210b.7༄༅༅། །རྒྱ་གར་སྐད་དུ། ཤྲཱི་ཧེ་བཛྲ་སཱ་དྷ་ནཾ། བོད་སྐད་དུ། དཔལ་ཀྱེའི་རྡོ་རྗེའི་སྒྲུབ་ཐབས། དཔལ་ཀྱེ་

211a.1རྡོ་རྗེ་ལ་ཕྱག་འཚལ་ལོ། །དཔལ་ལྡན་དགྱེས་པའི་རྡོ་རྗེ་དང་། །སྒོ་བཞིར་གནས་པའི་གཽ་རཱི་སོགས། །མཚམས་ཀྱི་སྐུལ་བྱེད་མ་བཞི་ལ། །སྒོ་གསུམ་དད་པས་ཕྱག་འཚལ་ཏེ། །རྣལ་འབྱོར་བློ་ཞན་དོན་དུ་ནི། །བདག་གིས་དགྱེས་པའི་རྡོ་རྗེ་ཡི། །

211a.2ཞལ་གཅིག་ཕྱག་གཉིས་སྒྲུབ་ཐབས་འདི། །མི་ནུས་བཞིན་དུ་བརྩམ་པར་བྱ། །སློབ་དཔོན་དེ་ཉིད་ཐོས་པ་དང་། །དབང་རྣམས་ཚུལ་བཞིན་མནོས་པ་དང་། །བསྒོམ་དང་ཆོ་ག་མཁས་པ་དང་། །བཀའ་ཡི་གནང་བ་ཐོབ་པ་ཡིས། །དངོས་གྲུབ་འདོད་པའི་སེམས་ཀྱིས་སུ། །དུར་

211a.3ཁྲོད་དང་ནི་ལྷ་རྟེན་དང་། །རང་གི་ཁྱིམ་དང་ཆུ་འགྲམ་དུ། །འཇིགས་པའི་སེམས་མེད་བསམ་གཏན་བྱ། །དྲན་ཐར་རྣམ་པ་བདུན་དག་གིས། །ལུས་སོགས་བདུན་པོ་དག་ནས་ནི། །སྐད་ཅིག་མ་ཡི་རྣལ་འབྱོར་མས། །རྡོ་རྗེ་སེམས་དཔའི་ལུས་བྱས་ཏེ། །སྙིང་གར་པདྨ་འདབ་

211a.4བརྒྱད་བསྒོམ། །དེ་སྟེང་ཉི་དཀྱིལ་ཧཱུྃ་བསམ་སྟེ། །འབར་བ་མེ་ཡིས་རབ་བསྲེགས་པས། །ཡེ་ཤེས་མིག་དང་ལྡན་བྱ་སྟེ། །སྔོན་དུ་དགྱེས་པའི་རྡོ་རྗེ་དང་། །ལྷ་མོ་བརྒྱད་དག་མངོན་པར་མཐོང་། །ཕྱི་དང་ནང་དང་བླ་མེད་པའི། །མཆོད་པ་རྣམས་ཀྱིས་ཡང་དག་མཆོད། །སྔོན་

211a.5འགྲོ་རྗེས་སུ་ཕྱག་བྱས་ཏེ། །སྡིག་པ་བྱས་པ་བཤགས་པ་དང་། །ཕྱིས་མི་བྱེད་པར་སྡོམ་པ་གཟུང་། །དགེ་བ་བྱས་བྱེད་ཡི་རང་བྱ། །སངས་རྒྱས་དགྱེས་པའི་རྡོ་རྗེ་དང་། །དེ་གསུངས་པ་ཡི་ཆོས་རྣམས་དང་། །མ་བརྒྱད་ལྷ་མོ་དགེ་འདུན་ལ། །བདག་ནི་དང་བས་སྐྱབས་སུ་

