་བྱ་བའི་བུམ་པ་དབུས་སུ་གཞག་པར་བྱའོ། །དེ་བཞིན་དུ་ཤར་གྱི་ཕྱོགས་སུ་འཆར་བ་ཞེས་བྱ་བའི་བུམ་པའོ། །ནུབ་

ཀྱི་ཕྱོགས་སུ་ཧ་རིངས་ཞེས་བྱ་བའི་བུམ་པའོ། །དེ་ལྟ་བུ་ལ་སོགས་པ་བུམ་པ་རྣམས་ཀྱི་མིང་སྨོས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་བཞིན་གཞུག་པར་བྱའོ། །དྲི་བཟང་པོའི་མེ་ཏོག་དང་། གཏོར་མ་དང་། ཕྲེང་བ་ཉི་ཤུ་དབུལ་བར་བྱ་ཞིང་། དྲིས་བཀང་བའི་ཁམ་པོར་ཉི་ཤུ་

ཕྱོགས་བཞིར་དབུལ་བར་བྱའོ། །འོ་མས་བཀང་བའི་ཁམ་ཕོར་ཉི་ཤུ་ཕྱོགས་བཞིར་གཞག་པར་བྱའོ། །མར་གྱི་མར་མེ་བརྒྱ་དབུལ་བར་བྱའོ། །བུམ་པའི་སྒྲོན་མ་བཞི་རབ་ཏུ་སྦར་བར་བྱའོ། །འོ་ཐུག་གིས་བཀང་བའི་ཁམ་ཕོར་བཅུ་གཉིས་ཀླུ་རྣམས་ལ་དབུལ་བར་བྱའོ། །

ཏིལ་གྱི་ཐུག་པའི་ཁམ་ཕོར་བཅུ་གཉིས་སྲིན་པོ་རྣམས་ལ་གཏོར་མ་མཆོད་པར་བྱའོ། །ཟན་དྲོན་གྱི་ཁམ་ཕོར་བརྒྱད་འབྱུང་པོ་རྣམས་ལ་གཏོར་མར་སྦྱིན་ནོ། །ཧྭགས་ཀྱི་བཅའ་བ་ལ་སོགས་པའི་གཏོར་མ་འཕགས་པ་སྤྱན་རས་གཟིགས་དབང་ཕྱུག་ལ་དབུལ་བར་བྱའོ། །གཞན་

རྣམས་ལ་མར་སར་དང་། ཞོས་བཀང་བ་དང་། ཇི་ལྟར་འོས་པ་དང་། ཇི་ལྟར་མཚུངས་པའི་ཁམ་ཕོར་རྣམས་ཕྱོགས་བཞིར་གཞག་པར་བྱའོ། །ཨ་ག་རུ་ནག་པོའི་བདུག་སྤོས་དབུལ་བར་བྱའོ། །ག་བུར་དང་། ཙནྡན་དཀར་པོ་དང་། ཀུན་དུ་རུ་ཀ་དང་། ཤྲི་བཱ་ས་ཅན་གྱི་

བདུག་པའི་ཁམ་ཕོར་ཕྱོགས་བཞིར་གཞག་པར་བྱའོ། །དེ་ནས་སྲོད་ལ་ལས་བརྩམས་པར་བྱས་ཏེ་ཉིན་མཚན་དུ་སྨྱུང་བར་གནས་པས་ཨརྒའི་ཡམ་ཤིང་ངམ། སེང་ལྡེང་གི་ཤིང་གིས་མེ་རབ་ཏུ་སྦར་ནས་ལས་འདི་ལ་སྔགས་འདིས་སྤྱན་དྲང་བ་བྱས་པར་འགྱུར་རོ། །སྔགས་ནི། ན་

Vol. 94 · folio 90b

མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཧི་རི་ཧི་རི། སུ་རུ་སུ་རུ། མ་ཧཱ་ཀཱ་རུ་ཎི་ཀཱ་ཨཱ་གཙྪ་ཨཱ་གཙྪ། ཨཱརྱ་ཨ་བ་ལོ་ཀི་ཏེ་ཤྭ་རཱ་དྷི་རི་དྷི་རི་ཎི། ཡ་ཐཱ་ས་མ་ཡ་མ་ནུ་སྨ་ར་སཱ་ཧཱ། གཤེགས་སུ་གསོལ་བའི་དུས་སུ་དྲི་ཞིམ་པོའི་མེ་ཏོག་གིས་བསྐུལ་

བས་སོ། །དངུལ་ལས་བྱུང་བའི་སྣོད་དམ། ས་ལས་བྱུང་བར་མཆོད་ཡོན་ཕུལ་ནས་དེ་ནས་ཨ་ག་རུ་ནག་པོའི་ཡམ་ཤིང་ཇི་སྐད་གསུངས་པའི་ཚད། གཞན་གསུངས་པ་ལ་ཏིལ་མར་གྱིས་བཏགས་པ་རྣམས་ཟླ་བ་གཟས་བཟུང་བའམ། ཉི་མ་གཟས་བཟུང་བ་ན་སྟོང་ཕྲག་བརྒྱད་སྦྱིན་

སྲེག་བྱའོ། །དེ་ནས་ཤར་ལ་སོགས་པའི་ཕྱོགས་སུ་འཕགས་པ་སྤྱན་རས་གཟིགས་དབང་ཕྱུག་མཆོག་ཏུ་ཐུགས་བརྩེ་བ་ཕྱག་ན་རིལ་བ་སྤྱི་བླུགས་དང་། དབྱུག་པ་བསྣམས་པ། རལ་པའི་ཅོད་པན་འཕྱང་བ་འབྱོན་པར་འགྱུར་རོ། །དེ་ནས་ཇི་སྐད་གསུངས་པའི་སྣོད་དུ་དྲི་ཞིམ་

པོའི་མེ་ཏོག་དཀར་པོ་རྣམས་སྙིམ་པས་བླངས་ནས་ཆུའི་མཆོད་ཡོན་དབུལ་བར་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་ཅི་ཡིན་པའི་མཆོག་སྟེ་སྦྱིན་པར་བྱའོ་ཞེས་གསུང་བར་བྱེད་དོ། །གང་མཆོག་བླངས་པ་དེ་སྟེར་རོ། །ནམ་མཁའ་ལ་འགྲོ་བའམ། མི་སྣང་

བའམ། རྒྱལ་པོ་ཉིད་དམ། རིག་པའི་དངོས་གྲུབ་ཐམས་ཅད་དམ། རིག་པ་འཛིན་པའི་རྒྱལ་པོ་ཉིད་དམ། མཚོན་ཆའམ། ཚེ་རིང་པོ་ཉིད་དམ། སེམས་ཅན་ཐམས་ཅད་དབང་དུ་བྱེད་པའམ། གི་ཝང་སྒྲུབ་པའམ། མིག་སྨན་སྒྲུབ་པའམ། གཏེར་འཕོ་བའམ། ཕུག་ཏུ་འཇུག་

པའམ། བཅུད་ལེན་ནམ། ལྡོང་རོས་སྒྲུབ་པའམ། མངོན་པར་ཤེས་པ་ལྔ་ཉིད་དམ། རང་གི་ལུས་ལ་རྗེས་སུ་འདོད་པའི་ཆོ་གའམ། ལྷའི་མིག་གམ། ནད་འཇོམས་པའམ། ལྷའི་ཤེས་པའམ། ལག་པ་དང་རྐང་པའམ། མིག་ཆ་དང་བྲལ་བ་ཉིད་དམ། ལྷའི་དབང་པོ་སྦས་པ་ཉིད་

དམ། ནད་འཇོམས་པ་ཉིད་དམ། མཛེའམ་ལུས་ལ་གང་ཅུང་ཟད་བསྒྲུབ་བྱ་མིན་པའི་ནད་དེ་དང་དེ་རྣམས་ལ་དེ་ལས་ཐར་བ་དང་། ཐོས་པ་འཛིན་པ་དང་། ནོར་སྒྲུབ་པ་ཉིད་དམ། གང་བླངས་པའི་མཆོག་དེ་སྦྱིན་པར་མཛད་དོ། །འཕགས་པ་སྤྱན་རས་གཟིགས་དབང་ཕྱུག་གི་གནས་

Vol. 94 · folio 91a

སུའང་འགྲོའོ། །ཚེ་བསྐལ་བར་འགྱུར་རོ། །བཅོམ་ལྡན་འདས་མ་འཕགས་མ་སྒྲོལ་མའི་སྒྲུབ་པོས་ཀུ་ཤའི་ཁྲེས་ཡོད་པས་ཨུ་དུམ་བཱ་རའི་ཆོ་ག་ཤེས་པར་བྱ་སྟེ། ཨུ་དུམ་བཱ་རའི་ཤིང་གི་ཤིང་ལྷམ་གཉིས་སམ། རྫ་མཁན་གྱི་ས་ལ། དེ་ནས་ཐམས་ཅད་མཉམ་པ་ཉིད་དོ། །

སྒྲོལ་མའི་མཆོག་ཏུ་གསང་བའི་ཉེ་བའི་སྙིང་པོའི་ཆོ་གར་འགྱུར་ཏེ། ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཨོཾ་ཀུ་རུ་ཀུ་རུ་ཀུལླེ་སྭཱ་ཧཱ། འདི་ནི་རིག་པ་འདི་ཐམས་ཅད་ཀྱི་མཆོག་ཏུ་གསང་བའི་ཉེ་བའི་སྙིང་པོ་སྟེ་བཟླས་པ་ཙམ་གྱིས་འཇིགས་

པ་ཐམས་ཅད་གནོན་པར་བྱེད་དོ། །ནད་ཐམས་ཅད་ཟད་ཅིང་འཇོམས་སོ། །འཇིགས་པ་ཐམས་ཅད་འཇོམས་པར་བྱེད་དོ། །ལས་ཕྲན་ཚེགས་རྣམས་ཀྱང་བཀླགས་པས་འགྲུབ་བོ། །འབུམ་ཕྲག་ཉི་ཤུ་རྩ་གཅིག་ཏུ་ཟློས་པར་བྱེད་པ་ནི་ནམ་མཁའ་ལ་འགྲོ་བར་བྱེད་པའོ། །དེ་ནས་

མིག་སྨན་ལྡོང་རོས་ཨ་ཤྭཏྠའི་འདབ་མ་བདུན་གྱི་ནང་དུ་ཇི་སྲིད་དྲོ་བར་གྱུར་པ་དེ་སྲིད་དུ་བཟླས་པར་བྱའོ། །དྲོ་བར་བྱེད་བཞིན་པས་ནི་དབང་དུ་བྱེད་དོ། །དུ་བ་འཐུལ་བས་ནི་མི་སྣང་བའོ། །འབར་བས་ནི་ནམ་མཁའ་ལ་འགྲོའོ། །ཏིལ་གྱི་སྲེག་བླུགས་འབུམ་གྱིས་སྦྱིན་སྲེག་བྱའོ། །

གང་འདོད་པ་དེ་སྟེར་བར་བྱེད་དོ། །འབུམ་ཕྲག་བཅུ་གཅིག་བཟླས་པར་བྱ་སྟེ་ཇི་སྲིད་དུ་འཕགས་པ་སྤྱན་རས་གཟིགས་དབང་ཕྱུག་མཐོང་བར་བྱེད་དོ། །དེ་མཐོང་ན་གང་བརྩམས་པ་དེ་འགྲུབ་པར་བྱེད་དོ། །ཙནྡན་དཀར་པོའི་ཡམ་ཤིང་གིས་སྦྱིན་སྲེག་སྟོང་ཕྲག་བརྒྱ་བྱ་སྟེ་ཉི་མ་སོ་

སོ་ལ་དོང་ཙེ་རྙེད་དོ། །ཙནྡན་དམར་པོའི་ཡམ་ཤིང་གིས་སྦྱིན་སྲེག་སྟོང་ཕྲག་བརྒྱ་བྱ་སྟེ། ཉི་མ་རེ་རེ་ལ་ཀཱ་ར་ཥཱ་པ་ཎ་དྲུག་རྙེད་དོ། །འབུམ་ཕྲག་བདུན་བདུན་བཟླས་པར་བྱ་སྟེ་མི་སྣང་བར་འགྱུར་རོ། །འབུམ་ཕྲག་ལྔ་བཟླས་པར་བྱ་སྟེ། ནད་འཇོམས་པར་བྱེད་དོ། །མཚན་མོ་བརྒྱད་དུ་

ལན་གསུམ་ཡོངས་སུ་བཟླས་པས་ནད་འཇོམས་པར་བྱེད་དོ། །འབུམ་ཕྲག་བཅུ་གཉིས་བཟླས་པར་བྱ་སྟེ་བཅུད་ལེན་དང་བཅུད་རྙེད་དོ། །དེ་ཟོས་པས་གཉེར་མ་དང་སྐྲ་དཀར་སྤངས་པར་འགྱུར་རོ། །འབུམ་ཕྲག་གསུམ་གྱིས་གྲི་དྷ་ཤཱི་སེལ་བར་བྱེད་དོ། །ལྕགས་བསྲེགས་

Vol. 94 · folio 91b

ནས་ལན་གསུམ་བཟླས་པའི་ཏིལ་མར་གྱིས་རྐང་པ་གཡས་པ་ལ་བསྐུས་ནས་ལྕགས་དེས་རྐང་པ་ལ་གདུང་བར་བྱ་ཞིང་གྲི་དྷ་ཤཱི་ཆོད་ཅིག་ཅེས་བརྗོད་པར་བྱའོ། །འབུམ་ཕྲག་གཉིས་བཟླས་པས་རྒྱལ་པོའི་བཙུན་མོ་དབང་དུ་བྱེད་དོ། །ཡུངས་ཀར་རྒྱལ་པོའི་སྲེག་བླུགས་བྱས་པས་དབང་དུ་

འགྱུར་ཞིང་མཚན་མོ་བདུན་གྱིས་ནོར་གྱི་བདག་པོར་འགྱུར་ཏེ་འདོད་པས་ཉེ་བར་བཞག་པ་མ་གཏོགས་སོ། །མཱརྒ་ལ་འབུམ་བཟླས་ཏེ་བསྐུས་ན་བཟའ་བཏུང་གང་བླངས་པ་དེ་རྙེད་དོ། །ཨརྒའི་ཡམ་ཤིང་གིས་སྦྱིན་སྲེག་བྱས་ན་གསེར་སྲང་བརྒྱ་རྙེད་དོ། །ཤིང་བི་ཎྱ་ཀཾ་གིས་སྦྱིན་སྲེག་

བྱ་སྟེ་སྐྱེ་བོ་ཐམས་ཅད་དགའ་བར་འགྱུར་རོ། །ཏཱ་མཱུ་ལའི་ཕྱེ་མས་སྦྱིན་སྲེག་སྟོང་ཕྲག་བརྒྱ་བྱ་སྟེ་ཅོད་པན་འཆིང་བར་འགྱུར་རོ། །བྱེ་བ་བཟླས་པར་བྱ་སྟེ་འཁོར་བརྒྱས་བསྐོར་བའི་རིག་པ་འཛིན་པར་འགྱུར་རོ། །འབྲས་ཡོས་ཀྱི་སྲེག་བླུགས་སྟོང་ཕྲག་བརྒྱད་ཀྱིས་སྦྱིན་སྲེག་བྱ་སྟེ་ཉི་མ་

བདུན་གྱིས་བགེགས་རྣམས་མེད་པར་འགྱུར་རོ། །འབུམ་ཕྲག་བཅུ་གཉིས་བཟླས་པར་བྱ་སྟེ། བ་ལྕི་སྐམ་པོ་ཧྭགས་ཀྱིས་བཙོ་བར་འགྱུར་རོ། །རྩ་བ་མེད་པའམ། དུག་མེད་པར་བརྗོད་པས་བསྐུས་ན་དྲི་བཟང་པོར་འགྱུར་རོ། །ཏཱམྦུ་ལ་ཐམས་ཅད་ཡང་དག་པར་སྦྱར་ཏེ་

འབུམ་གྱིས་སྦྱིན་སྲེག་བྱའོ། །ཏཱམྦུ་ལ་མ་ཚང་བ་ཉིད་མེད་པར་འགྱུར་རོ། །ཨ་བཱ་མརྒས་མིག་ནད་སེལ་བར་བྱེད་དོ། །རིམས་ཀྱིས་བཏབ་པ་ལ་ཀུ་ཤས་བྱབས་པས་སོ། །སྲད་བུ་ལ་བརྒྱད་བརྒྱ་བཟླས་ནས་བཅིང་བར་བྱ་སྟེ་སྐལ་བ་བཟང་པོར་འགྱུར་རོ། །ཟན་དང་ཞོ་

ལྷན་ཅིག་པ་འབུམ་གྱིས་སྦྱིན་སྲེག་བྱས་ན་ཇི་སྲིད་འདོད་པའི་ཟས་མ་ཚང་བ་མེད་པར་འགྱུར་རོ། །མར་གྱི་སྲེག་བླུགས་སྟོང་གིས་སྦྱིན་སྲེག་བྱས་ན་ཡུལ་གྲུ་གསུམ་རྙེད་དོ། །བསོད་ནམས་ཆུང་བའི་སེམས་ཅན་རྣམས་ཀྱིས་སྒྲུབ་པ་ལན་གསུམ་གྱིས་བསྒྲུབ་པར་བྱའོ་ཞེས་སོ། །གུ་

གུལ་གྱི་རིལ་བུ་ཀ་པར་ཥའི་རུས་པའི་ཚད་ཀྱིས་སྦྱིན་སྲེག་སྟོང་ཕྲག་བརྒྱ་བྱ། ཉི་མ་རེ་རེ་ལ་པ་ཎ་བཅུ་དྲུག་རྙེད་དོ། །ལྷག་མ་མེད་པ་ཟད་པར་བྱའོ། །དོང་ཀའི་མེ་ཏོག་གིས་སྦྱིན་སྲེག་སྟོང་ཕྲག་བརྒྱ་བྱ་སྟེ་མ་བཏགས་པའི་གོས་སྣ་ཚོགས་པ་བྱེ་བ་ཕྲག་བཅུ་གཉིས་རྙེད་དོ། །སྙིང་རྗེས་སྦྱིན་

Vol. 94 · folio 92a

དུ་བཅུག་པ་དང་། དེ་བཞིན་དུ་དད་པ་དང་། ལྷ་བསྙེན་པ་ལས་གཞན་མ་ཡིན་པས་འགྲུབ་པར་མི་འགྱུར་རོ། །ཞེས་དེ་བཞིན་དུ་རྟོགས་པར་བྱའོ། །རྟོག་པའི་རྒྱལ་པོ་འདི་ཡང་ཆོས་ཐམས་ཅད་ཀྱི་ནང་དུ་གཏོགས་པར་རྟོག་པ་ཐམས་ཅད་ཀྱི་ནང་དུ་གཏོགས་པའི་རིག་པ་འདི་

ནི་ཆོ་ག་རྒྱས་པར་བསྟན་པར་ལོ་བརྒྱ་ཕྲག་གིས་ཀྱང་དེ་དང་འདིས་མདོར་བསྡུས་ནས་བསྟན་པར་མི་ནུས་སོ། །ཆོ་ག་གཞན་རྣམས་སུ་ཡང་རིག་པ་འདི་སྒྲུབ་པའི་ཆོ་ག་དེ་ཐམས་ཅད་བསྒྲུབ་པར་བྱ་ཞིང་། དེ་བཞིན་དུ་གང་ངེས་པར་བརྗོད་པའི་ལས་རྣམས་སྒྲུབ་པར་བྱེད་དོ། །རྟོག་པའི་རྒྱལ་པོ་

འདིར་རིག་པའི་སྔགས་དེ་རྣམས་དང་གང་སྔགས་རྣམས་ཀྱིས་བསྒྲུབ་པར་བྱ་བ་དེ་རྣམས་ཁོ་ན་ཡངས་པ་དང་ལྡན་པའི་ཏིང་ངེ་འཛིན་རབ་ཏུ་གསལ་བ་ལ་སོགས་པ་དང་། རྟོག་པ་གཞན་གྱི་ཆོ་གས་ཀྱང་བསྒྲུབ་པར་བྱའོ་ཞེས་པའོ། །དེ་རྟོག་པའི་རྒྱལ་པོ་འདིའི་སྒྲུབ་ཐབས་ཀྱི་སྤྱོད་པ་སྦྱིན་པ་

དང་། སྒྲུབ་པའི་ཐབས་ཀྱི་ཆོ་ག་རྣམ་པ་སྣ་ཚོགས་པ་ལ་སོགས་པ་དང་། དཀྱིལ་འཁོར་གྱི་ལས་དང་། འཇིག་རྟེན་དང་འཇིག་རྟེན་ལས་འདས་པའི་མངོན་པར་འདོད་པའི་རིག་པ་དང་། སྔགས་རྣམས་དང་། རྟོག་པ་ཐམས་ཅད་དུ་རྒྱས་པར་བསྟན་པའི་ཕྱག་རྒྱ་ཆེན་པོའི་ཆོ་ག་བཅུ་རྣམས་

དང་། བྱང་ཆུབ་སེམས་དཔའ་ཆེན་པོའི་ཆོ་ག་བརྒྱད་རྣམས་ཀྱང་མཉམ་པ་ཉིད་དུ་འགྱུར་རོ། །འདི་ལྟ་སྟེ་འཕགས་པ་ཀུན་ཏུ་བཟང་པོའི་རྟོག་པ་དང་། བྱང་ཆུབ་སེམས་དཔའ་ཆེན་པོ་གཞོན་ནུ་བཞི་པོའི་རྟོག་པ་དང་། ཡངས་པའི་རི་བོ་དང་། ཀུན་ཏུ་རི་བོ་དང་། འཇིག་རྟེན་གསུམ་

ལས་རྣམ་པར་རྒྱལ་བའི་རྒྱུད་དེ། རྟོག་པ་ཆེན་པོ་ཐམས་ཅད་ཀྱི་སྤྱོད་པའི་ཆོ་ག་རྣམས་སུ་མཉམ་པ་ཉིད་དུ་འགྲོ་བར་བྱེད་དོ། །དེ་བཞིན་ཁོ་ནར་བདག་གིས་བརྗོད་པ་དེ་དང་། སངས་རྒྱས་མཐའ་ཡས་པས་གསུངས་པའི་རྟོག་པའི་རྒྱལ་པོ་བདེ་བླག་ཏུ་བསྒྲུབ་པར་བྱ་སྟེ་མཐའ་ཡས་

པའི་བྱང་ཆུབ་ཀྱི་ཕ་རོལ་ཏུ་འགྲོའོ། །བྱང་ཆུབ་སེམས་དཔའི་སྡེ་སྣོད། བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཐམས་ཅད་ཐུན་མོང་པའི་ཆོ་གའི་རིག་པའི་ལེའུ་རབ་འབྱམ་རྫོགས་སོ།། །།ཕྱག་རྒྱའི་ལེའུ་བྲི་བར་བྱའོ། །

Vol. 94 · folio 92b

དེ་ནས་སེམས་དཔའ་ཆེན་པོ་ཕྱག་རྒྱ་ཡང་དག་པར་མགུ་བར་བྱེད་པའི་ཏིང་ངེ་འཛིན་ལ་སྙོམས་པར་ཞུགས་ནས་དཀྱིལ་འཁོར་ཐམས་ཅད་ཀྱི་ཆོ་ག་ཐུན་མོང་བ་རྒྱུད་ཐམས་ཅད་ཀྱི་ནང་དུ་གཏོགས་པ་ཕྱག་རྒྱའི་རི་མོའི་ཆོ་ག །རབ་ཏུ་འཛུམ་པའི་བཞིན་དུ་གྱུར་པས་དེའི་འོག་ཏུ་ཕྱག་རྒྱའི་མཚན་

ཉིད་གསུངས་པར་གྱུར་ཏོ། །བཅིང་བ་རྣམས་ཀྱི་མཚན་ཉིད་ནི། །ཤེས་ནས་རབ་ཏུ་བཞག་པའོ། །དེ་བཞིན་གཤེགས་པ་ཐམས་ཅད་ཀྱི། །རིགས་ཀྱི་ཕྱག་རྒྱ་ཆ་གསུམ་རྣམས། །ཉི་མའི་དཀྱིལ་འཁོར་ཀུན་ནས་འབར། །གཙུག་ཏོར་ཕྱག་རྒྱ་རྫོགས་པ་ཡི། །ཉི་མའི་

དཀྱིལ་འཁོར་འཆར་བ་ནི། །འཁོར་ལོས་སྒྱུར་བའི་ཕྱག་རྒྱའོ། །གཙུག་ཏོར་དེ་ཉིད་ཅུང་ཟད་བཏེག །གཙུག་ཏོར་སྟེང་འགྲོའི་ཕྱག་རྒྱའོ། །ཀུན་ཏུ་དཀར་བ་གདུགས་དཀར་ཅན། །འཁོར་ལོ་འབར་བ་རྣམ་པར་འཕྲོ། །གཟི་བརྗིད་ཕུང་པོ་རྡོ་རྗེ་སྙིང་། །གཞན་གྱིས་མི་

ཐུབ་ལན་གསུམ་དཀྲིས། །རྒྱལ་བའི་གཙུག་ཏོར་ཕྱག་རྒྱའོ། །འཁོར་ལོ་རྩིབས་བརྒྱད་ལྟེ་བར་བཅས། །ཆོས་ཀྱི་འཁོར་ལོའི་མཚན་ཉིད་དོ། །པདྨ་རིན་ཆེན་ནོར་བུ་ནི། །རིན་ཆེན་སྙིང་པོའི་ཕྱག་རྒྱའོ། །དེ་ཉིད་དཀྱིལ་འཁོར་སོ་སོར་གནས། །ལས་ཀུན་བྱེད་པའི་གདུ་

བུ་ཅན། །དེ་དབུས་སོན་པ་དབུས་མ་ཡིན། །སྤྱན་དེ་དེ་བཞིན་གཤེགས་པའི་སྤྱན། །དེ་ཉིད་རྩ་བ་ཅན་གྱིས་དམན། །དེ་བཞིན་གཤེགས་པའི་མཛོད་སྤུའོ། །རྩེ་མོའི་སྟེང་འོག་ནུས་པའི་མཚན། །དེ་བཞིན་གཤེགས་པའི་ནུས་པའོ། །འབར་བའི་ཚོགས་པ་གཞན་

མི་ཐུབ། །འབར་བའི་སྙིང་པོའི་དཀྱིལ་འཁོར་ནི། །ཐམས་ཅད་ལྷུང་བཟེད་སོགས་ཕྱག་རྒྱ། །སྔགས་སམ་ཡིད་ཀྱི་བྱེ་བྲག་ལས། །དེ་བཞིན་གཤེགས་རིགས་ཕྱག་རྒྱའོ། །པདྨ་འདབ་བརྒྱད་ཕྱི་མ་ལ། །འདབ་མ་ཅན་རྫོགས་གང་བ་ཡི། །ཟླ་བའི་རྣམ་པ་ཆ་དང་བཅས། །

རྩ་བའི་ཕྱག་རྒྱ་པདྨ་ཅན། །པདྨ་གཡོ་བའི་སྟེང་དུ་ནི། །ངེས་ཞུགས་ནོར་བུ་འདོད་པ་ནི། །ཕུན་ཚོགས་བྱེད་པའི་ཕྱག་རྒྱའོ། །རྟ་མགྲིན་དང་ནི་སྔོན་ཕྱོགས་ཀྱི། །པདྨ་ཡི་ནི་ཟེ་འབྲུའོ། །པདྨ་དཀར་པོ་གོས་དཀར་ཅན། །ཟེ་འབྲུ་དེ་ཉིད་གྲགས་ལྡན་མའི། །ཨུཏྤལ་དེ་ཉིད་

