རབ་ཏུ་གནས་པའི་ཆོ་ག་ཞེས་བྱ་བ

Sanskrit title (Tibetan script, as in the text) པྲ་ཏིཥྛཱ་བི་དྷི་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 74 · folio 212a

༄༅༅། །རྒྱ་གར་སྐད་དུ། པྲ་ཏིཥྛཱ་བི་དྷི་ནཱ་མ། བོད་སྐད་དུ། རབ་ཏུ་གནས་པའི་ཆོ་ག་ཞེས་བྱ་བ། འཕགས་མ་གཙུག་ཏོར་ནས་བྱུང་བའི་གདུགས་དཀར་མོ་ཅན་ལ་ཕྱག་འཚལ་ལོ། །བླ་མ་རྗེ་བཙུན་སྤྲུལ་པ་ཡི། །རང་བཞིན་ལྷ་མོ་གུས་བཏུད་དེ། །རབ་གནས་ཆོ་ག་བསྡུས་

པ་ཡི། །མན་ངག་རིམ་པ་བྲི་བར་བྱ། །དེ་ལ་གང་ཟག་ཐམས་ཅད་ལ། །རབ་གནས་འཐད་པ་མ་ཡིན་ཏེ། །སྐྱེ་བ་མེད་པའི་ངོ་བོ་ལ། །གང་གིས་གང་ལ་ཇི་ལྟར་ནི། །རབ་ཏུ་གནས་པར་བྱ་བ་ཡོད། །ཀུན་རྫོབ་ལ་ཡང་གནས་པས་ནི། །དེ་ཡི་བྱིན་རླབས་མི་ཤེས་པས། །རབ་

གནས་ཆོ་ག་འཐད་པ་མིན། །ལས་དང་པོ་ཡི་རྣལ་འབྱོར་ལ། །རྒྱུད་སྦྱངས་དད་དང་ངེས་བསྐྱེད་ཕྱིར། །རབ་ཏུ་གནས་པ་བྱ་བར་གསུངས། །དེ་ལ་དང་པོར་སློབ་མ་ཡིས། །གཞི་དང་རྫས་རྣམས་ཚོགས་གྱུར་ནས། །མཚན་ཉིད་ལྡན་པའི་བླ་མ་ལ། །ལན་གསུམ་བར་དུ་གསོལ་

བ་གདབ། །གནང་བ་བྱིན་ལ་བླ་མ་ཡིས། །བསྙེན་པའི་ཆོ་ག་བརྩམ་པར་བྱ། །རབ་འབྲིང་རྟགས་དང་ལྡན་པས་ནི། །སྟ་གོན་ཆོ་ག་ལ་འབད་བྱ། །ས་ཆོག་ལ་སོགས་སྔོན་འགྲོ་སའི། །དཀྱིལ་འཁོར་ཁྲུས་ཀྱི་སྟེགས་བུ་དག །བསྟར་བ་བ་ཡི་རྣམ་ལྔས་བྱུག །བརྟན་

Vol. 74 · folio 212b

མའི་ཆོ་ག་ཡན་ལག་བྱ། །དེ་ནས་བུམ་པ་མཚན་ཉིད་ལྡན། །བཀྲུ་དང་བརྒྱན་པ་ལ་སོགས་བྱ། །རང་རང་མཚན་མ་བཀོད་ལ་གཞག །བསྐྱེད་དང་བཟླས་པ་རྫོགས་པར་བྱ། །རྣམ་རྒྱལ་བུམ་པར་ཆུ་བསྡུས་ལ། །གཟུངས་ཐག་རྡོ་རྗེས་བཟུང་ལ་གཞག །དེ་ནས་མཆོད་བསྟོད་

