ཚེ་སྒྲུབ་པའི་གདམས་ངག་ཅེས་བྱ་བ

Sanskrit title (Tibetan script, as in the text) ཨཱ་ཡུ་པ་རི་རཀྵ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 53 · folio 36b

༄༅༅། །རྒྱ་གར་སྐད་དུ། ཨཱ་ཡུ་པ་རི་རཀྵ་ནཱ་མ། བོད་སྐད་དུ། ཚེ་སྒྲུབ་པའི་གདམས་ངག་ཅེས་བྱ་བ། བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །བླ་མ་རྣམས་ལ་ཕྱག་འཚལ་ནས། །བཅུད་ལེན་ཞལ་གྱི་གདམས་པ་ཡིས། །ལུས་ངག་རྟག་ཏུ་བསྲུང་བར་བྱ། །དེ་མེད་

བསྒྲུབ་བྱ་གྲུབ་མིན་པས། །དེས་ན་ཐམས་ཅད་འབད་པ་ཡིས། །དོན་ནི་ཐམས་ཅད་སྒྲུབ་པའི་ཕྱིར། །སྐབས་འབྱུང་ཚེ་སྒྲུབ་འདི་རུ་བཤད། །མར་དང་སྦྲང་རྩི་འོ་མ་མཉམ། །སྣུམ་པའི་སྣོད་ལ་སྦྱར་བྱས་ནས། །ནས་ཀྱི་སྦང་མར་ཞག་གཅིག་བཞག །དེ་ནས་བཏོན་ནས་ཉེ་བར་བཟའ།

སོ་དང་སེན་མོ་ཟླ་དྲུག་གིས། །བརྗེས་འགྱུར་ལོ་ནི་སྟོང་ཐུབ་སྟེ། །རྟགས་ནི་མིག་རྣོ་སྟོབས་ལྡན་ནོ། །ཉེ་ཤིང་རྩ་བ་བླང་བྱས་ནས། །གྲིབ་སྐམ་ཞིབ་ཏུ་བཏགས་པར་བྱ། །འོ་མའམ་ཞོ་དང་སྦྱར་བྱས་ནས། །ཞོ་ནི་ལངས་ནས་སྐྲོག་པར་བྱ། །མར་སར་བླངས་ནས་ཐོ་རངས་བཟའ། །ཞག་ནི་

བདུན་ནས་རྟགས་འབྱུང་སྟེ། །བདུན་གཉིས་གྱུར་ནས་ཉི་འོད་ལྡན། །བདུན་གསུམ་ཉི་ཤུ་རྩ་གཅིག་ནས། །འབྲས་བུ་ནད་སེལ་ལུས་ཡང་ངོ་། །ལོ་དྲུག་ཏུ་ནི་བཟའ་བཏུང་གིས། །རྣམ་རྟོག་བྲལ་ཞིང་ཚེ་འགྲུབ་བོ། །ཐོ་རས་མུ་ཟི་སྲང་ཕྱེད་ནི། །ཡུངས་ཀར་མར་ཁུས་བཏུལ་ནས་བཟའ། །

ཤུ་བའི་ནད་སེལ་ཚེ་འགྲུབ་འགྱུར། །སྤྲིན་ནག་ཞོ་གཉིས་སྦྲུལ་མིག་པའི། །ཁུ་བས་མཉེས་ནས་གང་བར་བྱ། །ཞུ་རྗེས་དྲུག་ཅུའི་འབྲས་ཆན་བཏང་། །འོ་མ་བཏུང་ཞིང་ཚ་སྔོ་སྤང་། །ལོ་གཅིག་སྦྱོར་བ་འགྲུབ་པར་འགྱུར། །བྷྲྀང་ག་ར་ཛའི་ཕྱེ་ལ་ནི། །མར་དང་སྦྲང་གི་རྩི་སྦྱར་ནས། །ལྟོ་