Vol. 94 · folio 93a

སྒྲོལ་མ་ཡི། །ཨུཏྤ་ལ་ནི་ཟླ་བ་ཡིའོ། །ཅུང་ཟད་རིན་ཆེན་ཁྲོ་གཉེར་ཅན། །སྡོང་བུ་དང་བཅས་དཔལ་མོ་སྟེ། །ཕོ་ཉ་མོ་ཀུན་ཞེས་བྱའི་རིགས། །ཁ་བྱེ་རྒྱས་པ་རིགས་རྒྱལ་མོའོ། །ལྷག་མ་རྣམས་ཀྱི་ཐུན་མོང་ཉིད། །བྱུག་པའམ་རིལ་བ་སྤྱི་བླུགས་ཀྱི། །རྣམ་

པ་དེ་དག་ལྷག་མ་རུ། །རིག་པ་ཅན་རྣམས་ཀྱིས་ཤེས་བྱ། །འབར་བས་པད་རིགས་ཕྱག་རྒྱའོ། །རྩེ་མོ་ལྔ་པ་རྡོ་རྗེ་ཡི། །གདོང་གཉིས་ལྷ་མོ་སོ་སོར་གནས། །འབར་བའི་ཕྲེང་ལྡན་རིག་པ་མཆོག །རིག་པའི་རྒྱལ་པོའི་རྡོ་རྗེའོ། །དམ་ཚིག་རྡོ་རྗེ་ཐད་ཀར་གནས། །བུམ་

དབུས་སྟེང་སོང་མཱ་མ་ཀཱི། །གཙུག་ཏོར་གཅིག་པ་རྒྱལ་བ་སྟེ། །གཙུག་ཏོར་གཉིས་པ་རྣམ་པར་རྒྱལ། །གཙུག་ཏོར་གསུམ་པ་རྡོ་རྗེའི་མཚན། །དབུས་སུ་མདུང་གི་རྣམ་པ་ནི། །རྡོ་རྗེ་ཡི་ནི་མཚན་མའོ། །དབུས་སུ་འཁྱིལ་པ་བྱས་ནས་ནི། །མདུང་ལ་འཁྱིལ་པ་

མངོན་ཕྱོགས་པའོ། །རྡོ་རྗེའི་དབུས་སུ་དཀྱིལ་འཁོར་ལ། །ཀུན་ནས་འབར་བའི་དཀྱིལ་འཁོར་ནི། །ཡོད་པ་ཕྲེང་བ་ཅན་མའོ། །རྡོ་རྗེ་གཉིས་ཀའི་རྩེ་མོ་ལ། ཕྲེང་བ་དག་བྱེད་ཕྲེང་བ་འཆང་། །ཅུང་ཟད་ཅོད་པན་གཞོགས་སུ་ནི། །ལྕགས་ཀྱུ་རྡོ་རྗེ་ལྕགས་ཀྱུ་མའོ། །

དབྱུག་པ་དབྱུག་པའོ་དེ་བཞིན་དུ། །དགྲ་སྟ་དབུས་མའི་རྩེ་མོར་གནས། །རྡོ་རྗེ་ཁུ་ཚུར་བུམ་ཅན་ཡང་། །དེ་ནས་ངེས་པའི་རྣམ་པ་ནི། །རྡོ་རྗེ་རྩེ་གཅིག་འབར་བཅས་པ། །རྡོ་རྗེ་ཁ་མདུང་གི་སྣ། །ཕོ་ཉ་མོ་ཡི་རིང་པོ་སྟེ། །ཁྲོ་བོ་རྣམས་ཀྱི་ཐུང་ངུའོ། །རྣམ་པར་འཕྲོ་བ་

རིག་པའི་རྒྱལ། །ཅུང་ཟད་དབུས་སུ་གཙུག་ཏོར་ལྡན། །རིག་པའི་རྒྱལ་པོ་ཞེས་བྱའོ། །འོག་ཏུ་མདུང་ལ་སྟེང་རྡོ་རྗེ། །ཚོགས་ཀྱིའོ་སྟེང་དུ་མདུང་དང་ནི། །འོག་ཏུ་རྡོ་རྗེ་ལོག་འདྲེན་ཀུན། །དབུས་སུ་བི་དཱིའི་ཕྱོགས་བཞི་རུ། །མགོ་གསུམ་རྡོ་རྗེ་བི་དཱི་ནི། །རིག་པའི་

རྒྱལ་པོའི་དཀྱིལ་འཁོར་དུའོ། །དེ་ཉིད་འདིར་ཡང་དེ་བཞིན་དུ། །ཐམས་ཅད་དུ་ནི་འབར་བཅས་པ། །བདུན་ལྔ་གསུམ་གྱི་འབར་བར་བྱ། །རྡོ་རྗེའི་རིགས་ནི་ཐམས་ཅད་ལ། །རྡོ་རྗེ་ལྔ་ཡི་མཚན་ཉིད་རྣམས། །ཕྱག་རྒྱ་བཅས་པའོ་གཏུམ་པོ་རྣམས། །བི་དཱི་ཀ་དང་བཅས་

Vol. 94 · folio 93b

པའོ། །ཅིག་ཤོས་འཇིག་རྟེན་པ་རྣམས་ནི། །འབར་བ་དང་བཅས་གཏུམ་པོ་མི། །བི་དཱི་མེད་པར་སོ་སོར་གནས། །ཇི་ལྟར་འགྲོ་བར་བྱ་བ་ཡི། །དགེ་བའི་སྤྱོད་པས་འཇིག་རྟེན་པ། །འཇིག་རྟེན་འདས་པའི་རྒྱུད་ཤེས་པས། །ཐམས་ཅད་རྟོག་པ་དཀྱིལ་འཁོར་གྱིས་ཞེས་སོ། །

ཨོཾ་ས་ར་ས་ར་བཛྲ་པྲཱ་ཀཱ་རཾ་ཧཱུྃ་ཕཊ་སྭཱ་ཧཱ། ར་བའོ། །ཨོཾ་བི་ཕུ་རད། རཀྵ་བཛྲ་པཉྫ་ར་ཧཱུྃ་ཕཊ་སྭཱ་ཧཱ། རྡོ་རྗེའི་གུར་རོ། །ཨོྃ་ཀཱི་ལི་ཀཱི་ལི། བཛྲ་བཛྲི་བྷུ་བནྡྷ་བནྡྷ་ཧཱུྃ་ཕཊ་སྭཱ་ཧཱ། ཕུར་བའོ། །དེ་ལྟར་འདི་རྣམས་ཀྱི་དཀྱིལ་འཁོར་བྲི་བའི་ཕྱག་རྒྱའོ། །དེ་ནས་སེམས་དཔའ་ཆེན་པོ་

དེས། སླར་ཡང་ཕྱག་རྒྱ་ཡང་དག་པར་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྒྲུབ་ཐབས་ཐམས་ཅད་ཀྱི་སྤྱིའི་ཆོ་ག་མཚུངས་པ་ཉིད་ཀྱི་ཕྱག་རྒྱ་དང་རིག་པ་ཐམས་ཅད་ལ་ཀུན་ནས་མཉམ་པར་འཇུག་པ་དེ་རྣམས་གདོན་མི་ཟ་བ་ཁོ་ནར་དངོས་གྲུབ་རྟོགས་

པར་འགྱུར་རོ་ཞེས་སོ། །དེ་ནས་ཐལ་མོ་དབུས་མ་ཡི། །གུང་མོའི་སོར་མོ་གུང་མོས་གུང་མོ་ལ། །དེ་ཉིད་སྡིགས་མཛུབ་རྩེ་མོ་ལྟ་བར་གནས། །དེ་བཞིན་གཤེགས་རིགས་དམ་ཚིག་གི། །ཕྱག་རྒྱ་ལྷན་ཅིག་པར་བསྒྲགས་སོ། །དང་པོར་སྔགས་བཅས་རྫོགས་པར་བྱ། །

བཟླས་པ་ལ་སོགས་པར་འགྱུར་རོ། །ཡང་འདིར་སྔགས་ནི། ན་མཿསརྦ་ཏ་ཐཱ་ག་ཏེ་བྷྱཿ། ཨོྃ་ཏ་ཐཱ་ག་ཏཱ་ཨུད་བྷ་བཱ་ཡ་སྭཱ་ཧཱ། དེ་བཞིན་གཤེགས་པའི་རིགས་སུ་དམ་ཚིག་གི་སྔགས་སོ། །གཡོན་པའི་རྒྱབ་ཕྱིན་ཅི་ལོག་ཏུ་འགྱུར་ཏེ་བཀན་ལ་ལག་པའི་མཐེའུ་ཆུང་བཟུང་ལ་གང་

གིས་མཐེ་བོང་གཉིས་ཅུང་ཟད་བརྐྱང་བ་མནན་པར་བྱ་སྟེ། སོར་མོ་དག་ནི་མཆོག་གི་དམ་ཚིག་གི་སྔགས་ཏེ་རྡོ་རྗེའི་རིགས་སུ་རབ་ཏུ་གྲགས་པར་འགྱུར་རོ། །ཡང་འདིར་སྔགས་ནི། ན་མཿསརྦ་ཏ་ཐཱ་ག་ཏེ་བྷྱཿ། ཨོྃ་བཛྲ་ཨུད་བྷ་བཱ་ཡ་སྭཱ་ཧཱ། རྡོ་རྗེའི་རིགས་སུ་དམ་ཚིག་གི་ཕྱག་རྒྱའི་

སྔགས་སོ། །གུང་མོའི་སོར་མོ་གུང་མོ་ཅན། །བྱས་ནས་ཐལ་མོ་སྦྱར་བྱས་པ། །སོར་མོ་གཉིས་རྟག་བུག་པ་མེད། །དང་པོར་བཅིངས་ནས་དེ་བཞིན་ཕྱིས། །རྫོགས་ནས་བཟླས་པ་ལ་སོགས་འགྱུར། །ཡང་འདིར་སྔགས་ནི། །ན་མཿསརྦ་ཏ་ཐཱ་ག་ཏེ་བྷྱཿཞེས་པ་འདི་

Vol. 94 · folio 94a

རྣམས་དམ་ཚིག་གི་ཕྱག་རྒྱ་རྣམས་ལའོ། །ཨོྃ་པདྨ་ཨུད་བྷ་བཱ་ཡ་སྭཱ་ཧཱ། འདི་ནི་པདྨའི་རིགས་ཀྱི་ཕྱག་རྒྱའི་དམ་ཚིག་གི་སྔགས་སོ། །ཞེས་པ་དམ་ཚིག་ཕྱག་རྒྱ་ནེ། །གསུམ་པོ་འདི་རྣམས་ཀུན་ཏུ་བསྒྲག །ཡོན་ཏན་དཔག་མེད་རྣམ་པ་སྟེ། །སྟོབས་ཆེན་ཕ་

རོལ་གནོན་པའོ། །དང་པོར་བཅིང་བྱ་རྟག་ཏུ་སླར། །སྒྲུབ་པོས་ལྷ་ཡི་སྤྱན་སྔ་རུ། །དེ་ཡི་དངོས་གྲུབ་ཐོབ་པར་འགྱུར། །མྱུར་དུ་འདོད་པའི་ཞི་སོགས་རྣམས། །འཇིག་རྟེན་མགོན་པོ་མཐའ་ཡས་དང་། །དེ་སྲས་བདག་ཉིད་ཆེ་རྣམས་ཀྱིས། །ལུས་ཅན་ཀུན་གྱི་ཕྱག་རྒྱ་

ཆེ། །སྒྲུབ་པའི་དོན་དུ་གསུངས་པ་ཡིན། །རྟག་ཏུ་སྔ་བར་ལངས་ནས་ནི། །ཉིན་རེ་ཉིན་རེ་བཅིང་བར་བྱ། །བཙང་ཞིང་དད་དང་བློ་གྲོས་ལྡན། །དེ་ཡིས་དངོས་གྲུབ་འབྱུང་བར་འགྱུར། །དམ་ཚིག་ཕྱག་རྒྱ་གསུམ་པོ་འདི། །གང་གིས་ཤེས་པ་བློ་ལྡན་པས། །གཟུང་

བའི་འཕགས་པའི་མན་ངག་གིས། །དེ་ཡི་དངོས་གྲུབ་ཐེ་ཚོམ་མེད། །འདི་རྣམས་རྣམ་པར་ཤེས་པ་ནི། །ཆོ་ག་ཉམས་ཀྱང་སྒྲུབ་པ་པོས། །དེ་ཡི་དངོས་གྲུབ་བྱེད་པ་ཡིན། །སྟོབས་པོ་ཆེ་ལ་སོགས་རྣམས་ཀྱིས། །ཕྱག་རྒྱ་ཀུན་ཏུ་སྲུང་དོན་དུ། །དེ་ནས་དབུགས་

འབྱིན་ཆེན་པོ་དེ། །བདག་གིས་ཀུན་ནས་སྣང་བ་ཡི། །ཕྱག་རྒྱ་ཡང་དག་སྐུལ་བྱེད་པའི། །སྒོམ་པ་ཀུན་ནས་རྟག་ཏུ་ནི། །ཕྱག་རྒྱ་རབ་ཏུ་གསུངས་པ་སྟེ། །སྒྲོལ་མ་ཀུན་གྱི་ཐུན་མོང་དུ། །རྟག་པ་གང་དུ་གསུངས་པ་ཡིན། །རྟོག་པ་གཞན་དུ་རིག་པ་གང་། །དེ་རྣམས་

ཉིད་ཀྱང་རབ་སྦྱར་བྱ། །ཡང་འདིར་ཕྱག་རྒྱའི་མཚན་ཉིད་འགྱུར། །སླར་ཡང་སོར་མོ་ཕན་ཚུན་དུ། །ལན་གཉིས་ཁ་སྦྱར་གནས་པ་ལ། །མཛུབ་མོ་གཉིས་ནི་རབ་ཏུ་བརྐྱང་། །བློ་ལྡན་དེ་བཞིན་མཐེ་བོང་ཡང་། །སེམས་ནི་ལེགས་པར་མཉམ་བཞག་པས། །བཅིང་བྱ་

རྩ་བའི་ཕྱག་རྒྱའོ། །སྒྲོལ་མ་སྤྱན་དྲང་ཆེད་དུ་ནི། །འདི་རྣམས་རིག་པ་ལྷན་ཅིག་པས། །ཞེས་འདི་སྒྲོལ་མ་ཐམས་ཅད་ཀྱི། །རྩ་བའི་ཕྱག་རྒྱ་དོན་ཆེན་སྦྱིན། །སྒྲུབ་པ་པོ་ནི་དོན་ཐམས་ཅད། །རང་གི་རིག་པ་སྦྱར་བ་ཡིན། །ཆོ་ག་ཉམས་ཀྱང་དད་པ་ཡིས། །ལྷ་རྣམས་

Vol. 94 · folio 94b

འཕྲལ་དུ་འོང་བར་བྱེད། །དེ་ཉིད་མཐེ་བོང་བཀན་བྱས་ནས། །མཆོད་ཡོན་དག་ནི་དབུལ་བར་བྱ། །དེ་ནས་མཆོད་ཡོན་ཅན་དུ་འགྱུར། །མི་རྣམས་འདོད་པའི་འབྲས་རབ་སྦྱིན། །མཆོད་ཡོན་གྱི་ཕྱག་རྒྱའོ། །ལག་པ་བཀན་ཏེ་བཏེག་ལ་བརྐྱང་། །མཐེ་བོང་གདན་དུ་

རབ་བརྟག་བྱ། །དེ་ཉིད་འདོད་པའི་སྒྲུབ་པའི་དོན། །ལྷ་རྣམས་ཡོངས་སུ་མཉེས་པར་བྱེད། །གདན་གྱི་ཕྱག་རྒྱའོ། །མཐེ་བོང་དག་གི་རྩེ་མོ་ཆ། །བསྐུམས་ནས་ཐ་དད་གྱུར་གང་ཉིད། །ཁྲུས་བྱ་བདག་ཉིད་དོན་བཟང་སྒྲུབ། །ཁྲུས་ཀྱི་ཕྱག་རྒྱའོ། །སོར་མོའི་རྩ་

བའི་ཉེ་ལོགས་སུ། །གཡས་པའི་མཐེ་བོང་རྣམ་པར་དགོད། །སྨན་དང་སྲོག་ཆགས་ཡན་ལག་ནི། །ཡོངས་སུ་སྤངས་ཏེ་དྲི་དག་དབུལ། །དྲིའི་ཕྱག་རྒྱའོ། །དེ་བཞིན་གཡོན་པའི་མཐེ་བོང་ཡང་། །མཉམ་པར་བཞག་པས་རྣམ་པར་དགོད། །ལྷ་ཡི་དྲི་མཆོག་དང་

ལྡན་པའི། །མེ་ཏོག་སྣ་ཚོགས་དབུལ་བར་བྱ། །མེ་ཏོག་གི་ཕྱག་རྒྱའོ། །སྡིགས་མཛུབ་གཡས་པའི་རྩེ་མོ་ནི། །བསྐུམས་ཏེ་གུང་མོར་གནས་པར་འགྱུར། །གང་གིས་མཐེ་བོང་ཅན་གྱིས་ནི། །དེ་ཡིས་བདུག་སྤོས་དབུལ་བར་བྱ། །བདུག་སྤོས་ཀྱི་ཕྱག་རྒྱའོ། །

གཡོན་པའི་མཐེ་བོང་སྡིགས་མཛུབ་ནི། །གུང་མོར་གང་གིས་གནས་པར་བྱ། །གཙང་ཞིང་དག་པར་ཡང་དག་ལྡན། །དེ་ཉིད་གཏོར་མའི་མཆོད་པར་བྱ། །གཏོར་མའི་ཕྱག་རྒྱའོ། །སྡིགས་མཛུབ་རྩེ་མོར་མཐེ་བོང་གཉིས། །རྣམ་པར་བཀོད་པ་བྱས་ནས་ནི། །

བ་ཡི་མར་ནི་ཕུལ་བྱུང་བས། །སྒྲོལ་མ་དབུལ་བར་བྱ་བའོ། །མར་མེའི་ཕྱག་རྒྱའོ། །གུང་མོའི་རྩེ་མོར་མཛུབ་མོ་ནི། །ཕྱི་ཡི་རྩེ་མོའི་ཚིགས་སུ་སྦྱར། །མཐེ་བོང་དང་ནི་མིང་མེད་དག །བགྲང་ཕྲེང་སྲད་བུ་ཡོངས་སུ་འཛིན། །ཕྲེང་བ་འཛིན་པའི་ཕྱག་རྒྱའོ། །རྟག་ཏུ་

མེ་རུ་མངོན་ཕྱོགས་པས། །ལག་པ་གཡས་པའི་མིང་མེད་ནི། །གུང་མོའི་ཚིགས་སུ་བྱས་པར་འགྱུར། །ལག་གཉིས་སྦྱར་བའི་གུང་མོ་ལ། །མཐེ་བོང་ཅུང་ཟད་རྣམ་འདུད་པའོ། །མེ་ལྷ་སྤྱན་དྲང་བའི་ཕྱག་རྒྱའོ། །མིང་མེད་མཐེ་བོང་སྦྱར་བྱས་ནས། །སྔགས་དང་བཅས་

Vol. 94 · folio 95a

པ་རབ་སྦྱར་བྱ། །དེ་ཉིད་ཀྱིས་བརྗོད་གཤེགས་སུ་གསོལ། །མེ་ལྷ་སྤྱན་དྲངས་བ་བསྐུལ་བའི་ཕྱག་རྒྱའོ། །ཞེས་པ་འདི་སྒྲོལ་མ་ཐམས་ཅད་ཀྱི་རིག་པའི་ཚོགས་ཀྱིས་ཡོངས་སུ་བསྐོར་བའི་ཕྱག་རྒྱ་སྟེ་སྒྲུབ་པ་པོ་དངོས་གྲུབ་མཉམ་པ་མེད་པ་འདོད་པ་རྣམས་ཀྱིས་ཐུན་

མོང་དུ་རྟག་ཏུ་སྦྱར་བར་བྱའོ། །རྐང་པ་འཁྱོག་པོར་བྱས་ནས་ནི། །ཕྱག་རྒྱ་རྣམ་པར་རྒྱས་པ་ནི། །ལག་གཉིས་བརྐྱང་བྱས་འཁོར་ལོ་དང་། །སྔོན་དུ་མཐེ་བོང་བསྐུལ་ནས་ནི། །ཁུ་ཚུར་བཅིངས་ཏེ་མཐེ་བོང་དག །མཉམ་པར་བཤིབས་ཏེ་བརྐྱང་བར་བྱ། །གུང་མོ་སྒྲེང་བའི་ཕྱག་རྒྱ་

འདི། །བློ་ལྡན་བྱང་ཆུབ་སེམས་དཔའ་ཡི། །དབྱུག་པའི་ཕྱག་རྒྱར་གྲགས་པ་ཡིན། །སྒྲུབ་པོས་མྱུར་དུ་སྦྱར་བར་བྱ། །དངོས་གྲུབ་ཐམས་ཅད་བྱེད་པར་འགྱུར། །དབྱུག་པའི་ཕྱག་རྒྱའོ། །ལེགས་པར་ཁ་སྦྱར་བ་ཐལ་མོ་ཁོང་སྟོང་དུ་འགྱུར་ཏེ། ཁ་སྦྱར་གྱི་ཕྱག་རྒྱའོ། །

གང་དུ་མཐེ་བོང་ནང་དུ་བཅུག་པ་ནི་བཟང་པོའི་གདན་ནོ། །བཟང་པོའི་གདན་གྱི་ཕྱག་རྒྱའོ། །ཐལ་མོ་ཁོང་སྟོང་དེས་རབ་ཏུ་བརྗོད་པའི་ཁ་སྦྱོར་གྱི་ཕྱག་རྒྱ་ལས་མིང་མེད་ཀྱི་སོར་མོ་ཡང་དག་པར་སྦྱར་བ་ནི། ཁ་སྦྱོར་གྱི་ཕྱག་རྒྱའི་གཙོ་བོ་པདྨའི་རྣམ་པ་འོད་ཟེར་གྱི་རྣམ་པ་ནི་པདྨའི་

ཕྱག་རྒྱའོ། །ཞེས་སྒྲུབ་པ་པོ་བློ་དང་ལྡན་པས་ཤེས་པར་བྱའོ། །གདན་གྱི་དོན་དུ་རབ་ཏུ་སྦྱར་བར་བྱའོ། །ཕྱག་རྒྱ་འདི་ནི་གྲགས་པ་ཆེན་པོའོ། །པདྨའི་ཕྱག་རྒྱའོ། །རྩ་བའི་ཕྱག་རྒྱ་ནི་རབ་ཏུ་བརྗོད་པ་དེ་ཨུཏྤ་ལ་དེ་འདིར་བརྗོད་པར་བྱའོ། །ནས་ཙམ་རྣམ་པར་གྲོལ་བ་ནི་ཕྱག་

རྒྱ་པདྨའི་ཏོག་ནི་ཡན་ལག་ཉིད་དོ། །ཨུཏྤ་ལའི་ཕྱག་རྒྱ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་དང་། སྒྲོལ་མའི་ཚོགས་ཐམས་ཅད་ཀྱི་ཕྱག་རྒྱ་གང་ཡིན་པ་དེ་ཕྱག་རྒྱར་ཡོངས་སུ་བསྒྲགས་སོ། །ཚིགས་གསུམ་པ་བཅག་པ་ནི་ཁྲོ་གཉེར་ཅན་གྱིས་སོ། །དེ་ཁོ་ན་ཚིགས་

བར་བར་གྱུར་བ་ཡང་དག་པ་ཁོ་ནར་འདོད་པ་ནི་ཏིང་ངེ་འཛིན་ཡངས་པའི་ཕྱག་རྒྱར་གསུངས་སོ། །སྡིགས་མཛུབ་དང་མཐེ་བོང་ཡང་དག་པར་སྦྱར་བའི་ཕྱག་རྒྱ་ནི་རལ་གཅིག་མའི་ཅོད་པན་ལས་སོ། །དང་པོ་ཏིང་ངེ་འཛིན་ཡང་དག་པར་གསུངས་པའི་རིག་པའི་སྔགས་རྣམས་

Vol. 94 · folio 95b

ཕྱག་རྒྱ་གཉིས་པ་རལ་གཅིག་མའིའོ། །ཕན་ཚུན་སྦྱར་བྱས་ལྷག་མ་ཕྱི་རོལ་དུ་སྐྲའི་རྣམ་པར་རབ་ཏུ་བརྐྱང་ནས་དབུས་མ་གཉིས་ནི་མདུང་གི་རྣམ་པར་ལེགས་པར་གནས་པའི་ཕྱག་རྒྱ་ནི་མདུང་དུ་ཡང་དག་པར་བཤད་དོ། །ལྷ་ཡི་འབར་བར་བྱེད་པ་དང་། ཡང་དག་པར་མཚུངས་

པ་འདི་བསྟན་པ་ཙམ་གྱིས་གདུག་པ་རྣམས་ཐམས་ཅད་རྣམ་པར་འཇོམས་པ་མདུང་གི་ཕྱག་རྒྱའོ། །ཞེས་པ་ཕྱག་ཆེན་འདི་རྣམས་ནི། །དམ་ཚིག་དོན་དུ་རབ་སྦྱར་བ། །གང་གིས་ཡང་དག་ཤེས་བྱས་པ། །དེ་ཡིས་དངོས་གྲུབ་ཐོབ་པར་འགྱུར། །ཕྱག་རྒྱ་ལྷག་མ་ཐམས་ཅད་

ཉིད། །ཚད་མེད་གྲངས་མེད་ཉིད་དུ་བྱ། །ཕྱག་རྒྱ་ཡང་དག་ཡོངས་སུ་བསྒྲགས། །མདོར་ན་འདི་རུ་བརྗོད་པ་ནི། །སེམས་ཅན་སེམས་ནི་དུར་བ་རྣམས། །ལས་ཆེན་བྱེད་པར་མི་ནུས་པ། །མདོར་བསྡུས་འདིར་ནི་བརྗོད་པར་བྱ། །ཞེས་པའོ། །བྱང་ཆུབ་སེམས་དཔའི་སྡེ་

སྣོད་བཅོམ་ལྡན་འདས་མ་འཕགས་མ་སྒྲོལ་མ་རལ་པ་གྱེན་བརྫེས་ཀྱི་རྩ་བའི་རྟོག་པ་ཕྱག་རྒྱའི་ལེའུ་རབ་འབྱམ་རྫོགས་སོ།། །།དེ་ནས་ཡང་སེམས་དཔའ་ཆེན་པོས་སླར་ཡང་དངོས་པོའི་རང་བཞིན་གྱི་ཏིང་ངེ་འཛིན་སྒོམ་ཞིང་ལས་ཐམས་ཅད་ཀྱི་དངོས་གྲུབ་

བྱེད་པ་རྟོག་པའི་རྒྱལ་པོ་འདིར་གོས་དཀར་མོ་ཞེས་བྱ་བ་རང་གི་རིགས་ཀྱི་རིག་པ་ཆེན་མོའི་སྒྲུབ་ཐབས་སྲུང་བའི་དོན་དང་། བགེགས་བཟློག་པའི་དོན་དུ་གསུངས་པའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། དརྴ་ན། པརྵ་ཎ། བྷྱོ་ཤྲ་བ་

ཎ། སྨ་ར་ཎྱེ་ན། བཱ་སྱཱ་མ་ཧཾ། སརྦ་སཏྭཱ་ནཱཾ། སརྦ་བྱཱ་དྷི། ཙི་ཀིཏྤ་ཀ། ཏདྱ་ཐཱ། ཨོྃ་ཀ་ཊེ། བི་ཀ་ཊེ། ཀ་ཊཱཾ་ཀ་ཊེ། ཀ་ཊཱ། བི་ཀ་ཊཱ། བི་ཀ་ཊེ། བྷ་ག་བ་ཏི། བི་ཛ་ཡེ་སྭཱ་ཧཱ། འདི་ནི་གོས་དཀར་མོ་ཞེས་བྱ་བ་དེའི་རིག་པ་ཆེན་མོ་སྟེ། རིག་པ་ཐམས་ཅད་དང་། སྔགས་རྣམས་

