No title in the text — opening words: ས་དང་ཤིང་དང་རྡོའི་ཆོ་ག་བཞུགས

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 53 · folio 261b

༄ །ས་དང་ཤིང་དང་རྡོའི་ཆོ་ག་བཞུགས། ༄༅། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ལྷ་ཡི་རྣལ་འབྱོར་དང་ལྡན་པས། །ས་གཞི་མཆོད་

པ་མཆོག་བསྒྲུབས་ཏེ། །ལྷ་ལས་ལྡང་བར་བྱས་ནས་ནི། །དེ་ནས་ས་གཞི་སྦྱར་བར་བྱ། །དེ་ལ་སློབ་དཔོན་གྱིས་རང་གི་འདོད་པའི་ལྷའི་རྣལ་འབྱོར་བྱས་ཏེ་མཚན་མོའི་དུས་སུ་གཞོན་ནུ་མ་གཅིག་གདོང་ཤར་དུ་ཕྱོགས་པ་ལ་མཆོད་པ་བྱས་ཏེ་བསྟོད་ནས། ཀྱེ་བཅོམ་ལྡན་

འདས་མ་དགེ་བ་དང་མི་དགེ་བ་སྨྲོས་ཤིག་ཅེས་བརྗོད་དེ། ཨ། ཀ པ། ཏ། ཙ། ས། ཧ། བ། ཛ་རྣམས་ཚིག་གི་ཐོག་མར་བྱུང་བའི་དེའི་བརྗོད་པ་མ་འཁྲུལ་པར་རྗེས་སུ་དཔག་པར་བྱའོ། །དེ་མིག་དགུ་པའི་ས་རྣམས་ལ་དེར་གལ་ཏེ་བྱང་དུ་ཨ་ཡིག་ཐོག་མར་གྱུར་པ་དེའི་ཚེ་ངེས་

པར་ཤར་གྱི་ཕྱོགས་སུ་རྐང་པས་ལྷག་པའི་ཁྲུ་གང་གི་འོག་ན་སྲོག་ཆགས་གཉིས་ཀྱི་ཟུག་རྔུའོ། །དེ་མ་ཕྱུང་ན་རིགས་རྒྱུད་དང་རང་གི་ཆུང་མ་འཆི་བ་དང་མེའི་འཇིགས་པའི་སྐྱོན་འབྱུང་ངོ་། །ཀ་དང་པོར་བརྗོད་ན་བྱང་དུ་མེའི་ཟུག་རྔུ་སྟེ་རྒྱལ་རིགས་ཀྱི་རུས་པ་རྐང་པ་གཉིས་ཀྱིས་ལྷག་

པའི་ཁྲུ་གང་གི་འོག་ན་ཡོད་དོ། །དེ་གལ་ཏེ་མ་ཕྱུང་ན་དེའི་ཚེ་ནད་སྣ་ཚོགས་དང་། མེའི་འཇིགས་པ་དང་དོན་ཉམས་པ་རྒྱལ་པོས་གཟིར་བ་རབ་ཏུ་འབྱུང་བར་འགྱུར་རོ། །པ་དང་པོར་བརྗོད་ན་བྱང་དང་ལྷོའི་ཕྱོགས་སུ་རྐང་པས་དམན་པའི་ཁྲུ་གཉིས་ཀྱི་འོག་ན་རྗེའུ་རིགས་ཀྱི་རུས་པའི་དུམ་

Vol. 53 · folio 262a

བུའོ། །དེ་མ་ཕྱུང་ན་ཕྱི་དང་ནང་དུ་ཚ་གདུང་དང་དོན་ཉམས་པར་འགྱུར་རོ། །ཏ་དང་པོ་དང་ཕྱི་མར་བརྗོད་ན་སྲིན་པོའི་ཕྱོགས་ན་དམངས་རིགས་ཀྱི་རུས་པའི་དུམ་བུ་མཐོ་གཉིས་ཀྱི་འོག་ནའོ། །དེ་གལ་ཏེ་མ་ཕྱུང་ན་དེའི་ཚེ་ནད་སྣ་ཚོགས་ཀྱིས་གཟིར་བ་དང་མེའི་

འཇིགས་པ་དང་ཁྱིམ་གྱི་བདག་པོ་འཆིའོ། །ཙ་དང་པོར་བརྗོད་ན་ཆུའི་ཕྱོགས་སུ་བྲམ་ཟེའི་རུས་པའི་ཟུག་རྔུ་རྐང་པས་ལྷག་པའི་ཁྲུ་གཉིས་ཀྱི་འོག་ནའོ། །དེ་མ་ཕྱུང་ན་ཁྱིམ་མེས་འཇིག་པར་འགྱུར་རོ། །ས་དང་པོ་དང་ཕྱི་མར་ཡོད་ན་རླུང་གི་ཕྱོགས་སུ་སའི་བདག་པོའི་རྒྱུད་ཀྱི་རུས་

