སེང་གེ་ཞབས་འབྲིང་པའི་སྐྱེས་པ་རབས་ཀྱི་ཕྲེང་བ་ཞེས་བྱ་བ

Sanskrit title (Tibetan script, as in the text) ཧ་རི་བྷཊྚ་ནཱ་མ་ཛཱ་ཏ་ཀ་མཱ་ལ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 169 · folio 134b

བས་སྨྱོ་བའི་མུན་པ་བསལ་བར་བྱས་ཤིང་ཡིད་དགའ་བར་སོར་གདུབ་དེ་བླངས་ནས་འདི་སྙམ་དུ་བསམས་ཏེ། མཛའ་བོའི་ལྗོན་ཤིང་མེ་ཏོག་ནི། །སོར་གདུབ་དེ་རིང་བདག་གིས་རྙེད། །དེ་མཐོང་འབྲས་བུ་ནམ་གྱི་ཚེ། །སེམས་བདེ་བ་ནི་རྙེད་པར་འགྱུར། །ཕྱིས་དྲང་སྲོང་དེ་ལ་སྨྲས་པ། །བཅོམ་ལྡན་

འདས་ཀྱིས་གདམས་ངག་གི་ཆུའི་དབང་བསྐུར་བ་འདིས་སྨྱོ་བའི་གདུང་བ་ཟད་པར་གྱུར་པ་བདག་གིས་འདི་ལྟར་མཐོང་སྟེ། ཀིམྤ་ཀའི་འབྲས་བུ་དང་འདྲ་བ་ལ་ཉེ་བར་ལོངས་སྤྱོད་པར་གྱུར་པ། ཟ་བའི་དུས་ན་ནི་བདེ་བའི་རོ་ཉེ་བར་སྐྱེད་ལ་མཐར་ནི་སྡུག་བསྔལ་བསྐྱེད་པ་རྣམས་ཏེ། སུ་ཞིག་ཅེས་བྱ་

བའི་འདོད་པའི་འདམ་དུ་བདག་ཉིད་ནུབ་ཅིང་། བདེ་བ་ཉམས་སུ་མྱོང་བར་གྱུར་པ་དེ་ལྟར་ཡང་ཤེས་ཤིང་། གང་གི་ཕྱིར་བདག་འདི་ལྟར་ཡིད་འཕྲོག་མ་ཐོབ་པར་འདོད་པ་དེ་བས་ན། འདི་ལ་རྒྱུ་ནི་འདི་ཡིན་ཏེ། །མཛའ་བོའི་སྐྱེ་བོ་དང་ནི་བྲལ་བས་འཇིགས་པ་ཡི། །མཛེས་མ་རྣམས་ཀྱི་མེ་ཏོག་ལྟར་

འཇམ་ཡིད་རྣམས་ནི། །བདག་དང་བྲལ་བའི་དུག་གིས་ཡན་ལག་བརྒྱལ་བ་ཅན། །ལྗོན་པའི་དུས་ལ་སྐྱེས་པར་ངེས་པར་སྲོག་རྣམས་འདིར། །བདག་ལ་བརྟེན་ནས་གལ་ཏེ་སྲོག །དཀའ་ཐུབ་ཅན་མ་ངེས་དོར་ན། །གལ་ཏེ་བདག་ནི་གསོན་པོར་གནས། །བརྩེ་བྲལ་གཞན་ནི་ཅི་འདྲ་ཡོད། །

དེ་བས་ཇི་སྲིད་སྲོག་རྣམས་ཉིད། །བདག་དང་བྲལ་བས་དེ་འདོར་བ། །དེ་སྲིད་དེ་ཐོབ་ཕྱིར་བརྩོན་འགྲུས། །སྙིང་རྗེས་བསྐུལ་ནས་བརྩོམ་པར་བྱ། །དེ་ནས་དྲང་སྲོང་དེ་ལ་གསོང་པོར་སྨྲས་ཏེ། ཡི་གེ་དང་སོར་གདུབ་བཟུང་བ་དང་བདུད་རྩིའི་སྨན་ཞེས་བྱ་བ་བཟུང་ཞིང་། ཤིང་གི་ལོ་མའི་ཁང་

པ་དེ་ནས་རྣམ་པར་བྱུང་སྟེ། འདི་ལྟར་བསམས་པར་གྱུར་ཏོ། །གལ་ཏེ་རྣམ་པ་གང་གིས་ཀྱང་ལོ་རྒྱུས་འདི་ཕ་མ་དག་ལ་སྨྲས་པར་གྱུར་ན་ངེས་པར་འདི་དག་བདག་ལ་མི་འམ་ཅིའི་རྒྱལ་པོའི་གྲོང་ཁྱེར་དུ་འགྲོ་བ་ལ་གེགས་བྱེད་པར་འགྱུར་གྱིས་སྙམ་དུ་རྣམ་པར་བསམས་ནས། ཅུང་ཟད་ཡུལ་

གཞན་དུ་སོང་སྟེ། གྲོགས་པོ་སུ་ཞིག་གི་ཁྱིམ་དུ་སྨན་དེ་མར་གྱིས་སྨིན་པ་ཟོས་ནས་ཡི་གེར་བྲིས་པ་པི་ཝང་དང་ལྕགས་ཀྱི་ཕུར་པ་གཉིས་དང་ཐོ་བ་དང་རལ་གྲི་དང་བཅས་པའི་མདའི་རྟེན་རྣམས་བླངས་ཏེ། རིམ་གྱིས་མུ་ཏིག་གི་ཚོགས་ལྟར་དཀར་བའི་ཁ་བ་དང་ལྡན་པ་ཁ་བ་ཅན་གྱི་རི་ལས་འདས་ནས་འགྲམ་ངན་ཞེས་

Vol. 169 · folio 135a

བྱ་བའི་རི་རྗེས་སུ་ཐོབ་པར་གྱུར་ཏོ། །དེ་ནས་ནོར་བཟངས་ཀྱིས་རས་དེ་ལ་བྲིས་པ་མ་ལུས་པ་ཡིད་ལ་བྱས་ནས་ས་འཛིན་དེ་ལ་མིའི་སྐད་དང་ལྡན་པའི་སྤྲེའུའི་བདག་པོ་ལ་འབྲས་བུ་སྣ་ཚོགས་པ་རྣམས་ཀྱིས་བདག་ཏུ་བྱས་ནས་སྨྲས་པ། སྤྲེའུའི་བདག་པོ་མྱུར་དུ་ནི། །སྦྲུལ་རྣམས་དུ་

མས་ཀུན་ཁྱབ་པ། །འགྲམ་ངན་རི་འདི་ལས་ནི་བདག །ད་ལྟར་ཁྱེད་ཀྱིས་སྒྲོལ་བར་མཛོད། །དེ་ནས་སྤྲེའུའི་བདག་པོ་དེས་ནོར་བཟངས་ལ་སྨྲས་པ། ཁྱེད་ཚུར་ཤོག་ལ་བདག་གི་རྒྱབ་ཏུ་ཞོན་ཅིག་ཅེས་ཟེར་རོ། །སྐད་ཅིག་མ་ཉིད་ཀྱིས་སྤྲེའུ་དེའི་རྒྱབ་ཏུ་ཞོན་པར་བྱས་པའི་བདག་ཉིད་ཆེན་པོ་དེས་རི་དེ་ལས་

བརྒལ་ནས་མ་སྐྱེས་པའི་ལམ་ཞེས་བྱ་བའི་རི་ལ་ཞུགས་པར་བྱས་ནས་སྤྲེའུ་ཆེན་པོ་དེ་ལྡོག་པར་འགྱུར་བ་ལ། དེར་ཆེ་བའི་ཚད་ལམ་འགེགས་པར་བྱེད་ཅིང་མངོན་པར་རྒྱུག་པར་བྱེད་པའི་སྦྲུལ་ཆེན་པོ། མདའ་འཕངས་པས་སྐྱེ་བ་གཞན་དུ་ཉེ་བར་ཁྱེར་ནས། །ལམ་མ་སྐྱེས་པའི་ས་འཛིན་ལས་བརྒལ་

ནས་འདོད་པའི་གཟུགས་ཅན་ཞེས་བྱ་བའི་རི་ལ་སོང་བར་གྱུར་ཏོ། །དེ་ན་ཡང་སྲིན་མོ་འདོད་པའི་གཟུགས་ཅན་མ་ཞེས་བྱ་བ་ཡོད་དེ་སྡུག་བསྔལ་དང་ལྡན་པ་དེས་ཀྱང་རིག་པ་འཛིན་མའི་གཟུགས་སུ་མངོན་པར་སྤྲུལ་ནས་ནོར་བཟངས་ཀྱི་དྲུང་དུ་འོངས་ནས་སྨྲས་པ། སྐལ་བ་ཆེན་པོ་ལགས་བདག་གི་ཁྱོ་དྲག་

པ་རིག་པ་འཛིན་པ་གཞན་དག་རྣམས་ཀྱིས་གཡུལ་ངོར་གཤིན་རྗེའི་གནས་སུ་ཉེ་བར་ཁྲིད་པ་དེས་ན་བདག་ངུ་བ་སྟེ། དེ་བས་ན་གལ་ཏེ་ཁྱེད་ལ་རིག་པ་འཛིན་པ་ཉིད་ཀྱི་ཕྱིར་མངོན་པར་འདོད་པ་ཡོད་ན་དེ་བས་ན་བདག་ལས་སྔགས་རྣམས་ཟུང་ཤིག་དང་། བདག་ནི་ཁྱོད་དང་ལྷན་ཅིག་ཏུ་ཆོས་སྤྱོད་མར་འབྱུང་

བར་འགྱུར་ཞེས་ཟེར་ཏེ། མི་ཡི་བདེ་བ་ཆུང་བ་སྙིང་མེད་འདི་ནི་སྤང་བྱས་ནས། །དི་རིང་ཤོག་ཤིག་བདག་དང་ལྷན་ཅིག་ནམ་མཁའི་དཀྱིལ་དུ་འགྲོ་བར་མཛོད། །མ་ལ་ཡ་ཡི་རི་ཡི་ཙན་དན་རྣམས་ཀྱི་སྣ་ཚོགས་པ་ཡི་ནགས། །རི་བོ་རྩེ་མོ་དགའ་བ་རྣམས་ཀྱང་རེ་ཞིག་མཐོང་བར་མཛོད། །དེ་ནས་བདག་ཉིད་

ཆེན་པོ་དེ་ལ་རྒྱུས་ཤེས་པ་སྲིན་མོ་འདོད་པའི་གཟུགས་ཅན་མ་འདི་དེ་ཞེས་བྱ་བ་རྣམ་པར་བསམས་ནས་སྨྲས་པ། །སྲིན་མོ་བདག་ནི་རིག་པ་འཛིན་པ་ཉིད་མངོན་པར་འདོད་པ་མ་ཡིན་ཏེ། གང་ཞིག་རིག་པ་འཛིན་པ་ཉིད་ཀྱིས་དོན་དུ་གཉེར་བ་གཞན་ལ་ལ་ཞིག་ཁྱོད་ཀྱིས་བསླུ་བར་གྱིས་ཤིག་ཅེས་ཟེར་རོ། །དེ་

Vol. 169 · folio 135b

ནས་སྐད་ཅིག་དེ་ཉིད་ཀྱིས་འབར་བའི་མེ་ལྕེའི་ཚོགས་ལྟར་སེར་སྐྱའི་སྐྲའི་ཚོགས་ཀྱིས་ཁྱབ་ཅིང་ཀུན་ནས་འཁྱོག་པའི་མཆེ་བ་ཀུན་ནས་བཏགས་པ་ལས་ཀུན་ནས་བསླང་བའི་སྲེག་བླུགས་འཛིན་པའི་མེ་སྟག་གིས་རྐན་གྱི་བུག་པ་ཁྱབ་པ་འཕྲོས་ཤིང་མངའ་བའི་མཁའ་སྣང་དང་འདྲ་བ་དང་མིག་སྨན་གྱི་རིའི་ཕུག་གི་སྒོ་དང་འདྲ་

བའི་ངོ་བོ་གདོང་མངོན་པར་བསྟན་ནས། ཆུའི་སྒྲ་སྒྲོགས་པའི་ཆུ་འཛིན་པ་ལྟར་ལྟོ་བ་ཆེ་བ་ལྷོད་ཅིང་འཕྱང་བའི་ནུ་མ་གཉིས་ཀྱིས་ཀུན་ནས་རིག་པའི་བུམ་པ་དང་རྗེས་སུ་མཐུན་པའི་པུས་མོ་གཉིས་དང་ལྡན་པ། བྲག་དགྲ་སྟ་རྣོན་པོའི་སོ་དང་འདྲ་བ་ཆུའི་རྒྱུན་འཛིན་པའི་དུས་ཀྱི་མཚན་མ་ལྟར་ཤིན་ཏུ་འཇིགས་པའི་གཟུགས་

ཅན་ནོར་བཟངས་ལ་མངོན་པར་རྒྱུག་པར་གྱུར་ཏོ། །དེ་ནས་ནོར་བཟངས་ཀྱིས་དགོད་ཅིང་དེ་ལ་སྨྲས་པ། བཟང་མོ་སྔར་བྱུང་བ་དང་འདྲ་བའི་ཁྱོད་ཀྱིས་རིག་པ་འཛིན་པའི་གཟུགས་ཀྱིས་བདག་གི་སེམས་འདོད་པ་དང་སྨྲ་བ་ཉིད་དུ་ཁྲིད་པས་ཡིན་ཏེ། གཟུགས་རྣམ་པར་བསྒྱུར་བ་འདིས་ཁྱེད་ལ་བདག་གིས་ཇི་ལྟར་འདོད་

པ་བགྱི་ཞེས་སྨྲས་ཏེ། དེ་བས་ན་སོང་ཤིག་དང་ཡོངས་སུ་ངལ་བ་འདིས་ཅི་ཞིག་བྱ། གལ་ཏེ་ཡང་བདག་ལ་མངོན་པར་རྒྱུག་པ་ཁྱོད་ཀྱིས་གནས་པར་མི་འགྱུར་ན་དེ་བས་ན་མདའ་འདིས་ཁྱེད་དུས་རིང་པོར་འཇིག་པར་འགྱུར་ཞེས་ཟེར་རོ། །གང་གི་ཚེ་དེས་མངོན་པར་རྒྱུག་པ་དེའི་ཚེ་ནོར་བཟངས་ཀྱིས་པི་ཝང་བརྡུངས་

པར་གྱུར་ཏེ། དེ་ནས་པི་ཝང་སྒྲ་ཐོས་ཏེ། །ཡིད་དང་རྣ་བ་འཕྲོག་བྱེད་པ། །སྲིན་མོ་འཇིགས་མ་ལེགས་སོ་ཞེས། །སྨྲས་ནས་དེ་ཉིད་མྱུར་དུ་ནུབ། །དེ་ནས་ནོར་བཟངས་ཀྱིས་འདོད་པའི་གཟུགས་ཅན་གྱི་རི་བོ་དེ་ལས་འདས་པར་བྱས་ཏེ། སོ་གཅིག་པ་ཞེས་བྱ་བའི་རི་ལ་སོང་བར་གྱུར་ཏོ། །དེ་ཡང་

ཐབས་གཞན་གྱིས་ནི་བརྒལ་བར་ནུས་པ་མ་ཡིན་ནོ་སྙམ་དུ་རྣམ་པར་བསམས་ཏེ། ས་འཛིན་དེ་ལ་ལྕགས་ཕུར་ནི། །ཤིན་ཏུ་ལྕི་བའི་ཐོ་བ་ཡིས། །སོར་བཅུ་གཉིས་སུ་བརྟན་བྱེད་ཕྱིར། །ཡང་དང་ཡང་དུ་བརྡུངས་བར་གྱུར། །ཕུར་པ་དེ་ལ་ཞོན་ནས་ནི། །སླར་ཡང་གཞན་གྱིས་བརྐོས་པར་གྱུར། །

དེར་ནི་གནས་ནས་ཕུར་བུ་དེ། །འོག་ནས་དེ་ནི་བཏོན་པར་གྱུར། །དེ་ལྟར་ཐབས་ནི་ཆེན་པོ་ཡིས། །བརྩོན་འགྲུས་དེ་ལྡན་ནོར་བཟངས་ནི། །མི་འམ་ཅི་མོ་ཐོབ་བྱའི་ཕྱིར། །རི་བོ་དེ་ལས་བརྒལ་བར་གྱུར། །དེ་ནས་སོ་གཅིག་པ་བརྒལ་བར་བྱས་ནས། རྡོ་རྗེ་ཅན་ཞེས་བྱ་བའི་རི་ལ་སོང་བར་གྱུར་

Vol. 169 · folio 136a

ཏོ། །དེའི་ཡང་རྩེ་མོ་ལ་གནས་པ་སྟག་གི་སེན་མོ་ལྟར་འཁྱོག་ཅིང་རྣོ་བའི་མཆུ་དང་ལྡན་པ། བྱ་རྒོད་མོ་མཐོང་ནས་འདི་བྱ་རྒོད་ཀྱི་གཟུགས་ཅན་སྲིན་མོའོ་སྙམ་དུ་བསམས་སོ། །ད་ནི་ཐབས་དང་བཅས་པར་འདི་ལས་བདག་ཉིད་རྡོ་རྗེ་ཅན་གྱིས་འཛིན་ལས་འདའ་བར་བྱའོ་

སྙམ་དུ་རྣམ་པར་བསམས་ཏེ། ཤིང་གི་རྩ་བར་འོངས་ནས་ནོར་བཟངས་གཞུ་དང་ལྡན་རྣམས་ཀྱི། །མཆོག་ཏུ་གྱུར་པ་གཞུ་ནི་བདུངས་པ་བྱས་ནས་གཞུ་ལ་མཁས། །རྩ་ནི་ཤིན་ཏུ་འཇམ་པའི་གཏན་པ་ཉིད་དུ་འཛིན་བྱེད་པའི། །རི་དགས་ལ་ནི་རྣོ་བའི་མདའ་ཡིས་ཀུན་ནས་བསྣུན་པར་གྱུར། །

རི་དགས་དེ་ཡི་ཁྲག་འཛགས་པས། །རི་དགས་ལྟ་བུའི་མིག་ལྡན་པ། །ཕྱི་རོལ་དུ་ལྡན་པགས་པ་ཡིས། །ལུས་ནི་བསྒྲིབས་ཤིང་གནས་པར་གྱུར། །དེ་ནས་བྱ་རྒོད་གཟུགས་འཛིན་དེས། །གཡོ་བ་དང་བྲལ་གནས་པ་ནི། །ཤུགས་ཀྱིས་རི་དགས་ལྤགས་ལྡན་པ། །དེ་ནི་བཏོན་ནས་རི་ལ་ཁྱེར། །

པགས་པ་དེ་ནི་ཕུག་བྱས་ནས། །ལམ་ནི་རྙེད་ཕྱིར་ལམ་ལ་ནི། །བརྩོན་འགྲུས་ལྡན་པ་དེས་སྲིན་མོའི། །མགོ་ནི་རལ་གྲིས་གཅོད་པར་གྱུར། །དེ་ནས་སེང་ལྡེང་མོད་པ་སེང་ལྡེང་ཅན་ཞེས་བྱ་བའི་རི་ལ་འོངས་ཏེ་བསམས་པ། རི་འདི་ནི་མུན་པ་དང་བཅས་པའི་ཕུག་གི་སྒོ་འདི་ལས་ངེས་པར་བརྒལ་བར་བྱའོ་སྙམ་

མོ། །ངེས་པར་གནས་ཆེན་པོ་འདི་ཡིན་ཏེ་གང་དུ་ཡོན་ཏན་ལྔ་དང་ལྡན་པ་ཀླུ་རྣམས་ཀྱིས་ཡོངས་སུ་བཟུང་བ་སྨན་ཆེན་པོ་དེ་བྲག་རྣམས་ཀྱིས་བཀག་པ་ཞིག་ཡོད་དེ། །སྨན་ཆེན་པོ་དེ་ཡང་མུན་པ་འཇོམས་བྱེད་འོད་ཀྱིས་ནི། །གྲང་དང་དྲོ་དང་དུག་ཉམས་བྱེད། །སྦྲུལ་དང་སྲིན་པོ་ཆོམ་རྐུན་ལས། །བྱུང་བའི་འཇིགས་པའང་སྤོང་བར་བྱེད། །

གང་ཡང་འདི་སོ་སོར་འཛིན་པའི་ཀླུ་དེས་གཉིད་ལོག་པར་གནས་པར་བྱས་ཏེ། ཅིའི་སླད་དུ་ཞེ་ན། གང་གི་ཕྱིར་སྨན་ཆེན་པོ་འདི་ནི་མར་མེའི་རྩེ་མོ་ལྟར་གནས་འདི་སྣང་བར་བྱེད་དོ། །དེ་བས་ན་ཇི་སྲིད་དུ་ལྟོ་འཕྱེ་འདི་གཉིད་ལོག་པ་དེ་སྲིད་དུ་བྲག་འདི་བཏོན་ནས་སྨན་བཟུང་བར་བྱའོ་སྙམ་དུ་རྣམ་པར་བསམས། ལྕི་བའི་བྲག་དེ་ནི་ལག་པའི་

སྟོབས་ཀྱིས་བསལ་བར་བྱས་ཏེ་སྨན་དེ་མགོ་བོར་བཅིངས་ལ་ཕུག་དེར་ཞུགས་ཏེ། མྱུར་དུ་ཕུར་བུའི་རྩ་དག་གིས། །རི་ཡི་ཕྱོགས་དག་མདའ་དག་གིས། །ངལ་བའི་སྐྱེད་བྱེད་ཕུག་བྱས་ནས། །རྣམ་པར་མི་གཡོ་དེས་བྱས་གྱུར། །དེ་ནས་ཅུང་ཟད་ཕར་སོང་སྟེ། །ལྕགས་ཀྱི་སྐྱེས་པ་གཉིས་དག་གིས། །

Vol. 169 · folio 136b

རལ་གྲི་བཟུང་བར་བྱས་པ་དག །མྱུར་དུ་མདའ་དག་གིས་ཕུག་སྟེ། །ཕུར་བ་ཡིས་ནི་མངོན་དུ་བྱས། །དེ་དག་མི་གཡོ་བ་ཉིད་དུ་ཐོབ་པར་འགྱུར་བས་བདག་གི་བར་ནས་བྱུང་སྟེ་སོང་བར་གྱུར་ཏོ། །དེ་ནས་སྒྱོགས་དུ་མ་རྣམས་བཅག་ནས་འཛིན་པ་དང་ལྡན་པའི་ཆུ་བོ་དེ་དང་དེ་རྣམས་ལས་ཀྱང་བརྒལ་ནས་སྦའི་

ཆུ་བོ་རྗེས་སུ་རྙེད་པར་གྱུར་ཏེ། དེ་ནས་རྣམ་པ་གང་གིས་སྤའི་ལྕུག་གཉིས་ཕ་རོལ་ནས། །དྲག་པའི་རླུང་གིས་ཀུན་ནས་ཁྱེར་བའི་མདུན་དུ་བཟུང་ནས་ནི། །ཆུ་བོ་ཆེན་པོ་དེ་ལས་བདག་ཉིད་ཆེན་པོ་བརྒལ་གྱུར་པ། །མངོན་དུ་བྱས་པ་འབྲས་བུ་ཆེན་པོ་སྟེར་བའི་དམ་བཅས་ལྟར། །དེ་ནས་སྦའི་ཆུ་བོ་

ལས་འདའ་བར་བྱས་ནས་གསེར་གྱི་ར་བའི་སྟེགས་བུ་རྣམས་ཀྱིས་ཉེ་བར་མཛེས་པ་སྐྱེད་མོས་ཚལ་དུ་མས་ཡིད་འཕྲོག་པ། ཡིད་འཕྲོག་མའི་ཡབ་ཀྱི་གྲོང་ཁྱེར་མཐོང་བར་གྱུར་ཏོ། །དེར་ཡང་ཕྱོགས་གཅིག་ཏུ་རིག་པ་འཛིན་པ་རྣམས་ཀྱི་སྐྱེད་མོས་ཚལ་དུ་རྗེས་སུ་ཞུགས་ནས་ཤིང་རྣམས་བསྒྲིབས་པར་གནས་པར་

གྱུར་ཏེ། གཅིག་དང་བསྡོངས་པར་བྱས་པའི་བཞི་པོ་རྣམས་ཀྱང་ནི། །མི་འམ་ཅི་ཡི་བུ་མོ་བརྒྱ་ཕྲག་རྣམས་ཀྱང་འདིར། །ཆུ་བོ་ལ་ནི་རབ་ཏུ་དང་བའི་ཆུ་ཉིད་ནི། །བུམ་པ་རྣམས་ཀྱིས་ཡང་དག་འཛིན་པར་བྱེད་མཐོང་འགྱུར། །དེ་ནས་དེ་རྣམས་སོང་བ་དང་དེར་རྒས་པར་ནུས་པ་ཉེ་བར་གདུངས་པ་གཅིག་པུ་ཆུ་དང་

བཅས་པའི་གསེར་གྱི་བུམ་པ་འཛིན་པའི་ནུས་པ་དང་མི་ལྡན་པ་དབུགས་ཕྱུང་ནས་རྫིང་བུའི་འགྲམ་གྱི་མཐའ་མར་གནས་པར་གྱུར་ཏོ། །དེ་ནས་ནོར་བཟངས་ཀྱིས་བདག་ལ་ཕན་པའི་ཕྱིར་མི་འམ་ཅིའི་འབངས་མོ་འདི་རྒས་པས་ནུས་པ་འཕྲོགས་པ་སྟེ། གཞན་དུ་ན་བདག་གིས་འདིར་གཅིག་པུ་འདི་ཅིའི་ཕྱིར་

ཡིད་འཕྲོག་མའི་གཏམ་ཉེ་བར་དམིགས་པའི་ཕྱིར་རྙེད་པར་འགྱུར་སྙམ་དུ་རྣམ་པར་བསམས་ནས་ཉེ་བར་འོངས་ཏེ་དེ་ལ་དྲིས་པ། འཕགས་མ་ཆུ་འདི་གང་དུ་ཉེ་བར་ཁྱེར་བ་ཡིན། །མི་འམ་ཅིའི་འབངས་མོ་རྒས་པ་དེས་ཀྱང་ནོར་བཟངས་ལ་བལྟས་ནས་རིག་པ་འཛིན་པའི་སྐྱེད་མོས་ཚལ་འདི་ལས་ངེས་པར་བྱུང་ནས་

གཞོན་ནུ་རིག་པ་འཛིན་པ་འདི་ངོ་མཚར་བའི་ལྟད་མོའི་དབང་གིས་བདག་ལ་དྲིའོ་སྙམ་དུ་རྣམ་པར་བསམས་ནས་སྨྲས་པ། བཞིན་བཟངས་ཉོན་ཅིག །ཡིད་འཕྲོག་མ་ཞེས་བྱ་བ་ལྗོན་པའི་བུ་མོ་སྟེ། །ས་ཡི་བདག་པོ་མི་འམ་ཅི་ཡི་ཡིད་འཕྲོག་མ། །དེ་ཡང་སྐྱེས་པས་སྔོན་དུ་ཉེ་བར་ལོངས་སྤྱོད་པ། །ཇི་ལྟར་སླར་

Vol. 169 · folio 137a

ཡང་འདིར་ནི་མངོན་པར་འོངས་པ་ཡིན། །དེ་ཡི་ཕས་ནི་མི་ཡི་དྲི་ནི་ཀུན་ནས་འབྱུང་བཞིན་པ། །ཡན་ལག་ལས་ནི་སྣོམ་པར་ནུས་པ་མ་ཡིན་ཏེ། །ཉི་མ་རེ་རེར་བུམ་པའི་ཁ་ལས་འབྱུང་བ་ཡི། །དྲི་ཡི་ཆུ་ཡིས་དེ་ཕྱིར་དེ་ནི་འཁྲུ་བ་ཡིན། །དེ་ནས་ནོར་བཟངས་ཕྲད་འདོད་དེ་ལ་སྨྲས་

གྱུར་པ། །དོགས་པ་དང་བཅས་ཕྱོགས་རྣམས་ཡང་ཡང་བལྟ་བྱས་ཏེ། །འོད་ཀྱིས་བརྒྱན་པའི་སོར་གདུབ་འདི་ནི་དོགས་དང་བཅས། །ཡིད་འཕྲོག་མ་ལ་འདི་ནི་རབ་ཏུ་སྦྱིན་པར་མཛོད། །དེས་ཀྱང་དེ་ལྟར་བགྱི་ཞེས་སྨྲས་ནས་སོར་གདུབ་དེ་བཟུང་བར་གྱུར་ཏོ། །བྱང་ཆུབ་སེམས་དཔས་ཀྱང་ཆུའི་བུམ་པ་

དེའི་རྐེད་པར་བཞག་ནས་སླར་སྐྱེད་མོས་ཚལ་དེ་ཉིད་དུ་ཞུགས་པར་གྱུར་ཏོ། །དེ་ནས་མི་འམ་ཅིའི་འབངས་མོ་རྒན་མོ་ཡང་དག་པར་ཉེ་བར་འོངས་ཏེ་ཁྲུས་ཀྱི་ཐ་མར་ཡིད་འཕྲོག་མ་སོར་གདུབ་དེ་ཕང་པར་གཞག་ཅིང་གནས་ཏེ། དེ་ནས་སོར་གདུབ་དེ་ནི་ཡང་དག་བླངས་བྱས་ཏེ། །ཡིད་འཕྲོག་མས་ནི་ཁྱིམ་དུ་

བུད་མེད་དེ་ལ་ནི། །འཕགས་མས་འདི་ནི་གང་ནས་ཡང་དག་རྙེད་པ་ཞེས། །འདོད་པས་གང་བའི་ཡིད་དང་ལྡན་པས་དྲིས་པར་གྱུར་ཏེ། དེ་ནས་དེས་གཞོན་ནུ་རིག་པ་འཛིན་པས་སོར་གདུབ་འདི་བདག་གི་ལག་ཏུ་གཏད་པ་སྟེ། ཡིད་འཕྲོག་མ་ལ་འདི་སྦྱིན་པར་གྱིས་ཤིག་ཅེས་སྨྲས་པར་གྱུར་ཏོ། །དེ་ནས་

མི་འམ་ཅིའི་བདག་པོའི་བུ་མོས་ངེས་པར་འཕགས་པའི་སྲས་འོངས་སོ་སྙམ་དུ་རྣམ་པར་བསམས་ནས། སླར་དེ་ལ་འཕགས་མས་གལ་ཏེ་འདིར་འགུགས་པར་ནུས་ན་ཤིན་ཏུ་ཡང་དོན་ཆེན་པོ་དང་ལྡན་པར་འགྱུར་ཞེས་བྱ་བ་སྨྲས་སོ། །དེས་སྨྲས་པ། རེ་ཞིག་འབད་པར་བགྱི་སྟེ་གལ་ཏེ་བདག་གིས་

ནུས་པར་གྱུར་ན་དེ་བས་ན་གཞོན་ནུ་རིག་པ་འཛིན་པ་དེ་འོང་བར་བགྱི་ཞེས་བྱ་བ་སྨྲས་ནས་སྐྱེད་མོས་ཚལ་དེར་སོང་སྟེ་ནོར་བཟངས་ལ་སྨྲས་པ། བཟང་པོ་ཡིད་འཕྲོག་མ་ནི་ཁྱོད་ལ་ལྟ་བར་འདོད་དོ་ཞེས་སྨྲས་ཏེ། དེ་ནས་བུད་མེད་ཀྱི་ནི་ཆ་བྱད་ཡིད་འོང་དུ་བྱས་ཏེ། །མཚན་མོའི་མུན་པ་མཐུག་པ་ཉིད་དུ་འགྱུར་བ་ལ། །དེ་རིང་

བདག་དང་ལྷན་ཅིག་ཕྲད་འདོད་ཡིད་འཕྲོག་མའི། །གློ་བུར་ཉིད་དུ་ཕོ་བྲང་དུ་ནི་ཞུགས་པར་མཛོད། །དེ་ལྟར་བགྱི་ཞེས་བརྟན་པ་འདིས་ནི་ཤེས་བྱས་ཏེ། །སྒེག་པའི་ཆ་བྱད་ཀྱིས་ནི་ཡན་ལག་བསྒྲིབས་བྱས་པ། །མི་འམ་ཅིའི་གཡོག་རྒན་མོའི་རྗེས་སུ་འགྲོ་བཞིན་པ། །མཚན་མོ་ཡིད་འཕྲོག་མ་ཡི་ཁྱིམ་དུ་

Vol. 169 · folio 137b

ཞུགས་པར་གྱུར། །དེ་ནས་ནོར་བཟངས་མཐོང་ནས་དགའ་བའི་ཁུར་གྱིས་ཡན་ལག་ལེ་ལོ་ཅན། །ཅི་ལྟར་ཡང་ནི་འཇིགས་པ་ཉིད་ཀྱིས་དེས་ནི་མལ་ཆ་དོར་བར་གྱུར། །དེས་ཀྱང་གཡོ་བའི་རི་དགས་མིག་ལྟར་མཛའ་མོ་དེ་ལ་དཔུང་དག་གིས། །ཤིན་ཏུ་རིང་བར་བྲལ་བར་རིད་པ་མི་འམ་ཅི་མོ་ལ་ནི་འཁྱུད། །དེ་ནས་

དེས་ཇི་ལྟར་ཡང་ནོར་བཟངས་ཀྱི་ཚིག་གིས་ཡུན་རིང་པོར་བྲལ་བའི་སྡུག་བསྔལ་གྱིས་འཇིགས་པ་སེལ་བ་ཡིད་ལ་རེ་བའི་འབྲས་བུ་ཐོབ་ནས་སྨྲས་པ། ཨེ་མ་བདག་གི་དོན་དུ་འཕགས་པའི་སྲས་ཀྱིས་འོངས་པའི་སྡུག་བསྔལ་མང་པོ་ཉམས་སུ་མྱོང་བ་སྟེ། རྣམ་པ་ཐམས་ཅད་དུ་བདག་ནི་སྙིང་སྲ་བ་སྟེ་གང་གི་ཕྱིར་བདག་

གིས་འཕགས་པའི་སྲས་འདི་ལྟར་ཀུན་ནས་ངལ་བར་བྱས་སོ་ཞེས་ཟེར་རོ། །ནོར་བཟངས་ཀྱིས་སྨྲས་པ། འཇིགས་མ་དེ་ལྟར་ནི་མ་ཡིན་ཏེ། །སྡུག་བསྔལ་མི་བཟད་ཆེན་པོ་ལ་ཡང་བསམ་པར་མ་བྱས་ཤིང་། །བདེ་བས་རྗེས་འབྲེལ་མི་གཡོ་ཆོས་ཀྱི་ལམ་ཡང་དོར་བྱས་ནས། །ཕལ་ཆེར་ཡུན་རིང་མངོན་

