བྱང་ཆུབ་ཀྱི་སྤྱོད་པ་ལ་འཇུག་པའི་དཀའ་འགྲེལ

Sanskrit title (Tibetan script, as in the text) བོ་དྷི་ཙཱརྱ་ཨ་བ་ཏཱ་ར་པཉྩི་ཀཱ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 105 · folio 154a

གྱུར་པ་ལ་ཞེ་ན། མ་བསམས་པར་ཐོབ་པ་ལ་གློ་བུར་དུའོ། །དེ་ལྟར་ན་ཐམས་ཅད་དུ་ངེས་པར་འཆི་བ་ཡིད་ལ་བྱས་པས་འཇིག་རྟེན་པའི་སྐྱེ་བོ་ལ་སེམས་པའི་སྤྱོད་པ་ཡོངས་སུ་བསམ་པས་ཅི་ཞིག་བྱ་སྟེ་དགོས་པ་ཅུང་ཟད་ཀྱང་མེད་དེ་བླང་བར་བྱ་བ་མ་ཡིན་ནོ་ཞེས་

པའི་ཐ་ཚིག་གོ། །བྱིས་པ་དང་འགྲོགས་པ་སྡུག་བསྔལ་གྱི་རྒྱུ་ཉིད་དོ་ཞེས་སེམས་ཅན་རྙེད་པ་མེད་ལ་ཞེས་པ་འདིས་ཀྱང་སྟོན་ཏེ། སེམས་ཅན་རྙེད་པ་མེད་པ་སྟེ་རྙེད་པ་དང་བྲལ་བ་ཡིན་ལ། བསོད་ནམས་མ་བྱས་པའི་ཉོན་མོངས་པ་འདིས་བསོད་སྙོམས་ལ་སོགས་པ་ཤིན་ཏུ་ཉོན་མོངས་

པས་མི་རྙེད་དོ་ཞེས་འཕྱ་བར་བྱེད་དོ། །རྙེད་པ་ཅན་ལ་ཡང་མི་སྙན་པར་བརྗོད་དེ། ཡོན་བདག་གམ་སྦྱིན་པ་པོ་རྣམས་ཀྱིས་དད་པས་མཆོད་ནས་སྦྱིན་པ་པོ་དང་ཡོན་བདག་རྣམས་ཚུལ་འཆོས་ལ་སོགས་པས་དད་པར་བྱས་ནས་ཆོས་གོས་ལ་སོགས་པའི་རྙེད་པ་ཐོབ་པ་ཡིན་ཏེ། གཞན་

དུ་ན་གཞན་ལ་ཡང་དེ་ལྟ་བུའི་ཡོན་ཏན་ཡོད་ན་ཅིས་ན་འདི་ཉིད་ཀྱིས་ཐོབ་ལ་གཞན་གྱིས་མ་ཡིན་ཞེས་དེ་ལ་མ་དད་པར་བྱེད་ཅིང་ཚིག་དེ་ལྟར་སྨྲའོ། །དེ་ལྟར་གཉི་ག་ལ་ཡང་དེ་རྣམས་ལས་སེམས་ཞི་བ་ཡོད་པ་མ་ཡིན་ཏེ། དེ་འདི་ལྟར་རང་བཞིན་གྱིས་སྡུག་བསྔལ་གྱི་རྒྱུ་ཡིན་པའི་

ཕྱིར་རོ། །ཡང་ན་གང་བྱིས་པའི་སྐྱེ་བོ་དེ་རྣམས་སྡུག་བསྔལ་བས་གནས་པ་ཡིན་པ་དེ་ལ་དེ་སྐད་ཅེས་བྱའོ། །དེ་དག་གིས་ནི་དེ་ལྟ་བུར་གྱུར་པས་ཏེ། ལྷན་ཅིག་ཏུ་འགྲོགས་པར་གྱུར་པས་དགའ་བ་ཇི་ལྟར་སྐྱེ་བར་འགྱུར་ཏེ་མ་ཡིན་ནོ་ཞེས་པའི་དོན་ཏོ། །བྱིས་པ་སྙིང་གྲོགས་ཀྱང་

བརྟེན་པ་མ་ཡིན་པར་གང་གི་ཕྱིར་བྱིས་པ་ཞེས་པ་ལ་སོགས་པ་གསུངས་ཏེ། གྲོགས་པོ་ནི་སྙིང་དུ་སྡུག་པ་ཡིན་ལ། དེ་བཞིན་གཤེགས་པས་གསུངས་པས་ནི་ལུང་རྣམས་སུ་གསུངས་པ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་རང་ལ་དགོས་པ་མེད་པར་བྱིས་པ་གང་ལ་ཡང་དགའ་བ་སྐྱེ་

བར་མི་འགྱུར་ཏེ། དེའི་ཕྱིར་དེ་མེད་པ་ལས་བཟློག་པར་འགྱུར་རོ། །དེས་ཀྱང་བྱིས་པ་དང་འགྲོགས་པ་ཡིན་ན་ཡང་བརྟན་པ་མ་ཡིན་ནོ། །དེ་ལ་བྱམས་པར་བྱས་པས་ཀྱང་སོ་སོའི་སྐྱེ་བོ་མགུ་བར་མི་ནུས་སོ། །དེ་ལྟ་བས་ན་དེ་དང་འགྲོགས་པ་ལས་བྱུང་བའི་ཉེས་པ་སྤང་བའི་

Vol. 105 · folio 154b

ཆེད་དུ་བདེ་བ་དང་ཡིད་བདེ་བས་དབེན་པ་འདོད་པས་གནས་པར་བྱ་སྟེ། བདག་གིས་དགོན་པ་ལ་སོགས་པ་བསྟེན་པ་ལ་གནས་པར་བྱའོ་ཞེས་ནས་དེའི་ཕན་ཡོན་བསྟན་པའི་ཕྱིར། ཤིང་རྣམས་ཞེས་པ་ལ་སོགས་པ་གསུངས་ཏེ། ཤིང་རྣམས་སྨོད་པར་མི་བྱེད་པ་ནི་ལྗོན་ཤིང་རྣམས་སོ། །རབ་ཏུ་

བསྒྲིམས་ནས་ཞེས་པ་ནི་ནགས་ལ་སོགས་པ་རྣམས་སུ་དེ་དང་རྗེས་སུ་མཐུན་པའི་ཡང་དག་པར་སྤྱོད་པས་བསྟེན་མི་དགོས་པ་ནི་བསྟན་པར་བྱ་བ་མ་ཡིན་ཏེ། ནགས་ན་འགྲོགས་པ་ན་བསམས་པ་ངན་པ་དང་བྲལ་བའི་ཕྱིར་རོ། །དེའི་ཕྱིར་བདག་ནམ་ཞིག་ཤིང་རྣམས་དང་ལྷན་ཅིག་ཏུ་འགྲོགས་པར་

འགྱུར། ཅི་ལྟ་བུར་གྱུར་པ་ཞེ་ན། བདེ་བར་འགྲོགས་པས་ཏེ་འདི་ལྟར་སྨོན་པ་ཡིན་ལ་བདེ་བའི་རྒྱུ་ཡིན་པས་བདེ་བ་ཡིན་ནོ་ཞེས་སྔར་བཞིན་དུའང་ཡང་གཅིག་པུ་རྒྱུ་བར་བྱ་བ་ལ་དགའ་བར་བྱ་བར་ཕུག་གམ་ཞེས་པ་ལ་སོགས་པ་གསུངས་པ་ལ། ལྷ་གང་ནི་སྐྱེ་བོའི་ཚོགས་དང་བྲལ་བ་ཡིན་ཏེ།

གནས་བཅས་ནི་ཅི་ལྟར་འདོད་པར་ནུབ་གཅིག་གམ་གཉིས་ངལ་བསོ་ཞིང་གནས་པའོ། །ལྗོན་ཤིང་གི་དྲུང་ནི་ཤིང་གི་འོག་ཡིན་ལ། ཕུག་ནི་རི་ལ་སོགས་པ་རྣམས་སུ་གསང་བའི་ཡུལ་ཡིན་ཏེ་དེར་ཡང་ངོ་། །ལྟོས་པ་མེད་པ་ནི་ཞེན་པ་མེད་པ་ཡིན་ཏེ། འགྱུར་ཞིག་གུ་ནི་སྨོན་པའི་གནས་འགའ་

ཡང་མེད་པས་སོ། །དེ་ཉིད་ཀྱི་ཕྱིར་རྒྱབ་ཏུ་མི་ལྟ་བ་ནི་ཕྱིས་ལྡོག་པ་མེད་པའི་ཕྱིར་རོ། །ཡང་གཞན་གསུངས་པ། ས་ཕྱོགས་ཞེས་པ་ལ་སོགས་པ་ལ། འགེགས་པར་བྱེད་པ་གང་གིས་ཀྱང་སྔར་བདག་གིར་མ་བྱས་པ་ཡངས་ཤིང་རྒྱ་ཆེ་བ་ཡིད་བདེ་བར་བྱེད་པ་རྣམས་སུ་སྟེ། རང་བཞིན་གྱིས་

ནི་རང་ཉིད་ཀྱིས་སོ། །དེ་ལྟ་བུ་རྣམས་སུ་བཅོས་མ་མ་ཡིན་པས་གནས་པར་བྱའོ། །ནམ་ཞིག་བདག་ཅེས་པ་ནི་སྨོན་པ་སྟེ། འདིར་གནས་པའི་བདེ་བ་གང་ཡིན་པ་དེ་བསྟན་པའི་ཕྱིར། རང་དབང་ཞེས་པ་ལ་སོགས་པ་གསུངས་ཏེ། རང་དབང་དུ་སྤྱོད་པ་ནི་གཞན་དབང་གིས་འཇུག་

པ་མ་ཡིན་ལ་གནས་མེད་པ་ནི་གནས་དང་བྲལ་བ་ཡིན་ཏེ་གང་ལ་གནས་པ་ལ་ཞེན་པ་དང་བྲལ་བས་གང་ལ་གནས་མེད་པ་སྟེ། གང་ལ་ཡང་བདག་གིར་བྱས་པ་མེད་པའི་ཕྱིར་རོ། །དེ་ལྟ་བུར་གྱུར་པ་གང་དང་ཡང་འབྲེལ་པ་མེད་པ་ཡིན་ཏེ་ལྷག་མ་ནི་གོ་སླའོ། །ཡང་འདི་ལྟར་འདོད་པ་

Vol. 105 · folio 155a

ཆུང་བས་སྨོན་པར་བྱ་བ་ཡིན་ནོ་ཞེས་བསྟན་པའི་ཕྱིར། སའི་ལྷུང་བཟེད་ཙམ་ཞེས་པ་ལ་སོགས་པ་གསུངས་ལ། སའི་ལྷུང་བཟེད་ནི་སའི་རང་བཞིན་གྱི་སློང་སྣོད་དོ། །དེ་ཉིད་འབའ་ཞིག་ནི་དེ་ཙམ་ཡིན་ལ། དེ་ལྟ་བུའི་བདོག་པ་གང་གི་ཡིན་པ་དེ་ལ་དེ་སྐད་

ཅེས་བྱའོ། །ཀུན་ལ་མི་མཁོ་བ་ནི་ཕྱག་དར་ཁྲོད་ལས་གོས་བྱས་པའི་ཕྱིར་ཏེ་ཡོངས་སུ་ལོངས་སྤྱད་པར་བྱ་བ་མ་ཡིན་པ་དང་། མཁོ་བ་མ་ཡིན་པ་ཞེས་པའི་ཐ་ཚིག་གོ། །དེ་ལྟ་བུའི་ཆོས་གོས་གང་གི་གོས་ཡིན་པ་དེ་ལ་དེ་སྐད་ཅེས་བྱའོ། །གཉིས་པོ་འདི་གཞན་གྱིས་འཕྲོག་པ་མ་ཡིན་

ཏེ། དེ་ཉིད་ཀྱི་ཕྱིར་འཇིགས་པ་མེད་པ་དང་། ལུས་གསོན་པ་ལ་ལྟོས་པ་མེད་པ་ཡིན་ལ། དེ་ཉིད་ལུས་འདི་སྦ་བ་མ་བྱས་ཀྱང་ཞེས་པས་སྟོན་ཏེ། ཕྱི་དང་ནང་གི་བདག་ཉིད་ཀྱི་ཡོངས་སུ་བཟུང་བ་མེད་པའི་ཕྱིར་བསྲུང་བ་དང་བྲལ་བ་ཡིན་ནོ། །མི་རྟག་པ་འདི་ཡང་ཞེན་པ་འདོར་བའི་རྒྱུ་ཡིན་

པས་ཐམས་ཅད་དུ་བསྟེན་པར་བྱའོ་ཞེས་ཚིགས་སུ་བཅད་པ་གསུམ་གྱིས་གསུངས་པ་ནི། ལུས་ཀྱི་གཉུག་མའི་སར་སོང་ནས། །ཞེས་པ་ལ་སོགས་པ་ཡིན་ཏེ། ལུས་ཀྱི་གཉུག་མའི་ས་ནི་དུར་གྱི་ས་སྟེ། ལུས་ཀྱིས་ཡུན་རིང་པོར་གནས་ནས་ཀྱང་དེ་བཞིན་དུ་མཐར་གཏུགས་པའི་ཕྱིར་

རོ། །གཞན་རུས་ཞེས་པ་ནི་སྔར་ཤི་བ་རྣམས་ཀྱི་རུས་པ་ཡིན་ལ་རུས་པ་ནི་རྣག་དང་ལྡན་པའོ། །དེའི་ཆོས་ཅན་ནི་དེའི་རང་བཞིན་ལ། བདག་གི་ལུས་ནི་འདི་ཉིད་ཀྱང་། །ཞེས་པ་ལ་སོགས་པས་དེ་ཉིད་མགོ་སྙོམས་པར་སྟོན་པར་བྱེད་དེ། འདི་ལྟར་ཞེས་པ་ནི་རུས་པ་གཞན་ཞུ་

བ་དང་རང་གི་ལུས་པོ་འདྲ་བ་ལ་བརྗོད་དོ། །རུས་པ་སྟེ་སྨད་པར་འགྱུར་བའོ། །ཇི་ལྟ་བུར་གྱུར་པ་ཞེ་ན། རང་གི་དྲིའི་ཞེས་པ་ལ་སོགས་པ་གསུངས་ཏེ། ཤིན་ཏུ་དྲི་ང་བས་ལྕེ་སྤྱང་ཟས་དེ་དོན་དུ་གཉེར་བས་ཀྱང་བཟོད་པར་དཀའ་བ་ཡིན་ནོ། །སྡུག་པ་དང་འགྲོགས་པ་ནི་དེས་ཀྱང་

དགག་པར་སྟོན་པ་ནི་ལུས་འདི་གཅིག་པུ་ཞེས་པ་ལ་སོགས་པ་གསུངས་པ་ལ། ལུས་འདི་གཅིག་པུ་བྱུང་བ་ནི་གཅིག་པ་ཉིད་དུ་བརྟགས་པའི་ལུས་ཡིན་ལ། ལྷན་ཅིག་སྐྱེས་པ་ནི་ལུས་དང་ལྷན་ཅིག་སྐྱེས་པའི་རུས་དུམ་ཡིན་ལ། སོ་སོར་འགྱེས་པར་གྱུར་པ་ནི་བྲལ་བར་འགྱུར་ན་

Vol. 105 · folio 155b

ཞེས་པའི་དོན་ཏོ། མཛའ་བ་དང་གཞན་ལྟ་ཅི་ཞིག་སྨོས་པ་ནི་སོ་སོར་ཅིའི་ཕྱིར་མི་འགྱུར་ཞེས་པའི་དོན་ཏེ། གང་ཐམས་ཅད་དུ་བྲལ་བ་ཉིད་དུ་འགྱུར་རོ་ཞེས་པའོ། །དེ་ལྟར་གྱུར་ན་ཡང་བུ་དང་ཆུང་མ་ལ་སོགས་པ་རྟག་ཏུ་བདག་གི་བདེ་བ་དང་སྡུག་བསྔལ་གྱི་གྲོགས་སུ་གྱུར་པས་དེ་

རྣམས་ལ་རྗེས་སུ་ཆགས་པར་བྱ་བར་འོས་པ་ཉིད་དོ་ཞེ་ན། སྐྱེ་བོ་གཅིག་པུ་ཞེས་པ་ལ་སོགས་པ་གསུངས་ཏེ། སྐྱེ་བ་དང་འཆི་བ་དག་གི་སྡུག་བསྔལ་གང་གིས་ཀྱང་ཐུན་མོང་དུ་བྱེད་པར་མི་འགྱུར་ཏེ། ཐམས་ཅད་ཀྱི་བར་སྐབས་སུ་རང་གི་ལས་ཀྱིས་བསྐྱེད་པའི་བདེ་བ་དང་སྡུག་

བསྔལ་ཉིད་མྱོང་བར་འགྱུར་ཏེ། དེའི་ཕྱིར་འདི་མངོན་པར་ཞེན་པ་ཙམ་ཉིད་དོ། །སྡུག་བསྔལ་གྱི་སྐལ་བ་དེ་གང་གི་ཕྱིར་གཞན་བདག་ལས་ཐ་དད་པ་རྗེས་སུ་ཆགས་པ་བྱས་པ་དེ་ལ་སྡུག་བསྔལ་བ་དེའི་ཆ་སྟེ་ཤས་ལེན་པར་འགྱུར། དེའི་དེ་ཡང་དེ་ཉིད་ཀྱིས་མྱོང་བར་བྱ་བའི་

ཕྱིར། དེའི་ཕྱིར་དགེ་བའི་ཕྱོགས་ཀྱི་གེགས་བྱེད་པའི་མཛའ་བས་དགོས་པ་ཅུང་ཟད་ཀྱང་ཡོད་པ་མ་ཡིན་ནོ། །དེ་ཁོ་ན་ཉིད་དུ་གང་ལ་ལའི་མཛའ་བ་ཅུང་ཟད་ཀྱང་གང་གིས་ཀྱང་ཡོད་པ་མ་ཡིན་ནོ་ཞེས་བསྟན་པའི་ཕྱིར། ལམ་དག་ཏུ་ནི་ཞེས་པ་ལ་སོགས་པ་གསུངས་ཏེ། ལམ་དུ་

ཞུགས་པ་ནི་ཕྱོགས་འགའ་ཞིག་ཏུ་འགྲོ་བར་རྩོལ་བ་ཡིན་ལ། ཇི་ལྟར་གཞན་དུ་འགྲོ་བ་དང་ལྷན་ཅིག་ཏུ་གནས་གཅིག་སྟེ་འདུ་ཁང་ལ་སོགས་པའི་གནས་འཛིན་པར་འགྱུར་བ་དེ་བཞིན་དུ་འཁོར་བར་ཡང་ལས་ཀྱི་དབང་དུ་གྱུར་པས་འཁོར་བ་ན་སྐྱེ་བ་ནི་རིགས་གཅིག་པ་དང་སྣག་གི་གཉེན་

མཚམས་ལ་སོགས་པ་རྣམས་དང་གནས་གཅིག་པ་སྟེ། སྐྱེ་བའི་གནས་ཡོངས་སུ་ལེན་ཏོ། །སླར་ཡང་དེ་སྤངས་ནས་འགའ་ཞིག་ཏུ་གཅིག་པུ་འགྲོ་བར་འགྱུར་ཏེ། དེར་སུ་ཞིག་ཀྱང་དེ་དང་ལྷན་ཅིག་ཏུ་འགྲོ་བ་མ་ཡིན་ནོ། །དེའི་ཕྱིར་གང་ལ་ལའི་དངོས་པོར་གྱུར་པའི་གྲོགས་ལ་ལ་

ཡང་ཡོད་པ་མ་ཡིན་ནོ། །དེས་ན་དོན་མེད་སྟོང་ཕྲག་བསྐྱེད་པའི་རྒྱུ་རང་ཉིད་ཀྱིས་བརྟགས་ནས་སུ་ཞིག་གིས་གྲོགས་སུ་བྱེད་པར་འགྱུར་རོ་ཞེས་པའོ། །མཛའ་བའི་སྐྱོན་དེ་ལྟར་བརྗོད་ནས། ཡང་གཅིག་པུ་ཉིད་ཀྱི་ཡོན་ཏན་འདི་དག་ཡིན་ནོ་ཞེས་ཚིགས་སུ་བཅད་པ་གསུམ་གྱིས་

Vol. 105 · folio 156a

བསྟན་པའི་ཕྱིར། འཇིག་རྟེན་ཞེས་པ་ལ་སོགས་པ་གསུངས་ཏེ། ད་ནི་གསོན་པའི་མཐའ་མི་འདོད་ཀྱང་ངེས་པར་འཆི་བར་འགྱུར་བས་ཁྱིམ་ན་གནས་པའི་སྟོབས་ཀྱིས་དོར་བར་བྱ་བ་ཡིན་པ་དེ་བས་ན་དེ་ལྟར་རང་ཉིད་ཀྱིས་གསོན་པ་ཉིད་ན་དོར་བར་རིགས་སོ། །དེ་ནས་ཞེས་པ་

ནི་ཁྱིམ་ནས་སོ། །མྱ་ངན་མེད་པར་ཞེས་པ་ནི་ཀྱི་ཧུད་ཅེས་པ་ལ་སོགས་པ་བརྗོད་པའི་ཚིག་གིས་ཡོངས་སུ་གདུངས་པ་འཇིག་རྟེན་གྱི་གཉེན་ལ་སོགས་པས་མ་བྱས་པ་དེ་སྲིད་ཉིད་དུའོ། །དེ་ལས་དང་པོ་ཉིད་དུ་ནགས་སུ་འགྲོ་བར་བྱའོ། །ཡང་འདིར་ཡོན་ཏན་གྱི་ཁྱད་པར་ཅི་ལྟ་བུ་ཡོད་ཅེ་ན།

བཤེས་མེད་ཅེས་པ་ལ་སོགས་པ་གསུངས་ཏེ། རྗེས་སུ་ཆགས་པ་དང་འཁོན་པ་དང་བྲལ་བའི་ཕྱིར་རོ། །ཤི་ན་ཡང་མྱ་ངན་བྱེད་པ་མེད་པ་ནི་མྱ་ངན་གྱིས་བསྐྱེད་པའི་སྡུག་བསྔལ་བརྟེན་པར་མི་འགྱུར་བའོ། །ཅིའི་ཕྱིར་ཞེ་ན། འཇིག་རྟེན་ན་ནི་སྔར་ཉིད་ཤི། །གང་གི་ཚེ་ཁྱིམ་ནས་

བྱུང་བ་དེ་ཉིད་ཀྱི་ཚེ་རང་གི་བཤེས་དང་གཉེན་ལ་སོགས་པའི་འཇིག་རྟེན་གྱི་ཡུལ་ནའོ། །ཡོན་ཏན་གཞན་འདི་ཡང་ཡོད་པར་དྲུང་ན་འཁོད་པར་ཞེས་བྱ་བ་ལ་སོགས་པ་གསུངས་ཏེ། དྲུང་ན་འཁོད་པ་ནི་ཉེ་བར་གནས་པའི་གཉེན་དང་རིགས་གཅིག་པ་ལ་སོགས་པ་རྣམས་ཡིན་ཏེ། ནད་པ་

དེ་དང་བྲལ་བས་མྱ་ངན་ཏེ། མྱ་ངན་སྐྱེད་པ་དང་གནོད་པ་བྱེད་པ་ཡང་ཡོད་པ་མ་ཡིན་ཏེ། བདག་ཉིད་ཀྱི་ལུས་དང་ངག་དང་ཡིད་ལ་གདུང་བར་བྱེད་པ་མ་ཡིན་ནོ། །ཡང་ན་དེ་རྣམས་ཀྱི་མྱ་ངན་མཐོང་བས་འཆི་བ་པོའི་ཡིད་གདུང་བར་བྱེད་པ་མ་ཡིན་ནོ། །འདིའི་ཞེས་པ་ནི་སྐྱེ་བོ་དང་

འགྲོགས་པ་དང་བྲལ་བའི་སྟེ། འཆི་བའི་དུས་ན་ཡོན་ཏན་འདི་འབའ་ཞིག་ནི་མ་ཡིན་ནོ། །འོན་ཀྱང་སངས་རྒྱས་རྗེས་དྲན་ལ་སོགས་པའང་ཡིན་ལ། སོགས་པའི་སྒྲས་ནི་དེ་ཁོ་ན་ཉིད་ཡིད་ལ་བྱེད་པའམ་ཆོས་རྗེས་སུ་དྲན་པ་ཡང་ངོ་། །དེ་བས་ཞེས་པ་ལ་སོགས་པས་ནི་མཇུག་

སྡུད་པར་བྱེད་དེ། གཅིག་པུ་ནི་ཆགས་པ་མེད་པར་རྒྱུ་བས་སོ། །ཉམས་དགའ་བ་ནི་བདེ་བ་སྐྱེད་པའི་རྒྱུ་ཡིན་པའི་ཕྱིར་ལ། ཚེགས་ཆུང་བ་ནི་སྡུག་བསྔལ་གྱི་གཉེན་པོ་ཡིན་པའི་ཕྱིར་ཏེ། བདེ་བ་སྐྱེད་པ་ནི་མངོན་པར་མཐོ་བ་དང་ངེས་པར་ལེགས་པ་ཐོབ་པའི་རྒྱུ་ཡིན་པའི་ཕྱིར་ལ།

Vol. 105 · folio 156b

གཡེང་བ་ཐམས་ཅད་ཞི་བར་བྱེད་པ་ནི་ལུས་དང་ངག་དང་ཡིད་ཀྱིས་ཉེས་པར་སྤྱོད་པའི་རྣམ་པར་གཡེང་བ་ཐམས་ཅད་ཞི་བར་བྱེད་པ་ཡིན་ཏེ། ཟློག་པར་བྱེད་པའི་རྒྱུ་ཡིན་པའི་ཕྱིར་རོ། །བདག་གིས་རྟག་ཏུ་བསྟེན་པར་བྱ། །ཞེས་པ་ནི་འདི་ཉིད་ལ་མངོན་པར་ཞེན་པས་ཞེན་པ་མེད་

པར་བྱ་ཞེས་པའི་དོན་ཏོ། །དེ་ལྟར་སྐྱེ་བོ་དང་འགྲོགས་པ་སྤངས་པས་ལུས་རྣམ་པར་དབེན་པ་བཤད་ནས། སེམས་རྣམ་པར་དབེན་པ་བཤད་པའི་ཕྱིར། བསམ་པ་གཞན་ནི་ཞེས་པ་ལ་སོགས་པ་གསུངས་ཏེ། བསམ་པ་གཞན་ཀུན་ནི་མི་བདེན་པའི་རྣམ་པར་རྟོག་པའི་རང་བཞིན་

ཏེ་དེ་རྣམས་བཏང་བ་ནི་དེ་དང་བྲལ་བའོ། །བདག་གི་སེམས་ནི་རྩེ་གཅིག་གིས་ཞེས་པ་ནི་རྩེ་གཅིག་པ་ནི་གཙོ་བོ་ཡིན་ཏེ། སེམས་དེ་ཡིད་ལ་བྱེད་པ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། དེ་ལྟ་བུའི་སེམས་གང་ལ་ཡོད་པ་དེ་ནི་དེ་སྐད་ཅེས་བརྗོད་པའམ། སེམས་རྩེ་གཅིག་པས་གཅིག་ཏུ་

དབང་དུ་གྱུར་པར་དེའི་རྒྱུ་བ་ལ་ལྟ་བར་བརྩོན་པའམ། དམིགས་པ་ངེས་པ་ལ་འབྲེལ་བའི་ཡིད་གང་གི་ཡིན་པ་ཞེས་ཚིག་སྡུད་པ་ཡིན་ལ། དེ་ལྟ་བུར་གྱུར་པའི་ཡང་དག་པར་མཉམ་པར་གཞག་པ་ལ་སེམས་ཞི་བར་གནས་པས་གཞག་པར་བྱ་སྟེ། དེ་ལ་བརྩོན་པར་འགྱུར་བར་

འགྲོ་བར་བྱ་ཞིང་དེ་ལ་རྩེ་གཅིག་པས་སྦྱར་བར་བྱའོ་ཞེས་པ་ནི་གདུལ་བར་བྱ་སྟེ་ཡང་དང་ཡང་དུ་དམིགས་པ་དེ་ཉིད་ལ་སྦྱོར་བའམ་ཕྱིའི་རྣམ་པར་གཡེང་བ་དགག་པའི་ཕྱིར་དེ་ལ་སེམས་མཉམ་པར་གཞག་པ་ནི་གཉེན་པོ་ཡིན་པའི་ཕྱིར་རོ། །འདོད་པའི་རྣམ་པར་རྟོག་པ་དགག་པར་

འདོད་ནས། འཇིག་རྟེན་ཞེས་པ་ལ་སོགས་པ་གསུངས་ཏེ། སྲིད་པ་ལ་སྦྱོར་བ་མ་སྤངས་པས་འདོད་པར་བྱ་བ་ཉིད་ཀྱིས་ཞེན་པའི་ཕྱིར་འདོད་པ་ནི་གཟུགས་ལ་སོགས་པའི་ཡུལ་ལ་བརྗོད་དེ། ནིའི་སྒྲ་ནི་གང་གི་ཕྱིར་གྱི་དོན་ཡིན་ལ། དེ་བས་འདོད་ལ་དགའ་མི་བྱ། །ཞེས་

པ་དང་འབྲེལ་ཏོ། །དེ་ཡང་བརྟེན་པ་ན་ཕུང་ཁྲོལ་སྐྱེད་པ་ཡིན་ཏེ། མི་འདོད་པའི་འབྲས་བུ་སྟོབ་པའི་ཕྱིར་རོ། །འཇིག་རྟེན་འདི་ནི་སྐྱེ་བ་འདི་ཉིད་ཡིན་ལ། ཕ་རོལ་ནི་འཇིག་རྟེན་ཕ་རོལ་ཏེ་སྐྱེ་བ་ཕྱི་མ་ཞེས་པའི་དོན་ཏོ། །དེ་ཉིད་འདིར་བསད་དང་ཞེས་པ་ལ་སོགས་པས་

Vol. 105 · folio 157a

སྟོན་ཏེ། གཞན་གྱི་ཆུང་མ་འཕྲོག་པ་ལ་སོགས་པས་འཇིག་རྟེན་འདིར་འཆི་བ་ལ་སོགས་པའི་ཁྱད་པར་མངོན་སུམ་ཉིད་དུ་རྟོགས་ལ་འཇིག་རྟེན་ཕ་རོལ་དུ་ནི་ལུང་ལས་སོ། །དེ་ལ་གཞན་འདོད་པའི་འདོད་ཆགས་རྣམས་ལ་འདོད་པའི་ཆགས་པ་ནི་ཤིན་ཏུ་ཡང་

དཀའ་བ་ཡིན་ཏེ། འདི་ལྟར་བུད་མེད་ལ་སྟེ་རེག་པའི་ཆགས་པའོ། །དེའི་ཕྱིར་དང་པོར་དེ་ཉིད་ལ་ཆགས་པ་བཟློག་པའི་ཕྱིར་སྨད་པར་བཞེད་ནས། གང་ཕྱིར་ཞེས་པ་ལ་སོགས་པ་གསུངས་ཏེ། གང་གི་ཕྱིར་ནི་གང་གཞན་གྱི་ཆུང་མ་ལ་སོགས་པའི་ཆེད་དུ་ཡིན་ལ། ཕོ་ཉ་དང་ཕོ་

ཉ་མོ་ལ་དེའི་དོན་བསམ་པས་སྐྱེས་པ་དང་ཕྲིན་སྐུར་བར་བྱེད་པ་རྣམས་ཐལ་མོ་སྦྱར་ནས་ཁྱེད་ཀྱི་དྲིན་གྱིས་བདག་དང་དེ་ཇི་ལྟར་ཕྲད་པར་བྱེད་པ་དེ་བཞིན་དུ་མཛོད་ཅིག །དེ་ལྟར་ན་བདག་ཁྱེད་ཀྱིས་གསོན་པར་བྱས་པ་ཡིན་ནོ་ཞེས་གསོལ་བ་འདེབས་པ་སྔོན་དུ་སོང་བས་ལག་པ་ཐལ་མོ་སྦྱར་ཏེ་ལན་

དུ་མར་གསོལ་བ་འདེབས་སོ། །དེའི་ལས་ཀྱི་རྣམ་པར་སྨིན་པ་ལས་འཇིག་རྟེན་ཕ་རོལ་དུ་གནོད་པའི་མི་དགེ་བའི་ལས་དེ་ལ་ཡང་མ་བལྟས་པ་དང་། གྲགས་པ་མ་ཡིན་པ་འཇིག་རྟེན་འདི་ལ་གནོད་པར་བྱེད་པ་ཡིན་ལ་སྔོན་ཏེ་སྔ་མ་ཉིད་དུ་དེ་ལ་གསོལ་བ་འདེབས་པའི་དུས་ན་སྟེ། དེའི་

གསོན་པའི་གནས་སྐབས་ན་ཞེས་པའི་དོན་ཏོ། །འཇིགས་པ་ལ་ཡང་བདག་ཞུགས་ཤིང་། །ཞེས་ཏེ་དེ་ལ་ཞུགས་པ་ན་འཆི་བ་ལ་སོགས་པའི་ཉེས་དམིགས་ཀྱིས་འཇིགས་པ་ཡང་དེ་ལྟར་བྱུང་བ་ལ་མ་འཛེམས་པས་བདག་ཉིད་ནི་རང་གི་ལུས་བཅུག་པ་སྟེ་སྦྱར་བའོ། །རྫས་ཀྱང་

ཟད་པར་བྱས་པས་ཏེ་གོས་དང་རྒྱན་དང་བྱུག་པ་དང་ག་བུར་ལ་སོགས་པའི་བྱུག་པ་སྤྱད་པས་རྫས་ཀྱང་ཟད་པར་བྱེད་དོ། །གཉི་གར་ཡང་གང་གི་དོན་དུ་ཞེས་པ་དང་། སྔོན་ཞེས་པ་དང་ཡང་འབྲེལ་ཏོ། །གང་ལ་ཞེས་པ་ནི་རུས་པ་ཞེས་པ་དང་སྦྱར་བར་བྱ་སྟེ། ཡོངས་སུ་འཁྱུད་པ་ནི་

བརྟན་པར་འཁྱུད་པ་ཡིན་ལ། མཆོག་ཏུ་དགའ་བའི་རོ་ཉམས་སུ་མྱོང་བར་གྱུར་པ་ཡིན་ཏེ། དེ་ཉིད་ཀྱི་རུས་པ་ནི་ཤི་བ་དེའི་རུས་པ་ཡིན་ཏེ། དུར་ཁྲོད་ཀྱི་སར་ལྷུང་བ་རྣམས་ཡིན་ལ། གཞན་གྱི་དབང་དུ་གྱུར་པ་ནི་མ་ཡིན་ཏེ། བདག་གི་དབང་དུ་གྱུར་པ་ཡིན་ཞིང་བདག་མ་ཡིན་