པའི་ཟུག་རྔུ་འབྱུང་སྟེ་ཕྱེད་དང་བཅས་པའི་མཐོ་གཉིས་ཀྱི་འོག་ནས་སོ། །དེ་མ་ཕྱུང་ན་མཛའ་བ་ཡུན་ཐུང་བ་ཉིད་དང་མྱ་ངན་དུ་འགྱུར་རོ། །ཧ་དང་པོར་བརྗོད་ན་བྱང་གི་ཕྱོགས་སུ་རྐང་པ་གསུམ་གྱིས་ལྷག་པའི་ཁྲུ་གཉིས་ཀྱི་འོག་ན་རྗེའུ་རིགས་ཀྱི་སྐྱེ་བོའི་རུས་པའི་ཟུག་རྔུ་སྟེ་འདིས་ནི་སྐྱེས་པ་

དང་བུད་མེད་རྣམས་ཚེ་ཐུང་བ་ཉིད་དུ་འགྱུར་རོ། །བ་ཡིག་དང་པོ་དང་ཕྱི་མར་ཡོད་ན་དབང་ལྡན་དུ་མཐོ་གསུམ་ན་དམངས་རིགས་ཀྱི་རུས་པའོ། །ཡང་ན་བྱི་ལའི་རུས་པ་དང་ལྕགས་དང་སོལ་བ་ཡོད་དོ། །དེ་མ་ཕྱུང་བར་བཞག་ན་རྒྱུད་ཀྱི་ནོར་ཉམས་པར་འགྱུར་རོ། །ཛ་དང་པོ་དང་ཕྱི་མར་

བརྗོད་ན་དེའི་དབུས་ན་བྲམ་ཟེའི་རུས་པའི་ཟུག་རྔུ་སྟེ་དེ་མ་ཕྱུང་ན་རྒྱལ་པོའི་ཆད་པས་གཟིར་བ་དང་ནོར་ཟད་པའི་སྐྱོན་འབྱུང་བར་འགྱུར་རོ། །དེའི་ཕྱིར་ཐམས་ཅད་དུ་ཉེས་པ་དུ་མ་འབྱུང་བའི་ཕྱིར་ཟུག་རྔུ་རྣམས་དབྱུང་བར་བྱའོ། །དེ་ནས་གཞོན་ནུ་མ་མཆོད་དེ་མདུན་དུ་ཡུངས་ཀར་དཀར་པོ་དང་

ནིམ་པའི་ལོ་མ་ལ་སོགས་པ་གཡས་པའི་ཁུ་ཚུར་གྱིས་གཡས་སུ་བསྐོར་ཞིང་གཡོན་པའི་ཁུ་ཚུར་གྱིས་གཡོན་དུ་བསྐོར་ནས་མེ་ལ་ལན་གསུམ་དུ་དོར་བར་བྱའོ། །སྔགས་ནི་འདི་ཡིན་ཏེ། ཨོཾ་སརྦ་པཱ་པ་ད་ཧ་ན་བཛྲ་སརྦ་པཱ་པཾ་ད་ཧ་སྭཱ་ཧཱ། དེ་ནས་ཨརྐའི་རས་བལ་གྱིས་མར་

མེའི་སྡོང་བུ་བྱས་ཏེ། ཏིལ་ནག་པོའི་སྣུམ་གྱིས་མར་མེ་སྤར་ཏེ་ཟུག་རྔུ་བརྟག་པར་བྱའོ། །དེ་ལ་ཕྱོགས་གང་དུ་མར་མེའི་རྩེ་མོ་རྒྱུག་པ་དེར་ངེས་པར་ཟུག་རྔུ་ཡོད་དོ་ཞེས་རྟོགས་པར་བྱའོ། །གང་དུ་མར་མེ་རྡུལ་གྱིས་བསྐོར་བ་དེར་ཟུག་རྔུར་འགྱུར་རོ། །དེ་ནས་གཏོར་མ་དང་མཆོད་

Vol. 53 · folio 262b

པ་ལ་སོགས་པ་བྱས་ནས་མེ་ཏོག་དང་བཅས་པའི་འབྲས་ཡོས་ས་ལ་གཏོར་བར་བྱའོ།། །།ཤིང་གི་ལས་ཞེས་གསུངས་པ་དེ་བརྗོད་པར་བྱའོ། །ནགས་ཀྱི་འཁྲུལ་འཁོར་དེ་འདྲེན་པ། །མཁས་པས་ཡང་དག་བླངས་ནས་ནི། །ཤིང་གི་མགོ་བོར་ལེགས་བཞག་

