སེང་གེ་ཞབས་འབྲིང་པའི་སྐྱེས་པ་རབས་ཀྱི་ཕྲེང་བ་ཞེས་བྱ་བ

Sanskrit title (Tibetan script, as in the text) ཧ་རི་བྷཊྚ་ནཱ་མ་ཛཱ་ཏ་ཀ་མཱ་ལ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 169 · folio 1b

༄༅༅། །རྒྱ་གར་སྐད་དུ། ཧ་རི་བྷཊྚ་ནཱ་མ་ཛཱ་ཏ་ཀ་མཱ་ལ། བོད་སྐད་དུ། སེང་གེ་ཞབས་འབྲིང་པའི་སྐྱེས་པ་རབས་ཀྱི་ཕྲེང་བ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་

འཚལ་ལོ། །གང་ཞིག་མ་ལུས་ཕ་རོལ་ཕྱིན་པའི་སྟོབས་ཀྱིས་ཐོབ་གྱུར་པའི། །ཞི་བའི་གོ་འཕང་གིས་ནི་མེ་ཏོག་ཏོག་ཅན་སྡུག་བསྔལ་མཛད། །རྣམ་པར་དག་པའི་ཡོན་ཏན་འོད་ཟེར་དཀྱིལ་འཁོར་ཅན་

རྨོངས་ལ། །མུན་པ་སེལ་བར་མཛད་པའི་ཐུབ་པ་དེ་ལ་ཕྱག་འཚལ་ཤོག །སློབ་དཔོན་དཔའ་བོས་མཛད་པའི་སྐྱེས་པའི་རབས་ཀྱི་རྒྱུད་རྣམས་དང་། །གཞན་དག་མཉམ་པ་ཉིད་དུ་རྗེས་སུ་འགྲོ་ཕྱིར་

བྱེད་ནུས་མིན། །བསིལ་བའི་འོད་ཀྱིས་ཀུ་མུ་ད་ནི་སོ་སོར་བྱེད་ནུས་ཀྱི། །སྐར་མའི་ཚོགས་གཞན་གཅིག་ཏུ་བསྡུས་ཀྱང་མི་ནུས་པ་ཉིད་དོ། །སྙན་དངགས་མཁས་ཆེན་རྣམས་ཀྱི་སྙན་དངགས་ཉིད་ནི་འདི་

ཤེས་པས། །ཤིན་ཏུ་ལུང་ལ་མཁས་པར་གྲགས་པ་ཉིད་དུ་དགྲ་འགྲོ་སྟེ། །བྱང་ཆུབ་སེམས་དཔའི་སྤྱོད་པར་གྲགས་པ་ལ་ནི་དེ་ལྟར་ཡང་། །རང་དོན་འདོད་ལ་མཁས་པ་བདག་གིས་འདི་དག་ངེས་

Vol. 169 · folio 2a

པར་སྦྱར། །གལ་ཏེ་འཇིག་རྟེན་བྱ་བ་ལ་རྒོད་བདག་ལ་འདིར་སྐྱོན་གང་། །འོན་ཀྱང་ངོ་ཚ་མེད་པས་སྨྲ་ན་བདེན་པར་བརྗོད་མེད་ཀྱི། །རང་དོན་བསྒྲུབ་པར་འདོད་པ་ཡོན་ཏན་དག་ལ་སྲིད་པ་གང་། །ཐམས་ཅད་བཟོད་

པའི་སྐྱེས་བུས་འབྱུང་བའི་ཕྱིར་ནི་རིག་པ་སྟེ། །ཟས་གཙང་སྲས་ཀྱི་རིག་པ་དང་པོ་བདག་ནི་སྨྲ་བ་ན། །ངེས་པར་ཡོན་ཏན་གྲགས་པ་ལ་མཁས་བདག་གྱུར་ཅིག །གོམས་པ་བསགས་པའི་མཁས་པ་ཉིད་ཀྱིས་རྣམ་པར་དག་པའི་

བློས། །རི་མོ་མཁན་གྱི་གཟུགས་ལྟར་འཇམ་པོ་ཅི་ཞིག་མི་འདྲི་འམ། །ལུས་དང་ངག་དང་ཡིད་དག་གིས་ཀྱང་དགེ་བ་ཡི་ནི་ལས། །སྐྱེས་བུ་ལེ་ལོ་ཅན་གྱི་ཡིད་ཀྱིས་ཐོབ་པར་ནུས་མ་ཡིན། །མེ་ཏོག་དུ་མ་དོན་གཉེར་འབད་མེད་གལ་

ཏེ་འགྱུར་བ་ན། །མེ་ཏོག་ལས་བྱུང་སྦྲང་རྩི་བུང་བས་འཐུང་བར་མི་འགྱུར་རམ། །ཀྱེ་མ་རྒྱལ་བའི་ཡོན་ཏན་བརྗོད་པ་ཆུང་ཡང་དགེ་བའི་ཕྱིར་མི་ནུས། །དེ་སླད་སྙན་དངགས་མཁན་ནི་སུ་ཞིག་གུས་པ་ལྷོད་པར་བྱེད། །རྙེད་པ་ཆེན་པོ་

རྣམ་པར་མཐོང་ན་གཏོང་བ་ཆུང་བ་ནི། །བློ་ནི་རྒྱུ་ཆེན་ལྡན་པས་ཚོང་ཕྱིར་ཐོགས་པར་མི་རིགས་སོ། །དེ་ཕྱིར་རྣམ་པ་གང་གིས་མི་ལུས་ཐོབ་པ་རྟོགས་བྱས་ནས། །བསྟན་པ་འདི་ཡང་དྲང་སྲོང་གི་ནི་རབ་རིབ་བསལ་མཛད་དེ། །ཡུན་

Vol. 169 · folio 2b

རིང་པོས་ཀྱང་མི་འདྲའི་བསྟོད་པ་རྡུལ་གྱིས་ཁྱབ་པ་ཡི། །ཚིག་ནི་སངས་རྒྱས་རྟོགས་པ་བརྗོད་པའི་ཆུ་རྣམས་ཀྱིས་ནི་བཀྲུ་བར་བྱ། །གང་གི་ཕྱིར་ཆོས་ཀྱི་གཏམ་ལ་མཁས་པ་འདི་ནི་མདོ་སྡེའི་རྗེས་སུ་བརྗོད་པས་ཕྱིས་བྱང་ཆུབ་སེམས་དཔའི་སྐྱེས་རབས་རྗེས་སུ་བརྗོད་དེ་རི་མོ་བྲིས་པའི་ཁང་པ་ལ་མར་

མེའི་འོད་དང་འདྲ་བས་བདེ་བླག་ཏུ་གསལ་བར་ཉན་པ་པོའི་སྐྱེ་བོའི་ཡིད་ལ་དགའ་བ་ལྷག་པར་སྐྱེད་པར་བྱེད་པ། ཁམས་གསུམ་དུ་སྐྱེས་པའི་སེམས་ཅན་རྣམས་ཀྱི་སྡུག་བསྔལ་གྱི་རྒུད་པ་བསལ་བར་བྱ་བའི་ཕྱིར་སྨོན་ལམ་ཆེན་པོ་ཡང་དག་པར་བསྐྱེད་པའི་བཅོམ་ལྡན་འདས་ཀྱི་སྤྱོད་པ་རྗེས་

སུ་བརྗོད་པར་འགྱུར་བའི་གཉིད་རྨུགས་པའི་སྐྱོན་བསལ་ནས་ཡིད་མཉམ་པར་གཞག་པའི་ཉན་པ་པོ་རྣམས་ཀྱིས་བདུད་རྩི་བཞིན་དུ་འཐུང་བར་འདོད་པ་རྣམས་ཀྱིས་འཁོར་བའི་སྡུག་བསྔལ་དུ་མ་འཛད་པའི་ཕྱིར་དུ་ཡང་དག་པར་མྱང་བར་བྱའོ། །རྣམ་པ་སྣ་ཚོགས་ཉོན་མོངས་སྦྲུལ་ལྟ་བུའི། །

སྲིད་ཚོགས་ས་འོག་ནས་ནི་འགྲོ་དོན་ཕྱིར། །སངས་རྒྱས་ཉིད་ཕྱིར་སྨོན་ལམ་རྒྱ་ཆེན་པོ། །བདག་ཉིད་ཆེ་མིན་རྣམས་ལ་འབྱུང་བ་མིན། །འདི་ལྟར་རྗེས་སུ་ཐོས་ཏེ། སྔོན་འདས་པའི་དུས་ན་རྟག་ཏུ་མེ་ཏོག་འབྱུང་བའི་སྐྱེད་མོས་ཚལ་ཉམས་དགའ་བ་མཐའ་དང་ལྡན་པ་སྐྱེ་བོའི་ཚོགས་

མཐའ་མེད་པ་ལ་ཀུན་ནས་མི་གནོད་པའི་རྩིག་པའི་ངོས་བཞི་དང་ཚོང་དུས་ན། ནོར་བུ་དང་། གསེར་གྱི་ཀ་བའི་ཕྲེང་བས་ཡིད་འཕྲོག་པར་བྱེད་པའི་ཁང་པ་རྣམས་ཀྱིས་བར་དུ་ཆོད་པ། སྟོན་ཀའི་དུས་པས་ལྷག་པའི་དྲི་མ་དང་བྲལ་བའི་སྐར་མའི་བདག་པོ་དང་། སྐར་མའི་ཚོགས་ཀྱིས་མངོན་པར་

བརྒྱན་པ་མཐོ་རིས་དང་འདྲ་བའི་འོད་དང་ལྡན་པ་འོད་ལྡན་ཞེས་བྱ་བའི་རྒྱལ་པོའི་ཕོ་བྲང་བྱུང་བར་གྱུར་ཏོ། །དེ་ལ་ཡང་མཐའ་དག་གིས་སའི་བུད་མེད་ལ་མུ་ཏིག་གི་ཆུན་པོའི་སྲོག་ཤིང་དུ་གྱུར་པའི་ནོར་བུ་དང་འདྲ་བར་དྲི་མ་མེད་པའི་རབ་ཏུ་སྣང་བས་རབ་སྣང་ཞེས་བྱ་བའི་རྒྱལ་པོ་བྱུང་བར་གྱུར་ཏོ། །

གང་གི་ཁང་པའི་ནང་དུ་དྲི་མེད་ཤེལ་གྱི་རྩིག་ངོས་ལ། །རྣ་བར་མེ་ཏོག་ཕྲེང་དང་ཐིག་ལེ་རབ་ཏུ་སྣང་བ་ཡི། །བུད་མེད་རྣམས་ཀྱི་ལག་པ་འཇམ་པོ་རྒྱན་གྱི་ཆོ་ག་ལྟར། །མེ་ཏོག་འཛིན་པས་ཡོངས་སུ་ངལ་བའི་སྡུག་བསྔལ་འཛིན་མི་འགྱུར། །གང་ཞིག་ཉེ་བ་རྣམས་ནི་ཆུ་འཛིན་དང་འདྲ་

Vol. 169 · folio 3a

མཐོང་བ་སྟེ། །སྦྱིན་པའི་ཆུ་ཡིས་ཡོངས་སུ་འཕེལ་བའི་ས་བོན་ནི། །གང་གི་ཁྲོ་བ་ཡིས་ནི་སྟོབས་དང་ལྡན་པའི་དགྲ་རྣམས་ཀྱང་། །ཉིན་མོ་གློག་གིས་བྱུང་བའི་མེ་ལྟར་བཟོད་པར་མི་འགྱུར་རོ། །དུས་གཅིག་ན་དེ་ལྟ་བུའི་འབྱོར་པ་དང་སྟོབས་འབྱུང་བ་ཉི་མ་ཤར་བའི་རིའི་རྩེ་མོ་

དང་འདྲ་བའི་དྲི་མ་མེད་པའི་ནོར་བུ་སྟོང་ཕྲག་གིས་རྣམ་པར་ཤར་བའི་ལོགས་གཉིས་སུ་སེང་གེའི་ཁྲི་ལྷག་པར་གནས་པའི་སའི་བདག་པོ་དེའི་གནས་ཇི་ལྟ་བ་བཞིན་དུ་བཞུགས་པའི་བྲམ་ཟེ་དང་རྒྱལ་པོ་དང་བློན་པོ་ཆེན་པོ་དང་། །བློན་པོ་དང་ཕོ་ཉའི་ཚོགས་དང་ལྡན་པ། ཐ་མལ་པའི་སྐྱེ་བོ་

ཡོངས་སུ་དོགས་པ་དང་ལྡན་པ་སྒོ་བ་རྣམས་ཀྱིས་བཀག་བཞིན་པ། ཕྱི་རོལ་དུ་ངེས་པར་བཅིངས་པའི་གླང་པོ་ཆེ་དང་རྟ་དང་ཤིང་རྟའི་མཆོག་གི་འདུག་ས་ལ་ཀུན་ནས་གཟིགས་ཤིང་ཀུན་ནས་འོངས་ཏེ། ཞུགས་པ་རྗེས་སུ་གནང་བའི་ནགས་ན་རྒྱུ་བ་རྣམས་ཀྱིས་སའི་སྟེང་དུ་རྣམ་པར་གཞག་

པའི་པུས་མོ་དང་རང་བཞིན་དུ་ཡང་བའི་ཡིད་དང་ལྡན་པའི་ཕྱིར་བརྟབས་པ་དང་ཚིག་མི་གསལ་བ་དང་དོར་བའི་ཚིག་རྣམས་ཀྱིས་ངེས་པར་ཞུས་སོ། །བདག་ཅག་གིས་ནི་ནགས་མཐུག་པ་ལ་གླང་པོ་ཆེ་ཡི་ཚོགས་ནང་ན། །གླང་པོ་མཐོང་སྟེ་ཀུ་མུ་ཏ་ཡི་ཚོགས་ལྟར་དཀར་བ་ཡི་ནི་གཟུགས། །

སར་པའི་ཆུ་འཛིན་ཚོགས་ཀྱིས་འདོར་བར་བྱས་པའི་རྩ་བ་ལ། །ཁ་བ་ཅན་གྱི་རི་ཡི་རྩེ་མོ་དང་མཚུངས་གཟུགས་ཀྱི་བཞིན་དང་ལྡན། །དེ་ནི་དེ་འཛིན་པ་ལ་ལྷ་ཚད་མ་ཡིན་ཞེས་བྱའོ། །དེ་ནས་གཤོལ་གྱི་རྩེ་མོས་རྨོ་བཞིན་པའི་མོ་སྟའི་འབྲས་བུ་དང་ཀུ་ཤའི་རྩྭ་ཡང་ཡང་དག་པར་བྱུང་བའི་ཙག་

ཙག་ཞེས་བྱ་བའི་སྒྲ་དང་ལྡན་པ་འགའ་ཞིག་ཏུ་ཞིང་སྲུང་མའི་ལག་པའི་ཐལ་མོའི་སྒྲས་རྣམ་པར་བསྲེས་པའི་ཏེབ་ཏེབ་ཀྱི་སྒྲས་ཀུན་ནས་སྐྲག་པའི་ཡང་དག་པར་བླངས་པའི་ནེ་ཙོའི་གཤོག་པས་འཕངས་པས་རྣམ་པར་བསྐྱོད་པའི་ཡོངས་སུ་གྱུར་པའི་སྤྲེའུའི་དུམ་བུའི་གོས་ཀྱི་དྲ་བ་ཅན་དང་།

འབྲས་ཁུར་བའི་ཡོངས་སུ་ཚོལ་བར་གྱུར་བའི་ཞིང་པ་རྣམས་དང་། ཉེ་བར་ངེས་པར་འབྲེལ་བའི་སྐྲག་པའི་བྱ་རྒོད་ཅན་དང་། རྫིང་གི་ཆུ་རྙོག་པ་ཅན་ལ་གནས་པའི་སྐྱུག་ལྡད་དུ་གྱུར་པའི་མ་ཧེ་མོའི་རིགས་མཐུན་པའི་ཕྱོགས་ཀྱི་གདོང་གིས་བསྒུལ་བས་བཟློག་པར་བྱས་པའི་དེའི་ཡན་ལག་

Vol. 169 · folio 3b

དང་ལྡན་པ་དང་། ཐོས་བཞིན་པའི་རབ་ཏུ་བསྐྱོད་པའི་བ་གླང་གི་ཚོགས་བསྐྱོད་པའི་སིལ་སིལ་གྱི་སྒྲ་དང་ལྡན་པ་དང་། ཞིང་གི་པདྨ་རྣམས་ཀྱི་སྡོང་བུ་ལྷུང་བས་ངང་སྐྱ་དང་། ངུར་པ་དང་ཁྲུང་ཁྲུང་བཟའ་གཉིས་དང་ལྡན་པ་དང་། གྲོང་དང་། གྲོང་ཁྱེར་དང་ཡང་དག་པར་འབྲེལ་བའི་ཞིང་གི་ས་ལས་

ཤིན་ཏུ་འདས་ནས་དམག་གི་ཚོགས་ཀྱིས་ཀུན་ཏུ་སྐྲག་པས་རྣམ་པར་བྱེར་བར་གྱུར་པའི་རི་དགས་ཀྱི་ཚོགས་ཀྱིས་ཁྱབ་པ་དང་། རྟ་རྣམས་ཀྱི་རྨིག་པས་གཅོད་པར་གྱུར་པའི་རྩྭ་སར་པའི་མྱུ་གུ་ཅན་དེའི་རིའི་ནགས་ཅན་དེའི་སྟོན་ཀའི་དུས་ཡང་དག་པར་བྱུང་བ་ན། གླང་པོ་ཆེ་འཛིན་པས་མངོན་

པར་འཕེལ་བའི་ལྟད་མོ་དང་ལྡན་པའི་ཤིང་རྟ་མཆོག་ལ་ཞོན་པ་གདུགས་དཀར་པོས་ཉིན་མོར་བྱེད་པའི་འོད་ཟེར་གྱིས་ཡང་དག་པར་བཟློག་པར་བྱས་པའི་རྒྱལ་པོ་དེ་ནགས་གཞན་དུ་རབ་ཏུ་ཞུགས་པར་གྱུར་ཏོ། །དེ་ནས་གླང་པོའི་བདག་པོ་རིང་ནས་ཚོགས་ཀྱི་དབུས་སུ་དེར་གནས་པ། །དྲི་ཞིམ་

བསིལ་བའི་དྲི་ལྡན་མེ་ཏོག་ཤིང་དག་དུམ་བུ་བྱེད་བཞིན་པ། །ས་ཡི་བདག་པོས་མཐོང་བར་གྱུར་པ་སྨྱོན་ཆུའི་རི་མོ་ཉེ་བར་གནས་པ་ལ། །བུང་བའི་ཚོགས་ཀྱིས་བསྐོར་ཞིང་རྣ་བ་ཅུང་ཟད་བསྐྱོད་པས་སྡེབས་པར་བྱེད། །དེ་ནས་རེ་ཞིག་གླང་པོའི་བདག་པོ་འདི་དང་བདག་ཅག་གིས་གླང་པོ་

ཆེ་སྨྱོན་པ་འདི་འཐབ་པ་བལྟ་བར་བྱའོ་ཞེས་རྣམ་པར་བསམས་ནས་རྒྱལ་པོ་རབ་སྣང་གིས་ཀུན་ནས་བསྡམས་པ་ཞེས་བྱ་བའི་གླང་པོ་ཆེ་འདུལ་བ་ལ་གླང་པོའི་མཆོག་འདི་ནི་གདོང་གཡོགས་རབ་ཏུ་བསལ་བར་བྱས་ནས་ནགས་ཀྱི་གླང་པོ་ཆེ་དང་ལྷན་ཅིག་འཐབ་པའི་ཕྱིར་ཡང་དག་པར་བསྐུལ་

བར་གྱིས་ཤིག་ཅེས་བསྒོའོ། །ཇི་ལྟར་ལྷས་བཀའ་སྩལ་པ་བཞིན་དུ་བྱའོ་ཞེས་སྣ་བརྐྱང་བས་འཐབ་པ་ལ་སྤྲོ་བ་སྐྱེས་པའི་གླང་པོ་ཆེ་གཞན་གྱི་དམག་ཚོགས་ལྡོག་པར་བྱེད་པ་དེ་ལ་མངོན་དུ་ཕྱོགས་པ་གླང་པོ་ཆེ་འདུལ་བར་བྱེད་པས་བྱེད་པར་འགྱུར་རོ། །དེ་ནས་ཕན་ཚུན་མཐོང་བའི་ཁྲོས་པས་

ཤིན་ཏུ་ལྷག་པའི་མངོན་པར་འཕེལ་བ་སྨྱོན་ཆུའི་ཐིགས་པའི་ཕྲེང་བས་ཀུན་ནས་བརླན་པ་དང་། དྲི་ཞིམ་པར་བྱས་པའི་སའི་རྡུལ་དང་ལྡན་པ་ཀུན་ནས་ལྕི་བའི་མཆེ་བས་ཡང་དག་པར་ཕྲད་པའི་སྒྲས་འཇིགས་པར་བྱེད་པ། འདི་ནི་བྲོས་སོ་བྲོས་སོ་ཞེས་དམག་མིའི་སྐྱེ་བོས་ལྟ་བར་གྱུར་པ་

Vol. 169 · folio 4a

དག་ལ་ཡུན་རིང་པོར་འཐབ་མོ་བྱུང་བར་གྱུར་ཏོ། །ཕན་ཚུན་སོ་སོར་འཐབ་པས་ཐ་དད་གདོང་ཅན་ཀུན་ནས་ཟླུམ་པ་སེར་སྐྱའི་མིག་ལྡན་པ། །ཀུན་ནས་འཕངས་པས་རྣམ་པར་བརྟགས་པའི་སྣ་ལྡན་དཀར་དང་དཀར་མིན་སྤྲིན་གྱི་འོད་ལྡན་པ། །ཁྲོས་པས་སྣ་ནི་གྱེན་དུ་བསླང་

བའི་གླང་པོ་དག་ལ་སྦོམ་པའི་བསྐྱོད་པའི་ཆུ་ལྡན་པ། །ཅུང་ཟད་འདབ་མ་དཀར་དང་དམར་བའི་གསལ་བར་འགྲོ་འགྱུར་དེ་དག་གི་ནི་དཀན་གཉིས་དག །དཀར་བའི་གཉིས་འཐུང་བདག་པོ་མཆེ་བ་རྣམ་པར་འཕྲད་པ་ཡིས། །ཡང་དག་འབྱུང་བའི་མེ་སྟག་གིས་ནི་ཁྱབ་པར་བྱས་པ་དང་། །

དེ་ནས་རྒྱལ་པོའི་གླང་པོ་ཆེ་དེའི་མཆེ་བ་ལ་བརྟེན་པའི། །ལྕགས་ཀྱིས་དཀྲིས་པ་ཡོངས་སུ་གློད་པ་འབྱུང་བར་གྱུར་པ་སྟེ། །གླང་ཆེན་དེས་ནི་ས་ཡི་བདག་པོའི་གླང་པོ་ཆེ་ནི་བཅོམ། །འདུལ་བྱེད་དེ་ནི་ངོ་ཚ་དང་ལྡན་ཐུར་དུ་བལྟ་བར་གྱུར། །དེ་ཡི་ཚོགས་ལ་གླང་པོའི་དབང་པོ་དེ་ནི་སླར་ཡང་

ཞུགས། །ཟབ་མོ་ས་ཡི་བདག་པོ་ཡང་ནི་ངོ་མཚར་དང་བཅས་གྱུར། །དེས་ན་རྒྱལ་པོ་རབ་སྣང་ལ་བློན་པོ་ཆེན་པོ་རྣམས་ཡང་འདུས་ནས། ལྷ་གླང་པོ་ཆེ་རྣམས་ཐམས་ཅད་ཀྱིས་ཀྱང་འདི་ནི་བསྒྲུབ་པར་དཀའ་བ་སྟེ། སྔགས་ཀྱི་བཟླས་པ་དང་སྨན་གྱི་སྟོབས་རྣམས་ཀྱིས་དུ་མས་འཐུང་

བ་འདི་དབང་དུ་བྱའོ་ཞེས་ཞུས་སོ་དེ་བཞིན་དུ་བྱའོ་ཞེས་རྒྱལ་པོ་དེས་བརྗོད་ནས་སླར་རྒྱལ་པོའི་ཕོ་བྲང་དུ་གཤེགས་པར་གྱུར་ཏོ། །དེ་རྣམས་ཀྱང་ཐབས་དེས་སྤོས་ཀྱི་གླང་པོ་དེ་ལ་གླང་མོ་རྣམས་ཀྱིས་ཡོངས་སུ་བསྐོར་བ་འོངས་ནས་གླང་པོ་ཆེའི་ར་བར་ཞུགས་པར་བྱས་ཏེ། ཀ་བ་ལ་བཅིངས་

ནས་གླང་པོ་ཆེ་དེ་འོངས་སོ་ཞེས་རྒྱལ་པོ་ལ་ཞུ་བ་བྱས་པར་གྱུར་ཏོ། །དེ་ནས་རྒྱལ་པོས་ཀུན་ནས་སོང་བ་ཞེས་བྱ་བ་གླང་པོ་ཆེ་འདུལ་བྱེད་ལ་བཟང་པོ་དེ་ལྟར་འདི་གླང་པོ་ཆེའི་རྒྱལ་པོ་དུལ་བར་བྱ་བ་ཇི་ལྟར་བདག་ལ་བཞོན་པར་རུང་བར་འགྱུར་བ་ཞིག་ཅེས་བཀའ་སྩལ་ཏོ། །དེས་ཀྱང་

མགོས་ཕྱག་འཚལ་བ་དང་བཅས་པས་རྒྱལ་པོའི་ངག་གཟུང་ནས་གླང་པོ་ཆེ་དེ་འདུལ་བ་ལ་ཞུགས་སོ། །གང་གང་གླང་པོ་འདུལ་བ་དེས། །བསླབ་པ་ཡང་དག་བརྟན་གྱུར་པ། །བློ་ལྡན་སློབ་མ་བཟང་པོ་ལྟར། །གླང་པོ་དེ་དང་དེ་ནི་གཟུང་། །དེ་ནས་གླང་པོ་ཆེན་པོ་ཡང་དག་ཡོངས་

Vol. 169 · folio 4b

ནས་ནི། །གླང་ཆེན་རྣམས་ཀྱི་ང་རྒྱལ་རྒྱགས་པ་ཕྲོག་བྱེད་པ། །རྣམ་པར་འདུད་པའི་སྤྱི་བོ་འདུལ་བས་ཐལ་མོར་བཅས། །ས་ཡི་དབང་ཕྱུག་ལ་ནི་གླང་པོ་འདུལ་བར་ཞུས་པའོ། །འདི་ནི་དུལ་བས་སྐྱོང་བའི་གླང་པོ་ཆེ། །ཤིན་ཏུ་ས་སྐྱོང་གཞན་ལ་ཟློག་པར་བྱེད་པ་དེ། །གླང་པོའི་དབང་

པོའི་བསླབ་པ་ཐོབ་ནས་དེ་ལྟར་ནི། །རྒྱགས་པ་ཡང་ནི་དེ་ལྟར་མིན་ན་མགུ་མི་བྱེད། །ལྕགས་ཀྱུ་མེད་པས་ཀྱང་ནི་སྨྱུག་མ་མེད་པས་ཀྱང་། །རྣམ་པར་འགྱུར་བ་འགྲོ་མིན་དུས་སོགས་མེད་པས་ཀྱང་། །བདག་གིས་ལོངས་ཤིག་ཅེས་བྱ་སླར་ནི་བསྐུལ་བྱས་པ། །གླང་པོ་འདི་ནི་འབར་

བའི་ལྕགས་ཀྱི་རི་ལུ་ཟ། །དེ་ནས་དེའི་སྟེང་དུ་རྒྱལ་པོ་ཞོན་ནས་རྟོག །གླང་པོའི་དབང་པོ་འདི་ནི་ཁ་བའི་རི་དང་འདྲ། །འོན་ཀྱང་རང་ཉིད་རིན་པོ་ཆེ་ནི་རྟོག་ལ་མཁས། །ངོ་མཚར་སྐྱེས་པ་ཉིད་ཀྱིས་འདི་ནི་བརྟག་པར་གྱིས། །དེ་ནས་རྒྱལ་པོ་རབ་སྣང་གླང་པོ་ཆེའི་མཆོག་དེ་ལ་ཞོན་ནས་སྟོན་

ཀའི་དུས་ལྟར་དཀར་བའི་ཉིན་མོར་བྱེད་པ་སྤྲིན་ལ་ཞོན་པ་ལྟར་བཙུན་མོའི་འཁོར་གྱིས་བསྐོར་བ་དང་བཅས་པ་བག་མེད་པས་ནགས་སུ་རྩེ་བ་ཉམས་སུ་མྱོང་བའི་དོན་དུ་ཞུགས་པར་མཛད་དོ། །དེ་ནས་མཚོ་ནང་སྒེག་བཅས་ཆུ་ནི་ཡན་ལག་ལ་ནི་གཏོར་བྱེད་པ། །གསལ་བ་འདུད་པ་བཅག་པའི་

པད་མའི་རྩ་བ་དུམ་བུར་བྱེད་པ་ནི། །གླང་མོ་མཐོང་བས་གླང་པོའི་རྒྱལ་པོ་སྒེག་པས་ཀྱང་ནི་འགྲོ་འགྱུར་ཏེ། །པད་མས་པད་མ་བཅག་པར་གྱུར་པ་མངོན་པར་བཟོད་པར་བྱེད་པ་ཡི། །པད་མའི་ནགས་ཚལ་གྱི་ནི་དབུས་སུ་གླང་མོ་དེ་ནི་དེས་མཐོང་ནས། །གླང་པོའི་བདག་པོ་ཆགས་པའི་

གཟུགས་དངོས་ཀྱི་ནི་སེམས་ལ་ཁྱབ། །འཆལ་པ་རྩུབ་པའི་ངག་གིས་འདུལ་བར་བྱེད་པས་བཟློག་པར་གྱུར་པ་ཡང་། །ཤིན་ཏུ་མགྱོགས་པར་རྒྱུག་པ་དེ་ཡང་འཇིགས་པས་རབ་ཏུ་འགྲོ་བར་འགྱུར། །གླང་པོ་རྗེས་སུ་འགྲོ་བ་རབ་ཏུ་ཞུགས་པ་གླང་པོ་དེ་ལ་ནི། །རི་མོའི་མདོག་ནི་དམར་པོ་ལུས་

ཀྱིས་རྣམ་པར་འབྱེད་པ་ཡང་། །མགྱོགས་པར་རྗེས་སུ་སོང་བའི་རྟ་རྣམས་ཀྱིས་ནི་རླུང་གིས་འཆག་པ་ནི། །བཞོན་པ་བཞིན་དུ་འགྲམ་ལ་གནས་པའི་བྲན་གྱིས་ཅུང་ཟད་མཐོང་བར་འགྱུར། །ཁྱོད་ཀྱིས་བདག་ནི་ནམ་ཡང་བཏང་བ་མ་ཡིན་ཏེ། །ཁྱོད་ཀྱིས་བརྩེ་བ་མེད་པ་ཅི་ཞིག་འདི་ལྟ་བུ། །དེ་ལྟར་

Vol. 169 · folio 5a

རྐང་པ་དྲུག་པའི་ཕྲང་བ་ཡུད་ཙམ་ཞིག །སྒྲ་འབྱིན་དེ་ཡི་ལམ་ལ་རྗེས་སུ་འགྲོ་བར་འགྱུར། །གླང་པོའི་དཔྲལ་བའི་དབྱེས་ལ་ལྕགས་ཀྱུས་བཏབ་ཀྱང་དེ། །འདུལ་བར་བྱེད་པས་དེ་ནི་ཕྱིར་ལྡོག་མི་ནུས་ཏེ། །སྐྱེས་པ་ཡང་ནི་འདུལ་བར་བྱ་བ་ནུས་མ་ཡིན། །ཅི་ཞིག་དུད་

འགྲོ་འདོད་པའི་དོན་ལ་དམན་པའི་བློ། །དེ་ན་མྱུར་བ་ཉིད་དུ་མ་ཧེའི་ར་དང་དྲི་མ་དང་བཅས་པའི་ནགས་ཀྱི་མེའི་དུ་བས་མི་གསལ་བའི་རིའི་ཚང་ཚིང་གི་ནང་ཤིན་ཏུ་མི་མཉམ་པའི་སའི་ཆ་དང་ལྡན་པའི་ཕྱོགས་གཅིག་ན་གླང་པོ་ཆེ་ཚོགས་ཀྱིས་ཤིང་རྩ་བ་ནས་བཏོན་པའི་རྩེ་མོ་ནས་འཕུར་བའི་འདབ་ཆགས་

རྣམས་ཀྱི་ཚང་ནས་སྒོང་ང་ལྷུང་སྟེ་ཆག་པའི་དུམ་བུ་རྣམས་ཀྱི་བསྲེས་པ་དང་ལྡན་པ། སྟག་རྣམས་ཀྱིས་ཉེ་བར་ལོངས་སྤྱོད་ཅིང་ཟོས་པའི་རླན་གྱིས་ཤིན་ཏུ་གོས་པ་ལ་བྱ་རྒོད་དང་། ཁྲ་ད་དང་། ཅེ་སྤྱང་རྣམས་ཟ་བ་དང་ལྡན་པ། ཤིང་བྱའི་སྒྲ་ཤིན་ཏུ་རྩུབ་པས་འཇིགས་པར་བྱེད་པ། སྐྱ་

རེངས་ཞེས་བྱ་བས་ཤིང་རྟ་སྐུལ་བར་བྱེད་པའི་འོད་ཟེར་གྱིས་ཀུན་ནས་གདུངས་པའི་ས་འཛིན་གྱི་རྩེ་མོ་རྡོའི་ཚོགས་དང་ལྡན་པ། དམ་པ་མ་ཡིན་པ་དང་འབྲེལ་བ་ལྟ་བུར་མངོན་པར་མི་དགའ་བའི་གནས་སུ་གླང་མོ་དེ་འཇིགས་པ་དང་ལྡན་པས་རབ་ཏུ་ཞུགས་པར་གྱུར་ཏོ། །དེ་ཡང་ཆགས་པའི་དབང་

