འདུལ་བའི་མདོའི་རྒྱ་ཆེར་འགྲེལ་པ

Sanskrit title (Tibetan script, as in the text) བི་ན་ཡ་སཱུ་ཏྲ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 163 · folio 162a

གཞན་དུ་ཕྱིན་པ་དང་བྱིན་གྱིས་རློབ་པར་བྱེད་པ་མེད་པར་མཚམས་ཀྱི་ནང་དུ་སྐྱ་རེངས་ཤར་བ་དང་། དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པའོ་ཞེས་བྱ་བ་སྨྲས་ཏེ། རང་འཇུག་པ་དང་འབྲལ་བ་ནི་གནས་སྐབས་གསུམ་པོ་འདི་དག་ལ་འབྱུང་སྟེ། སྲ་བརྐྱང་པས་མཚམས་

ཀྱི་གནས་གཞན་དུ་ཕྱིན་པ་དང་། མཚམས་གང་དུ་དེ་བཏིང་བའི་མཚམས་དེར་བྱིན་གྱིས་རློབ་པར་བྱེད་པའི་དགེ་སློང་ཐམས་ཅད་མ་ལུས་པར་མེད་པའི་ཚེ་དེར་སྐྱ་རེངས་ཤར་བ་དང་། བྱིན་གྱིས་རློབ་པར་བྱེད་པའི་དགེ་འདུན་གྱི་མཚམས་ཀྱི་དཀྱིལ་འཁོར་གྱི་ཁོངས་སུ་གཏོགས་པ་གང་ཟག་གང་ལ་རྒྱུན་

བཅད་པའི་གནས་སྐབས་ནའོ། །དེ་ལ་དང་པོ་གཉིས་ཀྱིས་ནི་དེར་གཏོགས་པའི་དགེ་འདུན་ཐམས་ཅད་ཀྱི་སྲ་བརྐྱང་བཏིང་བ་རང་འཇུག་པ་དང་བྲལ་བར་འགྱུར་ལ། ཐ་མལ་ནི་གང་ཟག་གང་དེའི་དཀྱིལ་འཁོར་གྱི་ཁོངས་སུ་གཏོགས་པ་རྒྱུན་ཆད་པ་དེ་ཉི་ཚེ་བའི་སྲ་བརྐྱང་བཏིང་བ་རང་འཇུག་པ་

དང་འབྲལ་བར་འགྱུར་ཏེ། སྲ་བརྐྱང་བཏིང་བ་ནི་དབྱར་གྱི་གནས་ཀྱི་རྗེས་སུ་འཇུག་པ་ཡིན་པའི་ཕྱིར་རོ། །གང་གི་ཕྱིར་ཇི་ལྟར་སྲ་བརྐྱང་གདིང་བ་དེའི་ཕྱིར་དབྱར་གནས་པའི་གནས་ལས་གཞན་པའི་གནས་སུ་མི་འབྱུང་བ་དེ་བཞིན་དུ་དབྱུང་བ་ཡང་གནས་གཞན་དུ་གནས་པ་ཉིད་ན་འཇིག་པར་

འགྱུར་བ་དེའི་ཕྱིར་སྲ་བརྐྱང་དེས་མཚམས་གཞན་དུ་ཕྱིན་ན་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །གང་གི་ཕྱིར་བྱིན་གྱིས་རློབ་པར་བྱེད་པའི་དགེ་སློང་ཐམས་ཅད་སྲ་བརྐྱང་བཏིང་བའི་གནས་དེ་ནས་བྲལ་བར་གྱུར་པ་ཉིད་ཡིན་ན། ཇི་ལྟར་སྣམ་སྦྱར་ལ་སོགས་པ་བྱིན་གྱིས་

བརླབས་པའི་ཆོས་གོས་གཞན་དག་གིས་རྒྱུན་བཅད་པ་ཉིད་དང་། མཚམས་ཐ་དད་པ་ན་གནས་པ་ཉིད་དུ་འགྱུར་བ་དེ་བཞིན་དུ། སྲ་བརྐྱང་འདི་ཡང་རྒྱུན་ཆད་པ་ཉིད་ན་དེ་ལ་འབྲལ་བའི་སྤང་བ་ཉིད་དུ་འབྱུང་ཞིང་། སྤང་བ་ཉིད་དུ་གྱུར་པའི་ཆོས་གོས་ལ་ཇི་ལྟར་སྲ་བརྐྱང་གདིང་བ་ཉིད་མི་འབྱུང་བ་དེ་བཞིན་

དུ། བྱུང་བ་ཡང་འཇིག་པར་འགྱུར་བ་དེའི་ཕྱིར་བྱིན་གྱིས་རློབ་པར་བྱེད་པ་མེད་པར་མཚམས་ཀྱི་ནང་དུ་སྐྱ་རེངས་ཤར་ན་ཡང་སྲ་བརྐྱང་དབྱུང་བ་རང་འཇུག་པ་དང་བྲལ་བར་འགྱུར་རོ། །གང་གི་ཕྱིར་དགེ་སློང་གང་དབྱར་གནས་པར་ཁས་བླངས་པའི་དགེ་འདུན་གྱིས་དབྱར་གྱི་གནས་དེའི་མཚམས་ཀྱི་དཀྱིལ་

Vol. 163 · folio 162b

འཁོར་གྱི་ཁོངས་སུ་གཏོགས་པ་དེས་དཀྱིལ་འཁོར་དེ་གཏན་གཏོང་ཞིང་རྒྱུན་གཅོད་པར་བྱེད་པ་དེ་ལ་དགེ་སློང་ལྷག་མ་གཞན་དག་སྲ་བརྐྱང་བཏིང་བ་དེ་ལ་བག་ཡངས་སུ་གནས་པ་གང་ཡིན་པ་ཉིད་དང་། དགེ་སློང་དེ་དག་ལ་སྲ་བརྐྱང་བཏིང་བ་དེ་ཕན་ཡོན་དང་རྙེད་པའི་གཞིར་གནས་པ་གང་ཡིན་པ་དེ་ཉིད་

འཇིག་པར་འགྱུར་བ་དེའི་ཕྱིར་དཀྱིལ་འཁོར་གྱི་ཁོངས་སུ་གཏོགས་པ་བཅད་ན་ཡང་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །འདི་སྐད་བསྟན་ཏེ། གང་གི་ཕྱིར་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་ཞེས་བྱ་བའི་གང་ཟག་གཅིག་གིས་སྲ་བརྐྱང་བཏིང་བ་དེ་འཇིག་

པར་འགྱུར་བ་དེའི་ཕྱིར་གང་ཟག་གང་དབྱར་གནས་པར་ཁས་བླངས་པའི་དགེ་འདུན་གྱི་དབྱར་གྱི་གནས་དེའི་མཚམས་ཀྱི་དཀྱིལ་འཁོར་གྱི་ཁོངས་སུ་གཏོགས་པ་གཏན་པ་བཏང་ཞིང་རྒྱུན་བཅད་པ་དེ་ལ་སྲ་བརྐྱང་དབྱུང་བའི་འཇུག་པ་དང་བྲལ་བར་འགྱུར་ཏེ། བཏིང་བའི་རྒྱུན་དང་བྲལ་བ་དང་རྗེས་

སུ་འཇུག་པ་དང་བྲལ་བར་འགྱུར་རོ་ཞེས་བྱ་བའི་ཐ་ཚིག་སྟེ། རོ་གཅིག་པའི་དངོས་པོ་ཉིད་མེད་པར་འགྱུར་བའི་ཕྱིར་རོ། །རང་འཇུག་པ་དང་བྲལ་བ་རྣམ་པ་གསུམ་སྨོས་པ་དེ་དག་ལས་དང་པོ་གཉིས་ཀྱི་མཚན་ཉིད་ནི་རྒྱས་པར་བཤད་ཟིན་ན། དེའི་དཀྱིལ་འཁོར་གྱི་ཁོངས་སུ་གཏོགས་པ་

ཆད་པ་ཞེས་སྨོས་པ་དེ་རྣམ་པ་གང་གིས་དུས་གང་གི་ཚེ་ན་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྱུར་བ་དེ་མ་བསྟན་པས། དེའི་ཕྱིར་བྱེ་བྲག་ཏུ་རྟོགས་པར་བྱ་བའི་ཕྱིར་འདིར་སྐབས་གཞན་བསྟན་པར་བྱ་སྟེ། དེའི་ཕྱིར་མ་ལྟ་བུའི་ཚིག་དྲུག་སྟེ། སྦྱོར་བས་འགྲོ་བ་དང་། ངེས་

པར་བྱེད་པ་དང་། མཐར་ཐུག་པར་འགྱུར་བ་དང་། ཞིག་པར་འགྱུར་བ་དང་། བསམ་པའི་རྒྱུན་ཆད་པ་དང་། མཚམས་ལས་འདའ་བའོ་ཞེས་བྱ་བ་སྨྲས་སོ། །དེ་དག་ནི་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་ཞེས་བྱ་བ་དེའི་བྱེ་བྲག་ཏུ་བཤད་པར་གྱུར་པ་དག་ཡིན་ཏེ། ཚིག་དེ་དག་

ནི་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པའི་གང་ཟག་དེའི་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་བ་དག་གིས་མ་དང་འདྲ་ཞིང་མའི་གནས་ལྟ་བུ་དག་ཡིན་པས་དེའི་ཕྱིར་མ་ལྟ་བུའི་ཚིག་དྲུག་ཅེས་བྱ་སྟེ། སྦྱོར་བས་འགྲོ་བ་ལ་སོགས་པ་དྲུག་པོ་དག་བྱུང་བ་ནི་དེའི་དཀྱིལ་

Vol. 163 · folio 163a

འཁོར་གྱི་ཁོངས་སུ་གཏོགས་པ་ཆད་པ་དེ་ཡང་འབྱུང་བའི་ཕྱིར་རོ། །དེ་ལ་སྦྱོར་བས་འགྲོ་བ་ཞེས་བྱ་བ་ནི། སྦྱོར་བ་ངེས་པས་མཚམས་ལས་འདའ་ཞིང་འགྲོ་བའོ། །ངེས་པར་བྱེད་པ་ཞེས་བྱ་བ་ནི། མཚམས་ཀྱི་ཕྱི་རོལ་དུ་ངེས་པ་མེད་པར་བྱེད་པའོ། །མཐར་ཐུག་པར་གྱུར་པ་

ཞེས་བྱ་བ་ནི། ཆོས་གོས་བརྩམས་པ་ཟིན་པར་བྱས་པའོ། །ཞིག་པར་གྱུར་པའོ་ཞེས་བྱ་བ་ནི་ཆོས་གོས་བརྩམས་པ་མ་ཟིན་པའི་བར་སྐབས་སུ་རྐྱེན་འགའ་ཞིག་གིས་རྒྱུན་ཆད་པར་གྱུར་པའོ། །བསམ་པའི་རྒྱུན་ཆད་པ་ཞེས་བྱ་བ་ནི། ཆོས་གོས་ལ་རེ་བ་བྱུང་བ་རྒྱུན་ཆད་པར་གྱུར་པའོ། །མཚམས་ལས་

འདའ་བ་ཞེས་བྱ་བ་ནི། ཐེ་ཚོམ་ཟ་བའི་སྦྱོར་བས་མཚམས་ལས་འདའ་བར་བྱེད་པའོ། །དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཇི་ལྟར་ཆད་པར་བརྗོད་པར་བྱ་ཞེ་ན་དེའི་ཕྱིར། དེ་ལ་དེའོ་ཞེས་བྱ་བ་སྨྲས་ཏེ། གང་ཟག་གང་སྦྱོར་བས་འགྲོ་བ་ལ་སོགས་པ་རང་འཇུག་པ་དང་བྲལ་བའི་

རྒྱུ་ཀུན་དུ་སྤྱོད་པ་དེ་ལ་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་དེ་རྣམ་པར་གཞག་གི་དགེ་འདུན་ཐམས་ཅད་ལ་ནི་དེ་རྣམ་པར་མི་གཞག་སྟེ། ཇི་ལྟར་སྲ་བརྐྱང་གིས་མཚམས་གཞན་དུ་ཕྱིན་པ་དང་བྱིན་གྱིས་རློབ་པར་བྱེད་པ་མེད་པར་མཚམས་ཀྱི་ནང་དུ་སྐྱ་རེངས་ཤར་བ་ཞེས་བྱ་བ་སྔར་

བསྟན་པ་གཉིས་ཀྱིས་དགེ་འདུན་ཐམས་ཅད་ལ་སྲ་བརྐྱང་དབྱུང་བར་རང་འཇུག་པ་དང་བྲལ་བར་འགྱུར་བ་དེ་ལྟར་འདིས་ནི་མི་འགྱུར་བའོ། །འདི་སྐད་བསྟན་ཏེ། གང་ཟག་གང་ལ་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་གྱུར་པ་དེ་ཉིད་ལ་སྲ་བརྐྱང་འབྱུང་བར་རང་འཇུག་པ་དང་

བྲལ་བར་འགྱུར་བ་ཏེ། དེ་ཉིད་ཀྱི་སྲ་བརྐྱང་བཏིང་བ་ལས་གྱུར་པའི་རྙེད་པ་དང་ཕན་ཡོན་དག་ལྡོག་པར་འགྱུར་གྱི། དེས་དགེ་འདུན་གཞན་གྱི་ནི་ལྡོག་པར་མི་འགྱུར་རོ། །དེ་ལྟར་ན་མ་ལྟ་བུའི་ཚིག་དྲུག་པོ་དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་བ་དེ་བསྟན་

ཏོ། །དུས་གང་གི་ཚེ་མ་ལྟ་བུའི་ཚིག་དྲུག་པོ་དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་ཞེ་ན་དེའི་ཕྱིར། མཚམས་ལས་འདས་པ་ན་དེ་འགྲུབ་པོ་ཞེས་བྱ་བ་སྨྲས་ཏེ། དེའི་དཀྱིལ་འཁོར་གྱི་ཁོངས་སུ་གཏོགས་པའི་མཚམས་ལས་འདས་པ་ན་དེ་ཆད་པ་དེ་འགྲུབ་

Vol. 163 · folio 163b

པོ། །ཅི་གང་ཡང་རུང་བས་མཚམས་ལས་འདའ་ན་འམ་ཞེ་ན། མ་ཡིན་ཏེ་དེའི་ཕྱིར། ཕྱིར་མི་འོང་བའི་སེམས་ཀྱིས་སོ་ཞེས་བྱ་བ་སྨྲས་ཏེ། དབྱར་གནས་པར་ཁས་བླངས་པའི་དགེ་འདུན་གྱིས་མཚམས་ཀྱི་དཀྱིལ་འཁོར་གང་ན་སྲ་བརྐྱང་དུ་བཏིང་བའི་ཆོས་གོས་འདུག་པ་དེར་ཕྱིར་མི་འོང་བར་དམ་

བཅས་པའི་སེམས་ཀྱིས་མཚམས་ལས་འདས་ཏེ་འགྲོ་ན་དེའི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་ཏེ། འདིས་ནི་སྦྱོར་བས་འགྲོ་བ་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་བསྟན་ཏོ། །ཅི་སྦྱོར་བས་འགྲོ་བ་འབའ་ཞིག་གིས་དེ་ཆད་པར་ཟད་དམ་ཞེ་ན་མ་ཡིན་ཏེ་

དེའི་ཕྱིར། མཚམས་ཀྱི་ཕྱི་རོལ་དུ་དེ་སྐྱེས་ན་ཡང་ངོ་ཞེས་བྱ་བ་སྨྲས་ཏེ། མཚམས་ཀྱི་ནང་ནས་འགྲོ་བའི་ཚེ་ན་ཕྱིར་མི་འོང་བའི་སེམས་མ་སྐྱེས་སུ་ཟིན་ཀྱང་མཚམས་ཀྱི་ཕྱི་རོལ་དུ་སོན་པ་དེ་ཉིད་ན་ཕྱིར་མི་འོང་བར་ངེས་པའི་སེམས་དེ་སྐྱེས་ན་ཡང་། དེའི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་

པར་འགྱུར་ཏེ། འདིས་ནི་ངེས་པར་བྱེད་པས་དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པ་བསྟན་ཏོ། །ཅི་བྱེ་བྲག་མེད་པ་ཁོ་ནས་མཚམས་ལས་འདས་པའི་དུས་དང་། མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པ་ན་དེ་ཆད་པར་འགྱུར་རམ་ཞེ་ན་མ་ཡིན་ཏེ། དེའི་ཕྱིར་ཆོས་གོས་བྱ་བའི་

བསམ་པས་རྗེས་སུ་འབྲེལ་པ་མེད་ན་དེའི་ཚེ་ཉིད་ནའོ་ཞེས་བྱ་བ་སྨྲས་ཏེ། ཆོས་གོས་བྱའོ་སྙམ་དུ་སེམས་པའི་ཆོས་གོས་བྱ་བའི་བསམ་པ་གང་ཡིན་པ་དེས། དེར་རོ་གཅིག་པ་ཉིད་ཀྱི་རྗེས་སུ་འབྲེལ་པ་ཞེས་བྱ་བ་རྗེས་སུ་འཇུག་པ་ཉིད་དང་རྗེས་སུ་སོང་བ་ཉིད་གང་ཡིན་པའི་རྗེས་སུ་འབྲེལ་བ་དེ་མེད་ན། མཚམས་

ལས་འདས་པའི་དུས་དང་མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པའི་དུས་དེའི་ཚེ་ཉིད་ན་དེའི་དཀྱིལ་འཁོར་གྱི་ཁོངས་སུ་གཏོགས་པ་དེའི་ཆད་པར་འགྱུར་ཏེ། འདིས་ནི་སྦྱོར་བས་འགྲོ་བ་དང་ངེས་པར་བྱེད་པར་དེ་གཉིས་ཀྱི་བྱེ་བྲག་གི་གནས་སྐབས་བསྟན་ཏོ། །ཅི་ཆོས་གོས་བྱ་བའི་བསམ་པས་

རྗེས་སུ་འབྲེལ་པ་མེད་པ་འབའ་ཞིག་གིས་དེའི་ཚེ་ཆད་པར་འགྱུར་བར་ཟད་དམ་ཞེ་ན་མ་ཡིན་ནོ། །དེའི་ཕྱིར་ཡོད་ན་བྱེད་པར་འགྱུར་བ་ཉིད་ཆད་ནའོ་ཞེས་བྱ་བ་སྨྲས་ཏེ། གལ་ཏེ་ཆོས་གོས་བྱ་བའི་བསམ་པས་རྗེས་སུ་འབྲེལ་པ་ཡོད་ན་ནི་དེའི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་མི་འགྱུར་

Vol. 163 · folio 164a

ཏེ། གང་གི་ཚེ་ཆོས་གོས་བྱེད་པར་འགྱུར་བ་ཉིད་རྒྱུན་ཆད་པར་འགྱུར་བ་དེ་ཉིད་ཀྱི་ཚེ་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཡང་ཆད་པར་འགྱུར་ཏེ། འདིས་ཀྱང་སྦྱོར་བས་འགྲོ་བ་དང་ངེས་པར་བྱེད་པ་དེ་གཉིས་ཀྱི་བྱེ་བྲག་གི་གནས་སྐབས་གཞན་བསྟན་ཏོ། །ཅི་མཚམས་

ལས་འདས་པའི་དུས་དང་མཚམས་ཀྱི་ཕྱི་རོལ་དུ་ཆོས་གོས་བྱ་བའི་བསམ་པས་རྗེས་སུ་འབྲེལ་པ་མེད་པ་འབའ་ཞིག་གིས་དེ་ཆད་པར་འགྱུར་བར་ཟད་དམ་ཞེ་ན་མ་ཡིན་ཏེ་དེའི་ཕྱིར། ཕྱིར་འོངས་ན་ཡང་ངོ་ཞེས་བྱ་བ་སྨྲས་ཏེ། སྲ་བརྐྱང་གདིང་བའི་མཚམས་སུ་ཕྱིར་འོངས་ན་ཡང་ཆོས་གོས་བྱེད་པར་འགྱུར་

བའི་བསམ་པས་རྗེས་སུ་འབྲེལ་པ་ཉིད་ཆད་པར་གྱུར་ན་དེའི་ཚེ་ཡང་དེའི་དཀྱིལ་འཁོར་གྱི་ཁོངས་སུ་གཏོགས་པ་དེ་ཆད་པར་འགྱུར་ཏེ། གང་ཟག་དེ་ཉི་ཚེ་ལ་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ་ཞེས་བྱ་བའི་ཐ་ཚིག་གོ། །འདིས་ཀྱང་སྦྱོར་བས་འགྲོ་བ་དང་ངེས་བར་བྱེད་པ་དེ་

གཉིས་ཀྱི་བྱེ་བྲག་གི་གནས་སྐབས་གཞན་བསྟན་ཏོ། །བྱེད་པར་འགྱུར་བ་ཉིད་ཆད་ནའོ་ཞེས་གང་སྨོས་པ་དེ་ལ་བྱེད་པར་འགྱུར་བ་ཉིད་ཆད་པའི་གནས་སྐབས་དུ་ཡོད་ཅེ་ན། དེའི་ཕྱིར་བྱེད་པར་འགྱུར་བའི་མཐར་ཐུག་པ་དང་བརྩམས་པ་ཞིག་པ་དང་བསམ་པའི་རྒྱུན་ཆད་པ་གསུམ་ལ་དེ་གནས་སོ་

ཞེས་བྱ་བ་སྨྲས་ཏེ། ཆོས་གོས་བྱའོ་སྙམ་དུ་བསམས་པ་གང་ཡིན་པ་དེ་མཐར་ཐུག་པར་གྱུར་པ་དང་། བརྩམས་པ་ཞིག་པར་གྱུར་པ་དང་། བསམ་པའི་རྒྱུན་ཆད་པར་གྱུར་པ་ཞེས་བྱ་བ་དེ་གསུམ་གྱི་གནས་སྐབས་ལ་བྱེད་པར་འགྱུར་བ་ཆད་པ་དེས་གནས་པར་སྦྱར་རོ། །འདི་སྐད་བསྟན་ཏེ། ཆོས་གོས་

བྱེད་པར་འདོད་པ་དེ་མཐར་ཐུག་པར་གྱུར་པའི་དུས་དང་། དེ་བརྩམས་པ་ཞིག་པར་གྱུར་པའི་དུས་དང་། དེའི་བྱ་བའི་བསམ་པའི་རྒྱུན་ཆད་པར་གྱུར་པའི་དུས་ན་ཡང་བྱེད་པར་འགྱུར་བ་ཞེས་བྱ་བ་དེ་རྒྱུན་ཆད་པར་རིག་པར་བྱའོ། །དེ་ལྟ་བས་ན་ཕྱིར་མི་འོང་བའི་སེམས་ཀྱིས་མཚམས་ལས་འདའ་

ཞིང་འགྲོ་བའམ། མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པའི་གང་ཟག་ཆོས་གོས་བྱེད་པར་འགྱུར་བ་ཉིད་མཐར་ཐུག་པར་འགྱུར་བའམ། བརྩམས་པ་ཞིག་པར་གྱུར་བ་འམ། བྱ་བའི་བསམ་པ་རྒྱུན་ཆད་པར་གྱུར་པ་གང་ཡིན་པ་དེ་ནི་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་

Vol. 163 · folio 164b

པ་ཡིན་པས། དེ་ལ་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །འདིས་ནི་མཐར་ཐུག་པར་གྱུར་པ་དང་། ཞིག་པར་གྱུར་པ་དང་། བསམ་པའི་རྒྱུན་ཆད་པས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་བསྟན་ཏོ། །ཅི་ངེས་པར་གྱུར་པས་དེའི་དཀྱིལ་འཁོར་གྱི་ཁོངས་

སུ་གཏོགས་པ་ཆད་པར་འགྱུར་བ་ཟད་དམ་ཞེ་ན་མ་ཡིན་ཏེ། དེའི་ཕྱིར་ཡིད་གཉིས་ནི་ངེས་པར་འབྱིན་པར་བྱེད་པ་དང་འདྲའོ་ཞེས་བྱ་བ་སྨྲས་ཏེ། ཕྱིར་མི་འོང་བའི་སེམས་ཀྱིས་མཚམས་ལས་འདའ་ཞིང་འགྲོ་བ་དང་། མཚམས་ཀྱི་ཕྱི་རོལ་དུ་ཕྱིར་མི་འོང་བའི་སེམས་སྐྱེས་པ་དེ་གཉིས་ནི་ངེས་པ་དེས་

དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་ཅིང་སྲ་བརྐྱང་དབྱུང་བ་རང་འཇུག་པ་དང་བྲལ་བར་བྱེད་པ་དེ་བཞིན་དུ། ཡིད་གཉིས་ཀྱིས་མཚམས་ལས་འདའ་ཞིང་འགྲོ་བ་དང་། མཚམས་ཀྱི་ཕྱི་རོལ་དུ་ཡིད་གཉིས་ཟ་བས་ཀྱང་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་ཅིང་སྲ་བརྐྱང་

དབྱུང་བ་རང་འཇུག་པ་དང་འབྲལ་བར་འགྱུར་བ་སྟེ། ཅིའི་ཕྱིར་འོང་བར་བྱའམ་འོན་ཏེ་ཕྱིར་འོང་བར་མི་བྱ་སྙམ་པ་དེ་ལྟ་བུའི་སེམས་གཅིག་ཏུ་མ་ངེས་པས་མཚམས་ལས་འདའ་ཞིང་འགྲོ་བ་དང་། མཚམས་ཀྱི་ཕྱི་རོལ་དུ་སོན་པ་ན་དེ་ལྟ་བུའི་སེམས་སྐྱེས་པས་ཀྱང་དེའི་དཀྱིལ་འཁོར་གྱི་

ཁོངས་སུ་གཏོགས་པ་ཆད་ཅིང་གང་ཟག་དེའི་སྲ་བརྐྱང་དབྱུང་བ་རང་འཇུག་པ་དང་འབྲལ་བར་འགྱུར་རོ། །འདིར་གཞུང་ནི་མཚམས་ཀྱི་ཕྱི་རོལ་དུ་འགྲོ་བ་ན་དེ་འདི་སྙམ་དུ་ཅིའི་ཕྱིར་འོང་བར་བྱ་ཞིང་ཆོས་གོས་བྱ་འམ། འོན་ཏེ་ཕྱིར་འོང་བར་མི་བྱ་ཞིང་ཆོས་གོས་མི་བྱ་སྙམ་དུ་སེམས་པས་

མཚམས་ལས་འདའ་བར་བྱེད་ན་དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་ནི་མཚམས་ལས་འདའ་བའི་མཐའ་ལས་བྱུང་བ་ཡིན་ནོ་ཞེས་གསུངས་པ་ཡིན་ཏེ། འདིས་ནི་མཚམས་ལས་འདའ་བས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་བསྟན་ཏོ། །མ་ལྟ་བུའི་

ཚིག་དྲུག་པོ་མདོ་དང་སྦྱར་བའི་གནས་སྐབས་བསྟན་ནས། ད་ནི་ཚིག་དྲུག་པོ་དེ་དག་གིས་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྱུར་ཞིང་སྲ་བརྐྱང་དབྱུང་བ་རང་འཇུག་པ་དང་བྲལ་བར་འགྱུར་བ་ལུང་གི་ཚིག་དང་སྦྱར་བས་བསྒྲུབ་པར་བྱ་སྟེ། དེ་ལ་ཆོས་གོས་བྱ་བའི་

Vol. 163 · folio 165a

བསམ་པ་མེད་པ་དང་ཕྱིར་འོང་བའི་སེམས་མེད་པས་མཚམས་ལས་འདས་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་དབྱུང་བས་འགྲོ་བའི་མཐའ་ལས་བྱུང་བ་ཡིན་ནོ། །མཚམས་ཀྱི་ཕྱི་རོལ་དུ་སོན་པ་ན་ཕྱིར་མི་འོང་བའི་སེམས་སྐྱེས་སམ། ཕྱིར་འོང་བ་

ལ་ཐེ་ཚོམ་ཟ་བའི་སེམས་སྐྱེས་ཤིང་ཆོས་གོས་བྱ་བའི་བསམ་པས་རྗེས་སུ་འབྲེལ་པ་མེད་པར་གྱུར་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་ངེས་པར་བྱེད་པའི་མཐའ་ལས་བྱུང་བ་ཡིན་ནོ། །ཆོས་གོས་བྱ་བའི་བསམ་པས་རྗེས་སུ་འབྲེལ་པ་ཡོད་ཅིང་ཕྱིར་མི་འོང་བའི་སེམས་

ཀྱིས་སམ་ཐེ་ཚོམ་ཟ་བའི་སེམས་ཀྱིས་འགྲོ་བར་བྱེད་པ་དང་། མཚམས་ཀྱི་ཕྱི་རོལ་དུ་སོན་པ་ན་ཆོས་གོས་བྱ་བའི་བསམ་པར་རྗེས་སུ་འབྲེལ་པ་ཡོད་ཅིང་ཕྱིར་མི་འོང་བའི་སེམས་སམ་ཐེ་ཚོམ་ཟ་བའི་སེམས་སྐྱེས་པ་ལ་ནི། གལ་ཏེ་མཐར་ཐུག་པར་གྱུར་པས་ཆོས་གོས་བྱེད་པར་གྱུར་པ་ཉིད་ཆད་པར་

གྱུར་ན་ནི་དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་མཐར་ཐུག་པར་གྱུར་པའི་མཐའ་ལས་བྱུང་བ་ཡིན་ནོ། །གལ་ཏེ་བརྩམས་པ་ཞིག་བར་གྱུར་པས་ཆོས་གོས་བྱེད་པར་འགྱུར་བ་ཉིད་ཆད་པར་གྱུར་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་ཞིག་པར་གྱུར་པའི་མཐའ་

ལས་བྱུང་བ་ཡིན་ནོ། །གལ་ཏེ་བསམ་པའི་རྒྱུན་ཆད་པས་ཆོས་གོས་བྱེད་པར་འགྱུར་བ་ཉིད་ཆད་པར་གྱུར་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་བསམ་པའི་རྒྱུན་ཆད་པའི་མཐའ་ལས་བྱུང་བ་ཡིན་ནོ། །ཆོས་གོས་བྱ་བའི་བསམ་པ་ལ་ཐེ་ཚོམ་ཟ་ཞིང་ཕྱིར་མི་འོང་བའི་སེམས་

ཀྱིས་སམ། ཕྱིར་འོང་བ་ལ་ཐེ་ཚོམ་ཟ་བའི་སེམས་ཀྱིས་མཚམས་ལས་འདས་པ་དང་ཆོས་གོས་བྱ་བའི་བསམ་པ་མེད་ཅིང་ཕྱིར་མི་འོང་བའི་སེམས་ཀྱིས་སམ་ཕྱིར་འོང་བ་ལ་ཐེ་ཚོམ་ཟ་བའི་སེམས་ཀྱིས་མཚམས་ལས་འདས་ན་ནི། དེའི་སྲ་བརྐྱང་དབྱུང་བ་རང་འཇུག་པ་དང་བྲལ་བ་དེ་

མཚམས་ལས་འདའ་བའི་མཐའ་ལས་བྱུང་བ་ཡིན་ནོ། །སྲ་བརྐྱང་དབྱུང་བ་རང་འཇུག་པ་དང་བྲལ་བ་བཤད་ཟིན་ཏོ།། །།ད་ནི་བྱ་བ་ངེས་པའི་སྒོ་ནས་བཅོས་མ་བརྗོད་པར་བྱ་སྟེ། དེའི་ཕྱིར་ལས་ལས་གཞན་པའི་བྱ་བ་རྗེས་སུ་བསྒྲུབ་པར་མི་བྱའོ་ཞེས་བྱ་བ་སྨྲས་ཏེ། ལས་ཞེས་

Vol. 163 · folio 165b

བྱ་བ་ནི་གསོལ་བ་དང་བཞིའི་ལས་འོག་ནས་འབྱུང་བ་སྟེ། དེ་ལས་གཞན་པ་སྦྱོར་བས་འགྲོ་བ་ལ་སོགས་པ་རྗེས་སུ་བསྒྲུབ་པར་མི་བྱའོ། །འདི་སྐད་བསྟན་ཏེ། ལས་ཀྱི་མཚན་ཉིད་ཀྱི་བྱ་བ་མ་གཏོགས་པ་བྱ་བ་གཞན་གྱིས་སྲ་བརྐྱང་དབྱུང་བ་བཅོས་མ་མི་བྱ་བ་སྟེ། འདི་ལྟར་སེམས་བསྐྱེད་

པས་ཀྱང་དབྱུང་བ་འགྲུབ་པའི་ཕྱིར་རོ། །འདིར་སེམས་བསྐྱེད་པ་ཞེས་བྱ་བ་ནི་བདག་ལ་སྲ་བརྐྱང་མ་ི་དགོས་སོ་སྙམས་དུ་ལྟོས་པ་མེད་པའི་སེམས་བསྐྱེད་པའོ། །དེའི་དུས་ནི་དཔྱིད་ཟླ་ར་བ་ཉའོ་ཞེས་བྱ་བ་ནི། སྲ་བརྐྱང་དབྱུང་བའི་ཕྱིར་ལས་བྱ་བ་དེའི་དུས་ནི་དཔྱིད་ཟླ་ར་བ་ཉ་སྟེ་དེའི་དུས་སུ་དེ་

