འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་ཐབས་གསང་བའི་སྒྲོན་མ་ཞེས་བྱ་བ

Sanskrit title (Tibetan script, as in the text) ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་གུ་ཧྱ་སཱ་དྷ་ན་པྲ་དཱི་པ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 66 · folio 46b

༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་གུ་ཧྱ་སཱ་དྷ་ན་པྲ་དཱི་པ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་ཐབས་

གསང་བའི་སྒྲོན་མ་ཞེས་བྱ་བ། འཕགས་པ་འཇམ་དཔལ་དང་པོའི་སངས་རྒྱས་ལ་ཕྱག་འཚལ་ལོ། །དེ་ལ་དང་པོར་བསྙེན་པ་ནི། གནས་དབེན་པར་འདུག་སྟེ། རྣལ་འབྱོར་པས་ཁྲུས་དང་། བསྲུང་བ་དང་། གོས་བརྗེ་བ་དང་། བྱུག་པས་བྱུགས་ཏེ། གནས་དང་སྟན་

བསངས་ཏེ་འདུག་ནས། རང་རྡོ་རྗེ་འཆང་དུ་མོས་པའི་སྙིང་གར་ཉི་མ། དེའི་སྟེང་དུ་ཧཱུཾ་ལས་རྡོ་རྗེ། དེའི་ལྟེ་བ་ལ་ཧཱུཾ་ལས་འོད་འཕྲོས་པས་གནས་བསྲུངས་ཏེ། མཆོད་པ་བྱིན་གྱིས་བརླབས་ལ། རྡོ་རྗེ་འཁོར་ལོས་ཞིང་སྤྲུལ་ནས། བདག་དང་འབྲེལ་པར་བྱས་ལ། ཚོགས་

བསགས་པར་བྱའོ། །ཚོགས་བསགས་པ་ནི། ཕྱག་འཚལ་ཞིང་བདག་སྤྲོ་བ་བསྐྱེད་པ་དང་། མཆོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་དང་།

བདག་འབུལ་བ་དང་། དངོས་གྲུབ་བླང་བ་དང་། འདུད་ཀྱིས་བསྟོད་པ་དང་། བསྔོ་བའོ། །ལྷ་རྣམས་ཀྱིས་དྲིན་ལན་གྱི་ཚུལ་དུ་ཚུར་བསྟོད་པའོ། །དེ་དག་ནི་དང་པོ་སྦྱོར་བའི་ཏིང་ངེ་འཛིན་ཏོ། །དེ་ནས་སྡོམ་པ་བཟུང་། དེ་ནས་འཁོར་ལོ་བདག་ལ་བསྡུ། སྟོང་པར་བསྒོམས་

Vol. 66 · folio 47a

ཡེ་ཤེས་ཀྱི་ལུས་སུ་ལྡང་། དེ་ནས་མངོན་པར་བྱང་ཆུབ་པ་ལྔ་བསྒོམ་མོ། །དེ་དག་ནི་ཡོངས་སུ་དག་པའི་ཏིང་ངེ་འཛིན་ཏོ། །དེ་ནས་གཞལ་ཡས་ཁང་གདན་དང་བཅས་པ་བསྒོམ་མོ། །དེ་དག་ནི་གཞིའི་ཏིང་ངེ་འཛིན་ཏོ། །དེ་ནས་ཁང་བུའི་དབུས་སུ། སེང་གེ་

དང་པདྨའི་སྟེང་དུ། ཨ་ལས་རྡོ་རྗེ་འཆང་དུ་བསྐྱེད་དེ། སྐུ་མདོག་དཀར་པོ་ཞལ་བཞི་པ། བྱང་ཆུབ་མཆོག་གི་ཕྱག་རྒྱས་རྡོ་རྗེ་རྩེ་ལྔ་པ་བསྣམས་པའོ། །དེའི་ཐུགས་ཀར་དང་པོའི་སངས་རྒྱས་སོ། །དེ་དག་ནི་དང་པོའི་སངས་རྒྱས་བསྒོམ་པའི་ཏིང་ངེ་འཛིན་ཏོ། །དེ་ནས་སྙིང་གའི་