ཀྱིས་དངོས་གྲུབ་བྱེད་པ། པདྨའི་རིགས་སུ་རིགས་ཀྱི་རིག་པ་འདིས་བདག་ཉིད་སྲུང་བ་དང་། གཞན་སྲུང་བ་དང་། གཡོག་སྲུང་བ་དང་། རས་རིས་གནས་པ་དང་། ལྷ་རྣམས་བསྲུང་བར་བྱ་བ་དང་། རས་རིས་གྲུབ་པ་འདི་ཡང་ཁྱེད་ཀྱི་སྒྲུབ་ཐབས་གསུམ་བྱས་ནས་སམ། བདུན་

Vol. 94 · folio 96a

བྱས་ནས་བཟླས་པར་བྱའོ། །དེ་ནས་རང་གི་ལྷའི་བཟླས་པ་བརྩམ་པར་བྱ་སྟེ་མྱུར་དུ་དངོས་གྲུབ་ཏུ་འགྱུར་རོ། །བཟླས་པའི་མཐར་ཡང་བགེགས་རྣམས་སྲིད་པ་གཞན་དུ་འགྱུར་རོ། །རྟག་ཏུ་བཟླས་པས་ཀྱང་ནད་མེད་པར་འགྱུར་རོ། །ཉེ་བར་འཚེ་བ་ཐམས་ཅད་དང་བྲལ་བ་

དང་། རིང་དུ་འཚོ་བར་བྱེད་དོ། །བདེ་བ་ཡང་སོ་སོར་རྙེད་དོ། །སྲད་བུས་བདག་ཉིད་སྲུང་ཞིང་ཕྱིར་བཟློག་པ་ལ་སོགས་པ་རྣམས་ཀྱང་ངོ་། །དེ་ནས་འདིའི་ཕྱག་རྒྱ་ཉིད་ནི་སྒྲོལ་མ་ཐམས་ཅད་ཀྱི་སྤྱིའི་རྩ་བའི་ཕྱག་རྒྱ་སྟེ། དེ་ཉིད་སྡིགས་མཛུབ་བཅིངས་ནས་འཁྱིལ་བའི་རྣམ་

པར་བྱ་སྟེ་མཐེ་བོང་ཟུང་ཡང་ཀུན་ཏུ་བཙིར་བ་ནི་གོས་དཀར་མོའི་ཕྱག་རྒྱའོ། །འདི་ཡང་ཕྱག་རྒྱའི་སྒྲུབ་ཐབས་ཀྱི་རིག་པ་མཉམ་པར་འགྲོ་མ་གདོན་མི་ཟ་བ་སྟེ་དང་པོར་ཞབས་ལ་ཕྱག་བྱས་ཏེ། དེ་ནས་ལས་ཐམས་ཅད་བྱའོ། །ཡང་རྟོག་པའི་རྒྱལ་པོའི་དབང་པོ་ཆེན་པོ་འདིར་

འཕགས་མ་སྒྲོལ་མ་དང་། སྒྲོལ་མ་ཐམས་ཅད་ཀྱི་སྒྲུབ་པ་མངོན་པར་མཛེས་པ་ཐམས་ཅད་དང་། སྲུང་བ་དང་། ཉེས་པ་བྱས་པ་ཐམས་ཅད་ཟློག་པར་བྱེད་པ། འཕགས་མ་སྒྲོལ་མ་ཐམས་ཅད་ཀྱི་རྟོག་པའི་ཆོ་ག་རབ་ཏུ་སྦྱོར་བ་སྒྲུབ་ནུས་པར་འགྱུར་ཏེ། དེ་ཡང་གང་ཞེ་ན།

ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཙནྡྲེ་ཙནྡྲ་མ་ཏི་སཱུ་རྱེ། སཱུརྱ་མ་ཏི། གྷུ་ནི་གྷུ་ན། ལ་ལ། ལེ་ལེ། སཱུ་ཏེ་སཱུ་ཏ་ནི། སིདྡྷི་སིདྡྷི། པ་རཱ་ཀྲ་མེ་སྭཱ་ཧཱ། ཨ་མི་ཏཱ་བྷཱ་སུ་ཏཱ་སྭཱ་ཧཱ། སརྦེ་ཥཾ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ་སྭཱ་ཧཱ།

འདི་ཡང་འཕགས་པ་བཟང་པོ་ཞེས་བྱ་བ་འཕགས་མ་སྒྲོལ་མའི་རིག་པ་ཆེན་མོ་ཉེ་བར་འཚེ་བ་ཐམས་ཅད་འཇོམས་པར་བྱེད་པའོ། །གང་འདི་སྒྲོལ་མའི་རྟོག་པའི་ཆོ་ག་རབ་འབྱམ་སྤྱོད་པ་དང་། སྒྲུབ་ཐབས་དང་། ཕྱག་རྒྱའི་ཆོ་ག་ལ་སོགས་པ་དེ་ཐམས་ཅད་འཕགས་མ་སྒྲོལ་

མའི་ཟླ་བས་བསྒྲུབ་པར་བྱའོ། །ཞེས་ཀུན་ཏུ་རྟོགས་པར་བྱའོ། །རྟོག་པ་གཞན་གྱི་ཆོ་གས་ཀྱང་སྒྲུབ་པར་བྱེད་དོ། །རྟོག་པ་མེད་པས་ཀྱང་མངོན་སྤྱོད་ཀྱི་ལས་འདི་བྱེད་དེ། ཕྱག་འཚལ་བའི་ཡི་གེ་སྤངས་ནས། རིག་པ་འབའ་ཞིག་གི་སྭཱ་ཧཱའི་གནས་སུ་ཧཱུྃ་ཕཊ་སྦྱིན་པར་བྱའོ། །

Vol. 94 · folio 96b

རྟོག་པ་གཞན་གྱི་ཆོ་གས་ཀྱང་ངོ་། །གང་འདོད་པ་དེ་དབང་དུ་བྱེད་པར་འགྱུར་རོ། །ཡང་ན་ཉེ་བར་འཇོམས་པར་བྱེད་པར་འགྱུར་རོ། །མདོར་ན་གང་འདོད་པ་དེ་སྒྲུབ་པར་བྱེད་དོ། །དེ་ནས་སེམས་དཔའ་ཆེན་པོ་དེ་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས།

བསམ་པ་རྣམ་པར་དག་པས་སེམས་དཔའ་ཆེན་པོ་རྣམས་ལ་སྨྲས་པ། གང་རྟོག་པའི་རྒྱལ་པོ་འདིར་སྒྲུབ་པར་འགྱུར་བ་དང་། མཆོད་པར་འགྱུར་བ་དང་། ཡི་གེར་འདྲི་བར་འགྱུར་བ་དེ་རྣམས་དོན་ཐམས་ཅད་ཀྱི་དངོས་གྲུབ་འབྱུང་བར་འགྱུར་རོ། །སེམས་ཅན་ཐམས་ཅད་ལ་བྱམས་

པའི་སེམས་དང་། སེམས་ཅན་ཐམས་ཅད་ལ་ཀུན་ནས་དགའ་བ་ཡང་འབྱུང་བར་འགྱུར་རོ། །སྲུང་བར་བྱེད་པར་འགྱུར་རོ། །གང་དུ་རྟོག་པའི་རྒྱལ་པོ་འདི་ཡང་འབྱུང་བར་འགྱུར་བ་མཆོད་རྟེན་དུ་འགྱུར་བ་དང་། ས་ཕྱོགས་དེ་གང་ཉིད་ཀྱིས་ལག་མཐིལ་དུ་ཕྱིན་པར་འགྱུར་རོ། །

མཆོད་པ་འདི་ལྷ་དང་བཅས་པའི་འཇིག་རྟེན་ན་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་ཆོས་ཀྱི་རྣམ་གྲངས་འདི་ཐོབ་པ་དེས་ཐམས་ཅད་དུ་རྣལ་འབྱོར་དུ་བྱའོ། །སེམས་ཅན་ཐམས་ཅད་ཀྱི་སྟོབས་དང་སྟོབས་མེད་པ་ཤེས་ནས་རབ་ཏུ་གསལ་བར་བྱའོ། །འདི་ཡང་གཙང་མའི་ཕྱོགས་

སུ་ཐམས་ཅད་ཀྱིས་རབ་ཏུ་སྤྱོད་པར་འགྱུར་གྱིས་གཞན་དུ་མ་ཡིན་ནོ། །གང་ཞིག་བྱེད་པ་དེ་མངོན་པར་འདོད་པ་མེད་པ་སེམས་ཅན་གྱི་བསམ་པ་སྤང་བ་དང་། ཆོས་དང་ཆོས་སྨྲ་བ་པོ་ལ་མ་གུས་པ་ལ་མི་འཇུག་པའི་རབ་ཏུ་སྦྱོར་བས་རབ་ཏུ་སྦྱར་བར་བྱའོ། །རྟོག་པའི་རྒྱལ་པོ་འདིར་སྒྲུབ་པ་

པོ་ཐམས་ཅད་ཀྱིས་སྲུང་བའི་དོན་དུ་ལྷག་མ་དང་། ལྷག་མ་མེད་པ་ཡང་རུང་སྟེ་གཙང་སྦྲ་བྱས་པས་སྲུང་བའི་དོན་དུ་རིག་པའི་རྒྱལ་པོའི་སྔགས་སུ་འགྱུར་བ་ནི། ན་མོ་རེཏྣ་ཏྲ་ཡཱ་ཡེ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭ་ཡ། མ་ཧཱ་སཏྭཱ་ཡ། ཨོཾ་ཨ་མྲྀ་ཏ་ཨུད་བྷ་བ་ཧཱུྃ་ཕཊ་སྭཱ་ཧཱ།

འདི་ནི་རྟ་མགྲིན་ཞེས་བྱ་བའི་རིག་པའི་རྒྱལ་པོ་སྟེ། ཐལ་བ་ལ་ལན་བདུན་མངོན་པར་བསྔགས་པས་བདག་ཉིད་སྲུང་བ་དང་། གཡོག་སྲུང་བ་ལ་མདུད་པའི་སྤྱོད་པ་བྱའོ། །རྟོག་པའི་རྒྱལ་པོ་འདི་ཡང་རྒྱལ་ལམ། ཐ་སྐར་ཡང་རུང་སྟེ་དགེ་བའི་སྦྱོར་བ་ལ་མཆོད་པ་དང་། གཏོར་མའི་ཚོགས་

Vol. 94 · folio 97a

མཆོད་པ་རྒྱ་ཆེན་པོ་བྱས་ནས་ཆོས་དང་། ཆོས་ཡང་དག་པར་སྡུད་པ་པོ་ལ་ཡང་བསོད་སྙོམས་དང་། ཐེག་པ་ཆེན་པོ་ལ་བཟའ་བ་གྱ་ནོམ་པ་དང་། ཁྱད་པར་དུ་ཡོན་དང་བཅས་པའོ། །དེ་ནས་འདི་རྫོགས་པར་བྱའོ། །དེ་བཞིན་དུ་བྱ་སྟེ་རྟོག་པའི་རྒྱལ་པོ་ཇི་ལྟ་བ་བཞིན་དུ་

རྟོག་པའི་རྒྱལ་པོའི་རིག་པའི་གསང་སྔགས་བཀླག་པར་བྱ་སྟེ་དེ་བཞིན་དུ་དམན་པར་མི་འགྱུར་རོ། །ཇི་ལྟར་མྱུར་དུ་དངོས་གྲུབ་ཉིད་ཀྱང་སྩོལ་བར་བྱེད་དོ། །བཅོམ་ལྡན་འདས་བྱང་ཆུབ་སེམས་དཔའ་ཆེན་པོས་འདི་སྐད་ཅེས་བཀའ་སྩལ་པ་དང་། ལྷ་དང་བཅས་པའི་འཇིག་རྟེན་བཅོམ་ལྡན་འདས་ཀྱིས་

གསུངས་པ་ལ་མངོན་པར་དགའོ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཤིན་ཏུ་རྒྱས་པ་ཆེན་པོ་ཉིད་ཀྱི་རྟོག་པའི་རྒྱལ་པོ་རལ་པ་གྱེན་བརྫེས་ཞེས་བྱ་བ་བཅོམ་ལྡན་འདས་འཕགས་མ་སྒྲོལ་མའི་རྟོག་པ་རྫོགས་སོ།། །།དེ་ནས་བཅོམ་ལྡན་

འདས་རིའི་རྒྱལ་པོ་གྲུ་འཛིན་ན་བཞུགས་ཏེ། དེར་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་བོས་ཏེ་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་ཁྱོད་ཀྱིས་རལ་པ་གྱེན་བརྫེས་ཀྱི་རྟོག་པའི་རྒྱལ་པོ་ཆེན་པོ་དེ་བཤད་དོ། །

ད་ནི་ཕྱི་མའི་རྒྱུད་གསང་བ་དེ་གསང་ཆེན་ཕྱི་མ་དང་བཅས་པ་ཐབས་སླ་བ་བདེ་བླག་ཏུ་སྒྲུབ་པ། ཆོ་ག་དང་བཅས་པ་སྔོན་དུ་འགྲོ་བས་བརྗོད་པ་སྙིང་རྗེ་ཆེན་པོའི་བདག་ཉིད་ཅན་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཆེད་དང་། སྡུག་བསྔལ་གྱིས་གདུངས་བ་རྣམས་

ལ་སྙིང་བརྩེ་བའི་ཆེད་དང་། སྔོན་གྱི་སངས་རྒྱས་རྣམས་ཀྱིས་རྗེས་སུ་ཡི་རང་བར་མཛད་པ། སྒྲོལ་མ་ཐམས་ཅད་ཀྱི་ཐུན་མོང་བའི་རིག་པ། རལ་པ་གྱེན་བརྫེས་རྟོག་པའི་རྒྱལ་པོ་ཉིད་ཀྱི་སྦྱོར་བ་རྣམས་ཤོད་ཅིག །བཅོམ་ལྡན་འདས་ལ་སེམས་དཔའ་ཆེན་པོས་འདི་སྐད་ཅེས་གསོལ་

ཏེ། བཅོམ་ལྡན་འདས་དེ་བཞིན་གཤེགས་པས་རྗེས་སུ་གནང་བ་དང་། སངས་རྒྱས་བཅོམ་ལྡན་འདས་གཞན་རྣམས་ཀྱིས་ཀྱང་རྗེས་སུ་ཡི་རང་བར་མཛད་ན་བཤད་པར་བགྱིའོ། །དང་པོ་ཁོ་ནར་སྒྲུབ་པོས་རེ་ཞིག་སྐྱབས་གསུམ་ཡོངས་སུ་བཟུང་བ་དང་། བྱང་ཆུབ་ཏུ་སེམས་

Vol. 94 · folio 97b

བསྐྱེད་པ་དང་། རལ་པ་གྱེན་བརྫེས་སུ་ཇི་སྐད་གསུངས་པའི་དཀྱིལ་འཁོར་མཐོང་ཞིང་། དམ་ཚིག་དང་། སློབ་དཔོན་གྱིས་རྗེས་སུ་གནང་བ་དང་། སྒྲུབ་པའི་ཐབས་དང་། མངོན་པར་དབང་བསྐུར་བས་མངོན་པར་དབང་བསྐུར་བ་བླ་མ་ལ་ཡོན་ཕུལ་ནས་དཀྱིལ་འཁོར་གྱི་ནང་དུ་རིག་པ་བླངས་

ཏེ་རས་རིས་ཀྱི་སྤྱན་སྔར་རམ། སྐུ་གཟུགས་ཀྱི་དྲུང་དུ་སླར་ཡང་སྒྲོལ་མ་གང་ཡང་རུང་བའི་རིག་པ་བླང་པར་བྱས་ནས་དཀར་པོའི་ཚེས་གཅིག་ནས་བརྩམས་ཏེ་འབུམ་བཟླས་པར་བྱའོ། །དུས་ཕྱིས་མཚན་མོ་གསུམ་དུ་སྨྱུང་བར་གནས་པས་ཟླ་བ་ཉ་ལ་སྐུ་གཟུགས་སམ། རས་རིས་

ཀྱི་སྤྱན་སྔར་མཆོད་པ་དང་གཏོར་མའི་ཆོ་ག་བྱས་ནས་འོ་མ་ཅན་གྱི་ཡམ་ཤིང་གིས་མེ་སྦར་ནས་སེང་ལྡེང་ངམ། ཨ་ག་རུ་ནག་པོའི་ཡམ་ཤིང་སོར་དྲུག་པའི་ཚད་ཀྱིས་སྦྱིན་སྲེག་སྟོང་ཕྲག་བརྒྱད་བྱའོ། །ནམ་ལངས་ཁར་མཚན་མོ་མཆོད་པ་ཆེས་རྒྱ་ཆེན་པོ་དང་། གཏོར་མའི་ཆོ་

ག་ཇི་ལྟར་འབྱོར་པ་བྱས་ནས་སློང་མོའི་ཟས་ཟོས་ནས་དངོས་གྲུབ་སྩལ་བར་བྱའོ། །དེ་ནས་རིག་པ་འགྲུབ་པར་འགྱུར་རོ། །དེ་ནས་ལས་ཐམས་ཅད་བྱའོ། །ཡང་འདིར་མཆོག་ཏུ་གསང་བའི་སྒྲུབ་པའི་ཆོ་ག་གཞན་འབྱུང་སྟེ། བཅོམ་ལྡན་འདས་མའི་དཀྱིལ་འཁོར་ཆེན་

པོ་མཐོང་ནས་དཀྱིལ་འཁོར་དེ་ཉིད་དུ་དམ་ཚིག་དང་མེའི་བྱ་བ་གནས་པར་ཇི་སྲིད་གསུངས་པའི་ཆོ་གས་རིག་པ་སྒྲུབ་པར་འདོད་པས་སྒྲུབ་ཐབས་ཀྱི་ཆོ་ག་རིག་པ་རྣམ་པར་གསང་བའི་ཇི་སྐད་གསུངས་པས་དཀྱིལ་འཁོར་གཞན་གསུམ་བྲི་སྟེ། བླ་མ་ལ་ཡོན་རབ་ཏུ་ཕུལ་ནས་

དཀྱིལ་འཁོར་གྱི་དབུས་སུ་རིག་པ་བླངས་ནས་འོ་མ་ཅན་གྱི་ཤིང་གི་ཡམ་ཤིང་གིས་མེ་སྦར་ནས། དང་པོར་རེ་ཞིག་ཏུ་ཊིའི་ཚད་ཀྱི་གསེར་གྱི་ཕྱེ་མ་ལ་མར་གྱིས་བཏགས་པའི་སྦྱིན་སྲེག་བརྒྱད་བརྒྱ་བྱའོ། །དེ་ནས་ཨ་ག་རུ་ནག་པོའི་ཡམ་ཤིང་མཐོ་གང་ཙམ་གྱི་ཚད་དང་མར་

རྣམས་ཀྱིས་སྦྱིན་སྲེག་བརྒྱད་བརྒྱ་བྱའོ། །ཙནྡན་དཀར་པོའི་ཡམ་ཤིང་ལ་མར་གྱིས་བཏགས་པའི་སྦྱིན་སྲེག་བརྒྱད་བརྒྱ་བྱའོ། །དེ་ནས་སླར་ཡང་གསེར་གྱི་ཕྱེ་མ་ལ་མར་གྱིས་བཏགས་པའི་སྦྱིན་སྲེག་བརྒྱད་བརྒྱ་བྱའོ། །དེ་ནས་དངུལ་གྱི་ཕྱེ་མ་ལ་སྦྲང་རྩིས་བཏགས་པའི་སྦྱིན་སྲེག་བརྒྱད་བརྒྱ་

Vol. 94 · folio 98a

བྱའོ། །དེ་ནས་ར་གན་གྱི་ཕྱེ་མ་ལ་འོ་མས་བཏགས་པའི་སྦྱིན་སྲེག་བརྒྱད་བརྒྱ་བྱའོ། །དེ་ནས་ཟངས་ཀྱི་ཕྱེ་མ་ལ་ཞོས་བཏགས་པའི་སྦྱིན་སྲེག་བརྒྱད་བརྒྱ་བྱའོ། །དེ་ནས་མུ་ཏིག་གི་འབྲས་བུའི་ཕྱེ་མས་སྦྱིན་སྲེག་བརྒྱད་བརྒྱ་བྱའོ། །དེ་ནས་ཙནྡན་དམར་པོའི་ཕྱེ་

མས་སྦྱིན་སྲེག་བརྒྱད་བརྒྱ་བྱའོ། །དེ་ནས་ཙནྡན་དམར་པོའི་ཡམ་ཤིང་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་བརྒྱད་བརྒྱ་བྱའོ། །དེ་ནས་འབྲུ་དང་བཟའ་བ་དང་ལོངས་སྤྱོད་ལ་སོགས་པ་ཐམས་ཅད་ཀྱིས་སྦྱིན་སྲེག་བརྒྱད་བརྒྱ་བྱའོ། །དེ་ནས་དཀར་པོར་རྣམ་པར་

བཏགས་པ་ལེགས་པར་བཀྲུས་ཤིང་དྲི་ཞིམ་པོའི་གོས་སྐྲ་དང་བྲལ་བའི་སྦྱིན་སྲེག་བརྒྱད་བརྒྱ་བྱའོ། །རེ་རེ་ལ་ལན་རེ་ཡོངས་སུ་བཟླས་ནས་དེ་ནས་གུ་གུལ་དང་། ཤྲི་བ་ས་དང་། གནྡྷ་རས་དང་། ཀུན་ཏུ་རུ་ཀ་དང་། ག་བུར་རྣམས་གཅིག་ཏུ་བྱས་ནས་མར་གྱིས་བཏགས་པའི་

སྲེག་བླུགས་བདུན་དབུལ་བར་བྱའོ། །དེ་ནས་ཇི་ལྟར་རྙེད་བའི་འབྲས་བུ་ལ་སོགས་པ་རྣམས་ཀྱིས་སྲེག་བླུགས་བདུན་སྦྱིན་སྲེག་བྱའོ། །དེ་ནས་དྲི་བཟང་པོའི་མེ་ཏོག་རྣམས་ཀྱིས་སྲེག་བླུགས་བདུན་སྦྱིན་སྲེག་བྱའོ། །དེ་ནས་བཟའ་བ་མཆོག་གི་སྲེག་བླུགས་བདུན་སྦྱིན་

སྲེག་བྱའོ། །དེ་ནས་གཞོན་ནུ་མས་བཀལ་བའི་སྐུད་པ་ཆ་དང་བཅས་པར་བྱས་པ་ལ་མར་གྱིས་བཏགས་པའི་སྲེག་བླུགས་བདུན་སྦྱིན་སྲེག་བྱའོ། །ཀ་ར་བཱི་རའི་མེ་ཏོག་གིས་སྲེག་བླུགས་བདུན་སྦྱིན་སྲེག་བྱའོ། །དེ་ནས་མར་གྱི་སྲེག་བླུགས་བདུན་སྦྱིན་སྲེག་བྱའོ། །

དེ་ནས་ཐལ་བའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་སྡོང་བུ་ཅན་འབྲས་བུ་མེད་པ་རྣམས་ལ་བར་གྱིས་བཏགས་པའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་མར་སར་གྱི་སྲེག་བླུགས་བདུན་སྦྱིན་སྲེག་བྱའོ། །དེ་ནས་གེ་སར་གྱི་ཕྱེ་མའི་སྲེག་བླུགས་

བདུན་སྦྱིན་སྲེག་བྱའོ། །དེ་ནས་དར་བའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་ཡུང་བའི་ཕྱེ་མ་ལ་མར་གྱིས་བཏགས་པའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་རྒྱམ་ཚ་དང་། ལན་ཚྭ་ལ་མར་གྱིས་བཏགས་པའི་སྲེག་བླུགས་བདུན་སྦྱིན་སྲེག་བྱའོ། །

Vol. 94 · folio 98b

དེ་ནས་བུ་རམ་གྱི་སྲེག་བླུགས་བདུན་སྦྱིན་སྲེག་བྱའོ། །དེ་ནས་སྲ་རྩི་བོག་གི་ཕྱེ་མའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་ལྕགས་ཀྱི་ཕྱེ་མ་མར་གྱིས་བཏགས་པའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་ས་ལ་མ་ལྷུང་བའི་བ་ལང་གི་ལྕི་བ་ལ་མར་གྱིས་བཏགས་

བའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་བིལ་བའི་འབྲུ་ལ་ཞོ་དང་། སྦྲང་རྩི་དང་མར་གྱིས་བཏགས་པའི་སྲེག་བླུགས་བདུན་སྦྱིན་སྲེག་བྱའོ། །དེ་ནས་ཏིལ་ནག་པོ་དང་འབྲས་ཡོས་ལྷན་ཅིག་པ་ལ་ཞོ་དང་སྦྲང་རྩི་དང་། མར་གྱིས་བཏགས་པ་རྣམས་དང་། གསེར་དང་

དངུལ་གྱི་ཕྱེ་མ་ཕན་ཚུན་བསྲེས་པའི་སྦྱིན་སྲེག་བརྒྱད་བརྒྱ་བྱའོ། །བར་སྐབས་འདིར་སྒྲུབ་པ་པོ་ལྷ་ཐམས་ཅད་ཀྱིས་ཀུན་ཏུ་གཟིགས་པར་བྱེད་དོ། །དེ་དང་འདི་ཡང་བདག་གི་མཆོག་ཏུ་གསང་ཆེན་གྱི་གསང་བའི་སྒྲུབ་པ་ཉེ་བར་སྤྱོད་པའི་ཆོ་གའོ། །དེ་ལངས་ནས་དཀྱིལ་འཁོར་

ལ་བསྐོར་བར་བྱས་ཏེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ནས་བླ་མ་ལ་ཡོན་གྱི་མཆོག་ཕུལ་ཏེ། གང་གིས་སམ། དེའི་ཐད་ཀར་ཡང་རུང་སྟེ་ཞུ་བར་བྱའོ། །དཀྱིལ་འཁོར་བྲིས་པར་ལྷ་རྣམས་མཐོང་ནས་བླ་མ་ལ་ཕྱག་བཙལ་ཏེ་མངོན་པར་

དབང་བསྐུར་བ་དང་། དངོས་གྲུབ་ཀྱི་རྗེས་སུ་གནང་བ་ཡང་ཞུ་བར་བྱའོ། །དེ་ནས་ལས་གྲུབ་པའི་ཆོ་ག་འདིས་མཆོག་ཏུ་ཚུལ་ཁྲིམས་འཆལ་པས་ཀྱང་བཅོམ་ལྡན་འདས་མ་འགྲུབ་པར་འགྱུར་རོ། །སྒྲུབ་ཐབས་ཀྱི་ཉེ་བར་སྤྱོད་པའི་ཆོ་ག་འདི་མཆོག་ཏུ་གསང་བ་ཤིན་ཏུ་གསང་

ཆེན་ཏེ། མདོར་ན་ལས་གང་ཡང་ཅི་ཡིན་པ་འདིས་བྱེད་པའང་བྱེད་པར་འགྱུར་རོ། །དེའི་ཐམས་ཅད་ཞི་བ་ཅན་དང་། རྒྱས་པ་ཅན་དང་། མངོན་པར་མཛེས་པའི་ལས་རྣམས་ནི་ཇི་ལྟ་ཇི་ལྟར་སྒྲུབ་པར་བྱེད་པ་དེ་ལྟ་དེ་ལྟར་སྒྲུབ་པ་ཉེ་བར་འགྲོའོ། །དེ་ལྟར་ཡང་རིག་པ་རབ་ཏུ་སྦྱར་བ་དེ་

ལྟ་དེ་ལྟར་ལེགས་པར་རབ་ཏུ་སྦྱར་བར་འགྱུར་རོ། །ཇི་ལྟར་ཡང་སྒྲུབ་པར་བྱེད་པ་དེ་ལྟར་སྒྲུབ་པར་བྱེད་དེ་ལས་དེ་དང་འདི་རིག་པ་ཐམས་ཅད་དགའ་བ་ཞེས་པ་དེ་དང་འདིས་ལས་རྣམས་མཆོག་ཏུ་སྒྲུབ་པ་ཉེ་བར་སྐྱེའོ། །མདོར་ན་བདག་གི་སེང་གེའི་སྒྲ་འདི་གང་ལ་ལ་རིག་པ་ལ་དགའ་

