ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ

Sanskrit title (Tibetan script, as in the text) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 201 · folio 1a

༄། །སྨན་དཔྱད་ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བའི་བར་དུམ་བཞུགས་སོ། །

Vol. 201 · folio 1b

༄༅༅། །དེ་ནས་ཐལ་སྨན་རྣོན་པོ་དང་མེ་བཙའ་གདབ་པའི་ཆོ་གའི་ལེའུ་བཤད་པར་བྱའོ་ཞེས་བྱ་བ་ལ། འདི་བཤད་པའི་འབྲེལ་པ་ནི་འདི་ཡིན་ཏེ། ཇི་ལྟར་གཙགས་བུས་དབུག་པ་དང་། གཤགས་པ་ལ་སོགས་

པའི་ལས་བྱེད་པ་དང་འདྲ་བར་མེ་བཙའ་གདབ་པ་དང་། ཐལ་སྨན་གཉིས་ཀྱང་རང་གི་ཡུལ་ལ་སྦྱར་ན་གཅད་པ་དང་དབུག་པ་ལ་སོགས་པའི་ལས་བྱེད་པས་ན་དེའི་འོག་ཏུ་འདི་སྨོས་པ་ཡིན་ནོ། །ཐལ་སྨན་རྣོན་པོ་གཏང་བ་དང་། །

མེ་བཙའ་གདབ་པའི་ལས་ཀྱི་སྦྱང་བ་ཡིན་པས་ན། ཐལ་སྨན་རྣོན་པོ་དང་། མེ་བཙའ་གདབ་པའི་ལས་ཀྱི་ཆོ་ག་ཅེས་བྱ་སྟེ། དེ་བཤད་པར་བྱའོ། །གཙགས་སྤྱད་ལྕགས་སྤྱད་རྗེས་འདྲ་བ། །མང་པོ་ཀུན་ལས་ཐལ་སྨན་མཆོག །

དཀའ་བ་རྣམས་སུའང་གཅད་པའམ། །དབུག་པ་ལ་སོགས་བྱེད་པར་འགྱུར། །གཙགས་བུས་གདབ་པར་དཀའ་བ་ཡང་། །དེ་ཡིས་བསྒྲུབ་པར་རུང་བ་དང་། །ཤིན་ཏུ་གསོ་དཀའི་ནད་རྣམས་ལ། །གང་ཞིག་བཏུང་དུ་རུང་

བའང་ཡིན། །ཞེས་བྱ་བ་ལ། དེ་ལ་གཙགས་སྤྱད་ནི་རྩེ་མོ་དཀྱིལ་འཁོར་འདྲ་བ་ལ་སོགས་པའོ། །གཙགས་སྤྱད་དང་རྗེས་སུ་འདྲ་བ་ནི་སྲིན་བུ་པད་པ་ལ་སོགས་པ་སྟེ། དེ་དག་ཐམས་ཅད་ཀྱི་ནང་ན་མཆོག་ནི་ཐལ་སྨན་ཡིན་ནོ། །ཅིའི་

Vol. 201 · folio 2a

ཕྱིར་དེ་མཆོག་ཡིན་ན། གང་གི་ཕྱིར་ལུས་ཀྱི་ཕྱོགས་དཀའ་ཞིང་དོགས་པའི་གནས་རྣམས་སུ་ཡང་གཅད་པ་དང་། དབུག་པ་ལ་སོགས་པའི་ལས་བྱེད་པར་འགྱུར་བ་དང་། དེ་བཞིན་དུ་སྣའི་ཐོར་བུ་ལ་སོགས་པ་གཙགས་བུ་གདབ་པར་དཀའ་ཞིང་

དོགས་པ་རྣམས་སུ་ཡང་གདབ་པར་དཀའ་ཞིང་བསྒྲུབ་ཏུ་མི་རུང་བ་ཡང་ཐལ་སྨན་དེས་བསྒྲུབ་ཏུ་རུང་ཞིང་རྨ་ལ་སོགས་པའི་ནད་མང་པོ་ཡང་གསོ་བར་རུང་བ་དང་། དེ་བཞིན་དུ་ཤིན་ཏུ་གསོ་དཀའ་བའི་ནད་སྐྲན་དང་ལྟོ་སྦོས་པ་ལ་སོགས་པ་རྣམས་ལ་ཡང་བཏང་དུ་མི་རུང་ཞིང་།

གང་བཏུང་དུ་རུང་བ་ཡང་ཡིན་ནོ། །དེ་ནི་གཞང་འབྲུམ་མེ་དྲོད་ཉམས། །རྡེའུ་འགགས་སྦྱར་དུག་སྐྲན་སོགས་བཏུང་། །ཞེས་བྱ་བ་ལ། ཐལ་སྨན་རྣོན་པོ་དེ་ནི་གཞང་འབྲུམ་གྱི་ནད་དང་། ཕོ་བའི་མེ་དྲོད་ཉམས་པ་དང་། རྡེའུས་འགགས་པ་དང་། སྦྱར་དུག་དང་སྐྲན་

ལ་སོགས་པ་ལ་བཏུང་དུ་རུང་བ་ཡིན་ནོ། །སྨེ་བ་ཤ་བཀྲ་སྣ་ཐོར་དང་། །ཕྱི་རོལ་གཞང་འབྲུམ་ཚོར་མེད་མཛེ། །ཐོར་བུ་འབྲུམ་ཕྲན་མཚན་པར་རྡོལ། །རྨ་ལོག་སོགས་ལ་བྱུག་པར་བྱ། །ཞེས་བྱ་བ་ལ། ཐལ་སྨན་རྣོན་པོ་དེ་ནི་སྨེ་བ་དང་ཤ་བཀྲ་ལ་སོགས་པ་ལ་ཕྱི་རོལ་ནས་བྱུག་ཅིང་

བསྐུ་བར་བྱའོ། །སོགས་པ་ཞེས་སྨོས་པས་ནི་དེ་བསྒྲུབ་པར་བྱ་བའི་ནད་གཞན་དག་ལ་ཡང་བསྐུར་རུང་བའི་དོན་ཏོ། །ཁྲག་མཁྲིས་རླུང་ཅན་ནད་སྟོབས་ཆུང་། །རིམས་དང་ཚད་འཁྲུ་སྙིང་ཀླད་ནད། །སྐྱ་རྦབ་ཡི་ག་འཆུས་པ་དང་། །རབ་རིབ་ཅན་དང་སློན་ཁྲུས་བཏང་། །ལུས་

ཀུན་ཁྱབ་པའི་འོར་ནད་དང་། །འཇིགས་དང་སྦྲུམ་མ་ཟླ་མཚན་འཛག །ཕོ་མཚན་མོ་མཚན་སྐྲངས་པ་དང་། །བྱིས་པ་རྒན་པོ་ཟས་མ་ཞུ། །རྩ་བོ་ཆེ་དང་རུས་ཚིགས་གནད། །རུས་པ་གཞོན་ནུ་ཆུ་བ་རྩ། །ལྟོ་སྲུབས་མགུལ་བ་ལྟེ་བ་དང་། །ཤ་སྲབ་ཕྱོགས་དང་རླིག་པ་དང་། །

ཕོ་མཚན་བུ་ག་སེན་མོ་ཕྲག །མིག་མཆུ་མ་གཏོགས་མིག་ནད་རྣམས། །ཚ་གྲང་ཆར་དང་ཡུལ་རྨུས་ཚེ། །གཉིས་ཀ་གཏང་བར་མི་བྱའོ། །ཞེས་བྱ་བ་ལ། ཐལ་སྨན་རྣོན་པོ་བཏུང་བ་དང་། བསྐུ་བ་གཉིས་ཀ་ཡང་མི་བྱ་བའི་ནད་དམིགས་ནི། ཁྲག་ནད་ཅན་དང་མཁྲིས་པའི་ནད་

Vol. 201 · folio 2b

ཅན་དང་། རླུང་ནད་ཅན་དང་སྟོབས་ཆུང་བ་དང་། རིམས་དང་ཚད་པས་འཁྲུ་བ་དང་། སྙིང་ནད་ན་བ་དང་། ཀླད་ནད་ན་བ་དང་། སྐྱ་རྦབ་ཀྱི་ནད་ཅན་དང་། ཡི་ག་འཆུས་པ་དང་། མིག་ནད་རབ་རིབ་ཅན་དང་། སློན་སྨན་དང་བཀྲུ་སྨན་གཏང་བ་དང་། ལུས་དང་ཡན་ལག་ཐམས་ཅད་

སྐྲངས་པ་དང་། འཇིགས་པས་ཉེན་པ་དང་། སྦྲུམ་མ་དང་། ཟླ་མཚན་འཇག་པ་དང་། ཕོ་མཚན་དང་མོ་མཚན་སྐྲངས་པའི་རྒྱུད་ཕྱི་མ་ལས་གསང་བའི་ནད་བརྟགས་པའི་སྐབས་ནས་བཤད་པ་ལྟ་བུ་དང་། བྱིས་པ་གཞོན་ཆེས་པ་དང་། རྒན་པོ་ན་ཚོད་འདས་པ་དང་། དེ་

བཞིན་དུ་རྩ་བོ་ཆེ་ལ་སོགས་པ་དང་། ཤ་སྲབ་པའི་ཕྱོགས་དང་། རླིག་པ་ལ་སོགས་པའི་ཕྱོགས་དང་། དེ་བཞིན་དུ་མིག་གཉིས་སུ་མིག་མཆུའི་ནད་མ་གཏོགས་པ་མིག་ནད་གཞན་རྣམས་དང་། སོ་ག་ཚ་བའི་ཚེ་དང་། དགུན་གྲང་བའི་ཚེ་དང་། དབྱར་ཆར་འབབ་པའི་ཚེ་

དང་། ཆར་འབབ་ཅིང་ཡུལ་རྨུས་པའི་དུས་སུ་གཞན་གྱི་ཚེ་ཐལ་སྨན་རྣོན་པོ་བཏུང་བ་དང་། བཏང་བ་གཉིས་ཀ་མི་བྱའོ། །མུ་ཀ་ཀ་ན་ཤ་མྱ་ཀ །ཆུ་ཤིང་པ་རི་བ་ཏྲ་ཀ །ཨ་ཤྭ་ཀརྞ་འཛམ་བུའི་ཤིང་། །པ་ལ་ཤ་དང་ཨ་པོ་ཏ། །ཨིན་དྲི་བྲྀཀྵ་ཨརྐ་དང་། །ནག་ཏ་མ་ལ་མུཀྟི་

ཀ །སྲིང་ཤིང་ཨ་པ་མརྒ་དང་། །ཀ་ཀ་ཛ་ཀ་ཙི་ཏྲ་ཀ །ཨག་ནི་མན་ཏ་ཏིལ་བཅའ་སྒ། །རློན་ཤིང་རྩ་བ་ལ་སོགས་བཅས། །དུམ་བུར་ཡོངས་སུ་གཏུབས་པ་དང་། །ཀོ་ཤ་ཏ་ཀ་རྣམ་བཞི་དང་། །ནས་ཀྱི་སོག་མ་གྲ་མ་རྣམས། །རླུང་མེད་གནས་སུ་བསགས་ནས་དེ། །རྡོ་

ལེབ་སྟེང་དུ་སོ་སོར་བཞག །མུ་ཀ་ཀ་ཡི་ཕུང་པོ་དང་། །རྡོ་ཐལ་རྡོ་ནི་བཅུག་པར་བྱ། །དེ་ནས་ཏིལ་གྱི་སྡོང་བུས་བསྲེག །ཅེས་བྱ་བ་ལ། ཤིང་མུ་ཀ་ནག་པོ་ལ་སོགས་པ་བཏུས་ཏེ། དུམ་བུར་ཡོངས་སུ་གཏུབས་ལ། རླུང་མེད་པའི་གནས་སུ་བསོགས་ནས། རྡོ་ལེབ་ཀྱི་སྟེང་དུ་ཕུང་

པོར་སོ་སོར་བཞག་པ་དང་། ཀོ་ཤ་ཏ་ཀ་རྣམ་པ་བཞི་དང་། ནས་ཀྱི་སོག་མ་དང་གྲ་མ་རྣམས་ཀྱང་རྡོ་ལེབ་ཀྱི་སྟེང་དུ་སོ་སོར་བཞག་པ་དང་། དེ་བཞིན་དུ་མུ་ཀའི་ཕུང་པོ་དང་། རྡོ་ཐལ་གྱི་རྡེའུ་ཕྲ་མོ་བཅུག་ནས། ཏིལ་གྱི་སྡོང་བུས་བསྲེག་ཅིང་སྦྱང་བར་བྱའོ། །ཚིག་ནས་མེ་ནི་ཤི་བ་དང་། །

Vol. 201 · folio 3a

རྡོ་ཐལ་ཐལ་བ་ལོགས་ཤིག་དབྱེ། །ཐལ་བ་གཞན་དག་བྲེ་གང་སྟེ། །མུ་ཀའི་ཐལ་ལྷག་བླངས་ནས་ནི། །སོ་སོར་ཕྱེ་སྟེ་ཆུ་དང་གཅིན། །སྲང་སྟོང་དག་དང་བསྲེས་ནས་བཞུ། །ཚགས་ནི་བཟང་པོས་དེ་བཙགས་ལ། །ཇི་སྲིད་འབྱར་བག་དམར་ཞིང་

དངས། །རྣོ་བར་གྱུར་གྱི་བར་དུ་ནི། །ཐལ་བའི་དངས་མ་དེ་བླངས་ལ། །ལྕགས་སྣོད་བཟང་པོར་བསྐོལ་ཞིང་དཀྲུགས། །ཞེས་བྱ་བ་ལ། གོང་དུ་སྨོས་པའི་རྫས་དེ་དག་ཚིག་པར་གྱུར་ནས་མེ་ཤི་བ་དང་རྡོ་ཐལ་བསྲེགས་པ་དང་། ཐལ་བ་ལོགས་ཤིག་ཏུ་སོ་སོར་ཕྱེ་སྟེ་ལོགས་ཤིག་

བཞག་ནས། ཐལ་བ་གཞན་ཏེ། ཐལ་བ་བྱེ་གང་མུ་ཀ་ཀའི་ཐལ་བ་དེ་ལྷག་མར་བླངས་པར་བྱ་སྟེ། ཤ་མྱ་ཀ་ལ་སོགས་པའི་ཐལ་བ་ཆ་མཉམ་པར་བྱ་ལ། མུ་ག་ནི་ཆ་གཉིས་སུ་བྱས་ནས་སོ་སོར་དབྱེ་སྟེ། ཆུ་དང་ཐལ་བ་ལ་སོགས་པ་གཅིན་སྲང་སྟོང་དང་བསྲེས་ལ་དཀྲུགས་ཏེ།

རས་ཆེན་པོའི་ཚགས་བཟང་པོས་དེ་བཙགས་ལ་བཞུ་བར་བྱའོ། །ཇི་སྲིད་ཀྱི་བར་དུ་བཞུ་བར་བྱ་ཞེ་ན། དུས་ཇི་སྲིད་ན་ཐལ་སྨན་གྱི་རྒྱུན་འབྱར་བག་དང་། དམར་བ་དང་དྭངས་པ་དང་། རྣོ་བར་གྱུར་པ་དེ་སྲིད་ཀྱི་བར་དུ་བཞུས་ལ། ཐལ་བའི་དྭངས་མ་དེ་བླངས་ནས་ཐལ་བའི་ཚིགས་མ་

བོར་ཏེ། ལྕགས་སམ་ཟངས་ཀྱི་སྣོད་བཟང་པོར་སྨན་མར་བཙོ་བའི་ཚུལ་དུ་བསྐོལ་ཞིང་གཟར་བུས་དཀྲུགས་ཤིང་བཙོ་བར་བྱའོ། །དེ་ནས་འཚོད་པར་བྱེད་པ་དེར། །རྡོ་ཐལ་བསྲེགས་རྡོའི་དུམ་བུ་དང་། །ཉ་ཕྱིས་ཀྵི་ར་པ་ཀ་དང་། །དུང་གི་ལྟེ་བ་ལྕགས་སྣོད་གཞུག །མེ་

མདོག་ཅན་དུ་ལན་མང་བྱ། །ཐལ་སྨན་ཆ་ནི་ཕུལ་གང་དང་། །མེ་བསད་དེ་ཉིད་དང་བཏགས་ལ། །ལྡེ་གུ་དེར་ནི་གཞུག་པར་བྱ། །ཞེས་བྱ་བ་ལ། ཐལ་བའི་ཆུའི་དྭངས་མ་དེ་འཚོད་པར་བྱེད་པ་དེར་མུ་ཀ་ཀ་དང་བསྲེས་ལ་བསྲེགས་པའི་རྡོ་ཐལ་གྱི་དུམ་བུ་དང་། ཉ་ཕྱིས་དང་། ཀྵི་

ར་པ་ཀ་ཞེས་བྱ་བ་རྡེའུ་ཀེ་རུ་དང་། དུང་གི་ལྟེ་བ་ལྕགས་སྣོད་དུ་བཅུག་པ་མེའི་མདོག་ལྟར་དམར་བར་ཡང་དང་ཡང་དུ་བྱས་ལ། ཐལ་སྨན་གྱི་ཆ་ཕུལ་གང་དེར་བཅུག་སྟེ། མེ་བསད་ནས་ཐལ་བའི་ཆུ་དེ་ཉིད་དང་དེ་ཞིབ་ཏུ་བཏགས་ལ། ལྡེ་གུ་དེ་ཐལ་ཆུ་དེའི་ནང་དུ་གཞུག་པར་བྱའོ། །

Vol. 201 · folio 3b

ཁྱིམ་བྱ་རྨ་བྱ་བྱ་རྒོད་དང་། །ཀང་ཀ་ཕུག་རོན་རྟུག་པ་དང་། །བྱ་དང་རྐང་བཞིའི་མཁྲིས་པ་དང་། །བ་བླ་ལྡོང་རོས་ལན་ཚྭ་རྣམས། །ཞིབ་བཏགས་བཅུག་བྱ། ཞེས་བྱ་བ་ལ། དེ་དག་གི་ལྡེ་གུ་འབའ་ཞིག་གཞུག་པར་མ་ཟད་ཀྱི། ཁྱིམ་བྱ་ལ་སོགས་པའི་རྟུག་པ་ལ་སོགས་པ་

ཞིབ་ཏུ་བཏགས་ལ་གཞུག་པར་བྱའོ། །ལན་ཚ་ནི་ལྕེ་མྱང་ཚྭ་ལ་སོགས་པའོ། །དེ་ནས་ནི། །གཟར་བུས་དེ་ཡང་ཀུན་ཏུ་དཀྲུགས། །ཞེས་བྱ་བ་ལ། དེ་ལྟར་ལྡེ་གུ་བཅུག་པའི་རྗེས་ལ། གཟར་བུས་ཐལ་ཆུའི་ཁུ་བ་དེ་ཀུན་ཏུ་དཀྲུགས་ཤིང་བསྐྱོད་པར་བྱའོ། །གང་ཚེ་ལྦུ་

བ་བཅས་པར་ཁོལ། །ཆུ་བུར་སྦོམ་སྐ་ལྡེ་གུ་འདྲ། །དེ་ཚེ་ཕབ་ལ་གྲངས་པ་དང་། །ལྕགས་སྣོད་བཅུག་སྟེ་ནས་ནང་གཞུག །འདི་ནི་ཐལ་སྨན་འབྲིང་པོ་ཡིན། །ཞེས་བྱ་བ་ལ། དུས་གང་གི་ཚེ་ཐལ་སྨན་དེ་ལྦུ་བ་དང་བཅས་པར་ཁོལ་ཞིང་ཆུ་བུར་དང་བཅས་པ་དང་། སླ་བག་

ལས་སྐ་ཞིང་ལྡེ་གུ་འདྲ་བར་གྱུར་ལ། གཟར་བུ་ལ་ཆགས་པ་དེའི་ཚེ་ཐབ་ལས་ཕབ་ལ། གྲངས་པ་དང་། ལྕགས་ཀྱི་སྣོད་དུ་བཅུག་སྟེ། ནས་ཀྱི་ནང་དུ་ལེགས་པར་སྦ་ཞིང་གཞུག་པར་བྱ་སྟེ། འདི་ནི་ཐལ་སྨན་འབྲིང་པོ་ཞེས་བྱའོ། །འཇམ་པོ་མ་བཏགས་པར་བཅུག་ལ། །

གསུར་ལ་སླར་ནི་གདོན་པར་བྱ། །ཞེས་བྱ་བ་ལ། ཐལ་སྨན་འཇམ་པོ་ནི་རྡོ་ཐལ་གྱི་ཐལ་བ་དང་། རྡེའུ་ལ་སོགས་པ་མ་བཏགས་པར་བསྲེགས་པ་ལ་ཐལ་ཆུར་དེ་བཅུག་ཅིང་གསུར་ལ། དེའི་འོག་ཏུ་སླར་ཕྱིར་གདོན་པར་བྱའོ། །རྣོན་པོར་སྔ་མ་བཞིན་བཅུག་ལ། །ལངྐ་ལིངྐ་

དནྟི་དང་། །ཤུ་དག་བོང་ང་ཙི་ཏྲ་ཀ །སྭརྩ་ཀ་དང་ཁྲོན་བུ་དང་། །ཤིང་ཀུན་ཀ་རཉྫའི་ལོ་མ། །ཏ་ལའི་ལོ་མ་ཁ་རུ་ཚའི། །ཕྱེ་བཅུག །ཅེས་བྱ་བ་ལ། ཐལ་སྨན་རྣོན་པོ་སྦྱར་བ་ལ་ནི་སྔར་བཤད་པའི་ཐལ་སྨན་འབྲིང་པོ་སྦྱར་བ་བཞིན་དུ་ལྡེ་གུའི་སྦྱོར་བ་བཅུག་པ་དང་། དེ་བཞིན་

དུ་ལངྐ་ལིངྐ་ནས། ཁ་རུ་ཚའི་བར་ཞིབ་ཏུ་བཏགས་པའི་ཕྱེ་མ་གཞུག་པར་བྱའོ། །ཞག་བདུན་དེ་བཞག་བྱ། ཞེས་བྱ་བ་ལ། ཐལ་སྨན་དེ་གསུམ་ཆར་ཡང་ཞག་བདུན་བཞག་ལ། དེའི་འོག་ཏུ་གཏང་བར་བྱའོ། །རྣོན་པོ་དེ་ནི་རླུང་བད་ཀན། །ཚིལ་སྐྱེས་ཐོར་བུ་སོགས་ལ་

Vol. 201 · folio 4a

གཏང་། །ཞེས་བྱ་བ་ལ། ཐལ་སྨན་རྣོན་པོ་དེ་ནི་རླུང་བད་ཀན་དང་། ཚིལ་ལས་སྐྱེས་པའི་ཐོར་བུ་བ་དང་། གཞང་འབྲུམ་ལ་སོགས་པ་ལ་གཏང་བར་བྱའོ། །འདི་ཉིད་ནད་ཚབས་འབྲིང་ལ་འབྲིང་། །ཞེས་བྱ་བ་ལ། ཐལ་སྨན་འབྲིང་པོ་ནི་ཐོར་བུ་ལ་སོགས་

པ་འདི་དག་ཉིད་ཀྱི་ནད་ཚབས་འབྲིང་ཙམ་དུ་གྱུར་ཅིང་ཤིན་ཏུ་འཕེལ་བ་མ་ཡིན་པ་ལ་གཏང་བར་བྱའོ། །འཇམ་པོ་ཁྲག་མཁྲིས་གཞང་འབྲུམ་ལའོ། །ཞེས་བྱ་བ་ལ། ཐལ་སྨན་འཇམ་པོ་ནི་ཁྲག་དང་མཁྲིས་པ་ལས་བྱུང་བའི་གཞང་འབྲུམ་ལ་གཏང་བར་བྱའོ། །མཐུ་སྐྱེད་ཕྱིར་

ནི་འོ་མ་ཆུ། །ཐལ་སྨན་ཆུ་ནི་སླར་ཡང་གཞུག །ཅེས་བྱ་བ་ལ། ཐལ་སྨན་དེ་མཐུ་དང་ནུས་པ་བསྐྱེད་པའི་ཕྱིར་སྐ་བར་གྱུར་པ་འོ་མ་དང་། ཆུ་དང་ཐལ་སྨན་བཙགས་པའི་ཆུ་སླར་ཡང་གཞུག་པར་བྱའོ། །ཤིན་ཏུ་རྣོ་མིན་འཇམ་དང་མཉེན། །འབྱར་བག་སྣ་རྣོ་དཀར་བ་དང་། །རྩེ་ཅན་

བདེ་བར་འཇིལ་བ་དང་། །མི་འཛག་བྱུགས་ན་ནད་མི་ཆེ། །ཐལ་སྨན་ཡོན་ཏན་བཅུ་དང་ལྡན། །གཙགས་བུ་མེ་བཙའི་ལས་ཀྱང་བྱེད། །ཅེས་བྱ་བ་ལ། ཐལ་སྨན་ནི་ཤིན་ཏུ་རྣོ་བ་མ་ཡིན་པ་ལ་སོགས་པ་ཡོན་ཏན་བཅུ་དང་ལྡན་ཏེ། དེ་ལས་ཀྱང་སྣ་རྣོ་བ་ནི་མྱུར་དུ་ཁྱབ་ཅིང་འགྲོ་བར་བྱེད་

པའོ། །རྩེ་ཅན་ནི་སྟེང་ནས་བརྩེགས་པའམ་རྭ་ཅན་ལྟ་བུར་གནས་པའོ། །དེ་བདེ་བར་འཇིལ་བ་ནི་སྐྱུར་ལ་སོགས་པའི་ཁུ་བ་སྐྱུར་པོས་མྱུར་དུ་ཚ་བ་འཇིལ་ཞིང་བསིལ་བར་བྱེད་པའོ། །མི་འཛག་པ་ནི་འཛག་བག་མེད་པའོ། །གཞན་ཡང་གཙགས་བུའི་ལས་བཅད་པ་དང་། དབུག་

པ་དང་། དྲལ་བ་དང་། ཕྱི་བ་ལ་སོགས་པ་ཡང་བྱེད་ལ། དེ་བཞིན་དུ་མི་བཏབ་པས་ཞི་ཞིང་གསོ་དགོས་པའི་ནད་ཀྱང་ཞི་བར་བྱེད་པས་ན། གཙགས་བུ་དང་མེ་བཙའི་ལས་ཀྱང་བྱེད་པ་ཡིན་ནོ། །དཀྲུགས་པས་གཞིབས་པ་ལྟ་བུ་དང་། །ལུས་ནི་བཙིར་བ་ལྟ་བུ་དང་། །ནད་ཀྱི་རྗེས་

འགྲོ་སྙེགས་པས་ན། །རྩ་བ་ནས་ནི་འབྱིན་པར་བྱེད། །ལས་བྱས་ནད་དང་བྲལ་ནས་ཀྱང་། །རང་ཉིད་ཉེ་བར་ཞི་བར་འགྱུར། །ཞེས་བྱ་བ་ལ། ཐལ་སྨན་བསྐུ་བ་ནི་ཀུན་ཏུ་དཀྲུགས་ཤིང་རླངས་པས་གཞིབས་པ་ལྟ་བུ་དང་། དེ་བཞིན་དུ་ལུས་བཙིར་བ་ལྟ་བུ་དང་། ཐམས་ཅད་དུ་ནད་

Vol. 201 · folio 4b

ཀྱི་རྗེས་སུ་འགྲོ་ཞིང་སྙེགས་པས་དེས་གསོ་བར་བྱ་བའི་ནད་རྣམས་རྩ་བ་ནས་འབྱིན་པར་བྱེད་པ་དང་། དེ་བཞིན་དུ་ནད་བསིལ་བའི་ལས་ཚ་བ་ལ་སོགས་པ་བྱས་ནས། ནད་དང་བྲལ་བའི་འོག་ཏུ་རང་ཉིད་ཉེ་བར་ཞི་ཞིང་ཚ་བ་མེད་པར་འགྱུར་རོ། །ཐལ་སྨན་གྱིས་ནི་གསོ་བའི་ནད། །མཚོན་

བཅད་བྲུད་པའམ་གཏར་ག་བྱ། །ཐལ་སྨན་ཐུར་མ་གོས་ཀྱིས་ནི། །དཀྲིས་པ་བསྒོས་ཏེ་གླན་ནས་སུ། །གྲངས་བརྒྱའི་བར་དུ་བསྡད་ནས་ཕྱི། །ཞེས་བྱ་བ་ལ། ཐལ་སྨན་གྱིས་གསོ་ཞིང་བཅོས་པའི་ནད་ནི་མཚོན་གྱིས་བཅད་ཅིང་གཉིས་སུ་ཕྱེ་བ་དང་། མཚོན་གྱིས་བྲུད་ཅིང་

བདར་བ་དང་། གཏར་ག་བྱས་པའི་རྨ་དག་ལ་ཐལ་སྨན་གྱི་ཐུར་མ་གོས་ཀྱི་དུམ་བུ་བཀྲུས་ཤིང་སྤངས་པས་དཀྲིས་པར་ཐལ་སྨན་བསྒོས་ཏེ། གླན་ཞིང་བྱུགས་ལ་དེའི་འོག་ཏུ་གྲངས་བརྒྱའི་བར་དུ་བསྡད་དེ་ཕྱི་བར་བྱའོ། །དེ་ལ་གཞང་འབྲུམ་བསྐུས་གོས་ཀྱིས། །གཡོགས་ཏེ་

ལག་པས་དགབ་པར་བྱ། །ཞེས་བྱ་བ་ལ། དེ་ལ་གཞང་འབྲུམ་ཐལ་སྨན་གྱིས་གསོ་བར་བྱ་ལ། ཐལ་སྨན་བསྐུས་ལ། གོས་ཀྱིས་གཡོགས་ཏེ། རང་གི་ལག་པས་དགབ་པའི་ཆ་སྤྱད་བྱའོ། །དེ་ཡང་གྲངས་བརྒྱའི་བར་དུ་གཞུག་པར་བྱའོ། །མིག་མཆུའི་ནད་ལ་མིག་མཆུ་

བཟློག །མིག་འབྲས་ནག་པོར་རས་བལ་གྱིས། །བཀབ་སྟེ་ལེགས་པར་བྱུག་པར་བྱ། །ཞེས་བྱ་བ་ལ། མིག་མཆུའི་ནང་དུ་ནད་དབྱུང་བ་ལ། མིག་མཆུ་གྱེན་དུ་བཟློག་སྟེ། མིག་འབྲས་ནག་པོ་རས་བལ་གྱིས་བཀབ་ལ། ཐལ་སྨན་ལེགས་པར་བྱུག་པར་བྱའོ། །ཐལ་སྨན་པད་

ལོ་ཙམ་སྲབ་བསྐུ། །ཞེས་བྱ་བ་ལ། མིག་ཆུ་དེར་བསྐུ་བ་དེ་ཡང་ཐལ་སྨན་པདྨའི་ལོ་མ་ཙམ་དུ་སྲབ་ཏུ་བསྐུའི། མཐུག་པར་ནི་མ་ཡིན་ནོ། །སྣ་ཡི་བུ་གའི་ཐོར་བུ་ནི། །ཉི་མ་ལ་བལྟས་འདུག་པ་ལ། །སྣ་རྩེ་ལེགས་པར་བཏེག་ནས་ནི། །གྲངས་ནི་ལྔ་བཅུའི་བར་དུ་

གཞག །ཅེས་བྱ་བ་ལ། སྣའི་ནང་དུ་ཐོར་བུ་བྱུང་བ་ལ་ཐལ་སྨན་བཏང་བའི་ཐབས་ནི། ཉི་མ་ལ་ཁ་བལྟས་ཏེ་འདུག་ཏུ་བཅུག་ལ། དེའི་སྣ་རྩེ་མོ་ལེགས་པར་བཏེག་ཅིང་བཟློག་ལ་བསྐུས་ཏེ་གྲངས་ཀྱི་ཚད་ལྔ་བཅུའི་བར་དུ་གཞག་པར་བྱའོ། །རྣ་བའི་ཐོར་བུ་ལ་དེ་བཞིན། །ཞེས་

Vol. 201 · folio 5a

བྱ་བ་ལ། རྣ་བར་ཐོར་བུ་བྱུང་བ་ལ་ཡང་ཐལ་སྨན་བསྐུས་ནས་སྔ་མ་བཞིན་དུ་གྲངས་ལྔ་བཅུའི་བར་དུ་གཞག་པར་བྱའོ། །ཐལ་སྨན་བསྐུས་པའི་འོག་ཏུ་ནི། །ཕྱིས་ལ་ལེགས་ཉེས་རྟོགས་བྱ་སྟེ། །ལེགས་ཚིག་མར་དང་སྦྲང་རྩི་བསྐུ། །འོ་མ་རང་སྐྱུར་ཞོ་ག་

ཆུས། །དབལ་བསད་དེ་ནས་མར་བཅས་པའི། །མངར་དང་བསིལ་བས་བྱུག་པར་བྱ། །ཞེས་བྱ་བ་ལ། དེ་ལྟར་ཐལ་སྨན་བསྐུས་པའི་འོག་ཏུ་ཐུར་མའི་ཆ་སྤྱད་ཀྱིས་ཕྱིས་ལ། ལེགས་པར་ཚིག་པའམ། ཉེས་པར་ཚིག་པ་རྟོགས་པར་བྱས་ལ། ལེགས་པར་ཚིག་ན་མར་སར་

དང་སྦྲང་རྩི་སྦྱར་བས་བསྐུ་བར་བྱ་བ་དང་། འོ་མ་དང་སྦང་རྩབས་རང་སྐྱུར་དང་ཞོ་ག་ཆུས་དབལ་བསད་ཅིང་གྲང་བ་བསྐྱེད་ལ། དེའི་འོག་ཏུ་ཞུན་མར་དང་བཅས་པའི་སྨན་མངར་བ་དང་འཇམ་པས་བྱུག་པར་བྱའོ། །བཟའ་བཏུང་བད་ཀན་སྐྱེད་པ་དང་། །བསྲུལ་བའི་ཕྱིར་ནི་སྦྱིན་

པར་བྱ། །ཞེས་བྱ་བ་ལ། ཐལ་སྨན་དེ་ལ་བད་ཀན་སྐྱེད་པར་བྱེད་པའི་བཟའ་བཏུང་དག་བསྲུལ་ཞིང་རྣམ་པར་བྱང་བའི་ཕྱིར་སྦྱིན་པར་བྱའོ། །གལ་ཏེ་རྩ་བ་བརྟན་གྱུར་པས། །ཐལ་སྨན་གྱིས་བསྲེགས་མི་འདྲུལ་ན། །འུ་སུ་སྐྱུར་སྙིགས་ཤིང་མངར་དང་། །ཏིལ་གྱི་ལྡེ་གུས་དེ་ཚེ་བསྐུ། །

