དཀར་ཆག
This name comes from the volume’s file name in the source
No translation — Tibetan only: there is no translation we are licensed to publish (84000’s translations are no-derivatives, non-commercial)
Vol. 213 · folio 1a
༄༅། ཨཱཤྩརྻོདདྷཝདྷནེནྡུནེཔོནཱམསརྦཛྙཱརྐབནྡོརཱཛྙཱགམཱནཱམབྷིཔྲཱཡརྠོབིབརཎསྱཤཱསྟཱཧིམབཱནིཀཥྱརུཏཾསཀལབརྟྟིཏཱནཱཾདྷརྨྨདཔྲབྲྀཏྟེརཱཧོམཱཡཱཡཱཿཔྲིཏཱམཧཱིཀྲྀཏཡུགཀལྤསྱཔུཎྱམེགྷཔུལཾཔཱུརིཏནཡཱདརམྦྷསྱཀཐཱབིཛཧཱརཾ། །
༄༅། །ཀུན་མཁྱེན་ཉི་མའི་གཉེན་གྱི་བཀའ་ལུང་གི་དགོངས་དོན་རྣམ་པར་འགྲེལ་པའི་བསྟན་བཅོས་གངས་ཅན་པའི་སྐད་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་འཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་ལྡན་བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པའི་ཚུལ་ལས་བརྩམས་པའིགཏམ་ངོ་མཚར་ཆུ་གཏེར་འཕེལ་བའིཟླབ་གསར་པ་ཞེས་བྱ་བ་བཞུགས་སོ། །
༄། །རྐང་བཞི་མཉམ་པའི་བྲེལ་ཏཱའི་ཡོ་སྙེ་སུསང་དུ་བརྒྱུན་ཆགས་པ་པྲཱ་སྙཱ་པ་རྦྱོར་རྣམ་གྲངས་ཐེར་བའབུམ་ཆུར་བ་གཅིག་རྔོས་འབྲོའི་དང་པའོ་བར་ཡོད་པ་དང་། མཥྚན་དག་དང་ངལ་བརྒྱད་པ་དུ་ཕྱུར་བྲག་གསུམ་ལས་ཡ་དྲུག་བདུན་འབུམ་བརྒྱད་ཁྲི་སུམ་སྟོང་བཞི་བ་དུ་ཧེ་ཉེར་པ་བཞི་པ། གཉིས་པ་རྒུ་རྒྱུན་ཞེས་བྱ་བའི་སྡེབ་སྦྱོར་གྱིས་རབ་ཏུ་མཛེས་པར་བྱས་པ་ལོ།]
Vol. 213 · folio 1b
གུཎཛལནིདྷཡོམུནིཿསརྦཨཱཏྨཻཝམཱཔྲཱཔྟསམྭོདྷནཱསྟྱུཏྟརསྟཏྲལཀྵྨྱཱཀར།
(ཤིས་པ་བརྗོད་པའི་སྒོ་དང་པོ་རྒྱ་ཆེ་བའི་རྒྱན་ལས་བསམ་པ་རྒྱ་ཆེ་བ།) དཔལ་གྱི་འབྱུང་གནས་ཐུབ་པ་ཡོན་ཏན་རྒྱ་མཚོ་ཐམས་ཅད་བདག་ཉིད་ཀྱིས་བརྙེས་བྱང་ཆུབ་བླ་ན་མེད་པ་དེར།
Vol. 213 · folio 2a
སྶཀལགཏིནིམནྟྲཎཱམཱཙརཱཤེཥཏུབྷྱཱམྤྲསཾཔཱུརིཏཱཁྱོཏྟརཻལླཻཁནཻཿསྭཱགཏཾ
འགྲོ་བ་མཐའ་དག་མགྲོན་དུ་འགུགས་པའི་ཆོ་ག་མ་ལུས་ཁྱོད་ལ་རྫོགས་ཞེས་འཕྲིན་ཡིག་དམ་པས་ལེགས་ཕྱིན་པ།
Vol. 213 · folio 2b
སམཡམིཧཛིནཱརཏེཿཀཱརྻཙཱཀཱཤཀོཊིཿསམཻརྣིརྒཏཱཔྱབྷིམནོ྅ནིམིཏྟཱདྷརཾ།
དུས་འདིར་རྒྱལ་བ་དགྱེས་པའི་ཕྲིན་ལས་ཀུན་གསལ་མུ་དང་མཉམ་པར་སོང་ཡང་ཁེངས་པའི་མཚན་མ་འཛིན་མིན་པར། །
Vol. 213 · folio 3a
པྲབཙནསཀལཱསྟྲིདྷཱསམྦརཾཀཱཡསཾཀྵིཔྱསཽདེཤིཀཿཨུཏྟམེབྷིཿཔྲཡཙྪནྟུཧཱི།
(སྡོམ་པ་གསུམ་གྱི་བཀའ་དྲིན་ཆེ་བའི།) གསུང་རབ་ཐམས་ཅད་རྣམ་གསུམ་སྡོམ་པའི་རིས་སུ་བསྡུས་ནས་ལེགས་པར་འདོམས་པ་བླ་མ་རྣམས་ཀྱིས་དགེ་ལེགས་སྩོལ། ༡
Vol. 213 · folio 3b
(*ཤིས་པ་བརྗོད་པའི་སྒོ་གཉིས་པ་གཟུགས་ཅན་ལས་མཐའ་དགགི་གཟུགས་ཅན།)བྱང་ཆུབ་མཆོག་ཏུ་ཐུགས་བསྐྱེད་རྩ་བརྟན་གཏོང་བ་ཆེ་སོགས་ཚོགས་གཉིས་དག་པའི་ཆབ་ཀྱི་རྒྱུན། །སྤྲོ་བ་མཆོག་གིས་ཡང་ཡང་བཏུངས་པས་མི་ཟད་ཡོན་ཏན་ལོ་འདབ་རབ་རྫོགས་སྐུ་གསུམ་སྙེ་མ་གཡུར་དུ་ཟ། །འབད་རྩོལ་མཚན་མའི་ཀུན་རྟོག་དང་བྲལ་འགྲོ་ཁམས་
མཐའ་ཡས་མོས་པའི་ཤིང་རྟ་སྐད་ཅིག་རེར་ཡང་ཕྱུར་བུར་འགེངས། །འཇིག་རྟེན་གསུམ་ན་ཆེ་བའི་ཆེ་བ་ཐུབ་དབང་ཆོས་ཀྱི་དཔག་བསམ་ཆེན་པོས་དགེ་ལེགས་གྲིབ་མའི་འབབ་སྟེགས་མཛོད། ༢ །(*ཤིས་པ་བརྗོད་པའི་སྒོ་གསུམ་པ་རང་བཞིན་བརྗོད་པ་ལས་ཡོན་ཏན་གྱི་རང་བཞིན་བརྗོད་པ།)གང་ཞིག་སྐྱེ་
དང་གནས་དང་འཇིག་ལས་རྣམ་པར་གྲོལ་བ་མཁའ་ཁྱབ་སྐུ་ནི་རྣམ་རྟོག་སྤྲོས་པའི་མཚན་མ་ཞི། །གཞན་རྐྱེན་དག་གིས་རྟོག་པའི་ཡུལ་ལས་རིང་དུ་སོང་དེ་སོ་སོ་ཡང་དག་རིག་པའི་རྩལ་གྱིས་རང་བྱུང་དུ། །མཁྱེན་
པའི་ཡེ་ཤེས་ཕུན་སུམ་ཚོགས་བརྙེས་གཞན་དག་ཀྱང་ནི་དེ་ལ་འགོད་ཕྱིར་ལམ་མཆོག་འདོམས་པའི་ཐུགས་བརྩེར་ལྡན། །སྡུག་བསྔལ་སྐྱེ་བ་རྒྱུར་བཅས་འཇོམས་པའི་ནུས་པ་རྨད་བྱུང་རྫོགས་སངས་རྒྱས་རྣམས་བྱང་ཆུབ་བར་གྱི་སྐྱབས་སུ་སྤྱོན། ༣ །(*ཤིས་པ་བརྗོད་པའི་སྒོ་བཞི་པ་བྱ་བའི་རང་བཞིན་བརྗོད་པ།)རྗོད་བྱེད་ཚིག་ཡི་
གེའི་ཕྲེང་བ་ཚར་དུ་དངར་བའི་གདངས་སུ་འཕོས་པའི་བརྗོད་བྱ་དོན་གྱིས་ལྕི་བའི་ལུང༌། །གང་ལ་དམིགས་པས་ལམ་གསུམ་གནས་པའི་ལུས་ཅན་རྣམས་ཀྱི་སྲིད་པའི་ཟུག་རྔུ་མི་བཟད་ཚོར་བའི་རྒྱུན་ཆེན་གཅོད། །དེ་བཞིན་ཞི་
བསིལ་ཐར་པ་ཉིད་དང་ཐམས་ཅད་མཁྱེན་པའི་གནས་ལ་སྡང་བྱེད་སྒྲིབ་པ་བག་ཆགས་བཅས་མཐར་མཛད། །གང་ཞིག་ཆགས་བྲལ་འགོག་པ་ཉིད་དང་གང་གིས་ཆགས་བྲལ་མངོན་དུ་བྱེད་པ་ལམ་བདེན་དམ་པའི་ཆོས་ཀྱིས་སྲུངས། ༤ །(*ཤིས་པ་བརྗོད་པའི་སྒོ་ལྔ་པ་ཡོན་ཏན་གྱི་རང་བཞིན་བརྗོད་པ།)དམ་པའི་ཞལ་ལུང་དགེ་བ་སུམ་
ལྡན་ཐོས་བསམ་སྒོམ་པའི་སྤྲོ་བ་མཆོག་གིས་བྱང་ཆུབ་གསོས་སུ་ཉེར་བསྟེན་པས། །ཇི་ལྟ་བ་དང་ཇི་སྙེད་ཡུལ་ལ་ཆགས་དང་ཐོགས་པའི་སྒྲིབ་པ་ལས་གྲོལ་མཁྱེན་རབ་དར་ལ་བབ་པའི་དཔྱིད། །གཅིག་ཏུ་ཀུན་འབྱུང་
Vol. 213 · folio 4a
འབྲས་བུར་བཅས་པའི་ཉེན་ལྡན་འགྲོ་བ་སྲིད་ལས་གདོན་པའི་གཡར་དམ་མི་ཤིགས་རྭ་བ་ན། །ལེགས་གནས་རྒྱལ་བའི་གདུང་འཛིན་ཀུན་དང་རང་རྒྱལ་ཉན་ཐོས་ཞུགས་འབྲས་བཅས་པའི་འཕགས་པའི་དགེ་འདུན་སྤྱི་བོས་མཆོད། ༥ །(*ཤིས་པ་བརྗོད་པའི་སྒོ་དྲུག་པ་བསམ་པ་རྒྱ་ཆེ་བ།)ཕྱོགས་བཅུ་
མུ་མེད་ཞིང་ཁམས་དག་ན་བྱོན་དང་འབྱོན་གྱུར་ད་ལྟར་གཞེས་པའི་རྒྱལ་བ་ཀུན་གྱི་ཡེ་ཤེས་དངོས། །སེམས་ཅན་ཁམས་སུ་རང་གི་རིགས་མཆོག་རྨ་མེད་ཡོད་པ་གནས་སྐབས་དྲི་མས་བསྒོས་པ་སྦྱོང་ཕྱིར་སྤྲུལ་པའི་བུ། །དེ་མཚན་ཐིགས་
པ་རྣ་བའི་བཅུད་དུ་ལན་རེ་སིམ་པས་དུས་གསུམ་པ་ཡི་སངས་རྒྱས་མཚན་དུ་དག་ལྡན་ལྗགས། །འགྱུར་དགུ་མཉན་པའི་བསོད་ནམས་མཆོག་གི་འབབ་སྟེགས་བྱེད་པ་འཇམ་པའི་དབྱངས་ཁྱོད་སྐྱེ་བར་དགེ་བའི་བཤེས་སུ་མཛོད། ༦ །(*ཤིས་པ་བརྗོད་པའི་སྒོ་བདུན་པ་བར་མཆོད་པའི་ཟུང་ལྡན་ལས་རྐང་པ་དང་པོ་དང་གསུམ་པར་ཡོད་པ།)མང་མང་ཞིང་གི་སྨྲ་བའི་རྒྱལ་པོ་གངྒཱའི་
རྡུལ་གྱི་གྲངས་སྙེད་གསུང་གི་གསང་བ་མཐའ་དག་བསྡུས་པའི་གཟུགས། །འཇོ་སྒེག་ཟླ་བ་གསར་པའི་ལང་ཚོས་ཡིད་ཀྱི་སྲུབ་ཤིང་བྱེ་བའི་དཔལ་འཕྲོག་ཐུགས་རྗེའི་ག་པུར་འཐུལ་བའི་དཔྱིད། །ལྷང་ལྷང་ཏམྦུ་
ར་ཡི་རྒྱུད་ལས་སྲིད་ཞིའི་ཆོས་རྣམས་ཉམས་དང་འགྱུར་བ་སྟོང་གི་ལམ་དུ་འགྲོ་བའི་གླུར། །དལ་བུར་ལེན་པས་སྐལ་བཟང་རིག་པའི་སྒོ་བརྒྱ་འབྱེད་པ་དབྱངས་ཀྱི་རྒྱལ་མོ་རྟག་ཏུ་སྙིང་གི་པདྨར་རོལ། ༧ །འཇུག་པ་བཅུ་པའི་སྤྲུལ་པས་མ་བཏེག་སྲིད་པའི་བླ་ནས་བླ་མར་
འཕགས་པ་དགའ་ལྡན་གཞལ་མེད་ཁང་པ་ནས། །བསྐུལ་བ་མེད་པར་ལུས་ཅན་ཀུན་གྱི་སྡུག་བསྔལ་ཚོར་བ་དཔྱིས་འབྱིན་བྱེད་པའི་ཐབས་ཚུལ་སྒྲུབ་ལ་ཤིན་ཏུ་དགེས། །(ཕྱག་བྱ་བའི་སྒོ་དང་པོ་རྒྱུ་མེད་པ་ལ་འབྲས་བུ་རང་གི་ངོ་བོ་ཉིད་སྟོན་པའི་སྲིད་པ་ཅན།)ཇི་བཞིན་མིན་པའི་གཏམ་གྱིས་མ་བསྔགས་
དམན་པའི་ལམ་ལས་ཆེན་པོ་བདུན་གྱིས་ངེས་པར་མངོན་འཕགས་ཐེག་ཆེན་གྱི། །ལམ་མཆོག་ཀུན་དུ་སྣང་བའི་དཔལ་སྟེར་མི་ཕམ་མགོན་ཁྱོད་ཞབས་རྡུལ་དམར་འོད་སྙིང་ལ་སིམ་ཕྱིར་གཙུག་གིས་བསྟེན། ༨ །(*ཕྱག་བྱ་བའི་སྒོ་གཉིས་པ་ལས་ཀྱི་རྒྱུ་ལས་རྣམ་འགྱུར་གྱི་རྒྱུ།)སྟོན་པ་བླ་ན་མེད་པའི་
Vol. 213 · folio 4b
ཡེ་ཤེས་དྲི་མེད་རང་གཟུགས་ཐུན་མོང་གདུལ་བྱའི་སྣང་ངོ་རུ། །ཆོས་དང་དོན་སོགས་ཐ་དད་ཡང་དག་རིག་པའི་འཕྲུལ་གྱིས་རབ་འབྱམས་ལུང་གི་རི་མོ་དག །འདོད་ལྷའི་དཔུང་གིས་བསུབ་ཏུ་མེད་པར་མཁྱེན་རབ་ཡངས་པར་སྐད་ཅིག་རེར་ཡང་འགོད་པའི་མཚར། །ལྷར་
བཅས་འཇིག་རྟེན་ཡོངས་ཀྱི་བསྔགས་འོས་བསྟན་པ་སྡུད་མཛད་འཕགས་པའི་ཚོགས་ལ་གུས་པས་འདུད། ༩ །(*ཕྱག་བྱ་བའི་སྒོ་གསུམ་པ་འགོག་རྒྱན་ལས་བྱུང་བ་འགོག་པ།)སྙིགས་མའི་དུས་སུ་སྟོན་པ་རང་ཉིད་རྒྱུད་དང་བསྟན་བཅོས་མཛད་དང་འཛིན་པའི་ཚུལ་འབྱུང་བར། །ལུང་བསྟན་ཕལ་ཆེར་དགོངས་པ་ཙམ་མམ་འོན་ཏེ་
ངེས་པའི་དོན་དུ་མིན་ན་ཛམྦུའི་གླིང༌། །མཛེས་པར་བྱེད་པའི་རྒྱན་དྲུག་དག་དང་རྨད་བྱུང་གཉིས་སོགས་བཀའ་ལུང་ཐམས་ཅད་རང་དབང་དུ། །རྣམ་པར་འགྲེལ་ལ་བསྙེངས་པ་མེད་པའི་བློ་གྲོས་འདི་འདྲ་འགའ་ལ་སྲིད་པ་མིན་
པས་སོ། ༡༠ །(*ཕྱག་བྱ་བའི་སྒོ་བཞི་པ་དཔེ་རྒྱན་ལས་སྨད་པའི་དཔེ།)སཱ་ལའི་རྐང་འཐུང་འཁྲིགས་པའི་ནགས་ཚལ་བསྐྱོད་ཅིང་འཕོས་པའི་དྲི་ཡི་བཞོན་པ་ཡིད་འོང་མས། །ལམ་རིང་དུབ་པའི་དོན་མཐུན་མང་པོ་དབུགས་འབྱིན་མཁན་དེས་བརྒྱ་ཡི་ཆར་ཡང་མི་ཕོད་པའི། །ངེས་པར་འབྱུང་བའི་ཚུལ་ཁྲིམས་བསླབ་པ་གང་ལ་
གནས་ན་སྲིད་པའི་གདུང་བ་འཇིལ་བའི་སྨན། །དམ་པའི་ཆོས་འདུལ་སྣང་བ་མཆོག་གིས་ཡིད་ཀྱི་སྲུབ་ཤིང་བགྲོད་པ་འགོག་བྱེད་ཀུན་ཀྱང་དད། ༡༡ །(*ཕྱག་བྱ་བའི་སྒོ་ལྔ་པ་བྱ་བའི་རང་བཞིན་བརྗོད་པ།)གཞན་ལ་ཕན་འདོགས་དམ་བཅའི་ཡི་གེ་སྙིང་ལ་བྲིས་ནས་རིས་སུ་མ་ཆད་སེམས་ཅན་
ལ། །ཡིད་གཅུགས་བྱམས་དང་བརྩེ་བའི་འཛུམ་གྱིས་མདུན་ནས་བསུ་བ་ཐམས་ཅད་མཁྱེན་ཀུན་བགྲོད་གཅིག་ལམ། །རྒྱལ་བའི་མྱུ་གུ་བགྲང་དུ་མེད་པས་སྲིད་པ་གསུམ་ནི་སྙིང་པོར་ལྡན་པར་བྱེད་པའི་ཆོས། །སྟོང་ཉིད་སྙིང་རྗེ་དབྱེར་མེད་
བདག་ཉིད་བྱང་ཆུབ་སེམས་མཆོག་ལེགས་པར་འདོམས་དེ་ཐུབ་པའི་སྲས། ༡༢ །(*ཕྱག་བྱ་བའི་སྒོ་དྲུག་པ་རིགས་པའི་རྒྱུ་ལ་ཆོས་དཔེས་བགྲང་བྱ།)གང་ལ་སྦྱངས་པའི་རྣམ་པར་འབྱེད་པས་གཏི་མུག་འཐིབས་པོ་སྐད་ཅིག་གཉིས་པར་མི་གནས་བྱེད། །ཟག་བཅས་ཟག་པ་མེད་པས་བསྡུས་པའི་ཤེས་བྱ་
Vol. 213 · folio 5a
མཐའ་དག་རང་སྤྱི་ངེས་པའི་མཚན་ཉིད་ཀྱིས། །སྨྲ་བའི་འབབ་སྟེགས་ཐུང་ངུར་མི་འགྱུར་ཐམས་ཅད་མཁྱེན་ལམ་ཆོས་མངོན་བསྟན་པ་སྒྲོན་མེ་ལྟར། །ཀུན་དུ་སྣང་བྱེད་ཤེས་བྱ་ཀུན་གྱི་རྒྱལ་པོ་དེ་དག་གུས་པའི་སེམས་ཀྱིས་རི་མོར་བྱ། ༡༣ །(*ཕྱག་བྱ་བའི་སྒོ་བདུན་པ་ལྡན་པའི་གཟུགས་ཅན།)བགྲང་
ལས་འདས་པའི་བསྐལ་པའི་ཕྲེང་བར་དགང་བར་དཀའ་བའི་ཚོགས་གཉིས་ཆུ་ཡི་ཕུང་པོ་ཡང༌། །བློ་ལྡན་གང་གིས་སྐད་ཅིག་རེར་ཡང་ཐབས་ཤེས་ནོར་བུའི་འབྱོར་པ་ལྡན་པར་བསྐྱིལ་བའི་ནང༌། །རྟུན་པ་ཡང་རབ་དྲི་ཡི་བཞོན་པས་བསྲུབས་པའི་
སྙིང་པོ་སྐུ་བཞི་ཟུང་འཇུག་ལྷུན་པོ་ཅན། །ཚེ་གཅིག་འགྲུབ་པ་རྒྱུད་སྡེ་ཟབ་མོ་མཐའ་དྲུག་ཚུལ་བཞིའི་ལམ་ནས་སྨྲ་དེ་སྨྲ་བའི་མཆོག ༡༤ །(*ཕྱག་བྱ་བའི་སྒོ་བརྒྱད་པ་ཆ་ཤས་གཟུགས་ཅན།)དུག་གསུམ་ཟས་ལ་མངོན་པར་ཞེན་པས་བློ་གྲོས་རང་བཞིན་གསལ་བའི་འོད། །ཡོངས་སུ་ཉམས་བྱས་མཐའ་འཁོབ་མུན་པར་དགེ་སྡིག་
ལས་ཀྱི་འཇུག་ལྡོག་གི། །གོམ་པ་ཉམ་ངའི་གཡང་དུ་འདེགས་འཇོག་ཀྱེ་མ་སྣང་བྱེད་སུ་ཞིག་ཅེས། །ཟློས་པའི་ཚེ་ན་བདེན་གཉིས་ཆོས་ཀྱི་ཉི་ཟླའི་སྒྲོན་འདེགས་ཞི་བ་འཚོ། ༡༥ །ཀ་དག་ཆོས་དབྱིངས་ཆུ་གཏེར་ཆེན་པོར་སྐྱོན་བྲལ་པདྨའི་
ཁང་བཟང་དབུས། །སྨོན་ལམ་འགག་པ་མེད་པའི་རྩལ་འཁྲུངས་མཚོ་སྐྱེས་རྡོ་རྗེ་སྤྲུལ་པའི་སྐུ། །སྙིགས་མའི་འགྲོ་ལ་ཕན་པའི་ཐུགས་རྗེ་གལ་ཏེ་གཟུགས་སུ་གནས་གྱུར་ན། །(ཕྱག་བྱ་བའི་སྒོ་དགུ་པ་སྟོབས་མཚུངས་པའི་རབ་སྤེལ།) ཐེག་པར་དཀའ་བའི་དོགས་པས་སྐྲག་ནས་
ནོར་འཛིན་བུ་མོ་རིང་ཞིག་འདར། ༡༦ །(*ཕྱག་བྱ་བའི་སྒོ་བཅུ་པ་མཉམ་འཇོག་གཟུགས་ཅན།)ལུང་དང་རིགས་པའི་ལམ་ཆེན་ལས་འོངས་སྒྲུབ་དང་སུན་འབྱིན་ཉི་མ་ཡིས། །ལྟ་ངན་འཆལ་གཏམ་དབྱངས་སུ་ལེན་རྣམས་མྱ་ངན་མུན་པར་བཅིང་རིགས་སམ། །སྟོང་ལྟ་ཧད་པོས་སེམས་ཅན་བསླུར་བརྩམས་ཧ་ཤང་ཁྱོད་ཉིད་
རང་གི་སྐྱོན། །པདྨའི་ངང་ཚུལ་ཆེན་པོ་ཁྱོད་འདྲ་བསྟན་ལ་རི་མོར་བགྱིས་པ་སུ། ༡༧ །(*ཕྱག་བྱ་བའི་སྒོ་བཅུ་གཅིག་པ་ལྡན་པའི་གཟུགས་ཅན།)དུས་གསུམ་ཤེས་པར་བྱ་བའི་དངོས་པོ་མ་ཚང་མེད་པ་ཀུན་མཁྱེན་གྱི། །གཉིས་སུ་མེད་པའི་ཡེ་ཤེས་མེ་ལོང་
Vol. 213 · folio 5b
དག་པ་ལ་ཤར་འཕྲིན་ཡིག་གིས། །སཱ་ལའི་རྐང་འཐུང་འཁྲིགས་པའི་ནགས་སུ་དམ་ཆོས་དགེ་བའི་སྙིང་པོ་ཅན། །མངོན་པར་བསྔགས་པའི་དུས་སྟེང་ལེགས་སོན་ཆོས་རྒྱལ་དང་པོ་ཐོ་ཐོ་རི། ༡༨ །(*ཕྱག་བྱ་བའི་སྒོ་བཅུ་གཉིས་པ་བསམ་པ་རྒྱ་ཆེ་ལ་གཟུགས་ཅན་གྱིས་བརླིང་བ།)པུཎྜ་རཱི་ཀས་རང་གི་ལག་མཚན་སྙིང་རྗེའི་གཏེར་གྱིས་རིང་མོ་
ནས། །བྱང་ཆུབ་སྤྱོད་པའི་གཡར་དམ་སྨོན་ལམ་གཅད་དུ་མེད་པས་ལུ་གུ་རྒྱུད། །ལེགས་པར་སྦྲེལ་བའི་ཡུལ་ནི་རྗེས་དྲན་ས་གཞི་སྐྱོང་བའི་ཟློས་གར་གྱིས། །བོད་འབངས་སེམས་ཅན་རྫོགས་ལྡན་བསྐལ་པའི་
བདེ་བ་ལ་སྦྱོར་སྲོང་བཙན་རྗེ། ༡༩ །མདའ་ལྔའི་ནུས་པ་སྙིང་ལ་བཀང་བའི་མི་སྲུན་ཚིག་གི་བསླུ་བྲིད་མཚོན། །བྱེ་བ་ཕྲག་མང་དུས་གཅིག་ཕབ་ཀྱང་འཇམ་དཔལ་གཞོན་ནུས་སྤྲུལ་པའི་སྐུ། །གཞོན་ནུར་གྱུར་ཀྱང་ཆོས་ལ་གནས་པའི་དཀའ་ཐུབ་མ་རྨས་ཁྱད་པར་གྱིས། །
(ཕྱག་བྱ་བའི་སྒོ་བཅུ་གསུམ་པ་སེམས་ལྡན་རབ་རྟོག །)མགྲིན་སྔོན་སྐྱེངས་ཏེ་གངས་རིའི་ཕག་ཏུ་ཡིབས་པ་མིན་ནམ་ཁྲི་སྲོང་རྗེ། ༢༠ །(*ཕྱག་བྱ་བའི་སྒོ་བཅུ་བཞི་པ་མ་བསྡུས་པའི་གཟུགས་ཅན།)རྣམ་དག་བཤད་སྒྲུབ་ཕན་པའི་རིག་སྔགས་མང་པོས་བཏབ་པས་ལུང་རྟོགས་ཀྱི། །བསྟན་པ་དམ་པའི་ལུས་སྲོག་ཤིན་ཏུ་བརླིང་བར་བྱེད་པའི་བཀའ་ཁྲིམས་
བཙན། །སེམས་ཅན་ཁམས་སུ་ནད་དང་འཐབ་རྩོད་རྒུད་པས་རབ་དབེན་སྐྱིད་པའི་མགྲོན། །གསར་དུ་འགུགས་པའི་ཆོ་ག་ཀུན་ཤེས་མངའ་བདག་ཆེན་པོ་ཁྲི་རལ་པ། ༢༡ །(*ཕྱག་བྱའི་སྒོ་བཅུ་ལྔ་པ་བསམ་པ་རྒྱ་ཆེ།)འཕགས་ཡུལ་ལྔ་རིག་སྨྲ་བའི་དབང་པོ་གྲངས་མེད་དབུས་སུ་
མགྲིན་པ་ནས། །ལེགས་བཤད་སྙན་དགུ་འཇོ་བའི་རྒྱལ་པོའི་གོ་ས་བླ་ན་མེད་འགྱིང་ཡང༌། །འགྲོར་གནས་བདེ་བར་གཤེགས་པའི་སྙིང་པོ་སྒྲིབ་པས་གོས་པ་བསལ་ཕྱིར་དུ། །གངས་ཅན་འཛིན་མར་ཞབས་ཀྱིས་བཅགས་པའི་པཎ་
ཆེན་ཐམས་ཅད་གཙུག་ཏུ་མཆོད། ༢༢ །(*ཕྱག་བྱ་བའི་སྒོ་བཅུ་དྲུག་པ་ཆ་ཤས་ཀྱི་གཟུགས་ཅན།)རྡོ་རྗེ་རྣོན་པོའི་གསང་གསུམ་བྱིན་རླབས་མཚར་སྡུག་སྒེག་མོའི་ཁ་ཡི་ཆང༌། །བྲན་པའི་མོད་ལ་བློ་གྲོས་བ་ཀུ་ལ་ཡི་མཆུ་འདབ་ཡིད་འོང་བརྒྱ། །ཕྱེ་བ་ལས་ནི་གངས་ཅན་སྐད་དང་རྗེས་སུ་
Vol. 213 · folio 6a
མཐུན་པའི་བརྡ་ཡིག་གི །ལི་ཤིའི་དྲི་བསུང་གསར་པའི་འབྱུང་གནས་སམྦྷོ་ཊ་ལ་གུས་པས་འདུད། ༢༣ །(*ཕྱག་བྱ་བའི་སྒོ་བཅུ་བདུན་པ་ཡན་ལག་གསུམ་པའི་གཟུགས་ཅན།)དཀའ་བ་བརྒྱ་ཕྲག་བརྩེགས་པའི་གདུང་བ་དབུགས་འབྱིན་གྲོགས་སུ་བྱང་ཆུབ་སེམས། །ཡིད་འོང་བསིལ་ཡབ་དག་ཏུ་བསྟེན་ཅིང་
དམ་ཆོས་རིན་ཐང་ཆེ་བའི་ཁུར། །འདྲེན་པའི་ཆོ་ག་བརྡ་སྤྲོད་རིག་པའི་གོམ་སྟབས་སྟོང་དུ་བསྒྱུར་ལ་མཁས། །སད་མི་བདུན་དང་ཀ་ཅོག་ལ་སོགས་སྐད་གཉིས་སྨྲ་བའི་ཚོགས་ལ་འདུད། ༢༤ །(*ཕྱག་བྱ་བའི་སྒོ་བཅོ་བརྒྱད་བསྒྲུབ་བྱེད་ཀྱི་རྒྱུ་ལས་སྐྱེད་བྱེད་བསྐུལ་བའི་རྒྱུ།)དཔལ་ལྡན་གྲུ་འཛིན་རི་བོའི་
མགོན་པོ་སྲིད་པ་འགྲུབ་བྱེད་རྒྱུ་ཡི་ཚུལ། །འོད་གསལ་འཆི་བ་མེད་པའི་གདུང་གི་སྐྱེ་བ་མངོན་པར་བཟུང་བ་གང༌། །འཛམ་གླིང་ཐུབ་པའི་རྒྱལ་སྲིད་སྐྱོང་ལ་བསྙེངས་པ་བྲལ་བའི་བློ་གྲོས་ཀྱིས། །དྲན་དབང་ཀུནཾ་དུ་དགཾའ་
སྟེར་སྙིང་པོས་སྐྱ་པ་ཡིས་བདག་བྱིན་རློབས། ༢༥ །(*ཕྱག་བྱ་བའི་སྒོ་བཅུ་དགུ་པ་ཡོན་ཏན་གྱི་རང་བཞིན་བརྗོད་པ།)དཔག་མེད་བསྐལ་པའི་ཕྲེང་བར་རབ་བསགས་སྦྱིན་པ་ལ་སོགས་བསོཾད་ནཾམས་ཚོགས། །བྱང་ཆུབ་མཆོག་གི་རྩེ་མོཾར་ལུད་པས་མི་མཐུན་མེད་པར་བསྐྲུན་པའི་སྐུ། །སྟོང་པའི་མཁའ་ལ་རྫུ་འཕྲུལ་རྐང་པའི་འདེགས་འཇོག་
རེ་མོས་བསྒྱུར་བ་ཡིས། །པོ་ཏ་ལ་སོགས་གདུགས་ཕྱེད་ལ་འཁོར་མཁའ་འགྲོའི་དབང་པོ་དེ་ལ་འདུད། ༢༦ །(*ཕྱག་བྱ་བའི་སྒོ་ཉི་ཤུ་པ་བསམ་པ་རྒྱ་ཆེ་བ་ཡན་ལག་ཅན་གྱི་གཟུགས་ཀྱིས་བརླིང་བ།)མུ་མེད་ཕྱོགས་བཅུའི་འཇིག་རྟེན་དག་ན་དུས་གསུམ་གཤེགས་པའི་སངས་རྒྱས་ཀྱི། །གསུང་གི་གསང་བ་བསམ་མི་
ཁྱབ་པར་དབང་འབྱོར་དཔལ་ལྡན་རྡོ་རྗེ་འཛིན། །དུས་འདིར་དམ་ཆོས་རྙོག་པ་བགྲུང་ཕྱིར་གངས་ཅན་ནོར་གྱི་བློ་གྲོས་མར། །སྐྱེ་བ་དམ་པའི་ཟློས་གར་བསྒྱུར་བ་དགེ་ལེགས་གྲགཾས་པཾའི་རྒྱལཾ་མཚཾན་འཛིན། ༢༧ །(*ཕྱག་བྱ་བའི་སྒོ་ཉེར་གཅིག་པ་རིག་བྱེད་ཀྱི་གཏམ་སྦྱར་བའི་མཐའ་དག་གི་གཟུགས་ཅན།)ལེགས་