གིས་ཚེར་མ་དང་ལྡན་པའི་སྨྱུག་མའི་ཤིང་གི་ཡལ་ག་ལྷུང་བ་ཟུག་པས། བརླ་དང་རྗེ་ངར་དང་ལག་པ་དང་བྲང་གི་མཐིལ་ལས་རབ་ཏུ་འཛག་པའི་ཁྲག་དང་ལྡན་པའི་སའི་བདག་པོ་ཁུར་ཞིང་ལྕགས་ཀྱུ་བཏབ་པ་རྣམས་མི་ཚོར་བར་དགོན་པ་དེ་ཉིད་དུ་ཞུགས་པར་གྱུར་ཏོ། །པ་ལ་ཤ་དང་ཨུ་དུམ་བཱ་

ར་ལྟ་བུ་དམར་སྐྱའི་བཞིན་ལྡན་སྐད་ཅིག་མི་གཡོ་བར། །དྲིལ་བུའི་མ་ལ་ངོ་མཚར་བས་ནི་ཤིང་ལ་གནས་པའི་ཡལ་གའི་རི་དགས་རྣམས་ཀྱིས་བལྟ་བྱས་པ། །གླང་པོ་ཆེ་ནི་ལྕགས་ཀྱུ་ཤོར་བས་ཀུ་ཤའི་ཚོགས་ཀྱི་ཐང་ནི་སྔོ་བསངས་རྣམ་སྤངས་ནས། །རྩྭ་སར་བཅད་ནས་ཟ་ཞིང་

མགྲིན་པ་གྱེན་དུ་ལྟ་བའི་རི་དགས་རྣམས་ཀྱང་ཡུད་ཙམ་མཐོང་། །དེ་ནས་གླང་པོ་འདུལ་བས་རྒྱལ་པོ་དེ་ལ་ལྷ་ལགས་གླང་པོའི་བདག་པོ་འདི་ད་ནི་ལྕགས་ཀྱུ་མེད་པ་ཉིད་ཀྱིས་སྐྱེ་བོ་ངན་པ་ལྟར་ངོ་ཚ་དང་བྲལ་བའི་ཕྱིར་ཤིན་ཏུ་ཡང་དབང་དུ་བྱ་བ་མ་ཡིན་པ་སྟེ། གལ་ཏེ་རྣམ་པ་གང་གིས་ཀྱང་

Vol. 169 · folio 5b

གླང་པོ་གདུག་པ་ཅན་འདི་ཤིང་ཁ་ཅིག་གི་འོག་ནས་འགྲོ་བར་གྱུར་པ་དེ་བས་ན་དེའི་ཡལ་ག་བཟུང་ནས་ལྷས་བདག་ཉིད་བརྟན་པར་བྱའོ་ཞེས་ཞུས་སོ། །དེ་ནས་རྒྱལ་པོ་དེ་ཅོད་པན་དང་དཔུང་རྒྱན་དང་མུ་ཏིག་གི་ཆུན་འཕྱང་དང་། ན་བཟའ་ལྷུང་བ་ནེ་ཙོ་རྣམས་ཀྱིས་མྱང་བར་བྱས་ཏེ། སིན་དྷུ་

རས་རྗེས་སུ་ཁ་བསྒྱུར་བའི་གཙོ་མོའི་མཆུ་དང་རྗེས་སུ་མཐུན་པའི་འབྲས་བུ་དང་ལྡན་པ། འབྲས་བུ་མེད་པའི་སྲོག་གི་རེ་བ་ཅན་རྣམ་པ་གང་གིས་ཀྱང་ནྱ་གྲོ་དྷའི་ཤིང་གི་ཡལ་ག་ཡུན་རིང་པོར་མ་ཕྲད་པས་ཤིན་ཏུ་འདོད་པ་སྐྱེས་ཤིང་ཡིད་དུ་འོང་བ་ལྟར་འཕྱངས་ཤིང་འཁྱུད་པར་གྱུར་ནས་ཤིང་གི་སྡོང་བུ་

མཆོག་ལ་གནས་པར་གྱུར་ཏོ། །མཆེ་བ་གཉིས་པ་རྣམས་ཀྱི་བདག་པོ་སོ་བའི་ཤིང་རྣམས་ཀྱི། །ཡལ་གའི་རྩེ་མོ་རྣམས་ཀྱིས་བཤིག་པའི་རྣ་བའི་རྔ་ཡབ་ནི། །རིང་བའི་ཕྱིར་ནི་མིག་གི་ལམ་ལས་འདས་པ་མཐོན་པོ་དང་། །དྲིལ་བུའི་སྒྲ་དེས་སྐྱོང་གིས་ནི་ཐོས་པར་མ་གྱུར་ཏོ། །དེ་ནས་

མིའི་བདག་པོ་དེའི་བཙུན་མོའི་འཁོར་གྱི་བུད་མེད་རྣམས་ངུ་བྲོ་བས་བཟློག་པ་དང་བཅས་པས་རབ་ཏུ་ཞུགས་ཏེ་སའི་བདག་པོའི་མྱ་ངན་གྱི་དབང་གིས་སའི་སྟེང་ན་གནས་པར་ཡང་ནས་ཡང་དུ་འདི་ལྟར་སྡུག་བསྔལ་བྱེད་པའི་ཕྱིར་རྩོམ་པར་གྱུར་ཏོ། །ས་རྡུལ་ལྷུང་བ་སྐྱེས་པ་ལ་ནི་འགའ་ཞིག་ཏུ། །

རི་ཡི་ཚང་ཚིང་ཆེ་བའི་བྲག་གིས་མི་མཉམ་ལ། །ས་བདག་རྒྱལ་པོ་དེ་ནི་མཚོན་ཆ་དང་བྲལ་བ། །འཇིགས་པ་དང་བཅས་ནགས་ནས་ཅི་ལྟར་འོང་བར་འགྱུར། །རྣམ་པར་ལྷུང་བས་ཆག་དང་བྱུང་བའི་དཔུང་པ་ལག །ཡང་ན་དེ་ནི་སྙོམ་པའི་སྟོབས་ལྡན་གནོད་བྱས་པ། །རྐང་མཐིལ་

འཇམ་པོ་དག་ལ་ཀུ་ཤའི་རྩེ་རྣམས་འབིགས། །དེང་སང་ཆུ་ནི་འཐུང་འདོད་ཅི་ལྟར་འཐུང་བར་འགྱུར། །མ་བསམས་པ་ཡི་རྒུད་པ་དེ་ནི་ཐོབ་བྱས་པ། །སྐྱེ་བོ་རྣམས་ཀྱིས་བསྐོར་ཀྱང་ཇི་ལྟར་གླང་པོ་ཆེས། །ཡང་ན་བདེ་སྡུག་འབྲས་བུ་ཅན་གྱི་ལྷ་ཡི་ལམ། །གང་ཞིག་སུ་ཞེས་བྱ་བ་འདའ་

བར་བྱེད་པར་འགྱུར། །གལ་ཏེ་མི་ཡི་བདག་པོ་དེ་ཡི་ཅུང་ཟད་མི་ཤེས་པ། །ངེས་པར་བདག་ཅག་ཀྱང་ནི་འཆི་བར་འདོད་པ་སྟེ། །འོན་ཏེ་གླང་པོའི་བདག་པོ་གཉའ་རལ་ཅན་གྱིས་ཀྱང་། །གླང་མོའི་ཚོགས་ནི་ནགས་ཀྱི་རི་ལ་དགའ་བ་མིན། །གླང་པོ་འདུལ་དེས་བཀའ་སྩོལ་ཡང་དག་

Vol. 169 · folio 6a

རྟོགས་ནས་ཤེས་བྱ་བ། །ས་ཡི་སྟེང་གི་དབང་པོ་དེ་ནི་གསོན་ཞེས་སུ་ཞིག་སྨྲའམ། །སླར་ཡང་བཞེད་པ་ཡིས་ནི་ཡིད་འཕྲོག་ཟླ་བའི་ཞལ་ཅན་དེ། །མི་ཡི་བདག་པོའི་དཔལ་ནི་འཛིན་ཅིང་ནམ་ཞིག་མཐོང་འགྱུར་ཞེའོ། །དེ་ལྟར་བཙུན་མོའི་འཁོར་དེ་རྣམས་སྨྲེ་སྔགས་

འདོན་པ་རྩེ་གཅིག་པ་མིག་གི་མཆི་མས་སྨུག་རྩི་བཀྲུས་པ་དེ་ཡང་ཡང་དག་པར་དབུགས་ཕྱུང་ནས་བློན་པོའི་སྐྱེ་བོ་འཁོར་དང་བཅས་པ་ཤིང་རྟ་རྣམས་ལ་ཞོན་ནས་རིམ་གྱིས་སོང་སྟེ། གླང་པོ་ཆེའི་བདག་པོ་དེའི་རྐང་པའི་རྗེས་ཀྱིས་རྩྭ་དང་བོང་བ་ཀུན་ནས་བརྫིས་པ་དང་། སྨྱོན་ཆུའི་ཐིགས་

པ་ཀུན་ནས་ལྷུང་བས་རྩྭའི་མྱུ་གུའི་མཐར་ཐུག་པ་དྲི་དང་བཅས་པ་དང་། སྦྲང་རྩི་བྱེད་པའི་ཚོགས་ཀྱིས་ཀུན་ནས་བསྐོར་བའི་ལམ་དེ་རྗེས་སུ་ཚོལ་བར་གྱུར་ཏོ། །དེར་མུ་ཏིག་གི་ཚོགས་ལས་ལྷུང་བའི་ལྕི་བའི་རིན་པོ་ཆེའི་ཚོགས་ཀྱི་གཞི་དྲི་དང་བཅས་པ་དཀར་པོ་མུ་ཏིག་གི་ཚོགས་ཀྱི་སྐུད་པ་

འདུག་པ་རྩྭ་ལ་ཐོགས་པ་རི་དང་ཉེ་བར་དེ་ནས་མུ་ཏིག་གི་ཕྲེང་བ་དེ་ན་གནས་པ་གཡོ་ཞིང་ཤིན་ཏུ་དཀར་བའི་ལྟོ་འཕྱེ་དང་འདྲ་བའི་འོད་ཀུན་ནས་བྱེད་ནུས་པ་མིའི་བདག་པོའི་སྐྱེ་བོ་དེས་མཐོང་ངོ་། །མུ་ཏིག་གི་ཕྲེང་བ་མཐོང་བས་ཀྱང་ངེས་པར་ལྷ་ཉེ་བར་གནས་སོ་ཞེས་བསམས་པར་གྱུར་པའི་

བློན་པོ་དེ་རྣམས་དེ་ནས་ཅུང་ཟད་ཀྱི་བར་དུ་ཕྱིན་ནས་ནྱ་གྲོ་དྷ་དེའི་འོག་ཏུ་རྒྱལ་པོ་དེ་སྐོམ་པས་བསྐམས་ཏེ་ལུས་སྐྱ་བོར་གྱུར་ཅིང་ཀུན་ནས་ཅོད་པན་ལྷུང་བ་ཤིན་ཏུ་རྣོ་བའི་ཚེར་མ་ཅན་གྱིས་རྒྱས་པའི་ཤིང་རྣམས་ཀྱིས་ཕོག་པས་སྡུག་བསྔལ་གྱི་ཚོར་བ་མཐོང་བར་གྱུར་ཏོ། །རྟ་དང་ཤིང་རྟ་རྣམས་ལས་བབས་ཏེ་

དགའ་བའི་ཡིད་དང་ལྡན་པ་རྣམས་པད་མའི་རྩ་བའི་བུག་པ་རྣམས་ལས་ངེས་པར་བྱུང་བའི་ལྷའི་དབང་པོ་ལྷ་རྣམས་ཀྱིས་མཐོང་བ་བཞིན་དུ་གུས་པ་དང་བཅས་པས་བསྙེན་བཀུར་བྱེད་པར་གྱུར་ཏོ། །མིའི་བདག་པོ་དེས་ཀྱང་མ་ལུས་པ་དེ་རྣམས་ལ་སྨྲས་པར་གྱུར་ཏོ། །དེ་ནས་བློན་པོ་དེ་རྣམས་ཡི་རང་

བ་ནི་ཤིང་རྟ་བཅུ་པའི་སྲས་ལྟར་ཤིང་རྟའི་མཆོག་དེ་ལ་བསྐྱོན་ནས་དགོན་པའི་ས་ཕྱོགས་དེ་ལས་སླར་གྲོང་ཁྱེར་དེར་འོངས་པ་ན་རྟ་བབས་ལ་དྲི་ཞིམ་པོ་རྣམ་པ་སྣ་ཚོགས་པའི་མེ་ཏོག་གི་ཕྲེང་བ་རྣམས་ཀྱིས་བཅིངས་པར་གྱུར་པ་ན་བུང་བས་ངེས་པར་འབྲེལ་ཞིང་རྒྱལ་མཚན་དང་བ་དན་གྱིས་སྐུལ་བར་

Vol. 169 · folio 6b

བྱེད་པ། དྲི་དང་བཅས་པའི་ཆུས་ལམ་པོ་ཆེའི་བར་དྲི་ཞིམ་པོར་བྱས་པ། སྣ་ཚོགས་པའི་གར་གྱི་དགའ་སྟོན་ལ་འཇུག་པ་རྒྱལ་པོའི་ཕོ་བྲང་འོད་ལྡན་གྱི་གྲོང་ཁྱེར་བ་རྣམས་ཀྱི་ཡིད་དགའ་བར་བྱས་པར་གྱུར་ཏོ། །གླང་པོ་ཆེ་དེ་ཡང་གླང་མོ་དེ་ལ་འདོད་པས་ལྟད་མོ་བྱེད་པ་ནི་དྲེགས་པ་དང་བཅས་པའི་གཤོལ་

འཛིན་པའི་རྩེ་བ་ལྟར་གོམས་པར་བྱེད་ཅིང་། གླང་པོ་འདུལ་བ་འཇིགས་པ་དང་ངོ་ཚ་བས་རྣམ་པར་རྨོངས་པའི་ཡིད་ཀྱིས་དེ་དང་ལྷན་ཅིག་ཏུ་རྒྱལ་པོ་དེའི་དྲུང་དུ་འོངས་སོ། །སྐྲག་པས་འདར་བ་བསྐྱེད་པའི་གླང་པོ་འདུལ་བ་དེས། །དེ་ནས་མཐོང་བས་མི་ཡི་བདག་པོ་དེ་ཡི་ནི། །སྤྱན་གཉིས་

ཁྲོས་པས་སྐད་ཅིག་གིས་ནི་འགྱུར་བ་ཅན། །ཨུཏྤལ་དམར་པོ་ཟེའུ་འབྲུ་མེད་པ་བཞིན་དུ་དམར། །ཁྲོ་བའི་སྒྲ་ཅན་གྱིས་དྲི་མ་དང་བཅས་པར་བྱས་པའི་ཞལ་གྱི་ཟླ་བ་ཅན་གྱི་རྒྱལ་པོས་བདག་ཉིད་ངན་པ་གླང་པོ་འདུལ་བྱེད་དམན་པ་ཀྭའི་ཅི་ཁྱོད་སུ་ཞིག་གིས་བསྐུལ་བ་ཡིན། གང་གི་

ཕྱིར་དྲེགས་པ་འཛིན་པའི་གླང་པོ་ཆེ་ངན་པ་འདི་ལ་ཁྱོད་ཀྱིས་བདག་བསྐྱོན་པར་གྱུར་ཏོ་ཞེས་སྨྲས་སོ། །ཇི་ལྟར་གླང་པོ་ཆེའི་མཆོག་འདི་བདག་གི་ཚིག་གིས་ལྕགས་ཀྱི་རི་ལུ་འབར་བར་འགྱུར་བ་ཟའོ་ཞེས་འོན་ཀྱང་ཁྱོད་ཀྱི་བདེན་པ་ད་ལྟར་བལྟ་ཡིས། དེ་ནས་ཉི་མ་ཤར་བ་དང་། །འདྲ་བའི་གླང་

ཆེན་མདུན་དུ་དེ། །བྱིན་ཟ་དབུས་ནས་ཕྱུང་ནས་ནི། །ལྕགས་ཀྱི་རི་ལུ་གཞག་པར་གྱུར། །བློན་པོ་ཆེན་པོ་ལ་སྨྲས་པ། །ངོ་མཚར་ཅན་གྱི་བློན་པོས་བསྐོར། །གླང་པོའི་ཐོག་ཏུ་ཞོན་ནས་ནི། །ལྕགས་ཀྱི་རི་ལུ་ཁྱེར་ཤོག་ཅེས། །དེ་ལྟར་དེས་ནི་ཐོས་པ་དང་། །སྨྱུག་མ་མདུན་དུ་

བླངས་ནས་སུ། །གླང་པོ་ལོང་ཤིག་ཅེས་སྨྲས་པས། །དེ་ཡང་མི་མཐུན་ཉིད་མ་གྱུར། །ལྕགས་རིལ་ལེན་པར་འདོད་པ་དེ། །མཐོང་ནས་གླང་ཆེན་དེ་ཡང་ནི། །གླང་པོ་ཆེ་ནི་འདི་ལས་བཟློག །ཀུན་ནས་བསྡམས་པ་རྒྱལ་པོས་སྨྲས། །གླང་པོ་འདུལ་བྱེད་དེས་ནི་གླང་པོ་བཟློག་པ་དང་། །

དེ་ནས་སླར་ཡང་མི་ཡི་བདག་པོས་སྨྲས་པ་སྟེ། །ལུས་པོ་ཙམ་ནི་རྣམ་པར་འདུལ་བར་ནུས་ཡིན་གྱི། །སེམས་ཀྱི་གཡོ་བ་འདི་ནི་ཚར་གཅོད་ནུས་མ་ཡིན། །དེ་ནས་གནས་གཙང་མའི་ལྷ་ཅིག་བར་སྣང་ལ་གནས་ཏེ་སའི་བདག་པོ་འདི་གལ་ཏེ་སངས་རྒྱས་བཅོམ་ལྡན་འདས་རྣམས་ཀྱི་ཡོན་

Vol. 169 · folio 7a

ཏན་གྱི་ཚོགས་ཐོས་ན་དེ་ནས་ཐེ་ཚོམ་མེད་པར་སངས་རྒྱས་ཉིད་ཀྱི་ཕྱིར་སྨོན་ལམ་བྱེད་ཅེས་བྱ་བའོ། །དེའི་ཕྱིར་འདི་འདིར་དུས་ལ་བབ་པས་གླང་པོ་སྐྱོང་བ་འདི་ཉིད་ལ་བདག་རྗེས་སུ་ཞུགས་སོ་ཞེས་རྣམ་པར་བསམས་ནས་སྐད་ཅིག་ཉིད་ཀྱིས་དེའི་ལུས་ལ་རྗེས་སུ་ཞུགས་པར་

གྱུར་ཏོ། །དེ་ནས་ཀུན་ནས་བསྡམས་པའི་རྒྱལ་པོ་དེ་ལ་གསོལ་པ། །དཀའ་ཐུབ་ཀྱིས་ནི་ཡན་ལག་རིང་གྱུར་འདོད་པ་རྣམས། །འདོད་ལྷས་ཐུབ་པ་རྣམས་ཀྱང་རྣམ་འགྱུར་ཐོབ་བྱས་པས། །དེ་རྣམས་ཀྱིས་ཀྱང་གལ་ཏེ་ཡིད་ནི་འདུལ་ནུས་མིན། །གཞན་གྱིས་རབ་ཏུ་བྱེད་པ་ཇི་ལྟར་བྱས་

པར་འགྱུར། །རྒྱལ་པོས་སྨྲས་པ། སུ་ཞིག་གིས་སེམས་འདུལ་བ་ནུས་པར་འགྱུར། ཀུན་ནས་བསྡམས་ཀྱིས་གསོལ་པ། སངས་རྒྱས་ཞེས་བྱ་འགྲོ་བའི་མགོན། །བྱུང་འགྱུར་འབྱུང་བ་རྣམས་ཉིད་ནི། །དེ་རྣམས་རང་དང་གཞན་གྱི་སེམས། །འདུལ་བར་བྱེད་པར་ནུས་པ་ཡིན། །

སངས་རྒྱས་ཞེས་བྱའི་ཚིག་ཐོས་ནས། །ངལ་བ་དེ་ལས་དེ་ཡི་ནི། །དང་བ་སྤུ་ལངས་བྱུང་རྣམས་ཀྱིས། །མང་པོ་ཉིད་དུ་ཡང་དག་ཐོབ། །རྒྱལ་པོས་སྨྲས་པ། བཟང་པོ་སངས་རྒྱས་རྣམས་ལ་ཇི་ལྟ་བུའི་མཐུ་དང་ལྡན་པ་རེ་ཞིག་སྨྲོས་ཤིག། ཀུན་ནས་བསྡམས་ཀྱིས་གསོལ་བ། །མ་རིག་

རབ་རིབ་ལོང་རྣམས་ཀྱི། །སྲིད་པ་གཞན་ནི་བཟློག་ཕྱིར་རོ། །གང་དེ་རྟོགས་བྱའི་གོ་འཕང་ཞི། །དེ་རྟོགས་པས་ནི་དེ་བཞིན་གཤེགས། །དེ་ནས་རྒྱལ་པོ་དེ་ཡིད་རབ་ཏུ་དགའ་བ་དང་ལྡན་པས་སླར་སྨྲས་པ། འོ་ན་རེ་ཞིག་སངས་རྒྱས་ཉིད་ཇི་ལྟར་རྟོགས་པར་བྱ་བ་བརྗོད་པར་གྱིས་ཤིག་ཅེས་སོ། །

སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཡང་དག་ལྡན། །སློབ་མར་གྱུར་པའི་མི་རྣམས་ཀྱིས། །འབད་པས་སངས་རྒྱས་ཉིད་ནི་ཐོབ། །དེ་ནས་རྒྱལ་པོ་དེས་སངས་རྒྱས་ཉིད་རྟོགས་པའི་ལམ་ལ་ཉེ་བར་དམིགས་ནས་འདི་ལྟར་སྨོན་ལམ་བྱས་པར་གྱུར་ཏོ། །སེམས་

ཅན་རྣམས་ནི་ཞི་དོན་དུ། །སྦྱིན་སོགས་ཡོན་ཏན་མང་ལྡན་པ། །སངས་རྒྱས་རྟོགས་བྱ་ལ་མཁས་པ། །དེ་ནས་མྱུར་དུ་བདག་གྱུར་ཅིག །དེ་ནས་དེ་ལྟར་སྨོན་ལམ་ཆེན་པོ་བྱང་ཆུབ་སེམས་དཔའ་དག་པ་ཡིས། །བྱས་པའི་བློ་ཅན་བྱས་པར་གྱུར་ལ་བློ་ལྡན་རྣམས་ནི་དགའ་བར་འགྱུར། །རང་གི་

Vol. 169 · folio 7b

སྟོབས་ནི་རྣམ་པར་ཉམས་པའི་ཡིད་ནི་རྒྱ་ཡི་དབུས་གནས་པ། །མདས་ཕུག་རི་དགས་ལྟར་ནི་མེ་ཏོག་རྒྱལ་མཚན་གྱིས་ནི་སྡུག་བསྔལ་མྱོང་། །ཡིད་ཀྱི་ཞིང་རྣམས་ཀྱིས་ནི་འཛིན་པའི་སྨོན་ལམ་ཤིང་ནི་སྐྱེ་བོ་དགའ་བྱེད་པ། །ཕལ་ཆེར་ཡང་དག་འབྱུང་བ་དང་པོ་སྙིང་རྗེའི་མེ་ཏོག་གིས་ནི་ནུས་ལྡན་

པ། །རིམ་གྱིས་རྒྱུན་མ་ཆད་པར་འདོད་པའི་དབང་ཕྱུག་ཆེན་པོ་སྦྱིན་པའི་ཆུ་ཡིས་ནི། །འབྲས་བུ་དོན་དུ་གཉེར་བའི་ས་སྐྱོང་ཉིན་རེ་ཞིང་དུ་ཞིང་དང་འདྲ་བར་འཆུ། །ས་ཡི་བདག་པོ་སྤྱོད་པ་ནམ་མཁའ་ལྟ་བུར་རྒྱས་པས་རབ་ཏུ་བརྒྱན་པར་བྱས་པ་ནི། །བསལ་བར་དཀའ་བ་འགྲོ་བའི་མི་

ཤེས་རབ་རིབ་གཡོགས་པ་བསལ་བར་འདོད་པ་ཡིས། །རྒྱལ་པོ་ཟླ་བའི་སྨོན་ལམ་སྟོན་ཀ་དང་འདྲ་རྩོམ་པས་དྲི་མ་དང་བྲལ་རྒྱས། །ཤིན་ཏུ་སྦྱིན་པའི་ཟླ་འོད་དོན་དུ་གཉེར་ལ་ཀུ་མུ་ད་ཡི་དགའ་བ་སྐྱེད་པར་བྱེད། །གཡོག་རྣམས་གླང་པོའི་ཕྲུ་གུ་ལྟར་ནི་ཤིན་ཏུ་སྐྱོང་བྱེད་པ། །དཔལ་ནི་

གླང་མོ་བཞིན་དུ་ཡུན་རིང་པོར་ནི་མཉེས་བྱེད་ཅིང་། །སྦྱིན་པའི་དོན་དུ་གཉེར་བ་འདོད་པ་རྣམས་ནི་འོངས་ནས་ནི། །ས་བདག་དེ་ལ་གླང་པོའི་དབང་པོ་བུང་བ་ལྟར་ནི་བསྐོར། །གང་ཞིག་སྔོན་ནི་ཐོབ་དཀའ་མེ་ལྟར་འགྱུར་བ་སྟེ། །གང་ཞིག་ཉིད་ནི་བྱ་བས་དཀྱིལ་འཁོར་འབྱིན་འཁྱོག་པ་ཡི་མིག་

དང་ལྡན། །དེ་ཉིད་བྱང་ཆུབ་ལ་ནི་རྣམ་འབྲེལ་ངེས་པ་ཅན། །མི་ཡི་བདག་པོ་མཚོ་བཞིན་སྐྱེ་བོ་རྣམས་ལ་བསྐྱེད། །ལུས་ཅན་རྣམས་ཀྱི་སེར་སྣའི་མུན་པ་བསལ་བ་ནི། །རིམ་གྱིས་ཡིད་ནི་རང་བཞིན་གཞན་དུ་འགྲོ་བ་སྟེ། །དུ་བ་གང་ཞིག་ཉིད་ནི་མིག་ལ་རབ་གནོད་པ། །དེ་ཉིད་བསགས་པ་

སྤྲིན་ཉིད་དུ་ནི་འགྲོ་བའོ། །ཤིན་ཏུ་སྦྱིན་ལ་སེམས་རྩེ་གཅིག་པའི་རྒྱལ་པོ་ལ། །འབངས་ཀྱི་སྐྱེ་བོ་ཡང་ནི་སྦྱིན་པ་དེ་ལ་སྦྱིན། །གང་ཕྱིར་དུས་ཉིད་དེ་ལྟ་བུ་དེ་འགའ་ཞིག་ཏུ། །ཞིང་རྣམས་གང་དུ་འབྲས་བུ་མང་བར་འགྱུར་བ་ཡིན། །ཡོན་ཏན་ལ་ནི་རྗེས་ཆགས་མི་བདག་མཐོང་ནས་ནི། །བློན་

པོ་རྣམས་ཀྱང་ཡོན་ཏན་ལ་འདོད་སྐྱེད་པར་བྱེད། །རི་བོང་ཅན་གྱི་འོད་ཀྱིས་རྗེས་སུ་འབྲེལ་གྱུར་བ། །ཆུ་ཤེལ་དྲི་མ་དང་བྲལ་ཆུ་ནི་སྟེར་བར་བྱེད། །ཡོན་ཏན་དང་བཅས་སྐྱེ་བོས་སྦྱར་བར་གྱུར་པ་ནི། །མཛེས་པའི་ཡིད་ནི་ཡོན་ཏན་རྗེས་ཆགས་སུ་མི་འགྱུར། །ཐུབ་པའི་སྤྱོད་ཡུལ་འོངས་ཏེ་དམན་པའི་བློ་ལྡན་པ། །

Vol. 169 · folio 8a

སྦྲུལ་དང་རི་དགས་ཀྱང་ནི་དྲག་པོའི་ངོ་བོ་འདོར། །དེ་ལྟར་སངས་རྒྱས་ཡོན་ཏན་རྗེས་མཐུན་ཡི་གེ་ཅན། །གླང་པོ་འདུལ་བ་ལ་ནི་ཡིད་འཕྲོག་ངག་ཐོས་ནས། །སྲིད་པའི་འཆིང་བ་འཇོམས་པའི་རྒྱུ་ཅན་སྨོན་ལམ་འདི། །སྔར་བྱུང་ཤཱཀྱའི་སྲས་ཀྱི་འབྱུང་བར་འགྱུར་བ་ཡིན། །

དེ་ལྟར་བདེ་བར་གཤེགས་པའི་ཡོན་ཏན་གྱི་ཆེ་བའི་བདག་ཉིད་ཐོས་པའི་སྐྱེས་པ་ཁྱད་པར་ཅན་རྣམས་ལུས་ཅན་རྣམས་ཀྱི་འཁོར་བའི་སྡུག་བསྔལ་རྣམ་པར་གཅོད་པའི་ཕྱིར་དང་། སངས་རྒྱས་ཉིད་རྟོགས་པའི་ཕྱིར་བརྩོན་འགྲུས་ཀྱི་གོ་ཆ་གྱོན་པ་ཞེས་བྱ་བ་རྣམ་པར་བསམས་ནས་ཡང་དག་པར་རྫོགས་

པའི་བྱང་ཆུབ་ཐོབ་པའི་དོན་དུ་སློབ་བཞིན་པའི་བློ་ཅན་གྱིས་ཐོག་མ་ཉིད་དུ་སྦྱིན་པའི་ཕ་རོལ་ཏུ་ཕྱིན་པ་ལ་འབད་པར་བྱ་ཞེས་བྱའོ། །རབ་སྣང་གི་སྐྱེས་པའི་རབས་ཏེ་དང་པོ་རྫོགས་སོ།། །།གང་ཞིག་གཞན་གྱི་སྡུག་བསྔལ་རྣམས་ཀྱིས་སྡུག །དེ་ནི་རྣམ་པར་གཅོད་ཕྱིར་དམ་བཅའ་བྱས། །

འགྲོ་བ་རྣམས་ཀྱི་དོན་ནི་བྱེད་གྱུར་པ། །དེ་ཉིད་ཤིན་ཏུ་སྡུག་བསྔལ་རྣམས་ནི་བཟོད། །འདི་ལྟར་རྗེས་སུ་ཐོས་ཏེ་སའི་སྟེང་ན་ཅོད་པན་དུ་གྱུར་པ་ཚུལ་གྱིས་རབ་ཏུ་གདུང་བས་བློན་པོ་ཆེན་པོ་ཐམས་ཅད་ལས་རྣམ་པར་རྒྱལ་བའི་རྒྱལ་པོ་ཚངས་པས་བྱིན་གྱིས་བརླབས་པའི་གྲོང་ཁྱེར་བཱ་རཱ་ཎ་སཱིའི་རྒྱལ་པོའི་

ཕོ་བྲང་ན། བསོད་ནམས་ཀྱི་ཚོགས་སྣ་ཚོགས་པ་ཉེ་བར་བསགས་པ། བསྟན་བཅོས་དུ་མའི་ཆ་ལ་མཁས་པའི་གྲགས་པས་རབ་ཏུ་གྲགས་པ། གཏོང་བ་དང་ཁྲེལ་ཡོད་པ་དང་བཟོད་པ་ལ་སོགས་པའི་ཡོན་ཏན་རྣམས་ལྷག་པར་གནས་པ། བཤེས་པ་དང་དོན་དུ་གཉེར་བ་དང་གཉེན་འདུན་

དུ་གྱུར་པའི་སྐྱེ་བོ་རྣམས་ཀྱི་ཡིད་དུ་འོང་བའི་དེད་དཔོན་ཤིན་ཏུ་དགའ་བ་ཞེས་བྱ་བའི་བྱང་ཆུབ་སེམས་དཔའ་བྱུང་བར་གྱུར་ཏོ། །དུས་ཀུན་དུ་ནི་ཐམས་ཅད་ཉིད། །ཀུན་གྱི་ཕྱིར་ནི་སྦྱིན་བྱ་ཞེས། །སེམས་ཅན་ཀུན་ལ་བརྩེ་བ་ཡི། །དེ་ཡི་དམ་བཅའ་བྱུང་བར་གྱུར། །འཇིག་རྟེན་སྡུག་བསྔལ་

བཅད་པའི་ཕྱིར། །ཤིན་ཏུ་བྱས་པའི་སེམས་རྣམས་ཀྱི། །སེམས་ཅན་ལ་ཆེ་དམ་བཅའ་ནི། །ཆེན་པོ་ཉིད་རྣམས་ལ་ནི་སྐྱེ། །གཏོང་བས་སྐྱེ་བོ་རབ་དགའ་བྱེད། །དེས་ན་སེམས་དཔའ་དག་པར་འགྱུར། །སྟོན་ཀའི་དུས་ན་ཟླ་བ་བཞིན། །ཆེན་པོ་ཤར་བས་མུན་པ་སེལ། །བདག་ཅག་

Vol. 169 · folio 8b

དོན་དུ་འདིས་ནི་འཛིན། །ལོངས་སྤྱོད་བསོད་ནམས་སྟོབས་ཀྱིས་རྙེད། །དོན་དུ་གཉེར་རྣམས་རྫས་རྣམས་ལ། །དེ་ཡི་བདག་འཛིན་དེ་ལྟར་དམིགས། །ངེས་པར་ལེགས་པའི་བློ་གྲོས་འདི་ཡི་སྨོན་ལམ་ས་བོན་ནི། །ཡིད་ཀྱིས་འདི་ལ་ནི་རྒྱལ་བ་ཉིད་ཀྱི་འབྲས་བུའི་ཕྱིར། །སྔོན་ནི་སྦྱིན་པའི་ཕ་རོལ་