ཞེས་བྱ་བ་ལ། གལ་ཏེ་ཐལ་སྨན་བསྐུས་པའི་ནད་རྩ་བ་བརྟན་པར་གྱུར་པས་ཐལ་སྨན་གྱིས་བསྲེགས་ཤིང་། ཟས་བད་ཀན་ཅན་ཟོས་ཀྱང་འདྲུལ་བར་མི་བྱེད་ན། དེའི་འོག་ཏུ་འུ་སུ་དང་། སྐྱུར་གྱི་སྙིགས་མ་དང་། ཤིང་མངར་དང་། ཏིལ་བཏགས་པའི་ཕྱེ་མའི་ལྡེ་གུས་ནད་ཀྱི་གནས་དེ་

བསྐུ་བར་བྱའོ། །འདིར་སྐྱུར་སྙིགས་ནི་འབྲས་ཁུའི་རྩབ་མོ་སྐྱུར་པོའི་སྙིགས་མའམ། ཆང་གི་སྙིགས་མ་ལ་བྱའོ། །ཏིལ་གྱི་ལྡེ་གུ་ཤིང་མངར་བཅས། །མར་གྱིས་བསྐུས་ན་རྨ་འཚོ་བྱེད། །ཅེས་བྱ་བ་ལ། ཏིལ་གྱི་ལྡེ་གུ་ནི་ཏིལ་ཆུ་ཐགས་སུ་བྱས་པའོ། །ཤིང་མངར་དང་བཅས་པ་ནི་

དེ་དང་ལྷན་ཅིག་བཏགས་པའོ། །མར་གྱིས་བསྐུས་པ་ནི་དེ་གཉིས་ཀྱང་མར་དང་བསྐུས་པ་སྟེ། དེས་ནི་ཐལ་སྨན་གྱིས་ཚིག་པའི་རྨ་འཚོ་བར་བྱེད་དོ། །སྨིན་པ་འཛམ་བུ་ལྟར་ཀུན་གནག །ལེགས་ཚོས། ཞེས་བྱ་བ་ལ། སྨིན་ཅིང་ཚོས་པར་གྱུར་པ་ནི། ཤིང་འཛམ་བུའི་འབྲས་བུ་ལྟར་

Vol. 201 · folio 5b

ཀུན་ཏུ་གནག་པ་ནི་ལེགས་པར་ཚོས་པ་ཡིན་ནོ། །དེ་ལས་གོ་བཟློག་པ། དམར་ཞིང་ན་བ་གཡའ་སོགས་བྱེད། །བསྲེགས་ཉེས་ཡིན་ཏེ་དེ་སླར་བསྲེག །ཅེས་བྱ་བ་ལ། ལེགས་པར་ཚོས་པའི་མཚན་ཉིད་དེ་ལས་གོ་བཟློག་པའི་འཛམ་བུའི་འབྲས་བུ་སྨིན་པ་ལྟ་བུར་མ་གྱུར་པ་དང་།

ཐམས་ཅད་ཚིག་པར་མ་གྱུར་པ་དེ་ནི་བསྲེགས་ཉེས་པ་ཡིན་ལ། དེ་བཞིན་དུ་དམར་ཞིང་ན་བ་ལ་སོགས་པ་ཡང་བསྲེགས་ཉེས་ཤིང་མ་ཚིག་པ་ཡིན་པས། དེ་ནི་སླར་ཡང་བསྲེག་དགོས་ཏེ། དེར་ཐལ་སྨན་བསྐུ་བ་བསྣན་པར་བྱའོ། །བསྲེགས་དྲགས་ཁྲག་ནི་འཛག་པ་དང་། །བརྒྱལ་

ཞིང་ཚ་དང་རིམས་སོགས་འགྱུར། །ཞེས་བྱ་བ་ལ། ནད་ཀྱི་གནས་ཀྱི་ལུས་ཀྱི་ཕྱོགས་བསྲེགས་དྲགས་ནས། དེ་ལས་ཁྲག་འཛག་པར་གྱུར་བ་དང་། བརྒྱལ་བ་ལ་སོགས་པ་འབྱུང་བར་འགྱུར་རོ། །སོགས་པ་སྨོས་པས་ནི་ན་བ་དང་། དམར་བ་དང་། སྐྲངས་པ་དང་། རྣག་ཅིང་

འདྲུལ་བ་དང་། མེ་དབལ་ལ་སོགས་པ་བསྡུའོ། །གཞང་ཁར་བསྲེགས་དྲགས་ཁྱད་པར་དུ། །འགགས་པའམ་ཤས་ཆེར་འབྱུང་བར་འགྱུར། །ཁུ་བ་ཟད་པར་འགྱུར་བའམ། །གཞང་ཁ་འབྱུང་བས་འཆི་བར་འགྱུར། །ཞེས་བྱ་བ་ལ། གཞང་འབྲུམ་བསྲེགས་པའི་གཞང་ཁར་

བསྲེགས་དྲགས་པས་ནི་ཁྱད་པར་བཤང་བ་དང་། གཅི་བ་འགགས་པའམ། དེ་གཉིས་ཤས་ཆེར་འབྱུང་བར་འགྱུར་བའམ། ཁུ་བ་ཟད་ཅིང་གཞང་ཁ་འབྱུང་བར་འགྱུར་བས་ངེས་པར་གདོན་མི་ཟ་བར་འཆི་བར་འགྱུར་རོ། །སྣར་དྲགས་སྣ་ཡི་མཚུལ་པར་ནི། །ཉམས་པའམ་

ཡང་ན་ཡོ་བའམ། །ཡུལ་ནི་འཛིན་མི་ནུས་པར་འགྱུར། །ཞེས་བྱ་བ་ནི། སྣར་ཐལ་སྨན་གྱིས་བསྲེགས་དྲགས་པས་ནི་སྣའི་མཚུལ་པ་ཉམས་ཤིང་འཇིག་པ་དང་། དེ་བཞིན་དུ་སྣ་ཡོ་བར་འགྱུར་བ་དང་། དེ་བཞིན་དུ་སྣའི་ཡུལ་དྲི་འཛིན་པར་མི་ནུས་ཤིང་ཚོར་བ་མེད་པར་འགྱུར་རོ། །རྣ་བ་སྩོགས་

པའང་དེ་དང་འདྲ། །ཞེས་བྱ་བ་ལ། དེ་དང་འདྲ་བས་ན་དེ་འདྲ་སྟེ་ཐལ་སྨན་གྱིས་བསྲེགས་པའི་སྣ་ལྟར་རྣ་བ་ལ་སོགས་པ་ཐལ་སྨན་གྱིས་ཚིག་པ་ལ་ཡང་རང་རང་གི་ཡུལ་འཛིན་མི་ནུས་པར་འགྱུར་རོ། །སོགས་པ་ནི་ལྕེ་དང་པགས་པ་ལ་སོགས་པ་བསྡུའོ། །འདིར་ནི་མཆོག་ཏུ་སྐྱུར་བ་བླུགས། །ཤིང་

Vol. 201 · folio 6a

མངར་མར་དང་ཏིལ་བཏགས་བྱུག །རླུང་དང་མཁྲིས་པ་སེལ་བ་དང་། །བསིལ་བའི་སྤྱོད་པ་ཐམས་ཅད་ཕན། །ཞེས་བྱ་བ་ལ། ཚིག་དྲགས་པ་འདིར་ནི་མཆོག་གམ་ཁྱད་པར་དུ་སྒྱུར་རྩབས་ལ་སོགས་པའི་ཁུ་བ་སྐྱུར་བ་བླུགས་པ་དང་། ཤིང་མངར་དང་མར་དང་ཏིལ་

བཏགས་པས་བྱུགས་པ་དང་། བཟའ་བཏུང་ལ་སོགས་པ་རླུང་དང་མཁྲིས་པ་སེལ་བ་དང་བསིལ་བར་བྱ་བའི་སྤྱོད་པ་ཐམས་ཅད་ཕན་ནོ། །སྐྱུར་བའི་རེག་པ་བསིལ་བས་ན། །ཐལ་སྨན་དེ་དང་འདྲེས་གྱུར་ན། །དེ་ཡིས་མྱུར་དུ་མངར་འགྱུར་བས། །སྐྱུར་བས་ཚ་བ་ཤིན་ཏུ་འཇིལ། །

ཞེས་བྱ་བ་ལ། གང་གི་ཕྱིར་སྐྱུར་བ་ནི་རེག་པ་བསིལ་ཞིང་གྲང་བ་ཡིན་པས་ན། ཐལ་སྨན་དེ་དང་འདྲེས་ཤིང་འབྲེལ་པར་གྱུར་ན། རྒྱུ་དེའི་དབང་གིས་ཚ་བ་དང་། ལན་ཚྭའི་ཤས་མང་པོ་དང་བྲལ་ནས་མྱུར་དུ་མངར་བ་ཉིད་དུ་འགྱུར་བས་ན། དེའི་ཕྱིར་སྐྱུར་བའི་དངོས་པོ་རྩབ་མོའི་

དངས་མ་ལ་སོགས་པས་ཚ་བ་ཤིན་ཏུ་འཇིལ་བར་འགྱུར་གྱི། འོ་མ་ལ་སོགས་པ་མངར་བས་ནི་དེ་ལྟ་མ་ཡིན་ནོ། །དེ་ཡང་བསྡུས་པ་ལས། ཐལ་སྨན་རོ་ནི་སྐྱུར་དང་ཕྲད། །སྐད་ཅིག་གིས་ནི་མངར་བར་འགྱུར། །ཞེས་བཤད་པ་ཡིན་ནོ། །མེ་བཙའ་ཐལ་སྨན་ལས་མཆོག་སྟེ། །དེས་བསྲེགས་

པས་ནི་སླར་མི་འབྱུང་། །སྨན་དང་ཐལ་སྨན་མཚོན་སྤྱད་ཀྱིས། །མ་གྲུབ་པ་ཡང་གྲུབ་པར་བྱེད། །ཅེས་བྱ་བ་ལ། མེ་བཙའ་བཏབ་པ་ནི་ཐལ་སྨན་པས་ཀྱང་མཆོག་སྟེ། དེས་བསྲེགས་པའི་གཞང་འབྲུམ་ལ་སོགས་པ་སླར་མི་འབྱུང་བ་དང་། དེ་བཞིན་དུ་སྨན་ལ་སོགས་པས་གསོ་བ་མ་གྲུབ་

པ་ཡང་དེས་འགྲུབ་པར་བྱེད་པ་ཡིན་པས་ན། དེའི་ཕྱིར་མཆོག་ཡིན་ནོ། །པགས་པ་ཤ་དང་རྩ་རྒྱུས་དང་། །ཚིགས་དང་རུས་སོགས་དེ་ལ་གདབ། །ཅེས་བྱ་བ་ལ། མེ་བཙའ་དེ་ཡང་པགས་པ་ལ་སོགས་པ་བསྲེག་པའི་ཕྱིར་གདབ་པར་བྱའོ། །སྨེ་བ་མཛེ་ནད་ཀླད་ནད་དང་། །མགོ་བོའི་གཞོགས་

ཕྱེད་ན་སོགས་ལ། །ལྤགས་བསྲེགས་རས་བལ་བ་ལང་སོ། །མེ་ཤེལ་མདའ་སྨྱུག་སོགས་མེ་གདབ། །ཅེས་བྱ་བ་ལ། དེ་ལ་པགས་པ་བསྲེགས་པ་ལ་སོགས་པ་རས་བལ་དང་། བ་ལང་གི་སོ་ལ་སོགས་པས་མེ་བཙའ་གདབ་པར་བྱའོ། །སྨེ་བ་ལ་སོགས་པའི་ནད་འདི་དག་ནི་རྒྱུད་ཕྱི་མ་ལས་

Vol. 201 · folio 6b

ཤེས་པར་བྱའོ། །གཞང་འབྲུམ་རྨེན་བུ་མཚན་པར་རྡོལ། །བུ་ག་རྨ་ལོངས་ལ་སོགས་ལ། །ཤ་བསྲེག་སྤྲ་ཚིལ་མར་བསྲེགས་དང་། །བུ་རམ་འཛམ་བུའི་ཆུ་ཡིས་བསྲེག །ཅེས་བྱ་བ་ལ། གཞང་འབྲུམ་ལ་སོགས་པའི་ནད་རྣམས་ལ་ནི། སྤྲ་ཚིལ་ལ་སོགས་པས་ཤ་བསྲེག་པར་བྱ་ཞིང་།

འདི་དག་སོ་སོ་ཅི་རིགས་པར་བསྲེག་པར་བྱའོ། །པགས་པ་འབྱར་དང་ཁྲག་མ་ཆོད། །ཐིག་ལེ་གནག་སོགས་ལྤགས་ནད་ན། །དེ་དག་ཉིད་ཀྱི་རྩ་བསྲེག་གོ། །ཞེས་བྱ་བ་ལ། པགས་པ་འབྱར་བ་ལ་སོགས་པ་ལ་ནི་རྩ་བསྲེག་པར་བྱའོ། །བསྲེག་མིན་ཐལ་སྨན་བཀག་པ་དང་། །ནང་

ན་མཚོན་ལུས་རྨ་ཆེན་འབྱུང་། །ཁྲག་གཟགས་པ་དང་ལྟོ་དྲལ་བའོ། །ཞེས་བྱ་བ་ལ། བསྲེག་པར་མི་བྱ་བ་ནི་སྔར་ཐལ་སྨན་བཏང་བ་བཀག་པ་སྟེ། དེས་འཇིག་པ་དང་། སྦྲུམ་མ་ལ་སོགས་པ་དང་། དེ་བཞིན་དུ་ནང་ན་མཚོན་གྱི་ཟུག་རྔུ་ལུས་པ་མ་ཕྱུང་བ་དང་། རྨ་ཆེན་པོ་བྱུང་བ་

དང་། དེ་བཞིན་དུ་ནང་དུ་ཁྲག་གཟགས་པ་དང་། ལྟོ་བ་དྲལ་ཞིང་གས་པ་དག་ལ་མེ་བཙའ་མི་བྱའོ། །ལེགས་བསྲེགས་མར་དང་སྦྲང་རྩིས་བསྐུ། །སྣུམ་དང་བསིལ་བས་བྱུག་པར་བྱ། །ཞེས་བྱ་བ་ལ། ནད་ཀྱི་གནས་ལེགས་པར་བསྲེགས་པ་ནི། བ་མར་དང་སྦྲང་རྩི་གཉིས་ཀྱིས་

བསྐུས་ནས། དེའི་འོག་ཏུ་མར་དང་ཤིང་མངར་ལ་སོགས་པའི་ལྡེ་གུས་བསྐུ་ཞིང་བྱུག་པར་བྱའོ། །ལེགས་པའི་མཚན་མ་ཁྲག་མི་འབྱུང་། །སྒྲ་ཅན་ཆུ་བུར་ཕྲེའུ་འབྱུང་། །ཏ་ལའི་འབྲས་སྨིན་ཐི་བ་འདྲ། །ན་བ་ཆུང་ཞིང་འཚོ་བ་སླ། །ཞེས་བྱ་བ་ལ། མེ་བཙའ་ལེགས་པའི་གནས་ཀྱི་མཚན་

མ་འམ་རྟགས་ནི་ཁྲག་མི་འབྱུང་ཞིང་ཆོད་པ་དང་། གནས་ཏེ་སྒྲ་ཅན་དུ་གནས་ཤིང་ཆུ་བུར་གྱི་ཕྲེའུ་འབྱུང་བ་སྟེ། ཁྲག་ལས་ཆུ་ལྟ་བུ་འབྱུང་བ་དང་། ཏ་ལའི་འབྲས་བུ་སྨིན་པའམ། བྱ་ཐི་བའི་མདོག་འདྲ་བ་དང་། ན་བའི་ཚབས་ཆུང་ཞིང་རྨ་འཚོ་བ་སླ་བ་ཡིན་ནོ། །བག་མེད་པས་

བསྲེགས་ཐམས་ཅད་དང་། །བསྲེགས་ཉེས་བསྲེགས་ནི་དྲགས་པ་དང་། །མ་ཚོས་མཚན་ཉིད་བཅས་དང་བཞི། །ཞེས་བྱ་བ་ལ། བག་མེད་ཅིང་མ་དཔྱད་པར་བསྲེགས་པ་དང་། བསྲེགས་ཉེས་བ་དང་། དེ་བཞིན་དུ་བསྲེགས་དྲགས་པ་དང་། མཚོས་ཤིང་ལེགས་པར་མ་ཚིག་པའི་མཚན་

Vol. 201 · folio 7a

ཉིད་དང་བཅས་པ་སྟེ། རྣམ་པ་བཞི་ཡིན་ནོ། །མ་ཚོས་ལྤགས་མདོག་མི་སྡུག་ཚ། །ཆུ་བུར་འབྱུང་བར་མི་འགྱུར་བའོ། །ཞེས་བྱ་བ་ལ། མ་ཚོས་པའི་མཚན་མ་ནི་པགས་པའི་མདོག་མི་སྡུག་པར་འགྱུར་བ་དང་། ཤིན་ཏུ་ཚ་བ་དང་། ཆུ་བུར་ཕྲ་མོ་འབྱུང་བར་མི་

འགྱུར་བ་ཡིན་ནོ། །བསྲེགས་ཉེས་ཆུ་བུར་ཆེ་རབ་ཚ། །ཞེས་བྱ་བ་ལ། བསྲེགས་པ་ཉེས་པས་ནི་ཆུ་བུར་ཤིན་ཏུ་ཆེ་བ་དང་བཅས་པ་དང་། མི་བཟད་པར་རབ་ཏུ་ཚ་བ་ཡིན་ནོ། །བསྲེགས་དྲགས་པས་ནི་ཤ་འཕྱང་དང་། །པགས་པ་འཁུམས་ཤིང་རབ་ཏུ་ཚ། །དུད་པ་འཁྱིམས་པ་ལྟ་བུ་

དང་། །རྩ་སོགས་འཁུམས་ཤིང་སྐོམ་དད་བརྒྱལ། །རྨ་ཡི་གཏིང་ཟབ་འཆི་བར་འགྱུར། །ཞེས་བྱ་བ་ལ། ཤིན་ཏུ་བསྲེགས་དྲགས་པས་ནི་ཤ་འཕྱང་བ་ལ་སོགས་པར་འབྱུང་བར་འགྱུར་ཏེ། རྩ་ལ་སོགས་པ་རབ་ཏུ་འཁུམས་པ་དང་། དུད་པ་འཁྱིམས་ཤིང་འདུག་པ་ལྟ་བུ་དང་། རྩ་

ལ་སོགས་པ་འཁུམས་ཤིང་ཉམས་པ་དང་། སྐོམ་དད་སྐྱེ་བ་དང་། རྨའི་གཏིང་ཟབ་ཅིང་ཕུགས་རིང་བ་དང་། འཆི་བ་ཉིད་དུ་ཡང་འགྱུར་རོ། །མ་ཚོས་པ་ནི་མེ་ཕྲད་ཅིང་། །ཚ་བའི་སྨན་ནི་གཏང་བར་བྱ། །ཁྲག་སྐ་ཤིན་ཏུ་ན་བར་འགྱུར། །ཟགས་པར་གྱུར་ན་ནད་ཚབས་ཆུང་། །ཞེས་བྱ་

བ་ལ། མ་ཚོས་པ་ལ་མེར་ཕྲད་ཅིང་གདུང་བར་བྱ་བ་དང་། ཚ་བའི་སྨན་གྱི་ལྡེ་གུ་ལ་སོགས་པ་ཁྲག་ཞུ་བའི་ཕྱིར་བསྐུ་བར་བྱ་སྟེ། གང་གི་ཕྱིར་ཁྲག་ཤིན་ཏུ་སྐ་ཞིང་འཐས་པར་གྱུར་ན་ན་བར་འགྱུར་ལ། ཟགས་ཤིང་ཞུ་བར་འགྱུར། ནད་ཚབས་ཆུང་ཞིང་ཞུ་བར་འགྱུར་རོ། །བསྲེགས་ཉེས་བསིལ་

དང་དྲོ་བའི་སྨན། །དང་པོར་བཏང་ན་དེ་འོག་བསིལ། །ཞེས་བྱ་བ་ལ། བསྲེགས་ཉེས་པར་གྱུར་པ་ལ་ནི་དྲོ་བ་དང་བསིལ་བའི་སྨན་རིམ་གྱིས་སྦྱར་བར་བྱ་སྟེ། དང་པོར་དྲོ་བའི་སྨན་བསྐུས་ལ། དེའི་འོག་ཏུ་བསིལ་བའི་སྨན་བསྐུ་བར་བྱའོ། །བསྲེགས་ལེགས་ན་ནི་ཅུ་གང་དང་། །བླག་ཤ་

ཙནྡན་བཙག་ཡུག་སྣམ། །སླེ་ཏྲེས་བཅས་པ་མངར་བཅས་བསྐུ། །དེའི་འོག་མཁྲིས་མེ་དབལ་ལྟར་སྤྱད། །ཅེས་བྱ་བ་ལ། བསྲེགས་པ་ལེགས་པར་གྱུར་ན་ནི། ཅུ་གང་ལ་སོགས་པ་ནས། སླེ་ཏྲེས་ཀྱི་བར་གྱི་སྨན་བཏགས་པ་མར་དང་བཅས་པ་དང་པོར་བསྐུ་བར་བྱའོ། །དེ་ནས་དེའི་འོག་ཏུ་

Vol. 201 · folio 7b

མཁྲིས་པ་དང་མེ་དབལ་གསོ་བ་ལྟར་སྤྱད་ཅིང་བསྟེན་པར་བྱའོ། །བསྲེགས་དྲགས་མཁྲིས་པ་མེ་དབལ་གྱི། །ཆོ་ག་ཐམས་ཅད་མྱུར་དུ་སྤྱད། །ཅེས་བྱ་བ་ལ། བསྲེགས་དྲགས་པ་ལ་ནི་བཟའ་བཏུང་དང་། སྨན་གྱི་ལྡེ་གུ་བྱུག་པ་ལ་སོགས་པའི་ཆོ་ག་མཁྲིས་པ་དང་། མེ་དབལ་གསོ་བའི་ཆོ་ག་དང་

འདྲ་བར་ཐམས་ཅད་མྱུར་ཞིང་རིངས་པར་སྤྱད་པར་བྱའོ། །སྣུམ་གྱིས་ཤིན་ཏུ་བསྲེགས་དྲགས་པ། །དེར་ནི་རྩུབ་པའི་ཆོ་གའང་བྱ། །ཞེས་བྱ་བ་ལ། སྣུམ་གྱིས་བསྲེགས་དྲགས་པ་ལ་ནི་བཟའ་བཏུང་ལ་སོགས་པའི་ཆོ་ག་ཐམས་ཅད་རྩུབ་པའི་བག་བྱའོ། །འང་ཞེས་བྱ་བའི་སྒྲས་ནི་དེ་སྨན་རྩུབ་

པ་བསྐུ་བ་འབའ་ཞིག་ཏུ་མ་ཟད་ཀྱི། གོང་དུ་བཤད་པ་རྣམས་ཀྱང་ཅི་རིགས་པར་སྦྱར་བར་བྱའོ་ཞེས་བྱ་བའི་དོན་ནོ། །སྙིང་པོའི་གསང་བ་ལྟ་བུ་ནི། །གནས་འདིར་རྫོགས་པར་བྱས་པ་ཡིན། །ཞེས་བྱ་བ་ལ། གསང་བའི་སྨན་དཔྱད་ཀྱི་རྒྱུད་དོན་གྱིས་གསང་ཞིང་སྦ་བ་སྟེ། དེ་ལྟ་བུའི་གནས་

སོ། །གང་གི་གནས་ཤེ་ན། སྙིང་པོའི་གནས་ཏེ། ཚེའི་རིག་བྱེད་ཡན་ལག་བརྒྱད་ཀྱི་སྙིང་པོ་ལྟ་བུ་སྟེ། ཇི་ལྟར། ལུས་མ་ལུས་པའི་སྙིང་པོའང་། །ཞེས་བྱ་བ་ལ། སྙིང་པོ་ཡིན་པ་དང་འདྲ་བས་ན་རྒྱུད་མ་ལུས་པའི་དེ་ཁོ་ན་ཉིད་དུ་གྱུར་པའོ། །དེ་ལྟ་བུར་འདིར་རྫོགས་པར་བྱས་ཤིང་མཐར་ཕྱིན་པར་བྱས་པ་

ཡིན་ནོ་ཞེས་བྱའོ། །འདིར་དོན་ཕྲ་བ་མདོར་བཤད་ཀྱི། །རྒྱ་ཆེར་ཀུན་ཏུ་བསྟན་པ་ཡིན། །ཞེས་བྱ་བ་ལ། གང་གི་ཕྱིར་གནས་འདིར་དོན་ཕྲ་བ་མདོ་ཙམ་དུ་བསྟན་ཞིང་བློ་རྣོན་པོ་དང་ལྡན་པ་རྣམས་ལ་དོན་གྱི་མདོ་གཅེས་པ་འདིར་བཤད་ཀྱི། རྒྱ་ཆེར་ནི་རྒྱུད་ཀུན་ཏུ་སྤྲོས་ཤིང་བསྟན་པ་ཡིན་ནོ། །

དེ་བས་ན་གནས་འདིར་ནི་གནས་ཐམས་ཅད་དང་རྒྱུད་ཀྱི་མགོ་ལྟ་བུ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ཉེ་བར་སྦྱར་བ་ལས། མདོའི་གནས་ལེའུ་སུམ་ཅུ་པའི་རྣམ་པར་འགྲེལ་པའོ།། །།མདོའི་

གནས་ཀྱི་འོག་ཏུ་ལུས་ཀྱི་གནས་བརྩམས་པའི་འབྲེལ་པ་ནི་འདི་ཡིན་ཏེ། མདོའི་གནས་རྫོགས་ཁར་འདིར་དོན་ཕྲ་བ་མདོར་བཤད་ཀྱི། རྒྱ་ཆེར་ཀུན་ཏུ་བཤད་པ་ནི་གང་འདིར་དོན་ཕྲ་བ་བློ་ཞིབ་པའི་སྐྱེས་བུས་རྟོགས་པར་བྱ་བ་ནི། གཞུང་ཉུང་དོན་མང་པོ་ཞིག་མདོ་ཙམ་དུ་བསྟན་པ་ཡིན་གྱི།

Vol. 201 · folio 8a

མ་ལུས་པར་ཐམས་ཅད་བསྟན་པ་ནི་མ་ཡིན་ནོ། །དེ་བས་ན་སྨན་དཔྱད་ཀྱི་རྒྱུད་མ་ལུས་པའི་དོན་གྱི་མདོ་གཅེས་པ་ཙམ་ཞིག་སྟོན་པས་ན། དེ་ནི་མདོའི་གནས་ཡིན་ལ། དོན་དེ་ཉིད་འདིར་རྒྱུད་མ་ལུས་པར་རྒྱ་ཆེར་སྤྲོས་པ་ཡིན་པས་ན། དེའི་ཕྱིར་མདོའི་གནས་ཀྱི་འོག་

ཏུ་ལུས་གནས་བརྩམས་པ་ཡིན་ནོ། །དེ་ནས་ལུས་ཀྱི་རུམ་དུ་ཞུགས་པའི་གནས་དང་པོ་བཤད་པར་བྱའོ། །ཞེས་བྱ་བ་ལ། ལུས་ཀྱི་དབང་དུ་བྱས་ནས་བརྩམས་པའི་གཞུང་ལ་ནི། ལུས་ཀྱི་རུམ་དུ་ཞུགས་པ་ཞེས་བྱ་སྟེ། རུམ་དུ་ཞུགས་པ་ནི་བྱིས་པ་མངལ་དུ་ཆགས་པ་སྟེ། གང་

གི་མངལ་དུ་བུ་ཆགས་པར་འགྱུར་བའོ། །དེ་ནས་ཞེས་བྱ་བ་ལ་སོགས་པ་ནི་སྔ་མ་བཞིན་དུ་བཤད་པར་བྱའོ། །སྔོན་གྱི་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སོགས་པས་འདི་སྐད་ཅེས་བཤད་དོ། །ཞེས་བྱ་བ་ལ་ཡང་སྔ་མ་བཞིན་དུ་བཤད་པར་བྱའོ། །ཁུ་ཁྲག་སྐྱོན་མེད་པར་

སེམས་ཅན། །རང་ལས་ཉོན་མོངས་ཀྱིས་བསྐུལ་ནས། །ཚོགས་པས་མངལ་དུ་ཆགས་འགྱུར་ཏེ། །གཙུབ་ཤིང་ལས་ནི་མེ་འབྱུང་མཚུངས། །ཞེས་བྱ་བ་ལ། ཁུ་བ་ནི་ཁུ་ཆུའོ། །ཁྲག་ནི་དུས་ཚིགས་སུ་བྱུང་བས་ཟླ་མཚན་ཞེས་བྱ་བའི་ཁྲག་གོ། །ཁུ་ཁྲག་དེ་གཉིས་སྐྱོན་མེད་པའི་

རླུང་ལ་སོགས་པའི་ནད་ཀྱི་ཉེས་པ་མེད་པ་སྟེ། དེ་ལྟ་བུ་དེར་སེམས་ཅན་ཞེས་བྱ་བ་སྲིད་པ་བར་མ་དག་མངལ་དུ་ཆགས་པར་འགྱུར་རོ། །དེ་ཡང་རང་གི་ལས་དགེ་བའམ་མི་དགེ་བ་རང་གིས་བྱས་པའམ། མ་རིག་པ་ལ་སོགས་པའི་ཉོན་མོངས་པ་རྣམས་ཀྱིས་བསྐུལ་ཞིང་དྲངས་ནས་དེ་དག་གི་ཚོགས་

པ་ལ་ལྟོས་ཤིང་། དེའི་ནུས་པའི་དབང་གིས་སེམས་ཅན་དེ་མངལ་དུ་ཆགས་ཤིང་ཞུགས་པར་འགྱུར་རོ། །དེ་ཡང་ཇི་ལྟར་གཙུབ་ཤིང་ལས་མེ་འབྱུང་བ་ནི་གཙུབ་ཤིང་གཙུབ་གཏན་དང་། གཙུབས་པའི་རྩོལ་བའི་ཚོགས་པ་དང་ལྡན་པ་ལས་མེ་འབྱུང་བར་འགྱུར་བ་དང་མཚུངས་པ་འདི་དག་ཀྱང་ཚོགས་པ་ལས་

བྱུང་བ་ཡིན་པར་སྟོན་ཏོ། །མངལ་དེར་གནས་ཤིང་འཕེལ་བའི་རྒྱུ་གང་ཞིག་ཡིན་ཞེས་སྨྲས་པ་ནི། ས་བོན་བདག་ཉིད་འབྱུང་བ་ཆེ། །ཕྲ་མོ་སེམས་ཀྱི་རྗེས་འགྲོ་དང་། །མ་ཡི་ཁ་ཟས་དྭངས་མ་ལས། །རིམ་གྱིས་མངལ་དུ་རྣམ་པར་འཕེལ། །ཞེས་བྱ་བ་ལ། ས་བོན་གྱི་བདག་ཉིད་དུ་གྱུར་ཅིང་མངལ་སྐྱེད་

Vol. 201 · folio 8b

པའི་བདག་ཉིད་ཅན་ཁུ་བ་དང་ཁྲག་གི་གཟུགས་ཡོངས་སུ་གྱུར་པའི་འབྱུང་བ་ཆེན་པོ་ནམ་མཁའ་ལ་སོགས་པ་དང་། དེ་བཞིན་དུ་ཕྲ་ཞིང་དབང་པོ་ལས་འདས་པ་རྣལ་འབྱོར་པའི་སྤྱོད་ཡུལ་དུ་གྱུར་པ། སེམས་ཀྱི་རྗེས་སུ་ཞི་ཞིང་འབྲང་བ་རྣམས་དང་། དེ་བཞིན་དུ་མའི་ཁ་ཟས་ཀྱི་དྭངས་མའི་བདག་ཉིད་དུ་

ཡོངས་སུ་གྱུར་པ་ལས། རིམ་གྱིས་སེམས་ཅན་དེ་མངལ་དུ་རྣམ་པར་འཕེལ་ཞིང་རྒྱས་པར་འགྱུར་ཏེ་ནུར་ནུར་པོ་དང་། མེར་མེར་པོ་དང་། ནར་ནར་པོ་ལ་སོགས་པའི་གནས་སྐབས་འབྱུང་བར་འགྱུར་བའོ། །དྲིས་པ། སེམས་ཅན་འདི་མངལ་དུ་ཞུགས་པ་ནི་མངོན་སུམ་དུ་མི་སྣང་ནས་ཉེ་བར་

དམིགས་སུ་མེད་དོ་ཞེས་རྟོགས་པ་ལ། དེའི་ཕྱིར་འདི་སྨྲས་པ་ཡིན་ཏེ། ཇི་ལྟར་ཉི་མའི་ཟེར་གྱི་མེ། །མེ་ཤེལ་དང་ནི་ཕྲད་གྱུར་པའི། །ཤིང་ལ་འགྲོ་བར་མི་སྣང་སྟེ། །སེམས་ཅན་མངལ་གནས་དེ་དང་འདྲ། །ཞེས་བྱ་བ་ལ། དཔེར་ན་ཉི་མའི་འོད་ཟེར་དང་འབྲེལ་བའི་མེ་ནི་མེ་ཤེལ་ཞེས་བྱ་བའི་

ནོར་བུ་དང་འཕྲད་ཅིང་། འོད་དེས་བསྒྲིབས་ནས་མེ་ཤེལ་ལ་གནས་པའི་ཤིང་ལ་མཆེད་མོད་ཀྱི། དེར་འགྲོ་ཞིང་ཞུགས་པར་འགྱུར་བ་མི་སྣང་ངོ་། །དེ་བཞིན་དུ་སྲིད་པ་བར་མའི་སེམས་ཅན་མངལ་གྱི་གནས་སུ་འགྲོ་བ་མངོན་སུམ་དུ་མི་སྣང་ཡང་དེར་འཇུག་པ་ཡིན་ནོ། །དྲིས་པ། སེམས་ཅན་

རང་བཞིན་གཅིག་པ་ཉིད་ལས་སྐྱེ་བ་དག་ལུས་ཀྱི་རྣམ་པ་དུ་མར་ཇི་ལྟར་སྣང་དུ་རུང་ཞེས་རྟོགས་པར་བྱེད་པ་དག་གི་ཕྱིར། གཞུང་རྩོམ་པར་བྱེད་པས་འདི་སྨྲས་པ་ཡིན་ཏེ། རྒྱུ་ཡི་རྗེས་སུ་འགྲོ་བས་ན། །འབྲས་བུ་དེ་དང་སྐལ་མཉམ་ཉིད། །སེམས་ཅན་སྐྱེ་གནས་སྣ་ཚོགས་འཛིན། །ཟངས་མ་

