འཕགས་པ་ཐམས་ཅད་ཡོད་པར་སྨྲ་བའི་རྩ་བའི་དགེ་སློང་མའི་སོ་སོར་ཐར་པའི་མདོའི་འགྲེལ་པ

Sanskrit title (Tibetan script, as in the text) ཨཱརྱ་སརྦ་ཨསྟི་བཱ་དི་མཱུ་ལ་བྷིཀྵུ་ནཱི་པྲ་ཏི་མོཀྵ་སཱུ་ཏྲ་བྲྀཏྟི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 156 · folio 113a

ལ་བྱ་རོག་གི་རོ་བསྐུར་ནས་གྲོང་ཁྱེར་ཐམས་ཅད་དུ་སྒྲོགས་སུ་བཅུག་པ་དང་། ཁྱིམ་བདག་དང་བྲམ་ཟེ་དག་དགེ་སྦྱོང་ཚིག་པའོ་ཞེས་འཕྱ་སྨོད་པ་ལས་བསླབ་པ་བཅས་པ་དང་། དགེ་སློང་མ་བཅུ་གཉིས་སྡེ་དག་ངེད་ཀྱི་ཕྱིར་མ་བཅས་སོ་ཞེས་ཤེས་བཞིན་དུ་སྲོག་

ཆགས་བྱོལ་སོང་དག་གསོད་པ་དང་། དོན་ཉུང་ངུ་བའི་དགེ་སློང་མ་དག་འཕྱ་སྨོད་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་ཆེད་དུ་བསམས་ཏེ་བྱོལ་སོང་གི་སྐྱེ་གནས་སུ་སོང་བའི་སྲོག་ཆགས་བསད་ན་ལྟུང་བའོ། །བག་མ་བྱས་པ་ལས་བྱོལ་སོང་ཤི་ན་

ཐམས་ཅད་ཉེས་བྱས། བག་དང་བཅས་བཞིན་དུ་ཤི་ན་ཉེས་པ་མེད་དོ། །ལྟུང་བ་བཞི་བཅུ་དྲུག་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་དགེ་སློང་མ་བཅུ་གཉིས་སྡེས་དགེ་སློང་མ་གཞན་དག་གི་འགྱོད་པ་སྐྱེད་ཅིང་མི་དགའ་བར་བྱེད་པ་དང་། དོན་ཉུང་

ངུ་བའི་དགེ་སློང་མ་རྣམས་འཕྱ་སྨོད་ནས་བསླབ་པའི་གནས་བཅས་སོ། །ཡང་དགེ་སློང་མ་གང་གི་ཆེད་དུ་བསམས་ཏེ་ཅི་ནས་ཀྱང་དགེ་སློང་མ་འདི་སྐད་ཅིག་མི་དགའ་བར་བྱའོ་སྙམ་ནས་རྐྱེན་དེ་ཉིད་ཀྱིས་དགེ་སློང་མ་ལ་འགྱོད་པ་སྐྱེད་ན་ལྟུང་བའོ། །ཡང་དགེ་སློང་མ་གོང་ཞེས་བྱ་བ་ནི་

བཅུ་གཉིས་སྡེ་དག་སྟེ། གང་གཞན་ཡང་དེ་དང་འདྲའོ། །དེ་ལ་དགེ་སློང་མས་ཕ་རོལ་ལ་འགྱོད་པ་སྐྱེད་པའི་བསམ་པས་ཁྱོད་བསྙེན་པར་རྫོགས་པའི་ཚེ་རྒྱལ་པོ་འདི་ཞེས་བྱ་བ་དང་། ཉི་མ་དང་ཟླ་བ་གཟའ་ལ་ཞུགས་པ་དང་། ས་གཡོས་པ་ཤེས་སམ་ཞེས་དྲིས་ན། དེས་

མི་ཤེས་ཞེས་སྨྲས་པ་དང་། འོ་ན་ཁྱོད་ལོ་ཉི་ཤུ་མ་ལོན་ཞེས་འགྱོད་པ་སྐྱེད་པའམ་མཁན་པོ་དང་སློབ་དཔོན་གྱི་ཆོས་གོས་དག་ཁྱེར་རམ་ཞེས་དྲིས་པ་དང་། ཁྱེར་རོ་ཞེས་སྨྲས་ནས་ཁྱོད་ཕམ་པ་བྱུང་ངོ་ཞེའམ། ཁྱོད་ནི་མཁན་པོ་དང་སློབ་དཔོན་ཉེས་པ་ཅན་བསྐྲད་པའི་སློབ་མ་ཡིན་

ནོ་ཞེའམ། ཁྱོད་འཇིགས་པའི་ས་འདི་ལྟ་བུར་ཕྱིན་ནོ་ཞེས་ཟེར་བས་བདག་ཉིད་དགྲ་བཅོམ་པར་སྟོན་ཏོ་ཞེའམ་ཐབས་འདི་རྣམས་གང་གིས་ཀྱང་རུང་སྟེ། འགྱོད་པ་སྐྱེས་ན་ལྟུང་བ་རེ་རེའོ། །འོ་མ་དང་མར་དང་། ཉ་ཤ་ཟོས་པས་མཛེ་ཅན་དུ་འགྱུར་རོ་ཞེས་ཟེར་ན་ཉེས་བྱས་སོ། །ཕན་

Vol. 156 · folio 113b

པར་འདོད་པའི་ཕྱིར་ཁྱོད་ལ་གཞན་གྱིས་འདི་སྐད་དུ་འགྱོད་པ་བསྐྱེད་ན་འགྱོད་པ་མ་སྐྱེ་ཤིག་ཅེས་བསྟན་པ་དང་། འདུལ་བའི་ཕྱིར་སྤྱོད་ཡུལ་མ་ཡིན་པའི་གྲོང་དུ་མ་འཇུག་ཤིག་ཅེས་བསྟན་པ་ལ་ཉེས་མེད་དོ། །ལྟུང་བ་བཞི་བཅུ་བདུན་པ་རྫོགས་སོ།། །།སྟོན་པ་མཉན་དུ་

ཡོད་པ་ན་སྟེ། དེའི་ཚེ་བཅུ་གཉིས་སྡེ་མོ་དག་གཅིག་ལ་གཅིག་ག་ག་ཚིལ་དག་བྱེད་པ་དང་། དོན་ཉུང་ངུ་བས་འཕྱ་སྨོད་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་སློང་ལ་མཛུབ་མོས་ག་ག་ཚིལ་བྱེད་ན་ལྟུང་བའོ། །དེ་ལ་དགེ་སློང་མས་མཛུབ་མོ་རེ་

རེས་ག་ག་ཚིལ་བྱེད་ན་ལྟུང་བ། ཁུ་ཚུར་གྱིས་བྱེད་ན་ལྟུང་བ་གཅིག །སྨྲེ་བ་བསྟན་པའི་ཕྱིར་ན་ཉེས་པ་མེད་དོ། །ལྟུང་བ་བཞི་བཅུ་བརྒྱད་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་བཅུ་བདུན་སྡེ་རྣམས་ཆུ་བོ་ཨ་ཛིར་བ་ཏི་ཞེས་བྱ་བ་ན་ཁྲུས་བྱེད་

ཅིང་འཁོད་པ་དང་། རྒྱལ་པོ་གསལ་རྒྱལ་གྱིས་བཙུན་མོ་ཕྲེང་ལྡན་མ་ལ་ཁྱོད་ཀྱི་ཡོན་གནས་དག་རྩེད་མོ་བྱེད་པ་ལ་ལྟོས་ཞེས་བྱས་པ་དང་། ཕྲེང་ལྡན་མས་རྒྱལ་པོ་ཉིད་བགྲེས་ཀྱང་བདག་ལ་རྩེ་ན། བཅུ་བདུན་སྡེ་རྣམས་ནི་གཞོན་པས་རྩེ་བས་ལྟ་ངོ་མཚར་ཅི་ཆེ་ཞེས་སྨྲས་

སོ། །དེའི་ཚེ་བཅུ་བདུན་སྡེའི་ནང་ཨུ་པཱ་ལི་ཞེས་བྱ་བ་དགྲ་བཅོམ་པ་ཞིག་ཡོད་པ་དེས་རྒྱལ་པོ་འཕྱ་བར་ཤེས་ནས། རྫུ་འཕྲུལ་བསྐྱེད་དེ་བཅུ་བདུན་སྡེ་རྣམས་འཁོར་དང་བཅས་པ་ནམ་མཁའ་ལ་འཕུར་བ་དང་། ཕྲེང་ལྡན་མས་རྒྱལ་པོ་ལ་བཅུ་བདུན་སྡེ་ནམ་མཁའ་ལ་འཕུར་

ཞིང་མཛེས་པ་ལ་གཟིགས། སེམས་ནི་གློག་དང་འདྲ་ཉོན་མོངས་པ་ནི་ཡེ་ཤེས་ཀྱིས་སྤོང་བས་སེམས་ཅན་གྱི་དྲོད་བཟུང་དུ་མི་རུང་ངོ་ཞེས་སྨྲས་སོ། །དེ་ལྟར་གྱུར་པ་བཅོམ་ལྡན་འདས་ཀྱིས་གསན་ནས་བསླབ་པ་བཅས་པ་དང་། བཅུ་གཉིས་སྡེ་རྣམས་ངེད་ཀྱི་ཕྱིར་མ་ཡིན་ནོ་

ཞེས་རྟག་ཏུ་ཆུ་ལ་རྩེ་ཞིང་ཆུ་ལ་ཁྲུས་བྱེད་པ་དང་དོན་ཉུང་ངུ་བའི་དགེ་སློང་མས་འཕྱ་སྨོད་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཆུ་ལ་རྩེ་ན་ལྟུང་བའོ། །དེ་ལ་དགེ་སློང་མས་ཆུ་ལ་རྩེ་ན་དངོས་པོ་དགུས་རེ་རེས་ཀྱང་ལྟུང་བར་འགྱུར་ཏེ། ཁྲུས་རས་བཅིང་བ་དང་། ཆུར་

Vol. 156 · folio 114a

ཞུགས་པ་དང་། ལྟེ་བ་མན་ཆད་ནུབ་པ་དང་། བྱི་འཛུལ་བྱེད་པ་དང་། འགྲམ་གཅིག་ནས་གཅིག་ཏུ་བྱུང་བ་དང་། སྦལ་སྐད་ཟེར་བ་དང་། ཆུ་རྔ་བརྡུང་བ་དང་། ཆུ་རྒྱུན་ལས་བཟློག་པ་དང་། གཅིག་ལ་གཅིག་ཆུ་འཐོར་བ་སྟེ་འདི་རྣམས་གང་བྱས་

ཀྱང་དངོས་པོ་རེ་རེས་ལྟུང་བར་འགྱུར་རོ། །རྩེ་བའི་བསམ་པ་མེད་པས་འཁྲུ་ན་ཉེས་མེད་དོ། །ཆུ་ལ་རྩེ་བའི་བསམ་པས་སོར་མོ་མན་ཆད་ཆུའི་ནང་དུ་བཅུག་ན་ཉེས་བྱས་སོ། །ལྟུང་བ་བཞི་བཅུ་དགུ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་

ཚེ་འཕགས་པ་མ་འགགས་པ་བཅོམ་ལྡན་འདས་ཀྱིས་དགྲ་བཅོམ་པ་ཐོབ་པར་བྱས་པས་རུས་པའི་རི་ལས་ནི་བསྒྲལ། མཆི་མ་དང་ཁྲག་གི་རྒྱ་མཚོ་ནི་བསྐམས་པས། བཅོམ་ལྡན་འདས་ལ་དྲིན་ལ་ལན་གླན་ན། བཅོམ་ལྡན་འདས་ཀྱང་སེམས་ཅན་དག་འདུལ་བ་ལ་

དགྱེས་པས་བདག་གིས་སེམས་ཅན་དག་འདུལ་ན། བཅོམ་ལྡན་འདས་ཀྱི་དྲིན་ལན་ལོན་པར་འགྱུར་རོ་སྙམ་ནས་ཡུལ་གཞན་དུ་སོང་བ་དང་། ཁྱིམ་བདག་ཅིག་ལ་བུ་མི་སྲིང་གསུམ་ཡོད་པ་ལས་བུ་མོ་ངོ་མཚར་དུ་འཕྱོ་བ་ཞིག་པས། འཕགས་པ་མ་འགགས་པ་དེར་འོངས་པ་ལ་

ཆགས་ནས། ཆགས་པའི་མཚན་མ་དག་བསྟན་ནས་འཕགས་པ་མ་འགགས་པ་ལ་འཛིན་དུ་ཆས་པ་དང་། མ་འགགས་པ་ནམ་མཁའ་ལ་འཕགས་ནས་རྫུ་འཕྲུལ་དག་བསྟན་པ་དང་། མོ་ཡང་དད་པ་སྐྱེས་ནས་བདེན་པ་མཐོང་བར་གྱུར་ཏོ། །བདེན་པ་མཐོང་ནས་འཕགས་པ་མ་

འགགས་པ་བཤོས་ལ་སྤྱན་དྲངས་པ་དང་། མ་འགགས་པས་ཟན་ཟ་བའི་ཚེ་སྒོ་དམ་དུ་གཅོད་ན་ཟན་བཟའ་ཞེས་སྨྲས་པ་དང་། མོས་ཀྱང་དེ་བཞིན་དུ་ཁས་བླངས་ནས་མ་འགགས་པ་ཟན་ཟ་བའི་ཚེ་བུ་མོ་དེའི་མིང་པོ་ཁྱེའུ་གཉིས་ལ་བྲམ་ཟེ་དང་ཁྱིམ་བདག་གཞན་གྱི་བུ་དག་གིས་ཁྱེད་ཀྱི་

སྲིང་མོ་ནི་སྦྱར་མ་སྟེ་ཡ་མཚན་ཀུན་དང་ཉིན་ཞག་འདས་པར་བྱེད་དོ་ཞེས་སྨྲས་པ་དང་། ཁྱེའུ་དེ་གཉིས་ཁྲོས་ནས་མ་འགགས་པ་བསད་པའི་ཕྱིར་རལ་གྲི་ཕྱུང་སྟེ་བརྒྱུགས་པ་དང་། སྒོ་ལ་མ་ཐར་ནས་མ་འགགས་པས་ཀྱང་ཁྱེའུ་དེ་གཉིས་ལ་ཆོས་བཤད་དེ་བདེན་པ་མཐོང་བར་བྱས་ནས་མ་

Vol. 156 · folio 114b

འགགས་པ་ལ་དགེ་སློང་དག་གིས་རྨས་པ་ནས་རྒྱས་པར་སྦྱར་ཏེ་བསླབ་པ་བཅས་པ་དང་། བཅུ་གཉིས་སྡེ་མོ་རྣམས་ངེད་ཀྱི་ཕྱིར་མ་བཅས་སོ་ཞེས་སྐྱེས་པ་དང་ཁྱིམ་གཅིག་གི་ནང་དུ་ཉལ་བར་བྱེད་པ་དང་། དོན་ཉུང་ངུ་མས་འཕྱ་བ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །

ཡང་དགེ་སློང་མ་གང་སྐྱེས་པ་དང་ཁྱིམ་གཅིག་གི་ནང་དུ་ཉལ་ན་ལྟུང་བའོ། །ཁྱིམ་ཞེས་བྱ་བ་ཟད་པར་གཡོགས་པ་ལྟ་བུ་བཞི་རྒྱུད་གོང་མ་དང་འདྲའོ། །དེ་ལ་དགེ་སློང་མས་ཁང་པའི་ཡང་ཐོག་ཏུ་ཉལ་ལོ། སྐྱེས་པ་འོག་ཁང་དུ་ཉལ་ན་ཡང་ན་སྐས་དབྱུང་བར་བྱ། ས་སྐས་ཡོད་

ན་མཐོངས་དགབ་པར་བྱའོ། །དེ་ལྟར་མ་བྱས་ན་ལྟུང་བར་འགྱུར་རོ། །དེ་བཞིན་དུ་འོག་ཁང་དང་བར་ཁང་ལ་སོགས་པ་ཡང་སྦྱར་ཏེ། སབ་མོ་དང་རིབ་མ་དང་ཡོལ་བ་ལ་སོགས་པ་ཡང་དེ་བཞིན་དུ་བར་མ་ཆད་མ་བྱས་ན་ལྟུང་བར་འགྱུར་རོ། །མ་ནིང་ལ་སོགས་པ་མི་མ་ཡིན་པ་ཕོ་

དག་དང་ལྷན་ཅིག་ཁྱིམ་གཅིག་ཏུ་ཉལ་ན་ཉེས་བྱས་སོ། །ལྟུང་བ་ལྔ་བཅུ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་དགེ་སློང་མ་སྦོམ་དགའ་མོས་གཟུགས་མི་སྡུག་པར་བསྒྱུར་ནས་དགེ་སློང་མ་དག་ལ་བསྡིགས་ཤིང་སྔངས་པར་བྱེད་པ་དང་།

དགེ་སློང་མ་དག་འཕྱ་སྨོད་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་སློང་མ་ལ་སྔངས་པར་བྱེད་དུ་འཇུག་ན་ཐ་ན་རྩེད་མོ་བྱ་བར་བསམས་ན་ཡང་ལྟུང་བའོ། །དགེ་སློང་མས་དགེ་སློང་མ་སྔངས་པར་བྱ་བའི་ཕྱིར་སོལ་རིས་བྲིས་སམ། གཟུགས་

སྡོང་དུམ་འདྲ་བར་མི་སྡུག་པར་བསྒྱུར་ཏེ་གནོད་སྦྱིན་ལ་སོགས་པའི་གཟུགས་འདི་འདྲའོ་ཞེ་འམ། སྒྲ་མི་སྙན་པར་ཕྱུང་སྟེ། གནོད་སྦྱིན་ལ་སོགས་པའི་སྒྲ་འདི་འདྲའོ་ཞེ་འམ། ལུས་ལ་རྩུབ་པོས་རེག་པར་བྱས་ཏེ་གནོད་སྦྱིན་ལ་སོགས་པའི་རེག་པ་འདི་འདྲའོ་ཞེས་བདག་བྱེད་

དམ་གཞན་བྱེད་དུ་བཅུག་ཀྱང་རུང་སྟེ། ཐམས་ཅད་ལྟུང་བའོ། །ལྷའི་གཟུགས་ལ་སོགས་པ་ནས་འཇམ་པས་རེག་པའི་བར་དུ་བྱས་ན་ཐམས་ཅད་ཉེས་བྱས་སུ་འགྱུར་རོ། །དྲི་ཞིམ་པ་དང་མི་ཞིམ་པའི་ཁྱད་པར་ཡང་གོང་མ་བཞིན་ནོ། །དགེ་སློང་མ་དང་ཁྱིམ་པ་ལ་

Vol. 156 · folio 115a

སོགས་པ་ལ་བསྡིགས་ན་ཉེས་བྱས་སོ། །ཉོན་མོངས་པ་ལས་དགྲོལ་བའི་ཕྱིར་ལམ་རྒྱུད་ལྔའི་སེམས་ཅན་གྱི་གཟུགས་དང་རྒྱུད་ལ་སོགས་པ་བསྟན་ཅིང་བཤད་པ་ལ་ཉེས་པ་མེད་དོ། །ལྟུང་བ་ལྔ་བཅུ་གཅིག་པ་རྫོགས་སོ།། །།སྟོན་པ་

ཡུལ་མཉན་དུ་ཡོད་པ་ན་སྟེ། ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་འཁོར་དང་བཅས་པ་བཤས་ལ་སྤྱན་དྲངས་སོ། །དེའི་ཚེ་དྲུག་སྡེ་དང་བཅུ་བདུན་སྡེ་རྣམས་རྫིང་ཞིག་གི་འགྲམ་དུ་ཕྱིན་པ་དང་། དྲུག་སྡེས་བཅུ་བདུན་སྡེ་ལ་སྨྲས་པ། འུ་བུ་ཅག་ཆུའི་ནང་དུ་བྱིའུ་ཟུལ་བྱས་

ཏེ། སུ་རིང་དུ་འདུག་ཕོད་པ་ལྟའོ་ཞེས་སྨྲས་པ་ནས། བཅུ་བདུན་སྡེ་དག་ཆུའི་ནང་དུ་ཞུགས་ཏེ་བྱིའུ་ཟུལ་བྱེད་པ་དང་། དྲུག་སྡེ་རྣམས་ཀྱིས་དེ་དག་གི་གོས་རྣམས་བསྡུས་ནས་སྦས་ཏེ་སོང་ངོ་། །བཅུ་བདུན་སྡེ་དག་ཆུའི་ནང་ནས་བྱུང་བ་དང་། གོས་རྣམས་མེད་ནས་རྫིང་གི་

འགྲམ་ན་སྒྲེན་མོར་འཁོད་པའི་ཚེ། འཕགས་པ་མཽད་གལ་གྱི་བུ་ཡང་དེར་འོངས་ནས་མཽད་གལ་གྱི་བུས་ཏིང་ངེ་འཛིན་གྱིས་དགོངས་ཏེ་དེ་དག་གི་གོས་རྣམས་ཕྱུང་སྟེ་བྱིན་ནོ། །དེ་ལྟ་བུར་གྱུར་པ་ལས་བསླབ་པ་བཅས་པ་དང་། བཅུ་གཉིས་སྡེ་རྣམས་ངེད་ཀྱི་ཕྱིར་མ་བཅས་སོ་ཞེས་

གཞན་གྱི་གོས་དང་ཡོ་བྱད་ལ་སོགས་པ་སྦེད་པ་དང་། དོན་ཉུང་ངུ་བའི་དགེ་སློང་མ་རྣམས་འཕྱ་སྨོད་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་སློང་མའམ་དགེ་ཚུལ་ལམ་དགེ་ཚུལ་མའི་ལྷུང་བཟེད་དམ། ཆོས་གོས་སམ་ལྷུང་བཟེད་ཀྱི་སྣོད་དྲ་བའམ་

སྐོམ་བཏུང་བའི་སྣོད་དམ། སྐ་རགས་སམ། དགེ་སློང་གི་འཚོ་བའི་ཡོ་བྱད་དག་ཀྱང་རུང་བ་ཞིག་སྦེད་དམ་སྦེད་དུ་འཇུག་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བའོ། །དགེ་སློང་མས་ཕ་རོལ་ཀུ་རེ་བྱ་བའི་ཕྱིར་ཐ་ན་ལན་ཚྭའི་སྣོད་ཡན་ཆད་སྦེད་དམ་སྦེད་དུ་འཇུག་ན་ལྟུང་བའོ། །བར་

ཆད་བརྒྱད་བྱུང་བ་ལྟ་བུའི་ཕྱིར་ན་སྦས་ཀྱང་ཉེས་པ་མེད་དོ། །ལྟུང་བ་ལྔ་བཅུ་གཉིས་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་མང་དུ་ཟ་མང་དུ་འཐུངས་པས་བསོད་སྙོམས་དག་འདུག་པའི་ཆོས་གོས་དག་རྔུལ་དང་དྲི་

Vol. 156 · folio 115b

མས་མ་རུང་བར་གྱུར་པ་དང་། གོས་དྲི་མ་ཅན་དག་སློབ་མ་རྣམས་ལ་བྱིན་ནོ། །སློབ་མ་དག་གིས་གོས་དྲི་མ་ཅན་དག་བཀྲུས་ནས་གདུར་གྱི་ནང་དུ་སྦས་ཏེ་གཞག་པ་དང་། སྦོམ་དགའ་མོས་སློབ་མ་དག་ལ་མ་བྱས་པར་གོས་དེ་ཕྱུང་ནས་གྱོན་ཏེ་དྲི་མ་ཅན་དུ་གྱུར་པ་དང་། སློབ་མ་དག་མི་

དགའ་བར་གྱུར་ནས་འཕྱ་སྨོད་དོ་ཞེས་བྱ་བའི་བར་དུ་རྒྱས་པར་སྦྱར་ཏེ། བསླབ་པ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་གིས་དགེ་སློང་མ་ལ་གོས་བྱིན་ནས་དེའི་འོག་ཏུ་གདེང་མེད་པར་གྱོན་ན་ལྟུང་བའོ། །གདེང་མེད་པ་ཞེས་བྱ་བ་ནི་བདག་གི་གོས་སུ་བྱིན་

གྱིས་མ་བརླབས་པ་ལ་བྱའོ། །དེ་ལ་དགེ་སློང་མས་མཛའ་བོའི་འདུ་ཤེས་ཡོད་དམ་མཐོང་ན་དགའ་བར་འགྱུར་བ་ལྟ་བུ་ནི་གྱོན་ནའང་ཉེས་པ་མེད་དོ། །ལྟུང་བ་ལྔ་བཅུ་གསུམ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། །དེའི་ཚེ་དགེ་སློང་མ་བཅུ་

གཉིས་སྡེ་རྣམས་དགེ་སློང་མ་གཞན་དག་ལ་རྩ་བ་མེད་པར་ལྷག་མའི་ཆོས་ཀྱིས་སྐུར་ཅིང་དེའི་ཕྱིར་རྩོད་ཅིང་གཅིག་ལ་གཅིག་འཐབ་པར་གྱུར་པ་དང་། དོན་ཉུང་ངུ་བའི་དགེ་སློང་མ་རྣམས་འཕྱ་སྨོད་དོ་ཞེས་བྱ་བ་ནས་བསླབ་པ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་

ཞེ་སྡང་ཅན་ཞིག་ཁྲོས་ནས་མ་རངས་ཏེ། དགེ་སློང་མ་གཙང་མ་ཉེས་པ་མེད་པ་ལ་རྩ་བ་མེད་པའི་དགེ་འདུན་ལྷག་མའི་ཆོས་ཀྱིས་སྐུར་ན་ལྟུང་བའོ། །གཙང་མ་ཞེས་བྱ་བ་ནི་ལྷག་མ་ལ་སོགས་པའི་ཉེས་པ་མ་བྱུང་བ་ལ་བྱའོ། །དེ་ལ་དགེ་སློང་མས་དགེ་སློང་མ་ཉེས་པ་མེད་པ་ལ་

ཉེས་པ་མེད་པར་འདུ་ཤེས་ཏེ་བཟོད་པ་ནས་ལྟ་བའི་བར་དུ་སྦས་ནས་སྐུར་ན་ལྟུང་བའོ། །དེ་བཞིན་དུ་ཐེ་ཚོམ་ནའང་། ལྟུང་བ་ལྷག་མ་བྱུང་བ་ལས་ལྷག་མ་མ་བྱུང་བར་འདུ་ཤེས་ནས་ལྟ་བའི་བར་དུ་སྦས་ཏེ་ལྟུང་བས་སྐུར་ནའང་ལྟུང་བ། ཉེས་པ་མ་བྱུང་བ་ལས་ཉེས་པ་བྱུང་བར་འདུ་ཤེས་

པ་དང་། ཐེ་ཚོམ་པ་གཉིས་ལ་ཉེས་བྱས་རེ་རེ། ལྷག་མ་ཉིད་བྱུང་བ་ལ་བྱུང་ངོ་ཞེས་སྨྲས་པ་ལ་ཉེས་པ་མེད་དོ། །ལྟུང་བ་ལྔ་བཅུ་བཞི་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་ཡུལ་ཙམ་པ་ཞེས་བྱ་བ་ན་ཐ་ག་པ་གཞོན་ནུ་ཅིག་འདུག་པས་

Vol. 156 · folio 116a

མཉན་དུ་ཡོད་པར་སོང་སྟེ་ཆུང་མ་ཞིག་བླངས་སོ། །ཆུང་མ་བླངས་ནས་རིང་པོ་མ་ལོན་པར་ཆུང་མ་དང་འཐབ་མོ་བྱུང་ནས་ཐ་ག་པ་དེ་ཡུལ་ཙམ་པར་འགྲོའོ་ཞེས་ཆས་པ་དང་། སྦོམ་དགའ་མོ་ལམ་དུ་འགྲོ་བ་དང་ཕྲད་དོ། །ཐ་ག་པས་སྦོམ་དགའ་མོ་ལ་གར་འགྲོ་ཞེས་

དྲིས་ནས་སྦོམ་དགའ་མོས་ཡུལ་ཙམ་པར་འགྲོའོ་ཞེས་སྨྲས་སོ། །འོ་ན་འགྲོགས་སོ་ཞེས་དེ་གཉིས་འགྲོགས་ཏེ་སོང་བ་དང་། ཐ་ག་པའི་ཆུང་མས་ཁང་ཐོག་ཏུ་བྱུང་སྟེ་བལྟས་ན་དེ་གཉིས་འགྲོགས་པར་མཐོང་ངོ་། །དེས་སྐད་ཆེར་ཕྱུང་སྟེ། དགེ་སྦྱོང་མགོ་རེག་མས་ངའི་ཁྱོ་ཁ་

དྲངས་སོ་ཞེས་བོས་པ་དང་། གྲོང་ཁྱེར་གྱི་མི་རྣམས་ཀྱིས་བསྙགས་ནས་སྦོམ་དགའ་མོ་བརྡེགས་པ་དང་། སྦོམ་དགའ་མོས་མིག་དག་སྐྲངས་བཞིན་དུ་དགེ་སློང་མ་དག་གི་གན་དུ་ཕྱིན་ནས་དགེ་སློང་མ་དག་གིས་སྨྲས་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་

མ་གང་སྐྱེས་པ་དང་ལྷན་ཅིག་ལམ་དུ་ཞུགས་ཏེ་འགྲོ་ན་ཐ་ན་གྲོང་གཞན་ཞིག་ཏུ་ཕྱིན་ན་ཡང་ལྟུང་བའོ། །དགེ་སློང་མ་སྐྱེས་པ་དང་ལམ་དུ་ཞུགས་ཏེ་འགྲོ་ན་རྒྱང་གྲགས་ཕྱེད་ཚུན་ཆད་དུ་ནི་ཉེས་བྱས། རྒྱང་གྲགས་གཅིག་ལས་འདས་ན་ལྟུང་བའོ། །ལམ་མཚོན་པའི་ཕྱིར་རམ། ལམ་

མི་ཤེས་ཏེ་འགྲོགས་པ་ལ་ཉེས་པ་མེད་དོ། །ལྟུང་བ་ལྔ་བཅུ་ལྔ་པ་རྫོགས་སོ།། །།མདོར་བསྟན་པ་ནི། འགྲོན་པ་མང་པོ་རྐུན་མ་དང་། །བརྐོ་དང་མགྲོན་དང་བསླབ་པ་དང་། །འཐབ་དང་མི་སྨྲ་འགྲོ་བ་དང་། །མ་གུས་ཆང་འཐུང་དུས་མིན་པའོ། །སྟོན་པ་ཡུལ་

མཉན་དུ་ཡོད་པ་ན་སྟེ། དེའི་ཚེ་དགེ་སློང་མ་སྦོམ་དགའ་མོ་ཚོང་པའི་འདྲོན་པ་མང་པོ་དག་དང་འགྲོགས་ཤིང་གསེབ་ལམ་དུ་བྱུང་སྟེ་དོང་བ་དང་ཤོ་གམ་པས་བདས་ནས་ཤོ་གམ་གྱི་ལམ་ལས་འབྱོལ་ཞིང་གསེབ་ལམ་དུ་འགྲོ་བ་ཉིད་དགེ་སློང་མ་འདི་ཡིན་ནོ་ཞེས་སྦོམ་དགའ་མོ་ལ་བརྡེགས་སོ། །

སྦོམ་དགའ་མོས་སྣད་བཞིན་དུ་སླར་གཙུག་ལག་ཁང་དུ་ཕྱིན་པ་དང་། དགེ་སློང་མ་དག་གིས་སྨྲས་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་འདྲོན་པ་མང་པོ་རྐུན་མ་དང་ལྷན་ཅིག་ལམ་དུ་ཞུགས་ནས་འགྲོ་ན་ལྟུང་བའོ། །ཉེས་པ་ལྕི་ཡང་གི་ཁྱད་པར་དང་