ཕྱིན་པས་བསོད་ནམས་ཀྱི་ནི་ལས། །དེ་ནི་ཕྲད་པས་དགའ་བ་བཞིན་དུ་མྱུར་དུ་སྤྲད་ནས་འཁྱུད། །དེ་ལྟར་དགེ་བའི་རྩ་བ་ཉེ་བར་བསགས་པས་སྦྱིན་པ་ཆེན་པོ་ལ་ཞུགས་པ། སེམས་ཅན་གྱི་དོན་གྱི་ཕྱིར་སྙིང་རྗེའི་ལྕག་གིས་ཡིད་ཀྱི་རྟ་ཡང་དག་པར་བསྐུལ་བར་བྱས་པ། ངེས་པའི་ཤིང་རྟ་

ལ་ལྷག་པར་ཞོན་པའི་བྱང་ཆུབ་སེམས་དཔས། ཉིན་པར་འདི་ནི་གཏོང་མི་འགྱུར། །སྦྱིན་པའི་ཕ་རོལ་ཕྱིན་པ་ཞེས། །ལྷག་མ་ཕ་རོལ་ཕྱིན་རྣམས་དེའི། །ཕྲད་འདོད་ལྟ་བུར་གནས་པར་གྱུར། །དེ་ནས་བདག་ཉིད་ཆེན་པོ་དེ་སོ་གའི་དུས་ཀྱི་ཉིན་མོར་བྱེད་པའི་འོད་ཟེར་ལྟར་ཆུའི་སྣོད་ཀྱིས་

ཆུ་ཀུན་ནས་འཐུང་བར་གྱུར་པ་ཉིད་དམ་རེ་རེར་དོན་དུ་གཉེར་བ་རྣམས་ཀྱིས་ལྷག་མ་ཅུང་ཟད་ཙམ་མཛོད་ཀྱི་སྙིང་པོ་མཐོང་ནས། སློང་མོ་པའི་སྐྱེ་བོའི་རེ་བ་འབྲས་བུ་མེད་པར་བྱེད་པ་མི་ནུས་པས་རིན་པོ་ཆེའི་གླིང་དུ་མངོན་པར་འགྲོ་བར་འདོད་ཅིང་། སྣ་ཚོགས་པའི་ཟོང་གིས་ཡོངས་སུ་གང་བ། མཐོན་

པོའི་རླུང་རས་ལ་འཇམ་པའི་རླུང་ལྷུང་བ་དང་། ཤིན་ཏུ་མཁས་པའི་སྐྱ་ཆེན་འཛིན་པ་རྣམས་ཀྱིས་སྐྱ་བ་འཛིན་པ་རྣམས་དང་། ཡིད་ཆེས་པའི་འཁོར་གྱི་སྐྱེ་བོ་རྣམས་ཀྱིས་ལྷག་པར་གནས་པའི་གཟིངས་སུ་ཞུགས་ནས། ཚོང་པའི་སྐྱེ་བོ་དུ་མས་ཡོངས་སུ་བསྐོར་བ། ཨ་ཏ་ས་ཡི་མེ་ཏོག་ཁ་བྱེ་

བཀྲམ་པ་དང་འདྲ་བའི། །ནམ་མཁའི་ཆུ་ཉིད་དུ་ནི་ཀུན་ནས་འོངས་པ་འདྲ་བ་སྟེ། །འོད་ལྡན་ལྟོ་འཕྱེའི་ནོར་བུ་མར་མེ་སྟོང་གི་ནང་ནས་ནི། །ཟབ་ཅིང་བགྲོད་པར་དཀའ་བའི་ཆུ་ལྡན་རྒྱ་མཚོ་འཁྲུག་པར་བྱས། །གཟིངས་འགྲོ་བའི་དབང་གིས་ཆུ་མཐོ་བའི་འགྲམ་གྱི་ཤིང་རྣམས་བུམ་པ་ལྟར་སྐད་ཅིག་ཉིད་དུ་

ནི་ཡང་དག་པར་མཐོང་ནས་རླུང་གི་སྟོབས་ཀྱིས་འབྱུང་བར་གྱུར་པའི་རླབས་ཆེན་པོ་རྣམས་ཀྱིས་མི་མཉམ་པ་མདུན་དུ་རྒྱུག་པ་དང་འདྲ་བར་རིམ་གྱིས་རྒྱ་མཚོ་ཆེན་པོ་ལ་བརྒལ་ནས་རིན་པོ་ཆེའི་གླིང་དུ་ཕྱིན་ཏེ། རྣམ་པ་སྣ་ཚོགས་པའི་རིན་པོ་ཆེ་རྣམས་བླངས་ནས་ཚོང་པ་དེ་རྣམས་དང་ལྷན་ཅིག་ཏུ་གེགས་

Vol. 169 · folio 9a

མེད་པར་ཤིན་ཏུ་དགའ་བས་སླར་ལོག་སྟེ་འགྲོན་པོ་ཐང་གི་ལམ་ནས་ཁྲིད་པ་བརྩམས་པར་གྱུར་ཏོ། །འདི་ལ་བརྟེན་ནས་དོན་གཉེར་ཚོགས་ནི་རྒྱབ་ཕྱོགས་མ་སོང་སྟེ། །འདི་ཡི་སེམས་ནི་དགྲ་དང་བུ་ལའང་མཉམ་པར་འཇུག་པ་ཞེས། །དེ་ལྟར་ཡོན་ཏན་རྣམས་ནི་བརྗོད་ཅིང་

ཡོན་ཏན་འདོད་པ་ཡིས། །དེ་ཡི་འགྲོན་པོ་རྐུན་མོའི་ཚོགས་ཀྱིས་ཀྱང་ནི་ཆོམས་མི་འགྱུར། །ཚུལ་ཁྲིམས་གཙང་མས་བརྒྱན་པའི་སྐྱེ་བོ་ལ། །འགྲོ་བའི་དོན་དུ་སོ་སོར་འབྲེལ་བའི་སེམས། །འོན་ཀྱང་ཆོས་ལ་རྒྱབ་ཕྱོགས་སྐྱེ་བོ་ནི། །བཤེས་པ་བཞིན་དུ་བཟང་བ་ཉིད་དུ་འགྲོ། །དེ་ནས་བདག་ཉིད་

ཆེན་པོ་དེ་བཱ་རཱ་ཎ་སཱིར་ཉེ་བར་འོངས་ནས་དགའ་བའི་ཡིད་ཅན་གཉེན་འདུན་རྣམས་ཀྱིས་མཐོང་བར་གྱུར་ཏེ་རང་གི་ཁྱིམ་དུ་རྗེས་སུ་ཞུགས་ནས་རིན་པོ་ཆེའི་གླིང་ནས་རྙེད་པ་ལ་རང་དབང་དུ་སྤྱོད་པ་དེས་དོན་དུ་གཉེར་བའི་སྐྱེ་བོ་རྣམས་ལ་ཡང་ཉིན་རེ་བཞིན་དུ་འགྱེད་པར་བྱས་པར་གྱུར་ཏོ། །བདག་ཉིད་ཆེན་པོ་དེས་

ནི་གཞན་དོན་ཕུན་སུམ་ཚོགས། །རྒྱ་ཆེའི་སེམས་དང་ལྡན་པས་སྦྱིན་པ་རབ་སྦྱིན་ཅིང་། །འབྲས་བུ་དང་བཅས་དོན་གཉེར་མང་པོ་འོངས་པ་ཡི། །དོན་གཉེར་རྣམས་ཀྱིས་ཁྱིམ་གྱི་སྒོ་ནི་སྟོངས་མ་གྱུར། །དེ་ནས་བདག་ཉིད་ཆེན་པོ་དེ་དུས་གཅིག་གི་ཚེ་མལ་ཆ་མཆོག་ལ་གནས་ཤིང་ནུབ་མོ་

འདི་བསམས་པར་གྱུར་ཏོ། །ནོར་འདི་ཡང་སྐྱེ་བོ་དོན་དུ་གཉེར་བ་ལ་སོ་སོར་མཆོད་པའི་ཕྱིར་ནུས་པ་ཉིད་མ་ཡིན་སྙམ་མོ། །སླར་ནི་སྦྱིན་པའི་འབྲས་བུ་ཇི་ལྟ་བུ་བསྒྲུབ་པར་བྱ། གང་གིས་བདག་ལ་རྟག་ཏུ་སྦྱིན་པ་རྒྱུན་མ་ཆད་པས་ཡིད་ཚིམ་པ་དོན་དུ་གཉེར་བ་རྣམས་ལ་འགྱུར་ཞེས་བྱའོ། །གཞན་

ཡང་མཚན་མོ་འདི་མྱུར་དུ་འདའ་བ་ནི་གང་གི་ཕྱིར་བདག་གིས་དོན་དུ་གཉེར་བའི་ཚོགས་རྣམས་ལ་ཇི་ལྟར་དགྱེ་བར་བྱ་ཞེས་བསམས་སོ། །སྐྱེ་བོ་ཐམས་ཅད་ན་བའི་དུས་སུ་གཉིད་འདོད་དེ། །སེམས་ནི་བདེ་བའི་ཕྱིར་ནི་ངལ་བས་གདུངས་པའམ། །འདི་ནི་སྦྱིན་པའི་བདག་པོ་སྟེར་བའི་གེགས་བྱེད་

ཅེས། །དམ་པ་དེ་ནི་གཉིད་ལོག་པས་ནི་སྡུག་བསྔལ་གྱུར། །དེ་ནས་སེམས་དཔའ་ཆེན་པོ་དེ་གཉིད་ཀྱི་དབང་དུ་ཉེ་བར་སོང་བ་ན་རྨི་ལམ་དུ་འོད་ཟེར་དྲི་མ་མེད་པ་འཁོར་ཡུག་ལ་མངོན་པར་འབྱུང་བའི་འོབས་ལམ་ན་ལུས་ནུས་པ་བུང་བའི་ཚོགས་ཀྱིས་ཤིན་ཏུ་ནག་པ་ལྷོད་པའི་སྐྲའི་ཚོགས་ཀྱིས་

Vol. 169 · folio 9b

དཔུང་པ་ཕྱོགས་གཅིག་བཀབ་པར་བྱས་ཏེ། པད་མའི་འདབ་མ་ལྟར་ཤིན་ཏུ་དམར་ཞིང་ཡངས་པའི་མིག་དང་ལྡན་པ། གསེར་གྱི་བུམ་པ་དང་རྗེས་སུ་མཐུན་པའི་ནུ་མའི་སྟེང་དུ་ཁྱབ་པའི་མུ་ཏིག་གི་ཆུན་པོ་དང་ནོར་བུའི་འོད་ཀྱིས་ཀུན་ནས་གསལ་བར་བྱས་པའི་བྲང་གི་མཐིལ་ཅན། མེ་ཏོག་བན་དུ་ཛི་

བ་སར་པ་ལྟར་ཤིན་ཏུ་དམར་བའི་མཆུ་དང་ལྡན་པ། གསུས་གཉེར་གསུམ་ནི་སྐས་ཀྱི་གདང་བུ་ལ་འཛེགས་པས་རབ་ཏུ་སྲབ་པའི་སྤུའི་ཕྲེང་བ་འཁྱོག་ཟེར་བར་བྱས་པ། ཟླ་བའི་མཛེས་པ་གཟུགས་དང་ལྡན་པ་ལྟར་རྣ་བའི་རྒྱན་གྱི་ནོར་བུའི་འོད་ཀྱིས་མཁུར་ཚོས་ཀྱི་སྨུག་རྩི་འདོར་བ། སྲབ་པ་

དང་དཀར་བའི་སྟོད་གཡོགས་ཀྱིས་ཡན་ལག་སྦས་པ། སྟོན་ཀ་ཟླ་བ་ཚེས་པའི་འོད་ཀྱིས་ཀུན་ནས་ཁྱབ་པའི་གསེར་གྱི་སྐུ་གཟུགས་ལྟར་རྗེས་སུ་མཐུན་པའི་ལྷ་མོ་མཐོང་ངོ་། །དེས་ཀྱང་མངོན་པར་གསལ་བར་གྱུར་པའི་སོ་དང་ནོར་བུའི་འོད་ཀྱིས་བཞིན་སྣང་བར་བྱས་ཏེ། གསལ་བ་དང་

འཇམ་པའི་ཚིག་གིས་འདི་སྐད་ཅེས་གསུངས་སོ། །སྦྱིན་ལ་ཤིན་ཏུ་ཆགས་པས་མཛོད་ཀྱི་ཕུན་ཚོགས་ནི། །ཁྱོད་ཀྱིས་འདི་ནི་རིམ་གྱིས་སྲབ་པ་ཉིད་དུ་འགྱུར། །མཚན་མོ་མཛེས་པས་ཟླ་བའི་མཛེས་པ་ཟད་པ་སྟེ། །རྒྱ་མཚོའི་རླབས་ནི་ངེས་པར་བཟློག་པར་འགྱུར་བ་ལྟར། །དེ་ནས་ཁྱོད་ལ་

ཤར་བ་སོང་བ་འགྲོ་འགྱུར་ཏེ། །ལྟ་བ་བཟློག་ཅིང་དོན་དུ་གཉེར་ལ་རྒྱབ་ཕྱོགས་པ། །སྐད་དང་བྲལ་བ་ཡིད་འོང་དངོས་ནི་ལྷུང་བ་ཡི། །སྟོན་ཀའི་དུས་ནི་སྤྲིན་ལ་ཡུན་རིངས་རྨ་བྱ་བཞིན། །དེ་ལྟར་འཛད་པར་འགྱུར་བའི་མཛོད་ཀྱི་ཕུན་ཚོགས་ལ། །ཁྱོད་ནི་དོན་གཉེར་རྙེད་ནས་མྱ་ངན་འགྲོ་

འགྱུར་ཏེ། །ཁྱོད་ཀྱི་སྦྱིན་འདོད་འདི་ནི་ཤིན་ཏུ་གྲགས་པ་ནི། །ནམ་ཞིག་ཀྱང་ནི་རྣམ་པར་འགྱུར་བར་འགྲོ་མི་འགྱུར། །ཤིང་ནི་ཟད་པའི་སོང་བར་གཡོ་བའི་འོད་ཟེར་གྱིས། །མེ་ནི་འབར་བ་ཟད་པར་ཡང་ནི་རབ་འགྲོ་སྟེ། །ཕལ་ཆེར་གོམས་པས་རྣམ་པར་འཕེལ་བའི་སྐྱེ་བོ་ནི། །ཆེན་པོ་

རྣམས་ཀྱི་སྦྱིན་འདོད་རྒུད་ཀྱང་དེ་ལྟ་མིན། །འདི་ནི་ནོར་རྣམས་ཡོངས་སུ་ཟད་ཀྱང་དོན་གཉེར་རྣམས། །སློང་ལ་བརྟེན་པའི་འཇིགས་པ་འཇིགས་པར་མི་བྱེད་དེ། །དེ་ལྟར་གསལ་བར་བྱས་པའི་ངེས་པ་སྐྱེད་རྣམས་ཀྱིས། །སྐྱེ་བ་དཀའ་བ་ལ་ཡང་རྒྱ་ཆེན་ཉིད་མི་སྤོང་། །དེ་ལྟར་ཁྱོད་ནི་བདེན་

Vol. 169 · folio 10a

པར་སྨྲ་བ་སྟེ། །སྲིད་པ་རྣམ་པར་གཅོད་པའི་གོ་འཕང་ཚུལ་བྱེད་པ། །བྱ་བ་ཉུང་བ་ཉིད་ནི་མྱུར་དུ་བཅིངས་ནས་སུ། །འཇིག་རྟེན་རྣམས་ལ་འབྱོར་ཕྱིར་རྒྱ་ཤུག་གླིང་དུ་གཤེགས། །བདག་གིས་ཉེ་བར་བསྟན་པ་དེ་ཉོན་ཅིག །འགྲོ་བ་ས་འཛིན་ཀླུ་དང་གནོད་སྦྱིན་གྱིས་

འཇིགས་པ། །རྒྱ་མཚོ་མང་བ་རྣམས་ཀྱིས་ཀྱང་ནི་འགག་འགྱུར་བ། །དེ་ནི་ཤིན་ཏུ་སྒྲུབ་པའི་དོན་དུ་ཁྱོད་ཉིད་ནུས། །རི་བོ་མ་ལ་ཡ་ལ་འཛེག་བྱེད་བདུད་རྩི་ཞེས། །བརྩོན་པ་བཏང་ན་གཙང་བའི་དྲི་ལྡན་སྨན་ཡོད་དེ། །དགང་བླུགས་ཡོངས་སུ་སྨིན་ནས་དེ་ཟོ་ཤིག །ངལ་དང་སྐོམ་པ་

སེལ་དང་བཀྲེས་པ་སེལ་བའི་ཕྱིར། །གླིང་རྣམས་བརྒྱ་ཕྲག་ལྔ་དང་འཇིགས་པའི་ཆུ་ལྡན་ཆུ་བོ་དེ་དང་དེ་རྣམས་འདས་ནས་ནི། །ཆུ་གཏེར་རྣམས་ལ་བསོད་ནམས་དང་ནི་བརྩོན་འགྲུས་ཀྱིས་ནི་གཟིངས་རྣམས་དབུས་ནས་རྒལ་ནས་ཀྱང་། ས་འཛིན་མཐོན་པོའི་སྟེང་ན་ཆེན་མོ་མིང་གི་

ཚོགས་ནི་ཆེན་པོ་ཞེས་བྱ་སྨན་ཡོད་དེ། །དེ་ནི་བླངས་ནས་ལྟོ་འཕྱེ་ཆེན་པོའི་དུག་ནི་ཆད་པར་བྱ་ཕྱིར་དེར་ནི་ཁྱོད་སོང་ཅིག །ལྕང་ངར་གྱིས་ཕུག་པར་བྱས་པའི་སྤའི་ནགས་རྒལ་བར་བྱས་ནས་རྒྱ་མཚོའི་འགྲམ་དུ་ས་འཛིན་གྱི་ཕུག་གི་ནང་ན་གནས་པ་སྐར་མའི་མིག་ཅེས་བྱ་བ་སྲིན་པོ་ཁྱོད་ཀྱིས་མཐོང་

བར་འགྱུར་ཏེ། གཉིད་ལོག་པ་ལས་སད་པ་བཞིན་དུ་འབར་བའི་མེས་འབར་བ། །གང་གིས་མིག་དང་ཉི་མའི་དཀྱིལ་འཁོར་འདྲ་བའི་འབྲས་བུ་ཅན། །ཀུན་ནས་སེར་བའི་རྫི་མས་ཡོངས་བསྐོར་ལམ་གྱི་པྲི་ཀ་ཅན། །གཉིད་སངས་པ་ལ་བསྐུམ་པ་དང་འདྲ་བར་ནི་འཛུམས་མེད་པ། །དེ་ནི་གཉིད་

ལོག་པ་ན་མཐུག་པའི་དབུགས་ཀྱི་རླུང་གིས་ནི། །ཤིང་རྣམས་ཀྱི་ནི་མེ་ཏོག་དཀར་པོ་རབ་ཏུ་རྙིངས་པར་འགྱུར། །འདི་ཡི་ལྕེ་ནི་གཡོ་བ་རྣམ་པར་འགྱུར་ཏེ་ཁ་ཡི་སྦྱོར་བ་ལས། །འཇིགས་པའི་སྒྲ་ཡི་ཆུ་འཛིན་པ་ལས་གློག་འགྱུའི་རྒྱུན་བཞིན་ནོ། །དེ་ནས་གནོད་སྦྱིན་དང་ལྟོ་འཕྱེ་རྣམས་ཞི་

བའི་དོན་དུ་འདས་པའི་སངས་རྒྱས་རྣམས་ཀྱིས་གསུངས་པའི་མདོའི་ཚིག་རྣམས་འདོན་ཅིང་ཁྱོད་ཀྱིས་འགྲོ་བར་བྱས་ཏེ་སོང་ནས་ཀྱང་ཤིན་ཏུ་རིང་བ་མ་ཡིན་པ་ནི་སྐྱེད་མོས་ཚལ་རྣམ་པ་སྣ་ཚོགས་པའི་མེ་ཏོག་རྣམས་ཀྱིས་དྲི་ཞིམ་པའི་རླུང་དང་ལྡན་པ་རིན་པོ་ཆེ་དུ་མས་རབ་ཏུ་སྣང་བར་བྱས་པའི་

Vol. 169 · folio 10b

རྒྱ་མཚོའི་འགྲམ་ན་ས་འཛིན་རྣམས་ཀྱིས་རབ་ཏུ་བྱས་པ་དུ་མ་ཐ་དད་པའི་སྐྱེ་བོ་རྣམས་ཀྱིས་ཡང་དག་པར་གནོན་པའི་སྐྱེས་བུའི་ལམ་ཤི་བ་མེད་པའི་གྲོང་དང་འདྲ་བའི་རོ་ཧི་ཏ་ཞེས་བྱ་བའི་གྲོང་ཁྱོད་ཀྱིས་མཐོང་བར་འགྱུར་རོ། །དེར་ཡང་ཟླ་བ་ཉ་བ་ལྟར་ཡིད་དུ་འོང་བ་རྣམ་པ་སྣ་ཚོགས་པའི་ཡོན་ཏན་

གྱི་ཚོགས་དང་ལྡན་པ་དེད་དཔོན་མ་གྷ་ཞེས་བྱ་བ་ཡོད་དེ། །དེ་ནི་རྒྱ་ཤུག་གི་གླིང་གི་ལམ་ཁྱོད་ལ་ཉེ་བར་སྟོན་པར་འགྱུར་རོ། །དེད་དཔོན་ཆེན་པོ་དེ་ཡང་ནད་ཤིན་ཏུ་དྲག་པོ་ཉིད་ཀྱིས་སེང་གེ་དང་སྟག་གིས་འཇིགས་སུ་རུང་བའི་རི་བོ་དང་ནགས་ཀྱིས་ཁྱབ་པའི་དཔག་ཚད་མང་པོར་སོང་སྟེ་དུས་དུས་ཀྱི་ལམ་

གྱིས་སྦྱར་བར་འགྱུར་རོ། །ཁྱེད་ཀྱང་དེར་སྡུག་བསྔལ་མི་བྱའོ། །སྙིང་རྗེས་རབ་ཏུ་བསྐུལ་བ་ནི། །སེམས་ཅན་ཕན་ཕྱིར་བསྟན་པ་རྣམས། །སྤྲོ་བ་དང་འབྲེལ་རང་བཞིན་ཆོས། །འདོད་པ་ཡང་དག་སྒྲུབ་པ་ཡིན། །ཕྱི་ནས་ལྷའི་མཐུ་དང་བསོད་ནམས་ཀྱི་མཐུས་རིང་པོར་འདའ་བར་བྱ་

སྟེ། ཁ་བ་ཅན་གྱི་རིའི་རྩེ་མོར་རྗེས་སུ་བྱེད་པའི་ར་བས་ཡོངས་སུ་བསྐོར་ཞིང་དངུལ་གྱི་གྲོང་ཁྱེར་སྒོ་བཅད་པ་ཁྱོད་ཀྱིས་མཐོང་བར་འགྱུར་ཞེས་བྱ་བའོ། །དེར་ཡང་ཁྱོད་ཀྱིས་མདོའི་ཚིག་དེ་རྣམས་ཉིད་གདོན་པར་བྱའོ། །དེ་ནས་སྒོ་གླེགས་དེ་རང་ཉིད་ཀྱིས་ཕྱེ་བ་འབྱུང་བར་འགྱུར་རོ། །དེ་ཡི་རྗེས་

སུ་མི་འམ་ཅི་མོ་བཞི་ནི་ངེས་པར་འབྱུང་བར་འགྱུར་ཏེ་ལྕི་བ་ཡི། །ནུ་མའི་བུམ་པའི་ཁུར་གྱིས་ཤིན་ཏུ་ངལ་ཞིང་དགོད་པའི་དབང་གིས་སོ་ཡི་འོད་ནི་གསལ། །སྨིན་མའི་རི་མོ་ཆེ་བར་ལྡན་ཞིང་ཨུཏྤལ་འདབ་ལྟར་སྔོ་བའི་མིག་ལྡན་པ། །སྲབ་ཅིང་དཀར་བའི་ལྷ་ལས་འབྱུང་བའི་གོས་ཀྱི་ན་བཟའ་འཛིན་པར་

བྱེད་པ་མོ། །འཇམ་པའི་རྒོད་པས་ཟུར་མིག་གིས་ལྟ་བ་དང་སྨིན་མཚམས་སྒེག་པས་འདོད་པའི་ལྷ་གསལ་བར་བྱས་པ་དེ་རྣམས་ལ་ཡང་ཁྱོད་ཀྱིས་སྲིང་མོའི་འདུ་ཤེས་བསྐྱེད་པར་བྱའོ། །དེ་རྣམས་ཀྱང་ཁྱོད་ལ་རྒྱ་ཤུག་གི་གླིང་གི་ལམ་སྟོན་པར་བྱེད་པར་འགྱུར་རོ། །དེ་ནས་རྒྱ་ཤུག་གི་གླིང་

གི་བདག་པོ་མི་འམ་ཅིའི་རྒྱལ་པོ་རྣམས་ཀྱིས་རབ་ཏུ་སྤྲོ་བ་སྐྱེད་དེ་ཁྱོད་ལ་ཡིད་བཞིན་ནོར་བུ་སྦྱིན་པར་འགྱུར་རོ། །དེར་ཡང་བཻ་ཌཱུརྱའི་རང་བཞིན་གྱི་གྲོང་ཁྱེར་དང་ཉེ་བ་སྐྱེས་པ་སྐྱེད་མོས་ཚལ་དུ་ཡོངས་པ་མ་རྨོས་པར་བཏབ་པའི་ལོ་ཐོག་གི་འབྲས་བུ་སྦུན་པ་མེད་པར་ཟ་ཞིང་སྟོན་ཀའི་སྤྲིན་ཞེས་བྱ་བ་

Vol. 169 · folio 11a

སྐྱེས་པ་ལྟར་རྟའི་རྒྱལ་པོ་ཁྱོད་ཀྱིས་མཐོང་བར་འགྱུར་རོ། །དེས་ཁྱོད་ལ་ནམ་མཁའི་ལམ་གྱིས་དོན་བྱས་པའི་བཱ་རཱ་ཎ་སཱིར་འགུགས་པར་འགྱུར་བ་ཡིན་ནོ་ཞེས་བྱ་བ་སྨྲས་ནས་ལྷ་མོ་དེ་མི་སྣང་བར་གྱུར་ཏོ། །བྱང་ཆུབ་སེམས་དཔའ་ཡང་དགེ་བའི་རྨི་ལམ་མཐོང་བས་རབ་

ཏུ་དགའ་བ་མཆོག་འཛིན་ཅིང་ངེས་པར་བདག་རྒྱ་ཤུག་གི་གླིང་དུ་ཕྱིན་པའི་འབྲས་བུ་རྙེད་པར་འགྱུར་ཞེས་བྱ་བ་རྣམ་པར་བསམས་ནས་ལྷ་རྣམས་མཆོད་པར་བྱས་ཏེ། དགེ་སྦྱོང་དང་བྲམ་ཟེ་དང་སྡུག་ཕོངས་རྣམས་ལ་སྦྱིན་པ་བྱིན་ནས་ཇི་ལྟར་ལྷ་མོས་ཉེ་བར་བསྟན་པའི་ལོ་བཅུ་གཉིས་རྒྱ་

ཤུག་གི་གླིང་དུ་ཕྱིན་ཏེ་མིའམ་ཅིའི་བདག་པོའི་དྲུང་ནས་ཡིད་བཞིན་གྱི་ནོར་བུ་དེ་ཐོབ་ནས་ཅི་ནས་ཀྱང་རྟའི་བདག་པོ་དེ་འོང་ངམ་སེམས་ཤིང་འདུག་གོ། །བསོད་ནམས་ལས་ཅན་དེ་ལས་ཀྱང་ནི་རྣམ་བསམས་པ། །གཞན་དོན་སྒྲུབ་པ་ལ་ནི་ངེས་པར་འབྲེལ་སེམས་ཀྱིས། །ཟླ་བའི་འོད་ཟེར་རྣམས་ཀྱི་

སྤྲོ་བའི་སྤུངས་པ་ལྟར། །རྟ་ཡི་རྒྱལ་པོ་དེ་ཡང་ཀུན་ནས་མྱུར་དུ་འོངས་པར་གྱུར། །ཀུན་ནས་འོངས་ཏེ་མི་ཡི་སྐད་དུ་དེས་སྨྲས་པ། །གོས་ཀྱི་སྐུད་པའི་རྣམ་པ་མཐུན་པའི་ཟེའུ་སོགས་ཅན། །གྲོང་ཁྱེར་འདི་ལས་རི་དང་རྒྱ་མཚོས་བགྲོད་དཀའ་བའི། །རང་ཡུལ་ལས་ཕྱོགས་ནམ་མཁའི་

ལམ་ལས་སུ་བདག་ཁྱེར། །རབ་ཏུ་དགའ་བ་ཡོན་ཏན་ལ་དགའ་ཡོན་ཏན་ཅན་གྱིས་དབྱེན། །རྟ་མཆོག་ཟླ་བའི་འོད་ཟེར་ལྟར་ནི་དཀར་བ་དེ་ལ་སྨྲས། །བུང་བ་རྒྱས་པ་རྣམས་ཀྱིས་ཁྱབ་པའི་སྐྱེད་མོས་ཚལ་གྱི་ནང་། །བདག་གི་བཱ་རཱ་ཎ་སཱིར་རྟ་རྒྱལ་ཁྱོད་ཀྱིས་མྱུར་ཁྲིད་ཅིག །དེ་ནས་རྟ་ཡི་རྒྱལ་

པོས་བསྟན་པའི་སེམས་ཅན་དེ་ལ་སྨྲས། །བདག་གི་རྒྱབ་འདི་ལ་ནི་ཞོན་ནས་ཡན་ལག་བརྟན་པར་ཤོག །རང་གི་གོས་ལ་དག་པའི་འོད་ཟེར་རིན་པོ་ཆེ་བཅིངས་ནས། །དེ་ནི་བྱ་ཡི་རྒྱལ་པོ་དང་མཉམ་སྤྲིན་ལ་ཞོན་པར་གྱུར། །རྨིག་པ་རྣམས་ཀྱིས་ཐུག་མེད་ཆུ་འཛིན་འབིགས་ཤིང་འགའ་

ཞིག་ཏུ། །གློག་ནི་ཀུན་དུ་སྣང་བས་ཡན་ལག་ཀུན་ནས་སེར་བྱས་པ། །ནམ་མཁར་ཕྱིན་ནས་གཡོ་མེད་རྒྱ་མཚོའི་ཆུ་ལྟར་སྔོ་བ་ཡི། །བཱ་རཱ་ཎ་སཱིར་རྟ་ཡི་རྒྱལ་པོ་དེ་ནི་བབས་པར་གྱུར། །དེ་ཡང་རང་གི་ཁང་པ་དང་ཉེ་བར་འཇུག་སྟེ་སྤྲིན་གྱི་ཤུགས་སླར་ཡང་རྒྱ་ཤུག་གི་གླིང་ཉིད་དུ་ལོག་

Vol. 169 · folio 11b

པར་གྱུར་ཏོ། །བྱང་ཆུབ་སེམས་དཔས་ཀྱང་ཞུགས་ནས་རབ་ཏུ་དགའ་བའི་ཡིད་དང་ལྡན་པ་དོན་དུ་གཉེར་བ་རྣམས་དང་གཉེན་བཤེས་རྣམས་ཀྱིས་བསྡུས་ཏེ་རང་གི་ཁྱིམ་དུ་ཞུགས་ཉི་མ་གཞན་ལ་ཕྱིར་བྱུང་སྟེ། ཡིད་བཞིན་ནོར་བུ་དེ་རྒྱལ་མཚན་གྱི་མཆོག་ལ་བཞག་ནས་འདི་སྐད་ཅེས་སྨྲས་སོ། །

གང་ཞིག་གང་གང་རྫས་འདོད་པ། །མི་རྣམས་ཀྱིས་ནི་འདི་རྙེད་དཀའ། །ཡིད་བཞིན་ནོར་འདི་ཡང་དག་པར། །དེ་ཕྱིར་དེ་དེ་སྦྱིན་གྱུར་ཅིག །དེའི་ཚེ་ཡུལ་དེ་ན་ཞིང་པའི་སྐྱེ་བོ་ཆུ་མེད་པ་ཉིད་ཀྱི་ཆུ་འཛིན་དཀར་པོ་རྣམས་ཀྱིས་མ་ལུས་པར་ཁྱབ་པའི་ཕྱོགས་ཀྱི་མཐའ་ཅན། ཤི་བའི་བ་གླང་

རྣམས་ཀྱི་ལུས་ལ་ཁའི་ཚོགས་གནས་པ་དབུལ་པོའི་ཚོགས་ཀྱིས་ཤིན་ཏུ་ཁྱབ་པ། སློང་མོའི་ཉེ་བར་སྤྱོད་པས་མ་རྙེད་པའི་མུ་གེ་ཆེན་པོ་བྱུང་བར་གྱུར་ཏོ། །དེ་ནས་སྐྱེ་བོ་དེ་རྣམས་འོངས་ཏེ་རབ་ཏུ་དགའ་བ་ལ་རེ་ཞིག་ནོར་བུའི་མཆོག་འབྲས་ཀྱི་སོ་བ་ཉིད་ཕོབ་ཤིག་ཅེས་སྨྲ་བར་གྱུར་ཏོ། །དེ་ལྟར་

ཤོག་ཅིག་ཅེས་བྱ་བ་བྱང་ཆུབ་སེམས་དཔས་སྨྲས་པ་དང་། རྣམ་པར་བསམས་ནས་ནོར་བུ་ཆེན་པོ་འདི་ལ་བལྟས་སོ། །འགའ་ཞིག་པ་ལ་ཤ་ཡི་ཤིང་། །ནང་འབྱུང་ནམ་མཁའ་ལས་ལྟུང་བའི། །འབྲས་སོ་མང་པོས་ས་འདི་ནི། །བར་མ་ཆད་པར་བྱུང་བར་གྱུར། །དེ་ནས་ནོར་བུ་སྣ་

