ཡན་ལག་དྲུག་པ་ཞེས་བྱ་བའི་སྒྲུབ་ཐབས

Sanskrit title (Tibetan script, as in the text) ཥ་ཌཾ་ག་སཱ་དྷ་ནཾ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 9 · folio 126b

༄༅༅། །རྒྱ་གར་སྐད་དུ། ཥ་ཌཾ་ག་སཱ་དྷ་ནཾ་ནཱ་མ། བོད་སྐད་དུ། ཡན་ལག་དྲུག་པ་ཞེས་བྱ་བའི་སྒྲུབ་ཐབས། ཀྱེ་རྡོ་རྗེ་ལ་ཕྱག་འཚལ་ལོ། །དཀྱིལ་འཁོར་སྒྱུ་མ་ལ་བཞུགས་ཆུ་ཟླ་དང་མཚུངས་ལྷ་མོ་བརྒྱད་ཀྱི་བདག །

ཀྱེའི་རྡོ་རྗེ་རྣམ་ཐར་བསྡུ་དངོས་དེ་བཞིན་ཉིད་ཀྱི་ཞལ་དང་ཞབས་ཕྱག་སྤྲུལ། །བདུད་ཀྱི་སྙིང་ག་ཉམས་དགའ་བ་ཡི་གནས་སུ་སེམས་ཅན་དོན་མཛད་དགྱེས། །གར་མཁན་ནམ་མཁའ་ལྟ་བུས་དྲེགས་པར་མཛད་ཅིང་འགྲོ་བ་བསྲུང་བ་དང་། །དང་པོ་སངས་རྒྱས་ཀྱི་སྤྲུལ་སྐུ་འདྲ་བ། །སྐྱེ་བའི་

ཆུ་བོ་སྒྲོལ་བའི་ཐེག་གཅིག་པ། །བླ་མ་ལ་གུས་ཕྱག་འཚལ་རྟོག་པ་ཡིན། །ཀྱེའི་རྡོ་རྗེའི་རྒྱུད་ཆེན་རྒྱ་མཚོ་ལྟ་བུ་ལས། །ཌོཾ་བིའི་ཞལ་སྔ་ནས་ཀྱི་རིམ་རྙེད་པས། །ཀྱེ་རྡོ་རྗེའི་ཤྲཱིའི་སྒྲུབ་ཐབས་ནི། །མི་ཤེས་སྒྲིབ་གཡོགས་མུན་འདྲ་བའི། །ཐུར་མ་འདི་ནི་བརྩམ་པར་བྱ། །དངོས་གྲུབ་ཀྱི་ནི་

སེམས་འདི་ཡིས། །མཚན་མོའི་དུས་སུ་རང་ཁྱིམ་དང་། །དུར་ཁྲོད་ཆུ་འགྲམ་དེ་དག་ཏུ། །འཇིགས་པ་མེད་པར་བསམ་གཏན་བྱ། །སྙིང་གར་ཆུ་སྐྱེས་ཉི་མ་དེའོ། །གཟུགས་བརྙན་ཧཱུྃ་ལས་ཁྱད་པར་བསྒོམ། །བླ་མ་རྡོ་རྗེ་མཆོད་ནས་ནི། །བདུན་པོ་ཡོངས་སུ་དག་པར་ནི། །གཽ་རཱི་ལ་

སོགས་ལྷ་མོ་བརྒྱད། །མཆོད་པ་ཡོངས་སུ་སྤྲོ་བར་བྱ། །སྡིག་པ་བྱས་པ་བཤགས་པ་དང་། །བྱེད་པ་ཡང་ནི་སྡོམ་པ་དང་། །བསོད་ནམས་རྗེས་སུ་ཡི་རང་དང་། །དེ་དག་ཡོངས་སུ་བསྔོ་བར་བགྱི། །དཀོན་མཆོག་སྐྱབས་སུ་འགྲོ་བ་དང་། །བྱང་ཆུབ་མཆོག་སེམས་བསྐྱེད་པ་དང་། །

ལམ་ལ་གནས་ཤིང་བདག་ཀྱང་ནི། །གཞན་གྱི་དོན་དུ་དབུལ་བ་དང་། །གནང་བ་ནོད་དང་ཚངས་པ་ཡི། །གནས་ནི་བཞི་པོའི་བསམ་གཏན་བྱ། །དང་པོ་བྱམས་པ་བསྒོམ་བྱ་ཞིང་། །གཉིས་པ་སྙིང་རྗེའི་བྱེ་བྲག་བསྒོམ། །གསུམ་པ་དགའ་བ་བསྒོམ་པ་སྟེ། །ཐམས་ཅད་ཐ་མ་

