No title in the text — opening words: སྒྱུ་འཕྲུལ་ཆེན་མོའི་སྒྲུབ་ཐབས་བཞུགས

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 25 · folio 312b

༄། །སྒྱུ་འཕྲུལ་ཆེན་མོའི་སྒྲུབ་ཐབས་བཞུགས། ༄༅༅། །རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །དང་པོར་སྔགས་པ་བདག་ཉིད་ཀྱི། །ཞལ་གདོང་དག་པར་བྱས་པས་ན། །དེ་ནི་འཇིག་རྟེན་པ་ཡི་ལུགས། །དོན་དམ་རྣལ་འབྱོར་འདི་ལྟ་སྟེ། །སྙིང་

གར་ཟླ་བའི་དཀྱིལ་འཁོར་ལ། །ནག་པོ་ཧཱུྃ་ནི་བསམ་པར་བྱ། །འོད་ཟེར་རྣམ་ལྔས་ཁྱབ་པར་སྤྲོས། །འཇིག་རྟེན་ཁམས་ནི་གསལ་བྱས་ནས། །སླར་འདུས་ཞལ་ནི་དག་པར་བྱ། །དེ་ནས་བསྒོམ་པའི་ས་གཞི་ནི། །བདུད་རྩི་ལྔས་ནི་གཏོར་བར་བྱ། །དེ་སྟེང་

བདེ་བའི་སྟན་ལ་འདུག །སྙིང་གར་ཟླ་དཀྱིལ་ཧཱུྃ་ནི་བསམ། །དེ་ལས་འོད་ཟེར་རབ་འཕྲོས་ནས། །རང་བཞིན་དཀྱིལ་འཁོར་སྤྱན་དྲངས་ནས། །མདུན་གྱི་ནམ་མཁར་བསམ་པར་བྱ། །རང་གི་སྙིང་གའི་ཧཱུྃ་ལས་ནི། །མཁའ་འགྲོ་མ་བཞི་རབ་སྤྲོས་ལ། །ཕྱི་ནང་མཆོད་བསྟོད་ལ་སོགས་བྱ། །

དེ་ནས་སྡིག་པ་བཤགས་པར་བྱ། །ལུས་ངག་ཡིད་གསུམ་ལས་བྱས་སྡིག །རང་གི་བྱས་སོགས་སྡིག་པ་ཀུན། །རང་བཞིན་དཀྱིལ་འཁོར་དག་པ་བཤགས། །སངས་རྒྱས་ལ་སོགས་བསོད་ནམས་ལ། །རྗེས་སུ་ཡི་རང་བ་བྱས་ནས། །རྗེས་སུ་ཡི་རང་བསོད་ནམས་འདིས། །སེམས་ཅན་

Vol. 25 · folio 313a

ཐམས་ཅད་དོན་དུ་བསྔོ། །དཀོན་མཆོག་གསུམ་ལ་སྐྱབས་སུ་མཆི། །བྱང་ཆུབ་སེམས་ནི་རྣམ་གཉིས་ཀྱིས། །རང་གི་ལུས་ངག་ཡིད་གསུམ་འདིས། །སངས་རྒྱས་ལ་སོགས་རྣམས་ལ་དབུལ། །ཡན་ལག་བདུན་མཆོད་བྱས་ནས་སུ། །རང་གི་

ལུས་ངག་ཡིད་གསུམ་ལ། །རང་བཞིན་ཡི་གེ་གསུམ་འདི་བསམ། །ཡི་གེ་གསུམ་ནི་འདི་ལྟ་སྟེ། །ཧེ་དང་རུ་ནི་ཀ་དང་གསུམ། །ཧེ་ཞེས་ཆོས་རྣམས་རྒྱུ་མེད་པ། །ཧ་ཞེས་ཆོས་རྣམས་སྐྱེ་འགག་མེད། །ཨེ་ཞེས་ཆོས་རྣམས་སྨྲ་བརྗོད་བྲལ། །རུ་ཞེས་ཆོས་རྣམས་བྲག་ཅ་འདྲ། །ར་ཞེས་

ཡང་དག་བདེ་ཆེན་ལུས། །ཨུ་ཞེས་ཆོས་རྣམས་མི་རྟོག་བརྟེན། །ཀཱ་ཞེས་ཆོས་རྣམས་གནས་མེད་པའོ། །ཀ་ཞེས་ཆོས་རྣམས་བདེ་དང་ལྡན། །ཨ་ལས་ཆོས་རྣམས་སྐྱེ་མེད་བསྟན། །རང་གི་ལུས་ངག་ཡིད་གསུམ་གྱི། །རང་བཞིན་ཡི་གེ་གསུམ་པོ་འདི། །ནན་ཏན་གྱིས་