སྟེ། །བདུད་རྩིའི་མེ་ལ་སྦྱིན་སྲེག་བྱ། །དེ་ལ་ཚེས་དང་གཟའ་དང་རྒྱུ་སྐར་བཟང་པོ་ལ་མཆོད་རྟེན་བཞེངས་པ་དང་གཙུག་ལག་ཁང་ལ་སོགས་པའི་མཆོད་སྡོང་དང་། སྒོ་དང་། ཀ་བ་ལ་སོགས་པ་ཤིང་གི་རྩེ་མོའི་མཐར་ཐུག་པ་རྣམས་ཀྱི་ཆུ་དང་ཞེང་དག་ཕྱ་མཁན་དང་ཐིག་

སྐུད་འཛིན་པ་ལ་སོགས་པ་རྣམས་ཀྱིས་ཡང་དག་པར་བརྟགས་ཏེ། ཤིང་བཟོ་བའི་འཁོར་རྣམས་ཚོགས་པ་དང་མཆོད་སྦྱིན་བྱེད་པའི་སློབ་དཔོན་དག་དང་ལྷན་ཅིག་ནགས་སུ་འཁྲུལ་འཁོར་གྱིས་འགྲོ་བར་བྱའོ། །ནགས་ཚལ་དང་ཉེ་བར་སླེབས་པའི་དུས་སུ་བདག་ཉིད་

ལས་ཐམས་ཅད་པའི་གཟུགས་སུ་བརྟགས་ཤིང་བསམས་ཏེ། རྐང་པ་གཡས་མདུན་དུ་བྱས་ནས་ཤར་དང་བྱང་གི་ཕྱོགས་སུ་གདོང་ཕྱོགས་པའི་སློབ་དཔོན་ནགས་ཚལ་གྱི་ཕྱོགས་སུ་རབ་ཏུ་ཞུགས་ཏེ། ལོ་ཉིས་བརྒྱ་མ་ལོན་པའི་ཤིང་རྣམས་ནི་ཉེ་བར་མི་བླང་ངོ་། །དེ་ལ་ཤིང་

རྣམས་ནི་དྭི་ཀེ་ཤ་ར་དང་། མཱ་ལཱུ་ར་དང་། ཏིཏྟ་སཱ་ར་དང་། ལྷའི་ཤིང་དང་། སིང་ལྡིང་དང་། གམྦཱ་རི་དང་། སྦྲང་རྩི་ཅན་དང་། མྱ་ངན་མེད་དང་། བ་ཀུ་ལ་དང་། རྣམ་པར་རྒྱལ་བྱེད་དང་། སའི་ཙནྡན་དང་། ཙམྤ་ཀ་དང་། ཙནྡན་དང་། ཀིངྴུ་

ཀ་དང་། པ་ལཱ་ཤ་དང་། པིཙྪི་ལ་དང་། ཙ་ལ་ད་ལ་དང་། ཤ་ར་སཱ་ལ་དང་། ཏཱ་ལ་དང་། གྲནྠི་ལ་དང་། ཨརྫུ་ན་དང་། ཛམྦུ་དང་། བྷཎྜི་ལ་དང་། རོ་ཧི་ཎཱི་ལ་སོགས་པ་ཤིང་བཟང་པོ་དུ་མ་གང་དང་གང་དུ་སྐྱེས་པའི་ཤིང་དེ་དག་ལེགས་པར་བརྟགས་ཏེ་

མཚན་མོའི་དུས་སུ་ལས་ཐམས་ཅད་པའི་རྣལ་འབྱོར་དང་ལྡན་པའི་སློབ་དཔོན་སྤྲོ་བ་དང་ལྡན་པས་ཤིང་བཟོ་བ་གྲོགས་དང་བཅས་པ་ལེགས་པར་བསྲུང་བ་བྱས་ཏེ། ཉེར་སྤྱོད་ལྔས་བླ་མ་དང་སངས་རྒྱས་དང་བྱང་ཆུབ་སེམས་དཔའ་དང་ཕྱོགས་ཀྱི་བདག་པོ་དང་། ནགས་ཀྱི་ཤིང་

