དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པ་གསང་བ་རྟ་མཆོག་རོལ་པའི་རྒྱུད་ཆེན་པོ་ཞེས་བྱ་བ
Sanskrit title (Tibetan script, as in the text) སརྦ་ཏ་ཐཱ་ག་ཏ་བུད་ཏྲོ་པཱུ་ན་གུ་ཧྱ་བ་ནོ་ཤི་ཨ་ཤྭད་ད
No translation — Tibetan only: there is no translation we are licensed to publish (84000’s translations are no-derivatives, non-commercial)
Vol. 99 · folio 77a
༄༅༅། །རྒྱ་གར་སྐད་དུ། སརྦ་ཏ་ཐཱ་ག་ཏ་བུད་ཏྲོ་པཱུ་ན་གུ་ཧྱ་བ་ནོ་ཤི་ཨ་ཤྭད་ད། མ་བིན་ས་མ་ཧཱ་ཏནྟྲ་ནཱ་མ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པ་གསང་བ་རྟ་མཆོག་རོལ་པའི་རྒྱུད་ཆེན་པོ་ཞེས་བྱ་བ། དཔལ་
རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྡོ་རྗེ་བདེ་བ་ཆེན་པོ་ཕྱོགས་བཅུ་དང་དུས་གསུམ་གྱི་སངས་རྒྱས་མ་ལུས་པའི་འབྱུང་གནས། སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་གསང་བ་
Vol. 99 · folio 77b
གཞན་ལས་ཁྱད་པར་དུ་གྱུར་པ་མཚན་དང་དཔེ་བྱད་ཕུན་སུམ་ཚོགས་པས་སྤྲས་པ། བཀོད་པ་རྒྱན་གྱི་དཀྱིལ་འཁོར་ལྷུན་པོ་བརྩེགས་ཤིང་ཡོན་ཏན་རིན་པོ་ཆེའི་འབྱུང་གནས་སྣ་ཚོགས་རྣམ་པར་སྣང་བའི་ངོ་བོ། །ཟབ་པ་དང་རྒྱ་ཆེ་བའི་ཡན་ལག་ཐམས་ཅད་
གསལ་བར་བྱེད་ཅིང་ཡེ་ཤེས་ཀྱི་ཚོགས་ཀྱིས་ཆོས་མ་ལུས་པ་མཐར་ཕྱིན་པ། ཀུན་དུ་ཕྲིན་ལས་རྒྱ་ཆེར་འཕྲུལ་པའི་བདག་ཉིད། དཔལ་བདེ་བྱེད་པདྨ་གར་གྱི་དབང་ཕྱུག་ཆགས་པ་ཆེན་པོའི་ཏིང་ངེ་འཛིན་བརྙེས་པ་མེད་པའི་ཆོས་ཉིད་ཀྱིས་ཐམས་ཅད་ལ་དབང་
བསྐུར་བ་དེ་ཉིད་ལྷ་ཐམས་ཅད་འདུ་བའི་གནས་གཞལ་ཡས་ཁང་བར་དུ་གྱུར་བ། འོག་མིན་རྡོ་རྗེ་ལྷུན་པོའི་གནས་ཡེ་ཤེས་ཀྱི་སྣང་བ་རིན་པོ་ཆེ་སྣ་ཚོགས་ནི་འོད་འབར་བའི་ཁང་བཟངས། འདོད་པའི་ཡོན་ཏན་གཟུགས་སྡུག་པ་སྣ་ཚོགས་དང་། དྲི་ཞིམ་པ་སྣ་
ཚོགས་དང་། རོ་བྲོ་བ་སྣ་ཚོགས་དང་། རེག་བྱ་འཇམ་པ་སྣ་ཚོགས་དང་། ཆོས་ཀྱི་བདེ་བ་བསྐྱེད་པ་སྣ་ཚོགས་ཕྱོགས་བཅུར་འཕྲོ་ཞིང་འཁྲིགས་པ་རྩེ་མོ་མཐོ་ཞིང་ཁྱམས་ཀྱི་རྣམ་པར་ཕྱེ་བར་སྒོ་བཞི་སྒོ་ཁང་དང་བཅས་པར་བཞུགས་སོ། །དེའི་ཚེ་བདེ་བར་གཤེགས་
པའི་རོལ་པ་ཆེན་པོ་ཀུན་དུ་སྣང་བ་དང་། འོད་ཀྱི་དཔལ་དང་། དགའ་བའི་དབང་ཕྱུག་དང་། ཆོ་འཕྲུལ་བཀོད་པ་དང་། རྣམ་པར་གཟིགས་དང་། མི་བསྐྱོད་རྡོ་རྗེ་དང་། མངོན་པར་སྣང་བ་དང་། བརྟན་པའི་དབང་ཕྱུག་དང་། འབྲུག་སྒྲ་དང་། དྲི་མ་མེད་པ་དང་།
རིན་ཆེན་ཕུང་པོ་དང་། ནམ་མཁའི་མཛོད་དང་། རིན་ཆེན་དྲ་བ་དང་། དཀོན་མཆོག་མཚན་དང་། རིན་ཆེན་ཏོག་དང་། འོད་ཟེར་སྣང་བ་དང་། ཚེ་མཐའ་ཡས་དང་། ཆོས་ཀྱི་དབང་ཕྱུག་དང་། ཆགས་པ་མེད་པའི་འོད་དང་། དགའ་བའི་སྤྱན་དང་། དོན་
ཐམས་ཅད་ཡོད་པ་དང་། བརྩོན་འགྲུས་ཤུགས་ཅན་དང་། ལས་ཆེན་འཕྲུལ་ལས་དང་། གནོད་སྦྱིན་འདུལ་བ་དང་། སྣ་ཚོགས་དབང་ཕྱུག་གོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བའི་བློ་གྲོས་དང་། རྒྱ་མཚོའི་སྒྲ་དབྱངས་དང་།
Vol. 99 · folio 78a
གཟི་བརྗིད་བཀོད་པ་དང་། འཁོར་ལོ་རྣོན་པོ་དང་། ཤེས་སྣང་བ་དང་། རྡོ་རྗེ་རྒྱལ་མཚན་དང་། འོད་ཟེར་འཕྲོ་བ་དང་། དྲག་ཤུལ་ཅན་དང་། དྲི་མ་སེམས་དཔའ་དང་། སྒྱུ་མའི་སྤྲུལ་པ་དང་། རིན་ཆེན་རྒྱལ་པོ་དང་། དྲ་བ་ཅན་དང་། ལག་བཟངས་
དང་། གསེར་འོད་འཕྲོ་བ་དང་། རིན་ཆེན་སྙེ་མ་དང་། ཆོས་ཀྱི་མཐོ་བ་དང་། དྲི་མ་མེད་པ་དང་། མུན་པ་སེལ་བ་དང་། དགའ་བའི་དབྱངས་དང་། གཞོན་ནུ་རིན་ཆེན་དང་། རྡོ་རྗེ་རྣམ་པར་གནོན་པ་དང་། གར་མཁན་དང་། བྲོའི་རྒྱ་མཚོ་དང་། ཐོགས་མེད་བཀོད་
པ་དང་། པདྨོ་དགའ་བ་དང་། ས་ལི་དབང་ཕྱུག་དང་། རིན་ཆེན་སྤུངས་པ་དང་། སྤྲིན་གྱི་ཕྲེང་བ་དང་། ཡིད་འོང་མེ་ཏོག་དང་། ཡེ་ཤེས་སྒྲོན་མ་དང་། སྤོབས་པ་བརྩེགས་པ་དང་། ཁ་ལོ་སྒྱུར་བ་དང་། དྲན་པའི་དབང་ཕྱུག་དང་། པདྨའི་བློ་གྲོས་དང་། ལས་བྱེད་པའི་སྟོབས་དང་། སྙིང་པོ་
བློ་གྲོས་རྣམས་སོ། །དེ་དག་ཀུན་ཀྱང་རང་རང་གི་བཙུན་མོའི་ཚོགས་དང་འཁྲིལ་བའི་ཚུལ་གྱིས་བཞུགས་སོ། །གཞན་ཡང་པདྨོ་འཕྲོ་བ་དང་། པདྨ་འཛིན་པ་དང་། པདྨ་སྒྲོགས་པ་དང་། པདྨ་བསྐྱོད་པ་དང་། པདྨ་ཚིམ་བྱེད་དང་། པདྨ་འཐོར་བ་དང་། པདྨ་སྣང་
བ་དང་། པདྨ་དབང་བྱེད་རྣམས་ཀྱང་རང་རང་གི་ཕྲིན་ལས་ཀྱིས་བཀོད་དོ། །གཞན་ཡང་འཇིགས་བྱེད་ཆེན་པོ་བྱམས་པའི་དབང་ཕྱུག་བརྩེ་བའི་དབང་ཕྱུག་དང་། པད་གྲོལ་དབང་ཕྱུག་དང་། གྲོལ་བའི་དབང་ཕྱུག་དང་། སྦྱིན་པའི་དབང་ཕྱུག་དང་། སྤྱོད་པའི་
དབང་ཕྱུག་དང་། སྨྲ་བའི་དབང་ཕྱུག་དང་། མཐུན་པའི་དབང་ཕྱུག་ཀྱང་རང་རང་གི་རིག་པ་བཅས་པས་འཁོད་དོ། །དེ་དག་ལ་སོགས་པའི་འཁོར་གྱི་ཚོགས་རྣམ་པར་འབྱེད་པ་དང་། འབྱེད་པ་མེད་པར་སྣང་བའི་སངས་རྒྱས་དང་། བྱང་ཆུབ་སེམས་དཔའི་ཚོགས་
འབུམ་ཕྲག་བཅུ་གཉིས་དང་། ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཏིང་ངེ་འཛིན་གྱི་རྒྱལ་པོ་པདྨ་ཆགས་པའི་སྤྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཐུགས་ཀའི་དཔལ་བེའུ་ལ་སོགས་པའི་གནས་རྣམས་
Vol. 99 · folio 78b
ནས། འོད་ཟེར་གྱི་དཀྱིལ་འཁོར་གསལ་བར་བྱེད་པ་བཀྱེ་བས། དེས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་གསལ་བར་བྱས་པ་དང་། ཡ་མཚན་གྱི་ལྟས་ཆེན་པོ་བཅོ་བརྒྱད་འབྱུང་བར་གྱུར་ཏོ། །དེ་ནས་སྣོད་དང་བཅུད་དུ་བཅས་པའི་གསལ་ཞིང་འབར་བར་གྱུར་
ནས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་དམ་བསྐུལ་ཏེ། དེ་དག་གིས་ཀྱང་ཆོ་འཕྲུལ་རྣམ་པར་འཁོད་པ་ཞེས་བྱ་བ་ཕྱག་རྒྱ་ཆེན་པོས་རང་གིས་འཁོར་ལོའི་ཁྱམས་དག་ཏུ་སྤྲོ་བར་བྱེད་མཛད་དོ། །དེ་ཡང་ཞིང་ཁམས་རྣམ་པར་སྦྱོང་ཞིང་
སླར་འཁོར་གྱི་འཁོར་དང་བཅས་པ་འོད་ཟེར་འཕྲོ་བའི་གནས་སུ་འདུས་སོ། །དེ་ལྟར་འཆད་པའི་རྒྱ་ཆེན་པོའི་རྣམ་པར་རོལ་འཕྲུལ་བས་རོལ་ཞིང་ཞལ་འཛུམ་པ་དང་བཅས་པར་གྱུར་ནས་བཞུགས་པ་ལས་འཁོར་ཐམས་ཅད་ཀྱིས་ཐེ་ཚོམ་སྐྱེས་པར་གྱུར་ཏོ། །དེའི་དུས་ན་
མཐུན་པར་གླེང་བ་ནི། ཀྱེ་མ་ཧོ་ཡ་མཚན་སྣ་ཚོགས་ཆོས། །རྒྱལ་བའི་མཛད་པ་ཡ་མཚན་ཆེ། །ཆོ་འཕྲུལ་དཔག་མེད་གྱུར་པ་ཡི། །དགོས་པའི་དོན་ཉིད་ཇི་ལྟ་བུ། །རྒྱུ་རྐྱེན་མེད་པར་སངས་རྒྱས་ནི། །གསང་གསུམ་དམ་ཚིག་སྤྲོ་མི་མཛད། །དེ་ཡི་མཚན་ཉིད་ཡང་
སྣང་བ། །གསང་བའི་དབང་པོ་བསྐུལ་བར་མཛོད། །ཁྱོད་ནི་རྒྱལ་བ་ཀུན་གྱི་སྲས། །དགོངས་དོན་རྒྱ་མཚོ་དོན་མངའ་བ། །བཀའ་ཡི་བདག་པོ་དགོངས་མཛོད་དག །ལེགས་པར་ཞུ་ཞིང་གསོལ་གདབ་མཛོད། །དེ་ནས་གསང་བའི་བདག་པོ་ལག་ན་རྡོ་རྗེས་ལྔ་བརྒྱ་
དང་བཅས་པས་གཞན་དག་གི་ཐེ་ཚོམ་རྣམ་པར་གཅོད་པ་དང་རང་ཉིད་ཀྱི་སྒོ་གསལ་བར་བྱ་བའི་ཕྱིར་མདུན་རོལ་ནས་ལངས་ཏེ། ཕྱོགས་བཅུ་ནས་འཁོད་ནས་མཆོད་པའི་ཚོགས་རྒྱ་ཆེན་པོ་བཀོད་ཅིང་རྒྱལ་བ་ཀུན་ལ་མཆོད་དེ། ལན་བརྒྱ་རྩ་བརྒྱད་དུ་བསྐོར་བ་བྱས་
ཤིང་རྩེ་གཅིག་ཏུ་གུས་པས་ཕྱག་འཚལ་ནས། དགའ་བའི་བཞིན་གྱིས་གསོལ་བ་བཏབ་པ། ཨེ་མ་རྒྱལ་བ་ཉིད་ཀྱི་སྐུ། །རྣམ་པར་འཕྲུལ་པའི་དཀྱིལ་འཁོར་དག །ཏིང་འཛིན་ཡེ་ཤེས་གནས་ལས་བྱུང་། །དགའ་མཛད་དཀྱིལ་འཁོར་འདུས་པ་དང་། །བྱང་
Vol. 99 · folio 79a
ཆུབ་སེམས་སྤྲིན་ཆར་ཆེན་གྱིས། །ཉོན་མོངས་ལ་སོགས་སྦྱོང་མཛད་ཅིང་། །ཐུགས་རྗེ་ཆེན་པོ་ཡེ་ཤེས་ཀྱིས། །ཚོགས་པའི་འབྲས་བུ་ལེགས་སྨིན་མཛད། །སྐུ་མདངས་དགའ་བའི་བཞིན་བཅས་པས། །གསང་བའི་ཐེག་པ་བསྟན་དུ་གསོལ། །ཁྱོད་
ཀྱི་དགོངས་དོན་གཏིང་དཔག་དཀའ། །ཟབ་ཅིང་ཕྲ་ལ་རྒྱ་ཆེ་བས། །འཁོར་རྣམས་ཐེ་ཚོམ་རི་བོས་གནོན། །ཐུགས་རྗེ་ཆེ་མངའ་གསལ་བར་མཛོད། །འདི་དག་ཐམས་ཅད་བསྟན་པའི་སྣོད། །མགོན་པོ་བཏང་སྙོམས་ལྷུན་མངའ་མཛད། །དུས་འདིར་རྩོམ་པ་དོན་ཆེ་སྟེ། །སྨོན་
ལམ་འབྲས་བུ་མཐར་ཕྱིན་མཛོད། །དེ་སྐད་ཅེས་གསོལ་པ་དང་། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་ཀྱིས་སྟོང་གསུམ་གྱི་སྟོང་ཆེན་པོའི་བརྟན་གཡོའི་དཀྱིལ་འཁོར་ཐམས་ཅད་ཐུགས་མཉམ་པ་ཉིད་རྩེ་གཅིག་གི་སྒོ་ནས་གཟིགས་སོ། །རྣམ་པར་གཟིགས་ཀུན་དུ་གཟིགས།
དེ་ལྟར་དགོངས་ནས་དཀྱིལ་འཁོར་འདི་དག་ཐམས་ཅད་སྨྲ་བསམ་ལས་འདས་པར་སྣ་ཚོགས་རྣམ་པར་སྨྲོས་ཤིག །དེ་ཉིད་དངོས་པོ་དང་བར་གཟིགས་ནས། གཟིགས་པའི་མཐའ་དང་། དགོངས་པའི་མཐའ་དང་། མཛད་པའི་མཐའ་ཀུན་ལ་སྙོམས་པའི་ཏིང་ངེ་འཛིན་ལ་
སྙོམས་པར་བཞུགས་ཏེ། བཀོད་པ་དང་། རྣམ་པར་བཀོད་པ་དང་། རྣམ་པར་བཤད་པ་དང་། དགོངས་པ་དང་། རྣམ་པར་དགོངས་པ་དང་། རོལ་པ་དང་། རོལ་པ་ཆེན་པོ་དང་། མཛད་པ་དང་། སྣ་ཚོགས་མཛད་པས་ཀུན་དུ་སྤྲོ་བར་མི་བྱེད་དེ། འཇིག་རྟེན་དྲུག་གི་
རྣམ་པས་བསྡུས་པའི་སྟོང་གསུམ་གྱི་དངོས་པོ་འདི་དག །སངས་རྒྱས་ཀྱི་དཀྱིལ་འཁོར་འདི་ལས་གཞན་དུ་སྣང་བར་མི་དགོངས་སོ། །དེའི་དུས་དང་ས་དང་སའི་ཁྱད་པར་དང་། དཀྱིལ་འཁོར་བཀོད་པ་དག་ཀྱང་རྣམ་པར་མི་གཟིགས། ཀུན་དུ་མི་གཟིགས་ཤིང་དགོངས་
པ་ཡང་མི་འགོག་གོ། །དེ་དག་ནི་མཐར་ཡང་མི་གནས་ཤིང་ནམ་མཁའ་ལྟ་བུར་བཞུགས་སོ། །དེ་ནས་ཏིང་ངེ་འཛིན་དེ་ལ་ཞུགས་མ་ཐག་ཏུ་འཁོར་གྱི་དཀྱིལ་འཁོར་དེ་དག་ཀྱང་ཆོས་ཐམས་ཅད་ཀྱི་དཀྱིལ་འཁོར་གྱི་རང་བཞིན་ནམ་མཁའ་ལྟ་བུར་རྟོགས་པར་འགྱུར་རོ། །དེ་ནས་
Vol. 99 · folio 79b
ཡང་གསང་བའི་བདག་པོ་ལག་ན་རྡོ་རྗེ་ངོ་མཚར་གྱི་སྒོ་ནས་བསྐུལ་ཞིང་གཞན་དག་གི་དོན་ཐུགས་གཡོ་བར་མཛད་པའི་གླུས་གཡོ་སློང་བར་མཛད་དེ། ཚུལ་བན་དོན་གྱི་རྒྱལ་པོ་ཆེ། །འདྲེན་པ་ཀུན་གྱི་རྒྱུད་ཉིད་པས། །ནམ་མཁའ་ལྟ་བུའི་རྒྱུད་ཉིད་པས། །ནམ་མཁའ་ལྟ་བུའི་དཀྱིལ་འཁོར་ནས། །
ཐུགས་རྗེ་ཆེན་པོའི་ཡ་མཚན་སྟོན། །ཀྱེ་མའོ་མགོན་པོ་དོན་ཀུན་གནས། །ཞི་བའི་ལས་དམ་འཇུག་བྱེད་པ། །བྱང་སེམས་ཐུགས་རྗེའི་རླན་བྲལ་ལམ། །རྡོས་ཅན་ཆོས་དང་འགྲང་འགྱུར་ཅིང་། །ཞེས་གསོལ་བ་བཏབ་པ་ལས་ཀྱང་ཅི་ཡང་མི་གསུང་བར་བཞུགས་སོ། །དེ་ནས་ཡང་ཡུམ་
གཟི་ལྡན་པདྨོ་ཞེས་བྱ་བས་རྣམ་པར་མི་རྟོག་པའི་ཏིང་ངེ་འཛིན་ལས་སློང་བའི་གླུས་སྐུལ་བར་མཛད་དེ། མི་དམིགས་ཏིང་འཛིན་བསམ་འདས་བརྗོད་དང་བྲལ། །བདེ་བ་ཆེན་པོ་ཡེ་ཤེས་བྱང་ཆུབ་སེམས། །མི་དམིགས་ཐུགས་རྗེ་མི་འདའ་དམ་ཚིག་གིས། །རོལ་བའི་ཆོ་འཕྲུལ་རྒྱ་
ཆེན་བསྟན་དུ་གསོལ། །དེ་སྐད་ཅེས་ཡང་བསྐུལ་བའི་རྗེས། །མགོན་པོའི་གནས་རྣམས་ལ་དགོངས་ནས། །འོད་ཟེར་རྣམས་བཀོད་འཛུམ་མཛད་དེ། །འཁོར་བ་ལེགས་སྦྱིན་སྐབས་དབྱེ་མཛད། །ལེགས་སོ་ལེགས་སོ་རྡོ་རྗེ་ཅན། །པདྨོ་འཛིན་པའི་གྲོགས་བཅས་པས། །
ཡང་ཡང་བསྐུལ་བར་མཛད་པས་ན། །གནང་ཞིང་བསྟན་པར་མཛད་པ་ལ། །དགའ་བའི་སྤྱན་རྗེས་དང་བར་གྱིས། །གང་འདོད་རྟོགས་པ་ཞི་བར་མཛོད། །མ་འོངས་རྟོགས་པ་མཐའ་དག་རྣམས། །ཐུགས་རྗེ་ཤུགས་ཀྱིས་བཟུང་མཛད་དེ། །དོན་ཀུན་ཁྱབ་པའི་སྣང་བ་ཡིས། །
གཟུང་བར་བྱ་བའི་སྐབས་དབྱེ་མཛད། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བའི་རྟ་མཆོག་རོལ་པའི་རྒྱུད་ཆེན་པོ་ལས་རྣམ་པར་སྤྲུལ་པའི་ལེའུ་སྟེ་དང་པོའོ།། །།དེ་ནས་དགའ་ཞིང་འཁོར་འདུས་པས། །དགའ་
བའི་བཞིན་བཟངས་རྒྱས་མཛད་དེ། །གཙོ་བོས་ཇི་ལྟར་བཀའ་སྩལ་བཞིན། །ཐུགས་རྗེས་འབྱུང་བའི་དཀྱིལ་འཁོར་གཟུངས། །དེ་ནས་གཟིགས་ལྡན་པདྨོ་ཅན། །འཛུམ་མདངས་རྒྱས་པས་བསྐུལ་མཛད་དེ། །འོ་བྱེད་འཁྱུད་པ་ལ་སོགས་པ། །དགའ་བཞིན་
Vol. 99 · folio 80a
ཆགས་པར་རྣམ་པར་འགྱུར། །ཨེ་མ་རིག་པའི་རྒྱལ་པོ་ཁྱོད། །ཐུགས་རྗེ་ཆེན་པོ་ཉི་འོད་བཞིན། །ཐུགས་རྗེ་འབྱུང་བའི་དཀྱིལ་འཁོར་གཟུངས། །ཕྱོགས་རིས་མེད་པས་གོ་འབྱེད་པས། །ཡུལ་དུ་གྱུར་པ་ཀུན་རྒྱུད་དགོངས། །མི་དམིགས་ཆོ་འཕྲུལ་ནམ་
མཁའ་ལས། །བཀོད་པ་རྒྱ་མཚོ་སྤྲིན་ཕུང་བཞིན། །ཐུགས་རྗེ་སྤྲུལ་པའི་ཆར་ཆེན་པོས། །སྣ་ཚོགས་ལས་བརྒྱད་དག་པར་མཛོད། །དེ་ནས་གཙོ་བོ་རྡོ་རྗེ་འཆང་། །ཏིང་ངེ་འཛིན་ལས་བཞེངས་མཛད་དེ། །རང་གི་མཚན་མོས་རབ་མཛེས་པས། །རྒྱལ་པོ་ཟིལ་
གནོན་གཟི་བརྗིད་ཅན། །ཕྱག་གི་འཁོར་ལོ་རབ་བསྐོར་ཅིང་། །ཕྱོགས་རྣམས་ཀུན་དུ་གཟིགས་མཛད་དེ། །མི་དམིགས་ནམ་མཁའི་དབྱིངས་དག་ན། །རྡོ་རྗེ་སྤྲུལ་སྐུ་མངོན་ཕྱུང་ནས། །གཟི་ལྡན་པདྨོ་ཆེན་མོ་དང་། །རོལ་པའི་ཚུལ་དུ་བཞུགས་མཛད་དེ། །འཛུམ་
མིག་ཆགས་པའི་བཞིན་དག་གིས། །འཁོར་རྣམས་སློང་བའི་སྔགས་བརྗོད་དོ། །ཨོྃ་ཨཱཿཧཱུྃ་མ་ཧཱ་བྷསྨི་ཤ་ཀུ་རུ་བི་ན་ཧྲྀ་ད་ཡ་ཨྃ་བྷ་བ་ཧི་ཨ་ལ་ལ་ཧོ། །གཉིས་སུ་མེད་པའི་བྱང་སེམས་ཀྱིས། །དཀྱིལ་འཁོར་སྦྱོར་ཞིང་བསྡུ་བར་མཛོད། །བསོད་ནམས་ཡེ་ཤེས་ཚོགས་
རྫོགས་སྐུ། །རྡོ་རྗེ་གར་གྱི་རོལ་མཛད་ཅིང་། །དགའ་མཆོག་རྡོ་རྗེ་བྱང་ཆུབ་སེམས། །འཛུམ་ཞིང་འཁྱིལ་བའི་པདྨོའི་གནས། །དཀར་འཚེར་དག་པའི་རང་བཞིན་ཏེ། །དམར་པོ་དབང་དང་གཉིས་མེད་པར། །གསལ་ཁྱབ་ཀུན་དུ་སྤྲོས་པ་ལས། །དཀྱིལ་འཁོར་སྤྲུལ་པ་
མཐའ་ཡས་འཐོན། །ཞི་འགོག་མྱ་ངན་འདས་པ་དང་། །བྱང་ཆུབ་མགོན་གནས་ལམ་ཞེས་དག །གཉིས་མེད་གཉིས་སུ་སྦྱོར་མཛད་ཅིང་། །རང་གི་དཀྱིལ་འཁོར་གནས་ལ་བཀོད། །ངོ་མཚར་སྤྲུལ་པ་རྣམ་པར་རོལ། །བརྗིད་དང་བཅས་པས་གར་མཛད་ཅིང་། །འཛུམ་པར་
མཛད་དང་རོལ་པ་དང་། །ཀུན་དུ་འགྱིང་དང་སྤྱན་མཛེས་བལྟམ། །སྨིན་རིང་བསྐྱོད་ཅིང་བསྒྱུར་བ་དང་། །རྡོ་རྗེ་ཕུར་པས་གཡའ་བས་སློང་། །འདོར་ཞིང་སྐུམ་དང་འཇོག་ལྡེག་དང་། །རྣམ་པར་རོལ་པའི་གར་གྱིས་ཀྱང་། །རིགས་ཀྱི་ཕྲིན་ལས་སྣ་ཚོགས་སྤྲུལ། །ནམ་མཁའ་
Vol. 99 · folio 80b
ཀུན་ཏུ་ཁྱབ་པར་མཛད། །རྣམ་པར་རོལ་པའི་བདེ་འབྱུང་བར། །བྱང་ཆུབ་སེམས་སོགས་ཞི་ཞིང་གསལ། །རོལ་པའི་ཆར་ཉིད་མངོན་བབས་པས། །འཇིག་རྟེན་དྲུག་གི་ཕྱོགས་བཅུ་ན། །བརྟན་དང་གཡོ་བ་མ་ལུས་པའི། །སངས་རྒྱས་ཞིང་ཁམས་དག་བྱས་ནས། །བྱང་
ཆུབ་སེམས་ཚོགས་རོལ་པ་ལ། །བརྡེག་དང་འཁྱུད་དང་སྡོམ་པ་ལས། །སྦྱོར་དང་བསྟིམ་དང་མཉེས་པ་དང་། །ཀུན་དུ་རབ་དགྱེས་ཡེ་ཤེས་ཐིག །སྣ་ཚོགས་སྣང་བ་ཉི་མའི་འོད། །ཡང་དག་བདེ་ལ་རབ་གནས་མཛོད། །དེ་འདུས་པའི་ཆེ་ཚོགས་པའོ། །ཕྱོགས་བཅུ་ཀུན་
ནས་བཞེས་མཛད་དེ། །ཐབས་དང་ཤེས་རབ་བྱིན་བརླབས་པའི། །བྱང་སེམས་རྣམ་དག་རྒྱུན་གྱིས་མཆོད། །རྔ་དང་སིལ་སྙན་སྒྲ་སྒྲོགས་ཤིང་། །དབང་པོ་ཚིམ་པའི་རོལ་རྩེད་དང་། །གར་དབྱངས་གླུ་དྲུག་སྣ་ཚོགས་ཀུན། །སྟོང་གསུམ་གང་བར་གསུང་བྱས་ཏེ། །
བཅོམ་ལྡན་པདྨོ་བདེ་ཡང་བདེ། །གཟི་ལྡན་ཡུམ་དང་བཅས་པར་མཆོད། །ཨེ་མ་འདུས་པའི་ཚོགས་དབུས་ནས། །ཐུགས་རྗེ་ཆེ་མངའ་ཉི་དཀྱིལ་བཞིན། །འཁོར་ལོ་ཀུན་སྒྱུར་སྒྲོལ་མཛད་པས། །རང་གི་དཀྱིལ་འཁོར་རྒྱས་པར་མཛད། །རྡོ་རྗེ་འཆང་བའི་གསོལ་
འདེབས་ཀྱིས། །དཀྱིལ་འཁོར་དག་ལ་ལྷུན་གྲུབ་རྫོགས། །པདྨའི་དཔལ་ལྡན་སེམས་པ་ཆེ། །ཕྲིན་ལས་ཡེ་ཤེས་གནས་ཀུན་སྦྱོང་། །ཁྱོད་ཞབས་བསྐྱེད་པ་ཐུགས་རྗེའི་སྟོབས། །ཁམས་གསུམ་མ་ལུས་དག་པ་ཡི། །དེ་བཞིན་ཉིད་ཀྱི་ཡེ་ཤེས་མཆོག །མགོན་
པོ་བཀའ་དྲིན་མཛད་པས་ལེགས། །དེ་སྐད་གསོལ་བཏབ་དགྱེས་པར་འགྱུར། །ཕྱག་རྒྱ་ཆེན་པོའི་གནས་ལ་བཞུགས། །དེ་ནས་དགའ་བའི་བྱང་ཆུབ་སེམས། །སྔོན་གྱི་རྒྱུད་དང་ལམ་བཞི་ལས། །སྤྲུལ་པའི་བྱང་ཆུབ་སེམས་དཔའ་དང་། །སྔོན་གྱི་རྒྱུད་དང་
ལམ་གྲོགས་རྣམས། །དགོངས་ཤིང་ཐུགས་རྗེའི་ཡེ་ཤེས་ཐུགས། །རང་བཞིན་གནས་ནས་ཀུན་དགོངས་ཏེ། །ཕྱོགས་བཞི་ནས་ནི་བསྐུལ་བར་མཛད། །ཀྱེ་ཀྱེ་མཆོག་གསུམ་བདེ་བའི་སྐུ། །བྱམས་པའི་ཐུགས་མངའ་སྐུ་གསལ་མཛད། །རྡོ་རྗེ་རྒྱལ་པོ་བྱང་
Vol. 99 · folio 81a
ཆུབ་སེམས། །བདག་དགོངས་འགྲོ་བའི་དོན་ཆེན་མཛད། །ཀྱེ་ཀྱེ་ཡོན་ཏན་རིན་ཆེན་ཚོགས། །ཐུགས་རྗེ་མཉམ་ཉིད་ཡེ་ཤེས་ཆེ། །རྒྱལ་པོ་འཁོར་ལོ་བྱང་ཆུབ་ཉིད། །དཀྱིལ་འཁོར་སྣ་ཚོགས་སྤྲུལ་པའི་མཛོད། །ཀྱེ་ཀྱེ་རྣམ་པར་དག་པའི་སྐུ། །