Vol. 156 · folio 116b

གནང་མི་གནང་གི་རིམ་པ་ནི་གོང་མ་དང་འདྲའོ། །ལྟུང་བ་ལྔ་བཅུ་དྲུག་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དྲུག་སྡེ་རྣམས་རང་གིས་ས་བརྐོར་འཇུག་པ་དང་། བྲམ་ཟེ་དང་ཁྱིམ་བདག་དག་དགེ་སྦྱོང་འདི་དང་ངེད་དུ་ཐ་དད་ཅི་ཡོད་ཅེས་འཕྱ་སྨོད་པ་ནས་

ས་མ་བརྐོ་ཤིག་ཅེས་བསླབ་པ་བཅས་པ་དང་། བཅུ་གཉིས་སྡེ་རྣམས་ངེད་ཀྱི་ཕྱིར་མ་ཡིན་ཞེས་ས་བརྐོ་ཞིང་བརྐོར་འཇུག་པ་དང་། དོན་ཉུང་ངུ་པ་དག་འཕྱ་བ་ནས་བསླབ་པ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་གང་རང་གི་ལག་གིས་ས་བརྐོ་འམ་བརྐོར་འཇུག་ན་ལྟུང་

བའོ། །ས་ཞེས་བྱ་བ་ལ་རྣམ་པ་གཉིས་ཏེ། འཐས་པ་དང་མ་འཐས་པའོ། །འཐས་པའི་ས་ནི་སོར་བཞི་ཡན་ཆད་བརྐོས་ན་ལྟུང་བའོ། །མ་འཐས་པའི་ས་བརྐོས་ན་ཉེས་བྱས། སའི་ཤས་ཆེ་ལ་བྱེ་མ་ཆུང་སར་རྡོ་ཕྱུང་ངམ། ལྕི་བ་བརྐོས་ན་ལྟུང་བའོ། །བྱེ་མ་ཆེ་ན་

ཉེས་བྱས། ཕུར་པ་བཏབ་ན་ལྟུང་བའོ། །ཕྱུང་ན་ཉེས་བྱས། ཕུར་པ་བཙུགས་པའི་ཁུང་དུ་བཙུགས་ནའང་ཉེས་བྱས། རྩིག་པ་དང་གདངས་འཕན་མེད་པ་ལས་བཤིག་ན་ལྟུང་བའོ། །འཕན་ནམ་སེར་ཀ་ཡོད་པ་བཤིག་ན་ཉེས་བྱས། བརྩིགས་པ་བཀོག་པ་དང་། རླམ་

ཆགས་པ་ཕྱིས་པ་དང་། འདམ་བསྒུལ་ལམ་བསྒུལ་དུ་བཅུག་གམ། དོན་མེད་པར་ས་ལ་རི་མོ་འདྲི་ན་ཉེས་བྱས་གཞན་ཡང་མཐུན་མཐུན་དུ་རྒྱས་པར་སྦྱར་རོ། །ལྟུང་བ་ལྔ་བཅུ་བདུན་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་ཤཱཀྱ་མིང་ཆེན་

གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་འཁོར་དང་བཅས་པ་ཟླ་བ་བཞིར་མགྲོན་དུ་བྱས་སོ། །ཟླ་བ་བཞི་ཚང་ནས་དྲུག་སྡེ་རྣམས་འགྲོར་མི་བཏུབ་ཅིང་དེ་ན་འདུག་པ་དང་། བཅོམ་ལྡན་འདས་ཀྱིས་ཇི་སྲིད་དུ་མགྲོན་དུ་བོས་པ་དེ་ལས་ལྷག་པར་ཟས་བདག་གིར་བྱེད་ཅིང་མ་

འདུག་ཤིག་པར་བསླབ་པ་བཅས་པ་དང་། བཅུ་གཉིས་སྡེ་རྣམས་ངེད་ཀྱི་ཕྱིར་མ་ཡིན་ནོ་ཞེས་ཅི་སྲིད་དུ་མགྲོན་དུ་བོས་པ་དེ་ལས་ལྷག་པར་གནས་ཤིང་ཁ་ཟས་བདག་གིར་བྱེད་པ་དང་། དོན་ཉུང་ངུ་མའི་དགེ་སློང་མ་རྣམས་འཕྱ་སྨོད་ནས་བཅོམ་ལྡན་འདས་ཀྱིས་བཀའ་སྩལ་ནས་བསླབ་པ་

Vol. 156 · folio 117a

བཅས་སོ་ཞེས་བྱ་བའི་བར་དུ་སྔ་མ་བཞིན་ནོ། །ཟླ་བ་བཞི་མགྲོན་དུ་བྱས་ནས་དགེ་སློང་མས་བདག་གིར་གྱིས་ཤིག་དེ་ལས་ལྷག་པར་བདག་གིར་བྱས་ན་ལྟུང་བའོ། །སོ་སོར་མགྲོན་དུ་བྱས་པ་དང་། །ཡང་ཡང་མགྲོན་དུ་བྱས་པ་དང་། དུས་ཀྱིས་མགྲོན་

དུ་བྱས་པ་དང་། རྟག་ཏུ་མགྲོན་དུ་བྱས་པ་མ་གཏོགས་ཏེ་དེ་ལས་དེ་ནི་དུས་ཡིན་ནོ། །སོ་སོར་མགྲོན་དུ་བྱས་ཞེས་བྱ་བ་ནི་དགེ་འདུན་སྤྱིར་ཟླ་བ་བཞིར་མགྲོན་དུ་བྱས་པ་ལས། དེའི་ནང་ནས་ཁ་ཅིག་མིང་གིས་བཏུས་ཏེ་ཟླ་བ་བཞི་ལས་རིང་དུ་བཞག་པ་ལ་བྱའོ། །དུས་ཀྱིས་མགྲོན་དུ་བོས་

ཞེས་བྱ་བ་ནི་ཇི་སྲིད་མགྲོན་དུ་བོས་པ་ལས་རིང་དུ་མི་འདུག་ཏུ་མི་རུང་བར་དུས་ཀྱིས་འཆུ་བ་ལ་བྱའོ། །རྟག་ཏུ་ཞེས་བྱ་བ་ནི་ཚེ་གཅིག་ཏུ་མགྲོན་དུ་བྱས་པ་ལ་བྱའོ། །དེ་ལ་དགེ་སློང་གིས་ཇི་སྲིད་དུ་མགྲོན་དུ་བོས་པ་ལས་ཟན་གཅིག་ཙམ་ལྷག་པར་ཟ་ནའང་ལྟུང་བའོ། །ཡོན་བདག་གིས་

ཁ་ཟས་ངན་པ་བསྔོས་པ་ལས། བཟང་པོར་བསྣོར་ཏེ་བསླངས་ན་གང་བསླངས་ཀྱང་རུང་ལྟུང་བ་རེ་རེའོ། །ངན་པར་བསྣོར་ཏེ་བསླངས་ན་ཉེས་བྱས་སོ། །ནད་པ་ལ་ཉེས་པ་མེད་དོ། །ལྟུང་བ་ལྔ་བཅུ་བརྒྱད་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ།

དེའི་ཚེ་བཅོམ་ལྡན་འདས་ཀྱིས་དགེ་སློང་ཕོ་མོ་གཉིས་ཀའི་བསླབ་པ་ཐུན་མོང་བ་ཅིག་བཅས་ནས། དགེ་སློང་གཅིག་དགེ་སློང་མ་རྣམས་ལ་བསྒོར་བཏང་བ་དང་། དགེ་སློང་དེས་ཀྱང་དགེ་སློང་མ་གཅིག་ལ་སྨྲས་སོ། །དགེ་སློང་མ་དེས་དགེ་སློང་མ་རྣམས་ལ་བསྒོ་བ་དང་། དགེ་སློང་

མ་བཅུ་གཉིས་སྡེ་དག་བྱིས་པ་གླེན་པ་ཁྱེད་ལྟ་བུས་བསྒོ་བ་ལས་ངེད་མི་ཉན་ནོ་ཞེས་ཕྱིར་འཁྱལ་ཞིང་སྨྲས་པ་དང་། དེ་ལྟར་གྱུར་པ་དགེ་སློང་མ་དག་གིས་ཞེས་བྱ་བ་ནས་བསླབ་པ་བཅས་སོ་ཞེས་བྱ་བའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་སློང་མ་རྣམས་ཀྱིས་འཕགས་

མ་བསླབ་པ་འདི་ལ་སློབས་ཤིག་ཅེས་བསྒོ་ན། འདི་སྐད་ཅེས་བདག་ནི་དགེ་སློང་མ་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་ལ་མ་དྲིས་ཀྱི་བར་དུ་བྱིས་པ་གླེན་པ་མི་གསལ་བ་མི་མཁས་པ་ཁྱེད་ཅག་གི་ཚིག་གི་བསླབ་པ་འདི་ལ་མི་བསླབ་པོ་ཞེས་ཟེར་ན་ལྟུང་བའོ། །

Vol. 156 · folio 117b

ཀུན་ཤེས་པར་འདོད་པའི་དགེ་སློང་མས་ཀྱང་བསླབ་པ་འདི་ལ་སློབས་ཤིག་དགེ་སློང་མས་མདོ་སྡེ་འཛིན་པ་དང་འདུལ་བ་འཛིན་པ་དང་། མ་མོ་འཛིན་པ་ལ་དྲིས་ཤིག་དེ་ལ་དེ་ནི་དུས་ཡིན་ནོ། །བྱིས་པ་ཞེས་བྱ་བ་ནི་མདོ་སྡེ་དང་འདུལ་བ་སྤྱིར་མི་ཤེས་པ་ལ་བྱའོ། །གླེན་པ་ཞེས་བྱ་བ་ནི་མདོ་

སྡེ་དང་འདུལ་བའི་དོན་མི་ཤེས་པ་ལ་བྱའོ། །མི་གསལ་བ་ཞེས་བྱ་བ་ནི་ཅུང་ཟད་ཤེས་ཀྱང་མདོ་སྡེ་དང་འདུལ་བའི་ཚིག་མི་གསལ་བ་ལ་བྱའོ། །མི་མཁས་པ་ཞེས་བྱ་བ་ནི་མདོ་སྡེ་དང་འདུལ་བ་སོ་སོར་མཚམས་འབྲེལ་བར་མི་ཤེས་པ་ལ་བྱའོ། །ཀུན་ཤེས་པར་འདོད་པ་ཞེས་བྱ་བ་ནི་

ཚུལ་ཁྲིམས་ཀྱི་ཁྱད་པར་ཤེས་པར་འདོད་པ་ཞེས་བྱ་བའི་ཐ་ཚིག་གོ། །དེ་ལ་དགེ་སློང་མས་བསླབ་པ་སློབས་ཤིག་ཅེས་རིགས་པར་བསྒོ་བ་ལས་བྱིས་པའོ་ཞེས་བྱ་བ་ལ་སོགས་པ་གཞུང་གཞན་ལས་སྨོས་པའི་ཚིག་གང་སྨོས་ཏེ་སྨྲས་ཀྱང་རུང་མ་མཉན་ན་ཐམས་ཅད་ལྟུང་བའོ། །

ལྟུང་བ་ལྔ་བཅུ་དགུ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་བཅུ་གཉིས་སྡེ་རྣམས་ལྐོག་བུར་ཉན་ཅིང་གཅིག་ལ་གཅིག་ཚིག་དག་སྐྱེལ་བ་དང་། དགེ་སློང་མ་རྣམས་འཐབ་ཅིང་རྩོད་པར་གྱུར་ནས་དོན་ཉུང་ངུ་བའི་དགེ་སློང་མ་རྣམས་འཕྱ་བ་

ནས་བསླབ་པ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་སློང་མ་རྣམས་འཐབ་པར་གྱུར་མཚང་འབྲུ་བར་གྱུར། མི་མཐུན་པར་གྱུར་ཅིང་འཁོད་པ་ལས་དགེ་སློང་མ་འདི་དག་ཇི་སྐད་ཟེར་བ་བདག་གིས་མཉན་ཏེ། དེ་ལྟ་དེ་ལྟ་བུར་སྟ་གོན་བྱའོ་སྙམ་ནས་ཅང་མི་སྨྲ་བར་

བཞབས་ཏེ་ཉན་ཅིང་འདུག་ན་ལྟུང་བའོ། །དེ་ལ་དགེ་སློང་མས་སྒྲ་ཐོས་པ་ཙམ་དུ་ཉན་ན་ཉེས་བྱས་སོ། །སྒྲ་དང་དོན་གཉི་ག་ཐོས་པར་ཉན་ན་ལྟུང་བའོ། །དེ་བཞིན་དུ་ར་བ་དང་ཡོལ་བ་དང་སབ་མོ་ལ་སོགས་པའི་ཕག་ནས་མཉན་པའང་དེ་བཞིན་ནོ། །རྩོད་པ་བྱུང་བ་ཞི་བར་བྱ་བའི་བསམ་པས་

ཉན་ན་ཉེས་པ་མེད་དོ། །དགེ་སློང་མ་གྲོགས་ཀྱིས་དེར་འགྲོ་ན་སེ་གོལ་དང་སྐད་དང་རྟིང་སྒྲ་དག་མི་འབྱིན་ཅིང་འཇབ་པའི་ཚུལ་དུ་འགྲོ་ན་ཉེས་བྱས་སོ། །ལྟུང་བ་དྲུག་ཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དེའི་ཚེ་བཅུ་གཉིས་སྡེ་དག་དགེ་འདུན་ཆོས་བཞིན་

Vol. 156 · folio 118a

པའི་ལས་བྱེད་པའི་འཕྲོ་ལས་སྟན་ལས་ལངས་ཏེ་འགྲོ་བ་དང་། དགེ་སློང་མ་རྣམས་ལ་འཕྱ་སྨོད་པ་ནས་འདུལ་བ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དགེ་འདུན་ཆོས་བཞིན་དུ་རྣམ་པར་གདོན་མི་ཟ་བའི་གཏམ་ཟེར་བ་ན་ཅང་མི་སྨྲ་བར་

སྟན་ལས་ལངས་ཏེ་འགྲོ་ལ་དགེ་སློང་མ་འཁོད་པ་ལ་ཡང་མ་སྨྲས་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བའོ། །རྣམ་པར་གདོན་མི་ཟ་བའི་གཏམ་ཟེར་བ་ན་ཞེས་བྱ་བ་ནི། གསོལ་བ་དང་བཞི་ལ་སོགས་པའི་ལས་བརྒྱ་རྩ་གཅིག་གང་ཡང་རུང་བ་ལ་བྱའོ། །དགེ་སློང་མས་རྐྱེན་བྱུང་

སྟེ་འགྲོ་ན་རྐྱེན་བྱུང་ངོ་ཞེས་མ་སྨྲས་པར་སོང་ན་དགེ་འདུན་གྱི་སྒྲ་ཐོས་ཀྱི་བར་དུ་ནི་ཉེས་བྱས། སྒྲ་དང་དོན་གཉི་ག་མི་ཐོས་པར་སོང་ན་ལྟུང་བའོ། །རྐྱེན་བྱུང་ངོ་ཞེས་སྨྲས་ཏེ་སོང་བ་ལ་ཉེས་པ་མེད་དོ། །ལྟུང་བ་དྲུག་ཅུ་གཅིག་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་

ན་སྟེ། དེའི་ཚེ་དགེ་སློང་མ་སྦོམ་དགའ་མོ་སངས་རྒྱས་ལ་སོགས་པ་དཀོན་མཆོག་གསུམ་ལ་མ་གུས་པ་དང་། དོན་ཉུང་ངུ་བའི་དགེ་སློང་མ་རྣམས་འཕྱ་སྨོད་པ་ནས་འདུལ་བ་ལ་བསླབ་པ་བཅས་པའི་བར་དུ་སྔ་མ་བཞིན་ནོ། །གུས་པར་མི་བྱེད་ན་ལྟུང་བའོ། །དེ་ལ་དགེ་སློང་མས་དགེ་

འདུན་དང་ཁང་སྐྱོང་ལ་སོགས་པ་ལ་སྟན་ལོང་ཤིག་ཅེ་འམ། སོང་ཤིག་ཅེས་བྱ་བ་ལ་སོགས་པ་རིགས་པའི་ཚིག་གིས་བསྒོ་བ་མ་མཉན་པ་ནི་དགེ་འདུན་ལ་མ་གུས་པ་ཞེས་བྱ་སྟེ་ལྟུང་བའོ། །སློབ་དཔོན་དང་མཁན་པོ་ལ་སོགས་པ་གྲོགས་མོ་རྣམས་ཀྱིས་འདུག་ཤིག་ཅེས་བྱ་བ་ལ་སོགས་པ་རིགས་

པའི་ཚིག་གིས་བསྒོ་བ་མ་ཉན་ན་ཉེས་བྱས་སོ། །ལྟུང་བ་དྲུག་ཅུ་གཉིས་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་ཁྱིམ་བདག་རྟོགས་ལྡན་གྱི་བུ་དགེ་སློང་བདེར་འོངས་དགྲ་བཅོམ་པ་ཐོབ་པའི་འོག་ཏུ་ཡུལ་སྦལ་ཀར་ཞེས་བྱ་བ་ན་ཨ་མྲ་མུ་སྟེགས་ཞེས་བྱ་

བའི་ཀླུ་འདུལ་དུ་སོང་བ་ལས། སླར་འོང་བའི་ལམ་ཡོགས་སུ་སྔོན་གྱི་མཛའ་བོ་བ་ལང་རྫི་ཞིག་གིས་ཟན་ལ་བོས་ནས་བ་ལང་ལ་བླུད་པའི་ཆང་ཉུང་ཟད་ཅིག་སྐོམ་དང་བསེས་ཏེ་བླུད་པ་དང་། བདེ་བར་འོངས་ར་རོ་ནས་ཚོང་དུས་ཀྱི་དབུས་སུ་འགྱེལ་བ་དང་། བཅོམ་ལྡན་འདས་ཀྱི་བྱིན་གྱི་རླབས་

Vol. 156 · folio 118b

གྱིས་བདེ་བར་འོངས་ཀྱི་ཐོག་ཏུ་རྡོའི་ཁང་བུ་ཞིག་སྤྲུལ་ཏོ། །དེ་ལྟར་གྱུར་པ་ལས་བསླབ་པ་བཅས་པ་དང་དགེ་སློང་མ་རྣམས་ཀྱིས་བདག་ཅག་གི་ཆང་གི་སླད་དུ་ཇི་ལྟ་བུར་བསླབ་པར་བགྱི་ཞུས་པ་དང་། བཅོམ་ལྡན་འདས་ཀྱིས་ཆང་འཐུང་བའི་ཉེས་པ་རྣམས་བཤད་ནས་འདུལ་བ་ལ་བསླབ་པའི་

གནས་བཅས་སོ། །འབྲུའི་ཆང་དང་འབྲས་བུའི་ཆང་མྱོས་པར་འགྱུར་བ་འཐུངས་ན་ལྟུང་བའོ། །འབྲུའི་ཆང་ཞེས་བྱ་བ་ནི་ནས་འབྲས་ལ་སོགས་པའི་ཆང་ལ་བྱའོ། །འབྲས་བུའི་ཆང་ཞེས་བྱ་བ་ནི་རྒུན་འབྲུམ་ལ་སོགས་པ་ལ་བྱའོ། །དེ་ལ་དགེ་སློང་མས་ཆང་གི་ཁ་དོག་དང་རོ་དང་ཆང་གི་དྲི་དང་

མྱོས་པར་འགྱུར་བ་སྟེ་འདི་བཞི་དང་ལྡན་པའི་ཆང་འཐུངས་ན་ལྟུང་བའོ། །འདི་གཅིག་དང་མི་ལྡན་པའི་ཆང་འཐུངས་ན་ཉེས་བྱས་སོ། །ཆང་ནར་མ་སོན་པ་འཐུངས་ན་ཉེས་བྱས། དགེ་སློང་མས་བཟའ་བ་དང་བཏུང་བ་ལ་སོགས་པ་མྱོས་པར་འགྱུར་བ་ཤེས་བཞིན་དུ་ཟོས་སམ་འཐུངས་ན་

ཉེས་བྱས་སོ། །མཛེ་ནད་བྱུང་བའི་ཕྱིར་ལུས་བསྐུ་བའམ། ཁ་ནད་བྱུང་བའི་ཕྱིར་ཁར་བླུགས་ནས་ཕོ་བ་ལ་ཉེས་པ་མེད་དོ། །ལྟུང་བ་དྲུག་ཅུ་གསུམ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དེའི་ཚེ་དྲུག་སྡེ་འཆར་བ་དགྲ་བཅོམ་པ་ཐོབ་པའི་འོག་ཏུ་

ཁྱིམ་བདག་གི་ཆུང་མ་གཏུམ་མོ་ཞེས་བྱ་བའི་མནའ་མ་ལ་འདོད་ཆགས་སྨད་པའི་ཆོས་བཤད་པ་དང་། གཏུམ་མོའི་མནའ་མའི་བྱི་པོ་མི་རྒོད་ཀྱིས་འཆར་བའི་མགོ་བཅད་པའི་བར་དུ་རྒྱས་པར་སྦྱར་ཏེ། བཅོམ་ལྡན་འདས་ཀྱིས་བསླབ་པ་བཅས་པ་དང་། དགེ་སློང་མ་བཅུ་གཉིས་

སྡེ་དག་དགེ་སློང་མ་འཁོད་པ་དག་ལ་མ་སྨྲས་པར་དུས་དང་དུས་མ་ཡིན་པར་གྲོང་དུ་འཇུག་པ་དང་། དོན་ཉུང་ངུ་བའི་དགེ་སློང་མ་དག་འཕྱ་སྨོད་པ་ནས་འདུལ་བ་ལ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་དུས་མ་ཡིན་པར་གྲོང་དུ་འཇུག་ལ་དགེ་སློང་མ་འཁོད་པ་ལ་མ་སྨྲས་

ན་དེ་འདྲ་བའི་རྐྱེན་མ་གཏོགས་ཏེ་ལྟུང་བའོ། །དུས་མ་ཡིན་པ་ཞེས་བྱ་བ་ནི་ཕྱི་དྲོ་ལ་བྱའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་སྔོན་དགེ་སློང་མ་གཅིག་གོས་ལྷག་རྣམས་ཁྱིམ་པ་ཅིག་གི་ཁྱིམ་དུ་གཏམས་ཏེ་གཞག་པ་ལས། ཁྱིམ་བདག་དེའི་ཁྱིམ་མེ་ཤོར་ནས་དགེ་སློང་

Vol. 156 · folio 119a

མ་དེས་དགེ་སློང་མ་རྣམས་ལ་སྨྲས་ཀྱི་བར་དུ་གོས་ལྷག་མ་རྣམས་ཀྱང་མེས་ཚིག་པ་དང་། དགེ་སློང་མ་དེ་ལས་གླེངས་ཏེ་བར་ཆད་བརྒྱད་བྱུང་ན་དགེ་སློང་མ་འཁོད་པ་ལས་མ་བྱས་པར་སོང་ཡང་ཉེས་པ་མེད་དོ་ཞེས་རྗེས་སུ་གནང་བ་ལ་བྱའོ། །དེ་ལ་དགེ་སློང་མས་

དགེ་སློང་མ་འཁོད་པ་ལ་འཁོད་པར་འདུ་ཤེས་བཞིན་མ་བྱས་པ་དང་། ཐེ་ཚོམ་ཟ་བ་ལ་ལྟུང་བ་རེ་རེ། མི་འཁོད་པ་ལ་འཁོད་པར་འདུ་ཤེས་པ་དང་། ཐེ་ཚོམ་པ་གཉིས་ལ་ཉེས་བྱས་ཏེ་གོང་མའི་བཞི་རྒྱུད་དང་འདྲ་བར་སྦྱར་རོ། །ལྟུང་བ་དྲུག་ཅུ་བཞི་པ་རྫོགས་སོ།། །།

མདོར་བསྟན་པ་ནི། ཁྱིམ་དང་མཚན་མོ་ད་གདོད་དང་། །ཁབ་རལ་ཁྲི་དང་བདལ་བ་དང་། །གདིང་དང་གཡན་པ་དགབ་པ་དང་། །བདེ་བར་གཤེགས་ཀྱི་ཆོས་གོས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེ་ནས་དགེ་སློང་མ་དགའ་མོ་སྔ་དྲོ་ཆོས་གོས་གྱོན་ལྷུང་བཟེད་

ཐོགས་ནས་ཁྲིམས་ཟླ་དགེ་སློང་མ་གཞན་དག་དང་ཡོན་བདག་གཞན་ཞིག་གི་ཁྱིམ་དུ་སོང་སྟེ། དེ་ལ་མཐུན་པའི་ཆོས་བསྟན་པས་མངོན་པར་དད་པར་བྱས་ཏེ། དགེ་སློང་མའི་དགེ་འདུན་གྱི་ཕྱིར་བཤོས་སྦྱོར་བར་བསྐུལ་ཏོ། །དེ་ནས་ཕྱི་ཉིན་གྱི་ཚེ་དགེ་སློང་མའི་དགེ་འདུན་སྔ་དྲོ་ཤམ་

ཐབས་དང་ཆོས་གོས་དང་ལྷུང་བཟེད་ཐོགས་ཏེ། ཁྱིམ་བདག་དེའི་བཀད་ས་གང་ན་བ་དེར་སོང་སྟེ་སྟན་བཏིང་བ་ལ་འདུག་པའི་བར་དུའོ། །དགེ་སློང་མ་དགའ་མོ་བྱ་བ་དག་མང་དུ་བྱེད་པ་མང་བས་གདུགས་ཚོད་ལས་ཡོལ་དུ་བྱེད་པ་དང་། དགེ་སློང་མ་དེ་དག་གིས་ཁྱིམ་བདག་

དེ་ལ་འདི་སྐད་ཅེས་སྨྲས་སོ། །ཁྱིམ་བདག་དགེ་སློང་མའི་དགེ་འདུན་བསྙེན་བཀུར་བའི་དུས་ལ་བབ་བོ། །དེས་འདི་སྐད་ཅེས་སྨྲས་སོ། །འཕགས་མ་བདག་གིས་ག་ལ་འཚལ་བ་ཤོས་ཀྱི་ཞལ་ཏ་བ་དགའ་མོས་འཚལ་ཏོ་ཞེས་པ་ནས་དོན་ཉུང་ངུ་མའི་དགེ་སློང་མ་དག་འཕྱ་བར་

གྱུར་ཏེ། དེ་ལྟ་བུར་གྱུར་པ་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཟས་ཀྱི་སྔ་རོལ་དང་། ཟས་ཟོས་ཀྱི་འོག་ཏུ་ཁྱིམ་དུ་རྒྱུ་བར་མི་བྱའོ། །དེ་ན་ཞལ་ཏ་བ་དང་བཤོས་ཀྱི་བསྐུལ་མ་བཏབ་པ་ཞིག་ཡོད་ན་དེ་དག་དགེ་འདུན་གྱི་བྱ་

Vol. 156 · folio 119b

བ་དང་། དགེ་འདུན་གྱི་བྱེད་པ་ཞིག་ཡོད་པ་ལས་ཉམས་པར་གྱུར་པས། བཀའ་སྩལ་པ། ཟས་ཀྱི་སྔ་རོལ་ནི་ཁྱིམ་གཉིས་སོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་འདོད་པ་ནས་བསླབ་པ་ལ་གུས་པའི་བསྔགས་པ་བརྗོད་དེ་འདི་སྐད་ཅེས་བཀའ་སྩལ་

ཏོ། །ཡང་དགེ་སློང་མ་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་ཟས་ཀྱི་སྔ་རོལ་དང་ཟས་ཀྱི་འོག་ཏུ་གྲོང་རྒྱུ་ཞིང་འགྲོ་ལ། ཁྱིམ་པ་འདུག་པ་ལ་མ་བསྒོ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་དགའ་མོའོ། །ཟས་ཡོད་པ་ན་

ཟས་དང་བཅས་པའོ། །ཁྱིམ་ནི་ཁྱིམ་བདག་གི་ཁྱིམ་དུ་མགྲོན་དུ་བོས་པའོ། །ཟས་ཀྱི་སྔ་རོལ་ནི་སྔ་དྲོའི་དུས་སོ། །ཟས་ཟོས་ཀྱི་འོག་ཏུ་ཞེས་བྱ་བ་ནི་ཕྱེ་མ་རེད་ཀྱི་དུས་སོ། །ལྟུང་བ་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟ་བུ་ཞེ་ན་ཇི་ཙམ་དུ་དགེ་སློང་མས་དགེ་སློང་མ་དག་ཟས་

དང་བཅས་པའི་ཁྱིམ་དུ་མགྲོན་དུ་བོས་པ་ལས་ཟས་ཀྱི་སྔ་རོལ་དུ་ཁྱིམ་གཉིས་གཉིས་སུ་འགྲོ་བ་ལས་ཆེད་དུ་བསམས་ནས་ཁྱིམ་གསུམ་དུ་འགྲོ་ན་ལྟུང་བའོ། །ཟས་ཟོས་ཀྱི་འོག་ཏུ་ཁྱིམ་གསུམ་དུ་འགྲོ་བ་ལས་ཆེད་དུ་བསམས་ནས་ཁྱིམ་བཞིར་འགྲོ་ན་ལྟུང་བའོ། །གལ་ཏེ་

ཁྱིམ་བདག་ལ་བྱས་ཏེ་སོང་ན་ཉེས་པ་མེད་དོ། །ལྟུང་བ་དྲུག་ཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། ཚེ་དང་ལྡན་པ་འཆར་བ་བཙུན་མོ་ཕྲེང་ལྡན་མའི་སློབ་དཔོན་ཡིན་པས། དེ་ནམ་མ་ནངས་སྐྱ་རེངས་མ་ཤར་བར་རྒྱལ་པོའི་ཕོ་བྲང་དུ་སོང་

སྟེ་བཙུན་མོ་ལ་ཆོས་བཤད་པ་ལས་བཅས་ཏེ། ཕྱིས་བཅུ་གཉིས་སྡེ་རྣམས་དགེ་སློང་མ་རྣམས་ལ་མ་བཅས་སོ་ཞེས་ནམ་མ་ནངས་པར་རྒྱལ་པོའི་ཕོ་བྲང་དུ་འདོང་བས་དེ་ལྟ་བུར་གྱུར་པ་དགེ་སློང་མ་དག་གིས་བཅོམ་ལྡན་འདས་ལ་གསོལ་ཞེས་བྱ་བ་ནས། བསླབ་པ་བཅས་

ཞེས་བྱ་བའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་ནམ་མ་ནངས་སྐྱ་རེངས་མ་ཤར་རིན་པོ་ཆེ་ལྟ་བུ་མ་བསྡུས་པར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་སྒོའི་གཏན་པའམ་གཏན་པའི་ཉེ་འཁོར་ལས་འདས་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བའོ། །

Vol. 156 · folio 120a

ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དང་འདྲ་བ་གཞན་ཡང་ངོ་། །ནམ་མ་ནངས་ཞེས་བྱ་བ་ནི་ནམ་མ་ཟད་པའོ། །སྐྱ་རེངས་མ་ཤར་ཞེས་བྱ་བ་ལ་སྐྱ་རེངས་ལ་གསུམ་སྟེ། སྔོན་པོ་དང་། སེར་པོ་དང་། དམར་པོའོ། །སྐབས་འདིར་དམར་པོ་

