ཚད་མ་རྣམ་འགྲེལ་རྒྱན་གྱི་འགྲེལ་བཤད་ཤིན་ཏུ་ཡོངས་སུ་དག་པ་ཞེས་བྱ་བ

Sanskrit title (Tibetan script, as in the text) པྲ་མཱ་ཎ་བཱརྟི་ཀཱ་ལང་ཀ་ར་ཊཱི་ཀཱ་སུ་པ་རི་ཤུདྡྷ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 186 · folio 105b

སྲང་དམའ་བའི་ཁྱད་པར་མི་འཛིན་པའི་ཕྱིར་ཏེ་མི་ངེས་པའི་ཕྱིར་རོ། །དེས་ན་ཆོས་གཞན་ཉིད་ཀྱི་ཁྱད་པར་ལྗི་བ་ཉིད་གང་ཡིན་པ་དེ་བསལ་བའི་ཕྱིར་ཡན་ལག་ཅན་ནི། ཡན་ལག་རྣམས་ལས་གཞན་མིན་ཏེ། །ཞེས་བྱ་བ་ཕྱོགས་ལྟར་སྣང་བ་ཡིན་ནོ། །ཡན་ལག་ནི་ཞེས་བྱ་བ་ལ། ཡན་ལག་ནི་ཆོས་ཅན་ཡིན་ཏེ། དེ་དག་

ནི་ཡན་ལག་ཅན་ལས་གཞན་ཉིད་ཡིན་ནོ་ཞེས་གཞན་གྱིས་སྒྲུབ་པར་བྱེད་དོ། །དེས་ན་ཡན་ལག་ཅན་དོན་དམ་པ་པར་འགྲུབ་པོ་ཞེས་ཟེར་རོ། །དེ་ལ་སངས་རྒྱས་པས་བརྗོད་པ་ནི། ཡན་ལག་རྣམས་ནི་ཞེས་བྱ་བ་ལ་སོགས་པའོ། །ཡན་ལག་རྣམས་ནི་ཡན་ལག་ཅན་གྱི་རྫས་ལ་ཐ་དད་པ་མ་ཡིན་ཏེ། ཡན་ལག་

རྣམས་ཁོ་ན་ལ་ཡན་ལག་ཅན་ཞེས་ཐ་སྙད་འདོགས་པ་ཡིན་ནོ། །ཡན་ལག་ཅན་ནི་དོན་དམ་པ་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། མངོན་སུམ་མ་ཡིན་པ་ཉིད་དུ་ཐལ་བའི་ཕྱིར་རོ། །དོན་ནི་འདི་ཡིན་ཏེ་ཡན་ལག་རྣམས་ནི་ཁྱོད་མངོན་སུམ་དུ་གྱུར་པ་ཉིད་དུ་འདོད་པ་ཡིན་ན། དེ་དག་ནི་མངོན་

སུམ་མ་ཡིན་པ་ཉིད་དུ་འགྱུར་རོ། །འདི་ལྟར་ཡན་ལག་ཅན་གྱི་རྫས་ལས་ཡན་ལག་རྣམས་ཐ་དད་པར་དམིགས་པ་ཉིད་དུ་གྱུར་ན་ནི། ཡན་ལག་འདི་དག་མངོན་སུམ་ཡིན་ནོ་ཞེས་བྱ་བའི་ཐ་སྙད་འཐད་པ་ཞིག་ན། ཐ་དད་པ་ན་དམིགས་པ་ནི་མེད་དོ། །དེའི་ཕྱིར་ཐ་དད་པའི་ཕྱོགས་ལ་མངོན་སུམ་མ་ཡིན་

པར་ཐལ་ཏེ། ཐ་དད་པར་དམིགས་པ་ཉིད་མེད་པའི་ཕྱིར་རོ། །དེས་ན་ཡན་ལག་རྣམས་ནི་ཡན་ལག་ཅན་ལས་གཞན་ཡིན་ནོ་ཞེས་བྱ་བ་ནི་ཕྱོགས་ལྟར་སྣང་བ་ཡིན་ཏེ། ཆོས་ཅན་གྱི་ཁྱད་པར་མངོན་སུམ་གྱིས་མཚན་ཉིད་བསལ་བའི་ཕྱིར་རོ། །རྫས་ནི་ཞེས་བྱ་བ་ལ། དེ་ལ་རྫས་ནི་ཡོད་པ་ཡིན་ཏེ་

ཞེས་ཡོད་པས་རྟེན་བཅས་པའི་རྫས་ནི་ཆོས་ཅན་ཡིན་ནོ་ཞེས་མུ་སྟེགས་པ་དག་འཛེར་ཏོ། །དེ་ལ་སངས་རྒྱས་པས་བརྗོད་པ་རྫས་ནི་ཡོད་པ་མ་ཡིན་ཏེ་ཞེས་བྱ་བའོ། །གལ་ཏེ་རྫས་ཡོད་ན་དེའི་ཚེ་ཡོན་ཏན་ལས་རྫས་ཁྱད་པར་ཡོད་དགོས་ན་ཁྱད་པར་ཡང་ཡོད་པ་མ་ཡིན་ནོ། །འདི་ལྟར་རྫས་དང་ཡོན་

ཏན་དག་ཐ་དད་པའམ་ཐ་མི་དད་པ་ཞིག་ཡིན། ཐ་དད་པའི་ཕྱོགས་ལ་ནི། རྫས་དང་ཡོན་ཏན་གཉིས་ཁྱད་པར་མེད་པར་འགྱུར་རོ། །འདི་ལྟར་ཚིག་གི་དོན་གསུམ་ཡོད་པར་བྱེད་པ་ནི་ཡོད་པ་ཉིད་ཡིན་ནོ་ཞེས་བརྗོད་པའི་ཕྱིར། ཅི་ལྟར་རྫས་ལ་ཡོད་པ་ཉིད་གནས་པ་དེ་བཞིན་དུ་ཡོན་ཏན་ལ་ཡང་ཡིན་

Vol. 186 · folio 106a

ནོ། །དེས་ན་ཡོད་པས་རྟེན་བཅས་པར་ཁྱད་པར་མེད་པའི་ཕྱིར་ན། ཡོན་ཏན་དང་རྫས་དག་ཁྱད་པར་མེད་པར་འགྱུར་རོ། །དེས་ན་གཉི་ག་ཡང་རྫས་ཀྱི་རང་བཞིན་ནམ། ཡོན་ཏན་གྱི་རང་བཞིན་དུ་འགྱུར་རོ། །གཉིས་པའི་ཕྱོགས་ལ་ཡང་ཕན་ཚུན་རྗེས་སུ་ཞུགས་པས་ན་ཡོན་ཏན་གྱི་རང་

བཞིན་དག་རྫས་ཀྱི་རང་བཞིན་ཁོ་ནར་འགྱུར་རོ། །དེས་ན་རྫས་ནི་ཡོད་པ་ཡིན་ཏེ་བྱ་བ་ནི་ཕྱོགས་ལྟར་སྣང་བ་ཡིན་ཏེ། ཆོས་ཅན་རྫས་ཀྱི་རང་གི་ངོ་བོ་བསལ་བའི་ཕྱིར་རོ། །ཕྱི་མ་ཤོས་ཞེས་བྱ་བ་ནི། རྫས་ནི་ཡོད་པ་མ་ཡིན་ཏེ། །ཞེས་བྱ་བ་ལ་སོགས་པའོ། །ཆོས་ཅན་དང་ཆོས་ཀྱི་ཞེས་བྱ་བ་ནི་གོ་རིམས་ཅི་ལྟ་བར་མ་

ཡིན་གྱི་འོན་ཀྱང་ཅི་ལྟར་རིགས་པ་ཡིན་ནོ། །དེ་ལ་དཔེར་བརྗོད་པ་དང་པོའོ། །རྫས་ཀྱི་མཚན་ཉིད་ཅན་ཞེས་བྱ་བའི་རྣམ་འགྲེལ་རྣམ་པར་འགྲེལ་པའི་སྒོ་ནས་བར་དུ་ཆོད་པའི་གཞུང་གིས་སྟོན་པར་འགྱུར་རོ། །དེ་བས་ན་རེ་ཞིག་དཔེར་བརྗོད་པ་གཉིས་གོ་རིམས་ཅི་ལྟ་བ་བཞིན་རྣམ་པར་འགྲེལ་པ་ནི། གང་ཞིག་ཅེས་བྱ་བའོ། །

གལ་ཏེ་ཡན་ལག་མངོན་སུམ་དུ་གྱུར་པ་རྣམས་ཡན་ལག་ཅན་ལས་གཞན་ཡིན་ན་དེའི་ཚེ་དེ་ལས་ཐ་དད་པར་དམིགས་པར་འགྱུར་བ་ཞིག་ན། ཐ་དད་པར་དམིགས་པ་ཡང་མ་ཡིན་ཏེ། དེས་ན་དེ་ལྟར་མངོན་སུམ་མ་ཡིན་ནོ་ཞེས་བྱ་བའི་དོན་ཏོ། །དེ་བཞིན་ཞེས་བྱ་བ་ནི་ཐ་དད་པ་ཉིད་དུའོ། །དེ་ཡིས་ཞེས་བྱ་བ་ཐ་དད་

པའི་ངོ་བོར་དམིགས་པ་མེད་ན་ཡང་ངོ་། །ཐ་དད་པ་ལ་ནི་ཐ་དད་པར་དམིགས་པར་བྱ་བས་ཁྱབ་པ་ཡིན་ན་འདིར་ནི་ཁྱབ་པར་བྱེད་པ་མེད་དོ། །ཅིའི་ཕྱིར་མི་འགྲུབ་སྙམ་ན། ཐ་དད་པར་ཞེས་སྨོས་སོ། །ཡིན་ན་ཅི་འགལ་སྙམ་ན། ཐ་དད་པར་ཞེས་བྱ་བའོ། །དེས་ན་ཕ་རོལ་པོས་ནི་ཐ་མི་དད་པ་ཁོ་ནར་ཁས་

བླང་བར་བྱ་བ་ཡིན་ནོ། །དེའི་ཚེ་ཡང་ཡན་ལག་ཅན་བརྟགས་པ་ཁོ་ནར་འགྱུར་གྱི། དོན་དམ་པར་ནི་མ་ཡིན་ནོ། །གལ་ཏེ་ཡན་ལག་ཅན་གྱི་རང་བཞིན་ལས་ཐ་དད་པ་ན། ཡན་ལག་རྣམས་མངོན་སུམ་མ་ཡིན་པ་ཉིད་དོ། །འོ་ན་ཅི་ལྟར་མངོན་སུམ་ཉིད་དུ་འགྱུར་ཞེ་ན་གལ་ཏེ་ཞེས་བྱ་བའོ། །མངོན་སུམ་

ཉིད་ཡིན་ཞེས་བྱ་བ་ནི་ཡན་ལག་རྣམས་སོ། །མངོན་སུམ་ཉིད་མ་ཡིན་པ་ཉིད་བརྗོད་པ་ནི། གང་དུ་ཞེས་བྱ་བའོ། །དེའི་དངོས་ཞེས་བྱ་བ་ནི་ཡན་ལག་ཅན་ལས་ཐ་མི་དད་པའི་རང་བཞིན་ནོ། །དེ་བཞིན་ཞེས་བྱ་བ་ནི་མངོན་སུམ་ཉིད་དོ། །ཡན་ལག་མངོན་སུམ་མ་ཡིན་ན་ནི་གཞན་གྱི་འདོད་པ་མི་འགྲུབ་

Vol. 186 · folio 106b

བོ་ཞེས་བརྗོད་པ་ནི་དེ་ལྟ་མ་ཡིན་ཏེ་ཞེས་བྱ་བའོ། །དཔེར་བརྗོད་པ་འདི་ཉིད་ཡང་རྣམ་པ་གཞན་དུ་འཆད་པ་ནི། ཡང་ན་ཞེས་བྱ་བའོ། །སྔར་ནི་ཡན་ལག་རྣམས་མངོན་སུམ་མ་ཡིན་པར་བསྟན་པ་ཡིན་ལ། ད་ལྟར་ནི་ཡན་ལག་ཅན་མངོན་སུམ་མ་ཡིན་པར་སྟོན་པ་ཡིན་ནོ། །དེ་ཞེས་བྱ་བ་ནི་ཡན་ལག་ཅན་ནོ། །

ཅི་ལྟར་མངོན་སུམ་མ་ཡིན་པར་འགྱུར་ཞེ་ན། གཞན་ཉིད་ཡིན་ན་ཞེས་བྱ་བའོ། །དེ་དག་ཅེས་བྱ་བ་ནི་ཡན་ལག་རྣམས་སོ། །ཅི་ལྟར་མངོན་སུམ་མ་ཡིན་ན་གཞན་མངོན་སུམ་མ་ཡིན་པར་འགྱུར་ཞེ་ན། ཡན་ལག་ཅེས་བྱ་བའོ། །ཡན་ལག་དང་པོ་ཞེས་བྱ་བ་ནི་རྡུལ་གཉིས་པ་བཞིན་ནོ། །གཞན་ནི་ཞེས་བྱ་

བ་ནི་རྡུལ་གཉིས་པ་ཅན་ལ་སོགས་པའོ། །ལན་འདེབས་པ་ནི་གཅིག་ཉིད་ཅེས་བྱ་བའོ། །དེས་ན་ཞེས་བྱ་བ་ནི་ཡན་ལག་ཅན་མེད་པས་ནའོ། །དེས་ན་ཞེས་བྱ་བ་ནི་གཞན་མ་ཡིན་པས་ནའོ། །དཔེར་བརྗོད་པ་གཉིས་པ་རྣམ་པ་གཉིས་སུ་བཤད་ནས། གསུམ་པ་འཆད་པ་ནི། དེ་བཞིན་དུ་ཞེས་བྱ་བའོ། །ཡོན་

ཏན་དང་རྫས་གཉིས་ཐ་དད་པའི་ཕྱོགས་ལ་ཁྱད་པར་མེད་པར་བརྗོད་ནས། ཐ་མི་དད་པའི་ཕྱོགས་ལ་ཡང་ཁྱད་པར་མེད་པར་བརྗོད་པ་ནི། ཕན་ཚུན་སྤངས་པ་མ་ཡིན་ན་ཡང་ཞེས་བྱ་བ་སྟེ། རྫས་ལས་ཡོན་ཏན་ཐ་མི་དད་ན་ཡང་ངོ་། །གང་ལས་རྣམ་པར་དབྱེ་བ་ཡོད་ཅེས་བྱ་བ་ནི་རྫས་ཁོ་ན་ཡིན་ལ། འདི་ནི་

ཡོན་ཏན་ཁོ་ན་ཡིན་ནོ་ཞེས་ཐ་དད་པ་གང་ལས་ཡིན་ཞེས་པའོ། །ཡོན་ཏན་ཉིད་དང་རྫས་ཉིད་ཀྱི་སྤྱི་དག་ཡོན་ཏན་དང་རྫས་དག་ལ་ཐ་དད་པ་མེད་པའམ། ཐ་དད་པ་ཞིག་ཡིན། ཕྱོགས་དང་པོ་ལ་བརྗོད་པ་ནི། རང་གི་རང་བཞིན་ལ་ཞེས་བྱ་བའོ། །ཡོན་ཏན་དང་རྫས་ལ་སྤྱི་གཉིས་རྗེས་སུ་ཞུགས་ན་ཡོན་ཏན་

དང་རྫས་དག་ཉིད་དུ་འགྱུར་གྱི་སྤྱི་གཞན་ཡོད་པར་ནི་མི་འགྱུར་རོ། །གཉིས་པ་ལ་བརྗོད་པ་ནི། ཡོན་ཏན་ཉིད་ནི་གཞན་ཡིན་ན། །ཞེས་བྱ་བའོ། །འང་གི་སྒྲས་ནི་རྫས་ཉིད་གཞན་ཡིན་ན་ཡང་ཞེས་སྡུད་པའོ། །དེར་ཡང་ཞེས་བྱ་བ་ནི་ཡོན་ཏན་ཉིད་དང་། རྫས་ཉིད་ལ་ཡང་ངོ་། །ཡོད་མོད་ཅི་ཉེས་སྙམ་ན།

དེས་ན་ཞེས་སྨོས་སོ། །ཡོད་པ་དང་འབྲེལ་པས་ནའོ། །ཡོན་ཏན་ཉིད་རྫས་ལས་ཁྱད་པར་མེད་པའི་ཐལ་བ་སྔ་མ་གང་ཡིན་པ་དེ་བཟློག་པ་མེད་པར་འགྱུར་རོ། །དཔེར་ན་ཡོན་ཏན་དང་ལྡན་པའི་ཕྱིར་ཡོན་ཏན་རྫས་དང་ཁྱད་པར་མེད་པར་བརྗོད་པ་དེ་བཞིན་དུ་ཡོན་ཏན་ཉིད་ཀྱང་དེ་དང་ལྡན་པའི་ཕྱིར་ན། རྫས་

Vol. 186 · folio 107a

ཉིད་དུ་འགྱུར་རོ། །འདི་ཉིད་བརྗོད་པ་ནི། ཡོད་ཉིད་ཡོད་ན་ཞེས་བྱ་བའོ། །ཡོན་ཏན་དང་ཡོན་ཏན་ཉིད་ལ་ཡོད་ཉིད་དེ། ཡོད་པ་ཉིད་ཡོད་པར་ཁས་ལེན་ན། ཐམས་ཅད་ཅེས་བྱ་བ་ཡོན་ཏན་དང་ཡོན་ཏན་ཉིད་གཉི་ག་རྫས་སུ་འགྱུར་རོ། །ནམ་གྱི་ཚེ་ཞེ་ན། ཐ་དད་དང་གཞན་པ་སྟེ། ཡོན་ཏན་

དང་རྫས་དག་ཐ་དད་པ་དང་ཐ་མི་དད་པ་ལའོ། །དེ་བཞིན་དུ་སྤྱི་དག་ཐ་དད་པ་དང་མི་དད་པ་ལ་ཡང་ངོ་། །ཕན་ཚུན་སྤངས་པས་ཞེས་བྱ་བ་ལ་སོགས་པའི་རྩོད་པ་ལ་དོན་འདི་ཡིན་ཏེ། རྫས་དང་ཡོན་ཏན་དག་ཐ་མི་དད་པ་ཡིན་ན། རྣམ་པར་དབྱེ་བ་མེད་པར་འགྱུར་རོ་ཞེས་བྱ་བ་འདི་རིགས་པ་ཡིན་གྱི་ཐ་དད་པ་

ལ་ནི་རྫས་ཉིད་དང་ལྡན་པའི་ཕྱིར། རྫས་ཀྱི་གསལ་བ་ཡོན་ཏན་གྱི་གསལ་བ་ལས་ཐ་དད་པར་འཐད་པ་ཁོ་ནའོ་ཞེས་བྱ་བའོ། །གྲུབ་པའི་མཐའི་དོན་ནི་འདི་ཡིན་ཏེ། ཐ་དད་པའི་ཕྱོགས་ལ་ལྕགས་ཀྱི་ཐུར་མ་ལྟ་བུའི་དོན་དག་ལ་གཙོ་བོ་དང་གཙོ་བོ་མ་ཡིན་པའི་རྣམ་པར་དབྱེ་བ་མེད་པས་ཅི་ལྟར་རྫས་དང་ཅིག་ཤོས་ཀྱི་

རྣམ་པར་དབྱེ་བར་འགྱུར་ཞེས་བྱ་བ་ཡིན་ནོ། །རྫས་དང་ཅིག་ཤོས་ལ་སོགས་པར་རྣམ་པར་དབྱེ་བའི་རྒྱུ་མཚན་དོགས་པར་བྱེད་པ་ནི། ཡོན་ཏན་ཉིད་ལ་སོགས་པ་ཞེས་བྱ་བའོ། །ལན་ནི་རྫས་དང་ཅིག་ཤོས་ཉིད་དང་ལྡན་པས་ནི་རྫས་དང་ཅིག་ཤོས་མ་ཡིན་ནོ། །ཅིའི་ཕྱིར་ཞེ་ན། ཡོན་ཏན་གྱི་གསལ་བས་ཞེས་བྱ་

བའོ། །གཞན་དུ་ནི་ཞེས་བྱ་བ་གསལ་བར་བྱ་བ་མ་ཡིན་ན་ནི་ཡོན་ཏན་ཉིད་དུ་མི་འགྲུབ་པའོ། །འདི་ག་ལས་ཤེ་ན། ཡོན་ཏན་ཉིད་དང་ཞེས་བྱ་བའོ། །ཡོན་ཏན་ཉིད་དང་རྫས་ཉིད་ཀྱི་སྤྱི་ནི། རང་གི་ངོ་བོས་ཕན་ཚུན་ཐ་དད་པར་ངེས་ནུས་པ་ནི་མ་ཡིན་ཏེ། ཁ་དོག་དང་རྣམ་པ་དང་ཡི་གེས་སྟོང་པས་ན། སྤྱིའི་རྣམ་

པ་ནི་གཉི་ག་ལ་ཡང་མཚུངས་པའི་ཕྱིར་རོ། །དེའི་ཞེས་བྱ་བ་ཡོན་ཏན་ཉིད་དང་རྫས་ཉིད་ཀྱི་ཁྱད་པར་རྫས་ཉིད་དམ་ཡོན་ཏན་ཉིད་ཀྱི་ཐུན་མོང་མ་ཡིན་པའི་རང་བཞིན་ནོ། །དེ་དང་རིགས་མི་མཐུན་པ་ཞེས་བྱ་བ་ནི། རྫས་ཀྱི་གསལ་བ་དང་རིགས་མི་མཐུན་པ་ཡོན་ཏན་གྱི་གསལ་བས་གསལ་བར་བྱ་བ་ཉིད་ནི་ཡོན་

ཏན་ཉིད་ཀྱི་ཁྱད་པར་ཡིན་པའོ། །རིགས་མི་མཐུན་པ་གནས་པ་ཉིད་ཀྱིས་ཞེས་བྱ་བ་ནི་རྫས་ཉིད་དང་རིགས་མི་མཐུན་པ་ཡོན་ཏན་ཉིད་གནས་པས་སོ། །རིགས་གསལ་བ་རིགས་མི་མཐུན་པ་ཡིན་ན་ཡོན་ཏན་ཉིད་གསལ་བར་བྱེད་ལ། རིགས་མི་མཐུན་པ་ཉིད་ཀྱང་རྫས་ཉིད་དང་མི་འདྲ་བ་ཡོན་ཏན་ཉིད་ཀྱི་རིགས་

Vol. 186 · folio 107b

དང་ལྡན་པ་ལས་ཡིན་ན། དེས་ན་ཡོན་ཏན་ཉིད་དང་ལྡན་པས་རིགས་མི་མཐུན་པ་ཉིད་རིགས་མི་མཐུན་པ་ཉིད་ཡིན་ན་ཡང་གསལ་བ་ཡོན་ཏན་ཉིད་ཀྱིས་གསལ་བར་བྱེད་པ་ཡིན་ནོ། །དེ་ལ་ཡང་ཞེས་བྱ་བ་ནི་སྤྱི་དག་ལའོ། །རིགས་མི་མཐུན་པ་གནས་པ་ཉིད་ནི་མི་འདྲ་བའི་རིགས་དང་འབྲེལ་བ་ཉིད་དོ། །ལྡོག་པ་ཉིད་

ཡིན་ན་ཞེས་བྱ་བ་ནི་རིགས་དག་གོ། །དེ་ལྟར་ཞེས་བྱ་བ་ནི་རང་གི་ངོ་བོའི་ལྡོག་པ་ཉིད་དོ། །དེའི་ཕྱིར་ཡོན་ཏན་ཉིད་ལ་སོགས་པ་དང་ལྡན་པས་ནི། རྫས་དང་ཅིག་ཤོས་ཉིད་ལ་སོགས་པ་མ་ཡིན་ནོ། །གལ་ཏེ་ཞེས་བྱ་བ་ནི་འདི་སྙམ་དུ་རང་གི་ངོ་བོས་ནི་རིགས་རྣམས་ཕན་ཚུན་ལྡོག་པ་མ་ཡིན་ན། གང་གིས་བསལ་

བ་རྣམས་ཀྱང་དེ་ལྟར་འགྱུར། འོན་ཀྱང་རྫས་ཉིད་ལ་སོགས་པ་ལས་ཡོན་ཏན་ཉིད་ལྡོག་པ་ནི་ཡོན་ཏན་ཞེས་བྱ་བ་མཚུངས་པའི་རྣམ་པ་ཅན་གྱི་རྟོགས་པའི་རྒྱུ་མཚན་ཡིན་པའི་ཕྱིར་རོ། །དེ་བཞིན་དུ་རིགས་རྣམས་ཕན་ཚུན་ལྡོག་པ་ཡིན་པའི་ཕྱིར་ཉེས་པ་མེད་དོ་ཞེ་ན། ལན་ནི་ཞེས་བྱ་བའོ། །བར་མ་དོའི་ཤ་

ལྷག་པ་ཞེས་བྱ་བ་ནི་དགོས་པ་མེད་པའི་གནས་སུ་གྱུར་པའོ། །ཅི་ལྟར་དགོས་པ་མེད་སྙམ་ན། རང་གི་ཞེས་བྱ་བའོ། །རང་གི་དགོས་པ་རིགས་མི་མཐུན་པ་ལས་ལྡོག་པའི་མཚན་ཉིད་གང་ཡིན་པ་དེ་ནི། སྤྱིའི་རྣམ་པ་ཅན་གྱི་རྟོགས་པའི་རྒྱུ་མཚན་གྱི་ངེས་པ་གང་ཡིན་པ་དེ་ཉིད་ཀྱིས་འགྲུབ་པའི་ཕྱིར་རོ། །

དེའི་ཕྱིར་རང་གི་ངོ་བོ་ལས་ཐ་དད་པའི་སྤྱི་དམིགས་པ་ནི་མེད་དོ། །དེ་ལྟ་ཡིན་དང་ཞེས་བྱ་བ་ནི་སྤྱི་མེད་དང་ངོ་། །དེས་ན་ཞེས་བྱ་བ་ནི་རྫས་ཉིད་ལ་སོགས་པས་ནའོ། །འོ་ན་གང་གི་ཚེ་ཁྱད་པར་ཡོད་སྙམ་ན། མེད་ན་ནི་ཞེས་སྨོས་སོ། །ཁྱད་པར་གྱི་རྣམ་པ་ཉིད་བརྗོད་པ་ནི་རྫས་ཞེས་བྱ་བ་ནི། གཉི་གའི་སྒྲ་ནི་

རེ་རེ་དང་སྦྱར་ཏེ་རང་གི་ངོ་བོ་གཉི་ག་བསལ་བ་དང་། གཉི་གའི་ཁྱད་པར་བསལ་བའི་སྒོ་ནས་སོ། །འདིར་ནི་དཔེར་བརྗོད་མ་ཐག་ཏུ་བསྟན་པ་ཡིན་ཏེ། ཆོས་ཀྱི་རང་གི་ངོ་བོ་བསལ་བ་དང་། ཆོས་ཅན་གྱི་རང་གི་ངོ་བོ་བསལ་བ་དང་། ཆོས་ཀྱི་ཁྱད་པར་བསལ་བ་དང་། ཆོས་ཅན་གྱི་ཁྱད་པར་བསལ་

བ་དང་། ཆོས་དང་ཆོས་ཅན་གྱི་རང་གི་ངོ་བོའི་ཚོགས་པ་བསལ་བ་ན། ཆོས་དང་ཆོས་ཅན་གྱི་ཁྱད་པར་གྱི་ཚོགས་པ་སེལ་བའོ། །དེ་ལ་ཆོས་ཀྱི་རང་གི་ངོ་བོ་སེལ་བས་ནི་སྒྲ་མཉན་བྱ་མ་ཡིན་ཏེ་ཞེས་བྱ་བ་ལ་སོགས་པ་དཔེར་བརྗོད་པ་རྣམ་པ་བཞི་ཉེ་བར་བཀོད་པ་ཡིན་ནོ། །ལྷག་མ་གསུམ་ནི་དེ་མ་

Vol. 186 · folio 108a

ཐག་ཏུ་བསྟན་ཟིན་པ་ཉིད་དོ། །ད་ནི་དཔེར་བརྗོད་པ་ལྷག་མ་གཉིས་བརྗོད་པར་བྱ་བ་ཡིན་ནོ། །གལ་ཏེ་ཡང་ཆོས་ཀྱི་རང་གི་ངོ་བོ་དང་། ཆོས་ཅན་གྱི་རང་གི་ངོ་བོ་དང་། དེ་དག་གི་ཁྱད་པར་རྣམས་ཀྱི་དཔེར་བརྗོད་པ་བསྟན་ཟིན་པ་དེ་ལྟ་ན་ཡང་དེ་དག་ནི་ཐ་དད་པར་དཔེར་བརྗོད་པ་ཡིན་

ལ། ད་ནི་དཔེར་བརྗོད་པ་གཅིག་ཉིད་ལ་གཉིས་གཉིས་ཉེ་བར་སྟོན་པ་ཡིན་ནོ། །འདི་ལྟ་སྟེ། ངག་ཐམས་ཅད་ནི་བདེན་པའི་དོན་ཅན་མ་ཡིན་ནོ་ཞེས་བྱ་བ་བཞིན་ནོ། །ཅི་ལྟར་ན་འདི་གཉི་ག་ལྟར་ཡང་ཕྱོགས་ཀྱི་ཉེས་པ་ཡིན་སྙམ་ན། ཚིག་ཀུན་ཞེས་གསུངས་སོ། །ངག་དང་བདེན་པ་མ་ཡིན་པ།

ཆོས་ཅན་དང་ཆོས་ཀྱི་རང་གི་ངོ་བོ་དག་དང་། དེའི་ངོ་བོའི་ཁྱད་པར་དག་སྟེ། ངག་དང་བདེན་པ་མ་ཡིན་པ་ཉིད་ཀྱི་རང་གི་ངོ་བོ་ཁྱད་པར་དག་སྤོང་བ་བརྗོད་པར་འདོད་པ་ཡིན་ན། གཉི་གའི་རང་གི་ངོ་བོ་དང་ཁྱད་པར་སྤོང་བའི་མཚན་ཉིད་ཀྱི་སྐྱོན་ཡིན་ནོ། །འདི་ལྟར་ངག་ནི་ཆོས་ཅན་ནོ། །བདེན་པ་མིན་པ་

ཉིད་ཅེས་བྱ་བ་ནི་བསྒྲུབ་པར་བྱ་བའི་ཆོས་ཡིན་ནོ། །འདི་གཉི་ག་ཡང་སེལ་བ་ཡིན་ནོ། །གང་ཞིག་ངག་ཐམས་ཅད་ནི་བརྫུན་ཡིན་ནོ་ཞེས་བརྗོད་པ་དེ་ནི། ཆོས་ཅན་ངག་དང་ཆོས་མི་བདེན་པ་ཉིད་ཀྱི་རང་གི་ངོ་བོ་སེལ་བ་ཡིན་ཏེ། ངག་ཐམས་ཅད་མི་བདེན་པ་ཉིད་ཀྱིས་ངག་འདི་ཡང་རྗོད་པར་བྱེད་པ་མ་ཡིན་

པར་འགྱུར་ལ། རྗོད་པར་བྱེད་པ་ཉིད་མེད་ན་ཡང་མི་བདེན་པ་ཉིད་དུ་མ་བསྟན་པར་འགྱུར་རོ། །དེའི་ཕྱིར་རང་ཉིད་ཚད་མར་སྟོན་པ་ན། འདི་ཕྱོགས་ལྟར་སྣང་བ་ཉིད་དུ་སྟོན་པ་ཡིན་ནོ། །དེ་ལྟར་ཆོས་དང་ཆོས་ཅན་གྱི་རང་གི་ངོ་བོ་སེལ་བས་དཔེར་བརྗོད་པས་དཔེར་བརྗོད་པ་བསྟན་པ་ཡིན་ནོ། །ད་ནི་དེའི་ཁྱད་པར་

སེལ་བའི་སྒོ་ནས་སྟོན་པ་ནི། ཚིག་ཀུན་བདེན་པའི་དོན་མིན་ཞེས་བྱ་བ་སྟེ། ངག་ནི་ཆོས་ཅན་ནོ། །དེའི་ཁྱད་པར་ནི་རྟག་པ་ཉིད་དོ། །བདེན་པ་མ་ཡིན་པའི་སྤྱི་ནི་བསྒྲུབ་པར་བྱ་བའི་ཆོས་ཡིན་ལ་དེའི་ཁྱད་པར་ནི་བརྗོད་པར་བྱ་བ་མི་བདེན་པ་ཅན་ནོ། །མི་བདེན་པའི་སྒྲ་ནི་བརྗོད་པར་བྱ་བ་དང་། བརྗོད་པར་བྱ་

བ་མ་ཡིན་པ་ལ་གནས་པའི་བརྫུན་པ་ཅི་ཞིག་བརྗོད་པ་ཡིན་ལ། བརྗོད་པར་བྱ་བ་ལ་ལྟོས་པའི་བརྫུན་པ་ཉིད་ནི་ཁྱད་པར་ཡིན་ནོ། །གང་ཞིག་རྟག་པའི་ངག་ཐམས་ཅད་ནི་བདེན་པའི་དོན་ཅན་མ་ཡིན་ནོ་ཞེས་སྨྲ་བ་དེ་ནི། ངག་བརྗོད་པས་གནོད་པ་ཡིན་ནོ། །གལ་ཏེ་ངག་རྟག་པ་ཡིན་ན་དེའི་ཚེ་རྟག་

Vol. 186 · folio 108b

པ་ཉིད་ཀྱི་ཐམས་ཅད་ཀྱི་ཚེ་གནས་པའི་ཕྱིར་རྐན་ལ་སོགས་པའི་བྱེད་པས་ཅི་ཞིག་བྱ། དེའི་ཕྱིར་རྟག་པ་ཉིད་དུ་དམ་བཅའ་བ་ནི་ཆོས་ཅན་གྱི་ཁྱད་པར་མི་རྟག་པ་ཉིད་ལ་གནོད་པར་བྱེད་དོ། །བརྗོད་པའི་ཤུགས་ཀྱིས་ཀྱང་རྟག་པ་ཉིད་ལ་གནོད་པ་ཡིན་ཏེ། དེའི་ཕྱིར་ངག་རྟག་པ་ཞེས་བྱ་བ་ནི། ཕྱོགས་ལྟར་སྣང་བ་

ཡིན་ནོ། །ངག་ཐམས་ཅད་བདེན་པའི་དོན་མ་ཡིན་ནོ་ཞེས་བརྗོད་པ་ཡང་བསྒྲུབ་པར་བྱ་བའི་ཆོས་མི་བདེན་པ་ཉིད་ཀྱི་མཚན་ཉིད་ཀྱི་ཁྱད་པར་མི་བདེན་པ་བརྗོད་པར་བྱ་བ་ཅན་ཉིད་ལ་གནོད་དེ། ངག་ཐམས་ཅད་མི་བདེན་པའི་དོན་ཅན་ཡིན་ན། མི་བདེན་པའི་བརྗོད་པར་བྱ་བ་ཉིད་བསྟན་པ་མ་ཡིན་པའི་ཕྱིར་

རོ། །གཉི་གའི་ཞེས་བྱ་བ་འདིས་ཆོས་དང་ཆོས་ཅན་དག་གི་རང་བཞིན་གང་དག་ཡིན་པ་དེ་དག་བསལ་བ་ཡིན་ནོ། །བསྒྲུབ་པར་བྱ་བའི་ཆོས་ཀྱི་ཁྱད་པར་བརྗོད་པ་ནི། མི་བདེན་པ་ཉིད་ཅེས་བྱ་བའོ། །གཉི་ག་ཞེས་བྱ་བ་ནི། ཆོས་དང་ཆོས་ཅན་དག་གིས་ཁྱད་པར་གང་དག་ཡིན་པ་དེ་དག་བསལ་བའོ། །འདི་