དགའ་བ་རྒྱ་མཚོ་འབྱུང་བའི་གནས། །སོ་སོའི་ཡེ་ཤེས་སྣ་ཚོགས་འབྱེད། །ཆོས་རྣམས་ཀུན་གྱི་དེ་བཞིན་ཉིད། །ཀྱེ་ཀྱེ་འགྲོ་བའི་དོན་ཆེན་བདག །བཏང་སྙོམས་མི་འདོར་སྣ་ཚོགས་དོར། །བྱ་བ་གྲུབ་པའི་ཏིང་འཛིན་མཆོག །ཕྱོགས་བཅུའི་དཀྱིལ་འཁོར་རྣམ་དག་
སྟོན། །རང་དགའི་བསྐུམ་པས་གཡོ་མཛད་དེ། །ཕྱོགས་བཞི་བྱང་ཆུབ་དགའ་གནས་འཇུག །ཀྱེ་མའི་འགྲོ་རྣམས་དེ་བཞིན་ཉིད། །བྱང་ཆུབ་སེམས་ཀྱི་རྣམ་འཕྲུལ་ལས། །ཉོན་མོངས་གཟུང་འཛིན་སྒྲིབ་པ་ཡིས། །རང་གི་མཐའ་ལམ་འགེས་པར་བྱེད། །འདི་དག་
ཐུགས་རྗེའི་གནས་སུ་རུང་། །ཡེ་ཤེས་གསལ་བའི་ཐབས་མང་པོས། །ཐམས་ཅད་དུས་གཅིག་བསྒྲལ་བྱས་ནས། །རང་གི་བདེ་ཆེན་དོན་སྟོན་མཆོག །ཞེས་གསུངས་པདྨའི་རིག་པ་འཛིན། །སངས་རྒྱས་སྲས་བཅས་དགའ་བར་མཛད། །དེ་བཞིན་གཤེགས་པ་
ཐམས་ཅད་ཀྱི་དགོངས་པ་བླ་ན་མེད་པ་གསང་བ་དཔལ་རྟ་མཆོག་རོལ་པའི་རྒྱུད་ལས་ཐུགས་རྗེ་སྤྲུལ་པའི་རོལ་པའི་ལེའུ་སྟེ་གཉིས་པའོ།། །།དེ་ནས་བྱང་ཆུབ་སེམས་དཔའི་གཙོ། །རྡོ་རྗེ་འཆང་བ་སྟན་ལས་ལངས། །བདེ་གཤེགས་བསྔགས་པ་རྗོད་བྱེད་ཅིང་། །བསྐུམ་པས་
དབྱངས་ཀྱིས་གསོལ་བ་བཏབ། །ཀྱེ་མ་ཧོ་མཆོག་གསུམ་དམ་ཚིག་སྐུ། །ཡེ་ཤེས་བླ་ན་མེད་པའི་བདག །བྱང་ཆུབ་སེམས་ཀྱི་དཀྱིལ་འཁོར་ཉིད། །རྣམ་འཕྲུལ་ཐུགས་རྗེའི་དུས་ཉིད་པས། །རིགས་ཀྱི་འཁོར་ལོ་དཔག་མེད་སྐུ། །དེ་རིང་བཀྲ་ཤིས་ཕུན་སུམ་ཚོགས། །ཐུགས་
རྗེ་ཆེན་པོ་ཡལ་འདོར་ན། །ཅི་ཕྱིར་ཐེག་ཆེན་མཆོག་ཏུ་སྔགས། །ཡང་དག་ཞུས་པའི་ཚིག་གསན་ནས། །ཐུགས་རྗེའི་དཀྱིལ་འཁོར་གཟིགས་པར་མཛད། །མགོན་པོའི་པདྨའི་སྐུ་དེ་ཉིད། །གཟི་ལྡན་ཡུམ་དང་རོལ་མཛད་ཅིང་། །དྲི་མེད་ཡེ་ཤེས་ཕྱོགས་གཟིགས་ཤིང་། །
Vol. 99 · folio 81b
གཉིས་མེད་བྱང་ཆུབ་སེམས་ཀྱི་དཀྱིལ་འཁོར་གསལ། །ཐེག་པ་གསང་ཆེན་ཆེར་འབྱུང་བའི། །ལམ་འདི་དཔལ་ལྡན་རོལ་མོའི་མཆོག །སངས་རྒྱས་སྲས་བཅས་སྡུད་མཛད་དེ། །གཞན་འཕྲུལ་གནས་ཚོགས་གཡོ་མཛད་ཅིང་། །སྟོང་གསུམ་འདི་དག་སྤྱོད་
མཛད་ཅིང་། །ཏིང་ངེ་འཛིན་ལ་སྙོམས་འཇུག་སྟེ། །སྐུ་ལས་འོད་ཟེར་སྤྲོ་བར་མཛད། །དེས་ཁྱབ་རིགས་ཀྱི་དཀྱིལ་འཁོར་གསལ། །ཡེ་ཤེས་འོད་མདངས་སེམས་དཔའི་སྐུ། །གནས་ལྔར་གསང་བའི་སྔགས་ཀྱིས་གཞུག །ཕྱག་རྒྱ་ཆེན་པོ་ཡོངས་རྫོགས་སྐུ། །
ཞལ་གསུམ་ཕྱག་དྲུག་དགའ་བའི་མདངས། །དམར་གསལ་པདྨ་རཱ་གའི་མདངས། །གཡས་གཡོན་ཞལ་གཉིས་སྔོ་དང་སེར། །རིགས་རྒྱན་མཚན་མ་ཀུན་གྱིས་མཛེས། །ཕྱག་ན་པད་སྤོང་བུམ་པ་དང་། །རྡོ་རྗེ་རྩེ་ལྔ་དཔལ་བེའུ་དང་། །མཐའ་མས་མདའ་
གསོར་གཞུ་འཛིན་པའོ། །རིན་ཆེན་སྣ་ཚོགས་ན་བཟའ་དང་། །ཕྱག་རྒྱའི་ཡུམ་བཅས་རོལ་པ་མཛད། །གཞལ་ཡས་ཁང་པ་སྒོ་བཞི་དང་། །རིན་ཆེན་སྣ་ཚོགས་རྟ་བབས་བཅས། །དྲ་བ་དྲ་ཕྱེད་མུ་ཏིག་ཕྲེང་། །བྷན་དྷ་དྲིལ་བུ་སོགས་ཀྱིས་སྤྲས། །དབུས་
ཀྱི་དཀྱིལ་འཁོར་ཆེར་འཕགས་པའི། །ཕོ་བྲང་ཀ་བ་གདུང་རྣམས་ལ། །པདྨོ་རྡོ་རྗེ་སོགས་པས་སྤྲས། །འདོད་པའི་ཡོན་ཏན་ཕུན་སུམ་ཚོགས། །གནས་རྣམས་ཀུན་དུ་རིན་ཆེན་ཁྲི། །པདྨ་འཁོར་ལོ་ཉི་ཟླས་མཚན། །ཕྱི་རོལ་བར་ཁྱམས་འཁོར་བ་དང་། །སྣོད་
རྣམས་ཀུན་དུ་པདྨ་ལ། །ཐབས་དང་ཤེས་རབ་བྱེ་བྲག་གིས། །ཉི་མ་ཟླ་བ་རྐྱང་པའོ། །དེ་ནས་པདྨོ་རྣམ་དག་ཀུན། །དབུས་ཀྱི་གདན་ལ་བཞུགས་མཛད་དེ། །དགྱེས་པའི་གར་དབྱངས་བསྐྱོད་པའི་མཐུས། །ཐབས་དང་ཤེས་རབ་རྫོགས་པར་མཛད། །དེ་ཚེ་
ཐུགས་མཆོག་བྱང་ཆུབ་སེམས། །མཁའ་ཀློང་རྣམ་པར་དག་པས་ན། །རིག་པ་བདེ་བ་ཆེན་པོའི་སྐུ། །སྣ་ཚོགས་སྣ་ཚོགས་ཤར་བ་དེ། །གསུང་ཉིད་ཡི་གེ་འཁོར་ལོའི་ཚོགས། །འབར་བ་འོད་ཟེར་རྩེ་ལྔ་བ། །ཆོ་གའི་ཡན་ལག་རིམ་བཞིན་དུ། །ཐུགས་
Vol. 99 · folio 82a
ཀྱི་མཚན་མ་དམ་ཚིག་བྱ། །སྔགས་བཅས་འཕྲོ་ཞིང་འདུ་བའི་ཚུལ། །རྒྱལ་པོ་བདེར་གཤེགས་ཡབ་ཡུམ་དང་། །བྱང་ཆུབ་སེམས་དཔའ་སེམས་མ་དང་། །ལས་མཛད་ཁྲོ་བོ་ཡབ་ཡུམ་དང་། །ཕྱག་རྒྱ་ཆེན་པོའི་སྐུར་གྱུར་ནས། །རིགས་
ཀྱི་རྒྱལ་ཕྲེང་མཚན་མས་མཛེས། །རང་གི་དཀྱིལ་འཁོར་གནས་བཞུགས་ཤིང་། །རྡོ་རྗེ་གསང་བའི་གྲལ་དུ་འཁོད། །དེ་ཚེ་མགོན་པོ་བདེ་ཆེན་པོ། །རིགས་ཀུན་བདག་འགྱུར་ཞེས་བྱ་བས། །པདྨོ་རྣམ་པར་འཕྲུལ་བ་ཡི། །དཀྱིལ་འཁོར་ཆེན་པོ་འབྱིན་
པར་མཛད། །བྱང་སེམས་ཀམ་ལས་རྣམ་འཕྲུལ་བའི། །བདེར་གཤེགས་འོད་ཟེར་སྣང་བའི་སྐུ། །ཞལ་དང་ཕྱག་ལ་སོགས་པའི་རྒྱན། །གཙོ་བོའི་ཆ་ལུགས་ཅི་ལྟ་བར། །རང་འོད་ཡུམ་དང་འཁྲིལ་བར་མཛོད། །བཀྲ་ཤིས་མཚན་ལྡན་བདེ་བ་ལ། །རཱ་ག་པདྨོ་ཧཱུྃ་ཞེས་པས། །
སྔགས་མཆོག་ཡི་གེ་འབྲུ་བརྒྱད་དེ། །ལས་ཀུན་གྲུབ་པར་མཛད་པ་ཡིན། །གང་གི་པདྨ་ཤ་རི་དང་། །བྷུ་དྷ་ཧཱུྃ་གིས་བསྣན་བྱས་ན། །ཞི་རྒྱས་དབང་དྲག་ལས་ཀུན་དང་། །གྲུབ་ཆེན་བརྒྱད་ཀྱི་ཚོགས་སོག་རྣམས། །སྦྱོར་བ་ཙམ་གྱིས་གྲུབ་འགྱུར་ཞིང་། །ཡུན་རིངས་གནས་
པ་གནས་པ་ཡིན། །འབྱིན་པའི་དུས་སུ་གསང་སྔགས་ལ། །ཡི་གེ་ཛ་ཡིས་གདགས་བྱས་ནས། །རྣམ་འཕྲོ་རིགས་ཀྱི་དཀྱིལ་འཁོར་སྦྱོར། །རིགས་བདག་སྐུ་གནས་དགྱེས་པར་བཞུགས། །ཐུགས་རྗེ་སྐུལ་བའི་གླུ་དང་སྔགས། །འོད་ཟེར་ཚོགས་ཀྱིས་སྐུལ་བ་མཛོད། །
དམ་ཚིག་གསུམ་སྟོན་སྔགས་ཀྱི་མཐུས། །དགྱེས་ཆགས་བརྟན་པས་གཟི་དང་ལྡན། །ཨོྃ་རྣམ་དག་པདྨོ་བདེ་བའི་དབྱིངས། །ཡེ་ཤེས་བྱིན་ལས་གསལ་བའི་མཆོག །དཀྱིལ་འཁོར་གསང་གསུམ་དམ་ཚིག་ཆེ། །མཉམ་ཉིད་རིགས་བདག་ཐུབ་པ་ཆེ། །བྱིན་བརླབས་
འདོར་བར་མི་མཛད་པས། །སངས་རྒྱས་རྣམས་ཀྱི་སྐུ་གསུང་ཐུགས། །གསལ་མཛད་གཉིས་སུ་མེད་པའི་སྐུ། །རང་གི་ངོ་བོས་གནས་པ་ཡིན། །གཙོ་བོ་སྔགས་ཀྱིས་བསྐུལ་བྱས་ཏེ། །འོད་ཟེར་རྒྱན་བཅས་ཐུགས་ཀར་བསྡུས། །ཡི་གེ་ཨཱ་ནས་ཨཿའི་བར། །བཅུ་
Vol. 99 · folio 82b
དྲུག་འོད་ཟེར་འཕྲོ་བྱས་པས། །འགྲོ་ཀུན་སངས་རྒྱས་སྐུར་བཀོད་ཅིང་། །རིགས་མཐུན་དཀྱིལ་འཁོར་ཀུན་གསལ་འགྱུར། །སྔགས་ཀྱི་འོད་ཟེར་སྒྲར་བཅས་པས། །ཆོས་རྣམས་བཅུ་དྲུག་དག་པའི་དབྱིངས། །རང་གི་གནས་སུ་བཀོད་བྱས་པས། །མཚན་མཆོག་སུམ་ཅུ་རྩ་
གཉིས་རྫོགས། །དེ་བཞིན་ཀཱ་ནས་ཀྵ་ཡི་བར། །སུམ་ཅུ་རྩ་བཞིའི་རིམ་བཞིན་གསལ། །བརྙན་པའི་ཡི་གེ་དྲུག་དང་བཅས། །འོད་འཕྲོས་ཐམས་ཅད་སངས་རྒྱས་སྐུ། །ཡེ་ཤེས་དཀྱིལ་འཁོར་གསལ་བྱས་ནས། །སྔགས་ཀྱི་འོད་ཟེར་སྒྲར་བཅས་ནས། །ཆོས་མང་
ཡེ་ཤེས་ཟག་པ་མེད། །སླར་ཉིད་སྐུ་ཡི་གནས་ཞུགས་པས། །དཔེ་བྱད་བཟང་པོ་བརྒྱད་ཅུ་རྫོགས། །གཞན་ཡང་རིན་ཆེན་སྣ་བདུན་དང་། །བཀྲ་ཤིས་བརྒྱད་སོགས་ཀུན་གྱིས་སྤྲས། །ཁྃ་ལས་རྣམ་འཕྲུལ་ཆེ་མཐའ་ཡས། །ཞལ་གཅིག་ཕྱག་བཞི་དཀར་དམར་
མདངས། །པདྨ་སོགས་དང་རལ་གྲི་འཛིན། །ཆོས་ཀྱི་སྣང་བའི་རྒྱན་གྱིས་བསྒྲུབས། །པདྨ་རྒྱན་འབྲིང་རང་བཞིན་མཆོག །ཤར་གྱི་དཀྱིལ་འཁོར་གནས་ལ་བཞུགས། །གྃ་ལས་སྤྲུལ་པའི་ཆོས་དབང་ཕྱུག །དམར་སེར་ཞལ་གཅིག་ཕྱག་གཉིས་པ། །པདྨའི་ཕྲེང་བ་
བུམ་པ་འཛིན། །དཀྱིལ་འཁོར་གནས་སུ་བཞུགས་པའོ། །གྷྃ་ལས་སྤྲུལ་པའི་ཆགས་མེད་འོས། །ཞལ་གཅིག་ཕྱག་གཉིས་བྱུ་རུའི་འོད། །པད་གནས་གླེགས་བམ་མེ་ལོང་འཛིན། །ནུབ་ཀྱི་དཀྱིལ་འཁོར་གནས་བཞུགས་པའོ། །ངྃ་ལས་སྤྲུལ་པའི་སྤྱན་དག་
མ། །ཞལ་གཅིག་ཕྱག་གཉིས་བཙོད་ཀྱི་མདོག །རིན་ཆེན་ཕྲེང་བས་བསིལ་ཡབ་འཛིན། །བྱང་གི་དཀྱིལ་འཁོར་གནས་བཞུགས་པའོ། །ཙྃ་ལས་སྤྲུལ་པའི་མི་བསྐྱོད་པ། །ཞལ་གཅིག་ཕྱག་བཞི་ཆུ་ཤེལ་མདོག །རྡོ་རྗེ་དྲིལ་འཛིན་འཁྲིལ་པའི་ཚུལ། །
དཔལ་བེའུ་བུམ་སོགས་འོད་ཕྲེང་རྒྱན། །ཚྃ་ལས་སྤྲུལ་པའི་རྟ་དབང་ཕྱུག །ཞལ་གཅིག་ཕྱག་བཞི་བཻ་ཌཱུརྱ། །རིན་ཆེན་སྙེ་མ་དུང་ཕོར་འཛིན། །ལྷོ་ཡི་དཀྱིལ་འཁོར་གནས་ལ་བཞུགས། །ཛྃ་ལས་སྤྲུལ་པའི་འབྲུག་སྒྲ་ནི། །ཞལ་གཅིག་ཕྱག་གཉིས་གུར་
Vol. 99 · folio 83a
གུམ་མདོག །རིན་ཆེན་ཆག་ཤིང་འགུ་དྷེ་འཛིན། །ནུབ་ཀྱི་དཀྱིལ་འཁོར་གནས་ལ་བཞུགས། །ཉྃ་ལས་སྤྲུལ་པའི་དྲི་མེད་དཔལ། །ཞལ་གཅིག་ཕྱག་བཞི་མར་གད་མདོག །རིན་ཆེན་པད་སྲུངས་ཟ་མ་ཏོག །བྱང་གི་དཀྱིལ་འཁོར་གནས་ལ་
བཞུགས། །ཏྃ་ལས་སྤྲུལ་པའི་རིན་ཆེན་དབྱངས། །ཞལ་གཅིག་ཕྱག་བཞི་གསེར་གྱི་མདོག །རིན་ཆེན་དྲིལ་བུ་ཡུམ་དང་འཁྲིལ། །རིན་ཆེན་མཛོད་སྤུངས་འཁོར་ལོ་སོགས། །ཐྃ་ལས་སྤྲུལ་པའི་ནམ་མཁའི་མདོག །ཞལ་གཅིག་ཕྱག་བཞི་སྔོ་སྐྱའི་མདངས། །
རིན་ཆེན་གླིང་བུ་པདྨོ་འཛིན། །ཤར་གྱི་དཀྱིལ་འཁོར་གནས་ལ་ཞུགས། །དྃ་ལས་སྤྲུལ་པའི་དྲ་བ་ཅན། །ཞལ་གཅིག་ཕྱག་བཞི་མཐིང་གའི་མདོག །རིན་ཆེན་ཕྲེང་དང་པདྨོ་འཛིན། །ལྷོ་ཡི་དཀྱིལ་འཁོར་གནས་ལ་བཞུགས། །དྷྃ་ལས་སྤྲུལ་པའི་དཀོན་མཆོག་
རྒྱན། །ཞལ་གཅིག་ཕྱག་བཞི་དམར་སྐྱའི་མདངས། །ཆོས་ཀྱི་རྒྱལ་མཚན་རྒྱུད་མངས་འཛིན། །ནུབ་ཀྱི་དཀྱིལ་འཁོར་གནས་ལ་བཞུགས། །ནྃ་ལས་སྤྲུལ་པའི་རིན་ཆེན་ཏོག །ཞལ་གཅིག་ཕྱག་བཞི་མ་ར་ཏ། །དགོས་འདོད་བུམ་པ་དཔག་བསམ་ཤིང་། །
བྱང་གི་དཀྱིལ་འཁོར་གནས་ལ་བཞུགས། །ཊྃ་ལས་སྤྲུལ་པ་ཀུན་དུ་སྣང་། །ཞལ་གཅིག་ཕྱག་བཞི་གསེར་གྱི་མདོག །འཁོར་ལོ་དྲིལ་འཛིན་ཡུམ་དང་བུམ་པ་འཛིན། །གཙུག་ཏོར་དྲི་མེད་རྡོ་རྗེ་འཛིན། །ཐྃ་ལས་སྤྲུལ་པའི་འོད་ཀྱི་དཔལ། །ཞལ་གཅིག་ཕྱག་བཞི་
ཤེལ་གྱི་མདོག །འཁོར་ལོ་དྲ་བ་རལ་གྲི་འཛིན། །ཤར་གྱི་དཀྱིལ་འཁོར་གནས་ལ་བཞུགས། །དྃ་ལས་སྤྲུལ་པའི་དགའ་དབང་ཕྱུག །ཞལ་གཅིག་ཕྱག་བཞི་ཉི་མའི་མདངས། །འཁོར་ལོ་རྒྱལ་མཚན་དགའ་བའི་མཛོད། །ལྷོ་ཡི་དཀྱིལ་འཁོར་གནས་ལ་
བཞུགས། །ཏྃ་ལས་སྤྲུལ་པའི་ཆོ་འཕྲུལ་བཀོད། །ཞལ་གཅིག་ཕྱག་བཞི་དམར་སྐྱའི་མདངས། །ཉི་མའི་འོད་ཕྲེང་རྡོ་རྗེས་སྤྲས། །ནུབ་ཀྱི་དཀྱིལ་འཁོར་གནས་ལ་བཞུགས། །ནྃ་ལས་སྤྲུལ་པའི་རྣམ་པར་གཟིགས། །ཞལ་གཅིག་ཕྱག་གཉིས་ལྗང་སྐྱའི་མདངས། །
Vol. 99 · folio 83b
ཀུ་ཤའི་ཆུན་པོའི་ཨ་མྲའི་མདངས། །བྱང་གི་དཀྱིལ་འཁོར་གནས་ལ་བཞུགས། །པྃ་ལས་སྤྲུལ་པའི་དོན་ཡོད་པ། །ཞལ་གཅིག་ཕྱག་བཞི་ལྗང་སྔོའི་མདོག །རྒྱ་གྲམ་དྲིལ་བཅས་ཡུམ་དང་འཁྲིལ། །རྡོ་རྗེ་གདེངས་པོས་རལ་གྲི་འཛིན། །ཕྃ་ལས་སྤྲུལ་པའི་བརྩོན་
འགྲུས་འཁྱུགས། །ཞལ་གཅིག་ཕྱག་བཞི་ཀར་ཏི་ཀ །རྒྱ་གྲམ་ཕྲེང་བ་རྩེ་གསུམ་འཛིན། །ཤར་གྱི་དཀྱིལ་འཁོར་གནས་ལ་བཞུགས། །བྃ་ལས་སྤྲུལ་པའི་ལས་ཆེན་པོ། །ཞལ་གཅིག་ཕྱག་བཞི་སེར་སྐྱའི་མདོག །པདྨའི་ཕྲེང་བ་ནོར་བུ་འཛིན། །ལྷོ་ཡི་དཀྱིལ་
འཁོར་གནས་ལ་བཞུགས། །བྷྃ་ལས་སྤྲུལ་པའི་གནོད་སྦྱིན་འདུལ། །ཞལ་གཅིག་ཕྱག་བཞི་པདྨའི་མདངས། །ཕྱག་ན་རྡོ་རྗེ་མཆེ་བ་འཛིན། །ནུབ་ཀྱི་དཀྱིལ་འཁོར་གནས་ལ་བཞུགས། །མྃ་ལས་སྤྲུལ་པའི་སྣ་ཚོགས་དམ། །ཞལ་གཅིག་ཕྱག་བཞི་ལྗང་སེར་མདངས། །
ཟླ་བ་རིན་ཆེན་དབྱུག་པ་འཛིན། །བྱང་གི་དཀྱིལ་འཁོར་གནས་ལ་བཞུགས། །བདེར་གཤེགས་རྒྱལ་བ་དེ་དག་ཀྱང་། །ཙཀྲ་སྒྱུར་རྒྱལ་མ་ལུས་དང་། །མཚན་དང་དཔེ་བྱད་སྣ་ཚོགས་རྒྱན། །རིགས་བཙུན་བཙུན་མོ་མཛེས་པར་བྱ། །ཡང་སྤྲུལ་བྱམས་པའི་དབང་
ཕྱུག་ནི། །ཞལ་གཅིག་ཕྱག་བཞི་གངས་རི་མདོག །རྡོ་རྗེ་གདེངས་དབྱུག་རལ་གྲི་དང་། །ཏྲི་ཤཱུལ་ཐོད་བཅས་པདྨའི་ལྕུག །རྔམ་བརྗིད་འཁོར་བཅས་ཡུམ་དང་འཁྲིལ། །དྲག་པོའི་རྒྱན་ཆ་ཤར་གྱི་སྒོ། །ཁྭ་ལས་སྤྲུལ་པ་རྩེ་བའི་དབང་། །ཞལ་གཅིག་ཕྱག་བཞི་
གསེར་གྱི་མདོག །རིན་ཆེན་དབྱུག་པ་པདྨོ་དང་། །ཐོད་རྔ་རྡོ་རྗེ་མྱུ་གུའོ། །རྃ་ལས་སྤྲུལ་པའི་རྣམ་གྲོལ་དབང་། །ཞལ་གཅིག་ཕྱག་བཞི་དམར་མདངས་གསལ། །པདྨ་དང་ནི་དྲིལ་བུ་དང་། །ཐོད་སྤྲུལ་རས་སྔོན་བ་དན་འཛིན། །ལྃ་ལས་སྤྲུལ་པའི་འགྲོ་དབང་ཕྱུག །
ཞལ་གཅིག་ཕྱག་བཞི་ལྗང་གུའི་མདོག །རྡོ་རྗེ་རྒྱ་གྲམ་པདྨོ་དང་། །གྲི་གུག་གཏུན་ཤིང་ཕྲེང་བ་ཅན། །རིན་ཆེན་ཕྲེང་བས་མཛེས་བྱས་ནས། །འཁོར་བཅས་རྔམ་པའི་མདངས་བཅས་པས། །ལྷོ་ལ་སོགས་པའི་སྒོ་བཞི་རུ། །གཞན་འཇིགས་དྲག་པོའི་ལས་ཀྱིས་
Vol. 99 · folio 84a
འཁོད། །ཤྃ་ལས་སྤྲུལ་པའི་བྱིན་དབང་ཕྱུག །ཞལ་གཅིག་ཕྱག་བཞི་དཀར་དམར་འོད། །རྩེ་གསུམ་བྷན་དྷ་རིན་ཆེན་འཁྲིལ། །མི་ཡི་ཐོད་པ་རི་མོས་མཚན། །ཥྃ་ལས་སྨྲ་བའི་དབང་ཕྱུག་སྟེ། །ཞལ་གཅིག་ཕྱག་བཞི་སེར་སྐྱའི་མདངས། །
རིན་ཆེན་རྩེ་དགུ་བགྲད་ཕྲེང་དང་། །པདྨའི་ལྕུག་མ་སྡིགས་མཛུབ་མཛད། །ས་ལས་སྤྲུལ་པའི་སྤྱོད་དབང་ཕྱུག །ཞལ་གཅིག་ཕྱག་བཞི་དམར་སྐྱའི་མདངས། །དབྱུག་པ་རྩེ་གཅིག་པདྨ་དང་། །དགྲ་སྟ་ཞགས་པ་ཕྱག་ན་འཛིན། །ཧྃ་ལས་སྤྲུལ་པའི་དབང་
ཕྱུག་སྟེ། །ཞལ་གཅིག་ཕྱག་བཞི་ལྗང་གུའི་སྐུ། །རལ་གྲི་ལྕགས་ཀྱུ་དགྲ་སྟ་དང་། །མེ་ཡི་ཕྲེང་བ་འཁོར་ལོ་འཛིན། །གཞན་འཇོམས་འཇིགས་པའི་ཁྲོ་བོའི་མཆོག །རང་འོད་རིགས་མཐུན་ཡུམ་དང་རོལ། །དྲག་པོའི་རྒྱན་ཚོགས་མ་ལུས་འགེངས། །པདྨའི་འདབ་མ་
བཞིན་དུ་འཁོད། །ཀ་ལས་བདེ་བའི་བློ་གྲོས་དང་། །ཞལ་གཅིག་ཕྱག་བཞི་ནམ་མཁའི་མདངས། །ཡུམ་བཅས་རྡོ་རྗེ་དྲིལ་བུ་དང་། །ནམ་མཁའི་མཛོད་ཀྱི་འོད་ཀྱི་དཀྱིལ་འཁོར་དང་། །ཁ་ལས་ཁང་པ་རྒྱ་མཚོའི་སྒྲ་དབྱངས་ཅན། །ཞལ་གཅིག་ཕྱག་བཞི་བུ་ཤ་ར། །
རིན་ཆེན་པི་བང་ཕྲེང་བ་དང་། །རྔ་ཡབ་རྡོ་རྗེ་ཅོད་པན་ཐོགས། །ག་ལས་གཟི་བརྗིད་བཀོད་པ་ནི། །ཞལ་གཅིག་ཕྱག་བཞི་རྒྱ་སྐེགས་མདོག །པདྨའི་ལྕུག་མ་ཟླ་བ་དང་། །འཁོར་ལོ་ཡིད་བཞིན་བུམ་པ་དང་། །གྷ་ལས་སྤྲུལ་པའི་འཁོར་ལོ་གནོན་པ་ནི། །ཞལ་གཅིག་
ཕྱག་བཞི་མ་ར་དང་། །འཁོར་ལོ་དབྱུག་པ་མ་མོ་ཤིང་། །རྒྱ་གྲམ་རིན་ཆེན་ལྕུག་མ་འཛིན། །ཙ་ལས་ཤེས་རབ་སྣང་བ་ནི། །ཞལ་གཅིག་ཕྱག་བཞི་ལྗང་སྐྱའི་མདངས། །རིན་ཆེན་ཕུང་པོ་པདྨ་དང་། །རྩེ་གསུམ་དྲིལ་ཐབས་འོད་དཀྱིལ་འཁོར། །ཚ་ལས་རྡོ་རྗེ་རྒྱལ་མཚན་
ཏེ། །ཞལ་གཅིག་ཕྱག་བཞི་གསེར་གྱི་མདོག །རིན་ཆེན་གདུགས་མཛེས་ཉི་མ་དང་། །དཔའ་བོ་ལོངས་སྤྱོད་པདྨའི་སྤྱན། །ཛ་ལས་འོད་ཟེར་འཕྲོ་བ་ཅན། །ཞལ་གཅིག་ཕྱག་བཞི་མདངས་དམར་གསལ། །པདྨ་འཁོར་ལོ་མཆོད་སྡོང་བུ། །མུ་ཏིག་ཆུན་པོ་ཟ་མ་ཏོག །
Vol. 99 · folio 84b
ཛྷ་ལས་སྤྲུལ་པའི་དྲག་ཤུལ་ཅན། །ཞལ་གཅིག་ཕྱག་བཞི་ལྗང་སེར་མདོག །འོད་ཀྱི་མེ་ཕུང་མེ་འོད་དང་། །རལ་གྲི་འབར་བ་གཡས་དང་གཡོན། །ཏ་ལས་སྤྲུལ་པའི་དྲི་མ་སེལ། །ཞལ་གཅིག་ཕྱག་གཉིས་དམར་སྐྱའི་མདངས། །ཉི་མའི་ཕྲེང་བ་གཎ་ཌཱི་རྡེག །ཆོས་ཀྱི་
ཙཀྲ་རྫོགས་བྱེད་པའོ། །ཐ་ལས་སྒྱུ་མའི་འཕྲུལ་པ་ནི། །ཞལ་གཅིག་ཕྱག་བཞི་པ་ལ་ཤ། །སེང་གེ་རྒྱ་མཚོ་རིན་ཆེན་ཕྲེང་། །རིན་ཆེན་བུམ་པ་དེ་བཅུད་བཅས། །ལས་ཀྱི་རིན་ཆེན་རྒྱལ་པོ་ནི། །ཞལ་གཅིག་ཕྱག་བཞི་རཱ་གའི་མདངས། །རི་བོ་པདྨ་ཆུ་དྲི་དང་། །གསེར་ཉ་འཕྱོ་
བའི་རྫིང་བུ་ཡིན། །དྷ་ལས་འཕྲོས་པའི་དྲ་བ་ཅན། །ཞལ་གཅིག་ཕྱག་བཞི་ལྗང་གུའི་མདོག །རྒྱ་གྲམ་དྲིལ་བུ་འཕྲོ་བ་དང་། །བྷན་དྷ་སྦྲང་ཡབ་འཛག་པའི་རྒྱུན། །ཏ་ལས་སྤྲུལ་པའི་ལག་བཟངས་ནི། །ཞལ་གཅིག་ཕྱག་བཞི་ཀར་ཏའི་འོད། །པདྨའི་རྒྱལ་མཚན་དཀར་
དམར་མདངས། །དྲི་ཡི་གཞོང་པ་ཀུ་ཤའི་ཚུལ། །ཐ་ལས་གསེར་འོད་འཕྲོ་བ་འཛིན། །ཞལ་གཅིག་ཕྱག་བཞི་མཐིང་གའི་མདོག །གླེགས་བམ་མཛེས་པའི་སྐུ་གཟུགས་དང་། །རིན་ཆེན་མཛོད་དང་ཟླ་བའི་འོད། །ཌ་ལས་རིན་ཆེན་སྙེ་མ་ནི། །ཞལ་གཅིག་ཕྱག་བཞི་པད་
རཱ་ག །པདྨའི་སྡོང་བུ་དཔག་བསམ་ཤིང་། །བྷན་དྷ་རྩེ་གསུམ་ཟླ་ཚེས་གཟུགས། །དྷ་ལས་ཆོས་ཀྱི་མཐོང་བ་ནི། །ཞལ་གཅིག་ཕྱག་བཞི་སྣ་ཚོགས་སྐུ། །གོ་ཆ་ཡེ་ཤེས་སྒྲོན་མ་དང་། །དཔལ་བེའུ་ཟུར་བརྒྱད་ནོར་བུ་ཏོག །སྣ་ཚོགས་སྤྲིན་ཕུང་སེར་གྲ་བཅས། །མཆེ་
བ་དྲིལ་བུ་ངང་པ་འཛིན། །བྷ་ལས་གཞོན་ནུ་རིན་ཆེན་ནི། །ཞལ་གཅིག་ཕྱག་བཞི་ལྗང་སེར་མདོག །རྒྱ་གྲམ་འཁོར་ལོའི་ཕྲེང་བ་དང་། །འོད་ཟེར་རྩེ་གསུམ་སྔགས་པའི་བུམ། །སེམས་དཔའ་ཆེན་པོ་དེ་དག་རྣམས། །རྒྱན་ཕྲེང་ཆ་ལུགས་འོད་ཟེར་དང་། །ཡུམ་
གནས་འཁྲིལ་ཞིང་རང་གནས་ཀྱི། །གཙོ་ལ་འཁྲིལ་བའི་ཚུལ་དུ་བཞུགས། །ཉམ་ན་ལས་འཕྲུལ་བ་ཡི། །རྡོ་རྗེ་རྣམ་པར་གནོན་ལ་སོགས། །རིགས་ཀྱི་མཚན་མ་ཅི་བཞིན་དུ། །པདྨ་རཱ་ག་རཀྟ་མདངས། །བེའུ་གསེར་མདོག་ཨིན་དྲ་བཞིན། །པདྨ་རྡོ་རྗེ་
Vol. 99 · folio 85a
རིམས་སོགས་མཚན། །ཞལ་གཅིག་ཕྱག་བཞི་ཡུམ་དང་འཁྲིལ། །འོག་མའི་ཕྱག་མཚན་མཐུན་པ་ཡི། །རང་རྟགས་མཚན་མ་སྣ་ཚོགས་དང་། །པདྨའི་ལྕུག་མས་མཚན་བྱས་པའི། །མེ་ཏོག་འབྲས་བུ་རྣམས་ཀྱིས་མཛེས། །ཤར་ལ་སོགས་པའི་