ལ་སོགས་བཞུ་དང་མཚུངས། །ཞེས་བྱ་བ་ལ། རྒྱུའམ་བྱེད་པའི་རྗེས་སུ་འབྲང་བ་ཡིན་པས་ན་རྒྱུའི་རྗེས་སུ་འགྲོ་ཞེས་བྱ་བ་སྟེ། རྒྱུའི་རང་བཞིན་སྤངས་ཤིང་ལྟོས་པ་མེད་པར་འབྲས་བུ་འགྱུར་བ་ནི་མ་ཡིན་ནོ། །དེ་བས་ན་རྒྱུའི་རྗེས་སུ་འབྲང་བའི་ཕྱིར་འབྲས་བུ་ནི་དེ་དང་འདྲ། རྒྱུ་དེ་དང་

སྐལ་བ་མཉམ་པ་ཉིད་ཡིན་ཏེ། འབྱུང་བ་ཆེན་པོ་ལ་སོགས་པ་རྣམ་པ་གང་དག་ཡིན་པ་དེ་དང་དེ་དག་སྐལ་བ་མཉམ་ཞིང་ཆ་འདྲ་བ་ཉིད་ཡིན་ཏེ། སྐལ་བ་མཉམ་པ་དང་ཆ་འདྲ་བ་ཞེས་བྱ་བ་ནི་ཚིག་གི་རྣམ་གྲངས་ཡིན་ནོ། །གཏན་ཚིགས་ཀྱིས་སམ་རྒྱུ་དེས་ན་སེམས་ཅན་ནི་འབྱུང་བ་ཆེན་

Vol. 201 · folio 9a

པོ་ལ་སོགས་པ་རྒྱུའི་རྗེས་སུ་འགྲོ་བས། རང་བཞིན་གཅིག་པ་ཉིད་ལས་སྐྱེ་གནས་སྣ་ཚོགས་པའི་ཚུལ་ཅན་གྱིས་སྐྱེ་བའི་རྣམ་པའི་གཟུགས་བརྙན་གྱི་ཁྱད་པར་འཛིན་ཅིང་འཇོག་པ་ཡིན་ནོ། །དེ་ཡང་དཔེར་ན་ཟངས་ལ་སོགས་པ་དངོས་པོའི་རིགས་མེས་བཞུ་ཞིང་

ཁུ་བར་བྱས་པ་ཞུ་བའི་རྣམ་པའི་ཚུལ་གཅིག་པ་དག་ཀྱང་། སྤྲ་ཚིལ་ལ་སོགས་པ་ལས་བཟོ་བྱས་པའི་མི་ལ་སོགས་པའི་གཟུགས་སུ་བྱས་པ་དེར་བླུགས་ནས། གཞིའི་རྣམ་པ་ཅི་འདྲ་བ་དེ་དང་དེའི་གཟུགས་སུ་སྣང་ཞིང་འབྱུང་བར་འགྱུར་རོ། །དེ་བཞིན་དུ་སེམས་ཅན་རྣམས་ཀྱང་སྐྱེ་

གནས་དུ་མར་སོང་ཞིང་གནས་པ་ལས། དེའི་གཟུགས་ཀྱི་རྣམ་པ་འཛིན་པར་འགྱུར་རོ། །དེ་བས་ཁུ་བ་མང་བ་ལས། །ཕལ་ཆེར་སྐྱེས་པར་སྐྱེ་འགྱུར་ལ། །ཟླ་མཚན་མང་ལས་བུད་མེད་དེ། །དེ་གཉིས་མཉམ་པས་མ་ནིང་འགྱུར། །ཞེས་བྱ་བ་ལ། སྔར་བཤད་ཅིང་བརྟགས་པའི་རྒྱུ་དེས་

ན། ཕའི་ཁུ་ཆུ་མང་ཞིང་ཤས་ཆེ་བ་ལས་ནི། སྐྱེས་པར་སྐྱེ་བར་འགྱུར་གྱི། བུད་མེད་དུ་མ་ཡིན་ནོ། །དེ་བཞིན་དུ་མའི་ཁྲག་མང་བ་ལས་ནི་བུད་མེད་དུ་སྐྱེ་བར་འགྱུར་གྱི་ཕོར་མི་སྐྱེའོ། །ཁུ་བ་དང་ཁྲག་དེ་གཉིས་ཆ་མཉམ་ཞིང་མཚུངས་པ་ལས་ནི་མ་ནིང་དུ་སྐྱེ་བར་འགྱུར་བའམ། མཚན་གཉིས་

པར་སྐྱེ་བར་འགྱུར་རོ། །ཕལ་ཆེར་ཞེས་སྨོས་པ་ནི། རྐྱེན་གཞན་གྱིས་གཞན་དུ་ཡང་འགྱུར་བ་སྲིད་པའོ། །མངལ་དུ་སེམས་ཅན་དུ་མ་ཆགས་པར་འགྱུར་བ་དེའི་རྒྱུ་ཅི་ཞིག་ཡིན་པ་བསྟན་པར་བྱ་བའི་ཕྱིར་སྨྲས་པ་ནི། ཁུ་ཁྲག་རླུང་གིས་མང་དུ་ཕྱེ། །ཇི་ལྟ་བ་ལས་མཚེ་མར་འགྱུར། །ཞེས་

བྱ་བ་ལ། ཕ་མའི་ཁུ་ཁྲག་རླུང་གིས་མང་དུ་ཕྱེ་ཞིང་དུ་མར་བྱས་པ་ལས། རང་གི་མཚན་ཉིད་ཇི་ལྟ་བ་བཞིན་མཚེ་མ་སྐྱེ་བར་འགྱུར་བ་ཡིན་ནོ། །དེ་ཡང་ཁུ་བ་མང་བའི་ཁུ་ཁྲག་གྱེས་པ་ལས་ནི་ཕོའི་མཚེ་མར་འགྱུར་བ་ཡིན་ལ། ཟླ་མཚན་ཤས་ཆེ་བའི་ཁུ་ཁྲག་གྱེས་པ་ལས་ནི་མོའི་མཚེ་མར་འགྱུར་

བ་ཡིན་ནོ། །དེ་བཞིན་དུ་ཁུ་ཁྲག་ཆ་མཉམ་པ་དུ་མར་གྱེས་པ་ལས་ནི་མ་ནིང་གི་མཚེ་མར་འགྱུར་བ་ཡིན་ནོ། །དེ་ལྟར་ན་ལན་འགའ་ནི་ཕོར་སྐྱེ་བར་འགྱུར་ལ། ལན་འགའ་ནི་མོར་སྐྱེ། ལན་འགའ་ནི་མ་ནིང་དུ་སྐྱེ། ལན་འགའ་ནི་བུད་མེད་དང་མ་ནིང་གཉིས་སུ་ཅིག་ཅར་སྐྱེ་བར་འགྱུར་རོ། །

Vol. 201 · folio 9b

དེ་དག་ཇི་ལྟར་སྐྱེ་ཞེ་ན། སྐྱེ་གནས་མི་མཐུན་གཟུགས་མི་སྡུག །གནོད་པའི་དྲི་མས་སྐྱེ་བར་འགྱུར། །ཞེས་བྱ་བ་ལ། སྐྱེ་གནས་རིགས་མི་མཐུན་པ་དང་། གཟུགས་མི་སྡུག་པ་དག་ཏུ་ནི་རླུང་ལ་སོགས་པས་ཁུ་ཁྲག་གི་དྲི་མ་དེ་དག་གནོད་ཅིང་མ་རུངས་པར་བྱས་པ་ལས་སྐྱེ་བར་འགྱུར་

ཏེ། དེ་ལ་སྐྱེ་གནས་མི་མཐུན་པ་ནི་སྦྲུལ་དང་བྱི་ལ་ལ་སོགས་པའི་གཟུགས་སུ་སྐྱེ་བའོ། །མི་སྡུག་པ་ནི་ཞར་བ་དང་སྒུར་པོ་དང་ཞ་བོ་དང་འཐེང་པོ་དང་འོན་བ་དང་ལོང་བ་དང་མིའུ་ཐུང་བ་ལ་སོགས་པའོ། །བུད་མེད་ཟླ་བ་རེ་རེའི་ཁྲག །དྭངས་མ་ལས་བྱུང་ཞག་གསུམ་འཛག །ལོ་ནི་

བཅུ་གཉིས་ཡན་ཆད་ནས། །ལྔ་བཅུའི་བར་འཛག་དེ་ནས་ཟད། །ཅེས་བྱ་བ་ལ། བུད་མེད་དག་ནི་ཟླ་བ་རེ་རེ་ཞིང་ཟླ་མཚན་གྱི་ཁྲག་ཟས་ཀྱི་དྭངས་མ་ལས་བྱུང་བ་ཞག་གསུམ་གསུམ་མངལ་གྱི་སྒོ་ནས་འཛག་ཅིང་འབྱུང་བར་འགྱུར་རོ། །དེ་ཡང་འབྱུང་བའི་དུས་ནི་དང་པོར་ལོ་བཅུ་

གཉིས་ཡན་ཆད་ནས་འབྱུང་བར་འགྱུར་ལ། དེ་ནས་ལོ་ལྔ་བཅུ་ལོན་པ་དང་ཁྲག་དེ་ཟད་ཅིང་མེད་པར་འགྱུར་རོ། །བུད་མེད་ལོ་ནི་བཅུ་དྲུག་ལོན། །སྐྱེས་པ་ཉི་ཤུ་ལོན་དང་འདུས། །མངལ་གནས་ལམ་དང་ཁུ་བ་ཁྲག །རླུང་དང་སེམས་ནི་དག་གྱུར་པའི། །བུ་ནི་སྟོབས་དང་

ལྡན་པ་སྐྱེ། །ཞེས་བྱ་བ་ལ། བུད་མེད་གང་ལོ་བཅུ་དྲུག་ལོན་པའི་ན་ཚོད་དང་ལྡན་པ་དང་། སྐྱེས་པ་ལོ་ཉི་ཤུ་ལོན་པ་དག་འདུས་པའི་ཁུ་བ་ཁྲག་ལས་གྱུར་པ་དང་། དེ་བཞིན་དུ་མངལ་གྱི་གནས་དག་ཅིང་སྐྱོན་མེད་པ་དང་། བུ་འབྱུང་བའི་ལམ་རླུང་ལ་སོགས་པས་གནོད་པར་མ་གྱུར་པ་

དང་། དེ་བཞིན་དུ་ཕ་མའི་ཁུ་ཁྲག་ལ་སྐྱོན་མེད་ཅིང་དག་པ་དང་། དེ་བཞིན་དུ་རླུང་དག་ཅིང་སྦྱངས་པས་མ་བཀག་པ་དང་། དེ་བཞིན་དུ་སེམས་ཅན་དག་ཅིང་དང་ལ་སྐྱོན་མེད་པར་གྱུར་པ་ལས་བྱུང་བའི་བུ་ནི་སྟོབས་དང་ལྡན་ཞིང་བརྩོན་པ་ཕུན་སུམ་ཚོགས་པ་སྐྱེ་ཞིང་བཙས་པར་འགྱུར་རོ། །དེ་ལས་

ལོ་ནི་མ་ཚང་བའི། །ནད་ཅན་ཚེ་ཐུང་སྐལ་ངན་པའི། །བུ་ཆགས་པའམ་ཆགས་མི་འགྱུར། །ཞེས་བྱ་བ་ལ། དེ་ལས་སྐྱེས་པ་དང་བུད་མེད་གཉིས་ན་ཚོད་ཀྱི་ཚད་བསྟན་པ་དེ་མ་ཚང་བ་སྟེ། བུད་མེད་ལོ་བཅོ་ལྔ་ལོན་པ་དང་། སྐྱེས་པ་ལོ་བཅུ་དགུ་ལོན་པ་དག་གི་བུ་ནི་ནད་བུ་ཅན་དང་། ཚེ་ཐུང་བ་

Vol. 201 · folio 10a

དང་། སྐལ་བ་ངན་ཞིང་བཀྲ་མི་ཤིས་པའི་བུ་ཆགས་པར་འགྱུར་བའམ། ཡང་ན་རྣམ་པ་ཐམས་ཅད་དུ་བུ་ཆགས་པར་མི་འགྱུར་རོ། །རླུང་སོགས་རུལ་དང་མདུད་པ་ཅན། །དྲི་མ་སྐྱོན་དང་ལྡན་བཤད་པའི། །ཁུ་ཁྲག་ས་བོན་བྱེད་མི་ནུས། །ཞེས་བྱ་བ་ལ། རླུང་ལ་

སོགས་པའི་ནད་ཀྱིས་མ་རུང་ཞིང་གནོད་པར་བྱས་པའི་ཁུ་ཁྲག་ནི་ས་བོན་གྱི་བྱ་བ་བྱེད་མི་ནུས་སོ། །མངལ་དུ་ཆགས་པ་ཞེས་བྱ་བའི་འབྲས་བུ་སྐྱེད་པའི་རྒྱུར་མི་འགྱུར་རོ་ཞེས་བྱ་བའི་དོན་ནོ། །འདི་དག་གི་དབྱེ་བ་སྨྲས་པ་ནི། རང་གི་མཚན་མ་སྐྱོན་བྱུང་བཤད། །ཁྲག་གིས་རུལ་ཞིང་

བད་ཀན་དང་། །རླུང་གིས་མདུད་པ་ཅན་འདྲར་འགྱུར། །ཁྲག་དང་མཁྲིས་པས་རྣག་འདྲ་ལ། །རླུང་དང་མཁྲིས་པས་ཟད་པར་འགྱུར། །ཞེས་བྱ་བ་ལ། རླུང་ལ་སོགས་པ་རང་རང་གི་མཚན་མའམ་རྟགས་སོ་སོར་ངེས་པའི་ཚུལ་མ་འདྲེས་པ་སྟེ། དེ་ལ་རླུང་གི་མཚན་མ་ནི་རྩུབ་པ་དང་།

གནག་པ་དང་། དམར་བ་ལ་སོགས་པའོ། །མཁྲིས་པའི་མཚན་མ་ནི་དྲི་མནམ་པ་དང་། སེར་བ་དང་། དཀར་བ་ལ་སོགས་པའོ། །བད་ཀན་གྱི་མཚན་མ་ནི་སྣུམ་པ་དང་། སྐྱ་བ་དང་། འབྱར་བག་ལ་སོགས་པའོ། །དེ་ལྟར་ན་རང་རང་གི་མཚན་ཉིད་ཇི་ལྟ་བ་ལས་ཁུ་བ་དང་། ཁྲག་

རླུང་ལ་སོགས་པའི་སྐྱོན་ལས་བྱུང་བ་ཡིན་པར་ཤེས་པར་བྱའོ། །ཡང་ཁྲག་གི་སྐྱོན་གྱིས་ནི་ཁུ་བ་དང་ཁྲག་མི་རོ་ལྟར་མྱགས་ཤིང་དྲི་མ་མནམ་པར་ཤེས་པར་བྱའོ། །བད་ཀན་དང་རླུང་གི་སྐྱོན་གྱིས་ནི་མདུད་པ་ཆགས་པ་དང་འདྲ་བར་སྣང་ཞིང་ཁུ་ཁྲག་ཆད་པའི་དུམ་བུར་སྣང་བར་ཤེས་

པར་བྱའོ། །ཁྲག་དང་མཁྲིས་པ་ཤས་ཆེ་བ་ལས་གྱུར་པའི་ཁུ་བ་དང་ཁྲག་ནི་རྣག་དང་འདྲ་བ་དང་། ཤིན་ཏུ་མནམ་པར་ཤེས་པར་བྱའོ། །རླུང་དང་མཁྲིས་པ་འདྲེས་པའི་ལྡན་པ་ཤས་ཆེ་བ་ལས་གྱུར་པ་ནི། དེ་དག་ཉིད་ཀྱི་སྐབས་ལས་ཁུ་ཁྲག་ཟད་ཅིང་མེད་པ་ཉིད་དུ་ཤེས་པར་བྱའོ། །

འདི་དག་གསོ་དཀའ་ཉེས་གསུམ་ལྡན། །བཤང་གཅི་འདྲ་བ་གསོར་མི་རུང་། །ཞེས་བྱ་བ་ལ། གོང་དུ་སྨོས་པའི་རླུང་ལ་སོགས་པའི་སྐྱོན་དང་ལྡན་པའི་ཁུ་ཁྲག་ནི་ཤིན་ཏུ་གསོ་བ་དཀའ་བ་ཡིན་པར་ཤེས་པར་བྱ་ལ། དེ་དག་ལས་ཀྱང་རླུང་དང་། མཁྲིས་པ་དང་། བད་ཀན་གསུམ་ཅར་

Vol. 201 · folio 10b

གྱི་མཚན་ཉིད་དང་ལྡན་པ་ལ་བཤང་གཅི་འདྲ་བ་ནི་གསོར་མི་རུང་སྟེ། བཅོས་པར་མི་ནུས་པ་ཡིན་ནོ། །གསོར་རུང་བ་དག་གི་ཕྱིར་བཅོས་པའི་ཐབས་སྨྲས་པ་ནི། རླུང་ལ་སོགས་པས་གནོད་གྱུར་པ། །རང་གི་སྨན་གྱིས་གསོ་བར་བྱ། །ཞེས་བྱ་བ་ལ། རང་དང་རྗེས་སུ་མཐུན་པའི་སྨན་ནི་

རླུང་འཁྲུགས་པར་གྱུར་པ་ལ། དེ་ཞི་བའི་ཐབས་ནི། སྣུམ་པ་དང་། དྲོ་བ་དང་། སྐྱུར་བ་དང་། ལན་ཚྭ་རྣམས་ཡིན་ནོ། །མཁྲིས་པའི་ནི་བསིལ་བ་དང་། མངར་བ་དང་། ཁ་བ་དང་། བསྐ་བ་ལ་སོགས་པ་ཡིན་ནོ། །བད་ཀན་གྱི་རྩུབ་པ་དང་། ཁ་བ་དང་། ཚ་བ་ལ་སོགས་

པ་ཡིན་ནོ། །དེས་ན་རླུང་ནད་ལྡན་པའི་ཁུ་བ་དང་། ཁྲག་ལ་ནི་རླུང་ཞི་བའི་སྨན་བྱའོ། །མཁྲིས་པའི་ནད་དང་ལྡན་པའི་ཁུ་བ་དང་ཁྲག་ལ་ནི་མཁྲིས་པ་ཞི་བའི་སྨན་བྱའོ། །བད་ཀན་གྱི་ནད་དང་ལྡན་པའི་ཁྲག་ལ་ནི་བད་ཀན་སེལ་བའི་སྨན་བྱའོ། །རུལ་ལ་ད་ཏ་ཀིའི་མེ་ཏོག །སེང་

ལྡེང་སེའུ་འབྲུ་ཨརྫུ་ན། །མར་དང་བསྐོལ་བ་བླུད་པའམ། །ཨ་སན་སོགས་བསྐོལ་བ་བླུད། །ཅེས་བྱ་བ་ལ། རུལ་ཞིང་མི་རོ་ལྟར་མནམ་པའི་ཁུ་བ་དང་ཁྲག་ལ་ནི། ད་ཏ་ཀིའི་མེ་ཏོག་ལ་སོགས་པའི་སྨན་བསྐོལ་བའི་སྨན་མར་ནད་པ་ལ་བླུད་པར་བྱའོ། །ཡང་ན་ཨ་ས་ན་ལ་སོགས་

པའི་སྡེ་ཚན་དུ་བསྟན་པའི་སྨན་དང་བསྐོལ་བའི་མར་བླུད་པར་བྱའོ། །ཁུ་ཁྲག་མདུད་འདྲ་པ་ལ་ཤའི། །ཐལ་བ་སྲུ་སྲུའི་རྩ་བས་ཕན། །ཞེས་བྱ་བ་ནི། ཁུ་བ་དང་ཁྲག་མདུད་པ་འདྲ་བ་ལ་ནི། བ་ལ་ཤའི་ཐལ་བ་དང་། སྲུ་སྲུའི་རྩ་བ་དང་བསྐོལ་བའི་མར་ནད་པ་ལ་བླུད་པར་བྱའོ། །པ་ལ་

ཤའི་ཐལ་བ་ནི་ཤིང་པ་ལ་ཤ་ཐལ་སྨན་དུ་བྱས་པའོ། །སྲུ་སྲུའི་རྩ་བ་ནི་ཨསྨ་བེ་དེ་སྟེ་བྲག་འབིགས་ཞེས་བྱའོ། །རྣག་འདྲ་པ་རུ་ཤ་ཀ་དང་། ནྱ་གྲོ་དྷ་སོགས་བསྐོལ་ནས་བླུད། །ཅེས་བྱ་བ་ལ། ཁུ་བ་དང་ཁྲག་རྣག་འདྲ་བ་ལ་ནི། པ་རུ་ཤ་ཀ་ལ་སོགས་པ་དང་། ནྱ་གྲོ་དྷ་ལ་སོགས་པའི་

སྡེ་ཚན་གཉིས་པོའི་སྨན་གང་ཡིན་པ་དེ་དག་དང་བསྐོལ་བའི་མར་བླུད་པར་བྱའོ། །ཁུ་བ་ཟད་ལ་རོ་ཙའི་དཔྱད། །ཅེས་བྱ་བ་ལ། ཁུ་བ་ཟད་པ་ནི་རོ་ཙ་ཞིང་ཁུ་བའི་དཔྱད་ཀྱི་ལས་བྱའོ། །བཤང་འདྲ་སློན་ཁྲུས་ཤིང་ཀུན་དང་། །བུ་ཤེལ་ཙི་ཏྲ་ཀ་བསྐོལ་བླུད། །ཅེས་བྱ་བ་ལ། ཁུ་བ་བཤང་བ་གཅི་བ་

Vol. 201 · folio 11a

འདྲ་བ་འབྱུང་བའི་སྐྱེས་བུ་ལ་ནི་སློན་ཁྲུས་ཀྱིས་སྦྱང་བ་དང་། ཤིང་ཀུན་ལ་སོགས་པ་བསྐོལ་བའི་མར་བླུད་པར་བྱའོ། །པུ་ཤེལ་ཙི་ནི་ཨུ་ཤི་རའོ། །ཙི་ཏྲ་ཀྲ་ཀྲུ་ཏྲུག་ཏྲེས་སོ། །ཟླ་མཚན་མདུད་འདྲ་བ་ཐ་དང་། །ཚ་གསུམ་དུག་མོ་ཡུངས་བསྐོལ་བླུད། །ཅེས་བྱ་བ་ལ། བུད་

མེད་ཀྱི་ཟླ་མཚན་མདུད་པའམ་རྨེན་བུ་འདྲ་བ་ལ་ནི། སྨན་པ་ཐ་ལ་སོགས་པ་བསྐོལ་བའི་ཆུ་བླུད་པར་བྱའོ། །ཟླ་མཚན་རུལ་དང་རྣག་འདྲ་ལ། །ཙནྡན་བླུད་བྱ། ཞེས་བྱ་བ་ལ། བུད་མེད་ཀྱི་ཟླ་མཚན་མི་རོ་ལྟར་རུལ་བ་དང་། རྣག་འདྲ་བ་ལ་ནི་ཙནྡན་བསྐོལ་བའི་ཆུ་བླུད་པར་བྱ་སྟེ། འདིར་

གཤེར་བའི་རྫས་ཀྱི་ཁྱད་པར་གང་དང་བཏུང་བ་དངོས་སུ་མ་སྨོས་པས་སྤྱིར་བཤད་པ་ལ་སྙེགས་པ་ཡིན་པའི་ཕྱིར། ཆུ་དང་བཏུང་བ་ཡིན་པར་ཤེས་པར་བྱའོ། །ཕྱིས་བཤད་པའི། གསང་བའི་ནད་གསོར་བཤད་ཀུན་དང་། །འཇམ་རྩིར་བཅས་པ་གང་ཡིན་བྱ། །ཞེས་བྱ་བ་ལ། འདིར་འདི་

དག་འབའ་ཞིག་བྱ་བར་མ་ཟད་ཀྱི། འོག་ནས་ཕོ་མཚན་དང་མོ་མཚན་ཞེས་བྱ་བའི་ནད་གསོ་བར་བཤད་པ་དེ་ཐམས་ཅད་དང་འཇམ་རྩི་དང་བཅས་པ་རྣམས་ཀྱང་ནད་པའི་ཚུལ་ལས་ཅི་རིགས་པར་སྦྱར་ཞིང་གཏང་བར་བྱའོ། །ཁུ་བ་དཀར་ཞིང་ལྕི་བ་དང་། །དམར་དང་བསྐ་དང་མང་བ་དང་། །

མར་དང་སྦྲང་རྩི་ཏིལ་མར་འདྲ། །མངལ་དུ་ལེགས་ཆགས། ཞེས་བྱ་བ་ལ། ཁུ་ཆུ་གང་དཀར་པོ་ལ་སོགས་པའི་ཡོན་ཏན་དང་ལྡན་པ་དེ་ནི་མངལ་དུ་ལེགས་པར་ཆགས་ཤིང་འཛིན་པའི་རྒྱུ་ཡིན་པར་ཤེས་པར་བྱ་སྟེ། དཀར་བ་ནས་ཏིལ་མར་འདྲ་བའི་བར་འདི་དག་ནི་ཁུ་བའི་ཁྱད་པར་

ཡིན་པར་ཤེས་པར་བྱའོ། །ཟླ་མཚན་ཡང་། རྒྱ་སྐྱེགས་ཁུ་བ་རི་བོང་ཁྲག །འདྲ་ཞིང་བཀྲུས་ན་དག་འགྱུར་བཟང་། །ཞེས་བྱ་བ་ལ། ཟླ་མཚན་གྱི་ཁྲག་ཀྱང་ཁྱད་པར་འདི་དག་དང་ལྡན་ན་མངལ་ཞིག་བཟང་དུ་ཆགས་ཏེ། རྒྱ་སྐྱེགས་བཙོས་པའི་ཁུ་བ་འདྲ་བ་དང་། རི་བོང་གི་ཁྲག་ལྟར་དམར་བ་

དང་། གང་གོས་ལ་ཆགས་ཤིང་ཞེན་པ་བཀྲུས་ན་དག་ཅིང་དམར་བ་མེད་པར་འགྱུར་བ་སྟེ་མངལ་དུ་ཆགས་པ་བཟང་བའི་རྒྱུ་ཡིན་ནོ། །ཁུ་ཁྲག་སྐྱོན་མེད་ནད་མེད་ཅིང་། །ཕན་ཚུན་དུ་ནི་ཆགས་པ་དང་། །རོ་ཙ་སྣུམ་གྱིས་བརྟས་པ་དང་། །སྦྱང་བ་བྱས་ཤིང་འཇམ་རྩི་བཏང་། །ཞེས་བྱ་བ་ལ། སྐྱེས་

Vol. 201 · folio 11b

པ་དང་། བུད་མེད་གང་གི་ཁུ་བ་དང་། ཁྲག་དག་ཅིང་སྐྱོན་མེད་པ་དང་། ནད་མེད་པ་དང་ལྡན་ཞིང་བདེ་བར་གནས་པ་དང་། ཕན་ཚུན་གཅིག་ལ་གཅིག་རྗེས་སུ་ཆགས་ཤིང་ཞེན་པ་དང་ལྡན་པ་དང་། དེ་བཞིན་དུ་རོ་ཙ་བར་བྱེད་པའི་ཟས་དང་སྨན་ཤ་དང་། མར་དང་། དགེ་བའི་སྨན་མར་ལ་སོགས་

པའི་སྣུམ་གྱིས་བརྟ་བར་བྱ་བ་དང་། སློན་སྨན་དང་བཀྲུ་སྨན་གྱིས་སྦྱང་བ་བྱས་པ་དང་། འཇམ་རྩི་བཏང་ཞིང་བརྟས་ཀྱང་མངལ་དུ་ལེགས་པའི་རྒྱུར་འགྱུར་རོ། །མཆོག་ཏུ་སྐྱེས་པ་འོ་མ་མར། །མངར་བའི་སྨན་གྱིས་བརྟ་བར་བྱ། །བུད་མེད་ཏིལ་མར་ཤ་དག་ནི། །མཁྲིས་པ་སྐྱེད་པ་ཉེ་བར་

སྤྱད། །ཅེས་བྱ་བ་ལ། མཆོག་གམ་ཁྱད་པར་དུ་སྐྱེས་པ་ལ་ནི་མར་དང་འོ་མ་སྨན་མངར་བ་དང་བསྐོལ་བ་བླུད་ཅིང་གསོ་བར་བྱ་སྟེ། མངར་བ་ནི་འཚོ་བྱེད་ཀྱི་སྡེ་ཚན་དང་རྒུན་འབྲུམ་ལ་སོགས་པའོ། །བུད་མེད་ལ་ནི་མཆོག་ཏུ་ཏིལ་མར་དང་ཤ་དང་། མཁྲིས་པ་སྐྱེད་པའི་སྨན་དང་ཁ་ཟས་སྲོག་

ཆགས་རླན་ཅན་ན་གནས་པའི་ཤ་ལ་སོགས་པ་སྦྱིན་པར་བྱའོ། །བུད་མེད་ཉམ་ཆུང་བཞིན་རས་དང་། །ནུ་མ་རྐེད་པ་འགུལ་བ་དང་། །མིག་དང་དཀུ་གཡོ་སྐྱེས་པ་འདོད། །ཟླ་མཚན་ལྡན་པར་ཤེས་པར་བྱ། །ཞེས་བྱ་བ་ལ། བུད་མེད་གང་སྦེག་ཅིང་ཉམ་ཆུང་བའི་རྒྱུ་མེད་པར་ཉམ་ཆུང་བར་

སྣང་བ་དང་། བཞིན་རས་དང་ཞིང་དྲི་མ་མེད་པ་དང་། ནུ་མ་དང་རྐེད་པ་འགུལ་ཞིང་གཡོ་བ་དང་། མིག་དང་དཀུ་གཡོ་ཞིང་འགུལ་བ་ལྟར་སྣང་བ་དང་། སྐྱེས་པ་དང་ཕྲད་ཅིང་བསྟེན་པར་འདོད་པ་གང་ཡིན་པ་སྟེ། ཇི་སྐད་བཤད་པའི་མཚན་ཉིད་དེ་དག་དང་ལྡན་པའི་བུད་མེད་དེ་ནི་ཟླ་མཚན་ཅན་

ཡིན་པར་ཤེས་པར་བྱའོ། །དཔེར་ན་ཉི་མ་ནུབ་པ་ན། །པདྨའི་ཁ་ནི་ཟུམ་པར་འགྱུར། །དེ་བཞིན་ཟླ་མཚན་དུས་འདས་པའི། །མངལ་ནི་ཁུ་བ་ལེན་མི་འགྱུར། །ཞེས་བྱ་བ་ལ། དཔེར་ན་ཉི་མ་འཆར་བ་ནས་བརྩམས་ཏེ། ཉི་མའི་འོད་ཀྱིས་ཁ་བྱེ་བར་བྱས་པའི་པདྨ་ནི་ཉི་མ་ནུབ་པའི་རྗེས་ལ་

ཁ་ཟུམ་པར་འགྱུར་ཞིང་། ཁ་མ་བྱེ་བའི་མཚན་ཉིད་ཅན་དུ་འགྱུར་རོ། །དེ་བཞིན་དུ་བུད་མེད་ཀྱང་ཟླ་མཚན་འཛག་པ་ནས། ཉིན་ཞག་བཅུ་གཉིས་ཀྱི་བར་དུ་མངལ་གྱི་ཁ་བྱེ་བར་འགྱུར་ལ། དེ་ཕན་ཆད་ནི་ཁ་ཟུམ་པར་འགྱུར་བས། ཡང་ཁ་བྱེ་སྟེ། ཁུ་བ་ལེན་ཞིང་ཆགས་པར་མི་འགྱུར་རོ། །

Vol. 201 · folio 12a

ཟླ་བ་གཅིག་ཏུ་བསགས་པའི་ཁྲག །རྩ་ཆེན་གཉིས་ལས་དུས་སུ་ནི། །ཅུང་ཟད་གནག་ཅིང་དྲི་བྲལ་བ། །རླུང་གིས་མངལ་གྱི་སྒོ་རུ་འབྱིན། །ཞེས་བྱ་བ་ལ། ཟླ་བ་གཅིག་གི་བར་དུ་ཁ་ཟས་ཀྱི་བཅུད་ལ་སོགས་པས་འཕེལ་བར་བྱས་པའི་ཁྲག་གང་ཡིན་པ་སྟེ། རྩ་

ཆེན་པོ་གཉིས་ལས་ཟླ་མཚན་འཛག་པའི་དུས་སུ་རླུང་གིས་མངལ་གྱི་སྒོ་རུ་འདྲེན་ཞིང་འབྱིན་པར་བྱེད་པ་དེ་ཡང་ཁ་དོག་ཅུང་ཟད་གནག་པ་དང་། དྲི་དང་བྲལ་བ་སྟེ་དྲིང་བ་མེད་པ་ཡིན་ནོ། །དེ་ནས་ཟླ་མཚན་མཐོང་ཉིད་ནས། །ཞག་གསུམ་བར་དུ་སེམས་དགེ་བསམ། །རྒྱན་དང་ཁྲུས་

ནི་སྤང་བ་དང་། །ཀུ་ཤའི་སྟན་ལ་ཉལ་བ་དང་། །ནས་ཐུག་འོ་མར་བཙོས་ཉུང་ཟད། །བླུད་ཅིང་ལྟོ་སྦྱང་ཉམས་སྨད་བྱ། །ལོ་མའམ་རྫ་སྐྱོགས་ལེགས་པར་ནི། །བཟའ་ཞིང་འཁྲིག་པ་སྤང་བར་བྱ། །ཞེས་བྱ་བ་ལ། དེ་ལྟར་ཟླ་མཚན་བྱུང་བ་དེའི་འོག་ཏུ་བུད་མེད་དེས་སེམས་ལ་དགེ་

བ་བསམ་ཞིང་སེམས་མ་འཁྲུགས་པར་བྱ་བ་དང་། གདུ་བུ་དང་དོ་ཤལ་ལ་སོགས་པས་བརྒྱན་པ་དང་། ཁྲུས་བྱས་ཤིང་གཙང་སྦྲར་སྤྱོད་པ་དེ་གཉིས་དང་བྲལ་ཞིང་སྤང་བ་ལ། རྩྭ་ཀུ་ཤ་བཏིང་བའི་སྟན་གང་ཡིན་པ་དེ་ལ་ཉལ་བར་བྱ་བ་དང་། ནས་ཐུག་འོ་མ་དང་བཙོས་པའི་ཁ་ཟས་ཉུང་ཟད་ཅིག་ལོ་