ཚོགས་སྤྲོ་བའི་འོད་ལྡན་པ། །གཙང་བའི་འོད་དང་ལྡན་པའི་རྒྱན་རྣམས་ཡང་དང་ཡང་། །རླུང་གིས་རྣམ་པར་གཡོ་བ་ཀུན་ནས་ལྟུང་བ་ནི། །སྲབ་པའི་གོས་རྣམས་ཀྱང་ནི་ནམ་མཁའ་ལས་ལྟུང་སྟེ། །དེ་ནས་སྣ་ཚོགས་རྒྱན་དང་གོས་ཀྱི་ཕྲེང་བ་དང་། །དགའ་སྟོན་སྣ་ཚོགས་དང་ནི་

དབྱངས་སྙན་སྒྲ་འཇུག་པའི། །ངོ་མཚར་དང་བཅས་སྐྱེ་བོ་ཚོགས་ལ་བརྩེ་བས་ཏེ། །མདུན་གནས་དོན་གཉེར་རྣམས་ནི་འདི་ལྟར་ཚིམ་པར་གྱུར། །ཀྱེ་མ་ཀྱི་ཧུད་ཤིན་ཏུ་ངོ་མཚར་འདོད་འདི་ནི། །གཞན་ལ་ཕན་ཕྱིར་སྐྱེ་བ་བླངས་གྱུར་ཏེ། །ཨེ་མ་ཀུན་ད་ལྟར་དཀར་གྲགས་པ་རྣམས་ཀྱིས་

ནི། །ཡོངས་སུ་འདོར་བའི་ས་ནི་རྒོད་པ་འདྲ་བར་བྱེད། །ཅིས་ཀྱང་སྐྱེ་བོ་དེ་ལྟ་བུ་ནི་ཡོད་ཉིད་དེ། །རང་གི་སྐལ་བའི་ཕུན་སུམ་ཚོགས་དགེ་ལ་དམིགས་པའི། །ཁྱོད་ཅག་ལྟ་བུའི་འགྲོ་བའི་དོན་ནི་བྱེད་རྣམས་ལ། །གང་ཞིག་དེ་ལྟར་སྐྱེ་བ་སྐྱེ་བར་དོན་ཡོད་པ། །སྡུག་བསྔལ་ཆེན་པོ་ལས་གྲོལ་

Vol. 169 · folio 12a

བའི། །ཉོན་མོངས་མེད་པའི་འབྲས་ཆེན་སྟེར། །ཆོས་ཀྱི་རྣམ་པར་སྨིན་ལྟར་ཁྱོད། །དོན་གཉེར་རྣམས་ཀྱིས་བདེ་བའི་རྒྱུ། །དེ་ལྟར་བདག་ཉིད་ཀྱིས་སྡུག་བསྔལ་ལ་མ་རྩིས་ཤིང་འགྲོ་བ་རྣམས་ལ་བདེ་བར་བྱེད་པ་རྣམས་ཀྱི་སྙིང་རྗེ་ཆེན་པོ་དང་ལྡན་པའི་བདག་ཉིད་ཆེན་པོ་

དམ་བཅས་པ་ལས་འདའ་བར་མི་བྱེད་དེ། །དེ་ལྟར་བདག་གི་བདེ་བ་ལ་མ་ལྟོས་པར་གཞན་དོན་སྒྲུབ་པར་བྱེད་པ་ལ་མཁས་པས་བྱང་ཆུབ་ཏུ་འགྲོ་བར་བྱ་ཞེས་འགྲོ་བའོ། །རྒྱ་ཤུག་གི་གླིང་དུ་འགྲོ་བའི་སྐྱེས་པའི་རབས་ཏེ་སྐྱེས་པའི་རབས་གཉིས་པའོ།། །།མི་ཤེས་མུན་པ་

བསལ་བའི་དོན་དུ་ནི། །བྱང་ཆུབ་སེམས་དཔའ་ལས་གཞན་ནུས་པ་མིན། །ལེགས་པར་སྨྲས་པའི་ནོར་བུ་འགའ་ཞིག་ནི། །སྲོག་གི་རིན་གྱིས་ཉོས་པར་གྱུར་པ་ཡིན། །འདི་ལྟར་རྗེས་སུ་ཐོས་པ་ཡིན་ཏེ། ཐོས་པ་དང་ཚུལ་ཁྲིམས་ལ་སོགས་པའི་ཡོན་ཏན་རྣམས་ཀྱིས་མངོན་པར་

མཚོན་ཅིང་། སའི་སྟེང་དུ་རྒྱན་དུ་གྱུར་པ། སེམས་ཅན་རྣམས་བརྩེ་བ་དང་ལྡན་པ། དུས་རྟག་ཏུ་འཇུག་པའི་ཚངས་པའི་དབྱངས་ཀྱིས་མེའི་སྦྱིན་སྲེག་ལ་ཡམ་ཤིང་དང་ཀུ་ཤའི་ལས་ཀྱི་མཐའ་དང་ལྡན་པ་དུལ་བར་གྱུར་པའི་སློབ་མ་རྣམས་ཀྱིས་ཡོངས་སུ་བསྐོར་བའི་སློབ་དཔོན་དང་ལྡན་

པའི་བྲམ་ཟེའི་རིགས་ལ་འཇིག་རྟེན་པ་ལ་ཕན་པའི་དོན་དུ་བརྩོན་འགྲུས་དང་ལྡན་པའི་བྱང་ཆུབ་སེམས་དཔའ་དབང་དུ་བྱ་བའི་ཕྱིར་འཁྲུངས་པར་གྱུར་ཏོ། །བདག་ཉིད་ཆེན་པོ་དེ་ཉི་མ་རེ་རེ་ཞིང་ཡང་དག་པར་རྫོགས་པར་གྱུར་པའི་མཛེས་པ་དང་ལྡན་པ་ནི། འགྲོ་བའི་ཡིད་འོང་ཇི་ལྟ་ཇི་ལྟར་ཀུན་

ནས་འཕེལ། །རི་བོང་ཅན་ལྟར་འོད་ཟེར་རྣམས་ཀྱིས་མུན་འབྱེད་ཅིང་། །དེ་ལྟ་དེ་ལྟར་ཆེན་པོའི་རིགས་ཅན་ཆེ་བ་དེས། །རྒྱ་མཚོའི་ཆུ་ལྟར་འཕེལ་བ་ཀུན་ནས་བྱུང་བར་གྱུར། །ལ་ལ་ཞིག་ཉིད་སྐལ་བ་ཆེ། །དམ་པ་རྣམས་ལ་འདོད་པ་སྐྱེ། །གང་ལ་དམིགས་ནས་རིགས་ཀྱི་དཔལ། །

ཤིང་གི་ཡལ་ག་བཞིན་དུ་འཕེལ། །མཐུ་ཆེན་པོ་དང་ལྡན་པ་ཚངས་སྐུད་འདོགས་པའི་འདུ་བྱེད་བྱས་པ། བག་མེད་མང་བའི་ལང་ཚོ་ལ་གནས་པར་གྱུར་པ་ཡང་། ཆགས་པའི་སྐྱོན་རྣམ་པར་བཟློག་པ་དེའི་ཆོས་འདོར་བ་ཉིད་མཆོག་ཏུ་མཐོང་ནས་ཉེ་འདུན་རྣམས་ཀྱིས་ཆོས་འདོད་པ་

Vol. 169 · folio 12b

ཞེས་བྱ་བ་རྗེས་སུ་མཐུན་པའི་མིང་བཏགས་པར་གྱུར་ཏོ། །སྲོག་ཆགས་ཕལ་ཆེར་འཇིག་རྟེན་ལ། །ཡོན་ཏན་ཅན་ནམ་ཡོན་ཏན་གྱི། །མིང་ཡང་བསོད་ནམས་ལས་བྱུང་བ། །དགའ་བ་ཉིད་དུ་རབ་ཏུ་འགྱུར། །དེ་ལ་ཡང་རྣམ་པ་སྣ་ཚོགས་པའི་དོན་དང་ལྡན་པའི་བསྟན་བཅོས་ལེགས་པར་སྨྲས་

པ་རྣམས་ལ་ཡང་མཆོག་ཏུ་དགའ་བར་གྱུར་ཏོ། །ལེགས་པར་སྨྲས་པ་དོན་དུ་གཉེར་བ་དེ་ཡི་ལེགས་དཔྱད་ནི། །མཁས་པ་གང་ལས་ཀྱང་ནི་མཉན་པར་འགྱུར་བ་ཡིས། །ཤིན་ཏུ་སྣ་ཚོགས་ལས་བྱེད་དགའ་བར་གྱུར་པ་ནི། །བ་སྤུ་ལངས་དང་ཐིགས་པ་འཇུག་པ་བྱས་པར་གྱུར། །

གཙང་བ་འཇིག་རྟེན་རྣམ་པར་སྣང་བར་བྱེད་པ་ཀུན་ནས་ནི། །མཛེས་པ་མུན་པ་འབིགས་པར་བྱེད་པ་འོང་བར་གྲགས་པ་དང་། །དགེ་བ་གང་གི་སྙིང་ག་རི་བོང་ཅན་གྱི་མཚན་མ་ལྟར། །སྐྱེས་བུ་བཟང་པོའི་ལེགས་པར་བཤད་པས་ཅི་ཕྱིར་བདེར་མི་འགྱུར། །གང་ལས་ལེགས་པར་

བཤད་པ་ཤིན་ཏུ་ལེགས་པར་བཤད་པ་ཞེས། །རབ་རིབ་ཐར་བྱེད་ཐོས་པར་གྱུར་པས་རབ་རིབ་འབྱེད་པ་ནི། །བློ་ཡི་ཆེ་བ་རབ་ཏུ་གྲགས་པ་ཆེན་པོ་རྣམས་ཀྱི་འདུ་བའི་སར། །ཐོ་རངས་མཆོག་ཏུ་དེ་ནི་དེ་ལ་སྟོང་ཕྲག་བརྒྱ་སྦྱིན་འགྱུར། །བདག་ཉིད་ཆེན་པོ་དེ་ཡང་གང་དང་གང་དུ་འགྲོ་

བར་གྱུར་པ་དེ་དང་དེར་སྐྱེ་བོས་སོ་སོར་མཆོད་པར་གྱུར་ཏོ། །དེ་ནས་དུས་གཅིག་གི་ཚེ་ན་གདུག་པའི་སེམས་དང་ལྡན་པ་བྲམ་ཟེ་གཞན་དག་དེ་ལ་གནོད་པ་བྱེད་པར་འདོད་པས་བདག་ཉིད་ཆེན་པོ་དེའི་རྙེད་པ་དང་བཀུར་སྟིའི་ཁྱད་པར་དེ་ཉིད་རེ་རེར་མངོན་པར་འཕེལ་བར་གྱུར་པ་མི་བཟོད་པས་

ཁྲོ་བ་དང་ལྡན་པས་མྱུར་དུ་གོམ་པ་འདོར་བས་དེའི་གན་དུ་འོངས་པར་གྱུར་ཏེ། ཡོན་ཏན་གྱིས་རྙེད་མཆོད་པ་ནི། །གཞན་ལས་ཐོབ་མིན་སྐྱེ་བོ་ངན། །མཆོད་སྦྱིན་པ་ཡི་མཁས་པ་ཡང་། །གཞན་དག་ལ་ཡང་ཕྲག་དོག་བྱེད། །གདུག་པའི་བདག་ཉིད་བྲམ་ཟེའི་གཟུགས་འཛིན་པ་དེ་ཡང་ཤ་ཟ་ལྟར་

སེམས་དཔའ་ཆེན་པོ་གང་ན་དེར་ཉེ་བར་སོང་སྟེ་འདི་སྐད་ཅེས་སྨྲས་སོ། །བདག་གིས་ཐོས་པ་ཁྱོད་ནི་ཤིན་ཏུ་ལེགས་སྤྱད་དགའ། །ཤེས་པའི་ཁྱད་པར་ཅན་ལ་ནོར་ནི་སྦྱིན་པ་པོ། །དེ་ཕྱིར་བདག་ནི་སྐྱེ་བ་ཤེས་པ་ཁྱེད་ཅན་དུ། །ལེགས་པར་བཤད་པ་རྣམས་ཀྱིས་ཁྱེར་ཞིང་ཉེ་བར་འོངས། །

Vol. 169 · folio 13a

བུང་བ་རྣམས་ནི་ཡོངས་སུ་བསྐོར་བར་བྱེད་གྱུར་པ། །ལྷན་ཅིག་བྱེད་པའི་སྙེ་མ་ཁ་བྱེ་རྣམ་སྤངས་ནས། །མཆེ་བ་ཅན་གྱི་སྨྱོན་ཆུ་འཐུང་འདོད་ཡང་དག་འགྲོ། །དེ་ལ་ཡོན་ཏན་ཁྱད་པར་དེ་ནི་ངེས་པར་མཐོང་། །དེ་ནས་བྱང་ཆུབ་སེམས་དཔའ་ལེགས་པར་བཤད་པའི་སྐྱེས་སུ་

འབུལ་བར་བྱེད་པའི་བྲམ་ཟེ་དེ་མཐོང་ནས་རབ་ཏུ་དགའ་བས་བ་སྤུ་རབ་ཏུ་ལངས་པར་གྱུར་པའི་མཛེས་པ་དང་ལྡན་པ་ཀུན་ནས་ལངས་ཏེ་ལེགས་པར་འོངས་པ་དང་། ལེགས་པར་བཤད་པའི་རིན་པོ་ཆེ་འཚོང་བའི་བྲམ་ཟེ་ལ་བདག་ཅག་ནི་ལེགས་པར་བཤད་པའི་ནོར་བུ་རྣམས་ཉོའོ་ཞེས་བྱ་བ་

སྨྲས་ནས་བྲམ་ཟེ་དེ་བདག་ཉིད་ཀྱི་གདན་ཆེན་པོ་ལ་འདུག་ཏུ་བཅུག་སྟེ་རང་ཉིད་ས་ལ་འདུག་པར་གྱུར་ཏོ། །དེ་ནས་ཆོས་འདོད་པ་ལ་གྲོགས་པོ་རྣམས་ངོ་མཚར་དང་བཅས་པས་འདི་སྐད་ཅེས་སྨྲས་པར་གྱུར་ཏོ། །ལེགས་བཤད་རྣམས་ནི་ཐོས་པར་འགྱུར་བ་ཞེས་བྱ་ཁྱོད་ཀྱི་བཞིན་ནི་དགོད་

དང་བཅས་པར་འགྱུར། །ཐོས་ནས་མིག་གཉིས་མཆི་མ་དང་བཅས་པས་ནི་དགའ་བས་དཔལ་གང་ཡང་ནི་འགྲོ་བར་འགྱུར། །ཡན་ལག་གཅོད་པའི་དབང་གིས་དྲི་ཞིམ་ཀུ་མུ་ཏ་ནི་དལ་གྱིས་ཀུན་ནས་ཕྱེ་འགྱུར་ཏེ། །ཟླ་བའི་འོད་ཟེར་མུན་པ་བསལ་བར་བྱེད་པ་ཐོབ་ནས་མཛེས་པ་

མཆོག་ནི་རྒྱས་པར་འགྱུར། །དེ་ནས་ཆོས་འདོད་གུས་པ་མང་བ་དང་བཅས་པས་བྲམ་ཟེ་དེ་མཐོང་སྟེ་དེ་ལ་སློབ་མའི་སྐྱེ་བོ་ཉན་པར་འདོད་པ་ལ། སློབ་དཔོན་གྱིས་མངོན་པར་བརྗོད་པར་འོས་སོ་ཞེས་སྨྲས་སོ། །དེ་ནས་སྡིག་ཅན་དེས་གལ་ཏེ་ཁྱོད་ལེགས་པར་བཤད་པའི་རིན་པོ་ཆེ་འདོད་པའི་ཕྱིར་

དུ་བ་མེད་པའི་མེས་ཡོངས་སུ་གང་བའི་འོབས་ཆེན་པོ་ལ་བདག་ཉིད་མཆོང་བར་ནུས་ན་དེ་ནས་བདག་གིས་ལེགས་པར་བཤད་པ་སྔོན་མ་ཐོས་པ་ཡིད་དུ་འཕྲོག་པ་འདི་སྦྱིན་པར་བྱའོ་ཞེས་དེ་ལ་སྨྲས་སོ། །དེ་ནས་བྱང་ཆུབ་སེམས་དཔས་སེམས་ཅན་རྣམས་ལ་ཡོངས་སུ་འཕེལ་བའི་བློ་དང་ལྡན་

པ་འདི་སྨྲས་པར་གྱུར་ཏོ། །བྲམ་ཟེ་ཆེན་པོ་བདག་ཉིད་ཀྱི་སྡུག་བསྔལ་ལ་མི་ལྟོས་པར་བདག་ཅག་ལྟ་བུ་རྣམས་ལ་འདི་ནི་བྱ་དཀའ་བ་མ་ཡིན་ཏེ་འོན་ཀྱང་། ལེགས་བཤད་འགྲོ་བ་རྣམས་ཕྱིར་དམ་པའི་སྐྱེ་བོ་ལས། །ཞིང་ལས་འབྲས་བུ་བཞིན་དུ་བདག་གིས་ཀུན་ནས་བསགས་པ་སྟེ། །

Vol. 169 · folio 13b

མེ་དང་ལྡན་པའི་འོབས་ཆེན་ནང་དུ་བདག་ནི་འགྲོ་བ་ལ། །སྐྱེ་བོ་འདི་ནི་རྣམ་པ་གང་གིས་དེ་ནི་འཛིན་པར་འགྱུར། །བྲམ་ཟེས་སྨྲས་པ། ལེགས་པར་བཤད་པ་འདི་ནི་སྐྱེ་བོའི་ཚོགས་མ་ལུས་པ་ལ་ཐོས་པར་བྱ་སྟེ། དེ་ནས་མེའི་འོབས་སུ་བདག་ཉིད་མཆོང་བར་གྱིས་ཤིག །བྱང་ཆུབ་སེམས་

དཔས་སྨྲས་པ། ཇི་ལྟར་སློབ་དཔོན་འདོད་པ་དེ་ལྟར་བགྱིའོ། །རྣམ་པར་རྟོག་པའི་རྒྱ་མཚོ་ཤིན་ཏུ་རྒྱ་ཆེ་བ། །ཡུན་ནི་རིང་པོར་རྒལ་བར་དཀའ་བ་མ་བརྒལ་ཞིང་། །གཏི་མུག་རབ་རིབ་ཆེན་པོ་ཟད་པར་བྱེད་པ་ཡིས། །བྱང་ཆུབ་ནོར་བུ་འགྲོ་བས་ཇི་ལྟར་རྙེད་པར་འགྱུར། །དེ་བས་བདག་

གིས་ལེགས་པར་བཤད་པ་འདི་འདོད་པས། །སྲེག་བླུགས་ཟ་བ་ལ་ནི་ཆུ་བཞིན་ཞུགས་པར་བགྱི། །ཆོས་ཀྱི་གཏམ་གྱིས་ཕྲོགས་པའི་སེམས་ལྡན་བདག་ལ་ནི། །སྲེག་བླུགས་འཛིན་པ་ཡང་ནི་སྡུག་བསྔལ་བྱེད་མི་འགྱུར། །དེ་ལྟར་ཐོས་ནས་འོབས་ཆེན་པོ་ནི་བརྐོ་བྱས་ཏེ། །དེ་ནི་མེ་

དང་ལྡན་པར་མི་རྣམས་བྱེད་དུ་བཅུག །ཁྱིམ་གཞན་ནས་ནི་ཕྱི་རོལ་དུ་ནི་བྱུང་ནས་ནི། །སྐད་ཅིག་དེ་ལ་བྲམ་ཟེ་སྲིན་པོ་ལྷན་ཅིག་པས། །བློ་གྲོས་ཆེན་པོས་སྲེག་བླུགས་ཟ་བ་འབར་བ་ལ། །མཆོང་བའི་དོན་དུ་ངེས་པར་བྱས་པའི་ཡིད་ལྡན་པས། །མཆི་མས་གང་བའི་མིག་དང་ལྡན་པའི་

གྲོགས་རྣམས་ཀྱིས། །གྲོགས་པོ་ཉིད་ཀྱིས་ཡོངས་སུ་འཁྱུད་ནས་དེ་ནི་བཀག །དེ་ནས་ཆོས་འདོད་ལ་གྲོགས་པོ་རྣམས་དང་གཉེན་འདུན་རྣམས་སྡུག་བསྔལ་གྱི་མིག་མཆི་མས་ཡོངས་སུ་གང་བས་སྒྲ་དང་བཅས་པས་འདི་སྐད་ཅེས་སྨྲས་སོ། །ཤིན་ཏུ་ལེགས་པར་བཤད་པ་འདིས་ཅི་ཞིག་

བྱ་སྟེ། བྱ་བ་དང་བྱ་བ་མ་ཡིན་པ་ལ་མི་ལྟོས་པ་དྲི་མ་མེད་པའི་རིགས་ལས་སྐྱེས་པ་སྐར་མའི་བདག་པོའི་འོད་ཟེར་ལྟར་རྣམ་པར་དག་པ་གྲགས་པའི་རྟེན་མི་ལུས་རྙེད་པར་དཀའ་བ་འདི་ལ་བརྙས་པར་བྱས་ནས་གཉེན་འདུན་གྱི་སྐྱེ་བོ་ཡང་ཤིན་ཏུ་སྡུག་བསྔལ་གྱི་སྐལ་བ་ཅན་དུ་བྱས་ནས་བདག་ཉིད་

ཡོངས་སུ་འདོར་བར་འདོད་པ་སྟེ། འོ་ན་ལམ་མ་ཡིན་པར་འགྲོ་བའི་བློ་འདི་བཟློག་པར་གྱིས་ཤིག །རེ་ཞིག་ཁྱོད་ཀྱིས་ལྟ་བར་གྱིས་ཤིག །གང་རྣམས་ཞེས་བྱ་རྟག་ཏུ་ཤིན་ཏུ་ཡིད་འོང་སྐྱེ་བོ་ལ། །བུང་བས་ཀྱང་ནི་འདོད་པའི་འབྲས་སྟེར་གྲོགས་པོའི་སྐྱེ་བོ་ལ། །སྲོག་དེ་རྣམས་ཀྱིས་བདག་

Vol. 169 · folio 14a

གི་བདེ་ལ་མ་ལྟོས་ཉོ་བ་སྟེ། །ཅི་ཕྱིར་ལེགས་པར་བཤད་པ་ཤིན་ཏུ་ལེགས་པར་བཤད་པ་ཞེས། །དེ་ནས་བྱང་ཆུབ་སེམས་དཔའ་སྐྱེ་བོའི་ཚོགས་དེ་ལ་ལེགས་པར་བཤད་པའི་ཡོན་ཏན་བརྗོད་པར་འདོད་པས་ཆོས་བསྟན་པ་འདི་ལྟར་བྱས་པར་གྱུར་ཏོ། །རྣམ་

པར་ཤེས་པ་འབར་བར་བྱེད་ཅིང་སྤོབས་པ་རྒྱས་པར་བྱེད། །དེ་ཉིད་རབ་ཏུ་གསལ་བར་བྱེད་ཅིང་ལམ་ངན་གཅོད་པར་བྱེད། །དམ་པའི་ལེགས་པར་བཤད་པ་ཀྱེ་མ་ཡོངས་སུ་བསགས་གྱུར་པ། །དགེ་བའི་བཤེས་གཉེན་ལྟར་ནི་ཕན་པ་ཇི་བཞིན་བྱེད་མི་འགྱུར། །གང་དུ་ཤར་བའི་དྲི་མ་

མེད་པའི་ལམ་ལ་ཉི་མ་ཤར། །སྐྱེས་པ་རྣམས་ཀྱི་བློ་ནི་པདྨ་ལྟ་བུར་རྣམ་ཕྱེ་འགྱུར། །ཤིན་ཏུ་རབ་རིབ་འབིགས་པ་གཞན་ལས་ལེགས་པའི་བློ་གྲོས་ཀྱིས། །དེ་ནི་གཟུང་བྱ་བདག་ཉིད་ཚུལ་གྱིས་ལེགས་བཤད་ཅི་ལྟར་མིན། །དེ་ཕྱིར་བདག་གིས་མེ་ཡིས་སྲེག་པ་ལ་ནི་མ་བསམས་ཤིང་།

དེ་བཞིན་གཤེགས་པའི་གོ་འཕང་རྗེས་སུ་བསྒྲུབ་པར་འདོད་བཞིན་དུ། །ཤེས་རབ་བླ་མ་བླ་མ་བཞིན་དུ་ཉུང་མིན་ལེགས་བཤད་ཕྱིར། །དགའ་ཞིང་ལུས་ཀྱི་ཡོན་ཏན་རྣམས་ཀྱིས་བླ་མ་མཆོད་པར་བྱ། །མི་ལུས་ལྷ་ཡི་མཆོད་པའང་རུང་། །ལེགས་པར་བྱས་པའི་རྟེན་གྱིས་ཐོབ། །

ལེགས་པར་བཤད་པའི་བཅུད་ལེན་ནི། །བསོད་ནམས་ཀྱིས་ཐོབ་བརྒྱ་ལམ་ན། །དེའི་ཕྱིར་བདག་དགེ་བའི་ཕྱོགས་ལ་དམིགས་པའི་ཁྱེད་ཅག་བགེགས་བྱེད་པའི་ཕྱིར་འོས་པ་མ་ཡིན་ཏེ། །དེ་བས་གྲོགས་པོ་དེ་རྣམས་དང་གཉེན་འདུན་རྣམས་ལ་ཡང་རྗེས་སུ་ཆགས་པ་དང་བཅས་པ་རྣམ་

པར་བཟློག་ནས་བདག་ཉིད་མེའི་རང་བཞིན་དུ་བྱེད་པའི་ཕྱིར་ཤིང་སྡོང་པོ་ལ་ཞོན་ནས། བྲམ་ཟེ་དེ་ལ་ནི་སློབ་དཔོན་ལེགས་པར་བཤད་པ་དེ་རབ་ཏུ་བརྗོད་པར་མཛོད་ཅིག་ཅེས་སྨྲས་སོ། །བྲམ་ཟེས་སྨྲས་པ། རྟག་ཏུ་རབ་སྦྱིན་ལ་མཁས་ཤིང་། །གཙོ་བོ་གཡེར་བག་ཅན་རྣམས་ཀྱིས། །ཚུལ་

ཁྲིམས་དྲི་མེད་ལ་གནས་པའི། །ཤིན་ཏུ་བརྩོན་འགྲུས་གོ་ཆ་ཡིས། །མི་ཟད་གོ་འཕང་ཐོབ་པར་འགྱུར། །ཞེས་བྱ་བའོ། །དེ་ནས་བྱང་ཆུབ་སེམས་དཔའ་ཡང་རབ་ཏུ་དགའ་བས་ཚིགས་སུ་བཅད་པ་དེ་བཟུང་ནས་སྐྱེ་བོའི་ཚོགས་དེ་ལ་ཐོས་པར་བྱེད་ཅིང་གནས་སོ། །དེ་ནས་གྲོགས་པོ་དེ་རྣམས་

Vol. 169 · folio 14b

ལ་དེས་དོན་འདི་སྨྲས་སོ། །དགེ་བ་ལ་དམིགས་ཁྱེད་ཉིད་ཀྱིས་ནི་ལེགས་བཤད་པ། །མཆོག་ཏུ་དགའ་བ་ཡང་ཡང་བསྐྱེད་པ་སྟེ། །གང་ཕྱིར་སྡུག་བསྔལ་རྒྱུ་ཉིད་དུ་ནི་ཉེར་སོང་བ། །འོ་ན་དེ་ཕྱིར་བདག་ཅག་ལ་ནི་ལེགས་བཤད་མིན། །དེ་ནས་དེར་རང་བཞིན་གྱི་སྙིང་རྗེས་བརླན་པའི་བསམ་པ་དང་

ལྡན་པའི་མ་མོའི་ཚོགས་ནི་དམ་པ་དེའི་འབྲེལ་བ་མེད་པ་ཡང་མྱ་ངན་གྱི་དབང་གིས་འདི་ལྟར་རྩེ་གཅིག་པའི་ཡིད་མི་བདེ་བ་བྱུང་བར་གྱུར་ཏོ། །དྲི་ཞིམ་ངག་གི་སྦྲང་རྩི་ཤིན་ཏུ་དྲི་ཞིམ་པ། །ཡོངས་སུ་སྤྲོས་པའི་འོད་ཟེར་གེ་སར་ལྡན། །ཞལ་གྱི་ཆུ་སྐྱེས་དཔལ་ལྡན་འདི་ནི་སྲེག་བླུགས་ཟ། །སྙིང་རྗེ་དང་བྲལ་

ཇི་ལྟར་འདི་ནི་སྲེག་པར་བྱེད། །རྣམ་པར་དག་པའི་གསེར་ལྟར་དཀར་བའི་མེ་ཡིས་ནི། །ཡོངས་སུ་རྙིངས་གྱུར་ཡོངས་སུ་སྒྲ་སྒྲོགས་མིག་ལྡན་པ། །འདི་ཡི་ལུས་ཀྱི་ཀྱེ་མ་འབྱུང་བར་གྱུར་པ་སྟེ། །རབ་ཏུ་ཚིག་པའི་ཤིང་དང་འདྲ་བ་དྲི་མ་ཅན། །ཏོག་ཏོག་སྒྲ་ནི་འབྱུང་གྱུར་པ། །མེ་ཡི་ནང་དུ་འཇུག་

པ་ནི། །ལུས་པོ་འདི་ནི་དག་གྱུར་ཅིང་། །འདི་ནི་སུ་ཞིག་བལྟ་བར་ནུས། །རྣམ་པ་གཉིས་སུ་བྱེད་འགྱུར་བའི། །གླིང་བུ་རྣམས་ཀྱི་དུས་ཚིགས་སྒྲ། །གཉེན་འདུན་རྣམས་ཀྱི་རེ་བ་འདིའི། །ཇི་ལྟར་སྒྲ་ནི་གསལ་ཐོས་འགྱུར། །རླུང་གིས་ཆགས་པ་འདི་རྣམས་ནི། །བསྐྱོད་པས་འདབ་མ་

ལྷགས་རྣམས་ཀྱིས། །འདི་ནི་སྲེག་པར་མ་བྱེད་ཅིག །ཤིང་རྣམས་མེ་ལ་བཟློག་བཞིན་བྱེད། །སྡུག་བསྔལ་ཆུས་ནི་མིག་དམར་བའི། །ཧ་ཧ་ཞེས་པའི་ཡིག་གཅིག་ངག །འདི་ཡིས་གཉེན་འདུན་སྡུག་བསྔལ་བའི། །བདག་ཅག་ཡིད་ནི་རྣམ་པར་གདུང་། །འདི་ནི་འདི་འདྲའི་ངག་བྱས་

ཏེ། །དོན་དུ་གཉེར་ལ་འདིར་ནོར་སྦྱིན། །དེ་ལྟར་དམ་པའི་གྲོགས་འདི་རྣམས། །མཆི་མ་དང་བཅས་སྟོན་པར་འགྱུར། །ཉེ་བར་མིན་པར་བདག་ཅག་གི །ཡིད་ནི་སྡུག་བསྔལ་སྲེག་པར་བྱེད། །གྲོགས་པོའམ་ནི་གཉེན་རྣམས་ནི། །སྲོག་ཆགས་ཇི་ལྟར་འཛིན་པར་བྱེད། །དེ་བས་ན་

ཤིན་ཏུ་སྙིང་རྗེ་བའི་དྲག་པོའི་ལས་བྱ་དཀའ་བ་འདི་ལྟ་བ་འདི་ནུས་པ་མ་ཡིན་ནོ་ཞེས་བྱ་བ་མངོན་པར་བརྗོད་ནས་བུད་མེད་ཀྱི་སྐྱེ་བོ་དེ་ཁྱིམ་ལ་མངོན་པར་ཕྱོགས་ཏེ་རབ་ཏུ་སོང་བར་གྱུར་ཏོ། །དེ་ནས་བྱང་ཆུབ་སེམས་དཔས་སྨོན་ལམ་འདི་ལྟར་བྱས་པར་གྱུར་ཏེ། བདག་ནི་བརྒྱ་བྱིན་གོ་འཕང་དགེ་

Vol. 169 · folio 15a

བས་རྙེད་པ་དོན་མི་གཉེར། །རིག་འཛིན་བདག་པོ་ཉིད་ཀྱང་མིན་ཏེ་རྒྱལ་སྲིད་ཀྱང་མ་ཡིན། །དགེ་བ་སྐྱེས་པ་འདི་ཡིས་འགྲོ་བ་འདི་ལ་བདེ་གཤེགས་ཉིད། །ཐོས་ནས་སྡུག་བསྔལ་ཟད་པའི་དོན་དུ་འབྱུང་བར་འགྱུར་བར་ཤོག །དེ་ལྟར་བརྗོད་ནས་བདག་ཉིད་ཆེན་པོ་

དེས་བདག་ཉིད་དོར་ཏེ་དོར་མ་ཐག་ཏུ་མེ་དེ་འབར་བའི་ཚོགས་དང་དུ་བའི་ཚོགས་ཉེ་བར་ཞི་ནས་དྲི་ཞིམ་པའི་པདྨ་ཁ་ཕྱེ་བའི་དྲིས་དྲི་ཞིམ་པར་བྱས་པའི་ཕྱོགས་ཀྱི་དབུས་སུ་པདྨ་དང་ལོ་མ་སྔོན་པོ་ལ་གནས་པའི་དྲི་མ་དང་བྲལ་བའི་ཆུའི་ཐིགས་པ་དང་ལྡན་པ། ཤེལ་དང་འདྲ་བའི་ཐིགས་

པས་ཁྱབ་པའི་མར་གད་ཀྱི་བྲག་དང་རྗེས་སུ་མཐུན་པའི་ཚོགས་དང་ངར་ངུར་ཟུང་དང་། ངང་པ་དང་། ཆུ་སྐྱར་རྣམས་ཀྱིས་ཉེ་བར་མཛེས་པར་བྱས་པ་པདྨའི་འབྱུང་གནས་ཉིད་དུ་འགྲོ་བར་གྱུར་ཏོ། །དོན་བྱས་འདྲ་བ་པདྨ་ཉིད། །རློམ་པའི་སེམས་ཀྱི་པདྨ་ལ། །དེ་ཡང་བློ་ལྡན་རྣམས་ཀྱི་མཆོག །

