ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས

Sanskrit title (Tibetan script, as in the text) པཱི་ཏ་བརྞ་པྲཛྙཱ་པཱ་ར་མི་ཏཱ་སཱ་དྷ་ནཾ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 77 · folio 181a

༄༅༅། །རྒྱ་གར་སྐད་དུ། པཱི་ཏ་བརྞ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ།

ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་ཨ་ཡིག་ལས་སྐྱེས་པའི་ཟླ་བ་ལ་དྷཱིཿཡིག་སེར་པོ་ལས་སྐྱེས་པའི་སྣ་ཚོགས་པདྨ་ལ་ཧཾ་ཡིག་སེར་པོ་ལ་ཨ་ཡིག་ལ་སོགས་པའི་

Vol. 77 · folio 181b

དབྱངས་བཅུ་དྲུག་གིས་ཡོངས་སུ་བསྐོར་ཞིང་གནས་པའི་ཕྱི་རོལ་དུ་ཀ་ཡིག་ལ་སོགས་པའི་ཡི་གེ་སུམ་ཅུ་རྩ་གཉིས་ཀྱིས་ཡོངས་སུ་བསྐོར་བ་བསྒོམ་པར་བྱའོ། །དེ་ནས་སྒེག་མོ་དང་། ཕྲེང་བ་མ་དང་། གར་མ་དང་། གླུ་མ་དང་། མེ་ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་མ་ཞེས་པའི་

རྣལ་འབྱོར་མ་བརྒྱད་དོ། །དེ་ཐམས་ཅད་ཡོངས་སུ་གྱུར་པ་ལས་ཡེ་ཤེས་ཀྱི་ཟླ་བ་ཤར་བ་འོད་རབ་ཏུ་གསལ་བའོ། །དེའི་སྟེང་དུ་པདྨ། དེའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི། དེའི་སྟེང་དུ་ཟླ་བའི་དཀྱིལ་འཁོར་གཉིས་པ་ལ་དེའི་སྟེང་དུ་པུསྟི་གཉིས་པའོ། །དེ་ཐམས་ཅད་

ཡོངས་སུ་གྱུར་པ་ལས་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་ཞལ་གཅིག་ཕྱག་གཉིས་མ་དེ་བཞིན་གཤེགས་པ་ལྔའི་དབུ་རྒྱན་ཅན། ཆོས་འཆད་པའི་ཕྱག་རྒྱ་དང་ལྡན་པ། སྣ་ཚོགས་པདྨ་དང་ཟླ་བ་ལ་བཞུགས་པ་ན་བཟའ་དང་རྒྱན་ཐམས་ཅད་ཀྱིས་བརྒྱན་པ།

གཡས་གཡོན་གྱི་ལོགས་དག་ན་ཨུཏྤལ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་བསྣམས་པའོ། །སྔགས་ནི། ཨོཾ་ཨཱཿདྷཱིཿཧཱུཾ་སྭཱ་ཧཱ། དཔྲལ་བར་ཨོཾ་ཡིག་སེར་པོ། མགྲིན་པར་ཨཱཿཡིག་དཀར་པོ། སྙིང་གར་དྷཱིཿཡིག་སེར་པོ། ལྟེ་བར་ཧཱུཾ་ཡིག་ནག་པོ་ཞེས་བཟླས་པའི་དུས་སུ་

ཡི་གེ་བཞི་པོ་རྣམས་ཀྱི་རྗེས་སུ་བསམ་པར་བྱའོ་ཞེས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས་རྫོགས་སོ།།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words