པར་འདོད་པའི་སྐྱེ་བོའི་དོན་དུ་ནི། །གཉེན་བཤེས་པས་ནི་མ་སྤྱད་པ་ཡང་སྐྱེ་བོས་བྱེད་པ་ཡིན། །ཡིད་འཕྲོག་མས་སྨྲས་པ། ཨེ་མ་བདག་ནི་དོན་དང་བཅས་པ་སྟེ། །གང་གི་ཕྱིར་བདག་གི་དོན་དུ་འཕགས་པའི་སྲས་ལ་མཉེས་གཤིན་པ་ལ་རྩེ་གཅིག་པ་ཉིད་ཡིན་ཏེ། དེ་བས་ན། ད་ལྟར་ཡུན་རིང་བྲལ་བའི་ཉི་མ་དང་འབྲེལ་

གདུངས་པས་ནི། །ཟོས་པ་འདི་ནི་བསྐུམ་པ་ཉིད་དུ་མངོན་པར་ཐོབ། །བདག་གི་སྙིང་གི་ཀུ་མུ་ད་ནི་མཐོང་ཤར་བྱས། །ཤིན་ཏུ་དགའ་བ་ཟླ་བ་ཡིས་ནི་རབ་སད་བྱས། །དེ་ནས་ཡིད་འཕྲོག་མས་མི་འམ་ཅིའི་འབངས་མོ་རྒན་མོ་ལ་བོས་ཏེ་སྨྲས་པ། གང་ཞིག་འཕགས་པའི་སྲས་འདིར་གནས་བཞིན་པ་ཡབ་ཀྱིས་

གང་ནས་ཀྱང་ཐོས་པར་གྱུར་ན་དེ་ནས་ཁྲོ་བ་སྐྱེས་ཏེ་མི་ལེགས་པ་ཅི་ཡང་བྱེད་པར་འགྱུར་རོ་ཞེས་ཟེར་རོ། །དེ་བས་ན་འདི་འདིར་རྙེད་པ་རིག་པ་འཛིན་པའི་སྐྱེད་མོས་ཚལ་དེ་ཉིད་དུ་འཕགས་པའི་སྲས་ལ་མཚན་མོའི་དུས་སུ་རིག་པ་འཛིན་པའི་སྐྱེད་མོའི་ཚལ་དེ་ཉིད་དུ་སྲོད་ཀྱི་དུས་ལ་འཕགས་པའི་སྲས་ཁྱོད་

ཀྱིས་ཁྲིད་པར་འོས་པ་སྟེ། བདག་ཅག་ནང་པར་དེ་ཉིད་སྨྱུང་བ་དང་བཅས་པ་ཡན་ལག་མེད་པ་ལ་མཆོད་པའི་ཚུལ་གྱིས་འགྲོའོ་ཞེས་ཟེར་རོ། །ནོར་བཟངས་ཀྱིས་ཀྱང་མཛའ་མོས་ཡང་དག་པར་སྨྲས་སོ་ཞེས་བྱ་བ་སྨྲས་ནས་སྲོད་ཀྱི་དུས་སུ་རྒན་མོ་དེ་དང་ལྷན་ཅིག་རིག་པ་འཛིན་པའི་སྐྱེད་མོས་ཚལ་དུ་

Vol. 169 · folio 138a

ཞུགས་ནས་མཚན་མོ་འདས་པར་གྱུར་ཏོ། །དེ་ནས་ཡིད་འཕྲོག་མས་ཐོ་རངས་ཀྱི་དུས་ལ་གོས་དཀར་པོ་འཆང་ཞིང་ཉེ་གནས་མ་རྣམས་ཀྱིས་དྲི་དང་མེ་ཏོག་གི་ཕྲེང་བ་འཛིན་པས་སྐྱེད་མོས་ཚལ་དེ་དང་དེར་ཉེ་བར་འོངས་ཏེ། ཉེ་གནས་མ་དེ་རྣམས་ལ་སྨྲས་པ། སྨྱུང་བ་དང་བཅས་ཁྲུས་

བྱས་གཙང་། །མི་མོ་འབད་པ་ཆེན་པོ་ཡིས། །འདོད་པའི་ལྷ་ལ་བརྟེན་བྱས་ཏེ། །དེ་བས་གཅིག་པུ་མཆོད་པར་མཛོད། །སྐྱེད་ཚལ་འདི་ཡི་ཕྱི་རོལ་དུ། །མཆོད་གསུམ་མེ་ཏོག་མཚོན་ཆ་ལས། །ཁྱེད་ཅག་རྣམ་པར་ལོག་མཛོད་ཅིག །བདག་ནི་གཅིག་པུ་ཉིད་ཞུགས་བགྱི། །དེ་ནས་ཉེ་གནས་མ་རྣམས་

ཀྱིས་ཉེ་བར་འོངས་པའི་དྲི་དང་མེ་ཏོག་གི་ཕྲེང་བ་ལ་སོགས་པ་བཟུང་ནས་སྐྱེད་མོས་ཚལ་དུ་ཞུགས་ཏེ། རབ་ཏུ་དགའ་བའི་དགོད་པས་རྣམ་པར་ཁ་བྱེ་བའི་སོའི་ནོར་བུའི་འོད་ཟེར་རྣམས་ཀྱིས་བཞིན་ཀུན་ནས་སྣང་བར་བྱེད་པའི་ཡིད་འཕྲོག་མས་ནོར་བཟངས་ལ་དྲི་ཞིམ་པོའི་ཁ་དོག་གིས་བྱུགས་པར་གྱུར་ཏོ། །དེ་ནས་བྱང་

ཆུབ་སེམས་དཔས་དགོད་ཅིང་སྨྲས་པ། མཛེས་མ་ཡན་ལག་མེད་པའི་མཆོད་པ་ལ་ཉེ་བར་འཁོར་བའི་བྱུག་པ་འདི་བདག་ཅག་གི་ཡན་ལག་ལ་ཅིའི་ཕྱིར་སྦྱོར་བར་བྱེད། འོ་ན་འདོད་པའི་མཆོད་པ་མཛོད་ཅིག་ཟེར་རོ། །ཡིད་འཕྲོག་མས་དགོད་ཅིང་སྨྲས་པ། ཁྱོད་ཀྱི་ཚིག་རྣམས་ཉིད་ནི་མེ་ཏོག་མདའ་རྣམས་དྲི་ཞིམ་པ། །

གཟུགས་ནི་ཆུ་སྲིན་རྒྱལ་མཚན་འདི་ནི་གཞུ་ནི་འཛིན་བྱེད་པ། །དེ་བས་ཁྱེད་ཉིད་བདག་གི་སླད་དུ་མེ་ཏོག་རྒྱལ་མཚན་ཏེ། །མྱོས་བྱེད་དབང་ཕྱུག་ཁྲོས་པས་སྲེག་པ་སུ་ཞིག་དད་པར་བྱེད། །དེ་ནས་ཕན་ཚུན་འདི་ལྟར་དགོད་པའི་གཏམ་གྱིས་ཀུན་ནས་རྗེས་སུ་ཆགས་པ་འཕེལ་བ་དེ་དག་ལ་དེར་གནས་པར་བྱེད་པ་ལ་བཙུན་མོའི་

འཁོར་དང་ནང་འཁོར་དང་བཅས་པའི་མི་འམ་ཅིའི་བདག་པོ་སྐྱེད་མོས་ཚལ་དེར་འོངས་པར་གྱུར་ཏོ། །དེ་ནས་ཡབ་འོངས་པར་ཤེས་ནས་ལངས་ཏེ། ཡིད་འཕྲོག་མ་འཇིགས་པ་དང་བཅས་པས་ནོར་བཟངས་ལ་སྨྲས་པ། འཕགས་པའི་སྲས་ལགས་བདག་གི་བླ་མའི་སྐྱེ་བོ་ཀུན་ནས་འོངས་པ་སྟེ། །དེ་བས་ན་མྱུར་དུ་ལྗོན་ཤིང་

གི་ཁྱིམ་འདིར་ཞུགས་པར་འོས་སོ་ཞེས་ཟེར་རོ། །དེ་ནས་ནོར་བཟངས་ཀྱིས་མྱུར་དུ་ལངས་ཏེ་འཇིགས་ཤིང་གོམ་པ་བཀོད་པས་སོང་སྟེ། ལྗོན་ཤིང་གི་ཁང་པར་ཞུགས་པར་གྱུར་ཏོ། །དེ་ནས་ཡིད་འཕྲོག་མ་ཉེ་བར་འོངས་ཏེ་མས་དྲིས་པར་གྱུར་པ། །བུ་མོ་བར་ཆད་མེད་པར་ཁྱོད་ཀྱིས་མྱོས་བྱེད་ཀྱི་མཆོད་པས་རྫོགས་པར་

Vol. 169 · folio 138b

བྱས་སམ་ཞེས་ཟེར་རོ། །ཡིད་འཕྲོག་མས་སྨྲས་པ། བདག་ནི་མཆོད་པ་མྱོས་བྱེད་པ་ཡི་ཕྱིར་མ་ལགས། །ནུས་པས་སྐྱེད་མོས་ཚལ་འདིར་མངོན་བརྩམས་པ། །ཡིད་བྱུང་གནས་འདི་སྐད་ཅིག་མ་ནི་དེ་ཉིད་ལ། །ཡབ་ཀྱི་སྐྱེ་བོས་བར་ཆད་མེད་པར་དགག་པར་བྱས། མས་སྨྲས་པ། བདག་གི་བུ་མོ་ནི་

སེམས་མཉམ་པར་བཞག་པ་མྱོས་བྱེད་ཀྱི་མཆོད་པ་རྫོགས་པར་གྱིས་ཤིག་དང་། བདག་ནི་ནང་འཁོར་འདིར་འོངས་པར་གྱུར་པ་ཟློག་པར་འགྱུར་ཞེས་ཟེར་རོ། །ཡིད་འཕྲོག་མས་ཀྱང་མེ་ཏོག་མཚོན་ཆ་ལ་མཆོད་པ་བྱས་ཏེ། དེ་ལྟར་བགྱི་ཞེས་འདི་ལྟར་བསམ་ཞིང་གནས་སོ། །བདག་གིས་ནི་དུས་ཇི་ཙམ་ཉིད་

དུ་འཕགས་པའི་སྲས་སྦ་བར་བྱ་བར་ནུས་ཏེ། དེ་བས་ན་མ་ལ་སྨྲ་བར་བྱའོ་ཞེས་རྣམ་པར་བསམས་ནས་སྨྲས་པ། གལ་ཏེ་མ་ཡི་མག་པ་འདི། །ཇི་ལྟར་ཡང་ནི་འདིར་འོངས་འགྱུར། །ཁྱོད་ཀྱི་སེམས་ནི་དགའ་འགྱུར་ཏེ། །ཡབ་ནི་གཅིག་ཏུ་ཁྲོས་པར་འགྱུར། །མས་སྨྲས་པ། བུ་མོ་གལ་ཏེ་མག་པ་དེ། །

བདག་གི་འདིར་ནི་འོངས་གྱུར་ན། །ཁྱེད་ཀྱི་ཡབ་ནི་དང་བྱས་ནས། །བདག་ནི་ཤིན་ཏུ་དགའ་བར་འགྱུར། །ཡིད་འཕྲོག་མས་སྨྲས་པ། གལ་ཏེ་དེ་ལྟར་ཡིན་ན་དེ་བས་ན། །མ་ལ་མག་པ་བསྟན་པར་འགྱུར། །ཞེས་སྨྲས་ནས། རྒན་པོ་དེ་ལ་སྨྲས་པ། སོང་ལ་ལྗོན་ཤིང་གི་ཁྱིམ་འདི་ན་གནས་པའི་

འཕགས་པའི་སྲས་ལ་སྨྲ་བར་གྱིས་ཤིག་དང་། དེ་ནས་བྱུང་སྟེ་མ་ལ་གསོང་པོར་སྨྲ་བར་གྱིས་ཤིག་ཅེས་ཟེར་རོ། །དེས་ཀྱང་དེ་ལྟར་བགྱི་ཞེས་བྱ་བས་སོ་སོར་མཉན་ཏེ། ལྗོན་ཤིང་གི་ཁྱིམ་ན་གནས་པའི་ནོར་བཟངས་ལ་ལོ་རྒྱུས་དེ་སྨྲས་པར་གྱུར་ཏོ། །དེ་ནས་ནོར་བཟངས་ལྗོན་ཤིང་གི་ཁྱིམ་དེ་ལས་བྱུང་བར་

གྱུར་ཏོ། །ཡིད་འཕྲོག་མས་སྨྲས་པ། མས་མག་པ་མཐོང་བར་འོས་སོ་ཞེས་ཟེར་རོ། །མས་སྨྲས་པ། གཞོན་ནུ་རིག་པ་འཛིན་པ་འདི། །ལྗོན་ཤིང་ཁྱིམ་ནས་འོངས་པ་ནི། །གང་དུ་ཡང་ནི་མག་པ་དེ། །བདག་འཇིགས་རྗེས་སུ་འགྲོ་འགྱུར་རམ། །དེ་ནས་ཡིད་འཕྲོག་མས་དགོད་ཅིང་སྨྲས་

པ། འོ་ན་མའི་མག་པ་འདི་ཉིད་ཡིན་ཞེས་ཟེར་རོ། །མས་སྨྲས་པ། གལ་ཏེ་དེ་ལྟར་ཡིན་ན། །བདག་གི་བུ་མོ་ཁྱོད་མྱ་ངན་བྱ་བ་མ་ཡིན་ཏེ། དེ་ནས་ནོར་བཟངས་ཀྱིས་ཀུན་ནས་ཉེ་བར་འོངས་ཏེ། ཡིད་འཕྲོག་མའི་མ་ལ་མངོན་པར་ཕྱག་བཙལ་བར་གྱུར་ཏོ། །དེས་ཀྱང་བྱང་ཆུབ་སེམས་དཔའི་སྤྱི་བོར་

Vol. 169 · folio 139a

སྣོམ་ཞིང་འདི་ལྟར་ཤིས་པར་བརྗོད་པ་རབ་ཏུ་སྦྱར་གྱུར་ཏེ། ད་ནི་བདག་གི་བུ་མོ་དང་། །རིགས་ནི་རྣམ་གྲངས་ཁྱོད་དང་ནི། །གང་གཱ་རྒྱ་མཚོ་དག་ལྟར་ནི། །ནམ་ཡང་རྣམ་ཆད་མ་གྱུར་ཅིག །ད་ནི་དེ་བས་ན་བུ་མོ་ཁྱོད་ཀྱི་ཡབ་ལ་ལོ་རྒྱུས་འདི་བདག་གིས་སྨྲ་བར་བགྱི་ཞེས་བྱ་བ་མངོན་

པར་སྨྲས་ཏེ། ལྗོན་པའི་དྲུང་དུ་མངོན་པར་སོང་སྟེ་སྐབས་དང་མངོན་དུ་འགྲོ་བར་འདི་སྐད་ཅེས་སྨྲས་པ། འཕགས་པའི་སྲས་ལགས། གལ་ཏེ་ཇི་ལྟར་ཡང་ཡིད་འཕྲོག་མའི་བདག་པོ་འོངས་པར་གྱུར་ནས་འཕགས་པའི་སྲས་ཀྱིས་སླར་ཅི་ཞིག་བྱེད་པར་འགྱུར་ཞེས་ཟེར་རོ། །དེ་ནས་ལྗོན་པས་སྨིན་མ་

བསྐྱོད་པས་གསལ་བར་བྱས་པའི་ཁྲོ་བ་དང་ལྡན་པས་སྨྲས་པ། རིགས་མིན་ལམ་ལ་གནས་པ་དེ། །གལ་ཏེ་བདག་གིས་མཐོང་གྱུར་ན། །ཁྲག་ནི་རབ་ཏུ་འཛིན་ལྡན་པ། །མཚོན་ཆས་གཅོད་དེ་ཕྱོགས་རྣམས་དོར། །ཡིད་འཕྲོག་མའི་མས་སྨྲས་པ། ཕན་པར་བྱེད་པ་དེའི་སྟེང་དུ་མི་མཐུན་པ་སེམས་

པར་བྱེད་པ་ནི་རིགས་པ་མ་ཡིན་ནོ། །ལྗོན་པས་སྨྲས་པ། འོ་ན་འདི་ལྟར་ཕན་པར་བྱེད་པ་ཞེས་བྱ་བར་སྨྲོས་ཤིག་དང་། དེས་སྨྲས་པ། ཡིད་འཕྲོག་མ་འོངས་པ་ཙམ་གྱིས་བདག་ལ་སྨྲས་པ་དེ། ཅི་ལྟར་ཞེ་ན། རྔོན་པ་དྲག་པོ་ལས་བླངས་ཏེ། །རྒྱལ་པོའི་སྲས་དེའི་ཁྱིམ་དུ་ནི། །བདག་བཅུག་ནས་

ནི་དེ་དང་དེའི། །ལོངས་སྤྱོད་རྣམས་ཀྱིས་ཡང་དག་བསྟེན། །ལྗོན་པས་སྨྲས་པ། གལ་ཏེ་དེ་ལྟར་བདག་ཅག་ལ་དེ་བདེན་པར་ཕན་པར་བྱེད་པ་ཞེས་ཟེར་རོ། །དེ་ནས་དེས་ལྗོན་པ་ཁྲོ་བ་རྣམ་པར་ཟློག་པ་ཤེས་ནས་སླར་སྨྲས་པ། གལ་ཏེ་ཁྱེད་ནི་དང་བ་ཡིན་ན་དེ་བས་ན་བདག་འཕགས་པའི་སྲས་ལ་

བདེན་པར་སྨྲ་བ་སྟེ། ཁྱོད་ཀྱི་མག་པ་དེ་འོངས་པ་ཁོ་ན་ཞེས་ཟེར་རོ། །གཞན་ཡང་། འདི་ནི་མིང་ཙམ་མ་ཡིན་ཏེ། །ས་བདག་སྲས་ནི་བདག་གི་སླད། །གང་གིས་བགྲོད་དཀའ་འདི་ལྟར་ལམ། །བདག་གི་བུ་མོའི་ཕྱིར་ནི་བསྙེགས། །ལྗོན་པས་སྨྲས་པ། གལ་ཏེ་འདི་ལྟར་བདག་ཅག་ལ་དེ་

བདེན་པ་ཡིན་ན་དེ་བས་ན་བདག་གིས་མག་པ་དེ་མཐོང་བར་འདོད་པ་སྟེ། དེ་ནས་དེ་ནོར་བཟངས་ཉེ་བར་འོངས་པའི་ཕྱིར་སྒོ་སྲུངས་མ་བཏང་བར་གྱུར་ཏོ། །སྒོ་སྲུངས་མས་ཀྱང་སོང་སྟེ་བྱང་ཆུབ་སེམས་དཔའ་ལ་སྨྲས་པ། མིའམ་ཅིའི་བདག་པོ་ནི་ཚེ་དང་ལྡན་པ་མཐོང་བར་འདོད་དོ་ཞེས་ཟེར་རོ། །དེ་ནས་

Vol. 169 · folio 139b

ནོར་བཟངས་ཀུན་ནས་ཉེ་བར་འོངས་ཏེ། ལྗོན་པ་ལ་གསོང་པོར་བྱས་མངོན་པར་ཕྱག་འཚལ་བར་གྱུར་ཏོ། །དེ་ནས་མིའམ་ཅིའི་བདག་པོ་ཁྲོ་བའི་ལྷག་མ་ཅུང་ཟད་དང་ལྡན་པས་ཤེས་པར་བརྗོད་པ་བྱིན་ཏེ། ཆུ་བོའི་འགྲམ་དུ་ཁྲིད་ནས་བྱང་ཆུབ་སེམས་དཔའ་ལ་སྨྲས་པ། གཞོན་ནུ་ཆུ་བོའི་འགྲམ་གྱི་

ས་ལ་སྐྱེས་པར་གྱུར་པ་ནི། །དཔག་ཚད་བསྒྲིབས་པའི་མདའ་རྣམས་ཀྱིས་ནི་ནགས་འདི་ཕྱུང་བྱས་ནས། །གལ་ཏེ་ཉིན་རེར་དེ་ཉིད་དུ་ནི་བདག་ལ་ཕྲད་བྱེད་ན། །ཁྱོད་ལ་བུ་མོ་དང་ནི་ནོར་ཡང་དེ་དང་དེ་སྦྱིན་བྱ། །བྱང་ཆུབ་སེམས་དཔས་ཀྱང་དེ་ལྟར་བགྱི་ཞེས་མཉན་ནས་ཏོག་རྩེ་བླངས་ནས་ལྕགས་ངར་གྱིས་

འབིགས་པར་བྱེད་པའི་མདའ་རྣམས་ཀྱིས་ནི་ནགས་དེ་རྩ་བ་ནས་གདོན་པར་བྱ་བའི་ཕྱིར་དུ་བརྩམས་ཏེ། ལྗོན་པ་ཡང་རང་གི་ཕོ་བྲང་དུ་སོང་བར་གྱུར་ཏོ། །དེ་ནས་ཡིད་འཕྲོག་མ་ཡིད་མི་བདེ་བས་འདི་ལྟར་བསམས་ཏེ། མདའ་རྣམས་ཀྱིས་ནི་ནགས་མཐུག་པ། །བདག་གི་དགའ་བོ་གཅིག་པུ་ཉིད། །འཇམ་

པའི་ལག་པ་དག་གིས་ནི། །ཇི་ལྟར་རྩ་བ་ནས་འདོན་འགྱུར། །དེ་ནས་ལྷ་རྣམས་ཀྱི་བདག་པོས་ནོར་བཟངས་མདའ་རྣམས་རྩ་བ་ནས་འདོན་པར་བྱེད་པ་མཐོང་ནས་བྱང་ཆུབ་སེམས་དཔའ་འདིས་མདའ་རྣམས་རྩ་བ་ནས་བཏོན་པ་ཉི་མ་གཅིག་གིས་ནུས་པར་འགྱུར་བ་མ་ཡིན་ནོ་སྙམ་དུ་རྣམ་པར་བསམས་

ཏེ། གནོད་སྦྱིན་གཞོན་ནུ་རྣམས་བོས་ནས་བྱང་ཆུབ་སེམས་དཔའ་འདི་གཅིག་པུ་ཉིད་མདའ་རྣམས་འདོན་ནུས་པ་མ་ཡིན་ཞེས་སྨྲས་པ། དེ་ནས་ད་ལྟར་ནི། མཆེ་བ་འཁྱོག་ཅིང་སྤྲིན་ནི་སར་པ་ལྟར་ནི་ནག །ཕག་གི་གཟུགས་ཅན་གློ་བུར་དུ་ནི་བྱས་ནས་ཀྱང་། །ཇི་སྲིད་ཉི་མ་ནུབ་པར་མ་གྱུར་དེ་སྲིད་དུ། །སྐད་

ཅིག་གིས་ནི་མདའ་རྣམས་ཀུན་ནས་གདོན་པར་གྱིས། །དེ་ནས་གནོད་སྦྱིན་གཞོན་ནུ་དེ་རྣམས་ཀྱིས་དེ་ལྟར་བགྱི་ཞེས་བྱ་བས་ལྷའི་དབང་པོ་ལ་མངོན་པར་ཕྱག་འཚལ་ནས། མི་འམ་ཅིའི་བདག་པོའི་གྲོང་ཁྱེར་དུ་འོངས་ཏེ་ཕག་གི་གཟུགས་སུ་མངོན་པར་སྤྲུལ་ཅིང་མདའི་ནགས་དེ་ཐམས་ཅད་རྩ་བ་

ནས་འདོན་པར་བྱེད་ཅིང་གནས་ཏེ། བདག་ཉིད་ཆེན་པོ་འཇིག་རྟེན་ཕན་རྗེས་འཇུག་རྣམས་ལ། །སྐྱེ་བ་དུ་མར་ཉེ་བར་བསགས་པའི་ལས་དང་ནི། །ཟུག་རྔུར་གྱུར་པའི་དགེ་བས་ཀྱང་ནི་བསྐུལ་བ་ཡི། །ལྷ་ཡི་སྐྱེ་བོ་ཡང་ནི་གྲོགས་ཉིད་འགྱུར། །དེ་ནས་གནོད་སྦྱིན་ཕག་གི་གཟུགས་ཅན་དེ་རྣམས་

Vol. 169 · folio 140a

སོང་བ་དང་བྱང་ཆུབ་སེམས་དཔའ་ཡང་འོངས་ཏེ། ལྗོན་པ་ལ་མདའ་རྣམས་ཀྱི་ནགས་བདག་གིས་རྩ་བ་ནས་བཏོན་ཏེ་ཞེས་བྱ་བ་སྨྲས་པར་གྱུར་ཏོ། །དེ་ནས་ལྗོན་པས་རང་ཉིད་མངོན་སུམ་དུ་བྱས་ཏེ། གཞོན་ནུ་འདི་ནི་སྟོབས་དང་ལྡན་ནོ། །ཞེས་བྱ་བ་སྨྲ་ཞིང་། སླར་ཡང་

རྣམ་པར་བསམས་ཏེ་བྱང་ཆུབ་སེམས་དཔའ་ལ་བཀས་གནང་བར་གྱུར་ཏེ། མདེའུ་དང་བཅས་མདའ་རྣམས་འདི། །ཆུ་བོའི་ཕ་རོལ་པར་དོར་ནས། །ཏིལ་གྱི་བྲེ་ཆེན་འདི་བཏབ་སྟེ། །དེ་སྲིད་སླར་ཡང་འོང་བར་མཛོད། །དེ་ནས་བྱང་ཆུབ་སེམས་དཔས་ཐོས་ཏེ་ཆུ་བོ་དེའི་ཕ་རོལ་དུ་མདའ་རྣམས་དོར་བར་

བྱ་བའི་ཕྱིར་བརྩམས་སོ། །སླར་ཡང་ལྷའི་བདག་པོའི་མཐུས་ཤིན་ཏུ་སྟོབས་དང་ལྡན་པའི་རླུང་གིས་མདའ་རྣམས་དེ་གློ་བུར་ཉིད་དུ་ཆུའི་ཕ་རོལ་དུ་ཁྱེར་བར་གྱུར་ཏོ། །དེ་ནས་བྱང་ཆུབ་སེམས་དཔས་ཞིང་དེ་ལ་ཏིལ་རྣམས་རབ་ཏུ་གཏོར་ཏེ་སླར་ཡང་བཏུ་བའི་ཕྱིར་བརྩམས་པར་གྱུར་ཏོ། །དེ་ནས་

བརྒྱ་བྱིན་ལྷའི་བདག་པོས་སླར་གནོད་སྦྱིན་གྱི་གཞོན་ནུ་དེ་རྣམས་ཏིལ་རྣམས་བསྡུ་བའི་ཕྱིར་གྲོག་མའི་གཟུགས་ཀྱིས་བཏང་བར་བྱས་སོ། །དེ་རྣམས་ཀྱིས་ཀྱང་ཏིལ་དེ་རྣམས་བཏུས་ཏེ་བྲེ་བོ་ཆེ་འགེངས་ཤིང་གནས་པར་གྱུར་ཏོ། །དེ་ནས་བྱང་ཆུབ་སེམས་དཔས་ཏིལ་རྣམས་ཀྱི་བྲེ་བོ་ཆེ་དེ་བཟུང་ནས་

ཉི་མ་དེ་ཉིད་ལ་ལྗོན་པ་ལ་སྟོན་ཞིང་གནས་སོ། །དེ་ནས་མི་འམ་ཅིའི་བདག་པོ་དེས་ཨེ་མའོ་ངོ་མཚར་ཆེའོ་སྙམ་དུ་རྣམ་པར་བསམས་ནས་སླར་ཡང་སྨྲས་པ། བདག་གི་གཞོན་ནུ་འདི་ཐ་མལ་པའི་སྐྱེས་པའི་ལས་ལ་ངེས་པར་སྦྱར་བའི་ཕྱིར་རིགས་པ་མ་ཡིན་ཞེས་ཟེར་ཏེ། བདག་གི་སྲས་རྣམས་

འདི་དང་ལྷན་ཅིག་ཏ་ལ་བདུན། །ལྕགས་ཀྱི་རང་བཞིན་ཕག་མོ་བདུན་པོ་རྣམས་ཀྱང་ནི། །ལྕགས་ཀྱི་རང་བཞིན་གལ་ཏེ་མདས་ནི་ཕིགས་གྱུར་ན། །དེ་ནས་ཡིད་འཕྲོག་མ་ནི་ཁྱོད་ལ་རབ་ཏུ་སྦྱིན། །དེ་ལྟར་བགྱི་ཞེས་བྱ་བ་ཡང་བྱང་ཆུབ་སེམས་དཔས་སོ་སོར་ཐོབ་པར་ཏ་ལ་བདུན་དང་ཕག་མོ་བདུན་ཡང་གྲོང་ཁྱེར་ལས་

ཕྱི་རོལ་དུ་མི་འམ་ཅིའི་རྒྱལ་པོས་བཙུགས་ཤིང་གནས་སོ། །དེ་ནས་བྱང་ཆུབ་སེམས་དཔའ་དང་ལྷན་ཅིག་ཏུ་མིའམ་ཅིའི་གཞོན་ནུ་ཐམས་ཅད་ལག་པ་ན་གཞུ་ཐོགས་པ་རྣམས་ཡབ་འཁོར་དང་བཅས་པ་རྗེས་སུ་འགྲོ་ཞིང་འབེན་གྱི་གནས་སུ་སོང་བར་གྱུར་ཏོ། །འཁོར་རྣམས་ཀྱིས་རྣམ་པར་བཤམས་

Vol. 169 · folio 140b

པའི་གདན་ལ་ཉེ་བར་གནས་པའི་ལྗོན་པ་ལ་སྔོན་རོལ་ཉིད་དུ། ལྕགས་ཀྱི་འབེན་རྣམས་ཐམས་ཅད་རྣོ་བའི་གདོང་ཅན་གྱིས། །སླར་ཡང་འཕགས་པའི་སྲས་ཀྱིས་འབིགས་པར་གྱུར་པ་ནི། །དེ་ལྟར་བསམ་ཞིང་མཆི་མ་དང་བཅས་མིག་ལྡན་པ། །ཡིད་འཕྲོག་མ་ནི་རྣམ་འཁྲུགས་ཉིད་དུ་

སོང་བར་གྱུར། །དེ་ནས་ལྗོན་པའི་བདག་སྐྱེས་དེ་རྣམས་ཀྱིས་ནི་དེར། །འདུས་པ་ཆེན་པོར་སྟོབས་ཀྱིས་ཤིན་ཏུ་ང་རྒྱལ་ཅན། །ལ་ལ་ཞིག་གིས་རྣོ་བའི་མདའ་ཡིས་ཏ་ལ་གཅིག །ཕིགས་པར་གྱུར་ཏེ་འགའ་ཞིག་གིས་ནི་ཏ་ལ་གཉིས། །དེ་ཙམ་གྱི་དཔུང་པའི་སྟོབས་དང་ལྡན་པ་ཉེ་བར་གནས་པའི་མི་འམ་ཅི་

གཞོན་ནུ་དེ་རྣམས་ལ། སྔོན་དུ་ཁུ་ཚུར་བརྟན་བྱས་ཏེ། །མི་གཡོའི་མིག་ཅན་མི་གཡོ་བར། །ནོར་བཟངས་གཞུ་ནི་བདུངས་བྱས་ནས། །རྣོ་བའི་མདའ་ནི་འཕངས་པར་གྱུར། །དེ་ནས་ལྕགས་ཀྱི་རང་བཞིན་ཏ་ལ་དེ་རྣམས་ཕུག་བྱས་ནས། །ལྕགས་ཀྱི་རང་བཞིན་ཕག་མོ་བདུན་པོ་དེ་རྣམས་

ཀྱང་། །ས་འོག་མཐོང་བ་དང་འདྲ་མདའ་ནི་འདོད་ལྡན་བྱས། །ལྟོང་ནི་ནུབ་ཅིང་རྩ་ལ་རབ་ཏུ་ཞུགས་པར་གྱུར། །དེ་ནས་གློ་བུར་ཉིད་དུ་ལེགས་སོ་ལེགས་སོ་ཞེས་བྱ་བ་ངོ་མཚར་བས་ཀུན་ནས་འཁོར་བའི་སོར་མོ་དང་ལྡན་པའི་མ་ལུས་པ་མི་འམ་ཅིའི་འཇིག་རྟེན་བྱང་ཆུབ་སེམས་དཔའ་ལ་མངོན་

དུ་ཕྱོགས་པ་བྱུང་བར་གྱུར་ཏེ། མི་འམ་ཅིའི་བདག་པོ་ཡང་མཆོག་ཏུ་ངོ་མཚར་སྐྱེས་པར་གྱུར་ཏོ། །འབེན་རྣམས་རྣོ་བའི་གདོང་ཅན་གྱིས་ནི་འབིགས་འགྱུར་བ། །བདག་ཉིད་ཆེན་པོ་སྟོབས་ཆེན་ལྡན་པ་དེ་ཡིས་ནི། །དགོད་པའི་འོད་ཀྱིས་སྣང་བར་བྱས་པའི་སོ་ཡི་ཕྲེང་། །ཡིད་འཕྲོག་མ་ཡི་

བཞིན་ནི་དེ་ལྟར་བླང་བར་འགྱུར། །དེ་ནས་མི་འམ་ཅིའི་བདག་པོས་ཕོ་བྲང་དུ་འོངས་ཏེ། སླར་ནོར་བཟངས་ལ་སྨྲས་པ། གཟུགས་དང་ལང་ཚོ་མཉམ་པར་རྣམ་པར་བརྒྱན་པ་རྣམས། །བདག་གི་བུ་མོའི་དབུས་སུ་འཇུག་པ་ཁྱོད་ཀྱིས་ནི། །གློ་བུར་དུ་ནི་ལྷན་ཅིག་ཆོས་སྤྱོད་རང་གིས་ནི། །གལ་