ཕྱོགས་བཞི་རུ། །བྱང་ཆུབ་སེམས་དཔའི་ཆ་ལུགས་ཀྱིས། །རང་གི་དཀྱིལ་འཁོར་གནས་སུ་འཁོད། །ཡ་ཝ་ར་ལས་སྤྲུལ་པ་ཡི། །པདྨ་འཕྲོ་བ་ལ་སོགས་བཞི། །ཞལ་གཅིག་ཕྱག་གཉིས་དཀར་དང་སེར། །དམར་ལྗང་པདྨོ་མེ་ལོང་དང་། །རིན་ཆེན་ཕྲེང་བ་བི་བང་གར། །མཆོད་པ་
ལས་མཛད་ནང་གི་མཚམས། །ཥ་ཤ་ས་ཧ་ལས་འཕྲུལ་པའི། །པདྨོ་ཚིམ་བྱེད་ལ་སོགས་བཞི། །ཞལ་གཅིག་ཕྱག་གཉིས་རིགས་གཉིས་གཟུགས། །བདུག་སྤོས་མེ་ཏོག་དུང་དང་དྲི། །འགྱིང་ཚུལ་ཏྲི་ཤཱུལ་ལས་ཀྱི་ཚུལ། །མཆོད་པས་ཕྱི་ཡི་མཚམས་ན་གནས། །
དེ་དག་གི་གསང་སྔགས་ནི། ཨོྃ་དྷེ་ཧི་རཱ་ག་པདྨ་ཤི་རི་བུ་ཏ་ཧཱུྃ་ཧཱུྃ་སྭཱ་ཧཱ། ཨོྃ་པདྨ་མ་ཧཱ་དྷ་བ་ར་བུ་ན་སི་ཏ་མ་ཧཱ་དྷ་མ་ཧྲྀ་ད་ཡཱ་ཧཱུྃ་ཧཱུྃ། བྲད་ཏང་ཡ་ཛ་སྭཱ་ཧཱ། དབུས་ཀྱི་དཀྱིལ་འཁོར་གྱིའོ། །ཨོྃ་ཙཀྲ་ཨ་ལོ་ཀ་ན་མ་རཀྵ་སྃ་བྷ་ར་ད་ན་ཧྲི་ཏི་བ་ཡ་བ་ཏི་ཛ་སྭཱ་ཧཱ། ནུབ་ཕྱོགས་པའི་
དཀྱིལ་འཁོར་རོ། །ཨོྃ་བཛྲ་ད་ར་བ་ཀྲྀ་ཏ་ཡ་ནི་ཤྃ་ར་ཏི་བ་ཤྃ་ནི་ཛ་སྭཱ་ཧཱ། ཤར་ཕྱོགས་ཀྱི་དཀྱིལ་འཁོར་ལའོ། །ཨོྃ་རཏྣ་ཀུ་ཏི་དུ་མན་ཏ་བྷན་དྷ་བྷན་དྷ་དུ་ན་དུ་ན་བི་ཛ་སྭཱ་ཧཱ། ལྷོ་ཕྱོགས་ཀྱི་དཀྱིལ་འཁོར་པའོ། །ཨོྃ་པི་ཤ་ཙི་ན་དྷ་མ་མ་དུ་རུ་ཧ་ཧ་ཧ་ཧ་སརྦ་གུརྦ་ནི་ཧཱུྃ་ཕཊ་
སྭཱ་ཧཱ། བྱང་གི་དཀྱིལ་འཁོར་བའོ། །ཨོྃ་མ་མ་ཨ་བ་ལོ་ཀ་ན་རུ་རུ་ཡུ་རུ་སི་དེ་བྷྱོ་དེ་སཏྭ་མ་མ་ཧཱུྃ་ཛ་སྭཱ་ཧཱ། རིགས་ཀྱི་བྱང་ཆུབ་སེམས་དཔའ་རྣམས་ཀྱིའོ། །ཨོྃ་བི་ལོ་ཀ་ནཱ་མ་སི་ཏ་ན་མ་ཀུ་རུ་ཀུ་རུ་བོ་དྷི་ས་ཏྭ་བྷ་ར་བུ་ན་ཛ་ཧཱུྃ་ཛ་སྭཱ་ཧཱ། རིགས་ལས་སྤྲུལ་པའི་བྱང་ཆུབ་སེམས་
ཀྱིའོ། །ཨོྃ་བིན་དྷ་བིན་དྷ་སརྦ་ཀརྨ་སི་དེ་དེ་པི་ཀུ་རུ་བུ་ཏ་སྃ་བོ་ཧ་ཧཱུྃ་ཨོྃ་ཨྃ་ཛ་སྭཱ་ཧཱ། ལྷ་མོ་རྣམས་ཀྱིའོ། །ཨོྃ་ཨ་པ་སྨ་ར་ཀྲོ་དྷ་སྣི། ཡཀྴ་ཧཱུྃ་ཧཱུྃ་ཧཱུྃ་བི་ཏྃ་པ་ཀ་ཕཊ་སྭཱ་ཧཱ། ཁྲོ་བོ་རྣམས་ཀྱིའོ། །གསང་སྔགས་རྒྱལ་པོ་མི་བཟད་པས། །རྣམ་པར་སྤྲུལ་པ་སྐུ་ཡིས་ནི། །སྟོང་
Vol. 99 · folio 85b
གསུམ་གནས་ནས་གཡོ་མཛད་དེ། །རང་གི་ལྷ་ལ་གསལ་བར་མཛོད། །དེ་ནས་མགོན་པོ་རྡོ་རྗེ་འཛིན། །བདེ་ཆེན་གར་གྱི་དབང་ཕྱུག་གིས། །དཀྱིལ་འཁོར་རྣམ་གསུམ་གསལ་བྱེད་པའི། །ཏིང་ངེ་འཛིན་ལ་སྙོམས་ཞུགས་ནས། །དཀྱིལ་འཁོར་བྱིན་བརླབས་
དབང་བསྐུར་ཞིང་། །རིགས་ཀྱི་བདག་པོས་གསལ་བར་མཛོད། །གནས་ཀུན་མཚན་མ་ཡོངས་དག་ནས། །རྣམ་གསུམ་སྣང་བ་གཉིས་མེད་འགྱུར། །ཨོྃ་ན་མ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་མ་ཧཱ་བོ་དྷི་ཧྱ་སུ་ཏྲྃ་ཏྲི་ཤ་ཤུ་དྷེ་སོ་ནཱ་ཁྱ་ཧཱུྃ་ཧཱུྃ་ཧཱུྃ། ཨོྃ་རིན་ཆེན་དབུ་
རྒྱན་གྱི་སྔགས་སརྦ་བུ་ཏ་ཀུ་རུ་རཏྣ་མ་མ་ཀུ་ཏ། ཨ་ཨ་བཱིརྱ་སད་མ་མ་ཀུ་ཨ་བྷི་ཥིཉྩ་ཨོྃ་ཨཱཿཧཱུྃ་སྭཱ་ཧཱ། ཨོྃ་པདྨ་ཨ་མོ་ཀ་ས་མ་ཡ་ཤྲི་ཧ་ཧ་ཧ་ཚིན་དྷ་མ་ནི་ཨ་སྨི་ཤ་བི་མ་མ་ཡ་ཧཱུྃ་ཧཱུྃ། སྔགས་གསུམ་གྱི་གསལ་བར་ཕྱེད་པའོ། །ཨོྃ་བི་ཤ་ཙིན་དྷ་མ་ནི་ཨ་བ་སྃ་
བོ་ད་མ་མ་ཀུ་རུ་སི་ལ་ལ་ཏ་སི་ན་བི་བུད་པ་པྃ་ད་ཧཱུྃ་ཧཱུྃ་ཧཱུྃ། རྣམ་པར་སྤྲོ་བའི་སྔགས་སོ། །ཨོྃ་མ་ཏ་ལ་ནི་བི་ཤ་ཙཀྲ་ཀུ་མ་ཏ་བུ་ཏ་ན་མ་སི་ལ་དུ་ཏྲི་སི་ཧཱུྃ་ཕཊ་སྭཱ་ཧཱ། དཀྱིལ་འཁོར་གསལ་བའི་སྔགས་སོ། །ཨོྃ་ཨྃ་ཨ་ཨ་མིན་དུ་ཤེ་མ་ལ་ཤན་དུན་དྷེ་ཏ་ཐཱ་ག་ཏེ་བྷྱོད་
ཏི་པདྨ་ཀུ་རུ་ཨཱཿཧཱུྃ་སྭཱ་ཧཱ། རྦད་པའི་སྔགས་སོ། །ཨོྃ་པདྨ་མུ་ཁྃ་པདྨ་པ་བ་ས་བོ་ཏི་དི་ར་ཡྃ་གུ་རུ་ཧཱུྃ་ཧཱུྃ་ཧཱུྃ་ཧྃ་ཧྃ་དར་ཤ་སྭཱ་ཧཱ། སྙིང་པོའི་སྔགས་སོ། །ཨོྃ་ན་མ་སུ་ཏྲྃ་བྷོ་ག་ག་ན་གུ་མ་ལེ་སྃ་སཱ་ར་ཧཱུྃ་ཕཊ་སྭཱ་ཧཱ། རིག་པ་མཆོག་གི་སྔགས་སོ། །ཨོྃ་བ་ག་ག་བ་སྃ་པོ་པདྨ་དྷ་
ཨ་ཧྱེ་ཧྱི་མ་ཧཱ་ཀཱ་རུ་མ་ད་ཨ་མ་དྷུ་ན་ཛ་ཛ། སྤྱན་དྲང་བའི་སྔགས་སོ། །ཨོྃ་པདྨོ་སྃ་ག་ག་སུ་ར་ཏ་ར་ག་ས་མ་ཡེ་སྟྭྃ། གདན་གྱི་སྔགས་སོ། །ཨོྃ་ཨ་མུ་ཀ་སི་ནམ་སརྦ་བྷྱོ་ག་ག་ཏ་པཱུ་ཙ་མེ་ད་ན་ད་ཧཱུྃ་ཏྲི་སྭཱ་ཧཱ། མཆོད་པའི་སྔགས་སོ། །ཨོྃ་པདྨ་བི་ལོ་ཀུ་མ་ལ་སུ་ནྃ་
ཏུ་ཏྲྃ་སྭཱ་ཧཱ་བ་སྃ་ཧི་ཧི། དགྱེས་པར་བྱ་བའི་སྔགས་སོ། །དེ་ནས་གསང་བའི་བདག་པོ་མཆོག །རྡོ་རྗེ་གསང་བ་རྨད་འབྱུང་བའི། །སྐུ་དང་གསུང་ཐུགས་གསང་སྔགས་ཆེ། །བྱིན་གྱིས་བརླབས་པ་དོན་བཤད་མཛད། །བདེ་བར་གཤེགས་པའི་ཡེ་ཤེས་མཆོག །
Vol. 99 · folio 86a
དེ་དག་དཀྱིལ་འཁོར་རྣམ་འཕྲུལ་མཆོག །དྲི་མ་མེད་པའི་བྱང་ཆུབ་སེམས། །དེ་ནི་དཀྱིལ་འཁོར་སྙིང་པོ་མཆོག །རྡོ་རྗེ་གསང་བའི་གནས་ཆེན་པོ། །ཐབས་དང་ཤེས་རབ་རོལ་པའི་ཚུལ། །རང་བཞིན་བྱང་ཆུབ་སེམས་ཉིད་ལས། །རང་བཞིན་ལྷུན་གྲུབ་རྫོགས་
ཆེན་པོ། །འགྲོ་བའི་སྣང་བ་དམ་པའི་མཆོག །རང་བཞིན་དག་པ་དྲི་མེད་ཆོས། །དཀྱིལ་འཁོར་གནས་མཆོག་གཉིས་མེད་པའོ། །ཕུང་པོ་ཁམས་སོགས་རྣམ་དག་སྐུ། །ཨེ་མའོ་ཆོས་སྐུ་མྱ་ངན་འདས། །ཨེ་མའོ་ཆོས་རྣམས་ཡེ་ཤེས་སྐུ། །ཨེ་མའོ་ཆོས་ཀུན་རྣམ་པར་འཕྲུལ། །རྒྱ་
ཆེ་སྔགས་ཀྱི་ཚུལ་ལྡན་པའི། །དཀྱིལ་འཁོར་གསང་གསུམ་ངོ་མཚར་ཆེ། །ཐབས་ལྔ་མཛད་པ་སྣ་ཚོགས་ཀྱིས། །སྔོན་དང་ད་ལྟ་འབྲེལ་དོན་འབྱུང་། །ཐབས་མཁས་ཕ་རོལ་ཕྱིན་བཅུ་རྫོགས། །བསོད་ནམས་ཡེ་ཤེས་དག་པའི་ཤུགས། །ས་དང་ས་འདས་དོན་ཆེན་པོ། །
ཏ་ཐཱ་ག་ཏའི་བྱིན་བརླབས་དབྱིངས། །ལ་ལ་སྐུ་དང་གསུང་དང་ཐུགས། །ཟབ་པ་དེ་ཉིད་རང་གི་མཐུས། །གསང་གསུམ་གནས་ལ་ཕྱག་འཚལ་ལོ། །ཡ་མཚན་ཆོས་ལ་ཕྱག་འཚལ་ལོ། །རྣམ་འཕྲུལ་སྐུ་ལ་ཕྱག་འཚལ་ལོ། །བྱང་ཆུབ་སེམས་ལ་ཕྱག་འཚལ་ལོ། །ཞེས་སོ། །
དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་དཀྱིལ་འཁོར་རྣམ་པར་འཕྲུལ་པའི་ལེའུ་སྟེ་གསུམ་པའོ།། །།དེ་ནས་འདུས་པའི་འཁོར་ཚོགས་རྣམས། །དགའ་བ་ཆེན་པོ་ངོ་མཚར་གྱིས། །རྒྱུད་གསུམ་རྣམ་
དག་ཚིམ་གྱུར་ནས། །དགྱེས་པའི་དབྱངས་ཀྱིས་གསོལ་བ་བཏབ། །ཨེ་མའོ་ངོ་མཚར་ཡ་མཚན་ཆེ། །གཉིས་མེད་རོལ་པ་ཡ་མཚན་ཆེ། །དྲི་མེད་དག་པ་ཡ་མཚན་ཆེ། །འོད་འཕྲོ་འདུ་བ་ཡ་མཚན་ཆེ། །བྱང་ཆུབ་སྤྲིན་ཕུང་ཡ་མཚན་ཆེ། །སངས་རྒྱས་འབྱུང་བ་ཡ་མཚན་
ཆེ། །འཕྲུལ་པ་འབྱུང་པ་ཡ་མཚན་ཆེ། །ཁྲོ་བོ་འབྱུང་བ་ཡ་མཚན་ཆེ། །བྱིན་བརླབས་ཆོ་འཕྲུལ་ཡ་མཚན་ཆེ། །ཐ་བ་རླན་མཛད་ཡ་མཚན་ཆེ། །འགོག་པ་རླུང་མཛད་ཡ་མཚན་ཆེ། །བདག་ཅག་འཁོར་ཚོགས་འདུས་པ་རྣམས། །དམ་ཚིག་ཅན་དུ་བྱིན་བརླབས་
Vol. 99 · folio 86b
མཛད། །ཟ་འོག་རིམ་པ་ཅི་བཞིན་དུ། །རྡོ་རྗེ་གསང་བའི་གྲལ་དུ་འགོད། །དེ་ནས་བཅོམ་ལྡན་བདེ་ཆེན་པོས། །ཆགས་པ་ཆེན་པོ་རྡོ་རྗེའི་སྐུ། །སྐུ་དང་གསུང་ཐུགས་གཉིས་མེད་པའི། །འཁོར་རྣམས་རབ་ཏུ་སྦྱང་བའི་ཕྱིར། །རྡོ་རྗེ་རྒྱན་གྱི་ཏིང་འཛིན་གྱིས། །རང་གི་དཀྱིལ་འཁོར་གསལ་
བར་མཛོད། །དེ་ཚེ་བྱང་ཆུབ་སེམས་ཆེན་པོ། །འོད་ཟེར་ཀུན་དུ་ཁྱབ་པ་དེས། །དགའ་བ་ཆེན་པོའི་མཆོད་པ་ཡིས། །གནས་ཀྱི་མཚན་མ་གསལ་བར་མཛོད། །འདུ་ཤེས་མེད་དང་འགོག་གནས་སོགས། །རང་གི་རྟོག་པའི་མཐའ་ཞེས་རྣམས། །དྲི་མ་མེད་པའི་བྱང་ཆུབ་སེམས། །
རིན་ཆེན་ཆུ་དེས་དབང་བསྐུར་ནས། །རང་གི་ཡེ་ཤེས་དབང་ཐོབ་སྟེ། །འགྲོ་བའི་དོན་བྱེད་ནུས་དང་ལྡན། །ལས་ལ་སྤྱོད་པའི་གནས་རྣམས་དང་། །རང་སྐྱོབ་པ་ཡི་སེམས་དག་གིས། །ཐུགས་རྗེ་ཆེན་པོའི་བྱང་ཆུབ་སེམས། །སངས་རྒྱས་བསྟན་པ་འདི་གཉེར་རོ། །བྱང་ཆུབ་
སེམས་ཀྱི་མཚན་མ་ཡིས། །འདུས་པའི་གནས་ལྔ་རིག་པར་བྱ། །ཨོྃ་གུ་ཧྱ་བཛྲ་ས་མ་སྟྭྃ། ཨ་ལ་ལ་ཧོ། །རྡོ་རྗེ་རོ་ལངས་བསྡུས་པ་ཡིས། །གསང་བའི་དམ་ཚིག་ཆེན་པོ་རྣམས། །རིགས་ཀྱི་དགོངས་པ་ཇི་ལྟ་བར། །རྡོ་རྗེ་གསང་བའི་ལས་ལ་གནས། །སྐལ་བཟང་དམ་
ཚིག་ཆེན་པོ་སྟེ། །དེ་ལས་འདས་ན་རླག་པར་འགྱུར། །བཀའ་ཡི་བསྒོ་བའི་དོན་ཆེན་པོས། །འདས་པའི་འཁོར་ཚོགས་བསམ་ཡས་པས། །དམ་ཚིག་ཐོབ་པས་གྲལ་འཁོད་དོ། །དེ་ནས་གསང་བའི་བདག་པོ་ཉིད། །དབང་ཐོབ་ལས་མཛད་ཆེན་པོ་དེས། །བཅོམ་ལྡན་འདས་ལ་
གཙུག་གི་ཕྱག །རྣལ་འབྱོར་ལུགས་སུ་བྱས་ནས་ནི། །ཕྱི་ནང་གསང་བའི་མཆོད་པས་མཆོད། །མཉམ་འགྱུར་གསོལ་བ་རབ་ཏུ་གདབ། །འདི་ལྟར་མ་བྱུང་ངོ་མཚར་ཁྱོད། །སངས་རྒྱས་རྣམས་ཀྱི་དབང་ཕྱུག་ཆེ། །མངོན་སྤྱོད་ཡ་མཚན་སྟོན་པར་སྤྱོད། །བཀའ་ཡི་འཁོར་ལོ་
དམ་པ་ཉིད། །སྨྲ་བསམ་ཡུལ་ལས་རབ་འདས་ཀྱང་། །དཔེས་མཚོན་སྣང་བ་ལ་བརྟེན་ནས། །ཡི་གེ་མིང་ཚོགས་ལ་སོགས་ཀྱིས། །གསལ་བར་མཚོན་ཏེ་གོ་བར་མཛོད། །སྟོན་པ་དབང་ཕྱུག་དམ་པ་དེས། །གསོལ་བ་བཏབ་པའི་དོན་དགོངས་ནས། །བརྗོད་བསམ་འདས་
Vol. 99 · folio 87a
བའི་ཏིང་འཛིན་ལས། །མཉམ་པར་བཞུགས་ནས་མི་གསུང་བཞུགས། །དེ་ནས་འདུས་པའི་འཁོར་ཚོགས་ཀྱིས། །སྟོབས་མཆོག་སེང་གེ་ཆེན་པོ་ལ། །ལོགས་སུ་བཏུད་དེ་ཕྱག་འཚལ་ནས། །རྨད་འབྱུང་མཆོད་པ་སྣ་ཚོགས་བྱས། །གསོལ་བཏབ་བློ་
མཆོག་སེང་གེ་ཁྱོད། །བདག་ཅག་ཞུ་བའི་གནས་སྐབས་ཕྱེ། །སྟོབས་མཆོག་སེང་གེ་གསང་བདག་གིས། །གསོལ་བ་བཏབ་པའི་དོན་དགོངས་ནས། །འདུས་པའི་འཁོར་ཚོགས་ཁྱོད་ཉོན་ཅིག །བདག་ལ་ཞུས་ཤིག་སྤོབས་པར་བྱོས། །སླར་ཉིད་གསོལ་བ་
བཏབ་པའི་དོན། །ཀུན་གྱིས་མཐུན་པའི་ཚིག་སྨྲས་པ། །མགོན་པོ་རྒྱལ་བ་ཀུན་གྱི་མཛོད། །སངས་རྒྱས་རྣམས་ཀྱི་སྲས་ཀྱི་མཆོག །བྱང་ཆུབ་སེམས་དཔའ་རྗེ་བཙན་ལ། །ཆོས་རྣམས་སྟོན་པའི་གནས་ལ་གསན། །བཅོམ་ལྡན་གསང་མཆོག་དམ་པ་དེས། །
གསང་སྔགས་ལམ་རྣམས་མི་སྟོན་ཅིང་། །དགོངས་མཛད་འབྲེལ་པས་མི་མཛད་པ། །རྒྱུ་དང་རྐྱེན་གྱིས་གང་ལགས་པ། །འཁོར་ནི་ཚོགས་ལ་བསྟན་དུ་གསོལ། །གསལ་ཞིང་དབྱེ་བར་མཛད་པར་རིགས། །ཞུས་པའི་དོན་ཉིད་སླར་གསུངས་པ། །རྒྱལ་བ་
ཀུན་གྱི་གསང་བའི་མཛོད། །སྐུ་གསུང་ཐུགས་ཀྱི་རྡོ་རྗེ་དངོས། །སྣ་ཚོགས་སྣང་ཞིང་གསལ་བར་མཛོད། །དེ་ཉིད་རྫོགས་པའི་གསང་སྔགས་ཅན། །བཤད་ལས་འདས་པའི་དོན་དེ་ནི། །དགོངས་དོན་རྒྱལ་བས་གསུང་མི་མཛད། །དེ་ལྟར་སྟོན་པ་རྒྱལ་མཆོག་
གིས། །རྣམ་པར་བརྗོད་པ་མི་མཛད་པས། །ཡང་དག་དོན་གྱི་སྙིང་པོ་ཉིད། །རྒྱ་ཆེར་བཀའ་ནི་གསལ་བ་ཡིན། །འདུས་པའི་འཁོར་ཚོགས་རྣམས་ཉོན་ཅིག །བྱང་ཆུབ་དམ་པའི་སྙིང་པོ་ནི། །སྨྲ་བསམ་ལས་འདས་བརྗོད་མེད་པས། །ཚིག་ཏུ་བརྗོད་པ་ལེགས་མ་ཡིན། །གཉིས་
མཐའི་རྟོག་པ་ལས་གཞན་དག །ཚིག་གི་སྣང་བས་ཐེ་ཚོམ་སྐྱེད། །གྲོལ་བ་ཉིད་ཀྱིས་འཆིང་འགྱུར་ཞེས། །འདས་དང་མ་བྱོན་ཐམས་ཅད་དང་། །ད་ལྟར་བྱུང་བའི་དགོངས་པའི་དོན། །མ་གསུངས་མི་གསུང་གསུང་དུ་མེད། །དེ་ནས་སེམས་དཔའི་སྙིང་པོ་ནི། །སྤྲོས་དང་བྲལ་བའི་
Vol. 99 · folio 87b
བྱང་ཆུབ་སེམས། །ཀུན་རྫོབ་བདེན་པའི་ཚིག་དབང་དུ། །མཚན་མའི་ཚིག་གིས་རྣལ་འབྱོར་རྣམས། །དོན་དམ་རྟོགས་དཀའ་འགྲོ་བའི་ཕྱིར། །རྒྱལ་བས་ཚིག་སྐོར་བསྟན་པ་ཡིས། །འདུས་ཚོགས་འཁོར་གྱིས་ཡང་ཞུས་པ། །སྟོབས་མཆོག་སེང་གེ་དེ་ལྟར་ན། །བདག་
སོགས་མ་འོངས་རྣལ་འབྱོར་པས། །ཚིག་གི་རྗེས་འབྲངས་དོན་དག་ཏུ། །གསང་བའི་ལས་བརྗོད་གསལ་བྱེད་པ། །ཇི་ལྟ་བུ་ཡིས་མཚོན་པར་འགྱུར། །དཔའ་བོ་ཁྱོད་ནི་རྒྱལ་བའི་སྲས། །དབང་བསྐུར་ཐོབ་པར་ཞུ་བ་སྤོབས། །བཅོམ་ལྡན་དབང་མཆོག་དམ་པ་ལ། །ཞུས་
ཤིང་སྟོབས་མཆོག་སེང་གེ་ཁྱོད། །དེས་ཀྱང་འཁོར་གྱིས་ཞུས་པ་བཞིན། །རྒྱལ་བ་རྡོ་རྗེ་འཛིན་པ་ལ། །ཕྱག་འཚལ་རྨད་འབྱུང་མཆོད་རྫས་ནས། །རྡོ་རྗེ་ཚིག་ཏུ་འདི་སྐད་གསོལ། །ཀྱེ་མ་སྟོན་པ་ཐུགས་ཆེན་པོ། །ཕྱོགས་བཅུ་རྒྱལ་བ་ཀུན་འདུས་པ། །བྱང་ཆུབ་སེམས་ཀྱི་
མཚན་ཉིད་དེ། །ཚིག་ཏུ་བརྗོད་པ་མ་མཛད་ན། །མ་འོངས་སྒྲ་ལ་བརྟེན་པ་དག །དོན་ལ་རེག་པར་མི་འགྱུར་ཕྱིར། །མཚོན་བྱ་མཚོན་པར་བྱས་ནས་ནི། །སྙིང་པོ་བྱང་ཆུབ་དོན་འདི་ལ། །དཔེས་མཚོན་འཐད་པར་གྲུབ་བྱེད་པ། །གསང་བ་དེ་ཉིད་བསྟན་དུ་གསོལ། །དེ་ནས་
མགོན་པོ་རྡོ་རྗེ་འཛིན། །ཡེ་ཤེས་ལྔ་དང་རྟགས་ལྡན་པའི། །ཕྱག་གི་མཚན་མ་གསོར་མཛད་ཅིང་། །རྨད་འབྱུང་ཡ་མཚན་སྟོན་པར་མཛད། །ཐམས་ཅད་པདྨོར་འགྱུར་བ་ཡི། །རྨད་འབྱུང་ཆོས་ཀྱི་སྒྲ་ཡང་སྒྲོགས། །ཨོྃ་ཨཱཿཧཱུྃ་སྭཱ་ཧཱ། བོ་དྷི་ཙིཏྟ་གུ་ཧྱ། ས་མ་ཡ་
ཨ་ས། ཨ་ནུ་བོ་དྷི་ཙིཏྟ་ཨ་ནན་ཏ་གར་བྷ། མ་ཧཱ་ས་ཏྭ་པྲ་ཏ་ཨ་ཧཱུྃ། འདི་ནི་གསུངས་མ་ཐག་ཏུ་ཡང་། །སངས་རྒྱས་གྲགས་ཆེན་ཐམས་ཅད་དག །རབ་ཏུ་དྲག་ཅིང་བརྒྱལ་འགྱུར་ནས། །གཞན་ལྟ་མ་ལུས་སྨོས་ཅི་དགོས། །བཅོམ་ལྡན་འདས་ཀྱིས་ཡང་དག་བཀའ། །
བཤད་ཀྱིས་རིགས་ཀྱི་བུ་རྣམས་ཉོན། །དོན་དམ་ཀུན་རྫོབ་གཉིས་མེད་པར། །ཡང་དག་བདེན་པའི་དོན་བསྟན་པ། །དེ་ནི་དངོས་པོ་མཚན་ཉིད་དེ། །མཁའ་ལྡན་ཆེན་པོ་རྣམས་ཀྱི་གདེང་། །ཇི་སྲིད་བློ་ཡི་ཆོས་དག་ཏུ། །གཉིས་སུ་སྣང་བའི་མཚན་མ་ལ། །
Vol. 99 · folio 88a
བསམ་བརྗོད་ཀུན་རྫོབ་ཞེས་བྱ་སྟེ། །དེ་ལས་འདས་པ་དོན་དམ་ཡིན། །སྐུ་གསུམ་གཉིས་སུ་མེད་པ་ཡི། །སྣང་བའི་དངོས་པོ་མ་འགགས་པ། །དུས་གསུམ་བསྟན་པ་ཆེན་པོར་གནས། །ཡིད་བཞིན་པ་ཡི་དོན་ཉིད་དོ། །ཐམས་ཅད་སྒྱུ་མ་
ལྟ་བུའི་ཚུལ། །ཐམས་ཅད་རང་བཞིན་སྟོང་པ་ཉིད། །ཟུང་དུ་འཇུག་པའི་ཡེ་ཤེས་ནི། །དེ་ཉིད་བླ་མེད་མཆོག་དམ་པ། །དེ་སྐད་ཅེས་ནི་བཀའ་སྩལ་ནས། །ཨ་ལ་ལ་ཡི་སྒྲ་བརྗོད་དོ། །སྟོབས་མཆོག་སེང་གེ་དྲི་བ་དྲིས། །དེ་ལྟར་ལགས་སོ་བཅོམ་ལྡན་འདས། །སྔགས་ཀྱི་ལྷ་ལ་བློ་
གནས་གང་། །སྤྱོད་ལ་གནས་པ་གང་དག་གིས། །ཕན་ཚུན་འབྲེལ་འགྱུར་ཅི་ལྟ་བུར། །བློ་ཡི་རིམ་པ་འཇུག་བྱ་འམ། །བཅོམ་ལྡན་འདས་ཀྱིས་བཀའ་སྩལ་པ། །གསང་བའི་བདག་པོ་ཁྱོད་ཉོན་ཅིག །སངས་རྒྱས་རྣམས་ཀྱིས་བསྟན་པའི་དོན། །མཚན་ཉིད་རྣམ་དག་དུས་
ལགས་པ། །བགྲང་དང་བགྲང་བ་ལས་འདས་པའི། །དངོས་པོ་མཚན་ཉིད་དེ་བཞིན་ནོ། །ལེགས་སྤྱོད་བདེན་པའི་ལམ་འཇུག་ཅིང་། །རྣམ་གསུམ་སྔགས་ཀྱི་དོན་སྤྱད་ན། །འབྲེལ་པ་ཤུགས་ཀྱིས་སྒྲུབ་བྱེད་ན། །ལྟ་སྤྱོད་གཉིས་ལྡན་བདེན་པའི་མཆོག །རྣལ་འབྱོར་ས་ལ་
ལེགས་གནས་ཤིང་། །བདེན་གཉིས་འབྲེལ་པའི་དོན་བསྒྲུབས་ནས། །ཡང་དག་རྟག་པའི་དོན་གསལ་འགྱུར། །རྣལ་འབྱོར་ས་སྤྱོད་ས་ཐོབ་ཤོག །མ་སྐྱེས་ཐབས་ཀྱི་ཡེ་ཤེས་ལྡན། །ཐམས་ཅད་མཉམ་པ་ཉིད་ཀྱི་དབྱིངས། །བདེན་གཉིས་དབྱེ་བ་མེད་པ་ཡིས། །
ཡང་དག་དོན་མཆོག་སྒྱུ་མའི་སྐུ། །ཀུན་རྫོབ་སྒྱུ་མ་ཐབས་ཀྱི་གསུང་། །ཕྱག་རྒྱ་སྒྱུ་མའི་ཚུལ་ཉིད་དེ། །མེད་པ་མ་ཡིན་མཚན་མེད་དེ། །རྣལ་འབྱོར་གཉིས་དང་ལྡན་ཕྱིར་རོ། །སློབ་པའི་རྣལ་འབྱོར་གཉིས་བརྟེན་ནས། །ལྷུན་གྱིས་གྲུབ་པའི་ས་གོམས་ནས། །བདེན་
འགྱུར་བདེན་པ་གཉིས་ལ་གནས། །ཆེ་ཆུང་མཐུ་ཡིས་གྲུབ་པ་ཡིན། །སྒྲ་ཡི་རྗེས་འབྲངས་རྣལ་འབྱོར་པས། །དོན་མེད་སྤྱོད་ལ་གནས་པར་འགྱུར། །ཡང་དག་ཀུན་རྫོབ་བདེན་གསལ་བས། །གཉིས་མེད་དོན་དམ་བདེན་པར་གནས། །སྣ་ཚོགས་ཆོས་ཀྱི་གཡུལ་ངོ་
Vol. 99 · folio 88b
ཟློག །རིག་པའི་སྐྱེས་བུ་རྣམ་པར་གྲགས། །ཞེས་པས་དགྱེས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས། དེ་ཁོ་ན་ཉིད་བསྟན་པའི་ལེའུ་སྟེ་བཞི་བའོ།། །།དེ་ནས་རིག་
པའི་སྐྱེས་བུ་མཆོག །གསང་བའི་བདག་པོས་ཡང་ཞུས་པ། །བཅོམ་ལྡན་སྙིང་པོ་བྱང་ཆུབ་སེམས། །དགོངས་པའི་དོན་ནི་ཅི་ལྟ་བུ། །ལས་དང་ཉོན་མོངས་དག་བྱེད་པའི། །ཡེ་ཤེས་སྒྲོན་མ་ཅི་ལྟར་ལགས། །རྒྱལ་བས་དགོངས་པའི་བྱང་ཆུབ་སེམས། །རྡོ་རྗེ་
ལྟ་བུར་མཉམ་བཞག་ནས། །མི་རྟོག་ཡེ་ཤེས་གསལ་མཛད་དེ། །སྣ་ཚོགས་རྣམས་ཀྱང་བྱང་ཆུབ་སེམས། །བདེ་བ་ཆེ་ལས་གཞན་མེད་དོ། །ལུས་ངག་ཡིད་གསུམ་རྣམ་པའི་ཚོགས། །ཆོས་རྣམས་ཀུན་གྱི་རྒྱུ་ཡིན་ཏེ། །རྣམ་གསུམ་རྡོ་རྗེ་ལྟ་བུ་ཉིད། །སྐུ་
གསུམ་གསལ་བ་རྣམ་པར་སྣང་། །དངོས་པོ་གསལ་བའི་ཆོས་མེད་དེ། །གཅིག་ལས་རྣམ་འཕྲུལ་སྣ་ཚོགས་ཉིད། །ཕྱག་རྒྱ་གར་ཐབས་དབང་བསྒྱུར་བས། །འཆིང་བའི་ཚོགས་ལས་རྣམ་པར་གྲོལ། །དངོས་པོ་ཐམས་ཅད་བྲལ་བ་ཡི། །ཕུང་ཁམས་
སྐྱེ་མཆེད་རྣམ་པར་དབེན། །གཟུང་འཛིན་རྟོག་པའི་ཡུལ་བྲལ་བས། །དཔག་མེད་པ་ཡི་ངོ་བོ་ཉིད། །རྣམ་གསུམ་མཆོག་གི་དོན་ལས་བྱུང་། །འོད་གསལ་ཆེན་པོའི་རང་བཞིན་ནོ། །ངོ་མཚར་རྨད་དུ་བྱུང་བའི་དོན། །རྒྱལ་བ་ཀུན་གྱི་གསང་བའི་ཐུགས། །
