རྡོ་རྗེ་རྣལ་འབྱོར་མའི་བདེ་བ་མཆོག་གི་སྡོམ་པ་འཇུག་པ་ངེས་པ་དོན་གྱི་དཀྱིལ་འཁོར་གྱི་སྒྲུབ་ཐབས་ཞེས་བྱ་བ

Sanskrit title (Tibetan script, as in the text) བཛྲ་ཡོ་གི་ནཱི་སུ་ཁ་ཏ་རེ་ཝ་སཾ་བ་ར་མཎྜལ་ནི་ར་མ་ཡ་སཱ་དྷ་ཀ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 24 · folio 44a

༄༅༅། །རྒྱ་གར་སྐད་དུ། བཛྲ་ཡོ་གི་ནཱི་སུ་ཁ་ཏ་རེ་ཝ་སཾ་བ་ར་མཎྜལ་ནི་ར་མ་ཡ་སཱ་དྷ་ཀ་ནཱ་མ། བོད་སྐད་དུ། རྡོ་རྗེ་རྣལ་འབྱོར་མའི་བདེ་བ་མཆོག་གི་སྡོམ་པ་འཇུག་པ་ངེས་པ་དོན་གྱི་དཀྱིལ་འཁོར་གྱི་སྒྲུབ་ཐབས་ཞེས་བྱ་བ། དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །

དང་པོར་དཔལ་འཁོར་ལོ་སྡོམ་པའི་དམ་ཚིག་དང་དབང་ཐོབ་པའི་རྣལ་འབྱོར་པས། བདག་དང་གཞན་གྱི་དོན་ཕུན་སུམ་ཚོགས་པ་ཐོབ་པར་འདོད་པས། རྣམ་པར་མི་རྟོག་པའི་རང་བཞིན་གྱིས་འོད་གསལ་བ་ལ་དམིགས་ཏེ། དུར་ཁྲོད་ཀྱི་གནས་སུ་རྡོ་རྗེ་རྣལ་འབྱོར་མ་

བསྒྲུབ་པར་བྱའོ། །དེ་ཡང་། སྐྱེ་ལྡན་འདོད་མཐོང་བླ་མ་མགོན་པོའི་ཞབས་ལ་བཏུད། །དེ་ཡི་བརྩེ་བས་རྡུལ་བྲལ་ཞབས་ཀྱི་པད་མོ་ལས། །བདུད་རྩི་ཀུན་འབྱུང་བདེ་རྙེད་པ་ནི་བུམ་པ་བཞིན། །རྟག་ཏུ་དྲན་པས་རྣལ་འབྱོར་མ་ནི་བདག་འགྱུར་ཤོག །དེ་ལ་སྔོན་དུ་རྡོ་རྗེ་

རྣལ་འབྱོར་མའི་འཁོར་ལོ་རབ་ཏུ་གནས་པ་བྱས་པའམ། དཀྱིལ་འཁོར་ལ་ཅི་འབྱོར་པས་མཆོད་དེ།མངོན་པར་རྟོགས་པ་རྟག་པར་བསྒྲུབས་ལ། ཕྱི་དང་ནང་གི་མཆོད་པ་དང་རྐང་པ་བརྒྱད་ཀྱིས་བསྟོད་ནས་དངོས་གྲུབ་ཀྱི་རྫས་བསྒྲུབས་ཏེ། རི་ལུ་ཁར་

Vol. 24 · folio 44b

བཅུག་ལ་བློ་བདེ་བས་གནས་པར་བྱའོ། །དེ་ནས་རྣལ་འབྱོར་པའི་བུམ་པ་ལྔ་སྦྱར་བའི་ཆུས་དག་པར་བྱ་སྟེ། གྲུབ་པའི་རྫས་ཀྱིས་གཡུང་དྲུང་འཁྱིལ་པ་བྲི་བར་བྱའོ། །དབུས་སུ་ནི་བཙུན་མོའི་བྷ་ག་ཧྲཱིཿདང་བཅས་པའོ། །དེ་ནས་ཕག་མོ་ལྔ་བསམས་ཏེ། ཆོ་

གའི་རིམ་པ་ཡོངས་སུ་བྱས་ནས་མེ་ཏོག་གི་ཕྲེང་བ་རྣམ་པ་ལྔ་ཡིས་མཆོད་དེ། དེ་ནས་དེ་ཉིད་ཀྱི་སྲད་བུ་ལ་བཏུ་བ་ཤེས་པས་སྔགས་བཟླས་པར་བྱའོ། །དེ་ནས་དམ་ཚིག་གི་རྫས་དང་། བཟང་པོ་གསུམ་གྱི་མ་དས་བཀང་ལ། ཕྱི་ནང་གི་མཆོད་པས་མཆོད་དེ། འཁྱིལ་

བ་ལ་བབ་པ་འདི་ནི་སྔོན་དུ་བསྙེན་པའི་ཆོ་གའོ། །དེ་ཡང་། གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །སངས་རྒྱས་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་བྱ་སྟེ། གསང་བ་ནི་འཁོར་ལོ་སྡོམ་

པའི་དམ་ཚིག་གོ། །མཆོག་ནི་སེམས་ཅན་གྱི་དོན་དང་བདག་གི་དོན་གྱི་དམ་ཚིག་གོ། །དགྱེས་པ་ནི་འཁོར་ལོ་མཆོད་པའི་དམ་ཚིག་གོ། །ཐམས་ཅད་ནི་རྣལ་འབྱོར་བཅུ་གསུམ་མོ། །བདག་ཉིད་ནི་རྟག་པ་བསྒྲུབ་པའོ། །རྟག་ཏུ་བཞུགས་པ་ནི་དེའི་རྣམ་དག་གོ། །