Vol. 105 · folio 157b

པ་ནི་ཡོངས་སུ་མ་བཟུང་བ་དག་ཡིན་ཏེ། གཞན་གང་གིས་ཀྱང་བདག་གིར་མ་བྱས་པ་ཞེས་པའི་དོན་ཏོ། །དེའི་ཕྱིར་རབ་ཏུ་འདོད་ཅིང་ཡོངས་སུ་ཞེན་ནས་ཏེ། ཅིའི་ཕྱིར་ཇི་ལྟར་འདོད་པར་འཁྱུད་པའི་དོན་དུ་བརྟན་པར་འགྲོ་བར་མི་བྱེད་ཅེས་པའོ། །དགའ་བར་ཞེས་པ་ནི་སྔར་

བཞིན་ནོ། །རང་གི་ཆུང་མ་ལ་ཞེན་པའི་དབང་དུ་བྱས་ནས། གང་ཞིག་དང་པོ་ཞེས་པ་ལ་སོགས་པ་གསུངས་ཏེ། ངོ་ཚའི་དབང་དུ་གྱུར་པས་ཆུང་མའི་བཞིན་འོག་ཏུ་ལྟ་བ་ན་ཇི་ལྟར་ཡང་འདིའི་བྱད་བཞིན་གསལ་བར་བལྟ་བར་བྱ་བར་འདོད་པས་འབད་པས་ཏེ་འདོད་པ་ཅན་གྱིས་ཞེས་

པས་བསྐྱེད་པའི་སེམས་ཀྱིས་འདེགས་པ་ན་ཆུང་མ་ངོ་ཚའི་དབང་དུ་གྱུར་པ་དེ་ཡང་འོག་ཏུ་ལྟ་བར་བྱེད་དེ། ངོ་ཚས་ངེས་པར་འོག་ཏུ་ལྟའོ། །སྔོན་ནི་སྔར་དུར་ཁྲོད་དུ་འགྲོ་བ་ལས་སྔ་མར་ཡིན་ལ་དེ་ལྟ་ན་ཡང་བྱ་སླ་བས་མ་མཐོང་ངོ་ཞེས་མཐོང་ངམ་མ་མཐོང་ཡང་ཞེས་གསུངས་པ་ལ།

བརྒྱ་ལ་ཅུང་ཟད་མཐོང་བ་ན་རྣམ་པ་ཐམས་ཅད་དུ་ལྟ་བར་འདོད་པ་ཅིའི་ཕྱིར་ལྡོག །སེང་བའི་རས་ཀྱིས་གདོང་གཡོགས་པ་སྟེ་ཡུལ་དབུས་ན་ཕལ་ཆེར་བཅོམ་བརླག་པའི་རིགས་རྣམས་ཀྱི་རིགས་ཀྱི་ཆུང་མ་བཞིན་དགབ་པའི་དོན་དུ་སེང་རས་ཀྱིས་གཡོགས་ཏེ། གང་གི་བྱད་

དེས་གཡོགས་ཤིང་བསྒྲིབས་པའི་བྱད་དེས་ད་ནི་དུར་ཁྲོད་གྱི་ས་ན་བྱ་རྒོད་ཀྱིས་བསལ་བར་བྱས་པས་སོ། །གཡོགས་མ་ཐམས་ཅད་དང་བྲལ་བས་རྣམ་པར་བསལ་བར་བྱས་པ་ཇི་ལྟར་འདོད་པར་ཅིའི་ཕྱིར་ལྟ་ཞིང་རྟོག་པར་མི་བྱེད། ཅི་ལྟར་གྱུར་པས་ཤེ་ན། ཁྱོད་ཉོན་མོངས་

པའི་གདོང་ལ་མི་བཟོད་གྱུར་པ་བཞིན་དུ་དེའི་གདོང་བལྟ་བའི་དོན་དུ་ཁྱོད་ཀྱིས་སྔོན་ཡོངས་སུ་ངལ་བར་བྱས་པ་དེ་ལ་ཁྱེད་རྣམས་ཀྱིས་བཟོད་པར་མི་ནུས་པ་བཞིན་དུ་དེ་ལ་ད་ལྟར་འཇིགས་པ་མཐོང་ནས་འཇིགས་པར་གྱུར་པ་ན་ཅིའི་ཕྱིར་འབྱེར་བར་བྱེད་ཅིང་འབྲོས་པར་བྱེད།

འདོད་པ་ཅན་ལ་བརྒལ་ཞིང་བརྟགས་པས་བསྐྱོད་པ་གཞན་འདི་ཡང་བསྟན་པའི་ཕྱིར། གཞན་རྣམས་མིག་གིས་ཞེས་པ་ལ་སོགས་པ་གསུངས་ཏེ། སུ་ཡང་དེ་ལ་ལྟ་བར་མ་བྱེད་ཅིག་ཅེས་སྔར་གསུངས་ནས་ཡོད་པ་དེ། ཇི་སྲིད་དུ་ད་ནི་བྱ་རྒོད་ལ་སོགས་པས་ཟ་བ་ལ་

Vol. 105 · folio 158a

ཐུག་པ་སྟེ། ཀྱེ་ཕྲག་དོག་ཅན་ཅིའི་ཕྱིར་སྲུང་བར་མི་བྱེད་དེ་སྦེད་པར་མི་བྱེད། གཞན་ཡང་ད་ནི་ཤིན་ཏུ་ཡང་བསྲུང་བར་འོས་སོ་ཞེས། ཤའི་ཕུང་པོ་ཞེས་པ་ལ་སོགས་པ་གསུངས་ཏེ། བྱ་རྒོད་ལ་སོགས་པ་གང་རྣམས་ཀྱི་ཟས་ཏེ། ཁ་ཟས་ཤའི་

ཕུང་པོའི་གཟུགས་ལ་ཁྱོད་ཀྱིས་མེ་ཏོག་ལ་སོགས་པ་རྣམས་ཀྱིས་མཆོད་པར་བྱེད། བྱ་རྒོད་དང་གཞན་ཅེ་སྤྱང་ལ་སོགས་པ་རྣམས་ཀྱིས་ཤའི་ཕུང་པོ་སྟེ་ཤའི་ཚོགས་ཟ་བ་འཇིགས་སུ་རུང་བ་མཐོང་བ་ན་ཅིའི་ཕྱིར་ཕྲག་དོག་ཅན་སྲུང་བར་མི་བྱེད་ཅེས་སྦྱར་བར་བྱ་བ་དང་། ད་ལྟ་ཅིའི་ཕྱིར་

འབྱེར་བར་མི་བྱེད་ཅེས་པ་བར་དུ་ཆོད་པ་དང་ཡང་འབྲེལ་ཏོ། །འདི་ཡང་ཁྱེད་རྣམས་ཀྱིས་ཅིའི་ཕྱིར་ལྟ་བར་མི་བྱེད་ཅེས་རུས་གོང་ཞེས་པ་ལ་སོགས་པ་གསུངས་ཏེ། མི་འགུལ་ཡང་སྟེ་ཤིང་དང་བོང་བ་ལ་སོགས་པ་དང་འདྲ་བའི་ཕྱིར་རོ། །ཁྱོད་སྐྲག་ན་ཞེས་ཟུར་གྱིས་འདྲི་བར་བྱེད་དེ།

རུས་གོང་ལས་ཏེ་རུས་པའི་སྒལ་ཚིགས་ལས་སོ། །དེ་ལྟར་ཞེས་པ་ནི་འདི་ལྟར་འཇིགས་པའི་གཟུགས་མཐོང་བ་ལས་ཏེ་བལྟས་པ་ལས་སོ། །ཡང་ན་དེ་ལྟར་ཞེས་པ་ནི་སྐྲག་པ་སྟེ་གང་རིང་བ་ལས་ཀྱང་ཤིན་ཏུ་རིང་བར་བྲོས་པར་བྱེད་ཅེས་པ་དང་སྦྱར་རོ། །གང་གི་ཕྱིར་དེ་ལྟར་

གཡོ་བ་ལས་ཅིའི་ཕྱིར་འཇིགས་ཤེ་ན། རོ་ལངས་བཞིན་དུ་ཞེས་གསུངས་ཏེ། གསོན་པར་གྱུར་པ་འབྱུང་པོའི་གདོན་གྱིས་བསྐྱོད་པར་བྱས་པ་ན་བསྐྱོད་པ་ལས་ཅིས་ན་འཇིགས་པར་མི་འགྱུར་ཏེ། དེའི་ཕྱིར་ཤིན་ཏུ་འཇིགས་པར་རིགས་སོ་ཞེས་པའི་དོན་ཏོ། །རེ་ཞིག་དེ་ལྟར་སྨད་

པར་བྱ་བ་ཉིད་དུ་བསྟན་ནས། ཡང་གཞན་དུ་བསྟན་པའི་ཕྱིར། ཟས་ནི་གཅིག་པུ་ཞེས་པ་ལ་སོགས་པ་གསུངས་ཏེ། ཤེས་པ་གཏི་མུག་གིས་བསྒྲིབས་པ་འབའ་ཞིག་དུག་གིས་མྱོས་པར་འགྱུར་བའི་སེམས་འདོད་པ་ཅན་གྱི་དེ་འདོད་པར་བྱ་བ་ཉིད་ཡིན་པས་དེ་བཞིན་སྦྲང་

རྩིའི་བཏུང་བ་བཞིན་དུ་རིགས་ནས་དེའི་གདོང་འབའ་ཞིག་གི་མཆིལ་མའི་བཏུང་བ་འདོད་པ་ལ་བརྒལ་ཞིང་རྟག་པ་མཚུངས་པ་ཡིན་ཏེ། གཉི་གའི་ཡང་རྒྱུ་གཅིག་པུ་བཟའ་བ་དང་བཏུང་བའི་རང་བཞིན་ལས་བྱུང་བ་དེ་ལ་དེ་དག་གི་ནང་ནས་ཁྱེད་མི་གཙང་བ་བཤང་བ་ལ་མི་

Vol. 105 · folio 158b

དགའ་ཞིང་། ཁ་ཆུ་བད་ཀན་གྱི་བཏུང་བ་ལ་ཅིའི་ཕྱིར་དགའ་སྟེ་རྣམ་པ་གང་གིས་གཞན་དུ་མ་ཡིན་པར་དེར་དགའ་བར་འགྱུར་ཏེ། གཉི་ག་ལ་ཡང་རིགས་སོ་ཞེས་དགོངས་སོ། །འོན་ཏེ་དེ་ལྟར་ན་གལ་ཏེ་ཡང་གཉི་ག་ལ་ཡང་རྒྱུ་ཐ་དད་པ་མ་ཡིན་པ་དེ་ལྟར་ན་ཡང་དེ་ལ་ཤིན་ཏུ་དྲི་མི་ཞིམ་པས་

ཕྱིར་ཕྱོགས་ཤིང་གཞན་ལ་ནི་དེ་མེད་པས་དགའ་བ་ཡིན་ནོ་ཞེ་ན། འདི་དེ་ལྟར་ན་ཡང་ལེགས་པར་བརྗོད་པ་མ་ཡིན་ནོ་ཞེས་བསྟན་པའི་ཕྱིར། ཤིང་བལ་ཞེས་པ་ལ་སོགས་པ་གསུངས་ཏེ། རས་ལ་སོགས་པའི་བལ་གྱིས་ཡོངས་སུ་བཀང་བའི་ནང་ཚངས་ཅན་ལ་སོགས་པའི་སྔས་རེག་

ན་འཇམ་པ་ལ་འདོད་ཅིང་དགའ་བར་མི་བྱེད་དེ་སྡུག་པར་མི་བྱེད་པར་མི་གཙང་བ་ལས་བྱུང་བའི་དྲི་ང་བ་འཛག་པ་མ་ཡིན་ནོ་ཞེས་བྱས་ནས་མི་གཙང་བས་ཡོངས་སུ་གང་བའི་བུད་མེད་ཀྱི་ལུས་པོ་ཉིད་ལ་ཅིའི་ཕྱིར་དགའ་བར་བྱེད། དེ་ལྟར་ནའང་ཅིའི་ཕྱིར་འདོད་ལྡན་ཏེ་འདོད་པའི་བདེ་བ་

འདོད་པས་གང་ལས་མི་གཙང་བ་ལ་རྨོངས་ཏེ། འདི་ནི་གཏན་ཚིགས་ཀྱི་ཚིག་ཡིན་ལ། མི་གཙང་བ་སྟེ་ཡུལ་མི་གཙང་བའམ་མི་གཙང་བས་རྨོངས་པའོ། །མི་གཙང་བ་ལ་སྟེ། གཙང་བ་ལས་བཟློག་པ་དེ་ཉིད་ལས་ཤིན་ཏུ་ཡང་མངོན་པར་དགའ་བར་ཉམས་སུ་མྱོང་བར་འགྱུར།

དེ་ལྟ་བས་ན་གལ་ཏེ་རང་མི་གཙང་བ་ཉིད་བུད་མེད་ཀྱི་ལུས་མི་གཙང་བ་ཉིད་དང་ཐུན་མོང་བ་དེ་ལྟར་ན་ཡང་དེ་གཅིག་ནི་བསྒྲིབས་པ་ཡིན་ལ། གཞན་ནི་མ་གཡོགས་པ་ཡིན་ཏེ། དེའི་ཕྱིར་གཅིག་ཡོངས་སུ་སྤངས་པས་འདི་ལ་ཆགས་པར་བྱེད་དོ་ཞེ་ན། གང་ལ་གཡོགས་ན་ཞེས་པ་ལ་

སོགས་པ་གསུངས་ཏེ། མི་གཙང་བའི་རང་བཞིན་གཡོགས་པ་གང་ལ་ཅི་མཐོང་ན་ཡང་འདི་ལྟ་བུ་མངོན་པར་ཞེན་པ་སྟེ་མ་གཡོགས་པར་མཐོང་བར་གྱུར་ན་ཤིན་ཏུ་འདོད་པ་སྐྱེ་བར་རིགས་ཏེ། དེ་ལྟ་བུར་གྱུར་པ་ལ་ཅིའི་ཕྱིར་འདོད་པར་མི་བྱེད། འོན་ཏེ་དེ་ལྟ་བུར་གྱུར་པ་ལ་རྣམ་

པ་ཐམས་ཅད་དུ་ཅུང་ཟད་ཀྱང་དགོས་པ་མེད་པས་ཕྱིར་ཕྱོགས་པ་ཉིད་ཡིན་ནོ་ཞེ་ན། གང་དེ་ལྟར་ན་ཅིའི་ཕྱིར་ན་རྒྱུ་ཅི་གཡོགས་པ་བྱེ་བྲག་ཏུ་ཚོལ་ཏེ། དེ་གཞན་སྤངས་ནས་དེ་ཉིད་དང་ཕྲད་པ་ལ་འབད་པར་བྱེད། གཞན་ཡང་ཁྱོད་ལ་འདི་འདྲི་བར་བྱ་སྟེ། ཅི་ཁྱོད་མི་གཙང་བ་ལ་

Vol. 105 · folio 159a

ཆགས་པ་དང་བྲལ་བའམ་མ་ཡིན་ཞེས་སོ། །འདི་རྣམ་པར་རྟོག་པ་དང་པོའི་དབང་དུ་བྱས་ཏེ། གལ་ཏེ་མི་གཙང་ཞེས་པ་ལ་སོགས་པ་གསུངས་ཏེ། གལ་ཏེ་ཁྱོད་མི་གཙང་བ་ལ་མ་ཆགས་ཤིང་རྣམ་པ་ཐམས་ཅད་དུ་ཞེན་པ་མེད་ན་འོ་ན་ཅིའི་ཕྱིར་གཞན་ཐ་དད་

པ་པང་དུ་འཁྱུད། འདི་ཅི་ལྟ་བུ་ཞེ་ན། ཤའི་འདམ་ཞེས་གསུངས་ཏེ། ཤ་ཉིད་འདམ་དང་འདྲ་སྟེ་ཞལ་ཞལ་དུ་ཆོས་མཐུན་པའི་ཕྱིར་ལ། དེས་ཞལ་ཞལ་བྱས་པ་ནི་ཉེ་བར་བསྐུས་པའོ། །ཅིའི་ཕྱིར་དེ་ལྟར་གྱུར་པ་ཡིན་ཞེ་ན། རུས་གཟེབ་རྒྱུས་པས་སྦྲེལ་བ་ལ། །ཞེས་གསུངས་ཏེ། རྒྱུས་

པས་སྦྲེལ་བ་ནི་བཅིངས་ཤིང་དབང་དུ་བྱས་པ་ཡིན་ལ། རུས་གཟེབ་ནི་རུས་པ་མཐའ་དག་ཡིན་ཏེ། གཞན་དུ་ན་དུམ་བུར་འཐོར་བར་འགྱུར་རོ། །དེ་ལྟར་འདོད་ཆགས་དང་བྲལ་བའི་ཡུལ་དུ་སྟོན་པར་བྱེད་དོ། །འོན་ཏེ་མི་གཙང་བ་ལ་ཆགས་པ་ཡིན་ནོ་ཞེས་རྣམ་པར་རྟོག་པ་གཉིས་

པ་ཁས་ལེན་ན། དེ་ལ་ཁྱོད་ཉིད་ཅེས་པ་ལ་སོགས་པ་གསུངས་སོ། །ཡང་ན་གཞན་དུ་སྦྱར་བར་བྱ་སྟེ། གང་བརྗོད་པ་པགས་པ་ལ་སོགས་པ་གཞན་གྱིས་གཡོགས་པ་ལ་ཆགས་པར་གྱུར་ན་མ་གཡོགས་པ་དེ་ལ་ཡང་གལ་ཏེ་ཞེས་པ་ལ་སོགས་པ་གསུངས་ཏེ། གལ་ཏེ་པགས་པ་ལ་

སོགས་པས་གཡོགས་པའི་ཕྱིར་རྒྱུ་དེས་ཁྱོད་མི་གཙང་བ་ལ་ཆགས་པར་གྱུར་ན་དེའི་ཚེ་ཅིའི་ཕྱིར་གཞན་ཏེ་གཞན་གྱི་རུས་པ་ལ་འཁྱུད་པར་བྱེད། གཞན་ནི་སྔར་བཞིན་དུའོ། །འདི་ལ་ཡང་ཅིའི་ཕྱིར་མི་རིགས་ཞེས། ཁྱོད་ཉིད་ཅེས་པ་ལ་སོགས་པ་གསུངས་ཏེ། རང་ཉིད་དེ་བདག་ཉིད་

མི་གཙང་བ་ཤིན་ཏུ་མང་བ་ནི་མཆིལ་མ་དང་སྣབས་དང་གླད་རྒྱས་དང་གཅི་བ་དང་བཤང་བ་རྣམས་ཁྱེད་ལ་ཡོད་པ་ཡིན་ལ། མི་གཙང་བ་དེ་ཉིད་ཀྱིས་དགའ་བར་གྱིས་ཤིག །དེའི་ཕྱིར་མི་གཙང་བའི་རྐྱལ་པ་སྟེ་བཤང་བ་འབྱུང་བ་ཡིན་ལ། གཞན་ནི་ཐ་དད་པ་བུད་མེད་ཀྱི་ལུས་ཀྱི་

རང་བཞིན་མི་གཙང་ཞིང་བཙོག་པའི་བཤང་བ་ཟ་བའི་ངང་ཚུལ་ཅན་ཡིན་ལ། རྣམ་དྲན་བྱེད་ནི་ཡིད་ལ་བསམ་པར་བྱེད་པའོ། །བདག་གི་ཤ་འདི་ལ་ཞེས་པ་ལ་སོགས་པས་ཡང་སྤང་བའི་ཆེད་དུ་གཞན་གསུངས་པ་ཡིན་ལ། གང་གི་ཤ་ལ་དགའ་བ་འདི་ནི་ཤ་ལ་དགའ་བ་སྟེ།

Vol. 105 · folio 159b

བདག་ཡིན་ལ་འདི་ནི་རུས་གོང་གིའོ། །ཡང་ན་ཤ་ལ་དགའ་བ་ནི་ཤ་ལ་དགའ་བ་ཡིན་ལ་སྔར་བཞིན་དུ་བདག་ནི་འདི་ལའོ་ཞེས་ཏེ་བདག་འདིའི་ཤ་ལ་དགའ་བ་ཡིན་ནོ་ཞེས་པའི་ཐ་ཚིག་གོ། །དེ་ལྟར་ན་དེ་ལ་ཞེན་པའི་ཕྱིར་རམ་སླར་ཕན་འདོགས་པའི་བློས་རེག་དང་ལྟ་བར་འདོད་པ་སྟེ།

མཐོང་བ་དང་རེག་པ་ལ་དགའ་བའོ། །འདིར་གསུངས་པ་སེམས་མེད་པ་ནི་སེམས་ཀྱིས་སྟོང་པ་ཡིན་ཏེ་འཇིམ་གོང་བཞིན་དུ་རང་བཞིན་གྱིས་ཐ་མལ་པའོ། །ཡང་སེམས་དང་ལྡན་པས་སེམས་སོ་ཞེས་ཇི་ལྟར་གཞན་གྱིས་བརྗོད་པ་དེ་ལྟར་ཤ་ལ་ཁྱོད་ནི་ཞེས་པ་ལྟར་རང་བཞིན་མ་ཡིན་པ་ནི་མ་ཡིན་

ནོ། །འདོད་པ་ཅན་ཁྱོད་དེ་ཅིས་མི་འདོད། དེ་འདོད་པ་ན་འཇིམ་པའི་དུམ་བུ་ལ་ཡང་འགྱུར་ལ་དེ་བཞིན་དུ་ཡང་ཁྱོད་ཀྱང་སེམས་དང་བྲལ་བར་འགྱུར་རོ། །དེ་ལ་སེམས་ཀྱི་རང་བཞིན་གྱི་སེམས་ཡོད་པ་དེ་ལ་དེས་འདོད་པ་ཡིན་ནོ་ཞེས་པ་ནི། གལ་ཏེ་སེམས་ནི་ཞེས་པ་ལ་སོགས་པ་གསུངས་

ཏེ། གལ་ཏེ་སེམས་དེ་སེམས་ཀྱི་རང་བཞིན་འདོད་ན་དེ་གཟུགས་མེད་པའི་ཕྱིར་བལྟ་བར་མི་ནུས་ལ། ལུས་མེད་པའི་ཕྱིར་རེག་པར་མི་ནུས་ཏེ། གང་ཤ་དང་རུས་པའི་རང་བཞིན་གྱི་ལུས་རེག་པ་དང་བལྟ་བར་ནུས་ཤིང་གྲུབ་པ་ལ་དེ་དང་ལྡན་པའི་ཤེས་པ་མེད་པ་ཡིན་ཏེ། སེམས་དང་བྲལ་བའི་

ཕྱིར་རོ། །དེའི་ཕྱིར་ཅི་ཞིག་ཅེས་ཏེ། སེམས་མེད་པ་དེ་ལ་འཁྱུད་པར་བྱེད་ཅིང་སྦྱོར་བར་བྱེད། རྨོངས་པ་ཞེས་པ་ནི་འབྲས་བུ་མེད་པ་ཉིད་དུ་འཁྱུད་པར་རིགས་པ་མ་ཡིན་ནོ་ཞེས་པའི་ཐ་ཚིག་སྟེ། གཞན་དུ་ན་བོང་བ་ལ་སོགས་པ་ལ་ཡང་འཁྱུད་པར་ཐལ་ལོ། །གཞན་ཡང་འདི་ཡང་ཤིན་ཏུ་

སྨད་པ་ཡིན་ནོ་ཞེས་བསྟན་པའི་ཕྱིར་མི་གཙང་ཞེས་པ་ལ་སོགས་པ་གསུངས་ཏེ། གཞན་གྱི་ལུས་ལ་མི་གཙང་བའི་རང་བཞིན་དུ་གང་མི་རྟོགས་པ་དེ་ལ་ངོ་མཚར་ཅུང་ཟད་ཀྱང་མེད་པར་རིགས་པ་ཉིད་དེ། གཞན་གྱི་རྒྱུད་ཀྱི་རིགས་པ་དེ་བདག་ཉིད་ལ་བསྐལ་པ་ཡིན་པའི་ཕྱིར་རོ། །འདི་ནི་

ཤིན་ཏུ་ཡང་ངོ་མཚར་བའི་གནས་ཡིན་ཏེ། རང་སྟེ་བདག་ཉིད་ལ་མི་གཙང་བའི་རང་བཞིན་གང་ཡིན་པའི་ལུས་ཁྱོད་ཀྱིས་རྟོགས་པར་མ་གྱུར་ཏེ་མ་གོ་བའོ། །ད་ནི་བསྟན་བཅོས་མཛད་པ་དེ་ལ་སྐྱོ་བར་མཛད་པ། སྤྲིན་བྲལ་ཞེས་པ་ལ་སོགས་པ་གསུངས་ཏེ། སྤྲིན་བྲལ་ཉི་ཟེར་གྱིས་བྱེ་བ་

Vol. 105 · folio 160a

ནི་གསལ་བར་བྱས་པ་སྟེ་དེ་ལྟ་བུའི་པདྨ་གཞོན་ནུ་སྟེ་མངོན་པར་གསར་བའི་མཚོ་སྐྱེས་བོར་ནས་མི་གཙང་ཞེན་པའི་སེམས་ཀྱིས་མི་གཙང་བའི་གཟེབ་ལ་སུ་ཞིག་དགའ་སྟེ་རིགས་པ་མ་ཡིན་ནོ་ཞེས་པའི་ཐ་ཚིག་གོ། །གཞན་ཡང་ཞེས་པ་ལ་སོགས་པ་གསུངས་པ་ལ།

སོགས་པའི་སྒྲས་ནི་གོས་པ་ལ་སོགས་པ་ཡིན་ལ། མི་གཙང་གིས་གོས་པའི་ཕྱིར་གལ་ཏེ་རེག་པར་མི་འདོད་ན། གང་ལས་ཏེ་ལུས་ལས་ཡིན་ལ་དེ་བྱུང་བ་ནི་མི་གཙང་བ་འཐོན་པ་སྟེ་ལུས་དེ་ལ་ཅི་ལྟར་ཁྱོད་རེག་པར་འདོད། དེ་ལྟར་གྱུར་ན་ཡང་བདག་ལ་བརྒལ་ཞིང་བརྟག་པ་འདི་རིགས་

པའི་ངོ་བོ་མ་ཡིན་ཏེ། གང་གི་ཕྱིར་མི་གཙང་བ་གཅིག་ལ་ཡང་མངོན་པར་ཞེན་པ་མེད་དོ་ཞེས་གལ་ཏེ་ཞེས་པ་ལ་སོགས་པ་གསུངས་པ་ལ། མི་གཙང་བའི་ཞིང་ནི་མའི་མངལ་ཡིན་ཏེ་མི་གཙང་བ་དུ་མའི་གནས་ཡིན་པའི་ཕྱིར་རོ། །དེར་བྱུང་བ་སྟེ་དེར་སྐྱེས་པའོ། །དེའི་ས་བོན་ནི་མི་

གཙང་བ་དེ་ཉིད་དེ་ཕ་དང་མའི་ཁུ་བ་དང་ཁྲག་གི་རང་བཞིན་གང་གི་ས་བོན་ཡིན་པ་དེ་ལ་དེ་སྐད་ཅེས་བརྗོད་དོ། །དེས་བསྐྱེད་པ་ཞེས་པ་ནི་མས་འཐུངས་པ་དང་ཟོས་པ་སྐྱུགས་པ་དང་འདྲ་བའི་མི་གཙང་བའི་རོ་དེས་འཕེལ་བར་བྱས་པ་སྟེ། མངལ་ན་གནས་པ་བསྐྱེད་པའོ། །ཕྱིར་བྱུང་

བ་ན་ཡང་རང་གིས་ཟས་ཟོས་པ་དང་འཐུངས་པའི་ཡོངས་སུ་སྨིན་པའི་མི་གཙང་བའི་རོས་ཀྱང་བསྐྱེད། གཞན་ཁྱོད་ཅིའི་ཕྱིར་པང་དུ་འཁྱུད་ཅེས་པ་དང་འབྲེལ་ཏེ་གཞན་གྱི་བུད་མེད་ཀྱི་ལུས་སོ། །དེ་ལྟར་ན་ཁྱེད་ལ་བརྒལ་ཞིང་བརྟག་པ་ཡོད་དོ། །འོན་ཏེ་བདག་མི་གཙང་བ་ལ་

ཆགས་པ་མེད་དོ་ཞེས་པའི་ཕྱོགས་ཁས་ལེན་ན་དེའི་ཚེ་ཡང་བརྒལ་ཞིང་བརྟག་པ་མཚུངས་པ་ཉིད་དོ་ཞེས་མི་གཙང་ལས་བྱུང་ཞེས་པ་ལ་སོགས་པ་གསུངས་ཏེ། བཤང་བ་ལ་སོགས་པ་མི་གཙང་བའི་རྫས་ལས་བྱུང་བའི་སྲོག་ཆགས་ཀྱི་རིགས་སྲིན་བུ་ཡང་མི་འདོད་དེ་

ཞེན་པར་མི་བྱེད་པར་ཡང་མའི་ལུས་ཀྱི་ཚོགས་མི་གཙང་བ་ཤིན་ཏུ་མང་བའི་རང་བཞིན་མི་གཙང་བ་ལས་བྱུང་བ་ལ་ཡང་སྔར་གྱི་རིམ་པ་བཞིན་དུ་འདོད་པར་བྱེད། འོན་ཏེ་འདི་ལྟར་ཡང་འགྱུར་ཏེ་འདིར་ལན་ཅི་ཞིག་འདེབས་པར་བྱེད། གང་གི་ཕྱིར་བདག་ཀྱང་དེའི་ལུས་དེ་ལྟ་བུ་ཡིན་ལ།

Vol. 105 · folio 160b

དེས་ན་མི་གཙང་བ་མི་གཙང་བ་དང་ཕྲད་པ་ལ་ཉེས་པ་ཅི་ཡོད་དེ་གནོད་སྦྱིན་ཇི་ལྟ་བར་གཏོར་མ་ལ་དེ་བཞིན་ནོ་ཞེ་ན། འདིར་ཁྱོད་ནི་ཞེས་པ་ལ་སོགས་པ་གསུངས་ཏེ། འདིར་ནི་རྨོངས་པ་ཆེན་པོའི་མཐུས་བདག་ཉིད་ལ་ཡོད་པའི་མི་གཙང་བའི་རང་བཞིན་གང་ལ་རེ་ཞིག་སྨད་པར་མི་བྱེད་ཅིང་།

སླར་ཡང་གཞན་གྱི་མི་གཙང་བའི་རྐྱལ་པ་ལ་འདོད་པར་བྱེད་དེ། འདི་ནི་དོན་དང་བྲལ་བ་ཤིན་ཏུ་སྨད་པའི་གནས་ཡིན་ནོ། །མི་གཙང་རྐྱལ་པ་ཞེས་སྦྱོར་བའི་ཚིག་གིས་དེ་ཉིད་ལ་འབོད་པ་ཡིན་ནོ། །ད་ནི་མི་གཙང་བའི་རང་བཞིན་མངོན་སུམ་དུ་བྱས་པར་བསྟན་པའི་ཕྱིར། ག་བུར་ཞེས་པ་ལ་

སོགས་པ་གསུངས་ཏེ། གཙང་ཞིང་གཙང་སྦྲའི་དངོས་པོ་འདི་ལྟ་བུ་གང་ཕྱོགས་གཅིག་དང་ཕྲད་པ་ལས་བྱུང་བའི་མི་གཙང་བའི་རང་བཞིན་དུ་གྱུར་པའི་དངོས་པོ་དེ་རེ་ཞིག་གཞག་སྟེ་དེ་དང་ཕྲད་པ་ལས་གཞི་གཙང་བའི་རང་བཞིན་ཡང་མི་གཙང་བ་ཉིད་དུ་འགྱུར་རོ། །དེ་ལྟར་རེ་ཞིག་ཐ་སྙད་

འདི་མངོན་སུམ་གྱིས་གྲུབ་པ་དེ་ལྟ་ན་ཡང་གལ་ཏེ་མི་རྟོག་ཅིང་ཡིད་མི་ཆེས་ན་སྟེ་མཐོང་ཡང་དད་པར་མ་གྱུར་ན་ཞེས་པའི་དོན་ཏོ། །དེའི་ཚེ་དུར་ཁྲོད་དུ་སོ་སོར་གནས་པ་ན་བལྟ་བར་གྱིས་ཤིག །ཇི་ལྟ་བུར་གྱུར་པ་ལ་ཞེ་ན། འཇིགས་པ་སྟེ། རྣམ་པར་ཟོས་པ་དང་། རྣམ་པར་མྱགས་

པ་དང་། རྣམ་པར་རྣགས་པ་ལ་སོགས་པའི་རང་བཞིན་གྱིས་འཇིགས་སུ་རུང་བའམ་འཇིགས་པར་བྱེད་པའོ། །གཞན་ཡང་ཞེས་པ་ནི་འདི་བས་ལྷག་པའོ། །གཞན་ཡང་རང་བཞིན་གྱིས་མི་སྡུག་པ་ཐམས་ཅད་དུ་སྦྱར་ཏེ་ལུས་པོ་འདི་ཉིད་མི་དགའ་བའི་གནས་སུ་སྦྱར་རོ་ཞེས་བསྟན་

པར་འདོད་ནས། གང་ཞིག་པགས་པའི་ཁ་ཕྱེ་ཞེས་པ་ལ་སོགས་པ་གསུངས་ཏེ། ཁ་ཕྱེ་བ་ནི་རྣམ་པར་བྲལ་བ་སྟེ། གང་ལས་ཞེས་པ་ནི་ལུས་ལས་སོ། །དེའི་ཚེ་འཇིགས་པ་ཆེན་པོ་སྐྱེ་བར་འགྱུར་རོ། །ཇི་ལྟ་བུར་གྱུར་པ་ཞེ་ན། འདི་ལྟ་བུར་གྱུར་པའི་རང་བཞིན་ཤེས་ཀྱང་

ཇི་ལྟར་དེ་ཉིད་ཀྱི་གནས་ལ་འཇིགས་པའི་གནས་སུ་ནམ་ཞིག་ན་ཡང་མ་རྟོགས་པར་ཕྱིར་ཞིང་དགའ་ཞིང་མངོན་པར་ཞེན་པ་སྐྱེ་བར་འགྱུར་ཏེ། དེ་ལྟར་གྱུར་ན་ཡང་མི་གཙང་བའི་རང་བཞིན་གྱི་ལུས་སུ་གལ་ཏེ་མངོན་སུམ་དུ་གྱུར་པ་དེ་ལྟ་ན་ཡང་། ཙནྡན་ལ་སོགས་པ་དང་ཤུག་པས་ལུས་པོ་