བཤད་ཉི་མའི་འོད་ལ་སྡང་ཞིང་མཐའ་བྲལ་མཁའ་ཡང་འབིགས་སེམས་ཅན། །སྨྲ་ངན་རྡུལ་བརྩེགས་རི་བོའི་ཁེངས་པ་ཡོངས་སུ་སྙོལ་ལ་མི་འཇིགས་པར། །ལུང་དང་རིགས་པའི་ཁོ་ལག་རབ་རྫོགས་བརྡ་སྤྲོད་ཚད་མའི་རྣོ་
Vol. 213 · folio 6b
མཚོན་ཅན། །ཀུནཾ་དགཾའི་དཔལ་སྟེར་ཆོས་ཀྱི་རྒྱལཾ་མཚཾན་ཕྱོགས་བཅུར་བཙུགས་པའི་ལྷ་ཡི་དབང༌། ༢༨ །སྲིད་པ་གསུམ་ལས་རིང་དུ་མངོཾན་འཕཾགས་མཆོག་གི་གོ་འཕང་བརྙེས་གྱུར་ཀྱང༌། །དེ་ཡི་བློཾ་གྲོསཾ་ཁམས་གསུམ་འགྲོ་ལ་ཕན་པའི་རྒྱུ་ཕྱིར་ཡང་དག་འབབ། །གཅིག་
ཏུ་མཁས་པའི་སྤྱོད་ཚུལ་གསུམ་གྱིས་ཆོས་ཀྱི་རྒྱལཾ་མཚཾན་བརྟེན་བྱེད་ཀྱང༌། །(ཕྱག་བྱ་བའི་སྒོ་ཉེར་གཉིས་པ་གཞི་གཅིག་གིས་ཆོས་དུ་མ་འགལ་བ།)ཆོས་མིན་ཐམས་ཅད་ཡོངས་སུ་ཉམས་མཛད་ཆོས་ཀྱི་རྒྱལ་པོ་གཙུག་གིས་བསྟེན། ༢༩ །(*ཕྱག་བྱ་བའི་སྒོ་ཉེར་གསུམ་པ་ཉམས་ལྡན་གྱི་རྒྱན་ལས་དཔའ་བའི་ཉམས།)ནོར་རྒྱས་ངལ་བའི་སྡིག་པ་མ་བྱས་ས་འཛིན་ཡང་ནི་བསྒྲིལ་བ་
མེད། །ཚིགས་བཟང་རྒན་པོ་གྲོགས་སུ་མ་བཀུག་ཆུ་ཡི་གཏེར་ཡང་མ་བསྲུབས་པར། །བདུད་རྩིའི་གཏམ་སྙན་ཀུན་གྱི་འབྱུང་གནས་རིགས་གསུམ་རྣམ་འཕྲུལ་སཾ་སྐྱཾ་པཾའི། །གདུངཾ་རབཾས་མཚར་དུ་དངར་བ་བྱོན་དང་འབྱོན་འགྱུར་སྙན་
དངགས་དབྱངས་ཀྱིས་མཆོད། ༣༠ །(*ཕྱག་བྱ་བའི་སྒོ་ཉེར་བཞི་པ་ཡན་ལག་གཉིས་པའི་གཟུགས་ཅན།)བསྐལ་པ་སྙིགས་མ་ལྔ་བདོའི་དུས་ན་ང་ཡི་ལུང་དང་རྟོགས་པའི་བསྟན། །བཤད་སྒྲུབ་ཟུང་གིས་འཛིན་སྤེལ་བྱེད་པོ་མཚུངས་མེད་དེ་ནི་འདིའོ་ཞེས། །ངེས་པར་ལུང་དུ་བསྟན་པའི་ཕྲིན་ཡིག་བསུབ་ཏུ་མེད་པ་སྟོབས་བཅུ་པའི། །
ཡེ་ཤེས་དག་པའི་སྨྱུག་གུས་བྲིས་པ་རྡོ་རྗེ་འཆང་དབང་ཀུན་དགའ་བཟང༌། ༣༡ །(*ཆོས་ཅན་འགོག་པ།)དེ་ཡི་ཡོན་ཏན་བསྐལ་པར་བརྗོད་ཀྱང་མཐས་གཏུགས་དབེན་པའི་ཕྱོགས་རེའི་གཏམ། །ཐོས་པའི་བློ་ལྡན་ལན་གཅིག་མིན་པར་ཐལ་སྦྱར་བྲེལ་
ལ་ངོ་མཚར་བསྐྱུངས། །འདི་མཚན་ཐོས་པ་འཛིན་པའི་ལམ་དུ་ལན་རེ་ལྷུང་བའི་ལེགས་བྱས་ཀྱང༌། །ངན་འགྲོ་དམན་པའི་སྐྱེ་གནས་འགོག་པའི་མཆོག་ཏུ་ཐམས་ཅད་མཁྱེན་པས་བསྔགས། ༣༢ །(*ཕྱག་བྱ་བའི་སྒོ་ཉེར་ལྔ་པ་བསྡུས་པའི་དཔེ།)མང་དུ་ཐོས་བློ་ཙམ་གྱིས་འཇཾམ་པཾའི་དབྱཾངས། །
མཚུངས་པར་བསྔགས་པ་མིན་ཡང་ཚུལ་ཁྲིམས་དང༌། །ཏིང་ངེ་འཛིན་དང་ཤེས་རབ་བསླབ་པའི་གཞུང༌། །སྨྲ་མཁས་ལྷུནཾ་གྱིས་གྲུབཾ་པ་འདིས་ཀྱང་ངོ༌། ༣༣ །(ཕྱག་བྱ་བའི་སྒོ་ཉེར་དྲུག་པ་གསལ་བྱེད་ལས་རིགས་བརྗོད་པ་ཐ་མའི་གསལ་བྱེད།)ཨེ་ཝཾ་པ་ཡི་ལུགས་བཟང་
Vol. 213 · folio 7a
ལམ་གསུམ་ཁོངས། །མཛེས་བྱེད་རྒྱན་གྱི་དམ་པ་བསྐལ་པ་བརྒྱར། །བརྟན་པའི་ཆོ་ག་རབ་རྫོགས་རྒྱལ་ཚབ་ཏུ། །རིམ་པར་བྱོན་རྣམས་སྐྱེ་བ་གཏན་གྱི་སྐྱབས། ༣༤ །(*ཕྱག་བྱ་བའི་སྒོ་ཉེར་བདུན་པ་དཔེ་རྒྱན་ལས་ཆོས་དཔེ།)འཇལ་བྱེད་དཔྱད་པ་གསུམ་དང་མན་ངག་གིས། །གཞལ་བྱ་དམ་པའི་ཆོས་
དང་ཆོས་མིན་དག །རྣམ་པར་འབྱེད་པའི་རྒྱལ་པོ་ཉི་ཟླ་ལྟར། །ཡོངས་གྲགས་བོཾད་ཀྱིཾ་མཁཾས་པཾ་ཀུན་ལ་དད། ༣༥ །(*ཕྱག་བྱ་བའི་སྒོ་ཉེར་བརྒྱད་པ་བསྡུས་པའི་གཟུགས་ཅན།)གཟུངས་དང་སྤོབས་པ་ཤེས་རབ་རྫས་སྦྱོར་གྱིས། །དགོངས་འགྲེལ་འགྱུར་དགུའི་དཀའ་གནས་རིན་ཆེན་མིག །
དྲང་པོར་འབིགས་ལ་འཇིགས་མེད་གྲུབ་པའི་རྟགས། །བསྒྲིགས་ལེགས་ཕྲེང་དུ་བསྟར་བ་འདྲེན་བྱེད་དཔྱིད། ༣༦ །(*ཕྱག་བྱ་བའི་སྒོ་ཉེར་དགུ་པ་མཚུངས་པ་གསལ་བྱེད་ལས་གཞུང་གིས་དངོས་སུ་ཟིན་པའི་འགོག་པ་དང་དགོད་སྒྲ་ཅན།)འཆད་རྩོད་རྩོམ་ལ་མི་འཇིགས་ངགཾ་གི་དབཾང༌། །གྲུབ་མཐུས་བློཾ་གསལ་བྱེ་བའི་སྙེམས་པ་འགོག །གསར་རྙིང་གྲུབ་པའི་
སྲོལ་བཟང་རིས་མེད་པས། །རྒྱ་མཚོའི་གོས་ཅན་ཉེ་འཁོན་མེད་ལ་དགོད། ༣༧བཅུ་ཕྲག་གྲངས་སུ་རྫོགས་པ་རིག་པའི་སྲོག །འཆི་མེད་རྟག་པར་སྒྲུབ་པའི་ཕྲིན་ལས་ནི། །ཕྱོགས་ཀྱི་དཀྱིལ་འཁོར་
ཀུན་དུ་བཀོད་པ་ཡིས། །ཐུབ་བསྟན་རབ་ཏུ་གསལ་བྱེད་ཁྱོད་རྨད་བྱུང༌། ༣༨ །(ཕྱག་བྱ་བའི་སྒོ་གསུམ་ཅུ་པ་སྐྱེད་བྱེད་ཀྱི་རྒྱུ།) ཁྱད་པར་བདག་བློ་རབ་རྨོངས་རྡོ་བའི་ཁམས། །རང་བཞིན་མཉེན་པར་བཅོས་སུ་མེད་ན་ཡང༌། །རིག་གནས་རྒྱ་མཚོའི་ནང་དུ་དྲངས་པའི་དྲིན། །བསམ་ཀྱིན་དད་
པའི་བ་སྤུ་གཅིག་ཏུ་ཕྱོགས། ༣༩ །(*ཕྱག་བྱ་བའི་སྒོ་སོ་གཅིག་པ་ཡན་ལག་གཉིས་པའི་གཟུགས་ཅན།)གཞན་ཡང་གསར་རྙིང་བཀའ་དང་ཟབ་གཏེར་གྱི། །(ལྡན་པའི་གཟུགས་ཅན།)སྲོལ་ཆེན་འབྱེད་པའི་ཐུགས་རྗེའི་དར་བབ་མས། །བསྟན་འགྲོའི་དགེ་ལེགས་ཡིད་གཅུགས་མཛའ་ན་བོ། །འགུགས་བྱེད་ཕྱག་བགྱིར་འོས་པ་ཀུན་ལ་དད། ༤༠ །(*འདི་ནས་བརྩམས་ཏེ་ལྗོངསའདིར་ཐུགས་རྗེ་ལྷག་པར་ཆེ་བའི་སྐྱེས་བུ་དམ་པ་རྣམས་ལ་བསྔགས་པ་རབ་སྤེལ།)མི་འགྱུར་བདེ་པའི་
ཐང་ཆེན་སྟོང་པ་ཉིད། །ཡང་དག་རྟོགས་པའི་རྒྱལ་པོ་མངོན་གྱུར་ཀྱང༌། །ངོ་མཚར་མཛད་པས་མ་ཧཱ་བྷོ་ཊའི་ལྗོངས། །ཕན་པ་སྒྲུབ་པའི་བརྩོན་འགྲུས་བྲན་ལྟར་བཟང༌། ༤༡ །(མཐའ་དག་གཟུགས་ཅན།)བྱམས་པའི་
Vol. 213 · folio 7b
རྩ་བརྟན་སྙིང་རྗེའི་ཡལ་ག་རྒྱས། །ཀུན་དགའ་སྟེར་བའི་ཡོན་ཏན་མེ་ཏོག་བཀྲ། །སྐུ་གསུམ་འབྲས་བུ་སྨིན་པའི་དཔག་བསམ་ཤིང༌། །བཀྲ་ཤིས་གྲིབ་མ་སྣུམ་ལྡན་ཀུན་ལ་འབེབས། ༤༢ །སེ་ན་ཤུ་བྷར་གྲགས་པའི་རྒྱལ་པོའི་ཁབ། །རྒྱལ་བ་གཉིས་པའི་ལུགས་
བཟང་ནོར་བུའི་ཏོག །དཔལ་དང་མཆོག་གི་འབྱུང་གནས་དམ་པ་དེས། །བཤད་སྒྲུབ་རྒྱལ་མཚན་རྩེ་ན་བརྟན་པར་བྱས། ༤༣ །(*སྦྱར་བའི་དཔེ།)རང་གཞན་གྲུབ་པའི་གཞུང་ལུགས་རབ་འབྱམས་ཀྱི། །(ལྡན་པའི་གཟུགས་ཅན།)ཕ་མཐའ་ལ་སོན་འབྲས་བུ་ཕྱོགས་ཀུན་ལས། །རྣམ་པར་
རྒྱལ་བའི་མཚན་གྱི་བཀྲ་ཤིས་དབྱངས། །དཔལ་ལྡན་ཆོས་ཀྱི་གྲགས་པ་བས་ཀྱང་སྙན། ༤༤ །ཤིན་ཏུ་དར་བྱས་ཁོ་ར་ཁོར་ཡུག་ཏུ། །རྫོགས་སངཾས་རྒྱསཾ་ཀྱི་ཞལ་ལུང་དྲི་མ་མེད། །ལུང་རྟོགས་ཡོན་ཏན་ཕུནཾ་སུམ་ཚོགཾས་འཛིན་ལས། །བྱུང་བའི་འཆད་
རྩོད་རྩོམ་པའི་ཕྲིན་ལས་རྒྱུན། ༤༥ །(*རབ་སྤེལ།)སྲིད་ཞིའི་མཐའ་ཆེན་འགོངས་པའི་མྱ་ངན་ལས། །(བྱ་བ་བརྗོད་པ་ཐོག་མའི་གསལ་བྱེད།)འདས་པར་ཀུན་དུ་བཟཾང་བཞིན་དབང་གྱུར་ཀྱང༌། །རིས་བྲལ་འགྲོ་བ་མང་པོཾའི་བྲན་ཉིད་དུ། །དམ་བཅས་འབྲས་བུ་ངུར་སྨྲིག་རྒྱལ་མཚན་བཟུང༌། ༤༦ །ཟབ་
(*མཚུངས་པ་གསལ་བྱེད་ལས་མཚན་ཉིད་མཐུན་སྒྲ་ཅན།)རྒྱས་གདམས་པས་རྒྱགས་པའི་མགྲིན་པ་ལས། །རྟག་པར་བཀྲ་ཤིས་བྱེད་པའི་ཆོས་ཀྱི་གླུ། །རྩོལ་མེད་ལྷུན་གྱིས་གྲུབ་པར་འཇོ་བ་ལ། །དབྱངས་མཆོག་རྡོ་རྗེ་ཆོས་དང་མཚན་ཉིད་མཐུན། ༤༧ །(*ལས་ཀྱི་རྒྱུ་ལས་རྣམ་འགྱུར་གྱི་རྒྱུ།)དཔལ་ལྡན་རྡོ་རྗེ་འཆང་གི་གསང་བ་གསུམ། །བློ་དམན་
མོས་པར་འཚམ་པའི་སྒྱུ་འཕྲུལ་གཟུགས། །ཀུན་མཁྱེན་ཆོཾས་ཀྱི་རྒྱལ་སྲིད་སྐྱོཾང་བ་ལ། །སྡེ་སྣོད་སྨྲ་བ་ཡོངས་ཀྱི་གཙུག་ན་མཐོ། ༤༨ །(*མཛེས་པའི་ཡོན་ཏན་གཏམ་ལ་སྦྱར་བ།)ལྷ་མཆོག་ངག་གི་དབཾང་ཕྱུག་དཔལ་གྱི་མགུར། །རྗེས་སུ་ཆགས་
པས་བློ་ལྡན་ཀུནཾ་དགཾའ་བརྒྱ། །སྐྱེད་བྱེད་ལེགས་པའི་ལམ་སྟོན་ཐུན་མོང་མཆོག །ཟུང་གི་དངོས་གྲུབ་འབྱུངཾ་གནཾས་རྨད་དུ་བྱུང༌། ༤༩ །(རབ་སྤེལ།)ལུང་རྟོགས་ཆོས་ཀྱི་ཚུལ་ལ་སྦྱངས་པའི་ཐུགས། །མཁའ་ལྟར་ཡངས་པའི་རྣམ་འགྱུར་
Vol. 213 · folio 8a
ཅི་འདོད་ཀྱི། །ལེགས་བཤད་འཛད་དུ་མེད་པ་འབྱུང་བའི་གནས། །ལྔ་རིག་བསྟན་པའི་སྣང་བྱེད་བླ་ན་མེད། ༥༠ །(*ཡན་ལག་གཅིག་པའི་གཟུགས་ཅན།)བྱང་ཆུབ་མཆོག་ཏུ་མངོན་པར་སངས་རྒྱས་པའི། །ཡེ་ཤེས་རྒྱ་མཚོའི་རྣམ་པར་འཕྲུལ་པའི་སྲས། །ལྔ་རིག་གཞུང་གི་བརྗོད་
བྱ་མ་ལུས་པ། །སྙན་དངགས་དམ་པའི་གླུ་རུ་ལེན་ལ་དཔའ། ༥༡ །(*རིག་བྱེད་གཏམ་དང་སྦྱར་བའི་བསྡུས་དང་མ་བསྡུས་འགྲེས་པའི་གཟུགས་ཅན།)བརྩེ་ཆེན་ཀུན་དགའ་སྙིང་པོའི་ལུང་རྟོགས་ཀྱི། །ཆོས་ཚུལ་ལམ་གསུམ་སྒྲིབ་པ་སྦྱོང་བའི་རྒྱུན། །མང་ཐོས་སྐལ་ལྡན་ཤིང་རྟའི་དཀའ་སྤྱད་ཀྱིས། །མི་ནུབ་རྟག་ཏུ་འཕེལ་བའི་
ཆོ་ག་བསྒྲུབས། ༥༢ །(*སྐྱོད་བྱེད་འགྲུབ་པའི་རྒྱུ།)ཆོས་ཀྱི་བཀྲ་ཤིས་དམ་པ་འཇིག་རྟེན་འདིའི། །རྒྱན་དུ་བརྟན་པའི་ཆོ་ག་རིག་པའི་གཞུང༌། །རབ་འབྱམས་ལེགས་པར་སྨྲ་བའི་ངོ་མཚར་གྱིས། །ངག་གི་དབཾང་ཕྱུག་དགྱེས་པའི་འཛུམ་མང་སྟོན། ༥༣ །(*དངོས་པོའི་དཔེ།)སངས་
རྒྱས་གངྒཱ་ཀླུང་གི་བྱེ་སྙེད་ཀྱི། །བྱིན་རླབས་ནུས་པ་རྒྱ་མཚོ་ཆེན་པོའི་རྗེས། །སོང་བ་སྔགས་ཀྱི་སྤྱོད་པས་རང་དབང་དུ། །གྲུབ་པའི་ཡོན་ཏན་ཕུང་པོ་བསམ་ལས་འདས། ༥༤ །(*འདི་ནས་བརྩམས་ཏེ་སྡེ་དགེའི་གདུང་རབས་བསྟན་པ་ལ་སྐུ་དྲིན་ཆེ་བ་རྣམས་ལ་བསྔགས་པའི་ཐོག་མར་དངོས་པོའི་དཔེས་བརླིང་བའི་མཆོག་གི་ངེས་བསྟན།)འཁྲུལ་སྣང་རང་སར་དག་པའི་རང་རིག་པར། །དུས་གསུམ་དངོས་པོ་
སྒྲིབ་མེད་བཀྲ་བ་ཡི། །མཚོན་ཕྱིར་གྲུབ་པའི་མཚན་མ་ཀུན་དགའི་དཔྱིད། །ཅི་ཡང་ངོམ་པ་ཡོན་ཏན་རྒྱཾ་མཚོ་བཞིན། ༥༥ །(*མཐའ་དག་གི་གཟུགས་ཅན།)རིས་བྲལ་བྱམས་པའི་བཏུང་བ་ངོམས་མེད་དུ། །བསྟེན་པས་སྟོབས་
ཀྱི་ཤུགས་འཆང་ས་སྲུང་དབང༌། །སྡེ་བཞི་ཕུན་སུམ་ཚོགས་པའི་སྐྱེད་མོས་ཚལ། །དགེ་བའི་གོམ་སྟབས་ལྷོད་པོ་ཅིར་ཡང་བསྒྱུར། ༥༦ །(*དགག་པའི་དཔེ།)གང་གིས་བསྒྲུན་མིན་དཔུང་པས་ས་ཡི་སྟེང༌། །རང་དབང་བྱེད་པར་མཚུངས་ཀྱང་པད་དཀར་མིག །འཚེ་
བ་ཆོས་སུ་འདོམས་ཕྱིར་སངས་རྒྱས་ཀྱི། །བསྟན་པའི་དཔལ་གྱུར་ཁྱོད་ལས་ཤིན་ཏུ་དམན། ༥༧ །(ཁྱད་པར་ལ་གནས་པའི་དོ)(ནན་བཀོད་པ།)བསོད་ནམས་ཕུན་སུམ་ཚོགས་འདོད་ས་བདག་གི །ལས་ནི་སེམས་ཅན་ཐམས་ཅད་བདེ་བའི་རྒྱུ། །བདག་དོན་བོར་བ་རྒྱལ་
Vol. 213 · folio 8b
བའི་མྱུ་གུ་རྣམས། །གཞན་ཕན་མིན་པའི་བསྒྲུབ་བྱ་ཅང་སྲིད་དམ། ༥༨ །(*རྣམ་འགྱུར་གྱི་རྒྱུ།)གཞན་ཡང་སྙིང་སྟོབས་རབ་བརླིང་སྤྱོད་པ་ཡིས། །རྒྱལ་བསྟན་བླ་ནས་བླ་མར་འདེགས་པའི་ཆེད། །བློ་ལྡན་བྱང་ཆུབ་སེམས་དཔའ་ས་སྐྱོང་དུ། །བརྫུས་པའི་བསྔགས་འོས་ཀུན་ལ་གུས་བཏུད་
ནས། ༥༩ །(*འདི་ནས་བརྩམས་ཏེ་དངོས་པོ་ངེས་པར་བསྟན་པའི་དང་པོ་རིགས་པ་རང་བཞིན་བརྗོད་པ།)གང་ཞིག་ཐོས་ན་ཡོན་ཏན་ཀུན་གྱི་མ། །དཀོན་མཆོག་དམ་པའི་ཆོས་ལ་དད་གསུམ་གྱི། །རྩ་བ་བརྟན་པའི་རང་བཞིན་བདུད་ལས་བཞིས། །གཞོམ་དུ་མེད་པ་ཐོག་མར་དགེ་བའི་ཆོས། ༦༠ །(*མ་བསྡུས་པའི་གཟུགས་ཅན།)ལེགས་པར་ཐོས་པའི་མ་མས་བསྐྱེད་བསྲིངས་པའི། །
རྣམ་པར་འབྱེད་པའི་བུ་མོ་མིག་ཡངས་མས། །དཔྱད་ན་མི་བསླུ་ངེས་པས་དགའ་བའི་གྲོགས། །གསར་དུ་ཐོབ་པ་བར་དུ་དགེ་བའི་ཆོས། ༦༡ །(*ཡན་ལག་གཉིས་པའི་གཟུགས་ཅན།)བསམས་བྱུང་མཐུ་ཡི་སོར་མོས་ཡིད་གཉིས་མདུད། །
ཡོངས་སུ་བཀྲོལ་ཏེ་རྩེ་གཅིག་མཉམ་བཞག་པས། །བརྗོད་བྱའི་སྙིང་པོ་ཇི་བཞིན་རྟོགས་པའི་བློ། །རྣམ་པར་རྒྱས་དེ་ཐ་མར་དགེ་བའི་ཆོས། ༦༢ །(*རིགས་མཐུན་ལྡོག་པ་ཅན་ལ་རབ་རྟོག་གིས་བརླིང་བ།)གང་དེས་དབེན་པའི་སྔོ་བསངས་མུན་པ་ཆེ། །ཉིན་མཚན་མགོན་པོ་ཟུང་གིས་མ་ཕྲོགས་ཤིང༌། །
གཡོ་ཐབས་སྟོང་གིས་བསླུ་བར་མ་ནུས་པར། །བརྩེ་མེད་སྙིང་ནས་བཟུང་སྙམ་བགྱིད་པ་དེ། ༦༣ །(*ཡོན་ཏན་གྱི་རང་བཞིན་བརྗོད་པ།)སྣང་བ་དམ་པས་ཡོངས་སུ་བསལ་སླད་དུ། །བྱང་ཆུབ་མཆོག་ཏུ་ཐུགས་བསྐྱེད་སྨོན་པའི་སྟོབས། །གཞན་ལ་ཁྱད་པར་གྱུར་པའི་འཕྲིན་དང་པོ། །མུ་
མེད་རྒྱལ་བས་བསྒྲགས་པ་ཤཱཀྱའི་སྲས། ༦༤ །(*བསམ་པ་རྒྱ་ཆེ་བ།)དགའ་བར་ལྡན་པའི་ཡིད་བཟང་གྲངས་མེད་དབུས། །ཐེག་ཆེན་ཆོས་ཀྱི་གཏོང་ཕོད་མི་དམན་ཡང༌། །སྨོན་བྱའི་སྙིང་པོ་རྗེས་སུ་དྲན་པའི་གར། །འཛམ་གླིང་འཛིན་མའི་དོ་ར་ཡངས་པར་བསྒྱུར། ༦༥ །(*བསྡུས་ཤིང་མ་བསྡུས་པའི་གཟུགས་ཅན་རིག་བྱེད་ཀྱི་གཏམ་ལ་སྦྱར་བ།)དེ་ན་
ངོ་མཚར་སྔོན་མེད་རླབས་ཀྱི་ལྕེ། །སྲིད་པ་གསུམ་ལས་འདས་པར་གླལ་བ་ཡི། །བསམ་ཡས་ལེགས་པར་སྤྱད་པའི་ཆུ་གཏེར་ལས། །བྱང་ཆུབ་བདུད་རྩི་བརྙེས་པའི་ཚུལ་ཆེན་བསྟན། ༦༦ །(*རབ་སྤེལ།)ཁྱད་པར་བསོད་
Vol. 213 · folio 9a
ནམས་བརྒྱ་ཡི་བྱེད་པོ་དེས། །ཡང་ཡང་ལེགས་པར་བཀྲུས་པ་ཟླ་བའི་བཞིན། །མཐོང་ན་མི་མཐུན་བྲལ་བའི་ཡ་མཚན་དེ། །འཇིག་རྟེན་ཀུན་དུ་ལྷམ་མེར་ངོམ་པ་བཞིན། ༦༧ །(*རབ་སྤེལ།)བནྡྷུ་ཛཱི་བ་ཀཱ་ཡི་མཆུ་སྒྲོས་དང༌། །མུ་ཏིག་ཕྲེང་བ་དངར་བའི་ཚེམས་བར་ནས། །
གློག་འགྱུ་སྟོང་གི་མཉེན་ལྕུག་སྨ་འབེབས་སུ། །བྱེད་པ་འཕྲུལ་གྱི་རོ་འཛིན་ཅིར་ཡང་བསྒྱུར། ༦༨ །(*རིགས་བརྗོད་པ་ཐ་མའི་གསལ་བྱེད།)དེ་ཚེ་ཀུན་གྱི་རྣ་ལུང་འབབ་པའི་གདངས། །སྙན་དགུ་མ་ཚང་མེད་པའི་རྒྱུད་གཅིག་ལས། །ཐ་དད་རང་རང་སྐད་དུ་འཕོས་པའམ། །བྱིན་གྱིས་རླབས་སམ་
རྗེས་སུ་གནང་བའི་བཀའ། ༦༩ (*ཡོན་ཏན་མ་ཚང་བའི་ཁྱད་པར་བརྗོད་པ།)།སྲིད་པ་གསུམ་གྱི་ཀུན་རྟོག་སྔོ་བསངས་མའི། །དཔུང་པ་བག་ཆགས་བཅས་ལས་འདས་གྱུར་ཀྱང༌། །སེམས་ཅན་སྣ་ཚོགས་མོས་པའི་རྒྱུན་ཕྱོགས་སུ། །གཞོལ་ཞིང་བབས་པའི་རྣམ་གྲངས་བསམ་
མི་ཁྱབ། ༧༠ །(*རབ་སྤེལ།)ཚིག་དོན་ལང་ཚོ་དར་བབ་བཀའ་གང་དག །ཇི་སྙེད་འཛིན་དང་སྡུད་བྱེད་གཟུངས་ཀྱི་སྒོ། །དབང་ཐོབ་མང་པོས་སླད་འབྱིན་བསྡུས་པ་དང༌། །ཡི་གེར་བྲིས་པའི་གླེགས་བམ་བགྲང་དུ་མེད། ༧༡ །(*རིག་བྱེད་ཀྱི་གཏམ་ལ་སྦྱར་བའི་ལྡན་པའི་གཟུགས་ཅན།) བཀའ་ལུང་དྲི་མེད་ཤེལ་གྱི་ཁང་པའི་ངོས། །
དྲང་དང་ངེས་པའི་གཟུགས་དང་གཟུགས་བརྙན་གྱི། །ལྟད་མོ་མཚར་དུ་དངར་བའི་ཁྱད་པར་དག །ཚུལ་བཞིན་དཔྱོད་པའི་རྒྱལ་པོ་རྣམ་མང་གིས། ༧༢ །(*མང་བའི་དཔེ།)རྒྱ་ཆེན་སྡུད་དང་ཟབ་མོ་རྣམ་པར་འབྱེད། །དཀྲུགས་པ་སྡེབས་ཕྱིར་བྱས་པའི་
བསྟན་བཅོས་གྲངས། །བསྐལ་པའི་ཆར་དང་དབྱིག་འཛིན་མ་ཡི་རྡུལ། །ཆུ་གཏེར་ཐིགས་པའི་རྗེས་སུ་རྐང་པ་འཇོག ༧༣ །(*སེམས་མེད་རབ་རྟོག)འོན་ཏེ་བཀའ་དོན་ལེགས་པར་བཤད་ང་ནི། །རང་དགའི་ཚིག་དོན་འདྲེ་ན་མི་རུང་ཞེས། །འཕགས་ཡུལ་གདོད་ནས་གྲུབ་པའི་སྐད་
རིགས་ཀྱི། །ལྐོག་ན་སྦས་པའི་བརྟུལ་ཞུགས་བཟུང་ངམ་སྙམ། ༧༤ །(རབ་རྟོག)དེ་ཚེ་མཁས་པའི་ཚོགས་དང་ལོ་ཙཱ་བ། །རྒྱལ་ཆེན་རྣམས་ཀྱི་རྩོམ་པ་རྨད་བྱུང་དང༌། །ཐུབ་པའི་ལུང་བསྟན་རྩེ་དགའ་དྲན་ཆེ་བས། །གངས་ཅན་བརྡ་ཡི་ལམ་དུ་བརྒྱུད་ཅིང་བྱོན། ༧༥ །
Vol. 213 · folio 9b
གང་ཚེ་ལེགས་པར་གསུངས་དང་དགོངས་འགྲེལ་ཞེས། །མཚན་གྱི་གླིང་བུ་གང་དུ་སྙན་པ་དེར། །མཐའ་འཁོབ་མིང་གི་དུད་མོ་བསྐལ་པ་ཡི། །ཕ་རོལ་ལ་ཡང་གནས་པའི་གོ་ས་ཕྲོགས། ༧༦ །(*ཡན་ལག་ཅན་གྱི་གཟུགས་ཅན།)གཞི་ལམ་འབྲས་བུའི་ལྟད་མོ་བཀྲག་པོ་ཆེ། །འགོག་བྱེད་སྒྲིབ་གསུམ་གཉེན་
(རྒྱུའི་རྒྱན་ལས་རིག་པའི་རྒྱུ།)པོ་བླ་ན་མེད། །སྣང་བ་མི་ཟད་མཛོད་ཀྱི་ཉི་མ་འདི། །ཐོབ་པའི་འཇིག་རྟེན་སྐལ་བ་མི་དམན་གྲང༌། ༧༧ །(*སྦྱར་བའི་འགོག་པ།)མཐོང་ཆོས་སླད་མའི་གནས་སྐབས་མཐར་ཐུག་གི །འཐོབ་བྱ་ཡིད་འོང་ངེས་པར་འབྱིན་པའི་དཔྱིད། །དམ་ཆོས་ཡོངས་འདུའི་
དབང་པོ་འདི་ཡོད་བཞིན། །དཔག་བསམ་རྐང་འཐུང་ཕལ་ལ་རེ་བ་ལྷོད། ༧༨ །(*རྨད་བྱུང་གི་དཔེ།)གང་ཞིག་ཐོབ་ན་གནས་སྐབས་འདོད་པ་དགུ། །རྟོག་མེད་ཆར་དུ་བསྙིལ་བ་ཡིད་བཞིན་ནོར། །བྱང་ཆུབ་གསུམ་གྱི་འབྲས་བུ་འབྱིན་ནུས་ན། །འཆོས་སྐྱོབ་ཡོན་ཏན་ལྡན་པའི་
རྗེས་སུ་སྙེགས།༧༩ །(*ཆོས་དཔེ་ལ་གཟུགས་ཅན་གྱིས་སྦ་བ།)གང་འདི་ཡི་གེའི་རིས་སུ་འདྲི་བ་དང༌། །ཀློག་པ་ལ་སོགས་ལེགས་བྱས་རེ་རེའི་མཐའ། །མཁའ་བཞིན་གཞལ་དུ་མེད་པའི་ལུང་གི་རྔ། །བདེན་དཔང་ཚད་མ་དེ་བཞིན་གཤེགས་པས་བསྐུལ། ༨༠ །(*བསྡུས་ཤིང་མ་བསྡུས་པའི་གཟུགས་ཅན།)དམ་པའི་ཞལ་ལུང་བདུད་རྩི་འཇིག་རྟེན་
ན། །ཡུན་དུ་གནས་པའི་རྩེ་དགས་བྱང་ཆུབ་ཀྱི། །ལང་ཚོ་མཆོག་ཏུ་བདོ་བར་འདོད་པའི་ལས། །ཀློག་སྤོང་ལས་ཀྱི་འཁོར་ལོ་རྣམ་པ་གསུམ། ༨༡ །(*རིགས་བརྗོད་པ་ཐ་མའི་གསལ་བྱེད།)དེ་ནི་བརྗོད་བྱ་བདེན་པ་ཟུང་གི་གནས། །མ་ནོར་ལེགས་པར་འདོམས་པའི་ཚོགས་པ་