མའམ་རྫ་སྐྱོགས་གཙང་མར་ལེགས་པར་བཟའ་ཞིང་སྤྱད་པ་དང་། ལྟོ་སྦྱང་ཞིང་ཉམས་སྨད་པར་བྱ་བའི་ཕྱིར་བྱའོ། །དེ་བཞིན་དུ་དེའི་ཚེ་འཁྲིག་པ་སྤང་ཞིང་སྐྱེས་པ་བསྟེན་པ་དོར་བར་བྱའོ། །དེ་ནས་ཞག་ནི་བཞི་པ་ལ། །ཁྲུས་བྱས་གོས་ཕྲེང་དཀར་ཞིང་གཙང་། །ཕ་དང་འདྲ་བའི་བུ་འདོད་ཅིང་། །མདུན་

དུ་ཁྱོ་ནི་བལྟ་བར་བྱ། །ཞེས་བྱ་བ་ལ། ཟླ་མཚན་བྱུང་ནས་ཞག་གསུམ་འདས་ཏེ་ཞག་བཞི་པ་ལ་བབ་པ་དང་། ཁྲུས་བྱས་ཤིང་གཙང་སྦྲ་སྤྱད་ནས། གོས་དཀར་པོ་བགོས་ལ་ཕྲེང་བ་གདགས་པ་དང་། གཙང་སྦྲ་དང་ལྡན་པས་ཕ་དང་འདྲ་བའི་བུ་འདོད་ཅིང་། བདག་ཉིད་ཀྱི་མདུན་དུ་ཁྱོ་གནས་

པ་ལ་བལྟ་བར་བྱའོ། །ཟླ་མཚན་ཞག་ནི་བཅུ་གཉིས་དུས། །དེ་ལས་དང་པོའི་ཞག་གསུམ་དང་། །བཅུ་གཅིག་པ་སྨད། ཅེས་བྱ་བ་ལ། ཟླ་མཚན་སྣང་བ་ནས་ཞག་བཅུ་གཉིས་ཀྱི་བར་དུ་ནི་དུས་ཏེ། ཟླ་མཚན་འཛིན་པའི་དུས་ཡིན་ལ། ཞག་བཅུ་གཉིས་པོ་དེ་དག་ལས་དང་པོའི་ཞག་

Vol. 201 · folio 12b

གསུམ་ནི་སྨད་ཅིང་སྤང་བར་བྱ་བ་ཡིན་པས། དེའི་ཚེ་འཁྲིག་པའི་བྱ་བ་མི་བྱའོ། །དེ་བཞིན་དུ་ཞག་བཅུ་གཅིག་པ་ཡང་སྨད་པར་བྱ་བ་ཡིན་ནོ། །ཚེས་ཟུང་ལ། བུར་འགྱུར་གཞན་དུ་བུ་མོར་འགྱུར། །ཞེས་བྱ་བ་ལ། ཚེས་བཞི་དང་། ཚེས་དྲུག་དང་། ཚེས་བརྒྱད་དང་། ཚེས་བཅུ་

དང་། ཚེས་བཅུ་གཉིས་དག་ནི་བུ་ཕོར་སྐྱེ་བར་འགྱུར་ལ། དེ་ལས་གཞན་པ་ཚེས་ལྔ་དང་། ཚེས་བདུན་དང་། ཚེས་དགུ་དང་། ཚེས་བཅུ་གཅིག་གིས་ཉེ་བར་མཚོན་པ་དག་ཏུ་ནི་བུ་མོར་སྐྱེ་བར་འགྱུར་རོ། །དེ་ནས་བུ་ཕྱིར་སློབ་དཔོན་གྱིས། །ཆོ་ག་ཆོ་ག་བཞིན་བྱས་ལ། །ཞེས་བྱ་བ་ལ། དེ་ནས་

དེའི་འོག་ཏུ་བུ་སྐྱེ་བར་བྱ་བའི་ཕྱིར། སློབ་དཔོན་དེའི་ཆོ་ག་ཤེས་པ་བྲམ་ཟེ་སྲིད་སྲུང་གི་རིག་བྱེད་ཤེས་པས་བུ་སྐྱེ་བའི་ཆོ་ག་ལས་ཤེས་པ་བཞིན་དུ་བྱ་ལ། དེ་ཡང་སྲིད་སྲུང་གི་རིག་བྱེད་ཀྱི་ཆོ་ག་ནི་བྲམ་ཟེ་ལ་སོགས་པའི་རིགས་གསུམ་གྱིས་བྱའོ། །དམངས་རིགས་ཕྱག་འཚལ་ལ་བརྩོན་པས། །

སྔགས་ཀྱིས་བྱ་བ་མེད་པར་བྱ། །ཞེས་བྱ་བ་ལ། དམངས་རིགས་ཀྱི་བུད་མེད་ཀྱི་བུ་འདོད་པའི་དོན་དུ་ཆོ་ག་ནི་ཕྱག་འཚལ་བ་ལ་བརྩོན་ཞིང་གཙོ་བོར་བྱས་པས་བྱ་ལ། དེ་ཡང་བྲམ་ཟེའི་གསང་ཚིག་གི་སྔགས་མི་བརྗོད་པར་སྔགས་ཀྱིས་བྱ་བ་མེད་པའི་རིག་བྱེད་ལ་སྨོས་པའི་ཆོ་ག་བྱའོ། །དེ་

ལྟར་འདོད་སྤྱོད་དོན་ལྡན་ཞིང་། །ཡིད་ལ་འདོད་པའི་བུ་སྐྱེད་འགྱུར། །ཞེས་བྱ་བ་ལ། དེ་ལྟར་ཇི་སྐད་དུ་བཤད་པའི་ཆོ་ག་བྱས་པའི་འོག་ཏུ་དུས་ལ་བབ་པར་འདོད་པ་སྤྱོད་ཅིང་། འཁྲིག་པ་ལ་སྦྱོར་བ་ནི་དོན་མེད་པར་མི་འགྱུར་ཏེ། མངལ་གྱི་འབྲས་བུ་དོན་ཡོད་པར་འགྱུར་བ་དང་། དེ་བཞིན་

དུ་ཡང་ཡིད་ལ་འདོད་པ་བཞིན་དུ་བུ་དང་བུ་མོ་གང་ཞིག་ལ་དགའ་བ་དེ་མངལ་དུ་ཆགས་པར་འགྱུར་རོ། །བུ་འདོད་བཟའ་བྲན་དབེན་པར་ནི། །འདོད་སྤྱད་བྱ་ཞེས་དམ་པ་སྨྲ། །ཞེས་བྱ་བ་ལ། གང་གི་ཕྱིར་དམ་པ་ངོ་ཚ་ཤེས་པ་དག་གིས་ནི་བུ་སྐྱེ་བར་འདོད་པའི་ཕྱིར་བཟའ་བྲན་ཏེ། སྐྱེས་པ་

དང་བུད་མེད་དག་དབེན་ཞིང་གཅིག་ཏུ་གནས་པར་འདོད་པ་སྤྱད་པར་བྱ་བ་ནི་མཆོག་ཡིན་ནོ་ཞེས་སྨྲ་སྟེ། འཁྲིག་པའི་བདེ་བ་ཙམ་ལ་ཆགས་པའི་སྒོ་ནས་བབ་ཅོལ་དུ་འདོད་པ་སྤྱོད་དེ། བུ་འདོད་པ་ཙམ་མ་ཡིན་ནོ། །གཞན་དུ་ན་བུ་བཟང་པོ་ཉིད་བསྐྱེད་པར་བྱ་བའི་དོན་དུ་བྱའོ་ཞེས་བྱ་བའི་དོན་ནོ། །

Vol. 201 · folio 13a

གཞན་དུ་རིགས་བཟང་དག་ལས་ཀྱང་། །བུ་ངན་རིགས་བསྲེག་མེ་འདྲར་འགྱུར། །ཞེས་བྱ་བ་ལ། དེ་ལས་གཞན་པར་ཚུལ་དང་མི་མཐུན་པར་བྱས་པའི་དབང་གིས་ནི། མངལ་དུ་ཆགས་པའི་ཕོའམ་མོ་གང་དག་ཡིན་པའི་རིགས་ཤིན་ཏུ་བཟང་པོ་མཐུ་རྩལ་ལ་སོགས་པ་དུ་མ་

དང་ལྡན་པའི་རིགས་བཟང་པོ་ལས་སྐྱེས་པ་ཡིན་དུ་ཟིན་ཀྱང་བུ་ཤིན་ཏུ་ངན་པར་འགྱུར་ཏེ། དེའི་རིགས་བསྲེག་མེ་འདྲར་འགྱུར་ཞེས་བྱ་བ་མཐོང་བ་དང་མ་མཐོང་བའི་རིགས་དང་ཡོན་ཏན་མ་ལུས་པ་འཇིག་པར་བྱེད་པའི་རྒྱུར་འགྱུར་བའི་མེ་ལྟར་བསྲེག་པའི་ཕྱིར་རིགས་ཀྱི་མེ་ཞེས་བྱའོ། །ཇི་ལྟ་བ་

ཡི་བུ་འདོད་པ། །དེ་ཡི་ཚུལ་དུ་དེ་ཡིས་སྤྱད། །ཡུལ་དེའི་སྐྱེ་བོའི་སྤྱོད་པ་དང་། །དེ་ཡི་ཡོ་བྱད་ལ་བསམ་བྱ། །ཞེས་བྱ་བ་ལ། གང་བཟའ་བྲན་དེ་གཉིས་བུ་དང་བུ་མོ་ཇི་ལྟར་འདོད་ཅིང་ཡིད་ལ་དགའ་བ་དེའི་གཟུགས་དང་སྤྱོད་པ་དང་། ཡིད་ལ་གང་འདོད་པ་དེ་འདྲ་བའི་ཁ་དོག་དང་དབྱིབས་

དང་ཚད་ཡིད་ལ་བསམ་པས་སྤྱད་པར་བྱ་བ་དང་། དེ་བཞིན་དུ་ཡུལ་གང་ན་སྐྱེས་བུ་གང་བདེན་པར་སྨྲ་བ་དང་། གཡོ་མེད་པ་དང་། གཏོང་བ་དང་། སྙིང་རྗེ་དང་ལྡན་ཞིང་སྦྱིན་གནས་སུ་གྱུར་པའམ། དཔའ་ཞིང་རྟུལ་ཕོད་པའི་རང་བཞིན་དེ་ཡིད་ལ་བསམ་ཞིང་མངོན་དུ་བྱ་བ་སྟེ། འདིར་རིགས་དང་

རྗེས་སུ་མཐུན་པའི་ལས་ཇི་ལྟ་བའི་ཚུལ་གྱི་སྤྱོད་པ་དང་། དེའི་ཡོ་བྱད་དང་། འཁོར་བྲན་ཕོ་དང་བྲན་མོ་དང་། རྟ་དང་བ་ལང་ལ་སོགས་པ་དང་། ནོར་བུ་དང་། འབྲུ་དང་། གོས་དང་། རྒྱན་རིན་པོ་ཆེ་དང་། ཤིང་རྟ་དང་། ཁྱིམ་དང་། སྐྱེད་མོས་ཚལ་དང་། པི་ཝང་དང་། གླིང་བུ་དང་། རྫ་རྔ་དང་།

རྔ་བོ་ཆེ་དང་། གླུ་དང་། རོལ་མོ་དང་། མལ་ཁྲི་དང་། སྟན་ལ་སོགས་པ་ཡིད་ལ་བསམས་པས་ཤེས་པར་བྱའོ། །ལས་མཐར་སྐྱེས་པས་ཞུན་མར་དང་། །འོ་མ་འབྲས་ཆན་བཅས་པ་བཟའ། །སྐར་མཁན་ལུང་གིས་མལ་ཁྲིར་ནི། །སྐྱེས་པ་དང་པོ་རྐང་གཡས་ཀྱིས། །འཛག་བྱ་བུད་

མེད་གཡོན་གྱིས་འཛེག །དེ་ཡི་གཡས་ལོགས་དག་ཏུ་ཉལ། །ཏིལ་མར་མོན་སྲན་གྲེའུ་སྦྱར་བཟའ། །ཞེས་བྱ་བ་ལ། བུ་སྐྱེ་བར་བྱ་བའི་ཆོ་ག་ལས་བྱས་ཟིན་པའི་མཐར་སྐྱེས་པས་ནི་ཞུན་མར་དང་འོ་མ་དང་འབྲས་ཆན་དུ་བཅས་པ་བཟའ་ཞིང་ལོངས་སྤྱད་ནས་བུད་མེད་ལས་སྔར་མལ་ཁྲིར་རྐང་པ་གཡས་

Vol. 201 · folio 13b

པ་སྔོན་དུ་འདོར་བར་འཛེག་པར་བྱས་ལ། དེ་ཡང་སྐར་མཁན་གྱི་ལུང་གིས་ཏེ་སྐར་མཁན་གྱིས་སྐད་ཅིག་མ་དག་ལ་བཟང་ཞིང་ཤིས་པར་བསྟན་པ་དེ་ལ་འཛེག་པར་བྱས་ལ། དེའི་འོག་ཏུ་བུད་མེད་རྐང་པ་གཡོན་པ་སྔོན་དུ་འགྲོ་བས་འཛེག་ལ། སྐྱེས་པ་ཁྲི་ལ་འཛེག་པ་དེའི་གཡས་ལོགས་

སུ་གནས་པར་བྱའོ། །དེ་ལ་ཁྱད་པར་དུ་ནི་བུད་མེད་ཀྱིས་སྔར་ཏིལ་མར་དང་བཅས་པའི་མོན་སྲན་གྲེའུ་སྟེ། སྲན་མ་མ་ཤ་ལྷག་པར་བཟའ་བར་བྱའོ། །དེར་ནི་སྔགས་ཀྱི་ཚིག་བརྗོད་བྱ། །ཨཱ་ཧཱི་ར་སི། ཨུ་ལུ་ར་སི། སརྦ་ཏཿཔྲ་ཏིཥྛ་སདྡྷི་ཏྭ་དྷན་དུ། བི་ཏྲ་ཏ་ཏྭ་ད་དན་དུ། བྲཧྨ་བརྩ་སྭ་བྷཱ་བ་

ཞེས་བྱའོ། །ཚངས་པ་ཕུར་བུ་ཁྱབ་འཇུག་དང་། །ཉི་ཟླ་ཐ་སྐར་བུ་གཉིས་དང་། །ལེགས་ལྡན་མཛའ་བོ་ཆུ་ལྷ་རྣམས། །བདག་ལ་དཔའ་བའི་བུ་སྩོལ་ཅིག །ཅེས་བྱ་བ་ལ། མལ་ཁྲིར་འཛེག་པའི་དུས་དེར་རིག་བྱེད་ལས་བྱུང་བའི་སྔགས་ཀྱི་ཚིག་ཨཱ་ཧཱི་ར་སི། ཞེས་བྱ་བ་ལ་སོགས་པ་

བརྗོད་ཅིང་། གསོལ་བ་གདབ་པའི་ཚིག་ཚངས་པ་ལ་སོགས་པའི་ལྷ་རྣམས་ཀྱིས་བདག་ལ་དཔའ་ཞིང་རྟུལ་ཕོད་པའི་བུ་སྙིང་སྟོབས་དང་ལྡན་པ་སྩོལ་ཅིག །ཅེས་ཀྱང་བརྗོད་པར་བྱའོ། །དེ་ནས་ཕན་ཚུན་སྤྲོ་བསྐྱེད་དེ། །དགའ་དང་བཅས་པས་གནས་པར་བྱ། །ཞེས་བྱ་བ་ལ། དེའི་རྗེས་ལ་ཁྱོ་

ཤུག་ཕན་ཚུན་གཅིག་ལ་གཅིག་སྤྲོ་བསྐྱེད་ཅིང་ཡིད་མགུ་བར་བྱ་བ་དང་། དགའ་བ་དང་བཅས་ཤིང་འཁྲིག་པའི་ཆོས་དང་ལྡན་པས་གནས་པར་བྱའོ། །བུད་མེད་དེར་སེམས་གན་རྐྱལ་གནས། །ཡན་ལག་ལེགས་པར་གནས་འདུག་བྱ། །དེ་ལྟར་ཉེས་པ་རང་གནས་འདུག །ས་བོན་ལེགས་

པར་འཛིན་པར་འགྱུར། །ཞེས་བྱ་བ་ལ། བུད་མེད་དངོས་པོ་དེ་ལ་ཡིད་གཏོད་པ་ལ་སོགས་པའི་ཚུལ་གྱིས་མགོ་དང་ལག་ངར་ལ་སོགས་པའི་ཡན་ལག་ལེགས་པར་གནས་པར་བྱ་བ་ལ་འདུག་པར་བྱས་ཏེ། གང་གི་ཕྱིར་རྣམ་པ་དེ་ལྟར་གནས་པ་དེའི་རླུང་ལ་སོགས་པའི་ནད་ཀྱི་ཉེས་པ་མ་འཁྲུགས་

པར་ཐ་མལ་པར་གནས་པས་བུའི་ས་བོན་དེ་ལེགས་པར་འཛིན་ཞིང་གནས་པར་འགྱུར་རོ། །འཕྲལ་དུ་མངལ་ཆགས་མཚན་མ་ནི། །མངལ་དུ་ས་བོན་འཛིན་པ་དང་། །འདོད་ངོམས་ལྕི་དང་གཡོ་བ་དང་། །ཁྲག་དང་ཁུ་བ་རྗེས་འདྲེས་དང་། །སྙིང་འཕར་བ་དང་སྙོམ་པ་དང་། །སྐོམ་དང་རྨྱ་

Vol. 201 · folio 14a

དང་བ་སྤུ་ལྡང་། །ཞེས་བྱ་བ་ལ། བུད་མེད་གང་འཕྲལ་དུ་མངལ་ཆགས་ཤིང་དུས་དེའི་ཚེ་བུ་ཆགས་པའི་མཚན་མ་ནི་འདི་དག་ཡིན་ཏེ། མངལ་དེར་བྱ་བ་བྱ་བའི་གཞིར་གྱུར་བར་ས་བོན་ཞེས་པ་བྱེད་པར་གྱུར་པའི་ཁུ་བ་དེ་འཛིན་ཞིང་ཆགས་པར་གྱུར་པ་དང་། འདོད་པས་

ངོམས་ཤིང་ཆོག་ཤེས་པར་འགྱུར་བ་དང་། ལུས་ཀྱི་ཁོང་ལྕི་བ་དང་། ཁུ་བ་དང་ཁྲག་རྗེས་སུ་འདྲེས་ཤིང་ཕན་ཚུན་འབྲེལ་པ་དང་། སྙིང་ཅུང་ཟད་འཕར་ཞིང་འགུལ་བ་དང་། གཉིད་ཀྱིས་ནོན་པ་བཞིན་དུ་དབང་པོ་རྣམས་ཡུལ་འཛིན་པར་མི་ནུས་ཤིང་སྙོམ་པ་དང་། སྐོམ་གྱིས་ཉེན་པ་དང་།

རྨྱ་ཞིང་དུབ་པ་དང་། སྤུ་ལྡང་ཞིང་དགའ་བས་བ་སྤུའི་ཁུང་བུ་གྱེས་པར་འགྱུར་བ་ཡིན་ནོ། །ཟླ་བ་དང་པོར་མི་གསལ་ཞག །བདུན་ནས་ནུར་ནུར་པོ་རུ་འགྱུར། །འདིར་ནི་མངལ་གྱི་བུ་སྐྱེས་པ། །གསལ་བར་མ་གྱུར་གོང་དུ་བྱ། །ཞེས་བྱ་བ་ལ། དང་པོ་ཟླ་བ་གཅིག་གི་ཞག་བདུན་ནི་མངལ་ན་

གནས་པ་དེ་མི་གསལ་ཞིང་ངེས་པར་མི་མངོན་པར་འགྱུར་ལ། ཞག་བདུན་པོ་དེ་དག་འདས་ནས་ནུར་ནུར་པོར་ཕལ་ཆེར་སྐ་སླ་འདྲེས་པའི་ཚུལ་དུ་ཟླ་བ་གཅིག་གི་བར་དུ་གནས་པ་ཡིན་ནོ། །དེ་ལྟར་མངལ་གྱི་གནས་གསལ་བར་མ་གྱུར་པའི་གོང་དུ་ཟླ་བ་དང་པོ་འདི་ལྟར་མངལ་གྱི་བུ་སྐྱེད་པའི་ཆོ་

ག་ཇི་ལྟར་མངོན་པར་འདོད་པ་བཞིན་དུ་འོག་ནས་བཤད་པ་ལྟར་བྱའོ། །སྐྱེས་བུ་བྱེད་པ་འདི་སྟོབས་ལྡན། །ལས་ཀྱང་ཟིལ་གྱིས་གནོན་པར་ནུས། །ཞེས་བྱ་བ་ལ། གང་གི་ཕྱིར་བུ་སྐྱེས་པའི་སྐྱེས་བུ་བྱེད་པའི་རྩོལ་བ་འདི་ནི་ཤིན་ཏུ་སྟོབས་དང་ལྡན་པ་ཡིན་པས་དེ་དང་མི་མཐུན་པའི་ཐ་མལ་པའི་

ལས་ཏེ། ཟིལ་གྱིས་མནན་ནས་ལྡང་བར་མི་ནུས་པར་བྱས་ཏེ་གནས་པ་ཡིན་ནོ། །བུ་སྐྱེས་པའི་ཆོ་ག་ནི་འདི་ཡིན་ཏེ། སྐར་མ་རྒྱལ་སྐྱེས་བུ་ཡི་གཟུགས། །གསེར་རམ་དངུལ་ལམ་ལྕགས་ལས་བྱས། །མ་མདོག་འགྱུར་བསྲེགས་འོ་མར་བཅུག །དེ་ནི་སྙིམ་གང་བླུད་པར་བྱ། །ཞེས་བྱ་

བ་ལ། སྐར་མ་རྒྱལ་ལ་བབ་པའི་དུས་སུ་སྐྱེས་པའི་གཟུགས་བརྙན་ཆུང་ངུ་ཞིག་གསེར་དངུལ་གྱི་རྒྱུ་ལས་བྱས་པའམ། ལྕགས་ནག་པོ་ལས་བྱས་ལ། དེ་མེར་ལེགས་པར་བསྲེགས་ལ། མེའི་མདོག་ཅན་དམར་པོར་བྱས་ལ། གཟུགས་བརྙན་དེ་འོ་མར་བཅུག་ཅིང་གསུར་ལ། གསུར་

Vol. 201 · folio 14b

བའི་འོ་མ་སྙིམ་པ་གང་སྟེ་སྲང་བཞིའི་ཚད་ཙམ་བླུད་པར་བྱའོ། །ཡང་ན་གོ་ར་དན་ད་དང་། །ཨ་བ་མརྒ་ཛི་བ་ཀ །ཟངས་རྩི་བ་དང་ཤེརྱ་ཀ །གཅིག་གམ་གཉིས་སམ་གསུམ་ཞིག་གམ། །ཐམས་ཅད་ཆུ་ལ་བཏགས་པ་ནི། །སྐར་མ་རྒྱལ་ལ་བབ་ཚེ་བླུད། །ཅེས་བྱ་བ་ལ། གོ་ར་དན་ད་ལ་སོགས་

པ་སྨན་སྣ་རེ་རེའམ་གཉིས་གཉིས་གཅིག་ཏུ་བྱ་བ་འམ། གསུམ་གསུམ་མམ་བཞི་བཞི་གཅིག་ཏུ་བསྲེས་པའམ། ཡང་ན་ཐམས་ཅད་བསྲེགས་ལ་ཆུ་དང་བཏགས་ཏེ་ལྡེ་གུར་བྱས་ནས་སྐར་མ་རྒྱལ་ལ་བབ་པའི་ཚེ་བཏུང་བར་བྱའོ། །བྲི་ཧ་ཏི་ནི་དཀར་པོའི་རྩ། །འོ་མར་བཏབ་པ་རང་ཉིད་

ཀྱིས། །བུ་འདོད་སྣ་ཁུང་གཡས་པར་བླུགས། །བུ་མོ་འདོད་ན་གཡོན་པར་བླུགས། །ཞེས་བྱ་བ་ལ། སྨན་བྲི་ཧ་ཏི་དཀར་པོའི་རྩ་བ་འོ་མ་དང་ལྡེ་གུར་སྦྱར་ལ། བུད་མེད་རང་ཉིད་ཀྱིས་བུ་འདོད་ན་ནི། དེའི་ཐིགས་པ་སྣ་ཁུང་གཡས་པར་བླུགས་པར་བྱའོ། །བུ་མོ་འདོད་ན་ནི་གཡོན་པར་བླུགས་

པར་བྱའོ། །ལག་སྨ་ནའི་རྩ་འོ་མར་སྦྱར། །བུ་སྐྱེད་གནས་པ་རབ་སྟེར་བྱེད། །དེ་བཞིན་ནྱ་གྲོའི་མྱུ་གུ་བརྒྱད། །སྦྱར་བ་སྣའམ་ཁ་ནས་བཏུང་། །ཞེས་བྱ་བ་ལ། སྨན་ལག་སྨ་ནའི་རྩ་བའི་འོ་མ་དང་ལྡེ་གུར་སྦྱར་ལ་འཐུངས་ན་བུ་སྐྱེ་བར་བྱེད་པ་དང་། སྔར་སྐྱེས་པ་ལེགས་པར་གནས་པ་རབ་ཏུ་

སྟེར་ཞིང་བསྐྱེད་པ་ཡིན་པ་དེ་བཞིན་དུ་ཤིང་ནྱ་གྲོ་དྷའི་མྱུ་གུ་སྐྱེས་པར་གྱུར་པ་བརྒྱད་དང་སྦྱར་བའི་འོ་མའི་ལྡེ་གུ་ཡང་སྐྱེད་པ་དང་གནས་པར་བྱེད་པ་ཡིན་པས་སྣར་བླུགས་པ་དང་ཁ་ནས་བཏུང་བར་བྱའོ། །འཚོ་བྱེད་ཀྱི་ནི་སྨན་སྡེ་རྣམས། །ཕྱི་དང་ནང་ནས་ཉེ་བར་སྦྱར། །ཞེས་བྱ་བ་ལ། འཚོ་བྱེད་

ཀྱི་སྨན་ཛི་བན་ཏི་དང་། ར་མཉེ་བ་ལ་སོགས་པ་བཅུ་པོ་ཁྲུས་དང་དྲིལ་ཕྱིས་ལ་སོགས་པ་ཕྱི་རོལ་ནས་བཏང་བ་དང་། བཟའ་བ་དང་བཏུང་བ་ལ་སོགས་པ་ནང་ནས་བཏང་ཞིང་ཉེ་བར་སྦྱར་བར་བྱའོ། །མངལ་འཛིན་ཡིད་འོང་ཕན་པ་ཡི། །ཁྱོ་དང་འཁོར་གྱིས་བསྙེན་བཀུར་བྱ། །ཞེས་བྱ་བ་ལ།

མངལ་འཛིན་པའི་བུད་མེད་ལ་སྡུག་ཅིང་ཕན་པར་འཛིན་པ་ཁྱོ་དང་གཡོག་འཁོར་དག་ཀྱང་ཡིད་དུ་འོང་ཞིང་ཕན་པར་བྱེད་པ་ཉིད་ཀྱིས་བསྙེན་བཀུར་གྱི་ལས་དེ་དང་རྗེས་སུ་མཐུན་པར་བྱས་ན། མངལ་དེ་ལེགས་པར་འཕེལ་ཞིང་རྒྱས་པར་འགྱུར་རོ། །མར་སར་ཞུན་མར་འོ་མ་རྣམས། །རྟག་

Vol. 201 · folio 15a

ཏུ་དེ་ལ་བླུད་པར་བྱ། །ཞེས་བྱ་བ་ལ། ཡང་མངལ་འཛིན་པའི་བུད་མེད་དེ་ལ་མར་སར་ལ་སོགས་པ་རྟག་ཏུ་བླུད་པས་ཀྱང་བསྙེན་བཀུར་བྱའོ། །ཉལ་པོ་དྲགས་དང་རྩོལ་དྲགས་དང་། །ཁུར་དང་གོས་ནི་ལྕི་བ་དང་། །ཉིན་ཉལ་ནུབ་མོ་གཉིད་མ་ལོག །སྟན་སྲབ་ཙོག་

པུར་འདུག་པ་དང་། །མྱ་ངན་ཁྲོ་དང་འཇིགས་དང་སྐྱོ། །ཤུགས་དང་སྲེད་པ་དགག་པ་དང་། །སྨྱུང་བ་ལམ་འགྲོ་རྣོ་དང་ཚ། །ལྕི་དང་བཤང་འགགས་ཟན་ཟ་དང་། །གོས་དམར་གྱོན་དང་གཡང་ས་དང་། །ཁྲོན་ལྟ་ཤ་ཟ་ཆང་འཐུང་དང་། །གན་རྐྱལ་ཉལ་དང་བུད་མེད་དང་། །མི་འདོད་

གང་ཡིན་དེ་ཀུན་སྤང་། །ཞེས་བྱ་བ་ལ། ཡང་མངལ་འཛིན་པའི་བུད་མེད་ཀྱིས་འཁྲིག་པ་སྤྱད་དྲགས་པ་ལ་སོགས་པ་སྤང་བར་བྱའོ། །འདིར་སྨོས་པ་འདི་དག་འབའ་ཞིག་སྤང་བར་མ་ཟད་ཀྱི། ཟས་དང་སྤྱོད་ལམ་ལ་སོགས་པའི་དངོས་པོ་གང་སྔར་མང་དུ་བུ་ཚ་སྐྱེ་མྱོང་བའི་བུད་མེད་མི་འདོད་

ཅིང་གནོད་པར་འགྱུར་བ་རྣམས་སམ། དུས་དེའི་ཚེ་བྱ་བ་ལ་མཁས་པའི་བུད་མེད་མི་འདོད་ཅིང་གནོད་པར་འགྱུར་བས་དེ་སྤང་ཞིང་དོར་བར་བྱའོ། །འདི་དག་གི་ཚིག་གི་དོན་ནི་གོ་བར་ཟད་དོ། །དེ་བཞིན་གཏར་ག་གདབ་སློན་ཁྲུས། །མས་གཏོང་ཟླ་བརྒྱད་པར་མི་བྱ། །ཞེས་བྱ་བ་ལ། དེ་དག་

འབའ་ཞིག་ཏུ་མ་ཟད་ཀྱི། གཏར་ག་གདབ་ཅིང་ཁྲག་དབྱུང་བར་བྱ་བ་དང་། སློན་དང་ཁྲུས་ཀྱིས་སྦྱང་བར་བྱ་བ་དང་། ནི་རུ་ཧ་ལ་སོགས་པའི་མས་གཏོང་བ་གསུམ་པོ་དག་ཀྱང་ཟླ་བ་བརྒྱད་ཀྱི་བར་དུ་མི་བྱའོ། །འདི་དག་གིས་ནི་མངལ་འཇིག་པའམ། །དཀུ་སྐམས་པའམ་འཆི་བར་

འགྱུར། །ཞེས་བྱ་བ་ལ། དེ་ལྟར་སྔར་བསྟན་པ་ཉལ་པོ་དྲགས་པ་ལ་སོགས་པ་དག་སྦྲུམ་མས་བྱས་སུ་ཟིན་ན། རྒྱུ་དེས་འབྲས་བུ་ལུས་ཆད་པ་བཞིན་དུ་མངལ་མ་སྨིན་པར་མངལ་འཇིག་པར་འགྱུར་རོ། །ཡང་ན་དཀུ་སྐམས་ཤིང་མངལ་དུ་གནས་པ་འཕེལ་མི་ནུས་པར་འགྱུར་བའམ།

ཡང་ན་མངལ་ན་གནས་པའི་སེམས་ཅན་དེ་འཆི་ཞིང་སྲོག་དང་བྲལ་བར་འགྱུར་རོ། །རླུང་ནི་སྐྱེད་པར་བྱེད་པས་མངལ། །སྒུར་པོ་འོན་ལོང་མིའུ་ཐུང་འགྱུར། །མཁྲིས་པ་ཅན་གྱིས་སྤྱི་ཙེར་སེར། །བད་ཀན་ཤ་བཀྲ་སྐྱ་རྦབ་འགྱུར། །ཞེས་བྱ་བ་ལ། ཟས་དང་སྤྱོད་ལམ་རླུང་སྐྱེད་པར་བྱེད་

Vol. 201 · folio 15b

པ་བསྟེན་པས་ནི་མངལ་ན་གནས་པའི་སེམས་ཅན་དེ་སྒུར་པོ་དང་། ལོང་བ་དང་། འོན་པ་དང་། མིའུ་ཐུང་དུ་འགྱུར་རོ། །ཟས་དང་སྤྱོད་ལམ་མཁྲིས་པ་སྐྱེད་པར་བྱེད་པ་བསྟེན་པས་ནི་མངལ་ན་གནས་པ་ནི་སྤྱི་ཅེར་རམ་སྐྲ་སེར་བ་ལ་སོགས་པར་འགྱུར་རོ། །ཟས་དང་སྤྱོད་ལམ་དང་སྨན་བད་ཀན་

ཅན་བསྟེན་པས་ནི་མངལ་ན་གནས་པ་དེ་ཤ་བཀྲ་ཅན་ནམ། སྐྱ་རྦབ་ཅན་དུ་འགྱུར་རོ། །ནད་གཞན་འཇམ་ཞིང་བདེ་བ་དང་། །རྣོན་པོ་མ་ཡིན་སྨན་གྱིས་གསོ། །ཞེས་བྱ་བ་ལ། སྦྲུམ་མ་དེ་ལ་ནད་གང་ཞིག་བྱུང་བར་གྱུར་པ་ནི་འཇམ་ཞིང་བདེ་བར་གྱུར་པའོ། །མར་དང་། འོ་མ་དང་། ཤ་ཁ་

ར་དང་། རྒུན་འབྲུམ་ལ་སོགས་པ་དང་། སྨན་གྱི་རྣམ་པ་རྣོན་པོ་མ་ཡིན་པ་དོང་ག་ལ་སོགས་པས་གསོ་ཞིང་ནད་བསལ་བར་བྱའོ། །ནུར་ནུར་པོ་ལས་ཟླ་གཉིས་པར། །གོར་གོར་མེར་མེར་ནར་ནར་པོའོ། །དེ་ལས་ཕོ་མོ་མ་ནིང་རིམ། །ཞེས་བྱ་བ་ལ། མངལ་ཆགས་ནས་ཟླ་བ་གཉིས་པ་

