བསྲུང་བ་ལྔའི་ཆོ་ག

Sanskrit title (Tibetan script, as in the text) པཉྩ་རཀྵ་བི་དྷིཿ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 77 · folio 220a

༄༅༅། །རྒྱ་གར་སྐད་དུ། པཉྩ་

རཀྵ་བི་དྷིཿ། བོད་སྐད་དུ། བསྲུང་བ་ལྔའི་ཆོ་ག །འཕགས་མ་སོ་སོ་འབྲང་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཞལ་བསང་བ་ལ་སོགས་པ་བྱས་ནས་ཡིད་དང་མཐུན་པའི་གནས་སུ་སྟན་བདེ་བ་ལ་ཉེ་བར་འདུག་སྟེ། ཨོཾ་ཨཱཿརཀྵཿརཀྵ་ཧཱུཾ་ཕཊ་སྭཱ་ཧཱ། ཞེས་པས་རྣལ་འབྱོར་པའི་གནས་

དང་བདག་ཉིད་བསྲུང་ཞིང་ལྷག་པར་གནས་པར་བྱའོ། །དེ་ནས་རང་གི་ཐུགས་ཀར་ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར་ལ། དེའི་སྟེང་དུ་པྲཾ་ཡིག་ལས་འོད་ཟེར་འཕྲོས་པས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་སྣང་བར་མཛད་ནས་མདུན་དུ་བལྟས་ཏེ་སོ་སོ་འབྲང་མ་ཆེན་མོ་ལ་

སོགས་པའི་འཁོར་དང་བཅས་པ་མཆོད་པར་བྱའོ། །མེ་ཏོག་དང་། བདུག་སྤོས་དང་། མར་མེ་དང་། དྲི་བཟངས་དང་། གཏོར་མ་དང་། ཞལ་ཟས་ལ་སོགས་པ་རྣམས་ཕུལ་ནས་སྡིག་པ་སོ་སོར་བཤགས་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། དགེ་བའི་

རྩ་བ་ཡོངས་སུ་བསྔོ་བ་དང་། བཟོད་པ་གསོལ་བ་རྣམས་བྱའོ། །དེ་ནས་ཚད་མེད་པའི་གནས་བཞི་བསྒོམ་པར་བྱ་སྟེ། དེ་ལ་སྡུག་བསྔལ་བ་རྣམས་འདོན་པར་འདོད་པའི་སྙིང་རྗེ་དང་། བདེ་བ་ལ་རབ་ཏུ་དགོད་པའི་བྱམས་པ་དང་། བདེ་བ་ལ་གནས་པ་ཉིད་ཀྱིས་དགའ་བ་དང་། དེ་བཞིན་ཉིད་ཀྱི་ངོ་བོ་ཉིད་ཀྱིས་གཏང་

སྙོམས་སུ་བྱའོ། །དེ་ནས་ཆོས་ཐམས་ཅད་ལ་ཡིད་ཀྱིས་དམིགས་ནས་རྣམ་པར་མི་རྟོག་པ་རྣམ་པར་བསྒོམས་ཏེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་སོ། །དེ་ནས་ཧཱུཾ་ཡིག་གིས་ས་གཞི་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེ་ནས་དེ་བཞིན་དུ་རྡོ་རྗེའི་གུར་དང་། རྡོ་རྗེའི་ར་བ་དང་།

Vol. 77 · folio 220b

རྡོ་རྗེའི་བླ་བྲེ་ཡང་རྣམ་པར་བསམ་པར་བྱའོ། །དེའི་དབུས་སུ་སུཾ་ཡིག་ཡོངས་སུ་གྱུར་པ་ལས་རི་བོ་མཆོག་རབ་ཐར་པ་ཆེན་པོའི་གྲོང་ཁྱེར་དུ་གྱུར་པ་མེ་ཏོག་སྣ་ཚོགས་མངོན་པར་བཀྲམ་པས་སོ། །དེའི་སྟེང་དུ་ཧཱུཾ་ཡིག་ཡོངས་སུ་གྱུར་པ་ལས། སྣ་ཚོགས་རྡོ་རྗེ་ལ་པཾ་ཡིག་ཡོངས་སུ་གྱུར་པ་ལས། སྣ་ཚོགས་

པདྨ་གེ་སར་དང་བཅས་པའི་ཟེའུ་འབྲུ་ལ། དེའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་པྲཾ་ཡིག་ལས་འོད་ཟེར་ཡང་དག་པར་འཕྲོ་བ། དེས་ཡེ་ཤེས་ལྔའི་བདག་ཉིད་སྤྱན་དྲངས་ནས་དེ་བཞིན་གཤེགས་པ་ཐམས་ཅད་དང་ལྷན་ཅིག་ཏུ་བྱས་ནས་ས་བོན་ཡོངས་སུ་གྱུར་པ་ལས་འཆད་པར་འགྱུར་