Vol. 94 · folio 99a

བ་འདིས་ལས་བྱེད་པར་འགྱུར་རོ། །དེ་དང་འདི་ཁོ་ནའི་ལག་མཐིལ་དུ་དངོས་གྲུབ་སོ་སོར་གནས་པར་རྗེས་སུ་རྟོགས་པར་བྱའོ། །ལས་འདི་ཡང་གསོ་སྦྱོང་ཅན་གྱིས་སྔོན་བཟླས་པ་བྱས་པ་དག་འཕགས་པ་ཇི་ལྟ་བ་བཞིན་དུ་རྟོགས་པར་བྱའོ། །གསང་བའི་ཉེ་བར་སྤྱོད་

པའི་ཆོ་གའོ། །སྒྲུབ་ཐབས་གཞན་གྱི་ཆོ་ག་ནི་རྒྱ་མཚོའི་འགྲམ་དུ་སོང་ནས་བདེ་བར་གཤེགས་པའི་མཐོ་གང་གི་ཚད་མཆོད་རྟེན་སྟོང་ཕྲག་བརྒྱད་བྱས་ནས། རེ་རེའི་སྤྱན་སྔར་དྲི་དང་མེ་ཏོག་ལ་སོགས་པ་ཕུལ་ཏེ། སྟོང་ཕྲག་བརྒྱད་དུ་བཟླས་པར་བྱའོ། །རྫོགས་པའི་དུས་སུ་ཡང་

སློང་མོ་བཟའ་བར་བྱ་སྟེ་ཡོན་དབུལ་བར་བྱའོ། །དེ་ནས་རིག་པ་འགྲུབ་པར་འགྱུར་རོ། །ཆོ་ག་གཞན་ནི་ཆུ་བོའི་འགྲམ་དུ་ཆོ་གས་འབུམ་བཟླས་པར་བྱ་སྟེ་འགྲུབ་པར་འགྱུར་རོ། །ཆོ་ག་གཞན་འདི་ཡང་ཡོད་དེ། རིའི་རྩེ་མོར་འབུམ་བཟླས་པར་བྱ་སྟེ། འགྲུབ་པར་འགྱུར་རོ། །

འདི་ནི་ཆོ་ག་གཞན་ཏེ་མར་གྱི་སྲེག་བླུགས་ཀྱིས་སྦྱིན་སྲེག་འབུམ་བྱ་སྟེ། འགྲུབ་པར་འགྱུར་རོ། །འདི་ནི་ཆོ་ག་གཞན་ཏེ་ཏིལ་ནག་པོ་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་འབུམ་བྱ་སྟེ། འགྲུབ་པར་འགྱུར་རོ། །ཆོ་ག་གཞན་ནི་ཨ་ག་རུ་ནག་པོའི་ཡམ་ཤིང་གིས་

སྦྱིན་སྲེག་འབུམ་བྱ་སྟེ། འགྲུབ་པར་འགྱུར་རོ། །ཆོ་ག་གཞན་ནི་མེ་ཏོག་ཐམས་ཅད་ཀྱིས་སྦྱིན་སྲེག་འབུམ་བྱའོ། །འདི་ནི་ཆོ་ག་གཞན་ཏེ་ཐང་ཆུ་ཐམས་ཅད་ཀྱིས་སྦྱིན་སྲེག་འབུམ་བྱ་སྟེ་འགྲུབ་པར་འགྱུར་རོ། །ཆོ་ག་གཞན་ནི་མཆོད་རྟེན་ཆེན་པོ་རྣམས་ལ་མངོན་པར་ཕྱག་འཚལ་ཞིང་

འབུམ་བཟླས་པར་བྱ་སྟེ། འགྲུབ་པར་འགྱུར་རོ། །དེ་བཞིན་དུ་སྒྲུབ་པའི་ཐབས་འདི་རྣམས་ནི་དེ་ནས་ལས་སུ་འགྱུར་རོ། །དྲན་པ་ཙམ་གྱིས་བདག་ཉིད་སྲུང་བར་འགྱུར་རོ། །བཟླས་པ་ཙམ་གྱིས་ཞི་བར་བྱེད་དོ། །ཡུངས་ཀར་དཀར་པོའི་སྦྱིན་སྲེག་རྒྱས་པར་འགྱུར་རོ། །བོང་བུ་

དང་རྔ་མོའི་སྦངས་ཀྱིས་མངོན་སྤྱོད་ཅན་དུ་འགྱུར་རོ། །སྐེ་ཚེའི་འབྲུ་དང་མེ་ཏོག་གི་རྒྱལ་པོའི་གཟུགས་བརྙན་བྱས་ནས་རྐང་པ་གཡས་པ་ནས་བརྩམས་ཏེ་མཚོན་རྣོན་པོས་གཏུབ་ཅིང་གཏུབ་ཅིང་སྦྱིན་སྲེག་སྟོང་ཕྲག་བརྒྱད་བྱའོ། །དེ་ཉིད་ལ་མར་གྱི་སྲེག་བླུགས་ཉིན་ཞག་བདུན་དུ་ཐུན་གསུམ་

Vol. 94 · folio 99b

དུ་བརྒྱད་བརྒྱ་བྱའོ།། །།ཐུན་གཅིག་གམ། ཕྱོགས་སམ། ཟླ་བ་ལ་རྒྱལ་པོ་འབངས་སུ་འགྱུར་བས་དབང་དུ་འགྱུར་རོ། །འཁོར་ལོས་སྒྱུར་བ་ལ་ཡང་ལན་ཚྭ་སྲང་བཅྭ་བརྒྱད་ཀྱིས་གཟུགས་བྱས་ནས་རྒྱལ་པོའི་མེ་ལ་དེའི་རྐང་པ་གཡོན་པ་ནས་བརྩམས་ནས་རལ་གྲི་རྣོན་པོས་གཏུབ་ཅིང་

སྦྱིན་སྲེག་བྱའོ།། །།ཟླ་བ་གཅིག་གིས་རྒྱལ་པོ་དབང་དུ་འགྱུར་རོ། །འདི་ནི་ཆོ་ག་གཞན་ཏེ་དགྲ་མངོན་པར་མ་ལྷུང་བའི་རྐང་མཐིལ་གྱིས་མནན་པའི་རྡུལ་ཡོངས་སུ་བླངས་ནས་གླང་ཆེན་སྡོང་པོའི་ཤིང་གིས་མེ་རབ་ཏུ་སྦར་ནས་གཡས་པ་ལས་ཅིག་ཤོས་ཀྱི་ལག་པ་བླངས་ནས་ལན་

ཅིག་ཡོངས་སུ་བཟླས་པའི་སྲེག་བླུགས་སྟོང་ཕྲག་བརྒྱད་སྦྱིན་སྲེག་བྱ་སྟེ། ཟླ་བ་གཅིག་ལ་རྒྱལ་པོ་དབང་དུ་འགྱུར་རོ། །འདི་ནི་ཆོ་ག་གཞན་ཏེ་རྒྱལ་པོའི་རྐང་འཐུང་གི་ཤིང་གིས་མེ་སྦར་ནས་ཡུངས་ཀར་རྒྱལ་པོ་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་

བརྒྱད་བྱ་སྟེ། ཟླ་བ་གཅིག་ལ་སའི་བདག་པོ་དབང་དུ་འགྱུར་རོ། །འདི་ནི་ཆོ་ག་གཞན་ཏེ་ཐོག་མར་ཡང་ལྗོན་པའི་རྒྱལ་པོའི་ཤིང་གིས་མེ་སྦར་ནས་སྲ་རྩི་པོག་དང་ལན་ཚྭ་ལྷན་ཅིག་པ་ལ་མར་གྱིས་བསྲེས་པའི་སྦྱིན་སྲེག་བརྒྱད་ལྷག་པའི་སྟོང་ཕྲག་གཅིག་བྱས་ན་སའི་དབང་པོ་བསྒོ་

བ་བཞིན་བྱེད་པར་འགྱུར་རོ། །འདི་ནི་ཆོ་ག་གཞན་ཏེ་མ་བླངས་པའི་ཀ་ར་བཱི་རའི་མེ་ཏོག་དམར་པོ་བཏགས་ནས་གཟུགས་བརྙན་བྱས་ཏེ་རྐང་པ་གཡས་པ་ནས་བརྩམས་ནས་རལ་གྲིས་གཏུབ་ཅིང་གཏུབ་ཅིང་ཀ་ར་བཱི་རའི་ཡམ་ཤིང་གི་མེ་ལ་སྦྱིན་སྲེག་སྟོང་ཕྲག་བརྒྱད་བྱ། ཟླ་བ་

རེ་རེ་ལ་གཟུགས་བརྙན་སྲང་སུམ་ཅུ་སོ་དྲུག་པ་བྱའོ། །དེ་ནས་རྒྱལ་པོ་དབང་དུ་འགྱུར་རོ། །ཆོ་ག་གཞན་ནི་མེ་ཏོག་དམར་པོ་དང་ལན་ཚྭ་ཕན་ཚུན་བསྲེས་ཏེ་བཏགས་ནས་སྲང་བརྒྱད་ཀྱིས་གཟུགས་བརྙན་བྱས་ནས་རྐང་པ་གཡས་པ་ནས་བརྩམས་ནས་རལ་གྲི་རྣོན་པོས་གཏུབ་ཅིང་

གཏུབ་ཅིང་སྦྱིན་སྲེག་བྱའོ། །དེ་ནས་ཤིང་བྱས་པ་དེ་བཞིན་དུ་ཟླ་བ་གཅིག་ལ་ཉི་མ་རེ་རེ་ལ་བྱས་ན་སའི་བདག་པོ་དབང་དུ་འགྱུར་རོ། །འདི་ནི་ཆོ་ག་གཞན་ཏེ་སྐེ་ཚེ་དང་། ཨུཏྤ་ལ་སྔོན་པོ་བསྲེས་ཏེ་བཏགས་པ་སྲང་བཅུ་དྲུག་གིས་གཟུགས་ཀྱི་གཟུགས་བརྙན་བྱས་ནས་མནན་ཏེ་

Vol. 94 · folio 100a

སེང་ལྡེང་ཀོ་བི་དཱ་རའི་ཤིང་གིས་མེ་རབ་ཏུ་སྦར་ནས་མགོ་བོ་ནས་བརྩམས་ཏེ་རལ་གྲིས་གཏུབ་ཅིང་གཏུབ་ཅིང་ཟླ་བ་གཅིག་ཏུ་སྦྱིན་སྲེག་སྟོང་ཕྲག་བརྒྱད་བྱ་སྟེ་ཉི་མ་རེ་རེ་ལའོ། །དེ་ནས་གཟུགས་བརྙན་གཅིག་ནི་རྒྱལ་པོའི་འབངས་བཞིན་དུ་ཀུན་ཏུ་སྤྱོད་པར་བྱེད་དོ། །ཆོ་ག་

གཞན་འབྱུང་སྟེ་རྒྱ་མཚོ་ལས་བྱུང་བའི་ཚ་དང་། ལན་ཚྭ་བསྲེས་ཏེ་ཀ་ར་བཱི་རའི་མེ་ཏོག་དམར་པོ་དང་བཏགས་ནས་གཟུགས་བརྙན་རྫོགས་པར་བྱ་སྟེ་ཤིང་གི་རྒྱལ་པོའི་ཡམ་ཤིང་གིས་མེ་རབ་ཏུ་སྦར་ནས་རྐང་པ་གཡས་པ་ནས་བརྩམས་ཏེ་མཚོན་རྣོན་པོས་གཏུབ་ཅིང་གཏུབ་ཅིང་སྦྱིན་སྲེག་སྟོང་

ཕྲག་བརྒྱད་བྱའོ། །ཉི་མ་སོ་སོ་ལ་གཟུགས་བརྙན་རེ་རེ་མཉམ་ཞིང་མཉམ་པ་རེ་རེའོ། །རྒྱལ་པོ་གླང་པོ་བཞིན་དུ་བཀའ་བསྒོ་བ་བྱེད་པར་འགྱུར་རོ། །ཆོ་ག་གཞན་ནི་མྱ་ངན་མེད་པའི་མེ་ཏོག་ཡུངས་ཀར་དང་། ནཱ་ག་གེ་སར་བསྲེས་ནས་ཀོ་མེ་དང་། ནཱ་བྷཱ་ས་བཏགས་པ་སྲང་

བཅུ་དྲུག་གིས་གཟུགས་བརྙན་བྱས་ནས་གཟུགས་བརྙན་གྱི་མགོ་བོ་ནས་བརྩམས་ཏེ་ལག་པ་གཡོན་པས་མཚོན་རྣོན་པོས་གཏུབ་ཅིང་གཏུབ་ཅིང་དེའི་ཤིང་ཁོ་ནས་མེ་རབ་ཏུ་སྦར་ཏེ་སྟོང་ཕྲག་བརྒྱད་བརྒྱར་སྦྱིན་སྲེག་བྱའོ། །གཞན་རྣམས་གཡས་པས་ཉི་མ་སོ་སོར་ཟླ་བ་

གཅིག་ཏུ་གནས་ཏེ་ཉི་མ་གུང་ལ་གཞན་རྣམས་ཇི་ལྟར་འདོད་པས་འབངས་བཞིན་དུ་མྱུར་དུ་དབང་དུ་བྱེད་དོ། །ཆོ་ག་གཞན་ནི་སོ་མ་རཱ་ཛའི་འབྲས་བུ་དང་བསྲེས་པའི་དྲིའི་རྫས་རྣམས་ཐམས་ཅད་བཏགས་པ་སྲང་བཅུ་དྲུག་གིས་གཟུགས་བརྙན་བྱས་ནས་འོ་མ་ཅན་གྱི་ཡམ་ཤིང་གིས་

མེ་རབ་ཏུ་སྦར་ཏེ་ལྟེ་བ་ནས་བརྩམས་ནས་རྐང་མཐིལ་ལ་ཐུག་གི་བར་དུ་རལ་གྲིས་གཏུབ་ཅིང་གཏུབ་ཅིང་སྦྱིན་སྲེག་བྱའོ། །དེ་ནས་མགོ་བོ་ནས་བརྩམས་ཏེ་སླར་ཡང་སྦྱིན་སྲེག་ཟླ་བ་གཅིག་ཏུ་ཉི་མ་སོ་སོར་བྱས་ན་རྒྱལ་པོ་ཅི་བགྱི་དང་མཚུངས་པར་འགྱུར་རོ། །འདི་ནི་ཆོ་ག་གཞན་བླ་ན་

མེད་པ་སྟེ་ཙནྡན་དམར་པོ་དང་། ལན་ཚྭ་དང་མཉམ་པར་འགྲོ་བ་རྣམས་བཏགས་པ་སྲང་ཉི་ཤུ་རྩ་ལྔས་གཟུགས་བརྙན་བྱས་ནས་ཉི་མ་སོ་སོའི་སྔ་དྲོའི་དུས་ཚོད་ལ་ཙནྡན་དམར་པོའི་ཤིང་གི་མེ་ལ་རྐང་པ་གཡས་པ་ནས་བརྩམས་ནས་རལ་གྲི་རྣོན་པོས་གཏུབ་ཅིང་གཏུབ་ཅིང་སྦྱིན་སྲེག་སྟོང་

Vol. 94 · folio 100b

ཕྲག་བརྒྱད་བྱའོ། །ལས་འདི་ནི་ལག་པ་གཡས་པས་སྲེག་བླུགས་དབུལ་ཞིང་གཡོགས་ཀྱང་ངོ་། །ཟླ་བ་གཅིག་ཙམ་ལ་རྒྱལ་པོ་འབངས་བཞིན་དུ་བཀའ་བསྒོ་བ་བྱེད་པར་འགྱུར་རོ། །ཆོ་ག་གཞན་ནི་ས་ལ་མ་ལྷུང་བའི་བ་བྱུང་ཚྭ་དང་ཡང་དག་པར་བསྲེས་ནས་བཏགས་པར་བྱའོ། །

དེ་ནས་སྲང་ཉི་ཤུ་རྩ་ལྔས་གཟུགས་བརྙན་བྱས་ནས་ཕྱི་དྲོའི་དུས་ཚོད་ལ་ཡང་དག་པར་ཤེས་པས་གཟུགས་བརྙན་སོ་སོ་རེ་རེ་པ་ལཱ་ཤའི་མེ་ལ་གཟུགས་བརྙན་གྱི་རྐང་པ་གཡས་པ་ནས་བརྩམས་ཏེ་མཚོན་རྣོན་པོས་གཏུབ་ཅིང་གཏུབ་ཅིང་སྦྱིན་སྲེག་བརྒྱད་བརྒྱའོ། །ལས་ལྷག་མ་འདི་ནི་

དང་པོ་དང་མཚུངས་པར་དེ་ཡང་ཟླ་བ་ཙམ་ལ་རྒྱལ་པོ་བཀའ་བསྒོ་བ་རྗེས་སུ་སྒྲུབ་པར་བྱེད་པ་ཅི་བགྱིད་འགྱུར་རོ། །ཆོ་ག་གཞན་ནི་བ་ལང་གི་གཅིན་དང་གནས་དང་། གྲོག་མཁར་གྱི་ས་དང་སྦྲང་རྩི་མཉམ་པར་འགྲོ་བ་ཡིས། སྲང་ཉི་ཤུ་ཆའི་གཟུགས་བརྙན་བསྐྱེད་ནས་ཟླ་བ་གཅིག་

ཏུ་ཉི་མ་སོ་སོ་ལ་ལན་གསུམ་དུ་ཉི་མ་གུང་ལ་ཤིང་གི་རྒྱལ་པོའི་སྲེག་ཟ་རྣམ་པར་གནས་པ་ལ་གཟུགས་བརྙན་གྱི་རྐང་པ་གཡས་པ་ནས་བརྩམས་ནས་རལ་གྲི་རྣོན་པོས་གཏུབ་ཅིང་གཏུབ་ཅིང་སྦྱིན་སྲེག་སྟོང་ཕྲག་བརྒྱད་བྱའོ། །འབངས་བཞིན་དུ་འགྱུར་རོ་ཞེས་སྒྲུབ་ཐབས་འདི་

རྣམས་ནི་དུས་ཐམས་ཅད་སྟོན་དང་། དཔྱིད་དང་། སོ་ག་དང་། དགུན་གྱི་དུས་ཚོད་ལ་ཡང་རབ་ཏུ་སྦྱར་ན་མཚུངས་པ་མེད་པའི་ནོར་ཆེན་པོ་འདི་རྣམས་རྟག་ཏུ་ངེས་པར་ཐོབ་བོ། །དེ་ནས་སོ་གའི་སྒྲུབ་པ་འབྱུང་སྟེ། རིགས་དང་ཁ་དེག་མཐུན་པའི་ཞོ་དང་མར་ལྷན་ཅིག་པ་

ཀ་ར་བཱི་རའི་མེ་ཏོག་དང་གཅིག་ཏུ་བྱས་ཏེ་བཏགས་ནས་སྲང་སུམ་ཅུའི་ཚད་ཀྱིས་གཟུགས་བརྙན་བྱས་ནས་ཉི་མ་སྔ་དྲོ་འམ་ཕྱི་དྲོ་པ་ལཱ་ཤའི་ཡམ་ཤིང་གིས་མེ་སྦར་ནས་གཟུགས་བརྙན་གྱི་གཡས་ཀྱི་མགོར་བཞག་ནས་རྐང་པ་གཡས་པ་ནས་བརྩམས་ཏེ་ལག་པ་གཡས་པས་རལ་གྲི་རྣོན་

པོས་གཏུབ་ཅིང་གཏུབ་ཅིང་སྦྱིན་སྲེག་སྟོང་ཕྲག་བརྒྱད་བྱའོ། །ཟླ་བ་གཅིག་ལ་རྒྱལ་པོ་དབང་དུ་འགྱུར་རོ། །ཆོ་ག་གཞན་ནི་ཡུངས་ཀར་དཀར་པོ་དང་། གུར་གུམ་བསྲེས་ཏེ་ལེགས་པར་བཏགས་ལ་སྲད་བུ་བཅུ་པ་བྱས་ནས་འདི་འདིའི་ལྷག་མ་སྔར་བཞིན་ནོ། །འདི་ལ་ཁྱད་ནི་

Vol. 94 · folio 101a

ལག་པ་གཡོན་པས་གཏུབ་ཅིང་གཏུབ་ཅིང་སྦྱིན་སྲེག་བྱའོ། །ཆོ་ག་གཞན་ནི་རྒྱ་མཚོའི་ལན་ཚྭ་དང་། ནས་དང་གྲོ་རྣམས་གཅིག་ཏུ་བཏགས་པ་སྲང་སུམ་ཅུ་པས་གཟུགས་བརྙན་བྱས་ནས་དེའི་ཁར་ཚ་བ་གསུམ་གྱིས་བཀང་ནས་ཟངས་ཀྱི་ཐུར་མ་དུ་སྟི་རའི་མེ་ལ་བཟླས་

པ་བྱས་ནས་རྐང་པའི་འོག་ནས་ཕུག་སྟེ་སྤྱི་བོར་འཐོན་པར་བྱེད་དོ། །དེ་ནས་མགོ་བོའི་གཡས་བཞག་སྟེ་པ་ལཱ་ཤའི་འདབ་མ་ལ་རང་གི་རལ་གྲིའི་སོས་བཅད་ནས་ཇི་ལྟར་འདོད་པའི་དུས་ཚོད་ལ་སེང་ལྡེང་གི་མེར་ལག་པ་གཡས་པས་སྦྱིན་སྲེག་སྟོང་ཕྲག་བརྒྱད་བྱའོ། །ཟླ་བ་གཅིག་ལ་

རྒྱལ་པོ་ཇི་སྲིད་འཚོའི་བར་དུ་དབང་དུ་འགྱུར་རོ། །ཞེས་པ་འདི་རྣམས་ནི་སོ་གའི་དུས་ཀྱི་སྒྲུབ་ཐབས་སུ་འགྱུར་བ་རྣམས་སོ། །ཡང་འདིའི་དབྱར་གྱི་ལས་རྣམས་འབྱུང་བར་འགྱུར་ཏེ། དབྱར་གྱི་དུས་ཚོད་ལ་ངེས་པར་སྒྲུབ་པར་བྱེད་དོ། །པུ་ཤེལ་ཙེ་དང་། བཱ་ལ་ཀཾ་དང་། སཽ་བ་ཙ་

ལ་དང་། ལན་ཚྭ་དང་གཟུགས་བརྙན་གཅིག་ཏུ་བྱས་པ་ལ་ནམ་མཁའི་ཆུས་བཏགས་ནས་སྲང་ཉི་ཤུ་རྩ་ལྔས་རྒྱལ་པོའི་གཟུགས་བརྙན་བྱས་ནས་གཡས་པ་ནས་བརྩམས་ཏེ་ལག་པ་གཡས་པས་རལ་གྲི་རྣོན་པོས་གཏུབ་ཅིང་གཏུབ་ཅིང་པ་ལཱ་ཤའི་མེ་ལ་སྦྱིན་སྲེག་སྟོང་ཕྲག་བརྒྱད་

བྱའོ། །ཉི་མ་སོ་སོར་ཇི་ལྟར་འདོད་པའི་ཐུན་མཚམས་ལའོ། །ཟླ་བ་གཅིག་ཏུའོ། །རྒྱལ་པོ་དབང་དུ་འགྱུར་རོ། །འདི་ནི་ཆོ་ག་གཞན་ཏེ་པུ་ཤེལ་ཙེ་དང་། པྲི་ཡང་ཀུ་དང་། ཊཱཾ་པ་ཎ་དང་། འགྱུར་བྱེད་རྣམས་གཅིག་ཏུ་བྱས་ཏེ་ནམ་མཁའི་ཆུས་བཏགས་ནས་སྲང་སུམ་ཅུ་པའི་

རྒྱལ་པོའི་གཟུགས་བརྙན་བྱ་སྟེ། མགོ་བོ་ནས་བརྩམས་ནས་ལག་པ་གཡས་པས་རལ་གྲི་རྣོན་པོས་གཏུབ་ཅིང་གཏུབ་ཅིང་དོང་ཀའི་ཤིང་གིས་མེ་སྦར་ནས་ཟླ་བ་གཅིག་ཏུ་ཉི་མ་སོ་སོར་ཇི་ལྟར་འདོད་པའི་ཐུན་མཚམས་ལ་སྦྱིན་སྲེག་སྟོང་ཕྲག་བརྒྱད་བྱའོ། །འདི་ནི་ངེས་པར་མངག་

གཞུག་པ་བཞིན་དུ་ཀུན་ཏུ་སྤྱོད་དོ། །འདི་ནི་ཆོ་ག་གཞན་ཏེ། སརྫི་ཀ་དང་། འོ་མ་དང་། ནས་ཀྱི་འགྱུར་བྱ་དང་། ཤུ་དག་དང་། སྲན་མ་མཱ་ཤ་དང་། ཏིལ་རྣམས་གཅིག་ཏུ་བསྲེས་ནས་ལུས་ཀྱི་ཆུས་བཏགས་ཏེ་མི་བདག་གི་གཟུགས་བརྙན་སྲང་སུམ་ཅུ་པ་བྱས་ཏེ། ཨ་མྲའི་

Vol. 94 · folio 101b

ཤིང་གིས་མེ་རབ་ཏུ་སྦར་ནས་ཟླ་བ་གཅིག་ཏུ་ཉི་མ་སོ་སོར་ཇི་ལྟར་འདོད་པའི་ཐུན་མཚམས་ལ་ལག་པ་གཡས་པས་མགོ་བོ་ནས་བརྩམས་ཏེ་གཏུབ་ཅིང་གཏུབ་ཅིང་སྦྱིན་སྲེག་སྟོང་ཕྲག་བརྒྱད་བྱའོ། །རྒྱལ་པོ་དབང་དུ་འགྱུར་རོ། །འདི་ནི་ཆོ་ག་གཞན་མཆོག་སྟེ་རྒྱ་མཚོའི་ལན་ཚྭ་དང་ས་ལ་མ་

ལྷུང་བའི་བ་བྱུང་གཅིག་ཏུ་བྱས་ནས་ནས་ཀྱི་འགྱུར་བྱེད་དང་ལྷན་ཅིག་ནམ་མཁའི་ཆུས་བཏགས་ཏེ། སྲང་སུམ་ཅུའི་ཚད་ཀྱིས་རྒྱལ་པོའི་གཟུགས་བརྙན་བྱས་ཏེ་ཟླ་བ་གཅིག་ཏུ་ཉི་མ་སོ་སོར་ཇི་ལྟར་འདོད་པའི་ཐུན་མཚམས་ལ་ཨུ་དུམ་བཱ་རའི་ཤིང་གི་མེ་ལ་ལག་པ་གཡས་པས་རལ་གྲི་

རྣོན་པོས་རྐང་པ་གཡས་པ་ནས་བརྩམས་ཏེ་གཏུབ་ཅིང་གཏུབ་ཅིང་སྦྱིན་སྲེག་བྱས་ན་རྒྱལ་པོ་དབང་དུ་འགྱུར་རོ། །ཞེས་པ་འདི་རྣམས་ནི་དབྱར་གྱི་དུས་ཀྱི་སྒྲུབ་པའི་ཐབས་རྣམས་ཏེ་འདི་ཁོ་ན་ལ་དངོས་གྲུབ་ཉེ་བར་འགྱུར་རོ། །ཡང་འདིར་གཞན་འབྱུང་སྟེ་དགུན་སྨད་ཀྱི་དུས་ཀྱི་སྒྲུབ་པ་ནི་

གང་དུ་དུས་གཅིག་ཏུ་སྒྲུབ་པར་བྱེད་དོ། །འབྲུའི་ཕུབ་མ་དང་། ནས་ཀྱི་ཚིགས་དང་། ག་བི་ན་དང་། ཤུ་དག་རྣམས་གཅིག་ཏུ་བཏགས་ནས་སྲང་ལྔ་བཅུའི་ཚད་ཀྱིས་སའི་བདག་པོའི་གཟུགས་བརྙན་བྱས་ནས་ཟླ་བ་གཅིག་ཏུ་ཉི་མ་སོ་སོར་ཇི་ལྟར་འདོད་པའི་དུས་ཚོད་ལ་ནིམ་པའི་ཤིང་གི་མེ་ལ་

