No title in the text — opening words: སྤྱན་འདྲེན་རྒྱུད་གསུམ་པ
No translation — Tibetan only: there is no translation we are licensed to publish (84000’s translations are no-derivatives, non-commercial)
Vol. 100 · folio 1b
༄༅༅། །སྤྱན་འདྲེན་རྒྱུད་གསུམ་པ། བླ་མའི་བླ་མ་བླ་མེད་དཀོན་མཆོག་གསུམ། །ཆེ་བའི་ཆེ་མཆོག་དབང་མཆོག་དམ་པ་ལ། །གུས་པས་ཕྱག་འཚལ་དང་བས་
སྐྱབས་སུ་མཆི། །གནམ་སའི་མངའ་བདག་སྐྱེ་དགུའི་ལོངས་སྤྱོད་གཞི། །བསྟན་པ་དམ་པ་ཆོས་ཀྱི་མགོན་མཛད་པ། །ཚངས་པ་བརྒྱ་བྱིན་རྒྱལ་ཆེན་ཡུལ་འཁོར་སྲུང་། །འཕགས་
སྐྱེས་མིག་མི་བཟང་དང་ལུས་ངན་བོ། །འཇིག་རྟེན་སྐྱོང་བ་དབང་པོ་མེ་ལྷ་དང་། །གཤིན་རྗེ་བདེན་བྲལ་ཆུ་ལྷ་རླུང་གི་ལྷ། །རྣམ་ཐོས་བུ་དང་དབང་བདག་ས་ཡི་ལྷ། །ཉི་ཟླ་གཟའ་
སྐར་ཕྱོགས་ཀྱི་གླང་པོ་རྣམས། །བློན་པོ་སྡེ་དཔོན་ལྷ་མོ་ཕྱོགས་མཚམས་སྲུང་། །བཙུན་མོ་སྲས་བཅས་སོ་སོའི་འཁོར་ཀུན་དང་། །ལྷ་ཡི་སྡེ་དཔོན་ཆེན་པོར་མཚན་གྲགས་པ། །
ཁྱབ་འཇུག་ཚོགས་བདག་ནནྟི་ཀརྟི་ཀ། །ནག་པོ་ཆེན་པོ་སྟོབས་ཆེན་སྟོབས་པོ་ཆེ། །གནོད་འཛིན་པདྨ་པདྨ་ཆེན་པོ་དང་། །དུང་དང་དུང་ཆེན་གང་པོ་ཤིན་ཏུ་གང་། །མགྲིན་བཟང་
Vol. 100 · folio 2a
གང་བ་བཟང་པོ་ནོར་བུ་བཟང་། །བུམ་རྣ་དྲིལ་རྣ་རྣ་གསུམ་རྣ་བོ་ཆེ། །ཡང་དག་ཤེས་དང་ཡང་དག་རྒྱལ་བ་དང་། །རྒྱལ་བའི་ཁྱུ་མཆོག་འབྲོག་གནས་གངས་ལ་གནས། །བདེ་རི་ལྔས་རྩེན་ལྔ་ལེན་ཚིགས་ལྔ་སེར། །མགྲིན་བཅུ་རྣམ་
འཇིགས་འབྲུག་སྒྲ་ནམ་མཁའི་དབྱངས། །སྟོང་གསུམ་རྒྱ་མཚོ་དགའ་བོ་བསྙེན་དགའ་བོ། །མ་དྲོས་གཟི་ཅན་ནོར་རྒྱས་གདོན་ལ་འཇེབས། །དྲང་སྲོང་རིག་འཛིན་ཆར་སྤྲིན་ལོ་ཏོག་ལྷ། །ལམ་ལྷ་ཉིན་མཚན་དུས་མཚམས་ཚེས་གྲངས་ཡུད། །ཧ་ནུ་མན་ཏ་ལ་
སོགས་མཐུ་ཆེན་དང་། །ཚིག་དབང་ལྷ་མོ་སྒྲ་དབྱངས་དབྱངས་ཅན་དང་། །བེའུ་འདྲ་དཔལ་གྱི་ལྷ་མོ་འོད་ཟེར་ཅན། །དཀར་ཤམ་བརྗོད་སྐྱོབ་གང་གཱ་ཡ་མུ་ན། །སྲས་འཕན་དུང་ཅན་རི་མཁར་ནག་མོ་དང་། །མ་བདུན་སྲིང་མོ་བདུན་དང་སྲིང་མོ་བཞི། །ནག་མོ་