བའི་སྐུ་མདོག་གི་རྣམ་པ་ཅན་དང་རོ་གཅིག་ཏུ་གྱུར་ནས་སོ་སོ་འབྲང་བ་ཆེན་མོ་སྐུ་མདོག་དཀར་མོ་ལོ་བརྒྱད་གཉིས་ལོན་པའི་རྣམ་པ་ཅན་སྤྱི་བོར་ཟླ་བའི་གདན་ལ་མཆོད་རྟེན་གྱིས་བརྒྱན་པ། ཉི་མའི་དཀྱིལ་འཁོར་ལ་ཞབས་གཡས་བརྐྱང་སྐྱིལ་ཀྲུང་ཕྱེད་པས་བཞུགས་པ། ཞལ་

བཞི་པ། སྤྱན་གསུམ་པ། ཕྱག་བརྒྱད་པ། རྣ་རྒྱན་གཡོ་བས་མཛེས་ཤིང་དོ་ཤལ་དང་རྐང་གདུབ་ཀྱིས་བརྒྱན་པ། ཕྱག་གདུབ་དང་། དཔུང་རྒྱན་དང་། སྐ་རགས་ཀྱིས་མཛེས་ཤིང་རྒྱན་ཐམས་ཅད་ཀྱིས་བརྒྱན་པ། བཅོམ་ལྡན་འདས་མ་དེའི་ཞལ་དང་པོ་ནི་སྐུ་

མདོག་ལྟར་དཀར་པོ། གཡས་ནག་པོ། རྒྱབ་སེར་པོ། གཡོན་དམར་པོའོ། གཡས་ཀྱི་ཕྱག་དང་པོ་ན་འཁོར་ལོ། གཉིས་པ་ན་རྡོ་རྗེ། གསུམ་པ་ན་མདའ་དང་། བཞི་པ་ན་རལ་གྲི། གཡོན་གྱི་ཕྱག་དང་པོ་ན་རྡོ་རྗེའི་ཞགས་པ། གཉིས་པ་ན་རྩེ་གསུམ། གསུམ་

པ་ན་གཞུ། བཞི་པ་ན་དགྲ་སྟའོ། །བྱང་ཆུབ་ཀྱི་ཤིང་གིས་ཉེ་བར་མཛེས་པ། སྣ་ཚོགས་པའི་རིན་པོ་ཆེའི་མེ་ཏོག་དང་འབྲས་བུ་ལ་སོགས་པས་བརྒྱན་པ། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། དགའ་བྱེད་དབང་ཕྱུག་ལ་སོགས་པ་རྣམས་ཀྱིས་ཡང་

དག་པར་བསྟོད་པ་དང་ལྷ་དང་ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་གཡས་ཕྱོགས་ནས་ཡང་དག་པར་བསྙེན་བཀུར་བར་བྱེད་པ། དབང་པོ་དང་། གཤིན་རྗེ་དང་། ཆུ་བདག་དང་། རྣམ་ཐོས་སྲས་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་

Vol. 77 · folio 221a

པོ་ལ་སོགས་པ་རྣམས་དང་། ལྷ་རྣམས་ཀྱིས་བསྟོད་པ། འདོད་ཆགས་དང་ཞེ་སྡང་དང་གཏི་མུག་གི་བག་ཆགས་ལས་སྐྱེས་པའི་རྣམ་པར་སྨིན་པ་རྣམས་གཅོད་པར་མཛད་པ། གསང་སྔགས་མཆོག་གི་ཕྱག་རྒྱས་དུག་དང་བྱད་སྟེམས་རྣམས་འཇོམས་ཤིང་ཕྱེ་མར་

མཛད་པ། ཞེ་སྡང་རབ་ཏུ་སྦྱོར་བའི་མངོན་སྤྱོད་ཀྱིས་ཀྱང་གདུག་པའི་སེམས་དང་ལྡན་པ་རྣམས་རྣམ་པར་འཇོམས་པར་མཛད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་འཕགས་པའི་ཚོགས་རྣམས་ཡང་དག་པའི་མཆོད་པ་རྣམས་ཀྱིས་མངོན་པར་དགའ་བ་རྣམས་ཡོངས་སུ་སྐྱོང་

བར་མཛད་པ། ཐེག་པ་ཆེན་པོ་ལེན་པ་དང་། ཡི་གེ་འདྲི་བ་དང་། ཀློག་པ་དང་། འཆང་བ་དང་། ཁ་ཏོན་བྱེད་པ་དང་། ཉན་པ་དང་། འཛིན་པ་དང་མངོན་པར་ལྡན་པ་རྣམས་ལ་ཡོངས་སུ་སྐྱོང་བར་མཛད་པ་དེ་ལྟ་བུར་གྱུར་པའི་བཅོམ་ལྡན་འདས་མ་སྤྲོ་བ་དང་བསྡུ་བའི་སྦྱོར་བས་དུས་རྟག་ཏུ་རྒྱུན་མི་འཆད་

པར་གོམས་ཤིང་བལྟ་བར་བྱའོ། །དེའི་བཟླས་པའི་སྔགས་ནི། ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སོ་སོ་འབྲང་མ་ཆེན་མོ་དེའི་ཤར་ཕྱོགས་སུ་ཇི་ལྟ་བ་དེ་བཞིན་དུ་སྔོན་མའི་སྦྱོར་བས་ལྷག་པར་བྱས་ཏེ། སྣ་ཚོགས་པདྨའི་དབུས་སུ་ཧཱུཾ་ཡིག་གི་ས་བོན་དང་