རྒྱས་པར་བྱའོ། །བུམ་པ་སྟ་གོན་བྱ་བའོ། །ཟླ་བ་དྲུག་དང་གཟའ་བཞི་དང་། །རྒྱུ་སྐར་བཅུ་བཞི་ལ་བབ་དང་། །ཚེས་གྲངས་བདུན་གྱི་གྲངས་ཉིད་ལ། །རྒྱས་པའི་རབ་གནས་ལ་སོགས་བྱ། །དེ་ནས་རབ་ཏུ་གནས་པའི་གཞི། །དགྲམ་དང་འཕན་གདུགས་རྒྱལ་མཚན་གྱིས། །

གནས་ཁང་བརྒྱན་དང་མཆོད་པ་བཤམ། །ལུགས་མ་ལ་སོགས་སྟེགས་བུ་སྟེ། །རས་རིས་ལ་སོགས་བྱང་དུ་བསྒྲིག །ཁྲུས་དང་མཆོད་པའི་རྫས་ཚོགས་བྱ། །རས་རིས་སྐུ་ལ་དཀྲིས་བྱས་ཏེ། །བྱུར་བསལ་ལ་སོགས་ཆོ་ག་ནི། །ཡུངས་ཀར་ཆུ་དང་འབྲུ་ཟན་དང་། །དཱུར་

བས་བྱབས་ཏེ་སྦྱང་བར་བྱ། །ཨོཾ་བཛྲ་བ་དྲ་ཞེས་པའི་སྔགས་ཀྱིས་སོ། །དེ་ནས་བ་ཡི་རྣམ་ལྔ་དང་། །བདུད་རྩི་ལྔ་ཡིས་སྣོད་བཀང་ལ། །དཱུར་བའི་པིར་གྱིས་བཀྲུ་བར་བྱ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱ་ཧཱ། དེ་ནས་ཏིལ་མར་དྲི་ཞིམ་པ། །སྤོས་ཀྱིས་བསྒོས་པས་གོང་ལྟར་

བྱུག །དེ་ཡི་སྔགས་ནི་འདི་ཡིན་ཏེ། །ཨོཾ་ཧཱུཾ་ཧྲཾ་ཧྲི་བཾ། དེ་ནས་དེ་ནི་བསལ་བའི་ཕྱིར། །ཨུ་དུམྺཱ་ར་ཤིརྴ་དང་། །ཨ་ཤཱངྠ་དང་ནྱ་གྲོ་དང་། །པརྐ་ཏི་ཡི་ཤུན་པ་ཡི། །ཕྱེ་མས་བསྐུས་ཏེ་བཀྲུ་བར་བྱ། །དེ་ནས་སྐྱུ་རུ་ར་སོགས་པ། །འདག་ཆལ་ཀུན་གྱིས་བྱུག་པར་བྱ། །དེ་ནས་

བུམ་པའི་ཆུ་གཙང་དང་། །དྲི་ཞིམ་བདུད་རྩི་ལྔ་ཡིས་བཀྲུ། །བླ་མ་སངས་རྒྱས་བྱང་ཆུབ་སེམས། །གྲུབ་པའི་རིག་འཛིན་ལ་སོགས་ཀུན། །བཀྲ་ཤིས་བརྗོད་དང་མཆོད་བསྟོད་བསམ། །ལྷ་མོས་ཆུ་ནི་བླུགས་བསམ་སྟེ། །ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་

པ་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཨཱཿསྭཱ་ཧཱ། དེ་ནས་ཆུ་ཡི་ཐིགས་པ་དག །རས་བལ་འཇམ་པས་ཕྱི་བར་བྱ། །རས་རིས་གླེགས་བམ་ལ་སོགས་པ། །དངོས་སུ་བཀྲུ་བ་