བདག་ཉིད་གནས་པ་མཐོང་བར་འགྱུར། །ཞབས་དང་ཉེ་བར་མྱོས་པའི་བུང་བའི་འཁོར་བ་ནི། །ཞི་བའི་ཆོས་འདོད་པ་ལ་ཆོས་ནི་གསུངས་གྱུར་པ། །པདྨའི་འདབ་ལྟར་རྒྱས་པའི་སྤྱན་ནི་པད་གནས་པ། །པདྨའི་སྐྱེ་གནས་མཛེས་པ་ཤིན་ཏུ་འཛིན་པར་གྱུར། །འདི་ནི་རྨི་ལམ་ཡིན་

ཏེ་འོན་ཏེ་འདི་སྒྱུ་མ། །མེ་ནི་འདི་གང་གང་དུ་འདི་ནི་ཆུ་སྐྱེས་ཉིད། །དེ་ལྟར་ངོ་མཚར་ཕངས་པའི་སེམས་ལྡན་པ། །དེ་ལ་མཐོང་ཞིང་སྐྱེ་བོ་དེ་རྣམས་ངག་ཏུ་སྨྲ། །སྐྱེ་བོ་དེ་རྣམས་དེ་ནི་མཐོང་བར་གྱུར་པ་ལ། །ཆུ་སྐྱེས་དབུས་སུ་གནས་པར་འདོད་པ་མཐོང་བ་ནི། །དགའ་བའི་མཆི་མ་

ཡང་དག་འབྱུང་བའི་སྐད་ཅིག་གིས། །ཁྲོ་བས་མྱ་ངན་མཆི་མའི་ཆུ་ནི་གཏོང་བ་ལྟར། །དེ་ནས་ནམ་མཁའ་ལས་ནི་ཟེའུ་འབྲུས་ཁྱབ་པའི་དྲི་ལྡན་ལྷུང་བ་ལྟར། །བུང་བའི་ཕྲེང་རྣམས་ཀྱིས་ནི་ཀུན་ནས་རྗེས་སུ་འགྲོ་བ་མེ་ཏོག་ཆར། །བདུད་ཀྱང་མེ་ཏོག་གིས་བྱས་གཞུ་ནི་བཟུང་ནས་

ལོགས་སུ་འབྱུང་འགྱུར་ཏེ། །མྱ་ངན་ཉེ་བར་འཛིན་ཅིང་ལག་པ་རྣམ་པར་གནས་པའི་འཁོར་ལོ་ཅན། །དེ་ནས་བྲམ་ཟེ་དེ་འབར་བའི་སོལ་བའི་དབུས་སུ་གནས་པ་དང་འདྲ་བའི་བདག་ཉིད་ཀྱི་དབུགས་དྲི་བས་མངོན་པར་ཚ་བའི་བཞིན་གྱི་བར་དང་ལྡན་པ་བདག་ཉིད་རྣམ་པ་གང་གིས་ཀྱང་འཛིན་

Vol. 169 · folio 15b

ཅིང་འདི་སྐད་ཅེས་སྨྲས་སོ། །ས་ཡི་བུག་པ་ཟབ་མོ་ལ་ནི་ཡོངས་སུ་སྤྲོ་བྱེད་པ། །མེ་དང་འདྲ་བར་མདུན་དུ་ཆེ་བ་དག་ནི་མཐོང་བ་སྟེ། །འདི་ལ་རིམ་གྱིས་ཡོངས་སུ་བསྡིགས་བྱེད་ཤིན་ཏུ་སྡུག་བསྔལ་གྱིས། །ས་ལ་བདག་གི་གཟུགས་ནི་རྣམ་པར་ནུབ་པ་ལྟ་བུར་བྱེད། །དྲག་པོའི་མེ་ལྡན་

དམྱལ་བ་འདིར་ནི་བདག་ནི་ལྷུང་གྱུར་པ། །ཆོས་འདོད་ཁྱོད་ནི་དེ་རིང་འདིར་ནི་བདག་གི་སྐྱབས་གྱུར་ཅིག །འདོད་པ་མཐོན་པོ་གཞན་ལ་ཕན་པར་བྱེད་པ་ཆེན་པོ་རྣམས། །ཁྱེད་ཅག་ལྟ་བུ་གྲོགས་པོ་དང་ནི་དགྲ་ལ་མཉམ་སེམས་ལྡན། །དེ་ནས་བྱང་ཆུབ་སེམས་དཔའ་དེ་ལ་སྙིང་བརྩེ་བས་

བདེན་པའི་བྱིན་གྱི་རླབས་བྱས་པར་གྱུར་ཏེ། བདེན་པ་གང་གིས་སེམས་ཅན་དོན། །བྱང་ཆུབ་སྤྱོད་པ་བདག་སྤྱོད་པས། །དམྱལ་བ་འབར་བའི་མེ་ལྡན་པར། །དེས་ནི་བྲམ་ཟེ་མ་སོང་ཅིག །དེ་ལྟར་བྱང་ཆུབ་སེམས་དཔས་བྲམ་ཟེ་དེ་ལ་གནས་པའི་སྐད་ཅིག་དེ་ཉིད་དུ་ཧ་རི་ཙན་དན་གྱིས་རྗེས་

སུ་བྱུགས་པ་དང་འདྲ་བར་བདག་ཉིད་རབ་ཏུ་དགའ་བར་གྱུར་ཏོ། །དགེ་བའི་བཤེས་གཉེན་ལ་བརྟེན་ནས། །འགྲོ་བའི་དོན་ལ་མཁས་པ་ལ། །སྡིག་པ་བྱས་པ་རྣམས་ཀྱི་ཡང་། །སྡིག་པ་མྱུར་དུ་འཇིག་པར་འགྱུར། །དེ་ནས་བྱང་ཆུབ་སེམས་དཔའ་ལ་རབ་ཏུ་དགའ་བའི་ཡིད་དང་ལྡན་

པའི་གྲོགས་པོ་དང་གཉེན་བཤེས་དང་དོན་དུ་གཉེར་བ་རྣམས་ཀྱིས་ཀུན་ལ་སྣང་བར་གྱུར་པའི་སྦྱིན་པ་དང་ཚུལ་ཁྲིམས་ལ་སོགས་པ་ཡང་དག་པའི་གཟི་བརྗིད་ཀྱི་དོན་དུ་ཆོས་དང་མཐུན་པའི་གཏམ་བྱས་པར་གྱུར་ཏོ། །ལུས་དང་རྗེས་སུ་དཔག་པས་ཀྱང་། །གཉི་ག་མ་ངེས་རྒྱུ་ཕྱིར་ནི། །ཁྱད་

པར་ངེས་པར་སྐྱེད་པའི་ཕྱིར། །མངོན་སུམ་ཤིན་ཏུ་སྟོབས་དང་ལྡན། །ཡོངས་སུ་གཏོང་བ་ཆེན་པོ་འདི་ནི་ངོ་མཚར་བཅས། །ཡུན་རིངས་རྣམ་མཐོང་བདག་ལ་མེ་ལྕེ་འཕྲོ་བ་ནི། །མེ་འདི་མངོན་སུམ་ལུས་ཅན་རྣམས་ལ་ཐམས་ཅད་དུ། །རབ་རྒྱས་པདྨའི་འབྱུང་གནས་ཉིད་དུ་ཉེ་བར་སོང་། །

དེ་ནས་རྒྱ་ནི་ཆེ་བའི་ལས་ཀྱི་མཐུ་འདི་དང་། །ངོ་མཚར་ཆེན་པོ་ཡང་དག་པར་ནི་མཐོང་ནས་ནི། །དགེ་མི་དགེ་ཡི་འབྲས་བུ་བདེ་དང་སྡུག་བསྔལ་ཡོད་པ་སྟེ། །འདི་ནི་རྣམ་པར་བསམས་ནས་ལམ་ནི་ངན་པ་སྤོངས། །བདག་མེད་ཉིད་ཀྱིས་རྣམ་པར་བཙུམས་པའི་བདག་ཉིད་ཀྱི། །ལུས་ཅན་

Vol. 169 · folio 16a

རྣམས་ཀྱི་རབ་སད་ཉེ་བར་མཁོ་བ་སྟེ། །མཁས་པ་རྣམས་ནི་གསལ་བར་བློ་ཡི་མིག་རྣམས་ལ། །རབ་སད་ཡོད་པ་ལ་ནི་ཅི་ཞིག་རབ་ཏུ་སད། །ཕན་པས་མངོན་པར་ཕྱོགས་རྣམས་ལ་ཡང་ཆོས་དག་གིས། །དམ་པ་རྣམས་ནི་ཤིན་ཏུ་རབ་སད་སྐྱེད་པར་བྱེད། །ལྕག་གིས་ཡང་

དག་བསྐུལ་བས་རབ་ཏུ་འགྲོ་བ་ཡི། །རྟ་རྣམས་ལ་ནི་འགྲོས་ཀྱི་ཁྱད་པར་འབྱུང་བར་འགྱུར། །གཡོ་སྒྱུ་མང་བའི་ཁྱིམ་གྱི་གནས་ནི་སྐྱོང་བྱེད་པའི། །བློ་ལྡན་རྣམས་ལ་ཅུང་ཟད་ཀྱང་ནི་ཡིད་བརྟན་མེད། །རབ་ཏུ་གྲག་པའི་མཆེ་གཉིས་མྱོས་པ་འཛེག་རྣམས་ལ། །ལྕགས་ཀྱུ་མ་བཏབ་པར་ནི་

གཉིད་ནི་མི་རིགས་སོ། །བུ་ཆུང་སྨྲ་བ་དང་ནི་ཁྱིམ་ནི་ཕུན་སུམ་ཚོགས་ལྡན་པ། །སྒེག་དང་གཟུགས་བྱད་རྣམ་པར་མཛེས་པའི་བུད་མེད་རྣམས། །རབ་ཏུ་ཆགས་ཅན་བློ་མེད་རྣམས་ཀྱི་འདི་ཐམས་ཅད། །ཞི་བ་རྗེས་སུ་མཐུན་ལ་ལམ་ནི་འགག་པར་བྱེད། །རྣམ་པ་གང་གིས་མི་ཁོམ་

བརྒྱད་པོ་དང་བྲལ་བའི། །མི་ལུས་ཤིན་ཏུ་རྙེད་དཀའ་འཐོབ་ནས་ཀྱང་། །གང་ཞིག་བག་མེད་བསྟེན་པས་ཞི་བའི་དོན་མི་མྱུར། །འདི་ནི་བ་གླང་རྣམས་ཀྱི་གྲལ་དུ་རྣམ་པར་སྦྱར། །འདི་ནི་ཐོབ་དང་ཐོད་ནི་ཐོབ་བྱ་མ་ཡིན་པ། །འདི་ནི་བྱས་དང་འདི་ནི་བྱེད་འགྱུར་མི་རྣམས་ལ། །དེ་ལྟར་

ཡིད་ཀྱི་སྣ་ཚོགས་པས་ཟད་པ། །ཡིད་ཀྱི་ཤིང་རྟས་འཇུག་པ་འགྲོ་བར་མི་འགྱུར་རོ། །ཡུལ་རྣམས་ལ་ནི་ཉེ་བར་ལོངས་སྤྱོད་མཐར་ནི་རྩུབ་པ་སྟེ། །སྦྲུལ་གྱིས་དཀྲིས་པའི་ཙན་དན་བཞིན་དུ་ཡོངས་སུ་འཁྱུད་པ་ནི། །བདེ་བ་ཞེས་བྱ་ཡང་དག་མ་ཡིན་ཀུན་རྟོག་རྗེས་འགྲོ་བའི། །སྐྱེ་བོ་

རྣམས་ནི་སྡུག་བསྔལ་དྲ་བ་མང་ལ་ལྷག་པར་ཉལ། །ཀྱེ་མ་མ་རིག་པས་ནི་འགྲོ་བ་མ་ལུས་འོག་ཏུ་བྱས། །གློ་བུར་སྐྱེས་པའི་དྲི་མ་རྣམས་ཀྱིས་དྲི་མར་བཅས་པ་སྨད། །གང་ཞིག་འདི་ནི་བསྡུས་བྱས་འཆི་བའི་སྒྲ་ཡི་སྤྱོད་ཡུལ་ནི། །གླང་པོ་ཆེ་ནི་ཉལ་བ་བཞིན་དུ་བབས་ནས་གནས་པར་འགྱུར། །

གཡོ་སྒྱུ་ཅན་གྱི་སྒྲིབ་པའི་སྒྲ་རྣམས་ཀྱིས་ནི་ལམ་བཟང་འཕྲོག །མི་རྟག་པ་ཡི་འཇིགས་པ་རྟག་ཏུ་རྣམ་པར་བསམ་པར་མ་བྱས་ཤིང་། །བདེ་བར་གཤེགས་པའི་རྗེས་སུ་བསྟན་པའི་གྲུ་ནི་སྤངས་བྱས་ནས། །འགྲོ་བ་སྡུག་བསྔལ་རྒྱ་མཚོ་ལ་ནི་རྣམ་པར་ནུབ་པར་འགྱུར། །སྐད་ཅིག་རེ་རེར་

Vol. 169 · folio 16b

སྲོག་ནི་ཉེ་བར་ཟད་པར་འགྱུར་བ་སྟེ། །དུ་བའི་ལམ་ཅན་རབ་ཏུ་ཞི་བར་འགྱུར་བའི་གཟུགས་བཞིན་དུ། །དེ་བས་རྟག་ཏུ་ཡུལ་རྣམས་ལ་ནི་རྟག་ཏུ་རྒྱབ་ཀྱིས་ཕྱོགས་པ་འདི། །མྱུར་བ་དང་བཅས་ཕན་པའི་ཕྱིར་ནི་བློ་གྲོས་དང་ལྡན་མཛོད། །དེ་ལྟར་ཚིག་ནི་རིགས་པ་མ་ལྡན་གལ་ཏེ་བདག་གིས་སྨྲས་པ་

ནི། །ཇི་ལྟར་འདོད་པས་འདོད་པའི་བདེ་བའི་ཆོས་འབྲེལ་ཉམས་སུ་མྱོང་བར་གྱིས། །འོན་ཏེ་འདི་ནི་ཡོན་ཏན་དང་ལྡན་དམ་པ་རྣམས་ཀྱིས་བསམས་བྱས་ཀྱེ། །ཡུལ་ལ་སྲེད་པ་འགག་པར་བྱེད་པའི་ཞི་བ་མཆོག་ནི་བསྟེན་པར་མཛོད། །དེ་ལྟར་ཆོས་བསྟན་པ་མཛད་ནས་བྱང་ཆུབ་སེམས་དཔའ་གྲོགས་

པོའི་སྐྱེ་བོ་དང་བཅས་པ་ཁྱིམ་དུ་ཞུགས་པར་གྱུར་ཏོ། །དེ་ལྟར་ལེགས་པར་སྤྱོད་པ་ལ་མཁས་པའི་བཅོམ་ལྡན་འདས་དེས་སྲོག་རྣམས་ཀྱིས་ཀྱང་ལེགས་པར་བཤད་པ་རྣམས་ཉོ་བར་མཛད་དོ་ཞེས་བྱ་བ་བསམས་ནས་དུས་རྟག་ཏུ་སྡུག་བསྔལ་གཅོད་པར་འདོད་པའི་ཤེས་རབ་ཅན་གྱི་ཆོས་ཀྱི་

གཏམ་ཉན་པ་ལ་གུས་པ་ཆེན་པོ་བྱའོ། །དགེ་བའི་བཤེན་གཉེན་ལ་བརྟེན་པ་ཡང་མངོན་པར་འདོད་པའི་འབྲས་བུ་འགྲུབ་པར་བྱེད་པར་འགྱུར་བས་ན། །དེའི་ཕྱིར་དེ་དང་རྗེས་སུ་འཇུག་པས་གནས་པར་བྱ་ཞེས་བྱའོ། །ཆོས་འདོད་པའི་སྐྱེས་པའི་རབས་ཞེས་བྱ་བ་སྟེ་སྐྱེས་པའི་རབས་

གསུམ་པའོ།། །།དམ་པ་དུད་འགྲོའི་སྐྱེ་གནས་སོན་རྣམས་ཀྱང་། །གཞན་དོན་སྲོག་ནི་ཀུན་ནས་གཏོང་བ་སྟེ། །སུ་ཞེས་བྱ་བ་སྐྱེས་པར་གྱུར་པ་སྟེ། །ནོར་ཙམ་ལ་ནི་སུ་ཞིག་ཆགས་པར་བྱེད། །འདི་ལྟར་རྗེས་སུ་ཐོས་ཏེ། གཡོ་བ་མེད་པ་ངེས་པར་ཐིམ་པའི་ནེ་ཙོའི་ཚོགས་

དང་། རྩྭ་སྔོན་པོས་ཉེ་བར་ཁྱབ་པའི་སའི་ཆ་རྣམ་པ་སྣ་ཚོགས་པའི་རིའི་རྩེ་མོར་ཤིང་རྣམས་ཀྱི་གྲིབ་མ་ཉེ་བར་འདུག་ཅིང་སྐྱུག་ལྡད་བྱེད་པར་གྱུར་པའི་རི་དྭགས་ཀྱི་ཚོགས་དང་ལྡན་པ་དང་། བུང་བའི་ཚོགས་ཀྱིས་བསྐོར་ཞིང་ཉེ་བར་སྒྲ་འབྱིན་པར་གྱུར་པའི་མེ་ཏོག་སྐྱེས་པའི་ལྗོན་ཤིང་རྣམས་ལ་

ཡང་དག་པར་རེག་པས་དྲི་ཞིམ་པའི་རླུང་གིས་བསྐྱོད་པར་གྱུར་པའི་རི་ལས་འབབ་པའི་ཆུས་དག་པར་བྱས་པའི་བྲག་གིས་རྒྱབ་ཀྱི་མཐའ་དང་ལྡན་པ་དང་། ཐུབ་པའི་སྐྱེ་བོ་རྣམས་ཀྱི་ཡིད་དང་རྗེས་སུ་མཐུན་པ་དང་། རིགས་དང་ལྡན་པའི་ཤིང་དང་ལྗོན་ཤིང་རྣམས་ཀྱི་ཟེའུ་འབྲུ་ལྷུང་བས་ཆུ་བོའི་རླབས་

Vol. 169 · folio 17a

ཀྱིས་ཀུན་ནས་གདུངས་པའི་ཀུ་མུ་ད་ལྟར་དཀར་བའི་དབུ་བའི་ཚོགས་ཀྱིས་བརྒྱན་པར་བྱས་པའི་ཆུ་དང་ལྡན་པ་དང་། མཆོག་གི་ཆུ་དང་འདབ་ཆགས་རྣམས་ཀྱི་སྒྲ་འབྱིན་པའི་པདྨའི་ནགས་དང་ལྡན་པའི་རི་བོའི་ནགས་འགའ་ཞིག་གི་ནང་དུ་བྱང་ཆུབ་སེམས་དཔའ་རི་བོང་བྱུང་

བར་འགྱུར་ཏེ། དེར་ལྷན་ཅིག་གནས་པའི་ཡོན་ཏན་ལས་མངོན་པར་འཕེལ་བའི་གྲོགས་བཤེས་རབ་ཏུ་ཞི་བ་ཉེ་བར་བསགས་པའི་དབང་པོའི་ཚོགས་ཉེ་བར་ཞི་བ། གྲོང་པའི་ཆོས་ཀྱི་ཉེ་བར་ལོངས་སྤྱོད་པ་ལ་རྒྱབ་ཏུ་ཕྱོགས་པའི་ཡིད་དང་ལྡན་པ། རི་དགས་ཀྱི་པགས་པ་དང་སྤྱི་བླུགས་ཙམ་

ཡོངས་སུ་འཛིན་ཞིང་དཀའ་ཐུབ་ཀྱིས་གདུངས་པའི་དཀའ་ཐུབ་པ་དེའི་གྲོགས་སུ་བྱུང་བར་གྱུར་ཏོ། །ཞི་དང་ཆོས་ནི་མཚུངས་པ་དང་། །བདེ་སྡུག་བསྐྱེད་པ་མཉམ་པ་དང་། །དེ་དག་ཕན་ཚུན་མ་མཐོང་ཞིང་། །གྲོགས་བཤེས་མཆོག་དག་དགའ་མི་འགྱུར། །བྱིས་པའི་དུས་ན་རི་བོང་

དང་བྲལ་བ། །ཅུང་ཟད་དུས་ན་དྲོ་མིན་འོད་ཟེར་འབྱུང་། །རི་བོང་རྣམ་པ་དེས་ནི་བརྒྱ་ལམ་ན། །བརྟུལ་ཞུགས་ཅན་དེས་ལེགས་པར་བྱས་པ་མིན། །གོམ་པ་བདུན་དུ་དོར་བའི་གྲོགས་བཤེས་ཉིད་ཡིན་ཏེ། །རང་བཞིན་གྱིས་དག་སེམས་ལྡན་དམ་པ་རྣམས་ལ་ནི། །ཕན་ཚུན་ཡོན་ཏན་

གཏམ་གྱིས་ཡིད་ནི་ཆེས་གྱུར་པའི། །ངེས་པར་འབྲེལ་པའི་བསམ་ལྡན་རྣམས་ལ་སྨོས་ཅི་དགོས། །སྐྱེས་པ་ཏིང་འཛིན་གནས་པ་རྣམས་ཀྱི་བློ་ལ་ནི། །ཆོས་ཀྱི་དོན་དུ་གསལ་བ་ཉིད་ནི་འབྱུང་བ་སྟེ། །རབ་ཏུ་ཡང་བའི་ཡིད་ལྡན་དུད་འགྲོ་རྣམས་ལ་ནི། །ཆོས་ལ་རྩོམ་པའི་འདུ་ཤེས་

ཅི་ཕྱིར་གྱུར་པ་ཡིན། །ཀྱེ་མ་རི་བོང་སྐྱེས་པ་འདི་ནི་གང་དུ་སྐྱེ། །གང་དུ་ཚིག་བརྟན་འདི་ནི་ཞི་བ་འདི་གང་དུ། །འདི་ལྟར་ལྷ་རྣམས་ལ་ནི་བྱུང་བར་གྱུར་པ་ཡིན། །རི་བོང་ཉིད་ལ་ངོ་མཚར་བ་དང་བཅས་པའི་སེམས། །དེ་ནས་དུས་ནམ་ཞིག་ན་ཆུ་མེད་པ་ཉིད་ཀྱིས་ཀུན་སྐྱ་བ་དང་ཕྲག་དོག་དང་

བཅས་པའི་ཞིང་བའི་སྐྱེ་བོ་རྣམས་ཀྱིས་མཐོང་བར་གྱུར་པ་དང་། གློག་གི་རྒྱུན་གྱི་སྒེག་པ་རྣམ་པར་ཟློག་པ་དང་། རླུང་གི་སྟོབས་ཀྱི་ཚོགས་རྣམ་པར་ཆད་པའི་སྤྲིན་གྱི་ཚོགས་ཡོད་པ་ལ་ཉིན་མོར་བྱེད་པའི་འོད་ཟེར་རྣམས་ཀྱིས་བསྐམས་པའི་ཆུ་ལྷག་མ་དང་བཅས་པ་དང་། སྙིང་པོ་ཡོངས་

Vol. 169 · folio 17b

སུ་རྙིངས་པས་ཡང་བའི་ལོ་ཏོག་རྣམས་ཀྱིས་བཀབ་པའི་ཞིང་རྣམས་ཡོད་པ་ལ་ལན་ཅིག་ཆུ་རྣམ་པར་ཆད་པས་རབ་ཏུ་གྲམ་པའི་ཆུས་རྣམ་པར་གྲོལ་བ་ཤིན་ཏུ་རྒྱ་ཆེ་བའི་ཆུའི་འགྲམ་ན་ཆག་པ་དང་། གན་རྐྱལ་དུ་ཉ་ཕྱིས་གནས་པའི་ཆུ་བོ་རྣམས་ཡོད་པ་དང་། རྡུལ་བབས་པས་རྡུལ་གྱིས་མ་ནུས་པའི་

རྣམ་པར་འབྲེལ་བའི་དབུགས་ཀྱིས་རབ་ཏུ་བསྐྱོད་པའི་མགྲིན་པ་དང་ལྡན་པ་མྱོས་པའི་དུས་ལ་ཡང་གར་གྱི་བྱ་བ་རྣམ་པར་བཟློག་པའི་མགྲིན་པ་སྔོན་པོ་ཅན་རྣམས་ཡོད་པ་ལ་དམའ་བར་སྐྱེས་པའི་རྩྭ་སར་པའི་མྱུ་གུ་བསྐམས་པས་ས་ལ་རྩྭ་ཟ་བ་མ་རྙེད་པ་ཉིད་ཀྱིས་ཀུན་ནས་དཀྲིས་པའི་ལྟོ་བ་དང་

ལྡན་པ་དལ་གྱིས་འགྲོ་བས་བསྐྱོད་པ་དང་ལྐོག་ཤལ་འཕྱང་ཞིང་ལྷོད་པ་ཅན་འོ་མ་ཟད་པས་ནུ་འབུར་ཆུང་བ། ཀུན་ནས་སྟོབས་ཆུང་བའི་བ་བེའུ་དང་ལྡན་པ་ཡོད་པའི་དུས་ན། སྔོ་དང་འདྲ་བའི་ནས་ངན་པ་འཚལ་བས་རིད་པ་དང་རྩུབ་པའི་ཡན་ལག་ཅན་དབུལ་པོའི་སྐྱེ་བོ་ཡོད་པ་ན། མུ་

གེའི་སྐྱོན་གྱིས་དོན་དུ་གཉེར་བ་ལ་བཀུར་སྟི་རྒྱབ་ཏུ་ཕྱོགས་པར་བྱས་པའི་གྲོང་དང་ལྡན་པ། སྐབས་སྐབས་སུ་བསྒྲུབ་པའི་སྒྲ་ཐོས་བཞིན་པའི་བ་གླང་གི་ར་བ་རྣམས་ཡོད་པའི་དུས་སུ། དཀའ་ཐུབ་པ་དེས་རི་བོང་དེ་ལ་ཀྱེ་མ་ཕན་པར་བྱས་པ་ལ་ཡང་ཕོངས་པའི་དུས་སུ་རང་བཞིན་

གྱིས་དམན་པའི་སྲོག་ཆགས་རྗེས་སུ་འཇུག་པ་མ་ཡིན་ཏེ་ཞེས་བྱ་བ་སྨྲས་སོ། །ཁྱོད་ཀྱིས་བལྟ་བར་གྱིས་ཤིག་གང་གི་ཕྱིར་འདི་ནི། །ཆུ་རྒྱུན་འབབ་པས་རྣམ་འབྱེད་ཟླ་བའི་ནོར་བུ་ཅན་གྱི་སྒྲོ་ཚོགས་དགའ་བས་རྒྱས་བྱེད་ཅིང་། །གར་གྱིས་སྒེག་པར་ལྡན་པ་སྔོན་དུ་རྣམ་བསམས་སྐད་ཀྱིས་གང་

ཞིག་ལ་ནི་བསྟོད་བཞིན་པ། །རྨ་བྱ་ཆུ་མེད་པ་ཡི་སྤྲིན་དེ་ཉིད་ལ་མིག་གཉིས་བལྟ་བ་ལ་ནི་ལེ་ལོ་ཅན། །ཕལ་ཆར་སྐལ་བ་དང་ལྡན་ཉིད་ལ་རང་གི་དོན་ལ་མཁས་པའི་སྐྱེ་བོ་རྟེན་པར་བྱེད། །ཆུ་དང་བྲལ་བའི་ཆུ་འཛིན་རྣམས་ནི་སོ་སོར་འགྱུར་ཏེ་དབང་པོའི་གཞུ་ནི་རྣམ་པར་ཆད། །རི་ཡི་ཕུག་རྣམས་དང་ནི་

འབྲེལ་པས་ཟབ་མོའི་ཚིག་རྣམས་རྨ་བྱ་རྣམས་ཀྱིས་ཐོས་མིན་ཏེ། །དངོས་པོ་ཐམས་ཅད་རང་བཞིན་གྱིས་ནི་འཇིག་ཅེས་བསམས་བཞིན་མྱ་ངན་གྱིས་ནི་ཡུན་རིང་པོར། །གློག་གི་གར་མཁན་མས་ནི་འཇམ་བའི་སྒེག་པས་གར་བྱེད་པ་ཡང་ཡོངས་སུ་དོར་བར་བྱེད། །འབྲས་བུ་ཅན་གྱི་ཤིང་གི་

Vol. 169 · folio 18a

ནགས་ནི་འབྲས་ཟད་འགྱུར་ཏེ་ལྗོན་ཤིང་རྣམས་ནི་སྐམ་པར་འགྱུར། །རིམ་གྱིས་པདྨའི་རྩ་བ་རྣམས་ནི་རྙིངས་པས་པདྨའི་རྩ་བའི་འདབ་ནི་སྲ་འགྱུར་བ། །འདིར་ནི་བདག་གི་ཤིང་ལོའི་ཁང་པར་གང་ཞིག་རྒྱ་ཤུག་དང་ནི་ཨེ་གུ་དྷི་འབྲས་ཚོགས། །དེ་ཡང་ཟད་དེ་ཤིན་

ཏུ་བྱ་དཀའི་དཀའ་ཐུབ་དོན་དུ་ལྟད་མོ་ཅི་ལྟར་བྱེད་པར་འགྱུར། །ཁ་ཟས་མེད་པས་སྐད་ཅིག་རེ་རེར་ལུས་པོ་འདི་ནི་ནུས་པ་མེད་པར་འགྲོ་བ་སྟེ། །ནུས་པ་མེད་པས་རྣལ་འབྱོར་རྣམས་ཀྱི་སེམས་ལ་རབ་ཏུ་འཇོམས་ཕྱིར་ཏིང་འཛིན་ག་ལ་བརྟན། །ཏིང་འཛིན་དམན་པའི་ཡིད་ཅན་ཤེས་རབ་ཅན་

ཡང་དེ་ཉིད་མངོན་དུ་ཕྱོགས་པར་ཅི་ཕྱིར་འགྱུར། །དེ་ཉིད་མ་མཐོང་བས་ཀྱང་གཏི་མུག་རབ་རིབ་བཅིངས་པ་ཕྱིས་ནི་དོན་མེད་ངལ་བར་འགྱུར། །དེ་ཕྱིར་པགས་པའི་སྤྱིའུ་བླུགས་ཤིང་ཤུན་གོས་རྣམས་དོར་བྱས་ནས། །རང་གི་ཁྱིམ་དུ་གཉེན་འདུན་སྐྱེ་བོ་ལྷན་ཅིག་གནས་པར་བགྱི། །མུ་གེའི་

སྐྱོན་ལས་ཐལ་བར་གྱུར་ནས་སླར་ནི་ནགས་ནང་དུ། །བྱམས་པ་འདིར་ནི་ཁྱོད་དང་ལྷན་ཅིག་ཡུན་རིངས་གནས་པར་བགྱི། །དེ་ནས་བྱང་ཆུབ་སེམས་དཔའ་ཡུན་རིང་པོར་ལྷན་ཅིག་ཏུ་གནས་པས་མངོན་པར་འཕེལ་བའི་གཉེན་བཞིན་པས་བརླན་པའི་སྙིང་གཏམ་དྲང་སྲོང་དེ་ལ་སྨྲས་པ། འཆིང་

བའི་སྡོང་པོ་བཏོན་ནས་བདེ་བ་མངོན་འདོད་ཅིང་། །རྣམ་པ་གང་གིས་མཆེ་གཉིས་པ་ནི་ནགས་མཐར་སོང་། །སླར་ནི་ལྕགས་ཀྱུ་འདེབས་པའི་སྡུག་བསྔལ་མ་དྲན་པས། །མི་ཤེས་པ་ནི་སྐྱེ་བོའི་ནང་ཉིད་འགྲོ་བར་འདོད། །ཞི་དང་ཤེས་རབ་ཉིད་དང་དཀའ་ཐུབ་ཡོན་ཏན་དང་། །ཤེས་བྱ་ལ་ནི་ཇི་

བཞིན་རྗེས་འགྲོའི་ཐོས་པས་ཀྱང་། །ཁྱོད་ནི་ཐུབ་པ་གཞན་རྣམས་ཟིལ་གྱིས་མནན་ནས་གནས། །ཉི་མས་མར་མེ་བཞིན་དུ་རིང་བའི་འོད་ཟེར་གྱིས། །མུན་པ་མེད་པའི་རྣམ་པར་དབེན་པའི་མིག་གིས་ནི། །དེ་ལྟར་ཁྱོད་ཀྱི་བསྟན་བཅོས་ངེས་པར་ཡང་ནི་མཐོང་། །སྤྱོད་ཡུལ་ལས་འདས་ཡུལ་ལ་

རབ་ཏུ་ཞུགས་འདོད་པ། །ཇི་ལྟར་བག་མེད་བྱེད་བཞིན་ཞེས་བྱ་མཚོན་པ་ཡིན། །མུན་པ་རྣམ་པར་འབྱེད་ཅིང་ཇི་ལྟར་གསལ་བྱེད་པ། །ལུས་ཅན་རྣམས་ལ་ཡིད་ནི་དང་བ་བསྐྱེད་པ་སྟེ། །རྨོངས་པས་མཁས་པ་རྣམས་ཀྱི་ལེགས་བཤད་མི་ཤེས་པས། །དམུས་ལོང་ཟླ་བའི་དཀྱིལ་འཁོར་

Vol. 169 · folio 18b

གསལ་བར་བྱེད་པ་བཞིན། །ལེགས་པར་བློ་ཡི་མར་མེ་མེད་པས་དཀའ་ཐུབ་མ། །བདེ་བ་རྗེས་ཆགས་འདོར་བྱེད་ཅེས་བྱ་གཏམ་གང་ཡིན། །ཁྱིམ་པ་ཉིད་ལ་གང་ཞིག་ཡིད་ནི་དགའ་བྱེད་པ། །རྣམ་པར་དག་པའི་བསམ་ལྡན་དེ་ནི་ཆེ་མི་རིགས། །ཐུན་གསུམ་དུ་ནི་མར་གྱི་སྲེག་བླུགས་

