ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ

Sanskrit title (Tibetan script, as in the text) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 201 · folio 231b

མཉེ་བ། །བ་སྤྲུ་བ་གཉིས་པ་ལ་དང་། །ག་བྲའི་རྩ་བ་ཁ་སྲལ་ཕྲེའུ། །རི་དི་ཟུར་པ་ཀ་མ་ལ། །ཤྲིང་ག་ད་ཀ་ཀ་ཡ་སྱ། །རྩ་བ་ལྔ་ནི་ཆུང་ངུ་དང་། །རྒུན་འབྲུ་སྟར་གའི་འབྲས་བུ་སོགས། །མངར་ཞིང་སྣུམ་ལ་སྟོབས་སྐྱེད་པ། །ཞོ་ནི་གཉིས་གཉིས་བཏགས་ལྡེ་གུ། །

དེ་ནང་ཞུན་མར་བྲེ་གང་བསྐོལ། །འོ་མ་ར་ཤ་སྐྱུ་རུ་ར། །བི་ད་རི་དང་བུ་རམ་ཤིང་། །ཁུ་བ་ར་ཤའི་ཁུ་བར་བཅས། །བསྐོལ་ཏེ་བསྒྲངས་པར་སྦྲང་རྩི་ནི། །བྲེ་ཕྱེད་ཁ་ར་སྲང་ལྔ་བཅུ། །ན་ལེ་ཤམ་དང་སུག་སྨེལ་དང་། །ཤིང་ཚ་གན་དྷ་བྷ་དྲ་དང་། །ནཱ་ག་གེ་སར་སྲང་ཕྱེད་ཕྱེད། །

ཕྱེ་མར་བཏགས་ཏེ་བཅུག་ནས་ནི། །འཇུ་སྟོབས་རྗེས་མཐུན་ཚད་དུ་བླུད། །འདི་ནི་བདུད་རྩིའི་སྨན་མར་ཏེ། །མི་རྣམས་ཀྱི་ནི་བདུད་རྩི་ཡིན། །བདུད་རྩི་འདི་ནི་ཟོས་ནས་སུ། །འོ་མ་ཤ་ཁུ་ལྡན་ཟོས་ན། །ཁུ་ཆུ་ཉམས་དང་གློ་འགྲམས་དང་། །ཉམས་སྟོབས་ཟད་པའི་

གསོ་བ་ཡིན། །བུད་མེད་ལ་གདུ་ལུས་སྐེམ་དང་། །མདོག་སྐད་ཉམས་ལ་གཏང་བར་བྱ། །ལུད་པ་དང་ནི་སྐྱིགས་བུ་རིམས། །དབུགས་མི་བདེ་དང་ལུས་ཚ་དང་། །སྐོམ་དད་ཁྲག་མཁྲིས་སེལ་བྱེད་ཅིང་། །བུ་སྐྱེད་བྱེད་ཅིང་སློན་དང་བརྒྱལ། །མངལ་ནད་གཅིན་ནད་

འཇོམས་བྱེད་ཡིན། །ཞེས་བྱ་བ་ལ། འཚོ་བྱེད་ལ་སོགས་པའི་སྨན་ཞོ་གཉིས་གཉིས་བཏགས་པའི་ལྡེ་གུ་དང་། མར་བྲེ་གང་སྟེ་སྲང་སུམ་ཅུ་རྩ་གཉིས་བསྐོལ་བར་བྱ་སྟེ། འཚོ་བྱེད་ཀྱི་སྡེ་ཚན་དུ་གཏོགས་པ། རྩ་བ་ལྔ་ཆུང་ངུ་སྨན་སྣ་རེ་རེ་ཞིང་ཞོ་གཉིས་གཉིས་གཞུག་

པར་བྱ་ལ། རྒུན་འབྲུ་ལ་སོགས་པའི་སྨན་གཉིས་གཞུག་པར་བྱའོ། །འོ་མ་དང་སྐྱུ་རུ་ར་ལ་སོགས་པའི་ཁུ་བ་ནི་མར་དང་ཆ་མཉམ་དུ་སྦྱར་བར་ཤེས་པར་བྱ་སྟེ། ཁུ་བའི་རྫས་ནི་ལྔ་པོ་སོགས། །རེ་རེའང་མར་དང་མཉམ་པར་གཞུག །ཅེས་བཤད་པ་ཡིན་ནོ། །དེ་ལྟ་བུའི་

སྨན་མར་བསྐོལ་བ་དེར་སྦྲང་རྩི་བྲེ་ཕྱེད་ཅེས་བྱ་བ་སྲང་བཅུ་དྲུག་གཞུག་པར་བྱའོ། །ཤ་ཁར་ནི་སྲང་ལྔ་བཅུ་གཞུག་པར་བྱའོ། །ན་ལེ་ཤམ་ལ་སོགས་པའི་ཕྱེ་མ་སྲང་ཕྱེད་ཕྱེད་ཅེས་པ་ཞོ་བཞི་བཞི་གཞུག་པར་བྱ་སྟེ། དེ་དག་ཕྱེ་མར་ཞིབ་ཏུ་བཏགས་ཏེ་གཞུག་པར་བྱའོ། །

Vol. 201 · folio 232a

དེ་བཟའ་བའི་ཚད་ནི་འཇུ་སྟོབས་དང་རྗེས་སུ་མཐུན་པར་བྱ་སྟེ། ཕོ་བའི་མེ་དྲོད་ཀྱིས་ཇི་ཙམ་འཇུ་བའི་ཚད་དུ་བླུད་པར་བྱའོ། །སྨན་མར་འདིའི་མིང་ནི་བདུད་རྩིའི་སྨན་མར་ཞེས་ཚེའི་རིག་བྱེད་རྩོམ་པའི་དྲང་སྲོང་རྣམས་ཀྱིས་བཤད་པ་ཡིན་ནོ། །སྨན་མར་འདི་ནི་

མི་རྣམས་ཀྱི་བདུད་རྩི་ཡིན་ཏེ། བདུད་རྩི་ལྟར་ཡོན་ཏན་ཆེན་པོ་སྐྱེད་པའི་ཕྱིར་མིའི་བདུད་རྩིའི་སྨན་མར་ཞེས་བྱའོ། །དེ་ཡང་ཇི་ལྟར་ལྷ་རྣམས་ཀྱི་བདུད་རྩི་ལྟ་བུའམ། ཀླུ་རྣམས་ཀྱི་བདུད་རྩི་ལྟ་བུ་ཉིད་ཡིན་ནོ། །དེ་བས་ན་ཡོན་ཏན་ཆེན་པོ་དེ་ལྟ་བུ་དང་ལྡན་པའི་བདུད་རྩིའི་སྨན་མར་འདི་

ཟོས་ནས། དེའི་རྗེས་འོ་མ་དང་ཤ་ཁུ་བཏུང་བར་བྱ་ཞིང་མར་དེ་བཟའ་བར་བྱའོ། །དེ་ལྟར་མེ་དྲོད་ཇི་ཙམ་གྱིས་འཇུ་བའི་ཚད་དུ་ཟོས་ན་མིའི་ཁུ་ཆུ་ཉམས་པ་ལ་སོགས་པའི་སྟོབས་སྐྱེད་པར་བྱེད་པ་ཡིན་པས། དེ་དག་ལ་ཉམས་བརྟ་བའི་ཕྱིར་བླུད་པར་བྱ་སྟེ། དེས་ནི་ཡོན་ཏན་དེ་དག་

བསྐྱེད་པ་དང་། དེ་བཞིན་དུ་ལུད་པ་ལ་སོགས་པའི་ནད་སེལ་བར་བྱེད་པ་ཡིན། ཁུ་བ་འཕེལ་བར་བྱེད་པ་ཉིད་ཀྱིས་ན་བུ་སྐྱེད་པར་བྱེད་ཅིང་སློན་པ་ལ་སོགས་པ་འཇོམས་པར་བྱེད་པ་ཡིན་ནོ། །གཟེ་མ་བཙོད་དང་པུ་ཤེལ་ཙེ། །བ་ལ་ཏང་ཕལ་བུ་ཏི་ཀ ། ཀྲྀཥྞ་པརྞི་དཱུར་བའི་རྩ། །

ཐལ་ཏྲེས་སྟི་ར་པ་ལ་ཤ །དེ་རྣམས་སྲང་རེ་བསྐོལ་བ་ཡི། །འོ་མ་སྨན་ཁུའི་བཞི་འགྱུར་ལ། །ཁ་སྲལ་ཕྲེའུ་ཛི་བན་ཏི། །མེ་ད་གཉིས་དང་ཟངས་རྩི་བ། །ཛི་བ་ཀ་དང་ཉེའུ་ཤིང་བ། །རི་དི་རྒུན་འབྲུ་ཤ་ཁ་ར། །ས་བ་དང་ནི་པདྨའི་རྩ། །མར་ནི་བྲེ་གང་བསྐོལ་བ་ཡིས། །རླུང་

མཁྲིས་སྙིང་འཛག་གཟེར་ནད་སེལ། །གཅིན་སྲི་བ་དང་གཅིན་སྙི་དང་། །གཞང་འབྲུམ་ལུད་པ་ལུས་སྐེམ་དང་། །ཟད་བྱེད་རིམས་ནི་སེལ་བྱེད་ཅིང་། །གཞུ་འདྲེན་བུད་མེད་ཆང་དང་ལམ། །ཁུར་དུབ་སྟོབས་དང་ཤ་ཟད་སྐྱེད། །ཅེས་བྱ་བ་ལ། གཟེ་མ་ལ་སོགས་པའི་

སྨན་ཁུ་བ་བསྐོལ་ལ་ཁ་བ་སྲང་བཞི་བཅུ་རྩ་གཉིས་ཀྱི་ནང་དུ་འོ་མ་སྨན་ཁུའི་བཞི་འགྱུར་བཅུག་ལ། ཁ་སྲེལ་ཕྲེའུ་ཞེས་བྱ་བ་སྲན་ཨད་མ་ཀུབ་ཏ་ཞེས་བྱ་བ་ལ་སོགས་པའི་སྨན་མར་གྱི་བཞི་ཆ་གཞུག་པར་བྱའོ། །བུ་ཏི་ཀ་ནི་ཀརྞའོ། །ཀྲྀཥྞ་པརྞི་ནི་བྲི་ཐག་པརྞིའོ། །སྟི་ར་ནི་ས་ལ་

Vol. 201 · folio 232b

པརྞིའོ། །གཞན་རྣམས་ནི་གོ་བར་ཟད་དོ། །ཤིང་མངར་སྲང་བརྒྱད་རྒུན་འབྲུ་ནི། །བྲེ་གང་བསྐོལ་བར་མར་བཙོས་ལ། །པི་པི་ལིང་སྲང་བརྒྱད་ལྡེ་གུ། །བྲེ་གང་བསྐོལ་བ་བསྒྲངས་ནས་ནི། །ཁར་སྦྲང་རྩི་རེ་རེ་ཞིང་། །སྲང་བརྒྱད་དང་ནི་བསྲེས་པ་ལ། །ནས་ཕྱེ་མཉམ་སྦྱར་

ཟོས་པ་ཡིས། །དེ་ནི་གློ་འགྲམས་ཟད་བྱེད་དང་། །ཁྲག་གི་སྐྲན་ལ་ཕན་པ་ཡིན། །ཞེས་བྱ་བ་ལ། །ཤིང་མངར་སྲང་བརྒྱད་དང་། རྒུན་འབྲུ་བྲེ་གང་བསྐོལ་བའི་ཁུ་བར་མར་ཡང་བྲེ་གང་བཙོས་ལ། པི་པི་ལིང་གི་ལྡེ་གུ་སྲང་བརྒྱད་བཅུག་སྟེ། དེ་བསྐོལ་ནས་བསྒྲངས་པའི་ནང་

དུ་ཁ་ར་དང་སྦྲང་རྩི་སྲང་བརྒྱད་བརྒྱད་བཅུག་པ་དེ་དང་གཅིག་ཏུ་བྱས་པའི་མར་དེ་དང་ནས་ཕྱེ་ཆ་མཉམ་པར་སྦྱར་ལ། དེ་ཟོས་ན་གློ་འགྲམས་ཤིང་རྡོལ་བ་ལ་སོགས་པའི་ནད་ལ་ཕན་པ་ཡིན་ནོ། །སྐྱུ་རུ་ར་དང་བི་ད་རི། །བུ་རམ་ཤིང་ཁུ་འཚོ་བྱེད་ཀྱི། །སྡེ་ཚན་བསྐོལ་བའི་ཁུ་བ་མར། །

བ་དང་ར་ཡི་འོ་མ་ལས། །བྲེ་ནི་རེ་རེ་བཙོ་བར་བྱ། །བསྐོལ་བཙགས་ཁ་ར་སྦྲང་རྩི་ནི། །བྲེ་རེ་དེར་ནི་གཞུག་པར་བྱ། །དེ་ནི་ཟད་བྱེད་བརྗེད་བྱེད་དང་། །ཁྲག་དང་མཁྲིས་པ་ལུད་པ་དང་། །ལུས་སྐེམ་པ་ནི་སེལ་བྱེད་ཅིང་། །རྒས་སྲ་ཚེ་ནི་རིང་བ་དང་། །ཤ་དང་ཁུ་ཆུ་སྟོབས་སྐྱེད་

བྱེད། །ཅེས་བྱ་བ་ལ། སྐྱུ་རུ་རའི་ཁུ་བ་བྲེ་གང་། བི་ད་རིའི་ཁུ་བ་བྲེ་གང་། བུ་རམ་ཤིང་གི་ཁུ་བ་བྲེ་གང་། འཚོ་བྱེད་ཀྱི་སྡེ་ཚན་ཀུན་བསྐོལ་བའི་ཁུ་བ་བྲེ་གང་། མར་བྲེ་གང་། རའི་འོ་མ་བྲེ་གང་། བའི་འོ་མ་བྲེ་གང་སྟེ། དེ་ལྟར་བྲེ་བདུན་བཙོས་ནས་མར་ཚོས་བར་གྱུར་པ་དང་། རས་གཙང་མས་

བཙགས་ཏེ་དེའི་ནང་དུ་ཁ་ར་བྲེ་གང་དང་སྦྲང་རྩི་བྲེ་གང་སྟེ་སྲང་སུམ་ཅུ་རྩ་གཉིས་དེར་བཅུག་པར་བྱའོ། །སྨན་མར་འདི་འཐུངས་ན་ཟད་བྱེད་གཅོང་ཆེན་པོའི་ནད་དང་། བརྗེད་བྱེད་དང་ཁྲག་དང་མཁྲིས་པ་ལ་སོགས་པའི་ནད་སེལ་ཞིང་འཇོམས་པར་བྱེད་པ་དང་། རྒས་སྲ་ཞིང་ལང་

ཚོ་ཡུན་རིང་དུ་འཇོག་པ་དང་། ཚེ་རིང་བ་དང་། ཤ་དང་ཁུ་ཆུ་སྟོབས་སྐྱེད་པར་བྱེད་པ་ཡིན་ནོ། །མཁྲིས་པ་ཤས་ཆེས་མར་བལྡག་བྱ། །རླུང་ཤས་ཆེ་བས་བཏུང་བར་བྱ། །བལྡགས་པས་མཁྲིས་པ་ཞི་བྱེད་ཀྱིས། །ཉུང་བས་རླུང་ནི་འཇོམས་མི་ནུས། །འཐུངས་ན་རླུང་ནི་

Vol. 201 · folio 233a

གནོན་བྱེད་ཅིང་། །མེ་དྲོད་ནང་དུ་སྡུད་པར་བྱེད། །ཅེས་བྱ་བ་ལ། དེ་ལྟར་ན་མཁྲིས་པ་ཤས་ཆེ་བ་ལ་ནི་མར་བལྡག་པའི་ཚུལ་གྱིས་བསྟེན་པར་བྱ་ལ། རླུང་ཤས་ཆེ་བས་ནི་སྨན་མར་བཏུང་བར་བྱའོ། །ཅིའི་ཕྱིར་ཞེ་ན། བལྡགས་པས་ནི་མཁྲིས་པ་ཞི་བར་

བྱེད་ཀྱི། བལྡག་པ་ཉུང་བ་དེ་ཙམ་གྱིས་རླུང་འཇོམས་པར་ནི་མི་ནུས་ལ། དེས་ན་རླུང་གི་ནད་ལ་སྨན་མར་དེ་དག་འཐུངས་ན་རླུང་གནོན་པར་བྱེད་ཅིང་རླུང་ལས་རྒྱལ་བར་བྱེད་དོ། །མར་འདི་དག་གྲང་མོར་བསྟེན་ཀྱང་རླུང་གནོན་པར་བྱེད་དེ་མཐུ་རྩལ་གྱིས་གནོན་པར་བྱེད་དོ་ཞེས་བྱ་བའི་

དོན་ནོ། །ཡང་མར་འཐུངས་པས་ནི་བུད་ཤིང་གི་མེ་ལ་མར་བཅུག་པ་ལྟར་ཕོ་བའི་མེ་དྲོད་ནང་དུ་སྡུད་པར་བྱེད་ཅིང་སྟོབས་ཅན་དུ་བྱེད་དོ། །སྐེམ་ཞིང་ལུས་ཀྱི་ཤ་ཟད་པས། །སྨན་མར་བཤད་པ་འདི་དག་ཉིད། །སྨིག་རྐང་འབྲས་ཡོས་པི་པི་ལིང་། །ཕྱེ་མ་ལྡེ་གུར་བྱས་ལ་སྦྱིན། །

ཞུན་མར་བུ་རམ་སྦྲང་རྩིའི་ཆ། །བཅུག་སྟེ་བྱིན་ལ་འོ་མ་བླུད། །རོ་ཙ་བརྩོན་དང་ལུས་རྒྱས་སྟོབས། །འདི་ཡིས་མྱུར་དུ་སྐྱེད་པར་འགྱུར། །ཞེས་བྱ་བ་ལ། ལུས་སྐེམ་ཞིང་རིད་པས་སྔར་བཤད་པའི་སྨན་མར་འདི་དག་སྨིག་རྐང་ལ་སོགས་པའི་སྨན་གྱི་ཕྱེ་མ་དང་བསྲེས་ཏེ་ཁུ་བ་ཞུ་

བར་མ་གྱུར་པར་ལྡེ་གུར་བྱས་ལ་སྦྱིན་ནོ། །དེ་ཡང་ཕྱེ་མར་དང་བཅས་པའི་མར་སྐ་བ་ལ། བུ་རམ་དང་སྦྲང་རྩིའི་ཆ་བཅུག་སྟེ་གོང་གོང་པོར་བྱས་ལ་བྱིན་ནས་དེའི་རྗེས་ལ་སྐོམ་དུ་འོ་མ་བླུད་པར་བྱའོ། །དེས་ནི་རོ་ཙ་ཞིང་ཁུ་བ་འཕེལ་བ་ལ་སོགས་པ་མྱུར་ཞིང་རིང་པོར་མི་ཐོགས་པར་སྐྱེད་ཅིང་

འཐོབ་པར་འགྱུར་རོ། །བུམ་ཤ་ཤུན་ལྤགས་ས་བོན་བསལ། །སྲང་བརྒྱད་རླངས་པར་བཙོས་ནས་ནི། །ཞུན་མར་བྲེ་གང་ནང་གཞུག་དཀྲུགས། །སྦྲང་རྩིའི་མདོག་འདྲར་གྱུར་པ་དང་། །ཧྭགས་ནི་སྲང་བརྒྱད་པི་པི་ལིང་། །བཅའ་སྒ་ཟིར་སྲང་གཉིས་དང་། །དྲི་སྣ་གསུམ་དང་འུ་

སུ་དང་། །ན་ལེ་ཤམ་ནི་རེ་རེ་ཞིང་། །སྲང་ནི་ཕྱེད་ཕྱེད་ཚད་བཅུག་ལ། །ཕབ་སྟེ་བསྒྲངས་པར་གྱུར་བ་དང་། །སྦྲང་རྩི་མར་གྱི་ཕྱེད་བཅུག་ལ། །གཟར་བུས་དཀྲུགས་ཏེ་བཞག་གྱུར་བ། །ལུད་པ་སྐྱིགས་བུ་ཡི་ག་འཆུས། །དབུགས་མི་བདེ་དང་ཁྲག་མཁྲིས་དང་། །གློ་འགྲམས་

Vol. 201 · folio 233b

ཟད་བྱེད་འཇོམས་པར་བྱེད། །གློ་འགྲམས་པ་ནི་འབྱོར་བྱེད་ཅིང་། །བློ་དང་དྲན་པ་སྟོབས་རབ་སྐྱེད། །ཀུ་སྨན་ད་ཡི་བཅུད་ཀྱིས་ལེན། །ཡིད་དུ་འོང་བ་དམ་པ་འདི། །ཐ་སྐར་བུ་གཉིས་ཀྱིས་བཤད་ཡིན། །ཞེས་བྱ་བ་ལ། བུམ་ཤ་ནི་ཀུ་སྨན་ད་ཞེས་བྱ་བ་སྟེ། དེའི་ཕྱིའི་ཤུན་པ་

བཤུས་ཤིང་ནང་གི་ས་བོན་བསལ་བ་སྲང་བརྒྱད་རླངས་པར་ཁུ་བ་ཁ་རླངས་ལ་ཚོད་མའི་ཚུལ་ལྟར་བཙོ་བར་བྱ་སྟེ། འོག་ཏུ་ཆུས་གང་བའི་སྣོད་ཆེན་པོ་བསྐོལ་བའི་སྟེང་དུ་སྣོད་བུ་ག་ཅན་ལ་བཞག་སྟེ་དེ་ཚོས་པར་བྱས་པ་དང་། མར་བྲེ་གང་ལའང་སྣོད་གཅིག་ཏུ་བླུགས་ལ་གཟར་བུས་

དཀྲུགས་ལ་དེ་སྦྲང་རྩིའི་མདོག་འདྲ་བར་གྱུར་པ་དང་། ཧྭགས་སྲང་བརྒྱད་དང་། པི་པི་ལིང་དང་བཅའ་སྒ་དང་། ཟིར་སྲང་གཉིས་དང་དྲི་སྣ་གསུམ་ཞེས་བྱ་བ་མིང་གི་རྣམ་གྲངས་སུ་དྲི་བཟངས་གསུམ་ཞེས་བྱ་བ་ཤིང་ཚ་ལ་སོགས་པ་དང་། འུ་སུ་དང་ན་ལེ་ཤམ་བསྣན་ན་རེ་རེ་

ཞིང་སྲང་ཕྱེད་ཕྱེད་དེ་ཞོ་བཞི་བཞི་བཅུག་ལ་ཕབ་པ་བསྒྲངས་པར་གྱུར་པ་དང་། ལྡེ་གུར་སྦྲང་རྩི་སྲང་བཅུ་དྲུག་ལ་གཟར་བུས་ཀུན་ཏུ་དཀྲུགས་ཏེ། དེའི་འོག་ཏུ་རྫ་སྣོད་གཙང་མར་བཅུག་སྟེ་བཞག་པར་གྱུར་པ་དེ་ནི་བུམ་ཤའི་བཅུད་ཀྱིས་ལེན་ཞེས་བྱ་སྟེ། དེ་བླུད་ན་ལུད་པ་ལ་

སོགས་པའི་ནད་འཇོམས་པར་བྱེད་པ་དང་། གློ་འགྲམས་པ་འཆོས་པར་བྱེད་ཅིང་འཚོ་བ་དང་བློ་ལ་སོགས་པ་རབ་ཏུ་སྐྱེད་པར་བྱེད་པ་ཡིན་ཏེ། སྨན་མར་འདི་ནི་ཀུ་སྨན་ད་ཞེས་བྱ་བ་བུམ་ཤའི་བཅུད་ཀྱིས་ལེན་ཡིན་ཏེ་ཡིད་དུ་འོང་ཞིང་སྙིང་དགའ་བར་བྱེད་པའི་སྐྱོན་མེད་པའི་དམ་

པ་འདི་ནི་ལྷའི་སྨན་པ་ཐ་སྐར་གྱི་བུ་གཉིས་ཀྱིས་བཤད་པ་ཡིན་ནོ། །དེ་ཡང་བཅུད་ཀྱིས་ལེན་ཞེས་བྱ་བའི་ངེས་པའི་ཚིག་ནི། དངས་མ་ལ་སོགས་བདུན་ཐོབ་པའི། །ཐབས་གནས་ཡིན་པས་བཅུད་ཀྱིས་ལེན། །ཞེས་བྱ་བ་བཤད་པ་ཡིན་ནོ། །ནཱ་ག་བ་ལའི་རྩ་བ་ནི། །

ཞོ་གཅིག་སོགས་ཀྱིས་བསྐྱེད་སྲང་གཅིག །འོ་མར་བཅས་པ་ཟླ་གཅིག་བཏུང་། །འོ་མ་སྤྱད་ཅིང་ཟས་མི་བཟའ། །སྦྱོར་འདིས་ཚེ་ནི་འཕེལ་བྱེད་ཅིང་། །སྟོབས་སྐྱེད་ཁ་དོག་བཟང་བྱེད་མཆོག །ཅེས་བྱ་བ་ལ། ནཱ་ག་བ་ལའི་རྩ་བ་སྲང་གཅིག །དང་པོར་ཞོ་གཅིག་

Vol. 201 · folio 234a

ནས་བསྐྱེད་ཅིང་འོ་མ་དང་སྦྱར་ཏེ་བཏུང་བར་བྱ་སྟེ། ཉིན་ཞག་དང་པོ་ལ་ཞོ་གཅིག །གཉིས་པ་ལ་ཞོ་གཉིས། གསུམ་པ་ལ་ཞོ་གསུམ། བཞི་པ་ལ་ཞོ་བཞི། ལྔ་པ་ལ་ཞོ་ལྔ། དྲུག་པ་ལ་ཞོ་དྲུག །བདུན་པ་ལ་ཞོ་བདུན། བརྒྱད་པ་ལ་སྲང་གཅིག་བཏུང་སྟེ། དེ་

ཡན་ཆད་ཀྱི་ཉིན་ཞག་ལྷག་མ་ཉི་ཤུ་རྩ་གཉིས་ལ་སྲང་རེ་འོ་མ་དང་སྦྱར་ཏེ་བཏུང་བར་བྱའོ། །དེ་དག་གི་ཚེ་ནད་པས་འོ་མ་སྤྱད་ཅིང་བསྟེན་པར་བྱའི། ཁ་ཟས་གཞན་བཟའ་བར་མི་བྱའོ། །སྦྱོར་བ་འདི་ནི་ནཱ་ག་པ་ལའི་རྩ་བའི་སྦྱོར་བ་ཞེས་བྱ་སྟེ། སྟོབས་ལ་སོགས་པ་འཕེལ་

བར་བྱེད་པའི་མཆོག་ཡིན་ནོ། །མན་དུ་ཀ་པརྞི་ཤིང་མངར། །བཅའ་སྒའི་སྦྱོར་བའང་འདི་ཡིན་ནོ། །ཞེས་བྱ་བ་ལ། མན་དུ་ཀ་པརྞི་ཞེས་བྱ་བ་སྦལ་པའི་དབྱིབས་འདྲ་བའི་འོ་མ་ཡང་ཡོད་དོ། །དེ་ཡང་ནཱ་ག་པ་ལའི་རྩ་བ་དང་འདྲ་བར་ཞོ་གཅིག་ནས་རིམ་གྱིས་བསྐྱེད་པ་ཟླ་བ་

གཅིག་གི་བར་དུ་སྲང་གཅིག་འོ་མ་དང་ལྷན་ཅིག་བཏུང་ཞིང་ཟས་མི་བཟའ་བ་ལ་སོགས་པ་དང་། དེའི་ཡོན་ཏན་ལ་སོགས་པ་ཐམས་ཅད་ཀྱང་མཐུན་པ་ཡིན་ནོ། །ཤིང་མངར་དང་བཅའ་སྒའི་སྦྱོར་བ་ཡང་ནཱ་ག་པ་ལའི་སྦྱོར་བ་དང་མཐུན་པར་བྱར་རུང་ངོ་། །ནཱ་ག་པ་ལ་སྲང་བརྒྱ་

ནི། །ཆུ་སྲང་ལྔ་བརྒྱ་རྩ་བཅུ་གཉིས། །ནང་དུ་བསྐོལ་ཏེ་བཞི་ཆ་ལུས། །སྨན་ཁུ་དེ་དང་ཆ་མཉམ་པའི། །འོ་མ་མར་དང་བསྐོལ་བར་བྱ། །བ་ལ་ཨ་ཏི་བ་ལ་དང་། །ཤིང་མངར་པུརྞ་རྣ་བ་དང་། །སྟག་ཚེར་བ་དང་ཏང་པལ་དང་། །པི་ལ་ཡ་དང་ཁ་སྲལ་ཕྲེའུ། །ཨ་ཤྭ་གནྡྷ་

ཁ་ར་དཀར། །ཉེའུ་ཤིང་མེ་ད་རྣམ་གཉིས་དང་། །གཟེ་མར་མཉེ་བ་གཉིས་དང་། །པ་ཡ་སྱ་དང་ཟི་ར་གཉིས། །པདྨའི་རྩ་བ་སྡོང་བུ་དང་། །འབྲ་གོ་སྲིང་ག་ཏ་ཀ་དང་། །ཀེ་ཤེ་རུ་ཀ་སྲང་ཕྱེད་ཕྱེད། །ནཱ་ག་པ་ལའི་སྨན་མར་འདིས། །ཁྲག་མཁྲིས་གློ་རྡོལ་ཟད་བྱེད་དང་། །སྐོམ་

དད་མགོ་འཁོར་སེལ་བྱེད་ཅིང་། །སྟོབས་ནི་སྐྱེད་པར་བྱེད་པའི་མཆོག །མདོག་སྣུམ་མདངས་བཟང་ཚེ་འཕེལ་ཞིང་། །སྐྲ་དཀར་གཉེར་མ་འཇིག་པར་བྱེད། །ཟླ་བ་གཅིག་གི་བར་བསྟེན་ན། །རྒན་པོའང་གཞོན་ནུ་ཉིད་དུ་འགྱུར། །ཞེས་བྱ་བ་ལ། སྨན་ནཱ་ག་པ་ལ་སྲང་བརྒྱ་

Vol. 201 · folio 234b

ཆུ་སྲང་ལྔ་བརྒྱ་རྩ་བཅུ་གཉིས་ཀྱི་ནང་དུ་བསྐོལ་ཏེ་དེའི་བཞི་ཆ་ལུས་པ་དང་སྨན་ཁུ་དེ་དང་ཆ་མཉམ་པའི་འོ་མ་དང་། མར་སྲང་བརྒྱ་ཉི་ཤུ་རྩ་བརྒྱད་བཅུག་ལ་བསྐོལ་བར་བྱའོ། །དེའི་ནང་དུ་བ་ལ་དང་། ཨ་ཏི་བ་ལ་ལ་སོགས་པ་སྲང་ཕྱེད་ཕྱེད་བཅུག་ལ་དེ་བཞིན་དུ་བསྐོལ་བར་བྱའོ། །དེ་ལྟ་

བུར་བསྐོལ་བའི་ནཱ་ག་པ་ལའི་སྨན་མར་འདིས་ནི་ཁྲག་མཁྲིས་ལ་སོགས་པ་སེལ་བར་བྱེད་པ་དང་། སྟོབས་སྐྱེད་པ་ནས་རྒས་སྲ་བའི་བར་གྱི་ཡོན་ཏན་དང་ལྡན་པ་ཡིན་ནོ། །ཆོ་ག་འདིས་ནི་དྲོད་སྐྱེད་ཅིང་། །མེ་དྲོད་བྲི་བ་སྐྱེད་འཇུ་བྱེད། །གཅོང་ཆེན་བཤད་པའང་གློ་རྡོལ་བསྔགས། །

འཁྲུ་ན་གཅོད་པར་བྱེད་པར་ཕན། །ཞེས་བྱ་བ་ལ། བཤད་མ་ཐག་པའི་སྨན་མར་གྱི་ཆོ་གའི་སྦྱོར་བ་འདིས་ནི་གློ་རྡོལ་དང་ཟད་བྱེད་ཀྱི་ནད་ཀྱིས་བཏབ་པའི་སྟོབས་བསྐྱེད་པས་མེ་དྲོད་སྐྱེད་པར་བྱེད་ཅིང་འབྱུང་བ་དང་། ཕོ་བའི་མེ་དྲོད་འབྲི་བར་བྱེད་པ་དག་དྲོད་སྐྱེད་ཅིང་ཟས་འཇུ་བར་

བྱེད་པ་ཡིན་ནོ། །གཞན་ཡང་གཅོང་ཆེན་པོ་གསོ་བའི་སྐབས་སུ་བཤད་པའི་སྦྱོར་བ་དེ་ཡང་གློ་རྡོལ་བའི་ནད་ལ་བསྔགས་པ་ཡིན་ནོ། །གང་གི་ཕྱིར་གློ་རྡོལ་བའི་མི་དེ་འཁྲུ་བར་གྱུར་ན། གཅོད་པའི་སྦྱོར་བ་གང་ཡིན་པ་དེ་བྱས་ན་བསྔགས་སོ། །རྩ་བ་བཅུ་པ་ཁ་སྲལ་ཕྲེའུ། །

ཤང་ཀ་པུཥྤ་ཟུར་པ་དང་། །བ་ལ་ཧསྟི་པི་པི་ལིང་། །ཨ་པ་མརྒ་ཀྲུ་ཏྲུག་ཏྲེས། །ག་བྲ་པི་པི་ལིང་རྩ་བ། །མ་ནུ་སྲང་ནི་གཉིས་གཉིས་དང་། །ནས་སྲང་དྲུག་ཅུ་རྩ་བཞི་དག །ཨ་རུ་ར་ནི་སྲང་བརྒྱ་དག །ཆུ་སྲང་དྲུག་བརྒྱ་བཞི་བཅུས་བསྐོལ། །ནས་ཚོས་པ་དང་སྨན་ཁུ་དེ། །