Vol. 9 · folio 127a

བཏང་སྙོམས་སོ། །ཡང་ནི་སྟོང་པའི་བྱང་ཆུབ་ནི། །བསྒོམ་ཞིང་འདི་ནི་བརྗོད་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་བ་ཨཱཏྨ་ཀོ྅ཧཾ། སྟོང་པད་རཾ་སྐྱེས་ཧཱུྃ་དངོས་ལ། །སྣ་ཚོགས་རྡོ་རྗེའི་བསམ་གཏན་བྱ། །འགྲོ་བའི་བདུད་རྣམས་སེལ་བྱེད་པའི། །ཧཱུྃ་ལས་གསལ་

བར་སྤྲོ་བར་བྱ། །ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཡི་གེ་འདི་བརྗོད་དོ། །འདི་ལས་རྡོ་རྗེ་བསྐོར་བའི་གུར། །བླ་རེ་ཡང་ནི་བསྒོམ་པར་བྱ། །རྡོ་རྗེའི་ས་ལ་ནམ་མཁའི་དབྱིངས། །ཡཾ་རཾ་བཾ་ལཾ་བྱུང་བའི་དཀྱིལ་འཁོར་རོ། །བྷྲཱུཾ་ལས་འཁོར་ལོའི་སྟེང་དུ་བདག །བར་མའི་སྐྱེས་པའི་བསམ་

གཏན་བྱ། །འདི་ནི་འབྱུང་བའི་དཀྱིལ་འཁོར་བཞི། །འཁོར་ལོ་འདི་ནི་ལྔ་པའོ། །གཅིག་འགྱུར་དེ་ལས་སངས་རྒྱས་ཀྱི། །གཞལ་ཡས་ཁང་དུ་གྱུར་པ་སྟེ། །ངོས་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །དྲ་བ་དྲ་ཕྱེད་ཡང་དག་ལྡན། །ཀ་བ་བརྒྱད་ཀྱིས་ཤིན་

ཏུ་སྤྲས། །ལྷ་མོ་བརྒྱད་ཀྱི་འོད་རྣམས་ནི། །གསལ་བ་ཡིས་ནི་སྣམ་བུ་ཡིན། །འདི་ནི་ཆུ་སྐྱེས་འདབ་མ་ནི། །བརྒྱད་པ་བྲི་ཞིང་ཕྲེང་བ་གཅིག །ཉི་མའི་དཀྱིལ་འཁོར་ལ་གནས་པའི། །བདུད་བཞི་ཡིས་ནི་རྣམ་པར་བརྒྱན། །ཨོཾ་སརྦ་ཏ་ཐཱ་ག་ཏ་ཨ་ལཱ་ནཱི་ཡ་བཛྲ་སྭ་བྷཱ་བ་ཨཱཏྨ་ཀོ྅ཧོ། །

སངས་རྒྱས་ཕོ་བྲང་བྱེ་བྲག་རྫོགས། །རྣམ་པ་ལྔ་པོ་བསྒོམ་པ་ནི། །ཟླ་བ་མེ་ལོང་ཡེ་ཤེས་ཏེ། །རྟ་བདུན་པ་ནི་མཉམ་པ་ཉིད། །ལྷ་ཡི་ས་བོན་ཕྱག་མཚན་ནི། །སོ་སོར་རྟོག་པ་ཡིན་ཞེས་ཟེར། །ཐམས་ཅད་གཅིག་འགྱུར་བྱ་ནན་ཏན། །གཟུགས་བརྙན་རྫོགས་པ་དེ་ཆོས་དབྱིངས། །ཨཱ་ལི་

བསྒོམ་པ་ཟླ་བ་སྟེ། །ཀཱ་ལི་རྟ་བདུན་པ་ཡིན་ནོ། །གཉིས་ཀྱི་བར་ན་ཨོཾ་དང་ཧཱུྃ། །དེ་གཉིས་རྡོ་རྗེ་གྲི་གུག་གྱུར། །ཟླ་ཉི་ས་བོན་ཕྱག་མཚན་ནི། །འདི་དག་ཐམས་ཅད་གཅིག་གྱུར་པ། །ཆུ་དང་འོ་མ་ཐ་དད་མེད། །དེ་འདྲའི་རྡོ་རྗེ་བསམ་གཏན་ནི། །ཞལ་བརྒྱད་ཕྱག་ནི་བཅུ་དྲུག་པ། །འཇིགས་བྱེད་

ཞབས་ནི་བཞི་པའོ། །དཔའ་བོ་ཐོད་པའི་ཕྲེང་བ་ཅན། །བདག་མེད་མ་ཡིས་ཕྲག་ནས་འཁྱུད། །ཕྱག་རྒྱ་ལྔ་ནི་འཛིན་པའི་ལྷ། །ཟླ་བའི་ནོར་བུ་ཁ་དོག་འོད། །རྩ་བའི་ལུས་མདོག་གཡོན་གྱི་ནི། །ཞལ་ནི་དམར་དང་དཀར་དང་གཞན། །གླང་པོ་རྟ་བོང་གླང་རྔ་མོ། །མི་དང་སེང་གེ་དེ་བྱི་ལ། །གཡས་