སྐྱེ་དང་སྐྱེ་མེད་སྣ་ཚོགས་དངོས། །ཕྱོགས་འཛིན་མཐའ་ཡིས་བཅིང་བར་བྱེད། །དེ་དག་ཆོས་ལས་རྣམ་གྲོལ་བའོ། །བདེན་པ་ཆེན་པོའི་ཏིང་འཛིན་རྒྱ། །ངོ་མཚར་ཡ་མཚན་རྨད་ཀྱི་ཆོས། །མེ་ལོང་གསལ་བའི་རང་བཞིན་ཅན། །རྒྱལ་བ་རྣམས་ཀྱི་གསང་བའི་མཛོད། །འགག་
པ་མེད་པའི་ཆོས་རྣམས་ལ། །བྱང་ཆུབ་སེམས་ཉིད་སྐྱེ་བར་འགྱུར། །མཉམ་ཉིད་དེ་བཞིན་གཤེགས་པའི་སྐུ། །ཡ་མཚན་རྨད་དུ་བྱུང་བའི་ཆོས། །སྣ་ཚོགས་སྣང་བྱེད་གནས་གྲོལ་བ། །རང་བཞིན་ཞི་བའི་བྱང་ཆུབ་སེམས། །གཉིས་ཀྱི་མཐའ་ལས་གྲོལ་བའོ། །གནས་
Vol. 99 · folio 89a
དང་གནས་མེད་བྱང་ཆུབ་སེམས། །ཡ་མཚན་རྨད་ཀྱི་དོན་བྱུང་བའོ། །རྒྱ་ཆེར་སོ་སོར་གསལ་བའི་ངང་། །ཀུན་རྟོགས་བྱང་ཆུབ་སེམས་ཆེན་པོ། །དམིགས་མེད་གསང་བ་ལས་བྱུང་བའི། །དམིགས་དང་མི་དམིགས་སྣ་ཚོགས་ནི། །བདེ་བའི་ཡེ་ཤེས་གསལ་
བའོ། །མ་འགགས་པ་ཡི་ཆོས་ཉིད་དོ། །བྱ་བ་གྲུབ་པའི་ཚུལ་ཅན་དུ། །སྤྲོས་མེད་སྤྲོས་པ་སྣ་ཚོགས་སྣང་། །སྤྲོ་བསྡུ་འདུན་དང་སྤྲོས་བྲལ་བའི། །མཛད་པའི་བྱང་སེམས་བརྟན་པ་ལས། །ངོ་མཚར་ཆོ་འཕྲུལ་བླ་ན་མེད། །ཡེ་ཤེས་རྒྱ་མཚོ་རྨད་དུ་བྱུང་། །རང་གི་དེ་
ཉིད་གསལ་བར་འགྱུར། །རྒྱལ་བས་བཤད་པའི་དགོས་དོན་ལ། །འཁོར་རྣམས་ཡ་མཚན་ངོམས་པར་འགྱུར། །མཆོད་དང་ཞལ་དག་སྒྲ་འབྱིན་ཅིང་། །རང་གི་དེ་ཉིད་གསལ་འགྱུར་ནས། །བྱང་སེམས་དེ་ཉིད་བསྟོད་པར་བྱ། །ཨེ་མའོ་སྟོང་ཉིད་བྱང་ཆུབ་སེམས། །ཨེ་
མའོ་དག་པ་དྲི་མ་མེད། །ཨེ་མ་མི་སྒྲིབ་གསལ་བ་ཆེ། །ཨེ་མའོ་མཉམ་ཉིད་དབྱེར་མེད་ཆོས། །ཨེ་མའོ་སོ་སོ་རང་རིག་སེམས། །ཨེ་མའོ་བྱ་བྱེད་ལྷུན་གྱིས་གྲུབ། །དེ་བཞིན་ཉིད་ལ་ཕྱག་འཚལ་བསྟོད། །བཅོམ་ལྡན་འདས་ཉིད་བྱང་ཆུབ་སེམས། །བྱང་ཆུབ་སེམས་
ཉིད་ཐུགས་ཀྱི་མཆོག །བདག་ཅག་རིག་འཛིན་ཚོགས་པ་རྣམས། །བྱང་ཆུབ་སེམས་ཉིད་སྨོན་པ་དང་། །འཇུག་དང་ལྡང་དང་གཉིས་མེད་དེ། །རང་གི་བྱང་སེམས་གཡོ་བར་གྱིས། །རེག་པར་བགྱི་ཞིང་ཉེ་བར་བགྱི། །ཉམས་སུ་མྱོང་བར་འཚལ་ལགས་ན། །ཐུགས་རྗེ་
ཆེ་དགོངས་བྱིན་གྱིས་རློབས། །བདེ་བར་གཤེགས་པས་བྱིན་གྱིས་རློབས། །དེ་སྐད་ཚིག་ཏུ་གསོལ་བཏབ་པས། །བཅོམ་ལྡན་སྙིང་པོ་འདི་སྐད་གསུང་། །སྣ་ཚོགས་རྣམ་དག་ངོ་བོ་ཉིད། །ཆོས་རྣམས་འཕྲོ་བའི་ཚོགས་རྣམས་ཀུན། །རང་བཞིན་བརྗོད་བྲལ་རྟོག་པ་མེད། །
རང་གསང་རྟོགས་པའི་དཀའ་བའི་དོན། །སྲིད་གསུམ་ཡེ་ནས་རྣམ་དག་ཆོས། །བདག་རྟོག་འཁྲུལ་པའི་ཉེས་དམིགས་ཀྱིས། །དུས་རིང་འཁྱམས་འགྱུར་འགྲོ་བ་རྣམས། །རང་རྟོག་དངོས་པོའི་ལས་ལ་སྤྱོད། །ལོག་པའི་སེམས་ཀྱིས་ཀུན་བརྟགས་ཀྱང་། །
Vol. 99 · folio 89b
རང་བཞིན་ཉིད་ལ་འགྱུར་བ་མེད། །ཡེ་ནས་དོན་གྱི་སངས་རྒྱས་ལ། །འཁྲུལ་པའི་བདེ་སྡུག་འཁོར་ལོས་འཁྱམས། །ལོག་རྟོག་དངོས་མེད་བྱང་ཆུབ་སེམས། །འཁྲུལ་རྟོག་མི་གནས་རྒྱན་གྱི་མཆོག །ཐ་བའི་གནས་ཉིད་བྱང་ཆུབ་ཞིང་། །སྲིད་དངོས་སངས་རྒྱས་མངོན་
རྫོགས་སྐུ། །འཛིན་རྟོག་བྱང་ཆུབ་སྙིང་པོར་གསལ། །བརྟན་གཡོ་དངོས་པོ་ཐམས་ཅད་དང་། །བདེ་ཆེན་སྐུ་ལས་གཞན་མེད་དོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་དེ་བཞིན་
ཉིད་ཀྱི་ལེའུ་སྟེ་ལྔ་པའོ།། །།བཅོམ་ལྡན་རྒྱལ་བ་ཐམས་ཅད་ཀྱི། །དཀྱིལ་འཁོར་སྙིང་པོ་བསྡུས་པའི་དོན། །དེ་ནས་གསང་བའི་བདག་པོ་ཡིས། །དཀྱིལ་འཁོར་རྣམ་པར་འཕྲོ་བའི་དོན། །མཚན་ཉིད་འཕྲོ་ཞིང་རྟོགས་པ་དག །རྒྱལ་བས་བཤད་
ཕྱིར་བསྐུལ་འདེབས་མཛད། །བཅོམ་ལྡན་རྒྱལ་བ་ཐམས་ཅད་ཀྱིས། །དཀྱིལ་འཁོར་སྙིང་པོ་བསྡུས་པའི་དོན། །རྒྱ་ཆེ་མཛད་པའི་མཐུ་ལྡན་པ། །རྡོ་རྗེ་གསང་བ་གསུམ་གྱི་གནས། །རབ་རྒྱས་མཚན་བཞིན་ཆོ་གའོ། །ཡན་ལག་བདག་ལ་བསྟན་དུ་གསོལ། །དེ་ནས་
མགོན་པོ་གསང་བའི་བདག །གཉིས་མེད་ཡེ་ཤེས་ལ་འགྲོ་བའི། །ཏིང་ངེ་འཛིན་ལ་སྙོམས་ཞུགས་གནས། །རྒྱ་ཆེར་སྤྲུལ་པའི་དོན་བསྟན་མཛད། །སྟོང་ཉིད་ཡེ་ཤེས་ལས་བྱུང་བའི། །རི་བོ་རྒྱུད་འཛིན་རིགས་མཚན་ཅན། །དབྱངས་ཀྱི་ཡི་གེའི་ཚུལ་འཇུག་པའི། །རྟ་
བདུན་འོད་སོགས་གསལ་བྱེད་ལྡན། །སྐར་མའི་ཚོགས་དང་འདྲ་བ་ལས། །མཉམ་ཉིད་འོད་ཀྱི་གོང་བུའི་གཟུགས། །སྣང་བའི་འོད་ཟེར་ལྔ་ཡི་ཚུལ། །ཕྱག་རྒྱ་མཚན་མ་སྔགས་དང་བཅས། །རྣམ་འཕྲོས་རང་རིག་ཞིང་ཁམས་སྦྱོང་། །དེ་དག་གོང་བུའི་གཟུགས་མཚུངས་
བར། །གཙོ་བོ་རྡོ་རྗེ་འཛིན་པའི་སྐུ། །སྟོང་ཉིད་སྙིང་རྗེ་ཆེན་པོ་ཡིས། །མ་ལུས་རྒྱུད་རྣམས་གསལ་མཛད་ནས། །ནམ་མཁའ་དང་བའི་དཀྱིལ་འཁོར་བཞིན། །ཐུགས་རྗེ་ཆེན་པོ་སྐྱོན་སྐྱོང་མཛད། །ས་བོན་གསང་བའི་ལས་བྱུང་བའི། །མཁའ་སྣང་གསལ་བ་ཀུན་ཁྱབ་
Vol. 99 · folio 90a
ལས། །སྣ་ཚོགས་ཀུན་ནས་སོ་སོ་ཉིད། །འབྱུང་བཞིའི་དཀྱིལ་འཁོར་རིམ་བཞིན་བཀོད། །ཀུན་འཕྲུལ་ས་བོན་ལས་བསྐྱེད་པའི། །ཡེ་ཤེས་རིན་ཆེན་སྣ་ཚོགས་གཟུགས། །ཤར་དུ་དོ་ཤལ་ཕྲེང་བ་དང་། །གདུགས་དང་རྒྱལ་མཚན་རྔ་ཡབ་སོགས། །
མེ་ལོང་རོལ་མོའི་ཚོགས་བསམ་ཡས། །འཁོར་ལོ་རིན་ཆེན་རྡོ་རྗེ་པད། །ཏྭ་ར་ན་བཞི་རྒྱན་མཛེས་པ། །སྒྲ་དབྱངས་སྣ་ཚོགས་ཉི་ཟླའི་ཚོགས། །ཙཀྲ་བར་ཁྱམས་ཕྲེང་བ་དང་། །དམ་པའི་འདོད་ཡོན་ལྷ་མོ་འཁྲིགས། །རིན་ཆེན་འབར་བའི་ཁྲི་བརྩེགས་གནས། །ཉི་ཟླ་
པདྨའི་རིན་ཆེན་རྒྱན། །གནས་རྣམས་ཁྱབ་པར་ཅི་བཞིན་པར། །དཀྱིལ་འཁོར་ལྷུན་གྱིས་གྲུབ་པའོ། །ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨྃ་ཨཿ། རྀ་རཱྀ། ལྀ་ལཱྀ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་
ས་ཧ་ཀྵ། དེ་བཞིན་ཉིད་དབྱིངས་རྨད་འབྱུང་བའི། །བདེར་གཤེགས་ཀུན་གྱི་ཐུགས་གསལ་བ། །བྱིན་བརླབས་ཡ་མཚན་སྤྲུལ་པའི་སྐུ། །དཀྱིལ་འཁོར་སྣ་ཚོགས་ཀུན་གྱི་གནས། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཕུང་པོ་ཆོས་
རྣམས་སངས་རྒྱས་ཏེ། །འབྱུང་ལྔ་དབྱིངས་ཕྱུག་ཡུམ་གྱི་མཁའ། །ཁམས་དང་སྐྱེ་མཆེད་སེམས་དཔའ་དང་། །སེམས་མའི་ཚོགས་དང་ཁྲོ་མོའི་སྐུ། །ཕྱི་ནང་སྲིད་གསུམ་དངོས་སྣང་བའི། །དཀྱིལ་འཁོར་རིགས་ཀྱི་བདག་ཉིད་ཆེ། །གཟུགས་ཕུང་རྣམ་པར་སྣང་
མཛད་ཆེ། །ཚོར་བ་རིན་ཆེན་འབྱུང་ལྡན་སྐུ། །འདུ་ཤེས་སྣང་བ་མཐའ་ཡས་སྐུ། །འདུ་བྱེད་དོན་ཡོད་གྲུབ་པ་ཡིན། །རྣམ་ཤེས་རྡོ་རྗེ་སེམས་དཔའ་སྟེ། །ཐམས་ཅད་བདེར་གཤེགས་ལྔ་ཡི་སྐུ། །ས་ཁམས་སངས་རྒྱས་སྤྱན་ཡིན་ཏེ། །ཆུ་ཁམས་ལྷ་
མོ་མཱ་མ་ཀཱི། །མེ་ཁམས་ན་བཟའ་དཀར་མོ་སྟེ། །རླུང་ཁམས་དམ་ཚིག་སྒྲོལ་མའོ། །ནམ་མཁའ་ཀུན་དུ་བཟང་མོའི་སྐུ། །འབྱུང་བའི་དཀྱིལ་འཁོར་རྣམ་དག་པའོ། །དབང་པོའི་སྤྱོད་ཡུལ་མ་ལུས་ཀུན། །ཐམས་ཅད་བདེར་གཤེགས་རིགས་ཀྱི་
Vol. 99 · folio 90b
སྐུ། །མིག་ལ་རྣམ་པར་སྣང་མཛད་དེ། །རྣ་བ་རིན་ཆེན་འབྱུང་ལྡན་ཆེ། །སྣ་ལ་སྣང་བ་མཐའ་ཡས་ཉིད། །ལྕེ་ལ་དོན་ཡོད་གྲུབ་པའི་སྐུ། །ལུས་ཉིད་རྡོ་རྗེ་སེམས་དཔའ་ཡིན། །དེ་ལྟར་སྣང་བའི་དཀྱིལ་འཁོར་ཉིད། །ཡེ་ནས་ལྷུན་གྲུབ་གནས་པས་ན། །རྣལ་འབྱོར་
གསང་བ་དོན་ཤེས་བྱ། །ཕྱི་རོལ་དོན་ཤེས་ཡུལ་དྲུག་འདི། །ཡུམ་ཆེན་ལྔ་ཡི་ཕྱག་རྒྱའི་དབྱིབས། །གཟུགས་ཁམས་སངས་རྒྱས་སྤྱན་མ་སྟེ། །སྒྲ་ཚོགས་ལྷ་མོ་མཱ་མ་ཀཱི། །དྲི་ཚོགས་ན་བཟའ་དཀར་མོའི་དབྱིངས། །རོ་དྲུག་ལྷ་མོ་སྒྲོལ་མ་ཡིན། །རེག་ཚོགས་ལྷ་མོ་ཀུན་དུ་
བཟང་མོའི་སྐུ། །དུས་གསུམ་མཉམ་སྦྱོར་འདུ་འབྲལ་མེད། །རྡོ་རྗེ་པདྨོ་མཉམ་སྦྱོར་བས། །རང་རིག་དཀྱིལ་འཁོར་གསལ་བར་མཛོད། །ཐམས་ཅད་མ་ལུས་སྐུ་གསུང་ཐུགས། །ཡོན་ཏན་ཕྲིན་ལས་རོལ་པའི་རྒྱན། །ང་ཉིད་འདུ་འབྲལ་མེད་པའི་དབྱིངས། །ཐབས་དང་
ཤེས་རབ་རོལ་པའི་མཆོག །ས་ཡི་ཁྱད་པར་མ་ལུས་པའང་། །རྡོ་རྗེ་ཆོས་ཀྱིས་སྦྱོར་མཛད་དང་། །ཡོན་ཏན་ཕྲིན་ལས་མཐར་ཕྱིན་པས། །ཚེ་འདི་ཉིད་ཀྱི་གོ་འཕང་མཆོག །རྡོ་རྗེ་གསང་གསུམ་དམ་ཚིག་ཆེ། །རང་གི་མཐུ་ཡི་སྦྱོར་བྱེད་པ། །རྟག་ཏུ་མཉམ་བཞག་སྦྱོར་
བ་ཡིས། །དཀྱིལ་འཁོར་ཆེན་པོའི་གནས་བཞུགས་ཏེ། །དྲི་མེད་བྱང་ཆུབ་སེམས་ཀྱི་ཚུལ། །འགྲོ་རྣམས་ཚོགས་བཅས་དག་པར་བྱས། །རྟག་ཏུ་གསང་སྔགས་བརྗོད་བྱས་ཤིང་། །རྡོ་རྗེ་མགོན་པོའི་སྒོ་གསལ་བརྟན། །རྟག་ཏུ་གཏོར་སྦྱིན་གཏང་བྱས་ཏེ། །ཁམས་
ཀྱི་འཛིན་པ་མེད་པར་གྲོལ། །རྟག་ཏུ་ལྷ་ལ་མཆོད་བྱས་ཏེ། །རང་གི་བདུད་རྩིས་མཆོད་ཅིང་རོལ། །རྟག་ཏུ་མི་གཉིས་བསྟོད་བྱ་བ། །རྣམ་གྲོལ་ཐམས་ཅད་བྲག་ཅའི་སྒྲ། །ཕ་རོལ་ཕྱིན་བཅུ་དུས་གཅིག་ཏུ། །པདྨ་ཆོ་ག་རྟོགས་པར་འགྱུར། །ཟག་པ་ཟད་པས་སྐུ་ལྔ་
དང་། །པདྨའི་རིགས་ཀུན་མཉམ་པར་སྦྱོར། །པདྨའི་དམ་ཚིག་ལ་གནས་པ། །གནས་ཀུན་དཀྱིལ་འཁོར་གསལ་བར་འགྱུར། །པདྨ་རང་གི་གནས་སུ་བསྒོམ། །འདོད་ཆགས་ཆོས་ཀུན་སྤྱོད་པ་ཡི། །མགོན་པོ་རང་རང་གནས་ན་གསལ། །དྲི་མེད་དག་པའི་
Vol. 99 · folio 91a
ཐིག་ལེ་ལས། །འོད་ཟེར་ལྔ་ཡི་སྣང་བ་བཅས། །རང་གི་གནས་ནས་འཕྲོ་མཛད་ཅིང་། །དེ་ཉིད་མགོན་པོའི་སྐུ་འདོད་གཟུགས། །ཀུན་ཏུ་པདྨ་ཆགས་མེད་པས། །གནས་ཀུན་དཀྱིལ་འཁོར་གསལ་བར་འགྱུར། །ཐུབ་པ་ཆེན་པོའི་མཚན་རྣམས་
དང་། །དཔེ་བྱད་རྫོགས་པར་གྱུར་ནས་ནི། །ཡོན་ཏན་མ་ལུས་འབྱུང་བའི་གནས། །ཀུན་དུ་དྲེགས་པའི་སངས་རྒྱས་མཆོག །རྡོ་རྗེའི་དམ་ཚིག་ལ་གནས་པས། །རྡོ་རྗེ་རང་གི་གནས་སུ་བསྒོམ། །འོད་འཕྲོས་འདུས་པའི་གནས་ཕྱག་རྒྱའི། །ཡེ་ཤེས་མཉམ་
ཉིད་ཀུན་དོན་མཛད། །ཐུགས་རྗེས་རྣམ་མང་ཡུལ་བྲལ་ཞིང་། །འཇོམས་པར་མཛད་པའི་ཁྲོ་བོའི་སྐུ། །རང་གི་དཀྱིལ་འཁོར་དྲི་བྲལ་བ། །མངོན་སུམ་གསང་བའི་ཡེ་ཤེས་སྐུ། །འཁོར་ལོའི་དམ་ཚིག་ལ་གནས་པས། །འཁོར་ལོ་རང་གི་གནས་སུ་བསྒོམ། །
རྒྱལ་བ་ཀུན་གྱི་རིན་པོ་ཆེ། །འཕྲོ་འདུ་ཉི་ཤུ་རྩ་ལྔའི་ཚོགས། །ཕུང་ཚོགས་ཁམས་རྣམས་རྣམ་དག་ཅིང་། །ཕྲིན་ལས་ཡེ་ཤེས་བླ་ན་མེད། །བྱང་ཆུབ་དག་པའི་ཆ་ལུགས་གནས། །དཀྱིལ་འཁོར་སྤྲུལ་པའི་བྱིན་བརླབས་སྐུ། །དགའ་བའི་ཐབས་དང་ཤེས་
རབ་སྦྱོར། །ཕྱག་རྒྱ་ཆེན་པོའི་རིགས་འཛིན་གནས། །རྣལ་འབྱོར་དད་བརྩོན་ཏིང་འཛིན་ལྡན། །འགྲུབ་འགྱུར་རིང་པོར་ཐོགས་མེད་སྤྱོད། །ཅེས་གསུངས་པས་འཁོར་གྱི་བྱང་ཆུབ་སེམས་དཔའི་ཚོགས་རྣམས་མཉེས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་
དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་ཏིང་ངེ་འཛིན་གྱི་ལེའུ་སྟེ་དྲུག་པའོ།། །།དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་སྟན་ལས་ལངས་ཏེ། དགའ་བའི་མཆོད་པ་དང་གར་ཐབས་ཀྱིས་དཀྱིལ་འཁོར་ཐམས་ཅད་མཉེས་པར་བྱས་ནས། །
བཅོམ་ལྡན་འདས་ལ་ཕྱག་འཚལ་ཏེ་གསོལ་བ་བཏབ་བོ། །ཀྱེ་མ་རྒྱལ་བ་ཀུན་གྱི་གཙོ། །སངས་རྒྱས་ཚོགས་རྣམས་བསྐྱེད་པའི་ཡབ། །ཁྱེད་ཀྱིས་དཀྱིལ་འཁོར་སྤྲུལ་མཛད་ནས། །གདུལ་བྱའི་ལམ་འདི་གྲོལ་བྱས་ན། །ཕྱི་ཡི་འགྲོ་བ་ཅི་ལྟར་གཟུང་། །གང་དག་དབང་
Vol. 99 · folio 91b
པོ་མ་སྨིན་པའི། །དཀར་པོ་ཆོས་རྣམས་མཐོང་མི་འགྱུར། །དེ་དག་ཐུགས་རྗེ་ཆེན་པོ་ཡིས། །བཟུང་ཞིང་ལས་ལ་གཞུག་པར་སྣང་། །མ་འོངས་འགྲོ་བ་ལ་ལ་དག །འདི་ལྟར་དཀྱིལ་འཁོར་མཐོང་བ་རྣམས། །ཇི་ལྟར་དཀྱིལ་འཁོར་བརྟན་པར་འདུལ། །ཞེས་གསོལ་
པ་དང་། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མ་འོངས་པའི་འགྲོ་བ་ཐེག་པ་གསང་སྔགས་ཀྱི་ལམ་དུ་འཇུག་པར་འདོད་པ་དག་གིས་ནི། རྡོ་རྗེ་སློབ་དཔོན་ལ་བརྟེན་ཏེ་གཟུགས་བརྙན་གྱི་དཀྱིལ་འཁོར་དུ་གཞུག་པར་བྱའོ། །རྡོ་རྗེ་སློབ་དཔོན་བློ་གྲོས་མཆོག །
དད་བརྩོན་ཤེས་རབ་སྟོབས་དང་ལྡན། །བདག་ཆོས་མ་ལུས་ཤེས་འགྱུར་ནས། །སྐྱོབ་པ་བྱང་སེམས་སྡོམ་པ་བླངས། །བྱང་སེམས་སྙིང་རྗེ་ཆེན་པོ་དང་། །དགའ་བ་བཏང་སྙོམས་བཞི་བཞག་ནས། །སེམས་ཅན་ཐམས་ཅད་མགྲོན་དུ་གཉེར། །སླར་ཉིད་བྱང་ཆུབ་ལམ་
ལ་དགོད། །ཕ་རོལ་ཕྱིན་པ་དྲུག་རྣམས་དང་། །བསྡུ་བ་བཞི་ལ་ལེགས་གནས་པས། །ཐེག་པ་ཆེན་པོའི་ལམ་གཉེར་ཞིང་། །ཉན་ཐོས་ལ་སོགས་བློས་པ་མེད་པའི་བློས། །གསང་བའི་ཐེག་པ་དོན་གཉེར་ཞིང་། །དཀྱིལ་འཁོར་དབང་ཐོབ་དམ་ཚིག་ལྡན། །གསང་
བའི་རྒྱུད་རྣམས་དོན་ཤེས་ཤིང་། །དེ་ཉིད་བཅུ་ལས་གོམས་གྱུར་པས། །རང་གི་ཡེ་ཤེས་རྣམ་གྲོལ་ཞིང་། །དངོས་པོ་དེ་ཉིད་བརྟན་པར་གནས། །མུ་སྟེགས་ལ་སོགས་མི་བསྐྱོད་ཅིང་། །ཐེག་དམན་ལ་སོགས་འགྱུར་བ་མེད། །རྟག་ཏུ་འགྲོ་བ་བཟུང་བའི་བློས། །
དཀྱིལ་འཁོར་ལ་སོགས་ལས་ལ་བརྩོན། །མི་གནས་མྱ་ངན་འདས་པ་ཡི། །གྲོང་ཁྱེར་ཆེན་པོར་འགྲོ་བྱེད་དཔོན། །འཇིག་རྟེན་དྲག་བརྩོན་ཆོས་བརྒྱད་དག །བཏང་སྙོམས་སྤོང་ལེན་མེད་པ་ཉིད། །དམུས་ལོང་ཚོགས་ཀྱི་མིག་བུ་བས། །བླ་མའི་
གཙོ་བོར་གཟུང་བར་བྱ། །འཇུག་པའི་གང་ཟག་ཕུན་སུམ་ཚོགས། །ཞི་དེས་གསོང་པོར་སྨྲ་བ་དང་། །འཇམ་ཞིང་འགྲོ་བའི་ཡིད་འོང་བ། །རྩེ་གཅིག་དང་བ་བརྩོན་འགྱུར་བྱེད། །བློ་གྲོས་ཡོན་ཏན་ཀུན་ལ་འཇུག །ལྷ་དང་བླ་མ་ལ་སོགས་བུས། །
Vol. 99 · folio 92a
ཐེག་པ་ཆེན་པོའི་ལམ་དག་པས། །ངན་པའི་ཚོགས་སྤངས་གཞན་དུ་གནས། །དེ་ནི་བློ་གྲོས་བཟང་པོ་ཡོན་ཏན་ལྡན། །ཐེག་ཆེན་གསང་བ་འཛིན་པའི་སྣོད། །ས་མཆོག་ཤིན་ཏུ་དབེན་པའི་གནས། །རི་བོ་ནགས་ཚལ་འབྲས་བུ་དང་། །མེ་ཏོག་ཆུ་རྒྱུན་ཕུན་
སུམ་ཚོགས། །གནོད་བྱེད་སྐྱེ་བོ་ཚོགས་བྲལ་བ། །རྣལ་འབྱོར་གྲོགས་བཅས་དགའ་འགྱུར་བའི། །བདག་དབང་བར་ཆད་མེད་པའི་མཆོག །བསྙེན་པ་ཇི་བཞིན་རྫོགས་པ་ཡིས། །དཀྱིལ་འཁོར་བྲི་སོགས་ལས་རྣམས་བྱ། །ཕུན་སུམ་ཚོགས་པ་བདུན་ལྡན་པས། །བདག་
གནས་ས་གཞིའི་གྲོགས་བཅས་དང་། །མཆོད་རྫས་ཡོ་བྱད་མ་ལུས་པ། །བསྲུང་ཞིང་བྱིན་གྱིས་བརླབ་པར་བྱ། །རྡོ་རྗེ་ས་གཞི་ར་བ་དང་། །གུར་དང་བླ་རེ་བཅས་པ་ཡིས། །ཁྲོ་བོ་མེ་འོད་མཚོན་ཆའི་ཚོགས། །བསྲུང་ཞིང་འཁོར་ལོ་རིམ་བཞིན་བསྒོམ། །སེམས་
ཅན་ཐམས་ཅད་བསྒྲལ་བའི་བློས། །བསོད་ནམས་ཚོགས་ཀྱིས་དག་པར་བྱ། །ཕྱག་འཚལ་མཆོད་པ་དབུལ་བ་དང་། །སྡིག་བཤགས་བསོད་ནམས་རྗེས་ཡི་རང་། །སངས་རྒྱས་མྱ་ངན་མི་འདའ་ཞིང་། །ཆོས་ཀྱི་འཁོར་ལོ་བསྐོར་བ་དང་། །ལུས་དབུལ་བྱང་སེམས་
བསྐྱེད་པ་དང་། །ལམ་གནས་དགེ་བའི་རྩ་བ་བསྔོ། །རྒྱ་ཆེར་ཡོངས་སུ་བསྔོ་བྱས་ཤིང་། །སེམས་ཅན་དོན་དུ་སྨོན་ལམ་གདབ། །དམིགས་མེད་པ་ཡི་རང་བཞིན་གྱིས། །དེ་དག་བརྩོན་བྲལ་ནམ་མཁའ་བཞིན། །རྣམ་ཐར་གསུམ་ལས་འདས་པ་ཡི། །དེ་བཞིན་
ཉིད་ཀྱི་ཡེ་ཤེས་ཆེ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་འདྲ་བ་རྣལ་འབྱོར་པས། །དོན་ཀུན་མཉམ་པ་ཉིད་ལ་གསལ། །དེ་ལ་རྣམ་པར་འཕྲུལ་པའི་ཚོགས། །དཀྱིལ་འཁོར་ཆེན་པོ་སྤྲུལ་བྱས་པས། །རིགས་
ཀྱི་ཞིང་ཁམས་སྤྱོད་བྱེད་ཅིང་། །རྣལ་འབྱོར་ཆེན་པོ་ལས་ཀུན་འགྲུབ། །ས་ཕྱོགས་དྲི་མེད་ཡིད་འོང་བའི། །གྲོང་ངམ་གྲོང་ཁྱེར་དགོན་པའམ། །རི་ཕུགས་ནགས་ཚལ་གང་རུང་བར། །ཉམས་དགའ་ཡན་ལག་བརྟག་པར་བྱ། །གང་དུ་བཟང་ནི་འབྲས་བུ་བཅས། །
Vol. 99 · folio 92b
ནེའུ་གསིང་ཆུ་འགྲམ་མེ་ཏོག་བཅས། །དཔལ་རྫོགས་ཡོན་ཏན་འབྱུང་བའི་གནས། །དེ་ནི་རབ་གུས་བརྟག་པར་བྱ། །ནམ་མཁའ་འཁོར་ལོ་དྲ་བ་དང་། །ས་གཞི་པདྨ་དྲ་བ་དང་། །བཀྲ་ཤིས་ཕུན་སུམ་སྣ་ཚོགས་གཞི། །བར་ཆད་མེད་པའི་མཚན་ཉིད་ཡིན། །
ས་གཞི་ཞོམ་རྡིབ་མེད་པ་ཡི། །དབུས་སུ་མཐོ་བ་ཕྱག་རྒྱ་ཆེ། །ཤར་དང་བྱང་དུ་གཞོལ་བ་ནི། །ཕྲིན་ལས་རྣམ་བཞིའི་དངོས་གྲུབ་འགྱུར། །ལྷོ་དང་ནུབ་ཏུ་གཞོལ་བས་ནི། །འཇིག་རྟེན་པ་ཡི་དངོས་གྲུབ་འགྱུར། །ནུབ་དང་བྱང་དུ་གཞོལ་བ་ནི། །ཏིང་འཛིན་
ཕྲོ་མོའི་ལས་གཞན་འགྱུར། །གང་ཞིག་ཤར་ཕྱོགས་མཐོ་བ་དང་། །དབུས་སུ་དམའ་བ་སྤང་བར་བྱ། །ས་དེ་པུས་མོ་ནུབ་ཙམ་དུ། །བརྐོས་ཏེ་སླར་ཡང་དགང་བར་བྱ། །མང་འཕེལ་གྱུར་ན་དངོས་གྲུབ་མཆོག །གང་བར་གྱུར་པ་ཤིས་པ་ཡིན། །དམའ་
ཞིང་མ་ལེགས་གྱུར་པ་ཡིན། །སོལ་དུམ་རུས་སོགས་བྱུང་ན་ཡང་། །ཡང་ན་ཆུ་ཡིས་དགང་བྱས་ཏེ། །སློབ་དཔོན་རྡོ་རྗེ་དྲིལ་འཛིན་པས། །མཉམ་བཞག་ལྷ་ཡི་སྔགས་བརྗོད་ཅིང་། །ཤར་དུ་མི་དྲག་གོམ་པ་བརྒྱད། །སོང་སྟེ་སླར་ལྡོག་བལྟ་བར་