ལ་བྱའོ། །མ་ཤར་ཞེས་བྱ་བ་ནི་མ་བྱུང་བའོ། །རིན་པོ་ཆེ་ཞེས་བྱ་བ་ནི་མཚན་མོ་སྣང་བར་བྱེད་པ་སྟེ། ནོར་བུ་དང་། མུ་ཏིག་དང་། བཻ་ཌཱུརྱ་དང་། གཡས་སུ་འཁྱིལ་པ་ལ་སོགས་པ་ལ་བྱའོ། །རིན་པོ་ཆེ་ལྟ་བུ་ཞེས་བྱ་བ་ནི་འཐབ་མོའི་ཆ་བྱད་ཐམས་ཅད་དང་། རོལ་མོའི་ཆ་བྱད་དུ་

གཏོགས་པ་རྣམས་སོ། །རྒྱལ་པོ་ཞེས་བྱ་བ་ནི་དབང་བསྐུར་བ་སྟེ་ཐ་ན་བུད་མེད་ཀྱང་རུང་ངོ་། །གཏན་པ་ཞེས་བྱ་བ་ནི་གསུམ་སྟེ། རྒྱལ་པོ་དང་གྲོང་ཁྱེར་དང་བཙུན་མོའི་འཁོར་གྱི་སྒོ་གཏན་ནོ། །སྐབས་འདིར་ནི་རྒྱལ་པོའི་གྲོང་ཁྱེར་གྱི་སྒོ་གཏན་འདས་པར་བཟུང་ངོ་། །ཉེ་འཁོར་ནི་དེའི་གཡས་

གཡོན་ནོ། །འདས་ན་ཞེས་བྱ་བ་ནི་སོང་བའོ། །རྐྱེན་མ་གཏོགས་ཞེས་བྱ་བ་ནི་གནང་བའོ། །ལྟུང་བ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟ་བུ་ཞེ་ན། དགེ་སློང་མས་ནམ་མ་ནངས་པ་ལ་ནམ་མ་ནངས་པར་འདུ་ཤེས་སམ་ཐེ་ཚོམ་ཟ་ཡང་རུང་། རྒྱལ་པོ་དང་གྲོང་ཁྱེར་གྱི་

སྒོ་གཏན་ལས་འདས་ན་ལྟུང་བའོ། །ནམ་མ་ནངས་པ་ལ་མ་ནངས་པར་འདུ་ཤེས་པ་དང་། ཐེ་ཚོམ་ཟ་བ་ནི་ཉེས་བྱས་སོ། །ནམ་མ་ནངས་པ་ལ་ནམ་མ་ནངས་པར་འདུ་ཤེས་སམ་ཐེ་ཚོམ་ཟ་བཞིན་དུ་བཙུན་མོའི་འཁོར་གྱི་གཏན་པ་ལས་འདས་ན་ཉེས་བྱས། ནམ་ནངས་པ་ལ་མ་ནངས་པར་

འདུ་ཤེས་པ་དང་ཐེ་ཚོམ་ཟ་བ་ཡང་ཉེས་བྱས་ཉིད་དོ། །རྒྱལ་པོ་འམ་བཙུན་མོ་འམ་རྒྱལ་བུ་འམ་བློན་པོས་བོས་པ་དང་བར་ཆད་བརྒྱད་ལས་གང་ཡང་རུང་བ་བྱུང་སྟེ་དེར་སོང་ན་ཉེས་པ་མེད་དོ། །ལས་དང་པོ་པ་ལ་སོགས་པ་ལ་ལྟུང་བ་མེད་དོ། །ལྟུང་བ་དྲུག་ཅུ་དྲུག་པ་རྫོགས་སོ།། །།

གླེང་གཞི་མཉན་དུ་ཡོད་པ་ན་སྟེ། དྲུག་སྡེ་པོ་རྣམས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ། རི་མོ་དང་། བླ་མ་དང་། གཅེས་པ་དང་། ཡིད་ལ་འཛིན་པ་དང་། སེམས་རྩེ་གཅིག་པ་དང་། གུས་པར་ཡང་མི་ཉན་ལ། དགེ་སློང་རྣམས་ལ་ཡང་ཚེ་དང་ལྡན་

Vol. 156 · folio 120b

པ་དག་ཆོས་འདི་ཡང་མདོའི་ནང་དུ་གཏོགས་ཤིང་འདུས་པར་བདག་ཅག་གིས་ད་གདོད་ཤེས་སོ་ཞེས་བྱས་པ་དང་། དེ་དག་ལ་དགེ་སློང་མ་རྣམས་ཀྱིས་ཁྱོད་སྔོན་སོ་སོར་ཐར་པའི་མདོ་འདོན་པའི་ཚེ་མ་ཐོས་སམ་ཅི་ན་དེ་སྐད་ཟེར། དེ་དག་ན་རེ་ངེད་ཀྱི་ལས་འདི་གཅིག་པུའམ་འདོད་པ་དང་གནོད་

སེམས་དང་འཚེ་བའི་རྣམ་པར་རྟོག་པ་ལ་ཡང་རྟོག་མོད་ཅེས་ཟེར་བ་དགེ་སློང་དག་གིས་སྟོན་པ་ལ་གསོལ་ནས་བསླབ་པ་བཅས་པ་དང་། བཅུ་གཉིས་སྡེ་རྣམས་འདི་དགེ་སློང་མ་རྣམས་ལ་མ་བཅས་སོ་ཞེས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ་གོང་མ་སྐད་དུ་ཟེར་

བས་དགེ་སློང་མ་དག་གིས་བཅོམ་ལྡན་འདས་ལ་གསོལ་ནས་བསླབ་པ་བཅས་པའི་བར་དུ་སྔ་མ་བཞིན་ནོ། །ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་བཤད་པ་འདོན་པའི་ཚེ། འཕགས་མ་དག་ཇི་ལྟར་ཆོས་འདི་ཡང་མདོའི་ནང་དུ་འདུས་མདོའི་ནང་དུ་

གཏོགས་པར་བདག་གིས་ད་གཟོད་ཤེས་སོ་ཞེས་དེ་སྐད་ཟེར་ལ། དེ་གལ་ཏེ་དགེ་སློང་མ་རྣམས་ཀྱིས་ཀྱང་དགེ་སློང་མ་འདི་སྔོན་གྱི་གསོ་སྦྱོང་གི་ཚེ་ལན་གཉིས་སམ་གསུམ་གྱི་ཚེ་འདུག་པར་ཤེས་ན་ལན་མང་དུ་ལྟ་ཅི་སྨོས། དགེ་སློང་མ་དེ་མི་ཤེས་པས་ནི་མི་འགྲོལ་ཏེ། དེ་

ལ་ལྟུང་བ་གང་བྱུང་བ་དེ་ཆོས་བཞིན་དུ་འཆགས་སུ་གཞུག་པའི་སྟེང་དུ་ཁྱོད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་བཤད་པ་འདོན་པའི་ཚེ་བསྟི་སྟང་བྱེད་ཅིང་ཆོས་མི་ཉན། བླ་མར་མི་བྱེད། རུས་པ་བཞིན་དུ་མི་བྱེད། ཡིད་ལ་མི་འཛིན། སེམས་རྩེ་གཅིག་ཏུ་མི་བྱེད། རྣ་

བླགས་ཏེ་མི་ཉན། སེམས་ཐམས་ཅད་ཀྱིས་བསམས་ཏེ་ཆོས་མི་ཉན་པས་དགེ་སློང་མ་ཁྱོད་མ་རྙེད་པའོ། །རྙེད་པ་མ་ཡིན་ནོ། །ཉེས་པ་རྙེད་པའོ། །ལེགས་པ་མ་རྙེད་པའོ་ཞེས་འགྱོད་དུ་གཞུག་གོ། །དགེ་སློང་མ་དེ་ལ་འགྱོད་པར་བྱ་བ་ནི་འདི་ཡིན་ཏེ་ལྟུང་བའོ། །ཡང་དགེ་སློང་མ་

གང་ཞེས་བྱ་བ་ནི་བཅུ་གཉིས་སྡེ་དང་འདྲ་བ་གཞན་ཡང་ངོ་། །ཟླ་བ་ཕྱེད་ཕྱེད་ཅེས་བྱ་བ་ནི་གསོ་སྦྱིན་གྱི་དུས་སོ། །སོ་སོར་ཐར་པ་ནི་ཕས་ཕམ་པ་བཞི་ནས་རྩོད་པ་ཞི་བར་བྱ་བའི་ཆོས་བདུན་པའི་བར་དག་གོ། །མདོ་བཤད་ཅེས་བྱ་བ་ནི་ཡང་དག་པར་བཀོད་པའོ། །འདོན་པ་ཞེས་

Vol. 156 · folio 121a

བྱ་བ་ནི་རབ་ཏུ་བསྒྲགས་པའོ། །ཇི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་བྱ་བ་ནི། བཅོམ་ལྡན་འདས་ཀྱིས་གསུངས་པའི་མདོའི་ནང་ནས་འབྱུང་བ་ཡིན་པར་བདག་གིས་ད་གདོད་ཤེས་

སོ་ཞེས་ཟེར་བའོ། །གསོ་སྦྱིན་གྱི་ལས་གཉིས་གསུམ་ཞེས་པ་ནི་དེས་སོ་སོར་ཐར་པའི་མདོ་ལན་གཉིས་སམ་གསུམ་ཐོས་པའོ། །ལན་མང་དུ་ལྟ་ཅི་སྨོས་ཞེས་པ་ནི་ལན་མང་དུའོ། །མི་ཤེས་པས་ནི་མི་འགྲོལ་ཞེས་པ་ནི་གལ་ཏེ་མི་ཤེས་ན་ཡང་དེ་བཞིན་དུ་མི་གཏོང་གི་ལྟུང་བ་དང་

བཅས་པ་ཡིན་པར་བསྟན་པའོ། །དེ་ལྟུང་བ་གང་འབྱུང་བ་ཞེས་བྱ་བ་ནི་ལྟུང་བ་སྡེ་ལྔ་ལས་གང་ཡང་རུང་བའོ། །དེ་ཆོས་བཞིན་དུ་བྱེད་དུ་གཞུག་ཅེས་པ་ནི་འཆགས་སུ་གཞུག་པའོ། །བསྟི་སྟང་བྱེད་ཅིང་ཆོས་མི་ཉན་བླ་མར་མི་བྱེད་ཅེས་པ་ནི་རིམ་གྲོ་དང་བཙུན་པར་མི་བྱེད་པའོ། །རུས་

པ་བཞིན་མི་བྱེད་ཅེས་པ་ནི་དཔེ་སྟེ། ཇི་ལྟར་ལུས་ཀྱི་གཙོ་བོ་རུས་པ་བཞིན་སོ་སོར་ཐར་པ་ལ་གཙོ་བོར་མི་འཛིན་པའོ། །ཡིད་ལ་མི་འཛིན་ཅེས་པ་ནི་སེམས་ལ་འདྲིས་པར་མི་བྱེད་པའོ། །སེམས་རྩེ་གཅིག་ཏུ་མི་བྱེད་པ་ནི་སེམས་ཐམས་ཅད་གཅིག་ཏུ་མི་སྡུད་པའོ། །རྣ་བླགས་ཏེ་མི་

ཉན་ཅེས་པ་ནི་རྣ་བའི་དབང་པོ་དེར་མི་གཏོང་པའོ། །སེམས་ཐམས་ཅད་ཀྱིས་བསམས་ཏེ་ཆོས་མི་ཉན་ཅེས་པ་ནི་དབང་པོ་རྣམས་མ་བསྡུས་པའི་ཕྱིར་རོ། །མ་རྙེད་པ་ཞེས་པ་ནི་དགེ་བའོ། །རྙེད་པ་མ་ཡིན་ནོ་ཞེས་པ་ནི་དགེ་བ་དེ་མ་རྙེད་པའི་ཕྱིར་རོ། །ཉེས་པ་རྙེད་པའོ་ཞེས་པ་ནི་དགེ་

བ་རྙེད་པ་མ་ཡིན་པའི་ཕྱིར་རོ། །ལེགས་པ་མ་རྙེད་པ་ནི་དེ་ཉིད་མ་ཐོབ་པའོ། །འགྱོད་དུ་གཞུག་ཅེས་པ་ནི་ཉེས་པ་ལ་ཡིད་བྱུང་ཞིང་སྐྱོ་བར་བྱ་བ་སྟེ། འགྱོད་དུ་འཇུག་པའི་འོག་ཏུ་འཆགས་སུ་གཞུག་པའོ། །ལྟུང་བ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་གང་ཞེ་ན། དགེ་སློང་

མས་ལྟུང་བ་སྡེ་ལྔའི་ནང་དུ་གཏོགས་པ་འདོན་པའི་ཚེ་བསྟི་སྟང་དང་བླ་མ་དང་རུས་པ་བཞིན་དུ་མི་བྱེད། ཡིད་ལ་མི་འཛིན་སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་ཉན་སེམས་ཐམས་ཅད་ཀྱིས་བསམས་ཏེ་མི་ཉན་པར་བདག་གིས་ད་གདོད་ཆོས་འདི་མདོའི་ནང་དུ་གཏོགས་ཤིང་

Vol. 156 · folio 121b

འདུས་པར་ཤེས་སོ་ཞེས་ཟེར་ན་ཐམས་ཅད་ལྟུང་བའོ། །ལམ་ལོག་པར་རྒས་པ་དང་། མི་ཤེས་པར་བདེན་པ་ལ་ཉེས་པ་མེད་དོ། །ལས་དང་པོ་པ་ལ་སོགས་པ་ལ་ལྟུང་བ་མེད་དོ། །ལྟུང་བ་དྲུག་ཅུ་བདུན་པ་རྫོགས་སོ།། །།གླེང་གཞི་མཉན་དུ་ཡོད་པ་ན་སྟེ། བ་སོ་མཁན་ཆོས་ཅན་

སྔོན་གཅེར་བུ་པ་ལ་དད་པ་ཞིག་གནས་པར་བསོད་སྙོམས་པ་ཞིག་གིས་ཆོས་བཤད་དེ་བཏུལ་ནས་བསླབ་པའི་གནས་ལ་བཀོད་དེ་རྫས་ལས་བྱུང་བའི་བསོད་ནམས་བཤད་པ་དང་། ཆོས་ཅན་རང་གི་བཟོས་དགེ་འདུན་ལ་བསྙེན་བཀུར་བགྱིའོ་ཞེས་བྱས་པ་དང་། དགེ་སློང་མ་

རྣམས་ཀྱིས་བ་སོ་དང་རུས་པ་དང་རྭ་ལས་ཁབ་རལ་བྱེད་དུ་བཅུག །དགེ་སློང་མ་བཅུ་གཉིས་སྡེས་ཀྱང་རིན་མ་བྱིན་པར་ཁབ་རལ་མང་དུ་བཅོལ་བས་བ་སོ་དང་། རུས་པ་དང་། རྭ་ཡང་ཟད་དེ་དབུལ་པོར་གྱུར་པས་གཅེར་བུ་པ་དག་འཕྱ་སྟེ། འདི་ངེད་ལ་དགའ་བའི་ཚེ་ཡོ་བྱད་

ཕུན་སུམ་ཚོགས་པ་དང་ལྡན་ན་ད་ནི་དགེ་སློང་ཤཱཀྱའི་བུ་ལ་དགའ་བས་ཟན་ཡང་མེད་དོ་ཞེས་མི་སྙན་པར་ཟེར་ཏེ། དེ་ལྟ་བུར་གྱུར་པ་དགེ་སློང་མ་དག་གིས་སྟོན་པ་ལ་གསོལ་ནས་བཅུ་གཉིས་སྡེ་རྣམ་གྲངས་དུ་མས་སྨད་དེ། འདུལ་བ་ལ་བསླབ་པའི་གནས་བཅས་པའི་བར་དུ་

སྔ་མ་བཞིན་ནོ། ཡང་དགེ་སློང་མ་གང་བ་སོ་འམ་རུས་པའམ་རྭའི་ཁབ་རལ་བྱེད་དུ་བཅུག་ནས་བཅག་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དང་འདྲ་བ་གཞན་ཡང་ངོ་། །བ་སོ་དང་རུས་པ་དང་རྭ་ནི་དངོས་སུ་ཟད་ཁབ་རལ་ནི་རྣམ་པ་གཉིས་ཏེ། ཁ་གབ་ཅན་

དང་གློ་གབ་ཅན་ནོ། །བྱེད་ཅེས་བྱ་བ་ནི་བདག་གམ་གཞན་གྱིས་སོ། །བཅག་ནས་ཞེས་བྱ་བ་ནི་དངོས་པོ་དེ་སྔར་ཆོག་ལ་གདོང་ལྟུང་བ་བཤགས་པར་བྱའོ་ཞེས་བྱ་བའི་ཐ་ཚིག་གོ། །ལྟུང་བ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་གང་ཞེ་ན། དགེ་སློང་མས་བ་

སོའམ། རུས་པའམ། རྭ་ཡང་རུང་ཁབ་རལ་བྱས་སམ་བྱེད་དུ་བཅུག་ན་ཐམས་ཅད་དུ་ལྟུང་བའོ། །གང་གི་མདུན་དུ་འཆགས་པའི་ཚེ་དེས་ཀྱང་ཁྱོད་ཀྱིས་དངོས་པོ་བཅག་གམ་ཞེས་དྲིས་ཤིག །མ་དྲིས་པར་ཉེས་པ་བཤགས་ན་གཉི་ག་ལ་ཉེས་བྱས་ཏེ་ལྟུང་བ་ཡང་བཤགས་པར་མི་འགྱུར་

Vol. 156 · folio 122a

རོ། །མ་ཟིན་པར་བཏོང་བ་དང་། ཟིན་ཏེ་མི་འཆབ་པ་དང་། གཞན་གྱི་ཕྱིར་བྱེད་པ་ནི་ཉེས་བྱས་སོ། །བྱས་པ་རྙེད་པ་དང་བྱས་པ་སྤྱོད་པ་ནི་ཉེས་པ་མེད། ཁབ་རལ་རྣམ་པ་བཞི་ནི་འཆང་དུ་གནང་སྟེ། ར་གན་དང་ཟངས་དང་། ཁར་བ་དང་། ལྕགས་

ཀྱིའོ། །ལས་དང་པོ་པ་ལ་སོགས་པ་ལ་ཉེས་པ་མེད་དོ། །ལྟུང་བ་དྲུག་ཅུ་བརྒྱད་པ་རྫོགས་སོ།། །།གླེང་གཞི་མཉན་དུ་ཡོད་པ་ན་སྟེ། དགེ་སློང་ཞིག་ལྗོངས་རྒྱུ་ཞིང་མཉན་དུ་ཡོད་པར་ཕྱིན་ནས་རྐང་པ་བཀྲུས་ཏེ་ཁྲི་ཐུང་ངུ་བ་ཅིག་གི་སྟེང་དུ་འདུག་པ་དང་། དཔྱིད་ཚ་

བས་སྦྲུལ་གདུག་པ་ཞིག་ཀྱང་ཚ་བས་ཉེན་ཏེ་བསིལ་བར་འདོད་པས་དགེ་སློང་དེས་ཁྲིའུའི་དྲུང་དུ་རྐང་པ་བཀྲུས་པའི་གནས་དེར་ཉལ་ལོ། །དགེ་སློང་དེ་ཡང་ལམ་གྱིས་དུབ་པས་ལུས་འགྱུར་ཞིང་མགོ་འཆོག་སྟེ། ལུས་ཡང་དང་ཡང་བཏུད་པ་དང་། སྦྲུལ་གྱིས་འདིས་བདག་ལ་གནོད་པ་བྱེད་དོ་

སྙམ་ནས་དགེ་སློང་དེའི་འཕྲལ་བར་བཟུང་བས་དུས་ལས་འདས་སོ། །དེ་ལྟ་བུར་གྱུར་པ་བཅོམ་ལྡན་འདས་ལ་གསོལ་ནས་ཕྱིན་ཆད་ཁྲི་རྐང་ཐུང་ངུ་ལ་ཉལ་བར་མི་བྱའོ་ཞེས་བཀའ་སྩལ་པ་དང་། བཅུ་གཉིས་སྡེ་དག་གིས་ཁྲི་རྐང་པ་ཁྲུ་བཅུ་གཉིས་པ་བྱས་ཏེ་སྐས་བཙུགས་ནས་ཉལ་བར་

བྱེད་པ་དགེ་སློང་མ་དག་གིས་སྟོན་པ་ལ་གསོལ་ནས་བསླབ་པ་བཅས་སོ། །དགེ་སློང་མའི་དགེ་འདུན་གྱིས་ཁྲིའམ་ཁྲིའུ་བྱེད་ན་རྐང་པ་བུ་གར་གཞུག་པ་མ་གཏོགས་པར་བདེ་བར་གཤེགས་པའི་སོར་བརྒྱད་ཀྱི་ཚད་དུ་གྱིས་ཤིག །དེ་ལས་ལྷག་པར་བྱས་ན་བཅད་ནས་ལྟུང་བའོ། །

གཞན་ནི་གོ་སླ་བས་མ་བཤད་དོ། །སོར་བརྒྱད་ཀྱི་ཚད་དུ་གྱིས་ཤིག་ཅེས་བྱ་བ་ནི་སྟོན་པའི་སོར་དེ་མི་ཐ་མལ་པའི་ཁྲུ་ཚད་མ་གང་ངོ་། །བཅད་ན་ཞེས་བྱ་བ་ནི་ལྷག་མ་བཅད་ནས་ལྟུང་བ་བཤགས་སོ། །ལྟུང་བ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་གང་ཞེ་ན་དགེ་སློང་མས་ཇི་

ཙམ་དུ་བདེ་བར་གཤེགས་པའི་སོར་བརྒྱད་ལས་ཆུང་ཟད་ཅིག་ལྷག་ན་ཐམས་ཅད་དུ་ལྟུང་བར་འགྱུར་རོ། །གང་གི་མདུན་དུ་བཤགས་པ་དེས་ཀྱང་ལྷག་མ་བཅད་དམ་ཞེས་དྲིས་ཤིག་མ་དྲིས་པར་བཤགས་ན་གཉི་ག་ལ་ཉེས་བྱས་ཏེ། ལྟུང་བ་ཡང་བཤགས་པར་མི་འགྱུར་

Vol. 156 · folio 122b

བས་སླར་ཡང་བཤགས་པར་བྱའོ། །ལྟུང་བ་དྲུག་ཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བསྙེན་དགའ་བོས་སྔ་ཕྱིར་ཁྲི་ཐོབ་པ་རྣམས་རྒན་རིམས་ཀྱིས་ཕྲོགས་པས་ཡང་མལ་སྟན་བསྒོ་བའི་དུས་ལ་བབ་པ་དང་། གཞན་གྱིས་ཁྲི་ཕྲོགས་སུ་

དོགས་པའི་ཕྱིར་ཁྲི་ཤིང་བལ་གྱིས་བདལ་ཏེ་གཞག་གོ། །ཡང་དགེ་སློང་རྒན་རིམས་ཤིག་འོངས་ཏེ། བསྙེན་དགའ་བོ་ལ་འདི་སུའི་ཁྲི། འདི་བདག་གི་ཤིང་བལ་ལོ་ཞེས་བྱས་པ་དང་། དགེ་སློང་གཞན་ཞིག་གིས་ཤིང་བལ་ནི་བསྙེན་དགའ་བོའི་ཡིན། ཁྲི་ནི་དགེ་འདུན་

གྱིའོ་ཞེས་སྨྲས་པ་དང་། བསྙེན་དགའ་བོ་ཁྲོས་ནས་ཤིང་བལ་བསྡུས་ཏེ་ཉུང་ཟད་ཅིག་སྟེང་དུ་གཏོར་རོ། །དགེ་སློང་དེ་ཡང་མ་བརྟགས་པར་ཉལ་བས་ནམ་ནངས་ཏེ་ལངས་ན་ཤིང་བལ་གྱིས་ལུས་ཀུན་གཡོགས་ཤིང་སྐྱ་བོར་གྱུར་ཏོ། །དགེ་སློང་དག་གིས་ཁྱོད་འབྲས་ཀྱི་

གཡུལ་ན་ཉལ་ལམ་ཞེས་བྱས་པ་དང་། ཇི་ལྟར་གྱུར་པ་རྒྱས་པར་སྨྲས་ཏེ། དགེ་སློང་དག་གིས་སྟོན་པ་ལ་གསོལ་ནས་བསླབ་པ་བཅས་པ་དང་། བཅུ་གཉིས་སྡེ་རྣམས་འདི་དགེ་སློང་མ་རྣམས་ལ་མ་བཅས་སོ་ཞེས་དགེ་འདུན་གྱི་ཁྲིའུ་དང་ཁྲི་ལ་ཤིང་བལ་བདལ་བས་དོན་ཉུང་

ངུ་བའི་དགེ་སློང་མ་རྣམས་ཀྱིས་སྟོན་པ་ལ་གསོལ་ནས་འདུལ་བ་ལ་བསླབ་པའི་གནས་བཤད་དོ། །ཡང་དགེ་སློང་མ་གང་དགེ་འདུན་གྱི་ཁྲིའུ་འམ་ཁྲི་ལ་ཤིང་བལ་བདལ་ཏམ་བདལ་དུ་བཅུག་ན་བསྡུས་ནས་ལྟུང་བའོ། །གཞན་ནི་གོ་སླ་བས་མ་བཤད་དོ། །དེ་ལ་ཤིང་བལ་ཞེས་བྱ་

བ་ནི་རྣམ་པ་ལྔ་སྟེ། རྩྭ་ཀ་ཤ་དང་། ཤིང་མར་ཀ་དང་། ཤིང་ཞོམ་པ་དང་། རས་བལ་དང་། ལྕང་མའི་བལ་ལོ། །བདལ་ཞེས་བྱ་བ་ནི་བདག་ཉིད་ཀྱིས་སོ། །བདལ་དུ་བཅུག་ཅེས་བྱ་བ་ནི་གཞན་ལའོ། །བསྡུས་ནས་ཞེས་བྱ་བ་ནི་བདལ་བ་བསྡུས་པའི་འོག་ཏུ་ལྟུང་

བ་བཤགས་པར་བྱའོ། །ལྟུང་བ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟ་བུ་ཞེ་ན། དགེ་སློང་མས་དགེ་འདུན་གྱི་ཁྲིའམ་ཁྲིའུ་ལ་ཤིང་བལ་བདལ་ཏམ་བདལ་དུ་བཅུག་ན་ཐམས་ཅད་དུ་ལྟུང་བའོ། །གང་གི་མདུན་དུ་བཤགས་པ་དེས་ཀྱང་བདལ་བ་བསྡུས་སམ་

Vol. 156 · folio 123a

ཞེས་དྲིས་ཤིག །མ་དྲིས་པར་བཤགས་ན་གཉི་ག་ལ་ཉེས་བྱས་ཏེ་ལྟུང་བ་ཡང་བཤགས་པར་མི་འགྱུར་བས་སླར་ཡང་བཤགས་པར་བྱའོ། །ལྟུང་བ་བདུན་ཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས་སོ། །དེའི་ཚེ་ན་

དགེ་སློང་མ་རྣམས་གདིང་བ་རིང་པོར་བྱས་ནས་རིངས་སོ་ཞེས་བཅད། ཐུང་ངུར་བྱས་ནས་ཐུངས་སོ་ཞེས་སླར་སྡུད་དེ་བྱ་བ་མང་པོས་དགེ་བའི་བར་ཆད་དུ་གྱུར་པས་རྣམ་གྲངས་དུ་མས་སྨད་དེ། འདུལ་བ་ལ་བསླབ་པའི་གནས་བཤད་པའི་བར་དུ་སྔ་མ་བཞིན་ནོ། །དགེ་སློང་མ་གདིང་བ་

བྱེད་ན་ཚད་བཞིན་དུ་གྱིས་ཤིག །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་དོ། །ཞེང་དུ་མཐོ་ཕྱེད་དང་དོ་སྟེ། སྲིད་དུ་མཐོ་གང་གིས་བསྲིངས་ཤིག་དེ་ལས་ལྷག་པར་བྱས་ན་བཅད་ནས་ལྟུང་བའོ། །གདིང་བ་ཞེས་བྱ་བ་ནི་སྟན་ནོ། །སྲིད་དུ་བདེ་བར་

གཤེགས་པའི་མཐོ་དོ་ནི་ཁྲུ་ཚད་མ་གསུམ་མོ། །ཞེང་དུ་མཐོ་ཕྱེད་དང་དོ་ལ་ཁྲུ་ཚད་མ་གཉིས་དང་སོར་དྲུག་གོ། །སྲིད་དུ་མཐོ་གང་གིས་བསྲིངས་ཤིག་ཅེས་བྱ་བ་ནི་གལ་ཏེ་ལུས་རིངས་ཏེ་མི་ཆོག་ནའོ། །ལྷག་པར་བྱས་ན་ཞེས་བྱ་བ་ནི་དེ་ལས་འདས་པའོ། །བཅད་ནས་

ཞེས་བྱ་བ་ནི་དངོས་པོ་ལྷག་མ་བཅད་ནས་ལྟུང་བ་བཤགས་པར་བྱའོ། །ལྟུང་བ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་གང་ཞེ་ན། དགེ་སློང་མས་གདིང་བ་སྲིད་དུ་ཁྲུ་ཕྱེད་དང་ལྔ། ཞེང་དུ་ཁྲུ་དོ་དང་སོར་དྲུག་ལས་ལྷག་པར་བྱས་ན་ཐམས་ཅད་དུ་ལྟུང་བའོ། །གང་གི་མདུན་དུ་

བཤགས་པ་དེས་ཀྱང་དངོས་པོ་ལྷག་པ་བཅད་དམ་ཞེས་དྲིས་ཤིག་མ་དྲིས་ན་གཉི་ག་ལ་ཉེས་བྱས་སོ། །ལྟུང་བ་ཡང་བཤགས་པ་སླར་བཤགས་པར་བྱའོ། །ལྟུང་བ་བདུན་ཅུ་གཅིག་པ་རྫོགས་སོ།། །།གླེང་གཞི་མཉན་དུ་ཡོད་པ་ན་སྟེ། དེ་ན་དགེ་སློང་མ་ཞིག་གཡན་

པས་བཏབ་སྟེ་གཡན་པ་དགབ་པ་མེད་པར་བསོད་སྙོམས་ལ་སོང་བ་ལས་སྦྲང་མ་དག་འདུ་བར་གྱུར་པ་དང་། ཁྱིམ་བདག་དང་བྲམ་ཟེ་རྣམས་འཕགས་མ་འཁོར་མང་ཞེས་འཕྱ་བ་དགེ་སློང་མ་དག་གིས་སྟོན་པ་ལ་གསོལ་ནས་འདུལ་བ་ལ་བསླབ་པའི་གནས་བཤད་དེ། དགེ་སློང་མ་

Vol. 156 · folio 123b

གཡན་པ་དགབ་པར་བྱེད་ན་ཚད་བཞིན་དུ་གྱིས་ཤིག །དེ་ལ་གཡན་པ་དགབ་པའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་བཞི། ཞེང་དུ་མཐོ་དོའོ། །དེ་ལས་ལྷག་པར་བྱས་ན་བཅད་ནས་ལྟུང་བའོ། །དེ་ལ་གཡན་པ་དགབ་པ་ནི་ནད་ཀྱི་གོས་སོ། །སྲིད་དུ་བདེ་བར་