Vol. 74 · folio 213a

མེད་པ་ལ། །མེ་ལོང་སོགས་ལ་ཁྲུས་སོགས་བྱ། །དེ་ནི་ཁྲུས་ཀྱི་ཆོ་ག་ཡིན། །ཙནྡན་གཉིས་དང་གུར་གུམ་དང་། །ལང་གུ་ལྡན་ཏེ་དྲི་ལྔ་ཡིས། །རྟེན་ལ་ཐིག་ལེ་བྱས་དེ་ནས། །ཨོཾ་བཛྲ་གནྡྷ་ཨཱཿཧཱུཾ་སྭཱ་ཧཱ། དེ་ནས་མཆོད་པ་རྣམ་ལྔ་སོགས། །རང་རང་སྔགས་

ཀྱིས་དབུལ་བར་བྱ། །དེ་ནས་ཡེ་ཤེས་སེམས་དཔའ་ནི། །ནམ་མཁར་སྤྱན་དྲངས་མཆོད་བསྟོད་ལ། །ཁྱད་པར་རིགས་ཀྱི་ལྷ་བལྟས་ཏེ། །ཐུགས་ཀ་སྤྱི་བོ་མགྲིན་པ་དང་། །ཕྲག་པ་རྡོ་རྗེ་དང་བཅས་པས། །རེག་ལ་ལག་ཏུ་སྤོས་ཐོགས་ཏེ། །པུས་མོ་སར་བཙུགས་ལྕེ་ཧཱུཾ་ལས། །

རྡོ་རྗེ་དམར་པོར་བྱ་སྟེ་བརྗོད། །བཅོམ་ལྡན་གཙུག་ཏོར་གདུགས་དཀར་ཅན། །རིག་སྔགས་རྒྱལ་ལ་ཕྱག་འཚལ་བསྟོད། །ཐུགས་རྗེའི་བདག་ཉིད་ཅན་ཁྱོད་ཀྱིས། །སང་ནི་རབ་གནས་བགྱིད་པར་འཚལ། །སློབ་མ་ལ་ནི་བརྩེ་བ་དང་། །ཁྱོད་རྣམས་ལ་ནི་མཆོད་པའི་ཕྱིར། །གུས་

པས་བདག་དང་དེ་ལ་ནི། །བཅོམ་ལྡན་བཀའ་དྲིན་མཛད་པའི་རིགས། །འགྲོ་བ་འཁོར་ལོའི་བྱ་དོན་ཕྱིར། །སངས་རྒྱས་རྣམས་ནི་བདག་ལ་དགོངས། །དགྲ་བཅོམ་བྱང་ཆུབ་སེམས་རྣམས་དང་། །གང་ཡང་སྔགས་ཀྱི་ལྷ་གཞན་དང་། །ལྷ་དང་འཇིག་རྟེན་སྐྱོང་བ་དང་། །བསྟན་

པ་ལ་ནི་མངོན་དགའ་ཞིང་། །བྱང་ཆུབ་ལ་བརྟེན་འབྱུང་པོ་དང་། །རྡོ་རྗེ་སྤྱན་ལྡན་སེམས་ཅན་རྣམས། །རྡོ་རྗེ་འཆང་ཆེན་ཆེ་གེ་བདག །རིགས་པ་ཡི་ནི་རྒྱལ་པོ་ཡི། །ཇི་ལྟར་ནུས་པའི་མཆོད་པ་དང་། །འགྲོ་བ་ཞི་བས་རབ་གནས་བགྱིད། །སློབ་མ་མཆོད་དང་བདག་ལ་ནི། །ཁྱོད་

ཀྱིས་ཐུགས་བརྩེ་ཉེར་བཟུང་ནས། །རབ་གནས་འདི་ལ་ཐམས་ཅད་ཀྱིས། །ཐུགས་བརྩེར་ལྡན་པས་གནས་པར་མཛོད། །དེ་ནས་ཛཿཧཱུཾ་བཾ་ཧོཿཞེས། །ནམ་མཁའི་ལྷ་རྣམས་དམ་ཚིག་བསྟིམ། །བྱིན་རླབས་དབང་བསྐུར་རྒྱས་གདབ་བྱའོ། །དེ་ནས་མཆོད་པ་རྣམ་ལྔ་དང་། །