བྱའོ། །མོད་ལའོ་ཞེས་བྱ་བ་ནི། ལོ་གཉིས་ལ་སོགས་པ་དང་འབྲེལ་པའི་དཔྱིད་ཟླ་ར་བ་ཉར་ཐལ་བར་འགྱུར་བ་བསལ་བའི་ཕྱིར་ཚིག་འདི་སྨོས་ཏེ། དབྱར་དེ་ཉིད་ཀྱི་བར་དུ་མཆོད་པའི་མོད་ལ་འབྱུང་བའི་དཔྱིད་ཟླ་ར་བ་ཉ་ཁོ་ན་ལ་སྲ་བརྐྱང་དབྱུང་བར་བྱའོ། །དུས་དེའི་མདུན་རོལ་དུ་སྲ་བརྐྱང་འདིང་

བའི་དགེ་སློང་གིས་དེར་གཏོགས་པའི་དགེ་འདུན་ཐམས་ཅད་ལ་སང་སྲ་བརྐྱང་འབྱིན་པར་འགྱུར་གྱི་ཁྱེད་ཅག་གིས་རང་གི་ཆོས་གོས་དག་བྱིན་གྱིས་བརླབ་པར་བྱའོ་ཞེས་བརྗོད་པར་བྱའོ། །དཔྱིད་ཟླ་ར་བ་ཉ་ལ་གསོ་སྦྱོང་བྱས་པའི་རྗེས་ལ་གསོལ་བ་དང་བཞིའི་ལས་ཀྱིས་སྲ་བརྐྱང་དབྱུང་བར་བྱ་སྟེ།

འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱི་སྲ་བརྐྱང་བཏིང་བ་ལས། དེའི་རྗེས་སུ་འཇུག་པའི་དུས་ཚེས་བཅོ་ལྔ་ལགས་ཏེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་

དགེ་འདུན་གྱིས་སྲ་བརྐྱང་འབྱིན་པར་མཛད་དོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱི་སྲ་བརྐྱང་བཏིང་བ་ལས་དེའི་རྗེས་སུ་འཇུག་པའི་དུས་ཚེས་བཅོ་ལྔ་ལགས་ཏེ། དེའི་སླད་དུ་དགེ་འདུན་གྱིས་སྲ་བརྐྱང་འབྱིན་

ན་སྲ་བརྐྱང་འབྱིན་པར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་སྲ་བརྐྱང་ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་

Vol. 163 · folio 166a

ཏོ་ཞེས་གསུངས་པ་ཡིན་ནོ། །བཅོམ་པའི་དོན་ཉིད་དུ་ནི་སྔར་ཡང་ངོ་ཞེས་བྱ་བ་ནི། དེའི་དུས་ཡིན་ནོ་ཞེས་བྱ་བར་སྦྱར་ཏེ། དགེ་སློང་ཆོམ་རྐུན་གྱིས་བཅོམ་པ་དག་གི་དོན་དུ་ནི་དཔྱིད་ཟླ་ར་བའི་ཉ་བས་སྔར་ཡང་དབྱུང་བའི་དུས་ཡིན་ཏེ། དེའི་དོན་དུ་ཡང་ཟླ་བ་ཉ་ཤིའི་གསོ་སྦྱོང་

གི་དུས་གཅིག་དང་སྦྱར་ཏེ། སྔར་གསོ་སྦྱོང་བྱས་ལ་དེའི་མོད་ལ་གསོལ་བ་དང་བཞིའི་ལས་ཀྱིས་དབྱུང་བར་བྱའོ། །འདིའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱི་སྲ་བརྐྱང་བཏིང་བ་ལས་ཆོམ་རྐུན་གྱིས་བཅོམ་པའི་དགེ་

སློང་རྣམས་ལྷགས་ལ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། ཆོམ་རྐུན་གྱིས་བཅོམ་པའི་དགེ་སློང་རྣམས་ལ་བརྟེན་ཏེ་དགེ་འདུན་གྱིས་སྲ་བརྐྱང་འབྱིན་པ་མཛད་དོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་

གསོལ། འདི་ལྟར་གནས་འདིར་དགེ་སློང་གིས་དགེ་འདུན་གྱི་སྲ་བརྐྱང་བཏིང་བ་ལས་ཆོམ་རྐུན་གྱིས་བཅོམ་པའི་དགེ་སློང་རྣམས་ལྷགས་ཏེ། དེའི་སླད་དུ་ཆོམ་རྐུན་གྱིས་བཅོམ་པའི་དགེ་སློང་རྣམས་ལ་བརྟེན་ནས་དགེ་འདུན་གྱིས་སྲ་བརྐྱང་འབྱིན་པ་མཛད་ན། ཆོམ་རྐུན་གྱིས་བཅོམ་པའི་དགེ་སློང་

རྣམས་ལ་བརྟེན་ཏེ་སྲ་བརྐྱང་འབྱིན་པར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་ཆོམ་རྐུན་གྱིས་བཅོམ་པའི་དགེ་སློང་རྣམས་ལ་བརྟེན་ནས་དགེ་འདུན་གྱིས་སྲ་བརྐྱང་

ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །དེ་ཉམས་སུ་མ་མྱོང་བ་དང་ལྡན་པ་ལ་ནི་མ་ཐོས་ཀྱི་བར་དུ་ཕན་ཡོན་རྗེས་སུ་འཇུག་གོ་ཞེས་བྱ་བ་ནི། གང་གིས་སྔར་དུས་མ་ཡིན་པ་དེར་སྲ་བརྐྱང་དབྱུང་བ་ཉམས་སུ་མ་མྱོང་བ་དང་ལྡན་པ་དེ་ལ་ནི་ཇི་སྲིད་དུ་

སྲ་བརྐྱང་ཕྱུང་བ་དེས་མ་ཐོས་ཀྱི་བར་དུ་མཚམས་ཀྱི་ནང་ངམ་ཕྱི་རོལ་ན་འདུག་ཀྱང་རུང་སྟེ། སྲ་བརྐྱང་བཏིང་བ་དེའི་ཕན་ཡོན་རྗེས་སུ་འཇུག་ཅིང་ཡོད་དོ། །ནམ་ཐོས་པའི་ཚེ་ན་ནི་དེའི་ཕན་ཡོན་ལྡོག་ཅིང་མེད་པར་འགྱུར་རོ། །འདི་ནི་སྲ་བརྐྱང་དབྱུང་བ་ཐོས་པའི་མཐའ་ལས་བྱུང་བ་ཡིན་ཏེ། འདི་ཡང་མ་ལྟ་བུའི་

Vol. 163 · folio 166b

ཚིག་ཡིན་ནོ། །གཙུག་ལག་ལས་སྲ་བརྐྱང་དབྱུང་བ་ཐོས་པའི་མཐའ་ལས་བྱུང་བ་ནི་འདུན་པ་ཡིན་ནོ་ཞེས་གསུངས་པ་དེ་འདི་ཡིན་པར་རིག་པར་བྱའོ། །ཅི་གནས་སྐབས་ཐམས་ཅད་ལ་མ་ཐོས་ཀྱི་བར་དུ་ཕན་ཡོན་དེ་རྗེས་སུ་འཇུག་གམ་ཞེ་ན་དེའི་ཕྱིར། རྗེས་སུ་འབྲེལ་བ་མེད་ནའོ་ཞེས་བྱ་བ་སྨྲས་ཏེ། རྗེས་

སུ་འབྲེལ་པའི་ཤན་མེད་ན་མ་ཐོས་ཀྱི་བར་དུ་རྗེས་སུ་འཇུག་གི་ཐོས་ན་ནི་ལྡོག་གོ། །རྗེས་སུ་འབྲེལ་པ་ཞེས་བྱ་བ་ནི། གོས་ལ་རེ་བ་ཡོད་པ་དང་གོས་བརྩམས་པ་མ་ཞིག་པ་དང་གོས་བརྩམས་པ་མཐར་ཐུག་པར་མ་གྱུར་པའི་ཤན་ཡོད་ནའོ། །དེ་མེད་པ་ནི་རྗེས་སུ་འབྲེལ་པ་མེད་པ་ཞེས་བྱའོ། །རྗེས་སུ་

འབྲེལ་པ་ཡོད་པ་ལ་ཇི་སྲིད་དུ་ཕན་ཡོན་དེ་རྗེས་སུ་འཇུག་ཅེ་ན་དེའི་ཕྱིར་ཡོད་ན་མ་ཆད་ཀྱི་བར་དུའོ་ཞེས་བྱ་བ་སྨྲས་ཏེ། རྗེས་སུ་འབྲེལ་པ་ཡོད་པ་ལ་ནི་རྗེས་སུ་འབྲལ་པ་ཡོད་པ་དེ་ཉིད་མ་ཆད་ཀྱི་བར་དུ་དེའི་ཕན་ཡོན་རྗེས་སུ་འཇུག་གོ། །དེ་ཆད་ན་ནི་ཕན་ཡོན་དེ་ལྡོག་གོ། །འདིར་གཞུང་ནི་ཞུ་བ་ལས་སྲ་

བརྐྱང་དབྱུང་བ་ཐོས་པའི་མཐའ་ལས་བྱུང་བ་གང་ཞེ་ན། མཚམས་ཀྱི་ཕྱི་རོལ་དུ་ཤན་མེད་པའི་རྒྱུད་ཀྱིས་ཐོས་པ་དང་གོས་ལ་རེ་བ་ཆད་པ་དང་། ཤན་ཡོད་པ་ན་གོས་ཟིན་པར་གྱུར་པ་སྟེ། གལ་ཏེ་གོས་ལ་རེ་བ་ཡོད་པ་དང་བརྩམས་པ་ནི་ཤན་གྱི་རྒྱུན་ཡོད་པར་བརྗོད་པར་བྱ་སྟེ། དེ་བཞིན་དུ་དེ་

འཇུག་གོ་ཞེས་གསུངས་པ་ཡིན་ཏེ། འདིས་ཆོག་གོ་སྙམ་དུ་བསམ་པ་བརྟུལ་ན་རྙེད་པ་འབྱུང་བར་སྣང་བ་ཡང་རུང་། གོས་བརྩམས་པ་ཉིད་སྣང་དུ་ཟིན་ཀྱང་རུང་བསམ་པ་མཐར་ཐུག་པ་དང་རེ་བ་ཆད་པ་ཡིན་པར་རིག་པར་བྱ་བའོ། །དེ་གཉིས་ནི་མཐར་ཐུག་པའི་མཐའ་ལས་བྱུང་བ་དང་རེ་བ་ཆད་

པའི་མཐའ་ལས་བྱུང་བའི་རྣམ་པ་གཞན་གཉིས་ཡིན་ནོ། །ཞིག་པར་གྱུར་པའི་མཐའ་ལས་བྱུང་བའི་རྣམ་པ་གཞན་ཡང་འདིར་འབྱུང་བར་རིག་པར་བྱའོ། །མ་ཕྱུང་ན་ཐམས་ཅད་ཀྱི་དེའི་དུས་ཀྱི་རྙེད་པ་བསྒོ་བར་མི་བྱའོ་ཞེས་བྱ་བ་ནི། སྲ་བརྐྱང་གི་ཆོས་གོས་དེ་མ་ཕྱུང་ན་དགེ་སློང་ཐམས་ཅད་ཀྱི་སྲ་

བརྐྱང་བཏིང་བའི་དུས་དེའི་རྙེད་པ་བསྒོ་བར་མི་བྱ་བ་སྟེ། འདི་ལྟར་སྲ་བརྐྱང་ཞེས་བྱ་བའི་ཆོས་གོས་དེ་ནི་ཆོས་གོས་བྱིན་གྱིས་བརླབ་ཏུ་རུང་བ་གཞན་དག་གི་གཏེར་གྱི་གནས་ལྟ་བུ་ཡིན་པས། གང་གི་ཚེ་དེ་འདིང་བར་བྱེད་པ་ཐམས་ཅད་ཀྱིས་དེ་ཕྱུང་བར་འགྱུར་བ་དེའི་ཚེ་ན་སྲ་བརྐྱང་བཏིང་བའི་

Vol. 163 · folio 167a

དུས་ལས་བྱུང་བའི་རྙེད་པར་བསྒོ་བར་བྱའི། དེ་མ་ཕྱུང་བའི་སྔོན་རོལ་དུ་ནི་བསྒོ་བར་མི་བྱའོ་ཞེས་བྱ་བའི་ཐ་ཚིག་གོ། །གཞིར་གཏོགས་པའི་སྲ་བརྐྱང་གི་གཞིའོ་ཞེས་བྱ་བ་འདུལ་བ་གཞིའི་སྐབས་སུ་གཏོགས་པའི་སྲ་བརྐྱང་གི་གཞི་བཤད་ཟིན་ཏོ།། །།ད་ནི་སྲ་བརྐྱང་

གི་གཞི་ཞུ་བ་ལ་སོགས་པར་གཏོགས་པ་བསྡུ་བར་བྱ་སྟེ། དེ་ལ་སྔར་སྲ་བརྐྱང་གདིང་བར་བྱའོ། །ཚེས་བཅུ་དྲུག་ལའོ། །སྟོན་ཟླ་འབྲིང་པོའི་ཞེས་སྨོས་པས། སྟོན་ཟླ་འབྲིང་པོ་ཚེས་བཅུ་དྲུག་ལ་སྲ་བརྐྱང་གདིང་བའི་དུས་ཡིན་ན་ཤོལ་གྱི་ཟླ་བ་ནི་རྒྱལ་པོའི་རྗེས་སུ་འབྲང་བར་བྱའོ་ཞེས་སྨོས་པས་གལ་ཏེ་

སྟོན་ཟླ་འབྲིང་པོ་གཉིས་སུ་རྒྱལ་པོས་བྱས་ན་དེའི་ཚེ་ཟླ་བ་དེ་གཉིས་གང་ལ་སྲ་བརྐྱང་གདིང་བར་བྱ་ཞེ་ན་དེའི་ཕྱིར། དགག་དབྱེ་ཇི་ལྟ་བ་བཞིན་དུ་གདིང་ངོ་ཞེས་བྱ་བ་སྨྲས་ཏེ། དགག་དབྱེའི་ཉི་མའི་རྗེས་སུ་འབྲང་བས་སྲ་བརྐྱང་གདིང་བར་བྱའི་ཤོལ་གྱི་ཟླ་བའི་རྗེས་སུ་འབྲང་བས་ནི་མི་བྱའོ། །

དེས་ན་རྒྱལ་པོའི་རྗེས་སུ་འབྲང་བས་ན་དབྱར་ཟླ་འབྲིང་པོ་ཉ་ནས་དབྱར་ཟླ་ཐ་ཆུངས་ཉའི་བར་གྱི་ཟླ་བ་གཅིག་དང་། དབྱར་ཟླ་ཐ་ཆུངས་ཉ་ནས་སྟོན་ཟླ་ར་བ་ཉའི་བར་གྱི་ཟླ་བ་གཅིག་དང་། སྟོན་ཟླ་ར་བ་ཉ་ནས་སྟོན་ཟླ་འབྲིང་པོ་ཉའི་བར་གྱི་ཟླ་བ་གསུམ་པོ་དག་ཐལ་བའི་རྗེས་ལ་སྟོན་ཟླ་འབྲིང་པོ་ཉ་ནས་

སྟོན་ཟླ་ཐ་ཆུངས་ཉའི་བར་གྱི་ཟླ་བ་དེ་ངོ་གཉིས་སུ་གྱུར་ན། དེའི་ཚེ་སྟོན་ཟླ་འབྲིང་པོ་ཉའི་ཉིན་མོ་དགག་དབྱེ་བྱས་པའི་ཕྱི་དེ་ཉིན་པར་སྟོན་ཟླ་འབྲིང་པོ་ཚེས་བཅུ་དྲུག་ཅེས་བྱ་བའི་ཉི་མ་དང་པོ་དེ་ལ་སྲ་བརྐྱང་གདིང་བར་བྱའོ། །སྔར་ཡང་མ་ཡིན་ཕྱིས་ཀྱང་མ་ཡིན་ཏེ། འདི་ལྟར་འཐབ་ཀྲོལ་ཅན་དག་འོང་

དུ་དོགས་པའི་དབང་གིས་སྔར་དགག་དབྱེ་བྱེད་པ་ཡང་ཡོད་ལ། འཐབ་ཀྲོལ་ཅན་དག་མ་དོང་བའི་དབང་གིས་ཕྱིས་དགག་དབྱེ་བྱེད་པ་ཡང་ཡོད་པས་སྔ་ཕྱི་དེ་གཉིས་ཀྱི་དུས་ལ་ལྟོས་པའི་ཚེས་བཅུ་དྲུག་ལ་སྲ་བརྐྱང་གདིང་བར་མི་བྱའོ། །གསོ་སྦྱོང་གི་མཐའ་མ་ཡིན་པ་ལ་མི་བྱའོ་ཞེས་བྱ་བ་ནི།

སྲ་བརྐྱང་གདིང་བ་ཞེས་བྱ་བར་སྦྱར་ཏེ། འདིར་གསོ་སྦྱོང་ཞེས་བྱ་བའི་སྒྲ་ནི་ཚེས་བཅོ་ལྔའི་གསོ་སྦྱོང་གི་དུས་སུ་དགག་དབྱེ་བྱས་པའོ། །དེའི་མཐའ་ཞེས་བྱ་བ་ནི་སྟོན་ཟླ་འབྲིང་པོ་ཉ་ལ་དགག་དབྱེ་བྱས་པ་དེ་ཉིད་ཀྱི་ཕྱི་དེ་ཉིན་པར་སྟེ། སྟོན་ཟླ་འབྲིང་པོ་ཚེས་བཅུ་དྲུག་གོ། །དེ་བས་ན་སྟོན་ཟླ་འབྲིང་

Vol. 163 · folio 167b

པོ་ཚེས་བཅུ་དྲུག་མ་ཡིན་པའི་དུས་གཞན་ལ་སྲ་བརྐྱང་གདིང་བར་མི་བྱའོ། །དབྱུང་བ་ཡང་ངོ་ཞེས་བྱ་བ་ནི། སྲ་བརྐྱང་དབྱུང་བ་ཡང་གསོ་སྦྱོང་གི་མཐའ་མ་ཡིན་པ་ལ་མི་བྱ་བ་སྟེ། འདིར་ནི་དེའི་མཐའ་ཞེས་བྱ་བ་གསོ་སྦྱོང་གི་ཉི་མ་དེ་ཉིད་དང་སྦྱར་རོ། །དེའི་ཕྱིར་གསོ་སྦྱོང་གི་མཐའ་མ་ཡིན་པ་ལ་མི་

བྱའོ་ཞེས་དགག་པ་གཉིས་བྱས་སོ། །དེ་ལྟ་ན་ཡང་དབྱུང་བ་ཡང་གསོ་སྦྱོང་གི་མཐའ་ཁོ་ན་ལ་བྱ་བར་བསྟན་པས་གདིང་བ་དང་འདྲ་བར་ཚེས་བཅོ་ལྔ་ལ་གསོ་སྦྱོང་བྱས་པའི་ཕྱི་དེ་ཉིན་པར་ཚེས་བཅུ་དྲུག་ལ་དབྱུང་བར་ཐལ་བར་འགྱུར་བ་བསལ་བའི་ཕྱིར། འདི་ནི་ཉི་མ་དེ་ཉིད་ཀྱིའོ་ཞེས་བྱ་བ་སྨྲས་

ཏེ། སྲ་བརྐྱང་དབྱུང་བ་འདི་ནི་གསོ་སྦྱོང་གི་ཉི་མ་ཚེས་བཅོ་ལྔ་ཞེས་བྱ་བ་དེ་ཉིད་ལ་གསོ་སྦྱོང་བྱས་པའི་རྗེས་ལ་སྲ་བརྐྱང་དབྱུང་བ་ཡིན་གྱི། ཚེས་བཅུ་དྲུག་ལ་དབྱུང་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །བརྩམས་པ་འདི་ནི་དགེ་སློང་ཆོམ་རྐུན་གྱིས་ཆོམས་པ་ལ་སོགས་པ་ལ་བརྟེན་ནས་དུས་མ་

ཡིན་པར་དབྱུང་བའི་ཆེད་དུ་བྱས་པ་ཡིན་གྱི། དུས་སུ་དབྱུང་བ་ལ་ནི་སྲ་བརྐྱང་དབྱུང་བའི་ཉི་མ་ངེས་པ་ཡོད་པའི་ཕྱིར་འདིར་མདོར་བརྩམ་མི་དགོས་ཏེ། སྲ་བརྐྱང་དུས་སུ་དབྱུང་བའི་ཉི་མ་ནི་དཔྱིད་ཟླ་ར་བ་ཉ་ལ་གསོ་སྦྱོང་བྱས་པའི་རྗེས་ལ་དབྱུང་བ་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་

སྟེ། སྲ་བརྐྱང་གདིང་བ་ནི་སྟོན་ཟླ་འབྲིང་པོ་ཉ་ལ་དགག་དབྱེ་བྱས་ནས་སྟོན་ཟླ་འབྲིང་པོ་ཚེས་བཅུ་དྲུག་ལ་གདིང་བར་བྱའོ། །དུས་མ་ཡིན་པར་དབྱུང་བ་ལ་ནི་ཟླ་བའི་ངོ་ངེས་པ་མེད་དེ་གསོ་སྦྱོང་གི་ཉི་མ་གཅིག་དང་སྦྱར་ཏེ། གསོ་སྦྱོང་བྱས་ནས་དེའི་མོད་ལ་དབྱུང་བར་བྱའི། གསོ་སྦྱོང་གི་དུས་མ་ཡིན་

པར་ནི་དབྱུང་བར་མི་བྱའོ། །དུས་སུ་དབྱུང་བ་ནི་དཔྱིད་ཟླ་ར་བ་ཉ་ལ་གསོ་སྦྱོང་བྱས་ནས་དེའི་ཉི་མ་ཉིད་ལ་དབྱུང་བར་བྱའོ། །གལ་ཏེ་གཉུག་མར་གནས་པ་དག་གིས་སྟོན་ཟླ་འབྲིང་པོ་ཉ་ལ་དགག་དབྱེ་བྱས་ནས་སྟོན་ཟླ་འབྲིང་པོ་ཚེས་བཅུ་དྲུག་ལ་སྲ་བརྐྱང་བཏིང་པའི་འོག་ཏུ་དགེ་སློང་གློ་བུར་པ་

གཉུག་མར་གནས་པ་དག་པས་ཆེས་མང་བ་དག་དེར་ལྷགས་ཤིང་དེ་དག་ན་རེ། དེང་ཚེས་བཅོ་ལྔའི་གསོ་སྦྱོང་ཡིན་ནོ་ཞེས་ཟེར་ན་དུས་ཀྱི་ཕྱིར་ནི་མང་པོ་དག་གི་རྗེས་སུ་འཇུག་པར་བྱ་བ་ཡིན་པས་དེར་སྲ་བརྐྱང་གདིང་བའི་ཉི་མ་ལ་གཉུག་མར་གནས་པ་དག་གསོ་སྦྱོང་བྱེད་ན་དེ་དག་གིས་དེ་

Vol. 163 · folio 168a

ལ་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་ཡང་གསོ་སྦྱོང་བྱས་ན་ཕྱུང་བ་ཉིད་ཡིན་ནོ་ཞེས་བྱ་བ་སྨྲས་ཏེ། འདིས་ཀྱང་རྣམ་པ་གཞན་གྱིས་དབྱུང་བ་རང་འཇུག་པ་དང་བྲལ་བ་རྣམ་པར་གཞག་གོ། །འདི་ལྟར་དེང་གསོ་སྦྱོང་གི་ཉི་མ་ཡིན་ནོ་སྙམ་པའི་བློས་ཡང་གསོ་སྦྱོང་བྱས་

ན་སྲ་བརྐྱང་བཏིང་བ་རང་བྱུང་བར་འགྱུར་ཏེ། འདི་ལྟར་བདག་ཅག་གིས་དུས་མ་ཡིན་པར་སྲ་བརྐྱང་གདིང་ངོ་སྙམ་དུ་དེ་ལ་མི་ལྟོས་པའི་བློ་སྐྱེས་པའི་ཕྱིར་རོ། །ཡང་ཉི་མ་གཉིས་པ་ལ་སྲ་བརྐྱང་གདིང་བར་བྱ་སྟེ། དེའི་ཚེ་ན་སྟོན་ཟླ་འབྲིང་པོ་ཚེས་བཅུ་དྲུག་ཡིན་པའི་བློ་སྐྱེས་པའི་ཕྱིར་རོ། །བཀྲ་ཤིས་

ཀྱི་གསོ་སྦྱོང་དེའི་ཉིན་མོ་བྱས་པ་ལ་ནི་འདིར་ཐལ་བར་མི་འགྱུར་ཏེ། དེ་ན་དུས་མ་ཡིན་པར་བཏིང་བའི་བློ་མེད་པའི་ཕྱིར་རོ། །བཏིང་ནས་བྱེ་བ་དག་ལ་ནི་དེ་ཐ་དད་པར་འགྲུབ་པོ་ཞེས་བྱ་བ་ནི། སྲ་བརྐྱང་བཏིང་ནས་དེའི་འོག་ཏུ་དགེ་འདུན་བྱེ་བར་གྱུར་ན་དགེ་སློང་དེ་དག་ལ་སྲ་བརྐྱང་དབྱུང་བ་དེ་ཐ་དད་

པར་འགྲུབ་སྟེ། ཕྱོགས་གཅིག་གིས་ཕྱུང་ཟིན་ནས་ཕྱོགས་ཅིག་ཤོས་ཀྱིས་ཀྱང་དབྱུང་དགོས་ཏེ། འདི་ལ་གདིང་བ་གཅིག་ཡིན་པའི་ཕྱིར་ཕྱོགས་ཅིག་ཤོས་ཀྱིས་ཀྱང་ཕྱུང་བ་ཉིད་ཡིན་ནོ་སྙམ་དུ་ཤེས་པར་མི་བྱའོ། །ཆོས་སྨྲ་བ་དག་ཡོད་པས་དེ་གདིང་ངོ་ཞེས་བྱ་བ་ནི། གནས་གང་དུ་དབྱར་

གནས་པར་ཁས་བླངས་ནས་སམ་དགག་དབྱེ་བྱས་ནས་དགེ་འདུན་བྱེ་བར་གྱུར་པ་དེ་ན་ཆོས་སྨྲ་བ་དག་ཡོད་ལ། ཆོས་མ་ཡིན་པ་སྨྲ་བ་དག་ཀྱང་ཡོད་ན་ཆོས་སྨྲ་བ་དག་ཡོད་པའི་ཕྱོགས་དེས་སྲ་བརྐྱང་དེ་གདིང་བར་བྱ། དབྱུང་བར་བྱ། ཡོངས་སུ་བརྐྱང་བར་བྱའོ། །འདིར་གཞུང་ནི་དབྱར་གནས་

པའི་དགེ་འདུན་བྱེ་ན་གང་གིས་སྲ་བརྐྱང་གདིང་བར་བགྱི། གང་དག་ཆོས་སྨྲ་བ་དག་གིས་སོ་ཞེས་གསུངས་པ་དང་། དེ་དགེ་སློང་བྲམ་ཟེའི་བུ་མོས་ཞུས་པ་ལས་ཀྱང་དགེ་འདུན་བྱེ་ན་སུས་སྲ་བརྐྱང་གདིང་བར་བགྱི། ཆོས་སྨྲ་བ་དག་གིས་ཏེ། ཆོས་སྨྲ་བ་དེས་ནི་དབང་བྱེད་པ་ཉིད་ཡིན་པའི་ཕྱིར་

ཏེ། ཐམས་ཅད་ལ་ཡང་གདིང་བ་དབྱུང་བར་ནི་མི་འགྱུར་རོ་ཞེས་གསུངས་པ་ཡིན་ནོ། །དེར་གཞན་དག་གིས་བྱས་ཀྱང་གནས་ཀྱི་རྙེད་པ་ནི་དེ་དག་ལ་འོས་པ་ཉིད་ཡིན་ནོ་ཞེས་བྱ་བ་ནི། གནས་དེར་དགེ་སློང་དུས་འདིར་གནས་པ་ལ་རྙེད་པ་འདི་སྦྱིན་པར་བྱའོ་ཞེས་རྣམ་པ་དེ་ལྟར་གནས་ན་

Vol. 163 · folio 168b

གནས་པའི་རྒྱུ་ལས་བྱུང་བའི་རྙེད་པ་དགེ་སློང་རྣམས་ལ་རྣམ་པར་གཞག་པ་གང་ཡིན་པའི་གནས་ཀྱི་རྙེད་པ་དེ་ནི་ཆོས་མ་ཡིན་པ་སྨྲ་བ་གཞན་དག་གིས་སྲ་བརྐྱང་གདིང་བ་བྱས་ཀྱང་། གནས་ཀྱི་རྒྱུ་ལས་བྱུང་བའི་རྙེད་པ་སྟོན་ཟླ་འབྲིང་པོ་ཉའི་མཐར་ཐུག་པའི་དུས་ཚུན་ཆད་དུ་བྱུང་བ་གང་ཡིན་པ་དེ་ནི་

ཆོས་སྨྲ་བ་དེ་དག་ལ་འོས་པ་ཉིད་ཡིན་གྱི། ཆོས་མ་ཡིན་པ་སྨྲ་བ་དག་ལ་ནི་འོས་པ་མ་ཡིན་ཏེ། ཕྱོགས་གཞན་དུ་གནས་པའི་ཕྱིར་རོ། །གནས་ཀྱི་རྙེད་པ་ཞེས་སྨོས་པས་ནི་རྙེད་པ་གཞན་གཅད་པའི་ཕྱིར་ཏེ། དེས་ན་སྲ་བརྐྱང་བཏིང་བའི་རྒྱུ་ལས་བྱུང་བའི་རྙེད་པ་འབྱུང་བ་གང་ཡིན་པ་དེ་ནི་

ཐམས་ཅད་ལ་འོས་པ་ཉིད་ཡིན་ནོ། །རང་བཞིན་དུ་གནས་པའི་གནས་སུ་དེ་སྤངས་པ་རྣམས་ལ་མི་འབྱུང་ངོ་ཞེས་བྱ་བ་ནི། རང་བཞིན་དུ་གནས་པའི་གནས་སུ་སྲ་བརྐྱང་འདིང་བར་བྱེད་པ་དེ་སྤངས་པ་རྣམས་ལ་མི་འབྱུང་ངོ་ཞེས་བྱ་བའི་ཐ་ཚིག་གོ། །བསམ་པས་གནས་པ་ནི་བཏིང་བ་ཡིན་ནོ་

ཞེས་བྱ་བ་ནི། འདི་ལས་བདག་གི་རྙེད་པ་དང་ཕན་ཡོན་འབྱུང་ངོ་སྙམ་དུ་དེ་ལྟར་བསམ་པས་དོན་དུ་གཉེར་བར་འཇུག་པ་དེ་ནི་སྲ་བརྐྱང་བཏིང་བའི་ངོ་བོ་ཉིད་ཡིན་ནོ། །ལྷན་ཅིག་ཏུ་བྱ་བ་ལ་འདུན་པ་ཕུལ་བའི་དབང་གིས་ལྷག་མ་རྣམས་ཀྱིས་བྱས་ན་བྱས་པ་ཉིད་ཡིན་ནོ་ཞེས་བྱ་བ་ནི། བསམ་

པས་གནས་པ་ནི་བཏིང་བ་ཡིན་ལ་དེ་དང་བྲལ་བ་ནི་ཕྱུང་བ་ཡིན་པས། དེའི་ཕྱིར་གཞན་དག་དང་ལྷན་ཅིག་བྱ་བ་གང་ཡིན་པའི་བྱ་བ་དེ་དགེ་སློང་འདུན་པ་བླངས་པ་ལྷག་མ་དག་གིས་བྱས་ན་འདུན་པ་འབུལ་བར་བྱེད་པས་ཀྱང་འདུན་པ་ཕུལ་བའི་དབང་གིས་བྱས་པ་ཉིད་ཡིན་ནོ། །དེ་དང་བྲལ་བ་ནི་

ཕྱུང་བ་ཡིན་ནོ་ཞེས་བྱ་བ་ནི། བསམ་པས་གནས་པ་དེ་དང་བྲལ་བ་ནི་སྲ་བརྐྱང་ཕྱུང་བ་ཡིན་ནོ། །དེའི་ཕྱིར་འདུན་པ་མ་ཕུལ་བ་ལ་ནི་འདུག་ཏུ་ཟིན་ཀྱང་གཉིད་ལོག་གམ་སྙོམས་པར་ཞུགས་ན་མ་ཐོས་ཀྱི་བར་དུ་བཏིང་བ་དང་ཕྱུང་བ་མི་འབྱུང་ངོ་ཞེས་བྱ་བ་ནི། གང་གི་ཕྱིར་བསམ་པ་གནས་པ་ནི་བཏིང་