གསུམ། །འདུས་པའི་རང་བཞིན་ཚད་མར་གྱུར་པའི་ལུང༌། །གླེགས་བམ་ཕྲེང་དུ་དངར་བ་འདི་ལ་རག ༨༢ །(*བཞི་གའི་ཐོག་མར་ཡོད་པ་ཆོད་པའི་ཟུང་ལྡན།)ཚུལ་ཆེན་འདི་དག་དོན་དང་མ་འབྲེལ་བའི། །ཚུལ་ལུགས་སྨྲ་བའི་མགྲིན་པ་དཔང་མཐོ་ཡང༌། །ཚུལ་མིན་མུན་པ་འདོམ་གྱིས་འཇལ་བ་
བཞིན། །ཚུལ་བཞིན་རིག་པའི་མདུན་སར་ཁྲེལ་བའི་རྒྱུ། ༨༣ །(*སྨད་པའི་དཔེ།)དེ་སོགས་བསམ་གྱིས་མི་ཁྱབ་དགོས་པ་དང༌། །ཕན་འདོགས་ཡོན་ཏན་ཆེ་བའི་རིགས་པ་ལུང༌། །མི་ཟད་ཚངས་པའི་བུ་མོའི་རྒྱུད་མང་གི །དཔལ་ཡང་ཉུང་ངུར་བྱེད་
Vol. 213 · folio 10a
པའི་གླུ་དག་གིས།༨༤ །(*འབྱུང་མིན་གྱི་དཔེ།)རིངས་པར་བསུ་བས་སྔོན་མེད་འཛུམ་གྱི་རླབས། །ཉ་རྒྱས་ཟླ་བ་འབུམ་ཕྲག་བཞུ་བའི་ཚོན། །བཞིན་ལ་བྱུགས་པ་བཞིན་དུ་ས་ལ་སྤྱོད། །སྲས་བཅས་སྤྲོ་བ་མཆོག་གི་རྩེ་མོར་ཕྱིན། ༨༥ །(*ཤླཽ་ཀ་གཉིས་ལྡན་པའི་གཟུགས་ཅན།)གྲངས་མེད་སྐྱེ་བར་བསགས་པའི་
ལེགས་བྱས་ཀྱིས། །མངོན་མཐོ་མི་བདག་ཆེན་པོའི་ཞབས་ཟུང་གི །འཁོར་ལོའི་ཡན་ལག་ལྡན་པ་ཁྱོ་ཤུག་དག །གདུབ་སིལ་མགྲིན་པའི་རྫ་རྔ་འཁྲོལ་བ་ཅན། ༨༦ །ཁེངས་ལྡན་ཕྱོགས་ཀྱི་ས་འཛིན་བྱེ་བ་ཡི། །ཐོར་ཚུགས་དབང་
སྔོན་ཞུན་མ་འཁྱིལ་བའི་རྫིང༌། །རྒྱན་ཕྲེང་པདྨ་ཀུན་ནས་དགོད་པ་དེར། །ངལ་བསོར་སྤྱོད་པའི་དབང་ཕྱུག་མི་ཡི་ལྷ། ༨༧ །(*རིགས་བརྗོད་པ་བར་གྱི་གསལ་བྱེད།)ཀུན་མཁྱེན་ཆོས་ཀྱི་རྒྱལ་པོའི་བསྟན་པ་ལ། །ཕན་པ་བགྱིས་པ་ཟླ་མེད་མི་ཡི་ལྷ། །ལུས་ཅན་ཚེ་རིང་སྒྲུབ་པའི་རིག་བྱེད་སོགས། །གཙུག་ལག་
ལུགས་བརྒྱ་མཁྱེན་པའི་དབང་ཕྱུག་དང༌། ༨༨ །(*ལྡན་པའི་གཟུགས་ཅན་ལ་རབ་རྟོག་གིས་སྦ་བ།)སྐྱེ་དགུ་ཡོངས་ཀྱི་བསོད་ནམས་ཁང་པ་རུ། །སྔ་ན་མེད་པའི་བདེ་སྐྱིད་སྙིང་གི་མཛའ། །འགུགས་ཕྱིར་ལྷ་བརྒྱའི་མགོན་པོ་མིག་སྟོང་ཅན། །དབང་གི་ལས་གྲུབ་མི་བདག་རྫུ་འཕྲུལ་ཞུགས། ༨༩ །
(*སྒྲས་ཟིན་མཚུངས་པའི་ལྡོག་པ་ཅན་ལས་གཅིག་གི་ལྡོག་པ་ཅན།)གཙུག་ལག་ཀུན་ལ་བློ་གྲོས་རྣམ་གསལ་ཞིང༌། །གྲགས་སྙན་རྒྱ་མཚོའི་སྐ་རགས་ཅན་མཛེས་པའི། །སྨྲ་མཁས་དེ་ནི་དགེ་དབང་དང་མཚུངས་མོད། །འབྱེད་བྱེད་ཚངས་པར་སྤྱོད་པའི་བརྟུལ་ཞུགས་ཡོད། ༩༠ །(*ཡན་ལག་གཅིག་པའི་གཟུགས་ཅན།)འཇིག་རྟེན་སྟོབས་ཀྱིས་
དྲེགས་པ་བྱེ་བ་བརྒྱའི། །གཙུག་རྒྱན་ནོར་བུའི་ཁྲི་འཕང་ག་ལ་བར། །ཤིན་ཏུ་བརླིང་བར་ངལ་བསོར་སྤྱོད་པའི་དབང༌། །ལས་ཤུགས་བཙན་པོས་བསྐུར་བའི་བླ་མ་ཆེ། ༩༡ །(*རབ་སྤེལ་གྱི་རྒྱན།)ཀུན་དུ་དགའ་བསྐྱེད་ཡིད་གཅུགས་
རྒྱལ་བའི་སྲས། །རྣམ་འདྲེན་བསྟན་པ་སྐྱོང་ལ་སྤྲོ་བའི་རླབས། །སྲིད་པའི་རྩེ་མོར་ལུང་སྙམ་ཆོས་སྲིད་ཀྱི། །ཕྲིན་ལས་རྒྱ་མཚོའི་གོས་ཅན་ཁྱབ་པའི་སྡེ། ༩༢ །(སྐྱེད་བྱེད་འགྲུབ་པའི་རྒྱུ།)གང་དག་སྔོན་གྱི་ཐུགས་བསྐྱེད་རྒྱ་ཆེན་མས། །བྱང་ཆུབ་སྤྱོད་པར་སྤྱད་པའི་སྨོན་ལམ་
Vol. 213 · folio 10b
དབྱངས། །བརྗོད་བྱ་བཟང་པོའི་རོ་ལྡན་བླངས་པ་ཡི། །འབྲས་བུ་ཚེ་འདིའི་གྲོགས་སུ་ཉེ་བར་ལྷགས། ༩༣ །(*ཤེས་བྱེད་ཀྱི་སྒྱུ་ལས་ནང་ཤེས་བྱེད།)སྙིང་སྟོབས་ཆེ་དགུ་ཀུན་གྱིས་མ་སྤོབས་ཤིང༌། །སྟོབས་འབྱོར་མང་པོའི་འཛུམ་གྱིས་མ་ཁུགས་པའི། །བགྱི་བ་འདི་ལ་མེ་ཏོག་གཞུ་ཅན་ཡང༌། །བསླུ་བར་མ་
བཟོད་ཕམ་པའི་གྲགས་པ་བྱུང༌། ༩༤ །(*རྐང་པས་བསྐོར་བའི་རྗེས་ཁྲིད།)རྒྱལ་སྲས་སྙིང་སྟོབས་ལྡན་པས་བསྒྲུབས་ན་སྔོན། །བརྒྱ་ཕྲག་བཅུ་རྫོགས་མིག་གིས་མ་མཐོང་ཞིང༌། །བརྒྱད་ལྡན་རྣ་བ་བས་ཀྱང་མ་ཐོས་པའི། །རྒྱ་ཆེན་རྩོམ་པ་ཀུན་ལ་དཀའ་བ་ཅི། ༩༥ །(*རིགས་རང་བཞིན་བརྗོད་པ།)ཐམས་ཅད་མཁྱེན་པ་
ཉི་མའི་གཉེན་དཔལ་གྱི། །བཀའ་ལུང་སྤྱི་དང་བྱེ་བྲག་དགོངས་པའི་དོན། །རྣམ་པར་འགྲེལ་བའི་བསྟན་བཅོས་གངས་ཅན་པའི། །སྐད་ཀྱི་ལམ་དུ་ལེགས་པར་འགྱུར་རོ་འཚལ། ༩༦(*ཡན་ལག་ཅན་གྱི་གཟུགས་ཅན།)ཀུན་གྱི་ཆོས་སྦྱིན་ཇི་སྲིད་བསྐལ་པའི་བར། །
རྒྱུན་མི་ཆད་པའི་འབྱུང་གནས་པར་ཞེས་པ། །ངོ་མཚར་འཕྲུལ་གྱིི་ཕྱི་མོ་རྫོགས་ལྡན་གྱི། །བསྐལ་པའི་བསོད་ནམས་སྤྲིན་ཕུང་རྒྱས་པར་དཀྲིགས། ༩༧ །(*རྐང་པ་དང་པོ་དང་ཐ་མར་ཡོད་པ་ཆོད་པའི་ཟུང་ལྡན།)རྒྱལ་དང་དེ་ཡི་སྲས་རྣམས་འཇིག་རྟེན་ན། །འབྱོན་དང་བཞུགས་དང་མཛད་པ་མང་སྟོན་
ཡང༌། །སྒྲིབ་པ་བག་ཆགས་བཅས་པ་དཔྱིས་འབྱིན་ལ། །རྒྱལ་གསུང་དམ་པའི་ཆོས་ལས་གཞན་ཡོད་མིན། ༩༨ །(*དེ་ཉིད་བརྗོད་པའི་དཔེ།)ཟང་ཟིང་སྲིད་པའི་རྩེར་མཉམ་གཏོགས་པ་དེ། །སྦྱིན་ཆེན་མ་ཡིན་ཆོས་སྦྱིན་འདི་ཁོ་ན། །གནས་སྐབས་དབུལ་བ་བཅོམ་དེ་ཕན་ཆེན་
ཉིད། །མ་ཡིན་གཏན་དུ་ཕན་འདོགས་བསྒྲུབས་འདིའོ། ༩༩ །(*་ཆ་ཤས་གཟུགས་ཅན།)གཞན་ལ་སྨན་བྱེད་བྱང་ཆུབ་སེམས་མཆོག་གི །བཅུད་ཀྱིས་ལེན་པས་སྙིང་སྟོབས་ཕྲག་པ་དག །ཤིན་ཏུ་བརླིང་བྱས་བསྟན་པའི་ཁུར་གྱི་དབྱིག །འདེགས་པར་ལས་ཀྱི་གནམ་བསྐོས་
བླ་མ་ཆེ། ༡༠༠ །(*ཁྱད་འཕགས་ཕུལ་བྱུང༌།)གང་དྲིན་གལ་ཏེ་གསོབ་འདོད་སྟོང་གསུམ་གྱི། །སྣོད་འདི་བུམ་པ་བརྒྱ་སྐྱེས་དངོས་པོ་ཡིས། །ཡོངས་སུ་ལུད་པ་ཉིད་དུ་གཏམས་བཟོད་ཀྱང༌། །སྟོང་གི་ཆར་ཡང་འཚོབ་པར་མི་འགྱུར་སྙམ། ༡༠༡ །ལེགས་བྱས་རྒྱ་
Vol. 213 · folio 11a
ཆེན་གང་ལས་བརྩམས་པའི་གཏམ། །ཅུང་ཟད་མཉན་པར་འདུན་པའི་བློ་ཅན་དག །ངོ་མཚར་ཆུ་གཏེར་ཡོངས་སུ་འཕེལ་བགྱིད་པའི། །ལེགས་བཤད་ཟླ་བ་གསར་པ་འདི་ན་ངོམ། ༡༠༢ །ཀུན་མཁྱེན་ཉི་མའི་རྩ་ལག་སྲས་བཅས་ཀྱི། །
(བསྡུས་པའི་གཟུགས་ཅན།)རྗེས་སུ་སློབ་པར་འདུན་རྣམས་བརྩེ་བ་ཡིས། །ལེགས་པར་གདམས་པའི་ཚུལ་ཆེན་སྦྱིན་པའི་རྔ། །རྒྱ་ཆེན་བརྡུངས་པའི་ཚུལ་འདིར་དགའ་བས་ཉོན། ༡༠༣ །ཞེས་པ་སྟེ། (ཆ་ཤས་ཅན་གྱི་གཟུགས་ཅན།)དེའང་འཕགས་པའི་ཡུལ་གྱི་སྨྲ་བའི་དབང་
ཕྱུག་ཆེན་པོ་དཔལ་ལྡན་དཎྜཱིས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་དང༌། ས་སྐྱ་པཎྜི་ཏ་ཆེན་པོས། བསྟན་བཅོས་རྩོམ་པའི་དམ་པ་ཡི། །སྟོན་པ་ལ་ནི་མཆོད་བརྗོད་བྱ། །བསྟན་པ་སྤེལ་ཕྱིར་དག་པའི་ཚིག །འདི་ལ་
འཐད་པ་བཟང་པོ་སྣང༌། །ཞེས་གསུངས་པ་ལྟར། སྔོན་བྱོན་མཁས་པ་རྣམས་ཀྱི་རྣམ་པར་ཐར་པའི་རྗེས་སུ་སློབ་པར་འདོད་པའི་འདུན་པས། དབྱངས་ཀྱི་རྒྱལ་མོའི་ཏམྦུ་རའི་རྒྱུད་ལས་འཕོས་པའི་འགྱུར་ཁུགས་སྙན་པའི་དཔལ་ལས་ཡང་དག་པར་དྲངས་པའི་ཚིག་རྒྱན་
གྱི་ཕྲེང་བ་དག་གིས་མཆོད་པར་བརྗོད་པར་བྱ་བ་ཡང༌། འཕགས་པ་བསྐལ་པ་བཟང་པོ་ལས། དེ་བཞིན་གཤེགས་པ་དུས་མཁྱེན་རྒྱལ་པོ་ནི། །སྙན་དངགས་མཁན་ཚེ་བདེ་གཤེགས་རྩ་མཆོག་ལ། །ཚིགས་སུ་བཅད་པའི་དབྱངས་ཀྱིས་བསྟོད་ནས་ཀྱང༌། །དང་
པོར་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་འབྱུང་བ་ལྟར། འདིར་ཡུལ་མཆོག་ཏུ་གྱུར་པ་རྣམས་ཀྱི་སྐུ་གསུང་ཐུགས་ཀྱི་གསང་བ་མི་ཟད་རྒྱན་གྱི་འཁོར་ལོའི་ཡོན་ཏན་གྱི་ཆ་ཤས་ལས་ཉེ་བར་དྲངས་པའི་མཆོད་པར་བརྗོད་པ་དང༌། དངོས་པོ་ངེས་པར་བསྟན་པའི་
ཚིགས་སུ་བཅད་པ་བཅུ་ཕྲག་བཅུ་ལ་གསུམ་གྱིས་ཉེ་བར་ལྷགས་པ་སྔོན་དུ་འགྲོ་བས་ལམ་ཡངས་པོར་བྱས་ནས། སྐབས་སུ་བབ་པའི་གླེང་བར་བྱ་བ་ཉིད་ནི་འདི་ལྟར་སློབ་དཔོན་དབྱིག་གཉེན་གྱིས། མདོ་དོན་ཆེ་བ་ཉིད་ཐོས་ནས། །ཉན་པ་དང་ནི་འཛིན་པ་ལ། །ཉན་པ་པོ་ནི་གུས་
Vol. 213 · folio 11b
བྱེད་པས། །ཐོག་མར་དགོས་པ་བརྗོད་པར་བྱ། །ཞེས་གསུངས་པ་ལྟར། སྒྲོན་མའི་བསྐལ་པའི་བསྐལ་པ་བཟང་པོའི་འཆི་བ་མེད་པའི་ལམ་དུ། གང་དག་བྱོན་པ་དང་འབྱོན་པར་འགྱུར་བའི་རྣམ་པ་ཐམས་ཅད་མཁྱེན་པའི་ཆོས་ཀྱི་སྣང་བྱེད་ཆེན་པོ་སྟོང་ཕྲག་གཅིག་གམ་
སྟོང་དང་ལྔ་འབྱུང་བར་ལུང་བསྟན་པ་ལས། བྱང་ཆུབ་ཀྱི་མཆོག་ཏུ་ཐུགས་བསྐྱེད་ཅིང༌། ཞིང་བཟུང་བའི་ཚེ་ན་གང་དག་སྐར་མ་སྐྱོང་ལ་སོགས་པའི་བྲམ་ཟེའི་རིག་བྱེད་སློབ་པ་སྟོང་རྩ་བཞི་པོ་དག་ཀྱང་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་སེམས་བསྐྱེད་ཅིང་ཞིང་བཟུང་ཡང༌།
དེ་དག་གིས་སྤངས་པར་གྱུར་པའི་རྩོད་དུས་ཀྱི་སེམས་ཅན་རྣམས་ཚེ་ལོ་བརྒྱ་ཉི་ཤུ་པའི་བར་དུ་གྱུར་པ་ན། བདེ་བ་དང༌། དབང་ཕྱུག་དང༌། རིགས་དང༌། གཟུགས་ཀྱི་དྲེགས་པས་མྱོས་ཤིང་སེར་སྣ་ཅན་དུ་གྱུར་ཏེ། ཚེ་དང༌། ལས་དང༌། སེམས་ཅན་དང༌། ལྟ་བ་དང༌། ཉོན་
མོངས་པ་སྟེ་སྙིགས་མ་ལྔའི་མུན་པར་གྱུར་པའི་སེམས་ཅན་འདོད་ཆགས་བདོ་བ། ཞེ་སྡང་བདོ་བ། གཏི་མུག་བདོ་བ། ང་རྒྱལ་བདོ་བ། སྡིག་པ་དང་ཕྲག་དོག་དང་སེར་སྣ་བདོ་བ། ཆོས་མ་ལགས་པར་འདོད་ཆགས་ཀྱིས་ཆགས་པ། ཆོས་མ་ལགས་པའི་ལོངས་སྤྱོད་
ཚོལ་བ། ལོག་པར་ལྟ་བ། ཕྱིན་ཅི་ལོག་ཏུ་མཐོང་བ། འཕགས་པའི་ནོར་བདུན་དང་བྲལ་བ། ཕར་མི་འཛིན་པ། མར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། བགྱི་བ་མ་ལགས་པ་བགྱི་བ། བསོད་ནམས་མ་ལགས་པ་བསགས་པ། འཇིག་
རྟེན་ཕ་རོལ་ལ་འཇིགས་པར་མི་ལྟ་བ། བསོད་ནམས་བགྱི་བའི་དངོས་པོ་གསུམ་པོ་དག་ལ་མི་བརྩོན་པ་ལ་སོགས་པ་ཞིང་མ་དག་པ་མི་མཇེད་ཞིང་གི་སེམས་ཅན་ཤིན་ཏུ་གདུལ་དཀའ་བ་རྣམས་ལ་ཐུགས་བརྩེས་ལྷག་པར་གཟིགས་སོ། །གཟིགས་ནས་ཀྱང་སྨོན་ལམ་གྱི་ཆུ་
གཏེར་ཆེན་པོ་ཤིན་ཏུ་ཟབ་ཅིང་གཏིང་དཔོག་པར་དཀའ་བ་ལྔ་བརྒྱ་བཏབ་སྟེ་བདེན་པའི་སྟོབས་བརྗོད་པས། དེ་བཞིན་གཤེགས་པ་རིན་ཆེན་སྙིང་པོས་ལེགས་སོ་བཟླས་པས་བྱིན་གྱིས་བརླབས་པ་སྔོན་དུ་འགྲོ་བས། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་རྩོམ་པའི་
Vol. 213 · folio 12a
དངོས་པོ་ཕུལ་དུ་བྱུང་བ་རྣམ་པ་བཞི་དང་ལྡན་ཞིང༌། ལེ་ལོའི་དངོས་པོ་བཞི་ཡོངས་སུ་བོར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་པདྨ་དཀར་པོ་ལྟ་བུའོ་ཞེས་རྒྱ་ཆེར་བསྔགས་ཤིང་བསྐལ་པ་བཟང་པོའི་དེ་བཞིན་གཤེགས་པ་བཞི་པ་ཉིད་
དུ་ལུང་བསྟན་ཏོ། །གཞན་ཡང་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱང་མེ་ཏོག་ཟླ་བ་མདོག་མཛེས་དྲི་མ་མེད་པ་དག་སྐྱེས་སུ་སྩལ་བ་དང༌། ལྷ་དང་མིའི་སྐྱེ་དགུ་མང་པོས་མངོན་པར་མཆོད་པ་ལ་སོགས་པའི་ངོ་མཚར་གཏམ་གྱི་ཕུང་པོ་གང་དེ་ལྷ་དང་མིའི་
འཇིག་རྟེན་གྱི་ཁམས་ན་སྙན་དངགས་སྨྲ་བའི་དབང་པོ་ཇི་སྙེད་པ་དེ་སྙེད་ཀྱིས་རྗོད་པར་བྱེད་པའི་གླིང་བུ་དམ་པ་བྱེ་བ་ཕྲག་བརྒྱས་བསྐལ་པ་ནས་བསྐལ་པའི་ཕྲེང་བར་བསྔགས་ཀྱང་མུར་ཐུག་པ་མེད་པའི་བདག་ཉིད་ཅན་གཅིག་པུ། བདག་ཅག་གི་སྟོན་པ་བླ་ན་མེད་པ་
ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པའི་ཉིན་མོར་བྱེད་པ་ཆེན་པོ། རིས་སུ་མ་ཆད་པའི་སེམས་ཅན་ཐམས་ཅད་ལ་སྨན་པའི་ཐུགས་རྗེ་ཆེན་པོའི་བཞིན་གྱི་དཀྱིལ་འཁོར་ཕྱོགས་ཐམས་ཅད་ནས་ཡོངས་སུ་རྫོགས་པའི་བདག་ཉིད་ཅན་ཏེ། འདི་
ལྟར་མི་མཇེད་ཀྱི་བདག་པོ་ཚངས་པ་དང༌། དྲག་པོ་དང༌། སྲེད་མེད་ཀྱི་བུ་དང༌། མིག་སྟོང་ལྡན་པ་དང༌། ནམ་མཁའ་ལྡིང་དང༌། མིའམ་ཅིའི་རྒྱལ་པོ་དང༌། གདེངས་ཅན་དབང་པོ་དང༌། ལྷ་མ་ཡིན་གྱི་རྒྱལ་པོ་ལ་སོགས་པ་འཇིག་རྟེན་པའི་གོ་སར་ཆེ་ཞིང་ཆེ་བར་རློམ་
པ་ཐམས་ཅད་ཀྱང་ཡིད་བཞིན་གྱི་ནོར་བུ་རིན་པོ་ཆེ་འོད་ཟེར་སྟོང་གི་དྲྭ་བས་མངོན་པར་དཀྲིགས་པ། ལྷ་དང་མི་ལས་ཁྱད་པར་འཕགས་པའི་རྒྱན་གྱི་རྣམ་པ་མང་པོས་ཉེ་བར་སྤུད་པའི་རལ་པའི་དོ་ཀེར་གྱི་རྩེ་མོ་དག་གིས་ལན་ཅིག་མིན་པར་ཡང་ནས་ཡང་དུ་བཏུད་པར་བྱས་པ། གང་གི་ཞབས་
སེན་རིན་པོ་ཆེའི་པདྨ་རཱ་གའི་ཁ་དོག་གི་དཔལ་ལ་ལན་བརྒྱར་འཁུ་བའི་ལམ་ནས་ཉེ་བར་འཕོས་པའི་རྡུལ་གྱི་ཟེགས་མ་རེ་རེ་ཡང༌། ཇི་སྲིད་ལེགས་བྱས་རྒྱ་མཚོའི་ཕ་རོལ་ཏུ་སོན་པར་མ་གྱུར་པ་དེ་སྲིད་དུ་ཐོབ་པར་དཀའ་བ་དེ་ཉིད་ཀྱིས། སྙིགས་མའི་དུས་ཀྱི་སེམས་ཅན་ལས་
Vol. 213 · folio 12b
དང་ཉོན་མོངས་པའི་ཀུན་འབྱུང་གི་དབའ་རླབས་ཀྱི་ཤུགས་དྲག་པོ་རྒྱུན་མི་ཆད་པར་གཡོ་བས་རང་དབང་མེད་པར་བསྐྱོད་ཅིང༌། བརྣག་པར་དཀའ་བའི་སྡུག་བསྔལ་གྱི་ཟུག་རྔུ་རྣམ་པ་གསུམ་མམ་བརྒྱད་ཀྱི་གདུང་བ་ཤིན་ཏུ་བཟོད་བརླག་མེད་པའི་ཆུ་སྲིན་ཆེན་པོས་ཡོངས་སུ་
གང་བའི་སྲིད་པའི་རྒྱ་མཚོ་ཆེན་པོ་མཐའ་མེད་པ་རྣམས་སུ་བྱིང་བ་དག་ལ་ཉེ་བར་གཟིགས་སོ། །གཟིགས་ནས་ཀྱང་དེ་ལས་ཐར་བར་བྱ་བའི་ཐབས་ཀྱི་སྒོ་མང་པོ་ཕྱོགས་དུ་མ་ནས་དབྱེ་བའི་ཕྱིར། དཔལ་གྱི་མགུར། དུང་གི་ཚེམས་བར་ནས་འཕྲུལ་གྱི་ལྗགས་བརྐྱངས་ཏེ།
ཚངས་པའི་དབྱངས་ཡན་ལག་དྲུག་ཅུའི་གདངས་སུ་བསྒྱུར་ནས་ཆོས་ཀྱི་འཁོར་ལོ་མ་ལུས་པ་བསྐོར་ཏེ་དམ་པའི་ཆོས་ཀྱི་སྣང་བ་ཆེན་པོས་འཇིག་རྟེན་གྱི་ཁམས་ཀུན་དུ་སྣང་བར་བཀྱེ་བས། ཆུ་སྲིན་རྒྱལ་མཚན་ཐོགས་པ་སྡེ་དང་བཅས་པའི་སྟོབས་དང་འབྱོར་པ་མ་ལུས་པ་
སྟོངས་པར་བྱས། སེམས་ཅན་ཐམས་ཅད་ཀྱི་མ་རིག་པའི་ལིང་ཏོག་ནི་བསལ། མ་རྟོགས་པ་དང་ལོག་པར་རྟོགས་པ་དང་ཐེ་ཚོམ་གྱི་དྲྭ་བ་ནི་དྲལ། བདག་ཏུ་ལྟ་བའི་འཆིང་བ་དམ་པོ་ནི་བཀྲོལ། ལས་དང་ཉོན་མོངས་པའི་ཀུན་འབྱུང་གི་འབབ་ཆུ་དྲག་པོའི་རྒྱུན་ནི་
བཟློག །ང་རྒྱལ་གྱི་བྲག་རི་མཐོན་པོ་ནི་བསྙིལ། འདོད་ཆགས་ཀྱི་མེ་དཔུང་རབ་ཏུ་འབར་བ་ནི་བཅིལ། ཞེ་སྡང་གི་མཚོན་རྣོན་པོ་ནི་བརྟུལ། སྡུག་བསྔལ་རྣམ་པ་གསུམ་གྱི་དབའ་རླབས་ཀྱི་ལྕེ་ཞགས་དྲག་པོ་གནམ་དུ་འཕྱོ་བ་སྲིད་པའི་རྒྱ་མཚོ་ནི་ཟད་པའི་མཐའ་ཅན་དུ་
བྱས། མཐའ་ཡས་པའི་གདུལ་བྱ་རྣམ་པ་སྣ་ཚོགས་པ་དག་རང་རང་གི་མོས་པ་དང་བག་ལ་ཉལ་དང་རྗེས་སུ་མཐུན་པར་ལེགས་པར་གསུངས་པའི་ཆོས་ཀྱི་ཕུང་པོའི་བགོ་སྐལ་ཟད་མི་ཤེས་པར་སྩལ་བའི་སྒོ་ནས། འཇིག་རྟེན་གསུམ་པོ་མཐའ་དག་བླ་ན་མེད་པའི་འབྱོར་པ་ཕུན་
སུམ་ཚོགས་པའི་ཁུར་གྱིས་ཡོངས་སུ་ལྕི་བར་མཛད་དོ། །གཞན་ཡང་སྟོན་པ་ཉིད་ཀྱི་གཉིས་སུ་མེད་པའི་ཡེ་ཤེས་ཀྱི་རྣམ་པར་འཕྲུལ་པའི་རྒྱལ་བའི་མྱུ་གུ་གྲངས་མེད་པ་དག་ཀྱང་བྱོན་ནས་ཁ་ཅིག་གིས་ནི་བཀའ་ལུང་འཐོར་བ་སྡུད་པ་དང་སླད་འབྱིན་པ་ལ་སོགས་པའི་
Vol. 213 · folio 13a
སྒོ་ནས་ཡང་དག་པ་ཉིད་དུ་བསྡུས་སོ། །ལ་ལས་ནི་དགོངས་དོན་ཕྱིན་ཅི་མ་ལོག་པ་ཉིད་དུ་བཀྲལ་ལོ། །ལ་ལས་ནི་གཞན་ལ་རྒྱ་ཆེར་ཡང་དག་པ་ཉིད་དུ་བཤད་དོ། །ལ་ལས་ནི་ཚུལ་བཞིན་དུ་བསྒྲུབས་པ་ལ་སོགས་པའི་ཚུལ་གྱིས་ཆོས་ཤིན་
ཏུ་དར་ཞིང་རྒྱས་པར་མཛད་པའི་རྣམ་པར་ཐར་པའི་འཕྲིན་ཡིག་དམ་པའི་ཟེགས་མ་ཕྲ་མོ་རེ་ཡང་མིག་གི་དབང་པོའི་ལོངས་སུ་སྤྱད་པར་བྱ་བའི་བགོ་སྐལ་དུ་ཐོབ་པའམ། ཐོས་པ་འཛིན་པའི་སྣོད་ཀྱི་བུ་ག་དག་ཏུ་ལྷུང་བར་གྱུར་པའམ། ཡིད་ཀྱི་རྩིག་ངོས་སྐྱོན་མེད་པ་གང་
དུ་རྗེས་སུ་སེམས་པའི་པིར་གྱི་རྩེ་མོས་འདྲི་བར་བྱེད་པ་གང་དག་གི་རྒྱུད་ལ་དད་པ་གསུམ་གྱི་ཆུ་གཏེར་རབ་ཏུ་འཕེལ་བར་འགྱུར་བའི་ཡོན་ཏན་དང་ཐུགས་རྗེར་ལྡན་པའི་མི་མཆོག་དམ་པ་དེ་དག་གི་བཀའ་དྲིན་རྗེས་སུ་དྲན་ཅིང་བྱས་པ་དྲིན་དུ་གཟོ་བའི་ཕྱིར་དང༌། བློ་དང་ལྡན་
པའི་སྐྱེ་བོ་གཞན་དག་ལའང་འདྲི་བ་དང༌། འཛིན་པ་དང༌། འཆང་བ་དང༌། ཀློག་པ་དང༌། ལུང་ལེན་པ་དང༌། ཁ་ཏོན་དུ་བྱེད་པ་དང༌། ཚུལ་བཞིན་དུ་ཡིད་ལ་བྱེད་པ་དང༌། གཞན་དག་ལའང་རྒྱ་ཆེར་སྤེལ་བ་ལ་སོགས་པའི་སྒོ་ནས། རྟག་ཏུ་འབད་པར་བགྱི་
པའི་སྙིང་པོ་ལས་ཀྱང་ཆོས་སྙིང་པོར་གྱུར་པ་ནི་དམ་པའི་ཆོས་ཚུལ་རྣམ་པར་དག་པ་འདི་དག་གོ་ཞེས་རྗེས་སུ་གདམས་ཤིང་ངེས་པར་བྱ་བའི་ཆེད་དུ་ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་རྣམ་པར་འགྲེལ་པའི་བསྟན་བཅོས་གངས་ཅན་
པའི་སྐད་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་ལྡན་བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པའི་ཚུལ་ལས་བརྩམས་པའི་གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་པ་ཞེས་བྱ་བ་
འདི་འཆད་པ་ལ། བཀྲ་ཤིས་པའི་གྲངས་ཀྱིས་རྣམ་པར་ངེས་པར་བྱ་བ་སྟེ། དེའང་ཡིད་ཆེས་བསྐྱེད་པའི་ཆེད་དུ་བསྟན་པ་གང་ལས་བྱུང་བ། སྤྲོ་བ་བསྐྱེད་པའི་ཆེད་དུ་བསྟན་སྐྱོང་རྣམས་ཀྱིས་བྱ་བ་བྱས་པ། བཀྲལ་བྱ་ངེས་པའི་ཆེད་དུ་དམ་པའི་ཆོས་ཀྱི་རྣམ་པར་གཞག་