Vol. 105 · folio 161a

ལ་བསྐུས་པས་འདི་འདོད་པར་བྱ་བ་ཉིད་དུ་འགྱུར་རོ་ཞེ་ན། ལུས་ལ་བསྐུས་པ་ཞེས་པ་ལ་སོགས་པ་གསུངས་ཏེ། ལུས་ལ་བསྐུས་པ་ཡང་ཙནྡན་ལ་སོགས་པ་ལས་བྱུང་བའི་དྲི་འདིས་གང་ལ་བསྒོས་པའི་ལུས་ལ་འདོད་པར་བྱ་བའི་བློ་སྐྱེ་བར་འགྱུར་ཏེ། ཙནྡན་

འབའ་ཞིག་ལས་ཡིན་ལ། གཞན་མིན་ན་ཞེས་པ་ནི་ལུས་ཀྱི་མ་ཡིན་པའོ། །དེའི་ཕྱིར་གཞན་གྱི་དྲི་ཙནྡན་ལ་སོགས་པ་ལས་བྱུང་བས་འདིར་དྲི་ཞིམ་པར་མི་འགྱུར་བ་གཞན་དག་ལ་ཅིའི་ཕྱིར་མངོན་པར་དགའ་བར་བྱེད། གཞན་ཡང་ཙནྡན་ལ་སོགས་པའི་ལེགས་པར་སྦྱར་བས་ཀྱང་

བདག་ཉིད་ལ་གནོད་པ་འབའ་ཞིག་ཏུ་འགྱུར་ཏེ། ཕན་པའི་ཆེད་དུ་ནི་མ་ཡིན་ནོ་ཞེས་བསྟན་པའི་ཕྱིར། གལ་ཏེ་རང་བཞིན་ཞེས་པ་ལ་སོགས་པ་གསུངས་ཏེ། རང་བཞིན་གྱིས་དྲི་ང་བ་ནི་ལྷན་ཅིག་སྐྱེས་པའི་རུལ་བའི་རང་བཞིན་གྱི་ཕྱིར་རོ། །འདིར་ཞེས་པ་ནི་ལུས་ལའོ། །གལ་ཏེ་

འདོད་ཆགས་མ་སྐྱེས་ན་དེའི་ཚེ་ལེགས་མིན་ནམ་སྟེ་ལེགས་པ་ཉིད་དུ་འགྱུར་རོ། །འདི་ལྟ་བུའི་ཡོན་ཏན་ཡོད་བཞིན་དུ་དོན་མེད་པ་ལ་སྲེད་པའི་འཇིག་རྟེན་རྒྱུ་ཅིས་ལུས་དེ་ལ་དྲིས་སྐུད་པར་བྱེད་དེ་རྣམ་པ་ཐམས་ཅད་དུ་དེ་རིགས་པ་མ་ཡིན་ནོ་ཞེས་པའི་དོན་ཏོ། །སྟོང་ཕྲག་དུ་མས་མངོན་པར་

འདུ་བྱས་ཀྱང་རང་བཞིན་གཞན་དུ་འགྱུར་བ་མ་ཡིན་ནོ་ཞེས་འོན་ཏེ་དྲི་ཞིམ་ཞེས་པ་ལ་སོགས་པ་གསུངས་ཏེ། ལུས་པོ་རང་བཞིན་གྱིས་དྲི་ང་བ་ལས་ཅི་ཞིག་བྱུང་སྟེ་ཅི་ལྟ་བུར་གྱུར་པ་ཅུང་ཟད་ཀྱང་བྱུང་བ་མ་ཡིན་ནོ། །དྲི་ཞིམ་ཙནྡན་ན་ཞེས་པ་ནི་གང་ལ་མཛེས་པའི་དྲི་ཡོད་པ་ཞེས་འབྲུ་མང་པོ་པ་སྟེ་དེ་ལྟ་ན་ཡང་

དེའི་རང་བཞིན་ལ་ཉམས་པ་མེད་དོ་ཞེས་པའི་ཐ་ཚིག་གོ། །འོན་ཏེ་དེའི་དབང་གིས་དེ་ལ་འདོད་པར་བྱ་བ་ཉིད་དུ་བཟུང་ནས་མངོན་པར་འདོད་པ་སྐྱེ་བའོ་ཞེ་ན། གཞན་གྱི་དྲི་ཡིས་ཞེས་པ་ལ་སོགས་པ་གསུངས་ཏེ། འདི་ལྟར་ཡང་མཁས་པ་མ་ཡིན་ནོ་ཞེས་པའི་དོན་ཏོ། །སྐྲ་ལ་སོགས་

པ་མངོན་པར་འདུ་བྱས་པའི་སྒོ་ནས་ཀྱང་ལུས་འདི་དོན་མེད་པའི་རྒྱུ་ཡིན་ནོ་ཞེས་ཚིགས་སུ་བཅད་པ་གཉིས་ཀྱིས་བསྟན་པའི་ཕྱིར། གལ་ཏེ་འདི་སྐྲ་སེན་ཞེས་པ་ལ་སོགས་པ་གསུངས་ཏེ། རིང་བ་ན་ལྷན་ཅིག་སྐྱེས་པ་མ་བཅད་པ་ཞེས་པའི་དོན་ཏོ། །སོ་སྐྱ་བ་ནི་དྲི་ང་བ་དང་བཅས་

Vol. 105 · folio 161b

པས་ཏེ་སོ་ཤིང་དང་སོག་ལེ་ལ་སོགས་པས་འདུས་མ་བྱས་པས་སོ། །འདམ་གྱི་དྲིས་བསྒོས་ནི་དྲི་མ་ཉིད་འདམ་སྟེ་རྫབ་ཡིན་ལ་དེས་བསྒོས་པ་དེ་ལ་དེ་སྐད་ཅེས་བྱ་སྟེ། ཁྲུས་དང་བྱུག་པ་ལ་སོགས་པ་དང་བྲལ་བས་སོ། །གཅེར་བུ་ཞེས་བྱ་བ་ནི་གོས་དང་བྲལ་བའི་ཕྱིར་རོ། །ཇི་ལྟར་

སྐྱེས་བུ་བཞིན་དུ་སྟེ་ཇི་ལྟར་གྱུར་པས་གནས་པའོ། །གལ་ཏེ་ལུས་རང་བཞིན་གྱིས་འཇིགས་པ་ཡིན་ན་ཡི་དགས་བཞིན་དུ་རང་བཞིན་གྱིས་འཇིགས་པར་བྱེད་པ་ལ་འབད་པས་ཏེ་སྐྲ་དང་སེན་མོ་ལ་སོགས་པ་བཅོམ་པའི་ཁྱད་པར་དང་། སོ་ཤིང་དང་སོ་རྩི་དང་ཁྲུས་དང་བྱུག་པ་ལ་སོགས་པ་

རྣམས་ཀྱིས་འདི་ལྟ་བུར་གྱུར་པ་དེ་ཅིའི་ཕྱིར་བྱི་དོར་བྱེད། ཇི་ལྟ་བུར་ཞེ་ན། རང་ལ་གནོད་པས་མཚོན་བཞིན་ཏེ་བདག་ཉིད་ལ་གནོད་པའི་དོན་དུ་རལ་གྲི་ལ་སོགས་པས་ཇི་ལྟར་འདུས་བྱས་པ་དེ་ལྟར་རོ། །འདི་ལྟ་བུ་རྣམས་རྨོངས་པའི་དབང་དུ་གྱུར་པའི་སྤྱོད་པ་ལ་མྱ་ངན་མཛད་པ། བདག་ལ་

རྨོངས་ཞེས་པ་ལ་སོགས་པ་གསུངས་ཏེ། འབད་པ་དང་ལྡན་པའི་སྨྱོན་པ་སེམས་རང་བཞིན་དུ་མི་གནས་པས་བདག་ཉིད་ཀྱིས་བསམས་ནས་བདག་ཉིད་ལ་རྨོངས་པ་བསྐྱེད་ཅིང་ཡང་འདི་ལྟར་ཕྱིན་ཅི་ལོག་གི་ལམ་ཉམས་སུ་བླངས་པས་ཉོན་མོངས་པ་འདི་རྣམས་སེམས་རང་བཞིན་དུ་མི་

གནས་སོ་ཞེས་བསྟན་བཅོས་མཛད་པས་མྱ་ངན་མཛད་པའོ། །འདི་ན་བདག་ཉིད་ཤེས་པ་འགའ་ཡང་ཡོད་པ་མ་ཡིན་ཏེ། སྨྱོན་པས་འཁྲུགས་པ་སྟེ་ས་ཡོངས་སུ་གང་བ་ཡིན་ནོ། །དྲིས་པ་ལ་ཞར་ལ་བྱུང་བས་ལན་བཏབ་ནས་སྐབས་སུ་བབ་པ། རུས་གོང་ཞེས་པ་ལ་སོགས་པ་

གསུངས་པ་ལ། རོ་རྣམས་ཀྱི་རུས་གོང་འགའ་ཞིག་སྟེ་སོ་སོ་ན་གནས་པའོ། །འདི་སྐད་བརྗོད་པར་འགྱུར་ཏེ། གང་ལས་པགས་པ་ཕྲལ་བྱས་ནི། །ཞེས་པ་ལ་སོགས་པ་གསུངས་ནས། གང་ཤེས་ཀྱང་ཇི་ལྟར་ཞེས་པ་ལ་སོགས་པ་གསུངས་པ་དེར་གཞན་གྱི་ལེན་ཡིན་ནོ། །གང་

གིས་དེ་བཞིན་དུ་འདི་ལ་ཡང་ཆགས་པར་མི་འགྱུར་བ་དུར་ཁྲོད་ཀྱི་ལུས་དང་འདྲ་བ་ཡོད་པ་མ་ཡིན་ཏེ། དུར་ཁྲོད་དུ་དེ་མི་གཙང་བའི་གནས་ཡིན་ལ་འདིར་ནི་མ་ཡིན་ནོ་ཞེས་སོ། །འདིར་བརྗོད་པར་བྱ་བ་ནི་རུས་གོང་ཞེས་པ་ལ་སོགས་པ་ཡིན་ནོ། །གྲོང་གི་དུར་ཁྲོད་ཅེས་པ་ལ་འདིར་

Vol. 105 · folio 162a

ཁྱད་པར་ཅུང་ཟད་ཀྱང་ཡོད་པ་མ་ཡིན་ཏེ། དུར་ཁྲོད་དུ་བཙོག་པའི་གནས་ནི་ལུས་པོ་དེ་ཉིད་ཡིན་ལ། གྲོང་དུ་ཡང་ཡིན་ཏེ་མངོན་པར་དགའ་བའི་གནས་གང་ཡིན་ཞེས་ཟུར་གྱིས་འདྲི་བའོ། །འདི་ལ་མཁས་པའི་བློ་ཅན་གྱིས་མཉམ་པར་རིགས་སོ་ཞེས་བསམས་

པའོ། །གཡོ་བའི་རུས་གོང་གིས་ཁྱབ་པ་ཞེས་པ་འདིས་དེ་ཉིད་སྟོན་པ་ཡིན་ནོ། །འདི་ཙམ་ཁྱད་པར་ཡིན་གྱི་ཁྱད་པར་འདིས་མི་གཙང་བའི་རང་བཞིན་གྱིས་མི་གཙང་བའི་རྒྱུ་ལས་བཟློག་པ་ནི་མ་ཡིན་ཏེ། གང་གིས་ནི་འཇུག་པའི་ཡན་ལག་གི་རང་བཞིན་དུ་འགྱུར། ཁྱབ་པ་ནི་ཡོངས་སུ་

འཁྲུགས་པའོ། །འདི་ལྟ་བུའི་མི་གཙང་བའི་རང་བཞིན་ཡང་ཕག་ལ་སོགས་པ་རྣམས་ལ་བཞིན་དུ་མངོན་པར་དགའ་བའི་གནས་སུ་གྱུར་ན་ཡང་དེ་ལྟ་ན་ཡང་རྣམ་པ་དེ་ལྟ་བུ་དེ་ནོར་དང་བྲལ་བས་རྙེད་པར་སླ་བ་མ་ཡིན་ནོ་ཞེས་བསྟན་པའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། རིན་མེད་

པར་དེ་ནོར་དང་བྲལ་བས་རྙེད་ཅིང་ཐོབ་པར་མི་འགྱུར་ལ། དེའི་ཕྱིར་དེ་དོན་དུ་གཉེར་བས་དང་པོ་ཁོ་ནར་ནོར་ཉིད་བསགས་པར་བྱ་སྟེ། དེ་སོགས་པ་ལ་ངལ་བའི་སྒོ་ནས་སོ་ནམ་དང་ཚོང་དང་བསྙེན་པ་ལ་སོགས་པ་ལ་ཡང་དག་པར་བརྟེན་པས་ཡོངས་སུ་ངལ་བ་ལས་འདི་ཉིད་དུ་ཆོས་མ་ཡིན་པས་ཀྱང་ཚོལ་བའི་

ཕྱིར་དམྱལ་བ་ལ་སོགས་པ་རྣམས་སུ་སྡུག་བསྔལ་སྐྱེད་པར་བྱེད་དོ། །དེ་ལྟར་དེ་ཚོལ་བ་ནི་འཇིག་རྟེན་གཉི་གར་དོན་མེད་པའི་རྒྱུ་ཉིད་ཡིན་ནོ། །བསགས་པ་དེས་བདེ་བ་འཐོབ་པ་ཡང་མ་ཡིན་ཏེ། སྡུག་བསྔལ་ཉིད་འབའ་ཞིག་ཡིན་ནོ་ཞེས་བསྟན་པའི་ཕྱིར། བྱིས་པ་ཞེས་པ་ལ་སོགས་པ་

གསུངས་ཏེ། བྱིས་པའི་གནས་སྐབས་ན་གནས་པ་ལ་ནོར་སྤེལ་བའི་ནུས་པ་མེད་དེ། བྱིས་པ་ཉིད་ཀྱིས་ནོར་གང་གིས་སམ་རྣམ་པ་གང་གིས་བྱིས་པ་འདི་དར་ལ་བབ་པ་སྟེ་ལང་ཚོ་ལ་བབ་པའི་གནས་སྐབས་ནའོ། །བདེ་བར་འགྱུར་ཏེ་ནོར་དང་བྲལ་བས་ཅུང་ཟད་ཀྱང་མ་ཡིན་ནོ་ཞེས་པའི་དོན་ཏོ། །གང་

ཡང་ཕ་དང་མེས་པོ་ལ་སོགས་པས་བསགས་པའི་ནོར་གྱིས་ལང་ཚོ་ལ་བབ་པ་ན་བདེ་བ་ཉིད་ཐོབ་པ་དེ་ལྟ་ན་ཡང་ཐམས་ཅད་ལ་སོ་སོར་ངེས་པ་ཉིད་ནི་མ་ཡིན་ནོ། །འདིར་སྔར་བརྗོད་པའི་སྡུག་བསྔལ་གཉིས་ལས་གྲོལ་བར་ཡང་མ་ཡིན་ནོ། །དང་པོར་ནོར་སོག་པ་ཉེ་བར་མཁོ་བ་ཉིད་ཡིན་ཏེ།

Vol. 105 · folio 162b

བདེ་བ་སྒྲུབ་པའི་ཐབས་ཡིན་པའི་ཕྱིར་དེ་བསགས་པ་ཉིད་ན་ཡང་ལང་ཚོ་ལས་ཉམས་པ་ལས་འགའ་ཞིག་ལ་ཡང་མཁོ་བའི་ཡུལ་མ་ཡིན་ནོ། །འོན་ཏེ་དེ་ལྟར་གྱུར་ན་ཡང་དེ་སོགས་པ་ན་འདོད་པའི་བདེ་བ་མྱོང་བར་བྱེད་དོ་ཞེ་ན། འདོད་ལྡན་ཞེས་པ་ལ་སོགས་པ་སྨོས་ཏེ། འགའ་ཞིག་དམན་པའི་འདོད་

པ་ལ་གཡེངས་པའི་སེམས་ཀྱིས་ཤིང་དང་རྩྭ་དང་ལོ་མ་ལ་སོགས་པ་ལེན་པ་བྲན་གྱི་ལས་བྱེད་པའི་ཉི་མའི་མཐས་གཏུགས་པར་ལས་ཁུར་གྱིས་ལུས་སེམས་དུབ་སྟེ་སྤྲོ་བ་མེད་ལ། ཉི་མ་ནུབ་པ་ན་རང་གི་ཁྱིམ་དུ་འོངས་ནས་རོ་དང་འདྲ་བར་གཉིད་ལོག་པས་ཉལ་བར་གྱུར་པའོ། །ཡང་ཐོ་རངས་ལངས་

ནས་དམན་པའི་ལས་དེ་ཉིད་ལ་སྦྱོར་རོ། །གྱུར་ཞེས་པའི་སྒྲ་ནི་ཚིག་གི་རྒྱན་ཡིན་ཏེ། འདས་པའི་དོན་ཡུལ་ཡིན་པའི་ཕྱིར་རོ། །འདོད་པ་ཅན་འགའ་ཞིག་དེ་ལྟར་ཚེ་འདུས་བྱས་པས་སྐྱེལ་བར་བྱེད་ཀྱི་འདོད་པའི་བདེ་བའི་རོ་ནི་མྱང་བ་མ་ཡིན་ནོ། །གཞན་བསྟན་པའི་དབང་དུ་བྱས་ཏེ། ཚར་གཅོད་ཅེས་

པ་ལ་སོགས་པ་གསུངས་ཏེ། ཁ་ཅིག་ནི་སྔར་གྱི་རྣམས་ལས་གཞན་ངན་པ་ལ་ཆགས་པ་ཅན་ཡིན་ཏེ་བསྟེན་པ་པོ་ཞེས་པའི་དོན་ཏོ། །ཚར་གཅོད་བགྲོད་པ་ལ་སོགས་པ་རྣམས་ཀྱིས་གཞན་གྱི་དཔུང་ལས་རྒྱལ་བའི་དོན་དུ་བགྲོད་པ་སྟེ་འགྲོ་བའམ། གཞན་གྱི་ཡུལ་གྱི་ནོར་བླངས་པའི་དོན་དུ་འགྲོ་

བའོ། །དེ་ལ་སོགས་པས་གང་དག་མགྲོན་དུ་བཏང་བ་ལ་སོགས་པ་རྣམས་མཐར་གྱིས་ཡུལ་གཞན་དུ་བགྲོད་པས་ཉོན་མོངས་པས་ཡོངས་སུ་ངལ་བ་ཡིན་ལ། དེས་སྡུག་བསྔལ་གྱིས་ཡོངས་སུ་གདུང་བ་ཅན་ཡིན་ནོ། །རྣམ་པ་ཐམས་ཅད་དུ་དེ་ལྟར་གྱུར་པས་ཁྱུད་ཀོར་ལས་ཀྱང་སྟེ་དུ་མར་ཟད་

པར་གྱུར་ཀྱང་བུ་དང་ཆུང་མ་མི་མཐོང་སྟེ་སྤྱོད་ཡུལ་དུ་མ་གྱུར་ཏོ། །འདོད་བཞིན་དུ་ཞེས་པ་ནི་དེས་བུ་དང་ཆུང་མ་ལ་སོགས་པ་རྣམས་དོན་དུ་གཉེར་བས། དེ་ལ་འདོད་པ་རྣམས་ཡིན་ལ་སྟེ་དེའི་དོན་ཉིད་དུ་གཞན་བསྟེན་པ་ལ་སོགས་པ་ཁས་བླངས་པའོ་ཞེས་པའི་དོན་ཏོ། །ཀྱེ་མ་འདི་རྣམས་འབྲས་བུ་

མེད་པར་ཉམས་སུ་ལེན་པ་ཡིན་ནོ་ཞེས་ཤིན་ཏུ་མྱ་ངན་མཛད་པར་བདག་ནི་ཞེས་པ་ལ་སོགས་པ་གསུངས་ཏེ། བདག་ཉིད་འདོད་པས་བསླུས་པས་གང་གི་དོན་ཏེ་བདེ་བ་ཐོབ་པའི་རྒྱུ་མཚན་དུ་བཙོངས་ཤིང་གཞན་གྱི་བྲན་བྱས་ནས། དེ་མ་ཐོབ་པ་ནི་བདེ་བ་དེ་མ་ཐོབ་པ་ཡིན་ལ། ཚེའི་འདུ་བྱེད་པ་ཉིད་ཁོ་ན་

Vol. 105 · folio 163a

དོན་མེད་པར་གཞན་གྱི་ལས་ཉམས་སུ་ལེན་པར་ཟད་པར་བྱས་པ་སྟེ། ལེགས་པའི་ལས་འགའ་ཞིག་ལ་ནི་སྦྱར་བ་མ་ཡིན་ནོ་ཞེས་པའི་དོན་ཏོ། བདེ་བ་ཐོབ་པར་འདོད་པས་ཞུགས་པ་རྣམས་སླར་སྡུག་བསྔལ་དེ་ཉིད་ལ་འདི་རྣམས་ལྷུང་ངོ་ཞེས་བསྟན་པའི་ཕྱིར། ལ་ལ་ཞེས་པ་ལ་

སོགས་པ་གསུངས་ཏེ། གང་གི་བདེ་བར་སྤྱད་པར་འདོད་པས་གཞན་རྣམས་ལ་བཙོངས་ཏེ་གཞན་གྱི་དབང་དུ་བྱས་པ་ཡིན་ཏེ། རང་གི་ལུས་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་ལྟར་གཞན་དེ་རྣམས་ཀྱིས་ཡིན་ནོ་ཞེས་པའི་དོན་ཏོ། །དེ་ཉིད་ཀྱི་ཕྱིར་རྟག་ཏུ་སྐུལ་བར་བྱེད་པའི་ངང་ཚུལ་ཅན་དག་བདག་པོ་

གཞན་ཕ་རོལ་པོའི་དགོས་པ་ལ་འགྲོ་བ་ན་བུད་མེད་རྣམས་ལམ་ཉིད་དུ་བུ་བྱུང་བར་འགྱུར་རོ། །ཤིང་དྲུང་དགོན་སོགས་བབ་བབ་ཅེས་པ་ལ། སོགས་པའི་སྒྲས་ནི་རིའི་ཕྲག་གམ་ཆུ་ཀླུང་གི་འགྲམ་ལ་སོགས་པ་དཀའ་བའི་གནས་རྣམས་སུའོ། །དེ་རྣམས་ལ་གཞན་ཕྱིན་ཅི་ལོག་འདི་ཡང་ཡོད་པ་མ་ཡིན་

ནོ་ཞེས་བསྟན་པར་འདོད་ནས། འདོད་པས་ཞེས་པ་ལ་སོགས་པ་གསུངས་ཏེ། རང་གི་དངོས་པོ་བཙོངས་ནས་མཆེ་བ་བཞི་འཁྲིགས་པའི་ཡུལ་དུ་འཇུག་གོ། །ཇི་ལྟ་བུར་གྱུར་པ་ཅིག་ཅེ་ན། སྲོག་སྟོར་དོགས་བཞིན་པས་ཏེ། དེར་ཞུགས་པས་ན་གསོན་པར་འགྱུར་རམ་མི་འགྱུར་ཞེས། སྟོར་

དོགས་པས་འདི་ལྟར་བྱས་ནས་སོ། །འདིར་རྙེད་པ་ཐོབ་པས་འཚོ་བའི་རྒྱུར་བརྟགས་ཤིང་འཚོ་བར་བྱའོ་ཞེས་པའི་ཐ་ཚིག་གོ། །ཁེངས་ཕྱིར་བྲན་དུ་འགྲོ་བར་བྱེད། །ཅེས་པ་ནི་སྟོབས་དང་ལྡན་པ་འགའ་ཞིག་གིས་གནོད་པ་བྱས་པའི་དུས་སུ་རང་གི་ང་རྒྱལ་དབྱུང་བའི་ཕྱིར་སོར་མོ་བཅད་པ་

དང་། དུས་ཀྱི་ཚོད་འཛིན་པས་བསྙེན་པ་ཁས་ལེན་པའི་ཕྱིར་རོ། །རྨོངས་པ་ནི་ཤེས་རབ་ཀྱི་མིག་གཏི་མུག་གིས་མུན་པར་བྱས་པའོ། །དེ་གང་ཡིན་ཞེ་ན། འདོད་པས་བསླུས་པ་རྣམས་ཏེ་འདོད་པའི་ཆེད་དུའམ་འདོད་པས་བསླུས་པ་སྟེ་སྤྱོས་པའོ། །འདོད་པ་ལ་ཞེན་པའི་སེམས་དང་

ལྡན་པ་རྣམས་ལ་སྐྱེ་བ་འདི་ཉིད་ལའང་སྡུག་བསྔལ་མཐོང་བ་དེ་བསྟན་པའི་ཕྱིར། འདོད་ལྡན་ཞེས་པ་ལ་སོགས་པ་གསུངས་ཏེ། གཞན་གྱི་ཆུང་མ་དང་ནོར་འཕྲོག་པ་ལ་སོགས་པའོ། །ལྷག་མ་ནི་གོ་སླའོ། །གཞན་ཡང་འདི་བདེ་བ་སྒྲུབ་པ་ཉིད་ཀྱིས་ནོར་ལེན་པར་བྱེད་པ་ན་ཡང་

Vol. 105 · folio 163b

དོན་མེད་པ་རྒུད་པ་སྐྱེ་བར་འགྱུར་བའི་རྒྱུ་ཉིད་དོ་ཞེས་བསྟན་པར་འདོད་ནས། བསགས་པ་དང་ཞེས་པ་ལ་སོགས་པ་གསུངས་ཏེ། སོགས་པ་ནི་མེད་པ་ལ་སོགས་པར་བྱེད་པའོ། །བསྲུང་བ་ནི་དཀའ་བས་བསགས་པ་དེ་ཡང་ཆུ་དང་མེ་ལ་སོགས་པ་ཆུད་ཟ་བར་བྱེད་པ་ལྔ་ལས་ཡོངས་སུ་སྐྱོང་བར་

བྱེད་པའོ། །ཤིན་ཏུ་དཀའ་བ་དེ་ལྟར་སྲུང་བ་ཡང་བརྒྱ་ལ་རྐུན་མ་ལ་སོགས་པ་རྣམས་ཀྱིས་བརླག་པར་བྱེད་པས་གདུང་ཞིང་ཡིད་མི་བདེ་བ་སྡུག་བསྔལ་བའི་རྒྱུ་ནི་ཕུང་ཁྲོལ་ཡིན་ལ་དེ་ཉིད་དོན་མེད་པ་རྒུད་པའི་རྒྱུ་ཡིན་པའི་ཕྱིར་རྒྱུ་ལ་བརྟགས་ནས་ནོར་ཉིད་ཕུང་ཁྲོལ་དུ་བརྗོད་དོ། །བསགས་པ་ལ་

སོགས་པས་རྟག་ཏུ་རྣམ་པར་གཡེངས་པའི་ཕྱིར་དང་། ནོར་ལ་ཞེན་པའི་སེམས་ཀྱིས་སྐད་ཅིག་ཙམ་ཡང་ཏིང་ངེ་འཛིན་ལ་བརྟད་པའི་སྐབས་མེད་པའི་ཕྱིར་འཁོར་བ་ལ་བརྟེན་པའི་སྐྱེ་བ་ལ་སོགས་པའི་སྡུག་བསྔལ་ལས་གྲོལ་བའི་སྐབས་མེད་དེ། རྟག་ཏུ་དེ་ལ་ཡིད་ཞུགས་པ་ཉིད་ཀྱིས་ཚེའི་འདུ་བྱེད་ཟད་

པའི་ཕྱིར་རོ། །འདི་ཐམས་ཅད་མཇུག་བསྡུས་ནས་འདོད་པ་ལ་ཞེན་པ་ཡོངས་སུ་སྤང་བའི་ཆེད་དུ་སྐྱོ་བའི་གཏམ་གྱིས་སྤྲོ་བར་བྱེད་པ། འདོད་ལྡན་རྣམས་ལ་ཞེས་པ་ལ་སོགས་པ་གསུངས་ཏེ། དེ་ལྟ་བུ་ནི་བརྗོད་པའི་རྣམ་པ་ལ་བལྟའོ། །ཉེས་དམིགས་ནི་ཕུང་ཁྲོལ་ཡིན་ཏེ་མང་བ་ནི་རྣམ་པ་དུ་

མ་ཡིན་ལ། འདིར་བདེ་བ་སྐྱེད་པར་བྱེད་པ་ནི་གཏམ་ཙམ་ཡང་མེད་དེ། དེ་ལྟར་ན་ཡང་ཕྱིན་ཅི་ལོག་ལས་བརྒྱ་ཞིག་ལ་འདི་ནི་བདེ་བའོ་ཞེས་སྣང་སྟེ། དེ་ལྟར་ན་གྱི་ནའོ། །ཤིན་ཏུ་ལྕི་བའི་ཁུར་གྱིས་མནན་པ་བས་ངལ་བའི་ལུས་དང་ལྡན་པའི་ཕྱུགས་རྩྭ་ཅུང་ཟད་ཙམ་འཛིན་པ་བཞིན་དུ་ཤིན་ཏུ་

གསོག་གྱུར་ཅིང་མནོག་ཆུང་བའི་བདེ་བའི་ཆ་འདི་ལྟ་བུར་གྱུར་པ་དེ་ཕྱུགས་དང་ཡང་ཐུན་མོང་བ་གང་ཡིན་པ་དེའི་དོན་དུ་སྟེ། དེའི་རྒྱུ་མཚན་དལ་འབྱོར་ཕུན་སུམ་ཚོགས་པ་སྟེ་མི་ཁོམ་པ་བརྒྱད་ལས་གྲོལ་བ་འདི་བཅོམ་ཞིང་ཉམས་པར་བྱས་ཏེ། དོན་མེད་པར་བྱས་སོ་ཞེས་པའི་དོན་ཏོ། །ཁྱད་

པར་ཇི་ལྟ་བུ་ཞེ་ན། རྙེད་དཀའ་བ་ཡིན་ཏེ་བཤད་ཟིན་ཏོ། །གང་གིས་ཤེ་ན། ལས་ཀྱིས་མནར་བ་སྟེ་ལས་ནི་སྔོན་གྱི་ལས་ཡིན་ལ། དེས་མནར་བའི་ནི་ཕན་པ་དང་མི་ཕན་པ་ཤེས་པ་ལ་ཕྱིན་ཅི་ལོག་པའི་བློ་ཡིན་ཏེ་རྨོངས་པས་བྱས་ཞེས་པའི་དོན་ཏོ། །འདི་དངོས་པོ་ལ་ནི་སྤྱོད་པའི་ཚིག་

Vol. 105 · folio 164a

ཡིན་ཏེ་བསྐལ་པ་མནར་བ་ཉིད་དུ་བརྗོད་དོ། །ངེས་པར་འཇིག་ཅིང་ཆུང་གྱུར་པ། །ཞེས་པ་ལ་སོགས་པ་ཚིགས་སུ་བཅད་པ་གཉིས་ཀྱིས་ཕྱིན་ཅི་ལོག་གི་ངོ་བོ་ཉིད་དུ་སྟོན་པར་བྱེད་དེ། ངེས་པར་འཇིག་ཅིང་ཞེས་པ་ནི་མི་བརྟེན་པའི་རང་བཞིན་ཡིན་ལ། ཆུང་བ་ནི་འཇིག་

རྟེན་ལས་འདས་པ་ལ་ལྟོས་ནས་ཡིན་ཏེ། ཤིན་ཏུ་ཁྱད་ཞུགས་པས་ཆུང་བ་ཡིན་ནོ། །དམྱལ་ལ་སོགས་པར་ལྷུང་བྱེད་ཅིང་། །ཞེས་པ་ནི་དཔག་ཏུ་མེད་པའི་སྡུག་བསྔལ་བསྟེན་པས་རང་གི་བདེ་བ་སྐྱེད་པ་ལ་ཡང་ནུས་པ་མེད་དོ་ཞེས་བྱ་བའི་དོན་ཏོ། །ལུས་ནི་རང་གི་ལུས་ཏེ་འདིའི་དོན་ནི་བདེ་བ་སྐྱེད་

པའི་ཆེད་དུའོ། །གང་འདི་ནི་དམྱལ་བ་ལ་སོགས་པའི་སྡུག་བསྔལ་མ་བརྩིས་པར་བྱས་པ་སྟེ་དུས་ཐམས་ཅད་དུ་འཁོར་བར་སྔར་བྱས་པའི་བྱེ་བར་ཡོངས་སུ་ངལ་ཞིང་ཉོན་མོངས་པ་ཡིན་ལ། དེ་ལས་ཏེ་བྱེ་བའི་བརྒྱའི་ཆ་ཡོངས་སུ་ངལ་བས་སངས་རྒྱས་ཉིད་དུ་འགྱུར་ལ། དེ་ལ་ལྟོས་ནས་

ཤིན་ཏུ་ཆུང་བའི་ཆ་ཡིས་སངས་རྒྱས་ཉིད་འཐོབ་སྟེ། དེ་ལྟར་ན་དེའི་དོན་དུ་བློ་གྲོས་དམན་པ་རྣམས་སྤྲོ་བར་མི་བྱེད་དོ་ཞེས་པའི་དོན་ཏོ། །འོན་ཏེ་བྱང་ཆུབ་ཀྱི་སྤྱད་པ་སྤྱོད་པ་ཡང་དཀའ་བ་བརྒྱས་རྩོམ་པའི་ཕྱིར་ཤིན་ཏུ་སྡུག་བསྔལ་སྟོང་ཕྲག་དུ་མ་སྐྱེད་པའི་ཕྱིར་རོ་ཞེ་ན། འདོད་ལྡན་ཞེས་པ་ལ་

སོགས་པ་གསུངས་ཏེ། གང་ཞིག་འདོད་པའི་དོན་དུ་འཁོར་བར་སྤྱོད་པ་ནི་བྱང་ཆུབ་སྤྱོད་པའི་སྡུག་བསྔལ་ལ་ལྟོས་ནས་འདི་ཉིད་སྡུག་བསྔལ་ཤིན་ཏུ་ཆེན་པོ་ཡིན་ཏེ། དེ་རྣམས་མནར་མེད་པར་ལྷུང་བར་བྱེད་པའི་ཕྱིར་དང་། གཞན་གྱི་དབང་གིས་ཡུན་རིང་པོར་ཉམས་སུ་མྱོང་བའི་ཕྱིར་ལ། བྱང་ཆུབ་སེམས་དཔའ་

རྣམས་ལ་ནི་དུས་སོ་སོར་ངེས་པར་རང་ཉིད་འདོད་པས་ཉམས་སུ་མྱོང་བ་ཉིད་ཡིན་པས་ན་དེ་ལྟ་མ་ཡིན་ནོ། །དེ་ལྟར་ན་གང་བྱང་ཆུབ་སེམས་དཔའ་རྣམས་གཞན་གྱི་དོན་དུ་སྡུག་བསྔལ་ཉམས་སུ་མྱོང་བ་དེ་ནི་བྱང་ཆུབ་ཏུ་འགྱུར་བ་ཡིན་ལ། འདོད་པ་དང་ལྡན་པ་རྣམས་ཀྱིས་འདོད་པའི་དོན་དུ་སྡུག་