མཚན་མ་ཡོངས་སུ་གྱུར་པ་ལས་སྟོང་ཆེན་མོ་རབ་ཏུ་འཇོམས་མ་སྐུ་མདོག་ནག་མོ་དབུ་སྐྲ་ཁམ་པ་གྱེན་དུ་བརྫེས་པ་མིའི་ཐོད་པས་བརྒྱན་པ་སྨིན་མཚམས་སུ་ཁྲོ་གཉེར་བསྡུས་ཤིང་ཞལ་མཆེ་བ་གཙིགས་པ། འོད་ཟེར་འཕྲོ་བ་ཉི་མའི་དཀྱིལ་འཁོར་གྱི་གདན་ལ་

རོལ་པའི་སྟབས་ཀྱིས་འབྱུང་པོ་ཆེན་པོ་དང་། གནོད་སྦྱིན་ཆེན་པོ་ཀུན་ནས་གནོན་པ། ཕྱག་གདུབ་དང་། དཔུང་རྒྱན་གྱིས་བརྒྱན་པ། དོ་ཤལ་དང་། ཞབས་གདུབ་ཀྱིས་མཛེས་པ། དེའི་ཕྱག་གཡས་ཀྱི་དང་པོ་ན་མཆོག་སྦྱིན་དང་རྡོ་རྗེ། གཉིས་པ་ན་ལྕགས་

ཀྱུ། གསུམ་པ་ན་མདའ། བཞི་པ་ན་རལ་གྲི། ཕྱག་གཡོན་གྱི་དང་པོ་ན་སྡིགས་མཛུབ་དང་ཞགས་པ། གཉིས་པ་ན་དགྲ་སྟ། གསུམ་པ་ན་གཞུ། བཞི་པ་ན་པདྨའི་སྟེང་དུ་རིན་པོ་ཆེ་ཆ་དྲུག་པའོ། །དེའི་རྩ་བའི་ཞལ་ནག་པོ། གཡས་དཀར་པོ། །རྒྱབ་སེར་པོ། །

Vol. 77 · folio 221b

གཡོན་ལྗང་གུ། ཐམས་ཅད་སྤྱན་གསུམ་གསུམ་པ། སྐུ་ལ་རིན་པོ་ཆེ་ལ་སོགས་པ་སྣ་ཚོགས་པས་བརྒྱན་པ། ཕ་རོལ་གྱི་སྟོབས་ཆེན་པོ་གནོན་པ། དྲག་མོའི་ཆ་ལུགས་ཅན། ནྱ་གྲོ་དྷའི་ཤིང་ལྗོན་པས་ཉེ་བར་མཛེས་པ་མ་མོ་བདུན་ལ་སོགས་པའི་ལྷ་མོ་རྣམས་སྐྲག་པར་མཛད་པ། ནམ་གྲུ་ལ་སོགས་

པའི་མི་རྣམས་འཇོམས་པར་མཛད་པ། ནོར་རྒྱས་ལ་སོགས་པའི་ཀླུ་རྣམས་ཡང་དག་པར་སྐྲག་པར་མཛད་པ། རླུང་དང་མཁྲིས་པ་དང་བད་ཀན་ལ་སོགས་པ་རྣམས་སྦྱོང་བར་མཛད་པ། དྲག་པོའི་མུན་པ་སྟུག་པོའི་སྤྲིན་རྣམས་སེལ་བར་མཛད་པ། འཆི་བདག་ཐམས་ཅད་ཟད་པར་བྱེད་པའོ། །དེའི་བཟླས་པའི་སྔགས་ནི་ཨོཾ་ཨ་

མྲྀ་ཏ་བ་རཻ་བ་ར་བ་ར་པྲ་བ་ར་བི་ཤུདྡྷེ་ཧཱུཾ་ཧཱུཾ་ཕཊ་སྭཱ་ཧཱ། དེ་ནས་སོ་སོ་འབྲང་མ་ཆེན་མོའི་ལྷོ་ཕྱོགས་སུ་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་མཾ་ཡིག་གི་ས་བོན་ཡོངས་སུ་གྱུར་པ་ལས་སྐད་ཅིག་གིས་རྨ་བྱ་ཆེན་མོ་སྐུ་མདོག་སེར་མོ་ཉི་མའི་དཀྱིལ་འཁོར་ལ་ཞབས་གཡས་བརྐྱང་བའི་སེམས་

དཔའི་སྐྱིལ་ཀྲུང་གིས་བཞུགས་པ། ཞལ་གསུམ་པ་སྤྱན་གསུམ་པ། ཕྱག་བརྒྱད་པ། རིན་པོ་ཆེའི་ཅོད་པན་ཅན་རྒྱན་ཐམས་ཅད་ཀྱིས་བརྒྱན་པ། དེའི་གཡས་ཀྱི་ཕྱག་དང་པོ་ན་མཆོག་སྦྱིན། གཉིས་པ་ན་རིན་པོ་ཆེའི་བུམ་པ་བསྣམས་པ། གསུམ་པ་ན་འཁོར་ལོ། བཞི་པ་ན་རལ་གྲིའོ། །གཡོན་གྱི་