ལ་ནུར་ནུར་པོ་དེ་ལས་གོར་གོར་པོའམ། མེར་མེར་པོའམ། ནར་ནར་པོར་གྱུར་ལ། གོར་གོར་པོ་ལ་སོགས་པ་དེ་དག་ལས་རིམ་གྱིས་ཕོ་དང་མོ་དང་མ་ནིང་དུ་འགྱུར་ཏེ། དེ་ལས་གོར་གོར་པོ་ལས་ནི་སྐྱེས་པར་འགྱུར་རོ། །མེར་མེར་པོ་ལས་ནི་མོར་འགྱུར་ལ། ནར་ནར་པོ་ལས་ནི་སྐྱེས་པ་

ཡང་མ་ཡིན་བུད་མེད་ཀྱང་མ་ཡིན་པའི་མ་ནིང་དུ་འགྱུར་རོ། །དེ་ནས་གསལ་འགྱུར་མཚན་མ་ནི། །རིད་ཅིང་དཀུ་ནི་ལྕི་བ་དང་། །བརྒྱལ་སྐྱུགས་ཡི་ག་འཆུས་པ་དང་། །གླལ་དང་མཆིལ་མང་སྙོམ་བག་དང་། །སྤུ་ཡི་ཕྲེང་བ་གསལ་བ་དང་། །སྐྱུར་ལ་དགའ་ཞིང་ནུ་མ་རྒྱས། །ནུ་ཞོར་

བཅས་ཤིང་རྩེ་མོ་གནག །རྐང་པ་སྐྲངས་ཤིང་ཁ་ཟས་ཚ། །སྲེད་པ་སྣ་ཚོགས་ཉིད་དུ་འགྱུར། །ཞེས་བྱ་བ་ལ། དེ་ནས་ཟླ་བ་གཉིས་པ་དེ་ལ་ནི་སྦྲུམ་མ་དེའི་མངལ་ན་གནས་པའི་མཚན་མ་གསལ་པོ་འབྱུང་བར་འགྱུར་ཏེ། འདི་ལྟར་རིད་ཅིང་སྤེགས་པའམ། དཀུའམ་ལྟོ་བ་ལྕི་བའམ་

བརྒྱལ་ཞིང་འབོག་པ་དང་། སྐྱུག་ཅིང་སློན་པ་དང་། ཡི་ག་འཆུས་ཤིང་ཟས་ལ་མངོན་པར་མི་དགའ་བ་དང་། ཡན་ལག་འགྱུར་བ་དང་བཅས་པའི་གླལ་བ་དང་། མཆིལ་སྣབས་མང་བ་དང་། ཡན་ལག་སྙོམ་ཞིང་རྨྱ་བ་དང་། སྤུའི་ཕྲེང་བ་བྲང་ལ་གནས་པ་གསལ་ཞིང་ཁ་གྱེས་པ་དང་།

Vol. 201 · folio 16a

སྐྱུར་བག་ལ་དགའ་ཞིང་འདོད་པ་དང་། ནུ་མ་རྒྱས་པར་འགྱུར་བ་དང་། དེ་བཞིན་དུ་འོ་མ་ཅུང་ཟད་བཅས་ཤིང་ནུ་ཏོག་གི་རྩེ་མོ་ནག་པོར་འགྱུར་བ་དང་། རྐང་པ་གཉིས་ཅུང་ཟད་སྐྲངས་པ་དང་། ཁ་ཟས་ཟོས་པ་ཚ་ཞིང་སྐྱུར་བར་འགྱུར་བ་དང་། དེ་བཞིན་དུ་སྲིད་པ་མཆོག་

དང་ཐ་མ་སྐྱེ་ཞིང་ཕན་པ་དང་། གནོད་པའི་ཡུལ་དུ་མི་འདོད་པ་ཉིད་དུ་འགྱུར་རོ། །འདི་ཡི་སྙིང་ནི་མ་ལས་སྐྱེས། །མ་ཡི་སྙིང་ཡང་དེ་དང་ནི། །འབྲེལ་པས་དེ་ཕྱིར་སྦྲུམ་མ་ནི། །སྲེད་པ་དགག་པར་མི་བྱའོ། །དེ་ལ་གནོད་པར་འགྱུར་བ་ཡང་། །ཕན་དང་བསྲེས་ཏེ་ཅུང་ཟད་སྦྱིན། །སྲེད་

པ་བཀག་ན་མངལ་གྱི་བུ། །མི་སྡུག་པའམ་འཇིག་པར་འགྱུར། །ཞེས་བྱ་བ་ལ། །གང་གི་ཕྱིར་མངལ་ན་གནས་པ་འདིའི་སྙིང་ངམ་སེམས་ཀྱི་གནས་དེ་ནི་མ་ལས་སྐྱེས་པ་ཡིན་ལ། དེ་ནས་མངལ་ན་གནས་པ་དེའི་སྙིང་མའི་སྙིང་དང་རྗེས་སུ་འབྲེལ་ཞིང་འབྱོར་བའི་ཆ་ཡོད་པ་ཡིན་ནོ། །

དེའི་ཕྱིར་རྒྱུ་དེས་ན་སྦྲུམ་མ་དག་གང་ལ་སྲེད་ཅིང་འདོད་པ་དགག་ཅིང་ཡིད་ལ་རེ་བ་རྫོགས་པར་མི་བྱ་བར་བརྙས་ཐབས་སུ་གཞག་པར་མི་བྱའོ། །དེ་བས་སྦྲུམ་མ་དེ་ཟས་ལ་སོགས་པ་གནོད་པར་འགྱུར་བ་ཞིག་གིས་འདོད་པར་གྱུར་ན་ཡང་གནོད་པར་འགྱུར་བ་དེ་ཕན་པར་འགྱུར་བའི་ཟས་མང་

པོ་དང་བསྲེས་ཏེ། གནོད་པ་དེ་ཆེས་མང་བར་བྱས་ལ། ཅུང་ཟད་ཙམ་བྱིན་པས་འདོད་པ་བསྐང་བར་བྱའོ། །གལ་ཏེ་དེ་ལྟ་མ་ཡིན་ཏེ། སྲེད་པ་བཀག་ན་མངལ་གྱི་བུ་དེ་གཟུགས་མི་སྡུག་པའམ། གནས་སྐབས་གཞན་དུ་འགྱུར་བའམ། འཇིག་ཅིང་གནས་ལས་འཕོ་བ་ཉིད་དུ་

འགྱུར་རོ། །ཟླ་བ་གསུམ་པར་དེ་ཡི་ལུས། །མགོ་བོ་དཔྱི་གཉིས་དཔུང་པ་གཉིས། །ཡན་ལག་ལྔ་ནི་གསལ་དོད་འགྱུར། །ཡན་ལག་ཕྲ་མོ་རྣམས་ཀྱང་འབྱུང་། །མགོ་བོ་སོགས་དང་ཆ་མཉམ་དུ། །བདེ་དང་སྡུག་བསྔལ་ཤེས་པ་འབྱུང་། །ཞེས་བྱ་བ་ལ། མངལ་ཆགས་པའི་

ཟླ་བ་གསུམ་པ་ལ་ནི་དེའི་ལུས་ཡན་ལག་ལྔ་གསལ་བར་དོད་པར་འགྱུར་ཏེ། མགོ་བོ་ནི་ཡན་ལག་གཅིག་གོ། །དེ་བཞིན་དུ་དཔུང་པ་གཉིས་དང་། དཔྱི་གཉིས་དང་དེ་ལྟར་ཡན་ལག་ལྔ་དོད་པར་འགྱུར་རོ། །དེ་བཞིན་དུ་ཡན་ལག་ཕྲ་མོ་རྣམས་ཀྱང་རིམ་གྱིས་འབྱུང་བར་འགྱུར་ཞིང་།

Vol. 201 · folio 16b

མགོ་ལ་སོགས་པ་རྣམས་དང་ཆ་མཉམ་ཞིང་མཚུངས་པ་ཉིད་དུ་ཤེས་པ་དང་། སྡུག་བསྔལ་ཤེས་པ་ཡང་དེའི་ཚེ་འབྱུང་བར་འགྱུར་རོ། །མངལ་གནས་ལྟེ་བ་མ་ཡི་ནི། །སྙིང་གི་རྩ་དང་འབྲེལ་བའི་ཕྱིར། །དེ་ཡིས་དེ་ནི་འཕེལ་འགྱུར་ཏེ། །ཞིང་གི་ཡུར་བ་དག་དང་མཚུངས། །ཞེས་བྱ་

བ་ལ། མངལ་ན་གནས་པའི་སེམས་ཅན་དང་། མའི་སྙིང་གི་རྩ་དང་ལས་ཀྱི་དབང་གིས་འབྲེལ་བར་གནས་ཏེ། དེའི་ཕྱིར་རྩ་རྒྱུན་དེ་ནས་མངལ་ན་གནས་པའི་ལུས་འཕེལ་ཞིང་རྒྱས་པར་འགྱུར་ཏེ། དཔེར་ན་འབྲས་ལ་སོགས་པའི་ཞིང་ཡུར་བ་ནས་ཆུ་དྲངས་ཏེ། དེས་ཞིང་གི་ལོ་ཏོག་འཕེལ་ཞིང་

རྒྱས་པར་འགྱུར་བ་དང་འདྲའོ། །བཞི་པར་ཡན་ལག་གསལ་དོད་འགྱུར། །ལྔ་པར་སེམས་ནི་གསལ་བར་འགྱུར། །ཞེས་བྱ་བ་ལ། ཟླ་བ་བཞིའི་སྐབས་སུ་མངལ་ན་གནས་པའི་སེམས་ཅན་དེའི་ཡན་ལག་ཐམས་ཅད་མི་གསལ་བ་ལས་གསལ་བར་དོད་པར་འགྱུར། ཟླ་བ་ལྔ་པར་ནི་སེམས་

གསལ་བ་མ་ཡིན་པ་དེ་སྔར་བས་ཆེས་གསལ་བར་འགྱུར་རོ། །དྲུག་པར་ཆུ་བ་རྩ་དང་སྤུ། །སེན་མོ་པགས་པ་མདོག་སྟོབས་འགྱུར། །བདུན་པར་དངོས་པོ་ཐམས་ཅད་ཀྱི། །ཡན་ལག་ཀུན་ནི་རྫོགས་པར་འགྱུར། །ཞེས་བྱ་བ་ལ། ཟླ་བ་བདུན་པར་ནི་རྣམ་པ་ཐམས་ཅད་ནས་ཐམས་ཅད་དུ་

ཡན་ལག་ཐམས་ཅད་རྫོགས་ཤིང་འཕེལ་བ་ཁོ་ནར་འགྱུར་རོ། །མངལ་གནས་ནད་ཀྱིས་ཉེར་གཟིར་ན། །དེ་ཚེ་སྙིང་དང་འབྲེལ་བའི་ཕྱིར། །གཡའ་དང་ཚ་བར་བྱེད་པ་དང་། །ལྤགས་གས་རྨ་ཕྲན་འབྱུང་བར་འགྱུར། །ཞེས་བྱ་བ་ལ། མངལ་ན་གནས་པའི་སེམས་ཅན་རླུང་ལ་སོགས་པའི་ནད་

ཀྱིས་གཟིར་ན་དེའི་ཚེ་མའི་སྙིང་དང་དེ་འབྲེལ་བ་ཡིན་པའི་ཕྱིར་ནད་དེ་ཡང་འབྱུང་སྟེ། མངལ་གཡའ་བ་དང་ཚ་བར་བྱེད་པ་དང་། པགས་པའི་རྨ་ཕྲ་མོ་འདྲ་བ་པགས་པ་ཅུང་ཟད་གས་པའི་ནད་བརླ་དང་ནུ་མ་དང་བྲང་ལ་སོགས་པར་འབྱུང་བར་འགྱུར་རོ། །དེ་བཞིན་དུ་རྐང་པ་དང་ལག་པའི་མཐིལ་དང་། མཆན་

ཁུང་ལ་སོགས་པ་ཚ་བར་བྱེད་པར་འགྱུར་རོ། །དེར་ནི་མར་སར་རྒྱ་ཤུག་ཆུ། །མངར་བའི་སྨན་སྡེ་བསྐོལ་བ་ཕན། །ཞེས་བྱ་བ་ལ། དེ་ལྟ་བུའི་གཡའ་བ་ལ་སོགས་པའི་ནད་ཞི་བར་བྱ་བའི་ཕྱིར་མར་སར་དང་། རྒྱ་ཤུག་བསྐོལ་བའམ། མངར་བའི་སྨན་གྱི་སྡེ་ཚན་འཚོ་བྱེད་ལ་སོགས་

Vol. 201 · folio 17a

པའམ། རྒུན་འབྲུམ་ལ་སོགས་པའི་སྨན་ལྡེ་གུར་བྱས་པ་དང་། མར་བསྐོལ་བ་ཕྱི་རོལ་ནས་བསྐུ་ཞིང་ནང་ནས་བཏུང་བ་ལ་སོགས་པ་ཕན་པ་ཡིན་ནོ། །ལན་ཚྭ་ཉུང་ཞིང་སྣུམ་བག་ཅན། །ཡང་ཞིང་མངར་བའི་ཁ་ཟས་བཟའ། །ཞེས་བྱ་བ་ལ། ཡང་དེར་ཁ་ཟས་ནི་

ལན་ཚྭ་ཉུང་ཞིག་བཏབ་པ་དང་། སྣུམ་བག་དང་བཅས་པ་དང་། ཚད་དང་རང་བཞིན་གྱིས་ཡང་བ་དང་། མངར་བག་གི་ཁ་ཟས་བཟའ་བ་ཕན་ནོ། །ཙནྡན་པུ་ཤེལ་ཙེའི་ལྡེ་གུས། །བྲང་དང་ནུ་མ་ལྟོ་ལ་བསྐུ། །ཞེས་བྱ་བ་ལ། ཙནྡན་དང་ཨུ་ཤི་ར་ཆུ་འཐགས་སུ་བཏགས་པའི་ལྡེ་གུ་སླ་

བས་བྲང་ལ་སོགས་པ་བསྐུ་བར་བྱའོ། །འབྲས་བུ་གསུམ་པའམ་ཨེ་ནེ་ཡ། །ཤ་བཀྲ་རི་བོང་ཁྲག་སྦྱར་བསྐུ། །ཞེས་བྱ་བ་ལ། ཡང་ན་འབྲས་བུ་གསུམ་པོ་ལྡེ་གུར་བྱས་པའམ། །རི་དྭགས་ཨེ་ནེ་ཡ་དང་། ཤ་བཀྲ་དང་། རི་བོང་གི་ཁྲག་དང་ལྷན་ཅིག་བཏགས་པས་བྲང་དང་ནུ་མ་དང་

ལྟོ་བ་ལ་སོགས་པ་ལ་བསྐུ་བར་བྱའོ། །ཀ་ར་བཱི་རའི་ལོ་མ་དང་། །ཏིལ་མར་བསྐོལ་བས་བསྐུས་ཏེ་མཉེ། །པ་ཏོ་ལ་དང་ནིམ་པ་བཙོད། །བྱེའུ་རུག་གིས་ཀྱང་བསྐུ་བར་བྱ། །ཞེས་བྱ་བ་ལ། ཡང་ཀ་ར་བཱི་ར་དང་ལྷན་ཅིག་བསྐོལ་བའི་ཏིལ་མར་བསྐུས་ལ་ལེགས་པར་མཉེ་བར་བྱའོ། །

དེ་བཞིན་དུ་པ་ཏོ་ལ་ལ་སོགས་པའི་སྨན་དང་བསྐོལ་བའི་ཏིལ་མར་གྱིས་ཀྱང་བསྐུ་ཞིང་མཉེ་བར་བྱའོ། །སྐྱེར་པ་ཤིང་མངར་ཆུ་ཡིས་ནི། །བཀྲུ་དང་བསྐུ་བ་བསྟེན་པར་བྱ། །ཞེས་བྱ་བ་ལ། དེ་བཞིན་དུ་སྐྱེར་པ་དང་ཤིང་མངར་བསྐོལ་བའི་ཆུས་བཀྲུ་བ་དང་དྲིལ་ཕྱིས་ལ་སོགས་པ་བྱའོ། །ཟླ་བ་

བརྒྱད་པར་མ་དང་བུ། །ཐང་རེ་རིམ་གྱིས་གཟི་མདངས་འཕོ། །དེ་ཡིས་དེ་གཉིས་ཞུམ་དགར་འགྱུར། །བྱིས་མདངས་མ་ལ་མི་གནས་པས། །དེ་ཚེ་བཙས་ན་མི་འཚོ་ལ། །བུད་མེད་ཐེ་ཙོམ་བཅས་སྐབས་འགྱུར། །ཞེས་བྱ་བ་ལ། །ཟླ་བ་བརྒྱད་པའི་ཚོགས་ལ་བབ་པ་དང་། མ་

དང་མངལ་ན་གནས་པའི་བུ་གཉིས་ཐང་རེ་ཡང་དང་ཡང་དུ་རིམ་གྱིས་ལུས་ཟུངས་ཐམས་ཅད་ཀྱི་དྭངས་མའི་བཅུད་ཕན་ཚུན་འཕོས་ཏེ། ཕྱེད་འགའ་ནི་མ་ལ་འཕོ། ཕྱེད་འགའ་ནི་བུ་ལ་འཕོའོ། །དེ་ལྟར་མདངས་འཕོ་བ་དེས་མ་དང་བུ་གཉིས་ཀྱི་ལུས་ཞུམ་པ་དང་དགའ་བར་འགྱུར་ཏེ། གང་

Vol. 201 · folio 17b

གི་ཚེ་མདངས་དེ་མངལ་གྱི་བུ་ལ་འགྱུར་ན་དེའི་ཚེ་མངལ་ན་གནས་པ་ནི་དགའ་ཞིང་མདངས་ཅན་དུ་འགྱུར་ལ། སྦྲུམ་མ་ནི་ལུས་ཞུམ་པར་འགྱུར་རོ། །གང་གི་ཚེ་དྭངས་མ་དེ་ལ་མངལ་འཕོས་པ་དེའི་ཚེ་མ་ནི་དགའ་བར་འགྱུར་ལ། བུ་ནི་ཞུམ་པར་འགྱུར་རོ། །ཡང་དུས་དེའི་ཚེ་བྱིས་པ་བཅས་

ནའང་མི་འཚོའོ། །ཅིའི་ཕྱིར་ཞེ་ན། བྱིས་པའི་མདངས་མའི་མངལ་ན་མི་གནས་ཤིང་བརྟན་པོར་མ་གྱུར་པའི་ཕྱིར་རོ། །དེ་ལྟར་འཕོས་པ་དེའི་ཚེ་བཙས་ན་བུད་མེད་ཀྱི་སྲོག་ནི་ཐེ་ཙོམ་དང་བཅས་པར་འགྱུར་ཏེ། འཚོ་བར་འགྱུར་བའང་སྲིད་པའི་དོན་ནོ། །འདིར་ནི་འོ་མ་ཅན་བླུད་ཅིང་། །མངར་

བའི་སྨན་དང་བསྐོལ་བ་ཡི། །མར་གྱི་འཇམ་རྩི་གཏང་བྱ་ཞིང་། །ཕྱི་ས་རྙིང་པ་དག་བྱའི་ཕྱིར། །ལ་ཕུག་སྐམ་དང་རྒྱ་ཤུག་སྐྱུར། །བསྐ་བ་དང་ནི་བསྐོལ་བ་བསྔགས། །ཤ་ཏ་པུཥྤའི་ལྡེ་གུ་ནི། །རྒྱམ་ཚ་ཏིལ་མར་འཇམ་རྩི་གཏང་། །ཞེས་བྱ་བ་ལ། ཟླ་བ་བརྒྱད་པའི་སྐབས་

འདིར་སྦྲུམ་མ་ལ་འོ་མ་དང་བསྐོལ་བའི་ནས་ཐུག་བླུད་པར་བྱའོ། །ཡང་ཟླ་བ་བརྒྱད་པའི་སྐབས་འདིར་འཚོ་བྱེད་ལ་སོགས་པའི་སྡེ་ཚན་དུ་གཏོགས་པ་སྨན་མངར་བའི་ལྡེ་གུ་དང་བསྐོལ་བའི་མར་གྱི་འཇམ་རྩི་གཏང་བར་བྱའོ། །ཡང་ཟླ་བ་བརྒྱད་པའི་སྐབས་འདིར་ཕྱི་ས་རྙིང་པ་དག་པར་བྱ་བའི་

ཕྱིར་ལ་ཕུག་སྐམ་པོ་དང་། རྒྱ་ཤུག་སྐྱུར་པོ་དང་། སྨན་བསྐ་བ་དང་བསྐོལ་བའི་མར་གྱི་འཇམ་རྩིའམ། ཤ་ཏ་པུཥྤའི་ལྡེ་གུ་རྒྱམ་ཚ་དང་ཏིལ་མར་དུ་བཅས་པའི་འཇམ་རྩི་གཏང་བ་བསྔགས་པ་ཡིན་ནོ། །དེ་ཚེ་ཞག་གཅིག་འདས་པ་ནའང་། །དུས་སུ་བཙས་ཡིན་དེ་ཕན་ཆད། །རླུང་གིས་

དཀུར་ནི་བཀག་གྱུར་ན། །ལོ་ཡི་བར་དུ་གནོད་པ་བྱེད། །ཅེས་བྱ་བ་ལ། ཟླ་བ་བརྒྱད་པ་དེ་འདས་ནས་ཞག་གཅིག་ལོན་ཕན་ཆད་ཀྱང་བཙས་པའི་དུས་ཡིན་པས། དེ་ཡང་བཙས་པ་ནི་དུས་སུ་བཙས་པ་ཞེས་བྱ་ལ། དེ་ཕན་ཆད་ལོ་གཅིག་གི་བར་དུ་རླུང་གིས་མངལ་གྱི་གནས་སུ་བཀག་

ཅིང་འབྱུང་དུ་མི་སྟེར་ན། གནོད་པའི་ནད་སྐྱེད་པར་བྱེད་པ་ཡིན་ནོ། །ཟླ་དགུ་ལོན་ན་སྣུམ་བཅས་པའི། །འབྲས་ཆན་ཤ་ཁུ་བླུད་པར་སྔགས། །སྣུམ་མང་ནས་ཐུག་སྦྱིན་པའམ། །སྔར་བཤད་པ་ཡི་འཇམ་རྩི་གཏང་། །ཞེས་བྱ་བ་ལ། སྦྲུམ་མ་དེ་ཟླ་བ་དགུ་བ་ལ་བབ་པའི་ཚེ། ཤ་ལ་སོགས་

Vol. 201 · folio 18a

པའི་སྣུམ་དང་བཅས་པ་འབྲས་ཆན་དང་མར་དང་ཤ་ཁུ་བླུད་ན་ཕན་ཞིང་བསྔགས་པའམ། ནས་ཐུག་མར་མང་པོ་བཏབ་པ་བྱིན་ན་ཕན་པའམ། དེ་བཞིན་བཤད་མ་ཐག་པའི་སྨན་མངར་བ་དང་བསྐོལ་བའི་མར་གྱི་འཇམ་རྩི་གཏང་བར་བྱའོ། །དེ་ཉིད་ལ་བཅུག་རས་

བལ་ནི། །མཚན་མར་རྟག་ཏུ་གཞུག་པར་བྱ། །ཞེས་བྱ་བ་ལ། འཇམ་རྩི་སྦྱར་བའི་མར་དེ་ཉིད་ལ་བཅུག་ཅིང་སྤངས་པའི་རས་བལ་གྱི་ཡེའུ་ཡང་སྦྲུམ་མ་དེའི་མོ་མཚན་དུ་གཞུག་པར་བྱ་སྟེ། དེས་ནི་རླུང་གི་ནད་སེལ་བར་འགྱུར་རོ། །རླུང་འཇོམས་ལོ་མ་བསྐོལ་བའི་ཆུ། །བསྒྲངས་

པས་ཉིན་རེ་བཀྲུས་པ་ཕན། །ཞེས་བྱ་བ་ལ། རླུང་འཇོམས་པར་བྱེད་པའི་སྨན་སྲོ་མ་ལ་སོགས་པའི་ལོ་མ་བརྡུངས་པ་བསྐོལ་བའི་ཆུ་བཙགས་པ་བསྒྲངས་པས་ཉིན་རེ་ཞིང་བཀྲུས་ན་ཡང་སྦྲུམ་མ་ལའང་ཕན་པ་ཡིན་ནོ། །ཟླ་དགུ་ཕན་ཆད་ལུས་ལ་ནི། །སྣུམ་མེད་པར་ནི་མི་གཞག་གོ། །

ཞེས་བྱ་བ་ལ། སྦྲུམ་མ་ཟླ་བ་དགུ་པ་ལ་བབ་པ་ནས་བཙས་ཀྱི་བར་དུ་རྟག་ཏུ་སྣུམ་གྱིས་ལུས་ལ་བསྐུ་བར་བྱ་ཞིང་། སྣུམ་མེད་པར་གཞག་པར་མི་བྱའོ། །ནུ་ཞོ་གཡས་པ་སྔར་བྱུང་ཞིང་། །གཡས་ལོགས་ལ་ནི་བརྟེན་པ་དང་། །འདྲི་ཚིག་སྐྱེས་པའི་མིང་ཅན་སྨྲ། །དགའ་ཞིང་

རྨི་ལམ་སྐྱེས་པ་མཐོང་། །དཀུ་ནི་གཡས་པ་མཐོ་བ་དང་། །མངལ་ཡང་ཀུན་ནས་ཟླུམ་པ་དག །བུ་སྐྱེ། ཞེས་བྱ་བ་ལ། བུད་མེད་གང་གི་ནུ་མ་གཡས་པའི་ནུ་ཞོ་སྔར་བྱུང་བ་དེ་ལ་ནི་བུ་སྐྱེ་བར་འགྱུར་རོ། །དེ་བཞིན་དུ་གཡས་ལོགས་ལ་བརྟེན་ཅིང་གནས་པའམ། གཡས་

ནས་འགྲོ་བ་རྨི་བ་ལ་སོགས་པ་རྨི་བ་དང་འདྲ་བའི་ཚིག་སྐྱེས་པའི་མིང་ཅན་གྱི་དངོས་པོ་སྨྲ་བ་ལ་དགའ་བ་དང་། རྨི་ལམ་དུ་སྐྱེས་པ་དང་གླང་པོ་ཆེ་ལ་སོགས་པ་མཐོང་བ་དང་། དེ་བཞིན་དུ་དཀུ་གཡས་ལོགས་མཐོ་ཞིང་ཆེ་བ་དང་། དེ་བཞིན་དུ་མངལ་ཀུན་ནས་ཟླུམ་པར་གནས་ན་བུ་སྐྱེ་བར་འགྱུར་

རོ། །གཞན་དུ་བུ་མོར་འགྱུར། །གང་ཡང་སྐྱེས་པ་ཕྲད་འདོད་དང་། །གླུ་གར་རོལ་མོ་ལ་དགའ་དང་། །དྲི་དང་ཕྲེང་ཆགས་བུ་མོ་སྐྱེ། །ཞེས་བྱ་བ་ལ། བུ་སྐྱེ་བའི་མཚན་ཉིད་དང་མི་མཐུན་པ་དེ་ནི། གཞན་དུ་ཞེས་བྱ་བ་ལ། དེ་ཡང་དངོས་སུ་ནུ་མ་གཡོན་པ་ནས་དང་པོ་ཞོ་བྱུང་བ་ལ་

Vol. 201 · folio 18b

སོགས་པ་ནི་བུ་མོ་སྐྱེ་བའི་མཚན་ཉིད་ཡིན་ནོ། །དེ་བཞིན་དུ་གཞན་ཡང་སྦྲུམ་མ་གང་སྐྱེས་པ་དང་ཕྲད་ཅིང་འདོད་པ་སྤྱོད་ཅིང་ལྷག་པར་དགའ་བ་དང་། གར་ལ་སོགས་པ་ལ་དགའ་བ་དེ་ཡང་བུ་མོ་སྐྱེ་བར་འགྱུར་རོ། །དེ་འདྲེས་པས་ནི་མ་ནིང་འགྱུར། །དཀུ་ཡི་དབུས་ནི་མཐོ་བ་ཡིན། །

ཞེས་བྱ་བ་ལ། དེ་ཞེས་བྱ་བ་ནི་སྐྱེས་པ་དང་བུ་མོ་སྐྱེ་བའི་མཚན་ཉིད་གཉི་ག་ལ་སྙེགས་ཏེ། མཚན་ཉིད་དེ་ཉིད་འདྲེས་པ་དང་ལྡན་པའི་བུ་ནི་མ་ནིང་དུ་བཙས་པར་འགྱུར་རོ། །མ་ནིང་དེ་མངལ་ན་གནས་པའི་ཚེ་མའི་དཀུའི་ཕྱོགས་སུ་དབུས་མ་མཐོ་ཞིང་ཆེ་བར་འགྱུར་རོ། །མཚེ་མ་

ལོགས་གཉིས་མཐོ་བས་ན། །ལྟེ་བ་དམའ་བར་འདུག་པ་ཡིན། །ཞེས་བྱ་བ་ལ། མཚེ་མ་སྟེ་མངལ་ན་གནས་པའི་སེམས་ཅན་གཉིས་སྐྱེ་བར་འགྱུར་བའི་མཚན་ཉིད་ནི་ལོགས་གཉིས་མཐོ་བས་ལྟེ་བའི་ཕྱོགས་དམའ་ཞིང་ལུང་པ་ལྟར་འདུག་པ་ཡིན་ནོ། །དགུ་པའི་དང་པོ་ནས་

བརྩམས་ཏེ། །ས་ཕྱོགས་ཤིས་ཤིང་ཡོ་བྱད་ནི། །ཕུན་ཚོགས་ལྡན་པའི་དགེ་བའི་ཞག །དེ་ནི་བཙས་ཁྱིམ་ཞུགས་པར་བྱ། །ཞེས་བྱ་བ་ལ། ཟླ་བ་དགུ་པའི་ཚིགས་ཀྱི་དང་པོ་ནས་བརྩམས་ཏེ། སྦྲུམ་མ་དེ་བཙས་པའི་ཁྱིམ་གྱི་གནས་སུ་གནས་པར་བྱ་ལ། ཁྱིམ་དེ་ཡང་དང་པོར་ས་ཕྱོགས་

ཤིས་པའི་ཁྱིམ་པའི་དཔྱད་ཀྱི་ཆོ་ག་ཤེས་པས་ལེགས་པར་བརྟགས་པར་བརྩིགས་པ་དང་། ཡོ་བྱད་དགོས་པ་གང་དག་ཡིན་པ་དེ་ཕུན་སུམ་ཚོགས་པ་དང་ལྡན་པར་དགེ་བའི་ཞག་སྟེ། གཟའ་དང་རྒྱུ་སྐར་དང་བྱེད་པ་བཟང་པོའི་ཞག་ལ་དེ་ཁང་པ་དེར་གཞུག་པར་བྱའོ། །དེར་ནི་བུད་མེད་བཙའ་མྱོང་

བས། །བསྐོར་ཏེ་བཙའ་བའི་དུས་བར་བསྡད། །ཅེས་བྱ་བ་ལ། གནས་དེར་བུད་མེད་སྦྲུམ་མ་དེ་སྔར་ལན་མང་དུ་བཙའ་མྱོང་ཞིང་། དེའི་བྱ་བ་ལ་མཁས་པའི་བུད་མེད་རྣམས་ཀྱིས་ཀུན་ནས་བསྐོར་ཏེ་གནས་ལ་བསྡད་པར་བྱའོ། །དེང་ངམ་སང་ནི་བུ་བཙས་རྟགས། །སྙོམ་ཞིང་དཀུ་དང་མིག་ལྷོད་དུབ། །

སྨད་དུ་ལྕི་ཞིང་ཡི་ག་འཆུས། །མཆིལ་མ་མང་ཞིང་གཅིན་མང་འབྱུང་། །བརླ་དང་རྐེད་པ་ལྟོ་དང་རྒྱབ། །སྙིང་དང་ཆུ་སོ་བརླ་རྩ་ན། །མཚན་བྱེ་ན་ཞིང་ཟུག་པ་དང་། །འགུལ་ཞིང་འཛག་པར་འགྱུར་བ་ཡིན། །ཞེས་བྱ་བ་ལ། དེ་ལྟར་གནས་པ་ལས་དེང་ངམ་སང་བུ་བཙས་པར་འགྱུར་བ་

Vol. 201 · folio 19a

དང་ཤིན་ཏུ་ཉེ་བའི་རྟགས་ནི། སྦྲུམ་མ་དེ་སྙོམ་ཞིང་རྨྱ་ལ་དགའ་བ་ཆུང་བ་དང་། དཀུ་དང་མིག་ལྷོད་ཅིང་རང་གི་གནས་ལས་འགུལ་ཞིང་བསྐྱོད་པ་ལྟ་བུར་འགྱུར་བ་དང་། དྲག་ཤུལ་གྱིས་ངལ་བའི་རྒྱུ་མེད་པར་དུབ་པར་འགྱུར་བ་དང་། ལུས་ཀྱི་རོ་སྨད་ལྕི་ཞིང་

འདེགས་པར་དཀའ་བ་དང་། ཡི་ག་འཆུས་ཤིང་ཟས་མི་འདོད་པ་དང་། བད་ཀན་དང་མཆིལ་མ་ཁ་ནས་འཛག་པ་མང་བ་དང་། གཅིན་མང་པོ་འབྱུང་བར་འགྱུར་བ་དང་། དེ་བཞིན་དུ་བརླ་ལ་སོགས་པའི་ལས་ཀྱི་ཕྱོགས་སུ་ན་ཞིང་ཟུག་པ་དང་། མཚན་བཀས་པ་ལྟར་འབྱེད་པ་དང་། རྒྱུན་

མི་འཆད་པར་དེ་ན་ཞིང་སྐྱེ་བ་ཉིད་ལྟར་ཟུག་པ་དང་། མངལ་གྱི་སྒོ་འགུལ་བ་དང་། བེའུ་སྣབས་དང་ཁྲག་ལ་སོགས་པ་འཛག་པར་འགྱུར་བ་ཡིན་ནོ། །རང་དབང་མེད་འགྱུར་རྗེས་སུ་ནི། །དེ་འོག་མངལ་གྱི་ཆུ་འཛག་འགྱུར། །ཞེས་བྱ་བ་ལ། ལུས་སྙོམ་པ་ནས་མཚན་འབྱེ་བའི་བར་རང་

