ཆོས་མངོན་པའི་མཛོད་ཀྱི་འགྲེལ་བཤད

Sanskrit title (Tibetan script, as in the text) ཨ་བྷི་དྷརྨ་ཀོ་ཥ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 142 · folio 278b

པ་དེ་ལ་ནི་གདོན་མི་ཟ་བར་མ་རིག་པ་དང་མཚུངས་པར་ལྡན་པར་འགྱུར་རོ། །མ་རིག་པ་དང་མཚུངས་པར་མི་ལྡན་པའི་ཚོར་བ་ནི་སྲེད་པའི་རྒྱུར་ཡང་མི་འགྱུར་རོ། །དེ་ལྟ་བས་ན་རེག་པའི་དུས་ན་ཡོད་པའི་ཚུལ་བཞིན་མ་ཡིན་པ་ཡིད་ལ་བྱེད་པ་ནི་ཚོར་བ་དང་ལྷན་

ཅིག་འཇུག་པའི་མ་རིག་པའི་རྐྱེན་གྱི་ངོ་བོར་གྲུབ་པས་མ་རིག་པ་ནི་ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ལས་བྱུང་བ་ཡིན་ནོ་ཞེས་བྱ་བ་འདི་བསྟན་པ་ཡིན་ནོ། །དེ་ལྟ་བས་ན་ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ལས་བྱུང་བའི་ཕྱིར་མ་རིག་པ་རྒྱུ་མེད་པ་ཉིད་

ཀྱང་མ་ཡིན་ཞིང་དེ་ལྟར་རེག་པའི་དུས་ན་ཡོད་པའི་ཚུལ་བཞིན་མ་ཡིན་པ་ཡིད་ལ་བྱེད་པ་ཚོར་བ་དང་ལྷན་ཅིག་འབྱུང་བའི་མ་རིག་པའི་རྐྱེན་གྱི་ངོ་བོར་གྲུབ་པས་བཅུ་གཉིས་ལས་མ་གཏོགས་པའི་ཡན་ལག་གཞན་གྱིས་ཁ་བསྐང་བར་ཡང་མི་བྱའོ། །

ཐུག་པ་མེད་པར་ཐལ་བར་འགྱུར་བའང་མ་ཡིན་ཏེ། གཏི་མུག་ལས་སྐྱེས་པའི་ཡིད་ལ་བྱེད་པ་རྙོག་པ་ཞེས་འབྱུང་བས་ཚུལ་བཞིན་མ་ཡིན་པ་ཡིད་ལ་བྱེད་པ་དེ་ཡང་གཏི་མུག་ལས་སྐྱེས་པ་ཡིན་པར་གསུངས་པ་ཡིན་པའི་ཕྱིར་རོ། །དེ་ལྟ་བས་ན་འདི་ནི་

ཚུལ་བཞིན་མ་ཡིན་པ་ཡིད་ལ་བྱེད་པ་ལས་ཀྱང་མ་རིག་པ་འབྱུང་ལ་མ་རིག་པ་ལས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པ་འབྱུང་ངོ་ཞེས་འཁོར་ལོ་ལྟ་བུར་བཤད་པ་ཡིན་ནོ། །འདི་ནི་སློབ་དཔོན་གྱིས་ཉེས་པ་དང་བཅས་པར་གཟིགས་ནས་ཉེས་པ་དེ་

མངོན་པར་བྱ་བའི་ཕྱིར་ཐལ་བར་འགྱུར་བ་བརྩམ་པར་འོ་ན་ནི་དེ་ནི་ཞེས་བྱ་བ་རྒྱས་པར་སྨོས་ཏེ། འོ་ན་ནི་ཞེས་བྱ་བ་ནི་དོན་གཞན་བརྗོད་པར་འདོད་པ་ཡིན་ནོ། །སྐལ་ལྡན་ཁྱད་པར་ཅན་ན་རེ་ད་ནི་ཞེས་བྱ་བ་ནི་དོན་ཡིན་ནོ་ཞེས་ཟེར་རོ། །དེ་ནི་ཞེས་བྱ་བ་ནི་མདོ་དང་རིགས་པའི་སྒོ་

ནས་མ་རིག་པའི་རྒྱུ་ཚུལ་བཞིན་མ་ཡིན་པ་ཡིད་ལ་བྱེད་པ་ཡིན་ནོ་ཞེས་ཇི་སྐད་རྒྱས་པར་བཤད་པ་ཡིན་ཏེ། དེ་ནི་མདོ་གཞན་དུ་གསུངས་པས་རྟེན་ཅིང་འབྲེལ་པར་འབྱུང་བའི་མདོ་འདིར་ཡང་བརྗོད་པར་བྱ་དགོས་སོ། །བརྗོད་པར་བྱ་མི་དགོས་སོ་ཞེས་ཟེར་

Vol. 142 · folio 279a

བ་ནི་བཙུན་པ་དཔལ་ལེན་ཏོ། །རིགས་པ་གང་གིས་ཞེས་དྲིས་པ་དང་བཙུན་པ་དཔལ་ལེན་གྱིས་དགྲ་བཅོམ་པ་རྣམས་ཀྱི་ཚོར་བ་མ་རིག་པ་མེད་པ་ནི་སྲེད་པའི་རྐྱེན་མ་ཡིན་ནོ་ཞེས་བྱ་བ་རྒྱས་པར་སྨོས་ཏེ། དགྲ་བཅོམ་པ་རྣམས་ལ་ཡང་ཚོར་བ་

ཡོད་ལ་དེ་ནི་སྲེད་པའི་རྐྱེན་ཡང་མ་ཡིན་པས་ཚོར་བ་མ་རིག་པ་དང་བཅས་པ་ཁོ་ན་སྲེད་པའི་རྐྱེན་ཡིན་ནོ་ཞེས་བྱ་བར་ཤེས་སོ། །ཕྱིན་ཅི་ལོག་མེད་པའི་རེག་པ་ཡང་ཉོན་མོངས་པ་ཅན་གྱི་ཚོར་བའི་རྐྱེན་མ་ཡིན་ནོ་ཞེས་བྱ་བར་སྐབས་དང་སྦྱར་རོ། །དགྲ་བཅོམ་པ་མ་རིག་

པ་མེད་པའི་རེག་པ་ཡང་ཕྱིན་ཅི་ལོག་མ་ཡིན་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོ་ལས་ཚོར་བའི་རྐྱེན་དུ་བཤད་པ་གང་ཡིན་པའི་རེག་པ་ཡང་མ་རིག་པ་དང་བཅས་པ་ཁོ་ནའོ་ཞེས་བྱ་བར་ཤེས་ལ་མ་རིག་པ་ཡང་འདིའི་རྒྱུ་ཡིན་ནོ་ཞེས་བྱ་བར་ཤེས་པའི་རིགས་པ་

འདིས་རྟེན་ཅིང་འབྲེལ་པར་འབྱུང་བའི་མདོ་ལས་འབྱུང་བ་རེག་པ་མ་རིག་པ་དང་བཅས་པའི་རྐྱེན་གྱིས་ཚོར་བ། ཚོར་བ་མ་རིག་པ་དང་བཅས་པའི་རྐྱེན་གྱིས་སྲེད་པ་ཞེས་བྱ་བ་ཡིན་པར་ཤེས་སོ། །དེའི་ཕྱིར་ཇི་སྐད་བཤད་པའི་རིགས་པ་འདིས་དེ་ཡང་རེག་པའི་དུས་

སུ་བསྟན་པ་ཡིན་ལ་ཞེས་བྱ་བ་རྒྱས་པར་རྟེན་ཅིང་འབྲེལ་པར་འབྱུང་བ་འདིར་མ་རིག་པའི་རྒྱུ་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ་ཞེས་བྱ་བ་གྲུབ་པ་ཡིན་ནོ། །འདིར་བརྒལ་བ་གལ་ཏེ་ཚོར་བ་མ་རིག་པ་མེད་པ་ནི་སྲེད་པའི་རྐྱེན་མ་ཡིན་ནོ་ཞེས་བྱ་བ་ལ་སོགས་པའི་

ཚིག་གིས་རང་གི་རིགས་པ་ཁོ་ནས་མ་རིག་པའི་རྒྱུ་ཡང་ཚུལ་བཞིན་མ་ཡིན་པ་ཡིད་ལ་བྱེད་པ་ཡིན་ལ། ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ཡང་མ་རིག་པ་ཡིན་ནོ་ཞེས་བྱ་བར་ཤེས་ན། འོ་ན་མ་རིག་པ་དང་ཚུལ་བཞིན་མ་ཡིན་པ་ཡིད་ལ་བྱེད་པ་དག་ཕན་ཚུན་གྱི་

རྒྱུ་ཅན་ཉིད་ཡིན་པར་རབ་ཏུ་སྟོན་པ་མདོ་གཞན་ལ་བརྟེན་ཅི་དགོས། འདིར་སྨྲས་པ། དེ་ནི་བདེན་ན་འོན་ཀྱང་དེ་ནི་རིགས་པ་ཙམ་དུ་ཟད་ཀྱི། ཞལ་ནས་རྟེན་ཅིང་འབྲེལ་པར་འབྱུང་བའི་མདོ་ལས་གསུངས་པ་ནི་མ་ཡིན་ནོ། །དེའི་ཕྱིར་ཞལ་ནས་མདོ་གཞན་ལས་གསུངས་

Vol. 142 · folio 279b

པའི་སྒོ་ནས་རིགས་པ་འདི་རྣམ་པར་འཇོག་པས་མདོ་གཞན་ཉེ་བར་འགོད་པ་དགོས་པ་གཞན་ཡིན་པར་ཁོང་དུ་ཆུད་པར་བྱའོ། །དེ་ལྟ་ན་ནི་ཧ་ཅང་ཐལ་བར་འགྱུར་ཞེས་ཟེར་བ་ནི་བསྟན་བཅོས་མཛད་པའོ། །ཇི་ལྟར་ན་ཧ་ཅང་ཐལ་བར་འགྱུར་ཞེ་ན། བཤད་པ། མདོ་

གཞན་ལས་ནི་མ་རིག་པའི་འདུས་ཏེ་རེག་པ་ལས་བྱུང་བའི་ཚོར་བ་ལ་བརྟེན་ནས་སྲེད་པ་སྐྱེའོ་ཞེས་བསྟན་ཏེ། དགྲ་བཅོམ་པ་རྣམས་ཀྱི་ཚོར་བ་མ་རིག་པ་མེད་པ་ནི་སྲེད་པའི་རྐྱེན་མ་ཡིན་ནོ། །ཕྱིན་ཅི་ལོག་མེད་པའི་རེག་པ་ཡང་ཉོན་མོངས་པ་ཅན་གྱི་ཚོར་བའི་རྐྱེན་མ་ཡིན་

ལ། དགྲ་བཅོམ་པ་མ་རིག་པ་མེད་པའི་རེག་པ་ཡང་ཕྱིན་ཅི་ལོག་མ་ཡིན་ནོ་ཞེས་བྱ་བའི་རིགས་པ་འདིས་རེག་པ་དང་ཚོར་བ་ཞེས་བྱ་བའི་ཡན་ལག་འདི་གཉིས་ཀྱང་རྟེན་ཅིང་འབྲེལ་པར་འབྱུང་བའི་མདོ་འདིར་མ་སྨོས་བཞིན་དུ་གཞན་ནས་བསྟན་པའི་ཕྱིར་ཤེས་པར་

འགྱུར་བས་ཡན་ལག་འདི་གཉིས་ཀྱང་མ་སྨོས་པར་འགྱུར་རོ། །དེ་བཞིན་དུ་མདོ་གཞན་ལས་དེ་གལ་ཏེ་བསོད་ནམས་ཀྱི་འདུ་བྱེད་དག་མངོན་པར་འདུ་བྱེད་ན་བསོད་ནམས་སུ་ཉེ་བར་འགྲོ་བའི་རྣམ་པར་ཤེས་པར་འགྱུར་ཏེ། བསོད་ནམས་མ་ཡིན་པར་ཉེ་བར་འགྲོ་

བ་དང་། མི་གཡོ་བར་ཉེ་བར་འགྲོ་བ་ཡང་དེ་དང་འདྲའོ་ཞེས་བསྟན་ཏེ། དགྲ་བཅོམ་པའི་འདུ་བྱེད་མ་རིག་པ་མེད་པ་ནི་བསོད་ནམས་སུ་ཉེ་བར་འགྲོ་བའི་རྣམ་པར་ཤེས་པ་ནས། མི་གཡོ་བ་ཉེ་བར་འགྲོ་བའི་རྣམ་པར་ཤེས་པའི་བར་དུ་ཡང་མི་

འགྱུར་བས་འདུ་བྱེད་ཀྱི་ཡན་ལག་འདི་ཡང་རིགས་པས་གྲུབ་སྟེ། འདིར་བརྗོད་མི་དགོས་སོ་ཞེས་བྱ་བར་གྱུར་ཏོ། །དེ་བཞིན་དུ་རིགས་པའི་སྒོ་ནས་སྐྱེ་བ་མེད་པར་རྒ་ཤི་མི་འབྱུང་ངོ་ཞེས་བྱ་བར་ཤེས་པས་སྐྱེ་བའི་ཡན་ལག་ཀྱང་བརྗོད་མི་དགོས་པར་འགྱུར་

བས་ཧ་ཅང་ཐལ་བར་འགྱུར་རོ། །སློབ་དཔོན་གྱིས་འདི་ནི་ཀླན་ཀར་མི་རུང་བ་ཁོ་ན་ཡིན་ལ་ཞེས་བྱ་བ་ནི་རང་གི་གཞུང་ལུགས་རྒྱས་པར་བཤད་དོ། །འདིར་ནི་ཇི་ལྟར་ན་འཇིག་རྟེན་ཕ་རོལ་ནས་འཇིག་རྟེན་འདིར་ཞེས་བྱ་བ་རྒྱས་པར་འབྱུང་བ་ནི་དེ་ལ་མ་རིག་པ་

Vol. 142 · folio 280a

དང་། འདུ་བྱེད་དག་གིས་ནི་འཇིག་རྟེན་འདིར་འབྲེལ་པར་བྱེད་དེ། འཇིག་རྟེན་འདི་པ་དེ་ཡང་རྣམ་པར་ཤེས་པ་དང་། མིང་དང་། གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བའི་ཡན་ལག་རྣམས་ཡིན་ནོ། །

སྲེད་པ་དང་། ལེན་པ་དང་། སྲིད་པ་རྣམས་ཀྱིས་ནི་འཇིག་རྟེན་ཕ་རོལ་དུ་སྦྱོར་བར་བྱེད་དེ། འཇིག་རྟེན་ཕ་རོལ་དེ་ཡང་སྐྱེ་བ་དང་རྒ་ཤི་ཡིན་ནོ། །རྟེན་ཅིང་འབྲེལ་བར་འབྱུང་བའི་མདོ་འདིར་ནི་གདུལ་བ་རྣམས་ལ་དོན་དེ་ཙམ་ཞིག་བརྗོད་པར་བཞེད་པའི་ཕྱིར་

ལ་དོན་དེ་ཡང་གོང་དུ་བཤད་ཟིན་པའི་ཕྱིར་ཏེ། སྔོན་དང་ཕྱི་མཐའ་བར་དག་ལ། །རྨོངས་པ་རྣམ་པར་བཟློག་ཕྱིར་རོ། །ཞེས་བྱ་བ་འདིས་བཤད་ཟིན་པའི་ཕྱིར་འདིར་ནི་ཀླན་ཀར་མི་རུང་བ་ཁོ་ན་ཡིན་ལ་ཞེས་བྱ་བ་རྒྱས་པར་མ་ཚང་བར་བསྟན་པ་ཡང་མ་ཡིན་ནོ་

ཞེས་བྱ་བའི་བར་དང་སྦྱར་རོ། །གཉིས་ཀ་ཡང་འདུས་བྱས་ཀྱི་ཆོས་ཐམས་ཅད་ཡིན་ཞེས་བྱ་བ་ནི་འདུས་བྱས་ཀྱི་ཆོས་དུས་གསུམ་པ་ཐམས་ཅད་རྟེན་ཅིང་འབྲེལ་པར་འབྱུང་བ་ཡིན་ལ་དེ་དག་ཉིད་རྟེན་ཅིང་འབྲེལ་པར་འབྱུང་བ་ཡང་ཡིན་པས་ཁྱད་པར་ཅི་ཡང་མེད་དོ། །

མ་འོངས་པ་མ་བྱས་པ་རྣམས་ཁོ་ན་ཡང་ཇི་ལྟར་ན་ཞེས་བྱ་བ་ནི་ཇི་ལྟར་འབྱུང་བར་འགྱུར་བའི་མིང་གིས་མ་འོངས་པ་རྣམས་ལ་འདུས་བྱས་ཞེས་བྱ་བ་ལྟར་རྟེན་ཅིང་འབྲེལ་པར་འབྱུང་བ་ཡང་དེ་དང་འདྲའོ་སྙམ་དུ་བསམས་པ་ཡིན་ནོ། །མངོན་པར་འདུ་བྱེད་པ་པའི་སེམས་

པས་ཞེས་བྱ་བ་ལ། མངོན་པར་འདུ་བྱེད་པ་པ་ཞེས་སྨོས་པ་ནི་སེམས་པ་ཐམས་ཅད་ཀྱི་རང་གི་མཚན་ཉིད་མངོན་པར་བརྗོད་པའི་ཕྱིར་ཏེ། དེ་ནི་རྣམ་པར་སྨིན་པ་མངོན་པར་འདུ་བྱེད་པའི་ཕྱིར་མངོན་པར་འདུ་བྱེད་པ་ཡིན་ནོ། །དེས་བསམས་པའི་ཕྱིར་ཏེ། ལྷར་

སྐྱེ་བར་ཤོག་ཤིག་མིར་སྐྱེ་བར་ཤོག་ཤིག་ཅེས་བྱ་བ་ལ་སོགས་པ་སྨོན་ལམ་བཏབ་པའི་ཕྱིར་རོ། །དེའི་ཕྱིར་མ་འོངས་པ་རྣམས་ལ་འདུས་བྱས་ཞེས་བྱ་བའི་འབྱུང་བར་འགྱུར་བའི་མིང་གིས་ནི་མ་ཡིན་ནོ། །བསམས་པ་དེ་འདོར་དུ་གཞུག་པའི་ཕྱིར་ཟག་པ་མེད་

Vol. 142 · folio 280b

པ་རྣམས་ཇི་ལྟར་ཞེས་སྨོས་ཏེ། མ་འོངས་པ་ཟག་པ་དང་བཅས་པ་གང་དག་ཡིན་པ་དེ་དག་ནི་དེ་ལྟར་བསམ་དུའང་རུང་ན། མ་འོངས་པ་ཟག་པ་མེད་པ་གང་དག་ཡིན་པ་དེ་དག་གོ། །ཇི་ལྟར་བསམ་དུ་རུང་། རྒོལ་བར་བྱེད་པས་སྨྲས་པ། དེ་དག་

ཀྱང་ཟག་པ་མེད་པའི་ཆོས་རྣམས་ཐོབ་པར་གྱུར་ཅིག་ཅེས་ཐོབ་པར་བྱ་བའི་ཕྱིར་སེམས་པ་དགེ་བས་བསམས་པ་དག་ཡིན་ནོ། །མྱ་ངན་ལས་འདས་པ་ལ་ཡང་ཐལ་བར་འགྱུར་རོ་ཞེས་བྱ་བ་ནི་མྱ་ངན་ལས་འདས་པ་ཡང་མྱ་ངན་ལས་འདས་པ་ཐོབ་པར་གྱུར་ཅིག་སྙམ་དུ་

ཐོབ་པར་བྱ་བར་བསམས་པའི་ཕྱིར་འདུས་བྱས་སུ་ཐལ་བར་འགྱུར་རོ། །དེ་ལྟར་དོན་དེ་མ་འོངས་པ་རྣམས་འདུས་བྱས་ཉིད་ཡིན་པར་རྣམ་པར་གཞག་ན་ཉེས་པ་ཡོད་པས་དེ་དང་རིགས་མཐུན་པའི་ཕྱིར་ཞེས་བྱ་བ་ཚུལ་གཞན་རྒྱས་པར་འགོད་པར་བྱེད་དེ། ཇི་

ལྟར་མ་འོངས་པའི་གཟུགས་གཟུགས་སུ་རུང་བར་འགྱུར་བ་གང་ཡིན་པ་རེ་ཞིག་གཟུགས་སུ་མི་རུང་ཡང་གཟུགས་སུ་རིགས་མཐུན་པའི་ཕྱིར་གཟུགས་ཞེས་བྱ་བ་དེ་བཞིན་དུ་ཆོས་མ་འོངས་པ་རྣམས་ཀྱང་རྟེན་ཅིང་འབྲེལ་པར་འབྱུང་བའི་ཆོས་སུ་རིགས་མཐུན་པས་

དེ་བཞིན་དུ་མ་འོངས་པ་རྣམས་ལ་རྟེན་ཅིང་འབྲེལ་ཏེ་བྱུང་བའོ་ཞེས་བསྟན་པ་ཡིན་ནོ། །རྒྱུ་དང་འབྲས་བུར་གྱུར་པའི་ཕྱིར་ཞེས་བྱ་བ་ནི་འདི་ལྟར་རྒྱུ་ཡང་ཡན་ལག་དེ་ཁོ་ན་ཡིན་པས་སོ། །དེ་ལྟ་ཡིན་ཡང་ལྟོས་པའི་བྱེ་བྲག་གིས་རྣམ་པར་གཞག་པ་མེད་པ་ཡང་མ་ཡིན་

ཞེས་བྱ་བ་ནི་ལྟོས་པའི་བྱེ་བྲག་གིས་རྟེན་ཅིང་འབྲེལ་བར་འབྱུང་བ་དང་། རྟེན་ཅིང་འབྲེལ་བར་བྱུང་བ་རྣམ་པར་མི་གནས་པ་ཡང་མ་ཡིན་ཏེ། ཚུ་རོལ་དང་ཕ་རོལ་ལྟ་བུ་དང་། །རྒྱུ་དང་འབྲས་བུ་ལྟ་བུའོ། །རྒྱུ་དང་འབྲས་བུ་བཞིན་དང་ཕ་དང་བུ་བཞིན་ནོ་ཞེས་བྱ་བ་

དེ་ལས་རྒྱུ་དང་འབྲས་བུ་ནི་དཔེར་ན་ས་བོན་དང་མྱུ་གུ་ལ་སོགས་པ་ཇི་ལྟར་གང་ལ་ལྟོས་ནས་རྒྱུར་རྣམ་པར་གཞག་པ་དེ་ལ་ལྟོས་ནས་འབྲས་བུ་མ་ཡིན་ལ། གང་ལ་ལྟོས་ནས་འབྲས་བུ་རྣམ་པར་གཞག་པ་དེ་ལ་ལྟོས་ནས་རྒྱུ་མ་ཡིན་གྱི་འོ་ན་ཅི་ཞེ་ན། འབྲས་བུ་

Vol. 142 · folio 281a

ལ་ལྟོས་ནས་རྒྱུར་རྣམ་པར་གཞག་ལ། རྒྱུ་ལ་ལྟོས་ཀྱང་འབྲས་བུ་ཡིན་པ་དང་། ཇི་ལྟར་གང་ལ་ལྟོས་ནས་ཕ་ཡིན་པ་དེ་ལ་ལྟོས་ནས་བུ་མ་ཡིན་ལ། གང་ལ་ལྟོས་ནས་བུ་ཡིན་པ་དེ་ལ་ལྟོས་ནས་ཕ་མ་ཡིན་གྱི་འོ་ན་ཅི་ཞེ་ན། བུ་ལ་

ལྟོས་ནས་ཕ་ཞེས་བྱ་ཞིང་ཅིག་ཤོས་ལ་ལྟོས་ནས་ཀྱང་བུ་ཞེས་བྱ་ལ་དེ་དག་རྣམ་པར་མི་གནས་པ་ཡང་མ་ཡིན་པ་དེ་དང་འདྲའོ། །མུ་དང་པོ་ནི་ཆོས་མ་འོངས་པ་རྣམས་སོ་ཞེས་བྱ་བ་ནི་ཆོས་གཞན་གྱི་རྒྱུ་ཡིན་པའི་ཕྱིར་རྟེན་ཅིང་འབྲེལ་པར་འབྱུང་བ་ཡིན་ཏེ། འདི་

ལས་འབྱུང་བའི་ཕྱིར་རོ། །རྟེན་ཅིང་འབྲེལ་པར་འབྱུང་བ་ནི་མ་ཡིན་ཏེ། མ་བྱུང་བའི་ཕྱིར་རོ། །གཉིས་པ་ནི་དགྲ་བཅོམ་པའི་ཆོས་ཐ་མ་ཞེས་བྱ་བ་ནི་བྱུང་ཟིན་པའི་ཕྱིར་དང་། དེ་ལས་འབྲས་བུ་མི་འབྱུང་བའི་ཕྱིར་རོ། །གསུམ་པ་ནི་དེ་ལས་གཞན་པ་

ཞེས་བྱ་བ་ནི་དགྲ་བཅོམ་པའི་ཐ་མ་དག་ལས་གཞན་པའི་ཆོས་འདས་པ་དང་ད་ལྟར་བྱུང་བའི་ཆོས་རྣམས་སོ། །བཞི་པ་ནི་ཆོས་འདུས་མ་བྱས་རྣམས་སོ་ཞེས་བྱ་བ་ནི་དེ་དག་ལ་འབྲས་བུ་མེད་པའི་ཕྱིར་དང་། མི་སྐྱེ་བའི་ཆོས་དང་ལྡན་པའི་ཕྱིར་རོ། །གྲག་གོ་

ཞེས་བྱ་བ་ནི་མི་སྲིད་པ་ཡིན་ནོ། །ཅི་འདི་དག་གང་ཞིག་གང་འདོད་པ་འདོད་རྒྱལ་དུ་འཆད་པ་ཞིག་གམ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བ་གནས་སྐབས་པ་ཞེས་བྱ་བ་ནས་རྟེན་ཅིང་འབྲེལ་བར་འབྱུང་བ་ཡིན་ལ། རྟེན་ཅིང་འབྲེལ་པར་འབྱུང་བའི་ཆོས་དེ་དག་མ་

ཡིན་པའང་ཡོད་ཅེས་བྱ་བའི་བར་དེ་ལྟ་བུ་ལ་སོགས་པའོ། །སྔོན་གྱི་མཐའ་མི་ཤེས་པ་ཞེས་བྱ་བ་ནི་གང་གི་ཕྱིར་མ་རིག་པ་ཁོ་ན་བཤད་ཀྱི། ཕུང་པོ་གཞན་དག་ནི་མ་ཡིན་པ་དེའི་ཕྱིར་མ་རིག་པ་ཁོ་ན་ཡན་ལག་ཡིན་ནོ་ཞེས་བྱ་བ་འདི་ནི་ངེས་པའི་དོན་ཡིན་ནོ་ཞེས་

བྱ་བར་སྟོན་ཏོ། །ངེས་པའི་དོན་ཞེས་བྱ་བ་ནི་རྣམ་པར་ཕྱེ་བའི་དོན་ཏོ། །གླང་པོ་ཆེའི་རྗེས་ལྟ་བུ་ནི་མདོ་ཞིག་གོ། །དེ་དག་ལ་ནི་གཟུགས་ལ་སོགས་པ་གཞན་ཡང་ཡོད་དེ་ཞེས་བྱ་བ་ནི་སྐྲ་ལ་སོགས་པ་དེ་དག་ལ་སའི་ཁམས་ཙམ་ཁོ་ནར་མ་ཟད་ཀྱི་ཞེས་བྱ་བ་

Vol. 142 · folio 281b

ཡིན་ནོ། །དེ་བཞིན་དུ་འདིར་ཡང་གཙོ་བོ་ཇི་ལྟ་བ་བཞིན་དུ་བསྟན་པ་ཡིན་ནོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོ་འདིར་ཡང་བཅུ་གཉིས་དང་ལྡན་པའི་ཕུང་པོ་ལྔའི་གནས་སྐབས་དག་ཏུ་གང་ཞིག་གཙོ་བོ་ཡིན་པ་དེ་བསྟན་པ་ཡིན་ཏེ། མ་རིག་པ་གཙོ་

བོ་ཡིན་པའི་སྐབས་སུ་ནི་མ་རིག་པ་ཞེས་བསྟན་པ་ཡིན་ལ། འདུ་བྱེད་ལ་སོགས་པ་གཙོ་བོ་ཡིན་པའི་གནས་སྐབས་དག་ཏུ་ནི་འདུ་བྱེད་ལ་སོགས་པ་བསྟན་པ་ཡིན་པར་ཟད་ཀྱི་དེ་ལ་ནི་གཟུགས་དང་ཚོར་བ་ལ་སོགས་པ་ཆོས་གཞན་དག་ཀྱང་ཡོད་དོ། །དེ་ལས་ནི་

གང་གིས་ན་དེ་དག་མ་རྫོགས་པར་བསྟན་པར་གྱུར་པ་སའི་ཁམས་ཀྱིས་སྐྲ་ལ་སོགས་པ་སྟོན་པ་ནི་མ་ཡིན་གྱི་ཞེས་བྱ་བ་རྒྱས་པར་འབྱུང་བ་ནི་མདོ་དེ་ལས་ནི་གང་གིས་ནི་སྐྲ་ལ་སོགས་པ་དེ་དག་མ་རྫོགས་པར་བསྟན་པར་འགྱུར་བ་སྐྲ་ལ་སོགས་པ་གང་ཞེ་ན། སའི་

ཁམས་སོ་ཞེས་སའི་ཁམས་ཀྱིས་སྐྲ་ལ་སོགས་པ་སྟོན་པ་ནི་མ་ཡིན་ནོ། །དེ་དག་ལ་ནི་གཟུགས་ལ་སོགས་པ་གཞན་དག་ཀྱང་ཡོད་པས་སྐྲ་ལ་སོགས་པ་ནི་གཟུགས་ལ་སོགས་པའི་ངོ་བོ་ཉིད་ཀྱང་ཡིན་གྱི་སའི་ཁམས་འབའ་ཞིག་གི་ངོ་བོ་ཉིད་ཡིན་པ་ནི་མ་

ཡིན་ནོ། །འོན་ཀྱང་དེ་ལས་ནི་སའི་ཁམས་གང་ཞེ་ན། སྐྲ་དང་སྤུ་དག་གོ་ཞེས་སྐྲ་ལ་སོགས་པ་དག་ཁོ་ནས་སའི་ཁམས་སྟོན་པ་ཡིན་ཏེ། སྐྲ་ལ་སོགས་པ་མ་གཏོགས་པར་བོར་ཏེ་ནང་གི་སའི་ཁམས་མེད་པས་སའི་ཁམས་འདི་རྫོགས་པར་བསྟན་

པ་ཁོ་ན་ཡིན་ནོ། །དེ་བཞིན་དུ་འདི་ལས་ཀྱང་མ་རིག་པ་ལ་སོགས་པ་རྣམས་ཞེས་བྱ་བ་ནི་དེ་བཞིན་དུ་མདོ་འདི་ལས་ཀྱང་མ་རིག་པ་དང་འདུ་བྱེད་དང་རྣམ་པར་ཤེས་པ་ལ་སོགས་པ་ཡོངས་སུ་རྫོགས་པ་ཁོ་ནར་བསྟན་པ་ཡིན་གྱི་ལྷག་མ་དང་བཅས་པར་ནི་

མ་ཡིན་ནོ། །མཆི་མ་དང་མཆིལ་མ་དང་སྣབས་ལ་སོགས་པ་དག་ལ་ཞེས་བྱ་བ་ནི་མདོ་དེ་ལས་མཆི་མ་དང་མཆིལ་མ་དང་སྣབས་ལ་སོགས་པ་མི་འབྱུང་སྟེ། དེ་ལྟ་བས་ན་དེ་དག་ལ་ཡོད་པའི་སའི་ཁམས་མ་བཤད་པས་ལྷག་མ་དང་བཅས་པ་ཁོ་

Vol. 142 · folio 282a

ན་ཞེས་སྟོན་པར་བྱེད་དོ། །ཡང་ན་གལ་ཏེ་དེ་ཁོ་ན་དང་འདྲ་བར་བསྟན་པར་ནུས་ན་མ་རིག་པའི་ལྷག་མ་ཡོད་ལ་རག་གོ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་ཇི་ལྟར་མ་བཤད་པའི་ཕྱིར་སའི་ཁམས་ཀྱི་ལྷག་མ་མཆིལ་མ་དང་སྣབས་

ལ་སོགས་པ་ལ་ཡོད་པ་དེ་ཁོ་ན་དང་འདྲ་བར་བསྟན་པར་ནུས་ན། མ་རིག་པའི་ལྷག་མ་ཡོད་ལ་རག་སྟེ། གལ་ཏེ་ཞེས་བྱ་བའི་སྒྲ་ནི་བསྟན་པར་མི་ནུས་སོ་སྙམ་ནས་སྦྱོར་བ་ཡིན་ཏེ། སྔོན་གྱི་མཐའ་མི་ཤེས་པ་དང་། ཕྱི་མའི་མཐའ་མི་ཤེས་པ་དང་། མཐའི་

བར་མི་ཤེས་པ་དང་། སངས་རྒྱས་མི་ཤེས་པ་དང་། ཆོས་མི་ཤེས་པ་དང་། དགེ་འདུན་མི་ཤེས་པ་ཞེས་བྱ་བ་དེ་ལྟ་བུ་ལ་སོགས་པས་མི་ཤེས་པའི་གནས་ཐམས་ཅད་བཤད་ཟིན་པའི་ཕྱིར་རོ། །མ་རིག་པ་ནི་ཕུང་པོ་ལྔའི་གནས་སྐབས་ཡིན་ནོ་ཞེས་ཚོར་བ་

ལ་སོགས་པ་རིགས་པ་ཐ་དད་པ་ནི་མ་རིག་པར་ཅིའི་ཕྱིར་བསྟན་ཏེ། ཚོར་བ་ལ་སོགས་པ་ནི་མ་རིག་པ་ཉིད་དུ་མི་རུང་ངོ་། །ཡོད་པ་དང་མེད་པར་ངེས་པ་ཞེས་བྱ་བ་ནི་གང་ཞིག་ཡོད་དམ་མེད་ན་གོ་རིམས་བཞིན་དུ་ཡང་ཡོད་པ་དང་མེད་པར་ངེས་པ་ཁོ་ན་ཡན་ལག་ཡིན་ཏེ།