ཕྱག་དང་པོ་ན་ལྷུང་བཟེད་ཀྱི་སྟེང་ན་དགེ་སློང་། གཉིས་པ་ན་རྨ་བྱའི་མདོངས། གསུམ་པ་ན་བུམ་པའི་སྟེང་ན་སྣ་ཚོགས་རྡོ་རྗེ། བཞི་པ་ན་རིན་པོ་ཆེའི་རྒྱལ་མཚན་ནོ། །དེ་ནས་རྩ་བའི་ཞལ་ནི་སེར་པོ། གཡས་ནག་པོ། གཡོན་དམར་པོའོ། །མྱ་ངན་མེད་པའི་ཤིང་ལྗོན་པས་ཉེ་བར་མཛེས་པའོ། །

དེའི་ལོགས་ན་གནས་པའི་བི་ཤེཿབདུན་གྱིས་གཡོགས་པ། དྲག་པོ་དང་བཅས་པའི་སེར་སྐྱ་ལ་སོགས་པའི་སྲིན་པོ་རྣམས་འཇོམས་པར་མཛད་པ་ཀླུ་ལ་སོགས་པ་ཐམས་ཅད་སྐྲག་པར་མཛད་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་ཕྱག་བྱ་བའི་འོས་སུ་གྱུར་པ། རྒྱུ་སྐར་

ཉི་ཤུ་རྩ་བདུན་དང་བཅས་པའི་གཟའ་དགུ་ལ་སོགས་པ་རྣམས་ཀྱིས་བསྙེན་བཀུར་བྱ་བའི་འོས་སུ་གྱུར་པ། བརྟན་པ་དང་གཡོ་བའི་དུག་ཐམས་ཅད་རྣམ་པར་གྲོལ་བ། ལྷ་དང་བཅས་པའི་ལྷ་མ་ཡིན་རྣམས་ཡང་དག་པར་རྨོངས་པར་མཛད་པའོ། །བཅོམ་ལྡན་འདས་མ་དེའི་བཟླས་པའི་སྔགས་ནི། ཨོཾ་ཨ་

Vol. 77 · folio 222a

མྲྀ་ཏ་བི་ལོ་ཀི་ནི་གརྦྷ་སཾ་རཀྵ་ཨཱ་ཀཪྵ་ནི་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་སོ། །སོ་སོ་འབྲང་མ་དེའི་ནུབ་ཕྱོགས་སུ་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་མཾ་ཡིག་གི་ས་བོན་ཡོངས་སུ་གྱུར་པ་ལས་སྐྱེས་པའི་གསང་སྔགས་རྗེས་སུ་འཛིན་མ་བསྒོམ་པར་བྱ་སྟེ། སྐུ་

མདོག་དཀར་མོ་ཞལ་གསུམ་པ། སྤྱན་གསུམ་པ། ཕྱག་བཅུ་གཉིས་པ་ཉི་མའི་དཀྱིལ་འཁོར་འོད་འཕྲོ་བ་ལ་གཡས་བརྐྱང་གིས་བཞུགས་པ། རིན་པོ་ཆེའི་ཅོད་པན་ཅན། རྒྱན་ཐམས་ཅད་ཀྱིས་མཛེས་ཤིང་ལང་ཚོ་གཞོན་ནུ་དང་ལྡན་པ། དོ་ཤལ་དང་། རྐང་གདུབ་དང་། རྣ་རྒྱན་

གྱིས་བརྒྱན་པ། ཤི་རི་ཤཱའི་ཤིང་ལྗོན་པས་ཉེ་བར་མཛེས་པ། དེའི་ཕྱག་དང་པོ་ཆོས་ཀྱི་འཁོར་ལོའི་ཕྱག་རྒྱ། གཉིས་པ་ཏིང་ངེ་འཛིན་གྱི་ཕྱག་རྒྱ། གསུམ་པ་མཆོག་སྦྱིན། བཞི་པ་མི་འཇིགས་པ། ལྔ་པ་རྡོ་རྗེ། དྲུག་པ་ན་མདའོ། །གཡོན་གྱི་གསུམ་པ་སྡིགས་མཛུབ་

དང་བཅས་པའི་ཞགས་པ། བཞི་པ་ན་གཞུ། ལྔ་པ་ན་རིན་པོ་ཆེའི་དོག་པ། དྲུག་པ་ན་པདྨས་མཚན་པའི་ཆུ་སྐྱེས་སོ། །རྩ་བའི་ཞལ་དཀར་པོ། གཡས་ནག་པོ། གཡོན་དམར་པོའོ། །མེ་ཏོག་སྣ་ཚོགས་པ་མངོན་པར་བཀྲམ་པ། འཇིག་རྟེན་སྐྱོང་བ་བརྒྱད་ལ་སོགས་པ་དང་