དྲིས་བསྒོས་པའི། །རྒྱ་ཤུག་དང་ནི་ཨེཾ་གུ་དྷི་འབྲས་ནང་ཞུགས་པ། །ཆུ་ལ་བརྟེན་པའི་ངང་སྐྱ་དང་ནི་ས་ར་སས། །ཞིང་ལ་ཉེ་བར་སྦས་པའི་ཤིང་ལོའི་ཁང་པས་བརྒྱན། །དཀའ་ཐུབ་ཅན་གྱི་བུ་མོས་བླུགས་པའི་བུམ་ཆུ་ཡིས། །རབ་ཏུ་གཏོར་ཞིང་འབྱུང་བའི་ཤིང་ནི་ཆུང་བ་རྣམས། །འགྲམ་དུ་ཤིང་

གི་གྲིབ་མས་ཆུ་རྣམས་འགག་པ་ནི། །ཀུན་ནས་དབུགས་འབྱུང་མེ་ཏོག་དྲི་ཞིམ་རླུང་ལྡན་པ། །དཀའ་ཐུབ་ཅན་གྱི་བུ་རྣམས་ཡོངས་འཁོར་རྗེས་འགྲོ་བའི། །རི་དགས་རྣམས་ཀྱི་མྱུར་བར་དམ་བྱས་འགའ་ཞིག་ཏུ། །བཟླས་པས་ཁ་སྤུ་འགུལ་ཞིང་མགྲིན་པ་རེངས་པ་ཡི། །དཀའ་ཐུབ་ནོར་

ཅན་རྣམས་ཀྱིས་རི་བོ་ཚད་ཚིང་རྟེན། །ཀྱེ་མ་མཉེས་གཤིན་བརྟན་པས་ངེས་པར་འབྲེལ་བའི་སེམས། །དམ་མིན་བདེ་བ་མྱོང་བའི་ཆ་དང་རྗེས་ཆགས་པས། །ཆགས་ཅན་ཤེས་རབ་མེད་པ་རྣམས་ཀྱི་སེམས་འདི་ནི། །རི་རྩེའི་ས་རྣམས་ཆགས་པ་བསྐྱེད་པར་མི་འགྱུར་རམ། །མི་དགེའི་སྐྱེ་བོ་རྣམས་

ཀྱིས་བརྟེན་བྱ་ལམ་ངན་ཐོབ་ནས་གཏི་མུག་གིས། །ངེས་པར་མི་ཤེས་པ་ནི་མཉེས་གཤིན་ཞགས་པ་མ་སྤངས་ཉམས་པར་འགྱུར། །ལེགས་པར་བྱས་པ་རྣམས་ཀྱི་རྗེས་སུ་འགྲོ་བའི་ལམ་ཡང་ཡང་དག་འཛིན། །གང་ཕྱིར་རྡུལ་བྲལ་ལམ་ནི་གནས་པར་མི་འགྱུར་འདི་ནི་འདིར་མ་ཐོབ། །ཁྱིམ་ན་

གནས་པའི་སྡུག་བསྔལ་གྱི་སྐྱོན་མང་པོ་དང་ལྡན་པའོ་ཞེས་བྱ་བར་ཤེས་ནས། ཞི་བ་དང་རྗེས་སུ་མཐུན་པ་རྣམ་པར་གྲོལ་བའི་ལམ་གསལ་བར་བྱེད་པའི་རབ་ཏུ་བྱུང་བ་ཉིད་འདི་སྤངས་ནས་བདེ་བ་ཅུང་ཟད་ཙམ་གྱི་ཕྱིར་འཇིགས་པ་ཆེན་པོའི་སྡུག་བསྔལ་གྱི་ས་འོག་ཏུ་ཞུགས་པའི་ཕྱིར་ཁྱོད་ཉིད་

འདོད་པ་སྟེ། གང་ཡང་ཁྱོད་ཀྱིས་མངོན་པར་བརྗོད་པ་ནི། སླར་ཡང་བདག་དཀའ་ཐུབ་ཀྱི་དོན་དུ་ནགས་སུ་འོང་བར་བྱའོ་ཞེས་བྱ་བ་འདི་ནི་དད་པར་བྱ་བ་མ་ཡིན་ཏེ། ཅིའི་ཕྱིར་ཞེ་ན། གང་གི་ཕྱིར་ཁྱིམ་ན་གནས་པ་ནི་གེགས་མང་བ་སྟེ། དབང་པོའི་དོན་ལ་དབང་དུ་སོང་བའི་འདོད་ཅན་མ། །

Vol. 169 · folio 19a

མཐོང་བར་བྱེད་ཅིང་དགོད་པའི་སྒེག་པའི་རྒྱན་གྱིས་བརྒྱན། །མ་སྨྲས་འབྲས་བུ་སྟེར་བའི་དཀའ་ཐུབ་ཅན་རི་ལ། །གཞན་ཡང་དྲང་སྲོང་ཆེན་པོ་ཡུལ་རྣམས་ལ་རྗེས་སུ་འཇུག་པའི་སྲོག་ཆགས་ནི་སྡུག་བསྔལ་ཆེན་པོ་ཉམས་སུ་མྱོང་བ་ཡིན་ཏེ། ལྟོས་ཤིང་རྔོན་པའི་གླུ་

ཡིས་རི་དགས་ནི། །མདའ་ཡིས་འབེན་དུ་ཁྱེར་བ་ལྟར། །ཡུལ་རྣམས་མྱོང་བར་འདོད་རྣམས་ཀྱི། །རྒུད་པ་རྣམ་ཉིད་འབྱུང་བར་འགྱུར། །སོ་ཆག་པ་ནི་ཉི་མར་ལྟུང་བ་ཤི་བར་འགྱུར་བ་སྟེ། །ལྕི་བ་ཚ་བའི་སྡུག་བསྔལ་ཉེ་བར་ཉམས་སུ་མྱོང་ནས་ནི། །ཇི་ལྟར་ཡིད་དུ་འོང་བའི་གཟུགས་ལ་

སེམས་དང་བཅས་རྣམས་ཀྱི། །སྡུག་བསྔལ་ལ་ནི་ཆགས་པ་རྣམས་ཀྱི་དྲུང་དུ་མི་འགྱུར་རམ། །གལ་ཏེ་མཆིལ་པ་ལ་གནས་ཤ་ནི་བཟུང་བར་མི་འགྱུར་རམ། །ལུས་ཅན་འདི་ནི་ཆུ་ལས་སུ་ཞིག་གིས་ནི་འདོན་པར་བྱེད། །བདེ་བ་ལ་ནི་ཆགས་པའི་བློ་ཅན་མདུན་དུ་རྗེས་འབྲེལ་བའི། །རྨོངས་

པའི་སྐྱེ་བོ་ཡིས་ནི་འཇིགས་པར་རྣམ་པར་མཐོང་མི་བྱེད། །ཟུམ་པའི་པདྨ་ལ་ནི་བུང་བ་གནས་པར་བྱེད་པ་སྟེ། །ཤིན་ཏུ་དྲི་ལ་ཆགས་པ་དཀའ་བ་ཀུན་ནས་ཐོབ་འགྱུར་ཏེ། །གླང་པོ་ཆེས་ནི་ནགས་ནས་གླང་མོའི་རྗེས་སུ་འབྲང་བྱེད་ཅིང་། །ཤིན་ཏུ་རྣོ་བའི་ལྕགས་ཀྱུའི་སྡུག་བསྔལ་ཆེན་པོ་

བཟོད་པར་འགྱུར། །ཆུང་བའི་བློ་ཅན་རྣམས་ནི་རྣམ་རྨོངས་རྒུད་པའི་རྟེན་ཡིན་ལ། །བློ་བརྟན་བདག་ཉིད་ཆེན་པོ་རྣམས་ཀྱིས་ཀུན་ནས་སྤོང་བ་སྟེ། །གལ་ཏེ་རྟག་འབྱུང་བདེ་ལ་འདོད་པ་ཁྱེད་རྣམས་ལ་ནི་ཡོད། །དེ་ཕྱིར་དུག་བཞིན་ཡུལ་གྱི་སྦྲུལ་གྱི་སྤྱོད་ཡུལ་སྤོང་བར་མཛོད། །དྲང་སྲོང་གིས་

སྨྲས་པ། གནོད་པ་ལ་སོགས་དུ་མ་དང་སྐྱོན་གྱི་མདའ་རྣམས་ཀྱི་འབེན་དུ་གྱུར་པ་ནི་ཁྱིམ་ན་གནས་པ་སྟེ། བདེ་བ་ཅུང་ཟད་མྱོང་བས་རྨོངས་པར་བྱས་པའི་བདག་ཉིད་ཅན་རྣམས་ཀྱིས་ཡོངས་སུ་དོར་བའི་དོན་དུ་ནུས་པ་མ་ཡིན་ཏེ་འོན་ཀྱང་། ཤིན་ཏུ་སྙིང་གྲོགས་རི་བོང་ཚུལ་ཁྲིམས་རྒྱ་མཚོ་ཅན། །ཁྱེད་

ཉིད་ཀྱི་ནི་ཡོན་ཏན་རྣམས་ནི་དེ་ལྟ་བུ། །བདག་གི་སེམས་ནི་འཕྲོ་བར་གང་རྣམས་ཀྱིས་འགྱུར་བ། །ཞི་བ་འདོད་པས་སླར་ཡང་འདིར་ནི་འོང་བར་བྱེད། །བྱང་ཆུབ་སེམས་དཔས་སྨྲས་པ། གལ་ཏེ་ཁྱོད་གདོན་མི་ཟ་བ་ཉིད་དུ་མངོན་པར་འགྲོ་བ་འདོད་པ་དེ་ལྟ་ན་ཡང་ཉི་མ་གཅིག་པོ་འདི་འདིར་

Vol. 169 · folio 19b

གནས་པར་བྱས་ཏེ། ནང་པར་རང་གི་འདོད་པ་ཁྱེད་ཀྱིས་རྗེས་སུ་འགྲུབ་པར་གྱིས་ཤིག །དེ་ནས་ཐུབ་པ་དེས་འདི་ལྟར་བསམས་ཤིང་འདུག་སྟེ། ངེས་པར་བདག་ལ་འདི་སྤྱན་དྲང་བར་འདོད་པའོ་སྙམ་མོ། །འཛམ་བུའི་ཚལ་ནི་འབྲས་བུ་རྣམས་ཀྱིས་མངོན་དགའ་འགའ་ཞིག་འདིས། །མཐོང་

བར་གྱུར་ཏམ་འོན་ཏེ་ཙཱུ་ཏའི་ཤིང་འདིར་འབྲས་སྐྱེས་ཤིང་། །སྨིན་ཞིང་ཤིན་ཏུ་དམར་བ་འཇམ་པའི་འབྲས་བུའི་དྲི་ལྡན་པ། །ཨུ་དུམ་བཱ་རའི་ཤིང་ངམ་རི་གཞན་འགའ་ཞིག་ཏུ་ནི་མཐོང་། །དེ་ནས་རི་བོང་མཚན་མོ་དེ་འདས་པ་དང་ཐོ་རངས་ཀྱི་དུས་སུ་ནགས་དེ་ཐམས་ཅད་ལ་ཡོངས་སུ་བསྐོར་

ཞིང་རྩ་བ་དང་འབྲས་བུ་མ་རྙེད་པ་ལ་སེམས་ཤིང་གནས་སོ། །ལྟོ་སྟོང་དང་ལྡན་བཀྲེས་པ་དང་བཅས་ཡན་ལག་རིད་པ་འདི། །ཞི་བའི་ཐུབ་པ་བདེ་སྡུག་མཉམ་པ་གྲོགས་བཟང་ཡོད་པ་ལ། །བདག་ནི་རྩྭ་སྔོན་ནགས་ཀྱི་ནང་དུ་ཇི་ལྟར་ཟ་བར་བྱེད། །བསིལ་བར་དྲི་མ་མེད་པའི་ཆུ་ནི་ཇི་

ལྟར་བཏུང་བར་བགྱི། །ཡང་ན་དོན་དུ་གཉེར་བའི་སྐྱེ་བོ་རེ་བ་སྒྲུབ་པར་བྱེད་ནུས་པའི་ལུས་འདི་ཡོད་པ་ལ་བདག་ནུས་པ་མེད་པ་དང་འདྲ་བར་ཡིད་མི་བདེ་བས་ཅིའི་ཕྱིར་གནས་པར་བྱེད། །དེ་ནས་དྲང་སྲོང་དེའི་དྲུང་དུ་སོང་ནས་སྨྲས་པ། །དྲང་སྲོང་ཆེན་པོ་རེ་ཞིག་ཡུད་ཙམ་བཞུགས་ཤིག།

ཇི་སྲིད་བདག་གིས་ཁ་ཟས་ཀྱི་ཚོགས་ཅུང་ཟད་དབུལ་བར་བགྱིའོ། །དེ་ནས་ཐུབ་པ་དེ་འདི་ལྟར་ལྡུམ་གྱི་རྩ་བ་དང་འབྲས་བུ་ཀུན་ནས་ཟད་པའི་ནགས་འདིར་སླར་ཁ་ཟས་ཉེ་བར་སྡུད་པའི་ནུས་པ་ཇི་ལྟ་བུ་འདི་ལ་ཡོད་པར་འགྱུར་སྙམ་དུ་བསམས་སོ། །དེ་ནས་བདག་ཉིད་ཆེན་པོ་དེས་སོལ་བའི་ཕུང་

པོ་འབར་བར་མཐོང་ནས་སྨོན་ལམ་འདི་ལྟར་མངོན་པར་འཕེལ་ཞིང་འདུག་གོ། །ཇི་ལྟར་དོན་གཉེར་བཀྲེས་པ་ཞི་ཕྱིར་སྡུག་བསྔལ་དང་བྲལ་བ། །བདག་གིས་སྲེག་བླུགས་ཟ་བ་འབར་ཞིང་འཁྲུངས་ལ་སྲོག་རྣམས་དོར། །དེ་ལྟར་འགྲོ་བ་རྣམས་ཀྱི་སྡུག་བསྔལ་སེལ་བར་བྱེད་པ་ནི། །ཤིན་ཏུ་

རྙེད་པར་དཀའ་བའི་སྟོབས་བཅུ་ཉིད་ནི་ཐོབ་པར་བགྱི། །གཞན་གྱི་དོན་ལ་རང་གི་བདག་ཉིད་དོར་བ་རབ་ཏུ་དགའ་བའི་ཡིད་དེས་དེ་ལྟར་བསམ་བྱས་ནས། །ཉོན་མོངས་བཅས་པར་བྱ་ཕྱིར་ཞི་བའི་གོ་འཕང་མངོན་པར་འདོད་ཅིང་སྲོག་ཆགས་རྣམས་ཀྱི་གཉེན་དུ་ནི། །ནགས་ཀྱི་མེ་དེ་རྣམས་ཀྱང་འབར་བའི་

Vol. 169 · folio 20a

ཚོགས་ནི་ཉེ་བར་ཞི་གྱུར་དེ་ཡི་བསོད་ནམས་མཐུ་ཡིས་ཏེ། །སྒེག་པའི་ཆུ་རླབས་རི་མོ་ཅན་དང་རབ་བསྐྱོད་བུང་བའི་ཚོགས་ལྡན་པདྨའི་འབྱུང་གནས་ཉིད་དུ་གྱུར། །དེ་ནས་ཐུབ་པ་དེས་སྡུག་གོ་ཞེས་བརྗོད་ནས་མེ་ཞི་བར་བྱ་བའི་ཕྱིར་ཆུས་གང་བའི་སྤྱི་བླུགས་བཟུང་སྟེ། དེའི་དྲུང་

དུ་ཉེ་བར་སོང་ནས་བདག་ཉིད་ཆེན་པོ་དེ་རྣམ་པར་ཁ་བྱེ་བའི་པདྨ་དཀར་པོའི་དབུས་སུ་ཉེ་བར་གནས་བཞིན་པས་ཆོས་སྟོན་པར་མཛད་པ་མཐོང་བར་གྱུར་ཏོ། །རི་བོང་དེས་ནི་ཤིན་ཏུ་བྱིན་གྱིས་བརླབས་པ་ནི། །ཆུ་ནང་པདྨ་དཀར་པོ་དེས་ནི་མཛེས་པར་གྱུར། །སྟོན་དུས་གསལ་བའི་ནམ་མཁའ་ལ་

ནི་རབ་གསལ་བ། །རི་བོང་གིས་མཚན་གཟུགས་ནི་གསལ་བས་མཚན་པ་ལྟར། །དེ་ནས་པདྨ་དཀར་པོའི་ནང་དུ་གནས་པའི་རི་བོང་དེ་མཐོང་ནས་ཐུབ་པ་དེ་ངོ་མཚར་བའི་ཡིད་དང་ལྡན་པས་བསྟོད་པ་འདི་རབ་ཏུ་སྨྲ་བར་གྱུར་ཏོ། །ཨེ་མ་གཞན་གྱི་དོན་ནི་སྒྲུབ་པས་བཀྲ་ཤིས་པ། །གྲགས་

པའི་གཏེར་ཁྱོད་ཀྱི་ནི་ཕྲིན་ལས་འདི་ངོ་མཚར། །བསམ་བྱས་བདག་ཉིད་ཆེན་པོའི་ཁྱད་པར་ཡང་དག་བསྟེན། །བློ་གྲོས་ཆེན་པོ་སུ་དག་རི་བོང་ལྟར་ཁྱེད་སྤྱོད། །རླུང་གིས་ཁ་ལོ་སྒྱུར་བ་རབ་འབར་འདི་གང་དུ། །པདྨའི་ནགས་ཚལ་ཉིད་ནི་འདི་འདྲ་གང་དུ་ཡང་། །བདག་ཉིད་ཆེན་པོ་

རྣམས་ཀྱི་བསོད་ནམས་སྟོབས་ཀྱིས་ནི། །བྱིན་གྱིས་བརླབས་པས་དུག་ཤིང་འདི་ཡང་སྨན་ཤིང་འགྱུར། །དེ་ནས་བདག་ཉིད་ཆེན་པོ་དེ་པདྨ་དཀར་པོ་ལས་བབས་ནས་ཐུབ་པ་དེ་དང་ལྷན་ཅིག་ཏུ་ཤིང་ལོ་ལས་བྱས་པའི་ཁང་པར་ཞུགས་ཏེ། །བྱང་ཆུབ་སེམས་དཔའི་མཛད་པ་ཤེས་པས་ངོ་མཚར་བའི་

ཡིད་དང་ལྡན་པའི་ལྷའི་དབང་པོས་ཀུན་ནས་མིག་སྨན་གྱི་རི་བོ་ལྟར་སྔོ་བའི་ཆུ་འཛིན་གྱི་ཚོགས་ཀྱིས་ཉིན་མོར་བྱེད་པ་བསྒྲིབས་པས་ཡུན་རིང་པོ་མ་ཡིན་པའི་འོད་ཀྱི་གསལ་བས་ཀུན་ནས་དམར་བའི་ཕྱོགས་ཀྱི་བར་དང་ལྡན་པའི་ནམ་མཁའི་མཐོངས་བྱས་སོ། །དེ་ནས་རབ་ཏུ་བསྐྱོད་བྱས་ཆུ་ཡིས་

བསིལ་བའི་རླུང་རྣམས་ནི། །ཀུན་ནས་ཤིང་ལོས་བྱས་པའི་ཁང་པ་བྱེད་ཅིང་རྒྱུ་བར་འགྱུར། །རི་བོང་ལྷན་ཅིག་བྱེད་པའི་ཤིང་ལ་ནེ་ཙོ་རྣམས་བརྟེན་པ། །ཡང་དག་འབྱུང་བའི་ཕྲེད་ཅན་འབྲས་བུ་དང་བཅས་རྣམ་མཛེས་གྱུར། །བུང་བའི་གླིང་བུ་རྣམས་ཀྱི་སྒྲ་ནི་ཀུན་ནས་འབྱུང་བ་དང་། །

Vol. 169 · folio 20b

ཆུ་ཡི་རི་ནི་འབབ་ཆུ་དང་བཅས་རྫ་རྔ་བཞིན་དུ་སྒྲ་སྒྲོགས་དུས། །རི་ཡི་སྟེང་དུ་གནས་པའི་རྨ་བྱ་དང་འབྲལ་ནམ་མཁའ་ལ། །སྤྲིན་ནི་སད་པ་རྣམ་པར་ལྡང་བར་བྱེད་ཅིང་གར་བྱེད་འགྱུར། །ལྷ་དབང་ཡིད་ནི་འཕྲོག་པར་བྱེད་པའི་གཞུང་ནི་རྒྱས་བྱས་ནས། །གང་ཞིག་མང་བ་བསིལ་བའི་ཆར་ཆུ་

འབབ་པར་བྱས་པ་ནི། །ཆུ་འཛིན་རྣམས་ནི་སོ་ག་རྣམ་པར་ལྡང་བར་ཟད་བྱས་པ། །སྤྲོ་ཞིང་ཡུན་མི་རིང་བའི་འོད་ཟེར་རྣམས་ཀྱིས་རྣམ་པར་རྒྱས། །ཀུན་ནས་འཁོར་བའི་བུང་བ་ངེས་པར་ལྟུང་བས་ཁྲོས་པ་ནི། །ཀུན་ནས་དབུགས་བུང་རབ་ཏུ་བཞོན་པའི་ཀེ་ཏའི་ཤིང་གནས་པ། །དབུགས་

ནི་བུང་བ་རང་གི་ངོ་བོ་འཁྱིལ་པའི་ལུས་འཛིན་པ། །ཡང་དང་ཡང་དུ་ལྟོ་འཕྱེས་གདེངས་ཀ་རྒྱས་པར་བྱེད་པར་འགྱུར། །བུད་མེད་མེད་པར་བ་ཡི་མཐོང་བར་སྤྲོ་བས་སྤྲོ། །རི་ལམ་ཤིང་ལ་བརྟེན་པའི་ལམ་པ་ཡིས། །ཆུ་རྒྱུན་ནང་ན་སྤྱོད་པའི་ཉུང་བ་ནི། །འཚེད་བྱེད་རྣམས་ཀྱི་ངག་ནི་ཀུན་ཐོས་

འགྱུར། །ངོ་བོ་ལམ་པའི་བུད་མེད་རྣམས་ཀྱིས་འཕྲོག་པར་བྱེད་པའི་གློག །མཐོང་སྟེ་ཆུ་རྣམས་གཏོང་ལ་ཟུར་གྱིས་བལྟ་བའི་མིག །མཆེ་བ་གཉིས་པའི་སྟེང་དུ་རླུང་གིས་བསྐྱོད་པ་ནི། །རྒྱལ་མཚན་ལ་བཅིངས་བ་དན་གུར་ཀུམ་གྱིས་བཙོས་བཞིན། །རྨ་བྱའི་སྒྲོ་དང་བསྲེས་པའི་ཀ་ཤའི་

ཉག་མ་ནི། །འགའ་ཞིག་བསྐོར་ཞིང་ཀུན་ནས་བསྐོར་བའི་སི་ལེན་དྲ། །ཆུ་བོ་རྣམས་ཀྱི་ཆུ་ནི་རྙོག་ཅན་འགྱུར་བ་སྟེ། །འགྲམ་དུ་འཛམ་བུའི་འབྲས་བུ་ལྷུང་བས་དབུ་བ་འབྱེད། །ཆུ་བོའི་འགྲམ་རྣམས་འཛམ་བུའི་འབྲས་བུ་རྣམས་ཀྱིས་འབྲེལ་པ་སྟེ། །ནེའུ་གསིང་འཇམ་པོ་དང་འབྲེལ་

ཉམས་དགའ་མཛེས་པ་ལྟ་བར་གྱིས། །ཆུ་ཡི་ཐིགས་པ་ལྷུང་བས་སྒྲ་སྒྲོགས་ཤིང་ལོའི་ཁང་པ་ན། །ཐུབ་པ་དེ་ནི་རི་བོང་ལྷན་ཅིག་གནས་ཤིང་རབ་དགར་གྱུར། །དེ་ནས་དེ་ལ་དྲིས་པ་སྟེ། །རྣམ་པར་རྟོག་པ་ཆེན་པོ་འདིས། །ལྷ་ཡི་བདེ་བ་འདོད་པ་ཁྱོད། །ལྷ་དབང་གནས་ནི་འདོད་དམ་ཅི། །

རི་བོང་བརྟན་པའི་སེམས་ལྡན་པའི། །དཀའ་ཐུབ་ཅན་དེ་ལ་ནི་སྨྲས། །སྲོག་ཆགས་སྡུག་བསྔལ་ཞི་བྱའི་ཕྱིར། །བདག་ནི་སངས་རྒྱས་ཉིད་འདོད་དོ། །དེ་ནས་དེ་ལ་ཐུབ་པས་སྨྲས། །གང་ཚེ་སངས་རྒྱས་ཁྱོད་འགྱུར་བ། །དེ་ཚེ་བདག་སློབ་བདག་གྱུར་ཅིག །དེས་ཀྱང་དེ་ལ་ཁས་བླངས་

Vol. 169 · folio 21a

སོ། །དེ་ལྟར་དུད་འགྲོའི་སྐྱེ་གནས་སུ་སྐྱེས་པ་ན་ཡང་བཅོམ་ལྡན་འདས་འདི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ལ་སྤྱོད་ཅིང་སྲོག་རྣམས་ཀྱིས་ཀྱང་གཞན་རྣམས་ལ་ཕན་པ་མཛད་པ་སྟེ། དེ་བས་ན་སངས་རྒྱས་བཅོམ་ལྡན་འདས་ལ་དང་བ་དང་རྩེ་གཅིག་པས་གནས་

པར་བྱ་ཞེས་བྱ་བ་ནི། རི་བོང་གི་སྐྱེས་པའི་རབས་ཏེ། སྐྱེས་པའི་རབས་བཞི་པའོ།། །།བྱང་ཆུབ་སེམས་དཔའི་མགོ་བོ་ཡོངས་སུ་གཏོང་བ་སྟེ། །སུ་ཞིག་ངོ་མཚར་བར་ནི་གང་ཕྱིར་མ་གྱུར་ཏམ། །ཡང་ན་འབྲས་བུ་དང་ནི་རྗེས་སུ་མཐུན་པ་ནི། །ཕལ་ཆེར་ཆེན་པོ་རྣམས་ཀྱི་ཀུན་

ནས་རྩོམ་པ་རྣམས། །འདི་ལྟར་རྗེས་སུ་ཐོས་ཏེ། སྲེག་བླུགས་འཛིན་པའི་གྲོགས་པོའི་སྟོབས་ཀྱིས་ཡང་དག་པར་སྐྱེས་པའི་རླབས་ཆེན་པོ་དང་ལྡན་པའི་འོ་མའི་རྒྱ་མཚོའི་རྗེས་སུ་བྱེད་པའི་ཁ་བ་ཅན་གྱི་རི་དང་འདྲ་བའི་མུ་ཏིག་གི་ཕྲེང་བས་མངོན་པར་བརྒྱན་པར་བྱས་པའི་ལུས་ངན་གྱི་ཕྱོགས་ཀྱི་

བུད་མེད་ལ་རབ་ཏུ་དགའ་བའི་ཡིད་ཅན་ལྷའི་བཟོ་བོ་བི་ཤྭ་ཀརྨས་སྨུག་རྩི་དང་འདྲ་བར་བྲིས་པ། རྣམ་པ་སྣ་ཚོགས་པའི་སྐྱེ་བོས་ཀུན་ནས་གནོད་པར་བྱས་པ་རླུང་གིས་རྣམ་པར་བསྐྱོད་བཞིན་པའི་སྐྱེད་མོས་ཚལ་གྱི་མེ་ཏོག་རྣམས་ཀྱི་དྲིས་དྲི་ཞིམ་པར་བྱས་པའི་ཕྱོགས་རྣམས་ཀྱི་དབུས་དང་བཅས་

པ། རྟག་ཏུ་ལོ་ལེགས་པའི་ཕྱིར་མཛོད་དང་བང་མཛོད་ཡོངས་སུ་གང་བ་ཅན་གྲོང་ཁྱེར་གྱི་ངོ་བོས་དཔལ་གནས་པ་དང་འདྲ་བའི་བཟང་པོའི་བྲག་ཅེས་བྱ་བའི་རྒྱལ་པོའི་ཕོ་བྲང་བྱུང་བར་གྱུར་ཏེ། གང་ཞིག་འདི་ད་ལྟར་ཡང་བཟང་པོའི་བྲག་ཅེས་བྱ་བའི་གྲགས་པ་ཐོབ་པའོ། །དེ་ནས་རྒྱལ་

པོའི་ཚུལ་གྱི་ལག་པའི་སྟོབས་ཀྱིས་རྒྱལ་པོའམ་རྒྱལ་པོའི་བློན་པོ་ཆེན་པོ་གཞན་འཕམ་པར་བྱས་པ། ཆུ་བོ་རྣམས་རྒྱ་མཚོ་དང་འདྲ་བ་ཕུན་སུམ་ཚོགས་པ་ཐམས་ཅད་ཀྱི་རྟེན་རིག་པ་ཐམས་ཅད་ཀྱི་སྣོད་དུ་གྱུར་པ་འབྱུང་པོ་རྣམས་ལ་བརྩེ་བ་དང་ལྡན་པ། དྲི་མ་དང་བྲལ་བའི་ཞལ་གྱི་ཟླ་བ་

མཛེས་པས་ཟླ་བའི་འོད་སྐྱེངས་པར་བྱེད་པའི་རྒྱལ་པོ་ཟླ་འོད་ཅེས་བྱ་བ་བྱུང་བར་གྱུར་ཏེ། དགྲའི་གྲོང་ཁྱེར་རྣམས་ན་མི་མོའི་པད་གནས་དཔལ་ནི་འཕྲོག་བྱེད་ཅིང་། །གྲོགས་པོའི་སྐྱེ་བོ་ཀུ་མུ་ད་རྣམས་ལ་ནི་བདེ་བ་སྐྱེད་བྱེད་པ། །མི་ཡི་བདག་པོ་ཟླ་བ་དེ་ཡི་ལུས་ཀྱི་འོད་ཉིད་མཚན་མོའི་དུས་

Vol. 169 · folio 21b

ལ་ནི། །མུན་པའི་ཚོགས་ནི་ཟད་པར་བྱེད་ཅིང་མར་མེའི་འབྲས་བུ་བྱེད་པར་གྱུར། །རྒྱལ་པོ་དེ་ལ་ཡང་འཇིག་རྟེན་ལས་འདས་པའི་སྐྱེ་བོ་མ་ལུས་པ་ཉིད་ངོ་མཚར་བར་བྱེད་པའི་དམ་བཅའ་འདི་བྱུང་བར་གྱུར་ཏོ། །གལ་ཏེ་བདག་ལ་དོན་གཉེར་ལ་ལ་སློང་གྱུར་ན། །མིག་དག་དང་ནི་སྲོག་གི་རྟེན་གྱི་མགོ་

བོའམ། །སྲིད་པ་འཇིག་པར་བྱེད་པའི་གོ་འཕང་འགྲོ་འདོད་པ། །དོན་དུ་གཉེར་ལ་བདག་ནི་ཆད་པར་མི་བྱེད་དོ། །བརྒྱ་ཕྲག་བཅུའི་ནོར་ལ་སྐྱ་རེངས་དང་འདྲ་བར་བྱང་ཆུབ་སེམས་དཔའི་མདུན་དུ་རྟག་ཏུ་རྒྱུ་བ་བློན་པོའི་ཚོགས་རྣམས་ཀྱི་གཙོ་བོ་ཤེས་རབ་ཆེན་པོ་དང་ལྡན་པ་ཟླ་བ་ཆེན་པོ་ཞེས་བྱ་

བའི་བློན་པོ་བྱུང་བར་གྱུར་ཏེ། ཕན་ཚུན་ཡོན་ཏན་སྨྲ་བ་པོ། །ཕན་ཚུན་ཕན་ལ་མངོན་ཕྱོགས་ལ། །དེ་དག་ནམ་ཡང་ཡོད་མིན་ཏེ། །ཕན་ཚུན་རྣམ་པར་འབྲལ་བ་ཅན། །དེ་ནས་དུས་འགའ་ཞིག་གི་ཚེ་ཟླ་བ་ཆེན་པོས་མཚན་མོ་གཉིད་ཀྱི་དབང་དུ་ཉེ་བར་སོང་བ་ན། རྨི་ལམ་དུ་ཤིང་ལོའི་ཕུང་

པོ་ཚིག་པ་ལྟར་སོང་བ་སྡོ་བ་དང་རྩུབ་པའི་འོད་ཅན་གྱི་འབར་བའི་མེའི་ཚོགས་ལྟར་སྐྲ་དང་ཁ་སྤུ་རྣམས་སེར་སྐྱ་དང་ལྡན་པ་སེང་གེའི་སེན་མོ་ལྟར་འཁྱོག་པ་དང་རྣོ་བའི་སེན་མོ་ཅན་ཆུས་བུད་པར་བྱས་པའི་ལྕི་བའི་ཆུ་འཛིན་ལྟར་གསུས་པ་ཆེ་བ། ལྕགས་ཀྱི་ཀ་བ་ལྟར་གྲིམས་པ་དང་ཆེ་བའི་ལག་པ་དང་

བྲང་དང་ལྡན་པ། རི་བོང་ཅན་གྱི་ཆ་ལྟར་འཁྱོག་པའི་མཆེ་བ་རྣམས་ཀྱིས་རྣམ་པར་འབྱེད་པས་ཤིན་ཏུ་མཛེས་པ། འཕྲོ་ཞིང་ཡུན་རིང་པོ་མ་ཡིན་པའི་འོད་ཀྱིས་རྣམ་པར་གཡོ་བས་སྨིན་མ་བསྐྱོད་པ། ཁྲག་དང་བཅས་པའི་སྐྱེས་པའི་པགས་པས་སྨད་གཡོགས་པར་བྱས་པའི་གནོད་སྦྱིན་