བཙགས་ལ་ཨ་རུ་ར་བརྒྱ་དེར། །བུ་རམ་སྲང་བརྒྱ་བཅུག་ལ་བསྐོལ། །མར་དང་ཏིལ་མར་པི་པི་ལིང་། །ཕྱེ་མ་སྲང་ནི་བརྒྱད་པོ་དག །བསྐོལ་ཏེ་བསྒྲངས་ནས་སྦྲང་རྩིར་གཞུག །རྟག་ཏུ་ཨ་རུ་ར་གཉིས་བཅས། །ལྡེ་གུ་བཅུད་ལེན་འདི་ཟོས་ན། །དེས་ནི་སྐྲ་དཀར་གཉེར་

མ་མེད། །ཚེ་རིང་མདོག་སྟོབས་འཕེལ་བར་བྱེད། །ལུད་ལྔ་ཟད་བྱེད་དབུགས་མི་བདེ། །སྐྱིགས་བུར་བཅས་པའི་མི་བཟད་རིམས། །གཅིན་སྙི་བ་ཡི་ནད་དང་ནི། །གཞང་འབྲུམ་སྐྲན་དང་སྙིང་ནད་དང་། །ཆམ་པ་ཡི་ག་འཆུས་པ་སེལ། །བཅུད་ཀྱིས་ལེན་མཆོག་དཔལ་ཡོན་

Vol. 201 · folio 235a

ཅན། །འདི་ནི་དྲང་སྲོང་རི་བྱིས་བཤད། །ཅེས་བྱ་བ་ལ། སྨན་རྩ་བ་བཅུ་པ་ལ་སོགས་པའི་སྨན་སྣ་རེ་རེ་ཞིང་སྲང་གཉིས་གཉིས་དང་ནས་སྲང་དྲུག་ཅུ་རྩ་གཉིས་ཏེ་བྲེ་དོའོ། །ཨ་རུ་ར་སྲང་བརྒྱ་སྟེ་འདི་དག་ཆུ་སྲང་དྲུག་བརྒྱ་བཞི་བཅུའི་ནང་དུ་བསྐོལ་ལ་ལེགས་པར་

ཚོས་པར་གྱུར་པ་དང་སྨན་ཁུ་དེ་བཙགས་ལ་ཨ་རུ་ར་སྲང་བརྒྱ་བཅུག་ལ་དེར་བུ་རམ་སྲང་བརྒྱ་བཅུག་ལ་མར་ལ་སོགས་པ་ལས་སྲང་བརྒྱད་བརྒྱད་བཅུག་ལ། པི་པི་ལིང་ནི་སྐམ་པོ་ཡིན་པའི་ཕྱིར་སྲང་བཞི་གཞུག་པར་བྱ་སྟེ། དེ་ཡང་གཞུང་ལས། །ཕུལ་གང་ལས་ནི་གཤེར་

བའི་རྫས། །ཉིས་འགྱུར་དུ་ནི་གཞུག་པར་བྱ། །ཞེས་སྨོས་པ་ཡིན་ནོ། །དེ་ལྟར་བསྐོལ་བ་དེ་བསྒྲངས་ནས་སྦྲང་རྩི་སྲང་བརྒྱད་བརྒྱད་བཅུག་ལ། ལྡེ་གུ་དེ་ལས་ཨ་རུ་ར་གཉིས་གཉིས་རྟག་ཏུ་ཟོས་ན། དེས་སྐྲ་དཀར་དང་གཉེར་མ་མེད་པར་བྱེད་པ་དང་། ཚེ་དང་སྟོབས་ལ་

སོགས་པ་འཕེལ་བར་བྱེད་པ་དང་། སྔར་བཤད་པའི་ལུད་པ་ལྔ་པོ་འཇོམས་པར་བྱེད་པ་ཡིན་ཏེ། བཅུད་ཀྱིས་ལེན་འདི་ནི་དཔལ་ཡོན་དང་བཅས་ཤིང་བཀྲ་ཤིས་པ་ཡིན་ལ། འདི་ནི་དྲང་སྲོང་རི་བྱི་ཞེས་བྱ་ཨ་ག་སྟས་བཤད་པ་ཡིན་ནོ། །རྩ་བ་བཅུ་བ་བ་ལ་དང་། མུར་

བ་སེར་པོ་རྣམ་གཉིས་དང་། །པི་པི་ལིང་ནི་རྣམ་གཉིས་དང་། །པ་ཐ་ཨ་ཤྭ་གནྡྷ་དང་། །ཨ་པ་མརྒ་ཁ་སྲལ་ཕྲེའུ། །སླེ་ཏྲེས་དན་ཏི་བོང་ང་དཀར། །བིལ་བ་གཞོན་ནུ་དུར་བྱིད་དང་། །ཙི་ཏྲ་ཀ་རྩ་ལོ་མར་བཅས། །པ་ཡ་སྱ་དང་དུག་མོ་ཡུངས། །སྤང་སྤོས་བི་ཟ་ཀའི་སྙིང་པོ། །

མེ་ཏོག་བཅས་དང་རྐང་མར་དང་། །གོ་བྱེ་བྱི་དང་ག་ཏ་དང་། །ཉེའུ་ཤིང་བུ་ཏི་ཀ་རཉྫ། །དོང་ག་སོ་མ་ར་ཛ་དང་། །ས་ཧ་ར་ཛ་ཤི་ཀྲུ་དང་། །ནིམ་པའི་ཤུན་ལྤགས་བུ་རམ་ཤིང་། །ཕྲ་མོའི་ཁུ་བ་སྲང་རེ་དང་། །ཨ་རུ་ར་སྟོང་ཆིག་བརྒྱ་དང་། །ནས་སྲང་ཉིས་བརྒྱ་ལྔ་བཅུ་དྲུག །ཆུ་ནི་

བརྒྱད་འགྱུར་ནང་དུ་བསྐོལ། །ནས་ཚོས་པ་དང་ཕོག་ནས་ནི། །བཙགས་ནས་ཨ་རུ་ར་བཅས་དེར། །བུ་རམ་རྙིང་པ་སྲང་བརྒྱ་གཞུག །ཏིལ་མར་ཞུན་མར་སྐྱུ་རུ་རའི་ཁུ། །བྲེ་རེ་བཅུག་ནས་དེ་རྗེས་ཡང་། །མེ་ཆུང་ལ་ནི་བཙོས་ནས་སུ། །གཟར་བུར་ཆགས་ནས་ཐབ་ལས་

Vol. 201 · folio 235b

དབབ། །བསྒྲངས་ནས་སྦྲང་རྩི་བྲེ་དོ་དང་། །པི་པི་ལིང་ནི་ཕུལ་གང་གཞུག །དྲི་སྣ་གསུམ་ནི་ཕྱེར་བཏགས་པ། །སྲང་གསུམ་བཅུག་ནས་དེ་འོག་ཏུ། །རྫ་སྣོད་རྙིང་བཅུག་འབྲུ་ནང་དུ། །བཅུ་ག་སྟེ་ཟླ་བ་གཅིག་གཞག་བྱ། །དེ་ནས་སྔ་མ་བཞིན་དུ་བཟའ། །གནས་འཇོག་གིས་

བཤད་བཅུད་ལེན་འདི། །སྔོན་ལས་ཡོན་ཏན་ལྷག་པར་ཆེ། །ནད་མེད་ཀྱིས་བཟའ་དགག་པ་མེད། །དུས་ཀུན་ཏུ་ཡང་བསྔགས་པ་ཡིན། །ཞེས་བྱ་བ་ལ། རྩ་བ་བཅུ་ལ་སོགས་པ་སྨན་སྣ་རེ་སྲང་རེར་བྱའོ། །སེར་པོ་གཉིས་ནི་ཡུང་བ་དང་། སྐྱེར་པའོ། །པི་པི་ལིང་གཉིས་ནི་

པི་པི་ལིང་དང་ཧ་སྟི་པི་པི་ལིང་ངོ་། །ཁ་སྲལ་ཕྲེའུ་ནི་ཨད་མ་ཀུབ་ཏའོ། །བིལ་བ་གཞོན་ནུ་ནི་བིལ་བ་སྨིན་པ་ཆུང་ངུའོ། །ཙི་ཏྲ་ཀ་ནི་ཙི་ཏྲ་ཀའི་རྩ་བ་དང་ལོ་མ་གཉིས་སོ། །པ་ཡ་སྱ་ནི་ཀྵི་རི་ནིའོ། །དུག་མོ་ཡུངས་ཀྱི་ཤུན་ལྤགས་ལ་བྱའོ། །པི་ཟ་ཀ་ནི་ཨ་ཤ་ན་སྟེ་དེའི་ནི་སྙིང་པོ་

དང་མེ་ཏོག་གཞུག་གོ། །བྱི་དང་ག་ཏ་ནི་བླུགས་གཟར་གྱི་ཤིང་ངོ་། །སོ་མ་ར་ཛ་ནི་ཙན་ཏྲ་རེ་ཁའོ། །བུ་རམ་ཤིང་ཕྲ་མོ་ནི་རྩ་ལྟ་བུའི་བུ་རམ་ཤིང་སྟེ་སྨན་དེ་དག་སྲང་རེ་དང་ཨ་རུ་ར་སྟོང་ཆིག་བརྒྱ་ནས་སྲང་ཉིས་བརྒྱ་ལྔ་བཅུ་རྩ་དྲུག་སྟེ་བྲེ་བརྒྱད་པོ་དེ་དག་ཐམས་ཅད་གཅིག་ཏུ་བསྡུས་

ནས་སྨན་དང་ནས་ཀྱི་བར་སྲང་ཇི་ཙམ་ཡོད་པ་དེའི་བརྒྱད་འགྱུར་གྱི་ཆུའི་ནང་དུ་བསྐོལ་ནས་ཚོས་པར་གྱུར་པ་དང་ཕོག་ནས་རས་གཙང་མས་ཁུ་བ་བཙགས་ཏེ་ཨ་རུ་ར་དང་བཅས་པའི་ཁུ་བ་དེར་བུ་རམ་རྙིང་པ་སྲང་བརྒྱ་བཅུག་ལ་ཏིལ་མར་དང་ཞུན་མར་དང་སྐྱུ་རུ་རའི་ཁུ་བ་བྲེ་རེ་རེ་བཅུག་ལ། དེའི་

རྗེས་ལ་སླར་ཡང་མེ་ཆུང་ངུ་ལ་བཙོས་ནས་དཀྲུག་ཅིང་བསྐོལ་བ་ན་གཟར་བུར་ཆགས་པར་གྱུར་ན་ལྡེ་གུ་དེ་ཐབ་ལས་དབབ་ལ། དེ་བསྒྲངས་ནས་གྲང་བར་གྱུར་པ་དང་། སྦྲང་རྩི་བྲེ་དོ་སྟེ་སྲང་དྲུག་ཅུ་རྩ་བཞི་གཞུག་ལ་པི་པི་ལིང་ཕུལ་གང་སྟེ་སྲང་བཞི་གཞུག་པར་བྱ་སྟེ། ཤིང་ཚ་

དང་སུག་སྨེལ་དང་གན་དྷ་བྷ་དྲ་ཞེས་བྱ་བ་དྲི་སྣ་གསུམ་ཕྱེ་མར་བཏགས་པ་སྲང་གསུམ་གཞུག་པར་བྱའོ། །དེ་ནས་དེའི་འོག་ཏུ་ལྡེ་གུ་རྫ་མའི་སྣོད་རྙིང་པ་གཙང་མའི་ནང་དུ་བཅུག་ལ་འབྲུའི་ནང་དུ་བཅུག་ནས་ཟླ་བ་གཅིག་གཞག་པར་བྱའོ། །དེ་ནས་སྔ་མ་བཞིན་དུ་སྟེ་དྲང་སྲོང་རི་བྱིས་

Vol. 201 · folio 236a

བཤད་པའི་ལྡེ་གུའི་ཚུལ་ལྟར་བཟའ་ཞིང་ཨ་རུ་ར་གཉིས་གཉིས་དང་བཅས་པར་རྟག་ཏུ་བཟའ་བར་བྱ་སྟེ་བཅུད་ཀྱིས་ལེན་འདི་ནི་དྲང་སྲོང་ཆེན་པོ་གནས་འཇོག་གིས་བཤད་པ་ཡིན་ཏེ། སྔ་མ་ལས་ཡོན་ཏན་ལྷག་པར་ཆེ་སྟེ། དྲང་སྲོང་རི་བྱིས་བཤད་པའི་བཅུད་ཀྱིས་ལེན་

པས་ཀྱང་འདི་ཡོན་ཏན་ཆེས་ཆེ་བ་ཡིན་ནོ། །གཞན་ཡང་ནད་མེད་པ་དག་གིས་ཀྱང་བཟའ་བ་དང་སྤྱོད་ལམ་བསྲུང་བ་ལ་སོགས་པ་དགག་པ་མེད་པ་དང་། དུས་ཚིགས་དྲུག་ཆར་ཀུན་ཏུ་ཡང་། །བཟའ་བར་བསྔགས་ཤིང་ཡོན་ཏན་ཆེ་བ་ཡིན་ནོ། །རྒྱམ་ཚ་བཅའ་སྒ་སྲང་རེ་དང་། །

ཁ་རུ་ཚ་ནི་སྲང་གཉིས་དང་། །ད་ཏྲིག་སེའུ་འབྲུ་ཨརྫ་ཀ །དེ་དག་སྲང་ནི་བཞི་བཞི་དང་། །ན་ལེ་ཤམ་གཅིག་གོ་སྙོད་གཉིས། །འུ་སུའི་འབྲས་བུ་སྲང་བཞི་དང་། །ཚད་འདི་ལས་ནི་ཕྱེ་མར་བྱས། །ཟས་དང་སྐོམ་ལ་བཏབ་སྟེ་སྦྱིན། །དེས་ནི་ཡི་ག་འབྱེད་པ་དང་། །མེ་དྲོད་

སྐྱེད་ཅིང་ཉམས་སྟོབས་སྐྱེད། །རྩིབ་ལོགས་ན་དང་དབུགས་མི་བདེ། །ལུད་པ་ལུ་བའི་ནད་སེལ་བྱེད། །ཅེས་བྱ་བ་ལ། རྒྱམ་ཚ་དང་བཅའ་སྒ་སྲང་རེ། ཁ་རུ་ཚ་སྲང་གཉིས། ད་ཏྲིག་ལ་སོགས་པ་སྲང་བཞི་བཞི་ཕུལ་རེ། ན་ལེ་ཤམ་སྲང་གཅིག །གོ་སྙོད་སྲང་གཉིས། འུ་སུའི་

འབྲས་བུ་སྲང་བཞི་སྟེ། འདི་དག་གཅིག་ཏུ་བསྲེས་ལ་ཕྱེ་མར་བཏགས་ཏེ། ཕྱེ་མ་དེ་ལས་ནད་པ་ལུས་ཟུངས་དང་མེ་དྲོད་ལ་སོགས་པའི་ཚུལ་ལས་དཔགས་ཏེ་ནད་པ་ལ་ཉིན་རེ་ཞིང་སྦྱིན་པར་བྱ་སྟེ། ཕྱེ་མ་དེས་ནི་ཡི་ག་འབྱེད་ཅིང་ལེན་པ་དང་དྲོད་སྐྱེད་པ་དང་། ཉམས་སྟོབས་དང་ལྡན་

པར་བྱེད་པ་དང་། རྩིབ་ལོགས་ན་བ་ལ་སོགས་པ་སེལ་བར་བྱེད་པ་ཉིད་ཡིན་ནོ། །འུ་སུ་ཞོ་གཉིས་གོ་སྙོད་དང་། །ལ་ལ་ཕུད་ལ་ཞོ་བཞི་བཞི། །སེའུ་འབྲུ་དང་ནི་ད་ཏྲིག་དག །དེ་ཡི་ཉིས་འགྱུར་ཉིས་འགྱུར་བྱ། །ཁ་རུ་ཚ་ནི་སྲང་གཅིག་དང་། །བཅའ་སྒ་ཞོ་གཉིས་བིལ་བའི་རྐང་། །

སྲང་ལྔ་དང་ནི་སྦྱར་བ་ལ། །ཁ་ར་སྲང་ནི་བཅུ་དྲུག་གཞུག །རོ་དྲུག་པ་འདི་བཟའ་བ་དང་། །བཏུང་བ་སྔ་མ་བཞིན་དུ་སྦྱིན། །ཞེས་བྱ་བ་ལ། འུ་སུའི་འབྲས་བུ་ཞོ་གཉིས་གོ་སྙོད་དང་ལ་ལ་ཕུད་ཞོ་བཞི་བཞི་སྟེ། སེའུ་འབྲུ་དང་། ད་ཏྲིག་ལ་ཉིས་འགྱུར་ཏེ། དེ་གོ་སྙོད་དང་ལ་ལ་ཕུད་

Vol. 201 · folio 236b

ལས་སེའུ་འབྲུ་དང་ད་ཏྲིག་ཉིས་འགྱུར་ཉིས་འགྱུར་བྱས་ཏེ་སེའུ་འབྲུ་ཉིས་འགྱུར་དང་ད་ཏྲིག་ཉིས་འགྱུར་དུ་བྱས་ཏེ། དེ་ལྟར་ན་སེའུ་འབྲུ་སྲང་བཅུ་དྲུག །ད་ཏྲིག་སྲང་བཅུ་དྲུག་ཁ་རུ་ཚ་ལ་སྲང་གཅིག །བིལ་བའི་རྐང་ལ་སྲང་ལྔ་གཞུག་བར་བྱ་སྟེ། དེ་ཕྱེ་མར་བཏགས་པ་དང་།

ཁ་ར་སྲང་བཅུ་དྲུག་གཞུག་པར་བྱའོ། །རོ་དྲུག་པའི་ཕྱེ་མ་འདི་ནི་སྔ་མ་བཞིན་དུ་བཟའ་བ་དང་བཏུང་བ་ལ་སོགས་པའི་ནང་དུ་བྱིན་ན་ཡོན་ཏན་སྔ་མ་དང་འདྲ་བ་ཡིན་ནོ། །གཅོང་ཆེན་ལས་བཤད་ཆོ་ག་གང་། །གནས་སྐབས་ཇི་བཞིན་གློ་རྡོལ་ཕན། །ཞེས་བྱ་བ་ལ། གཅོང་ཆེན་

པོའི་སྐབས་སུ་བཤད་པའི་ཆོ་ག་གློ་གཅོང་ཆེན་པོ་ཟད་བྱེད་ཀྱི་གསོ་བའི་སྐབས་སུ་བཤད་པའི་ཆོ་ག་གང་ཡིན་པ་ཡང་སྐབས་ཇི་ལྟ་བ་བཞིན་དུ་སྦྱར་ན་གློ་རྡོལ་བའི་ནད་ལ་ཕན་པ་ཡིན་ནོ། །གློ་རྡོལ་ནད་ནི་བྱུང་གྱུར་ནས། །བད་ཀན་སྐྱེས་ནས་མགོ་བོ་བྲང་། །ན་བའི་ལུད་པ་

ཅན་གང་ཡིན། །དེ་ལ་དུད་པ་འདི་བརྔུབ་བྱ། །ཞེས་བྱ་བ་ལ། དེ་ལྟར་བཤད་མ་ཐག་པའི་བརྟ་བའི་ཆོ་གས་གློ་རྡོལ་བའི་ནད་བྱང་ཞིང་བྲལ་བར་གྱུར་བ་ན། བརྟས་པ་ཉིད་ཀྱིས་བད་ཀན་འཕེལ་ཞིང་རྒྱས་པར་གྱུར་ན་དེས་ལུད་པ་སྐྱེས་ཤིང་མགོ་བོ་དང་བྲང་ན་བའི་ལུད་པ་ཅན་གང་

ཡིན་པ་དེ་ལ་ནི། གནས་སྐབས་ལས་བབ་པ་ལས་མི་འདའ་བར་དུད་པ་འདི་བརྔུབ་ཅིང་བདུག་པའི་ཆོ་ག་བྱའོ། །མེ་ད་གཉིས་དང་པ་ལ་དང་། །ཤིང་མངར་སྲོ་མའི་ཤུན་ལྤགས་ནི། །ལྡེ་གུར་བྱས་ལ་རེང་བུ་ནི། །བྱས་ཏེ་དུད་པ་བརྔུབ་པར་བྱ། །རྗེས་ལ་འཚོ་བྱེད་སྨན་མར་

བཏུང་། །ཞེས་བྱ་བ་ལ། མེ་ད་རྣམ་གཉིས་ལ་སོགས་པའི་སྨན་མར་ཆུ་བཏགས་སུ་བྱས་པ་ལྡེ་གུ་སྲོ་མའི་ཤུན་ལྤགས་སམ་སྲོ་དར་དང་བསྲེས་ཏེ་རེང་བུར་བྱས་ལ། དུད་པ་བརྔུབ་པར་བྱའོ། །དེའི་རྗེས་ལ་བཏུང་བ་ནི་འཚོ་བྱེད་ཀྱི་སྡེ་ཚན་དང་སྦྱར་བའི་སྨན་བཏུང་བར་བྱའོ། །ལྡོང་

རོས་དང་ནི་པ་ལ་ཤ །ཨ་ཟ་གནྡྷ་ཅུ་གང་དང་། །དོང་ག་ལས་ཀྱང་དེ་བཞིན་བྱས། །དེ་རྗེས་ཁ་ར་བུ་རམ་དང་། །བུ་རམ་ཤིང་ཁུ་བཏུང་བར་བླུད། །ཅེས་བྱ་བ་ལ། ལྡོང་རོས་ལ་སོགས་པའི་ལྡེ་གུ་ཡང་དེ་བཞིན་དུ་སྲོ་མ་དང་བསྲེས་ཏེ་རེང་བུར་བྱས་ལ་དུད་པ་བརྔུབ་པར་བྱས་ལ།

Vol. 201 · folio 237a

དེར་བཏུང་བ་ནི་ཁ་རའི་ཆུ་དང་། བུ་རམ་ཤིང་གི་ཁུ་བའི་ཆུ་བླུད་པར་བྱའོ། །ལྡོང་རོས་དང་ནི་ནྱ་གྲོ་དྷའི། །མྱུ་གུ་རློན་པ་ཆ་མཉམ་བཏགས། །ཞུན་མར་དང་སྦྱར་དུད་པ་བརྔུབ། །དེ་འོག་སྲེག་པའི་ཤ་ཁུ་བཏུང་། །ཞེས་བྱ་བ་ལ། ལྡོང་རོས་དང་ནྱ་གྲོ་དྷའི་མྱུ་གུ་རློན་

པ་དང་ཆ་མཉམ་པར་བྱས་པ་ཞིབ་ཏུ་བཏགས་ལ། ཞུན་མར་དང་སྦྱར་བའི་དུད་པ་བརྔུབ་པར་བྱ་ལ། དུད་པ་བརྔུབ་པ་དེའི་རྗེས་ལ་ནི་སྲེག་པའི་ཤ་ཁུ་བཏུང་བར་བྱའོ། །གློ་རྡོལ་ལས་བྱུང་ལུད་པ་ལ། །ཐོག་མར་སྟོབས་དང་མེ་དྲོད་སྐྱེད། །ཅེས་བྱ་བ་ལ། གློ་རྡོལ་བ་ལས་བྱུང་བའི་

ལུད་པ་ལ་ནི་ཐོག་མ་ཁོ་ནར་སྟོབས་སྐྱེད་ཅིང་ཉམས་བརྟ་བའི་སྨན་བྱ་ཞིང་དེ་བཞིན་དུ་ཕོ་བའི་མེ་དྲོད་སྐྱེད་པའི་ཆོ་ག་བྱའོ། །ནད་གཞི་མང་ལ་སྣུམ་བཅས་པའི། །བཀྲུ་སྨན་འཇམ་པོ་གཏང་བར་བྱ། །ཞེས་བྱ་བ་ལ། ལུད་པ་ཅན་གང་ནད་གཞི་མང་ཞིང་ཤས་ཆེ་བ་ཡིན་ན་སྣུམ་དང་

བཅས་པའི་བཀྲུ་སྨན་འཇམ་པོ་གཏང་བར་བྱའོ། །དོང་ག་དང་ནི་དུར་བྱིད་གཉིས། །རྒུན་འབྲུའི་ཆུ་དང་སྦྱར་བ་དང་། །སེང་ཕྲོམ་བསྐོལ་བའི་ཁུ་བ་དང་། །བི་ད་རི་ཡི་ཁུ་བར་སྦྱར། །ཞུན་མར་ལ་བཙོས་ཅི་རིགས་སྦྱིན། །ལུས་ཟད་པ་ལ་སྦྱར་བར་བྱ། །ཞེས་བྱ་བ་ལ། བཀྲུ་སྨན་

དེ་ཡང་དོང་ག་ལ་སོགས་པའི་སྨན་ཞུན་མར་གྱི་ནང་དུ་སྨན་མར་གྱི་སྦྱོར་བས་བཙོས་པའི་བཀྲུ་སྨན་དེ་ལུས་ཟད་ཅིང་ཉམ་ཆུང་བ་ལ་སྦྱང་བའི་དོན་དུ་བླུད་པར་བྱའོ། །མཁྲིས་པ་བད་ཀན་ལུས་ཟུངས་རྣམས། །ཟད་པའི་ཟད་བྱེད་ལུད་པ་ཅན། །མར་དང་ཀར་ཀ་ཏ་སྲིང་གི །འོ་མ་བ་

ལ་གཉིས་བསྐོལ་བླུད། །ཅེས་བྱ་བ་ལ། གློ་རྡོལ་ཟད་བྱེད་ཀྱི་ལུད་པ་ཅན་ནད་སྐྱེད་པར་བྱེད་པའི་མཁྲིས་པ་ཡང་ཟད། བད་ཀན་ཡང་ཟད། དྭངས་མ་ལ་སོགས་པའི་ལུས་ཟུངས་རྣམས་ཀྱང་ཟད་པར་གྱུར་པ་ལ་ཀར་ཀ་ཏ་སྲིང་གི་དང་། བ་ལ་རྣམ་གཉིས་དང་བཙོས་པའི་འོ་

མའི་བཞི་འགྱུར་དང་བསྐོལ་བ་བླུད་པར་བྱའོ། །བི་ད་རིའམ་ཀ་དམ་པ། །ཏ་ལའི་འབྲས་བུ་དང་བསྐོལ་བའི། །མར་དང་འོ་མ་གཅིན་ནད་ནི། །མདོག་གྱུར་སྲི་བར་བྱེད་ལ་བླུད། །ཅེས་བྱ་བ་ལ། བི་ད་རི་ལ་སོགས་པའི་སྨན་དང་བསྐོལ་བའི་མར་གཅིན་ནད་མདོག་གྱུར་ཅིང་

Vol. 201 · folio 237b

སྡུག་པར་སྣང་བ་དང་། གཅིན་སྲི་བར་བྱེད་པ་ལ་སྦྱིན་པར་བྱའོ། །ཕོ་མཚན་རྐུབ་དང་ཆུ་སོ་དང་། །བརླ་དབྲག་མཇུག་ཏོ་སྐྲང་ཞིང་ན། །མར་གྱི་སྙིང་པོ་ཡང་བ་འམ། །ཏིལ་མར་བསྲེས་པའི་འཇམ་རྩི་གཏང་། །ཞེས་བྱ་བ་ལ། ཕོ་མཚན་ལ་སོགས་པ་སྐྲང་ཞིང་ན་བ་དང་ལྡན་པ་

ལ་མར་གྱི་སྙིང་པོ་ཡང་བར་གྱུར་པའམ། ཡང་ན་མར་དང་ཏིལ་མར་བསྲེས་པའི་འཇམ་རྩི་གཏང་བར་བྱའོ། །སྐམ་སའི་སྲོག་ཆགས་ཤ་དང་ནི། །བྱིའུ་སོགས་དང་ནི་ཁུང་ན་གནས། །དེ་བཞིན་མཐུ་རྩལ་གྱིས་ཟས་ཚོལ། །ཤ་ཟའི་ཤ་ཡང་རིམ་བཞིན་སྦྱིན། །ཞེས་བྱ་བ་

ལ། འཇམ་རྩི་བཏང་བའི་རྗེས་ལ་སྐམ་སའི་ཕྱོགས་ན་གནས་པའི་སྲོག་ཆགས་ཤ་བཀྲ་དང་དགོ་བ་ལ་སོགས་པའི་ཤ་བཟའ་ཞིང་། དེ་ནས་རིམ་བཞིན་བྱིའུ་ལ་སོགས་པ་བཟའ་བར་བྱས་ལ། དེའི་འོག་ཏུ་ཁུང་ན་གནས་པ་སྟེ་ཕྱི་བ་དང་གོ་ད་ལ་སོགས་པའི་ཤ་བཟའ་བར་

བྱ་ཞིང་། དེ་ནས་རིམ་གྱིས་མཐུ་རྩལ་གྱིས་བཟའ་བ་ཚོལ་བ་སྟག་དང་ཁྲ་ལ་སོགས་པ་སྲོག་ཆགས་གཞན་གྱི་ཤ་ཟ་བའི་ཤ་དག་རིམ་བཞིན་དུ་སྦྱིན་པར་བྱའོ། །དྲོ་བས་བད་ཀན་འཇིག་བྱེད་ལ། །རྩ་སྦུབས་རྣམས་ནི་དག་བྱེད་ཅིང་། །དྭངས་མ་ལེགས་པར་རྒྱུ་བྱེད་པས། །ལུས་

ནི་རྒྱས་པར་བྱེད་པར་འགྱུར། །ཞེས་བྱ་བ་ལ། བྱིའུའི་ཤ་ལ་སོགས་པ་དེ་དག་ནི་དྲོ་བས་བད་ཀན་གྱི་ཚོགས་རྩ་སྦུབས་ཀྱི་ནང་ནས་འཛག་ཅིང་རྒྱུ་བར་བྱེད་ལ། དེ་ནས་རྩ་སྦུབས་འགགས་པར་བྱེད་པའི་བད་ཀན་སྦྱངས་པས་དག་པར་བྱེད་པ་ཡིན་ལ། ལུས་ཀྱི་བཅུད་ཀྱང་ལུས་ཀྱི་

བཅུད་ཀྱི་དྭངས་མ་ལེགས་པར་རྒྱུ་ཞིང་བདེ་བར་འགྲོ་བར་བྱེད་པས། ལུས་རྒྱས་པར་བྱེད་པ་ཡིན་ཏེ། ལུས་སྦྱངས་པའི་མཚན་ཉིད་ནི་གཞུང་གཞན་དག་ལས་བཤད་དེ། རྩ་སྦུབས་ནད་ཀྱིས་བཀག་བ་རྣམས། །རྣོ་བས་སྦྱོང་ཞིང་དག་པར་བཤད། །ཅེས་འབྱུང་བ་ཡིན་ནོ། །

དབྱི་མོ་བར་གྱི་འབྲས་བུ་གསུམ། །རྩ་བ་བཅུ་དང་ཙི་ཏྲ་ཀ །རྒྱ་སྲན་པི་པི་ལིང་རྩ་བ། །པ་ཏ་རྒྱ་ཤུག་ནས་ཆུར་བསྐོལ། །ལི་དོང་གྲ་དང་བྱི་ཚེར་བ། །ཟུར་པ་མ་ནུ་པི་པི་ལིང་། །ཀར་ཀ་ཏ་ཡི་སྲིང་གི་བཏགས། །མཉམ་པའི་ཞུན་མར་དག་དང་བསྐོལ། །བསྐོལ་བའི་མར་

Vol. 201 · folio 238a

འདི་ཀྵ་ར་གཉིས། །ལན་ཚྭ་ལྔ་ནི་བཏགས་ཏེ་གཞུག །དེ་ལས་རན་པར་འཐུངས་ན་ནི། །ཟད་བྱེད་ལུད་པས་ཉེན་པ་སེལ། །ཞེས་བྱ་བ་ལ། དབྱི་མོ་ལ་སོགས་པའི་སྨན་ཆུར་བསྐོལ་བ་དང་། ལི་དོང་གྲ་ལ་སོགས་པ་ཆ་མཉམ་པར་བཏགས་པའི་ལྡེ་གུ་དང་མར་

བསྐོལ་ལ། བསྐོལ་བའི་མར་འདིར་ཀྵ་ར་གཉིས་ཞེས་བྱ་བ་ཡ་བཀྵ་ར་དང་། སྭརྫི་ཀ་ཀྵ་ར་གཉིས་དང་། དེ་བཞིན་དུ་ལན་ཚ་ལྔ་ཞེས་བྱ་བ་ལྕེ་མྱང་ཚ་དང་། ཁ་རུ་ཚ་བི་ད་དང་། རྩལ་རུ་ཚ་དང་རྒྱ་མཚོའི་ལན་ཚྭ་དང་། ནད་ཀྱི་ཚུལ་ལས་དཔགས་ཏེ་ཅི་རིགས་པར་བཅུག་ནས་ཚད་རན་པར་

འཐུངས་ན་ཟད་བྱེད་ལས་གྱུར་པའི་ལུད་པ་སེལ་བར་འགྱུར་རོ། །ཀ་ས་མར་ད་ཨ་རུ་ར། །གླ་སྒང་པ་ཏ་ཀད་པ་ལ། །དོང་གྲ་པི་པི་ལིང་ཏང་པལ། །པུ་ཙེ་ཤེལ་ཚད་ཞོ་གཉིས་གཉིས། །མར་ནི་བྲེ་གང་འོ་མ་དང་། །རྒུན་ཆུ་བྲེ་བཞིའི་ནང་དུ་བསྐོལ། །ཟད་བྱེད་རིམས་དང་མཆིན་པའི་

ནད། །ལུད་པ་ཀུན་སེལ་དགེ་བ་ཡིན། །ཞེས་བྱ་བ་ལ། ཀ་ས་མར་ད་ལ་སོགས་པའི་སྨན་ཞོ་གཉིས་གཉིས་ཀྱི་ཚད་དུ་བྱས་པ་མར་བྲེ་གང་དང་། འོ་མ་དང་རྒུན་ཆུ་བསྲེས་པ་བྲེ་བཞིའི་ནང་དུ་བསྐོལ་བའི་མར་དེས་ནི་ཟད་བྱེད་ལ་སོགས་པའི་ནད་སེལ་བར་བྱེད་པ་དང་། དགེ་ཞིང་