Vol. 53 · folio 263a

གི་ལྷ་ལ་སོགས་པ་རྣམས་ཡང་དག་པར་མཆོད་དེ། ཕྱོགས་ཀྱི་གཏོར་མ་ཡང་བྱིན་ནས་ཤིང་བཟོ་བ་གྲོགས་དང་བཅས་པ་བཟའ་བ་དང་། བཅའ་བ་དང་། ཟས་དང་། སྐོམ་དང་། ཏཱམྦཱུ་ལ་ལ་སོགས་པ་རྣམས་ཀྱིས་ཡང་དག་པར་མགུ་བར་བྱས་

ནས། འདོད་པའི་ལྷ་ལ་བཅོམ་ལྡན་ཆེ་གེ་ཞེས་བྱ་བ་ལ་སོགས་པའི་ཚིགས་སུ་བཅད་པ་རྣམས་ཀྱིས་གསོལ་བ་བཏབ་པས་ཐུགས་མཉེས་ཏེ། ཤིང་བཟོ་བ་གྲོགས་དང་བཅས་པ་དང་ལྷན་ཅིག་འདོད་པའི་ལྷའི་རྣལ་འབྱོར་དང་ཞི་བའི་ཡིད་ཀྱིས་ཉལ་བར་བྱའོ། །དེ་ལ་རྨི་ལམ་བཟང་པོ་ངེས་པར་མཐོང་

ན་ལེགས་པར་གྲུབ་པར་འགྱུར་རོ། །རྨི་ལམ་ངན་པ་ཐམས་ཅད་ཞི་བའི་སྔགས་བཟླ་བར་བྱའོ། །དེ་ནས་སྔ་བར་མཆོད་པ་ཐམས་ཅད་དང་ཡང་དག་པར་ལྡན་པའི་སློབ་དཔོན་རྣམ་པར་སྣང་མཛད་ཆེན་པོའི་རྣལ་འབྱོར་དང་ལྡན་པས་དེར་གནས་པའི་ཤིང་གི་ལྷ་མོའི་གཟུགས་ཀྱི་ཤིང་

གི་རྒྱལ་པོ་ཡང་དག་པར་མཆོད་པར་བྱའོ། །དེ་ལ་ཤིང་གི་ལྷ་མོ་དེ་རྣམས་དང་ཞིང་སྐྱོང་དེ་རྣམས་ཀྱང་འདི་ཡིན་ཏེ། ལྷའི་ཤིང་དང་། དྭི་ཀེ་ཤ་ར་དང་། ཙམྤ་ཀ་དང་། མྱ་ངན་མེད་པའི་ཤིང་རྣམས་ལ་ཤིང་གི་ལྷ་མོ་གསང་བ་མའོ། །ཞིང་སྐྱོང་སྟོབས་པོ་ཆེའོ། །ནེ་

མཱི་དང་། ཤཱ་ལ་དང་། ཤ་ར་ལའི་ཤིང་རྣམས་ཀྱི་ནི་འཇིག་རྟེན་གྱི་མའོ། །ཞིང་སྐྱོང་རི་བོ་ཆེན་པོའོ། །ཨ་རུ་རའི་ཤིང་དང་། བ་ཊ་དང་། ར་ཤིང་རྣམས་ཀྱི་ནི་རྣ་བ་ཉེད་མའོ། །ཞིང་སྐྱོང་ཤིན་ཏུ་སྟོབས་སོ། །ཙུ་ཏའི་ཤིང་ལ་ནི་ཨམྦི་ཀཱའོ། །ཞིང་སྐྱོང་སྟོབས་ཅན་

ནོ། །ཏ་ལའི་ཤིང་ལ་བདེ་བྱེད་མའོ། །ཞིང་སྐྱོང་སྐྲ་གྱེན་བརྫེས་སོ། །ཀནྡ་པའི་ཤིང་ལ་བཞིན་བཟང་མའོ། །ཞིང་སྐྱོང་དྲིལ་བུ་ཆེན་པོའོ། །ཀ་རཉྫ་ལ་ནི་ཀ་རཉྫར་གནས་མའོ། །ཞིང་སྐྱོང་གཏུམ་པའི་དྲིལ་བུའོ། །སྦྲང་རྩིའི་ཤིང་ལ་དབང་བསྐུར་མའོ། །ཞིང་

སྐྱོང་སྐྱེས་པའི་དབང་ཕྱུག་གོ། །གསེར་ཤིང་ལ་གཏུམ་མོའོ། །ཞིང་སྐྱོང་སུ་ཛ་ནེ་ཏཱའོ། །ཤྲི་གོ་རའི་ཤིང་ལ་དཔལ་ཆེན་མོའོ། །ཞིང་སྐྱོང་མེའི་ཁའོ། །དེ་ནས་ལས་དང་རྗེས་སུ་མཐུན་པར་ཤིང་གི་ལྷ་མོ་རྣམས་དང་ཞིང་སྐྱོང་རྣམས་ཀྱི་ཡང་རྣམ་པ་བསྒོམས་ནས་རང་