ནི་དེ་ལྟར་བསྒོམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷ་བ་ཨཱཏྨ་ཀོ྅ཧཾ། སྟོང་ཉིད་སེམས་ནི་བརྟན་བྱས་ནས། །དེ་ཉིད་ཉི་མའི་དཀྱིལ་འཁོར་གྱུར། །དེ་སྟེང་ཧཱུྃ་ནག་བསམ་བྱ་སྟེ། །དེ་གྱུར་རྡོ་རྗེར་བསྒོམ་པར་བྱ། །རྡོ་རྗེ་བུམ་པར་ཧཱུྃ་ནག་བསམ། །དེ་ལས་འོད་ཟེར་རྡོ་རྗེ་འཕྲོས། །གྲུ་བཞི་

རྡོ་རྗེ་བརྩིག་བྱས་ཏེ། །སྟེང་དུ་རྡོ་རྗེ་གཟེབ་བསམས་ནས། །འོག་ནི་རྡོ་རྗེ་ས་གཞི་སྟེ། །རྡོ་རྗེ་ར་བའི་ཕྱི་རོལ་དུ། །ལཾ་གྱུར་ས་གཞི་གྲུ་བཞི་སྟེ། །རྡོ་རྗེ་རྩེ་གསུམ་གྱིས་ནི་མཚན། །ས་ཡི་དཀྱིལ་འཁོར་ཕྱི་རོལ་དུ། །བཾ་གྱུར་ཆུ་ཡི་དཀྱིལ་འཁོར་ཟླུམ། །དེ་དབུས་བུམ་པ་དག་ཏུ་

བསམ། །ཆུ་ཡི་དཀྱིལ་འཁོར་ཕྱི་རོལ་དུ། །ཡཾ་གྱུར་རླུང་དཀྱིལ་གཞུ་ལྟ་བུར། །གཡས་གཡོན་བ་དན་མཚན་པར་བྱ། །ཡང་ན་དེ་ཡི་ཕྱི་རོལ་དུ། །རཾ་གྱུར་མེ་དཀྱིལ་གྲུ་གསུམ་བསམ། །རྡོ་རྗེ་ར་བའི་ནང་དུ་ནི། །ཕྱོགས་བཞི་མཚམས་བཞི་དག་ལ་ནི། །དུར་ཁྲོད་

བརྒྱད་ནི་བསམ་པར་བྱ། །པཾ་གྱུར་པདྨ་དམར་པོ་བསམ། །པདྨའི་ཟེ་འབྲུའི་སྟེང་དུ་ནི། །ཉི་མའི་དཀྱིལ་འཁོར་བསམ་པར་བྱ། །དབུས་སུ་མཐིང་ནག་ཧཱུྃ་ནི་བསམ། །ཧཱུྃ་ལས་འོད་ཟེར་རབ་སྤྲོས་པས། །ཕྱོགས་བཅུའི་བདེ་གཤེགས་རྣམས་བཀུག་ནས། །ཧཱུྃ་ལ་ཐིམ་ནས་

Vol. 25 · folio 313b

ཞུ་བར་གྱུར། །པདྨའི་འདབ་མ་བཞི་ལ་ནི། །ལྷ་མོ་བཞི་ནི་བསྐྱེད་པར་བྱ། །ཚད་མེད་བཞི་ཡི་རང་བཞིན་ལས། །རྡོ་རྗེ་མཁའ་འགྲོ་ལ་སོགས་བཞིས། །འདི་བཞིའི་རྡོ་རྗེ་གླུ་ཡིས་ནི། །མཉམ་ཉིད་ལ་གནས་བསྐུལ་བར་བྱ། །དཔལ་རྡོ་རྗེ་གླུའི་དམ་པའི་སྲིད་པ་

ཤིན་ཏུ་སྒྲུབ་བྱེད་པ། །ཀྱེ་མ་གཉེན་མཆོག་རྡོ་རྗེའི་འོད་ཀྱིས་པདྨ་རབ་ཕྱེ་ཤིག །ཨ་ལ་ལ་ལ་ལ་ཧོ། །བདེ་བ་ཆེན་པོ་རབ་ཏུ་དགྱེས་པའི་གར་མཛོད་ཅིག །ཉི་མའི་འོད་ཀྱིས་པདྨའི་ཁ་རབ་ཕྱེ་བ་བཞིན། །ཨ་ལ་ལ་ལ་ལ་ཧོ། །བདེ་བ་ཆེན་པོ་རབ་ཏུ་དགྱེས་པའི་གར་མཛོད་ཅིག །