211a.6མཆི། །བྱང་ཆུབ་སེམས་ཀྱང་བདག་གིས་བསྐྱེད། །ཐེག་པ་ཆེན་པོ་ལ་གནས་བགྱི། །ཀུན་གྱི་དོན་ནི་བདག་ཉིད་དབུལ། །དེ་ཡང་རྒྱ་ཆེར་བསྔོ་བར་བགྱི། །དང་པོ་བྱམས་པ་བསྒོམ་པར་བྱ། །གཉིས་པ་སྙིང་རྗེ་བྱེ་བྲག་བསྒོམ། །གསུམ་པ་དགའ་བ་བསྒོམ་པ་སྟེ། །ཀུན་གྱི་

211a.7ཐ་མར་བཏང་སྙོམས་སོ། །དང་པོ་སྟོང་པའི་བྱང་ཆུབ་སེམས། །གཉིས་པ་ལ་ནི་ས་བོན་འདུས། །གསུམ་པ་ལ་ནི་གཟུགས་རྫོགས་ཏེ། །བཞི་པ་ལ་ནི་ཡིག་འབྲུ་དགོད། །དེ་འོག་སྟོང་པའི་བྱང་ཆུབ་ནི། །ཕྱི་དང་ནང་མེད་སྟོང་སྨོན་ནོ། །བསམས་ནས་དེ་ཉིད་ཁོ་ན་ཡི། །ལུས་སུ་ཡང་དག་

211b.1བསྒོམ་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་ས་བྷཱ་བ་ཨཱཏྨ་ཀོ྅ཧཾ། སྔོན་གྱི་སྨོན་ལམ་རྗེས་དྲན་ན། །དེ་ཁོ་ན་ཉིད་ལས་ལངས་ནས། །འོག་ཕྱོགས་པདྨ་འདབ་བརྒྱད་ལ། །དེ་སྟེང་ཉི་མ་ཧཱུྃ་བསམས་པས། །ཧཱུྃ་ལས་རྡོ་རྗེའི་ས་གཞིར་གྱུར། །དེ་སྟེང་བགེགས་སྐྲད་ཧཱུྃ་བསམས་པའི། །

211b.2རཀྵ་སྒྲ་དང་ལྡན་པ་ཡིས། །ཚོགས་ཀྱི་བགེགས་རྣམས་སེལ་བར་བྱེད། །སླར་འདུས་རྡོ་རྗེའི་གུར་དུ་གྱུར། །བླ་རེ་ཡང་ནི་བསྒོམ་པར་བྱ། །སྟེང་འོག་ཕྱོགས་མེད་རྡོ་རྗེའི་དབྱིངས། །སྒོ་ཡི་དབྱིབས་འདྲ་ཉིད་དུ་བསྒོམ། །ཨེ་གཟུགས་བདག་མེད་མ་འདྲ་བར། །བསམས་ཏེ་དེ་ལས་

211b.3འབྱུང་འགྱུར་བའི། །ཆོས་ཀྱི་འབྱུང་གནས་དེ་དབྱིབས་ནི། །གྲུ་གསུམ་གྱེན་དཀར་ཡང་དག་ལྡན། །དེ་ཡི་དབུས་སུ་བསམ་པ་ནི། །ཡཾ་དང་རྃ་དང་བྃ་དང་ལཾ། །དེ་སྟེང་བདག་ཉིད་རྣམ་ཤེས་ནི། །ཨྃ་བྃ་ཉིད་ནི་ཡང་དག་གནས། །སྤྲོ་དང་བསྡུ་བའི་སྦྱོར་བ་ཡིས། །གཞལ་ཡས་ཁང་དུ་

211b.4གྱུར་པ་སྟེ། །ཐོག་གཅིག་པ་རུ་བསམ་པར་བྱ། །ངོས་བཞི་པ་ལ་སྒོ་བཞི་པ། །ཀ་བ་བརྒྱད་དང་ཡང་དག་ལྡན། །རྟ་བབས་བཞིས་ཀྱང་རྣམ་པར་མཛེས། །དྲ་བ་དྲ་ཕྱེད་ཀྱིས་བརྒྱན་པ། །ལྷ་མོ་བརྒྱད་ཀྱི་འོད་ཀྱིས་ཀྱང་། །གསལ་བར་ལྷ་ཡི་རྣམ་པས་བྱས། །དེ་ནས་པདྨ་འདབ་བརྒྱད་