སངས་རྒྱས་ཀུན་ནི་རྣལ་འབྱོར་མ་ལྔའོ། །དངོས་ནི་དངོས་ཀྱི་སྦྱོར་བ་སྟེ། རྣལ་འབྱོར་གྱི་སྣོད་བྱིན་གྱིས་བརླབ་པའི་ཆོ་གའོ། །སེམས་དཔའ་ནི་རྣལ་འབྱོར་པ་ཡོངས་སུ་ཤེས་པའི་སྦྱོར་བའོ། །རྡོ་རྗེ་ནི་རྡོ་རྗེའི་མཆོག་སྟེ་བསྔགས་སོ། །སེམས་དཔའ་ནི་འགྲོ་འོང་གི་ཕྲེང་བའོ། །བདེ་

བའི་མཆོག་ནི་འཁྱིལ་པ་ལ་བབ་པའི་ཚོགས་སོ། །འདིས་ནི་བསྙེན་པ་ངེས་པའི་དོན་དུ་ཤེས་པར་བྱའོ། །དེ་ནས་དུར་ཁྲོད་ལ་སོགས་པ་དབེན་པའི་གནས་སུ། དམ་ཚིག་གི་ཁྱད་པར་བྱུགས་པའི་ནང་དུ། རྒྱུས་པ་མཆོག་སྒྲིལ་བའི་ཐིག །ཐལ་བ་མཆོག་དང་འོ་མས་སྦགས་ལ་གདབ་

པར་བྱའོ། །དེ་ནས་ཆ་བརྒྱད་པའི་དཀྱིལ་འཁོར་ལ། འབྱི་བ་བྱས་ནས་གཅིག་དང་ཆ་གཅིག་བཅོམ་ལྡན་འདས་མའི་གནས་སོ། །ཆ་དྲུག་དང་ཆ་གཅིག་ནི་མཁའ་འགྲོ་མ་ལ་སོགས་པའིའོ། །ཆ་གཅིག་ནི་གཤིན་རྗེ་འཇོམས་མ་ལ་སོགས་པའིའོ། །སྒོར་ནི་ཁྭ་གདོང་མ་ལ་སོགས་

Vol. 24 · folio 45a

པའིའོ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པ་དང་། །ཁ་ཁྱེར་དྲ་བ་ཕྱེད་པས་སྤྲས། །འགྲམ་རྒྱབ་རིན་ཆེན་ཕ་གུ་སྟེ། །ཀ་བ་བརྒྱད་སོགས་འཁོར་ཡུག་མཛེས། །སྲེག་བྱེད་རྡོ་རྗེའི་ནང་ལོགས་སུ། །དུར་ཁྲོད་བརྒྱད་ཀྱིས་བརྒྱན་པའོ། །

དེ་ཡང་ཤར་དང་བྱང་དང་ནུབ་དང་ལྷོ་ནི། སྔོ་བ་དང་ལྗང་བ་དང་དམར་བ་དང་སེར་བའོ། །དཀྱིལ་འཁོར་ཕྱོགས་དང་པོའི་མདོག་གོ། །དཀར་པོ་ནི་དུར་ཁྲོད་ཀྱི་རྐང་རྙིང་པའི་ཐལ་བས་བྱའོ། །ནག་པོ་ནི་རུས་པ་སྣུམ་ཅན་གྱི་ཐལ་བས་སོ། །དམར་པོ་ནི་བྷ་གར་སྐྱེས་པའི་གུར་ཀུམ་གྱིས་

སོ། །ལྗང་གུ་ནི་ནིམ་པའི་ལོ་མ་ཆུར་བཙོས་ཤིང་བསྐམས་པས་སོ། །སེར་པོ་ནི་ཙ་དུར་ས་མས་སོ། །གལ་ཏེ་བྲི་བར་མ་ནུས་ན། ཐིག་དབྱེ་བ་ལ་ཐིག་ལེ་དང་བཅས་པའམ། མེ་ཏོག་གི་ཚོམ་བུས་ཀྱང་བྱའོ། །བཅོམ་ལྡན་འདས་མའི་ནི་ཧྲཱིཿདྨར་པོ་གཟི་བརྗིད་དང་ལྡན་པ་ལ་འཁྱིལ་པ་

དྲུག་གིས་བསྐོར་བའི་མཚན་མ་མེ་དང་པདྨ་དང་རོ་དང་ཉི་མ་དང་ཟླ་བའི་སྟེང་དུའོ། །གཞན་ནི་འཁྱིལ་པར་རོ། །སྐུ་མདོག་ཕྱོགས་དང་མཐུན་པར་རོ། །ཕྱོགས་མ་ནི་གཡོན་དུ་བསྐོར་བའོ། །མཚམས་མ་ནི་གཡས་སུ་བསྐོར་བ་སྟེ། ཕྱོགས་གཉིས་པའི་གཟུགས་ཅན་ནོ། །

བྲི་བར་ནི་སློབ་དཔོན་བདག་ཉིད་ཁོ་ནས་བྱ་སྟེ། དམ་ཚིག་དང་ལྡན་པའི་ཤེས་རབ་དང་བུས་ཀྱང་རུང་ངོ་། །སྦྱོར་བ་འདི་དག་ཐམས་ཅད་ལ་མི་རྟོག་པའི་གོ་ཆ་བགོ་བར་བྱ་སྟེ། འདི་ནི་རང་འབྱུང་བཅོམ་ལྡན་འདས། །གཅིག་པུ་ཁོ་ན་ལྷག་པའི་ལྷ། །ཞེས་བྱ་བས་བསྟན་ཏོ། །འདི་ནི་

ཞེས་བྱ་བ་ནི་བྷ་གའི་དཀྱིལ་འཁོར་རོ། །རང་འབྱུང་ནི་རྡོ་རྗེ་རྣལ་འབྱོར་མའི་བདེ་བ་མཆོག་གི་སྡོམ་པ་སྟེ། དེ་ཉིད་རོ་གཅིག་པའི་སྣང་བའོ། །ཅི་ཞེ་ན། བཅོམ་ལྡན་འདས་ཏེ། མྱ་ངན་ལས་འདས་པའི་གྲོང་ཁྱེར་གྱི་བདག་པོ། ལོངས་སྤྱོད་རྫོགས་པའི་འཁོར་ལོ། གཅིག་པུ་ནི་སེམས་