རྣམས་ཀྱིས་མིའི་བདག་པོ་དེའི་ཉེ་བར་འཕྲོག་བཞིན་པ་དང་ཅོད་པན་གྱི་གཙུག་གི་ནོར་བུ་རྣམ་པར་ལྷུང་བ་མཐོང་བར་གྱུར་ཏོ། །གཉིད་སད་ནས་ཡིད་མི་བདེ་བས་འདི་ལྟར་བསམས་པར་གྱུར་ཏོ། །ཀྱེ་མ་བདག་གི་རྨི་ལམ་རྣམ་པར་སྨིན་པ་རྩུབ་པ་འདི་མཐོང་ངོ་། །བདག་ཅག་གི་རྗེ་བོའི་ལུས་ཀྱང་

བླངས་ན་དོན་དུ་གཉེར་བ་ལ་བདག་གིས་སྦྱིན་པར་བྱའོ་ཞེས་དམ་བཅས་ཏེ། དེ་བས་ན་ཇི་སྲིད་དུ་མིའི་བདག་པོ་དེའི་མགོ་བོ་སུ་ཞིག་སློང་བར་མི་བྱེད་པ་དེ་སྲིད་དུ་དུ་མ་རིན་པོ་ཆེའི་རང་བཞིན་གྱི་མགོ་བོ་རྣམས་བཟོ་བོ་རྣམས་ལ་བྱེད་དུ་གཞུག་གོ་སྙམ་མོ། །དེ་རྣམས་ཉིད་ཀྱིས་ཀྱང་མགོ་བོ་སློང་

Vol. 169 · folio 22a

བ་སུ་ཞིག་ལ་ཕྱི་རོལ་ཉིད་དུ་སོ་སོར་མཆོད་ནས་གཏང་བར་བྱ་ཞེས་ཏེ། ས་སྐྱོང་བས་ནི་ས་འདི་ན། །དབང་པོ་སྐྱོང་བྱེད་སྐྱོང་བྱེད་ཅིང་། །ཡུན་རིང་བྱས་བདག་ཉིད་འཚོ་ཞིང་། །སྐྱེ་བོ་མ་ལུས་གསོ་བར་བྱེད། །དེ་ནས་ཟླ་བ་ཆེན་པོ་བློན་པོ་རྣམས་ཀྱི་གཙོ་བོས་རིན་པོ་ཆེའི་རང་

བཞིན་གྱི་མགོ་རྣམས་བྱེད་དུ་བཅུག་སྟེ། ཕྱི་རོལ་ཉིད་དུ་སློང་བ་པའི་སྐྱེ་བོ་རྣམས་ལ་གང་གིས་དོན་གྲུབ་ཅེས་བྱ་བ་རྣམ་པར་སྤྱོད་ཅིང་འདུག་གོ། །དེ་ནས་སྤོས་ངད་ལྡང་བའི་རི་ལ་སྤྲའི་གདོང་ཅན་སྐྲ་དང་སྨ་ར་ཡོངས་སུ་སྨིན་པ། མ་བྱས་པའི་ཁྲོ་གཉེར་བྱས་པ་འདྲ་བ། སྡོང་དུམ་ཚིག་པ་

ལྟར་དཀར་བ་མ་ཡིན་པ་དང་པགས་པ་རྩུབ་པ་དང་ལྡན་པ་དང་། འགྲོ་བ་ལ་སྲིན་བུ་པདྨ་ལྟར་འཁྱོག་པ་དང་རགས་པའི་རྩའི་དྲ་བས་མི་མཉམ་པའི་བྱིན་པ་དང་བརླ་དང་ལག་པ་དང་ལྡན་པ་དང་། སྦྲུལ་ལྟར་རང་བཞིན་གྱིས་དྲག་པ། དྲག་པོའི་མིག་ཅན་ཞེས་བྱ་བའི་བྲམ་ཟེ་སོ་སོར་གནས་པར་

གྱུར་ཏོ། །དེ་ལ་བསམ་པ་ཀུན་ནས་བྱུང་སྟེ། ཟླ་འོད་ཅེས་བྱ་བའི་རྒྱལ་པོ་ཐམས་ཅད་གཏོང་བ་སྟེ། དེ་བས་ན་རེ་ཞིག་འགྲོ་བར་བགྱིའོ། །རྒྱལ་པོ་དེ་ལ་མགོ་བོ་བླངས་པས་དམ་བཅའ་དོན་མེད་པར་བྱའོ་སྙམ་མོ། །མགོ་བོ་རབ་ཏུ་སྦྱིན་པའི་ནུས་པ་སུ་ཞིག་ཅེས་བྱ་བ་ལ་ཡོད་པ་ཞེས་བྱ་བ་རྣམ་

པར་བསམས་ནས། །རིམ་གྱིས་བཟང་པོའི་བྲག་ཏུ་འོངས་པར་གྱུར་ཏོ། །དེ་ནས་ས་འཛིན་བཅས་པ་རྣམ་གཡོས་ཏེ། །ཡང་དང་ཡང་དུ་རྒྱ་མཚོ་འཁྲུག་པའི་ས། །ཆུ་བོའི་ཆུ་ནི་གང་བ་རྙོག་པ་ཅན། །བསྐྱོད་པའི་ཉ་རྣམས་ཀྱིས་ནི་གཡོས་པའི་བར། །ཉི་ཟླ་དག་ནི་རྣམ་པར་མཛེས་མི་

འགྱུར། །རྡུལ་གྱིས་འོད་མེད་མེ་ལོང་རྣམ་པ་ཅན། །ཕྱོགས་རྣམས་ཀུན་ནས་དྲི་མ་ཅན་གྱུར་ཏེ། །བདག་པོ་མྱང་བ་བྱས་པ་དང་ནི་འདྲ། །དུས་མ་ཡིན་པ་ཡལ་ག་ཅན་རྣམས་ལས། །མེ་ཏོག་སྔོ་སྐྱ་གེ་སར་ཅན་འབྱུང་སྟེ། །རྡུལ་ཚོགས་འབྱུང་བའི་རླུང་རྣམས་ལྡང་བ་ནི། །གཙུག་ཕུད་

ཆ་ཡིས་རྗེས་སུ་འགྲོ་བ་ལྟར། །རྒྱུ་དང་མི་རྒྱུ་དང་བཅས་ས་འབྱུང་སྟེ། །དྲི་བཅས་རིད་པའི་སྐྱེ་བོས་ཁྱབ་ཅིང་ཁྱབ། །མཚན་མོ་ཀུན་ནས་དུད་པའི་སྐར་མ་ཅན། །ནུབ་དང་ཉེ་བར་སོང་བའི་ཟླ་བ་བཞིན། །ནགས་ཀྱི་བདག་པོ་རྣམས་ཀྱང་རྩྭ་འཇམ་པ། །བ་རྣམས་འོ་མ་སྐད་ཅིག་གིས་ཟད་

Vol. 169 · folio 22b

འགྱུར། །གཙང་བར་གྱུར་ཀྱང་ཞུགས་པའི་སྲེག་བླུགས་ཅན། །མཆོད་སྦྱིན་བྱེད་པའི་མེ་ནི་དེ་མི་འབར། །དེ་ནས་རྣམ་པ་སྣ་ཚོགས་པའི་མཚན་མ་ངན་པ་མཐོང་ནས་བཟང་པོའི་བྲག་ལ་གནས་པའི་སྐྱེ་བོས་འདི་ནི་ཅི་ཞིག་ཅེས་བྱ་བ་ཀུན་ནས་དོགས་པར་བྱེད་ཅིང་ཀུན་ནས་གཡེང་བ་དང་བཅས་པས་

འགྲོ་བར་གྱུར་ཏོ། །དེར་ནི་གང་ཞིག་ཤིན་ཏུ་མཁས་པ་དེ་རྣམས་རྒྱལ་པོའི་བརླག་པ་ཉེ་བར་རྟོགས་པར་གྱུར་པ་ཡིད་མི་བདེ་བར་གྱུར་ནས་འདི་ལྟར་སྨྲས་པར་གྱུར་ཏོ། །དཀའ་བ་སྡུག་བསྔལ་ལས་སྐྱེས་པ། །ས་སྐྱོང་འདི་ལ་མ་གྱུར་ཅིག །གང་གི་དཔུང་པའི་གྲིབ་མ་ལ། །བརྟེན་ནས་ལུས་

ཅན་བདེ་བར་ཉལ། །དེ་ནས་མཆི་མ་དང་བཅས་པའི། །མིག་དང་ལྡན་པའི་གྲོང་ཁྱེར་གྱི་ལྷ་མོས་བློན་པོ་ཟླ་བ་ཆེན་པོ་ལ། དྲག་པོའི་མིག་ཅན་ཞེས་བྱ་བའི་བྲམ་ཟེ་འདི་རྒྱལ་པོ་འདིའི་དབུ་སློང་བའི་ཕྱིར་འོངས་པ་སྟེ། དེ་བས་ན་ཐབས་གང་གིས་ཀྱང་འདི་བཟློག་པར་མཛོད་ཅིག་ཅེས་སྨྲ་

ཞིང་འདུག་གོ། །དེ་ནས་བློན་པོས་རིན་པོ་ཆེའི་རང་བཞིན་གྱི་མགོ་དེ་རྣམས་སྤུངས་ཏེ། བྲམ་ཟེ་ཆེན་པོ་གང་གིས་ཁྱེད་ཀྱི་དོན་འགྲུབ་པ་དེ་བདག་ཉིད་ཀྱིས་དོན་བསྒྲུབ་པར་བྱ་ཡིས་ཁྱོད་ཀྱིས་རྒྱལ་པོ་མཐོང་བས་དགོས་པ་ཅི་ཞིག་ཡོད་ཅེས་དྲག་པོའི་མིག་ཅན་ལ་སྨྲས་སོ། །གལ་ཏེ་ནོར་ནི་ཆུང་བའི་

སྐྱེས་བུ་ལས་ཀྱང་ནི། །འདོད་པ་རྙེད་འགྱུར་དེ་ཕྱིར་ནོར་མང་བས་ནི་ཅི་ཞིག་བྱ། །གལ་ཏེ་གླང་ཆེན་གོམ་པ་ཙམ་ནི་བརྐོས་པའི་ཆུས། །སྐོམ་པ་སེལ་ན་རྒྱ་མཚོས་དགོས་པ་ཅི་ཞིག་སྨྲོས། །བྲམ་ཟེས་སྨྲས་པ། རགས་པའི་འོ་མའི་ནུ་འཇིང་ལྡན་ཞིང་སྤྲིན་དཀར་ལྟར་ནི་འོད་ལྡན་པ་རྣམས་བེའུ་བཅས་

མི་འདོད་དེ། །ཅུང་ཟད་རྣ་བ་གཡོ་བ་སྐོར་བའི་བུང་བའི་ཚོགས་མྱོས་པ་ཡི་གླང་པོའི་དབང་པོ་རྣམས་མི་འདོད། །རྒྱན་ཡང་གསལ་བ་གསལ་བའི་འོད་ཟེར་ལྡན་པའི་ནོར་བུ་རྣམས་དང་གོས་ཀྱང་ཁྱད་པར་ཅན་མི་འདོད། །འདི་ནི་ཐམས་ཅད་སྟེར་བ་ཞེས་བྱ་དེ་ཕྱིར་བདག་ནི་ས་སྐྱོང་འདི་ལས་

མགོ་བོ་སློང་བར་འདོད། །བློན་པོས་སྨྲས་པ། དམ་པ་རིན་ཆེན་རང་བཞིན་མགོ་བོ་འདི་རྣམས་ནི། །དད་པ་རྩེ་གཅིག་པས་ནི་བདག་གིས་ཁྱེད་ལ་འབུལ། །གལ་ཏེ་འདི་རྣམས་ཀྱིས་ནི་ཁྱེད་ལ་དོན་མེད་ན། །ད་ལྟ་ཉིད་དུ་བདག་གི་མགོ་བོ་ཁྱེར་བར་མཛོད། །རྗེ་བོའི་དོན་དུ་སྲོག་འཛིན་པའི། །

Vol. 169 · folio 23a

འབངས་ཀྱི་དོན་ནི་བསྟན་འགྱུར་བ། །དེ་ཡི་དོན་དུ་འགྲུབ་གྱུར་པ། །གལ་ཏེ་དེ་རྣམས་དོན་བྱས་ཉིད། །བྲམ་ཟེས་སྨྲས་པ། ཡང་དང་ཡང་དུ་སྨྲས་པ་འདིས་ཅི་ཞིག་བྱ། །མངོན་སྤྱོད་ཀྱི་ལས་ལ་སའི་བདག་པོའི་མགོ་བོས་བདག་ལ་དགོས་པ་ཡོད་དོ། །དེ་ནས་རྒྱལ་པོ་ཟླ་

འོད་ལྷའི་མིག་གིས་མགོ་བོ་སློང་བ་པོ་དེ་ཕྱི་རོལ་ན་གནས་པ་མཐོང་ནས་ལངས་ཏེ་དགའ་བའི་གྲོགས་པོ་དང་འདྲ་བར་བློན་པོའི་གཙོ་བོ་དེ་ལ་སྨྲས་པ། མང་པོས་སྨྲས་པས་ཆོག་སྟེ་དོན་དུ་གཉེར་བར་མ་བྱས་པས་འཁོར་བའི་རྒྱ་མཚོ་ལས་རྒལ་བའི་ཕྱིར་ཟམ་པར་གྱུར་པ་བྱང་ཆུབ་སེམས་དཔའ་རྣམས་

ཀྱི་དོན་དུ་གཉེར་བ་རྣམས་ཏེ། ཕ་རོལ་རིང་ཞིང་རྒལ་དཀའ་བ། །རྒྱ་མཚོ་རྒལ་བར་འདོད་པ་ལས། །གང་ཞིག་འབྲེལ་བའི་གྲུ་གཅོག་པ། །དེ་ནི་ཇི་ལྟར་གྲོགས་པོར་བརྗོད། །དེ་ནས་ཆོས་ལ་གྲོགས་གྱུར་པའི། །སྐྱེས་བུ་ཆོས་ཀྱི་རྗེས་འཇུག་ལ། །སྤྲོ་བ་ཉིད་དུ་བྱ་བ་སྟེ། །ཆོས་ཀྱི་

གེགས་ནི་མི་རིགས་སོ། །གལ་ཏེ་དོན་གཉེར་འདི་ལྟ་བུ། །ཐར་པའི་རྒྱུ་ནི་མེད་གྱུར་ན། །སྦྱིན་པའི་ཕ་རོལ་ཕྱིན་པ་འདི། །བྱང་ཆུབ་སེམས་དཔས་ཇི་ལྟར་རྫོགས། །དེ་ལྟར་བླངས་ཏེ་རལ་གྲི་བླངས། །མི་བདག་འདིས་ནི་བྲམ་ཟེ་ལ། །བྲམ་ཟེ་བདག་གི་མགོ་ཆོད་ཅིག །ཅེས་བྱ་སྡུག་

བསྔལ་མེད་པར་སྨྲས། །བྲམ་ཟེ་གང་དུ་སེམས་ནི་སྙིང་རྗེ་མེད་པ་གང་དུ་སྟེ། །གཏུམ་པོ་དང་ནི་ཡང་དག་འབྲེལ་པ་ལྟ་བུ་བདག་འདིས་ཞེས། །མཆོད་ཕྱིར་ཐོགས་པས་ཡུན་རིང་པོར་ནི་རྣམ་བསམས་ནས། །བྲམ་ཟེའི་བྲང་ལ་ངོ་ཚ་དང་བཅས་འདྲ་བར་གནས་པར་གྱུར། །དེ་ནས་བྲམ་ཟེ་

དེས་སྨྲས་པ། །བློན་པོ་དང་གྲོགས་པོ་དང་གཉེན་འདུན་གྱི་སྐྱེ་བོས་ཡོངས་སུ་བསྐོར་བར་བྱས་པས་ཁྱེད་ལ་བདག་གཅིག་པུས་མགོ་གཅོད་པར་ནུས་པ་མ་ཡིན་ཏེ། །དེ་བས་ན་ཁྱེད་གཅིག་པུ་འདུག་པར་འོས་སོ་ཞེས་ཟེར་རོ། །དེ་ནས་རྒྱལ་པོ་དེས་མནའ་དང་བཅས་པར་སྡུག་བསྔལ་གྱི་ཆུས་

ཀུན་ནས་གདུངས་པའི་མིག་དང་ལྡན་པའི་སྐྱེ་བོའི་ཚོགས་དེ་བཟློག་ནས་རལ་གྲིའི་ལག་པ་ཅན་གྱི་བྲམ་ཟེ་དེ་དང་རྗེས་སུ་འགྲོ་བར་གྱུར་པ་རིན་པོ་ཆེའི་སྙིང་པོ་ཞེས་བྱ་བའི་སྐྱེད་མོས་ཚལ་དུ་སོང་བར་གྱུར་ཏོ། །དེ་ནས་བློན་པོ་ཟླ་བ་ཆེན་པོས་འདི་ལྟར་སྨྲེ་སྔགས་ཀྱིས་ཀུན་ནས་བསླང་བའི་ཡི་གེ་

Vol. 169 · folio 23b

སྨྲས་པ། ཀྱེ་མ་མི་ཡི་བདག་པོ་མགོ་བོ་མེད་པ་ནི། །དེ་རིང་སུ་ཞིག་གིས་ནི་ངེས་པར་ལྟ་བར་ནུས། །མཆོད་སྦྱིན་བྱེད་པའི་ནུས་པ་ཉེ་བར་ཉམས་པ་ནི། །མཆོད་སྦྱིན་སྲིན་པོ་རྣམས་ཀྱིས་ཉེ་བར་ཉམས་པ་ལྟར། །ས་ནི་སྐྱོང་བ་མེད་པར་དེ་རིང་གྲོང་ཁྱེར་འདིར། །ཤིན་ཏུ་ཕོངས་པར་རྣམ་པར་

སྣང་བ་ཉིད་འགྱུར་ཏེ། །བུང་བའི་ཚོགས་ཀྱིས་བསྐོར་བས་ཁྱབ་པའི་ཆུ་ནས་ནི། །གླང་པོ་རྣམས་ཀྱིས་པདྨ་རྒྱས་པ་འདོན་པ་ལྟར། །དེ་བས་ཇི་སྲིད་མི་ཡི་བདག་པོ་འདི་ནི་ཤི་བ་མ་ཐོས་པར། །དེ་སྲིད་ཐོག་མ་ཉིད་དུ་བདག་གི་སྲོག་འདི་བཏང་བར་བགྱི། །དེ་ལྟར་རྣམ་པར་བསམས་ནས་ཏིང་

འཛིན་སྟོབས་ཀྱི་བློ་ལྡན་དེ། །རང་ལུས་རྣམ་པར་སྤངས་ནས་རང་འབྱུང་འགྲོ་བ་ཉིད་དུ་གྱུར། །སྐྱེས་བུ་དེ་ཉིད་དོན་བྱས་བདེ་བ་ཡང་དག་ཐོབ་ནས་ནི། །ཟླ་བའི་འོད་ལྟར་དཀར་བའི་ལས་ནི་འགྲོ་ལ་གསལ་བྱས་ནས། །གྲོགས་པོ་རྣམས་ལ་རྒུད་པ་ཆེན་པོ་ཐོབ་པར་བལྟ་བྱས་ཏེ། །གང་ཞིག་

ཐོག་མ་ཉིད་དུ་ལུས་ཀྱི་འཇིག་པ་ཐོབ་པར་གྱུར། །དེ་ནས་རིན་པོ་ཆེའི་སྙིང་པོ་ཞེས་བྱ་བའི་སྐྱེད་མོས་ཚལ་དུ་ཞུགས་པའི་རྒྱལ་པོ་ལ་དེའི་བཙུན་མོའི་འཁོར་དུ་འོ་དོད་འབོད་པའི་སྒྲ་ཆེན་པོ་ཀུན་ནས་བྱུང་བར་གྱུར་ཏོ། །སྐྱེད་མོས་ཚལ་དེར་ཞུགས་ནས་བྲམ་ཟེ་དེས་རྒྱལ་པོ་ལ་སྨྲས་པ། །གསོན་པའི་

གཟུགས་དེ་ལྟར་གནས་པའི་ཁྱེད་ཀྱི་མགྲིན་པ་ལ་བདག་གིས་རལ་གྲི་རྡེག་པར་ནུས་པ་མ་ཡིན་ནོ། །རྒྱལ་པོས་སྨྲས་པ། བྲམ་ཟེ་དེ་བས་ན་རྟག་ཏུ་མེ་ཏོག་འབྱུང་བའི་ཙམ་པ་ཀའི་ཤིང་འདི་ལ་བདག་བཅིང་བར་གྱིས་ཤིག །བྲམ་ཟེ་དེས་ཀྱང་དེ་ལྟར་བྱས་པར་གྱུར་ཏོ། །དེ་ནས་སྐྱེད་མོས་ཚལ་

ན་གནས་པའི་ལྷ་མོ་རྣམས་དྲག་པོའི་ལས་ཅན་དེ་ལ་འདི་སྐད་ཅེས་སྨྲས་སོ། །འགྲོ་བའི་གཉེན་དུ་གྱུར་པ་ཡི། །ས་ཡི་བདག་པོ་འདི་ཡི་ནི། །མགྲིན་པར་རྣོ་བའི་རལ་གྲི་ཡིས། །ཇི་ལྟར་སྡིག་ཅན་ཁྱོད་རྡེག་བྱེད། །རྒྱུ་མཚན་མེད་པའི་དྲག་པོ་ཉིད་ཀྱིས་རྩུབ་པའི་ཡིད། །ཁྱོད་ནི་གལ་ཏེ་ས་ཡི་

བདག་པོའི་མགོ་གཅོད་ན། །མེ་སྟག་འཕྲོ་བར་བྱེད་པའི་ཐོག་གིས་ཁྱེད་ཀྱི་ཡང་། །མགོ་འདི་བདག་ཅག་རྣམས་ཀྱིས་ཁྱད་པར་དུ་བརླག་བགྱི། །དེ་ནས་རྒྱལ་པོ་དེས་ནགས་ཀྱི་ལྷ་མོ་རབ་ཏུ་མྱོས་པ་རྣམས་ལ་གུས་པ་དང་བཅས་པར་འདི་ལྟར་བཟློག་ཅིང་འདུག་གོ། །བདག་བླ་ན་མེད་པ་ཡང་

Vol. 169 · folio 24a

དག་པར་རྫོགས་པའི་བྱང་ཆུབ་ཏུ་འགྲོ་བར་འདོད་པ་ལ་ཁྱེད་ཅག་རྣམས་ཀྱིས་བར་ཆད་ཆེན་པོ་བྱ་བར་ནི་མི་རིགས་ཏེ། གང་གི་ཕྱིར་རྗེས་སུ་ཡི་རང་བས་ནི་བསོད་ནམས་ཐོབ་པར་འགྱུར་རོ། །འདི་ལས་གཞན་དུ་ན་དགེ་བའི་ཕྱོགས་ཉམས་པ་ཉིད་དུ་འགྱུར་རོ། །དོན་གཉེར་

སློང་བཞིན་པ་རྣམས་ལ། །བདག་གིས་མགོ་རྣམས་སྔོན་ཡང་བྱིན། །མགོ་བོ་འདིས་ནི་གཞན་རྣམས་ཀྱི། །སྟོང་ཕྲག་ཡོངས་སུ་རྫོགས་པར་འགྱུར། །དེ་ལྟར་བྱང་ཆུབ་སེམས་དཔའི་ཚིག་ཐོས་ནས་ལྷ་མོ་དེ་རྣམས་གནས་དེ་ནས་ལོག་པར་གྱུར་ཏོ། །དེ་ནས་རྒྱལ་པོ་དེས་འདི་ལྟར་སྨོན་ལམ་

བཏབ་སྟེ། །འཇིག་རྟེན་ཡུན་རིང་ངོ་མཚར་སྐྱེད་བྱེད་པའི། །མགོ་བོ་བྱིན་པ་འདི་ལས་དགེ་བ་གང་། །བྱང་ཆུབ་ཐོབ་ནས་དེས་ནི་ཞི་བ་གང་། །ཕྲ་རབ་རྡུལ་ལྡན་དབང་པོ་བདག་ལ་ཤོག །བཟང་པོའི་བྲག་ཅེས་བྱ་བའི་གྲོང་ཁྱེར་འདི་ཉིད་དང་། །བདག་གིས་གང་ལ་མགོ་བོ་རྣམས་ནི་བྱིན་

པ་སྟེ། །ཡིད་ནི་མངོན་པར་དགའ་བའི་གནས་དེར་མཆོད་རྟེན་ནི། །ཆེན་པོ་ལུས་འཛིན་རྣམས་ལ་ཕན་པའི་དོན་གྱུར་ཅིག །དེ་ལྟར་སྨོན་ལམ་བཏབ་པའི་ས་བདག་ཉིད་ཀྱི་ནི། །སྙིང་རྗེ་འཇམ་པའི་སེམས་དང་ལྡན་ལ་སྙིང་རྗེ་མེད་པ་དེས། །ལྟོ་འཕྱེའི་འོད་དང་འདྲ་བའི་འོད་ལྡན་རལ་གྲིས་

གློ་བུར་དུ། །ཞལ་གྱི་འདམ་སྐྱེས་པདྨ་བཞིན་དུ་གཅོད་པར་གྱུར། །དེ་ནས་སྐད་ཅིག་གིས་ནི་སའི་བདག་པོའི་མགོ་བོ་གཅོད་པ་ལ། །མེ་ཏོག་ཁ་བྱེ་མཆི་མའི་ཐིགས་པ་དོར་བས་རྗེས་འབྲེལ་པ། །རླུང་གིས་བསྐྱོད་པའི་རང་འདབ་ལག་པ་རྣམས་ཀྱིས་བདག་ཉིད་ལ། །ལྕུག་མ་གཞོན་ནུ་མ་རྣམས་

རང་དབང་མེད་པར་བརྡུང་བར་གྱུར་པ་བཞིན། །རླུང་གིས་རྣུ་བ་བསྐོར་བའི་མ་ལུས་འབྱེད་པ་ནི། །རླུང་གིས་རྣམ་འཁྲུགས་རླབས་ཀྱི་ལག་པས་པད་གདོང་གཡོ་བྱས་པའི། །སྐྱེད་མོས་ཚལ་དེར་པདྨོའི་བུད་མེད་རྣམས་ཀྱི་ཚོགས་བྱུང་བ། །རྐང་པ་དྲུག་པའི་སྐད་ཀྱིས་མྱ་ངན་དང་བཅས་བཞིན་དུ་

གྱུར། །སྒྲ་སྒྲོགས་རྒྱ་མཚོའི་ཆུ་ཡི་རྣམ་འགྱུར་ཅན། །ས་ནི་གཡོ་བར་གྱུར་ཅིང་ལྷ་རྣམས་ཀྱང་ནི་ངོ་མཚར་གྱུར། །ནམ་མཁའ་ས་དང་ཕྱོགས་རྣམས་ངོས་ལ་དྲི་ཞིམ་བསྒོས་བྱས་པའི། །མན་ད་ར་བའི་ཆར་ནི་ས་བདག་ལུས་ལ་འབབ་པར་གྱུར། །རྒྱལ་པོ་འཇིག་རྟེན་ཕ་རོལ་སོང་བར་གྱུར་ན་

Vol. 169 · folio 24b

རྒྱལ་པོའི་ཁབ། །དཔལ་མེད་སྐྱེ་བོ་མང་པོས་ཁྱབ་པ་མཛེས་པར་མི་འགྱུར་རོ། །སྒྲ་མེད་པ་དང་གཡོ་མེད་ཆུ་སྐྱར་དང་ནི་ངང་པ་ཅན། །ཉིན་མོར་བྱེད་པ་ནུབ་པར་གྱུར་པ་ལ་ནི་པདྨ་ལྟར། །དེ་ནས་ཚངས་པའི་འཇིག་རྟེན་ས་སྐྱོང་གཤེགས་པར་གྱུར་པ་དེ་ལ་ནི། །རྒྱ་མཚོའི་ཆུ་ཡི་རླབས་བསྐྱེད་

པས་ནི་སྐད་མེད་པ་ཡི་སྡུག་བསྔལ་ཤུགས་ལྡན་པ། །ས་ནི་དུ་བ་ལྟར་ནི་མཐོན་པོ་རྣམས་ལ་རིང་པོར་འཛེག་བྱས་ནས། །སེར་སྐྱ་དང་ནི་དཀར་པོའི་འོད་ལྡན་རི་རབ་གངས་ཀྱི་དཔུང་པ་ཅན། །བྲམ་ཟེ་དེས་ཀྱང་དེའི་མགོ་བོའི་སྐྲ་ལ་ཡང་དག་པར་བཟུང་ནས་སྐྱེད་མོས་ཚལ་དེ་ལས་ཕྱིར་འབྱུང་

བར་བརྩམས་སོ། །དེ་ནས་བཟང་པོའི་བྲག་ལ་གནས་པའི་སྐྱེ་བོས་མྱ་ངན་གྱི་དབང་གིས་འདི་སྐད་ཅེས་སྨྲས་སོ། །མི་སྐྱོང་སེང་གེའི་ཁྲི་ལ་གནས་པའི་འབངས་རྣམས་ཀྱིས། །དགའ་བ་སྐྱེས་པའི་གདོང་གིས་ཇི་ལྟར་མཐོང་བ་ནི། །མཚོ་ལས་སྐྱེས་པ་རྙིང་པ་ལྟ་བུའི་མགོ་བོ་དེ། །བྲམ་ཟེས་

སྐྲ་ནས་བཟུང་ནས་ཁྱེར་བ་ཉིད་དུ་གྱུར། །གཞན་ཡང་གང་ཞིག་ཤར་གྱི་རི་བོར་ཡང་དག་གནས་པའི་རི་བོང་ཅན་གྱི་མཛེས་ཆེན་འཛིན་བྱེད་ཅིང་། །གླང་པོ་མཆོག་གི་རྒྱབ་གནས་གྱེན་ལྟའི་གདོང་ཅན་རྒྱལ་པོ་རྣམས་ཀྱིས་གུས་པ་དང་བཅས་མཐོང་། མགོ་བོ་བཅད་པས་རྣམ་པར་འགྲོ་བའི་

འཐུག་པའི་ཁྲག་གིས་བྲང་གི་སྟེང་ནི་ཉེར་གོས་པ། །འོག་ཏུ་བལྟ་ཞིང་བསྐོར་བའི་ཁྲི་རྣམས་ཀྱི་ནི་ས་ཡི་བདག་པོ་འདིང་བ་ཀུན་ནས་ལྟ་བའོ། །བློན་པོ་སྐྱབས་མེད་ངུ་ཞིང་ཤིན་ཏུ་ཆེ་བའི་སྲེག་པའི་སར། །ག་པུར་དང་ནི་ཙན་དན་དུ་རུ་སྐ་ཡི་ཤིང་ལྡན་བྱས་ནས་ནི། །མི་ཡི་བདག་པོ་དེར་ནི་བཅུག་

ནས་རླུང་ཡང་རླུང་གིས་ནི། །སྲེག་བླུགས་འཛིན་པས་གསང་སྔགས་ཀྱིས་ནི་བསྣུན་པས་འབར་ཞིང་འབྱུང་། །དེ་ནས་འབར་བཞིན་པས་སྲེག་པ་མཐོང་ནས་སྨྲེ་སྔགས་འདོན་པར་གྱུར་པའི་སྐྱེ་བོའི་ཚོགས་དེས་འདི་སྐད་ཅེས་སྨྲས་སོ། །ཀྱེ་མ་བཅོམ་ལྡན་འདས་མ་མི་རྟག་པ་ཞེས་བྱ་བ་

ཁྱད་པར་མེད་པ་སྟེ། །དལ་ཞིང་སོ་ཡི་རྣམ་པར་བྱུགས་པ་སྔར་ནི་རི་བོང་འཛིན་པའི་མཛེས་པ་འཕྲོག་པར་བྱེད་པའོ། །གང་ཞིག་བུད་མེད་རྣམས་ཀྱི་སོར་མོའི་ཟེའུ་འབྲུ་གི་ཝང་འཛིན་པ་རྣམས་ཀྱིས་རེག་པ་ནི། །དེ་ཡི་ལྷ་ཡི་དབང་པོའི་རྒྱལ་མཚན་ལྷུང་བ་དང་འདྲ་ཞི་བ་ལ་ནི་དམིགས་

Vol. 169 · folio 25a

པར་བྱེད་པ་ཡི། །གཡོ་བའི་སྦྱིན་སྲེག་འབར་བའི་སོར་མོ་རྣམས་ཀྱིས་རྒྱལ་པོའི་ལུས་ནི་ཀུན་ནས་སྲེག་པར་བྱེར། །དེ་ལྟར་སྨྲེ་སྔགས་བཏོན་ནས་སྐྱེ་བོའི་ཚོགས་དེ་མྱ་ངན་གྱིས་འཁྲུག་པའི་ཡིད་ཅན་གྱིས་རང་རང་གི་གནས་སུ་སོང་བར་གྱུར་ཏོ། །དེ་ལྟར་ན་རང་གི་མགོ་

བོ་ཡོངས་སུ་གཏོང་བ་ལ་ཡང་ཡིད་མི་གཡོ་བས་བྱང་ཆུབ་སེམས་དཔར་གྱུར་པའི་བཅོམ་ལྡན་འདས་ཀྱིས་མཛད་དོ་ཞེས་བྱ་བ་རྣམ་པར་བསམས་ནས་བྱང་ཆུབ་འདོད་པ་གཞན་གྱིས་ཀྱང་གཏོང་བ་ལ་རྩེ་གཅིག་པའི་དམ་པས་གནས་པར་བྱ་ཞེས་བྱའོ། །བཅོམ་ལྡན་འདས་ཀྱི་སྐྱེས་རབས་འདི། །དགྲ་བཅོམ་

རྣམས་ལ་མཆོད་བྱའི་མཆོག། །འཁོར་བའི་སྡུག་བསྔལ་ཆེན་པོའི་རྒྱུན། །རྒྱལ་བར་མཛད་པ་ཉིད་ཀྱིས་གསུངས། །དེ་ཚེ་ཟླ་འོད་ཅེས་བྱ་བའི། །ས་ཡི་བདག་པོར་བདག་གྱུར་ཏེ། །ཤཱ་རིའི་བུ་ནི་བློན་པོར་གྱུར། །བྲམ་ཟེ་དེ་ཉིད་ལྷ་སྦྱིན་ནོ། །ཟླ་འོད་ཀྱི་སྐྱེས་པའི་རབས་ཏེ་སྐྱེས་པའི་རབས་