211b.5པ། །ཁ་དོག་དམར་པོ་ཉི་མ་གནས། །དེ་སྟེང་བདུད་བཞི་རྣམ་པར་བརྒྱན། །ཚངས་པ་དབང་པོ་ཉེ་དབང་དྲག །ཤར་སྒོ་ལ་སོགས་བཞིར་གནས་པ། །ཚངས་པ་དང་ནི་དབང་པོ་དང་། །ཉེ་དབང་དང་ནི་དྲག་པོ་སྟེ། །རིམ་པ་བཞིན་དུ་གནས་པའོ། །མཚམས་བཞི་པོར་ནི་ཤེས་བྱ་བ། །

211b.6གཤིན་རྗེ་དང་ནི་ནོར་བདག་དང་། །བདེན་བྲལ་དང་ནི་ཐགས་བཟངས་རིས། །པུཀྐ་སཱི་སོགས་གདན་དུ་བརྟག །དེ་ལྟར་ཕོ་བྲང་བྱེ་བྲག་རྫོགས། །དེ་བཞིན་གཤེགས་པ་འབྱུང་བ་ཡི། །ང་རྒྱལ་འདི་ཡིས་བྱ་བ་སྟེ། །ང་འམ་བདག་ཏུ་བསམ་པར་བྱ། །ཨོཾ་སརྦ་ཏ་ཐཱ་ག་ཏ་བཛྲ་སྭ་བྷཱ་བ་

211b.7ཨཱཏྨ་ཀོ྅ཧཾ། དབུས་ཀྱི་གཞི་སྟེང་ཨཱ་ལི་ནི། །བཅུ་དྲུག་རིམ་པ་གཉིས་ཤེས་བྱ། །དེ་འགྱུར་ཟླ་བ་གཉིས་པ་ནི། །མེ་ལོང་ལྟ་བུའི་ཡེ་ཤེས་སོ། །དེ་སྟེང་ཡང་དག་བསམ་པ་ནི། །ཀཱ་ལི་བཞི་བཅུ་ཉིས་འགྱུར་ལས། །རྟ་བདུན་པ་རུ་གྱུར་པ་སྟེ། །མཉམ་པ་ཉིད་ཀྱི་ཡེ་ཤེས་སོ། །དེ་

212a.1དབུས་ཧཱུཾ་ལས་བྱུང་བ་ནི། །རྡོ་རྗེ་ནག་པོ་རྩེ་ལྔ་པ། །ལྟེ་བ་ཧཱུྃ་གིས་མཚན་པ་སྟེ། །སོ་སོར་རྟོག་པའི་ཡེ་ཤེས་སོ། །དེ་ལས་འོད་འཕྲོས་སེམས་ཅན་དོན། །བྱས་ཏེ་བཞི་པོ་ཉིད་ལ་བསྟིམ། །འོད་ཀྱི་གོང་བུར་གྱུར་པ་ནི། །བྱ་བ་ནན་ཏན་ཡེ་ཤེས་སོ། །དེ་ལས་

212a.2ཐིག་ལེ་བརྒྱད་ཆད་དེ། །གྃ་དང་ཙྃ་དང་བྃ་དང་གྷྃ། །པྃ་དང་སྃ་དང་ལྃ་དང་ཌྃ། །ཟླ་བ་ཉི་མ་ཡང་དག་ལྡན། །ས་བོན་བརྒྱད་ལས་གྱུར་པ་ནི། །གྲི་དང་རྔེའུ་ཆུང་རུས་སྦལ་སྦྲུལ། །སེང་གེ་དགེ་སློང་འཁོར་ལོ་དང་། །རྡོ་རྗེ་ལ་སོགས་རིམ་པར་སྐྱེས། །གཽ་རཱི་ཤར་གྱི་སྒོ་ན་གནས། །ཙཽ་རཱི་ལྷོ་ཡི་