བ་ཡིན་ལ་དེ་དང་བྲལ་བ་ནི་ཕྱུང་བ་ཡིན་པ་དེའི་ཕྱིར་གང་གིས་འདུན་པ་མ་ཕུལ་བ་ལ་ནི་དགེ་འདུན་གྱི་ནང་དུ་འདུག་ཏུ་ཟིན་ཀྱང་གཉིད་ལོག་གམ་སྙོམས་པར་ཞུགས་ན་ཇི་སྲིད་དུ་སྲ་བརྐྱང་བཏིང་བའམ་ཕྱུང་བ་མ་ཐོས་ཀྱི་བར་དུ་དེ་ལ་སྲ་བརྐྱང་བཏིང་བའམ་བྱུང་བ་མི་འབྱུང་སྟེ་འདུན་པ་མ་ཕུལ་བའི་

Vol. 163 · folio 169a

ཕྱིར་རོ། །ཐོས་ན་ནི་བཏིང་བ་དང་ཕྱུང་བ་འབྱུང་བར་འགྱུར་རོ། །འདུན་པ་ཕུལ་བ་ལ་ནི་གཉིད་ལོག་གམ་སྙོམས་པར་ཞུགས་སུ་ཟིན་ཀྱང་མ་ཐོས་པའི་མདུན་དུ་ཡང་བཏིང་བ་དང་ཕྱུང་བ་འབྱུང་བ་ཁོ་ནར་འགྱུར་རོ། །མཚམས་གཅིག་པ་ཉིད་ཡིན་ན་དེར་གནས་གཞན་དུ་

གནས་པ་རྣམས་ཀྱང་བཏིང་བའི་ཕྱིར་གནས་པ་ཉིད་ཡིན་ནོ་ཞེས་བྱ་བ་ནི། མཚམས་གཅིག་གི་ནང་ན་གནས་དུ་མ་ཡོད་ན་དབྱར་དེར་ཁ་ཅིག་ནི་གནས་གཅིག་ཏུ་གནས་ཤིང་ལྷག་མ་ཡང་གཞན་དུ་གནས་ན་དེ་དག་ཐམས་ཅད་སྲ་བརྐྱང་བཏིང་བའི་ཕྱིར་གནས་པ་ནི་ཡིན་ལ། རྙེད་པའི་ཕྱིར་གནས་

པ་ནི་མ་ཡིན་ཏེ། དེ་དག་ལ་གནས་ཀྱི་རྙེད་པ་ནི་བདག་པོས་ཇི་ལྟར་རྣམ་པར་གཞག་པ་བཞིན་དུ་རྣམ་པར་གནས་སོ། །འདི་སྐད་བསྟན་ཏེ། མཚམས་གཅིག་གི་ནང་ན་གནས་དུ་མ་ཡོད་པ་དེར་ཅིག་ཅར་དབྱར་གནས་པར་ཁས་བླངས་པ་དག་སྲ་བརྐྱང་བཏིང་བའི་ཕྱིར་ཐམས་ཅད་དུ་གནས་པ་

ཉིད་ཡིན་ན། དེས་ན་གནས་གཅིག་ཏུ་སྲ་བརྐྱང་བཏིང་ཡང་ཐམས་ཅད་དུ་བཏིང་བར་འགྱུར་ཏེ་འདིར་དོན་ནི་དེ་ཡིན་ནོ། །དབྱར་དག་ལ་ནི་མཚམས་གཅིག་པ་ཉིད་ཀྱིས་གནས་གཅིག་ཡིན་པས། དབྱར་གྱི་འོག་ཏུ་སྲ་བརྐྱང་འདིང་བའི་དུས་ཀྱི་བར་དུ་ཡང་མཚམས་གཅིག་གོ་ཞེས་བྱ་བའི་

ཐ་ཚིག་གོ། །འདིར་གཞུང་ནི་བཙུན་པ་རེ་ཞིག་དགེ་སློང་དག་མཚམས་ཀྱི་ནང་དུ་གནས་བཞིའམ་ལྔ་བགྱིས་ཏེ་དབྱར་གནས་པར་ཁས་ལེན་ཅིང་དགག་དབྱེ་བགྱིས་ནས་སྲ་བརྐྱང་བཏིང་བར་བགྱིད་ན་གནས་དེ་དག་ཐམས་ཅད་དུ་སྲ་བརྐྱང་བཏིང་བར་འགྱུར་རམ། ཉེ་བ་འཁོར་ཐམས་ཅད་དུ་སྲ་

བརྐྱང་བཏིང་བར་འགྱུར་རོ་ཞེས་གསུངས་པ་ཡིན་ནོ། །དེ་ནི་བཏིང་བའི་ཚེ་དེ་ན་གནས་དེ་ཉིད་ཡིན་ནོ་ཞེས་བྱ་བ་ནི། གནས་གཞན་དེ་ནི་གནས་དེ་ཉིད་ཡིན་ཏེ། དེ་ཉིད་གནས་འདི་ཡིན་གྱི་གནས་ཐ་དད་པ་མ་ཡིན་ནོ། །གང་གི་ཚེ་ཞེ་ན། བཏིང་བའི་ཚེ་ན་སྟེ་སྲ་བརྐྱང་བཏིང་བའི་ཚེ་ནའོ། །དེའི་ཚེ་ན་མཚམས་

གཅིག་པ་དེ་ན་སྟེ་མཚམས་གཅིག་པ་ཡིན་ནའོ། །དེ་ལྟར་གནས་གཞན་དུ་སྲ་བརྐྱང་འདིང་བར་བྱེད་པ་ཡང་དེའི་ཚེ་ན་དེ་ཉིད་དུ་འདིང་བར་བྱེད་པ་ཡིན་ནོ། །འདི་སྐད་བསྟན་ཏེ། འདི་ལྟར་དབྱར་དག་ལ་གནས་དུ་མ་མཚམས་ཐ་དད་པ་དག་སྲ་བརྐྱང་འདིང་བའི་དུས་སུ་སྟོན་ཟླ་འབྲིང་པོ་ཚེས་

Vol. 163 · folio 169b

བཅུ་དྲུག་ལ་མཚམས་རྣམས་བསྐྱེད་དེ། གནས་དེ་དག་ཐམས་ཅད་མཚམས་གཅིག་ན་གནས་པར་གྱུར་ན་དེའི་ཚེ་གནས་གང་ཡང་རུང་བར་སྲ་བརྐྱང་འདིང་བར་བྱེད་ན། གནས་གཞན་ཐམས་ཅད་དུ་དབྱར་གནས་པའི་དགེ་སློང་ཐམས་ཅད་ཀྱིས་སྲ་བརྐྱང་བཏིང་བར་རིག་པར་བྱ་སྟེ། འདིང་བའི་དུས་

ན་མཚམས་གཅིག་ཡིན་པའི་ཕྱིར་རོ། །འདིར་གཞུང་ནི་ཉེ་བ་འཁོར་དགེ་སློང་གི་དགེ་འདུན་ཟླ་བ་གསུམ་གནས་པས་དབྱར་གྱི་ཟླ་བ་གསུམ་འདས་ནས་དེ་ཉིད་ཀྱི་ཚེས་བཅུ་དྲུག་ལ་མཚམས་ཆེན་པོ་བཤིག་སྟེ། གནས་བཞིའམ་ལྔ་མཚམས་གཅིག་ཏུ་བྱས་ནས་སྲ་བརྐྱང་འདིང་བར་བྱེད་ན་

གནས་དེ་དག་ཐམས་ཅད་དུ་སྲ་བརྐྱང་བཏིང་བར་བརྗོད་པར་བྱའོ་ཞེས་གསུངས་པ་ཡིན་ནོ། །བཏིང་ནས་མཚམས་ཐ་དད་པར་བྱས་ན་གང་ཡང་རུང་བ་དེ་ལས་དེའི་གནས་ཡིན་ནོ་ཞེས་བྱ་བ་ནི། མཚམས་གཅིག་ཏུ་གནས་དུ་མ་གང་ཡང་རུང་བར་སྲ་བརྐྱང་བཏིང་ནས་ཕྱིས་མཚམས་ཐ་དད་པར་

བྱས་ན། སྲ་བརྐྱང་བཏིང་བའི་གནས་དུ་མ་དེ་ལས་གནས་གང་ཡང་རུང་བ་ཆོས་གོས་དེའི་གནས་ཡིན་པ་སྟེ། གནས་གང་དུ་ཆོས་གོས་གདིང་བའི་ལས་བྱས་པའི་གནས་དེ་ཉིད་དེའི་གནས་མ་ཡིན་གྱི། གནས་གང་ཡང་རུང་བར་བཞག་ན་ཡང་རང་གི་གནས་ཁོ་ན་ན་གནས་པ་ཡིན་ནོ། །

འདིར་གཞུང་ནི་བཙུན་པ་གལ་ཏེ་སྲ་བརྐྱང་བཏིང་ནས་མཚམས་ཆེན་པོ་བཤིག་སྟེ། སོ་སོའི་མཚམས་འགུམས་པར་བགྱིད་ན་སྲ་བརྐྱང་ཕྱུང་བར་བརྗོད་པར་བགྱིའམ་ཉེ་བ་འཁོར་མི་བྱའོ། །གནས་དེ་དག་ཐམས་ཅད་དུ་སྲ་བརྐྱང་གདིང་བར་འགྱུར་རམ། ཉེ་བ་འཁོར་སྲ་བརྐྱང་བཏིང་བར་འགྱུར་

རོ་ཞེས་གསུངས་པ་ཡིན་ནོ། །ཐ་དད་པ་ཉིད་ཡིན་ན་གནས་སོ་སོར་དེ་དབྱུང་ངོ་ཞེས་བྱ་བ་ནི། སྲ་བརྐྱང་བཏིང་བའི་གནས་མང་པོ་དག་གིས་མཚམས་ཐ་དད་པ་ཉིད་ཡིན་ན། གནས་སོ་སོ་སོ་སོར་སྲ་བརྐྱང་དེ་དབྱུང་དགོས་ཀྱི་ཐམས་ཅད་ཀྱིས་གཅིག་ཏུ་དབྱུང་དུ་ནི་མི་རུང་ངོ་། །གལ་ཏེ་

གནས་གང་སྲ་བརྐྱང་གཞག་པའི་གནས་དེར་སྲ་བརྐྱང་འབྱིན་པར་བྱེད་ན། གནས་གཞན་ན་གནས་པའི་དགེ་སློང་དག་གིས་སྲ་བརྐྱང་དེ་རང་གི་གནས་དུ་སྤོ་བར་བྱའོ། །ཡང་ན་རང་གི་གནས་ནས་དགེ་སློང་འགའ་ཞིག་སྲ་བརྐྱང་གི་གན་དུ་གཞག་པར་བྱ་སྟེ། དེས་སྐྱ་རེངས་འཆར་བའི་དུས་

Vol. 163 · folio 170a

སུ་འབྲལ་བའི་ཉེས་པ་སེལ་བར་བྱེད་དོ། །གཞན་དུ་ན་སྐྱ་རེངས་འཆར་བའི་དུས་སུ་སྲ་བརྐྱང་དབྱུང་བར་འཇུག་པ་དང་བྲལ་བར་འགྱུར་བ་དང་འབྲལ་བའི་ཉེས་པར་ཡང་འགྱུར་རོ། །འདིར་གཞུང་ནི་བཙུན་པ་གལ་ཏེ་སྲ་བརྐྱང་བཏིང་ནས་མཚམས་ཆེན་པོ་བཤིག་སྟེ་སོ་སོའི་

མཚམས་ཀུན་ནས་སྲ་བརྐྱང་འབྱིན་པར་བགྱིད་ན་གནས་དེ་དག་ཐམས་ཅད་དུ་སྲ་བརྐྱང་ཕྱུང་བར་འགྱུར་རམ། ཉེ་བ་འཁོར་མི་འགྱུར་ཏེ། གང་དག་འབྱིན་པར་བྱེད་པ་དེ་དག་གིས་ནི་སྲ་བརྐྱང་ཕྱུང་བར་འགྱུར་ལ། གང་དག་འབྱིན་པར་མི་བྱེད་པ་དེ་དག་གིས་ནི་སྲ་བརྐྱང་ཕྱུང་བར་མི་འགྱུར་རོ། །

མཚམས་གཅིག་པ་ཉིད་དུ་ནི་ཕྱུང་ན་ཐམས་ཅད་ཀྱིས་སྲ་བརྐྱང་ཕྱུང་བར་འགྱུར་རོ་ཞེས་གསུངས་པ་ཡིན་ནོ། །བྱེ་བ་ཉིད་ན་ཕྱོགས་སོ་སོའོ་ཞེས་བྱ་བ་ནི། གནས་གཅིག་ཏུ་གཏོགས་པ་ཉིད་ཡིན་ན་དགེ་འདུན་བྱེ་ཞིང་ཕྱོགས་གཉིས་སུ་གྱུར་ན། ཕྱོགས་གཅིག་གིས་ཕྱུང་བས་ཕྱོགས་ཅིག་ཤོས་

ཀྱིས་ཕྱུང་བར་མི་འགྱུར་རོ་ཞེས་བྱ་བའི་ཐ་ཚིག་གོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། སྲ་བརྐྱང་བཏིང་བའི་གནས་སུ་དགེ་འདུན་བྱེ་ན། དེར་ཕྱོགས་གཅིག་གམ་ཅིག་ཤོས་ཀྱིས་སྲ་བརྐྱང་འབྱིན་པར་བགྱིད་ན་དེ་དག་ཐམས་ཅད་ཀྱིས་སྲ་བརྐྱང་ཕྱུང་བར་བརྗོད་པར་

བགྱིའམ། ཉེ་བ་འཁོར་མི་བྱ་སྟེ། གང་དག་འབྱིན་པར་བྱེད་པ་དེ་དག་གིས་ནི་སྲ་བརྐྱང་ཕྱུང་བར་འགྱུར་ལ། གང་དག་མི་བྱེད་པ་དེ་དག་གིས་ནི་སྲ་བརྐྱང་ཕྱུང་བར་མི་འགྱུར་རོ་ཞེས་གསུངས་པ་ཡིན་ནོ། །མ་བཏིང་བས་ཕྱུང་བ་ནི་མ་ཕྱུང་བ་མ་ཡིན་ནོ་ཞེས་བྱ་བ་ནི། གནས་གཞན་དུ་དབྱར་

གནས་པར་ཁས་བླངས་པ་གང་དག་ལ་སྲ་བརྐྱང་གདིང་བ་མེད་པ་དེ་དག་ནི་མ་བཏིང་བ་ཞེས་བྱ་སྟེ། མ་བཏིང་བའི་གང་ཟག་དེ་དག་གིས་སྲ་བརྐྱང་ཕྱུང་བ་གང་ཡིན་པ་དེ་ནི་མ་ཕྱུང་བ་མ་ཡིན་ཏེ། ཕྱུང་བ་ཉིད་ཡིན་ནོ། །འདིར་གཞུང་ནི་བཙུན་པ་རེ་ཞིག་དབྱར་གནས་པའི་དགེ་སློང་དག་

གིས་སྲ་བརྐྱང་བཏིང་ནས་མཚམས་ཀྱི་སླད་རོལ་དུ་མཆིས་ཤིང་ལྟོས་པ་མ་མཆིས་པར་གྱུར་ནས། དགེ་སློང་གློ་བུར་བ་དག་ལྷགས་ཏེ་སྲ་བརྐྱང་འབྱིན་པར་བགྱིད་ན་སྲ་བརྐྱང་ཕྱུང་བར་བརྗོད་པར་བགྱི་འམ། ཉེ་བ་འཁོར་ཕྱུང་བར་བརྗོད་པར་བྱའོ་ཞེས་གསུངས་པ་ཡིན་ནོ། །མི་འབྱུང་

Vol. 163 · folio 170b

བ་ཉིད་ཀྱིས་ཁ་བསྐང་དུ་མི་རུང་བ་ཉིད་མ་ཡིན་ནོ་ཞེས་བྱ་བ་ནི། གནས་གཞན་དུ་དབྱར་གནས་པར་ཁས་བླངས་པ་གང་ལ་སྲ་བརྐྱང་འདིང་བ་འབྱུང་བ་མེད་པ་དེ་ནི་མི་འབྱུང་བ་ཉིད་ཅེས་བྱ་སྟེ། མི་འབྱུང་བ་ཉིད་ཀྱི་གང་ཟག་དེས་སྲ་བརྐྱང་འདིང་བར་བྱེད་པའི་དགེ་སློང་དགེ་འདུན་དུ་མ་ལངས་

པའི་ཁ་བསྐང་དུ་མི་རུང་བ་ཉིད་མ་ཡིན་ཏེ་རུང་ངོ་། །འདིར་གཞུང་ནི་བཙུན་པ་རེ་ཞིག་དགེ་སློང་གིས་གཅིག་པུ་དབྱར་གནས་པར་ཁས་ལེན་ཅིང་། དེས་དགུང་བླ་གསུམ་པོ་དག་འདས་ནས་དགག་དབྱེ་བགྱིས་ཏེ། དགེ་འདུན་ལ་སྲ་བརྐྱང་འདིང་བའི་ཆོས་གོས་འབུལ་བར་བགྱིད་ཅིང་

དེར་དགེ་སློང་གློ་བུར་བ་དག་ལྷགས་ཤིང་དེ་དག་སྲ་བརྐྱང་འདིང་བའི་རྗེས་སུ་ཞུགས་ཏེ་དོང་ན་ཆོས་གོས་དེ་སུས་འཐོབ་པར་འགྱུར་ལགས། ཉེ་བ་འཁོར་དགེ་སློང་དེ་ཉིད་ཀྱིས་སོ་ཞེས་གསུངས་པ་ཡིན་ནོ། །མ་བཏིང་བ་ཉིད་ཀྱིས་དབྱུང་བར་མི་རུང་བ་ཉིད་མ་ཡིན་ནོ་ཞེས་བྱ་བ་ནི། གང་ལ་

སྲ་བརྐྱང་གདིང་བ་མེད་པ་དེ་ནི་མ་བཏིང་བ་ཞེས་བྱ་སྟེ། མ་བཏིང་བའི་གང་ཟག་དེས་སྲ་བརྐྱང་འབྱིན་པ་དགེ་འདུན་དུ་མ་ལངས་པའི་ཁ་བསྐང་དུ་མི་རུང་བ་ཉིད་མ་ཡིན་ཏེ་རུང་ངོ་། །འདི་ནི་སྔར་དགེ་སློང་གློ་བུར་བ་དག་ལྷགས་ཤིང་དེ་དག་སྲ་བརྐྱང་འདིང་བའི་རྗེས་སུ་ཞུགས་ཏེ་དོང་ན་ཞེས་

གསུངས་པ་དེ་ཉིད་ལས་སྲ་བརྐྱང་འབྱིན་པར་བྱེད་ན་ཡང་རུང་བར་དོན་གྱིས་མངོན་པས་མདོར་བྲིས་ཏེ། འདི་ལྟར་ཁ་བསྐང་བ་མེད་ན་དབྱུང་བའི་ལས་འབྱུང་བ་ཡང་མེད་པའི་ཕྱིར་རོ། །སྲ་བརྐྱང་བཏིང་བ་སྣམ་སྦྱར་མེད་པར་གྲོང་དུ་འཇུག་པ་ལ་སོགས་པ་དང་སུམ་མདོ་ཚུན་ཆད་དུ་འཇུག་པ་ལ་

ཡང་ཉེས་པ་མེད་དོ་ཞེས་བྱ་བ་ནི། དགེ་སློང་སྲ་བརྐྱང་བཏིང་བའི་སྣམ་སྦྱར་མེད་པར་གྲོང་དུ་འཇུག་པ་ལ་སོགས་པ་ལ་ཉེས་པ་མེད་དོ། །སོགས་པ་ཞེས་བྱ་བའི་སྒྲས་ནི་གྲོང་ཁྱེར་དུ་འཇུག་པ་ལ་སོགས་པ་བསྡུའོ། །སུམ་མདོ་ཚུན་ཆད་དུ་འཇུག་པ་ཞེས་བྱ་བ་ནི། ལམ་པོ་ཆེའི་སུམ་མདོ་

ཚུད་ཆད་དུ་འདུག་པ་ལ་ཡང་ཉེས་པ་མེད་དོ་ཞེས་བྱ་བའི་ཐ་ཚིག་གོ། །འདི་ནི་དོན་ལ་ཐོབ་པས་གསལ་བར་བྱ་བའི་ཕྱིར་མདོར་བྲིས་ཏེ། སྔར་གསུམ་པོ་འདི་དག་ནི་སྲ་བརྐྱང་བཏིང་བ་ལ་མི་འབྱུང་ངོ་ཞེས་སྨོས་པས་བསྟན་ཟིན་པའི་ཕྱིར་རོ། །འདིར་གཞུང་ནི་བཙུན་པ་སྲ་བརྐྱང་བཏིང་བའི་

Vol. 163 · folio 171a

གནས་ན་རྐྱེན་དུ་དག་བག་ཡངས་སུ་འགྱུར་ལགས། ཉེ་བ་འཁོར་བཅུ་སྟེ་བཅུ་གང་ཞེ་ན། ཡང་ཡང་ཟ་བ་དང་། འདུས་ཤིང་ཟ་བ་དང་། མ་སྨྲས་པར་རྒྱུ་བ་དང་། སྨད་གཡོགས་སྟོད་གཡོགས་དང་བཅས་པས་ཅི་བདེར་ལྗོངས་རྒྱུ་བ་དང་། མཚན་མོས་འབྲལ་བ་མེད་པ་

དང་། ཞག་བཅུས་འདའ་བ་མེད་པ་དང་། ཟླ་བས་འདའ་བ་མེད་པ་དང་། གོས་ཅི་ཙམ་གྱིས་ཆོག་པ་དག་སློང་བ་དང་། གོས་རུང་བར་མ་བྱས་པ་ཇི་ཙམ་འདོད་པ་དག་འཆང་བ་དང་། སྟོན་ཟླ་འབྲིང་པོ་ཚེས་བཅུ་དྲུག་ནས་དཔྱིད་ཟླ་ར་བ་ཉའི་བར་དུ་དབྱར་གནས་པའི་དགེ་འདུན་གྱི་

རྙེད་པ་མི་བསྒོ་བའོ་ཞེས་གསུངས་པ་དང་། གཞན་ཡང་བཅོམ་ལྡན་འདས་ཀྱིས་དགེ་སློང་གིས་ཁྱིམ་གཞན་དུ་སྨད་གཡོགས་དང་སྟོད་གཡོགས་ཀྱིས་འདུག་པར་བྱའོ་ཞེས་གང་གསུངས་ན། བཙུན་པ་སུམ་མདོ་དང་བཞི་མདོ་དག་ཏུ་སྨད་གཡོགས་དང་སྟོད་གཡོགས་ཀྱིས་

མཆིས་སུ་རུང་ངམ། ཉེ་བ་འཁོར་སྲ་བརྐྱང་བཏིང་ན་རུང་ངོ་ཞེས་གསུངས་པ་ཡིན་ཏེ། དེ་གཉི་གའི་འདིར་བསྡུས་པ་ཡིན་ནོ། །དགེ་འདུན་ཐམས་ཅད་དབྱར་ཕྱི་མར་གནས་པར་ཁས་བླངས་པ་དག་ལ་ཡང་སྲ་བརྐྱང་གདིང་བ་འཆགས་སོ། །དེ་གདིང་བའི་དུས་ནི་སྟོན་ཟླ་ཐ་

ཆུངས་ཚེས་བཅུ་དྲུག་གོ། །དཔྱིད་ཟླ་འབྲིང་བོ་ཉ་ལ་དེ་དབྱུང་ངོ་། །སྲ་བརྐྱང་འདིང་བའི་དགེ་སློང་གཞན་དུ་གྱུར་ན་དེ་སྦེད་པ་བསྐོ་བར་བྱའོ། །སྲ་བརྐྱང་གི་གཞི་ཞུ་བ་ལ་སོགས་པའི་སྐབས་སོ་ཞེས་བྱ་བ་ནི། སྲ་བརྐྱང་གི་གཞི་ཞུ་བ་ལ་སོགས་པའི་སྐབས་སུ་གཏོགས་པ་

བཤད་ཟིན་ཏོ། །སྲ་བརྐྱང་གི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།བམ་པོ་ལྔ་བཅུ་གཉིས་པ། ད་ནི་གོས་ཀྱི་གཞི་བསྡུ་བར་བྱ་སྟེ་དེའི་ཕྱིར། མཚོན་གྱིས་མ་དྲས་པའི་གོས་སྤྱད་པར་མི་བྱའོ་ཞེས་བྱ་བ་སྨྲས་ཏེ། མཚོན་གྱིས་མ་དྲས་པ་ཞེས་བྱ་བ་ནི། ཁ་ཚར་དང་ཕུན་ཚར་

མ་བཅད་པ་སྟེ་དེ་ནི་ཁྱིམ་པའི་གོས་ཡིན་པའི་ཕྱིར་བཀག་གོ། །འདིར་གཞུང་ནི་དེ་ལྟ་བས་ན་དགེ་སློང་དག་གིས་ཁྱིམ་བདག་གི་གོས་མཚོན་གྱིས་དྲས་པ་དག་ཁ་དོག་ངན་པ་བྱས་ཏེ་བཅང་བར་གནང་ངོ་ཞེས་གསུངས་པ་ཡིན་ནོ། །དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ་

Vol. 163 · folio 171b

ཞེས་བྱ་བ་ནི། གླེགས་བུར་དྲས་ཤིང་དྲུབས་པ་ཞེས་བྱ་བའི་ཐ་ཚིག་སྟེ། དེ་ཆོས་གོས་ཉིད་དུ་བྱ་བའི་ཕྱིར་བྱིན་གྱིས་བརླབ་པར་བྱའོ། །རྣམ་པ་གང་གིས་དྲུབས་པ་ཞེ་ན་དེའི་ཕྱིར་སྣམ་ཕྲན་སྣྲེལ་ཞི་ཉིད་དང་ལྷག་མ་མཉམ་པ་ཉིད་དང་དབུས་ནས་གཞན་དུ་ཚལ་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་

དང་མཐའ་བསྐོར་བ་ཉིད་དག་གིས་སོ་ཞེས་བྱ་བ་སྨྲས་ཏེ། ཞེང་དུ་བཏང་བའི་གླེགས་བུའི་ཚད་དག་ནི་སྔར་ཟླ་བས་སྤང་བ་རྣམ་པར་འབྱེད་པའི་སྐབས་སུ་གླེགས་བུ་ཕྱེད་དང་གསུམ་པ་ཉིད་དང་གླེགས་བུ་ཕྱེད་དང་བཞི་པ་ཉིད་དང་། གླེགས་བུ་ཕྱེད་དང་ལྔ་པ་ཉིད་ཅེས་བྱ་བ་ལ་སོགས་པས་

བཤད་པའི་རྣམ་པ་ཡིན་ནོ། །སྲིད་དུ་བཏང་བའི་གླེགས་བུའི་ཚད་དག་ནི་སྣམ་ཕྲན་སྣྲེལ་ཞི་ཉིད་དང་། ལྷག་མ་མཉམ་པ་ཉིད་དང་། དབུས་ནས་གཞན་དུ་གླེགས་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་རྣམ་པ་འདི་གསུམ་ལྟར་བྱའོ། །མཐའ་བསྐོར་བ་ཉིད་ཅེས་བྱ་བ་ནི་མཐའ་ཐམས་

ཅད་བསྐོར་བ་སྟེ། མཐའ་ཞེས་སྨོས་པའི་ཕྱིར་རོ། །དེ་ལྟ་བས་ན་མདོ་འདི་ནི་སྲིད་དུ་བཏང་བའི་གླེགས་བུའི་ཚད་དག་དང་མཐའ་སྐོར་གྱི་དབང་དུ་བྱས་པ་ཡིན་ནོ། །དེ་ལ་སྣམ་ཕྲན་སྣྲེལ་ཞི་ཉིད་ཅེས་བྱ་བ་ལ། འདིར་སྣམ་ཕྲན་ཞེས་བྱ་བའི་སྒྲ་ནི་སྲིད་དུ་བཏང་བའི་ཚལ་བུ་ལ་བྱའོ། སྣྲེལ་ཞི་

ཞེས་བྱ་བ་ནི་སྲིད་དུ་བཏང་བའི་སྣམ་ཕྲན་དག་གི་ཚལ་བུ་རྣམས་ཀྱིས་སྣ་དྲང་ཐད་དུ་མ་བབ་པར་མཐོན་དམན་མི་མཉམ་པ་ཉིད་ཀྱིས་འགྲུས་ཐབས་ཉིད་དུ་འདུག་པའོ། །དེའི་དངོས་པོ་ནི་དེ་ཉིད་དོ། །ལྷག་མ་མཉམ་པ་ཉིད་ཅེས་བྱ་བ་ལ་ལྷག་མ་ཞེས་བྱ་བ་ནི། ཞེང་དུ་ཐལ་རངས་སུ་བཏང་

བའི་སྣམ་ཕྲན་དག་གི་འཕྲོས་ནོན་པའི་ལྷག་མ་སྟེ། ཞེང་དུ་ཐལ་རངས་སུ་བཏང་བའི་སྣམ་ཕྲན་དག་གི་འཕྲོས་མ་ནོན་པའི་ཕྱོགས་ཚུན་ཆད་ཀྱི་གླེགས་བུ་དག་གོ། །མཉམ་པ་ཞེས་བྱ་བ་ནི་ལྷག་མ་དེ་དག་ཕན་ཚུན་སྲིད་མཉམ་པར་བྱའོ། །དེའི་དངོས་པོ་ནི་དེ་ཉིད་དོ། །དབུས་ནས་གཞན་དུ་

ཚལ་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་ལ། དབུས་ཞེས་བྱ་བ་ནི་ཞེང་དུ་ཐལ་རངས་སུ་བཏང་བའི་སྣམ་ཕྲན་དབུས་མ་གཉིས་ཀྱི་བར་གྱི་གླེགས་བུའོ། །དེ་ནས་གཞན་དུ་གླེགས་བུའི་འཕྲོ་ཞེས་བྱ་བ་ནི། དབུས་ནས་གཡས་གཡོན་གཞན་དུ་སྣམ་ཕྲན་ཞེང་དུ་ཐལ་རངས་སུ་བཏང་བ་

Vol. 163 · folio 172a

དག་གིས་གླེགས་བུའི་འཕྲོའོ། །ཕྱོགས་ཕྱོགས་སུ་ལྟ་བ་ཞེས་བྱ་བ་ནི། གཡས་གཡོན་གྱི་གླེགས་བུ་ཐམས་ཅད་ལ་ཁྱབ་པར་བྱ་བའི་ཕྱིར་ཕྱོགས་ཕྱོགས་སུ་ཞེས་ཟློས་བུར་བྱ་སྟེ། གཡས་ཕྱོགས་ཀྱི་ཚལ་བུ་རྣམས་ཀྱི་འཕྲོ་ཡང་གཡས་ཕྱོགས་སུ་ཕྱི་བརྒྱུད་དུ་བལྟ་ལ། གཡོན་

ཕྱོགས་ཀྱི་ཚལ་བུ་རྣམས་ཀྱི་འཕྲོ་ཡང་གཡོན་ཕྱོགས་སུ་ཕྱི་བརྒྱུད་དུ་བལྟ་བའོ། །དེའི་དངོས་པོ་ནི་དེ་ཉིད་དོ། །དེ་ལྟར་སྣམ་ཕྲན་སྣྲེལ་ཞི་ཉིད་དང་ལྷག་མ་མཉམ་པ་ཉིད་དང་། དབུས་ནས་གཞན་དུ་ཚལ་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་དེ་གསུམ་གྱིས་ནི་སྲིད་དུ་བཏང་བའི་གླེགས་

བུ་དག་དྲུབ་པ་བསྟན་ཏོ། །མཐའ་བསྐོར་བ་ཉིད་ཅེས་བྱ་བ་ནི་ཆུ་ཞེང་གི་མཐའ་འཁོར་བར་ཀུན་དགའ་བོ་མཐའ་སྐོར་གྱིས་བསྐོར་བའོ། །དེའི་དངོས་པོ་ནི་དེ་ཉིད་དོ། །དེ་ལྟར་རྣམ་པ་བཞི་པོ་དེ་དག་བསྡུས་པས་དྲུབས་པའི་ཆོས་གོས་གང་ཡིན་པ་དེ་བྱིན་གྱིས་བརླབ་པར་བྱའོ། །འདི་སྐད་བསྟན་

ཏེ། ཇི་ལྟར་སྲིད་དུ་བཏང་བའི་ཚལ་བུ་རྣམས་ཀྱི་སྣ་མཐོ་དམན་དུ་འདུག་པས་སྣམ་ཕྲན་ལ་ཞི་ཉིད་དུ་འགྱུར་བ་དེ་ལྟར་ཆོས་གོས་དེ་དྲུབ་པར་བྱའོ། །ཚལ་བུ་གཅིག་གི་སྣ་གླེགས་བུའི་འཕྲོས་ནོན་པའི་ལྷག་མ་མ་ནོན་པ་ཇི་ཙམ་ཡོད་པ་དེ་ཙམ་དུ་དེ་ལས་གཞན་པའི་གླེགས་བུ་ལྷག་མ་དག་