གཤེགས་པའི་མཐོ་བཞི་ནི་ཁྲུ་ཚད་མ་དྲུག་གོ། །ཞེང་དུ་མཐོ་དོ་ནི་ཁྲུ་ཚད་མ་གསུམ་མོ། །དེ་ལ་ལྟུང་བ་གང་ཞེ་ན་དགེ་སློང་མས་ཅི་ཙམ་དུ་གཡན་པ་དགབ་པ་སྲིད་དུ་ཁྲུ་དྲུག་ཞེང་དུ་ཁྲུ་གསུམ་ལས་ལྷག་པར་བྱས་ན་ཐམས་ཅད་དུ་ལྟུང་བའོ། །གང་གི་མདུན་དུ་བཤགས་པ་

དེས་ཀྱང་དངོས་པོ་ལྷག་མ་བཅད་དམ་ཞེས་དྲིས་ཤིག །མ་དྲིས་པར་བཤགས་ན་གཉི་ག་ལ་ཉེས་བྱས་སོ། །ལྟུང་བ་ཡང་བཤགས་པ་མ་ཡིན་པས་སླར་བཤགས་པར་བྱའོ། །ལྟུང་བ་བདུན་ཅུ་གཉིས་པ་རྫོགས་སོ།། །།བཅོམ་ལྡན་འདས་མཉན་དུ་ཡོད་པ་ན་བཞུགས་

སོ། །དེའི་ཚེ་བསྙེན་དགའ་བོ་བདེ་བར་གཤེགས་པའི་ཆོས་གོས་ཀྱི་ཚད་དང་། དེ་ལས་ལྷག་པའི་ཚད་དུ་གོས་བྱས་ཏེ་གྱོན་པས་དེ་ལྟར་མི་གནང་ངོ་ཞེས་དགེ་སློང་མ་རྣམས་ལ་བསླབ་པ་བཅས་པ་དང་། སྦོམ་དགའ་མོས་བསླབ་པ་འདི་དགེ་སློང་མ་རྣམས་ལ་མ་བཅས་སོ་ཞེས་བདེ་བར་

གཤེགས་པའི་ཆོས་གོས་ཀྱི་ཚད་དང་། དེ་ལས་ལྷག་པའི་ཚད་དུ་ཆོས་གོས་བྱེད་པས། དོན་ཉུང་ངུ་བའི་དགེ་སློང་མ་དག་འཕྱ་སྟེ། སྟོན་པ་ལ་གསོལ་ནས་སྦོམ་དགའ་མོ་རྣམ་གྲངས་དུ་མས་སྨད་དེ་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་མ་གང་བདེ་བར་

གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དམ། བདེ་བར་གཤེགས་པའི་ཆོས་གོས་ལས་ལྷག་པར་བྱེད་ན་ལྟུང་བའོ། །བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་བཅུ། ཞེང་དུ་མཐོ་དྲུག་སྟེ། དེ་ལ་

འདི་ནི་བདེ་བར་གཤེགས་པའི་ཆོས་གོས་ཀྱི་ཚད་དོ། །བདེ་བར་གཤེགས་པའི་མཐོ་བཅུ་ལ་ཁྲུ་ཚད་མ་བཅོ་ལྔའོ། །མཐོ་དྲུག་ལ་ཁྲུ་དགུའོ། །གཞན་ནི་བརྡ་ཕྲད་པར་ཟད་དོ། །དེ་ལ་ལྟུང་བ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་གང་ཞེ་ན། དགེ་སློང་མ་ཇི་ཙམ་དུ་བདེ་

Vol. 156 · folio 124a

བར་གཤེགས་པའི་ཆོས་གོས་ཀྱི་ཚད་དུ་ཆོས་གོས་བྱས་སམ་བདེ་བར་གཤེགས་པའི་ཆོས་གོས་ལས་ལྷག་པར་བྱས་ན་ཐམས་ཅད་དུ་ལྟུང་བར་འགྱུར་རོ། །ལས་དང་པོ་པ་དང་སྨྱོས་པ་དང་སེམས་འཁྲུགས་པ་དང་ནད་ཀྱིས་གཟིར་བ་དག་ལ་ལྟུང་བ་མེད་དོ། །

ལྟུང་བ་བདུན་ཅུ་གསུམ་པ་རྫོགས་སོ།། །།མདོར་བསྟན་པ་ནི། སྒོག་སྐྱ་སྤང་བར་བྱ་བ་དང་། །རྨོངས་ཀྱང་བྲེག་པར་མི་བྱ་དང་། །སོར་མོའི་ཚིགས་གཉིས་མི་འདའ་དང་། །ཐལ་མོ་བརྡེག་པར་མི་བྱ་དང་། །རྗེན་པ་བཙོ་བར་མི་བྱ་དང་། །ཆུས་ཀྱང་གཏོར་

པར་མི་བྱ་དང་། །སྔོན་པོ་བཤང་བ་མི་དོར་དང་། །རྩིག་པའི་རྒྱབ་ཏུ་དོར་མི་བྱ། །བཅོམ་ལྡན་འདས་མཉན་དུ་ཡོད་པ་ན་བཞུགས་ཏེ། འཁོར་མང་པོ་རྣམས་ལ་ཆོས་འཆད་པ་ལས་དགེ་སློང་ཅིག་བདེན་པ་མཐོང་བའི་རྒྱུ་དང་ལྡན་པར་མཁྱེན་ནས་ཆོས་བསྟན་ན་དེས་བདེན་པ་མཐོང་བར་

མ་གྱུར་ཏེ། ཅིའི་ཕྱིར་བདེན་པ་མཐོང་བར་མ་གྱུར་ཅེས་བརྟགས་ན། དགེ་སློང་དེས་སྒོག་སྐྱ་ཟོས་པས་བདེན་པ་མཐོང་བར་མ་གྱུར་ཏེ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་སྒོག་པ་ཟ་བར་མི་བྱ་སྒོག་པ་ཟོས་པར་གྱུར་ན་བདེན་པ་མཐོང་བའི་བར་ཆད་དུ་ཡང་འགྱུར་ལྷའི་འཁོར་

རྣམས་ཉན་པ་དང་། སྲུང་མ་དག་ཀྱང་མི་དགའ་བར་གྱུར་པ་ལས་བཅོམ་ལྡན་འདས་ཀྱིས་ཟར་མ་གནང་བ་དང་། དགེ་སློང་མ་རྣམས་སྒོག་སྐྱ་ཟ་བར་གྱུར་བ་ལས་མི་གནང་བར་བཅས། ཡང་དགེ་སློང་མ་གང་སྒོག་སྐྱ་ཟ་ན་ལྟུང་བའོ། །དགེ་སློང་མ་མི་ན་བར་སྒོག་སྐྱ་ཟ་ན་ཐམས་ཅད་

དུ་ལྟུང་བར་འགྱུར་རོ། །ན་བར་གྱུར་པ་མཚམས་ཀྱི་ཕྱི་རོལ་དུ་འདུག་ལ་བཟའ་བར་བྱའོ། །སྒོག་པ་ཟ་བའི་ཚེ་ཀློག་འདྲི་དང་ཁ་ཏོན་དག་ཀྱང་མི་བྱ། ཁྱིམ་པ་རྣམས་ལ་ཡང་ཆོས་མི་བསྟན། གཙུག་ལག་ཁང་དུ་ཕྱག་ལ་སོགས་པའང་མི་བྱ། དགེ་འདུན་གྱི་ཕྱི་

སར་ཡང་འགྲོ་བར་མི་བྱ། ནད་སོས་ནས་ལུས་དང་ཆོས་གོས་ལ་སོགས་པ་ཁྲུས་བྱས་ནས། གདོད་གཙུག་ལག་ཁང་དུ་སྔོན་བཞིན་དུ་གནས་པར་བྱའོ། །ལྟུང་བ་བདུན་ཅུ་བཞི་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། སྦོམ་དགའ་མོས་བདག་རང་གི་

Vol. 156 · folio 124b

གསང་བའི་སྤུ་རྣམས་བྲེགས་ནས་ཆུ་བོ་ཨ་ཛིར་བ་ཏིར་གཏོར་ཁྱིམ་བདག་མོ་དང་ཁྲུས་བྱེད་པ་ལས་ངོམས་པར་གྱུར་ཏེ། ངའི་འདྲ་བར་ཐིག་ལེ་ཅན་འདི་ཤིན་ཏུ་སྡུག་ཅིང་མཛེས་པས་ཁྱེད་ཀྱང་བྲེག་པའི་རིགས་སོ་ཞེས་བསྟན་པ་ལས། ཁྱིམ་བདག་འཕྱ་ཞིང་མ་དད་པར་གྱུར་པ་ལས་

བཅས། ཡང་དགེ་སློང་མ་གང་རྨོངས་འབྲེག་ན་ལྟུང་བའོ། །ཡང་དགེ་སློང་མས་ཆེད་དུ་བསམས་ཏེ་གསང་བའི་སྤུ་འབྲེག་ན་ལྟུང་བར་འགྱུར་རོ། །དེ་ལ་ཉེས་པ་མེད་པ་ནི་རྨ་བྱུང་བར་གྱུར་ཏམ། ཤུ་བ་བྱུང་བར་གྱུར་ན། དགེ་འདུན་མ་ལ་ཞུས་ཏེ་བྲེག་པར་བྱ། མ་དྲིས་

ན་ཉེས་བྱས་སོ། །ལྟུང་བ་བདུན་ཅུ་ལྔ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་བཞུགས་ཏེ། བཅོམ་ལྡན་འདས་འཁོར་མང་པོ་ལ་ཆོས་འཆད་པའི་ཚེ་དགེ་སློང་མའི་འཁོར་རྣམས་ཁྱིམ་མི་མོ་བཞིན་དུ་དྲི་མི་ཞིམ་པར་གྱུར། བཅོམ་ལྡན་འདས་

ཀྱིས་ཁྲུས་གྱིས་ཤིག་པར་བཀའ་སྩལ་ནས། སྦོམ་དགའ་མོས་མཛུབ་མོའི་ཚིགས་གཉིས་འདས་པར་བཀྲུས་ན་རྨ་བྱུང་ཞིང་སྣད་པར་གྱུར་ཏེ་ངུ་བ་ལས་དགེ་སློང་མ་དག་གིས་ཐོས་ཏེ་ཅིའི་ཕྱིར་ངུ་ཞེས་སྨྲས་ན། གསང་བའི་ཕྱོགས་འཁྲུ་བའི་ཚེ་མཛུབ་མོའི་ཚིགས་གཉིས་

འདས་པར་བཀྲུས་པས་སྣད་པར་གྱུར་ཏེ་ངུའོ་ཞེས་སྨྲས་པ་དང་། དོན་ཉུང་ངུ་བས་འཕྱ་བ་ལ་བཅས་སོ། །ཡང་དགེ་སློང་མ་གང་འཁྲུ་བ་ན་སོར་མོའི་ཚིགས་གཉིས་ལས་འདས་པར་བཅུག་སྟེ་འཁྲུ་ན་ལྟུང་བའོ། །དགེ་སློང་མ་ཁྲུས་བྱེད་པའི་ཚེ་མཛུབ་མོའི་ཚིགས་གཉིས་ལས་འདས་

པར་བཅུག་སྟེ་འཁྲུ་ན་ལྟུང་བའོ། །ཚིགས་གཉིས་མ་འདས་ན་ཉེས་བྱས། །ལྟུང་བ་བདུན་ཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་འདོད་ཆགས་ཀྱིས་གཟིར་བར་གྱུར་ནས་འདིས་ཉེས་བྱས་སོ་ཞེས་

མོ་མཚན་ལ་བརྡེགས་པ་དང་། སྣད་པར་གྱུར་ཏེ་ངུས་པ་ལས་དགེ་སློང་མ་དག་གིས་ཅིའི་ཕྱིར་དུ་ཞེས་སྨྲས་ནས། འདོད་ཆགས་སྐྱེས་པ་ལས་མོ་མཚན་ལ་བརྡེགས་ཏེ་སྣད་ནས་ངུའོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་

Vol. 156 · folio 125a

དང་། བཀའ་སྩལ་པ་དགེ་སློང་མ་འདོད་ཆགས་སྐྱེས་ནས་སེམས་གདུལ་བར་རིགས་པ་ལས་སེམས་མི་གདུལ་བར་མོ་མཚན་བརྡེགས་ན་ལྟུང་བར་འགྱུར་རོ་ཞེས་བཅས། ཡང་དགེ་སློང་མ་གང་གསང་བའི་ཕྱོགས་སུ་ཐལ་མོ་བརྡེགས་ན་ལྟུང་བའོ། །དགེ་

སློང་མས་ཇི་ཙམ་དུ་ཆེད་དུ་བསམས་ཏེ་གསང་བའི་ཕྱོགས་སུ་ཐལ་མོ་བརྡེགས་ན་ལྟུང་བའོ། །ལྟུང་བ་བདུན་ཅུ་བདུན་པ་རྫོགས་སོ།། །།བཅོམ་ལྡན་འདས་མཉན་དུ་ཡོད་པ་ན་བཞུགས་ཏེ། དེའི་ཚེ་ན་ཚེ་དང་ལྡན་པ་ཀུན་དགའ་བོས་བསམས་པ་བདག་

གིས་རྣམ་པ་ཐམས་ཅད་ཀྱི་སྒོ་ནས་བཅོམ་ལྡན་འདས་ལ་བསྙེན་བཀུར་གྱིས་བསྟབས་ན། རང་གི་ལག་གིས་དར་ཏེ་བཙོས་པ་དེ་ལྟ་བུ་ཞིག་བཅོམ་ལྡན་འདས་ལ་མ་གསོལ་གྱིས་བདག་གི་ལག་དར་ཏེ་བཙོས་པ་ཞིག་གསོལ་ཞེས་ཞུས་པ་དང་། བཀའ་སྩལ་པ་དེ་བཞིན་

གཤེགས་པའམ་དེ་བཞིན་གཤེགས་པའི་ཉན་ཐོས་ནི་རང་གིས་བཙོས་པའམ། དགེ་སློང་གིས་བཙོས་པ་བཟའ་བར་མ་བརྟགས་སོ་ཞེས་བཀའ་སྩལ་པ་ལས། ཕྱིས་དགེ་སློང་མ་ཞིག་བདག་ཉིད་ཀྱིས་རྗེན་པ་འཚོད་ཅིང་ཟ་བ་ལས་བཅས། ཡང་དགེ་སློང་མ་གང་རྗེན་

པ་འཚེད་ན་ལྟུང་བའོ། །རྗེན་པ་འཚེད་ཅེས་བྱ་བ་ནི་བཟའ་བ་ལྔ་དང་བཅའ་བ་ལྔ་སྔར་གཞན་གྱིས་མ་བཙོས་པར་བདག་འཚེད་ན་ལྟུང་བའོ། །དེ་ལ་ཉེས་པ་མེད་པ་ནི་སྔར་གཞན་གྱིས་བཙོས་པ་ལས་མ་ཚོས་པའམ། སྔར་ལྷན་ཅིག་བསྣུན་པ་བདག་ཉིད་ཀྱིས་བཙོས་ནའང་

ཉེས་པ་མེད་དོ། །ལྟུང་བ་བདུན་ཅུ་བརྒྱད་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་དང་འོད་སྲུངས་ཆེན་པོ་ཟམ་པའི་འོག་ཏུ་ཕྲད་པ་དང་། སྦོམ་དགའ་མོས་སྨྲས་པ་འདི་ནི་སྔོན་མུ་སྟེགས་ཅན་རིགས་དམའ་བ་ལས་རབ་ཏུ་བྱུང་

བའོ་ཞེས་ཚིག་གིས་སྤོས་ནས་ཆུས་ཀྱང་གཏོར་བ་ལས་བཅས་སོ། །ཡང་དགེ་སློང་མ་གང་འཁོར་གྱི་གཙོ་བོ་ལ་ཆུ་གཏོར་ན་ལྟུང་བའོ། །འཁོར་གྱི་གཙོ་བོ་ལ་ཞེས་བྱ་བ་ནི་དགེ་འདུན་གྱི་གནས་བརྟན་ནམ་དགེ་སློང་ཕ་ལ་བྱ་སྟེ་དགེ་སློང་མས་ཆེད་དུ་བསམས་ཏེ་ཆུ་གཏོར་ན་ལྟུང་

Vol. 156 · folio 125b

བའོ། །དེ་ལ་ཉེས་པ་མེད་པ་ནི་བརྒྱལ་བར་གྱུར་པ་ལས་ཆུ་གཏོར་རམ་ནད་ཀྱིས་བཏབ་པ་ལ་ཆུ་གཏོར་ན་ཉེས་པ་མེད་དོ། །ལྟུང་བ་བདུན་ཅུ་དགུ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་བཞུགས་ཏེ། སྦོམ་དགའ་མོས་ལྡུམ་པ་ཞིག་ལ་ཤང་ཙེ་བསླངས་

པ་ལས་མ་བྱིན་པ་དང་། དེའི་ནུབ་མོ་འཁྲུ་སྨན་འཐུངས་ཏེ་ངན་སྐྱུགས་བསགས་ནས་ཤང་ཙེ་ཟད་པར་བསྐུས་པ་དང་། ཁྱི་དག་གིས་ཟོས་ནས་ལྡུམ་པ་དེ་མ་དད་ཅིང་འཕྱ་བ་ལས་བཅས་ཡང་དགེ་སློང་མ་གང་རྩྭ་སྔོན་པོ་ལ་བཤང་བ་འདོར་ན་ལྟུང་བའོ། །དགེ་སློང་མས་ས་གཞན་

ཡོད་བཞིན་དུ་སྔོན་པོའི་ས་ཕྱོགས་སུ་བཤང་བ་འདོར་ན་ལྟུང་བའོ། །ཉེས་པ་མེད་པ་ནི་ཕྱོགས་ཐམས་ཅད་སྔོ་སྟེ་ས་གཞན་མེད་ན་ཉེས་པ་མེད་དོ། །ལྟུང་བ་བརྒྱད་ཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་མང་དུ་ནི་ཟ་ཉུང་ངུ་ནི་མི་འཐུང་

བ་ལས་བཤང་བ་གཅི་བ་དག་མང་བར་གྱུར་ཏེ། ནུབ་མོ་གཙུག་ལག་ཁང་གི་སྒོ་བཅད་པས་ངན་སྐྱུགས་སྣོད་དུ་བསགས་པ་ལས་དེའི་ཚེ་རྒྱལ་པོ་གསལ་རྒྱལ་གྱིས་བློན་པོ་དཔལ་འཕེལ་ཞེས་བྱ་བ་བཀའ་ཆད་ཅིག་བཅད་པ་ལས། དེའང་རྒྱལ་པོ་ལ་བཟོད་པ་གསོལ་དུ་འགྲོ་

བའི་ལམ་དུ་དགེ་སློང་མའི་དབྱར་མོ་ཁང་གི་དྲུང་དུ་བྱུང་བ་ལས་སྦོམ་དགའ་མོས་མ་བརྟགས་པར་མི་གཙང་བའི་བུམ་པ་རྩིག་པའི་རྒྱབ་ཏུ་འཕངས་པ་ལས་དེའི་མགོ་བོར་ཕོག་ནས་དཔལ་འཕེལ་གྱིས་བསམས་པ། ཡང་ན་ནི་བདག་ལ་བཀྲ་ཤིས་པར་འགྱུར། ཡང་ན་ནི་བདག་ལ་མི་

དགེ་བར་འགྱུར་རོ་ཞེས་བསམས་ནས་སོང་སྟེ་རྒྱལ་པོ་ལ་བཟོད་པར་གསོལ་བ་དང་། རྒྱལ་པོས་ཀྱང་བཟོད་པར་གནང་སྟེ་བློན་པོ་དེ་ཡང་དགའ་བར་གྱུར་ནས་བདག་ལ་མི་གཙང་བའི་བུམ་པས་འཐོར་བ་གང་ཡིན་པ་དེ་ལ་རས་ཆེན་པོ་ཞིག་སྦྱིན་ནོ་སྙམ་ནས། དགེ་སློང་མའི་དབྱར་མོ་ཁང་

དུ་སྨྲས་པ་དང་། སྦོམ་དགའ་མོ་ཡིན་པར་གྱུར་ཏེ་དེ་ལ་བྱིན་ནོ། །ཕྱིས་སྦོམ་དགའ་མོ་དགེ་སློང་མ་གཞན་དག་དང་འཐབ་པར་གྱུར་པ་དང་། ངའི་བཤང་བ་ཙམ་ཡང་ཁྱོད་ཀྱིས་མི་ནུས་ཏེ་ངའི་བཤང་བས་ཀྱང་རས་ཆེན་པོ་འདི་ལྟ་བུ་རྙེད་དོ་ཞེས་ངོམས་པ་ལས་བཅས།

Vol. 156 · folio 126a

ཡང་དགེ་སློང་མས་གང་མ་བརྟགས་པར་རྩིག་པའི་རྒྱབ་ཏུ་བཤང་བ་འདོར་ན་ལྟུང་བའོ། །དགེ་སློང་མས་རྩིག་པའི་རྒྱབ་ཏུ་སྔར་མ་བརྟགས་པར་བཤང་བ་འདོར་ན་ལྟུང་བར་འགྱུར་རོ། །ལྟུང་བ་བརྒྱད་ཅུ་གཅིག་པ་རྫོགས་སོ།། །།

མདོར་བསྟན་པ་ནི། སྐྱབས་ཡོད་པར་ནི་སྐྱེས་པ་དང་། །དགེ་སློང་དང་ཡང་འགྲེང་མི་བྱ། །བླ་གབ་མེད་པར་སྐྱེས་པ་དང་། །གཅིག་པུ་དགེ་སློང་གནས་མི་བྱ། །རྣ་བར་བཤུབ་པར་བྱེད་པ་གཉིས། །བདག་ལ་བརྡེག་པར་མི་བྱ་དང་། །ཚངས་པར་སྤྱོད་པ་མནལ་རྡོ་

དང་། །ལེགས་པར་མ་མཐོང་མི་གླེང་ངོ་། །སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་སྤོས་འཚོང་ཁྱེའུ་དང་གནས་ཁང་གཅིག་ཏུ་འདུག་ཏུ་མ་གནང་བ་དང་། སྦོམ་དགའ་མོས་བསམས་པ་གནས་ཁང་གཅིག་གི་ནང་དུ་འདུག་ཏུ་མ་གནང་ན་ཡང་

འགྲེང་བ་ནི་ཉེས་པ་མེད་དོ་སྙམ་ནས། སྤོས་འཚོང་ཁྱེའུ་དང་འགྲེང་ཞིང་གཏམ་རྣམ་པ་སྣ་ཚོགས་སྨྲ་བ་ལས་བཅས། །ཡང་དགེ་སློང་མ་གང་སྐྱེས་པ་དང་ལྷན་ཅིག་དབེན་པ་སྐྱབས་ཡོད་པ་ན་འགྲེང་ན་ལྟུང་བའོ། །དབེན་པ་སྐྱབས་ཡོད་པ་ཞེས་བྱ་བ་ནི་ཁྱིམ་རྣམ་པ་བཞི་གོང་

དུ་སྨོས་པ་དང་འདྲའོ། །བདག་ཀྱང་གཅིག་པུ་སྐྱེས་པ་ཡང་གཅིག་པུ་སྟེ། །གཞན་མེད་པར་དབེན་པར་འགྲོ་ཞིང་གཏམ་ཟེར་ན་ལྟུང་བའོ། །ཉེས་པ་མེད་པ་ནི་ཕ་མིང་དང་གཏམ་ཟེར་བ་ལ་ཉེས་པ་མེད་དོ། །ལྟུང་བ་བརྒྱད་ཅུ་གཉིས་པ་རྫོགས་སོ།། །།སྟོན་པ་

མཉན་དུ་ཡོད་པ་ན་སྟེ། དགེ་སློང་མ་རྣམས་བསོད་སྙོམས་ལ་དོང་། དེའི་ཚེ་དགེ་སློང་མ་སྦེད་མ་ལ་ཁང་སྐྱོང་གི་རེས་བབ་སྟེ། གཙུག་ལག་ཁང་གི་ཕྱག་དར་བྱེད་ཅིང་འདུག་པ་ལས་འཆར་བ་ཡང་དེར་འོངས་ཏེ་འགྲོ་ཞིང་སྔོན་གྱི་གཏམ་རྣམ་པ་སྣ་ཚོགས་ཟེར་བ་ལས་དགེ་སློང་མ་ནད་

པ་ཞིག་གིས་མཐོང་ནས། དགེ་སློང་མ་དག་སླར་ལྷགས་ན་གཙུག་ལག་ཁང་གི་ཕྱག་དར་ལ་སོགས་པ་མ་ཟིན་ནས། ཅིའི་ཕྱིར་མ་ཟིན་ཞེས་སྨྲས་པ་དང་། ནད་པ་དེས་ཇི་ལྟ་བུར་གྱུར་པ་ཞིབ་ཏུ་སྨྲས་ཏེ་དགེ་སློང་མ་དག་འཕྱ་བ་ལས་བཅས། ཡང་དགེ་སློང་མ་གང་དགེ་སློང་དང་

Vol. 156 · folio 126b

ལྷན་ཅིག་སྐྱབས་ཡོད་པ་ན་འགྲེང་ན་ལྟུང་བའོ། །ལྟུང་བའི་ཁྱད་པར་ནི་གོང་མ་དང་འདྲའོ། །ལྟུང་བ་བརྒྱད་ཅུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་བསམས་པ་དབེན་པ་སྐྱབས་ཡོད་པར་ནི་འགྲེང་ཞིང་གཏམ་

ཟེར་དུ་བཅོམ་ལྡན་འདས་ཀྱིས་མ་གནང་བས། བླ་གབ་མེད་པར་འགྲེང་ཞིང་གཏམ་བྱས་ཀྱང་ཉེས་པ་མེད་དོ་སྙམ་ནས། འགྲེང་ཞིང་གཏམ་རྣམ་པ་སྣ་ཚོགས་ཟེར་བ་ལས་བཅས་སོ། །ཡང་དགེ་སློང་མ་གང་སྐྱེས་པ་དང་། ལྷན་ཅིག་བླ་གབ་མེད་པ་ན་འགྲེང་ན་ལྟུང་

བའོ། །ལྟུང་བའི་ཁྱད་པར་ནི་གོང་མ་དང་འདྲའོ། །ལྟུང་བ་བརྒྱད་ཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦེད་མ་དང་འཆར་བ་གཉིས་བླ་གབ་མེད་པར་འགྲེང་ཞིང་གཏམ་རྣམ་པ་སྣ་ཚོགས་ཟེར་བ་ལས་བཅས་ཏེ། ཡང་དགེ་སློང་མ་གང་

གཅིག་པུ་དགེ་སློང་དང་ལྷན་ཅིག་བླ་གབ་མེད་པ་ན་འགྲེང་ན་ལྟུང་བའོ། །འདིའི་ཁྱད་པར་ཡང་གོང་མ་དང་འདྲའོ། །ལྟུང་བ་བརྒྱད་ཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་གཅིག་པུ་གནས་ཁང་གཅིག་ན་གནས་པ་ལས་ཕྱེ་མ་

རེད་ཁར་སྤོས་འཚོང་གི་ཁྱེའུ་ཁྲིའི་འོག་ཏུ་སྦས་ཏེ་བཞག་ནས། དེའི་འོག་ཏུ་བརྗེད་དེ་ཁྱེའུ་དེ་བྱུང་ནས་སྦོམ་དགའ་མོ་ཡང་སྐྲག་པར་གྱུར་ནས་རྐུན་པོ་བྱུང་ངོ་ཞེས་ཁུས་བཏབ་པ་དང་། དགེ་སློང་མ་དག་གིས་སྨྲས་ཏེ་སྤོས་འཚོང་ཡིན་པ་དང་འཕྱ་བས། བཅོམ་ལྡན་འདས་ཀྱིས་

ཁྱིམ་ཟླ་མེད་པར་དགེ་སློང་མ་གཅིག་པུ་མ་གནས་ཤིག །གཅིག་པུ་གནས་ན་ལྟུང་བར་འགྱུར་རོ་ཞེས་བཅས། ཡང་དགེ་སློང་མ་གང་གཅིག་པུ་གནས་ཁང་ན་གནས་ན་ལྟུང་བའོ། །དགེ་སློང་མས་ཤེས་བཞིན་དུ་གཅིག་པུ་གནས་ཁང་གཅིག་གི་ནང་དུ་གནས་པར་བྱེད་ན་ལྟུང་

བའོ། །བསམ་གཏན་གྱི་མཐུ་ཁུགས་སུ་ཉེ་བའམ་ཁུགས་ཟིན་ན་ཉེས་པ་མེད་དོ། །ལྟུང་བ་བརྒྱད་ཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་སྐྱེས་པའི་རྣ་བར་བཤུབས་པ་ལས་བཅས། ཡང་དགེ་སློང་མ་གང་སྐྱེས་པའི་རྣ་བར་བཤུབས་

Vol. 156 · folio 127a

ན་ལྟུང་བའོ། །ལྟུང་བ་བརྒྱད་ཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོའི་རྣ་བར་སྐྱེས་པས་བཤུབས་པ་ལས་བཅས། ཡང་དགེ་སློང་མ་གང་སྐྱེས་པས་རྣ་བར་བཤུབས་པ་ཉན་ན་ལྟུང་བའོ། །ལྟུང་བ་བརྒྱད་ཅུ་བརྒྱད་

པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་དགེ་སློང་དག་གི་རྣ་བར་བཤུབས་པ་ལས་བཅས་སོ། །ཡང་དགེ་སློང་མ་གང་དགེ་སློང་གི་རྣ་བར་བཤུབས་ན་ལྟུང་བའོ། །ལྟུང་བ་བརྒྱད་ཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ།

སྦོམ་དགའ་མོའི་རྣ་བར་དགེ་སློང་དག་གིས་བཤུབས་པ་ཉན་པ་ལས་བཅས། ཡང་དགེ་སློང་མ་གང་དགེ་སློང་གིས་རྣ་བར་བཤུབས་པ་ཉན་ན་ལྟུང་བའོ། །ལྟུང་བ་དགུ་བཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་དགེ་སློང་མ་གཞན་དང་འཐབ་

པ་ལས་དེའི་འོག་ཏུ་ཁྲོས་ནས་བདག་ཉིད་ལ་བརྡེག་པ་ལས་བཅས། ཡང་དགེ་སློང་མ་གང་ཁྲོས་ནས་བདག་ལ་བརྡེགས་ན་ལྟུང་བའོ། །དེ་ལ་དགེ་སློང་མས་ཇི་ཙམ་དུ་ཁྲོས་འཁྲུགས་རྔམས་ཏེ། བདག་ཉིད་ལ་ཁུ་ཚུར་དང་ཐལ་མོ་དང་རྡོ་དབྱུག་གིས་བརྡེགས་ཀྱང་རུང་སྟེ་ལྟུང་བར་འགྱུར་རོ། །

ལྟུང་བ་དགུ་བཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་ལ་ཁྱིམ་བདག་གིས་ཅི་དག་མཐོང་ངམ་ཐོས་སམ་ཞེས་སྨྲས་ནས། མཐོང་རེ་དཀོན་མཆོག་གསུམ་མེད་པར་གྱུར། ཚུལ་ཁྲིམས་མེད་པར་གྱུར་ཅེས་པ་ལས་

བཅས། ཡང་དགེ་སློང་མ་གང་ཚངས་པར་སྤྱོད་པ་མནའ་རྡོར་བྱེད་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཚངས་པར་སྤྱོད་པ་ཞེས་བྱ་བ་ནི་མྱ་ངན་ལས་འདའ་བའོ། །དེ་ལ་མནའ་རྡོར་བྱེད་ཅེས་བྱ་བ་ནི་དེ་ལ་མནའ་འདོར་བའོ། །དེ་ལ་མཐོང་རེ་