212a.3སྒོ་ན་གནས། །ནུབ་ཀྱི་སྒོ་རུ་བེཏྟཱ་ལཱི། །བྱང་གི་སྒོ་རུ་གྷསྨ་རཱི། །པུཀྐ་སཱི་ནི་དབང་ལྡན་དུ། །རི་ཁྲོད་མ་ནི་བྱིན་ཟའི་གྲྭར། །གཏུམ་མོ་བདེན་བྲལ་ལ་གནས་ཏེ། །གཡུང་མོ་འདི་རུ་རླུང་ན་གནས། །ལྷ་མོ་བསྐྱེད་པ་རྫོགས་ནས་སུ། །གཙོ་བོ་འོད་ཀྱི་གོང་བུ་ལ། །ལྷ་མོས་བདག་པོ་

212a.4མེད་མཐོང་ནས། །གོང་བུ་མཆོག་ལ་གསོལ་བ་གདབ། །སྙིང་རྗེ་ཡིད་ཀྱིས་བཅོམ་ལྡན་བཞེངས། །པུཀྐ་སཱི་ནི་བདག་ལ་སྐྱོབས། །སྟོང་པའི་ཏིང་འཛིན་སྤངས་ནས་ནི། །བདག་ལ་འདོད་པའི་བདེ་བ་མཛོད། །ཁྱོད་མི་བཞུགས་ན་བདག་འགུམ་པས། །སྟོང་པའི་རང་བཞིན་

212a.5ཡངས་སྤངས་ཏེ། །རི་ཁྲོད་མ་འབྲས་གྲུབ་པར་ནི། །ཀྱེ་ཡི་རྡོ་རྗེ་ཁྱོད་བཞེངས་ཤིག །འཇིག་རྟེན་ཕྱིར་སྨོན་འདོད་པའི་གཙོ། །ཅི་ཕྱིར་སྟོང་པ་ཉིད་ལ་བཞུགས། །ཁྱོད་མི་བཞུགས་ན་ཕྱོགས་མི་ཁུམས། །གཏུམ་མོ་བདག་ནི་གསོལ་བ་འདེབས། །གཡུང་མོ་བདག་ནི་ཡིད་རྨོངས་

212a.6པས། །སྙིང་རྗེ་རྒྱུན་ཆད་མ་མཛད་པར། །ཁྱོད་ཀྱི་བདག་ནི་ཐུགས་འཚལ་གྱིས། །མིག་འཕྲུལ་ལྟ་བུར་ཁྱོད་བཞེངས་ཤིག །བསྐུལ་བའི་གླུའོ། །བསྐུལ་བས་སྔོན་གྱི་བྱང་ཆུབ་ནི། །སྨོན་ལམ་རྗེས་སུ་དྲན་ཏེ་བཞེངས། །ཞལ་གཅིག་ཕྱག་གཉིས་ནག་པོ་ཆེ། །གཅེར་བུ་

212a.7སྤྱན་གསུམ་མཆེ་བ་གཙིགས། །ཕྱག་རྒྱ་ལྔ་དང་ཡང་དག་ལྡན། །སྣ་ཚོགས་རྡོ་རྗེ་སྤྱི་བོར་གནས། །གཡས་ན་རྡོ་རྗེ་རྩེ་ལྔ་འཛིན། །གཡོན་པ་ན་ནི་ཐོད་པ་འཛིན། །ཞབས་ཀྱིས་བདུད་བཞི་རྣམ་པར་མནན། །བརྐྱང་བསྐུམ་ཚུལ་དུ་གནས་པའོ། །གཽ་རཱི་ཁ་དོག་ནག་མོ་སྟེ། །ཙཽ་

212b.1རཱི་ཁ་དོག་བཙོད་དང་མཚུངས། །རོ་ལངས་མ་ནི་གསེར་བསྲེགས་མདོག །ཟ་ཕོད་མ་ནི་མརྒཏ་མཚུངས། །སྦོས་མོའི་མདོག་ནི་སྔོན་མོའོ། །རི་ཁྲོད་མ་ནི་ཟླ་ནོར་འོད། །གཏུམ་མོ་ནམ་མཁའ་ལྗང་གུ་སྟེ། །གཡུང་མོ་སྣ་ཚོགས་པ་རུ་འདོད། །གཽ་རཱི་གཡས་ན་གྲི་གུག་སྟེ། །གཡོན་