ཡེ་ཤེས་སེམས་དཔའ་ལ་དམིགས་ཏེ། མཚན་ཡང་དག་པར་བརྗོད་པ་མཚན་མ་བཟང་པོ་མ་བྱུང་གི་བར་དུ་བཟླས་པར་བྱའོ། །དེ་དག་ནི་ཐུན་མོང་གི་བསྙེན་པའོ། །དེ་ནས་ཚོམ་བུའི་དཀྱིལ་འཁོར་དུ། རོ་ལ་བསྙེན་པ་ཞག་ལྔ་བྱ་སྟེ། ཀུན་རིག་གི་སྔགས་བཟླས་པའི་སྤོས་ཆུས་

བཀྲུ། དེ་ནས་བགེགས་བསྐྲད་པ་ནི། དཀོན་མཆོག་གསུམ་ལ་ཕྱག་འཚལ་ལོ་ཞེས་བྱ་བ་ལ་སོགས་པ་བདེན་པ་བདར་ལ། ཚེ་འདས་པ་འདི་ལ་གསོན་གྱི་དུས་སུ་བརྙས་བྱེད་ཅིང་། གཤིན་གྱི་དུས་སུ་གེགས་བྱེད་པའི་བགེགས་དང་ལོག་འདྲེན་གང་དག་ཡོད་པ་དེ་དག་ཐམས་ཅད་སྐད་ཅིག་ཀྱང་

མ་གནས་པར་དེངས་ཤིག་ཅེས་བྱས་ལ་ཡུངས་ཀར་བརྡེག་ཅིང་། སྔགས་ཁྲོ་བོའི་སྙིང་པོ། །ཨོཾ་ཡ་མཱནྟ་ཀ་ཧཱུཾ་ཕཊ། ཅེས་བཟླས་སོ། །དེ་ནས་ཤེས་པ་དགུག་པ་ནི། གོང་གི་བདེན་པ་བདར་ལ་ཚེ་འདས་པ་མིང་འདི་ཞེས་བྱ་བ་ཁྱོད། འདི་ནས་ཤི་བའི་དུས་བྱས་ནས། ངན་སོང་

གསུམ་ལ་སོགས་པ་འགྲོ་བ་གང་ན་གནས་ཀྱང་རུང་སྐད་ཅིག་གིས་འདིར་ཁུགས་པར་གྱུར་ཅིག །ཨོཾ་སརྦ་བིད་སརྦ་པཱ་པཾ་ཨཱ་ཀཪྵ་ཡ་ཧཱུཾ་ཛཿཨ་ཎི་སུཾ་ཏྲི་པྲེ་དུ་ཛ། ཞེས་བརྗོད་ཅིང་སྙིང་ག་ནས་འོད་ཟེར་འཕྲོས་པས་ཀྱང་བཀུག་པར་བསམ་མོ། །ཛཿཧཱུཾ་བཾ་ཧོཿས་བསྟིམས་ལ་གཞག་གོ། །དེ་ནས་

ཡང་དུག་གཞོམ་པའི་ཚིགས་སུ་བཅད་པ་དང་། ཀུན་རིག་གི་སྔགས་ཀྱིས་བཀྲུས་ལ། རོ་བྱིན་གྱིས་བརླབས་ཏེ། རང་གི་ལྷ་རུ་བསྒོམས། ཡི་གེ་ཨ་སྤྱི་བོར་བསམས་ནས། འོད་འཕྲོས་པས་ཡེ་ཤེས་ལྔ་ཡིས་གང་བར་བསམ་མོ། །དེ་ནས་རང་ཨའི་སྤྲོ་བསྡུའོ། །དེ་ནས་རང་གི་

Vol. 66 · folio 47b

མིག་ལ་ཨ་ཨཱ་ཞེས་བྱ་བ་དགོད། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་ལ་ཡང་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་དགོད་པར་བྱའོ། །ཡིད་ལ་ཨཾ་ཨཿདགོད་པར་བྱའོ། །ལྟེ་བ་དང་། སྙིང་ག་དང་། མགྲིན་པ་དང་། མཚོག་མར་འཁོར་ལོ་བཞི་བསྒོམ་པར་བྱའོ། །དེ་ནི་སྔོན་དུ་བྱ་

བའི་ཆོ་གའོ། །དེ་ནས་རོ་སྟ་གོན་ལ་གནས་པ་ནི། ཚོམ་བུའི་དཀྱིལ་འཁོར་གྱི་དབུས་སུ་ཁྲི་དར་གྱིས་བགབ་པའི་སྟེང་དུ་བཞག་སྟེ། སློབ་དཔོན་སྨྱུང་བར་གནས་པས་གོང་དུ་བསྟན་པ་བཞིན་དུ་ཚོགས་བསགས་པའི་ཆོ་ག་བྱས་ལ། དེ་ནས་དབང་བསྐུར་བའི་ཕྱིར་ཚིག་འདིས་གསོལ་བ་གདབ་