བྱ། །འགྲིབ་པ་མེད་ན་དངོས་གྲུབ་འགྱུར། །སྣང་དང་མི་སྣང་ས་ཡི་བདག །མགུ་བྱས་རིན་གྱིས་ཉོ་བ་དང་། །བླངས་ཏེ་བར་ཆད་མེད་པའི་ཕྱིར། །བགེགས་གཞན་ཕྲ་མོ་བསྐྲད་པར་བྱ། །བར་ཆད་མེད་པའི་ས་དབུས་སུ། །རིགས་ཀྱི་བདག་པོ་འབྱོར་ལྡན་པས། །ཆོས་གོས་
ལ་སོགས་རྒྱན་ཐོགས་ཤིང་། །པདྨའི་དཀྱིལ་འཁོར་ལེགས་བཞུགས་ཏེ། །འཁོར་ལོས་སྒྱུར་རྒྱལ་ཆ་ལུགས་ཀྱིས། །མཆོད་སོགས་སྦྱང་ཞིང་བྱིན་བརླབས་ཏེ། །རྡོ་རྗེ་བསྲུང་བའི་ཕྱག་རྒྱ་ཡིས། །ཕྱོགས་བཅུའི་དཀྱིལ་འཁོར་རིག་པར་བཅས། །ས་ཡི་ལྷ་མོ་སྲུང་
མ་རྣམས། །སྤྱན་དྲངས་མཆོད་པས་མཉེས་པར་བྱ། །ཁྱད་པར་ས་ཡི་བདག་པོ་དང་། །འགྲོ་དྲུག་བགེགས་རྣམས་མ་ལུས་ཀུན། །དགུག་ཅིང་བུ་ལོན་མཆོད་སྦྱིན་གཏང་། །དྲི་ཞིམ་ཆུ་ཡིས་ཀུན་གཏོར་ཞིང་། །སྔགས་དང་ཕྱག་རྒྱས་སྦྱང་བར་བྱ། །གང་ཞིག་དངོས་
Vol. 99 · folio 93a
གྲུབ་ལ་སོགས་འདོད། །རབ་འབྲིང་ཐ་མ་གྲུབ་དོན་དུ། །ལྟོ་འཕྱེ་བརྟག་པའི་ཆོ་ག་བཞིན། །ཡན་ལག་ཀུན་དབང་རྒྱ་ཡང་བྱ། །དེ་ནས་དཀྱིལ་འཁོར་རྒྱར་མཉམ་པའི། །ས་གཞི་ཁྲུ་ལ་སོགས་ཚད་དུ། །བརྐོས་ཏེ་ས་ཡི་སྐྱོན་བསལ་ཞིང་། །ས་ཞག་
མདོག་བཟང་འཇམ་ཕྱིན་པས། །གང་ཞིག་དྲི་ཞིམ་ཆུར་བཅས་པའི། །སྔགས་བཏབ་གང་ཞིག་འཐས་པར་བཅག །བསྒྲུབ་པའི་དཀྱིལ་འཁོར་ཁྲུ་དོར་བསྟོད། །རྒྱར་ནི་ཁྲུ་དྲུག་པ་ཡི་ཚད། །ཚོགས་བསག་ཁྲུ་གང་འཕང་དུ་བསྟོད། །མཐའ་སྐོར་ཁྲུ་གང་པ་ཡི་ཚད། །
དབང་བསྐུར་སོར་བཞིའི་ཚད་བསྟོད་དེ། །ཇི་ལྟར་གྲུ་བཞི་རྒྱར་བསྐྱེད་ཅིང་། །དབྱིབས་ལེགས་མེ་ལོང་བཞིན་དུ་གནས། །ཚད་མཉམ་གྲོག་སྦུར་ལ་སོགས་པ། །རིན་ཆེན་ལྔ་དང་སྨན་ལྔ་དང་། །སྙིང་པོ་ལྔ་དང་འབྲུ་ལྔ་དག །དྲི་ཆུ་སྔགས་ཀྱིས་བཏབ་བྱས་ནས། །
དཀྱིལ་འཁོར་སྙིང་པོར་གཞག་པར་བྱ། །ཕྱོགས་ཀུན་མཉམ་པ་ཉིད་དམིགས་ཏེ། །སྟོང་པ་ཉིད་ཀྱི་སྔགས་ཀྱིས་སྦྱང་། །དྲི་ཞིམ་སྔགས་ཀྱིས་བྱིན་བརླབས་པའི། །ཆུ་རྒྱུན་ཕྱོགས་བཅུར་གཏོར་བྱས་ཤིང་། །སྣ་ཚོགས་གཏོར་མས་མཉེས་བྱས་ཏེ། །ལྷ་ཚོགས་
མགྲོན་རྣམས་ཚིམ་པར་བྱ། །སློབ་དཔོན་རིགས་ཀྱི་གཙོར་གནས་པའི། །རྒྱན་དང་ཆ་ལུགས་རྫོགས་བྱས་ནས། །སྒྲུབ་པའི་གྲོགས་མཆོག་བློ་གྲོས་ལྡན། །ཚུལ་བཞིན་དུ་ནི་གསོལ་བ་བཏབ། །དབུས་ཀྱིས་ཡི་ཆར་གནས་པ། །ཀུན་འབྱུང་ནམ་མཁའ་དག་པའི་
སྔགས། །བརྗོད་ཅིང་འབྱུང་བའི་ས་བོན་ལས། །དཀྱིལ་འཁོར་རི་བརྩེགས་བསྒོམ་པར་བྱ། །རྡོ་རྗེ་བསྡམས་པ་སར་གཞག་ཅིང་། །བྱམས་པའི་རྡོ་རྗེ་རྣམ་དག་ཅིང་། །རྡོ་རྗེ་དཀྱིལ་འཁོར་ཐུགས་དང་བཅས། །ཕྱག་མཚན་དྲན་པ་ཐོག་མཐར་རྒྱན། །རྡོ་རྗེ་ས་གཞི་
ར་བ་དང་། །གུར་སོགས་ཁྲོ་བོ་མེ་འོད་བཅས། །གཙོ་བོ་གར་གྱི་དབང་ཕྱུག་སྐུས། །པད་བཅས་ཐལ་མོ་ལན་གསུམ་བརྡབ། །འོད་འཕྲོས་གནས་ཀུན་གཡོས་པ་ལ། །ལྷ་མོ་གསེར་མདོག་རྒྱན་གྱིས་མཛེས། །མེ་ཏོག་ཕྲེང་བ་བུམ་ཐོགས་པའི། །ལུས་ཕྱེད་
Vol. 99 · folio 93b
ས་ལས་འཐོན་བྱས་ཏེ། །མཐུན་ན་བཀའ་ཉན་ཚུལ་དུ་གནས། །མཆོད་བསྟོད་ཞལ་བསིལ་སོགས་འབུལ་ཞིང་། །དྲི་ཞིམ་ལས་རྣམས་མ་རྫོགས་པར། །དེ་སྲིད་མི་འགྱུར་བརྟན་བཞུགས་ནས། །བདུད་སོགས་བསྒོ་བའི་ངག་བཅས་མཛད། །སྐྱོབ་པ་སངས་
རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལས། །ལྷ་མོ་ཁྱོད་ནི་དཔང་དུ་ཤོག །ཇི་ལྟར་རྒྱལ་བ་ཐམས་ཅད་ཀྱིས། །བདུད་ཀྱི་སྡེ་རྣམས་འཇོམས་མཛད་པ། །དེ་བཞིན་བདག་གིས་བདུད་ལས་ཀྱང་། །རྒྱལ་བར་བྱས་པའི་དཀྱིལ་
འཁོར་བརྩམ། །དེ་ནས་སློབ་དཔོན་རྒྱན་རྫོགས་པའི། །རྡོ་རྗེ་དྲིལ་འགྱིང་བཅས་པ་ལ། །དམ་ཚིག་ཉེ་བར་བསྐུལ་བ་ཡི། །གླུ་དག་ཕྱོགས་བཞིའི་གནས་ནས་གདོན། །རྒྱལ་བས་འགྲོ་བའི་མགོན་གྱུར་པའི། །ཆོས་ཀྱི་མེ་ལོང་གསལ་བ་སྔོན། །བདེར་གཤེགས་
རྣམས་ཀྱི་གསང་བ་པ། །རྡོ་རྗེ་གསང་གསུམ་དམ་ཚིག་མཆོག །ཡེ་ཤེས་དྲི་མ་མེད་པའི་ཚུལ། །སྒྲིབ་སོགས་མ་ལུས་བྲལ་བྱེད་པའི། །རྡོ་རྗེ་པདྨོ་མཉམ་པའི་དབྱིངས། །དཀྱིལ་འཁོར་ཆེན་པོ་དྲུག་ཅུའི་བདག །ཐེག་ཆེན་ཆོས་ཀྱི་འཁོར་ལོའི་མཛོད། །གསང་གསུམ་པདྨོ་
དག་པའི་དབྱིངས། །སོ་སོར་གསལ་བའི་དོན་བསྟན་པ། །རྡོ་རྗེ་ལྟ་བུས་གནས་ཀུན་སྦྱོར། །ཟབ་ཅིང་རྒྱ་ཆེན་སྒྲ་སྣ་ཚོགས། །ཆོས་ཀྱི་འཁོར་ལོ་བཤད་པའི་དུས། །རྒྱལ་པོ་ཡོན་ཏན་དཔེ་དང་བྲལ། །རིན་ཆེན་ལྷུན་པོའི་མཛོད་མངའ་བ། །ཉམས་དགའ་ཐུགས་རྗེའི་ཞིང་རྣམས་
དགོངས། །བདག་མེད་མཉམ་པའི་ཡེ་ཤེས་ཅན། །ཕྲིན་ལས་དག་པས་ཟད་པར་མཛོད། །གསང་གསུམ་སྣ་ཚོགས་རྡོ་རྗེའི་བདག །རིགས་མཆོག་ཤེས་རབ་བརྩོན་བྱེད་ཅིང་། །སྤྱན་བཟང་དག་པས་འགྲོ་ལ་གཟིགས། །སླར་ཉིད་ཁྲོ་བོ་ཆེན་པོའི་སྐུ། །ཞལ་ལྔ་ཕྱག་ཆ་སྣ་ཚོགས་
འཛིན། །འཇིགས་བྱེད་འབར་བའི་སྐུར་གནས་ཏེ། །མགུར་ནས་ཧཱུྃ་བསྒོམས་སྒྲ་སྒྲོགས་ཤིང་། །རྡོ་རྗེ་པདྨ་ལྟ་བུ་ཡིས། །ལྷ་རྣམས་བདག་ལ་བསྡུ་བྱེད་ཅིང་། །མ་དང་ཏ་ལས་བྱུང་བ་ཡི། །མིག་གཉིས་ཉི་ཟླའི་དཀྱིལ་འཁོར་བརྗིད། །འབར་ཞིང་ཐམས་ཅད་དག་བྱས་ནས། །
Vol. 99 · folio 94a
སླར་ཉིད་རང་གི་དཀྱིལ་འཁོར་རྫོགས། །ཤངས་ཀྱི་རླུང་སྒྲོམ་འབར་བ་ནས། །འཇིག་རྟེན་ཐམས་ཅད་འབར་བྱེད་པ། །རྡོ་རྗེའི་འགྲོས་ལས་བྱུང་བ་ཡི། །སྣ་ཚོགས་ས་གཞིར་བརྟན་པར་བྱས། །ཨོཾ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ་
ཧཱུྃ། ཨཱ་ན་ཡ་ཧོ་བྷ་ག་བཱན་བིདྱཱ་རཱ་ཛ་ཡ་ཧཱུྃ་ཧཱུྃ་ཧཱུྃ་ཕཊ། ཕྱག་གི་མཚན་མ་ཀུན་འཁྲོལ་ཞིང་། །ཁྲོ་བོའི་དཀྱིལ་འཁོར་སྤྲོ་བར་བྱེད། །ཧཱུྃ་ལྷ་དབང་རླུང་ལྷ་ཡི་ཚོགས། །གནོད་སྦྱིན་དྲི་ཟ་སྲིན་པོ་དང་། །ཤ་ཟ་གཤིན་རྗེ་མ་མོའི་ཚོགས། །མཁའ་འགྲོ་གནོད་སྦྱིན་མ་ལུས་
རྣམས། །གང་དག་ས་གཞི་འདིར་གནས་པ། །སྲུང་བྱེད་ས་ཡི་བདག་པོར་བས། །ཐོས་པ་ཙམ་གྱིས་མྱུར་བར་དེངས། །ང་ཡི་བཀའ་ལས་འདའ་མ་བྱེད། །གང་ཞིག་གནས་པའི་མཐུ་བོ་ཆེ། །པདྨ་རྡོ་རྗེ་ཁ་ཊྭཱཾ་ག། །ཐལ་བའི་ཚོགས་བཞིན་རླག་པར་བྱེད། །
རབ་འབར་ཁྲོ་བོའི་གནས་འཇོམས་པའོ། །པདྨའི་འབར་བའི་གཟུགས་འདི་ཡིས། །གལ་ཏེ་གང་གི་དམ་ཚིག་བཅག །འདོད་གསུམ་སྐྱེ་གནས་གསལ་བྱས་ཏེ། །འཇིགས་པར་འགྱུར་ཞིང་གཞན་འདིས་མེད། །ས་ལས་ཡོངས་སུ་བསྐོར་བྱས་ཏེ། །བགེགས་བྱེད་
བྱ་ཕྱིར་ཕུར་བར་གདབ། །ཨོྃ་གྷཱ་ཏ་ཡ་གྷཱ་ཏ་ཡ་སརྦ་དུཥྚ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་རོད་ཨཱཛྙཱ་པ་ཡ་ཏི་ཀཱ་ཡ་བཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ལག་པ་བསྐྱོད་ཅིང་རྐང་པ་བསྐྱོད། །ངོ་མཚར་ཁྲོ་བོའི་ཟུར་མིག་བཞིན། །སྨིན་མ་ཁྲོ་གཉེར་གཡོན་མཛད་ཅིང་། །ཁ་ཡི་
པདྨ་འཛུམ་བཅས་པས། །སོ་སོའི་ཕྱག་རྒྱ་གནས་སུ་བསྒྱུར། །འགྱིང་བག་བཅས་པས་ཞལ་ལ་བསྟོད། །རྟ་མཆོག་ཁྲོ་བོའི་གར་ཐབས་ཀྱིས། །ཞི་རྒྱས་དབང་དང་དྲག་པོའི་ཚུལ། །བ་ཡི་རྣམ་ལྔ་དྲི་བསྲེས་ཆུས། །དཀྱིལ་འཁོར་ས་གཞི་ཉེར་བྱུགས་ནས། །ལྷ་རྣམས་
གནས་སུ་དྲི་ཡི་ཆུས། །ཐིག་ལེ་གྲུ་བཞིར་ཟླུམ་པོར་བྱེ། །རང་གི་སྔགས་དང་མེ་ཏོག་རྣམས། །སོ་སོའི་གནས་སུ་དགྲམ་པར་བྱ། །དབུ་རྒྱན་རོལ་མོ་མཆོད་པའི་ཚོགས། །ལྷ་མགོན་གནས་ཀྱི་ཉེ་འཁོར་མཛེས། །དཀྱིལ་འཁོར་ལྷ་རྣམས་ཉེ་བའི་ས། །
Vol. 99 · folio 94b
མཆོད་ཅིང་བསྟོད་པས་མཉེས་པར་བྱ། །ཆོ་གའི་ཡན་ལག་རྫོགས་པ་དང་། །བཟོད་གསོལ་བསྐང་བའི་དོན་ཆེད་དུ། །རྡོ་རྗེ་དྲིལ་འཛིན་དཔའ་བོ་ཡིས། །ཕྱོགས་རྣམས་ཀུན་ཏུ་བསྐོར་བ་བྱ། །ཨོྃ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་བ་ཏིཥྛ་དྲྀ་ཌྷོ་མེ་བྷ་བ།
སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་ཏོ་ཥྱོ་མེ་བྷ་བ། སརྦ་སིདྡྷིཾ་མེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡ་ཀུ་རུ་ཧཱུྃ། ཧ་ཧ་ཧ་ཧ་ཧོཿ། བྷ་ག་ཝན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བིཛྲཱ་བྷ་བ་མ་ཧཱ་ས་མ་ཡ་སཏྭ་ཨཱཿ། གསང་སྔགས་རྒྱལ་པོ་
བླ་མེད་པའི། །ལན་ཅིག་བརྗོད་པ་ཙམ་གྱིས་ཀྱང་། །སྡིག་པ་མ་ལུས་ཟད་བྱེད་ཅིང་། །ལས་རྣམས་ཐམས་ཅད་འགྲུབ་པར་བྱེད། །པུས་མོ་ས་ལ་བཙུགས་བྱས་ཏེ། །ལག་པ་གཡས་པ་སྤོས་འཛིན་ཅིང་། །གཡོན་པས་དྲིལ་བུ་དཀྲོལ་བྱས་ཏེ། །ཚིག་འདིས་
གསོལ་བ་གདབ་པར་བྱ། །ཨོྃ་བདེར་གཤེགས་སྟོབས་བཅུ་བརྩོན་ལྡན་འགྲོ་བའི་མགོན། །མི་འཇིགས་ལ་སོགས་ཡོན་ཏན་རྩལ་མེད་ལྡན། །རིགས་གཉིས་ཐབས་ཀྱིས་བརྒྱུད་པའི་དཀྱིལ་འཁོར་ཆེ། །བསྙེངས་པ་མི་མངའ་ཐུགས་རྗེ་ཤུགས་ཆེན་པོ། །
དགའ་མཛད་དབང་གི་དཀྱིལ་འཁོར་ཚོགས་ཆེན་ལ། །ཚུལ་ཁྲིམས་ལ་སོགས་ཕུང་པོ་མཉེས་གྱུར་ཅིག །པདྨ་གར་གྱི་དབང་ཕྱུག་གཙོར་བྱས་པའི། །དྲི་བྲལ་ཐུགས་རྗེའི་དཀྱིལ་འཁོར་འདི་ཉིད་ནི། །མཉེས་པའི་ཚོགས་རྣམས་ཀུན་ལས་རྣམ་གྲོལ་
ཞིང་། །བདེ་ལེགས་ཡོན་ཏན་ཐམས་ཅད་འབྱུང་བའི་གནས། །འདོད་ཡོན་འབྲས་བུ་ཕུན་སུམ་ཚོགས་བསྒྲུབ་དང་། །འགྲོ་རྣམས་མ་ལུས་ཐུགས་རྗེས་བཟུང་བྱེད་ཅིང་། །ཁྱེད་རྣམས་ལ་ཡང་མཆོད་པ་བྱ་བའི་ཕྱིར། །དཀྱིལ་འཁོར་རྣམ་དག་རྒྱ་ཆེན་རྩོམ་
ལགས་ན། །མགོན་པོའི་བཀའ་དྲིན་རྗེས་སུ་བརྩེ་དགོངས་ཏེ། །ཁྱེད་ཀྱིས་རབ་ཏུ་གནས་པར་མཛད་འོས་ལགས། །མེ་ཏོག་དྲི་བཟངས་ཕྲེང་སོགས་འདི་བཞེས་ལ། །ཇི་སྲིད་འགྲོ་བའི་དོན་རྣམས་མ་གྲུབ་པར། །དེ་སྲིད་ཐུགས་རྗེས་བཟུང་ཞིང་བཞུགས་
Vol. 99 · folio 95a
ནས་ནི། །བདག་གི་གནས་སོགས་འདི་དག་བྱིན་གྱིས་རློབས། །དེ་ནས་སློབ་མ་ལ་བོས་ཏེ། །ཀྱེ་རིགས་ཀྱི་བུ་ཁྱོད་ཐེག་པའི་སྣོད། །རྡོ་རྗེ་ཐེག་པའི་གཞུང་འདི་ཉོན། །དད་གུས་དགའ་བའི་ཤུགས་ཕྱུང་ཤོག །སྔོན་གྱི་དེ་བཞིན་གཤེགས་རྣམས་ཀྱིས། །ཆོ་
ག་བཟང་པོ་འདི་བསྟན་བྱ། །མགོན་པོ་རྫོགས་སངས་རྒྱས་རྣམས་དང་། །མ་བྱོན་དེ་བཞིན་གཤེགས་པའི་ཚོགས། །དེ་བཞིན་ད་ལྟའི་སེམས་ཅན་རྣམས། །འགྲོ་ལ་ཕན་ཕྱིར་གནས་བཞུགས་ཏེ། །གསང་བ་ཟབ་མོ་བླ་ན་མེད། །ཆོ་ག་བཟང་པོ་འདི་སྤྱོད་པས། །སྐྱེས་མཆོག་རང་གི་
གནས་ཉིད་དུ། །ཀུན་མཁྱེན་ཡེ་ཤེས་བདེ་ཆེན་བརྙེས། །གསང་སྔགས་སྦྱོར་བ་མཉམ་མེད་པར། །པདྨ་གར་དབང་དཀྱིལ་འཁོར་གྱི། །བདུད་ཚོགས་ཤིན་ཏུ་མི་བཟད་པའི། །དཔུང་རྣམས་མ་ལུས་འཇོམས་པར་མཛད། །དེ་ཕྱིར་ཀུན་མཁྱེན་ཡེ་ཤེས་ཀྱི། །བློ་གྲོས་མཆོག་
འདི་ཁྱོད་ཀྱིས་ཀྱང་། །སངས་རྒྱས་ཆོས་དང་དགེ་འདུན་ལ། །ཀུན་དུ་སྐྱབས་སུ་འགྲོ་བར་གྱིས། །རྣལ་འབྱོར་མཁའ་འགྲོ་གསང་སྔགས་ཅན། །རིགས་ཀྱི་དཀྱིལ་འཁོར་སོ་སོ་ཡི། །འཁོར་ལོ་བཞུགས་པའི་ཚོགས་རྣམས་ལ། །ཀུན་ནས་སྐྱབས་སུ་འགྲོ་བར་གྱིས། །དཔའ་
བོ་དཔའ་མོ་འཁོར་དང་བཅས། །བྱང་ཆུབ་སེམས་དཔའི་བདག་ཉིད་ཆེ། །ཁྱད་པར་དུ་ཡང་སློབ་དཔོན་ལ། །ཁྱོད་ཀྱིས་སྐྱབས་སུ་འགྲོ་བར་གྱིས། །དེ་ནས་ལེགས་སྤྱོད་སློབ་མ་ཡིས། །སྐྱབས་འགྲོ་བྱང་སེམས་སྡོམ་པ་བཟུང་། །དཀོན་མཆོག་གསུམ་ལ་ཕྱག་འཚལ་ལོ། །དཀོན་
མཆོག་གསུམ་པོ་གཟུང་བར་བྱ། །བདག་གིས་སྡིག་པ་བྱས་པ་དང་། །བགྱིད་པ་རྗེས་སུ་ཡི་རང་བ། །མགོན་པོའི་སྤྱན་སྔར་མཆིས་ནས་སུ། །དེ་དག་ཐམས་ཅད་བཤགས་པར་བགྱི། །རྒྱལ་བ་སྲས་བཅས་འཁོར་རྣམས་དང་། །རང་རྒྱལ་དགྲ་བཅོམ་འགྲོ་རྣམས་
ཀྱིས། །བསྒོམ་བཟླས་ལ་སོགས་བསོད་ནམས་ལ། །དད་པས་རྗེས་སུ་ཡི་རང་ངོ་། །སེམས་ཉིད་མངོན་པར་སངས་རྒྱས་དང་། །ཆོས་ཀྱི་འཁོར་ལོ་སྐོར་བྱེད་པའི། །ཚོགས་སྤྱོད་བྱང་ཆུབ་སེམས་དཔའ་ལ། །བདག་ནི་རབ་ཏུ་སྐྱབས་སུ་མཆི། །སངས་རྒྱས་རྣམས་
Vol. 99 · folio 95b
འབྱུང་ཅི་ལྟ་བར། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་སེམས་མཆོག་དྲི་མེད་པས། །འགྲོ་བ་རྒྱ་ཆེ་ཚོགས་ལ་དམིགས། །དུས་གསུམ་བཞུགས་པའི་འགྲོ་རྣམས་ཀྱིས། །ཐུགས་ཀྱི་དཀྱིལ་འཁོར་གསལ་མཛད་པ། །དེ་བཞིན་ཉིད་དབྱིངས་བྱང་ཆུབ་སེམས། །
དུས་གསུམ་དག་ཏུ་གཏང་མི་བྱ། །རྡོ་རྗེ་སློབ་དཔོན་ལ་གུས་ཤིང་། །དུས་ཀུན་དུ་ནི་ཡོན་ཏན་བཟུང་། །རྣལ་འབྱོར་གསང་བ་སྨད་མི་བྱ། །རྡོ་རྗེ་སྤུན་ལ་མིག་བཞིན་བལྟ། །གསང་སྔགས་ཕྱག་རྒྱའི་རྣམ་པ་དག །བརྩོན་པས་དུས་གསུམ་དྲན་པར་བྱ། །དེ་ནས་
ཤིས་པར་བྱ་བའི་ཕྱིར། །རང་དང་མཚན་མའི་ཡི་གེ་སྔགས། །བྱིན་བརླབས་ཡེ་ཤེས་བསྐྱེད་པར་བྱ། །སླར་ཡང་བདུག་པ་མེ་ཏོག་དང་། །མར་མེ་དྲི་ཆབ་ལ་སོགས་པའི། །རང་གི་གནས་སུ་འདུག་ཅིང་དབུལ། །བཀྲ་ཤིས་ཤིང་མཆོག་འོ་མ་ཅན། །ལོ་མ་མེ་
ཏོག་འབྲས་བུར་བཅས། །རློན་པ་དྲང་ཞིང་འབུ་རྗེས་མེད། །ཆག་གས་མེད་པའི་ཚེམས་ཤིང་ནི། །སོར་ནི་བཅུ་གཉིས་དྲི་བཟངས་བྱུག །རྩེ་མོ་མེ་ཏོག་ཕྲེང་བཏགས་པ། །སྔགས་ཟློས་དྲི་ཆུས་བསང་བར་བྱ། །རིགས་ཀྱི་མཚོན་ཆར་བྱིན་བརླབས་པས། །
ཨོྃ་སརྦ་པཱ་པ་ད་ཧ་ན་བཛྲ་ཤི་ཏ་ནི་སྭཱ་ཧཱ། ཡི་གེ་གསུམ་བཅས་སྔགས་བརྗོད་ཅིང་། །ཤར་དུ་ཁ་བལྟས་སློབ་མ་ལ། །བདེན་པ་བདར་ཞིང་སྦྱིན་བྱ་ཞིང་། །དེས་ཀྱང་མི་སྨྲ་བླང་བར་བྱ། །གྲི་རྩེ་ལྟ་བུས་ལྕེ་བཞར་ཞིང་། །ཕྲ་མོའི་ཕྱོགས་ཀྱིས་སོ་བྲུད་དེ། །ས་
གཞི་དྲི་ཡིས་བྱུགས་པ་རུ། །ཕན་ཚུན་མི་ལྟ་དོར་བར་བྱ། །ཤར་ལ་སོགས་པའི་ཕྱོགས་ཀུན་གྱིས། །ཞི་སོགས་དངོས་གྲུབ་མཚན་མ་བརྟག །གྱེན་ཐུར་རབ་དང་འབྲིང་གིས་ལྟ། །མཚམས་ཀྱིས་འཇིག་རྟེན་ལས་རྣམས་འགྲུབ། །ལས་དག་པ་ཡི་
སྔགས་བཟླས་ནས། །སྦྱང་ཞིང་བྱིན་གྱིས་བརླབས་བྱས་པའི། །ཆུ་གཙང་དྲིས་སྦྱང་ཁྱོར་བ་གསུམ། །ཉེ་རེག་འཐོར་བའི་ཚུལ་དུ་སྦྱིན། །ཨོྃ་ཧྲི་བི་ཤུད་དྷ་སརྦ་དྷརྨ་པཱ་པ་ནི་ཙཱ་ཤ་བི་ཤོ་དྷརྨ་སརྦ་ཀལྤ་ན་ཨ་པ་ན་ཡ་ཧཱུྃ། གཙང་མའི་རས་ལ་ལེགས་
Vol. 99 · folio 96a
བཀལ་བའི། །སྲུང་སྐུད་མདུད་པ་གསུམ་ལྡན་པའི། །ཡི་གེ་གསུམ་གྱི་སྔགས་བཟླས་ནས། །དེ་ཡི་དཔུང་པ་གཡོན་པར་བཅིང་། །ཀུ་ཤ་རྩེ་མོ་མ་འཁྲུགས་པའི། །བམ་པོ་གཉིས་སུ་སྦམས་པ་ཡིས། །ཡབ་ཡུམ་གཉིས་སུ་བྱིན་བརླབས་པའི། །སྔས་དང་སྟན་དུ་
སྦྱིན་པར་བྱ། །ཨོྃ་སརྦ་དུ་སྟི་ཀུ་རུ་སྭཱ་ཧཱ། དགའ་བའི་གཏམ་གྱིས་གཟེངས་བསྟོད་ཅིང་། །མཆོད་པ་གཏོར་མའི་ཚོགས་བཅས་པས། །ལྷ་ཚོགས་རྣམས་ལ་བསྔོ་བྱས་ནས། །བདེན་པ་བརྗོད་ཅིང་ཅི་བདེར་ཉལ། །མི་སྨྲ་དགེ་བའི་སེམས་བཅས་པས། །རྨི་ལམ་མཚན་མ་བརྟག་པར་
བྱ། །སླར་ཉིད་སློབ་དཔོན་ནང་སོང་སྟེ། །དཀྱིལ་འཁོར་གསལ་བའི་ཏིང་འཛིན་གྱིས། །ལྷ་རྣམས་མཆོད་ཅིང་བསྟོད་བྱ་སྟེ། །དགེ་བའི་སེམས་ཀྱིས་ཉལ་བར་བྱ། །དེ་ནས་སྐྱ་རེངས་ཤར་དུས་སུ། །སློབ་དཔོན་སློབ་མ་སྔས་འོངས་ཏེ། །ཀྱེ་ཀྱེ་བཞིན་བཟངས་རྣམས་
ལོངས་ཤིག །རྨི་ལམ་མཚན་མ་ཅི་མཐོང་བ། །བདེན་པ་བརྗོད་པའི་དུས་ཡིན་ནོ། །དེས་ཀྱང་ཅི་བཞིན་སྨྲ་བར་བྱ། །རབ་འབྲིང་མཚན་མའི་ལྟས་བསྟན་ཅིང་། །ངན་པའི་ལྟས་རྣམས་བཟློག་པར་བྱ། །སྦྱིན་སྲེག་གཏོར་མ་ལ་སོགས་དང་། །བ་ཡི་རྣམ་ལྔས་བྱུག་
པར་བྱ། །དངོས་རྣམས་མཚན་མ་ལས་གྲོལ་བའི། །སྟོང་པ་ཆེན་པོ་ཡེ་ཤེས་བསྒོམ། །རིན་ཆེན་རྒྱུ་ལས་བྱུང་བ་ཡི། །བུམ་པ་མགུལ་རིང་ལྟོ་བ་ཟླུམ། །ཁ་ཁྱེར་ཞབས་བཏེག་འཕེལ་ཀ་ཆེ། །དྲི་ཞིམ་ཚོན་དཀར་ལེགས་བྱུགས་ཏེ། །པདྨའི་དཀྱིལ་འཁོར་ལེགས་
གནས་ཏེ། །སོ་སོའི་མཚན་མའི་ཡི་གེ་རྒྱན། །རྣམ་རྒྱལ་བུམ་པ་ལ་སོགས་རྣམས། །མཆོད་ནས་སྟན་ལ་དགྲམ་པར་བྱ། །རིན་ཆེན་སྣ་ལྔ་འབྲུ་ལྔ་དང་། །སྙིང་པོ་ལྔ་དང་སྨན་ལྔ་དང་། །བཀྲ་ཤིས་རྫས་ལྔ་གཞུག་པར་བྱ། །མགུལ་ཆིངས་གཟུངས་ཐག་ཁ་རྒྱན་
སོགས། །དམ་ཚིག་ལྷ་རྣམས་གསལ་བྱས་ནས། །ཡེ་ཤེས་སྐུ་དང་གཉིས་མེད་པར། །མཆོད་བསྟོད་སྔགས་ཀྱི་བཟླས་པ་བྱ། །སྔགས་བཅས་ཆུ་དང་གཉིས་མེད་གནས། །དཀྱིལ་འཁོར་གྲུབ་པའི་དུས་དག་ཏུ། །རང་རང་གནས་ཀྱི་ཕྱོགས་སུ་དགྲམ། །དམ་ཚིག་
Vol. 99 · folio 96b
དཀྱིལ་འཁོར་གསལ་བྱས་ནས། །ཡེ་ཤེས་ལྷ་དང་གཉིས་མེད་པའི། །ཐབས་དང་ཤེས་རབ་འབྲེལ་བྱས་པས། །དཀྱིལ་འཁོར་ས་ལ་ཐིག་གདབ་བྱ། །ཤེས་རབ་སྤྱན་མཛེས་བཅུ་དྲུག་ལོན་པའམ། །ཇི་བཞིན་བྱིན་གྱིས་བརླབས་ནས་ཀྱང་། །དཀྱིལ་འཁོར་བསྒྲུབ་པ་གནས་བྱའོ། །