212b.2ན་ཉ་ནི་དེ་བཞིན་ནོ། །ཆོམ་རྐུན་གཡས་ན་ཌ་མ་རུ། །གཡོན་པ་ན་ནི་ཕག་པའོ། །རོ་ལངས་གཡས་ན་རུས་སྦལ་ཏེ། །གཡོན་པ་ན་ནི་པདྨའི་སྣོད། །ཟ་ཕོད་མ་ཡི་གཡས་ན་སྦྲུལ། །གཡོན་པའི་ལག་ན་ཐོད་པའོ། །སྦོས་མོ་གཡས་ན་སེང་གེ་སྟེ། །གཡོན་གྱི་ཕྱག་ན་དགྲ་སྟ་འཛིན། །

212b.3རྔོན་པ་མ་གཡས་དགེ་སློང་སྟེ། །གཡོན་པ་ན་ནི་གསིལ་བྱེད་དོ། །གཏུམ་མོ་གཡས་ན་འཁོར་ལོ་སྟེ། །གཡོན་པ་ན་ནི་ཐོད་པ་འཛིན། །གཡུང་མོ་གཡས་ན་རྡོ་རྗེ་སྟེ། །གཡོན་ན་སྡིགས་མཛུབ་དེ་བཞིན་ནོ། །སྐྱིལ་ཀྲུང་ཕྱེད་པའི་གར་གྱིས་གནས། །གཽ་རཱི་ལ་སོགས་ཕྱག་གཉིས་

212b.4ཤེས། །སྤྱན་གསུམ་སྐྲ་ནི་གྱེན་དུ་ཡིན། །ཕྱག་རྒྱ་ལྔས་ནི་ཤིན་ཏུ་མཛེས། །ཚངས་པ་ལ་སོགས་གདན་ལ་བཞུགས། །དེ་ལྟར་སྐུ་རྣམས་རྫོགས་པ་དང་། །རང་གི་སྙིང་གར་པདྨ་བསམ། །དེ་དབུས་ཉི་མ་ཧཱུྃ་ལས་བསམ། །དེ་ལས་རྡོ་རྗེ་རྩེ་ལྔ་པ། །དེ་ལས་ཧཱུྃ་གིས་མཚན་པ་

212b.5སྟེ། །དེ་འགྱུར་ཡེ་ཤེས་སེམས་དཔའ་བསམ། །དེ་ཉིད་པད་ཉིར་ཧཱུྃ་རྡོ་རྗེ། །ཡེ་ཤེས་སེམས་དཔའ་རྫོགས་པའོ། །དེ་ལྟར་རིམ་པ་ཀུན་ལ་ཡང་། །དེ་ལྟར་ནང་དུ་ཤེས་པར་བྱ། །དེ་ལས་འོད་འཕྲོས་བདེ་གཤེགས་རྣམས། །ཛཿཧཱུྃ་བཾ་ཧོཿབཀའ་ལུང་གིས། །གཽ་རཱི་ལ་སོགས་རྣམས་

212b.6ཀྱིས་ནི། །སྤྱན་དྲངས་ནས་ནི་དེ་བསྟིམས་ནས། །ཡེ་ཤེས་འཁོར་ལོ་ཆེན་པོ་འབར། །སངས་རྒྱས་བྱང་ཆུབ་སེམས་དཔའ་ནི། །བསྒྲུབས་ཏེ་གཞན་ན་ཡོད་མ་ཡིན། །མྃ་ལས་གཏི་མུག་རྡོ་རྗེ་མ། །ཌྃ་ལས་ཞེ་སྡང་རྡོ་རྗེ་མ། །མྃ་ལས་སེར་སྣ་རྡོ་རྗེ་མ། །རྃ་ལས་འདོད་ཆགས་