ཏེ་རིག་པར་གྱུར་ན་དེ་བས་དེ་སྦྱིན་བྱ། །དེ་ལྟར་བགྱི་ཞེས་བྱ་བ་སོ་སོར་མཉན་ནས། བྱང་ཆུབ་སེམས་དཔས་རང་གི་གནས་སུ་འོངས་ཏེ། མི་འམ་ཅི་མོ་འབངས་མོ་རྒན་མོ་དེ་ཡིད་འཕྲོག་མ་ལ་བཏང་བར་གྱུར་ཏེ། གལ་ཏེ་གཟུགས་དང་ལང་ཚོ་དང་། །ཆ་བྱད་དང་རྒྱན་མཉམ་པའི་སྲིང་མོ་རྣམས་ཀྱི་

Vol. 169 · folio 141a

དབུས་སུ་གནས་པའི་ཡིད་འཕྲོག་མ་ཁྱོད་ཀྱིས་ཤེས་པར་གྱུར་ན། དེ་ནས་བདག་གིས་དེ་ཁྱོད་ཀྱི་ཆུང་མ་ཉིད་དུ་སྦྱིན་པར་བྱ་ཞེས་ཟེར་རོ། །འདི་ཡང་ཤིན་ཏུ་དཀའ་བ་ཁྱོད་ཀྱི་ཕས་ཉེ་བར་བཀོད་པ་འདི་ལ་ཐབས་གང་ཡིན་པ་ཞེས་འདྲིའོ། །དེ་ནས་ཡིད་འཕྲོག་མས་

སྨྲས་པ། བདག་གི་སྲིང་མོ་ཀུན་གྱི་ནང་ནས་ནི། །གོས་ཀྱིས་བསྒྲིབས་པའི་རྐང་པ་རྐང་གདུབ་ཅན། །རྐང་གདུབ་གཉིས་པོ་རབ་ཏུ་གསལ་བ་ནི། །དེ་ཡི་དབུས་སུ་བདག་ནི་འབྱུང་བར་འགྱུར། །དེ་བས་ན་མཚན་མ་འདི་ལ་བལྟས་ནས་བདག་ནི་འཕགས་པའི་སྲས་ཀྱིས་སྲིང་མོ་རྣམས་ཀྱི་དབུས་ན་

གནས་པ་གཟུང་བར་བྱ་ཞེས་ཟེར་རོ། །འབངས་མོ་དེས་ཀྱང་བྱང་ཆུབ་སེམས་དཔའ་ལ་དེ་ལྟར་སྨྲ་བར་བྱའོ། །དེ་ནས་ནོར་བཟངས་ཡིད་དགའ་བ་མི་འམ་ཅིའི་བདག་པོས་ཡང་དག་པར་བོས་པ་དེ་དང་དེར་ཉེ་བར་འོངས་ཏེ། ལང་ཚོ་དང་གཟུགས་དང་། རྒྱན་མཉམ་པར་དེ་རྣམས་གློག་ལྟར་སྣང་བར་གྱུར་

པའི་མི་འམ་ཅི་མོ་རྣམས་མཐོང་བར་གྱུར་ཏོ། །དེ་ནས་ལྗོན་པས་གཞོན་ནུ་དེ་ལ་སྨྲས་པ། གང་ཞིག་ཁྱེད་ཀྱིས་མཛའ་མོ་དེ་ཟུང་ཅིག་ཅེས་ཟེར་ཏེ། དེ་ནས་རྐང་པ་གཉིས་ཀྱིས་གསལ་བར་བྱས་པ་དེས། །གསལ་ཞིང་འོད་དང་ལྡན་པའི་སྐྱོད་པའི་རྐང་གདུབ་ཀྱིས། །ས་ལ་རྣམ་པར་འབྲེལ་

པས་ལྟ་བའི་ཡིད་འཕྲོག་མ། །ངོ་ཚེའི་གདོང་ཅན་ལག་པའི་རྩེ་མོས་བཟུང་བར་གྱུར། །དེ་ནས་ལྗོན་པ་སྙིང་དགའ་བས་ནོར་བཟངས་ལ་སྨྲས་པ། ཚེ་དང་ལྡན་པས་བར་ཆད་མེད་པར་བདག་གི་བཀའ་རྣམས་ཐམས་ཅད་བསྒྲུབས་ཏེ། དེ་བས་ན་ཡིད་འཕྲོག་མ་འདི་ཁྱོད་ཀྱིས་ལྷན་ཅིག་ཆོས་སྤྱོད་མ་སོ་སོར་

བཟུང་བར་མཛོད་ཅིག །གཞན་ཡང་། གང་ཕྱིར་སྔོན་དུ་འཇམ་པའི་ལུས་ཅན་ཁྱོད་ནི་ངལ་བྱས་པ། །མངོན་པར་འོངས་པ་བརྩེ་བ་བྲལ་བ་བདག་གིས་དོན་མེད་ཁྱོད། །དེ་ནི་གཞོན་ནུ་དུལ་བའི་ངོ་བོ་བཟོད་པར་འོས་པ་སྟེ། །གང་ཞིག་བླ་མའི་སྐྱེ་བོ་མཁས་རྣམས་བཟོད་མིན་དེ་ནི་ཅི། །ནོར་བཟངས་ཀྱིས་

སྨྲས་པ། འོ་ན་བླ་མ་རྣམས་ཀྱིས་བཀའ་རབ་ཏུ་སྦྱིན་པས་བདག་ནི་རྗེས་སུ་འཛིན་པ་སྟེ། ལྕི་བའི་སེམས་ལྡན་བླ་མ་རྣམས། །གང་ཞིག་ཉིད་ནི་བྱ་བ་སྟེ། །བཀའ་ནི་རབ་སྦྱིན་མཁས་པ་ཉིད། །དེ་རྣམས་ལས་ནི་དེ་ཉིད་སྐྱེ། །དེ་ནས་ལྷའི་གཞོན་ནུ་ལྷའི་བུ་མོ་དང་ལྷན་ཅིག་པ་འདྲ་བར་མིའམ་ཅི་མོ་དེ་དང་ལྷན་ཅིག་ལྗོན་པའི་ཕོ་བྲང་དུ་

Vol. 169 · folio 141b

དུས་ཅུང་ཟད་ཅིག་གནས་ཏེ། བྱང་ཆུབ་སེམས་དཔས་མི་འམ་ཅིའི་བདག་པོ་ལ་སྨྲས་པ། ལྷ་ལགས་གལ་ཏེ་བཀའ་དྲིན་ཡོད་ན། དེ་ནས་ཡིད་འཕྲོག་མ་དང་ལྷན་ཅིག་ཏུ་ཡབ་ཀྱི་ཕོ་བྲང་དུ་འགྲོ་བར་བགྱིའོ་ཞེས་ཟེར་རོ། །དེ་ནས་ལྗོན་པས་ཅི་ལྟར་གཞོན་ནུ་འདོད་པ་དེ་ལྟར་བྱའོ་ཞེས་སྨྲས་ནས། བུ་མོ་

རྣམས་ལ་སྨྲས་པ། བུ་མོ་རྣམས་སོང་ལ་གྱོས་པོའི་རིགས་ལ་མངོན་པར་འཇུག་པའི་ཡིད་འཕྲོག་མ་བརྒྱན་པར་མཛོད་ཅིག་ཅེས་ཟེར་རོ། །དེ་རྣམས་ཀྱིས་ཀྱང་དེ་ལྟར་བགྱིའོ་ཞེས་བྱ་བ་སོ་སོར་མཉན་ནས། སྲིང་མོ་ཁྱོ་བོ་ཡོན་ཏན་མཐོང་དང་ལྷན་ཅིག་ཏུ། །གྱོས་པོའི་རིགས་ལ་ཁྱེད་ནི་དེ་རིང་འགྲོ་འགྱུར་ཏེ། །

སྲིང་མོ་དེ་ལྟར་མཆི་མ་དང་བཅས་མིག་རྣམས་ཀྱིས། །ཆོ་ག་བཞིན་དུ་མི་འམ་ཅི་མོ་དེ་བརྒྱན་གྱུར། །བདག་ཅག་གིས་ནི་བརྒྱན་བྱ་མིན། །རང་གི་མཛེས་པས་འདི་བརྒྱན་པ། །དེ་ལྟར་རྒྱན་རྣམས་འདི་ཡི་ནི། །ལུས་ལ་ངོ་ཚར་བཅས་ལྟར་གནས། །དེ་ནས་ཡིད་འཕྲོག་མ་རྒྱན་རྫོགས་པ། སྲིང་མོ་རྣམས་ཀྱིས་

རྗེས་སུ་འགྲོ་བར་གྱུར་པས་དུལ་བ་དང་བཅས་པས་ཉེ་བར་འོངས་ཏེ། ཡུན་རིང་ཕྱག་རྣམས་དཔག་མེད་བཞིན་གྱི་ཆུ་སྐྱེས་ཅན། །མཆི་མ་དང་བཅས་ཉེ་བར་སྐྱེ་བོས་རྣམ་བལྟས་པ། །ཕ་དང་མ་ཡིས་མཆི་མ་དང་བཅས་མིག་ལྡན་པ། །སྐད་ཅིག་རྐང་པ་མཆི་མའི་ཐིགས་པ་རྣམས་ཀྱིས་སྦངས། །ཁྱེད་ནི་མེད་

པར་བདག་ནི་བརྟེན་པ་མི་འཐོབ་སྟེ། །བུ་མོ་ནམ་ཞིག་ཚེ་ན་སླར་ཡང་འོངས་པར་འགྱུར། །དེ་ལྟར་རྗོད་པར་བྱེད་ཅིང་མས་ནི་ཡིད་འཕྲོག་མ། །སྐད་ཅིག་ཏུ་ནི་ཀུན་ནས་བརྟེན་ཏེ་ནུས་མིན་དུ། །དེ་ནས་མིའམ་ཅིའི་བདག་པོས་འབྱུང་བར་འགྱུར་བའི་བུ་མོ་དང་བྲལ་བས། སྡུག་བསྔལ་གྱིས་

ཁྱབ་པའི་བདག་ཉིད་ཇི་ལྟར་ཡང་བརྟན་པར་བྱས་ནས་ཡིད་འཕྲོག་མའི་མ་ལ་སྨྲས་པ། གསལ་བའི་ཉི་མའི་དཀྱིལ་འཁོར་འདི་ནི་མཁའ་ལ་ཆ་ནི་གསུམ་དུ་སོང་བ་ལ། །སེམས་རྣམས་སྦེད་ཅིང་སྐད་ཅིག་ལུས་ནི་འཛིན་པ་རྣམས་ལ་ཉི་མའི་དྲོད་ནི་བརྟེན་འགྱུར་ཏེ། །གཞོན་ནུ་འདི་ནི་ཁྱོད་ཀྱི་བུ་མོ་ཆུ་བྲལ་པད་མོ་

ལྟར་ནི་རྙིང་པར་འགྱུར་བ་སྟེ། །དེ་བས་སོང་ཤིག་སླར་ཡང་འོངས་འགྱུར་ཏེ། །མི་བརྟན་པ་ནི་ཡོངས་སུ་དོར་བར་མཛོད། །དེ་ནས་ནོར་བཟངས་ཀྱི་སྤྱི་བོའི་གཙུག་གི་ནོར་བུ་བཅིངས་ནས་ལྗོན་པས་སྨྲས་པ། ནོར་བུ་འདི་ཡི་མཐུ་ཡིས་ནི། །མཐུ་ནི་ཆེན་པོ་ཁྱོད་ལ་ཡང་། །ལྷ་ཡི་ལྟར་ནི་ཐོགས་མེད་པ། །

Vol. 169 · folio 142a

ནམ་མཁའ་ལས་ནི་འགྲོ་བར་འགྱུར། །དེ་བས་ད་ནི་ཡིད་འཕྲོག་མ་ལ་དམིགས་ནས་ནམ་མཁའི་དཀྱིལ་དུ་འབྱུང་སྟེ། ཚེ་དང་ལྡན་པ་ཉེ་བར་རྒྱས་པའི་ཡབ་ཀྱི་ཕོ་བྲང་དུ་འགྲོ་བར་མཛོད་ཅིག །བདག་གི་བུ་མོ་འདི་ལེགས་དང་། །དཔལ་ལྡན་རྣམས་ཀྱིས་ཁྱེད་མདུན་འགྲོ། །ཚིག་

དང་དོན་དག་ལྟར་ཁྱེད་ཅག །ཕན་ཚུན་བརྟེན་པ་འབྱུང་གྱུར་ཅིག །དེ་ནས་འཕྲོག་པའི་སེམས་ལྡན་བླ་མ་དག་བཏུད་ནས། །སྐད་ཅིག་ཏུ་ནི་མི་འམ་ཅི་མོའི་སྐྱེ་བོ་འཁྱུད་བྱས་ཏེ། །ཀུན་ནས་འཕྲོས་པའི་རྒྱན་དང་རིན་ཆེན་འོད་ལྡན་པ། །བཟའ་མི་གཉིས་ནི་མྱུར་དུ་ནམ་མཁའ་ལ་ནི་སོང་བར་གྱུར། །ཕྱིར་

ལྟའི་མིག་ཅན་མཆི་མའི་ཆ་ནི་གྲོལ་བཞིན་པ། །བདག་པོ་དང་ནི་ལྷན་ཅིག་ནམ་མཁའ་ལ་འཇུག་པ། །མི་འམ་ཅི་མོ་དེ་ལ་མཆི་མ་བྱུང་བའི་མས། །ཇི་སྲིད་མིག་ལས་འདས་པ་དེ་སྲིད་མཐོང་བར་འགྱུར། །དེ་ནས་ནོར་བཟངས་ཀྱིས་རང་གི་སྐྱེ་བོ་དང་བྲལ་བས་སྐྲག་པའི་ཡིད་འཕྲོག་མ་ལ་ཡང་ནས་ཡང་དུ་མཆི་མ་

རྣམས་ཕྱིས་ནས། རྔུལ་གྱི་ཆ་དང་བཅས་པ་དེ་ཡི་གདོང་ནི་དེས་མཐོང་ནས། །པདྨ་རྒྱས་པ་ཆུ་ཡི་ཐིགས་པས་རྗེས་སུ་འབྲེལ་པ་ལྟར། །ཉིན་པར་འགྲོ་ཞིང་ཉི་མའི་འོད་ཟེར་བཟློག་པའི་དོན་དུ་ནི། །ལག་པ་གཉིས་ནི་བཏེག་ནས་སྣམ་བུ་ཆེན་པོ་བརྐྱང་བར་གྱུར། །དེ་ནས་གློ་བུར་ཉིད་དུ་གླང་པོ་ཆེའི་གྲོང་ཁྱེར་དང་ཉེ་

བར་གྱུར་ཏོ། །སྲབ་ཅིང་ཡིད་འཕྲོག་ནོར་ཅན་མཛེས་པ་ལ་ནི་དམིགས་བྱས་ནས། །རླུང་གིས་ཅུང་ཟད་སྣམ་བུ་བསྐྱོད་པར་བྱས་པས་འགྲོ་བ་ནི། །རིག་པ་འཛིན་པ་འདི་ནི་ནམ་མཁའ་ལས་ནི་འོངས་སམ་ཅི། །ཞེས་ནི་གྲོང་ཁྱེར་སྐྱེ་བོ་མི་གཡོ་མིག་ཅན་གྱིས་མཐོང་གྱུར། །དེ་ནས་ནོར་བཟངས་ནམ་མཁའི་

དཀྱིལ་ནས་ཡང་དག་པར་བརྒལ་བ་མཐོང་སྟེ། ཡིད་དགའ་བའི་སྒོ་བ་རྣམས་ཀྱིས་རྒྱལ་པོ་ནོར་ཅན་ལ་ལྷ་ལགས། ཡིད་འཕྲོག་མ་དང་ལྷན་ཅིག་ཏུ་ནོར་བཟངས་འོངས་སོ་ཞེས་བྱ་བ་སྨྲ་ཞིང་གནས་པར་གྱུར་ཏོ། །དེ་ནས་རྒྱལ་པོ་དེས་བདེན་ནམ་འོན་ཏེ་མིན་སྙམ་ནས། མཛའ་བོ་རྣམས་ནི་སྡུག་བསྔལ་

གྱིས་དད་པར་བྱ་ཞེས་བྱ་བ་སྨྲས་ཏེ། སྟན་ལས་ལངས་ཏེ་མི་འམ་ཅི་མོ་དང་བཅས་པའི་ནོར་བཟངས་ཉིད་ཞུགས་པ་མཐོང་ནས། འདི་ནི་རྨི་ལམ་ཡིན་ནམ་འོན་ཏེ་ཅི་སྙམ་དུ་རབ་ཏུ་དགའ་བས་ཡང་ནས་ཡང་དུ་འཁྱུད་དེ། འདི་མའི་དྲུང་དུ་ཁྲིད་པར་གྱུར་ཏོ། །དེ་ནས་ཀུན་ནས་ལངས་ཏེ་བྲལ་བར་མི་ནུས་

Vol. 169 · folio 142b

པ། །རབ་ཏུ་དགའ་བའི་མཆི་མའི་ཆུ་ཡིས་མིག་འགགས་པ། །མས་ནི་ཡུན་རིང་པོ་ནས་བདག་སྐྱེས་དེ་མཐོང་སྟེ། །སྐད་ཅིག་ཀུན་ནས་འཁྱུད་དེ་སྤྱི་བོར་འོ་བྱས་གྱུར། །དེ་ནས་ཡིད་འཕྲོག་མས་བཙུན་མོ་ལ་མངོན་པར་ཕྱག་བཙལ་ནས་སྨྲས་པ། །བདེ་བའི་འཕགས་པའི་སྲས་ཀྱིས་ཀྱང་། །བདག་

གི་དོན་དུ་རྩོལ་བྱས་པ། །གང་ཞིག་སྡུག་བསྔལ་རྣམས་མྱོང་བ། །འཕགས་མས་བདག་གི་དེ་བཟོད་མཛོད། །བཙུན་མོས་སྨྲས་པ། བུ་མོ་ཁྱོད་ནི་བདག་གི་རིགས་ལ་བསྔགས་པར་བྱ་བ་སྟེ། ཅིའི་ཕྱིར་ཁྱོད་ཀྱི་སྟེང་དུ་བདག་ནི་ཁྲོ་བ་དང་ལྡན་པ་བྱུང་བར་གྱུར་པ་དེ་བས་ན་ལྟོས་ཤིག །

ལྟོ་འཕྱེ་ཆེན་པོའི་ནོར་བུ་ནི། །གྲིབ་མས་གསལ་བྱས་ས་འོག་གི། །རྒྱ་མཚོ་ལས་ནི་རྩོལ་མ་བྱས། །སུ་ཞིག་རིན་ཆེན་རྙེད་པར་འགྱུར། །དེ་ནས་དྲི་མ་མེད་པ་གྲགས་པའི་གཏེར་ནི་འོངས་པ་ཡིས། །བདག་ཉིད་ཆེན་པོ་ཐོས་ཆེན་གྲལ་ལ་གནས་པའི་སྲས་ལ་ནི། །ཡུན་རིང་གྲོང་ཁྱེར་ལྷ་ཡི་རྣམ་པར་

འབྱོར་པ་ལྟ་བུ་ཡིས། །དུས་མིན་ཟླ་འོད་མི་ཡི་བདག་པོས་བྱེད་དུ་བཅུག་པར་གྱུར། །རིགས་བཟངས་པ་དང་ཁྲོ་བ་ཕྲག་དོག་གི་གཏམ་ཐོས་པའི་རྒྱལ་པོ་ནོར་ཅན་གྱིས་གཉིས་སྐྱེས་འདི་བསད་པར་བྱ་བ་མ་ཡིན་སྙམ་དུ་དགོངས་ནས་རང་གི་ཡུལ་ནས་བཏོན་པར་གྱུར་ཏོ། །བཅོམ་ལྡན་འདས་ཀྱིས་སྐྱེས་རབས་

འདི་དགེ་སློང་རྣམས་གྱི་མདུན་དུ་འདི་ལྟར་བསྟན་པར་མཛད་དེ། བརྩོན་འགྲུས་སྟོབས་དང་ལྡན་པ་ནི། །ནོར་བཟངས་རྒྱལ་སྲས་བདག་ཡོད་འགྱུར། །གཟུགས་དང་སྐལ་བཟང་ལྡན་པ་ནི། །མི་འམ་ཅི་མོ་གྲགས་འཛིན་གྱུར། །དེ་ཡི་དོན་དུ་བདག་གིས་ནི། །སྔར་ནི་སྡུག་བསྔལ་དེ་དེ་ཐོབ། །

ཕལ་ཆེར་འདོད་པས་ཁེངས་བདག་ཉིད། །ཉོན་མོངས་རྣམས་ཀྱི་སྣོད་དུ་གྱུར། །དེ་ཕྱིར་ཡུལ་སྐྱེས་བདེ་བའི་ཆ་ནི་དང་པོར་རྟོགས་བྱས་ནས། །ཡིད་འཕྲོག་ཡུལ་འདོད་རྣམས་ཀྱི་ཡོངས་སུ་སྨིན་ལ་དགའ་བ་ནི། །བདག་ཉིད་འདོད་པ་རྣམས་ཀྱིས་རིང་པོར་འདི་རྣམས་ཡོངས་སྤངས་སྐད། །འདོད་

པ་རྣམས་ནི་སྐད་ཅིག་སྦྲུལ་ལྟར་ཡུན་རིང་སྤང་བར་མཛོད། །མི་འམ་ཅི་མོ་དང་ནོར་བཟངས་ཀྱི་སྐྱེས་པའི་རབས་ཏེ་སྐྱེས་རབས་ལྔ་པའོ།། །།བསམ་གཏན་གྱི་ནི་མར་མེ་སྣང་བ་ཡིས། །སྣང་བ་ཐོབ་ཀྱང་མྱ་ངན་འདས་མི་འགྲོ། །གང་ཕྱིར་བྱང་ཆུབ་ཐོབ་པར་འདོད་པའི་ཡིད། །དེ་ནི་

Vol. 169 · folio 143a

སེམས་ཅན་ཕན་རྗེས་འབྲེལ་ཕྱིར་རོ། །འདི་ལྟར་རྗེས་སུ་ཐོས་ཏེ། རིག་བྱེད་ཀྱི་དེ་ཁོ་ན་ཉིད་ཡང་དག་པར་རྟོགས་པ་དང་། སྣ་ཚོགས་པའི་བསྟན་བཅོས་རྣམས་ལ་གོམས་པས་སྲིད་པ་དང་བྲལ་བའི་བློ་མཁས་པ་དུ་མ་རྣམས་ཀྱི་མདུན་ས་རྣམས་ལ་གྲགས་པས་ཁྱབ་པ།

རང་གི་གྲུབ་མཐའི་བྱ་བ་རྣམས་ལ་རྩེ་གཅིག་པ། ཁྱིམ་གྱི་གནས་ལ་ལྷག་པར་གནས་ཤིང་དུས་གཅིག་གི་ཚེ་ན་བྱང་ཆུབ་སེམས་དཔའ་བྲམ་ཟེ་འབར་བ་ཅན་ཞེས་བྱ་བ་བྱུང་བར་གྱུར་ཏོ། །བདག་ཉིད་ཆེན་པོ་དེ་ཡང་ཁྱིམ་ན་གནས་པའི་སྐྱོན་ཤེས་པ་རབ་ཏུ་ཞི་བའི་བདེ་བ་མངོན་པར་འདོད་པ་ཡོ་བྱད་ཀྱིས་

ཡོངས་སུ་གང་བའི་ཁྱིམ་ན་ཡང་དགའ་བ་ཐོབ་པར་མ་གྱུར་ཅིང་དུས་གཅིག་གི་ཚེ་ན་འདི་ལྟར་བསམས་ཏེ། ཡོ་བྱད་ཡོད་ན་རྒྱགས་པ་སྐྱེ་འགྱུར་ཏེ། །དེ་ཡོད་ན་ནི་རབ་ཞི་ག་ལ་འགྱུར། །རབ་ཞི་མེད་ན་ངོ་ཚ་བྲལ་བ་ནི། །དྲི་མ་ཅན་གྱི་ལས་ནི་སྐྱེ་བོས་འདོད། །དགའ་མིན་ཡང་དག་སྦྱོར་བའི་སྡུག་བསྔལ་སྐད་ཅིག་ཙམ། །

སེམས་ཀྱི་བདེ་བ་སྐད་ཅིག་ཏུ་ནི་དགའ་བྲལ་དུས། །ནོར་ནི་རྙེད་པར་བྱ་ཕྱིར་ཡིད་ནི་ངལ་རྣམས་ཀྱི། །གལ་ཏེ་དེ་ཕྱིར་འདོད་པའི་སྡུག་བསྔལ་འབྲས་བུ་མེད། །དེ་ལྟར་ཁྱིམ་པ་རྣམས་ནི་རྟག་ཏུ་སེམས་འཁྲུགས་པའི། །རང་གི་སྐྱེ་བོས་མཉེས་གཤིན་ངེས་འབྲེལ་ཡིད་ལྡན་པ། །བདེ་བ་ཞེས་བྱ་འབྲས་

མེད་མངོན་པའི་ང་རྒྱལ་བརྟེན། །ཁྱིམ་པ་རྣམས་ལ་ཡིད་བདེ་ཅུང་ཟད་ཀྱང་ནི་མེད། །ཁྱིམ་ཞེས་བྱ་བ་དེ་ལྟར་དགའ་བ་སྤངས་ནས་ནི། །འཆིང་བ་བྱེད་པ་འདི་ནི་མྱུར་དུ་བདག་འདོད་པ། །དཀའ་ཐུབ་རྣམས་ནི་མངོན་པར་འཕེལ་ཕྱིར་ནགས་ནང་དུ། །དེ་བས་རབ་ཏུ་ཞི་བའི་གནས་ནི་བདག་གིས་བརྟེན། །

དེ་ལྟར་བདག་ཉིད་ཆེན་པོ་དེས་བསམས་ནས་ཁྱིམ་ན་གནས་པ་ཡོངས་སུ་དོར་ཏེ། ཆུ་གཡོ་བ་མེད་ཅིང་འབབ་པ་འགྲམ་གྱི་ཤིང་མེ་ཏོག་སྐྱེས་པ་རྣམས་ཀྱིས་ཉེ་བར་མཛེས་པ། བསྟན་བཅོས་རྣམས་ལ་གོམས་པས་དྲི་མ་དང་བྲལ་བའི་ཤེས་རབ་དང་འདྲ་བའི་ཆུ་བོས་བརྒྱན་པར་བྱས་པའི་ས་འཛིན་གྱི་

ཕྱོགས་གཅིག་ན། རི་དགས་ཀྱི་ཚོགས་དབུགས་འབྱུང་བའི་སོ་རྣམས་ཀྱིས་རྩྭ་སྔོན་པོ་གཅོད་པས་ཡིད་དགའ་བས་པདྨོའི་ནགས་ཀྱི་ཚོགས་ན་ངང་པ་དང་། ངང་སྐྱ་དང་། ངུར་པ་རྣམས་ཀྱིས་ཉེ་བར་མཛེས་པའི་རྣལ་འབྱོར་པ་རྣམས་ཀྱི་ཡིད་དང་རྗེས་སུ་མཐུན་པའི་ཤིན་ཏུ་ཆེ་བ་ནགས་ཀྱི་ནང་འགའ་ཞིག་

Vol. 169 · folio 143b

ན། ཁྲི་སྙན་ས་ལེའི་པགས་པས་བྲང་གི་མཐིལ་འདྲེས་པར་བྱས་པའི་གནས་ཀྱི་ཁྱད་པར་ཐོབ་པ། ཀུན་ནས་དགའ་བ་དང་འདྲ་བ་ཚངས་པའི་དཔལ་གྱིས་འཁྱུད་པར་བྱ་བའི་གཟུགས་ཅན་ཆོག་ཤེས་པ། གཟུགས་དང་ལྡན་པ་དང་འདྲ་བར་ཤིང་འགའ་ཞིག་ལ་བརྟེན་ནས་རྣལ་འབྱོར་དང་ཡིད་

འབྲེལ་པས་དཀའ་ཐུབ་བྱ་བའི་ཕྱིར་བརྩམས་ཏེ། བསམ་གཏན་ལ་ནི་རྩེ་གཅིག་ཡིད་ལྡན་དབང་པོས་རྣམ་རྒྱལ་བ། །ཆོག་ཤེས་རྙེད་པས་བདེ་བ་སྙིང་རྗེ་དང་ནི་ལྡན་པ་དང་། །རྒྱ་ཆེན་བློ་ལྡན་གཉིས་སྐྱེས་དེས་ནི་གང་ཞིག་བརྟེན་པ་ནི། །ཤིང་དེས་ཤིང་ཉིད་དོན་ནི་བྱས་པ་དགའ་བཞིན་འདོད་པར་

འགྱུར། །རྩྭ་ཡི་གདིང་བ་བཏིང་བྱས་ནས། །སྣ་ཡི་རྩེ་མོར་མིག་བརྟན་པས། །བསྒོམ་པ་རྣམས་ཀྱི་མཆོག་དེས་ནི། །བསྒོམ་བྱ་རྩེ་གཅིག་ཡིད་འཛིན་འགྱུར། །བརྩོན་འགྲུས་ཕ་རོལ་ཕྱིན་པའི་ལམ། །བཞོན་པ་ཉེར་བསགས་ངལ་བ་ནི། །བསམ་གཏན་ཕ་རོལ་ཕྱིན་བསྟན་པ། །དེ་

ནས་དེ་ནི་ངལ་སོས་གྱུར། །འདོད་པ་དགེ་བ་རྣམས་དང་ནི། །ཆོས་རྣམས་ལ་ནི་སོ་སོར་གནས། །རྟོག་བཅས་དཔྱོད་པ་དང་བཅས་པ། །རྣམ་དག་བདག་ཉིད་དབེན་པ་ལས། །དགའ་དང་བདེ་བ་མྱོང་བྱས་པ། །ཞི་བའི་བདུད་རྩི་མྱང་བྱས་ཏེ། །བསམ་གཏན་ལམ་ནི་ཐོབ་པའི་ཕྱིར། །བསམ་

གཏན་དང་པོ་དེས་ཐོབ་གྱུར། །རྟོག་མེད་དཔྱོད་པ་མེད་པ་དང་། །དེ་ནས་དཔྱོད་པ་ལ་མཁས་པ། །དེས་ནི་ནང་བདག་ཉིད་དང་བཅས། །བསམ་གཏན་གཉིས་པ་འཛིན་པར་འགྱུར། །རིམ་གྱིས་དགའ་བ་ལས་བྲལ་ཏེ། །དྲན་པ་དང་ལྡན་བཏང་སྙོམས་ལྡན། །བརྟན་པ་ལུས་བདེ་མྱོང་བ་ཅན། །

བསམ་གཏན་གསུམ་པ་དེས་ཐོབ་འགྱུར། །བཏང་སྙོམས་ཀྱིས་ནི་ཡོངས་དག་པ། །བདེ་སྡུག་དག་ནི་སྤངས་པའི་ཕྱིར། །དགའ་བས་འདོད་ཆགས་བྲལ་བའི་ཕྱིར། །དེ་ནས་བསམ་གཏན་བཞི་པ་བརྙེས། །དེ་ལྟར་འདི་ནི་བསམ་གཏན་བཞི་སྐྱེས་པར་བྱས་པ། གཟུགས་དང་ལྡན་པ་དང་འདྲ་

བའི་སྙིང་རྗེས་འཁྱུད་པ། ཉེ་བར་ཞི་བ་ལ་རྩེ་གཅིག་པས་དུད་འགྲོ་རྣམས་ལ་ཡང་གཉེན་དང་འདྲ་བར་ནགས་དེ་ན་དབུགས་འབྱུང་བའི་རྒྱུ་གནས་པར་གྱུར་ཏེ། རི་དགས་དང་ནི་ཕུག་རོན་རྨ་བྱ་རི་སྐེགས་རྣམས། །བསམ་བཟང་སྦྲུལ་དང་རི་དགས་རྣམས་ཀྱང་དེ་དང་དེ། །གནས་ནས་སློབ་མ་ལྟར་ནི་

Vol. 169 · folio 144a

ནགས་ཀྱི་ནང་དུ་ནི། །དེ་དང་ཉེ་བར་འོངས་ཏེ་རྣམ་པར་ངལ་བསོ་གྱུར། །དེ་ནས་དུས་གཅིག་གི་ཚེ་ན་བདག་ཉིད་ཆེན་པོ་དེས་སྐྱིལ་མོ་ཀྲུང་བཅས་པའི་དེའི་རྐང་པ་དང་ཉེ་བར་གནས་པའི་རི་དགས་ཕོ་མོ་གཉིས་ནི་བསམ་གཏན་གྱིས་གཡོ་བ་མེད་པའི་མིག་གིས་ཕུག་རོན་

མོ་མངལ་བཙའ་བ་དང་ཉེ་བར་རྩྭ་རྣམས་དང་རྩྭའི་དུམ་བུ་རྣམས་ཀྱང་མཆུས་བཟུང་ནས། རལ་པའི་ཚོགས་རྣམ་པར་བཅིངས་པའི་ཅོད་པན་གྱིས་མགོ་བོ་ལ་འདུག་ནས་ཅུང་ཟད་དམའ་བའི་ཚང་བརྩམ་པར་བྱས་ཏེ། དེར་སྒོ་ང་རྣམས་བཞག་ནས་རྩྭ་དང་ས་བོན་རྣམས་དང་འབྲས་བུ་རྣམས་ཟ་བར་འདོད་པས་

ནམ་མཁའ་ལ་སོང་སྟེ་ནགས་གཞན་རྣམས་ལ་གནས་ནས་ཡང་ནས་ཡང་དུ་འོངས་ཏེ། སྒོ་ང་དེ་རྣམས་གཟུང་ཞིང་རྣམ་པར་གནས་པར་གྱུར་ཏོ། །དེ་ནས་ཕུག་རོན་མོ་ནི་སྲབ་པའི་མཇུག་སྒྲོས་ཁྱབ། །དེ་ཡི་ཡན་ལག་ཀུན་ནས་བཙིར་བས་དྲོད་ནི་བསགས་པ་ཡི། །ཚང་ན་སྒོ་ང་དཀར་དང་དམར་བའི་ཡན་ལག་ཅན། །

ཕུག་རོན་ཕྲུག་པ་རྣམས་ནི་ཀུན་ནས་འབིགས་འབྱུང་འགྱུར། །དེ་ནས་ཕུག་རོན་མོ་ནི་ཕུག་པ་རྣམས་མཐོང་སྟེ། །ཡང་ཡང་ཟ་བར་འདོད་པས་མཆུའི་རྩེ་ཕྱི་བ་ནི། །རང་གི་བཀྲེས་ཆེན་མ་བསམས་པྲི་ཡང་ཀུ་ཏ་ནི། །མ་རྨོས་འཁྲུངས་པའི་འབྲས་བུ་རྣམས་ཀྱིས་དེ་རྒྱས་གྱུར། །ཕུག་རོན་དེ་རྣམས་