Vol. 53 · folio 37a

སྟོང་དག་ལ་བཟའ་བར་བྱ། །སྐྱུར་རྩང་བཅུད་ཅན་ཁ་ཟས་བཏང་། །ཟླ་བ་དྲུག་ཏུ་ཟོས་གྱུར་ན། །ནད་རྣམས་སེལ་ཅིང་ཉིས་བརྒྱ་ཐུབ། །འབྲས་བུ་གསུམ་དང་ལྕགས་ཕྱེ་དང་། །དེ་བཞིན་བྷྲྀད་ག་ར་ཛ་དང་། །རུ་རྟ་དང་ནི་ཆ་མཉམ་སྟེ། །བྷྲྀང་གའི་ཁུ་བས་ལྡེ་གུར་སྦྱར། །

གྲིབ་སྐམས་ཕྱེ་མ་བཟའ་བར་བྱ། །རེག་པ་དང་ནི་སྔོ་སྐྱུར་སྤང་། །ལོ་གཉིས་ཀྱིས་ནི་འགྲུབ་འགྱུར་རོ། །ལྕགས་ཀྱི་ལྷུང་བཟེད་མར་གྱིས་བཀང་། །ལྷ་ཤིང་རྩ་བའི་ཤུན་ལྤགས་ནི། །ཞིབ་བཏགས་སྦྱར་ལ་ལོ་གཅིག་བཞག །གཟའ་སྐར་བཟང་པོའི་དུས་སུ་བཏོན། །ཡི་དམ་ལྷ་

ཡི་བསྙེན་པ་བསྐྱལ། །ར་ཡི་འོ་མ་བཏུང་བར་བྱ། །ཟླ་བ་གསུམ་ན་གཉེར་མ་དངས། །ཟླ་བ་དྲུག་ནས་རླུང་ཤུགས་ལྡན། །ལོ་གཅིག་སྦྱོར་བས་ཚེ་འགྲུབ་བོ། །འབྲས་བུ་གསུམ་དང་བྷྲྀང་གའི་ཕྱེ། །མར་དང་སྦྲང་རྩི་སྦྱར་ལ་བཟའ། །སྨན་ཉིད་ཞུ་བའི་དུས་སུ་ནི། །འོ་མ་འབྲས་བསྐོལ་

བཟའ་བར་བྱ། །མིག་རྣོ་ནད་མེད་སུམ་བརྒྱ་ཐུབ། །ཐོ་རངས་ཨ་རུ་གཉིས་དག་དང་། །ཉི་མ་ཕྱེད་ལ་བ་རུ་སྟེ། །ཞག་དུས་སྐྱུ་རུ་བཞི་དག་ཟ། །དྲུག་ཅུའི་འབྲས་དང་འོ་མ་ཡི། །རྣལ་འབྱོར་ཁ་ཟས་ཅི་ནུས་བཏང་། །སྐྲ་དཀར་གཉེར་མ་ནད་མེད་པས། །འདོད་པའི་དབང་ཕྱུག་ནད་མེད་

ལྡན། །བྱ་ཁྱུང་ལྟ་བུར་མིག་རྣོ་འགྱུར། །འབྲས་བུ་གསུམ་གྱི་ལྡེ་གུ་ནི། །ལྕགས་ཀྱི་སྣོད་ལ་བསྐུས་བྱས་ལ། །ཉིན་མཚན་གཉིས་ནི་ཁྲུས་བྱས་ནས། །མར་དང་སྦྲང་རྩི་སྦྱར་ལ་བཟའ། །ལོ་གཅིག་སྦྱོར་བས་སུམ་བརྒྱ་ཐུབ། །ནད་བྱང་སོ་དང་སེན་མོ་བརྗེ། །ཀོ་ཀི་ལ་ལྟ་བུའི་སྐད་ལྡན་འགྱུར། །དེ་ཕྱིར་བདག་ཉིད་ཀོ་ཀི་

ལར་གྲགས། །ཚེ་སྒྲུབ་པའི་གདམས་ངག་ཅེས་བྱ་བ་སློབ་དཔོན་ཀོ་ཀི་ལས་མཛད་པ་རྫོགས་སོ།།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words