མ་རིག་པ་ཡོད་པ་ན་འདུ་བྱེད་རྣམས་ཡོད་ལ་དེ་མེད་ན་དེ་དག་ཀྱང་མེད་པས་མ་རིག་པ་ཁོ་ན་ཡན་ལག་ཡིན་གྱི་ཚོར་བ་ལ་སོགས་པར་ནི་མ་ཡིན་ཏེ། དགྲ་བཅོམ་པ་རྣམས་ལ་དེ་དག་ཡོད་ཀྱང་རྣམ་པར་ཤེས་པའི་ཡན་ལག་སྐྱེད་པར་བྱེད་པའི་འདུ་བྱེད་གང་དག་ཡིན་པ་མི་

འབྱུང་ངོ་ཞེས་བྱ་བའི་ཐ་ཚིག་གོ། །དེ་ལྟ་བས་ན་ཕུང་པོ་ལྔ་ཡོད་ཀྱང་འདུ་བྱེད་རྣམས་ཀྱང་མི་འབྱུང་ཞེས་བྱ་བ་རྒྱས་པར་སྨོས་སོ། །དགྲ་བཅོམ་པ་རྣམས་ཀྱི་གནས་སྐབས་ན་ཕུང་པོ་ལྔ་ཡོད་ཀྱང་། བསོད་ནམས་ཀྱི་ཉེ་བར་འགྲོ་བ་ན་མི་གཡོ་བར་ཉེ་བར་འགྲོ་

བའི་བར་གྱི་རྣམ་པར་ཤེས་པ་མི་འབྱུང་སྟེ། ཉིང་མཚམས་སྦྱོར་བའི་རྣམ་པར་ཤེས་པ་མི་འབྱུང་ངོ་ཞེས་བྱ་བའི་ཐ་ཚིག་གོ། །སྐྱེ་བ་དེ་དང་དེར་ཉེ་བར་འགྲོ་བས་ན་ཉེ་བར་འགྲོ་བའོ། །བསོད་ནམས་ཀྱིས་ཉེ་བར་འགྲོ་བས་ན་བསོད་ནམས་ཀྱིས་ཉེ་བར་འགྲོ་བའི་

Vol. 142 · folio 282b

རྣམ་པར་ཤེས་པ་སྟེ། མི་གཡོ་བར་ཉེ་བར་འགྲོ་བའི་བར་དུ་ཡང་དེ་དང་འདྲའོ། །དེ་བཞིན་དུ་མ་རིག་པ་མེད་པའི་གནས་སྐབས་ན་ཕུང་པོ་ལྔ་དག་ཡོད་ཀྱང་སྲིད་པ་དང་ལེན་པ་ལ་སོགས་པ་ཡང་མི་འབྱུང་བས་མདོའི་དོན་ནི་ཇི་སྐད་བསྟན་པ་ཁོ་ན་ཡིན་ཏེ། མ་རིག་

པ་ལ་སོགས་པ་ཇི་ལྟར་བསྒྲགས་པ་ཁོ་ན་ལྟར་གཟུང་ངོ་ཞེས་བྱ་བའི་ཐ་ཚིག་གོ། །དེའི་ཕྱིར་ཕུང་པོ་གཞན་ཡོད་ཀྱང་འདུ་བྱེད་ལ་སོགས་པའི་རྐྱེན་མ་ཡིན་པས་དེ་དག་ནི་ཡན་ལག་མ་ཡིན་ཏེ། མདོ་ནི་འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པ་དང་།

བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་ཏེ་ཞེས་བྱ་བ་ལ་སོགས་པ་དང་། ཚེ་དང་

ལྡན་པ་ཤཱ་རིའི་བུས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །བྱམས་པ་དེང་འདིར་བཅོམ་ལྡན་འདས་ཀྱིས་སཱ་ལུ་ལྗང་པ་ལ་གཟིགས་ནས་དགེ་སློང་རྣམས་ལ་མདོ་འདི་གསུངས་སོ། །དགེ་སློང་དག་སུས་རྟེན་ཅིང་འབྲེལ་

པར་འབྱུང་བ་མཐོང་བ་དེས་ཆོས་མཐོང་ངོ་། །སུས་ཆོས་མཐོང་བ་དེས་སངས་རྒྱས་མཐོང་ངོ་ཞེས་བཀའ་སྩལ་ནས། བཅོམ་ལྡན་འདས་ཅང་མི་གསུང་བར་གྱུར་ནས། བྱམས་པ་བདེ་བར་གཤེགས་པས་བཀའ་སྩལ་པའི་མདོ་དེའི་དོན་རྟེན་ཅིང་འབྲེལ་པར་

འབྱུང་བ་ནི་གང་། ཆོས་ནི་གང་། སངས་རྒྱས་ནི་གང་། ཇི་ལྟར་རྟེན་ཅིང་འབྲེལ་པར་འབྱུང་བ་མཐོང་བས་ཆོས་མཐོང་ཞེས་བྱ་བ་ལ་སོགས་པ་དང་། རྟེན་ཅིང་འབྲེལ་པར་འབྱུང་བ་ཞེས་བྱ་བ་ནི་གང་འདི་མ་རིག་པ་ཞེས་བྱ་བ་ལ་སོགས་པ་གསུངས་སོ། །

དེ་གསུངས་ནས་མདོ་དེ་ལས། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་། ཆོས་རྣམས་ཀྱི་ཆོས་ཉིད་འདི་ནི་འདུག་པའོ་ཞེས་བྱ་བ་ནས། གང་འདི་ཆོས་ཉིད་དང་། ཆོས་གནས་པ་ཉིད་དང་། ཆོས་ངེས་པར་གྱུར་པ་ཉིད་དང་། རྟེན་

Vol. 142 · folio 283a

ཅིང་འབྲེལ་པར་འབྱུང་བ་ཉིད་དང་། དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཡང་དག་པ་ཉིད་དང་། བདེན་པ་ཁོ་ན་དང་། མ་ནོར་བ་ཉིད་དང་།

ཕྱིན་ཅི་མ་ལོག་པ་ཉིད་ཅེས་བྱ་བ་ལ་སོགས་པ་འདི་གསུངས་ཏེ། བཅོམ་ལྡན་འདས་བྱམས་པའི་བཀའ་ཡིན་ནོ། །གལ་ཏེ་ཆོས་མ་འོངས་པ་རྣམས་རྟེན་ཅིང་འབྲེལ་པར་འབྱུང་བ་མ་ཡིན་ནོ་ཞེས་བྱ་བ་ནི་མུ་དང་པོ་ནི་ཆོས་མ་འོངས་པ་རྣམས་སོ་ཞེས་གང་བཤད་

པ་ཡིན་ནོ། །མདོ་དང་འགལ་ལོ་ཞེས་བྱ་བ་ནི་སྐྱེ་བ་དང་རྒ་ཤི་དག་རྟེན་ཅིང་འབྲེལ་བར་འབྱུང་བ་ཉིད་མ་ཡིན་པར་འགྱུར་བ་ཞིག་ན། མ་རིག་པ་ནས་རྒ་ཤིའི་བར་ནི་ཡིན་པར་ཡང་བཤད་དོ། །ཡང་ན་ཞེས་བྱ་བ་རྒྱས་པར་འབྱུང་བ་ནི་འོན་ཏེ་སྐྱེ་བ་དང་རྒ་ཤིའི་ཡན་

ལག་དག་ཀྱང་རྟེན་ཅིང་འབྲེལ་པར་བྱུང་བ་ཡིན་པར་འདོད་ན་ནི་དེ་གཉིས་མ་འོངས་པའི་དུས་སུ་རྣམ་པར་གཞག་པར་མི་འདོད་པར་བྱ་དགོས་པའི་ཕྱིར། སྔོན་དང་ཕྱི་མཐར་གཉིས་གཉིས་དང་། བར་དུ་བརྒྱད་ཅེས་བྱ་བ་ཆ་གསུམ་དུ་དགོད་པ་རྣམ་པར་ཉམས་

པར་འགྱུར་རོ། །སྡེ་པ་གཞན་དག་ན་རེ་ཞེས་བྱ་བ་ནི་ས་སྟོན་པ་རྣམས་སོ། །འབྱུང་བའི་འདུས་བྱས་ཀྱི་མཚན་ཉིད་ཡིན་པའི་ཕྱིར་རོ་ཞེས་བྱ་བ་ནི་སྡེ་པ་གཞན་དག་གིས་རྟེན་ཅིང་འབྲེལ་པར་འབྱུང་བ་ཞེས་བྱ་བའི་འབྱུང་ཞེས་བྱ་བ་གང་ཡིན་པ་སྟེ། གསུམ་

པོ་འདི་དག་ནི་འདུས་བྱས་ཀྱི་མཚན་ཉིད་ཡིན་ཏེ། འདུས་བྱས་ལ་ནི་སྐྱེ་བ་ཡང་མངོན་ནོ། །འཇིག་པ་དང་གནས་པ་གཞན་དག་ཏུ་འགྱུར་བ་ཡང་མངོན་ནོ་ཞེས་བྱ་བ་འདུས་བྱས་ཀྱི་མཚན་ཉིད་བཤད་པ་གང་ཡིན་པ་དེ་རྟག་པ་ཡིན་པར་བརྟགས་པ་དེ་ནི་འདུས་

བྱས་ཀྱི་མཚན་ཉིད་ཡིན་པའི་ཕྱིར་ན་མི་རྟག་པ་ཡིན་ནོ་སྙམ་དུ་བསམས་པ་ཡིན་ནོ། །གལ་ཏེ་ཁྱོད་མཚན་ཉིད་ཀྱང་རྟག་པ་ཡིན་ནོ་ཞེས་སྨྲས་ན། དེའི་ཕྱིར་དངོས་པོ་གཞན་རྟག་པ་ནི་མི་རྟག་པའི་མཚན་ཉིད་ཡིན་པར་ཡང་མི་རུང་ངོ་ཞེས་བྱ་བ་སྨོས་ཏེ། མྱ་ངན་ལས་

Vol. 142 · folio 283b

འདས་པའམ། ནམ་མཁའ་ནི་མི་རྟག་པ་འགའི་མཚན་ཉིད་ཀྱང་མ་ཡིན་ཏེ། སྐྱེ་བའི་སྔོན་རོལ་ན་ཡང་མཚན་ཉིད་ཡོད་པས་སུའི་མཚན་ཉིད་ཡིན། མཚན་གཞི་ཞིག་ན་ཡང་གང་གི་ཡིན་ཏེ། རུང་བ་མ་ཡིན་ནོ། །འབྱུང་བ་ཞེས་བྱ་བ་རྒྱས་པར་འབྱུང་བ་ནི་

འབྱུང་བ་ཞེས་བྱ་བ་ནི་མདོ་སྡེ་པའི་ལུགས་ཀྱིས་མ་བྱུང་བ་ལས་བྱུང་བའི་མཚན་ཉིད་ཡིན་ཏེ། ཆོས་སྐྱེ་བ་དེའི་ཚེ་དེ་ཁོ་ནའི་ཡིན་ན་ཇི་ལྟར་འབྲས་ཆན་དང་། ཚོས་པར་བྱེད་པ་པོ་དང་བྱ་བའི་མཚན་ཉིད་ཀྱི་འབྲེལ་པ་ཡོད་པས་འབྲས་ཆན་ཚོས་པ་ཞེས་བྱ་བ་

ལྟར་སྐྱེ་བ་འདུས་མ་བྱས་འདི་ཁྱོད་ཀྱི་གཞུང་ལུགས་ལྟར་ན་མ་རིག་པ་ལ་སོགས་པ་དང་ཅི་ཞིག་འབྲེལ། ནམ་མཁའ་དང་གཟུགས་དག་ནི་སྐྱེ་བའི་མཚན་ཉིད་ཀྱི་འབྲེལ་པ་མེད་པས་གཟུགས་ཀྱི་ནམ་མཁའ་ཞེས་མི་བྱའོ། །དེ་བཞིན་དུ་འདི་མ་རིག་པ་

ལ་སོགས་པ་དང་ཅི་ཞིག་འབྲེལ་ན་གང་གི་ཕྱིར་མ་རིག་པ་ལ་སོགས་པ་དེ་དག་རྟེན་ཅིང་འབྲེལ་པར་འབྱུང་བ་ཞེས་བརྗོད་པར་འགྱུར། ཚིག་གི་དོན་ཀྱང་ནུས་པ་མེད་པར་འགྱུར་རོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་ཞེས་བྱ་བའི་ཚིག་གི་དོན་ནི་རྐྱེན་དང་ཕྲད་

ནས་འབྱུང་བ་ཡིན་ན། དེ་ཇི་ལྟར་རྟག་པ་ཞེས་ཀྱང་བྱ་ལ་རྟེན་ཅིང་འབྲེལ་པར་འབྱུང་བ་ཞེས་ཀྱང་བྱ། རྟེན་ཅིང་འབྲེལ་པ་ནི་ཕྲད་པའི་དོན་ཏེ་ཞེས་བྱ་བ་ནི་ཕྲད་པ་སྟོན་པར་བྱེད་པའི་ཡིན་ནོ་ཞེས་བྱ་བའི་ཐ་ཚིག་གོ། །ཨེ་ཏི་ནི་འགྲོ་བའི་དོན་ཏོ་ཞེས་བྱ་བ་ནི་སྐད་ཀྱི་

དབྱིངས་ཀྱི་དོན་ཡིན་ནོ། །ཡོངས་སུ་བསྒྱུར་བའི་ཕྱིར་ཞེས་བྱ་བ་ནི་སྐད་ཀྱི་དབྱིངས་དོན་དུ་མ་ཡིན་པའི་ཕྱིར་རོ། །རྟེན་ཅིང་འབྲེལ་པ་ཞེས་བྱ་བ་ཉེ་བར་བསྒྱུར་བ་ནི་ཕྲད་པ་སྟོན་པར་བྱེད་པ་ཡིན་པས་ཨེ་ཏི་ཞེས་བྱ་བ་འདི་འགྲོ་བའི་དོན་བོར་ནས་ཕྲད་པའི་དོན་ཡིན་

པར་འགྱུར་རོ། །པ་ད་ནི་ཡོད་པའི་དོན་ཏོ་ཞེས་བྱ་བ་ནི་པ་ད་ཡོད་པའི་དོན་ཡིན་ནོ། །དེས་ན་ཞེས་བྱ་བ་ནི་གཏན་ཚིགས་སོ། །དུས་སྔར་སྟེ་ཞེས་བྱ་བའི་རྐྱེན་ཡིན་ཏེ་ཞེས་བྱ་བ་ནི་བྱེད་པ་པོ་མཚུངས་པ་དག་ལ་དུས་སྔར་ཞེས་འབྱུང་བའི་ཕྱིར་རོ། །དེ་ནི་སྐྱེ་བའི་

Vol. 142 · folio 284a

སྔོན་རོལ་ན་འགའ་ཡང་མེད་ཅེས་བྱ་བ་ནི་མདོ་སྡེ་པའི་གཞུང་ལུགས་ལྟར་ནའོ། །བྱེད་པ་པོ་མེད་པའི་བྱ་བ་ཡང་མེད་དོ་ཞེས་བྱ་བ་ནི་བྱེད་པ་པོ་ཡོད་ན་བྱ་བ་རྣམ་པར་འཇོག་པའི་ཕྱིར་རོ། །འདིར་སྨྲས་ཏེ་ཞེས་བྱ་བ་ནི་སློབ་དཔོན་གྱིས་བརྡ་སྤྲོད་པ་པའི་

ཀླན་ཀ་འདི་ཚིགས་སུ་བཅད་པར་བསྡེབས་པ་ཡིན་ཏེ། གལ་ཏེ་འབྱུང་བའི་སྔོན་རོལ་ན་ཕྲད་ནས་ཏེ་ཕྲད་པར་འགྱུར་རོ་ཞེ་ན། མེད་ཕྱིར་རུང་བ་མ་ཡིན་ནོ། །བྱེད་པ་པོ་མེད་པ་ཁྲུས་ལ་སོགས་པའི་བྱ་བ་བྱེད་པ་ནི་མ་མཐོང་ངོ་། །གལ་ཏེ་ལྷན་ཅིག་ཅེས་བྱ་བ་ནི་འོན་ཏེ་

རྟེན་ཅིང་འབྲེལ་པ་ཞེས་བྱ་བའི་བྱ་བ་དང་། འབྱུང་བ་ཞེས་བྱ་བའི་བྱ་བ་ལྷན་ཅིག་བྱེད་དོ་སྙམ་དུ་སེམས་ན། དེ་ལྟ་ན་ནི་འདིར་ཏེ་ཞེས་བྱ་བའི་རྐྱེན་མ་གྲུབ་པོ། །ཅིའི་ཕྱིར་ཞེ་ན། སྔོན་དུ་བྱེད་ཕྱིར་ཏེ། བྱེད་པ་པོ་མཚུངས་པ་དག་ལ་དུས་སྔར་ཏེ་ཞེས་འབྱུང་བའི་ཕྱིར་ཏེ་

ཞེས་བྱ་བའི་རྐྱེན་ནི་དུས་སྔར་བྱ་བ་ཡིན་ནོ། །དེ་བས་ན་སྟེ་ཞེས་བྱ་བའི་རྐྱེན་གྲུབ་པར་མི་འགྱུར་རོ། །ཡང་སྐྱེ་ན་ནི་ཞེས་བྱ་བ་ནི་སྐྱེས་ཟིན་པ་ཞིག་ཡང་སྐྱེ་བར་རྟོགས་ན་ཐུག་པ་མེད་པར་ཐལ་བར་འགྱུར་ཏེ། སྐད་ཅིག་མ་གཉིས་པ་དང་། གསུམ་པ་ལ་ཡང་ཡང་དང་

ཡང་དུ་སྐྱེ་བས་མཐའ་ཐུག་པ་མེད་པར་ཐལ་བར་འགྱུར་རོ། །ཅི་སྟེ་མ་འོངས་པ་ཞིག་ཅེས་བྱ་བ་རྒྱས་པར་འབྱུང་བ་ནི་མ་འོངས་པ་ནི་བདག་ཉིད་དུ་མ་རེད་པ་ཡིན་པས་མེད་པ་བདག་ཉིད་དུ་རེད་པར་མ་གྱུར་པའི་དངོས་པོ་ཇི་ལྟར་བྱེད་པ་ཉིད་དུ་འགྲུབ། ཡང་ཇི་ལྟར། བྱེད་

པོ་མེད་པའི་བྱ་བ་འགྲུབ། །གང་གི་ཕྱིར་དེ་ལྟར་ཡིན་པ་དེའི་ཕྱིར་སྒྲ་པ་སྟེ། སྒྲ་རིག་པའི་ལྟར་ན་གནས་སྐབས་གང་སྐྱེ་བ་ཁོ་བོ་ཅག་ཀྱང་གནས་སྐབས་དེ་ཉིད་དང་ཕྲད་ནས་ཞེས་བྱ་བ་ཡིན་ནོ། །གནས་སྐབས་གང་ཞིག་ཅེས་བྱ་བ་ནི་འདི་ལ་གནས་སྐབས་གང་ཡོད་

པས་ན་གནས་སྐབས་གང་ཞིག་གོ། །སྐྱེ་བ་ལ་མངོན་དུ་ཕྱོགས་པའི་མ་འོངས་པ་སྟེ་ཞེས་བྱ་བ་ནི་མ་འོངས་པ་ཐམས་ཅད་སྐྱེ་བ་མ་ཡིན་གྱི། འོ་ན་ཅི་ཞེ་ན། སྐྱེ་བ་ལ་མངོན་དུ་ཕྱོགས་པ་སྟེ། སྐྱེ་བར་འདོད་པ་ཞེས་བྱ་བའི་ཐ་ཚིག་གོ། །གནས་སྐབས་དེ་ཁོ་ན་

Vol. 142 · folio 284b

སྟེ། སྐྱེ་བ་ལ་མངོན་དུ་ཕྱོགས་པའི་གནས་སྐབས་ཁོ་ན་རྐྱེན་དེ་དང་ཕྲད་ནས་ཞེས་བྱའོ། །གྲུབ་པ་མ་ཡིན་ཏེ་ཞེས་བྱ་བ་འབྱུང་བ་ལ། འདི་ནི་སྒྲ་པ་རྣམས་ཀྱི་ཡིན་པས་སྒྲ་པའི་སྟེ་བྱེད་པ་པོ་དང་བྱ་བ་རྣམ་པར་འཇོག་པའོ། །ཅིའི་ཕྱིར་ཞེ་ན། སྐྱེ་བོ་བྱ་བ་བྱེད་པ་པོའི་

ངོ་བོར་བརྟགས་པའི་དོན་ལས་སྐྱེ་ཞེས་བྱ་བ་བྱ་བའི་ངོ་བོར་བརྟགས་པ་གཞན་ཉིད་ཡིན་པར་མ་མཐོང་བའི་ཕྱིར་རོ། །དེ་ལྟ་བས་ན་སྐྱེའོ་ཞེས་བྱ་བ་དང་། འབྱུང་ངོ་ཞེས་བྱ་བ་དང་། བརྟེན་ནས་ཞེས་བྱ་བ་དེ་ལྟ་བུ་ལ་སོགས་པ་དག་ལ་ཀླན་ཀ་མེད་དོ། །འདིར་བཤད་

པ་ཞེས་བྱ་བ་ནི་དེ་དག་གི་གྲུབ་པའི་མཐས་ལུགས་སྟོན་པར་བྱེད་པ་ཡིན་ནོ། །ཇི་ལྟར་མེད་པ་སྐྱེ་བ་ལྟར། །ཞེས་བྱ་བ་རྒྱས་པར་འབྱུང་བ་ནི་ཇི་ལྟར་དངོས་པོ་མེད་པ་བདག་ཉིད་དུ་མ་རེད་པ་སྐྱེ་བ་ལྟར། མེད་པ་ཕྲད་པའང་དེ་དང་འདྲ། །ཞེས་བྱ་བའི་ཐ་ཚིག་གོ། །འོན་

ཏེ་བདག་ཉིད་དུ་རེད་ཟིན་པ་སྐྱེའོ་ཞེས་བྱ་བར་རྟོག་ན། སྐྱེས་པ་སྐྱེ་ན་མཐའ་ཐུག་མེད། །སྐྱེས་ཟིན་པ་ཡང་ཡང་སྐྱེ་ན་ནི་ཐུག་པ་མེད་དེ་མཐའ་ཐུག་པ་མེད་པར་ཐལ་བར་འགྱུར་རོ། །འདི་ལྟར་གྲངས་ཅན་པའི་གཞུང་ལུགས་ཀྱི་རྗེས་སུ་འབྲངས་ན་ཡོད་པ་ཁོ་ན་

སྐྱེའི་མེད་པ་ནི་མ་ཡིན་ནོ་ཞེས་འབྱུང་བས་དེའི་དབང་དུ་བྱས་ཏེ། འོན་ཏེ་སྔ་ན་ཡོད་ནའང་རུང་། །ཞེས་བྱ་བ་སྨོས་སོ། །འོན་ཏེ་ཞེས་བྱ་བའི་སྒྲ་ནི་གཞུང་ལུགས་ཐ་དད་པའི་དོན་ཡིན་ཏེ། གལ་ཏེ་ཁྱོད་ཀྱི་ཕྱོགས་ཡོད་པ་སྐྱེའོ་ཞེས་བྱ་བ་ཡིན་ན་ཁོ་བོ་ཅག་གི་

ཡང་ཡོད་པ་སྐྱེ་སྟེ་བྱེ་བྲག་ཏུ་སྨྲ་བའི་ལུགས་ཀྱིས་མ་འོངས་པ་ཡོད་པའི་ཕྱིར་དང་། མདོ་སྡེ་པའི་ལུགས་ཀྱིས་ཀྱང་སྐྱེད་པར་བྱེད་པའི་ཆོས་ས་བོན་ཡོད་པའི་ཕྱིར་རོ། །དེའི་ཕྱིར་སྔར་ཕྲད་ནས་ཕྱིས་སྐྱེ་བར་འགྱུར་བ་གང་ཡིན་པ་དེ་ནི་སྐྱེ་བའི་སྔོན་རོལ་ན་འགའ་

ཡང་མེད་ཅེས་བྱ་བ་འདི་ཅི་སྟེ་བརྗོད། རྣམ་པ་གཅིག་ཏུ་ན་གལ་ཏེ་ཡོད་པ་ཁོ་ན་སྐྱེ་ན་ནི་འོ་ན་ནི་འཇིམ་པའི་གོང་བུ་དང་། དབྱུ་གུ་ལ་སོགས་པ་ལ་མི་ལྟོས་པར་སྔར་བུམ་པ་རང་ལས་རབ་ཏུ་གྲུབ་པ་ཡོད་དོ་ཞེས་བྱ་བར་འགྱུར་རོ། །གཞན་དག་ན་རེ་མཐའ་

Vol. 142 · folio 285a

ཐུག་མེད། །འོན་ཏེ་སྔ་ན་མེད་ནའང་རུང་། །ཞེས་བྱ་བ་ཡིན་ཏེ། ཇི་སྟེ་མཐའ་ཐུག་པ་མེད་པར་གྱུར་ན་མི་རུང་བས་མེད་པ་སྐྱེའོ་སྙམ་དུ་སེམས་ན་ཡང་། ཇི་ལྟར་མེད་པ་སྐྱེ་བ་ལྟར། །མེད་པ་ཕྲད་པའང་དེ་དང་འདྲ། །ཞེས་བྱ་བ་དེ་

ཉིད་ཉེ་བར་གནས་པས་ཁོ་བོ་ཅག་གི་ཕྱོགས་གྲུབ་པ་ཡིན་ནོ་ཞེས་སྔ་མ་བཞིན་དུ་བརྗོད་པར་བྱའོ། །བྱེད་པ་པོ་གཅིག་གི་བྱ་བ་གཉིས་ནི་དུས་སྔར་ཏེ་ཞེས་བྱ་བའི་རྐྱེན་ཡིན་ཞེས་གང་སྨྲས་པ་དེ་ཡང་འཁྲུལ་པར་བསྟན་པའི་ཕྱིར། ལྷན་ཅིག་པ་ལའང་དེ་ཡོད་

དེ། །ཞེས་བྱ་བ་རྒྱས་པར་སྨོས་ཏེ། བྱ་བ་དུས་མཉམ་པ་ལའང་སྟེ། །ཞེས་བྱ་བའི་རྐྱེན་མཐོང་སྟེ། དཔེར་ན། མར་མེ་བྱུང་ནས་མུན་པ་མེད། །ཅེས་བྱ་བ་འདི་ལ་ཡང་མུན་པ་སྔར་མར་མེ་དང་ཕྲད་ལ་ཕྱིས་མེད་ཅིང་འཇིག་པ་མ་ཡིན་ནོ་ཞེས་བྱ་བའི་

དོན་ཏོ། །འོ་ན་ཅི་ཞེ་ན། མུན་པ་མར་མེ་དང་ཕྲད་པ་དེ་ཉིད་ཀྱི་ཚེ་མེད་པར་འགྱུར་རོ། །ཇི་སྟེ་འདི་ནི་དེ་མ་ཐག་ཏུ་ཡིན་གྱི་ཅིག་ཅར་ནི་མ་ཡིན་ནོ་སྙམ་དུ་སེམས་ན་དེའི་ཕྱིར་ཡང་ཁ་གདངས་ཉལ་བཞིན་ཞེས་བྱ་བ་འདི་སྨོས་ཏེ། འདིར་ཁ་གདངས་ཤིང་བགྲད་ལ་ཕྱིས་ཉལ་བ་

མ་ཡིན་ནོ། །འོ་ན་ཅི་ཞེ་ན། གང་ཞིག་ཁ་གདངས་ཤིང་ཉལ་བ་དེ་ལ་ཁ་གདངས་ཏེ་ཉལ་བ་ཞེས་བྱའོ། །འོན་ཏེ་འདི་སྔར་ཁ་གདངས་ལ་ཕྱིས་ཉལ་ལོ་ཞེས་བྱ་བར། འདོད་ན་དེའི་ཕྱིར་གལ་ཏེ་ཕྱིས། །བཙུམས་པ་ལ་ཡང་ཅི་ཕྱིར་མིན། །འགའ་ཞིག་ཁ་

གདངས་ནས་དེ་མ་ཐག་ཏུ་བཙུམས་ཏེ་ཉལ་བ་གང་ཡིན་པ་དེ་ལ་ཁ་གདངས་ཏེ་ཉལ་ལོ་ཞེས་བརྗོད་པར་འགྱུར་བ་ཞིག་ན། བརྗོད་པའང་མ་ཡིན་ཏེ། དེའི་ཕྱིར་གང་ཞིག་ཁ་གདངས་བཞིན་དུ་ཉལ་བ་དེ་ལ། ཁ་གདངས་ཤིང་ཉལ་ལོ་ཞེས་བྱའོ་ཞེས་བྱ་བ་ཤེས་སོ། །

གཞན་དག་ནི་ཞེས་བྱ་བ་ནི། བཙུན་པ་དཔལ་ལེན་ཏོ། །རྟེན་ཅིང་འབྲེལ་པ་ནི་ཟློས་པའི་དོན་ཡིན་ཞེས་བྱ་བ་ནི། བྱ་བ་དང་ཡོན་ཏན་དག་གི་ཚིག་སྣ་ཚོགས་ཀྱིས་བརྗོད་པར་བྱ་བའི་གཞི་ཐམས་ཅད་ཁྱབ་པར་བྱ་བར་འདོད་པ་ནི་ཟློས་པ་སྟེ། རྟེན་ཅིང་

Vol. 142 · folio 285b

འབྲེལ་བར་ཞེས་བྱ་བ་ནི་དེ་དག་སྟོན་པར་བྱེད་པ་ཡིན་ནོ། །འགྲོ་ཞིང་འཇིག་པར་རུང་བ་སྟེ་མི་སྡོད་པ་ཞེས་བྱ་བའི་ཐ་ཚིག་གོ། །སམ་ཞེས་བྱ་བའི་ཉེ་བར་བསྒྱུར་བས་ནི་འདུ་བའི་དོན་སྟོན་པར་བྱེད་དོ། །ཨུ་ཏ་གོང་ན་ཡོད་པའི་བ་ད་ནི་འབྱུང་བའི་དོན་ཏེ་ཞེས་བྱ་བ་ནི་སྐད་

ཀྱི་དབྱིངས་བསྒྱུར་བའི་ཕྱིར་རོ། །ཚོགས་པ་དེ་དང་དེ་ན་ཞེས་བྱ་བ་ནི་རྟེན་ཅིང་འབྲེལ་པར་ཞེས་བྱ་བ་ཟློས་པའི་དོན་ཡིན་པ་ཉིད་དུ་སྟོན་ཏོ། །འགྲོར་རུང་བ་སྟེ་ངང་གིས་འཇིག་པའི་ཆོས་རྣམས་འདུས་ནས་སྐྱེ་བ་ནི་རྟེན་ཅིང་འབྲེལ་བར་འབྱུང་བའོ། །གཟུགས་ལ་

སོགས་པ་ནི་ལྷན་ཅིག་འབྱུང་བར་ངེས་པས་ཆོས་གཅིག་པུ་སྐྱེ་བ་ནི་འགའ་ཡང་མེད་དེ། འདོད་ན་དགྲ་མེད་རྡུལ་རྫས་བརྒྱད། །ཅེས་བྱ་བ་ནས། སེམས་དང་སེམས་བྱུང་ངེས་ལྷན་ཅིག །ཅེས་བྱ་བའི་བར་ངེས་པའི་ཕྱིར་རོ། །རྟོག་པ་འདི་ནི་ཞེས་བྱ་བ་རྒྱས་པར་

འབྱུང་བ་ནི་རྟེན་ཅིང་འབྲེལ་པ་ནི་ཟློས་པའི་དོན་ཏོ་ཞེས་བྱ་བ་དེ་ལྟ་བུ་ལ་སོགས་པའི་རྟོག་པ་ནི་རྟེན་ཅིང་འབྲེལ་པར་འབྱུང་བའི་མདོ་འདི་ཁོ་ན་ལ་རུང་གི་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ་ཞེས་བྱ་བ་འདི་ལ་ཇི་ལྟར་བཏུབ་ཏེ་དོན་དུ་མི་

རུང་བའི་ཕྱིར་མིག་ལ་བརྟེན་ཅིང་མིག་ལ་བརྟེན་ནས་ཞེས་བྱ་བར་ཚིག་བསྡུ་བ་ནི་མི་སྲིད་ཀྱི། མིག་དང་གཟུགས་རྣམས་ལ་བརྟེན་ཅིང་ཕྲད་ནས་མིག་གི་རྣམ་པར་ཤེས་པ་སྐྱེའོ་ཞེས་བྱ་བའི་དོན་འདི་ཡིན་པར་ཤེས་སོ། །དེའི་ཕྱིར་ཚིག་གི་དོན་འདི་ནི་རིགས་པ་མ་ཡིན་ནོ་

ཞེས་བྱ་བ་ཀླན་ཀ་རྒྱས་པར་སྨྲས་པ་གང་ཡིན་པ་དེ་སོ་ན་འདུག་པ་ཉིད་དོ། །ཇི་ལྟ་ཞེ་ན། བྱེད་པ་པོ་གཅིག་གི་བྱ་བ་གཉིས་ནི་དུས་སྔར་ཏེ་ཞེས་བྱ་བའི་རྐྱེན་ཡིན་ཏེ། ཁྲུས་བྱས་ཏེ་བཟའོ་ཞེས་བྱ་བ་ལྟ་བུ་ཡིན་ན་སྔར་མིག་དང་གཟུགས་རྣམས་དང་ཕྲད་ནས་ཕྱིས་སྐྱེ་བར་

འགྱུར་བ་གང་ཡིན་པ་མིག་གི་རྣམ་པར་ཤེས་པ་དེ་ནི་སྐྱེ་བའི་སྔོན་རོལ་ན་འགའ་ཡང་མེད་ལ། བྱེད་པ་པོ་མེད་པའི་བྱ་བ་ཡང་མེད་དོ་ཞེས་བྱ་བ་ཡིན་ནོ། །ངེས་པར་གཟུང་བའི་དོན་དུ་རྣམ་གྲངས་གཉིས་གསུངས་པ་ཡིན་ནོ། །འདི་ཡོད་ན་ཞེས་བྱ་བ་དེ་ཙམ་ཞིག་