ཉིད་སྨྲས་པ་ནི་ངག་ཐམས་ཅད་ཅེས་བྱ་བའོ། །ཆོས་ཅན་ངག་ཐམས་ཅད་ཀྱི་ཁྱད་པར་རྟག་པ་གང་ཡིན་པ་དེ་དང་བསྒྲུབ་པར་བྱ་བ་མི་བདེན་པ་ཉིད་ཀྱི་ཁྱད་པར་བརྗོད་པར་བྱ་བ་མི་བདེན་པ་ཉིད་གང་ཡིན་པ་དེ་བསལ་བའི་ཕྱིར་རོ། །འདི་ཅི་ལྟར་ཞེ་ན། བརྗོད་པའི་ཤུགས་ཞེས་བྱ་བའོ། །དེའི་ཕྱིར་ཞེས་བྱ་བ་ནི་

ཚད་མར་གྱུར་པའི་ཕྱིར་བརྗོད་པའི་ཤུགས་དེས་ངག་ཉིད་དང་། མི་བདེན་པའི་བརྗོད་པར་བྱ་བ་ཅན་ཉིད་དེ་དག་མེད་པ་བསལ་བ་ཡིན་ནོ། །གལ་ཏེ་ཆོས་ཅན་གྱི་རང་གི་ངོ་བོ་དང་། ཆོས་ཀྱི་ཁྱད་པར་གཉིས་མེད་ན་དེའི་ཚེ་ངག་བརྗོད་པ་ཉིད་དུ་མི་འགྱུར་རོ། །དེས་ན་བརྗོད་པའི་ཤུགས་ལས། ཆོས་དང་ཆོས་

ཅན་གྱི་རང་གི་ངོ་བོ་དང་། ཆོས་ཀྱི་ཁྱད་པར་གཉིས་དང་འབྲེལ་པའི་མེད་པ་ཉིད་བསལ་བ་ཡིན་ནོ། །མེད་པ་བསལ་བ་ན་ཡང་གཉི་ག་ཡོད་པར་འགྱུར་ན་དེ་ཡང་སྔར་བརྗོད་པའི་ཚུལ་དུ་བསལ་ཟིན་པ་ཡིན་ནོ། །ཆོས་ཅན་གྱི་ཁྱད་པར་ཅི་ལྟར་སེལ་ཅེ་ན། ཆོས་ཅན་གྱི་ཁྱད་པར་ཡང་ཞེས་བྱ་བའོ། །

ཆོས་ཅན་ངག་གི་ཁྱད་པར་ཡང་ཁྱད་པར་རྟག་པ་ཉིད་ཁས་བླངས་པ་འདིར། མི་རྟག་པ་ཉིད་དང་བཙལ་མ་ཐག་པ་ཉིད་ལ་སོགས་པ་འགའ་ཞིག་ཡོད་པ་ཡིན་ལ་དེས་བསལ་བ་ཡིན་ནོ། །གལ་ཏེ་གང་གིས་ཏེ་སེལ་བར་འགྱུར་བ་དེའི་མི་རྟག་པ་ཉིད་ཅི་ལྟར་ཞེ་ན། གལ་ཏེ་ཞེས་བྱ་བའོ། །ཅི་

Vol. 186 · folio 109a

ལྟར་དགོས་པ་མེད་སྙམ་ན། གལ་ཏེ་ཞེས་གསུངས་སོ། །གསལ་བར་བྱེད་པ་ནི་གལ་ཏེ་ཞེས་བྱ་བའོ། །ངག་གི་རང་བཞིན་སྒྲུབ་པ་མེད་ན་ཞེས་བྱ་བ་ནི་ངག་གི་རང་བཞིན་ཕན་འདོགས་པར་བྱེད་པ་མ་ཡིན་ནའོ། །སྨྲ་བ་པོ་གྲུབ་པ་ཉེ་བར་འཇོག་པར་ཐལ་བར་འགྱུར་རོ་ཞེས་འབྲེལ་ཏོ། །ཕྱེད་

སྔ་མ་བཤད་ནས་ཕྱེད་ཕྱི་མ་འཆད་པ་ནི། དེར་གྱུར་པ་མ་ཡིན་པ་ཞེས་བྱ་བ་སྟེ། ངག་གི་རང་བཞིན་གྱི་ཕན་པ་མེད་ནའོ། །ལྟོས་པར་བྱ་བ་ཡང་ཡིན་ཏེ་ཞེས་བྱ་བ་ནི་ངག་གིས་དེ་ནི་ངག་གོ། །དེས་ན་ཞེས་བྱ་བ་མི་རྟག་པ་ཉིད་དུ་བསྒྲུབས་པས་ན། ཆོས་ཆོས་ཅན་དེ་དག་གི་ཁྱད་པར་བསལ་བའི་སྒོ་ནས་སོ། །དེ་ལྟར་

དཔེར་བརྗོད་པའི་སྤྲོས་པ་བཤད་ནས། སྔར་བཀོད་ཟིན་པའི་རྣམ་འགྲེལ་ཉིད་འཆད་པ་ནི། དེ་ལ་ཞེས་བྱ་བ་སྟེ། བརྗོད་མ་ཐག་པའི་དཔེར་བརྗོད་པ་དེ་དག་ལས་སོ། །ཅིའི་དོན་དུ་ཞེ་ན་ཕྱོགས་འདིས་ཞེས་གསུངས་སོ། །འོ་ན་ཅི་ལྟར་བསྒྲུབ་པར་བྱ་བ་ཡིན་སྙམ་ན། འོན་ཀྱང་ཞེས་བྱ་བའོ། །རྫས་ཀྱི་མཚན་ཉིད་དེ་ཡང་

གང་ཡིན་སྙམ་ན་བྱ་བ་དང་ཞེས་བྱ་བའོ། །དེ་བཞིན་དུ་མཐོང་བ་ལ་བརྟེན་པ་ཅན་ཉིད་དུ་ཡན་ལག་ཅན་བསྒྲུབ་པར་བྱ་བ་ཡིན་ནོ་ཞེས་འབྲེལ་ཏོ། །དེ་ལྟར་མི་སྒྲུབ་ན་གྲུབ་པ་ལ་སྒྲུབ་པ་ཉིད་ཀྱི་ཉེས་པར་འགྱུར་རོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །འདི་ཉིད་བརྗོད་པ་ནི་ཡན་ལག་ནི་ཞེས་བྱ་བའོ། །གལ་ཏེ་གང་གིས་

དེ་ལྟར་བརྗོད་པར་འགྱུར་བ། ཡན་ལག་ཅན་རྫས་ཀྱི་མཚན་ཉིད་དང་ལྡན་པ་དང་། མཐོང་བའི་ཡུལ་ཉིད་དུ་དེ་སྨྲ་བས་ཅི་ལྟར་འདོད་སྙམ་ན། བལྟར་མི་རུང་བ་ཞེས་བྱ་བའོ། །བལྟར་མི་རུང་བ་རྡུལ་ཕྲ་རབ་རྣམས་ལ་མི་སྲིད་པ། ཤེས་པ་ལ་སོགས་པའི་མཚན་ཉིད་ཀྱི་འབྲས་བུ་མཐོང་ནས། འབྲས་བུ་དེའི་རྒྱུ་

ཡན་ལག་ཅན་འདོད་པ་ཡིན་ནོ། །དེས་ན་དེའི་མཚན་ཉིད་དང་ལྡན་པ་ཁོ་ན་བསྒྲུབ་པར་བྱ་བ་ཡིན་ནོ། །དེ་རྫས་ཀྱི་མཚན་ཉིད་དང་ལྡན་པ་བསྒྲུབ་པར་བྱ་བ་ཡིན་པའི་རྒྱུ་ཅི་ཞེ་ན། ཁྱད་པར་ཅན་མིན་ཞེས་བྱ་བའོ། །ཕྱེད་ཕྱི་མ་འཆད་པ་ནི་རྡུལ་ཕྲ་རབ་ཅེས་བྱ་བའོ། །དེ་ཉིད་ཅེས་བྱ་བ་བློའི་རྣམ་པའོ། །འོན་ཏེ་ཡན་

ལག་ཅན་མེད་ན་བློའི་རྣམ་པ་དེ་ཉིད་དུ་མི་འགྱུར་རོ། །དེས་ན་བློའི་རྣམ་པ་ལས་མ་གཏོགས་པའི་ཡན་ལག་ཅན་ནི་གྲུབ་པ་ཁོ་ནའོ་ཞེ་ན། ཧ་ཅང་ཞེས་གསུངས་སོ། །ཧ་ཅང་ཡུལ་ཐག་རིང་པོ་ན་གནས་པ་མ་ཡིན་པ་ཕན་ཚུན་ཉེ་བ་ཉིད་དུ་གནས་ཤིང་མ་འདྲེས་པའི་སྐུ་ཡུལ་གང་ལ་ཡོད་པ་སེམས་གཅིག་གི་

Vol. 186 · folio 109b

རྣམ་པར་སྣང་བའི་རྟོགས་པ་དེ་ལ་དེ་སྐད་ཅེས་བརྗོད་དོ། །སྒྲ་རྣམས་ཀྱི་ཡུལ་ཧ་ཅང་ཐག་རིང་པོ་ན་གནས་པ་མ་ཡིན་པ་ནི་རྟོགས་པ་པོ་ལ་ལྟོས་པ་ཡིན་ལ། ཕན་ཚུན་ཉེ་བར་གནས་པ་ནི་ནང་ཕན་ཚུན་ལ་ལྟོས་པའོ། །དེས་ན་ཞེས་བྱ་བ་ནི་ཡན་ལག་ཅན་མེད་པར་འགྱུར་བ་དེས་ནའོ། །དེ་ཙམ་གྱིས་ཞེས་བྱ་བ་

ནི་བོམས་གཅིག་པའི་རྣམ་པ་ཅན་གྱི་རྟོགས་པ་ཙམ་གྱིས་སོ། །དེས་ན་ཞེས་བྱ་བ་ནི་ཡན་ལག་གྲུབ་པ་མེད་པས་ནའོ། །མཚན་ཉིད་དང་ལྡན་པ་ཉིད་བསྒྲུབ་པར་བྱ་བ་ཡིན་ནོ་ཞེས་བྱ་བ་འདི་ག་ལས་ཤེ་ན། དེ་ལ་ཡང་ཞེས་སྨོས་སོ། །མཚན་ཉིད་དེ་ཡང་གང་ཞེ་ན། ཡོན་ཏན་ཞེས་བྱ་བའོ། །དེ་དག་གིས་

ཞེས་བྱ་བ་ནི་ཡོན་ཏན་དང་བྱ་བ་དག་གིའོ། །དེ་ལྟར་ཡིན་དང་ཞེས་བྱ་བ་ནི་མཚན་ཉིད་དང་ལྡན་པ་ཡིན་དང་ངོ་། །གལ་ཏེ་ཡན་ལག་ཅན་འདི་ལ་ལྕི་བ་ཉིད་དང་འོག་ཏུ་འགྲོ་བའི་མཚན་ཉིད་ཀྱི་ཡོན་ཏན་དང་བྱ་བ་དག་ཡོད་པར་འགྱུར་བ་ཡིན་ན། དེའི་ཚེ་སྲང་དམའ་བར་འགྱུར་རོ། །དེས་ཞེས་བྱ་བ་འོག་ཏུ་

འགྲོ་བས་དྲངས་པས་ན་སྲང་མགོ་དམའ་བར་འགྱུར་རོ། །བཟློག་པ་བརྗོད་པ་ནི་ཡན་ལག་ཅན་ཞེས་བྱ་བའོ། །དེ་ནི་ཡན་ལག་ལས་ལྷག་པ་ཡང་ཡོད་པ་མ་ཡིན་ནོ་ཞེས་བྱ་བ་ནི། ཡན་ལག་རྣམས་བཅལ་བ་ན་སྲང་མགོ་ཅི་ཙམ་དམའ་བ་དེ་ཙམ་ནི་ཡན་ལག་ཅན་བཅལ་ཡང་ཡིན་ནོ་ཞེས་བྱ་བའི་དོན་ཏོ། །དེས་

ན་ཞེས་བྱ་བ་ནི་དམའ་བ་མེད་པས་ན་ཡན་ལག་ཅན་འདིའོ། །དེས་ན་ནི་དམའ་བ་མེད་པས་སོ། །དེའི་ཕྱིར་ཞེས་བྱ་བས་ནི་ཡོན་ཏན་དང་བྱ་བ་མེད་པས་ནའོ། །དེ་མེད་ན་ཞེས་བྱ་བ་ཡོན་ཏན་དང་ལས་མེད་ནའོ། །དེ་ལྟར་ཞེས་བྱ་བ་འདུ་བ་ཅན་གྱི་རྒྱུར་རོ། །དེའི་ཕྱིར་ཞེས་བྱ་བ་ནི་འདུ་བ་ཅན་གྱི་རྒྱུ་ཉིད་

མེད་པའི་ཕྱིར་རོ། །འདུ་བ་ཅན་གྱི་རྒྱུ་མེད་ཀྱང་དེ་མཐོང་བ་མ་ཡིན་པ་ཅི་ལྟར་ཞེ་ན། མངོན་སུམ་དང་རྗེས་སུ་དཔག་པ་དག་གིས་མ་མཐོང་བའི་ཕྱིར་རོ་ཞེས་བརྗོད་པ་ནི། འབྲས་བུ་ཞེས་བྱ་བ་སྟེ་འབྲས་བུ་ལྕི་བ་ཉིད་ལ་སོགས་པ་དང་། ངོ་བོ་ཡན་ལག་རྣམས་ལས་ཐ་དད་པ་དག་གོ། །བལྟར་རུང་

བ་ཉིད་ཀྱང་ཞེས་བྱ་བ་ནི་མཚན་ཉིད་དང་ལྡན་པ་འབའ་ཞིག་ཏུ་མ་ཟད་པའོ། །དེ་ནི་ཞེས་བྱ་བ་ནི་བལྟར་རུང་བ་ཉིད་དོ། །ཅིག་ཤོས་ཞེས་བྱ་བ་ནི་དངོས་པོའོ། །འོ་ན་རགས་པ་ཉིད་དུ་དམིགས་པ་ཅི་ཞིག་ཡིན་སྙམ་ན་རྣམ་པར་ཤེས་པའི་ཞེས་བྱ་བའོ། །དེ་ལས་འཕགས་པ་ཞེས་བྱ་བ་ནི། རྣམ་

Vol. 186 · folio 110a

པར་ཤེས་པའི་རྣམ་པ་ལས་བློ་ལྷག་པར་གྱུར་པའོ། །དེའི་ཕྱིར་ཡན་ལག་ཅན་ནི་རྫས་ཀྱི་མཚན་ཉིད་དང་ལྡན་པའམ། བལྟར་རུང་བ་མ་ཡིན་ནོ་ཞེས་གནས་སོ། །མཇུག་སྡུད་པ་ནི་དེས་ན་ཞེས་བྱ་བའོ། །དེས་ན་གནོད་པ་ཡིན་ནོ། །ག་ལས་ཤེ་ན། ཡན་ལག་ཅན་གྱི་མཚན་ཉིད་གཞན་ཙམ་གང་

ཡིན་པ་དེ་ལས་གཞན་དུ་འགྱུར་བའི་ཁྱད་པར་ལྕི་བ་ཉིད་ལ་སོགས་པའི་མཚན་ཉིད་དེ་ལའོ། །ཅི་ལྟ་བུའི་ཁྱད་པར་ཅན་ཞིག་ལ་ཞེ་ན། མེད་ན་མི་འབྱུང་བ་ལ་སྟེ། ཡན་ལག་ཅན་ཡོད་པ་ལ་མི་འཁྲུལ་པ་ལའོ། །གལ་ཏེ་ཁྱད་པར་འདི་ཁས་མི་ལེན་ན། དེའི་ཚེ་ཡན་ལག་ཅན་ཀུན་རྫོབ་ཏུ་ཡོད་པ་ཁོ་ནར་འགྱུར་རོ་ཞེས་བྱ་

བའི་དོན་ཏོ། །རྣམ་པར་འགྲེལ་པ་ནི། གཞན་གྱི་ཁྱད་པར་གནོད་པ་ཡིན་ན་ཞེས་འབྲེལ་ཏོ། །ཁྱད་པར་གྱི་གཞན་ཉིད་གང་ལ་ལྟོས་པ་ཡིན་ཞེ་ན། སྨྲས་པའི་ཞེས་བྱ་བ་སྟེ། སྨྲས་པའི་གཞན་དག་ཡིན་པ་སྟེ། ཡན་ལག་ཅན་ཞེས་བྱ་བ་ཀུན་རྫོབ་ཏུ་ཡོད་པ་ཙམ། དེ་ལས་ཁྱད་པར་དུ་གྱུར་པ་གང་ཡིན་པ་ལྕི་བ་ལ་

སོགས་པའི་མཚན་ཉིད་དོ། །འདི་ཉིད་བརྗོད་པ་ནི། རྫས་ཀྱི་མཚན་ཉིད་དང་ལྡན་པ་ཞེས་བྱ་བ་སྟེ། ལྕི་བ་ལ་སོགས་པའི་མཚན་ཉིད་ཀྱིས་མཚན་པ་ཞེས་བྱ་བའི་དོན་ཏོ། །ཁྱད་པར་དེ་ཡང་ཡན་ལག་མེད་ན་མི་འབྱུང་བ་ཉིད་ཀྱིས་བསྒྲུབ་པར་བྱ་བ་ཡིན་ནོ། །དེ་ལྟ་མ་ཡིན་ན་ཞེས་བྱ་བ་ནི་རྫས་ཀྱི་མཚན་ཉིད་

དང་མི་ལྡན་ནའོ། །གཞན་ཙམ་ནི་ཀུན་རྫོབ་ཏུ་ཡོད་པ་ཙམ་ནི་གྲུབ་པ་ལ་སྒྲུབ་པས་བསྒྲུབ་བྱ་མ་ཡིན་པའི་ཕྱིར་རོ། །དེ་ཉིད་ཀྱི་འདི་ལྟར་ཞེས་བྱ་བའོ། །ཡན་ལག་ཅན་འདི་སྣང་བ་ཙམ་དུ་འགྱུར་རོ། །ཡན་ལག་ཅན་མེད་ན་སྣང་བ་ཉིད་འཐད་པ་དཀའོ་ཞེ་ན། སྣང་བ་ཙམ་ཉིད་ཅེས་གསུངས་སོ། །སྣང་བ་རྣམ་

པར་ཤེས་པ་ལས་ཐ་མི་དད་པ་ཉིད་དཔེར་སྟོན་པ་ནི། རབ་རིབ་ཅེས་བྱ་བའོ། །དེ་དག་ཅེས་བྱ་བ་ནི་སྒྲ་དང་ཤ་སྦྲང་ལ་སོགས་པའོ། །འདིར་ཞེས་བྱ་བ་ནི་ཡན་ལག་ཅན་གནོད་པར་བྱེད་པ་ལའོ། །གཞན་དག་ཅེས་བྱ་བ་ནི་རིགས་པ་ཅན་ལ་སོགས་པའི་ཁྱད་པར་རོ། །འཆད་པ་ནི་ཕྲ་མོ་ཞེས་བྱ་བ་ལ་སོགས་

པའོ། །རྡུལ་གཉིས་པ་ལ་སོགས་པ་ནས་བརྩམས་པའི་རྫས་ཀྱི་ལྕི་བ་གང་ཡིན་པ་དེ་དག་གིས་གཞལ་བའི་ཚེ་དང་འབྲེལ་པའི་ཕྱིར་འཛིན་པ་ཡིན་ནོ། །གལ་ཏེ་རྫས་སོ་སོར་ངེས་པ་འབའ་ཞིག་གཞལ་ན་དེའི་ཚེ་དེའི་ལྗི་བ་ཉེ་བར་མཚོན་པར་ནུས་པ་ཞིག་ན། དུ་མ་གཞལ་བ་ན་ནི། གཅིག་གིས་ལྗིད་

Vol. 186 · folio 110b

ངེས་པར་གཟུང་བར་མི་ནུས་ཏེ་མེད་པའི་ཕྱིར་རོ། །འདི་ཉིད་གསུངས་པ་ནི་འདི་ལྟར་ཞེས་བྱ་བའོ། །དེའི་ཞེས་བྱ་བ་ནི་ལྗིད་ཅན་དེའིའོ། །འོ་ན་དེ་མེད་པ་ཁོ་ནའོ་ཞེ་ན། མ་རྟོགས་ཀྱང་ཞེས་བྱ་བའོ། །དེའི་ཕྱིར་ཞེས་བྱ་བ་ནི་ལྕི་བ་ཉིད་ལ་སོགས་པ་དང་འོག་ཏུ་འགྲོ་བ་མེད་པའི་ཕྱིར་རོ། །འདིའི་ལན་ནི་དེ་ནི་ཞེས་

བྱ་བའོ། །གལ་ཏེ་ལྕི་བ་ཉིད་བླ་ལྷག་པར་མི་རྟོགས་ན་ཡན་ལག་ཅན་བླ་ལྷག་པ་དེ་ནི་ག་ལས་རྟོགས། ལྕི་བ་ཉིད་དང་འོག་ཏུ་འགྲོ་བ་ཉིད་མེད་པར་ཡང་ཡན་ལག་ཅན་རྟོགས་པར་འགྱུར་རོ་ཞེ་ན། དེ་རིག་ཅེས་བྱ་བ་ནི་ལྕི་བ་ཉིད་ལ་སོགས་པ་རིག་པའོ། །དེ་ལ་ཡན་ལག་ཅན་གྲུབ་པ་རེ་བ་ཡིན་ནོ། །དེ་ལོག་ན་

སྟེ་ལྕི་བ་ཉིད་ལ་སོགས་པ་རིག་པ་ལོག་ན་ཅི་ལྟར་འགྱུར། དེ་ཞེས་བྱ་བ་སྣང་བ་ཙམ་མོ། །བསྒྲུབ་པར་བྱ་བ་ནི་ཀུན་རྫོབ་ཏུ་ཡོད་པའི་ཡན་ལག་ཅན་ནི་གྲུབ་པ་ལ་སྒྲུབ་པ་ཡིན་ནོ། །དེ་སྐད་སྨྲ་བ་དེ་ནི་རྡུལ་གཉིས་པ་ལ་སོགས་པའི་རིམ་གྱིས་ལྡན་པ་དང་ཅིག་ཅར་ལྡན་པའི་ཕྱག་དར་གྱི་ཕུང་པོ་འདི་གཉིས་ཀྱི་ལྗིད་

ཐ་དད་པར་འགྱུར་རོ། །ཅིའི་ཕྱིར་ཞེ་ན། དེ་ཕྱིར་ཞེས་གསུངས་སོ། །གཅིག་ལ་ནི་ཡན་ལག་ཅན་གྱི་ཚོགས་མང་པོ་ཡོད་པའི་ཕྱིར་དང་། གཞན་ལ་ནི་དེ་མེད་པའི་ཕྱིར་རོ། །འོན་ཏེ་གཉི་ག་ལ་ཡང་ཡན་ལག་ཅན་གཅིག་ཁོ་ན་ཡིན་པ་དེས་ན་ལྗིད་ཐ་དད་པར་མི་འགྱུར་རོ་ཞེ་ན། ད་ལྟ་ན་འོ་ན་སོ་སོ་དང་ལྷན་

ཅིག་ཏུ་བཅལ་བ་ལ་ལྗིད་ཐ་དད་པར་འགྱུར་རོ། །རྫས་སྣ་ཚོགས་ཀྱི་བདག་ཉིད་ཅན་ཕྱག་དར་གྱི་ཕུང་པོ་དུས་གཅིག་ཏུ་བཅལ་བ་དང་། དེ་ཉིད་ཡང་རིམ་མམ་ཅིག་ཅར་གྱི་གོང་བུར་བྱས་ནས་བཅལ་བ་སྟེ། དེ་ལྟར་སོ་སོ་དང་ལྷན་ཅིག་བཅལ་བ་ན་ལྗིད་ཐ་དད་པར་འགྱུར་རོ། །འདིར་ཡང་དེ་ཕྱིར་ཞེས་

བྱ་བ་ནི་སྔ་མ་བཞིན་ནོ། །འདིར་ཡང་གཉི་ག་ལ་ཡན་ལག་ཅན་གྱི་རྫས་གཅིག་ཁོ་ན་ཡོད་དོ་ཞེས་ནི་བརྗོད་པར་མི་ནུས་སོ། །རྣམ་པར་བཤད་པ་མཛད་པས་ནི་འདི་ལ་དང་གི་སྒྲས་འཕངས་པའི་ལན་བརྗོད་དེ། ལན་འདི་ནི་གསལ་བའི་ཕྱིར་རྣམ་པར་མ་ཕྱེའོ། །འགྲེལ་པ་བྱེད་པས་ནི་དེའི་ཕྱིར་ཞེས་བྱ་བ་ལྗིད་ཐ་

དད་པ་ཡོད་པ་དེའི་ཕྱིར་ཞེས་བཤད་དོ། །བཟློག་པ་བརྗོད་པ་ནི་ཐ་དད་པ་ནི་ཞེས་བྱ་བའོ། །རས་བལ་གྱི་འདབ་མའི་དཔེ་ཡང་མི་འཐད་དོ་ཞེས་བསྟན་པའི་ཕྱིར་རས་བལ་གྱི་ཞེས་བྱ་བའོ། །རས་བལ་གྱི་འདབ་མའི་རྟོགས་པ་ཡིན་ཏེ་ཞེས་བྱ་བ་ནི་ལྗིད་དོ། །འདི་ནི་ཞེས་བྱ་བ་ནི་རས་བལ་གྱི་འདབ་མའོ། །

Vol. 186 · folio 111a

འོན་ཏེ་ཞེས་བྱ་བ་ལ་སོགས་པ་ནི་རྩོད་པའོ། །དེ་ལྟ་ན་ཞེས་བྱ་བ་ནི་གྲུབ་པའི་མཐའོ། །དེ་ལྟར་གྱུར་ན་ནི་རྫས་ཕྲེང་གཞལ་བ་ཞེས་གང་བརྗོད་པ་དེ་མ་འབྲེལ་པར་ཐལ་ཏེ། གཅིག་ལ་རྫས་ཀྱི་ཕྱེ་བ་མེད་པའི་ཕྱིར་རོ། །འདིས་ནི་རང་གི་ཚིག་དང་འགལ་བ་མེད་དུ་བཅུག་པ་དེ་ལྟ་ན་ཡང་ཉེས་པ་ཡོད་པ་ཉིད་ཞེས་བརྗོད་པ་

ནི། ཐ་མའི་ཞེས་བྱ་བའོ། །ཡན་ལག་ཅན་ཐམས་ཅད་ཞིག་ནས་སྐྱེས་པའི་ཐ་མའི་ཡན་ལག་ཅན་གྱི་ལྗིད་མི་རྟོགས་པ་ཡང་མི་འཐད་དེ་དེ་ཡོད་པའི་ཐ་སྙད་མེད་པར་ཐལ་བའི་ཕྱིར་རོ་ཞེས་དགོངས་པའོ། །དེས་ན་ཞེས་བྱ་བ་ནི་ཞིག་པའི་གཉིས་པ་དེས་བརྩམས་པའི་ཡན་ལག་ཅན་གྱིའོ། །འདི་ལ་སྲང་དམའ་བའི་ཁྱད་པར་མེད་ན།

ཡན་ལག་ཅན་ཡོད་པའི་ཐ་སྙད་མི་འཐད་དོ་ཞེས་བྱ་བའི་ཉེས་པ་འདི་ཡལ་བར་དོར་ནས། ཉེས་པ་གཞན་བརྗོད་པ་ནི། དེ་ལྟ་ན་ཞེས་བྱ་བའོ། །གལ་ཏེ་ཡན་ལག་ཅན་ཐམས་ཅད་ཞིག་པ་ན་ཡན་ལག་གཅིག་སྐྱེ་བ་ཡིན་པའི་ཕྱིར་སྲང་དམའ་བའི་ཁྱད་པར་དུ་མི་འགྱུར་ཏེ་ཁྱད་པར་མེད་པའི་ཕྱིར་རོ་ཞེས་བྱ་བ་ཡིན་ན། དེའི་ཚེ་རྡུལ་ཕྲ་རབ་རྣམས་ཀྱང་

འཇིག་པར་འགྱུར་རོ། །ཡན་ལག་ཅན་ཐམས་ཅད་འཇིག་པ་ན་རྡུལ་གཉིས་པ་ཡང་བསྡུས་པ་ནི་མ་ཡིན་ནོ། །དེ་ཡང་རྡུལ་ཕྲ་རབ་གཉིས་པོ་མ་ཞིག་གི་བར་དུ་འཇིག་པ་མ་ཡིན་ནོ་རྡུལ་ཕྲ་རབ་རྣམས་ཀྱང་འཇིག་པར་ཐལ་ལོ། །དེ་ལྟ་ན་ཡང་རྡུལ་ཕྲ་རབ་རྣམས་ནི་རྟག་པ་ཡིན་ནོ་ཞེས་བྱ་བའི་གྲུབ་པའི་མཐའ་དང་འགལ་ལོ། །རྡུལ་ཕྲ་རབ་

འཇིག་པ་སྤོང་བའི་དོགས་པ་བསུ་བ་ནི། འོན་ཏེ་ཞེས་བྱ་བའོ། །རྡུལ་ཕྲ་རབ་རྣམས་ལ་ཡང་རྣམ་པར་དབྱེ་བ་ཡོད་དོ་ཞེ་ན། རྡུལ་ཕྲ་རབ་དག་ལ་ནི་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །རྡུལ་ཕྲ་རབ་རྣམས་ནི་ཆ་ཤས་དང་བཅས་པ་ཁོ་ནར་འཐད་དོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། ལུས་ཅན་དག་ནི་ཞེས་བྱ་བའོ། །

འདིས་ནི་རྡུལ་ཕྲ་རབ་རྣམས་ལ་རྣམ་པར་དབྱེ་བ་མེད་པའི་སྒྲུབ་བྱེད་ཆ་མེད་པ་ཉིད་མ་གྲུབ་སྟེ་གཞན་གྱིས་ལུས་ཅན་དུ་ཁས་བླངས་པའི་ཕྱིར་རོ་ཞེས་བསྟན་པ་ཡིན་ནོ། །གལ་ཏེ་དེ་ལྟ་ན་མདོ་སྡེ་པའི་ལྟར་ན་ཡང་རྡུལ་ཕྲ་རབ་རྣམས་ཆ་མེད་དུ་མི་འགྲུབ་པོ་ཞེ་ན། མ་ཡིན་ཏེ་མདོ་སྡེ་པས་ནི་རྡུལ་ཕྲ་རབ་རྣམས་ལུས་ཅན་

ཉིད་ཁས་མ་བླངས་པའི་ཕྱིར་ཏེ། ཐམས་ཅད་སོ་སོ་བ་མ་ཡིན་པའི་རྫས་ཀྱི་ཚད་ནི་ལུས་ཅན་ཡིན་ནོ་ཞེས་གཞན་ཉིད་ཀྱིས་ཁས་བླངས་པའི་ཕྱིར་རོ། །དེས་ན་ཉེས་པ་འདི་ནི་མེད་དོ། །གང་གི་ཕྱིར་དེ་ལྟར་ཡན་ལག་ཅན་ཐམས་ཅད་ཞིག་ན་རྡུལ་ཕྲ་རབ་འཇིག་པར་ཐལ་བ་དེའི་ཕྱིར། དུམ་བུའི་ཡན་ལག་ཅན་གྱི་རང་

Vol. 186 · folio 111b

བཞིན་ཡན་ལག་ཅན་ནི་འཇིག་པ་ཞེས་བྱ་བར་མི་འཐད་དོ། །དེ་ལྟ་ཡིན་དང་སྲང་དམའ་བའི་ཁྱད་པར་དུ་འགྱུར་རོ་ཞེས་བྱ་བའི་ཉེས་པ་སོ་ན་འདུག་གོ། །འོན་ཏེ་བྱ་བ་ནི་རྡུལ་ཕྲ་རབ་ཞིག་ན་ཡན་ལག་ཅན་ཐམས་ཅད་འཇིག་ལ་དེས་ན་ཐ་མར་གནས་པའི་ཡན་ལག་ཅན་གཅིག་ཁོ་ན་སྐྱེས་པ་དེའི་ཕྱིར་སྲང་དམའ་བའི་ཁྱད་པར་དུ་

མི་འགྱུར་རོ་ཞེས་བྱ་བའོ། །ལན་ནི་དེ་ལྟ་ནའོ་ཞེས་བྱ་བའོ། །མ་ཤ་ལ་སོགས་པ་རིམ་གྱིས་བཅལ་བ་གྲངས་ལྔས་རིམ་པར་བཅད་པ་ཕྱིས་གོང་བུར་བྱས་པ་རྣམས་ཀྱི། སྔར་གྲངས་ཅི་འདྲ་བ་དེ་འདྲ་བར་དེ་དང་མཚུངས་པ་མི་རུང་ངོ་། །གོང་བུར་བྱས་པའི་གནས་སྐབས་ན་ཡན་ལག་ཅན་གཅིག་ཡིན་པའི་ཕྱིར་དང་། མ་ཤ་ལ་

སོགས་པའི་ཡན་ལག་ཅན་རྣམས་ཀྱང་ཞིག་པའི་ཕྱིར་རོ། །འཆད་པ་ནི་མ་ཤའི་ཞེས་བྱ་བའོ། །འོ་ན་ཅི་ལྟར་འགྱུར་ཞེ་ན། གསེར་ཞེས་བྱ་བའོ། །འོན་ཏེ་ལྕི་བ་ཉིད་གཅིག་ཡིན་ཡང་ཞེས་བྱ་བ་ནི་ཡན་ལག་ཅན་ནོ། །དེ་ལྟར་ཞེས་བྱ་བ་ནི། མ་ཤ་ལྔའི་གོང་བུ་ཞེས་བྱ་བའོ། །དེ་ལྟར་ཡིན་ན་ཞེས་བྱ་བ་ནི་གཅིག་ཉིད་ཀྱིས་དེ་

ལྟར་ཐ་སྙད་བྱེད་པ་ཡིན་ནའོ། །དོན་དམ་པར་ནི་མི་འགྱུར་གྱི་འོན་ཀྱང་བརྟག་པར་འགྱུར་རོ། །དེ་ལྟར་ཡང་གཞན་པ་མ་ཡིན་ནོ། །དེའི་ཕྱིར་རང་གི་གཞུང་དང་འགལ་བས། རྡུལ་ཕྲ་རབ་ནི་འཇིག་པར་ནི་ཁས་བླང་བར་བྱ་བ་མ་ཡིན་ནོ། །འོ་ན་ཅི་ལྟར་གྲངས་དོན་དམ་པ་མ་ཡིན་ཞེ་ན། དེའི་ཕྱིར་ཡན་ལག་རྣམས་མ་ཞིག་ན།

མ་ཤ་ལ་སོགས་པ་དང་མཚུངས་པའི་རྒྱུ་མཚན་དེ་ལ་བརྟེན་པའི་གྲངས་འཐད་པ་ཡིན་ནོ་ཞེས་སྨོས་སོ། །དེ་ལ་བརྟེན་པ་ནི་ཡན་ལག་ལ་བརྟེན་པའོ། །གྲངས་ནི་ལྔའོ། །ཅིག་ཅར་ལྡན་པ་དང་རིམ་གྱིས་ལྡན་པ་དག་ནི་གནོད་མི་ཟ་བར་ལྗིད་ཁྱད་པར་ཡོད་པར་འགྱུར་རོ། །ཡོད་པ་ཡང་མ་ཡིན་ཏེ་དེས་ན་ཡན་ལག་ཅན་