རྡོ་རྗེའི་གླུ་ནི་བླངས་ནས་སུ། །གོང་བུ་དེ་ཉིད་ཧཱུཾ་དུ་གྱུར། །དེ་ལས་འོད་ཟེར་རབ་སྤྲོས་པས། །ཕྱོགས་བཅུའི་བདེ་གཤེགས་ཀུན་བཀུག་ནས། །ཧཱུྃ་ཉིད་ལ་ནི་ཐིམ་པར་བསམ། །སྙིང་རྗེའི་སྟོབས་ཀྱིས་རྡོ་རྗེར་གྱུར། །སྐུ་མདོག་མཐིང་ནག་ཞལ་བཞི་པ། །ཕྱག་བཞི་དག་གིས་

རབ་ཏུ་མཛེས། །དབུས་ཞལ་སྐུ་ནི་མཐིང་ནག་སྟེ། །གཡས་ཀྱི་ཞལ་སེར་གཡོན་ཞལ་ལྗང་། །ལྷག་མའི་ཞལ་ནི་དཀར་པོའོ། །གཡས་གཉིས་ཀ་པཱ་ལ་དང་མདའ། །གཡོན་གཉིས་ཁ་ཊྭཱཾ་གཞུ་ནི་འཛིན། །ཉི་མའི་དཀྱིལ་འཁོར་གདན་ལ་བཞུགས། །ཞལ་བཞི་སྤྱན་ནི་གསུམ་

གསུམ་སྟེ། །མི་མགོ་གསར་པའི་དོ་ཤལ་ལ། །རྒྱུ་མ་རློན་པའི་ཐག་པས་བརྒྱུས། །ཐོད་སྐམ་ཕྲེང་བས་དབུ་ལ་བརྒྱན། །རུས་ཆེན་རྒྱན་དང་ཡང་དག་ལྡན། །དགའ་བཞད་ཞལ་གདངས་མཆེ་བ་གཙིགས། །དབུ་སྐྲ་དམར་སེར་གྱེན་དུ་འབར། །དེ་ནས་གནས་དྲུག་བྱིན་གྱིས་

བརླབ། །དཔྲལ་བའི་མཚམས་སུ་ཙི་སེར་བསམ། །མིག་གཉིས་ལ་ནི་ཨོཾ་དཀར་པོ། །རྣ་བ་གཉིས་ལ་ཨཱ་དམར་བསམ། །སྣ་གཉིས་ལ་ནི་ཁེ་དཀར་པོ། །མགྲིན་པར་ཨཱཿདམར་བསམ་པར་བྱ། །སྙིང་གར་རེ་དམར་བསམ་པར་བྱ། །གནས་དྲུག་ཡང་དག་བྱིན་བརླབས་ནས། །

ཡབ་ཡུམ་སྐུ་ནི་དུས་གཅིག་རྫོགས། །སྟོང་ཉིད་ལ་ནི་ཤིན་ཏུ་འཁྱུད། །གཉིས་མེད་སྐུ་ལས་འོད་ཟེར་འཕྲོས། །འཇིག་རྟེན་ཁམས་གསལ་བྱས་ནས་ནི། །རྡོ་རྗེ་འཛིན་པས་དབུ་ནི་བརྒྱན། །སྐུ་གསུང་ཐུགས་ནི་བྱིན་གྱིས་བརླབས། །ཆོས་དབྱིངས་ཡེ་ཤེས་རྣམ་དག་གི །དེ་ཡི་ངོ་བོ་

Vol. 25 · folio 314a

བདག་ཉིད་ནི། །ཤར་གྱི་པདྨའི་འདབ་མ་ལ། །རྡོ་རྗེ་མཁའ་འགྲོ་མ་ནི་བསམ། །སྐུ་མདོག་མཐིང་ནག་ཞལ་བཞི་མ། །གཡས་སེར་གཡོན་ལྗང་གུ་ཡི་ཞལ། །ལྷག་པའི་ཞལ་ནི་དཀར་པོ་སྟེ། །གཡོན་གཉིས་ཁ་ཊྭཱཾ་དྲིལ་བུ་ལ། །གཡས་གཉིས་ཀ་པཱ་ལ་རྡོ་རྗེ། །ས་ཁམས་