ལུས་ལས་སྐྱེས་པ་རབ་འབྱུང་བ། །མ་ནི་ས་བོན་འཛིན་པ་ལ་ནི་བལྟ་བྱས་ནས། །སྐད་ཅིག་རབ་གཡོ་རྩེ་མོའི་སྒྲོ་ཅན་གདོང་རྣམས་ནི། །རབ་ཏུ་ཕྱེ་ཞིང་གནས་གྱུར་སྐད་ནི་གདོན་བྱས་པ། །དེ་ནས་བསམ་གཏན་རྫོགས་པའི་དུས་ན་ཤིང་དང་འབྲས་དོན་དུ། །དབང་པོ་ཞི་བ་ཐུབ་པ་དེ་ནི་ནགས་ནས་

འགྲོ་འདོད་པ། །ཕུག་རོན་མོ་ནི་རྩྭ་དང་ཤིང་གི་འབྲས་བུ་འཛིན་མཐོང་ནས། །ཚད་དང་ལྡན་པའི་མགོ་ལ་འབྲེལ་བཞིན་པ་ནི་གནས་པར་གྱུར། །དེ་ནས་བྱང་ཆུབ་སེམས་དཔས་ངེས་པར་བདག་གི་རལ་པའི་ཚོགས་འདི་རྩྭ་དང་ཤིང་བུའི་དུམ་བུས་ཚང་རྣམ་པར་བརྩམས་པའི་ཕུག་རོན་མོ་འདི་

བཙས་པ་སྟེ། གལ་ཏེ་ཡང་བདག་གིས་ལངས་ནས་ཤིང་རྣམས་དང་སྡོང་བུ་དང་རྩ་བ་དང་། འབྲས་བུ་རྣམས་འོངས་པའི་ཕྱིར་འགྲོ་བར་གྱུར་ན་དེ་ནས་ངེས་པར་དཀའ་ཐུབ་མ་འདི་ནི་གནས་འདིར་འོངས་ཏེ། འདི་རྣམས་དམར་བའི་རྐན་དང་ལྡན་པ་གསལ་བྱས་པ། །དེ་རིང་ཕུག་རོན་ཕྲུ་གུ་མཐོང་

Vol. 169 · folio 144b

བར་མ་གྱུར་པ། །ཤིང་རྣམས་ལ་ནི་ཡང་ཡང་མྱ་ངན་གྱིས་གནས་ཏེ། །ནམ་མཁའ་ལ་ནི་འཕུར་ནས་ཀུན་ནས་འཁོར་བར་འགྱུར། །ཨེ་མ་སྐྱེ་བ་བརྒྱར་འཁོར་བའི། །བག་ཆགས་འདི་ནི་རྗེས་སུ་འཇུག །དུད་འགྲོ་རྣམས་ཀྱང་ཕྲུ་གུ་ལ། །གང་ཕྱིར་མཉེས་གཤིན་ཀུན་ནས་འཕེལ། །གལ་ཏེ་

བུ་རྣམས་མེད་གྱུར་ན། །གཉེན་རྣམས་གྲོགས་པོ་ཉིད་གང་དུ། །རང་ཉིད་ན་མེད་ལ་འགྱུར་ཏེ། །གཉེན་བཤེས་ས་བོན་མེད་གང་ལ། །མཉེས་གཤིན་མེད་པ་ལ་སེམས་ནི། །མི་བདེ་རྣམས་ནི་ཡོད་མི་འགྱུར། །ཡིད་མི་བདེ་མེད་ཆགས་བྲལ་བ། །ཞི་བ་ལྡན་པ་བདེ་བར་གནས། །བུ་

ཞེས་བྱ་བའི་སྡུག་བསྔལ་རྣམས། །ཉོན་མོངས་ཀྱིས་རྨོངས་སྐྱེ་བྱས་ནས། །རྨོངས་པའི་སྐྱེ་བོ་ལ་ཐོབ་སྟེ། །ཕྱི་ནས་འགྱོད་པས་གདུང་པ་ཅན། །བ་ལང་རེ་ལྡེ་མི་འདོད་ཀྱང་ནི་སྟོབས་ལྡན་པའི། །རེ་ལྡེ་ཅན་གྱིས་ཇི་ལྟར་ནན་གྱིས་སྦྱོར་བར་བྱེད། །སྐྱེ་བོ་བློ་ངན་འདི་ནི་དགེ་དང་མི་དགེ་བས། །

སྲིད་པའི་རྒྱ་མཚོ་ལ་ནི་ལས་ཀྱིས་བསྐུལ་བར་འགྱུར། །དེ་ཕྱིར་ཕུག་རོན་ཕྲུ་གུ་རྣམས་ནི་ཇི་སྲིད་སྒྲོ་སྐྱེས་པར། །མ་གྱུར་བདག་གི་རལ་པའི་ཚང་ན་གནས་པ་དེ་སྲིད་དུ། །བསམ་གཏན་བདུད་རྩིས་ཉེ་བར་བསགས་པའི་སེམས་དང་ལུས་དགའ་བ། །འདིར་ནི་གཡོ་མེད་གཟུགས་དང་ལྡན་པ་ཉིད་དུ་

གནས་པར་བགྱི། །དེ་ལྟར་བྱང་ཆུབ་སེམས་དཔས་རྣམ་པར་བསམས་ཏེ་ཕུག་རོན་གྱི་ཕྲུ་གུ་རྣམས་ལ་རྗེས་སུ་བརྩེ་བས་དཀྲིས་པ་ལ་རྣམ་པར་མ་བརྩིས་པར་ཡང་སྐྱིལ་མོ་ཀྲུང་བཅིངས་ནས་བསམ་གཏན་གྱི་བདེ་བས་བདག་ཉིད་ཚིམ་ཞིང་གནས་སོ། །ཕུག་རོན་ཕྲུ་གུ་སྒྲོ་རབ་ཏུ་འཕེལ་བ་དེ་རྣམས་མ་

དང་ལྷན་ཅིག་ནམ་མཁའ་ལ་འཕུར་ཞིང་སོང་བ་རྣམས་ལ། དེ་དང་ཉེ་བར་གནས་པའི་ལྷ་མོས་ཀུན་ནས་ཉེ་བར་འོངས་ཏེ། བྱང་ཆུབ་སེམས་དཔའ་ལ་བལྟས་ནས་ངོ་མཚར་བས་ཀུན་ནས་ལྷག་པར་གནས་པའི་བློ་དང་ལྡན་པས་ཨེ་མའོ་བདག་ཉིད་ཆེན་པོ་དྲང་སྲོང་འདི་སེམས་ཅན་རྣམས་ལ་རྗེས་སུ་བརྩེ་

བ་སྟེ། གང་གི་ཕྱིར་སྔར་བྱུང་བའི་བསམ་གཏན་ལས་ལངས་ཏེ་ཕུག་རོན་རྣམས་ཀུན་ནས་བསྲུང་བའི་ཕྱིར་སླར་ཡང་བསམ་གཏན་གྱིས་བདག་ཉིད་གཡོ་བ་མེད་པར་བྱས་ཤིང་ཡང་དག་པར་གནས་ཏེ། བདག་ཉིད་ཆེན་པོ་འདི་ཡང་ཕུག་རོན་འདི་རྣམས་སོང་བ་རྣམས་ལ་ཡང་ཚང་འདི་

Vol. 169 · folio 145a

མགོ་བོ་ལས་ཀུན་ནས་མེད་པར་འགྱུར་བ་མ་ཡིན་ཏེ། དེ་བས་ན་བདག་གི་རལ་པའི་ཅོད་པན་ན་རྣམ་པར་བསགས་པའི་ཕུག་རོན་གྱི་ཚང་འདི་བཤིག་པར་བྱའོ་སྙམ་དུ་རྣམ་པར་བསམས་ནས། འགའ་ཞིག་སྒོ་ངའི་དུམ་བུ་རྣམས་ཀྱིས་ནང་ཁྱབ་པ། །ཤིན་ཏུ་ཐོབ་

པ་མཆོག་གི་ཚང་དེ་དེ་ཡིས་ནི། །རིམ་གྱིས་རིམ་གྱིས་འདབ་མ་ལྟར་ནི་འཇམ་པ་ཡི། །ལག་པ་གཉིས་ཀྱིས་མགོ་བོ་ལས་ནི་ཉེར་ཁྱེར་གྱུར། །ལྷ་མོ་དེ་ཡང་སོང་བ་ལ་བྱང་ཆུབ་སེམས་དཔས་བསམ་གཏན་ལས་སེམས་བཟློག་སྟེ། མགོ་བོའི་ཡང་བ་ཉིད་ཤེས་ནས་འདི་ལྟར་བསམ་ཞིང་གནས་

ཏེ། སྒྲོ་རྣམས་རབ་ཏུ་རྫོགས་པ་ཕུག་རོན་ཕྲུ་གུ་རྣམས། །མ་དང་ལྷན་ཅིག་ནགས་ཀྱི་ནང་དུ་སོང་བ་ལ། །ངེས་པར་གུས་པ་རྩེ་གཅིག་པ་ནི་སུ་ཞིག་གིས། །དེ་ཡི་ཚང་ནི་བདག་གི་མགོ་ལས་ཉེར་ཁྱེར་གྱུར། །དེ་ལྟར་རྣམ་པར་བསམས་ནས་བདག་ཉིད་ཆེན་པོ་དེས་ལངས་ནས་ཤིང་དང་ཀུ་ཤ་དང་མེ་ཏོག་

དང་འབྲས་བུ་རྣམས་འོངས་ཏེ་ཁྲུས་བྱས་པ། འཕྲོ་བའི་འོད་ཟེར་འབྱུང་བའི་མེ་ལ་བསྲེག་བྱས་ཉིན་ཕྱེད་ན། །དྲི་དང་འབྲེལ་པའི་འདམ་དང་བྲལ་བའི་འབྲས་བུ་ཉེར་ཟོས་ཏེ། །སྣ་ཡི་རྩེ་མོར་གནས་པའི་མིག་ལྡན་ཤིང་གི་འོག་ཏུ་ནི། །སེམས་གཅིག་པ་ནི་སླར་ཡང་རྣལ་འབྱོར་བརྩམས་པར་གྱུར། །དེ་ལྟར་

བསམ་གཏན་གྱིས་དེ་ཁོ་ན་ཉིད་རྣམ་པར་མཐོང་བ་མྱ་ངན་ལས་འདས་པ་ཉེ་བར་འགྲོ་བའི་ཕྱིར་ནུས་ཀྱང་བཅོམ་ལྡན་འདས་དེ་བྱང་ཆུབ་སེམས་དཔར་གྱུར་པ་ན་འཇིག་རྟེན་རྣམས་ལ་ཕན་པའི་ཕྱིར་ཉེ་བར་འཚེ་བ་མང་བའི་འཁོར་བ་ལ་ཡང་ཀུན་ནས་འཁོར་བར་འགྱུར་སྙམ་དུ་རྣམ་པར་བསམས་ནས་

སངས་རྒྱས་བཅོམ་ལྡན་འདས་ལ་མཆོག་ཏུ་དང་བ་བསྐྱེད་པར་བྱ་ཞེས་བྱ་བའོ། །དྲང་སྲོང་འབར་བ་ཅན་གྱི་སྐྱེས་པའི་རབས་ཏེ་སྐྱེས་རབས་དྲུག་པའོ།། །།ཤེས་རབ་བམ་ནི་བརྩོན་འགྲུས་ལྡན་པས་ཀྱང་། །བསོད་ནམས་ཆེན་པོ་རྣམ་པར་དག་པ་འམ། །མཐོ་བའི་བློ་ལྡན་ཆེན་པོ་

རྣམས་ཀྱིས་ནི། །འདི་དག་ཐམས་ཅད་འཇིག་རྟེན་ཕན་ཕྱིར་རོ། །འདི་ལྟར་རྗེས་སུ་ཐོས་ཏེ། བསྟན་བཅོས་སྣ་ཚོགས་ལ་ཡོངས་སུ་འདྲིས་པ། དྲི་མ་དང་བྲལ་བའི་ཡིད་དང་ལྡན་པ། འཇིག་རྟེན་པ་ཐམས་ཅད་ཀྱི་གཉེན་དུ་གྱུར་པ། །དུལ་བ་གཟུགས་དང་ལྡན་པ་འདྲ་བར་གཞན་ལ་ཕན་པ་ལ་འབྲས་

Vol. 169 · folio 145b

བུ་རྩེ་གཅིག་པ། འདབ་ཆགས་ངལ་བ་རྣམས་ལ་ཤིང་ཆེན་པོ་འདྲ་བར་སྐྱེས་བུའི་ཡོན་ཏན་ཐམས་ཅད་ཀྱིས་བརྟེན་པ། སྙན་པར་སྨྲ་བ་ཉིད་ཀྱིས་འཇིག་རྟེན་པ་ཐམས་ཅད་ཀྱི་ཡིད་འཕྲོག་པ། ལེགས་པར་བཤད་པ་རྣམས་ལ་རྩོམ་པ་པོ་འཇིག་རྟེན་ན་མཁས་པ་གཙང་བ་བག་དང་ལྡན་པ་རྒྱལ་པོའི་

རིགས་ཀྱི་རྒྱལ་མཚན་དུ་གྱུར་པ་དེ་དུས་གཅིག་གི་ཚེ་ན། གྲོང་ཁྱེར་འགའ་ཞིག་ཏུ་བྱང་ཆུབ་སེམས་དཔའ་ཀེ་ཤ་པ་ཞེས་བྱ་བའི་མིང་ཅན་བྱུང་བར་གྱུར་ཏེ། བདག་ཉིད་ཆེན་པོ་དེས་ཀྱང་འཚོ་བ་ཡོངས་སུ་དག་པར་སླར་སུ་ཞིག་ཡིན་སྙམ་དུ་སེམས་སོ། །བདག་གིས་གང་ལ་གནས་ན་བདེ་བར་

འཇིག་རྟེན་ལ་ཕན་པ་བསྒྲུབ་པར་ནུས་སྙམ་མོ། །རེ་ཞིག་བསྟེན་པ་ནི་མི་བདེན་པ་དང་། ང་རྒྱལ་དང་། རྒྱགས་པ་དང་། ཆགས་པ་དང་། འཚེ་བའི་སྐྱོན་དུ་མ་རྣམས་ཀྱི་རྒྱུ་ཡིན་པས་དེ་ལ་གནས་ཤིང་འབད་པ་དང་ལྡན་པ་ཡང་ནམ་ཞིག་གི་ཚེ་ཞི་བ་ཉེ་བར་ཐོབ་པར་འགྱུར། ཅིའི་ཕྱིར་ན།

མི་ཡི་བདག་པོ་སྣ་ཚོགས་སྟོན་པའི་འདབ་མ་ལ་བསམ་ནུས་པ་ཡི། །སྐྱེས་བུ་རྣམས་ཀྱི་སེམས་ནི་དང་བ་སྐྱེས་པ་འབྱུང་བར་འགྱུར་མ་ཡིན། །འཁྲུག་པ་མང་བའི་འདམ་ཅན་ཆུ་ལ་གོས་ནི་འཁྲུ་བར་བྱེད་བཞིན་པ། །ནམ་ཡང་དཀར་བ་ཉིད་དུ་འགྲོ་བར་འགྱུར་བ་ཉིད་ནི་མ་ཡིན་ཏེ། །ཚོང་ཡང་ཉོ་

ཚོང་གི་དུས་ན་བརྫུན་པའི་ཚིག་མང་བས་ཆོས་ལས་འདའ་བ་ཉིད་དོ། །ཞིང་གི་ལས་ཀྱང་བ་ལང་རྣམས་ལ་ལྕག་དང་དབྱུག་པ་བརྒྱབ་པས་སྡུག་བསྔལ་སྐྱེད་པར་བྱེད་དེ། རྣམ་པ་ཐམས་ཅད་དུ་སྨན་པ་ཉིད་བདག་ཉིད་དག་པ་དང་འཇིག་རྟེན་ལ་ཕན་པ་དང་བདེ་བར་བྱེད་པར་མཐོང་བ་ཡིན་ཏེ། དེ་བས་

ན་སྨན་པ་ཉིད་ཚོལ་བར་སྙམ་དུ་རྣམ་པར་བསམས་ནས་དུས་རིང་པོས་དེའི་རྟོག་པ་སྐྱེས་པར་གྱུར་ཏེ། ལྕི་བའི་སེམས་ལྡན་དེ་ལ་གནས་པ་ཡི། །ཡོན་ཏན་ཅན་དག་ནད་པ་རྣམས་ཀྱི་ནད་གཅོད་ལ། །ནམ་ཡང་ནད་ཀྱིས་གདུང་བར་འགྱུར་མིན་ལ། །ལུས་ཅན་རྣམས་ཀྱི་ལུས་ངལ་བསྲུང་བྱས་

བཞིན། །བར་ཆད་མེད་པར་དམ་པ་རྣམས་ལ་སྨྲས། །དེ་ནི་མེད་པས་མདུན་ས་མཛེས་མི་འགྱུར། །གཙང་བའི་མར་མེ་བྲལ་བས་འོད་མེད་པའི། །མཚན་མོ་ལ་ནི་རི་མོའི་ཁྱིམ་བཞིན་དུ། །འགྲོ་ལ་འདོད་པ་བསྐྱེད་ཅིང་མུན་པ་འཕྲོག །དེ་ནི་བདེ་ལྡན་མདུན་སར་གང་ཞིག་འགྲོ། །

Vol. 169 · folio 146a

ཤིན་ཏུ་དགའ་བར་གྱུར་པ་དེ་འགྱུར་ཏེ། །རི་བོང་ཅན་ནི་ཤར་ལ་ཟླ་ཚེས་ལྟར། །ཆེན་པོ་འགྲོ་བའི་དོན་ནི་བྱེད་པ་ཡི། །ཡོན་ཏན་བརྟེན་པ་གསལ་བའི་དེ་ཉིད་མཐོང་། །ཟླ་ལྟར་རྣམ་དག་སེམས་ལྡན་རྣམས་ཀྱིས་ནི། །སྐྱེ་བོ་ཡོན་ཏན་ལྡན་ལས་འབྱུང་བར་འགྱུར། །དེ་ལྟར་

འགྲོ་བའི་ལམ་ནི་གནོད་བྱེད་སེལ་བ་ལ་མཁས་པ། །ཡོན་ཏན་མང་བ་རྣམས་ཀྱི་མངོན་སུམ་དུ་ནི་གཏེར་དང་འདྲ། །དེ་ནི་ཤེས་རབ་ཡོངས་སུ་འདྲིས་པས་དག་པའི་བློར་འགྱུར་ཏེ། །ཀུན་ནས་ཡོངས་སུ་འདྲིས་པ་མེད་ཀྱང་གཉེན་ལྟར་གྱུར་པ་ཡིན། །དེ་ནས་དུས་གཅིག་གི་ཚེ་ན་ལེགས་པའི་བློ་ཅན་གྱི་སློབ་

མས་རྗེས་སུ་འགྲོ་བཞིན་པ། བྱང་ཆུབ་སེམས་དཔའ་ཡུལ་གཞན་དུ་སོང་བ་ལ་གླགས་རྙེད་པ་དང་འདྲ་བའི་ནད་ཀྱིས་བུད་མེད་འགའ་ཞིག་གི་བདག་པོ་སྲིད་པ་གཞན་དུ་ཉེ་བར་སོང་བར་གྱུར་ཏོ། །དེས་ཀྱང་འཇམ་པའི་ལག་པ་གཉིས་ཀྱིས་བརྡབས་པས་ཀུན་ནས་དཀར་དམར་དུ་བྱས་པའི་ལྕི་བའི་འོ་མ་

འཛིན་པ་མིག་གི་མཆི་མའི་ཐིགས་པ་རྣམས་ཀྱིས་བཞིན་བཀྲུས་པ། རྒྱན་རྣམ་པར་བཀྲོལ་བ། སྐྲ་ལོ་ལྷོད་པ་དང་རྣམ་པར་གྲོལ་བའི་ཁུར་གྱིས་སྐུ་ཀུནྡ་རའི་མེ་ཏོག་ཀུན་ནས་དོར་བ། ཀུནྡའི་ལྗོན་ཤིང་ལྟར་སྦྲང་བྱེད་ཀྱི་ཚོགས་ཀྱིས་མེ་ཏོག་འགེགས་པ། མེ་ཏོག་མཚོན་ཆའི་བུད་མེད་དང་འདྲ་བ།

ཀྱི་ཧུད་ཁྱིམ་ཐབ་ཁྱོད་གང་དུ་སོང་སྙམ་དུ་རྣམ་པ་མང་པོ་དེ་ལྟར་སྨྲེ་སྔགས་འདོན་ཅིང་འབྱུང་པོས་བཟུང་བར་གྱུར་ཏོ། །དེ་ནས་དྲན་པ་རྣམ་པར་རྨོངས་པ་ཉིད་ཀྱིས་སྨྲས། །རང་གི་སྐྱེ་བོ་མཆི་མ་གྲོལ་བར་ཉེར་འོངས་དང་། །དེ་རིང་བདག་གི་ཁྱིམ་འདིར་ཅི་ཕྱིར་ངུ་བ་སྟེ། །འཇིགས་པ་བྲལ་བ་བདག་གི་

ཁྱིམ་ཐབ་གསོན་པ་ཡིན། །དེ་ལྟར་སྨྲས་ནས་དགོད་དང་བཅས་པས་མི་འཁྲུགས་པར། །རི་བོང་ཅན་གྱི་གདོང་ཅན་ཁྱད་པར་རྣམ་བསམས་ཏེ། །ཤིན་ཏུ་མཐུག་པར་དགའ་བས་ཀུན་ནས་འཁྱུད་བྱས་ཏེ། །བདག་པོ་ཤི་བ་ལ་ནི་མལ་གྱི་སྟེང་གནས་སྨྲས། །དེ་རིང་བདག་ལ་མངོན་པར་མི་སྨྲ་ཅི་ཕྱིར་

འདི། །མཛའ་བོ་ཁྲོ་བ་དགའ་བ་ལ་གནོད་དོར་བར་མཛོད། །གལ་ཏེ་བདག་ནི་ནོངས་པར་བྱེད་པ་འབྱུང་འགྱུར་ན། །ཁྱེད་ཀྱི་ཡིད་ནི་ཁྲོས་པ་དོན་མེད་འབྱུང་བ་མིན། །ཀྱེ་ལགས་བཙུམས་པའི་མིག་ལྡན་གཡོ་སྒྱུ་ཉིད་ཀྱིས་ནི། །འོན་ཀྱང་ཁྱོད་ཀྱི་སྐྱོན་བཅས་ཉིད་ནི་བདག་གིས་ཤེས། །དེ་ལྟར་

Vol. 169 · folio 146b

དགོད་ཅིང་ཕྲད་པར་འདོད་པའི་ཡིད་ཅན་གྱིས། །དེ་ལ་ཉེ་བར་སྦས་ནས་འགྲམ་དུ་འོང་བྱེད་འགྱུར། །ངེས་པར་ཁྱོད་ནི་ཟླ་འདྲ་བཞིན་དང་ལྡན་པ་སུ་ཞིག་གི། །འདོད་པ་དགའ་བ་གཞོན་ནུ་མ་ནི་གཞན་ལ་དགའ་བར་བྱེད། །དེ་བས་སོང་ལ་ཡུན་རིང་ཁྱོད་ཀྱིས་འདོད་པ་འབྲས་བཅས་གྱིས། །

ཆགས་ལ་རྩེ་གཅིག་ཁྱེད་ལ་འདི་ལྟར་བདག་གིས་གེགས་མི་བྱེད། །ཤིན་ཏུ་རིང་ཤར་མ་ལུས་རི་བོང་ཅན་མཚན་མཐོང་ནས་ནི། །མཆི་མའི་ཆུ་ཡིས་ལྟ་བ་འགེགས་པ་དབུགས་ནི་ཕྱུང་བྱས་ཏེ། །དེ་ནི་ཁྱོད་དང་ཕྲད་པའི་ཡིད་རེ་ཁུར་གྱིས་ངལ་བ་ལ། །མལ་གྱི་དབུས་སུ་ཡན་ལག་རྣམས་ནི་རྒྱགས་བཞིན་

བསྙལ་བར་འགྱུར། །མཛེས་པ་ཁྱོད་ནི་ངེས་པར་འཇིགས་ཏེ་བདག་གི་ཚོགས་འདི་ནི། །མཉན་ནས་གང་གི་ཁྱེད་ནི་རྩུབ་པ་ཉིད་དུ་ཉེར་སོང་བ། །ལོངས་ཤིག་བདག་ནི་ཁྲོས་པ་མིན་ཞེས་ཀུན་ནས་བརྗོད་བཞིན་པ། །དེས་ནི་དེ་ཡི་མིག་ནི་སོར་མོ་རྣམས་ཀྱིས་ཕྱེ་བར་གྱུར། །དེ་ནས་དེ་ཡི་

རང་གི་སྐྱེ་བོའི་ཚོགས་དེས་ངེས་པར་འདི་དཀའ་ཐུབ་མ་འབྱུང་པོས་བཟུང་བ་སྟེ། གང་གིས་ཁྱོ་ཤི་བ་ལ་ཡང་འཁྱུད་ནས་འདི་ལྟར་མང་པོ་སྨྲ་བ་ཉིད་དུ་ཉེ་བར་སོང་བ་ཞེས་བྱ་བ་བརྗོད་དེ་ངུ་བས་ཀུན་ནས་ངལ་བས་གཉིད་ཀྱི་དབང་དུ་སོང་བར་གྱུར་ཏོ། །ཁྱིམ་ན་སྐྱེ་བོའི་སྒྲ་མེད་པ་མཐོང་ནས་དེས་སྲོག་དང་

བྲལ་བས་བྱ་བ་དང་བྲལ་བའི་ལུས་ཁྱོ་བོ་དེ་ཕྲག་པ་ལ་བཀལ་ཏེ་མཚན་མོ་ཡོངས་སུ་སྨིན་པས་འོད་མེད་པའི་ཟླ་བའི་དཀྱིལ་འཁོར་དང་ལྡན་པའི་ནམ་མཁའ་ལ་གྲོང་ཁྱེར་གྱི་སྒོ་རྣམས་རྣམ་པར་གྲོལ་བར་གྱུར་པའི་སྒོ་དང་ལྡན་པ་རྣམས་ལ། མཆིལ་པ་སྐད་འདོན་པས་ཁྱབ་པའི་གྲོང་དང་གྲོང་ཁྱེར་གྱི་ཤིང་

རྣམས་ཡོད་པ་དང་མཁའ་སྣང་གི་རྣམ་པའི་མར་མེའི་རྩེ་མོ་རྣམས་ཡོད་པ་དང་། ལྷག་མ་དང་བཅས་པའི་གཉིད་ཀྱིས་ཁྱབ་པའི་མིག་དང་ལྡན་པའི་སྐས་ཀྱི་རིམ་པས་མཚན་པའི་རྐང་པ་བྱས་ནས་ལམ་ནས་འགྲོ་བ་རྣམས་སོ་སོར་གནས་པར་གྱུར་པ་དང་། ཉི་མ་སྤྲིན་གྱིས་བསྒྲིབས་པའི་

དུས་ལྟར་ཀུན་ནས་འོད་མེད་པ་དང་འདྲ་བའི་ནོར་ལྡན་ཡོད་པ་དང་། ཐོ་རངས་ཀྱི་རྔའི་སྒྲས་ཀུན་ནས་གང་བའི་བར་དང་ལྡན་པའི་ལྷའི་ཁང་པ་རྣམས་ཡོད་པ་དང་ཁྱིམ་བྱའི་སྒྲ་ཀུན་ནས་ཐོས་པར་གྱུར་པ་དང་ལྡན་པའི་གྲོང་དང་གྲོང་ཁྱེར་རྣམས་ཡོད་པ་ལ་བུད་མེད་དེས་གང་དང་གང་དུ་ཕྱིན་

Vol. 169 · folio 147a

པར་གྱུར་པ་དེ་དང་དེ་ཉིད་དུ། དུས་རིང་ཉིད་ཀྱིས་རྣམ་པར་རྙིངས་པ་ཡི། །དྲི་མ་ཅན་གྱི་གོས་ནི་གོན་བཞིན་པ། །ཕེག་རྡོབ་བྱེད་པའི་སྒྲ་ལྡན་བྱིས་རྣམས་ཀྱིས། །ཀུན་ནས་འོད་མེད་མཛེས་པ་ཡོངས་སུ་བསྐོར། །དེ་ནི་མཐོང་ནས་བྱིས་པ་རྣམས་དགོད་འགྱུར། །མིག་ནི་

མཆི་མ་དང་བཅས་བུད་མེད་རྣམས། །འགྱུར་ཏེ་རང་ཉིད་ཀྱིས་འདི་ཀྱེ་མ་རྨོངས། །དྲི་མེད་བློ་ལྡན་མི་རྣམས་ཀྱིས་འདི་སྨྲས། །དེ་ནས་དུས་ཀྱི་རིམ་པས་རྣག་དང་བཅས་པ་ཤ་དང་པགས་པ་ལྷུང་བས་དཀར་རྩིས་རྗེས་སུ་བྱུགས་པ་དང་འདྲ་བར་རུས་པའི་ལྷག་མ་ཅན་ལུས་དེ་དེས་འཛིན་པར་བྱེད་ཅིང་

དུས་གཅིག་གི་ཚེ་ན། །རིའི་གནས་གཞན་རྣམས་དང་དུར་ཁྲོད་རྣམས་སུ་ཡང་ཀུན་ནས་འཁོར་བར་གྱུར་ཏོ། །དུས་གང་གི་ཚེ་ཡོངས་སུ་ངལ་བ་དང་ལྡན་པར་གྱུར་པ་དེའི་ཚེ་ཤིང་གི་རྩ་བ་འགའ་ཞིག་ན་ངལ་བསོ་སྟེ། དེའི་ལུས་དྲི་མ་དང་བྲལ་བའི་ཆུ་བོ་ལ་ཁྲུས་བྱས་ནས་ཉི་མའི་འོད་ཟེར་རྩུབ་པས་

བདག་གི་ཁྱིམ་ཐབ་ཀུན་ནས་ངལ་བ་ཞེས་བྱ་བ་བརྗོད་ཅིང་། སྐད་ཅིག་སྐད་ཅིག་དུ་ནི་ཀེང་རུས་དཀར་པོ་དེ། །རིམ་གྱིས་རིམ་གྱིས་པད་རྩ་མ་ཡིན་པས་ནི་བྱུགས། །དེ་ཡི་མགོ་ལས་སྐྱེས་པ་འཕོས་པའི་མགོ་ལ་ནི། །གསལ་ཞིང་ཨུཏྤལ་སྔོན་པོའི་ཕྲེང་བ་བཅིངས་པར་གྱུར། །ཀུན་ནས་

དམར་བའི་འདབ་མ་ནགས་ཀྱི་ནང་ནས་ནི། །ཉེ་བར་བཏུས་ནས་རྣ་བའི་བུ་གར་སྦྱོར་བར་གྱུར། །དཔྲལ་བ་དཀར་པོ་རི་མོ་མཐོང་ལ་བཙག་གིས་ནི། །ཐིག་ལེ་ཀུན་ནས་རྫོགས་པར་བྱེད་པ་ཉིད་དུ་འགྱུར། །སོ་རྣམས་རྩ་བ་གསལ་བ་མང་བའི་རྒྱ་སྐྱེགས་ཀྱིས། །ཚོན་གྱིས་དམར་བའི་འོད་

དང་ལྡན་པ་བྱས་པར་འགྱུར། །ཀུན་ནས་འཁྲུགས་པའི་པདྨའི་རྩ་ལྟར་དཀར་བའི་འོད། །ལག་པ་གཉིས་པ་མེ་ཏོག་རྩི་ནི་སྦྱར་བར་འགྱུར། །སྲབ་པའི་མར་མེའི་རྩེ་མོའི་མིག་སྨན་གྱིས་ནག་པ། །སྨིན་མཚམས་གཉིས་ཀྱི་ཤུལ་དག་རིམ་གྱིས་བྱས་པར་གྱུར། །རྒྱ་ཆེན་མིག་གི་བུག་པ་དག་

ལ་དགོད་བཅས་པས། །མིག་ཐུར་ཡང་ནས་ཡང་དུ་འཁོར་ཞིང་གནས། །དེ་ནས་སྤྲིན་མེད་ཟླ་བའི་འོད་ཟེར་གྱིས་དག་པ། །པདྨོའི་ལོ་མའི་ནང་ན་ཆུ་ནི་བཞག་བྱས་ཏེ། །དགོད་པ་སྔོན་དུ་འགྲོ་བ་ཅན་གྱི་ཀེང་རུས་དེར། །དགའ་བས་རྣམ་པར་ལྟ་བར་བྱེད་ཅིང་ཀུན་ནས་སྨྲས། །ཁྱོད་ཀྱི་ལུས་ནི་རྒྱན་

Vol. 169 · folio 147b

རྣམས་ངེས་པར་བྱས་པ་ནི། །སྐལ་བཟང་ཉིད་ཀྱིས་དགའ་བ་ཉིད་དུ་ཉེར་སོང་བ། །དྲི་མ་མེད་པའི་ཆུ་ཡི་མེ་ལོང་འདི་ལ་ཁྱོད། །བརྩེ་ལྡན་རེ་ཞིག་བཞིན་གྱི་ཟླ་བ་རྣམ་ལྟ་མཛོད། །དེ་ནས་མཚན་མོ་འོངས་པ་དང་མིའི་རུས་པ་བཞི་ས་ལ་བརྐོས་ཤིང་དེའི་དབུས་སུ་ནི་འདབ་མ་རྣམས་ཀུན་ནས་བཀྲམ་སྟེ་

པདྨོའི་འདབ་མ་རྣམས་ཀྱི་མལ་ཆ་རྣམས་བཀོད་ནས། །ཀེང་རུས་དེ་ལ་འཕགས་པའི་སྲས་ཚུར་ཤོག །ཨ་ག་རུ་དང་སྤོས་ཀྱིས་བསྒོས་ཤིང་གནས་པའི་ཁང་པ་བདག་གིས་བརྩམས་པ་འདིར་གླང་པོ་ཆེ་ཕྲུ་གུའི་སོའི་རང་བཞིན་རྐང་པ་དང་ལྡན་པ་འཇམ་པའི་མལ་ཆ་དང་བཅས་པ་ལ་