བཅས་པའི་ལྷ་རྣམས་ཀྱིས་ཡང་དག་པར་མཆོད་པའི་འོས་སུ་གྱུར་པ། རྒྱལ་པོ་ཆེན་པོ་བཞི་དང་བཅས་པའི་ལྷའི་ཚོགས་རྣམས་ཀྱིས་ཡང་དག་པར་བསྟོད་པ། མེ་ཏོག་མོ་དང་བཅས་པའི་རིག་འཛིན་མ་རྣམས་ཀྱིས་མཆོད་པའོ། །དེའི་བཟླས་པའི་སྔགས་ནི་ཨོཾ་བི་མ་ལེ་བི་པུ་ལེ་ཛ་ཡ་བ་

རེ་ཨ་མྲྀ་ཏེ་བི་ར་ཛེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་སོ། །དེ་ནས་སོ་སོ་འབྲང་མ་དེའི་བྱང་ཕྱོགས་སུ་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་ཏྲཾ་ཡིག་གི་ས་བོན་ཡོངས་སུ་གྱུར་པ་ལས་སྐྱེས་པའི་བསིལ་བའི་ཚལ་ཆེན་མོ་སྐུ་མདོག་ལྗང་གུ་ཉི་མའི་དཀྱིལ་འཁོར་ལ་གཡས་བརྐྱང་

གིས་བཞུགས་པ། ཞལ་གསུམ་མ། སྤྱན་གསུམ་མ། ཕྱག་དྲུག་པ། དེ་བཞིན་གཤེགས་པའི་དབུ་རྒྱན་ཅན། རྒྱན་ཐམས་ཅད་ཀྱིས་བརྒྱན་ཅིང་ལྷའི་ན་བཟས་ཉེ་བར་སྤྲས་པའོ། །དེའི་ཕྱག་དང་པོ་མི་འཇིགས་པའི་ཕྱག་རྒྱ། གཉིས་པ་ན་རྡོ་རྗེ། གསུམ་པ་ན་མདའོ། །གཡོན་

Vol. 77 · folio 222b

གྱི་དང་པོ་ཞགས་པ་དང་བཅས་པའི་སྡིགས་མཛུབ། གཉིས་པ་ན་གཞུ། གསུམ་པ་ན་རིན་པོ་ཆེའི་རྒྱལ་མཚན་ནོ། །རྩ་བའི་ཞལ་ལྗང་གུ། གཡས་པ་དཀར་པོ། གཡོན་པ་དམར་པོའོ། །ཙམ་པ་ཀའི་ཤིང་ལྗོན་པས་ཉེ་བར་མཛེས་པ། འདོད་ལྷ་དང་བཅས་པའི་ལྷ་རྣམས་

ཀྱིས་མཆོད་ཅིང་བསྟོད་པ། འཕྲོག་མ་དང་བཅས་པའི་གནོད་སྦྱིན་དང་གནོད་སྦྱིན་མོ་རྣམས་རྣམ་པར་འཇོམས་པར་མཛད་པ། བྱ་རོག་དང་། འུག་པ་དང་། བྱ་རྒོད་དང་། ཁྲ་དང་། ཀ་པོ་ར་ལ་སོགས་པ་རྣམས་འཇོམས་ཤིང་འདེད་པར་མཛད་པ། འབྱུང་པོ་དང་། ཡི་དགས་དང་།

ཤ་ཟ་དང་། རོ་ལངས་དང་། སྲིན་པོ་ལ་སོགས་པ་དང་བཅས་པ་རྣམས་ཡང་དག་པར་རྨོངས་པར་མཛད་པའོ། །དེའི་བཟླས་པའི་སྔགས་ནི་ཨོཾ་བྷ་ར་བྷ་ར། སཾ་བྷ་ར་སཾ་བྷ་ར། ཨིནྡྲི་ཡ་བ་ལ་བི་ཤོ་དྷ་ནི་ཧཱུཾ་ཧཱུཾ་ཕཊ། དེ་བཞིན་དུ་ཇི་ལྟར་གསུངས་པའི་མཎྜལ་རྣམ་པར་བསྒོམས་ནས། དེའི་

འོད་ཟེར་གྱི་ཚོགས་ཀྱིས་ཁྱབ་པ་ལས་རང་རང་གི་ས་བོན་ལས་བྱུང་བའི་འོད་ཟེར་གྱིས་ཁམས་གསུམ་མ་ལུས་པ་མངོན་པར་ཁྱབ་ནས་དེ་ལ་དེ་བཞིན་དུ་ཡི་གེ་ལ་རབ་ཏུ་གཞུག་པར་བྱའོ། །སླར་ཡང་ནམ་མཁའི་མཐོངས་སུ་སྤྲོས་ནས་ཡེ་ཤེས་ཀྱི་འཁོར་ལོ་སྤྱན་དྲངས་ནས་ཡང་དག་པར་བསྟོད་

ཅིང་གདན་དྲངས་པ་རང་གི་དམ་ཚིག་གི་འཁོར་ལོ་ལ་རབ་ཏུ་གཞུག་པར་བྱའོ། །དེ་ནས་གཉིས་སུ་མེད་ཅིང་རོ་གཅིག་ཏུ་གྱུར་པར་རྣམ་པར་བསྒོམས་ལ། དེའི་འོད་ཟེར་རྣམས་ཀྱིས་དེ་བཞིན་གཤེགས་པ་ཐམས་ཅད་གདན་དྲངས་ཏེ་ཡང་དག་པར་མཆོད་ནས་དབང་བསྐུར་བར་གསོལ་བ་བཏབ་