Vol. 213 · folio 13b
པ། འགྲེལ་ཚུལ་ངེས་པའི་ཆེད་དུ་བསྟན་བཅོས་ཀུན་གྱི་རྣམ་པར་གཞག་པ། བསྟན་པ་གནས་པའི་ཆེད་དུ་དགོངས་འགྲེལ་པར་དུ་སྒྲུབ་པར་བསྐུལ་བ། བསྐུལ་བ་མི་ལྡོག་ཆེད་དུ་ཇི་ལྟར་པར་དུ་སྒྲུབ་པ། དགོས་དོན་རྟོགས་པར་སླ་ཕྱིར་ཆོས་ཀྱི་བཞུགས་བྱང་སྨོས་པ།
བརྩམས་པ་དོན་ཡོད་ཆེད་དུ་དགེ་བ་བྱང་ཆུབ་ཏུ་བསྔོ་བའོ། །དང་པོ་ཡིད་ཆེས་བསྐྱེད་པའི་ཆེད་དུ་བསྟན་པ་གང་ལས་བྱུང་བ་བརྗོད་པ་ལ་གཉིས་ཏེ། སྟོན་པ་སངས་རྒྱས་ཇི་ལྟར་བྱོན་པ་དང༌། ཆོས་ཀྱི་འཁོར་ལོ་ཇི་ལྟར་བསྐོར་བའོ། །དང་པོ་ལ་སྟོན་པ་གང་དུ་བྱོན་པའི་ཞིང་
དང༌། དེར་ཇི་ལྟར་བྱོན་པ་དངོས་སོ། །དང་པོ་ལ་ཞིང་སྤྱིར་བཤད་པ་དང༌། བྱེ་བྲག་ཏུ་མི་མཇེད་ཀྱི་ཞིང་ངོས་བཟུང་བའོ། །དང་པོ་ལའང་ལོངས་སྤྱོད་རྫོགས་པའི་སྐུའི་ཞིང་དང༌། སྤྲུལ་པའི་སྐུའི་ཞིང་གཉིས་ལས། དང་པོ་ལོངས་སྤྱོད་རྫོགས་པའི་སྐུའི་ཞིང་ནི་ངེས་པ་
བཞིའམ་ཕུན་སུམ་ཚོགས་པ་བཞི་དང་ལྡན་པ་གང་དུ་ཡོད་པའི་གནས་ཕུན་སུམ་ཚོགས་པ་ཞིག་སྟེ། བཞི་ནི་སྟོན་པ་དང༌། འཁོར་དང༌། དུས་དང༌། ཆོས་ཕུན་སུམ་ཚོགས་པའོ། །དེ་ལ་སྟོན་པ་ནི་ཡང་དག་པར་རྫོགས་པའི་སངས་རྒྱས་ལོངས་སྤྱོད་རྫོགས་པའི་སྐུ་
མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་སྤྲས་པའི་བདག་ཉིད་ཅན་དུ་གྱུར་པའོ། །འཁོར་ནི་བྱང་ཆུབ་སེམས་དཔའ་ས་བཅུ་པ་ཐོབ་པ་ཡན་ཆད་ཀྱི་ཡུལ་དུ་གྱུར་པ་སྟེ། ས་དང་པོ་ཐོབ་པ་ཡན་ཆད་ཀྱི་ཡུལ་དུ་གྱུར་པ་ལ་འདོད་པ་ནི་སྤྲུལ་པའི་སྐུ་
ཁྱད་པར་ཅན་ལ་ལོངས་སྤྱོད་རྫོགས་པའི་སྐུར་བཏགས་པར་དབུ་མ་པ་ཆོས་ཀྱི་བཤེས་གཉེན་གྱིས་བཤད་པ་ལྟར་ཤེས་པར་བྱའོ། །དུས་ནི་རྒྱུན་མི་ཆད་པར་གནས་པ་སྟེ། རྟག་པ་བརྟན་པ་མཆོག་ཏུ་ཡང་ཞེས་གསུངས་པ་ལྟ་བུའོ། །ཆོས་ནི་ཐེག་པ་ཆེན་པོའི་ཆོས་
ཟབ་པ་དང་རྒྱ་ཆེ་བའི་ལོངས་སྤྱོད་རྒྱུན་མི་ཆད་པར་འབྱུང་བ་སྟེ། དེ་ལ་སངས་རྒྱས་ཀྱི་ཆོས་མི་འགྱུར་བའི་འཁོར་ལོ་ཞེས་བྱའོ། །དེ་དག་ཞིབ་ཏུ་བཤད་པ་ནི་འདིར་སངས་རྒྱས་ཀྱི་ཞིང་གཙོ་བོར་འཆད་པའི་སྐབས་ཡིན་པས་རྒྱས་པར་མ་སྤྲོས་སོ། །དེ་ལྟ་བུའི་ངེས་པ་
Vol. 213 · folio 14a
བཞིའམ་ཕུན་སུམ་ཚོགས་པ་བཞི་གང་ལ་ཡོད་པའི་གནས་དེ་ལ་སྟུག་པོ་བཀོད་པའམ་འོག་མིན་ཞེས་བྱ་ཞིང༌། དེ་ནི་ལོངས་སྤྱོད་རྫོགས་པའི་སངས་རྒྱས་ཀྱི་ཞིང་ཉིད་དོ། །སངས་རྒྱས་ཀྱི་ཞིང་དེ་ན་བདག་ཅག་གི་སྟོན་པ་འདི་ཉིད་བསྐལ་པ་དཔག་ཏུ་
མེད་པའི་དུས་ནས་མངོན་པར་རྫོགས་པར་སངས་རྒྱས་ཏེ་ལོངས་སྤྱོད་རྫོགས་པའི་སྐུར་བཞེངས་པའི་གནས་ཡིན་ནོ། །དེ་ལྟར་ཡང་སློབ་དཔོན་ངག་གི་དབང་ཕྱུག་གྲགས་པས་འཆི་བདག་བསླུ་བའི་རྟོག་པ་ལས། དཔལ་ལྡན་སྟུག་པོ་བཀོད་པ་ཉིད་དུ་དོན་དམ་ཐུགས་ཆུད་ཅིང༌།
དགའ་ལྡན་སྐྱེ་བོའི་དོན་མཛད་ཕྱིར་ན་དམ་པ་ཏོག་དཀར་གྱུར། །དེ་ནས་འདིར་ནི་འགྲོ་བའི་དོན་དུ་ཤཱཀྱའི་ཏོག་གྱུར་གང༌། །འཆི་བདག་ལས་རྒྱལ་སྒྱུ་མ་ཀུན་སྟོན་དེ་ནི་རྒྱལ་གྱུར་ཅིག །ཅེས་དང༌། ལངྐར་གཤེགས་པ་ལས། གཙང་མའི་རིགས་དག་སྤངས་པ་ཡི། །འོག་
མིན་ཞེས་བྱ་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་རྣམས་ནི་འདིར་འཚང་རྒྱ། །ཞེས་སོ། །དེ་ལ་འོག་མིན་ཞེས་བྱ་བའི་དོན་ནི། དེ་ཉིད་འདུས་པའི་གླེང་གཞིར་བཅོམ་ལྡན་འདས་འོག་མིན་གྱི་ལྷའི་རྒྱལ་པོའི་གནས་ན་བཞུགས་ཏེ་
ཞེས་བྱ་བའི་འགྲེལ་པར། འོག་མིན་གྱི་ལྷ་ཞེས་བྱ་བ་ནི་ཐོག་མའི་ལྷ་སྟེ། བཅོམ་ལྡན་འདས་རྣམ་པར་སྣང་མཛད་ཀྱི་སྲས་ཀྱི་ཐུ་བོ་སྟེ་ས་བཅུའི་བྱང་ཆུབ་སེམས་དཔའོ། །དེའི་གནས་ནི་ཐོག་མར་སངས་རྒྱས་པའི་གནས་སོ་ཞེས་སློབ་དཔོན་ཀུན་དགའ་སྙིང་པོས་བཤད་དོ། །
དེ་ལྟར་བཤད་པའི་འོག་མིན་དེ་ལ་ངོས་འཛིན་ཚུལ་མི་འདྲ་བ་འགའ་རེ་འབྱུང་སྟེ། བཀས་བཅད་བར་པར། འོག་མིན་ནི་གཙང་མའི་གནས་ཀྱི་ལོགས་ཤིག་ན་ཡོད་པར་བཤད་དེ། དེ་བཞིན་དུ་ཁ་ཅིག་གནས་གཙང་མའི་སྟེང་མ་ནི་འོག་མིན་ཞེས་བྱ་བ་ཡིན་ལ། དེ་དག་
སྤངས་པའི་སྟེང་ན་དབང་ཕྱུག་ཆེན་པོའི་གནས་གཞན་འོག་མིན་ཞེས་བྱ་བ་ཡོད་དོ་ཞེས་འོག་མིན་ཕལ་པའི་སྟེང་ན་ཡོད་པར་འདོད་དོ། །སློབ་དཔོན་བསོད་ནམས་རྩེ་མོ་ལ་སོགས་པ་མཁས་པ་ཕལ་ཆེ་བ་དག་ནི། དེ་ལྟར་བཞེད་པ་དེ་ནི་འཇིག་རྟེན་གྱི་ཁམས་ཆུང་ངུ་ཡང་
Vol. 213 · folio 14b
ཡིན་ཞིང་ལོངས་སྤྱོད་རྫོགས་པའི་སངས་རྒྱས་ཀྱི་ཞིང་མ་ཡིན་ཏེ། འཇིག་རྟེན་གྱི་ཁམས་དེ་དག་ནི་མི་རྟག་པ་ཡིན་པའི་ཕྱིར་རོ། །སྟུག་པོ་བཀོད་པ་ནི་མི་འཇིག་པ་ཡིན་ཏེ། རྡོ་རྗེ་རྩེ་མོ་ལས། འོག་མིན་སྟུག་པོ་ཉམས་དགའ་འདི། །སྟུག་པོའི་ཞིང་ཁམས་འཇིག་
མེད་པ། །དེ་ན་སངས་རྒྱས་རྣམས་ཀྱི་ཆོས། །རྫོགས་པར་ལོངས་སྤྱོད་ཚུལ་འདི་འབྱུང༌། །ཞེས་ཇི་སྐད་བསྟན་པ་ལྟར་ཡིན་ནོ། །དེ་ལའང་སྟུག་པོའི་ཞིང་ཁམས་དེའི་ཁྱད་པར་ཅི་ལྟ་བུ་ཞིག་གོ་སྙམ་ན། སློབ་དཔོན་རྩེ་མོས། སངས་རྒྱས་ཕལ་པོ་ཆེའི་མདོ་དང༌། དེ་ཉིད་
འདུས་པ་དང༌། དབང་བསྐུར་བའི་རྒྱུད་ལ་སོགས་པའི་རྗེས་སུ་འབྲངས་ནས་ཐེག་པ་ཆེན་པོ་ཐུན་མོང་དང་ཐུན་མོང་མ་ཡིན་པ་སྒོ་བསྟུན་ནས་བཤད་པ་ནི། འདི་ལྟར་འཇིག་རྟེན་གྱི་ཁམས་མི་མཇེད་ལ་སོགས་པ་བསམ་གྱིས་མི་ཁྱབ་པ་ནང་དུ་ཆུད་པ་ནི་གཞི་དང་སྙིང་པོ་མེ་ཏོག་
གི་རྒྱན་གྱིས་བརྒྱན་པ་ཞེས་བྱ་བ་ཡིན་ནོ། །དེ་ལྟ་བུ་བསམ་གྱིས་མི་ཁྱབ་པ་ནང་དུ་ཆུད་པ་ནི་འཇིག་རྟེན་གྱི་ཁམས་རྒྱ་མཚོ་ཞེས་བྱ་བ་ཡིན་ནོ། །འཇིག་རྟེན་གྱི་ཁམས་རྒྱ་མཚོ་དེ་ནི་དེ་བཞིན་གཤེགས་པ་རྣམ་པར་སྣང་མཛད་ཡེ་ཤེས་གང་ཆེན་མཚོའི་ཕྱག་གི་མཐིལ་
གྱི་སྙིང་པོ་ལ་གནས་སོ། །བཅོམ་ལྡན་འདས་དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འཁོར་དང་བཅས་པ་གང་ན་བཞུགས་པའི་གནས་དེ་ནི་སྟུག་པོ་བཀོད་པའི་ཞིང་ཁམས་ཞེས་བྱ་བ་ཡང་དག་པར་རྫོགས་པའི་སངས་རྒྱས་ལོངས་སྤྱོད་རྫོགས་པའི་སྐུའི་
གནས་ཡིན་ནོ་ཞེས་བཞེད་པ་ལྟར་རོ། །དེའང་བསམ་གྱིས་མི་ཁྱབ་པ་ཞེས་འབྱུང་བའི་དོན་དེ་ཉིད་འཇིག་རྟེན་གྱི་ཁམས་བགྲང་བའི་གྲངས་ཀྱིས་ངེས་པར་བྱ་བའི་ཕྱིར་ཅུང་ཟད་བཤད་ན། མངོན་པ་མཛོད་ལས། གླིང་བཞི་པ་དང་ཉི་ཟླ་དང༌། །རི་རབ་དང་ནི་འདོད་ལྷ་
དང༌། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་མོ། །མཉམ་དུ་འཇིག་ཅིང་འབྱུང་བ་ཡིན། །ཞེས་པ་ལྟར་རླུང་གི་དཀྱིལ་འཁོར་ནས་ཚངས་
Vol. 213 · folio 15a
པའི་འཇིག་རྟེན་གྱི་བསམ་གཏན་དང་པོའི་བར་དང༌། ཕྱི་རོལ་ཁོར་ཡུག་གི་ལྕགས་རིའི་མུ་ཁྱུད་ཀྱིས་ཡོངས་སུ་བསྐོར་བ་དང་བཅས་པ་ལ་ནི་གླིང་བཞི་པའི་འཇིག་རྟེན་གྱི་ཁམས་ཞེས་བྱའོ། །དེ་ཉིད་གཅིག་ནས་བགྲངས་པའི་སྟོང་དུ་ལངས་པ་གང་
ཡིན་པ་དེ་ལ་ནི་སྟོང་ཆུང་ངུའི་འཇིག་རྟེན་གྱི་ཁམས་ཞེས་བྱ་སྟེ་མུ་ཁྱུད་གཅིག་གིས་ཡོངས་སུ་བསྐོར་བའོ། །སྟོང་ཆུང་ངུའི་འཇིག་རྟེན་གྱི་ཁམས་གཅིག་ནས་བགྲངས་པའི་སྟོང་དུ་ལངས་པ་གང་ཡིན་པ་དེ་ལ་ནི་སྟོང་གཉིས་པ་བར་མའི་འཇིག་རྟེན་གྱི་ཁམས་ཞེས་བྱ་སྟེ།
མུ་ཁྱུད་གཅིག་གིས་ཡོངས་སུ་བསྐོར་བའོ། །དེ་ཡང་གཅིག་ནས་བགྲངས་པའི་སྟོང་དུ་ལངས་པ་གང་ཡིན་པ་དེ་ལ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ་སྟེ་མུ་ཁྱུད་གཅིག་གིས་ཡོངས་སུ་བསྐོར་བའོ། །དེ་ལྟ་བུའི་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་བྱེ་བ་ཕྲག་བརྒྱ་ལ་ནི་རབ་འབྱམས་ཀྱི་མཚམས་སྦྱོར་བ་གཅིག་གོ །དེ་བྱེ་བ་ཕྲག་བརྒྱ་ལ་ནི་རབ་འབྱམས་ཀྱི་རྒྱུད་གཅིག་གོ །དེ་བྱེ་བ་ཕྲག་བརྒྱ་ལ་ནི་རབ་འབྱམས་ཀྱི་རྒྱུད་བར་མ་གཅིག་གོ །དེ་བྱེ་བ་ཕྲག་བརྒྱ་ལ་ནི་མེ་ཏོག་གི་གཞིའི་སྙིང་པོའི་
རྒྱན་བཀོད་པ་གཅིག་གོ །འདི་ནི་བཅོམ་ལྡན་འདས་རྣམ་པར་སྣང་མཛད་དེའི་རྣམ་པར་སྨིན་པའི་སངས་རྒྱས་ཀྱི་ཞིང་ངོ༌། །དེའང་སངས་རྒྱས་བཅོམ་ལྡན་འདས་རྣམ་པར་སྣང་མཛད་གང་ཆེན་མཚོའི་ཕྱག་གི་རྡུལ་ཕྲ་རབ་གཅིག་ལ་གནས་ཤིང༌། དེ་ལྟ་བུའི་རྣམ་
པར་སྣང་མཛད་དེ་ནི་ལོངས་སྤྱོད་རྫོགས་པའི་སྐུའི་བདག་ཉིད་ཅན་ནོ། །ཚུལ་འདི་དག་ནི་དབུ་མ་པ་ཆོས་ཀྱི་བཤེས་གཉེན་ལ་སོགས་པ་ཡོངས་སུ་གྲགས་པའི་མཁས་པ་རྣམས་ཀྱི་བཞེད་པ་མཐུན་པར་འབྱུང་ངོ༌། །དེ་ལྟ་བུའི་སངས་རྒྱས་ཀྱི་ཞིང་དེ་ནི་བཅོམ་ལྡན་འདས་
རྣམ་པར་སྣང་མཛད་ཀྱིས་སྔོན་གྱི་དུས་སུ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། བསྐལ་པ་བསམ་གྱིས་མི་ཁྱབ་ཅིང་བརྗོད་དུ་མེད་པ་རྣམས་སུ། འཇིག་རྟེན་གྱི་ཁམས་བསམ་གྱིས་མི་ཁྱབ་ཅིང་བརྗོད་དུ་མེད་པ་ཡོངས་སུ་དག་པར་བྱས་ཏེ། བསྐལ་པ་རེ་རེ་ལའང་
Vol. 213 · folio 15b
དེ་བཞིན་གཤེགས་པ་བསམ་གྱིས་མི་ཁྱབ་ཅིང་བརྗོད་དུ་མེད་པའི་དྲུང་དུ། བྱང་ཆུབ་ཀྱི་སྤྱོད་པ་སྤྱད་པའི་སྨོན་ལམ་བསམ་གྱིས་མི་ཁྱབ་པ་ཡོངས་སུ་སྦྱངས་པའི་སྟོབས་ལས་བྱུང་བ་སྟེ། སངས་རྒྱས་ཕལ་པོ་ཆེར་བྱང་ཆུབ་སེམས་དཔའ་ཀུན་དུ་བཟང་པོས། གཞི་རྒྱན་
མེ་ཏོག་འཇིག་རྟེན་ཁམས་ཀྱི་རྒྱ་མཚོ་དེ། །རིན་ཆེན་ཀུན་གྱི་སྙིང་པོ་ཁ་དོག་སྣ་ཚོགས་ཏེ། །རྡུལ་རྣམས་ཀུན་དང་མཉམ་པའི་སྔན་ཅད་སངས་རྒྱས་ཀྱི། །དྲུང་དུ་སྔོན་ཚེ་རྒྱ་མཚོར་སྦྱངས་པ་དྲི་མེད་པས། །རྒྱ་ཆེན་སྙིང་རྗེའི་སྤྲིན་གྱིས་ཁམས་རྣམས་ཀུན་བཀང་ཞིང༌། །
ཞིང་གི་རྡུལ་དང་མཉམ་པའི་ལུས་ཀྱང་ཀུན་བཏང་ནས། །སྔོན་གྱི་བསྐལ་པ་རྒྱ་མཚོར་སྤྱོད་པ་སྤྱད་པས་ན། །འཇིག་རྟེན་རྒྱ་མཚོའི་ཁམས་དེ་ཡངས་ཤིང་རྣམ་པར་དག །སངས་རྒྱས་རྣམ་པར་སྣང་བས་སྨོན་ལམ་ཆེ་མཛད་དེ། །འོད་སྣང་བཏང་བ་ནམ་མཁའི་
དཀྱིལ་ན་གནས་པ་ནི། །རླུང་གི་ཕུང་པོས་བཏབ་ཀྱང་མི་བསྐྱོད་མི་གཡོ་སྟེ། །ནོར་བུ་ཀུན་རྒྱན་སངས་རྒྱས་གཟུགས་བརྙན་སྙིང་པོའོ། །ཞེས་བྱ་བ་ལ་སོགས་པ་མང་དུ་འབྱུང་ངོ༌། །དེ་ལྟ་བུའི་རྣམ་པར་སྣང་མཛད་གང་ཆེན་མཚོ་འཁོར་གྱི་བྱང་ཆུབ་སེམས་དཔའི་ཚོགས་
དང་བཅས་པ་བཞུགས་པའི་ཞིང་ཁམས་ཀྱི་ཡོན་ཏན་དང་ཚད་གཟུང་དུ་མེད་པ་ནི་འཕགས་པ་ཁོ་ནའི་ཡུལ་ལས་གཞན་དུ་མ་གྱུར་པ་སྟེ། ནམ་མཁའི་ཁམས་ཐམས་ཅད་ཆོས་ཀྱི་སྐུའི་ཞིང་ཡིན་ཞིང༌། དེ་ཐམས་ཅད་ཀྱང་སངས་རྒྱས་ཀྱི་ཞིང་རྒྱ་མཚོ་དང་སངས་རྒྱས་ཀྱི་གཟུགས་
ཀྱི་སྐུ་རྒྱ་མཚོས་རྒྱས་པར་གཏམས་པའི་ཕྱིར་རོ། །གཉིས་པ་སྤྲུལ་པའི་སྐུའི་ཞིང་ནི་དེ་ལྟ་བུའི་དེ་བཞིན་གཤེགས་པ་རྣམ་པར་སྣང་མཛད་དེའི་ཞིང་ཁམས་ཀྱི་ནང་གི་དུམ་བུ་ཐམས་ཅད་དང༌། དེ་བཞིན་གཤེགས་པ་དེའི་སྐུའི་བ་སྤུའི་ཁུང་བུ་རེ་རེ་ནའང་སྤྲུལ་པའི་སྐུའི་
སངས་རྒྱས་ཀྱི་ཞིང་བྱེ་བ་ཕྲག་མང་པོ་ཡོད་ཅིང༌། དེ་དག་ཀྱང་གནས་པ་ཐ་དད་པ་ནི་འཇིག་རྟེན་གྱི་ཁམས་རྒྱ་མཚོ་འབྱམས་སུ་ཀླས་པ། ལ་ལ་ནི་ནམ་མཁའི་དབྱིངས་ཀྱི་གནས་ལ་གནས་པ་དང༌། ལ་ལ་ནི་རིན་པོ་ཆེའི་འོད་ཀྱི་རྒྱ་མཚོ་ལ་གནས་པ་དང༌། ལ་ལ་ནི་སངས་
Vol. 213 · folio 16a
རྒྱས་ཐམས་ཅད་ཀྱི་འོད་ཀྱི་དཀྱིལ་འཁོར་རྒྱ་མཚོ་ལ་གནས་པ་ལ་སོགས་པ་གནས་པ་རྣམ་པ་སྣ་ཚོགས་པ་དག་ཡོད་དེ། སངས་རྒྱས་ཕལ་པོ་ཆེར་བྱང་ཆུབ་སེམས་དཔའ་ཀུན་དུ་བཟང་པོས། ཞིང་རྣམས་རྒྱ་མཚོ་ལ་ལ་དྲི་མེད་འོད་ཅན་ནམ་མཁའི་
དབྱིངས་ལ་གནས། །སྣང་བའི་སྙིང་པོ་འོད་ཅན་ནོར་བུའི་རྒྱ་མཚོ་དག་ལ་ལེགས་པར་གནས། །ཞེས་བྱ་བ་ལ་སོགས་པས་བསྟན་ཏོ། །དེ་བཞིན་དུ་དབྱིབས་ཀྱི་རྣམ་པའང་སྣ་ཚོགས་པ་དག་ཏུ་ཡོད་དེ། ཇི་སྐད་དུ། དབྱིབས་ཀྱིས་རྣམ་པར་ཕྱེ་བ་སྣ་ཚོགས་ཏེ། །ཕྱོགས་
རྣམས་ཀུན་ནས་ཞིང་རྣམས་རྒྱ་མཚོ་སྣང༌། །ལ་ལ་ཟླུམ་པོ་ལ་ལ་ཟུར་གསུམ་སྟེ། །དེ་དག་ལ་ལ་ཕྱོགས་ནང་གྲུ་བཞིར་གནས། །ཞེས་བྱ་བ་ལ་སོགས་པས་བསྟན་ཏོ། །དེ་བཞིན་དུ་འཇིག་རྟེན་གྱི་ཁམས་ཀྱི་ལྷུན་དག་ཀྱང་གཞན་དང་གཞན་དུ་ཡོད་དེ། ཇི་སྐད་དུ། ཞིང་
གི་རྒྱ་མཚོ་རྣམས་ལ་ནི། །རིན་ཆེན་རང་བཞིན་ཀུན་ནས་གནས། །རྡོ་རྗེ་བཞིན་དུ་མི་ཤིགས་སྲ། །རིན་ཆེན་པདྨོ་རྣམས་ལ་གནས། །ལ་ལ་འོད་ཟེར་རང་བཞིན་ཏེ། །དག་ཅིང་གཟུང་མེད་འོད་ཟེར་འབྱུང༌། །ཞེས་བྱ་བ་ལ་སོགས་པས་བསྟན་པ་དང༌། གཞན་ཡང་
བྱང་ཆུབ་སེམས་དཔའ་རྣམས་ཀྱི་མོས་པ་དང༌། ལས་དང༌། སྨོན་ལམ་རྣམ་པ་སྣ་ཚོགས་པའི་སྟོབས་ཀྱིས་རྒྱན་ཡང་དེ་བཞིན་དུ་ཤེས་པར་བྱ་སྟེ། ཇི་སྐད་དུ། ཞིང་རྣམས་རྒྱ་མཚོ་རྒྱ་ཆེ་མཐའ་ཡས་ཏེ། །རྣམ་དག་ལས་ཀྱིས་རྣམ་པ་སྣ་ཚོགས་གནས། །ཕྱོགས་
བཞི་ཞིང་རྣམས་རྒྱ་མཚོ་རྣམས་ཀུན་ཀྱང༌། །སྣ་ཚོགས་རྒྱན་ཅན་ཡངས་པར་ཀུན་ནས་གནས། །ཁ་དོག་སྣ་ཚོགས་ཡངས་པའི་ཞིང་གི་རྣམས། །རྒྱ་མཚོ་རྟག་པར་ཕྱོགས་རྣམས་ཀུན་དུ་འབྱུང༌། །རྒྱན་དང་རིན་ཆེན་འོད་འཕྲོ་སྣ་ཚོགས་སྤྲིན། །སྒྲ་འབྱིན་ཞིང་
གི་དབྱིངས་རྣམས་ཁེབས་པར་བྱེད། །ཅེས་བྱ་བ་ལ་སོགས་པས་བསྟན་ཏོ། །འཇིག་རྟེན་གྱི་ཁམས་རྒྱ་མཚོ་འབྱམས་སུ་ཀླས་པ་དེ་དག་ཏུ་སངས་རྒྱས་འབྱུང་བའི་ཚུལ་ཡང་སེམས་ཅན་གྱི་མོས་པའི་བྱེ་བྲག་ལྟར་རམ་བསམ་གྱིས་མི་ཁྱབ་པ་ཉིད་དེ། ལ་ལ་ནི་ཆོས་
Vol. 213 · folio 16b
ཀྱི་དབྱིངས་ཐམས་ཅད་གཟུགས་ཀྱི་སྐུས་གང་བར་སྟོན་པ་དང༌། ལ་ལ་ནི་སྐུ་ཚེ་རིང་པོར་སྟོན་པ་དང༌། ལ་ལ་ནི་ཐུང་ངུར་སྟོན་པ་དང༌། ལ་ལས་ནི་ཞིང་མང་པོ་སྦྱངས་པ་དང༌། ལ་ལས་ནི་ཞིང་ཉུང་ངུ་སྦྱངས་པ་དང༌།ལ་ལས་ནི་ཐེག་པ་ཡང་མང་པོར་སྟོན་པ་དང༌། ལ་ལས་ནི་ཐེག་
པ་གཅིག་ཏུ་སྟོན་པ་དང༌། ལ་ལས་ནི་སེམས་ཅན་ཧ་ཅང་མི་མང་བ་འདུལ་བ་དང༌། ལ་ལས་ནི་སྐད་ཅིག་གཅིག་ལའང་མཐའ་ཡས་པ་འདུལ་བར་སྟོན་པ་ལ་སོགས་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་བ་སྙེད་དུ་ཤེས་པར་བྱ་དགོས་ཀྱི་བྱིས་པ་སོ་སོ་སྐྱེ་བོའི་བློ་ལས་རིང་དུ་འདས་
པའི་ཕྱིར་མཐའ་གཅིག་ཏུ་ཞེན་པར་བགྱིར་མི་བཏུབ་པ་ཉིད་དེ། ཇི་སྐད་དུ། སངས་རྒྱས་ཆོས་སྐུ་བསམ་གྱིས་མི་ཁྱབ་སྟེ། །མིག་ཡོར་མ་ཡིན་མཚན་ཉིད་མེད་པའི་གཟུགས། །གཟུགས་ཀྱི་ཁྱད་པར་འགྲོ་བ་འདི་དག་ཏུ། །སེམས་ཅན་བསམ་པའི་ཕྱོགས་བཞིན་སྟོན་
ལ་ལྟོས། །སྐུ་ཚེ་ཐུང་བར་ལ་ལ་རྣམ་པར་སྟོན། །ལ་ལས་བསྐལ་པ་བསམ་ཡས་བྱིན་གྱིས་རློབ། །ཆོས་ཀྱི་སྐུ་ནི་ཕྱོགས་རྣམས་ཀུན་གྱི་སྒོ། །རབ་ཏུ་མཛེས་པར་འགྲོ་བ་འདི་ན་བཞུགས། །ལ་ལས་ཞིང་རྣམས་རྒྱ་མཚོ་བསམ་ཡས་དག །སྦྱངས་ཤིང་འབྱམས་
ཀླས་ཕྱོགས་བཅུ་ཀུན་ན་ཡང༌། །ལ་ལས་ཞིང་གཅིག་རྣམ་པར་སྦྱང་བར་མཛད། །སྨོན་ལམ་མ་ལུས་ཀུན་ཀྱང་ཚུལ་གཅིག་གོ །ཞེས་བྱ་བ་ལ་སོགས་པ་རྒྱ་ཆེར་འབྱུང་ངོ༌། །དོན་དེ་དག་ལ་དགོངས་ནས་སློབ་དཔོན་ཆེན་པོ་བསོད་ནམས་རྩེ་མོས། བློ་གྲོས་ཀྱི་རིམ་
པས་ཁ་ཅིག་ལ་ནི་ཛམྦུ་གླིང་དུ་སངས་རྒྱས་པར་སྣང་ངོ༌། །ཁ་ཅིག་ལ་ནི་གནས་གཙང་མའི་འོག་ཏུ་སངས་རྒྱས་ནས་མཛད་པ་དག་མཛད་དོ། །བཅོམ་ལྡན་འདས་དེ་བྱང་ཆུབ་སེམས་དཔའ་ཁ་ཅིག་ལ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གླིང་བཞི་
བྱེ་བ་ཕྲག་བརྒྱར་སངས་རྒྱས་པར་མངོན་ནོ། །ཁ་ཅིག་ལ་ནི་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་མཐའ་དག་པ་ཡང་སངས་རྒྱས་ཀྱི་ཞིང་གཅིག་ཏུ་སྟོན་པར་མཛད་ཅེས་གསུངས་སོ། །དེ་དག་ཀྱང་དོན་དམ་པར་ན་འཕགས་པ་
Vol. 213 · folio 17a
རྣམས་ཀྱི་ཡུལ་དུ་སངས་རྒྱས་རྣམས་ནི་གཅིག་ཀྱང་མ་ཡིན་ལ་མང་པོ་ཡང་མ་ཡིན་པ་དང༌། གཅིག་དང་ཐ་དད་པ་གང་དུ་ཡང་མ་གྲུབ་པ་ཉིད་དེ། རྒྱན་ལས། ཟག་མེད་དབྱིངས་ན་སངས་རྒྱས་རྣམས། །མཁའ་ལྟར་ལུས་ནི་མེད་ཕྱིར་
དང༌། །སྔོན་གྱི་ལུས་རྗེས་འབྲངས་པའི་ཕྱིར། །གཅིག་མིན་མང་པོ་ཉིད་མ་ཡིན། །ཞེས་དང༌། ཐ་དད་རིགས་དོན་མེད་ཕྱིར་དང༌། །རྫོགས་དང་ཐ་མ་མེད་པའི་ཕྱིར། །སངས་རྒྱས་གཅིག་མིན་དྲི་མེད་གནས། །ཐ་དད་མིན་ཕྱིར་མང་པོའང་མིན། །
ཞེས་སོ། །གཉིས་པ་བྱེ་བྲག་ཏུ་མི་མཇེད་ཀྱི་ཞིང་ངོས་བཟུང་བ་ལ། དངོས་དང༌། ཛམྦུའི་གླིང་བཀར་ཏེ་བཤད་པའོ། །དང་པོ་ལ་མི་མཇེད་ཀྱི་ཞིང་འདི་གང་དུ་གནས་པ་ངོས་བཟུང་བ་ནི། ཇི་སྐད་བཤད་པའི་རྣམ་པར་སྣང་མཛད་གང་ཆེན་མཚོའི་ཕྱག་གི་མཐིལ་གྱི་