སྒྲ་ཡི་ཚོགས་པ་དཔག་མེད་དབུལ། །དེ་ནས་བུམ་ཆུས་སླར་ཡང་བཀྲུ། །དེ་ནས་ལྷ་ཡི་སྔགས་དག་ནི། །སྐྱོན་ལྔ་སྤངས་ལ་བཟླས་པར་བྱ། །དེ་ནས་དང་པོར་གསོལ་བཏབ་ལ། །རྣམ་པར་བྱོན་པར་འདོད་པ་ཡིས། །ཚིགས་བཅད་ཡང་ནི་ཡི་གེ་བྱ། །མཐའ་མ་མུཿ

Vol. 74 · folio 213b

ཡིས་མཚན་པས་གཤེགས། །རྫས་ཀྱིས་གཡོགས་ཏེ་གཞག་པར་བྱ། །སློབ་མ་ཡོད་ན་སྟ་གོན་བྱ། །འདི་ནི་ལྷ་ཡི་སྟ་གོན་ནོ། །དེ་ནས། ཐིག་ཚོན་ལ་སོགས་བྱ་བ་ནི། །རྒྱས་པའི་དཀྱིལ་འཁོར་ཆོ་ག་ལྟར། །མཆོད་པའི་དངོས་པོ་གསེར་ཐུར་དང་། །རྒྱན་དང་སྐུ་ཆིངས་

གླེགས་ཤིང་དང་། །ན་བཟའ་ལ་སོགས་རྒྱས་པར་བྱ། །དཀྱིལ་འཁོར་བསྐྱེད་ལ་བཟླས་སོགས་བྱ། །དབང་བླང་དམ་ཚིག་རྫོགས་པར་བྱ། །དེ་ནས་གཞི་མ་བཀྲུ་ལ་སོགས། །གོང་གི་ཆོ་ག་ལྟར་བྱའོ། །དེ་ནས་ས་བོན་ལྷ་བཀུག་ལ། །ནམ་མཁའ་གནས་ལ་མཆོད་

བསྟོད་བྱ། །སྤོས་དང་རྡོར་དྲིལ་ཐོགས་ནས་སུ། །པུས་བཙུགས་གོང་ལྟར་བྱིན་བརླབས་ཏེ། །སང་ནི་རབ་གནས་བགྱིད་ལགས་ན། །ཞེས་པ་བགྱིད་པར་འཚལ་དུ་བསྒྱུར། །དེ་ནས་ཡེ་ཤེས་སྤྱན་དྲངས་ལ། །ཛཿཧཱུཾ་བཾ་ཧོཿས་དགུག་གཞུག་བྱ། །དེ་ནས་མཆོད་བསྟོད་རོལ་མོའི་

སྒྲ། །དཔག་མེད་མཆོད་དང་གནས་གསུམ་བརླབ། །དབང་བསྐུར་བྱས་ཏེ་བུམ་ཆུས་བཀྲུ། །རྣམ་སྣང་རང་གི་རིགས་ཀྱི་ལྷ། །གང་ཡིན་པས་ནི་རྒྱས་གདབ་བོ། །དེ་ནས་དབང་གཞན་རིམ་པས་བསྐུར། །ཨོཾ་བཛྲ་ཨཱ་བྷ་ར་ན་བི་བྷུ་ཥ་ཎི་སྭཱ་ཧཱ། ཞེས་པས་རྒྱན་གྱིས་མཆོད་པ་འབུལ། །