ཀྱང་དེ་དང་མཉམ་པར་བྱའོ། །དབུས་ཀྱི་སྣམ་བུ་ལ་ལྟོས་ནས་གཡས་གཡོན་གྱི་ཕྱོགས་གཉིས་སུ་གླེགས་བུའི་འཕྲོ་ཕྱོགས་ཕྱོགས་སུ་བལྟ་བར་བྱའོ། །ངས་བཞི་ཀུན་ནས་འཁོར་བར་ཀུན་དགའ་བོའི་མཐའ་སྐོར་གྱིས་འཕྲོ་ཐམས་ཅད་བསྐོར་བར་བྱའོ། །ཆོ་ག་འདི་ནི་རབ་ཏུ་བྱུང་བ་

གཞན་དག་ལས་དགེ་སློང་རྣམས་ཀྱིས་ཆོས་གོས་ཐ་དད་པར་བསྒྲུབ་པའི་ཕྱིར་རོ། །གོས་གང་ལ་ཆོས་གོས་ཀྱི་དོན་དུ་རྣམ་པ་དེ་ལྟ་བུར་བྱིན་གྱིས་བརླབ་པར་བྱ་ཞེ་ན། དེའི་ཕྱིར་མཐང་གོས་དང་བླ་གོས་དང་སྣམ་སྦྱར་ལའོ་ཞེས་བྱ་བ་སྨྲས་ཏེ། གསུམ་ཆར་ལ་ཡང་རྣམ་པ་དེ་ལྟ་བུར་དྲུབ་ཅིང་བྱིན་

གྱིས་བརླབ་པར་བྱའོ། །མཐང་གོས་ཞེས་བྱ་བ་ནི། ནང་དུ་བགོ་བར་བྱ་བའོ། །བླ་གོས་ཞེས་བྱ་བ་ནི་ལུས་ཀྱི་སྟོད་དུ་བགོ་བར་བྱ་བའོ། །སྣམ་སྦྱར་ཞེས་བྱ་བ་ནི་སྣམ་ཕྲན་ཏུ་དྲས་ཏེ་སྦྱར་བ་ལས་གོས་ཀྱི་རིགས་གང་འབྱུང་བའོ། །དགེ་སློང་མས་ནི་ཤིང་ང་དཔུང་ཆད་དང་རྔུལ་གཟན་རྣམ་པ་

Vol. 163 · folio 172b

གང་ཡང་རུང་བའོ་ཞེས་བྱ་བ་ནི། དགེ་སློང་མས་སྔར་བསྟན་པའི་ཆོས་གོས་གསུམ་དང་འདི་གཉིས་དང་ལྔ་བྱིན་གྱིས་བརླབ་པར་བྱའོ། །རྣམ་པ་གང་ཡང་རུང་བ་ཞེས་བྱ་བ་ནི། དྲས་ཤིང་དྲུབས་པ་མ་ཡིན་ཡང་རུང་བའོ། །འདིར་གཞུང་ནི་དགེ་སློང་མ་ཆོས་གོས་ཟིན་པས་སྲ་བརྐྱང་ཕྱུང་ནས་གལ་ཏེ་

ཆོས་གོས་ལྔ་པོ་གང་ཡང་རུང་བ་དག་ལས་ཆོས་གོས་གཅིག་དང་ནུབ་ཅིག་མཚམས་ཀྱི་ཕྱི་རོལ་དུ་བྲལ་ན་སྤང་པའི་ལྟུང་བྱེད་དོ་ཞེས་གསུངས་པ་ཡིན་ནོ། །ཆོས་གོས་ལྔ་པོ་དག་ཅེས་བྱ་བ་ནི་སྣམ་སྦྱར་དང་བླ་གོས་དང་མཐང་གོས་དང་ཤིང་ང་དཔུང་བཅད་དང་རྔུལ་གཟན་ཞེས་བྱ་བ་དག་གོ། །བརྙན་

པོ་ཡོད་ཅིང་བདོག་ནའོ་ཞེས་བྱ་བ་ནི། གལ་ཏེ་ཆོས་གོས་དྲས་ཤིང་དྲུབས་པ་བརྙན་པོ་ཡང་ཡོད་ཅིང་བདོག་ན། དེའི་ཚེ་དེ་ཡང་བྱིན་གྱིས་བརླབ་པར་བྱའོ། །གལ་ཏེ་མི་བདོག་ན་ནི་དྲས་ཤིང་དྲུབས་པ་མ་ཡིན་པ་ལ་ཡང་བྱིན་གྱིས་བརླབ་པར་བྱ་བ་སྟེ། ཆོས་གོས་བྱིན་གྱིས་མ་བརླབས་པས་འདུས་

པར་མི་བྱའོ། །དེ་དག་གཞག་སྟེ་སྐྱ་རེངས་འཆར་བ་འདའ་བར་མི་བྱའོ་ཞེས་བྱ་བ་ནི། ཆོས་གོས་བྱས་པ་གསུམ་མམ་ལྔ་པོ་དེ་དག་གཞག་སྟེ་སྐྱ་རེངས་འཆར་པ་འདའ་བར་མི་བྱའོ། །བརྙན་པོ་ཡང་ཡོད་ཅིང་བདོག་ནའོ། །འདི་སྐད་བསྟན་ཏེ། ཆོས་གོས་ཡོད་ན་སྐྱ་རེངས་འཆར་བའི་དུས་

སུ་ཆོས་གོས་བྱིན་གྱིས་མ་བརླབས་པས་འདའ་བར་མི་བྱའོ། །གཞན་མེད་ན་ཁ་མ་བསྒྱུར་བ་ལ་ཡང་བྱིན་གྱིས་བརླབས་པ་འཆགས་སོ་ཞེས་བྱ་བ་ནི། ཁ་བསྒྱུར་བ་འམ་བརྙན་པོ་གཞན་མེད་ན་ཁ་མ་བསྒྱུར་བའི་གོས་ལ་ཡང་བྱིན་གྱིས་བརླབས་པ་འཆགས་པའོ། །མ་དྲས་པ་ལ་ཡང་ངོ་

ཞེས་བྱ་བ་ནི། དྲས་པ་གཞན་མེད་ན་མ་དྲས་པ་ལ་ཡང་བྱིན་གྱིས་བརླབས་པ་འཆགས་པའོ། །དེ་ལ་གལ་ཏེ་འབྱོར་ན་ལྷན་ཐབས་གླན་ནོ་ཞེས་བྱ་བ་ནི། མ་དྲས་པ་དེ་ལ་གལ་ཏེ་ལྷན་ཐབས་ཞེས་བྱ་བ་གླེགས་བུའི་འཕྲོ་བདོག་ན་གླན་པར་བྱ་བའོ། །ཁྱིམ་དུ་རུང་བའི་རྣམ་པ་ལ་ཡང་ངོ་

ཞེས་བྱ་བ་ལ། ཁྱིམ་དུ་རུང་བ་ཞེས་བྱ་བ་ནི་ཁྱིམ་པའི་ཁྱིམ་དུ་སྤྱད་དུ་རུང་བའོ། །རྣམ་པ་ཞེས་བྱ་བ་ནི། དེ་ལྟ་བུའི་གོས་ཀྱི་རྣམ་པ་སྟེ་ཁ་ཚར་དང་ཕུན་ཚར་གྱི་མཐའ་གཅད་དུ་རུང་བ་དགེ་སློང་གི་ཆོས་གོས་ཀྱི་རྣམ་པ་ཉིད་དུ་མ་རེད་པ་ཞེས་བྱ་བའི་ཐ་ཚིག་སྟེ། གཞན་མེད་ན་དེ་ལ་

Vol. 163 · folio 173a

ཡང་བྱིན་གྱིས་བརླབས་པ་འཆགས་པའོ། །ཕྱིང་པ་དང་ལ་བ་དང་བེའུ་ཕྲུག་དང་ཀླམ་དང་སེངས་པ་ནི་མི་དྲ་བར་ལྷན་ཐབས་གླན་ཞིང་དྲུབ་པོ་ཞེས་བྱ་བ་ནི། ཆོས་གོས་ཉིད་དུ་བྱིན་གྱིས་བརླབ་པར་བྱའོ། །འདི་ལྟར་གཞན་ལས་སྤུ་ཅན་ནི་ཆོས་གོས་གསུམ་པོ་ཉིད་དུ་བྱིན་

གྱིས་བརླབ་པར་མི་བྱའོ་ཞེས་གསུངས་མོད་ཀྱི། འོན་ཀྱང་ལ་བ་དང་བེའུ་ཕྲུག་དག་ལ་སྤུ་བྱི་བ་ཡང་སྲིད་པས་འདིར་དེ་གཉིས་བཟུང་ངོ་། །འདིར་གཞུང་ནི་དགེ་སློང་དག་ལྔ་པོ་འདི་དག་ནི་མི་འདྲ་བ་དག་ཡིན་ཏེ། ཕྱིང་བ་ཐམས་ཅད་དང་། ལ་བ་ཐམས་ཅད་དང་། བེའུ་ཕྲུག་ཐམས་ཅད་

དང་། ཀླམ་པ་ཐམས་ཅད་དང་། གོས་སེངས་པ་ཐམས་ཅད་དེ། ལྷན་ཐབས་གླན་ཏེ་བཅང་བར་བྱའོ་ཞེས་གསུངས་པ་ཡིན་ནོ། །གནས་མལ་མི་གཙང་བས་གོས་པར་གྱུར་ན་དེའི་མོད་ལ་སྦྱང་བར་བྱའོ་ཞེས་བྱ་བ་ནི། དགེ་འདུན་གྱིའམ་གང་ཟག་གི་མལ་ཆ་དང་སྟན་ལ་མི་གཙང་བས་གོས་པར་

གྱུར་ན་དེའི་མོད་ཁོ་ན་ལ་མི་བརྐྱང་བར་བཀྲུ་བར་བྱ་བའོ། །དགེ་འདུན་གྱི་རྩྭའི་ཁྲི་དང་ཁྲིའུ་མ་གཏོགས་པ་སྟན་ཡན་ཆད་ལ་དེ་མ་ཡིན་པའི་གདིང་བ་མེད་པ་དང་གདིང་གཡོགས་ལ་ཡང་བར་ཆད་མ་བཅུག་པར་ཉེ་བར་སྤྱད་པར་མི་བྱའོ་ཞེས་བྱ་བ་ནི། དགེ་འདུན་གྱི་རྩྭའི་ཁྲི་དང་ཁྲིའུ་མ་གཏོགས་

པ་ཐ་ན་སྟན་ཡན་ཆད་དགེ་འདུན་གྱི་གནས་མལ་དགེ་འདུན་གྱི་གདིང་བ་མ་ཡིན་པ་རང་གི་གདིང་བ་མེད་པར་ལོངས་སྤྱད་པར་མི་བྱ་བ་དང་། དགེ་འདུན་གྱི་གདིང་གཡོགས་ལ་ཡང་གང་ཟག་གི་གོས་ཀྱི་བར་ཆད་མ་བཅུག་པར་སྤྱད་པར་མི་བྱ་བའོ། །རྩྭའི་ཁྲི་དང་ཁྲིའུ་ཞེས་བྱ་བ་ནི་རྩྭ་མུན་ཛ་དང་གྲེས་

མ་ལ་སོགས་པའི་ཐག་པས་བརྒྱུས་པའི་ཁྲི་དང་ཁྲིའུ་སྟེ། དེ་ལ་ནི་གདིང་བ་གཞན་མེད་ཀྱང་རུང་ངོ་། །སྟན་ཡན་ཆད་ཅེས་བྱ་བ་ནི། མལ་སྟན་ལྟ་ཞོག་གི་ཐ་མལ་པར་འདུག་པའི་སྟན་ཡན་ཆད་ལ་ཡང་གདིང་བ་མེད་པར་འདུག་པར་མི་བྱ་སྟེ། དེས་ན་འདིར་ཡན་ལག་གིས་རེག་པ་ཙམ་ལ་ཡང་

གདིང་བ་གཞུག་དགོས་པར་རིག་པར་བྱའོ། །དེ་མ་ཡིན་པ་ཞེས་བྱ་བ་ནི། དགེ་འདུན་གྱི་གདིང་བ་མ་ཡིན་པའོ། །གདིང་བ་མེད་པར་ཉེ་བར་སྤྱད་པར་མི་བྱའོ་ཞེས་བྱ་བ་ནི། གང་ཟག་གི་གདིང་བ་མེད་པར་རོ། །གདིང་གཡོགས་ཞེས་བྱ་བ་ནི། འདིར་སྟེང་ནས་བགོ་བའི་གོས་དང་ཐང་ལ་གཞར་

Vol. 163 · folio 173b

བའི་གདིང་བ་ལ་བྱ་སྟེ། དགེ་འདུན་གྱི་གདིང་གཡོགས་དེ་ལ་ཡང་གང་ཟག་གི་གོས་ཀྱི་བར་ཆད་མ་བཅུག་པར་ཉེ་བར་སྤྱད་པར་མི་བྱའོ། །ཐམས་ཅད་ཀྱི་ཁྲ་བོ་ཕལ་ཆེར་མ་ཉམས་པ་ལ་ཡང་ངོ་ཞེས་བྱ་བ་ལ། ཐམས་ཅད་ཀྱི་ཞེས་བྱ་བ་ནི། དགེ་འདུན་གྱི་འབའ་ཞིག་ཏུ་མ་ཟད་ཀྱི་གང་ཟག་གི་ལ་ཡང་ངོ་། །

ཁྲ་བོ་ཞེས་བྱ་བ་ནི། པར་ཐང་དང་དྲེའུ་རྔོག་དང་ཟ་འོག་ལ་སོགས་པ་ཚོན་རིས་ཅན་ཐམས་ཅད་དོ། །ཕལ་ཆེར་མ་ཉམས་པ་ཞེས་བྱ་བ་ནི། ཧ་ཅང་རྙིང་པ་མ་ཡིན་པའོ། །དེ་ཡང་སྟན་ཡན་ཆད་ལ་དེ་མ་ཡིན་པའི་གདིང་བ་མེད་པ་དང་། གདིང་གཡོགས་ལ་ཡང་བར་ཆད་མ་བཅུག་པར་ཉེ་བར་སྤྱད་

པར་མི་བྱའོ། །སྐབས་འདིར་དེ་མ་ཡིན་པ་ཞེས་བྱ་བ་ནི། ཁྲ་བོ་མ་ཡིན་པ་དང་། དགེ་འདུན་གྱི་མ་ཡིན་པ་གཉི་ག་གཟུང་ངོ་། །ངན་ངོན་ཙམ་དང་དྲི་མ་ཅན་གྱིས་མི་བྱའོ་ཞེས་བྱ་བ་ནི། གདིང་བ་ངན་ངོན་ཅན་དང་གདིང་བ་དྲི་མ་ཅན་གྱིས་དགེ་འདུན་གྱིའམ་གང་ཟག་གི་གནས་མལ་ལ་སྤྱད་པར་མི་བྱ་བའོ། །

གདིང་བ་བཅང་བར་བྱའོ་ཞེས་བྱ་བ་ནི། གང་ཟག་གིས་བཅང་བར་བྱ་བའོ། །དེ་ནི་སྟུག་ན་གཅིག་ཀྱང་རུང་ངོ་ཞེས་བྱ་བ་ནི། གདིང་བ་དེའོ། །སེངས་པ་ནི་ཉི་རིམ་མོ་ཞེས་བྱ་བ་ནི། སེངས་པ་ཞེས་བྱ་བ་ནི། སང་སེང་དུ་གྱུར་པ་ཡིན་ན་ཉི་རིམ་དུ་བྱ་དགོས་སོ། །ཁྲ་ཁྲ་བོ་མི་རུང་ངོ་ཞེས་བྱ་བ་ནི། སྟུག་པོ་ཡང་

རུང་སེངས་པ་ཡང་རུང་སྟེ། གདིང་བ་ཁྲ་བོ་བཀྲ་བ་ཁྲ་ཁྲ་བོར་འདུག་པར་བཅང་བར་མི་བྱའོ། །དེ་ལ་གླེགས་བུའི་འཕྲོ་བྱའོ་ཞེས་བྱ་བ་ནི། གདིང་བ་དེ་ལ་ཆོས་གོས་ཀྱི་གླེགས་བུའི་ཚལ་པ་ལྟ་བུ་བྱའོ། །ཕྱོགས་གང་དུ་དུ་ཞིག་བྱ་ཞེ་ན། དེའི་ཕྱིར་འོག་རོལ་གྱིས་སུམ་ཆའི་དང་པོར་རོ་ཞེས་བྱ་བ་

སྨྲས་ཏེ། འོག་རོལ་ཞེས་བྱ་བ་ནི། རྐང་བའི་མཐའ་ལོགས་སུའོ། །སུམ་ཆ་ཞེས་བྱ་བ་ནི་རྐང་བའི་མཐའ་ལོགས་སུ་སུམ་ཆ་བོར་ལ་སྟོད་དུ་སུམ་གཉིས་བོར་བའི་མཚམས་སུའོ། །དང་པོར་རོ་ཞེས་བྱ་བ་ནི། སུམ་ཆའི་མཚམས་དེ་ཉིད་འོག་རོལ་གྱི་ཆའི་དང་པོ་ཡིན་པས་དེ་ཉིད་དུ་བཅང་དེ་ཆོས་གོས་ཀྱི་

ཚལ་བུ་འདྲ་བར་གླེགས་བུའི་འཕྲོ་གཅིག་བྱ་བར་ཟད་ཀྱི་མཐར་ཡང་མི་བྱ་དབུས་སུ་ཡང་མི་བྱའོ་ཞེས་བྱ་བའི་ཐ་ཚིག་གོ། །གླེགས་བུ་གཅིག་པ་བྱིན་གྱིས་བརླབ་པར་མི་བྱའོ་ཞེས་བྱ་བ་ནི། གདིང་བ་སྟེ་དེའི་ཕྱིར་སྔར་འོག་རོལ་གྱི་སུམ་ཆའི་དང་པོར་རོ་ཞེས་སྨོས་པས་གླེགས་བུ་ཕྱེད་དང་གཉིས་པར་

Vol. 163 · folio 174a

བྱ་བར་བསྟན་པ་ཡིན་ནོ། །གཡན་པ་དགབ་པ་དེ་དང་ལྡན་པས་བཅང་བར་བྱའོ་ཞེས་བྱ་བ་ནི། དགེ་སློང་གཡན་པ་དང་ལྡན་པས་གཡན་པ་དགབ་པ་དེ་བཅང་བར་བྱ་བའོ། །དེ་ཞག་ལྔ་འམ་དྲུག་ཅིང་སྦྱང་བར་བྱ་བའོ་ཞེས་བྱ་བ་ནི། གཡན་པ་དགབ་པ་དེ་ཞག་ལྔའམ་དྲུག་ཅིང་

བཀྲུ་བར་བྱ་བའོ། །སྲིན་བལ་གྱི་དང་བལ་གྱི་དང་ཤ་ནའི་དང་ཟར་མའི་རུང་ངོ་ཞེས་བྱ་བ་ནི། ཆོས་གོས་ཉིད་དང་གོས་ལྷག་ཉིད་དུ་ཡང་དེ་དག་ལས་བྱས་པའི་གོས་རུང་བའོ། །རྣམས་སུ་མ་བྱས་པ་དང་གསོ་མ་ནི་མི་རུང་བའོ་ཞེས་བྱ་བ་ནི། དཔག་བསམ་ཤིང་ལས་བྱུང་བའི་གོས་ལ་སོགས་པ་དང་། གསོ་མ་

ལས་བྱུང་བའི་གོས་ནི་མི་རུང་བ་སྟེ། སྤང་བའི་ཞུ་བ་ལས་ཉེས་བྱས་བྱེད་པ་ཉིད་ཀྱིས་མི་རུང་བའི་ཁོངས་སུ་གསུངས་པའི་ཕྱིར་རོ། །སྐྲ་ལས་བྱས་པ་དང་གཅེར་བུ་པ་དང་བྱ་འུག་པ་པ་ཡང་དག་པར་ལེན་པ་ཡང་ངོ་ཞེས་བྱ་བ་ཡང་། མི་རུང་ངོ་ཞེས་བྱ་བར་སྦྱར་རོ། །སྐྲའི་ལ་བ་བ་ཡང་དག་པར་

ལེན་པ་དང་གཅེར་བུ་པ་ཡང་དག་པར་ལེན་པ་དང་། བྱ་འུག་པ་པ་ཡང་དག་པར་ལེན་པ་ནི་མི་རུང་ངོ་། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། མུ་སྟེགས་ཅན་གྱི་རྒྱལ་མཚན་གསུམ་པོ། གཅེར་བུ་པ་ཉིད་དང་། བྱ་འུག་པ་པ་ཉིད་དང་། སྐྲའི་ལ་བ་པ་ཉིད་འཆང་བར་བྱེད་ན་ཉེས་

པ་སྦོམ་པོར་འགྱུར་རོ། །མུ་སྟེགས་ཅན་གྱི་རྒྱལ་མཚན་གསུམ་པོ་དག་མ་གཏོགས་པ་དེ་ལས་གཞན་པའི་མུ་སྟེགས་ཅན་གྱི་རྒྱལ་མཚན་འཆང་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །གཞན་དེ་དག་ཀྱང་ཡང་དག་པར་བླངས་པ་སྔོན་ཏུ་གཏོང་བས་འཆང་ན་ནི་ཉེས་པ་སྦོམ་པོར་

འགྱུར་རོ་ཞེས་གསུངས་པ་ཡིན་ནོ། །དེ་ལ་སྦོམ་པོའོ་ཞེས་བྱ་བ་ནི། སྐྲ་ལས་བྱས་པ་དང་། གཅེར་བུ་པ་དང་། བྱ་འུག་པ་པ་ཡང་དག་པར་ལེན་པ་དེ་ལ་ནི་དགེ་འདུན་གྱི་དབྱེན་གྱི་ཕྱོགས་སུ་གཏོགས་པའི་ཉེས་པ་སྦོམ་པོར་འགྱུར་བར་རིག་པར་བྱའོ། །གཞན་བསྟན་པ་ནི་དེའོ་ཞེས་བྱ་བ་ནི་

གསུམ་པོ་དེ་དག་ལས་གཞན་པའི་མུ་སྟེགས་ཅན་གྱི་རྒྱལ་མཚན་གཞན་བསྟན་པ་ནི་མི་རུང་བ་དེ་སྟེ་ཉེས་བྱས་བྱེད་པ་ཉིད་ཡིན་ནོ། །དེ་དག་ཀྱང་ཡང་དག་པར་བླང་བ་སྔོན་དུ་བཏང་བས་འཆང་ན་ནི་སྦོམ་པོར་འགྱུར་བས་དེའི་ཕྱིར་ཡང་དག་པར་བླང་བ་སྔོན་དུ་གཏོང་པ་ལས་གཞན་པ་ཡང་དག་པར་བླང་

Vol. 163 · folio 174b

བ་སྔོན་དུ་གཏོང་བ་མ་ཡིན་པས་འཆང་ན་དེ་ཡང་རུང་བ་མ་ཡིན་ཏེ་དེ་ནི་ཉེས་བྱས་བྱེད་པ་ཉིད་ཡིན་ནོ། །འདི་སྐད་བསྟན་ཏེ། མུ་སྟེགས་ཅན་གྱི་རྒྱལ་མཚན་གང་ཅི་ཡང་རུང་བ་འཆང་ན། ཡང་དག་པར་བླང་བ་སྔོན་དུ་བཏང་བས་ཀྱང་རུང་། ཡང་དག་པར་བླང་བ་སྔོན་དུ་མ་བཏང་བས་ཀྱང་རུང་སྟེ། དེ་དག་

ཐམས་ཅད་ལ་དག་པ་དང་གྲོལ་བར་འཛིན་པས་འཆང་བ་ནི་ཉེས་པ་སྦོམ་པོར་འགྱུར་རོ། །དག་པ་དང་གྲོལ་བར་འཛིན་པ་མེད་ན་ནི་སྐྲའི་ལ་བ་པ་དང་གཅེར་བུ་པ་དང་། བྱ་འུག་པ་པ་གསུམ་ནི་སྦོམ་པོ་ཉིད་དུ་ལོགས་ཤིག་ཏུ་གསུངས་པས། དེ་གསུམ་ལས་གཞན་པའི་མུ་སྟེགས་ཅན་གྱི་རྒྱལ་

མཚན་ལ་དག་པ་དང་གྲོལ་བར་འཛིན་པ་མེད་ཅིང་། ཡང་དག་པར་བླང་བ་སྔོན་དུ་མ་བཏང་བས་འཛིན་པ་ཐམས་ཅད་ལ་ནི་ཉེས་བྱས་སོ། །སྐྲ་འབལ་བ་དང་ལོ་མ་གྱོན་པ་དང་གཡང་གཞིའི་སྨད་གཡོགས་སྟོད་གཡོགས་དང་བཅས་པས་འཚོ་བ་དང་གསོ་རས་དང་ཡན་ལག་གི་སྦུབས་དང་

གོས་ཐམས་ཅད་སྔོ་བ་དང་། གདེངས་ཀ་ལྟ་བུ་དང་ཁ་ཚར་རིང་པོ་དང་རལ་ག་དང་། གཙུག་ཏོར་དང་། མགོ་དཀྲིས་པ་དང་། ར་ཕྱར་དང་རྔ་བལ་གྱི་སྣམ་བུ་དང་། མུ་སྟེགས་ཅན་གྱི་རྒྱལ་མཚན་ཡང་ངོ་ཞེས་བྱ་བ་ཡང་མི་རུང་ངོ་ཞེས་བྱ་བར་སྦྱར་རོ། །སྐྲ་འབལ་བ་ཞེས་བྱ་བ་ནི། མུ་སྟེགས་

ཅན་གྱི་བརྟུལ་ཞུགས་སྐྲ་འཐོག་པར་བྱེད་པའོ། །ལོ་མ་གྱོན་པ་ཞེས་བྱ་བ་ནི། ལོ་མ་དང་ཤུན་པ་ལ་སོགས་པ་གྱོན་པའོ། །གཡང་གཞིའི་སྨད་གཡོགས་སྟོད་གཡོགས་དང་བཅས་པས་འཚོ་བ་ཞེས་བྱ་བ་ནི། རི་དགས་ཀྱི་པགས་པའི་འོ། །གསོ་རས་ཞེས་བྱ་བ་ནི། གསོ་མ་ལས་བྱས་

པའི་གོས་སེང་སེང་པོའོ། །ཡན་ལག་གི་གོས་སྦུབས་ཞེས་བྱ་བ་ནི། དོར་མ་ལ་སོགས་པའི་གོས་སོ། །གོས་ཐམས་ཅད་སྔོ་བ་ཞེས་བྱ་བ་ནི་གོས་རིལ་གྱིས་སྔོ་བ་བཀག་པ་ཡིན་གྱི། གོས་ཐམས་ཅད་སེར་བ་དང་དམར་བ་ནི་མ་བཀག་གོ། །གདེངས་ཀ་ལྟ་བུ་ཞེས་བྱ་བ་ནི། གོས་ཀྱི་ཁ་ཚར་སྦྲུལ་

མགོའི་གདེངས་ཀ་ལྟ་བུར་རིང་པོར་བྱེད་པའོ། །ཁ་ཚར་རིང་པོ་ཞེས་བྱ་བ་ནི། གོས་ཁ་ཚར་མ་བཅད་པའོ། །རལ་ག་ཞེས་བྱ་བ་ནི། ཤིང་ང་དཔུང་བཅད་ལས་གཞན་པའི་རྣམ་པ་ཡིན་པར་རིག་པར་བྱ་སྟེ། དཔེར་ན་ལྷམ་ཡུ་རིངས་ཀྱི་རྣམ་པ་ལས་ལྷམ་སྒྲོག་གུ་ཅན་གྱི་རྣམ་པ་ཅུང་ཟད་གཞན་

Vol. 163 · folio 175a

པ་དང་འདྲའོ། །གཙུག་ཏོར་ཞེས་བྱ་བ་ནི། གཙུག་ཏོར་མཐོན་པོའོ། །མགོ་དཀྲིས་པ་ཞེས་བྱ་བ་ནི། ཐོད་ལ་སོགས་པ་སྟེ་གཙུག་ཏོར་མ་ཡིན་ནོ། །ར་ཕྱར་ཞེས་བྱ་བ་ནི། ར་བལ་ལས་བྱས་པའི་ཕྱར་བའོ། །རྔ་བལ་གྱི་སྣམ་བུ་ཞེས་བྱ་བ་ནི། རྔ་མོའི་བལ་ལས་བྱས་པའི་སྣམ་

བུའོ། །མུ་སྟེགས་ཅན་གྱི་རྒྱལ་མཚན་ཞེས་བྱ་བ་ནི། དེ་དག་ལས་གཞན་པ་ཡིན་པར་རིག་པར་བྱའོ། །པུ་ལ་སའི་འདབ་མ་གང་ཙམ་དང་མར་མེའི་སྙིང་པོ་ཙམ་དེས་ཀྱང་སྙོམས་པར་བྱ་བའི་ཕྱིར་བགོ་བཤའ་བྱའོ་ཞེས་བྱ་བ་ནི། ཟས་ནི་ཐ་ན་ཤིང་པུ་ལ་སའི་ལོ་མ་གང་ཙམ་དེས་ཀྱང་དབང་བ་

ཐམས་ཅད་ལ་སྙོམས་པར་བྱ་བའི་ཕྱིར་བགོ་བཤའ་བྱའོ། །གོས་ནི་ཐ་ན་མར་མེའི་སྙིང་པོ་ཙམ་དེས་ཀྱང་དབང་བ་ཐམས་ཅད་ལ་སྙོམས་པར་བྱ་བའི་ཕྱིར་བགོ་བཤའ་བྱའོ། །འདིར་གཞུང་ནི་ཕྲན་ཚེགས་དག་ལས། དགེ་སློང་དག་དེ་ལྟ་བས་ན་ཟས་ཀྱི་རྙེད་པ་བྱུང་ན་པུ་ལ་སའི་ལོ་མས་ཀྱང་

སྙོམས་པར་བྱས་ཏེ་བགོ་བཤའ་བྱའོ། །གོས་ཀྱི་རྙེད་པ་བྱུང་ན་མར་མེའི་སྙིང་པོ་ཙམ་གྱི་སྦྱོར་བས་ཀྱང་སྙོམས་པར་བྱས་ཏེ་བགོ་བཤའ་བྱའོ་ཞེས་གསུངས་པ་ཡིན་ནོ། །ལ་བ་དང་དེ་ལྟ་བུ་དག་ནི་བཙོངས་ཏེའོ་ཞེས་བྱ་བ་ནི། བགོ་བཤའ་བྱའོ་ཞེས་བྱ་བར་སྦྱར་རོ། །ལ་བ་དང་ལ་བ་ལྟ་བུའི་

གོས་གཞན་གང་དག་གཅད་དུ་མི་རུང་བ་དེ་དག་ནི་བཙོངས་ཏེ་བགོ་བཤའ་བྱའོ། །མི་གཤེག་པ་ཉིད་དོ་ཞེས་བྱ་བ་ནི། ལ་བ་དང་དེ་ལྟ་བུ་དག་ནི་དེ་ལས་གཞན་པའི་གོས་གཞན་དུ་མི་གཤེག་པ་ཉིད་ཡིན་ནོ། །རྙེད་པ་བགོ་བ་ལ་ལྔ་བྱའོ་ཞེས་བྱ་བ་ནི། རྙེད་པ་བགོ་བ་ལ་བྱ་བ་ལྔ་བྱ་བའོ། །

རྙེད་པ་བགོ་བ་ལ་བྱ་བ་ལྔ་བྱ་བ་དེ་དག་གང་ཞེ་ན་དེའི་ཕྱིར། དེང་རྙེད་པ་བགོད་པར་འགྱུར་གྱིས་དེར་ཁྱེད་ཅག་གིས་ཚོགས་པར་བྱའོ་ཞེས་དགེ་འདུན་ལ་བརྗོད་པར་བྱ་བ་དང་། གཎྜཱི་བརྡུང་བ་དང་། ཚུལ་ཤིང་བྲིམ་པ་དང་། བགྲང་བ་དང་། སོ་སོའི་སྐལ་བ་བྲིམ་པའོ་ཞེས་བྱ་བ་སྨྲས་ཏེ། རྙེད་པ་བགོ་

བའི་དུས་སུ་བྱ་བ་ལྔ་པོ་དེ་དག་གོ་རིམས་བཞིན་དུ་བྱའོ། །ཐ་མ་ཡན་ཆད་བྱེད་པ་ཉིད་མ་འོངས་པ་དབང་བ་ཉིད་ཡིན་ནོ་ཞེས་བྱ་བ་ནི། རྙེད་པ་བགོ་བའི་དུས་སུ་བྱ་བ་ལྔ་པོ་དེ་དག་གི་གོ་རིམས་ཀྱི་ཐ་མ་ནི་སོ་སོའི་སྐལ་བ་བྲིམ་པ་སྟེ། གོང་མ་བཞི་ལྟ་ཅི་སྨོས་ཀྱི། ཐ་མ་དེ་ཡན་ཆད་བྱེད་པ་ན་དགེ་