པའོ། །དེ་ནས་ཕྱག་བྱས་སྤོས་ཐོགས་ལ། སྤྱན་དྲང་ཚིག་འདི་བརྗོད་པར་བྱའོ། །ཀྱེ་དབང་བསྐུར་ངེས་ཏེ་བླ་ན་མེད། །ཕྱོགས་བཅུར་བཞུགས་པའི་སངས་རྒྱས་རྣམས། །མ་ལུས་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །འདི་ལ་ཕན་

གདགས་དོན་ཆེད་དུ། །གནས་འདིར་སངས་རྒྱས་ཀུན་གཤེགས་ཏེ། །འདི་ལ་དབང་ནི་སྩལ་དུ་གསོལ། །ཞེས་བརྗོད་ལ། དང་པོའི་སྦྱོར་བ་དང་། དཀྱིལ་འཁོར་རྒྱལ་མཆོག་དང་། །ལས་རྒྱལ་མཆོག་རྣམས་བསྒོམས་ལ། སྐུའི་ཕྲེང་བའི་སྔགས་ཀྱིས་ལྷ་རྣམས་བསལ་བྱའོ། །

དེ་ནས་ཏིང་ངེ་འཛིན་གྱི་དཀྱིལ་འཁོར་དུ་དབང་བསྐུར་ལ་དམ་ཚིག་ལ་གཞག་པར་བྱའོ། །དེ་ནས་ཞག་ལྔར་རོའི་ལྷག་པའི་ལྷའི་སྙིང་པོའམ། སྐུའི་ཕྲེང་བའི་སྔགས་ཀྱི་བཟླས་པ་བྱའོ། །དེ་ནས་ཚོམ་བུའི་དཀྱིལ་འཁོར་གྱི་ཤར་ཁྲུ་གང་དོར་བར་ཞི་བའི་ཐབ་ཁུང་བྱས་ལ། ཏིལ་ནག་པོ་

ལ་སྡིག་པའི་གཟུགས་བརྙན་བྱས་ཏེ། སྡིག་པ་སྦྱོང་བའི་སྦྱིན་སྲེག་ཞག་གཅིག་བྱའོ། །དེ་ནས་དཀྱིལ་འཁོར་བྲི་བའི་ཆེད་དུ་འདུད་ཉི་ཤུས་བསྟོད་པར་བྱའོ། །དེ་ནས་གསོལ་བ་གདབ་བྱས་ནས། །ཕྱོགས་བཅུའི་སངས་རྒྱས་ནམ་མཁའ་ལ། །མངོན་སུམ་འདྲ་བར་གང་བར་བསྒོམས། །

དེ་དག་ནི་ཤི་བ་སྟ་གོན་ལ་གནས་པའི་ཏིང་ངེ་འཛིན་ཏོ། །དེ་དག་ནི་ཁྱད་པར་གྱི་བསྙེན་པའོ། །དེ་དག་ནི་སྔོན་དུ་བསྙེན་པའོ། །དེ་ནས་ཞག་བདུན་གྱི་ནང་པར་སྦྱིན་སྲེག་ཆེན་པོ་བྱའོ། །སློབ་མས་གསོལ་བ་གདབ་པ་དང་། སློབ་མ་ཡོངས་སུ་གཟུང་བའི་ཆོ་ག་བྱས་ལ། དེ་ནས་དང་པོ་སའི་ཆོ་ག་

Vol. 66 · folio 48a

བྱ་སྟེ། དང་པོ་ས་བརྟག་པ་ནི། སའི་ཕྱོགས་བརྟག་པ་དང་། མཚན་ཉིད་བརྟག་པ་དང་། ཚད་བརྟག་པའོ། །བསླང་བ་ནི། སྣང་བ་དང་། མི་སྣང་བའོ། །སྦྱང་བ་ནི། ལས་དང་། སྔགས་སོ། །གཟུང་བ་ནི། སེམས་ཀྱི་དབང་གིས་གཟུང་བ་དང་། རྫོགས་