ཞུགས་ཤིག་ཅེས་སྨྲས་སོ། །དེ་ནས་མོན་ལུག་སོ་རྣམས་ཀྱིས་ནི་དུམ་བྱས་ཏེ། །ཀེང་རུས་དེ་ཡི་ཁ་ལ་དགོད་པར་བྱས་ནས་ནི། །དེ་ལ་དེ་ཉིད་དུ་ནི་རྨོངས་པས་ཀུན་འཁྱུད་དེ། །མི་ཡིས་སྣང་བར་བྱས་པ་ཤིང་ཁང་མཐར་ནི་བསྙལ། །དེ་ནས་བྱང་ཆུབ་སེམས་དཔས་སློབ་མ་དང་རྗེས་སུ་

འགྲོ་བ་སྐྱེ་བོའི་དྲུང་ནས་ཀུན་ནས་མངོན་པར་འོངས་ཏེ། །སྐྱེ་བོ་རྣམས་ཀྱི་དྲུང་ནས་བུད་མེད་དེ་གདོན་གྱིས་བཟུང་བ་མཐོང་ནས་སློབ་མ་ལ་སྨྲས་པ། །ཡང་དག་མ་ཡིན་ཀུན་བརྟགས་ཀྱིས། །དེ་ལྟར་སྐྱེ་བོ་འདི་རྨོངས་པ། །ཤིན་ཏུ་བདག་འཛིན་བྱེད་པ་སྟེ། །ཅི་ལྟར་དངོས་པོ་མེད་པ་ཡང་། །

བདག་གི་ནད་ལྡན་རྣམས་ཀྱི་ནད། །སྨན་རྣམས་ཀྱིས་ནི་ཟད་པར་བྱས། །བུད་མེད་དེ་ཡི་གདོན་ཐབས་ཀྱིས། །བདག་གིས་ཟད་པར་བྱེད་པར་འགྱུར། །ཇི་ལྟར་མེ་ཏོག་མཐེ་བོ་ནི། །མེད་པར་སོར་མོས་འཛིན་མི་འགྱུར། །དེ་བཞིན་ཐབས་དང་རྣམ་བྲལ་བའི། །བྱ་བ་འབྲས་བུ་ཐོབ་མི་འགྱུར། །སློབ་

མས་སྨྲས་པ། བློ་དང་ལྡན་པ་རྣམས་ལ་ནི་ནུས་པར་བྱ་བ་མ་ཡིན་པ་ཞེས་བྱ་བ་ཅི་ཞིག་ཡོད་དེ། བདག་ཉིད་ཆེན་པོ་དེ་ཡང་སྙིང་རྗེའི་ཁ་ལོ་སྒྱུར་བས་རབ་ཏུ་བསྐུལ་བར་གྱུར་པའི་ཡིད་ཀྱི་ཤིང་རྟ་ཁྱིམ་དུ་མི་འགྲོ་ཞིང་། ཉིན་མོར་བྱེད་པ་ནུབ་པའི་དུས་ཀྱི་མཚམས་བགྲོད་པར་དཀའ་བ་ལ་མ་བརྩིས་

ཤིང་། ངེས་པར་བུད་མེད་དེ་ཁྱིམ་དང་ཡོངས་སུ་འདྲིས་པར་དུར་ཁྲོད་ཀྱི་ས་ཉིད་ལ་མངོན་པར་དགའ་བར་བྱེད་སྙམ་དུ་རྣམ་པར་བསམས་ཏེ། འབར་བའི་སྲེག་ལུགས་འཛིན་པའི་སྣང་བས་ནྱ་གྲོ་དྷའི་ཤིང་ལ་གནས་པའི་བྱ་རྒོད་དང་བྱའི་མཐའ་མ་གསལ་བར་བྱས་པ། མེས་འཇིགས་པ་དང་འདྲ་བའི་དཀྱིལ་

Vol. 169 · folio 148a

འཁོར་ལ་གནས་པའི་གླང་པོ་ཆེའི་ཚོགས་ལྟར་ནག་པའི་ཡུན་རིང་པོ་ནས་མུན་པས་ལྟ་བར་གྱུར་པ་དང་འདྲ་བར་ཅེ་སྤྱང་གི་ཚོགས་ཀྱིས་ལུས་མི་སྣང་བར་བྱས་པ་དང་། བར་མེད་པར་རྩུབ་པའི་སྐྲ་ཤད་ཀྱིས་སའི་དཀྱིལ་ཁྱབ་པ་དང་། མེའི་དབུས་སུ་བཙོས་བཞིན་པའི་ཁ་ཟླུམ་

པའི་མི་ལུས་དང་ལྡན་པ་དང་། པདྨའི་རྩ་བ་གསར་པ་ལྟར་ཀུན་ནས་དཀར་བའི་སྡུག་པ་རྣམས་ཀྱིས་ཁྱབ་པ་དང་། འགའ་ཞིག་ཏུ་རི་མོར་བྲིས་པའི་བུམ་པའི་གྱོ་མོ་རྣམས་ཀྱིས་བར་མཚམས་མེད་པ་དང་། ཕྱེད་ཚིག་པའི་ཤི་བའི་གོས་དྲི་མ་ཅན་གྱི་དུམ་བུ་རྣམས་ཀྱིས་ཀུན་ནས་ཁྱབ་པ་དང་། ཉེ་

བར་གནས་པའི་ཤ་ཟའི་བུད་མེད་ཀྱི་སྐྱེ་བོ་རྣམས་ཀྱིས་མིའི་ཤ་རྣམ་པར་འགོད་པར་འགྱུར་བ་དང་། གཞན་དུ་གློ་བུར་དུ་བྱུང་བའི་སྐྱེས་པ་རྣམས་ཀྱིས་ཤ་ཆེན་འཚོད་པར་གྱུར་པ་དང་། གང་ཞིག་ཏུ་ཚིག་པར་གྱུར་པའི་ལུས་ལས་འཕོ་བར་གྱུར་པའི་ཚིལ་གྱི་ཐིགས་པའི་ཕྲེང་བ་རྣམས་ཀྱིས་སོལ་བ་

འམ་མེ་ཤི་བར་གྱུར་པ་དང་། རབ་ཏུ་ཚ་བའི་མེ་ལྕེས་ཀུན་ནས་དམར་སྐྱའི་རྩ་བས་སྟེང་དུ་ཆུ་འཛིན་པ་ལྟར་སྔོ་བའི་སིན་དྷཱུ་ར་དང་རམས་ཀྱིས་བཙོས་པའི་སྣམ་བུ་གཉིས་དང་འདྲ་བའི་དུ་བའི་ཚོགས་ཆེན་པོས་སྟེང་ནས་བསྒྲིབས་པར་བྱས་པ་དང་། སྐྱེ་བོ་མ་ལུས་པ་རྣམས་ཡིད་འབྱུང་བ་སྐྱེད་

པར་འདོད་པ་ཉིད་དང་འདྲ་བའི་མི་རྟག་པ་གསལ་བར་བྱས་པ་དང་། ཤི་བའི་ལུས་ཀྱི་རང་བཞིན་གཡུལ་ངོའི་གནས་དང་འདྲ་བར་ཤིན་ཏུ་འཇིགས་པ། སྭཱ་ཧཱའི་བདག་པོའི་རླུང་གི་ཤུགས་ཀྱིས་རྣམ་པར་འདར་བ་ཡིས། །ཀུན་ནས་སྤྱན་དྲངས་ལྟར་ནི་འབར་བའི་འོད་ལྡན་མི་རྣམས་ཀྱིས། །

འབྱུང་བའི་ཅེ་སྤྱང་ཕོ་མོའི་ཚོགས་ལྟར་གྷོ་ཀའི་སྒྲ་ལྡན་པ། །དོགས་པ་མེད་པའི་ཡིད་ཅན་དེས་ནི་དུར་ཁྲོད་ཞུགས་པར་གྱུར། །བུད་མེད་དེ་ནི་གང་ན་གནས་པར་འགྱུར་སྙམ་དུ་ཀུན་ནས་འཁོར་ཞིང་དེས་ཤ་ཟ་མོ་རྣམས་ཀྱི་ལུས་ཀྱི་བྱ་བ་དེ་རྣམས་ཀུན་ནས་མཐོང་ནས། སློབ་མའི་བསྲུང་བའི་

སྔགས་ཀྱིས་གཙུག་ཕུད་འཆིང་བར་བྱས་པར་གྱུར་ཏོ། །དེར་ཡང་མི་ཡི་ཁྲག་གིས་དཔྲལ་བར་ཐིག་ལེ་བྱས་ནས་ནི། །སེར་སྐྱའི་སྨིན་མཚམས་གཉིས་ལྡན་ཆེན་པོའི་ལྟ་བ་ཅན། །ཁྱོ་ཕོས་འཛིན་པར་བྱས་པ་རྣོ་བའི་སོ་ལྡན་པའི། །དགྲ་སྟ་ལ་ནི་ལ་ལ་ཞིག་གིས་གདོང་མཐོང་

Vol. 169 · folio 148b

འགྱུར། །ཁྲག་གི་ཆང་གིས་གང་བ་ཟླ་བ་ལྟར་དཀར་བ། །ཐོད་པའི་སྣོད་ནི་གཞན་གྱིས་ས་ལ་རྣམ་བཀོད་ནས། །གཡོ་བའི་ཆུ་ཡི་དབུས་སུ་གནས་པའི་ཟླ་བ་ལྟར་གཡོ་བའི། །དགྲ་སྟ་གཡམ་པ་ལ་ནི་བརྡར་བར་བྱས་པར་གྱུར། །མེ་ཡི་ཚ་བས་བཙུམས་པར་བྱས་པའི་མིག་ལྡན་

པ། །གཞན་དག་མི་ནི་ཕྱེད་ནི་ཚིག་པའི་ལུས་ལྡན་པ། །ལྷུང་ཞིང་དྲོ་བའི་རྐང་མར་ཆ་ལྡན་ཞུ་བ་ནི། །གློ་བུར་དུ་ནི་དུར་ཁྲོད་དབུས་ནས་འགུགས་པར་འགྱུར། །ཁྲག་འཛག་པ་ཡི་རྐང་མར་ཆ་ཡིས་ཉེ་བར་བྱུགས་པ་ཡི། །རྡོ་ལ་ཁ་ཆུ་སྐྱེས་བཞིན་པས་ནི་རྣམ་པར་བཞག་པ་ནི། །

སྐྱེས་པའི་དུམ་བུ་བཅག་པས་ཡང་དག་འབྱུང་བའི་འཇིགས་སྒྲ་ལྡན། །གཞན་དག་གིས་ནི་རྡོ་བས་རྣམ་པར་གཅོད་པ་ཉིད་དུ་འགྱུར། །མཛའ་བོའི་ལག་པའི་མཐིལ་གྱིས་ཉེ་བར་ཁྱེར་བར་བྱེད་བཞིན་པ། །ཡ་བའི་མེ་ཏོག་ལྟར་ནི་མངོན་པར་དམར་པོ་དམར་ལྡན་པ། །ཐོད་པ་ཡང་དག་གནས་

པའི་ཁྲག་གི་ཆང་གིས་གཞན་དག་ནི། །འགྱུར་བའི་གདོང་ཅན་ཤ་དང་ཉེ་བར་བཅས་པ་འཐུང་བར་འགྱུར། །ཤ་ཟ་མོ་དེ་རྣམས་ཀྱང་འདི་ལྟར་བྱ་བ་ལ་རྩེ་གཅིག་པར་ཡང་དག་པར་མཐོང་ནས། ཨེ་མའོ་མཚན་མོ་རྒྱུ་བ་འདི་རྣམས་ཀྱི་རང་བཞིན་ནི་དྲག་པ་སྟེ། དྲག་པ་ཞེས་བྱ་བ་རྣམ་པར་བསམས་

ནས་ཕྱོགས་གཞན་ལ། ཤ་དང་འབྲས་ཀྱིས་འགའ་ཞིག་ཏུ། །ཆང་བཅས་ཉ་ཡིས་འགའ་ཞིག་ཀྱང་། །ས་ཡིས་མཐར་ཐུག་ཁྱབ་པ་ནི། །རི་ཡི་གཏོར་མས་འགའ་ཞིག་ཏུ། །དུར་ཁྲོད་མེ་ཡི་གྲིབ་མས་ནི། །གསལ་བར་བྱས་པའི་ལུས་ལྡན་པ། །ཤུགས་དང་བྲལ་བའི་རལ་གྲིར་

ལྡན། །ཕྱོགས་སྐྱོང་རྣམས་ཀྱིས་སྣང་བར་བྱས། །རིག་པའི་དངོས་གྲུབ་མངོན་འདོད་པའི། །བརྟེན་པར་བཟླས་པས་རབ་མགུལ་ཆུ། །བདག་ཉིད་ཆེན་པོ་རབ་འབྱུང་བས། །དབུས་སུ་བྱིན་གྱིས་བརླབས་པར་བྱས། །ཐལ་བར་རྩེ་གསུམ་རྣམས་བཀོད་པས། །བར་དུ་འགྲོ་བར་བྱས་པ་

ནི། །མེ་ཏོག་དམར་པོ་ཀུན་ཁྱབ་པའི། །དཀྱིལ་འཁོར་ཆེན་པོ་མཐོང་བར་འགྱུར། །འགའ་ཞིག་ཏུ་ཡང་ཁྲག་གིས་མངོན་པར་དམར་བར་བྱས་པའི་སོ་དང་ལྡན་པའི་རི་དགས་སྐྱོན་ཅན་རྣམས་ཀྱིས་ཀུན་ནས་དབུགས་ཕྱུང་བར་གྱུར་པའི་ཕྱིར་རྒྱུ་མའི་དྲ་བ་རྡོལ་བ། འདབ་ཆགས་རྣམས་ཀྱི་

Vol. 169 · folio 149a

མཆུས་མིག་ཕྱུང་བའི་བུ་ག་རྣམས་ཀྱིས་འཇིགས་སུ་རུང་བའི་གདོང་དང་ལྡན་པ། ཤི་བའི་ཆོམ་རྐུན་པས་འཚོ་བའི་ཡོ་བྱད་ཕྲོགས་པར་བྱས་པའི་བུད་མེད་མཐོང་ནས་ཡིད་བྱུང་བའི་བློ་དང་ལྡན་པ། ཀྱེ་མ་འདོད་ཆགས་དང་ལྡན་པ་རྣམས་ཀྱིས་འདོད་ཆགས་ཀྱི་བདག་

ཉིད་དུ་འདུག་པ་སྟེ། གང་རྣམས་ཀྱིས་འདི་ལྟ་བུའི་ལུས་ལས་བདེ་བའི་བློ་སྐྱེ་བར་འགྱུར་སྙམ་ནས་སྨྲས་པ། ཡང་ཡང་ཀུན་ནས་ཉམས་པ་འདོད་ཅིང་འདོད་པ་ནི། །སྐྱེ་བོའི་མིག་གི་བུང་བའི་ཚོགས་ཀྱིས་གང་ཞིག་ལ། །དེ་ནི་དེ་རིང་བུད་མེད་ལྗོན་ཤིང་ལས་བྱུང་བའི། །ཡིད་འོང་མཛེས་

དགོད་མེ་ཏོག་ཇི་ལྟར་མཐོང་མི་འགྱུར། །ཡན་ལག་མེད་པ་ཁྱོད་ཀྱིས་དགོད་པའི་བདག་ཉིད་ཀྱིས། །གང་ལ་འདབ་རྟེན་སྔོན་དུ་ཡང་དག་འགེངས་པ་སྟེ། །ཁྱོད་ཀྱིས་དི་རིང་བུད་མེད་ལུས་ཅན་དེ་ལ་ནི། །སྐྱོན་ཅན་བཙན་ཐབས་ཀྱིས་ནི་ཅི་ཕྱིར་མདའ་མི་གཏོང་། །གང་ཞིག་ཡང་ཡང་འདོད་

པའི་བདག་ཉིད་འཁྱུད་བྱས་པ། །པགས་པས་གཡོགས་ལ་འདོད་ཆགས་ཅན་གྱི་སྐྱེ་བོ་གང་། །དེ་རིང་དེ་འདི་རུས་པའི་རང་བཞིན་ལུས་འདི་ནི། །སྣ་ནི་འགེགས་པ་ཉིད་ནི་སྤངས་ནས་གྲོལ་བར་འགྱུར། །མཆི་མ་དང་བཅས་མིག་དང་ལྡན་པའི་ངོ་གདོང་འདི་ནི་ཅི་ཕྱིར་འདུད་མི་བྱེད། །

རི་བོང་ཅན་གྱི་གདོང་ཅན་སྐྱོན་དང་བྲལ་བའི་མཐུན་པ་བདག་ལ་དོན་མེད་ཁྲོས་པས་ཅི། །དེ་ལྟར་ངེས་པར་བརྗོད་པར་བྱེད་པའི་བདག་པོས་གང་ལ་མགོ་བོ་རྣམས་ཞུགས་པ། །དེ་ཡི་རྐང་པ་གཉིས་པོ་ལ་ནི་འདི་ཡི་ཁྱེད་རྣམས་ཀྱིས་ནི་སོ་རྣམས་གནས། །བདེ་བ་མྱོང་ཞིང་སྨིག་རྒྱུ་རྗེས་སུ་

ཚོལ་ཞིང་ཀུན་ནས་སྐྱེ་བར་གྱུར་པའི་འདོད་པ་ཅན། །ངལ་བ་བྱིས་པའི་སྐྱེ་བོ་སེམས་ཀྱི་རི་དགས་སྔོན་དུ་གང་གིས་བཀྲི་བར་བྱས་པ་ནི། །འབད་པས་འདོད་པའི་ལྷ་ཡི་རྔོན་པས་དེ་ནི་བརྩམས་པར་གྱུར་པ་ཇི་ལྟར་གང་གིས་ཀྱང་། །སྣང་རུང་མིན་པའི་གཟུགས་ཅན་གྱིས་ནི་ཆུང་རོལ་པ་ཡི་རང་

བཞིན་འདྲ་བ་རྣམས་ཆེད་བྱས། །དེ་ལྟར་བདག་ཉིད་ཆེན་པོ་དེས་བུད་མེད་ཀྱི་ལུས་མཐོང་བས་འདོད་ཆགས་དང་བྲལ་བ་ཡང་དག་པར་བྱུང་བས་སྨྲས་པར་གྱུར་པ། །ཀྱེ་མ་མི་རོའི་དྲི་མི་ཞིམ་པས་སྣ་ཡི་དབང་པོ་སྐྱོ་བར་བྱས་པ། སྡོང་ཁང་གི་མེའི་དུ་བས་ཡང་དག་པར་རེག་པས་བདག་ཉིད་

Vol. 169 · folio 149b

མི་གཙང་བ་རློམ་པར་བྱེད་པ་ནི་འདི་ལྟ་སྟེ། འདི་ཡང་ཆུ་འཛིན་ལྟོ་བའི་འོད་ནི་འཕྲོག་པའི་དུ་བ་འདིས་ནི་ཡུན་རིང་པོར་ནི་སོང་བ་ཡིན། །དུར་ཁྲོད་ལས་བྱུང་རྣམ་པར་འཕྲོ་བྱེད་འོད་ནི་འཕྲོ་བ་དྲི་མ་ཅན་དུ་ཁྱེར་བར་བྱེད། །ཆུ་གཏེར་རླབས་ལྡན་ཆུ་ལ་ཁྲུས་ནི་བྱས་ལྟར་གྲོང་བས་ཁྱབ་པ་རིམ་གྱིས་

ནུབ་པ་ནི། །རི་བོང་ཅན་ནི་ཟླ་ཚེས་གོས་རློན་ལྟ་བུར་འཛིན་ཅིང་ཇི་ལྟར་ཡང་ནི་འགྲོ་བར་འགྱུར། །སློབ་མས་སྨྲས་པ། བདག་གི་སྡུག་བསྔལ་མི་བཟོད་ཅིང་། །ཐེ་ཚོམ་བྱེད་པར་གྱུར་པ་ཡང་། །གཞན་གྱི་རྗེས་འཛིན་བྱ་བའི་ཕྱིར། །སོ་སོའི་སྐྱེ་བོས་ནུས་པ་མིན། །བྱང་ཆུབ་སེམས་དཔས་སྨྲས་

པ། །ཚེ་དང་ལྡན་པས་ཡང་དག་པར་མངོན་པར་སྨྲས་ཏེ། ད་ནི་དེ་བས་ན་མ་མོའི་ཁྱིམ་རྙིང་པ་འདི་རུ་དུར་ཁྲོད་ཀྱི་སྲེག་ལུགས་འཛིན་པའི་སྣང་བས་རྩིག་ངོས་ལ་བྲིས་པའི་ཕྱུགས་ཀྱི་ཁྲག་གིས་རྩེ་གསུམ་པ་གསལ་བར་བྱས་པ་ལ་རྗེས་སུ་ཞུགས་ཏེ། མཚན་མོའི་ལྷག་མ་འདའ་བར་བྱེད་ཅིང་། ད་

ནས་ཤིང་གིས་ཀུན་ནས་མཚན་པའི་སྒོ་དང་དྲིལ་བུའི་ཚོགས་ལྡན་པ། །རྒྱལ་མཚན་ལས་ལྷུང་རྨ་བྱའི་མགྲིན་པ་རྡུལ་ནི་འབྱུང་བའི་ས་ལྡན་པ། །ཕྱི་དང་ནང་དུ་མེ་ཏོག་རྙིང་པ་རོ་སྐུད་རྣམས་ཀྱིས་ཉེར་བསགས་པ། །མ་ཧེའི་མགོ་བོ་གང་ལ་བྱ་རྒོད་འདི་ནི་ངེས་པར་གནས་པ་ཡིན། །སློབ་

མས་སྨྲས་པ། མཁན་པོ་ཇི་ལྟར་བཀའ་སྩོལ་བ་བཞིན་དུ་བྱའོ་ཞེས་ཟེར་རོ། །དེ་ནས་ཀེ་ཤ་བས་མ་མོའི་ཁྱིམ་དེར་ཞུགས་ནས་ཅུང་ཟད་གཉིད་ལོག་པར་བྱས་ཏེ། སོ་སོར་རྣམ་པར་སད་པར་བྱས་ནས་སྨྲས་པ། ཚེ་དང་ལྡན་པ་ཕྱི་རོལ་དུ་བྱུང་ལ་རེ་ཞིག་མཚན་མོའི་ལྷག་མ་ཅི་ཙམ་ཡོད་པ་དེ་

ཤེས་པར་བྱོས་ཤིག །དེས་ཀྱང་དེ་ལྟར་བགྱི་ཞེས་སོ་སོར་མཉན་ནས་མངོན་པར་བྱུང་སྟེ་སྨྲས་པ། མཁན་པོ་ཐོ་རངས་ཉིད་ཡིན་ཏེ། དེ་ལྟར་ན། །མཚན་མོ་ཆད་པར་ཤེས་ནས་ཤིང་གི་ཚང་འདི་ལ་ནི་བཟོད་པ་ཅན་ཉིད་འདི་ལ་བརྟེན་པར་བྱེད། །ཟད་པར་གྱུར་པའི་བུད་ཤིང་ལྡན་པ་རོ་བསྲེགས་

མིའི་འོད་རྣམས་ཅུང་ཟད་དྲི་མ་ཅན་འཛིན་ཏེ། །ཉི་མ་ཤར་བའི་འོད་ཟེར་འཕྲོ་བ་རྣམས་ཀྱིས་རེག་པར་འགྱུར་བའི་ས་འཛིན་རྣམས་ཀྱི་གྲིབ་མ་རྣམས། །བར་ནི་སྔོ་བར་བྱས་པའི་བུང་བ་ལྟར་ནི་སེར་སྐྱའི་འོད་ལྡན་ས་ཕྱོགས་མཉམ་པར་སྐྱེ་བ་ཡིན། །དེ་ནས་བྱང་ཆུབ་སེམས་དཔའ་ཕྱིར་བྱུང་སྟེ་

Vol. 169 · folio 150a

སློབ་མ་ལ་སྨྲས་པ། ཚེ་དང་ལྡན་པས་ནད་པ་རྣམས་ནད་མེད་པར་བྱ་བའི་ཕྱིར་གྲོང་ཁྱེར་དུ་སོང་ཤིག་དང་། བདག་གིས་ཀྱང་ཁྱོ་ཤི་བ་དེ་ཐབས་གང་གིས་ཀྱང་འགྱུར་བ་མེད་པར་བྱའོ་ཞེས་ཟེར་རོ། །སློབ་མས་ཀྱང་དེ་ལྟར་བགྱིའོ་ཞེས་བྱ་བས་དེ་ལ་གསོང་པོར་སྨྲས་

ཏེ་ཤིན་ཏུ་རིངས་པར་གྲོང་ཁྱེར་དུ་སོང་བར་གྱུར་ཏོ། །བྱང་ཆུབ་སེམས་དཔས་ཀྱང་བུད་མེད་དཀའ་ཐུབ་ཅན་དེ་སླར་གང་ན་ཡོད་པར་གྱུར་སྙམ་དུ་བསམས་ནས་དེ་བལྟ་བའི་ཕྱིར་ཀུན་ནས་ཡོངས་སུ་འཁོར་བར་གྱུར་ཏོ། །ན་ཆུང་དེ་ཡང་ལངས་ཏེ་བདག་པོའི་ལུས་དེ་ལ་བཟུང་ནས་ཆུ་བོ་ལ་མངོན་པར་

འགྲོ་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཡང་དག་པར་སོང་སྟེ་དེའི་ཉལ་བའི་གནས་མཐོང་ནས་འདི་ལྟར་བསམས་པར་གྱུར་ཏེ། འདིར་ནི་དཀའ་ཐུབ་ཅན་མ་དེ་ཉལ་བར་འགྱུར་བ་ཡིན་ནོ། །དེ་ཅིའི་ཕྱིར་ཞེ་ན། པདྨོའི་འདབ་མ་རྣམས་ཀྱིས་མལ་ནི་བྱས་པ་འདི། །སྲབ་པའི་དྲོད་ཀྱིས་

འདབ་མ་དུད་ཁ་རྙིང་བྱས་པ། །མཚན་མ་ཉེ་བར་མནན་པས་དབུས་ནི་རྣམ་ནུབ་ཅིང་། །མལ་ནི་དེ་དང་བྲལ་བས་རྣམ་སྣང་འགྱུར། །དེ་ནས་བདག་པོའི་ལུས་འཛིན་པ་དེ་ཆུ་བོར་འགྲོ་བཞིན་པ་མཐོང་ནས་ཨེ་མ་ཐབས་དང་བཅས་པར་འདི་ནི་ནད་དང་བྲལ་བར་བྱའོ་སྙམ་དུ་རྣམ་པར་བསམས་ནས་

བདག་ཉིད་ཆེན་པོ་དེས་བུད་མེད་ཤི་བའི་ལུས་ཕྲག་པ་ལ་བཀལ་ཏེ། བུད་མེད་དེ་ལ་རྗེས་སུ་འབྲང་བར་གྱུར་ཏོ། །དེས་ཀྱང་རུས་པའི་ཀེང་རུས་དེ་འགྲམ་གྱི་ཤིང་གི་སྡོང་པོ་ལ་བཅིངས་ནས་གཞག་ཅིང་སྨྲས་པ། རེ་ཞིག་འཕགས་པའི་སྲས་སྡོད་ཅིག །ད་ནི་ཁྱོད་ནི་ཤིང་འདི་ལ། །གདོང་པ་འཁྲུ་

བའི་ཆུ་དེ་ནི། །ཇི་སྲིད་བདག་གིས་ཁྱེར་ལ་འོང་། །གདོང་པ་བཀྲུས་པ་གཉིད་བྲལ་བས། །དཀར་དང་དམར་བའི་མིག་ལྡན་པ། །གི་ཝང་ཨུ་ཤིར་མདའ་རྣམས་ཀྱིས། །ཁྱོད་ནི་བརྒྱན་པར་འགྱུར་བ་ཡིན། །དེ་ལྟར་མངོན་པར་སྨྲས་ནས་དེའི་ཆུ་བོ་ལ་འཇུག་ཅིང་རང་གི་གྲིབ་མ་ཀུན་ནས་

དག་པའི་མེ་ལོང་གི་དབུས་ལྟར་དྲི་མ་མེད་པའི་ཆུ་ལ་རྣམ་པར་བལྟས་ནས་ངེས་པར་བུད་མེད་འདི་དག་གིས་ཁྱོ་འཕྲོག་པར་འདོད་དོ་སྙམ་དུ་རྣམ་པར་བསམས་ནས། བདག་ཉིད་ཀྱི་གྲིབ་མ་འདི་ལྟར་ཀུན་ནས་བསྡིགས་ཤིང་གནས་ཏེ། འཁྱོག་ཅིང་རྒྱས་པའི་སྨིན་མ་ཀུན་ནས་སྤྱོད་བྱེད་

Vol. 169 · folio 150b

ཅིང་། །དགོད་པར་གསལ་བར་བྱས་པའི་སོ་ཡི་ཕྲེང་བ་ཅན། །སྐྱོན་ཅན་མ་ནི་ཕྲད་འདོད་ངེས་པར་བུད་མེད་ཁྱོད། །བདག་གི་མཛའ་བོ་ཁྱོད་ནི་ཡིད་འཕྲོག་འདོད་མ་ཡིན། །དགོད་པ་ཡིད་དུ་འོང་བས་རྣམ་པར་ཆགས་བྱེད་པ། །ཡིད་འཕྲོག་མིག་གི་མཐའ་མས་རྣམ་

པར་བལྟ་བས་ཀྱང་། །བདག་གི་མཛའ་བོ་དུལ་བ་ངོ་ཚ་མེད་པ་ཁྱོད། །ཅི་ལྟར་བདག་ལས་གཡོ་བ་ཅན་ཁྱོད་དགོས་མེད་གྱུར། །ཁྱོད་ནི་དགོད་པ་གསལ་བར་བྱེད་ཅིང་བདག་གི་ནི། །མཛའ་བོ་ཅེ་སྤྱང་མོ་ཡང་བསམ་པར་མི་བྱེད་དོ། །དེ་ལྟ་ན་ཡང་རྨོངས་ལས་ལྡོག་པར་མི་འགྱུར་

ཏེ། །དོན་མེད་ཀུན་ནས་འཁོར་བར་བྱེད་པ་འགྲོ་བར་གྱིས། །སྐྱེས་པས་ཀུན་ནས་འོངས་ཏེ་གལ་ཏེ་བསྟེན་འདོད་ན། །དེ་ནས་སྐྱེ་བོ་ལ་ནི་བུད་མེད་ཆུང་བར་འགྲོ། །འདོད་པར་མ་བྱས་གལ་ཏེ་ནན་གྱིས་འདོད་བྱེད་ན། །དགོད་པའི་དངོས་པོ་ལ་ནི་གང་གིས་གཏད་མི་བྱེད། །བདག་གིས་

ཁྱོད་ནི་འདི་ལྟར་ཀུན་ནས་སྐྲག་བྱས་ཀྱང་། །ནན་གྱིས་བདག་གི་མཛའ་བོ་འདི་ནི་གལ་ཏེ་འཛིན། །དེ་བས་ཁྱོད་ལ་སྐྱོན་ཉིད་བཟོད་པར་མི་འགྱུར་ཏེ། །གང་ཕྱིར་ཕྲག་དོག་ཡིད་ནི་ཤིན་ཏུ་གདུང་བར་བྱེད། །བདག་གིས་དེ་ལྟར་ཁྱད་པར་རྩུབ་པར་སྨྲས་ཀྱང་ནི། །ཁྱོད་ནི་ང་རྒྱལ་དང་བཅས་ཅི་

ཕྱིར་འདི་དགོད་འགྱུར། །ཅི་ཕྱིར་ཐ་མལ་པ་ཡི་ཁྱིམ་ལ་འདི་བརྗོད་པ། །མཛེས་མ་དོན་མེད་ངལ་བ་ཀྱོག་པོ་འཚོང་བ་ནི། །དེ་ལྟར་གདོན་གྱིས་དྲན་པ་ཉམས་པ་ཁྲོ་བ་དང་བཅས་པ། །དེས་ནི་ངོ་གདོང་ཁྲོ་གཉེར་མིག་ནི་གཡོ་བར་བྱས་པ་སྟེ། །དྲི་མ་མེད་པའི་ཆུ་ཡི་ནང་ན་གནས་པར་སྒྲ་

སྒྲོགས་ཤིང་། །རང་གི་གྲིབ་མ་ལ་ཡང་རྡོ་རྣམས་ཀྱིས་ནི་ཀུན་བརྡུངས་འགྱུར། །རང་གི་གྲིབ་དང་ལྷན་ཅིག་ཆུ་ལ་གནས་པས་ཕྲག་དོག་བཅས། །དེ་ནི་འདི་ལྟར་བྱེད་ཅིང་ཡང་ཡང་རྩོད་པའི་ཐད་གནས་པ། །འཁྲུལ་འཁོར་ཤིན་ཏུ་དྲི་མེད་གསལ་བའི་སོ་ཡི་ཕྲེང་བ་ཅན། །དེ་ལས་སྐྱེས་པའི་ངོ་

མཚར་དང་འདྲ་རུང་བའི་རང་བཞིན་དང་། །དེ་ནས་བུད་མེད་དེ་གལ་ཏེ་བདག་གིས་དེ་ལྟར་རྡོ་བ་རྣམས་ཀྱིས་ཀུན་ནས་བརྡུངས་པར་གྱུར་པ་ཡང་ཁྱོད་འགྲོ་བར་མི་འགྱུར་ན་དེའི་ཕྱིར་བདག་གིས་འཕགས་པའི་སྲས་བཟུང་ནས་དེར་འགྲོ་བར་འགྱུར་ཏེ། གང་དུ་སླར་འདི་མཐོང་བར་འགྱུར་བ་མ་

Vol. 169 · folio 151a

ཡིན་པ་ཞེས་བྱ་བ་བདག་ཉིད་ཀྱི་གྲིབ་མ་དེ་ལ་སྨྲས་ནས་ལུས་དེ་ཕྲག་པ་ལ་བཀལ་ཏེ་སོང་བར་གྱུར་ཏོ། །ཅིའི་ཕྱིར་སྐྱེས་པ་འདི་སླར་བུད་མེད་འཛིན་ཅིང་འབྲོས་པར་གྱུར་པ་རེ་ཞིག་འདི་ལ་དྲི་བར་བྱའོ་སྙམ་དུ་རྣམ་པར་བསམས་ནས། །ཀེ་ཤའི་དྲུང་དུ་ཉེ་བར་འོངས་ཏེ་སྨྲས་པ། །