ཏེ། ཁོ་ནས་ནི་ལྷག་པ་མེད་པར་སྟོན་ཏོ། །དེ་ཉིད་ཀྱི་སྣང་བ་རྡོ་རྗེ་རྣལ་འབྱོར་མ་ནི་ལྷག་པའི་ལྷའོ། །དེ་དག་གིས་ནི་བྲི་བའི་སྦྱོར་བ་མི་རྟོག་པའི་གོ་ཆ་དང་བཅས་པ་སྟོན་ཏོ། །དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་སྲུང་བ་ནི། མཚན་མའི་བདུད་ཐམས་ཅད་གཅོད་པའི་ཕྱིར། དཀྱིལ་འཁོར་གྱི་

Vol. 24 · folio 45b

མཚན་མའི་ནུས་པ་བསྐྱེད་པར་མི་ནུས་སོ་ཞེ་ན། སློབ་དཔོན་མཚན་ཉིད་བཟང་དང་ལྡན། །ཡང་དག་ཡེ་ཤེས་དེ་ཉིད་ཤེས། །ཞེས་པའི་ཕྱིར་ཚོགས་གཉིས་ཀྱི་འབྲས་བུར་འགྱུར་རོ། །དེ་ནས་སྦྱོར་བ་བཞི་དང་དག་པ་སྔོན་དུ་འགྲོ་བས། བསང་ཞིང་བསྲུང་ལ། གནས་དྲུག་བྱིན་གྱིས་

བརླབས་ཏེ། ས་བོན་གྱི་འཁོར་ལོ་སྤྱན་དྲངས་ཏེ། ཚོགས་བསག་པར་བྱའོ། །དེ་ནས་དག་པ་གསུམ་གྱི་སྔགས་ཀྱིས་སྦྱངས་ལ། སྟོང་པའི་བར་དོའི་རྒྱུན་གྱི་ཤེས་པ་སྒྱུ་མ་ལྟ་བུའི་ཏིང་ངེ་འཛིན་སྲུང་བའི་འཁོར་ལོ་བྷ་གར་འབྱུང་བ་བཞི་ཡོངས་སུ་གྱུར་པ་ལས། སྔར་བཤད་པའི་

དཀྱིལ་འཁོར་ལྟ་བུ་དུར་ཁྲོད་བརྒྱད་ཀྱིས་མཛེས་པའི་དཀྱིལ་འཁོར་དུ་བྱང་ཆུབ་པ་ལྔ་ལས་གྱུར་པའི་རྡོ་རྗེ་འཆང་མ་ཡེ་ཤེས་ཀྱི་བདུད་རྩི་ཞུ་བས། མེ་འབར་བ་རོ་དང་པདྨ་དང་ཉི་ཟླ་མནན་པའི་སྟེང་དུ། ཧྲིཿ་དམར་པོའི་འོད་ཟེར་བྱིན་བརླབ་ས་བསྡུས་པ་དང་། དྲོད་བསྡུ་བ་བྱས་ཏེ། མཚན་

གཉིས་ཡོངས་སུ་གྱུར་པ་ལས་བཞེངས་པའི་སྐུ་ལང་ཚོ་ལ་བབ་པ་ཕུན་སུམ་ཚོགས་པའི་གཟུགས་ཅན་སྐྱིལ་ཀྲུང་ཕྱེད་པའི་གར་གྱིས་གནས་པ་བདེན་པ་གཉིས་ཀྱི་ཞལ་ཅན། སྣ་ཚོགས་རྡོ་རྗེ་དང་སངས་རྒྱས་ལྔ་ཡིས་མཛེས་པ། རྡོ་རྗེ་དང་ཟངས་གྲི་དང་། དྲིལ་བུ་དང་པདྨ་འཛིན་པ་གཅེར་

བུ་སྐྲ་གྲོལ་ཞིང་ཕྱག་རྒྱ་ལྔ་ཡིས་མཛེས་པ། སྒེག་པའི་ཉམས་ཁ་ཊྭཱཾ་ག་དང་ལྡན་པ། ཁྲག་འཛག་པའི་ཕྲེང་བ་དང་། བདེ་བའི་རོས་རྒྱས་པས་བཞུགས་པའོ། །དེ་ལ་སྔོན་གྱི་བཅོམ་ལྡན་འདས་མའི་བྱིན་གྱིས་བརླབས་པ་དང་། གསུམ་བྱིན་གྱིས་བརླབས་པ་དང་། དྲུག་གི་གོ་ཆ་དགོད་

པ་དང་། དབང་བླང་བ་དང་། གསང་བའི་མཆོད་པ་དང་། བསྟོད་པ་དང་། བརྟན་པར་བྱས་ནས་ཕྱོགས་མ་དང་མཚམས་མ་སྐད་ཅིག་གིས་སྤྲུལ་པའི་ཚོགས་ཀྱིས་བཀོད་དེ། གོང་ལྟར་བསྒྲུབ་པར་བྱའོ། །དེ་ནས་བདུད་རྩི་མྱང་བར་བྱས་ནས། ཇི་སྙེད་པའི་སྔགས་ཀྱིས་བུམ་པ་བསྒྲུབ་པར་རོ། །

དེ་ནས་གྲུབ་པའི་རྫས་ཀྱི་སྦྱོར་བ་ཕྱིའི་མཆོད་པ་ལྔ་དང་། ཆང་དང་ལག་པ་དང་མད་དང་། སིནྡྷུ་རའི་མཆོད་པས་དམིགས་པར་བྱའོ། །དེ་ནས་ངེས་པའི་འཇུག་པས་བདག་ཉིད་ཞུགས་ལ་མཆོག་གི་མཚན་ཉིད་ཅན་གྱི་སློབ་མ་གསང་བའི་ཁང་པར་བཅུག་སྟེ། མེ་ཏོག་ལྡན་ཞིང་གཅེར་བུར་གནས་