ནི་ཡོད་པ་མ་ཡིན་ནོ་ཞེས་དགོངས་པའོ། །འོན་ཏེ་ཞེས་བྱ་བ་ནི་ཕ་རོལ་གྱིའོ། །གོང་རོལ་གྱི་གོང་མ་ཞེས་བྱ་བ་ནི། ཡན་ལག་ཅན་གྱི་མཚན་ཉིད་ཀྱི་འབྲས་བུའོ། །ཅི་ལྟར་རྫས་གཅིག་མི་རྟོགས་པ་དེ་བཞིན་དུ་གོང་མ་གོང་མའི་འབྲས་བུ་ཐམས་ཅད་ཀྱང་ཡིན་པར་འགྱུར་ཏེ། ཁྱད་པར་མེད་པའི་ཕྱིར་རོ་ཞེ་ན་འདི་ལ་རེ་

ཞིག་རང་ཉིད་ལན་འདེབས་པ་ནི། དེ་ནི་མ་ཡིན་ཏེ་ཞེས་བྱ་བའོ། །འདིར་བར་གྱི་སྒྲ་བྱ་རོག་གི་ལྟ་སྟངས་ཀྱི་ཚུལ་གྱིས་གཉི་ག་ཡང་སྦྲེལ་བར་བྱའོ། །དེས་ན་འདི་ལྟར་སྦྱར་སྟེ། ཡུངས་ཀར་ནས་བརྩམས་ཏེ་ཡུངས་ཀར་མཐའ་མཚམས་ནས་བཟུང་སྟེ་ཚོགས་ཆེན་པོ་ནས་ཚོགས་ཆེན་པོའི་མཐར་ཐུག་པར་འབྲས་

Vol. 186 · folio 112a

བུའི་ཕྲེང་བའི་གོང་ནས་གོང་དུ་འཕེལ་བ་དང་ལྡན་པའི་ལྕི་བ་ཉིད་གལ་ཏེ་རྟོགས་པ་མ་ཡིན་ན། དེའི་ཚེ་ཡུངས་ཀར་བར་གྱི་ཞེས་བྱ་བ་ཡུངས་ཀར་མུ་མཚམས་སུ་བཟུང་བའི་སྔ་མ་སྔ་མའི་ལྕིད་དག་ཀྱང་། ཤིན་ཏུ་ཆུང་བ་ཇེ་ཆུང་ཇེ་ཆུང་སོང་བ་ནི་ཤིན་ཏུ་རྟོགས་པར་དཀའ་བར་འགྱུར་རོ། །དེས་ན་འབྲས་

བུའི་ཕྲེང་བ་དེའི་རྒྱུའི་རྡུལ་ཕྲ་རབ་དག་ཉིད་གཞལ་བར་འགྱུར་རོ། །ཅིའི་ཕྱིར་ཞེ་ན། འབྲས་བུའི་ཞེས་བྱ་བའོ། །དེའི་རྒྱུ་དུམ་བུའི་ཡན་ལག་གི་ཡིན་པར་འགྱུར་རོ། །དེ་ཡང་ཞེས་བྱ་བ་རྒྱུའི་ཡན་ལག་གོ། །དེའི་རྒྱུའི་ཞེས་བྱ་བ་ནི་སྒྲའི་རྒྱུའིའོ། །དེའི་ཡང་ཞེས་བྱ་བ་ནི། དུམ་བུའི་རྒྱུ་ཡང་གཞལ་བས་ན་དེའི་རྒྱུའི་ཞེས་བྱ་བ་དུམ་

བུའི་སྒྲའི་རྒྱུའི་ལྗིད་ཡིན་པའི་ཕྱིར་ཞེས་སྦྱར་རོ། །རྡུལ་ཕྲ་རབ་ཀྱི་རྒྱུ་ཡང་ཅིའི་ཕྱིར་གཞལ་བར་མ་ཡིན་སྙམ་ན། དེ་དག་ལ་ནི་ཞེས་བྱ་བ་སྟེ། རྡུལ་ཕྲ་རབ་དག་ནི་བརྩམ་པར་བྱ་བ་མ་ཡིན་ཏེ་རྒྱུ་མེད་པའི་ཕྱིར་རོ། །འབྲས་བུ་ཉིད་ཡིན་ན་ནི་ཡན་ལག་ཅན་གྱི་རང་བཞིན་དུ་རང་འགྱུར་རོ། །དེའི་ཕྱིར་ལྗིད་ནི་ཆ་མེད་པའི་རང་བཞིན་

རྡུལ་ཕྲ་རབ་ཉིད་ལ་ཡོད་པ་ཡིན་ནོ། །དེས་ན་ཡན་ལག་ཅན་གྱི་ལྗིད་ནི་ཡོད་པ་མ་ཡིན་པས་ཡན་ལག་ཅན་རྟོགས་པ་ནི་ལོག་པ་ཁོ་ན་ཡིན་ནོ། །ཐ་མ་ཡིས་བྱ་བ་ནི། ཐ་མའི་ཡན་ལག་ཅན་ཞིག་ཀྱང་ཞེས་ཡང་གི་སྒྲ་ནི་རིམ་པ་གཞན་དུ་བྱ་སྟེ། ཐ་མའི་ཡན་ལག་ཅན་ཞིག་ཀྱང་ལྗི་བ་ཉིད་དམིགས་པ་གང་ཡིན་པ་དེ་ནི་དེ་

དག་གི་ཡིན་ཏེ། རྒྱུ་དང་འབྲས་བུར་གྱུར་པ་དུམ་བུའི་ཡན་ལག་ཅན་དང་། དེའི་ཡན་ལག་དག་ལ་མཐོང་ངོ་ཞེས་འབྲེལ་ཏོ། །ཡན་ལག་ཅན་ཡང་ཞིག་པར་གྱུར་ཀྱང་དུམ་བུའི་ཡན་ལག་ཅན་དང་དེའི་ཡན་ལག་ལུས་དག་ལ་ཡང་ལྗིད་དེ་ཉིད་མཐོང་ངོ་ཞེས་སྦྱར་རོ། །ཡང་ན་རྣམ་པ་གཞན་དུ་བཤད་དེ། ཐ་མའི་ཡན་ལག་

ཅན་ཞེས་བྱ་བ་རྒྱུ་དང་འབྲས་བུར་གྱུར་པ་ཐ་མའི་ཡན་ལག་ཅན་དང་། དུམ་བུའི་ཡན་ལག་ཅན་ཞིག་པ་དེ་དག་གཉིས་ཀྱི་ལྕི་བ་ཉིད་གང་ཡིན་པ་དེ་འབའ་ཞིག་མཐོང་ལ། ཡང་དུམ་བུའི་ཡན་ལག་ཅན་དང་དེའི་ཡན་ལག་དག་ཞིག་པར་གྱུར་ཀྱང་། རྒྱུ་དང་འབྲས་བུར་གྱུར་པ་དུམ་བུའི་ཡན་ལག་ཅན་དང་དེའི་ཡན་ལག་

གཉིས་པ་ཞིག་པར་གྱུར་པ་དག་དང་འབྲེལ་པའི་ལྗིད་ཉིད་གང་ཡིན་པ་དེ་ཉིད་མཐོང་ངོ་གང་གིས་ཕྱིར་དེ་ལྟར་ལྕི་བ་ཉིད་མཐོང་བ་དེས་ནའོ། །དངོས་པོའི་ཆོས་གང་ཞིག་ཐམས་ཅད་སྡུད་པར་བྱེད་པ་དག་ལས་གཅིག་ལ་མི་སྲིད་པ་དེ་ནི་ངེས་པར་གཞན་ལ་ཡོད་པ་ཡིན་ཏེ་དཔེར་ན་རྟག་པ་དང་གཞན་དག་ལ་དོན་བྱ་བ་བྱེད་པ་ཉིད་

Vol. 186 · folio 112b

བཞིན་ནོ། །ལྕི་བ་ཉིད་ཅེས་བྱ་བ་དངོས་པོའི་ཆོས་ཀྱང་རྡུལ་ཕྲ་རབ་དང་རགས་པ་གཉིས་ལས་རགས་པ་ལ་མི་སྲིད་པ་ཡིན་ནོ་ཞེས་བྱ་བ་ནི་རང་བཞིན་ནོ། །སུན་འབྱིན་པ་གཞན་ཡང་བརྗོད་པ་ནི། གཞན་ཡང་ཞེས་བྱ་བའོ། །འདབ་བལ་གྱི་ཞེས་བྱ་བ་ནི་གཅིག་ལའོ། །ཡོད་པ་ཉིད་དོ་ཞེས་བྱ་བ་ནི་མེད་པ་ཡིན་པ་སྟེ། འདབ་བལ་དེ་བལྟར་རུང་བ་ཡིན་པའི་

ཕྱིར་རོ། །དེ་ཞེས་བྱ་བ་ནི་འབྲས་བུ་མཐོང་བའོ། །དོན་ནི་ཡན་ལག་ཅན་ནོ། །དེའི་འབྲས་བུ་ནི་ཡན་ལག་ཅན་གྱི་འབྲས་བུའོ། །འོ་ན་དེ་ལྟ་མ་ཡིན་ན། དེ་རྟོགས་པར་འགྱུར་རོ་ཞེ་ན། ལྗིད་ཉིད་ཅེས་བྱ་བའོ། །མ་ཤ་ལ་སོགས་པ་རིམ་གྱིས་བགྲངས་པ་ནི་ཕྱིས་བསྒོངས་པའི་ཡན་ལག་ཅན་ཡན་ལག་རྣམས་ལས་ལྷག་པ་ནི་ཡོད་པ་མ་ཡིན་ནོ། །དེ་ཅིའི་ཕྱིར་ཞེ་ན།

ལྕི་བ་ཉིད་རྟོགས་པ་མེད་པ་བཞིན་དུ། ཡན་ལག་ཅན་དེའི་ཡོན་ཏན་གཟུགས་ལ་སོགས་པ་ཐམས་ཅད་རྟོགས་པ་མེད་པའི་ཕྱིར་རོ། །གལ་ཏེ་དེ་ལྟ་ན་ཡན་ལག་ཅན་ལ་གནོད་པར་བྱེད་པ་དུ་མ་ཡོད་པ་ཡིན་ནོ། །འོ་ན་ཅི་ལྟར་སྲང་དམའ་བའི་ཁྱད་པར་མི་འཛིན་པའི་ཕྱིར་ཞེས་བྱ་བ་འབའ་ཞིག་བརྗོད་ཅེ་ན། རྩ་བའི་སློབ་དཔོན་གྱིས་གསུངས་

པའི་དམའ་བ་མེད་པ་གང་ཡིན་པ་དེ་ནི་ཡན་ལག་ཅན་ལ་གནོད་པར་བྱེད་པ་གཞན་གྱི་ཉེ་བར་མཚོན་བྱེད་ཡིན་ནོ། །གལ་ཏེ་ཡན་ལག་ཅན་གྱི་ཡོན་ཏན་ཐམས་ཅད་རྟོགས་པ་མེད་པ་ཉིད་གང་ལས་ཤེ་ན། གཟུགས་སོགས་ཞེས་གསུངས་ཏེ། གཟུགས་ལ་སོགས་པའི་ལྷག་དང་ལྷག་ཅི་ལྟ་བ་བཞིན་རང་གི་དབང་པོས་མཐོང་བ་མེད་པའི་

ཕྱིར་རོ། །ཡན་ལག་ཅན་ནམ་དེའི་འབྲས་བུ་མངོན་སུམ་ཉིད་མ་ཡིན་མོད། དེ་ལྟ་ན་ཡང་དེ་ནི་ཡོད་དོ་ཞེས་དོགས་ན། མངོན་སུམ་དང་ཞེས་བྱ་བའོ། །གཞན་དག་ཀྱང་ཞེས་བྱ་བ་ནི་ཡན་ལག་ཅན་གྱི་གནོད་པར་བྱེད་པའོ། །ཡན་ལག་ཅན་གྱི་གཟུགས་དང་སྒྲ་ལ་སོགས་པ་ཐམས་ཅད་མི་རྟོགས་པ་ཡིན་ནོ་ཞེས་གང་ལས་ཤེས་པར་བྱ་བ་ཡིན་

ཞེ་ན། འདི་ལས་ཞེས་བྱ་བ་ནི་གྲུབ་པའི་མཐའོ། །ཅི་ལྟར་ལྷག་པ་མི་རྟོགས་སྙམ་ན། ཡན་ལག་ཅན་ཞེས་བྱ་བ་སྟེ། རེ་ཞིག་ཡན་ལག་ཅན་ནི་སྲིད་པ་མ་ཡིན་པས་གཟུགས་དང་རོ་ལ་སོགས་པའི་ཁྱད་པར་མི་རྟོགས་མོད་ཀྱི། ཡན་ལག་ཅན་ཡོད་པར་ཁས་བླངས་ཀྱང་། ཐ་མའི་ཡན་ལག་ཅན་ལ་གནས་པའི་གཟུགས་

དང་རོ་ལ་སོགས་པ་ཡན་ལག་ཅན་ལ་གནས་པའི་གཟུགས་ལ་སོགས་པ་དག་ལས་ཁྱད་པར་དུ་གྱུར་པ་ནི་རྟོགས་པ་མེད་དོ། །ཡོན་ཏན་དང་ལས་དང་ལྡན་པ་བལྟར་རུང་བའི་ཡན་ལག་ཅན་མེད་པ་ཉིད་ཅེས་བྱ་བའི་སྐབས་ཀྱི་མཇུག་བསྡུ་བའོ། །རྩ་བའི་སྐབས་ཉིད་མཇུག་སྡུད་པའི་ཕྱིར་ཆོས་ཀྱི་ཁྱད་པར་ཞེས་བྱ་བའོ། །ཡན་ལག་ཅན་

Vol. 186 · folio 113a

ནི་ཡན་ལག་རྣམས་ལས་གཞན་ཡིན་ཏེ་ཞེས་བྱ་བའི་ཕྱོགས་ཀྱི་སྐྱོན་གང་ཡིན་པ་དེ་ནི་ཆོས་ཀྱི་ཁྱད་པར་ལ་གནོད་པ་གང་ཡིན་པ་དེའི་སྒོ་ནས་ཕྱོགས་ཀྱི་སྐྱོན་གཅིག་ཡིན་ནོ། །གལ་ཏེ་ཕྱོགས་ལྟར་སྣང་བ་འདི་གང་གི་ནང་དུ་བསྡུ་ཞེས་དོགས་ན། ཕྱོགས་འདི་ཡང་ཞེས་བྱ་བའོ། །ཆོས་ཀྱི་ཁྱད་པར་གནོད་པའི་མཚན་ཉིད་

ཀྱི་ཕྱོགས་ལྟར་སྣང་བ་འདི་ཡང་གནོད་པ་རྣམ་པ་བཞིའི་ནང་དུ་འདུའོ། །དེ་ལ་ཡན་ལག་ཅན་གཞན་ཁས་བླངས་ནས་ཁྱད་པར་ལྕི་བ་ཉིད་ལ་སོགས་པའི་མཚན་ཉིད་རིགས་པའི་སྟོབས་ཀྱིས་མི་འདོད་པ་དེས་ན་གཞན་ཉིད་དུ་ཁས་བླངས་པ་ནི། གཞན་ཉིད་ཀྱི་ཁྱད་པར་མེད་པར་ཁས་བླངས་པས་གནོད་པ་ཡིན་ནོ། །དཔེར་ན་བདེ་བ་མ་

ཡིན་རབ་ཏུ་སྟེར་བ་ཉིད་ཆོས་ཡོད་པར་ཁས་བླངས་པས་གནོད་པ་བཞིན་ནོ། །དེ་བཞིན་དུ་རང་གི་ཚིག་དང་འགལ་བ་ནི། གཞན་ཉིད་ཁས་ལེན་པས་ཀུན་རྫོབ་ཏུ་ཡོད་པ་ལས་གཞན་ཉིད་དུ་ཁས་བླངས་པ་ཡིན་ཏེ། དེ་ལྟ་མ་ཡིན་ན་གཞན་ཉིད་དུ་མི་འཐད་པའི་ཕྱིར་རོ། །དེས་ན་ཡན་ལག་ཅན་དོན་དམ་པར་ཡོད་པ་ནི། དོན་དམ་

པར་ཡོད་པ་མ་ཡིན་པ་ཀུན་རྫོབ་ཏུ་ཡོད་པར་གནོད་པ་ཡིན་ནོ། །དེ་བཞིན་དུ་ཡན་ལག་ཅན་རྣམས་ལས་གཞན་ཉིད་ནི་མངོན་སུམ་གྱིས་བསལ་བ་ཡིན་པའི་ཕྱིར་ན། མངོན་སུམ་གྱིས་གནོད་པའི་རྗེས་སུ་དཔག་པས་བསལ་བ་ཡང་སྲང་དམའ་བའི་ཁྱད་པར་མི་འཛིན་པའི་ཕྱིར་རོ་ཞེས་བསྟན་ཟིན་ཏོ། །དེས་ན་ཕྱོགས་ལྟར་སྣང་

བ་གཅིག་པོ་འདི་ནི་གནོད་པ་རྣམ་པ་བཞིའི་ནང་དུ་འདུས་པ་ཡིན་ནོ། །གལ་ཏེ་ཐམས་ཅད་ཡན་ལག་ཅན་ལ་གནོད་པའི་དཔེར་བརྗོད་པ་ཡིན་པར་ཅི་ལྟར་རྟོགས་པར་བྱ་སྟེ་མ་བསྟན་པའི་ཕྱིར་རོ་ཞེ་ན། ཁས་བླངས་ཞེས་བྱ་བའོ། །ཆོས་ཀྱི་ཁྱད་པར་གནོད་པ་ན་གནོད་པ་རྣམ་པ་བཞི་ཀ་སྲིད་པའི་རྒྱུས། ཆོས་ཅན་གྱི་རང་གི་ངོ་བོ་དང་། དེའི་

ཁྱད་པར་གནོད་པའི་མཚན་ཉིད་ཀྱི་དཔེར་བརྗོད་པ་གཞན་རྟོགས་པར་བྱའོ། །རང་གི་ངོ་བོ་གནོད་པ་ལ་སོགས་པ་བཞིན་ནོ། །ཆོས་ཀྱི་རང་གི་ངོ་བོ་ལ་གནོད་པ་རྣམ་པ་བཞི་འཛིན་པ་ཡིན་ནོ། །སོགས་པའི་སྒྲས་ནི་ཆོས་ཀྱི་ཁྱད་པར་གནོད་པའོ། །ཡན་ལག་ཅན་གྱི་གནོད་པར་བྱེད་པའི་རིགས་པ་ཉེ་བར་སྟོན་པའི་དཔེར་བརྗོད་པ་ནི་ཅི་

སྐད་བརྗོད་པའི་ཕྱོགས་ཀྱིས་ན་རྟོགས་པར་བྱ་བ་ཡིན་ནོ། །རང་གི་ངོ་བོ་ལ་གནོད་པ་ལ་སོགས་པའི་དཔེར་བརྗོད་པ་ལྷག་མ་གཉིས་ཅི་ལྟར་བསྟན་པ་དེ་བཞིན་དུ་དཔེར་བརྗོད་པ་ལྷག་མ་གཉིས་ཀྱང་བསྟན་པར་བྱ་བ་ཡིན་ནོ་ཞེས་བྱ་བའི་དོན་ཏོ། །སྔར་བསྟན་པ་ཉིད་དོ་ཞེས་བྱ་བ་ནི་རྣམ་པར་བཤད་པར་རོ། །དེ་ལྟར་ཕྱོགས་ཀྱི་མཚན་ཉིད་དང་

Vol. 186 · folio 113b

དེར་སྣང་བའི་མཚན་ཉིད་ཀྱང་བསྟན་ནས། རིགས་པ་ཅན་ལ་སོགས་པའི་ཕྱོགས་ཀྱི་མཚན་ཉིད་ལ། ཧ་ཅང་ཁྱབ་པའི་ཉེས་པས་ཉེས་པ་ཆགས་པ་ཡིན་ནོ་ཞེས་བསྟན་པའི་དོན་དུ་དེའི་མཚན་ཉིད་ཉེ་བར་འགོད་པ་ནི། གལ་ཏེ་ཞེས་བྱ་བའོ། །སྐྱོན་ཅི་ཡོད་ཅེས་བྱ་བ་ནི། ཅི་ལྟར་སངས་རྒྱས་པའི་ཕྱོགས་ཀྱི་མཚན་ཉིད་ལ་སྐྱོན་མེད་པ་དེ་བཞིན་དུ་འདི་

ལ་ཡང་ཡིན་ནོ་ཞེས་བསམས་པའོ། །མ་གྲུབ་པའི་ཞེས་བྱ་བ་ནི་གྲུབ་པའི་མཐའོ། །བསྒྲུབ་པར་བྱ་བར་གྱུར་པ་ཞེས་བྱ་བ་ནི། ད་ལྟར་བ་ལོ་ཀི་ཏྱའི་སྔ་རྐྱེན་ཡིན་པའི་ཕྱིར་རོ། །གལ་ཏེ་ཡང་འདི་གཉིས་སྒྲུབ་པར་བྱེད་པ་ཉིད་དུ་བསྟན་པ་དེ་ལྟ་ན་ཡང་མ་གྲུབ་པ་ཉིད་ལ། མ་གྲུབ་པ་ཡང་སྒྲུབ་པར་བྱེད་པ་མ་ཡིན་ཏེ། དེས་ན་འདི་གཉིས་ནི་ཕྱིས་

བསྒྲུབ་པར་བྱ་བ་ཉིད་ཡིན་ནོ་ཞེས་བྱ་བའི་དོན་ཏོ། །དེ་བདེན་པ་ཞིག་ན་ཞེས་བྱ་བ་ནི་ཧ་ཅང་ཁྱབ་པ་སྤོང་བ་བརྗོད་པའོ། །གང་གི་ཚེ་བདེན་སྙམ་ན་གལ་ཏེ་ཞེས་བྱ་བའོ། །ཡང་ཅི་ལྟར་ན་འདི་ལྟར་མི་འགྲུབ་སྙམ་ན། བྱ་བ་ཞེས་བྱ་བའོ། །དེ་ལྟའི་བདག་མིན་ཞེས་བྱ་བ་ནི། སྒྲུབ་པར་བྱེད་པའི་བདག་ཉིད་མ་ཡིན་པར། གཞན་ཕྱིར་རྒོལ་བ་ལ་དེ་

ལྟར་སྒྲུབ་པར་བྱེད་པ་ཉིད་དུ་ཉེ་བར་བཀོད་པ་སྟེ། དེའི་ཚེ་སྒྲུབ་པར་བྱེད་པ་ཉིད་དུ་བསྟན་པའི་ཚེ་ཉིད་སྒྲུབ་པར་བྱེད་པར་མི་འདོད་ཀྱང་བསྒྲུབ་བྱར་འགྱུར་རོ། །ཅིའི་ཕྱིར་ཞེ་ན། བྱ་བ་ཞེས་བྱ་བའོ། །ཡང་ན་དེ་ལྟའི་མིན་ཞེས་བྱ་བ་བསྒྲུབ་པར་བྱ་བའི་བདག་ཉིད་མ་ཡིན་པ། གཞན་དག་ལ་སྒྲུབ་པར་བྱེད་པ་ཉིད་དུ་ཉེ་བར་བཀོད་པ་དེ་བསྒྲུབ་པར་

བྱ་བ་ཉིད་དུ་བསྟན་པའི་ཚེ་མ་ཟད་ཀྱི། སྒྲུབ་པར་བྱེད་པ་ཉིད་དུ་བསྟན་པའི་ཚེ་ཡང་བསྒྲུབ་བྱར་མི་འདོད་ན་ཡང་བསྒྲུབ་བྱར་ཐལ་བར་འགྱུར་རོ། །ཡང་ན་དེ་ཡང་ཞེས་བྱ་བ་སྟེ། བསྒྲུབ་པར་བྱ་བ་འབའ་ཞིག་ཏུ་མ་ཟད་ཀྱི་སྒྲུབ་པར་བྱེད་པ་ཉིད་དུ་བསྟན་པ་ཡང་བསྒྲུབ་པར་བྱ་བར་ཐལ་བར་འགྱུར་རོ་ཞེས་བྱ་བའོ། །ཅི་ལྟར་ཞེས་བྱ་བ་ནི་བསྒྲུབ་པར་

བྱ་བ་ཕྱིས་འགྱུར་བ་ཅི་ལྟར་ཡིན་ཏེ། ད་ལྟར་བ་ཁོ་ན་བསྒྲུབ་པར་བྱ་བ་ཡིན་ནོ་ཞེས་བྱ་བའོ། །ལན་ནི་དེའི་ཚེ་ཞེས་བྱ་བ་སྟེ། སྒྲུབ་པར་བྱེད་པ་ཉིད་དུ་བསྟན་པའི་དུས་ནའོ། །དེ་ལྟ་བུའི་བདག་ཉིད་མ་ཡིན་པར་ཞེས་བྱ་བ་ནི། བསྒྲུབ་པར་བྱ་བའི་བདག་ཉིད་མ་ཡིན་པར་རོ། །ཅི་ལྟར་དེའི་ཚེ་བསྒྲུབ་བྱ་མ་ཡིན་ཞེ་ན། དེ་ནི་ཞེས་བྱ་བའོ། །དེའི་ཚེ་ཞེས་

བྱ་བ་ནི་སྒྲུབ་པར་བྱེད་པར་བསྟན་པའི་དུས་ན། མིག་གིས་གཟུང་བ་ཉིད་ལ་སོགས་པ་བསྒྲུབ་པར་བྱ་བ་མ་ཡིན་ནོ། །གལ་ཏེ་བསྒྲུབ་པར་བྱ་བ་མ་ཡིན་པ་འོ་ན་ཕྱིས་ཅི་ལྟར་བསྒྲུབ་བྱར་འགྱུར་སྙམ་ན། མ་གྲུབ་པ་ནི་ཞེས་བྱ་བའོ། །དེས་ན་ཞེས་བྱ་བ་ནི་མ་གྲུབ་པ་ནི་སྒྲུབ་པར་བྱེད་པ་ཉིད་མ་ཡིན་པས་ནའོ། །དེ་ནི་སྒྲུབ་པར་བྱེད་པ་ཉིད་དུ་

Vol. 186 · folio 114a

བསྟན་པ་དེའོ། །གལ་ཏེ་དེ་ལྟ་ན་ཡང་སྒྲུབ་པར་བྱེད་པ་ཉིད་དུ་བསྟན་པའི་དུས་ན་ཅི་ལྟར་བསྒྲུབ་བྱ་མ་ཡིན་སྙམ་ན། དེས་ན་ཕྱིས་ཞེས་བྱ་བའོ། །སྒྲུབ་པར་བྱེད་པ་ཉིད་དུ་བསྟན་པའི་དུས་ན་ཡང་མ་གྲུབ་པ་སྒྲུབ་བྱེད་ཉིད་དུ་བསྟན་པ་ནི། ཕྱིས་བསྒྲུབ་པར་བྱ་བ་ཉིད་ཀྱིས་དམ་བཅའ་བ་ཡིན་ནོ་ཞེས་བྱ་བའི་དོན་ཏོ། །གལ་

ཏེ་ཞེས་བྱ་བ་ལ་སོགས་པ་ནི་རྩོད་པའོ། །ཅི་ལྟར་བསྒྲུབ་པར་བྱ་བའི་སྒྲ་ཤེས་པར་བྱ་བ་ཉིད་དུ་གྱུར་པའི་བསྒྲུབ་པར་བྱ་བ་རྟོགས་པར་བྱེད་ཀྱི། བསྐྱེད་པར་བྱ་བའི་རང་བཞིན་ནི་མ་ཡིན་པ་དེ་བཞིན་དུ། མ་གྲུབ་པའི་གཏན་ཚིགས་དང་དཔེ་དག་ཀྱང་བརྗོད་པར་བྱ་བར་མི་འགྱུར་རོ་ཞེས་བྱ་བའོ། །གལ་ཏེ་འདིར་ཞེས་བྱ་བ་ནི་མ་གྲུབ་པའི་དཔེ་

དང་གཏན་ཚིགས་དག་ལའོ། །གང་གི་ཚེ་ཤེས་པར་བྱེད་པའི་དབང་དུ་བྱས་པ་ཡིན་ན་དེའི་ཚེ། ཤེས་བྱེད་སྐབས་ཀྱིས་སྒྲུབ་པར་བྱེད་པ་ཉིད་དུ་བསྟན་པའི་མ་གྲུབ་པ་ཐམས་ཅད་ཀྱང་བསྒྲུབ་པར་བྱ་བའི་སྒྲས་རྟོགས་པར་འགྱུར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་འདོད་པའི་ཁྱད་པར་སྒྲུབ་པར་བྱེད་པ་ཉིད་དུ་བསྟན་པའི་མ་གྲུབ་པ་

ནི་བསྒྲུབ་པར་བྱ་བ་ཡིན་ནོ་ཞེས་བྱ་བ་དེ་ལྟ་བུའི་རང་བཞིན་ལ་བརྟེན་པར་མི་འགྱུར་རོ། །འཆད་པ་ནི་ཤེས་པར་བྱེད་པ་ཞེས་བྱ་བ་ལ་སོགས་པའོ། །བྱེད་པ་པོ་ལ་ལྟོས་པའི་བསྒྲུབ་པར་བྱ་བ་གང་ཡིན་པ་དེ་ནི་ཤེས་པར་བྱེད་པའི་སྐབས་ཀྱིས་བསལ་བར་བྱེད་པ་ལ་བཟློག་པར་བྱ་བ་ཡིན་ལ། གཞན་པའི་བསྒྲུབ་པར་བྱ་བ་སྒྲུབ་

པར་བྱེད་པ་ཉིད་དུ་ཉེ་བར་བསྟན་པ་ཐམས་ཅད་ནི་སྡུད་པར་བྱེད་པ་ཁོ་ནའོ། །དེས་ན་ཞེས་བྱ་བ་ནི་བསྒྲུབ་པར་བྱ་བ་གཞན་ཐམས་ཅད་སྡུད་པར་བྱེད་པའི་ཕྱིར་ན་བསྒྲུབ་པར་བྱ་བ་གཞན་སྒྲུབ་པར་བྱེད་པ་ཉིད་དུ་བསྟན་པ་ནི་རྣམ་པར་གཅོད་པར་ནུས་པ་མ་ཡིན་ནོ། །འོ་ན་བྱེད་པ་པོའི་བསྒྲུབ་པར་བྱ་བ་ཡང་ཅི་ལྟར་རྣམ་པར་གཅོད་སྙམ་ན། བྱེད་པ་

པོའི་ཞེས་བྱ་བའོ། །གལ་ཏེ་བསྒྲུབ་པར་བྱ་བ་གཞན་རྣམ་པར་མ་བཅད་པ་བཞིན་དུ་བྱེད་པ་པོའི་བསྒྲུབ་པར་བྱ་བ་ཡང་རྣམ་པར་མ་བཅད་པར་ཅི་སྟེ་མི་འགྱུར་ཞེ་ན་འགའ་ཞིག་ཅེས་བྱ་བའོ། །བྱེད་པ་པོའི་བསྒྲུབ་བྱ་རྣམ་པར་བཅད་པ་ངེས་པ་ནི། ཤེས་པར་བྱེད་པ་རྒྱུའི་སྐབས་ཀྱི་རྒྱུས་རྒྱུ་དང་བཅས་པ་ཡིན་ནོ། །རྒྱུ་མེད་པ་རྣམས་ཀྱང་ཞེས་

བྱ་བ་ནི། མ་གྲུབ་པའི་གཏན་ཚིགས་དང་དཔེ་དག་བསྒྲུབ་པར་བྱ་བ་ཉིད་ཡིན་པར་ངེས་པའོ། །སྒྲུབ་པར་བྱེད་པ་ཉིད་དུ་ཞེས་བྱ་བ་ནི། བསྒྲུབ་པར་བྱ་བ་ཉིད་དུ་བསྟན་པའི་དམ་བཅའ་བ་ཡིན་ནོ་ཞེས་བྱ་བ་ནི། སྒྲུབ་པར་བྱེད་པ་ཉིད་དུ་བསྟན་པ་དང་སྒྲུབ་པར་བྱེད་པ་མ་ཡིན་པ་ཉིད་དུ་བསྟན་པ་གཉི་གའི་སྤྱིའི་མཚན་ཉིད་ཡིན་ཏེ། དེས་ན་ཁྱད་པར་

Vol. 186 · folio 114b

འགའ་ཡང་ཡོད་པ་མ་ཡིན་ནོ། །ཁྱད་པར་གཞན་བསྟན་པའི་མཚན་ཉིད་གཞན་ཡང་ཡོད་པ་མ་ཡིན་ཏེ། དེས་ན་ཕྱོགས་ཀྱི་མཚན་ཉིད་ཤིན་ཏུ་ཁྱབ་ཆེས་པའི་ཉེས་པར་འགྱུར་རོ། །དེ་དང་ཞེས་བྱ་བ་ནི་བྱེད་པ་པོའི་བསྒྲུབ་པར་བྱ་བ་བཟློག་པར་བྱ་བ་དང་ངོ་། །གང་གི་ཕྱིར་སྐབས་སུ་གྱུར་པའི་མ་གྲུབ་པ་བསྒྲུབ་པར་བྱ་བ་ཉིད་ཡིན་པའི་རྒྱུ་དེས་ནའོ། །

གཞན་དུ་ཞེས་བྱ་བ་ནི་ཤེས་བྱེད་ཀྱི་སྐབས་ལ་མི་ལྟོས་ནའོ། །གཞུང་གང་གིས་དཔེར་བརྗོད་སྙམ་ན། དེ་ལྟར་ཞེས་བྱ་བའོ། །གྲངས་ཅན་ལ་ལྟོས་ནས་ཞེས་བྱ་བ་ནི། མི་རྟག་པ་ཉིད་ཀྱི་ཁྱད་པར་ཅན་གྱི་བུམ་པ་ནི་གྲངས་ཅན་ལ་མ་གྲུབ་སྟེ། དེས་ན་དཔེ་མ་གྲུབ་པ་ཡིན་ནོ། །མིག་གིས་གཟུང་བའི་ཕྱིར་ཞེས་བྱ་བ་ནི་གཏན་ཚིགས་མ་གྲུབ་

པའོ། །ནམ་མཁའ་མི་རྟག་པ་ཉིད་དུ་མ་གྲུབ་པ་ནི་དཔེ་མ་གྲུབ་པ་ཡང་ཡིན་ཏེ། རིགས་པ་ཅན་གྱི་ལུགས་ཀྱིས་ནམ་མཁའི་ནི་རྟག་པ་ཡིན་པའི་ཕྱིར་རོ།། །།འོན་ཏེ་ཞེས་བྱ་བ་ནི་རྣམ་འགྲེལ་ལ་འཇུག་པའོ། །དཔེ་དང་གཏན་ཚིགས་མ་གྲུབ་པར་བྱ་བ་ཐམས་ཅད་དམ་བཅའ་བར་ཐལ་བ་མ་ཡིན་ཏེ་ཞེས་འབྲེལ་ཏོ། །འོ་ན་དམ་བཅའ་བ་

ཉིད་གང་ཡིན་ཞེ་ན། འོན་ཀྱང་ཞེས་བྱ་བའོ། །ལས་གང་ལ་ཁྱད་པར་དུ་འཕགས་པ་ཡོད་པ་དེ་ནི་དམ་བཅའ་བ་ཡིན་ནོ་ཞེས་སྦྱར་རོ། །ཅིའི་ཕྱིར་ཞེ་ན། ལས་ལ་བྱ་བའི་ཞེས་བྱ་བའོ། །འོན་ཏེ་སྒྲུབ་པར་བྱེད་པ་ཉིད་དུ་བསྟན་པ་ཡང་ལས་ཁོ་ནའོ་སྙམ་ན། ལས་ཀྱང་ཞེས་བྱ་བའོ། །འོན་ཀྱང་སྟེ་དེ་ཡང་ཕྱུགས་འདོད་ཁོ་ནའོ་སྙམ་