དཔལ་སྐྱེད་པར་བྱེད་པ་ཡིན་ནོ། །ཀཎྜ་ཀ་རི་བ་ཤ་ཀ །སླེ་ཏྲེས་རྩ་བ་འབྲས་བུ་དང་། །མྱུ་གུ་ལོ་མར་བཅས་པ་རྣམས། །བསྐོལ་བའི་ཁུ་བ་མར་དུ་བཙོས། །ལུད་པའི་རིམས་ཀྱིས་བཏབ་པ་དང་། །ཡི་ག་འཆུས་པའི་ནད་རྣམས་སེལ། །ཞེས་བྱ་བ་ལ། ཀཎྜ་ཀ་རི་ལ་

སོགས་པ་སྨན་སྣ་རེ་རེའི་རྩ་བ་དང་འབྲས་བུ་དང་མྱུ་གུ་དང་ལོ་མར་བཅས་པ་བསྐོལ་བའི་ཁུ་བ་སྨན་མར་བསྐོལ་བའི་ཚད་ཀྱི་མར་དང་བསྐོལ་བ་ནི་ལུད་པ་དང་། རིམས་ལ་སོགས་པ་སེལ་བར་བྱེད་དོ། །སེའུ་འབྲུའི་ཁུ་བ་ཉིས་འགྱུར་རམ། །ཚ་གསུམ་ལྡན་པར་བསྐོལ་བའང་

ཕན། །ཞེས་བྱ་བ་ལ། སེའུ་འབྲུའི་ཁུ་བ་བསྐོལ་བ་ཚ་བ་གསུམ་དང་ལྡན་པར་བསྐོལ་བ་ཡང་ལུད་པ་དང་རིམས་དང་ཡི་ག་འཆུས་པ་སེལ་བར་བྱེད་དོ། །ཡ་བཀྵ་ར་མར་དང་སྦྱར། །ཟས་ཟོས་པ་ཡི་འོག་ཏུ་བླུད། །ཅེས་བྱ་བ་ལ། ཡ་བཀྵ་ར་དང་སྦྱར་བའི་མར་དེ་

Vol. 201 · folio 238b

ཟན་ཟོས་པའི་འོག་ཏུ་བླུད་ན་ཡང་ལུད་པ་ལ་ཕན་ནོ། །པི་པི་ལིང་དང་བུ་རམ་བསྐོལ། །ར་ཡི་འོ་མ་མར་བཅས་ཕན། །ཞེས་བྱ་བ་ལ། པི་པི་ལིང་དང་བུ་རམ་གཉིས་ལྡེ་གུར་བྱས་པ་རའི་འོ་མ་དང་མར་བཞི་འགྱུར་བསྐོལ་བ་བླུད་ན་ཡང་ཕན་ནོ། །འདི་ནི་མེ་དྲོད་སྦྱང་ཕྱིར་རོ། །

ཟད་བྱེད་ལུས་ཅན་གྱིས་མར་བཏུང་། །ནད་ཀྱིས་འགགས་པའི་མིད་པ་བྲང་། །རྩ་སྦུབས་རྣམས་ནི་དག་པར་བྱེད། །ཅེས་བྱ་བ་ལ། སྔར་བཤད་པའི་སྨན་ལ་སོགས་པ་འདི་དག་དང་བསྐོལ་བའི་སྨན་མར་ཟད་བྱེད་ཀྱི་ལུད་པ་ཅན་གྱི་ནད་པས་འཐུངས་ན་མེ་དྲོད་འཕེལ་ཞིང་རྒྱས་པར་

འགྱུར་ལ་ནད་ཀྱིས་འགགས་ཤིང་གོས་པའི་བྲང་དང་། ལྐོག་མའི་ནང་རྩ་སྦུབས་དག་ཅིང་སྦྱོང་བར་བྱེད་པ་ཡིན་ནོ། །ནས་ནི་བྲེ་གང་བཙོས་པ་རུ། །རྣམ་པར་རྒྱལ་བ་ཉི་ཤུ་བཙོ། །ཚོས་ནས་དེ་ཕྱུང་མཉེས་ནས་དེར། །བུ་རམ་རྙིང་པ་སྲང་དྲུག་དང་། །པི་པི་ལིང་ནི་སྲང་གཉིས་དང་། །

ལྡོང་རོས་ཞོ་གཉིས་སྐྱེར་ཁཎྜ། །ཞོ་གཅིག་ཚད་ནི་བཅུག་ནས་ནི། །སླར་ཡང་བསྐོལ་བའི་ལྡེ་གུ་དེས། །ལུད་པ་དབུགས་མི་བདེ་སེལ་བྱེད། །ཅེས་བྱ་བ་ལ། ནས་བྲེ་གང་བསལ་བ་བཙོས་པའི་ནང་དུ་ཨ་རུ་ར་རྣམ་པར་རྒྱལ་བ་རྡོག་མ་ཉི་ཤུ་བཅུག་སྟེ་བཙོས་ལ། དེ་ཚོས་

ཤིང་བངས་པར་གྱུར་པ་དང་། ཁུ་བ་དེའི་ནང་དུ་མཉེས་ནས་ཡང་བསྐོལ་བར་བྱ་སྟེ། འདིའི་ནང་དུ་བུ་རམ་རྙིང་པ་སྲང་དྲུག །པི་པི་ལིང་སྲང་གཉིས། ལྡོང་རོས་ཞོ་གཉིས་སྐྱེར་ཁཎྜ་ཞོ་གཅིག་བཅུག་ལ་ལྡེ་གུའི་ཚུལ་དུ་བསྐོལ་བར་བྱའོ། །ལྡེ་གུ་དེས་ནི་ལུད་པ་ལ་སོགས་པའི་ནད་

སེལ་བར་བྱེད་དོ། །རེག་འཇམ་སྒྲོ་རྩ་བསྲེགས་ནས་ནི། །མར་དང་སྦྲང་རྩི་ཁ་རར་སྦྱར། །ཡང་ན་རྨ་བྱའི་རྐང་པ་བསྲེགས། །མར་དང་སྦྲང་རྩིར་བསྲེས་པ་ཡི། །ལྡེ་གུ་ཟོས་ན་ལུད་པ་དང་། །དབུགས་མི་བདེ་བ་སེལ་བར་བྱེད། །ཅེས་བྱ་བ་ལ། བྱ་རོག་ཤ་བི་ད་ཞེས་བྱ་བ་སྒྲོ་

རྩ་ཁམ་འདྲ་བ་ཡོད་དེ། དེ་བསྲེགས་ནས་མར་ངང་ཁ་ར་སྦྲང་དང་སྦྱར་བའི་ལྡེ་གུ་ཟོས་ན་ལུད་པ་ལ་སོགས་པའི་ནད་འཇོམས་པར་འགྱུར་རོ། །ཡང་རྨ་བྱའི་རྐང་པ་བསྲེགས་ཏེ་མར་དང་སྦྲང་རྩི་སྦྱར་བའི་ལྡེ་གུ་ཟོས་ན་ཡང་ལུད་པ་ལ་སོགས་པའི་ནད་སེལ་ཏོ། །ཨེ་རཎྜ་ཡི་

Vol. 201 · folio 239a

ཐལ་བ་ནི། །ཏིལ་མར་ཚ་གསུམ་བུ་རམ་བཅས། །ལྡེ་གུའམ་བྱེའུ་རུག་ཨེ་རཎྜའི། །ལོ་མའི་ཐལ་བ་དེ་བཞིན་བྱ། །ཞེས་བྱ་བ་ལ། ཨེ་རཎྜའི་ལོ་མའི་ཐལ་བ་ཏིལ་མར་དང་ཚ་བ་གསུམ་དང་བུ་རམ་དང་སྦྱར་བའི་ལྡེ་གུ་གཅོང་ཆེན་པོའི་ལུད་པ་དང་ལྡན་པས་བལྡག་

པར་བྱའོ། །ཡང་ན་བྱེའུ་རུག་པ་དང་། ཨེ་རཎྜ་བསྲེགས་པའི་ཐལ་བ་དག་སྔ་མ་བཞིན་དུ་ཚ་བ་གསུམ་དང་ཏིལ་མར་དང་བུ་རམ་དང་སྦྱར་ཏེ་ལྡེ་གུར་བྱས་ལ་བལྡག་པར་བྱའོ། །ཚ་བ་གསུམ་གྱི་ཕྱེ་མ་ནི། །བུ་རམ་རྙིང་པ་མར་སྦྱར་ཕན། །ཞེས་བྱ་བ་ལ། པི་པི་ལིང་དང་ན་ལེ་ཤམ་

དང་བཅའ་སྒ་གསུམ་གྱི་ཕྱེ་མ་བུ་རམ་རྙིང་པ་དང་ཞུན་མར་ལྡེ་གུར་བྱས་ཏེ་བཟའ་བར་བྱའོ། །ཤུག་པ་ཚ་གསུམ་འབྲས་བུ་གསུམ། །བྱི་དང་ག་དང་ཐང་ཤིང་དང་། །བ་ལ་ར་སྣའི་ཕྱེ་མ་ཀུན། །དེ་དང་མཉམ་པའི་ཁ་རར་སྦྱར། །ཡང་ན་སྦྲང་རྩི་མར་དང་སྦྱར། །ལྡེ་གུ་ལུད་པ་

སེལ་བྱེད་མཆོག །ཅེས་བྱ་བ་ལ། ཤུག་པ་ལ་སོགས་པའི་སྨན་མར་ལུས་དང་ཆ་མཉམ་པའི་ཁ་ར་སྦྱར་ལ་ཟོས་ན་ཡང་ལུད་པ་ལ་ཕན་ནོ། །ཡང་ན་སྦྲང་རྩི་དང་ཞུན་མར་ཆ་མཉམ་དུ་སྦྱར་ཏེ་ལྡེ་གུ་ཟོས་པ་ཡང་ལུད་པ་སེལ་བའི་མཆོག་ཡིན་ནོ། །དེ་བཞིན་ན་ལེ་ཤམ་གྱི་ཕྱེ། །

མར་དང་སྦྲང་རྩི་ཁ་རར་བཅས། །ཞེས་བྱ་བ་ལ། ན་ལེ་ཤམ་གྱི་ཕྱེ་མ་མར་དང་སྦྲང་རྩི་དང་ཁ་ར་དང་ལྷན་ཅིག་ཟོས་པ་ཡང་ལུད་པ་སེལ་བའི་མཆོག་ཡིན་ནོ། །ཨ་རུ་ར་དང་བཅའ་སྒ་ནི། །བུ་རམ་དང་ནི་བཅས་པ་ཡི། །རི་ལུ་ཁར་ནི་བཞག་གྱུར་ན། །ལུད་པ་དབུགས་མི་བདེ་ཀུན་

སེལ། །ཞེས་བྱ་བ་ལ། ཡང་ན་ཨ་རུ་ར་ལ་སོགས་པའི་སྨན་བསྐོལ་ཏེ་རི་ལུར་བྱས་ལ་ཁའི་ནང་དུ་བཞག་ན། ལུད་པ་ལྔ་པོ་ཐམས་ཅད་དང་། དབུགས་མི་བདེ་བ་ལྔ་པོ་ཀུན་སེལ་བར་འགྱུར་བ་ཡིན་ནོ། །ཡང་ན་བ་རུ་ར་འབའ་ཞིག །ལུད་པ་སེལ་བར་བྱེད་པ་ཡིན། །ཞེས་བྱ་བ་ལ།

ཡང་ན་བ་རུ་ར་འབའ་ཞིག་ཁར་བཞག་ཅིང་མུར་ན་ཡང་ལུད་པ་དང་དབུགས་མི་བདེ་བ་ཐམས་ཅད་སེལ་བར་བྱེད་དོ། །སེང་ཕྲོམ་ཨ་མྲ་ཁ་ར་དང་། །བཅས་པའི་ལྡེ་གུ་མར་དང་བརྔོས། །ཐུག་པ་ཟན་དྲོན་ནང་དུ་བཏབ། །སློན་བྲོ་སྐོམ་དད་ལུད་པ་དང་། མ་ཞུ་ཚད་འཁྲུ་སེལ་བར་བྱེད། །

Vol. 201 · folio 239b

ཅེས་བྱ་བ་ལ། སེང་ཕྲོམ་གྱི་ལོ་མ་ལྡེ་གུར་སྦྱར་བ་མར་ལ་བརྔོས་ལ་ཁར་དང་བཅས་པ་ཐུག་པར་བྱས་པའམ། ཡང་ན་ཟན་དྲོན་ནམ་ཁུར་བ་དང་བསྲེས་པའི་ནང་དུ་སྨན་གོང་མ་མར་དང་བཅས་པ་ཟོས་ན་སློན་བྲོ་བ་ལ་སོགས་པའི་ནད་ཀུན་སེལ་བར་བྱེད་དོ། །ཀཎྜ་ཀ་རིའི་ཁུ་བ་བསྐོལ། །མུངྒའི་ཁུ་བར་

ལེགས་གཡོས་པ། །སྐྱུ་རུ་ར་སེར་སེའུ་འབྲུར་བཅས། །ལུད་པ་ཀུན་གྱི་སྨན་གྱུར་ཡིན། །ཞེས་བྱ་བ་ལ། ཀཎྜ་ཀ་རིའི་རང་གི་ཁུ་བ་མུངྒའི་ཁུ་བར་བཅུག་སྟེ། གཡོས་ལ་སྐྱུ་རུ་ར་སེར་པོ་དང་སེའུ་འབྲུ་དང་བཅས་པ་བཏབ་སྟེ་སྒེ་འུ་གཤེར་དང་བཅའ་སྒ་དང་མར་ལ་སོགས་པ་བཅུག་

ནས་ལེགས་པར་གཡོས་སུ་བྱས་པ་དེ་ནི་ལུད་པ་ཀུན་གྱི་སྨན་དུ་འགྱུར་བ་ཡིན་ནོ། །རླུང་འཇོམས་སྨན་བསྐོལ་འོ་མ་འམ། །མཆུ་ཡིས་བཟས་ཚོལ་ཁྲོན་རྐོ་དང་། །ཁུང་ན་གནས་པའི་ཤ་ཁུ་ནི། །ཟད་བྱེད་ལུད་པ་ཅན་ལ་སྦྱིན། །ཞེས་བྱ་བ་ལ། ཟད་བྱེད་ཀྱི་ནད་ཀྱིས་བཏབ་པའི་

མི་ལ་རླུང་འཇོམས་པའི་སྨན་དང་བསྐོལ་བའི་འོ་མའམ། ཡུ་ཤ་ཁུ་བ་བླུད་པར་བྱ་བའམ། ཡང་ན་ཤ་ཁུ་མཆུས་བཟས་ཚོལ་བའི་ཤ་ལས་བྱས་པའམ། ཁྲོན་རྐོ་བའི་རིགས་ཀྱི་ཤའམ་ཁུང་ན་གནས་པའི་ཤ་ལས་གཡོས་པའི་ཤ་ཁུ་སྦྱིན་པར་བྱའོ། །གློ་རྡོལ་གྱི་དུད་

བརྔུབས་ལ་གང་། །བཏུང་བར་བཅས་པ་བསྟེན་པ་ཡང་། །ཟད་བྱེད་ལུད་པར་དེ་གཏང་བྱ། །གང་ཡང་གཅོང་ཆེན་སྐབས་སུ་བཤད། །ཅེས་བྱ་བ་ལ། གློ་རྡོལ་གྱི་ལུད་པའི་ནད་གསོ་བའི་སྐབས་སུ་བཤད་པའི་དུད་པ་བརྔུབ་པ་དང་བཅས་པར་གོང་དུ་བསྟན་པ་གང་དག་ཡིན་པ་དེ་

ཡང་ཟད་བྱེད་ཀྱི་ལུད་པ་ཅན་ལ་སྦྱིན་པར་བྱའོ། །གང་ཡང་འོག་ནས་གཅོང་ཆེན་པོ་གསོ་བའི་སྐབས་སུ་བཤད་པའི་སྦྱོར་བ་གང་ཡིན་པ་དེ་ཡང་སྦྱིན་པར་བྱའོ། །སྟོབས་སྐྱེད་མེ་དྲོད་སྐྱེད་པ་དང་། །རྩ་རྒྱུན་སྦྱོང་བར་བྱེད་པའི་སྨན། །རྣམ་གྲངས་ཟད་བྱེད་ལུད་ཅན་ལ། །སྟོབས་

སྐྱེད་ཐམས་ཅད་བསྔགས་པ་ཡིན། །ཞེས་བྱ་བ་ལ། ཟད་བྱེད་ཀྱི་ལུད་པ་ཅན་གྱི་ནད་པ་ལ་ནི་བརྟ་ཞིང་སྟོབས་སྐྱེད་པའི་སྨན་གང་ཡིན་པ་དང་། དེ་བཞིན་དུ་གང་ཕོ་བའི་མེ་དྲོད་སྐྱེད་པའི་སྨན་དང་རྩ་རྒྱུན་དང་བུ་གའི་སྦུབས་སྦྱོང་བར་བྱེད་པའི་སྨན་དེ་དག་རྣམ་གྲངས་ཀྱིས་བྱིན་ན་

Vol. 201 · folio 240a

ཡང་ཟད་བྱེད་ཀྱི་ལུད་པ་སེལ་བར་བྱེད་དོ། །དེ་བཞིན་དུ་སྟོབས་སྐྱེད་པར་བྱེད་པའི་སྨན་ཐམས་ཅད་ཀྱང་ཟད་བྱེད་ཀྱི་ལུད་པ་ལ་བསྔགས་པ་ཡིན་ནོ། །གང་ཕྱིར་འདུས་པ་ལས་བྱུང་བའི། །ཟད་བྱེད་ལུད་པ་མི་བཟད་པས། །དེ་ཕྱིར་ནད་སྟོབས་ཇི་བཞིན་དུ། །

འདུས་པའི་ནད་ལ་ཕན་པས་གསོ། །ཞེས་བྱ་བ་ལ། རྒྱུ་གང་གི་ཕྱིར་འདུས་པའི་ནད་ལས་བྱུང་བའི་ཟད་བྱེད་ཀྱི་ལུད་པ་མི་བཟད་ཅིང་བརྣག་པར་དཀའ་ལ་སྡུག་བསྔལ་བ་ཡིན་པས་དེའི་ཕྱིར་ནད་ཀྱི་སྟོབས་ཇི་ལྟ་བ་ལ་ལྟོས་ལ། རླུང་གི་ཤས་ཆེ་བའམ། མཁྲིས་པའི་ཤས་ཆེ་

བའམ། བད་ཀན་གྱི་ཤས་ཆེ་བའི་འདུས་པའི་ནད་ལ་ཕན་པའི་ཁ་ཟས་དང་སྐོམ་དང་སྨན་དང་སྤྱོད་ལམ་ཕན་པས་གསོ་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས།

གསོ་བའི་གནས་ལེའུ་གསུམ་པའི་རྣམ་པར་འགྲེལ་པའོ།། །།དེ་ནས་སྐྱིགས་བུ་དང་དབུགས་མི་བདེ་བ་གསོ་བའི་ལེའུ་བཤད་པར་བྱའོ། །ཞེས་བྱ་བ་ལ། ནད་གཞིའི་གནས་སྐབས་སུ་བཤད་པའི་གོ་རིམས་ཀྱི་རྣམ་པས་སྐྱིགས་བུ་དང་དབུགས་མི་བདེ་

བའི་ལེའུ་འདི་བརྩམས་པ་ཡིན་ནོ། །གང་ཕྱིར་སྐྱིགས་བུ་དབུགས་མི་བདེ། །རྒྱུ་སོགས་མཚུངས་པས་དེ་ཡི་ཕྱིར། །གསོ་བའང་གཅིག་སྟེ། ཞེས་བྱ་བ་ལ། རྒྱུ་གང་གི་ཕྱིར་སྐྱིགས་བུ་དང་དབུགས་མི་བདེ་བ་ནི་རྒྱུ་ལ་སོགས་པ་མཚུངས་པ་ཡིན་ཏེ། སྔོན་དུ་བྱུང་བའི་ཚུལ་དང་

གྲངས་དང་རང་བཞིན་དང་རྟེན་གཅིག་ཉིད་ཡིན་པས། དེའི་ཕྱིར་སྐྱིགས་བུ་དང་དབུགས་མི་བདེ་བ་གསོ་བ་ཡང་གཅིག་ཏུ་བསྟན་ཅིང་བཤད་པ་ཡིན་ནོ། །དེས་ཉེན་ལ། ཐོག་མར་དུགས་ཀྱི་ཉེར་སྤྱད་བྱ། །སྣུམ་དང་ལན་ཚྭ་ཏིལ་མར་བྱུག །ཅེས་བྱ་བ་ལ། སྐྱིགས་བུ་དང་

དབུགས་མི་བདེ་བའི་ནད་དེས་ཉེན་ཅིང་གཟིར་བ་ཐོག་མར་ཏེ། གསོ་བ་ཐམས་ཅད་ཀྱི་ནང་ནས་དང་པོ་ཁོ་ནར་དུགས་ཉེ་བར་སྤྱད་པས་གསོ་བར་བྱ་ལ་དུགས་དེ་ཡང་སྣུམ་པ་སྟེ། སྣུམ་གྱི་སྨན་ལ་སྦྱར་བའི་དུགས་བྱའི། རྩུབ་པས་ནི་མ་ཡིན་ཏེ། རྩུབ་པས་ནི་རླུང་འཁྲུགས་པའི་

Vol. 201 · folio 240b

སྐྱོན་ཡོད་པའི་ཕྱིར་རོ། །སྣུམ་དེ་ཡང་ཕལ་ཆེར་རྒྱམ་ཚ་ལ་སོགས་པའི་ལན་ཚྭ་དང་ཏིལ་མར་སྦྱར་བས་བྱུག་ཅིང་བསྐུ་བར་བྱའོ། །དེ་ཡིས་བད་ཀན་བུ་གར་འགགས། །ཤིན་ཏུ་ཞེན་པ་ཞུ་ནས་ནི། །ཁོང་པར་གནས་པ་ལེགས་པར་འབྱིན། །བུ་གའི་རྒྱུན་སྲང་མཉེན་

གྱུར་ཞིང་། །རླུང་ནི་ལུགས་དང་མཐུན་པར་རྒྱུ། །ཞེས་བྱ་བ་ལ། དུགས་དེས་ཅི་ཞིག་བྱེད་ཅེ་ན། བུ་གའི་སྦུབས་རྣམས་སུ་ཤིན་ཏུ་ཞེན་ཅིང་འགགས་པའི་བད་ཀན་ལེགས་པར་ཞུ་ཞིང་ལུད་པ་དང་དབུགས་མི་བདེ་བ་དེའི་ཁོང་པར་གནས་པ་ལེགས་པར་འབྱིན་ཅིང་བདེ་བླག་ཏུ་

ཐོན་པར་འགྱུར་ལ། དེ་བཞིན་དུ་བུ་གའི་རྒྱུན་སྲང་ཤིན་ཏུ་སྲ་ཞིང་བད་ཀན་ནང་དུ་ཞེན་པ་དང་། རླུང་འཁྲུགས་པའི་དབང་གིས་རྩ་སྦུབས་ཤིན་ཏུ་སྲ་བར་གྱུར་པ་དག་དུགས་ཀྱིས་སྦྱངས་ན་མཉེན་པ་ཉིད་དུ་བྱེད་དོ། །དེ་བཞིན་དུ་རླུང་ལུགས་དང་མི་མཐུན་པར་རྒྱུ་ཞིང་རང་གི་ལམ་ལས་རྒྱུ་

བར་འགྱུར་རོ། །འཇམ་ཞིང་རླན་གྱུར་ཟས་སྣུམ་དང་། །རླན་ཅན་ཤར་བཅས་སྦྱིན་པའམ། །ཡང་ན་ཞོ་ཡི་སྤྲིས་མ་སྦྱིན། །ཞེས་བྱ་བ་ལ། ནད་པ་དུགས་ཀྱིས་ལུས་རླན་ཅིང་འཇམ་པར་གྱུར་པ་ལ་ཁ་ཟས་སྣུམ་བག་དང་རླན་ཅན་གྱི་སྲོག་ཆགས་ཀྱི་ཤ་དང་བཅས་པ་སྦྱིན་པར་བྱ་

བའམ། ཡང་ན་ཞོའི་སྤྲིས་མ་དང་བཅས་པ་སྦྱིན་པར་བྱའོ། །དེ་ནས་དེ་ལ་སློན་འཇམ་བཏང་། །མཆོག་ཏུ་ལུད་པ་རྙིང་ནད་དང་། །སྐད་འགགས་པ་ལ་སྐྱུག་སྨན་སྦྱིན། །རྒྱམ་ཚ་སྦྲང་རྩི་པི་པི་ལིང་། །སྦྱར་བའམ་རླུང་ལ་ཕན་པ་གཏང་། །ཞེས་བྱ་བ་ལ། དེ་ནས་ཞེས་བྱ་བ་དུགས་

བྱས་པའི་རྗེས་ལ་སྐྱིགས་བུ་དང་དབུགས་མི་བདེ་བས་ཉེན་པའི་ནད་པ་དེ་ལ་སློན་སྨན་འཇམ་པོ་གཏང་བར་བྱ་ལ། མཆོག་ཁྱད་པར་དུ་ནི་ལུད་པ་ལ་སོགས་པ་དང་ལྡན་པའི་སྐྱེས་བུ་དམ་པ་ལ་སྐྱུག་སྨན་གཏང་བར་བྱའོ། །སྐྱུག་སྨན་དེ་ཡང་རྒྱམ་ཚ་ལ་སོགས་པ་དང་ལྡན་པའམ། གང་

རླུང་ལ་ཕན་ཞིང་གནོད་པ་མེད་པ་དེ་ལྟ་བུའི་སྐྱུག་སྨན་གཏང་བར་བྱའོ། །བད་ཀན་གྱིས་ནི་གནོད་བྱས་པ། །བསལ་ན་བདེ་བ་འཐོབ་འགྱུར་ལ། །བུ་ག་རྣམ་པར་དག་གྱུར་ནས། །རླུང་ནི་གནོད་པ་མེད་པར་རྒྱུ། །ཞེས་བྱ་བ་ལ། བད་ཀན་གྱི་གནོད་པ་དང་བཅས་པ་བསལ་

Vol. 201 · folio 241a

ཞིང་སྦྱངས་ན་མི་དེ་བདེ་བ་འཐོབ་ཅིང་། སྐྱིགས་བུ་དང་དབུགས་མི་བདེ་བ་ཞི་བར་འགྱུར་ལ། ཡང་བད་ཀན་གྱིས་གནོད་ཅིང་བཀག་པར་བྱས་པའི་བུ་ག་རྣམས་དག་ཅིང་སྦྱངས་པར་གྱུར་པས་རླུང་གནོད་པ་མེད་པར་རྒྱུ་སྟེ་སུས་ཀྱང་གགས་བྱས་པ་མེད་པར་བདེ་

བར་རྒྱུ་བར་འགྱུར་ཞིང་། སྲོག་གནས་པའི་རྒྱུན་སྲང་དག་ཏུ་ལེགས་པར་འགྱུར་རོ། །ལྟོ་སྦོས་རྟུག་འགགས་མུན་འཐིབས་བྱེད། །མ་དུ་ལུང་ག་སྟར་བུ་དང་། །ཤིང་ཀུན་པི་ལུ་ཁ་རུ་ཚ། །ལྡན་ཟས་སྦྱིན་ན་བདེ་བར་འབྱུང་། །ཞེས་བྱ་བ་ལ། ལྟོ་སྦོས་པ་དང་གནས་སྐབས་

དེར་རྟུག་པ་འགགས་པ་ལས་མུན་འཐིབས་ཞེས་བྱེད་ཅིང་མུན་སྲོས་པ་སྙམ་དུ་སེམས་པའི་དབུགས་མི་བདེ་བ་བྱུང་བར་གྱུར་ན་མ་དུ་ལུང་ག་ཞེས་བྱ་བ། བ་ལུ་དང་སྟར་བུ་ལ་སོགས་པའི་སྨན་དང་ལྡན་པའི་ཟས་བྱིན་ན་དབུགས་བདེ་བར་འགྱུར་རོ། །རྒྱམ་ཚར་བཅས་པའི་འབྲས་

བུ་སྐྱུར། །ཅུང་ཟད་དྲོ་བའི་བཀྲུ་སྨན་གཏང་། །ཞེས་བྱ་བ་ལ། ཡང་ན་ལྟོ་སྦོས་པ་དང་། རྟུག་པ་འགགས་པ་ལས་བྱུང་བའི་སྐྱིགས་བུ་དང་དབུགས་མི་བདེ་བའི་ནད་མུན་འཐིབས་ཞེས་བྱེད་པ་རྒྱམ་ཚ་དང་འབྲས་བུ་སྐྱུར་པོ་མ་དུ་ལུང་ག་ལ་སོགས་པ་དང་སྦྱར་བ་ཅུང་ཟད་བསྲོས་ཏེ་

དྲོ་འཇམ་ཙམ་དུ་བྱས་པའི་བཀྲུ་སྨན་གཏང་བར་བྱའོ། །འདི་དག་བད་ཀན་གྱིས་ལམ་བཀག །སྲོག་གི་རླུང་ནི་འཁྲུགས་ལས་བྱུང་། །དེ་བས་དེ་ལམ་བསལ་བྱའི་ཕྱིར། །སྟེང་དང་འོག་ཏུ་སྦྱང་བྱས་ཕན། །ཞེས་བྱ་བ་ལ། གང་གི་ཕྱིར་ལུད་པ་དང་དབུགས་མི་བདེ་བ་འདི་དག་

ནི་བད་ཀན་གྱིས་རྒྱུ་བའི་ལམ་བཀག་པའི་སྲོག་ཅེས་བྱ་བའི་རླུང་དེ་འཁྲུགས་པར་གྱུར་པ་ལས་འབྱུང་བ་ཡིན་ལ། དེ་བས་སྲོག་ཅེས་བྱ་བའི་རླུང་དེའི་ལམ་བསལ་ཞིང་དག་པར་བྱ་བའི་ཕྱིར་སྟེང་དང་འོག་ཏུ་སྦྱང་བའི་ཐབས་སྐྱུག་སྨན་བཏང་ན་ཕན་ནོ། །ཇི་ལྟར་འབབ་པར་གྱུར་

པའི་ཆུ། །ཤིན་ཏུ་འཁྱིལ་ཞིང་འཕེལ་བ་ལྟར། །དེ་བཞིན་རླུང་ནི་འཁྱིལ་གྱུར་པའི། །དེ་ལམ་ལེགས་པར་སྦྱང་བར་བྱ། །ཞེས་བྱ་བ་ལ། དཔེར་ན་ཇི་ལྟར་ཆུ་འབབ་པར་གྱུར་པ་དག་རྒྱུ་བའི་རྒྱུན་ལམ་བཀག་པར་གྱུར་པ་ན་ཤིན་ཏུ་འཕེལ་ཞིང་མང་དུ་འཕེལ་བར་འགྱུར་བ་དང་

Vol. 201 · folio 241b

འདྲ་བ་དེ་བཞིན་དུ་རང་བཞིན་གྱིས་རྒྱུ་བའི་རླུང་དེའི་རྒྱུ་བའི་ལམ་འགགས་ཤིང་བདེ་བླག་ཏུ་འགྲོ་བའི་གོ་སྐབས་མ་ཐོབ་ན་ཤིན་ཏུ་འཁྱིལ་བར་འགྱུར་རོ། །དེ་བས་ན་རླུང་དེའི་རྒྱུ་བའི་ལམ་སློན་དང་ཁྲུས་ཀྱིས་སྦྱང་བར་བྱ་སྟེ། ལམ་བསལ་ན་ཕན་པར་འགྱུར་རོ། །སྦྱང་བ་བྱས་

ཀྱང་མ་དག་པའི། །ཞེན་པའི་དྲི་མ་དུ་བས་བསལ། །ཞེས་བྱ་བ་ལ། དེ་ལྟར་སྦྱང་བའི་རྣམ་པ་བྱས་སུ་ཟིན་ཀྱང་ལུད་པ་དང་དབུགས་མི་བདེ་བས་ཉེན་པའི་བད་ཀན་གྱི་ནད་ཀྱི་དྲི་མ་དག་ཅིང་ཤིན་ཏུ་ཞེན་པའི་ཉེས་པ་ལྷག་མ་ཡོད་པ་གང་ཡིན་པ་དེ་ནི་དུ་བ་བརྔུབ་པའི་ཐབས་ཀྱིས་

བསལ་བར་བྱའོ། །ཡུང་བའི་ལོ་མ་ཨེ་རཎྜའི། །རྩ་བ་རྒྱ་སྐྱེགས་ལྡོང་རོས་དང་། །ཐང་ཤིང་བ་ལ་སྤང་སྤོས་བཅས། །བཏགས་ཏེ་རེང་བུ་ཉིད་དུ་བྱ། །དེ་ནི་མར་བསྐུས་དུད་པ་བརྔུབ། །ཡང་ན་མར་སྦྲུས་ནས་བསྲེགས་བརྔུབ། །ཅེས་བྱ་བ་ལ། ཡུང་བའི་ལོ་མ་ལ་སོགས་

པའི་སྨན་ཆུ་བཏགས་སུ་བྱས་ཏེ་བསྐམས་ནས་རེང་བུ་དེ་མར་བསྐུས་ཏེ་མེ་ལ་བསྲེགས་པའི་དུད་པ་བརྔུབ་པར་བྱའོ། །ཡང་ན་མར་དང་ནས་སྦྲུས་ནས་བསྲེགས་པའི་དུད་པ་བརྔུབ་པར་བྱའོ། །སྦྲ་ཚིལ་སྲ་རྩི་པོག་དག་གམ། །ཨ་ཀ་རུ་བཟང་མར་སྦྱར་བརྔུབ། །ཅེས་བྱ་བ་ལ། སྤྲ་

ཚིལ་དང་སྲ་རྩི་པོག་ཅེས་བྱ་བ་སརྫ་ར་གཅིག་ཏུ་སྦྱར་བའི་དུད་པའམ། ཡང་ན་ཨ་ཀ་རུ་བཟང་པོའི་དུད་པ་བརྔུབ་པར་བྱའོ། །དེ་བཞིན་ཙནྡན་གླང་རྭ་འམ། །སྤུ་འམ་རྒྱུས་པའི་དུད་པ་བརྔུབ། །ཅེས་བྱ་བ་ལ། ཡང་ན་ཙནྡན་མེར་བསྲེགས་པའི་དུད་པ་བརྔུབ་པར་བྱའོ། །ཡང་ན་བ་