Vol. 142 · folio 286a

བརྗོད་ན་ནི་མ་རིག་པ་ཡོད་པ་འབའ་ཞིག་གིས་འདུ་བྱེད་རྣམས་འབྱུང་བ་མ་ཡིན་གྱི། གཞན་ཡང་ཡོད་ན་ཡིན་ནོ་ཞེས་བྱ་བར་ཤེས་པར་འགྱུར་ཏེ། དཔེར་ན་མིག་ཡོད་ན་མིག་གི་རྣམ་པར་ཤེས་པ་འབྱུང་ངོ་ཞེས་བྱ་བ་མིག་ཁོ་ན་ཡོད་ན་ཞེས་

བྱ་བར་ངེས་པར་གཟུང་བ་མ་ཡིན་ཏེ། དེས་ན་གཟུགས་ཡོད་ན་འབྱུང་ངོ་ཞེས་བྱ་བར་ཤེས་པར་འབྱུང་ངོ་ཞེས་བྱ་བ་དང་འདྲའོ། །འདི་སྐྱེས་པས་འདི་སྐྱེའོ་ཞེས་བྱ་བ་རྣམ་གྲངས་གཉིས་པ་འདིས་ནི་འདི་ཁོ་ན་སྐྱེས་པས་འདི་སྐྱེའི་གཞན་ལས་ནི་མ་ཡིན་ནོ་ཞེས་རྣམ་

གྲངས་གོང་མ་ཉིད་ངེས་པར་འཛིན་པར་བྱེད་པ་ཡིན་ནོ། །ཡན་ལག་བརྒྱུད་པར་བསྟན་པའི་ཕྱིར། །ཞེས་བྱ་བ་ནི་ཡན་ལག་འདི་སྟེ། མ་རིག་པའི་ཡན་ལག་ཡོད་ན་འདུ་བྱེད་ཀྱི་ཡན་ལག་འདི་འབྱུང་ངོ་། །ཡན་ལག་འདི་སྟེ་འདུ་བྱེད་ཀྱི་ཡན་ལག་འདི་སྐྱེས་པས་རྣམ་

པར་ཤེས་པའི་ཡན་ལག་འདི་སྐྱེའོ་ཞེས་བྱ་བ་ཡིན་ཏེ། ཡན་ལག་གཞན་དག་བརྒྱུད་པའང་དེ་དང་འདྲ་བར་བརྗོད་པར་བྱའོ། །ཡང་ན་ཚེ་བརྒྱུད་པར་ཞེས་བྱ་བ་ཅི་ཞེ་ན། བསྟན་པའི་ཕྱིར་རྣམ་གྲངས་གཉིས་གསུངས་སོ་ཞེས་བྱ་བར་སྦྱར་རོ། །མངོན་སུམ་དང་

ཞེས་བྱ་བ་རྒྱས་པར་འབྱུང་བ་ནི་མ་རིག་པ་ལ་སོགས་པ་མངོན་སུམ་དང་། བརྒྱུད་པའི་རྒྱུན་གྱིས་རྐྱེན་གྱི་ངོ་བོ་བསྟན་པའི་ཕྱིར་རྣམ་གྲངས་གཉིས་གསུངས་པ་ཡིན་ཏེ། འདི་ཡོད་པས་འདི་འབྱུང་ཞེས་བྱ་བས་ནི་མངོན་སུམ་གྱི་རྐྱེན་གྱི་ངོ་བོ་སྟོན་ཏོ། །འདི་སྐྱེས་པས་

འདི་སྐྱེའོ་ཞེས་བྱ་བས་ནི་བརྒྱུད་པའོ། །དེ་ལ་མངོན་སུམ་ནི་གང་གི་ཚེ་མ་རིག་པའི་མཇུག་ཐོགས་སུ་ཉོན་མོངས་པ་ཅན་གྱི་འདུ་བྱེད་འབྱུང་བ་ཡིན་ནོ། །བརྒྱུད་པ་ནི་གང་གི་ཚེ་དགེ་བ་འབྱུང་བ་ཡིན་ཏེ། དགེ་བའི་གནས་སྐབས་ན་མ་རིག་པ་མེད་པའི་ཕྱིར་རོ། །

གཞན་ཡང་མ་རིག་པ་འདུ་བྱེད་རྣམས་ཀྱི་མངོན་སུམ་གྱི་རྐྱེན་ཡིན་ལ་རྣམ་པར་ཤེས་པ་ལ་སོགས་པའི་ནི་བརྒྱུད་པ་ཡིན་ཏེ། འདི་སྐད་དུ་མ་རིག་པའི་ཡན་ལག་ཡོད་པས་འདུ་བྱེད་ཀྱི་ཡན་ལག་འབྱུང་ལ་འདུ་བྱེད་ཀྱི་ཡན་ལག་འདི་སྐྱེས་པས་བརྒྱུད་པའི་མ་རིག་

Vol. 142 · folio 286b

པའི་རྐྱེན་ཅན་གྱི་རྣམ་པར་ཤེས་པ་སྐྱེའོ་ཞེས་བཤད་པ་ཡིན་ཏེ། དེ་ཐམས་ཅད་ནི་སློབ་དཔོན་གྱི་གཞུང་ལུགས་ཡིན་ནོ། །གཞན་དག་ན་རེ་དགག་པའི་ཕྱིར་རོ་ཞེས་བྱ་བ་ནི་གནས་བརྟན་ཆོས་ཀྱི་དབྱིག་གོ། །རྒྱུ་མེད་ན་དངོས་པོ་མི་འབྱུང་ཞེས་བྱ་བས་ནི་རྣམ་

གྲངས་དང་པོས་རྒྱུ་མེད་པར་སྨྲ་བ་བཀག་པ་ཡིན་ནོ། །རང་བཞིན་དང་སྐྱེས་བུ་ལ་སོགས་པ་སྐྱེ་བ་མེད་པ་དང་ལྡན་པ་རྟག་པ་ལས་ཀྱང་ཆུང་ཟད་ཀྱང་མི་སྐྱེའོ་ཞེས་བྱ་བས་ནི་རྣམ་གྲངས་གཉིས་པས་སོ། །སློབ་དཔོན་གྱིས་རྟོག་པ་འདི་ལ་ནི་ཞེས་བྱ་བ་རྒྱས་པར་

སྨོས་ཏེ། ཚིག་སྔ་མ་སྨོས་པ་དོན་མེད་པར་གྱུར་ཞེས་བྱ་བ་ནི་འདི་ཡོད་ན་འདི་འབྱུང་ངོ་ཞེས་བྱ་བ་འདིའོ། །སྨྲ་བ་གཉི་ག་དགག་པ་འགྲུབ་པའི་ཕྱིར་ཞེས་བྱ་བ་ནི་འདི་སྐྱེས་པས་འདི་སྐྱེའོ་ཞེས་བྱ་བའི་རྣམ་གྲངས་འདི་ཁོ་ནས་རྒྱུ་ཡོད་པ་ཉིད་དང་སྐྱེ་བ་དང་ལྡན་པའི་རྒྱུ་

ཡིན་པ་ཉིད་དང་། རྒྱུ་མེད་པ་ཉིད་དང་རྒྱུ་རྟག་པ་ཉིད་དུ་སྨྲ་བའི་མཚན་ཉིད་ཅན་གཉིས་དགག་པ་འགྲུབ་པས་དེའི་ཕྱིར་རྣམ་གྲངས་སྔ་མ་དོན་མེད་པར་འགྱུར་རོ། །འོ་ན་ནི་གང་ལ་ལ་དག་ཅེས་བྱ་བ་རྒྱས་པར་འབྱུང་བ་ནི་རྒོལ་བ་གང་ལ་ལ་དག་བདག་རྟེན་

དུ་གྱུར་པ་སྟེ། མ་རིག་པའི་རྟེན་དུ་གྱུར་པ་ཡོད་པས་འདུ་བྱེད་ལ་སོགས་པ་སྟེ། འདུ་བྱེད་དང་རྣམ་པར་ཤེས་པ་དང་མིང་དང་གཟུགས་ལ་སོགས་པ་འབྱུང་ཞིང་སྐྱེ་བར་རྟོག་པར་བྱེད་ལ་མ་རིག་པ་ལ་སོགས་པ་སྟེ། མ་རིག་པ་དང་འདུ་བྱེད་ལ་སོགས་པ་སྐྱེས་

པས་དེ་དག་སྐྱེ་བར་རྟོག་པར་བྱེད་པ་ཡོད་ཅེས་བྱ་བར་སྐབས་དང་སྦྱར་རོ། །རྒྱུ་དེའི་ཕྱིར་སྨྲ་བ་དེ་དག་གི་རྟོག་པ་དེ་བསལ་ཞིང་དགག་པར་ངེས་པར་གཟུང་བ་འདི་མཛད་པ་ཡིན་ཏེ་བཟློག་པ་མཛད་པ་ཡིན་ནོ། །ཇི་ལྟ་ཞེ་ན། གང་ཞིག་སྐྱེས་པས་ཞེས་བྱ་བ་ནས་

སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཡང་དག་པར་འབྱུང་བར་འགྱུར་ཞེས་བྱ་བའི་བར་སྨྲས་སོ། །གང་ཞིག་སྐྱེས་པས་གང་སྐྱེ་བ་ནི་དེ་ཉིད་ཡོད་པས་དེ་འབྱུང་གི་གཞན་བདག་ཡོད་པས་ནི་མ་ཡིན་ཏེ། འདི་ལྟ་སྟེ། མ་རིག་པའི་རྐྱེན་གྱིས་འདུ་

Vol. 142 · folio 287a

བྱེད་དག་ནི་མ་རིག་པ་ཁོ་ན་ཡོད་པས་འདུ་བྱེད་རྣམས་འབྱུང་གི་གཞན་ཡོད་པས་ནི་མ་ཡིན་ལ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཡང་དག་པར་འབྱུང་བར་འགྱུར་རོ་ཞེས་བྱ་བའི་བར་དུ་དེ་དང་འདྲའོ། །ཇི་ལྟ་ཞེ་

ན། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་འདི་འབའ་ཞིག་ཡང་དག་པར་འབྱུང་བར་འགྱུར་བ་སྐྱེ་བ་

ཁོ་ན་ཡོད་པས་རྒ་ཤི་ལ་སོགས་པ་འབྱུང་གི། གཞན་པ་དག་ཡོད་པས་ནི་མ་ཡིན་ནོ། །དེ་ལྟ་མ་ཡིན་ཏེ་འདི་སྐད་དུ་འདི་ཡོད་པས་འདི་འབྱུང་ཞེས་བརྗོད་ན་ནི་བདག་རྟེན་དུ་གྱུར་པས་མ་རིག་པ་ལ་སོགས་པ་ཡོད་པས་འདུ་བྱེད་རྣམས་འབྱུང་ངོ་ཞེས་སྨྲ་བར་

ཡང་འགྱུར་རོ། །འོན་ཏེ་ཡང་འདི་སྐྱེས་པས་འདི་སྐྱེའོ་ཞེས་བྱ་བར་རྣམ་གྲངས་གཉིས་པ་ཁོ་ན་བརྗོད་པར་གྱུར་ན། དེ་ལྟ་ན་ཡང་དེ་ཁོ་ན་བཞིན་དུ་མ་རིག་པ་ལ་སོགས་པས་འདུ་བྱེད་ལ་སོགས་པ་སྐྱེ་བ་ནི་བདེན་ན། བདག་རྟེན་དུ་གྱུར་པ་ཡོད་པས་ཡིན་ནོ་

ཞེས་བྱ་བར་རྟོག་པར་འགྱུར་ཏེ། དེའི་ཕྱིར་གང་ཞིག་སྐྱེས་པས་སྐྱེ་བ་དེ་ཁོ་ན་ཡོད་པས་དེ་འབྱུང་གི་གཞན་བདག་རྟེན་དུ་གྱུར་པ་ཡོད་པས་ནི་མ་ཡིན་ནོ་ཞེས་བྱ་བར་རྣམ་གྲངས་གཉིས་ཀྱིས་ངེས་པར་འཛིན་པར་མཛད་པ་ཡིན་ནོ། །སློབ་དཔོན་དག་ཅེས་བྱ་བ་ནི་

སྔོན་གྱི་སློབ་དཔོན་རྣམས་སོ། །མ་སྤངས་པ་བསྟན་པའི་ཕྱིར་དང་། སྐྱེ་བར་འགྱུར་བ་བསྟན་པའི་ཕྱིར་རོ། །མ་རིག་པ་མ་སྤངས་ཤིང་ཡོད་ན་འདུ་བྱེད་རྣམས་མི་སྤོང་ཞིང་འབྱུང་ངོ་ཞེས་བྱ་བར་རྣམ་གྲངས་དང་པོས་སྟོན་ཏོ། །དེ་ཉིད་སྐྱེས་པས་འདི་སྐྱེ་བར་

འགྱུར་རོ་ཞེས་བྱ་བ་ནི་གཉིས་པས་སྟོན་ཏོ། །སྐྱེ་བ་མ་སྤངས་ཤིང་ཡོད་ན་རྒ་ཤི་ལ་སོགས་པ་མི་སྤོངས་ཤིང་འབྱུང་ལ། དེ་ཉིད་སྐྱེས་པས་དེ་དག་སྐྱེ་བར་འགྱུར་རོ་ཞེས་བྱ་བའི་བར་དུའང་དེ་དང་འདྲའོ། །གཞན་དག་ན་རེ་གནས་པ་དང་སྐྱེ་བ་ཡང་དག་པར་

Vol. 142 · folio 287b

བསྟན་པའི་ཕྱིར་རོ། །ཟེར་རོ་ཞེས་ཞེས་བྱ་བས་ནི་བཙུན་པ་དཔལ་ལེན་ན་རེ་དེའི་ཕྱིར་རྣམ་གྲངས་གཉིས་གསུངས་སོ་ཞེས་ཟེར་བ་ཡིན་ཏེ། རྒྱུའི་རྒྱུན་ནི་ཇི་སྲིད་པ་དེ་སྲིད་དུ་འབྲས་བུའི་རྒྱུན་འབྱུང་བར་འགྱུར་ཞེས་བྱ་བ་ནི་རྣམ་གྲངས་དང་པོས་སོ། །རྒྱུ་འདི་

སྐྱེས་པས་འབྲས་བུ་སྐྱེ་བར་འགྱུར་ཞེས་བྱ་བ་ནི་གཉིས་པས་སོ། །འབྱུང་བའི་དབང་དུ་མཛད་པས་ཡིན། །ཞེས་བྱ་བ་ནི་དགེ་སློང་དག་ཁྱེད་ལ་རྟེན་ཅིང་འབྲེལ་པར་འབྱུང་བ་བཤད་དོ་ཞེས་གསུངས་པའི་སྐབས་སུ་གནས་པའི་ཚིག་ཏུ་ཐལ་བ་ཅི་ཞིག་ཡོད་སྐབས་

ལ་ཅི་འབབ་ན་འདི་ཡོད་པས་འདི་འབྱུང་ངོ་ཞེས་བྱ་བ་འདིས་ནི་རྒྱུའི་རྒྱུན་ཇི་སྲིད་གནས་པ་དེ་སྲིད་དུ་འབྲས་བུའི་རྒྱུན་གནས་པ་བསྟན་ཏོ་ཞེས་དེ་ལྟར་འདིའི་གནས་པའི་དོན་ཡིན་པར་རྗོད་པར་བྱེད། བཅོམ་ལྡན་འདས་ཀྱིས་ཀྱང་ཅིའི་ཕྱིར་རིམ་པ་མི་མཐུན་པར་གསུངས་

པར་འགྱུར་ཏེ། སྐྱེ་བ་ནི་དང་པོར་ཡིན་ལ་གནས་པ་ནི་ཕྱིས་ཡིན་ཏེ་གནས་པ་ནི་སྐྱེ་བ་ལ་རག་ལས་པའི་ཕྱིར་རོ། །སྔར་ནི་འདི་སྐྱེས་པས་འདི་སྐྱེའོ། །ཕྱིས་ནི་འདི་ཡོད་པས་འདི་འབྱུང་ངོ་ཞེས་བརྗོད་པར་བྱ་དགོས་ན། དེ་ལྟ་ཡང་མ་ཡིན་ཏེ་དེའི་ཕྱིར་དེའི་དོན་ནི་

དེ་ལྟ་མ་ཡིན་ནོ། །ཡང་སྨྲས་པ་ཞེས་བྱ་བ་ནི་བཙུན་པ་དཔལ་ལེན་ཏོ། །སློབ་དཔོན་གྱིས་སླར་སྨྲས་པ་ནི། གལ་ཏེ་མདོའི་དོན་དེ་ཡིན་པར་གྱུར་ན་ཞེས་བྱ་བ་རྒྱས་པར་འབྱུང་བ་ལ། འདི་ཡོད་པས་འདི་མི་འབྱུང་ངོ་ཞེས་བྱ་བ་ཁོ་ནར་བཀའ་སྩལ་པར་

འགྱུར་ཞེས་བྱ་བ་ནི་དགག་པ་ཁོ་ནས་མི་འབྱུང་བར་བསྟན་ན་རིགས་པའི་ངོ་བོ་ཡིན་ནོ་ཞེས་སྟོན་པར་བྱེད་དོ། །སྔར་ནི་འབྲས་བུ་སྐྱེ་བ་ཞེས་བྱ་བ་ནི་འཇིག་པ་ནི་སྐྱེ་བ་སྔོན་དུ་འགྲོ་བ་ཅན་ཡིན་པའི་ཕྱིར་སྔར་འདི་སྐྱེས་པས་འདི་སྐྱེའོ་ཞེས་གསུངས་པར་འགྱུར་

བ་ཞིག་གོ། །མདོ་ལས་སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་ངོ་ཞེས་གསུངས་པ་དེ་དག་ནི་རྒ་ཤིས་བསྡུས་པ་ཁོ་ན་ཡིན་ཏེ། ཡན་ལག་གཞན་མ་ཡིན་པར་ཁོང་དུ་

Vol. 142 · folio 288a

ཆུད་པར་བྱའོ། །དེ་ལ་སེམས་ཅན་དང་སེམས་ཅན་དུ་མི་བགྲང་བའི་ཡུལ་ཡོངས་སུ་གྱུར་པ་དང་། ལུས་ཡོངས་སུ་གྱུར་པ་ལས་དེ་དག་འབྱུང་སྟེ། ཡིད་མི་བདེ་བ་དང་མཚུངས་པར་ལྡན་པའི་རྟོག་པ་ནི་མྱ་ངན་ནོ། །མྱ་ངན་གྱིས་

ཀུན་ནས་བསླང་བའི་ཚིག་ཏུ་སྨྲ་བ་ནི་སྨྲེ་སྔགས་འདོན་པའོ། །སྡུག་བསྔལ་དང་ཡིད་མི་བདེ་བ་དག་ནི་བཤད་ཟིན་ཏོ། །ཡིད་མི་བདེ་བའི་ཤུགས་ཟད་པ་ནི་འཁྲུག་པའོ། །གཞན་དག་ན་རེ་ཡིད་མི་བདེ་བ་ནི་མྱ་ངན་དང་སྨྲེ་སྔགས་འདོན་པ་སྔོན་དུ་འགྲོ་བའི་ངལ་

བ་ཡིན་ནོ་ཞེས་ཟེར་རོ། །བྱིས་པ་ནི་ཞེས་བྱ་བ་རྒྱས་པར་འབྱུང་བ་ན་བྱིས་པ་ནི་སོ་སོའི་སྐྱེ་བོའོ། །འདུ་བྱེད་ཙམ་ཞེས་བྱ་བ་ལ་ཙམ་ཞེས་བྱ་བ་སྨོས་པས་ནི་བདག་དགག་པའི་དོན་ཏོ། །མི་ཤེས་པས་ཞེས་བྱ་བ་ནི་མ་རིག་པ་མ་འདྲེས་པ་སྟོན་པར་བྱེད་དོ། །

བདག་ཏུ་ལྟ་བ་དང་ངའོ་སྙམ་པའི་ང་རྒྱལ་ལ་མངོན་པར་ཞེན་པ་ནི་གནས་པའོ། །ལུས་ལ་སོགས་པ་སྟེ། ལུས་དང་ངག་དང་ཡིད་དག་གིས་བསོད་ནམས་དང་། བསོད་ནམས་མ་ཡིན་པ་དང་མི་གཡོ་བའི་ལས་རྣམ་པ་གསུམ་རྩོམ་སྟེ། ཚེ་ཕྱི་མ་ལ་བདེ་བའི་

དོན་དུ་ནི་བསོད་ནམས་ཞེས་བྱ་བ་ནི་མ་འོངས་པའི་ཚེ་ལ་བདེ་བའི་དོན་དུ་འདོད་པ་ན་སྤྱོད་པའི་ལས་དགེ་བའོ། །བདེ་བ་དང་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་དོན་དུ་ནི་མི་གཡོ་བ་ཞེས་བྱ་བ་ནི་བསམ་གཏན་གསུམ་པའི་བར་དུ་ནི་བདེ་བའི་དོན་དུ་

གཟུགས་ན་སྤྱོད་པའི་དགེ་བའོ། །དེ་ཡན་ཆད་ནི་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་དོན་དུའོ། །ཚེ་འདི་ལ་བདེ་བའི་དོན་དུ་ནི་བསོད་ནམས་མ་ཡིན་པ་ཞེས་བྱ་བ་ནི་འདི་ལ་བདེ་བ་ལ་ལྟོས་ནས་དེ་བྱས་ཀྱི་ཕྱི་མ་ལ་བདེ་བ་ལ་ལྟོས་ཏེ་ནི་མ་ཡིན་

ནོ་ཞེས་བྱ་བའི་ཐ་ཚིག་གོ། །ལས་ཀྱི་འཕེན་པའི་དབང་གིས་ཏེ། ཇི་སྐད་བཤད་པའི་ལས་ཀྱི་འཕེན་པའི་དབང་གིས། མེ་འབར་བ་འགྲོ་བའི་ཚུལ་དུ་དམྱལ་བ་ལ་སོགས་པའི་འགྲོ་བ་དེ་དང་དེར་འགྲོ་བར་འགྱུར་ཏེ། དཔེར་ན་རྩྭ་རིང་པོ་ལ་བཏང་བའི་མེ་

Vol. 142 · folio 288b

འབར་བ་འགྲོའོ་ཞེས་བྱ་བ་དེ་བཞིན་དུ་རྣམ་པར་ཤེས་པའི་རྒྱུན་ཡང་སྲིད་པ་བར་མ་དང་འབྲེལ་བའི་ཕྱིར་སྲིད་པ་བར་མའི་རྒྱུན་གྱིས་ཡུལ་ཐག་རིང་པོར་ཡང་འགྲོ་བ་དེ་དང་དེར་འགྲོའོ། །དེ་ལྟར་བཤད་ན་ཞེས་བྱ་བ་ནི་གལ་ཏེ་འདུ་བྱེད་ཀྱི་རྐྱེན་ཅན་གྱིས་རྣམ་པར་

ཤེས་པའི་རྒྱུན་སྲིད་པ་བར་མར་ཉིང་མཚམས་སྦྱོར་བའི་སེམས་ནས་བཟུང་སྟེ། སྐྱེ་བའི་སྐད་ཅིག་མའི་བར་འདི་ཐམས་ཅད་ཡིན་ཏེ། རྣམ་པར་ཤེས་པའི་ཚོགས་དྲུག་ཅར་འདུ་བྱེད་ཀྱི་རྐྱེན་ཅན་གྱི་རྣམ་པར་ཤེས་པ་ཡིན་པར་འདོད་ན། རྣམ་པར་ཤེས་པའི་

ཡན་ལག་བསྟན་པ་སྟེ། གསུམ་པ་རྣམ་པར་ཤེས་པའི་ཡན་ལག་བསྟན་པ་ལས། རྣམ་པར་ཤེས་པ་གང་ཞེ་ན། རྣམ་པར་ཤེས་པའི་ཚོགས་དྲུག་གོ་ཞེས་བཤད་པ་དེ་འཐད་པ་ཡིན་ནོ། །དེ་ལྟ་མ་ཡིན་ཏེ། གལ་ཏེ་འདུ་བྱེད་ཀྱི་རྐྱེན་ཅན་གྱི་རྣམ་

པར་ཤེས་པ་རྣམ་པར་ཤེས་པའི་ཚོགས་དྲུག་གི་རྒྱུན་ཡིན་པར་མི་བཞེད་ཀྱི་ཉིང་མཚམས་སྦྱོར་བའི་སེམས་ཁོ་ན་ཡིན་པར་བཞེད་པར་གྱུར་ན་ནི་འདི་ལས་རྣམ་པར་ཤེས་པའི་ཚོགས་དྲུག་གོ་ཞེས་བཤད་པར་མི་འགྱུར་གྱི། འདི་སྐད་དུ་རྣམ་པར་ཤེས་པ་གང་

ཞེ་ན། ཡིད་ཀྱི་རྣམ་པར་ཤེས་པའོ་ཞེས་བརྗོད་པར་བྱ་དགོས་པར་འགྱུར་རོ། །ཉིང་མཚམས་སྦྱོར་བའི་སྐད་ཅིག་མ་ལ་ནི་རྣམ་པར་ཤེས་པ་ལྔ་འབྱུང་བ་མེད་དེ། འཆད་དང་མཚམས་སྦྱོར་འདོད་ཆགས་འབྲལ། །ཉམས་དང་འཆི་འཕོ་སྐྱེ་བ་རྣམས། །

ཡིད་ཀྱི་རྣམ་ཤེས་ཁོ་ནར་འདོད། །ཅེས་འབྱུང་བས་ཡིད་ཀྱི་རྣམ་པར་ཤེས་པ་ཁོ་ནས་ཉིང་མཚམས་སྦྱོར་བར་བྱེད་པའི་ཕྱིར་རོ། །རྣམ་པར་འབྱེད་པ་ལས་དེ་སྐད་བསྟན་པའི་ཕྱིར་རོ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བའི་མདོ་ལས། མིང་དང་གཟུགས་

རྣམ་པར་འབྱེད་པ་ལས་མིང་གང་ཞེ་ན། གཟུགས་ཅན་མ་ཡིན་པའི་ཕུང་པོ་བཞིའོ། །གཟུགས་གང་ཞེ་ན། གཟུགས་གང་ཡིན་པ་ཅི་ཡང་རུང་བ་ཞེས་བྱ་བ་ནས་རྒྱས་པར་གཟུགས་གང་ཡིན་པ་དང་། མིང་གང་ཡིན་པ་དེ་གཉིས་ནི་མིང་དང་གཟུགས་ཞེས་

Vol. 142 · folio 289a

བྱའོ་ཞེས་དེ་སྐད་དུ་བསྟན་པའི་ཕྱིར་རོ། །འདོད་པའི་སྲེད་པའོ་ཞེས་བྱ་བ་ནི་འདོད་པ་ན་སྤྱོད་པའི་སྲེད་པའོ། །བདེ་བ་ལ་ནི་བསམ་གཏན་གསུམ་པ་དག་ཏུའོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་ནི་བསམ་གཏན་བཞི་པར་

རོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་ནི་གཟུགས་མེད་པའི་སྲེད་པའོ་ཞེས་བྱ་བ་ནི་གཟུགས་མེད་པ་ན་སྤྱོད་པའོ། །འདོད་པ་ལ་སོགས་པ་ཉེ་བར་ལེན་ཏེ་ཞེས་བྱ་བ་ནི་འདོད་པ་དང་ལྟ་བ་དང་ཚུལ་ཁྲིམས་དང་བརྟུལ་ཞུགས་དང་བདག་ཏུ་སྨྲ་བ་

རྣམས་ཉེ་བར་ལེན་ཞེས་བྱ་བའི་ཐ་ཚིག་གོ། །འདོད་པའི་ཡོན་ཏན་ལྔ་དག་གོ་ཞེས་བྱ་བ་ནི་འདོད་པར་བྱ་བ་ཡིན་པས་འདོད་པའོ། །གོམས་པར་བྱ་བ་ཡིན་པས་ཡོན་ཏན་ནོ། །འདོད་པ་དག་ཉིད་ཡོན་ཏན་ཡིན་པས་འདོད་པའི་ཡོན་ཏན་ཏོ། །དེ་དག་ཀྱང་

གང་ཞེ་ན། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དག་ཡིན་ནོ། །ལྟ་བ་ནི་དྲུག་ཅུ་རྩ་གཉིས་ཀྱི་སྟེ། ཚངས་པའི་དྲ་བ་ལས་ཇི་སྐད་འབྱུང་བ་བཞིན་ནོ་ཞེས་བྱ་བ་ནི་ལྟ་བ་དེ་དག་གི་ཚངས་པའི་དྲ་བའི་མདོ་བལྟས་ནས་ཁོང་དུ་ཆུད་པར་བྱའོ། །

ཁྱི་དང་བ་ལང་གི་བརྟུལ་ཞུགས་ལ་སོགས་པ་ཞེས་བྱ་བའི་སྒྲས་ནི་རི་དགས་ཀྱི་བརྟུལ་ཞུགས་ལ་སོགས་པ་བསྡུའོ། །གཅེར་བུ་པ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་སྤོང་བ་དཀར་པོ་ལ་སོགས་པ་བསྡུའོ། །བྲམ་ཟེ་དང་ཞེས་བྱ་བ་

རྒྱས་པར་འབྱུང་བ་ནི་བྲམ་ཟེ་རྣམས་ནི་དབྱུ་གུ་དང་གཡང་གཞིའོ། །ཕྱུགས་བདག་རྣམས་ནི་རལ་བུ་དང་ཐལ་བའོ། །ཀུན་དུ་རྒྱུ་རྣམས་ནི་དབྱུ་གུ་གསུམ་དང་སྒྲེ་བོའོ། །སོགས་པ་ཞེས་བྱ་བའི་སྒྲ་གཉིས་ཀྱིས་ནི་ཐོད་པ་ཅན་ལ་སོགས་པ་ཐོད་པ་ཐོགས་

པ་ལ་སོགས་པ་བསྡུ་སྟེ། དེ་དག་ཡང་དག་པར་ལེན་པ་ནི་ཚུལ་ཁྲིམས་དང་བརྟུལ་ཞུགས་ཡང་དག་པར་ལེན་པའོ། །དེ་ལ་བདག་ཏུ་སྨྲ་བ་ཡོད་པས་ན་བདག་ཏུ་སྨྲ་བའོ་ཞེས་བྱ་བ་ནི་ཇི་སྐད་དུ་དགེ་སློང་ངམ་བྲམ་ཟེ་གང་ལ་ལ་དག་བདག་གོ་སྙམ་དུ་ཡང་དག་

Vol. 142 · folio 289b

པར་རྗེས་སུ་ལྟ་བ་ན། ཡང་དག་པར་རྗེས་སུ་ལྟ་བ་དེ་དག་ཐམས་ཅད་ནི་ཕུང་པོ་ལྔ་པོ་འདི་དག་ཁོ་ན་ལ་ཞེས་བྱ་བ་རྒྱས་པར་གསུངས་པ་ལྟ་བུ་ཡིན་ནོ། །གཞན་དག་ན་རེ་བདག་ཏུ་སྨྲ་བ་ནི་བདག་ཏུ་ལྟ་བ་དང་། ངའོ་སྙམ་པའི་ང་རྒྱལ་ཡིན་ནོ་ཞེས་ཟེར་

རོ།། །།བམ་པོ་ཉི་ཤུ་རྩ་དྲུག་པ། བདག་མེད་པའི་ཕྱིར་བདག་ཏུ་སྨྲ་བ་ཉེ་བར་ལེན་པ་ཞེས་བྱ་བའི་སྨྲ་བ་ཞེས་བྱ་བའི་སྒྲ་ཉེ་བར་བཀོད་པའི་དགོས་པ་སྟོན་པར་བྱེད་པ་ཡིན་ནོ། །བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཞེས་བྱ་བ་ནི་གང་ལ་

སྔོན་གོམས་པའི་བག་ཆགས་ལས་བྱུང་བ་སྐྱེ་ནས་ཐོབ་པའི་ཤེས་རབ་མེད་པ་དེ་ནི་བྱིས་པའོ། །གང་ལ་རྟོགས་པ་ལས་བྱུང་བ་སྟེ། བདེན་པ་རྟོགས་པ་ལས་བྱུང་བ་མེད་པ་དེ་ནི་སོ་སོའི་སྐྱེ་བོའོ། །གང་ལ་ལུང་ལས་བྱུང་བ་མེད་པ་དེ་ནི་ཐོས་པ་དང་མི་ལྡན་པའོ། །

བརྟགས་པའི་རྗེས་སུ་ལྷུང་བ་ཞེས་བྱ་བ་ནི་མིང་ཇི་ལྟ་བ་དང་། ཐ་སྙད་ཇི་ལྟ་བ་དེ་བཞིན་དུ་རྗེས་སུ་སོང་བ་ཞེས་བྱ་བའི་ཐ་ཚིག་གོ། །དེ་དག་ཅེས་བྱ་བ་ནི་འདོད་པ་ལ་སོགས་པའོ། །འདུན་པ་དང་འདོད་ཆགས་ཞེས་བྱ་བ་ནི་ཡུལ་མ་ཐོབ་པ་དག་ལ་དོན་དུ་གཉེར་བ་ནི་

འདུན་པའོ། །ཐོབ་པ་དག་ལ་ནི་འདོད་ཆགས་ཏེ། འདོད་པ་ལ་སོགས་པ་དེ་དག་ལ་འདུན་པ་དང་འདོད་ཆགས་གང་ཡིན་པ་དེ་ཉེ་བར་ལེན་པ་ཡིན་གྱི། །ཇི་སྐད་བཤད་ཉིད་མ་རིག་བཅས། །ཉེར་ལེན་རྣམས་ཏེ་ལྷ་རྣམས་གཉིས། །ཕྱེ་བའི་ཕྱིར་རོ་ཞེས་བྱ་བ་ནི་མ་

ཡིན་ནོ་སྙམ་དུ་བསམས་པ་ཡིན་ནོ། །ཡང་སྲིད་པ་པ་ཞེས་བྱ་བ་ནི་ཡང་སྲིད་པའི་འབྲས་བུ་ཅན་ནོ། །དེ་ནི་འདིར་སྲིད་པ་ཡིན་ནོ་ཞེས་བྱ་བ་ནི་དེ་ནི་འདིར་སྲིད་པའི་རང་གི་མཚན་ཉིད་དེ་ངོ་བོ་ཉིད་ཡིན་ནོ་ཞེས་བྱ་བའི་ཐ་ཚིག་གོ། །རྣམ་པར་ཤེས་པ་འཇུག་པའི་ཚུལ་དུ་ཞེས་