ན། སྒྲུབ་པར་བྱེད་པ་ཉིད་དུ་ཞེས་བྱ་བའོ། །ཅི་ལྟ་བུར་ཞེ་ན་དཔེར་ན་ཞེས་བྱ་བའོ། །འདི་ཉིད་རྣམ་པར་འགྲེལ་པ་ནི་འོ་མ་ཟ་བའི་བྱ་བས་ཞེས་བྱ་བའོ། །ཕྱིས་འགྱུར་བའི་བསྒྲུབ་པར་བྱ་བ་ལ་ལྟོས་ནས་ཀྱང་བསྒྲུབ་པར་བྱ་བ་ཉིད་མ་ཡིན་ནོ་ཞེ་ན། དེ་བཞིན་དུ་ཞེས་བྱ་བའོ། །འདོད་པར་འགྱུར་བ་ནི་སྒྲུབ་བྱེད་མ་གྲུབ་པའོ། །གྲུབ་པའི་མཐའ་རྣམ་

པ་བཞི་པོ་རྒྱུད་ཐམས་ཅད་པ་དང་ཞེས་བྱ་བ་འདིར། རིགས་པའི་མདོ་ལས། རྒྱུད་ཐམས་ཅད་དང་མི་འགལ་བ་རྒྱུད་ཀྱི་དབང་དུ་བྱས་པའི་དོན་ནི། རྒྱུད་ཐམས་ཅད་པའི་གྲུབ་པའི་མཐའ་ཡིན་ནོ་ཞེས་སོ། །རིགས་པའི་བཤད་པ་ལས་ཀྱང་། དཔེར་ན་སྣོམ་པ་ལ་སོགས་པ་རྣམས་ནི་དབང་པོ་དྲི་ལ་སོགས་པའི་དབང་པོའི་དོན་

ས་ལ་སོགས་པ་ནི་འབྱུང་བ་ཚད་མས་ནི་གཞལ་བྱ་འཛིན་པར་བྱེད་དོ་ཞེས་བྱ་བ་ལྟ་བུ་ཞེས་སོ། །མི་མཐུན་པའི་རྒྱུད་ཀྱི་གྲུབ་པའི་མཐའ་ཡང་རིགས་པའི་མདོ་ལས་སྤྱིའི་རྒྱུད་དུ་གྲུབ་པ་དང་གཞན་གྱི་རྒྱུད་དུ་མ་གྲུབ་པ་ནི། མི་མཐུན་པའི་རྒྱུད་ཀྱི་གྲུབ་པའི་མཐའོ་ཞེས་སོ། །འདིའི་དོན་ནི་འདི་ཡིན་ཏེ། མཚུངས་པའི་རྒྱུད་

Vol. 186 · folio 115a

དུ་གྲུབ་པའི་དོན་གཞན་རྣམས་ཀྱང་རྒྱུད་དུ་མ་གྲུབ་པ་ནི་མི་མཐུན་པའི་རྒྱུད་ཀྱི་གྲུབ་པའི་མཐའ་ཞེས་བརྗོད་དོ། །དཔེར་ན་རིགས་པའི་བསྟན་བཅོས་དང་འགལ་བའི་དོན་དེ་དང་མཚུངས་པ་བྱེ་བྲག་པའི་ལུང་ལས་གྲུབ་པ། སངས་རྒྱས་པའི་ལུང་དུ་མ་གྲུབ་པ་བཞིན་ནོ། །དབང་དུ་བྱེད་པའི་གྲུབ་པའི་མཐའི་མཚན་

ཉིད་ཀྱང་། གང་གྲུབ་ན་སྐབས་གཞན་འགྲུབ་པ་ནི་དབང་དུ་བྱེད་པའི་རྒྱུད་ཡིན་ནོ་ཞེའོ། །ཁས་བླངས་པའི་གྲུབ་པའི་མཐའི་མཚན་ཉིད་ཀྱང་ཡོངས་སུ་མ་བརྟགས་པ་ཁས་བླངས་པ་ལས་དེའི་ཁྱད་པར་ཡོངས་སུ་རྟོག་པ་ནི་ཁས་བླངས་པའི་གྲུབ་པའི་མཐའོ་ཞེས་སོ། །འདིར་ཡང་རིགས་པའི་རྣམ་པར་བཤད་པ་ལས་དོན་གྱི་རིགས་

འགའ་ཞིག་མ་བརྟགས་པར་ཁས་བླངས་པ་སྟེ། དཔེར་ན་སྒྲ་ནི་རྫས་ཡིན་ཏེ་དེ་ཅི་རྟག་པ་ཡིན་ནམ། འོན་ཏེ་མི་རྟག་པ་ཡིན་ཞེས་བྱ་བ་ལྟ་བུར་རྫས་ཡོད་པའི་ཁྱད་པར་མི་རྟག་པ་དང་། རྟག་པ་ཡོངས་སུ་རྟོག་པ་དེ་ནི་ཁས་བླངས་པའི་གྲུབ་པའི་མཐའ་ཡིན་ནོ་ཞེའོ། །དེ་ལྟར་རྒྱུད་ཐམས་ཅད་ལ་སོགས་པ་རྣམ་པ་བཞིའི་ཚུལ་

གྱིས། ཁས་བླངས་པའི་གྲུབ་པའི་མཐའི་མཚན་ཉིད་བསྒྲུབ་པར་བྱ་བ་བསྟན་པ་ནི། དམ་བཅའ་བ་ཡིན་ནོ་ཞེས་པའི་མཚན་ཉིད་བསྒྲུབ་པའི་ཕྱིར་ཏེ་བྱས་པའི་ཕྱིར་རོ། །སྐྱོན་མེད་དོ་ཞེས་བྱ་བ་ནི་དམ་བཅའ་བའི་མཚན་ཉིད་ཀྱིའོ། །སྒྲུབ་པར་བྱེད་པའི་ཡན་ལག་ཡིན་པ་བསྒྲུབ་བྱ་ཡིན་ནོ་ཞེས་བྱ་བ་ནི་རུང་བ་མ་ཡིན་ནོ། །ཅིའི་

ཕྱིར་ཞེ་ན། སྒྲུབ་པར་བྱེད་པ་ཉིད་དུ་བསྟན་པ་དང་། མ་བསྟན་པ་ཐམས་ཅད་ཀྱང་མ་གྲུབ་པའི་ཕྱིར་རོ། །གང་གི་ཕྱིར་གྲུབ་མཐའ་ཉིད་དུ་མཚུངས་ཏེ། མ་གྲུབ་པའི་གཏན་ཚིགས་དང་དཔེ་དག་ལ་ནི་ཁས་བླངས་པའི་གྲུབ་པའི་མཐའ་ཉིད་མཚུངས་པ་ཡིན་ནོ། །ཅིའི་ཕྱིར་ཞེ་ན། དེ་ཡང་ཞེས་སྨོས་ཏེ། མ་གྲུབ་པའི་གཏན་

ཚིགས་ལ་སོགས་པ་ཡང་ཁས་བླངས་པའི་མཚན་ཉིད་དེ། ཁས་བླངས་པའི་གྲུབ་པའི་མཐའི་མཚན་ཉིད་མཚུངས་པ་ཡིན་ནོ། །གཞན་ཡང་ཡན་ལག་ལྔ་ལས་ཞེས་བྱ་བ་ལ་སོགས་པའི་རྩོད་པའི་ལན་བརྗོད་པ་ནི། སྔར་མ་གྲུབ་པའི་ཞེས་སྨོས་ཏེ། ཐམས་ཅད་འབྲེལ་ཏོ། །ཡན་ལག་ཐམས་ཅད་མཚན་ཉིད་བརྗོད་པའི་སྔོན་རོལ་དུ་མ་གྲུབ་

པའི་རང་བཞིན་ཡིན་པའི་དེའི་ཡུལ་སྤངས་པས་ནི་དམ་བཅའི་མཚན་ཉིད་མ་ཡིན་ནོ། །གང་གི་ཕྱིར་དེ་ལྟར་ཡིན་པའི་གཏན་ཚིགས་དེས་ན། ལས་ལ་སོགས་པའི་ཁྱད་པར་ཉེ་བར་བཀོད་པའི་ལན་དེས་རྣམ་འབྱེད་ཅེས་བྱ་བ་ལ་ནི་སྒྲུབ་པར་བྱེད་པ་མ་ཡིན་པས་བསྒྲུབ་པར་བྱ་བ་ཡིན་ནོ་ཞེས་རྣམ་པར་འབྱེད་པ་ནི། ཅི་ལྟར་ཡང་

Vol. 186 · folio 115b

ནུས་པ་མ་ཡིན་ནོ། །འདིས་ནི་རྩོད་པ་དང་པོ་གཉིས་བསལ་བ་ཡིན་ནོ། །རྩོད་པ་ཐ་མ་སེལ་བས་རྣམ་འགྲེལ་དང་པོའི་རྐང་པ་དང་པོ་རྣམ་འགྲེལ་གཉིས་པའི་ཕྱེད་ཕྱི་མ་དང་བཅས་ཏེ་རྣམ་པར་འགྲེལ་པ་ནི། གྲུབ་མཐའ་ནི་ཞེས་བྱ་བ་སྟེ། ཁས་བླངས་པའི་གྲུབ་པའི་མཐའ་ནིའོ། །མ་གྲུབ་པ་ཐམས་ཅད་ཅེས་བྱ་བ་ནི་གཏན་ཚིགས་

མ་གྲུབ་པ་ལ་སོགས་པའོ། །ཁས་ལེན་པའི་ཕྱིར་ཏེ་ཞེས་བྱ་བ་ནི་ཁས་བླངས་པའི་གྲུབ་པའི་མཐའ་ཡིན་པའི་ཕྱིར་རོ། །ཁས་བླངས་པའི་གྲུབ་པའི་མཐའ་ཡིན་པ་ཉིད་གསལ་བར་བྱེད་པ་ནི། བསྟན་བཅོས་ལས་ཞེས་བྱ་བའོ། །གལ་ཏེ་ཁས་བླངས་པའི་གྲུབ་པའི་མཐའ་ཉིད་ཡིན་ཡང་མ་གྲུབ་པའི་གཏན་ཚིགས་

ལ་སོགས་པ་ཅི་ལྟར་བསྒྲུབ་བྱར་འགྱུར་སྙམ་ན། དེ་ཞེས་བྱ་བ་སྟེ། མ་གྲུབ་པའི་གཏན་ཚིགས་ལ་སོགས་པ་དེ་དང་པོར་སྒྲུབ་བྱེད་ཉིད་དུ་ཁས་བླངས་ཀྱང་ཕྱིས་ཕྱིར་རྒོལ་བས། སྒྲུབ་བྱེད་འདི་མ་གྲུབ་པས་ན་ཅི་ལྟར་བསྒྲུབ་པར་བྱ་བ་འདི་ལས་རྟོགས་པར་འགྱུར་ཞེས་བརྒལ་ཞིང་བརྟགས་པ་ན། སྒྲུབ་པར་བྱེད་པ་དེ་བསྒྲུབ་པར་བྱ་

བ་ཉིད་དུ་འགྱུར་རོ་དེས་ན་གདོན་མི་ཟ་བར་བསྒྲུབ་པར་བྱ་བ་ཉིད་དུ་ཁས་ལེན་པར་འགྱུར་བ་ཡིན་ནོ། །ཅིའི་ཕྱིར་ཞེ་ན་མ་གྲུབ་པ་ནི་ཞེས་གསུངས་སོ། །གལ་ཏེ་བསྒྲུབ་པར་བྱ་བ་ནི་མ་གྲུབ་པ་ཁོ་ན་ཡིན་ལ། ཁས་བླངས་པའི་གྲུབ་པའི་མཐའ་ཡང་ད་ལྟར་བ་ཁོ་ནར་མ་ཡིན་ནམ་ཞེས་དོགས་པ་བསུ་ནས་བརྗོད་པ་ནི། བྱ་བའི་

རྐྱེན་ཞེས་བྱ་བའོ། །སྒྲུབ་པར་བྱ་བའི་སྒྲ་ནི་བྱ་བའི་རྐྱེན་གྱི་མཐའ་ཅན་ཡིན་ལ། བྱ་བའི་རྐྱེན་ཡང་དུས་གསུམ་ལ་འགྱུར་བ་ཡིན་ནོ། །དེ་བཞིན་དུ་ཁས་བླངས་པའི་སྒྲ་ཡང་དུས་གསུམ་ལ་འཇུག་པ་ཡིན་ནོ། །ཐམས་ཅད་ཅེས་བྱ་བ་ནི་སྒྲུབ་པར་བྱེད་པ་ཉིད་དུ་ཉེ་བར་བསྟན་པ་དང་མ་བསྟན་པའོ། །དེ་ལྟར་རྩོད་པ་ཐ་མ་བསལ་ནས།

རྩོད་པ་བར་པ་སེལ་བ་ནི་འོན་ཏེ་ཞེས་བྱ་བའོ། །བསྒྲུབ་པར་བྱ་བའི་རང་གི་ངོ་བོའི་ཚིག་ཉིད་ཀྱིས་གྲུབ་པའི་རང་བཞིན་བཀག་པའི་ཕྱིར་ནམ་གྲུབ་པའི་སྒྲུབ་པར་བྱེད་པ་ལ་སོགས་པ་ནི་དམ་བཅའ་བ་ཉིད་མ་ཡིན་ཞེས་བྱ་བ་ནི་རྩོད་པའི་དོན་ཏོ། །ལན་ནི་དེ་ཡང་ཞེས་བྱ་བའོ། །འདིས་ནི་བསྒྲུབ་བྱའི་ཡན་

ལག་ཅེས་མི་རུང་ཞེས་བྱ་བ་དེ་རྣམ་པར་བཀྲལ་བ་ཡིན་ནོ། །དེས་བསྟན་པར་བྱ་བའི་དོན་མ་གྲུབ་པའི་ཕྱིར་ན་ཡན་ལག་གི་མཚན་ཉིད་ཐམས་ཅད་མ་གྲུབ་པའི་ཕྱིར་རོ། །གང་གི་ཚེ་ཞེ་ན། མཚན་ཉིད་སྒྲུབ་པའི་སྔོན་རོལ་དུའོ། །ཐམས་ཅད་ཅེས་བྱ་བ་སྒྲུབ་པར་བྱེད་པ་ཉིད་དུ་བསྟན་པ་དང་མ་བསྟན་པ་ཐམས་

Vol. 186 · folio 116a

ཅད་དམ་བཅའ་བར་འགྱུར་རོ་ཞེས་སྦྱར་རོ། །གལ་ཏེ་སྒྲུབ་པར་བྱེད་པ་བསྟན་པ་ཡང་དམ་བཅའ་བ་ཡིན་ན། འོ་ན་གང་གིས་དེའི་མཚན་ཉིད་དོན་དང་བཅས་པར་འགྱུར་བ་སྒྲུབ་པར་བྱེད་པ་ཉིད་གང་ཞིག་ཡིན་ཞེ་ན། དེ་ལས་མ་གཏོགས་པ་ཞེས་བྱ་བ་སྟེ། དམ་བཅའ་བ་ལས་མ་གཏོགས་པའོ། །གྲུབ་པ་སྒྲུབ་

པར་བྱེད་པ་ཉིད་དུ་བསྟན་པ་ནི་སྒྲུབ་པར་བྱེད་པ་ཉིད་ཡིན་ནོ། །ཐམས་ཅད་ནི་ཞེས་བྱ་བའི་ཀྱང་གི་སྒྲ་རྣམ་པར་འགྲེལ་པ་ནི། ཡང་ན་ཞེས་བྱ་བའོ། །མ་གྲུབ་པའི་སྒྲུབ་པར་བྱེད་པ་ལ་སོགས་པ་དམ་བཅའ་བ་མ་ཡིན་པའི་འཐད་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །འོ་ན་ནི་ཞེས་བྱ་བ་ནི། མ་གྲུབ་པའི་གྲུབ་པར་བྱེད་པ་ལ་སོགས་

པ་བརྒྱ་ལ་བསྒྲུབ་པར་བྱ་བར་འགྱུར་བའམ། བརྒྱ་ལ་ནི་མི་འགྱུར་བ་ཡང་སྲིད་དོ་ཞེས་ཐེ་ཚོམ་དུ་འགྱུར་རོ། །དམ་བཅའ་བ་ཡང་ངེས་པ་ཉིད་དུ་བསྟན་པར་བྱ་བ་ཡིན་ནོ། །དེ་ཡང་ཐེ་ཚོམ་ཡོད་ན་མི་འགྲུབ་པོ་ཞེས་བྱ་བའོ། །ལན་བརྗོད་པ་ནི་མ་ཡིན་ཏེ་ཞེས་བྱ་བའོ། །དེས་ན་ཐེ་ཚོམ་གྱི་སྐབས་མེད་དོ། །དེ་ལྟར་རྩོད་པ་གཉིས་བསལ་

ནས། རྩོད་པ་དང་པོ་རྗེས་སུ་བརྗོད་པ་ནི། གལ་ཏེ་ཞེས་བྱ་བའོ། །ཅི་ལྟར་ནུས་མིན་ཞེས་བྱ་བ་ལ་སོགས་པ་དོན་གྱི་རྣམ་པར་འགྲེལ་པ་ན། ལན་འདེབས་པ་ནི་འདི་ནི་མེད་དེ་ཞེས་བྱ་བའོ། །སྒྲུབ་པར་བྱེད་པ་ཉིད་འདོད་པའི་ཤུགས་ཡིན་པའི་ཕྱིར་རོ་ཞེས་འབྲེལ་ཏོ། །ཅི་ལྟར་ཞེ་ན། ཐབས་ཉིད་ཀྱིས་ཞེས་བྱ་བའོ། །གལ་ཏེ་སྒྲུབ་

པར་བྱེད་པ་གཞན་གྱིས་མ་བསྒྲུབས་ན་ནི། སྒྲུབ་པར་བྱེད་པ་ཉིད་དུ་བསྟན་པ་ནི་སྒྲུབ་པར་བྱེད་པ་ཉིད་དུ་མི་འགྱུར་རོ། །འོན་ཏེ་དེ་ནི་སྒྲུབ་པར་བྱེད་པ་ཉིད་དུ་བསྟན་པའི་ཕྱིར་ན་ཕྱུགས་འདོད་ཉིད་མ་ཡིན་ནོ་སྙམ་ན། འདིར་ཞེས་བྱ་བ་སྟེ་བྱེད་པའི་ཕྱུགས་འདོད་ཅེས་བྱ་བར་རོ། །ཁྱད་པར་དུ་འཕགས་པའི་རྐྱེན་ནི་ཏ་མའི་རྐྱེན་ནོ། །

ཅིའི་ཕྱིར་ཞེ་ན། མདོའི་རྣམ་པར་དབྱེ་བ་འདོད་པ་ཞེས་བྱ་བ་ནི་མདོ་གཅིག་ཡིན་ལ། འདོད་པའི་ཕུགས་ཞེས་བྱ་བ་ནི་གཉིས་པ་ཡིན་པ་སྟེ། འདི་གཉིས་ལས་གཅིག་ལུས་པའི་ཕྱིར་ན་འདོད་པའི་ཕུགས་ཞེས་བྱ་བའི་མདོ་ཡིན་ནོ། །ད་ལྟར་འདོད་པ་ཡིན་གྱི། འདོད་པར་འགྱུར་བ་ནི་ལས་མ་ཡིན་ནོ་ཞེས་གང་བརྗོད་པ་ནི་

མི་རིགས་སོ་ཞེས་སྨྲས་པ་ནི། བྱུང་བའི་ཞེས་བྱ་བའི་འདོད་ཕུགས་ཞེས་བྱ་བ་དེར་རོ། །གཙུག་ལག་ཅེས་བྱ་བ་ནི་གཙོ་བོའོ། །ཅིའི་ཕྱིར་གཙོ་བོ་མ་ཡིན་ཞེ་ན། རེ་ལྡེ་དག་ཏུ་ཞེས་བྱ་བའོ། །བྱེད་པར་འགྱུར་རོ་ཞེས་བྱ་བ་འདོད་པར་གྱུར་པ་ཡིན་པའི་ཕྱིར་བྱུང་བའི་རྐྱེན་གཙོ་བོ་མ་ཡིན་ནོ། །རེ་ལྡེ་དག་ཏུ་ཞེས་བྱ་བ་དང་རེ་ལྡེ་རྣམས་སུ་བྱ་

Vol. 186 · folio 116b

བར་ཡང་འདོད་པའི་ཕྱིར་གཅིག་གི་ཚིག་ཀྱང་གཙོ་བོ་མ་ཡིན་པ་ཉིད་དོ། །འོན་ཏེ་སྒྲུབ་བྱེད་མ་གྲུབ་པ་ལ་སོགས་པ་ནི་ཁས་བླངས་པའི་གྲུབ་པའི་མཐའ་མ་ཡིན་པའི་ཕྱིར་ན་དམ་བཅའ་བའི་དོན་མ་ཡིན་ནོ་ཞེ་ན། ཁས་བླངས་པའི་གྲུབ་པའི་མཐའ་ཡང་ཞེས་བྱ་བའོ། །འདི་ལ་ནི་མ་གྲུབ་པའི་སྒྲུབ་པར་བྱེད་པ་ལ་སོགས་པ་ལའོ། །དེ་ཡང་གྲུབ་

པའི་མཐའ་ནི་ཞེས་བྱ་བ་ལ་སོགས་པས་བསྟན་ཟིན་པ་ཁོ་ནའོ། །རིགས་པའི་མདོའི་སུན་འབྱིན་པ་མཇུག་སྡུད་པ་ནི། དེས་ན་ཞེས་བྱ་བའོ། །དེ་ལྟར་དམ་བཅའ་བའི་མཚན་ཉིད་ལ་ཧ་ཅང་ཁྱབ་པའི་ཉེས་པས་ཉེས་ཆགས་པ་ཡིན་ནོ་ཞེས་བསྟན་ནས། མཚན་ཉིད་སུན་དབྱུང་བའི་ཕྱིར་རྣམ་པར་རྟོག་པ་ནི་འདིར་ཞེས་བྱ་བ་སྟེ་དམ་བཅའ་བའི་མཚན་

ཉིད་ལའོ། །ཆོས་སམ་ཆོས་ཅན་ནམ། ཚོགས་པ་ཞིག་བསྒྲུབ་པར་བྱ་བ་སྟེ། མཚོན་པར་བྱ་བར་ཡིན་པར་འགྱུར་གྲང་ན་ཞེས་བྱ་བ་ནི་རྣམ་པར་རྟོག་པའོ། །དེ་ལས་ཞེས་བྱ་བ་ནི་རྣམ་པར་རྟོག་པ་དེ་རྣམས་ཀྱི་ནང་ནས་སོ། །ཆོས་བསྒྲུབ་པར་བྱ་བར་ཁས་ལེན་ན་ཆོས་མཐུན་པ་ཞེས་བྱ་བ་དཔེའི་མཚན་ཉིད་མེད་དེ་དཔེ་འགལ་ལོ་ཞེས་བྱ་

བའི་དོན་ཏོ། །འོན་ཏེ་ཆོས་ཅན་བསྒྲུབ་པར་བྱ་བ་ཡིན་ན། དེའི་ཚེ་གཏན་ཚིགས་དོན་མེད་དེ། ཆོས་ཅན་གྲུབ་ཟིན་པའི་ཕྱིར་རོ། །ཚོགས་པས་བསྒྲུབ་པར་བྱ་བ་ཡིན་ན་ནི། ཕྱོགས་གཉི་ག་ལས་བྱུང་བའི་ཉེས་པར་འགྱུར་རོ་ཞེས་བྱ་བ་ནི་དོན་གྱིས་འཐོབ་པོ། །གལ་ཏེ་ཞེས་བྱ་བ་ནི་འཆད་པའོ། །དེ་ཞེས་བྱ་བ་ནི་ཆོས་སོ། །དེ་ལྟར་

ཡིན་ན་ཅི་སྐྱོན་སྙམ་ན། སྨྲས་པ་དེ་ལྟར་ན་ཞེས་བྱ་བ་སྟེ་ཆོས་བསྒྲུབ་པར་བྱ་བ་ཡིན་ན། དེའི་ཆོས་ཡོད་པ་ཞེས་བྱ་བའི་བསྒྲུབ་པར་བྱ་བ་དེའི་ཆོས་ནི་དེའི་ཆོས་སོ། །དེ་ཡོད་པ་ནི་དེ་དང་བཅས་པའོ། །དེ་སྐད་དུ་རིགས་པའི་རྣམ་པར་བཤད་པ་ལས་བསྒྲུབ་པར་བྱ་བ་དང་ཆོས་མཚུངས་པ་སྟེ་ཆོས་མཐུན་པས་སོ། །བསྒྲུབ་པར་

བྱ་བ་དང་ཆོས་མཐུན་པའི་རྒྱུས་དེའི་ཆོས་ཡོད་པ་ནི་དཔེ་ཡིན་ནོ་ཞེས་སོ། །ཅི་ལྟར་ན་དཔེའི་མཚན་ཉིད་ཞུགས་སྙམ་ན། གང་གིས་ཞེས་བྱ་བའོ། །དེའི་ཆོས་ཡོད་པར་འགྱུར་ཞེས་བྱ་བ་ནི་བསྒྲུབ་པར་བྱ་བ་མི་རྟག་པ་ཉིད་ཀྱིས་ཆོས་སྐྱེ་བ་དང་ལྡན་པ་ཉིད་ལ་སོགས་པ་གང་ཡིན་པ་དེ་ཡོད་པ་སྟེ་བུམ་པ་ལ་སོགས་པ་གང་ལ་ཡོད་

པ་ཞེས་ཚིག་སྦྱར་རོ། །ཆོས་རྣམས་ནི་ཆོས་ཀྱི་རྟེན་ཡིན་པ་མི་སྲིད་པའི་ཕྱིར་རོ་ཞེས་བྱ་བའི་དོན་ཏོ། །འདིས་ནི་ཆོས་བསྒྲུབ་བྱ་ན་ཆོས་མཐུན་མེད་ཅེས་བྱ་བ་གང་ཡིན་པ་དེ་རྣམ་པར་བཀྲོལ་བ་ཡིན་ནོ། །ལྷག་མ་རྣམ་པར་འགྲེལ་པ་ནི་ཆོས་ཅན་ཞེས་བྱ་བའོ། །དོན་གྱིས་འཐོབ་པ་བརྗོད་པ་ནི། འོན་ཏེ་ཞེས་བྱ་བའོ། །

Vol. 186 · folio 117a

གལ་ཏེ་ཞེས་བྱ་བ་ལ་སོགས་པས་ནི་རྣམ་འགྲེལ་ལ་འཇུག་པར་བྱེད་པའོ། །འོན་ཏེ་ཕྱོགས་གཉི་ག་ལས་གྱུར་པའི་ཉེས་པ་ཅི་ལྟར་སྤོང་ཞེ་ན། ཚོགས་པ་ནི་ཞེས་བྱ་བའོ། །དེའི་ཞེས་བྱ་བ་གཉི་གའི་ཆོས་སོ། །ཅི་ལྟར་མི་འབྱོར་སྙམ་ན། འདི་ལྟར་ཞེས་བྱ་བའོ། །གཉིས་པོ་ཞེས་བྱ་བ་ནི་ཆོས་ཅན་དང་ཆོས་སོ། །འགྱུར་མོད་ཅི་སྐྱོན་

སྙམ་ན། བསྒྲུབ་པར་བྱ་བའི་ཞེས་བྱ་བའོ། །རྣམ་པ་དེ་ལྟ་བུའི་ཞེས་བྱ་བ་ནི་བསྒྲུབ་པར་བྱ་བའི་ཆོས་ཀྱི་ཁྱད་པར་ཅན་ནོ། །སྒྲ་ལ་ནི་བསྒྲུབ་པར་བྱ་བའི་ཆོས་ཀྱི་ཁྱད་པར་ཅན་གྱི་ཆོས་ཅན་གྱི་ཆོས་ཀྱི་གཏན་ཚིགས་གྲུབ་པ་མ་ཡིན་ནོ། །མི་རྟག་པ་ཉིད་ཀྱིས་ཞེས་བྱ་བ་ལ། སྔར་ནི་སྒྲུབ་པར་བྱེད་པ་སྐྱེ་བ་ཅན་ལ་སོགས་པས་ཆོས་

མཚུངས་པ་མེད་དོ་ཞེས་བསྟན་པ་ཡིན་ལ། ད་ལྟ་ནི་བསྒྲུབ་པར་བྱ་བའི་ཁྱད་པར་ཅན་གྱི་ཆོས་ཅན་གྱི་ཡིན་ནོ་ཞེས་བྱ་བ་ནི་ཁྱད་པར་ཡིན་ནོ། །ཚོགས་པ་ལ་ཞེས་བྱ་བ་ནི་གཞན་དག་གིའོ། །ཅི་ལྟར་ཚོགས་པའི་སྒྲ་ཡན་ལག་ལ་འཇུག་སྙམ་ན། ཚོགས་པ་ལ་འཇུག་པའི་ཞེས་བྱ་བའོ། །བསྟན་བཅོས་ཀྱིས་ཅི་བྱ་བ་ནི། གལ་

ཏེ་བསྟན་བཅོས་བྱེད་པའི་མཚན་ཉིད་མ་འགྲིགས་པས་འཆད་པ་པོ་ཉིད་ཀྱིས་བཅོས་ནས་བཤད་པར་བྱ་བ་ཡིན་ན། དེའི་ཚེ་དེས་བྱས་པའི་མཚན་ཉིད་མེད་པ་ཁོ་ནར་རྟོགས་པར་འགྱུར་མོད། བསྟན་བཅོས་ཀྱིས་ཅི་བྱ་ཞེས་བྱ་བའི་དོན་ཏོ། །ཅི་ལྟར་གཉིས་པ་བརྗོད་པ་མི་འགྲིགས་པའི་མཚན་ཉིད་གཞན་དུ་

བཤད་པར་བྱ་བ་དེ་བཞིན་དུ། གཏན་ཚིགས་ལ་སོགས་པའི་ཚུལ་ཉེས་པར་བྱས་པ་ཡང་གཞན་དུ་བརྟག་པར་བྱ་བར་འགྱུར་རོ། །ཅི་ལྟར་ཞེ་ན། མི་སྲིད་པའི་ཕྱིར་ཏེ། མཚན་ཉིད་ཀྱིས་བསྟན་པར་བྱ་བའི་དོན་ཏོ། །མཚན་ཉིད་ཅི་འདྲ་བར་བྱས་པ་དེ་ནི་བརྗོད་པར་འདོད་པའི་དོན་སྟོན་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །

དེ་ཉིད་གསལ་བར་བྱེད་པ་ནི། ཅི་ལྟར་ཞེས་བྱ་བའོ། །དེ་ཉིད་དུ་ཞེས་བྱ་བ་ནི། རིགས་པ་ཅན་ལ་སོགས་པ་ལ་བརྗོད་པ་ཉིད་དོ། །ཕྱོགས་ཀྱི་རང་བཞིན་ཉིད་ཅེས་བྱ་བ་ནི་གཙོ་བོ་ཉིད་དོ། །དེ་ཞེས་བྱ་བ་ཤེས་པར་འདོད་པའི་བྱེ་བྲག་དང་ལྡན་པའི་ཆོས་ཅན་ཆོས་སོ། །དེའི་ཚེ་ཅི་ལྟར་ཕྱོགས་འདིར་ཉེ་བར་བཏགས་

པ་ཡིན་ཏེ་མ་ཡིན་པ་ཁོ་ནའོ། །གལ་ཏེ་ཞེས་བྱ་བ་ནི་གཞན་ནོ། །དེ་ནི་ཚོགས་པའིའོ། །འདི་ནི་ཞེས་བྱ་བ་ནི་ཚོགས་པའོ། །འོ་ན་ཅི་ལྟར་དེ་ཕྱོགས་ཉིད་ཡིན་སྙམ་ན། བསྒྲུབ་བྱའི་ཞེས་བྱ་བའོ། །འདི་ནི་ཚོགས་པའོ། །དེ་ལྟར་ཡང་གསུངས་སོ་ཞེས་འབྲེལ་ཏེ། སློབ་དཔོན་ཕྱོགས་ཀྱི་གླང་པོས་གསུངས་

Vol. 186 · folio 117b

པའོ། །ཅི་སྐད་གསུངས་སྙམ་ན། དེ་ལ་ཞེས་བྱ་བའོ། །འོན་ཏེ་གྲུབ་ཀྱང་བསྒྲུབ་པར་བྱ་བ་ཉིད་དུ་འདོད་པར་འགྱུར་རོ་སྙམ་ན། གལ་ཏེ་ཞེས་བྱ་བའོ། །དེའི་ཚེ་ཡང་ཞེས་བྱ་བ་ནི་བསྒྲུབ་པར་བྱ་བ་ལ་ཐེ་ཚོམ་ཟ་བའི་ཆོས་ཅན་གྱི་ཆོས་ཉིད་ཀྱི་ཚེ་ཡང་ཅི་ལྟར་མི་འགྲུབ་པར་འགྱུར་ཏེ་གྲུབ་པ་ཁོ་ནའོ། །ཚོགས་པ་མ་གྲུབ་ཀྱང་

ཕྱོགས་ཀྱི་ཆོས་ཉིད་ནི་གཙོ་བོའི་ཚུལ་དུ་གྲུབ་པ་ཁོ་ནའོ་ཞེས་བྱ་བའི་དོན་ཏོ། །གལ་ཏེ་སློབ་དཔོན་ཕྱོགས་ཀྱི་གླང་པོ་བསྒྲུབ་པར་བྱ་བའི་ཆོས་ལ་ཐེ་ཚོམ་ཟ་བའི་ཆོས་ཅན་ཉིད་ཕྱོགས་སུ་བཞེད་ན། འོ་ན་ཅི་ལྟར་ཞེས་བྱ་བ་ལ་སོགས་པའོ། །ཉེ་བར་བཏགས་པ་མ་ཡིན་ན་ཅི་སྐྱོན་སྙམ་ན། ཆོས་ཅན་ཆོས་ཞེས་གསུངས་སོ། །

དཔེའི་ཆོས་ཅན་གྱི་ཆོས་ཀྱང་གཏན་ཚིགས་སུ་འགྱུར་རོ་ཞེས་བྱ་བའི་དོན་ཏོ། །གང་ཞིག་སྤང་བའི་དོན་དུ་ཉེ་བར་བཏགས་པ་བྱེད་པའི་རྩོད་པ་དེ་གང་ཡིན་སྙམ་ན། འདིར་ཞེས་བྱ་བའོ། །སྒྲུབ་པར་བྱེད་པའི་རང་བཞིན་དཔྱོད་པ་ལས་རང་བཞིན་བསྒྲུབ་པར་བྱ་བའི་བློ་དེ་མེད་པའོ། །དེའི་ཕྱིར་ཕྱོགས་ཆོས་ནི་

གཏན་ཚིགས་ཡིན་ནོ་ཞེས་བྱ་བའི་མཚན་ཉིད་མ་ཡིན་པར་འགྱུར་རོ་ཞེས་བྱ་བའོ། །དོགས་པ་བསུ་བ་ནི། བསྒྲུབ་པར་བྱ་བའི་ཞེས་བྱ་བའོ། །སྒྲུབ་པར་བྱེད་པའི་རང་བཞིན་དཔྱོད་པའི་དུས་ན་ནི་བསྒྲུབ་པར་བྱ་བ་ངེས་པ་མ་ཡིན་གྱི། འོན་ཀྱང་ཐེ་ཚོམ་ཟ་བ་ཡིན་ཏེ། དེས་ན་གཏན་ཚིགས་འཇུག་པ་ཉམས་པ་མེད་དོ་