པའི་རྣལ་འབྱོར་གྱི་ཏིང་ངེ་འཛིན་གྱིས་གཟུང་བའོ། །བྱིན་གྱིས་བརླབ་པ་ནི་རྡོ་རྗེ་རྒྱུའི་ཏིང་ངེ་འཛིན་གྱིས་སོ། །བསྲུང་བ་ནི་རྡོ་རྗེ་ཕུར་པ་ལ་སོགས་པས་བྱའོ། །དེ་དག་ནི་སའི་ཏིང་ངེ་འཛིན་ཏོ། །སྟ་གོན་ལ་ཡང་། དང་པོ་ལྷ་སྟ་གོན་ལ་གནས་པ་ནི། དྲིའི་ཐིག་ལེ་བྱས་ལ་དེར་དམ་ཚིག་

པ་བསྐྱེད་ནས། ཡེ་ཤེས་ཀྱི་འཁོར་ལོ་སྤྱན་དྲང་ཞིང་བསྲེལ་ལ་མཆོད་པ་རྣམ་པ་ལྔས་མཆོད་དོ། །བུམ་པ་ནི་གྲངས་ཚང་བར་བསགས་ལ། རྒྱན་དང་ཡོ་བྱད་དང་ལྡན་པར་བྱས་ནས། ནང་གཞལ་ཡས་ཁང་དུ་བསྒོམས་ནས། དེར་དམ་ཚིག་པ་བསྐྱེད་ལ། ཡེ་ཤེས་ཀྱི་འཁོར་

ལོ་སྤྱན་དྲང་ཞིང་བསྲེལ་ནས་མཆོད་དེ་བཟླས་པ་བྱས་ལ་གཞག་གོ། །སློབ་མ་ལྷག་པར་གནས་པ་ནི་འཇུག་པ་རྣམས་བསགས་ལ་བྱའོ། །དེ་ཡང་དགུ་སྟེ། ཚིག་གིས་དག་པར་བྱ་བ་དང་། གསོལ་བ་གདབ་པ་དང་། སྡིག་པ་བཤགས་པ་ལ་སོགས་པ་དང་། བྱིན་གྱིས་བརླབ་

པ་དང་། མཆོད་པ་དང་། སོ་ཤིང་སྦྱིན་པ་དང་། སྲུང་སྐུད་གདགས་པ་དང་། ཀུ་ཤ་སྦྱིན་པ་དང་། ཟབ་མོའི་ཆོས་བཤད་པའོ། །དེ་ནས་ལྷ་ཁ་སྦྱར་ལ་གཤེགས་སུ་གསོལ་ཏེ་ཉལ་བར་བྱའོ། །དེ་ནས་ནང་པར་རྨི་ལམ་དྲི་བར་བྱའོ། །དེ་དག་ནི་སྟ་གོན་གྱི་ཏིང་ངེ་འཛིན་ཏོ། །དེ་ནས་

ཐིག་གདབ་པར་བྱའོ། །ཐིག་ལ་བཅུ་གཅིག་སྟེ། རྒྱུ་དང་། འཁལ་མཁན་དང་། ཚད་དང་། བྱིན་གྱིས་བརླབ་པ་དང་། དབྱེ་བ་དང་། ངེས་ཚིག་དང་། གདབ་པའི་གནས་དང་། འདེབས་པའི་ཏིང་ངེ་འཛིན་དང་། གདབ་པའི་ཐབས་དང་། ཆོ་ག་ཉམས་

པའི་ཉེས་པ་དང་། བགེགས་བསལ་བས་སོ། །གདབ་པའི་ཐབས་ནི། དང་པོ་ཚངས་པའི་ཐིག །དེ་ནས་ལོགས་ཐིག །དེ་ནས་ཟུར་ཐིག །དེ་བཞིན་དུ་ཆ་དང་། ཆ་བྲན་དང་། སྐོར་ཐིག་དང་། སྒོ་ཐིག་ཡན་ཆད་བཏབ་ལ། ཕོ་བྲང་འཁོར་ལོ་རྩིབས་བརྒྱད། དེའི་ཕྱིར་

Vol. 66 · folio 48b

རོལ་དུ་རྩིབས་བཅུ་དྲུག །དེའི་ཕྱི་རོལ་དུ་ལྷའི་སྣམ་བུའི་ཐིག་གདབ་བོ། །དེ་དག་ནི་ཐིག་གི་ཏིང་ངེ་འཛིན་ཏོ། །དེ་ནས་ཚོན་དགྱེ་བར་བྱའོ། །དེ་ལ་བཅུ་གཉིས་ཏེ། རྒྱུ་དང་། འཐག་པའི་མཁན་པོ་དང་། ཚད་དང་། བྱིན་གྱིས་བརླབ་པ་དང་། དབྱེ་བ་དང་། ངེས་ཚིག་དང་། དགྱེ་བའི་གནས་དང་། འགྱེད་མཁན་