བདག་ནི་ཁྱོ་དང་ལྡན་པ་འགྲོ་ཞིང་རྣམ་མཐོང་ནས། །ཁྱེད་ནི་ཀུན་ནས་དོགས་པར་གྱུར་པ་ཅི་ཕྱིར་འབྲོས། །བདག་ཉིད་ཆེན་པོ་བདག་ནི་ཤ་ཟའི་བུད་མེད་མིན། །དེ་བས་དོགས་པ་དོར་ཅིག་བདག་ལ་ཉེར་བསྟན་འདིར། །བྱང་ཆུབ་སེམས་དཔས་སྨྲས་པ། སྲིང་མོ་བདག་ནི་ཁྱེད་ལ་འཇིགས་པ་

མ་ཡིན་ཏེ། །འོན་ཀྱང་སྐྱེས་པ་གཞན་ལ་སྡང་བར་བྱེད་པའི་ཆུང་མ་འདི་བཟུང་ནས་གང་དུ་མི་རྣམས་ཡོད་པ་མ་ཡིན་པ་དེར་འགྲོ་བར་བགྱིའོ། །ཁྱོད་ཀྱི་ཁྱོ་བོ་འདི་ནི་ལྷན་ཅིག་ཆོས་སྤྱོད་མ། །བདག་གི་འདི་ལ་མཉེས་གཤིན་པར་ནི་གཞན་ཡང་ལྟ། །ཁྱོད་ནི་མཛའ་བོ་ཡང་ནི་མཐོང་

ནས་ངོ་ཚ་བས། །བདག་གི་མཛའ་བོ་མིག་གཉིས་པོ་ནི་འཛུམས་པར་བྱེད། །ཇི་ལྟར་ཀུན་ནས་མཐོང་སྟེ་ཡང་ཡང་རྣམ་པར་དགའ། །གསལ་བར་བྱེད་ཅིང་འཇམ་པར་བྱས་ནས་ངོ་མཚར་བྱེད། །དེ་ལྟར་བདག་གི་ལྷན་ཅིག་ཆོས་སྤྱོད་མ་འདི་ལ། །ཁྱོད་ཀྱི་མཛའ་བོ་འདིས་ནི་འཕྲོག་

བྱེད་ཀུན་ནས་རྟོག །བདག་གི་བུད་མེད་འདི་ནི་དགའ་བར་བྱེད་མཐོང་ནས། །མཛེས་པའི་མིག་ནི་བརླ་དང་འོ་འཛིན་གཉིས་མཛེས་པ། །ཐུབ་པ་རྣམས་ཀྱི་སེམས་ཀྱང་གཞན་དུ་འགྱུར་བ་སྟེ། །བུད་མེད་ཁྱོད་ནི་འདོད་པ་ཅན་འདི་ལྟ་ཅི་སྨོས། །དེ་བས་འདི་ནི་རི་བོང་ཅན་གྱི་དཀྱིལ་འཁོར་

ལྟར། །བཞིན་ལྡན་རང་གི་མཛེས་པས་ལྷ་དབང་བུད་མེད་ནི། །ངོ་ཚ་དང་བཅས་དབུ་མ་ལྟར་ནི་དབང་ཆེན་གྱིས། །ལུས་ལ་བཟུང་ནས་ས་འཛིན་རྣམས་ཀྱི་ཕུག་རྣམས་སུ། །བདག་ཉིད་ཀྱིས་ནི་ཡུན་རིང་གནས་པར་བགྱི་བ་ལགས། །དེས་སྨྲས་པ། འཕགས་པས་འདི་ལྟར་ཀུན་

ནས་དོགས་པར་བྱ་བ་མ་ཡིན་ཏེ། །ཁྱོད་ཀྱི་ཆུང་མ་ཚུལ་ཁྲིམས་བཟང་ལྡན་ཕྱིར། །འདི་ནི་ཇི་ལྟར་སྐྱེས་པ་གཞན་ལ་སྡང་། །གཞན་གྱི་ཁྱིམ་ཐབ་སྤོང་བའི་སེམས་ལྡན་པ། །དེ་བཞིན་བདག་གི་ཁྱོ་བོ་འདི་ཡང་ཡིན། །རང་གི་བཟང་མོ་འདི་ནི་ཁྱོད་ཀྱིས་རྣམ་བརྒྱན་ཅིང་། །

Vol. 169 · folio 151b

བདག་ཀྱང་མཛེས་པའི་རྒྱན་གྱིས་ཅིག་ཅར་གནས་པར་བགྱི། །ཚུལ་ཁྲིམས་སྡུག་བསྔལ་མཉམ་པ་རྣམས་ལ་གྲོགས་པོ་ཉིད། །ཤེས་བྱའི་གྲགས་པ་འབྲས་བུ་དང་ནི་བཅས་པར་གྱིས། །བྱང་ཆུབ་སེམས་དཔས་སྨྲས་པ། ཁྱོད་ནི་བདག་པོའི་ཚུལ་ཁྲིམས་ཞེས། །གལ་ཏེ་བུད་མེད་

མཆོག་བདེན་ནས། །དེ་བས་ཆུ་བོ་འདི་བརྟེན་ནས། །བདག་ཅག་འདིར་ནི་གཅིག་ཏུ་གནས། །དེས་སྨྲས་པ། བློ་ལྡན་འཕགས་པའི་སྲས་ཀྱིས་ནི། །ཚུལ་ཁྲིམས་ཇི་ལྟར་མ་ཤེས་ནས། །ཁྱེད་ལ་འདི་ལྟར་སྨྲ་འགྱུར་བ། །དེ་བས་དོགས་པ་ཡོངས་སུ་དོར། །དེ་ལྟར་བགྱི་ཞེས་བྱ་བ་ཡང་

བྱང་ཆུབ་སེམས་དཔས་ཁས་བླངས་ཆུ་བོའི་འགྲམ་གྱི་ཤིང་གི་རྩ་བ་ལ་རུས་པའི་ཀེང་རུས་དེ་བཞག་ནས་རྒྱན་བྱེད་པའི་ཕྱིར་བརྩམས་པ་ལ་བུད་མེད་དེས་ཀྱང་བདག་ཉིད་ཀྱི་ཁྱོ་ཤི་བའི་ལུས་ལ་བརྒྱན་པར་བྱས་ཏེ། གཉིད་ཀྱི་དབང་དུ་སོང་བར་གྱུར་ཏོ། །དེ་ན་བྱང་ཆུབ་སེམས་དཔས་དེ་གཉིད་ལོག་

པར་ཤེས་ནས། གཉིས་པོ་དེ་དག་སྐྱེ་ནི་ཐག་པས་དེར་བཅིངས་ཏེ། །ལུས་གཉིས་བཀྲུས་པའི་པདྨའི་རྩ་བ་ལྟར་དཀར་བ། །འགྲམ་གྱི་མཐའ་མར་གོམ་པ་སྒྲ་མེད་ཉེར་སོང་ནས། །ཆུ་བོ་དེ་ལ་མ་དཔྱད་པར་ནི་དོར་བར་གྱུར། །མྱ་ངན་གྱིས་ནི་ཧ་ཧ་ཞེས་བརྗོད་ཐབས་ཤེས་པ། །དེ་ནས་གཉིད་ཀྱི་

དབང་སོང་དེ་ལ་དེས་ནི་རབ་བསད་ནས། །བདག་གི་མཛའ་མོ་ཁྱོད་ཀྱི་བདག་པོ་འདི་ནི་འཕྲོག་པ་སྟེ། །དེ་ལྟར་ཤིན་ཏུ་ཕོངས་པའི་ཡི་གེ་དང་ལྡན་དེ་སྨྲས་གྱུར། །དེ་ནས་གཉིས་པོ་དེ་དག་ཀྱང་ཤི་བའི་ལུས་གཉིས་ཆུས་ཁྱེར་བར་གྱུར་པ་ཀུན་ནས་མཐོང་ཞིང་ཀྱི་ཧུད་ཧ་ཧ་ཞེས་བྱ་བ་བརྗོད་ཅིང་ཆུ་བོ་དེའི་

འགྲམ་ནས་མངོན་པར་རྒྱུག་པར་གྱུར་ཏེ། དེ་དག་དེ་ལྟར་མྱུར་རྒྱུག་ཅིང་། །རོ་གཉིས་རྣམ་པར་མཐོང་བ་དག །དབུ་བ་འཁོར་ཞིང་གཡོ་བ་ཡིས། །ཆུ་བོ་དེ་ནི་དགོད་དང་འདྲ། །དེ་ནས་བུད་མེད་དེ་ཆུ་བོའི་འགྲམ་ནས་རྒྱུག་ཅིང་ཤི་བའི་རོ་ལ་མིག་མཆི་མས་ཡོངས་སུ་གང་བ་དང་ལྡན་པས་ཡང་

ནས་ཡང་དུ་འདི་ལྟར་ངན་པ་སྨྲ་བར་གྱུར་པ། གང་ཞིག་ཨུ་ཤི་ར་ཡི་རྣམ་པའི་བྱུག་རྣམས་ཀྱིས། །གསལ་བའི་དྲིས་ནི་བདག་གིས་ཁྱོད་བརྒྱན་པ། །གཞན་གྱི་ཁྱིམ་ཐབ་འཕྲོག་པ་ཁྱོད་ཀྱིས་ནི། །མཉེས་གཤིན་འབྲས་བུ་དེ་འདི་གསལ་བར་བྱས། །བདག་གིས་བསྟོད་ཚིག་བར་མཚམས་

Vol. 169 · folio 152a

མ་ཆད་དང་། །ལག་པ་ཡང་དག་འཛིན་དང་གུས་ལྟ་དང་། །ཤིན་ཏུ་དྲག་པའི་སེམས་ལྡན་ཁྱོད་ཀྱིས་ནི། །ཇི་ལྟར་གསུམ་པོ་འདི་ནི་བསམ་མ་བྱས། །ཤིན་ཏུ་འཇམ་པ་བདག་གི་བུད་མེད་ནི། །སྐལ་བཟང་གལ་ཏེ་ཡང་ནི་འདིར་གྱུར་ན། །དེ་ལྟ་ན་ཡང་རྟག་ཏུ་རྗེས་

འཇུག་འདིར། །འཕགས་མིན་བདག་ནི་དོར་བར་བྱེད་མཛེས་མིན། །བུད་མེད་རྣམས་ཀྱི་ཡིད་ནི་གསོ་བ་སྟེ། །སྐྱེ་བོའི་གྲགས་པ་འདི་ནི་མི་བདེན་འགྱུར། །བདག་ཉིད་དམ་པ་དི་རིང་དོར་ནས་འགྲོ། །སྐྱེས་པ་རྣམས་ལ་བདེན་ཉིད་ཁྱོད་ཀྱིས་གཞག །གཞན་གྱི་བུད་མེད་ལ་ནི་ཆགས་པ་རྣམ་

འགྲེལ་ཁྱེད་ཉིད་ལ། །མཉེས་གཤིན་མེད་པའི་སེམས་ལྡན་བརྩེ་དང་དུལ་བ་རྣམ་བྲལ་བ། །བདག་གི་ཚིག་ནི་ཕོངས་ཤིང་ཕོངས་འདི་གནས་པ་མ་ཡིན་ཏེ། །ཚ་བའི་ལྕགས་ལ་ཉུང་བའི་ཆུ་ནི་རྣམ་པར་བླུགས་པ་བཞིན། །དེ་ནས་བྱང་ཆུབ་སེམས་དཔས་དེ་ལྟར་ཤི་བའི་ལུས་ལ་ངན་པ་སྨྲ་བཞིན་པ་

དེ་ལ་སྐད་ཅིག་གིས་སྡུག་བསྔལ་དང་ལྡན་པ་དང་། སྐད་ཅིག་གིས་ཁྲོ་བ་དང་ལྡན་པ་དང་། སྐད་ཅིག་གིས་སྨྲེ་སྔགས་འདོན་པ་དེ་ལ་སྨྲས་པ། །མཉེས་གཤིན་པ་དང་བྲལ་བའི་ཡིད་ལྡན་ཁྲེལ་དང་རྣམ་བྲལ་བ། །འཇིག་རྟེན་སྨོད་པ་ལ་ནི་རྒྱབ་ཕྱོགས་གཡོ་ལ་མངོན་བརྩོན་པ། །མཉེས་

གཤིན་སྐྱེ་བོ་ངན་ལ་གང་ཞིག་འདི་ལྟར་མངོན་སྨྲ་བ། །རྨོངས་པས་དོན་མེད་དགོན་པར་ངུ་བ་དེས་ནི་བྱེད་པར་འགྱུར། །བདག་གིས་ཁྱོད་ལ་ཡང་དང་ཡང་དུ་སྨྲས་པ་སྟེ། ཅི་ལྟར་ཁྱོད་ཀྱི་ཁྱོ་ཕོ་འདི་བདག་གི་བུད་མེད་ངོ་ཚ་བས་ཐུར་དུ་ལྟ་བའི་གདོང་ཅན་ལ་ཡང་དགོད་ཅིང་སྒེག་པ་དང་བཅས་པར་ལྟ་བ་ངེས་

པར་འདི་བདག་གི་བུད་མེད་འདོད་པ་ཞེས་ཟེར་རོ། །དེ་ལ་ཡང་ཁྱོད་ཀྱིས་དད་པར་བྱ་བ་མ་ཡིན་ནོ་ཞེས་དེ་ལྟར་སྨྲས་ནས་བདག་ཉིད་ཆེན་པོ་དེས་ལྷན་ཅིག་སྐྱེས་པ་མ་ཡིན་པའི་སྨྲེ་སྔགས་འདི་ལྟར་བྱས་པར་གྱུར་ཏོ། །སྒེག་མོ་དེས་ནི་བདག་གི་མིག་ནི་འཛིན་བྱེད་ཅིང་། །ཀུན་ནས་འཛག་པའི་

མཆི་མས་མིག་ནི་བཀག་བྱས་པ། །བུད་མེད་ཁྱོད་ཀྱི་སྲོག་དང་མཉམ་པ་དེས་བདག་གི། །མཛའ་མོ་ཕྲོགས་ཏེ་ཉི་མར་ལྡན་པས་མཚན་མོ་ལྟར། །བདག་ནི་དེ་དང་བྲལ་བས་བརྟན་པ་རྙེད་འགྱུར་མིན། །རྟག་ཏུ་རྗེས་འབྲེལ་གླང་ཆེན་གྱིས་ནི་གླང་མོ་ལྟར། །བདག་དང་བྲལ་བས་དེས་

Vol. 169 · folio 152b

ཀྱང་བརྟན་པ་ཐོབ་མི་འགྱུར། །རི་དགས་མོ་ནི་ནུས་མེད་རི་དགས་དང་བྲལ་ལྟར། །དེ་ལྟར་བྱང་ཆུབ་སེམས་དཔས་སྨྲེ་སྔགས་འདོན་ཅིང་བུད་མེད་དེ་གོས་ཀྱིས་མགྲིན་པར་བཅིངས་ཏེ་གུས་པར་བྱེད་ཅིང་སྨྲས་པ། དེ་བས་ཐ་སྙད་ཕྱིར་ཤོད་ཅིག །རྒྱལ་བར་ངེས་པར་བདག་ཅག་འགྲོ། །ཡང་

ན་བདག་གི་མོ་འོངས་ཤིག །བདག་ཉིད་ངན་པ་དེས་ཕྲོགས་པ། །དེ་ལྟར་བྱང་ཆུབ་སེམས་དཔས་འགུགས་པར་གྱུར་པར་དེ་འཇིགས་པས་ཡིད་སྐྱོ་ནས་སྨྲས་པ། །ད་ནི་བདག་གི་ཆུང་མ་དེ་ཡོད་པར་ཅིའི་ཕྱིར་ནུས་ཏེ་འཕགས་པས་བཀའ་དྲིན་མཛོད་ཅིག་དང་། བདག་གི་སྲིང་མོའི་བུ་མོ་

ཡོད། །ཅུང་ཟད་ནུ་མ་མངོན་འབྱུང་བ། །སློབ་མ་བཟང་ལ་སྔགས་བཞིན་དུ། །བདག་གིས་ཁྱེད་ལ་དེ་སྦྱིན་གྱི། །བྱང་ཆུབ་སེམས་དཔས་སྨྲས་པ། བདག་ལ་ལྷའི་བུ་མོ་གཞན་གྱིས་ཀྱང་དགོས་པ་ཡོད་པ་མ་ཡིན་ཏེ། མཆོག་གི་གདོང་ཅན་ཆུང་མ་དེ་ཁྲིད་ལ་ཤོག་ཅེས་སྨྲས་སོ། །གལ་ཏེ་

ཁྱོད་ཀྱི་དེ་མོའོ། །བདག་གི་བུད་མེད་གཡོན་ལྟའི་མིག །རྡོ་བ་ཆེན་པོ་འདི་ཡིས་ནི། །ཁྱོད་ཀྱི་མགོ་བོ་ཕྱེ་མར་བྱ། །དེ་ནས་བྱང་ཆུབ་སེམས་དཔའ་རྡོ་བ་བླངས་ནས་བུད་མེད་དེ་ལ་ཀུན་ནས་བརྡུང་བར་འདོད་པ་བཞིན་དུ་ཁྲོ་གཉེར་གསལ་བར་བྱས་སོ། །དེ་ནས་བུད་མེད་དེ་འཇིགས་

པས་འཕགས་པ་བཀའ་དྲིན་མཛོད་ཅིག་དང་། བདག་ནི་ཕོངས་པ་དང་གཉེན་འདུན་མེད་པ་རྣམ་པར་འཇིགས་པར་འོས་པ་མ་ཡིན་ཏེ། ནོངས་པ་བྱས་ཀྱང་བུད་མེད་སྐྱེ་བོ་ནི། །རང་བཞིན་གྱིས་ཕོངས་སྐྱེ་བཟངས་རྩེ་བར་བྱེད། །དེ་ལྟར་ཁྲོས་པ་འདི་ནི་བསྡུས་མཛོད་ཅིག །བློ་གྲོས་བརྟན་པ་བདག་ནི་

གསད་བྱ་མིན། །དེ་ལྟར་སྨྲས་ནས་བྱང་ཆུབ་སེམས་དཔའི་རྐང་པ་དག་ལ་གཏུགས་པར་གྱུར་ཏོ། །དེ་ནས་བདག་ཉིད་ཆེན་པོ་དེས་འཇིགས་པ་དེ་ཤེས་ནས་སྨྲས་པ། གལ་ཏེ་ཁྱོད་ཁོ་བོ་ཅག་གི་ཚིག་བྱེད་པར་གྱུར་ན། དེ་བས་ན་བདག་གི་རྡོ་བ་འདི་ཁྱོད་ཀྱི་མགོ་བོ་ལ་ཕོག་པར་འགྱུར་བ་མ་ཡིན་ནོ། །

དེས་སྨྲས་པ། ཁྱོད་ཀྱི་བཀའ་ནི་བདག་གིས་འདའ་བར་བྱ་བ་མ་ཡིན་ཏེ་འཕགས་པས་སྨྲ་བར་འོས་སོ་ཞེས་ཟེར་རོ། །བྱང་ཆུབ་སེམས་དཔས་སྨྲས་པ། གལ་ཏེ་ཁྱོད་ནི་འདའ་བར་མི་བྱེད་ན་བདེ་བ་དང་ལྡན་པ་འབྱུང་བར་འགྱུར་རོ། །དེ་བས་ན་ཉོན་ཅིག་དང་། ཁྱོད་ཀྱིས་ཁྱོ་བོ་ཤི་བ་ཡི། །

Vol. 169 · folio 153a

ལུས་པོ་དེ་ནི་ཕྲག་པར་ཁྱེར། །དེ་ལྟར་རྨོངས་པ་རྣམས་ཤེས་ན། །མུན་པ་བཞིན་དུ་དོར་བར་གྱིས། །ཡང་དང་ཡང་དུ་འགྲོ་འགྲོ་ཞིང་། །ཡང་དང་ཡང་དུ་སྟེང་དུ་འབྱུང་། །སྐྱེ་དགུའི་བདག་པོ་ལག་ཐོབ་པ། །སྐྱེ་འདི་ཕོ་ལོང་བཞིན་དུ་བྱེད། །ནན་གྱིས་དུས་མིན་གསོད་

པར་བྱེད་པ་སུ་ཡི་འདི། །མི་རྟག་པ་ཉིད་གཟུགས་ནི་མནན་ནས་འབྱུང་བ་མིན། །རབ་ཏུ་དྲག་པའི་ཤུགས་དང་ལྡན་པ་རླུང་གིས་ནི། །འགྲོ་བ་ཆུ་གཏེར་ཚོགས་ནི་རིང་མིན་འབྱུང་བ་བཞིན། །དུས་མཐའི་དུས་ལ་རབ་ཏུ་སྟོབས་ལྡན་མེས་འབར་བ། །ཡང་ཡང་ལྟོ་བ་ཟླུམ་པོའི་ཉ་ཡིས་

ཀུན་ནས་ཁྱབ། །ས་འོག་གནས་པ་འཇིགས་པའི་སྦྲུལ་གྱི་ཚོགས་ལྡན་པ། །རྒྱ་མཚོ་ཆེན་པོ་ཡང་ནི་ཟད་པར་འགྲོ་བར་འགྱུར། །སྣ་ཚོགས་པ་ཡི་དཔག་བསམ་ཤིང་གིས་པར་བརྒྱན་པ། །ལྷ་ཡི་བུད་མེད་རྣམས་ཀྱིས་པདྨོའི་ཆུ་བརྟེན་པ། །གསེར་གྱི་ཕུང་པོ་མེ་ཡིས་རྣམ་

པར་ཞུ་བ་ནི། །རི་རབ་ཀྱང་ནི་རས་བལ་བཞིན་དུ་ཡང་བར་འགྱུར། །མཆོད་སྦྱིན་བརྒྱ་པའི་ཡིད་ནི་འཕྲོག་པ་རྣམས་སྤངས་ནས། །ལྷ་རྣམས་ཀྱིས་ནི་གྲོང་ཁྱེར་ལྷ་མིན་རབ་ཚ་བ། །འབྱོར་པ་འབར་བ་གང་དུ་ཡང་ནི་འགྲོ་འགྱུར་ཏེ། །སྤྲིན་རྣམས་ཟད་ལ་སྒེག་པ་མེད་པའི་

གློག་བཞིན་ནོ། །འདི་དག་ཀྱང་ནི་མུན་པ་རྣམ་རྒྱས་འབིགས་བྱེད་པ། །ཉིན་དང་མཚན་མོའི་ཁྱད་པར་དག་ནི་ལྡན་པ་ལྟར། །འགྲོ་བའི་མར་མེ་ཉི་མ་བསིལ་བའི་འོད་ཟེར་དག །དམར་བའི་སྟོབས་ལྡན་དཀྱིལ་འཁོར་སྣང་བར་གྱུར་པ་མིན། །གང་ཞིག་སྐྱེ་བ་དང་ལྡན་ཅུང་ཟད་ས་

གསུམ་པོ་འདིར་ཡོད། །དེ་དག་ཐམས་ཅད་ཉིད་ནི་ངེས་པར་འཇིག་པའི་མཐའ་མ་ཅན། །དེ་ལྟར་ཤེས་ན་སྐྱེ་དང་འཆི་བའི་སྡུག་བསྔལ་རྗེས་འབྲེལ་བའི། །འཇིག་རྟེན་ལ་ནི་རྣམ་སྐྱོ་ཞི་བ་ཉིད་ལ་ཡིད་གཏད་བྱ། །གང་ཞིག་བློ་ངན་གཉེན་འདུན་རྣམས་ལ་མཉེས་གཤིན་ངེས་ཞུགས་བྱེད། །

དེ་ནི་ཐ་མར་ཡོངས་གདུངས་མྱ་ངན་བྱེད་ཅིང་ཉེར་འགྲོ་བ། །འཇིགས་པའི་ཆུ་སྲིན་ལ་བརྟེན་ཆུ་བོའི་དབུས་དག་ཅེས། །རྒྱ་མཚོར་གཟིངས་དང་བྲལ་བས་རབ་ཏུ་ལྟུང་བ་སྟེར་བར་བྱེད། །སུ་ཡི་རྣམ་བྲལ་ཡོད་པར་མི་འགྱུར་ཏེ། །སྐྱེ་བོ་མཉེས་གཤིན་དེ་རིང་མི་འགྱུར་བ། །བཟང་མོ་འབྱུང་བར་

Vol. 169 · folio 153b

འགྱུར་རམ་མི་འགྱུར་བ། །དེ་ལྟར་ཁྱེད་ཀྱིས་མྱ་ངན་བསང་བར་གྱིས། །དེ་ལྟར་བུད་མེད་དེས་བྱང་ཆུབ་སེམས་དཔའི་ཚིག་ཡང་དག་པར་ཤེས་ནས་དྲན་པ་ཉེ་བར་རྙེད་པས་སྨྲས་པ། ཨེ་མའོ་ཁྱོད་ཀྱིས་གདམས་ངག་གི་མར་མེ་འདིས་གང་ནས་ཀྱང་འོངས་བ་ཅི་ཡང་ཡང་དག་པ་མ་ཡིན་པའི་ཀུན་

དུ་རྟོག་པའི་མུན་པ་བསལ་བ་ཞེས་བྱ་བའོ། །ཁྱེད་ལ་བརྟེན་ནས་བདག་གི་སེམས། །ཇི་ལྟར་སོས་པ་ཉེར་སོང་བ། །དེ་བཞིན་ཡང་དག་ལམ་དམིགས་ནས། །ཁྱེད་ཀྱང་མྱ་ངན་འདས་ཐོབ་ཤོག །དེ་ནས་བྱང་ཆུབ་སེམས་དཔས་བུད་མེད་དེ་རང་བཞིན་དུ་གནས་པ་བཟུང་ནས་གཉེན་འདུན་རྣམས་ཀྱི་

མདུན་དུ་ཁྲིད་པར་གྱུར་ཏོ། །ཐབས་འདི་ནི་བདག་གི་བུད་མེད་འདི་ལ་གདོན་དེ་ཀུན་ནས་བསལ་བར་བྱས་སོ་ཞེས་བྱ་བ་ཡང་རང་གི་སློབ་མ་རྣམས་ལ་སྨྲས་པར་གྱུར་ཏོ། །བདག་ཉིད་ཆེན་པོ་དེར་སོང་བ་ལ་ཡང་འཇིགས་པ་དང་འདྲ་བ་གྲོང་ཁྱེར་དེ་ལས་ནད་རྣམས་སླར་རབ་ཏུ་འཇིག་པར་འགྱུར་རོ། །

དེ་ནས་དེར་ལ་ལ་ཞིག་བློ་གྲོས་གསལ་བའི་ཉེ་གནས་པས་བྱང་ཆུབ་སེམས་དཔའ་ལ་འདི་ལྟར་ཡང་དག་པར་བསྟོད་ཅིང་གནས་ཏེ། ཁྱོད་ཀྱི་ཤེས་རབ་ལྷག་བྱས་ནས། །བློ་ལྡན་རྣམས་ཀྱི་བློ་རྣམས་ལས། །ལྷག་པར་ཁྱེད་ཀྱི་ཤེས་རབ་འཇུག །དེ་ཉིད་མཐོང་བ་རྣམས་དབེན་རྣམས་ཀྱི་བླ་མ་ཁྱེད་ལ་

ནི། །ལྕི་བའི་ཚིག་ལྡན་ངེས་པའི་གཏམ་ནི་རྣམ་པར་རྒྱས་བྱེད་ལ། །མཁས་པ་རྣམས་ཀྱི་ཡིད་ནི་མུན་པས་ཟིལ་གྱིས་གནོན་མིན་ཏེ། །ཁང་པའི་ནང་ན་མར་མེ་འབར་བར་བྱེད་པ་བཞིན་དུ་ཡིན། །འདུན་པར་བློ་ལྡན་རྣམས་ཀྱི་འདུན་པ་ཆེན་པོ་འཇོམས་ཕྱིར་མི་ཤེས་པ་ནི་རབ་འབྱུང་མིན། །ཁྱེད་

ཀྱི་ངག་གི་རྣམ་པར་དབེན་བྱེད་ཐེ་ཚོམ་གཅོད་ཅིང་ཉོན་མོངས་མེད་པ་མ་ཐོབ་ནས། །གང་ཕྱིར་མཁའ་སྣང་རྣམས་ཀྱི་འོད་ཟེར་མཚན་མོ་ལས་བྱུང་རྣམ་ཁྱབ་རབ་རིབ་འཇོམས་པ་མིན། །མར་མེའི་ལྕེ་ནི་གཅིག་པུར་དྲི་མ་མེད་པས་སྲབ་པ་དེ་ནི་མ་ལུས་སེལ་བར་བྱེད། །ཁྱེད་ནི་རང་རིགས་མཁའ་

ཆེན་གྱི་ནི་ཟླ་ཡིན་ཁྱེད་ཀྱི་གྲགས་པ་རྣམས་ནི་སྐར་མ་རྣམས། །མཐུག་པའི་མུན་པའི་ཚོགས་ནི་རབ་ཏུ་ཉམས་པར་བྱེད་པ་ཁྱེད་ཀྱི་ངག་ནི་ཟླ་ཚེས་ཡིན། །ཉན་པ་པོ་རྣམས་ཀུ་མུ་ཏ་ཡི་འབྱུང་གནས་ལྟར་ནི་མདུན་དུ་འདི་རྣམས་རབ་ཏུ་སད་པར་འགྲོ། །ཨེ་མ་རྣམ་པར་ངེས་པའི་

Vol. 169 · folio 154a

གཏམ་གྱི་རྩོམ་པ་མཚན་མོའི་སྒོར་འབྱུང་ཀུན་ནས་རྫོགས་པ་འདི། །དོན་སྤྱིའི་གྲུབ་མཐའ་ལ་ནི་ཤིན་ཏུ་རྣོན་པོས་ཀྱང་ནི་ཉིད་ཀྱི་བརྗོད་བྱ་ཇི་ཙམ་རྟོགས། །དེ་ཉིད་མཐོང་བ་ཁྱོད་ཀྱི་གྲོལ་བ་ལ་ནི་ཉན་པ་པོས་ནི་དེ་ཉིད་གསལ་བར་མཐོང་། །སྔོན་རོལ་དུ་ནི་ཕྲད་པར་

འདོད་པའི་ཅི་ནུས་འཇོ་བར་བྱས་པའི་བ་ལས་འཐུང་བས་ནི། །ཕྱིས་ནི་ཤེ་མ་སྐྱོ་བར་མི་འགྱུར་སེམས་དང་ལྡན་པའི་ཕྱིར་ནི་བདེ་བར་འོ་མ་འཛིན། །དེ་བས་ན་སྐྱེ་བོ་འདི་མགོན་དང་བཅས་པ་སྟེ་གང་གི་གཟུགས་དང་ལྡན་པ་ལྟར་དམ་པའི་ཆོས་དང་ལྡན་པའི་མཁན་པོ་ཉིད་རྗེས་སུ་བསྟན་

པར་བྱེད་པ་ཡོད་དོ། །ཞེས་བྱ་བའོ། །དེ་ལྟར་ན་བཅོམ་ལྡན་འདས་དེ་བྱང་ཆུབ་སེམས་དཔར་གྱུར་པ་ན་འཇིག་རྟེན་པ་རྣམས་ལ་ཕན་པའི་དོན་ཉིད་ཀྱི་ཕྱིར་བདག་ཉིད་ཤེས་རབ་ཀྱིས་གསལ་བར་མཛད་པ་སྟེ། རང་གི་གྲགས་པ་ལ་ཆགས་པས་ནི་མ་ཡིན་ནོ་སྙམ་དུ་རྣམ་པར་བསམས་ནས་རྟག་

ཏུ་བཅོམ་ལྡན་འདས་ཉིད་ལ་དད་པ་བསྐྱེད་པར་བྱ་བའོ། །གཞན་རྣམས་ལ་ཕན་པར་བྱེད་པས་སམ་འཇིག་རྟེན་ལ་གུས་པར་བྱེད་པས་ཤེས་རབ་ཉེ་བར་འཕེལ་བར་བྱ་ཞེས་བྱ་བ་སྟེ། སྐྱེས་ཆེན་ལྷན་ཅིག་ཏུ་ནི་བདག་ཉིད་མཉམ་ཉིད་འདོད་པའི་དོན་དུ་གལ་ཏེ་བློ་ཡོད་ན། །ཡིད་ནི་གཞན་དུ་མིན་པའི་མི་ཡིས་

ཐོག་མ་ཉིད་དུ་ཡོན་ཏན་རྣམས་ལ་གུས་པར་བྱ། །ཐོས་པ་ལ་སོགས་ཡོན་ཏན་རྣམས་ལ་སྐྱེས་ན་ལེ་ལོ་ཅན་ནི་ཇི་ལྟར་གུས་བསྐྱེད་འགྱུར། །ནོར་བུ་ལ་ཡང་ཡིད་འོང་ཉིད་ནི་ཡོད་པ་འདུས་མ་བྱས་པར་སྐྱེ་འགྱུར་མ་ཡིན་ནོ། །སྲེད་མེད་ཀྱི་སྐྱེས་པའི་རབས་ཏེ་སྐྱེས་རབས་བདུན་པའོ།། །།

ཤེས་རབ་གསལ་བས་ངོ་མཚར་མིན་པ་རྣམས། །འཇིག་རྟེན་པ་ཡི་དོན་ནི་བྱེད་བཞིན་པ། །དོན་དམ་ཚོལ་བར་བྱེད་ལ་བརྟེན་པ་རྣམས། །སུ་ཞིག་ལ་ནི་ངོ་མཚར་སྐྱེད་མ་ཡིན། །འདི་ལྟར་རྗེས་སུ་ཐོས་ཏེ། རྒྱལ་པོའི་ཡོན་ཏན་ཐམས་ཅད་དང་ལྡན་པའི་རྒྱལ་པོ་ཚངས་པས་བྱིན་གྱི་བརྒྱན་པར་

བྱས་པའི་བཱ་རཱ་ཎ་སཱིའི་རྒྱལ་པོའི་ཁབ་ཏུ། མཚན་མོ་ཟླ་བ་ལྟར་བྲམ་ཟེ་ལ་ལ་ཞིག་རིག་བྱེད་འདོན་པ་ལ་མཁས་པ། ཁྱིམ་ན་གནས་པ་རྗེས་སུ་སྐྱོང་ཞིང་མེའི་མཆོད་པ་ལ་རྩེ་གཅིག་པ། འཇིག་རྟེན་ཐམས་ཅད་ཀྱི་མཆོད་གནས་ཁྱིམ་ལ་ལྷག་པར་གནས་པར་གྱུར་ཏོ། །དུས་གཅིག་གི་