Vol. 53 · folio 263b

རང་གི་སྔགས་ཀྱིས་མཆོད་པར་བྱའོ། །དེ་ལ། ཨོཾ་ན་མཿསྭཱ་ཧཱ། ཞིང་སྐྱོང་གིའོ། །ཨོཾ་ཨེཾ་གུ་ཧྱ་ཀཱ་ཡི་ན་མཿསྭཱ་ཧཱ། དེ་བཞིན་དུ་ཨོཾ་མཾ་མ་ཧཱ་མེ་ར་ཝེ་ན་མཿསྭཱ་ཧཱ། ཨོཾ་ལཱཾ་ལོ་ཀ་མཱ་ཏྲི་ཀཱ་ཡཻ་ན་མཿསྭཱ་ཧཱ། ཨོཾ་ཨཿཨ་ཏི་བ་ལཱ་ཡ་ན་མཿསྭཱ་ཧཱ། ཨོཾ་ཀཱཾ་ཀརྞྞ་མོ་ཊི་ཀཱ་ཡཻ་ན་

མཿསྭཱ་ཧཱ། ཨོཾ་བཿབ་ལཱ་ཡ་ན་མཿསྭཱ་ཧཱ། ཨོཾ་ཨཾ་ཨཾ་བི་ཀཱ་ཡཻ་ན་མཿསྭཱ་ཧཱ། ཨོཾ་ཨཱུཾ་ཨཱུརྡྷ་ཀེ་ཤཱ་ཡ་ན་མཿསྭཱ་ཧཱ། ཨོཾ་ཤཾ་ཤཾ་ཀ་རི་ཀཱ་ཡཻ་ན་མཿསྭཱ་ཧཱ། ཨོཾ་གྷཾ་མ་ཧཱ་གྷཎྚཱ་ཡ་ན་མཿསྭཱ་ཧཱ། ཨོཾ་སུཾ་སུ་མུ་ཁཱ་ཡཻ་ན་མཿསྭཱ་ཧཱ། ཨོཾ་ཙཾ་ཙཎྜ་གྷཎྜཱ་ཡ་ན་མཿསྭཱ་ཧཱ། ཨོཾ་ཀཾ་ཀ་

རཾ་ཛ་བཱ་སི་ནྱཻ་ན་མཿསྭཱ་ཧཱ། ཨོཾ་པུཾ་པུཾ་སེ་ཤྭ་རཱ་ཡ་ན་མཿསྭཱ་ཧཱ། ཨོཾ་ཤཾ་ཤེ་ཀཱ་ཡཻ་ན་མཿསྭཱ་ཧཱ། ཨོཾ་སུཾ་སུ་ཛ་ནེ་ཏེ་ན་མཿསྭཱ་ཧཱ། ཨོཾ་ཙཾ་ཙཎྜཱ་ལྱཻ་ན་མཿསྭཱ་ཧཱ། ཨོཾ་བཾ་བཧྣི་མུ་ཁཱ་ཡ་ན་མཿསྭཱ་ཧཱ། ཨོཾ་ལཱཾ་མ་ཧཱ་ལ་ཀྵྨྱཻ་ན་མཿསྭཱ་ཧཱ། གཙུག་ལག་ཁང་གི་རྒྱུ་ཡི་ཕྱིར། །བདག་ནི་

ལྗོན་ཤིང་གཅད་པར་འདོད། །ད་ནི་ཁྱེད་རྣམས་ཤིང་གཞན་ལ། །གནས་ཏེ་བདག་ལ་བཟོད་པར་མཛོད། །ཅེས་བྱ་བའི་ཚིགས་བཅད་ལན་གསུམ་དུ་བརྗོད་དེ། ཤིང་ལ་གནས་པའི་ལྷ་ལ་གསོལ་ཏེ། དེ་ནས་མེ་ཏོག་ལ་སོགས་པས་ལེགས་པར་མཆོད་དེ། ཤིང་

གཞན་ལ་གནས་པར་བསམ་པར་བྱའོ། །དེ་ནས་བསྲུང་བའི་ཆེད་དུ་རྨ་བྱ་ཆེན་མོ་བཀླག་པར་བྱའོ། །དེ་ནས་ལས་ཐམས་ཅད་པའི་གཟུགས་ཅན་གྱི་ཤིང་བཟོ་བ་གསེར་དང་རས་དང་ཏཱམྦཱུ་ལ་ལ་སོགས་པ་རྣམས་ཀྱིས་ཡོངས་སུ་མགུ་བར་བྱས་ཏེ། དགྲ་སྟ་སྦྲང་རྩིས་བྱུགས་