དང་། དགྱེ་བའི་ཐབས་དང་། ཆོ་ག་ཉམས་པའི་ཉེས་པ་དང་། བར་ཆད་ཀྱི་བགེགས་བསལ་བའོ། །དགྱེ་བའི་ཐབས་ནི། འཁོར་ལོ་ཀུན་སེར་པོ། ལྟེ་བ་དཀར་པོ། ཤར་སྔོན་པོ། ལྷོ་སེར་པོ། ནུབ་དམར་པོ། བྱང་ལྗང་གུའོ། །པཉྩ་ར་ག་ནི། ནང་དུ་དཀར་པོ། དེའི་ཕྱི་རོལ་སྔོན་

པོ། །དེ་ནས་སེར་པོ། །དེ་ནས་དམར་པོ། །ཀུན་གྱི་ཕྱི་རོལ་ལྗང་གུའོ། །དེ་ནས་ཕྱག་རྒྱ་དགོད་པ་ནི། འཁོར་ལོའི་ལྟེ་བ་ལ་རྡོ་རྗེ་འཛིན་ཆེན་པོ། །འཁོར་ལོ་རྩིབས་བརྒྱད་པ་ལ། རྒྱལ་བ་རིགས་བཞི། ཡུམ་བཞི་སྟེ་བརྒྱད་བྲིའོ། །རྩིབས་བཅུ་དྲུག་པོ་ལ་སེམས་དཔའ་བཅུ་

དྲུག་བྲིའོ། །གྲྭ་ལ་མཆོད་པ་བརྒྱད་བྲིའོ། །སྣམ་བུ་ལ་བསྐལ་པ་བཟང་པོ་བྲིའོ། །སྒོ་བཞིར་སྲུང་མ་བཞི་བྲི་བར་བྱའོ། །དེ་དག་ནི་ཚོན་གྱི་ཏིང་ངེ་འཛིན་ཏོ། །དེ་ནས་སྔར་བསྙེན་པར་བྱས་པའི་རོ་དེ་བསྲེག་ཁང་དུ་དྲང་སྟེ། བུར་ལེགས་པར་བཅས་ལ་དེར་བཅུག་ནས་ཤིང་རྟ་ལ་སོགས་

པས་དྲངས་ནས། ཞར་ལ་བགེགས་བཟློག་པ་དང་། དུག་སྦྱང་བའི་ཚིགས་བཅད་སླུར་ལེན་ཞིང་རོལ་མོ་ལ་སོགས་པས་དྲངས་ལ། བསྲེག་ཁང་ལ་སྔགས་མཁན་དང་བཅས་པས་བསྐོར་བ་ལན་གསུམ་བྱས་ལ། ཤར་ཕྱོགས་ནས་གཞུག་བར་བྱའོ། །ནུས་ན་གཟུགས་བརྙན་གྱི་དཀྱིལ་

འཁོར་དུ་གཞུག་པ་དང་དབང་ཡང་བསྐུར་བར་བྱའོ། །དེ་དག་བྱས་ནས་དཀྱིལ་འཁོར་གྱི་རྒྱན་དང་ཡོ་བྱད་རྫོགས་པར་བཀོད་ནས། ལྷག་ཆད་བསྐང་བ་ལ་སོགས་པ་བྱས་ནས་སློབ་དཔོན་རྡོ་རྗེ་འཆང་ཆེན་པོའི་ཏིང་ངེ་འཛིན་དུ་འཇུག་པར་བྱའོ། །དེ་དག་ནི་སློབ་དཔོན་གྱི་ཏིང་ངེ་འཛིན་ཏོ། །

དེ་ནས་དམ་ཚིག་གི་འཁོར་ལོ་བསྒོམས་པ་ནི། ཁ་སྦྱར་ཡང་བསལ་ལ་གཟུགས་བརྙན་དང་བསྲེས་ཏེ། ཆོ་ག་ཡན་ལག་གསུམ་གྱིས་དམ་ཚིག་གི་ལྷ་རྣམས་བསྒོམ་པར་བྱའོ། །དེ་ནས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ། མདུན་གྱི་ནམ་མཁའ་ལ་བསྟོད་པ་བྱ། དེ་ནས་