Vol. 163 · folio 175b

སློང་གཞན་གློ་བུར་དུ་འོངས་པ་ཡང་རྙེད་པའི་སྐལ་བ་དབང་བ་ཉིད་ཡིན་པའོ། །འདི་ནི་ངེས་པའི་རྙེད་པ་མ་ཡིན་གྱི། དགེ་འདུན་ཙམ་ལ་སྤྱིར་སྤགས་ཏེ་ཕུལ་བའི་རྙེད་པ་ཡིན་པར་ཤེས་པར་བྱ་སྟེ། དཔེར་ན་དུས་སྟོན་ཆེན་པོ་དག་གི་ཚེ་ལྟ་བུའོ། །དབྱར་གནས་པའི་རྒྱུ་ལས་བྱུང་བ་ལ་སོགས་པའི་རྙེད་

པ་ངེས་པ་གཞན་དག་ལ་ནི་གློ་བུར་དུ་འོངས་ཀྱང་མི་དབང་བ་ཉིད་ཡིན་ནོ། །བྱ་བ་ལྔ་པོ་འཇུག་ཏུ་མ་བྱིན་པ་ཉིད་ལ་ནི་གློ་བུར་དུ་འོངས་པ་ཉིད་དབང་བར་བསྟན་ན། འཇུག་ཏུ་ཕྱིན་པ་ལ་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། འཇུག་ཏུ་ཕྱིན་པ་ཉིད་ན་མི་དབང་ངོ་ཞེས་བྱ་བ་སྨྲས་ཏེ། བྱ་བ་ལྔ་པོ་ཐམས་

ཅད་མཇུག་ཏུ་ཕྱིན་པ་ཉིད་ནི་འོངས་པ་དེ་ནི་དེར་རྙེད་པ་མི་དབང་ངོ་། །དེ་ནི་རྙེད་པ་ཆུང་ངུ་ལ་ཡང་ངོ་ཞེས་བྱ་བ་ནི། སྔར་བསྟན་པ་ལ་སོགས་པ་དེ་ནི་རྙེད་པ་ཆུང་ངུ་ལ་ཡང་བྱའི། རྙེད་པ་ཆེན་པོ་འབའ་ཞིག་ལ་བྱ་བར་མ་ཟད་དོ། །རྙེད་པའི་བྱ་བ་དེར་ཞུགས་ནས་སོང་བ་ཉིད་ཡིན་ཡང་མི་དབང་བ་མ་ཡིན་

ནོ་ཞེས་བྱ་བ་ནི། དབྱར་གནས་པ་ལ་སོགས་པའི་རྒྱུ་གང་གིས་རྙེད་པ་འབྲིམ་པར་བྱེད་པའི་བྱ་བ་དེར་གལ་ཏེ་དགེ་སློང་དེ་ཞུགས་པར་གྱུར་ན་གནས་སྐབས་དེ་དང་བྱ་བ་དེ་བྱས་པ་ཡིན་པས། གཙུག་ལག་ཁང་གི་མཚམས་ལས་འདས་ཏེ་སོང་ཡང་རྙེད་པ་དེ་དབང་བ་ཡིན་ནོ། །དེའི་ཕྱིར་འགྲོ་བས་

མནོད་པ་བཅོལ་བར་བྱ་བའོ་ཞེས་བྱ་བ་མི་གང་གི་ཕྱིར་རྙེད་པ་དེ་དབང་བ་དེའི་ཕྱིར་དགེ་སློང་འགྲོ་བས་རང་གི་སྐལ་བ་ནོད་པ་གཞན་ལ་བཅོལ་བར་བྱ་བའོ། །ཁས་བླངས་པ་དང་ལྡན་པར་མ་མནོས་ན་བསབ་པར་བྱ་བ་ཉིད་ཡིན་ནོ་ཞེས་བྱ་བ་ནི། མནོད་དོ་ཞེས་ཁས་བླངས་པ་དང་ལྡན་པས་གལ་ཏེ་

རྙེད་པ་མ་མནོས་ན་དེའི་ཚེ་སྒོ་ནས་བསབ་པར་བྱ་བ་ཉིད་ཡིན་པའོ། །རྙེད་པ་ཆུང་ངུ་ལ་པ་ན་ལྔ་ལ་སོགས་པའོ་ཞེས་བྱ་བ་ནི། རྙེད་པ་ཆུང་ངུ་ལ་ཡང་གལ་ཏེ་མནོད་པར་ཁས་བླངས་པ་དང་ལྡན་པས་མ་མནོས་ན། བགོ་སྐལ་མ་ཥ་ཀ་ལྔ་འམ་དེ་བས་ལྷག་པ་ཡིན་ན་དེ་ལ་བསབ་པར་བྱ་བ་ཉིད་ཡིན་

པའོ། །མ་བཅོལ་ན་མནོད་པར་མི་བྱའོ་ཞེས་བྱ་བ་ནི། བདག་པོས་མ་བཅོལ་ན་དེའི་སྐལ་བ་མནོད་པར་མི་བྱའོ། །སློབ་དཔོན་ནམ་མཁན་པོའི་ནི་མནོད་པར་བྱའོ་ཞེས་བྱ་བ་ནི། དེ་གཉིས་ཀྱི་ན་མ་བཅོལ་ན་ཡང་ངོ་། །ཡིད་གཅུགས་པའི་གནས་ཀྱི་དོན་དུ་ཡང་ངོ་ཞེས་བྱ་བ་ནི། གང་ཟག་གང་ཡིད་

Vol. 163 · folio 176a

གཅུགས་པའི་གནས་སུ་གྱུར་པ་ཡིན་ན་དེའི་དོན་དུ་ཡང་མ་བཅོལ་ཀྱང་མནོད་པར་བྱའོ། །རང་གི་ཕྱོགས་དང་མཐུན་པ་མ་ཡིན་པའི་དོན་དུ་མི་བྱའོ་ཞེས་བྱ་བ་ནི། བྱེ་བའི་ཕྱོགས་སུ་སོང་བའི་དོན་དུ་ཡང་མནོད་པར་མི་བྱ་བའོ། །དེ་ནི་གནས་མལ་ལ་ཡང་ངོ་ཞེས་བྱ་བ་ནི། མ་བཅོལ་

ན་མནོད་པར་མི་བྱའོ་ཞེས་བྱ་བ་ལ་སོགས་པ་དེ་ནི་གནས་མལ་ལ་ཡང་རིག་པར་བྱ་བ་སྟེ། གང་གིས་བཅོལ་ཏམ་གང་ལ་ཡིད་གཅུགས་པ་ཡོད་པ་ནི་མངོན་སུམ་དུ་མ་གྱུར་ཀྱང་དེའི་དོན་དུ་མནོད་པར་བྱའོ། །ཟས་ལ་ཡང་ངོ་ཞེས་བྱ་བ་ནི། མ་བཅོལ་ན་མནོད་པར་མི་བྱ་བའོ་ཞེས་བྱ་བ་ལ་སོགས་པ་རིག་

པར་བྱ་བ་སྟེ། དེ་དག་ནི་གཞན་གྱི་ཚིག་གི་སྐབས་མེད་པར་བྱ་བའི་ཕྱིར་རོ། །གཞན་གྱི་དོན་དུ་མནོད་པ་ཕ་རོལ་ལ་གོ་བར་བྱའོ་ཞེས་བྱ་བ་ནི། གཞན་གྱི་དོན་དུ་རྙེད་པ་དང་གནས་མལ་ལ་སོགས་པ་མནོད་པ་གང་ཟག་ཕ་རོལ་པོ་གཞན་དག་ལ་གོ་བར་བྱ་བ་སྟེ། འདི་ཡང་གཞན་གྱི་ཚིག་གི་སྐབས་མེད་

པར་བྱ་བའི་ཕྱིར་རོ། །འདིར་གཞུང་ནི་ནོད་པར་བྱེད་པར་ཕ་རོལ་ལ་གོ་བར་བྱའོ་ཞེས་གསུངས་པ་ཡིན་ནོ། །མི་དབང་བས་ནང་དུ་ཞུགས་ཏེ་མི་བྱའོ་ཞེས་བྱ་བ་ནི། རྙེད་པ་མི་དབང་བས་གང་དག་དབང་བ་དེ་དག་གི་ནང་དུ་ཞུགས་ཏེ་སྐལ་བ་མནོད་པར་མི་བྱའོ། །འདིར་གཞུང་ནི། དེ་ལྟ་བས་ན་

དགེ་སློང་གིས་གཞན་གྱི་རྙེད་པར་འཇུག་པར་མི་བྱའོ་ཞེས་གསུངས་པ་ཡིན་ནོ། །འདིར་དཔེ་གཞན་ཡང་ཚེ་དང་ལྡན་པ་ཉེ་དགའ་མགྲོན་དུ་མ་བོས་པས་ཟན་ཟོས་ནས་དེ་ནས་ཡོན་རས་ཡུག་ཆེན་མནོས་པ་ཡིན་ནོ། །དབང་བ་གཅིག་ཉིད་ཀྱིས་ཤིན་ཏུ་མང་པོ་ཐོབ་པ་ལ་མི་དབང་བའི་རྒྱུར་འགྱུར་བ་མེད་དོ་

ཞེས་བྱ་བ་ནི། གང་ཟག་དབང་བ་གཅིག་ཉིད་ཀྱིས་རྙེད་པ་ཤིན་ཏུ་མང་པོ་ཐོབ་པ་ལ་མི་དབང་བའི་རྒྱུར་འགྱུར་བ་མེད་པའོ། །འདི་སྐད་བསྟན་ཏེ། གལ་ཏེ་གཙུག་ལག་ཁང་ན་དགེ་སློང་གཅིག་པུ་འདུག་པར་གྱུར་ལ། དེར་རྙེད་པ་ཤིན་ཏུ་མང་པོ་གྲུབ་པར་གྱུར་ཀྱང་། དབང་བ་ཉུང་བ་མི་དབང་བའི་

རྒྱུར་མི་འགྱུར་ཏེ། རྙེད་པ་དེ་དེ་ཉིད་ཀྱི་ཡིན་པར་རིག་པར་བྱའོ། །འདིར་ཁུངས་ནི་རྒན་ཞུགས་དེ་གཉིས་འདི་སྙམ་དུ་བདག་ཅག་གཉིས་ལ་རས་ཡུག་ཆེན་བརྒྱ་ཇི་ལྟར་འབྱུང་བར་འགྱུར་ཏེ། གཞན་ནས་འཇུག་ཏུ་གཞུག་པར་བྱའོ་སྙམ་དུ་སེམས་སོ་ཞེས་གསུངས་པ་དང་། དེད་དཔོན་གྱིས་དགེ་

Vol. 163 · folio 176b

འདུན་གྱི་ཕྱིར་གཙུག་ལག་ཁང་དུ་རྙེད་པ་མང་པོ་བསྐུར་བ་ན། གཙུག་ལག་ཁང་དེ་ན་དགེ་སློང་གཅིག་པུ་ཞིག་གནས་པ་དེ་འགྱོད་པས་མི་ལེན་པ་ནས། བཅོམ་ལྡན་འདས་ཀྱིས་དེ་ནི་དེ་ན་གང་གནས་པ་དེའི་ཡིན་ནོ་ཞེས་རྗེས་སུ་གནང་བའི་བར་དུ་གསུངས་པ་ཡིན་ནོ། །བྱེ་བ་ན་ཆོས་མ་ཡིན་པའི་ཕྱོགས་

དང་མཐུན་པ་དག་ཏུ་སོང་བ་དགེ་འདུན་གྱི་རྙེད་པ་མི་དབང་ངོ་ཞེས་བྱ་བ་ནི། དགེ་འདུན་བྱེ་བ་ན་གང་ཟག་གང་ཆོས་ཀྱི་ཕྱོགས་དང་མཐུན་པ་སྤངས་ཏེ་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བ་གང་ཡིན་པ་དེ་དགེ་འདུན་གྱི་རྙེད་པ་མི་དབང་པའོ། །དེའི་དུས་ཀྱི་རྙེད་པ་ལ་ནི་ཆེས་རིང་དུ་

གནས་ན་གནས་པ་ཉིད་ཡིན་ནོ་ཞེས་བྱ་བ་ནི། དབྱར་གནས་པ་ལ་སོགས་པའི་དུས་དེར་འབྱུང་བའི་རྙེད་པ་ནི་དེའི་དུས་ཀྱི་རྙེད་པ་ཞེས་བྱ་སྟེ། དེ་ལ་ནི་གང་ཟག་དུས་ཆེས་ཡུན་རིང་དུ་དབྱར་གྱི་ནང་ན་གནས་གནས་ན། དུས་དེ་བས་ཐུང་བ་ཞིག་གནས་པར་མ་གྱུར་དུ་ཟིན་ཀྱང་དེ་རྙེད་པ་དེ་ལ་

གནས་པ་ཉིད་ཡིན་པས་རྙེད་པ་དེའི་སྐལ་བ་དབང་བའོ། །འདི་སྐད་བསྟན་ཏེ། གང་དུས་ཆེས་ཡུན་རིང་དུ་འདུག་འདུག་ནས་གནས་གཞན་དུ་སོང་བ་དེ་ནི་དེའི་དུས་ཀྱི་རྙེད་པ་དབང་བ་ཉིད་ཡིན་ཏེ། དེ་ནི་སོང་བའི་དབང་དུ་བྱས་ཏེ་གསུངས་པ་ཡིན་ནོ། །བབས་པ་དང་ཤི་བར་གྱུར་པ་གཉིས་ཀྱིས་

ཀྱང་ངོ་ཞེས་བྱ་བ་ནི། འདི་གཉིས་ཀྱང་ཆེས་རིང་དུ་གནས་གནས་པ་ཡིན་ན་དེས་དུས་ཀྱི་རྙེད་པ་དབང་བ་ཉིད་ཡིན་ནོ། །འདི་ལྟར་འདི་གཉིས་ལ་ཡང་རྙེད་པ་དགོས་པ་ཡོད་དེ་འགའ་ཞིག་ལ་དབུལ་ལམ། བུ་ལོན་པ་ཡོད་དམ། ནད་གཡོག་ལ་ཡོ་བྱད་དྲུག་མ་འབྱོར་ན་དེ་སྦྱིན་པར་བྱ་བ་ཉིད་དང་།

དགེ་སློང་རྣམས་ཀྱིས་ཤི་བའི་ཡོ་བྱད་དུ་བྱིན་གྱི་བརླབས་པ་ལ་སོགས་པར་ཤི་བའི་རྙེད་པའི་སྐལ་བ་དང་སྤྱད་པའི་སྒོ་དེ་ལྟ་བུ་དག་ཡོད་ལ། བབས་པ་ལ་ནི་དངོས་སུ་དགོས་པ་ཉིད་ཡོད་པའི་ཕྱིར་རོ། །རྙེད་པ་ནི་ཇི་ལྟར་རྣམ་པར་ངེས་པར་བྱེད་པ་ལྟར་རྣམ་པར་གཞག་གོ་ཞེས་བྱ་བ་ནི། རྙེད་པ་ནི་

བདག་པོ་དག་གིས་རྙེད་པ་འདི་ནི་འདི་ལྟར་རྣམ་པར་ངེས་པར་བྱའོ་ཞེས་བསྔོས་ཤིང་ཇི་ལྟར་རྣམ་པ་ངེས་པར་བྱས་པ་དེའི་རྗེས་སུ་འབྲང་བས་རྣམ་པར་གཞག་པར་བྱ་བ་སྟེ། གཙུག་ལག་ཁང་འདི་ན་གནས་པའི་དགེ་སློང་རྣམས་ཀྱིས་གནས་མལ་དང་བསོད་སྙོམས་ལ་སོགས་པ་ལོངས་སྤྱད་པར་

Vol. 163 · folio 177a

བྱའོ་ཞེའམ། དགུན་ནམ་དགུན་སྨད་དམ་དཔྱིད་དམ་སོས་ཀའམ། དབྱར་རམ་སྟོན་གནས་པའི་དགེ་འདུན་རྣམས་ལ་རྙེད་པ་འདི་འབུལ་གྱི་འདི་ན་གནས་པའི་དུས་ཚིགས་འདིའི་ཁོངས་སུ་གཏོགས་པས་སྤྱད་པར་བྱའོ་ཞེའམ། གང་ལ་ལ་གནས་ཁང་འདིའམ་ཁང་ཁྱིམ་

འདི་ན་གནས་པ་དེ་ལ་རྙེད་པ་འདི་ཁུད་པར་འབུལ་གྱི་དེས་འདི་སྤྱད་པར་བྱའོ་ཞེས་དེ་ལྟར་ཡོན་བདག་གིས་གཙུག་ལག་ཁང་ངམ། དུས་ཚིགས་སམ། གནས་ཁང་དག་གི་དབང་དུ་བྱས་ཏེ་དགེ་འདུན་ནམ་གང་ཟག་གང་ལ་རྙེད་པ་བསྔོས་ཤིང་རྣམ་པར་ངེས་པར་བྱས་པ་དེ་ནི་དེ་ཁོ་ན་བཞིན་དུ་

གཙུག་ལག་ཁང་དང་། དུས་ཚིགས་དང་། གནས་ཁང་དེ་ན་དགེ་འདུན་ནམ་གང་ཟག་སུ་གནས་པ་དག་གིས་འཁྲུལ་པ་མེད་པར་སྤྱད་པར་བྱ་བ་ཡིན་ཏེ། དེ་ནི་ཡོན་བདག་གིས་རྣམ་པར་ངེས་པར་བྱས་པའི་དབང་དུ་བྱས་པ་ཡིན་ནོ། །འཐོབ་པ་རྣམས་ཀྱིས་ཀྱང་ངོ་ཞེས་བྱ་བ་ནི། རྙེད་པ་ནི་ཇི་ལྟར་རྣམ་

པར་ངེས་པར་བྱེད་པ་ལྟར་རྣམ་པར་གཞག་གོ་ཞེས་བྱ་བའི་རྗེས་བསྙག་པའི་ཕྱིར། ཀྱང་ངོ་ཞེས་བྱ་བའི་སྒྲ་སྨོས་སོ། །འདི་ནི་གང་གི་ཚེ་ཡོན་བདག་གིས་རྣམ་པར་ངེས་པར་མ་བྱས་པ་དེའི་ཚེ་རྙེད་པ་ཐོབ་པའི་གང་ཟག་རྣམས་ཀྱིས་རྣམ་པར་ངེས་པར་བྱས་པའི་དབང་དུ་བྱས་པ་ཡིན་ཏེ། ཁས་བླངས་

པ་དང་ཁས་མ་བླངས་པའི་ཕྱོགས་གཉིས་ཀྱིས་ཁྱིམ་ཆེ་གེ་མོ་ནི་ཁྱེད་ཀྱིའོ། །ཁྱིམ་ཆེ་གེ་མོ་ནི་ངེད་ཀྱིའོ། །ལམ་པོ་ཆེ་འདི་ནི་ཁྱེད་ཀྱིའོ། །ལམ་པོ་ཆེ་འདི་ནི་ངེད་ཀྱིའོ་ཞེས་བྱ་བ་ལ་སོགས་པ་ལྟ་བུར་ཁྲིམས་སུ་བྱ་བ་བཅས་ན། གལ་ཏེ་ཕྱོགས་ཅིག་ཤོས་ཀྱི་རྣམ་པར་ངེས་པར་བྱས་པའི་ཁྱིམ་ལ་སོགས་

པ་གང་ཡིན་པ་དེ་ནས་ཕྱོགས་ཅིག་ཤོས་ཀྱི་རྙེད་པ་གང་ཐོབ་པ་དེ་ནི་ཕྱོགས་དེ་མི་དབང་སྟེ། ཁྱིམ་ལ་སོགས་པ་དེ་ཕྱོགས་གང་གིར་རྣམ་པར་ངེས་པར་བྱས་པའི་ཕྱོགས་དེ་དབང་བར་རིག་པར་བྱའོ། །གལ་ཏེ་གཅིག་གི་ཕྱོགས་སུ་བྱས་པའི་ཁྱིམ་དུ་ཕྱོགས་གཉི་ག་དུས་གཅིག་ཏུ་ཚོགས་ཏེ། རྙེད་པ་

མཉམ་དུ་གྲུབ་པར་གྱུར་ན་ཡང་རྙེད་པ་དེ་དག་ཁྱིམ་དེ་ཕྱོགས་གང་གི་རྣམ་པར་ངེས་པར་བྱས་པའི་ཕྱོགས་དེ་ཉི་ཚེ་དབང་གི །ཕྱོགས་ཅིག་ཤོས་མི་དབང་སྟེ། ཕྱོགས་དེས་ཐོབ་ཏུ་ཟིན་ཀྱང་ཕྱོགས་ཅིག་ཤོས་ལ་དབུལ་བར་བྱ་དགོས་སོ། །ཇི་སྟེ་དབང་བའི་ཕྱོགས་དེས་བྱིན་ན་ནི་མི་དབང་བའི་ཕྱོགས་ཀྱིས་

Vol. 163 · folio 177b

ཀྱང་ཅི་བདེར་ལོངས་སྤྱད་དུ་རུང་ངོ་། །ལ་ལ་འདི་སྙམ་དུ་དོགས་ཏེ། ཁྱིམ་དེར་ཕྱོགས་གཉི་གས་རྙེད་པ་གྲུབ་པ་ན་ཕྱོགས་ཅིག་ཤོས་ཀྱིས་ཀྱང་རྙེད་པ་གྲུབ་པ་ཡིན་ན་དེའི་སྐལ་བ་ཅིག་ཤོས་ལ་དབུལ་ཅི་དགོས་སྙམ་དུ་དོགས་པ་བསལ་བའི་ཕྱིར། ཐམས་ཅད་ཀྱིས་ཕུལ་ན་ཡང་ངོ་ཞེས་བྱ་བ་སྨྲས་ཏེ། སྦྱིན་

བདག་ཐམས་ཅད་ཀྱིས་གང་གི་ཚེ་རྙེད་པ་འབུལ་བར་བྱེད་དུ་ཟིན་ཀྱང་དེའི་ཚེ་འཐོབ་པ་རྣམས་ཀྱིས་རྣམ་པར་གཞག་པ་བྱས་པ་དེའི་རྗེས་སུ་འབྲང་བས་རྙེད་པ་རྣམ་པར་གཞག་པར་རིག་པར་བྱའོ། །འོ་ན་འདི་སྐད་ཅེས་གང་གི་ཚེ་དགེ་འདུན་གྱི་དབྱེ་བ་དེའི་ཚེ་དགེ་སློང་དག་གིས་ཁྱིམ་ཆེ་གེ་མོ་ནི་ཁྱེད་ཀྱིའོ། །ཁྱིམ་

ཆེ་གེ་མོ་ནི་ངེད་ཀྱིའོ་ཞེས་དེ་དང་དེ་ལྟར་ཁྲིམས་སུ་བྱ་བ་བཅས་ནས་དབྱར་གནས་པར་ཁས་ལེན་པར་བྱེད་དོ་ཞེས་གསུངས་པས། འདིར་དབྱར་གྱི་དུས་སུ་བྱེ་བ་དག་གི་ཕྱོགས་གཉིས་ཀྱི་དབང་དུ་མཛད་དེ་གསུངས་པ་མ་ཡིན་ནམ་ཞེ་ན། འདིར་དབྱར་གྱི་དུས་སུ་བྱེ་བ་དག་གི་ཕྱོགས་གཉིས་ནི་དཔེ་ཙམ་དུ་

ཟད་དེ། དགུན་ལ་སོགས་པ་དག་གི་དུས་ཚིགས་གཞན་དང་སྡེ་ཚན་གཞན་དག་ལ་ཡང་འདི་རུང་བས་དེའི་ཕྱིར། འདིར་སྤྱིར་མདོར་བསྡུས་སོ། །གལ་ཏེ་ཟས་ལ་ཡང་དེ་ལྟར་རྣམ་པར་ངེས་པར་བྱས་པར་གྱུར་ན་དེའི་ཚེ་ཕྱོགས་ཅིག་ཤོས་ཀྱིས་རྗེས་སུ་མ་གནང་ན། ཕྱོགས་གཞན་གྱིས་བཟའ་བར་མི་བྱ་

སྟེ། དེ་ལྟ་བས་ན་རྙེད་པ་ཐམས་ཅད་ལ་ཡང་རྗེས་སུ་གནང་བ་ཉིད་ཡིན་ན་ནི་ཉེས་པ་མེད་པར་རིག་པར་བྱའོ། །དགེ་འདུན་ཡོངས་སུ་མ་བཅད་ན་ལས་ཀྱི་མཚམས་ཀྱིས་ཡོངས་སུ་བཅད་དོ་ཞེས་བྱ་བ་ནི། སྦྱིན་བདག་གིས་འདི་སྐད་ཅེས་བདག་གིས་དགེ་འདུན་ལ་ཕུལ་ལོ་ཞེས་ཟེར་ཞིང་། དགེ་འདུན་

གང་དག་ལ་འབུལ་བ་ཡོངས་སུ་མ་བཅད་པར་རྙེད་པ་རྣམ་པར་ངེས་པར་མ་བྱས་ན། དེའི་ཚེ་ལས་ཀྱི་མཚམས་ཀྱིས་དགེ་འདུན་ཡོངས་སུ་གཅད་པར་བྱ་སྟེ། ལས་ཀྱི་མཚམས་ཞེས་བྱ་བ་ནི། ལས་བྱར་རུང་བའི་མཚམས་ཏེ། མཚམས་ཆེན་པོ་བཅད་པའི་གནས་ན་ནི་དཔག་ཚད་ཕྱེད་དང་གསུམ་གྱི་

མཐའ་ཚུན་ཆད་དོ། །མཚམས་མ་བཅད་པའི་གནས་རྩིག་པས་བསྐོར་བ་ན་ནི་ཕྱིར་འི་རྩིག་པའི་མཐའ་ཚུན་ཆད་དོ། །མཚམས་མ་བཅད་པའི་རྩིག་པས་མ་བསྐོར་བའི་གནས་ན་ནི་ཝ་ཁ་ནས་ཆུ་འཛག་པའི་སྣས་གར་སླེབ་པའི་མཐའ་ཚུན་ཆད་དོ། །དཀྱིལ་འཁོར་བའི་མཚམས་གཅད་པའི་གནས་

Vol. 163 · folio 178a

ན་ནི་དེ་ཉིད་ཀྱི་མཐའ་ཚུན་ཆད་དོ། །གྲོང་གི་གནས་ན་ནི་གྲོང་གི་ཉེ་འཁོར་གྱི་མཐའ་ཚུན་ཆད་དོ། །མཚམས་དེ་དག་གི་ཁོངས་སུ་གཏོགས་པའི་དགེ་སློང་རྣམས་ཀྱིས་རྙེད་པ་དེ་དབང་ངོ་ཞེས་བྱ་བའི་ཐ་ཚིག་གོ། །འདི་ལ་གཅིག་ལ་སོགས་པ་དེ་ནི་དེ་ཉིད་དོ་ཞེས་བྱ་བ་ནི། དགེ་འདུན་གྱི་

ཕྱིར་ཕུལ་བའི་རྙེད་པ་འདི་ལ་གང་ཟག་གཅིག་ལ་སོགས་པའི་དགེ་འདུན་དུ་མ་ལངས་པ་མཚམས་གཅིག་གི་ནང་དུ་གཏོགས་པ་རྣམས་ནི་དགེ་འདུན་ཉིད་དང་འདྲ་སྟེ། དེ་དག་རྙེད་པ་དེ་དབང་ངོ་ཞེས་བྱ་བའི་ཐ་ཚིག་གོ། །དཔེར་ན་དགེ་སློང་སྐྱེས་པའམ་བུད་མེད་འགའ་ཞིག་ལ་བརྟེན་ནས་དབྱར་གནས་

པར་ཁས་ལེན་ཅིང་གནས་དེ་ན་བུད་མེད་ལ་སོགས་པས་དགེ་འདུན་གྱི་ཕྱིར་རྙེད་པ་འབུལ་བར་བྱེད་ན་མཚམས་དེའི་ནང་དུ་གཏོགས་པ་རྣམས་ཀྱི་རྙེད་པ་དེ། གལ་ཏེ་བདག་གིས་འདི་ཉིད་ཀྱི་དགེ་འདུན་ལ་ཕུལ་ལོ་ཞེས་ཟེར་ལ། གལ་ཏེ་དེ་ན་གང་ཟག་གཞན་མེད་ན་ནི་རྙེད་པ་དེ་མཚམས་ཀྱིས་བསྟབས་པ་

ཡིན་ནོ། །གལ་ཏེ་འདི་ཁྱོད་ཁོ་ན་ལ་ཕུལ་ལོ་ཞེས་ཟེར་ན་ནི་རྙེད་པ་དེ་རྟེན་གྱིས་བསྟབས་པ་ཡིན་ཏེ། རྟེན་གྱི་དབང་གིས་གྲུབ་ཅེས་བྱ་བའི་ཐ་ཚིག་གོ། །ཆོས་ཀྱི་རྙེད་པ་ནི་དེ་སྨྲ་བ་རྣམས་དབང་བ་ཉིད་ཡིན་ནོ་ཞེས་བྱ་བ་ནི། ཆོས་ལ་ཕུལ་བའི་རྙེད་པ་ན་ཆོས་སྨྲ་བ་རྣམས་དབང་བ་ཉིད་ཡིན་པའོ། །འདུལ་བ་བྱེ་བྲག་

ཏུ་བཤད་པ་དག་ལས་མྱ་ངན་ལས་འདས་པ་ལ་ཕུལ་བ་ནི་མཆོད་རྟེན་གྱི་དང་འདྲ་བར་གཞག་གོ་ཞེས་གསུངས་པས། དེའི་ཕྱིར་འདི་ནི་བཤད་པ་ལ་སོགས་པའི་ཆོས་ཀྱི་རྙེད་པ་ཡིན་པར་རིག་པར་བྱའི། མྱ་ངན་ལས་འདས་པའི་ཆོས་ཀྱི་རྙེད་པ་ནི་མ་ཡིན་ནོ། །གཙུག་ལག་གི་ཚིགས་སུ་བཅད་པ་གཅིག་

འཛིན་པ་ནི་འདིར་དེ་ཉིད་ཀྱི་མཐའ་ཡིན་ནོ་ཞེས་བྱ་བ་ལ། གཙུག་ལག་ཅེས་བྱ་བ་ནི། དྲང་སྲོང་གིས་གསུངས་པ་སྟེ། དེའི་ཚིགས་སུ་བཅད་པ་གཅིག་འཛིན་པ་ནི་ཆོས་ཀྱི་རྙེད་པ་དབང་བ་འདི་ལ་ཆོས་སྨྲ་བ་དེ་ཉིད་ཀྱི་ཕྱིར་མཐའ་ཡིན་ནོ། །མདོ་འདི་ནི་རྩོད་པའི་གཞིའི་གཞུང་ལས་བྱུང་ངོ་། །མཚན་

མི་མཐུན་པའི་ཤི་བའི་ཡོ་བྱད་ལ་ཅིག་ཤོས་ཡོད་ན་མི་དབང་བ་ཉིད་དོ་ཞེས་བྱ་བ་ལ། མཚན་མ་མཐུན་པ་ཞེས་བྱ་བ་ནི་དགེ་སློང་དང་དགེ་ཚུལ་གྱི་རྒྱུད་དུ་གཏོགས་པའི་ཤི་བའི་ཡོ་བྱད་དེ་ལ་ནི། དགེ་སློང་མ་དང་དགེ་སློབ་མ་དང་དགེ་ཚུལ་མ་དག་མི་དབང་ངོ་། །དེ་བཞིན་དུ་དགེ་སློང་མ་དང་དགེ་སློབ་མ་དང་

Vol. 163 · folio 178b

དགེ་ཚུལ་མའི་རྒྱུད་དུ་གཏོགས་པའི་ཤི་བའི་ཡོ་བྱད་དེ་ལ་ཡང་དགེ་སློང་དང་དགེ་ཚུལ་དག་མི་དབང་བ་ཉིད་ཡིན་ནོ། །ཅི་ཐམས་ཅད་དུ་ཡང་ཞེ་ན་མ་ཡིན་ཏེ། དེའི་ཕྱིར་ཅིག་ཤོས་ཡོད་ན་ཞེས་བྱ་བ་སྨྲས་ཏེ། ཅིག་ཤོས་ཞེས་བྱ་བ་མཚན་མཐུན་པ་ཡོད་ན་མཚན་མི་མཐུན་པ་མི་དབང་ངོ་། །འདི་སྐད་བསྟན་ཏེ།

གང་ན་མཚན་མཐུན་པ་ཡོད་པ་དེ་ན་མཚན་མི་མཐུན་པ་མི་དབང་ངོ་། །གང་ན་མཚན་མཐུན་པ་མེད་པ་དེ་ན་ནི་མཚན་མི་མཐུན་པ་ཡང་དབང་ངོ་། །མདོ་འདི་ནི་གླེང་གཞིའི་གཞུང་ལས་འབྱུང་ངོ་། །གནས་ནས་ཕྱུང་བའི་ཡང་དེ་བཞིན་ནོ་ཞེས་བྱ་བ་ནི། གནས་ནས་ཕྱུང་བའི་རྒྱུད་དུ་གཏོགས་པའི་ཤི་བའི་