212b.7རྡོ་རྗེ་མ། །ཨཾ་ལས་ཕྲག་དོག་རྡོ་རྗེ་མ། །ནྃ་ལས་བདག་མེད་རྡོ་རྗེ་མ། །མིག་དང་རྣ་བ་སྣ་དང་ལྕེ། །ལུས་ཡིད་རིམ་བཞིན་དེ་ལྟར་དགོད། །ཕྱག་གཉིས་ཞལ་གཅིག་རོ་ཡི་གདན། །གྲི་གུག་ཐོད་པ་ཕྱག་ན་བསྣམས། །ཨྃ་ལས་མཁའ་སྤྱོད་མར་ཤེས་བྱ། །ཨ་ལས་ས་སྤྱོད་

213a.1མ་རུ་འདོད། །ཧཱུྃ་ལས་ཞབས་བསྐྱེད་འོག་ནས་བསམ། །དེ་ལྟར་སྐུ་གསུང་ཐུགས་དེ་ཡང་། །རྣལ་འབྱོར་མ་ནི་རིགས་གསུམ་འདོད། །རང་སྙིང་ས་བོན་ཁྱད་པར་སྤྲོ། །ལྕགས་ཀྱུའི་གཟུགས་ཀྱི་འོད་ཟེར་གྱིས། །སངས་རྒྱས་སྤྱན་དྲངས་མདུན་དུ་མཆོད། །

213a.2དབང་བསྐུར་བ་ནི་བླང་བ་སྟེ། །མགོན་པོ་དེ་བཞིན་གཤེགས་ཐམས་ཅད། །ཁྱོད་ཀྱིས་བདག་ལ་དབང་བསྐུར་ཅིག །དེ་བཞིན་གཤེགས་པ་ཁྲོ་བོ་དང་། །ལྷ་རྣམས་ཀྱིས་ནི་མདུན་བདར་ནས། །བུམ་པས་དེ་ལ་དབང་བསྐུར་བས། །བི་ཙི་ཏ། པི་པ་ཀ །བི་མརྟ། བི་ལ། སྐད་ཅིག་བཞི་

213a.3ལའོ། །ཨཱ་ནན་ད། པ་ར་མཱ་ནན་ད་དང་། བི་ར་མཱ་ནན་ད་དང་། ས་མ་ཛཱ་ནན་དའོ། །དགའ་བ་བཞིའོ། །དགོད་པ་དང་། བལྟ་བ་དང་། ལག་བཅངས་དང་། འཁྱུད་པ་ནི་སློབ་དཔོན་དང་། གསང་བ་དང་། ཤེས་རབ་ཡེ་ཤེས་དང་། བདེ་བ་ཆེན་པོའི་དེ་ཁོ་ན་ཉིད་དོ། །མཐའ་རུ་དབང་རྣམས་འབྲས་བུ་ནི། །རྩ་བར་མི་

213a.4བསྐྱོད་པས་བརྒྱན་པའོ། །སེམས་དང་ཕན་པ་རིན་ཆེན་དང་། །འོད་དཔག་མེད་པས་བརྒྱན་པའོ། །གཽ་རཱི་རྩཽ་རཱི་བེཏྟཱ་ལཱི། །གྷསྨ་རཱི་རྣམས་བརྒྱན་པའོ། །མི་བསྐྱོད་སངས་རྒྱས་རིན་ཆེན་དང་། །ཚེ་དཔག་མེད་ཀྱིས་བརྒྱན་པ་ནི། །སྦོས་མོ་རྔོན་མ་གཏུམ་མོ་དང་། །གཡུང་མོ་ལ་སོགས་

213a.5བརྒྱད་པའོ། །ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཧོ། འབུད་དང་འབར་དང་ཐོད་པ་དང་། །འཛིན་པ་ལྔ་དང་འབྲས་བུ་ལྔ། །དེ་འགྱུར་བདུད་རྩི་རོ་མྱང་བ། །རྡོ་རྗེ་ནས་ཀྱི་འབྲུ་བསམ་སྟེ། །དགྱེས་པའི་རྡོ་རྗེ་དེ་བཀླག་གོ། །ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭ་ད་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ལྷ་མོ་