Vol. 66 · folio 49a

ཛཿཧཱུཾ་བཾ་ཧོཿ བཞིས་དགུག་གཞུག་བཅིང་བ་བྱས་ལ། ཏིང་ངེ་འཛིན་དང་། བྱིན་གྱིས་བརླབ་པ་དང་། དབང་བསྐུར་བ་དང་། མཆོད་པ་ཕུལ་ལ་བསྟོད་པ་བྱའོ། །དེ་ནས་མཐོང་བ་ནང་གི་འཇུག་པ་བྱའོ། །དེ་དག་ནི་ལྷ་བསྒོམ་ཞིང་མཆོད་པའི་ཏིང་ངེ་འཛིན་ཏོ། །དེ་

ནས་ཨོཾ་ཛྭ་ལ་ཛྭ་ལ་ཞེས་མེ་སྦར་ལ་པྲ་བརྟག་པར་བྱའོ། །པྲ་ལེགས་ན་མེའི་དབུས་སུ་འཇམ་དཔལ་ཡེ་ཤེས་སེམས་དཔའ་བསྐྱེད་ལ་དེ་ཞུ་བ་ལས་དྲང་སྲོང་ཆེན་པོ་མེ་ལྷ་ཞི་བ་ལ་བ་ཀ་ཞེས་བྱ་བ། ཞི་ཞིང་དཀར་པོ་དབུ་གཅིག་པ། ཕྱག་བཞི་པ། མིག་གསུམ་པ། རལ་པའི་ཐོར་ཚུགས་

དང་ལྡན་པ། ཕྱག་དང་པོ་ན་བེར་དཀར། གཉིས་པ་ན་མཆོག་སྦྱིན། གཡོན་དང་པོ་ན་ཕྲེང་བ། གཉིས་པ་ན་གུནྡྷེ། གོས་དང་རྒྱན་དཀར་པོ། མཆོད་ཕྱིར་ཐོགས་དཀར་པོ། ཡན་ལག་ཐམས་ཅད་ནས་རྡོ་རྗེ་དཀར་པོ་འབྱུང་བ་མངོན་སུམ་དང་འདྲ་བར་བསྒོམ་མོ། །དེ་ནས་འཐོར་

འཐུང་དང་བསང་བ་བྱ་ལ། མཚན་ཉིད་མེད་པའི་མེ་སྤྱན་དྲང་བར་བྱ་སྟེ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །བསྲེག་བླུགས་ཞལ་ཟས་བཞེས་སླད་དུ། །འབར་བའི་ནང་དུ་གཤེགས་སུ་གསོལ། །

ཞེས་བརྗོད་ལ། རང་གི་སྙིང་ག་ནས་ཁྲོ་བོ་འདོད་པའི་རྒྱལ་པོ་སྤྲོས་ལ། ཊཀྐི་ཧཱུཾ་ཛཿཞེས་བརྗོད་དོ། །དེ་ནས་མདུན་གྱི་ནམ་མཁའ་ལ། ཚངས་པ་འཇིག་རྟེན་མགོན་གྱི་སྲས། བྱ་བ་ལ་སོགས་པས་བསྟོད་དོ། །དེ་ནས་ནང་དུ་དགུག་གཞུག་བཅིང་དབང་དུ་བྱའོ། །དེ་ནས་བཛྲ་སནྡྷི་ཞེས་

བརྗོད་དོ། །དེ་ནས་ཏིང་ངེ་འཛིན་དང་ལྡན་པར་བྱ། བྱིན་གྱིས་བརླབ་དབང་བསྐུར། དེ་ནས་ཨོཾ་ཧ་ན་ས་མ་ཡ་ཧཱུཾ་ཕཊ། ཅེས་བརྗོད་ལ་དམ་ཚིག་ལ་གཞག་པར་བྱའོ། །དེ་ནས་ཨོཾ་བཛྲ་བནྡྷ་ཞེས་བརྗོད་ལ་ལས་འདི་མཛོད་ཅིག་ཅེས་བསྒོའོ། །དེ་ནས་མཆོད་པའི་ཡན་ལག་གིས་མཆོད། །

དེ་ནས་བསྟོད་པ་བྱའོ། །དེ་ནས་བསྲེག་རྫས་རྣམས་དབུལ་ཏེ། རྡོ་རྗེ་གནོད་སྦྱིན་གྱིས་བསངས་ལ། མེ་ལྷའི་ལྕེ་དང་གཟར་བུའི་ཁ་ལ་ལྷའི་ས་བོན་བཀོད་ནས། པུས་མོའི་བར་དུ་ལག་པ་བཞག་ནས། དང་པོ་མར་གྱི་དགང་བླུགས་གསུམ་ཞལ་ཅུང་ཟད་གདངས་པར་དབུལ་ལོ། །ཨོཾ་ཨགྣ་