མེ་ལོང་རང་བཞིན་ནོ། །མདོག་སེར་རིན་ཆེན་མཁའ་འགྲོ་མ། །ལྷོ་ཡི་པད་འདབ་བསམ་པར་བྱ། །གཡས་ནག་གཡོན་ནི་ལྗང་གུའི་ཞལ། །ལྷག་པའི་ཞལ་ནི་དཀར་པོའོ། །གཡོན་གཉིས་བ་དན་ཅེ་སྤྱང་སྟེ། །གཡས་གཉིས་རྩེ་གསུམ་རིན་ཆེན་འཛིན། །ཆུ་ཁམས་མཉམ་ཉིད་རང་བཞིན་ནོ། །

མདོག་དཀར་པདྨ་མཁའ་འགྲོ་མ། །ནུབ་ཀྱི་པད་འདབ་བསམ་པར་བྱ། །གཡས་སེར་གཡོན་ནི་ལྗང་བའི་ཞལ། །ལྷག་པའི་ཞལ་ནི་ནག་པོ་སྟེ། །གཡོན་གཉིས་གཞུ་དང་ཀ་པཱ་ལ། །གཡས་གཉིས་མདའ་དང་སྣ་ཚོགས་པད། །མེ་ཁམས་སོ་སོར་རྟོག་རང་བཞིན། །ལྗང་མདོག་སྣ་ཚོགས་མཁའ་འགྲོ་

མ། །བྱང་གི་པད་འདབ་བསམ་པར་བྱ། །གཡས་སེར་གཡོན་ནི་སྔོ་བའི་ཞལ། །ལྷག་པའི་ཞལ་ནི་དཀར་པོའོ། །གཡོན་གཉིས་ཞགས་པ་ཀ་པཱ་ལ་འཛིན། །གཡས་གཉིས་རལ་གྲི་ཅང་ཏེའུ་འཛིན། །རླུང་ཁམས་ནན་ཏན་རང་བཞིན་ནོ། །རྡོ་རྗེ་མཁའ་འགྲོ་ལ་སོགས་བཞི། །ཉི་མའི་གདན་

ལ་རབ་ཏུ་གནས། །ཀ་པཱ་ལ་སོགས་རྒྱན་རྣམས་ནི། །གཙོ་བོའི་རྒྱན་དང་མཐུན་པར་བཤད། །སྤྱན་ནི་གཙོ་བོ་ཉིད་དང་མཐུན། །ཅུང་ཟད་ཞལ་གདངས་མཆེ་གཙིགས་ལ། །དབུ་སྐྲ་དམར་སེར་གྱེན་དུ་འབར། །ཐམས་ཅད་ཀྱི་ནི་སྐུ་རྣམས་ལ། །མེ་དཔུང་འབར་བའི་འོད་ཟེར་འཕྲོས། །སྙིང་རྗེའི་སྟོབས་ཀྱི་རྡོ་རྗེ་

མ། །ལྷ་མོ་འདི་བཞིས་མཛེས་བསྐོར་བསྒོམ། །ཇི་ལྟར་རྫོགས་པའི་རིམ་པ་ནི། །སློབ་དཔོན་དག་ལ་དྲི་བར་བྱ། །སྤྱི་བོར་རླུང་གི་དཀྱིལ་འཁོར་བསམ། །སྙིང་གར་ས་ཡི་དཀྱིལ་འཁོར་རོ། །ལྟེ་བར་ཆུ་ཡི་དཀྱིལ་འཁོར་བསམ། །གསང་བར་མེ་ཡི་དཀྱིལ་འཁོར་ཏེ། །མ་ནིང་གིས་ནི་བསྒོམ་པར་བྱ། །

ཨོཾ་ཨཱཿཧཱུཾ། རྣལ་འབྱོར་པ་ནི་ངལ་བསོའི་ཕྱིར། །སྔགས་ཀྱི་འཛབ་ནི་བཟླས་པར་བྱ། །ཨོཾ་ཨཱཿཧྲཱིཿཧཱུཾ་ཕཊ། ཏིང་ངེ་འཛིན་ལས་ལངས་ནས་ནི། །འཁོར་བ་དང་ནི་མྱ་ངན་འདས། །གཉིས་སུ་མེད་པར་བསྒོམ་པར་བྱ། །རྒྱ་གར་གྱི་མཁན་པོ་སྐུ་མེད་རྡོ་རྗེས་མཛད་པ་སྒྱུ་འཕྲུལ་ཆེན་མོའི་སྒྲུབ་ཐབས་རྫོགས་སོ།། །།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words