དབང་མེད་པར་འགྱུར་བའི་ནད་དུ་མ་བྱུང་བའི་རྗེས་ལ། དེའི་འོག་ཏུ་མངལ་གྱི་ཆུ་འཛག་ཅིང་འབྱུང་བར་འགྱུར་བ་ཡིན་ནོ། །དེ་ནས་མངལ་ནས་ལས་བྱུང་རྩོམ། །བཀྲ་ཤིས་བསྲུང་བའི་ཆོ་ག་བྱ། །ལག་པར་འབྲས་བུ་སྐྱེས་མིང་གཞག །ལེགས་བསྐུས་ཆུ་ནི་དྲོན་མོ་བླུགས། །མར་དང་

བཅས་པའི་ཐུག་པ་བླུད། །དེ་འོག་ས་ལ་མལ་བཅས་འདུག །བརླ་གཉིས་བཀུག་སྟེ་གན་རྐྱལ་གནས། །ཡན་ལག་ཡང་དང་ཡང་དུ་བསྐུ། །ལྟེ་བ་མན་ཆད་མཉེ་བྱ་ཞིང་། །གླལ་དང་འཆག་པ་བྱེད་དུ་གཞུག །ཅེས་བྱ་བ་ལ། འདིར་དེ་ནས་ཞེས་བྱ་བའི་སྒྲ་ནི་བཀྲ་ཤིས་པའི་དོན་དུ་

གཟུང་ངོ་། །མངལ་ནས་བྱུང་བར་རྩོམ་པ་ནི། །འབྱུང་བའི་དུས་དང་ཉེ་བའོ། །བཀྲ་ཤིས་པའི་བསྲུང་བ་བྱ་བ་ནི། དཔུང་པ་ལ་སོགས་པར་སྲུང་སྐུད་གདགས་ཤིང་བཀྲ་ཤིས་པའི་ཆོ་ག་བྱ་བ་དང་། ལག་པར་འབྲས་བུ་སྐྱེས་པའི་མིང་དང་ལྡན་པ་སྟར་ག་དང་གླ་གོར་ཞོ་ཤ་ལ་སོགས་པ་

གཞག་པ་དང་། སྣུམ་གྱིས་ལེགས་པར་བསྐུ་བ་དང་། རོ་སྨད་དུ་ཆུ་དྲོན་པོ་བླུགས་པ་དང་། དེ་བཞིན་དུ་མར་དང་བཅས་པའི་ནས་ཐུག་བླུད་པར་བྱའོ། །དེ་ནས་དེའི་འོག་ཏུ་ས་ལ་མལ་བཅས་པར་འདུག་ལ། བརླ་གཉིས་བཀུག་ཅིང་བསྐུས་ལ་གན་རྐྱལ་དུ་གནས་པར་བྱ་བ་དང་།

Vol. 201 · folio 19b

དེ་བཞིན་དུ་རླུང་ལྡང་ཞིང་འཁྲུགས་པའི་འཇིགས་པ་ཡོད་པས། དེ་ཡང་དང་ཡང་དུ་མཉེ་ཞིང་སྣུམ་གྱིས་བསྐུ་བར་བྱའོ། །ལྟེ་བ་མན་ཆད་བདེ་བར་མཉེ་བར་བྱ་བ་དང་། གླལ་དང་འཆག་པ་དག་ཀྱང་བདེ་བར་བྱེད་དུ་གཞུག་གོ། །དེ་ལྟས་མངལ་གནས་ཐུར་དུ་འབྱུང་། །དེ་རྟགས་སྙིང་

ག་ལས་འཕོས་ནས། །མངལ་གནས་ལྟོ་བར་ཞུགས་ནས་སུ། །ཆུ་སོའི་སྟེང་ན་གནས་པར་འགྱུར། །ཞེས་བྱ་བ་ལ། ལས་སུ་བྱ་བར་བཤད་པ་འདས་མ་ཐག་པ་དེ་ལྟ་བུས་མངལ་ན་གནས་པའི་སེམས་ཅན་དེ་སྟེང་ནས་ཐུར་དུ་འབྱུང་ཞིང་འགྲོ་བ་དང་། སྙིང་ག་ལས་འཕོས་ཏེ་ཆུ་སོའི་

སྟེང་དུ་གནས་པར་བྱེད་དོ། །དེའི་མཚན་ཉིད་རྟགས་ནི་སྙིང་ག་ནས་འཕོས་ཤིང་གནས་དེ་བོར་ནས་མངལ་ན་གནས་པ་དེ་ལྟོ་བར་ཞུགས་ཏེ་རིམ་གྱིས་བབས་ནས། ཆུ་སོ་ཞེས་བྱ་བ་ལྒང་པའི་ཐད་ཀར་གནས་པར་འགྱུར་རོ། །དེ་ནས་དབང་མེད་ནད་ལྡང་སྟེ། །མྱུར་དུ་ཁྲི་ལ་གཞག་པར་

བྱ། །ཞེས་བྱ་བ་ལ། དེ་ནས་བཙས་པའི་དུས་སུ་བྱུང་བའི་དབང་མེད་པའི་ནད་དུ་མ་དང་ལྡན་པ་དེ་ལ་གོང་མ་དེ་དག་བྱས་པའི་རྗེས་ལ་སྦྲུམ་མ་དེ་མྱུར་བ་ཉིད་དུ་ཁྲིའི་སྟེང་དུ་གཞག་པར་བྱའོ། །དེ་འོག་མངལ་གནས་ལེགས་བཙིར་ནས། །དེ་ཡིས་མཚན་ནི་དབྱེ་བར་བྱ། །ཞེས་བྱ་བ་ལ།

དེ་ནས་དེའི་འོག་ཏུ་མངལ་ན་གནས་པ་དེ་རིམ་གྱིས་ཐུར་དུ་བཙིར་ནས། དེའི་མཚན་མོ་སྣུམ་དང་སྨན་བསྐུ་བ་ལ་སོགས་པས་བྱ་བ་ཉིད་དུ་བསྒྲུབ་པར་བྱའོ། །དང་པོར་དལ་གྱིས་བཙིར་བྱ་ཞིང་། །བཙས་ཀར་དྲག་ཏུ་བཙིར་བར་བྱ། །ཞེས་བྱ་བ་ལ། དང་པོར་མངལ་ན་གནས་པ་དེ་དལ་བུས་

རིམ་གྱིས་བཙིར་བར་བྱ་ཞིང་མངལ་ན་གནས་པ་དེ་འབྱུང་ཁར་ནི་ཤིན་ཏུ་དྲགས་པར་བཙིར་བར་བྱའོ། །དེ་ཡང་མཚན་གྱི་སྒོར་ཕྱིན་པར་གྱུར་པ་ནས་བཙས་ཀྱི་བར་དུ་ཤིན་ཏུ་བཙིར་བར་བྱའོ། །དེ་ནས་བུ་སྐྱེའི་སྒྲ་དང་ནི། །ཆུ་དང་རླུང་གིས་དགའ་བ་སྐྱེད། །བཙས་པའི་ནད་ཀྱིས་གཟིར་

པ་ཡིས། །སྲོག་བྲལ་འདྲ་བ་སླར་གསོ་བྱ། །ཞེས་བྱ་བ་ལ། སྦྲུམ་མ་དེ་བུ་འབྱིན་པར་བྱེད་པ་ན་བུ་སྐྱེ་བའི་སྒྲ་ཡང་དང་ཡང་དུ་བརྗོད་པར་བྱ་སྟེ། སྐལ་བ་ཅན་གྱི་བུ་སྐྱེས་སོ་སྐྱེས་སོ་ཞེས་ཡང་དང་ཡང་དུ་སྨྲ་བ་ལྟ་བུ་དང་། དེ་བཞིན་དུ་ཆུ་གྲང་མོ་གཏོར་བ་དང་། རླུང་ཡབ་ཀྱིས་གཡབ་

Vol. 201 · folio 20a

བདག་གིས་དེ་ལ་དགའ་བ་སྐྱེད་ལ། བཙས་པར་གྱུར་པའི་ནད་ཀྱིས་གཟིར་ཅིང་ཉོན་མོངས་པར་སྲོག་དང་བྲལ་བ་འདྲ་བར་སྣང་བ་དེ་སླར་གསོ་ཞིང་དབུགས་དབྱུང་བར་བྱའོ། །མངལ་དུ་ཐོགས་ན་སྦྲུལ་ནག་པོའི། །པགས་པས་མོ་མཚན་བདུག་པར་བྱ། །ཞེས་བྱ་

བ་ལ། བུ་བཙས་པ་ན་མངལ་དུ་ཐོགས་ཤིང་འབྱུང་དཀའ་བར་གྱུར་བ་ན། སྦྲུལ་ནག་པོའི་པགས་པ་མེར་བསྲེགས་པས་མོ་མཚན་བདུག་པར་བྱའོ། །བྱ་རྣུའི་མེ་ཏོག་རྩ་བའམ། །ལྕམ་པའམ་ཡང་ན་བྱི་ཤ་ལྱ། །རྐང་པའམ་ལག་པར་གདགས་པར་བྱ། །ཞེས་བྱ་བ་ལ། དེ་བཞིན་

དུ་མངལ་ནས་བུ་མ་ཐོན་པ་ལ། བུ་ཝརྞ་པུཥྤ་ཞེས་བྱ་བ་བྱ་རྣུའི་རྩ་བ་དང་། མེ་ཏོག་དང་། ལྕམ་པ་དང་། བྱི་ཤ་ལྕགས་ཞེས་བྱ་བ་གང་ཡང་རུང་བ་རྐང་པའམ་ལག་པར་གདགས་ཤིང་བཅིང་བར་བྱའོ། །ཤ་མ་དབྱུང་བའི་ཕྱིར་ཡང་ནི། །དེ་དག་ཉིད་བྱ་དེ་ནས་བཏེག །དཔུང་པ་གཉིས་ནས་

བཟུང་སྟེ་སྦྲུག །རྟིང་པས་མཇུག་ཏོ་བརྡེག་པ་དང་། །རྐུབ་ཚོས་དམ་དུ་བཙིར་བར་བྱ། །སྐྲ་ཡིས་ལྐོག་མ་རྐན་རེག་བྱ། །སྣུ་ཧའི་འོ་མ་སྤྱི་བོར་བླུགས། །ཞེས་བྱ་བ་ལ། བུ་མ་ཕྱིན་པ་ལ་བྱ་བའི་ཆོ་ག་གང་ཡིན་པ་དེ་ཉིད་ནི། ཤ་མ་ཐོགས་ཏེ་མ་ཕྱིན་པ་ལ་ཡང་དེ་དབྱུང་བར་བྱ་བའི་ཕྱིར་དེ་དག་

ཉིད་བྱ་བ་དང་། གཞན་ཡང་བུ་བཙས་པའི་བུད་མེད་དེ་དལ་གྱིས་བཏེག་ལ། དཔུང་པ་གཉིས་ནས་བཟུང་སྟེ་སྤྲུག་ཅིང་བསིག་པར་བྱ་བ་དང་། དེ་བཞིན་དུ་རྟིང་པས་བུ་བཙས་པའི་མཇུག་ཏོར་བརྡེག་ཅིང་བསྣུན་པ་དང་། དེ་བཞིན་དུ་རྐུབ་ཚོས་གཉིས་ནས་བཟུང་སྟེ་དམ་དུ་བཙིར་ཞིང་མནན་པར་

བྱའོ། །དེ་བཞིན་དུ་བཅས་པའི་སྐྲའི་ཚོམས་ཀྱི་ལན་བུ་གཅིག་དྲངས་ཏེ། རྣ་བ་དང་རྐན་ལ་རེག་ཅིང་བྱུག་པར་བྱ་བ་དང་། དེ་བཞིན་དུ་སྤྱི་བོར་ཤིང་སྣུ་ཧའི་འོ་མ་བླུགས་པར་བྱའོ། །སྟག་པ་ཀུ་བ་ལངྒ་ལི། །སྦྲུལ་ལྤགས་རུ་རྟ་ཡུངས་ཀར་རྣམས། །རེ་རེའམ་གཉིས་སམ་མ་ལུས་

པས། །མོ་མཚན་བྱུག་པའམ་བདུག་པར་བྱ། །ཞེས་བྱ་བ་ལ། སྟག་པ་ལ་སོགས་པའི་སྨན་སྣ་རེ་རེའམ་གཉིས་གཉིས་སམ་ཐམས་ཅད་དང་བསྲེས་པ་ཆུ་བཏགས་སུ་བྱས་པས་བྱུག་པར་བྱ་བའམ། དེ་དག་མེ་ལ་བསྲེགས་པའི་དུད་པས་བདུག་པར་བྱའོ། །ཀུ་བ་ནི་ཁ་བོའོ། །ལངྒ་ལི་ནི་བྱི་ཤ་ལྱའོ། །

Vol. 201 · folio 20b

རུ་རྟའམ་བལ་བུའི་ལྡེ་གུ་ནི། །ཆང་དྭངས་དང་ནི་བླུད་པར་བྱ། །ཀུ་ལངྠའམ་བལ་བ་ཛ། །ཆང་རྙིང་དག་ལ་བཏབ་སྟེ་བླུད། །ཅེས་བྱ་བ་ལ། རུ་རྟ་དང་བལ་བུའི་ལོ་མ་ཆུ་འཐགས་སུ་བཏགས་པའི་ལྡེ་གུ་ཆང་གི་དྭངས་མ་དང་བསྲེས་ཏེ་བུད་མེད་དེ་ལ་བླུད་ན་ཡང་ཤམ་ཕྱིན་པར་འགྱུར་རོ། །ཡང་ན་ལྡེ་གུ་དེ་ཉིད་རྒྱ་སྲན་ཀུ་ལངྠ་བཙོས་པའི་ཁུ་བའམ་

བལ་བ་ཛའི་ཁུ་བ་རྙིང་པའི་ནང་དུ་བཏབ་སྟེ་བླུད་ན་ཡང་ཤ་མ་ཕྱིན་པར་འགྱུར་རོ། །ཤུ་ཏི་ཡུངས་ཀར་ཟིར་དང་། །ཤི་ཀྲུ་ཏིག་སྣ་ཀྲུ་ཏྲུག་ཏྲེས། །ཤིང་ཀུན་རུ་རྟ་པོ་སོན་ཆ། །འོ་མ་བ་གཅིན་ཡུངས་མར་དང་། །བསྐོལ་བ་བཤང་བའི་སྒོའམ་ནི། །མོ་མཚན་ནས་ནི་འཇམ་རྩི་བཏང་། །ཞེས་བྱ་བ་ལ། ཤུ་ཏི་སྟེ་ཤ་ཏ་པུཥྤ་ལ་སོགས་པའི་སྨན་

རྣམས་ལྡེ་གུར་བཏགས་པ་དང་། འོ་མ་དང་བ་གཅིན་གཉིས་ཀ་དང་། སྨན་ལྡེ་གུར་བྱས་པ་ལ་ཡུངས་མར་དང་བསྐོལ་བའི་སྨན་མར་དེ་བཤང་བའི་སྒོའམ། མོ་མཚན་ནས་འཇམ་རྩི་བཏང་ན་ཡང་ཤ་མ་ཕྱིན་པར་འགྱུར་རོ། །ཤུ་ཏི་ཆུ་དག་རུ་རྟ་དང་། །ཡུངས་ཀར་པི་པི་ལིང་ལྡེ་

གུ། །སྣུམ་དང་ལན་ཚྭར་བཅས་པ་ཡི། །མས་གཏོང་ཤ་མ་མྱུར་དུ་འབྱིན། །ཞེས་བྱ་བ་ལ། ཡང་ཤུ་ཏི་ལ་སོགས་པ་སྨན་ལྡེ་གུར་བྱས་པ་སྣུམ་དང་ལན་ཚྭ་དང་བཅས་པའི་སྨན་གྱི་ནི་རུ་ཧ་མས་གཏོང་ན་ཡང་ཤ་མ་མྱུར་དུ་འབྱིན་པར་བྱེད་པ་ཡིན་ནོ། །དེར་ཐོགས་རྒྱུ་ནི་རླུང་ཡིན་ཏེ། །

དེ་བཅོམ་ཤ་མ་མྱུར་དུ་འབྱུང་། །ཞེས་བྱ་བ་ལ། གང་གི་ཕྱིར་ཤ་མ་དེ་ཐོགས་ཤིང་མ་ཕྱིན་པའི་རྒྱུ་ནི་རླུང་ཡིན་ལ། དེ་བས་ན་རླུང་དེ་སྨན་དང་སྣུམ་གྱི་ཆོ་ག་ལ་སོགས་པས་བཅོམ་ནས་ཤ་མ་མྱུར་དུ་འབྱུང་བར་འགྱུར་ཏེ། དེ་བས་རླུང་གཞོམ་པའི་ཕྱིར་འཇམ་རྩི་གཏང་བར་བྱའོ། །ཡང་ན་

ལག་བཀྲུས་སེན་མོ་བྲེགས། །མཁས་པ་ཡིས་ནི་དྲངས་ཏེ་དབྱུང་། །ཞེས་བྱ་བ་ལ། ཡང་ན་ཤ་མ་དེའི་བྱ་བ་ལ་མཁས་པའི་བུད་མེད་ལག་པ་སྣུམ་གྱིས་བསྐུས་ཤིང་སོར་མོ་ལེགས་པར་བྲེགས་པས་མངལ་གྱི་སྒོ་ནས་དྲངས་ཏེ་དབྱུང་བར་བྱའོ། །ཤ་མ་བྱུང་ན་མོ་མཚན་དང་། །ཡན་

ལག་ཏིལ་མར་གྱིས་བྱུགས་མཉེ། །ཞེས་བྱ་བ་ལ། ཐབས་དེ་དག་གིས་ཤ་མ་ཕྱིན་པར་བྱས་པའི་འོག་ཏུ་མོ་མཚན་ཏིལ་མར་གྱིས་བསྐུས་ཏེ་མཉེ་བ་དང་། ཡན་ལག་རྣམས་ཀྱང་ཏིལ་མར་གྱིས་བསྐུ་ཞིང་མཉེ་བར་བྱའོ། །མངལ་ནད་གཟེར་ནི་ཆུ་སོ་མགོ། །ལྟོ་བ་གཟེར་ལ་ཐལ་སྨན་

Vol. 201 · folio 21a

ནི། །རྣོན་པོ་ཞིབ་ཏུ་བཏགས་པ་དག །མར་རམ་ཆུ་ཚན་སྦྱར་བ་བླུད། །ཅེས་བྱ་བ་ལ། བུ་བཙས་པའི་ཚེ་སྐྱེ་བའི་མངལ་ནད་མགོ་དང་ཆུ་སོ་དང་ལྟོ་བར་གཟེར་བའི་བདག་ཉིད་ཅན། མ་ཀ་ལ་ཞེས་བྱ་བ་ལ། ཐལ་སྨན་རྣོན་པོ་ཞིབ་ཏུ་བཏགས་པ་མར་རམ་ཆུ་ཚན་དང་སྦྱར་

ཏེ་དེ་བླུད་པར་བྱའོ། །འུ་སུ་བསྐོལ་ཆུ་བུ་རམ་དང་། །ཚ་གསུམ་དྲི་བཟངས་གསུམ་བཏབ་བླུད། །ཅེས་བྱ་བ་ལ། ཡང་ན་འུ་སུ་བསྐོལ་བའི་ཆུ་ལ་བུ་རམ་དང་ཚ་བ་གསུམ་དང་སྟེ། པི་པི་ལིང་དང་། ན་ལེ་ཤམ་དང་། བཅའ་སྒ་དང་། དྲི་བཟང་གསུམ་པོ་ཤིང་ཚ་དང་། གན་དྷ་བྷ་དྲ་དང་།

སུག་སྨེལ་བཏབ་པ་བླུད་པར་བྱ་སྟེ། དེ་ཡང་ཚ་བ་གསུམ་དང་དྲི་བཟངས་གསུམ་ཞོ་གཉིས། བུ་རམ་ཞོ་གཉིས་སྦྱར་བ་གཏང་བར་བྱའོ། །ཞེས་སྨན་པ་རྒན་པོ་དག་ཟེར་རོ། །དེ་ནས་བྱིས་པའི་ཉེར་སྤྱོད་ཀྱིས། །བྱིས་པ་མ་མས་སྐྱོང་དུ་གཞུག །ཅེས་བྱ་བ་ལ། དེ་ནས་དེའི་འོག་ཏུ་དེ་ལས་

གཞན་པའི་བུད་མེད་མ་མར་བྱས་པ་ལ་བྱིས་པ་སྐྱེས་མ་ཐག་གཏད་དེ། དེས་ཀྱང་བྱིས་པ་གསོ་བའི་ཉེ་བར་སྤྱོད་པའི་ཆོ་ག་དག་གིས་བསྐྱང་ཞིང་གསོ་བར་བྱའོ། །བུ་བཙས་བཀྲེས་ཡོད་ཏིལ་མར་དང་། །མར་ལས་ཚད་ཆེན་བླུད་བྱ་བ། །ཚ་བ་ལྔའི་ཕྱེ་རན་བཏབ་སྦྱིན། །དེ་འོག་བུ་རམ་ཆུ་དྲོན་ནམ། །

རླུང་འཇོམས་སྨན་བསྐོལ་ཆུ་བླུད་དེ། །དེས་ནི་རླུང་ནད་ལྡང་མི་འགྱུར། །ཁྲག་ངན་དག་ཀྱང་དག་པར་བྱེད། །རིམ་འདི་ཞག་ནི་གཉིས་གསུམ་བྱ། །ཞེས་བྱ་བ་ལ། དེ་ལྟར་བུ་བཙས་པའི་བུད་མེད་དེ་བཀྲེས་ཤིང་བྲུ་བ་ཚ་བ་ཡོད་པར་གྱུར་ན། ཏིལ་མར་རམ་མར་གང་དང་འཕྲོད་ཅིང་གོམས་པ་ལས།

སྔར་སྣུམ་གྱི་སྐབས་བཤད་པའི་ཚད་ཆེན་པོ་གང་ཉིན་ཞག་གཅིག་གི་ཐུན་བརྒྱད་ཀྱིས་འཇུ་བར་འགྱུར་བ་དེ་བླུད་པར་བྱའོ། །དེ་ཡང་ཚ་བ་ལྔའི་ཕྱེ་མ་རན་ཙམ་བཏབ་པ་སྦྱིན་པར་བྱ་ལ། དེའི་འོག་ཏུ་བུ་རམ་དང་ཆུ་བསྐོལ་བ་བླུད་པའམ། རླུང་འཇོམས་པའི་སྨན་རྩ་བ་བཅུ་པ་ལ་སོགས་པ་དང་། བསྐོལ་

བའི་ཆུ་བླུད་པར་བྱའོ། །རྣམ་པ་དེ་ལྟ་བུའི་ཆོ་ག་བྱས་པ་དེས་ནི་རླུང་ནད་ལྡང་ཞིང་འཁྲུགས་པར་མི་འགྱུར་བ་དང་། དེ་བཞིན་དུ་ཁྲག་ངན་པ་དང་བཅས་པ་དག་ཀྱང་དག་ཅིང་མེད་པར་བྱེད་པར་གྱུར་ཏེ། རིམ་པ་འདིས་ནི་ཞག་གཉིས་སམ་གསུམ་གྱི་བར་དུ་བྱ་བ་ཡིན་ནོ། །སྣུམ་མི་འཕྲོད་ལ་ཆོ་ག་འདི། །སྣུམ་མེད་

Vol. 201 · folio 21b

པར་ནི་བསྟེན་པར་བྱ། །ཞེས་བྱ་བ་ལ། སྣུམ་གྱི་ཆོ་ག་དང་མི་འཕྲོད་པའམ། བསྟེན་པར་མི་ནུས་པ་ལ། ཚ་བ་ལྔ་ལ་སོགས་པའི་ཆོ་ག་བཤད་མ་ཐག་པ་འདི་སྣུམ་དང་མ་སྦྱར་བར་སྨན་གྱི་ཆོ་ག་འབའ་ཞིག་བསྟེན་ཞིང་གོམས་པར་བྱའོ། །འཐུངས་ནས་ལྟོ་བ་ཏིལ་མར་དང་། །མར་བསྐུས་

ནས་ནི་གོས་ཀྱིས་དཀྲི། །ཞེས་བྱ་བ་ལ། བུ་བཙས་པ་དེས་སྨན་གྱི་སྦྱོར་བ་དེ་འཐུངས་ཟིན་པ་དང་། དེའི་ལྟོ་བ་མར་དང་ཏིལ་མར་གྱིས་བསྐུ་བྱུག་བྱས་ལ། དེའི་འོག་ཏུ་གོས་ཀྱིས་དཀྲི་བར་བྱ་སྟེ། དེ་ལྟ་བུས་ནི་རླུང་གི་ནད་ཀྱིས་སྐབས་མི་རྙེད་པའི་ཕྱིར་ཁོང་པར་གནོད་པ་སྐྱེད་པར་མི་འགྱུར་རོ། །

ཞུ་ནས་ཁྲུས་བྱས་ཐུག་པ་ནི། །སྔར་བཤད་སྨན་དང་བསྐོལ་བ་བླུད། །ཅེས་བྱ་བ་ལ། སྣུམ་ཞུ་ཟིན་པ་དང་། ཆུ་དྲོན་པོས་ཁྲུས་བྱས་ལ། ནས་ཐུག་སྔར་བཤད་པའི་སྨན་ཚ་བ་ལ་རླུང་འཇོམས་པའི་སྨན་གཞན་དག་དང་བསྐོལ་བ་བླུད་པར་བྱའོ། །ཞག་གསུམ་ཕན་ཆད་བི་ད་རི། །

ལ་སོགས་སྨན་སྡེའི་ཁུ་བར་བསྐོལ། །ནས་ཐུག་ཕན་ཞིང་སྣུམ་མང་བའམ། །གོམས་པའི་དབང་ལས་འོ་ཐུག་བླུད། །ཞག་བདུན་ཕན་ཆད་དེ་ལ་ནི། །རིམ་གྱིས་བརྟ་བའི་ཆོ་ག་ཕན། །ཞེས་བྱ་བ་ལ། ཞག་གསུམ་འདས་པའི་རྗེས་ལ་ཡང་བཙས་པ་དེ་ལ་རིམ་གྱིས་ཟས་ཀྱི་ཆ་བསྟེན་

པར་བྱའི། མོད་ལ་ཐ་མལ་པ་ལ་མི་དབབ་སྟེ། དེ་ཡང་དེ་ལ་ཁ་ཟས་དང་སྨན་བརྟ་བར་བྱེད་པ་དག་སྦྱིན་ཞིང་། བི་ད་རི་ལ་སོགས་པའི་སྡེ་ཚན་དང་བསྐོལ་བའི་ནས་ཐུག་གམ། འོ་ཐུག་ཤིན་ཏུ་སྣུམ་མང་པོ་བཏབ་པ་བླུད་ལ། དེ་ཡང་གོམས་པའི་དབང་ལས་ནས་ཐུག་གམ། འབྲས་ཀྱི་

འོ་ཐུག་གང་ཡང་རུང་བ་བླུད་པར་བྱའོ། །ཞག་ནི་བཅུ་གཉིས་མ་ལོན་པར། །ཤ་ནི་སྦྱིན་པར་མི་བྱའོ། །ཞེས་བྱ་བ་ལ། ཞག་བཅུ་གཉིས་མ་རྫོགས་ཀྱི་བར་དུ་བུ་བཙས་པའི་བུད་མེད་ལ་སྨན་པས་ཤ་སྦྱིན་པར་མི་བྱའོ། །ཞག་བཅུ་གཉིས་འདས་པའི་འོག་ཏུ་ནི་སྲོག་ཆགས་སྐམ་ས་ན་

གནས་པའི་ཤ་ཁུ་ལ་སོགས་པ་མེ་དྲོད་ཀྱི་ཚད་ལས་ལྟོས་ཏེ་རིམ་གྱིས་སྦྱིན་པར་བྱའོ། །མངལ་དུ་འཕེལ་དང་བཙས་པའི་ནད། །གཤེར་དང་ཁྲག་འཛག་བཙིར་བ་ཡིས། །ནད་དེ་གསོ་དཀའ་ཡིན་པའི་ཕྱིར། །བཙས་ཚེ་འབད་དེ་རིམ་གྲོ་བྱ། །ཞེས་བྱ་བ་ལ། འདིར་བུ་བཙས་

Vol. 201 · folio 22a

པའི་བུད་མེད་ནི་ཤིན་ཏུ་འབད་པ་དང་ལྡན་པས་རིམ་གྲོ་བྱ་ཞིང་གསོ་དགོས་ཏེ། གང་གི་ཕྱིར་མངལ་དུ་འཕེལ་བས་ལུས་ཟུངས་ཟད་ཅིང་། ལྷོད་པར་བྱས་པ་ཉིད་དང་། དེ་བཞིན་དུ་བཙས་པའི་ནད་འདྲེན་ཅིང་འབྱིན་པར་བྱེད་པའི་ནད་དང་། གཤེར་བག་དང་། ཁྲག་འཛག་

པ་དང་། དེ་བཞིན་དུ་པགས་པ་ལ་སོགས་པ་བཙིར་ཞིང་མཉེས་པས་བུ་བཙས་པའི་བུད་མེད་ཀྱི་ལུས་ནི་ཁྱད་པར་དུ་ཡང་གསོག་དང་ཁོང་སྟོང་ལྟ་བུ་ཡིན་པས། བཙས་པའི་ནད་ནི་ཤིན་ཏུ་གསོ་ཞིང་བཙས་པར་དཀའ་བའམ། གསོར་མི་རུང་བ་ལྟ་བུ་ཡིན་པས། དེའི་ཕྱིར་ཇི་སྐད་དུ་བཤད་

པའི་ཆོགས་འབད་དེ་གསོ་ཞིང་རིམ་གྲོ་བྱའོ། །དེ་ལྟར་ཟླ་བ་ཕྱེད་དང་གཉིས། །ཁ་ཟས་བསྡམས་སོགས་དང་བྲལ་ནས། །བཙས་པའི་མིང་དང་བྲལ་བའམ། །ཟླ་མཚན་བྱུང་བར་གྱུར་བར་དུའོ། །ཞེས་བྱ་བ་ལ། རྣམ་པ་དེ་དག་གིས་བཙས་པའི་དུས་དེ་འདས་པར་གྱུར་པ་དང་། རིམ་

གྱིས་ཟླ་བ་ཕྱེད་དང་གཉིས་ལོན་པའི་འོག་ཏུ་ཁ་ཟས་མི་མཐུན་པ་བསྡམས་པ་ལ་སོགས་པ་དང་བྲལ་ཞིང་སྤངས་ནས་བཙས་པའི་མིང་མེད་པར་འགྱུར་ཏེ། བུ་བཙས་པ་ཞེས་བྱ་བའི་མིང་དང་བྲལ་བར་འདོད་དོ། །ཡང་དྲང་སྲོང་ལ་ལ་དག་ནི་ཡང་ཟླ་མཚན་བྱུང་ཞིང་མཚན་ནས་འཛག་པར་གྱུར་གྱི་

བར་དུ་བུད་མེད་བཙས་པ་ཞེས་བྱ་ལ། དེ་ཕན་ཆད་དེའི་མིང་མེད་དོ་ཞེས་ཟེར་རོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ཉེ་བར་སྦྱར་བ་ལས། ལུས་ཀྱི་གནས་ལེའུ་དང་པོའི་རྣམ་པར་འགྲེལ་པའོ།། །།དེ་

ནས་ལུས་ཀྱི་རུམ་དུ་ཞུགས་པའི་ནད་ཀྱི་བྱེ་བྲག་བཤད་པར་བྱའོ། །ཞེས་བྱ་བ་ལ། འདི་བརྩམས་པའི་འགྲེལ་པ་ནི་འདི་ཡིན་ཏེ། བྱིས་པ་རུམ་དུ་ཆགས་སུ་ཟིན་ཀྱང་སྤང་བར་བྱ་བའི་ཟས་དང་སྤྱོད་ལམ་དང་སྨན་གང་ཡིན་པ་སྦྲུམ་མས་བསྟེན་ནས། དེས་མངལ་གྱི་གནས་ན་གནས་པ་ལ་ནད་འབྱུང་

བའམ་འཆི་བར་འགྱུར་བ་ཡིན་པས་ན། དེ་གསོ་བར་བྱ་བའི་ཕྱིར་འདི་བརྩམས་པ་ཡིན་ནོ། །སྦྲུམ་མས་སྤང་བར་བྱ་བ་དག །བསྟེན་པའམ་ནད་ཀྱི་དབང་ལས་ནི། །ཟླ་མཚན་བྱུང་བའམ་གཟེར་ཞིང་ན། །ཕྱི་ནང་སྣུམ་དང་བསིལ་ཐབས་བྱ། །ཞེས་བྱ་བ་ལ། བུད་མེད་སྦྲུམ་མས་སྤང་བར་བྱ་བའི་

Vol. 201 · folio 22b

དངོས་པོ་ཉལ་པོ་བསྟེན་དྲགས་པ་དང་། ངལ་དུབ་ལ་སོགས་པ་བསྟེན་པའམ། ནད་ཀྱི་དབང་ལས་ཟླ་མཚན་བྱུང་ཞིང་ཁྲག་འཛག་པར་འགྱུར་བའམ། ཡང་ན་ཆུ་སོའི་ངོས་གཉིས་དང་། མཇུག་དོ་དང་མོ་མཚན་གྱི་སྒོ་ལ་སོགས་པར་གཟེར་ཞིང་ན་བར་གྱུར་ན། དེའི་ཚེ་ལུས་ཀྱི་ཕྱི་ནང་སྣུམ་ཞིང་

བསིལ་བའི་ཐབས་སུ་བྱ་སྟེ། ཟས་དང་སྐོམ་དང་བསྐུ་བ་ལ་སོགས་པས་སྣུམ་པ་དང་བསིལ་བའི་བག་སྦྱར་བར་བྱའོ། །ཨུ་ཤིར་པདྨ་ཙནྡན་དང་། །འོ་མ་ཅན་ཤིང་ཤུན་པ་ཡི། །ལྡེ་གུར་མར་ནི་བསྐུ་བ་དང་། །རས་བལ་སྤངས་པ་བཤང་སྒོ་དང་། །མོ་མཚན་གཉིས་སུ་ཐེམ་བུར་གཞུག །ཅེས་

བྱ་བ་ལ། ཨུ་ཤི་རལ་སོགས་པའི་སྨན་རྣམས་ལྡེ་གུར་བྱས་པས་བྱུགས་ཤིང་ཤིན་ཏུ་སྤངས་པར་བྱས་པའི་རས་བལ་གྱི་ཐེམ་བུ་བཤང་སྒོ་དང་མོ་མཚན་གཉིས་སུ་གཞུག་ཅིང་ཉེ་བར་གཞག་པར་བྱའོ། །ཚིག་གི་དོན་ནི་གོ་བར་ཟད་དོ། །ལན་བརྒྱར་བཀྲུས་པའི་མར་གྱིས་ནི། །བསྐུ་བའམ་བུད་