Vol. 24 · folio 46a

པའི་ཆ་བྱད་ཀྱིས། བླ་མའི་ཞབས་ལ་འཇུས་ལ་འདི་སྐད་ཅེས་བརྗོད་དོ། །བླ་མ་རྡོ་རྗེ་འཆང་སྐུ་གསུང་ཐུགས་ཀྱི་འཁོར་ལོ། །བདེ་བ་མཆོག་གི་སྡོམ་པ་དང་ལྡན་པས། བཅོམ་ལྡན་འདས་མ་རྡོ་རྗེ་རྣལ་འབྱོར་མ་ཐམས་ཅད་ཀྱི་འཇུག་པ་སྩལ་དུ་གསོལ། བདག་བྱིན་གྱིས་

བརླབ་ཏུ་གསོལ། བདེ་བ་ཆེན་པོའི་ཡེ་ཤེས་མཛད་དུ་གསོལ་ཞེས་སོ། །དེ་ནས་ལུས་བརྐྱང་པའི་སྤྱི་བོའི་གཙུག་ཞབས་ཀྱི་པད་མོ་ལ་བཏུད་པའི། ཞབས་གཡས་པའི་མཐེ་བོང་འོད་ཟེར་གྱི་རྒྱུན་གྱིས། བདེ་བའི་ཡེ་ཤེས་འཁོར་ལོའི་གནས་ཁྱབ་པར་བསྒོམ་པས། བྱིན་གྱི་རླབས་ཀྱིས་

རླུང་འཁྲུག་ཅིང་བྱིན་གྱིས་རློབ་པར་འགྱུར་རོ། །དེ་བས་ན། རྣལ་འབྱོར་པ་ཉིད་བསོད་ནམས་མཆོག །དག་བྱེད་སྡིག་པ་འཇིག་བྱེད་པ། །གསང་སྔགས་ཀྱི་ནི་བཟླས་བརྗོད་དང་། །བསམ་གཏན་གྱིས་ནི་འགྲུབ་པར་འགྱུར། །ཞེས་པའི་དོན་ཏེ། རྣལ་འབྱོར་ནི་ཟུང་དུ་འཇུག་པའོ། །པ་ནི་ལྡན་

པའི་དོན་ཏེ། ཉིད་ནི་དཀྱིལ་འཁོར་ཉིད་སྦྱོར་བའོ། །བསོད་ནམས་མཆོག་ནི་གྲུབ་པ་རྫས་ཀྱི་མཆོད་པའོ། །དག་བྱེད་ནི་བདག་ཉིད་ངེས་པར་འཇུག་པའོ། །སྡིག་པ་ནི་སློབ་མའི་བག་ཆགས་ཏེ། འདིར་ཞུགས་པས་འཇིག་པའོ། །གསང་སྔགས་ནི་རྣལ་འབྱོར་མ་ཐམས་ཅད་དེ།

ཀྱི་ནི་གྲུབ་པའི་སྔགས་སོ། །བཟླས་བརྗོད་ནི་བསྙེན་པ་དང་འཕོ་བའོ། །དེ་གཅིག་པུས་སམ་ཞེ་ན་མ་ཡིན་ཏེ། བསམ་གཏན་གྱིས་སོ། །དེ་ཁོ་ནས་ཀྱང་མ་ཡིན་ཏེ། ཀྱང་ཞེས་པས་སྔགས་དང་ལྡན་པས་འགྲུབ་པར་འགྱུར་རོ། །དེ་ནས་བྷ་ག་སར་པ་མེ་ཏོག་གཅལ་བཀྲམ་པའི་སྟེང་དུ་

སློབ་མ་བཞག་སྟེ། དཀྱིལ་འཁོར་ཏིང་ངེ་འཛིན་གྱིས་བལྟས་ནས། ཇི་སྙེད་པའི་མཆོད་པ་བྱའོ། །གལ་ཏེ་དངོས་གྲུབ་མཆོག་འདོད་ན། །སྤོས་དང་དྲི་ལ་སོགས་པ་དང་། །མར་མེ་བརྒྱ་ཡང་དབུལ་བར་བྱ། །ཞེས་བྱ་བ་དང་། དབུགས་འབྱིན་པར་ནི་མཆོག་དག་དང་། །དྲི་ཡི་ཆུ་

དང་བཅས་པས་ཀྱང་། །རྟག་ཏུ་དུས་ཀྱི་ཁྱད་པར་གྱིས། །རིགས་ལྡན་རྣམས་ནི་མཆོད་པར་བྱ། །དེ་ནས་སིནྡྷུ་རའི་འཁོར་ལོ་སློབ་མ་ལ་བློས་བཅུག་སྟེ། བ་སྤུའི་བུ་གར་དེ་བཞིན་གཤེགས་པ་ཐམས་ཅད་བསྡུ་བར་བྱ་སྟེ། བཟང་པོ་གསུམ་གྱི་ཁུ་བས་བྱིན་གྱིས་བརླབས་པ་འཐུངས་པ་དང་།

Vol. 24 · folio 46b

ཅོད་པན་གྱི་ཐིག་ལེ་བླ་མས་བྱིན་གྱིས་བརླབ་པའི་སྦྱོར་བ་དང་། དམ་ཚིག་སྙིང་པོ་ནས་སྙིང་པོར་བཅུག་པ་དང་། སྒྲ་དང་བཅས་པའི་རོལ་མོའི་ཆེད་དུ་བརྗོད་པས་ཆོས་ཐམས་ཅད་ལ་སྒྲ་བརྙན་ལྟ་བུར་ཡིད་འཇུག་པ་དང་། རྡོ་རྗེ་རྣལ་འབྱོར་མས་ནི་ནམ་མཁའ་དང་མཉམ་པར་ཁྱབ་