སངས་རྒྱས་མེད་པར་གྱུར་ཅིག་ཅེས་བྱ་ནའང་ལྟུང་བའོ། །ཆོས་ཞིག་པར་གྱུར་ཅིག་ཅེས་བྱ་ནའང་ལྟུང་བའོ། །དགེ་འདུན་མེད་པར་གྱུར་ཅིག་ཅེས་ཟེར་ནའང་ལྟུང་བའོ། །ངའི་ཚུལ་ཁྲིམས་ལ་གཏོགས་ཞེས་ཟེར་ན་ལྟུང་བའོ། །དགེ་སློང་གྲོགས་དགའ་བ་དང་། ཕ་མ་དང་། ཁྱིམ་

Vol. 156 · folio 127b

པ་གཞན་ལ་མནའ་རྡོར་བྱེད་ན་ཉེས་བྱས་སོ། །མནའ་རྡོར་བྱེད་ན་ཉེས་བྱས། ལྟུང་བ་དགུ་བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་མང་པོ་རྣམས་དགེ་འདུན་གྱི་ལྷག་མ་བྱུང་བའི་གང་ཟག་དང་ཉེས་པ་གཞན་བྱུང་བ་རྣམས་ལ་མཐོང་

བ་དང་ཐོས་པ་དང་དོགས་པ་མེད་པར་སྤང་བའི་ལས་བྱེད་པ་ལས་བཅས། ཡང་དགེ་སློང་མ་གང་ལེགས་པར་མ་མཐོང་བ་ལ་སོགས་པ་གླེངས་ན་ལྟུང་བའོ། །ཡང་དགེ་སློང་མས་ཉེས་པ་མ་མཐོང་བར་གླེངས་ཏེ་སྤང་བའི་ལས་བྱེད་ན་འང་ལྟུང་བ། མ་ཐོས་པར་གླེངས་ནའང་ལྟུང་

བའོ། །མི་དོགས་པར་གླེངས་ན་ཡང་ལྟུང་བའོ། །སོ་སོ་ནས་བསྣོར་ཏེ་གླེངས་ན་འང་ལྟུང་བའོ། །ལྟུང་བ་དགུ་བཅུ་གསུམ་པ་རྫོགས་སོ།། །།མདོར་བསྟན་པ་ནི། མུན་པ་རྒྱ་སྐྱེགས་ཆང་ཆང་དང་། །མ་གཏད་པར་ནི་འགྲོ་མི་བྱ། །ཁྱིམ་པ་དག་གི་སྟན་ལ་འང་མིན། །དེ་

ལ་གནས་པར་བྱ་མ་ཡིན། །སྔ་ན་གནས་པར་ཤེས་པ་དང་། །ནད་པ་ལ་ཡང་ངན་གྲོགས་བྱ། །དབྱར་མོ་ཁང་ནས་བསྐྲད་མི་བྱ། །ཁྲི་དང་གདིང་བ་གཅིག་ལའང་མིན། །སྟོན་པ་མཉན་དུ་ཡོད་པ་ན་སྟེ། དགེ་སློང་མ་དག་ཅིག་ལྗོངས་རྒྱུར་དོང་བ་ལས། ཁང་པ་མུན་ཅན་ཞིག་ཏུ་

མ་བརྟགས་པར་ནུབ་མོ་ནང་དུ་ཞུགས་པ་ལས་ཁྱིམ་པ་དག་གིས་བཟུང་སྟེ། མི་ཚངས་པར་སྤྱད་པ་ལས་བཅས། ཡང་དགེ་སློང་མ་གང་མ་བརྟགས་པར་གནས་ན་ལྟུང་བའོ། །ཅི་ཙམ་དུ་དགེ་སློང་མས་ཁང་པ་སྔར་མུན་ནག་ཅན་དུ་མ་བརྟགས་པ་ལ་མ་བརྟགས་པར་ཤེས་བཞིན་དུ་

འདུག་ན་ལྟུང་བར་འགྱུར་རོ། །སྔར་བརྟགས་སམ་མུན་པ་མེད་པ་ནི་ཉེས་པ་མེད་དོ། །ལྟུང་བ་དགུ་བཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་འདོད་ཆགས་ཀྱིས་གཟིར་ནས་ཁྱིམ་མི་མོ་རྣམས་ལ། ཁྱེད་ཁྱིམ་ཐབ་མེད་པའི་ཚེ་འདོད་

ཆགས་ཀྱིས་གཟིར་བ་ན་ཐབས་ཅི་ལྟར་འདོད་ཆགས་སེལ། དེ་དག་གིས་སྨྲས་པ། རྒྱ་སྐྱེགས་ཀྱི་ཆང་ཆང་པོ་འཛུད་དོ། །དེ་ནས་ཡང་བཙུན་མོ་ཕྲེང་ལྡན་མའི་དེར་སོང་སྟེ། སྦོམ་དགའ་མོས་སྨྲས་པ། རྒྱལ་པོ་བྱ་བ་དང་བྱེད་པ་དག་ལ་སོང་བའི་ཚེ་འདོད་ཆགས་ཀྱིས་གཟིར་

Vol. 156 · folio 128a

ན་ཐབས་གང་གིས་ཞི་བར་བྱེད། བཙུན་མོས་སྨྲས་པ། དེ་ནི་ཁྱིམ་མི་མོས་བྱས་པ་ཡིན་ན། ཁྱེད་རབ་ཏུ་བྱུང་བས་ཅི་ཞིག་བྱ། སྦོམ་དགའ་མོས་སྨྲས་པ། བདག་ཀྱང་འདོད་ཆགས་ཀྱིས་རབ་ཏུ་གཟིར་བར་གྱུར་ཏོ། །བཙུན་མོས་སྨྲས་པ། རྒྱ་

སྐྱེགས་ཀྱི་ཆང་ཆང་གིས་ཞི་བར་བགྱིད་དོ། །དགེ་སློང་མ་སྦོམ་དགའ་མོ་ཡང་ནམ་འདོད་ཆགས་ཀྱིས་གཟིར་བར་གྱུར་པ་དེ་ན་རྒྱ་སྐྱེགས་ཆང་ཆང་རྟིང་པ་ལ་སྦྱར་ཏེ་འཇུག་པ་ལས། དེའི་དུས་སུ་ཁང་པ་མེ་ཤོར་བས་རྟིང་པ་ལ་ཆགས་བཞིན་དུ་བྱུང་བ་དང་། མེ་གསོད་པའི་ར་མདའ་བ་

ཁྱིམ་པ་དག་གིས་མཐོང་སྟེ། སྦོམ་དགའ་མོ་ལ་འདི་ཇི་ཞེས་དྲིས་ན་ཁྱེད་ཀྱིས་མ་ལ་དྲིས་ཤིག །སྲིང་མོ་ལ་དྲིས་ཤིག་ཅེས་བྱས་པས་ཁྱིམ་པ་རྣམས་འཕྱ་བ་ལས་བཅས། ཡང་དགེ་སློང་མས་རྒྱ་སྐྱེགས་ཀྱི་ཆང་ཆང་འཇུག་ན་ལྟུང་བའོ། །ཡང་དགེ་སློང་མས་འདོད་ཆགས་ཀྱི་

དབང་གིས་ཆེད་དུ་བསམས་ཏེ་རྒྱ་སྐྱེགས་ལ་སོགས་པའི་ཆང་ཆང་འཇུག་ན་ལྟུང་བའོ། །ལྟུང་བ་དགུ་བཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་གྲོང་གི་དབུས་སུ་ཁྱིམ་མི་མོ་རྣམས་བསྡུས་ནས་ཁ་ཕུག་ཏུ་བལྟས་ཏེ་ཆོས་མང་དུ་སྟོན་

ཅིང་འཆད་པ་ལས། ཁྱིམ་མི་མོ་རྣམས་ཁྱིམ་གྱི་བྱ་བ་དང་བྱེད་པས་བྲེལ་ཏེ་སོ་སོར་ལངས་ཏེ་དོང་བ་དང་། སྦོམ་དགའ་མོ་ཁ་ཕུག་ཏུ་བལྟས་པས་མ་མཐོང་སྟེ། ད་དུང་ཡང་ཆོས་སྒྲོགས་པ་ལས། གྲོགས་མོ་ཁྱོད་སུ་ལ་ཆོས་འཆད་ཅེས་དྲིས་ན་ཁྱིམ་མི་མོ་རྣམས་ལ་འཆད་དོ་ཞེས་

སྨྲས་པ་དང་། དེས་སྨྲས་པ་ཁྱིམ་མི་མོ་རྣམས་ནི་དོང་ཟིན་ཏོ་ཞེས་སྨྲས་ནས། དེ་དག་གིས་ཀྱང་སྟན་རྣམས་བོར་ཏེ་སོང་བ་ལས། སྟན་རྣམས་རྐུན་པོ་དག་གིས་ཁྱེར་ཏེ་སྟོར་བར་གྱུར་ནས་ཁྱིམ་པ་རྣམས་མ་དད་པར་གྱུར་པ་ལས་བཅས། ཡང་དགེ་སློང་མ་གང་ཆོས་འཆད་ན་ཁྱིམ་པའི་སྟན་

ཁྱིམ་པ་ལ་མ་གཏད་པར་སྟན་བོར་ཏེ་སོང་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མས་ཅི་ཙམ་དུ་ཁྱིམ་མི་མོ་རྣམས་ལ་ཆོས་འཆད་པའི་ཚེ་ཁྱིམ་པ་རྣམས་དོང་བར་ཤེས་བཞིན་དུ། སྟན་བདག་ཉིད་ཀྱིས་མ་བརྟུལ་ཏམ། ཁྱིམ་པ་ལ་བརྟུལ་

Vol. 156 · folio 128b

ཅིག་ཅེས་མ་བསྒོ་བར་སོང་ན་འདོམ་བཞི་བཅུ་རྩ་དགུ་ཚུན་ཆད་ནི་ཉེས་བྱས། དེ་ལས་རིང་དུ་སོང་ན་ལྟུང་བའོ། །བར་ཆད་བརྒྱད་བྱུང་ན་ཉེས་མེད་དོ། །ལྟུང་བ་དགུ་བཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་ཞུགས་པ་ལས་

ཁྱིམ་བདག་གཙང་སྦྲ་ལ་དགའ་བ་ཞིག་གི་སྒོར་ཕྱིན་ཏེ། །ཁྱིམ་བདག་དེའི་མལ་སྒོ་ཁྱམས་ན་འདུག་པ་བུ་མོ་ཞིག་བསྲུང་ཞིང་མིས་རེག་པ་ལྟ་ཅི་སྨོས་ཏེ། ཆུང་ངུ་ན་སྦྲང་མ་ཡང་འདུག་ཏུ་མི་རུང་སྟེ་སྐྲོད་པ་ལས་སྦོམ་དགའ་མོས་སྨྲས་པ། མཚན་བཟངས་མོ་བསོད་སྙོམས་བྱིན་ཅིག་ཅེས་

སྨྲས་པ་དང་། བུ་མོས་སྨྲས་པ་བདག་ནི་མལ་འདི་སྲུང་ངོ་། །སྦོམ་དགའ་མོས་སྨྲས་པ་བསོད་སྙོམས་ཁྱེར་ཤོག །དེའི་བར་དུ་སྲུང་ངོ་ཞེས་ནས་བུ་མོས་བསོད་སྙོམས་ལེན་དུ་སོང་བའི་འོག་ཏུ་སྦོམ་དགའ་མོས་རྐང་པ་མ་བཀྲུས་པ་ཁྱིམ་བདག་དེའི་མལ་ཐོག་ཏུ་འདུག་པ་ལས། ཁྱིམ་བདག་དེ་མ་

དད་ཅིང་འཕྱ་བ་ལས་བཅས། ཡང་དགེ་སློང་མ་མ་བསྒོ་བར་ཁྱིམ་པའི་ཁྱིམ་དུ་སྟན་ལ་འདུག་ན་ལྟུང་བའོ། །དགེ་སློང་མས་ཁྱིམ་པ་འདུག་པ་ལ་མ་དྲིས་པར་ཁྱིམ་པའི་སྟན་ལ་འདུག་ན་ལྟུང་བའོ། །ལྟུང་བ་དགུ་བཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་

ཅིག་ལྗོངས་རྒྱུར་དོང་བ་ལས་ཕྱེམ་རེད་དགོངས་སུ་ཁྱིམ་བདག་པོ་ནི་མེད། ཁྱིམ་བདག་མོ་ལ་དྲིས་ནས་དེར་ཉལ་བ་ལས་ཁྱིམ་བདག་ཀྱང་ཕྱིས་འོངས་ཏེ། དེ་ཆུང་མ་དང་ཡོངས་སུ་སྤྱོད་པ་ལས། དེའི་ཆུང་མ་ཉོར་ཞིང་སྐད་མི་སྙེན་པར་ཟེར་བ་ལས་དགེ་སློང་མ་དེ་དག་གིས་ཐོས་ཏེ་དགེ་སློང་

མ་གཞོན་ནུ་མ་ཞིག་གིས་གད་མོ་ཤོར་ནས། ཁྱིམ་བདག་དེ་ལ་འཕྱ་ཞིང་མི་སྙན་པར་ཟེར་བ་ལས་བཅས་སོ། །ཡང་དགེ་སློང་མ་གང་ཁྱིམ་བདག་ལ་མ་དྲིས་པར་གནས་པར་བྱེད་ན་ལྟུང་བའོ། །དགེ་སློང་མས་ཇི་ཙམ་དུ་ཁྱིམ་བདག་པོ་ལ་མ་དྲིས་པར་ཁྱིམ་བདག་གི་ཁྱིམ་དུ་ཞག་ལོན་པར་བྱེད་

ན་ལྟུང་བའོ། །བུད་མེད་དབང་ཆེ་བ་ཡུགས་ས་མོ་ལ་དྲིས་པ་ལ་ཉེས་པ་མེད་དོ། །ལྟུང་བ་དགུ་བཅུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་ལྗོངས་རྒྱུ་ཞིང་དོང་བ་ལས། ཁྱིམ་བདག་གི་གྲོང་དུ་ཕྱིན་ཏེ། དེ་ན་སྔ་ན་དགེ་སློང་

Vol. 156 · folio 129a

མ་འཁོད་པ་གང་གིས་ཁྱིམ་པའི་ཐ་སྙད་ཀྱིས་བསུ་བ་དང་། ཕྱག་བྱས་པ་ལ་སོགས་པ་མ་བྱས་པས་སྦོམ་དགའ་མོ་ཁྲོས་ཏེ། དེ་དག་བསྐྲད་ནས་བདག་ཉིད་དེར་གནས་པ་ལ་བཅས། ཡང་དགེ་སློང་མ་གང་ཁྱིམ་པའི་ཁྱིམ་ན་སྔོན་གནས་པ་སྐྲོད་ན་ལྟུང་བའོ། །

ཡང་དགེ་སློང་མ་གང་གིས་ཁྱིམ་པའི་ཁྱིམ་ན་དགེ་སློང་མ་སྔ་ན་གནས་པ་ལས་བདག་ཕྱིས་འོངས་ཏེ་ཁྲོས་ནས་སྐྲོད་པར་བྱེད་ན་ལྟུང་བའོ། །དེ་ལ་ཉེས་པ་མེད་པ་ནི་གནས་དེ་ནས་མ་བསྐྲད་ན་སྲོག་ལ་སྨན་པའམ། ཚངས་པར་སྤྱོད་པའི་བར་ཆད་དུ་འགྱུར་བ་ཙམ་གྱི་ཚོད་ན་ཉེས་པ་མེད་དོ། །ལྟུང་བ་དགུ་

བཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་སློབ་མ་དང་ཉེ་གནས་དག་སྔར་བསྙེན་ནས། ཕྱིས་ནད་ཀྱིས་བཏབ་པར་གྱུར་པ་ལ་ནད་གཡོག་དང་སྨན་དང་ཟས་དག་མ་བྱིན་པ་ལས་བཅས། ཡང་དགེ་སློང་མ་གང་ལྷན་ཅིག་གནས་པ་

དང་། ཉེ་གནས་བསྙེན་པ་ལ་ནད་ཀྱིས་བཏབ་ནས་གྲོགས་མི་བྱེད་ན་ལྟུང་བའོ། །དགེ་སློང་མས་དགེ་སློང་མ་དང་ཉེ་གནས་རབ་ཏུ་བྱུང་ཞིང་བསྙེན་པར་རྫོགས་པར་བྱས་ལ་དེའི་འོག་ཏུ་ན་བར་གྱུར་ལ་ནད་གཡོག་མི་བྱེད་ན་ལྟུང་བའོ། །སྨན་མི་བྱེད་ན་ཡང་ལྟུང་བའོ། །ཁ་ཟས་ལ་སོགས་པས་

གསོ་བར་མི་བྱེད་ན་ཡང་ལྟུང་བའོ། །བདག་ལ་མེད་ན་གཞན་ལས་བཙལ་ཏེ་སྦྱིན་ནོ། །བདག་མི་ཁོམ་ན་གཞན་ལ་ཡང་བཅོལ་ཏེ་ནད་གཡོག་བྱེད་དུ་གཞུག་གོ། །ཡོ་བྱད་མ་རྙེད་པའམ། མེད་པའམ་བར་ཆད་བརྒྱད་བྱུང་ན་ཉེས་པ་མེད་དོ། །ལྟུང་བ་བརྒྱ་པ་རྫོགས་སོ།། །།

སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བསམས་པ། སྐྱེ་དགུའི་བདག་མོ་ཆེན་མོ་ནི་སྤང་བ་ཕུན་སུམ་ཚོགས་པ་དང་ལྡན་པས་དེ་དང་ལྷན་ཅིག་གནས་པར་ཡང་བདག་གིས་མི་ནུས། ཆོས་སྦྱིན་མ་ནི་འཁོར་མང་བས་དེ་དང་གནས་པར་ཡང་བདག་གིས་མི་ནུས་ཏེ། གཽ་ཏ་མ་

རིད་དེ་མ་དང་ལྷན་ཅིག་ཏུ་གནས་སོ་སྙམ་ནས། དེ་དང་ལྷན་ཅིག་ཏུ་གནས་པར་གྱུར་པ་ལས། སྲོད་ཀྱི་དུས་སུ་སྦོམ་དགའ་མོ་ཟས་བཟང་པོའི་གཏམ་དང་། ཟས་ཞིམ་པོའི་གཏམ་མང་དུ་བྱེད་ཅིང་དེ་འབའ་ཞིག་གིས་ནམ་ནངས་པར་བྱེད་དེ། སློབ་མ་དག་ལ་ཆོས་མི་སློབ་བོ། །དེ་ནས་སྔ་དྲོའི་

Vol. 156 · folio 129b

དུས་སུ་བསོད་སྙོམས་ལ་འཇུག་པར་བྱེད་དོ། །སྦོམ་དགའ་མོ་རྟག་པར་ཡང་དེ་ལྟར་བྱེད་པ་ལས་གཽ་ཏ་མ་རིད་དེ་མས་དེའི་འཁོར་རྣམས་མི་དགེ་བ་ལས་བཟློག་སྟེ་དགེ་བ་ལ་བཙུད་པ་ལས་སྦོམ་དགའ་མོ་ཁྲོས་འཁྲུགས་རྔམས་ནས་གཽ་ཏ་མ་རིད་དེ་མ་འདི་སྔོན་བུ་ཤ་ཟ་བ་ཡིན་ནོ་ཞེས་འཛེར་ཅིང་བསྐྲད་

པ་ལས་བཅས། ཡང་དགེ་སློང་མ་གང་དབྱར་མོ་ཁང་ནས་དགེ་སློང་མ་སྐྲོད་ན་ལྟུང་བའོ། །དགེ་སློང་མས་ཇི་ཙམ་དུ་ཁྲོས་འཁྲུགས་རྔམས་ཏེ། དགེ་སློང་མའི་གཙུག་ལག་ཁང་ནས་དགེ་སློང་མ་སྐྲོད་དམ་སྐྲོད་དུ་འཇུག་གམ་བར་ཆད་བརྒྱད་བྱུང་ན་ཉེས་པ་མེད་དོ། །ལྟུང་བ་བརྒྱ་རྩ་

གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་རིད་དེ་དང་ཨ་རི་སྟ་གཉིས་ཁྲི་གཅིག་གི་སྟེང་མཐང་སྤྲད་ཅིང་ཉལ་བ་ལས། དོན་ཉུང་ངུ་བའི་དགེ་སློང་མ་དག་འཕྱ་བ་ལས་བཅས། ཡང་དགེ་སློང་མ་གང་དགེ་སློང་མ་དང་ལྷན་ཅིག་ཁྲི་གཅིག་གི་

སྟེང་དུ་ཉལ་ན་ལྟུང་བའོ། །ཡང་དགེ་སློང་མས་ཆེད་དུ་བསམས་ཏེ་ཁྲི་གཅིག་གི་སྟེང་དུ་གོས་གཅིག་གི་ནང་དུ་མཐང་སྤྲད་དེ་ཉལ་ན་ལྟུང་བའོ། །རྗེས་སུ་གནང་བ་ནི་དགེ་སློང་མ་དག་ཅིག་ལྗོངས་རྒྱུ་ཞིང་དོང་བ་ལས། ཁྱིམ་བདག་གི་གྲོང་དུ་གནས་པར་གྱུར་པ་ལས། ཁྱིམ་བདག་

གི་མལ་ཁྲི་དག་བརྙན་པོར་བྱིན་པ་དང་། ཁྱིམ་པའི་དེ་ན་ཁྲི་ཉུང་བས་བཅོམ་ལྡན་འདས་ཀྱིས་ཁྲི་གཅིག་གི་སྟེང་དུ་ཉལ་དུ་མ་གནང་ངོ་ཞེས་ཁ་ཅིག་ས་ལ་ཉལ་བར་གྱུར་པ་དང་། ཕྱིས་བཀའ་སྩལ་པ་ཁྲི་ཉུང་ཞིང་དགེ་སློང་མ་མང་ན་ཁྲི་གཅིག་གི་སྟེང་དུ་གཉིས་ཉལ་བར་གནང་སྟེ། བར་དུ་

གཏུར་བུ་དང་། ཆོས་གོས་ཀྱིས་ཆོད་ཅིག་དང་ཉེས་པ་མེད་དོ་ཞེས་བཀའ་སྩལ་ཏོ། །ལྟུང་བ་བརྒྱ་རྩ་གཉིས་པ་རྫོགས་སོ།། །།མདོར་བསྟན་པ་ནི། དབྱར་མ་ཚང་བར་མི་འགྲོ་དང་། །དབྱར་གནས་དེ་ནས་འགྲོ་བ་དང་། །དོགས་དང་བཅས་པའི་ཡུལ་འཁོར་གཉིས། །ལྷ་རྟེན་

ཁང་པ་ཐ་མ་ཡིན། །ལོ་ནི་བཅུ་གཉིས་མ་ལོན་དང་། །ལོན་ཡང་བསྐོས་པ་མ་ཡིན་གྱིས། །ཁྱིམ་སོ་བཟུང་ན་བཅུ་གཉིས་དང་། །དེ་ཡང་དགེ་འདུན་མ་བསྐོས་ནའོ། །སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་དབྱར་ཚུལ་དུ་ཞུགས་པ་ལས། ཟླ་བ་མ་ཚང་བར་

Vol. 156 · folio 130a

ཚུལ་དྲལ་ཏེ། ལྗོངས་རྒྱུ་ཞིང་འགྲོ་བ་ལ་བཅས། ཡང་དགེ་སློང་མ་གང་དབྱར་མ་ཚང་བར་ལྗོངས་རྒྱུ་ཞིང་འགྲོ་ན་ལྟུང་བའོ། །དགེ་སློང་མས་དབྱར་ཚུལ་དུ་ཞུགས་ན་ཟླ་བ་གསུམ་གྱི་བར་དུ་ཚང་བར་ཚུལ་བསྲུང་བར་བྱའོ། །ཟླ་བ་གསུམ་མ་ཚང་བར་ཚུལ་

དྲལ་ན་ལྟུང་བའོ། །བར་ཆད་བརྒྱད་བྱུང་ན་ཉེས་པ་མེད་དོ། །ལྟུང་བ་བརྒྱ་རྩ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཚུལ་བྱུང་བའི་འོག་ཏུ་ལྗོངས་རྒྱུ་བ་སྤྱོད་ཅིག་ཅེས་གསུངས་པ་ལས་

བཅས། ཡང་དགེ་སློང་མ་དབྱར་གནས་ནས་ལྗོངས་རྒྱུ་ཞིང་མི་འགྲོ་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་གང་གཞན་ཡང་དེ་དང་འདྲ་བ་དག་གོ། །དབྱར་གནས་ཞེས་བྱ་བ་ནི། དབྱར་ཟླ་བ་གསུམ་དུ་ཚུལ་བསྲུངས་པའོ། །ལྗོངས་རྒྱུ་ཞིང་མི་འགྲོ་ན་ཞེས་བྱ་བ་ནི་ཚུལ་ནས་བྱུང་བའི་

འོག་ཏུ་ལྗོངས་རྒྱུ་ཞིང་མི་སྤྱོད་པའོ། །དགེ་སློང་མས་ཚུལ་ནས་བྱུང་བའི་འོག་ཏུ་ཐ་ན་ཉིན་ཞག་ཙམ་ཡང་ལྗོངས་རྒྱུ་བ་མི་སྤྱོད་ན་ལྟུང་བར་འགྱུར་རོ། །ལྟུང་བ་བརྒྱ་རྩ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་དགེ་སློང་མ་ལྗོངས་རྒྱུ་བ་སྤྱོད་ཅིག་ཅེས་

བཀའ་སྩལ་པ་ལས། སྦོམ་དགའ་མོས་ཡུལ་དོགས་པ་དང་བཅས་པ། འཇིགས་ཤིང་བག་ཚ་བ་དང་བཅས་པའི་ཕྱོགས་སུ་ལྗོངས་རྒྱུ་བ་ལས་མི་རྒོད་དག་གིས་བཅོམ་པ་ལས་བཅས། ཡང་དགེ་སློང་མ་གང་ཡུལ་འཁོར་དོགས་པ་དང་བཅས་པར་ལྗོངས་རྒྱུ་ཞིང་འགྲོ་ན་ལྟུང་བའོ། །

དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དོགས་པ་དང་བཅས་ཞེས་བྱ་བ་ནི་མི་རྒོད་དག་ཡོད་པར་དོགས་པའོ། །འཇིགས་པ་དང་བཅས་ཞེས་བྱ་བ་ནི་མི་རྒོད་དག་གིས་བཅོམ་པར་མངོན་དུ་སྣང་ངོ་། །བག་ཚ་བ་དང་བཅས་ཞེས་བྱ་བ་ནི་གཅན་གཟན་གཏུམ་པོ་མི་ལ་ཟ་བ་དག་གནས་

པའོ། དགེ་སློང་མས་ཇི་ཙམ་དུ་ཤེས་བཞིན་དུ་དེ་འདྲ་བའི་ཡུལ་འཁོར་དུ་ལྗོངས་རྒྱུ་ཞིང་འགྲོ་ན་ལྟུང་བའོ། །བར་ཆད་བརྒྱད་བྱུང་སྟེ་དེར་མི་འགྲོར་མི་རུང་ན་ཉེས་པ་མེད་དོ། །ལྟུང་བ་བརྒྱ་རྩ་ལྔ་པ་རྫོགས་སོ།། །།སྟོན་པ་ཡུལ་མཉན་དུ་ཡོད་པ་ན་སྟེ། དགེ་སློང་མ་ཞིག་ལྗོངས་རྒྱུ་

Vol. 156 · folio 130b

ཞིང་དོང་བ་ལས། ཕ་རོལ་པོ་གཞན་དག་འཁྲུགས་ཤིང་དམག་འགྱེད་པའི་ནང་དུ་ཕྱིན་ཏེ། དེ་དག་གིས་མི་ཚངས་པར་སྤྱད་ནས་ཚངས་པར་སྤྱོད་པའི་བར་ཆད་དུ་གྱུར་པ་ལས་བཅས། ཡང་དགེ་སློང་མ་གང་ཡུལ་འཁོར་འཁྲུགས་པར་ལྗོངས་རྒྱུ་ཞིང་འགྲོ་ན་ལྟུང་བའོ། །ཡང་དགེ་སློང་མ་

ཤེས་བཞིན་དུ་ཡུལ་འཁྲུགས་པའི་ནང་དུ་འགྲོ་ན་ལྟུང་བར་འགྱུར་རོ། །འཁྲུགས་པ་དེའི་ནང་དུ་རྒྱལ་པོ་འམ་བློན་པོ་དག་གིས་ནན་གྱིས་བཀུག་ན་ཉེས་པ་མེད་དོ། །ལྟུང་བ་བརྒྱ་རྩ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་ཁྱིམ་པ་རྣམས་ལ་བཀའ་

སྩལ་པ། འཇིག་རྟེན་གྱི་ལྷ་ལ་མཆོད་ཅིག་དང་། ལྷ་དགའ་ན་འགོ་ཞིང་སྟོན་པར་འགྱུར་ཞེས་གསུངས་པ་ལས། དགེ་སློང་མ་དག་ཀྱང་མ་མོའི་ཚོགས་དང་འཇིག་རྟེན་པའི་ལྷ་ལ་བརྟེན་ལ་ཕྱག་འཚལ་ཞིང་མཆོད་པ་བྱེད་པ་དང་། བཀའ་སྩལ་པ་ང་ཁྱིམ་པ་རྣམས་ལ་ལྷ་མཆོད་པར་

གསུངས་ཀྱི་རབ་ཏུ་བྱུང་བ་ལ་མ་ཡིན་ནོ་ཞེས་གསུངས་པ་དང་། ཕྱིས་དྲུག་སྡེ་པོ་དང་བཅུ་གཉིས་སྡེ་རྣམས་ལྷའི་རྟེན་ཁང་དུ་སོང་ནས་ལ་ལ་ལྷ་ལ་སྨོད་ཅིང་མི་སྙན་པར་ཟེར་རོ། །དེ་ལ་མི་དགའ་བར་གྱུར་པ་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དགེ་སློང་མ་རྣམས་

ལ་བཀའ་སྩལ་པ། ལྷའི་རྟེན་ཁང་དུ་སོང་ནས་མི་སྙེན་པར་ཟེར་ཅིང་སྨྲ་ན་ལྟུང་བའོ་ཞེས་བཅས། ཡང་དགེ་སློང་མ་གང་ལྷ་ཁང་རྣམས་སུ་སོང་ནས་སྨྲ་བར་བྱེད་ན་ལྟུང་བའོ། །དགེ་སློང་མས་འཇིག་རྟེན་པའི་ལྷའི་རྟེན་ཁང་དུ་སོང་ནས་སྨོད་ཅིང་མི་སྙན་པར་ཟེར་ན་ཐམས་ཅད་དུ་ལྟུང་

བར་འགྱུར་རོ། །དགེ་སློང་མས་རྟེན་ཁང་དུ་ཕྱིན་ནས་སེ་གོལ་བརྡབས་ཏེ་ཞལ་ནས་གསུངས་པའི་ཚིགས་སུ་བཅད་པ་རྒྱུད་གཉིས་སམ་གསུམ་བརྗོད་པར་བྱའོ། །དེ་ལྟར་མ་བྱས་ན་འང་ཉེས་བྱས་སོ། །ལྟུང་བ་བརྒྱ་རྩ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་