རྡུལ་ཕྲ་རབ་ལ་གནས་པའི་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་ཞིང་དེའི་ཁོར་ཡུག་ཆེན་པོའི་ནང་ན་སྤོས་ཆུའི་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པ་རྒྱ་མཚོའི་རྡུལ་སྙེད་ཀྱི་དབུས་སུ། སྤོས་ཆུའི་རྒྱ་མཚོ་དབུས་མའི་ཟེ་བ་ཡིད་དུ་འོང་ཞིང་འོད་མཐའ་
ཡས་པ་གནས་པའི་ནོར་བུའི་རྒྱལ་པོ་པདྨོ་ཆེན་པོ་བཞིའི་གཞི་ལ་བརྟེན་པའི་འཇིག་རྟེན་གྱི་ཁམས་ཀྱི་རྒྱུད་ཉི་ཤུ་བརྩེགས་མ་ཉིད་དུ་ཡོད་དོ། །དེ་དག་ཀྱང་ཕྲེང་བ་བསྡུས་པ་ལྟ་བུར་གཅིག་ནས་གཅིག་ཏུ་བརྒྱུད་མར་མ་ཡིན་པར་བར་སྐབས་རྣམས་སུའང་འཇིག་རྟེན་
གྱི་ཁམས་བགྲང་བ་ལས་འདས་པ་དག་གིས་བར་ཆོད་པར་བྱས་པ་དང་བཅས་ཏེ་གནས་སོ། །དེ་དག་ལས་ཐམས་ཅད་ཀྱི་འོག་མ་ནི། དཔལ་འབྱུང་བའི་འོད་ཟེར་རྣམ་པར་སྣང་བ་ཞེས་བྱ་བ་ན། དེ་བཞིན་གཤེགས་པ་ཚུལ་རྣམ་པར་དག་ཅིང་དྲི་མ་མེད་པའི་
མར་མེ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སྤོས་སྣ་ཚོགས་ཀྱི་པདྨོ་དཔལ་གྱི་རྒྱན་ཞེས་བྱ་བ་ན་དེ་བཞིན་གཤེགས་པ་སེང་གེའི་འོད་ཟེར་མཆོག་གི་འོད་ཅེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱི་རྒྱན་ཀུན་ཏུ་
Vol. 213 · folio 17b
སྣང་བ་ཞེས་བྱ་བ་ན་དེ་བཞིན་གཤེགས་པ་འོད་དྲི་མ་མེད་པའི་ཡེ་ཤེས་ཀྱི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་འོད་ཟེར་སྣ་ཚོགས་ཡིད་དུ་འོང་བ་ཞེས་བྱ་བ་ན་དེ་བཞིན་གཤེགས་པ་རྡོ་རྗེའི་འོད་ཟེར་སྟོབས་དང་བརྩོན་འགྲུས་
མཐའ་ཡས་པ་ཡང་དག་པར་འབྱུང་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་འོད་ཤིན་ཏུ་བཀྱེ་བའི་མེ་ཏོག་སིལ་མའི་འཁོར་ལོ་ཞེས་བྱ་བ་ན་དེ་བཞིན་གཤེགས་པ་སྤོས་ཀྱི་འོད་ཟེར་དགའ་བའི་སྟོབས་རྒྱ་མཚོ་ཞེས་བྱ་བ་བཞུགས་སོ། །དེའི་སྟེང་
འཇིག་རྟེན་གྱི་ཁམས་དགེ་བ་སྣ་ཚོགས་ཀྱི་རྣམ་པ་ཞེས་བྱ་བ་ན་དེ་བཞིན་གཤེགས་པ་ཀུན་དུ་སྣང་བའི་འོད་ཀྱི་དབང་པོའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་རྒྱན་གྱི་འོད་ཟེར་མེ་ཏོག་ཤིན་ཏུ་རྒྱས་པའི་དཀྱིལ་འཁོར་ཞེས་བྱ་བ་ན་དེ་བཞིན་གཤེགས་
པ་དགའ་བ་རྒྱ་མཚོའི་ཤུགས་དང༌། ཡོན་ཏན་གྲགས་པའི་དབང་ཕྱུག་འོད་ཟེར་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་ཡང་དག་པར་འབྱུང་བའི་གཟི་བརྗིད་ཅེས་བྱ་བ་ན་དེ་བཞིན་གཤེགས་པ་གྲགས་པ་ཆེན་པོའི་ཡེ་ཤེས་རྒྱ་མཚོའི་རྒྱལ་མཚན་
ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སྒྲ་དབྱངས་རབ་ཏུ་སྒྲོག་པ་ཞེས་བྱ་བ་ན་དེ་བཞིན་གཤེགས་པ་མཚན་གྱི་གཟི་བརྗིད་ཐུབ་པ་མེད་པའི་ཟླ་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་རྡོ་རྗེའི་རྒྱལ་མཚན་ཞེས་བྱ་བ་ན་དེ་
བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱིས་ཤིན་ཏུ་འཕགས་པའི་རྒྱལ་པོ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་མདོག་རྣམ་པར་སྣང་བ་ཞེས་བྱ་བ་ན་དེ་བཞིན་གཤེགས་པ་རྒྱལ་བའི་ཡོན་ཏན་ཆོས་ཉིད་ཚད་མེད་པ་ཞེས་བྱ་བ་བཞུགས་
སོ། །དེའི་སྟེང་འཇིག་རྟེན་གྱི་ཁམས་སྣང་བའི་མདོག་ཅེས་བྱ་བ་ན་དེ་བཞིན་གཤེགས་པ་ཚངས་པའི་དབང་པོའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་མི་མཇེད་ཅེས་བྱ་བ་ན་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་
Vol. 213 · folio 18a
ཅེས་བྱ་བ་འདི་བཞུགས་སོ། །སངས་རྒྱས་ཀྱི་ཞིང་འདིའི་སྟེང་འཇིག་རྟེན་གྱི་ཁམས་མཉམ་ལ་རྡུལ་མེད་པའི་འོད་ཅེས་བྱ་བ་ན་དེ་བཞིན་གཤེགས་པ་ཆོས་ཀྱི་དབྱིངས་ཤིན་ཏུ་འཕགས་པའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་
འོད་སྣ་ཚོགས་ཡིད་དུ་འོང་བའི་མར་མེ་ཞེས་བྱ་བ་ན་དེ་བཞིན་གཤེགས་པ་སྟོབས་ལ་ཐུབ་པ་མེད་པས་ཀུན་དུ་སྣང་བའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་འོད་འཕྲོ་སྣང་བ་དྲི་མ་མེད་པ་ཞེས་བྱ་བ་ན་དེ་བཞིན་གཤེགས་པ་ཡོན་ཏན་གྱི་ཉི་མ་དྲི་མ་
མེད་པའི་སྤྱན་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་རིན་པོ་ཆེའི་འབྱུང་གནས་ཀྱིས་རབ་ཏུ་བརྒྱན་པའི་སྙིང་པོ་ཞེས་བྱ་བ་ན་དེ་བཞིན་གཤེགས་པ་ཆགས་པ་མེད་པའི་ཡེ་ཤེས་ཕྱོགས་ཀུན་ཏུ་རྣམ་པར་སྣང་བའི་འོད་ཅེས་བྱ་བ་བཞུགས་སོ། །དེའི་སྟེང་
འཇིག་རྟེན་གྱི་ཁམས་རྡུལ་དང་བྲལ་བ་ཞེས་བྱ་བ་ན་དེ་བཞིན་གཤེགས་པ་དཔལ་ཚད་མེད་པའི་ཚུལ་དཔལ་གྱི་རྒྱལ་མཚན་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་ཕྱོགས་ཡོངས་སུ་དག་ཅིང་སྣང་བ་ཞེས་བྱ་བ་ན་དེ་བཞིན་གཤེགས་པ་ཆོས་ཀྱི་དབྱིངས་དང་
ནམ་མཁའ་ཀུན་དུ་སྣང་བའི་འོད་ཅེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་རིན་པོ་ཆེའི་འོད་འཕྲོ་འཁྱིལ་པའི་དཔལ་ཡང་དག་པར་འབྱུང་བ་ཞེས་བྱ་བ་ན་དེ་བཞིན་གཤེགས་པ་མཚན་བསོད་ནམས་ཀྱི་སྤྲིན་གྱིས་ཤིན་ཏུ་འཕགས་པའི་གཟི་བརྗིད་ཅེས་བྱ་བ་
བཞུགས་ཏེ་ཆོས་སྟོན་པའི་ཞིང་དུ་བསྟན་པའི་བར་གྱིས་རྒྱས་པར་བསྟན་ཏོ། །དེ་ལས་བཅུ་གསུམ་པ་མི་མཇེད་ཅེས་བྱ་བ་ནི་སྟོང་གསུམ་གྱི་འཇིག་རྟེན་གྱི་ཁམས་འདི་ཉིད་ཡིན་ཏེ། འདི་ནི་སངས་རྒྱས་ཀྱི་ཞིང་བཅུ་གསུམ་གྱི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་བ།
རྡོ་རྗེའི་གཞིའི་ས་མཚམས་དང་ལྡན་པ། རླུང་གི་དཀྱིལ་འཁོར་ཁ་དོག་སྣ་ཚོགས་པ་ཅན་གྱིས་བཟུང་བ། པདྨོའི་དྲྭ་བ་ལ་རབ་ཏུ་གནས་སོ། །མི་མཇེད་ཀྱི་ཞིང་དེ་ནའང་སྟོན་པ་བཅོམ་ལྡན་འདས་རྣམ་པར་སྣང་མཛད་འདི་བཞུགས་སོ་ཞེས་མདོ་ལས་འབྱུང་སྟེ། དེའང་
Vol. 213 · folio 18b
སློབ་དཔོན་བསོད་ནམས་རྩེ་མོས། དེས་ན་བློ་རྒྱ་ཆེ་ཆུང་གི་དབྱེ་བས་སྣ་ཚོགས་སུ་སྣང་བ་ནི་སྤྲུལ་པའི་སངས་རྒྱས་ཀྱི་གནས་སོ་ཞེས་གསུངས་པ་བཞིན་དུ་རྣམ་པར་སྣང་མཛད་འདི་ཡང་སྤྲུལ་པའི་སྐུའི་སངས་རྒྱས་ཡིན་པར་གསལ་ལོ། །དེ་ལྟ་བུའི་ཞིང་དེ་ལ་མི་མཇེད་ཅེས་
བྱ་བར་གྲགས་སོ། །ཅིའི་ཕྱིར་དེ་སྐད་དུ་གྲགས་ཤེ་ན། མི་མཇེད་ཅེས་བྱ་བ་ནི་བཟོད་པའམ་སྲན་ཐུབ་པའི་མིང་ཡིན་ཏེ། ཞིང་དེའི་སེམས་ཅན་རྣམས་ནི་ཉོན་མོངས་པ་དུག་གསུམ་ལ་མི་མཇེད་པའི་ཕྱིར། མི་མཇེད་ཅེས་བྱ་བའི་དོན་དུ་སྙིང་རྗེ་ཆེན་པོ་པདྨ་དཀར་པོའི་མདོ་ལས་
བཤད་དོ། །ཡང་ན་ཞིང་དེ་ན་ཡོད་པའི་བྱང་ཆུབ་སེམས་དཔའ་བཟོད་པ་བརྟན་པོ་ལ་རབ་ཏུ་གནས་པ་རྣམས་ཀྱི་ཡོན་ཏན་གྱི་ཁྱད་པར་ལས་ཏེ། ཞིང་དེ་དག་གི་སེམས་ཅན་མི་སྲུན་པ་རྣམས་ཀྱིས་བྱང་ཆུབ་སེམས་དཔའ་དེ་དག་ལ་ཀུན་ནས་སྤྱོས་པ་དང་བསྡིགས་པའི་ལས་ཀྱིས་རྣམ་
པར་གཙེ་བར་བྱས་ཀྱང་ཇི་མི་སྙམ་པར་མི་མཇེད་པའི་ཕྱིར་དེ་སྐད་ཅེས་བྱ་བའི་དོན་དུ་ཡང་བཤད་དེ། འཇམ་དཔལ་གྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ལས། རིགས་ཀྱི་བུ་སངས་རྒྱས་ཀྱི་ཞིང་དེ་ན་རིགས་ཀྱི་བུ་དང༌། རིགས་ཀྱི་བུ་མོ་བྱང་ཆུབ་སེམས་དཔའི་ཐོག་
པ་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་རྣམས་བསྐྱེད་པ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱས་པ། བཟོད་པ་དང༌། དུལ་བ་དང༌། དེས་པ་དང་ལྡན་པ་དག་ཡོད་དེ། དེ་དག་ནི་སེམས་ཅན་ཐམས་ཅད་ཀྱིས་སྤྱོས། བསྡིགས། མཚོན་གྱིས་
བཏབ་ཀྱང་ཇི་སྙམ་མི་མཇེད་དེ། འདོད་ཆགས་དང༌། ཞེ་སྡང་དང༌། གཏི་མུག་རྣམས་ཀྱིས་མི་འཕྲོགས་སོ། །རིགས་ཀྱི་བུ་སྐྱེས་བུ་དམ་པ་དེ་དག་གི་མིང་གིས་འཇིག་རྟེན་གྱི་ཁམས་མི་མཇེད་ཅེས་བརྗོད་དོ་ཞེས་བསྟན་ཏོ། །དེ་ལྟ་བུའི་འཇིག་རྟེན་གྱི་ཁམས་མི་མཇེད་དེ་བསྐལ་
པ་བཟང་པོ་ཞེས་བྱ་བར་ཡང་གྲགས་ཏེ། དེ་ཅིའི་ཕྱིར་ཞེ་ན། བསྐལ་པ་འདི་དང་པོ་ཆགས་པའི་དུས་སུ་རྒྱ་མཚོའི་ནང་ནས་གསེར་གྱི་པདྨ་སྟོང་ཕྲག་གཅིག་ཤར་བ། གནས་གཙང་མའི་ལྷ་རྣམས་ཀྱིས་བརྟགས་པས་བསྐལ་པ་འདི་ལ་འདྲེན་པ་སྟོང་འབྱོན་པའི་ལྟས་སུ་ཤེས་ནས། ཨེ་
Vol. 213 · folio 19a
མ་བསྐལ་པ་འདི་ནི་བསྐལ་པ་བཟང་པོའོ་ཞེས་ཆེད་དུ་བརྗོད་པས་དེ་སྐད་དུ་གྲགས་པའི་དོན་ཡང་སྙིང་རྗེ་ཆེན་པོ་པདྨ་དཀར་པོ་ལས་བཤད་དོ། །དེ་ལྟ་བུའི་འཇིག་རྟེན་གྱི་ཁམས་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བགྲང་བའི་ཚུལ་སྔ་མ་ལྟར་ཤེས་
པར་བྱ་ཞིང༌། དེ་ལ་གླིང་བཞི་པའི་འཇིག་རྟེན་གྱི་ཁམས་འདི་ཇི་ལྟར་གནས་པའི་ཚུལ་རྣམས་ཐེག་པ་ཐུན་མོང་བའི་ལུགས་སུ་གྲགས་པའི་གཏམ་ལས་བརྩམས་ཏེ་མདོ་ཙམ་བརྗོད་པར་བྱའོ། །དེའང་སྣོད་དང་བཅུད་ཀྱི་འཇིག་རྟེན་མངོན་པར་འགྲུབ་པའི་རྐྱེན་ནི། དེར་སྐྱེ་བར་འགྱུར་བའི་སེམས་ཅན་
རྣམས་ཀྱི་ལས་མཐུན་པར་བསགས་པའི་མཐུ་ཉིད་ཀྱིས་སོ། །མངོན་པར་འགྲུབ་པའི་ཚུལ་དང་ཚད་ཀྱི་ངེས་པ་རྣམས་ནི་གཞན་དུ་ཤེས་པར་བྱ་བ་ལས་འདིར་མ་སྤྲོས་སོ། །ཅིའི་ཕྱིར་མ་སྤྲོས་ཤེ་ན། གོང་དུ་ཇི་སྐད་བཤད་པ་རྣམས་དང༌། འོག་ཏུ་འཆད་པར་འགྱུར་བ་ཐམས་ཅད་དང་འགྲོས་མཚུངས་སུ་
བཏང་བ་ལས། འདིར་ཧ་ཅང་བཤད་པ་ལྷག་པ་གློ་བུར་བ་ཉིད་དུ་མི་འགྱུར་བར་བྱ་བའི་ཕྱིར་རོ། །ཇི་ལྟར་གནས་པའི་ཚུལ་ནི་འཇིག་རྟེན་གྱི་ཁམས་འདི་འདེགས་པར་བྱེད་པའི་འོག་གཞི་ནི་འཇམ་པ་ཞེས་བྱ་བའི་རླུང་གི་དཀྱིལ་འཁོར་ཁ་དོག་སྔོ་སྐྱར་ཡོད་པ། ཚན་པོ་ཆེའི་རྡོ་རྗེས་ཀྱང་གཞིག་པར་མི་ནུས་
པ་ཤིན་ཏུ་འཐས་པ་ཉིད་དུ་གནས་ཏེ། འདི་ནི་འཇིག་རྟེན་གྱི་ཁམས་མི་མཇེད་ལྟ་བུ་ཞིག་རྟོན་པར་བྱེད་པའི་གཞི་ཡིན་ནོ། །དེའི་སྟེང་དུ་འོག་གི་རྒྱ་མཚོ་ཞེས་བྱ་བ་ཆུའི་ཕུང་པོ་ཆེན་པོར་གྱུར་པ་རླུང་གི་དཀྱིལ་འཁོར་དེ་ལ་བརྟེན་ཏེ་གནས་སོ། །དེའང་སློབ་དཔོན་དབྱིག་གཉེན་གྱིས། ཇི་ལྟར་ན་ཆུ་དེ་
དག་ཐད་ཀར་མི་འབོ་བ་ནི་ཁ་ཅིག་ན་རེ་སེམས་ཅན་རྣམས་ཀྱི་ལས་ཀྱི་དབང་གིས་ཏེ། དཔེར་ན་བཟའ་བ་དང་བཏུང་བ་ཟོས་པ་དང་འཐུང་བ་མ་ཞུ་བ་ལོང་ཀར་མི་ལྟུང་བ་བཞིན་ནོ་ཞེས་ཟེར་རོ། །སྡེ་པ་གཞན་དག་ན་རེ་སྦྱང་གི་ཚུལ་དུ་རླུང་གིས་འཛིན་ཏོ་ཞེས་ཟེར་རོ་ཞེས་གསུངས་སོ། །ཆུའི་དཀྱིལ་འཁོར་གྱི་
སྟེང་དུ་ཡང་གསེར་གྱི་ས་གཞི་ཞེས་བྱ་བ་ཤིན་ཏུ་མི་ཤིགས་པ་གསེར་གྱི་རང་བཞིན་ཅན་དུ་ཡོད་པའོ། །ས་གཞི་དེ་ལ་ནི་ཁོར་ཡུག་རི་བོའི་བར་གྱི་རི་དང་གླིང་དང་རྒྱ་མཚོར་བཅས་པ་རྣམས་བརྟེན་ནས་གནས་ཏེ། དེའང་ཐམས་ཅད་ཀྱི་དབུས་ན་ནི་རིའི་རྒྱལ་པོ་རི་རབ་ཅེས་བྱ་བ་ཡོད་དེ། དེ་ནི་གྲུ་བཞི་
Vol. 213 · folio 19b
པའི་རྣམ་པ་ལ་བང་རིམ་བཞིས་མཛེས་པར་བྱས་པ། རིན་པོ་ཆེའི་རང་བཞིན་ཅན་ཏེ། དེ་ནི་ཤེལ་དང༌། བཻ་ཌཱུརྻ་དང༌། པདྨ་རཱ་ག་དང༌། གསེར་རྣམས་ཀྱི་རྒྱུ་ལས་ངོས་བཞི་དག་ཏུ་རིམ་པ་བཞིན་དུ་གྲུབ་པ་ཡིན་ནོ། །དེ་དག་གི་རྐྱེན་གྱིས་བསྒྱུར་བས་ནམ་མཁའ་ལའང་ཁ་དོག་ཐ་དད་པ་ཉིད་དུ་སྣང་
བ་སྟེ། ཛམྦུའི་གླིང་འདི་ཡོད་པའི་ལོགས་ཀྱི་ངོས་ནི་བཻ་ཌཱུརྻའི་རང་བཞིན་ཅན་ཡིན་པའི་ཕྱིར། དེའི་འོད་ཀྱིས་ནམ་མཁའ་ཡང་བཻ་ཌཱུརྻའི་ཁ་དོག་ཏུ་ཤར་བ་བཞིན་ནོ། །དེ་ལྟ་བུའི་རི་རབ་དེའི་ཆུ་མཚམས་ནས་འོག་ཏུ་རྣམ་པར་བཅལ་བའི་རི་བོའི་ཁོང་སེང་རྣམས་སུ་ལྷ་མ་ཡིན་གྱི་ཚོགས་རྟེན་དང་
བརྟེན་པར་བཅས་པ་རྣམས་ཡོད་དོ། །དེའང་འདི་ལྟ་སྟེ་ལྷ་མ་ཡིན་གྱི་དབང་པོ་སྒྲ་གཅན་འཛིན་ཞེས་བྱ་བ་དང༌། དེ་བཞིན་དུ་མགུལ་ཕྲེང་ཅན་དང༌། རབ་གནོན་དང༌། ཐག་བཟངས་རིས་རྣམས་རང་རང་གི་འཁོར་དང་བཅས་ཏེ་འོག་ནས་འོག་ཏུ་རིམ་པ་དེ་ཇི་ལྟ་བ་བཞིན་དུ་གནས་སོ། །རི་རབ་ཀྱི་
བང་རིམ་བཞི་ལས་བང་རིམ་དང་པོ་ནི་ལག་ན་གཞོང་ཐོགས་པ་རྣམས་ཀྱི་གནས་སོ། །བང་རིམ་གཉིས་པ་ནི་ལག་ན་ཕྲེང་ཐོགས་པ་རྣམས་ཀྱི་གནས་སོ། །བང་རིམ་གསུམ་པ་ནི་རྟག་མྱོས་པའི་ལྷ་རྣམས་ཀྱི་གནས་སོ། །བང་རིམ་བཞི་པ་ནི་རྒྱལ་ཆེན་རིས་བཞིར་གཏོགས་པའི་ལྷའི་རིགས་
མང་པོ་སྟེ་དེ་དག་རྟེན་དང་བརྟེན་པར་བཅས་པ་རྣམས་གནས་སོ། །རི་རབ་ཀྱི་སྟེང་གི་མཚམས་བཞིའི་ལྕོག་ཆེན་པོ་བཞི་ལ་ནི་གནོད་སྦྱིན་གསང་བ་པ་རྣམས་གྲོང་དང་གྲོང་རྡལ་དུ་བཅས་པ་གནས་སོ། །དེའི་དབུས་སུ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་གྲོང་ཁྱེར་ལྟ་ན་སྡུག་ཅེས་བྱ་བ་
ཡོད་ཅིང༌། གྲོང་ཁྱེར་དེའི་དབུས་སུ་ལྷ་རྣམས་ཀྱི་དབང་པོ་བརྒྱ་བྱིན་གྱི་ཕོ་བྲང་རྣམ་པར་རྒྱལ་བའི་ཁང་བཟང་ཞེས་བྱ་བ་བསོད་ནམས་ཀྱི་མཐུ་ལས་གྲུབ་པ། ཕྱི་ནང་ཀུན་དུ་ངོ་མཚར་གྱི་བཀོད་པ་དཔག་ཏུ་མེད་པས་ཤིན་ཏུ་མཛེས་པར་བྱས་པ་དག་ཡོད་དོ། །དེ་ལའང་སུམ་ཅུ་རྩ་གསུམ་པ་ཞེས་
པའི་ཐ་ཚིག་ཀྱང་ནོར་ལྷ་བརྒྱད་དང༌། དྲག་པོ་བཅུ་གཅིག་དང༌། ཐ་སྐར་གྱི་བུ་གཉིས་དང༌། ཉི་མ་བཅུ་གཉིས་ཏེ་ཉེ་དབང་སུམ་ཅུ་རྩ་གཉིས་དང༌། དེ་དག་གི་དབང་པོ་མཆོད་སྦྱིན་བརྒྱ་པ་དང་བཅས་པའི་ལྷའི་གཙོ་བོ་སུམ་ཅུ་རྩ་གསུམ་ཡོད་པས་དེ་སྐད་དུ་གྲགས་སོ། །གྲོང་ཁྱེར་ལྟ་ན་སྡུག་གི་
Vol. 213 · folio 20a
ཕྱོགས་བཞི་ན་བཞོན་པ་གནས་པའི་ཤིང་རྟ་སྣ་ཚོགས་ཞེས་བྱ་བའི་སྐྱེད་མོས་ཚལ་དང༌། གཡུལ་དུ་ཆས་པའི་གནས་རྩུབ་འགྱུར་ཞེས་བྱ་བའི་ཚལ་དང༌། སྤྱོད་ལམ་རྣམ་པ་སྣ་ཚོགས་ལ་འཇུག་པའི་གནས་འདྲེས་མ་ཞེས་བྱ་བའི་ཚལ་དང༌། རྩེ་ཞིང་རོལ་པའི་གནས་
དགའ་བའི་ཚལ་ཞེས་བྱ་བ་རྣམས་ཡོད་དོ། །ཚལ་དེ་དག་གི་ཕྱི་རོལ་དུ་ལྷ་རྣམས་ཀྱིས་མངོན་པར་རྩེ་བར་བྱེད་པའི་གནས་ས་གཞི་བཟང་པོ་ཡིད་དུ་འོང་བ་རྣམ་པ་བཞི་ཡང་ཡོད་ཅིང༌། ལྟ་ན་སྡུག་གི་གྲོང་ཁྱེར་གྱི་བྱང་ཤར་མཚམས་སུ་ལྷ་རྣམས་ཀྱི་འདོད་དགུ་ཕུན་སུམ་ཚོགས་པ་འབྱུང་བའི་
གནས་སུ་གྱུར་པའི་ཤིང་ཡོངས་འདུ་ས་བརྟོལ་དང༌། དར་དཀར་པོ་ལ་བ་ལྟ་བུའི་རྡོ་ཨ་མོ་ལིག་ཅེས་བྱ་བ་ལ་སོགས་པ་དག་ཡོད་དོ། །ལྷོ་ནུབ་ཀྱི་མཚམས་སུ་ལྷ་རྣམས་ཀྱིས་བགྱི་བར་རུང་བ་དང་བགྱི་བར་རུང་བ་མ་ཡིན་པ་རྣམས་གཏམ་དུ་བགྲོ་བའི་ལྷའི་མདུན་ས་ཆོས་བཟང་ཞེས་བྱ་བ་བཀོད་
པ་ཕུན་ཚོགས་མཛེས་ཤིང་ཡིད་དུ་འོང་བར་བྱས་པ་ཡོད་དོ། །གཞན་ཡང་ལྷའི་རྔ་བོ་ཆེ་ཞེས་བྱ་བ་ལྷ་རྣམས་ཀྱིས་འདོད་པའི་ཡོན་ཏན་ལ་བག་མེད་པར་སྤྱོད་པ་ན་མི་རྟག་པའི་སྒྲ་འབྱུང་བས་སྐུལ་བར་བྱེད་པ་དང༌། མི་མཐུན་པའི་ཕྱོགས་ལས་རྣམ་པར་རྒྱལ་བའི་ཤིས་པར་བརྗོད་པ་ལ་སོགས་
པའི་སྒྲ་རང་འབྱུང་བར་བྱེད་པ་དེ་དང༌། གཡུལ་ངོར་སྤྱོད་པའི་གླང་པོ་ཆེ་རབ་བརྟན་དང༌། སྐྱེད་མོས་ཚལ་དུ་སྤྱོད་པའི་གླང་པོ་ཆེ་ས་སྲུང་གི་བུ་དང༌། རྟའི་རྒྱལ་པོ་སྤྲིན་གྱི་ཤུགས་ཅན་ཏེ་དེ་དག་རང་རང་གི་འཁོར་དང་བཅས་པ་ལ་སོགས་པ་ཡོད་པའི་གནས་རྣམས་སོ། །ལྷུན་པོའི་ཕྱི་རོལ་གྱི་ཁོར་
ཡུག་ཀུན་དུ་གསེར་གྱི་རི་བདུན་ཞེས་བྱ་བ་རིན་པོ་ཆེ་གསེར་གྱི་རྡུལ་འབའ་ཞིག་བརྩེགས་པའི་རང་བཞིན་ཅན་གྱིས་རི་རབ་ལ་རིམ་པ་བདུན་དུ་གྲུ་བཞི་པའི་དབྱིབས་སུ་བསྐོར་བ་ཐམས་ཅད་ཀྱང་གསེར་གྱི་ས་གཞི་ལ་བརྟེན་ཏེ་གནས་སོ། །དེའི་དང་པོ་ནི་གཉའ་ཤིང་འཛིན་གྱི་རི་སྟེ། དེའི་བྱང་ཕྱོགས་ཀྱི་
ལོགས་ཀྱི་སྟེང་ན་ལྕང་ལོ་ཅན་ཞེས་བྱ་བའི་ཕོ་བྲང་ཡོད་དེ། དེ་ན་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་གྱི་འཁོར་གྱིས་བསྐོར་བ་དང༌། ཤར་ཕྱོགས་སུ་ཡུལ་འཁོར་སྲུང་ཞེས་བྱ་བ་ན་རྒྱལ་པོ་ཆེན་པོ་ཡུལ་འཁོར་སྲུང་དྲི་ཟའི་འཁོར་གྱིས་བསྐོར་བ་དང༌། ནུབ་ཕྱོགས་སུ་སྣ་ཚོགས་གཟུགས་
Vol. 213 · folio 20b
ཞེས་བྱ་བ་ན་རྒྱལ་པོ་ཆེན་པོ་མིག་མི་བཟང་ཀླུའི་འཁོར་གྱིས་བསྐོར་བ་དང༌། ལྷོ་ཕྱོགས་སུ་འཕགས་སྐྱེས་པོ་ཞེས་བྱ་བ་ན་རྒྱལ་པོ་ཆེན་པོ་འཕགས་སྐྱེས་པོ་གྲུལ་བུམ་གྱི་འཁོར་གྱིས་བསྐོར་བ་དང་བཅས་པ་རྣམས་དང༌། དེ་དག་གི་གྲོང་དང་གྲོང་རྡལ་དང༌། ཚལ་གྱི་རྣམ་པ་དག་གིས་
མཛེས་པར་བྱས་པ་དག་གནས་སོ། །དེ་བཞིན་དུ་གསེར་གྱི་རི་གཉིས་པ་ནི་གཤོལ་མདའ་འཛིན་ནོ། །གསུམ་པ་ནི་སེང་ལྡེང་ཅན་ནོ། །བཞི་པ་ནི་ལྟ་ན་སྡུག་གོ །ལྔ་པ་ནི་རྟ་རྣ་ཅན་ནོ། །དྲུག་པ་ནི་རྣམ་པར་འདུད་དོ། །བདུན་པ་ནི་མུ་ཁྱུད་འཛིན་ཞེས་བྱ་བ་རྣམས་ཏེ། ཐམས་ཅད་ཀྱང་ཆུའི་སྟེང་དུ་