སྟེ། དེ་ལྟར་ཡིད་ལ་བྱོས་ཤིག །བཛྲ་བཱ་རཱ་ཧཱིའི་རྟོག་པ་ཐམས་ཅད་དང་བྲལ་བར་ཁྱོད་ཀྱི་སྙིང་ལ་ཞུགས་སོ། །ཞེས་པ་དང་། ཀྱེ་རྡོ་རྗེ་རྣལ་འབྱོར་མའི་འཁོར་ལོ་འདིར་བྲག་ཅ་ལྟ་བུའི་གསུང་གིས་འགྲོ་བ་ཐམས་ཅད་ཐུགས་བསྐྱེད་ཅིང་། སྐལ་བ་བཟང་པོ་དང་ལྡན་པ་ཉེ་བར་

ཟུངས་ཤིག །རྡོ་རྗེ་རྣལ་འབྱོར་སྒྱུ་མའི་གཟུགས་ནི། འདོད་པའི་ཡོན་ཏན་ལྔས་མཆོད་ན་གྲུབ་པའི་རྒྱུར་འགྱུར་རོ་ཞེས་པ་དང་གནས་ལྔ་དང་། ཡན་ལག་གི་རྩ་བ་བཞི་པ་དང་། ལོ་མ་བཞིར་ནི་ཐིག་ལེ་བཅས་ཏེ། རྟེན་དུ་བྱིན་གྱིས་བརླབས་པ་དང་། ཐམས་ཅད་ཀྱི་མཐའ་ལ་ཧོཿ་

དང་ཧཱུཾ་དང་ཕཊ་ཀྱིས་མཛེས་པས་མཆོད་པ་དང་། བསྟོད་པ་དང་། བསྡུ་བ་བྱ་བ་དང་། དག་པ་རྣམ་གསུམ་བརྗོད་པ་དང་། རྡོ་རྗེ་རྣལ་འབྱོར་མའི་དཀྱིལ་འཁོར་དུས་ཀྱི་ཁྱད་པར་ལ་མཆོད་ཅིག་ཅེས་པ་དང་། དམ་ཚིག་གི་བསྔགས་པ་བརྗོད་ལ་བརྟན་པ་དང་། ཀྱེ་རྡོ་རྗེ་ཁྱོད་ཉིད་

ནི་རྡོ་རྗེ་རྣལ་འབྱོར་མའི་འཁོར་ལོ་སྟེ། བདེ་བ་ཆེན་པོའི་སེམས་ཀྱིས་རིགས་ཐམས་ཅད་ལ་ཀུན་ཏུ་སྤྱོད་ཅིག་ཅེས་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་བཙུན་མོའི་བྷ་ག་ལ་བཞུགས་པ་ནི་རྡོ་རྗེ་ཁྱོད་ཉིད་དོ། །འཁོར་བ་དང་མྱ་ངན་ལས་འདས་པ་གཉིས་

ཀྱིས་ཤིགས་པ་མེད་པའི་ཡེ་ཤེས་བརྟུལ་ཞུགས་ཀྱི་དམ་ཚིག་གིས་མཆོད་ཅིག་ཅེས་པ་དང་། འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་མི་བྱའོ། །ཞེས་བྱ་བས་ཚོགས་ཐམས་ཅད་ཀྱི་རོལ་པ་ལ་

འཇུག་པར་བྱ་བ་དང་། ཀྱེ་རྡོ་རྗེས་དང་ཆུ་དང་མེ་དང་རླུང་དང་ནམ་མཁའི་རང་བཞིན་དུ་གྱུར་པ་དང་། སངས་རྒྱས་དང་བྱང་ཆུབ་སེམས་དཔའ་དང་། རྡོ་རྗེ་རྣལ་འབྱོར་མ་ཐམས་ཅད་དང་། ངས་ཀྱང་ལུང་བསྟན་ཏོ། །བུ་རྡོ་རྗེ་ཡེ་ཤེས་ཀྱི་དབང་ཐོབ་ཁྱོད་ཀྱི་དྲུང་དུ་མཆོག་ཏུ་གྱུར་པ་རྣམས་ལྷགས་ནས་བ་སྤུའི་

Vol. 24 · folio 47a

བུ་ག་རེ་རེ་ཞིང་སངས་རྒྱས་གྲངས་མེད་པ་བཞུགས་ནས། དེ་ཉིད་ནས་བྱུང་སྟེ། སེམས་ཅན་ཐམས་ཅད་ཀྱི་དོན་མཛད་པ་ཡིན་ནོ། །རྡོ་རྗེ་རྣལ་འབྱོར་མ་ཉིད་ཀྱི། །གསང་བ་མཆོག་གི་དཀྱིལ་འཁོར་འདི། །མཐོང་བ་དང་ནི་རེག་པ་དང་། །ཐོས་པ་དང་ནི་དྲན་པས་ཀྱང་། །སྡིག་པ་ཀུན་

ལས་གྲོལ་བར་འགྱུར། །དེ་ལྟར་འདི་ལ་ཐེ་ཚོམ་མེད། །སྦྱོར་བ་ཕུན་སུམ་ཚོགས་པ་དེ་ལྟ་བུས་ནི། ངེས་པའི་དོན་གྱི་འཇུག་པའི་རིམ་པ་ཡོངས་སུ་རྫོགས་པར་འགྱུར་རོ། །དེས་ནི་དེའི་རབ་ཏུ་འབྱེད་པ་བཤད་པར་བྱ་སྟེ། དེ་ཡང་། འབྱུང་གནས་སྒྲ་ཚུལ་ངེས་འབྱུང་རྣམས། །དམ་ཚིག་སྤྱོད་པའི་སྤྱོད་ཡུལ་