Vol. 9 · folio 127b

པའི་ཐོད་པ་བརྒྱད་པ་ནི། །དང་པོ་གླང་པོ་རིམ་ཤེས་བྱ། །གཞི་དང་ཆུ་གནས་རླུང་དང་ནི། །མེ་ལྷ་དེ་ནས་སྣང་བྱེད་དང་། ཕྱི་མཐར་བྱེད་དང་ནོར་སྦྱིན་ནི། །གཡོན་པའི་ཐོད་པ་བརྒྱད་ནའོ། །ལྷ་མོ་ཞལ་གཅིག་ཕྱག་གཉིས་མ། །གནག་ཅིང་གྱེན་དུ་བསྒྲེང་བ་སེར། །གྲི་གུག་ཐོད་པ་ཁ་ཊྭཱཾ་ག །འཛིན་ཅིང་

སྟག་ལྤགས་ཤམ་ཐབས་ཅན། །ཨོཾ་པདྨ་སུ་ཁཱ་དྷ་ར་མ་ཧཱ་རཱ་ག་སུ་ཁནྡ་ད་ཙ་ཏུར། ཨཱ་ནནྡ་བྷ་ག་བི་ཤྭ་ཧཱུྃ་ཧཱུྃ་ཧཱུྃ། ཀརྱཾ་ཀུ་རུ་ཥྭ་མེ། ཨོཾ་བཛྲ་མ་ཧཱ་དྭེ་ཥ་ཙ་ཏུར། ཨཱ་ནནྡ་དཱ་ཡ་ཀ་ཁ་ག་མུ་ཁཻ་ཀ་ར་སོ་ནཱ་ཐ་ཧཱུྃ་ཧཱུྃ་ཧཱུྃ། ཀརྱཾ་ཀུ་རུ་ཥྭ་མེ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། །དང་པོར་

སྐྱེས་བུ་བསམ་དེ་ནས། །མཁའ་འགྲོ་མ་དེའི་འཁོར་ལོ་སྤྲོ། །རྡོ་རྗེ་རྗེས་སུ་ཆགས་བྱེད་པས། །རྒྱལ་བའི་ཁུ་བ་རྗེས་སུ་འགྱུར། །ས་བོན་བརྒྱད་དུ་གྱུར་པའོ། །དེ་བཞིན་གཤེགས་པའི་ཐིག་ལེ་དེ། །གཾ་ཙཾ་བཾ་གྷཾ་བཾ་སཾ་ལཾ་ཌཾ། །ལྷ་མོའི་ས་བོན་དབྱུང་བའོ། །གཽ་རཱི་དབང་གཤིན་ཆོམ་རྐུན་མ། །རོ་

ལངས་མ་ནི་ཆུ་བདག་གནས། །གྷསྨ་རཱི་ནི་གསུས་པོ་ཆེ། །དེ་བཞིན་པུཀྐ་སཱི་དབང་ལྡན། །རི་ཁྲོད་མ་ནི་བྱིན་ཟའི་གྲྭ། །གཏུམ་མོ་བདེན་བྲལ་ལ་གནས་ཏེ། །གཡུང་མོ་འདི་ནི་རླུང་གནས་ན། །ལྷ་མོའི་འཁོར་ལོ་རྫོགས་པའོ། །ཧོ་གཉིས་དབུས་སུ་གནས་པ་ནི། །སྐུ་གསུང་ཐུགས་ཀྱི་ཡི་གེ་སྟེ། །

འདི་ནི་བར་མའི་སེམས་ཅན་མིང་། །ལྷ་མོའི་པདྨར་བསམ་གཏན་བྱ། །བར་མ་མཉམ་པར་འཇུག་པ་ནི། །ཁུ་བའི་ངོ་བོས་རྗེས་སུ་དྲན། །མཚམས་ཀྱི་ལྷ་མོས་བསྐུལ་བ་སྟེ། །དེ་ནས་དབྱངས་ཀྱིས་བསྐུལ་བར་བྱ། །སྙིང་རྗེའི་ཡིད་ཀྱིས་བླ་མེད་བཞེངས། །པུཀྐ་སཱི་ནི་བདག་ལ་སྐྱོབས། །སྟོང་པའི་

རང་བཞིན་སྤངས་ནས་ནི། །བདག་ལ་འདོད་པའི་བདེ་ཆེན་སྦྱོར། །ཁྱེད་མི་བཞུགས་ན་བདག་འགུམ་པས། །སྟོང་པའི་རང་བཞིན་ཉིད་སྤངས་ལ། །རི་ཁྲོད་མ་འབྲས་གྲུབ་པར་ནི། །ཀྱེ་ཡི་རྡོ་རྗེ་ཁྱེད་བཞེངས་ཤིག །འཇིག་རྟེན་ཕྱིར་སྨོན་འདོད་པའི་གཙོ། །ཅི་ཕྱིར་སྟོང་པའི་ངང་ལས་