ཆེན་མོ་རལ་པ་གཅིག་ལ་སོགས། །ལྷ་མོ་ཆེན་མོ་གནོད་སྦྱིན་ཆེན་མོ་དང་། །སྲིན་མོ་ཆེན་མོ་ཤ་ཟ་ཆེན་མོ་དང་། །གཞོན་ནུའི་སྐུ་འཚོ་རྫུ་འཕྲུལ་དབང་གིས་འཕགས། །སླག་ཆེན་བརྗིད་པ་ལྷ་དམག་གཡུལ་དུ་བསྟོད། །རྨད་གྲགས་ཆེན་པོའི་དགེ་བསྙེན་
ཆེན་པོ་དང་། །ལྷ་སྲས་གཞོན་ནུ་ཀླུ་སྲས་གཞོན་ནུ་དང་། །རིག་འཛིན་གཞོན་ནུ་དྲང་སྲོང་གཞོན་ནུ་དང་། །བི་ཀྵུས་བསྟེན་པའི་གཞོན་ནུ་ལྔ་བརྒྱ་སྤུན། །གནོད་སྦྱིན་གཞོན་ནུ་ཏི་ར་ཀ་ལ་སོགས། །གཟི་བརྗིད་ཆེན་པོའི་གཞོན་སྡེ་ཐམས་ཅད་དང་། །སྐྱེ་དགུའི་
བདག་པོ་ལ་སོགས་ལྷ་དང་ཀླུ། །གནོད་སྦྱིན་དྲི་ཟ་ལྟོ་འཕྱེ་ལྷ་མ་ཡིན། །གསེར་འདབ་གྲུལ་བུམ་སྲིན་པོ་མིའམ་ཅི། །འབྱུང་པོ་ཤ་ཟ་ཡུལ་བདག་འདྲེ་ལ་སོགས། །ཅང་ཤེས་སྙིང་རྗེའི་ལམ་དུ་ཞུགས་དགུ་དང་། །རིག་པའི་ལྕགས་ཀྱུས་ཟིན་པ་ཀུན་
Vol. 100 · folio 2b
གསོན་ཅིག། །གང་གི་མིང་ལའང་བཀྲ་ཤིས་དཔལ་འབར་བ། །ཡི་གེ་གཉིས་འབྲེལ་དཀོན་མཆོག་གསུམ་གྱི་མཚན། །སྐྱེས་བུ་གང་ཞིག་ཉན་ཏམ་འདོན་པ་ཡང་། །གཞའ་གསང་ཡུན་གྱི་ཆུ་སྲིད་འཐོབ་འགྱུར་ན། །ཡོན་ཏན་ཕུན་སུམ་དཔག་ཡས་དཀོན་མཆོག་ལ། །
བསྙེན་བཀུར་མཉེས་བྱེད་བཀའ་ལ་གུས་པ་དང་། །ཆོས་ཐོས་ཉམས་སུ་ལེན་པ་ཅི་ཞིག་སྨོས། །དེ་བས་གསུང་རབ་དཔག་བསམ་རྒྱས་པ་ཡི། །ལྷ་ཡི་ལོངས་སྤྱོད་ཚལ་དུ་ཀུན་གཤེགས་ཏེ། །ཆོས་རྗེ་ཉི་མ་ཐམས་ཅད་མཁྱེན་པའི་བཀའ། །བདུད་སྡེ་ལྟ་མིན་གཡུལ་
ལས་རྒྱལ་བྱེད་པ། །རིན་ཆེན་འོད་མཆོག་ལྷ་དབང་གཙུག་གི་རྒྱན། །བག་ཡོད་དད་པའི་སྤྱི་བོས་བླང་བར་མཛོད། །ཀྱེ་རྒྱལ་བའི་སྲས་ཁྱོད་ཚུར་ཤོག །བདག་དང་སེམས་ཅན་ཀུན་ཀྱང་ཡོངས་སུ་མྱ་ངན་ལས་འདས་པར་བགྱིས་ལ། སེམས་ཅན་མ་རྒལ་བས་མ་འཇིགས་
པར་བསོད་ནམས་དང་ཡེ་ཤེས་ཀྱི་ཚོགས་བཙལ་བས་མི་ངོམས་པ་ལ་སེམས་ཞོག་ཤིག །མངོན་པར་འདུ་བྱེད་པའི་རང་བཞིན་གྱི་མཚན་ཉིད་ཀྱང་མ་གཏང་ཤིག །སངས་རྒྱས་ཀྱི་གཟུགས་ཀྱི་སྐུ་ཡང་མ་དོར་ཅིག །འདོད་ཆགས་དང་བྲལ་བའང་ཐོབ་པར་གྱིས་ཤིག །