ནས་བདག་ཉིད་ལ་དབང་བསྐུར་བར་བལྟ་བར་བྱའོ། །མཆོད་པ་དང་། བསྟོད་པ་དང་། བདུད་རྩི་མྱང་བ་སྔོན་དུ་འགྲོ་བས་མཁས་པས་བསྒོམ་པར་བྱའོ། །མིག་ལ་གཏི་མུག་རྡོ་རྗེ་སོ་སོ་འབྲང་མ་ཆེན་མོའོ། །རྣ་བ་ལ་ཞེ་སྡང་རྡོ་རྗེ་སྟོང་ཆེན་མོ་རབ་ཏུ་འཇོམས་པ་ཆེན་མོའོ། །སྣ་ལ་

སེར་སྣ་རྡོ་རྗེ་རྨ་བྱ་ཆེན་མོའོ། །ཞལ་ལ་འདོད་ཆགས་རྡོ་རྗེ་གསང་སྔགས་རྗེས་སུ་འཛིན་མ་ཆེན་མོའོ། །རེག་བྱ་ལ་ཕྲག་དོག་རྡོ་རྗེ་བསིལ་བའི་ཚལ་ཆེན་མོའོ། །དེ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་

Vol. 77 · folio 223a

རྣམས་ཏེ། ཕུང་པོ་དང་། ཁམས་དང་། སྐྱེ་མཆེད་ཀྱི་རང་བཞིན་རྣམས་ལ་དེ་བཞིན་དུ་ལྷ་རྣམས་ཀྱི་རྣམ་པར་དག་པའི་ཁྱད་པར་ཤེས་པར་བྱའོ། །དེ་ལ་དེ་ལྟ་བུའི་དམ་ཚིག་ཏུ་གྱུར་པས་ཆོ་ག་འདིས་སྔགས་བཟླས་པར་བྱའོ། །གོང་གི་སྔགས་

ཀྱི་ཡི་གེ་བརྗོད་པར་བྱ་བ་དེའི་ལྷའི་སྦྱོར་བས་བསྒྲུབ་བྱའི་མིང་སྤེལ་ནས་ཞི་བའི་སེམས་ཀྱིས་རྒྱུན་མི་འཆད་པར་བཟླས་པར་བྱའོ། །རིམས་དང་། དུག་དང་། དེ་བཞིན་དུ་ནད་དང་། གཡུལ་ལ་ཡང་དེ་བཞིན་དུ་བྱའོ། །མཁའ་འགྲོ་མ་དང་། འབྱུང་པོ་དང་། རྨུགས་བྱེད་དང་།

གཙང་པོ་དང་། དགྲས་རབ་ཏུ་འཚེ་བ་དང་། ཐོག་དང་། སྐར་མདའ་ལྟུང་བའི་འཇིགས་པ་རྣམས་ལ་རི་དང་། ནགས་དང་། ལམ་དག་ཏུ་དེའི་སྔགས་དྲན་པས་རྟག་ཏུ་བག་ཚ་བ་ཐམས་ཅད་སེལ་བར་བྱེད་དོ། །དེ་ལ་རིམ་པ་འདི་བཞིན་དུ། །སེམས་ཅན་ཀུན་ལ་ཕན་

དོན་ཕྱིར། །སེམས་ཅན་ཀུན་ལ་ཕན་འབྱུང་བ། །གང་དང་གང་གིས་གསོལ་འདེབས་པ། །དེ་ཡི་ཚེ་ནི་འཕེལ་བའི་རྒྱུ། །བསྲུང་བ་ལྔ་ཡི་ཆོ་ག་འདིས། །བདེ་ལེགས་འབྱུང་བ་བདག་གིས་བྲི། །སེམས་ཅན་ཀུན་ལ་ཕན་དོན་ཕྱིར། །དགེ་བའི་མཎྜལ་ཟླུམ་པོ་བྲི། །

ས་ཕྱོགས་གཙང་ཞིང་ཉམས་དགའ་བར། །བ་ཡི་ལྕི་བས་ཉེ་བར་བྱུགས། །བླ་རེ་ཡིས་ནི་སྟོད་གཡོགས་ཤིང་། །རྣམ་པ་སྣ་ཚོགས་གོས་རྣམས་བཅད། །ཙནྡན་ཁྱད་པར་ཅན་དག་དང་། །དྲི་བཟངས་དག་གིས་ཀུན་ནས་བྱུགས། །སོར་མོ་ཉི་ཤུ་རྩ་བརྒྱད་ཀྱི། །མཎྜལ་