ཏེ་དགེ་བའི་སེམས་ཀྱིས་ཤིང་བཟོ་བ་ལག་པ་གཡས་པ་གྱེན་དུ་ཕྱོགས་པ་དང་། ཁ་བྱང་ཤར་དུ་བལྟས་ཏེ་ཉི་མ་ལ་བལྟས་ནས་ཤིང་གཅད་པར་བྱའོ། །དེར་ཡང་དགེ་བ་དང་མི་དགེ་བའི་མཚན་མ་བལྟ་བར་བྱ་སྟེ་མི་དགེ་བའི་མཚན་མ་བྱུང་ན་སྤང་བར་བྱ་ཞིང་། དགེ་བའི་མཚན་མ་

བྱུང་ན་གཟུང་བར་བྱའོ། །གལ་ཏེ་ཤིང་བྱང་ཕྱོགས་སུ་ལྷུང་བར་གྱུར་ན་དེའི་ཚེ་མཆོད་སྦྱིན་བྱེད་པ་ལ་ནོར་དང་ལས་ཀྱི་དངོས་གྲུབ་ཏུ་འགྱུར་རོ། །དབང་ལྡན་གྱི་ཕྱོགས་སུ་ལྷུང་ན་རིག་པ་དང་ཡེ་ཤེས་ཀུན་དུ་འགྲོ་བར་འགྱུར་རོ། །གལ་ཏེ་དབང་པོའི་ཕྱོགས་སུ་ཤིང་ལྷུང་ན་དེའི་ཚེ་

Vol. 53 · folio 264a

དཔལ་དང་འབྱོར་པ་དང་རྒྱས་པར་འགྱུར་རོ། །གལ་ཏེ་ཤིང་གཞན་རྣམ་པར་ཉིད་པའི་བར་དུ་ལྷུང་བར་གྱུར་པ་དེའི་ཚེ་དགེ་བ་དང་བདེ་བ་ཉིད་དུ་འགྱུར་རོ། །གལ་ཏེ་ཤིང་གཞན་མ་བཅོམ་པར་ལྷུང་ན་མཆོད་སྦྱིན་བྱེད་པ་ལ་འཇིགས་པ་ཆེན་པོར་

འགྱུར་རོ། །མེ་དང་བདེན་བྲལ་དང་གཤིན་རྗེ་དང་ཆུ་དང་རླུང་གི་ཕྱོགས་རྣམས་སུ་ལྷུང་ན་གྲངས་བཞིན་དུ་མེའི་འཇིགས་པ་དང་ནད་དང་འཆི་བ་དང་ཆུ་དང་རླུང་གི་འཇིགས་པ་འབྱུང་བར་འགྱུར་རོ། །བསྐྱོད་པ་ན་སྒྲ་མི་གསལ་བ་རིང་དུ་གྲག་ཅིང་ལྷུང་ན་མཆོད་སྦྱིན་བྱེད་པ་པོ་ལ་

སྡུག་བསྔལ་གྱི་མཚན་མར་འགྱུར་རོ། །གཅོད་པའི་དུས་སུ་གལ་ཏེ་རྔ་མོ་དང་རྟ་དང་ཅེ་སྤྱང་དང་བོང་བུ་དང་སྦྲུལ་དང་ཕག་དང་བྱ་རོག་ལ་སོགས་པ་གདུག་པའི་འདབ་ཆགས་མཐོང་བར་གྱུར་ན་དེའི་ཚེ་ངེས་པར་གསད་པ་དང་བཅིང་བ་དང་བགེགས་དུ་མ་འབྱུང་བར་འགྱུར་རོ། །གལ་

ཏེ་ཤིང་ལས་ཁྲག་འཛག་ན་དེའི་ཚེ་མཆོད་སྦྱིན་བྱེད་པ་འཆི་བར་འགྱུར་རོ། །ཞོ་དང་མར་དང་སྦྲང་རྩི་དང་འོ་མ་འཛག་ན་གསད་པ་དང་བཅིང་བ་ལ་སོགས་པའི་འཇིགས་པ་འབྱུང་བར་འགྱུར་རོ། །འོན་ཀྱང་ཤིང་རྣམས་ལ་རང་བཞིན་པའི་མངར་བ་དང་ཚ་བ་དང་ཁ་བ་དང་བསྐ་