ཞེས་བྱ་བར་སེམས་ནའོ། །ངེས་པ་མེད་པའི་ཕྱིར་ཞེས་བྱ་བ་ནི། བསྒྲུབ་པར་བྱ་བའི་ཆོས་ལ་ཐེ་ཚོམ་ཟ་བ་ཞེས་བྱ་བའི་ངེས་པ་འདི་ནི་མེད་དེ། །ཐེ་ཚོམ་དུ་གྱུར་པ་ཡང་བསྒྲུབ་པར་བྱ་བའི་ཆོས་མ་ཡིན་པར་ཡང་འགྱུར་བ་ཡིན་ནོ། །ཐེ་ཚོམ་དུ་གྱུར་པ་བསྒྲུབ་པར་བྱ་བ་ངེས་པ་ཉིད་སྟོན་པ་ནི། ཐེ་ཚོམ་ཟ་བ་

ལ་ཞེས་བྱ་བའོ། །ལན་ནི་མ་ཡིན་ཏེ་ཞེས་བྱ་བའོ། །གང་དང་གང་ཐེ་ཚོམ་དུ་གྱུར་པ་དེ་དང་དེ་ལ་གཏན་ཚིགས་འཇུག་པ་ཉིད་དོ་ཞེས་བྱ་བའི་ངེས་པ་ནི་ཡོད་པ་མ་ཡིན་ནོ། །འོ་ན་ཅི་ལྟར་གཏན་ཚིགས་ཐེ་ཚོམ་ལ་བརྗོད་ཕྱིར་ཞེས་གསུངས་ཤེ་ན། གྲུབ་པ་དང་ཞེས་གསུངས་སོ། །འདི་ཉིད་གསལ་བར་བྱེད་པ་ནི་ངེས་

པ་དང་ཞེས་བྱ་བའོ། །འདི་ག་ལས་ཤེ་ན། རིམ་པ་ཅི་ལྟ་བར་གཏན་ཚིགས་གཉིས་བརྗོད་པ་ནི། བསྒྲུབ་བྱ་ངེས་པ་ལ་དགོས་པ་མེད་པའི་ཕྱིར་དང་། བསལ་བ་ལ་ནི་མི་ནུས་པའི་ཕྱིར་རོ། །ཐེ་ཚོམ་དུ་གྱུར་པ་ལ་གཏན་ཚིགས་འཇུག་པ་ཉིད་ཀྱང་མ་ཡིན་ལ། ཐེ་ཚོམ་དུ་གྱུར་པ་ཉིད་ལ་འཇུག་པ་ཡང་མ་

Vol. 186 · folio 118a

ཡིན་ཏེ། ཐེ་ཚོམ་མངོན་དུ་གྱུར་པ་མེད་ཀྱང་སྒྲུབ་པར་བྱེད་པ་འཇུག་པའི་ཕྱིར་རོ། །དེ་ལྟར་རྣམ་པ་གཉི་ག་ལྟར་ཡང་ཕྱོགས་ཀྱི་ཆོས་ཞེས་བྱ་བ་བསལ་ནས་མངོན་པར་འདོད་པའི་མཇུག་སྡུད་པ་ནི། འདིར་ཞེས་བྱ་བ་སྟེ། རུང་བ་མ་ཡིན་ཏེ་ཞེས་བྱ་བ་ལ་སོགས་པའི་རྩོད་པ་ལའོ། །ཕྱོགས་སུ་གྱུར་

པ་ཞེས་བྱ་བ་བསྒྲུབ་པར་བྱ་བའི་ཆོས་ལ་ཐེ་ཚོམ་དུ་གྱུར་པའི་ཆོས་ཅན་ནོ། །ཅི་ལྟར་ཆོས་ཅན་ཉིད་ཅེས་བྱ་བའི་དོན་ནི་འདི་ཡིན་ཏེ། ཐེ་ཚོམ་དུ་གྱུར་པའི་བསྒྲུབ་པར་བྱ་བའི་ཁྱད་པར་ཅན་དུ་གྱུར་པའི་ཆོས་ཅན་ནི་དངོས་པོ་ཁོ་ནར་ཕྱོགས་ཡིན་མོད་ཀྱི་འོན་ཀྱང་འདི་ལ་གཞན་དག་ཅི་ལྟར་མ་གྲུབ་པ་ཁྱད་པར་

ཡིན། བསྒྲུབ་པར་བྱ་བ་ལ་ཡང་མ་གྲུབ་པ་ཡིན་ཏེ། དེས་ན་ཅི་ལྟར་དེས་ཁྱད་པར་དུ་བྱས་པ་ཕྱོགས་ཡིན་ཞེས་ལོག་པར་རྟོགས་པ་ཡོད་དོ་ཞེས་བྱ་བའོ། །ལན་བརྗོད་པ་ནི། ཆོས་ཅན་ཡན་ལག་ལ་རྟོགས་པར་འགྱུར་བའི་སྤྱི་ཉེ་བར་བཏགས་པའི་ཕྱིར་ཏེ། ལྷག་པར་སྒྲོ་བཏགས་པའི་ཕྱིར་ན་ཆོས་ཅན་ཉིད་ཕྱོགས་

ཡིན་ནོ། །ཆོས་ཅན་ལ་ནི་སྤྱིའི་རང་བཞིན་གྱི་ཕྱོགས་ཉེ་བར་བཏགས་པ་ཡིན་ཏེ། དེ་ནི་མ་འོངས་པ་ཡིན་པའི་ཕྱིར་རོ། །བསྒྲུབ་པར་བྱ་བ་ལ་ཐེ་ཚོམ་ཟ་བའི་ཆོས་ཅན་གྱི་རང་བཞིན་ནི་ཉེ་བར་བཏགས་པ་མ་ཡིན་ཏེ། དངོས་པོ་ཉིད་ཡིན་པའི་ཕྱིར་རོ། །ཕྱོགས་དེ་ནི་ཡོད་དུ་ཟིན་ཀྱང་ཡལ་བར་དོར་བ་ནི་ཉེ་བར་བཏགས་པའི་སྒོ་

ནས་རྩོད་པའི་ལན་གདབ་པའི་ཕྱིར་རོ། །གཞན་གྱི་ལྟར་གཞན་ལ་འཇུག་པའི་སྒྲ་གཞན་ལ་བཏགས་པ་ནི་མ་ཡིན་ནོ། །འདི་ཉིད་གསལ་བར་བྱེད་པ་ནི་གལ་ཏེ་ཞེས་བྱ་བའོ། །དེ་ཞེས་བྱ་བ་ནི་ཚོགས་པའོ། །ལན་ནི་དེ་ཉིད་ཀྱི་ཕྱིར་ཞེས་བྱ་བ་སྟེ་མི་ཉེ་བ་ཉིད་ཀྱི་ཕྱིར་རོ། །ཅི་ལྟར་ཞེས་བྱ་བ་ནི་གཞན་ནོ། །ཅི་ཞེས་བྱ་བ་ལ་སོགས་

པ་ནི་ལན་ནོ། །གལ་ཏེ་གང་གིས་དེ་སྐད་བརྗོད་པ་འགའ་ཞིག་དེ་ལྟར་འབྱུང་བར་འགྱུར་བ་ལ་ཐ་སྙད་བྱེད་པ་མཐོང་ངམ་སྙམ་ན། སྣལ་མ་ཞེས་བྱ་བའོ། །དེ་ལ་ཞེས་བྱ་བ་ནི་སྣལ་མ་ལ་རས་ཡུག་ཆེན་བཏགས་སོ། །ཞེས་བྱ་བའི་ཚིག་ལའོ། །བསམ་པ་གང་སྙམ་ན། རས་ཞེས་བྱ་བའོ། །འདི་ལ་ཡང་ཞེས་བྱ་བ་ནི་བསམ་པ་

ལའོ། །དོན་འདི་ལ་སྦྱོར་བ་ནི། དེ་བཞིན་དུ་འདིར་ཡང་ཞེས་བྱ་བའོ། །གལ་ཏེ་ཡན་ལག་ལ་སྤྱི་ཉེ་བར་བཏགས་པའི་ཕྱིར་རོ་ཞེས་བྱ་བ་དེ་ལྟར་གཞུང་འཛུགས་ན་འོ་ན་ཅི་ལྟར་ཞེས་བྱ་བའོ། །ཆོས་ཅན་ཙམ་ཕྱོགས་ཡིན་ན་ཚིག་འདི་འཐད་དོ་ཞེས་བྱ་བའི་དོན་ཏོ། །གཞན་གྱི་ཞེས་བྱ་བ་འཆད་པ་པོ་རྣམས་ཀྱི་ཉེས་པ་གཞན་

Vol. 186 · folio 118b

དག་ལ་ཞེས་བྱ་བ་འདིས་ནི། རྣམ་པར་བཤད་པ་མཛད་པ་བདག་ཉིད་བསྟན་ཏོ། །བསྒྲུབ་པར་བྱ་བའི་ཞེས་བྱ་བ་ལ་སོགས་པས་ནི། དེའི་ཚེ་ན་དེའི་ཆོས་ཡིན་གྱི་ཞེས་བྱ་བ་ལ་སོགས་པ་འཆད་པར་རྩོམ་པའོ། །བསྒྲུབ་པར་བྱ་བའི་ཆོས་དང་ཆོས་ཅན་གྱི་ཚོགས་པ་ནི་ཕྱོགས་ཡིན་ནོ་ཞེས་བྱ་བ་ནི། བསྒྲུབ་པར་བྱ་བའི་ཆོས་ལ་ཐེ་

ཚོམ་ཟ་བའི་ཆོས་ཅན་ནི་ཕྱོགས་ཡིན་ནོ་ཞེས་བྱ་བའོ། །དེ་ལ་སྟེ་གྲུབ་པའི་མཐའ་འདི་རྣམ་པར་གནས་པ་ནའོ། །དེའི་ཆ་ཉིད་པས་ཞེས་བྱ་བ་ནི་ཕྱོགས་པའི་ཆ་ཉིད་པས་སོ། །དེས་ནི་ཆོས་ཅན་གྱིས་སོ། །དེས་ན་སྟེ་བསྒྲུབ་པར་བྱ་བའི་ཆོས་ཀྱིས་མ་ཁྱབ་པས་ན། བསྟན་བཅོས་མཛད་པས་སྨོས་སོ། །ཅི་སྐད་སྨོས་ཤེ་ན།

དེའི་ཆ་ནི་དེའི་ཆོས་ཡིན་གྱི་ཞེས་སོ། །ཡང་ཅི་ལྟར་ན་གཉི་ག་བརྗོད་པ་ཆོས་ཀྱི་སྒྲས་ཆོས་ཅན་འཛིན་ཞེ་ན། ཆའི་སྒྲ་ཞེས་བྱ་བའོ། །ཅི་ལྟར་ཞེ་ན། སྨྲ་བ་པོ་ཞེས་བྱ་བའོ། །སྨྲ་བ་པོའི་བསམ་པ་ཡང་དེ་ལྟར་ཅི་སྟེ་འགྱུར་སྙམ་ན། ཕྱོགས་ཀྱི་ཞེས་བྱ་བའོ། །ཕྱོགས་གཅིག་ཙམ་ཞེས་བྱ་བ་ནི་ཆོས་ཅན་གྱི་མཚན་ཉིད་དམ་ཆོས་ཀྱི་

མཚན་ཉིད་དོ། །གཉིས་འཛིན་པ་ནི་མ་ཡིན་གྱི་འོན་ཀྱང་ཆོས་ཉིད་འཛིན་པ་ཡིན་ནོ། །འདིས་ནི་རྣམ་པར་བཤད་པ་མཛད་པས། ཆའི་སྒྲ་ཕྱོགས་གཅིག་བརྗོད་པ་ཁོ་ནར་བཤད་ཀྱི་ཆོས་བརྗོད་པ་ནི་མ་ཡིན་ནོ་ཞེས་བྱ་བར་གསལ་བ་ཁོ་ནའོ། །ཕྱོགས་གཅིག་ཙམ་ནི་འཛིན་པ་མ་ཡིན་ནོ་ཞེས་བྱ་བ་འདི་ག་ལས་སྙམ་ན།

གསུངས་པ་ནི་ཕྱོགས་ཀྱི་སྒྲས་ཞེས་བྱ་བའོ། །གཙོར་སྤྱི་རྗོད་པར་བྱེད་པ་མ་ཡིན་པ་ཉིད་གསུངས་པ་ནི་ཕྱོགས་ཀྱི་ཞེས་བྱ་བའོ། །འདི་ཡང་ཕྱོགས་ཀྱི་ཆོས་ཉིད་འཛིན་པ་ན་ཡོད་པའི་ཕལ་པའི་ཚོགས་པ་ཕྱོགས་སུ་བརྗོད་པ་ཡིན་ནོ། །བསྒྲུབ་པར་བྱ་བ་རྟོགས་པའི་དུས་ན་ཡོད་པ་ནི་དངོས་པོ་ཡིན་ནོ། །འོ་ན་ཅི་ལྟར་སྤྱིའི་དོན་

རྟོགས་སྙམ་ན། སྤྱིའི་ཞེས་བྱ་བའོ། །ཤུགས་ནི་ཁྱད་པར་ཅན་རྟོགས་པ་ནི་ཁྱད་པར་རྟོགས་པ་མ་ཡིན་ནོ་ཞེས་བྱ་བས་སོ། །ཁྱད་པར་རྟོགས་པ་དེ་ཡང་ལྷག་པར་སྒྲོ་འདོགས་པའི་བདག་ཉིད་ཅན་སྔར་བསྟན་པ་ཉིད་དོ། །དེའི་ཞེས་བྱ་བ་ནི་བསྒྲུབ་པར་བྱ་བའི་ཆོས་ལ་ཐེ་ཚོམ་ཟ་བ་ནི་ཆོས་ཅན་གྱིའོ། །ཅིའི་ཕྱིར་ཞེ་ན། དེ་ཉིད་ནི་

ཞེས་བྱ་བའོ། །བདག་ཉིད་ནི་བདག་ཉིད་ཀྱི་ཆོས་མ་ཡིན་ཏེ། ཆོས་དང་ཆོས་ཅན་ནི་ཐ་དད་པ་ལ་བརྟེན་པའི་ཕྱིར་རོ། །ཕྱོགས་ཀྱི་སྒྲས་སྤྱི་བརྗོད་ན་ཅིར་འགྱུར་སྙམ་ན། གལ་ཏེ་ཞེས་བྱ་བའོ། །གཙོ་བོར་མཚུངས་པའི་ཆ་ཤས་གང་དག་ཡིན་པའི་ཆ་ཤས་དེ་གཉིས་ཀྱི་སྤྱི་གང་ཡིན་པ་དེའི་དངོས་པོའོ། །ལྡོག་པ་བརྗོད་པ་ནི། དེ་

Vol. 186 · folio 119a

ལྟར་ཡང་ཞེས་བྱ་བའོ། །དེའི་ཕྱིར་ཞེས་བྱ་བ་ནི་སྐབས་ཉེ་བར་སྡུད་པའོ། །དེ་ལྟར་བདག་ཅག་གི་ལྟར་ན། དེ་བཏགས་ནས་ཕྱོགས་ཀྱི་སྒྲ་གཞན་དུ་རྟོགས་པ་མ་ཡིན་ནོ་བསྟན་ནས། ཉེས་པ་གཞན་བརྗོད་པ་ནི། གཞན་ཡང་ཞེས་བྱ་བའོ། །འདོད་པ་རྗེས་སུ་གནང་བའི་མཚན་ཉིད་གང་ཡིན་སྙམ་ན། རང་

གི་ཞེས་བྱ་བའོ། །ཉེ་བར་བཏགས་པ་ཁས་བླངས་ཀྱང་བདག་ཅག་གི་ལྟར་ན་ཉེས་པ་མེད་དོ་ཞེས་བརྗོད་པ་ནི། ཡང་ན་ཞེས་བྱ་བའོ། །དགོས་པ་དེ་གང་ཞེ་ན། ཉེ་བར་ཞེས་བྱ་བའོ། །གཞན་ལ་ཡང་དགོས་པ་དེ་ཡོད་དོ་སྙམ་ན། ཁྱེད་ལ་ཞེས་སྨོས་ཏེ་རིགས་པ་ཅན་ལ་སོགས་པ་ལ་ནི་དེ་མ་ཐག་པར་བརྗོད་པའི་དགོས་པ་དེ་

ལྟར་མ་ཡིན་པའི་ཕྱིར་ཏེ་ཁས་མ་བླངས་པའི་ཕྱིར་རོ། །ངེད་ཀྱིས་ནི་གཞན་གྱི་རྩོད་པ་བསལ་བ་དོན་དུ་ཉེ་བར་བཏགས་པ་ལ་བརྟེན་པ་ཡིན་ནོ་ཞེས་བྱ་བའི་དོན་ཏོ། །ངེས་པར་བཟུང་བ་དེས་བཟློག་པར་བྱ་བའོ། །དངོས་ཏེ་ཞེས་བྱ་བ་ནི་དོར་ནས་སོ། །འོན་ཏེ་གྲུབ་པ་བསྒྲུབ་པར་བྱ་བ་ཡིན་པ་དགག་པའི་སྒྲུབ་པར་བྱེད་པ་ལ་སོགས་པའི་

མཚན་ཉིད་ཁོ་ནས་འཕངས་པ་ཡིན་པས། ངེས་པར་གཟུང་བ་འདིས་ཅི་བྱ་ཞེ་ན། དེ་ནི་ཞེས་སྨོས་སོ། །དོན་དེ་ཞེས་བྱ་བ་ནི་མ་གྲུབ་པའི་དོན་དེའོ། །ཅིའི་ཕྱིར་ཞེ་ན། སྒྲུབ་བྱེད་ཀྱི་མཚན་ཉིད་བརྗོད་པའི་ཤུགས་ལས་སོ། །དེ་ཞེས་བྱ་བ་གྲུབ་པ་བཟློག་པའི་དོན་དུའོ། །འོན་ཏེ་མ་གྲུབ་པ་སྒྲུབ་པར་བྱེད་པ་ཉིད་དུ་བསྟན་པ་དམ་

བཅའ་བ་ཉིད་ཡིན་པ་བཟློག་པའི་དོན་དུ་ངེས་པར་གཟུང་བ་ཡིན་ནོ་ཞེ་ན། གཏན་ཚིགས་སོགས་ཞེས་གསུངས་སོ། །གཏན་ཚིགས་ཀྱི་མཚན་ཉིད་ནི་བསྒྲུབ་པར་བྱ་བ་སྒྲུབ་པ་ནི་གཏན་ཚིགས་སོ་ཞེས་བྱ་བའོ། །སོགས་པའི་སྒྲས་ནི། དཔེའི་མཚན་ཉིད་བསྒྲུབ་པར་བྱ་བ་དང་ཆོས་མཚུངས་པ་དེའི་ཆོས་ཡོད་པའི་དཔེ་ནི་དཔེ་ཡིན་ནོ་

ཞེས་བྱ་བའོ། །དེ་ལ་སོགས་པའི་མཚན་ཉིད་ཀྱིས་གཏན་ཚིགས་ལ་སོགས་པ་ལ་ཁྱབ་པའི་ཕྱིར་རོ། །སྒྲུབ་པར་བྱེད་པ་མ་གྲུབ་པ་ནི་སྒྲུབ་པར་བྱེད་པ་མེད་པ་ཉིད་དུ་དོགས་པ་མེད་པ་ཁོ་ནའོ། །དེས་ན་མ་གྲུབ་པའི་སྒྲུབ་བྱེད་དམ་བཅའ་བ་ཡིན་པ་བསལ་བའི་དོན་དུ་ནི་ངེས་པར་གཟུང་བ་མ་ཡིན་ནོ། །རྣམ་འགྲེལ་འདི་ཉིད་བཤད་

པའི་དོན་དུ་གཞན་གྱི་དོགས་པ་བསུ་བ་ནི་འདི་སྙམ་དུ་ཞེས་བྱ་བའོ། །དེ་བསྒྲུབ་པར་བྱ་བ་ཉིད་ཅི་ལྟར་ཡིན་ཞེ་ན། སྒྲུབ་པར་བྱེད་པས་ནི་ཞེས་བྱ་བའོ། །དེར་ཞེས་བྱ་བ་ནི་སྒྲུབ་པར་བྱེད་པ་ཉིད་དུ་བསྟན་པ་མ་གྲུབ་པའོ། །ཅི་ལྟར་གཏན་ཚིགས་ལ་སོགས་པའི་མཚན་ཉིད་ཀྱིས་ཁྱབ་སྙམ་ན། ཅི་ལྟར་ཞེས་བྱ་བ་སྟེ། ཅི་ལྟར་

Vol. 186 · folio 119b

སྒྲུབ་པར་བྱེད་པ་ཉིད་དུ་བསྟན་པ་སྤངས་པ་དེ་བཞིན་དུ་དཔེ་དང་ཆོས་མཐུན་པས་བསྒྲུབ་བྱ་སྒྲུབ་པར་བྱེད་པ་ནི་གཏན་ཚིགས་སོ་ཞེས་བྱ་བ་ལ་སོགས་པ་གཏན་ཚིགས་ཀྱི་མཚན་ཉིད་ཀྱིས་སྤངས་པ་ཡིན་ནོ་ཞེས་རྗེས་སུ་འཇུག་གོ། །ཅི་ལྟར་སྤངས་སྙམ་ན་བསྒྲུབ་བྱ་སྒྲུབ་པར་བྱེད་པ་ནི་ཞེས་བྱ་བ་ལ་སོགས་པའོ། །གཏན་ཚིགས་

ཉིད་ཡིན་ལ་ཞེས་བྱ་བ་ནི་བསྒྲུབ་བྱ་མ་ཡིན་པའོ། །གང་གི་ཕྱིར་དེ་ལྟ་མ་ཡིན་པ་འདིས་ནི་ཞེས་བྱ་བ་དེ་བས་ན། སྔར་ངེས་པར་བཟུང་ན། དམ་བཅའ་བའི་མཚན་ཉིད་བརྗོད་པ་དོན་མེད་དོ། །མ་གྲུབ་པའི་སྒྲུབ་པར་བྱེད་པ་ལ་སོགས་པ་བསྟན་པ་ནི། གཏན་ཚིགས་ལ་སོགས་པའི་མཚན་ཉིད་ཁོ་ནས་དམ་བཅའ་བ་ཉིད་

ཡིན་པ་བཅད་པའི་ཕྱིར་རོ། །གང་གི་ཚེ་ཕྱིས་ངེས་པར་གཟུང་བ་བརྗོད་པ་དེའི་ཚེ་ནི། དེའི་ཕྱིར་ཞེས་བྱ་བ་བསྒྲུབ་པར་བྱ་བ་བསྟན་པ་ནི་དམ་བཅའ་བ་ཉིད་དོ་ཞེས་བྱ་བའི་ངག་ལས། ཕྱིས་ངེས་པར་གཟུང་བ་དེ་བརྗོད་པས་ཤུགས་ཀྱིས་ཁྱབ་པའི་འབྲས་ཅན་ཡིན་པར་རྟོགས་སོ། །དེ་ཡང་ཞེས་བྱ་བ་ནི་ཕྱིས་ངེས་པར་གཟུང་

བའོ། །ཁྱབ་པ་ན་ཧ་ཅང་ཐལ་བའོ། །འདི་ག་ལས་སྙམ་ན་འདི་ལྟར་ཞེས་བྱ་བའོ། །མཚན་ཉིད་གཞན་གྱིས་ཞེས་བྱ་བ་ནི་གཏན་ཚིགས་ལ་སོགས་པའི་མཚན་ཉིད་ཀྱིས་སོ། །གཞན་དུ་ན་ཞེས་བྱ་བ་ནི་གལ་ཏེ་མཚན་ཉིད་གཞན་གྱིས་ཁྱབ་པ་ཡང་དམ་བཅའ་བ་ཡིན་པར་མ་གྱུར་ན་དེའི་ཚེ་ཕྱིས་ངེས་པར་གཟུང་བ་དོན་

མེད་དོ། །རྣམ་པར་བཅད་པར་བྱ་བ་མེད་པའི་ཕྱིར་རོ། །གཏན་ཚིགས་སོགས་མཚན་གྱིས་ཁྱབ་ཕྱིར། །སྒྲུབ་པར་བྱེད་ལ་དགོས་པའང་མེད། །ཅེས་བྱ་བ་དང་། དེ་ལྟ་ན་ཡང་། དཔེ་དང་གཏན་ཚིགས་མ་གྲུབ་སྨྲ། །དམ་བཅའ་བར་ནི་ཐལ་བར་འགྱུར། །ཞེས་བྱ་བ་ལ་སོགས་པས་འགལ་བར་སེམས་པ་ལ་རྩོད་པ་

བྱེད་པས། གལ་ཏེ་རང་ཉིད་ཀྱིས་ཞེས་སྨྲས་སོ། །ཐལ་བར་འགྱུར་ཞེས་གྲུབ་པའི་མཐའ་སྨྲ་བས་ཐལ་བ་བརྗོད་པ་ལ། གཞན་རིགས་པ་ཅན་ལ་སོགས་པས། གཏན་ཚིགས་ལ་སོགས་པའི་མཚན་ཉིད་ཀྱིས་ཁྱབ་པས་ལན་བཏབ་པར་བྱས་པ་ན། ཡང་གྲུབ་པའི་མཐའ་སྨྲ་བས་སྔར་མ་གྲུབ་པའི་རང་བཞིན་ཕྱིར་

ཞེས་བྱ་བ་ལ་སོགས་པས་ལན་དུ་བརྗོད་པ་ཡིན་ནོ་ཞེ་ན་ཞེས་སྦྱར་བར་བྱའོ། །དེ་བཞིན་དུ་ཞེས་བྱ་བ་ལ་སོགས་པ་ཡང་དེ་ཁོ་ན་ལྟར་ལན་གཞན་བརྗོད་པ་ཞེས་སྦྱར་རོ། །དེས་ན། གཏན་ཚིགས་སོགས་མཚན་གྱིས་ཁྱབ་ཕྱིར། །ཞེས་བྱ་བ་མ་འབྲེལ་ལོ་ཞེས་བྱ་བའི་དོན་ཏོ། །ཕན་ཚུན་འགལ་བ་ཡིས་ཞེས་

Vol. 186 · folio 120a

བྱ་བ་ནི། ཕན་ཚུན་གནོད་པའི་གཞུང་གིས་སོ། །ཁྱེད་ཀྱི་གཞུང་ཕན་ཚུན་འགལ་བ་གང་ཡིན་པ་དེས། ཁོ་བོ་ཅག་ཐལ་བར་བརྗོད་པར་བྱེད་པ་ཉིད་དེ། གལ་ཏེ་བསྒྲུབ་པར་བྱ་བ་བསྟན་པ་དམ་བཅའ་བར་ཁས་ལེན་ན་དེ་ནི་མ་གྲུབ་པའི་སྒྲུབ་པར་བྱེད་པ་ཡང་དམ་བཅའ་བར་ཁས་བླངས་པར་བྱ་དགོས་སོ། །འོན་

ཏེ་སྔར་ངེས་པར་བཟུང་བ་ཁས་ལེན་ན་ནི་དེའི་ཚེ་ངེས་པར་བཟུང་བ་དོན་མེད་པར་ཁས་བླངས་པར་འགྱུར་ཏེ། མ་གྲུབ་པའི་སྒྲུབ་པར་བྱེད་པ་ལ་སོགས་པ་ཡང་གཏན་ཚིགས་ལ་སོགས་པས་ཁྱབ་པའི་ཕྱིར་རོ་ཞེས་མི་འདོད་པ་ཐོག་ཏུ་འགལ་བ་ཡིན་ནོ། །གཏན་ཚིགས་འདིས་སངས་རྒྱས་པ་རང་གི་འདོད་པའི་དོན་སྒྲུབ་པ་ནི་

མ་ཡིན་ནོ། །དེ་ལྟ་ཡིན་དང་ཞེས་བྱ་བ་ཕྱིས་ངེས་པར་བཟུང་བ་ཡིན་དང་ངོ་། །དམ་བཅའ་བ་ཉིད་དུ་ཞེས་བྱ་བ་ནི་མ་གྲུབ་པའི་སྒྲུབ་པར་བྱེད་པ་ལ་སོགས་པ་ཡང་ངོ་། །དམ་བཅའ་བ་མ་ཡིན་པ་སེལ་ཏེ་དམ་པ་ཉིད་དུ་བྱེད་དོ་ཞེས་བྱ་བའི་དོན་ཏོ། །བཤད་པ་ཞེས་བྱ་བ་ནི་སློབ་དཔོན་ཕྱོགས་ཀྱི་གླང་པོས་སོ། །གཞན་གཏན་

ཚིགས་ཐམས་ཅད་མི་རྟག་པའི་ཕྱིར་རོ་ཞེས་བྱ་བ་དང་དམ་བཅའ་བ་ནི་སྒྲ་རྟག་གོ་ཞེས་བྱ་བ་སྟེ་འདི་གཉིས་འགལ་བ་སྟེ་གནོད་པ་དེར་གྱུར་པ་ན་དམ་བཅའ་བའི་སྐྱོན་ཡིན་ནོ་ཞེས་རགས་པ་ཅན་ལ་སོགས་པས་བརྗོད་པ་གང་ཡིན་པ་དེ་རུང་བ་མ་ཡིན་ནོ། །དམ་བཅའི་ཉེས་པ་མ་ཡིན་ནོ། །ཞེས་བྱ་བའི་དོན་ཏོ། །ཅིའི་ཕྱིར་ཞེ་ན།

དེ་ནི་ཞེས་བྱ་བ་སྟེ། འགལ་བ་ནིའོ། །ཆོས་མི་མཐུན་པའི་དཔེ་གང་ཡིན་པ་དེར་བརྗོད་པ་ཡིན་ནོ། །སྒྲ་ནི་རྟག་སྟེ་ཐམས་ཅད་མི་རྟག་པའི་ཕྱིར་རོ་ཞེས་བྱ་བ་འདིར་བརྗོད་པར་འདོད་པ་ནི། སྒྲ་ནི་རྟག་སྟེ། ཐམས་ཅད་མ་ཡིན་པའི་ཕྱིར་རོ་ཞེས་བྱ་བ་ཡིན་ཏེ། བསྒྲུབ་པར་བྱ་བ་མེད་པ་རྗེས་སུ་བརྗོད་ནས་སྒྲུབ་པར་བྱེད་པ་མེད་པ་བསྒྲུབ་

པར་བྱ་བ་ཡིན་ཏེ། གང་མི་རྟག་པ་དེ་ནི་ཐམས་ཅད་ཡིན་ནོ་ཞེས་བྱ་བར་རོ། །དེས་ན་མི་རྟག་པ་ནི་ཐམས་ཅད་ཡིན་པའི་ཕྱིར་རོ་ཞེས་བརྗོད་པར་བྱ་བ་ལ། ཐམས་ཅད་མི་རྟག་པ་ཡིན་པའི་ཕྱིར་རོ་ཞེས་བརྗོད་པ་ནི། ལེགས་པར་མ་སྦྱངས་པ་ཁོ་ནའི་ཡིན་པས་མ་སྦྱངས་དག་ཅེས་བརྗོད་པ་ཡིན་ནོ། །རྣམ་པར་འགྲེལ་པ་

ནི་གཞན་དག་ཅེས་བྱ་བའོ། །ཅི་ལྟར་འདི་གཉིས་འགལ་སྙམ་ན། གལ་ཏེ་ཞེས་བྱ་བའོ། །དེ་ལྟར་རྩོད་པའི་ཆ་བཤད་ནས་གྲུབ་མཐའི་ཆ་འཆད་པ་ནི། དེ་ལ་སྨྲས་པ་ཞེས་བྱ་བའོ། །རེ་ཞིག་བསྟན་བཅོས་མཛད་པ་རང་ཉིད་ལན་གསུངས་པ་ནི། འགལ་བ་ཞེས་བྱ་བའོ། །དེ་ལྟ་ན་ནི་ཞེས་བྱ་བ་གལ་ཏེ་ཕན་པ་མེད་པ་

Vol. 186 · folio 120b

ལྷན་ཅིག་གནས་པ་མ་ཡིན་པའི་ཕྱིར་འགལ་བ་ཡིན་ན། དེའི་ཚེ་ཡན་ལག་གི་སྐྱོན་ཐམས་ཅད་ཕྱོགས་ཀྱི་སྐྱོན་དུ་འགྱུར་ཏེ། སྒྲུབ་པར་བྱེད་པའི་སྐྱོན་དུ་འགྱུར་བའི་གོ་སྐབས་མེད་པ་ཉིད་དོ་ཞེས་བྱ་བའི་དོན་ཏོ། །ཐ་མི་དད་ཀྱང་ལོགས་སུ་བརྗོད་པར་འགྱུར་རོ་སྙམ་ན། དམ་བཅའ་བའི་དོན་ལ་གནོད་པས་ཞེས་བྱ་བའོ། །དེ་

ལྟར་ཕན་མི་འདོགས་པའི་ཕྱོགས་བཟློག་ནས། ལྷན་ཅིག་མི་གནས་པའི་ཕྱོགས་སེལ་བ་བརྗོད་པ་ནི། འོན་ཏེ་ལྷན་ཅིག་མི་གནས་པའི་རང་བཞིན་གྱི་ཞེས་བྱ་བ་སྟེ། མ་འབྲེལ་བ་ཞེས་བྱ་བ་རྗེས་སུ་འཇུག་གོ། །འོན་ཏེ་ཞེས་བྱ་བ་ནི་ཆོས་ཅན་སྒྲ་ལ་ཐམས་ཅད་མི་རྟག་པའི་ཕྱིར་ཞེས་བྱ་བའི་ཕྱིར་གཏན་ཚིགས་ཡོད་པ་ན།

དམ་བཅའ་བ་རྟག་པ་ཉིད་སེལ་བར་བྱེད་པ་དེས་ན་མ་གྲུབ་པ་མ་ཡིན་ནོ་ཞེས་བསམས་པའོ། །ལན་ནི་དེ་ལྟ་ཡིན་ན་ཞེས་བྱ་བའོ། །ཚད་མ་གང་གིས་ཆོས་ཅན་སྒྲ་ལ་ཐམས་ཅད་མི་རྟག་པའི་ཕྱིར་ཞེས་བྱ་བའི་གཏན་ཚིགས་ངེས་པ་དེ་ཉིད་ཀྱིས། སྒྲ་རྟག་གོ་ཞེས་བྱ་བའི་དམ་བཅའ་བ་ལ་གནོད་པ་དེས་ན་ཚད་མས་

བསལ་བས་ཕྱོགས་ལྟར་སྣང་བར་འགྱུར་ཏེ། འདི་ནི་མངོན་སུམ་ལ་སོགས་པས་བསལ་བའི་ཕྱོགས་ལྟར་སྣང་བའི་ནང་དུ་འདུ་བར་འགྱུར་རོ། །དམ་བཅའ་བ་དང་གཏན་ཚིགས་འགལ་བ་ཞེས་བྱ་བའི་ཕྱོགས་ལྟར་སྣང་བ་གཞན་དུ་མི་འགྱུར་རོ་ཞེས་བྱ་བའི་དོན་ཏོ། །མི་རྟག་གཏན་ཚིགས་དང་ལྡན་པས། །ཞེས་བྱ་བའི་རྣམ་

འགྲེལ་གྱི་དོན་ཛ་ཡནྟས་བཤད་པ་ནི། གལ་ཏེ་སྒྲ་ཉིད་ལ་མི་རྟག་པ་ཉིད་དང་། དེས་ཀྱང་གཏན་ཚིགས་དང་ལྡན་པར་རྗོད་པར་བྱེད་ན། དེའི་ཚེ་དེ་ལྟར་དེ་ཐམས་ཅད་མི་རྟག་པ་ཡིན་པའི་ཕྱིར་ཞེས་བྱ་བས་ཕྱོགས་དེ་བསལ་བར་འགྱུར་རོ་ཞེས་བྱ་བའོ། །གཞན་དག་ནི་བཤད་པའི་རྗེས་སུ་འབྲངས་ནས་གཞན་དུ་འཆད་དེ། གལ་