ཟླུམ་པོར་བྲི་བར་བྱ། །དེ་ནས་རྡུལ་ཚོན་དཀར་པོ་ཡིས། །ཞི་བའི་ལས་ལ་རབ་ཏུ་བསྔགས། །ཟེའུ་འབྲུ་གེ་སར་དང་བཅས་པའི། །པདྨ་འདབ་མ་བརྒྱད་པར་བྱ། །བུམ་པ་ལྔ་ནི་ཡང་དག་དགོད། །མེ་ཏོག་ཕྲེང་བ་གོས་ཀྱིས་མཛེས། །ལོ་མ་དག་གིས་ཁ་བརྒྱན་ཅིང་། །

གདུགས་དང་བ་དན་ཡང་དག་ལྡན། །པུ་སྟི་དང་ནི་ཆོས་དབྱིངས་དང་། །བྲིས་སྐུ་མདུན་དུ་ཡང་དག་བཀྲམ། །མེ་ཏོག་སྤོས་དང་དྲི་དང་ནི། །གཏོར་མ་ཞལ་ཟས་དབུལ་བར་བྱ། །དཱུར་བ་ཀུན་དང་ཡང་དག་སྦྱོར། །མེ་ཏོག་དཀར་པོ་ཁྱད་འཕགས་རྣམས། །ཕྱོགས་

Vol. 77 · folio 223b

དང་ཕྱོགས་མཚམས་ལྷ་རྣམས་ཀྱི། །ཆོ་ག་ཇི་བཞིན་མཆོད་པར་བྱ། །ཟན་དང་བུ་རམ་མེ་ཏོག་དཀར། །འོ་མ་ཡི་ནི་བྱེ་བྲག་རྣམས། །ཤར་ཕྱོགས་གནས་སུ་དགོད་བྱས་ནས། །དྲི་ཟ་རྣམས་ལ་གཏོར་མ་དབུལ། །ཏིལ་ནག་དང་ནི་ཆང་གིས་བཀང་། །ཤ་དང་ཉ་ཤ་སྒོག་

པ་རྣམས། །ལྷོ་ཕྱོགས་སུ་ནི་ཡང་དག་དགོད། །གྲུལ་བུམ་རྣམས་ལ་གཏོར་མ་དབུལ། །འོ་མ་ཞོ་དང་འོ་ཐུག་དང་། །མཉྫ་ན་ཡི་བྱེ་བྲག་རྣམས། །ནུབ་ཀྱི་ཕྱོགས་སུ་ཡང་དག་དགོད། །གཏོར་མ་ཆེན་པོ་ཀླུ་ལ་འབུལ། །མོན་གྲེའུ་མུད་ག་རྒྱ་སྲན་དང་། །ཛམྦུ་ཊི་དང་བུར་ཆང་

རྣམས། །བྱང་གི་ཕྱོགས་སུ་ཡང་དག་དགོད། །གནོད་སྦྱིན་རྣམས་ལ་གཏོར་མ་དབུལ། །དབང་ལྡན་ནས་ནི་བརྩམས་ནས་ནི། །ཇི་སྲིད་རླུང་གི་སྤྱོད་ཡུལ་བར། །ནག་པོ་དམར་པོ་སེར་པོ་དང་། །ལྗང་གུའི་མེ་ཏོག་ཕྲེང་བ་དཔྱང་། །དབུས་སུ་མེ་ཏོག་ཕྲེང་བ་དཀར། །མེ་ཏོག་

སྣ་ཚོགས་ཁྱད་འཕགས་རྣམས། །འོ་མ་ཁྲག་གི་ཁམ་ཕོར་རྣམས། །ཞོ་ཟན་དྲི་རྣམས་དེ་བཞིན་དུ། །དེ་བཞིན་དངོས་པོ་མ་ལུས་རྣམས། །ཇི་ལྟར་རིགས་པས་མཆོད་ཡོན་དབུལ། །འབྲས་བུ་རྩ་བ་ཇི་སྙེད་དང་། །ལ་དུ་མོ་ད་ཀ་ཆང་བུ། །ཇི་སྐད་གསུངས་བཞིན་

ཆང་བུ་སོགས། །ཀ་ར་འོ་མའི་བྱེ་བྲག་གི། །གཏོར་མ་ལྷོ་ཡི་ཕྱོགས་སུ་བཞག །མཚན་མ་བརྒྱད་ཀྱིས་རབ་མཛེས་པ། །དེ་བཞིན་དུ་ཡང་། ཆོས་འཆད་པ་ཡི་སློབ་དཔོན་དང་། །ལས་ཀྱི་རྡོ་རྗེ་དེ་བཞིན་དུ། །ཁྲུས་བྱས་གཙང་མའི་གོས་བགོ་ཞིང་། །དེ་བཞིན་

སྟན་ཡང་གཙང་མར་འདོད། །ཞལ་ནི་ཤར་དུ་མངོན་ཕྱོགས་ནས། །སྨྲ་བཅད་ནས་ནི་རྟག་ཏུ་བཀླག །དགེ་སློང་ཚུལ་ཁྲིམས་གཙང་མ་ཡི། །བསོད་སྙོམས་པ་རྣམས་མཆོག་ཏུ་བསྔགས། །སྦྱིན་བདག་སློབ་དཔོན་གང་ཞིག་གིས། །ཡོངས་སུ་དག་པར་བཀླག་པར་བྱ། །