བའི་བཅུད་འབྱུང་བ་དེ་ལ་ནི་ཉེས་པ་མེད་དོ། །སྦལ་པ་ལེ་བརྒན་གྱི་མདོག་ཅན་བྱུང་ན་དེས་ནི་ནད་འབྱུང་བ་རྗེས་སུ་དཔག་པར་བྱའོ། །དེ་བཞིན་དུ་ཤིང་གི་ཁོང་ནས་བྱི་བ་མདོག་སེར་སྐྱ་བྱུང་ན་དེས་ཆོམ་རྐུན་གྱི་འཇིགས་པ་དང་སྭཱ་ཤའི་ནད་འབྱུང་བར་རྗེས་སུ་དཔག་པར་བྱའོ། །

ཤིང་གི་བར་ནས་རྩངས་པ་མདོག་སེར་པོ་བྱུང་ན་དེས་ནི་ནོར་ཉམས་པར་རྗེས་སུ་དཔག་པར་བྱའོ། །དེའི་ཁོང་ནས་ཁྱིམ་གྱི་རྩངས་པ་ཕུག་རོན་གྱི་མདོག་ཅན་བྱུང་ན་དེས་མཆོད་སྦྱིན་བྱེད་པ་དབུལ་པོར་འགྱུར་བར་རྗེས་སུ་དཔག་པར་བྱའོ། །ཁ་དོག་དམར་པོའི་ན་ཀཱུ་ཀ་ལཱ་

ཤ་བྱུང་ན་དེས་ནི་ནད་འབྱུང་བར་རྗེས་སུ་དཔག་པར་བྱའོ། །ཁོང་ནས་སྦྲུལ་སྔོ་བསངས་བྱུང་ན་དེས་ཀྱང་ནོར་ཟད་པ་ཉིད་དོ། །ཁ་ཏྲཱུའི་མདོག་ཅན་གྱི་ཆུ་བྱུང་ན་དེས་ནི་ཆུའི་འཇིགས་པ་ཉིད་རྗེས་སུ་དཔག་པར་བྱའོ། །གདུགས་དང་། རྒྱལ་མཚན་དང་། གཡུང་དྲུང་དང་།

Vol. 53 · folio 264b

དཔལ་བེའུ་དང་། བུམ་པ་དང་། རྔ་ཡབ་དང་། འཁོར་ལོ་དང་། པདྨ་དང་། དགའ་བ་འཁྱིལ་པ་དང་། སྡོང་རིས་དང་ཀུ་ཤ་རྣམས་ནི་མཚན་མ་བཟང་པོ་སྟེ་དེ་ལྟ་བུ་ལ་སོགས་པ་དགེ་བ་དང་མི་དགེ་བའི་མཚན་མ་རྣམས་ཡོངས་སུ་ཤེས་པར་བྱས་ནས་ཤིང་གཅད་པར་

བྱའོ། །དེ་ནས་ཤིང་དེ་དག་ཡང་དག་པར་རྣམ་པར་ཕྱེ་ནས་རྩ་བ་དང་སྐེད་པ་དང་རྩེ་མོའི་མཚམས་རྣམས་ཕྱེ་སྟེ་ཆ་གཅིག་གིས་ལྷག་པའི་ཆ་བཅུའི་ཚད་དུ་བྱ་སྟེ། ཤིང་རྣམས་ཇི་ལྟ་བར་ནགས་ཀྱི་འཁྲུལ་འཁོར་ཡང་དེ་བཞིན་ཏེ་མཆོད་རྟེན་དང་བིམྦ་ལ་སོགས་པའི་ཕྱིར་དུ་ནགས་ཀྱི་

འཁྲུལ་འཁོར་དེ་རྣམས་ཀྱིས་དྲང་བར་བྱའོ།། །།རྡོ་བ་ཡང་ཤིས་པ་རྣམས་གཟུང་བར་བྱ་ཞིང་མི་ཤིས་པ་རྣམས་སྤང་བར་བྱའོ། །དེ་ལ་རིའི་ལྗོངས་དང་ངམ་གྲོག་དང་ཆུ་འགྲམ་ལ་སོགས་པར་གནས་པའི་རྡོ་བ་མཁྲེགས་པ་དང་སྲ་བ་དང་དྲི་ཞིམ་པ་དང་ཤིན་

ཏུ་རེག་ན་མཉེན་པ་དང་དྲི་ང་བ་མེད་ཅིང་འཇམ་པ་དང་སྣུམ་པས་ནི་ཚེ་དང་ལྡན་ནོ། །འདི་ལ་ཤིས་པ་གཉིས་ཏེ་དཀར་པོ་དང་སེར་པོ་དང་དམར་པོ་དང་ལྗང་གུ་དག་དང་། རྡོ་བ་ནག་པོ་ལ་གལ་ཏེ་རི་མོ་དཀར་པོ་ཕྲ་མོ་དང་ཐིག་ལེ་དང་ལྡན་པ་དེའི་ཚེ་བློན་དང་ལྡན་པ་དང་། བཟའ་