ཆོས་ཐམས་ཅད་ལ་ཆགས་པ་མེད་པའི་ཐམས་ཅད་མཁྱེན་པའི་ཡེ་ཤེས་ཀྱང་བཙལ་བར་གྱིས་ཤིག །ཆོས་ཐམས་ཅད་ལ་གཞན་གྱི་དྲིང་འཇོག་པ་མེད་པར་སངས་རྒྱས་ཀྱི་ཞིང་ཡང་ཡོངས་སུ་སྦྱང་བར་གྱིས་ཤིག །ཞིང་གི་མཚན་ཉིད་ནམ་མཁའ་ལྟ་བུར་ཡང་ཤེས་པར་གྱིས་
ཤིག །སེམས་ཅན་ཡོངས་སུ་སྨིན་པར་བྱ་བས་མ་སྐྱོ་ཤིག །བདག་མེད་པའི་མཚན་ཉིད་ཀྱང་མ་སྤོང་ཤིག །མངོན་པར་ཤེས་པ་ལ་ཡང་རྣམ་པར་འཕྲུལ་པར་གྱིས་ཤིག །ཆོས་ཀྱི་དབྱིངས་ལས་ཀྱང་མ་གཡོ་ཤིག །བྱང་ཆུབ་ཏུ་སེམས་བསྐྱེད་པ་ཡང་མ་གཏང་ཤིག །
ཐམས་ཅད་མཁྱེན་པའི་ཡེ་ཤེས་ལ་ཡང་འབྱུང་བར་གྱིས་ཤིག །ཆོས་ཀྱི་འཁོར་ལོ་བསྐོར་བས་སེམས་ཅན་ཐམས་ཅད་ཚིམ་པར་གྱིས་ཤིག །ཆོས་ཉིད་བརྗོད་དུ་མེད་པ་ལས་ཀྱང་འདའ་བར་མ་བྱེད་ཅིག །དེ་བཞིན་གཤེགས་པའི་རྣམ་པར་འཕྲུལ་པ་དང་བྱིན་གྱི་བརླབས་ཀྱང་ཡོངས་
Vol. 100 · folio 3a
སུ་སྟོན་ཅིག །བྱང་ཆུབ་སེམས་དཔའི་ལུས་ཀྱང་མ་དོར་ཅིག །སྐྱེ་བའི་སྐྱེ་མཆེད་ཐམས་ཅད་དུ་ཡང་སྣང་བར་གྱིས་ཤིག །ཡོངས་སུ་མྱ་ངན་ལས་འདའ་བ་ཆེན་པོ་ཡང་ཡོངས་སུ་སྟོན་ཅིག་ཅེས། ཀྱེ་རྒྱལ་བའི་སྲས་འདི་དག་ནི་ལྟ་བའི་ཆོས་ཟུང་དང་སྣེལ་ཞིར་སྒྲུབ་པ་མངོན་
པར་བསྒྲུབ་པ་རྣམས་ཉེ་བར་སྒྲུབ་པ་འདི་དག་ནི་སངས་རྒྱས་ཀྱི་ཕྲིན་ལས་ཡང་དག་ཕུལ་གྱི་ཆོས་བཅུ་པ་ཞེས་བྱའོ། །ཀྱེ་རྒྱལ་བའི་སྲས་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཕྲིན་ལས་ཏེ། བྱང་ཆུབ་སེམས་དཔའ་རྣམས་རང་བྱུང་གི་ཕྲིན་ལས་གཞན་གྱི་དྲིང་འཇོག་པ་མེད་པར་
བླ་ན་མེད་པའི་བྱང་ཆུབ་འཐོབ་པར་འགྱུར་བ་དག་གོ། །ལྷ་ཡི་རྒྱལ་པོ་དབང་ཆེན་མཆོག་སྦྱིན་གཙོ། །དཔའ་བོ་འཇིགས་མེད་འཇིག་རྟེན་ཀུན་ལ་གྲགས། །ཤེས་རབ་འོད་གསལ་ཟླ་བ་ཉ་བའི་ཞལ། །སྐྱེས་མཆོག་སྨོན་ལམ་ཕྲིན་ལས་གཅིག་པའི་མཆེད། །ཚངས་པ་