མེད་དེ་ཡི་ལུས། །ཨུ་ཤིར་ལ་སོགས་ཆུ་ནང་གཞུག །ཅེས་བྱ་བ་ལ། ལན་བརྒྱར་ཞེས་བྱ་བའི་སྒྲ་ནི་ལན་མང་དུ་བྱ་བའི་སྒྲ་ཉེ་བར་མཚོན་པ་ཡིན་པར་ཤེས་པར་བྱ་སྟེ། དེ་ཡང་ཆུའི་ནང་དུ་ལག་པས་ཡང་དང་ཡང་དུ་མཉེས་པའི་མར་གྱིས་བུད་མེད་ཀྱི་ལུས་བསྐུ་ཞིང་བྱུག་པ་དང་། དེའི་ཆུ་དེ་ཨུ་

ཤི་རལ་སོགས་པའི་ཆུར་དེ་གཞུག་ཅིང་ལུས་ནུབ་པར་བྱའོ། །ཁ་ར་སྦྲང་རྩི་ཀུ་མུ་ཏ། །པདྨ་ཨུཏྤལ་གེ་སར་ནི། །འོ་མའི་མར་སྦྱར་ཀ་ཤེ་རུ། །ཤྲྀང་ག་ཏ་ཀ་སྦྱིན་པར་བྱ། །ཞེས་བྱ་བ་ལ། འོ་མ་བསྲུབས་པ་ལས་བྱུང་བའི་མར་ནི་འོ་མའི་མར་ཏེ། ཁ་ར་དང་སྦྲང་རྩི་ལ་སོགས་པ་དང་ལྡེ་གུར་

བྱས་ལ་བཟའ་བར་བྱ་བ་དང་། དེ་བཞིན་དུ་སྨན་ཤྲྀང་ག་ཏ་ཀ་དང་། ཀ་ཤེ་རུ་དག་དང་བཟའ་བར་སྦྱིན་པར་བྱའོ། །གནྡྷ་པྲི་ཡང་ཀུ་དང་ནི། །ཆུ་སྐྱེས་རྣམས་ཀྱི་རྩ་བ་དང་། །ཨུ་དུམྺཱ་ར་གཞོན་ནུ་དང་། །ལྡན་པའི་འོ་མ་སྐོམ་དུ་བླུད། །ཅེས་བྱ་བ་ལ། དེ་བཞིན་དུ་གནྡྷ་པྲི་ཡང་ཀུ་ལ་སོགས་པའི་

སྨན་གྱི་ལྡེ་གུའམ། ཕྱེ་མ་འོ་མར་བཅུག་པའམ། པྲི་ཡང་ཀུ་ལ་སོགས་པ་དང་ལྷན་ཅིག་བསྐོལ་བའི་འོ་མ་བླུད་པར་བྱ་སྟེ། ཆུ་སྐྱེས་ཀྱི་རྩ་བ་ནི་ཨུཏྤ་ལ་སྔོན་པོ་ལ་སོགས་པའི་རྩ་བའོ། །ཨུ་དུམྺཱ་ར་གཞོན་ནུ་ནི་ཨུ་དུམྺཱ་རའི་འབྲས་བུ་མ་སྨིན་པ་ཆུང་བའོ། །སཱ་ལུའི་རྩ་བ་ཀ་ཀོ་ལ། །བ་ལ་གཉིས་

Vol. 201 · folio 23a

དང་ཤིང་མངར་དང་། །བུ་རམ་ཤིང་དང་བསྐོལ་བ་ཡི། །འོ་མ་སཱ་ལུ་རྩ་སྣར་ཆན། །སྦྲང་རྩི་ཁ་རར་བཅས་པ་ནི། །སྐོམ་སའི་ཤ་ཁུ་ལྡན་པར་བཟའ། །ཞེས་བྱ་བ་ལ། སཱ་ལུའི་རྩ་བ་ལ་སོགས་པའི་སྨན་འོ་མའི་ནང་དུ་བཙོས་པའི་འོ་མ་དང་འབྲས་སཱ་ལུའི་རྩ་སྣར་གྱི་

ཆན་སྦག་ཅིང་བཟའ་བར་བྱའོ། །བ་ལ་གཉིས་ནི་བ་ལ་དང་། ཨ་ཏི་བ་ལའོ། །ཡང་ན་ནུས་པ་བསིལ་བ་དང་ལྡན་པ་སྦྲང་རྩི་དང་། ཁ་ར་དང་བཅས་པའི་སཱ་ལུ་རྩ་སྣར་གྱི་ཆན་སྐམ་སའི་ཤ་ཁུ་དང་ལྡན་པ་ཅུང་ཟད་བཟའ་བར་བྱའོ། །ཁྲུས་སྨན་མ་གཏོགས་ཁྲག་མཁྲིས་ཀྱི། །གསོ་དཔྱད་

བཤད་པ་ཐམས་ཅད་བྱ། །ཞེས་བྱ་བ་ལ། ཁྲུས་སྨན་གྱི་སྦྱོར་བ་མ་གཏོགས་པ་ཁྲག་དང་མཁྲིས་པ་གསོ་བའི་དཔྱད་དུ་བཤད་པའི་བྱ་བ་ཕྱི་ནང་ནས་བྱ་བ་གང་ཡིན་པ་ཐམས་ཅད་བྱ་སྟེ། དེ་ནས་བཀྲུ་སྨན་བཏང་བ་དང་། སློན་སྨན་བཏང་བ་མ་གཏོགས་པ་ཁྲག་གསོ་བའི་ཆོ་ག་ཐམས་ཅད་བྱའོ། །

ཟླ་གསུམ་མ་ཚང་བར་དུ་ནི། །ཁྲག་དགག་ཕྱིར་ནི་འབད་པར་བྱ། །ཞེས་བྱ་བ་ལ། ཟླ་མཚན་བྱུང་བ་དེ་ལ་ཟླ་བ་གསུམ་མ་ཚང་གི་བར་དུ་ཁྲག་དགག་པའི་ཆོ་ག་གོང་དུ་སྨོས་པ་དེ་དག་འབད་པས་བྱ་སྟེ། དེའི་ཚེ་ཤིན་ཏུ་སྙི་ཞིང་སྙིང་པོ་མེད་པའི་ཕྱིར། དེའི་ཚེ་ཕལ་ཆེར་མངལ་དུ་མི་འཆགས་པར་

འགྱུར་རོ། །བེའུ་སྣབས་ལྡན་པའང་དགག་པར་བྱ། །ཞེས་བྱ་བ་ལ། དེ་བཞིན་དུ་བེའུ་སྣབས་དང་ལྡན་པ་ལ་ཡང་དགག་པའི་ཆོ་ག་བྱ་སྟེ། འདིར་ཟླ་བ་གསུམ་རྫོགས་པ་ཡན་ཆད་མངལ་དུ་ལེགས་པར་ཆགས་པ་ཡིན་པས་དགག་པའི་ཚུལ་གྱིས་གསོ་བར་བྱའོ། །འདིའི་གསོ་བ་ནི་མི་མཐུན་

པ་ཡིན་ཏེ། བེའུ་སྣབས་ཀྱི་གསོ་བ་ནི་རྩུབ་པ་དང་། རྣོ་བ་དང་། ཁ་བ་ལ་སོགས་པ་ཡིན་མོད་ཀྱི། དེ་ཁྲག་གི་གསོ་བ་དང་མི་མཐུན་ལ། ཁྲག་གི་གསོ་བ་མངར་བ་དང་། བསིལ་བ་ལ་སོགས་པ་བསྟེན་པ་ནི་བེའུ་སྣབས་དང་མི་མཐུན་པ་ཡིན་པས། དེའི་ཁྱད་པར་གྱི་གསོ་བ་སྨྲས་པ་ནི། དེར་ནི་

བསེལ་ཕན་རྩུབ་པ་དང་། །སྨྱུང་དང་གླ་སྒང་ཨུ་ཤི་ར། །སླེ་ཏྲེས་འུ་སུ་ཨ་ར་ལ། །བྱི་ཚེར་དང་ནི་པར་པ་ཏ། །ཙནྡན་པ་ལ་བོང་ང་དཀར། །བསྐོལ་བའི་ཆུ་ནི་བླུད་པར་བྱ། །རྩྭ་འབྲུ་ལས་གཡོས་ཟས་སྦྱིན་དང་། །མུངྒ་སོགས་ཁུས་བེའུ་སྣབས་ནི། །བསལ་ལ་སྣུམ་སོགས་སྔོན་བཞིན་གཏང་། །ཞེས་

Vol. 201 · folio 23b

བྱ་བ་ཡིན་ཏེ། བེའུ་སྣབས་རིགས་ཀྱི་ནད་བེའུ་སྣབས་ཅན་དེ་ལ་ནི་ཟས་དང་སྐོམ་ལ་སོགས་པ་བསིལ་བ་བསྐུ་ཞིང་བཏུང་བས་ཕན་པ་དང་། དེ་ཡང་རྩུབ་སྟེ་རྣོ་བ་དང་བསྐ་བ་ལ་སོགས་པ་དང་ལྡན་པ་དང་། དེ་བཞིན་དུ་སྨྱུང་བར་གནས་ཤིང་ཟན་བཅད་པ་དང་། དེ་བཞིན་དུ་གླ་སྒང་ལ་སོགས་པའི་

སྨན་དང་བསྐོལ་བའི་ཆུ་བླུད་པ་ཕན་པ་ཡིན་པས་དེ་བསྐོལ་བའི་ཆུ་བླུད་པར་བྱའོ་ཞེས་བྱ་བ་ཡིན་ནོ། །ཨ་ར་ལ་ནི་ཀ་ཏང་གའོ། །གཞན་དག་ནི་གོ་བར་ཟད་དོ། །རྩྭ་འབྲུ་ནི་ཅི་ཙེ་དང་ཁྲེ་ལ་སོགས་པ་སྟེ། དེ་དག་གི་ཆན་མུངྒ་ལ་སོགས་པའི་ཁུ་བ་དང་སྦགས་པྱེ་སྦྱིན་པར་བྱའོ། །སོགས་པའི་

སྒྲས་ནི་སྲན་མ་ཙ་ན་ཀ་དང་། སྲན་ཆུང་དང་། སྲན་མ་ལ་སོགས་པའི་གོང་བུའི་འབྲུ་རྣམས་ཀྱི་ཁུ་བ་བསྡུའོ། །དེ་ལྟར་བེའུ་སྣབས་བསལ་ཞིང་མེད་པར་བྱས་ནས། སྔ་མ་བཞིན་དུ་སྣུམ་དང་དྲོ་བ་ལ་སོགས་པ་ཕྱི་དང་ནང་ནས་གཏང་བར་བྱའོ། །མངལ་ནི་རྣམ་པར་འཇིག་གྱུར་ན། །མངལ་ནང་

དག་པར་བྱ་ཕྱིར་དང་། །ནད་ཀྱིས་གཟིར་བ་མི་དྲན་ཕྱིར། །ཆང་རྣོ་ཅི་ནུས་བཏུང་བར་བྱ། །ཞེས་བྱ་བ་ལ། མངལ་མ་སྨིན་པར་འཇིག་ཅིང་ཟགས་པར་གྱུར་ན། ཆང་གང་ཡང་རུང་བ་ལས་ཆང་རྣོན་པོ་བཏུང་བར་བྱ་ལ། དེ་ཡང་ཅི་ཙམ་ནུས་ཤིང་ཡོག་པ་བཏུང་བར་བྱའོ། །ཅིའི་ཕྱིར་བཏུང་ཞེ་ན།

མངལ་གྱི་ནང་ནས་ཉེས་པ་དག་ཅིང་སྦྱང་བར་བྱ་བའི་ཕྱིར་དང་། ནད་ཀྱིས་གཟིར་བ་མི་དྲན་ཅིང་བརྣགས་ནུས་པའི་ཕྱིར་རོ། །དེ་ནས་རྩ་བ་ལྔ་པོ་ནི། །ཆུང་ངུའི་ཐུག་པ་རྩུབ་དེ་བླུད། །ཅེས་བྱ་བ་ལ། དེ་ལྟར་ཆང་འཐུངས་པའི་རྗེས་ལ། རྩ་བ་ཆུང་ངུ་ལྔ་པོ་བྲི་ཧ་ཏི་ལ་སོགས་པ་དང་བསྐོལ་བའི་ཐུག་

པ་རྩུབ་ཅིང་སྣུམ་མེད་པའི་ནས་ཐུག་བླུད་པར་བྱའོ། །ཆང་མི་འཐུང་ལ་ཐུག་པ་ནི། །ཚ་བ་ལྔ་དང་བསྐོལ་བ་དང་། །བིལ་བ་ལ་སོགས་ལྔ་དང་བསྐོལ། །ཏིལ་དང་རྩ་འབྲུའི་ཆན་སྦྱིན་བྱ། །ཞེས་བྱ་བ་ལ། གང་ཆང་འཐུང་བར་མི་བྱེད་པའི་བུད་མེད་དེ་མངལ་འཇིག་པར་གྱུར་ན། ཚ་བ་ལྔའི་

ལྡེ་གུ་དང་སྦྱར་ཏེ་བསྐོལ་བ་དང་། བིལ་བ་ལ་སོགས་པ་རྩ་བ་ཆེན་པོ་ལྔ་བསྐོལ་བའི་ཁུ་བ་དང་བཅས་པའི་ཏིལ་དང་། རྩྭ་འབྲུའི་ཆན་སྦྱིན་པར་བྱའོ། །ཟླ་བ་དང་མཉམ་ཉིན་ཞག་རིམ། །མངལ་འཇིག་པ་ལ་ཐུག་སོགས་སྦྱིན། །ཞེས་བྱ་བ་ལ། མངལ་འཇིག་པའི་བུད་མེད་ལ། ཟླ་བ་དུ་

Vol. 201 · folio 24a

ལོན་ནས་མངལ་འཇིག་པར་གྱུར་པའི་གྲངས་དང་ཉིན་ཞག་གི་གྲངས་སུ་སྦྱར་ཏེ། ཞག་དེ་སྲིད་ཀྱི་བར་དུ་ཐུག་པ་ལ་སོགས་པ་སྦྱིན་པའི་ཆོ་ག་བྱའོ། །ཡང་ཞིང་སྣུམ་དང་ལན་ཚྭ་མེད། །དྲོད་སྐྱེད་ལྡན་ལ་ཕན་པ་ཡིན། །ཞེས་བྱ་བ་ལ། ཐུག་པ་དེ་ཡང་རྫས་རང་བཞིན་གྱིས་

ཡང་བ་དང་། ཚད་ཆུང་བར་བྱས་པ་ཡང་བར་བྱ་བ་དང་། སྣུམ་བག་དང་ལན་ཚྭ་མེད་པ་དང་། དྲོད་སྐྱེད་པའི་སྨན་ཚ་བ་ལྔ་དང་། ན་ལེ་ཤམ་ལ་སོགས་པ་བཏབ་པ་དག་དེ་ལ་ཕན་པ་ཡིན་ནོ། །ནད་དང་ལུས་ཟུངས་ལྗན་ལྗིན་ནི། །བསྐམ་ཕྱིར་ཆོ་ག་འདི་བྱའོ། །ཞེས་བྱ་བ་ལ། གོང་དུ་བཤད་པའི་

ཆོ་ག་བྱས་པ་འདི་ནི་རླུང་ལ་སོགས་པའི་ནད་རྣམས་དག་ཅིང་སྦྱང་བར་བྱ་བའི་ཕྱིར་དང་། དེ་བཞིན་དུ་མངལ་གྱི་ལྗན་ལྗིན་བསྐོམ་པར་བྱ་བའི་ཕྱིར་བྱ་བ་ཡིན་ནོ། །དེ་ཕན་ཆད་ཟས་སྣུམ་འཇམ་རྩི། །སྟོབས་སྐྱེད་དྲོད་སྐྱེད་འཚོ་བྱེད་སྦྱིན། །ཞེས་བྱ་བ་ལ། ཆོ་ག་དེ་དག་བྱས་པའི་འོག་ཏུ་ཁ་ཟས་སྣུམ་

བག་དང་། ནི་རུ་ཧ་སྣུམ་ཅན་དང་། འཇམ་རྩི་དང་སྟོབས་ལ་སོགས་པ་སྐྱེད་པ་འཚོ་བྱེད་ཀྱི་སྡེ་ཚན་དང་འོ་མ་ལ་སོགས་པ་སྦྱིན་པར་བྱའོ། །སྙིང་པོར་ལྡན་པས་ཆེར་སྐྱེས་ལ། །མོ་མཚན་ནས་ནི་ཁྲག་འཛག་པས། །མངལ་དུ་སྐྱེ་བར་མི་ནུས་ལ། །ལྟོ་ན་འགུལ་དང་བཅས་པར་གནས། །དེ་ནི་

སོ་ན་གནས་ཞེས་བྱ། །དེས་ནི་ལྟོ་བ་རྒྱས་མི་འགྱུར། །ཞེས་བྱ་བ་ལ། མངལ་ན་གནས་པ་གང་སྙིང་པོ་དང་ལྡན་ཞིང་དངོས་པོ་ཐམས་ཅད་ཀྱི་སྟོབས་ཐོབ་ལ་རྒྱས་ཤིང་ཆེར་སྐྱེས་པར་གྱུར་པ་ན། སྦྲུམ་མས་སྤང་བར་བྱ་བ་མ་སྤངས་པས་མོ་མཚན་ནས་ཁྲག་འཛག་ཅིང་ཟླ་མཚན་བྱུང་བར་གྱུར་ན།

ཆེར་སྐྱེས་ཞིང་འཕེལ་བར་མི་ནུས་པ་ལྟོ་བ་ནས་འགུལ་ཞིང་གཡོ་བ་དང་བཅས་པས་གནས་པར་འགྱུར་ལ། དེ་ལྟ་བུའི་མངལ་དེ་ནི་སོ་ན་གནས་པ་ཞེས་བྱའོ་ཞེས་དྲང་སྲོང་རྣམས་ཀྱིས་བཤད་དེ། རྒྱུ་དེས་ན་སྦྲུམ་མ་ལྟོ་རྒྱས་ཤིང་འཕེལ་བར་འགྱུར་རོ། །མྱ་ངན་སྨྱུང་དང་རྩུབ་སོགས་སམ། །

ཡང་ན་མངལ་ནས་ཁྲག་འཛག་པས། །མངལ་དུ་སྐྱེ་བར་མ་ནུས་ལ། །རླུང་འཁྲུགས་སྐེམ་ཞིང་སྐམས་གྱུར་པའི། །མངལ་དེ་ཀླུ་ཡི་ལྟོ་ཞེས་བྱ། །འདིར་ནི་ལྟོ་བ་རྒྱས་གྱུར་ཀྱང་། །འགྲིབ་ཅིང་རིང་ཞིག་ལོན་ན་འཕར། །ཞེས་བྱ་བ་ལ། མྱ་ངན་ལ་སོགས་པ་རླུང་ནད་ལྡང་བར་གྱུར་

Vol. 201 · folio 24b

པའི་རྒྱུས་རླུང་ནད་འཁྲུགས་ཤིང་ལྡང་བར་གྱུར་པའམ། ཡང་ན་མངལ་ནས་ཁྲག་ཤས་ཆེར་འཛག་པས་ཀྱང་རླུང་ནད་འཁྲུགས་ཤིང་སྐྱེ་བར་འགྱུར་ཏེ། དེས་ནི་མངལ་ན་གནས་པ་དེ་སྐེམ་ཞིང་ཉམ་ཆུང་བའམ། ཡང་ན་བསྐམས་པར་གྱུར་པས་ཡོངས་སུ་འགྲིབ་པར་འགྱུར་ཏེ། དེ་ལྟ་བུའི་

མངལ་གྱི་གནས་སྐབས་དེ་ནི་ཀླུའི་ལྟོ་ཞེས་བྱ་བར་བཤད་ལ། ཀླུའི་ལྟོ་ཞེས་བྱ་བ་དེ་ནང་ན་གནས་ན་ལྟོའམ་ཀླུ་རྒྱས་པ་ལས་འགྲིབ་པར་འགྱུར་བ་དང་། དེའི་ཚེ་འཕར་ཞིང་འགུལ་བ་ཡུན་རིང་ཞིག་ན་ཅུང་ཟད་འཕར་བར་འགྱུར་རོ། །དེ་གཉིས་བརྟ་དང་རླུང་འཇོམས་སྨན། །མངར་བ་དག་དང་

བསྐོལ་བ་ཡི། །མར་དང་འོ་མ་ཚིམ་སྦྱིན་ཞིང་། །སྐྱེས་མ་ཐག་བའི་ཤ་སྦྱིན་བྱ། །དེ་གཉིས་ཀྱིས་ནི་ཚིམ་བྱའི་ཕྱིར། །ཁྱོགས་དང་བཞོན་པར་བསྐྱོན་ཏེ་བསྐུལ། །ཞེས་བྱ་བ་ལ། སོ་ན་གནས་པ་དང་། ཀླུའི་ལྟོ་ཞེས་བྱ་བའི་མངལ་གྱི་གནས་སྐབས་རྣམ་པ་དེ་གཉིས་ལ་མར་དང་འོ་མས་ཚིམ་

ཞིང་ངོམས་པར་བྱས་ལ། དེ་ཡང་རོ་ཙ་བར་བྱེད་པ་དང་རླུང་འཇོམས་པར་བྱེད་པའི་སྨན་མངར་བ་རྣམས་དང་བསྐོལ་ཞིང་བཙོས་པ་སྦྱིན་པར་བྱ་བ་དང་། དེ་བཞིན་དུ་མངལ་དེ་རྒྱས་པར་བྱ་བའི་ཕྱིར། རེའུ་ལ་སོགས་པ་བཙས་མ་ཐག་པའི་ཤའམ། དེ་བཞིན་དུ་མར་ལ་སོགས་པ་དེ་གཉིས་ཀྱིས་

ཚིམ་ཞིང་ངོམས་པར་བྱ་བའི་ཕྱིར། ཁྱོགས་དང་། རྟ་དང་། གླང་པོ་ལ་སོགས་པའི་བཞོན་པ་ལ་བསྐྱོན་ཏེ། སྦྲུམ་མ་དེ་ཤུགས་ཀྱིས་དྲངས་ལ། རྒྱུན་མི་འཆད་པར་བསྐུལ་བར་བྱའོ། །སྔོན་པོ་ཞེས་བྱ་མི་འགུལ་ལ། །ཁྲ་དང་བ་ལང་ཉ་ཤ་དང་། །སྒྲ་སྒྲོགས་བྱ་དང་རྨ་བྱ་ཡི། །ཤ་ཁུ་

མར་ནི་མང་པོ་དང་། །མོན་སྲན་གྲེའུ་དག་དང་ནི། །ལ་ཕུག་དག་གི་ཁུ་བ་བླུད། །ཅེས་བྱ་བ་ལ། མངལ་གྱི་གནས་ན། གནས་སྐབས་ནང་ན་མི་འགུལ་བ་ལ་ནི་སྔོན་པོ་ཞེས་བྱ་སྟེ། དེ་ལ་ནི་ཁྲ་ལ་སོགས་པའི་ཤ་ཁུ་ཞུན་མར་མང་པོ་བཏབ་པ་དང་། དེ་བཞིན་དུ་མོན་སྲན་གྲེའུ་དང་ལ་

ཕུག་བསྐོལ་བའི་ཁུ་བ་ལ་མར་མང་པོ་བཏབ་པ་བླུད་པར་བྱའོ། །བིལ་བ་གཞོན་ནུ་མ་ཤ་ཏིལ། །ཕྱེ་དང་འོ་མ་སྦྱར་བ་བླུད། །ཅེས་བྱ་བ་ལ། ཡང་ན་བིལ་བ་གཞོན་ནུ་ལ་སོགས་པ་ཐམས་ཅད་གཅིག་ཏུ་བྱས་ལ། འོ་མ་དང་སྦྱར་ལ་བླུད་པར་བྱའོ། །བིལ་བ་གཞོན་ནུ་ནི་བིལ་བའི་འབྲས་བུ་

Vol. 201 · folio 25a

མ་སྨིན་པ་གཞོན་ནུ་ལ་བྱའོ། །ཚིལ་བཅས་ཤ་དང་སྦྲང་ཆང་སྦྱིན། །རྐེད་པ་བསྐུ་བ་བསྟེན་པར་བྱ། །ཞེས་བྱ་བ་ལ། ཕྱུགས་གཞོན་པའི་ཚིལ་དང་བཅས་པའམ། སྦྲང་རྩིའི་ཆང་ངམ། རྒུན་ཆང་སྦྱིན་པར་བྱའོ། །དེ་བཞིན་དུ་ལྟེ་བའི་གནས་སུ་ཏིལ་མར་གྱིས་

བསྐུ་ཞིང་བྱུག་པ་ཡང་རྒྱུན་དུ་བསྟེན་པར་བྱའོ། །འདིར་རྐེད་པ་ཞེས་བྱ་བ་ནི་ཉེ་བར་མཚོན་པ་ཙམ་དུ་ཟད་དེ། དེ་བས་ན་ཆུ་སོ་དང་བརླ་དང་རྩིབ་ལོགས་དང་རྒྱབ་ཐམས་ཅད་དུ་ཡང་བསྐུ་བར་བྱའོ། །དེ་ནི་རྟག་ཏུ་དགའ་བསྐྱེད། །དེ་འདྲས་མངལ་ནི་འཕེལ་བར་བྱེད། །ཅེས་བྱ་བ་ལ། ཡང་སྦྲུམ་མ་དེ་

ལུས་ཐམས་ཅད་དུ་སྐད་ཅིག་མ་རེ་རེ་ཞིང་ཅི་ནས་ཀྱང་སེམས་མགུ་ཞིང་དགའ་བ་སྐྱེ་བར་འགྱུར་བ་དེ་ལྟར་བྱ་སྟེ། ཚུལ་དེ་ལྟར་བྱས་པས་ནི་མངལ་དེ་འཕེལ་ཞིང་རྒྱས་པར་འགྱུར་རོ། །རྒྱས་པ་གཞན་དུ་ལོ་ཚང་ནས། །དཀའ་བས་བཙས་པའམ་སྐྱེ་མི་འགྱུར། །ཞེས་བྱ་བ་ལ། མངལ་རྒྱས་པ་དེ་ཇི་སྲིད་

དུ་བཤད་པ་ལས་གོ་བཟློག་པའི་ཚུལ་དུ་བསྟེན་པས་ནི། ལོ་ཚང་བར་གྱུར་ནས་དཀའ་ཞིང་སྡུག་བསྔལ་བ་དང་བཅས་པས་མངལ་གྱི་སྒོ་ནས་སྐྱེ་ཞིང་འབྱུང་བར་འགྱུར་བའམ། ཡང་ན་སྐྱེ་བར་མི་འགྱུར་བར་མངལ་དེ་ཉིད་དུ་གནས་པར་འགྱུར་རོ། །སྦྲུམ་མ་རྟུག་པ་འགགས་གྱུར་ན། །སྣུམ་མམ་

མཐུན་པའི་འཇམ་རྩི་ཡིས། །མྱུར་བ་ཁོ་ནར་གསོ་བར་བྱ། །གཞན་དུ་སྦྲུམ་མ་བུ་བཙས་འཆི། །ཞེས་བྱ་བ་ལ། གལ་ཏེ་སྦྲུམ་མ་རྟུག་པ་འགགས་པའི་ནད་ཀྱིས་བཏབ་ན། སྣུམ་གྱི་སྦྱོར་བས་མྱུར་དུ་གསོ་བར་བྱ་བ་དང་། དེ་བཞིན་དུ་རྗེས་སུ་མཐུན་པའི་འཇམ་རྩི་གོང་དུ་སྨོས་པ་བཏང་བས་གསོ་བར་བྱ་སྟེ།

གཞན་དུ་དེ་ལྟར་མ་བྱས་ན་སྦྲུམ་མ་བུ་དང་བཅས་པ་འཆི་བར་འགྱུར་རོ། །མངལ་དུ་ནད་རབ་བསགས་པས་སམ། །མི་མཐུན་པའམ་གནོད་གཞན་གྱིས། །ནང་དུ་ཤིན་ལྟོ་གྲང་ཞིང་། །རེངས་དང་སྦོ་དང་ནད་ཚབས་ཆེ། །མངལ་མི་འགུལ་དང་མགོ་འཁོར་སྐོམ། །དབུགས་འབྱིན་དཀའ་ཞིང་དུབ་

པ་དང་། །དགའ་བ་མེད་ཅིང་མི་འགྱུར་དང་། །དབང་མེད་ནང་ནི་མང་པོ་འབྱུང་། །ཞེས་བྱ་བ་ལ། མངལ་གྱི་གནས་སུ་རླུང་ལ་སོགས་པའི་ནད་རྣམས་རབ་ཏུ་བསགས་ཤིང་ཉེ་བར་འཕེལ་བའི་ནད་ཤིན་ཏུ་སོགས་པ་དེ་ལས་མངལ་གྱི་གནས་སུ་ཞི་བར་འགྱུར་བའམ། དེ་བཞིན་དུ་མི་མཐུན་པའི་སྟེ། ཇི་སྐད་

Vol. 201 · folio 25b

བཤད་པའི་ཉལ་པོ་དྲགས་པ་ལ་སོགས་པའམ། གནོད་པའི་རྐྱེན་གཞན་རང་བཞིན་གྱིས་གནོད་པ་དང་། དུས་ཀྱིས་གནོད་པ་དང་། ཚད་ཆེས་པའི་གནོད་པ་ལས་གཞན་དག་བསྟེན་པའམ། ཡང་ན་སྔོན་གྱི་ལས་ཉེ་བར་བསགས་པའམ། མི་དགེ་བ་མ་དང་བུས་བྱས་པས་མངལ་གྱི་ནང་དུ་ཤི་

བའི་དུས་བྱེད་པར་གྱུར་ན། སྦྲུམ་མའི་ལྟོ་གྲང་ཞིང་དྲོད་མེད་པ་དང་། རེངས་ཤིང་འགྱུར་མི་ཤེས་པ་དང་། སྦོ་ཞིང་རྐྱལ་པ་དབུགས་ཀྱིས་གང་བ་ལྟར་གནས་པ་དང་། ནད་ཚབས་ཆེ་ཞིང་ཚོར་བ་དྲག་པོས་གཟིར་བ་དང་། དེ་བཞིན་དུ་མངལ་གྱི་ནང་ན་གཡོ་ཞིང་འགུལ་བ་མེད་པར་གནས་པ་དང་།

མགོ་འཁོར་ཞིང་ན་བ་དང་། སྐོམ་དད་ཆེ་བ་འབྱུང་བར་འགྱུར་བ་དང་། དེ་བཞིན་དུ་སྦྲུམ་མ་དེ་དབུགས་གྱེན་དུ་འབྱིན་པ་དཀའ་ཞིང་ཐོགས་པ་དང་། ངལ་ཞིང་དུབ་པ་དང་། དགའ་བ་མེད་ཅིང་སེམས་གདུང་བ་ལ་གནས་པ་དང་། མངལ་ལ་སོགས་པ་ལ་མངོན་པར་མི་དགའ་བ་དང་། མི་འགྱུར་

ཞིང་གནས་ལས་འཕོས་པ་ལྟར་འགྱུར་བ་དང་། དེ་བཞིན་དུ་དབང་མེད་པའི་ནད་བུ་བཙས་པའི་ཚེ་འབྱུང་བ་ལྟ་བུ་དུ་མ་ཞིག་འབྱུང་བར་འགྱུར་རོ། །དེ་ལ་ཆུ་དྲོན་བླུགས་པ་དང་། །བུ་རམ་སྦང་མ་ལན་ཚྭར་བཅས། །བཏགས་པས་མོ་མཚན་བསྐུ་བ་དང་། །ཤལ་མ་ལི་དང་ཟར་མ་ཡི། །

ཁུ་བ་མར་དང་ལྡེ་གུར་བྱས། །ནང་དུ་ཡང་དང་ཡང་དུ་གཞུག །སྔགས་དང་ཤ་མ་འབྱིན་སྦྱོར་བྱ། །ཞེས་བྱ་བ་ལ། ནང་དུ་བུ་ཤི་བའི་བུད་མེད་དེ་ལ་ཆུ་དྲོན་པོ་ཅུང་ཟད་ཀྱིས་མཚན་གྱི་ཐོག་ཀོར་དུ་བླུགས་པ་དང་། བུ་རམ་དང་སྦང་མ་དང་ལན་ཚྭར་བཅས་པ་བཏགས་པའི་ལྡེ་གུས་མོ་མཚན་ལ་བསྐུ་བར་

བྱ་བ་དང་། དེ་བཞིན་དུ་ཤལ་མ་ལི་དང་། ཟར་མའི་ཁུ་བ་གཞུག་པར་བྱ་སྟེ། འདིར་ཤལ་མ་ལིའི་ཁུ་བ་ཞེས་བྱ་བ་ནི། མོ་ཙ་ར་སའི་ཁུ་བ་ལ་བྱ་སྟེ། ཁུ་བ་དེ་མར་དང་ལྷན་ཅིག་བཏགས་པའི་ལྡེ་གུར་བྱས་པས་མངལ་གྱི་ནང་དུ་ཡང་དང་ཡང་དུ་རྒྱུན་མི་འཆད་པར་གཞུག་ཅིང་དགང་བར་བྱའོ། །

གལ་ཏེ་བུ་ཤིམ་བྱུང་ན། །དེ་ནས་སྨན་པས་རྒྱལ་པོ་ལ། །ཞུས་ལ་དེ་འབད་མྱུར་དུ་དབྱུང་། །ཤལ་མ་ལི་ནི་ཐང་ཆུ་མར། །བཅས་པས་ལག་པ་མོ་མཚན་བསྐུ། །ཞེས་བྱ་བ་ལ། གལ་ཏེ་དེ་ལྟར་ན་ཡང་བུ་ཤི་བ་མངལ་ནས་མ་བྱུང་ན། སྲིད་སྲུང་གི་རིག་བྱེད་ལ་སོགས་པའི་སྔགས་དང་། དེ་

Vol. 201 · folio 26a

བཞིན་དུ་ཤ་མ་འབྱིན་པའི་སྐབས་སུ་བཤད་པའི་སྦྱོར་བ་བསྟེན་པ་དང་། ལང་གུ་ལི་སོགས་པས་བདུག་ཅིང་བྱུག་པ་ལ་སོགས་པ་བྱའོ། །གལ་ཏེ་དེ་ལྟར་བྱས་ཀྱང་བུ་ཤི་བ་མ་བྱུང་ན། དེ་ནས་དེའི་འོག་ཏུ་སྨན་པས་རྒྱལ་པོ་ལ་འདི་ལྟར་བྱ་བ། འདི་ལྟ་བུས་ནི་མངལ་དུ་