Vol. 66 · folio 49b

ཡེ་ཧ་བྱ་ཀ་བྱ་བ་ཧ་ནེ་དི་བྱཱ་དི་བྱཱ་དྷི་པ་ཡེ་ཤཱནྟིཾ་ཀུ་རུ་སྭཱ་ཧཱ། ཞེས་དབུལ་ལོ། །བགེགས་ཀྱི་མཚན་མ་ཡང་ཤེས་པར་བྱའོ། །ཡང་བསང་གཏོར་བྱས་ལ། མར་གྱི་དགང་བླུགས་བདུན་དབུལ་ལོ། །ཨོཾ་སརྦ་པཱ་བཾ་ད་ཧ་ན་སྭཱ་ཧཱ། ཏིལ་གྱིའོ། །ཨོཾ་སརྦ་སཾ་པ་དེ་སྭཱ་ཧཱ། ཞོའིའོ། །ཨོཾ་སརྦ་བྷསྨི་ཀུ་

རུ་སྭཱ་ཧཱ། ཨུཏྤ་ལའིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དུར་བའིའོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་མ་ཆག་པའིའོ། །ཨོཾ་བཛྲ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའིའོ། །ཨོཾ་བཛྲ་བི་ཛཱ་ཡ་སྭཱ་ཧཱ། འབྲས་ཀྱི་ལག་པན་གྱིའོ། །ཨོཾ་བཛྲ་མ་ལེ་པུཥྚ་ཡེ་སྭཱ་ཧཱ། མངར་གསུམ་དང་

དཀར་གསུམ་གྱིའོ། །ཨོཾ་མ་ཧཱ་བེ་གཱ་ཡ་སྭཱ་ཧཱ། ནས་ཀྱིའོ། །ཨོཾ་མ་ཧཱ་པ་ལཱ་ཡ་སྭཱ་ཧཱ། སྲན་མ་ཤའིའོ། །ཨོཾ་བཛྲ་གྷསྨ་རེ་སྭཱ་ཧཱ། གྲོའིའོ། །ཨོཾ་བཛྲ་ཨ་ཛྙཱ་ན་སྭཱ་ཧཱ། ཡམ་ཤིང་དང་། དཱུར་བའི་མྱུ་གུའིའོ། །ཨོཾ་བོ་དྷི་བྲྀཀྵཱ་ཡ་སྭཱ་ཧཱ། བྱང་ཆུབ་ཀྱི་ཤིང་ལ་སོགས་པའོ། །ཨོཾ་བཛྲ་ར་ཏ་

ཡ་སྭཱ་ཧཱ། ནྱ་གྲོ་དྷའིའོ། །ཨོཾ་བཛྲ་ཡ་ཀ་ར་སྭཱ་ཧཱ། ཨ་མྲའིའོ། །ལན་གྲངས་ཅི་ནུས་དབུལ་ལོ། །དེ་ནས་བསྟོད་པ་བྱ། དེ་དག་ནི་མེ་ལྷའི་ཏིང་ངེ་འཛིན་ཏོ། །དེ་ནས་བསང་གཏོར་བྱས་ལ། དེ་ནས་མེ་ལྷའི་སྙིང་གར་གཞལ་ཡས་ཁང་བསྒོམས་ལ། གཟུགས་བརྙན་གྱི་དཀྱིལ་

འཁོར་ནས་བསྲེག་ཁང་དུ་མེ་ཏོག་གི་རི་མོ་འམ། དུས་གཅིག་ཏུ་སྤྱན་དྲང་ཞིང་དབུལ་ལོ། །སྤྱན་དྲང་བ་ནི། ཧཱུཾ་མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མ་ལུས་འཇོམས་མཛད་པ། །དངོས་རྣམས་མ་ལུས་ཇི་བཞིན་མཁྱེན་གྱུར་པ། །བཅོམ་ལྡན་

འཁོར་བཅས་འདིར་ནི་གཤེགས་སུ་གསོལ། །དེ་ནས་བསྟོད་པ་དང་། དེ་ནས་དགུག་གཞུག་བཅིང་དབང་དུ་བྱ། ཨོཾ་བཛྲ་སནྟི་བཾཾ་ཞེས་བརྗོད། མཆོད་ཡོན་དང་ཞབས་བསིལ་དབུལ། ཕྱག་རྒྱས་གདབ། བདེ་བར་གཤེགས་པ་རྣམས་རྡོ་རྗེ་དབྱིངས་ཀྱི་དབང་ཕྱུག་མས་བྱིན་གྱིས་