བཞུགས། །ཁྱོད་མི་བཞུགས་ན་ཕྱོགས་མི་ཁུམས། །གཏུམ་མོ་བདག་ནི་གསོལ་བ་འདེབས། །གཡུང་མོ་བདག་ནི་ཡིད་རྨོངས་པས། །སྙིང་རྗེ་རྒྱུན་ཆད་མ་མཛད་པར། །བདག་གིས་ཁྱོད་ཀྱི་ཐུགས་འཚལ་གྱིས། །ཁྱོད་ནི་མིག་འཕྲུལ་ལྟ་བུར་བཞེངས། །བསྐུལ་བའི་གླུའོ། །བསྐུལ་

Vol. 9 · folio 128a

བས་སྔོན་གྱི་བྱང་ཆུབ་ཀྱི། །སྨོན་ལམ་རྗེས་སུ་དྲན་པའོ། །ཁུ་བའི་གཟུགས་ལས་བཞེངས་པ་ནི། །ཨོཾ་དང་ཧཱུྃ་གཉིས་རྡོ་རྗེ་ཆེ། །ཞལ་བརྒྱད་ཞབས་ནི་བཞི་པ་སྟེ། །ཕྱག་ནི་བཅུ་དྲུག་དག་གིས་བརྒྱན། །བདུད་བཞི་མཉམ་པར་མནན་པ་སྟེ། །ཕྱེད་བཅས་པ་ཡིས་གར་

མཁན་ནི། །མགོ་བོའི་ཕྲེང་བས་དོ་ཤལ་བྱས། །སྣ་ཚོགས་རྡོ་རྗེ་སྤྱི་བོར་འཛིན། །རྩ་བའི་ཞལ་ནི་ནག་པོ་ཆེ། །གཡས་པ་ཀུ་མུ་ད་དང་མཚུངས། །གཡོན་པ་དམར་པོ་ཆེན་པོ་འཇིགས། །ཕྱི་མའི་ཞལ་ནི་བུང་བ་མཚུངས། །སྤྱན་ནི་ཉི་ཤུ་རྩ་བཞིས་ཕྱུག །བདག་མེད་མ་ལ་བདེ་བ་སྟེར། །

གླང་པོ་རྟ་བོང་གླང་རྔ་མོང་། །མི་དང་སེང་གེ་དེ་བྱི་ལ། །གཡས་པའི་ཐོད་པ་བརྒྱད་པོ་ནི། །དང་པོ་གླང་པོ་རིམ་ཤེས་བྱ། །གཞི་དང་ཆུ་གནས་རླུང་དང་ནི། །མེ་ཟླ་དེ་ནས་སྣང་བྱེད་དང་། །ཕྱི་མཐར་བྱེད་དང་ནོར་སྦྱིན་ནི། །གཡོན་པའི་ཐོད་པ་བརྒྱད་ནའོ། །གཽ་རཱི་ཁ་དོག་ནག་མོའོ། །ཆོམ་རྐུན་

མ་ནི་བཙོད་དང་མཚུངས། །རོ་ལངས་མ་ནི་གསེར་བསྲེགས་མདོག །གྷསྨ་རཱི་ནི་མརྒཏ་མཚུངས། །པུཀྐ་སཱི་ནི་དབང་སྔོན་མོ། །རི་ཁྲོད་མ་ནི་ཟླ་ནོར་འོད། །གཏུམ་མོ་ནམ་མཁའི་སྔོ་བསངས་མ། །གཡུང་མོ་སྣ་ཚོགས་པ་རུ་འདོད། །གཽ་རཱི་གཡས་ན་གྲི་གུག་སྟེ། །གཡོན་ན་ཉ་ནི་དེ་བཞིན་

ནོ། །ཆོམ་རྐུན་མ་གཡས་ཅང་ཏེའུ་སྟེ། །གཡོན་ན་ཕག་པ་དེ་བཞིན་ནོ། །རོ་ལངས་མ་གཡས་རུས་སྦལ་ཏེ། །གཡོན་པའི་ལག་པ་ཐོད་པའོ། །ཟ་ཕོད་མ་ཡི་གཡས་ན་སྦྲུལ། །གཡོན་པའི་ལག་པ་ཐོད་པའོ། །པུཀྐ་སཱི་གཡས་སེང་གེ་སྟེ། །གཡོན་པའི་ཕྱག་ན་དགྲ་སྟ་འཛིན། །