མིའི་རྒྱུད་དང་རིགས་དང་རྒྱལ་སྲིད་དང་ནོར་དང་འབངས་རྣམས་ལ་ཤིས་སོ། །སྟེང་དང་བྱང་དང་དབང་ལྡན་དང་ཤར་གྱི་ཕྱོགས་སུ་གདོང་ཕྱོགས་པས་ནི་གྲངས་བཞིན་དུ་མཁའ་སྤྱོད་ཀྱི་དངོས་གྲུབ་དང་སྐྱེ་བོ་དང་ནོར་དང་རིགས་རྒྱུད་འཕེལ་ལོ། །ཐར་པ་དང་མངོན་པར་

འདོད་པའི་དངོས་གྲུབ་སྦྱིན་པའི་རྡོ་བ་རྣམས་གཟུང་བར་བྱའོ། །ཤིན་ཏུ་འཇམ་པའི་གཟོང་གིས་བསྣུན་པ་ན་བྱེ་མ་དང་བཅས་པ་དང་། རྩུབ་པ་དང་བྲལ་བ་དང་གོག་སྒྲ་ཅན་གྱི་རྡོ་བ་རྒན་པོ་འདི་དག་ཡོངས་སུ་སྤང་ངོ་། །དེ་ལྟར་ཤིས་པ་དང་མི་ཤིས་པའི་རྡོ་བ་རྣམས་ཤེས་

པར་བྱས་ནས་ཤིས་པའི་རྡོ་བ་རྣམས་བ་ཡི་རྣམ་ལྔས་བྱུགས་ཏེ་དྲི་བཟང་པོའི་ཆུས་ཁྲུས་བྱས་ནས་དྲི་ལ་སོགས་པ་རྣམས་ཀྱིས་རྒྱས་པའི་སེམས་ཀྱིས་མངོན་པར་མཆོད་དེ་ཤིང་གི་སྐབས་སུ་བཤད་པའི་ལས་རྣམས་ཐམས་ཅད་འདིར་ཡང་བྱའོ། །དེ་ནས་གྲོང་ཁྱེར་དུ་འཇུག་པའི་

Vol. 53 · folio 265a

དུས་སུ་ཤིང་རྣམས་དང་། རྡོ་བ་རྣམས་རྒྱལ་པོའི་སྐྱེས་བུ་རྣམས་ཀྱིས་རྒྱས་པའི་སེམས་ཀྱིས་དྲང་བར་བྱ་ཞིང་སྔ་མ་བཞིན་དུ་མར་མེ་དང་སིལ་སྙན་སྣ་ཚོགས་ཀྱི་སྒྲ་དང་ཅ་ཅོ་དང་བཅས་ཏེ་ཤིན་ཏུ་གུས་པ་དང་བཅས་པས་ཞུགས་ཏེ། རྒྱ་ཆེ་ཞིང་མཉམ་པའི་

སར་བཀོད་དེ་པདྨའི་དབུས་སུ་གཞག་པར་བྱའོ། །གཙུག་ལག་ཁང་སོགས་བཞེངས་པ་ལ་ཉེ་བར་མཁོ་བའི་ས་བརྟག་པ་དང་ཤིང་དང་རྡོ་བའི་ཆོ་ག་འདི་སྔགས་ཀྱི་གཞུང་ལུགས་ཆེ་བ་ཞིག་གིས་དུམ་བུར་མངོན་ནོ། །འདིའི་རྒྱ་དཔེ་གཉལ་གྱི་ཕྱོགས་ནས་རྙེད་དེ་ལྷ་དང་བཅས་པའི་

སྐྱེ་དགུ་མཐའ་དག་གི་གཙུག་གི་ནོར་བུས་ཞབས་རྟེན་གྱི་པདྨ་ལ་ཕྱག་བྱས་པའི་འདྲེན་པ་དམ་པ་ཆོས་ཀྱི་རྗེ་རིན་པོ་ཆེ་ཞྭ་དམར་ཅོད་པན་འཛིན་པ་བཞི་པའི་ཞལ་སྔ་ནས་བསྒྱུར་ཅིག་ཅེས་གསུང་བ་བཞིན་དུ་ཞ་ལུ་ལོ་ཙཱ་བས་དཔལ་སྣེའུ་གདོང་རྩེར་བསྒྱུར་བའོ།། །།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words