བྱ་བ་ནི་སྲིད་པ་བར་མ་དང་འབྲེལ་པའི་ཕྱིར་མེ་འབར་བ་འགྲོ་བའི་ཚུལ་དུ་མ་འོངས་པའི་སྐྱེ་བ་ནི་སྐྱེ་བ་སྟེ། །མིང་དང་གཟུགས་ཀྱི་ངོ་བོ་ཉིད་ཡིན་པའི་ཕྱིར། ཕུང་པོ་ལྔ་པ་ཡིན་ནོ། །རྒ་ཤི་འབྱུང་སྟེ་མདོ་ལས་ཇི་སྐད་བསྟན་པ་ལྟ་བུའོ་ཞེས་བྱ་བ་ནི་རྒ་བ་གང་ཞེ་ན་མགོ་སྒྲེ་

Vol. 142 · folio 290a

བོར་གྱུར་པ་དང་། སྐྱེ་བོ་གང་ཡིན་པ་ཞེས་བྱ་བ་རྒྱས་པར་འབྱུང་བ་དང་། ཤི་བ་གང་ཞེ་ན། སེམས་ཅན་དེ་དང་དེ་དག་གནས་དེ་དང་དེ་ནས་ཤི་འཕོ་ཞིང་འཆི་བ་གང་ཡིན་པ་ཞེས་བྱ་བ་རྒྱས་པར་འབྱུང་བ་ཡིན་ནོ། །འབའ་ཞིག་ཅེས་བྱ་བ་

ནི་བདག་དང་བདག་གི་དང་བྲལ་བ་ཞེས་བྱ་བའི་དོན་ཡིན་པར་སྟོན་ཏོ། །སྡུག་བསྔལ་གྱི་ཕུང་པོ་ཞེས་བྱ་བ་ནི་སྡུག་བསྔལ་གྱི་ཚོགས་སོ། །ཆེན་པོ་ཞེས་བྱ་བ་ནི་ཐོག་མ་དང་ཐ་མ་མེད་པའོ། །བྱེ་བྲག་ཏུ་སྨྲ་བའི་ལུགས་ནི་སྔར་བཤད་པ་གང་ཡིན་པ་དེ་ཁོ་ན་ཡིན་

ནོ་ཞེས་བྱ་བ་ནི་བཅུ་གཉིས་དང་ལྡན་པའི་ཕུང་པོ་ལྔའི་གནས་སྐབས་ཀྱི་ཡན་ལག་བཅུ་གཉིས་ཞེས་བྱ་བ་ཡིན་ནོ། །རིག་པ་མ་ཡིན་པ་གང་ཡིན་པའོ། །མིག་ལ་སོགས་པ་དག་ལ་ཡང་ཐལ་བར་འགྱུར་རོ་ཞེས་བྱ་བ་ནི་མིག་དང་རྣ་བ་ལ་སོགས་པ་ཡང་མ་རིག་

པ་ཡིན་པར་ཐལ་བར་འགྱུར་ཏེ། དེ་དག་ཀྱང་རིག་པ་མ་ཡིན་པའི་ཕྱིར་རོ། །ཅི་ཡང་མ་ཡིན་པར་འགྱུར་ཞེས་བྱ་བ་ནི་གལ་ཏེ་མ་རིག་པ་རིག་པ་མེད་པ་ཡིན་ན་རྫས་སུ་མེད་པར་འགྱུར་རོ་ཞེས་བྱ་བའི་ཐ་ཚིག་གོ། །དེ་ཡང་རིགས་པ་མ་ཡིན་ནོ་ཞེས་བྱ་བ་ནི་

རྐྱེན་གྱི་དངོས་པོར་བསྟན་པའི་ཕྱིར་རོ། །དེའི་མི་མཐུན་པའི་ཕྱོགས་ཞེས་བྱ་བ་ནི་འགལ་བར་དགག་པ་ཡིན་ནོ་ཞེས་སྟོན་པར་བྱེད་དོ། །མཛའ་བོ་ལས་གཞན་པ་གང་ཡིན་པ་ཡང་མ་ཡིན་ཞེས་བྱ་བ་ནི་མ་ཡིན་པ་ཙམ་ནི་མ་ཡིན་ནོ་ཞེས་སྟོན་པར་བྱེད་དོ། །

མཛའ་བ་མེད་པ་ཡང་མ་ཡིན་ནོ་ཞེས་བྱ་བ་ནི་མེད་པ་ཡང་མ་ཡིན་ནོ་ཞེས་སྟོན་པར་བྱེད་དོ། །ཆོས་མ་ཡིན་པ་དང་། དོན་མ་ཡིན་པ་དང་། བྱ་བ་མ་ཡིན་པ་ལ་སོགས་པ་ཡང་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་རིགས་པ་མ་ཡིན་པ་དང་། ཐ་སྙད་

མ་ཡིན་པ་དང་། མི་མ་ཡིན་པ་ལ་སོགས་པ་བསྡུའོ། །ཆོས་ལ་སོགས་པའི་མི་མཐུན་པར་གྱུར་པ་ཞེས་བྱ་བ་ནི་ཆོས་དང་། དོན་དང་། བྱ་བ་དང་། རིག་པ་དང་ཐ་སྙད་དང་མིག་ལ་སོགས་པའི་མི་མཐུན་པར་གྱུར་པ་ཡིན་གྱི་ཆོས་ལ་སོགས་པ་ལས་

Vol. 142 · folio 290b

གཞན་པ་མིག་ལ་སོགས་པ་གང་དག་ཡིན་པ་དེ་ཡང་མ་ཡིན་ལ། ཆོས་ལ་སོགས་པ་མེད་པ་ཡང་མ་ཡིན་ནོ། །དེ་བཞིན་དུ་མ་རིག་པ་ཡང་ཞེས་བྱ་བ་རྒྱས་པར་འབྱུང་བ་ནི་འདི་ག་ལས་ཤེ་ན་མ་རིག་པའི་རྐྱེན་གྱིས་འདུ་བྱེད་རྣམས་ཞེས་འབྱུང་བས་རྐྱེན་གྱི་དངོས་པོར་

བསྟན་པའི་ཕྱིར་དགྲ་བཅོམ་པ་རྣམས་ལ་འདུ་བྱེད་མེད་པའི་ཕྱིར་རིག་པ་མ་ཡིན་པ་གཞན་མིག་ལ་སོགས་པ་ཡང་རྐྱེན་གྱི་དངོས་པོར་བསྟན་པར་རིགས་པ་མ་ཡིན་ལ་རྐྱེན་མ་ཡིན་པའི་ཕྱིར་མེད་པ་རི་བོང་གི་རྭ་ལ་སོགས་པ་ཡང་མ་ཡིན་ནོ། །མ་རིག་པ་ནི་ཀུན་དུ་སྦྱར་བ་

ནས་སྦྱོར་བའི་བར་ཡིན་པར་བརྗོད་དོ་ཞེས་བྱ་བ་ནི་མདོ་དག་ལས་མ་རིག་པའི་ཀུན་དུ་སྦྱོར་བ་ནས་མ་རིག་པའི་སྦྱོར་བ་ཞེས་བྱ་བའི་བར་གསུངས་པ་ཡིན་ནོ། །མེད་པ་ཙམ་ནི་དེ་ལྟ་བུ་ཡིན་པར་འོས་པ་མ་ཡིན་ནོ་ཞེས་བྱ་བ་ནི་ཀུན་དུ་སྦྱོར་བ་ལ་སོགས་པ་ཡིན་པར་འོས་པ་

མ་ཡིན་ནོ་ཞེས་བྱ་བའི་ཐ་ཚིག་གོ། །མིག་ལ་སོགས་པ་ཡང་དེ་ལྟ་བུ་ཡིན་པར་འོས་པ་མ་ཡིན་ནོ་ཞེས་དེ་ལྟར་སྐབས་དང་སྦྱར་རོ། །དེ་ཡང་ལྟ་བའི་རང་བཞིན་ཡིན་པས་མ་རིག་པ་ཡིན་པར་མི་རུང་ངོ་ཞེས་བྱ་བ་ནི་ལྟ་བ་དང་མ་རིག་པ་དག་ཀུན་དུ་སྦྱོར་བ་ལ་སོགས་པ་

ཉིད་དུ་ཐ་དད་པར་འབྱུང་བའི་ཕྱིར་རོ། །འོ་ན་ནི་གང་ལྟ་བའི་རང་བཞིན་མ་ཡིན་པ་ཞེས་བྱ་བ་ནི་ཤེས་རབ་འདོད་ཆགས་ལ་སོགས་པ་དང་མཚུངས་པར་ལྡན་པ་ཉོན་མོངས་པ་ཅན་གང་ཡིན་པའོ། །ལྟ་བ་དེ་དང་མཚུངས་ལྡན་ཕྱིར། །ཞེས་བྱ་བ་ནི་མ་རིག་པ་

དང་མཚུངས་པར་ལྡན་པའི་ཕྱིར་ཞེས་བྱ་བའི་ཐ་ཚིག་གོ། །ཇི་ལྟར་ན་ལྟ་བ་མ་རིག་པ་དང་མཚུངས་པར་ལྡན་ཞེ་ན། འདི་ལྟར་མ་རིག་པའི་མཚན་ཉིད་ཀྱི་རྨོངས་པ་ནི་ཉོན་མོངས་པའི་ས་མང་པོ་པའི་ནང་ན་འབྱུང་ལ། ཉོན་མོངས་པའི་ས་མང་པོ་པ་ཐམས་

ཅད་ཀྱང་ས་མང་པོ་པ་རྣམས་དང་ལྷན་ཅིག་མཚུངས་པར་ལྡན་པར་འགྱུར་བས། འཇིག་ཚོགས་ལ་ལྟ་བ་ལ་སོགས་པའི་ལྟ་བ་ཤེས་རབ་ཀྱི་ངོ་བོ་ཉིད་དང་མ་རིག་པར་མཚུངས་པར་ལྡན་ནོ་ཞེས་བྱ་བར་ཤེས་སོ། །དེ་ལྟ་བས་ན་ཤེས་རབ་ཀྱི་རྫས་གཉིས་མཚུངས་

Vol. 142 · folio 291a

པར་མི་ལྡན་པའི་ཕྱིར་མ་རིག་པ་ནི་ཤེས་རབ་མ་ཡིན་ནོ། །མ་རིག་པས་ཉོན་མོངས་པ་ཅན་དུ་གྱུར་པའི་ཤེས་རབ་ནི་རྣམ་པར་མི་འདག་གོ་ཞེས་བྱ་བ་ནི་དཔེར་བརྗོད་པའི་ཚུལ་གྱིས་མ་རིག་པ་ཤེས་རབ་ལས་དོན་གཞན་དུ་གྱུར་པ་ཡིན་པར་

སྟོན་ཏོ། །ཤེས་རབ་དེ་ཉིད་ཤེས་རབ་ཀྱི་ཉེ་བའི་ཉོན་མོངས་པ་ཡིན་པར་ཡང་རིགས་པ་མ་ཡིན་ཞེས་བྱ་བ་ནི་ཤེས་རབ་ཀྱི་ཉེ་བའི་ཉོན་མོངས་པ་ཡིན་པར་བསྟན་པས་མ་རིག་པ་ཤེས་རབ་ལས་དོན་གཞན་དུ་གྱུར་པ་ཡིན་ཏེ། ཉེ་བའི་ཉོན་མོངས་པ་ཉིད་དུ་བསྟན་པའི་

ཕྱིར་འདོད་ཆགས་བཞིན་ནོ། །དེའི་ཕྱིར་ཇི་ལྟར་སེམས་ཀྱི་ཉེ་བའི་ཉོན་མོངས་པ་འདོད་ཆགས་རིགས་ཐ་དད་པ་གཞན་ཡིན་པ་ལྟར་ཞེས་བྱ་བ་རྒྱས་པར་སྨོས་སོ། །འདྲེས་ན་རྣམ་པར་མི་འདག་ཅེས་བྱ་བ་ནི་ཤེས་རབ་ཉོན་མོངས་པ་ཅན་བར་བར་དུ་འབྱུང་བ་དང་འདྲེས་

ན་སྐད་ཅིག་མ་གཞན་ལས་བྱུང་བའི་ཤེས་རབ་དགེ་བ་རྣམ་པར་མི་འདག་གོ་ཞེས་བྱ་བའི་ཐ་ཚིག་གོ། །གདོན་མི་ཟ་བར་འདོད་ཆགས་ཀྱིས་ཀུན་ནས་དཀྲིས་པ་ཡིན་ནམ་ཅི་ཞེས་བྱ་བ་ནི་འདོད་ཆགས་དང་མཚུངས་པར་ལྡན་པ་ཡིན་ནམ་ཞེས་བྱ་བའི་ཐ་ཚིག་གོ། །དེ་

ནི་འདོད་ཆགས་ཀྱིས་དེ་ལྟར་ཉེ་བར་བཅོམ་པ་ཡིན་ཞེས་བྱ་བ་ནི་འདོད་ཆགས་ཀུན་དུ་སྤྱོད་པས་མ་ཡིན་གྱི། དེ་ནི་བག་ཆགས་བཞག་པས་ཉེ་བར་བཅོམ་པ་ཡིན་ལ་རྣལ་འབྱོར་པ་བག་ཆགས་དེ་སྟེ་གནས་ངན་ལེན་དེ་རྣམ་པར་བཟློག་པར་ནི་སེམས་དེ་རྣམ་པར་

གྲོལ་བར་འགྱུར་རོ། །དེ་བཞིན་དུ་མ་རིག་པས་ཉེ་བར་ཉོན་མོངས་པ་ཅན་དུ་གྱུར་པའི་ཤེས་རབ་རྣམ་པར་མི་འདག་ཅེས་བྱ་བ་ནི་དེའི་ཕྱིར་ཤེས་རབ་མ་རིག་པ་ཡིན་ཡང་ཉེས་པ་མེད་དོ་ཞེས་སྟོན་པར་བྱེད་དོ། །ཡོངས་སུ་རྟོག་པ་ལ་ནི་སུ་ཞིག་ཟློག །ཅེས་བྱ་བ་ནི་དེ་ནི་

རྟོག་པ་ཙམ་དུ་ཟད་དེ། ལུང་ལ་མི་ལྟོས་པ་ཡིན་ནོ་ཞེས་བྱ་བར་སྟོན་ཏོ། །གང་ཡང་ཉོན་མོངས་པ་ཐམས་ཅད་མ་རིག་པ་ཡིན་ནོ་སྙམ་དུ་སེམས་པ་ཞེས་བྱ་བ་ནི་བཙུན་པ་དཔལ་ལེན་ཏོ། །འདི་སྙམ་དུ་མ་རིག་པ་ཞེས་བྱ་བ་འདི་ནི་ཉོན་མོངས་པ་ཐམས་ཅད་སྤྱིའི་

Vol. 142 · folio 291b

མིང་ཡིན་གྱི། འདོད་ཆགས་ལ་སོགས་པའི་ཉོན་མོངས་པ་མ་གཏོགས་པར་མ་རིག་པ་ནི་མེད་དོ་སྙམ་དུ་སེམས་སོ། །ཅིའི་ཕྱིར་སྙམ་དུ་སེམས་ཤེ་ན། སངས་རྒྱས་ཀྱིས་ཚེ་དང་ལྡན་པ་གསུས་པོ་ཆེ་ཆེན་པོ་རབ་ཏུ་མི་ཤེས་ཤིང་རབ་ཏུ་མི་ཤེས་ཏེ་དེ་ལྟ་བས་ན་མ་རིག་པ་

ཞེས་བྱའོ་ཞེས་གསུངས་པའི་མདོ་དེའི་ཕྱིར་ཏེ། ཉོན་མོངས་པ་འཇིག་ཚོགས་ལ་ལྟ་བ་ལ་སོགས་པ་ཡང་ལོག་པར་འཛིན་པའི་ཕྱིར་མི་ཤེས་པའི་རང་གི་ངོ་བོ་ནི་ཡིན་ནོ། །དེའི་ཡང་འདི་ཉིད་ཀྱིས་ཞེས་བྱ་བ་རྒྱས་པར་འབྱུང་བ་ནི་བཙུན་པ་དེའི་ཡང་དག་པ་སྨོས་པ་འདི་

ཉིད་ཀྱིས་བརྩལ་ཞིང་བཀག་པ་ཡིན་ཏེ། དེའི་གཞུང་ལུགས་ཞེས་བྱ་བ་ཞིག་ཁོང་ནས་དབྱུང་ངོ་། །ཇི་ལྟ་ཞེ་ན། སྨྲས་པ། ཉོན་མོངས་པ་ཐམས་ཅད་ཀྱི་རང་བཞིན་ཡིན་ན་ཀུན་དུ་སྦྱོར་བ་ལ་སོགས་པའི་ནང་དུ་ཡང་ལོགས་ཤིག་ཏུ་བཤད་པར་མི་འགྱུར་ཏེ། ཀུན་

དུ་སྦྱོར་བ་ལྷག་མ་དང་ཐ་མི་དད་པའི་ཕྱིར་རྗེས་སུ་ཆགས་པའི་ཀུན་དུ་སྦྱོར་བ་ལ་སོགས་པའི་ནང་དུ་མ་རིག་པའི་ཀུན་དུ་སྦྱོར་བ་ཞེས་ལོགས་ཤིག་ཏུ་བཤད་པར་མི་འགྱུར་ཞིང་། འདོད་ཆགས་ཀྱི་འཆིང་བ་དང་ཞེ་སྡང་གི་འཆིང་བ་ཞེས་གསུངས་ནས། གཏི་མུག་གི་

འཆིང་བ་ཞེས་བྱ་བ་དང་། འདོད་པའི་འདོད་ཆགས་ཀྱི་ཕྲ་རྒྱས་ཞེས་བྱ་བ་ལ་སོགས་པ་གསུངས་ནས། མ་རིག་པའི་ཕྲ་རྒྱས་ཞེས་བྱ་བ་དང་། ཆུ་བོ་དག་གི་ནང་དུ་མ་རིག་པའི་ཆུ་བོ་ཞེས་བྱ་བ་དང་། སྦྱོར་བ་དག་གི་ནང་དུ་མ་རིག་པའི་སྦྱོར་བ་ཞེས་བྱ་བ་ལོགས་ཤིག་

ཏུ་བཤད་པར་ཡང་མི་འགྱུར་བ་ཞིག་ན་རྗེས་སུ་ཆགས་པའི་ཀུན་དུ་སྦྱོར་བ་ལ་སོགས་པའི་ནང་དུ་ཡང་མ་རེག་པའི་ཀུན་དུ་སྦྱོར་བ་ལ་སོགས་པ་བཤད་དོ། །ཅིའི་ཕྱིར་ཕན་ཚུན་མཚུངས་པར་ལྡན་པ་མེད་ཅེ་ན། ལྟ་བ་དང་ལྟ་བར་རམ། འདོད་ཆགས་དང་འདོད་ཆགས་

སུ་མཚུངས་པར་ལྡན་པ་ནི་མེད་དོ། །མ་རིག་པ་ནི་ཉོན་མོངས་པའི་ས་མང་པོ་པ་ཉིད་ཡིན་པས་ལྟ་བ་ལ་སོགས་པ་དང་མཚུངས་པར་ལྡན་པར་ཡང་བཤད་དེ། ས་མང་པོ་པའི་ནི་མཚུངས་པར་ལྡན་པར་ངེས་པའི་ཕྱིར་རོ། །སེམས་ཀྱང་མ་རིག་པས་ཉེ་བར་

Vol. 142 · folio 292a

ཉོན་མོངས་པ་ཅན་དུ་གྱུར་པ་ཁོ་ནར་བཤད་པར་འགྱུར་ཏེ། མ་རིག་པས་ཉེ་བར་ཉོན་མོངས་པ་ཅན་དུ་གྱུར་པ་ཉིད་སྨོས་པ་ཁོ་ནས་འདོད་ཆགས་ལ་སོགས་པས་ཉེ་བར་ཉོན་མོངས་པ་ཅན་དུ་གྱུར་པ་ཉིད་གྲུབ་པའི་ཕྱིར་འདི་སྐད་དུ་འདོད་

ཆགས་ཀྱིས་ཉེ་བར་ཉོན་མོངས་པ་ཅན་དུ་གྱུར་པའི་སེམས་ཞེས་ནི་བཤད་པར་མི་འགྱུར་རོ། །འོན་ཏེ་བྱེ་བྲག་ཏུ་བྱ་བའི་ཕྱིར་དེ་སྐད་དུ་བཤད་དོ་ཞེས་བྱ་བར་འདོད་ན་ཞེས་བྱ་བ་ནི་འདོད་ཆགས་དང་ཁོང་ཁྲོ་བ་དང་། ང་རྒྱལ་གྱིས་ཞེས་ཉོན་མོངས་པ་ཐམས་

ཅད་སྨོས་པར་ཐལ་ན་མི་རུང་བས་འདོད་ཆགས་ཀྱི་མཚན་ཉིད་ཀྱི་མ་རིག་པས་ཉེ་བའི་ཉོན་མོངས་པ་ཅན་དུ་གྱུར་པ་ནི་མི་འདག་གོ་ཞེས་ཁྱད་པར་དུ་བྱ་དགོས་པར་འགྱུར་རོ། །གལ་ཏེ་འདོད་པ་ཡིན་ནོ་ཞེ་ན། འོ་ན་ནི་སེམས་ལ་ཡང་ཁྱད་པར་དུ་བརྗོད་པར་མི་

འགྱུར་གྱི། འདི་སྐད་དུ་མ་རིག་པས་ཉེ་བར་ཉོན་མོངས་པ་ཅན་དུ་གྱུར་པའི་སེམས་ནི་རྣམ་པར་མི་འདག་གོ་ཞེས་བྱ་བ་ཁོ་ན་ཞིག་བརྗོད་པར་བྱ་བ་ཡིན་པར་འགྱུར་རོ། །གསལ་བ་དང་ཤེས་རབ་དང་ཡེ་ཤེས་ཞེས་བྱ་བ་ནི་དོན་གཅིག་གོ། །མ་རིག་

པ་ལ་ཇི་ལྟ་བ་དེ་ཁོ་ན་བཞིན་དུ་སྐྱོན་དུ་འགྱུར་རོ་ཞེས་བྱ་བ་ནི་ཡང་མི་གསལ་བ་ཞེས་བྱ་བའི་དོན་གང་ཡིན་གསལ་བ་མ་ཡིན་པ་དོན་གང་ཡིན་པའོ། །མིག་ལ་སོགས་པ་དག་ལ་ཡང་ཐལ་བར་འགྱུར་རོ། །འོ་ན་ནི་གསལ་བ་མེད་པ་ཡིན་ནོ། །དེ་ལྟ་ན་ནི་

ཅིའང་མ་ཡིན་པར་འགྱུར་ཏེ་རིགས་པ་མ་ཡིན་ནོ་ཞེས་བྱ་བ་ཡིན་ནོ། །འོན་ཏེ་གསལ་བའི་མི་མཐུན་པའི་ཕྱོགས་སུ་གྱུར་པ་ཆོས་གཞན་ཞིག་ཡིན་ནོ་ཞེ་ན་ཡང་མ་རིག་པ་ལ་ཇི་ལྟ་བ་དེ་བཞིན་དུ་དེ་ཅི་ཡིན་པ་འདི་མི་ཤེས་སོ། །ཆོས་རྣམས་བསྟན་པ་དེ་ལྟ་བུ་ཡང་

ཡོད་དེ་ཞེས་བྱ་བ་རྒྱས་པར་འབྱུང་བ་ནི་ལས་ཀྱིས་རབ་ཏུ་ཕྱེ་བ་དེ་ལྟ་བུ་ཞེས་བྱ་བའི་ཐ་ཚིག་གོ། །དེ་ལྟ་བས་ན་མ་རིག་པའི་ངོ་བོ་ཉིད་ནི་རིག་པའི་མི་མཐུན་པའི་ཆོས་གསལ་བ་མ་ཡིན་པ་དེ་འགའ་ཞིག་ཡོད་དེ། དེའི་ལས་ནི་རིག་པ་དང་མི་མཐུན་པ་ཉིད་

Vol. 142 · folio 292b

ཡིན་ནོ་ཞེས་ལས་ཀྱི་བྱེད་པ་ལས་ཤེས་པར་བྱའོ། །དཔེར་ན་མིག་གང་ཞེ་ན་གཟུགས་དང་བ་མིག་གི་རྣམ་པར་ཤེས་པའི་རྟེན་གང་ཡིན་པའོ་ཞེས་བྱ་བ་ལ་གཟུགས་དང་བ་ཞེས་བྱ་བ་གོ་འདི་བསྟན་པ་ངོ་བོ་ཉིད་ཀྱིས་རབ་ཏུ་ཕྱེ་བ་མ་ཡིན་ནམ་ཞེ་ན་མ་ཡིན་ཏེ།

མངོན་སུམ་མ་ཡིན་པའི་ཕྱིར་དང་། རྟག་ཏུ་མིག་གི་རྣམ་པར་ཤེས་པའི་རྗེས་སུ་དཔག་པར་བྱ་བ་ཡིན་པའི་ཕྱིར་རོ། །ངའོ་སྙམ་དུ་སེམས་ཅན་འཇུག་པ་ཞེས་བྱ་བའི་དོན་འདི་ནི་མི་ཤེས་པ་ཡིན་ཏེ། གནས་བརྟན་དེས་ཀྱང་འདིའི་བརྗོད་པར་བྱ་བ་ནི་དམིགས་

མ་ཕྱེད་དོ། །མདོ་སྡེ་པ་རྣམས་ཀྱིས་ནི་འཇུག་པ་ཞེས་བྱ་བ་མ་རིག་པ་རྣམ་པ་གཞན་ཞིག་ཡིན་པར་བརྗོད་དོ། །མདོ་ལས་གསུངས་པ་གང་ཡིན་པ་དེ་ཡིན་ནོ་ཞེས་བྱ་བ་རྒྱས་པར་འབྱུང་བ་ལ། བཙུན་པ་ཆོས་སྐྱོབ་ཀྱི་བསམ་པ་ནི་སྲེད་པ་ལ་སོགས་པ་ལོགས་ཤིག་

ཏུ་བསྟན་པའི་ཕྱིར་འཇུག་པ་ཞེས་བྱ་བ་འདི་ནི་མ་རིག་པ་རྣམས་ཀྱི་རྣམ་པ་གཞན་ཞིག་སྨོས་པ་ཡིན་ནོ་སྙམ་པ་ཡིན་ནོ། །སློབ་དཔོན་གྱིས་བཤད་པ། འཇུག་པ་དེ་ཡོད་ཀྱང་། མདོ་ལས་འཇུག་པ་བཤད་པ་ཡོད་ཀྱང་ངོ་། །གཅིག་གི་ཚིག་སྨོས་པ་ནི་དེའི་

རིགས་བསྟན་པའི་ཕྱིར་རོ། །དེ་མ་རིག་པ་འདི་ཡིན་ནོ་ཞེས་བྱ་བ་འདི་ག་ལས་ཏེ་མ་རིག་པ་ཡིན་ནོ་ཞེས་བྱ་བ་འདི་གཏན་ཚིགས་གང་གིས་ཡོངས་སུ་ཆོད། བཙུན་པ་ཆོས་སྐྱོབ་ཀྱིས་རང་གི་བསམ་པ་དགྲོལ་བའི་ཕྱིར་འདི་ལྟར་འདི་ཉོན་མོངས་པ་གཞན་ཡིན་ནོ་

ཞེས་བརྗོད་པར་མི་ནུས་པའི་ཕྱིར་རོ་ཞེས་བྱ་བ་སྨོས་སོ། །ཅིའི་ཕྱིར་མི་ནུས་ཤེ་ན། སྲེད་པ་དང་། ལྟ་བ་དང་། ངའོ་སྙམ་པའི་ང་རྒྱལ་རྣམས་ལོགས་ཤིག་ཏུ་བཤད་པའི་ཕྱིར་རོ། །སློབ་དཔོན་གྱིས་ང་རྒྱལ་གཞན་ཡང་ཡོད་པ་ཁོ་ན་མ་ཡིན་ནམ་ཞེས་

བྱ་བ་སྨོས་ཏེ། ངའོ་སྙམ་པའི་ང་རྒྱལ་ལས་གཞན་པ་དྲུག་པོ་དག་ལས་གང་ཡང་རུང་བ་ཞིག་སྟེ་འཇུག་པ་ཞེས་བྱ་བ་ནི་དེ་ཡིན་གྱི། མ་རིག་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །འདི་ལ་དཔྱད་པར་ཆད་ན་བརྗོད་པ་མང་པོར་འགྱུར་ཞེས་བྱ་བ་ནི་མ་

Vol. 142 · folio 293a

རིག་པའི་ཡན་ལག་འདི་ལ་དཔྱད་པར་ཆད་ན་གཞུང་མང་པོར་འགྱུར་ཏེ། ཇི་སྐད་བཤད་པ་ལྟ་བུ་ཡིན་ནོ། །དེ་ལྟ་བས་ན་འདི་ནི་གཞག་སྟེ་དེ་ཙམ་ཁོ་ནས་ཆོག་གོ། །ཡང་ན་ང་རྒྱལ་གཞན་ཁོ་ན་ཡིན་གྱི་མ་རིག་པ་ནི་མ་ཡིན་ནོ་ཞེས་བྱ་བ་འདི་

ག་ལས་ཞེས་བྱ་བ་དེ་ལྟ་བུ་ལ་སོགས་པ་དཔྱད་པར་ཆད་ན་ལན་དང་ཡང་ལན་སྨོས་པས་བརྗོད་པ་མང་པོར་འགྱུར་ཏེ། དེ་ལྟ་བས་ན་དཔྱད་པ་འདི་ནི་གཞག་གོ་ཞེས་བྱ་བའི་ཐ་ཚིག་གོ། །ཡང་མིང་དང་གཟུགས་ཞེས་བྱ་བ་ནི་མ་རིག་པའི་ཡན་ལག་བསྟན་ཟིན་པའི་

འོག་ཏུ་འདུ་བྱེད་ཀྱི་ཡན་ལག་ཡིན་ལ། དེའི་འོག་ཏུ་ཡང་རྣམ་པར་ཤེས་པའི་ཡན་ལག་བསྟན་པར་བྱ་དགོས་ན། ཅི་སྟེ་འདི་དག་ལས་འདས་ནས་ཉེ་བར་འགོད་ཅེ་ན། །འདི་ཉིད་ནི་སློབ་དཔོན་གྱིས། །བཤད་ཟིན་འཆད་པར་འགྱུར་བ་གཞན། །ཞེས་འཆད་

པར་འགྱུར་རོ། །གཟུགས་ནི་རྒྱ་ཆེར་བཤད་པ་ཡིན་ནོ་ཞེས་བྱ་བ་ནི། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་བྱ་བ་དེར་རོ། །མིང་དང་དབང་པོ་དང་དོན་གྱི་དབང་གིས་ཞེས་བྱ་བ་ནི་མིང་གི་དབང་དང་། དབང་པོའི་དབང་

དང་དོན་གྱི་དབང་གིས་གཟུགས་ལ་སོགས་པའི་དོན་རྣམས་ལ་གཞོལ་བས་ན་མིང་ངོ་། །མིང་གང་གི་དབང་གིས་ཤེ་ན་ཞེས་བྱ་བ་ནི་མིང་རྣམ་པ་གཉིས་ཡོད་པའི་ཕྱིར་འདྲི་བ་ཡིན་ནོ། །སློབ་དཔོན་གྱིས་འཇིག་རྟེན་ན་གྲགས་པ་གང་ཡིན་པ་སྟེ་ཞེས་བྱ་བ་འདི་

རྒྱས་པར་སྨོས་ཏེ། བ་ལང་དང་རྟ་ཞེས་བྱ་བ་ནི་སྤྱི་གོ་བར་བྱེད་པ་ཡིན་ནོ། །གཟུགས་དང་རོ་ཞེས་བྱ་བ་ནི་དོན་གཅིག་གོ་བར་བྱེད་པ་ཡིན་ནོ། །དེ་ལྟ་བས་ན་ཚོར་བ་ལ་སོགས་པའི་ཕུང་པོ་བཞི་ནི་མིང་ཞེས་བྱ་བའི་སྒྲར་བརྗོད་དེ། འདི་ལྟར་མིང་དེའི་དབང་སྟེ་མིང་དུ་

འདོགས་པའི་དབང་གིས་དོན་མངོན་སུམ་མ་ཡིན་པ་དག་ལ་ཡང་མིང་འདིའི་དོན་ནི་འདི་ཡིན་ནོ་ཞེས་གཞོལ་ཞིང་འཇུག་པར་འགྱུར་རོ། །དབང་པོ་དོན་གྱི་དབང་གིས་ནི་གཟུགས་ལ་སོགས་པ་མངོན་སུམ་དག་ལ་གཞོལ་བར་འགྱུར་ཏེ། སྐྱེའོ་ཞེས་བྱ་བའི་ཐ་ཚིག་

Vol. 142 · folio 293b

གོ། །དོན་གྱི་དབང་གིས་ནི་མིང་ལ་ཡང་འདིའི་མིང་ནི་འདིའོ་ཞེས་གཞོལ་བར་འགྱུར་རོ། །དེ་ཡང་ཅིའི་ཕྱིར་མིང་ཉིད་ཡིན་ཞེ་ན་ཞེས་བྱ་བ་ནི་མིང་དུ་འདོགས་པའི་མཚན་ཉིད་ཀྱི་མིང་དེ་ཡང་རྒྱུ་གང་གིས་མིང་ཉིད་ཡིན་ཞེ་ན། དོན་དེ་དང་དེ་དག་ལ་མིང་དེ་གཞོལ་

བར་བྱེད་པའི་ཕྱིར་རོ་ཞེས་བྱ་བ་ནི་འདི་ལྟར་དོན་དེ་དག་ལ་ཕུང་པོ་བཞིའི་མཚན་ཉིད་ཀྱི་མིང་གཞོལ་བར་བྱེད་ཅིང་འཇུག་པར་བྱེད་པས་དེ་ལྟ་བས་ན་འདི་ནི་མིང་ཉིད་ཡིན་ཏེ། གཞོལ་བར་བྱེད་པས་ནི་མིང་ཉིད་ཡིན་པའི་ཕྱིར་རོ། །འདིར་ལུས་བོར་ནས་ཞེས་