བསྔལ་མྱོང་བ་ནི་བྱང་ཆུབ་ཏུ་འགྱུར་བ་མ་ཡིན་ནོ་ཞེས་པའི་དོན་ཏོ། ཡང་ཁྱད་པར་དུ་འདོད་པའི་རྒྱུས་སྡུག་བསྔལ་བ་ཉིད་དུ་རབ་ཏུ་བསྟན་པའི་ཕྱིར། དམྱལ་སོགས་ཞེས་པ་ལ་སོགས་པ་གསུངས་ཏེ། མཚོན་ལ་སོགས་པ་འདི་རྣམས་སྡུག་བསྔལ་སྐྱེད་པར་བྱེད་པའི་རྒྱུ་ཉིད་དུ་རབ་ཏུ་གྲགས་

Vol. 105 · folio 164b

པ་དང་། འདོད་པ་རྣམས་མཚུངས་པར་འགྱུར་བ་ནི་མ་ཡིན་ནོ། །ཅིའི་ཕྱིར་ཞེ་ན། དམྱལ་བ་ལ་སོགས་པ་ངན་འགྲོའི་སྡུག་བསྔལ་ལུང་ལས་བཤད་པ་དྲན་པ་ལས་ཏེ། དྲན་པས་ཡུལ་དུ་བྱས་པ་ལས་སོ། །མཚོན་ཆ་ལ་སོགས་པ་ཡང་དུས་ངེས་པར་འཆི་བ་ལ་སོགས་པ་འདི་རྣམས་སྡུག་བསྔལ་སྐྱེད་

པར་བྱེད་པ་པོ་ཡིན་ལ། འདོད་པ་ནི་དུས་ཡུན་རིང་པོར་དམྱལ་བ་ལ་སོགས་པའི་སྡུག་བསྔལ་མི་བཟད་པའི་རྒྱུ་རྣམས་ཡིན་ཏེ། ཇི་ལྟ་བུར་དེ་རྣམས་ཀྱི་དཔེར་འགྱུར། དེ་ལྟར་ལུས་རྣམ་པར་དབེན་པའི་རྗེས་ལ་སེམས་རྣམ་པར་དབེན་པ་བརྗོད་ནས། སྐབས་སུ་བབ་པ་ལ་སྦྱར་བའི་ཆེད་དུ། དེ་ལྟར་

འདོད་པ་ཞེས་བྱ་བ་ལ་སོགས་པ་གསུངས་ཏེ། འདོད་པ་སྟེ་འཇིག་པའི་རྒྱུ་རྣམས་སོ། །དེ་ལྟར་བརྗོད་པའི་རིམ་པས་སྐྱོ་ཞིང་སྐྲག་པར་བྱས་ནས་སྔར་བརྗོད་པའི་དབེན་པའི་དགའ་བ་ལ་མངོན་པར་དགའ་བ་བསྐྱེད་པར་བྱའོ། །གང་དུ་གནས་ནས་བྱ་ཞེ་ན། དེ་ལ་གསུངས་པ། རྩོད་པ་དང་ཞེས་པ་ལ་

སོགས་པ་གསུངས་ཏེ། འགྲན་ཟླ་མེད་པས་དེ་རྩོད་པས་སྟོང་པ་དག་ཡིན་ལ། སྟག་དང་རི་དགས་དང་སྦྲུལ་དང་རྐུན་པོ་ལ་སོགས་པ་དང་བྲལ་བས་དགའ་བ་ཡིན་ནོ། །དེའི་ཕན་ཡོན་སྐལ་ལྡན་ཞེས་པ་ལ་སོགས་པ་གསུངས་པ་ལ། སྐལ་ལྡན་ནི་ལེགས་པར་སྤྱོད་པ་རྣམས་ཡིན་ལ།

ཟླ་བ་ནི་ཟླ་བ་ཉིད་ཡིན་ལ། འོད་ནི་འོད་ཟེར་ཡིན་ཏེ། དེ་ཉིད་དཀར་ཞིང་བསིལ་བར་ཆོས་མཐུན་པས་ཙནྡན་ཡིན་ལ། གང་རླུང་བསིལ་བ་རྣམས་དང་ལྡན་པའི་རྡོ་ལེབ་དེ་རྣམས་ལ་འཆག་པར་བྱེད་ཅེས་པ་དང་འབྲེལ་ཏོ། །ཁྱད་པར་ཅི་ལྟ་བུ་དང་ལྡན་པ་ཞེ་ན། ཉམས་དགའ་བར་ཏེ། རང་བཞིན་

གྱིས་གཙང་ཞིང་དག་པ་རྩུབ་པ་ལ་སོགས་པའི་ཉེས་པ་དང་བྲལ་བ་རྣམས་སོ། །ཡངས་པའི་རྡོ་ལེབ་ཁང་བཟངས་ནི་ཁང་བཟངས་དང་འདྲ་བ་སྟེ་ཡངས་པ་རྣམས་སོ། །ཇི་ལྟ་བུར་གྱུར་པའི་དམ་པས་འཆག་པར་བྱེད་ཅེ་ན། སྒྲ་མེད་པ་སྟེ། མི་མཐུན་པའི་སྒྲ་དང་བྲལ་བས་སོ། །ཞི་བ་ནི་

རྩུབ་པ་མ་ཡིན་པ་བདེ་བའི་རེག་པ་དང་ལྡན་པས་ཞེས་པའི་དོན་ཏོ། །ནགས་ཀྱི་རླུང་ནི་གཡོབ་པར་བྱེད་པའི་རླུང་ངོ་། །འཆག་པར་བྱེད་པ་ནི་ཡང་དང་ཡང་དུ་དལ་བས་འཆག་པའོ། །འཆག་པ་ཙམ་འབའ་ཞིག་ནི་མ་ཡིན་ཏེ། འོན་ཀྱང་གཞན་ལ་ཕན་པའི་ཆེད་དུ་སེམས་ཅན་རྣམས་

Vol. 105 · folio 165a

ལ་བདེ་བ་སྐྱེད་པའི་སེམས་པའང་ཡིན་ནོ། །རྣལ་འབྱོར་པ་རྣམས་ཀྱིས་ནི་འདི་ཐམས་ཅད་འབད་པ་མེད་པར་འགྲུབ་པ་ཡིན་ལ། འདོད་པ་ཅན་རྣམས་ཀྱིས་ནི་འབད་པས་བསྒྲུབ་པར་བྱ་བ་ཡིན་ནོ། །དེ་ལྟར་ན་འདིས་ནི་རྣམ་པར་དབེན་པའི་བདེ་བ་དབང་ཕྱུག་གི་བདེ་བ་

ལས་ཀྱང་ཁྱད་པར་དུ་འཕགས་པར་བསྟན་ཏོ། །དབེན་པར་གནས་པ་རྣམས་ལ་བདེ་བ་ཐུན་མོང་མ་ཡིན་པ་གཞན་འདི་ཡང་ཡོད་པར་བསྟན་པའི་ཕྱིར། ཁང་སྟོང་ཞེས་པ་ལ་སོགས་པ་སྨོས་ཏེ་གོ་སླའོ། །རང་དབང་སྤྱོད་ཅིང་ཞེས་པ་ལ་སོགས་པ་ནི་བཤད་པ་ཉིད་ཀྱི་དོན་གསལ་བར་བྱེད་དེ།

བདག་ནི་རང་ཉིད་ཡིན་ལ་རང་དབང་དུ་སྤྱོད་པ་ནི་འདོད་པ་ཡིན་ཏེ། དེས་རང་དབང་དུ་སྤྱོད་པའི་ངང་ཚུལ་གང་ལ་ཡོད་པ་དེ་ནི་རང་དབང་དུ་སྤྱོད་པ་ཞེས་པའི་དོན་ཏོ། །དེ་ལྟར་རྣམ་པར་དབེན་པའི་ཡོན་ཏན་བཤད་དེ། སྐབས་སུ་བབ་པ་བཤད་པར་འདོད་ནས། དེ་ལས་ཞེས་པ་ལ་སོགས་པ་གསུངས་

ཏེ། དེ་ལས་ཞེས་བྱ་བ་ནི་སྔར་བརྗོད་པའི་རིམ་པ་སྟེ། སོགས་པའི་སྒྲས་ནི་གཞན་ཡང་དེ་ལྟར་ཡིན་ལ། རྣམ་པ་ཡིས་ཞེས་པ་ནི་ལུས་དང་སེམས་ཀྱིས་རྣམ་པར་དབེན་པ་ཡིན་ལ། ཡོན་ཏན་བསྒོམ་པ་ནི་འདི་ལྟར་ཡང་བདེ་བ་ཕུན་སུམ་ཚོགས་པ་ཐམས་ཅད་ཀྱི་རྒྱུ་ནི་བདེ་བ་ཡིན་ནོ་ཞེས་སེམས་ལ་

ཡང་ནས་ཡང་དུ་མངོན་དུ་བྱས་པའི་རྒྱུས་སོ། །རྣམ་པར་རྟོག་པའི་རྒྱུ་ཉེ་བར་ཞི་བ་ནི་གང་གི་དམ་པ་མ་ཡིན་པའི་ཡིད་ལ་བྱེད་པ་དེ་ལྟར་གྱུར་པ་ན་བྱང་ཆུབ་ཀྱི་སེམས་བསྒོམ་པར་བྱ་སྟེ། འདི་ལྟར་སེམས་ཡོངས་སུ་བྱང་བ་བསྒོམ་པ་ན་བྱང་ཆུབ་ཀྱི་སེམས་ཕུལ་དུ་ཕྱིན་པའི་གོ་འཕང་སྐྱེ་བར་

འགྱུར་རོ་ཞེས་ནིའི་སྒྲས་ཁྱད་པར་སྟོན་ཏོ། །དེ་ལ་རེ་ཞིག་གཅིག་ཏུ་གཞན་དུ་བདག་ཉིད་མ་བྱས་པ་དེ་སྲིད་དུ་གཞན་ལ་ཕན་པ་དང་བདེ་བའི་སེམས་ཕུན་སུམ་ཚོགས་པར་མི་འགྱུར་ཏེ། བདག་ཏུ་འཛིན་པ་ནི་བདག་ཉིད་ལ་ཁྱད་པར་དུ་འཇུག་པའི་ཕྱིར་རོ། །དེའི་ཕྱིར་འདི་བཟློག་པར་བྱ་

བའི་ཆེད་དུ་དང་པོར་ཏེ་ཐོག་མར་བདག་དང་གཞན་དུ་མཉམ་པོ་བསྒོམ་པར་བྱ་སྟེ། ཕྱི་ནས་ནི་བདག་དང་གཞན་དུ་བརྗེ་བའོ་ཞེས་པའི་དོན་ཏོ། །འདི་ལྟར་ཞེས་པ་ནི་འཆད་པར་འགྱུར་བའི་ཚུལ་གྱིས་སོ། །འབད་པས་ཞེས་པ་ནི་མངོན་པར་ཞེན་པ་ཆེན་པོས་སོ། །བདེ་དང་སྡུག་བསྔལ་མཉམ་

Vol. 105 · folio 165b

པས་ཞེས་པ་ནི་དེ་ཉིད་ཀྱི་རྣམ་པ་སྟོན་པ་ཡིན་ནོ། །བདག་ལས་འདི་དག་ལ་ཁྱད་པར་ཅུང་ཟད་ཀྱང་ཡོད་པ་མ་ཡིན་ཏེ། གང་ལས་ཇི་ལྟར་བདག་སྡུག་བསྔལ་ཞིང་གནོད་པ་དེ་བཞིན་དུ་འདི་རྣམས་ལ་ཡང་ངོ་། །ཇི་ལྟར་བདག་གི་བདེ་བ་ཡོངས་སུ་བཟུང་བ་སྟེ། དེ་བཞིན་དུ་འདི་རྣམས་ལ་ཡང་ཞེས་

སྲོག་ཆགས་ཐམས་ཅད་ལ་བདེ་བ་དང་སྡུག་བསྔལ་མཉམ་པར་འགྱུར་བ་ཡིན་ཏེ། དེའི་ཕྱིར་བདག་བཞིན་དུ་བདག་གིས་བསྐྱང་བར་བྱ་སྟེ། དཔེར་ན་བདག་སྡུག་བསྔལ་དང་སྡུག་བསྔལ་གྱི་རྒྱུ་ལས་འབྱིན་པ་དེ་བཞིན་དུ་སེམས་ཅན་གཞན་ཡང་གནོད་པར་བྱ་བ་དང་དཔེར་ན་བདག་ཉིད་རྣམ་

པ་ཐམས་ཅད་དུ་བདེ་བར་འདོད་པ་དེ་བཞིན་དུ་གཞན་ཡང་བདག་བཞིན་དུ་ཡོངས་སུ་བསྲུང་བར་བྱའོ། །འོ་ན་བདག་ཉིད་ལས་འགྲོ་བ་དུ་མའི་རྣམ་པ་ཐ་དད་པའི་སེམས་ཅན་རྣམས་གཅིག་ཏུ་འགྲུབ་པར་མི་འགྱུར་བ་མ་ཡིན་ནམ། བདེ་བ་དང་སྡུག་བསྔལ་ཐ་མི་དད་པར་ཡང་ཇི་ལྟར་འདོད་པར་འགྱུར་ཞེ་ན། འདི་ལ་ལག་པ་ལ་

སོགས་པ་ཞེས་པ་ལ་སོགས་པ་གསུངས་པ་ལ། ལག་པ་དང་རྐང་པ་དང་མགོ་བོ་ལ་སོགས་པ་དབྱེ་བ་རྣམ་པ་མང་པོ་ཇི་ལྟར་ལུས་གཅིག་ཏུ་ཞེན་པས་ཡོངས་སུ་བསྲུང་བར་བྱ་བར་འགྱུར་ཏེ། སྡུག་བསྔལ་ལས་བཟློག་པའི་ཕྱིར་དང་། བདེ་བ་ལ་གཏོད་པའི་ཕྱིར་རོ། །དེ་བཞིན་དུ་འགྲོ་བ་

སྟེ་སེམས་ཅན་གྱི་འཇིག་རྟེན་ཐ་མི་དད་ཅིང་གཅིག་པ་ཉིད་དུ་ཞེན་པས་བདག་གིས་ཡོངས་སུ་བསྲུང་བར་བྱ་བ་ཉིད་དུ་འགྱུར་རོ། །བདེ་བ་དང་སྡུག་བསྔལ་ཐ་མི་དད་པར་ཡང་གི་སྒྲ་མི་མངོན་པར་བྱས་པས་སྟོན་ཏོ། །དེ་ལྟར་ལག་པ་ལ་སོགས་པའི་དབྱེ་བ་བཞིན་དུ་འདི་ཐམས་ཅད་ཅེས་ཏེ་རྣམ་པ་མང་

པོའི་འགྲོ་བའི་བྱེ་བྲག་ཐ་དད་པ་ཡང་ངོ་། །བསམ་པ་ནི་འདི་ཡིན་ཏེ། ལུས་པོ་འདི་ལ་གཅིག་པ་ཉིད་མེད་ཀྱང་ཇི་ལྟར་གོམས་པས་གཅིག་ཏུ་ཞེན་པ་དེ་བཞིན་དུ་འགྲོ་བ་རྣམ་པ་དུ་མ་ལས་ཡང་ཡིན་ཏེ། ཁྱད་པར་ཅུང་ཟད་ཀྱང་མེད་དོ། །འདི་དེ་ལྟར་དུ་གྱུར་ན་གལ་ཏེ་ཁྱེད་དང་ལྷན་ཅིག་

ཏུ་འགྲོ་བ་གཅིག་གི་རང་བཞིན་ཡིན་པ་དེའི་ཚེ་ཇི་ལྟར་ཁྱེད་ཀྱི་སྡུག་བསྔལ་གཞན་གྱི་རྒྱུད་ལ་གནོད་པར་མི་འགྱུར་ལ། དེ་བཞིན་དུ་བཟློག་པ་ལ་ཡང་སྦྱར་བར་བྱའོ་ཞེས་དོགས་ནས། གལ་ཏེ་གཞན་གྱི་ལུས་ཞེས་བྱ་བ་ལ་སོགས་པ་གསུངས་ཏེ། གལ་ཏེ་གཞན་གྱི་ལུས་ཏེ་གཞན་གྱི་

Vol. 105 · folio 166a

ལུས་པོ་དག་ལ་བདག་གི་སྡུག་བསྔལ་གལ་ཏེ་གནོད་པར་མ་གྱུར་པ་དེ་ལྟར་ན་ཡང་སྡུག་བསྔལ་དེ་ཉིད་བདག་གི་ཡིན་ནོ། །ཅིའི་ཕྱིར་ཞེ་ན། བདག་ལ་ཆགས་པས་བཟོད་པར་དཀའ་བ་ཡིན་ཏེ་མི་ནུས་སོ་ཞེས་པ་སྟེ་འདི་ནི་གཏན་ཚིགས་ཀྱི་ཚིག་ཡིན་ལ། ཆའི་

སྒོ་ནས་འཇུག་ན་ཡང་སྡུག་བསྔལ་གྱི་རང་བཞིན་ཉིད་མི་འདོར་རོ་ཞེས་པའི་དོན་ཏོ། །དེ་བཞིན་དུ་བཟློག་པ་ཡང་བཤད་པར་བྱའོ། །དེའི་ཕྱིར་རང་དང་གཞན་གྱི་ཁྱད་པར་དོར་ནས་སྡུག་བསྔལ་གྱི་རང་བཞིན་ཉིད་བཟློག་པའི་གཏན་ཚིགས་བདག་གིས་ཞེས་པ་ལ་སོགས་པ་གསུངས་པ་ལ།

གང་སྡུག་བསྔལ་ཡིན་པ་དེ་བདག་གིས་བསལ་བར་བྱ་སྟེ། བདག་གི་སྡུག་བསྔལ་བཞིན་ནོ། །སེམས་ཅན་གཞན་གྱི་སྡུག་བསྔལ་ཡིན་པས་ཞེས་པ་ནི་རང་བཞིན་གྱི་གཏན་ཚིགས་ཀྱི་སྦྱོར་བ་ཡིན་ཏེ། སྡུག་བསྔལ་གྱི་རང་བཞིན་ཙམ་འབྱུང་བར་འགྱུར་བ་སྤོང་བར་བྱ་བ་ཉིད་དོ། །

གཏན་ཚིགས་མ་གྲུབ་པ་ཡང་མ་ཡིན་ཏེ། སྡུག་བསྔལ་གྱི་རང་བཞིན་ཉིད་དུ་ཁྱད་པར་མེད་པར་བསྒྲུབ་པའི་ཕྱིར་རོ། །མ་ངེས་པ་ཡང་མ་ཡིན་ཏེ། །ཁྱད་པར་མེད་པའི་ཕྱིར་བདག་གི་སྡུག་བསྔལ་ཡང་སྤང་བར་བྱ་བ་མ་ཡིན་པར་འགྱུར་རོ་ཞེས་པ་ནི་བཟློག་ན་གནོད་པ་ཅན་ནོ། །འདི་

ཉིད་ཀྱི་ཕྱིར་འགལ་བ་ཡང་མ་ཡིན་ནོ། །དེ་བཞིན་དུ་སྦྱོར་བ་གཞན་འདི་ཡང་ཡིན་ཏེ། གང་སེམས་ཅན་ཡིན་པ་དེ་ཐམས་ཅད་ལ་བདག་གིས་ཕན་པར་བྱ་སྟེ། ཇི་ལྟར་སེམས་ཅན་བདག་ཉིད་བཞིན་ནོ། །སྲོག་ཆགས་གཞན་ཡང་སེམས་ཅན་ཡིན་པ་ཞེས་པ་ནི་རང་བཞིན་གྱི་

གཏན་ཚིགས་ཉིད་དེ། སེམས་ཅན་གྱི་བདག་ཉིད་ཙམ་འབྱུང་བར་འགྱུར་བ་ལ་ཕན་གདགས་པར་བྱའོ། །འདི་ཡང་མ་གྲུབ་པ་མ་ཡིན་ཏེ། སེམས་ཅན་གྱི་བདག་ཉིད་ཀྱི་ཕྱོགས་གྲུབ་པའི་ཕྱིར་རོ། །བདག་ཉིད་ལ་ཡང་ཕན་མི་འདོགས་པར་ཐལ་བར་འགྱུར་བས་མ་ངེས་པ་

ཡང་མ་ཡིན་ལ། སྔར་བཞིན་དུ་འགལ་བ་ཡང་མ་ཡིན་ནོ། །སྡུག་བསྔལ་ལ་མངོན་པར་ཞེན་པ་ཞེས་པ་བདག་དང་གཞན་ལ་ཁྱད་པར་ཡོད་པ་མ་ཡིན་ནམ། དེའི་ཕྱིར་དེ་ལྟར་ན་གཏན་ཚིགས་ནི་མ་ངེས་པ་ཡིན་ནོ་ཞེ་ན། གང་ཚེ་བདག་དང་ཞེས་པ་ལ་སོགས་པ་གསུངས་པ་ལ། བདེ་

Vol. 105 · folio 166b

བ་སྟེ་དགའ་བ་འདོད་པར་མཚུངས་ཤིང་མཉམ་པ་ཉིད་ལ་དེ་དག་དང་གཞན་ལ་ཁྱད་པར་ཅི་ཡོད་དེ་ཅུང་ཟད་ཀྱང་མེད་དོ། །གང་གི་ཕྱིར་བདག་ཉིད་ལ་བདེ་བ་བསྐྱེད་པར་བྱ་བའི་ཕྱིར་བརྩོན་ལ་གཞན་ལ་མ་ཡིན་ཞེས་པའི་དོན་ཏོ། །གཏན་ཚིགས་དང་པོ་ལ་མ་ངེས་པ་ཉིད་སྤང་བའི་ཕྱིར།

གང་ཚེ་བདག་དང་ཞེས་པ་ལ་སོགས་པ་གསུངས་ཏེ། འཇིགས་པ་ནི་སྡུག་བསྔལ་གྱི་རྒྱུ་ཡིན་ལ། གཞན་མིན་ཞེས་པ་ནི་གཞན་ལ་མ་ཡིན་པའོ། །དེ་ལྟར་གྱུར་ན་ཡང་སྡུག་བསྔལ་གཅིག་གི་བདག་ཉིད་དུ་ཁྱད་པར་མེད་པར་གྱུར་པ་དེ་ལྟ་ན་ཡང་། གང་ལ་སྡུག་བསྔལ་གྱིས་གནོད་པ་དེ་ཉིད་ཀྱིས་

བསྲུང་བར་འོས་ཀྱི་གཞན་གྱིས་ནི་མ་ཡིན་ནོ་ཞེ་ན། གལ་ཏེ་དེ་ལ་ཞེན་པ་ལ་སོགས་པ་གསུངས་ཏེ། གཞན་དེའི་སྡུག་བསྔལ་གྱིས་བདག་ལ་གནོད་པ་དང་གདུང་བ་མེད་པའི་ཕྱིར་རྒྱུ་འདིས་གལ་ཏེ་གཞན་མ་བསྲུངས་ན་གཞན་འདི་ཉམས་པར་འགྱུར་ཏེ། གང་གི་ཕྱིར་མ་འོངས་པ་སྟེ་

འཇིག་རྟེན་ཕ་རོལ་གྱི་ལུས་དམྱལ་བར་སྐྱེས་པའི་སྡུག་བསྔལ་གྱི་བདག་ཉིད་འདིར་སྐྱེས་པའི་ལུས་པོ་འདི་ལ་ཅུང་ཟད་ཀྱང་གནོད་པར་མི་སྲིད་དེ། དེ་གཞན་ཡིན་པའི་ཕྱིར་རོ། །དེ་ཞེས་པ་ནི་འཇིག་རྟེན་པའི་བརྗོད་པའམ་དེའི་དོན་ཏོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་བསམ་པ་

གང་གིས་འདིར་བསྲུང་བ་ལུས་ཀྱི་རང་བཞིན་ཡིན་པའི་ཕྱིར་ཏེ། སྡིག་པ་ལས་ལྡོག་པའི་ཕྱིར་དང་དགེ་བ་ལ་འཇུག་པའི་ཕྱིར་རོ། །བདག་ནི་དུས་ཐམས་ཅད་དུ་གཅིག་ཡིན་ཏེ། ལུས་ངག་ལ་ཐ་དད་པ་ཡོད་པ་མ་ཡིན་ལ། དེའི་ཕྱིར་ཉེས་པ་འདི་མེད་དོ་ཞེ་ན། བདག་གིས་ཞེས་བྱ་བ་

ལ་སོགས་པ་གསུངས་ཏེ། བདག་ནི་འགེགས་པར་འགྱུར་བའི་ཕྱིར་དང་། ཅུང་ཟད་བཀག་པའི་ཡང་ཕྱིར་གང་ཞིག་ངའོ་ཞེས་རྟོག་པའི་ཡུལ་དུ་འགྱུར། དེའི་ཕྱིར་ངའོ་ཞེས་ཤེས་པའི་ཡུལ་གང་ལ་ཡང་གཅིག་ཅེས་པ་མེད་པའི་ཕྱིར་ཞེན་པའི་རྣམ་པར་རྟོག་པ་འདི་ནི་ལོག་པའོ། །

བདག་ཉིད་དེའི་ཚེ་ཡང་ཞེས་པ་ནི་འདི་སྲིད་པ་གཞན་ཡིན་ལ། སྒྱུ་མ་ལྟ་བུ་ཉེ་བར་ལེན་པའི་ཕུང་པོ་ལྔ་ཙམ་དམིགས་པའི་ཕྱིར་རོ། །འདི་ཡང་ཞེན་པའི་དབང་གིས་བརྗོད་པ་ཡིན་ཏེ། ཡང་དངོས་པོ་ལ་ནི་དམིགས་པ་ཅུང་ཟད་ཀྱང་ཡོད་པ་མ་ཡིན་ཏེ་རྣམ་པར་རྟོག་པའི་བདག་ཉིད་ཡིན་

Vol. 105 · folio 167a

པའི་ཕྱིར་རོ། །ཡང་འདི་ཅིའི་ཕྱིར་རྣམ་པར་རྟོག་པ་ལོག་པ་ཡིན་ཞེ་ན། འདི་ལྟར་ཤི་བ་ཞེས་པ་ལ་སོགས་པ་གསུངས་ཏེ། བདག་གཅིག་ཏུ་ཕུང་པོ་ལྔ་པོ་ཙམ་ཉིད་ཡིན་ལ། གང་གི་ཚེ་བདག་ལ་སོགས་པ་འགའ་ཞིག་འཇིག་རྟེན་ཕ་རོལ་དུ་འགྲོ་བར་སྲིད་པ་ཐ་

མ་མ་ཡིན་པ་དེའི་ཚེ་ངེས་པར་ཕུང་པོ་དེ་འདི་ཉིད་དུ་འཇིག་པར་འགྱུར་བ་ནི་མ་ཡིན་ཏེ། དེ་ཉིད་འཇིག་རྟེན་ཕ་རོལ་དུ་སྐྱེ་བར་འགྱུར་རོ། །འོན་ཀྱང་སྔ་མ་འགགས་ནས་དེས་རྐྱེན་འདིས་ཁྱད་པར་དུ་གྱུར་པའི་ལས་དང་ཉོན་མོངས་པས་འདུས་བྱས་པ་བར་མ་དོའི་སྲིད་པ་སྔར་མེད་པའི་རྒྱུད་སྐྱེད་

པར་འགྱུར་ཏེ། དེའི་ཕྱིར་ཐོག་མ་མེད་པའི་འཁོར་བ་ནས་འཇུག་པའི་ལོག་པའི་རྣམ་པར་རྟོག་པ་ལ་གོམས་པའི་བག་ཆགས་ཀྱི་དབང་ལ་སོགས་པའི་རྐྱེན་གྱིས་ཕྱིར་ཕྱིན་ཅི་ལོག་པ་ཉིད་སྐྱེ་བར་འགྱུར་རོ། །གཞན་ཡང་གནོད་པར་བྱེད་པ་གཞན་འདི་ཡིན་ནོ་ཞེས་གང་གི་ཚེ་ཞེས་པ་ལ་སོགས་པ་

གསུངས་ཏེ། གང་གི་ཚེ་འབྱུང་བར་འགྱུར་བའི་ལུས་ཀྱི་སྡུག་བསྔལ་བསྲུང་བའི་དོན་རེ་ཞིག་ཞོག་ལ། འདིར་ལུས་པོ་གཅིག་ལ་ཡན་ལག་ཐ་དད་པས་སྡུག་བསྔལ་ཐ་དད་པ་ཡིན་ཏེ། དེའི་ཕྱིར་གང་གཞན་གྱི་སྡུག་བསྔལ་གཞན་གྱིས་བསྲུང་བ་ལ་འབད་པར་མི་རིགས་ན། རྐང་

པ་ལ་སོགས་པ་ལ་ཕངས་པ་གང་ཞིག་མཐོང་བ་ན་ཅིའི་ཕྱིར་ལག་པ་ལ་སོགས་པས་སྐྱོང་བར་བྱེད་དེ། གཞན་ཉིད་དུ་ཁྱད་པར་མེད་པའི་ཕྱིར་འདི་རིགས་པ་མ་ཡིན་ནོ་ཞེས་པའི་དོན་ཏོ། །འོན་ཏེ་འདི་རིགས་པ་ཡིན་ན་ཡང་ལུས་པོ་འདི་ལ་བདག་གིར་འཛིན་པ་སྟེ། བདག་ཅེས་པ་

བདག་ཏུ་འཛིན་པ་ལས་བདག་མེད་ཀྱང་འཇུག་པར་འགྱུར་ཏེ། རྐང་པ་ལ་སོགས་པ་ལ་བསྲུང་བའི་ཡིད་ལ་བྱེད་པ་འབྱུང་བར་འགྱུར་རོ་ཞེ་ན། འདི་ཡང་ལེགས་པ་མ་ཡིན་ཏེ། ཇི་ལྟར་གང་མི་རིགས་པ་སྟེ་རིགས་པ་དང་མི་མཐུན་པ་དེ་བཟློག་པར་བྱ་སྟེ། བདག་དང་གཞན་གྱི་

ཡང་བསལ་བར་བྱ་སྟེ། ནན་གྱིས་ནི་ནུས་པ་ཅི་ལྟ་བར་རོ། །ནུས་པ་དང་བྲལ་བས་ནི་འདིར་བཏང་སྙོམས་ཉིད་དུ་བྱ་བར་རིགས་སོ་ཞེས་པའི་དོན་ཏོ། །གལ་ཏེ་བདག་ལ་སོགས་པ་མེད་པར་གྱུར་པ་དེ་ལྟ་ན་ཡང་རྒྱུད་ཅེས་པ་གཅིག་ཡོད་པ་ཡིན་ཏེ། དེ་བཞིན་དུ་ལག་པ་དང་

Vol. 105 · folio 167b

རྐང་པ་ལ་སོགས་པ་མང་པོ་རྣམས་ལ་ཡང་ཚོགས་པའི་ལུས་གཅིག་ཡོད་པ་ཡིན་ལ། གཉིས་པོ་འདི་འཇིག་རྟེན་འདི་དང་འཇིག་རྟེན་ཕ་རོལ་དུ་ཇི་ལྟར་སྲིད་པར་བདག་སྡུག་བསྔལ་ཁྱེར་བར་བྱེད་པ་ལ་སོགས་པའི་ངེས་པར་བྱེད་པར་འགྱུར་ཏེ། དེའི་ཕྱིར་ཁྱད་པར་ཅི་ཞིག་ཡོད་ཅེས་པའི་གཏན་

ཚིགས་མ་གྲུབ་པ་ཡིན་ལ། སྔ་མ་ནི་མ་ངེས་པ་ཡིན་ནོ་ཞེས་དོགས་ནས་རྒྱུད་དང་ཞེས་པ་ལ་སོགས་པ་གསུངས་ཏེ། རྒྱུད་ཅེས་པ་འགའ་ཞིག་དོན་དམ་པར་སྲིད་པ་མ་ཡིན་ཏེ། འོན་ཀྱང་རྒྱུ་དང་འབྲས་བུའི་དངོས་པོ་འཇུག་པ་སྐད་ཅིག་བརྒྱུད་པའི་རྒྱུན་གྱི་རང་བཞིན་ཉིད་འདི་ཡིན་ཏེ། དེ་ལ་

ཐ་དད་པ་དེ་མ་དམིགས་པའི་ཕྱིར་རོ། །དེའི་སྐད་ཅིག་མ་འདི་རྣམས་ཚིག་གཅིག་གིས་བློའི་ཐ་སྙད་བྱ་བའི་དོན་དུ་རྒྱུད་ཅེས་བརྡར་བྱས་པ་ཡིན་ཏེ། དེ་ལྟར་ན་འདི་ནི་བརྟགས་པར་ཡོད་པ་ཉིད་ཡིན་ལ། དེས་ན་འདིར་མངོན་པར་ཞེན་པ་སྤོང་བར་བྱ་སྟེ། གཞན་དུ་ན་གང་གིས་ཁས་མི་

ལེན་པར་འགྱུར་བ་བདག་གིས་གནོད་པ་ཅི་ཞིག་བྱས། དེ་བཞིན་དུ་ཚོགས་པ་ཅན་ལ་སོགས་པའི་དངོས་པོ་གཅིག་པུར་གྱུར་པ་ཡོད་པ་ནི་མ་ཡིན་ཏེ། དེ་རྣམས་ལས་དེ་ཐ་དད་པར་མ་དམིགས་པའི་ཕྱིར་ལ། དེ་ཉིད་དང་གཞན་དུ་བརྟགས་པའི་ཆ་ཤས་ཀྱི་རྣམ་པར་དཔྱད་པས་མི་གནས་

པའི་ཕྱིར་འདིར་བརྗོད་པར་མི་བྱ་སྟེ། དེའི་ཕྱིར་འདི་ཡང་སྔར་བཞིན་དུ་ཀུན་རྫོབ་ཏུ་ཡོད་པ་ཉིད་དོ། །འདི་དག་གོ་རིམས་ཇི་ལྟ་བར་དཔེར་བརྗོད་པ། ཕྲེང་བ་དམག་ཅེས་པ་ལ་སོགས་པ་གསུངས་ཏེ། རྒྱུད་ནི་ཕྲེང་བ་བཞིན་དུ་ཡིན་ལ། ཚོགས་པ་ནི་དམག་ལ་སོགས་པ་བཞིན་ཡིན་པ་

ལ་སོགས་པའི་སྒྲས་ཕྲེང་བ་དང་། ནགས་ལ་སོགས་པ་བཟུང་ངོ་། །ཇི་ལྟར་གྲོག་མོ་ལ་སོགས་པ་དུ་མ་འདི་རྣམས་སྔ་ཕྱིའི་རིམ་པས་གནས་པ་རྣམས་ལ་རང་གི་ངོ་བོ་ལས་མ་གཏོགས་པ་མེ་ཏོག་བརྒྱུས་པ་བཞིན་དུ་རྒྱུད་གཅིག་ནི་ཡོད་པ་མ་ཡིན་ནོ། །གང་གི་ཚེ་གླང་པོ་ཆེ་དང་རྟ་དང་