ནུབ་ཏུ་མགོ་བཞག་ནས་རྐང་པ་ཤར་དུ་ཕྱོགས་པའི་གཟུགས་བརྙན་གྱི་མགོ་བོ་ནས་བརྩམས་ཏེ་ལག་པ་གཡས་པས་རལ་གྲི་རྣོན་པོས་གཏུབ་ཅིང་གཏུབ་ཅིང་སྦྱིན་སྲེག་སྟོང་བྱའོ། །རྒྱལ་པོ་དབང་དུ་འགྱུར་རོ། །ཆོ་ག་གཞན་ནི་ཨ་རུ་ར་དང་། སྐྱུ་རུ་རའི་འབྲས་བུ་དང་། ཤྲི་བཱ་

ས་ཀ་དང་། ཀུན་ཏུ་རུ་ཀ་དང་། བ་ལས་བྱུང་བའི་མར་རྣམས་ལྷན་ཅིག་བཏགས་པ་སྲང་སུམ་ཅུའི་མི་བདག་གི་གཟུགས་བརྙན་བྱས་ནས་ནུབ་ཏུ་མགོ་བཞག་སྟེ་སྔར་བཞིན་དུ་པ་ལཱ་ཤའི་མེ་ལ་ཟླ་བ་གཅིག་ཏུ་ཉི་མ་སོ་སོར་ཇི་ལྟར་འདོད་པའི་དུས་ཚོད་ལམ་ལ་སྦྱིན་སྲེག་སྟོང་ཕྲག་བརྒྱད་

བྱའོ། །རྒྱལ་པོ་མངག་གཞུག་པ་བཞིན་དུ་རྟག་ཏུ་དབང་དུ་འགྱུར་རོ། །ཆོ་ག་བཞིན་བ་རུ་རའི་འབྲས་བུ་དང་། ནས་དང་། ཙི་ཀ་སེང་འདབ་མ་དང་། རྩ་བ་དང་བཅས་པ་དང་། ཏིལ་དང་ཡུངས་ཀར་དཀར་པོ་རྣམས་གཅིག་ཏུ་བྱས་ཏེ་བ་ལས་བྱུང་བའི་མར་ལྷན་ཅིག་བཏགས་ནས་སྲང་

Vol. 94 · folio 102a

སུམ་ཅུས་རྒྱལ་པོའི་གཟུགས་བརྙན་བྱས་ཏེ་མགོ་བོ་ནུབ་ཏུ་བསྟན་ནས། སྔར་བཞིན་ཨུ་དུམ་བཱ་རའི་ཤིང་གི་མེ་ལ་ཟླ་བ་གཅིག་ཏུ་ཉིན་ཞག་སོ་སོར་སྦྱིན་སྲེག་སྟོང་ཕྲག་བརྒྱད་བྱའོ། །སའི་བདག་པོ་གདོན་མི་ཟ་བར་དབང་དུ་འགྱུར་རོ། །ཆོ་ག་གཞན་ནི་རྒྱ་མཚོ་ནས་བྱུང་

བའི་ལན་ཚྭ་དང་། བུ་རམ་དང་། སྐྱུ་རུ་རའི་འབྲུ་རྣམས་དང་། ཡུངས་ཀར་དཀར་པོ་གཅིག་ཏུ་བྱས་ཏེ་ཡང་དག་པར་བཏགས་པ་སྲང་སུམ་ཅུས་རྒྱལ་པོའི་གཟུགས་བརྙན་བྱས་ཏེ་མགོ་བོ་ནུབ་ཏུའོ། །སྔར་བཞིན་དུ་འོ་མ་ཅན་གྱི་ཤིང་གི་མེ་ལ་ཟླ་བ་གཅིག་ཏུ་ཉིན་ཞག་སོ་སོར་ཇི་ལྟར་འདོད་པའི་དུས་

ཚོད་ལ་མེ་ལ་སྦྱིན་སྲེག་སྟོང་ཕྲག་བརྒྱད་བྱས་ན་རྒྱལ་པོ་བཀའ་བསྒོ་བ་རྗེས་སུ་སྒྲུབ་པར་བྱེད་པར་འགྱུར་རོ། །ཆོ་ག་གཞན་ནི་རྒྱ་ཚྭ་དང་། རྒྱ་མཚོའི་ལན་ཚྭ་དང་། ནས་དང་། ཏིལ་དང་། བུ་རམ་རྣམས་གཅིག་ཏུ་བྱས་ཏེ་བའི་མར་གྱིས་ཀུན་ཏུ་བཏགས་པ་སྲང་ལྔ་བཅུས་རྒྱལ་པོའི་

གཟུགས་བརྙན་བྱས་ནས་ནུབ་ཏུ་མགོ་བོ་བཞག་སྟེ་སྔར་བཞིན་དུ་ཇི་ལྟར་མངོན་པར་འདོད་པའི་དུས་ཚོད་ལ་ཟླ་བ་གཅིག་ཏུ་ཉི་མ་སོ་སོར་སྦྱིན་སྲེག་སྟོང་ཕྲག་བརྒྱད་བྱའོ། །རྟག་ཏུ་མངག་གཞུག་པ་བཞིན་དུ་ཉེ་བར་འགྲོའོ། །ཞེས་པ་འདི་རྣམས་ནི་དགུན་གྱི་དུས་ཀྱི་སྒྲུབ་པ་རྣམས་གྲུབ་

པར་བྱེད་པའོ། །དེ་ཉིད་ལའོ་འདི་རྣམས་ནི་མཆོག་ཏུ་གསང་བའོ། །ཞེས་པ་སྟེ་སླར་ཡང་རིག་པ་འཛིན་པར་གྱུར་ཅིག །གསང་བའི་སྒྲུབ་པ་ལ་སྒྲུབ་པའི་སྦྱོར་བའི་དུས་ཅན་གྱི་དངོས་གྲུབ་གཡོ་བར་བྱེད་དེ། ཇི་སྐད་གསུངས་པའི་དུས་ངེས་པར་གྱུར་པ་སོ་ག་ལ་སོགས་པ་རྣམས་ལ་ལས་

བྱས་པའོ། །དེ་ནས་གང་གི་རྒྱལ་པོ་འདི་རྟག་ཏུ་ཀུན་ཏུ་བཅིངས་པར་འགྱུར་རོ། །དངོས་གྲུབ་ཉམས་པ་ཡང་མེད་དེ། ལས་གཞན་དང་ལྷན་ཅིག་དེ་ཡོད་པའོ། །ཡང་ཆོ་ག་གཞན་ནི་གྲུབ་པ་གང་གིས་འཕོ་བར་འགྱུར་བ་གང་ཡིན་པ་དེ་རྣམས་ནི་སེམས་ཅན་གྱི་བྱེ་བྲག་ལས་སམ། ཆོ་ག་

མེད་པའམ། འབྱུང་བ་ཉིད་ལས་སམ། དབང་པོ་མ་ཚང་བ་ཉིད་ལས་སམ། སློབ་དཔོན་གྱི་མན་ངག་མེད་པར་རང་གི་རིག་པ་བཟུང་སྟེ་སྟོན་པའི་བཀའ་སོ་སོར་འབྲང་བས་མང་པོ་མི་ཤེས་ཏེ་བླ་མ་དམ་པ་མེད་པ་ལས་སམ། ནུས་པ་དང་བྲལ་བ་ལས་སས་རྫས་མ་མཐོང་བས་རྟོག་པའི་དཀྱིལ་

Vol. 94 · folio 102b

འཁོར་གྱི་སློབ་དཔོན་ལ་ཕུལ་བ་དང་། བླ་མ་དམ་པ་སྦྱིན་པའི་འོས་སུ་གྱུར་པ་ལ་བདག་ཉིད་ཤེས་པ་མེད་དོ་ཞེས་མ་ཞུམ་པ་དང་ལྡན་པས་རྟོགས་པ་ཡང་མེད་ཅིང་མཐོང་བ་ཡང་མེད་པར་ལས་ཆེན་པོའི་སྒྲུབ་པ་རྣམས་ཤེས་པར་བྱེད་པ་བསོད་ནམས་མ་ཡིན་པ་སྨྲ་བ་ཚུལ་ཁྲིམས་འཆལ་པའམ།

དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་ཡང་རུང་སྟེ་རང་གི་བསླབ་པའི་མཚམས་ཞིག་པ། ཕམ་པར་གྱུར་པའི་ལྟུང་བ་ལ་ཞུགས་པའམ། བྱང་ཆུབ་ཀྱི་སེམས་དང་བྲལ་བའམ། མཚམས་མེད་པ་བྱས་པའམ། སློབ་དཔོན་ལ་བརྙས་པའམ། མཆོད་

རྟེན་གྱི་གནས་ལ་རྡོག་པས་བརྫིས་པའམ། སློབ་དཔོན་གྱི་གྲིབ་མ་ལ་འགོམ་པར་བྱེད་པའམ། ཐེག་པ་ཆེན་པོ་ལ་ཡང་བརྙས་པ་དང་། བྱང་ཆུབ་སེམས་དཔའ་རྣམས་ལ་སྡང་བར་གྱུར་པའམ། ལྷ་ཐམས་ཅད་ལ་བརྙས་པ་སྟེ། ཉེས་པ་འདི་རྣམས་ཀྱིས་ལས་གཞན་

བྱས་པ་དེ་ཡང་དག་པར་བྱས་པ་མ་ཡིན་རྣམ་པ་གཞན་དུ་བྱས་པར་འགྱུར་ཏེ། དེ་དངོས་གྲུབ་དང་བྲལ་བ་ནི་དེ་ཉིད་ཀྱི་ཆོ་ག་ལས་འདས་པའི་ཕྱིར་རོ། །གང་ལ་ལ་འདི་རྣམས་བྱེད་པ་དེའི་དངོས་གྲུབ་དེ་སྐད་ཅིག་མ་གཅིག་ལ་འཇིགས་པར་བྱེད་དེ་རིག་པ་ཅུང་ཟད་བཟླས་པ་ནི་དུས་གཞན་

དུ་ཀུན་ཏུ་གནས་ཏེ་གང་ཡང་སྒྲུབ་པའི་དུས་ཅན་གྱི་དངོས་གྲུབ་མ་ཡིན་པ་དེ་འདིར་འགྱུར་རོ། །སླར་ཡང་རིག་པ་འཛིན་པ་གང་ཞིག་གསང་བའི་སྒྲུབ་པའི་ཆོ་གས་རྒྱལ་པོའི་རྐང་རྗེས་ཀྱིས་ལ་བར་སྐབས་འདིར་བརྒྱད་བརྒྱའམ། ལྔ་བརྒྱར་སྲེག་བླུགས་མར་གྱིས་བཏགས་པའི་སྦྱིན་

སྲེག་བྱེད་དོ། །དེ་ཉིད་དུ་ཐམས་ཅད་དུ་བྱེད་པའི་རྒྱལ་པོ་ཇི་སྲིད་འཚོའི་བར་དུ་དབང་དུ་འགྱུར་རོ། །འཁོར་ལོས་སྒྱུར་བ་ལ་ཡང་ཇི་སྐད་གསུངས་པའི་དུས་ཀྱི་སྒྲུབ་པ་བྱེད་པ་ལ་ངེས་པར་དངོས་གྲུབ་མེད་པར་མི་འགྱུར་ཏེ་དངོས་གྲུབ་ཉམས་པར་ཡང་མི་འགྱུར་རོ། །དེ་ནས་ཡང་

སེམས་དཔའ་ཆེན་པོ་སྟོང་ཕྲག་བརྒྱད་ཅི་ཡང་མི་གསུང་བར་གནས་པར་གྱུར་ཏོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྐྱེ་བོ་དུ་མའི་ནང་དུ་ལྷུང་བ་དགེ་བའི་སྤྱོད་པའི་མཆོད་པ་ཆུང་ངུ་དེ་

Vol. 94 · folio 103a

སྟན་ལས་ལངས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་མངོན་པར་ཕྱག་འཚལ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཏེ་སེམས་ཅན་ཐམས་ཅད་མཉམ་པ་ཉིད་ཀྱི་ཏིང་ངེ་འཛིན་དང་ལྡན་པའི་སེམས་དཔའ་ཆེན་པོ་དེ་ལ་འདི་

སྐད་ཅེས་སྨྲས་སོ། །སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སེམས་ཅན་ཐམས་ཅད་ལ་ཀུན་ཏུ་ལྟ་བ་ཞེས་བྱ་བ་བྱང་ཆུབ་སེམས་དཔའ་ཆེན་པོའི་ཏིང་ངེ་འཛིན་གྱི་རྒྱལ་པོ་གསུངས་ཤིག །སེམས་དཔའ་ཆེན་པོ་གསུངས་ཤིག །དེ་སྐད་ཅེས་སྨྲས་པ་དང་། སེམས་

དཔའ་ཆེན་པོ་དེས་ཏིང་ངེ་འཛིན་གྱི་རྒྱལ་པོ་སྒོམ་ཞིང་འཛུམ་པའི་བགེགས་དང་བྲལ་བས་བཅོམ་ལྡན་འདས་ལ་ཀུན་ཏུ་ལྟ་ཞིང་བཅོམ་ལྡན་འདས་ཀྱིས་རྗེས་སུ་གནང་ནས། བྱང་ཆུབ་སེམས་དཔའ་ཆེན་པོ་མཐུ་ཆེན་ཐོབ་ལ་སྨྲས་པ། གང་ཁྱོད་སྙིང་རྗེ་ཆེན་པོ་དོན་དམ་པ། མཆོག་ཏུ་གསང་

བ། ལྷན་ཅིག་པའི་རྒྱུད་ཐམས་ཅད་ཀྱི་རྗེས་སུ་སོན་པ་གང་ཡིན་པ་འདི་རྣམས་ནི་ལྷ་དང་བཅས་པའི་འཇིག་རྟེན་གྱིས་མཆོད་པ་བྱ་བར་འགྱུར་ཏེ་མཆོག་ཏུ་ཚུལ་ཁྲིམས་འཆལ་པ་ཡང་ངན་འགྲོར་འགྲོ་བར་མི་འགྱུར་རོ། །ལྷ་ཐམས་ཅད་དང་། ཀླུ་ཐམས་ཅད་དང་། གནོད་སྦྱིན་ཐམས་

ཅད་ཀྱི་དཔལ་ཡང་གང་ལ་ལ་བཅོམ་ལྡན་འདས་མ་འཕགས་མ་སྒྲོལ་མའི་རྟོག་པ་ཐོབ་པར་འགྱུར་བ་དང་། ཤེས་པར་འགྱུར་བ་དང་། ཁ་ཏོན་བྱེད་པར་འགྱུར་བ་དང་། འདྲི་བར་འགྱུར་བ་དང་། སྒྲུབ་པར་འགྱུར་བ་དང་། མཆོད་པར་འགྱུར་བ་དང་། གླེགས་བམ་དུ་བྲིས་ནས་རང་

གི་ཁྱིམ་དུ་འཇོག་པར་འགྱུར་བ་དང་། ཉལ་བའི་དུས་དང་། མལ་ནས་ལྡང་བའི་དུས་སུ་མགོ་ལ་འཇོག་པར་བྱེད་པར་འགྱུར་བ་དེའི་ཕུང་ཁྲོལ་ཆེན་པོ་ཐམས་ཅད་ཡོངས་སུ་སྤངས་ཏེ་ལོངས་སྤྱོད་ཆེན་པོར་འགྱུར་རོ། །ཚེ་རིང་པོ་ཉིད་དུ་ཡང་འགྱུར་རོ། །མདོར་ན་གང་ཡང་བདག་

གི་རྒྱུད་མ་ལུས་པ་ཤེས་པར་འགྱུར་རོ། །སེམས་དཔའ་ཆེན་པོ་དེ་ལྷ་དང་། ཀླུ་དང་། གནོད་སྦྱིན་ལ་སོགས་པ་ཐམས་ཅད་ཀྱིས་ཤེས་པར་འགྱུར་རོ། །དེ་རྣམས་འདིས་ཟིལ་གྱིས་གནོན་པར་འགྱུར་བ་དེས་ན་བཤད་པར་བྱེད་དོ། །དེ་ནས་སེམས་དཔའ་ཆེན་པོ་སྐད་ཅིག་

Vol. 94 · folio 103b

ལ་ཏིང་ངེ་འཛིན་གྱི་རྒྱལ་པོ་སྒོམ་ཞིང་རབ་ཏུ་འཛུམ་པའི་རང་བཞིན་དུ་གྱུར་པས་རལ་པ་གྱེན་དུ་བརྫེས་པ། སྤྱན་གསུམ་པ། ཕྱག་བཞི་པ། བཅོམ་ལྡན་འདས་འོད་དཔག་མེད་དབུ་ལ་བཞུགས་པ། མཉམ་པར་གསུང་བ་པདྨའི་ཕྱག་ཅན། ལྷའི་ལུས་ཆེན་པོ། ལྟ་བར་མི་

དཔོག་པའི་སྐུ། སེམས་ཅན་ཐམས་ཅད་ཀྱི་གྲོལ་བ། དེ་བཞིན་གཤེགས་པ་རྣམས་ཀྱི་ལྟེ་བ་གང་ཅུང་ཟད་རྟོག་པར་ནུས་པར་མཐོང་ནས། བཅོམ་ལྡན་འདས་མ་སྒྲོལ་མ་ཡིད་ལ་བྱས་ཏེ་སངས་རྒྱས་ཐམས་ཅད་ལ་རབ་ཏུ་བཏུད་དེ་རིན་པོ་ཆེའི་པདྨ་ལ་ཉེ་བར་འདུག་སྟེ་སྨྲས་

པ། སེམས་ཅན་ཐམས་ཅད་ཀྱི་སྤྱོད་པ་དང་། སྒྲུབ་པ་སོ་སོ་དང་། བྱང་ཆུབ་སེམས་དཔའ་སོ་སོའི་སྤྱོད་པ་དང་བྱང་ཆུབ་སེམས་དཔའི་མྱུ་གུ་རྣམས་ལ་ངེས་པར་ཕན་པ་དང་བདེ་བའི་ཆེད་དུ་སངས་རྒྱས་ཉིད་ཀྱིས་ཐབས་མཁས་པའི་བྱ་བ་གང་གིས་སྦྱིན་པའི་ཕ་རོལ་ཏུ་ཕྱིན་པ་ཡོངས་

སུ་རྫོགས་པའི་ཆེད་དང་། ས་དང་པོར་སོ་སོར་ཐོབ་པའི་ཆེད་དང་། བླ་ན་མེད་པའི་སངས་རྒྱས་ཐོབ་པའི་ཆེད་དུ་ཇི་ལྟར་སངས་རྒྱས་བཅོམ་ལྡན་འདས་ལྷ་དང་བཅས་པའི་འཇིག་རྟེན་གྱི་བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། བསོད་ནམས་ཀྱི་ཚོགས་ཆེན་པོ་རྒྱུན་དུ་

ཉེ་བར་བསྐྱེད་པ། དེ་བཞིན་ཁོ་ནར་བསོད་ནམས་ཀྱི་མཐུས་སེམས་ཅན་རྣམས་ཀྱི་གོང་དུ་ཡོངས་སུ་བསྔགས་པའི་མཚན་བཟང་པོས་བརྒྱན་པ། འཁོར་ལོས་སྒྱུར་བའི་རྒྱལ་པོར་སྐྱེ་བར་འགྱུར་རོ། །དེ་ནས་བྱང་ཆུབ་སེམས་དཔའི་རིགས་གང་གིས་སྔོན་བྱས་པའི་ལས་

རྣམས་ཀྱིས་དེ་བཞིན་དུ་བྱ་བ་ཡང་རྟག་ཏུ་རང་ཉིད་འཁོར་ལོས་སྒྱུར་བ་དེ་ཡང་དབང་དུ་བྱ་སྟེ་སྔོན་བརྗོད་པའི་ལས་རྣམས་ཁོ་ནས་སོ། །དེ་ལས་ཀྱང་ས་ཐམས་ཅད་པའི་བདག་པོར་འགྱུར་རོ། །སངས་རྒྱས་བཅོམ་ལྡན་འདས་ལ་མངོན་པར་མ་དང་བ་རྣམས་རབ་ཏུ་དང་

བ་ཉིད་ཀྱིས་དཀྱིལ་འཁོར་བར་ཡང་འགྱུར་རོ། །ཡུལ་གྱི་དཔོན་པོའམ། ཇི་ལྟ་བུའི་བསོད་ནམས་དེས་སེམས་ཅན་རྣམས་ཀྱི་གོང་དུ་རྒྱལ་པོ་བྱེད་དུ་འཇུག་གོ། །ཉེ་བར་ལོངས་སྤྱོད་ཡོངས་སུ་ལོངས་སྤྱད་པས་བྱ་བ་ཡང་རབ་ཏུ་བྱེད་དོ། །དེ་ཡང་གལ་ཏེ་སྔར་བརྗོད་པའི་

Vol. 94 · folio 104a

ལས་ཁོ་ནས་དེ་འབངས་སུ་འགྱུར་རོ། །དེ་ནས་རྒྱལ་པོ་དང་བློན་པོ་ལ་སོགས་པའི་སེམས་ཅན་རྣམས་དབང་དུ་བྱེད་པའི་སྒྲུབ་པར་འགྱུར་ཏེ། སྟོན་དང་། སོ་ག་དང་། དབྱར་གྱི་དུས་རྣམས་སུ་ངེས་པར་སྒྲུབ་པར་བྱེད་དོ། །རྒྱལ་པོའི་བློན་པོ་དབང་དུ་བྱེད་

པ་ལ་ནི་དེའི་རྐང་པའི་རྗེས་ཀྱི་རྡུལ་དང་། སྐེ་ཚེ་མཉམ་པར་བྱས་པ་ཟླ་བ་གཅིག་ཏུ་ཇི་ལྟར་འདོད་པའི་དུས་ཚོད་ལ་དུས་གཅིག་ཏུ་སྟོང་ཕྲག་བརྒྱད་སྦྱིན་སྲེག་བྱ་སྟེ་དབང་དུ་འགྱུར་རོ། །ཆོ་ག་གཞན་ནི་སྣ་མའི་མེ་ཏོག་དང་ཏིལ་བསྲེས་པས་སྔར་བཞིན་དབང་དུ་འགྱུར་རོ། །ཆོ་ག་

གཞན་ནི་དུར་བྷའི་མྱུ་གུ་དང་ལྷན་ཅིག་པའི་སྐེ་ཚེས་ཟླ་བ་གཅིག་ཏུ་སྦྱིན་སྲེག་སྟོང་ཕྲག་བརྒྱད་བྱ་སྟེ་སྔར་བཞིན་དུ་དབང་དུ་འགྱུར་རོ། །ཆོ་ག་གཞན་ནི་མ་པའི་ས་བོན་རྣམས་པ་ཤཱི་དང་། ཀ་ཀྟུ་ཀཱ་མ་དང་། ཕྱེ་མ་རྣམས་ལན་ཚཱ་དང་བསྲེས་པས་ཟླ་བ་གཅིག་ཏུ་ཇི་ལྟར་འདོད་པའི་ཐུན་མཚམས་

ལ་སྦྱིན་སྲེག་སྟོང་ཕྲག་བརྒྱད་བྱ་སྟེ་དབང་དུ་འགྱུར་རོ། །ཆོ་ག་གཞན་ནི་ཏིལ་དང་ཨརྫུ་ནའི་མེ་ཏོག་བསྲེས་པ་ལ་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་ཀྱིས་དབང་དུ་འགྱུར་རོ། །ཆོ་ག་གཞན་ནིམ་པའི་ས་བོན་རྣམས་དང་ཚ་བའི་ཏིལ་མར་གྱིས་བཏགས་པའི་སྦྱིན་སྲེག་

སྟོང་ཕྲག་བརྒྱད་བྱ་སྟེ་སྔར་བཞིན་དུ་དབང་དུ་འགྱུར་རོ། །རྒྱལ་པོའི་མདུན་ན་འདོན་དབང་དུ་བྱེད་པར་འདོད་པས་སྐེ་ཚེ་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་ཟླ་བ་གཅིག་ལ་ཇི་ལྟར་འདོད་པའི་ཐུན་མཚམས་ནས་བརྩམས་ནས་དུས་གཅིག་ཏུ་སྦྱིན་སྲེག་

སྟོང་ཕྲག་བརྒྱད་བྱས་ན་དབང་དུ་འགྱུར་རོ། །ཆོ་ག་གཞན་ནི་སྲན་མ་ཙ་མེད་ཀ་ལ་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱ་སྟེ་སྔར་བཞིན་དུ་དབང་དུ་འགྱུར་རོ། །ཆོ་ག་གཞན་ནི་ཨིརྒུ་དའི་ཏིལ་མར་གྱིས་སྦྱིན་སྲེག་བྱ་སྟེ་སྔར་བཞིན་དུ་དབང་དུ་འགྱུར་རོ། །དེ་རྣམས་

ཐམས་ཅད་ལ་དོང་ཀའི་ཡམ་ཤིང་གིས་མེ་སྦར་ལ་སྦྱིན་སྲེག་གམ། པ་ལཱ་ཤའི་མེ་ལ་ཡང་རུང་ངོ་། །བྲམ་ཟེ་དབང་དུ་བྱེད་པ་ལ་འོ་མ་ཅན་གྱི་ཤིང་གི་མེ་ལ་སྦྱིན་སྲེག་ཟླ་བ་གཅིག་ཏུ་ཇི་ལྟར་འདོད་པའི་ཐུན་མཚམས་ནས་བརྩམས་ནས་དུས་གཅིག་ལ་སྦྱིན་སྲེག་སྟོང་ཕྲག་བརྒྱད་བྱས་ན་

Vol. 94 · folio 104b

དབང་དུ་འགྱུར་རོ། །རྒྱལ་རིགས་དབང་དུ་བྱེད་པ་ལ་ཚ་བའི་ཏིལ་མར་གྱིས་བཏགས་པའི་ཡུངས་ཀར་སེང་ལྡེང་གི་ཤིང་གི་མེ་ལ་སྦྱིན་སྲེག་བྱས་ན། སྔར་བཞིན་དབང་དུ་འགྱུར་རོ། །རྗེ་རིགས་དབང་དུ་བྱེད་པ་ལ་འབྲས་སཱ་ལུའི་ཟན་ཞོ་དང་ལྷན་ཅིག་པ་ཨ་མྲའི་ཤིང་གི་མེ་ལ་སྦྱིན་

སྲེག་བྱ་སྟེ། སྔར་བཞིན་དབང་དུ་འགྱུར་རོ། །དམན་པ་ཐམས་ཅད་དབང་དུ་བྱེད་པ་ལ་ཚེར་མ་ཅན་གྱི་ཡམ་ཤིང་གིས་མེ་སྦར་ནས་སྐེ་ཚེ་དང་། དུག་དང་། ནིམ་པ་ལྷན་ཅིག་པའི་སྦྱིན་སྲེག་ཟླ་བ་གཅིག་ཏུ་ཇི་ལྟར་འདོད་པའི་ཐུན་མཚམས་ལ་བརྩམས་ནས་དུས་གཅིག་ལ་སྟོང་ཕྲག་བརྒྱད་བྱས་

ན་དེ་དབང་དུ་འགྱུར་རོ། །གཞན་ཡང་འདིར་འབྱུང་བ་ནི་ཐུན་མོང་དུ་མཆོག་དང་། །འབྲིང་དང་ཐ་མ་སྒྲུབ་པའི་ལས་ནི་ཡུངས་ཀར་དཀར་པོ་སྟོང་ཕྲག་བརྒྱད་གང་བསྟན་བྱའི་སྦྱིན་སྲེག་བྱེད་པ་དེ་དབང་དུ་འགྱུར་རོ། །བུད་མེད་དབང་དུ་བྱེད་པ་ལ་ཏིལ་གྱི་སྦྱིན་སྲེག་སྟོང་ཕྲག་བརྒྱད་