གཙང་མའི་རྒྱུ་ལས་བྱུང་བའི་རས། །ཁ་དོག་ཉི་ཤུ་རྩ་ལྔའམ། །ལྔ་ལས་བྱུང་བའི་སྐུད་པ་དག །བྱིན་གྱིས་བརླབ་ཅིང་བསྒྲིལ་བར་བྱ། །སྟོང་བ་ཉིད་ཀྱིས་སྦྱང་བྱས་ནས། །རིགས་ཀྱི་ལྷ་རུ་གནས་པ་དང་། །མཆོད་བསྟོད་སྔགས་བཅས་བསྒྲིལ་བར་བྱ། །ཨྃ་བཛྲ་ས་མ་
ཡ་མུ་ཏྲ་མ་ཏི་ཀྲ་མ་ཧཱུྃ། ཨོྃ་ཨཱཿཧཱུྃ། ཛ་གདགས་པ་ཡི་སྔགས་བརྗོད་ཅིང་། །རྡོ་རྗེ་སློབ་དཔོན་ཐུགས་ཀ་ནས། །སློབ་མས་སྨིན་མཚམས་དྲང་པོར་ཐེན། །དེ་ལ་གནས་ཀྱི་ནུབ་དང་ཤར། །འོད་འཕྲོས་བྱང་སེམས་ཐུགས་རྗེ་ཆེ། །ནམ་མཁའི་དཀྱིལ་འཁོར་མངོན་
པར་ལྟ། །རྡོ་རྗེ་ལྟེ་བས་ཕྱོགས་དང་མཚམས། །དཀྱིལ་འཁོར་ཆེན་པོ་རྫོགས་པར་བསྟན། །སྟོབས་མཆོག་དཔའ་བོ་དགོངས་སུ་གསོལ། །རྡོ་རྗེ་ཐིག་སྐུད་སྒྲར་ལྡན་པས། །ནམ་མཁའི་དཀྱིལ་འཁོར་ལེགས་གྲུབ་ཅིང་། །འགྲོ་བའི་དོན་ལ་བསྐུལ་བར་མཛོད། །
ཨོྃ་ཨ་ནུ་ན་ཨ་ནུ་ག་ཏོ་སརྦ་དྷརྨ་པ་ར་པ་ར་ཨ་ནུ་ག་ཏ་སརྦ་ཨ་ནན་ཏ། ཨ་བ་ཏ་ར་སརྦ་དྷརྨ་ཧཱུཾ། ལྷ་རྣམས་མདུན་དུ་བཞུགས་འགྱུར་ནས། །མཆོད་བསྟོད་དབང་པོའི་ཚུལ་དུ་དགོངས། །རྡོ་རྗེ་ཁུ་ཚུར་སར་བཞག་ཅིང་། །ཤར་ནས་ནུབ་ཏུ་བརྐྱང་བ་ཡི། །
ཚངས་ཐིག་དང་པོ་གདབ་བྱས་ནས། །དེ་བཞིན་སྒོ་ནས་ཚད་ཀྱིས་ནི། །ཟུར་བཞི་ཤིན་ཏུ་ལེགས་པར་གཞལ། །རྡོ་རྗེ་ལྷོ་བྱང་གཉིས་པ་དང་། །མཚམས་ཀྱི་ཐིག་རྣམས་གདབ་པར་བྱ། །ལོགས་ཐིག་གྲུ་བཞི་མཉམ་འགྱུར་ནས། །བརྒྱད་དང་བཅུ་དྲུག་
དག་ཏུ་བགོ། །བར་ཁྱམས་ཕྱི་ཁྱམས་མ་གཏོགས་པའི། །གཞན་དག་ཆ་ཕྲན་བཞི་བཞིར་བགོ། །ཐིག་གི་ཆོ་ག་རྫོགས་པ་དང་། །ཡེ་ཤེས་སྐུད་པས་མཆོད་བསྟོད་ཅིང་། །རྡོ་རྗེ་ཁུ་ཚུར་སྔགས་བཅས་ཀྱིས། །རང་གི་གནས་སུ་གཤེགས་གསོལ་བྱ། །ཨོྃ་བཛྲ་
Vol. 99 · folio 97a
ག་ཛཿ། དཀྱིལ་འཁོར་བདག་པོའི་ང་རྒྱལ་གྱིས། །མིག་གཉིས་མ་དང་ཏ་ལས་བྱུང་བར་བསམ། །དཀྱིལ་འཁོར་གནས་རྣམས་ཀུན་བལྟས་ཏེ། །སྔགས་དང་ཕྱག་རྒྱ་བཅས་པ་ཡིས། །སྒོ་དག་བཞི་པོ་དབྱེ་བྱས་ནས། །ཆ་ཕྲན་དག་ཀྱང་བློ་ཡིས་བརྟག །རྡོ་རྗེ་
སློང་བའི་ཕྱག་རྒྱ་ཡིས། །རི་མོའི་མཁར་ནི་བཏེག་བྱས་ཏེ། །འབྱུང་འཇུག་གསང་བའི་ཆོ་ག་དག །རྣལ་འབྱོར་བརྟན་པ་ཡིད་ཀྱིས་བྱས། །ཨོྃ་བེ་གཱ་ཀྲ་མ་ཧཱུྃ། པདྨ་རང་བཞིན་རྣམ་དག་པས། །དཀྱིལ་འཁོར་འབྱུང་བའི་གནས་ཆེན་པོ། །ཐུགས་རྗེ་ཡེ་ཤེས་རྣམ་འཕྲུལ་
ཚོགས། །ཁྱབ་མཛད་བྱིན་བརླབས་སྟོན་པའི་གཙོ། །རྒྱལ་བ་རྣམས་ཀྱི་སྐུ་གསུང་ཐུགས། །ཡོན་ཏན་ཕྲིན་ལས་རྨད་དུ་འབྱུང་། །མ་ལུས་སེམས་ཅན་དོན་གྱི་ཕྱིར། །ཕོ་བྲང་དག་པར་བྱིན་གྱིས་བརླབས། །ཕྱོགས་མཚམས་མ་ལུས་རྣམ་དག་པས། །བྱང་ཆུབ་ཡེ་ཤེས་
གནས་གསལ་འགྱུར། །ཉོན་མོངས་ཉེས་ཚོགས་ཀུན་བཅོམ་པའི། །ཐུགས་རྗེ་ཆེན་པོ་དྲི་མེད་ཤུགས། །ཡེ་ཤེས་བྱིན་བརླབས་ལས་བྱུང་བའི། །དཀྱིལ་འཁོར་གསང་བ་གྲུབ་པར་མཛོད། །རིན་ཆེན་རྣམ་ལྔའི་ཕྱེ་མ་དང་། །ས་ཚོན་ལ་སོགས་གང་འབྱོར་པ། །
རིན་པོ་ཆེ་ཡི་སྣོད་བླུགས་ཏེ། །དཀྱིལ་འཁོར་གནས་ཀྱི་ཕྱོགས་ལྔར་བཞག །སྦྱང་ཞིང་བྱིན་གྱིས་བརླབས་བྱས་ན། །རིགས་ལྔའི་སྐུད་ཚོགས་ཡུམ་བཅས་ལ། །རིགས་ཀྱི་དཀྱིལ་འཁོར་དབུས་སོགས་དང་། །མཆོད་བསྟོད་སྔགས་ཀྱིས་མཉེས་པར་བྱ། །ཨོྃ་བཛྲ་
ཙི་ཏ་མ་ཏི་ས་མ་ཡ་ཧཱུྃ། དཀར་མཐིང་སེར་པོ་ལྗང་གུ་དང་། །དམར་པོའི་ཚོན་རྣམས་རིམ་བཞིན་དུ། །དབང་ལྡན་མཚམས་ནས་བརྩམ་བྱས་ཏེ། །པཉྩ་རཱ་ག་དྲང་བར་བྱ། །གཡས་པས་པདྨ་རྡོ་རྗེ་བཟུང་། །གཡོན་པས་འདྲེན་པའི་ལས་བྱའོ། །དེ་ལ་མཆོད་འབུལ་
སྔགས་བརྗོད་ཅིང་། །བདེན་པ་བདར་ཏེ་དགབ་པར་བྱ། །འདི་ནི་ཆོས་དབྱིངས་རྣམ་པར་དག །སེམས་ཅན་ཁམས་ནི་རང་སྒྲོལ་བྱེད། །དཔལ་ལྡན་པདྨ་གར་དབང་ནི། །དེ་བཞིན་གཤེགས་པ་ཀུན་གྱི་གནས། །ཡང་དག་བདེན་པའི་བྱིན་བརླབས་ཀྱིས། །དཀྱིལ་
Vol. 99 · folio 97b
འཁོར་ལས་རྣམས་ཤིས་པར་མཛད། །དབུས་ཀྱི་ལྟེ་བ་ནས་བརྩམས་ཏེ། །དང་པོ་སློབ་དཔོན་གྱིས་བྲི་ཞིང་། །ཕྱིས་ནི་ཅི་དགར་ཤེས་པར་བྲི། །མཐོ་དམན་མེད་སྙོམས་དྲང་པོར་བྱ། །དེ་ནས་མཚན་མ་རྟགས་བསྟན་ཏེ། །ཆད་ཅིང་སྨྲ་བས་མི་འགྲུབ་སྟེ། །ཡོན་
པོས་གདུང་པའི་ལས་རྣམས་སྐྱེ། །ཆད་པས་སློབ་དཔོན་སློབ་མ་དག །ཤི་ཐམ་ངན་པར་འགྱུར་བ་ཡིན། །ལྟག་དང་བཅས་པས་གཡུལ་འཁྲུགས་ཤིང་། །ཕྱོགས་འཁྲུལ་པ་ཡིས་སྨྱོ་བར་འགྱུར། །དབུས་ཀྱི་དཀྱིལ་འཁོར་གནས་དག་ཏུ། །རེའུ་
མིག་ཉི་ཤུ་རྩ་ལྔ་ལས། །བདེར་གཤེགས་གཙོ་བོའི་རིགས་སུ་བཅས། །ཕྱག་རྒྱའི་ཡི་གེ་མཚན་མ་བྲི། །ཕྱི་རོལ་པདྨའི་འདབ་གནས་ལ། །ཉི་ཤུ་རྩ་བཞི་ཚོགས་རྣམས་ལ། །བྱང་སེམས་ཁྲོ་བོ་བཅས་པ་དག །ཤར་ནས་རིམ་བཞིན་བྲི་བར་བྱ། །ཕྱི་དང་ནང་གི་མཚམས་རྣམས་
སུ། །མཆོད་པའི་ལྷ་མོ་བརྒྱད་རྣམས་བཞག །བར་ཁྱམས་བསྐལ་བཟངས་སེམས་དཔའ་རྣམས། །སྒོ་བཞིར་ཁྲོ་བོའི་ཚོགས་གཞག་གོ། །དབུས་ཀྱི་དཀྱིལ་འཁོར་དབུས་སོང་སྟེ། །བདེར་གཤེགས་འོད་ཟེར་སྣང་བ་ཡི། །པདྨོ་རྡོ་རྗེ་དྲིལ་བཅས་པས། །རང་གི་ཁ་དོག་
ཚོན་བཅས་བཞག །དེ་ཡི་ཤར་ཕྱོགས་རེའུ་མིག་ལ། །ཚེ་མཐའ་ཡས་དང་ཆོས་དབང་ཕྱུག །ཆགས་མེད་འོད་དང་སྤྱན་དགའ་བའི། །པད་བརྩེགས་པདྨའི་ཕྲེང་མ་དང་། །པད་གནས་རིན་ཆེན་གླེགས་བམ་རིན་ཆེན་ཕྲེང་། །རང་མདོག་སྔགས་ཀྱིས་བརྒྱན་པ་བཞག །ཤར་
ཀྱི་དཀྱིལ་འཁོར་དབུས་གནས་པར། །བདེ་བར་གཤེགས་པ་མི་བསྐྱོད་པ། །རྡོ་རྗེ་དྲིལ་བུའི་སྔགས་བཅས་པས། །རང་གི་འོད་བཅས་གདན་ལ་བཞག །དེ་ཡི་ཤར་ཕྱོགས་རེའུ་མིག་ལ། །འབྲུག་སྒྲ་དྲི་མ་མེད་པའི་རིགས། །མངོན་པར་སྣང་མཛད་བསྟན་དབང་ཕྱུག །
ཆགས་ཤིང་རིན་ཆེན་པད་སྤུངས་པ། །རིན་པོ་ཆེ་ཡི་དྲ་བ་སྟེ། །རིམ་བཞིན་རང་མདོག་སྔགས་ཀྱིས་བརྒྱན། །ལྷོ་ཡི་དཀྱིལ་འཁོར་དབུས་གནས་པ། །བདེར་གཤེགས་རིན་པོ་ཆེ་སྦྱངས་ཀྱིས། །རིན་ཆེན་བརྩེགས་དང་དྲིལ་བུ་ལ། །རང་མདོག་སྔགས་ཀྱིས་མཚན་
Vol. 99 · folio 98a
བྱས་པའོ། །དེ་ཡི་ཤར་ཕྱོགས་རེའུ་མིག་ལ། །ནམ་མཁའི་མཛོད་དང་དྲ་བ་ཅན། །དཀོན་མཆོག་རྒྱལ་མཚན་རིན་ཆེན་ཏོག །རིན་ཆེན་གླིང་བུ་རིན་ཆེན་ཕྲེང་། །རིན་ཆེན་རྒྱལ་མཚན་རིན་ཆེན་བུམ། །རང་གི་འོད་བཅས་སྔགས་ཀྱིས་བརྒྱན། །ནུབ་
ཀྱི་དཀྱིལ་འཁོར་དབུས་གནས་པ། །བདེར་གཤེགས་ཀུན་དུ་སྣང་བའི་འོད། །འཁོར་ལོ་དྲིལ་བུམ་མཚན་མ་ལ། །རང་འོད་སྔགས་ཀྱིས་མཚན་པ་བྲི། །པདྨོ་རིགས་ཀྱི་འཁོར་ལོའི་ཚད། །བྱང་གི་དཀྱིལ་འཁོར་དབུས་གནས་པ། །བདེར་གཤེགས་དོན་ཡོད་
གྲུབ་པ་ཡི། །རྡོ་རྗེ་སྣ་ཚོགས་དྲིལ་བུ་བསྣམས། །རང་གི་སྔགས་དང་ཁ་དོག་གསལ། །དེ་ཡི་ཤར་ཕྱོགས་རེའུ་མིག་ལ། །བརྩོན་འགྲུས་དང་ནི་ཤུགས་ཆེན་པོ། །གནོད་སྦྱིན་འདུལ་བ་སྣ་ཚོགས་དབང་། །རྒྱ་གྲམ་ཕྲེང་དང་པདྨ་ཕྲེང་། །རྡོ་རྗེ་གདེངས་པོ་ཟླ་ཁམ་ཅན། །
འོད་འཕྲོས་སྔགས་ཀྱིས་མཚན་བྱས་པའི། །མཚམས་ཀྱི་རེའུ་མིག་བཞི་རྣམས་ལ། །འོད་འཕྲོས་པདྨ་འཛིན་པ་དང་། །པདྨ་གནོན་དང་པད་སྐྱོང་དང་། །མེ་ལོང་རིན་ཆེན་ཕྲེང་བ་དང་། །པི་ཝང་གར་གྱི་ཕྱག་རྒྱ་ལ། །རང་འོད་སྔགས་ཀྱིས་མཛེས་པར་བྱ། །ཕྱི་རོལ་པདྨའི་
ཤར་བརྩམས་ཏེ། །རིགས་ཀྱི་བྱང་སེམས་བཞི་བཞིར་གནས། །བདེ་བའི་བློ་གྲོས་རྒྱ་མཚོའི་སྒྲ། །གཟི་མདངས་དང་ནི་འཁོར་ལོ་ཡི། །ནམ་མཁའི་མཛོད་ཀྱི་འཁོར་ལོ་རིན་པོ་ཆེ། །པད་ལྕུག་འཁོར་ལོ་དབྱུག་པ་རྣམས། །རང་འོད་སྔགས་ཀྱི་མཚན་མར་
གནས། །ཤེས་རབ་སྣང་བ་རྡོ་རྗེ་རྒྱལ། །འོད་ཟེར་འཕྲོ་བ་དྲག་ཤུལ་གྱི། །རིན་ཆེན་ཕུང་པོ་རིན་ཆེན་གདུགས། །པདྨའི་སྡོང་པོ་འོད་ཕུང་བྲི། །དྲི་མའི་ཚོགས་དང་སྒྱུ་མ་འཕྲུལ། །རིན་ཆེན་རྒྱལ་པོ་དྲ་བ་ཅན། །རིན་ཆེན་རི་བོ་རྒྱ་གྲམ་བྲི། །ལག་བཟངས་གསེར་འོད་
འཕྲོ་བ་དང་། །རིན་ཆེན་སྙེ་མ་ཆོས་མཐོང་དང་། །པདྨའི་རྒྱ་གྲམ་གླེགས་བམ་དང་། །པདྨའི་སྡོང་པོའི་གོ་ཆ་བྲི། །དྲི་མེད་མུན་པ་སེལ་བ་དང་། །དགའ་བ་དབྱངས་དང་གཞོན་ནུ་ཡི། །ཆུ་ཤེལ་ནོར་བུའི་ཕྲེང་བ་དང་། །སྤྲིན་ཕུང་རྡོ་རྗེ་རྒྱ་གྲམ་བྲི། །དེ་ནི་རིགས་ལྔའི་
Vol. 99 · folio 98b
སེམས་དཔའ་སྟེ། །རང་འོད་སྔགས་ཀྱིས་མཚན་བྱས་པའི། །དེ་མཐར་ཁྲོ་བོ་བཞི་རྣམས་ཀྱི། །ཕྱག་རྒྱའི་མཚན་མ་བྲི་བྱས་ཏེ། །སྦྱིན་བདག་སྨྲ་བའི་དབང་ཕྱུག་དང་། །རྩེ་གསུམ་རིན་ཆེན་རྩེ་དགུ་དང་། །དབྱིག་པ་རྩེ་གཅིག་རལ་གྲིའོ། །གྲུ་ཆད་མཆོད་པའི་ལྷ་མོ་བཞི། །
བདུག་སྤོས་མེ་ཏོག་མར་མེ་དྲི། །ཕྱི་རོལ་བར་ཁྱམས་གནས་དག་ལ། །ཕྱོགས་རེ་སེམས་དཔའ་བཞི་བཞི་སྟེ། །རྡོ་རྗེ་རྣམ་སྣང་གར་མཁན་དང་། །བློ་ཡི་རྒྱ་མཚོ་ཐོགས་མེད་བཀོད། །རྡོ་རྗེ་མཚན་མ་གསང་སྔགས་བཅས། །རང་འོད་གནས་གདན་དག་ལ་བྲི། །པདྨོ་དགའ་བའི་
ས་ལ་དབང་། །རིན་ཆེན་སྤུངས་པ་སྤྲིན་གྱི་ཕྲེང་། །རིན་ཆེན་མཚན་མ་སྔགས་དང་བཅས། །རང་འོད་གདན་ལ་གནས་པ་བྲི། །ཡིད་འོང་མེ་ཏོག་སྒྲོན་མ་དང་། །སྤོས་བརྩེགས་ཁ་ལོ་སྒྱུར་བ་དང་། །པདྨའི་མཚན་མ་སྔགས་དང་བཅས། །རང་འོད་གདན་ལ་གནས་
པར་བྲི། །དྲན་དབང་པདྨའི་བློ་གྲོས་དང་། །ལས་བྱེད་སྙིང་པོའི་བློ་གྲོས་དང་། །རྒྱ་གྲམ་མཚན་མ་སྔགས་དང་བཅས། །རང་འོད་གདན་ལ་གནས་པར་བྲི། །ཤར་སོགས་པ་ཡི་སྒོ་རྣམས་སུ། །ཁྲོ་བོའི་འཇིགས་པའི་རྒྱལ་པོ་ཡི། །རྡོ་རྗེ་རྒྱ་གྲམ་རྡོ་རྗེ་གདེངས། །རིན་ཆེན་དབྱུག་
པ་པདྨ་ཕྲེང་། །རང་གི་ཡི་གེ་གདན་གནས་པའི། །ཕྱག་རྒྱའི་མཚན་མ་བྲི་བར་བྱ། །ཕྱོགས་བཞི་རྒྱན་དང་ཕྲེང་བ་དང་། །འདོད་ཡོན་ལྷ་མོ་ལ་སོགས་པའི། །རྒྱན་རྣམས་པདྨ་རྡོ་རྗེ་དང་། །རིན་ཆེན་འཁོར་ལོ་རྒྱ་གྲམ་བྲི། །འཕྲོ་བས་མཚན་མ་ཁ་དོག་ལྔ། །ཉི་ཤུ་རྩ་ལྔའི་
འོད་བཅས་པའོ། །ཕྱི་རོལ་རྟ་བབས་དྲ་བ་སོགས། །བྷན་དྷ་དྲིལ་བུ་ཉི་ཤུ་བཞི། །གདུགས་དང་བུམ་པ་བྱ་ཡི་ཕྲེང་། །དཔག་བསམ་རྫིང་བུ་དང་བ་དང་། །ཉི་ཟླ་མེ་ལོང་རྒྱལ་མཚན་ལྔ། །ཆོས་ཀྱི་འཁོར་ལོ་རི་དགས་རྣམས། །མཛེས་བྱས་ཕྱི་མཐའ་པདྨ་དང་། །རྡོ་རྗེ་མེ་འོད་
མཚོན་གྱིས་བསྐོར། །དབུས་མིག་ཁ་དོག་ཉི་ཤུ་ལྔ། །པད་ཕྲེང་དམར་པོ་བར་ཁྱམས་དཀར། །སྒོ་བཞིའི་རིན་ཆེན་སྣ་བཞི་པ། །གྲུ་ཆད་གསེར་གྱི་ཁ་དོག་ཅན། །མཆོད་པ་ལྔ་དང་བུམ་དགྲམ་ཞིང་། །བླ་རྒྱན་ན་བཟའ་ཕྱོགས་རྒྱན་བྲི། །མེ་ཏོག་ཚོམ་བུ་སྔགས་བཅས་པ། །
Vol. 99 · folio 99a
སོ་སོའི་གནས་སུ་དགྲམ་པར་བྱ། །གཏོར་མའི་ཚོགས་མང་སྦྱར་བྱས་ནས། །ཕྱི་རོལ་ཕྱོགས་དང་མཚམས་སུ་དགོད། །ལྷ་ཡི་ཏིང་འཛིན་གསལ་བྱས་པས། །དཀྱིལ་འཁོར་ཤིས་པའི་ལས་འགྲུབ་འགྱུར། །དེ་ནས་ལྷ་རྣམས་བསྟོད་བྱས་ཏེ། །རྡོ་རྗེ་པདྨོ་དམ་
ཚིག་གཞུག །ཐུགས་ཀའི་སྔགས་ཀྱིས་དགུག་བྱས་པའི། །མགྲོན་རྣམས་ཚིམ་པར་འགྱུར་བ་དང་། །དམ་ཚིག་སྔགས་ཀྱིས་བསྐུལ་བྱས་ཤིང་། །རང་གི་ཕྲིན་ལས་བཅོལ་བར་བྱ་ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་
གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་གཟུགས་བརྙན་བརྩམ་པའི་ལེའུ་སྟེ་བདུན་པའོ།། །།དེ་ནས་བྱང་ཆུབ་སེམས་དཔའི་གཙོ། །རྡོ་རྗེ་འཆང་སོགས་མགུ་འགྱུར་ནས། །རྒྱལ་བ་སར་ཡང་བསྐུལ་བ་མཛད། །ཀུན་དོན་ཐུགས་རྗེ་ཆེན་པོའི་ཤུགས། །
མ་འོངས་གསང་སྔགས་སྤྱོད་རྣམས་ཀྱིས། །དཀྱིལ་འཁོར་ཆེན་པོར་གང་འཇུག་པ། །དབང་བསྐུར་ཚུལ་བཞིན་ཇི་ལྟ་བུར། །དེ་བཞིན་རབ་ཏུ་གནས་པ་གང་། །བདག་གཞན་དོན་གྱི་ཡན་ལག་བསྲུང་། །སྦྱིན་སྲེག་རིམ་པ་ཇི་ལྟར་ལགས། །གཙོ་བོ་ཐུགས་
རྗེ་ཆེར་ལྡན་པས། །མ་ལུས་གདུལ་བྱ་ཀུན་གྱི་ཕྱིར། །དུས་འདི་སྣང་བར་མཛད་ནས་ཀྱང་། །ཆོ་གའི་ཡན་ལག་རྒྱས་པ་གསུངས། །དེ་ནས་བྱང་ཆུབ་སེམས་ཚོགས་ཀྱིས། །གུས་པར་གཟུང་སྟེ་སྤྱད་པར་བགྱི། །དེ་ནས་བཅོམ་ལྡན་འདས་ཀྱི་དབང་། །ཕྱག་རྒྱ་
ཤེས་རབ་རབ་བསྐྱོད་ཅིང་། །རབ་ཏུ་དགའ་བའི་བཞིན་རྒྱས་པ། །རིགས་རྣམས་ཀུན་ལ་གཟིགས་མཛད་དེ། །མཆོག་གསུམ་སྦྱིན་པའི་ཞེས་བྱ་བའི། །དོན་འདི་རབ་ཏུ་གནས་པར་མཛད། །བྱང་ཆུབ་སེམས་དཔའ་བློ་ལྡན་པའི། །མ་འོངས་གདུལ་བྱ་གང་དག་
གིས། །གཉིས་མེད་གསང་བའི་ཐེག་པ་འདིར། །སྨིན་པའི་ལམ་ལ་འཇུག་འདོད་པས། །གང་གིས་མཉེས་པའི་ལས་རྣམས་ཀྱིས། །རྡོ་རྗེ་སློབ་དཔོན་མགུ་བྱས་ནས། །ཡང་དང་ཡང་དུ་གསོལ་བཏབ་སྟེ། །དཀྱིལ་འཁོར་གསང་བའི་དོན་དུ་གཉེར། །མ་ལུས་སྡུག་
Vol. 99 · folio 99b
བསྔལ་ལས་བསྒྲལ་ཕྱིར། །བྱང་ཆུབ་སེམས་མཆོག་རྒྱ་ཆེན་བློས། །ཕྱི་ནང་འབྱོར་བའི་ཡོ་བྱད་དག །ཐམས་ཅད་བྱང་ཆུབ་དོན་དུ་བསྔོས། །འདོད་ཆགས་རྣམ་དག་པདྨོའི་དབྱིངས། །ཆོས་ཀུན་གྱིས་ནི་དེ་བཞིན་ཉིད། །ཡེ་ཤེས་སྤྲུལ་པའི་དཀྱིལ་འཁོར་མཆོག །དེ་རིང་ཡིད་
འོང་དོན་ཆེན་གཉེར། །ཨོྃ་ཨུ་ཏ་ཀ་ཏ་ས་མ་ཡ་སྟྭྃ། པདྨ་དགའ་བའི་སྐུ་མཆོག་མཉེས། །སྣ་ཚོགས་དཀྱིལ་འཁོར་འབྱུང་བའི་གནས། །མཚན་དཔེ་ཕུན་སུམ་ཚོགས་པ་ཡི། །བདེར་གཤེགས་སྐུ་ལ་ཕྱག་འཚལ་ལོ། །རྡོ་རྗེ་ཆེན་པོས་གཞན་རྣམས་འཇོམས། །མི་ཤེས་
དྲི་མ་ཀུན་སེལ་བའི། །ཐུགས་མཆོག་གསང་བའི་ཆོས་མཐར་ཕྱིན། །རྡོ་རྗེ་ཐུགས་ལ་ཕྱག་འཚལ་ལོ། །གསང་སྔགས་སྙིང་པོ་གསང་བའི་ཆོས། །རབ་སྣང་པདྨའི་དབྱིངས་ནས་འཕྲུལ། །བྱང་ཆུབ་ནམ་མཁའི་མཚན་ཉིད་ཅན། །རྡོ་རྗེ་གསུང་ལ་ཕྱག་འཚལ་ལོ། །ཡོན་ཏན་
རིན་ཆེན་ཆར་འབེབས་ཤིང་། །དེ་བཞིན་གཤེགས་པའི་རྒྱལ་འགྱུར་བ། །དཔལ་མཆོག་བཀྲ་ཤིས་ཕུན་སུམ་ཚོགས། །ཐེག་པ་ཆེ་ལ་ཕྱག་འཚལ་ལོ། །ཀུན་དུ་གནས་འགྱུར་ཁྱབ་པ་པོ། །ལས་མཛད་རྡོ་རྗེ་དམ་ཚིག་མཆོག །མི་མཐུན་གནས་རྣམས་རབ་འཇོམས་
མཛད། །རྡོ་རྗེ་འཇོམས་ལ་ཕྱག་འཚལ་ལོ། །དངོས་གྲུབ་ཀུན་གྱི་དབང་ཕྱུག་རྒྱལ། །དཀྱིལ་འཁོར་ཆེན་པོའི་གནས་ཉིད་དུ། །དབང་བསྐུར་གསང་བ་ལས་བྱུང་བ། །དམ་ཚིག་ཡེ་ཤེས་རབ་གྲུབ་མཛོད། །ཤེས་རབ་ཆོས་ཉིད་ལས་འཕྲུལ་བའི། །རྗེས་སུ་འཇུག་པས་
སྙིང་རྗེའི་ཚོགས། །ཡང་དག་བདེན་པ་ལས་བྱུང་བའི། །བྱིན་བརླབས་འདོད་པ་ཐམས་ཅད་རྫོགས། །བདེར་གཤེགས་སྤྲུལ་པའི་ཚིག་ཚོགས་ནི། །དབང་བསྐུར་རྫོགས་མཛད་པ་ཡི་རིགས། །མེ་ཏོག་ཕྲེང་བ་ལ་སོགས་པས། །སློབ་མ་བརྒྱན་པར་བྱས་ནས་ནི། །ཕྱིར་
ཕྱོགས་སྟེགས་བུ་ལ་བཞག་སྟེ། །གཏོར་མ་ཕྱོགས་ཀུན་ལས་བྱིན་ནས། །ཀུན་ལ་གསོལ་འདེབས་བསྒོ་བྱ་ཞིང་། །སློབ་མ་གཞུག་པ་ཉིད་དུ་བྱ། །རས་གཙང་དམར་པོའི་རྒྱུ་ལས་བྱུང་། །གནས་གཞན་མ་སྤྱད་མ་ཉམས་པར། །རང་གི་སྔགས་ཀྱིས་བྱིན་བརླབས་ནས། །ལེགས་
Vol. 99 · folio 100a
པར་གདོང་ནི་གཡོག་པར་བྱ། །པདྨོའི་ཐལ་སྦྱར་རིན་ཆེན་ཕྲེང་། །སྔགས་བརྗོད་གཟུངས་འཛིན་རྩེ་གཅིག་ཏུ། །བརྟན་པོར་བྱང་ཆུབ་དོན་གཉེར་བས། །དཀྱིལ་འཁོར་གནས་སུ་མོས་པ་བསྐྱེད། །དེ་ནས་སློབ་དཔོན་བློ་ལྡན་པས། །ཐེག་ཆེན་ལམ་ལ་ཞུགས་
པའི་ཕྱིར། །སློབ་མ་དག་ལ་སླར་སྨྲས་པ། །གསང་སྔགས་ལམ་མཆོག་ཟབ་པ་འདི། །ཤིན་ཏུ་བཟུང་བ་དཀའ་བ་ཡིན། །ཁྱོད་ཀྱིས་བཟུང་བར་འདོད་པ་རྣམས། །མི་སྙེམས་པ་ཡི་བློ་བསྐྱེད་ནས། །ལྟ་སྤྱོད་མཆོག་ལ་གནས་དགོངས་སོ། །ཀྱེ་མ་རྡོ་རྗེ་གསང་བའི་དོན། །
ཐེག་ཆེན་སྙིང་པོ་བླ་ན་མེད། །ཚེ་འདིས་བྱང་ཆུབ་འགྲུབ་བྱེད་ཀྱང་། །རྨོངས་རྣམས་ཐེ་ཚོམ་སྐྱེ་བར་འགྱུར། །ངང་ཚུལ་བཟང་པོ་འདི་རྟོགས་པས། །དུས་གསུམ་བཞུགས་པའི་སངས་རྒྱས་རྣམས། །བྱིན་བརླབས་ངོ་མཚར་མཆོག་བརྙེས་ཏེ། །སེམས་
ཅན་དོན་ཕྱིར་ཚུལ་དང་ལྡན། །ཁྱོད་ཀྱིས་སྒྲོ་སྐུར་དང་བྲལ་ཞིང་། །དད་བརྩོན་ཐེ་ཚོམ་མེད་པར་ཟུང་། །དེ་ནས་སློབ་མས་སླར་གསོལ་པ། །ཡང་དག་ཐུགས་རྗེ་ཆེར་མངའ་བའི། །མགོན་མཆོག་རྣམས་ཀྱིས་བདག་ལ་གནོང་། །འདི་དག་བདག་ལ་གཏོལ་
མེད་པས། །ཁྱོད་ཀྱིས་གསུངས་བཞིན་གསོལ་བར་འཚལ། །སླར་ཡང་རབ་གུས་དང་བའི་ཡིད། །ཚུལ་ཆེན་མི་ཉན་དམ་ཚིག་མཆོག །སློབ་དཔོན་ཆེ་ལ་སྐྱབས་སུ་མཆི། །སངས་རྒྱས་དཀྱིལ་འཁོར་སྲས་བཅས་ཚོགས། །ཐུགས་མཆོག་དྲི་མེད་བདག་ལ་
དགོངས། །བདག་གིས་བྱང་ཆུབ་དོན་གཉེར་བས། །དཀྱིལ་འཁོར་གནས་སུ་མོས་པ་བསྐྱེད། །གར་གྱི་དབང་ཕྱུག་བདེ་ཆེན་མཆོག །མགོན་འགྱུར་རྣམས་ལ་སྐྱབས་སུ་མཆི། །མྱ་ངན་ལས་འདས་ཕོ་བྲང་འདིར། །བདག་ཉིད་ཞུགས་པར་མཛད་པ་ལེགས། །དེ་ནས་
ལས་ཀྱི་རྡོ་རྗེ་ཡིས། །གསང་བའི་མཐེ་བོ་ནས་བཟུང་སྟེ། །ཡོལ་བའི་ནང་དུ་གཞུག་པར་བྱ། །ཨོྃ་པདྨོ་སརྦ་ཏ་ཐཱ་ག་ཏ་ས་མ་ཡ་ཡོ་ག་ཙིཏྟ་ཨུ་ཏ་པཱ་ཏ་ཡཱ་མི་ཧཱུྃ་སྭཱ་ཧཱ། དེ་ནས་གསང་བའི་གནས་ཞུགས་པས། །མཆོད་བརྙེས་རྒྱུན་བཤགས་ལ་སོགས་ཀྱིས། །སྣོད་དུ་རུང་