རི་ཁྲོད་མ་གཡས་དགེ་སློང་སྟེ། །གཡོན་པ་ན་ནི་གསིལ་བྱེད་ཤེས། །གཏུམ་མོ་གཡས་ན་འཁོར་ལོ་སྟེ། །གཡོན་ན་ཐོད་པ་དེ་བཞིན་ནོ། །གཡུང་མོ་གཡས་ན་རྡོ་རྗེ་སྟེ། །གཡོན་ན་སྡིགས་མཛུབ་དེ་བཞིན་ནོ། །སྐྱིལ་ཀྲུང་ཕྱེད་པའི་གར་གྱིས་གནས། །གཽ་རཱི་ལ་སོགས་ཕྱག་གཉིས་

ཤེས། །སྤྱན་གསུམ་སྐྲ་ནི་གྱེན་དུ་ཡིན། །ཕྱག་རྒྱ་ལྔ་ཡིས་ཤིན་ཏུ་མཛེས། །ཚངས་པ་དབང་པོ་ཉེ་དབང་དྲག །གཤིན་རྗེ་ནོར་གྱི་བདག་པོ་དང་། །བདེན་བྲལ་དང་ནི་ཐགས་བཟངས་རིས། །གཽ་རཱི་ལ་སོགས་པ་ཡི་གདན། །ཐམས་ཅད་རྡོ་རྗེ་འདི་ཡིས་ནི། །རང་སྔགས་ཡི་གེ་

Vol. 9 · folio 128b

རྫོགས་པ་དང་། །ཕྱག་རྒྱ་ཕྱག་མཚན་གྱུར་པ་ལས། །སྙིང་གར་ཡེ་ཤེས་བསམ་གཏན་བྱ། །རང་སྙིང་པད་ཉིར་ཧཱུྃ་རྡོ་རྗེ། །ཧཱུྃ་ཡེ་ཤེས་སེམས་དཔའ་བཞུགས་པའི་སྙིང་། །པད་ཉིར་གནས་པའི་ཧཱུྃ་རྡོ་རྗེ། །ཧཱུྃ་ཡེ་ཤེས་རྗེས་སུ་བསམ་པའོ། །དམ་ཚིག་འཁོར་ལོ་ལ་མཉམ་ཐིམ། །

ཡེ་ཤེས་འཁོར་ལོ་ཆེན་པོ་འབར། །སངས་རྒྱས་བྱང་ཆུབ་སེམས་དཔའ་ནི། །བསྒྲུབས་ཏེ་གཞན་ཡང་དུ་མ་ཡིན། །ཛ་ཧཱུྃ་བཾ་ཧོཿབཀའ་ལུང་འདིས། །གཽ་རཱི་ལ་སོགས་བཞི་པོ་འདིས། །དགུག་དང་འདི་ནི་གཞུག་པ་དང་། །བཅིང་དང་རྗེས་སུ་དགྱེས་པར་བྱ། །མིག་ལ་སོགས་པ་

གཏི་མུག་སོགས། །རྡོ་རྗེ་གསུམ་ནི་གནས་གསུམ་བསམ། །མིག་གཉིས་རྡོ་རྗེ་གཏི་མུག་མ། །རྣ་གཉིས་ཞེ་སྡང་རྡོ་རྗེ་མ། །སྣ་ནི་སེར་སྣ་མ་ཞེས་བརྗོད། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་རྣལ་འབྱོར་མ། །མིང་གི་ཡི་གེ་དང་པོས་

བསྐྱེད། །ཕྱག་གཉིས་ཞལ་གཅིག་བཟང་པོ་ཡི། །གྲི་གུག་ཐོད་པ་ལག་ན་བཅས། །སྣ་ཚོགས་མདོག་ཅན་རོ་ཡི་གདན། །སྐུ་གསུང་ཐུགས་ཀྱི་གནས་སུ་ནི། །ཨོཾ་ཨཱཿཧཱུྃ་ནི་འདི་ཡི་སྔགས། །འདི་ལས་མཁའ་སྤྱོད་ས་སྤྱོད་མ། །ཞབས་འོག་གནས་པའི་བསམ་གཏན་བྱ། །སྐུ་

གསུང་ཐུགས་ཀྱི་རྡོ་རྗེ་ནི། །རྣལ་འབྱོར་མ་ནི་རིགས་གསུམ་དངོས། །རང་སྙིང་ས་བོན་ཁྱད་པར་སྤྲོ། །ལྕགས་ཀྱུའི་གཟུགས་ཀྱི་འོད་ཟེར་གྱིས། །སངས་རྒྱས་སྤྱན་དྲངས་ཡང་དག་མཆོད། །དབང་བསྐུར་བ་ནི་བླང་བའོ། །མགོན་པོ་དེ་བཞིན་གཤེགས་ཐམས་ཅད། །ཁྱེད་ཀྱིས་