མིན། །ཐོག་མ་དབུས་མཐར་ཡང་དག་གནས། །འཇིག་རྟེན་གསུམ་དུ་རྙེད་དཀའ་བས། །ཞེས་པས་བསྟན་དེ་འབྱུང་གནས་ནི། །བྷ་ག་སར་བར་མེ་ཏོག་གིས་གཅལ་བཀྲམ་པའོ། །སྒྲའི་ཚུལ་ནི་སྒྲ་བརྙན་ཏེ། དེ་ལྟ་བུའི་མཆོད་པའི་ཚོགས་ཀྱིས་རབ་ཏུ་མཆོད་པའོ། །ངེས་པ་ནི་ནིར་ན་སྟེ་མི་སླུ་བའི་

འཁོར་ལོའོ། །ཆུ་བྱིན་གྱིས་བརླབས་པའི་ཁུ་བས་རྣམ་པར་རྟོག་པ་འཁྲུ་བ་དང་། དབང་ཆེན་བླ་མའི་སྦྱོར་བའི་ཅོད་པན་དང་། མེའི་སྙིང་པོར་བཅུག་པའི་དབྱེར་མི་ཕྱེད་པ་བརྡ་དང་། རླུང་ཡུལ་རྣམས་ལ་འཇུག་པའི་སྒྲ་བརྙན་དང་། ནམ་མཁའ་བཛྲ་བཱ་རཱ་ཧཱི་ཁྱོད་ལ་བཞུགས་པས་ཁྱོད་ཉིད་ཅེས་བྱ་

བའི་མིང་ངོ་། །དམ་ཚིག་ནི་གཞན་གྱི་དོན་གཙོ་བོར་གྱུར་པ་སྟེ། རྡོ་རྗེ་སློབ་དཔོན་ནོ། །སྤྱོད་པ་ནི་སྐུ་གསུང་ཐུགས་ཀྱི་དམ་ཚིག་སྟེ། དེ་ཡང་ངེས་པ་དོན་གྱི་རིགས་དབང་སྔོན་དུ་སོང་བའི་སྤྱོད་ཡུལ་ཡིན་པའོ། །ཐོག་མ་ནི་སློབ་དཔོན་གྱི་ལས་ཏེ། དེ་ཡང་འཇུག་པའི་དང་། བསྟེན་པའི་དང་། རྣལ་འབྱོར་

གྱི་དང་། ལས་ཀྱི་དང་། ཟས་མཆོག་གི་ཐོག་མ་ཡིན་པས་སོ། །དབུས་ནི་རྗེས་སུ་སྲུང་བ་སྟེ། སྙིང་པོ་ལ་སྤྱོད་པས་སོ། །མཐའ་ནི་བརྟུལ་ཞུགས་ཏེ་ལས་དང་བསགས་པ་མཐར་བྱེད་ཅིང་མངོན་པར་འདུ་མ་བྱས་པའི་མཚན་ཉིད་དོ། །ཡང་དག་ནི་བདེ་བ་ཆེན་པོ་མདོག་འགྱུར་བའི་འདོད་པའི་ཡོན་ཏན་ལྔ་སྟེ།

དེ་གཉུག་མའི་སེམས་གནས་པར་བྱེད་དོ། །འཇིག་རྟེན་གསུམ་ནི་འདོད་པ་ལ་སོགས་པ་སྟེ། དུ་ཞེས་པ་དེ་དག་ཐམས་ཅད་ཀྱི་རང་བཞིན་དུ་ལུང་བསྟན་པའོ། །རྙེད་པར་དཀའ་བ་སྟེ། དེ་ཐོབ་པའི་ཕན་ཡོན་ནི་དབུགས་དབྱུང་བ་དང་གཟེངས་བསྟོད་པའོ། །དེ་ལྟར་རིམ་པ་ཐམས་ཅད་ལ་མཆོད་པས་

Vol. 24 · folio 47b

མཉེས་པར་བྱ་སྟེ། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞྞ་ནཱི་ཡེ་བཛྲ་བཻ་རོ་ཙ་ནི་ཡེ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། མཁའ་འགྲོ་མ་ལ་སོགས་པ་ནི་རང་རང་གི་མིང་བརྗོད་པའི་མཐར་ཡི་གེ་གསུམ་གྱིས་སྤེལ་བའོ། །དེའི་རྗེས་ལ་རྐང་པ་བརྒྱད་པའི་སྔགས་ཀྱིས་བསྟོད་པ་དང་། དེའི་མཐུ་བརྟན་པར་

བྱེད་པས་ཀྱང་ངོ་། །དེ་ཡང་། འཁོར་ལོ་ཀུན་ནི་སྔགས་པ་ཡིན་ཏེ།། སྔགས་ཀྱི་ལས་ཀུན་བྱེད་པས་ན། །མཆོད་དང་བསྟོད་དང་བསྒྲུབ་པ་ཡང་། །སྔགས་ཉིད་ཀྱིས་ནི་དབྱེ་བར་འགྱུར། །ཞེས་པས་ཤེས་པར་བྱའོ། །དེ་ལས་གཞན་པའི་སྦྱོར་བ་བརྗོད་པ་ནི། །དཔལ་དང་ལྡན་པའི་

བཅོམ་ལྡན་འདས་མ་ཁྱོད། །མཁའ་མཉམ་བདེ་རོལ་འགྲོ་བ་ཀུན་བདག་མོ། །ལོངས་སྤྱོད་སྒྱུ་མའི་གཟུགས་དང་ཆགས་པའི་མདངས། །མཁའ་འགྲོ་དྲ་བའི་སྡོམ་ལ་ཕྱག་འཚལ་ལོ། །རྣམ་དག་མི་གཡོ་བསྐྱོད་མེད་ཆོས་ཀྱི་དབྱིངས། །ལྷན་ཅིག་སྐྱེས་པའི་བདེན་པ་སྟོན་པའི་ཞལ། །