བྱ་བ་རྒྱས་པར་འབྱུང་བ་ནི་འཆི་བའི་ཚེ་ལུས་བོར་ནས། སྐྱེ་བ་གཞན་དུ་གཞོལ་བའི་ཕྱིར་ཚོར་བ་ལ་སོགས་པ་གཟུགས་ཅན་མ་ཡིན་པའི་ཕུང་པོ་རྣམས་ནི་མིང་ཞེས་བྱ་སྟེ་ཇི་སྐད་དུ་ཤི་ཞིང་དུས་བྱས་པ་དེའི་ལུས་རུལ་བ་དེ་ཉེ་དུ་རྣམས་ཀྱིས་མེས་བསྲེགས་པའམ།

ཆུར་བསྐུར་བའམ། སའི་འོག་ཏུ་འཇུག་པར་འགྱུར་ཞིང་རླུང་དང་ཉི་མ་དག་གིས་ཡོངས་སུ་ཟད་པ་དང་། གཏུགས་པར་འགྱུར་ཏེ། སེམས་ཞེས་བྱ་བ་དང་། ཡིད་ཅེས་བྱ་བ་དང་། རྣམ་པར་ཤེས་པ་ཞེས་བྱ་བ་དད་པས་ཡོངས་སུ་བསྒོས་པ་དང་། ཚུལ་

ཁྲིམས་དང་། ཐོས་པ་དང་། གཏོང་བ་དང་། ཤེས་རབ་ཀྱིས་ཡོངས་སུ་བསྒོས་པ་གང་ཡིན་པ་དེ་ནི་ཚེ་ཕྱི་མ་ལ་གང་དུ་འགྲོ་བ་དང་། ཁྱད་པར་དུ་འགྲོ་བ་དང་། མཐོ་རིས་སུ་འགྲོ་བར་འགྱུར་རོ་ཞེས་གསུངས་པ་ལྟ་བུ་ཡིན་ནོ། །སྐྱེ་མཆེད་དྲུག་ནི་བཤད་

ཟིན་ཏོ་ཞེས་བྱ་བ་ནི། དེ་དག་གི་ནི་རྣམ་ཤེས་རྟེན། །མིག་ལ་སོགས་པ་གཟུགས་དང་བ། །རྣམ་ཤེས་སོ་སོར་རྣམ་རིག་པ། །ཡིད་ཀྱི་སྐྱེ་མཆེད་ཀྱང་དེ་ཡིན། །ཞེས་བྱ་བ་དེར་རོ། །ཡིད་ཀྱི་དབང་པོ་འགགས་པ་གོ་གཟུགས་ལ་སོགས་པའི་ཆོས་མ་འོངས་

པ་འབྱུང་བར་འགྱུར་བ་དང་། ཡིད་ཀྱི་རྣམ་པར་ཤེས་པ་ད་ལྟར་གྱི་དང་། ཇི་ལྟར་འདུ་ཤེས་ན། རྒྱུ་དང་འབྲས་བུའི་དངོས་པོ་གང་ཡིན་པ་སྟེ། རྒྱུ་ནི་ཡིད་ཀྱི་དབང་པོ་དང་གཟུགས་ལ་སོགས་པའི་ཆོས་སོ། །འབྲས་བུ་ནི་ཡིད་ཀྱི་རྣམ་པར་ཤེས་པའོ། །

Vol. 142 · folio 294a

འབྲས་བུ་གཅིག་པའི་དོན་ཞེས་བྱ་བ་ནི་འབྲས་བུ་གཅིག་པ་ཉིད་དོན་ཡིན་པས་འབྲས་བུ་གཅིག་པའི་དོན་ཏེ་འབྲས་བུ་གཅིག་པ་ཉིད་ཅེས་བྱ་བའི་ཐ་ཚིག་གོ། །ཇི་ལྟར་འབྲས་བུ་གཅིག་པའི་དོན་ཡིན་ཞེ་ན། སྨྲས་པ། ཡིད་ཀྱི་དབང་པོ་ལ་

སོགས་པ་གསུམ་པོ་དེ་ཐམས་ཅད་ཀྱང་རེག་པ་བསྐྱེད་པར་བྱ་བ་ལ་མཐུན་ཞིང་རྗེས་སུ་མཐུན་པ་ཡིན་ནོ། །ཆོས་ཀྱི་རྣམ་གྲངས་དྲུག་ཅེས་བྱ་བ་ནི་འདི་ལ་དྲུག་ཚན་དྲུག་ཡོད་པས་ན་དྲུག་ཚན་དྲུག་པ་སྟེ། ནང་དང་ཕྱི་དང་རྣམ་པར་ཤེས་པ་དང་། རེག་པ་དང་། ཚོར་

བ་དང་། སྲེད་པ་དང་། དྲུག་ཡོད་པའི་ཕྱིར་རོ། །ཁུངས་ནི་རེག་པའི་ཚོགས་དྲུག་ཅེས་བྱ་བ་ཡིན་ཏེ། གཞན་པ་ཉིད་མ་ཡིན་ན་དབང་པོ་དང་དོན་དང་རྣམ་པར་ཤེས་པ་དག་བཤད་ཟིན་པས། རེག་པའི་ཚོགས་དྲུག་ཅེས་བཟླས་པར་ཡང་མི་འགྱུར་ཏེ། དེའི་ཕྱིར་དྲུག་

ཚན་དྲུག་ཉིད་ཉམས་པར་འགྱུར་རོ། །ཚོར་བ་དང་སྲེད་པ་དག་ཀྱང་ཆོས་ཀྱི་སྐྱེ་མཆེད་ལས་ལོགས་ཤིག་ན་ཡོད་པར་འགྱུར་དུ་འོང་ཞེས་བྱ་བ་ནི་གལ་ཏེ་ལོགས་ཤིག་ཏུ་བསྟན་པའི་ཕྱིར་ལོགས་ཤིག་ན་ཡོད་པར་འགྱུར་ན་ནི་ཚོར་བ་དང་སྲེད་པ་དག་ཀྱང་ཆོས་ཀྱི་སྐྱེ་

མཆེད་ལས་ལོགས་ཤིག་ཏུ་བསྟན་པས་ཚོར་བ་དང་སྲེད་པ་དེ་གཉིས་ཀྱང་ཆོས་ཀྱི་སྐྱེ་མཆེད་ལས་གཞན་ཡིན་པར་འགྱུར་བ་ཞིག་ན། དེ་གཉིས་ནི་ཆོས་ཀྱི་སྐྱེ་མཆེད་ཀྱི་ནང་དུ་འདུས་པའི་ཕྱིར་ལོགས་ཤིག་ན་ཡོད་པར་ཡང་མི་འདོད་དོ། །དེ་ནི་ཉེས་པ་མེད་དེ་ཞེས་བྱ་བ་

རྒྱས་པར་འབྱུང་བ་ནི་ཇི་སྐད་བཤད་པ་དེ་ནི་ཉེས་པ་མེད་དེ། དེ་དག་ལས་མ་གཏོགས་པ་སྟེ། ཚོར་བ་དང་སྲེད་པ་ལས་མ་གཏོགས་པ་ཆོས་ཀྱི་སྐྱེ་མཆེད་འདུ་ཤེས་ལ་སོགས་པའི་ངོ་བོ་ཉིད་ཀྱང་ཡོད་པའི་ཕྱིར་ཏེ་ཡོད་པ་ཡིན་པའི་ཕྱིར་རོ། །དེ་ལྟ་བུར་མེད་དོ་ཞེས་བྱ་

བ་རྒྱས་པར་འབྱུང་བ་ནི་འདི་སྐད་དུ་གསུམ་འདུས་པ་ནི་རེག་པ་ཡིན་ནོ་ཞེས་སྨྲ་བ་ཁྱོད་ཀྱི་ལྟར་ན་དེ་ལྟ་བུར་རེག་པར་གྱུར་པ་གསུམ་ལས་ལོགས་ཤིག་ན་མེད་ཀྱང་དགོས་པའི་དབང་གིས་མདོ་འདི་ལས་ལྷག་མ་གང་ཞིག་ལ་རེག་པའི་ཚོགས་དྲུག་གོ་ཞེས་སྨོས་སུ་རུང་

Vol. 142 · folio 294b

བ་རེག་པར་གྱུར་པ་དབང་པོ་དང་དོན་དང་རྣམ་པར་ཤེས་པ་གསུམ་ལས་རེག་པར་གྱུར་པ་དབང་པོ་དང་དོན་དང་རྣམ་པར་ཤེས་པ་གཞན་གསུམ་ནི་མེད་དོ། །དེ་ལྟ་བས་ན་ཚོར་བ་དང་སྲེད་པ་དག་ནི་ལོགས་ཤིག་ན་མེད་དུ་ཟིན་ཀྱང་གདུལ་བྱའི་དོན་གྱི་དབང་གིས་ལོགས་ཤིག་

ཏུ་བསྟན་པར་རིགས་ཀྱི། འདུས་པ་ཙམ་རེག་པ་ཡིན་པར་སྨྲ་བ་ཁྱོད་ཀྱི་ལྟར་ན་ནི་དགོས་པ་གང་གིས་ཀྱང་རེག་པའི་ཚོགས་དྲུག་ཅེས་ལོགས་ཤིག་ཏུ་བསྟན་པར་རིགས་པ་མ་ཡིན་ཏེ། འདི་ལྟར་རེག་པའི་ཚོགས་དྲུག་ཅེས་སྨོས་པས་དབང་པོ་དང་དོན་དང་རྣམ་

པར་ཤེས་པ་གསུམ་བཤད་ཟིན་པའི་ཕྱིར་དེ་རྣམས་མི་སྨོས་པར་འགྱུར་རོ། །དེའི་ཕྱིར། ཆོས་ཀྱི་རྣམ་གྲངས་དྲུག་ཚན་དྲུག །ཅེས་བྱ་བ་མི་འགྲུབ་པར་འགྱུར་རོ། །ཁོ་བོའི་ལྟར་ན་ནི་རེག་པ་དང་ཚོར་བ་དང་སྲེད་པ་དྲུག་ཚན་སྨོས་ཀྱང་དེ་རྣམས་ལས་མ་

གཏོགས་པའི་ཆོས་ཀྱི་སྐྱེ་མཆེད་ལ་སོགས་པའི་དོན་དང་། དབང་པོ་དང་རྣམ་པར་ཤེས་པའི་དྲུག་ཚན་ཡོད་པའི་ཕྱིར་འགྲུབ་སྟེ། དེ་ལྟ་བས་ན་རེག་པ་དྲུག་ཚན་ཞེས་ལོགས་ཤིག་ཏུ་བསྟན་པའི་ཕྱིར་རེག་པ་ཞེས་བྱ་བ་སེམས་དང་མཚུངས་པར་ལྡན་པའི་ཆོས་

གཞན་ཞིག་ཡོད་དོ་ཞེས་བྱ་བར་གྲུབ་པོ། །ཇི་སྟེ་མདོ་འདི་ལས། ནང་གི་དྲུག་དང་ཕྱི་ཡི་དྲུག །ཅེས་འབྱུང་བས་དབང་པོ་དང་དོན་དང་རྣམ་པར་ཤེས་པ་མེད་པ་དག་ཀྱང་བསྟན་ཏེ། དེའི་ཕྱིར་དབང་པོ་དང་ཡུལ་དང་རྣམ་པར་ཤེས་པ་གསུམ་རེག་པར་གྱུར་པ་ཞེས་བྱ་བ་འདི་

ལྷག་མ་བསྟན་པའི་ཕྱིར་འདི་ལས་རེག་པའི་ཚོགས་དྲུག་ཅེས་སྨོས་པ་ཡིན་ནོ་ཞེས་སྨྲ་བར་གྱུར་ན། ལན་འདི་དགག་པའི་ཕྱིར་འདི་བརྩམས་ཏེ། གལ་ཏེ་རྣམ་པར་ཤེས་པ་མེད་པའི་དབང་པོ་དང་དོན་དག་ཡོད་དུ་ཟིན་ཀྱང་སྟེ། དེ་དང་མཚུངས་པ་དག་ཅེས་བྱ་བའི་

ཐ་ཚིག་གོ། །དབང་པོ་དང་དོན་མེད་པའི་རྣམ་པར་ཤེས་པ་ནི་མེད་དེ། རྣམ་པར་ཤེས་པ་ནི་གདོན་མི་ཟ་བར་དབང་པོ་དང་། དོན་དང་བཅས་པ་ཡིན་ལ་རྣམ་པར་ཤེས་པ་དེ་ཡང་འདི་ལས་རྣམ་པར་ཤེས་པའི་ཚོགས་དྲུག་ཅེས་འབྱུང་བས་བསྟན་ཟིན་ཏོ། །

Vol. 142 · folio 295a

དེ་ལྟ་བས་ན་རྣམ་པར་ཤེས་པ་ནི་ཚོགས་དྲུག་ཅེས་འབྱུང་བའི་ཕྱིར་དབང་པོ་དང་དོན་དང་རྣམ་པར་ཤེས་པ་གསུམ་བསྟན་ཟིན་པས་ཡང་རེག་པའི་ཚོགས་དྲུག་ཅེས་རེག་པ་སྨོས་ཟིན་པ་སྨོས་པ་ནི་དོན་མེད་པར་འགྱུར་རོ། །དེའི་ཕྱིར་རེག་པ་

ནི་འདུས་པ་ལས་གཞན་ཡིན་ནོ་ཞེས་བྱ་བར་གྲུབ་པོ། །འདིར་སློབ་དཔོན་དཔལ་ལེན་གྱིས་མིག་དང་གཟུགས་ཐམས་ཅད་ཀྱང་མིག་གི་རྣམ་པར་ཤེས་པ་ཐམས་ཅད་ཀྱི་རྒྱུ་མ་ཡིན་ཞེས་བྱ་བར་རྒྱས་པར་སྨོས་ཏེ། ཐམས་ཅད་ཀྱང་མ་ཡིན་ཞེས་བྱ་བ་ནི་

མིག་དང་གཟུགས་སྔར་བྱུང་བ་དག་རྒྱུ་ཡིན་གྱི་རྣམ་པར་ཤེས་པ་དང་ལྷན་ཅིག་འབྱུང་བ་དག་ནི་མ་ཡིན་པའོ། །མིག་གི་རྣམ་པར་ཤེས་པ་ཐམས་ཅད་ཀྱང་འབྲས་བུ་མ་ཡིན་ཞེས་བྱ་བ་འདི་མིག་དང་གཟུགས་སྔར་བྱུང་བ་དག་གི་ཕྱིས་བྱུང་བ་ཡིན་གྱི་ལྷན་

ཅིག་འབྱུང་བ་དག་གི་ནི་མ་ཡིན་པས་དེའི་ཕྱིར་རེག་པའི་ཚོགས་དྲུག་ཅེས་འབྱུང་བའི་མདོ་འདི་ལས་གང་དག་རྒྱུ་དང་འབྲས་བུའི་དངོས་པོ་ཡིན་པའི་རྣམ་པར་ཤེས་པ་དང་དབང་པོ་དང་ཡུལ་དེ་དག་རེག་པའི་དངོས་པོར་རྣམ་པར་གཞག་གོ་ཞེས་ཟེར་ཏེ་འདི་ནི་

གཞན་དུ་བསྟན་པ་མ་ཡིན་ནོ། །དེ་སྐད་དུ་མི་འདོན་ཏོ་ཞེས་བྱ་བ་ནི་དེ་སྐད་དུ་འདོན་པར་མི་བྱེད་དོ་ཞེས་བྱ་བའི་ཐ་ཚིག་གོ། །འོ་ན་ཇི་སྐད་དུ་འདོན་ཞེ་ན་ཆོས་འདི་དག་འབྲེལ་པ་དང་། འདུས་པ་དང་། ཚོགས་པ་ལས་བྱུང་བ་གང་ཡིན་པ་དེ་ནི་རེག་པའོ་

ཞེས་འདོན་ཏོ། །ཡང་ན་ནི་འདི། རྒྱུ་ལ་འབྲས་བུ་བཏགས་པ་ཡིན། །ཞེས་བྱ་བ་ནི་རྒྱུ་འབྲེལ་ཅིང་འདུས་ལ་ཚོགས་པ་ལ་འབྲས་བུ་རེག་པ་བཏགས་ཏེ། དཔེར་ན། སངས་རྒྱས་རྣམས་ནི་འབྱུང་བ་བདེ། །ཞེས་བྱ་བ་ལྟ་བུའོ། །འདི་ལ་རྒྱུ་སྐྱེ་

བའི་རྣམ་པ་ཧ་ཅང་མང་པོར་འཕྲོ་བ་ཡོད་པས། རྒྱུ་སྐྱེ་བའི་རྣམ་པ་ཧ་ཅང་མང་པོར་འཕྲོ་བ་ཡིན་ནོ། །ཚིག་བླ་དགས་ཞེས་བྱ་བ་ནི་མིང་ཡིན་ནོ་ཞེས་བྱ་བ་འདིས་ལྷག་པར་བརྗོད་པས་ན་ཚིག་བླ་དགས་ཏེ་ཚིག་ནི་མིང་ལ་འཇུག་ལ། མིང་གིས་

Vol. 142 · folio 295b

ནི་དོན་རྗོད་པར་བྱེད་པས་ཚིག་བླ་དགས་ནི་མིང་ཡིན་ནོ། །མིང་དེ་ལྷག་པར་ཏེ་ཕལ་ཆེར་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པ་འདིའི་དམིགས་པ་ཡིན་པས་དེའི་ཕྱིར་ཚིག་བླ་དགས་ཀྱི་འདུས་ཏེ་རེག་པ་ཞེས་བྱའོ་ཞེས་གྲག་སྟེ། རེག་པ་དང་འདུས་ཏེ་རེག་

པ་ཞེས་བྱ་བ་ནི་གཅིག་གོ། །ཡིད་ཀྱི་རྣམ་པར་ཤེས་པས་སྔོན་པོ་ཡང་རྣམ་པར་ཤེས་ཞེས་བྱ་བ་ནི་བརྗོད་པར་བྱ་བ་ཡང་རྣམ་པར་ཤེས་སོ་ཞེས་བྱ་བའི་ཐ་ཚིག་གོ། །སྔོན་པོའོ་ཞེས་བྱ་བར་ཡང་རྣམ་པར་ཤེས་ཞེས་བྱ་བ་ནི་དོན་འདིའི་མིང་ནི་འདི་ཡིན་ནོ་ཞེས་བྱ་

བར་རྣམ་པར་ཤེས་པའོ། །གཅིག་ནི་རྟེན་གྱིས་རབ་ཏུ་ཕྱེ་བ་ཡིན། །ཞེས་བྱ་བ་ནི་དང་པོ་ནི་རྟེན་གྱིས་རབ་ཏུ་ཕྱེ་བ་ཡིན་ཏེ། ཐོགས་པའི་རྟེན་ཅན་གྱི་རེག་པའམ་ཐོགས་པའི་རེག་པ་ནི་ཐོགས་པའི་རེག་པ་ཡིན་ནོ། །དམིགས་པས་རབ་ཏུ་ཕྱེ་བ་ཡིན། །

ཞེས་བྱ་བ་ནི་ཚིག་བླ་དགས་ཀྱི་དམིགས་པ་ཅན་ནམ་ཚིག་བླ་དགས་ལ་རེག་པ་ནི་ཚིག་བླ་དགས་ཀྱི་རེག་པ་ཡིན་ནོ། །ཚིག་གི་དབང་དུ་བྱས་ནས་ཞེས་བྱ་བ་ནི་ཚིག་གི་དབང་དུ་བྱས་ཤིང་ཚིག་ངེས་པར་གཟུང་ནས་གཟུགས་ལ་སོགས་པའི་དོན་རྣམས་ལ་ཡིད་ཀྱི་རྣམ་

པར་ཤེས་པ་འཇུག་གི་ལྔ་པོ་མིག་གི་རྣམ་པར་ཤེས་པ་ལ་སོགས་པ་ནི་ཚིག་གི་དབང་དུ་བྱས་ནས་དོན་རྣམས་ལ་འཇུག་པ་མ་ཡིན་ཏེ། དེའི་ཕྱིར་ཡིད་ཀྱི་རྣམ་པར་ཤེས་པ་དེ་ཉིད་ཚིག་བླ་དགས་ཡིན་ཏེ་ཚིག་ལ་འཇུག་པ་ནི་ཚིག་བླ་དགས་ཞེས་བྱའོ། །དེ་དང་མཚུངས་

པར་ལྡན་པའི་རེག་པ་ནི་ཚིག་བླ་དགས་ཀྱི་རེག་པ་སྟེ། དེས་ནི་རེག་པ་གཉིས་པ་འདི་ནི་མཚུངས་པར་ལྡན་པས་རབ་ཏུ་ཕྱེ་བ་ཡིན་ཞེས་བྱའོ། །རིག་པ་དང་མ་རིག་པ་དང་གཞན་རེག་ཅེས་བྱ་བ་ནི་རིག་པ་དང་མ་རིག་པ་དང་གཞན་ནི་རིག་དང་མ་རིག་དང་གཞན་རེག་སྟེ། རིག་པ་

དང་། མ་རིག་པ་དང་། དེ་གཉིས་ལས་གཞན་པ་ཞེས་བྱ་བའི་ཐ་ཚིག་གོ། །རིག་པ་ཞེས་བྱ་བ་ནི་ཟག་པ་མེད་པའི་ཤེས་རབ་པོ། །མ་རིག་པ་ནི་ཉོན་མོངས་པ་ཅན་གྱི་ཤེས་རབ་པོ། །རིག་པ་ཡང་མ་ཡིན་མ་རིག་པ་ཡང་མ་ཡིན་པ་ནི་ཤེས་རབ་དགེ་བ་ཟག་པ་དང་བཅས་པ་གང་

Vol. 142 · folio 296a

ཡིན་པ་དང་། མ་བསྒྲིབས་ལ་ལུང་དུ་མ་བསྟན་པའི་ཤེས་རབ་གང་ཡིན་པ་སྟེ། རེག་པ་དེ་དག་ཀྱང་གོ་རིམས་བཞིན་དུ་རིག་པར་བྱའོ། །མ་རིག་པའི་རེག་པ་ཞེས་བྱ་བ་རྒྱས་པར་འབྱུང་བ་ནི་མ་རིག་པའི་རེག་པ་ཉོན་མོངས་པ་

ཐམས་ཅད་དང་མཚུངས་པར་ལྡན་པ་ཡང་དང་ཡང་ཀུན་དུ་འབྱུང་ཞིང་རྟག་ཏུ་ཀུན་དུ་འབྱུང་བ་ནི་ཕྱོགས་གཅིག་ཡིན་ཏེ་དེ་སྨོས་པས་རེག་པ་གཉིས་སུ་འགྱུར་ཏེ་གནོད་སེམས་དང་རྗེས་སུ་ཆགས་པའི་རེག་པ་ཡིན་ནོ། །བདེ་བ་མྱོང་འགྱུར་ལ་སོགས་གསུམ། །ཞེས་

བྱ་བ་ནི་བདེ་བ་མྱོང་བའོ། །བདེ་བ་མྱོང་བར་རུང་བ་ནི་བདེ་བ་མྱོང་བར་འགྱུར་བའོ། །ཡང་ན་འདི་ལ་བདེ་བ་མྱོང་བར་འགྱུར་བ་ཡོད་པས་ན་བདེ་བ་མྱོང་བར་འགྱུར་བའོ། །འདི་དག་ལ་དེ་དག་ལ་སོགས་པ་ཡོད་པས་ན་བདེ་བ་མྱོང་བར་འགྱུར་བ་ལ་སོགས་པའོ། །

བདེ་བ་དང་མཐུན་པའི་ཕྱིར་ཞེས་བྱ་བ་ནི་བདེ་བའི་ཚོར་བར་བྱ་བ་དང་མཐུན་པ་ནི་བདེ་བ་མྱོང་བར་འགྱུར་བའོ། །ཡང་ན་དེ་མྱོང་བར་བྱ་བའམ་མྱོང་བར་ནུས་པ་ཞེས་བྱ་བ་ལ། མྱོང་བར་བྱ་བ་ཞེས་བྱ་བ་ནི་ལས་ཙམ་དུ་སྟོན་ཏོ། །མྱོང་བར་ནུས་པ་ཞེས་བྱ་བ་ནི་འོས་པར་

སྟོན་པ་ཡིན་ནོ། །དེ་དག་ནི་རིག་པ་བཅུ་དྲུག་ཡིན་ནོ་ཞེས་བྱ་བ་ནི་མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་དུ་དྲུག་དང་། ཡང་ཐོགས་པའི་རེག་པ་དང་། ཚིག་བླ་དགས་ཀྱི་རེག་པ་དང་། རིག་པ་དང་མ་རིག་པའི་རེག་པ་དང་། རིག་པ་

ཡང་མ་ཡིན་མ་རིག་པ་ཡང་མ་ཡིན་པའི་རེག་པ་དང་། རེག་པ་གཉིས་པོ་གནོད་སེམས་དང་། རྗེས་སུ་ཆགས་པའི་རེག་པ་དང་། རེག་པ་གསུམ་པོ་བདེ་བ་མྱོང་བར་འགྱུར་བ་དང་། སྡུག་བསྔལ་མྱོང་བར་འགྱུར་བ་དང་། བདེ་བ་ཡང་མ་ཡིན་སྡུག་

བསྔལ་བ་ཡང་མ་ཡིན་པ་མྱོང་བར་འགྱུར་བའི་རིག་པ་དང་བཅུ་དྲུག་གོ། །རེག་པ་བཤད་ཟིན་ཏོ། །ཚོར་བ་བརྗོད་པར་བྱ་སྟེ་ཞེས་བྱ་བ་ལ་ཚོར་བ་ལ་ཡང་ཚོར་བ་མྱོང་བ་ཞེས་བཤད་མ་ཟིན་ནམ། འོན་ཏེ་བཤད་ཟིན་པ་ཡང་འཆད་ན་ནི། བཤད་ཟིན་པ་འཆད་

Vol. 142 · folio 296b

པར་འགྱུར་བ་གཞན་ཞེས་འབྱུང་བས་བཤད་ཟིན་པ་གང་ཡིན་པ་དང་། འཆད་པར་འགྱུར་བ་གང་ཡིན་པ་དེ་ནི་མི་བཤད་དོ་ཞེས་བྱ་བ་འདི་བརྗོད་པར་མི་བྱའོ་ཞེ་ན། རྣམ་པར་སྟོན་པའི་ཕྱིར་ཉེས་པ་མེད་དེ། སྔར་ནི་མཚན་ཉིད་བཤད་ལ། ད་ནི་རྣམ་པ་འཆད་པ་

ཡིན་ནོ། །སྐྱེས་ཟིན་པ་ལ་ཞེས་བྱ་བ་རྒྱས་པར་འབྱུང་བ་ནི་བསྐྱེད་པར་བྱ་བའི་ཆོས་སྐྱེས་ཟིན་པ་ལ་ནི་སྐྱེད་པར་བྱེད་པའི་ཆོས་ཀྱི་ནུས་པ་མེད་དེ་ལྷན་ཅིག་སྐྱེས་པའི་ཕྱིར་རོ། །དམ་བཅས་པ་དང་བྱེ་བྲག་མེད། །ཅེས་བྱ་བ་ནི་སྒྲུབ་པ་འདི་དམ་བཅས་པ་དང་ཁྱད་པར་

མེད་དོ་ཞེས་བྱ་བའི་ཐ་ཚིག་གོ། །གལ་ཏེ་སྒྲུབ་པ་དམ་བཅས་པ་དང་ཁྱད་པར་མེད་པ་ཉིད་ནི་མི་འདོད་ན་འོ་ན་ནི་ཕན་ཚུན་དུ་སྐྱེད་པར་བྱེད་པར་ཐལ་བར་འགྱུར་བའི་ཕྱིར་ཏེ། ཅི་ཞེ་ན། ཇི་ལྟར་ན་ལྷན་ཅིག་འབྱུང་བ་གཉིས་སྐྱེད་པར་བྱེད་པ་དང་བསྐྱེད་པར་བྱ་བའི་དངོས་

པོར་འགྲུབ་ཅེས་བྱ་བར་སྐབས་དང་སྦྱར་རོ། །འདིས་ནི་ལྷན་ཅིག་འབྱུང་བ་གཉིས་ལ་བསྐྱེད་པར་བྱ་བ་དང་། སྐྱེད་པར་བྱེད་པའི་དངོས་པོ་ཡོད་དོ་ཞེས་དམ་བཅའ་བ་ནི་སྔར་ཁས་བླངས་པ་དང་འགལ་ལོ་ཞེས་དམ་བཅས་པའི་སྐྱོན་རྗོད་པར་བྱེད་པ་ཡིན་ནོ། །འདོད་པའི་

ཕྱིར་ཉེས་པ་མེད་དོ་ཞེས་བྱ་བ་ནི་སྔར་ཁས་བླངས་པ་སྟོན་པར་བྱེད་དོ། །འདོད་པ་འདི་ནི་མདོ་ལས་མི་བཞེད་ཅེས་བྱ་བ་ནི་ཆོས་མངོན་པ་ལས། ལྷན་ཅིག་འབྱུང་གང་ཕན་ཚུན་འབྲས། །ཞེས་འབྱུང་བའི་འདོད་པ་འདི་ནི་མདོ་ལས་མི་བཞེད་པ་ཡིན་ནོ། །དེ་བསྟན་

པའི་ཕྱིར་མིག་གི་འདུས་ཏེ་རེག་པ་ལ་བརྟེན་ནས་མིག་གི་འདུས་ཏེ་རེག་པ་ལས་བྱུང་བའི་ཚོར་བ་སྐྱེ་ཞེས་བྱ་བ་སྨོས་སོ། །མདོ་ཚད་མར་བྱེད་པས་ཕན་ཚུན་འབྲས་བུ་ཡིན་པ་བཅོམ་ནས་ལྷན་ཅིག་འབྱུང་བ་དག་ལ་རྒྱུ་དང་འབྲས་བུའི་དངོས་པོ་གཞོམ་པར་འདོད་

ནས་སྐྱེད་པར་བྱེད་པའི་ཆོས་དང་འགལ་བའི་ཕྱིར་ཡང་རིགས་པ་མ་ཡིན་ཞེས་བྱ་བ་སྨོས་ཏེ། སྐྱེད་པར་བྱེད་པའི་ཆོས་ནི་གང་འདུས་པ་ཐ་དད་པ་འདི་ཡིན་པར་གྲགས་ཏེ། དཔེར་ན་ས་བོན་སྔ་ལ་མྱུ་གུ་འཕྱི་བ་ཞེས་བྱ་བ་དེ་ལྟ་བུ་ལ་སོགས་པ་ཡིན་ནོ། །དེ་ལ་

Vol. 142 · folio 297a

ཡང་དབང་པོ་དང་དོན་དག་སྔ་ལ་རྣམ་པར་ཤེས་པའི་ཕྱི་ཞེས་བྱ་བ་ནི་སྐད་ཅིག་མ་དང་པོ་ལ་དབང་པོ་དང་དོན་དག་བྱུང་ལ་རྣམ་པར་ཤེས་པ་ནི་སྐད་ཅིག་མ་གཉིས་པ་ལའོ་ཞེས་བྱ་བ་ཡིན་ནོ། །འོ་ན་ནི་མྱུ་གུ་དང་གྲིབ་མ་དག་ཇི་ལྟར་

ཞེས་བྱ་བ་ཅི་ཞེ་ན། ལྷན་ཅིག་འབྱུང་བ་དག་ལ་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་སྟེ། མྱུ་གུ་ནི་སྐྱེ་བ་ཁོ་ནའི་ཚེ་གྲིབ་མ་སྐྱེད་པར་བྱེད་ཀྱི། སྐད་ཅིག་མ་དང་པོ་ལ་མྱུ་གུ་གྲིབ་མ་མེད་པར་འབྱུང་ལ། སྐད་ཅིག་མ་གཉིས་པ་ལ་གྲིབ་མ་

དང་བཅས་པ་ནི་མ་ཡིན་པ་ལྟར་རེག་པ་དང་ཚོར་བ་དག་ཀྱང་དེ་དང་འདྲའོ། །གྲིབ་མ་དང་མྱུ་གུ་འདི་གཉིས་ཀྱི་རྒྱུ་ཡང་ཚོགས་པ་སྔ་མ་ཡིན་ནོ་ཞེས་བརྗོད་པར་ལྟ་ནུས་ཏེ། དོན་འདི་ནི་ལྷན་ཅིག་འབྱུང་བའི་རྒྱུ་བསྟན་པར་བཤད་ཟིན་པས་ཡང་མི་བརྗོད་དོ། །

གཞན་དག་ན་རེ་རེག་པའི་འོག་ཏུ་ཚོར་བ་འབྱུང་ངོ་ཞེས་ཟེར་རོ་ཞེས་བྱ་བ་ནི་བཙུན་པ་དཔལ་ལེན་ཏོ། །གསུམ་འདུས་པ་དེ་ནི་རེག་པ་ཡིན་ནོ་ཞེས་བྱ་བ་ནི་སྐྱེད་པར་བྱེད་པ་དང་། སྐྱེད་པའི་དངོས་པོ་གང་ཡིན་པའོ། །སྐད་ཅིག་མ་གསུམ་པ་ལ་ཚོར་བ་འབྱུང་

ངོ་ཞེས་བྱ་བ་ནི་དབང་པོ་དང་དོན་ནི་སྐད་ཅིག་མ་དང་པོ་ཡིན་ནོ། །རྣམ་པར་ཤེས་པ་དང་སྐྱེ་བ་ནི་སྐད་ཅིག་མ་གཉིས་པ་ཡིན་ནོ། །ཚོར་བ་སྐྱེ་བ་ནི་སྐད་ཅིག་མ་གསུམ་པ་ཡིན་ནོ། །རྣམ་པར་ཤེས་པ་ཐམས་ཅད་ལ་ཚོར་བ་ཡོད་པར་ཡང་མི་འགྱུར་ཞེས་བྱ་བ་ནི་

རྣམ་པར་ཤེས་པའི་སྐད་ཅིག་མ་གཉིས་པ་ལ་ཚོར་བ་མེད་པའི་ཕྱིར་རོ། །རྣམ་པར་ཤེས་པ་ཐམས་ཅད་རེག་པ་ཡིན་པར་ཡང་མི་འགྱུར། སྐད་ཅིག་མ་སྔ་མ་སྟེ་གཉིས་པ་ལ་རེག་པ་རྣམ་པར་གཞག་པའི་ཕྱིར་ཚོར་བའི་སྐད་ཅིག་མ་གསུམ་པ་ལ་རྣམ་པར་