བརླབ། སེམས་དཔའ་རྣམས་གནས་བཞིར་ཡུམ་བཞིས་བརླབ། བདེ་བར་གཤེགས་པ་རྣམས་རིན་པོ་ཆེའི་ཅོད་པན་དར་དཔྱངས་ཀྱིས་དབང་བསྐུར། སེམས་དཔའ་རྣམས་རིགས་ལྔའི་ཅོད་པན་གྱིས་དབང་བསྐུར་རོ། །དེ་ནས་མཆོད་པ་རྣམ་པ་ལྔ་ལ་སོགས་པས་མཆོད། དེ་

Vol. 66 · folio 50a

ནས་བསང་བ་དང་། འཐོར་འཐུང་བྱས་ལ་གོང་མ་ལྟར་རྫས་སྔགས་སམ། ཡང་ན་སྤྱི་སྔགས་སམ། ལྷའི་སྔགས་ཀྱིས་དབུལ་ལོ། །དེ་ནས་བསང་བ་དང་འཐོར་འཐུང་བྱིན་ལ། མར་གྱི་དགང་བླུགས་ཕུལ་ལ་འདུད་ཉི་ཤུས་བསྟོད་པ་བྱའོ། །ཡི་གེ་བརྒྱ་པ་

བཟླས། ཨོཾ་བཛྲ་མུཿཞེས་ཕྱག་རྒྱ་བཀྲོལ་ལ་བསྐྱེད་པ་སྙིང་གར་བསྡུ། སྤྱན་དྲངས་པ་གཤེགས་སུ་གསོལ་ཏེ། འགྲོ་བ་འདི་དག་ཀུན་གྱི་དཔུང་། །སེམས་དཔའ་ཆེན་པོ་བརྟན་མཛོད་ལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་གཤེགས་པར་མཛད་དུ་

གསོལ། །དེ་ནས་བསང་གཏོར་བྱས་ལ། སླར་ཡང་མེ་ཐབ་ཏུ་བསམས་ལ། མཆོད་ཡོན་ལ་སོགས་བྱིན་ལ། རྫས་ལྷག་མ་ཀུན་སྦྱིན་སྲེག་བྱས། ཐ་མར་ཡང་། དགང་བླུགས་དང་འཐོར་འཐུང་ཕུལ་ལ། འདོད་པའི་དོན་ལ་གསོལ་བ་གདབ་པར་བྱའོ། །ཕྱག་རྒྱ་དགྲམ་

པར་བྱས་ལ། སྔ་མ་བཞིན་གཤེགས་སུ་གསོལ་ཏེ། ཨོཾ་ཨཱཿཧཱུཾ་མུཿ། ཞེས་བརྗོད་ལ། ཁྲོ་བོ་ཏི་རིནྟི་རིའི་ཕྱག་རྒྱ་བཅིངས། གྱེན་དུ་བཀྲོལ་ལ་གཤེགས་སུ་གསོལ། གཏོར་མ་གཏང་། ཕྱག་བཙལ། མཆོད་བསྟོད། བཟོད་པར་གསོལ། དངོས་གྲུབ་བླང་།

དགེ་བའི་རྩ་བ་བསྔོ། ཕྱག་རྒྱ་དགྲོལ། བསྐོར་བ་བྱ། གཤེགས་སུ་གསོལ། བསྐྱེད་པ་བསྡུ། དམན་མ་ཕྱག །ཕྱོགས་སྐྱོང་གསོལ། ཐ་མ་སློབ་མ་བསྲུང་ལ་དགྱེའོ། །དེ་ནས་སྐར་མ་བཟང་པོ་ལ། རུས་པ་བསྡུས་ལ། ཚ་ཚ་འདེབས་པར་གཞག་གོ། །བདག་གིས་སྒྲུབ་

ཐབས་ལེགས་སྦྱར་བས། །འཇམ་དཔལ་མཚན་མཆོག་ཐོབ་གྱུར་ཅིག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་ཐབས་གསང་བའི་སྒྲོན་མ་སློབ་དཔོན་ཆེན་པོ་པྲ་ཛྙཱ་གུ་རུས་མཛད་པ་རྫོགས་སོ།།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words