རྐང་ཐང་ལ་སོགས་པ་བསྡུས་པ་རྣམས་ལས་ཐ་དད་པའི་དམག་ལ་སོགས་པ་གཞན་ཅུང་ཟད་ཅིག་ཀྱང་དེར་ཡོད་པ་མ་ཡིན་ཏེ། དེ་བཞིན་དུ་ཚོགས་པའང་ཡིན་ལ་འདི་ཡང་གཞན་དུ་རྒྱས་པར་དཔྱད་པས་འདིར་དཔྱད་པར་མི་བྱའོ། །དེའི་ཕྱིར་ཤེས་པ་འདི་ནི་བརྫུན་པ་ཡིན་ཏེ། རྟག་

Vol. 105 · folio 168a

ཏུ་དངོས་པོར་དམིགས་པ་དང་བྲལ་བའི་ཕྱིར་དོན་ལ་དཔྱད་མི་བཟོད་པའི་ཕྱིར་རོ། །དེ་དེ་ལྟར་ན་བདག་ལ་སོགས་པ་བདག་པོ་གང་ཡང་མེད་པས་གང་དང་འབྲེལ་བའི་སྡུག་བསྔལ་ལ་སོགས་པ་ཡང་མེད་དོ། །དེའི་ཕྱིར་སྡུག་བསྔལ་དེའི་བདག་པོར་

གང་ཞིག་འགྱུར་ཏེ་གང་ཡང་མ་ཡིན་ནོ་ཞེས་པའི་དོན་ཏོ། །གལ་ཏེ་བདག་ལ་སོགས་པ་མེད་ན་དེའི་ཚེ་བདག་སྡུག་བཞིན་ཞེས་པ་དང་། སེམས་ཅན་ཡིན་ཕྱིར་བདག་ལུས་བཞིན། །ཞེས་བྱ་བའི་དཔེ་ཇི་ལྟར་འཐད་ཅེ་ན། འདི་ནི་བདེན་ཏེ་འོན་ཀྱང་ཕོངས་པའི་སྒོ་ནས་སྒྲུབ་པར་བྱེད་

པ་ནི་མ་ཡིན་ཏེ། འོན་ཀྱང་གཞན་ལ་བདག་ཏུ་འཛིན་པའི་མངོན་པར་ཞེན་པ་སྤང་བར་བྱ་བའི་དོན་དུ་ཡིན་ཏེ། གལ་ཏེ་གཞན་གྱི་བདག་ཏུ་འཛིན་པའི་མངོན་པར་ཞེན་པ་དེ་ལྡོག་པ་ཉིད་དུ་ཡིན་པ་དེའི་ཚེ་རྗེས་སུ་དཔག་པའི་སྦྱོར་བ་ལ་དགོས་པ་ཅུང་ཟད་ཀྱང་ཡོད་པ་མ་ཡིན་ནོ། །འོན་ཏེ་མ་ལོག་པ་

དེའི་ཚེ་བསམ་པ་དེ་ཉིད་ཀྱིས་རང་གི་ཆ་དང་གཞན་གྱི་ཆར་བྱས་ནས་དེ་རྟོགས་པར་བྱ་བའི་དོན་དུ་སྒྲུབ་པར་བྱེད་པ་དང་དཔེ་དགོད་པར་བྱ་བ་སྟེ། དེ་ལྟར་ན་དཔེ་མ་གྲུབ་པ་ཡིན་ཏེ། ཐ་སྙད་ལ་འཇུག་པར་བྱ་བའི་དོན་ཡིན་པས་སོ། །གཞན་ཡང་ཟིན་པའི་ཕུང་པོ་ཉིད་ལ་དགོངས་ནས་དཔེ་

མཛད་པ་ལ་ཉམས་ཅུང་ཟད་ཀྱང་མེད་པས་འདི་ཉིད་དུ་བདག་གི་སྒྲ་འཇུག་པར་མཛད་དོ། །ད་ནི་སྐབས་སུ་བབ་པ་བསྡུ་བར་བཞེད་ནས། སྡུག་བསྔལ་དཔག་ཏུ་མེད་པ་ཞེས་བྱ་བ་ལ་སོགས་པ་གསུངས་པ་ལ། གསུངས་པའི་རིམ་པས་གང་རྣམས་ལ་བདག་པོ་མེད་པ་ཞེས་པའི་ཚིག་སྡུད་པ་

ཡིན་ཏེ། བདག་གི་བ་མ་ཡིན་པ་གང་དང་ཡང་འབྲེལ་པ་མ་ཡིན་ནོ་ཞེས་པའི་དོན་ཏོ། །གང་ཅུང་ཟད་ཐམས་ཅད་ཉིད་ཀྱིས་མ་ཡིན་ནོ་ཞེས་ཁྱད་པར་དུ་བྱེད་དེ། གང་དུ་ཡང་གང་གི་ཡང་བདག་གི་བ་ཉིད་ཡོད་པ་མ་ཡིན་ལ་འདི་ལས་ཁྱད་པར་ཡོད་པ་མ་ཡིན་པའི་ཕྱིར་སྡུག་བསྔལ་ཉིད་བདག་

དང་གཞན་གྱིར་དབྱེ་བ་མ་བྱས་པར་བཟློག་པར་བྱ་བ་ཉིད་དུ་འགྱུར་ལ་དེ་ལ་བདག་གི་བ་ལ་སོགས་པ་རྒྱུ་མཚན་གཞན་ནི་ཡོད་པ་མ་ཡིན་ཏེ་དེས་ན་གང་གི་བདག་གིས་བདག་གི་བ་ཉིད་ནི་བཟློག་པར་བྱ་བ་ཡིན་ལ། གཞན་དག་གིས་ནི་མ་ཡིན་ཞེས་པ་འདི་ངེས་པར་འགྱུར་བར་གང་གིས་བྱས་

Vol. 105 · folio 168b

ཏེ་ཁྱད་པར་གང་གིས་བྱས། དེ་ལྟར་ན་སྡུག་བསྔལ་ཉིད་ཀྱི་ཕྱིར་ཞེས་བྱ་བའི་གཏན་ཚིགས་ངེས་པ་མ་ཡིན་ནོ་ཞེས་སྨྲས་པ་ཡིན་ནོ། ཅི་སྟེ་སྡུག་བསྔལ་ཅན་འགའ་ཞིག་ཀྱང་འཁོར་བ་ན་གལ་ཏེ་ཡོད་པ་ཡིན་ན། དེ་ལྟ་ན་སྡུག་བསྔལ་བཟློག་པར་བྱ་བ་མ་ཡིན་པ་ཉིད་དུ་འགྱུར་ཏེ། སྙིང་

རྗེའི་ཞིང་སྡུག་བསྔལ་ཅན་འགའ་ཡང་ཡོད་པ་མ་ཡིན་པའི་ཕྱིར་ཞེས་དོགས་ནས། ཅིའི་ཕྱིར་སྡུག་བསྔལ་ཞེས་བྱ་བ་ལ་སོགས་པ་གསུངས་ཏེ། བཟློག་པར་བྱ་བ་མ་ཡིན་པ་ཉིད་ཡིན་ཏེ། བདག་མེད་པའི་ཕྱིར་རོ་ཞེས་གལ་ཏེ་སེམས་ན། དེའི་ཚེ་འདིར་རིགས་པ་མ་ཡིན་ནོ། །ཅིའི་ཕྱིར་

ཞེ་ན། ཐམས་ཅད་རྩོད་མེད་ཕྱིར་ཏེ། རྒོལ་བ་ཐམས་ཅད་ལ་རྩོད་པ་མེད་པའི་ཕྱིར་ལ་ལོག་པ་མེད་པར་རྟོགས་པ་མེད་པའི་ཕྱིར་རོ། །ཚུ་རོལ་མཛེས་པ་ཡང་འདིར་རང་གི་སྡུག་བསྔལ་སྤོང་བར་ཞུགས་པའི་ཕྱིར་རོ། །དེ་རྣམས་ཀྱིས་བདག་ཁས་བླངས་པ་ཉེས་པར་མ་གྱུར་པ་ནི་མ་ཡིན་

ཏེ། དེའི་རང་བཞིན་མ་དམིགས་པས་སོ། །ཁས་བླངས་པ་ཙམ་གྱི་སྒོ་ནས་དེ་ཡོད་པར་གྲུབ་པ་ནི་མ་ཡིན་ཏེ། དེ་ལ་སྒྲུབ་པར་བྱེད་པ་མེད་པའི་ཕྱིར་དང་། གནོད་པར་བྱེད་པ་དུ་མ་བརྗོད་པའི་ཕྱིར་རོ། །དེ་ལྟར་ན་སྡུག་བསྔལ་ཐམས་ཅད་བཟློག་པར་བྱ་བ་ཡིན་པ་དེའི་ཚེ་ཐམས་ཅད་

བཟློག་པར་བྱའོ། །གལ་ཏེ་བཟློག་པར་བྱ་བ་མ་ཡིན་ན་དེའི་ཚེ་བདག་ཉིད་ཀྱང་སྟེ་ཟིན་པའི་ཕུང་པོ་ལྔའི་རང་བཞིན་གྱི་སྡུག་བསྔལ་ཡང་བཟློག་པར་བྱ་བ་མ་ཡིན་ཏེ། ཐམས་ཅད་དུ་ཁྱད་པར་མེད་པའི་ཕྱིར་རོ་ཞེས་མཇུག་སྡུད་དོ། །ཅི་སྟེ་ཐམས་ཅད་ཀྱི་སྡུག་བསྔལ་བསལ་

བར་བྱ་བའི་ཕྱིར་བརྩོན་པ་སྙིང་རྗེ་གཞན་གྱི་དབང་དུ་གྱུར་པས་གཞན་སྡུག་བསྔལ་བས་སྡུག་བསྔལ་བ་ཡིན་པ་དེ་ལྟ་ན་ལྷུར་སྡུག་བསྔལ་ཐམས་ཅད་ཀྱི་རྒྱུ་དེ་ཉིད་དང་པོ་ཉིད་དུ་བསྐྱེད་པར་བྱ་བ་ཉིད་དུ་སྦྱར་བར་མི་རིགས་སོ་ཞེས་གཞན་གྱི་ཚིག་གིས་དོགས་པར་བྱས་ནས། སྙིང་རྗེ་ཞེས་པ་ལ་སོགས་པ་གསུངས་ཏེ་

ནན་གྱིས་ཞེས་པ་ནི་རྩོལ་བས་སོ། །འདིར་ལན་གསུངས་པ། འགྲོ་བའི་སྡུག་བསྔལ་ལ་སོགས་པས་བྱས་པའི་རྣམ་པ་མང་པོ་བསམ་པར་བྱས་ན་སྙིང་རྗེ་བྱས་པའི་སྡུག་བསྔལ་འདི་ཅི་ལྟར་མང་སྟེ། སྙིང་རྗེ་ཅན་གྱི་སྡུག་བསྔལ་ནི་མང་བ་མ་ཡིན་ནོ་ཞེས་དགོངས་སོ། །གཞན་ཡང་

Vol. 105 · folio 169a

ལན་འདི་ཡང་ཡོད་དོ་ཞེས། གལ་ཏེ་སྡུག་བསྔལ་གཅིག་གིས་ཞེས་པ་ལ་སོགས་པ་གསུངས་ཏེ། སྐྱེས་བུ་གཅིག་གི་སྡུག་བསྔལ་གྱིས་གལ་ཏེ་སེམས་ཅན་མང་པོ་རྣམས་ཀྱི་སྡུག་བསྔལ་མེད་པར་འགྱུར་ཞིང་བཟློག་པར་འགྱུར་ན་དེའི་དེ་ལྟ་བུའི་སྡུག་བསྔལ་བསྐྱེད་

པར་བྱ་ཞིང་བསྒྲུབ་པར་བྱའོ། །སྙིང་རྗེའི་བདག་ཉིད་ཅན་གྱི་དམ་པས་རང་དང་གཞན་གཉི་གའི་སྡུག་བསྔལ་བསལ་བར་བྱའོ། །བརྟགས་པ་ནི་མ་ཡིན་ནོ་ཞེས་བསྙད་པའི་ཕྱིར། དེས་ན་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་སྙིང་རྗེ་ཅན་གྱིས་རང་གཞན་གྱི་སྡུག་བསྔལ་བསྐྱེད་པར་བྱ་བ་

ཉིད་དེ། དེའི་ཕྱིར་བྱང་ཆུབ་སེམས་དཔའ་མེ་ཏོག་ཟླ་མཛེས་ཀྱིས་རྒྱལ་པོ་ཉམས་པ་སྟེ་རྒྱལ་པོ་ལས་ཉམས་ཏེ་ཤེས་ཤིང་གོ་ཡང་ངོ་། །བདག་གི་སྡུག་བསྔལ་མ་བསལ་བ་ནི་མ་བཟློག་པ་ཡིན་ཏེ་བཏང་སྙོམས་སུ་བྱས་ཞེས་པའི་ཐ་ཚིག་གོ། །དེ་བཞིན་དུ་རྒྱལ་པོའི་ཕྱིར་མའི་

སྡུག་བསྔལ་ཡང་ངོ་། །སྡུག་བསྔལ་ཐམས་ཅད་ཀྱིས་མི་ཟད་བྱས་པ་སྟེ། །སྡུག་བསྔལ་གྱིས་ཞེས་སྐབས་སུ་བབ་པ་ལ་དྲུག་པའི་མཐའ་ཅན་གྱིས་འབྲེལ་ཏོ། །གང་མེ་ཏོག་ཟླ་མཛེས་ཀྱི་དེ་ལྟ་བུ་བྱུང་བའི་ལས་འདི་ལྟར་ཡང་འདས་པའི་དུས་ན་རིན་པོ་ཆེ་པད་མའི་རྣམ་པར་དག་པ་

མངོན་པར་འཕགས་པའི་རྒྱལ་པོ་ཞེས་བྱ་བའི་དེ་བཞིན་གཤེགས་པ་བྱུང་ཞིང་རྒྱལ་པོ་ཡང་བྱུང་བར་གྱུར་པ་ན་བཅོམ་ལྡན་འདས་དེ་ཡང་སངས་རྒྱས་ཀྱི་མཛད་པ་མཛད་ཅིང་ཡུན་རིང་དུ་བཞུགས་ནས་ཡོངས་སུ་མྱ་ངན་ལས་འདས་སོ། །དེའི་ཚེ་ཡོངས་སུ་མྱ་ངན་ལས་འདས་ནས་བསྟན་

པ་ནུབ་པར་གྱུར་པ་ན་རྒྱལ་པོ་དཔས་བྱིན་ཞེས་བྱ་བ་བྱུང་བར་གྱུར་ཏེ། དེའི་ཕོ་བྲང་འཁོར་ནི་རིན་ཆེན་ལྡན་པ་ཞེས་བྱ་བ་ཡིན་ལ། དེའི་ཚེ་དེའི་དུས་ན་སེམས་ཅན་རྣམས་ལྟ་བ་ལོག་པར་གྱུར་ཏོ། །དེ་རྣམས་ལ་ཐུགས་བརྩེ་བའི་དོན་དུ་བྱང་ཆུབ་སེམས་དཔའ་རབ་ཏུ་བྱུང་བ་མང་

པོ་བྱུང་བར་གྱུར་ཏེ་ཡུལ་འཁོར་དང་གྲོང་རྡལ་དེ་ལས་དེ་རྣམས་ཀྱང་བསྐྲད་ནས་ཆོས་སྨྲ་བ་མེ་ཏོག་ཟླ་མཛེས་དང་ལྷན་ཅིག་ཏུ་ཀུན་ཏུ་བཟང་པོ་ཞེས་བྱ་བའི་དགོན་པའི་ནགས་ཁྲོད་ན་བརྟེན་ཅིང་གནས་སོ། །དེ་ནས་ཡང་བྱང་ཆུབ་སེམས་དཔའ་མེ་ཏོག་ཟླ་མཛེས་སེམས་ཅན་རྣམས་

Vol. 105 · folio 169b

ལ་སྙིང་རྗེའི་བསམ་པས་དབེན་པར་ནང་དུ་ཡང་དག་འཇོག་ལ་ཞུགས་ཏེ། བདག་གིས་གྲོང་དང་གྲོང་རྡལ་དང་ཡུལ་འཁོར་དུ་སོང་ལ་སེམས་ཅན་ལམ་ངན་པར་ཞུགས་པ་རྣམས་དགེ་བའི་ལམ་ལ་གཞག་པར་བྱའོ་ཞེས་སེམས་ལ་རྣམ་པར་རྟོག་པ་སྐྱེས་ཏེ། ཚངས་པ་མཚུངས་པར་སྤྱོད་

པ་རྣམས་ལ་དོན་དེ་སྨྲས་སོ། །དེ་རྣམས་ཀྱིས་བཀག་པར་གྱུར་ཀྱང་བདག་ཉིད་ཉམས་པ་དང་རྒྱལ་པོ་ཡང་ཉམས་པར་ཤེས་བཞིན་དུ་ནགས་ཁྲོད་དེ་ལས་བྱུང་བར་གྱུར་ཏེ། རིམ་གྱིས་ཆོས་སྟོན་ཅིང་རྒྱལ་པོ་དེའི་ཕོ་བྲང་གི་འཁོར་དུ་ཕྱིན་པར་གྱུར་ཏོ། །དེས་རྒྱལ་པོའི་བུ་དང་། བློན་པོ་

དང་། མདུན་ན་འདོན་ལ་སོགས་པ་སེམས་ཅན་མང་པོ་རྣམས་ལ། ཇི་ལྟར་འདུལ་བར་ཐབས་རྣམ་པ་དུ་མས་ཡང་དག་པའི་ལམ་ལ་འཇོག་པའི་ཚེ་རྒྱལ་པོ་དེ་རྒྱལ་པོའི་ལམ་དུ་མཐོང་བ་བཞིན་དུ་ཁྲོས་ཏེ། ཕྲག་དོག་གིས་བསླངས་པའི་སེམས་ཀྱིས་འདིས་སྐྱེ་བོ་ཐམས་ཅད་རངས་པར་

བྱས་སོ་སྙམ་ནས་བསད་པའི་དོན་དུ་རང་གི་བུ་རྣམས་ལ་བསྒོ་བ་དང་། དེ་རྣམས་ཀྱང་དེ་གསོད་པ་ལ་ཕྱིར་ཕྱོགས་པར་གོ་ནས་གསོད་པའི་གཤེད་མ་དགའ་བྱེད་ལ་བཀའ་བསྒོ་བའོ། །དེས་ཀྱང་རྒྱལ་པོའི་བཀའ་བཞིན་དུ་བྱེད་པས་ལག་པ་དང་། རྐང་པ་ལ་སོགས་པ་རིམ་གྱིས་བཅད་

ནས་མིག་དག་ཀྱང་སྐམ་པས་ཕྱུང་སྟེ། སྲོག་དང་བྲལ་བར་བྱས་སོ། །དེ་ནས་དགེ་སློང་དེ་རྒྱལ་པོའི་ལམ་དུ་སྲོག་དང་བྲལ་བའི་ལུས་ལས་ངོ་མཚར་རྨད་དུ་བྱུང་བ་དུ་མ་དེ་མཐོང་ནས། དགེ་སློང་འདི་ནི་བྱང་ཆུབ་སེམས་དཔའ་ཉིད་དོ་ཞེས་རྒྱལ་པོས་ཆོ་ངེ་བྱས་ནས་ཡོངས་སུ་གདུང་

བར་གྱུར་ཏེ། རྣམ་པ་དུ་མས་སྨྲེ་སྔགས་འདོན་ཏོ། །དེ་ལྟར་མེ་ཏོག་ཟླ་མཛེས་ཀྱི་དེ་ལྟ་བུ་བྱུང་བ་ཅུང་ཟད་འདིར་མདོར་བསྡུས་ནས་བརྗོད་པ་ཡིན་ཏེ། ཡང་རྒྱས་པར་ནི་ཏིང་ངེ་འཛིན་རྒྱལ་པོའི་མདོར་བསྟན་པས་དེ་ཉིད་དུ་རིག་པར་བྱའོ། །ཕ་རོལ་སྡུག་བསྔལ་བས་སྡུག་བསྔལ་

བའི་སྙིང་རྗེ་ཅན་རྣམས་ནི་སྡུག་བསྔལ་ཆེན་པོས་ཀྱང་གནོད་པར་འགྱུར་བ་མ་ཡིན་ནོ་ཞེས་བསྟན་པའི་ཕྱིར། དེ་ལྟར་རྒྱུད་ནི་ཞེས་པ་ལ་སོགས་པ་གསུངས་ཏེ། དེ་ལྟར་ནི་བདག་དང་གཞན་དུ་མཉམ་པའོ། །རྒྱུད་བསྒོམས་པ་ནི་སེམས་ཀྱི་རྒྱུད་ལྷུན་གྱིས་གྲུབ་པས་འཇུག་པའོ། །

Vol. 105 · folio 170a

གཞན་གྱི་སྡུག་བསྔལ་ཞི་ཞིང་མཉམ་པར་དགའ་བ་སྟེ། བདེ་བའི་རྒྱུ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། བདག་གི་བདེ་བ་ཡང་གཞན་གྱི་སྡུག་བསྔལ་བས་སྡུག་བསྔལ་བ་ཉིད་གང་རྣམས་ཀྱིས་ཡིན་པ་ཞེས་པའི་དོན་ཏོ། །དེ་རྣམས་མནར་མེད་པར་

འཇུག་པ་རྣམས་ནི་གཞན་སྡུག་བསྔལ་ལས་གདོན་པའི་དོན་དུ་སྡུག་བསྔལ་དེ་ཉིད་ལ་བདེ་བར་སེམས་པ་རྣམས་སོ། །འདི་ཉིད་འདིར། པདྨའི་མཚོ་རུ་ངང་པ་ལྟར། །ཞེས་གསུངས་ཏེ། མནར་མེད་པའི་སྡུག་བསྔལ་ཡང་བདེ་བ་ཉིད་ཡིན་ཏེ། གང་རྣམས་ཀྱི་གཞན་གྱི་སྡུག་བསྔལ་

གྱི་དོན་དུ་ཡིན་པས་སྡུག་བསྔལ་གྱི་རྒྱུ་གཞན་གང་གིས་སྡུག་བསྔལ་བར་འགྱུར། གཞན་ཡང་དེ་རྣམས་ཀྱི་བདེ་བ་ཡང་ཐུན་མོང་མ་ཡིན་པ་ཉིད་གཞན་གྱི་སྡུག་བསྔལ་གྱིས་སྐྱེ་བར་འགྱུར་ཏེ། དེ་བས་ན་བསྟན་པའི་ཕྱིར། སེམས་ཅན་རྣམས་ནི་གྲོལ་བ་ན། །ཞེས་གསུངས་ཏེ། སེམས་

ཅན་རྣམས་ལ་སྡུག་བསྔལ་གྱི་འཆིང་བ་ལས་གྲོལ་བར་བྱེད་པ་ཡོད་པ་ལའོ། །གང་ཡིན་དེ་ཞེས་པ་ནི་དེ་རྣམས་ཉིད་ཀྱིས་ཉམས་སུ་མྱོང་བས་གྲུབ་པའི་ཕྱིར་འདི་ཙམ་ཞེས་བརྗོད་པར་ནུས་པ་མ་ཡིན་ལ། དེ་ཉིད་ཀྱི་ཕྱིར་དགའ་བའི་རྒྱ་མཚོ་ཡིན་ཏེ་མགུ་བའི་རྒྱ་མཚོ་སྙིང་རྗེ་དང་ལྡན་

པའི་རྒྱུད་རྣམས་ལ་སྐྱེ་བར་འགྱུར་རོ། །དགའ་བའི་རྒྱ་མཚོ་དེ་ཉིད་ཀྱིས་མཐར་ཕྱིན་པ་ནི་བདེ་བ་གཞན་ལ་ཕྱིར་ཕྱོགས་པ་ལས་ཡོངས་སུ་ཐོབ་པ་སྟེ། བདེ་བ་ཐམས་ཅད་སྤངས་པ་ཡིན་ནོ་ཞེས་བྱ་བའི་ཐ་ཚིག་གོ། །ཅི་སྟེ་དེ་ཉིད་བདེ་བའི་མཐར་ཐུག་པ་ཅི་ལྟར་ཡིན་ཏེ། གཅིག་

ཏུ་ཉོན་མོངས་པའི་ཡོངས་སུ་གདུང་བ་ཉེ་བར་ཞི་བས་རྣམ་པར་གྲོལ་བའི་བདེ་བ་ཡིན་པའི་ཕྱིར་ཤིན་ཏུ་ལྷག་པ་ཡིན་ནོ་ཞེ་ན། རོ་བྲལ་ཐར་པ་ཞེས་པ་ལ་སོགས་པ་གསུངས་ཏེ། ཐར་པ་ཡང་དེ་ལ་ལྟོས་ནས་དེ་རྣམས་རོ་དང་བྲལ་བ་ཉིད་དུ་སྣང་ངོ་། །དགོངས་པ་ནི་འདི་ཡིན་ཏེ། གཞན་ལ་

ཕན་པ་དང་བདེ་བ་བསྒྲུབ་པ་ཉིད་དེ་རྣམས་ཀྱི་རོའི་མཆོག་ཉིད་ཀྱིས་ཞུགས་པའི་ཕྱིར་དེ་ལ་མངོན་པར་ཞེན་པ་ཡིན་ལ། སྙིང་རྗེ་དང་ལྡན་པ་རྣམས་ལ་བདེ་བ་དེ་ཉིད་དགོས་པ་ཡིན་གྱི་ཐར་པ་ནི་མ་ཡིན་ནོ། །དེ་གལ་ཏེ་ཉམས་སུ་ལེན་པ་ལ་ཆེད་ཆེར་བྱེད་ན་ཐར་པ་ཡང་མངོན་དུ་གྱུར་ན་ཡང་གཞན་གྱི་དོན་དེ་

Vol. 105 · folio 170b

ཉིད་ལ་ཆེད་དུ་གཉེར་བ་ནི་མ་ཡིན་ནོ། །གང་གསུངས་པ། འགྲོ་བ་མ་ལུས་རང་བཞིན་མངོན་དུ་མཛད་གང་གི། །དེ་བཞིན་གཤེགས་པ་ཉིད་ནི་ཞར་ལ་བྱུང་བ་སྟེ། །གཞན་དབང་གྱུར་པ་ཁྱོད་ཀྱི་ཡོན་ཏན་རྣམས་ལས་ནི། །ཅུང་ཟད་ཙམ་ཞིག་ཚིག་གི་རྗོད་བྱེད་སྙན་དངགས་མཁན། །ཞེས་སོ། །

གང་གི་ཕྱིར་ཐར་པ་ལ་རིངས་པ་མེད་པ་དེའི་ཕྱིར་ཏེ། རྒྱུ་འདི་ལས་གཞན་གྱི་དོན་བྱས་ཀྱང་སྟེ། དེ་ལ་སེམས་གཞོལ་བར་ཞུགས་པས་རློམ་སེམས་དང་རྒྱགས་པ་མ་ཡིན་ལ། ངོ་མཚར་བ་ཡང་མེད་དེ་དཀའ་བ་སྤྱད་པས་རྨད་དུ་བྱུང་བའི་བློ་ཡང་དེ་རྣམས་ལ་སྐྱེ་བར་འགྱུར་བ་མ་ཡིན་ཏེ། བདག་

གིས་དམ་པའི་ལས་བྱས་པ་འདིའི་ལས་ཀྱི་རྣམ་པར་སྨིན་པའི་འབྲས་བུ་འཇིག་རྟེན་ཕ་རོལ་དུ་འབྱུང་བར་འགྱུར་རོ་ཞེས་པ་དང་། རྣམ་པར་སྨིན་པའི་འབྲས་བུ་ལ་འདོད་པ་ཡང་སྐྱེ་བ་མ་ཡིན་ནོ། །འདིའི་རྒྱུ་གཅིག་ཏུ་གཞན་དོན་ལ་དགའ་བས་ཞེས་གསུངས་ཏེ། གང་གཞན་གྱི་དོན་རྣམས་

ལ་གཅིག་ཏུ་སྟེ། དགོས་པ་གཞན་ལ་ལྟོས་པ་མེད་པས་ཁྱད་པར་དུ་ཤིན་ཏུ་དགའ་བ་ཡིན་ཏེ་དེ་ཉམས་སུ་ལེན་པ་ལ་ཚིམ་པ་མེད་པ་ཡིན་ལ་རྒྱུ་དེས་སོ། །འདིས་ནི་བདག་དང་གཞན་དུ་མཉམ་པའི་འབྲས་བུའི་སྐབས་ཀྱི་ཁྱད་པར་དེ་བསྟན་པར་འགྱུར་རོ། །དེ་ལྟར་ན་ཞར་ལ་བྱུང་བ་དེ་ལྟར་

བརྗོད་ནས་སྐབས་སུ་བབ་པ་མཇུག་བསྡུ་བའི་སྒོ་ནས་བསྟན་པར་བྱ་བའི་ཕྱིར། དེ་བས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བརྗོད་པའི་རིམ་པས་བདག་དང་གཞན་ལ་ཁྱད་པར་ཅུང་ཟད་ཀྱང་མེད་པ་དེ་བས་ནའོ། །ཆུང་ངུ་ན་ཞེས་པ་ནི་སྡུག་བསྔལ་གྱི་རྒྱུ་ཅུང་ཟད་

ཙམ་མི་སྙན་པ་ལས་ཀྱང་བདག་བསྲུང་ཞིང་སྦ་བར་བྱའོ། །དེ་ལྟར་གྱུར་ན་ཡང་བདག་དང་གཞན་དུ་མཉམ་པར་བསྒྲུབ་པ་ཞེས་བྱ་བ་འདི་ཉམས་སུ་བླང་བར་མི་ནུས་པ་ཉིད་ཡིན་ལ། དེ་བས་ཀྱང་བདག་དང་གཞན་དུ་བརྗེ་བ་ནི་ཤིན་ཏུ་ཡང་མི་ནུས་པ་ཡིན་ཏེ། དེ་ཇི་ལྟར་ན་བླང་བར་

བྱ་བ་ཡིན་ཞེ་ན། གོམས་པ་ཡིས་ནི་ཞེས་བྱ་བ་ལ་སོགས་པ་གསུངས་པ་ལ། དེ་བཞིན་དུ་བརྗོད་པའི་རིམ་པས་འདིར་དངོས་པོ་གོམས་པའི་སྤྱོད་ཡུལ་དུ་འགྱུར་བ་ནི་དཀའོ་ཞེས་པའི་བློ་བསྐྱེད་པར་མི་བྱ་སྟེ། གང་གི་ཕྱིར་གཞན་དག་སྟེ་ཕ་མ་དང་འབྲེལ་པའི་ཁུ་བ་ཁྲག་གི་

Vol. 105 · folio 171a

ཐིགས་པ་ལ་ལུས་ཞེས་ཞེན་པ་རྣམས་ལ་གོམས་པས་བདག་གོ་ཞེས་ཤེས་པར་འགྱུར་ཏེ་བསྟན་པ་ཉིད་ཀྱིས་འཇུག་གོ། །འོན་ཏེ་བདག་གི་ཞེས་ཤེས་པའི་རྒྱུ་མཚན་གཞན་ཡོད་པ་ཡིན་ཏེ། ཅིའི་ཕྱིར་འདིར་མི་འཐད་ཅེ་ན་དངོས་པོ་མེད་པར་གྱུར་ཀྱང་ཞེས་པ་ལ་

སོགས་པ་གསུངས་ཏེ། བདག་ལ་སོགས་པའི་དངོས་པོའི་རྒྱུ་མཚན་དུ་གྱུར་པ་མེད་ན་ཡང་གོམས་པ་འབའ་ཞིག་ལས་དེ་ལྟར་སྒོམ་པར་བྱེད་པས་གཞན་ལ་ཡང་ངེས་པ་ཉིད་དུ་འགྱུར་རོ། །དེ་ཉིད་དེ་བཞིན་ཞེས་པ་ལ་སོགས་པ་གསུངས་ཏེ། བདག་ཅེས་ཅིའི་ཕྱིར་མི་བཟུང་སྟེ་

གཟུང་བར་བྱ་བ་ཉིད་དུ་ཤིན་ཏུ་ནུས་པ་ཡིན་ལ། དེའི་རང་བཞིན་ཉིད་དུ་རང་གི་ལུས་གྲུབ་པ་ཉིད་དོ། །གཞན་དུ་ན་དེ་དང་མཉམ་པ་ཉིད་དུ་ཡང་མི་འགྱུར་ཏེ། དེ་ལྟར་ན་བདག་དང་གཞན་དུ་བརྗེ་བ་དཀའ་བས་བསྒྲུབ་དགོས་པ་མ་ཡིན་ནོ། །དེ་ལྟར་བདག་དང་གཞན་དུ་མཉམ་པ་

བསྟན་ནས། བདག་དང་གཞན་དུ་བརྗེ་བ་བསྟན་པར་བཞེད་ནས། བདག་ཉིད་སྐྱོན་བཅས་ཞེས་བྱ་བ་ལ་སོགས་པ་གསུངས་ཏེ། རྟོགས་པ་དང་ལྡན་པ་རྣམས་ཀྱིས་ཡོན་ཏན་དང་སྐྱོན་བླང་བ་དང་དོར་བ་དག་གི་རྒྱུ་མཚན་བདག་དང་གཞན་ལ་དེ་མཐོང་ནས་བླང་བ་དང་དོར་བར་བྱ་བ་དག་

བསྒོམ་ཞིང་གོམས་པར་བྱའོ། །བདག་ལུས་ཡོངས་སུ་དོར་བ་ནི་བདག་ཉིད་ལ་གཞན་དུ་བྱའོ། །གཞན་བླང་བ་ཞེས་པ་ནི་གཞན་རྣམས་ལ་བདག་ཉིད་དུའོ། །དེ་ལྟར་ན་འདིས་བདག་དང་གཞན་དུ་བརྗེ་བའི་ཐབས་གཞན་བསྟན་པར་འགྱུར་རོ། །དེ་ལྟར་གྱུར་ན་སེམས་ཅན་རྣམ་

པ་ཐ་དད་པ་མང་པོ་རྣམས་ལ་ཇི་ལྟར་སོ་སོར་བདག་དང་གཞན་དུ་བརྗེ་བ་བསྒོམ་པར་ནུས་ཤེ་ན། ཇི་ལྟར་ལག་པ་ལ་སོགས་པ། །ཞེས་པ་ལ་སོགས་པ་གསུངས་ཏེ། གང་སྟེ་ཡང་ལག་པ་ལ་སོགས་པ་ཐ་དད་པ་ཡིན་པ་དེ་ལྟ་ན་ཡང་ལུས་སུ་ཞེན་པའི་ཡན་ལག་ཉིད་ཀྱིས་སུ་ཞེས་དེ་ལ་