ལང་གི་རྭ་མེ་ལ་བསྲེགས་པའི་དུད་པའམ། བ་ལང་གི་སྤུའམ། བ་ལང་གི་རྒྱུས་པའི་དུད་པ་བརྔུབ་པ་ཡང་སྐྱིགས་བུ་དང་དབུགས་མི་བདེ་བ་ནང་དུ་ཞེན་པའི་སྐྱོན་སེལ་བར་བྱེད་པར་འགྱུར་རོ། །གཙོད་དང་གོད་ཀུ་རང་ག །དགོ་བ་ལྤགས་མིག་ར་ཡི་འམ། །ཞེས་བྱ་བ་ལ།

ཡང་ན་གཙོད་ལ་སོགས་པའི་སྲོག་ཆགས་ཀྱི་པགས་པ་ལ་སོགས་པའི་དུད་པ་བརྔུབ་ན་ཡང་ཕན་ནོ། །ཡང་ན་གུ་གུལ་ལྡོང་རོས་སམ། །ཡང་ན་སཱ་ལའི་ཐང་ཆུ་ཉིད། །ཅེས་བྱ་བ་ལ། ཡང་ན་གུ་གུལ་གྱི་དུད་པ་བརྔུབ་པའམ། ཡང་ན་ལྡོང་རོས་ཀྱི་དུད་པ་བརྔུབ་པའམ། ཤིང་སཱ་

Vol. 201 · folio 242a

ལའི་ཐང་ཆུའི་དུ་བ་བརྔུབ་པར་བྱའོ། །མོ་རྩ་གུ་གུལ་ཨ་ག་རུ། །ཤུག་པ་མར་དང་སྦྱར་དུད་བརྔུབ། །ཅེས་བྱ་བ་ལ། ཡང་ན་མོ་རྩ་ཞེས་བྱ་བ་ཤིང་ཤལ་མ་ལིའི་ཐང་ཆུ་དྲི་ཞིམ་པ་ལ་སོགས་པ་མངར་བའི་སྤོས་མར་དང་སྦྱར་བའི་དུད་པ་བརྔུབ་པར་བྱའོ། །དུགས་

བྱར་མི་རུང་བཏང་སྙོམས་བཞག །བྲང་དང་མིད་པ་ཞོམ་པ་ལ། །བཤོལ་དུ་མེད་ན་འཇམ་དུགས་བྱ། །ཁ་ར་དཀར་པོའི་འོ་མས་སམ། །དྲོ་འཇམ་ཙམ་གྱིས་དུགས་བྱ་ཞིང་། །དཀྲི་དང་ལྡན་པར་བྱ་བའི་དུགས། །དུགས་ཀྱི་ལེའུར་བཤད་དུགས་བྱ། །ཞེས་བྱ་བ་ལ། དུགས་བྱར་

མི་རུང་བའི་ནད་པ་མཁྲིས་པ་དང་ཚ་བས་ཉེན་པ་དང་། ཉམས་སྟོབས་དང་ལུས་ཟུངས་ཟད་པ་དང་ཤིན་ཏུ་སྣུམ་པ་དང་སྦྲུམ་མ་ལ་སོགས་པ་བྲང་དང་ལྐོག་མ་ཞོམ་པ་ལ་སོགས་པ་དུགས་བྱར་མི་རུང་སྟེ་བཤོལ་དུ་མེད་པ་ཡིན་ན་དུགས་འཇམ་པོ་བྱ་སྟེ། དེ་ཡང་ཁ་ར་དཀར་པོ་འོ་མ་དང་

བཅས་པའི་སྣུམ་བག་དྲོ་འཇམ་ཙམ་དུ་བྱས་པ་བླུགས་ལ་དུགས་བྱ་ཞིང་། དེ་བཞིན་དུ་དཀྲིས་པ་དང་ལྡན་པའི་དུགས་ཀྱི་ལེའུར་བཤད་པའི་སྨན་དང་སྦྱར་བས་དུགས་བྱའོ། །མ་ཞུར་དེ་གསོའི་ཆོ་ག་སྤྱད། །ཅེས་བྱ་བ་ལ། མ་ཞུ་བ་ལས་སྐྱིགས་བུ་དང་དབུགས་མི་བདེ་བ་ལས་གྱུར་

པ་ལ་ནི་མ་ཞུ་བ་གསོ་བའི་ཆོ་ག་སྨྱུང་བ་དང་སྨིན་པར་བྱས་པ་ལ་སོགས་པ་སྤྱད་པར་བྱའོ། །སྦྱོར་དྲགས་རླུང་ཤས་ཆེ་གྱུར་ན། །རླུང་ནད་བསལ་བའི་སྦྱོར་བ་བྱ། །ཤ་ཁུ་སྣུམ་སོགས་རབ་ཚ་སྦྱིན། །བསྐུ་བ་དག་གིས་ཞི་བར་བྱ། །ཞེས་བྱ་བ་ལ། སྐྱུག་སྨན་ལ་སོགས་

པའི་ཉམས་སྨད་པའི་ཆོ་གའི་སྦྱོར་བ་དྲགས་པས་རླུང་ཤས་ཆེ་ཞིང་རྒྱས་པར་གྱུར་པ་མཐོང་ན་རླུང་ནད་དེ་བསལ་བའི་ཆོ་ག་བྱ་ལ། དེ་ཡང་ཤ་ཁུ་དང་སྣུམ་གྱི་རྣམ་པ་མར་ལ་སོགས་པ་དང་། འོ་མ་ལ་སོགས་པ་དང་། བསྐུ་བ་ལ་སོགས་པས་ནད་དེ་ཞི་བར་བྱའོ། །བད་ཀན་མ་

སློང་དུགས་མི་བྱ། །ཉམ་ཆུང་བ་ལ་སྦྱང་བྱས་པས། །རླུང་གི་གནས་རྙེད་གནས་རྣམས་ནི། །སྐམས་པར་བྱས་ནས་སྲོག་འཕྲོག་བྱེད། །དེ་བས་སྨན་ཁུ་སྣུམ་དང་ནི། །ལྡེ་གུ་སོགས་ཀྱིས་དེ་ཞིར་བྱ། །ཞེས་བྱ་བ་ལ། བཤད་མ་ཐག་པའི་སྐྱུག་སྨན་བཏང་བ་ལ་སོགས་

Vol. 201 · folio 242b

པའི་སྦྱོར་བ་ནི་བད་ཀན་མ་སློང་བ་ལ་སོགས་པ་ལ་གཏང་བར་མི་བྱའོ། །ཅིའི་ཕྱིར་ཞེ་ན། སྐྱིགས་བུ་དང་དབུགས་མི་བདེ་བ་དང་ལྡན་པ་རྣམས་དེ་ལྟ་བུ་དང་ལྡན་པ་དེ་ལ་སྦྱང་བ་བྱས་ན་རླུང་གི་གནས་རྙེད་ཅིང་བརྟེན་པའི་གཞི་རྙེད་པ་སྙིང་ཞེས་བྱ་བའི་གནད་ཀུན་ཏུ་སྐམས་པར་བྱས་ནས་

མྱུར་བ་ཁོ་ནར་སྲོག་འཕྲོག་ཅིང་འཇིག་པར་བྱེད་དོ། །རྒྱུ་དེ་བས་བད་ཀན་མ་སློང་བ་ལ་སོགས་པ་དེ་རྣམས་ལ་སྨན་བསྐོལ་བའི་ཁུ་བ་ལ་སོགས་པས་སྐྱིགས་བུ་དང་དབུགས་མི་བདེ་བའི་ནད་ཞི་བར་བྱའོ། །སྐེམ་ཞིང་གློ་རྡོལ་ཆེད་འཁྲུ་དང་། །ཁྲག་མཁྲིས་ཚ་བ་ལས་བྱུང་བའི། །

སྐྱིགས་བུ་དབུགས་མི་བདེ་བ་ལ། །མངར་སྣུམ་བསིལ་སོགས་དག་གིས་གསོ། །ཞེས་བྱ་བ་ལ། སྐེམ་ཞིང་རིད་པ་ལ་སོགས་པ་ལས་བྱུང་བའི་སྐྱིགས་བུ་དང་དབུགས་མི་བདེ་བའི་ནད་ལ་ནི་མངར་བ་ལ་སོགས་པས་ཉམས་བརྟ་བའི་གསོ་བའི་ཐབས་ཀྱིས་གསོ་བར་

བྱའོ། །ཀུ་ལངྠ་དང་རྩ་བ་བཅུ། །བསྐོལ་བའི་སྐམ་སའི་ཤ་ཁུ་ཕན། །ཞེས་བྱ་བ་ལ། ཡང་ན་སྐྱིགས་བུ་དང་དབུགས་མི་བདེ་བ་དང་ལྡན་པ་ལ་རྒྱ་སྲན་ཀུ་ལངྠ་དང་རྩ་བ་བཅུ་པ་དང་བསྐོལ་བའི་སྐམ་སའི་ཤ་ཁུ་བླུད་ན་ཕན་ནོ། །ཤི་ཀྲུ་པར་ཏ་ཀ་དང་ནི། །ཀས་མར་ད་བ་ཤ་ཀ།

ལ་ཕུག་ལོ་མའི་ཁུ་བ་དང་། །ནིམ་པའི་མྱུ་གུ་ལས་བྱུང་དང་། །ཁ་ལུང་བྲི་ཧ་ཏི་ཁུ་ཕན། །ཞེས་བྱ་བ་ལ། ཡང་ན་ཤི་ཀྲུ་ལ་སོགས་པའི་སྨན་བཙོས་པའི་ཁུ་བ་ལས་ཡུ་ཤར་བྱས་པ་ཡང་ཕན་པ་ཡིན་ནོ། །ཀཎྜ་ཀ་རི་བྱི་ཚེར་བ། །བིལ་བའི་རྐང་དང་གཟེ་མ་དང་། །སླེ་ཏྲེས་

ཀར་ཀ་ཏ་སྲིང་གི། །ཙི་ཏྲ་ཀ་དང་ཀུ་ལངྠ། །ཆུར་བསྐོལ་བ་ཡི་ཡུ་ཤ་བྱ། །ཞེས་བྱ་བ་ལ། ཡང་ན་ཀཎྜ་ཀ་རི་ལ་སོགས་པ་སྨན་ཆུར་བསྐོལ་བའི་ཡུ་ཤ་ཡང་ཕན་ནོ། །ཡང་ན་ར་སྣ་རྩ་ཆུང་ལྔ། །མུངྒ་ཙི་ཏྲ་ཀར་བཅས་བླུད། །ཅེས་བྱ་བ་ལ། ཡང་ན་ར་སྣ་དང་རྩ་བ་ཆུང་ངུ་ལྔ་དང་།

མུངྒ་དང་ཙི་ཏྲ་ཀ་བསྐོལ་བའི་ཡུ་ཤ་བླུད་ན་ཡང་ཕན་ནོ། །ཙི་ཏྲ་གོ་སྙོད་ཁ་རུ་ཚ། །ཀར་ཀ་ཏ་སྲིང་ཐུག་པ་ཕན། །ཞེས་བྱ་བ་ལ། ཡང་ན་ཙི་ཏྲ་ཀ་ལ་སོགས་པའི་སྨན་དང་སྦྱར་བའི་ཐུག་པ་བླུད་ན་ཡང་སྐྱིགས་བུ་དང་དབུགས་མི་བདེ་བ་ལ་ཕན་ནོ། །ཡང་ན་རྩ་བ་བཅུར་སྦྱར་བའི། །

Vol. 201 · folio 243a

ཐུག་པ་བླུད་ན་ལུད་པ་དང་། །སྐྱིགས་བུ་དབུགས་མི་བདེ་ནད་སེལ། །ཞེས་བྱ་བ་ལ། ཡང་ན་རྩ་བ་བཅུ་པ་དང་སྦྱར་བའི་ཐུག་པ་བླུད་ན་ལུད་པ་ལ་སོགས་པའི་ནད་སེལ་ཏོ། །རྩ་བ་བཅུ་པ་ར་སྣ་དང་། །ཟུར་པ་ག་བྲའི་རྩ་བ་དང་། །བིལ་བ་གཉིས་དང་མ་ནུ་དང་། །

ཀར་ཀ་ཏ་སྲིང་པི་པི་ལིང་། །ལྕ་བ་སླེ་ཏྲེས་བཅའ་སྒ་ནི། །བསྐོལ་བའི་ཁུ་བ་བླུད་ཞུ་ནས། །དེ་ཉིད་དང་བཙོས་ཐུག་པ་བླུད། །སཱ་ལུ་དྲུག་ཅུ་པ་དང་གྲོ། །ནས་དང་མུངྒ་རྒྱ་སྲན་ཟོས། །ལུད་པ་སྙིང་ནད་རྩིབ་ལོགས་ཟུག །སྐྱིགས་བུ་དབུགས་མི་བདེ་བ་སེལ། །ཞེས་བྱ་བ་ལ། རྩ་བ་

བཅུ་པ་ལ་སོགས་པའི་སྨན་བསྐོལ་བའི་ཁུ་བ་བླུད་ན་ཞུ་བར་གྱུར་པ་དང་། རྩ་བ་བཅུ་པ་ལ་སོགས་པ་དེ་ཉིད་ཀྱི་ཁུ་བ་དང་བཙོས་པའི་ཐུག་པ་བླུད་པར་བྱ་ཞིང་འབྲས་སཱ་ལུ་ལ་སོགས་པ་ལས་གཡོས་པའི་ཟས་ཟོས་ན་ལུད་པ་ལ་སོགས་པའི་ནད་སེལ་བར་འགྱུར་རོ། །ཡང་ན་ཨརྐའི་

མྱུ་གུ་ཡི། །འོ་མ་དང་སྦྲུས་ནས་ཀྱི་ཟན། །སྦྲང་རྩི་དང་བཅས་རྩ་བཅུ་སོགས། །བསྐོལ་བའི་ཁུ་བ་བཅས་པ་བླུད། །ཅེས་བྱ་བ་ལ། ཡང་ན་ཨརྐའི་མྱུ་གུའི་འོ་མ་དང་སྦྲུས་པའི་ནས་ཟན་སྦྲང་རྩི་དང་བཅས་པ་དེ་རྩ་བ་བཅུ་པ་དང་ར་སྣ་ལ་སོགས་པ་བཤད་མ་ཐག་པའི་

སྨན་བསྐོལ་བའི་ཁུ་བ་དང་སྦྱར་ཏེ་བླུད་ན་ཡང་ཕན་ནོ། །ཟས་ནི་ཀྵ་ར་ཤིང་ཀུན་མར། །ཁ་རུ་ཚ་དང་སེའུ་སྦྱར་བཟའ། །མ་ནུ་ཟུར་པ་ཚ་བ་གསུམ། །སྟར་བུ་ཁ་ལུང་སྦྱར་བ་སྦྱིན། །ཞེས་བྱ་བ་ལ། ཡང་ན་ཁ་ཟས་ནི་ནང་དུ་ཀྵ་ར་ལ་སོགས་པའི་སྨན་ནད་ཀྱི་མཚན་ཉིད་ལ་ལྟོས་ལ་

གང་ཡང་རུང་བ་དང་སྦྱིན་པར་བྱའོ། །སྐྱིགས་བུ་དབུགས་མི་བདེ་སྐོམ་དང་། །རྩ་བ་བཅུ་བསྐོལ་ཁུ་བའམ། །ཡང་ན་ཐང་ཤིང་བསྐོལ་ཁུའམ། །ཆང་གི་དྭངས་མ་བླུད་པར་བྱ། །ཞེས་བྱ་བ་ལ། སྐྱིགས་བུ་དང་དབུགས་མི་བདེ་བའི་ནད་ཀྱིས་སྐོམ་དད་དུ་གྱུར་པ་ལ་རྩ་བ་བཅུ་

བསྐོལ་བའི་ཆུའམ་ཐང་ཤིང་བསྐོལ་བའི་ཁུ་བའམ། ཆང་གི་དྭངས་མ་བླུད་པར་བྱའོ། །པི་པི་ལིང་དང་དེའི་རྩ་བ། །ཨ་རུ་ར་དང་བྱི་དང་ག །ཙི་ཏྲ་ཀ་རྣམས་ལྡེ་གུར་སྦྱར། །མར་སྣོད་བསྐུས་ཏེ་བསྐམས་པ་རུ། །སྣོད་དུ་དར་བ་ཟླ་གཅིག་བཞག །དེ་འཐུངས་མེ་ཡི་

Vol. 201 · folio 243b

དྲོད་སྐྱེད་ཅིང་། །ལུད་པ་དབུགས་མི་བདེ་བ་སེལ། །ཞེས་བྱ་བ་ལ། པི་པི་ལིང་ལ་སོགས་པའི་སྨན་ཆུ་འཐགས་སུ་བྱས་པ་མར་གྱི་སྣོད་ཀྱི་བུམ་པར་བསྐུས་པ་དེ་བསྐམས་པར་གྱུར་པ་དང་། དེར་དར་བ་སར་པ་བླུགས་ལ་དར་བ་དེ་སྣོད་དེར་ཟླ་བ་གཅིག་ལོན་པ་དང་། དེ་འཐུངས་ན་

མེ་དྲོད་སྐྱེད་པ་ལ་སོགས་པར་འགྱུར་རོ། །པ་ཐ་མུར་བ་ཐང་ཤིང་དང་། །ས་ར་ལ་དང་ཆང་དྭངས་མ། །ནུབ་གཅིག་བཞག་སྟེ་ལན་ཚྭ་བཏབ། །དེ་ལས་ཁྱོར་གང་བླུད་པར་བྱ། །ཞེས་བྱ་བ་ལ། པ་ཐ་ལ་སོགས་པ་མཉེས་ཤིང་བཙགས་ལ་ནུབ་གཅིག་ཞག་བཞག་སྟེ་ལན་ཚྭ་ཉུང་

ཞིག་བཏབ་སྟེ་དེ་ལས་ཁྱོར་གང་ཙམ་བླུད་ན་ཡང་སྐྱིགས་བུ་དང་དབུགས་མི་བདེ་བའི་ནད་ཞི་བར་འགྱུར་རོ། །ག་བྲའི་རྩ་བ་བཅའ་སྒའི་ཕྱེའམ། །ཡ་བཀྵ་ར་ན་ལེ་ཤམ། །བཅས་ཕྱེ་ཆུ་ཚན་བླུགས་པ་ཕན། །ཞེས་བྱ་བ་ལ། ཆུ་བསྐོལ་བའི་དྲོ་འཇམ་ཙམ་གྱི་ནང་དུ་ག་བྲའི་རྩ་བ་དང་

བཅའ་སྒ་དང་བཏགས་ཏེ་བླུད་པའམ། ཡང་ན་ན་ལེ་ཤམ་དང་ཡ་བཀྵ་རའི་ཕྱེ་མ་དང་བཅས་པ་ཆུ་བསྐོལ་བ་དྲོ་འཇམ་ཙམ་གྱི་ནང་དུ་བཅུག་སྟེ་བླུད་ན་ཡང་ཕན་ནོ། །པ་སྤྲི་ཀ་ནི་བསྐོལ་བའི་ཆུ། །བཏགས་པ་ལྡེ་གུར་བྱས་བསྲེས་བླུད། །ཅེས་བྱ་བ་ལ། པ་སྤྲི་ཀ་ནི་ཧིང་ཀུ་པ་ཏྲི་ཀ་སྟེ་

དེ་བསྐོལ་བའི་ཁུ་བ་དང་དེ་བཏགས་པའི་ལྡེ་གུར་བྱས་པ་དང་བསྲེས་ཏེ་བླུད་ན་ཡང་ཕན་ནོ། །སཔྟ་པརྞིའི་ཁུ་བའམ། །ཤྲི་ཤ་ཡི་ནི་མེ་ཏོག་ནི། །པི་པི་ལིང་དང་སྦྲང་རྩིར་སྦྱར། །བད་ཀན་མཁྲིས་པ་འདྲེས་གྱུར་པའི། །སྐྱིགས་བུ་དབུགས་མི་བདེ་བ་སེལ། །ཞེས་བྱ་བ་ལ། བད་

ཀན་དང་མཁྲིས་པ་འདྲེས་པ་ལས་གྱུར་པའི་སྐྱིགས་བུ་དང་དབུགས་མི་བདེ་བ་ལ་ནི་ཁུ་བ་པི་པི་ལིང་དང་སྦྲང་རྩིར་སྦྱར་བ་བླུད་པའམ། ཡང་ན་ཤྲི་ཤའི་མེ་ཏོག་བསྐོལ་བའི་ཁུ་བ་པི་པི་ལིང་དང་སྦྲང་རྩི་དང་སྦྱར་བར་བྱའོ། །ཅུ་གང་པི་པི་ལིང་དང་ནི། །འབྲས་དང་བཅའ་སྒ་མར་དག་ལས། །

ཁུ་བ་མཁྲིས་པ་ལས་གྱུར་སེལ། །ཞེས་བྱ་བ་ལ། མཁྲིས་པ་ལས་གྱུར་པའི་སྐྱིགས་བུ་དང་དབུགས་མི་བདེ་བ་ལ་ནི་ཅུ་གང་ལ་སོགས་པ་དང་སྦྱར་བའི་ཁུ་བ་ཧ་ཐབས་སུ་བཅོས་པ་སྦྱིན་པར་བྱའོ། །རླུང་དང་ལྡན་ལ་རེག་འཇམ་ཤ །རི་བོང་ཤ་དང་པི་པི་ལིང་། །མར་དང་ཤ་སྤྱ་

Vol. 201 · folio 244a

ཀ་ཡི་ཁྲག །ཅེས་བྱ་བ་ལ། རླུང་ལས་གྱུར་པའི་སྐྱིགས་བུ་དང་དབུགས་མི་བདེ་བའི་ནད་ལ་ནི་བྱ་རེག་འཇམ་གྱི་ཤ་དང་། རི་བོང་གི་ཤ་ལ་སོགས་པ་དང་། ཤ་སྤྱ་ཀའི་ཁྲག་དང་སྦྱར་བའི་ཁུ་བ་བྱིན་ན་ཕན་ནོ། །ལྕམ་པའི་ཁུ་བ་ཚ་བ་གསུམ། །མར་དང་འོ་

མར་སྦྱར་བ་དང་། །འབྲས་ཆན་ཟོས་ལ་འོ་མ་བླུད། །རླུང་མཁྲིས་འདྲེས་པ་ལས་གྱུར་སེལ། །ཞེས་བྱ་བ་ལ། རླུང་དང་མཁྲིས་པ་འདྲེས་པ་ལས་གྱུར་པའི་སྐྱིགས་བུ་དང་དབུགས་མི་བདེ་བ་ལ་ནི་ལྕམ་པ་ལ་སོགས་པའི་སྨན་དང་སྦྱར་བའི་མར་དང་འོ་མ་དང་བཅས་པའི་འབྲས་ཆན་

བྱིན་ལ་དེའི་འོག་ཏུ་ནི་འོ་མ་བླུད་པར་བྱའོ། །ར་ཡི་འོ་མ་བཞི་འགྱུར་གྱི། །ཆུ་བསྐོལ་བུ་རམ་དོང་གྲ་བཏབ། །ཅེས་བྱ་བ་ལ། ཡང་ན་རའི་འོ་མ་བཞི་འགྱུར་གྱི་ནང་དུ་བསྐོལ་ལ་ཆུ་གདུས་ནས་བུ་རམ་དང་བཅའ་སྒ་བཏབ་སྟེ་བླུད་པར་བྱའོ། །པི་པི་ལིང་རྩ་ཤིང་མངར་དང་། བུ་རམ་

ལྕ་བ་རྟ་སྦངས་ཁུ། །སྦྲང་རྩི་མར་སྦྱར་ཟོས་གྱུར་ན། །སྐྱིགས་བུ་དབུགས་མི་བདེ་བ་སེལ། །ཞེས་བྱ་བ་ལ། པི་པི་ལིང་གི་རྩ་བ་ལ་སོགས་པ་དང་བསྲེས་པའི་སྦྲང་རྩི་དང་མར་དུ་སྦྱར་བ་ཟོས་ན་ཡང་སྐྱིགས་བུ་དང་དབུགས་མི་བདེ་བ་སེལ་བར་འགྱུར་རོ། །རྟ་དང་གླང་པོ་བ་

ལང་ཕག །རྔ་མོ་བོང་བུ་ལུག་དང་ར། །གང་ཡང་རུང་བའི་རྟུག་བཙིར་ཁུ། །སྦྲང་རྩིར་སྦྱར་བ་བལྡགས་ན་ཕན། །ཞེས་བྱ་བ་ལ། ཡང་རྟ་ལ་སོགས་པའི་རྟུག་པ་གང་ཡང་རུང་བ་བཙིར་བའི་ཁུ་བ་སྦྲང་རྩི་དང་སྦྱར་བ་ཡང་སྐྱིགས་བུ་དང་དབུགས་མི་བདེ་བ་ལ་ཕན་ནོ། །བད་ཀན་

ཤས་ཆེར་བཏུང་བ་བླུད། །ཅེས་བྱ་བ་ལ། བད་ཀན་གྱི་ཤས་ཆེ་བའི་ནད་པས་ནི་རྟ་སྤངས་ལ་སོགས་པའི་ཁུ་བ་གང་ཡང་རུང་བ་སྦྲང་རྩི་དང་སྦྱར་ཏེ་བཏུང་བ་བླུད་པར་བྱའོ། །རྐང་བཞི་པ་ཡི་ལྤགས་རུས་སྤུ། །རྨིག་པ་བསྲེགས་ལ་སྣག་ཚར་བྱས། །ཨ་ཤྭ་གནྡྷའི་ལྡེ་གུ་ནི། །

སྦྲང་རྩིར་སྦྱར་བས་བད་ཀན་ཤས། །ཆེ་བའི་དབུགས་མི་བདེ་བ་སེལ། །ཞེས་བྱ་བ་ལ། རྐང་བཞི་པའི་པགས་པ་ལ་སོགས་པ་བསྲེགས་ནས་སྣག་ཚ་ལྟ་བུར་བྱས་པ་སྦྲང་རྩི་དང་བཅས་པའི་ལྡེ་གུ་ཟོས་ན་བད་ཀན་ཤས་ཆེ་བའི་དབུགས་མི་བདེ་བ་སེལ་བར་བྱེད་དོ། །ཡང་ཨ་ཤྭ་

Vol. 201 · folio 244b

གནྡྷ་བསྲེགས་པའི་ལྡེ་གུ་སྦྲང་རྩི་དང་བཅས་པ་བྱིན་ན་ཡང་དེ་དང་འདྲའོ། །ཟུར་པ་མ་ནུ་སྐྱུ་རུ་རའམ། །མ་ནུ་པི་པི་ལིང་བཅས་ཕན། །ཞེས་བྱ་བ་ལ། ཟུར་པ་དང་མ་ནུ་དང་སྐྱུ་རུ་ར་སྦྲང་རྩི་དང་བཅས་པའི་ལྡེ་གུ་ཟོས་ན་བད་ཀན་ཤས་ཆེ་བའི་དབུགས་མི་བདེ་བ་སེལ་བར་བྱེད་དོ། །

ཡང་ན་མ་ནུ་དང་པི་པི་ལིང་དུ་བཅས་པ་སྦྲང་རྩི་དང་སྦྱར་ཏེ་ཟོས་ན་ཡང་དེ་དང་འདྲའོ། །ཡུག་སྣམ་པི་པི་ལིང་བཅས་པའམ། །ཀ་པིད་ཏ་ཡི་ཁུ་བའམ། །ཞེས་བྱ་བ་ལ། ཡང་ན་བཙག་ཡུག་སྣམ་པི་པི་ལིང་དང་བཅས་པའི་ཕྱེ་མ་སྦྲང་རྩི་དང་སྦྱར་ཏེ་ཟོས་པའམ། ཡང་ན་ཀ་པིད་

ཏའི་ཁུ་བ་སྦྲང་རྩི་དང་སྦྱར་བ་ཟོས་ན་ཡང་ཡོན་ཏན་དེ་དང་འདྲའོ། །བིལ་བའི་རྐང་ཁུ་སྐྱུ་རུ་ར། །པི་པི་ལིང་དང་རྒྱམ་ཚར་སྦྱར། །ཞེས་བྱ་བ་ལ། ཡང་ན་བིལ་བའི་རྐང་གི་ཁུ་བ་དང་སྐྱུ་རུ་ར་དང་། པི་པི་ལིང་དང་རྒྱམ་ཆར་སྦྱར་བའི་ལྡེ་གུ་ཟོས་ན་ཡང་དེ་དང་འདྲའོ། །མར་དང་སྦྲང་རྩི་ཨ་རུ་

རའམ། །ཚ་བ་གཉིས་དང་ཁ་རུ་ཚ། །ཞེས་བྱ་བ་ལ། ཡང་ན་མར་དང་སྦྲང་རྩི་དང་ཨ་རུ་ར་དང་སྦྱར་བའི་ལྡེ་གུ་བཟའ་བའམ། ཡང་ན་ཚ་བ་སྟེ་པི་པི་ལིང་དང་ན་ལེ་ཤམ་དང་ཁ་རུ་ཚ་མར་དང་སྦྲང་རྩིར་སྦྱར་བ་བཟའ་བར་བྱའོ། །རྒྱ་ཤུག་འབྲས་ཡོས་སྦྲང་རྩི་དང་། །རྒུན་འབྲུ་པི་པི་

ལིང་དོང་གྲ། །ཞེས་བྱ་བ་ལ། ཡང་ན་རྒྱ་ཤུག་ལ་སོགས་པ་སྦྲང་རྩི་དང་སྦྱར་བའི་ལྡེ་གུ་བཟའ་བར་བྱའོ། །བུ་རམ་རྒུན་འབྲུ་ཡུང་ར་སྣ། །པི་པི་ལིང་དང་ན་ལེ་ཤམ། །ཏིལ་མར་དང་ནི་སྦྱར་བ་ཕན། །ཞེས་བྱ་བ་ལ། ཡང་ན་བུ་རམ་ལ་སོགས་པ་དང་ཏིལ་མར་སྦྱར་བའི་ལྡེ་གུ་

བཟའ་བར་བྱའོ། །ལྡེ་གུ་སྨན་གྱི་ཕྱེ་མ་ཡང་། །ཤ་ཁུ་ཆུ་དྲོན་ཚ་སོགས་བཏུང་། །ཞེས་བྱ་བ་ལ། ལྡེ་གུའི་དོན་དུ་སྨན་གང་དག་བཤད་པ་དེ་དག་གི་ཕྱེ་མ་དག་ཀྱང་ནད་དམིགས་ལས་དཔགས་ཏེ་ཤ་ཁུ་དང་ཆུ་དྲོན་དང་ཆང་དང་ཞོ་ག་ཆུ་དང་དར་བ་རང་སྐྱུར་ལ་སོགས་པ་གང་ཡང་རུང་

བ་དང་སྤྱོས་ཏེ་བཏུང་བར་བྱའོ། །ཛི་བན་ཏི་དང་གླ་སྒང་དང་། །བྱིའུ་རུག་པ་དང་ཤིང་ཚ་དང་། །སུག་སྨེལ་གཉིས་དང་མ་ནུ་དང་། །ལྕ་བ་ཏ་མ་མ་ལི་ཀ །ཨ་རུ་ར་དང་ག་བྲའི་རྩ། །དོང་ག་དང་ནི་བ་ལ་ཀ །ཟུར་པ་ཀར་ཀ་ཏ་སྲིང་གི །ནཱ་ག་གེ་སར་པི་པི་ལིང་། །ཙ་རོང་ཅི་

Vol. 201 · folio 245a

རིགས་སྦྱར་ནས་ནི། །ཕྱེ་མ་ཉིས་འགྱུར་ཁ་རར་བཅས། །རྩིབ་ལོགས་ནད་རིམས་ལུད་པ་སེལ། །སྐྱིགས་བུ་དབུགས་མི་བདེ་འཇོམས་མཆོག །ཅེས་བྱ་བ་ལ། ཛི་བན་ཏི་ལ་སོགས་པའི་ཕྱེ་མ་དང་དེའི་ཉིས་འགྱུར་གྱི་ཁ་ར་དང་སྦྱར་བ་དག་ཀྱང་བཟའ་བ་

དང་བཏུང་བ་དང་ལྡེ་གུ་ལ་སོགས་པའི་སྦྱོར་བ་བྱས་ན་རྩིབ་ལོགས་ལ་སོགས་པའི་ནད་འཇོམས་པར་བྱེད་པའི་མཆོག་ཡིན་ནོ། །དོང་ག་བུ་རམ་ཆ་སྙོམས་པ། །བཟའ་བའམ་སྣ་ནས་བཏང་སྨན་བྱ། །ཞེས་བྱ་བ་ལ། བུ་རམ་དང་དོང་ག་ཆ་སྙོམས་པ་བཟའ་བའམ། དེའི་ཁུ་བ་

སྣ་ནས་གཏང་བར་བྱའོ། །ཡང་ན་སྒོག་སྐྱ་འམ་ཀུན་དོང་ངམ། །གྲི་རྩ་ན་ཡི་རྩ་བས་བྱ། །ཞེས་བྱ་བ་ལ། སྒོག་སྐྱ་ལ་སོགས་པའི་རྩ་བའི་ཁུ་བ་ཡང་སྣ་སྨན་བྱའོ། །ཙནྡན་གྱི་ནི་ཁུ་བ་དང་། །བུད་མེད་ནུ་ཞོ་སྣར་བླུགས་བྱ། །ཞེས་བྱ་བ་ལ། ཡང་ན་ཙནྡན་གྱི་ཁུ་བ་དང་བུད་མེད་

ཀྱི་ནུ་ཞོར་སྦྱར་བ་སྣར་བླུགས་པར་བྱའོ། །སྦྲང་མའི་རྟུག་པ་ནུ་ཞོར་སྦྱར། །རྒྱ་སྐྱེགས་ཁུ་བ་དང་སྦྱར་བླུགས། །ཞེས་བྱ་བ་ལ། སྦྲང་མའི་རྟུག་པ་བུད་མེད་ཀྱི་ནུ་ཞོ་དང་སྦྱར་བ་སྣར་བླུགས་པར་བྱ་བའམ། ཡང་ན་རྒྱ་སྐྱེགས་ཀྱི་ཁུ་བ་དང་སྦྱར་བའི་སྨན་སྣ་ནས་བླུགས་ན་ཡང་ཕན་ནོ། །