ཡོ་བྱད་ལ་ཡང་གནས་ནས་མ་ཕྱུང་བ་ཅིག་ཤོས་ཡོད་ན་གནས་ནས་ཕྱུང་བ་མི་དབང་ལ། གནས་ནས་མ་ཕྱུང་བ་མེད་ན་ནི་གནས་ནས་ཕྱུང་བ་དབང་ངོ་། །མེད་ན་ཡང་ངོ་ཞེས་བྱ་བ་ནི། མ་སྤངས་པའི་རྒྱུད་དུ་གཏོགས་པའི་ཤི་བའི་ཡོ་བྱད་ལ་ནི་མ་སྤངས་པ་ཅིག་ཤོས་མེད་ན་ཡང་སྤངས་པ་མི་དབང་

བའོ། །ཅི་དུས་ཐམས་ཅད་དུའམ་ཞེ་ན་མ་ཡིན་ཏེ། དེའི་ཕྱིར་རྒྱུ་ལས་སེམས་མ་ལོག་ནའོ་ཞེས་བྱ་བ་སྨྲས་ཏེ། ལྟུང་བ་མ་མཐོང་བ་ལ་སོགས་པའི་རྒྱུ་གང་གིས་དེ་གནས་ནས་དབྱུང་བའི་ལས་བྱས་པའི་རྒྱུ་དེ་ལས་སེམས་མ་ལོག་ཅིང་བཟློག་པར་མ་བྱས་པ་དེ་གནས་ནས་མ་ཕྱུང་བའི་རྒྱུད་དུ་

གཏོགས་པའི་ཤི་བའི་ཡོ་བྱད་ལ་གནས་ནས་མ་ཕྱུང་བ་ཅིག་ཤོས་མེད་ན་ཡང་མི་དབང་གི །རྒྱུ་ལས་སེམས་ལོག་ན་ནི་དབང་ངོ་། །འདིར་གཞུང་ནི་གང་དབང་ལགས། དེ་དག་ལས་གང་གིས་དང་པོར་སྡིག་པ་ཅན་གྱི་ལྟ་བའི་རྣམ་པ་སྤོང་བར་བྱེད་པའོ་ཞེས་གསུངས་པ་ཡིན་ནོ། །དེའི་དེ་མནོད་པར་བྱ་བ་

ཉིད་ལ་དེ་ནི་ཐ་དད་པ་ཉིད་མ་ཡིན་ནོ་ཞེས་བྱ་བ་ནི། སྤངས་པ་དེའི་ཤི་བའི་ཡོ་བྱད་དེ་མནོད་པར་བྱ་བ་ཉིད་ལས། སྤངས་པ་དེ་ནི་མ་སྤངས་པ་དང་ཐ་དད་པ་ཉིད་མ་ཡིན་ནོ། །འདི་སྐད་བསྟན་ཏེ། སྤངས་པ་དེ་དག་གི་ཤི་བའི་ཡོ་བྱད་དེ་དག་མནོད་པར་བྱ་བ་ཉིད་ལ་སྤངས་པ་དེ་དག་ནི་མ་སྤངས་པ་དག་དང་ཐ་དད་པ་

ཉིད་མ་ཡིན་པའི་ཕྱིར། སྤངས་པའི་ཤི་བའི་ཡོ་བྱད་པ་ནི། སྤངས་པ་ཅིག་ཤོས་ཡོད་ཀྱང་མ་སྤངས་པ་ཡང་དབང་སྟེ། སྤངས་པ་ནི་དགེ་འདུན་ལས་ཐ་དད་པ་ཉིད་མ་ཡིན་པའི་ཕྱིར་རོ། །ཐ་དད་པའི་ལ་ནི་ཐ་དད་པ་ཉིད་དོ་ཞེས་བྱ་བ་འདི་ནི། ཁས་བླངས་པ་དང་ཁས་མ་བླངས་པའི་ཕྱོགས་ཐ་དད་པའི་ཤི་

Vol. 163 · folio 179a

བའི་ཡོ་བྱད་ལ་ནི་ཕྱོགས་དེ་གཉིས་ཐ་དད་པ་ཡིན་པས། ཕྱོགས་ཐ་དད་པའི་ཤི་བའི་ཡོ་བྱད་བླང་བར་བྱ་བ་ཉིད་ལ་ཐ་དད་པ་ཡིན་ཏེ། གཅིག་ལ་གཅིག་མི་དབང་ངོ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། གཞན་གྱི་ཕྱོགས་སུ་གཏོགས་པའི་ཤི་བའི་ཡོ་བྱད་ལ་གཞན་གྱི་ཕྱོགས་སུ་

གཏོགས་པའི་གང་ཟག་མི་དབང་བས་ཆོས་དང་མཐུན་པའི་ཕྱོགས་སུ་གཏོགས་པའི་ཤི་བའི་ཡོ་བྱད་ལ་ཡང་། ཆོས་མ་ཡིན་པ་དང་མཐུན་པའི་ཕྱོགས་སུ་གཏོགས་པ་མི་དབང་ལ། ཆོས་མ་ཡིན་པ་དང་མཐུན་པའི་ཕྱོགས་སུ་གཏོགས་པའི་ཤི་བའི་ཡོ་བྱད་ལ་ཡང་ཆོས་དང་མཐུན་པའི་ཕྱོགས་སུ་གཏོགས་

པ་མི་དབང་ངོ་། །འདིར་གཞུང་ནི་ཁས་བླངས་པ་རྣམས་ཀྱི་གནས་སུ་ཁས་མ་བླངས་པའི་དགེ་ཚུལ་འོངས་ཏེ་དུས་བྱས་པར་གྱུར་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཆོས་དང་མཐུན་པའི་ཕྱོགས་ཁས་བླངས་པ་ནི་ཁས་བླངས་པ་ཡིན་ལ། ཆོས་མ་ཡིན་པ་དང་མཐུན་པའི་ཕྱོགས་ཁས་བླངས་པ་ནི་

ཁས་མ་བླངས་པ་ཡིན་པར་རིག་པར་བྱའོ། །རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་ལས་གཞན་པ་དག་དེ་མི་དབང་བ་ཉིད་ཡིན་ནོ་ཞེས་བྱ་བ་ནི། རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་ལས་གཞན་པ་ཉེ་དུ་ལ་སོགས་པ་དང་རྒྱལ་པོ་ཡང་རབ་ཏུ་བྱུང་བའི་ཤི་བའི་ཡོ་བྱད་དེ་མི་དབང་

བ་ཉིད་ཡིན་ཏེ། དེ་ནི་རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་དག་ཁོ་ན་དབང་བ་ཡིན་ནོ། །འདིར་རབ་ཏུ་བྱུང་བ་ཞེས་སྨོས་པ་ནི་དགེ་ཚུལ་དང་དགེ་ཚུལ་མ་དང་དགེ་སློབ་མ་ཡང་དབང་བ་ཉིད་དུ་བསྟན་པའི་ཕྱིར་རོ། །ཚངས་པ་མཚུངས་པར་སྤྱོད་པ་ཞེས་སྨོས་པ་ནི། གཞན་མུ་སྟེགས་ཅན་

བསལ་བའི་ཕྱིར་རོ། །གསོལ་བ་འམ་དང་པོ་དང་ཐ་མས་བྱིན་གྱིས་བརླབས་ཟིན་པ་ནི་འོངས་པ་ནི་མི་དབང་ངོ་ཞེས་བྱ་བ་ནི། ཤི་བའི་ཡོ་བྱད་ལ་དགེ་འདུན་གྱིས་གསོལ་བས་བྱིན་གྱིས་བརླབས་སུ་ཟིན་ཀྱང་རུང་། དང་པོ་དང་ཐ་མས་བྱིན་གྱིས་བརླབས་ཟིན་ཀྱང་རུང་སྟེ། དེའི་འོག་ཏུ་རབ་ཏུ་

བྱུང་བ་ཚངས་པ་མཚུངས་པར་སྤྱོད་པ་འོངས་པ་དག་ནི་མི་དབང་བ་ཉིད་ཡིན་ནོ། །བྱིན་གྱིས་བརླབས་པ་དེ་གཉིས་མ་ཟིན་པའི་སྐབས་སུ་འོངས་པ་ནི་དབང་ངོ་། །དང་པོར་ཤི་བའི་བསོད་ནམས་སུ་ཡོན་བཤད་པ་བྱས་ནས་ཕྱིས་བྱིན་གྱིས་བརླབ་པར་བྱའོ། །གལ་ཏེ་ཡོན་བཤད་པ་མ་བྱས་པར་བྱིན་གྱིས་

Vol. 163 · folio 179b

བརླབས་པ་དེ་གཉིས་བྱེད་ན་ནི། བྱིན་གྱིས་བརླབས་པ་དེས་ཕྱིས་འོངས་པ་དག་སྐལ་བ་མི་དབང་བ་ཉིད་དུ་ཡང་མི་འགྱུར་ལ་བྱིན་གྱིས་བརླབས་པ་དེ་ཡང་མི་འཆགས་སོ། །ཡོན་བཤད་པའི་འོག་ཏུ་བྱིན་གྱིས་རློབ་ན་ནི་བྱིན་གྱིས་བརླབས་པ་དེ་ཡང་འཆགས་ལ་ཕྱིས་འོངས་པ་དག་ཀྱང་སྐལ་བ་མི་དབང་བ་

ཉིད་དུ་འགྱུར་རོ། །གསོལ་བས་བྱིན་གྱིས་བརླབ་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་ཉེ་དགའ་གུམ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་ཉེ་

དགའ་གུམ་པའི་རྫས་བགོ་བར་བགྱི་བ་གུམ་པའི་ཡོ་བྱད་ཆོས་གོས་དང་ཆོས་གོས་མ་ལགས་པ་གདའ་བ་དང་མི་གདའ་བ་བྱིན་གྱིས་བརླབ་པོ། །འདི་ནི་གསོལ་བའོ་ཞེས་གསུངས་པ་ཡིན་ཏེ། འདིར་ཉེ་དགའ་ཞེས་སྨོས་པ་ནི། གླེང་གཞིའི་དབང་གིས་གསུངས་པར་ཟད་དེ། ལས་བྱ་བའི་སྐབས་སུ་ནི་གང་ཟག་

གང་ཤི་བའི་ཡོ་བྱད་བྱིན་གྱིས་བརླབ་པར་བྱ་བ་དེ་ཉིད་ཀྱི་མིང་ནས་བརྗོད་པར་བྱའོ། །དང་པོ་དང་ཐ་མས་བྱིན་གྱིས་བརླབ་པ་བསྟན་པའི་ཕྱིར། དེ་ལས་འགའ་ཞིག་དགེ་འདུན་གྱི་རྒན་པ་དང་གསར་བུ་གཉིས་ལ་བྱིན་པ་ནི་དེ་ཞེས་བྱའོ་ཞེས་བྱ་བ་སྨྲས་ཏེ། དེ་ལས་ཞེས་བྱ་བ་ནི། ཤི་བའི་ཡོ་བྱད་དེ་ལས་སོ། །འགའ་

ཞིག་ཅེས་བྱ་བ་ནི་དངོས་པོ་འགའ་ཞིག་གོ། །རྒན་པ་ཞེས་བྱ་བ་ནི་གྲལ་གཙོའོ། །གསར་བུ་ཞེས་བྱ་བ་ནི་གྲལ་ཐ་མ་ན་འདུག་པ་སྟེ། དེ་གཉིས་ལ་ཤི་བའི་ཡོ་བྱད་དེ་ལས་དངོས་པོ་སྣ་རེ་ཞིག་སྦྱིན་པ་ནི་དང་པོ་དང་ཐ་མས་བྱིན་གྱིས་བརླབ་པ་དེ་ཞེས་བྱའོ། །འདིར་གཞུང་ནི་ཡོ་བྱད་ཅིག་བཙོངས་ཏེ་ཅུང་ཞིག་དགེ་

འདུན་གྱི་རྒན་པ་དང་དགེ་འདུན་གྱི་གསར་བུ་ལ་བྱིན་ནས་ཞེས་གསུངས་པ་ཡིན་ནོ། །དེ་ལ་དང་པོ་དང་ཐ་མ་ཞེས་བྱ་བ་ནི། དགེ་འདུན་གྱི་རྒན་པ་ནི་དང་པོ་ཡིན་ལ། དགེ་འདུན་གྱི་གསར་བུ་ནི་ཐ་མ་ཡིན་ཏེ། ཤི་བའི་ཡོ་བྱད་ཀྱི་གནས་དེར་ཚོགས་པའི་དགེ་འདུན་ཚུལ་བཞིན་དུ་དངར་བ་རྣམས་ལས་དང་པོ་དང་

ཐ་མ་དེ་གཉིས་ལ་ཤི་བའི་ཡོ་བྱད་དེ་ལས་དངོས་པོ་སྣ་རེ་ཕུལ་ན་ཆོ་ག་དེ་ཉིད་ཀྱིས་བྱིན་གྱིས་བརླབས་པ་ཡིན་ནོ། །ཡང་རྣམ་པ་གཅིག་ཏུ་ན་དང་པོ་དང་ཐ་མ་ཞེས་བྱ་བ། ཕྱོགས་གཅིག་དང་ཚིག་གཅིག་གིས་ཀྱང་བསྟན་ཏེ། ཐ་མ་ཞེས་བྱ་བ་ནི། རྒན་རབས་ནས་རྗེས་སུ་མཐུན་པར་བགྲངས་ནས་གསར་བུ་ཐ་མ་

Vol. 163 · folio 180a

ཡིན་ལ། གཞོན་རབས་ནས་རྗེས་སུ་མི་མཐུན་པར་བགྲངས་ན་རྒན་པ་ཐ་མ་ཡིན་པས། དེ་ལྟར་ན་རྒན་པ་དང་གསར་བུ་གཉི་ག་ཐ་མ་ཞེས་བྱའོ། །དང་པོ་ཞེས་བྱ་བ་ནི་རྒན་རབས་ནས་རྗེས་སུ་མཐུན་པར་བགྲངས་ཏེ་གསར་བུ་ཐ་མར་བྱས་ན་དེ་ལ་ཤི་བའི་ཡོ་བྱད་སྣ་གཅིག་དང་པོར་སྦྱིན་དགོས་

པས་དེ་དང་པོ་ཡིན་ལ། གཞོན་རབས་ནས་རྗེས་སུ་མི་མཐུན་པས་བགྲངས་ཏེ། རྒན་པ་ཐ་མར་བྱས་ན་དེ་ལ་ཡང་ཤི་བའི་ཡོ་བྱད་སྣ་གཅིག་དང་པོར་སྦྱིན་དགོས་པས། དེ་ལྟར་ན་རྒན་པ་དང་གསར་བུ་གཉི་ག་དང་པོ་ཞེས་བྱ་སྟེ། དེ་ནི་དང་པོ་དང་ཐ་མས་བྱིན་གྱིས་བརླབ་པར་བྱ་བ་ཡིན་ནོ། །གང་ན་བྱིན་གྱིས་

བརླབ་པ་བྱ་བ་འདུག་པ་དེ་ནི་མཚམས་སུ་གཏོགས་པ་རྣམས་བྱིན་གྱིས་རློབ་པར་བྱེད་པ་ཡིན་ནོ་ཞེས་བྱ་བ་ནི། གནས་གང་ན་བྱིན་གྱིས་བརླབ་པར་བྱ་བའི་དངོས་པོ་འདུག་པ་དེའི་མཚམས་སུ་གཏོགས་པའི་རབ་ཏུ་བྱུང་བ་རྣམས་ནི་དེ་བྱིན་གྱིས་རློབ་པར་བྱེད་པ་ཡིན་ཏེ། དེ་དག་གི་དངོས་པོ་དེ་བྱིན་གྱིས་བརླབ་པར་

བྱའོ་ཞེས་བྱ་བའི་ཐ་ཚིག་གོ། །འདི་ལ་ཤི་བའི་གནས་ཉིད་ནི་རྒྱུ་མ་ཡིན་ནོ་ཞེས་བྱ་བ་ནི། ཤི་བའི་ཡོ་བྱད་བྱིན་གྱིས་བརླབ་པར་བྱ་བ་འདི་ལས། ཤི་བའི་གནས་ཉིད་ནི་རྒྱུ་མ་ཡིན་ཏེ། འདིར་ཤི་བ་དེའི་དབང་གིས་མཚམས་དེ་ན་གནས་པའི་དགེ་སློང་རྣམས་ཀྱིས་གནས་གཞན་ན་ཤི་བའི་ཡོ་བྱད་འདུག་པ་བྱིན་

གྱིས་བརླབ་ཏུ་མི་རུང་བ་ཉིད་ཡིན་ལ། གནས་གཞན་དུ་ཤི་བ་དེའི་ཡོ་བྱད་མཚམས་འདི་ན་འདུག་པ་ནི་མཚམས་འདི་ན་གནས་པའི་དགེ་སློང་རྣམས་ཀྱིས་བྱིན་གྱིས་བརླབ་ཏུ་རུང་བ་ཉིད་དོ། །མཚམས་ཀྱི་བར་ན་འདུག་པ་ལ་ལུས་སམ་གཞན་གྱིས་རེག་པས་ཇི་ཙམ་ནོན་པ་དེར་གཏོགས་པ་རྣམས་སོ་ཞེས་བྱ་བ་ལ།

མཚམས་ཀྱི་བར་ཞེས་བྱ་བ་ནི། མཚམས་གཞན་དང་གཞན་གྱི་བར་རོ། །དེ་དག་ན་བྱིན་གྱིས་བརླབ་པར་བྱ་བ་འདུག་པ་ནི་མཚམས་ཀྱི་བར་ན་འདུག་པའོ། །མཚམས་ཀྱི་བར་ན་འདུག་པའི་ཤི་བའི་ཡོ་བྱད་དེ་ལ་ཤི་བ་དེའི་ལུས་ཀྱིས་རེག་གམ་ཁྲི་དང་ཁྲིའུ་ལ་སོགས་པ་གཞན་གྱིས་རེག་པའི་ཤི་བའི་ཡོ་བྱད་

བྱིན་གྱིས་བརླབ་པར་བྱ་བ་དེས་མཚམས་ཇི་ཙམ་ནོན་ཅིང་ཁྱབ་པའི་མཚམས་དེར་གཏོགས་པའི་དགེ་སློང་རྣམས་བྱིན་གྱིས་རློབ་པར་བྱེད་པ་ཡིན་ཏེ། མཚམས་དེ་ན་གནས་ཤིང་འཁོད་པ་དེ་དག་གིས་བྱིན་གྱིས་བརླབ་པར་བྱའི། མཚམས་གཞན་ན་གནས་པ་དག་གིས་ནི་མ་ཡིན་ནོ། །དེ་ལྟ་བས་ན་འདི་ལ་ནི་

Vol. 163 · folio 180b

བྱིན་གྱིས་བརླབ་པར་བྱ་བའི་རྫས་ཀྱི་དབང་གིས་རྣམ་པར་གཞག་གི་ཤི་བའི་རོའི་དབང་གིས་མ་ཡིན་ནོ། །གང་ན་ནོར་དང་འདྲ་བ་དེ་འདུག་པ་དེའི་ཁོངས་སུ་ཡོ་བྱད་གཏོགས་པ་ཉིད་ཡིན་ནོ་ཞེས་བྱ་བ་ནི། མཚམས་གང་ན་ནོར་དང་འདྲ་བ་དེ་འདུག་པའི་མཚམས་དེའི་ཁོངས་སུ་ཤི་བའི་ཡོ་བྱད་མཚམས་

གཞན་ན་འདུག་པ་ཡང་གཏོགས་པས། དེས་ན་མཚམས་གང་ན་ནོར་དང་འདྲ་བ་དེ་འདུག་པའི་མཚམས་དེའི་ཁོངས་སུ་གཏོགས་པའི་དགེ་འདུན་གྱིས་མཚམས་དེ་ཉིད་ཀྱི་ནང་དུ་ནོར་དང་འདྲ་བ་དེ་བྱིན་གྱིས་བརླབས་ན་ཤི་བའི་ཡོ་བྱད་མཚམས་གཞན་ན་འདུག་པའི་ཆོས་གོས་དང་ཆོས་གོས་མ་ཡིན་པ་སྣང་བ་

དང་མི་སྣང་བ་ཐམས་ཅད་བྱིན་གྱིས་བརླབ་པར་འགྱུར་རོ་ཞེས་བྱ་བར་སྦྱར་རོ། །ནོར་དང་འདྲ་བར་ཞེས་བྱ་བ་ནི། ཁྱིམ་པའམ་རབ་ཏུ་བྱུང་བ་གང་གི་ལག་ཏུ་གཞག་ཤིང་ཤི་བའི་ཡོ་བྱད་བྱིན་གྱིས་བརླབ་པར་བྱ་བ་གཞག་པའི་ཁྱིམ་པའམ་རབ་ཏུ་བྱུང་བ་དེ་ལ་བྱ་སྟེ། དེ་ནི་ནོར་དེའི་དངོས་པོ་དང་འདྲ་བའམ་

དེའི་གཟུགས་བརྙན་ནམ། དེའི་རིང་ལུགས་ལྟ་བུ་ཡིན་པའི་ཕྱིར་རོ། །འདི་སྐད་བསྟན་ཏེ། འདི་ལྟར་གནས་གཞན་ན་ནོར་དང་འདྲ་བའི་གང་ཟག་དེ་འདུག་ན། དེས་གཞན་ཤི་བའི་ནོར་བྱིན་གྱིས་བརླབ་པར་བྱ་བ་དག་གནས་གཞན་དུ་བཞག་ཏུ་ཟིན་ཀྱང་ནོར་དང་འདྲ་བའི་གང་ཟག་དེ་འདུག་པའི་གནས་དེ་

ཉིད་ན་བྱིན་གྱིས་བརླབ་པར་བྱ་བའི་ནོར་དེ་ཡང་འདུག་པ་ཉིད་དང་འདྲ་བར་བསྟན་པར་བྱ་སྟེ། དེས་ན་གནས་གང་ན་ནོར་དང་འདྲ་བའི་གང་ཟག་དེ་འདུག་པའི་གནས་དེ་ཉིད་དུ་ནོར་དང་འདྲ་བའི་གང་ཟག་དེ་ཉིད་བྱིན་གྱིས་བརླབས་ན། དེས་གཞན་ཤི་བའི་ཡོ་བྱད་ཆོས་གོས་དང་ཆོས་གོས་མ་ཡིན་པ་སྣང་བ་

དང་མི་སྣང་བ་གནས་གཞན་དུ་གཞག་པ་ཐམས་ཅད་བྱིན་གྱིས་བརླབ་པ་ཉིད་དུ་འགྱུར་རོ། །དེའི་ཕྱིར་དེའི་ནོར་དང་འདྲ་བས་གཞན་ན་འདུག་པ་བྱིན་གྱིས་བརླབ་པར་བྱའོ་ཞེས་བྱ་བ་སྨྲས་ཏེ། དགེ་སློང་རྣམས་ཀྱིས་ནོར་དང་འདྲ་བའི་གང་ཟག་དྲུང་ན་འདུག་པས་གཞན་ཤི་བའི་ཡོ་བྱད་དེ་ལ་གཞག་པ་ཐག་

རིང་པོ་ན་འདུག་པ་གསོལ་བ་འབའ་ཞིག་གི་ལས་ཀྱིས་བྱིན་གྱིས་བརླབ་པར་བྱ་བའོ། །འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། འདི་ལྟར་གནས་འདིར་དགེ་སློང་གྲེ་སྐྱེས་གུམ་པར་གྱུར་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་

Vol. 163 · folio 181a

བར་མཛོད་ཅིག་དང་། དགེ་འདུན་གྱིས་དགེ་སློང་ཀུན་དགའ་བོ་ནོར་དང་འདྲ་བས་དགེ་སློང་གྲེ་སྐྱེས་གུམ་པའི་རྫས་བགོ་བར་བགྱི་བ། གུམ་པའི་ཡོ་བྱད་ཆོས་གོས་དང་ཆོས་གོས་མ་ལགས་པ་གདའ་བ་དང་མི་གདའ་བ་བྱིན་གྱིས་བརླབ་བོ། །འདི་ནི་གསོལ་བའོ་ཞེས་གསུངས་པ་

ཡིན་ནོ། །བསྐུར་པ་བསྐུར་པར་བྱ་བ་མ་སྤངས་པ་ནི་དེ་ཉིད་ཡིན་ནོ་ཞེས་བྱ་བ་ནི། བསྐུར་བའི་དངོས་པོ་གང་ཡང་རུང་བ་གང་ལ་བསྐུར་བར་བྱ་བའི་གང་ཟག་དེས་མ་སྤངས་པ་ནི་དེ་ཉིད་ཡིན་ཏེ། བསྐུར་བར་བྱ་བའི་དབང་བ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་སྐུར་བར་བྱེད་པས་བསྐུར་བར་བྱ་བ་ལ་

དངོས་པོ་ཞིག་སྐུར་བར་བྱེད་ཅིང་། བསྐུར་བར་བྱ་བ་དེས་ཀྱང་དངོས་པོ་དེ་སྤོང་བར་མི་བྱེད་ན། དངོས་པོ་དེ་བསྐུར་བར་བྱ་བ་དབང་བར་རིག་པར་བྱའོ། །དེ་ན་སྐབས་དེར་སྐུར་བ་བྱེད་པ་དང་བསྐུར་བར་བྱ་བ་གཉི་ག་ཤི་བར་གྱུར་ན་དངོས་པོ་དེ་སྐུར་བར་བྱེད་པ་ཉིད་ཤི་བའི་ཡོ་བྱད་དུ་འགྱུར་རོ། །སྤངས་པ་ནི་

སྐུར་བར་བྱེད་པ་ཉིད་ཀྱིའོ་ཞེས་བྱ་བ་ནི། བསྐུར་བར་བྱ་བའི་གང་ཟག་དེས་སྤངས་པ་ནི་སྐུར་བར་བྱེད་པ་ཉིད་ཀྱི་རྒྱུད་དུ་དབང་བ་ཡིན་པར་རིག་པར་བྱ་སྟེ། དེས་ན་སྐབས་དེར་སྐུར་བར་བྱེད་པ་དང་བསྐུར་བར་བྱ་བ་གཉི་ག་ཤི་བར་གྱུར་ན་དངོས་པོ་དེ་སྐུར་བར་བྱེད་པ་ཉིད་ཀྱི་ཤི་བའི་ཡོ་བྱད་དུ་འགྱུར་རོ། །དེས་སྤངས་

ན་ཡང་ངོ་ཞེས་བྱ་བ་ནི། སྐུར་བར་བྱེད་པ་དེས་དངོས་པོ་དེ་སྤངས་ན་ཡང་འོན་ཀྱང་དངོས་པོ་དེ་སྐུར་བར་བྱེད་པ་དེ་ཉིད་དབང་བར་འགྱུར་རོ། །འདི་སྐད་བསྟན་ཏེ། སྐུར་བར་བྱེད་པས་བསྐུར་བར་བྱ་བ་ལ་བསྐུར་བའི་དངོས་པོ་དེ་བསྐུར་བར་བྱ་བ་དེས་སྤངས་པར་གྱུར་པ། སྐུར་བར་བྱེད་པ་དེས་ཐོས་ནས་དེས་ཀྱང་

བདག་གིས་སྔར་སྤངས་ཟིན་པ་འདིས་བདག་ལ་ཅི་ཞིག་བྱ་ཞེས་ཡང་སྤངས་པར་གྱུར་དུ་ཟིན་ཀྱང་། དངོས་པོ་དེ་སྐུར་བར་བྱེད་པ་ཉིད་དབང་ངོ་། །དེས་ན་སྐབས་དེར་སྐུར་བར་བྱེད་པ་དང་བསྐུར་བར་བྱ་བ་གཉི་ག་ཤི་བར་གྱུར་ན་དངོས་པོ་དེ་སྐུར་བར་བྱེད་པ་ཉིད་ཀྱི་ཤི་བའི་ཡོ་བྱད་དུ་འགྱུར་རོ། །འདིར་གཞུང་ནི་

དགེ་སློང་གིས་དགེ་སློང་ལ་ཆོས་གོས་དག་བསྐུར་ནས། གང་ལ་བསྐུར་བ་དེས་སྤངས་ནས་གང་གིས་བསྐུར་བ་དེས་ཀྱང་སྤངས་ན། གང་ལ་བསྐུར་བ་དེ་ཡིར་བྱིན་གྱིས་རློབ་པ་ནི་བྱིན་གྱིས་མ་བརླབས་པ་ཡིན་ནོ། །གང་གིས་བསྐུར་བ་དེ་ཡི་ཕྱིར་བྱིན་གྱིས་རློབ་པར་བྱེད་ན་ནི་བྱིན་གྱིས་བརླབས་པ་ཡིན་ཏེ།

Vol. 163 · folio 181b

ལེགས་པར་བྱིན་གྱིས་བརླབས་པ་ཡིན་ནོ་ཞེས་གསུངས་པ་ཡིན་ཏེ། དེ་ཤི་བའི་ཡོ་བྱད་དུ་བྱིན་གྱིས་བརླབས་པ་ཉིད་ཀྱིས་སྐུར་བར་བྱེད་པ་དེ་ཉིད་ཀྱིར་བྱིན་གྱིས་བརླབས་པར་བྱའོ་ཞེས་བྱ་བའི་ཐ་ཚིག་གོ། །ཕྱི་རོལ་དུ་ཡང་མཚམས་ཀྱི་ནང་དུ་འདུ་ཤེས་པ་དག་གིས་འབའ་ཞིག་གིས་བྱིན་གྱིས་རློབ་པ་མི་

འཆགས་སོ་ཞེས་བྱ་བ་ནི། མཚམས་ཀྱི་ཕྱི་རོལ་དུ་མཚམས་ཀྱི་ནང་དུ་འདུ་ཤེས་པའི་གང་ཟག་རྣམས་ཀྱིས་འབའ་ཞིག་གིས་ཞེས་བྱ་བ་མི་མཐུན་པ་དག་གིས་བྱིན་གྱིས་རློབ་པར་བྱེད་ན་མི་འཆགས་སོ། །ཡང་ཞེས་བྱ་བའི་སྒྲས་ནི་མཚམས་ཀྱི་ནང་དུ་ཡང་མི་འཆགས་ཏེ། འབའ་ཞིག་གིས་བྱིན་གྱིས་

རློབ་པ་ནི་མི་མཐུན་པ་ཉིད་ཡིན་པའི་ཕྱིར་རོ། །འདི་སྐད་བསྟན་ཏེ། མཚམས་ཀྱི་ཕྱི་རོལ་ལམ་མཚམས་ཀྱི་ནང་དུ་འདུ་ཤེས་པའི་གང་ཟག་རྣམས་ཀྱིས་མི་མཐུན་པས་བྱིན་གྱིས་རློབ་པ་མི་འཆགས་ན། མཚམས་ཀྱི་ཕྱི་རོལ་དུ་འདུ་ཤེས་པ་དག་གིས་ལྟ་མི་འཆགས་པ་སྨོས་ཀྱང་ཅི་དགོས་ཏེ་མི་འཆགས་

པ་མི་བྱའོ་ཞེས་སྤྱིར་བསྟན་པ་དེས་འདི་ལ་ཉེས་བྱས་སུ་ཤེས་པར་བྱའོ། །ཡིད་གཉིས་ཟ་ན་ཡང་ཡིད་གཉིས་ནི་འདུ་ཤེས་དང་འདྲའོ་ཞེས་སྤྱིར་བསྟན་པ་དེས་དེ་ལ་ཡང་ཉེས་བྱས་སུ་འགྱུར་བར་ཤེས་པར་བྱའོ། །ཕྱི་རོལ་དུ་མཚམས་ཀྱི་ནང་དུ་འདུ་ཤེས་པའམ། ཡིད་གཉིས་ཟ་བས་རྐུ་སེམས་ཀྱིས་བྱིན་

གྱིས་རློབ་པར་བྱེད་ན། རྐུ་སེམས་དེ་ལ་ཉེས་པ་སྦོམ་པོར་འགྱུར་རོ། །མཚམས་ཀྱི་ནང་དུ་རྐུ་སེམས་ཀྱིས་བྱིན་གྱིས་རློབ་པར་བྱེད་ན། བརྐུས་པའི་མདུན་རོལ་དུ་དེ་ལ་ཡང་ཉེས་པ་སྦོམ་པོར་འགྱུར་རོ། །བརྐུས་པ་ཉིད་ན་ནི་དངོས་པོ་ལས་རྣམ་པར་གཞག་གོ། །དབྱུང་བ་དང་རིམ་གྲོ་དང་ཆོས་མཉན་པ་དང་ཡོན་