ན་སྟེ། དགེ་སློང་མ་སྦོམ་དགའ་མོ་བདག་བསྙེན་པར་རྫོགས་ནས་ལོ་བཅུ་གཉིས་མ་ལོན་པར་གཞན་དག་རབ་ཏུ་འབྱིན་ཅིང་བསྙེན་པར་རྫོགས་པའི་མཁན་མོ་བྱེད་པ་ལས། །དོན་ཉུང་ངུ་མས་འཕྱ་བ་ལས་བཅས་ཡང་དགེ་སློང་མ་གང་ལོ་བཅུ་གཉིས་མ་ལོན་པར་རབ་ཏུ་འབྱིན་པ་བསྙེན་

Vol. 156 · folio 131a

པར་རྫོགས་པར་བྱེད་ན་ལྟུང་བའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ལོ་བཅུ་གཉིས་མ་ལོན་པར་ཞེས་པ་ནི་བདག་བསྙེན་པར་རྫོགས་ནས་ལོ་བཅུ་གཉིས་མ་ལོན་པའོ། །རབ་ཏུ་འབྱིན་བསྙེན་པར་རྫོགས་པར་བྱེད་ཅེས་པ་ནི་གཞན་གྱི་མཁན་མོ་བྱེད་པའོ། །

དེ་ལ་དགེ་སློང་མས་བདག་ལོ་བཅུ་གཉིས་མ་ལོན་པར་ཤེས་བཞིན་དུ་རབ་ཏུ་འབྱིན་པ་དང་། བསྙེན་པར་རྫོགས་པར་བྱེད་ན་ལྟུང་བའོ། །ལོ་བཅུ་གཉིས་ལོན་ཀྱང་ཆོས་ལྔ་དང་མི་ལྡན་བཞིན་དུ་རབ་ཏུ་འབྱིན་པ་དང་བསྙེན་པར་རྫོགས་པའི་མཁན་མོ་བྱེད་ན་ལྟུང་བའོ། །ཆོས་ལྔ་དང་ལྡན་

ཡང་ལོ་མ་ཚང་ན་ལྟུང་བའོ། །ལྟུང་བ་བརྒྱ་རྩ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ལོ་བཅུ་གཉིས་ལོན་ནོ་ཞེས་ནས་གཞན་རབ་ཏུ་འབྱིན་པ་དང་བསྙེན་པར་རྫོགས་པར་བྱེད་དེ། །འཁོར་འཆང་བའི་སྡོམ་པ་དགེ་འདུན་ལས་མ་ཐོབ་བཞིན་

དུ་བདག་ཉིད་ཀྱིས་སློབ་མའི་འཁོར་འཆང་པ་ལས་བཅས། ཡང་དགེ་སློང་མ་གང་དགེ་འདུན་ལས་འཁོར་འཆང་དུ་གནང་བའི་སྡོམ་པ་མ་ཐོབ་པར་འཁོར་འཆང་ན་ལྟུང་བའོ། །དགེ་སློང་མ་བསྙེན་པར་རྫོགས་ནས་ལོ་བཅུ་གཉིས་ལོན་ལ་ཆོས་ལྔ་དང་ལྡན་པར་གྱུར་ཀྱང་རབ་ཏུ་འབྱིན་པ་དང་བསྙེན་

པར་རྫོགས་པའི་མཁན་མོ་བྱེད་ཅིང་འཁོར་འཆང་བའི་སྡོམ་པ་དགེ་འདུན་ལ་གསོལ་ཅིག །དགེ་འདུན་གྱིས་སྡོམ་པ་སྦྱིན་པར་བྱའོ། །འཁོར་འཆང་བའི་སྡོམ་པ་མ་གསོལ་ཏམ། དགེ་འདུན་ལ་སྡོམ་པ་མ་ཐོབ་བཞིན་དུ་འཁོར་འཆང་ན་ལྟུང་བའོ། །ལྟུང་བ་བརྒྱ་རྩ་དགུ་པ་རྫོགས་

སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་བུད་མེད་ཁྱིམ་སོ་མྱོང་བ་རབ་ཏུ་བྱུང་བ་རྣམས་ལོ་བཅུ་ལོན་ལ་ལོ་གཉིས་ཀྱི་བར་དུ་བསླབ་པའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་བྱིན་ལ། ལོ་བཅུ་གཉིས་ལོན་ཀྱང་བསྙེན་པར་རྫོགས་པར་གྱིས་ཤིག་ཅེས་གསུངས་པ་

ལས། སྦོམ་དགའ་མོས་ཁྲིམས་མ་ཕོག་པར་ལོ་བཅུ་གཉིས་ཀྱང་མ་ལོན་པར་ཐལ་བྱུང་བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་ཁྱིམ་སོ་བཟུང་བ་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་ན་ལྟུང་བའོ། །ཡང་དགེ་སློང་མ་བུད་མེད་བག་མ་མྱོང་བ། བར་

Vol. 156 · folio 131b

ཁྲིམས་མ་ཕོག །ལོ་བཅུ་གཉིས་ཀྱང་མ་ལོན་པར་ཤེས་བཞིན་དུ་བསྙེན་པར་རྫོགས་པར་བྱེད་ན་ལྟུང་བའོ། །ལྟུང་བ་བརྒྱ་རྩ་བཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་ཁྱིམ་སོ་བཟུང་བ་ལོ་བཅུ་གཉིས་ལོན་ཀྱང་བསླབ་པའི་ཆོས་དྲུག་དང་།

རྗེས་སུ་མཐུན་པའི་ཆོས་དྲུག་མ་བྱིན་པར་ཐལ་བྱུང་དུ་བསྙེན་པར་རྫོགས་པར་བྱས་པ་ལ་བཅས། ཡང་དགེ་སློང་མ་གང་ཁྱིམ་སོ་བཟུང་བ་ལོ་བཅུ་གཉིས་ལོན་ན་ཡང་བསླབ་པའི་སྡོམ་པ་མ་བྱིན་པར་བསྙེན་པར་རྫོགས་པར་བྱེད་ན་ལྟུང་བའོ། །ལྟུང་བའི་ཁྱད་པར་ནི་གོང་མ་དང་འདྲའོ། །ལྟུང་བ་བརྒྱ་རྩ་

བཅུ་གཅིག་པ་རྫོགས་སོ།། །།མདོར་བསྟན་པ་ནི། མང་པོ་སྡོམ་པ་བྱས་པ་དང་། །སྦྲུམ་མ་དང་ནི་མི་སློབ་དང་། །བསྡུས་ནས་ཡལ་བར་དོར་བ་དང་། །བཀར་བར་བྱ་བ་ཐ་མའོ། །ལོ་ནི་ཉི་ཤུ་མ་ལོན་དང་། །ལོན་ཡང་སྡོམ་པ་མ་བྱིན་དང་། །གཏུམ་མོ་མྱ་ངན་གཟིར་བ་དང་། །

ཆོས་དྲུག་རྣམས་ལ་མ་བསླབ་པའོ། །སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་བདག་ཉིད་ཀྱིས་སློབ་མ་དང་ཉེ་གནས་ཀྱི་འཁོར་མང་དུ་བསྡུས་ཤིང་དེའི་ཐོག་ཏུ་གཞན་གྱི་སློབ་མ་དང་ཉེ་གནས་དག་འཁོར་དུ་བསྡུས་པས་མང་ཆེས་ཏེ། དེ་དག་ལ་ཆོས་ཀྱང་མི་སྟོན།

ཁ་ཏོན་གྱི་ལུང་ཡང་མི་འབོགས་པ་ལས། དེ་དག་གིས་ཆོས་དག་མ་ལོབས་པ་ལས་བཅས། ཡང་དགེ་སློང་མ་གང་འཁོར་མང་པོ་འཆང་བར་དགེ་འདུན་ལས་སྡོམ་པ་མ་ཐོབ་པར་འཁོར་འཆང་ན་ལྟུང་བའོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །འཁོར་མང་དུ་འཆང་

ཞེས་བྱ་བ་ནི་སློབ་མ་དང་ཉེ་གནས་མང་དུ་སྡུད་པའོ། །སྡོམ་པ་མ་ཐོབ་ཅེས་བྱ་བ་ནི་དགེ་འདུན་ལས་སོ། །དགེ་སློང་མས་འཁོར་མང་དུ་འཆང་བའི་སྡོམ་པ་མ་ཐོབ་བཞིན་དུ་འཁོར་མང་པོ་འཆང་ཞིང་འཆད་པ་དང་། ཁ་ཏོན་ལ་སོགས་པའི་ལུང་མི་འབོགས་ན་ལྟུང་བར་འགྱུར་རོ། །ལྟུང་བ་བརྒྱ་རྩ་

བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་ལྗོངས་རྒྱུ་ཞིང་སོང་བ་ལས། བུད་མེད་སྦྲུམ་མ་ཅིག་དང་ཕྲད་དེ་དེའང་རབ་ཏུ་བྱུང་ནས་ཕྱི་བཞིན་དུ་ཁྲིད་པ་ལས་ལམ་དུ་བུ་བྱུང་བ་དང་། ཁྱིམ་བདག་རྣམས་ཀྱིས་མཐོང་སྟེ་དགེ་སློང་མ་འདི་དག་

Vol. 156 · folio 132a

ནི་མི་ཚངས་པར་སྤྱོད་དོ་ཞེས་འཕྱ་ཞིང་མ་དད་པ་ལས་བཅས། ཡང་དགེ་སློང་མ་གང་སྦྲུམ་མ་རབ་ཏུ་འབྱིན་ན་ལྟུང་བའོ། །དགེ་སློང་མས་བུད་མེད་སྦྲུམ་མར་ཤེས་བཞིན་དུ་རབ་ཏུ་འབྱིན་ན་ལྟུང་བའོ། །སྦྲུམ་མར་མི་ཤེས་ན་ཉེས་པ་མེད་དོ། །ལྟུང་བ་བརྒྱ་རྩ་བཅུ་

གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་སློབ་མ་ལ་ཆོས་མ་བསྟན་ཅིང་ཡལ་བར་བོར་བ་ལས་བཅས། ཡང་དགེ་སློང་མ་གང་རབ་ཏུ་བྱུང་བསྙེན་པར་རྫོགས་པར་བྱས་ནས་མི་སྟོན་ན་ལྟུང་བའོ། །དགེ་སློང་མས་སློབ་མ་ཉེ་གནས་རབ་ཏུ་བྱུང་

བསྙེན་པར་རྫོགས་པར་བྱས་ལ་ཚུལ་ཁྲིམས་ལ་སོགས་པ་མ་བསྟན་ཏམ། ཆོས་གཞན་ཡང་མ་བསྟན་ན་ལྟུང་བར་འགྱུར་རོ། །བདག་ཉིད་འཆད་མི་ཤེས་ན་ཡང་གཞན་མཁས་པ་དག་ལ་བཅོལ་བར་བྱའོ། །མ་བཅོལ་ན་ཡང་ཉེས་བྱས་སོ། །ལྟུང་བ་བརྒྱ་རྩ་བཅུ་བཞི་པ་རྫོགས་

སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་སློབ་མ་ཉེ་གནས་དག་བསྙེན་པར་རྫོགས་པར་བྱས་ནས་ན་བར་གྱུར་པ་ལ་ནད་གཡོག་ཀྱང་མི་བྱེད། སྨན་དང་ཟས་ལ་སོགས་པ་ཡང་མི་སྟོབས་པ་ལས་དེ་དག་ཚངས་པར་སྤྱོད་པའི་བར་ཆད་དུ་གྱུར་ཏེ། དོན་ཉུང་ངུ་བའི་

དགེ་སློང་མ་དག་འཕྱ་བ་ལས་བཅས། ཡང་དགེ་སློང་མ་གང་རབ་ཏུ་བྱུང་བསྙེན་པར་རྫོགས་པར་བྱས་ནས་ཡལ་བར་བོར་ན་ལྟུང་བའོ། །དགེ་སློང་མས་སློབ་མ་ན་བར་གྱུར་པ་དག་ལ་ནད་གཡོག་མི་བྱེད་ན་ལྟུང་བར་འགྱུར་རོ། །ཟས་དང་སྨན་གྱིས་མི་སྟོབས་ནའང་ལྟུང་བའོ། །བདག་

ལ་མེད་ནའང་གཞན་ལ་བཙལ་ཏེའང་སྦྱིན་པར་བྱའོ། །དེ་ལྟར་མ་བྱས་ན་ཉེས་བྱས་སོ། །ལྟུང་བ་བརྒྱ་རྩ་བཅོ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་ཁྱིམ་བདག་མོ་ཞིག་ཁྱོ་ལམ་རིང་པོར་སོང་བའི་འོག་ཏུ་རབ་ཏུ་བྱུང་བ་ལས།

ཕྱིས་ཁྱོ་སླར་འོངས་པ་དང་ཆུང་མ་སླར་ཕྲོགས་ཏེ་ཚངས་པར་སྤྱོད་པའི་བར་ཆད་དུ་གྱུར་པ་ལས་བཅས། ཡང་དགེ་སློང་མ་གང་རབ་ཏུ་བྱུང་ནས་མ་བཀར་ན་ལྟུང་བའོ། །དགེ་སློང་མས་གཞན་གྱི་བུད་མེད་རབ་ཏུ་བྱུང་ལ། དེ་ལ་གནོད་པའམ། ཚངས་པར་སྤྱོད་པའི་བར་ཆད་དུ་འགྱུར་བ་ལ་

Vol. 156 · folio 132b

སྐྱབས་མ་བྱས་སམ་གུད་དུ་མ་བཀར་ན་ལྟུང་བར་འགྱུར་རོ། །དེ་ལྟར་མི་ཤེས་པ་ལ་ཉེས་པ་མེད་དོ། །ལྟུང་བ་བརྒྱ་རྩ་བཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བུད་མེད་ཁྱིམ་སོ་མ་བཟུང་བ་ལོ་བཅོ་བརྒྱད་ལོན་ན་ལོ་གཉིས་སུ་བར་ཁྲིམས་སྲུང་དུ་

བཅུག་ལ། ལོ་ཉི་ཤུ་ལོན་ན་བསྙེན་པར་རྫོགས་པར་གྱིས་ཤིག་ཅེས་བཀའ་སྩལ་པ་ལས། སྦོམ་དགའ་མོས་ལོ་ཉི་ཤུ་མ་ལོན་པར། བར་ཁྲིམས་ཕོག་སྟེ་ཐལ་བྱུང་བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་གཞོན་ནུར་གྱུར་པ་ལོ་ཉི་ཤུ་མ་ལོན་པར་བསྙེན་པར་རྫོགས་

པར་བྱས་ན་ལྟུང་བའོ། །དགེ་སློང་མས་བུད་མེད་ཁྱིམ་སོ་མ་བཟུང་བ་ལོ་བཅོ་བརྒྱད་ལོན་པ་ལ་ལོ་གཉིས་ཀྱི་བར་དུ་བར་ཁྲིམས་ཕོག་ལ་ལོ་ཉི་ཤུ་ན་བསྙེན་པར་རྫོགས་པར་བྱ་བའི་རིགས་པ་ལས། དེ་ལྟར་མ་བྱས་པར་ཤེས་བཞིན་དུ་བསྙེན་པར་རྫོགས་པར་བྱེད་ན་ལྟུང་བའོ། །ལྟུང་བ་བརྒྱ་རྩ་

བཅུ་བདུན་པ་རྫོགས་སོ།། །།བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །སྐྱེ་དགུའི་བདག་མོ་ཆེན་མོས་གསོལ་བ། དགེ་སློང་ཕ་དང་དགེ་སློང་མ་གཉིས་བསྙེན་པར་རྫོགས་པར་བྱ་བ་ལ་རིམ་པ་དང་ཁྱད་པར་ཅི་མཆིས་ཞེས་གསོལ་བ་དང་བཀའ་སྩལ་པ་གཞོན་ནུ་མ་ལོ་བཅོ་

བརྒྱད་ལོན་པ་ལོ་གཉིས་ཀྱི་བར་ཁྲིམས་ཀྱང་བསྲུངས་ལ། ལོ་ཉི་ཤུ་ལོན་པ་ཞིག་བསྙེན་པར་རྫོགས་པར་བྱེད་ན་དགེ་སློང་མ་དག་གིས་སྟན་རྣམས་ཐིང་ལ་གཎྜཱི་བརྡུངས་ཏེ། དགེ་འདུན་ཐམས་ཅད་འདུས་ནས་གསོལ་བ་དང་ལས་ཀྱིས་ཚངས་པར་སྤྱོད་པའི་ཉེ་གནས་ཀྱི་སྡོམ་པ་དགེ་

སློང་མ་རྣམས་ཀྱིས་བྱིན་ཅིག །དེའི་འོག་ཏུ་དགེ་སློང་མ་གཉི་གའི་ཚོགས་འདུས་ལ། གསོལ་བ་དང་བཞིའི་ལས་ཀྱིས་དགེ་སློང་མ་བསྙེན་པར་རྫོགས་པར་གྱིས་ཤིག་ཅེས་གསུངས་པ་ལ། ཕྱིས་དགེ་སློང་མ་དག་གིས་ཚངས་པར་སྤྱོད་པའི་ཉེ་གནས་ཀྱི་སྡོམ་པ་མ་བྱིན་པར་ཤེས་བཞིན་དུ་

བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་གཞོན་ནུར་གྱུར་པ་ལོ་ཉི་ཤུ་ལོན་པ་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མ་བྱིན་པར་བསྙེན་པར་རྫོགས་པར་བྱེད་ན་ལྟུང་བའོ། །དགེ་སློང་མ་ཚངས་པར་སྤྱོད་པའི་ཉེ་གནས་ཀྱི་སྡོམ་པ་སྔར་མ་བྱིན་པར་བསྙེན་

Vol. 156 · folio 133a

པར་རྫོགས་པར་བྱེད་ན་ལྟུང་བའོ། །ལྟུང་བ་བརྒྱ་རྩ་བཅོ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་སྔ་དྲོ་བསོད་སྙོམས་ལ་ཞུགས་པ་ལས་བུད་མེད་གཉིས་ཤིག་འཐབ་མོ་འགྱེད་པ་མཐོང་སྟེ། དེ་གཉིས་

ལས་སྐེ་རྩ་སྒྲེང་ཞིང་གྲོགས་ཀྱི་གཡོ་མཚང་མང་དུ་འདྲུ་བ་ལས། སྦོམ་དགའ་མོས་བསམས་པ། བུད་མེད་འདི་རབ་ཏུ་བྱུང་ན་བདག་འཐབ་མོ་བྱེད་པའི་གྲོགས་སུ་རུང་ངོ་ཞེས་དེ་རབ་ཏུ་ཕྱུང་ནས་ཕྱི་བཞིན་དུ་ཁྲིད་དོ། །ཕྱིས་སྦོམ་དགའ་མོ་དགེ་སློང་མ་གཞན་དག་དང་འཐབ་པར་གྱུར་པའི་ཚེ།

དགེ་སློང་མ་དེ་ཅང་མི་ཟེར་བར་འདུག་གོ། །སྦོམ་དགའ་མོས་སྨྲས་པ། ཁྱོད་ངའི་འཐབ་མོའི་གྲོགས་སུ་འགྱུར་བར་བྱ་བའི་ཕྱིར་རབ་ཏུ་བྱུང་ན་ཅིའི་ཕྱིར་བསམ་གཏན་བཞི་ལ་སྙོམས་པར་ཞུགས་པ་བཞིན་དུ་ཅང་མི་སྨྲ་བར་འདུག །དེས་སྨྲས་པ་སྔོན་ཁྱིམ་མི་མོ་དེ་དག་གི་གཡོ་མཚང་ནི་ངས་

ཀྱང་ཤེས་ཀྱི། དགེ་སློང་མ་འདི་དག་གི་གཡོ་མཚང་ནི་ངས་ཀྱང་མི་ཤེས་སོ་ཞེས་སྨྲས་པ་དང་སྦོམ་དགའ་མོས་སྨྲས་པ་སྐྱེ་དགུའི་བདག་མོ་ཆེན་མོ་ནི་ལྕི་བ་བརྒྱད་ཁས་བླངས་པ་ལས་བསྙེན་པར་རྫོགས་པ་ཡིན། ཨུཏྤ་ལའི་ཁ་དོག་མ་ནི་གྲོང་ཁྱེར་ཆེན་པོ་དྲུག་ཏུ་སྨད་འཚོང་མ་བྱེད་པ་ཡིན།

གཽ་ཏ་མ་རིད་དེ་མ་ནི་སྔོན་བུ་ཤ་ཟོས་པ་ཡིན་ནོ་ཞེས་དགེ་སློང་མ་དག་གི་གཡོ་མཚང་བསྟན་པ་དང་། ཕྱིས་དགེ་སློང་མ་དག་འཐབ་མོ་བྱུང་བའི་ཚེ་དེ་དག་གི་གཡོ་མཚང་སྨྲ་ཞིང་དེ་སྐད་ཟེར་བ་ལས་བཅས། ཡང་དགེ་སློང་མ་གང་བུད་མེད་གཏུམ་མོ་རབ་ཏུ་ཕྱུང་ནས་བསྙེན་པར་རྫོགས་པར་

བྱེད་ན་ལྟུང་བའོ། །དགེ་སློང་མས་བུད་མེད་གཏུམ་མོ་འཐབ་མོ་རྒོད་པར་ཤེས་བཞིན་དུ་རབ་ཏུ་ཕྱུང་ན་ལྟུང་བའོ། །དེ་ལྟར་མི་ཤེས་ན་ཉེས་པ་མེད་དོ། །ལྟུང་བ་བརྒྱ་རྩ་བཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་སོང་བ་ལས་བུད་

མེད་དང་ཁྱིམ་ཐབ་དང་བུ་དག་ཤི་བའི་མྱ་ངན་གྱིས་གཟིར་ཞིང་ངུ་བ་རབ་ཏུ་ཕྱུང་བ་ལས། དེ་རབ་ཏུ་ཕྱུང་ཡང་རྟག་ཏུ་ངུ་ཞིང་མྱ་ངན་བྱེད་པར་གྱུར་ཏེ། ཆུང་ངུ་ན་རྨི་ལམ་དུ་ཡང་སྟོན་ཅིག་ཅེས་ཟེར་རོ། །དེ་ལྟར་གྱུར་པ་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་མྱ་ངན་གྱིས་གཟིར་པའི་

Vol. 156 · folio 133b

བུད་མེད་རབ་ཏུ་བྱུང་ན་ལྟུང་བའོ། །དགེ་སློང་མས་བུད་མེད་མྱ་ངན་གྱིས་མནན་པ་མྱ་ངན་མ་སངས་པར་ཤེས་བཞིན་དུ་རབ་ཏུ་བྱུང་ན་ལྟུང་བའོ། །ལྟུང་བ་བརྒྱ་ཉི་ཤུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བསྙེན་པར་རྫོགས་པར་འདོད་པ་ལ་ལོ་གཉིས་ཀྱིས་

བར་དུ་ཁྲིམས་མ་ཕོག་ཀྱང་ལོ་གཉིས་མ་བསྲུངས་པར་ཐལ་བྱུང་བསྙེན་པར་རྫོགས་པར་བྱས་པ་ལས་བཅས། ཡང་དགེ་སློང་མ་གང་ལོ་གཉིས་སུ་ཆོས་དྲུག་དང་མཐུན་པའི་ཆོས་དྲུག་ལ་མ་བསླབས་པར་བསྙེན་པར་རྫོགས་པར་བྱེད་ན་ལྟུང་བའོ། །དགེ་སློང་མས་ཆོས་དྲུག་དང་མཐུན་པའི་ཆོས་དྲུག་ལ་མ་

བསླབས་པར་ཤེས་བཞིན་དུ་ཐལ་བྱུང་བསྙེན་པར་རྫོགས་པར་བྱེད་ན་ལྟུང་བའོ། །དེ་ལ་ཆོས་དྲུག་ཅེས་པ་ནི་གཅིག་པུ་ལམ་དུ་མི་འགྲོ་བ་དང་། གཅིག་པུ་ཆུ་མི་རྒལ་བ་དང་། སྐྱེས་པ་ལ་རེག་པར་མི་བྱ་བ་དང་། སྐྱེས་པ་དང་ཁྱིམ་གཅིག་གི་ནང་དུ་ཞག་ལོན་པར་མི་བྱ་བ་དང་། སྨྱན་མི་བྱ་བ་

དང་། གྲོགས་ཀྱི་ཁ་ན་མ་ཐོ་བ་ཕས་ཕམ་པའམ་ལྷག་མ་བྱུང་བ་མཐོང་ན་མི་བཅབ་བོ། །རྗེས་སུ་མཐུན་པའི་ཆོས་དྲུག་ནི་གསེར་དངུལ་ལ་རེག་པར་མི་བྱ་བ་དང་། གསང་བའི་སྤུ་མི་བྲེག་པ་དང་། ས་མི་བརྐོ་བ་དང་། རྩྭ་སྔོན་མོ་མི་གཅད་པ་དང་། བྱིན་ལེན་བྱ་བ་དང་། སྤངས་པའི་

ཁ་ཟས་མི་བཟའ་བའོ། །ལྟུང་བ་བརྒྱ་ཉི་ཤུ་གཅིག་པ་རྫོགས་སོ།། །།མདོར་བསྟན་པ་ནི། ཆོས་དྲུག་རྣམས་ལ་བསླབ་པ་དང་། །ཁྱིམ་ཐབ་ཀྱིས་ཀྱང་མ་བཏང་དང་། །གལ་ཏེ་བདག་ལ་གོས་བྱིན་དང་། །ཕྱི་ནས་ཁྱོད་ནི་མི་དགའ་དང་། །ལོ་རེ་བཞིན་དུ་མ་གནང་

དང་། །ཞག་གིས་ཆོད་པའི་དད་པ་དང་། །ཟླ་བ་ཕྱེད་ཅིང་གདམས་པ་དང་། །དགེ་སློང་མེད་པའི་གསོ་སྦྱིན་ནོ། །སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་མ་རྣམས་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལོ་གཉིས་བསླབས་ནས་བསྙེན་

པར་རྫོགས་པར་གྱིས་ཤིག་ཅེས་བཀའ་སྩལ་ན། སྦོམ་དགའ་མོའི་སློབ་མ་རྣམས་ལོ་གཉིས་སུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་བསླབས་ཀྱང་ད་དུང་བསྙེན་པར་རྫོགས་པར་བྱེད་དུ་མི་བཏུབ་པས་དོན་ཉུང་ངུ་བས་འཕྱ་བ་ལས་བཅས། ཡང་དགེ་སློང་མ་གང་ལོ་གཉིས་སུ་ཆོས་

Vol. 156 · folio 134a

དྲུག་དང་རྗེས་སུ་མཐུན་པའི་ཆོས་དྲུག་བསླབ་པར་ཤེས་ལ་བསྙེན་པར་རྫོགས་པར་མི་བྱེད་ན་ལྟུང་བར་འགྱུར་རོ། །དགེ་སློང་མས་བདག་ཉིད་ཀྱི་སློབ་མ་བར་ཁྲིམས་མནོས་ནས་ལོ་གཉིས་ལོན་པར་ཤེས་བཞིན་དུ་བསྙེན་པར་རྫོགས་པར་མི་བྱེད་ན་ལྟུང་བར་འགྱུར་རོ། །

སློབ་མ་དེ་ཉིད་ན་བར་གྱུར་ཏམ་བར་ཆད་བརྒྱད་གཅིག་བྱུང་ན་ཉེས་མེད་དོ། །ལྟུང་བ་བརྒྱ་ཉི་ཤུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་སོང་བ་ལས། ཁྱོ་ཤུག་གཉིས་ཤིག་འཐབ་པ་མཐོང་ནས། སྦོམ་དགའ་མོས་

དེའི་ཆུང་མ་ལ་ཁྱོད་རབ་ཏུ་བྱུང་ཤིག་ཅེས་བསྒོ་ནས་དེའི་ཁྱོ་མ་དད་བཞིན་དུ་རབ་ཏུ་བྱུང་བ་ལས་བཅས། ཡང་དགེ་སློང་མ་གང་ཁྱིམ་ཐབ་ཀྱིས་མ་བཏང་བར་ཤེས་བཞིན་དུ་བུད་མེད་རབ་ཏུ་འབྱིན་ན་ལྟུང་བའོ། །དགེ་སློང་མས་གཞན་གྱི་བུད་མེད་ཁྱིམ་ཐབ་ཀྱིས་མ་བཏང་བར་ཤེས་བཞིན་དུ་རབ་ཏུ་

འབྱིན་ན་ལྟུང་བའོ། །ཁྱིམ་ཐབ་རིང་པོར་སོང་སྟེ་ཐལ་བྱུང་མ་འཁོར་བའམ་བུད་མེད་རང་དབང་ཡོད་ན་ཉེས་མེད་དོ། །ལྟུང་བ་བརྒྱ་ཉི་ཤུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ལ་སློབ་མ་དག་གིས་བདག་ཅག་བསྙེན་པར་རྫོགས་པར་

བྱ་བར་གསོལ་ཞེས་བྱས་པ་དང་། སྦོམ་དགའ་མོས་སྨྲས་པ་དང་། ང་ལ་ཆོས་གོས་བྱིན་ཅིག་དང་གདོད་བསྙེན་པར་རྫོགས་པར་བྱའོ་ཞེས་ནས་དེ་དག་ཆོས་གོས་བྱིན་ནས་དེའི་འོག་ཏུ་གདོད་བསྙེན་པར་རྫོགས་པར་བྱས་པ་དང་དོན་ཉུང་ངུ་པས་འཕྱ་བ་ལས་བཅས། ཡང་དགེ་སློང་མ་

གང་བསྙེན་པར་རྫོགས་འདོད་པ་ལ་གལ་ཏེ་ང་ལ་ཆོས་གོས་བྱིན་ན་དེའི་འོག་ཏུ་ཁྱོད་བསྙེན་པར་རྫོགས་པར་བྱའོ་ཞེས་དེ་སྐད་ཟེར་ན་ལྟུང་བའོ། །དགེ་སློང་མས་སློབ་མ་བསྙེན་པར་རྫོགས་པར་འདོད་པ་ལ་རྔན་པ་ཆོས་གོས་དག་ལེན་ན་ལྟུང་བར་འགྱུར་རོ། །སློབ་མ་ཆོས་གོས་མང་ལ་སེར་སྣ་ཅན་

ཞིག་ན་སེར་སྣ་དང་དབྲལ་བའི་ཕྱིར་ཐབས་དེས་བསླངས་ན་ཉེས་མེད་དོ། །ལྟུང་བ་བརྒྱ་ཉི་ཤུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། གཽ་ཏ་མ་རིད་དེ་ཁྱིམ་པ་མོ་དག་ལ་ཆོས་བཤད་པའི་རྗེས་ལ་ཁྱོད་ཁྱིམ་གྱི་བྱ་བ་རྣམས་ཐོང་ཤིག་དང་ཕྱིས་རབ་ཏུ་བྱུང་ངོ་ཞེས་

Vol. 156 · folio 134b

སྨྲས་ནས། དེ་དག་གིས་ཁྱིམ་གྱི་བྱ་བ་རྣམས་བཏང་སྟེ། བདག་ཅག་རབ་ཏུ་དབྱུང་དུ་གསོལ་ཞེས་བྱས་པ་དང་། དེས་རབ་ཏུ་མ་ཕྱུང་ངོ་། །དེས་རབ་ཏུ་མ་ཕྱུང་བ་དང་ཁྱིམ་མི་མོ་རྣམས་འཕྱ་བར་གྱུར་ཏེ། བདག་ཅག་གིས་ཁྱིམ་གྱི་བྱ་བ་རྣམས་ཀྱང་བཏང་བ་ལས་རབ་ཏུ་མ་ཕྱུང་ངོ་ཞེས་འཕྱ་བ་ལས་བཅས།