ལྔ་པའོ།། །།བྱང་ཆུབ་སེམས་དཔས་བུད་མེད་ཉིད་དུས་ནའང་། །རང་ལུས་ལས་ནི་ཤ་ནི་བཅད་ཅིང་བྱིན། །གཞན་དོན་ནུས་པའི་མི་ཡི་ལུས་ཉིད་ལ། །ལྷག་པའི་བསམ་པ་སྟོབས་ལྡན་སྨོས་ཅི་དགོས། །འདི་ལྟར་རྗེས་སུ་ཐོས་ཏེ། རྣམ་པ་སྣ་ཚོགས་པའི་སྐྱེད་མོས་ཚལ་

སྔོ་བས་མཐར་ཐུག་པར་བྱས་པ། ནོར་སྦྱིན་དང་འདྲ་བར་གྱུར་པའི་ཚོང་པའི་སྐྱེ་བོས་ཡོངས་སུ་གང་བའི་ཚོང་འདུས་ཀྱི་ལམ་དང་ལྡན་པ། དྲི་ཟའི་ཡུལ་ལ་དཀར་པོ་གཙོ་བོར་གྱུར་པ། ས་ལ་རྒྱན་དང་འདྲ་བ་ཨུཏྤ་ལ་དང་ལྡན་པ་ཞེས་བྱ་བ་རྒྱལ་པོའི་ཕོ་བྲང་གང་ཞིག་རྫོགས་པ་དང་ལྡན་པ་ཞེས་

བྱ་བ་ད་ལྟར་ཡང་གྲགས་པར་གྱུར་པའོ། །དེ་ལ་ལང་ཚོ་དང་པོས་ཉེ་བར་བསགས་བཞིན་པའི་མཛེས་པའི་རང་གི་ས་ལ་ལྷ་མོ་དང་འདྲ་བའི་བྱང་ཆུབ་སེམས་དཔའ་གཟུགས་ལྡན་མ་ཞེས་བྱ་བའི་བུད་མེད་བྱུང་བར་གྱུར་ཏེ། ཉེ་བར་ཞི་བ་ཉིད་ཀྱིས་གཞན་ལ་ཕན་པ་ནི། །གྲུབ་པར་བྱེད་དང་ཡིད་

ཀྱང་གསལ་བར་བྱེད་ཉིད་ཀྱིས། །སྐྱེ་བོ་རྣམས་ལ་ཤིན་ཏུ་ངོ་མཚར་བྱེད་འགྱུར་བ། །དེ་ནི་སྙིང་རྗེས་གཟུགས་དང་ལྡན་པ་འདྲ་བར་སྣང་། །དེ་ནས་དུས་གཅིག་གི་ཚེ་ཡུལ་དེར་དགེ་བའི་རྩ་བ་ཟད་པས་མཛོད་དང་བང་མཛོད་ཀུན་ནས་ཟད་པ་མཐོང་ནས་ཀུན་ནས་ཕོངས་པའི་སྐྱེ་བ་དང་ལྡན་པ་

Vol. 169 · folio 25b

ལ་སྐྱ་རེངས་ཀྱི་ཁ་ལོ་སྒྱུར་བའི་འོད་ཟེར་རྣམས་ཀྱི་ཚ་བས་ལྷག་མ་དང་བཅས་པའི་ཁ་བ་ཅན་རིའི་ཁ་བ་རྣམ་པར་ཞུ་བ་དང་། ཁ་བ་མེད་པ་ཉིད་ཀྱིས་ཆུ་བོ་ཀུན་གྱི་ཆུ་ཀུན་ནས་སྐམས་པ་དང་། ཆུ་མེད་པ་ཉིད་ཀྱིས་ཞིང་པ་རྣམས་ཀུན་ནས་རྙིངས་པ་དེ་མཐོང་ནས་ཞིང་པའི་སྐྱེ་བོ་ཡིད་མི་བདེ་བ་དང་། དོན་དུ་གཉེར་

བ་རྣམས་ཀྱི་ཡིད་ཀྱི་རེ་བ་ཡོངས་སུ་མ་རྫོགས་པ་དང་། ཤིན་ཏུ་སྟོབས་ཆུང་བའི་བ་གླང་རྫི་རྣམས་ཀྱིས་རྗེས་སུ་འགྲོ་བཞིན་པའི་ཤི་བ་ལྷག་མའི་བ་གླང་གི་ཚོགས་དང་ལྡན་པ། ཁ་ཟས་ལ་རྩེ་གཅིག་པའི་དབུལ་པོའི་སྐྱེ་བོ་དང་ལྡན་པ། དམ་པ་མ་ཡིན་པའི་སྐྱེ་བོས་འབྲེལ་བ་དང་འདྲ་བར་གནོད་པ་

བྱེད་པའི་མུ་གེ་ཤིན་ཏུ་ཆེ་བ་བྱུང་བར་གྱུར་ཏོ། །ཡིད་འོང་ནུ་མའི་རྡེག་པོ་ནུབ་གྱུར་པ། །གཅང་བའི་གསེར་གྱི་བུམ་པ་དང་འདྲ་བའི། །ཁ་ཟས་མེད་པའི་བུད་མེད་རྣམས་ཀྱིས་ནི། །སོ་འཛིན་ལྕི་བ་སྲ་བ་ཉིད་ནི་དོར། །བདེ་བ་ཡོངས་སུ་དམན་པ་འཛིན་པར་བྱེད་བཞིན་པས། །ལྷག་པ་དཔུང་

པའི་ཡལ་ག་རྣམས་ལ་སྲ་བ་ཉིད། །ཡོངས་སུ་ཕོངས་པའི་མིག་ཅན་བུད་མེད་རྣམས་ཀྱི་ནི། །གདུ་བུ་རྣམས་ནི་ལྷོད་པ་ཉིད་དུ་ཀུན་ནས་འགྱུར། །ཀུན་ནས་ཡེགས་པའི་སྐྲ་རྣམས་ཀྱིས་ནི་ཁྱབ་གྱུར་པ། །མཚན་མོ་ཟད་པས་རི་བོང་མཚན་ལྟར་འོད་མེད་ཅིང་། །སྨིན་མ་སྒེག་པའི་རྒོད་པ་འབྱུང་བ་རྣམ་

བྲལ་བ། །བུད་མེད་རྣམས་ཀྱི་གདོང་པ་རྣམས་ནི་བྱུང་བར་གྱུར། །ཁྱིམ་གྱི་ནང་དུ་འདག་པས་ཉེ་བར་བྱུགས་ནས་ནི། །བཟའ་བ་རྙིང་པ་བྱིས་པ་ལ་ནི་སྦྱིན་བྱས་ནས། །ཁྱིམ་བདག་མོ་ནི་རང་གིས་དེ་ལྟར་གདུང་བ་མིན། །ཁྱིམ་བདག་ལམ་གྱིས་བཀྲེས་ལྡན་མཐོང་ནས་འཛིན་མི་འགྱུར། །བེའུ་ཤི་

བ་ཉིད་ཀྱིས་རྩྭ་ཡི་བཟའ་བ་འདོར་བ་ནི། །སྐད་འདོན་པས་ནི་གཡོ་བར་གྱུར་པའི་ལྐོག་ཤལ་ལྡན། །ནགས་ནས་བདག་པོའི་ཁྱིམ་དུ་འོངས་པའི་བ་ཉིད་ནི། །ལྷག་པར་མཆི་མ་དང་བཅས་མིག་ལྡན་བྱེད་པར་གྱུར། །རིམ་གྱིས་ཀུན་ནས་སྟོབས་ཆུང་ཉིད་དུ་སོང་བ་ཡི། །རྩྭ་ཟ་མེད་པ་ཉིད་ཀྱིས་རིམ་གྱིས་

འགྲོ་རྣམས་ཀྱི། །ལྷག་པར་ལྷོད་པ་ཉིད་དུ་སོང་བར་གྱུར་པ་སྟེ། །བ་རྣམས་ནུ་འཇིང་རྣམས་ལ་འོ་མ་ཟད་པར་གྱུར། །ཀུན་ནས་སྟོབས་ནི་ཆུང་བ་དམན་པ་ཅུང་ཟད་མཐོང་ནས་ནི། །མཇུག་མའི་རྩ་བ་ལ་ནི་ཉེ་བར་དམིགས་ནས་ཀུན་འཁྲུགས་པ། །རྣམ་པ་གང་གིས་ཀྱང་ནི་རུང་བའི་ཚིག་ལ་གསལ་བ་ནི། །

Vol. 169 · folio 26a

ཕྱུགས་རྫིས་རྒས་ཤིང་ཡན་ལག་རིད་པའི་བ་ནི་བསླང་བར་གྱུར། །བཟའ་དང་བཏུང་བ་ཟད་པས་བ་གླང་ནོར་ནི་ཤི་བ་ཡང་། །གོས་ནི་རྙིང་བ་གོན་པས་ལུས་པོ་སྐྱ་བ་དང་ལྡན་པ། །སྐྱེ་བོ་གནས་པས་ཉེ་བར་ཉམས་པའི་ཡུལ་ཕྱོགས་དེ་ལ་ནི། །ཁྱིམ་ལས་ཕྱི་རོལ་བྱུང་བའི་

དོན་དུ་ནུས་པར་མི་འགྱུར་རོ། །དེ་ནས་གཟུགས་ལྡན་མས་ཁྱིམ་འགའ་ཞིག་ཏུ་བུད་མེད་གང་ཞིག་མངལ་ཕྱིར་བྱུང་བའི་དབང་གིས་ཤིན་ཏུ་ལྷག་པར་རབ་ཏུ་འབར་ཞིང་དྲེགས་པའི་མེས་གདུང་བར་བྱས་པའི་ལུས་ཅན་འགྲམ་པ་དང་མིག་དང་ལྟོ་བ་ཤིན་ཏུ་ཞོམ་པའི་ཁུང་བུ་ཅན་རྩིབ་མའི་ཕྲེང་

བ་མངོན་པར་གསལ་བ། ཤིན་ཏུ་དྲི་མ་ཅན་གྱི་གོས་རུལ་གྱིས་ཡན་ལག་གཡོགས་པ། བདག་ཉིད་ལ་མཉེས་གཤིན་པའི་གུས་པས་བུ་ལ་ཆགས་པ་དང་བྲལ་བའི་བུད་མེད་སུ་ཞིག་བུ་དེ་ཉིད་ཟ་བར་འདོད་པ་མཐོང་ངོ་། །མཐོང་ནས་ཀྱང་སྲིང་མོ་ཤིན་ཏུ་དྲག་པའི་ལས་འདི་ཁྱེད་བྱེད་པར་འདོད་དམ་

ཞེས་བྱ་བ་དེ་ལ་སྨྲས་སོ། །བུད་མེད་དེ་ཡང་འདི་ལྟར་བསམས་ཏེ་གཟུགས་ལྡན་མ་ཞེས་བྱ་བ་འདི་ནི་སྦྱིན་པའི་ངང་ཚུལ་ཅན་ལ་སྙིང་རྗེ་དང་ལྡན་པ་སྟེ། །དེ་བས་ན་གལ་ཏེ་བདག་གིས་འདི་ལ་བྱ་བ་འདི་སྨྲས་པར་གྱུར་ན་ངེས་པར་འདི་བདག་ལ་བཀྲེས་པའི་གཉེན་པོ་བྱེད་པར་འགྱུར་ཞེས་བྱ་བ་རྣམ་

པར་བསམས་ནས་སྨྲས་པ། སྲིང་མོ་བདག་ཤིན་ཏུ་མངལ་བྱུང་བས་མངོན་པར་འཕེལ་བའི་བཀྲེས་པའི་མེས་ཀུན་ཏུ་སོང་བའི་ལུས་དང་ལྡན་པ་སྟེ། དེ་བས་ན་བུ་ཆུང་འདི་ཟ་བར་འདོད་དོ་ཞེས་བྱ་བའོ། །བྲང་སྐྱེས་ཞེས་བྱའི་བུ་ཆུང་འདི། །སྡང་བར་བྱེད་པ་ལྟར་མཐོང་ཞིང་། །བདག་ཅག་

སེམས་ཅན་རྣམས་ལ་ནི། །ཆོས་དང་ཆོས་མིན་དག་མི་མཐོང་། །དེ་ནས་གཟུགས་ལྡན་མ་སྙིང་རྗེ་སྐྱེས་པར་གྱུར་པའི་མཆི་མས་གང་བར་གྱུར་པའི་མིག་གི་ཨུཏྤ་ལ་དང་ལྡན་པ་དེས་བུད་མེད་ལ་འདི་སྐད་ཅེས་སྨྲས་སོ། །སྙིང་རྗེ་དང་བཅས་ངུས་པ་ཙམ་གྱིས་རྣམ་མཐོང་བའི། །སྡུག་བསྔལ་

ཅན་འདི་ཁྱིམ་པའི་སྐྲ་ཡིས་ཁྱབ་པ་ནི། །རི་དགས་ཕྲུ་གུ་ལྟར་ནི་ཡིད་འཕྲོག་མིག་ལྡན་པའི། །སྙིང་རྗེ་མེད་མ་ཁྱོད་ནི་བྱིས་པ་ཇི་ལྟར་ཟ་བར་བྱེད། །མྱུར་དུ་འགྲོ་བས་རབ་བསྐྱོད་མཐོ་བའི་གཙུག་ཕུད་ཅན། །ས་ཡི་རྡུལ་གྱིས་མིག་གི་རྫི་མ་རྩུབ་གྱུར་པའི། །བྱིས་པ་གཞན་གྱི་བུ་ལ་ཡང་

Vol. 169 · folio 26b

ནི་འཇམ་སེམས་པ། །བུད་མེད་རྣམས་ལ་བྱམས་པ་ཉིད་ནི་འབྱུང་བར་འགྱུར། །རྒོད་པས་རྣམ་པར་འཕྲོ་བྱས་པ་ཡི་མཆུ་ཡི་འདབ་མ་ཅན། །ཁྱད་པར་བྱས་པ་ཤིན་ཏུ་རྒྱ་ཆེའི་མིག་དང་ལྡན། །ཟུར་ཆག་སྨྲ་བས་ཁྱབ་པ་ཇི་ལྟར་འདི་ལ་ནི། །བུ་ཡི་གདོང་པ་བལྟ་བའི་དོན་དུ་ཅི་ཡི་ཕྱིར་མི་

ནུས། །རྟ་ཡི་འགྲོས་ཀྱི་ལད་མོ་བྱིས་པའི་ཕྱིར་ནི་བྱེད་བཞིན་པ། །དབྱུག་པའི་རྟ་ལ་གནས་པ་དྲི་ཅན་གཙུག་ཕུད་ཀྱིས་ཁྱབ་པ། །རྒོད་པས་འཕྲོ་བའི་སོ་ཡི་ཕྲེང་བ་འཁྱོག་ཅིང་མཛེས་ལྡན་པ། །བུད་མེད་སུ་ཞིག་བུ་ནི་བལྟ་བའི་ཕྱིར་ནི་འདོད་མ་ཡིན། །མཆུ་གཉིས་ཕྱེ་བ་དགའ་བས་ཀུན་

ནས་ལྟ་བར་གྱུར་པ་ནི། །ཁ་ཟས་ཟ་བར་འདོད་པས་རྩུབ་པའི་སྒྲ་ནི་སྒྲོགས་བྱེད་པ། །ཁྭ་ཏ་མོ་ནི་བཀྲེས་པས་ཡོངས་སུ་གདུང་ཡང་ཕྲུ་གུ་ནི། །རྗེས་འགྲོ་འབད་པས་གསོན་བུད་མེད་དམ་པས་སྨོས་ཅི་དགོས། །གཞན་ཡང་བརྒྱ་ལམ་ན་སྐྱེ་བོས་འདི་ཐོས་ནས་ཤ་ཟ་མོ་ལྟར་ཁྲོ་བའི་དབང་གིས་

འདི་བུ་གསོད་པ་ཞེས་བྱ་བ་ཡིན་པས་ཡུལ་ཕྱོགས་འདི་ནས་སྐྲོད་པར་བྱེད་དོ། །དེ་བས་ན་འདི་མ་བརྩམས་པ་ལས་ཡིད་སྐྱོ་བར་གྱིས་ཤིག་ཅེས་བྱ་བའོ། །སྟག་མོས་རི་དགས་ཕྲུ་གུ་ལྟར། །བུ་ཆུང་འདི་ནི་བཟའ་བྱས་ནས། །རི་དགས་སྡིག་ཅན་རབ་འབར་འདི། །ལྕགས་ཀྱི་རི་ལུ་ཟ་བར་

བྱེད། །དེས་སྨྲས་པ། སྲིང་མོ་ཇི་ལྟར་བྱ་སྟེ་གང་གི་ཕྱིར་ཡན་ལག་ཐམས་ཅད་ནས་བྱུང་བའི་བཀྲེས་པའི་མེ་འདི་བཟོད་པར་མི་ནུས་སོ་ཞེས་ཟེར་རོ། །དེ་ནས་གཟུགས་ལྡན་མ་འདི་ལྟར་བསམ་པར་བྱེད་དེ། །གལ་ཏེ་བདག་བྱིས་པ་བླངས་ནས་འགྲོ་བར་གྱུར་པ་ན་དེའི་ཚེ་ངེས་པར་འདི་སྲོག་དང་

བྲལ་བར་འགྱུར་རོ། །འོན་ཏེ་འདི་ལ་བཀྲེས་པ་ཞི་བའི་དོན་དུ་བཟའ་བ་ཤིན་ཏུ་རིང་པོ་ནས་བླངས་པར་གྱུར་ན་དེ་ནས་འདིས་བུ་འདི་སྲོག་དང་བྲལ་བར་བྱེད་པར་འགྱུར་རོ། །དུས་ལས་འདས་པ་འབྲས་བུ་མེད་པའི་ལས་བྱེད་ཅིང་། །རྨོངས་པས་འཇིག་རྟེན་སྤྱོད་པ་ཉིད་དུ་ངལ་བར་འགྲོ། །དྲོ་བའི་

འོད་ཟེར་ཇི་སྲིད་དུ་ནི་ནུབ་མི་འགྱུར། །དེ་སྲིད་ཉིད་དུ་ཉི་མ་སྐྱོང་བ་གཟུང་བར་རིགས། །དེ་ནས་འདིར་དུས་ལ་བབ་པས་རང་གི་ཤ་རྣམས་ཀྱིས་འདི་ནི་ཚིམ་པར་བགྱི་ཞེས་ཟེར་རོ། །སྡིག་ཅན་སྙིང་པོ་མེད་འདི་ཡི། །ལུས་ལས་སྙིང་པོ་བླང་བྱ་སྟེ། །ཆུ་ཀླུང་གིས་ཟོས་རྩ་འགུལ་བའི། །འགྲམ་

Vol. 169 · folio 27a

གྱི་ཤིང་ལས་འབྲས་བུ་བཞིན། །དེ་ནས་བུད་མེད་དེས་སླར་སྨྲས་པ། །སྲིང་མོ་སོང་ཤིག་དང་ཁྱོད་ཀྱི་དྲུང་དུ་བདག་གིས་བྱིས་པ་འདི་བག་མེད་པར་བྱེད་མི་ནུས་སོ། །དེ་ནས་གཟུགས་ལྡན་མས་དེ་ལ་སྨྲས་པ། །གལ་ཏེ་ཁྱོད་ལ་འདིར་མཚོན་ཆ་ཅུང་ཟད་ཡོད་ན་རེ་ཞིག་ལོང་ཤིག །

དེས་ཀྱང་གཟུགས་ལྡན་མ་ལ་མཚོན་ཆ་གཏད་ཅིང་འདུག་གོ། །དེ་ནས་གཟུགས་ལྡན་མས་ནི་རང་གི་ལུས་ཀྱི་སྡུག་བསྔལ་མ་བསམས་ཤིང་། །གསེར་གྱི་བུམ་པའི་རྣམ་པ་ཅན་གྱི་ནུ་མ་གཉིས་བཅད་ནས། །མཚོན་ཆ་ཤིན་ཏུ་རྣོན་པོ་དེས་ནི་ཁྲག་ནི་འབབ་བྱེད་པ། །བཀྲེས་པས་ཉེ་བར་གདུངས་

པའི་བུད་མེད་དེ་ལ་བྱིན་པར་གྱུར། །བདག་གིས་སྡུག་བསྔལ་ལྟོས་མེད་པར། །སྲོག་ཆགས་རྣམས་ཀྱི་སྡུག་བསྔལ་སེལ། །གཞན་གྱི་སྡུག་བསྔལ་གྱིས་གནོད་དེ། །གང་ཕྱིར་རང་སྡུག་བསྔལ་གྱིས་མིན། །ནུ་མ་གཉིས་པོ་དེ་ཡང་བུད་མེད་དེ་ལ་བྱིན་ནས་གཟུགས་ལྡན་མ་རང་གི་ཁྱིམ་

གྱི་ནང་དུ་རབ་ཏུ་ཞུགས་པར་གྱུར་ཏོ། །ནུ་མ་གཉིས་བཅད་རྣམ་པར་འཛག་པའི་ཁྲག་གིས་ནི། །མུ་ཏིག་ཧར་དང་གོས་དང་སྐྱེ་རགས་བཅིངས་བ་གོས། །གཟུགས་ནི་བཟང་བ་ཙན་དན་དམར་པོས་གོས་པ་ལ། །གསེར་གྱི་སྐུ་གཟུགས་འདྲ་བའི་བུད་མེད་དེ་བྱུང་གྱུར། །དེ་ནས་གཟུགས་

ལྡན་མ་ལ་ཁྱིམ་ཐབ་ཀྱིས་ངོ་མཚར་བ་དང་བཅས་པས་སྟན་ལས་ལངས་ཏེ་དྲིས་བ། ཁྱེད་ལ་དགེ་བ་འདི་གང་གིས། །མཛེས་མ་དགེ་བ་མེད་པས་ནི། །ལུས་ལ་ཤ་ཟ་བཞིན་དུ་ཡང་། །འོ་མ་འཛིན་དག་བཅད་པར་བྱས། །དེས་ཀྱང་གཏམ་དེ་ཁྱིམ་ཐབ་ལ་བརྗོད་པ། །འཕགས་པའི་བུས་

མངལ་བྱུང་བས་མངོན་པར་འཕེལ་བའི་བཀྲེས་པའི་མེ་དང་ལྡན་པའི་བུད་མེད་དེ་ལ་མྱུར་དུ་བཟའ་བ་དང་བཏུང་བ་སྦྱིན་པར་འོས་ཞེས་སླར་སྨྲས་སོ། །གཟུགས་ལྡན་མའི་ཁྱིམ་ཐབ་དེས་ཀྱང་ངོ་མཚར་བའི་ཡིད་དང་ལྡན་པས་དེ་ལྟར་བྱ་ཞེས་བརྗོད་ནས། སྙིང་རྗེའི་སྣོད་དུ་གྱུར་པ་ཡི། །དེས་སྨྲས་ལ་

ལ་ཤིན་ཏུ་ཞིམ། །སྣོད་ཀུན་ནས་འབྱུང་ཟ་བ་ནི། །ཕོངས་པའི་བུད་མེད་དེ་ལ་བྱིན། །དེ་ནས་སྐྱེ་བོའི་ཚོགས་དེས་ནི། །གཟུགས་ལྡན་མ་ཡི་ངོ་མཚར་དེ། །མཐོང་ནས་ཡུད་ཙམ་ངོ་མཚར་བས། །སོར་མོའི་འདབ་མ་བསྐྱོད་ཅིང་འདུག །འཇིག་རྟེན་འདི་ཡང་དེ་ལ་སྨྲས། །ཁྱོད་ཀྱི་ཕྲིན་ལས་འདི་ཡིས་

Vol. 169 · folio 27b

ནི། །སེར་སྣ་ཅན་གྱི་སེམས་ཀྱང་ནི། །ངེས་པར་གཏོང་ལ་རབ་སྤྲོ་བྱས། །སྦྱིན་པའི་ཕ་རོལ་ཕྱིན་པ་གང་། །བྱང་ཆུབ་འདོད་རྣམས་ཀྱིས་ཐོས་འདི། །འཇིག་རྟེན་ཕན་ཕྱིར་དེ་ནི་ཁྱོད། །ངེས་པར་གཟུགས་དང་ལྡན་པར་གནས། །བུད་མེད་ཉིད་ནི་གང་དུ་བློ་རྣོ་འདི་གང་དུ། །གཏོང་བ་འདི་ནི་གང་

དུ་འཇམ་ཉིད་འདི་གང་དུ། །དམ་པ་འདི་ཡིས་ཀུན་ནས་གཏོང་བ་སྔོན་འགྲོ་བའི། །གཏོང་བས་གཏོང་བ་དང་ལྡན་གཞན་དག་ངོ་ཚར་བྱས། །དེ་ནས་གཟུགས་ལྡན་མའི་ཁྱིམ་ཐབ་དེས་བདེན་པའི་བྱིན་རླབས་འདི་ལྟར་བྱས་པར་གྱུར་ཏོ། །ཇི་ལྟར་སྐྱེས་པ་གཞན་གྱི་ཡང་། །སྦྱིན་པ་འདི་འདྲ་མི་ཐོས་

པ། །དེ་ལྟར་མྱུར་དུ་བདེན་པ་དེས། །བདག་གི་ནུ་མེད་ནུ་འབྱུང་ཤོག །བདེན་པའི་བྱིན་གྱིས་བརླབས་བྱེད་པའི། །དེ་ལྟར་ཁྱིམ་བདག་དེས་སྨྲས་པ། །ནུ་མའི་ཁུར་གྱིས་མི་ནུས་པ། །དེ་ཡི་བྲང་ལ་སླར་སྐྱེས་གྱུར། །སྦྱིན་པའི་ཆུ་ཡིས་འཇིག་རྟེན་སྐོམ་པ་སེལ་བྱེད་ཅིང་། །སོ་ཡི་འོད་ཟེར་ཟེ་

འབྲུས་ཡིད་འཕྲོག་ཞལ་གྱི་པདྨ་ཅན། །གྲོང་ཁྱེར་དེ་ལ་ལྕི་བའི་ནུ་འཇིང་གི་ནི་ངང་སྐྱ་ཅན། །གཟུགས་ལྡན་མ་ནི་སླར་ཡང་པདྨོ་ཀུན་ནས་སྣང་བར་གྱུར། །དེ་ནས་ལྷའི་བདག་པོས་འཇིག་རྟེན་པ་ཐམས་ཅད་ཀྱི་གཏོང་བ་ལས་ལྷག་པར་གྱུར་པའི་གཏོང་བ་འདིས་གཟུགས་ལྡན་མ་བདག་ལྷའི་གྲོང་ཁྱེར་

ལས་ལྷུང་བར་བྱས་ནས་རང་ཉིད་ཀྱི་བདག་པོ་ཉིད་བྱེད་འདོད་པར་སླར་ཅི་ཞིག་འགྱུར་རམ་ཞེས་བྱ་བ་རྣམ་པར་བསམས་ནས། དོགས་པ་དང་བཅས་པའི་ཡིད་དང་ལྡན་པས་དགོངས་པ་དེའི་ཤེས་པར་འདོད་བཞིན་པས། །རབ་ཏུ་བརྐྱང་བར་བྱས་པའི་ཆུ་འཛིན་པའི་ཚོགས་ཀྱིས་ཤིན་ཏུ་སྔོ་བའི་བར་སྣང་ལ་

འདུག་སྟེ། ཨུཏྤ་ལ་དང་ལྡན་པའི་རྒྱལ་པོའི་ཕོ་བྲང་དུ་ཞུགས་ནས་པདྨའི་སྡོང་པོའི་སྐུད་པ་ལྟར་དཀར་བའི་མཆོད་ཕྱིར་ཐོགས་ཀྱིས་བྲང་གི་དབུས་སུ་མངོན་པར་བརྒྱན་པར་བྱས་པ་དང་ལྡན་པ་དང་། མགྲིན་པར་བཏགས་པའི་ཕྲེང་བ་དང་ལྡན་པ་དང་། །བུད་མེད་ཀྱི་མིག་དང་འདྲེས་པ་ལྟར། ཁྲི་སྙན་ས་

ལེ་ནག་པོའི་པགས་པ་ཕྲག་པའི་ཕྱོགས་སུ་བཀལ་བར་བྱས་པ། ལག་པ་གཡས་པས་ཤིང་ལོའི་ཐུམ་བུ་གཉིས་ཐོགས་པ། བྲམ་ཟེ་གཉིས་སྐྱེས་ཀྱི་གཟུགས་མངོན་པར་སྤྲུལ་ནས་སློང་མོ་དོན་དུ་གཉེར་བ་ཞེས་བྱ་བ་གཟུགས་ལྡན་མའི་ཁྱིམ་དུ་ཕྱིན་པར་གྱུར་ཏོ། །དེ་ནས་གཟུགས་ལྡན་

Vol. 169 · folio 28a

མས་རྣམ་པ་སྣ་ཚོགས་པའི་བཟའ་སྟོན་བླངས་ནས་བྲམ་ཟེ་གཉིས་སྐྱེས་ཀྱི་བརྒྱ་བྱིན་ལ་བྱིན་ནོ། །གནས་སྐབས་ལ་བབ་པ་སྔོན་དུ་འགྲོ་བར། ལྷ་ཡི་བདག་པོས་འདི་ལ་སྨྲས། །ཁྱེད་ཀྱིས་ནུ་མ་ཡོངས་བཏང་བས། །ཀུན་ནས་འབྱུང་ཞིང་ཁྱབ་པ་ནི། །བཅག་པའི་དུང་

ལྟར་དཀར་བ་ཡི། །གྲགས་པས་འགྲོ་བ་བརྒྱན་པར་བྱས། །དཀའ་ཐུབ་འདིས་ནི་ཅི་ཞིག་ཁྱོད། །ལྷ་ཡི་དབང་པོའི་གནས་འདོད་དམ། །བཟང་མོ་ངོ་མཚར་དབང་གིས་ཁྱོད། །ཉིད་ལ་བདག་ནི་འདྲི་བར་བྱེད། །དེ་ནས་ལྷ་ཡི་བདག་པོ་ལ་ནི་ཇི་བཞིན་དེས་སྨྲས་པ། །ས་གསུམ་ཞི་བའི་

དོན་དུ་རྒྱལ་བ་ཉིད་ནི་བདག་འདོད་དེ། །བྲམ་ཟེ་བདག་གི་བདེན་པ་འདིས་ནི་དེ་ལྟར་འགྲོ་བ་ལ། །ཡོན་ཏན་རྣམས་ཀྱི་རྟེན་གྱུར་དེས་ནི་སྐྱེས་པའི་དངོས་པོར་ཤོག །ཚིག་ནི་དེ་ལྟར་སྨྲས་པ་དེས་ནི་སྐྱེས་པ་ཉིད་གྱུར་ཏེ། །དགའ་བའི་སེམས་ལྡན་བརྒྱ་བྱིན་ཡང་ནི་རང་གི་གྲོང་ཁྱེར་སོང་། །འགྲོ་བ་ལ་

ནི་ངོ་མཚར་བ་དེ་འབྱུང་བར་ཤེས་ནས་ནི། །འཇིག་རྟེན་པ་ཡང་ཤིན་ཏུ་བརྟེན་པའི་ངོ་མཚར་ཅན་དུ་གྱུར། །ཁ་སྤུ་འབྱུང་བ་རྣམ་བསྐྱོད་མིག་སྨན་ཕྱེ་མ་ལྟར་གནག་པ། །སྐྱེས་པར་གྱུར་བ་ཉེ་བར་མཐོང་ནས་དེ་ཞལ་ཟླ་བ་ལ། །ཉིད་དུ་གླང་པོའི་འཕྲལ་སྒོང་ལྟར་ཚོ་ནུ་འབུར་གཉིས་པོ་ནི། །ཡངས་པའི་བྲང་

ལ་ངོ་ཚ་ལྟར་ཉིད་ཀྱིས་ནི་མི་སྣང་གྱུར། །བྱང་ཆུབ་སེམས་དཔའ་ལ་ཡང་གཟུགས་དང་ལྡན་པ་ཞེས་བྱ་བ་འཇིག་རྟེན་དུ་མིང་དུ་གྲགས་པར་གྱུར་ཏོ། །དེ་ནས་ཨུཏྤ་ལ་ལྡན་པའི་རྒྱལ་པོའི་ཕོ་བྲང་ལ་དུས་གཅིག་གི་ཚེ་ན་རྒྱལ་པོ་སྲས་མེད་པར་གྲོངས་པ་ཉིད་ཉེ་བར་སོང་བར་གྱུར་ཏེ། རྒྱལ་པོ་གྲོངས་

པར་གྱུར་པ་སྒྲ་གཅན་གྱིས་གཟུང་བའི་མཚན་མོ་བྱེད་པའི་མཚན་མོ་ལྟར་གྲོང་ཁྱེར་དེ་མཛེས་པར་མ་གྱུར་ཏོ། །རྒྱལ་པོ་ཞིག་པས་མངོན་པར་འཕེལ་བའི་མྱ་ངན་དང་ལྡན་པའི་བློན་པོ་རྣམས་ལ་ཉམས་པ་འགའ་ཞིག་ལ་བཙུན་མོའི་འཁོར་གྱི་སྐྱེ་བོ་ལ་དབུགས་དབྱུང་བར་བྱས་ནས་གྲོང་ཁྱེར་བའི་

ཚོགས་ལ་འདི་སྐད་ཅེས་སྨྲས་སོ། །གཙོ་བོ་མེད་པའི་ཕྱིར་ཡུལ་འདིར་བརྒྱ་ལམ་ན་དགྲ་རྣམས་འོངས་ཏེ་རང་གི་ནོར་དང་བྲལ་བར་བྱེད་པར་འགྱུར་ཏེ། དེ་བས་ན་ཁྱིམ་རབ་ཏུ་འབར་བ་བསལ་བའི་དོན་དུ་ཁྲོན་པ་རབ་ཏུ་རྐོ་བ་དང་འདྲ་བར་དུས་འདས་པ་སྡུག་བསྔལ་གྱི་རྒྱུ་བདག་ཅག་འདོད་པར་འགྱུར་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words