དེ་ནས་རང་རང་རིགས་ཀྱིས་བསྟོད། །གསེར་ཐུར་ཨ་ཛ་ན་བྱུགས་པས། །སྤྱན་དབྱེ་སྔགས་ནི་འདི་ཡིན་ནོ། །ཨོཾ་ཙཀྵུ་ས་མནྟ་ཙཀྵུ་བི་ཤོ་དྷ་ནི་བཛྲེ་སྭཱ་ཧཱ། ཨོཾ་ཨནྡ་ས་མཱ་ངྷི་དྷྱཱ་ནཾ་པྲི་ཎ་ནེ་སྭཱ་ཧཱ། ཞེས་པས་བཟའ་བ་བཟང་པོ་དབུལ། །དེ་ནས་བདུད་རྩི་འཁྱིལ་པ་ཡི། །སྔགས་ཀྱིས་ཞབས་

བཀོད་དབུལ་བ་ནི། །རྡོ་རྗེ་བཟུང་བའི་ལག་གཡས་ཀྱིས། །ལན་གསུམ་བསྐོར་ལ་བརྟན་པར་བྱ། །དེ་ནས་སུ་པྲ་ཏིཥྛ་བཛྲེ་སྭཱ་ཧཱ། ཞེས་པས་གནས་སུ་གཞུག་པར་བྱ། །དེ་ནས་མཆོད་བསྟོད་རྒྱས་པར་བྱ། །དེ་ནས་བླ་མས་སློབ་མ་ལ། །ཁྱོད་ཀྱིས་ང་ལ་གསོལ་བཏབ་པའི། །སྐུ་

གཟུགས་དག་ནི་ཁྱད་པར་དུ། །ཇི་སྐད་གསུངས་བཞིན་སྤྱན་དབྱེ་བ། །དེ་ནི་ངས་ཀྱང་བྱས་འགྱུར་ཏེ། །ཁྱོད་ཀྱི་དེ་ནི་ཀུན་རྫོབ་པས། །ཅི་བདེ་བར་ནི་མཆོད་པར་བྱོས། །ཞེས་བྱ་ཞལ་ཁེབས་ལ་སོགས་བྱ། །དེ་ནས་སློབ་མས་མཆོད་པ་དང་། །བླ་མ་ཡོན་གྱིས་མཉེས་པར་བྱས། །

Vol. 74 · folio 214a

བླ་མས་ལེགས་ལྡན་གཏོར་མས་མཆོད། །བྱིན་ཆེན་བཀྲ་ཤིས་ཡུན་རིང་དུ། །བཞུགས་པར་བཀའ་ཡིས་ཆོས་སྐྱོང་བསྒོ། །གསོལ་བཏབ་ལ་སོགས་བླ་མས་བྱ། །སློབ་མའི་སྒྲིབ་པ་གཞོམ་པ་དང་། །རང་གི་ལྷག་ཆད་བསྐང་བའི་ཕྱིར། །སྦྱིན་སྲེག་ཆོ་གས་བསྐང་

བར་བྱ། །བསྡུ་གཤེགས་སྨོན་ལམ་གདབ་པར་བྱ། །མཆོད་བསྟོད་ལ་སོགས་རྒྱས་པར་བྱ། །རབ་ཏུ་གནས་པའི་ཆོ་ག་འདི། །ཀཱ་མ་དྷེ་ནུའི་རྗེས་འབྲངས་ཏེ། །པདྨའི་ལྕགས་ཀྱུས་མཚན་པ་ཡི། །དགེ་སློང་གིས་སྦྱར་བསོད་ནམས་ཀྱིས། །ཁམས་གསུམ་སེམས་ཅན་ཐམས་ཅད་

ཀྱང་། །སྤྲུལ་པའི་སྐུ་དང་མཉམ་འགྱུར་ཤོག །མང་དུ་ཐོས་པའི་སློབ་དཔོན་པདྨའི་ལྕགས་ཀྱུས་རིགས་ལྡན་ཧ་ར་པའི་སློབ་དཔོན་ཀཱ་མལ་དྷེ་ནུ་པའི་རྗེས་སུ་འབྲངས་ནས་སྦྱར་བ་རྫོགས་སོ།། །།ཨཱ་ཙཱརྱ་བི་ན་ཡ་ཙནྡྲ་དང་། ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་བའོ།།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words