བདག་ལ་དབང་བསྐུར་ཅིག །དེ་ནས་དེ་བཞིན་གཤེགས་འདི་དག །ཧེ་རུ་ཀ་གཟུགས་བྱས་ནས་ནི། །བདུད་རྩི་ལྔ་ཡི་ཆུས་གང་བའི། །བུམ་པ་ཉིད་ཀྱི་ཕྱག་གིས་བསྣམས། །བླུགས་ཏེ་དབང་བསྐུར་མཐའ་རུ་འདིའི། །རྩ་བའི་མི་བསྐྱོད་ཕྱག་རྒྱའོ། །དེ་ནི་ཡང་ནི་གཽ་རཱི་དང་། །པུཀྐ་

སཱི་འདིའི་ཕྱག་རྒྱའོ། །སངས་རྒྱས་རིན་ཆེན་དཔག་མེད་ཡང་། །ཕྱི་མ་དྲུག་ལ་གཉིས་གཉིས་རིམ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འབུད་པ་དང་། འབར་བ་དང་། ཐོད་པ་དང་། ལྕགས་ཀྱུ་ལྔ་དང་། ས་བོན་ལྔར་གྱུར་པའི་བདུད་རྩིའི་རོ་མྱོང་བར་བྱེད་

Vol. 9 · folio 129a

པ་ལ། །རྡོ་རྗེ་ནས་ཀྱི་འབྲུ་ཙམ་བསམས་ཏེ། དཔལ་ཀྱེ་རྡོ་རྗེ་བརྟག་པའོ། །ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭ་ད་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། །ཡེ་ཤེས་མཆོད་པ་སྣ་ཚོགས་སོགས། །ལྷ་མོ་འདི་བརྒྱད་མཆོད་པ་ནི། །སྤྲོ་ཞིང་འཁོར་ལོའི་བདག་པོ་ནི། །འཁོར་

ལོའི་བདག་ཉིད་པས་སྔོན་མཆོད། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། རྣལ་འབྱོར་མ་ནི་དེ་དག་གིས། །འཁོར་ལོའི་གཙོ་བོ་ལ་བསྟོད་པ། །ཁྱོད་ནི་རྣལ་འབྱོར་མ་རྣམས་བསྐོར། །ཉིད་ཀྱི་ཐུགས་ཀྱིས་ཁྱོད་དགོངས་གྲུབ། །རྒྱུ་དང་མི་རྒྱུ་འཁོར་བ་ཀུན་སྒྲུབ་

པ། །སྙིང་རྗེའི་ཐུགས་ཀྱིས་སེམས་ཅན་བྱང་ཆུབ་ཏུ། །ཀུན་རྫོབ་སྒྱུ་མས་བྱང་ཆུབ་སྒྲུབ་པའི་ཡིད། །དགྱེས་པའི་ཤྲཱི་ཧེ་རུ་ཀ་རྡོ་རྗེ་བསྟོད། །ཨོཾ་སརྦ་ཏ་ཐཱ་ག་ཏ་སྟུ་ཏི་བཛྲ་སྭ་བྷཱ་བ་ཨཱཏྨ་ཀོ྅ཧཾ། །རྡོ་རྗེ་རྗེས་སུ་ཆགས་བྱེད་དང་། །སངས་རྒྱས་གཞལ་མེད་བྱེ་བྲག་བསྒོམ། །

དབང་བསྐུར་བདུད་རྩི་མྱང་བ་དང་། །མཆོད་པ་བསྟོད་པ་ཡན་ལག་དྲུག །ཡན་ལག་དྲུག་བསྒོམ་རྣལ་འབྱོར་གང་། །དེ་ནི་མྱུར་དུ་དངོས་གྲུབ་ཐོབ། །ཕོ་བྲང་སངས་རྒྱས་རྣམ་སྣང་མཛད། །དབང་ནི་མི་བསྐྱོད་དེ་བཞིན་གཤེགས། །བདུད་རྩི་མྱང་བ་འོད་དཔག་མེད། །བསྟོད་

པ་རིན་ཆེན་འབྱུང་ལྡན་དཔལ། །མཆོད་པ་དོན་ཡོད་ཡང་དག་མཆོད། །རྗེས་ཆགས་རྡོ་རྗེ་སེམས་དཔའོ། །དངོས་གྲུབ་འདི་ནི་ཉེ་བ་ཡི། །ཡན་ལག་དྲུག་གིས་བསྐྱེད་པ་ནི། །དང་པོ་སྤྲིན་དང་འདྲ་བ་མཐོང་། །གཉིས་པ་དུ་བ་འདྲ་བ་སྟེ། །གསུམ་པ་གློག་གི་རྣམ་པའོ། །བཞི་པ་མར་མེ་