རྒྱམ་ཚ་ཞུན་མར་དང་བཅས་པ། །ནུ་ཞོ་མར་དང་བསྐོལ་བའམ། །མངར་བའི་སྨན་དང་ལྡེ་གུར་བྱས། །དེ་བཏུང་བའམ་སྣ་ནས་གཏང་། །ཞེས་བྱ་བ་ལ། ཡང་རྒྱམ་ཚ་དང་ཞུན་མར་དྭངས་མ་དང་བཅས་པ་བུད་མེད་ཀྱི་ནུ་ཞོ་དང་བསྐོལ་བའི་སྨན་བཏུང་བའམ། སྣ་ནས་བཏང་བའམ།

སྨན་མངར་བའི་སྡེ་ཚན་རྒུན་འབྲུ་ལ་སོགས་པ་དང་ལྡེ་གུར་བྱས་པའི་མར་དང་རྒྱམ་ཚ་བཏུང་བའམ་སྣ་ནས་གཏང་བར་བྱའོ། །ཁ་ར་སྦྲང་རྩིར་བཅས་པ་ནི། །གྲང་དྲོའི་རེས་ཀྱིས་བླུགས་པའམ། །དེ་བཞིན་འོ་མ་བསྐོལ་བ་ནི། །སྨན་གྱི་ཕྱེ་མ་མར་སྦྱར་བླུགས། །ཞེས་

བྱ་བ་ལ། ཁ་ར་དང་སྦྲང་རྩིར་བཅས་པའི་སྨན་གྲང་དྲོའི་རེས་ཀྱིས་གཞུག་ཅིང་བསྟེན་པའམ། ཡང་ན་དེ་བཞིན་དུ་འོ་མ་བསྐོལ་བའི་སྨན་གྱི་ཕྱེ་མར་སྦྱར་བ་ལས་བཙིར་བའི་ཁུ་བ་བླུགས་ན་ཕན་ནོ། །པི་པི་ལིང་དང་ཁ་རུ་ཚ། །ཡ་བཀྵ་ར་སླེ་ཏྲེས་དང་། །ཤིང་ཀུན་ཙོ་ར་བྱེའུ་

Vol. 201 · folio 245b

རུག་པ། །མར་དང་ཞོ་ག་ཆུར་སྦྱར་ཞིང་། །རྩ་བཅུའི་ཁུ་བར་བསྐོལ་བ་བླུད། །ཅེས་བྱ་བ་ལ། པི་པི་ལིང་ལ་སོགས་པའི་སྨན་ལྡེ་གུར་བྱས་པ་དང་བསྐོལ་བའི་མར་ལ་སོགས་པ་འཐུངས་ན་ཡང་སྐྱིགས་བུ་དང་དབུགས་མི་བདེ་བ་ལ་ཕན་ནོ། །ཡང་ན་འཚོ་བྱེད་བསྐོལ་

བའི་ཁུ། །སྦྲང་རྩིར་བཅས་པ་བླུད་པར་བྱ། །ཞེས་བྱ་བ་ལ། འཚོ་བྱེད་ཀྱི་སྨན་སྣ་བཅུ་དང་མར་དུ་བསྐོལ་བ་དང་སྦྲང་རྩིར་སྦྱར་བ་བླུད་ན་དེ་དག་ལ་ཕན་ནོ། །ཏེ་ཛོ་བ་ཏི་ཨ་རུ་ར། །པི་པི་ལིང་དང་པུ་ཙེ་ཤེལ། །རུ་རྟ་མ་ནུ་བུ་ཏི་ཀ །ཙི་ཏྲ་ཀ་དང་པ་ལ་ཤ།། ཟུང་པ་ལན་ཚྭ་རྣམ་

གཉིས་དང་། །ཛི་བན་ཏི་དང་བིལ་བའི་རྐང་། །ཤུ་དག་བལ་བུའི་ལོ་མ་རྣམས། །དེ་དག་ཞོ་ནི་གཉིས་གཉིས་བསྐོལ། །ཤིང་ཀུན་ཞོ་ཕྱེད་མར་བྲེ་གང་། །བསྐོལ་བ་དེ་ནི་འཐུངས་གྱུར་ན། །རྐང་ལག་ལ་ནི་ཞེན་པའི་རླུང་། །གཞང་འབྲུམ་དང་ནི་ཕོ་བའི་ནད། །སྐྱིགས་བུ་

སྙིང་ནད་རྩིབ་ལོགས་ཟུག །མྱུར་དུ་སེལ་བར་བྱེད་པ་ཡིན། །ཞེས་བྱ་བ་ལ། ཏེ་ཛོ་བ་ཏི་ལ་སོགས་པའི་ལྡེ་གུ་གཉིས་གཉིས་དང་། ཤིང་ཀུན་ཞོ་ཕྱེད་དེ་མ་ཤ་དྲུག་དང་མར་བྲེ་གང་བསྐོལ་ལ་མར་དེ་འཐུངས་ན་རྐང་ལག་ལ་ཞེན་པའི་རླུང་ལ་སོགས་པ་མྱུར་དུ་སེལ་བར་བྱེད་

དོ། །ཏེ་ཛོ་བ་ཏི་ཞེས་བྱ་བ་ནི་སྨན་བཟི་ཅན་ནོ། །པུ་ཙེ་ཤེལ་ནི་ཀ་ཏུ་ཀ་རོ་ཧི་ནིའོ། །ལན་ཚྭ་གཉིས་ནི་ལྕེ་མྱང་ཚ་དང་ཁ་རུ་ཚའོ། །བིལ་བའི་རྐང་ནི་བིལ་བ་མད་ཛའོ། །ཞུན་མར་ཆ་ཕྱེད་བཅས་པ་ཡི། །ཡ་བཀྵ་ར་རྒྱམ་ཚ་སྦྱིན། །ཞེས་བྱ་བ་ལ། ཡང་ན་ཞུན་མར་གྱི་ཆ་

ཕྱེད་ཀྱི་ཡ་བཀྵ་ར་སྦྱར་བ་བླུད་པར་བྱ་བའམ། ཡང་ན་མར་གྱི་ཆ་ཕྱེད་རྒྱམ་ཚ་དང་སྦྱར་བ་བླུད་ན་ཡང་དེ་དག་མྱུར་དུ་སེལ་ཏོ། །ཐང་ལ་འབར་གྱིའམ་དུག་གི་མར། །ཞོ་ཅན་ཧ་པུ་ཤའི་མར་བླུད། །ཅེས་བྱ་བ་ལ། དྲང་སྲོང་ཐང་ལ་འབར་གྱིས་བཤད་པའི་སྨན་མར་གཅིན་ནད་གསོ་

བའི་སྐབས་སུ་བཤད་པའམ། དུག་གི་སྨན་མར་ཁྲག་མཁྲིས་ཀྱི་སྐབས་སུ་བཤད་པ་དང་། ཞོ་ཅན་གྱི་སྨན་མར་སྐྲན་གསོ་བའི་སྐབས་སུ་བཤད་པ་དང་། ཧ་པུ་ཤ་ལ་སོགས་པའི་སྨན་མར་དེ་ཉིད་དུ་བཤད་པ་སྟེ་སྨན་མར་དེ་དག་བླུད་ན་ཡང་སྐྱིགས་བུ་དང་དབུགས་མི་

Vol. 201 · folio 246a

བདེ་བ་སེལ་ཏོ། །ཆུ་གྲང་གློ་བུར་བླུགས་པ་དང་། །སྡངས་དང་སྤྲུགས་དང་འཇིགས་པ་དང་། །དགའ་དང་ཕྲག་དོག་དབུགས་བསྡམས་དང་། །གནོད་པའི་འབུ་ཡིས་སོས་བཏབ་དང་། །ཞེས་བྱ་བ་ལ། ཡང་སྐྱིགས་བུའི་ནད་ལ་ཆུ་གྲང་གློ་བུར་དུ་འཕྲལ་ལ་

བླུགས་པ་དང་། དེ་བཞིན་དུ་སྡངས་ཤིང་སྐྲག་པར་བྱས་པ་དང་། དེ་བཞིན་དུ་ལུས་སྤྲུགས་པ་དང་། འཇིགས་པས་ཏེ་སེམས་ཞུམ་བག་དུ་གྱུར་པ་ངོ་ཚ་བའི་བག་ལ་བརྟེན་པ་དང་། དགའ་བ་སྟེ་སེམས་དགའ་ཞིང་སྤྲོ་བའི་ཞད་བྱུང་བ་དང་། ཕྲག་དོག་སྟེ་གཞན་གྱི་ཡོན་ཏན་

ལ་མི་བཟོད་པ་དང་དབུགས་བསྡམས་པ་སྟེ། ཁ་དང་སྣ་ནས་འབྱུང་བའི་དབུགས་དགག་པ་དང་། དེ་བཞིན་དུ་གནོད་པའི་ལུས་ལ་ཚ་བ་སྐྱེད་ཅིང་འཇིགས་པར་ནུས་པའི་འབུས་སོས་བཏབ་པ་ལ་ཕན་ཏེ། དེ་དག་གིས་ནི་རླུང་གི་ཤུགས་འབྱུང་བའི་རྒྱུན་ལ་གགས་བྱས་པའི་

ཕྱིར་རོ། །གང་ཡང་བད་ཀན་རླུང་འཇོམས་སྨན། །དྲོ་ཞིང་རླུང་ནི་བདེ་རྒྱུ་བསྟེན། །གང་ཡང་ཕལ་ཆེར་རླུང་གི་ནད། །ལྷག་པར་འཇོམས་པར་བྱེད་པས་སྤྱད། །ཅེས་བྱ་བ་ལ། སྐྱིགས་བུ་དང་དབུགས་མི་བདེ་བ་དག་ལ་གང་ཡང་བཟའ་བ་དང་བཏུང་བ་དང་སྨན་ལ་སོགས་པ་བད་

ཀན་དང་རླུང་འཇོམས་པར་བྱེད་པ་བསྟེན་པ་དང་། དེ་བཞིན་དུ་དྲོ་ཞིང་རླུང་བདེ་བར་རྒྱུ་བར་བྱེད་པ་གང་དག་ཡིན་པ་དེ་ཐམས་ཅད་བསྟེན་པར་བྱའོ། །དེ་ལས་ཀྱང་ཁྱད་པར་དུ་རླུང་གི་ནད་ལྷག་པར་འཇོམས་ཤིང་སེལ་བར་བྱེད་པའི་དངོས་པོ་དེ་བསྟེན་ཅིང་སྤྱད་པར་བྱའོ། །ཐམས་ཅད་ལ་

ནི་བརྟ་བྱས་པས། །ཚབས་ཆུང་གསོ་བར་སླ་བ་ཡིན། །ལྷག་པར་ཉམས་སྨད་པ་ཡིས་ནི། །ཞི་བའི་ཐབས་སུ་འགྱུར་མ་ཡིན། །དེ་བས་ཞི་བ་བརྟ་བའི་ཐབས། །མང་པོ་དེ་ལ་སྤྱད་པར་བྱ། །ཞེས་བྱ་བ་ལ། སྐྱིགས་བུ་དང་དབུགས་མི་བདེ་བ་ཐམས་ཅད་ལ་བརྟ་བའི་ཆོ་ག་བྱས་

ན་ནད་ཚབས་ཆུང་བར་འགྱུར་ལ། དེ་ནས་དེ་གསོ་སླ་བར་འགྱུར་ལ། ལྷག་པར་ཉམས་སྨད་པ་ནི་དེ་ཞི་ཞིང་བསལ་བའི་ཐབས་སུ་མི་འགྱུར་ཏེ། ཉམས་སྨད་པར་བྱས་པས་དེ་གསོ་བ་དཀའ་བར་འགྱུར་རོ། །དེ་བས་ན་དེ་ཞི་བ་དང་བརྟ་བར་བྱ་བ་ཐབས་མང་པོ་གང་ཡོད་པ་དེ་ལ་སྤྱད་

Vol. 201 · folio 246b

པས་གསོ་བར་བྱའོ། །ལུད་པ་དབུགས་མི་བདེ་གཅོང་སློན། །སྐྱིགས་བུའི་སྨན་ནི་ཕན་ཚུན་འདྲེ། །ཞེས་བྱ་བ་ལ། ལུད་པ་ལ་སོགས་པའི་སྨན་གྱིས་ཕན་ཚུན་གཅིག་ལ་གཅིག་ཕན་ཞིང་འདྲེ་བ་ཡིན་པས་ལུད་པའི་སྐབས་སུ་བཤད་པའི་སྨན་གྱིས་དབུགས་མི་བདེ་བ་ལ་

སོགས་པ་གསོར་རུང་ལ། དབུགས་མི་བདེ་བ་ལ་སོགས་པའི་སྨན་གྱིས་ནི་ལུད་པ་གསོར་རུང་བས་ན་དེའི་ཕྱིར་ཇི་སྐད་དུ་བཤད་པའི་སྨན་གྱིས་འདི་དག་ཐམས་ཅད་གསོ་ཞིང་བཅོས་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ།

སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། གསོ་བའི་གནས་ལེའུ་བཞི་པའི་རྣམ་པར་འགྲེལ་པའོ།། །།དེ་ནས་གཅོང་ཆེན་པོ་གསོ་བའི་ལེའུ་བཤད་པར་བྱའོ། །ཞེས་བྱ་བ་ལ། སྐྱིགས་པུ་དང་དབུགས་མི་བདེ་བ་གསོ་བའི་འོག་ཏུ་གཅོང་ཆེན་པོ་

གསོ་བའི་སྐབས་སུ་བརྩམས་པ་དགོས་པ་ནི། སྔར་ནད་གཞིའི་སྐབས་སུ་དགོས་པ་བཤད་པའི་རིམ་པས་འདིའི་གསོ་བ་བཤད་པའི་གོ་རིམས་ལ་བབ་པ་ཡིན་ནོ། །སྟོབས་ལྡན་ནད་ནི་མང་གྱུར་ལ། །སྣུམ་ཆོས་དུགས་བྱས་སྦྱང་བ་ནི། །སྣུམ་མེད་མ་ཡིན་ཉམས་སྨོད་མིན། །

སྟེང་འོག་གི་ནི་སྦྱང་བར་བྱ། །ཞེས་བྱ་བ་ལ། གཅོང་ཆེན་པོ་ཟད་བྱེད་དང་ལྡན་པའི་ནད་པ་ཉམས་སྟོབས་ལྡན་པའི་ནད་པ་མང་པོས་ཁྱབ་པར་གྱུར་པ་སྣུམ་གྱི་ཆོ་ག་དང་། དུགས་བྱས་ནས་སྦྱང་བ་ཞེས་བྱ་བ་སྐྱུག་སྨན་དང་བཀྲུ་སྨན་བྱ་བ་ལ་དེ་སྣུམ་མེད་ཅིང་རྩུབ་ཆོས་སུ་ཡང་མི་བྱ་ལ།

ཉམས་སྨོད་ཅིང་འབྲི་བར་ཡང་མི་འགྱུར་བ་དེ་ལྟ་བུའི་སྦྱང་བ་བྱའོ། །འོ་མ་པོ་སོན་ཆར་བཅས་པའམ། །ཤ་ཁུ་མངར་དང་ལྡན་པའམ། །ཞུན་མར་བཏབ་པའི་ནས་ཐུག་ནི། །སྐྱུག་སྨན་བསྐོལ་བས་སློན་དུ་གཞུག །ཅེས་བྱ་བ་ལ། སྐྱུག་སྨན་ནི་འོ་མ་དང་པོ་སོན་ཆར་སྦྱར་བས་

ཟད་བྱེད་ཀྱི་ནད་ཀྱིས་བཏབ་པ་སློན་དུ་གཞུག་པའམ། ཡང་ན་རོ་མངར་བ་དང་སྦྱར་བའི་ཤ་ཁུ་དང་པོ་སོན་ཆར་སྦྱར་བས་སློན་དུ་གཞུག་པའམ། ཡང་ན་ཞུན་མར་བཏབ་པའི་ནས་ཐུག་དང་སྨན་པོ་སོན་ཆ་ལ་སོགས་པ་དང་སྦྱར་ཏེ་བསྐོལ་བ་བླུད་ལ་སློན་དུ་གཞུག་པར་བྱའོ། །ཤ་མ་

Vol. 201 · folio 247a

དུར་བྱིད་དོང་གར་བཅས། །ཁ་ར་སྦྲང་རྩི་མར་དང་ནི། །བཅས་པའི་འོ་མའམ་སྐྱོ་མའམ། །རྒུན་འབྲུ་ཏང་པལ་བི་ད་རི། །ཡང་ན་ཤ་ཁུར་ལྡན་པ་ཡི། །བཀྲུ་སྨན་འཇམ་པོ་གཏང་བར་བྱ། །ཞེས་བྱ་བ་ལ། ཡང་ན་བཀྲུ་སྨན་དམ་ཞིང་ཉམས་དམའ་བར་

མི་བྱེད་པ་སྦྱར་བར་བྱ་སྟེ། དེ་ཡང་ཤ་མ་དུར་བྱིད་ལ་སོགས་པའི་ཁར་དཀར་པོ་དང་སྦྱར་བའི་བཀྲུ་སྨན་གཏང་བའམ་ཡང་ན་འོ་མ་དང་བཅས་པའི་སྐྱོ་མ་ཞེས་བྱ་བ་ཕྱེ་མར་གྱི་སྐྱོ་མ་དང་བཀྲུ་སྨན་དུ་སྦྱར་ཏེ་གཏང་བའམ། ཡང་ན་རྒུན་ཆུ་ལ་སོགས་པ་སྨན་རེ་རེ་ཁུ་བ་དང་སྦྱར་ཏེ་བཀྲུ་སྨན་

འཇམ་པོ་གཏང་བར་བྱའོ། །ལྟོ་སྦྱངས་པ་ལ་བརྟ་བ་དང་། །དྲོད་སྐྱེད་ཆོ་ག་སྤྱད་པར་བྱ། །ཟས་སྐོམ་ཡི་གར་འོང་བ་དང་། །རླུང་འཇོམས་བྱེད་ཅིང་ཡང་བ་སྦྱིན། །ཞེས་བྱ་བ་ལ། གཅོང་ཆེན་གྱི་ནད་པ་ལ་དེ་ལྟར་སློན་ནམ་ཁྲུས་ཀྱིས་ལྟོ་སྦྱངས་པར་གྱུར་ནས་ཉམས་བརྟབ་དང་།

དྲོད་སྐྱེད་པའི་ཆོ་ག་གང་དག་ཡིན་པ་སྤྱད་པར་བྱ་ཞིང་། དེ་བཞིན་དུ་ཟས་དང་སྐོམ་གྱི་རྣམ་པ་ཡི་གར་འོང་ཞིང་སྙིང་དགའ་བར་བྱེད་ལ་སྲེད་པ་སྐྱེད་པར་བྱེད་པ་དང་། གཙོ་ཆེར་རླུང་འཇོམས་ཤིང་སེལ་བར་བྱེད་པའི་རང་བཞིན་ཅན་དང་ཡང་བ་སྟེ་རང་བཞིན་གྱིས་ཡང་བ་དང་གཡོས་

སུ་བྱས་པས་ཡང་བར་གྱུར་པ་གང་དག་ཡིན་པ་སྦྱིན་པར་བྱའོ། །སཱ་ལུ་དྲུག་ཅུ་པ་དང་གྲོ། །ནས་དང་མུངྒ་ལོ་གཅིག་ལོན། །ཞེས་བྱ་བ་ལ། འབྲས་སཱ་ལུ་རྩ་སྣར་ལ་སོགས་པ་དང་། འབྲས་དྲུག་ཅུ་པ་ལ་སོགས་པའི་འབྲུ་ལོ་གཅིག་ལོན་པ་ནི་གཅོང་ཆེན་པོའི་ནད་ལ་ཕན་ནོ། །

ར་ཡི་འོ་མ་མར་དང་ཤ །ཤ་ཟའི་ཤ་ནི་ཟད་བྱེད་འཇོམས། །ཞེས་བྱ་བ་ལ། རའི་འོ་མ་ལ་སོགས་པ་དང་སྲོག་ཆགས་ཤ་ཟ་བ་རྣམས་ཀྱི་ཤ་གང་དག་ཡིན་པ་ནི། ལྷག་པར་ཉམས་སྟོབས་སྐྱེད་ཅིང་ཟད་བྱེད་འཇོམས་པར་འགྱུར་རོ། །བྱ་རོག་འུག་པ་སྤྱང་ཀི་གཟིག །བ་ལང་

རྟ་དང་ནེའུ་ལེ་སྦྲུལ། །བྱ་རྒོད་རྔ་མོང་བོང་བུ་ཁྲའི། །ཤ་ནི་སྒྱུ་ཡིས་བྱིན་ན་ཕན། །ཞེས་བྱ་བ་ལ། བྱ་རོག་གི་ཤ་ལ་སོགས་པ་སྒྱུ་ཐབས་ཀྱིས་གསོང་སྟེ་གཞན་གྱི་ཤར་བཙོས་ནས་བྱིན་ན་ཡང་གཅོང་ཆེན་པོའི་ནད་ལ་ཕན་ཞིང་ནད་པ་ལ་ཆ་ཡོད་པ་མངོན་སུམ་དུ་མ་ཡིན་ནོ། །དེ་

Vol. 201 · folio 247b

ཡང་དྲང་སྲོང་ཙ་ར་ཀས། བྱ་རོག་ཤ་ནི་སྲེག་པར་བརྗོད། །སྦྲུལ་ཤ་ཉ་ཡི་ཤ་ཞེས་བརྗོད། །རྟ་བླ་བ་ནི་རྒྱུ་མའི་སྒྲས། །སྨན་པ་མཁས་པས་སྦྱིན་པར་བྱ། །ཞེས་བཤད་པ་ཡིན་ནོ། །ཤེས་ན་དེ་ལས་སྨོད་པས་ན། །སློན་ཞིང་མདངས་དང་སྟོབས་མི་འགྱུར། །ཞེས་བྱ་བ་ལ། གང་

གི་ཕྱིར་བྱ་རོག་ལ་སོགས་པའི་ཤ་ནི་འཇིག་རྟེན་ན་སྨད་པར་བྱ་བ་ཡིན་པས་ནད་པ་དེས་ཤེས་པར་གྱུར་ན་དེ་ལ་སྨོད་པའི་སེམས་སྐྱེ་བས་སླར་སློན་ཞིང་སྐྱུག་པར་འགྱུར་བ་དང་། དེ་བཞིན་དུ་ལུས་ཀྱི་མདངས་དང་ཉམས་སྟོབས་དག་ཏུ་ཡང་མི་འགྱུར་རོ། །བད་མཁྲིས་རི་དྭགས་ལ་

སོགས་ཤ །རླུང་ལ་མཐུ་རྩལ་གཟན་ཚོལ་ཤ །ཚོ་ཁུར་སྦྱར་ཞིང་ཕན་པ་དང་། །ཤ་ཁུ་སོགས་ལའང་སྦྱར་བར་བྱ། །ཡུངས་མར་དག་དང་བརྔོས་པའམ། །ཡང་ན་ཅི་རིགས་མར་དང་བརྔོས། །ཁུ་བར་ལྡན་ཞིང་མཉེན་ལ་སྣུམ། །སྤོད་ལ་སོགས་དང་ལེགས་གཡོས་སྦྱིན། །

ཞེས་བྱ་བ་ལ། བད་ཀན་དང་མཁྲིས་པ་ལས་གྱུར་པའི་གཅོང་ཆེན་པོ་ལ་ནི་རི་དྭགས་ལ་སོགས་པའི་ཤ་སྟེ་ཕག་རྒོད་ལ་སོགས་པའི་རིགས་ཆེན་པོ་དང་། ཁྲོན་རྐོ་བ་དང་། མཆུས་གཟན་ཚོལ་བའི་སྡེ་ཚན་གྱི་ཤ་བརྡུངས་ཤིང་བཏགས་པའི་ཤ་ཁུ་བླུད་ན་ཕན་ནོ། །རླུང་ལས་གྱུར་པ་ལ་

ནི་མཐུ་རྩལ་གྱིས་ཟས་ཚོལ་བ་སྟག་ལ་སོགས་པའི་ཤ་དང་ཆུ་ན་གནས་པའི་སྲོག་ཆགས་ཀྱི་ཤ་བརྡུངས་པ་ལས་ཤ་ཁུར་བྱའོ། །དེ་བཞིན་དུ་ཤ་ཁུ་དང་ཐུག་པ་ལ་སོགས་པ་དང་ཚོད་མ་སྣ་ཚོགས་པ་ལ་སོགས་པ་ལ་ཡང་དེ་དག་སྦྱར་ཞིང་གཡོས་སུ་བྱས་པའམ། ཡུངས་མར་དང་

བརྔོས་ཤིང་གཡོས་པའམ། ཡང་ན་མར་དང་བརྔོས་པ་དག་ཅི་རིགས་པར་རླུང་དང་བད་ཀན་དང་མཁྲིས་པ་ལ་སྦྱིན་པར་བྱ་བ་དེ་ཡང་ཁུ་བ་དང་ལྡན་ཞིང་ཞིམ་པ་དང་། མཉེན་ཞིང་ཚ་བ་ཆུང་ངུ་བསྐོལ་བ་དང་། སྣུམ་ཞིང་རྩུབ་བག་མེད་པ་དང་། སྤོད་དེ་སྒེའུ་གཤེར་དང་བཅའ་སྒ་དང་།

སེའུ་འབྲུ་ལ་སོགས་པའི་སྤོད་དང་ལེགས་པར་གཡོས་པ་སྦྱིན་པར་བྱའོ། །དེ་བཞིན་ལ་ཕུག་རྒྱ་སྲན་ལས། །གཡོས་པའི་ཡུ་ཤར་སྦྱར་བར་བྱ། །ཞེས་བྱ་བ་ལ། ཡང་དེ་བཞིན་དུ་ལ་ཕུག་རྒྱ་སྲན་ལ་སོགས་པའི་ཁུ་བ་ན་ལེ་ཤམ་ལ་སོགས་པའི་སྤོད་དང་སྦྱར་ཞིང་སྣུམ་པའི་

Vol. 201 · folio 248a

ཡུ་ཤར་སྦྱར་བ་ཡང་གཅོང་ཆེན་པོའི་ནད་ཀྱིས་བཏབ་པ་ལ་ཕན་ནོ། །པི་པི་ལིང་བཅས་ནས་དང་བཅས། །རྒྱ་སྲན་བཅས་ཤིང་དོང་གྲར་བཅས། །སེའུ་འབྲུ་སྐྱུ་རུ་ར་དང་བཅས། །ར་ཤའི་ཁུ་བ་སྣུམ་ཅན་བླུད། །དེས་ནི་ཆམ་པ་ལ་སོགས་པ། །གནོད་པ་དྲུག་ནི་

སེལ་བར་འགྱུར། །ཞེས་བྱ་བ་ལ། ར་ཤའི་ཁུ་བ་པི་པི་ལིང་དང་བཅས་ཤིང་དེ་དག་གཡོས་པ་དང་། ནས་དང་རྒྱ་སྲན་དང་དོང་གྲའི་ཁུ་བ་དང་བཅས་པ་དང་། སེའུ་འབྲུ་དང་། སྐྱུ་རུ་ར་མར་ལ་སོགས་པའི་སྣུམ་དང་གཡོས་པ་གང་ཡིན་པ་བླུད་པར་བྱ་སྟེ། དེ་ལྟ་བུའི་ར་ཤའི་ཁུ་བ་དེས་

ནི་ཆམ་པ་ལ་སོགས་པའི་གནོད་པ་སེལ་བར་འགྱུར་ཏེ། ཆམ་པ་ལུད་པ་དབུགས་མི་བདེ། །མགོ་ནད་སྐད་འགགས་མ་ཞུར་བཅས། །ཞེས་བྱ་བའི་གཞུང་གིས་བསྟན་པའི་ནད་འཇོམས་པ་ཡིན་ནོ། །མཁྲིས་པ་སོགས་ལས་ཁྱད་པར་དུ། །ཆང་རྙིང་རྩ་སྦུབས་སྦྱོང་བྱེད་པ། །

ངོམས་པ་ཉིད་དུ་བླུད་པར་བྱ། །རྒུན་ཆང་ཆང་རྙིང་ཆང་དྭངས་བླུད། །ཅེས་བྱ་བ་ལ། མཁྲིས་པ་ལ་སོགས་པ་ལས་གྱུར་པའི་ཟད་བྱེད་ཀྱི་ནད་ལ་ཁྱད་པར་དུ་ཡང་ཆང་ཞིམ་ཆང་ཤིན་ཏུ་རྙིང་པར་གྱུར་ཅིང་རྩ་སྦུབས་ཀྱི་བུ་ག་སྦྱོང་བར་བྱེད་ཅིང་ངོམས་པ་ཉིད་དུ་བླུད་པར་བྱ་ལ། དེ་ལས་ཀྱང་ཁྱད་པར་

དུ་མཁྲིས་པ་ལ་སོགས་པ་ལ་རྒུན་ཆང་དང་། ཆང་རྙིང་དང་། ཆང་དྭངས་མ་བླུད་པར་བྱའོ། །རྩ་བ་ཆུང་ངུ་ལྔ་བསྐོལ་བའམ། །ཏ་མ་ལ་ཀ་ཆུར་བསྐོལ་བའམ། །པརྞི་བཞི་དང་བསྐོལ་བའམ། །འུ་སུ་བཅའ་སྒ་བསྐོལ་བ་བླུད། །ཅེས་བྱ་བ་ལ། ཡང་ན་རྩ་བ་ཆུང་ངུ་ལྔ་དང་

བསྐོལ་བའི་ཆུ་བླུད་པར་བྱ་བའམ། ཏ་མ་ལ་ཀ་དང་ཆུ་བསྐོལ་བའམ། མ་ཤ་པརྞི་ལ་སོགས་པ་པརྞི་བཞི་བསྐོལ་བའམ། འུ་སུ་དང་བཅའ་སྒའང་བསྐོལ་བའི་ཆུ་བླུད་པར་བྱའོ། །དེ་དང་ཁ་ཟས་གཙང་མ་དག །འབད་པས་བཙོས་པ་རྗེས་མཐུན་ཡིན། །ཞེས་བྱ་བ་

ལ། རྩ་བ་ལྔའི་ཆུ་ལ་སོགས་པ་དེ་དང་ཁ་ཟས་གཙང་ཞིང་སྨེ་བག་མེད་པ་འབད་པས་བཙོས་ན་ཡང་རྗེས་སུ་མཐུན་ཞིང་ཕན་པ་ཡིན་ནོ། །རྩ་བ་བཅུ་དང་འོ་མ་འམ། ཤ་ཁུའི་ནང་དུ་བཙོ་བར་བྱ། །བ་ལ་བཏབ་པའི་མར་སྦྱར་བའམ། །ཤ་ཟའི་ཤ་ཁུར་བཙོས་

Vol. 201 · folio 248b

པ་སྦྱིན། །ཅེས་བྱ་བ་ལ། རྩ་བ་བཅུ་དང་འོ་མའམ་ཤ་ཁུར་བཙོས་ལ། སྨན་པ་ལའི་ལྡེ་གུ་བཏབ་པའི་སྨན་མར་སྦྱར་ཏེ་སྦྱིན་པའམ། ཤ་ཟ་བའི་ཤ་ཁུ་དང་བཙོས་པ་སྦྱིན་པར་བྱའོ། །འོ་མ་བཅུ་འགྱུར་དག་དང་ནི། །མར་བསྐོལ་སྦྲང་རྩིར་བཅས་པའང་ཕན། །ཞེས་བྱ་བ་ལ།

ཡང་ན་འོ་མ་བཅུ་འགྱུར་དང་མར་བསྐོལ་བ་ལ་སྦྲང་རྩི་དང་སྦྱར་བའི་སྨན་མར་སྦྱིན་ན་ཡང་ཕན་ནོ། །ཛི་བན་ཏི་དང་ཤིང་མངར་དང་། །རྒུན་འབྲུ་དུག་མོ་ཡུངས་འབྲས་བུ། །མ་ནུ་ཟུར་པ་པི་པི་ལིང་། །བྱ་ཀྲི་གཟེ་མ་བ་ལ་དང་། །ཏ་མ་ལ་ཀི་ཨུཏྤལ་སྔོ། །ཀྱི་ལྕེ་བ་དང་བྱི་ཚེར་བ། །ལྡེ་

གུར་བྱས་དང་མར་བསྐོལ་བ། །གཅོང་ཆེན་སེལ་བའི་དམ་པ་ཡིན། །ཞེས་བྱ་བ་ལ། ཛི་བན་ཏི་ལ་སོགས་པའི་སྨན་མར་གྱི་བཞི་ཆའི་ལྡེ་གུར་བྱས་པ་དང་། ཆུ་མར་གྱི་བཞི་འགྱུར་བསྲེས་པ་དང་། མར་བསྐོལ་བའི་སྨན་ཡང་གཅོང་ཆེན་པོའི་ནད་རྒྱལ་པོའི་ནད་ཅེས་བྱ་བ་སེལ་

ཞིང་འཇོམས་པར་བྱེད་པའི་མཆོག་ཡིན་ནོ། །འབྲ་གོ་རྒུན་འབྲུ་མ་དུ་ཀ །པ་རུ་ཤ་དང་པི་པི་ལིང་། །མར་དང་བསྐོལ་བས་སྐད་འགགས་དང་། །ལུད་པ་དབུགས་མི་བདེ་རིམས་འཇོམས། །ཞེས་བྱ་བ་ལ། འབྲ་གོ་ལ་སོགས་པའི་སྨན་གྱི་ལྡེ་གུ་དང་ཆོ་ག་བཞིན་དུ་བསྐོལ་

བའི་སྨན་མར་གྱིས་ཀྱང་སྐད་འགགས་པ་ལ་སོགས་པའི་ནད་འཇོམས་པར་བྱེད་དོ། །རྩ་བཅུ་འོ་མར་བསྐོལ་བ་ལས། །བྱུང་བའི་མར་གསར་གང་ཡིན་དེ། །པི་པི་ལིང་དང་སྦྲང་རྩིར་བཅས། །སྐད་འགགས་སེལ་བའི་དམ་པ་ཡིན། །མགོ་བྲང་རྩིབ་ལོགས་གཟེར་