ལན་གཅིག་ལ་སོགས་བརྩམས་ནས་ནི། །ཉི་ཤུ་རྩ་གཅིག་ལ་སོགས་བཀླག །ཆོ་ག་ཆད་པ་ལ་སོགས་པས། །བཀླགས་པས་ཡང་དག་འགྲུབ་མི་འགྱུར། །བློ་དང་བརྩོན་འགྲུས་ཕུན་ཚོགས་པ། །བརྩེ་བས་སེམས་ཅན་དོན་བརྩོན་པས། །དེ་ཡི་བདེ་ལེགས་སྒྲུབ་པར་ནི། །སྔོན་གྱི་སངས་

Vol. 77 · folio 224a

རྒྱས་རྣམས་ཀྱིས་གསུངས། །ཁ་ཟས་དཀར་པོས་སྟོན་མོ་བྱས། །ཤ་ཡི་བཟའ་བ་རྣམ་པར་སྤངས། །བསྟན་བཅོས་ཀུན་ལས་མཐུན་པར་ནི། །ཀུན་ལ་ཤ་ནི་མེད་བྱས་ལ། །སློབ་དཔོན་བྱང་དུ་ཞལ་ཕྱོགས་པས། །དེ་ལ་ལས་ནི་ཡང་དག་བརྩམ། །བསྒོམ་

པ་སྔོན་དུ་གསུངས་པ་བཞིན། །ལྷ་རྣམས་སོ་སོ་ལ་དམིགས་ནས། །མཆོད་ཅིང་བསྟོད་པ་དང་ལྡན་པས། །དྲིལ་བུ་དཀྲོལ་ཞིང་དེ་བཞིན་ལ། །མཐའ་ཡས་སྤྱོད་ཡུལ་སངས་རྒྱས་ལ་ནི་ཕྱག་འཚལ་འདུད། །བདེན་པ་གསུང་མཛད་སངས་རྒྱས་ལ་ནི་ཕྱག་འཚལ་འདུད། །བདེན་

པ་ལ་ནི་རབ་གནས་རབ་ཏུ་རྒྱལ་གྱུར་ཅིག །འདོད་པ་ཀུན་ལས་གྲོལ་ཞིང་འབྲས་བུ་དང་བཅས་ཤོག །སྐྱེས་བུ་དཔའ་བོ་ཕྱག་འཚལ་འདུད། །དེ་བཞིན་གཤེགས་ལ་ཕྱག་འཚལ་འདུད། །ལྷ་རྣམས་ཀུན་ལ་ཕྱག་འཚལ་འདུད། །ཆོས་ཀྱི་དབྱིངས་ལ་ཕྱག་འཚལ་འདུད། །དཱུར་བ་ཀུན་དང་ཡང་

དག་སྦྱར། །བསྒྲུབ་བྱའི་མིང་ནི་སྔགས་ཀྱིས་སྤེལ། །ལྷ་རྣམས་ཀུན་ནི་མཆོད་བྱ་ཞིང་། །ཆོས་ཀྱི་དབྱིངས་ཀྱི་རང་བཞིན་དུ། །སྔགས་ནི་ལན་ཅིག་བརྗོད་ནས་ནི། །ལན་ཅིག་སྦྱོར་བས་མཆོད་པར་བྱ། །ཁྲི་ཕྲག་གཅིག་གི་ལས་ཀྱིས་ནི། །ཚེ་ནི་ཀུན་དུ་འཕེལ་བར་རིགས། །གང་དང་གང་གིས་

གསོལ་འདེབས་ན། །དེར་ནི་མཎྜལ་བྲི་བར་བྱ། །རྒྱལ་སྲིད་ཡུལ་དང་དེ་བཞིན་གྲོང་། །ལྷས་དང་སྐྱེད་མོས་ཚལ་དེ་བཞིན། །མི་མ་ཡིན་པ་ཞུགས་གྱུར་པའི། །འཆི་ནད་དང་ནི་མུ་གེ་རྣམས། །དེ་ཡི་ལས་ཀྱིས་བསྲུང་བར་བྱ། །ཤིང་སྐམ་ལ་ཡང་ལོ་འབྲས་འབྱུང་། །ལས་ཀྱི་སྡུག་

བསྔལ་བསམ་མི་ཁྱབ། །བྱ་བ་གང་ཞིག་བསྒྲུབ་འདོད་ན། །དེ་ནས་བསྲུང་བའི་ཆོ་ག་ཡིས། །ངེས་པར་སྲུང་བར་བྱེད་པར་འགྱུར། །རླུང་དང་མཁྲིས་པ་ལས་སྐྱེས་ནད། །བད་ཀན་འདུས་པ་ལས་གྱུར་པའི། །མ་ལུས་པ་ཡི་ནད་རྣམས་ཀུན། །རྟག་ཏུ་བདེ་ལེགས་ཉིད་དུ་འགྱུར། །

ཀློག་དང་ཁ་ཏོན་སྦྱོར་བ་ཡིས། །ངེས་པར་བགེགས་རྣམས་མེད་པར་འགྱུར། །བསྲུང་བ་ལྔའི་ཆོ་ག་རྫོགས་སོ།།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words