རྒྱུ་མེད་རྡོ་རྗེ་སྤྲུལ་པའི་གཟུགས་འཛིན་མ། །བཛྲ་བཱ་རཱ་ཧཱི་ཞབས་རྡུལ་ལ་འདུད། །རྒྱལ་བའི་བདག་མོ་ལྔ་ཡི་ཕྱག་རྒྱ་ཅན། །རྣམ་དག་སྐུ་ལ་མི་བསྐྱོད་རྟགས་ཀྱིས་མཛེས། །རིགས་དྲུག་འཁོར་ལོས་སྒྱུར་བའི་གོ་ཆར་ལྡན། །འཁོར་ལོ་ཀུན་གྱི་ཡུམ་ལ་ཕྱག་འཚལ་ལོ། །ཁྱོད་ཉིད་

རྣམ་དག་ཕུང་པོ་ལྔ་སྟོན་ཅིང་། །འབྱུང་བ་རྣམ་དག་ཚངས་པའི་གནས་བཞིར་གནས། །བདུད་མཐར་མཛད་པས་སྤྲུལ་པའི་ཞབས་འཆང་མ། །འཁོར་ལོ་སྡོམ་པའི་ཞབས་ལ་རྟག་ཏུ་འདུད། །ཐོག་མ་ནས་བསགས་བག་ཆགས་སྡིག་པའི་མཐུས། །རྣམ་སྨིན་གསར་དུ་བསྐྱོད་ཅིང་

བརྟས་གྱུར་པའི། །སྡིག་དང་ཉོན་མོངས་ཇི་སྙེད་མཆིས་པ་རྣམས། །བཅོམ་ལྡན་འདས་མའི་འཁོར་ལོ་ཁྱེད་ལ་བཤགས། །འདས་དང་མ་འོངས་ད་ལྟར་དུས་རྣམས་ལ། །ཉན་ཐོས་རང་རྒྱལ་བྱང་ཆུབ་སེམས་དཔའ་དང་། །འབྲས་བུ་རྒྱུད་བཞི་འཁོར་ལོ་སྡོམ་པ་ཡི། །དགེ་འདུན་

ཀུན་ལ་བདག་ནི་རྗེས་ཡི་རང་། །ཁྱོད་ནི་འདས་དང་མ་འོངས་ཐམས་ཅད་དུ། །མི་འགྱུར་ནམ་མཁའ་ལྟ་བུར་བཞུགས་ན་ཡང་། །དོགས་པའི་ས་ལས་སེམས་ཅན་བསྒྲལ་བའི་ཕྱིར། །མྱ་ངན་མི་འདའ་བརྩེ་བས་བཞུགས་སུ་གསོལ། །འཁོར་བ་ཇི་སྲིད་བར་དུ་བཞུགས་ནས་

Vol. 24 · folio 48a

ཀྱང་། །སེམས་ཅན་དམན་དང་བར་མ་མཆོག་རྣམས་ལ། །ཐུགས་རྗེས་ཆགས་པའི་སྤྱན་གྱིས་གཟིགས་ནས་ཀྱང་། །བདེ་བ་མཆོག་གི་འཁོར་ལོ་བཤད་དུ་གསོལ། །རྣམ་པར་རྟོག་པ་ཀུན་ལས་འདས་པ་ཡི། །བདེ་ཆེན་འཁོར་ལོ་ཟག་པ་མེད་པའི་དབྱིངས། །ཨཱ་

ལི་ཀཱ་ལི་སྙོམས་འཇུག་རྟོག་མེད་མ། །བསྔགས་པའི་ཆོས་རྣམས་ཐམས་ཅད་བསྔོ་བར་བགྱི། །ཞིང་དང་ཉེ་བའི་ཞིང་སོགས་བཅུ་གཉིས་སུ། །དམ་ཚིག་བརྡ་དང་བདེ་སྤྱོད་རོལ་པ་ཡིས། །བུ་བཞིན་དགོངས་པས་བདག་སྒྲིབ་དག་འགྱུར་ཏེ། །བདེ་བ་མཆོག་གི་ས་ལ་གནས་པར་

ཤོག། །བླ་མའི་ཞབས་ལ་རྟག་ཏུ་འདུད་བྱེད་ཅིང་། །རྡོ་རྗེ་རྣལ་འབྱོར་མ་ནི་དྲན་འགྱུར་ནས། །བཙུན་མོའི་ཤུ་ཀྲའི་ཚོགས་ལ་བདག་སྤྱོད་ཅིང་། །ཞབས་ཀྱི་པདྨོ་མཆོད་ཅིང་མཆོད་བྱེད་ཤོག །དཔའ་མོ་བཅོམ་ལྡན་འདས་མ་ཉི་ཤུ་བཞི། །ཞལ་མཐོང་དེ་ཡི་ངོ་བོར་

བདག་གྱུར་ཏེ། །འགྲོ་བ་བདེ་བས་ཕོངས་པ་ཐམས་ཅད་ལ། །ཉེར་འཚོ་རིན་ཆེན་ལྟ་བུར་བདག་གྱུར་ཅིག །དེ་ལྟར་རྣལ་འབྱོར་མའི་འཁོར་ལོའི་ངེས་པར་སྦྱོང་བ་ལ་ནི་ཞུགས་ན་ནི། བཅོམ་ལྡན་འདས་མ་འཁོར་ལོ་སྡོམ་པའི་དངོས་གྲུབ་མྱུར་དུ་ཐོབ་པར་འགྱུར་རོ། །དེས་ནི་སློབ་དཔོན་རབ་