ཤེས་པ་རེག་པ་མ་ཡིན་ནོ། །རེག་པ་ཕྱི་མ་ལ་ཡོད་པའི་ཚོར་བ་རེག་པ་སྔ་མའི་རྒྱུ་ལས་བྱུང་བ་ཡིན་ནོ། །ད་ལྟར་སྐད་ཅིག་མ་གཉིས་པར་རེག་པའི་ངོ་བོར་བཤད་པ་གང་ཡིན་པ་དེ་ལ་ཡོད་པའི་ཚོར་བ་ནི་རེག་པ་སྔ་མའི་རྒྱུ་ལས་བྱུང་བ་སྟེ། སྐད་ཅིག་མ་

Vol. 142 · folio 297b

དང་པོའི་རྣམ་པར་ཤེས་པའི་རྒྱུ་ཅན་དུ་བྱུང་བ་ཡིན་ལ་གཞན་ལ་ཡོད་པའང་རེག་པ་དེ་སྔོན་དུ་འགྲོ་བ་ཡིན་པས་དེ་ལྟར་རྣམ་པར་ཤེས་པ་ཐམས་ཅད་ལ་ཚོར་བ་ཡོད་པར་འགྱུར་རོ། །རྣམ་པར་ཤེས་པ་ཐམས་ཅད་ཀྱང་རེག་པ་ཡིན་ནོ་ཞེས་བྱ་བ་ནི་རེག་པ་དེ་དག་

ཀྱང་ཚོར་བ་དང་བཅས་པ་ཡིན་པས་སོ། །དམིགས་པ་ཐ་དད་པ་དག་ཅེས་བྱ་བ་རྒྱས་པར་འབྱུང་བ་ནི་འདི་དག་ལ་དམིགས་པ་ཐ་དད་པ་ཡོད་པས་འདི་གཉིས་ནི་དམིགས་པ་ཐ་དད་པ་དག་སྟེ། སྔ་མའི་དམིགས་པ་ནི་གཟུགས་སོ། །ཕྱི་མའི་ནི་སྒྲའོ། །

དམིགས་པ་ཐ་དད་པ་དེ་གཉིས་རེག་པ་ཕྱི་མ་སྒྲ་ལ་དམིགས་པ་ལ་ཡོད་པའི་ཚོར་བ་རེག་པ་སྔ་མའི་རྒྱུ་ལས་བྱུང་བ་སྟེ། གཟུགས་ལ་དམིགས་པའི་རྒྱུ་ཅན་འབྱུང་ངོ་ཞེས་བྱ་བ་དེ་ནི་རིགས་པ་མ་ཡིན་ནོ། །ཇི་ལྟར་ཞེས་བྱ་བ་ནི་ཉེས་པ་སྟོན་པ་ཡིན་ཏེ། རིགས་

མི་འདྲ་བ་ལ་དམིགས་པའི་རེག་པ་ལས་བྱུང་བའི་ཚོར་བ་སྟེ། གཟུགས་ཀྱི་རྣམ་པ་ལ་དམིགས་པའི་རེག་པ་ལས་བྱུང་བའི་ཚོར་བ་གཞན་ལ་དམིགས་པར་འགྱུར་ཞིང་སྒྲ་ལ་དམིགས་པར་འགྱུར་ཏེ། རྒྱུ་མ་ཚང་བའི་ཕྱིར་འབྲས་བུ་མི་འབྱུང་ངོ་། །གང་

གི་ཚེ་གཟུགས་ལ་དམིགས་པའི་རེག་པ་ལས་བྱུང་བའི་ཚོར་བ་གཟུགས་ལ་དམིགས་པ་ཁོ་ནའི་ཚོར་བར་བྱུང་བར་འགྱུར་བ་དེའི་ཚེ་རེག་པ་ཕྱི་མ་ལ་ཡོད་པའི་ཚོར་བ་རེག་པ་སྔ་མའི་རྒྱུ་ལས་བྱུང་བ་ཡིན་ནོ་ཞེས་བྱ་བར་རིགས་ཀྱི། གང་གི་ཚེ་གཟུགས་ལ་དམིགས་པ་

ལ་སྒྲ་ལ་དམིགས་པའི་ཚོར་བ་འབྱུང་བ་དེའི་ཚེ་འདི་ཇི་ལྟར་རུང་སྟེ། འབྲས་བུ་ནི་འཇིག་རྟེན་ན་རྒྱུ་དང་མཐུན་པར་སྣང་ངོ་། །འོན་ཏེ་གཟུགས་ལ་དམིགས་པའི་རེག་པ་ལས་བྱུང་བའི་ཚོར་བ་ནི་སྒྲ་ལ་དམིགས་པའི་རེག་པ་དང་མཚུངས་པར་ལྡན་ཡང་

གཟུགས་ལ་དམིགས་པར་འགྱུར་རོ་ཞེས་བྱ་བར་འདོད་ན་ཡང་དེའི་ཕྱིར་ཡང་ན་སེམས་གང་དང་མཚུངས་པར་ལྡན་པ་དེ་ལས་གཞན་པ་ལ་དམིགས་པར་འགྱུར་ཞེས་བྱ་བ་འདི་སྨོས་ཏེ། སྒྲ་ལ་དམིགས་པའི་སེམས་དེ་ལས་གཞན་པ་ལ་དམིགས་པ་

Vol. 142 · folio 298a

སྟེ། གཟུགས་ལ་དམིགས་པ་གང་ལས་སྐྱེས་པ་དེ་དང་དམིགས་པ་མཚུངས་ཞེས་བྱ་བའི་ཐ་ཚིག་གོ། །འདི་དེ་དང་མཚུངས་པར་ལྡན་པ་ཞེས་ཀྱང་འདི་སྐད་བརྗོད་དེ། འདྲ་བར་ལྡན་པ་ནི་མཚུངས་པར་ལྡན་པ་ཡིན་ནོ། །གལ་

ཏེ་རྟེན་མཚུངས་པའི་ཕྱིར་རོ་ཞེ་ན། ཇི་ལྟར་རྣ་བའི་རྟེན་ཅན་དུ་གྱུར་པ་གཟུགས་ལ་དམིགས་པར་འགྱུར། ཇི་ལྟར་མི་འགྱུར་ཞེ་ན། སེམས་དང་སེམས་ལས་བྱུང་བ་རྣམས་ནི་རྟེན་དང་ལྷན་ཅིག་ཡུལ་གཅིག་ལ་འཇུག་པའི་ཕྱིར་རོ། །དེ་ལྟ་བས་ན་

ཚོར་བ་ནི་གང་ལ་དམིགས་སུ་ཟིན་ཀྱང་ཉེས་པ་ཡོད་པར་རབ་ཏུ་བསྟན་ཏེ། རེ་ཞིག་གལ་ཏེ་གཟུགས་ལ་དམིགས་པའི་རེག་པ་ལས་བྱུང་བའི་ཚོར་བ་དམིགས་པ་གཞན་སྒྲ་ལ་དམིགས་ན་ཡང་གཟུགས་ལ་དམིགས་པའི་རེག་པ་དེ་བདེ་བ་མྱོང་བར་འགྱུར་

བ་ནས་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་མྱོང་བར་འགྱུར་བ་ཞེས་བྱ་བའི་བར་དུ་མི་འགྱུར་ཏེ། ཚོར་བ་དང་དམིགས་པ་གཅིག་པའི་ཕྱིར་དེ་ལྟར་བསྟན་པར་རུང་ངོ་། །འོ་ན་ནི་དེའི་ཚེ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་དེ་ལྟར་ཉེས་པ་

ཡོད་ན་འོ་ན་ནི་དེའི་ཚེ་སྟེ། གང་གི་ཚེ་ཞེ་ན་སྒྲ་ལ་དམིགས་པའི་ཚེ་རེག་པར་གྱུར་པའི་རྣམ་པར་ཤེས་པ་ཚོར་བ་མེད་པ་ཡིན་ལ་སྒྲ་ལ་དམིགས་པ་དེའི་སྔ་རོལ་གྱི་རྣམ་པར་ཤེས་པ་ཚོར་བ་དང་བཅས་པ་གང་ཡིན་པ་དེ་ནི་རེག་པ་མ་ཡིན་ཏེ། དེ་ལྟར་ན་ཉེས་

པར་མི་འགྱུར་རོ། །དེ་ལྟ་མ་ཡིན་ཏེ་གལ་ཏེ་སྔར་བྱུང་བའི་རྣམ་པར་ཤེས་པ་ཚོར་བ་དང་བཅས་པ་རེག་པ་ཡིན་པར་གྱུར་ན་དེ་ལྟ་ན་ནི་རེག་པའི་རྐྱེན་གྱིས་ཚོར་བ་ཡིན་པས་ཇི་སྐད་བཤད་པའི་ཉེས་པར་འགྱུར་རོ། །ཡང་ཅིའི་ཕྱིར་རྣམ་པར་ཤེས་པ་ཅུང་

ཟད་ཅིག་ནི་ཚོར་བ་དང་བཅས་པ་ཡིན་ལ་ཅུང་ཟད་ཅིག་ནི་རེག་པ་མ་ཡིན་ཞེ་ན། རྐྱེན་མ་ཚང་བའི་ཕྱིར་རོ། །རྐྱེན་མ་ཚང་བ་ནི་གེགས་བྱེད་པར་གནས་ཏེ། མཚུངས་པ་དེ་མ་ཐག་པའི་རྐྱེན་ཐམས་ཅད་ཚོར་བའི་རྐྱེན་གྱིས་རེག་པར་གྱུར་པའི་རྣམ་པར་

Vol. 142 · folio 298b

ཤེས་པ་སྐྱེད་པར་ནུས་པ་ནི་མ་ཡིན་ནོ། །དེ་ལྟ་ན་དེའི་ལུགས་ཀྱིས་དམིགས་པ་ཐ་དད་པའི་རྣམ་པར་ཤེས་པ་ནི་གཅིག་ཏུ་ཚོར་བ་མེད་པ་ཡིན་ལ་དེ་སྐྱེད་པར་བྱེད་པ་ནི་རེག་པར་གྱུར་པ་མ་ཡིན་ནོ། །གལ་ཏེ་གཟུགས་ལ་དམིགས་པའི་མིག་གི་རྣམ་པར་ཤེས་

པའི་མཇུག་ཐོགས་སུ་གཟུགས་ལ་དམིགས་པ་ཁོ་ནའི་མིག་གི་རྣམ་པར་ཤེས་པའམ། ཡིད་ཀྱི་རྣམ་པར་ཤེས་པ་སྐྱེ་ན་དེ་ནི་ཚོར་བ་དང་བཅས་པ་ཡིན་ལ་མིག་གི་རྣམ་པར་ཤེས་པ་སྔར་སྐྱེས་པ་དེ་ཡང་རེག་པ་ཡིན་ནོ། །དེ་ལྟ་ཡིན་ན་ཞེས་བྱ་བ་དང་ས་

མང་པོའི་ངེས་པ་ཉམས་པ་ཡིན་ཞེས་བྱ་བ་ནི་རེག་པ་དང་ཚོར་བ་དག་རྣམ་གྲངས་ཀྱིས་ཡོད་པའི་ཕྱིར་རོ། །ས་ནི་གསུམ་སྟེ་ཞེས་བྱ་བ་ལ། རྟོག་པ་དང་བཅས་ཤིང་དཔྱོད་པ་དང་བཅས་པ་ནི་འདོད་པའི་ཁམས་དང་བསམ་གཏན་དང་པོའོ། །རྟོག་པ་

མེད་ལ་དཔྱོད་པ་ཙམ་ནི་བསམ་གཏན་ཁྱད་པར་ཅན་ནོ། །རྟོག་པའང་མེད་དཔྱོད་པའང་མེད་པ་ནི་བསམ་གཏན་གཉིས་པ་ནས་སྲིད་པའི་རྩེ་མོའི་བར་རོ། །དགེ་བའི་ས་ནི་ཆོས་དགེ་བ་སྟེ། མི་དགེ་བ་དང་། ལུང་དུ་མ་བསྟན་པ་ཡང་དེ་དང་འདྲའོ། །

སློབ་པའི་ས་ནི་སློབ་པའི་ཟག་པ་མེད་པའི་ཆོས་རྣམས་སོ། །མི་སློབ་པའི་ས་ནི་མི་སློབ་པའི་ཟག་པ་མེད་པའི་ཆོས་རྣམས་སོ། །སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་ས་ནི་ཟག་པ་དང་བཅས་པའི་ཆོས་རྣམས་སོ། །སེམས་ལས་བྱུང་བའི་

སྐབས་ཡིན་པའི་ཕྱིར་འདུས་མ་བྱས་ནི་འདིར་མི་སྨོས་སོ། །དེ་ལ་གང་དག་ས་འདི་དག་ན་ཡོད་པ་ཞེས་བྱ་བ་རྒྱས་པར་འབྱུང་བ་ལ་ཞེས་བྱ་བ་ནི་ཚིག་གི་ཕྲད་དོ། །གང་དག་ཅེས་བྱ་བ་ནི་སེམས་ལས་བྱུང་བ་གང་དག་གོ། །ས་འདི་དག་ཐམས་ཅད་ན་

ཡོད་པ་ཞེས་བྱ་བ་ནི་རྟོག་པ་དང་བཅས་ཤིང་དཔྱོད་པ་དང་བཅས་པའི་ས་ནས་སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་སའི་བར་ན་ཡོད་པ་དེ་དག་ནི་ས་མང་པོ་པ་ཚོར་བ་དང་སེམས་པ་ལ་སོགས་པ་ཇི་སྐད་བཤད་པ་ཡིན་ནོ། །གང་དག་དགེ་བ་

Vol. 142 · folio 299a

ཁོ་ན་ལ་ཡོད་པ་དེ་དག་ནི་དགེ་བའི་ས་མང་པོ་པ་ཡིན་ཏེ་དད་པ་ལ་སོགས་པའོ། །གང་དག་ཉོན་མོངས་པ་ཅན་ཁོ་ན་ལ་ཡོད་པ་དེ་དག་ནི་ཉོན་མོངས་པའི་ས་མང་པོ་པ་ཡིན་ཏེ། མ་རིག་པ་ལ་སོགས་པ་ཇི་སྐད་བཤད་པ་ཁོ་

ནའོ། །ཅི་རིགས་པར་ཞེས་བྱ་བ་རྒྱས་པར་འབྱུང་བ་ནི་གཞན་དག་ན་རེ་ས་མང་པོ་པ་ལ་སོགས་པ་དེ་དག་ཀྱང་གང་དག་གང་ན་ཡོད་པ་དེ་དག་དེ་ན་རྣམ་གྲངས་ཀྱིས་ཡིན་གྱི། ཐམས་ཅད་ཅིག་ཅར་ནི་མ་ཡིན་ནོ་ཞེས་ཟེར་ཏེ། དཔེར་ན་ཚོར་བ་ལྟ་

བུ་ས་ཐམས་ཅད་ན་ཡོད་ཀྱང་འདུ་ཤེས་དང་སེམས་པ་དང་རེག་པ་དང་ཡིད་ལ་བྱེད་པ་ལ་སོགས་པ་དང་ཅིག་ཅར་མ་ཡིན་ལ་རེག་པ་ཡང་ཚོར་བ་ལ་སོགས་པ་དང་དེ་དང་འདྲ་བ་དང་། དེ་བཞིན་དུ་དགེ་བ་ལ་རྣམ་པར་རྟོག་པ་ལ་སོགས་པ་ཡང་ཞེས་བྱ་བ་དེ་ལྟ་བུ་

ལ་སོགས་པའོ། །གཞན་དག་ནི་འདི་སྐད་དུ་འདི་ནི་ཕུང་པོ་ལྔ་ལས་ཇི་སྐད་དུ་བྲིས་པ་དེ་བཞིན་དུ་གཟུང་བར་བྱའོ་ཞེས་ཟེར་ཏེ། འདི་ལྟ་སྟེ། འདུན་པ་གང་ཞེ་ན། བསམ་པའི་དངོས་པོ་ལ་འདོད་པ་སྟེ། མ་བསམས་པ་ལ་འདུན་པ་མེད་དོ་སྙམ་

དུ་བསམས་པ་ཡིན་ནོ། །མོས་པ་གང་ཞེ་ན། ངེས་པའི་དངོས་པོ་ལ་དེ་ཁོ་ན་བཞིན་དུ་ངེས་པར་འཛིན་པའོ། །དྲན་པ་གང་ཞེ་ན་འདྲིས་པའི་དངོས་པོ་ལ་མི་བརྗེད་པ་སྟེ། སེམས་ཀྱི་མངོན་པར་བརྗོད་པ་ཉིད་དོ། །ཏིང་ངེ་འཛིན་གང་ཞེ་ན། བརྟག་

པར་བྱ་བའི་དངོས་པོ་ལ་སེམས་རྩེ་གཅིག་པ་ཉིད་དོ། །ཤེས་རབ་གང་ཞེ་ན། དེ་ཉིད་ལ་རབ་ཏུ་རྣམ་པར་འབྱེད་པ་སྟེ། རིག་པ་དང་མ་རིག་པས་བསྐྱེད་པ་དང་། དེ་ལས་གཞན་པའོ་ཞེས་བྱ་བ་ལྟ་བུ་ལ་སོགས་པ་ཕུང་པོ་ལྔའི་གཞུང་ལས་འབྱུང་

བ་ཡིན་པར་བལྟའོ། །དེ་ལས་ནི་ཚོར་བ་དང་། འདུ་ཤེས་དང་། རེག་པ་དང་། ཡིད་ལ་བྱེད་པ་དང་། སེམས་པ་དང་ལྔ་ནི་ཀུན་དུ་འགྲོ་བའོ། །འདུན་པ་དང་། མོས་པ་དང་། དྲན་པ་དང་། ཏིང་ངེ་འཛིན་དང་། ཤེས་རབ་དང་ལྔ་ནི་

Vol. 142 · folio 299b

ཡུལ་སོ་སོར་ངེས་པའོ་ཞེས་བྱ་བ་དེ་ལྟ་བུ་ལ་སོགས་པ་བཤད་དོ། །མི་དགེ་བའི་ས་མང་པོ་རྣམས་ནི་འདོན་པའི་ཞར་ལ་ད་ཁོང་ནས་དྲངས་ཞེས་བྱ་བ་ནི་མདོ་ལ་སོགས་པ་ལས་དགེ་བ་དང་། མི་དགེ་བ་ཞེས་འབྱུང་བས་དེ་སྐད་དུ་འདོན་པའི་ཞར་ལ་ཁོང་ནས་དྲངས་

ཏེ། ཕྱིས་ཁོང་ནས་ཕྱུང་ངོ་ཞེས་བྱ་བའི་ཐ་ཚིག་གོ། །རབ་ཏུ་བྱེད་པའི་རྐང་པ་ལས་ནི་མ་བཏོན་ཏེ་ས་མང་པོ་པ་རྣམས་དང་། དགེ་བའི་ས་མང་པོ་པ་རྣམས་དང་། ཉོན་མོངས་པའི་ས་མང་པོ་པ་རྣམས་དང་། ཉོན་མོངས་པ་ཆུང་ངུའི་ས་མང་པོ་པ་རྣམས་སོ་

ཞེས་རྣམ་པ་བཞི་ཞིག་འབྱུང་ངོ་། །ལྷན་ཅིག་སྐྱེས་པ་ཞེས་གསུངས་ཀྱི་རེག་པ་དང་ལྷན་ཅིག་སྐྱེས་པ་ཞེས་ནི་མ་གསུངས་ན་ཞེས་བྱ་བ་ནི་ཁྱད་པར་དུ་མཛད་པའི་ཕྱིར་ཚོར་བ་ལ་སོགས་པ་འདི་དག་ཕན་ཚུན་ལྷན་ཅིག་སྐྱེས་པ་ཡིན་གྱི་རེག་པ་དང་ནི་མ་ཡིན་ནོ་

ཞེས་བྱ་བའི་དོན་དུ་ཡོངས་སུ་བཟུང་ནས་མདོའི་ལན་གདབ་པར་བྱའོ་ཞེས་བྱ་བའི་ཐ་ཚིག་གོ། །བྱམས་པ་དང་ལྷན་ཅིག་པར་གྱུར་པ་ཞེས་བྱ་བ་ནི་ལྷན་ཅིག་ཅེས་བྱ་བ་ནི་སྒྲ་འདི་ཅིག་ཅར་འབྱུང་བ་ལ་བྱ་བར་ངེས་པ་མེད་ཀྱི། དེ་མ་ཐག་པ་ལ་ཡང་མཐོང་ངོ་། །

བྱམས་པ་དང་དྲན་པ་ཡང་དག་བྱང་ཆུབ་ཀྱི་ཡན་ལག་ནི་ཕྲད་པ་མེད་དེ། བྱམས་པ་ནི་གཅིག་ཏུ་ཟག་པ་དང་བཅས་པ་ཡིན་པའི་ཕྱིར་ལ། དྲན་པ་ཡང་དག་བྱང་ཆུབ་ཀྱི་ཡན་ལག་ནི་གཅིག་ཏུ་ཟག་པ་མེད་པ་ཡིན་པའི་ཕྱིར་རོ། །དེ་ལྟ་བས་ན་འདི་ནི་ཁོངས་སུ་

མི་རུང་ངོ་། །འདྲེས་པ་ཡིན་ཞེས་བྱ་བ་ནི་ལྷན་ཅིག་སྐྱེས་པ་ཡིན་ནོ་སྙམ་དུ་བསམས་པ་ཡིན་ནོ། །མདོ་དེ་ཉིད་ལས་ཞེས་བྱ་བ་ནི་གང་ཁོ་ན་ལས། ཚོར་བ་གང་ཡིན་པ་དང་སེམས་པ་གང་ཡིན་པ་དང་འདུ་ཤེས་གང་ཡིན་པ་ཞེས་བྱ་བ་རྒྱས་པར་འབྱུང་བའི་མདོ་དེ་

ལས་ཞེས་བྱ་བའི་ཐ་ཚིག་གོ། །དེ་མི་ཤེས་སོ་ཞེས་བྱ་བ་རྒྱས་པར་འབྱུང་བ་ནི་ཅི་རེ་ཞིག་འདི་ཚོར་བ་ལ་སོགས་པ་དེ་དག་གི་དམིགས་པར་ངེས་ཤིང་དམིགས་པ་ལ་ངེས་པ་སྟེ། དམིགས་པ་གང་ཁོ་ན་མྱོང་བར་བྱེད་པ་དེ་ཁོ་ན་རྣམ་པར་ཤེས་པས་རྣམ་པར་

Vol. 142 · folio 300a

ཤེས་པར་བྱེད་པའི་བར་ཞིག་ཡིན་ནམ། འོན་ཏེ་སྐད་ཅིག་མ་ངེས་པ་སྟེ། སྐད་ཅིག་མ་གང་ཁོ་ན་ལ་ཚོར་བར་བྱེད་པ་དེ་ཁོ་ན་ལ་རྣམ་པར་ཤེས་པར་བྱེད་པའི་བར་ཡིན་ཞེ་ན། བདག་ནི་འདི་དམིགས་པ་ལ་ངེས་པ་ཡིན་ནོ་ཞེས་སྨྲ་སྟེ།

དེ་ལྟ་བས་ན་མདོ་དང་མི་འགལ་ལོ་སྙམ་དུ་བསམས་པ་ཡིན་ནོ། །སློབ་དཔོན་གྱིས་མདོ་དེ་ཉིད་ལས་ཚེ་དང་དྲོད་དག་ལྷན་ཅིག་པ་ལ་འདྲེས་པ་ཞེས་གསུངས་པའི་ཕྱིར་སྐད་ཅིག་མ་ངེས་པ་ཡིན་པར་གྲུབ་པོ་ཞེས་བྱ་བ་སྨོས་ཏེ། ཚེ་དང་དྲོད་དང་ཆོས་འདི་

གཉིས་ནི་འདྲེས་པ་ཡིན་གྱི། མ་འདྲེས་པ་ནི་མ་ཡིན་ནོ་ཞེས་འབྱུང་བས། ཚེ་དང་དྲོད་དག་ལྷན་ཅིག་སྐྱེས་པ་ཉིད་དུ་བཤད་པ་ཡིན་ཏེ། དེ་གཉིས་ཀྱིས་དམིགས་པ་ནི་མེད་པའི་ཕྱིར་རོ། །དེ་ལྟ་བས་ན་འདི་སྐད་དུ་ཚོར་བ་དང་འདུ་ཤེས་དང་སེམས་པ་

དང་རྣམ་པར་ཤེས་པ་རྣམས་ནི་གདོན་མི་ཟ་བར་ལྷན་ཅིག་འབྱུང་བ་ཡིན་ཏེ། མདོ་དེ་ལས་ལྷན་ཅིག་འདྲེས་པ་ཡིན་པར་གསུངས་པས་བཤད་པའི་ཕྱིར་ཚེ་དང་དྲོད་ལྟ་བུའོ་ཞེས་བསྒྲུབས་པ་ཡིན་ནོ། །དེ་ཡང་ཇི་ལྟར་ན་ཞེས་བྱ་བ་རྒྱས་པར་འབྱུང་བ་

ནི། དེ་ཡང་ཇི་ལྟར་རྣམ་པར་ཤེས་པ་ནི་ཡོད་ལ་དབང་པོ་དང་ཡུལ་དང་རྣམ་པར་ཤེས་པ་གསུམ་འདུས་པ་མ་ཡིན་ཏེ། དེ་ལྟ་བས་ན་རྣམ་པར་ཤེས་པ་ཡོད་ཕན་ཆད་གདོན་མི་ཟ་བར་འདུས་པ་ཡིན་པར་ཁས་བླང་བར་བྱ་དགོས་ལ། འདུས་པ་ཡང་

ཁྱོད་ཀྱི་ལྟར་ན་རེག་པ་ཡིན་ནོ། །དེས་ན་རྣམ་པར་ཤེས་པ་ཐམས་ཅད་རེག་པ་ཡིན་ཡང་མི་འགྱུར་ཞེས་བྱ་བ་དང་། ཡང་ན་འདུས་པ་ཡིན་ལ་རེག་པ་མ་ཡིན་ཞེས་བྱ་བ་འདི་འགལ་ལོ། །ཡིད་བདེ་བའི་བར་རྒྱུ་བ་དྲུག །ཅེས་བྱ་བ་རྒྱས་པར་འབྱུང་བ་ནི་

མིག་གིས་གཟུགས་མཐོང་ནས་ཡིད་བདེ་བའི་གནས་ལྟ་བུའི་གཟུགས་རྣམས་ལ་ཉེ་བར་རྒྱུའོ། །རྣ་བས་སྒྲ་དག་ཐོས་ནས་ཡིད་བདེ་བའི་གནས་ལྟ་བུའི་སྒྲ་རྣམས་ལ་ཉེ་བར་རྒྱུའོ་ཞེས་བྱ་བ་ནས་དེ་བཞིན་དུ་ཡིད་ཀྱི་ཆོས་དག་རྣམ་པར་ཤེས་ནས་ཡིད་བདེ་

Vol. 142 · folio 300b

བའི་གནས་ལྟ་བུའི་ཆོས་རྣམས་ལ་ཉེ་བར་རྒྱུའོ་ཞེས་བྱ་བ་དང་། དེ་བཞིན་དུ་མིག་གིས་གཟུགས་དག་མཐོང་ནས་ཡིད་མི་བདེ་བའི་གནས་ལྟ་བུ་དང་། བཏང་སྙོམས་ཀྱི་གནས་ལྟ་བུ་ཞེས་བྱ་བ་རྒྱས་པར་སྦྱར་བར་བྱའོ། །གསུམ་དུ་འགྱུར་ཞེས་བྱ་བ་ནི་ཡིད་

བདེ་བ་དང་མི་བདེ་བ་དང་བཏང་སྙོམས་ཀྱི་ངོ་བོ་ཉིད་རྣམ་པ་གསུམ་ཡིན་པའི་ཕྱིར་རོ། །གཅིག་ཏུ་འགྱུར་ཞེས་བྱ་བ་ནི་ཡིད་ཀྱི་རྣམ་པར་ཤེས་པ་ཙམ་དང་མཚུངས་པར་ལྡན་པའི་ཕྱིར་རོ། །དྲུག་ཏུ་འགྱུར་ཞེས་བྱ་བ་ནི་གཟུགས་ལ་སོགས་པའི་ཡུལ་དྲུག་

ཐ་དད་པའི་ཕྱིར་རོ། །གསུམ་ཀར་ཡང་རྣམ་པར་གཞག་སྟེ་ཞེས་བྱ་བ་ནི་ཚོར་བའི་རྫས་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པ་གང་ཡིན་པ་ནི་གཅིག་ཡིན་ནོ། །དེ་ཡིད་བདེ་བ་ལ་སོགས་པའི་ངོ་བོ་ཉིད་གསུམ་ཐ་དད་པའི་སྒོ་ནས་ནི་རྣམ་པ་གསུམ་

དུ་དབྱེའོ། །དེ་ཡང་ཡུལ་དྲུག་སོ་སོར་ཐ་དད་པའི་སྒོ་ནས་ནི་རྣམ་པ་དྲུག་ཏུ་དབྱེ་བས་བཅོ་བརྒྱད་ཡིན་ནོ། །ངོ་བོ་ཉིད་གཞག་པ་མེད་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་ཀྱི་ཉེ་བར་རྒྱུ་བ་ཞེས་བྱ་བར་མི་འགྱུར་རོ། །མཚུངས་པར་

ལྡན་པ་གཞག་པ་མེད་ན་ཡིད་ཀྱི་ཉེ་བར་རྒྱུ་བ་ཞེས་བྱ་བ་དེ་ལྟ་བུར་ཡང་མི་འགྱུར་ལ། བཅོ་བརྒྱད་དེ་ལས་གཞན་པ་ཞིག་ཡིན་པར་ཡང་འགྱུར་རོ། །དམིགས་པ་གཟུགས་ལ་སོགས་པ་ཡུལ་དྲུག་རྣམ་པར་གཞག་པ་མེད་ན་ཡིད་བདེ་བ་ལ་སོགས་པ་ལས་རྣམ་པ་

དྲུག་ཐ་དད་པའི་སྒོ་ནས་ཡིད་ཀྱི་ཉེ་བར་རྒྱུ་བ་བཅོ་བརྒྱད་ཅེས་བྱ་བར་མི་འགྱུར་རོ། །དེ་ལྟ་བས་ན་གསུམ་ཀར་གཞག་གོ་ཞེས་བྱ་བར་གྲུབ་པོ། །མ་འདྲེས་པ་ལ་དམིགས་པ་ཞེས་བྱ་བ་ནི་དམིགས་པ་མ་འཆོལ་བ་ཅན་ཡིན་ནོ། །ཆོས་ལ་ཉེ་བར་རྒྱུ་བ་གསུམ་

ནི་གཉི་ག་ཡིན་ཞེས་བྱ་བ་གང་དག་གཟུགས་ལ་སོགས་པའི་ཡུལ་ལྔ་ལས་མ་གཏོགས་པ་ཆོས་ལ་དམིགས་པའི་ཆོས་ལ་ཉེ་བར་རྒྱུ་བ་དེ་དག་ནི་མ་འདྲེས་པ་ལ་དམིགས་པ་ཡིན་ནོ། །གང་དག་གཟུགས་ལ་སོགས་པའི་ཡུལ་དྲུག་ལས་གཉིས་དང་། གསུམ་

Vol. 142 · folio 301a

ནས། ཡུལ་དྲུག་གི་བར་ལ་དམིགས་པ་དེ་དག་ནི་འདྲེས་པ་ལ་དམིགས་པ་ཡིན་ནོ། །ཡིད་ལ་བརྟེན་ནས་རྒྱུ་བའི་ཕྱིར་རོ་ཞེས་གྲག་ཅེས་བྱ་བ་ལ། གྲག་ཅེས་བྱ་བའི་སྒྲ་ནི་གཞན་གྱི་གཞུང་ལུགས་སྟོན་པར་བྱེད་པ་ཡིན་ཏེ། ཡིད་ལ་

བརྟེན་ཅིང་གནས་ནས་ཡུལ་དག་ལ་ཉེ་བར་རྒྱུ་བའི་ཕྱིར་རོ་ཞེས་གྲག་སྟེ། དམིགས་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཉེ་བར་རྒྱུ་བར་བྱེད་ཅེས་བྱ་བ་ནི་འཇུག་པར་བྱེད་པའོ། །ཇི་ལྟ་ཞེ་ན། ཚོར་བའི་དབང་གིས་ཡིད་ཡུལ་དག་ལ་ཡང་དང་ཡང་དུ་རྣམ་པར་རྒྱུ་བའི་

ཕྱིར་ཞེས་བྱ་བ་སྨོས་ཏེ། ཉེ་བར་ཞེས་བྱ་བའི་སྒྲའི་དོན་ཡང་དང་ཡང་དུ་ཞེས་བྱ་བ་ཡིན་ནོ། །ཉེ་བར་རྒྱུ་བར་བྱེད་པའང་མ་ཡིན་ནོ་ཞེས་བྱ་བ་ནི་ངེས་པར་རྟོག་པར་བྱེད་པ་མ་ཡིན་ཞེས་བྱ་བའི་ཐ་ཚིག་གོ། །མི་རུང་ངོ་ཞེས་བྱ་བ་ནི་མི་སྲིད་པའོ། །གལ་ཏེ་ཡིད་ཀྱི་ཉེ་བར་

རྒྱུ་བ་ཡིད་ཁོ་ན་ལ་བརྟེན་པ་ཡིན་ན་བསམ་གཏན་གསུམ་པའི་བདེ་བ་གང་ཡིན་པ་དེ་ཁོ་ན་ལ་བརྟེན་གྱི་མིག་གི་དབང་པོ་ལ་སོགས་པ་ལ་བརྟེན་པ་མ་ཡིན་ན། ཅིའི་ཕྱིར་ཡིད་ཀྱི་ཉེ་བར་རྒྱུ་བའི་ནང་དག་ཏུ་མ་སྨོས་ཤེ་ན། དང་པོ་འདོད་པའི་ཁམས་ན་ཞེས་བྱ་བ་རྒྱས་

པར་སྨོས་ཏེ། དང་པོ་ནི་དང་པོ་ནའོ། །འདོད་པའི་ཁམས་ན་ཡིད་ཀྱི་ས་པའི་བདེ་བ་མེད་དེ། དེ་ལྟ་བས་ན་དེ་ནི་ཡིད་ཀྱི་ཉེ་བར་རྒྱུ་བ་མ་ཡིན་ནོ། །དེའི་ཕྱིར་ལྷག་མ་བསམ་གཏན་གསུམ་པ་ན་བདེ་བའི་དབང་པོ་ཡིད་ལ་བརྟེན་པ་ཉིད་ཡིན་ཡང་ཡིད་ཀྱི་ཉེ་བར་རྒྱུ་བའི་