213a.6བརྒྱད་རྣམས་སྤྲོས་ནས་ནི། །མཆོད་པ་བརྒྱད་ཀྱིས་སྔོན་བཞིན་དུ། །དཀྱིལ་འཁོར་གཙོ་བོ་ཉིད་ལ་མཆོད། །ཨོཾ་སརྦ་ཏ་ཐཱ་ག་ཏ་པུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། རྣལ་འབྱོར་མ་རྣམས་དེ་དག་གིས། །འཁོར་ལོའི་གཙོ་བོ་ལ་བསྟོད་ལ། །ཁྱོད་ནི་རྣལ་འབྱོར་བརྒྱད་ཀྱིས་བསྐོར། །ཉིད་

213a.7ཀྱི་ཐུགས་ཀྱི་ཁྱོད་དགོངས་འགྲུབ། །རྒྱུ་དང་མི་རྒྱུ་འཁོར་བ་ཀུན་འགྲུབ་པ། །སྙིང་རྗེའི་ཐུགས་ཀྱིས་སེམས་ཅན་བྱང་ཆུབ་ཏུ། །ཀུན་རྫོབ་སྒྱུ་མས་སྒྲུབ་པའི་ཡིད་དགྱེས་མཛོད། །ཨོཾ་སརྦ་ཏ་ཐཱ་ག་ཏ་སྟུ་ཏིར་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ཡན་ཆད་བསྙེན་པ་དང་ཉེ་བའི་བསྙེན་པ་བཤད་ནས། །

213b.1སྒྲུབ་པ་དང་སྒྲུབ་པ་ཆེན་པོ་བཤད་པར་བྱ་སྟེ། དཀྱིལ་འཁོར་ལྷ་རྣམས་ལུས་ལ་བསྡུ། །ལྟེ་བར་ཙཎྜ་ལཱི་སྦར་ལ། །དེ་བཞིན་གཤེགས་པ་ལྔ་བསྲེགས་ཏེ། །སྤྱན་ལ་སོགས་པ་ཡང་བསྲེགས་ཏེ། །བསྲེགས་པས་ཧཾ་ལས་རི་བོང་འབྱུང་། །དང་པོ་སྤྲིན་དང་འདྲ་བ་མཐོང་། །གཉིས་སུ་

213b.2དུ་བ་འདྲ་བ་མཐོང་། །གསུམ་པ་གློག་གི་རྣམ་པ་སྟེ། །བཞི་པ་མར་མེ་འདྲ་བ་དང་། །ལྔ་པ་ཐམས་ཅད་སྣང་བ་སྟེ། །སྤྲིན་མེད་ནམ་མཁའ་འདྲ་བ་སྟེ། །ཕྱིས་ནི་སྒྱུ་མའི་རྣམ་པ་མཚུངས། །རྨི་ལམ་རྣམ་པ་སྐད་ཅིག་གོ། །རང་གི་སྙིང་ག་འདི་ཉིད་དུ། །སྤྲོས་དང་བསྡུ་བའི་སྦྱོར་བ་ཡིས། །

213b.3སྤྲོས་མེད་བསྒོམ་པའི་སྦྱོར་བ་སྟེ། །ཐོག་མ་མཐའ་དབུས་མེད་པ་ཡི། །འཁོར་མེད་མྱ་ངན་འདས་པ་མེད། །དེ་ལྟར་མ་ཡིན་དམིགས་མ་ཡིན། །ཞེས་མར་མེའི་རྩེ་མོའི་བར་དུའོ། །བར་ཆོད་བགེགས་ཀྱིས་མི་ཚུགས་ཕྱིར། །གཏོར་མ་རྒྱུན་ཏུ་སྦྱིན་པར་བྱ། །ཨོཾ་ཨིནྡ་ཛ་མ་ཛ་ལ། ཡཀྵ་

213b.4བྷཱུ་ཏ། བཧྣི་བ་ཨུ། རཱཀྵ་ཙནྡ། སཱུ་ཛྫ། མཱ་ད་བཔྤ། ཏ་ལེ་པཱ་ཏཱ་ལ། ཨཥྚ་སཔྤ། ཨི་དཾ། བ་ལི། བྷུཾ་ཛ། ཛིཾ་གྷ། པུཥྤ། དྷཱུ་པ། མཱཾ་ས། པིཾ་གྷ། ཨཾ་བྷ་སཔྤ། ཀཛྫ་སཱ་དྷ། ཁནྟི་ཁུ་ནི་ཕེ་ཌ་གཱ་ད། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱ་ཏ། ཨོཾ་ཨཱཿཧཱུྃ་ཕཊ་སྭཱ་ཧཱ། ཨོཾ་ཏྲཻ་ལོཀྱཱ་