མཉམ་གཞག །རབ་ཏུ་འདུད་པ་བྱས་ནས་ནི། །གཡོན་ནས་བརྩམས་པའི་རིམ་པ་འདིས། །དེ་ནས་བསྐོར་བ་རབ་ཏུ་བྱ། །དཀྱིལ་འཁོར་དང་ནི་བླ་མ་ལ། །ཇི་བཞིན་ཆོ་གས་ཕྱག་བྱའོ། །དེ་ནས་བླ་མ་དག་ལ་ཡོན། །དེ་བཞིན་གཤེགས་པས་གསུངས་པ་དབུལ། །གསེར་ནི་བརྒྱ་སྟོང་

དབུལ་བ་དང་། །རིན་ཆེན་རྣམ་པ་སྣ་ཚོགས་དང་། །རས་ནི་ཟུང་འགྱུར་བརྒྱ་ཉིད་དང་། །གླང་པོ་རྟ་དང་ཡུལ་འཁོར་རམ། །རྣ་རྒྱན་དང་ནི་གདུ་བུ་དང་། །མགུལ་གདུབ་སོར་གདུབ་དམ་པ་དང་། །གསེར་ལས་བྱས་པ་མཆོད་ཕྱིར་ཐོགས། །ཆུང་མ་བཟང་དང་བུ་མོ་ཉིད། །བྲན་ཕོ་བྲན་མོ་སྲིང་མོ་

དང་། །དེང་ནས་བརྩམས་ཏེ་བྲན་དུ་ནི། །ཁྱོད་ལ་བདག་ནི་འབུལ་ལགས་ཤེས། །བློ་ལྡན་ཀུན་ནས་དང་བ་ཡིས། །བདག་ཉིད་ཀྱང་ནི་དབུལ་བར་བྱ། །དེ་ལྟར་ངེས་པར་བྱ་བ་ནི། །སྒྲུབ་པ་པོ་ཡིས་རབ་ངེས་བྱ། །དེ་ནས་དེ་ལ་མཁའ་འགྲོ་མས། །རྣལ་འབྱོར་མ་རྣམས་མཉེས་པར་འགྱུར། །

Vol. 24 · folio 48b

མཁའ་འགྲོ་མ་དང་ལཱ་མ་དང་། །ཁཎྜ་ར་ཧེ་གཟུགས་ཅན་མ། །སྒྲུབ་པོ་མཁའ་འགྲོ་མ་ལྷན་ཅིག །དེ་དང་རྣམ་སྤྱོད་འགྲོ་བ་ཀུན། །སྒྲུབ་པ་པོ་ནི་དེ་དག་གིས། །ཅི་བདེ་བྱེད་པར་ཐེ་ཚོམ་མེད། །རྣལ་འབྱོར་དེ་ནི་གྲུབ་གྱུར་ན། །འཇིག་རྟེན་གསུམ་དུ་མི་བཟློགས་ཤིང་། །མི་སྣང་ཕུག་དང་ནམ་

མཁར་རྒྱུ། །རྐང་མགྱོགས་དེ་བཞིན་བཅུད་ཀྱིས་ལེན། །སྒྲུབ་པ་པོ་ནི་འདོད་ཙམ་གྱིས། །རྟག་པར་རྒྱུན་དུ་སྐྱེད་པར་འགྱུར། །གཟུགས་ནི་དུ་མ་བྱེད་པ་དང་། །ནམ་མཁའ་ལ་ནི་འགྲོ་བར་འགྱུར། །མཁའ་འགྲོ་རྣམས་ཀྱང་ཁྱད་པར་དུ། །དེས་གནོན་འགྲོ་བ་ཐམས་ཅད་ཀྱང་། །ལྷན་ཅིག་

བལྟས་པའི་སྦྱོར་བ་ཡིས། །སྐད་ཅིག་གིས་ནི་སྦྱོར་ཉིད་བསྐྱེད། །སྔགས་པ་དཀྱིལ་འཁོར་མ་མཐོང་བར། །གང་ཞིག་རྣལ་འབྱོར་པ་ཉིད་འདོད། །མཁའ་ལ་ཁུ་ཚུར་གྱིས་བརྡེག་དང་། །སྨིག་རྒྱུའི་ཆུ་ནི་འཐུང་དང་མཚུངས། །རྣལ་འབྱོར་འདི་ནི་མཆོག་རབ་དང་། །སྦྱོར་བ་ཀུན་གྱི་དམ་

པ་ཡིན། །གང་ཞིག་རྟག་ཏུ་འདོད་འགྱུར་བ། །འདིས་ནི་ལྷ་མིན་ཟིལ་གནོན་འགྲོ། །དཀྱིལ་འཁོར་འདི་ནི་དབང་བསྐུར་བ། །རྒྱུད་རྣམས་ཀུན་གྱི་སྒྲུབ་པར་གསུངས། །དགོད་པ་བལྟ་དང་ལག་བཅངས་དང་། །གཉིས་གཉིས་འཁྱུད་པ་ལ་སོགས་དག །རྒྱུད་རྣམས་ཀུན་གྱི་དམ་པ་ཡིན། །

དེ་ལ་དབང་བསྐུར་བྱས་པ་ཡིན། །ཞེས་རྒྱུད་དང་མཐུན་པའི་བསྙེན་བཀུར་བྱའོ། །ཇི་ལྟར་ངེས་པའི་དོན་དེ་ལྟར་བྱིན་གྱིས་བརླབས་པ་དང་ལྡན་པ་ནི་ཞེས་པ་བསྟན་པར་བྱའོ། རྡོ་རྗེ་རྣལ་འབྱོར་མའི་བདེ་བ་མཆོག་གི་སྡོམ་པ། འཇུག་པ་ངེས་པ་དོན་གྱི་དཀྱིལ་འཁོར་ཞེས་བྱ་བ་རྫོགས་སོ།། །།

རྒྱ་གར་གྱི་མཁན་པོ་ཨ་བ་དྷཱུ་ཏཱི་པ་དཔལ་གཉིས་མེད་རྡོ་རྗེས་མཛད་པའོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ། །

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words