འཇོམས་ཤིང་། །ལུད་པ་དབུགས་མི་བདེ་རིམས་སེལ། །ཞེས་བྱ་བ་ལ། རྩ་བ་བཅུ་ནི་རྩ་བ་ལྔ་ཆེ་ཆུང་གཉིས་བསྡོམས་པ་སྟེ་དེ་དང་བསྐོལ་བའི་འོ་མ་བསྲུབས་པ་ལས་མར་གསར་བྱུང་བ་དེ་པི་པི་ལིང་དང་སྦྲང་རྩི་དང་བཅས་པར་ཟོས་ན་སྐད་འགགས་པ་སེལ་ཞིང་

འཇོམས་པའི་དམ་པ་ཡིན་ནོ། །དེ་བཞིན་དུ་མགོ་དང་བྲང་ལ་སོགས་པའི་ནད་ཀྱང་སེལ་བར་བྱེད་པ་ཡིན་ནོ། །རྩ་བ་ལྔ་པ་ལྔར་བསྐོལ་བའི། །འོ་མ་ལས་བྱུང་མར་གང་ཡིན། །རྩ་བ་ལྔ་པ་ལྔ་ཡི་ནི། །ཁུ་བ་འོ་མའི་བཞི་འགྱུར་ལ། །བསྐོལ་བ་ཡི་ནི་

Vol. 201 · folio 249a

མར་འདི་ཡིས། །ཟད་བྱེད་ཀྱི་ནི་སྟོབས་བདུན་འཇོམས། །ཞེས་བྱ་བ་ལ། རྩ་བ་ལྔ་བསྐོལ་བའི་འོ་མ་ལས་བྱུང་བའི་མར་གང་ཡིན་པ་དེ་རྩ་བ་ལྔ་པ་ལྔ་པའི་ཁུ་བ་འོ་མའི་བཞི་འགྱུར་གྱི་ནང་དུ་བསྐོལ་བའི་མར་འདིས་ནི་ཟད་བྱེད་ཀྱི་སྟོབས་ཆམ་པ་ལ་སོགས་

པ་བདུན་འཇོམས་པར་བྱེད་དོ། །ཡང་ན་གྲེ་བར་དུད་པས་བརྔུབ་པ་སྙམ་སེམས་པ་ལ་སོགས་པ་ནད་ཀྱི་བླ་བརྣན་བདུན་འཇོམས་པར་བྱེད་དོ། །ཡ་བཀྵ་ར་ཚ་བ་ལྔ། །སྲང་དྲུག་དང་ནི་བཙོས་པའི་མར། །བྲེ་གང་འོ་མ་ཆ་མཉམ་བྱས། །དེས་ནི་བུ་ག་དག་བྱེད་ཅིང་། །སྐྲན་

དང་དམུ་རྫིང་མཆེར་པ་དང་། །ཕོ་ནད་སྐྱ་རྦབ་ཆམ་པ་དང་། །ལུད་པ་དབུགས་མི་བདེ་དྲོད་ཉམས། །སྐྲང་དང་སྟོད་ཀྱི་རླུང་ནད་འཇོམས། །ཞེས་བྱ་བ་ལ། ཡ་བཀྵ་ར་དང་ཚ་བ་ལྔ་སྟེ་པི་པི་ལིང་དང་པི་པི་ལིང་གི་རྩ་བ་དང་། དབྱི་མོ་དང་བཅའ་སྒ་དང་། ཀྲུ་ཏྲུག་ཏྲེས་ཏེ་ལྔ་པོ་

སྲང་དྲུག་ལྡེ་གུར་བྱས་པ་དང་། འོ་མ་བྲེ་གང་དང་ཆུ་བྲེ་གསུམ་དང་མར་བྲེ་གང་བསྐོལ་བ་དེས་ནི་བུ་གའི་རྒྱུན་སྲང་དག་པར་བྱེད་ཅིང་སྐྲན་ལ་སོགས་པའི་ནད་འཇོམས་པར་བྱེད་པ་ཡིན་ནོ། །ར་སྣ་བ་ལ་གཟེ་མ་དང་། །སྟི་ར་བར་ཤ་བུའི་ཆུར། །ཛི་བན་ཏི་དང་པི་པི་ལིང་། །འོ་བཅས་

གཅོང་ཆེན་འཇོམས་པའི་མཆོག །ཅེས་བྱ་བ་ལ། ར་སྣ་ལ་སོགས་པའི་སྨན་བསྐོལ་བའི་ཆུ་མར་གྱི་བཞི་འགྱུར་དང་། མར་དང་འོ་མ་ཆ་མཉམ་པར་བསྐོལ་བ་ཛི་བན་ཏི་དང་། པི་པི་ལིང་བཏབ་པའི་སྨན་མར་ནི་གཅོང་ཆེན་པོ་ཟད་བྱེད་ཅེས་བྱ་བ་འཇོམས་པའི་མཆོག་ཡིན་ནོ། །ཨ་

ཤྭ་གན་དྷ་འོ་མར་བསྐོལ། །ལས་བྱུང་མར་འོ་ཁ་རར་བཅས། །ཞེས་བྱ་བ་ལ། ཨ་ཤྭ་གན་དྷ་བསྐོལ་བའི་འོ་མ་བསྲུབས་པ་ལས་བྱུང་བའི་འོ་མ་དང་ཁ་རར་བཅས་པ་བླུད་ན་ཟད་བྱེད་ཀྱི་ནད་སེལ་བར་བྱེད་དོ། །སྤྱི་ཡི་ཤ་ནི་སྲང་བརྒྱད་དག །ཆུ་བྲེ་སུམ་ཅུ་གཉིས་ནང་

བསྐོལ། །དེ་ཡི་བརྒྱད་ཆ་ལུས་པ་རུ། །འཚོ་བྱེད་བཅུ་ནི་སྲང་རེར་གཞུག །ཞུན་མར་བྲེ་གང་བཅས་བསྐོལ་བ། །ཤ་ཡི་སྨན་མར་འདི་བླུད་པའམ། །ཤ་ཁུ་དང་སྦྱར་ཅི་རིགས་སྦྱིན། །རླུང་དང་མཁྲིས་པ་ལས་གྱུར་ནད། །ལུད་པ་དབུགས་མི་བདེ་སྐད་

Vol. 201 · folio 249b

འགགས། །སྐེམ་ཞིང་རྩིབ་ལོགས་ཟུག་པ་འཇོམས། །ཞེས་བྱ་བ་ལ། སྤྱིའི་ཤ་ཁུང་ན་གནས་པ་དང་མཐུ་རྩལ་གྱིས་གཟས་ཚོལ་བ་ལ་སོགས་པའི་སྲོག་ཆགས་གང་ཡང་རུང་བའི་ཤ་སྲང་བརྒྱད་དང་ཆུ་བྲེ་སུམ་ཅུ་རྩ་གཉིས་ཞེས་པ་ཆུ་སྲང་སྟོང་ཉི་ཤུ་རྩ་གཉིས་ཀྱི་ནང་དུ་བསྐོལ་

བ་དེའི་ཤ་ཁུ་བརྒྱད་ཆ་ལུས་པའི་ནང་དུ་མར་བྲེ་གང་སྟེ་སྲང་སུམ་ཅུ་རྩ་གཉིས་བཅུག་ལ། འཚོ་བྱེད་བཅུ་པོ་སྟེ་ཛི་བན་ཏི་དང་ར་མཉེ་བ་ལ་སོགས་པ་སྲང་རེའི་ཚད་དུ་བྱས་པ་དང་ལྡེ་གུར་སྦྱར་བ་བཅུག་སྟེ་བསྐོལ་ལ་ཤའི་སྨན་མར་དེ་འབའ་ཞིག་བླུད་པ་དང་། ཤ་ཁུ་དང་སྦྱར་ཏེ་བྱིན་

ན་རླུང་ལ་སོགས་པའི་ནད་འཇོམས་པར་འགྱུར་རོ། །སུག་སྨེལ་ཏི་མུ་ས་འབྲས་གསུམ། །ས་ནག་ཚ་བ་གསུམ་ཙི་ཏྲ། །ས་ར་ནི་མྦ་སེང་ལྡེང་དང་། །སཱ་ལའི་འབྲས་བུ་ལས་བྱུང་དང་། །གོ་བྱེ་དང་ནི་བྱི་དང་ག །སྲང་ནི་བརྒྱད་བརྒྱད་ཚད་དུ་བྱས། །ཆུ་ནི་བཅུ་དྲུག་འགྱུར་

བྱས་པར། །བཅུ་དྲུག་ཆར་གནས་བར་དུ་བསྐོལ། །སླར་ཡང་དེ་དང་མར་བྲེ་གང་། །བསྐོལ་བ་འདིར་ནི་ཅུ་གང་ནི། །སྲང་དྲུག་ཁར་སྲང་སུམ་ཅུ་བཅུག །སྦྲང་རྩི་སྲང་ནི་དྲུག་ཅུ་གཞུག །དྲི་སྣ་གསུམ་ནི་སྲང་རེ་གཞུག །གཟར་བུས་དཀྲུགས་ཏེ་ལྡེ་གུར་བྱས། །

སྔ་དྲོ་ཟོས་ལ་འོ་མ་བཏུང་། །བཅུད་ལེན་བསྡམས་པ་མེད་པ་ཡིན། །ཡིད་གཞུངས་མིག་རྣོ་ཚེ་རིང་ལ། །དྲོད་སྐྱེད་སྐྲན་དང་གཅོང་ཆེན་ནད། །སྐྱ་རྦབ་དང་ནི་མཚན་པར་རྡོལ། །མྱུར་དུ་འཇོམས་པར་བྱེད་པ་ཡིན། །ཞེས་བྱ་བ་ལ། སུག་སྨེལ་ལ་སོགས་པའི་སྨན་

བཅུ་དྲུག་སྲང་རེའི་ཚད་དུ་བྱས་པ་དང་། སྨན་སྤྱིར་བསྡོམས་པའི་བཅུ་དྲུག་འགྱུར་གྱི་ཆུ་དེ་སྲང་ཉིས་བརྒྱ་ལྔ་བཅུ་རྩ་དྲུག་དང་བསྐོལ་ལ་བཅུ་དྲུག་ཆ་ལུས་ཀྱི་བར་དུ་གདུས་ནས་སྨན་ཁུ་དེ་དང་མར་བྲེ་གང་བསྐོལ་ལ་མར་ཚོས་པ་དེར་ཅུ་གང་སྲང་དྲུག་ཁ་ར་སྲང་སུམ་ཅུ་སྦྲང་རྩི་མར་

གྱི་ཉིས་ལྡབ་སྟེ་སྲང་དྲུག་ཅུ་བཅུག་ལ། དྲི་སྣ་གསུམ་ཤིང་ཚ་དང་སུག་སྨེལ་དང་གནྡྷ་བྷ་དྲ་ཞེས་བྱ་བ་སྤྱིར་སྲང་སུམ་ཅུ་བཅུག་ལ། དེའི་འོག་ཏུ་ཆ་མཉམ་པར་འདྲེས་པར་བྱ་བའི་ཕྱིར་གཟར་བུས་དཀྲུགས་ལ་ལྡེ་གུར་བྱས་པ་ལས་ཅི་རན་ཙམ་ཞིག་སྔ་དྲོ་ཟོས་ལ་དེའི་རྗེས་ལ་

Vol. 201 · folio 250a

འོ་མ་བཏུང་བར་བྱ་སྟེ། བཅུད་ཀྱིས་ལེན་དེ་ནི་སྤྱོད་ལམ་བསྲུང་ཞིང་བསྡམས་མི་དགོས་པ་ཡིན་ལ་ཡིད་གཞུངས་པ་དང་དྲོད་སྐྱེད་པའི་བར་དུ་བྱེད་ཅིང་སྐྲན་ལ་སོགས་པའི་ནད་རིང་པོ་མི་ཐོགས་པར་འཇོམས་པར་བྱེད་པ་ཡིན་ནོ། །གང་ཡང་ཞུན་མར་བུ་

རམ་བཅས། །གློ་རྡོལ་ལ་བཤད་ཟད་བྱེད་སྦྱར། །ཞེས་བྱ་བ་ལ། གང་ཞུན་མར་དང་བུ་རམ་དུ་བཅས་པའི་སྨན་གློ་རྡོལ་ཞིང་འགྲམས་པའི་སྐབས་སུ་བཤད་པ་གང་ཡིན་པ་དེ་ཟད་བྱེད་ཅེས་བྱ་བའི་གཅོང་ཆེན་པོའི་ནད་ལ་སྦྱར་ཞིང་གཏང་བར་བྱའོ། །ཤིང་ཚ་སུག་

སྨེལ་པི་པི་ལིང་། །ཅུ་གང་ཁར་རིམ་ཉིས་འགྱུར། །ཕྱེ་མར་བྱས་བཟའ་འམ་སྦྲང་རྩི་དང་། །མར་དང་སྦྱར་ཏེ་ལྡེ་གུར་ཟོས། །སྐད་འགགས་ལུད་པ་དབུགས་མི་བདེ། །ཟད་བྱེད་རྩིབ་ལོགས་བད་ཀན་འཇོམས། །ཞེས་བྱ་བ་ལ། ཤིང་ཚ་ཉིས་འགྱུར་གྱི་སུག་

སྨེལ་སུག་སྨེལ་གྱི་ཉིས་འགྱུར་པི་པི་ལིང་། པི་པི་ལིང་གི་ཉིས་འགྱུར་གྱི་ཅུ་གང་། ཅུ་གང་གི་ཉིས་འགྱུར་གྱི་ཁ་ར་སྟེ་ཤིང་ཚ་ཞོ་གཉིས། སུག་སྨེལ་ཞོ་བཞི། པི་པི་ལིང་ཞོ་བརྒྱད། ཅུ་གང་ཞོ་བཅུ་དྲུག །ཁ་ར་ཞོ་སུམ་ཅུ་རྩ་གཉིས་ཏེ་དེ་དག་ཕྱེ་མར་བྱས་ལ་བཟའ་བའམ།

སྦྲང་རྩི་དང་མར་དང་སྦྱར་ཏེ་ལྡེ་གུར་བྱས་ནས་ཟོས་ན། སྐད་འགགས་པ་དང་ལུད་པའི་ནད་ལ་སོགས་པ་འཇོམས་པར་བྱེད་དོ། །འདི་ཡི་སྐད་འགགས་ལ་ཁྱད་པར། །སྣ་སྨན་དུད་པ་བརྔུབ་སོགས་བྱ། །ཞེས་བྱ་བ་ལ། གཅོང་ཆེན་པོ་གསོ་བའི་སྐབས་སུ་གསོ་བ་

གང་དག་བཤད་པ་དེ་ནད་ཀྱི་ཕྱོགས་གཅིག་པའི་གསོ་བ་ཡིན་དུ་ཟིན་ཀྱང་། སྤྱིར་གསོ་བར་སྦྲེལ་རུང་མོད་ཀྱི་དེ་ལས་ཀྱང་ཁྱད་པར་དུ་གཅོང་ཆེན་པོ་འདིའི་སྐད་འགགས་པ་ལ་དུད་པ་བརྔུབ་པ་ལ་སོགས་པར་སྦྱར་བར་བྱའོ། །དེ་ལའང་རླུང་ལས་གྱུར་པ་ལ། །ཀ་ས་མར་ད་

བར་ད་ཀ །བྲིང་གར་ཛའི་ཁུ་བ་མར། །བསྐོལ་བའམ་ཨར་ད་ག་ལ་བསྐོལ། །དྲོ་འཇམ་ཟོས་རྗེས་ལ་བླུད་ན། །ལུད་པ་ལུ་དང་སྐད་འགགས་སེལ། །ཞེས་བྱ་བ་ལ། གཅོང་ཆེན་པོ་ལས་གྱུར་པའི་སྐད་འགགས་པ་ལ་རླུང་ལས་གྱུར་པ་ལ་ནི་ཀ་ས་མར་ད་ལ་སོགས་པའི་

Vol. 201 · folio 250b

ཁུ་བ་དྲོ་འཇམ་ཙམ་དུ་བྱས་པ་ཟས་ཟོས་པའི་རྗེས་ལ་བླུད་ན་ཡང་ལུད་པ་ལུ་བ་དང་སྐད་འགགས་པ་སེལ་བར་འགྱུར་རོ། །ཡང་ན་ཨར་ད་ག་ལ་ཞེས་བྱ་བ་མིང་གི་རྣམ་གྲངས་རུ་ཙ་ཀ་ར་ཞེས་བྱ་བ་དང་བསྐོལ་བའི་མར་བླུད་ན་ཡང་ལུད་པ་ལུ་བ་དང་སྐད་འགགས་པ་སེལ་བར་འགྱུར་རོ། །

རྒྱ་ཤུག་ལོ་མའི་ལྡེ་གུ་ནི། །མར་བརྔོས་རྒྱམ་ཚར་བཅས་པའམ། །ཞེས་བྱ་བ་ལ། ཡང་ན་རྒྱ་ཤུག་གི་ལོ་མ་ལྡེ་གུར་བྱས་པ་རྒྱམ་ཚ་དང་སྦྱར་བ་དེ་ཟས་ཟོས་པའི་རྗེས་ལ་སྦྱར་བར་བྱའོ། །ཤིང་མངར་དང་ནི་པི་པི་ལིང་། །བྱི་དང་ག་དང་རྒུན་འབྲུ་དང་། །ཧན་ས་པརྞིའི་རྩ་བ་རྣམས། །

ཏིལ་མར་བསྐོལ་བ་སྣར་བླུགས་བྱ། །ཞེས་བྱ་བ་ལ། ཤིང་མངར་ལ་སོགས་པའི་སྨན་ལྡེ་གུར་བཏགས་པ་ཏིལ་བསྐོལ་ཏེ་བཙགས་པ་སྣར་བླུགས་པར་བྱའོ། །འབྲས་ཆན་མར་དང་བུ་རམ་བཅས། །ཟོས་ལ་དེ་རྗེས་ཆུ་ཚན་བཏུང་། །འོ་ཐུག་སྣུམ་ཅན་བླུད་པ་དང་། །སྣུམ་གྱི་དུགས་ཀྱི་

ཆོ་ག་བྱ། །ཞེས་བྱ་བ་ལ། བུ་རམ་དང་ཆང་དང་བཅས་པའི་འབྲས་ཆན་ཟོས་ལ། དེའི་རྗེས་ལ་ཆུ་བསྐོལ་བ་དྲོ་འཇམ་ཙམ་བཏུང་བར་བྱའོ། །དེ་བཞིན་དུ་འོ་ཐུག་ལ་མར་བཏབ་པ་ཡང་བླུད་པར་བྱ་བ་དང་། དེ་སྣུམ་གྱི་དུགས་དག་ཀྱང་རླུང་ལས་གྱུར་པའི་སྐད་འགགས་པ་ལ་སྦྱར་བར་བྱའོ། །མཁྲིས་

པ་ལས་གྱུར་འོ་མའི་ཤིང་། །ལྡེ་གུ་བསྐོལ་བའི་ཞུན་མར་ནི། །སྦྲང་རྩིར་བཅས་ཏེ་དེ་རྗེས་ནི། །འོ་མ་བསྐོལ་ཏེ་བསྒྲངས་པ་བླུད། །ཅེས་བྱ་བ་ལ། མཁྲིས་པ་ལས་གྱུར་པའི་སྐད་འགགས་པ་ལ་ནི་འོ་མ་ཅན་གྱི་ལྡེ་གུ་དང་བསྐོལ་བའི་ཞུན་མར་སྦྲང་རྩི་དང་བཅས་པ་བླུད་ལ། དེའི་རྗེས་ལ་འོ་

མ་བསྐོལ་ཏེ་བསྒྲངས་པ་བླུད་པར་བྱའོ། །ཤིང་མངར་མ་དུ་ཀ་འོ་ཐུག །ཞུན་མར་བཅས་པ་བླུད་པའམ། །ཞེས་བྱ་བ་ལ། ཡང་མཁྲིས་པ་ལས་གྱུར་པའི་སྐད་འགགས་པ་ལ་ཤིང་མངར་དང་མ་དུ་ཀའི་ཁུ་བ་དང་བཅས་པར་བསྐོལ་བའོ་ཐུག་ལ་ཞུན་མར་བཏབ་པ་བྱིན་ན་ཡང་ཕན་ནོ། །

བ་ལ་དྲི་བཟང་བི་ད་རི། །ཤིང་མངར་ཀྵྀ་ཏ་བི་ད་རི། །རྒྱམ་ཚར་བཅས་པ་བསྐོལ་བའི་མར། །སྐད་འགགས་སྣ་སྨན་བླ་མེད་ཡིན། །ཞེས་བྱ་བ་ལ། ཡང་མཁྲིས་པ་ལས་གྱུར་བའི་སྐད་འགགས་པ་ལ་བ་ལ་ལ་སོགས་པའི་བི་ད་རི་རྣམ་པ་གཉིས་དང་། ཤིང་མངར་སྨན་གྱི་ཁུ་བ་དང་། །

Vol. 201 · folio 251a

རྒྱམ་ཚ་དང་བཅས་པར་བསྐོལ་བའི་མར་སྣ་ནས་བཏང་བ་ནི་སྣ་སྨན་བླ་ན་མེད་པ་ཡིན་ནོ། །པྲ་པུཎྜ་རཱི་ཀ་ཤིང་མངར། །པི་པི་ལིང་དང་བྲི་ཧ་ཏི། །བ་ལ་འོ་མ་མར་བསྐོལ་ཏེ། །སྐད་འགགས་པ་ཡི་སྣ་སྨན་མཆོག །ཅེས་བྱ་བ་ལ། པྲ་པུཎྜ་རཱི་ཀ་ཞེས་བྱ་བ་སྟག་ཚེར་བའི་སྨན་

དང་འོ་མ་དང་མར་སར་པ་བསྐོལ་བའི་སྣ་སྨན་དེ་ཡང་སྐད་འགགས་པ་སེལ་བའི་མཆོག་ཡིན་ནོ། །མངར་བའི་སྡེ་ཚན་ཕྱེ་མ་ནི། །སྦྲང་རྩི་མར་སྦྱར་ལྡེ་གུ་སྦྱིན། །ཞེས་བྱ་བ་ལ། ཛི་བ་ནི་ལ་སོགས་པ་མངར་བའི་སྡེ་ཚན་གྱི་ཕྱེ་མ་སྦྲང་རྩི་དང་སྦྱར་བའི་ལྡེ་གུ་བྱིན་ན་ཡང་མཁྲིས་པ་ལས་གྱུར་པའི་

སྐད་འགགས་པ་སེལ་ཏོ། །བད་ཀན་ལས་གྱུར་ཚ་བ་དང་། །ཟས་རྩུབ་བ་གཅིན་བླུད་པར་བྱ། །ཞེས་བྱ་བ་ལ། བད་ཀན་ལས་གྱུར་པའི་སྐད་འགགས་པ་ལ་ནི་ན་ལེ་ཤམ་ལ་སོགས་པའི་ཚ་བ་དང་ཟས་རྩུབ་པ་བསྟེན་ཅིང་བ་གཅིན་དང་བཅས་པར་བླུད་པར་བྱའོ། །ཀད་ཕ་ལ་དང་

སྐྱུ་རུ་ར། །ཚ་གསུམ་ཏིལ་མར་སྦྲང་རྩིར་སྦྱར། །ཞེས་བྱ་བ་ལ། བད་ཀན་ལས་གྱུར་པའི་སྐད་འགགས་པ་ལ་ནི་ཀད་ཕ་ལ་ལ་སོགས་པའི་སྨན་ཏིལ་མར་དང་སྦྲང་རྩིར་སྦྱར་བ་སྦྱིན་པར་བྱའོ། །ཡ་བཀྵ་ར་ཚ་བ་གསུམ། །ཀྲུ་ཏྲུག་ཏྲེས་དང་དབྱི་མོ་དང་། །ཨ་རུ་ར་དང་སྦྲང་རྩིར་སྦྱར། །

ཞེས་བྱ་བ་ལ། ཡང་བད་ཀན་ལས་གྱུར་པའི་སྐད་འགགས་པ་ལ་ཡ་བཀྵ་ར་ལ་སོགས་པའི་སྨན་སྦྲང་རྩི་དང་སྦྱར་བ་སྦྱིན་པར་བྱའོ། །ནས་ཐུག་ཏིལ་མར་ཞུན་མར་དང་། །པི་པི་ལིང་དང་སྐྱུ་རུ་ར་སྦྱར། །ཞེས་བྱ་བ་ལ། ཡང་ནད་དེ་ལ་ནས་ཐུག་པི་པི་ལིང་དང་སྐྱུ་རུ་ར་སྦྱར་ཏེ་གཡོས་པའི་

ཏིལ་མར་དང་། ཞུན་མར་བཏབ་པ་སྦྱིན་པར་བྱའོ། །བཅའ་སྒ་དང་ནི་པི་པི་ལིང་། །བཟའ་བའམ་སྐྱུག་སྨན་རྣོན་པོ་བསྟེན། །ཞེས་བྱ་བ་ལ། ནད་དེ་ལ་བཅའ་སྒ་དང་པི་པི་ལིང་བཟའ་བ་དང་། དེའི་རྗེས་ལ་ཟས་གཞན་བཟའ་བའམ། སྐྱུག་སྨན་རྣོན་པོ་གཏང་བར་བྱའོ། །ཤ་ཁ་ར་

དང་སྦྲང་རྩིར་བསྲེས། །མངར་བའི་སྨན་དང་ལྷན་ཅིག་བསྐོལ། །འོ་མ་འཐུངས་པས་སྐད་གསང་ནི། །ཆེན་པོར་སྨྲས་པའི་འགགས་ནད་སེལ། །ཞེས་བྱ་བ་ལ། མི་གང་སྐད་གསང་ཆེན་པོར་སྨྲས་པའི་དབང་གིས་སྐད་འགགས་པར་གྱུར་པ་དེ་ལ་ནི་མངར་བའི་སྨན་སྡེ་དང་བསྐོལ་

Vol. 201 · folio 251b

བའི་འོ་མ་ཁ་ར་དང་སྦྲང་རྩི་བཏབ་སྟེ་བླུད་ན་སེལ་བར་བྱེད་དོ། །ཡི་ག་འཆུས་ལ་སྣ་ཚོགས་ཟས། །ཕན་པའི་སྨན་དང་སྦྱར་བ་སྦྱིན། །ཞེས་བྱ་བ་ལ། ཡི་ག་འཆུས་པའི་ནད་ལ་ཕན་ཞིང་ཡང་བའི་ཟས་སྣ་ཚོགས་སྦྱིན་ཞིང་དེ་ཡང་དེ་ལ་ཕན་པའི་སྨན་དང་སྦྱར་ཏེ་སྦྱིན་པར་བྱའོ། །ཕྱི་དང་

ནང་ནི་སྦྱང་བ་དང་། །སེམས་དགའ་ཡིད་དང་མཐུན་སྨན་སྦྱིན། །ཞེས་བྱ་བ་ལ། ཡང་ཡི་ག་འཆུས་པའི་ནད་ལ་ནི་སྦྱང་བ་ཁྲུས་ལ་སོགས་པ་བྱ་བ་དང་། ནང་གི་སྦྱང་བ་བཀྲུ་སྨན་དང་སྐྱུག་སྨན་བཏང་བ་ཕན་པ་དེ་བཞིན་དུ་སེམས་དགའ་ཞིང་ཡིད་དང་མཐུན་པ་སྨན་དབང་པོ་ཚིམ་པར་བྱེད་

པ་སྦྱིན་པར་བྱའོ། །དུས་གཉིས་སུ་ནི་སོ་ཤིང་དག །བཅའ་ཞིང་ཁ་ནི་སྦྱང་བྱ་ཞིང་། །བསྐ་བས་ཁ་ནི་བཀྲུ་བ་དང་། །རྗེས་སུ་མཐུན་པའི་དུད་པ་བརྔུབ། །ཅེས་བྱ་བ་ལ། དུས་གཉིས་སུ་ཞེས་པ་ནང་པར་དང་ཟོས་པའི་རྗེས་ལ་སོ་ཤིང་བཅའ་བར་བྱ་བ་ལ། ཇི་ལྟར་བཅའ་བའི་ཚུལ་ནི་ཁ་

བསྐ་བའི་ཁ་ནད་སྦྱངས་པའི་སྐབས་ནས་བཤད་དོ། །དེ་བཞིན་དུ་རྗེས་སུ་མཐུན་པའི་དུད་པ་ཡང་བརྔུབ་པར་བྱའོ། །ད་ལིས་ཀྱི་ནི་རི་ལུ་དང་། །ཁ་ར་ག་བུར་བཅས་པ་སྦྱིན། །འབྲས་ཁུ་ཟླ་བའི་ཟེར་ལྟར་དཀར། །བཟའ་བ་ཡི་ག་འབྱེད་པའི་མཆོག །ཅེས་བྱ་བ་ལ། ད་ལིས་ཀྱི་ཕྱེ་མར་བཤད་པ་

གང་དག་ཡིན་པ་དང་། རི་ལུའི་སྦྱོར་བ་བྱས་པ་དེ་ཡང་མཆོག་ཏུ་ཡི་ག་འབྱེད་པ་ཡིན་ནོ། །དེ་བཞིན་དུ་འབྲས་བཏགས་པ་སྤྲུས་པ་མར་ལ་བཙོས་པའི་ཁུ་བ་ཟླ་བའི་འོད་ཟེར་ལྟར་དཀར་བ་བཟའ་བ་ཡང་ཡི་ག་འབྱེད་པའི་མཆོག་དམ་པ་ཡིན་ནོ། །དེ་ལས་རླུང་གྱུར་ཡི་ག་འཆུས། །ཧ་རེ་ཎུ་

དང་པི་པི་ལིང་། །བྱི་དང་ག་དང་ར་སྣ་དང་། །རྒྱམ་ཚ་དང་ནི་དོང་གྲ་དང་། །སུག་སྨེལ་ག་བྲའི་རྩ་བ་དང་། །ནས་ཚིག་འཁུས་པའི་ཐལ་བ་དང་། །ཤིང་ཀུན་བཅས་པ་མར་རམ་ནི། །ཆང་གི་དྭངས་མར་སྦྱར་ཏེ་བཏུང་། །ཞེས་བྱ་བ་ལ། ཡི་ག་འཆུས་པ་དེ་རྣམས་ཀྱི་ནང་ནས་རླུང་ལས་

གྱུར་པའི་ཡི་ག་འཆུས་པ་ལ་ནི་ཧ་རེ་ཎུ་ལ་སོགས་པའི་སྨན་གྱི་ཕྱེ་མ་མར་དང་སྦྱར་བའམ། ཆང་གི་དྭངས་མ་དང་སྦྱར་ཏེ་བཏུང་བར་བྱའོ། །ཤུ་དག་ཆུས་ནི་སློན་དུ་གཞུག །ཅེས་བྱ་བ་ལ། ཡང་ན་རླུང་ལས་གྱུར་པའི་ཡི་ག་འཆུས་པ་ལ་ནི་ཤུ་དག་གི་ཆུ་བླུད་ལ་སློན་དུ་གཞུག་

Vol. 201 · folio 252a

གོ། །མཁྲིས་གྱུར་བུ་རམ་ཆུས་སློན་གཞུག །ཅེས་བྱ་བ་ལ། མཁྲིས་པ་ལས་གྱུར་པའི་ཡི་ག་འཆུས་པ་ལ་ནི་བུ་རམ་དང་སྦྱར་བའི་ཆུ་བླུད་ལ་སློན་དུ་གཞུག་གོ། །ཁ་ར་དང་ནི་ཞུན་མར་དང་། །རྒྱམ་ཚ་སྦྲང་རྩིར་བཅས་པ་སྦྱིན། །ཞེས་བྱ་བ་ལ། མཁྲིས་

པ་ལས་གྱུར་པའི་ཡི་ག་འཆུས་པ་ལ་ནི་ཁ་ར་དང་མར་དུ་བཅས་པའམ། རྒྱམ་ཚ་དང་སྦྲང་རྩིར་བཅས་པ་བླུད་པར་བྱའོ། །བད་ཀན་ནིམ་པའི་ཆུས་སློན་གཞུག །ཅེས་བྱ་བ་ལ། བད་ཀན་ལས་གྱུར་པའི་ཡི་ག་འཆུས་པ་ལ་ནི་ནིམ་པ་བསྐོལ་བའི་ཆུ་བླུད་ལ་སློན་དུ་གཞུག་གོ། །ལ་ལ་ཕུད་

དང་དོང་གྲའི་ཆུ། །སྦྲང་རྩིའམ་ཆང་རྙིང་རྣོ་སྦྱར་བ། །བུ་རམ་སྦྲང་རྩི་ཆང་བཅས་བླུད། །ཅེས་བྱ་བ་ལ། བད་ཀན་ལས་གྱུར་པའི་ཡི་ག་འཆུས་པ་ལ་ནི་ལ་ལ་ཕུད་ཅེས་བྱ་བ་ཏི་མུ་ས་དང་དོང་གྲའི་ཆུ་སྦྲང་རྩི་དང་སྦྱར་བའམ། ཡང་ན་ཆང་རྙིང་པ་རྣོན་པོ་དང་སྨན་རྣོན་པོ་བསྐོལ་བ་བུ་རམ་དང་སྦྲང་རྩི་

དང་སྦྱར་བ་བླུད་པར་བྱའོ། །ཧ་རེ་ཎུ་སོགས་ཕྱེ་མ་ནི། །སྔར་བཤད་ཆུ་ཚན་སྦྱར་བ་བླུད། །ཅེས་བྱ་བ་ལ། ཡང་ན་སྔར་བཤད་པའི་ཕྱེ་མ་ཧ་རེ་ཎུ་དང་པི་པི་ལིང་དང་བྱི་དང་ག་ལ་སོགས་པ་དེ་ཆུ་དྲོན་དང་སྦྱར་ཏེ་བླུད་པར་བྱའོ། །སུག་སྨེལ་དང་ནི་ཤིང་ཚ་དང་། །ནཱ་ག་པུཥྤ་ན་ལེ་ཤམ། །པི་པི་ལིང་དང་