བཤད་པ་མ་བྱས་པར་བྱིན་གྱིས་བརླབ་པར་མི་བྱའོ་ཞེས་བྱ་བ་ནི། མཚམས་དེར་ཤི་ན་ཤི་བའི་རོ་དབྱུང་བ་ལ་སོགས་པ་མ་བྱས་པར་ཤི་བའི་ཡོ་བྱད་བྱིན་གྱིས་བརླབ་པར་མི་བྱའོ། །ལྷུང་བཟེད་དང་ཆོས་གོས་ཁྱིམ་གཞན་ན་འདུག་པ་ཉིད་ནི་ཁྱིམ་བདག་གིས་གང་ལ་བྱིན་པ་དེ་དབང་བ་ཉིད་ཡིན་ནོ་ཞེས་བྱ་བ་ནི།

གལ་ཏེ་ཤི་བའི་ལྷུང་བཟེད་དང་ཆོས་གོས་ལ་སོགས་པ་ཁྱིམ་པ་གཞན་ན་འདུག་པར་གྱུར་ན་དེ་དག་ནི་ཁྱིམ་བདག་དེས་རབ་ཏུ་བྱུང་བ་གང་ལ་བྱིན་པའི་རབ་ཏུ་བྱུང་བ་དེ་དབང་བ་ཉིད་ཡིན་ནོ། །གལ་ཏེ་དབང་ཞིང་དེས་ཕོངས་པ་ཡིན་ནོ་ཞེས་བྱ་བ་ནི། ཁྱིམ་བདག་དེས་རབ་ཏུ་བྱུང་བ་གང་ལ་བྱིན་པའི་རབ་ཏུ་བྱུང་

Vol. 163 · folio 182a

བ་དེ་ཡང་གལ་ཏེ་མཚན་མཐུན་པ་ཞེས་བྱ་བ་ལ་སོགས་པ་རྣམས་པ་ལྔར་སྨོས་པ་དག་གིས་དབང་བ་ཉིད་ཡིན་ཞིང་ལྷུང་བཟེད་ལ་སོགས་པའི་དངོས་པོ་དེས་ཀྱང་ཕོངས་པ་ཡིན་ན་དེས་དེའི་ཚེ་བླང་བར་བྱའོ། །གལ་ཏེ་ཁྱིམ་བདག་སྦྱིན་པའི་ཕྱིར་འཇུག་པར་མི་བྱེད་ན་དེའི་ཚེ་སུ་དབང་བ་ཉིད་

ཡིན་ཞེ་ན་དེའི་ཕྱིར། སྦྱིན་པར་མི་བྱེད་ན་བསླངས་པ་དང་ལྡན་པའོ་ཞེས་བྱ་བ་སྨྲས་ཏེ། འདིར་ཡང་དབང་ཞིང་དེས་ཕོངས་པར་ཞེས་བྱ་བར་སྦྱར་བར་རིག་པར་བྱའོ། །ཁྱིམ་བདག་གི་རང་དགར་སྦྱིན་པར་མི་བྱེད་ན་དེའི་ཚེ་དེ་དབང་ཞིང་དེས་ཕོངས་པའི་རབ་ཏུ་བྱུང་བ་གང་གིས་ཁྱིམ་བདག་དེ་ལ་བསླངས་པ་དང་

ལྡན་པ་དེ་དབང་བ་ཉིད་ཡིན་ནོ། །ཅིག་ཅར་བསླངས་ན་ནི་སྤྱིར་དབང་ངོ་། །མཐར་གྱིས་ན་དང་པོའོ་ཞེས་བྱ་བ་ནི། མཐར་གྱིས་སློང་ན་དང་པོར་གང་གིས་བསླངས་ན་དེར་དབང་བ་ཉིད་ཡིན་ནོ། །གལ་ཏེ་ལེན་པ་མེད་དམ་ལེན་པ་ཡོད་ཀྱང་རུང་སྟེ། ཁྱིམ་བདག་གིས་གང་ཟག་གང་ལ་ཡང་བྱེ་བྲག་ཏུ་མ་བྱས་

པར་སུ་ཁྱེར་བ་ཁྱེར་ཅིག་སྙམ་དུ་བོར་བར་གྱུར་ན་དེ་ལ་སུ་དབང་བ་ཉིད་ཡིན་ཞེ་ན། དེའི་ཕྱིར་མེད་པ་ཉིད་ཡིན་ཞིང་མ་བསྔོས་པར་པོར་ན་སོང་བ་དང་ལྡན་པའོ་ཞེས་བྱ་བ་སྨྲས་ཏེ། ལེན་པ་མེད་ཅིང་གང་ཟག་ལ་བྱེ་བྲག་ཏུ་མ་བསྔོས་པར་བོར་ན་དེའི་ཚེ་དང་པོར་དེར་སོང་བ་ནི་སོང་བ་དང་ལྡན་པ་ཞེས་བྱ་བ་སྟེ། དེ་

དབང་བ་ཉིད་ཡིན་ནོ། །དེའི་ཕྱིར་དེ་ནི་མཐར་གྱིས་དང་འདྲའོ་ཞེས་བྱ་བ་སྨྲས་ཏེ། ཇི་ལྟར་མཐར་གྱིས་སློང་བ་ལ་དང་པོར་གང་གིས་བསླངས་པ་དབང་བ་དང་འདྲ་བར་འདིར་ཡང་དེ་བཞིན་ནོ། །བུ་ལོན་པ་བྱུང་བ་ན་དེ་ལ་གཞལ་བར་བྱ་བའི་ཚད་ཀྱི་ཤི་བའི་ཡོ་བྱད་དེ་དབང་བ་ཉིད་ཡིན་ནོ་ཞེས་བྱ་བ་ནི། གལ་

ཏེ་ཤི་བའི་འོག་ཏུ་བུ་ལོན་པ་བྱུང་ན་དེའི་ཚེ་བུ་ལོན་པ་དེ་ལ་ཤི་བ་དེས་གཞལ་བར་བྱ་བའི་རྫས་ཀྱི་ཚད་ཀྱི་ཤི་བའི་ཡོ་བྱད་བུ་ལོན་པ་དེ་དབང་བ་ཉིད་ཡིན་ནོ། །མ་བགོས་པར་བྱུང་ན་དེ་ལ་གཞལ་བར་བྱ་བ་ཉིད་ཡིན་གྱི་བགོས་པའི་འོག་ཏུ་བྱུང་ན་ནི་དེ་ལ་མི་གཞལ་བར་བྱ་བ་ཉིད་དོ་སྙམ་དུ་དོགས་པ་བསལ་བའི་

ཕྱིར་བགོས་ན་ཡང་ངོ་ཞེས་བྱ་བ་སྨྲས་ཏེ། གཞལ་བར་བྱ་བ་ཉིད་དོ་ཞེས་བྱ་བར་སྦྱར་རོ། །དེ་དང་ལྷན་ཅིག་རྣམ་པར་གཞག་པ་དེ་ལ་སྦྱིན་པར་བྱ་བ་ཉིད་དམ་བླང་བར་བྱ་བ་ཉིད་གང་ཡིན་པ་སྟེ། དེ་ཉིད་མ་ཡིན་ནོ་ཞེས་བྱ་བ་ནི། ཤི་བ་དེ་དང་བུ་ལོན་དེད་པ་དང་བུ་ལོན་འཇལ་བར་ལྷན་ཅིག་རྣམ་པར་གཞག་པ་

Vol. 163 · folio 182b

ཞེས་བྱ་བ་མངོན་སུམ་དུ་འཐམས་པ་དགེ་སློང་གིས་བུ་ལོན་དེད་པ་ལ་ཕར་གཞལ་བར་བྱ་བའི་རིན་དང་། བུ་ལོན་འཇལ་བ་ལས་དགེ་སློང་གིས་ཚུར་བླང་བར་བྱ་བའི་སྤུ་གྱུར་པ་གང་ཡིན་པ་དེ་ཉིད་གཞལ་བ་དང་བླང་བར་བྱའི། ཤི་བ་དེས་བུ་ལོན་དད་པ་ལས་རྫས་གང་བླངས་པ་དང་བུ་ལོན་འཇལ་བ་ལ་གང་

གཏད་པ་དེ་ཉིད་དངོས་སུ་གཞལ་ཞིང་བླང་བར་མི་བྱ་བའོ། །དཔེར་ན་ཤི་བས་ཚོང་བ་ལས་རས་ཡུག་ཆེན་བླངས་ཏེ་རིན་སྦྱིན་པར་བྱའོ་ཞེས་འཐམས་པ་ལ་ནི་རིན་སྦྱིན་པར་བྱའི། རས་ཡུག་ཆེན་དངོས་སྦྱིན་པར་མི་བྱ་བ་དང་། ཐག་པ་ལ་རས་ཡུག་ཆེན་གྱི་དོན་དུ་རྒྱུ་སྤུན་གཏད་པ་ལས་ནི་རས་ཡུག་ཆེན་བླང་

བར་བྱའི། རྒྱུ་སྤུན་བླང་བར་མི་བྱ་བ་ལྟ་བུའོ། །འདིར་གཞུང་ནི་དགེ་སློང་དག་གིས་ཕྲ་བ་བཀུག་པ་དང་། དེ་ན་རེ་འཕགས་པ་དག་བདག་གིས་དེ་ལ་སྦོམ་པོར་དབུལ་བར་བགྱི་བ་ལགས་སོ་ཞེས་ཟེར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལ་དགེ་སློང་ཤི་བས་ཅི་འདྲ་བ་གཏད་པས་དགུག་

པར་བྱའོ་ཞེས་གསུངས་པ་ཡིན་ནོ། །དེས་ཚངས་པ་མཚུངས་པར་སྤྱོད་པ་རྣམས་ལ་བུ་ལོན་ཆགས་པ་ཉིད་དུ་མི་འགྱུར་རོ་ཞེས་བྱ་བ་ནི། ཤི་བ་ལ་བུ་ལོན་ཆགས་པ་དེས་ཚངས་པ་མཚུངས་པར་སྤྱོད་པ་རྣམས་ལ་བུ་ལོན་ཆགས་པ་ཉིད་དུ་མི་འགྱུར་བ་སྟེ། ཚངས་པ་མཚུངས་པར་སྤྱོད་པ་དག་གིས་རང་གི་

ལྷུང་བཟེད་དང་ཆོས་གོས་ཀྱིས་ཤི་བ་དེའི་བུ་ལོན་གཞལ་བར་མི་བྱའོ་ཞེས་བྱ་བའི་ཐ་ཚིག་གོ།། །།བམ་པོ་ལྔ་བཅུ་གསུམ་པ། ལག་གི་བླས་དཀོན་མཆོག་གི་བླངས་པ་ཉིད་ཡིན་ན་དེའི་ཇི་སྙེད་པ་དེ་སྙེད་མཉམ་པར་བསབ་པོ་ཞེས་བྱ་བ་ནི། གང་ཟག་ལག་གི་བླས་དཀོན་མཆོག་གསུམ་གྱི་

དཀོར་བླངས་ཤིང་ཁྱེར་བ་ཉིད་ཡིན་ན། དཀོན་མཆོག་དེའི་དཀོར་ཇི་སྙེད་བླངས་པ་དེ་སྙེད་ལག་གི་བླ་དེའི་ཤི་བའི་ཡོ་བྱད་ལས་ཆ་མཉམ་པར་བྱས་ཏེ། དཀོན་མཆོག་ལ་དབུལ་ཞིང་དཀོར་བསབ་པར་བྱའོ། །འདི་ལྟར་གཙུག་ལག་ལས། གལ་ཏེ་དགེ་འདུན་གྱི་ནི་མཆོད་རྟེན་གྱིར་བྱེད། མཆོད་རྟེན་གྱི་ནི་དགེ་

འདུན་གྱིར་བྱེད་ཅིང་དེ་བཞིན་དུ་ཆོས་ཀྱི་ཡང་འདྲེས་པར་བྱེད་ན། དེའི་ལྷུང་བཟེད་དང་ཆོས་གོས་ལས་ཆ་གསུམ་དུ་བྱས་ཏེ། ཇི་སྙེད་བླངས་པ་དེ་སྙེད་དེར་དབུལ་ཞིང་ལྷག་མ་དགེ་འདུན་ལ་དབུལ་ལོ་ཞེས་གསུངས་མོད་ཀྱི། དེ་ནི་ཐ་མལ་པའི་ཤེས་པས་གཟུང་བར་དཀའ་ལ། འདི་ལ་ལྷག་པར་ཕུལ་བ་ཡང་ཉེས་

Vol. 163 · folio 183a

པ་མེད་པས། དེའི་ཕྱིར་ཐམས་ཅད་འགེད་ལ་རག་གོ། །ལག་གི་བླ་ཞེས་སྨོས་པ་ནི་དཔེ་ཙམ་དུ་ཟད་དེ་འདི་ལྟར་གཞན་དག་གིས་བརྐུས་ན་དེ་དག་ལ་ཡང་དེ་བཞིན་བྱར་རུང་ངོ་། །ལག་གི་བླ་ཞེས་བྱ་བ་ནི། ལས་སར་པ་ལ་སྦྱོར་དུ་འཇུག་པས་ལག་གི་བླ་ཞེས་བྱའོ། །ནད་གཡོག་དང་བཅས་པ་

ཉིད་ཡིན་ན་ཡོ་བྱད་དྲུག་དེ་དབང་བ་ཉིད་ཡིན་པས་བྱིན་གྱིས་བརླབ་པར་མི་བྱ་བ་ཉིད་དོ་ཞེས་བྱ་བ་ནི། གལ་ཏེ་ཤི་བ་དེ་ནད་གཡོག་དང་བཅས་པ་ཉིད་ཡིན་ན། ཤི་བ་དེའི་ཡོ་བྱད་དྲུག་ནི་ནད་གཡོག་དེ་དབང་བ་ཉིད་ཡིན་པས། དགེ་སློང་རྣམས་ཀྱིས་བྱིན་གྱིས་མི་བརླབ་པར་བྱ་བ་ཉིད་ཡིན་ནོ། །ཡོ་བྱད་དྲུག་ནི་ཆོས་

གོས་གསུམ་དང་སྟན་དང་ལྷུང་བཟེད་དང་ཆུ་ཚགས་སོ། །དེ་ནི་རབ་དང་འབྲིང་དང་ཐ་མ་དང་བཅས་པ་ལས་སོ་ཞེས་བྱ་བ་ནི། དེ་དབང་བ་ཉིད་དོ་ཞེས་བྱ་བར་སྦྱར་ཏེ། ནད་གཡོག་དེ་ལ་ཡོ་བྱད་དྲུག་པོ་དག་ལས་ཁ་ཅིག་ནི་དགེ་སྦྱོང་གི་ཡོ་བྱད་དང་འཚོ་བའི་ཡོ་བྱད་རབ་ལས་སྦྱིན་པར་བྱའོ། །ཁ་ཅིག་ནི་འབྲིང་།

ཁ་ཅིག་ནི་ཐ་མ་དང་ལྡན་པ་ལས་སྦྱིན་པར་བྱའོ། །དུ་མ་ཉིད་ཡིན་ན་དེ་ཐུན་མོང་ངོ་ཞེས་བྱ་བ་ནི། ནད་གཡོག་གཉིས་སམ་གསུམ་མམ་མང་པོ་ཉིད་ཡིན་ན་ཡོ་བྱད་དྲུག་པོ་དེ་དེ་དག་ནི་ཐུན་མོང་ཡིན་ནོ། །དེའི་དོན་དུ་སོང་བ་ཉིད་ཡིན་ལ་ནད་པ་ཤི་ན་སྦྱིན་པར་བྱ་བ་ཉིད་དོ་ཞེས་བྱ་བ་ནི། ནད་གཡོག་ནད་པ་དེའི་

དོན་དུ་གཞན་དུ་སོང་བ་ཉིད་ཡིན་ལ། ཕྱི་ནས་ནད་པ་ཤི་བར་གྱུར་ན་ཡང་ཡོ་བྱད་དྲུག་པོ་སྦྱིན་པར་བྱ་བ་ཉིད་ཡིན་ནོ། །གལ་ཏེ་ནད་པའི་ཕྱིར་ནད་གཡོག་གཞན་དུ་སོང་བར་གྱུར་ན་དེ་ལྟ་ན་ཡང་ཡོ་བྱད་དྲུག་པོ་སྦྱིན་པར་བྱ་བ་ཉིད་ཡིན་གྱི་གཞན་དུ་མ་ཡིན་ནོ་ཞེས་བྱ་བའི་ཐ་ཚིག་གོ། །རྫས་དེ་མི་དབང་བ་ལ་ནི་དེ་མི་

སྦྱིན་ནོ་ཞེས་བྱ་བ་ནི། ཤི་བའི་རྫས་དེ་མི་དབང་བ་ཁྱིམ་པ་ལ་སོགས་པའི་གཡོག་ལ་ནི་ཡོ་བྱད་དྲུག་པོ་དེ་མི་སྦྱིན་པའོ། །འདིར་གཞུང་ནི་བཙུན་པ་བྲོ་གཡོག་ཁྱིམ་པ་ལགས་ན། དེ་ལ་བྲོ་གཡོག་གི་ཆོས་གོས་སྩལ་བར་བགྱིའམ། བཀའ་སྩལ་པ་མི་བྱའོ། །དེ་བཞིན་དུ་ནད་གཡོག་དགེ་སློང་མ་དང་དགེ་

སློབ་མ་དང་དགེ་ཚུལ་མ་ལ་ཡང་མི་སྦྱིན་ནོ་ཞེས་རྒྱ་ཆེར་གསུངས་པ་ཡིན་ནོ། །གང་ན་མཚན་མི་མཐུན་པ་དག་འབའ་ཞིག་ཡོད་ལ་མཚན་མཐུན་པ་དག་མེད་པ་དེར་ནི་མཚན་མི་མཐུན་པ་དག་ལ་ཡང་སྦྱིན་པར་བྱ་བ་ཉིད་ཡིན་ཏེ། དེ་དག་དེ་དབང་བའི་ཕྱིར་རོ། །གཞན་དུ་གནས་པར་ཁས་བླངས་པ་ལ་མི་སྦྱིན་པར་མི་

Vol. 163 · folio 183b

བྱའོ་ཞེས་བྱ་བ་ནི། ནད་གཡོག་གནས་གཞན་དུ་གནས་པར་ཁས་བླངས་པ་ལ་ཡོ་བྱད་དྲུག་པོ་དག་མི་སྦྱིན་པར་མི་བྱ་ཞིང་སྦྱིན་པར་བྱ་སྟེ། འདི་ལྟར་གཞན་དུ་གནས་པར་ཁས་བླངས་པ་ནི་མི་སྦྱིན་པའི་རྒྱུ་མ་ཡིན་པའི་ཕྱིར་རོ། །འདི་ལ་བསྙེན་པར་མ་རྫོགས་པ་ནི་ཐམས་ཅད་དབང་བ་ཉིད་དོ་ཞེས་བྱ་བ་ནི། ཤི་བའི་ཡོ་བྱད་

བགོ་བ་འདི་ལ་བསྙེན་པར་མ་རྫོགས་པ་ནི་སོ་སོའི་སྐལ་བའི་ཆ་ཐམས་ཅད་བསྙེན་པར་རྫོགས་པ་དང་མཉམ་པར་དབང་སྟེ། དབྱར་གྱི་རྙེད་པ་ལ་སོགས་པ་གཞན་དག་ལ་སུམ་ཆ་དབྲི་བ་ལྟ་བུ་མ་ཡིན་ནོ། །ནད་པས་སྨྲས་པ་སྦྱིན་པ་ཕྲི་ཡང་ཇི་སྐད་སྨྲས་པ་བཞིན་དུ་བྱ་བ་ཉིད་དོ་ཞེས་བྱ་བ་ནི། ནད་པས་ནད་གཡོག་

གམ་གཞན་གང་ལ་སྨྲས་པའི་གང་ཟག་དེས་སྦྱིན་པ་ཕྲི་ཡང་ནད་པས་ཇི་སྐད་སྨྲས་པ་ཁོ་ན་བཞིན་བྱ་དགོས་སོ། །ཇི་སྐད་བསྟན་ཏེ། གལ་ཏེ་ནད་པ་གང་ཟག་འགའ་ཞིག་ལ་དངོས་པོ་འགའ་ཞིག་བྱིན་ཅིག་ཅེས་ནད་གཡོག་གམ་གཞན་ལ་གཏད་པ་ལས་ནད་གཡོག་གམ་གཞན་དེས་ཕྲིར་ཟིན་ཀྱང་དེ་ལྟར་མི་བྱ་བར་

སྔར་ནད་པས་བསྒོ་བ་ཁོ་ན་བཞིན་དུ་བྱ་དགོས་ཏེ་ཤི་བས་སྔར་ལྟོས་པ་མེད་པར་བྱིན་ཟིན་པའི་ཕྱིར་རོ། །ཤི་བ་ཉིད་ཀྱི་དུས་ན་རྫས་ཉིད་སྒྲུབ་པ་ལ་ནི་ནོར་བདག་མི་དབང་ངོ་ཞེས་བྱ་བ་ནི། ནད་པས་བདག་ཤི་བར་གྱུར་ན་དེའི་འོག་ཏུ་གཟོད་རྫས་འདི་ཉིད་གང་ཟག་ཆེ་གེ་མོ་ཞིག་ལ་སྦྱིན་པར་གྲུབ་པ་ལ་ནི་ཤི་བ་དེ་ནོར་

བདག་ཏུ་མི་འགྱུར་བས་ནོར་དེ་དེ་ལ་མི་སྦྱིན་པར། དགེ་འདུན་གྱིས་བྱིན་གྱིས་བརླབ་པར་བྱའོ། །འདི་སྐད་བསྟན་ཏེ། གལ་ཏེ་བདག་ཤི་བར་གྱུར་ན་དེའི་ཚེ་ཆེ་གེ་མོ་ཞིག་ལ་བདག་གི་རྫས་འདི་སྦྱིན་པར་བྱ་ཞེས་ཟེར་བའི་རབ་ཏུ་བྱུང་བ་ནི་ནོར་དེའི་བདག་པོར་མི་འགྱུར་ཏེ། ཤི་བའི་ནོར་དེ་རབ་ཏུ་བྱུང་བ་གཞན་

དབང་བས་དེ་དག་གིས་དེ་བྱིན་གྱིས་བརླབ་པར་བྱ་བ་ཉིད་ཡིན་ནོ། །ཁྱིམ་ན་གནས་པ་ནི་དབང་ངོ་ཞེས་བྱ་བ་ནི། ཁྱིམ་པ་ནི་གལ་ཏེ་བདག་ཤི་བར་གྱུར་ན་དེའི་འོག་ཏུ་གཟོད་རྫས་འདི་ཉིད་གང་ཟག་ཆེ་གེ་མོ་ཞིག་ལ་སྦྱིན་པར་བསྒྲུབ་ན། དེ་ཤི་བའི་ཚེ་ཡང་ནོར་དེའི་བདག་པོར་འགྱུར་རོ། །འདིར་གཞུང་ནི་

ཕྲན་ཚེགས་དག་ལས་ཁྱིམ་པ་དག་ནི་ལྟོས་པ་དང་བཅས་པས་དུས་བྱེད་པ། རབ་ཏུ་བྱུང་བ་དག་ནི་ལྟོས་པ་མེད་པས་དུས་བྱེད་པའི་ཕྱིར་རོ་ཞེས་གསུངས་པ་ཡིན་ཏེ། དེ་ལྟ་བས་ན་ཁྱིམ་པ་ནི་ལྟོས་པ་དང་བཅས་པའི་ཕྱིར་དབང་ལ། རབ་ཏུ་བྱུང་བ་ནི་ལྟོས་པ་མེད་པའི་ཕྱིར་མི་དབང་ངོ་། །ཁྱིམ་པས་བུ་དང་ཆུང་མ་

Vol. 163 · folio 184a

ཕུལ་ནས་ཤི་ན་ཅི་བདེར་བྱའོ་ཞེས་བྱ་བ་ནི། ཁྱིམ་པས་དགེ་འདུན་ལ་བུ་དང་ཆུང་མ་ཕུལ་ནས་ཁྱིམ་པ་ཉིད་ཤི་ན་དེའི་བུ་དང་ཆུང་མ་དག་ཅི་བདེར་བྱ་སྟེ། བདག་གིར་མི་བྱའོ་ཞེས་བྱ་བའི་ཐ་ཚིག་གོ། །གླང་པོ་ཆེ་དང་རྟ་དང་བོང་བུ་དང་དྲེའུ་དང་གོ་ཆ་རྣམས་ནི་རྒྱལ་པོ་ལ་དབུལ་ལོ་ཞེས་བྱ་བ་ནི།

གླང་པོ་ཆེ་ལ་སོགས་པ་ནི་རྒྱལ་པོ་ལ་དབུལ་ལོ། །དབྱིག་དང་གསེར་དང་གཞན་བྱས་པ་དང་མ་བྱས་པ་རྣམས་ནི་གསུམ་ལའོ་ཞེས་བྱ་བ་ནི་དབུལ་ལོ་ཞེས་བྱ་བར་སྦྱར་ཏེ། དབྱིག་དང་གསེར་དང་དེ་དག་ལས་གཞན་པ་ཟངས་ཀྱི་རང་བཞིན་ལ་སོགས་པ་བརྡུངས་སུ་བྱས་པ་དང་མ་བྱས་པ་རྣམས་ནི་དཀོན་མཆོག་

གསུམ་ལ་དབུལ་ལོ། །རིན་པོ་ཆེ་རྣམས་ཀྱང་ཞེས་བྱ་བ་ནི། ནོར་བུ་དང་བཻ་ཌཱུརྱ་དང་དུང་གཡས་སུ་འཁྱིལ་བ་ལ་སོགས་པ་དག་ཀྱང་དཀོན་མཆོག་གསུམ་ལ་དབུལ་ལོ། །མུ་ཏིག་རྣམས་ནི་གལ་ཏེ་གཞན་ཡོད་ན་དེའི་སྐལ་བས་སམ་ལྷག་པ་ཉིད་ཡིན་ན་ཡང་རུང་གལ་ཏེ་མེད་ཀྱང་དེ་བཞིན་དུ་སངས་རྒྱས་ལའོ་

ཞེས་བྱ་བ་ནི། མུ་ཏིག་རྣམས་ནི་གལ་ཏེ་མུ་ཏིག་ལས་གཞན་པ་བཻ་ཌཱུརྱ་ལ་སོགས་པའི་རིན་པོ་ཆེ་ཡོད་ན་དཀོན་མཆོག་གསུམ་པོ་དག་ལས་སངས་རྒྱས་དེའི་སྐལ་བས་མུ་ཏིག་རྣམས་བརྗེས་ཏེ་སངས་རྒྱས་བཅོམ་ལྡན་འདས་ལ་དབུལ་བར་བྱའོ། །སངས་རྒྱས་ཉག་གཅིག་གི་སྐུ་སྐལ་གྱི་རིན་པོ་ཆེ་གཞན་དག་པས་མུ་

ཏིག་རིན་ཆེ་བའི་ཕྱིར་མུ་ཏིག་ལྷག་པ་ཉིད་ཡིན་ཡང་རུང་སྟེ། དེ་ལྟ་ན་ཡང་མུ་ཏིག་དེ་དག་ཐམས་ཅད་སངས་རྒྱས་ལ་དབུལ་ལོ། །གལ་ཏེ་མུ་ཏིག་ལས་གཞན་པའི་རིན་པོ་ཆེ་མེད་ན་ནི་དེ་བཞིན་དུ་སྐྱིན་པ་མེད་ཀྱང་བླ་སྟེ། དཀོན་མཆོག་གསུམ་ཆར་གྱི་སྐུ་སྐལ་གྱི་མུ་ཏིག་ཐམས་ཅད་སངས་རྒྱས་ཉག་གཅིག་ལ་

དབུལ་ལོ། །ཚོན་རྩི་ཆེན་པོ་རྣམས་ཀྱང་ངོ་ཞེས་བྱ་བ་ནི། གང་ཀུས་དང་མཚལ་དང་མཐིང་ཤུན་ལ་སོགས་པ་ཡང་སངས་རྒྱས་ལ་དབུལ་ལོ་ཞེས་བྱ་བའི་རྗེས་བསྙག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །དེ་དག་ནི་བཏགས་ཏེ་དྲི་གཙང་ཁང་གི་ཞལ་ཞལ་དུ་བྱའོ་ཞེས་བྱ་བ་ནི། སངས་རྒྱས་ལ་ཕུལ་

བའི་མུ་ཏིག་དེ་དག་ནི་བཏགས་ཏེ་དྲི་གཙང་ཁང་གི་ཞལ་ཞལ་དུ་བྱའོ། །དེ་མ་ཡིན་པ་སངས་རྒྱས་ཀྱི་ནི་སྐུ་གཟུགས་དང་དྲི་གཙང་ཁང་དང་མཆོད་རྟེན་གྱི་ཡོ་བྱད་དུ་བྱའོ་ཞེས་བྱ་བ་ནི། མུ་ཏིག་མ་ཡིན་པ་སངས་རྒྱས་ཀྱི་སྐུ་སྐལ་གྱི་རིན་པོ་ཆེ་གཞན་ནི་སྐུ་གཟུགས་ལ་སོགས་པའི་ཡོ་བྱད་དུ་སྦྱར་བར་བྱའོ། །ཆོས་

Vol. 163 · folio 184b

ཀྱིས་ནི་སངས་རྒྱས་ཀྱི་བཀའ་བྲི་བ་དང་སེང་གེའི་ཁྲི་དག་གིའོ་ཞེས་བྱ་བ་ནི། ཡོ་བྱད་དུ་སྦྱར་རོ་ཞེས་བྱ་བར་སྦྱར་ཏེ། ཆོས་ཀྱི་སྐུ་སྐལ་གྱི་རིན་པོ་ཆེ་དག་ནི་དར་མ་བྲི་བ་དང་སེང་གེའི་ཁྲིའི་ཡོ་བྱད་དུ་སྦྱར་བར་བྱའོ། །ཐེག་པ་ནི་སྐུ་གཟུགས་ལའོ་ཞེས་བྱ་བ་ནི། ཁྱོགས་དང་ཤིང་རྟའི་ཐེག་པ་བཞོན་པ་དག་ནི་

སྐུ་གཟུགས་ལ་དབུལ་བའོ། །རྒྱལ་མཚན་དང་དེའི་སྲོག་ཤིང་དག་ནི་རྒྱལ་མཚན་གྱི་དོན་དུའོ་ཞེས་བྱ་བ་ནི། རྒྱལ་མཚན་དང་རྒྱལ་མཚན་གྱི་སྲོག་ཤིང་དག་ནི་རྒྱལ་མཚན་ཉིད་ཀྱི་དོན་དུ་དབུལ་ལོ། །དེར་རུང་བའི་སྲོག་ཤིང་རྣམས་ཀྱང་ངོ་ཞེས་བྱ་བ་ནི། རྒྱལ་མཚན་གྱི་སྲོག་ཤིང་དུ་རུང་བའི་སྲོག་ཤིང་

གཞན་དག་ཀྱང་སྐུ་གཟུགས་ལ་དབུལ་ལོ་ཞེས་བྱ་བའི་རྗེས་བསྙག་པའི་ཕྱིར། ཀྱང་ངོ་ཞེས་བྱ་བའི་སྒྲ་སྨོས་སོ། །གཞན་དག་དང་མཚོན་ཆ་རྣམས་ནི་དགེ་འདུན་ལའོ་ཞེས་བྱ་བ་ནི། དབུལ་ལོ་ཞེས་བྱ་བར་སྦྱར་ཏེ། རྒྱལ་མཚན་གྱི་སྲོག་ཤིང་དུ་རུང་བ་ལས་གཞན་པ་རྒྱལ་མཚན་གྱི་སྲོག་ཤིང་དུ་མི་རུང་བའི་

སྲོག་ཤིང་ཐུང་ངུ་དག་དང་མཚོན་ཆ་རྣམས་ནི་དགེ་འདུན་ལ་དབུལ་ལོ། །དེ་དག་ནི་འཁར་སིལ་གྱི་ཡུ་བ་དང་ཁབ་དང་གྲིའུར་བྱས་ཏེ་བྲིམ་མོ་ཞེས་བྱ་བ་ནི། གཞན་དག་དང་མཚོན་ཆ་དེ་དག་ལས་སྲོག་ཤིང་གཞན་དེ་དག་ནི་འཁར་སིལ་གྱི་ཡུ་བར་བྱ། མཚོན་ཆ་རྣམས་ནི་ཁབ་དང་གྲིའུར་བྱས་ཏེ་དགེ་འདུན་ལ་

བྲིམ་མོ། །དགེ་འདུན་གྱི་གཞན་ནི་གཞག་པ་དང་བགོ་བ་དང་བཟའ་བ་དག་ཏུ་ཅི་རིགས་པར་བྱའོ་ཞེས་བྱ་བ་ནི། དགེ་འདུན་གྱི་སྲོག་ཤིང་དང་མཚོན་ཆ་ལ་སོགས་པ་ཇི་སྐད་སྨོས་པའི་རྣམ་པ་དེ་དག་ལས་གཞན་པ་ཞིང་དང་རས་དང་འབྲས་ལ་སོགས་པ་དག་ནི་གཞག་པར་འོས་པ་དག་ཀྱང་གཞག་པར་བྱའོ། །བགོ་བར་