བྱ་སྟེ་དབང་དུ་འགྱུར་རོ། །ནག་པོའི་བཅུ་བཞི་པ་ལ་ཡུངས་ཀར་དཀར་པོ་ལ་མར་དང་། ཞོ་དང་སྦྲང་རྩིས་བཏགས་པའི་སྲེག་བླུགས་བདུན་སྦྱིན་སྲེག་བྱའོ། །གང་བསྟན་བྱ་ཉི་མ་གསུམ་ལ་དབང་དུ་འགྱུར་རོ། །གཞོན་ནུ་མ་དབང་དུ་བྱེད་པར་འདོད་པས་རམ་ག་

ནའི་མེ་ཏོག་སྟོང་ཕྲག་བརྒྱད་ཀྱིས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱས་ན་དབང་དུ་འགྱུར་རོ། །སྤྲ་ཚིལ་ལས་བྱུང་བའི་གཟུགས་བརྙན་བྱས་ནས་བདག་ཉིད་ཀྱི་ལག་པར་བཞག་སྟེ་སྟོང་ཕྲག་བརྒྱད་བཟླས་ན་གང་བསྟན་པ་དེ་དབང་དུ་འགྱུར་རོ། །རས་

རིས་ཀྱིས་སྤྱན་སྔར་མེ་ཏོག་དཀར་པོ་བརྒྱད་བརྒྱ་དབུལ་བར་བྱ་སྟེ། གང་འདོད་པ་དེ་དབང་དུ་འགྱུར་རོ། །དུང་དང་གླ་རྩི་དང་། ཤུ་དག་དང་གི་ཝང་དང་། རྒྱ་སྤོས་རྣམས་གཅིག་ཏུ་བྱས་ནས་བཏགས་པར་བྱའོ། །སྟོང་ཕྲག་བརྒྱད་མངོན་པར་བསྔགས་པར་བྱས་ནས་

འདི་བཏུངས་པས་སམ། གང་ལ་བྱིན་པ་དེ་དབང་དུ་འགྱུར་རོ། །བྲམ་ཟེ་མོ་དབང་དུ་བྱེད་པ་ལ་རས་རིས་ཀྱི་སྤྱན་སྔར་བིལ་བའི་མྱུ་གུ་སྟོང་ཕྲག་བརྒྱད་སྦྱིན་སྲེག་བྱས་ན་དབང་དུ་འགྱུར་རོ། །དུར་ཁྲོད་དུ་ལན་བདུན་བཟླས་པས་བུད་མེད་གང་ལ་སྐྱེས་བུ་གང་གིས་མདུན་དུ་

Vol. 94 · folio 105a

འདུག་ནས་སྟོང་ཕྲག་བརྒྱད་བཟླས་པ་བྱས་པས་དབང་དུ་འགྱུར་རོ། །སོར་མོ་གཅིག་པའི་ཤིང་བླངས་ནས་སྟོང་ཕྲག་བརྒྱད་མངོན་པར་བསྔགས་ཏེ་གང་དང་གང་ཀུན་ཏུ་འགུགས་པར་བྱེད་པ་དེ་དབང་དུ་འགྱུར་རོ། །མེ་ཏོག་བརྒྱ་པ་སྟོང་ཕྲག་བརྒྱད་

འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་དབུལ་བར་བྱའོ། །འདི་ལ་མེ་ཏོག་གཅིག་བླངས་ནས་བུད་མེད་ལ་བལྟས་ནས་བསྐོར་བར་བྱ་སྟེ་འོང་བར་བྱེད་ཅིང་དབང་དུ་འགྱུར་རོ། །འོ་མ་དང་ནས་ཟན་ཟ་ཞིང་ཕྱོགས་གཅིག་ཏུ་བཟླས་པ་བྱའོ། །དེ་ནས་གྲོག་

མཁར་གྱི་ས་ལས་བྱུང་བའི་ནོར་རྒྱས་ཀྱི་བུ་བྱས་ནས་དེ་ལ་ཉེ་བར་འདུག་སྟེ། ཇི་སྲིད་གཡོ་བར་འགྱུར་བ་དེ་སྲིད་དུ་བཟླས་པར་བྱའོ། །དེ་ལྟ་བུས་གྲུབ་པར་འགྱུར་རོ། །ནོར་རྒྱས་ཀྱི་བུ་བདག་ཉིད་མ་ཤ་བཅུ་གཉིས་ཀྱི་བཟའ་བ་སྦྱིན་པར་བྱེད་དོ། །འདས་པ་དང་མ་འོངས་

པ་དང་། ད་ལྟར་བྱུང་བའི་དོན་སྟོན་པར་བྱེད་དོ། །འོ་མ་དང་ནས་ཟན་ཟ་ཞིང་སྐུ་གཟུགས་ཀྱི་མདུན་དུ་སྟོང་ཕྲག་བརྒྱད་བཟླས་པས་ལོངས་སྤྱོད་སོ་སོར་རྙེད་དོ། །ཟླ་བ་གཅིག་ཏུ་བསོད་སྙོམས་བཟའ་ཞིང་དཀར་པོའི་བཅུ་གཅིག་ལ་མཚན་མོ་གཅིག་ཏུ་སྨྱུང་བར་གནས་

པས་སྐུ་གཟུགས་ཀྱི་སྤྱན་སྔར་མཆོད་པ་ཆེན་པོ་བྱས་ནས་འཕགས་པ་སྤྱན་རས་གཟིགས་དབང་ཕྱུག་དང་། སྐུ་གཟུགས་ཀྱི་ཞབས་དག་ལ་འཇུས་ནས་ཇི་སྲིད་དུ་སྐུ་གཟུགས་གཡོ་བར་གྱུར་པ་དེ་སྲིད་དུ་བཟླས་པར་བྱའོ། །གཡོས་པས་གང་མཐོང་བར་འགྱུར་རོ། །

དངོས་གྲུབ་ཐམས་ཅད་ཀྱི་རྒྱལ་པོར་འགྱུར་རོ། །ཡིད་ཀྱིས་གང་སྐྱེད་པར་བྱེད་དུ་འཇུག་གོ། །ལོ་སྟོང་ཕྲག་ལྔར་འཚོ་བར་འགྱུར་རོ། །གང་གཱར་ཞུགས་ཏེ་འབུམ་ཕྲག་གཅིག་བཟླས་པར་བྱའོ། །ཕྱི་ནས་དེ་སྲིད་དུ་སྐུ་གཟུགས་ཀྱི་སྤྱན་སྔར་བྱེ་མ་ལས་བྱུང་བའི་

མཆོད་རྟེན་བྱས་ནས་སྦྲང་རྩི་དང་འོ་མ་གཅིག་ཏུ་བྱས་ཏེ་སྦྱིན་སྲེག་བྱའོ། །ཀླུ་ཐམས་ཅད་འོང་བར་འགྱུར་རོ། །གང་སྨྲས་པ་དེ་ཐམས་ཅད་བྱེད་དོ། །རིའི་རྩེ་མོར་འཛེགས་ཏེ་རས་རིས་རབ་ཏུ་བཞུགས་ནས་ཏིལ་མར་གྱིས་བཏགས་པའི་ཙནྡན་གྱི་ཞོགས་མའི་སྦྱིན་སྲེག་བྱ་

Vol. 94 · folio 105b

སྟེ། གནོད་སྦྱིན་འོང་བར་འགྱུར་རོ། །གང་སྨྲས་པ་དེ་ཐམས་ཅད་བྱེད་དོ། །ནགས་སུ་རས་རིས་རབ་ཏུ་བཞུགས་ནས་སྦྲང་རྩི་དང་པི་པི་ལིང་གཅིག་ཏུ་བྱས་པའི་སྦྱིན་སྲེག་སྟོང་ཕྲག་བརྒྱད་བྱ་སྟེ་རིག་པ་འཛིན་པ་ཐམས་ཅད་འོང་བར་བྱེད་དོ། །བཀའ་བསྒོ་བ་ཐམས་ཅད་

བྱེད་པར་འགྱུར་རོ། །ཤིང་གཅིག་ཏུ་རྟེན་ཅིང་འབྲེལ་པར་འབྱུང་བའི་སྙིང་པོ་ཅན་གྱི་མཆོད་རྟེན་རབ་ཏུ་བཞུགས་ནས་འབུམ་ཕྲག་བཟླས་པར་བྱའོ། །འབུམ་ཡོངས་སུ་རྫོགས་པ་ན་གསོ་སྦྱོང་ཅན་གྱིས་གཟུགས་ཀྱི་རྣམ་པས་བྱང་ཆུབ་ཤིང་ལས་བྱུང་བ་རྩེ་གསུམ་མཚན་

ཉིད་དང་ལྡན་པ་བྱེད་དུ་བཅུག་ནས་སྟོང་ཕྲག་རྫོགས་པའི་སྦྱིན་སྲེག་བྱ་སྟེ། ཟླ་བ་ཉ་ལ་དྲི་བཟང་པོས་རབ་ཏུ་བྱུགས་ནས་རས་རིས་ལ་ཇི་ལྟར་འབྱོར་པའི་མཆོད་པ་བྱས་ནས་ལག་པ་གཡས་པས་བླངས་ཏེ། མཚན་ཐོག་ཐག་ཏུ་བསྒྲུབ་པར་བྱ་སྟེ། ཇི་སྲིད་འབར་

གྱི་བར་དུའོ། །འབར་བས་འབྱུང་པོའི་བདག་པོ་གཉིས་པ། གདུལ་དཀའ་འདུལ་བ་པོ་སེམས་ཅན་ཐམས་ཅད་ཀྱིས་མི་ཚུགས་པའི་ལྷ་ཆེན་པོར་འགྱུར་རོ། །རྒྱ་མཚོར་ཞུགས་ཏེ་འབུམ་བཟླས་སོ། །ཀླུའི་རྒྱལ་པོ་རྒྱ་མཚོ་ལ་སོགས་པ་གང་འདོད་པའི་ཀླུ་དེ་མཐོང་བར་

བྱེད་དོ། །ནོར་བུ་རིན་པོ་ཆེ་ཡང་འདི་ལ་རབ་ཏུ་སྩོལ་ལོ། །དེ་བླངས་པས་རིག་པ་འཛིན་པར་འགྱུར་ཏེ། ཀླུའི་རིག་པ་འཛིན་པ་ཐམས་ཅད་ཀྱི་རྒྱལ་པོར་འགྱུར་རོ། །འོ་མ་དང་ནས་ཟན་ཟ་ཞིང་འབུམ་ཕྲག་བདུན་བཟླས་པར་བྱའོ། །དེ་ནས་གསོ་སྦྱོང་ཅན་གྱིས་ལས་

བྱེད་པས་ཟངས་ཀྱི་སྣོད་བྱེད་དུ་བཅུག་ནས་ཆོ་འཕྲུལ་གྱི་ཕྱོགས་ཀྱི་ཟླ་བ་ཉ་ལ་འབྲུ་དང་སྨན་ཐམས་ཅད་ཀྱིས་ཡོངས་སུ་བཀང་བར་བྱས་ནས་རས་རིས་ཀྱི་སྤྱན་སྔར་སོ་སོར་བཞག་སྟེ། ཇི་སྲིད་འབར་བ་དེ་སྲིད་དུ་བཟླས་པར་བྱའོ། །དེ་དང་ལག་པ་བཅུག་ནས་གང་འདོད་པ་

དེ་དང་དེ་འབྱུང་བར་འགྱུར་རོ། །སྣོད་བཟང་པོའི་སྒྲུབ་ཐབས་སོ། །རྒྱ་མཚོར་འགྲོ་བའི་ཆུ་ཀླུང་དུ་ཞུགས་ནས་འབུམ་བཟླས་པར་བྱའོ། །ཕྱི་ནས་ཟླ་བ་ཉ་ལ་ནོར་བུའམ་ས་ལས་བྱུང་བའི་མཆོད་རྟེན་བྱས་ཏེ་དེ་ཉིད་དུ་རས་རིས་བྱེད་དུ་བཅུག་ནས་ཆོ་འཕྲུལ་གྱི་ཕྱོགས་ཀྱི་ཟླ་བ་

Vol. 94 · folio 106a

ཉ་ལ་འབྲུ་དང་སྨན་ཐམས་ཅད་ཀྱིས་ཡོངས་སུ་བཀང་བ་བྱས་ནས་རས་རིས་ཀྱི་སྤྱན་སྔར་སོ་སོར་བཞག་སྟེ་མཆོད་པ་ཆེན་པོ་བྱས་ནས་བཞག་པའི་ནོར་བུའམ། ས་ལས་བྱུང་བ་ལག་པ་གཡས་པས་བླངས་ཏེ་སྐྱིལ་མོ་ཀྲུང་གིས་ཉེ་བར་འདུག་ལ་ཇི་སྲིད་འབར་

བ་དེ་སྲིད་དུ་བཟླས་པར་བྱའོ། །ཡིད་བཞིན་གྱི་ནོར་བུ་འཆང་བའི་རིག་པ་འཛིན་པར་འགྱུར་རོ། །རིང་བསྲེལ་དང་བཅས་པའི་མཆོད་རྟེན་དུ་རས་རིས་རབ་ཏུ་བཞུགས་ནས་འབུམ་བཟླས་པར་བྱའོ། །ཆོ་འཕྲུལ་གྱི་ཕྱོགས་ཀྱི་ཟླ་བ་ཉ་ལ་མཆོད་པ་སྣ་ཚོགས་པ་བྱས་ནས་

མར་མེའི་ཕྲེང་བ་ཡང་རྒྱ་ཆེར་བྱས་ཏེ་ལག་པ་གཡས་པས་རྒྱལ་མཚན་གོས་དཀར་པོ་འཕྱང་བ་བཟུང་ནས་ཇི་སྲིད་འབར་བ་དེ་སྲིད་དུ་བཟླས་པར་བྱའོ། །རྒྱལ་མཚན་གྱི་རིག་པ་འཛིན་པར་འགྱུར་རོ། །ཐམས་ཅད་དུ་ཐོགས་པ་མེད་པར་འགྲོའོ། །ཆོ་འཕྲུལ་གྱི་ཕྱོགས་

ཀྱི་ཟླ་བ་ཉ་ལ་རས་རིས་ལ་མཆོད་པ་ཆེན་པོ་བྱས་ནས། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་ལ་དྲི་བཟང་པོའི་དྲི་ཡིས་སོ་སོར་བྱུགས་ནས་དྲི་ཞིམ་པོའི་མེ་ཏོག་གི་ཕྲེང་བ་དཀྲིས་ཏེ་ལག་པ་གཡོན་པས་བཟུང་ནས་སྐྱིལ་མོ་ཀྲུང་གིས་ཉེ་བར་འདུག་

སྟེ་ཇི་སྲིད་འབར་བ་དེ་སྲིད་དུ་བཟླས་པར་བྱའོ། །རིག་པ་འཛིན་པའི་རྒྱལ་པོར་འགྱུར་རོ། །གང་དུ་འདོད་པ་དེ་རུ་འགྲོ་བར་བྱེད་དོ། །བྱང་ཆུབ་སེམས་དཔའི་སྤྱད་པ་སྤྱོད་པའི་གཞོན་ནུ་མ་རབ་ཏུ་མཛེས་པ་ལེགས་པར་ཁྲུས་བྱས་པ་རྒྱན་གྱིས་བརྒྱན་པར་བྱས་ནས་རས་རིས་

ཀྱི་སྤྱན་སྔར་ཇི་ལྟར་འབྱོར་པའི་མཆོད་པ་བྱ་སྟེ། ལག་པ་གཡོན་པས་རབ་ཏུ་བཟུང་སྟེ་གཡས་པ་ཇི་སྲིད་དེ་དང་ཐབས་ཅིག་ཏུ་འབར་བར་གྱུར་པ་དེ་སྲིད་དུ་བཟླས་པར་བྱའོ། །ཇི་ལྟ་བ་བཞིན་དུ་ཐབས་ཅིག་ཏུ་རིག་པ་འཛིན་པར་འགྱུར་རོ། །མཚན་མ་གཅིག་པའི་སྟེང་

དུ་ལག་པ་བཞག་ནས་ཇི་སྲིད་འཁོར་རྣམས་མི་མཐོང་བ་དེ་སྲིད་དུ་བཟླས་པར་བྱའོ། །མ་མཐོང་བ་ན་སེམས་ཅན་ཐམས་ཅད་འོངས་ནས་གྲུབ་པ་གསུམ་པོ་ཐམས་ཅད་སྦྱིན་པར་བྱེད་དོ། །ཟླ་བ་གཟས་བཟུང་བའམ། ཉི་མ་གཟས་བཟུང་བ་ན་བ་བླ་བྱང་ཆུབ་ཤིང་གི་

Vol. 94 · folio 106b

འདབ་མའི་ནང་དུ་བཏུམས་པར་བྱས་ནས་དབང་ཕྱུག་ཆེན་པོའི་ལྷ་ཁང་དུ་རིང་བསྲེལ་དང་བཅས་པའི་མཆོད་རྟེན་དུ་ཇི་སྲིད་དུ་བ་འཐུལ་བ་དེ་སྲིད་དུ་བཟླས་པར་བྱའོ། །དེས་ཐིག་ལེ་བྱས་ནས་མི་སྣང་བར་འགྱུར་རོ། །འོ་མ་དང་ནས་ཟན་བཟའ་ཞིང་རྒྱ་མཚོའི་འགྲམ་

དུའམ། ཤིང་དྲུང་དུ་ཐུན་གསུམ་དུ་སྟོང་ཕྲག་བཟླས་པར་བྱའོ། །མཚན་མོ་བདུན་དུ་རྒྱ་མཚོར་གནས་པའི་ཏིལ་རྣམས་མཐོང་བར་བྱེད་དོ། །ཇི་ལྟར་འདོད་པ་བླང་བར་བྱའོ། །མོན་སྲན་སྡེའུ་ཟ་ཞིང་རི་བོ་ལ་འཛེགས་ནས་སྟོང་ཕྲག་བརྒྱད་བཟླས་པར་བྱའོ། །མཚན་མོ་

ཉི་ཤུར་རི་བོ་ལ་གནས་པའི་གསེར་དང་ནོར་བུ་རིན་པོ་ཆེ་སྟོན་ཅིང་སྨྲ་བར་བྱེད་དོ། །ཇི་ལྟར་འདོད་པ་བླང་བར་བྱའོ། །རྒྱ་མཚོར་འགྲ་བའི་ངོགས་སམ་ཤིང་གི་འགྲམ་དུ་ཟླ་བ་གཅིག་ཏུ་ཉིན་མཚན་དུ་བཟླས་པར་བྱའོ། །ཐམས་ཅད་ཆུ་ཀླུང་གི་འགྲམ་དུ་མཐོང་བར་བྱེད་དོ། །

ཇི་ལྟར་འདོད་པ་བླང་བར་བྱའོ། །སྐྱེས་པ་དང་བུད་མེད་དབང་དུ་བྱེད་པ་ལ་སོལ་བས་ས་ལ་གཟུགས་བརྙན་བྲིས་ཏེ། དེའི་སྟེང་དུ་ཉེ་བར་འདུག་ནས་སྟོང་ཕྲག་བརྒྱད་ཉིན་ཞག་གསུམ་ཐུན་གསུམ་དུ་བཟླས་པར་བྱའོ། །དབང་དུ་འགྱུར་རོ། །རྒྱལ་པོའམ་རྒྱལ་པོའི་གོས་

འདོད་པས་མེ་ཏོག་དཀར་པོ་ཡོངས་སུ་མཉེས་པ་རྣམས་ལ་ལན་ཅིག་ཡོངས་སུ་བཟླས་པའི་ཆུར་གཞུག་པར་བྱའོ། །མཚན་མོ་བདུན་ལ་གོས་རྣམས་རྙེད་དོ། །བའི་མར་ལ་སྟོང་ཕྲག་བརྒྱད་བཟླས་པ་ཙམ་གྱིས་སྐལ་བ་བཟང་པོར་འགྱུར་རོ། །བཟླས་པས་བརྟན་པ་

དང་གཡོ་བ་རྣམས་ཁྱད་པར་དུ་འཕོ་བར་བྱེད་དོ། །ལྕགས་ལས་བྱུང་བའི་མཛུབ་གང་ཙམ་གྱི་རལ་གྲི་བྲངས་ནས་རིང་བསྲེལ་དང་བཅས་པའི་མཆོད་རྟེན་དུ་རས་རིས་རབ་ཏུ་བཞུགས་ནས་མཆོད་པ་རྒྱ་ཆེན་པོ་བྱ་སྟེ། ཨ་ཤྭཏྠའི་འདབ་མས་གཡས་ནས་བསྐོར་ཏེ་རལ་གྲི་

རབ་ཏུ་བཞག་ནས་ཇི་སྲིད་འབར་བ་དེ་སྲིད་དུ་བཟླས་པར་བྱའོ། །དེ་བླངས་པས་འཁོར་དང་བཅས་པ་འཕུར་བར་འགྱུར་ཏེ་རིག་པ་འཛིན་པ་སྟོང་གིས་ཡོངས་སུ་བསྐོར་བ་རིག་པ་འཛིན་པ་རྣམས་ཐམས་ཅད་ཀྱིས་ཤེས་ནས་བར་གྱི་བསྐལ་བར་གནས་པར་འགྱུར་རོ། །འོ་མ་དང་

Vol. 94 · folio 107a

ནས་ཟན་བཟའ་ཞིང་འབུམ་ཕྲག་བདུན་བཟླས་པར་བྱའོ། །སྔོན་སྤྱད་པ་བྱས་པས་ནག་པོའི་བརྒྱད་པའམ། ནག་པོའི་བཅུ་བཞི་པ་ལ་རས་རིས་ལ་མཆོད་པ་རྒྱ་ཆེན་པོ་བྱས་ནས་དགེ་འདུན་གྱི་བསྟན་པ་ཅན་ནམ་སློང་མོ་ཟོས་ནས་དཔའ་བོའི་རིན་གྱིས་ཉོས་པའི་ལྡོང་

རོས་བླངས་ཏེ་དེས་ཇི་སྐད་གསུངས་པ་བཞིན་དུ་ས་ལ་པདྨ་འདབ་མ་བརྒྱ་པ་བྲིས་ནས་པདྨའི་འདབ་མ་ལ་ཉེ་བར་འདུག་སྟེ་ཉི་མ་སོ་སོར་ཇི་སྲིད་དུ་ས་ཟོས་ནས་པདྨ་གྱེན་དུ་འགྲོ་བ་དེ་སྲིད་དུ་བཟླས་པར་བྱའོ། །པདྨའི་འདབ་མ་ལ་ཉེ་བར་འདུག་པའི་རིག་པ་འཛིན་པ་ཉི་ཤུ་འབྱུང་བར་འགྱུར་

རོ། །ལྷའི་གཞལ་མེད་ཁང་ཡང་འབྱུང་ངོ་། །དེ་ནས་དེ་འཁོར་དང་བཅས་པ་དེ་གཞལ་མེད་ཁང་ལ་འཛེགས་ནས་འབུར་བར་བྱེད་དོ། །དེ་ཡང་པདྨ་རིན་པོ་ཆེ་དུ་མས་བརྒྱན་པའི་ལྷའི་གཞལ་མེད་ཁང་དུ་འགྱུར་རོ། །བད་གྱི་བསྐལ་པར་འཚོ་བར་བྱེད་དོ། །བདེ་བ་ཅན་དུ་

ཡང་འགྲོ་ཞིང་སླར་ཡང་འོང་བར་བྱེད་དོ། །ལུས་ཐ་དད་པ་དག་ཏུ་སྐྱེ་བ་སོ་སོར་རྙེད་དོ། །སྟོང་ཕྲག་བརྒྱད་མངོན་པར་བསྔགས་པའི་ཆུས་ཤིང་སྐམ་པོ་ལ་གཏོར་ན་མེ་ཏོག་དང་འབྲས་བུ་ཕུན་སུམ་ཚོགས་པར་འགྱུར་རོ། །ཆུ་ཀླུང་བསྐམས་པར་ཞུགས་ནས། འབུམ་

བཟླས་པར་བྱ་སྟེ་ཆུ་སྐྱེའོ། །ཆུ་ཀླུང་རྒྱས་པར་འཛགས་པར་བཟླས་ན་ཐང་དུ་འགྱུར་རོ། །རྒྱལ་པོ་འམ་རྒྱལ་པོའི་བློན་པོ་དབང་དུ་བྱེད་པར་འདོད་ན་རས་རིས་ཀྱི་སྤྱན་སྔར་ཇི་ལྟར་རྙེད་པའི་མེ་ཏོག་རྣམས་ནག་པོའི་བརྒྱད་པ་ལ་སྟོང་ཕྲག་བརྒྱད་དབུལ་བར་བྱའོ། །ལན་

ཚྭའི་སྲེག་བླུགས་ཀྱང་སྟོང་ཕྲག་བརྒྱད་སྦྱིན་སྲེག་བྱའོ། །ངེས་པར་རྒྱལ་པོ་དབང་དུ་འགྱུར་རོ། །དེ་ཉིད་ཀྱིས་བརྒྱད་པ་ནས་བརྩམས་ཏེ་ཇི་སྲིད་བཅུ་གཅིག་པའི་བར་དུ་གི་ཝང་ལ་ཐུན་གསུམ་དུ་བརྒྱད་བརྒྱར་བཟླས་པ་དེས་ཐིག་ལེ་བྱས་ན་གང་འདོད་པ་དེ་དབང་དུ་

འགྱུར་རོ། །ཁྱེའུ་འམ་བུ་མོ་དབང་དུ་བྱེད་པར་འདོད་ན་གཟུགས་བརྙན་གྱི་སྤྱན་སྔར་ཡུངས་ཀར་སྟོང་ཕྲག་བརྒྱད་སྦྱིན་སྲེག་བྱའོ། །གནས་ཀྱི་ཐལ་བ་བླངས་ཏེ་གཟུགས་བརྙན་བྱས་ན་གང་གི་མིང་ནས་སྨོས་པ་དེ་དབང་དུ་འགྱུར་རོ། །གཙང་མའི་དོན་དུ་བའི་མར་བླངས་ཏེ་ཟླ་བ་

Vol. 94 · folio 107b

གཟས་བཟུང་བའམ། ཉི་མ་གཟས་བཟུང་བའི་དུས་སུ་ཟངས་ཀྱི་སྣོད་དུ་བཅུག་ནས་ཇི་སྲིད་དངོས་གྲུབ་རྣམ་གསུམ་དུ་གྱུར་པ་དེ་སྲིད་དུ་བཟླས་པར་བྱའོ། །འགྲོ་བཞིན་པ་ལ་ཐོས་པ་འཛིན་པར་འགྱུར་རོ། །དུ་བ་འཐུལ་བཞིན་པ་ལ་བཅུད་ཀྱིས་ལེན་ནོ། །འབར་བས་མི་སྣང་

བ་དང་། སྐྱེ་བ་དྲན་པར་འགྱུར། ཨརྒའི་མེ་ཏོག་འབུམ་གྱིས་སྦྱིན་སྲེག་བྱས་ན་དོང་ཙེ་འབུམ་སྦྱིན་པར་བྱེད་དོ། །སྐུ་གཟུགས་ཀྱི་སྤྱན་སྔར་མེ་ཏོག་སྟོང་ཕྲག་བརྒྱད་དབུལ་བར་བྱ་སྟེ་དོང་ཙེ་བརྒྱད་རྙེད་དོ། །གཟུགས་བརྙན་གྱི་སྤྱན་སྔར་འབྲས་སཱ་ལུ་དང་། འབྲས་ཐུག་པོ་ཆེ་ལ་

མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱས་ན་དོང་ཙེ་ལྔ་བརྒྱ་རྙེད་དོ། །སྔོན་སྤྱད་པ་བྱས་པས་རས་རིས་ཀྱི་སྤྱན་སྔར་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱའོ། །དོང་ཙེ་སུམ་བརྒྱ་རྙེད་དོ། །གཟུགས་བརྙན་སྦྱིན་སྲེག་སྟོང་ཕྲག་བརྒྱད་བྱའོ། །