བཅའ་སྒ་རྣམས། །རིམ་བཞིན་ཆ་རེས་བསྐྱེད་ཕྱེ་མ། །ཁ་ར་དག་དང་མཉམ་སྦྱར་བས། །མཆིལ་མང་ཡི་ག་འཆུས་པ་དང་། །སྙིང་དང་རྩིབ་ལོགས་ན་ལུད་པ། །དབུགས་མི་བདེ་དང་མགུལ་ནད་འཇོམས། །ཞེས་བྱ་བ་ལ། སུག་སྨེལ་ལ་སོགས་པའི་ཕྱེ་མ་གོ་རིམས་བཞིན་དུ་ཆ་

རེས་བསྐྱེད་པའི་ཕྱེ་མ་དང་ཁ་ར་མཉམ་པོར་སྦྱར་བའི་ཕྱེ་མས་ནི་མཆིལ་མ་མང་བ་ལ་སོགས་པ་འཇོམས་པར་བྱེད་དོ། །ཆ་རེས་བསྐྱེད་པའི་ཚུལ་ནི་སུག་སྨེལ་ཞོ་གཅིག །ཤིང་ཚ་ཞོ་གཉིས། ནཱ་ག་གེ་སར་ཞོ་གསུམ། ན་ལེ་ཤམ་ཞོ་བཞི། པི་པི་ལིང་ཞོ་ལྔ། བཅའ་སྒ་ཞོ་

དྲུག་སྟེ། དེ་སྤྱིར་བསྡོམས་པའི་ཕྱེ་མ་དང་ཁ་ར་མཉམ་པོར་སྦྱར་བར་བྱའོ། །ལ་ལ་ཕུད་དང་ད་ཏྲིག་དང་། །སྟར་བུ་བཅའ་སྒ་སེའུ་འབྲུ་དང་། །རྒྱ་ཤུག་ཞོ་ནི་གཉིས་གཉིས་བྱས། །ཁ་ར་སྲང་བཞི་འུ་སུ་དང་། །གོ་སྙོད་ཤིང་ཚ་ཁ་རུ་ཚ། །ཞོ་རེ་པི་པི་ལིང་འབྲུ་བརྒྱ། །

Vol. 201 · folio 252b

ན་ལེ་ཤམ་ནི་ཉིས་བརྒྱ་དག །ཕྱེར་བཏགས་ཡི་ག་འབྱེད་པའི་མཆོག །ཡིད་འོང་ཕྱི་ས་འགགས་པ་དང་། །ལུད་པ་སྙིང་ག་རྩིབ་ལོགས་ན། །མཆེར་པ་གཞང་འབྲུམ་ཕོ་ནད་སེལ། །ཞེས་བྱ་བ་ལ། ལ་ལ་ཕུད་ལ་སོགས་པའི་སྨན་སྣ་རེ་རེ་ཞོ་གཉིས་གཉིས་བྱས་ལ་ཁར་སྲང་བཞི་དང་།

འུ་སུ་ལ་སོགས་པའི་སྨན་སྣ་བཞི་པོ་སྣ་རེ་ཞིང་ཞོ་རེ། པི་པི་ལིང་འབྲུམ་བུ་བརྒྱ། ན་ལེ་ཤམ་ཉིས་བརྒྱ། དེ་ཐམས་ཅད་ཕྱེ་མར་བཏགས་པ་དེ་ནི་ཡི་ག་འབྱེད་པའི་མཆོག་ཡིན་ཞིང་ཕྱི་ས་འགགས་པ་ལ་སོགས་པ་བསལ་བར་བྱེད་པའི་མཆོག་ཡིན་ནོ། །བལ་བུའི་ལོ་མ་ན་ལེ་ཤམ། །

དོང་གྲ་དང་ནི་པི་པི་ལིང་། །གོ་རིམས་བཞིན་དུ་ཆ་རེས་བསྐྱེད། །ཤིང་ཚ་སུག་སྨེལ་དང་པོའི་ཕྱེད། །པི་པི་ལིང་གི་བརྒྱད་འགྱུར་གྱི། །ཁ་རར་སྦྱར་བའི་ཕྱེ་མ་དེ། །དྲོད་སྐྱེད་ཡི་ག་འབྱེད་པ་དང་། །ལུད་པ་ལུ་དང་དབུགས་མི་བདེ། །ཡི་ག་འཆུས་དང་སློན་བྲོ་དང་། །མཆེར་པ་སྙིང་ནད་

རྩིབ་ལོགས་ཟུག །སྐྱ་རྦབ་ཚད་འཁྲུ་རིམས་ནད་འཇོམས། །རླུང་འཁྱིལ་པ་ནི་བདེ་རྒྱུ་བྱེད། །ཅེས་བྱ་བ་ལ། བལ་བུའི་ལོ་མ་ལ་སོགས་པའི་རིམ་པ་བཞིན་དུ་ཆ་རེས་བསྐྱེད་དེ་དེས་ན་བལ་བུའི་ལོ་མ་ཞོ་གཅིག །ན་ལེ་ཤམ་ཞོ་གཉིས། དོང་གྲ་ཞོ་གསུམ། པི་པི་ལིང་ཞོ་བཞི། ཤིང་ཚ་

སུག་སྨེལ་དང་པོ་ཞེས་བྱ་བ་བལ་བུའི་ཕྱེད་དེ། དེས་ན་ཤིང་ཚ་ཞོ་ཕྱེད། ཁ་ར་པི་པི་ལིང་བརྒྱད་འགྱུར་དུ་བྱས་པ་སྟེ་སྲང་བཞི་ཕྱེ་མར་བྱས་པ་དེ་ནི་ཕོ་བའི་མེ་དྲོད་སྐྱེད་པ་དང་ཡི་ག་འབྱེད་ཅིང་ཟས་ལེན་པར་བྱེད་པ་དང་། ལུད་པ་ལ་སོགས་པའི་ནད་འཇོམས་པར་བྱེད་པ་དང་། རླུང་འཁྱིལ་ཞིང་

ལམ་ལོག་པར་འགྲོ་བ་ལུགས་བཞིན་དུ་རྒྱུ་བར་བྱེད་པ་ཡིན་ནོ། །སུག་སྨེལ་ཤིང་ཚ་པུ་ཤེལ་ཙེ། །ཞོ་ནི་གཉིས་གཉིས་བྱས་པ་དང་། །ནཱ་ག་གེ་སར་སྲང་ཕྱེད་དང་། །གན་དྷ་བྷ་དྲ་སྲང་ཕྱེད་གཞུག །ཕྱེར་བཏགས་བུ་རམ་རྙིང་པ་ནི། །སྲང་ནི་ཉི་ཤུ་ལྔ་ནང་བསྐོལ། །སྦྲུས་ཏེ་ཞོ་གཉིས་

ཚད་རི་ལུར། །བྱས་པའི་ཡོན་ཏན་དེ་དག་མཉམ། །ཞེས་བྱ་བ་ལ། སུག་སྨེལ་ལ་སོགས་པ་ཇི་སྐད་དུ་བཤད་པ་བཞིན་དུ་སྦྱར་ཏེ། ཕྱེ་མར་བཏགས་པ་བུ་རམ་རྙིང་པ་སྲང་ཉི་ཤུ་རྩ་ལྔའི་ནང་དུ་བསྐོལ་ལ་སྦྲུས་ཏེ་ཞོ་གཉིས་ཀྱི་ཚད་བ་རུ་རའི་རྡོག་མ་ཙམ་གྱི་རི་ལུར་བྱས་པ་ལས་རེ་རེ་

Vol. 201 · folio 253a

ཟོས་ན་ཡང་ད་ལིས་ཀྱི་ཕྱེ་མ་དང་མཉམ་པའོ། །ཨརྐ་སླེ་ཏྲེས་ཀྵ་རའི་ཆུར། །ནས་དང་ནུབ་གཅིག་སྤངས་ནས་ནི། །ཆུ་དང་ཟན་ནི་སྦྲུས་ནས་སུ། །བྱིན་ཏེ་ཉམས་སྟོབས་ལྡན་སློན་གཞུག །དེ་བཞིན་སྐམ་སའི་སྲོག་ཆགས་ཤ །བསྲེགས་པ་ཚ་དང་ཁ་སྦྱར་སྦྱིན། །

ཟས་ནི་སྐམ་ཞིང་རབ་ཡང་དང་། །ཙ་ན་ཀ་སོགས་ཁུ་བ་བླུད། །ཅེས་བྱ་བ་ལ། བད་ཀན་ལས་གྱུར་པའི་མཆིལ་སྣབས་མང་བའི་ནད་ལ་ཤིང་ཨརྐ་དང་། སླེ་ཏྲེས། ཡ་བཀྵ་རའི་ཆུར་བཅུག་ལ། ནས་དང་ནུབ་གཅིག་སྦངས་ནས་ཆུ་དང་ཟན་དུ་སྦྲུས་ཏེ་ཉམས་སྟོབས་དང་ལྡན་པའི་

མི་ལ་སློན་དུ་གཞུག་གོ། །ཡང་དེ་བཞིན་དུ་དེ་ལ་སྐམ་སའི་སྲོག་ཆགས་ཀྱི་ཤ་ཐུར་མ་ལ་བསྐྱོན་ཏེ་བསྲེགས་ནས་སྨན་ཚ་བ་དང་ཁ་བར་སྦྱར་ཏེ་སྦྱིན་ལ་ཡང་ཟས་ཀྱི་རྣམ་པ་སྐམ་བག་དང་། རབ་ཏུ་ཡང་བ་བྱིན་ལ་ཙ་ན་ཀའི་ཁུ་བ་བླུད་པར་བྱའོ། །བད་ཀན་གྱིས་རབ་མཆིལ་མ་མང་། །

རླུང་གིས་མཆིལ་མང་སྐྱེད་པར་བྱེད། །དེ་ནི་བད་ཀན་མཆིལ་མར་བཤད། །སྣུམ་དང་དྲོ་བས་དེ་བསལ་བྱ། །ཞེས་བྱ་བ་ལ། བད་ཀན་ལས་གྱུར་པའི་མཆིལ་མ་མང་པོ་ཡང་དང་ཡང་དུ་འབྱུང་བ་ན་རླུང་འཕེལ་བས་བད་ཀན་གྱི་མཆིལ་མའི་ལྗན་ལྗིན་སྐྱེད་ཅིང་འབྱིན་པར་བྱེད་ལ། འདི་ནི་

བད་ཀན་ལས་གྱུར་པའི་མཆིལ་མ་མང་བ་ཡིན་པར་བཤད་པས། དེ་ལ་སྨན་པས་སྣུམ་དྲོ་བའི་སྨན་དང་ཟས་བཏང་བས་དེ་བསལ་བར་བྱའོ། །རིམས་འདི་ཆམ་པ་དག་དང་ནི། །སློན་པའི་ནད་ལའང་སྦྱར་བར་བྱ། །ཞེས་བྱ་བ་ལ། བད་ཀན་གྱིས་མཆིལ་མ་མང་བའི་གསོ་བའི་རིམ་

པ་དེ་ནི་ཆམ་པ་ཞེས་བྱ་བ་སྣ་ཆུ་འཛག་པའི་ནད་དང་། སློན་ཞིང་སྐྱུག་པའི་ནད་ལ་ཡང་སྦྱར་བར་བྱའོ། །མཆོག་ཏུ་ཆམ་པར་བསྐུ་བ་དང་། །སྣུམ་དང་དུགས་ཀྱི་ཆོ་ག་བྱ། །མགོ་དང་ལྐོག་མ་རྩིབ་ལོགས་སུ། །འབྲས་ཁུར་སྣུམ་བཅས་དུགས་བྱ་ཞིང་། །ལན་ཚྭ་སྐྱུར་དང་ཁ་དང་ཚ། །ཤ་

ཁུ་སྣུམ་དང་བཅས་པ་སྦྱིན། །ཞེས་བྱ་བ་ལ། མཆོག་གམ་ཁྱད་པར་དུ་ཆམ་པའི་ནད་ལ་ནི་ལུས་བསྐུ་བ་དང་། སྣུམ་བསྟེན་པ་དང་། དེ་བཞིན་དུ་མགོ་བོ་དང་། ལྐོག་མ་ལ་སོགས་པར་འབྲས་ཁུར་བཙགས་པ་སྣུམ་ཅན་གྱིས་དུགས་བྱ་བ་དང་། ཤ་ཁུ་སྣུམ་དང་སྦྱར་བ་བླུད་པ་དང་།

Vol. 201 · folio 253b

རོ་ལན་ཚྭ་དང་། སྐྱུར་བ་དང་། ཁ་བ་དང་། ཚ་བ་བསྟེན་ཅིང་སྦྱིན་པར་བྱ་བའོ། །མགོ་དང་སྙིང་ག་རྩིབ་ལོགས་གཟེར། །ནད་གཞི་ཇི་བཞིན་གསོ་བར་བྱ། །ཞེས་བྱ་བ་ལ། མགོ་བོ་ལ་སོགས་པའི་ནད་ལ་ནད་དམིགས་ཇི་ལྟ་བ་ལས་དེའི་གསོ་བའི་དཔྱད་བྱའོ། །ཆུ་དང་རླན་ཅན་གནས་

པའི་ཤ། །ལེགས་སྦྱར་དཀྲི་བའི་དུགས་བྱ་ཞིང་། །དེར་ནི་སྣུམ་བཞིའི་སྦྱོར་བ་བསྔགས། །ཞེས་བྱ་བ་ལ། ཆུ་དང་རླན་ཅན་ན་གནས་པའི་སྲོག་ཆགས་ཀྱི་ཤས་དཀྲི་བའི་དུགས་ཀྱི་རྣམ་པ་བྱ་ལ། དེ་ཡང་ལེགས་པར་སྦྱར་ཞིང་ལན་ཚྭ་དང་ཤིང་ཀུན་ལ་སོགས་པའི་སྨན་སྦྱར་བས་དུགས་

བྱའོ། །ཡང་ཆམ་པའི་ནད་དེ་ལ་སྣུམ་གྱི་ཆོ་གར་བཤད་པ་དག་གིས་དུགས་བྱ་ཞིང་བསྐུ་བ་ཡང་བསྔགས་པ་ཡིན་ནོ། །ནད་གཞི་འདྲེས་པར་གྱུར་པ་ལ། །རྒྱ་སྤོས་ཤུ་ཏི་ཤིང་མངར་དང་། །ཙནྡན་མར་གྱི་ལྡེ་གུས་བྱུག །ཅེས་བྱ་བ་ལ། ནད་གཞི་འདྲེས་པ་སྟེ་མཁྲིས་པ་དང་བད་

ཀན་འདྲེས་པར་གྱུར་པ་ལ། རྒྱ་སྤོས་ལ་སོགས་པའི་སྨན་སྦྱར་བའི་སྣུམ་གྱིས་བྱུགས་པ་ཕན་ནོ། །བ་ལ་ར་སྣ་ཏིལ་མར་དང་། །ཤིང་མངར་ཨུཏྤལ་མར་དེ་བཞིན། །ཞེས་བྱ་བ་ལ། དེ་བཞིན་དུ་ནད་གཞི་འདྲེས་པར་གྱུར་པ་དེ་ལ་བ་ལ་ལ་སོགས་པའི་སྨན་དང་སྦྱར་བའི་མར་

གྱིས་བསྐུ་བ་དེ་དེ་བཞིན་དུ་བསྔགས་པ་ཡིན་ནོ། །བ་སྤྲུ་བ་དང་ཤི་ཀྲུ་དང་། །བ་ལ་ར་མཉེ་བི་ད་རི། །ཞེས་བྱ་བ་ལ། ནད་གཞི་འདྲེས་པ་ལ་བ་སྤྲུ་བ་དང་། ཤི་ཀྲུ་ཞེས་བྱ་བ་སོ་བན་ཛི་དང་བ་ལ་དང་། ར་མཉེ་བ་དང་། བི་ད་རིའི་ལྡེ་གུ་སྣུམ་དང་སྦྱར་བའི་བསྐུ་བ་ཡང་བསྔགས་པ་

ཡིན་ནོ། །སྣ་སྨན་དུད་པ་བརྔུབ་པ་དང་། །ཟས་ཟོས་འོག་ཏུ་སྣུམ་བསྟེན་ཅིང་། །ཏིལ་མར་གྱིས་ནི་བསྐུ་བ་དང་། །དེ་བཞིན་འཇམ་རྩིའི་ལས་རབ་བསྔགས། །ཞེས་བྱ་བ་ལ། དེ་བཞིན་དུ་མགོ་དང་རྩིབ་ལོགས་དང་ཕྲག་པར་ན་ཞིང་ཟུག་པ་ལ་ནི་རྩིབ་ལོགས་དང་སྣ་ནས་

བཏང་བ་དང་དུད་པ་བརྔུབ་པ་དང་། ཟས་ཟོས་པའི་འོག་ཏུ་སྣུམ་བསྟེན་ཅིང་བཟའ་བ་དང་། བ་ལའི་ཏིལ་མར་ལ་སོགས་པའི་ཏིལ་མར་གྱིས་བསྐུ་བ་དང་། དེ་བཞིན་དུ་འཇམ་རྩི་མས་གཏོང་བའི་ལས་བྱ་བ་ནི་མཆོག་ཏུ་བསྔགས་པ་ཡིན་ནོ། །ཡང་ན་རྔབས་རྭ་ལ་སོགས་

Vol. 201 · folio 254a

པས། །ནད་དམིགས་ཇི་བཞིན་ནད་ཁྲག་དབྱུང་། །ཞེས་བྱ་བ་ལ། དེ་བཞིན་དུ་མགོ་དང་རྩིབ་ལོགས་གཟེར་ཞིང་ནད་གཞི་འདྲེས་པ་དང་ལྡན་པ་དེ་ལ་རྔབས་རྭ་དང་། སྲིན་བུ་པད་པ་དང་། བསྐུ་བ་ལ་ཞལ་ཞལ་གདབ་པ་ལ་སོགས་པ་ནད་དམིགས་ཇི་སྐད་

བསྟན་པ་བཞིན་དུ་ཁྲག་དབྱུང་བར་བྱ་སྟེ། རླུང་ལས་གྱུར་པའི་ནད་ཁྲག་དབྱུང་བར་བྱ། །མཁྲིས་པ་ལས་གྱུར་པའི་སྲིན་བུ་པད་པས། བད་ཀན་ལས་གྱུར་པའི་བསྐུ་བས་དབྱུང་བར་བྱའོ། །ཤུག་པ་ཙནྡན་པུ་ཤེལ་ཙི། །མར་བཅས་སྡེ་གུས་བསྐུ་བ་འམ། །ཞེས་བྱ་བ་ལ།

ཡང་ན་ཁྲག་ཅན་ལ་ནི་ཤུག་པ་ལ་སོགས་པའི་ལྡེ་གུ་མར་དང་སྦྱར་བ་བསྐུས་པས་ཕན་ནོ། །དྲུར་བ་ཤིང་མངར་བཙོད་དང་ནི། །ནཱ་ག་གེ་སར་མར་སྦྱར་བསྐུ། །ཞེས་བྱ་བ་ལ། ཡང་ན་དྲུར་བ་ལ་སོགས་པའི་སྨན་གྱི་ལྡེ་གུ་མར་དང་སྦྱར་བ་བསྐུས་ན་ཡང་ཕན་ནོ། །ནྱ་གྲོ་དྷ་སོགས་

བསྐོལ་ཏིལ་མར། །ལན་བརྒྱ་བཀྲུས་པའི་མར་གྱིས་ནི། །བསྐུ་བའམ་འོ་མ་ཤིང་མངར་ཆུས། །བླུགས་པར་གྱུར་པ་འང་བསྔགས་པ་ཡིན། །ཡང་ན་ཁྲག་དེ་ཉིད་ནྱ་གྲོ་དྷ་ལ་སོགས་པ་སྟེ། ནྱ་གྲོ་དྷའི་སྡེ་ཚན་ལས་བཤད་པའི་སྨན་དང་བསྐོལ་བའི་ཏིལ་མར་གྱིས་བསྐུས་ན་ཡང་

ཕན་ནོ། །ཡང་ན་ཆུ་གྲང་མོའི་ནང་དུ་ལན་མང་དུ་བཀྲུས་ཤིང་ལག་པས་མཉེས་པའི་མར་སར་གྱིས་བསྐུས་ན་ཡང་ཕན་ནོ། །ཡང་ན་འོ་མ་འབའ་ཞིག་གིས་བླུགས་པ་ཕན་པ་ཡིན་ནོ། །ཡང་ན་ཤིང་མངར་གྱི་ཆུ་བླུགས་པ་ཡང་ཕན་པ་ཡིན་ནོ། །ཕལ་ཆེར་མེ་དྲོད་ཉམས་པའི་

ཕྱིར། །མ་ཞུ་བེའུ་སྣབས་བཅས་འཁྲུ་ན། །དེ་ལ་ཕོ་བའི་ཚད་འཁྲུ་ཡི། །སྐབས་སུ་བཤད་པའི་སྨན་བསྟེན་ཕན། །ཞེས་བྱ་བ་ལ། གཅོང་ཆེན་པོའི་ནད་དང་ལྡན་པ་དག་ནི་ཕལ་ཆེར་གྱི་ནང་དུ་ཕོ་བའི་མེ་དྲོད་ཉམས་ཤིང་བྲི་བ་ཡིན་པའི་ཕྱིར། མ་ཞུ་བའི་བེའུ་སྣབས་དང་བཅས་

པར་འཁྲུ་བར་འགྱུར་ལ། དེ་བས་ནད་དེ་ལ་ཕོ་བའི་ནད་གསོ་བའི་སྐབས་སུ་བཤད་པ་དང་། ཚད་པས་འཁྲུ་བའི་སྐབས་སུ་བཤད་པའི་སྨན་དེ་དག་ནད་དམིགས་དང་སྦྱར་བ་སྦྱིན་པར་བྱའོ། །ཟད་བྱེད་ལྡན་པའི་བཤང་བ་ནི། །རྣམ་པ་ཀུན་ཏུ་བསྲུང་བྱ་སྟེ། །དེ་ཡི་ལུས་ཟུངས་

Vol. 201 · folio 254b

ཀུན་ཟད་པས། །དེ་སྟོབས་བཤང་བའི་སྟོབས་ཀྱིས་གནས། །ཞེས་བྱ་བ་ལ། གཅོང་ཆེན་པོས་བཏབ་པའི་ནད་པ་དེ་ལུས་སྐམ་ཞིང་རིད་པར་གྱུར་པས་ན་དེའི་ཕྱིར་བཤང་བ་ཅི་ནས་ཀྱང་ཤས་ཆེར་མི་འབྱུང་བར་བསྲུང་བར་བྱ་སྟེ། གང་གི་ཕྱིར་གཅོང་ཆེན་པོའི་ནད་ཀྱིས་ཐེབས་པ་

དེའི་ལུས་ཟུངས་ཀུན་ཟད་པར་འགྱུར་བས་དེའི་ཉམས་སྟོབས་ནི་བཤང་བ་ལ་གནས་པའི་སྟོབས་ཀྱིས་གནས་པར་བྱེད་པ་ཡིན་པས་ཅི་ནས་ཀྱང་བཤང་བ་ཤས་ཆེར་མི་འབྱུང་ཞིང་། འཁྲུ་བ་ལ་སོགས་པ་མི་འགྱུར་བ་དེ་ལྟར་བསྲུང་བར་བྱའོ། །རིགས་པས་ཤ་རྣམས་ཁོ་ན་སྦྱིན། །

སྐོམ་དུ་རྒུན་ཆང་བླུད་པར་བྱ། །ཤུགས་ནི་བཀག་པར་གྱུར་པ་ཡིས། །གཅོང་ཆེན་གྱིས་ནི་གླགས་མི་རྙེད། །ཅེས་བྱ་བ་ལ། གཅོང་ཆེན་པོའི་ནད་དང་ལྡན་པ་དེ་ལ་རིགས་ཤིང་རན་པར་ཤ་རྣམས་ཁོ་ན་སྦྱིན་པར་བྱ་ཞིང་བཟའ་བར་བྱ་ལ། སྐོམ་ཞིང་འཚལ་ནན་དུ་རྒུན་ཆང་

བླུད་པར་བྱ་ཞིང་། དེ་བཞིན་དུ་བཤང་བའི་ཤུགས་བཀག་པར་གྱུར་པས་གཅོང་ཆེན་པོའི་ནད་ཀྱིས་གླགས་རྙེད་པར་མི་འགྱུར་རོ། །ཆང་དང་ཆང་དྭངས་རྒུན་ཆང་དང་། །ཆང་རྙིང་བུ་རམ་སྦྲང་ཆང་དང་། །ཅི་རིགས་པར་ནི་བླུད་པ་དང་། །ཤ་ནི་སྦྱིན་པ་ཉིད་དུ་བྱ། །ཞེས་བྱ་བ་ལ། གཅོང་

ཆེན་པོའི་མི་དེ་ལ་བཟའ་བར་ཤ་བྱིན་ནས་ཆང་དང་ཆང་གི་དྭངས་མ་ལ་སོགས་པ་ཅི་རིགས་བླུད་པར་བྱའོ། །བུ་གའི་རྒྱུན་འགགས་དག་ཕྱིར་དང་། །སྟོབས་དང་མདངས་ནི་རྒྱས་བྱའི་ཕྱིར། །སྣུམ་དང་འོ་མ་ཆུས་གང་བའི། །སྣོད་དུ་ལུས་ནི་བྱིང་བར་བྱ། །ཞེས་བྱ་བ་ལ། ཡང་དེ་ལ་

བུ་གའི་རྒྱུན་སྲང་ནད་ཀྱིས་འགགས་པ་དེ་དག་པར་བྱ་བའི་ཕྱིར་དང་། ལུས་ཀྱི་སྟོབས་དང་མདངས་རྒྱས་པར་བྱ་བའི་ཕྱིར་སྣུམ་གྱིས་གང་བའི་སྣོད་དང་འོ་མས་གང་བའི་སྣོད་དང་སྨན་གྱི་ཆུས་གང་བའི་སྣོད་དུ་ལུས་བྱིང་བར་བྱ་བའམ། ནད་དམིགས་ཇི་ལྟ་བ་བཞིན་དུ་གཞུག་པར་

བྱའོ། །ཕྱུང་ནས་བསྲེས་པའི་སྣུམ་གྱིས་ནི། །བསྐུ་ཞིང་ལག་པས་བདེ་བར་མཉེ། །བདེ་བར་འདུག་པར་གྱུར་པ་ལ། །དལ་གྱིས་ལྡེ་གུས་དྲིལ་བར་བྱ། །ཞེས་བྱ་བ་ལ། ལུས་བྱིང་བའི་ཆུ་ལས་སླར་ཕྱུང་སྟེ། བསྲེས་པའི་སྣུམ་གྱིས་སླར་ཡང་ལུས་བསྐུ་ཞིང་ལག་པས་

Vol. 201 · folio 255a

དལ་གྱིས་མཉེ་བ་དང་། བདེ་བར་ལུས་ཕབ་སྟེ་འདུག་པར་གྱུར་པ་དལ་གྱིས་ལྡེ་གུས་དྲིལ་བར་བྱའོ། །ཛི་བན་ཏི་དང་དཱུར་བ་དང་། །བཙོད་དང་ཨ་ཤྭ་གན་དྷ་དང་། །ཨ་བ་མརྒ་བ་སྤྲུ་བ། །ཨག་ནི་མན་ཏི་ཤིང་མངར་དང་། །བ་ལ་ཡུངས་ཀར་བི་ད་རི། །རུ་རྟ་འབྲས་དང་

ཟར་མ་དང་། །མོན་སྲན་གྲེའུ་གཉིས་ཏིལ་དང་ཕབས། །ཐམས་ཅད་གཅིག་ཏུ་བཏགས་ནས་ནི། །ནས་ཀྱི་ཕྱེ་ནི་སུམ་འགྱུར་དང་། །ཞོ་དང་སྦྲང་རྩི་ལྷན་ཅིག་སྦྱར། །འདི་དག་གིས་ནི་དྲིལ་ཕྱི་བྱ། །ཤ་རྒྱས་མདོག་བཟང་སྟོབས་སྐྱེད་བྱེད། །ཅེས་བྱ་བ་ལ། ཛི་བན་ཏི་ནས་ཕབས་ཀྱི་

བར་གཅིག་ནས་ཕྱེ་མར་བཏགས་ལ་ཕྱེ་མ་དེ་དག་གི་སུམ་འགྱུར་གྱི་ནས་ཀྱི་རྗེན་ཕྱེ་དང་བསྲེས་ལ་ཞོ་དང་སྦྲང་རྩི་དང་སྦྱར་བ་འདིས་ལུས་ལ་དྲིལ་ཕྱིས་བྱས་ན། དེའི་ཤ་རྒྱས་པ་དང་། མདོག་བཟང་བ་དང་། སྟོབས་སྐྱེད་པར་འགྱུར་རོ། །ཡུངས་ཀར་སེར་པོའི་ལྡེ་གུ་དང་། །འཚོ་བྱེད་སྡེ་ཚན་

དང་སྦྱར་བ། །ཁྲུས་ཀྱི་སྨན་གྱིས་ཁྲུས་བྱ་ཞིང་། །དུས་ཚིགས་བདེ་བའི་ཆུས་ཁྲུས་བྱ། །ཞེས་བྱ་བ་ལ། ཡང་ཟད་བྱེད་ཀྱི་ནད་དང་ལྡན་པ་དེ་ཡུངས་ཀར་གྱི་ལྡེ་གུ་དང་འཚོ་བྱེད་ཀྱི་སྡེ་ཚན་གྱི་སྨན་དང་བསྐོལ་བའི་ཆུས་ཁྲུས་ཀྱི་སྨན་དྲི་བཟང་པོ་དག་གི་ཁྲུས་དེ་ཡང་དུས་ཚིགས་དང་རྗེས་སུ་མཐུན་

ཞིང་ལུས་བདེ་བ་སྐྱེད་པར་བྱེད་དོ། །དྲི་དང་ཕྲེང་བ་སོགས་ཀྱིས་བརྒྱན། །བཀྲ་མི་ཤིས་པ་འཇིགས་པ་བསྟན། །ཞེས་བྱ་བ་ལ། དེ་ལྟར་ཁྲུས་བྱས་ནས་དྲི་དང་ཕྲེང་བ་ལ་སོགས་པས་བརྒྱན་ཞིང་སྤུད་པ་དང་། བཀྲ་མི་ཤིས་པའི་འཇིགས་པ་མདངས་དང་སྐལ་བ་སྐྱེད་པར་བྱེད་པའི་དངོས་

པོ་ལ་བསྟན་པར་བྱའོ། །མཛའ་བཤེས་བལྟ་ཞིང་གླུ་དང་ནི། །རོལ་མོ་མཉན་ཞིང་དགའ་སྟོན་བྱ། །འཇམ་རྩི་འོ་མ་ཞུན་མར་དང་། །ཤ་དང་ཆང་བསྟེན་ཚུལ་ལ་གནས། །ལྷ་ལ་བརྟེན་པའི་ཆོ་ག་དང་། །མཆོད་པའི་ལས་ལ་བརྩོན་པར་བྱ། །ཞེས་བྱ་བ་ལ། གཅོང་ཆེན་པོ་

དང་ལྡན་པའི་མི་དེ་མཛའ་བཤེས་ཡིད་དུ་འོང་བ་ལ་ལྟ་བ་དང་། གླུ་ལ་སོགས་པ་ལ་མཉན་པ་ལ་དགའ་སྟོན་གྱི་རྣམ་པ་བྱ་བ་དང་། འཇམ་རྩི་དང་འོ་མ་དང་ཞུན་མར་བསྟེན་པ་དང་། དེ་བཞིན་དུ་ཤ་ལ་སོགས་པ་བསྟེན་པ་དང་། ཚུལ་ལེགས་པ་ལ་གནས་པར་བྱ་བ་དང་། ལྷ་ལ་

Vol. 201 · folio 255b

བརྟེན་པའི་ཆོ་ག་གཏོར་མ་དང་། སྦྱིན་སྲེག་དང་། སྡིག་པ་བཤགས་པ་ལ་སོགས་པ་ལ་གནས་པ་དང་། མཆོད་པའི་ལས་ལ་བརྩོན་པ་དག་ཀྱང་ཕན་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་

དགའ་བས་ངེས་པར་སྦྱར་བ་ལས། གསོ་བའི་གནས་ལེའུ་ལྔ་པའི་རྣམ་པར་འགྲེལ་བའོ།། །།དེ་ནས་སློན་པའི་ནད་དང་སྙིང་ནད་དང་སྐོམ་དད་གསོ་བའི་གནས་བཤད་པར་བྱའོ། །ཞེས་བྱ་བ་ལ། ནད་གཞིའི་རིམས་ཀྱིས་སློན་པ་ལ་སོགས་པའི་གསོ་བའི་

རིམ་པས་འབྱུང་བས་ན་དེ་བརྩམས་ཏེ་བཤད་པ་ཡིན་ནོ། །སློན་ནད་ཕལ་ཆེར་མ་ཞུ་བའི། །གནས་འཁྲུགས་ལས་བྱུང་དེ་ཡི་ཕྱིར། །རླུང་མ་གཏོགས་ལ་དང་པོར་ནི། །སྨྱུང་བྱས་སྐྱུག་སྨན་བཏང་བ་ཕན། །ཞེས་བྱ་བ་ལ། སློན་ནད་ཕལ་ཆེར་ནི་མ་ཞུ་བའི་གནས་ནས་

འཁྲུགས་ཤིང་སློངས་པ་ལས་བྱུང་བ་ཡིན་ལ། དེས་ན་རླུང་ལས་གྱུར་པ་མ་གཏོགས་པ་དག་ལ་ནི་དང་པོར་སྨྱུང་བ་བྱས་ནས་སྐྱུག་སྨན་གཏང་བ་ཕན་པ་ཡིན་ནོ། །སྟོབས་ལྡན་རྒྱུན་དུ་སློན་གྱུར་ཅིང་། །ནད་མང་གྱུར་ལ་གཏང་བར་བྱ། །ཞེས་བྱ་བ་ལ། དེ་ལ་སྐྱུག་སྨན་དེ་ཡང་