213b.5ཀྵེ་པ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྙིང་པོའོ། །བསམ་གཏན་མི་ནུས་རྣལ་འབྱོར་གང་། །དེ་ནི་དག་པ་རྗེས་སུ་དྲན། །སྙིང་རྗེའི་སྤྱན་ནི་དམར་པོ་སྟེ། །ཡན་ལག་ནག་པོ་བྱམས་པ་ཡིན། །ཕྱག་རྒྱ་ལྔ་ནི་སངས་རྒྱས་ཡིན། །ཁྲོས་པས་གདུག་པ་འདུལ་བ་ཡིན། །སྤྱན་གསུམ་པ་ནི་

213b.6སྐུ་གསུམ་མོ། །རུས་པ་བདེན་པ་བཞི་པོའོ། །གཟུགས་ཀྱི་ཕུང་པོ་རྡོ་རྗེ་མ། །ཚོར་བ་གསང་བའི་གཽ་རཱི་མ། །འདུ་ཤེས་ཕུང་པོ་ཆུ་མའོ། །འདུ་བྱེད་རྡོ་རྗེ་མཁའ་འགྲོ་མ། །རྣམ་པར་ཤེས་པ་བདག་མེད་མ། །དོན་དམ་ལ་ནི་ཕུང་པོ་མེད། །སྐྱེ་མཆེད་དྲུག་ནི་དག་པ་ནི། །མིག་ནི་གཏི་

213b.7མུག་རྡོ་རྗེ་མ། །རྣ་བ་ཞེ་སྡང་རྡོ་རྗེ་མ། །སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ས་ནི་པུཀྐ་སཱི་རུ་བཤད། །ཆུ་ཡི་ཁམས་ནི་རྔོན་པ་མ། །དྲོད་ནི་གཏུམ་མོར་ཤེས་པར་བྱ། །རླུང་ནི་གཡུང་མོར་རབ་ཏུ་གྲགས། །གཟུགས་ནི་གཽ་རཱིར་ཡང་

214a.1དག་བརྗོད། །སྒྲ་ནི་ཆོམ་རྐུན་མ་རབ་བརྗོད། །དྲི་ནི་རོ་ལངས་མ་རུ་བཤད། །རོ་ཡི་ཚུལ་ནི་ཟ་ཕོད་མ། །རེག་བྱ་ས་སྤྱོད་མ་ཞེས་བྱ། །ཆོས་ཀྱི་དབྱིངས་ནི་མཁའ་སྤྱོད་མ། །དེ་ལྟར་དག་པས་རྗེས་དྲན་བྱ། །བདག་གི་སྒྲུབ་ཐབས་རིམ་པ་འདི། །བློ་ཞན་དོན་དུ་བདག་

214a.2གིས་བརྩམས། །དེ་ཡི་དགེ་བ་གང་ཡིན་པས། །སེམས་ཅན་འཁོར་བ་ལས་གྲོལ་ཤོག །དཔལ་དགྱེས་པ་རྡོ་རྗེའི་སྒྲུབ་ཐབས། སློབ་དཔོན་ཆེན་པོ་བདེ་བའི་རྡོ་རྗེས་མཛད་པ་རྫོགས་སོ།། །།རྒྱ་གར་གྱི་མཁན་པོ་དྷརྨ་ཙནྡྲ་དང་། ལོ་ཙཱ་བ་དྷརྨ་ཙནྡྲས་རང་འགྱུར་དུ་བསྒྱུར་

214a.3ཞིང་ཞུས་ཏེ་གཏན་ལ་ཕབ་པའོ།། །།ཞལ་གཅིག་ཕྱག་གཉིས་པའི་སྒྲུབ་ཐབས་རྫོགས་སོ།།