གཅིག་ཏུ་ཡུལ་དུ་བྱེད་པ་དེ་བཞིན་དུ་འགྲོ་བ་ཡང་མ་ལུས་པ་གཅིག་ཉིད་དུ་ཞེན་པས་དེའི་ཡན་ལག་ཉིད་ཀྱིས་སྲོག་ཆགས་ལ་འགྲོ་བ་ཞེས་གཅིག་ཉིད་དུ་དེ་ཅིའི་ཕྱིར་མི་འཛིན། བདག་དང་གཞན་དུ་བརྗེ་བ་འདི་ལ་དཀའ་བའི་བློ་གྲོས་མི་བྱ་སྟེ། གོམས་པས་ཐོབ་པ་ཡིན་ནོ་ཞེས་

Vol. 105 · folio 171b

བསྟན་པའི་ཕྱིར། ཇི་ལྟར་བདག་མེད་ཅེས་པ་ལ་སོགས་པ་གསུངས་ཏེ། དོན་བཤད་ཟིན་པ་ལ་བདག་དང་གཞན་དུ་བརྗེས་པ་ན་འཇིག་རྟེན་ཕ་རོལ་དུ་འབྲས་བུ་ལ་འདོད་པ་སྐྱེས་པ་མ་ཡིན་ནོ། །གང་དང་འདྲ་བར་ཞེ་ན། བདག་ཉིད་ཀྱི་ཟས་ཟོས་ནས་ཏེ། སྦྱིན་པ་འདིས་བདག་དང་

སེམས་ཅན་ལོངས་སྤྱོད་ཕུན་སུམ་ཚོགས་པར་གྱུར་ཅིག་ཅེས་འབྲས་བུ་མི་འདོད་པ་བཞིན་ནོ། །དེ་བཞིན་དུ་ནི་དེ་ལྟར་རོ། །དེ་ལྟར་ན་འདི་གོམས་པའི་ཡུལ་ཉིད་དུ་བསྟན་ནས། བཟློག་པ་ལ་གོམས་པར་བྱ་བར་རང་གི་སེམས་སྦྱར་བའི་ཕྱིར། དེ་བས་ཞེས་པ་ལ་སོགས་པ་གསུངས་ཏེ།

འདོད་པ་ནི་མངོན་པར་འདོད་པའི་དངོས་པོ་ཐོབ་པའི་ཆེད་དུ་གདུང་བ་སྟེ། སེམས་ཀྱི་ཆོས་ཡིན་པའམ་ལུས་ཀྱི་སྡུག་བསྔལ་ཡིན་པ་ནི་དཔེར་ན་འགོ་བའི་ནད་ལྟ་བུའོ། །མྱ་ངན་ནི་སྡུག་བསྔལ་དང་བྲལ་བ་ལ་སོགས་པས་བྱས་པའི་སྡུག་བསྔལ་ལོ། །སོགས་པའི་སྒྲས་ནི་ལུས་

དང་སེམས་ཀྱི་སྡུག་བསྔལ་གཞན་བཟུང་ངོ་། །དེ་ཉིད་དཔེའི་སྒོ་ནས་བསྟན་པར་བྱ་བའི་ཕྱིར། དེ་བས་མགོན་པོ་ཞེས་པ་ལ་སོགས་པ་གསུངས་ཏེ། དེ་ཉིད་ཀྱི་ཕྱིར་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གིས་རང་གི་མཚན་ཡང་བྱིན་གྱིས་བརླབས་ཏེ།

འཕགས་པ་སྤྱན་རས་གཟིགས་དབང་ཕྱུག་ཅེས་བདག་ཉིད་ཀྱི་མཚན་བྱིན་གྱིས་བརླབས་པ་དང་ལྡན་པ་ཡིན་ལ། འཁོར་གྱི་འཇིགས་པ་ནི་སྐྲག་པ་ཡིན་ཏེ། སེམས་བསྐུམས་ནས་འཇུག་པ་ཡིན་ལ། སྤོབས་པ་དང་བྲལ་ཞེས་པའི་བར་དུའོ། །འགྲོ་བ་ནི་འཇིག་རྟེན་པ་ཡིན་ལ་

དེ་ལས་འཇིགས་པའམ་དེ་ཉིད་ཀྱིས་འཇིགས་པའོ། །དེ་བསལ་བའི་ཕྱིར་ནི་དེ་སྤོང་བའི་དོན་དུའོ། །མཚན་གང་སེམས་ཅན་འགའ་ཞིག་སེམས་མོས་པས་ཀྱང་བདག་གི་མིང་འཛིན་པར་བྱེད་ན་དེ་ལ་སྡུག་བསྔལ་ཐམས་ཅད་རྣམ་པ་ཐམས་ཅད་དུ་འབྱུང་བར་མི་འགྱུར་ལ། ཐ་ན་

འཁོར་གྱིས་འཇིགས་ཤིང་སྐྲག་པ་ཡང་འབྱུང་བར་མི་འགྱུར་རོ་ཞེས་བྱིན་གྱིས་བརླབས་སོ། །གཞན་ཡང་དཀའ་བའི་ཚོར་བ་ལ་ཡང་གོམས་པས་དགའ་བར་འགྱུར་བས་ན་བདག་ཅག་གི་ལྡོག་པར་མི་རིགས་པ་ཉིད་དོ་ཞེས་བསྟན་པའི་ཕྱིར་དཀའ་ལས་ཤེས་པ་ལ་སོགས་པ་

Vol. 105 · folio 172a

གསུངས་ཏེ། འདི་ནི་མི་ནུས་སོ་ཞེས་ནས་ལྡོག་པར་མི་བྱའོ། །ཅིའི་ཕྱིར་ཞེ་ན། གང་ལས་གོམས་པའི་སྟོབས་འདིར་མཐོང་སྟེ། གང་གིས་ཐོས་ནས་འཇིགས་པ་ཞེས་པ་ནི་རྣ་བའི་ལམ་དུ་གྱུར་ན་སྐྲག་པ་དང་འཇིགས་པ་སྐྱེ་བར་འགྱུར་བ་ལ། ཕྱི་ནས་རྒྱུ་ཅུང་

ཟད་ཐོབ་པ་ལས་སྡུག་པར་གོམས་པའི་དབང་གིས་འཇིགས་པའི་རྒྱུ་དེ་ཉིད་ཀྱིས་མེད་པར་གྱུར་ན་མི་དགའ་བར་འགྱུར་རོ། །གཞན་ཡང་དགོས་པ་འདི་ཡང་ཡོད་པར་མཐོང་བ་ཡིན་ཏེ། དེ་ལ་གུས་པའི་སྒོ་ནས་གོམས་པའི་དབང་དུ་གྱུར་པར་བྱའོ་ཞེས་བསྟན་པའི་ཕྱིར། གང་ཞིག་

བདག་དང་ཞེས་པ་ལ་སོགས་པ་གསུངས་ཏེ། གང་ཞིག་མྱུར་ཞིང་མགྱོགས་པ་ཉིད་དུ་སྡུག་བསྔལ་གྱི་འཇིགས་པ་ཐམས་ཅད་ལས་བསྐྱབ་ཅིང་བསྲུང་བར་འདོད་པས་དེ་སྤྱད་པར་བྱ་སྟེ། བདག་དང་གཞན་དུ་བརྗེ་བའོ། །ཅི་ལྟ་བུར་གྱུར་པ་ཞེ་ན། གསང་བའི་དམ་པ་སྟེ་དེའི་རིགས་ཅན་མ་

ཡིན་པ་རྣམས་སྐྲག་པའི་རྒྱུ་ཡིན་པའི་ཕྱིར་རམ། མ་དད་པ་བསལ་བའི་ཕྱིར་ཤིན་ཏུ་ཡང་གསང་བར་བྱ་སྟེ། གཞན་དུ་ན་དེས་སྤངས་པས་དེ་རྣམས་ངན་སོང་དུ་འགྲོ་བར་འགྱུར་རོ། །གང་བདག་ཉིད་སྐྱོན་བཅས་ཞེས་པ་ལ་སོགས་པ་གསུངས་པའི་བདག་ཉིད་དང་གཞན་གྱི་བདག་

ཉིད་ཉེས་པ་དང་ཡོན་ཏན་དེ་རྣམས་རྒྱས་པར་བསྟན་པའི་ཕྱིར། བདག་ལུས་ཞེས་པ་ལ་སོགས་པ་གསུངས་ཏེ། བརྟན་ཆགས་པས་ཞེས་པ་ནི་བདག་ཏུ་འཛིན་པས་བསྐྱེད་པའི་མངོན་པར་ཞེན་པས་སོ། །ཆུང་ཞེས་པ་ནི་འཁོར་གྱི་འཇིགས་པ་སྐད་ཅིག་མ་ཅུང་ཟད་ལས་ཀྱང་ངོ་། །

འཁོར་གྱི་འཇིགས་པའི་རྒྱུ་ཡིན་པས་ན་འཇིགས་པ་འམ། རྣམ་པར་རྟོག་པས་བརྟགས་པའི་འཇིགས་པ་འདི་འཇིགས་པ་ཞེས་བརྗོད་དོ། །འདི་ལྟ་བུར་གྱུར་པའི་བདག་ཉིད་ལ་སེམས་དང་ལྡན་པ་སུ་ཞིག་སྡང་བར་གྱུར་པའི་བདག་ཉིད་ལ་སེམས་དང་ལྡན་པ་སུ་ཞིག་སྡང་བར་མི་བྱེད་དེ་སྡང་

བར་བྱ་བ་ཉིད་དེ་ཞེས་པའི་དོན་ཏོ། །དེ་གང་ཡིན་ཞེ་ན། དགྲ་བཞིན་དུ་གང་གི་འཇིགས་པ་སྐྱེད་པར་བྱེད་པ་སྟེ། བརྗོད་པའི་རིམ་པས་དགྲ་བཞིན་དུ་གང་ཞིག་འཇིགས་པ་སྐྱེད་པར་བྱེད་པའོ། །བསམ་པ་ནི་འདི་ཡིན་ཏེ། དགྲ་ལ་ཡང་སྡང་བར་བྱེད་དེ། སྡུག་བསྔལ་སྐྱེད་པར་

Vol. 105 · folio 172b

བྱེད་པ་ཡིན་པའི་ཕྱིར་རོ། །དེ་འདི་ལ་ཡང་ཡོད་པས་ཅིའི་ཕྱིར་མི་འཇིགས་ཏེ། འཇིགས་པར་བྱ་བའོ། །དེ་ལ་ཉེས་པ་གཞན་ཡང་བརྗོད་པའི་ཕྱིར། དམན་གང་ཞེས་པ་ལ་སོགས་པ་གསུངས་ཏེ། དམན་པ་ནི་ནད་པ་ཡིན་ལ། བཀྲེས་པ་ནི་བྲུ་བ་ཚ་བ་ཡིན་ཞིང་། སྐོམ་པ་ནི་ལྟུང་བ་འདོད་

པ་ཡིན་ལ། སོགས་པའི་སྒྲས་ནི་གོས་ལ་སོགས་པ་དང་བྲལ་བའོ། །འདི་རྣམས་ལས་གསོ་བའི་ཆོ་ག་ནི་སྤྱིར་འཆོས་པ་ཡིན་ཏེ། ཉེ་བར་ཞི་བར་བྱེད་པའི་ཐ་ཚིག་གམ། འདི་དག་གི་ཕྱིར་འཆོས་པ་སྟེ། དེ་གསོ་བར་བྱེད་འདོད་པ་དེས་གང་ཞིག་ན་བའི་ཟས་དང་སྨན་ལ་སོགས་པའི་རྒྱུ་

མཚན་གྱིས་བྱ་དང་ཉ་དང་རི་དགས་དག་གསོད་པར་བྱེད་དེ་སྲོག་དང་བྲལ་བར་བྱེད་པའོ། །མཁས་པ་སུ་ཞིག་ལུས་དེ་ལ། །འདོད་ཅིང་ཞེས་པ་ལ་སོགས་པ་འཆད་པར་འགྱུར་བ་དང་འབྲེལ་ཏོ། །ལམ་སྒུག་པར་བྱེད་པས་གནས་ཏེ། ལམ་མ་ཡིན་པ་ནས་འཇུག་པར་བྱེད་པར་འགྱུར་བའི་རྐུན་

མོ་ཉིད་ལ་བརྗོད་དེ། །གཞན་གྱི་རྫས་འཕྲོག་པར་བྱེད་དོ་ཞེས་པའི་ཐ་ཚིག་གོ། །དེ་བཞིན་དུ་ཕ་དང་མ་ཡང་སྟེ་དེ་དག་ཀྱང་བདག་ཉིད་ཀྱི་རྙེད་པའི་རྒྱུ་དང་རིམ་གྲོའི་རྒྱུས་ཀྱང་གསོད་པར་བྱེད་དེ། འདི་དག་གསོན་པའི་དོན་གྱིས་རྙེད་པའམ་བཀུར་སྟི་བདག་གིར་གྱུར་ཅིག་ཅེས་བསམས་ནས་

གསོད་པར་བྱེད་དོ། །དཀོན་མཆོག་གསུམ་གྱིས་ནི་སངས་རྒྱས་དང་ཆོས་དང་དགེ་འདུན་གྱི་བདག་ཉིད་ཀྱི་ཡིན་ཏེ། དཀོར་ནི་ནོར་ཡིན་ལ། བརྐུས་ནས་ནི་བླངས་ནས་སོ། །སྔར་བརྗོད་པའི་རྒྱུ་མཚན་དུ་འདིར་ཡང་། མཁས་པ་སུ་ཞིག་ལུས་དེ་ལ། །ཞེས་བྱ་བ་དང་འབྲེལ་ཏོ། །

གང་གིས་ཏེ་ཕ་བསད་པ་ལ་སོགས་པ་བྱས་པས་མནར་མེད་པ་ལ་སོགས་པའི་མེས་དེའི་ལས་ཀྱིས་སྐྱེས་པ་སྟེ་སྲེག་པར་འགྱུར་ཏེ། འདི་ནི་མཚོན་པ་ཙམ་ཡིན་ལ། དེ་ལས་གཞན་པའི་དམྱལ་བའི་བུད་ཤིང་གིས་ཀྱང་སྲེག་གོ། །ཡང་ན་དཀོན་མཆོག་གསུམ་གྱི་དཀོར་རྐུ་བར་བྱེད་

པ་དེ་རབ་ཏུ་ཚ་བ་ལ་སོགས་པའི་སྡུག་བསྔལ་ཡིན་ཏེ། མནར་མེད་པའི་སྡུག་བསྔལ་དང་འདྲ་བའི་ཕྱིར་རོ། །འདི་ལྟར་ཉེས་པ་འདི་མཐོང་བ་ན་མཁས་པ་སྟེ། རིག་པ་དང་ལྡན་པ་སུ་ཞིག་གིས་དེ་ལྟ་བུའི་སྡུག་བསྔལ་ཐམས་ཅད་ཀྱི་རྒྱུ་བདག་ཉིད་འདོད་ཅིང་དེ་ལ་དགའ་བའོ། །

Vol. 105 · folio 173a

སྲུང་བ་སྟེ་ཡོངས་སུ་སྐྱོང་བ་དང་མཆོད་པར་བྱེད་པ་སྟེ་རྙེད་པས་མཆོད་པར་བྱེད། འདི་ལ་དགྲ་བཞིན་དུ་ལྟ་བར་མི་བྱེད་དེ་འོན་ཀྱང་དེ་བཞིན་དུ་བདེ་བླག་ཏུ་དེ་ལྟ་བར་རིགས་ཏེ། སྡུག་བསྔལ་ཐམས་ཅད་ཀྱི་རྒྱུ་ཡིན་པའི་ཕྱིར་ཞེས་ཟུར་གྱིས་སྟོན་པ་ཡིན་ནོ། །འདི་ལྟར་སྤྱོ་བའི་གནས་ལ་སུ་ཞིག་སྟེ་མཁས་

པ་གང་ཞིག་བརྙས་པར་མི་བྱེད་ཅིང་བསྟེན་པར་བྱེད་ཅེས་པའི་ཐ་ཚིག་གོ། །དེ་ལྟར་བདག་གི་ཉེས་པ་བརྗོད་ནས་བདག་དང་གཞན་གྱི་ཉེས་པ་དང་ཡོན་ཏན་རྣམས་བསྟན་པར་བཞེད་པས། གལ་ཏེ་བྱིན་ན་ཞེས་པ་ལ་སོགས་པ་གསུངས་ཏེ། དངོས་པོ་འདི་ལ་རྙེད་ནས་དོན་དུ་གཉེར་བ་ཡང་འོངས་པར་གྱུར་པ་ན་དེ་ལ་ཅི་འདི་སྦྱིན་པའམ་

འོན་ཏེ་སྤྱད་པར་བྱ་ཞེས་རྣམ་པར་རྟོག་པས་ངེས་པར་བྱེད་དོ། །གལ་ཏེ་སྦྱིན་ན་དེའི་ཚེ་ཅི་ཞིག་སྤྱད་པར་བྱ་སྟེ། གཞན་གྱིས་རྣམ་པ་ཐམས་ཅད་དུ་དབང་དུ་བྱས་པའི་ཕྱིར་རོ། །དེ་ལྟར་ན་བདག་གི་དོན་དུ་སྟེ་རང་གི་བདེ་བ་བསྒྲུབ་པའི་ཕྱིར་གཞན་ལ་རྒྱབ་ཀྱིས་ཕྱོགས་པས་འཇུག་པར་འདོད་པ་རྣམས་ཀྱི་འགྲོ་བར་གསུངས་

པ་ཡིན་ཏེ། སེར་སྣ་གཙོ་བོར་གྱུར་པའི་ཕྱིར་རོ། །འདི་ལས་བཟློག་པ་གསུངས་པ་ནི་གལ་ཏེ་ཞེས་པ་སྟེ། འོན་ཏེ་གལ་ཏེ་སྤྱད་ན་འོ་ན་ཅི་ཞིག་སྦྱིན་པར་བྱ་སྟེ་དེའི་དུས་ལ་ལྟོས་ནས་ད་ལྟར་བྱུང་བའི་སྒྲའོ། །དེའི་ཕྱིར་འདི་ལྟར་རང་དོན་ལ་ལྟོས་པ་མེད་པ་གཞན་གྱི་བདེ་བ་བསྒྲུབ་པའི་ཆེད་དུ་ཞུགས་པ་རྣམས་ལྷའི་རྒྱལ་པོ་སྟེ་

ལྷའི་དབང་ཕྱུག་གོ། །དེ་ལྟར་གཞན་ལ་ཕན་པ་དང་མི་ཕན་པ་དག་བརྗོད་ནས་གཞན་དང་བདག་གི་གནོད་པ་དང་ཕན་པ་དག་གི་སྐྱོན་དང་ཡོན་ཏན་རྣམས་ཇི་ལྟར་སྲིད་པ་བསྟན་པའི་ཕྱིར། བདག་ཕྱིར་ཞེས་པ་ལ་སོགས་པ་གསུངས་ཏེ། བདག་གི་བདེ་བ་ཡིད་ལ་བྱེད་པས་ལུས་དང་ངག་གི་ཆད་པ་རྣམས་ཀྱིས་གཞན་ལ་

གནོད་པར་བྱས་ནས་དམྱལ་བ་ལ་སོགས་པའི་ངན་འགྲོ་རྣམས་སུ་སྡུག་བསྔལ་མྱོང་བར་འགྱུར་རོ། །བཟློག་པས་ནི་འཇིག་རྟེན་པ་དང་འཇིག་རྟེན་ལས་འདས་པའི་ཕུན་སུམ་ཚོགས་པར་འགྱུར་རོ། །བདག་དང་གཞན་ལ་སེམས་ཙམ་གྱིས་ཀྱང་ཕན་པ་དང་གནོད་པར་བྱེད་པར་འདོད་པ་ལས་ཡོན་ཏན་དང་སྐྱོན་གང་ཡིན་

པ་བསྟན་པའི་ཕྱིར། བདག་ཉིད་ཅེས་པ་ལ་སོགས་པ་གསུངས་ཏེ། མཐོ་བ་ནི་ལང་ཚོ་དང་གཟུགས་དང་ནོར་ལ་སོགས་པ་རྣམས་ཀྱིས་གཞན་ལས་མཆོག་ཡིན་ནོ་ཞེས་མངོན་པར་ང་རྒྱལ་བ་གང་ཞིག་དེ་རྣམས་ཉིད་མཐོ་བར་འདོད་ཅིང་གཞན་ལ་སྟེ་ཕ་རོལ་ལ་སྤོ་བ་སྟེ་འཕོ་བར་བྱས་ན་སྔར་གྱི་ལས་བཟློག་པར་འགྱུར་རོ། །བདག་དང་གཞན་

Vol. 105 · folio 173b

ལ་ངག་ཙམ་དུ་ཡང་བདེ་བའི་རྒྱུ་མ་ཡིན་པ་ཉིད་དོ་ཞེས་བསྟན་པའི་ཕྱིར། བདག་གི་དོན་དུ་ཞེས་པ་ལ་སོགས་པ་གསུངས་ཏེ། སོགས་པའི་སྒྲས་ནི་བདག་གི་དངོས་པོ་མི་སྡུག་པ་ལ་སོགས་པ་དང་རྗེ་དཔོན་ཉིད་ལ་སོགས་པ་ཞེས་པ་འདིར་ཡང་སོགས་པའི་སྒྲས་རིགས་ལ་སོགས་པ་དང་། གཟུགས་བཟང་བ་

ལ་སོགས་པའོ། །ད་ནི་བརྗོད་པའི་དོན་ཉིད་བསྡུས་ནས་བསྟན་པའི་ཕྱིར། འཇིག་རྟེན་ཞེས་པ་ལ་སོགས་པ་གསུངས་ཏེ། བདག་བདེ་བར་འདོད་པས་ཀྱང་དེ་ལྟར་བསྒྲུབ་པ་ཐམས་ཅད་བྱ་བ་མ་ཡིན་པ་ལ་ཡང་བྱ་བ་ཉིད་དུ་ཞེན་པར་བྱེད་དོ། །དེའི་ཕྱིར་དེའི་ལས་ཀྱི་སྒྲིབ་པ་ལས་འཇིག་

རྟེན་ཕ་རོལ་དུ་མི་འདོད་པའི་ལས་ལས་བྱུང་བའི་སྡུག་བསྔལ་སྐྱེ་བར་འགྱུར་རོ། །བདེ་བ་ཞེས་ཏེ་བདེ་བ་དང་འབྲེལ་པ་ཡིན་ལ། གཞན་བདེ་འདོད་ཅེས་པ་ནི་ཕ་རོལ་པོ་རྣམས་ལ་ཕན་པ་དང་བདེ་བ་ལ་སྦྱར་བའི་ཆེད་དུ་བསྒྲུབས་པའི་ཕྱིར་རོ། །ད་ནི་བསྟན་པའི་དོན་ཉིད་དཔེས་མདོར་བསྡུས་ཏེ་

བསྟན་པའི་སྒོ་ནས་བསྟན་པར་བྱ་བའི་ཕྱིར། མང་དུ་ཞེས་པ་ལ་སོགས་པ་གསུངས་ཏེ། རྒྱས་པས་བཤད་པ་ཅི་ཞིག་བྱ་སྟེ། འདི་ཉིད་འདིར་མདོར་བསྡུས་པས་གསལ་བར་དཔེར་བརྗོད་པ་རྟོགས་པར་བྱས་པ་ལ་བདག་ལ་གཞན་དུ་བརྗེ་བ་ལ་འབད་པར་བྱའོ། །འདི་ལྟར་ཡང་སོ་སོའི་

སྐྱེ་བོ་བདག་ཉིད་ཀྱི་དགོས་པ་ལ་ཞུགས་པའི་ཡིད་ཅན་དང་ཐུབ་པ་སྟེ། སངས་རྒྱས་བཅོམ་ལྡན་འདས་གཞན་གྱི་དོན་དུ་གཞན་དབང་དུ་གྱུར་པའི་ཁྱད་པར་འདི་བྱེ་བྲག་ཏུ་ལྟོས་ལ་ངེས་པར་ཟུང་ཤིག །ཅི་ལྟར་ལུང་ལས་དཔེ་ཡོད་པ་ཡིན་པར་བསྟན་པ་དེ་ལྟར་འདི་རྟོགས་པར་བྱ་སྟེ། དེའི་ལས་

བཟློག་པ་ལ་སེམས་དང་ལྡན་པས་ཀྱང་ཅིའི་ཕྱིར་ཡང་སྤྲོ་བ་མེད་པར་འགྱུར་རོ། །དེ་ལྟར་ན་ཡང་སངས་རྒྱས་དོན་དུ་གཉེར་བའི་གལ་ཏེ་ལམ་འདི་ཉིད་ཡིན་ན་ཡང་། གང་རྣམས་འཁོར་བའི་བདེ་བ་ཙམ་འདོད་པ་དེ་རྣམས་ལ་དེ་ཇི་ལྟར་བདེ་བའི་ལམ་ཡིན་ཞེ་ན། བདག་བདེ་ཞེས་

པ་ལ་སོགས་པ་གསུངས་ཏེ། སངས་རྒྱས་ཉིད་དེ་བྱང་ཆུབ་བསྒྲུབ་པར་བྱ་བ་སྟེ། རྫོགས་པར་བྱ་བ་ནི་བདག་དང་གཞན་དུ་བརྗེ་བའི་ལམ་བླང་བར་བྱ་བ་ཡིན་ཏེ། སྐྱེས་བུ་མཆོག་གི་དོན་ཡིན་པས་སོ། །འདི་འབའ་ཞིག་བདག་དང་གཞན་དུ་བརྗེ་བ་མེད་པར་མི་འགྲུབ་པ་ཡིན་ལ།

Vol. 105 · folio 174a

འཁོར་བ་ན་ཡང་ལྷ་དང་མི་དག་གི་བདེ་བ་ཕུན་སུམ་ཚོགས་པའི་མཚན་ཉིད་དེ་ཇི་ལྟར་འགྱུར་བ་ཡིན་ཏེ་མ་ཡིན་པ་ཉིད་དོ། །གང་གིས་མི་འགྱུར་ཞེ་ན། བདག་བདེ་བ་ཞེས་གསུངས་ཏེ། བདག་གི་བདེ་བ་དང་གཞན་གྱི་སྡུག་བསྔལ་བརྗེ་བར་ངེས་པར་མ་བྱས་

པའི་འོ། །བདག་གི་བདེ་བ་གཞན་གྱི་ཡིན་པ་དང་། གཞན་གྱི་སྡུག་བསྔལ་བདག་གི་ཡིན་ནོ་ཞེས་འཕོ་བར་མ་བྱས་སོ་ཞེས་པའི་དོན་ཏོ། །ཇི་ལྟར། གལ་ཏེ་བྱིན་ན་ཅི་སྤྱད་ཅེས། །ཞེས་པ་ལ་སོགས་པ་གསུངས་སོ། །གཞན་ཡང་བདེ་བ་གཞན་ཡང་སྐྱེ་བ་འདི་ཉིད་ལ་གཞན་ལ་

ཕན་བཏགས་པ་མེད་པར་མི་འབྱུང་ངོ་ཞེས་བསྟན་པའི་ཕྱིར་འཇིག་རྟེན་ཕ་རོལ་ཞེས་པ་ལ་སོགས་པ་སྨོས་ཏེ། གང་འཇིག་རྟེན་ཕ་རོལ་དུ་གཞན་ལ་ཕན་བཏགས་པ་མེད་པར་བདེ་བར་མི་འགྱུར་རོ་ཞེས་བྱ་བ་འདི་རེ་ཞིག་གཞག་སྟེ་ནི་རེ་ཞིག་དེ་ལྟར་གྱུར་ཀྱང་སྟེ། དེ་ནི་ཤིན་ཏུ་ལྐོག་ཏུ་གྱུར་པ་ཡིན་

པའི་ཕྱིར་རོ། །གང་ཡང་སྐྱེ་བ་འདི་ཉིད་ལ་མཐོང་བ་སྟེ་གྲུབ་པའི་དོན་ཡིན་ལ་མངོན་པར་འདོད་པའི་བསྒྲུབ་བྱའི་མཚན་ཉིད་མི་གྲུབ་སྟེ་མི་རྫོགས་ལ། དེར་ལོག་པར་རྟོགས་པ་མེད་པའི་ཕྱིར་ཅི་ཞིག་བརྗོད་པར་བྱ། གང་གིས་མི་འགྲུབ་ཅེ་ན། བྲན་གཡོག་ཅེས་པ་ལ་སོགས་པ་སྨོས་ཏེ། རྗེ་དཔོན་

ནི་བདག་པོ་ཡིན་ལ་བྲན་གཡོག་ནི་ལས་ཀྱི་འབྲས་བུ་ལེན་པ་བྲན་གྱིས་རྗེས་སུ་འཚོ་བ་ཡིན་ཏེ། དེའི་ལས་མ་བྱས་པ་ན་གཉི་ག་ཡང་མཐོང་བའི་ཆོས་ལ་མི་འགྲུབ་པར་དེ་མཐོང་བ་ཉིད་དོ། །དེ་ཡང་གོ་རིམས་ཇི་ལྟ་བ་བཞིན་དུ་དེའི་བསྒྲུབ་པར་བྱ་བ་བསྙེན་བཀུར་གྱི་བདེ་བ་ལ་སོགས་པ་དང་དེ་ལས་

བྱུང་བའི་ཟས་དང་གོས་ལ་སོགས་པ་ཡིན་ནོ། །འདི་ལྟར་ཤེས་ཀྱང་བདག་དང་གཞན་ལ་ཡོད་པའི་སྤྱོད་པ་ཕྱིན་ཅི་ལོག་ནི་རྨོངས་པའི་མཐུ་ཡིན་ནོ་ཞེས་བསྟན་པའི་ཕྱིར། མཐོང་དང་ཞེས་བྱ་བ་ལ་སོགས་པ་གསུངས་ཏེ། ཕན་ཚུན་བདེ་བ་སྐྱེད་པ་ནི་བདེ་བ་སྒྲུབ་པར་བྱེད་དོ། །ཅི་ལྟ་

བུར་གྱུར་པ་ཞིག་ཅེ་ན། མཐོང་དང་མ་མཐོང་བདེ་འགྲུབ་པ་སྟེ། མཐོང་བ་དང་མ་མཐོང་བའི་འཇིག་རྟེན་དུ་བདེ་བ་འགྲུབ་པ་སྟེ་ཆེན་པོ་ཉིད་ཡིན་ལ། བདེ་བའི་དགའ་སྟོན་གྱི་དགའ་བ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་བོར་ནས་ཕན་ཚུན་དུ་མི་འདོད་པ་བྱས་པས་སྡུག་བསྔལ་བའི་ཕྱིར་

Vol. 105 · folio 174b

སྡུག་བསྔལ་སྐྱེད་པར་བྱེད་པ་ཡིན་པས་སྡུག་བསྔལ་ལེན་ཅིང་འཛིན་པ་ཡིན་ནོ། །མི་བཟད་པས་ནི་དམྱལ་བ་ལ་སོགས་པར་བྱས་པའི་ཤིན་ཏུ་འཇིགས་སུ་རུང་བའི་རང་བཞིན་ཡིན་པའི་ཕྱིར་རོ། །རྨོངས་པ་ཞེས་པ་ནི་སྨད་པ་ཡིན་ཏེ། རྨོངས་པའི་དབང་གིས་ཕན་པ་དང་མི་ཕན་

པ་མ་མཐོང་བ་ཡིན་ལ། ཡང་ན་རྨོངས་པ་ཞེས་པ་ནི་འདིར་གཏན་ཚིགས་ཀྱི་ཚིག་ཡིན་ནོ། །གང་གི་ཕྱིར་རྨོངས་པ་ཡིན་པ་དེའི་ཕྱིར་འདི་རྣམས་ཕྱིན་ཅི་ལོག་གི་འཇུག་པ་ཡིན་ཏེ། དེ་ལྟར་ན་རྨོངས་པ་འདི་ཉིད་སེམས་ཅན་རྣམས་ལ་གནོད་པར་བྱེད་པ་ཡིན་ནོ་ཞེས་བསྟན་བཅོས་མཛད་པས་

སྙིང་བརྩེ་བར་མཛད་དོ། །འདི་ཡིད་ལ་བྱས་པས་ཀྱང་བདག་ཏུ་འཛིན་པའི་མངོན་པར་ཞེན་པ་མི་བྱའོ་ཞེས་བསྟན་པའི་ཕྱིར། འཇིག་རྟེན་དག་ན་ཉེར་གནོད་ཅེས་པ་ལ་སོགས་པ་གསུངས་པ་ལ་ཉེ་བར་གནོད་པ་ནི་ཡིད་མི་བདེ་བའི་རྒྱུ་གནོད་པ་ཡིན་ནོ། །སྡུག་བསྔལ་བ་རྣམས་ནི་ལུས་ཀྱི་

ཚོར་བ་རྣམས་སོ། །འཇིགས་པ་ནི་སྡུག་བསྔལ་གྱི་རྒྱུ་རྣམས་ལ་སྐྲག་པའོ། །འདི་ཐམས་ཅད་ཀྱི་རྒྱུ་ནི་བདག་ཏུ་འཛིན་པ་ཡིན་ནོ། །གང་གི་ཕྱིར་དེ་ལྟར་ཡིན་པ་དེ་བས་ན་སྡུག་བསྔལ་གྱི་རྒྱུ་ཡོངས་སུ་བཟུང་བ་འདིས་ཅི་ཞིག་བྱ་སྟེ། དགོས་པ་ཅུང་ཟད་ཀྱང་ཡོད་པ་མ་ཡིན་ནོ། །དེ་ལྟར་

ན་བདག་ཏུ་འཛིན་པ་ནི་སྡུག་བསྔལ་ཐམས་ཅད་ཀྱི་རྒྱུ་ཡིན་པའི་ཕྱིར་དེ་ཡོད་ན་སྡུག་བསྔལ་ལ་ལྡོག་པ་མེད་དོ་ཞེས་འཇིག་རྟེན་དག་ན་ཞེས་པ་ལ་སོགས་པ་སྨོས་ཏེ། བདག་ནི་བདག་ཏུ་འཛིན་པ་ཡིན་ལ་བདག་ཡོངས་སུ་དོར་བ་འདི་ཉིད་བདག་ཏུ་འཛིན་པ་ཡོངས་སུ་དོར་བ་ཡིན་ནོ། །དེ་ལྟར་ན་བདག་ཏུ་