དོང་ཙེ་བརྒྱ་ལྷག་པར་རྙེད་དོ། །རིགས་ཀྱི་བདག་པོ་དང་རིགས་ཀྱི་བདག་མོ་དབང་དུ་བྱེད་པར་འདོད་པས། གཟུགས་བརྙན་གྱི་སྤྱན་སྔར་ཨརྒའི་ཡམ་ཤིང་གིས་མཚན་མོ་བདུན་དུ་ཐུན་གསུམ་དུ་སྦྱིན་སྲེག་སྟོང་ཕྲག་བརྒྱད་བྱའོ། །རིགས་པའི་བདག་པོ་དབང་དུ་འགྱུར་རོ། །རིགས་

པའི་བདག་པོ་ཉིད་དུ་བྱེད་པར་འདོད་པས་སྐུ་གཟུགས་ཀྱི་སྤྱན་སྔར་མཚན་མོ་བདུན་དུ་ཐུན་གསུམ་དུ་དུར་བྷའི་སྦྱིན་སྲེག་སྟོང་ཕྲག་བརྒྱད་བྱ་སྟེ། རིགས་ཀྱི་བདག་པོ་ཉིད་དུ་འགྱུར་རོ། །ཇི་སྲིད་འཚོའི་བར་དུ་འཕགས་པའི་དགེ་འདུན་དབང་དུ་བྱེད་པར་འདོད་པས་རས་རིས་ཀྱི་སྤྱན་སྔར་

ཨརྒའི་མེ་ཏོག་སྟོང་ཕྲག་བརྒྱད་དབུལ་བར་བྱའོ། མཚན་མོ་བདུན་དུ་འདོད་ཅིང་དོན་དུ་གཉེར་བའི་དོན་གང་ཡིན་པ་སྨྲ་བར་བྱའོ། །རྟག་ཏུ་བཟླས་པས་ནོར་རྣམས་རྙེད་དོ། །རས་རིས་ཀྱི་སྤྱན་སྔར་གུ་གུལ་གྱི་རིལ་བུའི་སྦྱིན་སྲེག་སྟོང་ཕྲག་བརྒྱད་བྱའོ། །གསེར་སྟོང་རྙེད་དོ། །

སྐུ་གཟུགས་ཀྱི་སྤྱན་སྔར་ཟླ་བ་གཅིག་ཏུ་ཀུན་དུ་རུའི་བདུག་པའི་སྦྱིན་སྲེག་སྟོང་བྱའོ། །གཏེར་སོ་སོར་རྙེད་དོ། །སྐུ་གཟུགས་ཀྱི་སྤྱན་སྔར་ཨརྒའི་ཤིང་གི་ཡམ་ཤིང་ཞོ་དང་སྦྲང་རྩི་དང་། མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱའོ། །དོང་ཙེ་སྟོང་རྙེད་དོ། །དགྲ་

Vol. 94 · folio 108a

བོ་དབང་དུ་བྱེད་པར་འདོད་པས་གསོ་སྦྱོང་ཅན་གྱིས་ཐུན་གསུམ་དུ་གཟུགས་བརྙན་གྱི་སྤྱན་སྔར་པཱ་ཤཱའི་མེ་ལ་སྐེ་ཚེའི་སྲེག་བླུགས་སྟོང་ཕྲག་བརྒྱད་བྱའོ། །དགྲ་བོ་དབང་དུ་འགྱུར་རོ། །ཟླ་བ་གཅིག་གི་དུས་ལ་རྒྱ་སྐྱེགས་ཀྱིས་སྦྱིན་སྲེག་སྟོང་ཕྲག་བརྒྱད་བྱའོ། །

སྐྱེ་བོ་ཐམས་ཅད་དགའ་བར་འགྱུར་རོ། །འབྲས་སཱ་ལུ་དང་། ཐུག་པོ་ཆེའི་སྦྱིན་སྲེག་སྟོང་ཕྲག་བརྒྱད་བྱ་སྟེ་ཐུན་གསུམ་དུ་ཀཱ་ར་ཥཱ་པ་ཎ་བརྒྱ་རྙེད་དོ། །འོ་མ་དང་ནས་ཟན་བཟའ་ཞིང་འབུམ་བཟླས་པར་བྱའོ། །སྔོན་སྤྱད་པ་བྱས་པས་ནག་པོའི་བརྒྱད་པའམ་ནག་པོའི་བཅུ་

གཅིག་པ་ལ་སྐྱེས་བུའི་རོ་མ་ཉམས་པ་བླངས་ནས་བཀྲུས་ཏེ་རྒྱན་གྱིས་བརྒྱན་པ་བག་མར་བླངས་པའི་འདོད་མའི་གཟུགས་ཀྱི་ཆ་བྱད་འཛིན་པ་བྱས་ནས་དྲི་དང་མེ་ཏོག་དང་བདུག་པ་རྣམས་ཀྱིས་མངོན་པར་མཆོད་པ་དེ་རྐང་པ་གཡོན་པས་བྲང་ཁར་ཡང་དག་པར་མནན་ནས་སྤྱི་བོར་ཡང་

དང་ཡང་དུ་རིག་པ་བཟླས་ཏེ་ཐལ་ལྕག་གིས་བསྣུན་པར་བྱས་ཏེ་ལངས་པ་དེ་སྲིད་དུའོ། །ལངས་ནས་འདས་པ་དང་མ་འོངས་པ་དང་ད་ལྟར་བྱུང་བ་སྟོན་པར་བྱེད་དོ། །དེ་ནས་རྒྱལ་གྱི་ལྕགས་ལས་བྱུང་བའི་རལ་གྲིས་བསྣུན་པར་བྱའོ། །དངུལ་དང་གསེར་གྱི་རང་བཞིན་དུ་

འགྱུར་རོ། །དེ་ནས་མི་འདོད་དོ་ཞེས་བརྗོད་པར་བྱའོ། །འདོད་པ་བྱིན་ཅིག་ཅེས་སོ། །དེ་ནས་ཡིད་བཞིན་གྱི་ནོར་བུ་སྐྱུག་པར་བྱེད་དོ། །དེ་བླངས་ནས་ཡིད་བཞིན་གྱི་ནོར་བུའི་རིག་པ་འཛིན་པར་འགྱུར་ཏེ། ཡིད་ལྟར་མགྱོགས་པའི་བར་གྱི་བསྐལ་པའི་བར་དུ་གནས་སོ། །

དཀར་པོའི་ཚེས་གཅིག་ནས་བརྩམས་ནས་ཉིན་མཚན་དུ་སྨྱུང་བར་གནས་པས་རྒྱ་མཚོར་འགྲོ་བའི་ཆུ་བོར་ཞུགས་ནས་ཟླ་བ་ཙམ་མམ། མཱ་ཥའི་ཚད་ཀྱི་སྣ་མའི་མེ་ཏོག་འབུམ་རབ་ཏུ་འབབ་པར་བྱ་སྟེ། ཡུལ་གྲུ་བཅུ་རྙེད་དོ། །དཀར་པོའི་ཚེས་གཅིག་ནས་བརྩམས་ནས་རྒྱ་མཚོར་

འགྲོ་བའི་ཆུ་ཀླུང་དུ་པདྨ་འབུམ་དབུལ་བར་བྱ་སྟེ་གཏེར་སྦྲག་མ་རྙེད་དོ། །སྔོན་སྤྱད་པ་བྱས་པ་དེ་ཉིད་ཆུ་ཀླུང་དུ་ཞུགས་ནས་སྣ་མའི་མེ་ཏོག་འབུམ་དབུལ་བར་བྱའོ། །མཐར་ཏིལ་ནག་པོའི་སྦྱིན་སྲེག་འབུམ་བྱའོ། །ཡུལ་གྲུར་བ་དང་བཅས་པ་བཅུ་རྙེད་དོ། །མྱ་ངན་མེད་པའི་ཤིང་ལ་སྲན་

Vol. 94 · folio 108b

མ་ཙམ་དཀའི་ཚད་ཙམ་གྱི་རིལ་བུ་བྱས་ནས་སྐུ་གཟུགས་ཀྱི་སྤྱན་སྔར་ཞོ་དང་སྦྲང་རྩི་དང་མར་གྱིས་བཏགས་པ་འབུམ་སྦྱིན་སྲེག་བྱས་ན་གང་ཅུང་ཟད་ཚོལ་བ་དེ་རྙེད་དོ། །ཨ་པཱ་མརྒའི་ཡམ་ཤིང་ལ་ཆོ་ག་འདི་ཁོ་ནས་གསེར་སྟོང་རྙེད་དོ། །མྱ་ངན་མེད་པ་དང་། ཌེ་ཌེ་ཀ་བསྲེས་ལ་ཨ་པཱ་

མརྒའི་དང་། ཏན་ཏུ་ལ་གསུམ་གྱིས་བཏགས་པའི་སྦྱིན་སྲེག་འབུམ་བྱས་ན་རྒྱལ་པོའི་བུ་མོ་དང་བཙུན་མོ་རྙེད་དོ། །རྒྱལ་པོ་རྣམས་བློན་པོ་དང་བཅས་པ་དབང་དུ་བྱེད་པར་འདོད་པས་སྐུ་གཟུགས་ཀྱི་མདུན་དུ་མྱ་ངན་མེད་པའི་ཡམ་ཤིང་གིས་མེ་རབ་ཏུ་སྦར་ནས་ཟླ་བ་གཅིག་ཏུ་མྱ་ངན་

མེད་པའི་མེ་ཏོག་རྣམས་ཁོ་ན་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱ་སྟེ་རང་གི་ཁྱིམ་དུ་གཏེར་མཐོང་པར་འགྱུར་རོ། །རྒྱ་མཚོར་འགྲོ་བའི་ཆུ་ཀླུང་དུ་རྐེད་པའི་ཚད་ཀྱིས་ཆུར་ཞུགས་ནས་མེ་ཏོག་བརྒྱ་པ་འབུམ་དབུལ་བར་བྱའོ། །དེ་ནས་མེ་ཏོག་

བརྒྱ་པ་ལ་སྟོང་ཕྲག་བརྒྱད་ཡོངས་སུ་བཟླས་ནས་གང་གིས་བསྣམས་པའམ་མཐོང་བར་བྱིན་ན་དེ་དབང་དུ་འགྱུར་རོ། །རྒྱལ་པོ་འམ་རྒྱལ་པོའི་བློན་པོ་དབང་དུ་བྱེད་པར་འདོད་པས་ཟླ་བ་གཅིག་ཏུ་སྐེ་ཚེ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱ་སྟེ་

དབང་དུ་འགྱུར་རོ། །གང་བརྗོད་པ་དེ་བྱེད་རྒྱལ་པོ་ཉེ་བར་དབང་དུ་བྱེད་པ་ལ་སྐུ་གཟུགས་ཀྱི་སྤྱན་སྔར་སྐེ་ཚེ་ཞོ་དང་སྦྲང་རྩི་དང་ལྷན་ཅིག་པ་རྣམས་དང་། དེ་ནས་ཀྱང་ལི་ཏ་དང་ལྷན་ཅིག་དང་། དེ་ནས་ཀྱང་སྦྲང་རྩི་དང་ལྷན་ཅིག་པ་རྣམས་ཟླ་བ་གཅིག་ཏུ་ཐུན་གསུམ་དུ་ཇི་ལྟར་

ན་གསུངས་པའི་རིམ་པས་བརྒྱད་བརྒྱར་སྦྱིན་སྲེག་བྱ་སྟེ་དབང་དུ་འགྱུར་རོ། །རྒྱལ་པོའི་མདུན་ན་འདོན་དབང་དུ་བྱེད་པར་འདོད་པས་མར་དང་ལྷན་ཅིག་པའི་འབྲས་ཡོས་ཀྱིས་སྦྱིན་སྲེག་བྱའོ། །རྒྱལ་རིགས་ལ་འོ་ཐུག་དང་བསྲེས་པས་སོ། །རྗེ་རིགས་ལ་འོ་མ་དང་ལྷན་ཅིག་

པས་སོ། །དམངས་རིགས་ལ་ཏིལ་མར་གྱིས་བཏགས་པ་རྣམས་ཀྱིས་སོ། །གསུམ་པོ་ཐམས་ཅད་ལ་ལན་ཚྭའི་སྦྱིན་སྲེག་གིས་སོ། །ཡུགས་ས་མོ་ལ་མ་ཤའི་སྦྱིན་སྲེག་གིས་སོ། །སེམས་ཅན་ཐམས་ཅད་ལ་ཚའི་ཏིལ་མར་གྱིས་བཏགས་པའི་ཏིལ་རྣམས་ཀྱིས་དབང་དུ་

Vol. 94 · folio 109a

བྱེད་དོ། །ཐམས་ཅད་ལ་ཟླ་བ་གཅིག་ཏུ་དུས་གཅིག་ཏུ་པ་ལཱ་ཤའི་མེ་ལ་སྦྱིན་སྲེག་སྟོང་ཕྲག་བརྒྱད་པའོ། །གཙང་མར་གྱུར་པས་ཉིན་མཚན་དུ་སྨྱུང་བར་གནས་ཏེ་གཟུགས་བརྙན་གྱི་སྤྱན་སྔར་བིལ་བའི་ཡམ་ཤིང་གིས་མེ་སྦར་ནས་བིལ་བའི་སྦྱིན་སྲེག་འབུམ་བྱའོ། །

གཏེར་མཐོང་བར་འགྱུར་རོ། །མཚན་མོ་ཉི་ཤུར་འོ་མ་དང་ནས་ཟན་ཟ་ཞིང་པ་ལཱ་ཤའི་མེ་ལ་ཡུངས་ཀར་དཀར་པོའི་སྦྱིན་སྲེག་བྱ་སྟེ་ནོར་རྙེད་དོ། །འོ་མ་དང་ནས་ཟན་ཟ་ཞིང་འབུམ་ཕྲག་ལྔར་བཟླས་པར་བྱའོ། །དེ་ནས་རས་རིས་ཀྱི་སྤྱན་སྔར་ཟླ་བ་གཅིག་ཏུ་ཐུན་གསུམ་དུ་ཡུངས་

ཀར་དཀར་པོ་ལ་མར་གྱིས་བཏགས་པའི་སྦྱིན་སྲེག་སྟོང་ཕྲག་བརྒྱད་བྱ་སྟེ་ནོར་གྱི་རྒྱུན་གང་དུ་འདོད་པ་དེར་ལྟུང་བར་བྱེད་དོ། །ཟས་བཞིན་སྨྱུང་བར་གནས་པས་ཡུངས་ཀར་གྱིས་སྦྱིན་སྲེག་བྱའོ། །རྒྱུ་སྐར་གྱི་གནོད་པ་ཉེ་བར་ཞི་བར་བྱེད་དོ། །གཟུགས་བརྙན་གྱི་སྤྱན་སྔར་མཚན་

བརྒྱད་དུ་བིལ་བའི་ཤིང་གིས་མེ་སྦར་ནས་ཏིལ་གྱིས་སྦྱིན་སྲེག་འབུམ་བྱའོ། །གཏེར་མཐོང་བར་བྱེད་དོ། །ཡང་ན་དབང་ཕྱུག་ཉིད་རྙེད་དོ། །གཟུགས་བརྙན་གྱི་སྤྱན་སྔར་མཆོད་པ་རྒྱ་ཆེན་པོ་བྱས་ནས་དཀར་པོའི་ཚེས་གཅིག་ནས་བརྩམས་ཏེ་ཟླ་བ་གཅིག་ཏུ་པ་ལཱ་ཤའི་

མེ་ལ་མེ་ཏོག་བརྒྱ་པའི་སྦྱིན་སྲེག་སྟོང་ཕྲག་བརྒྱ་བྱའོ། །ཇི་ལྟར་འདོད་པའི་ནོར་རྙེད་དོ། །རིང་བསྲེལ་དང་བཅས་པའི་མཆོད་རྟེན་དུ་པ་ལཱ་ཤའི་ཤིང་གིས་མེ་རབ་ཏུ་སྦར་ནས་ཞོ་དང་སྦྲང་རྩི་དང་མར་གྱིས་བཏགས་པ་འབུམ་སྦྱིན་སྲེག་བྱའོ། །ཡུལ་གྲུ་བཅུ་ལ་སྤྱོད་པ་རྙེད་དོ། །

གཟུགས་བརྙན་གྱི་སྤྱན་སྔར་དཀར་པོའི་ཚེས་གཅིག་ནས་བརྩམས་ཏེ་འོ་མ་དང་ནས་ཟན་ཟ་ཞིང་པདྨ་འབུམ་དབུལ་བར་བྱའོ། །གཏེར་རྙེད་དོ། །ཡང་ན་དབང་ཕྱུག་རྙེད་དོ། །འདི་རྣམས་ཁོ་ན་ཀུ་མུ་དའི་ཆོ་ག་སྟེ་རྒྱལ་པོ་ལ་གང་ཚོལ་བ་དེ་རྙེད་དོ། །གཟུགས་བརྙན་གྱི་སྤྱན་སྔར་

བིལ་བ་དང་ཏིལ་ཕན་ཚུན་བསྲེས་པས་འབུམ་སྦྱིན་སྲེག་བྱའོ། །གཏེར་མཐོང་བར་བྱེད་དོ། །གཟུགས་བརྙན་གྱི་སྤྱན་སྔར་དཀར་པོའི་ཚེས་གཅིག་ནས་བརྩམས་ནས་པྲི་ཡང་ཀུའི་ཞོགས་མ་རྣམས་ཞོ་དང་སྦྲང་རྩི་དང་མར་གྱིས་བཏགས་པའི་བིལ་བའི་མེ་ལ་འབུམ་སྦྱིན་སྲེག་བྱའོ། །

Vol. 94 · folio 109b

ལོངས་སྤྱོད་ཆེན་པོར་འགྱུར་རོ། །གཟུགས་བརྙན་གྱི་སྤྱན་སྔར་ཉིན་མཚན་དུ་སྨྱུང་བར་གནས་པས་དཀར་པོའི་ཚེས་གཅིག་ནས་བརྩམས་ཏེ་པདྨ་ཞོ་དང་སྦྲང་རྩི་དང་མར་གྱིས་བཏགས་པ་འབུམ་གྱིས་སྦྱིན་སྲེག་བྱའོ། །དབང་ཕྱུག་ཉིད་སོ་སོར་རྙེད་དོ། །རས་རིས་

ཀྱི་སྤྱན་སྔར་འབུམ་ཕྲག་གསུམ་བཟླས་པར་བྱའོ། །དེ་ནས་བུ་རམ་གྱི་ཡམ་ཤིང་སོར་གཅིག་པའི་ཚད་འབུམ་ཕྲག་གསུམ་སྦྱིན་སྲེག་བྱའོ། །རས་རིས་རབ་ཏུ་འགུལ་བར་འགྱུར་རོ། །མེ་ཏོག་ཆུན་པོ་གཡོ་བར་བྱེད་པ་དང་། དེ་ནས་རྒྱལ་རིགས་སོ་སོར་རྙེད་

པ་འམ་ཡང་ན་གང་ཡིད་ཀྱིས་བསམས་པའོ། །སྐྱེས་བུ་ཆེན་པོ་དབང་དུ་བྱེད་པ་ལ་གཟུགས་བརྙན་གྱི་སྤྱན་སྔར་སྣ་མའི་མེ་ཏོག་ཞོ་དང་སྦྲང་རྩི་དང་མར་གྱིས་བཏགས་པ་རྣམས་ཟླ་བ་གཅིག་ཏུ་ཐུན་གཅིག་ལ་སྟོང་ཕྲག་བརྒྱད་སྦྱིན་སྲེག་བྱའོ། །དབང་དུ་འགྱུར་རོ། །ཡུལ་

དབང་དུ་བྱེད་པ་ལ་གཟུགས་བརྙན་གྱི་སྤྱན་སྔར་ཀ་ར་བཱི་རའི་མེ་ཏོག་ལ་ཞོ་དང་སྦྲང་རྩི་དང་མར་གྱིས་བཏགས་པ་འབུམ་སྦྱིན་སྲེག་བྱའོ། །ཡུལ་སོ་སོར་རྙེད་དོ། །ཡུལ་གྱི་དཔོན་པོ་བྱེད་པར་འདོད་པས་དོང་ཀའི་མེ་ཏོག་ལ་ཞོ་དང་སྦྲང་རྩི་དང་མར་གྱིས་བཏགས་པ་འབུམ་ཕྲག་གསུམ་

སྦྱིན་སྲེག་བྱའོ། །ཡུལ་གྱི་རྗེ་བོར་འགྱུར་རོ། །པ་ལཱ་ཤའི་མེ་ལའོ། །སྡེ་དཔོན་བྱེད་པར་འདོད་པས་གཟུགས་བརྙན་གྱི་སྤྱན་སྔར་ཀུནྡའི་མེ་ཏོག་ལ་ཞོ་དང་སྦྲང་རྩི་དང་མར་གྱིས་བཏགས་པ་འབུམ་སྦྱིན་སྲེག་བྱ་སྟེ་སྡེ་དཔོན་ཉིད་རྙེད་དོ། །གཟུགས་བརྙན་གྱི་སྤྱན་སྔར་པ་ལཱ་ཤའི་

མེ་ལ་བཏང་བཟུང་གི་མེ་ཏོག་ལ་ཞོ་དང་སྦྲང་རྩི་དང་མར་གྱིས་བཏགས་པ་སྟོང་ཕྲག་བཅུ་སྦྱིན་སྲེག་བྱའོ། །ཡུལ་གྲུའི་རྗེ་བོར་འགྱུར་རོ། །གཟུགས་བརྙན་གྱི་སྤྱན་སྔར་ཀར་བཱི་རའི་མེ་ཏོག་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྦྱིན་སྲེག་འབུམ་ཕྲག་གསུམ་བྱས་ཏེ་ཅོད་

པན་གསུམ་བཅིངས་པར་འགྱུར་རོ། །གཟུགས་བརྙན་གྱི་སྤྱན་སྔར་ཉི་མ་སོ་སོ་ལ་མཆོད་པ་སྔོན་དུ་འགྲོ་བས་ཇི་ལྟར་འདོད་པའི་ཐུན་མཚམས་ནས་བརྩམས་ཏེ་དེ་ནས་ཨརྒའི་ཤིང་གིས་མེ་རབ་ཏུ་སྦར་ནས་དྲིའི་ཏིལ་མར་གྱིས་བཏགས་པའི་ཤིང་གསེར་གྱི་ཕྱེ་མ་ཚོན་གང་ཙམ་

Vol. 94 · folio 110a

གྱིས་སྟོང་ཕྲག་བརྒྱད་སྦྱིན་སྲེག་བྱའོ། །ཟླ་བ་དྲུག་གིས་རྒྱལ་སྲིད་སོ་སོར་རྙེད་དོ། །མ་སྐྱེས་པའི་ལོངས་སྤྱོད་སྐྱེ་བར་འགྱུར་རོ། །ལོ་གསུམ་གྱིས་རྒྱལ་སྲིད་ཆེན་པོར་སོ་སོར་རྙེད་དོ། །ཆོ་ག་འདི་ཉིད་ཁོ་ནས་ལྕགས་ལས་བྱུང་བའི་ཕྱེ་མའི་སྦྱིན་སྲེག་བྱ་སྟེ་

ལོ་གསུམ་གྱིས་མཚོན་ཆ་བཅིངས་པར་འགྱུར་རོ། །ཆོ་ག་འདི་ཉིད་ཀྱིས་གུར་ཀུམ་གྱི་སྲེག་བླུགས་དྲིའི་ཏིལ་མར་གྱིས་བཏགས་པ་འབུམ་སྦྱིན་སྲེག་བྱའོ། །ནོར་གྱི་བདག་པོ་ཆེན་པོར་འགྱུར་རོ། །དྲི་ཐམས་ཅད་ཀྱི་སྲེག་བླུགས་དང་། མར་གྱིས་སྲེག་བླུགས་

འབུམ་སྦྱིན་སྲེག་བྱའོ། །ཇི་ལྟར་འདོད་པའི་གནས་སུ་དཔོན་པོ་བྱེད་དོ། །ཡང་ན་ཇི་ལྟར་མངོན་པར་འདོད་པའི་ཡུལ་སོ་སོར་རྙེད་དོ། །པ་ལཱ་ཤའི་མེ་ཉིད་ལ་ག་པུར་གྱི་སྲེག་བླུགས་མར་གྱིས་བཏགས་པ་འབུམ་སྦྱིན་སྲེག་བྱ་སྟེ་རྒྱལ་པོ་དགའ་བར་འགྱུར་རོ། །པ་ལཱ་ཤའི་མེ་

ལ་སྦྱིན་སྲེག་ཙནྡན་གྱིས་ཡམ་ཤིང་དྲིའི་ཏིལ་མར་གྱིས་བཏགས་པ་འབུམ་སྦྱིན་སྲེག་བྱའོ། །ཡུལ་ཆེན་པོའི་དཔོན་པོར་འགྱུར་རོ། །གསེར་གྱི་ངང་ཚུལ་གྱིས་སྲེག་བླུགས་འབུམ་པ་ལཱ་ཤའི་མེ་ལ་སྦྱིན་སྲེག་བྱའོ། །སེམས་ཅན་ཐམས་ཅད་ཀྱིས་མི་ཚུགས་པར་འགྱུར་རོ། །ཨ་

ག་རུའི་ཡམ་ཤིང་ལ་མར་གྱིས་བཏགས་པ་འབུམ་སྦྱིན་སྲེག་བྱ་སྟེ་ཐོས་པ་འཛིན་པར་འགྱུར་རོ། །པཱ་ཤ་ཀའི་ཡམ་ཤིང་ལ་དྲིའི་ཏིལ་མར་གྱིས་བཏགས་པ་འབུམ་སྦྱིན་སྲེག་བྱ་སྟེ། ནད་ཆེན་པོ་ཉེ་བར་ཞི་བར་འགྱུར་རོ། །ནིམ་པའི་འབྲས་བུ་ལ་དྲིའི་ཏིལ་མར་གྱིས་བཏགས་

པ་འབུམ་སྦྱིན་སྲེག་བྱ་སྟེ། གང་འདོད་པའི་བཅིངས་པ་དེ་གྲོལ་བར་བྱེད་དོ། །རྒྱུད་མཚུངས་པའི་བའི་མར་བླངས་ཏེ་འབུམ་མངོན་པར་བསྔགས་ཏེ་འཐུངས་ཤིག་མཆོག་ཏུ་ཡིད་གཞུངས་པར་འགྱུར་རོ། །ཨརྒའི་མེ་ལ་ཨརྒའི་མེ་ཏོག་དྲིའི་ཏིལ་མར་གྱིས་བཏགས་པ་

འབུམ་སྦྱིན་སྲེག་བྱའོ། །སེམས་ཅན་ཐམས་ཅད་ཀྱི་གནང་ཆེན་པོར་འགྱུར་རོ། །དེ་རྣམས་ཐམས་ཅད་རིང་བསྲེལ་དང་བཅས་པའི་མཆོད་རྟེན་དང་གཟུགས་བརྙན་གྱི་མདུན་དུ་སྦྱིན་སྲེག་བྱའོ། །མེ་ཏོག་གམ་འབྲས་བུ་ལ་ལན་བདུན་མངོན་པར་བསྔགས་པ་བྱས་ན་དེ་གང་

Vol. 94 · folio 110b

ལ་བྱིན་པ་དེ་དགའ་བར་འགྱུར་རོ། །གསོ་སྦྱོང་ཅན་གྱིས་དཀར་པོའི་བཅྭ་ལྔ་ལ་རིང་བསྲེལ་དང་བཅས་པའི་མཆོད་རྟེན་དུ་ས་ལ་མ་ལྷུང་བའི་བ་བྱུང་གིས་དཀྱིལ་འཁོར་ཉེ་བར་བྱུགས་ཏེ་དྲི་དང་མེ་ཏོག་དང་བདུག་པ་ལ་སོགས་པ་རྣམས་ཀྱིས་མཆོད་པ་བྱས་ནས་གཟུགས་བརྙན་གྱི་