ཏེ་སྒྲ་ལ་མི་རྟག་པ་ཉིད་ཀྱི་གཏན་ཚིགས་དང་ལྡན་པར་གྱུར་པས། དེ་ལྟར་ཞེས་བྱ་བ་ཐམས་ཅད་མི་རྟག་པའི་ཕྱིར་རོ་ཞེས་རྗོད་པར་བྱེད་ན། དེའི་ཚེ་དེ་ལྟར་ཞེས་བྱ་བ་གཞན་གྱི་མངོན་པར་འདོད་པའི་གཏན་ཚིགས་དང་དམ་བཅའ་བ་འགལ་བས་ཕྱོགས་དེ་ནི་བཟློག་པ་སྟེ་བསལ་བར་འགྱུར་རོ། །འཆད་པ་ནི།

གལ་ཏེ་མི་རྟག་པ་ཉིད་ཀྱི་གཏན་ཚིགས་དང་ལྡན་པས་སྒྲ་ལ་དེ་ལྟར་རབ་ཏུ་བརྗོད་པ་ཡིན་ན། དེའི་ཚེ་བསལ་བར་འགྱུར་བ་ཞིག་ན་ཞེས་སྦྱར་ཏེ། འདི་ཡང་ཡོད་པ་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཅི་ཡིན་སྙམ་ན། གང་གི་ཕྱིར་ཞེས་བྱ་བའོ། །འདི་ལ་ཞེས་བྱ་བ་ནི། སྒྲ་ནི་རྟག་སྟེ་ཐམས་ཅད་མི་རྟག་པའི་ཕྱིར་

Vol. 186 · folio 121a

རོ་ཞེས་བྱ་བའི་ངག་ལའོ། །དཔེ་བསྟན་པ་ལས་དོན་གཞན་གཏན་ཚིགས་བསྟན་པ་ཅི་ཞིག་ཡོད་དེ་མེད་པ་ཁོ་ནའོ་ཞེས་བྱ་བའི་དོན་ཏོ། །དཔེ་བསྟན་པ་ཉིད་འདིར་དོན་ཡིན་ནོ་ཞེས་བྱ་བར་བསམས་པའོ། །ཆོས་ཀྱི་མཐུན་པའི་དཔེ་བསྟན་པ་དེ་གང་ཡིན་སྙམ་ན། སྒྲ་རྟག་སྟེ་ཞེས་བྱ་བའོ། །གཞན་གྱིས་འདི་

ཡང་མ་སྦྱངས་པས་བརྗོད་པ་ཡིན་ནོ་ཞེས་བརྗོད་པ་ནི། འདིར་ཡང་ཞེས་བྱ་བའོ། །དེ་ཉིད་ཅེས་བྱ་བ་ནི་ཆོས་མི་མཐུན་པའི་དཔེ་སྟོན་པ་ཡིན་ནོ་ཞེས་བྱ་བ་ཉིད་དོ། །འདི་གཏན་ཚིགས་སུ་ཞེས་བྱ་བ་ནི། ཐམས་ཅད་མི་རྟག་པའི་ཕྱིར་ཞེས་བྱ་བའི་སྒྲ་འདི་གཏན་ཚིགས་སྟོན་པས་ན་གཏན་ཚིགས་སུ་འགྱུར་བ་ཡིན་ནའོ། །འོན་

ཏེ་སྒྲ་ཉིད་ལ་མི་རྟག་པ་ཉིད་སྟོན་པར་བྱེད་པ་དེས་ན། གཏན་ཚིགས་དང་དམ་བཅའ་བདག་འགལ་བ་ཡིན་ནོ་ཞེ་ན། དེ་ལྟར་ནི་ཞེས་སྨོས་ཏེ། སྒྲ་ཉིད་ལ་མི་རྟག་པ་ཉིད་སྟོན་པར་འགྱུར་རོ། །འདིས་ནི་འདི་ལ་དཔེར་བསྟན་པ་ཉིད་ལས་ཞེས་བྱ་བ་ལ་སོགས་པ་ལས། མི་རྟག་པ་གཏན་ཚིགས་དང་ལྡན་པས་ཞེས་བྱ་བ་རིགས་པར་

ཉེ་བར་བསྟན་པ་ཡིན་ནོ། །ཅི་ལྟར་མི་རྟག་པ་ཉིད་སྟོན་པར་མི་འཐད་སྙམ་ན། འདི་ལྟར་ཞེས་བྱ་བ་ལ་སོགས་པའོ། །ཁྱད་པར་གལ་ཏེ་ཆོས་ཅན་སྒྲ་ལ་གཞན་ཏེ་འགལ་བ་རྟག་པ་ཉིད་བརྗོད་ནས། སྤྱི་ནི་སྟེ་ཆོས་ཅན་ཐམས་ཅད་ཁྱབ་པའི་མི་རྟག་པ་ཉིད་རྗེས་སུ་འཇུག་པས་ཏེ། བརྗོད་པས་ན། སྒྲའི་མཚན་ཉིད་ཁྱད་

པར་ཏེ་མི་རྟག་པ་ཉིད་ཀྱི་སྤྱིས་ཁྱབ་པ་མ་ཡིན་ནོ། །སྒྲ་རྟག་གོ་ཞེས་ཁྱད་པར་བརྗོད་པ་ནི་དམིགས་ཀྱིས་བསལ་བ་ཡིན་ལ། ཐམས་ཅད་མི་རྟག་པའི་ཕྱིར་ཞེས་སྤྱི་བརྗོད་པ་ནི་སྤྱིར་བཏང་བ་ཡིན་ནོ། །དེས་ན་དམིགས་ཀྱིས་བསལ་བའི་ཡུལ་སྤངས་ནས། སྤྱིར་བཏང་བ་འཇུག་པ་ཡིན་ནོ་ཞེས་བྱ་བའི་རིགས་པས། སྒྲ་ནི་སྤྱིས་མ་ཁྱབ་

པར་འགྱུར་རོ། །ཁྱབ་ན་ཡང་སྒྲ་མི་རྟག་གོ་ཞེས་བརྗོད་པ་ལ་འབྲས་བུ་ཅི་ཡོད་དེ། དགོས་པ་ཅི་ཡང་ཡོད་པ་མ་ཡིན་ནོ། །དེས་ན་དེ་ནི་མི་བརྗོད་པ་ཁོ་ནར་ཐལ་བར་འགྱུར་རོ་ཞེས་དགོངས་པའོ། །གལ་ཏེ་གཉིས་པ་སྤྱི་དང་ཁྱད་པར་སྟོན་པར་བྱེད་པ་ཉིད་ཡིན་ཡང་སྤྱིར་བཏང་བ་དང་དམིགས་ཀྱིས་བསལ་བའི་བདག་

ཉིད་ཡིན་པར་མི་འགྱུར་ཏེ། སྨྲ་བ་པོའི་འདོད་པ་མ་ཡིན་པའི་ཕྱིར་རོ་ཞེས་དོགས་ན། སྒྲ་ལས་བྱུང་བའི་རིགས་པ་ཉིད་རྣམ་པར་འགྲེལ་པ་ནི། སྒྲ་ལས་ཞེས་བྱ་བའོ། །སྒྲ་ཐམས་ཅད་ནི་སྒྲུབ་པ་དང་དགག་པའི་རྗེས་སུ་འཇུག་པར་རྟོགས་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །གནོད་པར་བྱ་བ་ཡང་ཨ་ཎའི་རྐྱེན་གྱིས་

Vol. 186 · folio 121b

བསྒྲུབས་པ་ཡིན་ལ། གནོད་པར་བྱེད་པ་ནི་ཨཱ་ཉེ་བར་བསྒྱུར་བ་དང་བྲལ་བ་ལས། ཀ་ཞེས་བྱ་བས། ཀའི་རྐྱེན་གྱིས་བསྒྲུབས་པའོ། །ངེས་པ་ཡང་གནོད་པར་བྱ་བ་དང་གནོད་པར་བྱེད་པ་ཞེས་རྗེས་སུ་འཇུག་གོ། །འདིར་ལྷས་བྱིན་ཉིད་ཀྱིས་བཟའ་བར་བྱའོ་ཞེས་བྱ་བའི་ངེས་པ་ནི། མཆོད་སྦྱིན་ཟ་བར་སྒྲུབ་པས་གནོད་པ་ཡིན་ནོ། །

འདིར་ལྷས་བྱིན་ཁོ་ནས་གནས་པར་བྱ་བ་ཡིན་ནོ་ཞེས་བྱ་བ་ནི། གཞན་གནས་པ་ལ་གནོད་པར་བྱེད་པ་ཡིན་ནོ། །དེ་ལ་ཞེས་བྱ་བ་ནི་སྒྲུབ་པ་དང་ངེས་པ་ལའོ། །སྤྱི་དང་ཁྱད་པར་བརྗོད་པ་བདག་ཉིད་གནོད་པར་བྱ་བ་དང་གནོད་པར་བྱེད་པའི་དངོས་པོར་འགྱུར་བ་ཡིན་ནོ། །གལ་ཏེ་གནོད་བྱ་གང་ཡིན་པ་དེ་ནི་དང་པོ་ཉེ་

བར་བླང་བར་བྱ་བ་ཡིན་ཏེ། དཔེར་ན་ལས་ལ་ནི་ཨ་ཎའི་རྐྱེན་ཏོ་ཞེས་བྱ་བ་དང་། བྲམ་ཟེ་རྣམས་ལ་ཞོ་སྦྱིན་པར་བྱའོ་ཞེས་བྱ་བ་ལྟ་བུའོ། །གནོད་པར་བྱེད་པ་གང་ཡིན་པ་དེ་ནི་ཕྱིས་ཉེ་བར་ལེན་པ་ཡིན་ཏེ། དཔེར་ན་ཨཱ་ཉེ་བར་བསྒྱུར་བ་མེད་ལས་ནི་ཀའོ་ཞེས་བྱ་བ་དང་ཀཽ་ཌི་ནྱ་ལ་དར་བ་བྱིན་ཅིག་ཅེས་བྱ་བ་བཞིན་

ནོ། །འདིར་ནི་ཕྱིན་ཅི་ལོག་ཏུ་གྱུར་ཏེ། དེས་ན་ཅི་ལྟར་སྒྲ་རྟག་པ་ཡིན་ཏེ་ཞེས་བྱ་བ་གནོད་པར་བྱེད་པ་དང་། ཐམས་ཅད་མི་རྟག་པ་ཡིན་པའི་ཕྱིར་རོ་ཞེས་བྱ་བ་ཕྱིས་ཉེ་བར་བླངས་པ་གནོད་པར་བྱ་བར་ཡང་ཅི་ལྟར་འགྱུར་སྙམ་ན། དེ་ལ་རེས་འགའ་ཞེས་གསུངས་སོ། །སྔར་གནོད་པར་བྱ་བ་ཞེས་བྱ་བ་ལས་ལ་ནི་

ཨ་ཎའོ་ཞེས་བྱ་བའོ། །རེས་འགའ་ནི་སྔར་གནོད་པར་བྱེད་པ་ཞེས་བྱ་བ་ནི། དཔེར་ན་ཀཽ་ཌི་ནྱ་ལ་དར་བ་བྱིན་ཅིག །བྲམ་ཟེ་རྣམས་ལ་ནི་ཞོ་བྱིན་ཅིག་ཅེས་བྱ་བ་སྟེ། དེས་རིམ་པ་ངེས་པ་ཡོད་པ་མ་ཡིན་ནོ། །དེས་ན་སྒྲ་རྟག་སྟེ་ཞེས་བྱ་བ་གནོད་པར་བྱེད་པ་ནི་དང་པོ་ཡིན་ལ། ཕྱིས་ཀྱི་ཐམས་ཅད་མི་རྟག་

པའི་ཕྱིར་ཞེས་བྱ་བ་ནི་གནོད་པར་བྱ་བ་ཡིན་ནོ། །རྣམ་པ་ཐམས་ཅད་དུ་ཞེས་བྱ་བ་ནི་གནོད་བྱ་གནོད་བྱེད་སྔ་ཕྱི་ངེས་པ་མེད་ཀྱང་ངོ་། །འདི་འདྲ་བར་གནས་པ་ཡང་ག་ལས་ཡིན་སྙམ་ན། ཐ་སྙད་ནི་ཞེས་བྱ་བའོ། །སྒྲའི་ཚུལ་འདི་ནི་འདིར་ཡང་ཡོད་པ་ཡིན་ནོ་ཞེས་སྟོན་པས་རྣམ་འགྲེལ་རྣམ་པར་འགྲེལ་པ་ནི། འདིར་

ཡང་ཞེས་བྱ་བའོ། །ཕྱིར་དེ་ལྟར་གནོད་པར་བྱ་བ་དང་། གནོད་པར་བྱེད་པའི་དངོས་པོ་འཐད་ཀྱི། གང་གིས་དམ་བཅའ་བ་དང་གཏན་ཚིགས་འགལ་བས་ཕྱོགས་ཀྱི་སྐྱོན་དུ་འགྱུར་བ་ངག་གཞན་གྱིས་སྒྲ་ཉིད་མི་རྟག་པ་སྟོན་པར་ནི་འཐད་པ་མ་ཡིན་ནོ། །སྒྲ་རྟག་པ་ཡིན་ནོ་ཞེས་བྱ་བ་འདི་ལ་

Vol. 186 · folio 122a

རྗེས་སུ་མཐུན་པའི་དཔེ་བརྗོད་པ་ནི། ཅི་ལྟར་ཞེས་བྱ་བའོ། །ཁྱད་པར་གྱིས་སྤྱི་ལ་གནོད་པ་ཞེས་བྱ་བ་འདི་ཉིད་ག་ལས་ཤེ་ན། དམིགས་ཀྱིས་བསལ་བའི་ཡུལ་བཞག་སྟེ་ཞེས་བྱ་བའོ། །དཔེར་བརྗོད་པའི་དོན་དཔེའི་དོན་ལ་ཉེ་བར་སྦྱོར་བ་ནི། དེའི་ཕྱིར་སྤྱི་རྗེས་སུ་འཇུག་པར་འགྱུར་བ་

ན། ཁྱད་པར་སྒྲ་དེ་མི་རྟག་པ་ཉིད་སྤྱིས་ཁྱབ་པ་ཡིན་ནོ། །དེས་ན་གནོད་བྱ་གནོད་བྱེད་ཀྱི་དངོས་པོ་མེད་པའི་ཕྱིར་སྒྲ་ལ་མི་རྟག་པ་ཉིད་བསྟན་པ་ནི་མ་ཡིན་ནོ་ཞེས་བྱ་བར་དགོངས་པའོ། །སྤྱི་རྗེས་སུ་འཇུག་པ་ལའང་ཞེས་བྱ་བ་རྣམ་པར་འགྲེལ་པ་ནི། སྤྱི་རྗེས་སུ་འཇུག་པ་ལ་ནི་ཞེས་བྱ་བའོ། །འདི་ནི་ཞེས་བྱ་བ་ནི་ཁྱད་

པར་ཁྱབ་པའོ། །ཚིག་གི་ཞེས་བྱ་བ་ནི་ཐམས་ཅད་མི་རྟག་པའི་ཕྱིར་ཞེས་བྱ་བའི་ཚིག་གི་ཤུགས་ཀྱིས་སོ། །དོན་འདི་ཡིན་ཏེ། གལ་ཏེ་ཁྱད་པར་ཁྱབ་པ་མ་ཡིན་ན། ཐམས་ཅད་མི་རྟག་པའི་ཕྱིར་རོ་ཞེས་བྱ་བའི་ཚིག་ཉིད་མི་འཐད་དོ་ཞེས་ནི་བརྗོད་པར་མི་བྱ་སྟེ། ཅིའི་ཕྱིར་ཞེ་ན། ཚིག་ནི་ཞེས་བྱ་བའོ། །སྒྲ་མ་

རྟོགས་པའི་ཆོས་ཅན་གཞན་ལ་ཚིག་གི་དོན་བྱས་པའི་ཕྱིར་རོ། །ཉེས་པ་གཞན་ཡང་བརྗོད་པ་ནི། གལ་ཏེ་ཞེས་བྱ་བའོ། །གལ་ཏེ་སྒྲ་ལ་མི་རྟག་པ་ཉིད་བསྟན་པར་བྱ་བ་ཡིན་ན། དེའི་ཚེ་སྒྲ་རྟག་སྟེ་ཐམས་ཅད་མི་རྟག་པའི་ཕྱིར་རོ་ཞེས་དོར་ལ། སྒྲ་ནི་རྟག་ཏེ་མི་རྟག་པའི་ཕྱིར་རོ་ཞེས་བརྗོད་པར་འགྱུར་རོ། །

གལ་ཏེ་དེ་ལྟར་བརྗོད་ན་ཡང་ཅི་སྐྱོན་སྙམ་ན། གཞན་དུ་ཞེས་བྱ་བའོ། །ཁྱད་པར་དག་ནི་ཞེས་བྱ་བ་ནི་རྟག་པ་དང་མི་རྟག་པ་དག་གོ། །དེ་ལྟ་ཡིན་དང་ཞེས་བྱ་བ་ནི། ཡུལ་གཅིག་ལ་འཇུག་པ་ཡིན་དང་ངོ་། །དེ་སྐད་ནི་སྨྲ་བ་སུ་ཡང་ཡོད་པ་མ་ཡིན་ཏེ། དེས་ན་དམ་བཅའ་བའི་འགལ་བ་ཞེས་བྱ་བར་ཚར་བཅད་པའི་གནས་

ནི་ཡོད་པ་མ་ཡིན་ནོ། །དོགས་པ་བསུ་བ་ནི་རྨོངས་པའི་ཕྱིར་ཞེས་བྱ་བའོ། །གལ་ཏེ་ཡང་མ་རྨོངས་པ་དེ་སྐད་མི་སྨྲ་བ་དེ་ལྟ་ན་ཡང་རྨོངས་པའི་བློ་ཅན་འགའ་ཞིག་སྨྲ་བར་འགྱུར་བ་སྟེ། དེ་བཞིན་བསམ་པའི་དབང་གིས་འགལ་བའི་དཔེར་བྱེད་པ་ནི་འཐད་པ་ཡིན་ནོ་ཞེས་བྱ་བའི་དོན་ཏོ། །ལན་ནི་དེ་ལྟ་བུ་ནི་ཞེས་བྱ་བ་སྟེ།

རྨོངས་ཚབས་ཆེ་བ་ཡང་ངོ་། །འདི་ཉིད་དུ་ཞེས་བྱ་བ་སྟེ་སྒྲ་ཉིད་ལའོ། །འདི་ནི་སྨྲ་བའི་དབང་དུ་བྱ་བ་ཡང་མ་ཡིན་ནོ་ཞེས་བརྗོད་པ་ནི། གང་ལ་ཞེས་བྱ་བའོ། །འགའ་ཞིག་ཅེས་བྱ་བ་ནི་རྨོངས་པའི་བློ་ཅན་ནོ། །དེའི་ཚེ་ནི་ཞེས་བྱ་བ་ནི་གྲུབ་པའི་མཐའོ། །སྦྱོར་བ་ནི་ཞེས་བྱ་བས་ནི་སྦྱོར་བ་བྱ་བའི་ཕྱིར་གཞན་

Vol. 186 · folio 122b

སློབ་པར་བྱེད་པའོ། །སྒྲ་ནི་རྟག་སྟེ་མི་རྟག་པའི་ཕྱིར་རོ་ཞེས་སྦྱོར་བའི་སྒྲ་ནི་རྟག་སྟེ་ཐམས་ཅད་མི་རྟག་པའི་ཕྱིར་ཞེས་ནི་མ་ཡིན་ནོ། །འདི་འདྲ་བའི་སྦྱོར་བ་ནི་འགལ་བའི་དཔེར་མི་འཐད་དོ་ཞེས་བསྟན་ཟིན་པ་ཉིད་དོ། །མི་རྟག་པའི་ཕྱིར་ཞེས་བྱ་བ་ནི་འགལ་བའི་དཔེར་བརྗོད་དུ་འཐད་པ་ཁོ་ནའོ། །ཅི་ལྟར་ཞེ་ན། དེ་ལྟ་བུ་

ནི་ཞེས་བྱ་བའོ། །དེས་ན་ཞེས་བྱ་བ་ནི་མི་རྟག་པར་གྱུར་པའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་འགལ་བའི་ཕྱིར་རོ། །བཤད་པ་ཞེས་བྱ་བ་ནི་རྣམ་འགྲེལ་མཛད་པས་སོ། །སློབ་དཔོན་གྱིས་ཞེས་བྱ་བ་ནི་རྩ་བའི་སློབ་དཔོན་གྱིས་སོ། །གལ་ཏེ་སྒྲ་ལ་གནས་པ་ཡིན་ན་ཞེས་བྱ་བ་ནི་གཏན་ཚིགས་གནས་ནའོ། །འདི་

ག་ལས་ཤེ་ན། སྒྲ་ལ་ཞེས་བྱ་བའོ། །གལ་ཏེ་གཉི་ག་ལྟར་ཡང་སྒྲ་ལ་མི་རྟག་པ་ཉིད་བསྟན་པ་ཡིན་ནོ་ཞེ་ན། འདི་ནི་ཞེས་བྱ་བ་སྟེ་ཐམས་ཅད་མི་རྟག་པའི་ཕྱིར་རོ་ཞེས་བྱ་བ་ནིའོ། །གཞན་དུ་ཞེས་བྱ་བ་ནི་སྒྲ་ལས་མ་གཏོགས་པའི་ཆོས་ཅན་གཞན་ལའོ། །སེལ་བ་མ་ཡིན་ནོ་ཞེས་བྱ་བ་ནི་ཐམས་ཅད་ཀྱི་མི་

རྟག་པ་ཉིད་ཀྱི་སྒྲའི་མི་རྟག་པ་ཉིད་སེལ་བ་མ་ཡིན་པའོ། །སྐབས་ཀྱི་མཇུག་སྡུད་པ་ནི་དེས་ན་ཞེས་བྱ་བའོ། །ཐམས་ཅད་མི་རྟག་པ་ཡིན་ནོ་ཞེས་བྱ་བ་འདི་ནི་ཆོས་མི་མཐུན་པའི་དཔེར་བརྗོད་པར་ཟད་ཀྱི་གཏན་ཚིགས་ནི་མ་ཡིན་ནོ། །གལ་ཏེ་སྒྲ་མི་རྟག་སྟེ་དམ་བཅའ་བ་ཡིན་ལ། ཐམས་

ཅད་མི་རྟག་པའི་ཕྱིར་རོ་ཞེས་བྱ་བ་ནི་ཆོས་མི་མཐུན་པའི་དཔེ་ཡིན་ན། འོ་ན་གཏན་ཚིགས་གང་ཡིན་སྙམ་པར་དོགས་པ་བསུ་བ་ནི། དེ་ནི་ཞེས་བྱ་བའོ། །བཤད་པ་ཞེས་བྱ་བ་ནི་རྩ་བའི་སློབ་དཔོན་གྱིས་སོ། །གཏན་ཚིགས་ཞེས་བྱ་བ་ནི་ཕྱོགས་ཀྱི་ཆོས་སོ། །གང་དུ་ཞེས་བྱ་བ་ལ་སོགས་

པ་ནི་རྣམ་པར་བཤད་པ་མཛད་པ་ཉིད་ཀྱི་ཚིགས་སུ་བཅད་པའོ། །ལྔ་པས་ཞེས་བྱ་བ་ནི། ཐམས་ཅད་མི་རྟག་པ་ཡིན་པའི་ཕྱིར་རོ་ཞེས་བསྟན་པས་སོ། །འདི་ཅི་ལྟར་ཞེས་བྱ་བ་ནི། ཐམས་ཅད་མ་ཡིན་པ་ཉིད་གཏན་ཚིགས་སུ་ཅི་ལྟར་རྟོགས་ཤེ་ན། གཞན་དུ་ཞེས་བྱ་བ་ནི། ཐམས་ཅད་

མ་ཡིན་པར་རོ། །དེ་ནི་གཏན་ཚིགས་མ་ཡིན་ཏེ་མ་གྲུབ་པའི་ཕྱིར་རོ་ཞེས་བརྗོད་པ་ནི། ཐམས་ཅད་མ་ཡིན་པ་དེའང་སྒྲ་ལ་འཐད་པ་མ་ཡིན་ནོ། །ཅིའི་ཕྱིར་ཞེ་ན། སྤྱི་ནི་ཁྱད་པར་མི་སྤོང་བའི་ཕྱིར་རོ། །སྤྱི་ནི་ཁྱད་པར་སྤོང་བ་མ་ཡིན་གྱི། འོན་ཀྱང་འཕངས་ནས་གནས་པ་ཉིད་དོ། །

Vol. 186 · folio 123a

དཔེར་ན་ཤིང་གི་ཤ་པ་ལ་སོགས་པའི་ཁྱད་པར་བཞིན་ནོ། །དེ་བཞིན་དུ་ཐམས་ཅད་ཀྱིས་ནི་སྒྲ་ཡང་འཕེན་པ་ཡིན་པའི་ཕྱིར་ན། སྒྲ་ནི་ཐམས་ཅད་ཁོ་ནའོ། །དེས་ན་འདི་ནི་ཐམས་ཅད་མ་ཡིན་པ་ཉིད་དུ་མ་གྲུབ་པའོ། །གལ་ཏེ་གང་གིས་འདི་མ་གྲུབ་པ་ཉིད་དུ་བརྗོད་པར་འགྱུར་བ་ཅི་ལྟར་ནི་འདི་གཏན་

ཚིགས་བརྗོད་པ་ཡིན་སྙམ་ན། ཐམས་ཅད་མི་རྟག་པ་ཉིད་ཀྱིས་ཁྱབ་པ་ཡིན་ནོ་ཞེས་བྱ་བའོ། །དེ་ལས་ཞེས་བྱ་བ་ནི་མི་རྟག་པས་ཁྱབ་པའི་ཐམས་ཅད་ལས་སོ། །འདིའི་ཞེས་བྱ་བ་ནི་བསྒྲུབ་པར་བྱ་བ་རྟག་པའིའོ། །ཁྱད་པར་རྣམས་ཉིད་ཀྱིས་ཞེས་བྱ་བ་ནི་ཁྲ་བོ་ནི་སེར་སྐྱ་སྤངས་ནས་གནས་ཀྱི་བ་ལང་ཉིད་ནི་ཁྱད་པར་སྤངས་

ནས་གནས་པ་མ་ཡིན་ཏེ་ཁྱད་པར་གཅིག་དོར་ན་ཁྱད་པར་གཞན་ལ་ངེས་པའི་ཕྱིར་རོ། །སྒྲ་ནི་ཚང་བ་མ་ཡིན་ནོ་ཞེས་འབྲེལ་ཏོ་ཅི་ལྟར་ཞེ་ན། གང་གི་ཕྱིར་སྒྲ་ནི་ཕྱོགས་གཅིག་ཡིན་པས་སོ། །དེ་ནི་མ་ཡིན་ཏེ་ཞེས་བྱ་བ་ནི་ལན་ནོ། །གལ་ཏེ་སྤྱི་ནི་རང་གི་ཁྱད་པར་སྤོང་བར་མཐོང་བ་ཡིན་ནོ་ཞེས་དོགས་པ་ནི། ཤིང་ཞེས་བྱ་བའོ་

ལན་ནི་དཔེར་ན་ཞེས་བྱ་བ་ལ་སོགས་པའོ། །འགའ་ཞིག་གིས་ཤིང་ནི་ཤ་པ་ཁོ་ནའོ་ཞེས་བརྗོད་པ་ན། དེ་ལ་ལན་དུ་ཤིང་ཤ་པ་ཉིད་ནི་ཤིང་མིན་ཞེས་བྱ་བ་སྟེ། ཤིང་ཉིད་ངེས་པར་འགོག་པ་ཡིན་གྱི། ཤིང་ཉིད་དང་བྲལ་བ་ཁོ་ན་ཤིང་ཤ་པ་ཡིན་ནོ་ཞེས་ནི་སྟོན་པ་མ་ཡིན་ནོ། །དེ་བཞིན་དུ་ཐམས་ཅད་ཀྱི་སྒྲ་མཉན་པ་གཉི་ག་ཉིད་ལ་

འཇུག་པ་འགོག་པ་ཡིན་པར་འགྱུར་རོ། །དེ་ཙམ་གྱིས་ཐམས་ཅད་མིན་ཞེས་བྱ་བ་ནི། ཐམས་ཅད་ཀྱི་སྒྲའི་འཇུག་པ་ངེས་པ་བཀག་པ་ཙམ་གྱིས་ནི། སྒྲ་དེ་ཐམས་ཅད་མ་ཡིན་པར་མི་འགྱུར་རོ། །ཅིའི་ཕྱིར་ཞེ་ན། ཁྱད་པར་ཀུན་སོ་སོར་སྒྲ་བཞིན་དུ་ཐམས་ཅད་མ་ཡིན་པར་གྱུར་ན། ཐམས་ཅད་དེ་མེད་འགྱུར་ཕྱིར་

ཏེ་མི་སྲིད་པར་འགྱུར་བའི་ཕྱིར་རོ། །དེས་ན་འགའ་ཡང་ཐམས་ཅད་དུ་མི་འགྱུར་བ་ཞིག་ན་འདོད་པ་ཡང་ཡིན་ནོ། །དེའི་ཕྱིར་སྒྲ་ཐམས་ཅད་ཀྱི་ནང་ན་ཡོད་པའི་ཕྱིར་དེ་ཐམས་ཅད་མ་ཡིན་པ་ཉིད་དང་མ་གྲུབ་པོ། །གལ་ཏེ་སྒྲ་གཅིག་པུ་ཁོ་ན་ཐམས་ཅད་མ་ཡིན་གྱི་གཞན་ནི་མ་ཡིན་ཏེ། དེས་ན་མ་གྲུབ་པ་ཉིད་མ་

ཡིན་ནོ་ཞེས་དོགས་པ་བསུ་བ་ནི། འོན་ཏེ་ཞེས་བྱ་བའོ། །ལན་ནི་དེ་ལྟ་ཡིན་ན་ཞེས་བྱ་བའོ། །ཅི་དང་འདྲ་བར་ཞེ་ན། སྒྲ་མི་རྟག་སྟེ་གཅོམ་ཡིན་པའི་ཕྱིར་ཞེས་བྱ་བའོ། །སྒྲ་ཐམས་ཅད་ནི་ཆོས་ཅན་ཡིན་ལ། གཏན་ཚིགས་ཀྱང་དེ་ཉིད་ཡིན་ནོ། །དེས་ན་སྤྱིའི་དངོས་པོས་ཀྱང་གཏན་ཚིགས་ཉིད་

Vol. 186 · folio 123b

མ་ཡིན་ནོ་ཞེས་འཆད་པར་འགྱུར་རོ། །དཔེ་ལ་གཞན་གྱིས་ལོག་པར་རྟོགས་པའི་དོགས་པ་བསུ་བ་ནི། གལ་ཏེ་ཞེས་བྱ་བའོ། །ཅི་ལྟར་མ་གྲུབ་སྟེ་གྲུབ་པ་ཁོ་ནའོ། །ཅིའི་ཕྱིར་ཞེ་ན། རང་གི་ངོ་བོ་ཞེས་བྱ་བའོ། །གཅོམ་ཉིད་ནི་སྒྲའི་རང་བཞིན་ཡིན་པས་དེ་མེད་ན་སྒྲ་ཉིད་མེད་པར་འགྱུར་རོ། །དེ་ལྟར་ཡང་མ་ཡིན་ཏེ།

དེས་ན་མ་གྲུབ་པ་ཡིན་ནོ་ཞེས་བྱ་བའི་དོན་ཏོ། །ལན་ནི་མ་ཡིན་ཏེ་ཞེས་བྱ་བའོ། །འོ་ན་ཅི་ལྟར་མ་གྲུབ་སྙམ་ན། གཏན་ཚིགས་ཉིད་དུ་ཞེས་བྱ་བའོ། །གཏན་ཚིགས་ཉིད་དུ་ཅི་ལྟར་མ་གྲུབ་སྙམ་ན། གཏན་ཚིགས་ཉིད་ནི་ཞེས་བྱ་བའོ། །གཞན་དུ་ནི་ཞེས་བྱ་བ་ནི་ཐ་དད་པ་མ་ཡིན་ནའོ། །ཐ་མི་དད་ཀྱང་ཅི་སྟེ་

བསྒྲུབ་བྱ་དང་སྒྲུབ་བྱེད་ཀྱི་དངོས་པོ་མ་ཡིན་སྙམ་ན། སྒྲ་ནི་ཞེས་བྱ་བའོ། །དོན་འདི་ཡིན་ཏེ། ཆོས་ཅན་ཉིད་སྒྲུབ་པར་བྱེད་པ་ཡིན་པར་འགྱུར་བའམ། ཆོས་ཅན་ཉིད་སྤྱིས་ནི་གཏན་ཚིགས་ཡིན་ལ་ཁྱད་པར་གྱིས་ནི་བསྒྲུབ་པར་བྱ་བ་ཡིན་པར་འགྱུར། དེ་ལ་རེ་ཞིག་ཕྱོགས་དང་པོ་ནི་མ་ཡིན་ཏེ། ཐ་མི་དད་པའི་

ཕྱིར་རོ། །འདི་ལྟར་ཆོས་ཅན་གྲུབ་པའམ་མ་གྲུབ་པ་ཞིག་ཡིན་པར་འགྱུར། གལ་ཏེ་གྲུབ་ན་ནི་དེའི་ཚེ་ཤེས་པར་བྱ་བ་མ་ཡིན་ཏེ། ཤེས་པར་བྱ་བ་ནི་མ་གྲུབ་པའི་ཕྱིར་རོ། །འོ་ན་མ་གྲུབ་པ་ཡིན་ནོ་ཞེ་ན། མ་གྲུབ་པས་ནི་ཞེས་བྱ་བའོ། །མ་གྲུབ་ན་ནི་གཏན་ཚིགས་ཉིད་མ་གྲུབ་པར་འགྱུར་ཏེ། ཤེས་པར་

བྱ་བའི་སྒྲ་མ་གྲུབ་པའི་ཕྱིར་རོ། །ཡང་གྲུབ་པ་ཉིད་དུ་དོགས་པ་བསུ་ནས་སེལ་བར་བྱེད་པ་ནི། དེ་སྟེ་གྲུབ་པོ་ཞེ་ན་ཞེས་བྱ་བའོ། །གཞན་ཡང་གལ་ཏེ་ཆོས་ཅན་ཉིད་སྒྲུབ་པར་བྱེད་པ་ཡིན་ན་དེའི་ཚེ་སྤྱི་བསྒྲུབ་པར་བྱ་བ་མ་ཡིན་པར་འགྱུར་རོ། །ཕྱོགས་གཉིས་པ་ཡང་མ་ཡིན་ཏེ། སྤྱི་དང་ཁྱད་པར་གྱི་ངོ་བོས་གཏན་

ཚིགས་ཐ་དད་པར་འགྱུར་ཏེ། བ་ལང་གི་སྒྲ་འདི་ནི་མི་རྟག་སྟེ་སྒྲ་ཡིན་པའི་ཕྱིར། བུམ་པའི་སྒྲ་བཞིན་ནོ་ཞེས་བྱ་བ་བཞིན་ནོ། །འོན་ཀྱང་རྣམ་པ་འདི་ནི་སྒྲ་ནི་མི་རྟག་སྟེ་གཅོམ་པའི་ཕྱིར་ཞེས་བྱ་བ་སྐབས་འདིར་བརྗོད་པར་འདོད་པ་མ་ཡིན་ཏེ། སྒྲ་ཐམས་ཅད་ཆོས་ཅན་ཉིད་བླངས་པའི་ཕྱིར་རོ། །དེའི་ཚེ་ཡང་