འཛིན་པ་ཡོངས་སུ་མ་དོར་བ་དེ་ཉིད་བདག་ཏུ་འཛིན་པ་གང་ཡིན་པ་ཉིད་དོ། །དེའི་ཕྱིར་བདག་ཏུ་འཛིན་པ་ཡོངས་སུ་མ་དོར་ན་སྡུག་བསྔལ་ལྡོག་པ་མེད་དོ་ཞེས་རིག་པར་བྱའོ། །འདིར་རྗེས་མཐུན་པའི་དཔེ་ཇི་ལྟར་མེ་ནི་ཞེས་པ་ལ་སོགས་པ་གསུངས་ཏེ། གང་ཞིག་སྲེག་པ་མི་འདོད་ཅིང་མེ་

ཡོངས་སུ་མ་དོར་ན་དེའི་སྲེག་པ་ལྡོག་པར་ཡང་མི་འགྱུར་ཏེ། རྒྱུ་ལ་ནུས་པ་དེ་ཡོད་ན་འབྲས་བུ་མི་སྐྱེ་བར་རིགས་པ་མ་ཡིན་ཏེ། དེའི་འབྲས་བུ་ཉིད་ཡིན་ལ་ཉམས་པར་ཐལ་བའི་ཕྱིར་དང་། རྣམ་པ་ཐམས་ཅད་དུ་མི་སྐྱེ་བར་ཐལ་བར་འགྱུར་བའི་ཕྱིར་རོ། །དེའི་ཕྱིར་སྡུག་བསྔལ་ལྡོག་པར་

Vol. 105 · folio 175a

འདོད་པས་བདག་ཏུ་འཛིན་པར་མི་བྱའོ། །དེ་ལྟར་ཞེས་པ་ལ་སོགས་པ་སྐབས་སུ་བབ་པ་མཇུག་སྡུད་པ་སྟེ། གང་གི་ཕྱིར་བདག་ཏུ་འཛིན་པ་འདི་ནི་བདག་ལ་སྡུག་བསྔལ་ཐམས་ཅད་སྐྱེད་པར་བྱེད་པ་ཡིན་ལ། གཞན་ལ་ཡང་སྡུག་བསྔལ་སྐྱེད་པར་བྱེད་པ་དེ་ལྟ་བས་ན་བདག་

ཉིད་གཞན་ལ་གཏང་བྱ་སྟེ། བདག་ལ་གཞན་ཉིད་དུ་གཟུང་བར་བྱ་སྟེ་བདག་ཉིད་གཞན་ཡིན་ལ། གཞན་ནི་མ་ཡིན་ནོ་ཞེས་པའམ། གཞན་གྱི་དབང་དུ་བྱའོ་ཞེས་ཏེ་དེ་བརྟེན་པ་ལྷུར་བྱེད་པའི་ཕྱིར་རོ། །དེ་བཞིན་དུ་གཞན་ཕ་རོལ་པོ་གཟུང་བར་བྱ་བ་ནི་ཁས་བླང་བར་བྱ་བ་ཡིན་ལ། བདག་བཞིན་

དུ་གཞན་ལ་བདག་གི་དངོས་པོར་གཟུང་བར་བྱ་སྟེ། འདི་ཉིད་བདག་ཡིན་ལ་བདག་ནི་བདག་མ་ཡིན་ནོ་ཞེས་སོ། །འདི་ནི་འདིར་བསྡུས་པའི་དོན་ཡིན་ཏེ། ཇི་ལྟར་སྔར་ཡོངས་སུ་མ་ཤེས་པས་བདག་ལ་ཡོངས་སུ་ངལ་བས་ཕན་པ་དང་བདེ་བ་སྐྱེད་པའི་ཕྱིར་སྤྱད་ལ། ད་ནི་གཞན་རྣམས་དང་བདག་གི་

ལུས་ཡོངས་སུ་བརྗེ་བ་སྤྱད་པར་བྱ་སྟེ། དཔེར་ན་གཞན་ལ་སྔར་སྤྱད་པ་དེ་བཞིན་དུ་བདག་ལ་གཞན་ཉིད་དུ་བརྗེས་པས་ན་སྤྱད་པར་བྱའོ། །ཅི་སྟེ་ཅི་ལྟར་བདག་མེད་པས་བདག་ལ་བདག་ཉིད་འཁྲུལ་པ་ཡིན་པ་དེ་བཞིན་དུ་གཞན་ལ་ཡང་ཡིན་ཏེ། དེ་ལ་ཡང་དེ་མེད་པའི་ཕྱིར་དེ་ལ་ཇི་ལྟར་ན་འཁྲུལ་པར་

ཁྱད་པར་མེད་པ་ལ་འབྲས་བུ་ལ་ཁྱད་པར་ཡོད་ཅེ་ན། འཁྲུལ་པར་ཁྱད་པར་མེད་པ་ལ་ཡང་འབྲས་བུའི་ཁྱད་པར་མཐོང་བ་མ་ཡིན་ནམ། དཔེར་ན་མར་མེའི་འོད་ལ་ནོར་བུ་ཞེས་ཞེན་པས་དེའི་ཡུལ་དུ་ཕྱིན་པ་ན་ནོར་བུ་དང་ཕྲད་པ་མེད་ལ། ཡང་གཞན་དུ་ནོར་བུའི་འོད་ལ་ནོར་བུ་མཐོང་ངོ་ཞེས་ཡིད་ལ་

བྱས་ནས་དེའི་ཡུལ་དུ་ཕྱིན་པས་ནོར་བུ་དང་ཕྲད་པར་འགྱུར་ཏེ། དེ་ལ་གཉི་ག་ལ་ཡང་འཁྲུལ་བ་ཞེས་པ་ཡོད་དེ་འཁྲུལ་པར་ཁྱད་པར་མེད་ཀྱང་འབྲས་བུ་ལ་ཁྱད་པར་ཡོད་པ་ཡིན་ནོ། །དེ་ལྟར་ཡང་། མར་མེ་ནོར་བུའི་འོད་དག་ལ། །ནོར་བུ་བློ་ཡིས་མངོན་རྒྱུག་པ། །ལོག་པའི་ཤེས་པར་ཁྱད་མེད་

པར། །ཇི་ལྟར་དོན་བྱེད་ལ་ཁྱད་ཡོད། །ཅེས་གང་བརྗོད་པའོ། །དེ་ལྟར་ན་ཡང་ཇི་སྲིད་དུ་གང་དུ་བརྒྱུད་པ་ཡོད་པ་དེ་སྲིད་དུ་ཤེས་པ་དངོས་པོ་དང་འབྲེལ་པ་ཡོད་པ་དེར་ཐོབ་པ་ཡོད་ལ། གང་དུ་ཤེས་པ་དང་དངོས་པོ་ལ་བརྒྱུད་པས་ཀྱང་འབྲེལ་པ་མེད་པ་ན་དེར་ཐོབ་པ་ཡོད་པ་མ་ཡིན་ལ་ཐོབ་པར་

Vol. 105 · folio 175b

བྱ་བར་ཐོབ་པར་བྱས་པའི་ཁྱད་པར་ཡོད་པ་ནི་རིགས་པ་ཉིད་ཡིན་ཏེ། འདིར་ཡང་དེ་བཞིན་དུ་ཡོད་པ་མ་ཡིན་ཏེ། གཉི་ག་ལ་ཡང་ཁྱད་པར་མེད་པའི་ཕྱིར་ལ། དེ་ལྟར་ན་འདི་ནི་དཔེ་དང་མི་མཐུན་པ་ཡིན་ནོ་ཞེ་ན། དེ་ནི་རིགས་པ་མ་ཡིན་ཏེ། འཁྲུལ་པར་ཁྱད་པར་མེད་ཀྱང་འབྲས་བུ་ལ་ཁྱད་པར་མཐོང་སྟེ། འདི་

ཙམ་གྱི་ཁྱད་པར་གྱིས་དཔེར་བརྗོད་པ་དང་མཐུན་པ་ཡིན་ཏེ། གང་འཁྲུལ་པ་དེ་ཐམས་ཅད་ལ་འབྲས་བུ་ཐུན་མོང་བ་མ་ཡིན་ནོ་ཞེས་ཁྱབ་པ་དྲན་པ་ཙམ་འདིར་མངོན་པར་འདོད་པ་ཡིན་ནོ། །དཔེའི་ཆོས་དང་ཐམས་ཅད་དུ་མཐུན་པར་ནི་སྦྱར་བར་བྱ་བ་ཡང་མ་ཡིན་ནོ། །དེ་ལ་གལ་ཏེ་དཔེ་དང་མཐུན་པ་མ་

ཡིན་པ་དེ་ལྟ་ན་ཡང་ཅི་ལྟར་ཡང་དཔེ་དང་མཐུན་པར་ཡོད་པས་ཉེས་པ་མེད་དོ། །ཤིན་ཏུ་ལྐོག་ཏུ་གྱུར་པའི་དོན་ལ་རྟོགས་པ་དང་ལྡན་པ་རྣམས་བཅོམ་ལྡན་འདས་ཀྱི་བཀའ་ཉིད་ཀྱིས་འཇུག་པར་བྱའོ། །དེ་ལྟར་འདིར་འཁྲུལ་པ་ཁྱད་པར་མེད་ཀྱང་དེ་ལྟ་བུའི་འབྲས་བུ་བསྒྲུབས་པ་ལ་ནུས་པ་ཡོད་ལ།

འགའ་ཞིག་གི་ཡིན་གྱི་ཐམས་ཅད་ཀྱི་མ་ཡིན་ནོ་ཞེས་བྱ་བ་དེ་ནི་ལུང་ཉིད་ཀྱིས་རྟོགས་པར་བྱ་སྟེ། རྟེན་ཅིང་འབྲེལ་པར་འབྱུང་བ་བསམ་གྱིས་མི་ཁྱབ་པའི་ཕྱིར་ཡང་ངོ་། །ཇི་ལྟར་ཡང་གཞན་གྱི་དོན་མེད་པར་རང་གི་དོན་ཀྱང་མི་འགྲུབ་སྟེ། དེ་ལྟར། བྲན་གཡོག་ལས་བྱེད་མི་བཏུབ་ལ། །ཞེས་བྱ་བ་ལ་

སོགས་པས་མཐོང་བའི་ཆོས་ཀྱི་ཅུང་ཟད་བསྟན་པ་ཡིན་ནོ། །འདིར་ཀུན་རྫོབ་ཏུ་རྒྱུ་དང་འབྲས་བུ་ཡོད་པ་ལ་ནི་ཅུང་ཟད་ཀྱང་འཁྲུལ་བ་ཡོད་པ་མ་ཡིན་ཏེ། དེ་ལྟར་ལོག་པའི་ཀུན་རྫོབ་ཏུ་བྱས་པ་དང་ཁྱད་པར་ཡོད་པ་མ་ཡིན་ནོ། །རྣལ་འབྱོར་སྤྱོད་པའི་གཞུང་གིས་ཀྱང་རྒྱུ་དང་འབྲས་བུ་ཐམས་ཅད་

ཀྱི་ཐ་སྙད་ནི་འཁྲུལ་པ་ཉིད་ཡིན་ཏེ། ཕྱི་རོལ་གྱི་དོན་ལ་བརྟེན་པའི་ཕྱིར་དང་། དམིགས་པ་ཐམས་ཅད་འཁྲུལ་པ་ཡིན། །ཞེས་པའི་ཚིག་ལས་སོ། །དེའི་ཕྱིར་འཁྲུལ་པ་ཁྱད་པར་མེད་ཀྱང་རྒྱུ་མཚན་ལ་ཁྱད་པར་ཡོད་པས་ཐམས་ཅད་འཚམ་མོ། །དེ་ལྟར་ན་མཐར་ཐུག་པའི་བསམ་པས་

བསྐུལ་ནས་རང་གི་སེམས་བྱ་བ་དེ་ཉིད་ལ་སྦྱར་བར་བྱའོ་ཞེས། བདག་ནི་གཞན་གྱི་དབང་གྱུར་ཞེས་པ་ལ་སོགས་པ་གསུངས་ཏེ། ཡིད་ཁྱོད་ངེས་པར་ཞེས་པ་ནི་འདིར་ཐེ་ཚོམ་དང་ཕྱིན་ཅི་ལོག་ཏུ་མི་བྱའོ་ཞེས་པ་ཡིན་ཏེ། འདི་ནས་བཟུང་ནས་ཁྱོད་ཀྱིས་སེམས་ཅན་ཐམས་ཅད་ཀྱི་དགོས་པ་

Vol. 105 · folio 176a

ལས་མ་གཏོགས་པར་རང་གཞན་དེ་རང་གི་དགོས་པ་ལ་སོགས་པ་བསམ་པར་མི་བྱ་སྟེ། ཡིད་ཀྱིས་ཀྱང་མི་བྱ་ཞེས་པའི་དོན་ཏོ། །ཅིའི་ཕྱིར་ཡང་རང་གི་དགོས་པ་ཡང་བསམ་པར་མི་བྱ་ཞེ་ན། གཞན་ནི་ཞེས་པ་ལ་སོགས་པ་གསུངས་ཏེ། རང་གི་དོན་ནི་རང་གི་

དགོས་པའོ། །མིག་སྟེ་ལྟ་བར་བྱེད་པ་དང་སོགས་པའི་སྒྲས་ཉན་པ་ལ་སོགས་པ་ཡང་ཡིན་ནོ། །དེའི་སྟེ་གཞན་གྱི་ཡིན་ལ་མིག་ལ་སོགས་པས་རྣ་བ་ལ་སོགས་པ་གཞན་ཡང་གཟུང་ངོ་། །ལག་པ་ལ་སོགས་པ་ཞེས་པ་འདིར་ཡང་རྐང་པ་ལ་སོགས་པ་ཡང་གཟུང་ངོ་། །གང་གིས་གཞན་དང་

འབྲེལ་པར་ཁྱེད་ཀྱིས་ངེས་པ་ན་རྒྱུ་དེ་ཉིད་ཀྱིས་སེམས་ཅན་གཙོ་བོར་བྱས་ཏེ། སེམས་ཅན་གཞན་གྱི་དབང་དུ་བྱས་ནས་དེའི་དགོས་པ་ལ་ཞུགས་པའི་ཞེས་པའི་ཐ་ཚིག་གོ། །བདག་གི་ལུས་ལ་ཞེས་པ་ནི་དེ་ལ་རྟེན་པར་གྱུར་པ་ཡིན་ཏེ། གང་དང་གང་གོས་ལ་སོགས་པ་བདེ་བའི་ཡོ་བྱད་མཐོང་ཞིང་

རྟོགས་པ་དེ་དང་དེ་ཞེས་ཟློས་པའི་ཚིག་གིས་ཁྱད་པར་གསུངས་པ་ཡིན་ཏེ། ཐམས་ཅད་ཉིད་ཡིན་ལ་ཅུང་ཟད་ཙམ་ནི་མ་ཡིན་ནོ་ཞེས་པའི་དོན་ཏོ། །རང་གི་ལུས་ལས་ཕྲོགས་ཤིང་ཕྲལ་ནས་ཕན་ཞིང་འདོད་པའི་དངོས་པོ་སྦྱར་རོ། །ད་ནི་དམན་པ་ལ་སོགས་པ་རྣམས་ལ་ང་རྒྱལ་ལ་སོགས་པའི་

སེམས་ཀྱི་སྡིག་པ་བསལ་བར་བཞེད་ནས། དམན་སོགས་ཞེས་པ་ལ་སོགས་པ་གསུངས་ཏེ། དམན་པ་ལ་ལྟོས་ནས་ང་རྒྱལ་དང་། མཉམ་པ་ལ་ལྟོས་ནས་འགྲན་པ་དང་། མཆོག་ལ་ལྟོས་ནས་ཕྲག་དོག་སྐྱེ་བར་འགྱུར་བ་འདི་ནི་བྱིས་པའི་ཆོས་ཡིན་ཏེ། གང་སྔར། མཐོ་ལ་ཕྲག་དོག་

མཉམ་ལ་འགྲན། །ཞེས་གསུངས་པའོ། །འདི་ཐམས་ཅད་ཉོན་མོངས་པའི་རྒྱུ་ཡིན་ཡང་བདག་དང་གཞན་དུ་བརྗེས་པས་རྣམ་པར་བྱང་བའི་རྒྱུ་ཉིད་དུ་སྒྱུར་བར་བྱེད་དོ། །དེ་ལྟར་ན་འདི་ཉིད་རྣམ་རྟོག་མེད་པའི་ཞེས་པ་ལ་སོགས་པས་བརྗོད་པར་བྱ་སྟེ། རྣམ་རྟོག་མེད་པ་ཞེས་པ་ནི་ཐེ་

ཚོམ་མེད་པས་སོ། །བསྒོམ་པར་བྱ་བ་ནི་འཆད་པར་འགྱུར་བའི་ཚུལ་གྱིས་སོ། །ཕྲག་དོག་བསྒོམ་པ་དེ་ཉིད་འཆད་པར་འགྱུར་བའི་གཞུང་གིས་སྟོན་པ་ནི། འདི་ནི་ཞེས་པ་ལ་སོགས་པ་གསུངས་པ་ཡིན་ཏེ། ཚུལ་ཁྲིམས་དང་ཡོན་ཏན་ལ་སོགས་པས་བདག་ཏུ་མཐོ་བ་དང་གཞན་ནི་དེ་

Vol. 105 · folio 176b

དང་བྲལ་བས་དམའ་བ་ཉིད་དུ་མཐོང་བར་བྱས་པས། བདག་ལ་འདི་ནི་བཀུར་བྱས་ཞེས་པ་ལ་སོགས་པའི་རྣམ་པས་ཕྲག་དོག་བསྒོམ་པར་བྱའོ། །འདི་ནི་ཞེས་པ་ནི་བདག་དང་གཞན་དུ་བརྗེས་པ་ཉིད་ཡིན་ཏེ། གཞན་ཉིད་ལ་ང་ཞེས་བསྟན་པ་ཡིན་ནོ། །འཆད་པར་འགྱུར་བ་ཐམས་ཅད་ལ་

གཞན་དང་བདག་ཏུ་བརྗེས་ནས་ཡོད་པ་ལ་སྦྱར་བར་བྱའོ། །བསྟོད་པ་ཞེས་པ་ནི་ཡོན་ཏན་བསྒྲགས་པའི་སྒོ་ནས་བསྔགས་པའོ། །བདག་ལ་སྨོད་པ་ཞེས་པ་ནི་དམན་པ་ཉིད་ཀྱི་སྒོ་ནས་སྨད་པར་བྱ་བའོ། །ལས་རྣམས་བདག་གིས་བྱེད་པ་ནི་དམན་པའི་ལས་ཁུར་ཁྱེར་བ་ལ་སོགས་པ་བྱེད་

པའོ། །བདེ་བར་གནས་པ་ཞེས་པ་ནི་སེམས་བདེ་བར་གནས་པའང་ཡིན་ནོ། །འདི་འཇིག་རྟེན་ལ་ཆེ་བར་གྲགས་པ་ནི་འདིས་ཆེན་པོ་ཉིད་ཀྱང་གོམས་ཤིང་འབད་པས་བསྒྲུབ་པར་བྱ་བ་ཡིན་ཏེ། དེ་བཞིན་དུ་གཞན་གྱིས་ཀྱང་ཁྱོད་དང་འདྲ་བར་རྙེད་དཀའ་བ་མ་ཡིན་ནོ། །གོང་མ་གོང་མ་མཐོང་

བས་ན་ཁྱེད་ཆེན་པོ་ཕུལ་དུ་བྱུང་བར་ཡང་གནས་པ་མ་ཡིན་ཏེ། ཚུ་རོལ་མཐོང་བ་ཐམས་ཅད་དམན་པ་ཡིན་པའི་ཕྱིར་རོ། །དེ་ལྟར་ན་ཇི་ལྟར་བདག་ཀྱང་ཡོན་ཏན་ཆེན་པོ་དང་ལྡན་པ་ཉིད་དུ་འགྱུར་བ་དེ་ལྟར་བདག་གིས་བྱ་སྟེ། གྲགས་པའི་སྒྲས་ནི་འདི་གཉི་ག་ལ་ཡང་བྱ་རོག་གི་ལྟ་སྟངས་ཀྱིས་སྦྱར་བར་བསྟན་

པ་ཡིན་ནོ། །དེ་ལྟར་གྱུར་ན་ཡང་བདག་གི་ཡོན་ཏན་མེད་པ་ཅི་ཞིག་བྱ་སྟེ། ཡོན་ཏན་དང་ལྡན་པ་ཉིད་དུ་བྱའོ་ཞེས་ཁ་བསྐང་ངོ་། །དགོས་པ་ཅུང་ཟད་ཀྱང་མེད་པས་བདག་ཉིད་ལ་ཡོན་ཏན་དང་ལྡན་པ་ཉིད་དུ་ངེས་པར་བྱས་པ་འདི་ཉིད་ཀྱིས་མཆོག་སྟེ། གང་གཞན་སུ་ལ་ཡང་འདིར་ཡོན་ཏན་གྱི་ཆ་

ཤས་ཉིད་ཀྱང་ཡོད་པ་མ་ཡིན་ལ། གང་གི་ཕྱིར་བདག་ཡོན་ཏན་ཐམས་ཅད་ལྡན་པ་ཡིན་ཏེ། སེམས་ཅན་གཞན་ལ་ནི་ཡོད་པ་མ་ཡིན་ཞིང་རྣམ་པ་ཐམས་ཅད་དུ་ཡོན་ཏན་དང་ལྡན་པ་ཡང་ཡིན་ཏེ། ལྟ་བས་ཕོངས་པས་ཀྱང་ཡོན་ཏན་ཐོབ་པར་འགྱུར་རོ་ཞེས་པའི་ཚིག་ལས་སོ། །གཞན་

ཡང་མཐོན་པོ་དང་དམའ་བ་དག་ནི་ལྟོས་པས་བྱས་པ་ཡིན་ཏེ། འདི་རྣམས་ལས་བདག་ཉིད་མཐོན་པོར་བྱས་པའི་སྐྱེས་བུ་དམ་པ་དེ་ནི་ཡོད་པ་མ་ཡིན་ལ། བདག་ལས་ཤིན་ཏུ་ངན་པའི་དམན་པ་ཡང་ཡོད་པ་ཡིན་ཞིང་། གང་ལ་ལྟོས་ནས་བདག་ཀྱང་མཆོག་ཡིན་ཏེ་གང་རྣམས་ལས་བདག་ཉིད་

Vol. 105 · folio 177a

དམ་པའོ། །དེ་ལྟར་ན་ཐམས་ཅད་ལས་བདག་ནི་དམན་པ་མ་ཡིན་ཏེ། འདི་ནི་ཐམས་ཅད་ལས་མཐོ་བ་ཡང་མ་ཡིན་ནོ། །དེ་ལྟར་ན་ཡང་ཁྱེད་ནི་ཚུལ་ཁྲིམས་ལ་སོགས་པས་ཕོངས་པས་སྡིག་པ་དང་བཅས་པའི་རང་བཞིན་ཡིན་པའི་ཕྱིར་དམན་པ་ཡིན་ལ། བདག་ལ་ནི་དེ་

ཡོད་པ་མ་ཡིན་པས་དམན་པ་མ་ཡིན་ནོ་ཞེ་ན། ཚུལ་ཁྲིམས་ལྟ་བས་ཞེས་པ་ལ་སོགས་པ་གསུངས་པ་ལ། ཚུལ་ཁྲིམས་ཀྱིས་ཕོངས་པ་ནི་སོ་སོར་ཐར་པའི་སྡོམ་པ་བླངས་པ་ཉམས་པ་ཡིན་ལ་ལྟ་བས་ཕོངས་པ་ནི་འཇིག་ཚོགས་ལ་ལྟ་བ་ལ་སོགས་པ་རྣམ་པ་ལྟ་བ་ལྔ་པོ་ཡིན་ཏེ་དེ་ཉིད་ཕོངས་པ་ཡིན་

པའམ། དེ་རྣམས་ཀྱིས་ཕོངས་པར་བྱས་པ་ཡིན་ཏེ། སོགས་པའི་སྒྲས་ནི་སྤྱོད་པས་ཕོངས་པ་ལ་སོགས་པ་ཡང་གཟུང་ངོ་། །འདི་ཐམས་ཅད་ཉོན་མོངས་པ་རྣམས་ཀྱི་སྟོབས་ཀྱིས་བདག་ཉིད་ཀྱི་འདོད་པའི་དབང་དུ་གྱུར་པ་མ་ཡིན་ནོ། །དེ་ལ་གལ་ཏེ་ཁྱེད་སྙིང་རྗེ་དང་ལྡན་པ་ཡིན་ན་དེའི་ཚེ་བདག་གསོ་བར་བྱ་བ་

ཡིན་ཏེ་ཁྱེད་ལ་གང་དང་གང་དུ་གསོ་བའི་ནུས་པ་ཡོད་པ་ཅི་ལྟ་བ་བཞིན་དུ་སྟེ། གང་གི་ཉེས་པ་དང་བྲལ་བར་བསྒྲུབ་པར་བྱ་བའི་བློ་ཡོད་ན་ཞེས་པའི་དོན་ཏོ། །ཡང་ན་ནུས་པ་ཅི་ལྟ་བར་བདག་གིས་གནོད་ཀྱང་དང་དུ་བླང་ངོ་ཞེས་ཕྱི་མ་དང་འབྲེལ་ཏེ། བརྟུལ་ཞུགས་དང་ངེས་པའི་དཀའ་བའི་བྱ་བ་ལ་སོགས་པའི་

མཚན་ཉིད་ཀྱིས་སྡུག་བསྔལ་བའོ། །གལ་ཏེ་ཁྱེད་ལ་བདག་གིས་གསོ་བའི་བློ་ཅུང་ཟད་ཡོད་ན་དེ་ཡང་བདག་གིར་ཁས་བླང་བར་བྱའོ། །དེ་ལྟར་གྱུར་ན་ཡང་གཅིག་ཏུ་ཁྱོད་ལ་འདི་གསོ་བའི་ནུས་པ་ཡོད་པ་མ་ཡིན་ཏེ། བསྒྲུབ་བྱའི་ཉེས་པ་དང་ལྡན་པའི་ཕྱིར་འདི་རིགས་སོ་ཞེ་ན། འོན་ཏེ་ཞེས་པ་ལ་སོགས་པ་གསུངས་ཏེ། འོན་

ཏེ་ཞེས་པ་ནི་རྣམ་པ་གཞན་དགོད་པ་ཡིན་ཏེ། གལ་ཏེ་འདི་ལ་བདག་གསོ་བའི་ནུས་པ་མེད་ན་དེ་རྒྱུ་ཅིས་བདག་ནི་མཐོ་ལ་འདི་ནི་དམའ་བ་ཡིན་ནོ་ཞེས་འདི་ནུས་པ་མེད་པར་ཡང་བདག་ལ་བརྙས་པར་བྱེད། འོན་ཏེ་གལ་ཏེ་ཡང་གསོ་བའི་ནུས་པ་དང་བྲལ་བ་དེ་ལྟ་ན་ཡང་གཞན་གྱི་ཡོན་ཏན་དེ་ཡིས་བདག་ལ་ཅི་ཞིག་

བྱ་སྟེ། དགོས་པ་ཅུང་ཟད་ཀྱང་མེད་ལ་རྣམ་པ་ཐམས་ཅད་དུ་ཉེ་བར་མཁོ་བ་དང་བྲལ་བའི་ཕྱིར་རོ། །འདི་ཉིད་འབའ་ཞིག་གི་དབང་དུ་བྱས་ཏེ། གང་ལས་བདག་ཉིད་དེ་རང་ཉིད་ཀྱི་ཡོན་ཏན་དང་ལྡན་པ་འདི་ཡིན་ལ། དེ་ལས་ཡོན་ཏན་གྱི་ཆ་ཅུང་ཟད་ཀྱང་བདག་ལ་ཡོད་པ་མ་ཡིན་ནོ། །དེ་ལྟར་

Vol. 105 · folio 177b

གྱུར་ན་ཡང་སྙིང་རྗེའི་ཡོན་ཏན་དང་ལྡན་པས་དེ་ལས་གཞན་ལ་ཡང་དེའི་ཡོན་ཏན་ཉེ་བར་མཁོ་བ་ཡིན་ནོ་ཞེ་ན། སྙིང་རྗེ་ཡང་དངོས་པོ་ལ་མཐོང་བ་མ་ཡིན་ནོ་ཞེས་བསྟན་པའི་ཕྱིར། ངན་འགྲོ་ཞེས་པ་ལ་སོགས་པ་གསུངས་ཏེ། གང་ཞིག་སྡིག་པ་བྱེད་པ་དེ་ངན་འགྲོར་ངེས་པའི་ཕྱིར་ངན་འགྲོའི་ཁར་གནས་

པར་བརྗོད་དོ། །ཡང་ན་ངན་འགྲོར་གནས་པས་འདིར་ཁ་ཞེས་པ་དང་འབྲེལ་ཏོ། །ཡང་ན་ངན་འགྲོ་ནི་དམན་པའམ་མཁོ་བའི་ཡོ་བྱད་དང་བྲལ་བ་དེར་གནས་པ་ཡིན་ནོ། །གདུག་པའི་ཁར་གནས་ཞེས་པ་ལ་གདུག་པ་ནི་སྦྲུལ་དང་གཅན་གཟན་གཏུམ་པོ་ལ་ཡང་བརྗོད་དོ། །དེ་རྣམས་ཀྱི་ཁར་

གནས་པའི་སྐྱེ་བོ་ལ་སྙིང་རྗེ་བའི་ཡིད་ཀྱིས་སྙིང་རྗེ་མ་ཡིན་ཏེ། དེ་སྡུག་བསྔལ་དང་བྲལ་བར་འབད་པར་བྱེད་པ་མ་ཡིན་ནོ། །དེ་ཙམ་འབའ་ཞིག་ནི་ཡོད་པ་མ་ཡིན་ལ་ཁྱད་པར་འདི་ཡང་ཡིན་ཏེ། གང་ཡོན་ཏན་རློམ་པས་ཏེ་ཡོན་ཏན་ལྷག་པ་ཡིན་ནོ་ཞེས་ནམ་ཡང་མཁས་པ་རྣམས་ལ་རྒྱལ་བར་བསྔོ་སྟེ་

རྒྱལ་བར་འདོད་དོ། །དེ་ལྟར་རེ་ཞིག་མཐོ་ལ་ཕྲག་དོག་བཤད་ནས། མཉམ་པ་ལ་བརྗོད་པའི་ཕྱིར་བདག་དང་མཉམ་པ་ལ་ཞེས་པ་ལ་སོགས་པ་གསུངས་ཏེ། གཞན་དང་ལྷན་ཅིག་ཏུ་ཡོན་ཏན་ལ་སོགས་པས་བདག་མཉམ་པར་བལྟས་ཤིང་གསལ་བར་བྱས་ནས། གང་དེ་ལས་ལྷག་པར་བྱ་བའི་

ཕྱིར་ཏེ། གཞན་ལས་ཡོན་ཏན་རྣམས་ཀྱིས་བདག་ལྷག་པར་བྱ་བའི་ཕྱིར་འབད་པར་བྱའོ། །གལ་ཏེ་རྙེད་པ་དང་བཀུར་སྟི་འདི་ལ་ལྷག་པ་མཐོང་ན་དེའི་ཚེ་འདི་ལས་ཕྲོགས་ནས་གཟུང་བར་བྱའོ། །དེ་ལྟར་ནའང་མི་སྟེར་ན་རྩོད་པ་དང་མཚང་འབྲུ་བ་ལ་སོགས་པས་ཀྱང་བསྒྲུབ་པར་བྱ་སྟེ། བདག་གི་

རྙེད་པ་དང་བཀུར་སྟི་ཞེས་ཟླས་དབྱེ་བ་ཡིན་པའི་ཕྱིར་མ་ནིང་གི་རྟགས་སོ། །བདག་གི་ཞེས་པ་ནི་རང་གི་གང་ཡིན་པ་སྟེ། ཇི་ལྟ་འདི་བཟུང་ནས་འདུག་ཅེས་པའི་དོན་ཏོ། །གཞན་ཡང་གལ་ཏེ་རྙེད་པ་ལ་སོགས་པའི་ཡོན་ཏན་མཐོང་བ་རྣམས་ཀྱིས་འདི་མཆོད་པ་དེ་ལྟར་བདག་གིས་བྱའོ། །གང་གིས་

རྙེད་པ་ལ་སོགས་པའི་རྒྱུ་འདི་འགྲིབ་པར་འགྱུར་བར་བྱའོ་ཞེས། ཡང་ནི་བདག་གི་ཡོན་ཏན་ཞེས་པ་ལ་སོགས་པ་གསུངས་ཏེ། ཡང་ནི་ཞེས་པ་ནི་བརྟག་པ་བཟུང་བའི་ཚིག་དག་གོ། །ཇི་ལྟར་བདག་གི་ཡོན་ཏན་གསལ་བར་འགྱུར་བ་དེ་ལྟར་བདག་གིས་བརྩམ་པར་བྱ་སྟེ། བདག་གི་ནུས་པ་

Vol. 105 · folio 178a

བརྟན་པར་བྱ་ཞེ་ན། བདག་གི་སྐྱོན་ཡང་ཞེས་པ་ལ་སོགས་པ་གསུངས་ཏེ། ཡང་ནི་སྔར་བཞིན་ནོ། །འདིས་ཀྱང་ཅིར་འགྱུར་ན་བདག་ནི་མཆོད་འགྱུར་འདི་ལ་མིན་པར་འགྱུར་རོ། །དེས་ཀྱང་ཅིར་འགྱུར་ཞེ་ན་ཞེས་དོགས་ནས་བདག་དེང་རྙེད་པ་ཞེས་པ་ལ་སོགས་པ་གསུངས་

ཏེ། གང་གིས་བདག་ནི་བཀུར་འགྱུར་འདི་ལ་མིན་ཏེ། ཤིན་ཏུ་ལེགས་པར་རྙེད་པ་དེས་བདག་གིས་ཐོབ་ཅེས་བདག་ཉིད་ལ་བསྟོད་པ་སྟོན་པར་བྱེད་དེ་བསྒྲུབ་བྱ་གྲུབ་པའི་ཕྱིར་རོ། །སླར་ཡང་ཤིན་ཏུ་དགའ་བ་གསལ་བར་བྱ་བའི་ཕྱིར། འདི་ནི་མ་རུངས་ཞེས་པ་ལ་སོགས་པ་གསུངས་ཏེ།

རྒྱས་པའི་མིག་དང་ལྡན་པའི་གདོང་དང་ཡིད་རབ་ཏུ་དགའ་བར་རེ་ཞིག་བལྟའོ། །དེ་ལྟར་རྙེད་པ་འདོད་པས་མ་རུངས་པར་བྱས་པ་རྙེད་པ་བཀུར་སྟི་ལས་ཕྱི་རོལ་དུ་བྱ་སྟེ་བསལ་བར་བྱའོ་ཞེས་པའི་དོན་ཏོ། །ཡུན་རིང་པོ་ནི་དུས་ཤིན་ཏུ་རིང་བར་རོ། །ནམ་ཡང་འདི་ལ་བརྟེན་ནས་ཁོ་བོ་ཅག་ལ་འདི་