འབར་བ་དང་། །ལྔ་པ་ཐམས་ཅད་སྣང་བ་སྟེ། །སྤྲིན་མེད་ནམ་མཁའ་འདྲ་བའོ། །ཕྱིས་ནི་སྒྱུ་མའི་རྣམ་པ་མཚུངས། །རྨི་ལམ་སྣང་བ་སྐད་ཅིག་གོ། །ལྟེ་བར་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་བསྲེགས་ཏེ། །སྤྱན་ལ་སོགས་པ་ཡང་བསྲེགས་པ། །བསྲེགས་པས་

ཧཾ་ལས་རི་བོང་འབྱུང་། །བསམ་གཏན་མི་ནུས་རྣལ་འབྱོར་གང་། །དོན་ནི་དག་པ་རྗེས་སུ་དྲན། །སྙིང་རྗེ་སྤྱན་ནི་དམར་པོ་སྟེ། །ཡན་ལག་ནག་པོ་བྱམས་པའི་ཐུགས། །བསྡུ་བའི་དངོས་པོ་བཞི་པ་ནི། །ཞབས་ནི་རྣམ་པ་བཞི་ཞེས་བརྗོད། །ཞལ་བརྒྱད་རྣམ་པར་ཐར་པ་ཡིན། །བཅུ་དྲུག་ཕྱག་

Vol. 9 · folio 129b

ནི་སྟོང་པ་སྟེ། །ཕྱག་རྒྱ་ལྔ་ནི་སངས་རྒྱས་ཡིན། །ཁྲོ་བོ་གདུག་པ་འདུལ་བ་པོ། །སྤྱན་གསུམ་པོ་ནི་སྐུ་གསུམ་མོ། །རུས་པ་བདེན་པ་བཞི་པའོ། །གཟུགས་ནི་རྡོ་རྗེ་མ་ཡིན་ཏེ། །ཚོར་བ་གསང་བའི་གཽ་རཱི་མ། །དེ་བཞིན་ཆུ་མ་འདུ་ཤེས་ཕུང་། །འདུ་བྱེད་རྡོ་རྗེ་མཁའ་འགྲོ་མ། །རྣམ་ཤེས་

འདི་ནི་བདག་མེད་མ། །དོན་དམ་ལ་ནི་ཕུང་པོ་མེད། །དེ་ནི་ཡན་ལག་དྲུག་ཏུ་འགྱུར། །སྐྱེ་མཆེད་དྲུག་ནི་དག་པ་ཡི། །ཞེ་སྡང་རྡོ་རྗེ་རྡོ་རྗེ་མ། །རྡོ་རྗེ་རོ་མ་འབབ་རི་ཡིན། །ཕྲག་དོག་རྡོ་རྗེ་མ་དེ་བཞིན། །གཏི་མུག་རྡོ་རྗེ་མ་ཡང་ནི། །ཡིན་ཏེ་རྡོ་རྗེ་མཁའ་འགྲོ་མ། །སེར་སྣ་གསང་བའི་གཽ་རཱི་མ། །ཡིད་

ལ་བདག་མེད་རྣལ་འབྱོར་མ། །ས་ནི་པུཀྐ་སཱི་རུ་བརྗོད། །ཆུ་རྣམས་རི་ཁྲོད་མ་ཞེས་ཟེར། །དྲོད་ནི་གཏུམ་མོར་ཤེས་པར་བྱ། །རླུང་ནི་གཡུང་མོར་རབ་ཏུ་བརྗོད། །གཟུགས་ནི་གཽ་རཱིར་ཡང་དག་བཤད། །སྒྲ་ནི་ཆོམ་རྐུན་མ་རུ་བཤད། །སོ་སོའི་དྲི་ནི་རོ་ལངས་མ། །རོ་ཡི་ཚུལ་ནི་ཟ་ཕོད་མ། །རེག་

བྱ་ས་སྤྱོད་མ་ཞེས་བརྗོད། །ཆོས་ཀྱི་ཁམས་ནི་མཁའ་སྤྱོད་མ། །ས་ནི་དང་པོར་ནོར་སྦྱིན་མཐའ། །ཕྱུག་པོ་ཐམས་ཅད་ས་འགྲུབ་པོ། །གླང་པོ་ལ་སོགས་འཛིན་པ་ནི། །ནད་ནི་ཉེ་བར་ཞི་བའོ། །གློ་དང་དབུགས་དང་དེ་བཞིན་སྨྱོ། །ཁྲག་སྐྱུགས་མཛེ་ནད་བིརྫི་ཀ །མཆེར་པ་མཆིན་པ་རང་