Vol. 169 · folio 154b

ཚེ་ན་དེས་སྨན་གྱི་དོན་དུ་རི་དགས་ཀྱི་ཚོགས་དུ་མས་ཁྱབ་པ་ཤིན་ཏུ་མཐུག་པའི་ཤིང་རྣམས་ཀྱི་མུན་པ་དང་ལྡན་པ་ཤིན་ཏུ་ཡིད་འཕྲོག་པའི་ཆུ་བོའི་ཆུ་འགྲམ་གྱི་ཤིང་རྣམས་ཀྱི་རྩ་བའི་ཚོགས་དཀྲུགས་པ་གཡོ་བའི་རི་བོའི་ནགས་ཀྱི་ནང་དུ་རབ་ཏུ་ཞུགས་པར་གྱུར་ཏོ། །དཀའ་བའི་ནད་རྣམས་གཅོད་པའི་

སྨན་རྣམས་ཀྱི་ཁུར་པོ་བླངས་ནས་ཆུ་བོ་དང་ཉེ་བའི་བྲག་གི་དཀྱིལ་འགའ་ཞིག་ལ་ལྷག་པར་གནས་ཤིང་ངལ་བསོ་བར་གྱུར་ཏེ། སར་པའི་ཀ་ནི་ཀ་རའི་མེ་ཏོག་ལྟར་དཀར་པོ་ངེས་པར་འབྲེལ་བ་མི་གཡོ་བ་བུང་བའི་ཚོགས་ལྟར་སྐྲ་ལོ་ནག་པ། པདྨོའི་འདབ་མ་དང་རྗེས་སུ་མཐུན་པའི་མིག་དང་ལྡན་

པ། གསེར་དང་ཆུ་ཤིང་གི་སྙིང་པོ་ལྟར་ཡིད་དུ་འོང་བ་ཚོ་བའི་བརླ་གཉིས་དང་ལྡན་པ། ལང་ཚོ་དང་པོས་ཉེ་བར་རྒྱས་པའི་ལྕི་བའི་འོ་མ་འཛིན་པའི་ཁུར་བུས་ཡན་ལག་གི་སྲོག་ཤིང་ནུས་པ་མེད་ཅིང་དབུས་སྲབ་པ། རི་དང་ནགས་མཛེས་པའི་དོན་དུ་ལས་ཀྱི་བཟོ་བོ་རྣམས་ཀྱིས་སྐྱེས་པར་བྱས་པ་

དང་འདྲ་བའི་མི་འམ་ཅི་མོ་མཐོང་བར་གྱུར་ཏོ། །དེ་ནས་ཀྱང་དེའི་གཟུགས་མཛེས་པས་སྙིང་ཀུན་ནས་འགུགས་པ་ཅི་ལྟར་ཡང་རྣམ་པར་འགྱུར་བར་ཡང་དག་པར་སོང་བར་གྱུར་ཏེ། མི་འམ་ཅི་མོ་དེ་ནི་དེ་ལ་ངེས་པར་འབྲེལ་བའི་མིག །དབུགས་ཀྱིས་གསལ་བར་བྱས་པའི་སོ་ཡིས་མཛེས་པ་ཅན། །

འདར་བར་གྱུར་པའི་སེམས་ལ་མྱོས་བྱེད་མདའ་ཡིས་ནི། །གླགས་ནི་རྣམ་པར་ཤེས་པ་ཀུན་ནས་གདུང་བར་གྱུར། །སེམས་དང་རྣ་བ་དགའ་སྟོན་པ་ཡི་གླུ་ཡིས་ནི། །རི་དགས་རྣམས་ཀྱི་ཡང་ནི་ཡིད་ལ་ཆགས་པ་སྐྱེད། །དེས་ནི་རིམ་གྱིས་མེ་ཏོག་རྣམས་ནི་འཐུ་བྱེད་པ། །བྲམ་ཟེ་དེ་

དང་ཉེ་བར་ཀུན་ནས་འོངས་པར་གྱུར། །དེ་ནས་རྣ་བར་མིག་ནི་འགེགས་པ་དེ་མཐོང་ནས། །རི་བོང་ཅན་གྱི་མཚན་མའི་རི་མོ་ལྟར་མཐོང་དགའ། །མེ་ཏོག་རྒྱལ་མཚན་འགྲོ་བའི་ཡིད་ནི་རྨོངས་བྱེད་པའི། །མདའ་རྣམས་ཀྱི་ནི་ཡུལ་དུ་གྱུར་པར་དེ་སོང་གྱུར། །དེ་ནས་འཇིགས་པས་ཁྱབ་པ་དེ་ནི་དེ་ལ་སྨན་

འགྱུར་ཏེ། །ཡལ་ག་རྣམ་པར་དོར་ནས་ཀུན་འདར་ལག་པ་ཅན། །བུང་བ་མིག་ལ་རྣམ་པར་གནོད་པར་བྱེད་པ་འདི་ལས་ནི། །འཇིགས་པ་བདག་ལ་བྲམ་ཟེ་གཙོ་བོས་བསྐྱབ་པར་མཛོད། །དེ་ནས་དེ་ནི་ལངས་ཏེ་གློ་བུར་ཟླ་བའི་བཞིན། །རི་དགས་མོ་ཡི་མིག་ལྟར་རྒྱས་པའི་མིག་

Vol. 169 · folio 155a

ཅན་དེ་ལ་སྨྲས། །ཁྱོད་ཀྱི་མིག་ལ་གནོད་པའི་བུང་བ་ལ་ནི་བདག་གིས་དགག །ཆུ་ཤིང་ལྟ་བུའི་བརླ་ལྡན་དོགས་མེད་མེ་ཏོག་འདི་ཐུས་ཤིག །དེ་སྐད་སྨྲས་ནས་དེའི་གདོང་ལ་མངོན་པར་ལྷུང་བའི་བུང་བ་བསྲེལ་ཞིང་གནས་སོ། །མི་འམ་ཅི་མོ་དེས་ཀྱང་མེ་ཏོག་རྣམས་བཏུས་ཏེ་སྨྲས་པ།

གཡོ་བའི་སྦྲང་བྱེད་འདི་ལས་བདག་ནི་འཕགས་པའི་སྲས་ཀྱིས་ཡོངས་སུ་སྐྱོབ་པ་སྟེ། ཕན་པར་བྱས་པ་ལ་ཡང་གདོན་མི་ཟ་བར་སླར་ཕན་པར་བྱའོ། །དེ་བས་ན་འཕགས་པ་སྤྱོན་ཅིག །བདག་གི་གནས་སུ་བྱོན་ནས་ངལ་བསོ་སྟེ་གནས་ན་རུང་བའི་ཁ་ཟས་བཟའ་བར་བྱ་སྟེ་རང་གི་གནས་སུ་ཁྱེད་གཤེགས་པར་

མཛོད་ཅིག་ཅེས་ཟེར་རོ། །དེས་ཀྱང་དེ་ལྟར་བགྱིའོ་ཞེས་སོ་སོར་མཉན་ནས་མི་འམ་ཅི་མོ་དེ་དང་ལྷན་ཅིག་ཏུ་སོང་བར་གྱུར་ཏོ། །དེ་ནས་མི་འམ་ཅི་མོ་དེས་སྒོ་འགེགས་པར་བྱེད་པ་བྲག་ཆེན་པོ་བསལ་བར་བྱས་ནས་སྨྲས་པར་གྱུར་པ། འཕགས་པ་ཕུགས་འདིར་ཞུགས་ཤིག་ཅེས་ཟེར་རོ། །དེར་ཞུགས་པ་ལ་སླར་བྲག་དེས་ཕུག་གི་

སྒོ་སྒྲིབ་པར་བྱེད་པ་བྱས་པར་གྱུར་ཏེ། དེ་ནས་ཁྲེལ་ཡོད་པས་ནི་དུད་པའི་གདོང་ཅན་དེས་དེ་ལ། །འོ་མ་འཛིན་པ་དག་ནི་ལག་པ་གཉིས་ཀྱིས་དགབ་བྱས་ཤིང་། །དགོད་པས་འཇམ་པ་མངོན་པར་སྨྲ་བ་ལ་ནི་ཕྲད་འདོད་པ། །རྩེ་བར་གྱུར་ཏེ་ལྷ་ཡི་རྣམ་པར་རོལ་མ་བཞིན་དུ་ནི། །དེ་དང་ལྷན་ཅིག་འདོད་ལྷའི་མདའ་ཡིས་སེམས་ནི་

འབིགས་བྱེད་པ། །ཡིད་འཕྲོག་རི་མོ་གསུམ་གྱིས་ཡིད་དུ་འོང་བའི་དབུས་ལྡན་པས། །གཉིས་སྐྱེས་དེས་ནི་མཚན་མོ་སྐད་ཅིག་མ་ལྟར་བསམས་པ་ནི། །ཕྲད་པར་འདོད་པ་ཡིད་ཀྱི་བདེ་བ་ཀུན་ནས་ཉམས་མྱོང་བཞིན། །དེ་ནས་དུས་གཅིག་གི་ཚེ་ན་མི་འམ་ཅི་མོ་དེའི་ལྟོ་བར་བྱང་ཆུབ་སེམས་དཔའ་ཡང་དག་པར་སྐྱེས་

པར་གྱུར་ཏོ། །དུས་ཀྱི་རིམ་པས་ཀྱང་མཚན་ཉིད་ཐམས་ཅད་ཀྱིས་བརྒྱན་པར་བྱས་ཤིང་རང་གི་ལུས་ཀྱི་འོད་ཀྱིས་ཕུག་སྣང་བར་བྱེད་པ་དང་ལྷའི་གཞོན་ནུ་ལྟར་དེ་ལས་བུ་བཙས་པར་གྱུར་ཏོ། །དེ་ཡང་གང་གི་ཚེ་སྐྱེས་ནས་ལོ་བརྒྱད་ལོན་པ་དེའི་ཚེ་ཕའི་དྲུང་ནས་བསྟན་བཅོས་དུ་མ་རྣམས་ལྷག་པར་རྟོགས་པར་གྱུར་ཏོ། །

སྐར་མའི་རྩིས་ལ་ཡང་དེ་ལ་ཤིན་ཏུ་སྤོབས་པ་སྐྱེས་པར་གྱུར་ཏོ། །དེ་ནས་མ་དང་ལྷན་ཅིག་དེའི་ཕྱིར་བྱུང་ནས་ཤེས་བྱ་ལྷག་མ་རྟོགས་པར་བྱ་བའི་ཕྱིར་ཐུབ་པ་རྣམས་ལ་ཉེ་བར་བརྟེན་པར་གྱུར་ཏོ། །དེ་རྣམས་ལས་ཀྱང་ཤེས་པ་ཀུན་ནས་རྟོགས་ཏེ་ཉེ་བར་འོངས་ནས་ཕ་ལ་སྨྲས་པ། །ཕ་ལགས་གོམ་པའི་རྣམ་པར་

Vol. 169 · folio 155b

བཀོད་པས་ཀྱང་བདག་གིས་ནི་ཆོམ་རྐུན་ཤེས་སོ་ཞེས་ཟེར་རོ། །ཕས་སྨྲས་པ། ཆོམ་རྐུན་གྱི་རྐང་རྗེས་སུ་སླར་ཇི་ལྟ་བུ་ཡིན་ཞེས་བརྗོད་པར་གྱིས་ཤིག །དེས་སྨྲས་པ། སོར་མོ་བསྐྱོད་པས་ཐ་མར་རྡུལ་གྱིས་རྣམ་ཁྱབ་པ། །ཀུན་ནས་ཁྱབ་པ་ཉིད་ཀྱིས་མཉམ་པར་ཞུགས་པ་མིན། །དོགས་པའི་ཡིད་ཅན་

གྱི་ནི་རྐང་རྗེས་ཤེས་བྱས་ཏེ། །མྱུར་བའི་དབང་གིས་མདུན་གྱི་གོམ་པ་ལ་གནོད་པ། །གང་ཕྱིར་རྐང་རྗེས་རྣམ་པར་བཀོད་པས་ནི། །ཤེས་རབ་ཆེན་པོ་དེས་ནི་ཆོམ་རྐུན་ཤེས། །སྐྱེད་པར་བྱེད་པས་དེ་ཕྱིར་དེ་ཡིས་ནི། །རྐང་རྗེས་ཤེས་པ་ཞེས་བྱར་མིང་ནི་བསྒྲགས། །དེ་ནས་དུས་གཅིག་གི་ཚེ་ན་བདག་

ཉིད་ཆེན་པོ་དེ་མེ་ཏོག་དང་འབྲས་བུ་དང་རྩ་བ་ཉེ་བར་འོངས་པའི་ཕྱིར་མ་མོ་སོང་བ་དང་ཕ་ལ་དྲིས་པར་གྱུར་ཏེ། རེ་ཞིག་པའི་སྐྱེས་པ་འདི་ཉིད་ཡིན་ནམ་འོན་ཏེ་གཞན་འགའ་ཞིག་ཏུ་ཡིན་ནམ་ཅི་ཞེས་བྱ་བའོ། །བྲམ་ཟེས་སྨྲས་པ། བུ་བཱ་རཱ་ཎ་སཱི་ཞེས་བྱ་བ་རྒྱལ་པོའི་ཁབ་ཡོད་དེ་དེ་ནི་བདག་གི་སྐྱེས་པའི་ས་

ཞེས་ཟེར་རོ། །རྐང་རྗེས་ཤེས་པས་སྨྲས་པ། གལ་ཏེ་འདིར་ནི་གནས་ཤིང་སྐྱེས་པ་དང་ནི་ཕྲད་འདོད་ན། །ཕ་ལགས་མྱུར་དུ་བདག་དང་ལྷན་ཅིག་ཅི་ཡི་ཕྱིར་མི་འགྲོ། །མཁས་པ་རྣམས་ཀྱི་མདུན་སར་བསྟན་བཅོས་རྣམས་དབེན་བསལ་ཚིག་རྣམས། །ཉན་པའི་དོན་དུ་བདག་ལ་ཡང་ནི་ལྟད་མོ་སླར་

ཡང་ཡོད། །བྲམ་ཟེས་སྨྲས་པ། བུ་གལ་ཏེ་འདིར་ཤིན་ཏུ་ལྕི་བའི་བྲག་བསལ་བར་བྱ་བའི་ཕྱིར་ཚེ་དང་ལྡན་པ་ཁྱོད་ལ་ནུས་པ་ཡོད་པར་གྱུར་ན་དེ་ནས་ཕྱིར་དབྱུང་བར་བྱའོ། །དེ་ནས་རྐང་རྗེས་ཤེས་པས་བྲག་དེ་ལ་འབད་པ་མེད་པར་བསལ་བར་བྱས་ཏེ། ཕ་དང་ལྷན་ཅིག་ཏུ་བཱ་རཱ་ཎ་སཱིར་ཀུན་ནས་སོང་བར་གྱུར་ཏོ། །

བྲམ་ཟེ་དེས་ཀྱང་རྐང་རྗེས་ཤེས་པ་དེ་ལག་པ་ནས་བཟུང་སྟེ་སྒོ་སྐྱོང་རྣམས་ཀྱིས་རྣམ་པར་བསལ་བར་བྱས་པ་ཕྱི་རོལ་ན་གནས་པའི་སྐྱེ་བོ་མང་པོས་ཁྱབ་པ་དང་། ཉེ་བར་འདུག་པའི་གླང་པོ་ཆེའི་ཕྲུག་པ་དང་གླང་མོའི་རྐེད་པ་རྣམས་ལ་ཆབ་འོག་གི་རྒྱལ་པོ་ཀུན་ནས་འཇུག་པ་དང་། བོས་ཤིང་མྱུར་དུ་མངོན་པར་

ཕྱོགས་པའི་ཕོ་ཉ་འཇུག་པ་དང་། ཉེ་བར་གནས་པའི་སྒོས་སྟོང་པའི་རྟ་རྣམས་ཀྱི་ཁ་ནས་ཕོ་ཞིང་དབུ་བའི་དུམ་བུས་སའི་སྟེང་འདྲེས་པ་དང་། སའི་བདག་པོ་མཐོང་བའི་དུས་མངོན་པར་འདོད་པའི་གོས་དཀར་པོ་དང་ལྡན་པའི་ལག་པའི་དཀྱིལ་ནས་མེ་ཏོག་རྣམས་རྣམ་པར་གཞག་པའི་ཞབས་ཐོགས་པ་

Vol. 169 · folio 156a

རྣམས་ཀྱིས་གདན་འཛིན་པའི་གཉིས་སྐྱེས་རྣམས་ཀྱི་སྒོ་རྣམ་པར་མཐོང་བར་གྱུར་པ། ཕྲག་པ་གཡོན་པར་བཀལ་བའི་རལ་གྲི་དང་ལྡན་པའི་རྐང་ཐང་རྣམས་ཀྱིས་ཕྱོགས་གཅིག་ཏུ་ལྷག་པར་གནས་པ། མདུན་སར་ཚོགས་པའི་དུས་སུ་རྒྱལ་པོ་ཚངས་སྦྱིན་གྱི་རྒྱལ་པོའི་ཁབ་ཀྱི་ཉེ་འཁོར་

ཀུན་ནས་མཐོང་ཞིང་སྒོ་བ་ལ་ཞུས་ནས་ཞུགས་ཏེ། སེང་གེའི་ཁྲི་ལ་གནས་པའི་རྒྱལ་པོ་ལ་རྒྱལ་བའི་ཤིས་པ་བརྗོད་པས་མངོན་དུ་ཕྱོགས་པར་བྱས་ཏེ་སྨྲས་པ། རྐང་རྗེས་ཤེས་པ་བདག་གི་བུ་འདི་ནི། །ལྷ་ལགས་ཆོམ་རྐུན་རྐང་རྗེས་ཀྱིས་ཤེས་ཏེ། །འགྲོ་བ་ལ་ནི་སྦྱོར་ཞིང་ཡོངས་སྐྱོང་ཕྱིར། །དེ་བས་

ཁྱེད་ཀྱིས་འདི་ནི་བཟོད་པའི་རིགས། །དེ་ནས་རྒྱལ་པོ་དེས་ངོ་མཚར་བའི་བློ་དང་ལྡན་པས་རྐང་རྗེས་ཤེས་པ་ལ་གཟིགས་ནས་གསུངས་པ། འདི་ནི་གསེར་རྣམས་གཅད་པའི་འོད་ཀྱིས་གཟུགས་ལྡན་བྲང་ནི་སེང་གེ་ལྟར་རྒྱས་པ། །སེན་མོ་འཇམ་པའི་གྲིབ་མ་ཅན་ཏེ་བཞིན་ནི་རི་བོང་འཛིན་ལ་ལྷག་པར་གནས། །

བུང་བ་ལྟར་ནི་སྐྲ་རྣམས་ནག་ལ་མིག་གཉིས་རྒྱས་ཤིང་དཀར་བ་སྟེ། །དེ་ཉིད་རྣམས་ནི་རབ་ཏུ་རྟོགས་པ་འདི་ཡི་བློ་གྲོས་ཇི་ལྟར་འགྱུར་བ་མིན། །དེ་ལྟར་བརྗོད་པས་རྒྱལ་པོ་དེས་རྐང་རྗེས་ཤེས་པ་ལ་བཀུར་སྟི་ཆེན་པོ་བྱས་སོ། །དེ་ནས་བྱང་ཆུབ་སེམས་དཔས་སྨྲས་པ། ཁྱིམ་གཅིག་ལ་གནས་དོགས་པ་

ཡིས། །ཀུན་ནས་ཁྱབ་པའི་མིག་ལྡན་པ། །གང་ཞིག་བདག་གིས་སྟོན་པར་འགྱུར། །མི་བདག་ཁྱོད་ཀྱིས་དེ་བསད་མིན། །དེ་ལྟར་བགྱི་ཞེས་རྒྱལ་པོའི་བཀའ་ཐོས་ནས་རྐང་རྗེས་ཤེས་པའི་ཁྱིམ་དུ་ཀུན་ནས་འོངས་པར་གྱུར་ཏེ། དེ་ཡང་འདི་ལྟར་ཤེས་རབ་ཆེན་པོ་དང་ལྡན་པ་རྐང་རྗེས་ཤེས་གནས་

པ་ལ་གཞན་གྱི་རྫས་འཕྲོག་པ་ལས་རྣམ་པར་ལོག་པའི་ཆོམ་རྐུན་རྣམས་བསྐོར་བ་ལ་སོགས་པའི་ཐབས་ཀྱིས་སྲོག་འཚོ་བར་བྱེད་པས་འགྱུར་བ་ནི། སྒོ་རྣམས་ལྕགས་ནི་མ་བཅུག་པ། །བདེ་བར་སྐྱེ་བོ་གཉིད་ལོག་པའི། །ཁྱིམ་བདག་ནོར་ནི་བསལ་བར་བྱས། །མཚན་མོའི་ཁྱིམ་ན་གནས་པར་གྱུར། །

དེ་ནས་དུས་གཅིག་གི་ཚེ་ན་རྒྱལ་པོ་ཚངས་པས་བྱིན་ཤིང་རྟ་མཆོག་ལ་ཞོན་ནས་སྐྱེ་བོའི་འཁོར་དང་བཅས་པ་མདུན་ན་འདོན་རྟའི་ཐོག་ན་གནས་པ་དང་ལྷན་ཅིག་ཏུ་གཏམ་བྱེད་ཅིང་། །ཟླ་ཚེས་ཤར་བའི་དུས་ལྟར་ཤིན་ཏུ་དགའ་བར་གྱུར་པའི་བཙུན་མོའི་འཁོར་གྱི་སྐྱེད་མོས་ཚལ་ན་གནས་པ། མྱོས་ཤིང་

Vol. 169 · folio 156b

རབ་ཏུ་དགའ་བའི་སྐྱེ་བོ་དང་ལྡན་པའི་རང་གི་གྲོང་ཁྱེར་ལ་གཟིགས་ཤིང་ཕྱི་རོལ་དུ་ངེས་པར་འབྱུང་བར་གྱུར་ཏོ། །འགའ་ཞིག་གི་ཕྱོགས་གཅིག་ལ་ཡང་མྱོས་པའི་དབང་གིས་གཉིད་ལ་ཉེ་བར་ཞུགས་པ་ཕྲག་པའི་ཕྱོགས་ལས་མདུད་པའི་མེ་ཏོག་དང་བཅས་པའི་སྐྲ་ལོ་ལས་རྟ་བབས་ལས་ཀུན་ནས་

འཕོ་བའི་ཡ་ཕུབས་དང་འདྲ་བའི་གོས་ཀྱིས་ཕྱོགས་གཅིག་ཏུ་ལྷོད་ཅིང་རྣམ་པར་འབྲེལ་བའི་མུ་ཏིག་གི་ཧར་དང་ལྡན་པའི་བཟང་མོ་ཞེས་བྱ་བར་རེས་མའི་གཙོ་བོས་མཐོང་སྟེ། མདུན་ན་འདོན་ལ་སྨྲས་པ། བློ་གྲོས་ཆེན་པོ་དང་ལྡན་པ་ཆོམ་རྐུན་གྱི་རྐང་རྗེས་ཤེས་པའི་མཐུ་ལ་འཕགས་པས་གཟིགས་ཤིག །

གསལ་བར་བྱེད་པའི་བུད་མེད་འདི་ལ་ནི། །མྱོས་པའི་དབང་གིས་ཤིན་ཏུ་གཉིད་སྐྱེས་པའི། །གང་ཞིག་བཅིངས་པ་ཡང་ནི་ལྷོད་པ་འདི། །སུ་ཞིག་འཇིགས་པ་མུ་ཏིག་ཧར་མི་འཕྲོག །དེ་ནས་གདུག་པའི་བདག་ཉིད་མདུན་ན་འདོན་དེ་རང་བཞིན་གྱིས་གཡོ་བའི་ཡིད་དང་ལྡན་པས་བྱང་ཆུབ་སེམས་

དཔའི་ཡོན་ཏན་བརྗོད་པ་ལ་མི་བཟོད་པར་གྱུར་པས་སྨྲས་པ། །ཆོམ་རྐུན་གྱི་རྐང་རྗེས་ཤེས་པའི་སྐྱོན་ཅན་ཉིད་ལྷས་མཁྱེན་པ་མ་ཡིན་དེ་བས་ན་དེའི་འདི་ལྟར་ཡོན་ཏན་རྣམས་ཀྱི་བདག་ཉིད་ཆེན་པོ་བརྗོད་པར་མཛད། །རྒྱལ་པོས་སྨྲས་པ། སླར་དེའི་སྐྱོན་རྣམས་ནི་ཅི་ལྟ་བུ་ཡིན། མདུན་ན་འདོན་

གྱིས་སྨྲས་བ། །རང་ཉིད་ཀྱིས་ནི་ནོར་ཕྲོགས་པ། །ཁྱིམ་པ་རྣམས་ལ་མཚན་མོ་འདི། །གཡོན་ཅན་ཆོམ་རྐུན་རྐང་རྗེས་ཤེས། །ལྷ་ཡི་དྲུང་དུ་གསལ་བར་བྱེད། །དེ་ནས་རྒྱལ་པོ་དེས་དེ་ལྟར་བདག་གིས་བྱེད་པར་འགྱུར་ཏེ། ཇི་ལྟར་འཕགས་པས་ཆོམ་རྐུན་གྱི་རྐང་རྗེས་ཤེས་པའི་བདག་ཉིད་ཆེན་པོ་དད་པར་

འགྱུར་སྙམ་དུ་བརྗོད་ནས་ཤིང་རྟ་ལས་བབས་ཏེ། རང་ཉིད་ཀྱིས་རེས་མའི་གཙོ་མོ་དེས་མུ་ཏིག་གི་ཧར་དེ་བླངས་ནས་ལན་གསུམ་བསྐོར་བ་བྱས་ནས་རང་གི་ཕོ་བྲང་བཱ་རཱ་ཎ་སཱིར་འོངས་ཏེ། སེང་གེའི་ཁྲིའི་བདག་ཉིད་དུ་ས་ལ་བསྐོས་ཤིང་གཞག་པར་གྱུར་ཏོ། །དེ་ནས་རེས་མའི་གཙོ་མོ་དེ་མྱོས་པ་རྣམ་པར་

ཆད་པས་དྲན་པ་ཡང་དག་པར་ཉེ་བར་སྐྱེས་པ་གཉིད་ལས་རབ་ཏུ་སད་ནས་གོས་ཀྱི་མཐའ་མ་མཐོང་སྟེ། ཀྱི་ཧུད་བདག་གི་མུ་ཏིག་གི་ཧར་སུ་ཞིག་གིས་ཕྲོགས་སྙམ་དུ་རྣམ་པར་བསམས་ནས། ཡང་དག་པར་ཉེ་བར་འོངས་ཏེ་རྒྱལ་པོ་ལ་ཞུས་ཤིང་གནས་སོ། །གོས་ཀྱི་མདུད་པ་ལྷོད་པ་བཀྲོལ་བྱས་

Vol. 169 · folio 157a

ནས། །ས་ཡི་སྐྱོང་བ་བདག་ནི་གཉིད་ལོག་པའི། །གང་གིས་ཀྱང་ནི་མུ་ཏིག་ཧར་ཕྲོགས་པ། །ཟླ་འོད་ལྟར་དང་ནོར་བུའི་གཞི་ཡིས་ལྕི། །དེ་ནས་རྒྱལ་པོ་དེས་མདུན་ན་འདོན་གྱི་མངོན་སུམ་དུ་ཆོམ་རྐུན་གྱི་རྐང་རྗེས་ཤེས་པ་ལ་བོས་ནས་སྨྲས་པ། བཟང་མོ་འདི་ཡི་རིན་ཐང་

ཆེ་བའི་མུ་ཏིག་གི་ཧར་སུ་ཞིག་གིས་ཁྱེར་བ་སྟེ། དེ་བས་ན་ཆོམ་རྐུན་བརྗོད་པར་གྱིས་ཤིག་ཅེས་ཟེར་རོ། །དེ་ནས་ཆོམ་རྐུན་པའི་རྐང་རྗེས་ཤེས་པས་ཕྱི་རོལ་དུ་བྱུང་སྟེ། རྐང་པའི་རྗེས་བཀོད་པ་མཐོང་ཞིང་གྲོང་ཁྱེར་དེ་ལ་ལན་གསུམ་བསྐོར་བ་བྱས་ཤིང་། མིའི་བདག་པོའི་ཕོ་བྲང་དུ་རྗེས་སུ་ཞུགས་ནས་

སེང་གེའི་ཁྲིའི་འོག་གིས་ཀུན་ནས་མཐོང་ཞིང་ཡང་ཡང་དུ། །མི་ཡི་བདག་པོའི་བཞིན་ལྟ་ཞིང་། །བློ་གྲོས་ཆེན་པོ་དེ་བགད་གྱུར། །རྒྱལ་པོས་སྨྲས་པ། ཅིའི་ཕྱིར་འདི་དགོད་པ་སྟེ་འོ་ན་སྨྲོས་ཤིག་ཅེས་ཟེར་རོ། །རྐང་རྗེས་ཤེས་པས་སྨྲས་པ། ལྷ་ལགས་ཇི་ལྟར་བདག་གིས་མཐོང་བ་ནི་གང་

ཞིག་བཟང་མོ་འདི་ཡི་མུ་ཏིག་གི་ཧར་ཁྱེར་བའི་ཆོམ་རྐུན་པ་འདི་ཐ་མལ་པ་ནི་མ་ཡིན་ནོ། །རྒྱལ་པོས་སྨས་པ། འོ་ན་སྨྲོས་ཤིག་དང་། རྐང་རྗེས་ཤེས་པས་སྨྲས་པ། ལྷས་ནི་དཔེ་ཅིག་གསན་པར་འོས་པ་སྟེ་ཞེས་བྱ་བའོ། །ས་འཛིན་རྩིག་པའི་ལོགས་ལ་ས་ནི་རྐོ་བྱེད་ཅིང་། །འགའ་ཞིག་ཏུ་

ནི་རྫ་མཁན་རིགས་ནི་རྒྱས་པའི་ཕྱིར། །ས་དེ་ལྷུང་བར་བྱེད་པས་མནན་པར་གྱུར་པའི་ལུས། །སྡུག་བསྔལ་གྱིས་ཕོངས་དེས་ནི་སྐད་ཅིག་འདི་སྐད་སྨྲས། །གང་ལ་ཤིང་རྣམས་ཆེན་པོ་སྐྱེ་བར་འགྱུར་བ་དང་། །སྲོག་འཛིན་རྣམས་ཀྱིས་རྣམ་པར་སྦྱོར་ཕྱིར་ལོ་ཏོག་རྣམས། །ས་དེ་ཉིད་ཀྱིས་དེ་

རིང་བདག་གིས་ལུས་བཅག་པ། །འགྲོ་བ་འདིར་ནི་བདག་གིས་ཅི་ཕྱིར་བདེ་ཐོབ་འགྱུར། །དེ་ལྟར་བརྗོད་ནས་ཅང་མི་སྨྲ་བར་གྱུར་ཏོ། །དེ་ནས་རྒྱལ་པོ་དེས་རྐང་རྗེས་ཤེས་པ་ལ་སྨྲས་པ། འོ་ན་གསལ་བར་སྨྲ་བར་གྱིས་ཤིག །རྐང་རྗེས་ཤེས་པས་སྨྲས་པ། གལ་ཏེ་འདི་ལས་ཀྱང་ལྷས་ཤིན་

ཏུ་གསལ་བར་སྨྲ་བ་བཞེད་ན་དེ་བས་ན་དཔེས་གཞན་བརྗོད་པར་བྱ་སྟེ། མེ་ལ་མཆོད་པ་གཉིས་སྐྱེས་ལ་ལ་ཡོད་གྱུར་ཏེ། །ཆོ་ག་བཞིན་དུ་མེ་ལ་རབ་ཏུ་མཆོད་ཅིང་གྲགས་པ་ནི། །དེ་ཡི་མེ་སྟག་གིས་ནི་ལག་པ་ཚིག་པ་དེ། །ཁྱབ་པ་ཉེ་བར་སོང་བ་འདི་སྐད་སྨྲས་པར་གྱུར། །གང་ཞིག་བདག་

Vol. 169 · folio 157b

ནི་ཉིན་རེར་བསྲེག་ལུགས་ཀྱིས་མཆོད་པ། །འདུད་པའི་སེམས་ཀྱིས་ཀྱང་ནི་ཕྱག་ནི་བཙལ་བྱས་པ། །མེ་འདི་དེ་ཉིད་ཀྱེ་མ་བདག་ལ་སྲེག་བྱེད་པ། །ལུས་ཅན་རྣམས་ཀྱི་སུ་ཞིག་སྐྱབས་ནི་འབྱུང་བར་འགྱུར། །དེ་ཙམ་ཞིག་བརྗོད་ནས་སླར་ཡང་མི་སྨྲ་བར་གནས་པར་གྱུར་ཏོ། །རྒྱལ་པོས་སྨྲས་པ།

ཁྱེད་ཀྱི་ཚིག་འདི་བདག་ཅག་གིས་ཤེས་པ་མ་ཡིན་ཏེ། །དེ་བས་ན་ཤིན་ཏུ་མངོན་པར་གསལ་བའི་དོན་ཅི་ལྟར་འགྱུར་བ་དེ་ལྟར་སྨྲོས་ཤིག་ཅེས་ཟེར་རོ། །རྐང་རྗེས་ཤེས་པས་སྨྲས་པ། གལ་ཏེ་རྒྱལ་པོ་ཆེན་པོ་ཤིན་ཏུ་རབ་ཏུ་གསལ་བར་གཞན་ཡང་བཞེད་ན་དེ་བས་ན་གསན་པར་འོས་པ་སྟེ། ལ་ལ་ཁྲུས་ནི་

བྱ་ཕྱིར་ཆུ་བོའི་ཆུ་ལ་འཇུག་པ་སྟེ། །བྲམ་ཟེ་དེས་ནི་ཁྱེར་བར་གྱུར་པས་འདི་ལྟར་སྨྲས། །གང་ཞིག་ཆུ་ཞེས་སྐྱེས་སོ་འཚོ་བར་བྱེད་པ་དེ་ཉིད་ནི། །སྡུག་བསྔལ་ཅན་བདག་ཁྱེར་ཏེ་སུ་ལ་སྐྱབས་སུ་འགྲོ། །དེ་ལྟར་བརྗོད་ནས་སླར་ཡང་ཅང་མི་སྨྲ་བར་གནས་པར་གྱུར་ཏོ། །དེ་ནས་རྒྱལ་པོ་དེས་སླར་དེ་ལ་སྨྲས་པ། བྲམ་ཟེ་