ལྟར་དགའ་བ་སྐྱེ་བར་མ་གྱུར་པའོ། །འདིས་ཀྱང་མ་རུངས་པར་བྱས་པ་ཞེས་བསྟན་པའི་ཕྱིར་འགྲོ་བ་ཀུན་གྱིས་ཞེས་པ་ལ་སོགས་པ་གསུངས་ཏེ། དེའི་ཉེས་པ་བརྗོད་པས་གཞད་གད་དུ་བྱེད་པའོ། །དེ་དེར་ཞེས་པ་ནི་ཕྱོགས་ཐམས་ཅད་དུའོ། །འདིར་ཡང་བལྟ་ཞེས་པ་དང་འབྲེལ་ཏོ། །ད་ནི་ལྷག་པ་ཐོབ་

པར་གྱུར་པས་སེམས་རངས་པས་བདག་ཉིད་དམན་པ་ཉིད་དུ་བསྒོམ་པར་བྱའོ་ཞེས་བསྟན་པའི་ཕྱིར། ཉོན་མོངས་འདི་ཡང་ཞེས་པ་ལ་སོགས་པ་གསུངས་ཏེ། འདི་ཡང་ནི་དེ་ལྟར་སྤྱོ་བའི་གནས་ཐམས་ཅད་དུ་དམན་པ་ལ་འདུག་པ་ཡང་ཡིན་ཏེ། དེ་ཉིད་ཀྱི་ཕྱིར་ན་ཉོན་མོངས་པ་ཡིན་ལ་བདག་དང་

ལྷན་ཅིག་ཏུ་འགྲན་ཏེ་མཉམ་པོར་བྱེད་པར་གྲགས་སོ། །གྲགས་ཞེས་པ་ནི་མི་འདོད་པ་དང་འདི་མི་རིགས་ཞེས་པ་ཉིད་དོ། །ཇི་ལྟར་མི་རིགས་ཤེ་ན། འདི་བདག་ཅེས་པ་ལ་སོགས་པ་གསུངས་ཏེ། ཐོས་པས་ནི་བསྟན་བཅོས་ལ་སོགས་པ་རྣམས་ཐོས་པ་ཡིན་ལ། རེ་ཞིག་འདི་དང་བདག་

མཉམ་མམ་ཅི་ཞེས་ཏེ། ཤེས་རབ་ནི་བློ་ཁྱད་པར་དུ་གྱུར་པ་ཡིན་ལ། གཟུགས་རིགས་ནོར་གྱིས་ཀྱང་མཉམ་མམ་ཞེས་པའི་ཐ་ཚིག་གོ། །དེ་ལྟར་ཉིད་དུ་སྐྱེ་བོ་རྣམས་ཀྱིས་ཀྱང་བདག་གི་ཡོན་ཏན་ཕྱོགས་བཅུར་བསྒྲགས་པ་ཐོས་ཤིང་མཉན་ནས་སྤུ་ལྡང་བ་སྐྱེས་པར་གྱུར་པ་སྟེ་ལུས་ལ་བ་སྤུ་ལྡང་བ་

Vol. 105 · folio 178b

དང་ལྡན་པའོ། །དགའ་བ་ནི་ཡིད་རབ་ཏུ་དགའ་བ་དང་ལྡན་ཞིང་ཡོངས་སུ་ལོངས་སྤྱོད་པ་སྟེ་བདེ་བའི་དགའ་སྟོན་ནོ། །འོན་ཏེ་བརྒྱ་ལ་འགའ་ཞིག་ནས་འདིས་བག་མེད་པས་རྙེད་པར་གྱུར་ན་དེའི་ཚེ་ཇི་ལྟར་ཞེ་ན། གལ་ཏེ་འདི་ལ་རྙེད་ཡོད་ཀྱང་། །ཞེས་པ་ལ་སོགས་པ་གསུངས་ཏེ། དེ་ལྟར་འདིའི་རྙེད་པ་

ལ་བར་དུ་གཅད་པའི་ཕྱིར་འབད་པར་བྱས་ཀྱང་གལ་ཏེ་ཅི་ལྟར་ཡང་འདི་ལ་རྙེད་པ་ཡོད་ན་དེའི་ཚེ་འདིའི་སྐེ་ལ་རྡོག་པས་མནན་ནས་བླང་བར་བྱ་སྟེ། བདག་གིས་འདི་ལ་སྟོབས་ཀྱིས་བླང་ངོ་། །ཅི་སྟེ་རྣམ་པ་ཐམས་ཅད་དུ་འདིའི་སྲོག་དང་བྲལ་བར་བྱ་བ་ཡིན་ནམ་ཞེ་ན། ངའི་ལས་ནི་ཞེས་པ་ལ་སོགས་པ་

གསུངས་ཏེ། འཚོ་བ་ཙམ་ཞིག་ནི་རེ་ཞིག་སྲོག་འཛིན་པ་དེ་ཙམ་འདི་ལ་བྱིན་ནས་གཞན་ཐམས་ཅད་བདག་གིས་ཡོངས་སུ་གཟུང་བར་བྱའོ། །དེ་ལྟ་ན་ཡང་ནམ་ཞིག་ངའི་ལས་ནི་བྱེད་ཅེ་ན་ཞེས་ཏེ། གལ་ཏེ་འདི་ཁོ་བོའི་བཀའ་ཉན་པ་ལ་སྦྱོར་ནའམ་མ་སྨྲས་ཀྱང་རྗེས་སུ་མཐུན་པར་བྱེད་ན་དེའི་ཚེ་འདི་ལ་

འཚོ་བ་ཙམ་ཞིག་སྦྱིན་པར་བྱ་སྟེ། གཞན་དུ་ནི་མ་ཡིན་ནོ། །ཡང་འདི་ཇི་ལྟར་ན་དམན་པའི་གནས་སྐབས་སུ་ཁྱེར་བར་བྱེད་ཅེ་ན། གང་འདི་བདེ་ལས་ཞེས་པ་ལ་སོགས་པ་གསུངས་ཏེ། གང་ཞེས་པ་ནི་གང་ལས་ཏེ་བདེ་བ་ལས་ཡིན་ལ། ཉམས་པར་བྱ་བ་ནི་བྲལ་བར་བྱའོ། །འདི་ཙམ་གྱིས་གཏོང་བར་

བྱ་བ་ནི་མ་ཡིན་ཏེ་འོན་ཀྱང་བདག་གིས་གནོད་ལ་རྟག་ཏུ་སྦྱར་བར་བྱ་སྟེ་དུས་ཐམས་ཅད་དུ་བདག་གི་སྡུག་བསྔལ་གྱི་ཁུར་འདིའི་སྤྱོ་བར་ཡང་དག་པར་བཞག་སྟེ་དེའི་ཕྱིར་འདི་ལ་དེ་ལྟར་བྱའོ། །ཡང་ཅིའི་ཕྱིར་འདི་ལྟར་ཁྱོད་འདི་ལ་ཞེ་སྡང་བར་བྱེད་ཅེ་ན། འདི་ཡིས་ཞེས་པ་ལ་སོགས་པ་གསུངས་ཏེ།

སྡང་བའི་སེམས་ཅན་འདིས་སྔར་འཁོར་བ་ཐམས་ཅད་དུ་བདག་ལ་ལན་གྲངས་བརྒྱ་ཕྲག་དུ་མར་གནོད་པ་བྱས་པ་ཡིན་ཏེ། བཅིང་བ་དང་བསད་པ་དང་བརྡེག་པ་ལ་སོགས་པ་རྣམས་ཀྱིས་སྡུག་བསྔལ་བར་བྱས་པ་ཡིན་ནོ། །ད་ནི་སྡུག་བསྔལ་འདི་བཟོད་པར་མ་ནུས་ཏེ་བརྒྱ་ལ་འདི་ལས་སེམས་ལྡོག་པར་

དོགས་ནས་ཐབས་སླ་བའི་རིམ་པས་དེ་ཉིད་ལ་སྦྱར་བར་བྱ་བའི་ཆེད་དུ་ཉེ་བར་སྟོན་པ་ནི་ཡིད་ཁྱོད་ཅེས་པ་ལ་སོགས་པ་གསུངས་ཏེ། ཐོག་མ་མེད་པའི་འཁོར་བར་གཞལ་བར་མི་ནུས་པའི་བསྐལ་པར་རང་གི་དོན་བྱེད་འདོད་པས་ཏེ་གོམས་པས་ངལ་བ་ཆེན་པོས་དུབ་པར་གྱུར་པས་སྡུག་བསྔལ་

Vol. 105 · folio 179a

ཆེན་པོ་དུས་ཡུན་རིང་པོར་མྱོང་བར་གྱུར་པའི་མཚན་ཉིད་ཀྱིས་སྡུག་བསྔལ་ཉིད་བསྒྲུབས་པ་ཡིན་ཏེ། ལས་དེ་དང་དེ་ལས་དགོས་པ་ཅུང་ཟད་ཀྱང་ཐོབ་པ་མ་ཡིན་ནོ། །བྱུང་བར་གྱུར་པ་དེ་དང་དེ་རེ་ཞིག་བཟློག་པར་བྱ་བ་མ་ཡིན་པར་གྱུར་ན་ཡང་ད་ལྟ་འོང་བ་ལ་ཅི་ལྟར་རིགས་ཤེ་ན། དེ་

ལྟར་བདག་གིས་གསོལ་པ་འདེབས་པ་ཞེས་བྱ་བ་ལ་སོགས་པ་གསུངས་ཏེ། གསོལ་བ་འདེབས་པ་ནི་བསྙེན་བཀུར་སྔོན་དུ་སོང་བའི་ཚིག་བརྗོད་པ་ཉིད་ཀྱིས་ཏེ། ཇི་ལྟར་སྔར་རང་ཉིད་ཀྱི་ལས་དེ་དང་དེ་ལ་ཞུགས་པ་དེ་ལྟར་བདག་དང་གཞན་དུ་བརྗེ་བ་ལ་གོམས་པ་འདི་ལ་ཡང་འཇུག་པར་གྱིས་ཤིག །དཔྱོད་

པ་མེད་པ་ཞེས་བྱ་བ་ཤིན་ཏུ་ལྐོག་ཏུ་གྱུར་པའི་དོན་ལ་དཔྱོད་པ་དང་བྲལ་བའི་ཕྱིར་རོ། །ཅི་སྟེ་བསྒྲུབ་བྱའི་དོན་རྟོགས་པ་མེད་པར་ཅི་ལྟར་འདི་ལ་འཇུག་པ་ཉིད་དུ་འགྱུར་ཞེ་ན། ཐུབ་པའི་བཀའ་ཞེས་པ་ལ་སོགས་པ་གསུངས་ཏེ། ཕྱིས་ནི་དུས་ཕྱིས་ནས་རྟོགས་པར་འགྱུར་ཏེ། དེའི་སྟེ་བདག་གི་ཚིག་གིས་

ཞུགས་པ་འམ་བདག་དང་གཞན་དུ་བརྗེ་བའི་ཡོན་ཏན་ལས་སོ། །དེ་ཁྱོད་ཀྱིས་ཉམས་སུ་བླངས་ནས་དེར་འགྱུར་རོ། །ཇི་ལྟར་ཤེས་ཤེ་ན། ཐུབ་པའི་བཀའ་ནི་ཡང་དག་པ་ཡིན་པ་སྟེ། ཡང་དག་ཕྱིན་ཅི་མ་ལོག་པ་རྟོགས་པར་བྱེད་པ་ཡིན་ཏེ། གང་གི་ཕྱིར་བཅོམ་ལྡན་འདས་ཀྱི་བཀའ་ཡིན་པ་དེའི་ཕྱིར་

ཤེས་སོ། །དེ་ལྟར་གྱུར་ན་ཡང་བདག་གིས་ལས་འདི་དུ་མར་བྱས་ཀྱང་དེ་ལྟར་ན་ཡང་ཁྱད་པར་ཅུང་ཟད་ཀྱང་མ་རྟོགས་སོ་ཞེས་དོགས་ནས་གལ་ཏེ་ཁྱོད་ཀྱིས་ཞེས་པ་ལ་སོགས་པ་གསུངས་ཏེ། ཁྱོད་ནི་བདེན་པར་སྨྲ་བ་མ་ཡིན་ཏེ་གཞན་དུ་གལ་ཏེ་ལས་འདི་སྔར་བྱས་ནས་དེ་ཚེ་ཁྱེད་ལ་ལས་ཀྱི་འབྲས་བུ་ཡང་

འབྱུང་བར་འགྱུར་རོ། །དེ་ལ་སངས་རྒྱས་ཀྱི་ཕུན་སུམ་ཚོགས་པའི་བདེ་བ་སངས་རྒྱས་ཉིད་མ་ཡིན་པ་སངས་རྒྱས་ཉིད་ཀྱི་བདེ་བ་བོར་ནས་སྲིད་པར་མི་འགྱུར་ཏེ། གནས་སྐབས་ངན་པ་འདིའི་སྐབས་མི་སྲིད་དོ། །ལས་དེ་མ་བྱས་ན་འབྲས་བུ་ཡང་སྐྱེ་བར་འགྱུར་བ་མ་ཡིན་ནོ། །ད་ནི་མཇུག་བསྡུ་

བའི་ཚུལ་གྱིས་རང་གི་སེམས་དེ་ཉིད་ལ་བསྟན་པར་བྱ་བའི་ཕྱིར། དེ་བས་ཞེས་པ་ལ་སོགས་པ་གསུངས་ཏེ། གང་ལས་འདི་ལྟ་བུའི་འབྲས་བུ་འདི་གོམས་པ་ལས་སྐྱེ་བར་འགྱུར་བ་དེའི་ཕྱིར་བྱས་ཤིང་བསྒྲུབས་པ་དེ་ལྟར་རོ། །དེའི་ཕྱིར་བརྗོད་པའི་འབྲས་བུ་འདོད་པས་དེའི་བྱ་བ་ལ་སྐྱོ་བ་

Vol. 105 · folio 179b

བསལ་ནས་རང་བཞིན་ཉམས་སུ་བླང་བར་བྱའོ་ཞེས་བསྟན་པའི་ཕྱིར་གཞན་གྱི་ཞེས་པ་ལ་སོགས་པ་གསུངས་སོ། །སེམས་ཅན་གཞན་གྱི་རྟོག་མཁན་ཞེས་པ་ལ་སོགས་པ་གསུངས་ཏེ། རབ་ཏུ་སྦས་ནས་དེའི་དགོས་པར་བྱེད་པ་ཡིན་ནོ། །ད་ནི་བདག་དང་གཞན་དུ་བརྗེ་བ་བོར་ནས་སླར་ཡང་ཕྲག་དོག་

བསྒོམ་པ་ལ་རང་གི་སེམས་སྦྱང་བའི་ཕྱིར། བདག་སྐྱིད་པ་ལ་སོགས་པ་གསུངས་ཏེ། དེ་བས་གནས་པའི་ཕྱིར་སྐྱིད་པ་ཡིན་ལ་སྡུག་བསྔལ་གྱི་གནས་པས་མི་སྐྱིད་པ་ཡིན་ནོ། །དེ་ལྟར་ཕྲག་དོག་གྱིས་ཤིག་ཅེས་རང་གི་སེམས་ལ་འདི་ལྟར་གསུངས་པ། བདག་ནི་ཞེས་པ་ལ་སོགས་པ་

གསུངས་ཏེ། བདག་ནི་ཞེས་པ་ནི་བདག་གི་ལུས་ལའོ། །གང་ཚེ་ཞེས་པ་ནི་དུས་ནམ་ཞིག་ནའོ། །ཅི་བྱེད་ཅེས་པ་ནི་རང་གི་དོན་ནམ། གཞན་གྱི་དོན་ནམ། དམ་པའི་ལས་སམ། དམ་པ་མ་ཡིན་པའི་ལས་སམ། ཐ་མལ་པའི་ལས་ཅི་བྱེད་ཅིང་གནས་ཞེས་སོ། །དེ་ལྟར་འདིའི་ལུས་ལ་གླགས་

བརྟགས་ཏེ་བཙལ་ལོ། །འོན་ཏེ་གང་གི་ཚེ་འདི་ལ་གླགས་མ་རྙེད་ན་དེའི་ཚེ་ཇི་ལྟར་བྱ་ཞེ་ན། གཞན་གྱི་ཞེས་པ་ལ་སོགས་པ་གསུངས་པ་ལ། གཞན་གྱིས་བྱས་པའི་ཉེས་པ་འདི་ཡང་ཁྱོད་ཉིད་ཀྱི་ཉེས་པར་སྤྱད་པ་ཡིན་ནོ་ཞེས་གང་གིས་འདིའི་སྤྱོད་པ་ཡིན་ནོ་ཞེས་དེ་ལྟར་འདི་ཉིད་ཀྱི་ལུས་ཀྱི་མགོ་ལ་

བསྒྱུར་བར་བྱོས་ཤིག །ཡང་ན་གཞན་གྱིས་བྱས་པའི་ཉེས་པ་ཡང་འདི་ཉིད་ཞེས་བྱ་བ་ནི་ཉེས་པར་སྤྱོད་པ་ཡང་འདི་ཉིད་ཀྱི་མགོ་བོ་ལ་བསྒྱུར་བར་བྱོས་ཤིག་ཅེས་དེའི་ལས་ཀྱི་འབྲས་བུའི་ཆ་ཉིད་དུ་གྱིས་ཤིག་པའོ། །གང་། འགྲོ་བའི་སྡུག་བསྔལ་གང་ཅིའང་རུང་། །དེ་ཀུན་བདག་ལ་སྨིན་གྱུར་ཅིག །

བྱང་ཆུབ་སེམས་དཔའི་དགེ་འདུན་གྱིས། །འགྲོ་བ་བདེ་ལ་གནས་པར་ཤོག །ཅེས་འཆད་པར་འགྱུར་རོ། །གང་གི་ཚེ་ཡང་ཉེས་པ་ཆུང་ངུ་ཡང་འདི་ལ་མཐོང་ན་དེའི་ཚེ་སྦ་བར་མི་བྱའོ་ཞེས་བདག་གིས་ཉེས་པ་ཞེས་བྱ་བ་ལ་སོགས་པ་གསུངས་ཏེ། ཆུང་ངུ་སྟེ་ལུས་འདིའི་ཤིན་ཏུ་ཕྲ་བའི་ཡང་ཉེས་

པ་རབ་ཏུ་ཤོགས་ཞེས་ཏེ་མངོན་པར་གྱིས་ཤིག་པའོ། །ཐུབ་པ་ཆེན་པོ་ནི་སངས་རྒྱས་བཅོམ་ལྡན་འདས་ཏེ་དེའི་སྤྱན་སྔར་རོ། །གང་གིས་འདི་འཇིགས་པས་སླར་ཡང་མི་བྱེད་པའི་སྡོམ་པ་ཉིད་ཀྱིས་གནས་སོ། །གལ་ཏེ་འདིའི་སྙན་པ་གསལ་བར་གྱུར་པ་མཐོང་ན་དེ་ལ་གསུངས་པ། གཞན་གྱི་

Vol. 105 · folio 180a

ཞེས་པ་ལ་སོགས་པ་སྟེ། འདིའི་གྲགས་པ་གཞན་རྣམས་ཀྱི་དེ་བས་ལྷག་པའི་གྲགས་པ་གསལ་བར་དྲི་མ་ཅན་དུ་གྱིས་ཤིག་ཅེས་དེ་རྙོག་པ་དང་བཅས་པར་གྱིས་ཤིག་པ་དང་སྦ་བར་གྱིས་ཤིག་ཅེས་པའི་དོན་ཏོ། །འདི་ལ་སྙིང་རྗེའི་སེམས་ཅུང་ཟད་ཙམ་ཡང་བསྐྱེད་པར་

མི་བྱའོ་ཞེས་བདག་ནི་བྲན་གྱིས་ཞེས་པ་ལ་སོགས་པ་གསུངས་ཏེ། ངེས་པར་དམན་པའི་བྲན་གྱི་ཐ་མ་ལྟར་གཞན་གྱི་དགོས་པ་སེམས་ཅན་གྱི་དོན་རྣམས་ལ་འདི་ལྟར་བཀོལ་བར་གྱིས་ཤིག་སྟེ་ཁུར་ཁྱེར་བ་ལ་སྦྱོར་བའོ། །གལ་ཏེ་འདི་ལ་ཡོན་ཏན་གྱི་ཆ་ཅུང་ཟད་མཐོང་བ་དེའི་ཚེ་ཅི་བསྟོད་པ་བྱ་བའམ་ཞེ་

ན། འདི་ནི་སྐྱོན་ཅན་ཞེས་པ་ལ་སོགས་པ་གསུངས་ཏེ། བརྒྱ་ལ་ཡོན་ཏན་ལྷག་པ་ལྷན་ཅིག་སྐྱེས་པ་ཡོད་ན་ཡང་འདི་ནི་བསྟོད་པར་བྱ་བ་མ་ཡིན་པ་ཉིད་དོ། །ཅིའི་ཕྱིར་ཞེ་ན། གང་གི་ཕྱིར་འདི་ནི་ཉེས་པ་དུ་མའི་བདག་ཉིད་ཡིན་པའི་ཕྱིར་རོ། །གཞན་ཡང་ཡོན་ཏན་རྟོགས་པའི་སྒོ་ནས་བསྟོད་པར་བྱ་བར་

འགྱུར་ན་འདི་ཉིད་རྩ་བ་དང་བཅས་པ་ཉམས་པ་ཡིན་ནོ་ཞེས་འདིའི་ཡོན་ཏན་ཞེས་བྱ་བ་ལ་སོགས་པ་གསུངས་སོ། །འདིར་ཡང་མང་དུ་བརྗོད་པས་ཅི་ཞིག་བྱ་སྟེ། མདོར་ན་འདི་ལ་ཆད་པའི་ལས་བྱའོ་ཞེས་བསྟན་པའི་ཕྱིར། མདོར་ན་ཞེས་བྱ་བ་ལ་སོགས་པ་གསུངས་ཏེ། གནོད་པ་ཞེས་པ་ནི་

སྡུག་བསྔལ་བའམ་གནོད་པ་བྱེད་པའོ། །འདི་ལྟར་གལ་ཏེ་ཡང་བདག་གིས་སྡུག་བསྔལ་གྱི་ཁུར་ཁྱེར་བར་མི་ནུས་སོ་ཞེས་སྨྲས་ན་དེའི་ཚེ་འདིར་ཅི་ལྟར་འཇུག་པར་བྱ་ཞེ་ན། གང་གིས་ངག་རྩུབ་གྱུར་ཚུལ་དུ། །ཞེས་པ་ལ་སོགས་པ་གསུངས་ཏེ། གང་གིས་ངག་རྩུབ་པར་འགྱུར་བ་ནི་ཕོད་པ་

ཆེ་བ་ཡིན་ཏེ་དང་པོ་ཉིད་དུ་འདི་ལ་དེ་ལྟར་སྐབས་དབྱེ་བར་མི་བྱའོ། །འོན་ཀྱང་གཞག་པར་བྱ་སྟེ་གཟུང་བར་བྱའོ། །བག་མ་གསར་བའི་འཇུག་པ་བཞིན་དུའོ། །དེ་ཉིད་གསུངས་པ། འཇིགས་དང་ཞེས་ཏེ་ཉམས་པ་ལས་སྐྲག་པའོ། །ངོ་ཚ་ཞེས་པ་ནི་བྱ་བ་མ་ཡིན་པ་ལ་ངོ་ཚ་བའོ། །ཐམས་ཅད་དུ་མི་

མཐུན་པ་ལ་འཇུག་པ་ལས་བཟློག་པ་ལ་བརྩོན་པར་བྱ་ལ། དེ་ལྟར་གནས་པ་ན་ཡང་རྣམ་པ་ཐམས་ཅད་ལྕགས་ཀྱུ་མེད་པར་མི་བྱའོ་ཞེས་བསྟན་པའི་ཕྱིར། འདི་ལྟར་གྱིས་ཤིག་ཅེས་པ་ལ་སོགས་པ་གསུངས་ཏེ། འདི་ལྟར་བཀའ་ཉན་པ་ལ་འཇུག་པར་བྱས་ནས་ལུས་འདི་དབང་དུ་གྱུར་པར་བྱ་སྟེ།

Vol. 105 · folio 180b

རང་ལ་རག་ལས་པས་གཞག་པར་བྱ་སྟེ། རྟ་དུལ་བ་བཞིན་ནོ། འོན་ཏེ་འདི་ལྟར་དབང་དུ་མ་གྱུར་ན་དེའི་ཆད་པས་གཅད་པར་བྱ་སྟེ། དེ་ལས་འདས་ན་སྟེ་གལ་ཏེ་ཁྱོད་བཀའ་ལས་འདས་པས་འཇུག་ན་དེའི་ཚེ་ཆད་པས་གཅད་པར་བྱ་སྟེ་སྤྱོ་བར་བྱ་བའམ། ཚར་གཅད་པར་བྱའོ། །ད་ནི་བདག་གི་སེམས་དང་

བདག་ཐ་དད་པ་བཞིན་དུ་ཡོངས་སུ་བརྟགས་ནས་བརྟན་པས་བསྡུ་བའི་ཕྱིར་གསུངས་པ། འོན་ཏེ་དེ་ལྟར་ཞེས་པ་ལ་སོགས་པ་སྟེ། གལ་ཏེ་ཡང་ཁྱོད་འདི་ལ་རབ་ཏུ་ཞུགས་པར་གྱུར་ཏེ། བརྒྱ་ལ་ཉམས་པར་གྱུར་ན་དེའི་ཚེ་ཉེས་པ་དེས་ཁྱོད་ཉིད་ཚར་གཅད་པར་བྱའོ། །ཅིའི་ཕྱིར་ཞེ་ན། ཉེས་པ་ཐམས་

ཅད་ཁྱོད་ལ་བརྟེན་པ་ཡིན་ཏེ། རང་ཉིད་སེམས་ལུས་མེད་པར་གྱུར་པ་ཡང་ཁྱོད་ཉིད་ཀྱི་བསམ་པ་ཉིད་ཀྱིས་འདི་ཐམས་ཅད་དུ་འཇུག་པར་བྱེད་དེ། དེས་གང་འགའ་ཞིག་ཏུ་ངན་གཡོ་ཅན་དུ་རྟེན་པར་བྱེད་དོ། །དེར་ཁྱོད་ཀྱིས་དྲང་པོ་མ་ཡིན་ནོ་ཞེས་བསམ་པའོ། །དེ་ནས་མི་བཟོད་པས་རང་གི་

སེམས་ཉིད་ལ་བསྡིགས་པ་ཁྱོད་ཀྱིས་ཞེས་པ་ལ་སོགས་པ་གསུངས་ཏེ། བསྡིགས་པ་འདི་ནི་འཇིག་རྟེན་པའི་བརྗོད་པའོ། །གང་དུ་འགྲོ་བ་ཁོ་བོས་བལྟ། །ཞེས་པ་ནི་ད་ནི་ཁྱོད་ཀྱིས་གང་དུ་འབྲོས་པར་བྱེད་ཅེས་སོ། །ཇི་ལྟར་ཁྱོད་ཀྱིས་མི་ཤེས་པ་ན་གླགས་རྙེད་པ་དེ་ལྟ་ནི་ནུས་པ་མ་ཡིན་ཏེ། ད་ནི་རང་

བཞིན་ཡོངས་སུ་ཤེས་པས་བདག་ཉིད་སྟོབས་དང་ལྡན་པ་ཡིན་ཏེ། དེ་ཉིད་གསུངས་པ། དྲེགས་པ་ཐམས་ཅད་གཞོམ་བྱ་སྟེ། །ཞེས་པ་ནི་ཁྱོད་ཀྱི་སྲོག་བླང་བར་བྱའོ། །འོན་ཏེ་འདི་ལྟར་ཁྱོད་ཀྱིས་སྔར་བཞིན་དུ་བདག་ལ་ད་ལྟར་ཡང་སྟོབས་ཡོད་དོ་ཞེས་སེམས་པ་བསམ་པར་མི་བྱ་སྟེ། ཁྱོད་ཀྱིས་གང་དུ་ཁོ་

བོ་བརླག་པ་སྟེ། ལམ་མ་ཡིན་པར་བྲིད་པ་ནི་གང་གི་ཕྱིར་སྔོན་གྱི་དུས་ཡུན་རིང་པོ་གཞན་ཡིན་ལ། ད་ནི་དུས་འདི་གཞན་ཡིན་ཏེ། སྔོན་དང་འདྲ་བ་མ་ཡིན་ནོ། །ད་ནི་སྔོན་གྱི་དུས་མ་ཡིན་ནོ་ཞེས་ཅི་ལྟར་ཤེས་པར་བྱ་ཞེ་ན། ད་དུང་ཞེས་པ་ལ་སོགས་པ་གསུངས་ཏེ། སྔར་ནི་རང་གི་དོན་ལ་ཞེས་པའི་

སེམས་ཉིད་ཀྱིས་ཁྱོད་ཀྱིས་ཁོ་བོ་བསླུས་པ་ཡིན་ལ། དེ་ཡང་བདག་ལ་ད་ལྟ་ཡང་ཡོད་དོ་ཞེས་ཡིད་ལ་མ་བྱེད་ཅིག །འདི་ལྟར་ཤེས་པར་བྱས་ནས་སེམས་ཅན་མང་པོའི་དོན་ལ་རབ་ཏུ་ཞུགས་ཤིག །སྐྱོ་བར་སེམས་ཏེ་དཀའ་བའི་བློ་བོར་ཅིག་པའོ། །ཡང་ན་སེམས་ཅན་གྱི་དོན་གྱི་ཁུར་ཁྱེར་བར་

Vol. 105 · folio 181a

སེམས་པ་ན། སྡུག་བསྔལ་བའི་བློས་དོར་བར་མ་བྱེད་ཅིག །ཅིའི་ཕྱིར་ཞེ་ན། བདག་གིས་གཞན་ལ་ཁྱོད་བཙོངས་ཀྱིས། །ཞེས་ཏེ། སྔར་ཉིད་དུ་བདག་དང་གཞན་དུ་ཡོངས་སུ་བརྗེས་པ་ན། ཁྱོད་བདག་གིས་གཞན་ལ་རག་ལས་པ་ལ་སྦྱར་བ་ཡིན་ནོ། །དེ་ལྟ་ན་

ཡང་བདག་ཉེས་པ་མ་བྱས་པ་ལ་ཡང་ཁྱེད་ཡོངས་སུ་མ་མགུ་བ་གང་གིས་ཡོངས་སུ་གཏང་བའི་བློ་སྐྱེད་ཅེས་དོགས་ནས། གལ་ཏེ་བག་མེད་ཅེས་པ་ལ་སོགས་པ་གསུངས་ཏེ། གལ་ཏེ་ཡང་ཇི་ལྟར་བག་མེད་པར་གྱུར་ཏེ། བློ་སྟོར་བས་བག་མེད་པའམ་དྲན་པ་ཉམས་ཏེ་སེམས་ཅན་རྣམས་ལ་སེམས་

ཁྱོད་མ་བྱིན་ཏེ། རང་ཉིད་ཀྱིར་བྱས་ན་དེའི་ཚེ་ཁྱོད་ཀྱིས་ཁོ་བོ་དམྱལ་བའི་སྲུང་མ་རྣམས་ཏེ། དམྱལ་བའི་སྡུག་བསྔལ་སྐྱེད་པ་ལ་སྦྱར་བ་གཤིན་རྗེའི་སྐྱེས་བུ་རྣམས་ལ་བྱིན་པར་ངེས་ཏེ་ཐེ་ཚོམ་ཡོད་པ་མ་ཡིན་ནོ། །དེ་ལྟར་རྗེས་སུ་མཐུན་པར་བྱས་ཀྱང་ཁྱོད་རྗེས་སུ་མི་མཐུན་པ་ཡིན་ཏེ། དེའི་ཕྱིར་ཁྱེད་ལ་གཏོང་

བའི་བློར་འགྱུར་རོ། །འོན་ཏེ་གང་གིས་ན་དེ་ལྟར་རྗོད་པར་བྱེད་པ་བརྒྱ་ལ་དེ་ལྟར་གྱུར་ཏམ་ཞེ་ན། དེ་ལྟར་ཞེས་པ་ལ་སོགས་པ་གསུངས་ཏེ། དེ་ལྟར་ཞེས་པ་ནི་ཁྱོད་ལ་རྗེས་སུ་མཐུན་པ་སྤྱད་པ་ལས་ཏེ། ལན་གྲངས་དུ་མར་ཁྱོད་ཀྱིས་ཁོ་བོ་སྡུག་བསྔལ་འབའ་ཞིག་གི་སྣོད་དུ་བྱས་པ་ཡིན་ལ། ཡུན་རིང་

བ་ནི་དུས་རིང་པོར་རོ། །ཅི་ཞིག་བྱས་ནས་ཤེ་ན། དམྱལ་བ་རྣམས་ལ་བྱིན་ནས་སོ། །ཁོན་རྣམས་ཏེ་སྔར་གྱི་དགྲ་སྟེ་དགྲ་ཉིད་དུ་གྱུར་པ་རྣམས་ཡིན་ཏེ། ད་ནི་དེ་རྣམས་དྲན་པར་བྱས་ལ་གཞོམ་པར་བྱ་སྟེ། རྩ་བ་དང་བཅས་པ་བརླག་པར་བྱའོ། །རང་གི་དོན་ཏེ་ཁོལ་དང་བྲན་ཉིད་ཡིན་ཏེ། དུས་

ཐམས་ཅད་དུ་དེའི་དབང་དུ་གྱུར་པའི་ཕྱིར་རོ། །དེ་ལྟར་ན་རང་གི་སེམས་དེ་ལ་དྲག་ཏུ་བསྣུན་ནས་སླར་ཡང་ཞི་བའི་རིམ་པས་བསླབ་པར་བྱ་བའི་ཕྱིར་དེའི་ཚེ་བདག་ནི་ཞེས་པ་ལ་སོགས་པ་གསུངས་ཏེ། གལ་ཏེ་ཁྱོད་བདག་ཉིད་ཡུན་རིང་པོ་ངེས་པར་ལེགས་པ་འདོད་པའི་ཡིན་ན་དེའི་ཚེ་བདག་ཉིད་ལ་

དགའ་བར་མི་བྱ་སྟེ་སྤང་བར་བྱའོ་ཞེས་པའི་ཐ་ཚིག་སྟེ། གཞན་དུ་ན་བདག་ཉིད་ལ་དགའ་བ་ཉིད་དུ་བྱས་པར་མི་འགྱུར་རོ། །གལ་ཏེ་ཡང་བདག་ཉིད་ལ་ཁྱོད་ཀྱིས་འཇིགས་པ་ཐམས་ཅད་ལས་བསྲུང་བའི་བློ་ཡོད་ན་དེའི་ཚེ་ལུས་འདི་བསྲུང་བར་རིགས་སོ་ཞེས་རང་གི་སེམས་ལ་བརྗོད་དོ། །ཅི་སྟེ་དེ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words