ཆོས་ཅན་གང་ཡིན་པ་དེ་ཉིད་གཏན་ཚིགས་སུ་འགྱུར་རོ། །ཅིའི་ཕྱིར་བརྗོད་པར་མི་འདོད་སྙམ་ན། ཐལ་ཟིན་པ་ལ། ལྟོས་ཏེ་དཔེ་ཉིད་དུ་ཉེ་བར་བླངས་པའི་ཕྱིར་རོ། །དོགས་པ་བསུ་བ་ནི་གལ་ཏེ་ཞེས་བྱ་བའོ། །གཅིག་ཏུ་ཞེས་བྱ་བ་ནི་བསྒྲུབ་བྱ་མི་རྟག་པ་ཉིད་ནི་སྒྲུབ་པར་བྱེད་པ་མི་འདོད་མོད་ཅེས་བྱ་

Vol. 186 · folio 124a

བའོ། །འདི་ལ་ལན་ནི་འགལ་བ་ཞེས་བྱ་བའོ། །ཅི་ལྟར་འགལ་སྙམ་ན། སྒྲ་ཡིན་པའི་ཕྱིར་ཞེས་བྱ་བའོ། །ཚོགས་པ་མི་འགལ་བར་དོགས་པ་བསུ་བ་ནི་གལ་ཏེ་ཞེས་བྱ་བའོ། །ཅིའི་ཕྱིར་ཞེ་ན། སྒྲ་ཡིན་པའི་ཕྱིར་ཞེས་བྱ་བའོ། །དོན་འདི་བསྒྲུབ་པའི་ཕྱིར་དཔེ་བརྗོད་པ་ནི། དུ་བ་ཞེས་བྱ་

བའོ། །འདིར་ལན་ནི་དེ་ལ་ནི་ཞེས་བྱ་བའོ། །དུ་བ་ཡིན་པའི་ཕྱིར་དུ་བ་མེ་དང་ལྡན་པར་འགྱུར་བ་ཉིད་དོ་ཞེས་འབྲེལ་ཏོ། །ཅིའི་ཕྱིར་ཞེ་ན། དུ་བ་དེ་ལ་ནི་སྤྱི་དང་ཞེས་བྱ་བར་སྦྱར་རོ། །འདིར་ཡང་ནི་སྒྲ་ལའོ། །གལ་ཏེ་དེ་ལྟར་བྱེད་ན་སྤྱི་སྒྲུབ་པར་བྱེད་པའི་གཏན་ཚིགས་སུ་འགྱུར་བ་ཉིད་དོ། །འདིར་ནི་ཞེས་བྱ་བ་ནི་སྒྲ་ནི་མི་

རྟག་སྟེ་གཅོམ་ཡིན་པའི་ཕྱིར་ཞེས་བྱ་བར་རོ། །གལ་ཏེ་སྒྲ་ཞེས་བྱ་བ་ནས་བཟུང་ནས་སྐྱོན་མེད་དོ་ཞེ་ན་ཞེས་བྱ་བའི་མཐར་ཐུག་པ་ནི་རྩོད་པའོ། །ཅི་གལ་ཏེ་འགལ་བ་མེད་པ་ཁོ་ནའོ། །གང་གི་ཚེ་ཞེ་ན། སྒྲ་ཆོས་ཅན་ཡིན་པ་ནའོ། །ཆོས་ཅན་ནི་སྒྲུབ་པར་བྱེད་པ་ཉིད་དུ་འགྱུར་ན་ནི་སྒྲའི་རང་བཞིན་ཉིད་ཡིན་

པར་འགྱུར་ཏེ། ཐུན་མོང་གི་རང་བཞིན་ནི་གཏན་ཚིགས་ཡིན་པའི་ཕྱིར་སྒྲ་ཞེས་སྨོས་སོ། །འབྲེལ་པ་ཡོད་ན་དེའི་ཚེ་ཅི་ལྟར་ཞེས་སྦྱར་རོ། །དེ་ལྟ་ཡིན་ན་ཞེས་བྱ་བ་ནི་འབྲེལ་བ་མེད་ནའོ། །མ་ངེས་པ་ཉིད་ཡིན་ཏེ་ཞེས་བྱ་བ་ནི་མི་མཐུན་པའི་ཕྱོགས་ལས་ལྡོག་པར་ཐེ་ཚོམ་ཟ་བའི་ཕྱིར་རོ། །འོན་ཏེ་ཡང་

ཞེས་བྱ་བ་ལ་སོགས་པས་ནི་གྲུབ་པའི་མཐའ་སྨྲ་བའི་དོགས་པ་བསུ་བའོ། །སྒྲུབ་པར་བྱེད་པ་ཡང་བསྟན་པར་བྱ་བ་ཉིད་དང་ལྡན་པར་ཏེ་འབྲེལ་པར་མ་གྲུབ་པའོ། །ཁྱད་པར་འགའ་ཡང་ཞེས་བྱ་བ་ནི་ཆོས་ཅན་གྱི་རང་བཞིན་ལས་སམ། ཆོས་ཀྱི་རང་བཞིན་ལས་སོ། །གལ་ཏེ་ཆོས་ཅན་ཉིད་སྒྲུབ་པར་བྱེད་

པ་ཡིན་ན། དེའི་ཚེ་གཏན་ཚིགས་གཞི་མ་གྲུབ་པོ་ཞེས་བྱ་བའི་དོན་ཏོ། །ཡང་ཞེས་བྱ་བ་ཆོས་ཅན་དང་སྒྲུབ་པར་བྱེད་པ་གཉི་ག་བརྗོད་པར་བྱ་བ་མ་ཡིན་ཏེ། སྒྲ་ནི་མི་རྟག་སྟེ་སྒྲ་ཡིན་པའི་ཕྱིར་ཞེས་བྱ་བ་ནི་བརྗོད་པར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །དེས་ན་གལ་ཏེ་ཆོས་ཅན་སྒྲུབ་པར་བྱེད་པ་ཉིད་དུ་བྱེད་ན་

དེའི་ཚེ་སྒྲ་མི་རྟག་སྟེ་ཞེས་བྱ་བའམ། ཡང་ན་སྒྲ་ཡིན་པའི་ཕྱིར་ཞེས་བརྗོད་པར་བྱའོ། །ཆོས་ཅན་དང་གཏན་ཚིགས་གཉིས་སུ་བརྗོད་པར་བྱ་བ་ནི་མ་ཡིན་ནོ། །དེ་ལྟར་གྲུབ་པའི་མཐའ་བཀོད་ནས་ལན་འདེབས་པ་ནི། དེ་ནི་མ་ཡིན་ཏེ་ཞེས་བྱ་བའོ། །དེ་ཞེས་བྱ་བ་གཏན་ཚིགས་གཞན་ལ་ལྟོས་པ་སྤང་བའི་

Vol. 186 · folio 124b

ཕྱིར་ནའོ། །ཆོས་ཅན་གཞན་ནི་སེལ་བ་ལ་ཞེས་བྱ་བའི་ཆོས་ཅན་གཞན་བསལ་བའི་རྒྱུ་མཚན་དུའོ། །ཆོས་ཅན་དང་སྒྲུབ་པར་བྱེད་པ་གཉི་གར་སྦྱར་བར་བྱ་བ་ཡིན་ནོ་ཞེས་བྱ་བའི་དོན་ཏོ། །འདིས་སྨྲས་པ་ཞེས་བྱ་བ་ལ་སོགས་པ་ནི་ལན་ནོ། །སྒྲ་ཉིད་ཀྱི་མཚན་ཉིད་སྒྲུབ་བྱེད་ཀྱི་རང་བཞིན་དུ་གྱུར་པའི་ཆོས་ཅན་གང་ཡིན་

པ་དེ་ལ། གལ་ཏེ་རྟག་པ་ཉིད་བསྒྲུབ་པར་ནུས་པ་ཡོད་པ་ཡིན་ན་དེའི་ཚེ་སྒྲ་ཉིད་ཡིན་པའི་ཕྱིར་ཞེས་བྱ་བའི་གཏན་ཚིགས་གཞན་བླངས་པ་དོན་མེད་དོ། །འོན་ཏེ་ཆོས་ཅན་ལ་ནུས་པ་མེད་པ་དེ་ལྟ་ན་ཡང་སྒྲ་ཡིན་པའི་ཕྱིར་རོ་ཞེས་ཡང་བརྗོད་པ་དེས་ཅི་ཞིག་བྱ་སྟེ། ནུས་པ་མེད་པ་ཉིད་ཀྱི་ཕྱིར་རོ། །ཆོས་ཅན་ལ་

ནུས་པ་མེད་ན། དེའི་རང་བཞིན་དུ་གྱུར་པའི་སྒྲུབ་པར་བྱེད་པ་ཡང་ནུས་པ་མེད་དོ་ཞེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་མི་ནུས་པ་དང་མི་དགོས་པའི་ཉེས་པ་ཡོད་པའི་ཕྱིར་རོ། །ཡང་བསྟན་པ་ལ་ཞེས་བྱ་བ་ནི་སྒྲ་མི་རྟག་པ་ཞེས་བྱ་བ་དེ་ལ། ལྟོས་ཏེ་ཡང་སྒྲ་མི་རྟག་པའི་ཕྱིར་རོ་ཞེས་བྱ་བའོ། །དེ་ལ་

བརྗོད་པར་འདོད་པ་གང་ཡིན་པ་སྒྲུབ་པར་བྱེད་པ་ལས་ཐ་དད་པའི་སྒྲ་མི་རྟག་པ་ཉིད་ཀྱི་ཁྱད་པར་དང་ལྡན་པར་བརྗོད་པ་འདོད་པ་དེ་འདིར་མེད་པའི་ཕྱིར་རོ། །མ་གྲུབ་པ་ཞེས་བྱ་བ་ནི་གཞི་མ་གྲུབ་པ་ཉིད་ཀྱིའོ། །འདིས་ནི་སྒྲ་མི་རྟག་སྟེ་ཞེས་བྱ་བ་ལ་སོགས་པའི་རྩོད་པ་བསལ་བ་ཡིན་ནོ། །དེས་ན་མ་གྲུབ་

པ་ཉིད་ཅེས་བྱ་བའི་སྐྱོན་ནི་མེད་དེ་ཞེས་བྱ་བའི་རྩོད་པ་ཉེ་བར་འགོད་པ་ནི་རྗེས་སུ་འགྲོ་བ་མེད་པའི་ཕྱིར་ཞེས་བྱ་བའོ། །ལན་འདེབས་པ་ནི་ཉེས་པ་དེ་ཡང་ཞེས་བྱ་བའོ། །ངེས་པ་མེད་པ་བརྗོད་པའི་སྐབས་སུ་ནི་ཞེས་བྱ་བ་ནི། གང་གི་ཚེ་ཉེས་པ་གཅིག་ཁོ་ན་བརྗོད་པར་བྱའོ་ཞེས་ཚད་མ་བྱས་པའི་ཚེའོ། །ངེས་

པ་བརྗོད་པའི་སྐབས་སུ་ནི་རིགས་པ་མ་ཡིན་ནོ་ཞེས་འབྲེལ་ཏོ། །ཅི་ལྟར་རྗེས་སུ་འགྲོ་བ་མེད་པའི་ཉེས་པ་མི་རིགས་སྙམ་ན། ཕམ་ཟིན་པ་ལ་ཏེ་མ་གྲུབ་པའི་ཉེས་པ་བརྗོད་པས་རྡུགས་པར་བྱས་ཟིན་པ་ལ། ཕམ་པ་སྟེ་རྗེས་སུ་འགྲོ་བ་མེད་པའི་ཉེས་པ་བརྗོད་པའི་སྒོ་ནས་རྡུགས་པ་གང་ཡིན་པ་སྟེ་མེད་པའི་ཕྱིར་

རོ། །རྡུགས་ཟིན་པ་ལ་ནི་རྡུགས་པ་འཐད་པ་མ་ཡིན་ཏེ། དེ་ལྟར་གྱུར་ན་ནི་ཐུག་པ་མེད་པས་རྩོད་པ་དག་རྫོགས་པའི་མཐའ་མེད་པར་འགྱུར་རོ། །འོན་ཏེ་རྗེས་སུ་འགྲོ་བ་མེད་པའི་ཉེས་པ་ཉིད་ཐོག་མར་ཅི་སྟེ་མི་བརྗོད་སྙམ་ན། བརྒལ་ཞིང་བརྟག་པར་བྱ་བ་རྗེས་སུ་འགྲོ་བ་མེད་པའི་ཉེས་པ་ཡལ་

Vol. 186 · folio 125a

བར་དོར་བའི་ཕྱིར་ན་ཐོག་མར་མི་བརྗོད་དོ། །དེའི་ཕྱིར་ཞེས་བྱ་བ་ནི། གཞི་མ་གྲུབ་པས་མ་གྲུབ་པ་ཡིན་པའི་ཕྱིར་རོ། །མི་རིགས་པ་ནི་མི་ནུས་པའོ། །ཆོས་ཅན་ནུས་སོ་ཞེ་ན་ནི། དེའི་ཚེ་རྩོད་པ་མེད་པར་ཐལ་བར་འགྱུར་ཏེ། ཆོས་ཅན་གྲུབ་པ་ཙམ་གྱིས་གྲུབ་པས་ན་རྗེས་སུ་འགྲོ་བ་ལ་

སོགས་པ་ལ་ལྟོས་པ་མེད་པའི་ཕྱིར་རོ། །དེ་ལྟ་ན་ཡང་ཞེས་བྱ་བ་ནི་རྩོད་པ་མེད་ནའོ། །དེས་ན་སྟེ་མི་རིགས་པས་ན་ཆོས་ཅན་ནི་རང་གི་ཆོས་ཀྱི་སྒྲུབ་བྱེད་དུ་མ་གྲུབ་པོ། །ཅིའི་ཕྱིར་ཞེ་ན། ཆོས་ཅན་གཏན་ཚིགས་དངོས་གྱུར་ནི། །ཞེས་བྱ་བ་གཏན་ཚིགས་ཉིད་དུ་ཉེ་བར་བཀོད་པ་ནི། ཤེས་པར་བྱེད་པ་ཉིད་

གང་ཡིན་པ་དེར་མ་གྲུབ་པའི་ཕྱིར་ཏེ་ཤེས་པར་བྱ་བ་ཡིན་པའི་ཕྱིར་རོ། །ཤེས་པར་བྱ་བ་ཡིན་ཡང་ཤེས་བྱེད་ཅི་སྟེ་མ་ཡིན་སྙམ་ན། ཤེས་བྱ་ཤེས་བྱེད་ཐ་དད་པའི་ཕྱིར་རོ། །དེ་མེད་ན་ནི་ཐ་དད་པ་མེད་ནའོ། །དེ་མེད་ཀྱང་ཅི་ལྟར་མ་གྲུབ་སྙམ་ན་གསལ་བ་ཞེས་བྱ་བའོ། །གསལ་བ་ལ་སོགས་པ་ནི་རང་ཉིད་ཤེས་

བར་གྱུར་ན་བུམ་པ་ལ་སོགས་པ་གསལ་བར་བྱེད་པ་ཡིན་ན། དེ་བཞིན་དུ་ཤེས་པར་བྱེད་པ་ཡང་ཤེས་པར་བྱ་བ་ལས་ཐ་དད་པར་ཤེས་པར་གྱུར་ན་ཤེས་པར་བྱ་བ་ཤེས་པར་བྱེད་པར་འགྱུར་ཏེ། ཤེས་པར་བྱ་བ་ནི་ཤེས་པར་བྱེད་པ་ལས་རང་བཞིན་ཐ་དད་པའི་ཕྱིར་རོ། །དེས་ན་ཞེས་བྱ་བ་ནི་ཐ་དད་པ་མེད་པས་སོ། །

ཐ་དད་ན་ཞེས་བྱ་བ་ནི། གལ་ཏེ་སྒྲུབ་པར་བྱེད་པ་ཆོས་ཅན་ལས་ཐ་དད་པར་གྱུར་ན། དེའི་ཚེ་དེ་ལ་རྗེས་སུ་འགྲོ་བ་ཡོད་དམ་འོན་ཏེ་མེད་ཅེས་སེམས་པར་འགྱུར་ཏེ། དཔེར་ན་གཞལ་བྱ་ཉིད་བཞིན་ནོ། །སྔར་སྒྲུབ་པར་བྱེད་པའི་རང་བཞིན་གྲུབ་པར་བྱས་ནས། གཞི་མ་གྲུབ་པ་དང་རྗེས་སུ་འགྲོ་བ་མེད་པའི་

ཉེས་པ་བརྗོད་པ་ཡིན་ལ། ད་ལྟ་ན་ནི་ཐ་དད་པ་ཉིད་མེད་དོ་ཞེས་བརྗོད་པ་ཡིན་ནོ། །དེ་ཙམ་གྱིས་ཞེས་བྱ་བ་ནི་ཐ་དད་པ་མེད་པ་ཙམ་གྱིས་སོ། །དེའི་ཕྱིར་ཞེས་བྱ་བ་ནི། ཤེས་བྱེད་ཉིད་དུ་མ་གྲུབ་པའི་ཕྱིར་རོ། །གྲུབ་པ་ཉིད་ཅེས་བྱ་བ་ནི་རང་གི་ངོ་བོས་སོ། །དེ་བཞིན་དུ་ཆོས་ཅན་ལ་ཡང་རང་གི་སྒྲུབ་པར་བྱེད་པར་

གྲུབ་པ་ཡིན་ནོ་ཞེས་བསམས་པའོ། །ལན་ནི་གྲུབ་པ་ནི་ཞེས་བྱའོ། །མར་མེ་ལ་སོགས་པ་གྲུབ་པའོ། །ལྐོག་ཏུ་གྱུར་པ་མི་རྟག་པ་ཉིད། ལྐོག་ཏུ་མ་གྱུར་པ་སྒྲ་ལ་སོགས་པས་གྲུབ་པ་ནི་མ་ཡིན་ནོ། །ཅི་ལྟར་མི་མཐུན་ཞེ་ན། མར་མེ་ཞེས་བྱ་བའོ། །འདི་སྐད་བརྗོད་པ་ཡིན་ཏེ། གལ་ཏེ་འགའ་ཞིག་

Vol. 186 · folio 125b

དཔེར་ན་མར་མེ་ཐ་དད་པ་མེད་ཀྱང་རང་གི་སྒྲུབ་པར་བྱེད་པར་གྲུབ་པ་དེ་བཞིན་དུ་ཆོས་ཅན་སྒྲ་ཡང་། གལ་ཏེ་ཡང་ཆོས་ཅན་དང་བསྒྲུབ་བྱའི་རང་བཞིན་དུ་ཐ་དད་པ་མ་ཡིན་པ་དེ་ལྟ་ན་ཡང་མི་རྟག་པ་ཉིད་ཀྱི་སྒྲུབ་བྱེད་དུ་འགྱུར་རོ་སྙམ་དུ་སེམས་ན། དེ་ལ་མི་མཐུན་པ་ཉེ་བར་བཀོད་པ་ཡིན་ནོ་ཞེས་བརྗོད་པ་ཡིན་ནོ། །

དེས་ན་གལ་ཏེ་ཐམས་ཅད་མ་ཡིན་པ་ཉིད་སྒྲུབ་བྱེད་དུ་ལེན་པ་ཡིན་ན། དེའི་ཚེ་དམ་བཅའ་བའི་དོན་གྱི་ཕྱོགས་གཅིག་ཡིན་པར་གནས་པ་ཉིད་དོ། །གལ་ཏེ་ཐ་དད་པ་མེད་པའི་ཕྱིར་ཐམས་ཅད་ལ་ཉེས་པ་མེད་པ་འདིར་མི་འགྱུར་རམ་ཞེས་དོགས་པ་བསུ་བ་ནི། དངོས་པོ་ཀུན་ལ་བྱ་བ་སྟེ་སྒྲ་དང་བྱས་པ་

ལ་སོགས་པ་ལའོ། །མིན་ཞེས་བྱ་བ་ནི་ཉེས་པ་མཚུངས་པ་མ་ཡིན་པའོ། །ཅིའི་ཕྱིར་ཞེ་ན། ཀུན་རྫོབ་ཏུ་ཞེས་བྱ་བའོ། །སྒྲ་དང་བྱས་པ་དག་ལ་ནི། ལྡོག་པས་བརྟགས་པའི་ཐ་དད་པ་ཡོད་དེ། དེས་ན་ཆོས་ཅན་སྒྲ་ལས་ཐ་དད་པའི་བྱས་པས་མི་རྟག་པ་ཉིད་ཀྱི་ཁྱད་པ་ཅན་གྱི་སྒྲ་གོ་བར་བྱེད་པ་

ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་དོགས་པའོ། །མངོན་སུམ་དུ་གྲུབ་པ་ཞེས་བྱ་བ་ནི་བསྒྲུབ་བྱ་སྒྲུབ་བྱེད་མ་ཡིན་པ་ཉིད་དོ། །དེ་ནི་ཞེས་བྱ་བ་ནི་ཆོས་ཀྱི་དབྱེ་བ་བརྟགས་པའོ། །དེ་ལ་ཡང་ནི་མར་མེ་ལ་ཡང་ངོ་། །ཐ་དད་པར་བརྟགས་པས་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་

ཡིན་ན་ཧ་ཅང་ཐལ་བར་འགྱུར་རོ་ཞེས་བྱ་བ་ནི་རྩོད་པའི་དོན་ཏོ། །འདིས་ནི་ཕྱོགས་སྔ་མའི་ཆ་རྣམ་པར་བཀྲོལ་བ་ཡིན་ནོ། །ལན་གྱི་ཆ་རྣམ་པར་འགྲེལ་བ་ནི་མ་ཡིན་ཏེ་ཞེས་བྱ་བའོ། །མར་མེའི་རང་བཞིན་ཞེས་བྱ་བ་ནས་བརྩམས་ཏེ། མར་མེ་ནི་ཆོས་ཅན་ཡིན་ནོ་ཞེས་བྱ་བའི་བར་ནི་རྩོད་པའོ། །འདིར་

བསམ་པ་ནི་འདི་ཡིན་ཏེ། གལ་ཏེ་ཀུན་རྫོབ་ཏུ་སྒྲ་དང་བྱས་པ་དག་ཐ་དད་པའི་ཕྱིར་ཤེས་པར་བྱ་བ་དང་ཤེས་པར་བྱེད་པའི་དངོས་པོ་ཡིན་ན། དེའི་ཚེ་མར་མེ་ལ་ཡང་དབྱེ་བ་བརྟགས་པས་འགྱུར་རོ། །འོན་ཏེ་འདིར་མེད་ན། སྒྲ་དང་བྱས་པ་དག་ལ་ཡང་མི་འགྱུར་རོ་ཞེས་བྱ་བ་ཡིན་ནོ། །ཐ་དད་

པར་རྟོགས་པ་ཉིད་བརྗོད་པ་ནི། བྱེད་པ་དང་བཅས་པ་དང་ཞེས་བྱ་བའོ། །འབྲས་བུ་བྱེད་པའི་གནས་སྐབས་འབྲས་བུ་བྱེད་བཞིན་པ་ནི་བྱེད་པ་དང་བཅས་པའི་གནས་སྐབས་ཡིན་ལ། འབྲས་བུ་མི་བསྐྱེད་པའི་གནས་སྐབས་ནི་བྱེད་པ་མེད་པའི་གནས་སྐབས་ཡིན་ནོ། །དེས་ན་མར་མེའི་སྒྲས་

Vol. 186 · folio 126a

ནི་གནས་སྐབས་གཉིས་བརྗོད་པ་ཡིན་ནོ། །བརྗོད་པར་འདོད་པ་ནི་མར་མེའི་སྒྲས་བྱེད་པ་དང་བཅས་པའི་གནས་སྐབས་ཉིད་བརྗོད་པ་ཡིན་ནོ་ཞེས་བྱ་བ་ཡིན་ཏེ། རང་བཞིན་གྱི་སྒྲས་བྱ་བ་མེད་པའི་གནས་སྐབས་བརྗོད་པའི་ཕྱིར་རོ། །འདིས་ནི་ཆོས་ཅན་དུ་རྟོགས་པའི་ས་བོན་

བསྟན་ཏོ། །ད་ནི་བསྒྲུབ་བྱར་བརྟགས་པའི་ས་བོན་བརྗོད་པ་ནི། རང་བཞིན་ཞེས་བྱ་བའོ། །རང་བཞིན་གྱི་སྒྲས་ནི་བྱེད་པ་དང་བཅས་པ་དང་བྱེད་པ་མེད་པའི་གནས་སྐབས་གཉིས་ཡལ་བར་དོར་བ་རང་བཞིན་མ་ཡིན་པ་ལས་ལྡོག་པའི་དངོས་པོ་བརྗོད་པ་ཡིན་ནོ། །ད་ནི་བསྒྲུབ་པར་བྱ་བ་དང་སྒྲུབ་པར་བྱེད་

པ་སྟོན་པར་བྱེད་པས། སྒྲུབ་པར་བྱེད་པ་ཡང་སྟོན་པ་ནི། དེ་ལ་ཞེས་བྱ་བའོ། །དོན་བྱ་བ་བྱེད་པ་ནི་སྒྲུབ་པར་བྱེད་པ་ཡིན་ལ། རང་བཞིན་ནི་བསྒྲུབ་པར་བྱ་བ་ཡིན་པའམ། ཡང་ན་བཟློག་པས་ཏེ། རང་བཞིན་ནི་སྒྲུབ་པར་བྱེད་པ། དོན་བྱ་བ་བྱེད་པ་ནི་བསྒྲུབ་པར་བྱ་བ་ཡིན་ནོ། །གཉི་ག་ལྟར་ཡང་ཆོས་ཅན་

ནི་མར་མེ་ཡིན་ནོ། །བྱེད་པ་མེད་པ་ལ་ནི་ཞེས་བྱ་བ་ལ་སོགས་པ་ནི་གྲུབ་པའི་མཐའོ། །འདིས་ནི་ཆོས་ཅན་དང་བསྒྲུབ་བྱ་དང་། སྒྲུབ་པར་བྱེད་པ་རྣམས་ལྡོག་པའི་དབྱེ་བས་བརྟགས་པའི་ཐ་དད་པ་ཡང་ཡོད་པ་མ་ཡིན་ནོ་ཞེས་བརྗོད་པ་ཡིན་ནོ། །འདི་ལྟར་རེ་ཞིག་བྱ་བ་དང་བཅས་པ་དང་བྱ་བ་མེད་པའི་

གནས་སྐབས་གཉི་ག་ཁྱབ་པའི་ཆོས་ཅན་ནི་མ་གྲུབ་སྟེ། བྱ་བ་མེད་པ་ནི་གནས་སྐབས་དངོས་པོ་མ་ཡིན་པའི་ཕྱིར་རོ། །དེས་ན་མར་མེའི་སྒྲས་ནི་བྱ་བ་དང་བཅས་པའི་གནས་སྐབས་ཁོ་ན་བརྗོད་པ་ཡིན་ནོ། །རང་བཞིན་གྱི་སྒྲས་ཀྱང་དེ་བཞིན་ནོ། །བྱ་བ་མེད་པ་ལ་ནི་མར་མེའི་རང་བཞིན་མེད་པའི་ཕྱིར་རོ། །

འབྲས་བུ་བྱེད་པའི་ཕྱིར་རོ་ཞེས་བྱ་བས་ཀྱང་། བྱེད་པ་དང་བཅས་པའི་གནས་སྐབས་ཉིད་བརྗོད་པ་ཡིན་ནོ། །དེའི་ཕྱིར་མར་མེའི་སྒྲ་དང་། རང་བཞིན་གྱི་སྒྲ་དང་། འབྲས་བུ་བྱེད་པའི་སྒྲས་ནི་གཅིག་ཉིད་ལས་ལྡོག་པ་བརྗོད་པ་ཡིན་ནོ། །དེས་ན་ལྡོག་པས་བརྟགས་པའི་དབྱེ་བ་ཡང་མེད་དོ། །བརྗོད་པར་

འདོད་པའི་དོན་བྱ་བ་མེད་པས་བྱེད་པ་མེད་པ་ཡིན་ནོ་ཞེས་བྱ་བ་ནི་རྩོད་པའོ། །བརྗོད་པར་འདོད་པའི་དོན་ནི་མར་མེས་བསྒྲུབ་པར་བྱ་བའོ། །དེ་མེད་པས་མར་མེ་བྱེད་པ་མེད་པ་ཡིན་ནོ། །དེས་ན་མར་མེ་བྱེད་པ་མེད་པ་གང་ཡིན་པ་དེ་ནི་རང་བཞིན་གྱི་སྒྲས་བརྗོད་པ་ཡིན་ལ། བྱ་བ་དང་བཅས་པའི་

Vol. 186 · folio 126b

གནས་སྐབས་ནི་མར་མེའི་སྒྲས་ཡིན་ནོ་ཞེ་ན་ཞེས་ནི་མི་རིགས་ཏེ་ཞེས་བྱ་བ་ནི་ལན་ནོ། །ཧ་ཅང་ཐལ་བའི་ཕྱིར་རོ་ཞེས་བྱ་བ་ནི། བྱ་བ་མེད་པའི་རི་བོང་གི་རྭ་ལ་ཡང་རང་བཞིན་ཡོད་པར་འགྱུར་རོ། །དེ་སྐད་བརྗོད་པས་ནི་ཞེས་བྱ་བ་ནི་བྱེད་པ་དང་བཅས་པ་དང་ཅིག་ཤོས་ཉིད་ལ་སོགས་པ་བརྗོད་པས་ནིའོ། །ཐ་

དད་པར་ཞེས་བྱ་བ་ནི་དོགས་པའོ། །ལན་ནི་དེ་ནི་ཞེས་བྱ་བ་སྟེ་ཐ་དད་པར་རྟོགས་པ་ནིའོ། །སྤྱི་དང་ཞེས་བྱ་བ་ནི་དོན་བྱ་བ་བྱེད་པ་ཙམ་ཡིན་ལ། འབྲས་བུ་བྱེད་པའི་ཁྱད་པར་ནི་མར་མེ་ཡིན་ནོ། །ཡང་ན་རང་བཞིན་ནི་སྤྱི་ཡིན་ཏེ་བུམ་པ་དང་སྣམ་བུ་ལ་སོགས་པ་ཐུན་མོང་གི་རང་བཞིན་ཡིན་པའི་ཕྱིར་རོ། །

མར་མེ་ནི་ཁྱད་པར་ཡིན་ནོ། །དེ་ཉིད་ཀྱི་ཕྱིར་མར་མེས་རང་བཞིན་ཁྱད་པར་དུ་བྱེད་དེ། མར་མེའི་རང་བཞིན་ཞེས་སོ། །དེ་དག་ནི་དངོས་པོ་ཉིད་ཀྱིས་གྲུབ་པའི་ཕྱིར་མི་བྱེད་པ་དང་བཅས་པ་དང་ཅིག་ཤོས་ཀྱི་དངོས་པོས་ནི་མ་ཡིན་ནོ། །བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་ལ་ཐ་དད་པ་

ཉིད་ངེས་པ་ཡང་མ་ཡིན་ཏེ། འབྲས་བུ་བྱེད་པ་ལ་སོགས་པ་རྣམས་ལ་མར་མེ་ལས་ཐ་དད་པ་ཡོད་ཀྱང་དེ་མེད་པའི་ཕྱིར་རོ། །འོན་ཀྱང་བསྒྲུབ་པར་བྱ་བ་དང་སྒྲུབ་པར་བྱེད་པ་ཐ་དད་པ་ལ་ངེས་པ་ཡིན་ཏེ། དེ་མེད་ན་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་མེད་པའི་ཕྱིར་རོ། །ལོག་པར་རྟོགས་

པ་ལ་ལྟོས་ནས་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་ཡིན་ཡང་ཆད་པ་མེད་དེ། བྱས་པ་དང་མི་རྟག་པ་ཉིད་བཞིན་ནོ། །དེའི་ཕྱིར་ཆོས་ཅན་གྱིས་ཞེས་བྱ་བ་ནི། སྒྲ་ནི་མི་རྟག་སྟེ་སྒྲ་ཡིན་པའི་ཕྱིར་ཞེས་བྱ་བའོ། །དེའི་ཕྱིར་ཞེས་བྱ་བའི་རྣམ་པར་འགྲེལ་པ་ནི། ཐ་དད་པ་མེད་པའི་ཕྱིར་

ཞེས་བྱ་བའོ། །འོ་ན་བྱས་པ་དང་མི་རྟག་པ་ཉིད་ཅི་ལྟར་ཐ་དད་སྙམ་ན་བྱས་པ་དང་ཞེས་བྱ་བའོ། །དོན་དམ་པར་ཐ་དད་པ་ཉིད་དུ་ཅི་སྟེ་ཁས་མི་ལེན་སྙམ་ན། འདི་ལྟར་ཞེས་བྱ་བའོ། །མངོན་སུམ་གྱིས་ནི་བྱས་པ་ལ་སོགས་པ་ཐ་མི་དད་པར་འཛིན་པར་བྱེད་པ་ཡིན་པའི་ཕྱིར་དངོས་པོ་པའི་ཐ་དད་

པ་ལ་གནོད་པར་བྱེད་པ་ཡིན་པ་དེས་ན། ཅི་ལྟར་དོན་དམ་པར་ཐ་དད་པར་འགྱུར་རོ། །དོན་དམ་པར་ཐ་དད་པར་དོགས་པ་བསུ་བ་ནི། གལ་ཏེ་ཞེས་བྱ་བའོ། །ལན་ནི་ཆོས་ཅན་ཙམ་ནི་མངོན་སུམ་མ་ཡིན་ཞེས་བྱ་བའོ། །ཅི་ལྟར་གཅིག་ཡིན་ཞེ་ན། མི་རྟག་པ་ཉིད་ཅེས་བྱ་བའོ། །སྒྲ་ལས་མི་

Vol. 186 · folio 127a

རྟག་པ་ཉིད་གཞན་ཡིན་ན། སྒྲ་འཛིན་པར་མི་འགྱུར་རོ་ཞེས་བརྗོད་པ་ནི། མི་རྟག་གཞན་ཉིད་ཅེས་བྱ་བའོ། །ཅིའི་ཕྱིར་ཞེ་ན། གང་གི་ཕྱིར་རྟག་པ་ཉིད་དམ་གཉི་ག་མ་ཡིན་པའི་རང་བཞིན་དུ་ཡིན་ན། འདི་གཉི་ག་ཡང་རུང་བ་མ་ཡིན་ནོ། །དེས་ན་མི་རྟག་པ་ཉིད་གཞན་ཡིན་ན། ཆོས་

ཅན་འཛིན་པ་ཅི་ལྟར་ཡིན། རེ་ཞིག་ཆོས་ཅན་རྟག་པ་ཉིད་དུ་འཛིན་པ་འཐད་པ་མ་ཡིན་ནོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །དེ་ལྟ་ཡིན་དང་རྗེས་སུ་དཔག་པ་ལས་རྟག་པ་ཉིད་མི་འགྲུབ་པོ་ཞེས་བརྗོད་པ་ནི། ཚད་གཞན་ཞེས་བྱ་བའོ། །ཅི་ལྟར་མི་རྟག་པ་ཉིད་དུ་འཛིན་པ་མ་ཡིན་ཞེ་ན། མངོན་སུམ་