འཕགས་པའི་དཔངས་ལ་ནི་མཐོ་དམན་གྱི་ཁྱད་པར་ཞུགས་པ་སྟེ། རི་རབ་ནས་བརྩམས་ཏེ་མུ་ཁྱུད་འཛིན་གྱི་བར་ལ་སྔ་མ་སྔ་མའི་ཕྱེད་ཕྱེད་ཀྱིས་ཕྱི་མ་ཕྱི་མ་དམན་པར་གནས་སོ། །གསེར་གྱི་རི་དེ་དག་གི་ཐད་ཀྱི་སྟེང་གི་ནམ་མཁའ་ལ་འཕུལ་བར་བྱེད་པའི་རླུང་གི་དཀྱིལ་འཁོར་དྭངས་ཤིང་
སྒྲིབ་པ་མེད་པ་འཁོར་ལོ་བཞིན་དུ་གཡས་སུ་འཁོར་བ་ལ་བརྟེན་པའི་ཉི་མ་དང༌། ཟླ་བ་དང༌། རྒྱུ་སྐར་གྱི་གཞལ་མེད་ཁང་རྣམས་དང༌། ཁོར་ཡུག་ལྕགས་ཀྱི་རི་བོ་དང༌། ཛམྦུའི་གླིང་གི་རི་བོ་དང༌། ལྗོན་ཤིང་ལ་སོགས་པ་རྣམས་སུའང་རྒྱལ་ཆེན་རིས་བཞི་པའི་སྡེར་གཏོགས་པའི་ལྷ་རྣམས་
ཅི་རིགས་པར་གནས་སོ། །དེ་དག་ལས་ཉི་མ་དང་ཟླ་བའི་གཞལ་མེད་ཁང་གི་འོག་གི་ཕྱི་རོལ་ནི་མེ་ཤེལ་དང་ཆུ་ཤེལ་གྱི་དཀྱིལ་འཁོར་ལས་ཚ་བར་བྱེད་པ་དང༌། བསིལ་བར་བྱེད་པ་དང༌། སྣང་བར་བྱེད་པའི་འོད་ཀྱི་ཕྲེང་བ་དག་སྤྲོས་ཏེ་འགྲོ་བ་རྣམས་རང་རང་གི་ལས་དང་རྗེས་སུ་འཚམ་པར།
མིག་དང༌། ལུས་དང༌། ཡན་ལག་དང༌། མེ་ཏོག་དང༌། འབྲས་བུ་དང༌། ལོ་ཏོག་དང༌། སྨན་དང༌། ཆུ་ཀླུང་རྣམས་འགའ་ཞིག་ཏུ་ནི་ཕན་འདོགས་པར་བྱེད་པ་དང༌། འགའ་ཞིག་ཏུ་ནི་གནོད་པར་བྱེད་པ་དག་ཅི་ཡང་འབྱུང་ངོ༌། །གཞན་ཡང་འཆར་ནུབ་ཀྱི་དུས་ཀྱང་མཛོད་ལས། ནམ་ཕྱེད་ཉི་
མ་ནུབ་པ་དང༌། །ཉི་མ་ཕྱེད་དང་འཆར་དུས་གཅིག །ཅེས་གསུངས་པ་བཞིན་དུ། དཔེར་ན་སྒྲ་མི་སྙན་དུ་ནམ་ཕྱེད་པར་གྱུར་པ་དེའི་ཚེ་ལུས་འཕགས་སུ་ཉི་མ་ནུབ་བོ། །ཛམྦུའི་གླིང་དུ་ཉི་མ་ཕྱེད་དོ། །བ་ལང་སྤྱོད་དུ་ཉི་མ་འཆར་བ་རྣམས་དུས་ཅིག་ཅར་ཉིད་དུ་འབྱུང་བ་ཡིན་ནོ། །རོལ་པའི་མཚོ་བདུན་
Vol. 213 · folio 21a
ཞེས་བྱ་བ་ནི་རི་བརྒྱད་པོ་དེ་དག་གི་བར་དུ་གནས་པའི་ཆུའི་ཕུང་པོ་ཡན་ལག་བརྒྱད་དང་ལྡན་པ་གང་ཡིན་པས་མངོན་པར་གཏམས་པའི་རྒྱ་མཚོ་རིམ་པ་བདུན་དུ་ཡོད་དོ། །དེའང་ཡན་ལག་བརྒྱད་ནི་བསིལ་བ་དང༌། ཞིམ་པ་དང༌། ཡང་བ་དང༌། འཇམ་པ་དང༌། དྭངས་པ་
དང༌། དྲི་ང་བ་མེད་པ་དང༌། འཐུང་ན་མགྲིན་པ་ལ་མི་གནོད་པ་དང༌། ལྟོ་བ་ལ་མི་གནོད་པ་རྣམས་སོ། །མཚོ་དེ་དག་ཏུ་ཀླུའི་རྒྱལ་པོ་འཁོར་དང་བཅས་པ་རྣམས་ཀྱིས་མངོན་པར་རྩེ་ཞིང་རོལ་པའི་གནས་སུ་བྱེད་དོ། །གསེར་གྱི་རི་བོ་ཕྱི་མ་ནས་བརྩམས་ཏེ་ཁོར་ཡུག་གི་རི་བོའི་བར་ལ་གླིང་དང་གླིང་
ཕྲན་རྣམས་མ་གཏོགས་པ་ཕྱིའི་རྒྱ་མཚོའམ་བ་ཚ་ཅན་གྱི་རྒྱ་མཚོ་ཞེས་བྱ་བ་ཁོ་ར་ཁོར་ཡུག་ཀུན་དུ་དུམ་བུར་མ་ཆད་པ་ཡོད་ཀྱང་རི་རབ་ཀྱི་རིན་པོ་ཆེའི་མདངས་ཀྱིས་ཕོག་པས་རྒྱ་མཚོ་ཆེན་པོ་དེའི་ཁ་དོག་ཀྱང་ཐ་དད་པ་ཉིད་དུ་གྱུར་པས་རྒྱ་མཚོ་བཞིའི་གྲངས་སུ་མངོན་པར་བརྗོད་པ་ཡིན་ནོ། །གླིང་
རྣམས་ནི་ཕྱི་རོལ་གྱི་རྒྱ་མཚོ་ཆེན་པོ་ན་ཡོད་དེ། དེའང་རི་རབ་ཀྱི་ཤར་ཕྱོགས་ཀྱི་རྒྱ་མཚོ་ན་ལུས་འཕགས་པོའི་གླིང་ཞེས་བྱ་བ་ཟླ་བ་ཁམ་པའི་དབྱིབས་སུ་གནས་པ། དེ་ལ་ལུས་དང་ལུས་འཕགས་ཞེས་བྱ་བའི་གླིང་གཡོག་གཉིས་དང་བཅས་པ་ཡོད་དོ། །དེ་དག་ཏུ་སྐྱེས་པའི་མི་རྣམས་ནི་
གཟུགས་ཆེ་ཞིང་ལྟ་ན་སྡུག་པ་ཡོད་པས་ལུས་འཕགས་ཞེས་བྱ་སྟེ། དེ་ལྟ་བུའི་མི་རྣམས་ཀྱི་གནས་པ་གྲོང་དང༌། གྲོང་རྡལ་དང༌། གྲོང་ཁྱེར་དང༌། ཡུལ་འཁོར་དང༌། ཕོ་བྲང་རྣམས་གནས་སོ། །དེ་བཞིན་དུ་རི་རབ་ཀྱི་ལྷོ་ཕྱོགས་ཀྱི་རྒྱ་མཚོ་ན་ཛམྦུའི་གླིང་སྟེ་ཤིང་རྟ་ཆེན་པོའི་དབྱིབས་སུ་གནས་
པ། འདི་ལའང་རྔ་ཡབ་དང་རྔ་ཡབ་གཞན་ཞེས་བྱ་བའི་གླིང་གཡོག་གཉིས་དང་བཅས་པ་ཡོད་དོ། །འདི་དག་ཏུ་མི་རིགས་མི་འདྲ་བ་མང་པོ་རྣམས་དང༌། དེ་དག་གིས་བསྟི་བའི་གྲོང་དང་གྲོང་རྡལ་ལ་སོགས་པ་དུ་མ་ཡོད་དོ། །གླིང་འདིའི་འོག་རོལ་དཔག་ཚད་ཉི་ཁྲི་ན་དམྱལ་བ་ཆེན་པོའི་གནས་རྣམས་
ཡོད་དེ། དེའང་འདི་ལྟ་སྟེ་ཚ་བའི་དམྱལ་བ་བརྒྱད་ལས་སྡུག་བསྔལ་ཀུན་གྱི་མཐར་ཐུག་པར་གྱུར་པ་ནི་མནར་མེད་པའི་དམྱལ་བ་ཞེས་བྱ་བ་སྟེ། དེ་ནི་ཐམས་ཅད་ཀྱི་འོག་ཏུ་གནས་ཤིང༌། དེའི་གོང་ནས་གོང་དུ་རབ་ཏུ་ཚ་བ་དང༌། ཚ་བ་དང༌། ངུ་འབོད་ཆེན་པོ་དང༌། ངུ་འབོད་དང༌། བསྡུས་འཇོམས་དང༌།
Vol. 213 · folio 21b
ཐིག་ནག་དང༌། ཡང་སོས་ཀྱི་དམྱལ་བ་པ་ལྕགས་བསྲེགས་ཀྱི་ས་གཞིའི་གནས་དང་བཅས་པ་རྣམས་རིམ་པར་གནས་སོ། །དེ་བཞིན་དུ་བརྒྱད་པོ་དེ་དག་གི་ངོས་རེ་ལ་ཉེ་འཁོར་བ་ཞེས་བྱ་བ་མེ་མུར་དང༌། རོ་མྱགས་ཀྱི་འདམ་དང༌། མཚོན་ཆའི་སྐོར་གྱི་དམྱལ་བ་དང༌། ཆུ་བོ་རབ་མེད་དེ།
དམྱལ་བ་ལྷག་པ་བཞི་བཞི་སྟེ་བཅུ་དྲུག་པོ་རྣམས་ཀྱང་གནས་སོ། །ཚ་བའི་དམྱལ་བ་དེ་དག་གི་མཐའ་ལོགས་ཤིག་ཏུ་གྲང་བའི་དམྱལ་བ་ཞེས་བྱ་བ་བརྒྱད་ཡོད་པ་རྣམས་ནི་འདི་ལྟ་སྟེ། ཆུ་བུར་ཅན་དང༌། ཆུ་བུར་རྡོལ་བ་ཅན་དང༌། ཨ་ཆུ་འདོན་པ་དང༌། ཀྱི་ཧུད་འདོན་པ་དང༌། སོ་ཐམས་ཐམས་
པ་དང༌། ཨུཏྤལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ཆེན་པོ་ལྟར་ལུས་ཐམས་ཅད་གས་པར་གྱུར་པའི་གྲང་བའི་དམྱལ་བ་པ་རྣམས་དང་དེ་དག་གི་གནས་གངས་རིའི་ཕྲེང་བ་ཆབ་རོམ་གྱི་ཐང་དང་བཅས་པ་རྣམས་ཡོད་དོ། །གཞན་ཡང་ཉི་ཚེ་བའི་དམྱལ་བ་ཞེས་པ་ཀུན་འབྱུང་བ་ཐ་དད་པ་
ལས་གྲུབ་པའི་སྡུག་བསྔལ་གྱི་བྱེ་བྲག་རྣམ་པ་མང་པོ་ཡོད་ཅིང་གནས་ནི་ངེས་པ་མེད་དེ། ཆུ་བོ་དང༌། རི་དང༌། མྱ་ངམ་གྱི་ཐང་དང༌། འོག་ཏུའང་ཡོད་པར་བཤད་དོ། །ཡི་དྭགས་ཀྱི་འཇིག་རྟེན་ཞེས་བྱ་བ་ཡང་ཛམྦུའི་གླིང་འདིའི་རྒྱལ་པོའི་ཁབ་ཀྱི་འོག་རོལ་དཔག་ཚད་ལྔ་བརྒྱ་ན་ཡི་དྭགས་ཀྱི་གྲོང་
ཁྱེར་སེར་སྐྱ་ཞེས་བྱ་བ་ཡོད་དེ། དེ་ན་ཡི་དྭགས་ཀྱི་བདག་པོ་ཆོས་ཀྱི་རྒྱལ་པོ་གཤིན་རྗེ་མཐུ་བོ་ཆེ་དཔུང་དང་བཅས་པ་གནས་ཤིང༌། དེའི་འཁོར་དུ་གཏོགས་པའི་ཡི་དྭགས་ཀྱི་རིགས་ནི་ཁ་ཁབ་མིག་ལྟར་ཕྲ་བ་ལ་སོགས་པ་སུམ་ཅུ་རྩ་དྲུག་ཏུ་གསུངས་པ་རྣམས་ཏེ་ཐམས་ཅད་རིས་སུ་བསྡུ་ན།
ཕྱིའི་སྒྲིབ་པ་ཅན་དང༌། ནང་གི་སྒྲིབ་པ་ཅན། ཟས་སྐོམ་གྱི་སྒྲིབ་པ་ཅན་དུ་འདུ་བ་སྟེ། དེ་དག་གི་འདུག་པའི་གནས་དང་བཅས་པ་རྣམས་ཡོད་དོ། །དུད་འགྲོ་ནི་ཐང་དང་ཆུ་དང་ནམ་མཁའི་སྤྱོད་ཡུལ་ཅན་ཡིན་པས་ཕལ་ཆེ་བ་དག་ཕྱིའི་རྒྱ་མཚོའི་ནང་དུ་ཆང་གི་སྦང་མ་ལྟར་བྱིངས་ན་གནས་པ་དང༌།
ཁ་འཐོར་བ་ནི་མི་དང་ལྷ་དང་ལྷ་མ་ཡིན་གྱི་ཡུལ་དང་གླིང་བར་གྱི་མུན་པ་ཆེན་པོ་རྣམས་སུ་གནས་སོ། །ཡང་རི་རབ་ཀྱི་ནུབ་ཕྱོགས་ཀྱི་ཕྱིའི་རྒྱ་མཚོ་ན་བ་ལང་སྤྱོད་ཀྱི་གླིང་ཞེས་བྱ་བ་ཀུན་ནས་ཟླུམ་པོར་གྱུར་པ་ཟླ་བ་ཉ་གང་བའི་དབྱིབས་སུ་གནས་པ། དེ་ལ་གཡོ་ལྡན་དང་ལམ་མཆོག་འགྲོ་ཞེས་
Vol. 213 · folio 22a
བྱ་བའི་གླིང་གཡོག་གཉིས་དང་བཅས་པ་ཡོད་དེ། དེ་དག་ཏུ་སྐྱེས་པའི་མི་རྣམས་ཀྱི་ལོངས་སྤྱོད་ནི་ཤས་ཆེར་བ་ལང་དང་རིན་པོ་ཆེ་ལས་བྱུང་བ་ལ་ཉེ་བར་སྤྱོད་པའི་ཕྱིར་མིང་ཡང་དེ་སྐད་ཅེས་བྱ་སྟེ། དེ་ལྟ་བུའི་ཡུལ་གླིང་མིའི་འགྲོ་བ་དང་བཅས་པ་རྣམས་ཡོད་དོ། །རི་རབ་ཀྱི་བྱང་ཕྱོགས་ཀྱི་
ཕྱིའི་རྒྱ་མཚོ་ན་སྒྲ་མི་སྙན་གྱི་གླིང་ཞེས་བྱ་བ་གྲུ་བཞི་པ་ཁྲིའུའི་དབྱིབས་སུ་གནས་པ། དེ་ལ་སྒྲ་མི་སྙན་དང་སྒྲ་མི་སྙན་གྱི་ཟླ་ཞེས་བྱ་བའི་གླིང་གཡོག་གཉིས་དང་བཅས་པ་ཡོད་དེ། དེ་དག་ཏུ་སྐྱེས་པའི་མི་རྣམས་ཀྱི་ལོངས་སྤྱོད་ནི་མ་རྨོས་པ་དང་མ་བཏབ་པར་འཁྲུངས་པའི་འབྲས་སཱ་ལུའི་ཟས་དང༌།
དཔག་བསམ་གྱི་ཤིང་ལས་བྱུང་བ་ལ་ཅི་བདེར་སྤྱོད་པ་ལ་སོགས་པ་མཐོ་རིས་ཀྱི་ལྷའི་འཇིག་རྟེན་ལྟ་བུ་ཡོད་དེ། དྲན་པ་ཉེར་གཞག་ལས། མཐོ་རིས་ལས་གཞན་པའི་མཐོ་རིས་ཀྱི་འཇིག་རྟེན་གཉིས་པ་ལྟ་བུ་ཞེས་གསུངས་པས། གླིང་འདིའི་བདེ་བ་དང་འབྱོར་པ་ལ་མིའི་གནས་
གཞན་གསུམ་གྱིས་འགྲན་པར་མི་ནུས་པ་ཞིག་གོ །ཡུལ་དེར་པི་ཤཱ་ཙི་ཀ་ཞེས་པ་ཤ་ཟའམ་འདྲེའི་སྐད་ཀྱིས་སྨྲ་བའི་ཕྱིར་སྒྲ་མི་སྙན་ནམ། དཔག་བསམ་གྱི་ཤིང་ལས་འཆི་འཕོ་བར་སྒྲོན་པའི་སྒྲ་མི་སྙན་པར་འབྱུང་བས་སམ། ཡང་ན་ཀླུ་རྣམས་ཀྱིས་གཙེས་པའི་སྐྱོན་གྱི་ཉི་མ་སྤྲིན་
གྱིས་གཡོགས་པ་ན། དེས་རྫ་རྔ་དང་པི་ཝང་ལ་སོགས་པའི་རོལ་མོ་རྣམས་ལས་སྐད་མི་སྙན་པར་འབྱིན་པ་ལས་དེ་སྐད་དུ་གདགས་པར་གྲག་གོ །དེ་ལྟ་བུའི་ཡུལ་གླིང་མིའི་འགྲོ་བ་དང་བཅས་པ་རྣམས་ཡོད་དེ། དེ་དག་གི་ཕྱི་རོལ་གྱི་རྒྱ་མཚོ་ཆེན་པོའི་མཐའ་སྐོར་ཀུན་དུ་ལྕགས་རི་ཆེན་པོ་
ཞིག་གིས་བསྐོར་བ་ལ་ཁོར་ཡུག་གི་ལྕགས་རི་ཞེས་བྱ་བ་ཡིན་ནོ། །རི་རབ་ཀྱི་རྩེ་མོ་སུམ་ཅུ་རྩ་གསུམ་པའི་གནས་ནས། སྟེང་གི་ནམ་མཁའ་ལ་རླུང་གི་དཀྱིལ་འཁོར་ལ་བརྟེན་ཏེ་སྤྲིན་གྱི་ཕུང་པོ་བཞིན་དུ་མངོན་པར་འཕགས་པའི་རིན་པོ་ཆེའི་གཞི་ལ། གཟུགས་ཀྱི་ཁམས་ཀྱི་ལྷ་དང༌།
འདོད་པའི་ཁམས་ཀྱི་ལྷ་རྣམས་ཀྱི་གཞལ་མེད་ཁང་དམ་པ་ལྷ་རྫས་ཀྱི་འབྱོར་པ་ཕུན་སུམ་ཚོགས་པ་ལས་ལེགས་པར་གྲུབ་པ་རྣམས་ནི། དཔེར་ན་བླ་ཁབ་མང་པོ་སྟེང་ནས་སྟེང་དུ་ཕུབ་པའམ། མཆོད་རྟེན་ཁ་སྦུབས་པའི་བང་རིམ་གྱི་རྣམ་པ་བཞིན་དུ་འོག་མ་འོག་མ་ལས་གོང་མ་གོང་མ་ཇེ་ཆེར་
Vol. 213 · folio 22b
གནས་ཏེ། དེའང་འདོད་པའི་ཁམས་ཀྱི་ལྷའི་གནས་བཞི་ནི་ཉིས་འགྱུར་དང༌། གཟུགས་ཀྱི་ཁམས་ཀྱི་ལྷའི་གནས་ནི་སྟོང་འགྱུར་གྱིས་རྒྱ་ཆེ་བ་ཉིད་དུ་གནས་ཏེ། ཇི་སྐད་དུ། གནས་ནས་གནས་འོག་ཇི་སྲིད་པ། །དེ་ནས་དེ་ཡི་གོང་དེ་སྲིད། །ཅེས་སོ། །གནས་དེ་དག་ཏུ་བརྟེན་པའི་ལྷ་རྣམས་ནི་
འདི་ལྟ་སྟེ། འཐབ་བྲལ་དང༌།དགའ་ལྡན་དང༌། འཕྲུལ་དགའ་དང༌། གཞན་འཕྲུལ་དབང་བྱེད་པ་སྟེ་འདོད་པའི་ཁམས་ཀྱི་ལྷ་རྣམས་སོ། །དེ་ལྟར་ན་མནར་མེད་པ་ནས་བརྩམས་ཏེ་འདིའི་བར་ལ་འདོད་པའི་ཁམས་ཞེས་བྱ་ཞིང༌། བྱེ་བྲག་ཏུ་ལག་ན་གཞོང་ཐོགས་ཀྱི་ལྷ་ཡན་ཆད་ནི་འདོད་པ་ན་སྤྱོད་པའི་ལྷ་
དྲུག་ཡིན་ཏེ། དེ་དག་འདོད་པའི་ཡོན་ཏན་འཁྲིག་པ་དང་ཁམས་ཀྱི་ཟས་ལ་འདོད་ཆགས་དང་བཅས་པའི་ཕྱིར་འདོད་པའི་ཁམས་ཀྱི་ལྷ་ཞེས་གདགས་སོ། །གཟུགས་ཀྱི་ཁམས་ཀྱི་ལྷ་རྣམས་ནི་བསམ་གཏན་བཞིས་བསྡུས་ཏེ། དེ་དག་ཀྱང་འདི་ལྟ་སྟེ། ཚངས་རིས་དང༌། ཚངས་པ་མདུན་ན་
འདོན་དང༌། ཚངས་ཆེན་ཏེ་བསམ་གཏན་དང་པོར་གཏོགས་པའི་ལྷ་རྣམས་སོ། །འོད་ཆུང་དང༌། ཚད་མེད་འོད་དང༌། འོད་གསལ་བ་སྟེ་བསམ་གཏན་གཉིས་པར་གཏོགས་པའི་ལྷ་རྣམས་སོ། །དགེ་ཆུང་དང༌། ཚད་མེད་དགེ་དང༌། དགེ་རྒྱས་ཏེ་བསམ་གཏན་གསུམ་པར་གཏོགས་པའི་ལྷ་རྣམས་
སོ། །སྤྲིན་མེད་དང༌། བསོད་ནམས་སྐྱེས་དང༌། འབྲས་བུ་ཆེ་བ་དང༌། མི་ཆེ་བ་དང༌། མི་གདུང་བ་དང༌། གྱ་ནོམ་སྣང་བ་དང༌། ཤིན་ཏུ་མཐོང་བ་དང༌། འོག་མིན་ཏེ་བསམ་གཏན་བཞི་པར་གཏོགས་པའི་ལྷ་རྣམས་ཏེ་གཟུགས་ཀྱི་ཁམས་ཀྱི་ལྷ་རྣམས་སོ། །དེ་དག་ལ་ལ་ནི་གཟུགས་ན་སྤྱོད་པའི་ལྷ་རིས་
བཅུ་བདུན་ཞེས་བྱ་སྟེ། འདོད་པའི་ཡོན་ཏན་འདོད་ཆགས་དང་བྲལ་ལ། གཟུགས་ལ་འདོད་ཆགས་དང་བཅས་པའི་ཕྱིར་གཟུགས་ཀྱི་ཁམས་ཀྱི་ལྷ་ཞེས་གདགས་སོ། །གཟུགས་མེད་པའི་ཁམས་ཀྱི་ལྷ་རྣམས་ནི་འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌།
ཅི་ཡང་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དེ་གཟུགས་མེད་པའི་ཁམས་ཀྱི་ལྷ་རྣམས་སོ། །བཞི་པོ་འདི་དག་ནི་ལུས་ཅན་མ་ཡིན་པའི་ཕྱིར་གནས་ལོགས་པ་མེད་ཀྱང་སེམས་ཀྱི་ཏིང་ངེ་འཛིན་གྱི་བྱེ་བྲག་གི་རྣམ་པ་བཞིར་འབྱེད་པའི་སྒོ་ནས་གཟུགས་མེད་པའི་
Vol. 213 · folio 23a
ཁམས་ཀྱི་ལྷ་ཞེས་བྱ་སྟེ། གཟུགས་ལ་འདོད་ཆགས་དང་བྲལ་བར་གྱུར་ལ། གཟུགས་མེད་པ་ལ་འདོད་ཆགས་དང་བཅས་པའི་ཕྱིར་དེ་སྐད་ཅེས་གདགས་སོ། །མངོན་པ་བ་ཁ་ཅིག་ནི་གཟུགས་མེད་པའི་ཁམས་ནི་འོག་མིན་གྱི་སྟེང་ནས་སྟེང་དུ་བརྩེགས་མར་ཡོད་པ་དང་གཟུགས་
ཀྱང་ཡོད་ལ། གཟུགས་མེད་པ་ཞེས་བརྗོད་པ་ནི་དམན་པ་ལ་དགག་སྒྲ་སྦྱར་བ་ཡིན་ཞེས་སྨྲ་བ་ཡང་ཡོད་དོ། །དེ་དག་གི་སྐྱེ་བའི་གནས་ཀྱི་ཁྱད་པར་ཡང༌། ལྷ་དང༌། དམྱལ་བ་དང༌། སྲིད་པ་བར་མ་རྣམས་ནི་བརྫུས་ཏེ་སྐྱེས་པ་ཡིན་ལ། མི་དང་དུད་འགྲོ་བ་རྣམས་ནི་སྒོ་ང་ལས་སྐྱེས་པ་དང༌། མངལ་ལས་སྐྱེས་པ་དང༌།
བརྫུས་ཏེ་སྐྱེས་པ་དང༌། དྲོད་གཤེར་ལས་སྐྱེས་པ་སྟེ་བཞི་ག་ཚང་བ་དང༌། ཡི་དྭགས་ལ་མངལ་ལས་སྐྱེས་པ་དང་བརྫུས་ཏེ་སྐྱེས་པ་གཉིས་ཀ་ཡོད་པར་བཤད་དོ། །དེ་ལྟར་ཇི་སྐད་བསྟན་པའི་གླིང་བཞི་དང༌། རིའི་རྒྱལ་པོ་དང༌། གསེར་གྱི་རི་བདུན་དང༌། ཁོར་ཡུག་དང༌། འདོད་པའི་ལྷ་དྲུག་དང༌། ཚངས་པའི་
འཇིག་རྟེན་གྱི་བར་ལ་གླིང་བཞི་པའི་འཇིག་རྟེན་གྱི་ཁམས་ཞེས་བྱའོ། །དེ་བྱེ་བ་ཕྲག་བརྒྱ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ཇི་ལྟར་བགྲང་བའི་ཚུལ་ནི་སྔོན་དུ་སྨྲས་ཟིན་པ་ལྟར་རོ། །གཉིས་པ་ཛམྦུའི་གླིང་བཀར་ཏེ་བཤད་པ་ནི། དེ་ལ་ཇི་སྐད་སྨོས་པའི་གླིང་གཞན་གསུམ་ནི།
ལོངས་སྤྱོད་ཀྱི་ས་དང༌། ཛམྦུའི་གླིང་ནི་ལས་ཀྱི་ས་སྟེ་དེ་ཡང་དུས་ཀྱི་འཁོར་ལོའི་རྒྱུད་འགྲེལ་རྣམས་ནས། རི་རབ་ཀྱི་རྭའི་འོག་གི་གླིང་དྲུག་ནི་ལོངས་སྤྱོད་ཀྱི་ས་པ་དང༌། བསིལ་རིའི་ཕྱི་མཚམས་ནས་ལན་ཚྭའི་རྒྱ་མཚོའི་མཐར་ཐུག་པའི་བདུན་པ་ཛམྦུའི་གླིང་ནི་ལས་ཀྱི་ས་པ་སྟེ། དེ་ལ་དུམ་བུ་བཅུ་
གཉིས་སུ་གནས་པའི་ལྷོ་གླིང་དབུས་མ་ཛམྦུའི་གླིང་ཆུང་ངུར་བཞེད་པ་ཡིན་ནོ། །དེ་ལ་ཅིའི་ཕྱིར་ཛམྦུའི་གླིང་ཞེས་བྱ་ཞེ་ན། གླིང་གང་གི་ཡུལ་དབུས་སུ་གྱུར་པ་ནི་འཕགས་པའི་ཡུལ་གྱི་མ་ག་དྷཱ་སྟེ། དེའི་བྱང་ནས་བྱང་དུ་རི་ནག་པོ་རྒྱུད་དགུ་འདས་པའི་ཕ་རོལ་ན་རིའི་རྒྱལ་པོ་གངས་ཅན་ཞེས་བྱ་བ་གངས་
རི་དཔལ་དང་ལྡན་པ་ཡོད་དོ། །དེའི་ཕ་རོལ་དུ་རིའི་རྒྱལ་པོ་སྤོས་ཀྱི་ངད་ལྡང་ཞེས་བྱ་བ་ཡོད་དེ། དེ་དག་གི་ཚུ་རོལ་ན་ཀླུའི་རྒྱལ་པོ་མ་དྲོས་པས་བདག་གིར་བྱས་པའི་མཚོ་མ་དྲོས་པ་ཞེས་བྱ་བ་ཆུ་བསིལ་ཞིང་སྦྲང་རྩི་ལྟ་བུས་གང་བ་ལ། མེ་ཏོག་ཨུཏྤལ་དང་པདྨ་དང་ཀུ་མུ་དཱ་དང་པུཎྜ་རཱི་ཀ་རྣམས་ཀྱིས་
Vol. 213 · folio 23b
ཁེབས་པ་དབྱིབས་ལེགས་ཤིང་ལྟ་ན་སྡུག་པ་གནས་སོ། །དེའི་ཤར་དང་ལྷོ་དང་ནུབ་དང་བྱང་གི་ཕྱོགས་བཞི་ནས་ཆུ་བོ་ཆེན་པོ་བཞི་འབབ་པ་ནི་འདི་ལྟ་སྟེ། ཆུ་བོ་གངྒཱ་དང༌། སིནྡྷུ་དང༌། པཀྵུ་དང༌། སི་ཏཱ་རྣམས་རིམ་པ་དེ་ཉིད་ཀྱིས་སོ། །ཆུ་བོ་དེ་དག་རེ་རེས་ཀྱང་མ་དྲོས་པའི་མཚོ་ལ་གཡས་སུ་
ལན་གྲངས་བདུན་བདུན་དུ་བསྐོར་ནས་ཆུ་བྲན་ལྔ་བརྒྱ་ལྔ་བརྒྱ་དང་ལྷན་ཅིག་ཏུ་རང་རང་གི་ཕྱོགས་ཀྱི་རྒྱ་མཚོ་ག་ལ་བར་འགྲོ་བར་བྱེད་དོ། །མཚོ་མ་དྲོས་པའི་འགྲམ་ངོགས་སུ་ཤིང་ཛམྦུ་ཏྲི་ཤ་ཞེས་བྱ་བ་འབྲས་བུ་རོ་མཆོག་མངར་པོ་དང་ལྡན་པར་སྐྱེས་པ། ཤིང་དེའི་འབྲས་བུ་ཤིན་ཏུ་སྨིན་པར་གྱུར་པ་ཆུའི་
ནང་དུ་ལྷུང་བ་ལས་ཛམྦུ་ཞེས་བྱ་བའི་སྒྲ་ཡང་འབྱུང་ངོ༌། །དེར་ལྡང་བའི་འབྲས་བུ་དེ་ལས་ཀླུའི་རྒྱལ་པོ་རྣམས་ཉར་སྤྲུལ་ནས་ཟ་བར་བྱེད་ཅིང༌། མ་ཟོས་པ་རྣམས་ནི་ཆུ་དང་ཕྲད་པའི་སྟོབས་ཀྱིས་ཛམྦུ་ཆུ་བོའི་གསེར་དུ་འགྱུར་བ་ཞིག་ཡོད་དོ། །དེས་ན་ཤིང་དེས་ཉེ་བར་མཚོན་པའི་གླིང་ཡིན་པས་ཛམྦུའི་
གླིང་ཞེས་ཐ་སྙད་དུ་བྱས་སོ། །གཞན་ཡང་རིའི་རྒྱལ་པོ་སྤོས་ཀྱི་ངད་ལྡང་དེའི་བྱང་ཕྱོགས་ན་བྲག་གསེར་གྱི་བྱ་སྐྱིབས་ལྷ་མ་ཡིན་གྱི་ངོས་ཞེས་བྱ་བ་དབྱིབས་ལེགས་པ་ནང་གི་ས་གཞི་ཡང་གསེར་གྱི་བྱེ་མ་བརྡལ་ཞིང་ཙནྡན་གྱི་ཆུས་ཆག་ཆག་བཏབ་པ་སྟེ། དེར་ཡིད་དུ་མི་འོང་བའི་ཤིང་ངམ།
ཐགསེག་མ་གང་ཅི་ཡང་རུང་བ་ལྷུང་བ་མི་མ་ཡིན་རྣམས་ཀྱིས་ཕྱིར་འདོར་བར་བྱེད་པ། དེའི་ཁོར་ཡུག་ཏུའང་བྲག་གསེར་གྱི་བྱ་སྐྱིབས་བརྒྱད་སྟོང་དང་བཅས་པ་ཡོད་དོ། །བྲག་དེའི་བྱང་ཕྱོགས་སུ་ཤིང་སཱ་ལའི་རྒྱལ་པོ་རབ་ཏུ་བརྟན་པ་ཞེས་བྱ་བ་འདོམ་བཞི་བཅུ་ཐུར་དུ་ཟུག་ཅིང་བརྒྱད་ཅུ་གྱེན་དུ་འཕགས་
པ་སཱ་ལའི་ཕྲེང་བ་རིམ་པ་བདུན་གྱིས་བསྐོར་བ་དང༌། ཤིང་དེའི་ཤར་ཕྱོགས་སུ་རྫིང་བུ་དལ་གྱིས་འབབ་པ་ཞེས་བྱ་བ་དབྱིབས་ཟླུམ་པོ། །རྫིང་གཡོག་བརྒྱད་སྟོང་དང་བཅས་པ། ཐམས་ཅད་ཀྱང་ཡན་ལག་བརྒྱད་དང་ལྡན་པའི་ཆུས་གང་བའི་ནང་ན་མེ་ཏོག་ཨུཏྤལ་དང་པདྨ་དང་ཀུ་མུ་དཱ་དང་པདྨ་