འོས་པ་དག་ཀྱང་བགོ་པར་བྱའོ། །བཟའ་བར་འོས་པ་དག་ཀྱང་བཟའ་བར་བྱ་སྟེ། དེ་ལྟར་ཅི་རིགས་པར་བྱའོ། །ཞིང་དང་ཁང་ཁྱིམ་དང་ཚོང་ཁང་དང་གནས་མལ་དང་མགར་སྤྱད་དང་གསེར་མགར་གྱི་ལག་ཆ་དང་འདྲེག་མཁན་གྱི་ལག་ཆ་དང་། རྫ་མཁན་གྱི་ལག་ཆ་དང་། ཤིང་མཁན་གྱི་ལག་ཆ་དང་། བསིལ་

ཡབ་མཁན་གྱི་ལག་ཆ་དང་བྲན་དང་བྲན་མོ་དང་ལས་བྱེད་པ་དང་ཞོ་ཤས་འཚོ་བ་དང་བ་ལང་དང་མ་ཧེ་དང་ར་དང་ལུག་དང་སྨན་དང་སངས་རྒྱས་ཀྱི་བསྟན་བཅོས་ཀྱི་གླེགས་བམ་དང་མྱུར་དུ་མི་འགྲུབ་པའི་དམ་རྒྱ་དག་ནི་དང་པོར་འོས་པ་ཉིད་ཡིན་ནོ་ཞེས་བྱ་བ་ནི། དགེ་འདུན་གྱི་ཞིང་ལ་སོགས་པ་འདི་དག་ནི་དང་

Vol. 163 · folio 185a

པོར་འོས་པ་ཉིད་ཡིན་ཏེ། གཞག་པར་འོས་པ་ཉིད་ཡིན་ནོ། །རས་དང་རས་ཡུག་ཆེན་དང་བེའུ་རས་དང་མཆིལ་ལྷམ་དང་ལྷམ་སྒྲོ་གུ་ཅན་དང་འབྲུ་མར་དང་འབྲུ་མར་སྣོད་དང་བྱ་མ་བུམ་དང་རིལ་བ་སྤྱི་བླུགས་དང་གླེགས་བམ་གཞན་དང་དམ་རྒྱ་གཞན་དང་ཚོན་རྩི་གཞན་དག་ནི་གཉིས་པར་

འོས་པ་ཉིད་ཡིན་ནོ་ཞེས་བྱ་བ་ནི། དགེ་འདུན་གྱི་རས་ལ་སོགས་པ་འདི་དག་ནི་གཉིས་པར་འོས་པ་ཉིད་ཡིན་ཏེ། བགོ་བར་འོས་པ་ཉིད་ཡིན་ནོ། །འབྲས་དང་ཏིལ་དང་ནས་དང་མོན་སྲན་སྡེའུ་དང་མོན་སྲན་གྲེའུ་དང་འབྲུ་གཞན་དང་བཟའ་བ་དང་བཏུང་བ་དག་ནི་གསུམ་པར་འོས་པ་ཉིད་ཡིན་ནོ་ཞེས་བྱ་བ་ནི།

དགེ་འདུན་གྱི་འབྲས་ལ་སོགས་པ་འདི་དག་ནི་གསུམ་པར་འོས་པ་ཉིད་ཡིན་ཏེ། བཟའ་བར་འོས་པ་ཉིད་ཡིན་ནོ། །གཞིར་གཏོགས་པའི་གོས་ཀྱི་གཞིའོ་ཞེས་བྱ་བ་ལ་འདུལ་བའི་གཞིར་གཏོགས་པའི་གོས་ཀྱི་གཞི་བཤད་ཟིན་ཏོ།། །།ད་ནི་ཕྲན་ཚེགས་ལ་སོགས་པར་གཏོགས་པའི་གོས་ཀྱི་གཞི་

བསྡུ་བའི་ཕྱིར་གླེགས་བུ་དང་གླེགས་བུ་ཕྱེད་དག་མཉམ་པར་བྱའོ་ཞེས་བྱ་བ་སྨྲས་ཏེ། གླེགས་བུ་རྣམས་ཀྱང་ལོགས་ཤིག་ཏུ་མཉམ་པར་བྱ། གླེགས་བུ་ཕྱེད་རྣམས་ཀྱང་ལོགས་ཤིག་ཏུ་མཉམ་པར་བྱའོ། །གླེགས་བུ་ཡང་གླེགས་བུ་རྣམས་དང་ལྷན་ཅིག་ཚད་མཉམ་པར་བྱ། གླེགས་བུ་ཕྱེད་རྣམས་ཀྱང་གླེགས་བུ་ཕྱེད་རྣམས་

དང་ལྷན་ཅིག་ཚད་མཉམ་པར་བྱ་སྟེ། མཉམ་པ་འདི་ནི་མཛེས་པ་ཉིད་དུ་བྱ་བའི་ཕྱིར་རོ། །གཞལ་བའི་ཕྱིར་དེའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བ་ནི། གླེགས་བུ་དང་གླེགས་བུ་ཕྱེད་གཞལ་བའི་ཕྱིར་དེ་གཉིས་ཀྱི་ཚད་ཀྱི་ཆག་ཤིང་བཅང་བར་བྱའོ། །གལ་ཏེ་ཆག་ཤིང་གཅིག་གིས་གཉི་གའི་དགོས་པ་

འགྲུབ་ན་ནི་གཉིས་མི་དགོས་སོ། །དེ་ལྟར་ཡང་གཞན་ལས་ཆག་ཤིང་གཅིག་ཁོ་ན་བཅང་བར་བྱའོ་ཞེས་གསུངས་ཏེ། བཅོམ་ལྡན་འདས་ཀྱིས་བཀའ་སྩལ་པ། ཆག་ཤིང་བྱ་ཞིང་དེའི་ཚད་ཀྱི་གླེགས་བུ་བྱའོ། །གླེགས་བུའི་ཚད་ཀྱི་གླེགས་བུ་ཕྱེད་གཅད་པར་བྱའོ་ཞེས་གསུངས་པ་ཡིན་ནོ། །ཚལ་བུ་དག་ཀྱང་ངོ་ཞེས་

བྱ་བ་ནི་ཡང་མཉམ་པ་ཉིད་དུ་བྱ་བའོ། །དེའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བ་ནི་གཞལ་བའི་ཕྱིར་ཚལ་བུའི་ཚད་ཀྱི་ཆག་ཤིང་བཅང་བར་བྱ་བའོ། །དེའི་ཆེ་ཚད་ནི་སོར་བཞིའོ་ཞེས་བྱ་བ་ནི། ཚལ་བུ་དེའི་ཆེ་ཚད་ཀྱི་ཞེང་ནི་སོར་བཞིར་བྱའོ། །བྱ་རོག་གི་མཐོ་གང་ཡང་ངོ་ཞེས་བྱ་བ་ཡང་ཚལ་བུ་དེའི་

Vol. 163 · folio 185b

ཆེ་ཚད་ཀྱི་ཞེང་སྟེ། བྱ་རོག་གི་མཐོ་ཞེས་བྱ་བ་ནི་མཛུབ་མོའི་ཚིགས་དབུས་མའི་སྟེང་དུ་མཐེ་བོའི་ཚིགས་དབུས་མའི་ལྟོ་གཏད་དེ་རྒྱ་གྲམ་དུ་བྱ་རྐང་འདྲ་བར་གཞག་སྟེ། དེ་ལྟར་གཞག་པའི་མཐེབ་མཛུབ་གཉིས་ཀྱི་རྩེ་མོའི་བར་གྱི་ཚད་ནི་བྱ་རོག་གི་མཐོ་གང་ཞེས་བྱའོ། །དེ་ལ་དངོས་སུ་ན་སོར་བཞི་ཁོ་ན་ཡོད་དེ།

རྣམ་པ་གཞན་གྱིས་བསྟན་པའི་ཕྱིར་དེ་སྐད་གསུངས་སོ། །ཆུང་ཚད་ནི་སོར་གཉིས་སམ་ཕྱེད་དང་གསུམ་མམ་མཐེབ་སོར་གཅིག་གོ་ཞེས་བྱ་བ་ནི། ཚལ་བུ་ཆུང་ཚད་ཀྱི་ཞིང་ནི་སོར་གཉིས་སམ་སོར་ཕྱེད་དང་གསུམ་མམ་མཐེ་བོའི་སོར་གཅིག་གོ། །གཞུང་ཁ་ཅིག་ལས་ནི་ཆེ་ཚད་ནི་སོར་བཞིའོ། །ཆུང་ཚད་ནི་སོར་ཕྱེད་

དང་གསུམ་མོ། །དེའི་བར་ནི་འབྲིང་ཚད་དོ་ཞེས་འབྱུང་སྟེ། གཞུང་ཁ་ཅིག་ལས་ནི་ཆེ་ཚད་ནི་སོར་བཞིའམ་བྱ་རོག་གི་མཐོ་གང་ངོ་། །ཆུང་ཚད་ནི་སོར་གཉིས་སམ་མཐེ་བོའི་ལྟོ་གང་ངོ་། །དེའི་བར་ནི་འབྲིང་ཚད་དོ་ཞེས་གསུངས་སོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། སོར་བཞི་ནི་ཆོས་གོས་ཆེ་

ཚད་ཀྱིའོ། །སོར་གསུམ་དང་སོར་ཕྱེད་དང་སོར་གཉིས་དང་མཐེབ་སོར་གཅིག་ནི་ཆོས་གོས་ཆུང་ཚད་ཀྱིའོ། །འབྲིང་གི་ནི་བར་མའོ། །ས་ལ་ཆོས་གོས་གདིང་བར་མི་བྱའོ་ཞེས་བྱ་བ་ནི། ས་ལ་ཆོས་གོས་གདིང་བར་མི་བྱ་བའོ། །དེའི་དོན་དུ་གཏན་པ་བྱའོ་ཞེས་བྱ་བ་ནི། ཆོས་གོས་གདིང་བ་དེའི་དོན་དུ་སྲ་བརྐྱང་བྱ་

བའོ། །ཤིང་ལས་བྱས་པའམ་སྨྱིག་མ་ལས་བྱས་པའམ་གྲུ་བཞི་བཏོད་པའི་ཕྱིར་ཐག་གུ་གཞུག་པའི་བུ་ག་བཏོད་པ་ནི་དེ་ཞེས་བྱའོ་ཞེས་བྱ་བ་ནི། ཐང་བཅད་ཅིང་གདིང་བའི་ཕྱིར་ཐག་གུ་གང་ཡིན་པ་དེ་གཞུག་པའི་བུ་ག་གང་ལ་བཏོད་པ་དེ་ནི་གཏན་པ་ཞེས་བྱའོ། །དེའི་ཚད་ཇི་ཙམ་དུ་བྱ་ཞེ་ན་དེའི་ཕྱིར་ཆོས་གོས་ཇི་

ཙམ་པར་རོ་ཞེས་བྱ་བ་སྨྲས་ཏེ། ཆོས་གོས་དང་འཚམ་པའི་ཚད་དུ་བྱའོ། །ཆོས་གོས་ཚད་ཐ་དད་པ་དུ་མ་ཡོད་པས་གཏན་པ་ཡང་དུ་མ་བྱ་དགོས་སོ། །གྲིའུས་དྲའོ་ཞེས་བྱ་བ་ནི་ཆོས་གོས་སོ། །དེ་བཅང་བར་བྱའོ་ཞེས་བྱ་བ་ནི་གྲིའུ་དེའོ། །དེ་དབྱིབས་ཇི་ལྟ་བུར་བྱ་ཞེ་ན་དེའི་ཕྱིར་བྱ་རོག་གི་མཆུ་ལྟ་བུའམ་བྱ་གག་

གི་གཤོག་པ་ལྟ་བུར་རོ་ཞེས་བྱ་བ་སྨྲས་ཏེ། དབྱིབས་དེ་ལྟ་བུར་བྱའོ། །ཅི་ལས་བྱས་པ་ཞེ་ན་དེའི་ཕྱིར། ལྕགས་ལས་བྱས་པ་ལས་གཞན་མ་ཡིན་ནོ་ཞེས་བྱ་བ་སྨྲས་ཏེ། ལྕགས་ལས་བརྡུངས་པ་ནི་ལྕགས་ལས་བྱས་པ་སྟེ། དེ་ལས་གཞན་པ་ལས་མི་བྱའོ། །ཡུ་བ་རྩི་ཅན་དང་ཁྲ་བོ་མི་བཅང་ངོ་ཞེས་བྱ་བ་ནི།

Vol. 163 · folio 186a

གྲིའུའི་ཡུབ་བསེ་རྩི་ཅན་དང་སྲ་རྩི་ལ་སོགས་པ་འཚེར་བག་ཅན་གྱིས་བསྐུས་པ་དང་ཚོན་རིས་དང་འབུར་ཤད་ལ་སོགས་པའི་རི་མོ་ཅན་བཅང་བར་མི་བྱའོ། །སོར་དྲུག་གི་ཚད་ལས་ལྷག་པ་མི་བཅང་ངོ་ཞེས་བྱ་བ་ནི། གྲིའུ་ཡི་སྲིད་ཀྱི་ཚད་སོར་དྲུག་ལས་ལྷག་པར་མི་བཅང་བའོ། །འདིར་

གཞུང་ནི་གྲིའུ་ནི་གསུམ་སྟེ། ཆེན་པོ་དང་འབྲིང་དང་ཆུང་ངུའོ། །ཆེན་པོ་ནི་སོར་དྲུག་གོ། །ཆུང་ངུ་ནི་སོར་བཞིའོ། །དེའི་བར་ནི་འབྲིང་ངོ་ཞེས་གསུངས་པ་ཡིན་ནོ། །ཁ་ཅིག་ལས་ནི་བརྒྱད་ལས་མི་བཅང་ངོ་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་ནི་གྲིའུ་སོར་བརྒྱད་ཀྱི་ཚད་ལས་ལྷག་པ་མི་བཅང་ངོ་ཞེས་

འབྱུང་ངོ་། །འདིར་གཞུང་ནི་ཆེན་པོ་ནི་སོར་བརྒྱད་དོ་ཞེས་གསུངས་པ་ཡིན་ནོ། །སོར་བཞི་པས་ཐུང་བ་ནི་དགོས་པ་མེད་དོ་ཞེས་བྱ་བ་ནི། དེ་བས་ཐུང་བ་ནི་ཅིར་ཡང་མི་མཁོ་བས་དེ་ཡང་བཅང་བར་མི་བྱ་བའོ། །ལྕི་བའི་བྱུག་པས་བསྐུས་པར་བཙེམ་མོ་ཞེས་བྱ་བ་ནི། ཆོས་གོས་སྲ་བརྐྱང་ལ་གྲིའུས་དྲས་པ་བཙེམ་

པའི་གནས་ནི་དངོས་སུ་འམ་བརྒྱུད་པས་རྡུལ་ལྡང་བ་མེད་པར་བྱ་བའི་ཕྱིར་ལྕི་བའི་བྱུག་པས་བསྐུས་པར་བཙེམ་མོ། །འདི་ནི་རྡུལ་གྱིས་མ་རུང་བར་འགྱུར་བ་སྤང་བའི་ཕྱིར་རོ། །ལྕི་བ་མེད་ན་ཆག་ཆག་བཏབ་ཅིང་ཕྱགས་པར་རོ་ཞེས་བྱ་བ་ནི། བ་ལང་གི་ལྕི་བ་མེད་ན་ཆུས་ཆག་ཆག་བཏབ་ཅིང་ཕྱགས་མས་ཕྱགས་པའི་

གནས་སུ་ཆོས་གོས་བཙེམ་མོ། །དེ་བཙེམ་པར་བྱའོ་ཞེས་བྱ་བ་ནི། དགེ་སློང་གིས་ཆོས་གོས་དེ་བཙེམ་དུ་རུང་བའོ། །འདིར་གཞུང་ནི་དགེ་སློང་དག་བྱ་གག་གི་གཤོག་ཤིང་ངམ་སྨྱིག་མའི་ཚལ་བུ་གང་ཡིན་པས་ཆོས་གོས་དག་བཙེམ་པར་བྱེད་དོ་ཞེས་གསུངས་པ་དང་། གཞན་ལས་བཙེམ་པར་འོས་པ་བཙེམ་པར་བྱའོ་ཞེས་

གསུངས་པས་དེའི་ཕྱིར་མདོ་འདི་བྱས་སོ། །ཁབ་ཀྱིས་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བའི་སྒྲས་ནི་བྱ་གག་གི་གཤོག་ཤིང་དང་སྨྱིག་མའི་ཚལ་བུ་འབའ་ཞིག་ཏུ་མ་ཟད་ཀྱི་ཁབ་ཀྱིས་ཀྱང་བཙེམ་དུ་རུང་བའོ། །དྲ་བའི་གཞུང་ནི་དགེ་སློང་དག་ལག་པ་དག་གིས་དྲ་བར་བྱེད་པ་ནི་མ་རུང་བར་གྱུར་ནས། བཅོམ་ལྡན་

འདས་ཀྱིས་བཀའ་སྩལ་པ། གྲིའུས་དྲ་བར་བྱའོ་ཞེས་གསུངས་པ་ཡིན་ནོ། །ཁབ་ཀྱི་གཞུང་ནི་དགེ་སློང་དག་བྱ་གག་གི་གཤོག་ཤིང་དང་སྨྱིག་མའི་ཚལ་བུས་ཆོས་གོས་འཚེམ་པ་ན། བཅོམ་ལྡན་འདས་ཀྱིས་བཀའ་སྩལ་པ། ཁབ་བཅང་བར་བྱའོ་ཞེས་གསུངས་པ་ཡིན་ནོ། །དེ་བཅང་བར་བྱའོ་ཞེས་བྱ་བ་ནི་ཁབ་དེའོ། །

Vol. 163 · folio 186b

ར་གན་དང་ཟངས་དང་འཁར་བ་དང་ལྕགས་ལས་བྱས་པ་ལས་གཞན་པ་མི་བཅང་ངོ་ཞེས་བྱ་བ་ནི། ར་གན་ལ་སོགས་པ་ལས་བྱས་པ་ལས་གཞན་པའི་ཁབ་བཅང་བར་མི་བྱ་བའོ། །ཁ་ཅིག་ལས་ཟངས་དང་ལྕགས་རྣོ་བ་དག་ལས་བྱས་པ་ཞེས་སོ་ཞེས་བྱ་བ་ནི། གཞུང་ཁ་ཅིག་ལས་ཁབ་ནི་རྣོ་ཟངས་དང་རྣོ་

ལྕགས་ལས་བྱས་པ་བཅང་ངོ་ཞེས་འབྱུང་ངོ་། །རྣོ་བ་ཞེས་བྱ་བ་ནི། དེ་གཉིས་ཀྱི་རིགས་ཀྱི་བདག་ཉིད་གཞན་ཞིག་ཡོད་དོ། །དེའི་ཁབ་རལ་སྦུ་གུ་ལྟ་བུའམ་ཆད་པ་ལྟ་བུར་བཅང་བར་བྱའོ་ཞེས་བྱ་བ་ནི། ཁབ་དེའི་ཁབ་རལ་སྦུ་གུའི་རྣམ་པ་ལྟ་བུ་དང་། ཆད་པའི་རྣམ་པ་ལྟ་བུ་གློ་ནས་དབྱེར་རུང་བ་བཅང་བར་

བྱ་བའོ། །དེ་ངོ་ཚ་མེད་པ་དང་དགེ་ཚུལ་དག་ལ་རག་ལས་པར་མི་བྱའོ་ཞེས་བྱ་བ་ནི། ཁབ་རལ་དེ་དགེ་སློང་ངོ་ཚ་མེད་པ་དང་དགེ་ཚུལ་དག་ལ་རག་ལས་པར་མི་བྱ་བའོ། །མི་བཤེས་པ་དང་མི་དྲན་པ་དང་རང་བཞིན་དུ་གནས་པ་མ་ཡིན་པ་དག་ལ་ཡང་ངོ་ཞེས་བྱ་བ་ནི། མི་བཤེས་པ་དང་དྲན་པ་དང་མི་

ལྡན་པ་དང་རང་བཞིན་དུ་གནས་པ་མ་ཡིན་པ་དག་ལ་ཡང་ཁབ་རལ་དེ་རག་ལས་པར་མི་བྱ་བའོ། །ཁབ་དང་གྲིའུ་དག་བཙས་མི་ཟོས་པར་བྱ་བའི་ཕྱིར་སྤྲ་ཚིལ་གྱིས་བསྐུས་པའི་རས་མར་གཞུག་པར་བྱའོ་ཞེས་བྱ་བ་ནི། ཁབ་དང་གྲིའུ་དག་བཙའ་ཞེས་བྱ་བ་མཚོན་གྱི་དྲི་མས་མི་ཟོས་པར་བྱ་བའི་ཕྱིར་སྤྲ་

ཚིལ་གྱིས་བསྐུས་པའི་རས་མར་གཞུག་པར་བྱ་བའོ། །འདིར་གཞུང་ནི་དགེ་སློང་རྣམས་ཀྱི་ཁབ་བཙས་ཟོས་པ་དང་། བཅོམ་ལྡན་འདས་ཀྱིས་བཀའ་སྩལ་པ། རས་མི་སྤྲ་ཚིལ་གྱིས་བསྐུ་བར་བྱ་ཞིང་དེར་ཁབ་དཀྲིས་ཏེ་གཞག་པར་བྱའོ་ཞེས་གསུངས་པ་དང་། ཁ་ཅིག་ལས་ཁབ་དང་མཚོན་གཞག་པར་

བྱའོ་ཞེས་གསུངས་པ་ཡིན་ནོ། །མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་ཏེ་སྒྲོག་གཟུངས་གདགས་སོ་ཞེས་བྱ་བ་ནི། ཆོས་གོས་གྱོན་པ་ལུས་ལས་མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་ཏེ་དེར་སྒྲོག་གཟུངས་གདགས་པའོ། །སྒྲོག་རྟེན་ཅེས་བྱ་བ་ནི། སྒྲོག་གཟུངས་ཀྱི་རྟེན་མ་

ཆོས་གོས་ལ་ལྷན་པ་གྲུ་བཞིས་གླན་པའོ། །སྒྲོག་གཟུངས་ཞེས་བྱ་བ་ནི་འཛིན་པའི་ཐག་གུའོ། །སྒྲོག་གུ་ཡང་ངོ་ཞེས་བྱ་བ་ནི། མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་ཏེ་གདགས་པའོ། །སྒྲོག་གུ་ཞེས་བྱ་བ་ནི་གཟུང་པའི་ཐག་གུའོ། །བཙོ་བླག་མཁན་ལ་གོས་ཁ་བསྒྱུར་བ་དང་ཁ་མ་

Vol. 163 · folio 187a

བསྒྱུར་བ་འཁྲུར་གཞུག་པར་མི་བྱའོ་ཞེས་བྱ་བའི་གཞུང་ནི། དྲུག་སྡེ་དག་བཙོ་བླག་མཁན་དག་ལ་གོས་དག་འཁྲུར་འཇུག་པ་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་གོས་ངུར་སྨྲིག་དག་བཙོ་བླག་མཁན་དག་ལ་འཁྲུར་མི་གཞུག་པར། གཞོང་པ་འཇམ་པོར་

རང་གིས་བཀྲུ་བར་བྱའོ་ཞེས་གསུངས་པ་དང་། དྲུག་སྡེ་དག་གོས་དཀར་པོ་དག་བཙོ་བླག་མཁན་ལ་འཁྲུར་འཇུག་པ་ན། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཐམས་ཅད་ཀྱི་ཐམས་ཅད་དུ་བཙོ་བླག་མཁན་ལ་གོས་འཁྲུར་མི་གཞུག་གོ་ཞེས་གསུངས་པ་ཡིན་ནོ། །དེ་དང་

འདྲ་བར་རང་གིས་མི་བྱའོ་ཞེས་བྱ་བ་ནི། གཙོ་བླག་མཁན་དེ་དང་འདྲ་བར་དགེ་སློང་རང་གིས་བཀྲུ་བར་མི་བྱ་བ་སྟེ། དེ་ནི་བརྡབ་པ་ལ་སོགས་པས་མ་རུང་བར་འགྱུར་བ་སྤང་བའི་ཕྱིར་རོ། །དེའི་ངོགས་སུ་མི་བྱའོ་ཞེས་བྱ་བ་ནི། གཙོ་བླག་མཁན་དེའི་ངོགས་སུ་བཀྲུ་བར་མི་བྱའོ། །ཤིང་གི་ངོས་ལ་མི་བྱའོ་ཞེས་

བྱ་བ་ནི། གོས་བཀྲུ་བར་མི་བྱ་བའོ། །གཞོང་པ་འཇམ་པོར་བཀྲུ་བར་བྱའོ་ཞེས་བྱ་བའི་གཞུང་ནི། གཞོང་པ་འཇམ་པོར་རང་གིས་བཀྲུ་བར་བྱའོ་ཞེས་གསུངས་པ་ཡིན་ནོ། །ཆུ་བདེ་བས་སོ་ཞེས་བྱ་བ་ནི། ཧ་ཅང་ཡང་མི་དྲོ་ཧ་ཅང་ཡང་མི་གྲང་བ་སྟེ་དེ་ནི་དྲི་མ་འདག་པའི་ཐབས་བསྟན་པ་ཡིན་ནོ། །ལག་པ་གཉིས་ཀྱིས་

མཐར་གྱིས་བསྒྱུར་ཞིང་ངོ་ཞེས་བྱ་བ་ནི་ལག་པ་གཉིས་ཀྱིས་མཐར་གྱིས་བསྒྱུར་ཞིང་བཀྲུ་བར་བྱ་བའོ། །མི་ནུས་ན་རྐང་པ་གཉིས་ཀྱིས་སོ་ཞེས་བྱ་བ་ནི། གལ་ཏེ་ལག་པ་གཉིས་ཀྱིས་མི་ནུས་ན་རྐང་པ་གཉིས་ཀྱིས་བཀྲུ་བར་བྱ་བའོ། །དེ་ལྟར་ཁྱིམ་པས་བཀྲུར་རུང་ངོ་ཞེས་བྱ་བ་ནི། ཇི་ལྟར་རང་གིས་བཀྲུ་བའི་ཆོ་ག་

བསྟན་པ་དེ་ལྟར་ཁྱིམ་པས་ཀྱང་བཀྲུར་རུང་བའོ། །དེའི་གཞན་དུ་གྱུར་པར་སྤྱོད་པ་བསྲུང་བར་བྱའོ་ཞེས་བྱ་བ་ནི། ཆོ་ག་ཇི་སྐད་བསྟན་པ་ལས་གཞན་དུ་ཁྱིམ་པ་དེའི་ལོག་པར་སྤྱོད་པར་དགེ་སློང་གིས་བསྲུང་བར་བྱ་བའོ། །འདིར་གཞུང་ནི་གཞན་གྱིས་ལག་པ་གཉིས་ཀྱིས་ཀྱང་མི་ནུས་ལ། རྐང་པ་གཉིས་

ཀྱིས་ཀྱང་མི་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ཞལ་ཏ་བྱས་ཏེ་གཞན་གྱིས་བཀྲུ་བར་བྱའོ་ཞེས་གསུངས་པ་ཡིན་ནོ། །ཕྱག་དར་ཁྲོད་ལེགས་པར་བཀྲུ་བ་དང་བཙེམས་པ་དག་ཁ་བསྒྱུར་བ་བཅང་བར་བྱའོ་ཞེས་བྱ་བ་ནི། ཕྱག་དར་ཁྲོད་ནི་ལེགས་པར་བཀྲུས་པ་དང་། ལེགས་པར་

Vol. 163 · folio 187b

བཙེམས་པ་དང་། ལེགས་པར་ཁ་བསྒྱུར་བར་བྱས་ཏེ་བཅང་བར་བྱའོ། །འདིར་གཞུང་ནི་དགེ་སློང་གིས་ཕྱག་དར་ཁྲོད་མི་གཙང་བས་གོས་པ་དག་བཅང་བར་མི་བྱ་བའོ། །གང་འཆང་ན་ཉེས་བྱས་སུ་འགྱུར་རོ། །ཕྱག་དར་ཁྲོད་པ་དག་ལེགས་པར་བཀྲུས་པ་དང་། ལེགས་པར་བཙེམས་པ་དང་། ལེགས་པར་ཁ་

བསྒྱུར་བ་བྱས་ཏེ་བཅང་བར་བྱའོ་ཞེས་གསུངས་པ་ཡིན་ནོ། །མི་གཙང་བས་གོས་པའི་ཆོས་གོས་མི་བཅང་ངོ་ཞེས་བྱ་བ་ཡང་། མོད་ལ་ལེགས་པར་བཀྲུས་ཏེ་བཅང་བར་བྱའོ་ཞེས་བྱ་བར་སྦྱར་རོ། །ཚོན་བཟང་བ་ཉིད་དུ་བྱ་བའི་ཕྱིར་གྲིབ་མ་དང་ཉི་མ་འདྲོས་པར་བརྡུང་ཞིང་བསྐམ་པར་བྱའོ་ཞེས་བྱ་བའི་གཞུང་ནི།

རྣམ་པར་འབྱེད་པའི་སྟན་གྱི་བསླབ་པའི་གཞི་ལས། པིབ་པ་ལའི་ཚོན་བླངས་ཏེ་ཆམ་ཆོམ་བརྡུང་བར་བྱ་ཞིང་སྐམས་ཏེ་བསྐོལ་བར་བྱའོ་ཞེས་གསུངས་པ་ཡིན་ནོ། །ཚོན་བརྡུང་བ་དང་བསྐམ་པ་དང་གྲིབ་མ་དང་ཉི་མ་འདྲེས་མ་ལ་གཞན་དུ་བྱས་ན་ཉམས་པར་འགྱུར་རོ། །པིབ་པ་ལ་ཞེས་སྨོས་པ་ནི་ཚོན་གཞན་གྱི་

དཔེ་ཡིན་ནོ། །གོས་དག་མེད་པར་བསྐོལ་ལོ་ཞེས་བྱ་བ་ནི། ཚོན་གྱི་ནང་དུ་གོས་དག་མ་བཅུག་པར་བསྐོལ་བར་བྱ་བའོ། །བྱེ་བྲག་གསུམ་མན་ཆད་དུའོ་ཞེས་བྱ་བ་ནི། བསྐོལ་ལོ་ཞེས་བྱ་བར་སྦྱར་རོ། །གང་གི་ཕྱིར་བྱེ་བྲག་གསུམ་མན་ཆད་དུ་བསྐོལ་དགོས་པ་དེའི་ཕྱིར། མང་བ་ཉིད་དུ་འདོད་པ་ཉིད་ཡིན་

ན་ལན་གསུམ་བྱའོ་ཞེས་བྱ་བ་ལ། མང་བའི་དངོས་པོ་ནི་མང་བ་ཉིད་དོ། །དེ་འདོད་པ་ཉིད་ཡིན་ན་ལན་གསུམ་བསྐོལ་བར་བྱའོ། །ཕྱི་མ་ཆེས་ངན་པ་ཉིད་དོ་ཞེས་བྱ་བ་ནི། དང་པོ་བསྐོལ་བ་བས་ཕྱིས་བསྐོལ་བ་ཤོས་ཆེས་ངན་པ་ཉིད་ཡིན་ནོ། །དེའི་ཕྱིར་ཐ་དད་པར་གཞག་གོ་ཞེས་བྱ་བ་ནི། གང་གི་ཕྱིར་ཕྱི་མ་

ཆེས་ངན་པ་ཉིད་ཡིན་པ་དེའི་ཕྱིར་བསྐོལ་བ་རྣམས་སྣོད་ཐ་དད་པར་བླུགས་སོ། །འདི་ནི་དང་པོའོ་ཞེས་བྱ་བ་ལ་སོགས་པའི་ཡི་གེ་བྲིའོ་ཞེས་བྱ་བ་ནི། འདི་ནི་ཚོན་དང་པོའོ། །འདི་ནི་གཉིས་པའོ། །འདི་ནི་གསུམ་པའོ་ཞེས་དང་པོ་ལ་སོགས་པར་བསྐོལ་བའི་ཚོན་ཡོངས་སུ་ཤེས་པར་བྱ་བའི་ཕྱིར་སྣོད་ཀྱི་སྟེང་

དུ་ཡི་གེ་བྲིའོ། །སྔར་དང་པོ་དང་སྦྱར་རོ་ཞེས་བྱ་བ་ནི། སྔར་ཚོན་དང་པོ་བསྐོལ་བ་དང་གོས་རྣམས་སུ་སྦྱར་བར་བྱ་བའོ། །གོས་ཀུན་ནས་བསུབས་པ་ལའོ་ཞེས་བྱ་བ་ནི། ཚོན་ལེགས་པར་འཇེན་པ་ཉིད་དུ་བྱ་བའི་ཕྱིར། ཚོན་གྱིས་ཀུན་ནས་བསུབས་པའི་གོས་དེ་ལ་ཚོན་དང་སྦྱར་བར་བྱའོ། །དེ་ལས་ཐུན་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words