Vol. 99 · folio 100b
བར་གྱུར་པ་དང་། །དམ་ཚིག་གསུམ་སྒྲོགས་ཆུ་བླུད་ཅིང་། །རྡོ་རྗེ་གསང་བའི་དམ་སྒྲོགས་ཤིང་། །ཕྱག་རྒྱས་སྔགས་ཀྱི་གནས་གསུམ་སྦྱང་། །ཨོྃ་རྒྱལ་བ་ཀུན་གྱི་ཁྱོད་ཉིད་ནི། །བྱིན་གྱིས་བརླབ་ཅིང་བརྟན་མཛད་པས། །པདྨ་གར་དབང་དཀྱིལ་འཁོར་འདིར། །བདག་མེད་དམ་
ཚིག་སྤངས་པ་དང་། །དད་མེད་བརྩོན་འགྲུས་ཉམས་པ་དང་། །བློ་དམན་ཤེས་རབ་ཆུང་བ་དང་། །བློ་དམན་རྟོག་འཛིན་ལ་གནས་ལ། །སྲོག་གི་ཕྱིར་ཡང་བརྗོད་མི་བྱ། །བདེ་ཆེན་མགོན་པོ་པད་འཆང་སྐུ། །ཁྱོད་ཀྱི་སྙིང་ལ་ཞུགས་པ་ན། །གསང་བའི་ཡེ་ཤེས་གཞན་བརྗོད་
དུས། །སྙིང་ཁྲག་འཐུང་ཞིང་གཞན་དུ་ཤེས། །བདག་ནི་གར་གྱི་དབང་ཕྱུག་སྐུ། །ཁྱོད་ལ་ཐུགས་རྗེས་བཟུང་བྱེད་པས། །ང་ཡིས་བསྒོ་བའི་ཚིག་འདི་དང་། །འདའ་བར་རུང་བ་མ་ཡིན་ནོ། །བདག་ལ་བརྙས་ཤིང་འཁུ་བྱེད་ན། །རབ་གཏུམ་ཁྲོ་བོ་ཆེན་པོའི་སྐུ། །ཀླད་པ་ཚལ་པ་
བརྒྱར་འགས་ཤིང་། །ལུས་སེམས་ངལ་སོགས་རྡུལ་དུ་བྱེད། །གནས་བཞི་འབྱུང་བའི་དཀྱིལ་འཁོར་ལ། །རང་སྔགས་ས་བོན་འོད་ཟེར་བཅས། །དབབ་པའི་གསང་སྔགས་ལན་སྟོང་དུ། །དྲི་ཞིམ་བདུག་སྤོས་དྲིལ་དཀྲོལ་ཞིང་། །ཡེ་ཤེས་སེམས་དཔའ་གཞུག་
པར་བྱ། །དེས་ནི་མཚན་མའི་རྟགས་མཐོང་འགྱུར། །སྐུ་ཡི་ཡེ་ཤེས་ཕྱོགས་བཅུར་གཡོས། །གསུང་གི་ཡེ་ཤེས་གསང་བ་བརྗོད། །ཐུགས་ཀྱི་ཡེ་ཤེས་མངོན་ཤེས་གསལ། །སྔགས་གསུམ་ཕྱག་རྒྱས་བརྟན་པར་གནས། །བདེན་པའི་ཡེ་ཤེས་བྱིན་བརླབས་ཀྱིས། །
དཀྱིལ་འཁོར་རིགས་ཀྱི་ལྷ་གང་ཡིན། །བདག་གིས་བསྐལ་བ་ཅི་ལྟ་བར། །དུས་འདིར་དབབ་པར་མཛད་པར་རིགས། །ནོར་བུ་ཕྲེང་བ་གར་བབ་པ། །རིགས་དེ་རང་གི་དམ་ཚིག་ཉིད། །སྔགས་དང་ཕྲེང་བ་མ་ལུས་པ། །སླར་ཉིད་དེ་ལ་སྦྱིན་པར་བྱ། །གསེར་གྱི་
ཐུར་མ་བྱིན་བརླབས་པས། །མ་རིགས་ལྡོངས་པའི་ལིང་ཏོག་བསལ། །ཕྱོགས་བཅུའི་སངས་རྒྱས་ཐམས་ཅད་ཀྱིས། །ཁྱོད་ཀྱི་མིག་འབྱེད་བརྩོན་པར་མཛད། །མ་རིག་བསྒྲིབས་གཡོགས་བསལ་མཛད་ནས། །པདྨོ་སྤྱན་བཟང་དྲི་མ་མེད། །ཨོྃ་པདྨ་ཙུཀྵ་ཛྙཱ་ན་པྲ་བེ་
Vol. 99 · folio 101a
ཤ་ཕཊ། རྡོ་རྗེས་གདོང་གཡོགས་བསལ་བྱས་ནས། །དཀྱིལ་འཁོར་གསལ་བ་བསྟན་པར་བྱ། །ལེགས་པར་ལྟོས་ཅིག་བློ་གྲོས་ཆེ། །སྔོན་གྱི་རྒྱལ་བ་ལ་སོགས་རྣམས། །གསང་སྔགས་སྙིང་པོ་དཀྱིལ་འཁོར་འདིར། །ལེགས་པར་ཞུགས་ཏེ་གྲུབ་
པ་བཞིན། །མེ་ཏོག་གང་ལ་བབ་པ་ཡི། །ལྷ་དེ་རིགས་ཀྱི་དམ་ཚིག་ཡིན། །ཤར་གྱི་སྒོ་སྲུང་ནས་བརྩམས་ཏེ། །གཙོ་བོའི་བར་དུ་དཀྱིལ་འཁོར་བསྟན། །ཞལ་ཟས་ན་བཟའ་ལ་སོགས་པས། །བླ་མ་བློ་ལྡན་མཉེས་པར་བྱ། །ཡི་དམ་ལྷ་སྐུ་ཕྱག་རྒྱ་སོགས། །
གསང་བའི་མིང་དང་བཅས་པར་བསྟན། །དེ་རིང་དུས་ནས་བཟུང་བྱས་ཏེ། །རྡོ་རྗེ་འཛིན་པའི་གནས་ཐོབ་པར། །རབ་རིབ་ཐ་མའི་བློ་ལྡན་པས། །དུས་ཀུན་དུ་ནི་གཟུང་བར་བྱ། །ཀྱེ་མ་ཧོ་བློ་གྲོས་རྒྱ་མཚོའི་གནས། །འགྲོ་ལ་བསྐྱབ་པའི་དོན་བརྩོན་ལ། །ཁྱོད་ཞབས་
པདྨ་ལ་བཏུད་དེ། །ཕོ་བྲང་གྲོང་མཆོག་ཉམས་དགའ་འདིར། །དབང་བསྐུར་བ་ཡི་རིན་ཆེན་མཛོད། །སྣང་མཛད་ལུས་ལ་བབ་པ་ལགས། །རིགས་བཞིན་ཐུགས་རྗེ་བརྩེ་དགོངས་པས། །དྲི་མའི་སྐྱོན་སོལ་བྱིན་བརླབས་མཛོད། །གནང་བར་མཛད་པའི་དུས་
ལགས་པས། །སྐྱོབ་པའི་སྐུ་མཆོག་ཐོབ་པར་མཛོད། །ཤར་གྱི་སྒོ་ཕྱོགས་ཁྲུ་དོའི་རྒྱབ། །དབང་བསྟེན་དཀྱིལ་འཁོར་དབུས་ཀྱི་ཚད། །པདྨ་འདབ་བརྒྱད་སྒོ་དང་བཅས། །དམར་པོའི་ཚོན་གྱིས་ལེགས་བྱུགས་ཏེ། །སེང་གེའི་ཁྲི་བཤམས་པདྨོར་བཅས། །
འཁོར་ལོས་སྒྱུར་རྒྱལ་ཚུལ་གྱིས་གཞག །སྤྱི་བོར་གདུགས་མཛེས་རྒྱལ་མཚན་གཡས། །དུང་དང་ཟངས་དུང་སིལ་སྙན་རྣམས། །རོལ་ཆ་མཆོད་ཆ་ཕྱོགས་མཚམས་དགོད། །རྒྱན་ཕྲེང་གོས་ཀྱིས་ལེགས་བཀླུབས་པ། །དྲི་ཆུ་སྔགས་བཅས་ཡུངས་ཀར་དང་། །ཀུ་ཤའི་
ཆུ་ཡིས་དག་པར་བྱ། །ཨོྃ་མ་ཧཱ་བིན་ཏ་ཧ་ན་ཧ་ན་ཧཱུྃ་ཕཊ། དེ་ནས་རིགས་ཀྱི་ལྷར་བསྐྱེད་དེ། །བཀྲ་ཤིས་དག་པའི་གླུ་བླངས་ཤིང་། །རོལ་མོ་རྒྱན་ཕྲེང་བཀོད་བྱས་ཏེ། །བུམ་པའི་ཆུ་ཡིས་དབང་བསྐུར་བྱ། །དེ་ཡི་ཕྱིར་ན་སྒྲིབ་ཚོགས་དང་། །བག་ཆགས་ཉོན་མོངས་གནས་དག་
Vol. 99 · folio 101b
ནས། །ལྷ་ཡི་ཆུ་རྒྱུན་དག་པའི་མཐུས། །ཡེ་ཤེས་ཕུང་པོ་དབང་ཕྱུག་མཆོག །ཨོཾ་ལྷ་ཡི་ཆུ་ནི་དག་པའི་ཆུ། །རྡོ་རྗེ་གསང་གསུམ་གནས་ལས་བྱུང་། །བྱང་སེམས་ཆུ་ཡིས་ཚོགས་རྣམས་དག །དབང་བསྐུར་བ་ཡིས་དོན་ཐོབ་མཛོད། །ཡོན་ཏན་རིན་ཆེན་རྣམ་དག་མཆོག །རིགས་
ལྔའི་སྐུ་རྒྱན་བྱས་པ་ཡི། །དབུ་རྒྱན་བཟང་པོའི་ཅོད་པན་བཅས། །ཀུན་འབྱུང་རིན་ཆེན་ཕུང་པོ་མཆོག །ཏྲྃ་ཡོན་ཏན་མ་བཅས་པ་ཡི་རྒྱན། །རིགས་ཀྱི་དཀྱིལ་འཁོར་གསལ་བར་བྱེད། །ཁམས་གསུམ་ཆོས་ཀྱི་རྒྱལ་པོ་ཆེ། །མཚན་དང་དཔེ་བྱད་ཀུན་རྫོབ་ཀུན། །ཡེ་
ནས་རྡོ་རྗེ་རྩེ་ལྔ་པ། །འོད་ཕྲེང་སྔགས་ཀྱིས་བརྒྱན་བྱས་པའི། །རྟོགས་བཅས་ཚོགས་རྣམས་ཀུན་ལས་རྒྱལ། །བདེར་གཤེགས་ཐུགས་རྗེ་རྩེ་གཅིག་པས། །ཁམས་གསུམ་གནས་རྣམས་དོར་མི་མཛད། །བྱང་སེམས་རྡོ་རྗེ་རྩེ་ལྔ་པ། །རང་རིག་ཡེ་ཤེས་གནས་གསལ་བྱེད། །
ཆོས་རྣམས་སྐྱེ་བ་མེད་པའི་དོན། །སྒྲ་བརྗོད་དངོས་པོ་བྲག་ཅ་བཞིན། །སྟོང་པའི་དྲིལ་བུ་གསུང་རང་བཞིན། །དེ་ལས་སྣ་ཚོགས་རྒྱ་ཆེན་ཚོགས། །ཧོྃ་ཆོས་ཀུན་རྒྱུ་ལས་རྣམ་གྲོལ་ཞིང་། །དེ་བཞིན་རྐྱེན་མེད་འབྲས་བུའི་ཚོགས། །རང་བཞིན་པདྨ་དག་པའི་དབྱིངས། །ངེས་པའི་ཐེག་
པ་སྟོན་བྱེད་གསུང་། །ཀྱེ་ཧོ་རྡོ་རྗེ་ཆེ་གེ་མོ། །རིགས་ཀྱི་མཚན་གྱིས་དབང་བསྐུར་ཏེ། །ཆོས་སྐུ་འོད་གསལ་བདེ་བ་ཆེ། །པདྨའི་སྒྲ་དབྱངས་མིང་དང་བཅས། །ཨོྃ་ཕྱག་རྒྱ་ཆེན་པོ་གསང་བའི་གནས། །རྡོ་རྗེ་ལྟ་བུའི་ཏིང་འཛིན་གྱིས། །མི་མཐུན་ལ་སོགས་བཅོམ་བྱས་ཏེ། །
རྣམ་པར་སྣང་མཛད་དེ་བཞིན་གཤེགས། ཨོྃ་བཛྲ་པདྨོ་ཨ་བྷི་ཥིཉྩཱ་མི། ཨོྃ་རཏྣ་མུ་ཀུ་ཊ་ཨ་བྷི་ཥིཉྩཱ་ཧཱུྃ། ཨོྃ་ཨ་ཏི་པ་ཏི་ཏྲྃ་ཨ་བྷི་ཥིཉྩཱ་ཧྃ། ཨོྃ་ན་མ་ཆེ་གེ་མོ་ཨ་བྷི་ཥིཉྩཱ་མི། སློབ་དཔོན་ལྷ་ལ་རབ་གུས་པས། །ཚོགས་བཅས་ཡོན་ཏན་བཟུང་བྱེད་ཅིང་། །རྡོ་རྗེ་དམ་
ཚིག་པ་ཡི་སྤུན། །མིག་གི་འབྲས་བུ་བཞིན་དུ་བསྐྱང་། །འདི་དག་ལ་གུས་སྨོད་བྱེད་པ། །ཚེ་སྲོག་རྡོ་རྗེ་གཏུམ་པོས་འཕྲོག །སྔགས་རྣམས་དུས་སུ་བརྗོད་བྱ་ཞིང་། །ཕྱག་རྒྱ་རྒྱུན་དུ་བཅིང་བར་བྱ། །གསང་བའི་ཚིག་དང་མཚན་མའི་ཚོགས། །དུས་ཀུན་དག་ཏུ་
Vol. 99 · folio 102a
སྦ་བྱས་ཏེ། །བདུད་རྩི་ལྔ་པོ་ཤ་སོགས་རྣམས། །མཉམ་པར་ཤེས་པས་རྒྱུན་དུ་སྤྱད། །བྲོ་དྲུག་གླུ་དྲུག་སྟབས་པ་ཡི། །བརྟུལ་ཞུགས་གནས་སྐབས་དག་ཏུ་བྱ། །ཉོན་མོངས་ཆོས་ལྔ་འདོད་ཡོན་ལྔ། །དམ་ཚིག་ཉམས་པས་ཤེས་པར་སྤྱད། །རྡོ་
རྗེ་དྲིལ་བུའི་ཕྱག་རྒྱ་ཆེ། །གནས་གསུམ་བརྟུལ་ཞུགས་ལ་གནས་ཤིང་། །ལུང་བསྟན་རྗེས་གནང་དབུགས་འདོན་པའི། །ཆོ་ག་བཟང་པོ་སྤྱད་པར་བྱ། །དེ་ནི་རྡོ་རྗེ་སློབ་དཔོན་མཆོག །ཡོན་ཏན་བཟའ་བའི་གནས་ཐོབ་འགྱུར། །རྡོ་རྗེ་དྲིལ་བུའི་ཕྱག་རྒྱ་སྐུ། །ཡང་
དག་སྔགས་ཀྱིས་བྱིན་བརླབས་ཏེ། །མ་འོངས་བཟུང་བའི་བློ་གནས་པས། །གསང་བའི་དམ་ཚིག་རྗེས་སུ་ཟུང་། །ཨོྃ་སརྦ་ཏ་ཐཱ་ག་ཏ་སྭ་ར་པདྨ་ས་མ་ཡ་སྟྭྃ། །ཨོྃ་ད་དུ་ཤྲཱི་པདྨོ་གྷཱཾ་དྷ་ཨ། ཨོྃ་མ་ཧཱ་པདྨོ་སྭཱ་ཧཱ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་ཧཱུྃ་ཕཊ། །མཆོད་པ་བཀྲ་
ཤིས་བཟང་ལ་ཀླགས། །བརྟུལ་ཞུགས་མཆོག་ཏུ་གྱུར་པ་ཡིན། །བདག་དང་གཞན་གྱི་དོན་སྤྱོད་པའི། །དངོས་གྲུབ་ཐུན་མོང་ཆོ་གའི་ལས། །ཞི་རྒྱས་དབང་དང་དགུག་པ་དང་། །དབྱེ་རྨོངས་བསྐྲད་པའི་ཆོ་ག་དང་། །གསད་པ་ལ་སོགས་ལས་རྣམས་ཀུན། །གསང་
བའི་དཀྱིལ་འཁོར་འདི་ཡི་ཚུལ། །ཁྱོད་ཀྱིས་གང་འདོད་གྲུབ་པར་གྱིས། །དེ་ནས་རང་བཞིན་འོད་གསལ་བའི། །པདྨའི་དཀྱིལ་འཁོར་རབ་སྦྱོར་བས། །འཁོར་བའི་ཆོས་རྣམས་ཟིལ་གནོན་ཅིང་། །ཕྱོགས་བཅུར་དམ་ཆོས་གསུང་སྒྲོགས་ཤིང་། །ཕ་རོལ་ཕྱིན་དྲུག་གནས་
འཕགས་ཏེ། །སྒྲོ་འདོགས་ཐེ་ཚོམ་གཅོད་པར་བྱེད། །ལུང་བསྟན་བདེར་གཤེགས་སྲས་བཅས་ཀྱིས། །རིགས་མཆོག་མཛད་པ་བླ་ན་མེད། །རྒྱལ་བ་ཀུན་གྱིས་ལུང་བསྟན་མཛད། །ཁམས་གསུམ་འཛིན་བཅས་ཀུན་ལས་གྲོལ། །འདོད་ཆགས་བྲལ་བ་ལྟ་བུའི་སྡིག །
ཁམས་གསུམ་ཀུན་ན་གཞན་མེད་དེ། །དེས་ན་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་མ་བྱེད་ཅིག །ཨོྃ་མ་ཧཱ་ས་མ་ཡ་ཧཱུྃ་ཕཊ། །གསང་སྔགས་རྒྱུན་རྣམས་འཛིན་བྱ་དང་། །ལྷ་དང་སློབ་དཔོན་གཟུང་བར་བྱ། །འདི་ནི་སངས་རྒྱས་ཐམས་ཅད་ཀྱིས། །གསུང་
Vol. 99 · folio 102b
གཅིག་སྒོ་ནས་གསུངས་པ་ཡིན། །འགྲོ་རྣམས་ཀུན་ལ་ཕན་པའི་བློས། །དཀྱིལ་འཁོར་ལ་སོགས་བརྩོན་པར་གྱིས། །དད་བརྩོན་ཤེས་རབ་བློ་ལྡན་པས། །གང་འདོད་འབྲས་བུའི་ཚུལ་ལ་སྦྱོར། །མཆོག་ཏུ་གསང་བའི་གྲོང་ཁྱེར་འདིར། །གང་གིས་འདོད་དོན་གང་གཉེར་
བ། །དེས་ནི་སྒྲིབ་སོགས་ཀུན་སྤངས་ཤིང་། །མཆོག་གནས་ཡེ་ཤེས་གསལ་བར་སྦྱོར། །བདེ་ཆེན་གསང་བའི་ཐེག་པ་ཆེ། །ཚེ་འདི་བྱང་ཆུབ་འགྲུབ་པར་བྱེད། །ཉོན་མོངས་དགྲ་སོགས་ལས་གྲོལ་བའི། །བདེ་བ་ཆེན་པོའི་གནས་ཐོབ་པའོ། །དེ་ནས་ལྷ་དང་བཞུགས་གནས་
པའི། །རྣམ་དག་དེ་ཉིད་བསྟན་བྱ་སྟེ། །མཆོད་སྦྱིན་གཏོང་ཚོགས་མགྲོན་གཉེར་ཅིང་། །བཀྲ་ཤིས་འགྲོ་བའི་ཚོགས་བསགས་བྱ། །སླར་ཡང་སློབ་མ་བློ་ལྡན་པས། །ཡོན་མཆོག་བླ་མ་ལ་ཕུལ་ཏེ། །མཎྜལ་མཆོད་པའི་ཚོགས་རྣམས་ཀྱིས། །མཉེས་བྱས་གསོལ་
བ་གདབ་པར་བྱ། །ཤེས་རབ་ཡན་ལག་ཕུན་སུམ་ཚོགས། །བཅུ་དྲུག་ཡང་ན་ཉི་ཤུ་བཞི། །རྡོ་རྗེ་བླ་མ་ལ་ཕུལ་ཏེ། །བྱིན་གྱིས་བརླབས་པའི་ཆོ་ག་བྱ། །ཁྲུས་བྱས་དྲི་ཞིམ་རྒྱན་གྱིས་བཀླུབས། །སྣ་ཚོགས་སྔགས་དང་ཕྱག་རྒྱས་སྦྱང་། །རིགས་ཀྱི་ལྷ་དང་ལྡན་བྱས་
པས། །དམ་ཚིག་བསྐུལ་བའི་བརྡས་མཚོན་ཏེ། །གཉིས་མེད་ཡེ་ཤེས་སྙོམས་འཇུག་བྱ། །བྱང་ཆུབ་སེམས་ཀྱི་ཆུ་རྒྱུན་གྱིས། །རང་གི་དཀྱིལ་འཁོར་མཆོད་བྱས་པས། །སློབ་དཔོན་ཚོགས་ལ་དབང་ཡང་བསྐུར། །ཇི་ལྟར་རྒྱལ་བ་སྲས་མཆོག་གིས། །འཇུག་
པ་པོ་རྣམས་ཚིམ་མཛད་པའི། །གཉིས་མེད་ཡེ་ཤེས་གསང་བའི་དོན། །དབབ་པའི་ཕྱག་རྒྱ་ལས་བྱུང་བའི། །ཨ་ལ་ལ་ཧོ། །ཨོྃ་ཨཱཿཧཱུྃ། ཨ་ཧོ་སུ་ཀ་རང་གི་གནས། །ཨ་ཧོ་ར་ཏི་ཚིམ་པར་མཛད། །དཀྱིལ་འཁོར་ཀུན་ལ་རང་བཞིན་གནས། །ཤེས་རབ་
མཆོག་ལྡན་བྱིན་བརླབས་པ། །སློབ་མའི་ལག་ཏུ་གཏད་པར་བྱ། །རང་བཞིན་བདེ་བའི་ཡེ་ཤེས་ཉིད། །ཟག་པ་མེད་པའི་དོན་གསལ་འགྱུར། །རྣམ་རྟོག་མེད་པའི་སེམས་ཀྱིས་ནི། །རང་གི་དངོས་ཉིད་མཐོང་བར་འགྱུར། །ཨེ་མ་ཧོ་འགྲོ་བའི་གནས་འདི་དག །
Vol. 99 · folio 103a
དེ་བཞིན་ཉིད་ལས་གཞན་དུ་འཁྲུལ། །དེ་དག་བདེ་ཆེན་ཡེ་ཤེས་པས། །གཞན་དུ་འགྱུར་བ་ཅི་ཡང་མེད། །ཡེ་ཤེས་འདི་ནི་ཤིན་ཏུ་ཕྲ། །རྡོ་རྗེ་སྙིང་པོ་མཁའ་འདྲ་ཞིང་། །རྡུལ་བྲལ་ཐར་བ་ཞི་བའི་ཆོས། །རང་གི་རང་བཞིན་དེ་ཉིད་དོ། །དེ་ནི་སྦྱིན་
སྲེག་གསང་བའི་དོན། །ཁྱེད་རྣམས་ཀུན་ལ་ཕྱིར་བཤད་དེ། །དཀྱིལ་འཁོར་ཆེན་པོ་ཕྱོགས་བཞིའམ། །གཞན་ཡང་གནས་གཞན་གང་འཐད་པར། །ཞི་རྒྱས་དབང་དང་མངོན་སྤྱོད་དང་། །ལས་ཀུན་པ་ཡི་ཐབ་ཁུང་བརྩམ། །ཟླུམ་པོ་ཁྲུ་གང་ཟླ་ཁམ་དང་། །གྲུ་
གསུམ་སྣ་ཚོགས་དབྱིབས་ཅན་ནོ། །དེ་དག་དཀར་སེར་དམར་དང་ནག །སྣ་བཞི་ཀུན་གྱིས་མཚན་པའོ། །རྡོ་རྗེ་འཁོར་ལོ་པདྨའི་རྒྱན། །སྣ་ཚོགས་རྡོ་རྗེ་མཚོན་ཆ་ཅན། །ཁྲུ་གང་བཞི་དང་གཉིས་མེད་དང་། །ཁྲུ་གསུམ་དེ་ཡི་ཞབས་སུ་ཕྱེད། །བུད་ཤིང་ཡམ་
ཤིང་སོ་སོ་ཡི། །མཚན་ཉིད་ལོ་འབྲས་ཁ་དོག་རོ། །རྩེ་མོ་ཆ་ལས་སོར་བཞི་དང་། །སོར་བརྒྱད་བཅུ་དྲུག་ཉི་ཤུའི་ཚད། །སྦམས་པའི་སོ་སོའི་མར་གྱིས་བྱུག །རིམ་བཞིན་རྩ་བ་བུད་ཁང་ནི། །ཟླུམ་དང་གྲུ་བཞི་ཟླ་གམ་དང་། །གྲུ་གསུམ་ཚུལ་དུ་བརྩིག་པར་བྱ། །
ལྷ་རྣམས་ཀུན་གྱི་ཁང་པ་ཉིད། །མེ་ཡི་གནས་སུ་གཞག་བྱས་ཏེ། །སོ་སོའི་ལས་དང་མཐུན་པ་སྟེ། །ཨག་ནེ་རཱ་ཙ་བོད་བར་བྱ། །གཡས་པ་མི་འཇིགས་ཕྱག་རྒྱས་གཡབ། །གཡོན་པ་བགྲང་ཕྲེང་གཟུང་བར་བྱ། །ཨོྃ་ཨེ་ཧྱེ་ཧི་ཨག་ནེ་ཡེ་མ་ཧཱ་བ་བ་ཧི་སྭཱ་ཧཱ། །ཁྲོ་བོ་རྒྱལ་
པོས་གསུང་བྱ་སྟེ། །མེ་ལྷའི་གདན་མཆོད་པདྨ་དབུལ། །དེ་རྗེས་མཆོད་པ་རྣམ་ལྔ་དང་། །སྲེག་རྫས་མ་ལུས་དབུལ་བྱས་ནས། །ལྷ་རྣམས་མཆོད་པའི་ཕྱག་ཚང་དུ། །བསྟོད་ཅིང་གསོལ་བ་གདབ་པར་བྱ། །གཡས་གཡོན་དགང་གཟར་བླུགས་གཟར་གྱིས། །ཁུ་
བཅུད་འཛག་པའི་རྣམ་གྲངས་དབུལ། །ཨོྃ་མ་ཧཱ་ཨ་ན་ལ་མ་ཧཱ་བྷུ་ཏཱ་བཛྲ་ལ་བསྨི་ཀུ་རུ་ཧཱུྃ་སརྦྦ་དུ་ཥྚན་ཧཱུྃ་ཕཊ། །མེ་ལྷ་མཆོད་པའོ། །ཨོྃ་མ་ཧཱ་ཀུ་རུ་པཉྩ་ཧཱུྃ། དགང་བླུགས་དབུལ་བའི་སྔགས་སོ། །ཨོྃ་སརྦ་བ་དྷ་ཧ་ན་བཛྲ་སྭཱ་ཧཱ། ཏིལ་གྱིའོ། །ཨོྃ་བཛྲ་བུཥྤེ་ཧཱུྃ། མེ་ཏོག་གིའོ། །
Vol. 99 · folio 103b
ཨོྃ་སརྦ་ཨགྣ་ཡེ་ཧཱུྃ་སྭཱ་ཧཱ། །ཡམ་ཤིང་ངོ་། །ཨོྃ་བཛྲ་པཱུ་ཛ་མེ་གྷ་ག་ལོ་ཀེ་ཤྭ་ར་ཧཱུྃ། འཇིག་རྟེན་དབང་ཕྱུག་བྱ་བའི་མཆོད་པའོ། །ཨོྃ་དྷུ་བེ་ཏི་བ་བུ་ཤ་གྷན་དྷེ་སྦྱར་བའི་མཆོད་པ་རྣམས་སོ། །ཨོྃ་ཨ་པྲ་ཏི་བཛྲཱ་ཨ་སྭཱ་ཧཱ། །ཀུ་ཤའིའོ། །ཨོྃ་བཛྲ་ཨཱ་ཡུ་ཥེ་སྭཱ་ཧཱ། །དཱུར་བའིའོ། །
གཞན་ཡང་རྫས་རྣམས་གང་ཚོགས་པ། །རང་མིང་ཡི་གེ་གསུམ་སྔགས་དབུལ། །དེ་ནས་དཀྱིལ་འཁོར་ཀུན་མཆོད་ཅིང་། །འདོད་པའི་དོན་ལ་གསོལ་བ་གདབ། །སྡིག་བཤགས་བག་ཆགས་ཀུན་བྱས་པས། །ལྷ་ཡི་དངོས་གྲུབ་ཐོབ་པར་འགྱུར། །ཐ་མ་མེ་ལྷ་མཆོད་བྱས་
ནས། །ཕྲིན་ལས་སོ་སོའི་སྔགས་བརྗོད་ཅིང་། །ཨོྃ་བཛྲ་ན་མ་སརྦ་ཏ་ཐཱ་ག་ཏ་ཧྲྀ་ད་ཡ་མ་ཀུ་རུ་ཧཱུྃ། །ལྷ་རྣམས་གཤེགས་སུ་གསོལ་ཞིང་། དམ་ཚིག་ལྷ་ལ་བསྡུ་བར་བྱ། །དེ་ནས་རབ་གནས་བཟང་པོ་ནི། །འགྲོ་ལ་ཕན་ཕྱིར་བཤད་པར་བྱ། །ས་ཕྱོགས་ཉམས་དགའ་
མཛེས་པ་རུ། །གཟུགས་བརྙན་དཀྱིལ་འཁོར་ལེགས་བྱས་ཏེ། །མཆོད་རྫས་རྫས་ཀྱིས་མཉེས་བྱས་ནས། །སློབ་དཔོན་ཆས་སུ་གཞུག་པར་བྱ། །དཀྱིལ་འཁོར་གསལ་བར་བསྒྲུབས་བྱས་ནས། །རྟེན་ཚོགས་སྦྱང་བའི་ཆོ་ག་བྱ། །ཇི་ལྟར་རྫོགས་པའི་སངས་
རྒྱས་ཀུན། །དགའ་ལྡན་གནས་ནས་གཤེགས་མཛད་དེ། །ལྷ་མོ་སྒྱུ་མའི་ལྷུམས་ཞུགས་ནས། །དེ་བཞིན་འདིར་ཡང་བཞུགས་སུ་གསོལ། །དཀོན་མཆོག་གནས་འདིར་བཞུགས་ནས་ཀྱང་། །མེ་ཏོག་ལ་སོགས་མཆོད་བཞེས་ལ། །འདི་དོན་གཟུང་བར་བྱ་བ་
དང་། །བྱང་ཆུབ་སེམས་མཆོག་སྤེལ་བར་མཛོད། །ནང་པར་རབ་གནས་བགྱིད་པར་འཚལ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གྲུབ་པ་ལ། །བཀའ་དྲིན་ཆོ་ག་མཛད་པར་འོས། །དེ་ནས་གནས་
རྣམས་ཀུན་སྦྱངས་ནས། །འགྲོ་དྲུག་གནས་ཀུན་སྒྲོལ་བྱེད་པ། །ཐམས་ཅད་དུས་འདིར་དགོངས་སུ་གསོལ། །བྱང་ཆུབ་སེམས་དཔའ་དགྲ་བཅོམ་དང་། །གསང་བའི་སྔགས་ལྡན་ལྷ་རྣམས་ཀུན། །འཇིག་རྟེན་མཆོད་པའི་དོན་ཕྱིར་རོ། །རབ་གནས་བཟང་པོར་འོས་པ་
Vol. 99 · folio 104a
ལགས། །དེ་ནས་གནས་རྣམས་ཀུན་སྦྱངས་ནས། །བྱིན་གྱིས་བརླབས་པ་རྫོགས་བྱས་ཏེ། །རང་གི་དཀྱིལ་འཁོར་ཇི་ལྟ་བར། །དབང་བསྐུར་ཆོ་ག་རྫོགས་བྱས་ནས། །སྦྱིན་སྲེག་གཏོར་མ་ལ་སོགས་གཏང་། །ཞེས་གསུངས་སོ། །དེ་བཞིན་གཤེགས་
པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་ལམ་ཁྱད་པར་དུ་འཕགས་པའི་ལེའུ་སྟེ་བརྒྱད་པའོ།། །།དེ་ལྟར་དེ་བཞིན་གཤེགས་པའི་མཐུས་ཐམས་ཅད་འདུལ་བར་མཛད་པ་དེའི་ཚེ། བདུད་ཀྱི་རྒྱལ་པོ་
ཤིན་ཏུ་མྱ་ངན་སྐྱེས་ཏེ། ཀྱེ་མའོ་ཧོ་སངས་རྒྱས་འདིར་ནི་བདག་གི་གནས་ལ་སོགས་པ་བཅོམ་ཞིང་རླག་པར་བྱེད་ན་ཐབས་ཇི་ལྟ་བུར་གདུལ་བར་བྱ། །འོན་ཀྱང་འདི་ཉིད་ལ་ནི་བདག་ཅི་ཡང་བྱ་བའི་གནས་མེད། ཤིན་ཏུ་དམན་པར་གྱུར་པ་དག་དང་མཚུངས་པར་
འགྲན་ནམ། དེ་བཞིན་དུ་འཇིག་རྟེན་གསུམ་པ་འདི་དག་ནི། སྲིད་པ་མི་སྲེག་བརླག་པར་བྱ་བའི་ཕྲིན་ལས་ཡིན་པས། ཐམས་ཅད་ལ་བཀའ་བསྒོ་ཞིང་། ལས་ངན་པ་འདི་དག་ལ་བཟློག་པར་བྱའོ་ཞེས་བསམ་མོ། །དེ་ནས་འཇིག་རྟེན་གསུམ་གྱི་གནས་ན་མཐུ་ཆེ་བ་