བརྒྱ་བྱིན་འཇིག་རྟེན་སྐྱོང་ལ་སོགས། །རྡོ་རྗེ་ཏིང་འཛིན་རི་རབ་སྲུབ་ཤིང་དང་། །སྙིང་རྗེ་བརྩོན་འགྲུས་ཀླུ་ཡི་སྲུབ་ཐག་གིས། །ཤེས་རབ་ཆེན་པོའི་རྒྱ་མཚོ་བསྲུབས་པའི་བཅུད། །དམ་ཆོས་བདུད་རྩིའི་མགྲོན་དུ་གཤེགས་ཀུན་ལ། །ཆོས་བསྒྲགས་བསོད་ནམས་
དབྱིག་ཀྱང་སྤྱིར་འབུལ་གྱིས། །སྲིན་དམག་ལྷ་མིན་གཡུལ་ལས་རྒྱལ་བ་དང་། །ལྷ་ཡི་རྒྱལ་སྲིད་དབུ་རྨོག་བཙན་པར་བསྔོ། །གཟི་བྱིན་གཡོག་འཁོར་ལོངས་སྤྱོད་འཕེལ་བ་དང་། །མཐུ་རྩལ་གོ་འཕང་ཁྱད་པར་ཐོབ་པར་བསྔོ། །རྫུ་འཕྲུལ་མངོན་ཤེས་ཕ་རོལ་ཕྱིན་ལ་
སོགས། །རྣམ་པར་ཐར་པའི་སྒོ་ཀུན་རྫོགས་པ་དང་། །དགེ་བའི་ཕྲིན་ལས་དགོངས་དགུ་གྲུབ་པར་བསྔོ། །དམ་ཆོས་བདུད་རྩིའི་བདེ་བས་ལུས་ཁྱབ་སྟེ། །སྡུག་བསྔལ་གནོད་པའི་རྒྱུད་ལས་གྲོལ་བར་བསྔོ། །དགེ་བའི་བཤེས་གཉེན་བཀའ་དྲིན་བྱམས་པའི་གཉེན། །
བདག་ཅག་ཉོན་མོངས་མཚོན་གྱིས་རྨས་པ་རྣམས། །ཐུགས་རྗེའི་བྱིན་གྱི་བརླབས་ཀྱིས་བསྐྱང་བ་དང་། །གང་གིས་གང་ལ་སྤྱི་བོས་མཐུ་སྐྱེད་ཅིང་། །དེ་བཞིན་གཤེགས་པའི་བསྟན་པ་བསྲུང་བར་གསོལ། །མ་འོས་འཁྲུལ་པའི་ནོངས་པ་མཆིས་སོ་འཚལ། །དུས་རིག་
Vol. 100 · folio 3b
རྒྱུད་མཁྱེན་ཀུན་ལ་བཟོད་པར་གསོལ། །ལྷ་ཚོགས་ཆོས་ཀྱི་སྦྱིན་པའི་བཀྲ་ཤིས་ཀྱིས། །ཕུན་སུམ་ཚོགས་འཛིན་དམ་ཆོས་རྒྱས་པར་སྨོན། །རྒྱུད་གསུམ་པ་རྫོགས་སྷོ།། །།
Source and licence
Text: Esukhia’s Derge Kangyur e-text (Esukhia/derge-kangyur · commit a582cf47) · public domain
Licence Public Domain · Evidence
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
No translation — Tibetan only: there is no translation we are licensed to publish (84000’s translations are no-derivatives, non-commercial)
- Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
- The Tibetan text is not in the collection search yet — the available tokenizer drops Tibetan vowel signs and would match the wrong words