ཆེན་པོ་འོ་ན་ཤིན་ཏུ་གསལ་བར་བརྗོད་པར་མཛོད་ཅིག་དང་། རྐང་རྗེས་ཤེས་པས་སྨྲས་པ། གལ་ཏེ་དེ་ལྟར་ཡིན་ན་དེ་བས་ན་ལྷས་གསན་པར་འོས་སོ་ཞེས་ཟེར་རོ། །ནགས་མཐའ་འགའ་ཞིག་ཏུ་ནི་འདབ་ཆགས་རྣམས་གནས་པ། །ཡུན་རིང་སྣ་ཚོགས་ཤིང་གི་ས་བོན་ཟ་བ་ནི། །དེ་ལས་བྱུང་བའི་རབ་

ཏུ་སྟོབས་ལྡན་མེ་ཡིས་ནི། །གཟི་བརྗིད་གསལ་བས་མཚན་རྣམས་སྟོབས་ཀྱིས་ཚིག་པར་བྱས། །གང་ཞིག་ནགས་ནི་མཐུག་པ་ཡིས། །ཤིང་གི་གྲིབ་ལྡན་འདབ་ཆགས་རྣམས། །དེ་ཉིད་ལས་ནི་བྱུང་བའི་མེ། །དེ་རྣམས་གང་ལ་སྐྱབས་སུ་འགྲོ། །རྒྱལ་པོས་སྨྲས་པ། འོ་ན་ཚིག་གི་དོན་རྣམ་པར་

གསལ་བར་ཁྱེད་ཀྱིས་སྨྲ་བར་འོས་པ་སྟེ། །ད་དུང་ཡང་བདག་ཅག་གིས་ཤེས་པར་འགྱུར་བ་མ་ཡིན་ནོ། །ཞེས་ཟེར་རོ། །རྐང་རྗེས་ཤེས་པས་སྨྲས་པ། རྒྱལ་པོ་ཆེན་པོ་ཤིན་ཏུ་གསལ་བའི་དཔེ་གསོན་ཅིག །ཞིང་པ་ལ་ལ་ཞིག་ཞིང་ལ། །ལོ་ཏོག་བསྐྱེད་པར་འདོད་པ་ནི། །ཐོང་གཤོལ་གྱིས་

ནི་རྨོ་ཞིང་གནས། །དགའ་བས་གཉའ་ཤིང་འཛིན་པ་ནི། །དེ་ཡི་བུ་མོ་འབྲས་ཆན་ནི། །བཟུང་ནས་གུས་པས་རྩེ་གཅིག་པ། །མྱུར་བར་ཞིང་སར་འོངས་པ་སྟེ། །ལང་ཚོས་ཡངས་པའི་མིག་ལྡན་པ། །དེ་ནས་འབྲས་སྣོད་འཇོག་བྱེད་ཅིང་། །དེ་ཡི་བསྟན་དང་ཡང་དག་ལྡན། །སྐེ་རགས་དང་

Vol. 169 · folio 158a

བྲལ་ལྷོད་པ་ནི། །མཚན་མའི་གོས་ནི་ལྷུང་བར་འགྱུར། །དེ་ནི་གཅེར་བུ་དེ་མཐོང་ཞིང་། །གྲོང་གནས་པ་ཡི་ཡིད་ལས་བྱུང་། །སོ་སོར་རྟོག་པ་མ་ཐོབ་པར། །འདོད་དང་བཅས་པ་སེམས་བཅས་འགྱུར། །དེ་ནས་ངོ་ཚས་འཇིགས་པས་གཡོ་བའི་མིག་ལྡན་དེ། །ལག་

པ་རྣམས་འདར་མཆི་མ་འབྱུང་བའི་མིག་ལྡན་པ། །ཡིད་འབྱུང་བས་ནི་ཆོས་ཀྱི་སེམས་དཔའ་རྒྱལ་བ་ནི། །འོངས་ཏེ་གཟུགས་འགྱུར་སྡུག་བསྔལ་ལྡན་མ་ཡང་། །བཙན་ཐབས་ཀྱིས་ནི་བྱ་མིན་ནད་པས་བྱས་ནས་ནི། །ཕྱིས་ནས་འགྱོད་པ་སྐྱེས་པས་གདུང་བ་དེས་སྨྲས་པ། །བྱ་མིན་འདི་

ལྟར་བྱེད་པ་བདག་ལ་ཇི་ལྟར་ནི། །བུ་མོ་ཁྱོད་ཀྱི་དི་རིང་འདིར་ནི་གེགས་མ་བྱས། །བུ་མོ་དེས་ནི་ངོ་ཚ་དང་བཅས་ཕ་དེ་ལ་སྨྲས་པ། །འཕགས་པ་ལགས་སྡུག་བསྔལ་ལྡན་པ་བདག་ལ་ཁྱོད་ཉིད་སྐྱབས་ཡིན་ཏེ། །དལ་བ་མིན་པ་ཆེན་པོ་གལ་ཏེ་ཁྱོད་ལས་འདི་འབྱུང་ན། །ད་ནི་གཞན་ལས་ཅི་ཡི་

ཕྱིར་ནི་བདག་ཉིད་སློང་བར་བགྱིད། །མངའ་བདག་ཉིད་ཀྱི་དྲུང་ནས་ནི། །གལ་ཏེ་སྡུག་བསྔལ་ཆེན་པོ་འབྱུང་། །འཇིག་རྟེན་འདི་ཡི་ཡིད་འཕྲོག་མ། །བདེ་བ་གང་ལས་སྐྱེ་བར་འགྱུར། །མུན་པ་འཕྲོས་པའི་འོད་ལྡན་པ། །གལ་ཏེ་མར་མེ་ཉིད་བྱེད་ན། །སྣང་བཅས་ཁྱིམ་ནི་འདོད་རྣམས་ཀྱིས། །སྣང་བ་

གང་ནས་སློང་བར་འགྱུར། །དེ་ལྟར་བདག་ཉིད་ཆེན་པོ་དེས་སྨྲས་ནས་སླར་ཡང་ཅང་མི་སྨྲ་བར་གནས་པར་གྱུར་ཏོ། །རྒྱལ་པོས་སྨྲས་པ། ཁྱེད་ཀྱིས་འདི་ཙམ་པ་སྨྲས་ཀྱང་འདི་ཅི་ཡིན་ཞེས་བདག་གིས་ཤེས་པ་མ་ཡིན་ནོ། །རྐང་རྗེས་ཤེས་པས་སྨྲས་པ། གལ་ཏེ་རྒྱལ་པོ་ཆེན་པོ་གཞན་ལ་ཉེ་བར་བསྟན་

པས་སྨྲས་པ། མཁྱེན་པ་མ་ཡིན་ན་དེ་བས་ན་གསལ་བར་བདག་གིས་བརྗོད་པར་འགྱུར་ཏེ། སྐྱེད་མོས་ཚལ་གྱི་ཐ་མར་གཉིད། །ལོག་པའི་ན་ཆུང་ལ་གསལ་བར། །མུ་ཏིག་གི་ཧར་ཁྱེད་ཉིད་ཀྱི། །མདུན་ན་འདོན་འདིས་མངོན་དུ་འཕྲོགས། །རྒྱལ་པོས་སྨྲས་པ། དེ་ནི་སླར་བདག་གིས་

གང་དུ་གཞག་པར་འགྱུར་ཞེས་ཟེར་རོ། །རྐང་རྗེས་ཤེས་པས་སྨྲས་པ། གལ་ཏེ་དེ་ལྟར་ཡིན་ན་དེ་བས་ན་སེང་གེའི་ཁྲི་འདི་བསལ་བར་མཛོད་ཅིག་དང་སེང་གེའི་ཁྲི་ཡང་བསལ་བ་དང་། དེ་ནས་དེའི་ས་འོག་བརྐོས་ནས་ནི། །སྐྱེ་བོ་དགོད་པས་རྣམ་པར་མཐོང་བར་གྱུར་པ་ནི། །ལྟོ་འཕྱེ་དཀར་

Vol. 169 · folio 158b

པོ་གཉིད་ལོག་ལྟར་ནི་རབ་བཟུང་ནས། །ཡིད་འཕྲོག་མུ་ཏིག་ཧར་ནི་ཀུན་ནས་བཏོན་པར་གྱུར། །དེ་ནས་རྒྱལ་པོ་ངོ་མཚར་སྐྱེས་ཏེ་སྐྱེ་བོས་ཀྱང་ནི་དེར། །དོན་དམ་ལ་ནི་མ་ལུས་འབྲེལ་བའི་བློ་ཅན་དེ་ཡི་མཁྱེན་པ་ཡིས། །སྐྱེ་ངན་དངོས་པོས་ཡིད་ནི་སྨོད་ཅིང་སྐྱེ་བཟང་ལ་བརྙས་ཅན། །ཁྲོ་བ་དང་བཅས་

ཉིད་ནི་མདུན་ན་འདོན་དེ་འབྱུང་བར་འགྱུར། །སྐྱེ་བོ་ཡོན་ཏན་ཅན་རྣམས་ཀྱི། །ཡོན་ཏན་ཕུན་ཚོགས་ཆེར་གྲགས་པ། །སེར་སྣས་ནོན་པའི་སེམས་ལྡན་པའི། །སྐྱེ་བོ་ངན་རྣམས་བཟོད་པ་མིན། །རེས་མའི་གཙོ་མོ་དེས་ཀྱང་མུ་ཏིག་གི་ཧར་བླངས་ནས་སེམས་དགའ་ཞིང་རང་གི་ཁྱིམ་དུ་སོང་བར་

གྱུར་ཏོ། །བྱང་ཆུབ་སེམས་དཔས་ཀྱང་གདན་ལ་ཀུན་ནས་ཉེ་འཁོར་དང་བཅས་པ་རྒྱལ་པོ་དེའི་ལམ་བཟང་པོ་རྟོགས་པར་བྱ་བའི་ཆོས་ཀྱི་བསྟན་པ་འདི་ལྟར་བྱས་པར་གྱུར་ཏེ། སྐྱེ་བོ་འདི་ཡི་ཕུན་ཚོགས་འདི། །སྡུག་བསྔལ་གྱིས་ནི་ཡང་དག་ལྡན། །དུག་ཅན་སྦྲུལ་གྱིས་ཤིས་བརྗོད་པ། །དུག་དང་ལྷན་ཅིག་སྐྱེས་

པ་ལྟར། །ནོར་གྱི་ཕྱིར་ནི་བྱ་མིན་རྣམས། །བདེ་བ་འདོད་པས་བྱེད་འགྱུར་བ། །དམྱལ་བའི་སྡུག་བསྔལ་ལས་འབྱུང་བས། །སྡུག་བསྔལ་ཆེན་པོ་མཐོང་མིན་པ། །ཡུལ་གྱི་མུན་པ་ལས་ནུབ་པའི། །ཚད་ནི་ཀུན་ནས་མཐོང་བྱེད་ཅིང་། །སྐྱེ་བོ་ཤི་བ་མིན་པས་སེམས་ཀྱི་ཁྱིམ་ལ་འབྲེལ་པ་འདེབས་

པར་བྱེད། །ཡུན་རིང་རེ་བའི་ལྟོ་འཕྱེ་མོ་ནི་ཉེ་བར་ཞི་བའི་བདེ་བའི་ཕྱིར། །ཆོག་ཤེས་སྔགས་ནི་ཐོབ་པའི་སྐྱེས་པ་ལ་ནི་ཀུན་ནས་ཡོད་པར་བྱེད། །ལོངས་སྤྱོད་རྣམས་ནི་ཐོབ་པའི་ཡིད་ལྡན་ངལ་བ་རྣམས་ལ་མ་བལྟས་གཞན་རྣམས་ལ་ནི་བརྟེན། །བསྙེན་པ་སྡུག་བསྔལ་སྐྱེད་པར་བྱེད་པ་སུ་ལའང་གནོད་

པར་མི་བྱེད་དགྲ་སྟའི་སོ་ལྟར་ནི། །གལ་ཏེ་གཏན་དུ་བ་ཡི་བདེ་བ་འདོད་ན་དེ་བས་ཆོག་ཤེས་ལ་ནི་དམིགས་པར་མཛོད། །རེ་བའི་མེ་སྟག་ཆོག་ཤེས་ལ་ནི་ཡང་དག་གནས་པའི་ཡིད་ནི་ཚིག་བྱེད་མ་ཡིན་ནོ། །དེ་ནས་རྒྱལ་པོ་དེས་ལེགས་སོ་ལེགས་སོ་ཞེས་བྱ་བས་བྱང་ཆུབ་སེམས་དཔའ་ལ་མངོན་

པར་བསྟོད་དེ། ཡོ་བྱད་ཆེན་པོས་གུས་པར་བྱས་ཏེ་རང་གི་ཁྱིམ་དུ་རྣམ་པར་བཏང་བར་གྱུར་ཏོ། །དེ་ལྟར་བཅོམ་ལྡན་འདས་དེས་སོ་སོའི་སྐྱེ་བོའི་གནས་སྐབས་སུ་ཡོད་པ་ན་ཡང་ཤེས་རབ་ཀྱིས་འཇིག་རྟེན་པ་རྣམས་ངོ་མཚར་བར་མཛད་ན། མངོན་པར་རྫོགས་པར་སངས་རྒྱས་ནས་ལྟ་སྨོས་

Vol. 169 · folio 159a

ཀྱང་ཅི་དགོས་སྙམ་དུ་རྣམ་པར་བསམས་ནས། སེམས་དང་ལྡན་པ་སུ་ཞིག་སངས་རྒྱས་བཅོམ་ལྡན་འདས་ལ་དང་བ་བསྐྱེད་པར་མི་བྱེད་ཅེས་བྱ་བའོ། །རྐང་རྗེས་ཤེས་པའི་སྐྱེས་པའི་རབས་ཏེ་སྐྱེས་རབས་བརྒྱད་པའོ།། །།ཡུལ་གྱི་དགྲ་རྣམས་ཀྱིས་ནི་

བསྐུལ་གྱུར་པ། །ཤིན་ཏུ་འཇིགས་པའི་ས་ཡི་འོག་ཏུ་སྡིག །སྐྱེ་བོ་རིང་པོ་ནས་ནི་འགེགས་བྱེད་དེ། །ལེགས་པར་གསུངས་པ་མྱུར་དུ་གྲོགས་པོ་ལྟར། །འདི་ལྟར་རྗེས་སུ་ཐོས་ཏེ་གྲོང་ཁྱེར་གཞན་ཞིག་ན་དྲང་སྲོང་རྒྱས་པའི་རིགས་བརྒྱན་པར་བྱེད་འདོད་པ་ལྟར་གར་གྱི་ཆ་རྣམས་ལ་མཁས་པའི་

དྲང་སྲོང་རྒྱས་པའི་སྲས་སུ་ཞིག་གི་ཁྱིམ་བདག་མོའི་ལྟོ་བ་ན་བྱང་ཆུབ་སེམས་དཔའ་སྐྱེ་བར་འགྱུར་ཏེ། རྒྱས་པའི་སྲས་ཀྱི་མཆོག་གི་བུད་མེད་དེ་ལ་ནི། །དུས་ནི་འདས་ནས་མཚན་མོའི་ཟླ་བའི་ཆ་ལྟ་བུར། །ཡིད་འཕྲོག་ཡན་ལག་ཅན་ནི་བུ་མོའི་རྒྱུ་ཡིས་ནི། །གཟུགས་ལྡན་གར་གྱི་ཆ་དང་འདྲ་བ་

སྐྱེས་པར་གྱུར། །དེ་ཡི་གཟུགས་ནི་ཁྱད་པར་དུ་ཡང་མཛེས་པ་མཐོང་ནས་ནི། །ཆུ་ལས་སྐྱེས་པའི་རྡུལ་ལྟར་འཇམ་པའི་ལུས་ཀྱི་སྲོག་ཤིང་གི། །བཞིན་གྱི་རི་བོང་ཅན་གྱི་མཛེས་པ་མ་ལུས་འཕྲོག་བྱེད་པའི། །ཕ་ནི་དགའ་བས་དཔེ་མེད་མ་ཞེས་མིང་དུ་བཏགས་པར་གྱུར། །དེ་ནས་དཔེ་མེད་མས་ལོ་གཉིས་ལོན་པ་

དང་དེའི་ཕ་མ་དག་འཇིག་རྟེན་གཞན་དུ་ཉེ་བར་སོང་བར་གྱུར་ཏོ། །རྒྱས་པའི་སྲས་དེའི་གཞན་དག་ལ་རྒྱས་པ་ཐམས་ཅད་ཀྱི་མཆོག་ཏུ་གྱུར་པའི་གཙོ་བོ་གྲོགས་པོ་བྱུང་བར་གྱུར་ཏོ། །དེས་ཀྱང་ཡང་དག་པར་ཉེ་བར་འོངས་ཏེ་དཔེ་མེད་མའི་རང་གི་སྐྱེ་བོ་ལ་སྨྲས་པ། མཐོ་རིས་སུ་ཉེ་བར་སོང་བའི་གྲོགས་པོ་དེ་ལ་

དཔེ་མེད་མ་འདིའི་འོ་མ་བདག་ནི་ཕ་ཡིན་ཏེ། དེ་བས་ན་མྱ་ངན་གྱིས་ཆོག་གིས་གལ་ཏེ་ཡང་ཁྱེད་ཅག་ལ་འདོད་ན་དེ་བས་ན་བདག་གི་འདི་གར་གྱི་ཆ་རྣམས་ལ་མཁས་པ་བྱེད་པར་འགྱུར་ཞེས་ཟེར་རོ། །རང་གི་སྐྱེ་བོས་དེ་ལྟར་བགྱི་ཞེས་བྱ་བ་སོ་སོར་ཐོས་པ་ལ་གཙོ་བོ་དེས་དཔེ་མེད་མ་བླངས་ནས་རང་གི་ཁྱིམ་དུ་ཁྱེར་ཏེ་

དུས་རིང་བ་མ་ཡིན་པ་ཉིད་ཀྱིས་ཡི་གེ་རྣམས་ལ་མཁས་པར་བྱས་ཏེ། གར་གྱི་ཆ་རྣམས་ལ་གོམས་ཤིང་མཁས་པར་བྱས་པར་གྱུར་ཏེ། འདིས་ནི་ལེགས་པར་བདག་ནི་གནས་ལ་ངེས་སྦྱར་ཏེ། །བདག་ཉིད་ཆེན་པོ་གཙོ་བོ་རྣམས་ཀྱི་མཆོག་གིས་ནི། །དེ་ལྟར་རབ་ཏུ་འཛིན་ལྟར་ཕྲད་འདོད་དེ་ལ་ནི། །ཉི་མ་

Vol. 169 · folio 159b

རེ་རེར་གར་གྱི་ཆས་ནི་ཀུན་འཁྱུད་གྱུར། །དེ་ནས་གཙོ་བོ་དེས་གར་གྱི་ཆ་མ་ལུས་པ་དེ་ལ་གྲུབ་པའི་ངོ་བོར་བྱས་ནས་བུ་མཆོག་ལ་རབ་ཏུ་བྱིན་པར་གྱུར་ཏོ། །གྲོང་ཁྱེར་དེ་ལ་ཡང་མིའི་བདག་པོས་བོས་ནས་གཙོ་བོ་དེ་ལ་སྨྲས་པ། ཀློག་དང་གར་ནི་མ་ལུས་པ། །གང་གིས་ཁྱེད་ཀྱིས་མཉེན་དང་

མཐོང་། །འཇིག་རྟེན་འདི་ལ་དེ་ཉིད་ཀྱི། །འབྲས་བཅས་རྣ་བ་མིག་དང་སེམས། །དེ་བས་འདིར་ནི་གར་མཆོག་ནི། །གར་གྱི་དབང་ཕྱུག་སྟོན་བྱེད་པའི། །ཁྱེད་ལ་ལྟ་བར་འདོད་པ་སྟེ། །ཁྱིམ་དུ་བཙུན་འཁོར་བཅས་སྐྱེ་བོ། །གཙོ་བོས་སྨྲས་པ། ཁྱེད་འདྲ་རྟོགས་ལྡན་ས་ཡི་དབང་ཕྱུག་ཡོད་པ་ལ། །

སྦྱོར་བ་བྱེད་པའི་ཡིད་ནི་བདེ་བླག་བྱ་བར་འགྱུར། །ཤར་ནས་གནས་པའི་བདེ་མཐོང་འགྲོ་བའི་འོད་ཅན་ལ། །ཟེའུ་འབྲུ་ཀུན་ནས་དབུགས་ནི་འབྱུང་བ་པདྨ་ལྟར། །ཨེ་མ་ཡིད་ཀྱི་རྣམ་འགྱུར་གསལ་བར་རབ་ཏུ་འགྲོ་སྟེ་གང་གི་ཉམས་རྣམས་ཀྱིས། །ཤིན་ཏུ་གླུ་ཡི་རྣམ་འགྱུར་དེ་རྣམས་རྗེས་

ལྷུང་ཉམས་ཀྱི་དབང་གིས་གདོན་པར་མཛོད། །ཀུན་ནས་འགྲོ་བ་འདི་ཡང་སྒེག་ཅིང་རྐང་པ་རྣམ་པར་བཀོད་པས་འཇམ་པ་ནི། །དེ་ལྟར་བརྗོད་ཅིང་ལྟད་མོ་བ་ནི་འཕྲོག་བྱེད་གར་མཁན་ལ་ཡང་སྤྲོ་བ་སྐྱེད། །དེ་ལྟ་བུར་གྱུར་པའི་ལྷ་ཡང་ལྟད་མོ་བ་སྟེ་དེ་བས་ན་བདག་གི་རྗེས་སུ་འཛིན་པ་སྟེ་གལ་

ཏེ་བདག་གར་གྱི་བསྟན་བཅོས་རབ་ཏུ་སྦྱོར་ཞིང་ལྷས་མཐོང་བར་འདོད་ཅེས་ཟེར་རོ། །རྒྱལ་པོས་སྨྲས་པ། །དེ་བས་ན་དུས་འདའ་བས་ཆོག་སྟེ་གར་གྱི་ཆོ་ག་རབ་ཏུ་རྩོམ་པ་ཉིད་དུ་མཛོད་ཅིག་ཅེས་ཟེར་རོ། །དེ་ལྟར་བགྱི་འོ་ཞེས་བྱ་བ་གཙོ་བོ་དེས་སོ་སོར་མཉན་ནས་མིག་ལ་དགའ་བར་གྱུར་པ་ལྟད་མོའི་

ཁྱིམ་རྣམ་པར་བསམས་ན། །བཙུན་མོའི་འཁོར་དང་བློན་པོ་དང་གྲོང་ཁྱེར་བའི་ཚོགས་དང་བཅས་པའི་རྒྱལ་པོ་དེ་ཡང་དག་པར་ཉེ་བར་བཞུགས་པ་ལ་རྫ་རྔའི་སྒྲས་ཀུན་ནས་ཁྱབ་པའི་མིའི་བདག་པོའི་ཕོ་བྲང་དུ་ཟློས་གར་མཁན་གྱིས་ཤིས་པ་བརྗོད་པའི་ཚིགས་སུ་བཅད་པ་གདོན་པ་སྔོན་དུ་འགྲོ་

བར་གར་གྱི་ཆོ་ག་རབ་ཏུ་སྐབས་ཕྱེ་བར་བྱས་པ་ལ། གཙོ་བོ་དེས་དཔེ་མེད་མ་དང་ལྷན་ཅིག་ཏུ་ལྟད་མོ་བ་རྣམས་ཀྱི་སར་རབ་ཏུ་ཞུགས་པར་གྱུར་ཏོ། །ཀུན་ནས་ཐོས་པར་བྱེད་ཅིང་རྫ་རྔའི་སྤྲིན་གྱི་སྒྲ་ཆེན་པོ། །གར་དེ་སྤྲིན་གྱི་དུས་ན་མིག་རྣམས་ལ་ནི་མངོན་པར་དགའ། །དགོད་པས་སྣང་བར་

Vol. 169 · folio 160a

བྱས་པའི་གདོང་ཅན་སྒེག་ཅིང་མངོན་དགའ་བ། །གར་མཁན་མོ་ཡི་གློག་དེ་མ་ལུས་པ་ནི་བརྒྱན་པར་བྱས། །གཙོ་བོའི་དཔྱིད་ནི་མཛེས་པ་མ་ཉམས་ཡང་དག་ཐོབ་ནས་ནི། །དེ་ནི་འཇམ་པས་དགོད་པའི་དབང་གིས་བཞིན་གྱི་ཆུ་སྐྱེས་ཀྱི། །སོར་ཕྲེང་འོད་ཟེར་ཟེའུ་འབྲུ་

ཅན་ན་ཅུང་ཟད་དུ། །དཔེ་མེད་མ་ཡིན་པདྨོ་སྒེག་དང་བཅས་པར་གསལ་བྱས་གྱུར། །ཉམས་ནི་གང་གང་སྟོན་པར་བྱེད་ཅིང་སྒེག་དང་བཅས་པར་ཉམས་ལྡན་ནས། །དེ་ནི་གང་དུ་ཤིན་ཏུ་དགར་འགྱུར་ཡན་ལག་སྲོག་ཤིང་ཅན། །མཚར་བས་ལེགས་སོ་ལེགས་སོ་ཞེས་ནི་སྐྱེ་བོ་ཀུན་བརྗོད་

ཅིང་། །དེ་ལ་བལྟས་ནས་ཕྲད་འདོད་ཕྱིར་ནི་དེ་རང་བཞིན་ལྟར་འགྱུར། །བུད་མེད་གཟུགས་ནི་ཟླ་བ་ལྟར་ནི་ཡིད་འོང་སྒེག་སྤངས་ཀྱང་། །སྐྱེ་བོ་སེམས་ནི་ཕྲད་པར་འདོད་པ་བྱེད་པ་ཉིད་ཡིན་ཏེ། །ངོ་ཚ་སྒེག་དང་འཇམ་པའི་དགོད་པས་མཆུ་ནི་བསྐུམ་བྱས་པ། །ཡིད་ཀྱི་རྣམ་འགྱུར་ལྡན་པའི་སྣ་

ཚོགས་ཆ་མཁས་སྨོས་ཅི་དགོས། །དེ་ནས་དཀའ་ཐུབ་པའི་སྲས་གཞན་དག་དཀའ་ཐུབ་སྤྱོད་པའི་ཡོངས་སུ་ངལ་བས་ཡིད་སྐྱོ་བ་ཉིད་ཀྱིས་འདི་ལྟར་བསམས་པར་གྱུར་ཏོ། །རང་བཞིན་གྱིས་རྩུབ་པའི་རྩ་བ་དང་འབྲས་བུ་མངོན་པར་ཟོས་པས་མོད་པའི་སྡུག་བསྔལ་ཉེ་བར་ལྷུང་བས་བཟོད་པར་དཀའ་

བའི་རི་དགས་ཀྱི་པགས་པ་དང་ཤིང་གི་ལོ་མ་ཙམ་གྱོན་པས་སྲ་བ་ལ་ཉལ་བས་ལུས་སྐྱོ་བའི་དཀའ་ཐུབ་ཀྱི་ནགས་ན་གནས་པས་བདག་ལ་ཆོག་སྟེ། དེ་བས་ན་བདག་ནི་སོང་སྟེ་ཁྱིམ་ན་གནས་པ་ཉིད་དུ་བྱ་དགོས་སྙམ་མོ། །རབ་ཏུ་དགའ་བའི་ཁྱིམ་བདག་མོ་ཀུན་ནས་དོན་དུ་གཉེར་བའི་སྐྱེ་བོ་ཚོ་བར་

གྱུར་པ་ན་མེ་མཆོད་ཀྱི་དུ་བས་གཙང་བར་བྱས་པ་དང་། བུད་མེད་རྣམས་ཀྱིས་བ་རྣམས་ཀྱི་བེའུ་ལ་རབ་ཏུ་རྩེ་བར་བྱེད་པ་དང་། ཤིན་ཏུ་དྲི་ཞིམ་པའི་མེ་ཏོག་རྣམས་ཀྱིས་ལྷའི་གནས་མཆོད་པ་དང་། ཀུན་ནས་འབྱུང་བའི་ཀུནྡ་སར་པ་ལྟར་དཀར་བའི་ཞོ་དང་བསྲེས་པའི་གཏོར་མ་རྣམ་པར་བཀོད་པས་

ཤར་ཕྱོགས་སུ་བསྲེས་པ་དང་། ཐོ་རངས་དང་མཚན་མོའི་སྒོ་རྣམས་ལ་བ་ལང་སྐྱོང་བར་བྱེད་པ་རྣམས་ཀྱིས་བ་རྣམས་འཇོ་བར་བྱེད་པས་འོ་མའི་རྒྱུན་གྱི་སྒྲ་ཐོས་པ་དང་། ཉི་མ་རེ་རེའི་རྗེས་ལ་མངོན་པར་འོངས་པའི་གྲོགས་པོ་སྐྱེ་བོའི་གཏམ་གྱིས་དགའ་བར་གྱུར་པ་བྲམ་ཟེ་ཉན་པ་པོ་ཁྱིམ་པ་སུ་ཞིག་

Vol. 169 · folio 160b

ཅེས་བྱ་བའི་ཁྱིམ་སྙིང་དགའ་བར་མི་འགྱུར་སྙམ་དུ་རྣམ་པར་བསམས་ནས་གྲོང་ཁྱེར་དུ་འོངས་ཏེ། མིའི་བདག་པོའི་ཕོ་བྲང་དུ་རྫ་རྔའི་སྒྲ་ཐོས་ནས་གྲོང་ཁྱེར་བའི་སྐྱེ་བོ་ཡང་དེ་ལ་མངོན་པར་ཕྱོགས་པར་མཐོང་ནས། རེ་ཞིག་བདག་གིས་ཀྱང་འགྲོ་བར་བགྱིས་ཏེ་ལྟད་མོ་བལྟ་བར་བགྱིའོ་སྙམ་དུ་རྣམ་པར་

བསམས་ནས་མིའི་བདག་པོའི་ཕོ་བྲང་དུ་རྗེས་སུ་ཞུགས་ཏེ་མཐའ་གཅིག་ཏུ་སྤའི་གདན་ལ་ཉེ་བར་གནས་ཤིང་སྒེག་པའི་རྐང་པ་རྣམ་པར་བཀོད་པ་དང་། ཡན་ལག་གཡོ་བ་དང་སྨིན་མ་མཐོན་པོས་འདི་ལྟར་རབ་ཏུ་བསྐུལ་བ་འདྲ། །འདི་ལྟར་གྱུར་པའི་གཞོན་ནུ་མ་ཡི་གཟུགས་ནི་ཨེ་མ་སྒེག་པ་ཡི། །མཛེས་

པ་ཡིད་འོང་སུ་ཞིག་ཡིད་ལ་བདེ་བར་བྱེད་མ་ཡིན། །བུད་མེད་ཀྱི་གཟུགས་འདི་ལྟ་བུ་རྣམས་དཀའ་ཐུབ་ཀྱི་ནགས་ན་གནས་པ་རྣམས་ཀྱི་མིག་གི་ཡུལ་དུ་གང་ན་འགྲོ་བ་ཡིན་ཏེ། གླུའི་སྒྲ་རྣམས་ནི་རྣ་བའི་ལམ་དུ་ཇི་ལྟར་འགྲོ་བ་ཡིན་སྙམ་པ་དེ་བས་ན་བདག་གི་དཀའ་ཐུབ་ཀྱི་

ནགས་ན་གནས་པ་ཡོངས་སུ་དོར་བ་ནི་གནས་ཡིན་ནོ་སྙམ་དུ་རྣམ་པར་སེམས་ཤིང་། མིག་མི་གཡོ་བ་དང་ལྡན་པས་དཔེ་མེད་མ་མཐོང་བར་གྱུར་ཏེ། དེ་བས་གཙོ་བོ་ལྟ་བས་འབྲེལ་བ་མིག་ནི་དཀར་རྒྱས་པ། །དེ་ཡི་གོས་ནི་འོ་མའི་རྒྱ་མཚོའི་ལྦུ་བ་ལྟར་དཀར་བ། །གསེར་གྱི་པདྨ་

ཟུམ་དང་རྗེས་སུ་མཐུན་པ་འཛིན་པ་ཡི། །འོ་མ་འཛིན་པ་གཉིས་ལས་གློ་བུར་དུ་ནི་ཅུང་ཟད་ལྷུང་བར་གྱུར། །འོ་མ་འཛིན་པ་གཉིས་ནི་འབྱུང་བ་སྲབ་པའི་དབུས་ཀྱི་ཆ། །དེ་ལ་དེ་ནས་རྒྱས་པ་མཐོང་ནས་ཅུང་ཟད་དགོད་བྱས་ཏེ། །གླགས་ནི་ཚོལ་ལ་རྩེ་གཅིག་པ་དང་གཡོ་བའི་བསམ་པ་ཅན། །

ཡིད་ལས་སྐྱེས་པའི་དབང་གིས་ཀུན་ནས་འདོད་པ་སོང་བར་གྱུར། །བུད་མེད་གཟུགས་ནི་མཐོང་ནས་ནི། །དཀའ་ཐུབ་ནོར་ཅན་ལེགས་བློ་ཡང་། །བརྟན་ནི་སྐད་ཅིག་ཏུ་ནི་དོར། །ཐ་མལ་སྐྱེ་བོ་སྨོས་ཅི་དགོས། །དེ་ནས་དཔེ་མེད་མ་སྟེང་གོས་ལྷུང་བ་བླངས་ནས་གཙོ་བོ་དེ་ཡན་

ལག་མེད་པའི་དབང་དུ་སོང་བར་ཤེས་ནས་མུན་པ་དང་བཅས་པའི་སྐྱེ་བོའི་སྒྲོན་མར་གྱུར་པའི་ལེགས་པར་བཤད་པ་འདི་ལྟར་རབ་ཏུ་སྨྲས་པར་གྱུར་ཏོ། །ཆོས་ལ་ཡིད་ནི་ཉམས་པ་མེད་པར་ཤིན་ཏུ་རིང་བཏང་ནས། །སུ་ཞིག་དྲི་མ་དང་བཅས་ལས་ནི་དམྱལ་བའི་དོན་དུ་བྱེད། །གང་ཞིག་མཚན་མོ་རྣམས་ལ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words