སྤྱན་སྔར་ཨུ་དུམ་བཱ་རའི་ཤིང་གིས་མེ་སྦར་ནས་ཟླ་བ་གཅིག་གི་དུས་གཅིག་ལ་ཙཱ་རུ་བཟའ་ཞིང་ཚངས་པའི་ཡམ་ཤིང་གིས་སྦྱིན་སྲེག་སྟོང་ཕྲག་བརྒྱད་བྱའོ། །ཡིད་གཞུངས་པར་འགྱུར་རོ། །བྲམ་ཟེ་དབང་དུ་བྱེད་པ་ལ་གཟུགས་བརྙན་གྱི་མདུན་དུ་ཟླ་བ་གཅིག་ཏུ་འོ་མའི་སྦྱིན་

སྲེག་བྱའོ། །དབང་དུ་འགྱུར་རོ། །རྒྱལ་རིགས་དབང་དུ་བྱེད་པ་ལ་གཟུགས་བརྙན་གྱི་སྤྱན་སྔར་ཙཱ་རུའི་སྦྱིན་སྲེག་བྱས་ན་དབང་དུ་འགྱུར་རོ། །རྗེ་རིགས་དབང་དུ་བྱེད་པ་ལ་ནས་དང་ཞོ་བསྲེས་པའི་སྦྱིན་སྲེག་བྱ་སྟེ་སྔར་བཞིན་དབང་དུ་འགྱུར་རོ། །དམངས་རིགས་དབང་

དུ་བྱེད་པ་ལ་ནས་ལ་དྲིའི་ཏིལ་མར་གྱིས་བཏགས་པའི་སྦྱིན་སྲེག་བྱ་སྟེ་སྔར་བཞིན་དབང་དུ་འགྱུར་རོ། །གཞན་རྣམས་ལ་གཞན་གྱིས་མི་ཐུབ་པ་ལ་དུག་གིས་བཏགས་པའི་སྦྱིན་སྲེག་བྱ་སྟེ་དབང་དུ་འགྱུར་རོ། །དགྲ་ལ་བལྟས་ནས་བཟླས་པས་འཇིགས་པར་འགྱུར་རོ། །

བརྒྱད་བརྒྱར་མངོན་པར་བསྔགས་པའི་ཆུས་རིག་པ་ལན་ཅིག་མངོན་པར་བསྔགས་པས་སམ། ལན་བདུན་མངོན་པར་བསྔགས་པས་ཀྱང་རུང་སྟེ་རྒྱལ་པོའི་ཕོ་བྲང་དུ་ངག་འཛིན་པར་འགྱུར་རོ། །དཀར་པོའི་ཚེས་གཅིག་ནས་བརྩམས་ཏེ་གཟུགས་བརྙན་གྱི་མདུན་དུ་

སེང་ལྡེང་གི་མེ་ལ་གུ་གུལ་གྱི་རིལ་བུ་མར་གྱིས་བཏགས་པའི་སྟོང་ཕྲག་བརྒྱད་ཐུན་གསུམ་དུ་སྦྱིན་སྲེག་བྱའོ། །གང་འདོད་པ་དེ་རྙེད་དོ། །རིང་བསྲེལ་དང་བཅས་པའི་མཆོད་རྟེན་དུ་འོ་མ་དང་ནས་ཟན་བཟའ་ཞིང་འབུམ་ཟློས་ཤིག་དེ་ནས་བུ་རམ་གྱི་ཡམ་ཤིང་སོར་གཅིག་པའི་

ཚད་འབུམ་སྦྱིན་སྲེག་བྱའོ། །ཅོད་པན་གསུམ་བཅིངས་པར་འགྱུར་རོ། །རིལ་བུ་སྒྲུབ་པར་བྱེད་པར་འདོད་པས། དོང་ཀའི་མེ་ཏོག་གི་གེ་སར་དང་། ནཱ་ག་གེ་སར་དང་། ཙནྡན་དཀར་པོ་རྣམས་གཅིག་ཏུ་བྱས་ནས་རྒྱ་ཤུག་གི་ཚིག་གུའི་ཚད་ཀྱི་རིལ་བུ་བྱ་སྟེ་མི་མཉམ་

Vol. 94 · folio 111a

པའི་ལྕགས་གསུམ་གྱིས་དཀྲིའོ། །དང་པོར་ཟངས་ཀྱིས་སོ། །དེ་ནས་དངུལ་གྱིས་སོ། །དེ་ནས་གསེར་གྱིས་སོ། །དེ་ནས་རིལ་བུ་ཟ་མ་ཏོག་ཏུ་བཅུག་སྟེ། བཅོམ་ལྡན་འདས་མའི་སྤྱན་སྔར་རིང་བསྲེལ་དང་བཅས་པའི་མཆོད་རྟེན་དུ་ཉིན་མཚན་དུ་སྨྱུང་

བར་གནས་པས་ཟླ་བ་གཟས་བཟུང་བ་ན་མཆོད་པ་དང་གཏོར་མའི་ཆོ་ག་བྱས་ནས་མདུན་དུ་བཞག་སྟེ་ཇི་སྲིད་ཁ་ཊ་ཁ་ཊ་ཞེས་སྒྲ་སྒྲོགས་པ་དེ་སྲིད་དུ་བཟླས་པར་བྱའོ། །དེ་ནས་གཅིག་ལུང་སྟོན་པའི་ལྷ་ལ་དབུལ་བར་བྱའོ། །གཞན་རྣམས་གཡོག་པོ་རྣམས་ལ་སྦྱིན་པར་

བྱའོ། །བླ་མའི་བླ་མར་གྱུར་པའི་ཕྱིར་སངས་རྒྱས་བཅོམ་ལྡན་འདས་ལ་དབུལ་བར་བྱའོ། །དེ་ནས་དེ་རྣམས་རིན་གྱིས་ཉོ་བར་བྱའོ། །གང་གང་གི་ཚེ་བདག་ཉིད་ཀྱི་ཁར་བཅུག་པས་མི་སྣང་བར་འགྱུར་རོ། །མཆོག་སྒྲོགས་པར་བལྟ་བར་བྱའོ། །ལོ་སྟོང་ཕྲག་

བཅུར་འཚོ་བར་འགྱུར་རོ། །གཟུགས་བརྙན་གྱི་མདུན་དུ་ཀ་དམ་པའི་མེ་ཏོག་ལ་ཞོ་དང་སྦྲང་རྩི་དང་མར་གྱིས་བཏགས་པ་སྟོང་ཕྲག་བརྒྱད་སྦྱིན་སྲེག་བྱ་སྟེ་གང་བསམས་པ་དེ་དབང་དུ་འགྱུར་རོ། །རྒྱ་མཚོར་འགྲོ་བའི་ཆུ་ཀླུང་དུ་ཞུགས་ཏེ་སྨྱུང་བར་གནས་པས་ནཱ་ག་གེ་སར་གྱི་མེ་

ཏོག་སྟོང་ཕྲག་བརྒྱད་དབུལ་བར་བྱ་སྟེ་གོས་ཅུང་ཟད་རྙེད་དོ། །གཟུགས་བརྙན་གྱི་མདུན་དུ་སྣ་མའི་མེ་ཏོག་ལ་ཞོ་དང་སྦྲང་རྩི་དང་མར་གྱིས་བཏགས་པའི་སྟོང་ཕྲག་བརྒྱད་དབུལ་བར་བྱའོ། །སེམས་ཅན་ཐམས་ཅད་དགའ་བར་འགྱུར་རོ། །འདི་ཁོ་ན་ཀུ་མུ་ད་རྣམས་

ཀྱིས་རྒྱལ་པོ་དགའ་བར་འགྱུར་རོ། །རྒྱལ་པོ་དབང་དུ་བྱེད་པ་ལ་ཐམས་ཅད་དུ་ཙནྡན་གྱི་ཕྱེ་མ་ལ་བཏགས་པས་ཟླ་བ་གཅིག་ཏུ་སྦྱིན་སྲེག་བྱ་སྟེ་རྒྱལ་པོ་དབང་དུ་འགྱུར་རོ། །བྲམ་ཟེ་དབང་དུ་བྱེད་པ་ལ་ཀུ་རུཎྜ་ཀིའི་མེ་ཏོག་སྟོང་ཕྲག་བརྒྱད་སྦྱིན་སྲེག་བྱའོ། །རྗེ་རིགས་དབང་

དུ་བྱེད་པ་ལ་སཽ་གནྡྷི་ཀའི་མེ་ཏོག་སྟོང་ཕྲག་བརྒྱད་སྦྱིན་སྲེག་བྱའོ། །དམངས་རིགས་དབང་དུ་བྱེད་པ་ལ་ཀིཾ་ཀ་ར་ཊའི་མེ་ཏོག་སྟོང་ཕྲག་བརྒྱད་སྦྱིན་སྲེག་བྱའོ། །བུ་མོ་དབང་དུ་བྱེད་པ་ལ་ཡུ་ཐི་ཀའི་མེ་ཏོག་སྟོང་ཕྲག་བརྒྱད་སྦྱིན་སྲེག་བྱའོ། །ཞེས་པ་འདི་རྣམས་

Vol. 94 · folio 111b

གཟུགས་བརྙན་གྱི་མདུན་དུ་བེ་ཀངྐ་ཏའི་ཡམ་ཤིང་གི་མེ་ལ་སྦྱིན་སྲེག་བྱའོ། །ཡུགས་ས་མོ་ལ་བེ་ཀངྐ་ཏའི་ཡམ་ཤིང་མར་གྱིས་བཏགས་པའི་སྦྱིན་སྲེག་བྱའོ། །རིང་བསྲེལ་དང་བཅས་པའི་མཆོད་རྟེན་དུ་གཟུགས་བརྙན་གྱི་སྤྱན་སྔར་ལན་བདུན་མངོན་པར་

བསྔགས་པའི་གི་ཝང་གིས་ཐིག་ལེ་བྱས་ནས་རྒྱལ་པོའི་ཁབ་ཏུ་འགྲོ་བར་བྱའོ། །ཐམས་ཅད་དགའ་བར་འགྱུར་རོ། །གདོང་ལ་བརྒྱད་བརྒྱར་ཡོངས་སུ་བཟླས་ནས་རྒྱལ་པོའི་ཁབ་ཏུ་འགྲོ་བར་བྱའོ། །ཐམས་ཅད་དགའ་བར་འགྱུར་རོ། །གཟུགས་བརྙན་གྱི་མདུན་

དུ་སྔོན་དུ་མྱུ་གུ་རྣམས་ལ་མར་གྱིས་བཏགས་པ་པ་ལཱ་ཤའི་མེ་ལ་སྦྱིན་སྲེག་བྱའོ། །མཚན་མོ་བདུན་གྱིས་ཕ་རོལ་ཞིང་བར་འགྱུར་རོ། །བདག་ཉིད་ཞི་བ་ལ་པ་ལཱ་ཤའི་མེ་ཉིད་ལ་ཐུན་གསུམ་དུ་མར་དང་ལྷན་ཅིག་པའི་འོ་མས་སྦྱིན་སྲེག་བྱའོ། །མཚན་མོ་བདུན་གྱིས་ཞི་བར་

འགྱུར་རོ། །གཟུགས་བརྙན་གྱི་མདུན་དུ་ཟངས་ཀྱི་སྣོད་དུ་མར་བཞག་ནས་ཉི་ཟླ་གཟས་བཟུང་བའི་དུས་སུ་གཏོར་མའི་ཆོ་ག་བྱས་ནས་བཟླས་པར་བྱའོ། །སྣོད་གཡོ་བར་བྱེད་དོ། །མར་ཡང་གྲུབ་པར་འགྱུར་རོ། །དཔྲལ་བར་ཐིག་ལེ་བྱའོ། །སྐྱེ་བོ་ཐམས་ཅད་

དགའ་བར་འགྱུར་རོ། །འཐུངས་ཤིག་ཡིད་གཞུངས་པར་འགྱུར་རོ། །ནུས་པ་བྱེད་པ་ལ་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་དངུལ་དང་ཟངས་ཀྱི་སྣོད་དུ་བ་ལས་བྱུང་བའི་མར་བཞག་ནས་ཆོ་གས་འབུམ་ཟློས་ཤིག །དེ་ནས་གཟས་ཟིན་པའི་དུས་སུ་བསྒྲུབ་

པར་བྱ་སྟེ་གྲུབ་པར་འགྱུར་རོ། །འཐུངས་ན་ནུས་པ་སྐྱེ་སྟེ་མགྱོགས་པ་དང་། ལྡིང་བ་དང་། མ་ཆོད་བ་ལ་སོགས་པ་ནུས་པར་འགྱུར་རོ། །མར་དེ་ཉིད་ཀྱིས་ལུས་ལ་མངོན་པར་བྱུགས་ནས་མེར་རབ་ཏུ་ཞུགས་ན་མི་འཚིག་གོ། །ཆུ་ལ་རབ་ཏུ་ཞུགས་ན་ཐམས་ཅད་ཆུ་ལ་

རྐང་པ་མི་འབྱིང་བར་འགྱུར་རོ། །ལག་པ་ལ་མངོན་པར་བྱུགས་ན་ལྕགས་ཚིག་པ་ཉམས་པར་བྱེད་དོ། །པདྨའི་རྩ་བ་ཟ་བར་བྱེད་ཅིང་གཟུགས་བརྙན་གྱི་མདུན་དུ་ལྡོང་རོས་བླངས་ནས་ལག་པ་ཁ་སྦྱར་བཞག་ནས་ཇི་སྲིད་གཟའ་ལས་གྲོལ་བ་དེ་སྲིད་དུ་བཟླས་པར་བྱའོ། །དེས་

Vol. 94 · folio 112a

ཐིག་ལེ་བྱས་པས་སྲོག་ཆགས་ཐམས་ཅད་དགའ་བར་འགྱུར་རོ། །ཆོ་ག་འདི་ཉིད་ཀྱིས་མ་ཤ་གཅིག་ཁར་བཅུག་སྟེ་ཇི་སྲིད་མྱུ་གུ་བྱུང་བ་དེ་སྲིད་དུ་བཟླས་པར་བྱའོ། །མྱུ་གུའི་ཕྱེ་མས་དབང་དུ་བྱེད་དོ། །ཕ་རོལ་འགུགས་པ་ལ་མྱུ་གུས་རྣམ་པར་སྟང་བར་

བྱེད་དོ། །ལྡོང་རོས་སྒྲུབ་པར་འདོད་པས་གཟུགས་བརྙན་གྱི་མདུན་དུ་ཨ་ཤྭཏྠའི་འདབ་མར་བཞག་ནས་འབུམ་ཡོངས་སུ་བཟླས་པར་བྱའོ། །ཉི་ཟླ་གཟས་བཟུང་བ་ན་ཆོ་གས་བསྒྲུབ་པར་བྱ། གྲུབ་པ་ལ་ཐིག་ལེ་བྱས་ན་མི་སྣང་བར་འགྱུར་རོ། །ཚིམ་པར་བྱེད་པར་འདོད་

པས་འོ་མ་ཅན་གྱི་ཤིང་གི་ཡམ་ཤིང་གིས་མེ་རབ་ཏུ་སྦར་ནས་འོ་མ་ཅན་གྱི་ཤིང་གི་ཡམ་ཤིང་ཞོ་དང་སྦྲང་རྩི་དང་མར་གྱིས་བཏགས་པའི་སྟོང་ཕྲག་བརྒྱད་སྦྱིན་སྲེག་བྱའོ། །དེ་ནས་རིག་པ་དང་བཅས་པ་ཚིམ་པར་འགྱུར་རོ། །གང་གཅིག་ཏུ་མཉམ་པའི་གནས་གང་དུ་ཚངས་པའི་

སྲིན་པོ་འམ་གཞན་སེམས་ཅན་གང་ལ་ལ་སོ་སོར་གནས་པ་དེར་སོང་ནས་འབུམ་ཟློས་ཤིག་དེས་འདིར་འགྲུབ་པར་འགྱུར་རོ། །གཏེར་སྩོལ་བར་བྱེད་དོ། །འོ་མ་དང་ནས་ཟན་བཟའ་ཞིང་རིང་བསྲེལ་དང་བཅས་པའི་མཆོད་རྟེན་རས་རིས་བཞུགས་སུ་གསོལ་ནས་ལོ་གཅིག་

བཟླས་སོ། །དེ་ནས་ནག་པོའི་བརྒྱད་པའམ་བཅུ་གཅིག་པ་ལ་ཉིན་མཚན་དུ་སྨྱུང་བར་གནས་པས་མཆོད་པ་རྒྱ་ཆེན་པོ་བྱས་ནས་གཏོར་མ་དབུལ་བར་བྱའོ། །གནོད་སྦྱིན་རྣམས་ལ་གནོད་སྦྱིན་གྱི་གཏོར་མ་སྲན་ཚོད་དང་། ཀ་ཀ་མོ་ཊི་ཀ་དང་། ཞོ་དང་། ཆུར་བ་དང་། འཁུར་བ་ཅན་

སོ་ཁ་བ་དྷི་ལ་སོགས་པ་ཕྱི་རོལ་དུ་འབྱུང་པོ་ཐམས་ཅད་པའི་གཏོར་མ་ཕུལ་ནས་རས་རིས་ཀྱི་སྤྱན་སྔར་འོ་མ་ཅན་གྱི་ཡམ་ཤིང་གི་མེ་ལ་འོ་མའི་ཤིང་གི་ཡམ་ཤིང་གི་ཁྲུ་གང་གི་ཚད་ལ་ཞོ་དང་སྦྲང་རྩི་དང་མར་གྱིས་བཏགས་པ་སྟོང་ཕྲག་བརྒྱད་སྦྱིན་སྲེག་བྱའོ། །ཀུ་ཤའི་ཁྲེས་ལ་ཉེ་བར་

འདུག་སྟེ་ནོར་བྱིན་ཅིག་གནོད་སྦྱིན་འོང་བར་འགྱུར་རོ། །མདུན་དུ་གནས་པ་ལ་དྲིའི་ཆུས་མཆོད་ཡོན་དབུལ་བར་བྱའོ། །དེ་ནས་དེ་རྣམས་བདག་གིས་ཅི་བགྱི་བ་བརྗོད་པར་བྱའོ་ཞེས་སྟོན་པར་བྱེད་དོ། །གནོད་སྦྱིན་བདག་གི་བཀའ་སྒྲུབ་པར་གྱུར་ཅིག་དེ་བཞིན་དུ་གྱུར་ཅིག་ཅེས་བྱས་ན་

Vol. 94 · folio 112b

མི་སྣང་བར་འགྱུར་རོ། །དེ་ནས་བརྒྱ་ཕྲག་དུ་མའི་འཁོར་སོ་སོ་ལ་ལྷའི་གཞལ་དུ་མེད་པའི་བཟའ་བ་སོ་སོར་སྩོལ་བར་བྱེད་དོ། །ལྷ་རྣམས་ཀྱིས་རིན་པོ་ཆེའི་ཅོད་པན་ལ་སོགས་པའི་རྒྱན་དང་། བཅུད་དང་བཅུད་ལེན་དང་། སྨན་རྣམས་རབ་ཏུ་སྩོལ་བར་བྱེད་དོ། །ཡང་

ན་གང་ཚོལ་བ་དེའོ། །གནས་གང་དུ་གནོད་སྦྱིན་མོ་རྣམས་ཀུན་ཏུ་གནས་པ་དེར་ས་ལམ་ལྷུང་བའི་བ་བྱུང་གིས་དཀྱིལ་འཁོར་བྱས་ནས་འབུམ་ཟློས་ཤིག །དེ་ནས་སེང་ལྡེང་གི་སོལ་བ་དུ་བ་མེད་པ་ལ་ཞོ་དང་སྦྲང་རྩི་དང་མར་གྱིས་བཏགས་པའི་གུ་གུལ་གྱི་རིལ་བུ་སྟོང་ཕྲག་བརྒྱད་སྦྱིན་

སྲེག་བྱ་སྟེ་ཇི་སྲིད་ཐོ་རངས་ཀྱི་དུས་ལ་ཇི་ལྟར་མངོན་པར་འདོད་པའི་ལྷ་རྣམས་འོང་པར་བྱེད་པ་དེ་སྲིད་དུའོ། །ལྷན་ཅིག་མཆོག་སྩོལ་བར་བྱེད་དོ། །ཡང་ན་ལྷའི་སྨན་སྩོལ་བར་བྱེད་དོ། །ཟོས་ན་ཚེ་བསྐལ་པར་འགྱུར་རོ། །བཏུ་ཤཱཪྠི་དང་། དུར་བྷ་དང་། ཚེར་མ་རྣམས་

མར་གྱིས་བཏགས་པ་སྟོང་ཕྲག་བརྒྱད་སྦྱིན་སྲེག་བྱའོ། །གོས་རྙེད་དོ། །ཤུ་དག་ལ་སྟོང་ཕྲག་བརྒྱད་མངོན་པར་བསྔགས་པར་བྱས་ནས་ཁར་བཅུག་ན་ཐ་སྙད་འདོད་པ་སྨྲ་བའི་མཆོག་ཏུ་འགྱུར་རོ། །དྲི་ཞིམ་པོའི་ཏིལ་མར་ལ་ཡོངས་སུ་བཟླས་ནས་ཁལ་སྐུས་ཤིག །

རྒྱལ་པོའི་ཁབ་ཏུ་སྨྲ་བའི་མཆོག་ཏུ་འགྱུར་རོ། །མིག་སྨན་ལ་སྟོང་ཕྲག་བརྒྱད་མངོན་པར་བསྔགས་པ་བྱས་ནས་མིག་ལ་མིག་སྨན་དུ་བྱའོ། །ཐ་སྙད་རྣམས་ལ་སྨྲ་བའི་མཆོག་ཏུ་འགྱུར་རོ། །ཉི་ཟླ་གཟས་བཟུང་བ་ན་རྣ་བའི་མིག་སྨན་ཁར་བཅུག་ནས་ཇི་སྲིད་གྲོལ་བ་དེ་སྲིད་དུ་

བཟླས་པར་བྱའོ། །དེ་ནས་དེ་ལ་བསྲུང་བ་བྱས་ནས་ཡང་དག་པའི་ཆོ་གས་བཏགས་པར་བྱའོ། །སྟོང་ཕྲག་བརྒྱད་དུ་མངོན་པར་བསྔགས་པས་མིག་ལ་མིག་སྨན་དུ་བྱའོ། །མི་སྣང་བར་འགྱུར་རོ། །སེམས་ཅན་ཐམས་ཅད་ལའོ། །ར་ས་རིས་ཀྱི་སྤྱན་སྔར་འབུམ་སྦྱིན་སྲེག་

བྱའོ། །དཔལ་མོ་མཐོང་ངོ་། །གང་མཆོག་སྩོལ་བར་བྱེད་པའི་མཆོག་རྙེད་དོ། །མི་སྨྲ་བར་སློང་མོ་ཟ་བས་འབུམ་ཟློས་ཤིག །མི་སྣང་བར་འགྱུར་རོ། །རས་རིས་ཀྱི་སྤྱན་སྔར་ལག་པ་གཡོན་པ་ཁུ་ཚུར་བཅངས་ནས་འབུམ་ཟློས་ཤིག །དེ་ནས་གྲུབ་པར་འགྱུར་རོ། །

Vol. 94 · folio 113a

ཁུ་ཚུར་བཅིངས་པས་མི་སྣང་བར་འགྱུར་ཏེ་བཀྲོས་པ་སྣང་བར་འགྱུར་རོ། །རིང་བསྲེལ་དང་བཅས་པའི་མཆོད་རྟེན་ནམ་ཆུ་ཀླུང་གི་འགྲམ་དུ་རས་རིས་བཞུགས་སུ་གསོལ་ནས་པདྨ་འབུམ་གྱིས་སྦྱིན་སྲེག་བྱ་སྟེ་དཔལ་མོ་མཐོང་ངོ་། །མཱ་ཥས་དེ་བཞིན་དུ་མཆོག་སྩོལ་

བར་བྱེད་དོ། །ཆོ་ག་འདི་ཉིད་ཀྱིས་ཨུཏྤ་ལ་སྔོན་པོས་འབུམ་སྦྱིན་སྲེག་བྱ་སྟེ་གཏེར་མཐོང་ངོ་། །གུ་གུལ་གྱི་རིལ་བུས་འབུམ་སྦྱིན་སྲེག་བྱ་སྟེ་དོང་ཙེ་འབུམ་རྙེད་དོ། །དྲི་ཞིམ་པོའི་མེ་ཏོག་འབུམ་སྦྱིན་སྲེག་བྱ་སྟེ་གོས་བྱེ་བ་རྙེད་དོ། །གུ་གུལ་གྱི་བདུག་པ་བརྒྱད་བརྒྱས་ཡིད་ལ་

མངོན་པར་འདོད་པ་རྙེད་དོ། །རས་རིས་ཀྱི་སྤྱན་སྔར་ཉི་མ་སོ་སོར་ཡུངས་ཀར་སྟོང་ཕྲག་བརྒྱད་སྦྱིན་སྲེག་བྱ་སྟེ་ཉི་མ་གསུམ་ལ་དོང་ཙེ་ཉི་ཤུ་རྩ་ལྔ་རྙེད་དོ། །ཆོ་ག་འདི་ཉིད་ཀྱིས་མཚན་མོ་བདུན་དུ་སྦྱིན་སྲེག་བྱའོ། །དོང་ཙེ་ཡང་དག་པར་རྙེད་དོ། །ལན་ཚྭ་ལས་བྱུང་བའི་གཟུགས་

བརྙན་བྱས་ནས་གཏུབ་ཅིང་གཏུབ་ཅིང་སྦྱིན་སྲེག་བྱའོ། །འདོད་པའི་སྐྱེས་བུ་དང་བུད་མེད་དེ་དབང་དུ་འགྱུར་རོ། །བཞི་གས་ཀྱང་གོས་སོ། །ཡུངས་ཀར་ལ་མར་གྱིས་བཏགས་པའི་སྟོང་ཕྲག་བརྒྱད་སྦྱིན་སྲེག་བྱའོ། །ཉི་མ་གསུམ་གྱིས་བགེགས་ཐམས་ཅད་ཉེ་བར་

ཞི་བར་བྱེད་དོ། །ཆུར་རྐང་པ་གཅིག་བཅུག་ནས་དེ་བཞིན་དུ་ཐང་ལ་སྟེ། ཇི་སྲིད་དུ་ཆུར་གནས་པའི་རྐང་པ་ཡང་བར་གྱུར་པ་དེ་སྲིད་དུ་བཟླས་པར་བྱའོ། །སྡིག་པ་ལས་གྲོལ་བར་འགྱུར་རོ། །ཨརྒའི་ཤིང་གིས་མེ་རབ་ཏུ་སྦར་ནས་སྐེ་ཚེ་སྟོང་ཕྲག་བརྒྱད་སྦྱིན་སྲེག་

བྱ་སྟེ་ཉི་མ་བདུན་གྱིས་ལས་ཀྱི་སྒྲིབ་པ་ཟད་པར་བྱེད་དོ། །ཚངས་མ་དང་། སླེ་ཏྲེས་དང་། ཤུ་དག་དང་། པི་པི་ལིང་གི་ཕྱེ་མ་ཆ་མཉམ་པར་བྱས་ནས་སྦྲང་རྩི་དང་ལྷན་ཅིག་པས་འཕགས་པ་འཇམ་དཔལ་གྱི་སྤྱན་སྔར་ལན་ཉི་ཤུ་རྩ་གཅིག་ཡོངས་སུ་བཟླས་ནས་ལྷག་པར་

བྱས་ཏེ་ཉི་མ་བདུན་ལ་དེ་བཞིན་དུ་ཡིད་གཞུངས་པར་འགྱུར་རོ། །ཉིན་མཚན་བདུན་ཕྲག་གཉིས་ཀྱིས་མཆོག་ཏུ་ཡང་ཡིད་གཞུངས་པར་འགྱུར་རོ། །ཟླ་བ་གཉིས་ཀྱི་སྦྱོར་བས་ཐོས་པ་འཛིན་པར་འགྱུར་རོ། །རས་རིས་ཀྱི་སྤྱན་སྔར་རམ་གཟུགས་བརྙན་གྱི་སྤྱན་སྔར་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words