བཀྲ་ཤིས་ཀྱི་ཚིགས་སུ་བཅད་པ

Sanskrit title (Tibetan script, as in the text) མཾ་ག་ལ་གཱ་ཐཱ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 79 · folio 224b

༄༅༅། །རྒྱ་གར་སྐད་དུ།

མཾ་ག་ལ་གཱ་ཐཱ། བོད་སྐད་དུ། བཀྲ་ཤིས་ཀྱི་ཚིགས་སུ་བཅད་པ། དཀོན་མཆོག་གསུམ་ལ་ཕྱག་འཚལ་ལོ། །དམ་པ་ཏོག་དཀར་དགའ་ལྡན་ཕོ་བྲང་དམ་པ་རུ། །མི་ཕམ་མགོན་ལ་རྒྱལ་ཚབ་དམ་པར་དབང་བསྐུར་ཞིང་། །འཛམ་གླིང་ཉིད་དུ་གླང་ཆེན་ཐལ་ཀ་

ལྟར་གཤེགས་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །སེར་སྐྱའི་གནས་ཀྱི་གྲོང་ཁྱེར་དམ་པར་ཟས་གཙང་སྲས། །བུད་མེད་སྐྱོན་བྲལ་གཡོ་སྒྱུ་སྤངས་པ་ལྷ་མཛེས་ཡུམ། །ལྷུམས་སུ་ཟླ་བཅུར་བློ་གྲོས་ལྡན་པ་ཤཱཀྱའི་རིགས། །བཀྲ་ཤིས་དམ་པ་

དེས་ཀྱང་དེང་འདིར་བདེ་ལེགས་ཤོག །ལུམ་བིའི་ཚལ་ནི་དབེན་ཞིང་ཉམས་དགའ་པླ་ཀྵ་ཡི། །ཡལ་ག་ནས་བཟུང་བལྟམས་གྱུར་ཚངས་དང་བརྒྱ་བྱིན་འདུད། །མཁའ་ལ་གཤེགས་ཏེ་ཕྱོགས་བཅུར་པདྨ་བྱུང་གྱུར་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་

ཤོག །གཞལ་མེད་ཁང་མཛེས་དམ་པར་དྲང་སྲོང་འདུན་མཛད་ནས། །མཚན་ལྟས་ཤིས་པར་བརྗོད་དེ་སྟོན་པར་འབྱུང་འགྱུར་དང་། །ཤཱཀ་རིགས་བུད་མེད་འཁོར་ལྡན་ཀུན་བསུས་རྒྱན་བཏགས་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །གཞོན་ནུའི་སྟོབས་ནི་

Vol. 79 · folio 225a

སྒྱུ་རྩལ་ཡིག་རྩིས་འཕོང་ལ་སོགས། །ཀུན་ལས་མཐར་བྱུང་ལྷ་མི་ལ་སོགས་ཀུན་གྱིས་མཆོད། །ཤཱཀྱའི་རིགས་འཁྲུངས་ལོག་རྟོག་བསལ་ཕྱིར་བཙུན་མོའི་འཁོར། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཕོ་བྲང་ནས་བྱུང་རྒ་ན་ཤི་བ་ལ་

སོགས་གཟིགས། །མི་རྣམས་རྨོངས་མཛད་ལྷ་ཡིས་མདུན་བདར་མཁའ་ལ་ནི། །སྲིད་གསུམ་དག་ལས་རྒལ་ཕྱིར་མཐོན་མཐིང་དབུ་སྐྲ་བྲེགས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ལྷ་རྣམས་རྫུ་འཕྲུལ་གྱིས་ནི་ངུར་སྨྲིག་གོས་རྣམས་ཕུལ། །ནཻ་རཉྫ་ནའི་ཆུ་

བོར་དཀའ་ཐུབ་མ་ལུས་རྫོགས། །ཐུབ་པ་བསམ་གཏན་ལས་བཞེངས་བཀྲ་ཤིས་འོ་ཐུག་བཞེས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །པདྨ་ལས་བྱུང་ཁྱུ་མཆོག་བྱང་ཆུབ་ཤིང་དྲུང་དུ། །སྐྱིལ་མོ་ཀྲུང་བཅས་མི་གཡོ་མཆོག་གིས་བདུད་བཏུལ་ནས། །ཐོ་རངས་

བདུད་བཏུལ་མི་འགྱུར་ཕུན་སུམ་སངས་རྒྱས་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཱ་རཱ་ཎ་སཱིར་ཆོས་ཀྱི་འཁོར་ལོ་མགོན་པོས་བསྐོར། །ཀུན་ཤེས་ལ་སོགས་ལྔ་སྡེ་བཟང་ལ་བདེན་བཞི་བསྟན། །ལྷ་ཀླུ་ལྷ་མིན་མི་དང་མི་མིན་འདུན་གྱུར་གང་། །བཀྲ་ཤིས་

དམ་པ་དེས་ཀྱང་དེང་འདིར་བདེ་ལེགས་ཤོག །ང་རྒྱལ་སྙེམས་པར་ལྡན་པའི་སྟོན་པ་དྲུག་བཏུལ་ཅིང་། །གླང་ཆེན་རབ་སྨྱོ་མི་བཟད་ལྷ་སྦྱིན་གྱིས་རྦད་བཏུལ། །དྲང་སྲོང་མཆོག་ལ་སྤྲེའུ་རྒྱལ་ཅང་ཤེས་སྦྲང་རྩི་ཕུལ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །པདྨོ་གཞོན་ནུ་

ལྟ་བུའི་མཚན་ལྟས་ཤཱཀྱའི་རིགས། །ཟས་གཙང་སྲས་སུ་རྒྱལ་རིགས་འཁོར་ལོས་སྒྱུར་རྒྱལ་དུ། །བལྟམས་པ་ནས་བཟུང་ལྷ་ཡི་ཚལ་དུ་མ་ལུས་རྫོགས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བྱམས་པའི་སྟོབས་ནི་འགྲོ་བ་མ་ལུས་སྒྲོལ་མཛད་ཅིང་། །

སེམས་ཅན་མཐའ་ཡས་ཞི་བདེའི་ལམ་ལ་བཀོད་གྱུར་ཏེ། །གྲོང་ཁྱེར་རྩྭ་མཆོག་དམ་པར་དགོངས་པ་ཡོངས་རྫོགས་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཀྱི་ཚིགས་སུ་བཅད་པ་རྫོགས་སོ།། །།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words