ཡང་དགེ་སློང་མ་གང་ཁྱིམ་བདག་མོ་ཁྱིམ་སོ་ཐོང་ཤིག་དང་ཕྱིས་ཁྱོད་རབ་ཏུ་དབྱུང་བ་མི་དཀའོ་ཞེས་དེ་སྐད་སྨྲས་ལ། དེའི་འོག་ཏུ་རབ་ཏུ་མི་འབྱིན་ན་ལྟུང་བའོ། །དགེ་སློང་མས་ཁྱིམ་མི་མོ་ལ་ཁྱིམ་སོ་ཐོང་ཤིག་དང་ཕྱིས་རབ་ཏུ་དབྱུང་ངོ་ཞེས་སྨྲས་པ་ལས་དེའི་འོག་ཏུ་མ་ཕྱུང་ན་ཐམས་ཅད་དུ་འོང་ལྟུང་བར་འགྱུར་རོ། །

བར་ཆད་བརྒྱད་ལ་སོགས་པའི་གློ་བུར་བ་བྱུང་བ་ལ་ཉེས་མེད་དོ། །ལྟུང་བ་བརྒྱ་ཉི་ཤུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་བུད་མེད་མང་པོས་རབ་ཏུ་འབྱིན་པར་གསོལ་བ་ལ་དེ་དག་ཅིག་ཅར་རབ་ཏུ་འབྱིན་པར་མི་བྱེད་ཅིང་ཀུན་ཀྱང་ལོ་རེ་རེ་ཞིང་རེ་

རེ་བསྔོས་ལ། མིང་ཡང་ལོ་གཅིག་མ་ལོ་གཉིས་མ་ཞེས་བཏགས་ཤིང་འབོད་པ་དང་། དགེ་སློང་མ་གཞན་དག་གིས་ཁྱོད་ཅིའི་ཕྱིར་དེ་སྐད་འབོད་ཅེས་དྲིས་ན། དེ་དག་གི་མིང་ནི་ལོབས་དཀའ་སྟེ་དེ་སྐད་དུ་འབོད་ན་བདེའོ་ཞེས་དེ་སྐད་དུ་སྨྲས་པ་ལས་དོན་ཉུང་ངུ་མས་འཕྱ་བ་ལས་བཅས། ཡང་

དགེ་སློང་མ་གང་ལོ་རེ་ཞིང་རབ་ཏུ་འབྱིན་ན་ལྟུང་བའོ། །དགེ་སློང་མས་བུད་མེད་རབ་ཏུ་འབྱུང་བར་གསོལ་བ་ལས་ཅིག་ཅར་དུ་རབ་ཏུ་མི་འབྱིན་ཞིང་ལོ་རེ་ཞིང་རེ་རེ་འབྱིན་པར་བྱེད་ན་ལྟུང་བའོ། །གཉིས་ཀ་མིང་མཐུན་པ་ལས་ལོ་གཅིག་མ་ཞེས་འབོད་པ་དང་ལོ་རེ་བཞིན་དུ་གསོལ་དུ་འོངས་པའི་ཐད་ཀར་

རབ་ཏུ་འབྱིན་པ་ལ་ཉེས་མེད་དོ། །ལྟུང་བ་བརྒྱ་ཉི་ཤུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་བཞུགས། སྦོམ་དགའ་མོ་ཟླ་བ་ཕྱེད་ཀྱི་ཚེ་དགེ་སློང་ཕ་ལ་ལུང་སྟོན་པར་གསོལ་བའི་དད་པ་བླངས་ནས་དགེ་སློང་མའི་གསོ་སྦྱིན་གྱི་དུས་སུ་དད་པ་མི་ལེན་པ་དང་། དགེ་སློང་མ་གཞན་

གྱིས་ཅིའི་ཕྱིར་དད་པ་མི་ལེན་ཅེས་དྲིས་པ་དང་། གསོ་སྦྱིན་སྔ་མའི་ཚེ་དད་པ་བླངས་པས་ཆོག་མོད་ཅེས་པ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཞིག་གིས་མཆོད་པའི་དད་པ་བྱིན་ན་ལྟུང་བའོ། །དགེ་སློང་མས་གསོ་སྦྱིན་གྱི་དུས་སུ་དད་པ་མི་ལེན་པར་གསོ་སྦྱིན་སྔ་མའི་

Vol. 156 · folio 135a

དད་པས་ཆོག་གོ་ཞེས་ཟེར་ན་ལྟུང་བར་འགྱུར་རོ། །ལྟུང་བ་བརྒྱ་ཉི་ཤུ་བདུན་པ་རྫོགས་སོ།། །།ནམ་བཅོམ་ལྡན་འདས་ཀྱིས་དགེ་སློང་མ་རྣམས་ལ་ཟླ་བ་ཕྱེད་ཕྱེད་ཅིང་དགེ་འདུན་པ་ལ་ཆོས་བསྟན་པ་ལུང་ནོས་ཤིག་ཅེས་གསུངས་པ་ལས། དགེ་སློང་མ་

བཅུ་གཉིས་སྡེ་རྣམས་བདག་ཅག་སྡེ་སྣོད་གསུམ་དང་ལྡན་པས་ལུང་ནོད་མི་དགོས་སོ་ཞེས་ལུང་མི་ནོད་པ་ལས་བཅས། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་གདམས་པ་དང་རྗེས་སུ་བསྟན་པ་མི་ཉན་ན་ལྟུང་བའོ། །དགེ་སློང་མས་ཟླ་བ་ཕྱེད་ཕྱེད་ཅིང་ཆོས་བཤད་པའི་རིགས་པ་ལས་ཆོས་བཤད་པའི་

ལུང་མི་ནོད་ན་ལྟུང་བར་འགྱུར་རོ། །གདམས་པ་ཞེས་བྱ་བ་ནི་མདོ་ཙམ་བསྟན་པའོ། །རྗེས་སུ་བསྟན་པ་ཞེས་བྱ་བ་ནི་རྒྱས་པར་འཆད་པའོ། །ལྟུང་བ་བརྒྱ་ཉི་ཤུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། །དགེ་སློང་མ་དག་ཅིག་ལྗོངས་

རྒྱུར་དོང་བ་ལས། དགེ་སློང་མེད་པའི་གནས་སུ་གསོ་སྦྱིན་བྱས་ཏེ། དོན་ཉུང་ངུ་བས་འཕྱ་བ་ལས་བཅས། ཡང་དགེ་སློང་མ་གང་དགེ་སློང་མེད་པར་གསོ་སྦྱིན་བྱེད་ན་ལྟུང་བའོ། །དགེ་སློང་མས་ཆེད་དུ་བསམས་ཏེ་དགེ་སློང་མེད་པའི་གནས་སུ་གསོ་སྦྱིན་བྱས་ན་ལྟུང་བར་འགྱུར་

རོ། །ལམ་རིང་པོར་འགྲོ་བའི་ཚེ་གསོ་སྦྱིན་གྱི་དུས་ལ་བབ་ན་དགེ་སློང་མེད་ནའང་ཉེས་མེད་དོ། །གང་ན་དགེ་སློང་གི་དགེ་འདུན་ཡོད་པ་ལ་སེམས་ཀྱིས་དམིགས་ཤིང་བྱིན་གྱིས་བརླབ་པར་བྱའོ། །ལྟུང་བ་བརྒྱ་ཉི་ཤུ་དགུ་པ་རྫོགས་སོ།། །།མདོར་བསྟན་པ་ནི། དགེ་སློང་མེད་པར་

དབྱར་མི་གནས། །དབྱར་གནས་ནས་ཀྱང་སྐབས་དབྱེ་དང་། །ཚོགས་ལའང་ཁང་ན་མི་སྨྲ་དང་། །མི་སྙན་ཟེར་དང་སེར་སྣ་ལྔ། །སྤངས་ནས་བཟའ་བར་མི་བྱ་དང་། །རྒྱུད་ཀྱང་གཞག་པར་མི་བྱའོ། །སྟོན་པ་མཉན་དུ་ཡོད་པ་ན་དགེ་སློང་མ་དག་ཅིག་དགེ་སློང་མེད་པའི་གཙུག་ལག་ཁང་

དུ་ཚུལ་དུ་ཞུགས་པ་ལས་བཅས། ཡང་དགེ་སློང་མ་གང་དགེ་སློང་མེད་པའི་གཙུག་ལག་ཁང་དུ་དབྱར་གནས་ཤིང་ཚུལ་དུ་འཇུག་ན་ལྟུང་བའོ། །དགེ་སློང་མ་དབྱར་ཚུལ་དུ་འཇུག་པའི་ཚེ་དགེ་སློང་པ་ལ་བརྟེན་ནས་ལུང་མ་ནོས་ཤིང་ཚུལ་དུ་འཇུག་དགོས་པ་ལས། ཆེད་དུ་དགེ་སློང་ཕ་མེད་པའི་

Vol. 156 · folio 135b

གནས་སུ་སོང་སྟེ། དགེ་སློང་མ་འབའ་ཞིག་ཚུལ་དུ་འཇུག་པར་བྱེད་ན་ལྟུང་བར་འགྱུར་རོ། །ཚུལ་དུ་འཇུག་པའི་ཐད་ཀར་དགེ་སློང་ཐམས་ཅད་བབས་སམ་ཤི་བར་གྱུར་ན་ཉེས་མེད་དོ། །ལྟུང་བ་བརྒྱ་སུམ་ཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཅོམ་ལྡན་འདས་

ཀྱིས་བཀའ་སྩལ་པ། དགེ་སློང་མ་ཚུལ་ནས་བྱུང་བའི་ཚེ་དགེ་འདུན་སྡེ་གཉིས་ལ་མཐོང་བ་དང་ཐོས་པ་དང་དོགས་པ་གསུམ་གྱི་སྒོ་ནས་གླེང་བ་གསོལ་ཅིག་ཅེས་བཀའ་སྩལ་པ་ལས། ཕྱིས་སྦོམ་དགའ་མོ་ཚུལ་ནས་བྱུང་བའི་ཚེ་དགེ་འདུན་གཉིས་ཀ་ལ་གླེང་བ་མི་གསོལ་པ་ལས་བཅས།

ཡང་དགེ་སློང་མ་གང་དབྱར་གནས་ནས་དགེ་འདུན་གཉི་ག་ལས་གནས་གསུམ་པོ་དག་གི་སྐབས་མི་འབྱེད་ན་ལྟུང་བའོ། །ཇི་ཙམ་དུ་དགེ་སློང་མས་ཚུལ་ནས་འབྱུང་བའི་ཚེ་དགེ་འདུན་སྡེ་གཉིས་ལས་མཐོང་བ་དང་། ཐོས་པ་དང་། དོགས་པ་གསུམ་གྱི་སྒོ་ནས་གླེང་བར་མི་གསོལ་ཞིང་། དགེ་

སློང་མ་ཉི་ཚེ་ཚུལ་ལས་འབྱུང་བར་བྱེད་ན་ཀུན་ལ་ལྟུང་བར་འགྱུར་རོ། །ཉེས་མེད་པ་ནི་གོང་མ་དང་འདྲའོ། །གོང་མ་དང་གཉི་ག་ལའང་ལྕི་བའི་ཆོས་སུ་གཏོགས་སོ། །ལྟུང་བ་བརྒྱ་སུམ་ཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་དགེ་སློང་

མའི་དགེ་འདུན་ལ་ཚིག་མི་སྙན་པ་སྣ་ཚོགས་ཀྱིས་བསྡིགས་པར་བྱེད་པ་དང་། དོན་ཉུང་ངུ་བས་འཕྱས་པ་ལས་བཅས། ཡང་དགེ་སློང་མ་གང་ཚོགས་ལ་ངན་དུ་ཟེར་ན་ལྟུང་བའོ། །དགེ་སློང་མས་ཆེད་དུ་བསམས་ཏེ་དགེ་འདུན་འདུས་པའི་ཚོགས་ལ་ཚིག་ངན་པ་སྣ་ཚོགས་ཀྱིས་སྐྲག་

པའམ་འཇིགས་པར་བྱ་བའི་ཕྱིར་བསྡིགས་ན་ལྟུང་བའོ། །དགེ་སློང་མ་དེ་ཐམས་ཅད་ཆོས་མ་ཡིན་པ་ལ་ཕྱོགས་པར་གྱུར་ཏེ། གཏོང་དུ་མི་བཏུབ་པ་ལས་བསྡིགས་པས་ནི་ཉེས་མེད་དོ། །ལྟུང་བ་བརྒྱ་སུམ་ཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་

དགའ་མོ་དག་དགེ་འདུན་མའི་ཚོགས་ལ་མྱ་ངན་གྱི་ཚིག་སྨྲ་བ་ལས་དོན་ཉུང་ངུ་བས་འཕྱ་བ་ལས་བཅས། ཡང་དགེ་སློང་མ་གང་ཚོགས་ལ་མི་སྙན་པར་ཟེར་ན་ལྟུང་བའོ། །དགེ་སློང་མས་དགེ་འདུན་མའི་ཚོགས་ལ་མྱ་ངན་གྱི་ཚིག་ཏུ་སྨྲ་བ་ལ་སོགས་པ་ནི་སྦྱར་མ་འདི་ཞེས་བྱ་བ་ལ་

Vol. 156 · folio 136a

སོགས་ཏེ། མྱ་ངན་གྱི་ཚིག་ཏུ་འགྱུར་རོ་ཅོག་གང་སྨྲས་ཀྱང་ལྟུང་བའོ། །ལྟུང་བ་བརྒྱ་སུམ་ཅུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་དག་ལྗོངས་རྒྱུ་བ་ལས་དེ་དག་གིས་ཁྱིམ་བདག་དག་ལ་སྐྱེ་དགུའི་བདག་མོ་ལ་སོགས་

པ་དགྲ་བཅོམ་པ་དག་གི་ཡོན་ཏན་བརྗོད་དེ། སྐྱེ་དགུའི་བདག་མོ་ཆེན་མོ་ནི་བཅོམ་ལྡན་འདས་ཀྱིས་ཉན་ཐོས་མའི་ནང་ན་མཆོག་གནས་བརྟན་རྒྱལ་མོ་ལྟ་བུར་གསུངས། ཨུཏྤ་ལའི་མདོག་ནི་ཐོས་པ་འཛིན་པའི་མཆོག་ཏུ་གསུངས། ཆོས་སྦྱིན་མ་ནི་མདོ་སྡེ་རྣམ་པར་འཛིན་པའི་ནང་ན་མཆོག་ཏུ་

གསུངས། གཽ་ཏ་མ་རིད་དེ་མ་ནི་འདུལ་བ་འཛིན་པའི་མཆོག་ཏུ་གསུངས་ཏེ། དེ་ལ་སོགས་པའི་ཀུན་གྱི་ཡོན་ཏན་བསྔགས་པ་ལས། སྦོམ་དགའ་མོས་ཐོས་པར་གྱུར་པ་དང་ཕྲག་དོག་སྐྱེས་ནས་དེ་དག་དེ་མ་ཡིན་ཏེ། སྐྱེ་དགུའི་བདག་མོ་ནི་ལྕི་བའི་ཆོས་བརྒྱད་ཁས་བླངས་པ་ལས་རབ་ཏུ་

བྱུང་བ་ཡིན། ཨུཏྤ་ལའི་ཁ་དོག་ནི་གྲོང་ཁྱེར་ཆེན་པོ་དྲུག་ཏུ་སྨད་འཚོང་བར་བྱེད་པ་ཡིན། ཆོས་སྦྱིན་མ་ནི་འཕྲིན་གྱིས་རབ་ཏུ་བྱུང་བ་ཡིན། གཽ་ཏ་མ་རིད་དེ་མ་ནི་བུ་ཤ་ཟོས་པ་ཡིན་ནོ་ཞེས་བསྔགས་པ་ལས་སེར་སྣ་བྱེད་ཅིང་མི་སྙན་པར་བསྒྲགས་པ་ལས། ཁྱིམ་བདག་གིས་འཕྱ་བ་ལས་

བཅས། ཡང་དགེ་སློང་མ་གང་བསྔགས་པ་ལ་སེར་སྣ་བྱེད་ན་ལྟུང་བའོ། །དགེ་སློང་མས་དགེ་སློང་མ་གཞན་གྱི་ཡོན་ཏན་བསྔགས་པ་ཐོས་ན་ཕྲག་དོག་གི་སེམས་ཀྱིས་དེ་ལ་མི་སྙན་པར་སྒྲོགས་ན་ལྟུང་བར་འགྱུར་རོ། །ལྟུང་བ་བརྒྱ་སུམ་ཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་

པ་ན་སྟེ། དགེ་སློང་མ་སྦོམ་དགའ་མོ་གྲོང་མི་དག་ཅིག་ལ་ཆོས་བཤད་ནས་དེ་དག་དད་པར་གྱུར་པ་དང་། ཕྱིས་དགེ་སློང་མ་གཞན་དག་གྲོང་དེར་བསོད་སྙོམས་ལ་འགྲོ་བ་དང་། དེ་ལ་འགོག་པར་བྱེད་དེ། གྲོང་འདི་དག་ང་ཉིད་ཀྱིས་དད་པར་བྱས་པ་ཡིན་པས་ཁྱེད་སུ་ཡང་དེར་མ་འདོང་ཤིག་

ཅེས་འགོག་པ་ལས་བཅས། ཡང་དགེ་སློང་མ་གང་ཁྱིམ་ལ་སེར་སྣ་བྱེད་ན་ལྟུང་བའོ། །དགེ་སློང་མས་དགེ་སློང་གཞན་བསོད་སྙོམས་ལ་འཇུག་པའི་ཚེ། གྲོང་ལ་སེར་སྣ་བྱེད་ཅིང་གཞན་ལ་འགོག་པར་བྱེད་ན་ལྟུང་བའོ། །དགེ་སློང་མ་སྡིག་ཅན་དུ་གྱུར་པས་གྲོང་མི་དེ་དག་སྔར་བདག་

Vol. 156 · folio 136b

གིས་དད་པར་བྱས་པ་མི་དད་པར་འགྱུར་གྱིས་དོགས་པ་ལ་ཉེས་མེད་དོ། །ལྟུང་བ་བརྒྱ་སུམ་ཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་གནས་ཁང་མང་དུ་བརྩིགས་ཏེ། དགེ་སློང་མ་གསར་དུ་འོངས་པ་གནས་ཁང་མེད་པ་དག་ལ་འང་བརྙན་པོར་མི་སྟེར་

བ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་གནས་ཁང་ལ་སེར་སྣ་བྱེད་ན་ལྟུང་བའོ། །དགེ་སློང་མ་གནས་ཁང་ལ་སེར་སྣ་བྱེད་ཅིང་ཚངས་པ་མཚུངས་པར་སྤྱོད་པ་གསར་དུ་འོངས་པའམ། གནས་མེད་པ་དག་ལ་གནས་འཆུགས་པར་མི་བྱེད་ན་ལྟུང་བར་འགྱུར་རོ། །གནས་ཁང་

དོག་པར་གྱུར་ན་གདིང་བ་ཙམ་གྱི་ཚད་དུ་ཡང་ངས་གཞི་བགོ་བར་བྱའོ། །དེ་ལྟར་མ་བྱས་ན་ཡང་ལྟུང་བར་འགྱུར་རོ། །ལྟུང་བ་བརྒྱ་སུམ་ཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་གཞན་གྱིས་སྔར་བསོད་སྙོམས་བསླངས་ཀྱིས་དོགས་པའི་ཕྱིར་ནང་པར་སྔ་རབ་ཏུ་

བསོད་སྙོམས་ལ་འོངས་པ་ལས། བྲམ་ཟེ་དག་བཀྲ་ཤིས་བྱས་པའི་སྒོར་ཕྱིན་པ་དང་དགེ་སྦྱོང་མ་མགོ་རེག་མ་འདི་དག་མཐོང་བས་ལྟས་ངན་ཏོ་ཞེས་ཤིན་ཏུ་བརྡེགས་ཏེ། མིག་དག་ཀྱང་སྐྲངས་ནས་སླར་གནས་སུ་ཕྱིན་པ་དང་དགེ་སློང་མ་དག་གིས་ཅིའི་ཕྱིར་མིག་སྐྲངས་ཞེས་དྲིས་པ་དང་དེས་ཀྱང་ཞིབ་ཏུ་

སྨྲས་སོ། །དེ་ལྟ་བུར་གྱུར་པ་དོན་ཉུང་ངུ་པས་འཕྱ་བ་ལས་བཅས། ཡང་དགེ་སློང་མ་གང་རྙེད་པ་ལ་སེར་སྣ་བྱེད་ན་ལྟུང་བའོ། །རྙེད་པ་ཞེས་བྱ་བ་ལ་རྣམ་པ་གཉིས་ཏེ། ཟས་ཀྱི་རྙེད་པ་དང་། གོས་ཀྱི་རྙེད་པའོ། །སྐབས་འདིར་ཟས་ཀྱི་རྙེད་པ་དང་སྦྱར་རོ། །དགེ་སློང་མས་ཟས་ཀྱི་རྙེད་པ་ལ་ཕྲག་

དོག་བྱ་བའི་ཕྱིར་དགེ་སློང་མ་གཞན་དག་བསོད་སྙོམས་ལ་འདོང་བ་ལ་ངས་མ་བསླངས་ཀྱི་བར་དུ་ཁྱེད་མ་སློང་ཤིག་ཅེས་བསྒོ་ན་འང་ལྟུང་བར་འགྱུར་རོ། །གཞན་པས་སྔར་སོང་སྟེ་བདག་ཉིད་ཀྱིས་བསླངས་ཏེ་ཟས་གྲུབ་ན་འང་ལྟུང་བའོ། །ལྟུང་བ་བརྒྱ་སུམ་ཅུ་བདུན་པ་རྫོགས་སོ།། །།སྟོན་པ་

མཉན་དུ་ཡོད་པ་ན་སྟེ། སྦོམ་དགའ་མོས་སློབ་མ་དང་ཉེ་གནས་དག་ལ་ཆོས་མི་སློབ་ཅིང་རྒུན་འབྲུམ་དང་བལ་པོ་སེའུ་དག་མཉེད་ཅིང་ལས་ངན་པ་མང་དུ་བྱེད་དུ་བཅུག་པ་ལས་སློབ་མ་དག་གིས་ཆོས་བཤད་པར་གསོལ་བ་དང་། སྦོམ་དགའ་མོས་སྨྲས་པ་ངས་འཕགས་པ་དྲུག་སྡེ་པ་རྣམས་

Vol. 156 · folio 137a

ལ་ཆོས་ཀྱི་ཕྱིར་བལ་པོ་སེའུ་དང་རྒུན་འབྲུ་དག་མཉེད་མཉེད་དེ་ནི་ལག་པ་ཆུ་བུར་གྱིས་གང་། ཕྱག་འཚལ་འཚལ་ནས་ཀླད་པའི་སྐྲ་བྱི་ཞིང་པུས་མོ་འང་རྡོལ། ཐེ་ཚོམ་འདྲི་འདྲི་སྟེ་ཁ་ཆུ་བུར་གྱིས་གང་སྟེ། དེ་ལྟ་བུ་དཀའ་བ་མང་པོ་སྤྱད་པས་ཆོས་ཐོས་པ་དེ་དང་ཁྱེད་ཀྱིས་

ལས་མང་པོ་མ་བྱས་པར་ཅིའི་ཕྱིར་ཆོས་བསྟན་ཞེས་ཟེར་བ་ལས་བཅས། ཡང་དགེ་སློང་མ་གང་ཆོས་ལ་སེར་སྣ་བྱེད་ན་ལྟུང་བའོ། །དགེ་སློང་མས་སློབ་མ་དང་ཉེ་གནས་དག་ཆོས་འདྲིའམ་གཞན་དག་ཆོས་འདྲི་ཡང་རུང་སྟེ་ཕྲག་དོག་དང་སེར་སྣའི་བསམ་པས་མི་སྟོན་ན་ལྟུང་བར་འགྱུར་རོ། །

བདག་ལ་ཀླན་ཀ་ཚོལ་ལམ་ཤེས་སམ་མི་ཤེས་བགམ་པའི་ཕྱིར་འདྲི་བ་ལ་མ་བསྟན་ན་འང་ཉེས་མེད་དོ། །ལྟུང་བ་བརྒྱ་སུམ་ཅུ་བརྒྱད་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་བཅུ་གཉིས་སྡེ་རྣམས་ཁ་ཟས་བྱིན་ལེན་བྱས་ནས་མདུན་དུ་བཞག་སྟེ་ཟ་བའི་ཚེ།

ཟ་བཞིན་དུ་ལངས་ཤིང་ལས་བྱེད། དེ་ནས་ཡང་སླར་འདུག་ཅིང་ཟ་བ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཟས་ཟོས་ཏེ་སྤངས་ནས་ཟོས་ན་ལྟུང་བའོ། །ལྷག་མར་མ་བྱས་པའི་ཟས་ཟོས་ནའང་ལྟུང་བར་འགྱུར་རོ་ཞེས་གོང་དུ་བཤད་པ་དང་ཁྱད་པར་ཅི་ཡོད་ཅེ་ན།

གོང་མ་ནི་སྤྱོད་ལམ་ལས་ཀྱང་ཉམས་སེམས་ཀྱི་རྒྱུད་ཀྱིས་ཀྱང་མི་བཟའ་བར་བཅད་ནས་ཁ་ཟས་ཞིག་རྙེད་དེ་ཟ་བར་འདོད་ན་ལྷག་མར་གྱིས་ཏེ་ཟོ་ཤིག་ཅེས་གསུངས། འདིར་ནི་ཁ་ཟས་ཟ་བའི་ཚེ་སེམས་ཀྱི་རྒྱུད་ཀྱིས་མ་བཅད་པར་འཕྲལ་དུ་སྤྱོད་ལམ་ལས་ཉམས་པར་བྱེད་ཅིང་། ཡང་ཟ་ཡང་

འདུག་པར་བྱེད་པ་ལས་ལྟུང་བར་འགྱུར་རོ། །ལྟུང་བ་བརྒྱ་སུམ་ཅུ་དགུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོ་སྔ་དྲོའི་དུས་སུ་བསོད་སྙོམས་ལ་ཞུགས་པ་དང་ཁྱིམ་བདག་མོ་ཞིག་གི་སྒོར་བསོད་སྙོམས་བསླངས་པ་ལས། ཁྱིམ་བདག་

མོ་དེ་ངུ་བ་མཐོང་ནས་སྦོམ་དགའ་མོས་ཅིའི་ཕྱིར་ངུ་ཞེས་དྲིས་པ་དང་། དེས་བདག་གི་བུ་ཐོན་བུ་བྱུང་བས་བུའི་བྱ་བ་དག་མ་འཚལ་ཏེ་ཁྱོད་ཀྱིས་མཁྱེན་ནམ་ཞེས་དྲིས་པ་དང་། སྦོམ་དགའ་མོས་སྨྲས་པ་ཁྱོད་ནི་ཁབ་ཁྲིན་དང་འདྲ་སྟེ་ལས་གཅིག་པུ་བྱེད་ཤེས་པར་འགྱུར་གྱི། ངས་ནི་ལས་ཀྱི་གནས་

Vol. 156 · folio 137b

དང་བཟོའི་གནས་ཐམས་ཅད་ཤེས་ཀྱི་ང་ལ་བསོད་སྙོམས་བྱིན་ཅིག །ངའི་མཁན་མོ་བྱིན་ནམ་ཚངས་པ་མཚུངས་པར་སྤྱོད་པ་དང་མཛའ་མོའི་བསོད་སྙོམས་ཀྱང་བྱིན་ཅིག །ཁྱོད་ཀྱི་བུའི་བྱ་བ་ངས་བྱའོ་ཞེས་སྨྲས་ནས་ཁྱིམ་བདག་མོ་དེས་ཀྱང་བསོད་སྙོམས་མང་དུ་བྱིན་ནོ། །དེ་ནས་སྦོམ་དགའ་

མོས་བུ་དེ་ལེགས་པར་བཀྲུས་ལེགས་པར་ཕྱིས་ནས། མཚོག་མ་སྲ་བར་བྱ་བའི་ཕྱིར་ས་ལྕི་བའི་འཇི་བས་བསྐུས། གནོད་པ་བསྲུང་བའི་ཕྱིར་སྒོ་ཀའི་ས་ལས་དཔྲལ་བར་ཐིག་ལེ་གསུམ་བྱས་ནས་བསོད་སྙོམས་མང་དུ་ཁྱེར་ཏེ་སོང་ངོ་། །དེའི་འོག་ཏུ་དེའི་ཁྱིམ་ཐབ་ཀྱང་འོངས་ནས་བུའི་

བྱ་བ་བྱས་པ་མཐོང་ནས་ཆུང་མ་ལ་སྨྲས་པ། བཟང་མོ་བུའི་བྱ་བ་བདག་ལེགས་པར་བྱས་པ་ནི་ལེགས་སོ་ལེགས་སོ་ཞེས་སྨྲས་པ་དང་། དེས་སྨྲས་པ་བདག་གིས་ནི་མ་འཚལ་གྱི་སྦོམ་དགའ་མོས་བགྱིས་སོ་ཞེས་སྨྲས་པ་དང་། དེས་སྨྲས་པ་ཕྱིས་ཀྱང་དགེ་སློང་མ་དག་འོངས་པ་དང་བྱེད་དུ་

ཆུག་ཤིག་ཅེས་སྨྲས་སོ། །དུས་གཞན་ཞིག་ན་སྐྱེ་དགུའི་བདག་མོ་ཆེན་མོ་བསོད་སྙོམས་ལ་ཞུགས་པ་ལས་ཁྱིམ་དེའི་སྒོར་ཕྱིན་ནོ། །ཁྱིམ་བདག་མོ་དེས་སྨྲས་པ། འཕགས་མ་བུའི་བྱ་བ་བྱོས་ཤིག་ཅེས་སྨྲས་པ་དང་། སྐྱེ་དགུའི་བདག་མོས་སྨྲས་པ་སྔོན་བྱང་ཆུབ་སེམས་དཔའ་ལྷུམས་

ནས་བྱུང་བ་མ་གཏོགས་པར་གཞན་གྱི་བུའི་བྱ་བ་བྱེད་ངས་མ་མྱོང་བའི་སྟེང་དུ། དགེ་སློང་མས་ཁྱོད་ཀྱི་བུའི་བྱ་བ་བྱས་ན་ནི་ཁྱོད་ལ་བསོད་ནམས་མ་ཡིན་པ་མང་དུ་འཕེལ་ལོ་ཞེས་སྨྲས་པ་དང་། ཁྱིམ་བདག་མོ་དེས་སྔོན་སྦོམ་དགའ་མོས་བུའི་བྱ་བ་བྱེད་པ་དག་ཞིབ་ཏུ་སྨྲས་པ་དང་། ཁྱིམ་

བདག་མོ་དེས་ཐོས་ནས་དགེ་སློང་མ་རྣམས་འཕྱ་ཞིང་མི་སྙན་པ་ཟེར་བ་ལས་བཅས། ཡང་དགེ་སློང་མ་གང་རྒྱུད་འཇོག་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །རྒྱུད་ཅེས་བྱ་བ་ནི་བུས་པ་ཆུང་ངུ་ལ་བྱ་སྟེ་རིགས་ཀྱི་རྒྱུད་ལ་བྱའོ། །འཇོག་ཅེས་བྱ་བ་ནི་འཁྲུ་བ་