དང་། དབང་དང་གཟི་བརྗིད་ཐམས་ཅད་འདུས་ནས། ཀྱེ་ཁྱེད་རྣམས་བདག་ལ་ཉོན་ཅིག །འཇིག་རྟེན་གྱི་ཁམས་འདི་དག་ནི། རྒྱལ་པོ་གཅིག་གི་དབང་དུ་མ་གནས་ན། ཐམས་ཅད་སྲིད་པ་འཇིག་པར་འགྱུར་རོ། །དེས་ན་ཕྱོགས་ཐམས་ཅད་འཁོར་དང་བཅས་པ་འདུས་
ལ། བདག་གི་བཀའ་ཉན་པར་མཛོད་ཅིག་ཅེས་བསྒྲགས་སོ། །དེའི་ཚེ་འཇིག་རྟེན་གྱི་དྲག་བྱེད་ཆེན་པོའི་ཚོགས་ཀྱིས་རང་རང་གི་རྫུ་འཕྲུལ་བསྟན་ཅིང་སྨྲས་པ། ཁྱེད་ཇི་ལྟ་བུའི་ང་རྒྱལ་ཅན་ཅིག་ཡིན། ངེད་རྣམས་རེ་རེས་ཀྱང་འཁོར་དཔག་ཏུ་མེད་པ་སྐྱོང་བའི་རྒྱལ་པོ་ཆེན་པོ་
ཡིན་པས། ཡུལ་འཁོར་གྲངས་མེད་པ་ལ་དབང་བྱེད་ཅིང་། གཞན་གྱི་རེག་ནས་དམ་པར་གྱུར་པ་ལགས་པས་ཁྱོད་རང་ཞི་བ་ལ་གནས་ན་ལེགས་སོ་ཞེས་མཐུན་པར་བརྗོད་པས། བདུད་ཀྱི་རྒྱལ་པོ་ཡང་ཤིན་ཏུ་ཉོན་མོངས་པས་རྒྱས་ཏེ་གཞན་དག་ལ་སྨྲས་པ། ལྷར་བཅས་
Vol. 99 · folio 104b
འཇིག་རྟེན་འདི་དག་ཀུན། །ང་ཡི་བཀའ་ལས་གནས་པ་ཡིན། །སྐྱེ་འགྲོ་མ་ལུས་གང་དག་ཀུན། །རྒྱལ་པོའི་བཀའ་གསང་ཉན་པར་གྱིས། །ཁམས་གསུམ་བདག་པོ་ལྷ་ཡི་ལྷ། །ས་རྣམས་ཀུན་གྱི་ས་སྟེང་པ། །བདག་ནི་མཐུ་དང་རྫུ་འཕྲུལ་ཚད། །ཀུན་གྱིས་འགྲན་པར་
ནུས་མ་ཡིན། །ང་ཡི་བཀའ་ལས་འདའ་བྱེད་ན། །སྲོག་སྲིད་བརླག་ཅིང་གནས་ཀྱང་འཐོར། །ཞེས་བརྗོད་དོ། །དེ་ནས་ཚངས་པའི་རྒྱལ་པོས། རང་གི་འཁོར་དཔག་ཏུ་མེད་པ་བསྡུས་ཏེ། དེ་དག་གི་དབུས་ནས་སྲིན་པོ་ཆེན་པོའི་གཟུགས་འཛིན་པའི་ཁྲོ་བོར་གནས་ནས། རང་
གི་མཐུ་ལས་སྤྲུལ་པའི་ཁྲོ་བོ་དང་། མཚོན་ཆའི་ཚོགས་སྤྲོ་བར་མཛད་དོ། །དེ་བཞིན་དུ་ཁྱབ་འཇུག་དང་། དབང་ཕྱུག་ཆེན་པོ་དང་། བརྒྱ་བྱིན་དང་། ཚོགས་ཀྱི་བདག་པོ་དང་། བྷྲྀང་གི་རི་ཏི་དང་། གཞོན་ནུ་གདོང་དྲུག་པ་རྣམས་ཀྱིས་ཀྱང་རང་རང་གི་འཁོར་དང་དཔག་
ཏུ་མེད་པ་བསྡུས་ཏེ། དེ་དག་གི་དབུས་ན་འགྱིང་ཞིང་སྤྲུལ་པ་བསམ་གྱིས་མི་ཁྱབ་པར་སྤྲོས་ཏེ། དབང་དང་རྫུ་འཕྲུལ་སྟོན་ཏོ། །རི་རབ་ཀྱི་ཁ་ཁྱེར་ལ་གནས་པའི་རྒྱལ་པོ་ཆེན་པོ་བཞིས་ཀྱང་རང་རང་གི་འཁོར་གྱི་དབུས་ན་འགྱིང་ཞིང་མཐུ་དང་རྫུ་འཕྲུལ་སྟོན་པར་མཛད་
དོ། །གསེར་གྱི་རི་ལ་གནས་པའི་ཕྱོགས་སྐྱོང་བརྒྱ་བྱིན་དང་། དབང་ལྡན་དང་། གཤིན་རྗེ་དང་། བདེན་བྲལ་དང་། ཆུ་ལྷ་དང་། གནོད་སྦྱིན་དང་། ཉི་མ་དང་། སའི་ལྷ་རྣམས་ཀྱིས་ཀྱང་རང་རང་གི་གནས་དང་བཅས་པར་འཇིགས་པའི་མཚོན་ཆ་དང་བཅས་པར་འཁོད་
དོ། །ཉི་མ་དང་། ཟླ་བ་དང་། མིག་དམར་དང་། ཕུར་བུ་དང་། པ་བ་སངས་དང་། སྤེན་པ་དང་། གཟའ་ཆེན་པོ་རྣམས་ཀྱིས་ཀྱང་རང་རང་གི་འཁོར་དང་བཅས་པས་འཇིགས་པའི་ཁྲོ་བོའི་ཚོགས་དང་། མཚོན་ཆར་བཅས་པས་འཁོད་དོ། །མཐའ་ཡས་དང་།
འཇོག་པོ་དང་། སྟོབས་ཀྱི་རྒྱུ་དང་། རིགས་ལྡན་དང་། ནོར་རྒྱས་དང་། དུང་སྐྱོང་དང་། པདྨ་དང་། ཆུ་ལྷ་རྣམས་ཀྱིས་རང་རང་གི་གཡོག་འཁོར་རྣམས་དང་། འཇིགས་པའི་སྤྲུལ་པས་འཁོད་དོ། །དེ་བཞིན་དུ་ཁམས་གསུམ་གྱི་དྲེགས་བྱེད་ཀྱི་ཚོགས་གནས་
Vol. 99 · folio 105a
པའི་གནོད་སྦྱིན་དང་། དྲི་ཟ་དང་། གྲུལ་བུམ་དང་། འགྲོ་བ་དྲུག་གཙོ་བོ་དབང་ཆེ་ཞིང་མཐུ་ཡོད་པ་རྣམས་དང་། མ་མོ་རྣམས་དང་། གཤིན་རྗེ་དང་། ལྷ་མ་ཡིན་རྣམས་དང་། འདབ་བཟངས་དང་། སྲིན་པོ་དང་། ནམ་མཁའ་ལྡིང་དང་། རྒྱུ་སྐར་
གྱི་ཚོགས་སུ་བཅས་པ་རྣམས་ཀྱིས་ཀྱང་རང་རང་གི་འཁོར་གྱི་དཀྱིལ་འཁོར་གྱི་དབུས་ན་འཇིགས་པའི་གཟུགས་ཀྱི་མཚོན་ཆ་དང་ང་རོ་དང་བཅས་པས་རྣམ་པར་འཕྲུལ་ཞིང་འཁོད་དོ། །དེ་ནས་བདུད་ཀྱི་རྒྱལ་པོ་ཡང་ཉོན་མོངས་པ་སྐྱེས་ཏེ། རང་གི་འཁོར་
རྣམས་འདུ་བར་མཛད་ཅིང་རྫུ་འཕྲུལ་གྱི་ནུས་པ་ཅི་ཡོད་པ་དུས་འདི་དག་གཅིག་ཏུ་སྟོན་ནས། མཚོན་ཆ་སྣ་ཚོགས་འབར་བའི་གཞལ་ཡས་ཁང་ནས་དྲག་པོ་འབར་བར་འཇིགས་པའི་སྐུར་སྟོན་ཏོ། །ཁྲོ་མོའི་ཚོགས་དང་རོལ་པ་མཛད་པ་ལགས།
འཁོར་བའི་ཚོགས་མཚོན་ཆ་མེ་འོད་བཅས་པ་ཕྱོགས་བཅུར་སྤྲོས་ཏེ་ནམ་མཁའ་ཐམས་ཅད་གང་བར་བྱས་ནས་ཐོག་སེར་ནད་དང་ཚུབ་མ་ཐམས་ཅད་སྐྱེས་སོ། །དེས་འཇིག་རྟེན་གྱི་ལྷ་ཀུན་མྱོས་ཤིང་རྨོངས་པར་གྱུར་པ་དང་། །འཇིགས་པའི་ཚོགས་ཀྱིས་ཕྱོགས་
ཐམས་ཅད་ནས། འཁོར་བའི་མེ་འོད་འབར་བའི་མཚོན་ཆས་བསད་ཅིང་གཏུབས་པ་ལས། སོ་སོའི་ཚོགས་བྲེད་པར་གྱུར་ཏེ། རང་གི་སྙིང་པོ་ཕུལ་ཞིང་སྐྱབས་སུ་གསོལ་ལོ། །དེ་ནས་ལྷ་ཐམས་ཅད་འདུ་བར་བྱེད་པའི་བདུད་ཀྱི་སྡེ་དེ་དག་ལ་མནས་དོར་ཞིང་དམ་ཚིག་
བྱིན་ཏེ། སོ་སོའི་སྙིང་པོ་བླངས་ཏེ། འཁོར་ཚོགས་ཐམས་ཅད་རྗེ་དཔོན་དང་བྲལ་ཏེ། ལྷ་ཆེན་པོ་བརྒྱད་ནི་རང་གི་རྩེ་ལ་འཁོད་དོ། །རྒྱལ་པོ་ཆེན་པོ་བཞི་ནི་ཤར་གྱི་གླིང་ལ་འཁོད་དོ། །གནོད་སྦྱིན་དང་། ཕྱོགས་སྐྱོང་དག་ནི་ཤར་གྱི་གླིང་ཕྲན་གཉིས་སུ་འཁོད་དོ། །འགྲོ་བ་རིས་
དྲུག་གི་སེམས་ཅན་རྣམས་ནི་ལྷོར་དགོད་དོ། །དྲི་ཟ་དང་མ་མོ་རྣམས་ནི་ལྷོའི་གླིང་ཕྲན་ལ་དགོད་དོ། །ལྷ་མ་ཡིན་རྣམས་ནི་ནུབ་ཏུ་དགོད་དོ། །གཤིན་རྗེ་དང་འདབ་བཟངས་དང་སྲིན་པོ་རྣམས་ནི་ནུབ་ཀྱི་གླིང་གི་གླིང་ཕྲན་གཉིས་ལ་དགོད་དོ། །གཟའ་དང་རྒྱུ་སྐར་རྣམས་
Vol. 99 · folio 105b
ནི་བྱང་དུ་དགོད་དོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་གསང་བ་བླ་ན་མེད་པ་ལས། བདུད་ཀྱི་སྤྲུལ་པ་བསྟན་པའོ། །དེ་ནས་བདུད་ཀྱི་རྒྱལ་པོ་དེ་ཉིད་ཤིན་ཏུ་དགའ་ཞིང་འཁོར་ཐམས་ཅད་ལ་བཀའ་བསྒོ་བ། །རྒྱལ་པོ་གཅིག་གི་འཁོར་དུ་གནས་པས་ནི། །
ཡིད་དང་མཐུན་པར་སྤྱོད་པས་གནས་པ་ཡིན་པས། ཁྱེད་རྣམས་ཀྱིས་ཀྱང་ངས་ཅི་ལྟར་བསྒོ་བའི་བཀའ་བཞིན་ཉོན་ལ། ཐར་པའི་ལམ་འདི་ཆོད་ལ། སྟོན་པ་གཞན་ལ་གུས་པར་མ་བྱེད་ཅིག །ཁོ་བོའི་འཇིག་རྟེན་སྟོངས་པར་འོང་ངོ་། །བསམ་པ་རྒྱ་ཆེན་པོ་མེད་པའི་འགྲོ་བ་
འདི་དག་ནི། གཏི་མུག་ཅན་གྱི་རང་བཞིན་ཏེ། །བྱོལ་སོང་ལྟ་བུ་ཡིན་པས། བདེ་ལེགས་ཀྱི་གནས་ཐོབ་པའི་དོན་མེད་པ་ཡིན་ནོ། །ཡང་ཚིགས་སུ་བཅད་དེ་སྨྲས་པ། ཀྱེ་འདུ་ཤེས་མེད་པའི་འགྲོ་བ་དག །རང་གི་བདེ་བ་སྤོང་བྱེད་ཅིང་། །ཐར་པའི་ལམ་གཞན་
སྒྲུབ་བྱེད་པ། །དེ་དག་འཁྲུལ་པས་རང་རྒྱུད་བརླག །ཉེས་འདོད་བདེ་ལེགས་སྤོང་བྱེད་པ། །རྨོངས་པས་འགྲོ་རྣམས་སྙིང་རེ་རྗེ། །རེ་ཞིག་ཐུགས་རྗེ་སྐལ་ལྡན་པས། །བདག་གི་འཁོར་དུ་འདུས་པ་ཡིན། །གནས་གཞན་གོང་མ་ཐོབ་འདོད་པས། །བདག་ལ་དད་སེམས་
གུས་པར་གྱིས་ཤིག་ཅེས་བསྒོའོ། །དེ་དག་གིས་ཀྱང་དེ་ལྟར་ཉན་ཏེ། །རང་རང་གི་གནས་ཤོར་ཞིང་མྱ་ངན་གྱི་སེམས་སྐྱེས་ཀྱང་ཅི་ལྟར་བྱ་བའི་ཐབས་མེད་དེ། དེ་ལྟར་འཁོད་ཅིང་གནས་སོ། །དེ་ནས་བདུད་ཀྱི་རྒྱལ་པོ་རང་གི་གནས་སུ་སོང་སྟེ། འཁོར་དང་
བཅས་པ་རྣམས་དགའ་བའི་ལོངས་སྤྱོད་འདོད་པའི་ཡོན་ཏན་ལ་སྤྱོད་ཅིང་། །དགྱེས་པའི་གླུ་གར་དང་རོལ་མོ་ལ་སྤྱོད་དོ། །ཇི་ལྟར་ཁམས་གསུམ་ཀུན་གྱི་བདག་པོ་ནི་བདག་ཡིན་པས་འདི་ལས་ལྷག་པའི་བསྒྲུབ་བྱ་ནི་གཞན་དག་ཡོད་པར་བདག་གིས་མ་མཐོང་
ངོ་། །ད་སངས་རྒྱས་ཀྱི་ཚོགས་དང་བྱང་ཆུབ་སེམས་དཔའ་དག་ཀྱང་བདག་གི་དབང་དུ་བསྡུ་ན་ཐབས་ཅི་ལྟར་བརྩམ་ཞིང་། །རང་གི་འཁོར་དག་ལ་ཡང་འདྲི་བར་བྱེད་དོ། །དེ་ནས་བདུད་ཀྱི་གྲོང་ཁྱེར་ཀུན་ལ་བསྒོ་སྟེ། སངས་རྒྱས་ཀྱི་འཁོར་རྣམས་ལ་མི་དགེ་བའི་
Vol. 99 · folio 106a
ལྟས་དང་མཚན་མ་ངན་པའི་ཆོ་འཕྲུལ་སྣ་ཚོགས་ཀྱི་བསྒྲུབ་པ་ཐམས་ཅད་དུ་རབ་ཏུ་འཆད་ཅིང་། །ཅི་འདོད་པ་རྣམས་ལ་གྲུབ་པར་བྱ་ན་བདག་ཅག་ལ་མོས་པ་བྱེད་དོ། །དེའི་རྗེས་ལ་དེ་དག་གི་གཙོ་བོ་རྣམས་བདག་གི་འཁོར་དུ་འདུས་པའི་ཚེ་ཐབས་སྣ་ཚོགས་
ཀྱི་སྒོ་ནས་གདུལ་བར་བྱའོ། །གལ་ཏེ་འོངས་པར་མ་ནུས་པ་བདག་ནི་ཁོ་རང་གི་གནས་དེ་ཉིད་དང་བཅས་པ་གཞོམ་པར་བྱའོ་ཞེས་བརྗོད་དོ། །དེའི་སྟོང་གསུམ་གཡོ་བར་བྱེད་པའི་ཚོགས་ཀྱི་ཁྲོ་བོའི་མཚོན་ཆའི་ཚོགས་དང་བཅས་པ་སྤྲུལ་ནས། དཀར་པོའི་རིགས་ལ་དགའ་
བའི་འགྲོ་བ་རྣམས་མ་ལུས་བཅོམ་ཞིང་། ས་ལ་གནས་པའི་བྱང་ཆུབ་སེམས་དཔའ་རྣམས་ཀྱང་བརླག་པར་བཤམས་པ་ལས། བདེན་པའི་མཐུ་གང་ལ་གནོད་པར་མ་གྱུར་ཏོ། །དེ་ནས་རབ་ཏུ་ཁྲོས་ཏེ། བདག་གི་ཁམས་གསུམ་འདི་དུས་གཅིག་ཏུ་གདུལ་བར་བྱ་
སྤྱོད་པ་ལ། ངན་པའི་ཚུལ་ཅན་གཡོ་སྒྱུ་དང་བཅས་པ་འདི་དག་མི་འདུལ་ལམ། དེ་རང་གི་སྡེ་ཚན་འོག་མ་ལ་གནས་པ་ཀུན་བསྐུལ་ཏེ། ཐར་པའི་ལམ་ལ་གནས་པ་འདི་དག་རིགས་ཀྱིས་གདུལ་བར་བྱའོ་ཞེས་བརྗོད་དོ། །དེ་ནས་ཚངས་པ་ལ་སོགས་པ་བསྒོ་བར་མཛད་
པ་དང་། དེ་དག་གིས་ཀྱང་རང་རང་གི་སྤྲུལ་པ་དང་། མཚོན་ཆ་རྣམས་ཕྱོགས་ཀུན་དུ་སྤྲོ་ཞིང་། རང་གི་གསང་སྔགས་དྲག་པོའི་ཚོགས་དག་ཀྱང་རྗོད་པར་བྱེད་དོ། །དེས་འཇིག་རྟེན་འཁྲུགས་ཤིང་གཡོས་ནས་ཐམས་ཅད་བྲེད་པར་གྱུར་ཏོ། །བླ་ན་མེད་པའི་གསང་བ་
དཔལ་རྟ་མཆོག་རོལ་པའི་རྒྱུད་ལས། བདུད་ཀྱི་སྡེ་དང་བཅས་པ་ཤུགས་འབྱུང་བའི་ལེའུ་སྟེ་དགུ་པའོ།། །།དེ་ནས་བཅོམ་ལྡན་བདེ་ཆེན་མཆོག །སངས་རྒྱས་ཀུན་གྱི་བདག་ཉིད་ཀྱིས། །སྟོང་གསུམ་སོ་སོར་འདུལ་མཛད་ཕྱིར། །རྣམ་འཕྲུལ་ཏིང་འཛིན་
གནས་ལ་བཞུགས། །དེ་བཞིན་ཉིད་ལས་མ་གཡོས་ཀྱང་། །ཐུགས་རྗེ་ཆེ་དང་སྨོན་ལམ་མཐུས། །སོ་སོའི་ལས་རྟོག་མཐུན་བཞིན་དུ། །སྣ་ཚོགས་རྟོག་པའི་ཚུལ་མ་སྟོན། །འདོད་ཆགས་ལ་ཞེན་སྨོན་པ་དག །ཆགས་པ་ཆེན་པོས་འདུལ་བར་མཛད། །དེ་བཞིན་
Vol. 99 · folio 106b
ཞེ་སྡང་གཏི་མུག་དང་། །ང་རྒྱལ་ཕྲག་དོག་འདུལ་དོན་དུ། །མཐུན་བྱས་སྣང་བ་སྣ་ཚོགས་དང་། །མི་མཐུན་སྒོ་ནས་འདུལ་བར་མཛད། །པདྨོ་བདེར་གཤེགས་རྡོ་རྗེ་དོན། །རིན་ཆེན་རིན་ཆེན་ལས་སྣ་ཚོགས། །ཕྱག་རྒྱ་ཆེ་སོགས་འཁོར་ལོ་སྒྱུར། །ཇི་ལྟ་བ་བཞིན་དག་
པར་མཛད། །ཐབས་ཆེན་རྣམ་དག་པདྨོའི་དོན། །ཤེས་རབ་སྤྲུལ་པའི་མཆོག་འགྱུར་བས། །གར་གྱི་དབང་ཕྱུག་བདེ་བ་ཆེ། །རྡོ་རྗེ་ལྟ་ཉིད་སྤྲུལ་པར་མཛད། །གཞན་ཡང་མཛད་པ་རྒྱ་ཆེན་པོ། །སྣ་ཚོགས་མཐུ་ཡིས་འདུལ་མཛད་དེ། །དག་པའི་འགྲོ་བ་མཐུན་བྱས་
སྐུ། །གསེར་འོད་མཚན་དང་དཔེ་བྱད་ལྡན། །གོ་བྱེད་ཐེག་པ་བླ་ན་མེད། །ཟབ་མོ་གསང་སྔགས་ཇི་བཞིན་པར། །རྒྱལ་བ་བདེར་གཤེགས་ཕྱག་རྒྱའི་སྐུ། །རབ་སྤྲུལ་དཀྱིལ་འཁོར་སྣ་ཚོགས་པའི། །ལ་ལས་བྱང་སེམས་རྒྱ་ཆེན་མཆོག །ལ་ལར་ལམ་ལྔ་དག་པར་
སྦྱོར། །ལ་ལར་ཕ་རོལ་ཕྱིན་བཅུ་རྫོགས། །ལ་ལར་འབྲས་བུའི་དོན་ལ་སྦྱོར། །ལ་ལར་དགའ་ལྡན་ལྷ་ཡུལ་འཕགས། །ལྷུམས་སུ་ཞུགས་དང་བལྟམས་པ་དང་། །འཇིག་རྟེན་སྤྱོད་མཐུན་རོལ་རྩེད་སོགས། །གཞན་གྱི་སྐུར་སྤང་བྱ་བ་རྣམས། །བཅས་
ཀའི་ཅན་གྱི་བསམ་འཕྲུལ་པ། །མཐུན་འཇུག་ཐབས་ཀྱི་བྱ་བ་མཆོག །དཀའ་ཐུབ་མཛད་དང་དཀའ་བ་སྤྱོད། །རྡོ་རྗེ་གདན་ལ་ཡང་སངས་རྒྱས། །བདུད་འདུལ་མངོན་རྫོགས་སངས་རྒྱས་ཤིང་། །རྩེ་གཅིག་ཏིང་འཛིན་བསྐུལ་ནས་བཞུགས། །ཆོ་འཕྲུལ་
མཛད་པ་ཀུན་འདུལ་ཞིང་། །ཆོས་ཀྱི་འཁོར་ལོ་རིམ་བཞིན་བསྐོར། །མྱ་ངན་འདའ་ཚུལ་རིང་བསྲེལ་སྟོན། །ཞི་ཚོགས་ཁྲོ་བོར་འཁྱིལ་པ་དང་། །རང་བྱུང་དུད་འགྲོའི་གཟུགས་སྣ་ཚོགས། །སྣོད་ཀྱི་འཇིག་རྟེན་ཀུན་མཐུ་སྐུ། །ཚངས་པ་ཁྱབ་འཇུག་འཇིག་རྟེན་
སྐྱོང་། །བདུད་དང་སྲིན་པོ་གཟུགས་སོགས་ཀྱིས། །འགྲོ་བའི་ལས་རྟོག་དག་མཛད་ཅིང་། །རང་གི་ཡེ་ཤེས་དོན་བཀོད་བྱ། །དེ་ཚེ་འགྲོ་བའི་གནས་མཚོན་ཚོགས། །ལས་ཀྱི་སྟོབས་ཚོགས་མཐུས་བརྡབས་རྣམས། །དེ་བཞིན་ཉིད་མཐུས་ཚོགས་ཆེན་པོས། །ཡང་
Vol. 99 · folio 107a
དག་ལམ་ལས་རབ་གྲོལ་ཞིང་། །ང་རྒྱལ་ཆེན་པོའི་དྲེགས་ཚོགས་སྐྱེས། །རང་གི་མཐུ་དང་རྫུ་འཕྲུལ་སྟོན། །ཉོན་མོངས་ལས་ཀྱི་ལམ་ལ་ཞེན། །རང་གི་རིགས་ཚོགས་བསྡུ་བར་བྱེད། །འཇིག་རྟེན་གསུམ་འཇིག་ཨ་ལ་ལ། །ཁམས་གསུམ་
གཙོ་བོ་བདག་ཅག་རྣམས། །སུ་ཞིག་སྤྲུལ་པ་ཨ་ལ་ལ། །འཇིག་པར་མཛད་པའི་འོས་མ་ལགས། །རང་གི་དཀའ་ཐུབ་བདེ་གནས་པས། །མྱ་ངན་འདས་པའི་ལམ་མཆོག་སྟེ། །གཞན་གྱི་བསྟན་པ་ཅི་ཞིག་བྱ། །བདེ་ཚོགས་འཇིགས་པའི་ཡན་ལག་གོ། །སུ་
ཞིག་རང་གི་བདེ་སྤོང་ཞིང་། །གཞན་ནས་སྡུག་བསྔལ་དོན་གཉེར་བ། །གཟུགས་མང་སྤྲུལ་པ་བསམ་ཡས་ཀྱང་། །རང་གི་སྐུ་མཛེས་བསྒྱུར་བ་དཀའ། །སྒྲ་མང་སྤྲུལ་པ་བསམ་ཡས་པས། །རང་གི་གསུང་ཉན་འཕྲོ་བྱེད་དམ། །སེམས་རྟོག་བྱ་བའི་འོད་བཅས་
ཀྱིས། །ཏིང་འཛིན་རྩེ་གཅིག་འགྱུར་བ་མེད། །དྲག་པོའི་སྟོབས་མཆོག་གཟི་ལྡན་རྣམས། །རང་གིས་རང་སྤྱོད་བདེ་བར་སྡོད། །དེ་ནས་བདུད་དཔུང་དང་པོ་དང་། །དབང་ཕྱུག་ཚངས་པ་ཁྱབ་འཇུག་ཆེ། །རྒྱ་བྱེད་གླུ་དང་དྲེགས་བྱེད་རྣམས། །རབ་ཏུ་ཁྲོས་ཏེ་རང་གི་
མཐུས། །སྟོན་ཞིང་དྲག་པོའི་གསང་སྔགས་དང་། །གཏུམ་ཚིག་ང་རོ་འབོད་སྒྲོགས་བྱེད། །དེ་ཚེ་རྒྱལ་པོའི་བྱིན་བརླབས་མཐུས། །མཐུན་འཇུག་ཐབས་ཀྱིས་འདུལ་མཛད་དེ། །ཐེག་པ་གསང་བ་བླ་མེད་མཆོག །ཁྱད་པར་སྒོ་གསུམ་གསང་བྱེད་ཅིང་། །ཡང་
དག་དོན་ལ་བདེ་བཀོད་ཕྱིར། །ཐུགས་རྗེ་ཆེན་པོས་མཐུན་མཛད་དེ། །འཇུག་པའི་ལམ་རིང་བདེ་བསྟན་ཞིང་། །དགའ་བའི་སྒོ་ནས་བདེ་མཛད་ཀྱང་། །རང་གི་ཉོན་མོངས་དྲེགས་པའི་མཐུས། །དོན་འཇུག་མཐུན་པའི་སྤྱོད་སྒོ་འཇིག །གཏི་མུག་ཆེན་པོ་མུན་གཏིབས་ནས། །
ང་རྒྱལ་རི་བོ་ཀུན་དུ་བཀོད། །ཞེ་སྡང་མེ་ལྕེ་འབར་བསྲེགས་ཤིང་། །ཕྲག་དོག་རླུང་གིས་བསྐྱོད་བྱས་ནས། །འདོད་ཆགས་ཆུ་བོས་འབྱིན་པར་འགྱུར། །དྲེགས་པའི་མཐུ་ཡིས་རབ་ཁྲོས་ཏེ། །ཚོགས་རྣམས་གཅིག་ལ་གཅིག་བསྒོ་ཞིང་། །གསང་སྔགས་རྫུ་འཕྲུལ་སྟོབས་
Vol. 99 · folio 107b
ཕྱུང་ནས། །རབ་ཏུ་བསྒྲགས་པའི་མཐུ་ཡིས་ནི། །འཇིག་རྟེན་གསུམ་དག་འཁྲུག་པར་བྱེད། །མི་ནད་མུ་གེ་འཁྲུག་པ་དང་། །མཚོན་ཆ་ལོ་ཏོག་འབྲས་བུ་འཕྲོག །འབྱུང་པོའི་འཇིགས་གཟུགས་ཉེས་ཚོགས་རྣམས། །རྒྱུན་མི་འཆད་དུ་འཁོར་བར་འབྱུང་། །ས་གཞི་མེ་འབར་
ཆུ་བདག་བྱེད། །དུག་དང་དབྱིག་དུག་རླུང་བཞིན་གཡོས། །བདེ་ལམ་མཐོ་རིས་ཐར་ལམ་གཅོད། །མི་དག་སེམས་ཀྱིས་ནོན་འགྱུར་ཞིང་། །འགྲོ་རྣམས་སྡུག་བསྔལ་བསྐྱེད་བྱས་པས། །སངས་རྒྱས་རྣམས་ཀྱིས་ཐུགས་ཁྲལ་བསྐྱེད། །དེ་ནས་བྱང་ཆུབ་སེམས་བཅས་
པའི། །འཁོར་རྣམས་དུས་གཅིག་བསྟན་པར་བཞེངས། །གཙོ་བོའི་ཕྱོགས་སུ་འདུད་བྱེད་ཅིང་། །ལན་གྲངས་བསྐོར་ཞིང་ཕྱག་ཀྱང་འཚལ། །མགོན་པོ་བདེ་བ་མཉེས་བྱེད་ཅིང་། །མཆོད་ནས་གསོལ་བ་གདབ་པར་བྱ། །ཐུགས་རྗེ་ཆེ་མངའ་ལྷ་ཡི་ལྷ། །བྱམས་སོགས་
དགའ་བའི་བདུད་རྩི་ཆུས། །གདོས་བཅས་ཐལ་བར་བརླག་མཛད་པས། །ཐིམ་འགྱུར་རྡོ་རྗེ་ཡེ་ཤེས་ཚོགས། །ཆོ་འཕྲུལ་དཀྱིལ་འཁོར་བསྟན་དུ་གསོལ། །མཛད་པའི་བྱིན་བརླབས་བསྟན་དུ་གསོལ། །དེ་དག་ཉོན་མོངས་རླབས་འཁྲུགས་པས། །རང་གཞན་ཐར་
ལམ་བདེ་བར་འཇོམས། །བྱང་ཆུབ་སེམས་ཉིད་རླན་བྲལ་ལམ། །སྲིད་གསུམ་ཡལ་བར་དོར་བྱེད་ན། །ཐུགས་རྗེ་ཆེན་པོ་གང་ལ་གདགས། །ཨེ་མ་ཧོ་འབྲས་བུ་མྱ་ངན་འདས། །ཨེ་མ་ཧོ་བྱང་སེམས་པདྨའི་རྫིང་། །ཨེ་མ་ཧོ་བརྗོད་བྲལ་ཀུ་མུ་ད། །ཨེ་མ་ཧོ་མེ་ཏོག་
འབྲས་བཅས་ཤིང་། །འདི་དག་དཀྱིལ་འཁོར་རྣམ་དག་པས། །རིགས་མཆོག་མཚན་ཉིད་ཡོན་ཏན་གནས། །དུས་འདིར་དག་པར་ག་ལ་མཛད། །ཐུགས་རྗེ་ཆེན་པོ་ག་ལ་གདགས། །འདི་དག་སྐལ་ལྡན་གསུང་བའི་སྣོད། །རྡོ་རྗེ་ཐེག་པའི་བསྟན་པ་འཛིན། །ད་
ལྟར་རྣམ་རྟོག་རི་བོས་ནོན། །ཐབས་ཀྱིས་འདུལ་བར་མི་འགྱུར་བས། །ཤུགས་ཀྱིས་བསྒྲལ་བར་བྱ་བའི་ཕྱིར། །དཀྱིལ་འཁོར་སྣ་ཚོགས་བསྟན་དུ་གསོལ། །ཞེས་གསོལ་ཏོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་
Source and licence
Text: Esukhia’s Derge Kangyur e-text (Esukhia/derge-kangyur · commit a582cf47) · public domain
Licence Public Domain · Evidence
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
No translation — Tibetan only: there is no translation we are licensed to publish (84000’s translations are no-derivatives, non-commercial)
- Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
- The Tibetan text is not in the collection search yet — the available tokenizer drops Tibetan vowel signs and would match the wrong words