དཀར་པོ་ཆེ་ཞིང་མཆོག་ཏུ་ཆེ་བ་དག་གིས་ཁེབས་པ་ཡོད་དོ། །བརྒྱ་བྱིན་གྱི་གཡུལ་ངོར་སྤྱོད་པའི་གླང་པོ་ཆེ་རབ་བརྟན་ཞེས་བྱ་བ་གླང་པོ་ཆེ་བརྒྱད་སྟོང་གི་འཁོར་དང་བཅས་ཏེ། དགུན་དང༌། དཔྱིད་དང༌། སྟོན་གསུམ་དུ་ཟླ་བ་བཞི་བཞིར་བྲག་གསེར་གྱི་བྱ་སྐྱིབས་དང༌། ཤིང་སཱ་ལའི་རྒྱལ་པོ་དང༌། རྫིང་བུ་
Vol. 213 · folio 24a
དལ་གྱིས་འབབ་པ་དག་ཏུ་རེ་མོས་སུ་འཇུག་ཅིང་འཁོད་པ་དེ་ལྟ་བུའི་ངོ་མཚར་གྱི་ཕྲེང་བ་མང་པོ་དག་ཡོད་དོ། །དེ་དག་ཏུ་མ་ཟད་གླིང་འདི་ནི་གླིང་གཞན་ལས་མངོན་པར་འཕགས་པའི་ཁྱད་པར་གྱི་ཆོས་ཤིན་ཏུ་མང་ཏེ། མདོ་དྲན་པ་ཉེར་གཞག་ལས། གླིང་གསུམ་གྱི་
ནང་ནས་འདི་ནི་ལས་ཀྱི་ས་ཡིན། འདིར་ནི་དགེ་བ་བཅུའི་ལས་ཀྱི་ལམ་དག་སེམས་པ་ཡིན། འདིར་ནི་སངས་རྒྱས་འབྱུང་བ་ཡིན། འདི་ནི་མིའི་གནས་བཞི་དག་གི་རག་ལས་པ་ཡིན། འདིར་ནི་དགེ་བ་བཅུའི་ལས་ཀྱི་ལམ་དག་ངེས་པར་སེམས་ཤིང་རྣམ་པར་དཔྱོད་པ་ཡིན། འདིར་ནི་
ཚངས་པར་སྤྱོད་པའི་གནས་ཡིན། འདིར་ནི་འཆི་བ་དང་སྐྱེ་བའི་སེམས་པ་ཡིན། འདིར་རྡོ་རྗེ་ལས་བྱས་པའི་གདན་ཡོད་ཅེས་གསུངས་པ་ལྟར་གླིང་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཞིང་སྦྱོང་བའི་སྨོན་ལམ་གྱི་ཁྱད་པར་མང་པོས་མཛའ་བར་བཅིངས་པ་དང༌།
གདུལ་བར་བགྱི་བའི་འགྲོ་བ་མཐའ་དག་གིས་ཀུན་ནས་བསྟེན་པའི་གནས་ཡིན་པའི་ཕྱིར་ཁྱད་པར་དུ་འཕགས་པ་སྟེ། དེ་ཡང་སྔོན་བདག་ཅག་གི་སྟོན་པ་འདིས་བྱང་ཆུབ་ཀྱི་སྤྱད་པ་སྤྱོད་པ་ན། ཝཱ་རཱ་ཎ་སཱི་ཁོ་ན་ལ་ཡང་འདས་པའི་དུས་ཀྱི་སངས་རྒྱས་མང་པོ་བྱོན་པ་ལ་མཆོད་པ་དང༌། དེ་དག་
གི་རྗེས་སུ་བསྟན་པ་ཐོས་པའང་དཔག་ཏུ་མ་མཆིས་པ་བྱུང་བར་ངེས་ཏེ། རྒྱ་ཆེར་རོལ་པའི་མདོ་ལས། དེར་ནི་ང་ཡིས་མཆོད་སྦྱིན་སྟོང་ཕྲག་བྱེ་བ་ཁྲག་ཁྲིག་དྲུག་ཅུ་བྱས། །དེར་ནི་སངས་རྒྱས་སྟོང་ཕྲག་བྱེ་བ་ཁྲག་ཁྲིག་དྲུག་ཅུ་དེ་དག་མཆོད། །ཝཱ་རཱ་ཎ་སཱི་དམ་པ་དེ་ནི་སྔོན་གྱི་དྲང་སྲོང་རྣམས་
ཀྱི་གནས། །ས་དེ་ལྷ་དང་ཀླུ་ཡིས་མངོན་བསྟོད་རྟག་ཏུ་ཆོས་ནི་མངོན་པར་གཞོལ། །ངས་ནི་སྔོན་ཆད་སངས་རྒྱས་བྱེ་བ་སྟོང་ཕྲག་དགུ་བཅུ་རྩ་གཅིག་དྲན། །དེ་དག་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར། །ཞི་ཞིང་ཉེར་ཞི་བསམ་གཏན་མངོན་གྱུར་རྟག་ཏུ་
རི་དྭགས་རྣམས་ཀྱིས་བསྟེན། །དེ་ཕྱིར་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར། །ཞེས་གསུངས་པ་དང༌། གནས་བྱ་རྒོད་ཕུང་པོ་ཉིད་དུ་བཞུགས་པའི་སངས་རྒྱས་ལ་བཀུར་སྟིར་མཛད་པ་ཡང་ཆེས་ཤིན་ཏུ་མང་སྟེ། ཏིང་ངེ་འཛིན་རྒྱལ་པོའི་མདོ་ལས། སངས་རྒྱས་
Vol. 213 · folio 24b
དག་ནི་བྱེ་བ་ཕྲག་སྟོང་དང༌། །དེ་བས་ལྷག་པ་གངྒཱའི་བྱེ་མ་སྙེད། །ཀུན་ཀྱང་བྱ་རྒོད་ཕུང་པོ་འདིར་བཞུགས་ཏེ། །མི་དབང་དེ་ཀུན་ང་ཡིས་བཀུར་སྟིར་བྱས། །ཞེས་གསུངས་པའི་ཕྱིར་རོ། །དེ་བཞིན་དུ་མ་འོངས་པར་ཡང་སྒྲོན་མེའི་བསྐལ་པ་འདི་ལ་འབྱོན་པར་འགྱུར་བའི་སངས་རྒྱས་
བཅོམ་ལྡན་འདས་སྟོང་ཕྲག་གཅིག་ལ་བཞིས་དམན་པའམ་གཅིག་གིས་དམན་པ་རྣམས་ཀྱང་བྱང་ཆུབ་ཀྱི་སྙིང་པོ་མངོན་དུ་མཛད་ཅིང་ཆོས་ཀྱི་འཁོར་ལོ་བསྐོར་བའི་གནས་སུ་འགྱུར་བའི་ཕྱིར་དང༌། བྱེ་བྲག་ཏུ་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།
བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་ཐུབ་པའི་དབང་པོ་ཉིད་ཀྱིས་བྱང་ཆུབ་ཀྱི་ཤིང་ལྗོན་པའི་དྲུང་ག་ལ་བར་སྐྱིལ་མོ་ཀྲུང་གཅིག་ལ་ཡིད་ཀྱི་སྲུབ་ཤིང་སྡེ་དང་བཅས་པ་ལས་རྣམ་པར་རྒྱལ་བའི་གོ་འཕང་
དམ་པ་མངོན་དུ་མཛད་པའི་ཚུལ་བསྟན་པ་དང༌། འཇིག་རྟེན་གྱི་ཁམས་ཐམས་ཅད་དུ་སྣང་བར་བྱེད་པའི་ཆོས་ཀྱི་འཁོར་ལོ་བསྐོར་བའི་བྱིན་གྱིས་རློབ་པས་བྱིན་གྱིས་བརླབས་ཏེ། སླར་ཡང་མི་ཤིགས་རྡོ་རྗེ་རིན་པོ་ཆེའི་ཁམས་སུ་བརླིང་བར་བྱས་པའི་གནས་སུ་གྱུར་པའི་གླིང་ཐམས་ཅད་ཀྱི་གཙུག་
གི་ནོར་བུ་གཅིག་པུར་གྱུར་པ་ནི་ཛམྦུའི་གླིང་འདི་ཉིད་དོ། །གཞན་ཡང་གླིང་འདིའི་ནུབ་ཕྱོགས་སུ་གསང་ཆེན་རྡོ་རྗེ་ཐེག་པའི་ཉེ་ལམ་གྱི་བདུད་རྩི་བསམ་གྱིས་མི་ཁྱབ་པའི་འབྱུང་གནས་སུ་གྱུར་པའི་ཆོས་མཛོད་ཆེན་པོ། རིག་པ་འཛིན་པ་རྣམས་ཀྱི་དགའ་བའི་ཚལ་ལྟ་བུའི་གནས་མཆོག་ཁྱད་པར་ཅན་ཨཽ་ཌྱཱན་
རྡོ་རྗེ་ཆེན་པོའི་ཕོ་བྲང་ཞེས་བྱ་བ་ཡོད་དོ། །ཤར་ཕྱོགས་སུ་རྒྱལ་བ་མ་ལུས་བསྐྱེད་པའི་ཡབ་གཅིག་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་བརྟན་པའི་འཁོར་ལོ་བུས་པ་ཆུང་ངུའི་གཟུགས་སུ་བཟུང་ནས། ཡིད་ཅན་རྒྱ་མཚོ་ཆེན་པོའི་རྡུལ་གྱི་གྲངས་དང་མཉམ་པ་རྣམ་པ་ཐམས་ཅད་
མཁྱེན་པའི་གྲོང་ཁྱེར་དུ་འཁྲིད་པའི་ཆོས་ཀྱི་ཚུལ་ལེགས་པར་འདོམས་པའི་གནས་རྒྱའི་རི་བོ་རྩེ་ལྔ་ཞེས་བྱ་བ་ཡོད་དོ། །ལྷོ་ཕྱོགས་སུ་སྙིང་རྗེ་ཆེན་པོའི་གཏེར་ཆེན་འཕགས་པ་སྤྱན་རས་གཟིགས་དབང་ཕྱུག་དང་ཐུགས་རྗེ་ཤིན་ཏུ་མྱུར་བའི་དཔའ་མོ་རྗེ་བཙུན་སྒྲོལ་མ་སྟེ་དེ་གཉིས་ཀྱིས་སེམས་ཅན་གྱི་ཁམས་སུ་ཉིན་མཚན་
Vol. 213 · folio 25a
གྱི་དུས་རྣམ་པ་དྲུག་ཏུ་དགོངས་ཤིང་དངོས་དང་རྣམ་པར་འཕྲུལ་བའི་སྒྱུ་འཕྲུལ་གྱི་དྲྭ་བས་བྱང་ཆུབ་ཀྱི་སྤྱོད་པ་སྐྱོང་ཞིང་བཞུགས་པའི་གཞལ་མེད་ཁང་དག་གིས་མངོན་པར་བརྒྱན་པའི་རི་བོ་གྲུ་འཛིན་ཞེས་བྱ་བ་དང༌། སྟོན་པ་ཤཱཀྱའི་རྒྱལ་པོས་ཟུང་འཇུག་གི་སྐུར་བཞེངས་ནས་སྐལ་བ་དང་ལྡན་པའི་གདུལ་བྱ་མཆོག་
གི་འཁོར་རྣམས་ལ་དཔལ་དུས་ཀྱི་འཁོར་ལོའི་རྩ་བའི་རྒྱུད་ཀྱི་བདུད་རྩིའི་དགའ་སྟོན་སྩལ་བའི་གནས་སུ་བྱིན་གྱིས་བརླབས་པ་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོ་ཞེས་བྱ་བ་བཞུགས་སོ། །བྱང་ཕྱོགས་སུ་རྒྱལ་བའི་སྲས་ཀྱི་རང་གཟུགས་ཆོས་བཞིན་མཛད་པའི་ཆོས་རྒྱལ་བདུན་དང་རིགས་ལྡན་ཉི་ཤུ་རྩ་
ལྔས་ལེགས་པར་བསྲུངས་པ། ཀ་ལཱ་པ་ཞེས་བྱ་བས་མཚོན་པའི་གྲོང་ཁྱེར་བྱེ་བ་ཕྲག་དགུ་བཅུ་རྩ་དྲུག་དང་ལྡན་པའི་འཛིན་མའི་དཀྱིལ་འཁོར་དམ་པ་ཤམྦྷ་ལ་ཞེས་བྱ་བ་དང༌། ས་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྣམ་པར་འཕྲུལ་པའི་རོལ་རྩེད་བགྲང་དུ་མེད་པ་དག་
གིས། བཅོམ་ལྡན་འདས་བུ་རམ་ཤིང་པའི་ལུང་དང་རྟོགས་པའི་བསྟན་པ་ཡིད་བཞིན་གྱི་ནོར་བུ་རིན་པོ་ཆེ་མཁས་པའི་ཕྲིན་ལས་གསུམ་གྱི་རྒྱལ་མཚན་དམ་པའི་རྩེ་མོ་ལ་མངའ་གསོལ་ཏེ། ཇི་སྲིད་མ་ཕམ་རྒྱལ་བའི་དབང་པོའི་བསྟན་པ་ཤར་བར་མ་གྱུར་པ་དེ་སྲིད་དུ་བརྟན་པར་བགྱིད་པའི་གནས་དམ་པ་བོད་ཡུལ་
ཁ་བའི་ལྗོངས་ཞེས་བྱ་བ་རྣམས་ཡོད་དོ། །གཞན་ཡང་འཇིག་རྟེན་ལས་འདས་པ་ཆེན་པོ་དཔལ་ཧེ་རུ་ཀའི་ཡེ་ཤེས་སྐྱེ་བ་མེད་པའི་ཀློང་ནས་སྐྱེ་བའི་ཆོ་འཕྲུལ་གྱི་རྣམ་པར་རོལ་པའི་དཔའ་བོ་དང་རྣལ་འབྱོར་མ་ས་ཆེན་པོའི་རྡུལ་ཕྲ་བ་སྙེད་ཀྱིས་རྣམ་པར་རྩེ་བའི་གནས་ཆེན་པོ་ཡུལ་སུམ་ཅུ་རྩ་གཉིས། གནས་ཉི་ཤུ་
རྩ་བཞི། དུར་ཁྲོད་ཆེན་པོ་བརྒྱད་རྣམས་དང༌། གཞན་ཡང་ཡུལ་འཁོར་ལྔ་བརྒྱ་དང༌། ལྗོངས་ཆེན་པོ་བཅུ་དྲུག་དང༌། ཡུལ་ཕྲན་སྟོང་ཕྲག་གཅིག་སྟེ། དེ་དག་ཏུ་བསྟེན་པའི་མིའི་རིགས་མི་འདྲ་བ་སུམ་བརྒྱ་དྲུག་ཅུ་དང༌། སྐད་ཀྱི་རིགས་མི་འདྲ་བ་བདུན་བརྒྱ་ཉི་ཤུ་འབྱིན་པ་ཡོད་པར་བཤད་པ་རྣམས་
ཀྱང་གླིང་འདི་ཉིད་དུ་ཡོད་པས་སོ། །མདོར་ན་བསྐལ་པ་བཟང་པོའི་བྱང་ཆུབ་སེམས་དཔའ་སྟོང་དང་བཞི་ལས་ཐུགས་བསྐྱེད་ཀྱི་སྟོབས་རྨད་དུ་བྱུང་བར་བཤད་པ་ནི་སྟོན་པ་འདི་ཉིད་དེ། གང་དེས་མཛད་པའི་ཕྲེང་བ་རྨད་དུ་བྱུང་བ་དང་བཅས་ཏེ་སེམས་ཅན་གྱི་དོན་ལ་བྱོན་པའི་གནས་ནི་ཛམྦུའི་གླིང་ཞེས་བྱ་བ་འདི་ཉིད་
Vol. 213 · folio 25b
དོ། །གཉིས་པ་དེར་ཇི་ལྟར་བྱོན་པ་དངོས་ནི། སློབ་དཔོན་ཆེན་པོ་ཀླུ་སྒྲུབ་ཀྱིས། དང་པོར་བྱང་ཆུབ་མཆོག་ཏུ་ཐུགས་བསྐྱེད་དེ། །བསྐལ་པ་གྲངས་མེད་གསུམ་དུ་ཚོགས་བསགས་ཤིང༌། །བར་དུ་གཅོད་པའི་བདུད་རྣམས་འཇོམས་མཛད་པ། །བཅོམ་ལྡན་སེང་གེ་དེ་ལ་ཕྱག་འཚལ་ལོ། །ཞེས་
གསུངས་པ་ལྟ་བུའི་གོ་རིམ་དང་རྗེས་སུ་མཐུན་པར་བརྗོད་པར་བྱའོ། །དེ་ལ་དང་པོ་བྱང་ཆུབ་ཏུ་ཐུགས་བསྐྱེད་པ་དང༌། བར་དུ་ཚོགས་གཉིས་བསགས་པ་དང༌། མཐར་སངས་རྒྱས་པ་དངོས་སོ། །དང་པོ་ཐུགས་བསྐྱེད་པ་ལའང་ཐེག་པ་དམན་པ་ལ་གྲགས་པ་དང༌། ཐེག་པ་ཆེན་པོ་ལ་གྲགས་
པ་གཉིས་སོ། །དང་པོ་ཐེག་པ་དམན་པ་ལྟར་ན། འདུལ་བ་ལུང་ལས། སངས་རྒྱས་འདོད་ཆགས་བྲལ་ཐོས་ཤིང༌། །གླང་པོ་དྲེགས་པའི་ཤས་ཆེན་དང༌། །འཇིག་རྟེན་སྡུག་བསྔལ་གྱུར་མཐོང་ནས། །ངས་ནི་བྱང་ཆུབ་སེམས་བསྐྱེད་དོ། །ཞེས་འབྱུང་བའི་དོན་བསྡུས་ཏེ་བརྗོད་ན་འདི་ལྟར་
སྔོན་བྱུང་བ་འདས་པའི་དུས་ཀྱི་བསྐལ་པ་ལ་ཁོ་བོ་ཅག་གི་སྟོན་པ་འདི་ནི་རྒྱུད་རང་བཞིན་གྱིས་མཉེན་ཞིང་ཆོས་ལ་གུས་པ་ལྷུར་བགྱིད་པ། འོད་ལྡན་ཞེས་བྱ་བའི་གྲོང་ཁྱེར་གྱི་རྒྱལ་པོ་རབ་གསལ་ལམ་འོད་ལྡན་ཞེས་བྱ་བ་སྟོབས་དང་འབྱོར་པ་ནི་ལྷ་རྣམས་ཀྱི་དབང་པོའི་ཕུན་སུམ་ཚོགས་པ་ལྟ་བུ་ལ་སྤྱོད་པ་
ཞིག་ཏུ་གྱུར་ཏོ། །དེ་ལ་དུས་གཞན་ཞིག་ན། གླང་པོ་ཆེ་མེ་ཏོག་ཀུ་མུ་དའི་མདོག་བཞིན་དུ་ཐལ་ཀར་ཡོད་པ། གཟུགས་བཟང་ཞིང་ཡན་ལག་བདུན་ལེགས་པར་རྫོགས་པ་ཞིག་ཡོད་དེ། དེ་འདུལ་བའི་ཆེད་དུ་ཀུན་དུ་བགྲོད་ཅེས་བྱ་བའི་གླང་པོ་འདུལ་མཁན་ཞིག་ཡོད་པ་དེ་བཀུག་སྟེ་འདུལ་དུ་འཇུག་
གོ །དེས་ཀྱང་དེ་ལྟར་མཉན་ཏེ་དུལ་བར་བྱས་ནས་སླར་རྒྱལ་པོ་ལ་ཕུལ་ལོ། །དེ་ནས་ཉམས་སད་པའི་ཕྱིར་རྒྱལ་པོ་དང་འདུལ་མཁན་གཉི་གས་གླང་པོ་ཆེའི་རྒྱབ་ཏུ་ཞོན་ཏེ་རི་དྭགས་བཤོར་དུ་སོང་ངོ༌། །ཇི་ཙམ་ན་གླང་པོ་ཆེ་དེས་ནགས་ཀྱི་བན་གླང་མོའི་དྲི་ཚོར་བའི་རྐྱེན་བྱས་པས་རྩེ་དགའི་བདེ་བ་རྗེས་སུ་དྲན་
ཏེ་དེའི་རྗེས་སུ་རླུང་དང་འདྲ་བར་མགྱོགས་པའི་ཤུགས་ཀྱིས་རྒྱུག་པ་ན། རྒྱལ་པོ་སྐྲག་སྟེ་འདུལ་མཁན་ལ་སྨྲས་པ། ཀྱེ་གླང་པོ་འདུལ་བ་གླང་པོའི་དབང་པོ་གདུལ་བ་ལ་འབད་པར་གྱིས་ཤིག དེས་སྨྲས་པ། ལྷ་འདི་ནི་འཁྲུལ་གྱིས། ཤིང་གི་ཡལ་ག་ལ་འཇུས་ཤིག དེ་ནས་གཉིས་ཀས་ཤིང་གི་ཡལ་
Vol. 213 · folio 26a
ག་ལ་འཇུས་ཏེ་གླང་པོ་ཆེ་ཅི་དགར་བཏང་ནས་བདེ་བར་བབ་བོ། །དེར་རྒྱལ་པོས་འདུལ་མཁན་ལ་སྨྲས་པ། ཁྱོད་ཀྱིས་གླང་པོ་མ་ཐུལ་བ་ང་ལ་བྱིན་ནོ། །དེས་སྨྲས་པ། ལྷ་ཁོ་བོ་ཅག་གིས་འདིའི་ལུས་ནི་ཤིན་ཏུ་དུལ་བར་བྱས་པ་ཡིན་ནོ། །འོན་ཀྱང་སེམས་ནི་དེ་ལྟར་མ་ལགས་པས།
དེང་བན་གླང་མོའི་དྲི་ཚོར་ཏེ་ཉན་དུ་མ་བཏུབ་བོ། །དེ་ལྟ་ནའང་དཔྱད་རྗེས་སུ་དྲན་ནས་རིང་པོར་མི་ཐོགས་པར་འོང་བར་འགྱུར་རོ། །དེས་ཇི་སྐད་སྨྲས་པ་བཞིན་དུ་ཞག་བདུན་ནས་ཁྱིམ་དུ་བྱུང་ངོ༌། །དེ་མཐོང་ནས་འདུལ་མཁན་གྱིས་རྒྱལ་པོ་ལ་སྦྲོན་ནོ། །དེ་ནས་རྒྱལ་པོའི་མདུན་དུ་ཡིད་ཆེས་པར་བྱ་བའི་
ཕྱིར་ཀུན་དུ་བགྲོད་ཀྱིས་ལྕགས་ཀྱི་ཐོ་ལུམ་སོལ་མལ་དུ་བསྲེགས་པ་རབ་ཏུ་འབར་བ་ཞིག་ཐོགས་ཏེ་ཁ་ཁ་ཞེས་བརྗོད་དོ། །དེ་ལ་གླང་པོས་ཀྱང་བག་ཚ་བ་མེད་པར་ལེན་དུ་བརྩམས་པ་ན། འདུལ་མཁན་གྱིས་སྨྲས་པ། ལྷ་འདི་ལེན་དུ་ནི་བཏུབ་ན་འོན་ཀྱང་འགུམ་པར་འགྱུར་རོ། །དེ་དག་གིས་རྒྱལ་པོ་
ཡིད་ཆེས་པར་གྱུར་ཏེ་ཡང་སྨྲས་པ། དེ་ལྟར་དུལ་བར་བགྱིས་པ་ལ་བདག་ཅག་ཟུང་ནི་དེ་ལྟ་བུའི་གཡེང་བར་བྱེད་པའི་རྒྱུ་ཅི་ཞིག་ཅེས་དྲིས་པ་ལ། ལྷ་ཁོ་བོ་ཅག་གིས་ལུས་ནི་ཐུལ་གྱིས་སེམས་ནི་མ་ལགས་སོ་ཞེས་བྱ་བ་སྔར་ཡང་མ་གསོལ་ལམ། དེར་རྒྱལ་པོས་སྨྲས་པ། སེམས་འདུལ་བ་གང་
དག་ཡོད་པ་ཁྱོད་ཀྱིས་མཐོང་བ་དང་ཐོས་པ་བྱུང་ངམ་ཞེས་དྲིས་སོ། །དེ་ཡང་ལྷས་བསྐུལ་ནས། ལྷ་གཅིག་ལུས་དང་སེམས་འདུལ་བ་པོ་ནི་སངས་རྒྱས་བཅོམ་ལྡན་འདས་རྣམས་སོ་ཞེས་བྱ་བ་ལ་སོགས་པ་གཏམ་གྱི་ཞར་ལས་སངས་རྒྱས་ཀྱི་མཚན་ཐོས་པའི་མོད་ལ་རྒྱལ་པོ་སངས་རྒྱས་བཅོམ་ལྡན་
འདས་ལ་ཤིན་ཏུ་དད་པར་གྱུར་ཏེ་སྦྱིན་པ་ནི་བྱིན། བསོད་ནམས་ནི་ཅི་ཡང་བསགས་ཏེ་བླ་ན་མེད་པའི་བྱང་ཆུབ་ལ་མོས་པས། སྦྱིན་པ་རྒྱ་ཆེན་གྱུར་པ་འདི་ཡིས་སུ། །འགྲོ་བ་རང་བྱུང་སངས་རྒྱས་གྱུར་ནས་ནི། །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་བོའི་ཚོགས་རྣམས་བདག་གིས་
བསྒྲལ་བར་བྱ། །ཞེས་པ་སྨོན་ལམ་དུ་བཏབ་པས་སྨོན་ལམ་གྱི་ཐོག་མ་བསྐྲུན་པར་བཤད་དོ། །གཉིས་པ་ཐེག་པ་ཆེན་པོ་ལས་འབྱུང་བ་ལ། སེམས་བསྐྱེད་ཀྱི་ངོ་བོ་དང༌། ཇི་ལྟར་སེམས་བསྐྱེད་པ་དངོས་སོ། །དང་པོ་སེམས་བསྐྱེད་ཀྱི་ངོ་བོ་ནི། གཞན་གྱི་དོན་བསྒྲུབ་པའི་ཕྱིར་ཡང་དག་པར་
Vol. 213 · folio 26b
རྫོགས་པའི་བྱང་ཆུབ་ལ་དམིགས་པའི་མཚན་ཉིད་ཅན་གང་ཡིན་པ་སྟེ། དེ་སྐད་དུའང༌། མངོན་པར་རྟོགས་པའི་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །དེ་ལའང་ནང་གསེས་ཀྱི་སྒོ་ནས་དབྱེ་ན། བྱང་ཆུབ་ཏུ་སྨོན་པའི་སེམས་
བསྐྱེད་པ་ཞེས་བྱ་བ་དང༌། དེ་བསྒྲུབ་པར་རྩོམ་པ་འཇུག་པའི་སེམས་བསྐྱེད་པ་ཞེས་བྱ་བ་གཉིས་སུ་འགྱུར་ཏེ། ཞི་བའི་ལྷས། འགྲོ་བར་འདོད་དང་འགྲོ་བ་ཡིས། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་སོ། །དེ་ལའང་ཡུལ་གྱི་སྒོ་ནས་དབྱེ་ན།
ཀུན་རྫོབ་བྱང་ཆུབ་ཀྱི་སེམས་ཞེས་བྱ་བ་དང༌། དོན་དམ་བྱང་ཆུབ་ཀྱི་སེམས་ཞེས་བྱ་བ་གཉིས་སུ་འགྱུར་ཏེ། དང་པོ་ཐོབ་པར་བྱེད་པའི་རྒྱུ་ནི། རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་
བསྟན་པའི་སེམས་བསྐྱེད་འདོད། །ཅེས་འབྱུང་བ་ལྟ་བུའོ། །ཕྱི་མ་ཐོབ་པར་བྱེད་པའི་རྒྱུ་ནི། ཇི་སྐད་དུ། རྫོགས་པའི་སངས་རྒྱས་རབ་བསྙེན་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །བསྐྱེད་ཕྱིར་དེ་ནི་དམ་པར་འདོད། །ཅེས་འབྱུང་བ་ལྟ་
བུའོ། །དེ་བཞིན་དུ་ས་མཚམས་ཀྱི་སྒོ་ནས་དབྱེ་ན། མོས་པ་དང༌། ལྷག་པའི་བསམ་པ་རྣམ་པར་དག་པ་དང༌། རྣམ་པར་སྨིན་པ་དང༌། སྒྲིབ་པ་སྤོང་བ་སྟེ་བཞིའོ། །དེ་སྐད་དུའང༌། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང༌། །རྣམ་པར་སྨིན་པ་གཞན་དུ་
འདོད། །དེ་བཞིན་སྒྲིབ་པ་སྤོང་བའོ། །ཞེས་སོ། །གྲོགས་དང་དཔེའི་སྒོ་ནས་ནི། འདུན་པ་དང་ལྡན་པས་ལྟ་བུ་ནས། ཆོས་ཀྱི་སྐུ་སྤྲིན་ལྟ་བུའི་བར་གྱི་ཉི་ཤུ་རྩ་གཉིས་སུ་རྒྱན་ལས་ཇི་སྐད་བཤད་པ་ལྟར་ཤེས་པར་བྱའོ། །གཉིས་པ་ཇི་ལྟར་སེམས་བསྐྱེད་པ་དངོས་ནི། དྲིན་ལན་བསབས་
པའི་མདོ་ལས་འབྱུང་བའི་སྙིང་པོ་དྲིལ་ན་འདི་ལྟར། བཅོམ་ལྡན་འདས་འདི་སྔོན་གྱི་བསྐལ་པ་དཔག་ཏུ་མེད་པའི་གོང་རོལ་དུ་སོ་སོ་སྐྱེ་བོ་འཆིང་བ་ཐམས་ཅད་དང་ལྡན་པའི་དུས་སུ། ལས་ཀྱི་དབང་གིས་མིའི་ཤིང་རྟ་ཞེས་བྱ་བའི་དམྱལ་བར་ལྷུངས་ཏེ། གྲོགས་གཞན་ཞིག་དང་ལྷན་ཅིག་ཏུ་དམྱལ་
Vol. 213 · folio 27a
བའི་སྲུང་མ་ཨ་བང་སྡོད་པའི་ཤིང་རྟ་འདྲེན་པའི་གྱད་དུ་གྱུར་ཏོ། །སྲུང་མ་དེ་ནི་ལུས་བོང་ཤིན་ཏུ་ཆེ་ཞིང་ཁ་དང་མིག་དང་རྣ་བ་དང་སྣ་རྣམས་ནས་མེ་འབུད་ཅིང་དུ་བ་གཏུལ་བ། རྒྱུད་གཏུམ་པོ་མི་བཟད་པ་དང་ལྡན་པ་ཡིན་པས་ཤིང་རྟ་ལ་སྐྱིལ་མོ་ཀྲུང་བཅས་ཏེ་གནས་བཞིན་དུ་ལག་པ་
ན་ལྕགས་ཀྱི་དབྱུག་པ་ཐོགས་ནས་ཤིང་རྟ་འདྲེན་པ་གཉིས་ལ་བརྡེག་གོ །དེས་ཤིན་ཏུ་ན་བའི་སྡུག་བསྔལ་ལ་མ་བཟོད་ནས་ཇི་ལྟར་ནུས་པའི་སྟོབས་ཀྱིས་དྲངས་པས། ཅིག་ཤོས་ནི་ཉམ་ཆུང་བར་གྱུར་པས་དེ་ལྟར་དུ་འདྲེན་པར་མ་ནུས་པ་ལ། དམྱལ་བའི་སྲུང་མས་ལྕགས་ཀྱི་མདུང་རྩེ་གསུམ་པ་
བྲང་ལ་བཙུགས་ནས་ལྕགས་ཀྱི་དབྱུག་པས་བསྣུན་པས་ཁྲག་ཆལ་བར་ཕབ་བོ། །དེའི་ཚེ་གྱད་དེ་ནི་ཐེག་པ་ཆེན་པོའི་རིགས་དང་ལྡན་པར་གྱུར་པ་ཡིན་པས་གྲོགས་ཀྱི་སྡུག་བསྔལ་མཐོང་བས་སྙིང་རྗེ་རབ་ཏུ་རྒྱས་པའི་སེམས་སྐྱེས་ཏེ། སྲུང་མ་ཨ་བང་ལ། འདི་ལ་སྙིང་རྗེ་ཅུང་ཟད་སྐྱེད་ཅིག་ཅེས་