དང་འཕྱི་བ་དང་། གོས་བསྐོན་པ་དང་། ཟས་བསྙོད་ཅིང་རྩེད་མོ་ལ་སོགས་པའོ། །དགེ་སློང་མས་གཞན་གྱི་བུ་ཆུང་ངུ་འཁྲུ་བར་བྱེད་དམ་འཕྱི་བར་བྱེད་དམ་གོས་བསྐོན་ནམ་ཟས་བསྙོད་ན་ཐམས་ཅད་དུ་ལྟུང་བར་འགྱུར་རོ། །གཉེན་དུ་འོངས་པ་ལ་ཉེས་མེད་དོ། །ལྟུང་བ་བརྒྱ་བཞི་བཅུ་

Vol. 156 · folio 138a

པ་རྫོགས་སོ།། །།མདོར་བསྟན་པ་ནི། ཁྲུས་རས་བཅང་བར་བྱ་བ་དང་། །ཆོས་གོས་བཀྲུ་བར་བྱ་བ་དང་། །སྦྱར་མ་དང་ནི་བརྗེ་བ་དང་། །དགེ་སྦྱོང་ཆོས་གོས་སྦྱིན་པ་དང་། །སྨེ་གབ་དང་ནི་ཚོགས་ཀྱི་གོས། །དབུལ་པོ་ཡི་རང་བྱེད་པ་དང་། །གཏན་པ་

དབྱུང་བར་བྱ་བ་དང་། །ཆོས་གོས་བགོ་བཤའ་བྱ་བའོ། །སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ཆུ་བོ་ཨ་ཙིར་བ་ར་ཏའི་ནང་ན་ཁྱིམ་མི་མོ་དག་དང་ལྷན་ཅིག་ཁྲུས་བྱེད་པའི་ཚེ་དེ་དག་ལ་རྨོངས་བསྟན་ནས་ངའི་སྤུ་ཕྱོགས་གཅིག་ཏུ་འཁྱིལ་ཞིང་ལྕང་ལོ་ཅན་དུ་འདུག་པ་ལྟོས་ཞེས་དེ་

དག་ལ་ངོམ་པ་དང་། དགེ་སློང་མ་གཞན་དག་འཕྱ་བར་གྱུར་པ་ལས་བཀའ་སྩལ་པ། ཕྱིན་ཆད་ཁྲུས་བྱེད་ན་ཁྲུས་རས་གྱོན་ལ་ཁྲུས་གྱིས་ཤིག་ཅེས་བཅས། ཡང་དགེ་སློང་མ་གང་ཁྲུས་རས་མི་འཆང་ན་ལྟུང་བའོ། དགེ་སློང་མས་ཁྲུས་རས་མེད་པར་ཁྲུས་བྱེད་ན་འབབ་ཆུའམ་

ལྟེང་ཀའི་ནང་ནའང་རུང་སྟེ། དང་པོར་ཆུར་ཞུགས་ནས་ལྟེ་བར་མ་ཕྱིན་གྱི་བར་དུ་ནི་ཉེས་བྱས། ལྟེ་བ་འདས་ན་ལྟུང་བའོ། །ཆུ་བཅུས་པ་ཞིག་ལ་ཁྲུས་བྱེད་ནའང་དང་པོ་མགོ་ནས་ཡས་བླུགས་ནས་ལྟེ་བར་མ་ཕྱིན་གྱི་བར་དུ་ཉེས་བྱས། ལྟེ་བ་ལས་བླངས་འདས་ན་ལྟུང་བར་འགྱུར་རོ། །གཅིག་

པུར་ཁང་པ་དབེན་པ་ན་ཁྲུས་བྱེད་ན་ཁྲུས་རས་མེད་ནའང་ཉེས་མེད་དོ། །ལྟུང་བ་བརྒྱ་བཞི་བཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ཤམ་ཐབས་ཁྲག་གིས་ཕོག་པ་ཁྱེར་ནས་ཁྲུས་མཁན་གྱི་ནང་དུ་སོང་སྟེ། བཞིན་བཟངས་ངའི་

འདི་ཁྲུས་ཏེ་བྱིན་ཅིག་ཅེས་སྨྲས་པ་དང་། དེས་སྨྲས་པ་གོས་ཕལ་འཁྲུ་བའི་ནང་དུ་ཆུག་ཤིག་ཅེས་བསྒོ་བ་དང་སྦོམ་དགའ་མོས་ཀྱང་དེར་བཅུག་གོ། །དེའི་འོག་ཏུ་ཁྲུས་མཁན་དེས་གོས་བཀྲུ་བར་བཤམས་པ་དང་། སྦོམ་དགའ་མོའི་ཤམ་ཐབས་དེ་ཁྲག་གིས་ཕོག་པ་མཐོང་ནས་

འདིས་ངའི་གོས་ཐམས་ཅད་མི་གཙང་བས་འཕགས་ཏེ་མ་རུང་བར་གྱུར་ཏོ་ཞེས་དེ་ཡང་ཁྲོས་པར་གྱུར་པ་ལས་བཅས། ཡང་དགེ་སློང་མ་གང་བཙོ་བླག་མཁན་ལ་ཆོས་གོས་འཁྲུར་བཅོལ་ན་ལྟུང་བའོ། །དགེ་སློང་མས་ཁྲུས་མཁན་ལ་གོས་རྙིང་པ་འཁྲུར་བཅོལ་ན་ཐམས་ཅད་དུ་ལྟུང་བར་འགྱུར་

Vol. 156 · folio 138b

རོ། །ལྟུང་བ་བརྒྱ་བཞི་བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྟེ་སྤང་བའི་སྐབས་ན་བཤད་པ་དང་མཐུན། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་ཆོས་གོས་བྱིན་གྱིས་མི་རློབ་ན་ལྟུང་བའོ། །སྡོམ་གྱི་ཚིགས་སུ་བཅད་པ་ལས་ཀྱང་མི་

འབྱུང་བས་ལྷག་མ་འདྲ་ནས་ལྟུང་བའི་གྲངས་སུ་མ་སྩལ་ཏོ། །སྟོན་པ་མཉན་དུ་ཡོད་པ་ན་སྟེ། ཁྱིམ་བདག་ཅིག་ལ་བུ་མིང་སྲིང་གཉིས་བདོག་པ་དང་། ཁྱིམ་བདག་དེ་དུས་ལས་འདས་པའི་འོག་ཏུ་བུ་མིང་སྲིང་གཉིས་མ་དང་གསུམ་རབ་ཏུ་བྱུང་ངོ་། །དེའི་མིང་པོའི་མིང་ནི་མོས་པ་ཅན་

ཞེས་བྱ། སྲིང་མོའི་མིང་ནི་མོས་མ་ཅན་ཞེས་བྱ་སྟེ། དུས་ཕྱི་ཞིག་ན་མོས་པ་ཅན་དེ་སྦྱར་མ་བཟང་པོ་ཅིག་གྱོན་ཏེ། དགེ་སློང་མའི་དབྱར་མོ་ཁང་དུ་འོངས་པ་དང་། མོས་མ་ཅན་གྱིས་ཆོས་གོས་སྦྱར་མ་དེ་བླངས་ཏེ་ཁྱེར་ནས་བདག་གི་རྙིང་པ་ནི་མོས་པ་ཅན་ལ་བྱིན་ནོ། །མོས་པ་ཅན་

གྱིས་ཆོས་གོས་རྙིང་པ་དེ་ཡང་ལེགས་པར་བཀྲུས། ལེགས་པར་ཁ་དོག་བསྒྱུར་ཏེ་བཟང་པོར་བྱས་ནས་དབྱར་མོ་ཁང་དུ་སོང་བ་དང་། མོས་མ་ཅན་གྱིས་མཐོང་ནས་སྨྲས་པ། ཁྱོད་བདག་གི་ཆོས་གོས་སླར་ཁྱེར་ལ་ང་བདག་གི་བྱིན་ཅིག་མོས་སྨྲས་པ་དང་། དེས་ཀྱང་བྱིན་ནོ། །

དགེ་སློང་མ་གཞན་དག་གིས་མོས་མ་ཅན་ལ་སྨྲས་པ། ཁྱོད་གཙང་མའི་རིས་ཀྱི་ལྷ་བཞིན་དུ་རྟག་ཏུ་གོས་བཟང་པོ་ཤེ་དག་གིས་ཆ་བར་བྱེད་ན་ག་ལས་རྙེད་ཅེས་སྨྲས་ན། དེས་ཀྱང་ཞིབ་ཏུ་སྨྲས་ནས། དགེ་སློང་མ་དེ་དག་འཕྱ་བ་ལས་བཅས། ཡང་དགེ་སློང་མ་གང་འཁོར་གྱི་གཙོ་

བོ་དང་སྦྱར་མ་རྗེ་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་མོས་མ་ཅན་ལྟ་བུའོ། །འཁོར་གྱི་གཙོ་བོ་ཞེས་བྱ་བ་ནི་དགེ་སློང་ཕའོ། །སྦྱར་མ་ཞེས་བྱ་བ་ནི་ཆོས་གོས་གསུམ་གང་ཡང་རུང་སྟེ་བརྗེས་ན་ལྟུང་བའོ། །ལྟུང་བ་བརྒྱ་བཞི་བཅུ་གསུམ་པ་རྫོགས་སོ།། །།སྟོན་པ་རྒྱལ་པོའི་ཁབ་ན་སྟེ། ཀླུ་

རི་བོ་དང་། སྐྱས་ཀྱི་དུས་སྟོན་བྱེད་པའི་ཚེ། ལྷོ་ཕྱོགས་ནས་གར་མཁན་དག་ཅིག་ལྷགས་ཏེ། དྲུག་སྡེ་པོའི་ཚུལ་དུ་གར་བྱ་བའི་ཕྱིར་སྦོམ་དགའ་མོའི་གན་དུ་སོང་སྟེ། ཆོས་གོས་རྣམས་བརྙས་ནས་སྦོམ་དགའ་མོས་གླ་མང་དུ་བླངས་སོ། །དེ་ནས་གར་མཁན་དེ་དག་གིས་

Vol. 156 · folio 139a

ཆོས་གོས་བགོས་ཤིང་དྲུག་སྡེའི་ཚུལ་དུ་གར་བྱས་པ་དང་། དྲུག་སྡེ་པོ་དག་ཁྲོས་ནས་སྦོམ་དགའ་མོ་ལ་སོགས་པ་བཅུ་གཉིས་སྡེ་དག་བརྡེགས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མས་དགེ་སྦྱོང་གི་གོས་ཁྱིམ་པ་ལ་འཚོང་ན་

ལྟུང་བའོ་ཞེས་བཅས། ཡང་དགེ་སློང་མ་གང་དགེ་སྦྱོང་གི་གོས་ཁྱིམ་པ་ལ་བྱིན་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །དགེ་སྦྱོང་གི་གོས་ཞེས་བྱ་བ་ནི་ཆོས་གོས་ལྔ་ལས་གང་ཡང་རུང་བའོ། །ཁྱིམ་པ་ལ་འཚོང་ཞེས་བྱ་བ་ནི། ཟས་སམ་གོས་ཀྱི་རིན་དུ་འཚོང་

བ་སྟེ། དགེ་སློང་མས་འཚོང་ན་ཐམས་ཅད་དུ་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཀའ་སྩལ་པ། དགེ་སློང་མས་སྨེ་གབ་ཆོངས་ཤིག་ཅེས་བཀའ་སྩལ་པ་དང་། སྦོམ་དགའ་མོས་སྔ་དྲོ་བསོད་སྙོམས་ལ་ཞུགས་

པའི་ཚེ་ཁྲག་གིས་བྱིན་པ་ལ་ཕོག་པ་ཁྱིམ་པ་དག་གིས་མཐོང་སྟེ། དེ་དག་གིས་ཅི་ཡིན་ཞེས་དྲིས་པ་དང་། སྦོམ་དགའ་མོས་སྨྲས་པ་ཅི་ཡིན་པ་མི་ཤེས་ན་མ་ལ་དྲིས་ཤིག །སྲིང་མོ་ལ་དྲིས་ཤིག་ཅེས་སྨྲས་པ་དང་། དེ་དག་འཕྱ་བ་ལས་བཅས། ཡང་དགེ་སློང་མ་གང་སྨེ་གབ་མི་འཆང་ན་

ལྟུང་བའོ། །དགེ་སློང་མས་སྨེ་གབ་མི་འཆང་ན་ཐམས་ཅད་དུ་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་བཙུན་མོ་ཕྲེང་ལྡན་མའི་གན་དུ་ཕྱིན་པ་དང་བཙུན་མོ་ཕྲེང་ལྡན་མའི་དགེ་སློང་མ་སྨེ་གབ་འཆང་ན་གནང་

བར་ཐོས་ནས། དགེ་སློང་མ་སྤྱི་ལ་སྨེ་གབ་ཀྱི་རྒྱུ་གོས་སྣ་ཚོགས་ལས་མང་དུ་བསྐུར་བ་དང་། དེ་དག་ཐམས་ཅད་སྦོམ་དགའ་མོས་བདག་གིར་བྱེད་པ་ལས་བཅས། ཡང་དགེ་སློང་མ་གང་ཚོགས་ཀྱི་གོས་བདག་གིར་བྱེད་ན་ལྟུང་བའོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་

མོའོ། །ཚོགས་ཞེས་བྱ་བ་ནི་དགེ་སློང་མའི་དགེ་འདུན་ནོ། །གོས་ཞེས་བྱ་བ་ནི་སྨེ་གབ་ཀྱི་གོས་སོ། །དགེ་སློང་མས་དགེ་འདུན་གྱི་སྤྱི་ལ་བསྔོས་པར་ཤེས་བཞིན་དུ་བདག་གིར་བྱས་ན་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་དྲུག་པ་རྫོགས་སོ།། །།སྟོན་པ་མཉན་དུ་

Vol. 156 · folio 139b

ཡོད་པ་ན་སྟེ། སྦོམ་དགའ་མོས་ཚུལ་ནས་བྱུང་བའི་འོག་ཏུ་གཏན་པ་གདིང་བའི་དུས་ལ་བབ་པ་དང་། ཁྱིམ་བདག་དབུལ་པོ་ནད་པ་ཞིག་གི་གན་དུ་སོང་སྟེ། བཞིན་བཟངས་དགེ་འདུན་ལ་གཏན་པའི་གོས་ཕུལ་ཞེས་བསྒོ་བ་དང་། དེས་སྨྲས་པ་བདག་ནི་དབུལ་ཞིང་ནད་པ་བས་ཆོས་གོས་

མི་འབྱོར་ཏེ་ཞེས་སྨྲས་པ་དང་། སྦོམ་དགའ་མོས་སྨྲས་པ་ཚོང་པ་ལས་སྔ་སྐྱིན་གྱིས་ལ་རིན་ཕྱིས་བཅོལ་ཞེས་སྨྲས་ནས། ཚོང་པའི་གན་དུ་ཁྲིད་དེ་གཏུགས་ནས་རས་རིན་པོ་ཆེ་ཞིག་ཁྱེར་རོ། །དེ་ནས་དུས་ཕྱི་ཞིག་ན་ཁྱིམ་བདག་ནད་པ་དེས་རས་རིན་མ་འཁོར་ནས། དེས་བཟུང་སྟེ་ཉི་ཚན་

ལ་བཏགས་པས་མ་དད་ཅིང་འཕྱ་བ་ལས་བཅས། ཡང་དགེ་སློང་མ་གང་དབུལ་པོའི་རྒྱུད་གོས་ཀྱི་སྦྱིན་པ་ཡང་དག་པར་འཛིན་དུ་འཇུག་ན་ལྟུང་བའོ། །དགེ་སློང་མས་གཏན་གདིང་བའི་གོས་ཁྱིམ་ལ་དབུལ་པོ་འམ་ནད་པ་སྦྱོར་མི་བཟོད་པ་ལ་སློང་ཞིང་སྦྱོར་དུ་འཇུག་ན་ལྟུང་བར་འགྱུར་རོ། །ལྟུང་བ་

བརྒྱ་བཞི་བཅུ་བདུན་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། བཀའ་སྩལ་པ། དགེ་སློང་མ་དག་ཆོམ་པོ་དག་གིས་བཅོམ་སྟེ། གློ་བུར་དུ་ལྷགས་ན་གཏན་པ་གློ་བུར་དུ་ཕྱུང་ལ་དགེ་སློང་མ་དེ་དག་ལའང་གོས་བྱིན་ཅིག །གཏན་པ་འབྱིན་པའི་ཚེའང་དགེ་སློང་མ་ཐམས་

ཅད་འདུས་ཤིག་ཅེས་བཀའ་སྩལ་པ་ལས། སྦོམ་དགའ་མོ་འདུར་མི་བཏུབ་པ་ལས་བཅས། ཡང་དགེ་སློང་མ་གང་གཏན་པ་འབྱིན་པར་མི་འདུ་ན་ལྟུང་བའོ། །དགེ་སློང་མ་དགེ་འདུན་གློ་བུར་དུ་གཏན་པ་འབྱིན་པའི་ཚེ་མི་འདུ་ན་ལྟུང་བར་འགྱུར་རོ། །ལྟུང་བ་བརྒྱ་བཞི་བཅུ་བརྒྱད་པ་རྫོགས་

སོ།། །།སྟོན་པ་མཉན་དུ་ཡོད་པ་ན་སྟེ། བཀའ་སྩལ་པ། ཟླ་བ་ལྔ་ཚང་ཡང་དུས་སུ་གཏན་པ་ཕྱུང་ལ་དགེ་སློང་མ་ཐམས་ཅད་འདུས་ཏེ་རྙེད་པ་བགོས་ཤིག་ཅེས་གསུངས་པ་ལས། སྦོམ་དགའ་མོ་འདུར་མི་བཏུབ་པ་ལས་བཅས། ཡང་དགེ་སློང་མ་ཆོས་གོས་ཀྱི་རྙེད་པ་བགོ་བཤའ་

བྱེད་པར་མི་འདུ་ན་ལྟུང་བའོ། །གཏན་པ་ཕྱུང་བའི་འོག་ཏུ་གོས་ཀྱི་རྙེད་པ་བགོ་བཤའ་བྱེད་པར་མི་འདུ་ན་ལྟུང་བའོ། །ལེན་པར་མི་འདོད་ན་མ་འདུས་ཀྱང་ཉེས་པ་མེད་དོ། །ལྟུང་བ་བརྒྱ་བཞི་བཅུ་དགུ་པ་རྫོགས་སོ།། །།མདོར་བསྟན་པ་ནི། ཚུར་ཤོག་རྣམ་པར་ཞི་བྱ་དང་། །

Vol. 156 · folio 140a

བོར་ནས་འགྲོ་བར་བྱེད་པ་དང་། །གཙུག་ལག་བསླབ་པར་མི་བྱ་དང་། །མི་སྦྱིན་ཁ་ཟས་མི་བཙོང་དང་། །ཁྱིམ་གྱི་སོ་ནམ་མི་བྱ་དང་། །ཁྲི་འདུག་བསྙེན་བཀུར་བྱེད་པ་དང་། །བལ་བཀལ་བར་ཡང་མི་བྱ་དང་། །གདུགས་དང་མཆིལ་ལྷམ་མི་བཅང་ངོ་། །

སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་སློབ་མ་དང་ཉེ་གནས་དག་གི་འཐབ་གཅུགས་བྱས་ནས་དེ་དག་འཐབ་པར་གྱུར་པ་དང་། སླར་གཅུགས་པར་མི་བྱེད་དོ། །དགེ་སློང་མ་དག་གིས་འཐབ་པ་ཅིའི་ཕྱིར་མི་གཅུགས་ཞེས་བྱས་ན། སྦོམ་དགའ་མོས་སྨྲས་པ།

འདི་དག་འཐབ་འདོད་ན་ཅིའི་ཕྱིར་མགོས་མགོ་བོ་མི་རྡུང་། འཐབས་ཀྱང་སླའོ་ཞེས་ཟེར་བ་དང་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་གཅུགས་ནུས་ལ་འཐབ་མོ་ཞི་བར་མི་བྱེད་ན་ལྟུང་བའོ། །དགེ་སློང་མས་སློབ་མ་དང་ཉེ་གནས་གང་འཐབ་ཀྱང་རུང་སྟེ།

གཅུགས་ནུས་བཞིན་དུ་གཅུགས་པར་མི་བྱེད་དམ། ཆེད་དུ་གཅུགས་བྱས་ཏེ་འཐབ་ནའང་ལྟུང་བའོ། །ལྟུང་བ་བརྒྱ་ལྔ་བཅུ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། དགེ་སློང་མ་སྦོམ་དགའ་མོས་གཙུག་ལག་ཁང་སྒོ་བཅད་དེ་ལྡེ་མིག་ཀྱོག་པོ་ཐོགས་བཞིན་དུ་

ལྗོངས་རྒྱུར་སོང་བ་ལས། དགེ་སློང་མ་གཞན་གྱིས་སྒོ་མ་ཕྱེད་དེ་མེ་ཤོར་བ་ལས་བཅས། ཡང་དགེ་སློང་མ་གང་དབྱར་མོ་ཁང་བོར་ཏེ་འགྲོ་ན་ལྟུང་བའོ། །དགེ་སློང་མས་གཙུག་ལག་ཁང་སྒོ་བཅད་དེ། ལྡེ་མིག་གཞན་ལ་མ་བཞག་པར་ལྗོངས་རྒྱུར་འགྲོ་ན་ལྟུང་བའོ། །ལྡེ་མིག་བཞག་པ་

བརྗེད་དམ་བར་ཆད་བརྒྱད་བྱུང་བ་ལ་ཉེས་མེད་དོ། །ལྟུང་བ་བརྒྱ་ལྔ་བཅུ་གཅིག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྔ་དྲོ་བསོད་སྙོམས་ལ་ཞུགས་པ་ལས། སྤོས་འཚོང་གི་ཁྱེའུ་འཇིག་རྟེན་གྱི་རིག་པ་སློབ་པ་མཐོང་བ་དང་དེ་ལ་ཆགས་པར་གྱུར་ནས་

བདག་ལ་རིག་པ་སློབས་ཤིག་ཅེས་སྨྲས་པ་དང་། སྤོས་འཚང་གི་ཁྱེའུས་མོ་ལ་བསླབས་ཏེ། སི་རི་བྷུ་སི་རི་བྷུ་སི་རི་བྷུ་སི་རི་སྭཱཧཱ། སྦོམ་དགའ་མོ་ཡང་ལོབས་བཞིན་དུ་ད་དུང་ང་ལ་སློབས་ཤིག་ཅེས་ཡང་ནས་ཡང་དུ་སློབ་པ་ལས་སྤོས་འཚོང་གི་ཁྱེའུ་ཡང་ཁྲོས་ནས། གཏུམ་མོ་མགོ་རེག་

Vol. 156 · folio 140b

མ་ཁྱོད་དགོས་པ་མེད་དོ་ཞེས་སྨྲས་ཤིང་ལངས་ཏེ་སོང་ངོ་། །དགེ་སློང་མ་གཞན་དག་གིས་སྨྲས་པ་ཅིའི་ཕྱིར་ལོབས་བཞིན་དུ་ཡང་སློབ་ཅེས་དྲིས་པ་དང་། དེ་ལ་ཆགས་པས་ན་ལྷན་ཅིག་འདུག་ན་བདག་དགའོ་ཞེས་ཟེར་བ་ལས་འཕྱ་སྟེ་བཅས། ཡང་དགེ་སློང་མ་གང་ཁྱིམ་པ་ལས་

གཙུག་ལག་སློབ་ན་ལྟུང་བའོ། །དགེ་སློང་མས་སྐྱེས་པ་ལ་ཆགས་པའི་ཕྱིར་དེ་ལ་བདག་ཉིད་རིག་པ་སློབ་ན་ལྟུང་བའོ། །ལྟུང་བ་བརྒྱ་ལྔ་བཅུ་གཉིས་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་སྐྱེས་པ་གཞན་ཞིག་དང་ཕྲད་པ་དང་དེ་ལ་ཆགས་ནས་ཚུར་

ཤོག་ངས་ཁྱོད་ལ་རིག་པ་བསླབ་པོ་ཞེས་སྔར་ལོབས་པ་དེ་སྐྱེས་པ་དེ་ལ་ཡང་སློབ་པོ། །དེས་སྨྲས་པ་བདག་ལོབས་སོ་ཞེས་བྱས་པ་དང་མོས་སྨྲས་པ། ད་དུང་ཡང་སློབས་ཤིག་ཅེས་བྱས་པ་དང་། དེ་ཡང་ཁྲོས་ནས་མགོ་རེག་མ་གཏུམ་མོ་ཁྱོད་དང་རིག་པ་འདི་གཉི་ག་ང་ལ་དགོས་པ་མེད་དོ་ཞེས་སྨྲས་

ཏེ་སོང་བ་ལས་བཅས། ཡང་དགེ་སློང་མ་གང་སྐྱེས་པ་ལ་གཙུག་ལག་སློབ་ན་ལྟུང་བའོ། །དགེ་སློང་མ་གང་སྐྱེས་པ་ལ་ཆགས་པའི་ཕྱིར་རིག་པ་སློབ་ཏུ་འཇུག་ན་ལྟུང་བའོ། །ལྟུང་བ་བརྒྱ་ལྔ་བཅུ་གསུམ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་

བསོད་སྙོམས་མང་དུ་རྙེད་ནས། ཁ་ཟས་གཤེར་བ་དག་ནི་ཟ། ཕྱེ་མ་ལ་སོགས་པ་སྐམ་པོ་དག་གིས་གོས་དག་ཉོ་བར་བྱེད་པ་ལས་དོན་ཉུང་ངུ་བའི་དགེ་སློང་མ་དག་འཕྱ་བ་ལས་བཅས། ཡང་དགེ་སློང་མ་གང་ཁ་ཟས་འཚོང་ན་ལྟུང་བའོ། །དགེ་སློང་མས་ཕྱེ་ལ་སོགས་པ་བསོད་

སྙོམས་ཀྱི་ཁ་ཟས་ཀྱིས་གོས་ཉོ་བར་བྱེད་ན་ལྟུང་བའོ། །ལྟུང་བ་བརྒྱ་ལྔ་བཅུ་བཞི་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོས་སྔ་དྲོ་བསོད་སྙོམས་ལ་ཞུགས་པ་དང་། ཁྱིམ་པ་ཞིག་གི་སྒོར་ཕྱིན་པ་དང་བུད་མེད་གཞོན་ནུ་མ་ཞིག་ངུ་ཞིང་འདུག་པ་མཐོང་

ནས། ཁྱོད་ཅིའི་ཕྱིར་ངུ་ཞེས་དྲིས་པ་དང་། བདག་ནི་ཁྱིམ་གསར་དུ་ཕུབ་པ་ཞིག་ཁྱིམ་གྱི་བྱ་བ་དག་མ་འཚལ་ཏེ་ངུའོ་ཞེས་སྨྲས་པ་དང་། སྦོམ་དགའ་མོས་སྨྲས་པ། ང་ལ་བསོད་སྙོམས་མང་དུ་བྱིན་ན་ཁྱིམ་གྱི་བྱ་བ་རྣམས་ངས་བྱའོ་ཞེས་སྨྲས་པ་དང་། དེས་ཀྱང་བསོད་སྙོམས་

Vol. 156 · folio 141a

མང་དུ་བྱིན་ནས་སྦོམ་དགའ་མོས་ཀྱང་དེའི་ཁྱིམ་ཕྱག་དར་བྱས་ཆག་ཆག་གིས་བཏབ་སྣོད་སྤྱད་དག་བཀྲུས་ཏེ་ལེགས་པར་གཞག་ནས་སླར་བསོད་སྙོམས་ཁུར་ཏེ་སོང་ངོ་། །ཕྱིས་སྐྱེ་དགུའི་བདག་མོ་ཡང་བསོད་སྙོམས་ལ་ཞུགས་པ་དང་ཁྱིམ་བདག་མོ་དེས་སྨྲས་པ་

འཕགས་མ་ཁྱིམ་གྱི་བྱ་བ་དག་མཛོད་ཅིག་ཅེས་བྱས་པ་དང་། སྐྱེ་དགུའི་བདག་མོས་སྨྲས་པ། སྔོན་རབ་ཏུ་མ་བྱུང་བའི་ཚེ་རྒྱལ་པོ་ཟས་གཙང་མའི་ཁྱིམ་གྱི་བྱ་བ་རྣམས་ངས་བྱས་པ་མ་གཏོགས་པར་གཞན་གྱི་ཁྱིམ་གྱི་བྱ་བ་བྱེད་མ་མྱོང་བའི་སྟེང་དུ། དགེ་སློང་མས་ཁྱོད་ཀྱི་ཁྱིམ་གྱི་བྱ་བ་

བྱེད་ན་ཁྱོད་ལ་བསོད་ནམས་མ་ཡིན་པ་མང་དུ་འཕེལ་ལོ་ཞེས་སྨྲས་པ་དང་། དེས་སྨྲས་པ། འོ་ན་སྦོམ་དགའ་མོས་ངའི་ཁྱིམ་གྱི་བྱ་བ་མང་དུ་བྱས་སོ་ཞེས་རྒྱས་པར་སྨྲས་སོ། །དེ་ནས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཁྱིམ་གྱི་བྱ་བ་བྱེད་ན་ལྟུང་བའོ། །དགེ་

སློང་མས་ཁྱིམ་གྱི་བྱ་བ་བྱེད་ན་ལྟུང་བར་འགྱུར་རོ། །བདག་གི་གཉེན་ཡིན་ན་ཉེས་མེད་དོ། །ལྟུང་བ་བརྒྱ་ལྔ་བཅུ་ལྔ་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། སྦོམ་དགའ་མོ་ཉིན་མོ་གནས་པའི་སར་ཁྲིའུ་དང་ཁྲི་སྟན་དག་སློབ་མ་དང་ཉེ་གནས་དག་ལ་བསྐུར་ཞིང་དེ་ལ་

བདག་འདུག་ན་བསྙེན་བཀུར་བྱེད་པ་བདག་གིར་བྱེད་པ་ལས་དོན་ཉུང་ངུ་མས་འཕྱ་བ་ལས་བཅས། ཡང་དགེ་སློང་མ་གང་ཁྲི་ལ་འདུག་ཅིང་བསྙེན་བཀུར་བྱེད་པ་བདག་གིར་བྱེད་ན་ལྟུང་བའོ། །དགེ་སློང་མས་དགེ་སློང་མ་དང་ཉེ་གནས་དང་སློབ་མ་དག་ཁྲི་སྟན་ཡང་མང་དུ་སྐྱེད་ཅིང་དེ་ལ་

བདག་འདུག་པར་བྱེད་དམ། དེ་ལ་བདག་གིར་བསྙེན་བཀུར་ཉམས་སུ་ལེན་ན་ལྟུང་བའོ། །ན་བ་དང་རྒན་མོ་ལ་ཉེས་མེད། ལྟུང་བ་བརྒྱ་ལྔ་བཅུ་དྲུག་པ་རྫོགས་སོ།། །།སྟོན་པ་མཉན་དུ་ཡོད་པ་ན་སྟེ། གཙུག་དགའ་མོ་ལས་བཅས་ཏེ། དེའི་གླེང་གཞི་ཡང་གོང་མ་ཁྱིམ་གྱི་

བྱ་བ་བྱེད་པ་དང་འདྲ་སྟེ། དགེ་སློང་མས་བལ་འཁལ་ན་ལྟུང་བར་འགྱུར་རོ། །ལྐོག་ཏུ་དབེན་པར་འདུག་སྟེ། རྒྱ་ཅང་དང་། ལྕག་པོད་དང་གླེགས་ཐག་ཙམ་འཁལ་ཞིང་འཐག་སྟེ། དགེ་སློང་ཕའི་བྱ་བར་བསམས་ན་ཉེས་མེད་དོ། །ཡང་དགེ་སློང་མ་བལ་འཁལ་ན་ལྟུང་བའོ། །ལྟུང་བ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words