གཟུགས་ནི། །གླང་པོ་ལ་སོགས་རབ་ཏུ་བརྗོད། །ནི་རཾ་སུ་འམ་གཞན་ལས་ནི། །བསམ་གཏན་སྔགས་ཀྱི་བཟླས་པ་བྱ། །ཨོཾ་ཨཥྚཱ་ན་ནཱ་ཡ་བིཾ་གོརྡྷ་ཀེ་ཤ་ཝརྟྨ་ནེ། ཙ་ཏུརྦིཾ་ཤ་ཏི། ནེ་ཏྲཱ་ཡ། ཤོ་ཌ་ཤ་བྷུ་ཛཱ་ཡ། ཀྲྀཥྞ་ཛཱི་མཱུ་ཏ་ཝ་པུ་ཥེ། ཀ་པཱ་ལ་མཱ་ལཱ་ནེ་ཀཱ་དྷཱ་རི་ཎེ། ཨཱཏྷྨཱ་ཏ་ཀྲཱུ་ར་ཙིཏྟཱ་ཡ་ཨརྡྷེནྡུ་

དཾཥྚྲྀ་ཎེ། མཱ་ར་ཡ་མཱ་ར་ཡ། ཀཱ་ར་ཡ་ཀཱ་ར་ཡ། གརྫྫ་ཡ་གརྫྫ་ཡ། ཏརྫྫ་ཡ་ཏརྫྫ་ཡ། ཤོ་ཥ་ཡ་ཤོ་ཥ་ཡ། སཔྟ་སཱ་ག་རཱ་ན། བནྡྷ་བནྡྷ། ནཱ་གཱཥྚ་ཀཱན། གྲྀཧྞ་གྲྀཧྞ་སརྦ་ཤ་ཏྲཱུཾ། ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧཿཕཊ་སྭཱ་ཧཱ། བར་ཆད་ཐམས་ཅད་ཉེར་ཞིའི་ཕྱིར། །གཏོར་མ་རྒྱུན་དུ་སྦྱིན་པར་བྱ། །ཨོཾ་

ཨིནྡཾ་ཛ་མ་ཛ་ལ་ཛཀྑ་བྷཱུ་ཏ་བཧྣི་བཱ་ཨུ་རཱཀྑ་ཙནྡ་སུཛྫ་མ་ད་བཔྤ་ཏ་ལ་པཱ་ཏཱ་ལེ་ཨཥྚ་སཔྤ་སྭཱ་ཧཱ། ཨི་དཾ་བ་ལིཾ་བྷུཾ་ཛ་ཛིཾ་གྷ་ཕུལླ་དྷཱུཔྤ་མཱཾ་ས་པིཾ་ག་ཨམྦྷ་སཔྤ་ཀཛྫ་སཱ་ད། ཁནྟི་ཁུ་ཎི། ཕེ་ཊ་གཱ་ད། ཨོཾ་ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ། ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུྃ་ཕཊ་སྭཱ་ཧཱ། །ལྷ་མོའི་རྒྱུད་ཀྱི་པདྨ་མང་པོ་ནི། །

Vol. 9 · folio 130a

བླ་མ་ཞི་བས་ཉི་མའི་འོད་ཀྱིས་ཕྱེ། །མི་ཐུབ་ཟླ་བས་སྦྲང་རྩི་གཞི་བས་འཐུངས་བས། །སྒྲུབ་པའི་ཐབས་ནི་སྦྲང་རྩི་སྐྱུགས་པའོ། །དཔལ་གྱི་ཐུགས་རྗེའི་སྟོབས་ཀྱིས་སྒྲུབ་ཐབས་བྱས། །འདི་ལས་ངལ་བར་གྱུར་པའི་བསོད་ནམས་གང་། །དེས་ཐོབ་སྐྱེ་བའི་རྒྱ་

མཚོ་ལས་སྒྲོལ་བའི། །ཐེག་པ་འགྲོ་བ་སྒྲོལ་བའི་རྒྱུར་གྱུར་ཅིག །ཡན་ལག་དྲུག་པའི་སྒྲུབ་ཐབས་ཞེས་བྱ་བ། །སློབ་དཔོན་མི་ཐུབ་ཟླ་བས་མཛད་པ་རྫོགས་སོ།། །།བླ་མ་དམ་པས་བཀའ་སྩལ་པ། །དགེ་སློང་ཤཱཀྱ་ཡེ་ཤེས་ཀྱིས། །ཡན་ལག་དྲུག་པའི་སྒྲུབ་ཐབས་འདི། །

ཤཱཀྱ་དཀོན་མཆོག་བདག་མེད་ལ། །རྣལ་འབྱོར་མ་ནི་ཐམས་ཅད་ཕྱིར། །ནུས་པས་བསྒྱུར་བ་གང་ཡོད་པ། །ཀྱེ་ཡི་རྡོ་རྗེ་མྱུར་ཐོབ་ཤོག །རྒྱ་གར་གྱི་མཁན་པོ་རཏྣ་ཤྲཱི་ཛྙཱ་ནའི་ཞལ་སྔ་ནས་དང་། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words