སྨྲས་སོ། །དེས་དེ་ལ་ཁྲོས་ནས་ལྕགས་ཀྱི་མདུང་ཐུང་འབར་བ་རྩེ་གསུམ་པ་གྱད་ཀྱི་གཉའ་བར་བཙུགས་པས་དེ་ཉིད་དུ་དུས་བྱས་སོ། །དེར་སྙིང་རྗེའི་སེམས་ཀྱི་མཐུ་ཆེན་པོས་བསྐལ་པ་བརྒྱ་སྙེད་ཀྱི་སྡིག་པ་ཡང་ཆུས་བཀྲུས་པའི་དྲི་མ་བཞིན་དུ་བྱང་ནས་དམྱལ་བའི་གནས་དེ་ལས་ཐར་བར་གྱུར་ཏོ། །
དེ་ནས་རིང་ཞིག་ལོན་པ་ན་ཛམྦུའི་གླིང་གི་ལྷོ་ཕྱོགས་ཀྱི་རྒྱུད་དུ་རྫ་མཁན་གྱི་ཁྱེའུ་སྣང་བྱེད་ཅེས་བྱ་བ་ཞིག་ཏུ་གྱུར་ཏོ། །དེ་ལྟ་བུའི་རིགས་ལ་གནས་པའི་གང་ཟག་དེ་ལ་ཡང༌། ཇི་སྐད་དུ། རིགས་དང་དགེ་བཤེས་སྙིང་རྗེ་དང༌། །སྡུག་བསྔལ་རྣམས་ཀྱིས་མི་ལྡོག་པ། །རྒྱུ་བཞི་རྐྱེན་ནི་འདི་དག་
གིས། །བྱང་ཆུབ་སེམས་ནི་རབ་ཏུ་འཇུག །ཅེས་པ་ལྟར་བྱང་ཆུབ་ཀྱི་སེམས་འཕེལ་བར་བྱེད་པའང་བདག་རྐྱེན་དགེ་བའི་བཤེས་ལ་རག་ལས་པ་ཡིན་པའི་ཕྱིར། ཇི་ལྟར་ན་ཁྱེའུ་སྣང་བྱེད་སངས་རྒྱས་ཤཱཀྱ་ཐུབ་པ་ཆེན་པོ་ལ་ཤིན་ཏུ་དད་པར་གྱུར་ཏེ། ཐུག་འཇམ་ཡོལ་གོ་གང་ཞིག་ཕུལ་ཏེ། མེ་ཏོག་
ཏུ་འགྲོན་བུ་ལྔས་ཀྱང་མངོན་པར་གཏོར་ནས། བདེ་བར་གཤེགས་པ་ཁྱེད་སྐུ་ཅི་འདྲ་དང༌། །སྐུ་ཚེའི་ཚད་ཀྱང་ཁྱེད་དང་ཅི་འདྲ་བ། །མཚན་མཆོག་བཟང་པོ་ཁྱེད་དང་ཅི་འདྲ་བ། །དེ་བཞིན་བདག་ཀྱང་དེ་དང་འདྲ་བར་ཤོག །ཅེས་སྨོན་ལམ་བཏབ་ཅིང་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །
Vol. 213 · folio 27b
དེ་ལྟར་ཡང༌། འཕགས་པ་བསྐལ་པ་བཟང་པོ་ལས། ང་ནི་སྔོན་ཚེ་དམན་པར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམ་གང་ཞིག་ནི་དབུལ་བར་བྱས་ནས་ཀྱང༌། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་འབྱུང་ངོ༌། །གཉིས་པ་བར་དུ་ཚོགས་གཉིས་
བསགས་པ་ལ། ཐེག་པ་ཆུང་ངུར་གྲགས་པ་དང༌། ཐེག་པ་ཆེན་པོར་གྲགས་པ་གཉིས་སོ། །དང་པོ་ཐེག་པ་ཆུང་ངུར་གྲགས་པ་ལྟར་ན། མཛོད་ལས། དེ་གྲངས་མེད་གསུམ་ལ་འཚང་རྒྱ། ཞེས་གསུངས་པ་ལྟར། གྲངས་མེད་གསུམ་གྱིས་ཚར་ཕྱིན་པར་འདོད་དེ། དེ་ཡང་
བྱང་ཆུབ་ཀྱི་ཕྱོགས་ཀྱི་ཆོས་རྣམས་གཞན་དོན་དུ་བྱང་ཆུབ་ཐོབ་པའི་སེམས་ཀྱིས་སངས་རྒྱས་རྣམས་མཆོད་པས་མཉེས་པར་བྱེད་པ་དང༌། གཞན་དོན་དུ་ཕ་རོལ་ཏུ་ཕྱིན་པ་དྲུག་གི་སྤྱོད་པ་རྣམས་བསྐལ་པ་ཆེན་པོ་གྲངས་མེད་པ་གསུམ་དུ་སྤྱད་པས་བྱང་ཆུབ་ཏུ་སངས་རྒྱས་པར་འདོད་པའི་དབང་དུ་བྱས་
པ་ནི། འདི་ལྟར་བསྐལ་པ་གྲངས་མེད་པ་དང་པོ་ལ་བདག་ཅག་གི་སྟོན་པ་འདི་ནི་སྔོན་དུ་རྫ་མཁན་གྱི་ཁྱེའུར་གྱུར་པའི་ཚེ། ཐོག་མར་དེ་བཞིན་གཤེགས་པ་ཤཱཀྱ་ཐུབ་པ་ཆེན་པོ་འཇིག་རྟེན་དུ་བྱོན་པ་ལ་མར་དང་ཏིལ་མར་གྱིས་བསྙེན་བཀུར་བ་ནས་བཟུང་སྟེ། རྒྱལ་པོར་གྱུར་པའི་ཚེ་ཡན་ལག་བཞི་པའི་
དཔུང་གི་ཚོགས་ཡོངས་སུ་སྤངས་ནས། བྱང་ཆུབ་མངོན་པར་འདོད་པའི་སེམས་ཀྱིས། དེ་བཞིན་གཤེགས་པ་ཡུལ་འཁོར་སྐྱོང་གི་ཞམ་རིང་བྱས་པའི་བར་ལ། དེ་བཞིན་གཤེགས་པ་བདུན་ཁྲི་ལྔ་སྟོང་ལ་བསྙེན་བཀུར་བས་མཉེས་པར་བྱས་པ་ཡིན་ནོ། །དེ་ལྟར་ཡང་འདུལ་བ་ལུང་ལས།
སངས་རྒྱས་ཤཱཀྱ་ཐུབ་པ་ནས། །འདྲེན་པ་ཡུལ་འཁོར་སྐྱོང་གི་བར། །བདུན་ཁྲི་དང་ནི་ལྔ་སྟོང་གི །སངས་རྒྱས་རྣམས་ནི་ང་ཡིས་མཆོད། །ཅེས་སོ། །བསྐལ་པ་གྲངས་མེད་པ་གཉིས་པ་ལ་བྲམ་ཟེའི་ཁྱེའུར་གྱུར་པའི་ཚེ། དེ་བཞིན་གཤེགས་པ་མར་མེ་མཛད་ལ་ཨུཏྤལ་སྔོན་པོ་བདུན་གྱིས་
མངོན་པར་གཏོར་བ་ནས་བཟུང་སྟེ། བྲམ་ཟེར་གྱུར་པའི་ཚེ་དེ་བཞིན་གཤེགས་པ་དབང་པོའི་རྒྱལ་མཚན་མཐོང་བ་ལ་ཡིད་རབ་ཏུ་དགའ་བས་ཐལ་མོ་སྦྱར་ཏེ་བསྟོད་པ་ཕུལ་བའི་བར་ལ། དེ་བཞིན་གཤེགས་པ་བདུན་ཁྲི་དྲུག་སྟོང་ལ་བསྙེན་བཀུར་བས་མཉེས་པར་བྱས་པ་ཡིན་ཏེ། ཇི་སྐད་དུ།
Vol. 213 · folio 28a
སངས་རྒྱས་མར་མེ་མཛད་པ་ནས། །ཐུབ་པ་དབང་པོའི་རྒྱལ་མཚན་བར། །བདུན་ཁྲི་དང་ནི་དྲུག་སྟོང་གི །སངས་རྒྱས་རྣམས་ནི་ང་ཡིས་མཆོད། །ཅེས་སོ། །བསྐལ་པ་གྲངས་མེད་པ་གསུམ་པ་ལ། རྒྱལ་པོར་གྱུར་པའི་ཚེ། དེ་བཞིན་གཤེགས་པ་བདེ་མཛད་
དམ་པ་ལ་མཆོད་པ་ཕུལ་བ་དང༌། སངས་རྒྱས་དེ་མྱ་ངན་ལས་འདས་པ་ནའང་སྐུ་གདུང་གི་མཆོད་རྟེན་བརྩིགས་པ་ནས་བཟུང་སྟེ། བྲམ་ཟེའི་ཁྱེའུ་བླ་མ་ཞེས་བྱ་བར་གྱུར་པའི་ཚེ། དགའ་སྐྱོང་གི་ཚིག་ཐོས་ནས། དེ་བཞིན་གཤེགས་པ་འོད་སྲུངས་ལས་རབ་ཏུ་འབྱུང་བའི་ཐུགས་བསྐྱེད་པའི་བར་
ལ། དེ་བཞིན་གཤེགས་པ་བདུན་ཁྲི་བདུན་སྟོང་ལ་བསྙེན་བཀུར་བས་མཉེས་པར་བྱས་པ་ཡིན་ཏེ། ཇི་སྐད་དུ། གང་ཡང་སངས་རྒྱས་བདེ་མཛད་ནས། །སངས་རྒྱས་འོད་སྲུངས་བར་དུ་ནི། །ངས་ནི་བདུན་ཁྲི་བདུན་སྟོང་གི །རྒྱལ་བ་རྣམས་ནི་མཆོད་པ་བྱས། །ཞེས་འབྱུང་ངོ༌། །དེ་ལའང་མངོན་
པ་མཛོད་ལས་ནི། ཤཱཀྱ་ཐུབ་པ་ནས་རིན་ཆེན་གཙུག་ཏོར་ཅན་ཐ་མར་གྱུར་པའི་བར་ནི་གྲངས་མེད་པ་དང་པོའོ། །དེ་ནས་མར་མེ་མཛད་ཐ་མར་གྱུར་པའི་བར་ནི་གྲངས་མེད་པ་གཉིས་པའོ། །དེ་ནས་རྣམ་པར་གཟིགས་ཐ་མར་གྱུར་པའི་བར་ནི་གྲངས་མེད་པ་གསུམ་པ་སྟེ། དེ་ལྟར་ཡང༌། དེ་ཉིད་ལས།
རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང༌། །དང་པོ་ཤཱཀྱ་ཐུབ་པ་ཡིན། །ཞེས་འབྱུང་བ་ལྟར་རོ། །དེ་ནས་མཚན་བཟང་གི་རྒྱུ་བསྒྲུབ་པ་ལ་བསྐལ་པ་བརྒྱར་ཐོགས་པ་ལ། བྲམ་ཟེའི་ཁྱེའུར་གྱུར་པ་ན་སངས་རྒྱས་སྐར་རྒྱལ་མེའི་ཁམས་ལ་སྙོམས་པར་ཞུགས་
པ་ལ་རྐང་གཅིག་གིས་འགྲེང་སྟེ་ཞག་བདུན་གྱི་བར་དུ་བསྐོར་བ་བར་མ་ཆད་པར་བྱས་ཏེ་བསྟོད་པ། སྐྱེས་བུ་ཁྱུ་མཆོག་ཁྱོད་འདྲའི་དགེ་སྦྱོང་ཆེན་པོ་གཞན་དག་ལྷ་ཡུལ་ས་ལ་མེད། །འཇིག་རྟེན་འདི་ནའང་ཡོད་པ་མ་ཡིན་རྣམ་ཐོས་བུ་ཡི་གནས་ནའང་མེད། །ལྷ་ཡི་ཕོ་བྲང་གནས་མཆོག་དག་ནའང་
ཡོད་མིན་ཕྱོགས་དང་ཕྱོགས་མཚམས་དག་ནའང་མེད། །རི་དང་ནགས་སུ་བཅས་པའི་ས་སྟེངས་རྒྱས་པ་ཀུན་ཏུ་བསྐོར་ཀྱང་ཡུལ་གཅིག་ག་ལ་ཡོད། །ཅེས་པའི་ཚིགས་སུ་བཅད་པའི་དབྱངས་ཀྱིས་བསྟོད་པ་བྱས་པ་དང༌། བསྐལ་པ་ཆེན་པོ་དགུའི་ཚོགས་བཟླུམས་ཏེ། དེ་ནས་བསྐལ་པ་
Vol. 213 · folio 28b
ཆེན་པོ་དགུ་བཅུ་རྩ་གཅིག་འདས་པ་ན་གྲོང་ཁྱེར་ཉེར་ལྡན་དུ་སངས་རྒྱས་འོད་སྲུངས་བྱོན་པའི་ཚེ། བྲམ་ཟེའི་ཁྱེའུ་བླ་མར་གྱུར་པ་ཡན་ཆད་ཀྱིས་མཚན་བཟང་གི་རྒྱུ་གྲུབ་པ་ནི་བྱང་ཆུབ་སེམས་དཔའ་ངེས་པ་ལ་གནས་པ་ཞེས་བྱ་བ་ཡིན་ནོ། །དེའང་མཚན་བཟང་གྲུབ་པའི་རྒྱུ་ནི། འཇིག་རྟེན་གྱི་
ཁམས་ཐམས་ཅད་ཀྱི་བསོད་ནམས་དང༌། ཉན་ཐོས་དང་རང་སངས་རྒྱས་ཐམས་ཅད་འགྲུབ་པའི་བསོད་ནམས་ཀྱི་ཕུང་པོ་ཇི་སྙེད་པ་དེ་སྙེད་བཅུར་བསྒྱུར་བས་ནི་སངས་རྒྱས་ཀྱི་བ་སྤུའི་ཁུང་བུ་གཅིག་གོ །བ་སྤུ་ཇི་སྙེད་སྐྱེད་པར་བྱེད་པའི་བསོད་ནམས་དེ་སྙེད་བརྒྱར་བསྒྱུར་བས་ནི་དཔེ་བྱད་བཟང་པོ་
གཅིག་གོ །དཔེ་བྱད་བརྒྱད་ཅུ་པོ་ཚང་བར་འགྲུབ་པར་བྱེད་པའི་བསོད་ནམས་དེ་སྙེད་བརྒྱར་བསྒྱུར་བས་ནི་མཚན་བཟང་པོ་གཅིག་གོ །མཚན་བཟང་པོ་སུམ་ཅུ་རྩ་གཉིས་པོ་ཚང་བར་འགྲུབ་པར་བྱེད་པའི་བསོད་ནམས་སྟོང་དུ་བསྒྱུར་བས་ནི་ཟླ་བ་ཉ་གང་བ་ལྟ་བུའི་མཛོད་སྤུ་འགྲུབ་བོ། །མཛོད་སྤུ་
འགྲུབ་པར་བྱེད་པའི་བསོད་ནམས་ཀྱི་ཕུང་པོ་དེ་འབུམ་དུ་བསྒྱུར་བས་ནི་གཙུག་ཏོར་བལྟར་མི་སྣང་བ་འགྲུབ་པར་འགྱུར་ཏེ། དེ་ལྟར་ཡང་རིན་ཆེན་ཕྲེང་བ་ལས། རང་སངས་རྒྱས་ཀུན་ལས་བྱུང་དང༌། །སློབ་དང་མི་སློབ་ལས་བྱུང་དང༌། །འཇིག་རྟེན་མ་ལུས་ཀུན་བསོད་ནམས། །འཇིག་རྟེན་བཞིན་
དུ་དཔག་མེད་གང༌། །དེ་ཙམ་བཅུར་ནི་བསྒྲེས་པ་ཡིས། །བ་སྤུའི་བུ་ག་གཅིག་འགྲུབ་སྟེ། །སངས་རྒྱས་བ་སྤུའི་བུ་ག་ནི། །ཐམས་ཅད་དེ་དང་འདྲ་བར་འགྱུར། །བ་སྤུའི་བུ་ག་ཐམས་ཅད་ནི། །སྐྱེད་པར་བྱེད་པའི་བསོད་ནམས་གང༌། །དེ་དག་བརྒྱར་ནི་བསྒྱུར་བ་ཡིས། །དཔེ་བྱད་
བཟང་པོ་གཅིག་ཏུ་བཞེད། །བསོད་ནམས་དེ་དག་དེ་སྙེད་ཀྱིས། །རྒྱལ་པོ་དཔེ་བྱད་བཟང་པོ་ནི། །གཅིག་མཐར་ཕྱིན་ཏེ་དེ་ལྟ་བུར། །བརྒྱད་ཅུའི་བར་དུ་འབྱུང་བར་འགྱུར། །དཔེ་བྱད་བཟང་པོ་བརྒྱད་ཅུ་དག །འགྲུབ་པའི་བསོད་ནམས་ཚོགས་གང་ཡིན། །དེ་དག་བརྒྱར་ནི་བསྒྱུར་བ་
ཡིས། །སྐྱེས་བུ་ཆེན་པོའི་མཚན་གཅིག་གོ །མཚན་ནི་སུམ་ཅུ་འགྲུབ་པའི་རྒྱུ། །བསོད་ནམས་རྒྱ་ཆེ་གང་ཡིན་པ། །དེ་དག་སྟོང་དུ་བསྒྱུར་བ་ཡིས། །ཟླ་བ་ཉ་འདྲའི་མཛོད་སྤུའོ། །མཛོད་སྤུ་ཡི་ནི་བསོད་ནམས་དག །སྟོང་ཕྲག་བརྒྱ་ནི་བསྡོམས་པ་ཡིས། །སྤྱི་གཙུག་
Vol. 213 · folio 29a
བལྟར་ནི་མི་སྣང་བ། །སྐྱོབ་པའི་གཙུག་ཏོར་སྐྱེད་པར་བྱེད། །ཅེས་སོ། །དེ་ལྟར་མཚན་བཟང་འགྲུབ་པའི་རྒྱུ་མཐར་ཕྱིན་ནས། དགའ་ལྡན་གྱི་གནས་སུ་དམ་པ་ཏོག་དཀར་དུ་འཁྲུངས་པ་ནི་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཞེས་བྱའོ། །དེ་ཉིད་
ནས་ཛམྦུའི་གླིང་དུ་བྱུང་སྟེ་དོན་ཐམས་ཅད་གྲུབ་པ་ཞེས་བྱ་བར་གྱུར་པ་ནི་སྲིད་པ་ཐ་མ་པའི་བྱང་ཆུབ་སེམས་དཔའ་ཞེས་བྱ་བ་ཡིན་ནོ། །དུས་དེ་དང་དེ་དག་ཏུ་ཕ་རོལ་ཏུ་ཕྱིན་པ་དྲུག་ཀྱང་རྒྱལ་བུ་ཐམས་ཅད་སྒྲོལ་དུ་གྱུར་པའི་ཚེ། སྙིང་རྗེ་ཆེན་པོས་འགྲོ་བ་ཐམས་ཅད་ལ་བདོག་པ་མ་ལུས་པ་བཏང་བས་སྦྱིན་
པའི་ཕ་རོལ་ཏུ་ཕྱིན་པ་རྫོགས་ཤིང༌། དྲང་སྲོང་བཟོད་པར་སྨྲ་བར་གྱུར་པའི་ཚེ་ཆགས་པ་དང་བཅས་བཞིན་དུ་ཡན་ལག་དང་ཉིང་ལག་རྣམས་བཅད་ཀྱང་འཁྲུགས་པ་མི་མངའ་བས་བཟོད་པའི་ཕ་རོལ་ཏུ་ཕྱིན་པ་དང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་པ་ཡིན་ལ། བྲམ་ཟེའི་ཁྱེའུར་གྱུར་པའི་ཚེ་
སངས་རྒྱས་སྐར་རྒྱལ་ལ་མངོན་པར་བསྟོད་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྫོགས་པ་ཡིན་ནོ། །རྒྱལ་བུ་དོན་གྲུབ་ཏུ་གྱུར་པའི་ཚེ་རྡོ་རྗེའི་གདན་ལ་སྲོད་ཀྱི་དུས་སུ་བདུད་བཏུལ་ནས་ཐོ་རངས་རྡོ་རྗེ་ལྟ་བུའི་ཏིང་ངེ་འཛིན་རྒྱུད་ལ་བསྐྱེད་པས་བསམ་གཏན་གྱི་ཕ་རོལ་ཏུ་ཕྱིན་པ་དང་ཤེས་རབ་ཀྱི་ཕ་རོལ་ཏུ་
ཕྱིན་པ་རྫོགས་པར་འདོད་པ་ཡིན་ནོ། །མཛད་པ་བཅུ་གཉིས་ཇི་ལྟར་བསྟན་པ་ནི་མངོན་པར་འབྱུང་བའི་མདོ་ལ་སོགས་པ་ནས་འབྱུང་བ་ལྟར་ཤེས་པར་བྱ་བ་ཉིད་དོ། །གཉིས་པ་ཐེག་པ་ཆེན་པོའི་ལུགས་ལ། ཇི་སྲིད་བསགས་པ་ཚོགས་ཀྱི་ཡུན་ཚད་དང༌། བསགས་པར་བྱ་བ་ཚོགས་ཀྱི་ངོ་བོ་དང༌།
ཇི་ལྟར་བསགས་པའི་ཚུལ་ཏེ་རྣམ་པ་གསུམ་ལས། དང་པོ་ཇི་སྲིད་དུ་བསགས་པའི་ཡུན་གྱི་ཚད་ནི། བསྐལ་པ་ཆེན་པོ་གྲངས་མེད་པ་གསུམ་དུ་བཤད་པ་ནི་བཀའ་དང་དགོངས་འགྲེལ་གྱི་བསྟན་བཅོས་ཕལ་ཆེ་བ་ལས་འབྱུང་སྟེ། མདོ་སྡེ་རྒྱན་ལས། ས་ནི་དང་པོ་ཡིན་པར་འདོད། །འདི་སྟེ་
བསྐལ་པ་དཔག་མེད་ཀྱི། །ཞེས་དང༌། གྲངས་མེད་གཉིས་ནི་རྫོགས་པ་ཡིས། །སྒོམ་པའི་ལམ་ནི་ཚར་ཕྱིན་ཏོ། །ཞེས་གྲངས་མེད་དང་པོས་ནི་མོས་པས་སྤྱོད་པའི་ས་དང་པོ་དང༌། གྲངས་མེད་གཉིས་པས་ནི་ས་གཉིས་པ་ནས་བདུན་པ་མན་ཆད་དང༌། གྲངས་མེད་གསུམ་པས་ནི་ས་
Vol. 213 · folio 29b
བཅུ་པ་མན་ཆད་ཐོབ་པར་བཞེད་དོ། །བརྒྱད་སྟོང་པའི་འགྲེལ་ཆེན་ལས་ནི་བསྐལ་པ་གྲངས་མེད་པ་སུམ་ཅུ་རྩ་གསུམ་དུ་བཤད་དེ། དེའང་ཚོགས་ལམ་དང་སྦྱོར་ལམ་ལ་གྲངས་མེད་གསུམ་དང༌། ས་བཅུ་པོ་རེ་རེ་ལ་གསུམ་གསུམ་གྱིས་བྱང་ཆུབ་སེམས་དཔའི་
ས་རྫོགས་པར་བཤད་པ་ནི་ངེས་པའི་དོན་དང༌། གྲངས་མེད་གསུམ་དུ་བཤད་པ་ནི་དྲང་དོན་དགོངས་པ་ཅན་ཡིན་ཏེ། གྲངས་མེད་སུམ་ཚན་བཅུ་གཅིག་ཏུ་རིགས་གཅིག་པའི་ཕྱིར་རྗེས་སུ་འཇུག་པ་རྣམས་ཧ་ཅང་རྒྱུན་རིང་བ་ལ་ཞུམ་པ་སྤང་བའི་ཕྱིར་ཡིན་པར་བཞེད་དོ། །དེ་ལྟ་བུའི་གྲངས་མེད་བརྩམ་པའི་ཐོག་མ་ཉིད་ཀྱང་བྱང་ཆུབ་ཀྱི་ཆེད་དུ་
དགེ་བའི་རྩ་བ་གང་དག་བསགས་པ་རྣམས་མཐུན་པ་མ་ཡིན་པའི་ཕྱོགས་གང་གིས་ཀྱང་ཟིལ་གྱིས་མི་གནོན་པར་འགྱུར་བའི་བཟང་པོ་དང༌། ཚེ་རབས་ཐམས་ཅད་དུ་བྱང་ཆུབ་ཀྱི་སེམས་སྟོན་པའི་དགེ་བའི་བཤེས་གཉེན་དང་ཕྲད་པའི་སྨོན་ལམ་སྟོབས་དང་ལྡན་པ་དང༌། མི་དགེ་བའི་གྲོགས་ཀྱིས་
མོས་པ་བཟློག་ཀྱང་དེའི་དབང་དུ་འགྲོ་བར་མི་འགྱུར་བར་བྱང་ཆུབ་ཀྱི་སེམས་མི་གཏོང་བའི་སེམས་བརྟན་པ་དང༌། ཡོན་ཏན་ལ་ཆོག་པར་མི་འཛིན་ཞིང་མཐོང་བའི་ཆོས་དང་ཚེ་རབས་ཕྱི་མར་བཅས་པ་ལ་དགེ་བའི་ཆོས་མི་ཉམས་ཤིང་འཕེལ་བར་བྱེད་པ་སྟེ། ཆོས་འདི་རྣམས་དང་ལྡན་པ་ནི་ཁྱད་
པར་དུ་འགྲོ་བ་སྟེ། དེ་ལྟ་བུའི་ཆོས་བཞི་པོ་འདི་དག་ཚོགས་ཀྱི་ལམ་དུ་ནམ་ཐོབ་ན། དེ་ནས་བཟུང་སྟེ་བསྐལ་པ་གྲངས་མེད་ཀྱི་འགོ་བརྩམ་པར་འདོད་དེ། ཐེག་པ་བསྡུས་པ་ལས། བཟང་དང་སྨོན་པའི་སྟོབས་ཅན་དང༌། །སེམས་བརྟན་ཁྱད་པར་འགྲོ་བ་ཡིས། །བྱང་ཆུབ་སེམས་
དཔའ་གྲངས་མེད་གསུམ། །ཀུན་ཏུ་བརྩམ་པར་མཛད་པ་ཡིན། །ཞེས་གསུངས་ཤིང༌། རྗེ་བཙུན་བསོད་ནམས་རྩེ་མོས་ནི་རང་གི་སྟོབས་ཀྱིས་དེ་བཞིན་གཤེགས་པ་མཐོང་བ་ནས་གྲངས་མེད་དང་པོ་འགོ་བརྩམ་པར་གསུངས་སོ། །གཉིས་པ་བསགས་པར་བྱ་བ་ཚོགས་ཀྱི་ངོ་བོ་ནི། སྟོང་
ཉིད་སྙིང་རྗེའི་སྙིང་པོ་ཅན་དང༌། འཁོར་གསུམ་དུ་རྣམ་པར་མི་རྟོག་པའི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་སྟེ། བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་ཀྱིས་བསྡུས་པའི་ལམ་གང་ཡིན་པ་སྟེ། མདོ་སྡེ་རྒྱན་ལས།བསོད་ནམས་ཡེ་ཤེས་མཚུངས་པ་མེད། །
Vol. 213 · folio 30a
གཅིག་གིས་འཁོར་བར་མངོན་མཐོ་བྱེད། །གཞན་གྱིས་ཉོན་མོངས་མེད་པར་འཁོར། །ཞེས་དང༌། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་ནི་གཉིས་ཆར་ལ་ཡང་གཏོགས། །ལྔ་ཆར་ཡང་ནི་ཡེ་ཤེས་ཚོགས། །
ཞེས་དང༌། གཏམ་དུ་བྱ་བ་རིན་པོ་ཆེའི་ཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་བྱུང༌། །དེ་ལྟ་བས་ན་ཚོགས་འདི་གཉིས། །སངས་རྒྱས་ཉིད་ནི་འཐོབ་པའི་
རྒྱུ། །ཞེས་གསུངས་པ་ལྟ་བུའོ། །གསུམ་པ་ཇི་ལྟར་ཚོགས་བསགས་པའི་ཚུལ་ནི། བསྐལ་པ་ཆེན་པོ་གྲངས་མེད་དང་པོ་ལ་འཇུག་པའི་དུས་སུ་རྒྱལ་པོའི་ཕོ་བྲང་རྣམ་པར་རྒྱལ་བའི་རྒྱལ་མཚན་དུ་སྟོན་པ་འདི་ཉིད་རྒྱལ་པོ་རྣམ་པར་རྒྱལ་བའི་སྲས་གཞོན་ནུ་བརྩོན་འགྲུས་སྤྱོད་ཅེས་བྱ་བར་གྱུར་
ཏོ། །དེའི་ཚེ་དེ་བཞིན་གཤེགས་པ་འོད་འཕྲོའི་ཕུང་པོ་ཆེན་པོ་ལས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་རྗེས་སུ་བསྟན་པ་མནོས་ཤིང༌། དེ་བཞིན་གཤེགས་པ་འཁོར་དང་བཅས་པ་ལོ་བྱེ་བ་ཕྲག་དྲུག་ཅུ་རྩ་དྲུག་ཏུ་བསྙེན་བཀུར་བགྱིས་པ་ནས་བརྩམས་ཏེ། བསྐལ་པ་གྲངས་མེད་པ་
གཅིག་ཏུ་ཚོགས་བསགས་པས་ས་དང་པོ་མངོན་དུ་མཛད་པ་ཡིན་ནོ། །གྲངས་མེད་གཉིས་པ་ལ་འཇུག་པའི་དུས་སུ་གྲོང་ཁྱེར་ཛམྦུ་ཆུ་བོའི་གསེར་དུ་རྒྱལ་པོ་མཛེས་པར་སྣང་བ་ཞེས་བྱ་བ་ཞིག་ཡོད་དེ། དེའི་ཚེ་སྟོན་པ་འདི་ཉིད་དེའི་གནང་ཆེན་ཚོང་དཔོན་ཤེས་རབ་བཟང་པོ་ཞེས་བྱ་བར་གྱུར་
པའི་ཚེ། དེ་བཞིན་གཤེགས་པ་དཀོན་མཆོག་ཡན་ལག་ལས་རྗེས་སུ་བསྟན་པ་མནོས་ཤིང༌། དེ་བཞིན་གཤེགས་པ་འཁོར་དང་བཅས་པ་ལོ་སྟོང་དུ་བསྙེན་བཀུར་བ་ནས་བརྩམས་ཏེ། བསྐལ་པ་གྲངས་མེད་པ་གཅིག་ཏུ་ཚོགས་བསགས་པས་ས་བདུན་པ་མངོན་དུ་མཛད་པ་ཡིན་ནོ། །
གྲངས་མེད་པ་གསུམ་པ་ལ་འཇུག་པའི་དུས་སུ་རྒྱལ་པོ་དགྲ་ཐུལ་གྱི་ཕོ་བྲང་པདྨོ་ཅན་དང་ཉེ་བ་ཞིག་ཏུ་བྲམ་ཟེའི་སློབ་མ་གཞོན་ནུ་སྤྲིན་ཞེས་བྱ་བར་གྱུར་པའི་ཚེ། དེ་བཞིན་གཤེགས་པ་མར་མེ་མཛད་ལ་ཨུཏྤ་ལ་ལྔས་མངོན་པར་གཏོར་ཏེ། རལ་པ་གསེར་གྱི་མདོག་ཅན་སྟན་དུ་བཏིང་ནས། འདི་
Source and licence
Text: Esukhia’s Derge Tengyur e-text (Esukhia/derge-tengyur · commit 17465313) · public domain
Licence Public Domain · Evidence
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
No translation — Tibetan only: there is no translation we are licensed to publish (84000’s translations are no-derivatives, non-commercial)
- Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
- The Tibetan text is not in the collection search yet — the available tokenizer drops Tibetan vowel signs and would match the wrong words