ནང་དུ་མ་སྨོས་སོ། །ཇི་ལྟར་ཡིད་བདེ་བའི་ཉེ་བར་རྒྱུ་བའི་མི་མཐུན་པར་ཡིད་མི་བདེ་བའི་ཉེ་བར་རྒྱུ་བ་ཡོད་པ་དེ་ལྟར་བདེ་བའི་ཉེ་བར་རྒྱུ་བའི་མི་མཐུན་པའི་སྡུག་བསྔལ་གྱི་ཉེ་བར་རྒྱུ་བ་མེད་དེ། སྡུག་བསྔལ་ནི་ཡིད་ཀྱི་རྣམ་པར་ཤེས་པ་ལ་མི་བརྟེན་པའི་ཕྱིར་རོ། །

དེའི་ཕྱིར་བདེ་བ་དེ་ནི་ཐམས་ཅད་དུ་ཡིད་ཀྱི་ཉེ་བར་རྒྱུ་བ་མ་ཡིན་ནོ། །གྲག་ཅེས་བྱ་བ་ནི་གཞན་གྱི་གཞུང་ལུགས་ཡིན་པའོ། །ཡིད་བདེ་བའི་གནས་ལྟ་བུ་ཞེས་བྱ་བ་ནི་ཡིད་བདེ་བ་སྐྱེད་པར་བྱེད་པའོ། །རྣམ་པར་ཤེས་པ་ལྔས་ཞེས་བྱ་བ་རྒྱས་པར་འབྱུང་བ་ནི་

Vol. 142 · folio 301b

མིག་གིས་གཟུགས་དག་མཐོང་ནས་ཞེས་བྱ་བ་རྒྱས་པར་འབྱུང་བ་དེ་ནི་རྣམ་པར་ཤེས་པའི་ཚོགས་ལྔས་མངོན་པར་བསྒྲུབས་ཤིང་བསྐྱེད་པ་ཉིད་ལ་དགོངས་ཤིང་ཐུགས་ལ་གཞག་སྟེ་གསུངས་པར་ཟད་ཀྱི་འདི་དག་ནི་ཡིད་ཀྱི་ས་པ་ཡིན་ཏེ་དཔེར་ན་མི་སྡུག་པ་ལྟ་བུ་སྔར་

རྣམ་པར་བསྔོས་པ་ལ་སོགས་པ་མཐོང་བའི་ཕྱིར། མིག་གི་རྣམ་པར་ཤེས་པས་མངོན་པར་བསྒྲུབས་པའང་ཡིད་ལ་མཉམ་པར་གཞག་པ་ཡིན་པའི་ཕྱིར་ཡིད་ཀྱི་ས་པ་ཡང་ཡིན་པ་བཞིན་ནོ། །གཞན་ཡང་ཞེས་བྱ་བ་ནི་མིག་གིས་གཟུགས་དག་མཐོང་ནས་ཞེས་བྱ་བ་

ནས། ལུས་ཀྱིས་རེག་བྱ་དག་རེག་ནས་ཞེས་བྱ་བའི་བར་དུ་གསུངས་པའི་ཕྱིར་དེ་ནི་ཀླན་ཀར་མི་རུང་ངོ་། །གལ་ཏེ་མིག་གིས་གཟུགས་དག་ལྟ་བ་ན་ཡིད་བདེ་བའི་གནས་ལྟ་བུའི་གཟུགས་རྣམས་ལ་ཉེ་བར་རྒྱུའོ་ཞེས་བྱ་བ་ནས་ལུས་ཀྱིས་རེག་བྱ་དག་ལ་རེག་པ་ན་ཞེས་བྱ་བའི་བར་དུ་

གསུངས་པར་གྱུར་ན་ནི་ཀླན་ཀར་ཡང་རུང་བ་ཞིག་ན་དེ་སྐད་དུའང་མ་གསུངས་པས་དེ་ནི་ཀླན་ཀར་མི་རུང་བ་ཉིད་དོ། །གང་གིས་མ་མཐོང་བ་ནས་ཞེས་བྱ་བ་རྒྱས་པར་འབྱུང་བ་ནི་གང་གིས་གཞན་ལས་ཐོས་ནས་ཡིད་ཉེ་བར་རྒྱུ་བ་དེ་ཡང་དེའི་ཡིད་ཀྱི་ཉེ་བར་རྒྱུ་བ་ཡིན་ནོ། །

གཞན་དུ་ན་ཞེས་བྱ་བ་རྒྱས་པར་འབྱུང་བ་ནི་འདོད་པའི་ཁམས་སུ་སྐྱེས་པས་གཟུགས་ལ་སོགས་པ་མངོན་སུམ་དུ་མ་བྱས་པའི་ཕྱིར་གཟུགས་ཀྱི་ཁམས་ལ་དམིགས་པ་དག་ཀྱང་གཟུགས་ལ་སོགས་པ་ལ་ཉེ་བར་རྒྱུ་བ་ཡིན་པར་མི་འགྱུར་ལ་གཟུགས་ཀྱི་ཁམས་སུ་སྐྱེས་པ་

འདོད་པའི་ཁམས་ལ་དམིགས་པ་དག་ཀྱང་དྲི་དང་རོ་དང་རེག་བྱ་ལ་ཉེ་བར་རྒྱུ་བ་ཡིན་པར་མི་འགྱུར་ཏེ། དྲི་ལ་སོགས་པ་ནི་དེའི་ཡུལ་མ་ཡིན་པའི་ཕྱིར་རོ། །ཇི་ལྟར་ཆེས་གསལ་བ་དེ་ལྟར་བཤད་ཅེས་བྱ་བ་ནི་གཟུགས་ལ་སོགས་པའི་དམིགས་པའི་མངོན་སུམ་དུ་བྱས་པའི་ཡིད་

ཀྱི་ཉེ་བར་རྒྱུ་བ་རྣམས་ནི་ཆེས་གསལ་བ་ཡིན་པའི་ཕྱིར་རོ། །གང་གཟུགས་དག་མཐོང་ནས་དེ་དང་ལྷན་གཅིག་འབྱུང་བའི་སྒྲ་རྣམས་ལ་ཉེ་བར་རྒྱུ་བ་དེ་ཡང་དེའི་ཡིད་ཀྱི་ཉེ་བར་རྒྱུ་བ་ནི་ཡོད་མོད་ཀྱི་ཇི་ལྟར་མི་འཆོལ་བ་དེ་ལྟར་བཤད་དོ། །ཇི་ལྟར་ན་མི་འཆོལ་ཞེ་ན་དབང་པོ་དང་དོན་

Vol. 142 · folio 302a

རྣམ་པར་ཆད་པའི་སྒོ་ནས་ཞེས་བྱ་བ་སྨོས་ཏེ། མིག་ལ་སོགས་པའི་དབང་པོ་རྣམ་པར་ཆད་པ་དང་། གཟུགས་ལ་སོགས་པ་དོན་རྣམ་པར་ཆད་པའི་སྒོ་ནས་བཤད་པ་ཡིན་ནོ། །དེ་ལྟ་མ་ཡིན་ན་མིག་གིས་གཟུགས་དག་མཐོང་ནས་ཡིད་བདེ་བའི་

གནས་ལྟ་བུའི་སྒྲ་རྣམས་ལ་ཉེ་བར་རྒྱུའོ་ཞེས་བྱ་བ་དེ་ལྟ་བུ་ལ་སོགས་པ་ནི་འཆོལ་བར་འགྱུར་རོ། །རྒྱུད་ངེས་པས་ནི་ཡོད་ཅེས་བྱ་བ་ནི་འདི་ལྟར་སེམས་ཅན་འགའི་རྒྱུད་ལ་ལྟོས་ནས་ནི་ལ་ལ་ཡིད་བདེ་བའི་གནས་ལྟ་བུ་ཁོ་ན་ཡིན་པ་ནས་བཏང་སྙོམས་ཀྱི་གནས་ལྟ་བུ་ཁོ་ནའི་

བར་དུ་ནི་ཡིན་ནོ། །དམིགས་པ་ནི་མ་ཡིན་ནོ། །ཅི་ཞེ་ན་ངེས་པས་སོ། །ཅིའི་ཕྱིར་ཞེ་ན། དམིགས་པ་དེ་ཉིད་ལ་ལའི་ཡིད་བདེ་བའི་གནས་ལྟ་བུ་ཡིན་ལ། ལ་ལའི་མ་ཡིན་ནོ། །དེ་བཞིན་དུ་གཟུགས་དང་གཟུགས་མེད་པ་དང་ལྡན་པའི་བར་ཞེས་བྱ་བ་ནི་དུ་ཞིག་ནི་

གཟུགས་ཀྱི་ཁམས་དང་ལྡན་པ་ཡིན། དེ་དག་ལས་ཀྱང་དུ་ཞིག་གི་དམིགས་པ་ནི་ཅི་ཞིག་ཡིན། དུ་ཞིག་ནི་གཟུགས་མེད་པའི་ཁམས་དང་ལྡན་པ་ཡིན། དེ་དག་ལས་ཀྱང་དུ་ཞིག་གི་དམིགས་པ་ནི་ཅི་ཞིག་ཡིན་ཞེས་བྱ་བའོ།། །།བམ་པོ་ཉི་ཤུ་རྩ་བདུན་པ།

འདོད་ན་ཐམས་ཅད་རང་དམིགས་ཅན། །ཞེས་བྱ་བ་ནི་འདོད་པ་ན་ནི་ཡིད་ཀྱི་ཉེ་བར་རྒྱུ་བ་འདོད་པ་ན་སྤྱོད་པ་བཅོ་བརྒྱད་པོ་ཐམས་ཅད་ཡོད་ལ་དེ་དག་ཐམས་ཅད་ཀྱི་དམིགས་པ་ཡང་འདོད་པའི་ཁམས་དེ་ཉིད་ཡིན་ནོ། །ཚིག་ལེའུར་བྱས་པའི་ཚིག་ནི་འདི་དག་ལ་དམིགས་པ་རང་

གི་ཁམས་ཡོད་པས་ན་རང་དམིགས་ཅན་ནོ་ཞེས་བྱ་བ་ཚིག་རྣམ་པར་སྦྱར་རོ། །སྤྱོད་ཡུལ་གཟུགས་ཅན་བཅུ་གཉིས་སོ། །ཞེས་བྱ་བ་ནི་གཟུགས་ཀྱི་ཁམས་ནི་འདོད་པ་ན་སྤྱོད་པའི་ཉེ་བར་རྒྱུ་བ་བཅུ་གཉིས་ཀྱི་སྤྱོད་ཡུལ་ཡིན་ནོ། །དྲི་དང་རོ་ལ་ཉེ་བར་རྒྱུ་བ་དྲུག་མ་

གཏོགས་ཞེས་བྱ་བ་ནི་དྲི་དང་རོ་ལ་དམིགས་པའི་ཡིད་བདེ་བའི་ཉེ་བར་རྒྱུ་བ་གཉིས་མ་གཏོགས་པ་དང་། དེ་དག་ཁོ་ན་ལ་དམིགས་པའི་ཡིད་མི་བདེ་བའི་ཉེ་བར་རྒྱུ་བ་གཉིས་མ་གཏོགས་པ་དང་། དེ་དག་ཁོ་ན་ལ་དམིགས་པའི་བཏང་སྙོམས་ཀྱི་ཉེ་བར་རྒྱུ་བ་གཉིས་མ་གཏོགས་

Vol. 142 · folio 302b

ཞེས་བྱ་བ་ཡིན་ནོ། །ཅིའི་ཕྱིར་ཞེ་ན། དྲི་དང་རོ་དང་སྣ་དང་ནི། །ལྕེ་ཡི་རྣམ་ཤེས་ཁམས་མ་གཏོགས། །ཞེས་འབྱུང་བས་གཟུགས་ཀྱི་ཁམས་དེ་ནི་དྲི་དང་རོ་དེ་གཉིས་མེད་པའི་ཕྱིར་རོ། །གོང་མ་གསུམ་གྱི་ཞེས་བྱ་བ་ནི་ཁམས་གོང་མ་ནི་འདོད་པ་ན་སྤྱོད་པའི་ཡིད་བདེ་

བ་དང་། ཡིད་མི་བདེ་བ་དང་བཏང་སྙོམས་ཆོས་ལ་ཉེ་བར་རྒྱུ་བ་གསུམ་གྱི་དམིགས་པ་ཡིན་ཏེ། དེ་ན་གཟུགས་ལ་སོགས་པ་མེད་པའི་ཕྱིར་རོ། །བསམ་གཏན་ནི་གཉིས་ན་བཅུ་གཉིས་ཞེས་བྱ་བ་ནི་ཡིད་མི་བདེ་བའི་ཉེ་བར་རྒྱུ་བ་དྲུག་མེད་པའི་ཕྱིར་རོ། །རང་ལ་

དམིགས་བརྒྱད་ཅེས་བྱ་བ་ནི་བརྒྱད་ཀྱི་དམིགས་པ་ཡིན་ནོ། །དྲི་དང་རོ་ལ་ཉེ་བར་རྒྱུ་བ་བཞི་མ་གཏོགས་ཞེས་བྱ་བ་ནི་ཡིད་བདེ་བ་དང་། བཏང་སྙོམས་ཀྱི་ཉེ་བར་རྒྱུ་བ་དྲི་ལ་དམིགས་པ་གཉིས་དང་། རོ་ལ་དམིགས་པ་གཉིས་མ་གཏོགས་སོ་ཞེས་བྱ་བའི་ཐ་ཚིག་སྟེ། དེ་ན་

དེ་གཉིས་མེད་པའི་ཕྱིར་རོ། །གཟུགས་མེད་པ་གཉིས་ཀྱི་སྟེ་ཞེས་བྱ་བ་ནི་གཟུགས་མེད་པའི་ཁམས་ནི་བསམ་གཏན་དང་པོ་དང་གཉིས་པའི་ས་པའི་ཡིད་བདེ་བ་དང་བཏང་སྙོམས་ཆོས་ལ་ཉེ་བར་རྒྱུ་བ་དག་གི་དམིགས་པ་ཡིན་ཏེ་གཟུགས་ལ་སོགས་པ་ནི་མེད་པའི་ཕྱིར་

རོ། །བཏང་སྙོམས་ཀྱི་ཉེ་བར་རྒྱུ་བ་དྲུག་ཁོ་ན་ཡོད་ཀྱི་གཞན་དག་ནི་མེད་དོ་ཞེས་བྱ་བ་ནི་བཏང་སྙོམས་ཀྱི་ཉེ་བར་རྒྱུ་བ་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་ལ་དམིགས་པ་དག་ཁོ་ན་ཡོད་དོ། །བསམ་གཏན་གསུམ་པ་དང་། བཞི་པ་ནི་ཡིད་བདེ་བའི་ཉེ་བར་

རྒྱུ་བ་རྣམས་ཀྱང་མེད་པའི་ཕྱིར་རོ། །དེ་ན་དྲི་དང་རོ་ལ་དམིགས་པ་དག་ནི་འདོད་པ་ན་སྤྱོད་པའི་དྲི་དང་རོ་ལ་དམིགས་པ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །དེ་ན་ནི་བཞིའོ་ཞེས་བྱ་བ་ནི་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ཏེ་བར་ཆད་མེད་པའི་ལམ་གྱི་

དམིགས་པ་ནི་བསམ་གཏན་བཞི་པ་ཡིན་པའི་ཕྱིར་ལ། དེ་ན་ཡང་གཟུགས་དང་སྒྲ་དང་རེག་བྱ་དང་ཆོས་ཡོད་པའི་ཕྱིར་རོ། །གང་གི་ལྟར་ན་དེ་རྣམ་པར་ཆད་པ་ལ་དམིགས་པ་ཡོད་པའི་ཡིན་ཞེས་བྱ་བ་ནི་སློབ་དཔོན་གང་དག་གི་གཞུང་ལུགས་ཀྱིས། ནམ་མཁའ་མཐའ་ཡས་སྐྱེ་མཆེད་

Vol. 142 · folio 303a

ཀྱི་ཉེར་བསྡོགས་དེ་རྣམ་པར་ཆད་པ་ལ་དམིགས་ཤིང་གཟུགས་ལ་སོགས་པ་སོ་སོ་ལ་དམིགས་པ་ཡིན་ཏེ། སྤྱིར་མི་དམིགས་པ་ཞེས་བྱ་བའི་ཐ་ཚིག་གོ། །སློབ་དཔོན་ཁ་ཅིག་གི་གཞུང་ལུགས་ལྟར་ན་ནི། བསམ་གཏན་བཞི་པ་ལ་རེག་པ་ལ་སོགས་པའི་རྣམ་པར་

དམིགས་པ་ཞེས་བྱ་བ་ཡིན་ནོ། །སློབ་དཔོན་གང་དག་གི་གཞུང་ལུགས་ཀྱིས་བཟླུམས་ཏེ་དམིགས་པ་ཁོ་ན་སྟེ་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་དེ་བསམ་གཏན་བཞི་པའི་ས་པའི་ཕུང་པོ་ལྔ་ཆར་ལ་དམིགས་པ་ཡིན་ནོ་ཞེས་བྱ་བར་འདོད་པའི་སློབ་དཔོན་དེ་དག་གི་ལྟར་ན་ནི་དོན་

ཆོས་ལ་ཉེ་བར་རྒྱུ་བའི་འདྲེས་པ་ལ་དམིགས་པ་གཅིག་ཁོ་ན་ཡོད་དོ། །གོང་མར་འགྲོ་བ་གཅིག་ཅེས་བྱ་བ་ནི་གང་གི་ཕྱོགས། གཟུགས་མེད་ཉེ་བར་བསྡོགས་ན་བཞི། །ཞེས་བྱ་བ་ཡིན་པ་དེ་དག་གི་ཕྱོགས་ཡིན་ནོ། །གཟུགས་མེད་པའི་དངོས་གཞི་རྣམས་ཀྱི་མ་ཡིན་ཞེས་བྱ་བ་རྒྱས་པར་

འབྱུང་བ་ནི་གཟུགས་མེད་པའི་དངོས་གཞི་རྣམས་ཀྱི་དམིགས་པ་ནི་ཁམས་འོག་མ་མ་ཡིན་ཏེ། ས་འོག་མ་པའི་ཟག་པ་དང་བཅས་པའི་དངོས་པོ་ལ་མི་དམིགས་སོ་ཞེས་བྱ་བའི་ཐ་ཚིག་གོ། །འོག་ནས་བཤད་པར་བྱའོ་ཞེས་བྱ་བ་ནི། གཟུགས་མེད་དངོས་གཞི་དགེ་བ་ཡི། །སྤྱོད་ཡུལ་

ཟག་བཅས་འོག་མ་མིན། །ཞེས་བྱ་བ་ཡིན་ནོ། །བསམ་གཏན་དང་པོ་དང་ཞེས་བྱ་བ་རྒྱས་པར་འབྱུང་བ་ནི་བསམ་གཏན་དང་པོ་དང་གཉིས་པའི་ས་པ་ནི་བརྒྱད་དང་ལྡན་ནོ། །བསམ་གཏན་གསུམ་པ་དང་བཞི་པའི་ས་པ་ནི་བཞི་དང་ལྡན་ནོ། །གང་དག་དང་ཞེ་ན། སྨྲས་པ། དྲི་དང་རོ་ལ་

དམིགས་པ་མ་གཏོགས་པ་ཉོན་མོངས་པ་ཅན་རྣམས་དང་སྟེ། དེ་ན་དྲི་དང་རོ་མེད་པའི་ཕྱིར་རོ། །ཇི་ལྟར་ན་བསམ་གཏན་དང་པོ་དང་གཉིས་པ་དག་ན་ཡིད་ཀྱི་ཉེ་བར་རྒྱུ་བ་བཅུ་གཉིས་ཡོད་པར་བཤད་ཅེ་ན། ཡིད་བདེ་བ་དང་བཏང་སྙོམས་ཀྱི་ཉེ་བར་རྒྱུ་བ་རྣམས་ཀྱི་དམིགས་པ་ཡུལ་དྲུག་རྣམ་པར་

གཞག་པའི་ཕྱིར་རོ། །དེ་ལ་འདོད་པའི་ཁམས་སུ་སྐྱེས་པ་གཟུགས་ན་སྤྱོད་པའི་དགེ་བའི་སེམས་མ་ཐོབ་པ་ནི་རང་གི་ས་པ་ལ་དམིགས་པ་ཡིད་བདེ་བའི་ཉེ་བར་རྒྱུ་བ་གཟུགས་དང་སྒྲ་དང་རེག་བྱ་དང་ཆོས་ལ་དམིགས་པ་ཉོན་མོངས་པ་ཅན་བཞི་དང་། བཏང་སྙོམས་ཀྱི་ཉེ་བར་རྒྱུ་བ་ཉོན་མོངས་

Vol. 142 · folio 303b

པ་ཅན་བཞི་པོ་གང་དག་ཡིན་པ་དེ་དག་ཁོ་ན་དང་ལྡན་པ་སྟེ། ས་འོག་མར་སྐྱེས་པ་ནི་ས་གོང་མ་པའི་ཉོན་མོངས་པ་ཅན་རྣམས་དང་ལྡན་པ་ཡིན་ནོ། །ཉོན་མོངས་པ་ཅན་མ་ཡིན་པ་དྲི་དང་རོ་ལ་དམིགས་པ་བཞི་དང་ནི་ལྡན་པ་མ་ཡིན་ཏེ། དེ་དག་ནི་ཉོན་མོངས་པ་ཅན་མ་ཡིན་པའི་ཕྱིར་ལ། གཟུགས་

ན་སྤྱོད་པའི་དགེ་བའི་ཆོས་མ་ཐོབ་པའི་ཕྱིར་ནི་གཟུགས་ན་སྤྱོད་པའི་ཆོས་ཉོན་མོངས་པ་ཅན་མ་ཡིན་པ་མ་ཐོབ་པ་ཡིན་པས་དེ་དག་དང་མི་ལྡན་ནོ། །བཏང་སྙོམས་ཀྱི་ཉེ་བར་རྒྱུ་བ་བསམ་གཏན་གསུམ་པ་དང་། བཞི་པའི་ས་པ་དག་ཀྱང་དྲུག་ཁོ་ནར་བཤད་དེ། དེ་དག་གང་གི་ས་པ་ལ་དམིགས་པ་ཉོན་

མོངས་པ་ཅན་གང་དག་ཡིན་པ་དེ་དག་དང་ལྡན་ནོ། །དྲི་དང་རོ་ལ་དམིགས་པ་གང་དག་ཡིན་པ་དེ་དག་ནི་ཉོན་མོངས་པ་ཅན་མ་ཡིན་ཏེ། དེའི་ཕྱིར་སྔར་བཤད་པའི་ཚུལ་ཁོ་ནས་དེ་གཉིས་དང་མི་ལྡན་ནོ། །ཉོན་མོངས་པ་ཅན་གཅིག་ཁོ་ན་དང་ཞེས་བྱ་བ་ནི་ཉོན་མོངས་པ་ཅན་མ་ཡིན་པ་དང་

ནི་མ་ཡིན་པ་སྟེ། དགེ་བ་ནི་མེད་པའི་ཕྱིར་རོ། །གཟུགས་ན་སྤྱོད་པའི་དགེ་བའི་སེམས་ཐོབ་པ་ཞེས་བྱ་བ་རྒྱས་པར་འབྱུང་བ་ནི་འདོད་པའི་ཁམས་ཁོ་ནར་སྐྱེས་པ་གཟུགས་ན་སྤྱོད་པའི་དགེ་བའི་སེམས་མི་ལྕོགས་པ་མེད་པས་བསྡུས་པ་ཐོབ་པར་འདོད་པའི་ཁམས་ལས་འདོད་ཆགས་དང་མ་བྲལ་

བ་ནི་འདོད་པ་ན་སྤྱོད་པ་བཅོ་བརྒྱད་པོ་ཐམས་ཅད་དང་ཡང་ལྡན་ནོ། །བསམ་གཏན་དང་པོའི་ས་པ་ནི་བཅུ་དང་ལྡན་ཞེས་བྱ་བ་ཇི་ལྟར་བཅུ་ཡིན་ཞེ་ན། ཡིད་བདེ་བའི་ཉེ་བར་རྒྱུ་བ་དྲི་དང་རོ་ལ་དམིགས་པ་མ་གཏོགས་པ་ཉོན་མོངས་པ་ཅན་བཞི་དང་ཞེས་བྱ་བ་སྨོས་ཏེ། ཉེར་བསྡོགས་རྣམས་ནི་བཏང་

སྙོམས་ཀྱི་དབང་པོ་དང་མཚུངས་པར་ལྡན་པ་ཡིན་པའི་ཕྱིར་ཉེར་བསྡོགས་དག་ན་ནི་ཡིད་བདེ་བའི་ཉེ་བར་རྒྱུ་བ་རྣམས་མེད་དོ། །དེའི་ཕྱིར་ཡིད་ཀྱི་ཉེ་བར་རྒྱུ་བ་དངོས་གཞིས་བསྡུས་པ་རང་གི་ས་ལ་དམིགས་པ་ཉོན་མོངས་པ་བཞི་ཁོ་ན་དང་ལྡན་གྱི་དངོས་གཞིའི་དགེ་བ་མ་ཐོབ་པས་ཉོན་མོངས་པ་ཅན་

མ་ཡིན་པའི་རྙེད་པ་མེད་པའི་ཕྱིར་དྲི་དང་རོ་ལ་དམིགས་པ་དག་དང་ནི་མ་ཡིན་ཏེ། བསམ་གཏན་ཉོན་མོངས་པ་ཅན་འོག་མ་པ་ལ་དམིགས་པ་ནི་མེད་དོ། །མི་ལྕོགས་པ་མེད་པའི་ས་པའི་བཏང་སྙོམས་ཀྱི་ཉེ་བར་རྒྱུ་བ་དྲུག་དང་ཞེས་བྱ་བ་འདིར་ནི་ཁྱད་པར་མེད་པར་བརྗོད་པའི་ཕྱིར་བཏང་

Vol. 142 · folio 304a

སྙོམས་ཀྱི་ཉེ་བར་རྒྱུ་བ་ཉེར་བསྡོགས་ཀྱི་བསྡུས་པ་ཉོན་མོངས་པ་བཞི་ཆར་དང་ཡང་ལྡན་ལ་བཏང་སྙོམས་ཀྱི་ཉེ་བར་རྒྱུ་བ་དགེ་བ་འདོད་པའི་ཁམས་ལ་དམིགས་པ་དྲུག་དང་། རང་གི་ས་ལ་དམིགས་པ་དག་དང་ཡང་ལྡན་ནོ། །བསམ་གཏན་གཉིས་པ་དང་། གསུམ་པ་དང་།

བཞི་པ་དང་། གཟུགས་མེད་པ་ལས་སྐྱེས་པ་རྣམས་དང་ནི་སྔ་མ་བཞིན་ནོ་ཞེས་བྱ་བ་ཇི་ལྟ་བུ་ཞེ་ན། འདོད་པའི་ཁམས་སུ་སྐྱེས་པ་དེ་ཉིད་གཟུགས་ན་སྤྱོད་པའི་དགེ་བའི་སེམས་ཐོབ་ལ་འདོད་ཆགས་དང་མ་བྲལ་བ་ནི་བསམ་གཏན་གཉིས་པའི་ས་པ་དྲི་དང་རོ་ལ་དམིགས་པ་མ་གཏོགས་པ་ཉོན་མོངས་པ་

ཅན་བརྒྱད་ཁོ་ན་དང་ལྡན་ཏེ། མ་ཐོབ་པ་གང་དག་ཁོ་ན་དང་ལྡན་པ་ཡིན་ནོ། །བསམ་གཏན་གསུམ་པ་དང་བཞི་པའི་ས་པ་ནི་དྲི་དང་རོ་ལ་དམིགས་པ་དག་མ་གཏོགས་པ་བཞི་ཁོ་ན་དང་ལྡན་ནོ། །གཟུགས་མེད་པ་ན་སྤྱོད་པ་ནི་ཉོན་མོངས་པ་ཅན་གཅིག་ཁོ་ན་དང་ལྡན་ནོ། །སྲོལ་འདིས་ཏེ་

ལམ་འདིས་ནི་ལྷག་མ་ཡང་ཁོང་དུ་ཆུད་པར་བྱའོ། །ཇི་ལྟ་ཞེ་ན། བསམ་གཏན་དང་པོར་སྐྱེས་པ་བསམ་གཏན་གཉིས་པའི་ས་པའི་དགེ་བའི་སེམས་མ་ཐོབ་པ་ནི་བསམ་གཏན་དང་པོའི་ས་པ་ཐམས་ཅད་དང་ལྡན་ནོ། །བསམ་གཏན་གཉིས་པའི་ས་པ་ནི་ཉོན་མོངས་པ་ཅན་བརྒྱད་དང་ལྡན་ནོ། །

བསམ་གཏན་གསུམ་པ་དང་། བཞི་པ་དང་། གཟུགས་མེད་པ་ལས་སྐྱེས་པ་རྣམས་དང་ནི་སྔ་མ་བཞིན་ནོ། །བསམ་གཏན་གཉིས་པའི་ས་པའི་དགེ་བའི་སེམས་ཐོབ་པ་དེ་ལས་འདོད་ཆགས་དང་མ་བྲལ་བ་ནི་བསམ་གཏན་དང་པོའི་ས་པ་ཐམས་ཅད་དང་ལྡན་ནོ། །བསམ་གཏན་གཉིས་

པའི་ས་པ་ནི་བརྒྱད་དང་ལྡན་ནོ། །དྲི་དང་རོ་ལ་དམིགས་པ་དག་མ་གཏོགས་པ་ཡིད་བདེ་བའི་ཉེ་བར་རྒྱུ་བ་ཉོན་མོངས་པ་ཅན་བཞི་དང་། བཏང་སྙོམས་ཉེ་བར་རྒྱུ་བ་བསམ་གཏན་གཉིས་པའི་ཉེར་བསྡོགས་ཀྱིས་བསྡུས་པ་བཞི་དང་ལྡན་ནོ། །བསམ་གཏན་གསུམ་པའི་ས་པ་ནི་དྲི་དང་རོ་ལ་དམིགས་

པ་དག་མ་གཏོགས་པར་ཉོན་མོངས་པ་ཅན་བཞི་དང་ལྡན་ཏེ། བསམ་གཏན་བཞི་པའི་ས་པ་དག་ཀྱང་དེ་དང་འདྲའོ། །གཟུགས་མེད་པ་ན་སྤྱོད་པའི་ཉོན་མོངས་པ་ཅན་གཅིག་ཁོ་ན་དང་ལྡན་ནོ། །བསམ་གཏན་གསུམ་པའི་ས་པའི་དགེ་བའི་སེམས་ཐོབ་པ་དེ་ལས་འདོད་ཆགས་དང་མ་བྲལ་བ་ནི་

Vol. 142 · folio 304b

བསམ་གཏན་གཉིས་པའི་ས་པ་ཐམས་ཅད་དང་ལྡན་ནོ། །བསམ་གཏན་གསུམ་པའི་ས་པ་ནི་དྲི་དང་རོ་ལ་དམིགས་པ་དག་མ་གཏོགས་པ་དང་བཏང་སྙོམས་ཀྱི་ཉེ་བར་རྒྱུ་བ་ཉོན་མོངས་པ་ཅན་བཞི་དང་། བཏང་སྙོམས་ཀྱི་ཉེ་བར་རྒྱུ་བ་བསམ་གཏན་གསུམ་པའི་ཉེར་བསྡོགས་ཀྱིས་བསྡུས་པ་བཞི་དང་ལྡན་

ནོ། །བསམ་གཏན་བཞི་པ་དང་གཟུགས་མེད་པ་ལས་སྐྱེས་པ་རྣམས་དང་ནི་སྔ་མ་བཞིན་ནོ། །འདི་ནི་ཕྱོགས་ཡིན་ཏེ། ཕྱོགས་འདིས་བསམ་གཏན་གསུམ་པ་དང་བཞི་པ་དག་ཏུ་སྐྱེས་པའི་རང་གི་ས་པ་དང་ས་གོང་མ་པའི་བཏང་སྙོམས་ཀྱི་ཉེ་བར་རྒྱུ་བ་ཉོན་མོངས་པ་ཅན་དང་། དགེ་བ་དག་ཁོ་ན་དག་དང་

མི་ལྡན་པ་ཡང་ཅི་རིགས་པར་སྦྱར་བར་བྱའོ། །བཏང་སྙོམས་ཆོས་ལ་ཉེ་བར་རྒྱུ་བ་ཞེས་བྱ་བ་ནི་འདོད་པ་ན་སྤྱོད་པའི་སྤྲུལ་པའི་སེམས་ནི་བཏང་སྙོམས་དང་མཚུངས་པར་ལྡན་པའི་ཕྱིར་རོ། །གཞན་དག་ན་རེ་ཞེས་བྱ་བ་ནི་བསྟན་བཅོས་མཛད་པ་འདི་ཉིད་ཡིན་ནོ། །གང་ཞིག་གང་ལ་འདོད་ཆགས་དང་བྲལ་བ་དེ་ནི་

དམིགས་པ་དེ་ལ་ཉེ་བར་རྒྱུ་བར་རིགས་པ་མ་ཡིན་ནོ་ཞེས་བྱ་བ་རྒྱས་པར་འབྱུང་བ་ནི་གང་ཟག་གང་ཞིག་གཟུགས་ལ་སོགས་པ་གང་ལས་འདོད་ཆགས་དང་བྲལ་བ་དེ་ནི་གཟུགས་ལ་སོགས་པའི་དམིགས་པ་དེ་ལ་ཉེ་བར་རྒྱུ་བ་མ་ཡིན་ནོ། །ཇི་ལྟར་ཉེ་བར་རྒྱུ་བར་བྱེད་ཅེ་ན། དེ་ལ་རྗེས་སུ་ཆགས་པར་ཡང་བྱེད།

ཁོང་ཁྲོ་བར་ཡང་བྱེད། སོ་སོར་མ་བརྟགས་པར་བཏང་སྙོམས་སུའང་བྱེད་པ་སྟེ་ཞེས་བྱ་བ་དེ་ལྟ་བུར་རོ། །གང་གི་ཚེ་སོ་སོར་བརྟགས་ཏེ་བཏང་སྙོམས་སུ་བྱེད་པ་དེའི་ཚེ་ནི་གཏོད་པར་མི་བྱེད་པས་དགེ་བ་ཉིད་ཡིན་ཏེ། དེའི་ཕྱིར་སོ་སོར་མ་བརྟགས་པར་ཞེས་ཁྱད་པར་དུ་བྱས་སོ། །དེ་ལྟ་བས་ན་ཡིད་བདེ་བ་