བུ་ཤི་བའི་བུད་མེད་ངེས་པར་འཆི་བར་འགྱུར་ན་ཇི་ལྟར་བགྱི་ཞེས་ཞུས་ལ། དེའི་བཀའ་ལུང་མཉན་པར་བགྱི་སྟེ། རང་གི་ཆད་པའི་གནོད་པ་སྤང་བའི་ཕྱིར་དེ་ལྟར་བྱས་ནས། དེའི་འོག་ཏུ་སྨན་པ་དེས་ཤིན་ཏུ་འབད་པ་དང་བཅས་པ་དང་། དེ་ལ་མཁས་པའི་གྲོགས་པོ་དང་བཅས་པས་

མངལ་ན་གནས་པ་དེ་མྱུར་དུ་དབྱུང་བར་བྱ་སྟེ། དེ་ཡང་ཤལ་མ་ལིའི་ཐང་ཆུ་མར་དང་བཅས་པས་སྨན་པའི་ལག་པ་དང་། དེའི་མོ་མཚན་བསྐུ་ཞིང་བྱུག་པར་བྱའོ། །ལག་པས་དབྱུང་ནུས་དེ་ཉིད་ཀྱི། །ཞེས་བྱ་བ་ལ། གལ་ཏེ་མངལ་དུ་ཤི་བ་དེ་ལག་པས་དབྱུང་བར་ནུས་པ་ཡིན་ན། དེའི་

ཚེ་ལག་པ་ཉིད་ཀྱིས་མྱུར་དུ་དབྱུང་བར་བྱས་ཏེ། །ལུས་ནི་ལེགས་པར་མི་གནས་ན། །གཅུས་ཤིང་བསྒྱུར་དང་བཟློག་པ་དང་། །བཙིར་དང་འདེགས་གཞག་ལ་སོགས་ཀྱིས། །ལུགས་དང་མཐུན་པར་དྲངས་ནས་ནི། །མངལ་གྱི་སྒོར་ནི་དྲང་པོར་དྲང་། །ཞེས་བྱ་བ་ལ། མངལ་ན་གནས་པའི་

ལུས་ལེགས་པར་མི་གནས་ཏེ། དབྱུང་བ་བདེ་བར་མི་འདུག་ན་གཅུས་ཤིང་བསྒྱུར་བ་ལ་སོགས་པས་འབྱུང་བའི་སྒོ་ཅི་ལྟ་བ་བཞིན་དུ་ལེགས་པར་གཞག་ནས། མངལ་གྱི་སྒོར་ཕྱོགས་པར་བྱས་ནས་དྲང་པོར་འདུག་པ་དང་དྲང་བར་བྱའོ། །དེ་ཡང་གཅུས་ཤིང་བསྒྱུར་བ་ནི། བརླ་ནས་ཕན་

ཚུན་གཅུས་ཤིང་བསྒྱུར་བ་དང་། དེ་བཞིན་དུ་སྟེང་དུ་བཟློག་པ་དང་། ཀུན་ནས་བཙིར་བ་དང་། ཁྱད་པར་བརྡེག་ཅིང་གཞུག་པ་དང་། སོགས་པ་ཞེས་བྱ་བས་ཐབས་གཞན་དག་ཀྱང་བློས་ལེགས་པར་བརྟགས་ལ་དྲང་བར་བྱའོ། །གང་ཞིག་རྐང་ལག་མགོ་བོ་ནི། །ཡོན་པོར་མངལ་དུ་གནས་

གྱུར་དང་། །རྐང་པ་གཅིག་ནི་མཚན་དུ་བྱུང་། །གཉིས་པ་བཤང་སྒོར་ཆུད་ཡོན་པོ། །དེ་ནི་འགགས་པ་ཞེས་བྱ་སྟེ། །མཚོན་གྱིས་བཅད་པར་འོས་པ་ཡིན། །ཞེས་བྱ་བ་ལ། མངལ་དུ་ཤི་བ་གང་ཡིན་པ་དེ་རྐང་པ་དང་ལག་པ་དང་མགོ་བོ་ཀུན་ཀྱང་ཆ་མཉམ་པར་ཡོན་པོ་ཉིད་དུ་གནས་པར་

Vol. 201 · folio 26b

གྱུར་པ་དང་། དེ་བཞིན་དུ་མངལ་དུ་ཤི་བ་གང་རྐང་པ་གཅིག་ནི་མོ་མཚན་དུ་བྱུང་ལ། རྐང་པ་གཉིས་པ་བཤང་བའི་སྒོར་བྱུང་བར་གྱུར་པའི་ཡོན་པོ་དེ་ནི་འགགས་པ་ཞེས་བྱ་སྟེ། མངལ་དུ་ཐོགས་ཚབས་ཆེ་བ་ཡིན་པས་དེ་དག་ལག་པས་དབྱུང་བར་མི་ནུས་ཀྱིས། །དེ་ནི་གཙགས་སྤྱད་ཀྱི་མཚོན་

གྱིས་བཅད་ནས་དབྱུང་བར་འོས་པ་ཡིན་ནོ། །ལས་དེར་དཀྱིལ་འཁོར་སོར་གདུབ་ཅན། །གཙགས་བུ་གཉིས་ནི་བསྔགས་པ་ཡིན། །ཞེས་བྱ་བ་ལ། མངལ་དུ་ཤི་བ་དེ་དབྱུང་བའི་གཙགས་བུའི་རྩེ་མོ་དཀྱིལ་འཁོར་ལྟ་བུ་དང་། སོར་གདུབ་ཅེས་བྱ་བ་བསྔགས་པ་ཡིན་གྱི། འཕེལ་

གཙགས་ལ་སོགས་པས་མི་བྱའོ། །འཕེལ་གཙགས་རྩེ་མོ་རྣོ་བས་ནི། །མངལ་དུ་གཏང་བར་མི་བྱའོ། །ཞེས་བྱ་བ་ལ། གང་གི་ཕྱིར་འཕེལ་གཙགས་ནི་རྩེ་མོ་རྣོ་ཞིང་འཛུག་པ་ཡིན་པས་ན། དེའི་མངལ་གྱི་ནང་དུ་དེས་གཅད་པའི་ལས་བྱར་མི་རུང་ངོ་། །དང་པོར་མགོ་བོའི་ཐོད་པ་ནི། །

ཕྱེ་ལ་རྣམ་པར་དབྱུང་བར་བྱ། །དེ་ནས་མཆན་ཁུང་བྲང་ཀོས་ཀོ །རྐན་གྱི་ཕྱོགས་ནི་གང་རུང་བར། །གཏད་དེ་མངལ་གྱི་ལྕགས་ཀྱུ་ནི། །བརྟན་པོ་དག་གིས་མཁས་པས་དྲང་། །མགོ་བོ་མ་ཕྱེ་མིག་སྦུབས་དང་། །མཁུར་ཚོས་ནས་ཀྱང་དྲང་བྱ་ཞིང་། །ཕྲག་པ་ཐོགས་ན་དཔུང་པར་

བཅད། །ཅེས་བྱ་བ་ལ། དེ་འབྱིན་པ་ན་དང་པོ་སྟེ་ཐོག་མ་ཁོ་ནར་མགོ་བོའི་ཐོད་པར་གཙགས་སྤྱད་ཀྱིས་ཕྱེ་ཞིང་དབྲལ་ལ། མགོ་བོ་དེ་མངལ་གྱི་ལྕགས་ཀྱུས་དབྱུང་བར་བྱའོ། །མགོ་མ་གཏུབས་ཤིང་མ་ཕྱེ་བ་ནི་རངས་པ་དབྱུང་བར་བྱ་སྟེ། དེ་བཞིན་དུ་དེ་ཡང་མཆན་ཁུང་ངམ། བྲང་

ངམ་ཀོས་ཀོའམ། རྐན་གྱི་ཕྱོགས་གང་ཡང་རུང་བར་གཏད་ཅིང་ལས་ཀྱི་བྱ་བ་ལ་མཁས་པའི་སྨན་པས་མངལ་གྱི་ལྕགས་ཀྱུ་དེ་ཉིད་བརྟན་ཞིང་མི་འགྱུར་བ་དག་གིས་དྲང་བར་བྱའོ། །དེ་བཞིན་དུ་མགོ་མ་ཕྱེ་བ་དག་ལ་མིག་སྦུབས་གཉིས་དང་། མཁུར་ཚོས་གཉིས་ནས་ཀྱང་མངལ་

གྱི་ལྕགས་ཀྱུ་དེ་ཉིད་ཀྱིས་དྲང་བར་བྱའོ། །གལ་ཏེ་དེ་ཕྲག་པར་ཐོགས་ན་ཕྲག་པའི་ཕྱོགས་ཀྱི་དཔུང་པ་བཅད་ལ་དེ་དབྱུང་བར་བྱའོ། །ལྟོ་བ་རླུང་གིས་སྦོས་གྱུར་བ། །ནང་གྲོལ་དབྲལ་ཏམ་རྒྱུ་མ་ནི། །ཕྱི་རོལ་དུ་ནི་བཏོན་ཏེ་དབྱུང་། །ཞེས་བྱ་བ་ལ། མངལ་དུ་ཤི་བ་དེ་ལྟོ་བ་རླུང་གིས་གང་ཞིང་སྦོས་

Vol. 201 · folio 27a

པར་གྱུར་ཏེ། རྐྱལ་བ་དབུགས་ཀྱིས་གང་བ་ལྟར་འདུག་ན། ཤི་བ་དེའི་ལྟོ་སྦོས་པ་དབྲལ་ཏེ་དབྱུང་བར་བྱ་བའམ། རྒྱུ་མ་ཕྱི་རོལ་དུ་བཏོན་ལ་ལྷོད་ཅིང་སྙི་བར་གྱུར་པ་དང་དབྱུང་བར་བྱའོ། །རྐེད་པར་ཐོགས་ན་དེ་བཞིན་དུ། །དེ་ཡི་རུས་ཚིགས་དབྱེ་བར་བྱ། །ཞེས་བྱ་བ་

ལ། མངལ་དུ་ཤི་བ་དེ་རྐེད་པར་ཐོགས་ཏེ་མ་ཐོན་ན་རོ་སྨད་ཀྱི་ལྷུ་ཚིགས་སྔ་མ་བཞིན་དུ་བཅད་ཅིང་ཕྱེ་ལ་དབྱུང་བར་བྱའོ། །རླུང་གི་དབང་གིས་ཡན་ལག་གང་། །མངལ་དུ་ཐོགས་པ་དེ་དང་དེ། །དུམ་བུར་གཏུབས་ལ་ལེགས་ཕྱུང་སྟེ། །འབད་དེ་བུད་མེད་བསྲུང་བར་བྱ། །ཞེས་བྱ་བ་ལ། རླུང་གི་

དབང་གིས་མངལ་དུ་ཤི་བ་དེའི་ཡན་ལག་གང་དང་གང་ཆགས་ཤིང་ཐོགས་པར་གྱུར་པ་དེ་དང་དེ་གཙགས་སྤྱད་ཀྱིས་དུམ་བུར་གཏུབས་ལ་ལེགས་པར་དབྱུང་བར་བྱའི། མ་བརྟགས་པར་བཅོལ་དུ་མི་བྱའོ། །དེ་བཞིན་དུ་མངལ་དུ་བུ་ཤི་བ་དེའི་མ་བུད་མེད་ནི་འབད་དེ་གནོད་པ་མེད་པར་བྱའོ། །རླུང་ནི་རྣམ་

པར་འཁྲུགས་གྱུར་པས། །མངལ་གྱི་གནས་སྐབས་སྣ་ཚོགས་བྱེད། །དེ་ཕྱིར་དེ་ནི་མཁས་པ་ཡིས། །གནས་སྐབས་དག་ནི་བལྟས་ཏེ་སྤྱད། །ཅེས་བྱ་བ་ལ། གང་གི་ཕྱིར་རླུང་རྣམ་པར་འཁྲུགས་ཤིང་ལྡང་བར་བྱེད་པ་ན་མངལ་གྱི་གནས་སྐབས་སྣ་ཚོགས་ཤིང་དུ་མ་དག་སྐྱེད་པར་བྱེད་པ་

ཡིན་པ། དེའི་ཕྱིར་རླུང་གིས་གནས་སྐབས་དུ་མར་བྱེད་པ་དེ་སྨན་པ་མཁས་ཤིང་ཤེས་རབ་དང་ལྡན་པ་དག་གིས་དེའི་གནས་སྐབས་དང་སྦྱར་ཏེ། འདིར་མ་སྨོས་པ་དག་ཀྱང་རིག་པས་བརྟགས་ཏེ་སྤྱད་པར་བྱའོ། །མ་དང་ལྷན་ཅིག་འཆི་འགྱུར་བས། །གསོན་པོ་མངལ་དུ་གཅད་མི་བྱ། །འཆི་བར་

འགྱུར་བ་དག་ལ་ནི། །ཡུད་ཙམ་བཏང་སྙོམས་གཞག་མི་བྱ། །ཞེས་བྱ་བ་ལ། གནས་སྐབས་འགའ་ཞིག་ཏུ་ཚུལ་འགའ་ཞིག་ལས་བརྟགས་ཏེ། འདི་ནི་ནང་དུ་ཤི་བ་ཡིན་ནོ་སྙམ་ནས། མ་ཤི་བཞིན་དུ་གསོན་པོ་ལ་མངལ་དུ་གཅད་པར་མི་བྱ་སྟེ། ཅིའི་ཕྱིར་ཞེ་ན། དེ་ལྟར་བྱས་ན་དེ་མ་དང་

ལྷན་ཅིག་འཆི་བར་འགྱུར་བའི་སྐྱོན་ཡོད་པའི་ཕྱིར་རོ། །ཡང་སྦྲུམ་མ་མངལ་ན་གནས་པ་ཤི་བར་ངེས་པར་རྟོགས་པ་དག་ལ་ནི། ཡུད་ཙམ་སྐད་ཅིག་མ་གཅིག་ཙམ་མམ། མིག་བཙུམས་ཙམ་གྱི་བར་དུ་ཡང་བཏང་སྙོམས་སུ་གཞག་ཅིང་དོར་བར་མི་བྱའོ། །དེ་ལ་ནི་མྱུར་བ་ཉིད་དུ་གསོ་བའི་ཆོ་

Vol. 201 · folio 27b

ག་བྱའོ། །མོ་མཚན་འགགས་དང་ཉམས་པ་དང་། །གཟེར་ནད་དབུགས་ཀྱིས་ཉམ་ཐག་དང་། །སྒྲེགས་པ་མནམ་དང་ལུས་གྲང་བའི། །མངལ་དུ་བུ་ཤི་བུད་མེད་སྤང་། །ཞེས་བྱ་བ་ལ། མངལ་དུ་བུ་ཤི་བ་གང་མོ་མཚན་འགགས་ཤིང་འདུས་པའམ། དེ་བཞིན་དུ་དེའི་མཚན་

ཉམས་ཤིང་རང་གི་གནས་ལས་ཆགས་པའམ། གཟེར་ནད་མགོ་བོ་དང་། ཆུ་སོ་དང་ལྟོ་བ་གཟེར་བའི་མཚན་ཉིད་ཅན་དང་། དབུགས་བརྩེགས་པས་ཉམ་ཐག་པ་དང་། སྒྲེགས་པ་མནམ་ཞིང་རུལ་བ་དང་། ལུས་གྲང་ཞིང་དྲོད་ཡལ་བ་སྟེ། དེ་ལྟ་བུའི་མངལ་དུ་བུ་ཤི་བའི་བུད་མེད་

ཡོངས་སུ་སྤང་བར་བྱའོ། །དེ་ནས་ཤ་མ་མ་ཐོན་ན། །སྨན་པས་སྔོན་བཞིན་གདོན་པར་བྱ། །ཞེས་བྱ་བ་ལ། དེ་ལྟར་མངལ་དུ་བུ་ཤི་བ་བྱུང་བའི་འོག་ཏུ་ཤ་མ་ཐོགས་ཤིང་མ་ཐོན་པར་གྱུར་ན། སྨན་པས་སྔར་ཤ་མ་དབྱུང་བའི་ཆོ་ག་ཇི་སྐད་བཤད་པ་ལྟ་བུས་དབྱུང་ཞིང་གདོན་པར་བྱའོ། །

དེ་ལྟར་ཟུག་རྔུ་ཕྱུང་ནས་ནི། །ཆུ་དྲོན་གྱིས་ནི་བཀྲུ་བར་བྱ། །ཞེས་བྱ་བ་ལ། སྔར་བཤད་པའི་རྣམ་པ་དེ་དག་གིས་ཟུག་རྔུ་ཕྱུང་ཞིང་མངལ་དུ་བུ་ཤི་བ་ཐོན་ནས་ཆུ་དྲོ་འཇམ་ཙམ་བླུགས་ཤིང་དེ་བཀྲུ་བར་བྱའོ། །ལུས་ལ་སྣུམ་གྱིས་བྱུགས་པ་དང་། །མཚན་དུ་རས་བལ་སྣུམ་ཅན་གཞུག །

དེས་ནི་མོ་མཚན་འཇམ་འགྱུར་ཞིང་། །དེ་ཡིས་གཟེར་བ་ཞི་བར་འགྱུར། །ཞེས་བྱ་བ་ལ། དེ་ལྟར་ཆུ་དྲོན་པོས་བཀྲུས་པའི་འོག་ཏུ་བུད་མེད་ཀྱི་ལུས་ལ་སྣུམ་གྱིས་བྱུགས་པ་དང་། མངལ་གྱི་མོ་མཚན་དུ་རས་བལ་སྣུམ་ཅན་གཞུག་པར་བྱ་སྟེ། རས་བལ་སྣུམ་ཅན་དེས་མོ་མཚན་དེ་འཇམ་ཞིང་

མཉེན་པར་འགྱུར་བ་དང་། དེ་བཞིན་དུ་དེའི་གཟེར་ཞིང་ན་བའི་བག་གང་དང་གང་ཡོད་པ་ཞི་ཞིང་མེད་པར་འགྱུར་རོ། །ལ་ལ་ཕུད་དང་བོང་ང་དཀར། །ར་སྣ་ཤིང་ཀུན་སུག་སྨེལ་དང་། །ཚ་བ་ལྔ་ཡི་ཕྱེ་མ་སྣུམ། །སྦྱར་བའམ་ལྡེ་གུ་ཆུ་བསྐོལ་བླུད། །ཅེས་བྱ་བ་ལ། བུད་མེད་མངལ་དུ་

བུ་ཤི་བ་བཏོན་པ་དེ་ལ་ལ་ལ་ཕུད་ལ་སོགས་པའི་ཕྱེ་མ་སྣུམ་དང་སྦྱར་བ་བླུད་པའམ། ཡང་དེ་དག་ཉིད་བཏགས་པའི་ལྡེ་གུ་ཆུ་དང་བསྐོལ་བའམ། ཡང་ན་སྨན་དེ་དག་ཆམ་ཆོམ་བརྡུངས་ཏེ་བསྐོལ་བ་བླུད་པར་བྱའོ། །དེ་ཡང་རང་བཞིན་དང་གོམས་པ་ལ་སོགས་པའི་དབང་གིས་མར་དང་སྦྱར་བར་

Vol. 201 · folio 28a

ཅི་རིགས་པ་སྦྱིན་པར་བྱའོ། །དེ་བཞིན་ནད་རྣམས་འཛག་པ་དང་། །ཚོར་བ་ཞི་ཕྱིར་ཞག་གསུམ་ནི། །པུ་ཙེ་ཤེལ་དང་བོང་ང་དཀར། །བ་ཤ་ཀ་ཡི་ཤུན་པ་དང་། །ཤིང་ཀུན་ཏེ་ཛོ་བ་ཏི་རྣམས། །བཏགས་པའི་ཕྱེ་མའམ་བསྐོལ་བ་བླུད། །ཅེས་བྱ་བ་ལ། སྔ་མ་

བཞིན་དུ་ཁྲག་ལ་སོགས་པའི་ནད་རྣམས་འཛག་པར་བྱ་བའི་ཕྱིར་དང་། དེ་བཞིན་དུ་ནད་ཀྱི་ཚོར་བ་ཞི་བར་བྱ་བའི་ཕྱིར། མངལ་དུ་ཤི་བའི་རོ་བཞིན་ཞག་གསུམ་གྱི་བར་དུ་པུ་ཙེ་ཤེལ་དང་བོང་ང་དཀར་པོ་ལ་སོགས་པའི་སྨན་རྣམས་ཕྱེ་མར་བཏགས་པའམ་ལྡེ་གུར་བྱས་པའམ། བསྐོལ་བ་སྣུམ་

དང་བཅས་པ་བླུད་པར་བྱའོ། །དེ་ནས་ཞག་བདུན་བར་དུ་ནི། །སྣུམ་ཉིད་ཉེ་བར་བཏུང་བར་བྱ། །ཞེས་བྱ་བ་ལ། དེ་ནས་དེ་ལྟར་ཞག་གསུམ་འདས་པ་དང་། ཞག་བདུན་གྱི་བར་དུ་སྣུམ་ཉིད་བཏུང་བར་བྱའི། སྨན་རྩུབ་པ་གཞན་དག་ནི་བཏུང་བར་མི་བྱའོ། །དགོངས་ཀ་ཆང་ནི་རྙིང་པ་དང་། །

དེ་བཞིན་ལེགས་སྦྱར་ཆང་བཏུང་བྱ། །ཞེས་བྱ་བ་ལ། དེ་བཞིན་དུ་དགོངས་ཀ་ནི་ཆང་རྙིང་པ་བཟང་པོ་དང་། སྨན་བསྐོལ་བ་ལས་བྱས་པའི་ཆང་གི་རྣམ་པ་བཏུང་བར་བྱའོ། །ཤིར་ཤ་ཀ་ཀུ་བར་བསྐོལ་སྦངས། །རས་བལ་མོ་མཚན་ནང་དུ་གཞུག །ཅེས་བྱ་བ་ལ། ཤི་རི་ཤ་ལ་སོགས་པ་

བསྐོལ་བར་བཅུག་པའི་རས་བལ་དག་ཀྱང་མོ་མཚན་གྱི་ནང་དུ་གཞུག་པར་བྱའོ། །བླ་བརྣན་གཞན་དག་གང་བྱུང་བ། །དེ་ལ་རང་གི་གསོ་བས་གསོ། །ཞེས་བྱ་བ་ལ། མངལ་དུ་བུ་ཤི་བ་བཏོན་པ་དག་ལ་རིམས་ལ་སོགས་པ་བླ་བརྣན་གྱི་ནད་གཞན་གང་འབྱུང་བར་འགྱུར་བ་དེ་ལ་རང་རང་གི་གསོ་

བ་གང་དག་ཡིན་པ་དེས་གསོ་བར་བྱའོ། །རླུང་འཇོམས་སྨན་ནི་འོ་མར་བསྐོལ། །ཞག་བཅུའི་བར་དུ་བཟའ་བ་ཕན། །ཞེས་བྱ་བ་ལ། རླུང་འཇོམས་པའི་སྨན་རྩ་བ་བཅུ་པ་ལ་སོགས་པ་འོ་མར་བསྐོལ་བ་དག་ཞག་བཅུའི་བར་དུ་བཟའ་ཞིང་བཏུང་བ་ཕན་པ་ཡིན་ཏེ། འདི་ནི་གོང་མའི་ཞག་བཅུ་འདས་

ནས་ཞག་བཅུ་གཉིས་པ་ཡིན་པར་ཤེས་པར་བྱའོ། །ཞག་བཅུའི་བར་དུ་ཤ་ཁུ་བཏུང་། །ཞེས་བྱ་བ་ལ། ཡང་བུད་མེད་དེ་ལ་ཞག་བཅུ་པ་གསུམ་པ་ལ་ནི་ཤ་ཁུ་བཏུང་ཞིང་སྦགས་ཏེ་བཟའ་བ་ཕན་པ་ཡིན་ནོ། །དེ་ཕན་ཆད་ནི་ཡང་ཞིང་ཕན། །ཉུང་ངུ་བཟའ་ཞིང་སྣུམ་བསྐུ་དུགས། །བ་ལའི་ཏིལ་

Vol. 201 · folio 28b

མར་ལ་སོགས་བསྟེན། །ཞེས་བྱ་བ་ལ། དེ་ལྟར་ཟླ་བ་གཅིག་འདས་པ་དང་། དེའི་འོག་ཏུ་བུད་མེད་ཡང་ཞིང་ཕན་པའི་ཟས་ཉུང་ཤས་བཟའ་བ་དང་། བ་ལའི་ཏིལ་མར་ལ་སོགས་པའི་སྣུམ་གྱིས་བསྐུ་བ་འོག་ནས་བཤད་པ་བསྟེན་ཅིང་གོམས་པར་བྱའོ། །ཟླ་བ་བཞི་ལོན་ཕན་ཆད་དེ། །དེ་ནི་

རིམ་གྱིས་ཅི་བདེར་སྤྱད། །ཅེས་བྱ་བ་ལ། དེ་ལྟར་ཟླ་བ་བཞི་ལོན་ཕན་ཆད་དེ་ཟླ་བ་ལྔ་པ་མན་ཆད་རིམ་གྱིས་ཁ་ཟས་དང་སྤྱོད་ལམ་ལ་སོགས་པ་བསྡམ་པ་མེད་ཅིང་ཅི་བདེར་གནས་པ་ལ་བསྟེན་པར་བྱའོ། །བ་ལའི་རྩ་བའི་ཁུ་བ་ནི། །ཆུ་དྲུག་འོ་མ་དེ་མཉམ་དང་། །ནས་དང་རྒྱ་ཤུག་ཀུ་ལངྠ། །

རྩ་བ་བཅུ་པའི་ཆ་གཅིག་དྲུག །བསྐོལ་བའི་ཆ་ནི་ཆར་བྱས་པའི། །ཏིལ་མར་ཆ་ནི་བཅུ་བཞི་དང་། །མེད་གཉིས་དང་ཐང་ཤིང་བཙོད། །རམ་ཉེ་བ་གཉིས་ཙནྡན་དང་། །ཐལ་ཏྲེས་རུ་རྟ་ཛི་བ་ཀ །རྒྱ་སྤོས་རྒྱམ་ཚ་ཟངས་རྩི་བ། །གླ་སྒང་རྡོ་དྲེག་ཤུ་དག་དང་། །པུརྞ་རྣ་བ་ཨ་ག་རུ། །ཨ་

ཤྭ་གནྡྷ་ཉེའུ་ཤིང་དང་། །ཀྵི་ར་ཀུ་ཤུ་ཤིང་མངར་དང་། །བ་ལ་ར་ས་ཤུ་ཏི་དང་། །པརྞི་གཉིས་དང་སུག་སྨེལ་དང་། །ཤིང་ཚ་གནྡྷ་བྷ་དྲ་རྣམས། །ཞིབ་ཏུ་བཏགས་པའི་ལྡེ་གུ་དང་། །ཏིལ་མར་མེ་ཆུང་ལ་བསྐོལ་བ། །རླུང་ནད་ཐམས་ཅད་སེལ་བའི་མཆོག །བུ་བཙས་བྱིས་པ་རུས་པ་

གནད། །སྣད་དང་སྐེམ་ལ་བསྔགས་པ་ཡིན། །རིམས་སྐྲན་གདོན་དང་སྨྱོ་བྱེད་དང་། །གཅིན་ནད་རྒྱུ་མ་སྐྱེས་པ་སེལ། །ཐང་ལ་འབར་གྱིས་མངལ་གྱི་ནི། །ནད་རྣམས་སེལ་བའི་མཆོག་ཏུ་བསྔགས། །ཞེས་བྱ་བ་ལ། སྨན་པ་ལ་ནི་རྩ་བ་ཡིན་པས་ན་བ་ལའི་རྩ་བ་སྟེ། དེ་བསྐོལ་བའི་ཁུ་བ་

ཆ་དྲུག་གཞུག་པར་བྱའོ། །དེ་བཞིན་དུ་འོ་མ་ཡང་དེ་དང་མཉམ་པ་སྟེ། ཆ་དྲུག་ཉིད་གཞུག་པར་བྱའོ། །ནས་ལ་སོགས་པ་གསུམ་པོ་ནི་བཞི་པ་རྩ་བ་བཅུ་བཞི་པའི་ཆ་གཅིག་གཞུག་པར་བྱའོ། །དེ་ལྟར་ཆ་བཅུ་གསུམ་དུ་འགྱུར་རོ། །ཏིལ་མར་ནི་ཆ་བཅུ་བཞི་གཞུག་པར་བྱ་སྟེ། གང་གི་

ཚེ་ཏིལ་མར་སྲང་བཅུ་དྲུག་བསྐོལ་བ་དེའི་ཚེ། བ་ལའི་རྩ་བ་བསྐོལ་བའི་ཁུ་བ་སྲང་ཉི་ཤུ་རྩ་བཞི་གཞུག་བར་བྱ་ལ། ནས་ལ་སོགས་པའི་སྨན་བཞིའི་ཁུ་བ་ནི་སྲང་བཞི་གཞུག་པར་བྱའོ། །ཆུ་སྲང་བཞི་བརྒྱ་བཞི་བཅུ་རྩ་བརྒྱད་དང་བསྐོལ་ལ་དེའི་བཞི་ཆ་ལུས་པར་བྱས་པ་དང་། སྲང་བརྒྱ་རྩ་བཅུ་

Vol. 201 · folio 29a

གཉིས་སུ་འགྱུར་རོ། །མེ་ད་གཉིས་ལ་སོགས་པའི་སྨན་རྣམས་ཀྱི་ལྡེ་གུ་ནི་སྨན་སྣ་རེ་རེ་ཡང་ཞོ་རེ་རེ་དང་ནམ་ཕྱེད་སྲན་མ་གཅིག་གི་ལྔ་ཆ་གཞུག་པར་བྱའོ། །མེད་གཉིས་ནི་མེད་དང་མ་ཧཱ་མེ་དའོ། །རམ་ཉེ་བ་གཉིས་ནི་ཀ་ཀོ་ལ་དང་ཀྵི་ར་ཀ་ཀོ་ལི་ཞེས་བྱ་བ་སྟེ།

རམ་ཉེ་བ་འོ་མ་ཡོད་པ་དང་། འོ་མ་མེད་པའི་དབྱེ་བས་ཕྱེ་བའོ། །པརྞི་གཉིས་ནི་མ་ཤ་པརྞི་དང་མུངྒ་པརྞིའོ། །གཞན་དག་ནི་གོ་བར་ཟད་དོ། །དེ་ལྟར་སྨན་དེ་རྣམས་ཞིབ་ཏུ་བཏགས་ལ། མེ་ཆུང་དུས་བཙོས་ཤིང་བསྐོལ་བ་ནི་རླུང་ནད་ཐམས་ཅད་སེལ་བའི་མཆོག་ཡིན་ནོ། །དེ་བཞིན་

དུ་བཙས་པའི་ནད་ལ་སོགས་པ་ལ་ཡང་ཕན་ཞིང་བདེ་བར་བྱེད་པ་ཡིན། རིམས་དང་སྐྲན་ལ་སོགས་པ་ཡང་སེལ་ཞིང་འཇོམས་པ་ཡིན་ནོ། །བ་ལ་ལ་སོགས་པ་དང་བསྐོལ་བའི་ཏིལ་མར་འདི་ནི་མངལ་གྱི་ནད་ཐམས་ཅད་སེལ་བའི་མཆོག་ཡིན་པར་སྨན་པའི་གཙོ་བོ་དྲང་སྲོང་ཐང་ལ་

འབར་གྱིས་བཤད་ཅིང་བསྔགས་པ་ཡིན་ནོ། །མ་ནི་ཤི་ཚེ་ཆུ་སོར་ནི། །མངལ་གནས་གལ་ཏེ་དཀུར་འཕར་ན། །དེ་ནི་སྐྱེ་བའི་དུས་ཡིན་པས། །དབྲལ་ཏེ་བྱིས་པ་མྱུར་དུ་དབྱུང་། །ཞེས་བྱ་བ་ལ། མངལ་ན་གནས་པའི་བུ་སྐྱེ་བའི་དུས་སུ་གལ་ཏེ་མ་ཤི་བའི་དུས་བྱེད་པར་གྱུར་ན། དེ་དབུགས་

ཆད་པའི་སྐབས་སུ་ཆུ་སོ་དང་དཀུའི་ཕྱོགས་ཤིན་ཏུ་འཕར་ཞིང་གཡོ་བར་གྱུར་ན། བུ་དེ་གསོན་ཞིང་བཙས་པའི་དུས་ལ་བབ་པ་ཡིན་པས། ཆུ་སོའི་ཕྱོགས་ལེགས་པར་དབྲལ་ཏེ་དབྱུང་བར་བྱ་ལ། དེ་ཡང་གང་གི་ཚེ་ཞེ་ན། སྐྱེ་བའི་དུས་ལ་བབ་པའི་ཚེ་ན་དེ་ལྟར་བྱའི་གཞན་དུ་མ་ཡིན་ནོ། །ཤི་

རི་ཀ་ཡི་ས་བོན་དང་། །པ་ཡ་སྱ་དང་ཐང་ཤིང་བཞི། །ཏིལ་ནག་སྲུ་སྲུའི་རྩ་བ་དང་། །བཙོད་དང་ཉེའུ་ཤིང་ཞེས་བྱ་བཞི། །བྲི་ཤ་དང་ནི་པ་ཡ་སྱ། །ཨུཏྤལ་ཐལ་ཏྲེས་བྲི་ཡང་ཀུ། །བྱི་ཚེར་ཐལ་ཏྲེས་ར་སྣ་དང་། །པདྨ་ཙ་རི་ཤིང་མངར་དང་། །བྲི་ཧ་ཏི་གཉིས་ཏང་པལ་དང་། །འོ་ཤིང་མྱུ་གུ་ཤུན་

པ་དམར། །ཀྲྀཥྞ་པརྞི་བ་ལ་དང་། །ཤི་ཀྲུ་གཟེ་མ་སླེ་ཏྲེས་དང་། །ཤྲིང་ག་ཏརྒ་རྒུན་པད་རྩ། །ཤིང་མངར་ཁ་ར་ཀ་ཤེ་རུ། །ཚིགས་བཅད་ཕྱེད་ཀྱིས་རྫོགས་བཤད་པའི། །བདུན་པ་འདི་དག་འོ་མར་སྦྱར། །ཟླ་བ་བདུན་ལ་རིམ་བཞིན་དུ། །མངལ་འཛག་པ་ལ་གཏང་བར་བྱ། །ཞེས་བྱ་བ་ལ།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words