གྱིས་ནི་ཞེས་བྱ་བའོ། །མངོན་སུམ་གྱིས་རྟག་པ་ཉིད་དུ་རྟོགས་ན། མི་རྟག་པ་ཉིད་ཀྱི་རྗེས་སུ་དཔག་པས་སེལ་བར་མི་འགྱུར་རོ། །མངོན་སུམ་གཞན་གྱིས་བསལ་བར་བྱ་བ་མ་ཡིན་པ་ཉིད་བརྗོད་པ་ནི། མངོན་སུམ་ཚད་མ་གཞན་ཐམས་ཅད་ཀྱི་ནི་རྩ་བ་ཡིན་ཞེས་བྱ་བའོ། །རྒྱལ་པོའི་བུ་དག་ནི་སྡོམ་དང་

ཆོས་མཚུངས་པ་ཡིན་ནོ། །སྡོམ་ནི་རང་གི་བུ་རྣམས་ཉིད་ཀྱིས་གསོད་པར་བྱེད་པ་དེ་བཞིན་དུ། རྒྱལ་པོའི་བུ་ཕ་སླུ་བར་བྱེད་པ་ཡིན་ནོ་ཅི་ལྟར་རྒྱལ་པོའི་བུ་ཕ་གསོད་པར་འཇུག་པ་དེ་བཞིན་དུ་མངོན་སུམ་གྱིས་སྐྱེད་པའི་ཚད་མ་གཞན་དག་ནི་མངོན་སུམ་སེལ་བར་བྱེད་པ་མ་ཡིན་ནོ། །དེས་ན་གལ་ཏེ་རྟག་

པ་ཉིད་མངོན་སུམ་གྱིས་མཐོང་བ་ཡིན་ན། དེའི་ཚེ་མངོན་སུམ་གྱིས་བསྐྱེད་པ་མི་རྟག་པ་ཉིད་ཀྱི་རྗེས་སུ་དཔག་པས་བསལ་བར་ཅི་ལྟར་འགྱུར། མི་རྟག་པ་ཉིད་ཀྱི་རྗེས་སུ་དཔག་པ་ནི་འདོད་པ་ཡིན། དེ་ཡང་མེད་པར་འགྱུར་རོ་ཞེས་བྱ་བའི་དོན་ཏོ། །མངོན་སུམ་སྐྱེད་པར་བྱེད་པ་ཉིད་ཡིན་པར་བརྗོད་

པ་ནི། ཚད་མ་ཐམས་ཅད་ཀྱི་ཞེས་བྱ་བའོ། །མངོན་སུམ་མཁྲང་པོས་བསྟན་པའི་རྟག་པ་ནི་རྗེས་སུ་དཔག་པ་མི་རྟག་པར་དཔོག་པར་གནོད་པ་མ་ཡིན་ནོ་ཞེས་བྱ་བའི་དོན་ཏོ། །གཉི་གའི་རང་བཞིན་དུ་ཡང་ཆོས་ཅན་འཛིན་པར་མི་འཐད་དོ་ཞེས་བསྟན་པའི་དོན་དུ་དོགས་པ་བསུ་བ་ནི། འོན་ཏེ་ཞེས་བྱ་

བའོ། །དེས་ནི་མངོན་སུམ་གྱིས་སོ། །འོ་ན་ཅི་ལྟར་རྟག་པ་ཉིད་དམ་མི་རྟག་པ་ཉིད་དུ་རྟོགས་ཞེ་ན། རྟག་པ་ཉིད་དམ་ཞེས་བྱ་བའོ། །ལན་ནི་མི་རྟག་པ་ཉིད་ཅེས་བྱ་བའོ། །རྟག་པ་དང་མི་རྟག་པ་ཉིད་ཀྱི་རང་བཞིན་བརྗོད་པ་ནི། གང་གི་ཕྱིར་ཞེས་བྱ་བའོ། །དེས་ཅིར་འགྱུར་སྙམ་ན། དངོས་པོ་ཞེས་བྱ་བའོ། །

Vol. 186 · folio 127b

དེ་ལ་ཞེས་བྱ་བ་ནི་རྟག་པ་དང་མི་རྟག་པ་དག་གི་ནང་ནས་རྟག་པར་འཛིན་པ་ནི་དངོས་པོ་དུས་ཁྱབ་པར་བཟུང་ནས་འགྱུར་བ་ཡིན་ནོ། །གལ་ཏེ་ཁྱབ་པ་དེ་མ་བཟུང་ན་དེའི་ཚེ་མི་རྟག་པར་རིག་པ་ཉིད་དུ་འགྱུར་རོ། །འཆད་པ་ནི་གང་གི་ཚེ་ཞེས་བྱ་བའོ། །དོགས་པ་ནི་དེ་ཉིད་ཅེས་བྱ་བ་སྟེ་དུས་གཞན་ཁྱབ་པ་

ཉིད་དོ། །མི་རྟག་པ་ཉིད་ནི་མ་རྟོགས་པ་མ་ཡིན་ནོ་ཞེས་བྱ་བའོ། །གྲུབ་པའི་མཐའ་སྨྲ་བ་འདྲི་བ་ན་མི་རྟག་པ་ཞེས་བྱ་བའོ། །ཕ་རོལ་གྱི་ལན་ནི་དེ་ཉིད་ཀྱི་ཞེས་བྱ་བ་སྟེ་ཆོས་ཅན་ཉིད་ཀྱིའོ། །གྲུབ་པའི་མཐའ་སྨྲ་བ་རྣམ་པར་རྟག་པར་བྱེད་པ་ནི་དེ་ཞེས་བྱ་བ་སྟེ་མི་རྟག་པ་དེ་ཉིད་ཆོས་ཅན་གྱི་རང་བཞིན་རྟོགས་པ་ཉིད་

ཀྱི་ཚེ་ཡིན་ནམ། འོན་ཏེ་ཕྱིས་ཡིན། རྣམ་པར་རྟོག་པ་དང་པོ་ཁས་ལེན་པར་དོགས་པ་ལ་ནི་དེ་ཉིད་ཀྱི་ཚེ་ཞེས་བྱ་བའོ། །དམིགས་པར་བྱ་བ་ཉིད་དུ་ཡོད་དོ་ཞེ་ན། ལན་ནི་ཅི་སྟེ་ཞེས་བྱ་བའོ། །གལ་ཏེ་ཆོས་ཅན་རྟོགས་པའི་དུས་ཉིད་ན་མི་རྟག་པ་ཉིད་བལྟར་རུང་བར་ཡོད་པ་ཡིན་ནོ། དེའི་ཚེ་ཆོས་

ཅན་མངོན་སུམ་ཡིན་པར་བཞིན་དུ། མི་རྟག་པ་ཉིད་ཀྱང་ཅི་སྟེ་མངོན་སུམ་གྱིས་མ་རྟོགས། མངོན་སུམ་གྱིས་མ་རྟོགས་ཀྱང་། ཆོས་ཅན་གྱི་ཁྱད་པར་དུ་གྱུར་པའི་ཆོས་གཞན་ཉིད་ཡིན་ནོ་ཞེ་ན། མ་རྟོགས་ན་ཞེས་གསུངས་ཏེ། མི་རྟག་པ་ཉིད་དེ་ཅི་ལྟར་ཆོས་ཅན་དེའི་བདག་ཉིད་དུ་གྱུར་པ་ཡིན།

ཅིའི་ཕྱིར་ཞེ་ན། དེའི་བདག་ཉིད་ནི་ཞེས་བྱ་བའོ། །དེ་ཉིད་བརྗོད་པ་ནི་འབྲེལ་པ་ཉིད་དུ་ཞེས་བྱ་བའོ། །གལ་ཏེ་མི་རྟག་པ་ཉིད་ཀྱི་ཆོས་གཞན་ཆོས་ཅན་དང་འབྲེལ་པ་ནི། དེ་རྟོགས་པའི་དུས་ན་ཡོད་པ་ཡིན་ན་དེའི་ཚེ་གདོན་མི་ཟ་བར་མི་རྟག་པ་ཉིད་དེ་དེ་ལྟར་ཆོས་ཅན་དང་འབྲེལ་པ་ཉིད་དུ་རྟོགས་

པར་འགྱུར་རོ། །ཅིའི་ཕྱིར་ཞེ་ན། དེ་དང་ཞེས་བྱ་བའོ། །དེ་ལྟར་ནི་ཆོས་ཅན་དང་འབྲེལ་བར་འགྱུར་རོ། །རྣམ་པར་རྟོག་པ་གཉིས་པ་ཁས་ལེན་པའི་དོགས་པ་བསུ་བ་ནི་ཕྱིས་ཞེས་བྱ་བ་སྟེ་ཆོས་ཅན་མངོན་སུམ་དུ་བྱས་པའི་དུས་ཕྱིས་སོ། །ལན་ནི་དམིགས་པའོ་ཞེས་བྱ་བའོ། །གང་ཞེས་

བྱ་བ་མི་རྟག་པ་ཉིད་དོ། །དེའི་ཚེ་ཞེས་བྱ་བའི་ཆོས་ཅན་གྱི་རང་བཞིན་མངོན་སུམ་དུ་གྱུར་པའི་དུས་ནའོ། །མི་རྟག་ཉིད་དེ་ཅི་ལྟར་ཡོད། །ཅེས་བྱ་བ་སྟེ་མེད་པ་ཁོ་ནའོ་ཅི་ལྟར་མེད་སྙམ་ན། བརྗོད་པ་གཞན་དུ་མེད་པའི་ཡུལ་གྱི་རྟོགས་པ་མེད་པར་འགྱུར་རོ། །ཡང་ན་གཞན་དུ་མེད་པས་རྟོགས་

Vol. 186 · folio 128a

པར་འགྱུར་ཞེས་བྱ་བ་སྟེ། གཞན་དུ་ཞེས་བྱ་བ་མེད་པ་ཉིད་དུ་ནི། གཏན་ཚིགས་མེད་པ་ཉིད་ཀྱིས་རྟོགས་པར་འགྱུར་ཏེ། མེད་པའི་ཐ་སྙད་ཉིད་དུ་རིགས་སོ་ཞེས་བྱ་བའི་དོན་ཏོ། །དམིགས་པ་ཞེས་བྱ་བ་ནི་འཆད་པའོ། །འོན་ཏེ་ཞེས་བྱ་བ་ནི་སྔར་མི་རྟག་པ་ཉིད་ཀྱི་ཆོས་དང་འབྲལ་

བའི་ཆོས་ཅན་ཙམ་རྟོགས་པ་གང་ཡིན་པ་དེ་ནི་འཁྲུལ་པ་ཡིན་ཏེ། དེས་ན་མི་རྟག་པ་ཉིད་མ་དམིགས་ཀྱང་མ་དམིགས་པ་ལས་མེད་པར་འགྱུར་བའི་མཚན་ཉིད་ཀྱི་སྐྱོན་མེད་དོ་ཞེ་ན། ལན་ནི་གལ་ཏེ་ཞེས་བྱ་བའོ། །ཆོས་ཅན་འཛིན་པར་ཁས་ལེན་པ་ན། གལ་ཏེ་སྒྲ་ལ་སོགས་པའི་ཆོས་ཅན་ཐམས་

ཅད་ལ་འཇུག་པ་ཡིན་ན། དེའི་ཚེ་ཆོས་ཅན་ལ་ཚད་མ་མེད་དོ། །དེའི་ཕྱིར་རྗེས་སུ་དཔག་པ་ཚད་མར་ཅི་ལྟར་འགྱུར། ཅི་སྟེ་མི་འགྱུར་སྙམ་ན། ཆོས་ཅན་དང་ནི་ཞེས་བྱ་བའོ། །དེ་ལྟར་ན་གྲུབ་པ་ཅི་ཡོད་སྙམ་ན། མངོན་སུམ་དང་ནི་ཞེས་བྱ་བའོ། །འོ་ན་ཅི་ལྟར་མངོན་སུམ་དང་རྗེས་སུ་དཔག་པ་

དག་ཚད་མ་ཡིན་སྙམ་ན། ཆོས་ཅན་མི་རྟག་པ་ཉིད་དང་། ལྡན་པ་རྟོགས་པ་ན། དེ་དག་དེ་ལྟར་སྲིད་པ་ཡིན་ནོ་ཞེས་བརྗོད་པ་ནི། གང་ཚེ་ཞེས་བྱ་བའོ། །གང་གི་ཚེ་འབྱུང་བ་དང་འབྱུང་བའི་རང་བཞིན་མངོན་སུམ་གྱིས་མ་བཟུང་སྟེ་མི་རྟག་པ་ཉིད་བཟུང་བ་ཞེས་བྱ་བའི་དོན་ཏོ། །དེའི་ཚེ་བྱུང་བ་དང་འབྱུང་

བར་འགྱུར་བའི་ཞེས་འབྲེལ་ཏོ། །གང་གི་ཚེ་ཞེ་ན། གཏན་ཚིགས་ཆོས་ཅན་དང་འབྲལ་བ་མངོན་སུམ་གྱིས་གྲུབ་པ་ཡོད་ན་དེ། ཕྱོགས་ཀྱི་ཆོས་ཉིད་གྲུབ་ནའོ། །དོན་ནི་འདི་ཡིན་ཏེ། གང་གི་ཚེ་འདི་མི་རྟག་པ་ཉིད་མངོན་སུམ་གྱིས་གྲུབ་པ་དེའི་ཚེ། མཐའ་གཉིས་ལ་རྗེས་སུ་དཔག་པར་བྱ་ནུས་པ་ཡིན་

ཏེ། འདས་པ་དང་མ་འོངས་པ་དག་ནི་ལྐོག་ཏུ་གྱུར་པ་ཡིན་པའི་ཕྱིར་རོ། །སྲོག་ཆགས་འདི་ནི་སྔོན་གཏོང་བ་བྱས་པ་ཡིན་ཏེ་བདེ་བར་གནས་པའི་ཕྱིར་རོ། །འདི་ནི་བདེ་བར་འགྱུར་ཏེ་གཏོང་བ་པོ་ཡིན་པའི་ཕྱིར་རོ། །འདིས་ནི་བསྟན་བཅོས་གོམས་པར་བྱས་པ་ཡིན་ཏེ། མཁས་པའི་ཕྱིར་རོ་ཞེས་

དེ་ལྟར་མི་རྟག་པ་ཉིད་ཀྱི་ཕྱོགས་ལ་ནི་རྗེས་སུ་དཔག་པའི་འབྲས་བུ་དང་བཅས་པར་འགྱུར་གྱི། བསྟན་པའི་ཕྱོགས་ལ་ནི་མངོན་སུམ་གྱིས་བསྟན་པ་བཟུང་བ་ན། འདས་པ་དང་མ་འོངས་པའི་གནས་སྐབས་དག་ཀྱང་བཟུང་བའི་ཕྱིར་རྗེས་སུ་དཔག་པ་དོན་མེད་པར་འགྱུར་རོ། །རྟག་པ་ཉིད་

Vol. 186 · folio 128b

དུ་སྨྲ་བས་ཀྱང་འདས་པ་དང་མ་འོངས་པའི་གནས་སྐབས་དག་ལ་རྗེས་སུ་དཔག་པ་འདོད་པ་ཡང་ཡིན་ཏེ། དེའི་ཕྱིར་རྗེས་སུ་དཔག་པའི་ཤུགས་ལས་གཞན་གྱིས་ཀྱང་མི་རྟག་པ་ཉིད་དུ་ཁས་བླང་བར་བྱའོ། །འདི་ཡན་ཆད་ཀྱིས་ནི་ཉེས་པ་གཉིས་བསྟན་པ་ཡིན་ཏེ། གལ་ཏེ་དངོས་པོ་རྣམས་རྟག་པ་

དང་ཆོས་ཐམས་ཅད་ཀྱང་མི་འཛིན་པར་འདོད་ན་དེའི་ཚེ་སྒྲ་མི་རྟག་སྟེ་བྱས་པའི་ཕྱིར་ཞེས་བྱ་བའི་རྗེས་སུ་དཔག་པ་མེད་པར་འགྱུར་ཏེ། གཞི་ལ་གྲུབ་པའི་ཕྱིར་རོ། །སྔོན་དང་ཕྱི་མའི་མཐའ་གཉིས་རྗེས་སུ་དཔག་པར་ཡང་མི་འགྱུར་ཏེ། མངོན་སུམ་གྱིས་གྲུབ་པའི་ཕྱིར་ཞེས་བྱ་བའོ། །དེའི་ཚེ་ཞེས་བྱ་

བ་ནི་བྱུང་བ་དང་འབྱུང་བ་དག་རྗེས་སུ་དཔག་པས་གྲུབ་པའི་དུས་ནའོ། །ཅིག་ཤོས་ནི་རྗེས་སུ་དཔག་པར་བྱའོ། །རྟག་པ་ཉིད་ཀྱི་ཕྱོགས་ལ་ནི་རྗེས་སུ་དཔག་པ་དོན་མེད་པ་ཁོ་ནའོ་ཞེས་བརྗོད་པ་ནི་གལ་ཏེ་ཞེས་བྱ་བའོ། །འོན་ཏེ་མི་རྟག་པ་ཉིད་ལ་སོགས་པའི་ཆོས་རྣམས་ལ་ནི་བཟུང་དུ་ཟིན་ཀྱང་

འཁྲུལ་པ་ཡོད་དེ། དེས་ན་ཆོས་དེ་དག་ནི་རྗེས་སུ་དཔག་པས་ངེས་པ་ཡིན་ནོ། །དེས་ན་རྗེས་སུ་དཔག་པ་དོན་མེད་པར་ཅིར་འགྱུར་སྙམ་ན། འཁྲུལ་པ་ཡིན་ན་ནི་ཞེས་བྱ་བའོ། །ཐམས་ཅད་འཇིག་ཅེས་བྱ་བ་ནི། ཆོས་རྣམས་ཐམས་ཅད་མ་བཟུང་ན། རྣམ་པ་ཐམས་ཅད་དུ་ཆོས་ཅན་དུ་འཛིན་པར་

མི་འགྱུར་ལ། ཆོས་ཅན་གྱི་མངོན་སུམ་བཞིན་དུ་མངོན་སུམ་ཐམས་ཅད་ཚད་མ་མ་ཡིན་ན། རྗེས་སུ་དཔག་པ་ཡང་མེད་པར་འགྱུར་ཏེ། དེས་ན་རྣམ་པར་རིག་པ་ཙམ་འབའ་ཞིག་ཏུ་འགྱུར་རོ། །གང་གི་ཕྱིར་ཐམས་ཅད་འཇིག་པའི་ཉམས་པར་འགྱུར་བ་དེས་ནའོ། །འོན་ཏེ་རྟག་པ་དང་མི་རྟག་པ་དག་

ནི་མངོན་སུམ་གྱིས་གྲུབ་པ་མ་ཡིན་ནོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་ཆོས་ཀྱང་མངོན་སུམ་གྱིས་གྲུབ་ན། དེའི་ཚེ་ཆོས་ཀྱི་ཡུལ་ཅན་གྱི་རྗེས་སུ་དཔག་པར་མི་འགྱུར་རོ། །ཅིའི་ཕྱིར་ཞེ་ན། ཆོས་ཐམས་ཅད་ཅེས་བྱ་བའོ། །ཆོས་ཐམས་ཅད་མ་བཟུང་ན་ཆོས་ཅན་ཡང་མ་བཟུང་བར་

འགྱུར་རོ་ཞེས་ལན་བཏབ་པ་ནི། དེ་ནི་ཞེས་བྱ་བའོ། །གལ་ཏེ་སྒྲ་ཉིད་ལ་སོགས་པས་ཆོས་ཅན་དུ་བཟུང་ཡང་། མི་རྟག་པ་ཉིད་ལ་སོགས་པར་ནི་བཟུང་བ་མ་ཡིན་ནོ་སྙམ་ན། དེས་ན་ཞེས་བྱ་བའོ། །དེའི་ཕྱིར་རྗེས་སུ་དཔག་པ་དོན་མེད་པ་ཁོ་ནའོ་ཞེས་དགོངས་པའོ། །དེ་ལ་ཞེས་བྱ་བ་ནི་

Vol. 186 · folio 129a

མི་རྟག་པ་ལ་སོགས་པ་ལའོ། །འཁྲུལ་པའི་ཆོས་ཞེས་བྱ་བ་ནི་མི་རྟག་པ་ཉིད་ལ་སོགས་པའོ། །རྟག་པ་དང་མི་རྟག་པ་ཉིད་སྤངས་ནས་སྒྲ་ཉིད་ལ་སོགས་པར་འཛིན་པར་འགྱུར་རོ་ཞེས་བྱ་བའི་དོན་ཏོ། །ཐོ་ཡོར་པོ་ཉིད་ལ་སོགས་པ་མེད་པར་ཡང་རོད་རོད་པོ་ཙམ་བལྟ་བར་ནུས་ཀྱི།

རྟག་པ་ཉིད་ལ་སོགས་པ་དང་བྲལ་བའི་དོན་ནི་མ་ཡིན་ནོ་ཞེས་ལན་འདེབས་པ་ནི། མི་དང་ཞེས་བྱ་བའོ། །དེའི་ཆོས་ཅན་གྱིའོ། །དེ་ཡིན་ཏེ་ཞེས་བྱ་བ་ནི་ཁྱབ་པ་དང་ཅིག་ཤོས་ཉིད་དོ། །གལ་ཏེ་དེ་ཞེས་བྱ་བ་ཁྱབ་པ་དང་ཅིག་ཤོས་སོ། །དེ་ནི་ཞེས་བྱ་བ་ནི་ཆོས་ཅན་གྱི་རང་བཞིན་ནོ། །ཡུལ་ཁྱབ་ལ་གཞན་དུ་

འཛིན་པ་བཞིན་དུ་ཡུལ་ཁྱབ་པ་ཡང་གཞན་དུ་འཛིན་པར་འགྱུར་རོ་ཞེས་བྱ་བའི་རྩོད་པ་འགོད་པ་ནི། གལ་ཏེ་ཞེས་བྱ་བའོ། །ཀ་བ་ལ་སོགས་པ་ཡན་ལག་ཅན་གྱི་རྫས་ནི་རིང་པོ་ཉིད་ཡིན་ཡང་། ཡན་ལག་འགའ་ཞིག་བསྒྲིབས་པའི་དུས་ན། རིང་པོ་ཉིད་དུ་མི་འཛིན་པ་དེ་བཞིན་དུ། དུས་ཁྱབ་པའི་དོན་ལ་

ཡང་ཁྱབ་པ་ཉིད་དུ་འཛིན་པར་མི་འགྱུར་རོ་ཞེ་ན། ལན་ནི་རིང་པོ་མངོན་སུམ་གྱིས་འཛིན་པ་ལ་ཡིན་ནོ། །ཅིའི་ཕྱིར་ཞེ་ན། ཤིང་ལ་སོགས་པ་བསྒྲིབས་པ་དེར་རོ། །དེ་ནི་ཡན་ལག་ཅན་ནོ། །འོ་ན་དེ་གང་ཡིན་སྙམ་ན། གཞན་གྱི་ལུགས་ཀྱིས་དེ་ནི་ཡན་ལག་ཅན་ཡིན་ནོ་ཞེས་བརྗོད་པ་ནི། རིང་པོ་ཉིད་ཅེས་བྱ་བའོ། །

ཡན་ལག་ཅན་རིང་པོ་ཡིན་གྱི་ཡན་ལག་ནི་མ་ཡིན་ནོ་ཞེས་བྱ་བའི་དོན་ཏོ། །ཡན་ལག་ཅན་གྱི་རིང་པོ་དེ་ཡང་རྗེས་སུ་དཔག་པར་རྟོགས་པར་བྱ་བ་ཡིན་གྱི། མངོན་སུམ་གྱིས་རྟོགས་པར་བྱ་བ་ནི་མ་ཡིན་ནོ། །རྗེས་སུ་དཔག་པས་རྟོགས་པར་བྱ་བ་ཉིད་གཞན་གྱི་ལུགས་ལ་གནས་ནས་བརྗོད་པ་ནི། འདི་ལྟར་ཞེས་

བྱ་བའོ། །གང་གི་ཕྱིར་ཡན་ལག་གཅིག་གཡོས་པར་གྱུར་ན། ཐམས་ཅད་ཀྱང་གཡོ་བར་འགྱུར་བ་དེའི་ཕྱིར་དངོས་པོ་དེ་ནི་རིང་པོ་གཅིག་ཡིན་ནོ་ཞེས་རྟོགས་པར་འགྱུར་རོ། །གལ་ཏེ་དངོས་པོ་གཅིག་ཡིན་པར་མ་གྱུར་ན་ནི། གཅིག་གཡོས་པས་ཐམས་ཅད་གཡོ་བར་མི་འགྱུར་ཏེ། དེས་ན་གཅིག་པ་ཉིད་

འདི་ནི་རྗེས་སུ་དཔག་པ་ལས་རྟོགས་པ་ཡིན་ནོ། །དེ་ལྟར་རྗེས་སུ་དཔག་པ་གཉིས་བསྟན་ནས། གཉིས་པ་བརྗོད་པ་ནི། ཡན་ལག་གཅིག་ཅེས་བྱ་བའོ། །དེ་ལྟར་གཞན་གྱི་ལུགས་ཀྱིས་རྗེས་སུ་དཔག་པ་བརྗོད་ནས་ཟློག་པར་བྱེད་པ་ནི། དེ་ནི་རྗེས་སུ་དཔག་པ་ཡང་ཞེས་བྱ་བའོ། །རྗེས་སུ་དཔག་

Vol. 186 · folio 129b

པས་གཉིས་པོ་གང་ཡིན་པ་དེ་ནི་རྗེས་སུ་དཔག་པ་ཉིད་མ་ཡིན་པ་ཁོ་ན་སྟེ། གཡོ་བ་ལ་སོགས་པ་ནི་རྣམ་པ་གཞན་དུ་ཡང་འཐད་པའི་ཕྱིར་རོ། །ཅི་ལྟར་ཞེ་ན། གང་གི་ཕྱིར་ཡན་ལག་ཅན་དང་བྲལ་བ་ཕན་ཚུན་འབྲེལ་པའི་ཡན་ལག་ཁོ་ན་དཔོག་པ་ཡིན་པའི་ཕྱིར་རོ། །ཡུལ་ཁྱབ་པའི་དཔེ་སུན་ཕྱུང་ནས། དོན་དུས་ཁྱབ་

པ་ཉིད་སུན་འབྱིན་པ་ནི། དེ་ནི་ཞེས་བྱ་བ་སྟེ་དུས་ཁྱབ་པའོ། །རྗེས་སུ་དཔག་པའི་ཡུལ་ནི་མ་ཡིན་གྱི། འོན་ཀྱང་མངོན་སུམ་གྱི་ཡུལ་ཉིད་དོ། །དེ་ཉིད་བརྗོད་པ་ནི། མངོན་སུམ་མ་ཞུགས་ན་ཞེས་བྱ་བའོ། །ཚད་མ་གཞན་ནི་རྗེས་སུ་དཔག་པའོ། །དེ་ཉིད་ནི་ཞེས་བྱ་བ་ནི་ཁྱབ་པའོ། །དེའི་ཕྱིར་ཞེས་མཐོང་བ་

དང་མ་མཐོང་བ་གཅིག་མ་ཡིན་པའི་ཕྱིར་རོ། །དེ་ནི་ཞེས་བྱ་བ་ནི་དུས་ཁྱབ་པའམ་མ་ཁྱབ་པའོ། །དེ་ལ་ནི་དེ་ལྟར་གནས་པའོ། །གལ་ཏེ་དོན་འདི་དུས་ཁྱབ་པའི་རང་བཞིན་དུ་མངོན་སུམ་གྱི་ཡུལ་མ་ཡིན་ན། དེའི་ཚེ་ཁྱབ་པ་ཉིད་དེ་དག་དེའི་རང་བཞིན་མ་ཡིན་ནོ། །ཁྱབ་པའི་རང་བཞིན་ཉིད་མ་ཁྱབ་པའི་རང་

བཞིན་དུ་ཡུལ་དུ་བྱེད་པ་ཡིན་ནོ་ཞེ་ན། མངོན་སུམ་གྱིས་ཞེས་བྱ་བའོ། །དཔེར་ན་སྔོན་པོའི་རང་བཞིན་དུ་ནི་སེར་པོ་ལ་སོགས་པ་མངོན་སུམ་གྱིས་ཡུལ་དུ་བྱེད་པ་མ་ཡིན་པ་དེ་བཞིན་དུ་ཁྱབ་པ་ཡང་མ་ཁྱབ་པར་ཡུལ་དུ་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་བུ་ཉིད་དུ་ཞེས་བྱ་བ་ནི་མ་ཁྱབ་པ་ཉིད་

དུའོ། །གཞན་དུ་ན་ཞེས་བྱ་བ་ནི་དུས་གཞན་ཁྱབ་པ་ཉིད་དུ་བཟུང་བ་ཡིན་ནའོ། །བྱུང་བ་དང་ཞེས་བྱ་བ་ནི་དོགས་པའོ། །དེ་ལྟ་མ་ཡིན་ནོ་ཞེས་བྱ་བ་ནི། ཐམས་ཅད་ཀྱིས་བྱ་བའི་དོན་བྱེད་པར་ཐལ་བ་མ་ཡིན་པའོ། །ལན་ནི་དེ་ཞེས་བྱ་བ་སྟེ་དུས་ཀྱི་ཆ་རྣམས་མ་བཟུང་ནའོ། །དུས་དེ་ཙམ་ཞེས་བྱ་བ་ནི་ད་ལྟ་བའི་

དུས་དང་འབྲེལ་པ་ཉིད་དུའོ། །དེ་ལྟ་ཡིན་དང་ཞེས་བྱ་བ་ནི། དུས་དེ་ཙམ་དང་འབྲེལ་བར་བཟུང་བ་ནའོ། །གློག་ལ་སོགས་པ་བཞིན་དུ་ཞེས་བྱ་བ་ལ་གློག་ནི་ད་ལྟ་བའི་དུས་དང་འབྲེལ་བ་ཙམ་དུ་བཟུང་བས་སྐད་ཅིག་མ་ཉིད་ཡིན་ནོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །གཞན་དག་གིས་

ལྟར་ན་འཇིག་པའི་རྒྱུ་མེད་པའི་ཕྱིར་མི་འཇིག་གོ་ཞེས་ལན་འདེབས་པ་ནི་འོ་ན་ཞེས་བྱ་བའོ། །འཇིག་པའི་སྲིད་པར་དོགས་པ་བསུ་བ་ནི། གྱིས་ཞེས་བྱ་བའོ། །འདི་ལས་ཡང་འཇིག་པའི་རྒྱུ་འདི་འདྲ་བ་ནི་དོན་ལ་ཡང་ཡོད་དོ་ཞེས་ལན་འདེབས་པ་ནི། འདི་ལ་ཡང་ཞེས་བྱ་བ་སྟེ། བུམ་པ་ལ་སོགས་པ་

Vol. 186 · folio 130a

ལའོ། །རིགས་མཐུན་པ་དུས་ཕྱིས་འབྱུང་བ་བུམ་པའི་སྐད་ཅིག་དང་མི་མཐུན་པ་བྱ་བས་ནོན་པའོ། །དེ་ནི་ཞེས་བྱ་བ་ནི་ནོན་པས་བྱས་པའི་འཇིག་པའོ། །དུས་ཕྱིས་མ་དམིགས་པ་མ་གྲུབ་པར་དོགས་པ་བསུ་བ་ནི། གལ་ཏེ་ཞེས་བྱ་བའོ། །ལན་ནི་མ་ཡིན་ཏེ་ཞེས་བྱ་བའོ། །ཅིའི་ཕྱིར་ཞེ་ན།

དེ་ཉིད་ཅེས་བྱ་བ་སྟེ་སྔར་བཟུང་བ་ཉིད་དོ། །འདི་ཉིད་བརྗོད་པ་ནི་སྔར་གྱི་ཞེས་བྱ་བའོ། །ཅི་ལྟར་སྔར་གྱི་དུས་མ་བཟུང་སྙམ་ན། རེ་ཞིག་གཟུགས་ལ་སོགས་པ་ལས་མ་གཏོགས་པའི་གཟུགས་ནི་མངོན་སུམ་ལ་མི་གྲུབ་པ་མེད་དོ་ཞེས་བརྗོད་པ་ནི། ཡུད་ཙམ་ཞེས་བྱ་བའོ། །ཅི་ལྟར་མངོན་སུམ་གྱིས་མ་གྲུབ་སྙམ་ན།

ཉི་མ་དང་པོར་ཞེས་བྱ་བའོ། །ཐུན་དང་པོ་ཉིད་ལ་སོགས་པ་རྟོགས་པ་མ་ཡིན་ནོ། །ཐུན་གཉིས་པར་མངོན་སུམ་གྱིས་ཉིན་མོ་ལ་སོགས་པ་རྟོགས་པ་མེད་དོ་ཞེས་འབྲེལ་ཏེ། འདི་ལ་གཏན་ཚིགས་བརྗོད་པ་ནི། དེའི་ཚེ་ཞེས་བྱ་བས་དེ་ཉི་མ་དང་པོ་ལ་སོགས་པའི་དུས་ནའོ། །གལ་ཏེ་མངོན་སུམ་གྱིས་དེ་མ་གྲུབ་

ན་དྲན་པས་འགྲུབ་པར་འགྱུར་རོ་སྙམ་དུ་དོགས་པ་ནི། ཉི་མ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་དེ་ལྟ་མ་ཡིན་པའོ། །ཅིའི་ཕྱིར་ཞེ་ན། དྲན་པ་ཞེས་བྱ་བའོ། །ཅི་ལྟར་ཞེ་ན་དྲན་པ་ནི་ཞེས་བྱ་བའོ། །འདི་ཉིད་བརྗོད་པ་ནི། དྲན་པ་ཞེས་བྱ་བའོ། །འོ་ན་མངོན་སུམ་གྱིས་དེ་འཛིན་པར་འགྱུར་རོ་སྙམ་ན། མངོན་

སུམ་གྱིས་ཞེས་བྱ་བའོ། །སྔ་མ་དང་ཕྱི་མ་གཅིག་གི་རང་བཞིན་མ་ཡིན་མོད་དུས་བསགས་པའི་རང་བཞིན་ཉིད་དུ་ནི་འགྱུར་རོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །ལན་ནི་བསགས་པ་ཞེས་བྱ་བའོ། །གལ་ཏེ་ཞེས་བྱ་བ་ནི་དོགས་པའོ། །ཉི་མ་དུ་མ་འཛིན་པའི་མངོན་སུམ་གང་ཡིན་པ་དེས་ཉི་མ་

བསགས་པའི་རང་བཞིན་ཟླ་བ་ཞེས་བྱ་བའི་དུས་འཛིན་ནོ་ཞེས་བྱ་བའི་དོན་ཏོ། །ལན་ནི་མངོན་སུམ་ཞེས་བྱ་བའོ། །མངོན་སུམ་དུ་མ་ཞུགས་སོ་ཞེས་བྱ་བ་འདི་ལ་ཚད་མ་ཅི་ཡང་ཡོད་པ་མ་ཡིན་ནོ། །དྲན་པས་མངོན་སུམ་དུ་མ་རྟོགས་སོ་ཞེས་བྱ་བ་ཡང་འཐད་པ་མ་ཡིན་ནོ་ཞེས་བརྗོད་པ་ནི། དྲན་པ་ཞེས་བྱ་བའོ། །

གང་གི་ཕྱིར་དྲན་པ་ལས་བྱུང་བ་ཡིན་པ་དེས་ན། བསགས་པའི་རང་བཞིན་དེ་ནི་ཀུན་རྫོབ་པ་ཡིན་གྱི། དོན་དམ་པ་ནི་མ་ཡིན་ནོ། །དེ་ལྟ་ཡིན་དང་ཅི་ཞིག་འགྲུབ་སྙམ་ན། དུས་ནི་ཞེས་བྱ་བའོ། །དེ་ཁྱབ་སྟེ་དུས་དེས་ཁྱབ་པ་སྒྲ་ལ་སོགས་པའི་དོན་རྣམས་ནི་ཀུན་རྫོབ་པ་ཡིན་ནོ། །དེས་ན་ཞེས་བྱ་བ་ནི་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words