ལ་སོགས་པ་ཟག་པ་དང་བཅས་པ་དག་ཀྱང་ཐམས་ཅད་ནི་ཉེ་བར་རྒྱུ་བ་ནི་མ་ཡིན་ནོ། །འོ་ན་ཅི་ཞེ་ན། ཀུན་ནས་ཉོན་མོངས་པ་པ་རྣམས་ཡིན་ཏེ། ཀུན་ནས་ཉོན་མོངས་པ་དང་མཐུན་པ་དག་སྟེ། ཡིད་བདེ་བ་ལ་སོགས་པ་གང་དག་གིས་ཡིད་ཡུལ་རྣམས་ལ་ཉེ་བར་རྒྱུ་བར་བྱེད་པ་ཡིན་ནོ། །གང་དག་

གི་གཉེན་པོར་རྟག་ཏུ་ཡོད་པ་དྲུག་གནས་པ་ཞེས་བྱ་བ་ནི་ཀུན་ནས་ཉོན་མོངས་པ་གང་དག་གི་གཉེན་པོར་རྟག་ཏུ་འབྱུང་བ་ནི་རྟག་ཏུ་ཡོད་པ་སྟེ་གནས་ཤིང་རྣལ་འབྱོར་གྱི་ཁྱད་པར་དུ་བྱེད་པ་ཡིན་པ་སྟེ་དེ་དག་ཀྱང་དྲུག་གོ། །ཇི་ལྟ་ཞེ་ན། བཤད་པ་མིག་གིས་གཟུགས་རྣམས་མཐོང་ནས་ཡིད་བདེ་

Vol. 142 · folio 305a

བར་ཡང་མི་འགྱུར་ཏེ་རྗེས་སུ་ཆགས་པར་ཡང་མི་འགྱུར་ཞིང་ཡིད་མི་བདེ་བར་ཡང་མི་འགྱུར་ཏེ། ཁོང་ཁྲོ་བར་ཡང་མི་འགྱུར་ལ་བཏང་སྙོམས་སུ་གནས་ཤིང་གཏོད་པར་མི་བྱེད་དོ། །ཇི་ལྟར་གཏོད་པར་མི་བྱེད་ཅིང་སོ་སོར་མ་བརྟགས་པར་རམ། འོན་ཏེ་སོ་སོར་བརྟགས་ཏེ་ཞེ་ན། ཁྱད་

པར་དུ་བྱ་བའི་ཕྱིར་དྲན་པ་དང་ལྡན་ཞིང་ཤེས་བཞིན་དུ་ཞེས་བྱ་བ་སྨོས་ཏེ། དྲན་པ་དང་མཚུངས་པར་ལྡན་པའི་ཤེས་རབ་ཀྱིས་ཡིད་ལ་བརྗོད་ཅིང་ཞེས་བྱ་བའི་ཐ་ཚིག་གོ། །དེ་བཞིན་དུ་ཡིད་ཀྱིས་ཆོས་རྣམས་ཤེས་ནས་ཞེས་བྱ་བའི་བར་དུ་ཞེས་བྱ་བ་ནི་ཡུལ་དྲུག་ཐ་དད་པའི་སྒོ་ནས་རྟག་ཏུ་ཡོད་པ་དྲུག་ཡིན་ནོ། །

དགྲ་བཅོམ་པ་ལ་ཡང་མེད་པ་མ་ཡིན་པས་ཞེས་བྱ་བ་ནི་དགྲ་བཅོམ་པ་ལ་འཇིག་རྟེན་པའི་དགེ་བ་ཟག་པ་དང་བཅས་པའི་ཆོས་ལ་དམིགས་པ་སྟེ། ཆོས་ཀྱི་སྐྱེ་མཆེད་དྲུག་ལ་དམིགས་པའམ་རྟོགས་པའི་ཆོས་ལ་དམིགས་པའི་ཡིད་བདེ་བ་ཡོད་དེ། དེ་སངས་རྒྱས་ཀྱི་རྒྱུད་ལ་མངའ་བའི་ཡོན་ཏན་རྣམས་མངོན་དུ་

བྱེད་པ་ན་ཡིད་བདེ་བ་དགེ་བ་སྐྱེ་བས་འདི་ནི་དགག་པ་ཡིན་པར་མི་རུང་ངོ་། །འོ་ན་གང་ཞིག་ཅེ་ན། འདི་ནི་ཀུན་ནས་ཉོན་མོངས་པའི་ཡིད་ཀྱི་ཉེ་བར་རྒྱུ་བ་དེ་དགག་པ་ཡིན་པར་མངོན་ནོ། །དེ་ལྟ་བས་ན་ཡིད་བདེ་བ་ལ་སོགས་པ་ཟག་པ་དང་བཅས་པ་དག་ཀྱང་ཐམས་ཅད་ནི་ཉེ་བར་རྒྱུ་བ་མ་ཡིན་ནོ་ཞེས་བྱའོ། །

འདི་ལ་བཙུན་པ་གོ་ཆ་མཐའ་ཡས་ན་རེ། དེ་ནི་རིགས་པ་མ་ཡིན་ནོ། །ཅིའི་ཕྱིར་ཞེ་ན། མདོ་ལས་གཞན་དུ་བསྟན་པའི་ཕྱིར་ཏེ། བཅོམ་ལྡན་འདས་ཀྱིས་མདོ་ལས་ནི་ཀུན་ནས་ཉོན་མོངས་པ་དག་ཁོ་ན་ཡིད་ཀྱི་ཉེ་བར་རྒྱུ་བ་ཡིན་པར་ནི་མ་བཤད་ཀྱི། འདི་སྐད་དུ་དགེ་སློང་དག་དེ་ལས་ཡིད་བདེ་

བའི་ཉེ་བར་རྒྱུ་བ་དྲུག་པོ་གང་དག་ཡིན་པ་དེ་དག་ལ་བརྟེན་ཅིང་གནས་ཏེ། ཡིད་མི་བདེ་བའི་ཉེ་བར་རྒྱུ་བ་དྲུག་པོ་གང་དག་ཡིན་པ་དེ་དག་སྤོངས་ཤིག །དགེ་སློང་དག་དེ་ལ་བཏང་སྙོམས་ཀྱི་ཉེ་བར་རྒྱུ་བ་དྲུག་པོ་གང་དག་ཡིན་པ་དེ་དག་ལ་བརྟེན་ཅིང་གནས་ཏེ་ཡིད་བདེ་བའི་ཉེ་བར་རྒྱུ་བ་དྲུག་པོ་གང་དག་ཡིན་

པ་དེ་དག་སྤོངས་ཤིག །དགེ་སློང་དག་བཏང་སྙོམས་ནི་གཉིས་ཏེ། ཐ་དད་པ་ཉིད་ལ་བརྟེན་པ་དང་། གཅིག་པ་ཉིད་ལ་བརྟེན་པའོ། །དགེ་སློང་དག་དེ་ལ་གཅིག་པ་ཉིད་ལ་བརྟེན་པའི་བཏང་སྙོམས་གང་ཡིན་པ་དེ་ལ་བརྟེན་ཅིང་གནས་ཏེ་ཐ་དད་པ་ཉིད་ལ་བརྟེན་པའི་བཏང་སྙོམས་གང་ཡིན་པ་དེ་

Vol. 142 · folio 305b

ཡང་སྤོངས་ཤིག་ཅེས་བཤད་དེ། དེ་ལྟ་བས་ན་མདོ་འདི་དང་སྦྱར་ན་ཡིད་བདེ་བ་ལ་སོགས་པའི་ཉེ་བར་རྒྱུ་བ་ནི་ཀུན་ནས་ཉོན་མོངས་པ་ཁོ་ན་མ་ཡིན་ནོ་ཞེས་བྱ་བར་ཤེས་སོ་ཞེས་ཟེར་རོ། །དེ་ནི་ཁུངས་སུ་མི་རུང་སྟེ། སྤང་བར་གསུངས་ཀྱང་ཀུན་ནས་ཉོན་མོངས་པ་ཉིད་ཡིན་པར་མི་ལྡོག་གོ། །གཅིག་

ལ་བརྟེན་ནས་ཅིག་ཤོས་སྤང་བར་གསུངས་སུ་ཟིན་ཀྱང་ཡིད་ཀྱི་ཉེ་བར་རྒྱུ་བ་འདི་དག་ཀུན་ནས་ཉོན་མོངས་པ་ཉིད་ཡིན་པ་ནི་མི་ལྡོག་སྟེ། གཞན་དུའང་སྲིད་པའི་ཕྱིར་རོ། །འདི་སྐད་དུ་ང་རྒྱལ་ཉིད་ང་རྒྱལ་ལ་བརྟེན་ནས་སྤང་བར་བྱའོ་ཞེས་གསུངས་མོད་ཀྱི། ང་རྒྱལ་ནི་ནམ་དུ་ཡང་གང་དུ་ཡང་རྣམ་པར་བྱང་བ་ཡིན་པར་མི་སྲིད་དོ། །དེ་

ལྟ་བས་ན། ཉོན་མོངས་པ་རྣམས་ཕན་ཚུན་འགལ་བར་འཇུག་པས་འཇུག་པ་གཞན་ལ་ལྟོས་ན་ཡོན་ཏན་དང་ལྡན་པ་ཡིན་པའི་ཕྱིར་ལྕི་བ་དང་ཡང་བ་ལ་དགོངས་ཏེ་མདོ་ལས་གསུངས་པས་ཉེས་པ་མེད་དོ། །འདིར་དཔེ་ནི་དགའ་བོ་ལ་སོགས་པ་ལྟ་བུ་ཡིན་ནོ། །དེའི་ཕྱིར་འདི་ནི་བཅོམ་ལྡན་འདས་ཀྱིས་སྤང་བར་བྱ་

བའི་ཕྱིར་བཏང་སྙོམས་དག་ཁོ་ན་རྟེན་ཉིད་དུ་བསྟན་པ་ཡིན་ཏེ། དགེ་སློང་དག་བཏང་སྙོམས་ནི་གཉིས་ཏེ་ཞེས་བྱ་བ་ལ་སོགས་པ་གསུངས་པའི་ཕྱིར་རོ་ཞེན་པ་ལ་བརྟེན་པ་དང་། ངེས་པར་འབྱུང་བ་ལ་བརྟེན་པའི་བྱེ་བྲག་གིས་སྟོན་པའི་བཀའ་སུམ་ཅུ་རྩ་དྲུག་འབྱུང་བས་འདི་དག་ཀུན་ནས་ཉོན་མོངས་པ་

དང་། རྣམ་པར་བྱང་བ་ཉིད་ཡིན་པར་གྲུབ་པ་མ་ཡིན་ནམ་ཞེ་ན། བྱེ་བྲག་ཏུ་སྨྲ་བའི་གཞུང་ལུགས་དང་མཐུན་པར་བྱེད་པའི་ཕྱིར་ཉེས་པ་མེད་དོ། །སློབ་དཔོན་གྱི་ལྟར་ན་ཡང་དེ་ན་ཡིད་ཀྱི་ཉེ་བར་རྒྱུ་བ་ལས་མ་གཏོགས་པའི་ཡིད་བདེ་བ་ལ་སོགས་པ་ཡོད་དོ། །ཡིད་བདེ་བ་ལ་སོགས་པ་དེ་དག་ཉིད་ཅེས་བྱ་བ་

རྒྱས་པར་འབྱུང་བ་ནི་ཉེ་བར་རྒྱུ་བ་བཅོ་བརྒྱད་པོ་དེ་དག་ཉིད་ཁ་ཅིག་ནི་ཞེན་པ་ལ་བརྟེན་པ་སྟེ། མངོན་པར་ཞེན་པ་ལ་བརྟེན་པ་ཡིན་ནོ། །ཁ་ཅིག་ནི་ངེས་པར་འབྱུང་བ་ཉིད་ལ་བརྟེན་པ་སྟེ་ངེས་པར་འབྱུང་བའི་ངོ་བོ་ནི་ངེས་པར་འབྱུང་བ་ཉིད་དེ་ཀུན་ནས་ཉོན་མོངས་པའམ་འཁོར་བའི་སྡུག་བསྔལ་ལས་སོ། །

ཞེན་པ་དང་ངེས་པར་འབྱུང་བ་ཉིད་ལ་བརྟེན་པའི་བྱེ་བྲག་གིས་བཅོ་བརྒྱད་ཕྲག་གཉིས་ན་སྟོན་པའི་བཀའ་སུམ་ཅུ་རྩ་དྲུག་གོ། །དེ་དག་གིས་བྱེ་བྲག་སྟེ་ཡིད་ཀྱི་ཉེ་བར་རྒྱུ་བ་དེ་དག་གིས་བྱེ་བྲག་རྣམ་པ་གཉིས་སྟོན་པ་སངས་རྒྱས་ཀྱིས་བཀའ་སྩལ་ཅིང་བཤད་པའི་ཕྱིར་ཏེ། མདོ་ལས་ཇི་སྐད་འབྱུང་བ་

Vol. 142 · folio 306a

བཞིན་ནོ། །སྔར་རྟེན་ཅིང་འབྲེལ་པར་འབྱུང་བ་དེ་ཡང་མདོར་བསྡུ་ན་ཉོན་མོངས་པ་དང་ལས་དང་གཞི་རྣམས་སོ་ཞེས་བསྟན་པ་ཞེས་བྱ་བ་ནི། ཉོན་མོངས་གསུམ་མོ་ལས་གཉིས་སོ། །གཞི་བདུན་ཞེས་འབྱུང་བའི་ཕྱིར་རོ། །ལས་རྣམས་ཀྱང་རྣམ་པར་སྨིན་པ་བསྐྱེད་པར་བྱ་བ་

ལ་དེ་བཞིན་ཞེས་བྱ་བ་ནི་ལས་རྣམས་ཀྱང་དེ་དང་འདྲ་བར་རྣམ་པར་སྨིན་པ་བསྐྱེད་པར་བྱ་བ་ལ་ཉེ་བའི་རྒྱུ་ཡིན་ནོ་ཞེས་བྱ་བར་སྐབས་དང་སྦྱར་རོ། །ཉོན་མོངས་པ་ཡང་རྣམ་པར་སྨིན་པའི་རྒྱུ་ཡིན་མོད་ཀྱི་དེ་ནི་ཐག་རིང་བ་ཡིན་ནོ། །དེ་དག་ནི་བཤད་ཟིན་ཏོ་ཞེས་བྱ་བ་ནི། འདིར་གང་འཆི་དང་སྐྱེ་བ་ཡི། །

སྲིད་པའི་བར་དུ་འབྱུང་བའོ། །ཞེས་བྱ་བ་དང་། དེ་ནི་འཆི་བའི་སྔོན་རོལ་ཏེ། །སྐྱེ་བའི་སྐད་ཅིག་ཕན་ཆད་དོ། །ཞེས་འབྱུང་བས་བཤད་ཟིན་ཏོ། །ཀུན་ནས་དཀྲིས་པ་ཚིག་རྐྱ་ཐུབ་པ་རྣམས་ཀྱིས་ནི་མ་ཡིན་ནོ་ཞེས་བྱ་བ་ནི་ཕྲག་དོག་དང་སེར་སྣ་དང་ཁོང་ཁྲོ་བ་དང་འཆབ་པ་རྣམས་ཀྱིས་ཏེ།

འདི་དག་ནི་ཚིག་རྐྱ་ཐུབ་པ་ཡིན་ཏེ། མ་རིག་པ་མ་གཏོགས་པ་ཉོན་མོངས་པ་གཞན་དང་མཚུངས་པར་མི་ལྡན་པའི་ཕྱིར་རོ། །མ་རིག་པ་ནི་ཐམས་ཅད་ན་ཡོད་པ་ཉིད་པས་དེ་དང་མཚུངས་པར་ལྡན་པས་ནི་ཚིག་རྐྱ་མི་ཐུབ་པ་མ་ཡིན་ནོ། །ངོ་ཚ་བ་མེད་པ་ལ་སོགས་པ་ཉོན་མོངས་པ་གཞན་དང་

མཚུངས་པར་ལྡན་པ་དག་གིས་ནི་ཉིང་མཚམས་སྦྱོར་བར་དགག་པ་མེད་དོ། །གནས་སྐབས་དེ་ཞན་པ་ཡིན་མོད་ཀྱི་ཞེས་བྱ་བ་རྒྱས་པར་འབྱུང་བ་ནི་འཆི་བའི་གནས་སྐབས་དེ། འཆི་འཕོ་སྐྱེ་བ་བཏང་སྙོམས་ལ། །ཞེས་འབྱུང་བའི་ཕྱིར་སེམས་དང་སེམས་ལས་འབྱུང་བའི་རྒྱུ་བ་མི་གསལ་བའི་ཕྱིར།

གཞན་པ་ཡིན་མོད་ཀྱི་གང་ཟག་གང་ཞིག་གིས་ཉོན་མོངས་པ་གང་ལ་ཡང་དང་ཡང་དུ་སྟེ་རྟག་ཏུ་དང་། འཆི་བའི་ཚེ་དང་། ཉེ་བར་སྤྱད་ཅིང་བྱུང་བའི་གང་ཟག་དེ་ལ་ནི་འཆི་བའི་དུས་དེའི་ཚེ་འཇིག་ཚོགས་དང་མཐར་འཛིན་པ་ལ་སོགས་པ་ཉོན་མོངས་པ་དེ་དག་ཉིད་ཀུན་དུ་འབྱུང་ངོ་། །སྔོན་

འཕངས་པའི་ཕྱིར་ཞེས་བྱ་བ་ནི་སྔོན་བསྐྱེད་པའི་ཕྱིར་སྔོན་གོམས་པའི་ཕྱིར་ཞེས་བྱ་བའི་ཐ་ཚིག་གོ། །ཡང་ན་དེའི་ཚེ་ཉོན་མོངས་པ་ཉེ་བར་གནས་པ་གང་ཡིན་པ་དེ་སྔ་མའི་འབྲས་བུའི་ངོ་བོར་ཉེ་བར་བཟུང་ཞིང་འཕངས་ལ་བསྐྱེད་པ་ཡིན་པའི་ཕྱིར་དེའི་ཚེ་དེ་ཉེ་བར་གནས་སོ། །འདོད་པ་དང་

Vol. 142 · folio 306b

གཟུགས་ཀྱི་ཁམས་དག་ན་ནི་ཆད་པ་མ་སྨོས་པས་སྲིད་པ་བཞི་པོ་ཐམས་ཅད་ཡོད་ཅེས་བྱ་བ་ནི་གསུམ་ཁོ་ན་གཟུགས་མེད་པའི་ཁམས་དག་ན་ཡོད་ལ། གཟུགས་མེད་པའི་ཁམས་དག་ཁོ་ན་ནི་གསུམ་ཡོད་དོ་ཞེས་ངེས་པར་གཟུང་བའི་ཕྱིར་ཁམས་གཞན་ཉིད་ན་སྲིད་པ་བཞི་ཆར་ཡོད་དོ་ཞེས་བྱ་བར་

གནང་བར་བྱས་པ་ཡིན་ནོ། །རྒྱུ་མཐུན་པ་མེད་པའི་ཕྱིར་ཞེས་བྱ་བ་ནི་གཅིན་དང་། ཕྱི་ས་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཡང་ན་ཕྲ་མོ་རྣམས་ཀྱི་ཡིན་པས་ཕྲ་མོ་སྟེ་ཞེས་བྱ་བ་ནི་ཟས་ཕྲ་མོའོ། །བྱིས་པ་ནི་སྐྱེས་མ་ཐག་པའོ། །དྲོད་གཤེར་ལས་སྐྱེ་བ་ལ་སོགས་པ་ནི་ཤིག་ལ་

སོགས་པ་སྟེ། སོགས་པ་ཞེས་བྱ་བའི་སྒྲས་ནི་མངལ་ན་འདུག་པ་བསྡུའོ། །ཁམ་གྱི་ཟས་ནི་འདོད་པ་ན་ཞེས་བྱ་བ་ནི་འདོད་པའི་ཁམས་ཁོ་ན་ན་ཁམ་གྱི་ཟས་ཡོད་དོ་ཞེས་བྱ་བར་ངེས་པར་བཟུང་བ་ཡིན་ནོ། །ཅིའི་ཕྱིར་ཞེ་ན། སྨྲས་པ། དེའི་འདོད་ཆགས་དང་བྲལ་བ་སྟེ་ཁམ་གྱི་ཟས་ཀྱི་འདོད་ཆགས་དང་

བྲལ་བ་རྣམས་གཟུགས་ཀྱི་ཁམས་དེར་སྐྱེ་བའི་ཕྱིར་རོ། །ཁམ་དུ་བྱས་ཏེ་མིད་པའི་ཕྱིར་ཞེས་བྱ་བ་ནི་ཁམ་བུར་བྱས་ཏེ་རྡེག་པའི་ཕྱིར་ཁམ་ཡིན་ནོ། །དེ་ཁམ་དུ་བྱས་ཏེ་མིད་པ་ཡང་བཟའ་བའི་ཕྱིར་སྣ་དང་ལྕེས་ཁམ་དུ་བཅད་ནས་སོ། །དྲི་དང་རོ་དང་རེག་བྱའི་སྐྱེ་མཆེད་ཐམས་ཅད་ཁམ་ཡིན་ནོ་

ཞེས་བཤད་པ་དང་། གྲིབ་མ་དང་ཉི་མ་དང་མེ་དང་འོད་དག་ལ་ཡོད་པ་དེ་དག་ཇི་ལྟར་ཟས་ཉིད་ཡིན་ཞེས་འདྲི་བར་བྱེད་དེ། དེ་དག་ལ་ཡོད་པའི་དྲི་ལ་སོགས་པ་ཁམ་དུ་བྱས་ཏེ་མིད་པ་ནི་མེད་དོ་ཞེ་ན། འདི་ནི་ཕལ་ཆེར་བསྟན་པ་ཡིན་ནོ་ཞེས་གྲག་ཅེས་བྱ་བ་ནི་དེ་དག་ལ་ཡོད་པའི་དྲི་ལ་སོགས་པ་ཁམ་

དུ་བྱེད་པ་ཉིད་དོ་ཞེས་བྱ་བར་ནི་མི་སྟོན་གྱི། འདོད་པ་ན་སྐྱེ་མཆེད་གསུམ་གྱི་བདག་ཉིད་དོ་ཞེས་བྱ་བ་ནི་ཕལ་ཆེ་བ་བསྟན་པར་ཟད་དོ། །གྲག་ཅེས་བྱ་བའི་སྒྲ་ནི་གཞན་གྱི་གཞུང་ལུགས་ཡིན་པའོ། །རང་གི་བསམ་པ་བསྟན་པའི་ཕྱིར། །གང་དག་མི་མིད་པ་རང་ལ་ཞེས་བྱ་བ་རྒྱས་པར་སྨོས་

ཏེ། །གྲིབ་མ་ལ་སོགས་པ་ལ་ཡོད་པ། གང་དག་མི་མིད་ལ་གནས་པར་ཡང་བྱེད་འཚོ་བར་ཡང་བྱེད་པ་དེ་དག་ཀྱང་ཟས་ཕྲ་མོ་ཡིན་ཏེ་ཁྲུས་དང་ལུས་མཉེ་བ་ཡིན་ནོ། །དཔེར་ན་ཁྲུས་དང་ལུས་མཉེ་བ་ལྟ་བུ་ཁམ་དུ་བྱས་ཏེ། ཡང་མི་མིད་མོད་ཀྱི་འོན་ཀྱང་ཟས་ཀྱང་ཡིན་པ་དེ་དང་འདྲའོ། །རང་

Vol. 142 · folio 307a

དབང་གྲོལ་ལ་མི་ཕན་ཕྱིར། །ཞེས་བྱ་བ་ནི་དེས་རང་དབང་སྟེ། རང་གི་དབང་པོ་ལ་མི་ཕན་པའི་ཕྱིར་དང་། འདོད་པའི་ཁམས་ལས་གྲོལ་བའི་ཕྱིར་མི་འོང་བ་དང་། དགྲ་བཅོམ་པ་རྣམས་ལ་མི་ཕན་པའི་ཕྱིར་གཟུགས་ཀྱི་སྐྱེ་མཆེད་ཟས་མ་ཡིན་ནོ། །གཟུགས་ཀྱི་སྐྱེ་མཆེད་ནི་མིད་པའི་

ཚེ་ཞེས་བྱ་བ་ནི་གཟུགས་ཀྱི་སྐྱེ་མཆེད་དེ་གང་གི་ཚེ་ཟས་ཁའི་ནང་དུ་བཅུག་སྟེ་ཟ་ཞིང་མིག་གི་ཡུལ་ལས་འདས་པ་དེའི་ཚེ་རང་གི་དབང་པོ་སྟེ། མིག་གི་དབང་པོའམ་དེའི་འབྱུང་བ་ཆེན་པོ་བཞི་སྟེ་དབང་པོ་དེའི་རྟེན་འབྱུང་བ་ཆེན་པོ་གང་དག་ཡིན་པ་དེ་དག་ལ་ཡང་། ཕན་མི་འདོགས་ན་ཡུལ་མ་ཡིན་

པའི་ཕྱིར་རྣ་བ་ལ་སོགས་པའི་དབང་པོ་གཞན་དང་གཞན་དག་ལ་ཕན་འདོགས་པ་ལྟ་སྨོས་ཀྱང་ཅི་དགོས་ཏེ་གཟུགས་ཀྱི་སྐྱེ་མཆེད་ནི་རྣ་བ་ལ་སོགས་པའི་ཡུལ་མ་ཡིན་ནོ། །འོ་ན་ཟས་བཤམས་པའི་ཚེ་མཐོང་བ་ཕན་འདོགས་པར་འགྱུར་རོ་ཞེ་ན། དེའི་ཕྱིར། གང་གི་ཚེ་མཐོང་བ་ན་ཞེས་བྱ་བ་རྒྱས་

པར་སྨོས་སོ། །འོན་ཏེ་དེའི་ཚེ་ཡང་དེ་ལ་དམིགས་པ་བདེ་བ་མྱོང་བར་འགྱུར་བའི་རེག་པ་ཟས་ཡིན་གྱི་གཟུགས་ནི་མ་ཡིན་ནོ་ཞེས་བྱ་བ་འདི་ཇི་ལྟར་ཤེས་ཤེ་ན། གྲོལ་བ་ཞེས་བྱ་བར་རྒྱས་པར་སྨོས་ཏེ། གལ་ཏེ་དེ་མཐོང་བ་ན་ཟས་ཀྱི་བྱ་བ་བྱེད་པར་གྱུར་ན་ནི་གྲོལ་བའི་ཕྱིར་མི་འོང་བ་དང་དགྲ་བཅོམ་

པ་ཁམ་གྱི་ཟས་ཀྱི་འདོད་ཆགས་དང་བྲལ་བ་ཟས་ཤིན་ཏུ་ཡིད་དུ་འོང་བ་མཐོང་བ་རྣམས་ལ་ཡང་ཇི་ལྟར་མིད་པའི་དྲི་དང་རོ་དང་རེག་བྱའི་སྐྱེ་མཆེད་རྣམས་ཀྱིས་དབང་པོ་དང་འབྱུང་བ་ཆེན་པོ་རྣམས་ལ་ཕན་འདོགས་པ་ལྟར་ཕན་འདོགས་པར་འགྱུར་རོ། །དེ་ལྟ་བས་ན་དེ་ལ་དམིགས་པ་བདེ་བ་མྱོང་

བར་འགྱུར་བའི་རེག་པ་ཟས་ཡིན་ནོ་ཞེས་བྱ་བར་གྲུབ་པོ། །རེག་དང་སེམས་པ་རྣམ་ཤེས་ནི། །ཞེས་བྱ་བ་ལ། རྣམ་ཤེས་ཞེས་བྱ་བ་ནི་རྣམ་པར་ཤེས་པ་ཞེས་བྱ་བའི་ཐ་ཚིག་གོ། །ཁམ་གྱི་ཟས་ནི་སྐྱེ་མཆེད་གསུམ་གྱི་བདག་ཉིད་ཡིན་པའི་ཕྱིར་ཟག་པ་དང་བཅས་པའོ་ཞེས་བྱ་བར་གྲུབ་པོ། །

རེག་པ་ལ་སོགས་པ་གསུམ་ཟག་པ་དང་བཅས་པ་དང་། ཟག་པ་མེད་པས་སྲིད་པ་ཡང་དེའི་ཕྱིར་དེ་དག་ཁོ་ན་ཟག་བཅས་ཞེས་ཁྱད་པར་དུ་བྱས་པ་ཡིན་ནོ། །ཟག་པ་མེད་པའི་ཆོས་རྣམས་ནི་དེ་ལྟ་མ་ཡིན་ནོ་ཞེས་བྱ་བ་དེ་དག་ནི་དེ་ལྟར་སེམས་ཅན་བྱུང་བ་རྣམས་གནས་པར་བྱེད་པ་དང་འཚོ་བར་བྱེད་པ་

Vol. 142 · folio 307b

དང་། སྲིད་པ་ཚོལ་བར་བྱེད་པ་རྣམས་ལ་ཕན་པར་བྱེད་པ་མ་ཡིན་ནོ། །ཡིད་ལས་སྐྱེས་པའི་ཕྱིར་ཞེས་བྱ་བ་ནི་འགྲུབ་ཅིང་སྐྱེ་བའི་ཕྱིར་རོ་ཞེས་བྱ་བ་ཡིན་ནོ། །ཡིད་ཅེས་བྱ་བ་ནི་ངེས་པར་བཟུང་བ་ཡིན་ནོ། །དེ་ཉིད་ཀྱི་ཕྱིར་ཕྱིའི་ཁུ་ཆུ་དང་ཁྲག་ལ་སོགས་པས་ཅུང་ཟད་ཀྱང་རྒྱུར་བྱས་པ་མེད་པའི་ཕྱིར་

ཞེས་བྱ་བ་ལ་སོགས་པ་སྨོས་ཏེ། སོགས་པ་ཞེས་བྱ་བའི་སྒྲས་ནི་འདམ་རྫབ་དང་མེ་ཏོག་ལ་སོགས་པ་བསྡུའོ། །སྐྱེ་བ་ལ་མངོན་དུ་ཕྱོགས་པའི་ཕྱིར་མངོན་པར་འགྲུབ་པ་སྟེ་ཞེས་བྱ་བ་ནི་འདི་ལ་མངོན་པར་འགྲུབ་པ་སྟེ་འབྱུང་བ་སྐྱེ་བ་ལ་མངོན་དུ་ཕྱོགས་པ་ཡོད་པས་ན་མངོན་པར་འགྲུབ་པའོ། །གནོད་

པ་དང་བཅས་པ་ཞེས་བྱ་བ་ནི་སྡུག་བསྔལ་དང་བཅས་པའོ། །འདིར་སྲིད་པ་བར་མ་ནི་མངོན་པར་འགྲུབ་པ་ཡིན་ནོ་ཞེས་བྱ་བའི་ཁུངས་ནི་གནོད་པ་དང་བཅས་པ་མངོན་པར་གྲུབ་ནས་ཞེས་བྱ་བ་འདི་ཡིན་ནོ། །དེ་བཞིན་དུ་གང་ཟག་ཀྱང་ཡོད་ཅེས་རྒྱས་པར་འབྱུང་བ་ནི་མདོ་འདི་ལས་མུ་བཞི་གསུངས་པའི་

ཕྱིར་སྲིད་པ་བར་མ་ནི་མངོན་པར་འགྲུབ་པ་ཡིན་ཏེ། གང་གི་མངོན་པར་འགྲུབ་པའི་ཀུན་དུ་སྦྱོར་བ་སྤངས་ལ་སྐྱེ་བའི་ཀུན་དུ་སྦྱོར་བ་མ་སྤངས་པའི་གང་ཟག་ཀྱང་ཡོད། གང་གི་སྐྱེ་བའི་ཀུན་དུ་སྦྱོར་བ་སྤངས་ལ་མངོན་པར་འགྲུབ་པའི་ཀུན་དུ་སྦྱོར་བ་མ་ཡིན་པ་ཡང་ཡོད། གང་གི་མངོན་པར་འགྲུབ་པའི་

ཀུན་དུ་སྦྱོར་བ་ཡང་སྤངས་ལ་སྐྱེ་བའི་ཀུན་དུ་སྦྱོར་བ་ཡང་སྤངས་པ་ཡང་ཡོད། གང་གི་མངོན་པར་འགྲུབ་པའི་ཀུན་དུ་སྦྱོར་བ་ཡང་མ་སྤངས་ལ། སྐྱེ་བའི་ཀུན་དུ་སྦྱོར་བ་ཡང་མ་སྤངས་པ་ཡང་ཡོད་དོ། །ཁམས་གཉིས་ལས་འདོད་ཆགས་དང་བྲལ་ཞེས་བྱ་བ་ནི་འདོད་པ་དང་གཟུགས་ཀྱི་ཁམས་ལས་

འདོད་ཆགས་དང་བྲལ་བའོ། །ཕྱིར་མི་འོང་བ་ཞེས་བྱ་བ་ནི་ཁྱད་པར་དུ་བྱ་བ་ཡིན་ཏེ། དགེ་སློང་དག་གང་འཕགས་པའི་ཤེས་རབ་ཀྱིས་སྤངས་པ་དེ་ནི་སྤངས་པ་ཡིན་ནོ་ཞེས་འབྱུང་བས་སོ་སོའི་སྐྱེ་བོ་རྣམས་ཀྱི་སྲིད་པ་བར་མའི་ཀུན་དུ་སྦྱོར་བ་ནི་གཏན་དུ་སྤངས་པ་མ་ཡིན་པའི་ཕྱིར་དེའི་ནི་ཡང་འབྱུང་བ་

ཡིན་པའི་ཕྱིར་རོ། །དེ་ལ་མུ་དང་པོ་ནི་ཕྱིར་མི་འོང་བ་ཁམས་གཉིས་ལས་འདོད་ཆགས་དང་བྲལ་བའོ། །གཉིས་པ་ནི་བར་མ་དོར་ཡོངས་སུ་མྱ་ངན་ལས་འདའ་བའོ། །གསུམ་པ་ནི་དགྲ་བཅོམ་པའོ། །བཞི་པ་ནི་རྣམ་པ་དེ་དག་མ་གཏོགས་པ་སྟེ། དེ་དག་ལས་གཞན་པ་བདག་ཅག་ལ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words