ཉམས་སྟོབས་དང་ལྡན་པའི་སྐྱེས་བུ་ལ་སྦྱར་བར་བྱའི་ཉམས་སྟོབས་ཞན་པ་ལ་ནི་མ་ཡིན་པ་དེ་ཡང་རྒྱུན་དུ་སློན་ཞིང་ནད་མང་ལ། ཕལ་ཆེར་སློན་པར་གྱུར་པ་ལ་སྐྱུག་སྨན་གཏང་བར་བྱའོ། །དེ་འོག་རིམ་གྱིས་བཀྲུ་སྨན་ནི། །ཡིད་འོང་ཆང་རྒུན་ཆུ་སོགས་སམ། །འོ་མས་

བཏང་གྱུར་དེ་མོད་ལ། །གྱེན་འབྱུང་ནང་ནི་ཐུར་དུ་འབྱུང་། །ཞེས་བྱ་བ་ལ། དེ་ལྟར་སློན་སྨན་བཏང་བའི་འོག་ཏུ་བཀྲུ་སྨན་གཏང་བར་བྱ་སྟེ། དེ་ལ་ཡང་རིམ་གྱིས་བྱའི་ཅིག་ཅར་ནི་མ་ཡིན་ནོ། །དེ་ཡང་ཡིད་དུ་འོང་ཞིང་དགའ་བར་བྱེད་པ་བཀྲུ་སྨན་ཆང་དང་རྒུན་ཆུ་ལ་སོགས་

པ་དང་ལྷན་ཅིག་བཏང་བའམ། ཡང་ན་འོ་མ་དང་ལྷན་ཅིག་བཀྲུ་སྨན་གཏང་བར་བྱ་སྟེ། གང་གི་ཕྱིར་བཀྲུ་སྨན་དེ་བཏང་བར་གྱུར་ན། དེའི་མོད་ལ་གྱེན་དུ་འབྱུང་ཞིང་སློན་པའི་ནད་ཐུར་དུ་འབྱུང་བར་བྱེད་དོ། །ཞི་བའི་སྨན་ནི་རྩུབ་པ་སྟེ། །ཉམ་ཆུང་བ་ཡང་དེ་ཉིད་

Vol. 201 · folio 256a

བྱ། །ཞེས་བྱ་བ་ལ། དེ་བཞིན་དུ་ཞི་བར་བྱ་བའི་སྨན་འབྲས་ཡོས་ལ་སོགས་པ་རྩུབ་བག་གིས་བྱ་ལ། སྐྱེས་བུ་ཉམ་ཆུང་བ་དག་ལ་ནི་ཞི་བར་བྱ་བའི་སྨན་དེ་ཉིད་བྱའི་སྦྱང་བའི་སྨན་མི་བྱ་སྟེ། སྦྱང་བའི་སྨན་སྦྱར་མི་བཟོད་པའི་ཕྱིར་རོ། །ཟས་ནི་སྐམ་

ཞིང་ཡི་གར་འོང་། །གོམས་ཤིང་ཡང་བ་བསྔགས་པ་ཡིན། །དེ་བཞིན་སྨྱུང་བ་ཡུ་ཤ་དང་། །ཤ་ཁུ་འབའ་ཆ་སྐམ་པ་ལ། །ཚོད་མ་ལྡེ་གུ་བཟའ་བ་དང་། །བཏུང་བ་དྲི་བཟངས་པ་ན་ཀ །རོ་དྲུག་ཟས་སྐོམ་སྣ་ཚོགས་དང་། །འབྲས་བུ་ཁྲུས་དང་མཉེ་བ་དང་། །དྲི་

ཞིམ་འབྲས་བུ་མེ་ཏོག་སྐྱེས། །ཟས་དང་སྐོམ་ལ་སྤྱོད་པ་དང་། །ཟོས་མ་ཐག་ཏུ་འཕྲལ་དུ་ནི། །ཆུ་གྲང་གིས་ནི་གདོང་བཀྲུ་བྱ། །ཞེས་བྱ་བ་ལ། སློན་པའི་ནད་ལ་ཟས་ཀྱང་སྐམ་ཞིང་སློན་བག་མ་ཡིན་པར་སྦྱིན་པ་དང་། ཡི་གར་འོང་ཞིང་སྙིང་དགའ་བར་བྱེད་པ་དང་། གོམས་

ཤིང་རྒྱུན་དུ་བསྟེན་ལ་དུས་ཡུན་རིང་པོར་ཟོས་པ་དང་། ཚད་དང་རྫས་ཀྱི་རང་བཞིན་གྱིས་ཡང་བ་དེ་ལྟ་བུའི་ཁ་ཟས་སྦྱིན་པ་ནི་བསྔགས་པ་ཡིན་ནོ། །ཡང་དེ་བཞིན་དུ་སྨྱུང་བར་བྱ་ཞིང་། ཟས་བཅད་པ་དང་། ཡུ་ཤ་ཞེས་བྱ་བ་མོན་སྲན་སྡེའུ་ལ་སོགས་པའི་ཁུ་བ་ལས་

བྱས་པའི་བཏུང་བ་དང་། ཤ་ཁུ་དང་འབའ་ཆ་སྟེ་རྩ་བ་དང་འབྲས་བུ་ལས་བྱས་པ་དང་། སྐམ་པ་ལ་ཞེས་བྱ་བ་ཕལ་ཆེར་ཏིལ་གྱི་ལྡེ་གུ་དང་སྐྱུར་བག་ལས་བ་བྱས་པ་སྟེ། དེ་ཡང་གཞུང་ལས། །དེ་ལ་ཤ་ལ་ཤ་ཁུ་སྟེ། །འབྲུ་ལས་ཡུ་ཤ་འབྲས་བུ་ལས། །ཁ་ལོའི་

རྩ་བ་ཏིལ་རྩིག་སྐྱུར། །ལས་བྱས་སྐམ་པ་ལི་ཀར་བཤད། །ཅེས་འབྱུང་བ་ཡིན་ནོ། །ཚོད་མ་ནི་ཚོད་མའི་སྡེ་ཚན་ལས་བཤད་པའི་རིགས་སྣ་ཚོགས་པའོ། །ལྡེ་གུ་ནི་ལྡེ་གུར་སྦྱར་ནས་ལྷག་པའི་སྨན་རྣམས་སོ། །བཟའ་བ་ནི་བཟའ་བ་དང་བཏུང་

བ་རྣམས་སོ། །བཏུང་བ་དྲི་བཟངས་ནི་རྒུན་ཆུ་ལ་སོགས་པ་ལས་བྱས་པའི་བཏུང་བའི་དྲི་ཞིམ་པོ་དང་སྦྱར་བའོ། །བད་ཀན་ནི་སྦྲང་ཆུ་དང་དྲི་སྣ་གསུམ་ལ་སོགས་པ་ལ་སྦྱར་བའོ། །རོ་དྲུག་པ་ནི་ཕལ་ཆེར་སྐྱུར་བའི་ཤས་དང་ལྡན་ཞིང་སེའུ་འབྲུལ་སོགས་པ་ལ་

Vol. 201 · folio 256b

སྦྱར་བའི་ཚོད་མ་བཤད་པ་ཞེས་བྱའོ། །ཟས་སྐམ་པོ་སྣ་ཚོགས་ནི་ལ་དུ་ལ་སོགས་པའོ། །འབྲས་བུ་ནི་ཤིང་ཏོག་དང་འབྲས་བུ་སྣ་ཚོགས་ཀྱི་སྡེ་ཚན་ལ་བསྟེན་པའོ། །ཁྲུས་ནི་ཆུ་དྲི་ཞིམ་པོ་དྲོ་འཇམ་ཙམ་གྱིས་བཀྲུ་བའོ། །མཉེ་བ་ནི་རྒྱ་མཚོའི་ལྦུ་བ་ལ་སོགས་

པས་མཉེ་བའོ། །དྲི་ཞིམ་པ་ནི་དྲི་ཞིམ་པའི་སྨན་དང་སྦྱར་བ་སྟེ། དྲི་དེ་དག་ཀྱང་འབྲས་བུ་དང་མེ་ཏོག་ལས་བྱུང་བ་སྟེ། འདིར་དྲི་ཞེས་བྱ་བའི་སྒྲས་ནི་དྲི་སྨན་དག་ཀྱང་བྱའོ། །ཡང་དེ་བཞིན་དུ་ཟས་སྐོམ་ལ་སོགས་པ་ལ་སྤྱད་མ་ཐག་དུ་འཕྲལ་དུ་དེའི་མོད་ལ་ཆུ་

གྲང་གིས་གཏོར་ཞིང་བླུགས་པའམ་སློན་པའི་ནད་རྣམས་ལ་ཕན་པ་ཡིན་ནོ། །དེ་དག་ནི་སློན་ཞིང་སྐྱུག་བྲོ་བའི་ནད་ཐམས་ཅད་ཀྱི་སྤྱིའི་གསོ་བ་བཤད་པ་ཡིན་ནོ། །རླུང་ལས་གྱུར་པའི་སློན་པའི་ནད། །རྒྱམ་ཚ་མར་བཅས་དྲོ་བའམ། །ཚ་གསུམ་ལན་ཚྭ་གསུམ་སྦྱར་

བས། །ལུད་པ་དང་ནི་སྙིང་འཛག་དང་། །བཅས་པ་སེལ་བར་བྱེད་པ་ཡིན། །ཞེས་བྱ་བ་ལ། རླུང་ལས་གྱུར་པའི་སློན་ནད་ལ་ནི་རྒྱམ་ཚ་དང་ཞུན་མར་སྦྱར་བ་ཉུང་ཟད་དྲོ་བས་སེལ་བར་བྱེད་དོ། །དེ་ལས་ཀྱང་མཆོག་ཏུ་ལུད་པ་དང་སྙིང་འཛག་ཅིང་ན་བ་དང་བཅས་

པའི་སློན་བྲོ་བ་སེལ་ཏོ། །ཡང་ན་ཚ་བ་གསུམ་དང་ལན་ཚྭ་གསུམ། །ཞེས་བྱ་བ་ལྕེ་མྱང་ཚ་དང་ཁ་རུ་ཚ་དང་། ཁ་རུ་ཚ་ནག་པོ་དང་། ཞེས་བྱ་བ་གསུམ་དང་སྦྱར་བའི་ཞུན་མར་བླུད་ན་ཡང་རླུང་ལས་གྱུར་པའི་སློན་ནད་སེལ་ཏོ། །སེའུ་འབྲུའི་ཁུ་བ་བཅའ་སྒ་

དང་། །འུ་སུ་ཞོ་དང་མར་བསྐོལ་བའམ། །ཆུ་དང་འོ་མ་ཆ་མཉམ་པ། །ཞེས་བྱ་བ་ལ། ཡང་ན་སེའུ་འབྲུའི་ཁུ་བ་དང་བཅའ་སྒ་དང་འུ་སུ་དང་། ཞོར་བསྲེས་པ་དང་བསྐོལ་བའི་མར་བླུད་ན་རླུང་ལས་གྱུར་པའི་སློན་ནད་འཇོམས་སོ། །ཡང་ན་ཆུ་དང་འོ་མ་

ཆ་མཉམ་པ་བླུད་ན་རླུང་ལས་གྱུར་པའི་སློན་བྲོ་བ་སེལ་ཏོ། །ཁྲོན་གྱི་ཟས་ཚོལ་ཤ་ཁུ་ནི། །འབྲས་སྐྱུར་རྒྱམ་ཚ་མར་ཤས་ཆེ། །ཞེས་བྱ་བ་ལ། ཡང་ན་ཁྲོན་གྱི་ཟས་ཚོལ་བའི་ཁྱིམ་བྱ་ལ་སོགས་པའི་ཤ་ཁུ་སེའུ་འབྲུ་ལ་སོགས་པའི་འབྲས་བུ་དང་སྦྱར་

Vol. 201 · folio 257a

ཞིང་ཞུན་མར་དང་རྒྱམ་ཚ་ཤས་ཆེར་བཏབ་པ་བླུད་ན་ཡང་རླུང་ལས་གྱུར་པའི་སློན་བྲོ་བ་འཇོམས་སོ། །ཁ་ཟས་སྣུམ་པོ་བཅའ་སྒ་དང་། །ཞོ་དང་སེ་འབྲུར་སྦྱར་བའམ། །རྒྱམ་ཚར་བཅས་པ་དྲོ་འཇམ་ཕན། །ཞེས་བྱ་བ་ལ། ཁ་ཟས་སྣུམ་

བག་ཏུ་བཅའ་ཞིང་བཅའ་སྒ་ལ་སོགས་པ་སྦྱར་བ་ལ་རྒྱམ་ཚ་བཏབ་པ་དྲོ་འཇམ་ཙམ་བྱིན་ན་ཡང་ཕན་ནོ། །འདིར་ནི་བཀྲུ་སྨན་ལན་ཚྭ་དང་། །སྣུམ་དང་དྲོ་བར་བཅས་པ་ཕན། །ཞེས་བྱ་བ་ལ། རླུང་ལས་སྐྱེས་པའི་སློན་ནད་འདི་ལ་སྣུམ་དང་སེང་ཕྲོམ་ལ་སོགས་པ་

དང་སྦྱར་བའི་བཀྲུ་སྨན་ལན་ཚྭ་དང་སྦྱར་ཞིང་ཆུ་དྲོ་བ་བཏང་ན་ཕན་ནོ། །མཁྲིས་པ་ལས་གྱུར་བཀྲུ་སྨན་ཕྱིར། །རྒུན་འབྲུ་བུ་རམ་ཤིང་ཁུ་དང་། །དུར་བྱིད་སྦྱར་བའི་བཀྲུ་སྨན་གཏང་། །ཞེས་བྱ་བ་ལ། མཁྲིས་པ་ལས་གྱུར་པའི་སློན་བྲོ་བའི་བཀྲུ་སྨན་བྱ་བའི་ཕྱིར་རྒུན་

འབྲུའི་ཁུ་བ་དང་བུ་རམ་ཤིང་གི་ཁུ་བ་དང་དུར་བྱིད་དུ་སྦྱར་བའི་བཀྲུ་སྨན་གཏང་བར་བྱའོ། །ཞུན་མར་སེང་ཕྲོམ་སྦྱར་བ་གཏང་། །ཞེས་བྱ་བ་ལ། ཡང་ན་མཁྲིས་པ་ལས་གྱུར་པའི་སློན་བྲོ་བ་དང་། སེང་ཕྲོམ་དང་ཞུན་མར་སྦྱར་བ་གཏང་བར་བྱ་སྟེ། དེ་ཡང་སེང་ཕྲོམ་

སྲང་བརྒྱད་ཅེས་བྱ་བ་ལ་སོགས་པའི་གཞུང་གིས་བཤད་པ་ལྟར་བྱའོ། །འཕེལ་ཏེ་བད་ཀན་གནས་ཁྱབ་པའི། །མཁྲིས་པར་མངར་དང་ཁ་བ་ཡིས། །གྱེན་དུ་དྲངས་ལ། ཞེས་བྱ་བ་ལ། མཁྲིས་པ་ལས་གྱུར་པའི་སློན་བྲོ་བ་འཕེལ་བར་འགྱུར་ཏེ། བད་ཀན་གྱི་

གནས་ཁྱབ་པར་གྱུར་པ་ལ་ནི་མཁྲིས་པའི་ནད་དེ་སྨན་མངར་བ་དང་ཁ་བ་དག་གིས་གྱེན་དུ་དྲངས་ལ་སློན་པར་བྱའི་སྨན་གཏང་བར་ནི་མི་བྱའོ། །དག་གྱུར་ནས། འབྲས་ཡོས་ཁ་ར་བཅས་པ་ལས། །སྐྱོ་མའམ་ནས་ཐུག་བླུད་པར་བྱ། །ཞེས་བྱ་བ་ལ། ཁྲུས་དང་སློན་

གྱིས་དེ་དག་ཅིང་སྦྱངས་པར་གྱུར་ན་འབྲས་ཡོས་ཁ་ར་དང་བཅས་པ་ལས་སྐྱོ་མར་བྱས་ཏེ་བླུད་པའམ་ནས་ཐུག་གི་ནང་དུ་སྦྲང་རྩི་དང་ཁ་ར་བཏབ་པ་བླུད་པར་བྱའོ། །སཱ་ལུ་དྲུག་ཅུ་པ་ཡི་ཆན། །སྐམ་སའི་ཤ་ཁུ་མུངྒའི་ཁུ། །ཞེས་བྱ་བ་ལ། ཡང་དེ་བཞིན་དུ་སྐམ་སའི་ཤ་

Vol. 201 · folio 257b

ཁུ་དང་མུངྒའི་ཁུ་བ་ཡུ་ཤ་ཞེས་བྱ་བ་དང་། སཱ་ལུ་རྩ་སྣར་རམ་འབྲས་དྲུག་ཅུ་པའི་ཆན་སྦགས་ཏེ་བཟའ་བ་སྦྱིན་པར་བྱའོ། །སོ་ཕག་བསྲེགས་ཏེ་ཆུར་བཅུག་གསུར། །ཤིན་ཏུ་བསྒྲངས་པའི་ཆུ་བླུད་པའམ། །ཞེས་བྱ་བ་ལ། སྐོམ་དུ་ནི་སོ་ཕག་ལེགས་པར་བསྲེགས་ཏེ་

ཆུའི་ནང་དུ་བཅུག་ལ་གསུར་བའི་ཆུ་དྭངས་མ་ཤིན་ཏུ་ལེགས་པར་བསྒྲངས་ལ་བླུད་པར་བྱའོ། །མུངྒ་འུ་སུ་པུ་ཤེལ་ཙེ། །པི་པི་ལིང་དང་ནུབ་གཅིག་སྦངས། །ཞེས་བྱ་བ་ལ། མོན་སྲན་སྡེའུ་དང་འུ་སུ་ལ་སོགས་པའི་སྨན་དང་ནུབ་གཅིག་སྤངས་པའི་ཆུ་བསྐོལ་ཏེ་བསྒྲངས་

པ་བླུད་པར་བྱའོ། །ཡང་ན་རྒུན་ཆུ་བུ་རམ་ཤིང་། །སླེ་ཏྲེས་ཆུ་འམ་འོ་མ་བླུད། །ཅེས་བྱ་བ་ལ། ཡང་མཁྲིས་པ་ལས་གྱུར་པའི་སློན་བྲོ་བ་ལ་རྒུན་འབྲུའི་ཆུའམ། བུ་རམ་གྱི་ཁུ་བའམ། སླེ་ཏྲེས་བསྐོལ་བའི་ཆུའམ། འོ་མ་གང་ཡང་རུང་བ་བླུད་པར་བྱའོ། །འཛམ་བུ་ཨ་

མྲའི་ལོ་མ་དང་། །ཨུ་ཤིར་ནྱ་གྲོ་དྷའི་མྱུ་གུ། །བསྐོལ་ཏེ་བསྒྲངས་པར་སྦྲང་རྩི་ནི། །བཏབ་སྟེ་བླུད་ན་སློན་པ་དང་། །རིམས་དང་ཚད་འཁྲུ་བརྒྱལ་བ་དང་། །སྐོམ་དད་ཆེ་བ་མི་བཟད་སེལ། །ཞེས་བྱ་བ་ལ། ཤིང་འཛམ་བུ་དང་ཨ་མྲ་གཉིས་ཀྱི་ལོ་མ་ནི་ཨུ་ཤི་ར་ཞེས་བྱ་བ་

པུ་ཤེལ་ཙེ་དང་། །ཤིང་ནྱ་གྲོ་དྷའི་མྱུ་གུ་བསྐོལ་བའི་ཆུ་བསྒྲངས་ཏེ་སྦྲང་རྩི་བཏབ་པ་བླུད་ན་ཡང་སློན་པ་ལ་སོགས་པའི་ནད་སེལ་བར་འགྱུར་རོ། །སྐྱུ་རུ་རའི་ཁུ་ཙན་དན་བཅས། །མུངྒ་བ་ལའི་ཆུ་བླུད་ཕན། །ཞེས་བྱ་བ་ལ། ཡང་ན་སློན་ནད་དེ་ལ་སྐྱུ་རུ་ར་བསྐོལ་བའི་ཆུ་བསྒྲངས་

པར་ཙནྡན་དཀར་པོ་ལྡེ་གུ་དང་སྦྱར་བ་བླུད་པར་བྱའོ། །ཡང་ན་མུངྒ་དང་བ་ལ་ཆུར་ནུབ་གཅིག་སྦངས་པ་བླུད་པར་བྱའོ། །རྒྱ་ཤུག་ཚི་གུ་ཁ་ར་དཀར། །འབྲས་ཡོས་སྦྲ་ཚིལ་པི་པི་ལིང་། །དངུལ་རྡོ་སྦྲང་རྩིའམ་ཨ་རུ་ར། །རྒུན་འབྲུའམ་རྒྱ་ཤུག་དང་སྦྱར་ཕན། །ཞེས་བྱ་བ་ལ།

ཡང་སློན་ནད་དེ་ལ་རྒྱ་ཤུག་གི་ཚི་གུ་ལ་སོགས་པའི་སྨན་སྦྲང་རྩི་དང་སྦྱར་བའམ། ཡང་ན་ཨ་རུ་ར་སྦྲང་རྩི་དང་སྦྱར་བའམ། རྒུན་འབྲུ་སྦྲང་རྩི་དང་སྦྱར་བའམ། རྒྱ་ཤུག་སྦྲང་རྩི་དང་སྦྱར་བའི་ལྡེ་གུ་སྦྱིན་པར་བྱའོ། །བད་ཀན་ལས་གྱུར་ནིམ་པ་དང་། །པི་པི་ལིང་དང་པོ་སོན་ཆ། །

Vol. 201 · folio 258a

ཡུངས་ཀར་ཆུ་དྲོན་གྱིས་སློན་བྱ། །ཉམ་ཆུང་བ་ལ་སྨྱུང་བ་བྱ། །ཞེས་བྱ་བ་ལ། བད་ཀན་ལས་གྱུར་པའི་སློན་བྲོ་བ་ལ་ནི་ནིམ་པ་ལ་སོགས་པ་དང་བསྐོལ་བའི་ཆུ་དྲོ་འཇམ་ཙམ་བྱས་པ་བླུད་ལ་སློན་པར་བྱའོ། །གལ་ཏེ་ནད་པ་ཉམ་ཆུང་བ་ལ་ནི་སློན་པར་

མི་བྱའི། སྨྱུང་བར་བྱས་པ་དེས་ཞི་བར་བྱའོ། །དོང་ག་ལ་སོགས་ཁུ་བ་བསྐོལ། །བསྒྲངས་པ་སྦྲང་རྩིར་བཅས་པ་བླུད། །ཅེས་བྱ་བ་ལ། བད་ཀན་ལས་གྱུར་པའི་སློན་བྲོ་བ་ལ་དོང་ག་ལ་སོགས་པའི་སྨན་གྱི་སྡེ་ཚན་བསྐོལ་བའི་ཁུ་བ་བསྒྲངས་པའི་ནང་དུ་སྦྲང་རྩི་བཏབ་

པ་བླུད་ན་ཞི་བར་འགྱུར་རོ། །ནས་ཀྱི་སྐྱོ་མ་སློན་འཇོམས་པའི། །སྨན་དག་དང་ནི་སྦྱར་བ་བླུད། །ཅེས་བྱ་བ་ལ། ཡང་བད་ཀན་གྱི་སློན་བྲོ་བ་ལ་ནི་ནས་ཀྱི་ཕྱེ་དང་། སློན་འཇོམས་པའི་སྨན་འབྲས་ཡོས་དང་། རྒྱ་ཤུག་དང་སེའུ་འབྲུ་ལ་སོགས་པའི་སྨན་བསྐོལ་བ་

དང་ནས་ཕྱེ་དང་སྦྱར་ཏེ་དེའི་ཟན་ནམ་སྐྱོ་མ་བླུད་པར་བྱའོ། །བད་ཀན་འཇོམས་ཟས་ཡི་གར་འོང་། །བཏུང་བ་ཟིན་ཐིག་བུ་སྲིན། །ཞེས་བྱ་བ་ལ། ཡང་བད་ཀན་ལས་གྱུར་པའི་སློན་བྲོ་བ་ལ་ནི། བད་ཀན་འཇོམས་པའི་ཟས་འབྲས་ཡོས་ལ་སོགས་པ་ལས་གཡོས་

པའི་ཟས་རྒུན་འབྲུ་ལ་སོགས་པ་ལས་བྱས་པའི་བཏུང་བ་ར་གཞེས་བྱ་བ་རོ་དྲུག་པ། ཟིན་ཐིག་ལེ་དང་། བུ་སྲིན་དང་བཅས་པ་བླུད་ན་ཡང་བད་ཀན་ལས་གྱུར་པའི་སློན་བྲོ་བ་སེལ་ཏོ། །ཟིན་ཐིག་ལེ་ནི་ཨར་ཛ་ཀ་དང་། ཀུ་ཐེ་ར་ཞེས་བྱ་བའོ། །བུ་སྲིན་ནི་ཀ་ཏྲི་ནའོ། །ལྡོང་

རོས་དང་ནི་པི་པི་ལིང་། །ན་ལེ་ཤམ་ནི་སྐྱུར་རྩི་ཆེ། །ཀ་པིད་ཐ་ཡི་ཁུ་བ་དང་། །སྦྲང་རྩིར་བཅས་པས་སློན་ནད་སེལ། །ཞེས་བྱ་བ་ལ། ལྡོང་རོས་ལ་སོགས་པའི་སྨན་གསུམ་པ་སྐྱུར་རྩི་ཆེན་པོ་ཞེས་བྱ་བ་བི་ཛ་པུ་རའི་ཁུ་བ་དང་། ཀ་པིད་ཐའི་ཁུ་བ་དང་སྦྱར་ཞིང་སྦྲང་རྩི་དང་སྦྱར་

བ་བླུད་ན་སློན་ནད་སེལ་བར་འགྱུར་རོ། །ཀ་པིད་ཐ་དང་ཚ་བ་གསུམ། །བྱི་ཚེར་སྦྲང་རྩིར་སྦྱར་བ་སྦྱིན། །ཞེས་བྱ་བ་ལ། བད་ཀན་ལས་གྱུར་པའི་སློན་བྲོ་བ་ལ་ནི། ཀ་པིད་ཐ་དང་ཚ་བ་གསུམ་སྦྱར་བ་སྦྱིན་པའམ། ཡང་ན་བྱི་ཚེར་བ་དང་སྦྲང་རྩིར་སྦྱར་བ་སྦྱིན་པར་བྱའོ། །མཐུན་

Vol. 201 · folio 258b

པའི་སྤྱོད་པ་བྱས་པ་ཡིས། །མི་སྡུག་ཡུལ་མཐོང་ལས་བྱུང་སེལ། །ཞེས་བྱ་བ་ལ། ཡུལ་མི་སྡུག་པ་མཐོང་བ་ལས་བྱུང་བའི་སློན་བྲོ་བ་ལ་ནི། ཡིད་དང་རྗེས་སུ་མཐུན་པའི་སྤྱོད་པ་ཡིད་དགའ་ཞིང་དབུགས་ཕྱུང་བས་མགུ་བར་བྱས་པའི་སྤྱོད་པ་བྱས་པས་སེལ་བར་འགྱུར་རོ། །

སྲིན་བུ་ལས་བྱུང་སྲིན་བུ་ཡི། །སྨན་དུ་བཤད་པ་རྣམས་ཀྱིས་གསོ། །ཞེས་བྱ་བ་ལ། སྲིན་བུ་ལས་བྱུང་བའི་སློན་བྲོ་བ་ལ་ནི་སྲིན་བུ་ལས་གྱུར་པའི་སྙིང་ནད་ཀྱི་སྐབས་སུ་བཤད་པའི་སྨན་རྣམས་ཀྱིས་གསོ་ཞིང་ཞི་བར་བྱའོ། །ལྷག་མ་ནད་དམིགས་ཇི་བཞིན་དུ། །དེ་ཞི་འགྱུར་

བའི་དཔྱད་ཀྱིས་གསོ། །ཞེས་བྱ་བ་ལ། སློན་པའི་ནད་ལྷག་མ་སྐོམ་དད་དང་མ་ཞུ་བ་དང་ཡིད་མི་བདེ་བ་སྐྱེས་པར་གྱུར་པ་དག་ལ་ནི། རང་གི་ནད་དམིགས་ཇི་ལྟ་བ་བཞིན་དུ་རླུང་ལས་གྱུར་པ་ལ་སོགས་པ་ལ་ཕན་པའི་སྨན་གྱིས་ཞི་བར་བྱ་བ་དང་། དེ་བཞིན་དུ་དེ་ཞི་བར་འགྱུར་བའི་

སྤྱོད་པ་སྐོམ་དད་དང་། སློན་པ་ལ་སོགས་པ་ལ་གང་དག་ཕན་པར་འགྱུར་བ་དག་གིས་གསོ་བར་བྱའོ། །སློན་པའི་སྐབས་སུ་རླུང་གི་ནད་རྣམས་ནི། །ལུས་ཟུངས་ཟད་པས་ངེས་པར་ལྡང་འགྱུར་རོ། །དེ་བས་འདིར་ནི་སྐྱུག་སྨན་སྦྱོར་དྲགས་པའི། །སྐབས་བཤད་བཅད་

དང་བརྟ་བའི་ཆོ་ག་བྱ། །བུ་རམ་ཞུན་མར་ཤ་ཁུ་དགེ་བ་ཆེ། །ཚ་བ་གསུམ་དང་འཚོ་བྱེད་སྨན་མར་དང་། །འོ་ཐུག་དང་ནི་ཕན་པའི་ལྡེ་གུ་ཡིས། །རྒྱུན་དུ་སློན་པ་ཞི་བ་ཉིད་དུ་བྱ། །ཞེས་བྱ་བ་ལ། གང་གི་ཕྱིར་སློན་པའི་སྐབས་སུ་ནི་སློན་པའི་ལུས་ཟུངས་ཟད་པར་བྱ་

བའི་ཕྱིར་ངེས་པ་ཁོ་ནར་ལྡང་ཞིང་འཁྲུགས་པར་འགྱུར་རོ། །དེ་བས་ན་སྐབས་འདིར་ནི་སྐྱུག་སྨན་གྱི་སྦྱོར་བ་དྲགས་པའི་སྐབས་སུ་སློན་དྲགས་པས་ནད་འགྱུར་བའི་གསོ་བར་བཤད་པ་དེས། གཅད་པ་དང་བརྟ་བའི་ཆོ་ག་གང་དག་ཡིན་པ་བྱའོ། །དེ་བཞིན་དུ་བུ་

རམ་དང་། ཞུན་མར་དང་། ཤ་ཁུ་དང་། དགེ་བ་ཆེན་པོའི་སྨན་མར་ལ་སོགས་པ་དུས་ཇི་ལྟ་བ་བཞིན་དུ་ནད་དམིགས་དང་ལུས་ཟུངས་ཀྱི་ཚུལ་དང་སྦྱར་ཏེ་རྒྱུན་དུ་སློན་པ་ཞི་བ་ཉིད་དུ་བྱའོ། །སྙིང་ནད་རླུང་གྱུར་ཏིལ་མར་ནི། །སྐྱུར་རྩབས་དར་བ་ཞོ་ག་ཆུ། །ལྡན་པ་ཚ་ན་དྲོ་

Vol. 201 · folio 259a

འཇམ་བླུད། །དེས་ནི་ལྟོ་སྦོས་སྐྲན་ཀྱང་འཇོམས། །ཞེས་བྱ་བ་ལ། སྙིང་གི་ནད་རླུང་ལས་གྱུར་པ་ལ་ནི་འབྲས་ཁུ་དང་སྐྱུར་དུ་གྱུར་པ་སྐྱུར་རྩབས་ཞེས་བྱ་བ་ལ་སོགས་པ་དང་ལྡན་པའི་ཏིལ་མར་བསྐོལ་བ་བླུད་པར་བྱ་སྟེ། དེ་ཡང་དྲོ་འཇམ་ཙམ་དུ་བྱས་

ལ་བླུད་པར་བྱའོ། །དེས་ནི་དེའི་ལྟོ་སྦོས་པ་ལ་སོགས་པ་འཇོམས་པར་བྱེད་དོ། །ཏིལ་མར་ལན་ཚྭར་བཅས་དང་སྐྱུར། །བ་གཅིན་བསྐོལ་བའང་དེ་དང་མཚུངས། །ཞེས་བྱ་བ་ལ། སྒྱུར་བག་སྐྱུར་རྩབས་ལ་སོགས་པ་དང་བ་གཅིན་དང་ལན་ཚྭ་ཐམས་ཅད་དང་ཏིལ་མར་ལྷན་

ཅིག་བསྐོལ་ལ་ཚོས་པར་གྱུར་པ་འཐུངས་ན་ཡང་ཡོན་ཏན་དེ་དང་འདྲ་སྟེ། རླུང་ལས་གྱུར་པའི་སྙིང་ནད་དང་། །ལྟོ་སྦོ་བ་དང་སྐྲན་ནད་འཇོམས་པ་ཡིན་ནོ། །བིལ་བ་ར་སྣ་རྒྱ་ཤུག་ནས། །ཐང་ཤིང་དང་ནི་བ་སྤྲུ་བ། །རྒྱ་སྲན་རྩ་བ་ལྔ་པ་རྣམས། །བསྐོལ་བའི་ཆུ་དེར་ཏིལ་མར་ནི། །

བསྐོལ་བ་དེ་ནི་སྣར་བཏང་དང་། །བཏུང་དང་འཇམ་རྩིར་གཏང་བར་བྱ། །ཞེས་བྱ་བ་ལ། བིལ་བ་ལ་སོགས་པ་བསྐོལ་ནས་སྨན་གྱི་ཁུ་བ་ཏིལ་མར་བཞི་འགྱུར་དང་བསྐོལ་ལ་ཏིལ་མར་དེ་སྣ་ནས་བཏང་བ་དང་འཇམ་རྩི་མས་གཏོང་བའི་སྦྱོར་བ་བྱའོ། །བཅའ་སྒ་རྒྱམ་ཚ་བྱེའུ་རུག་པ། །

སླེ་ཏྲེས་ཤིང་ཀུན་མ་ནུ་དང་། །ཨ་རུ་ར་དང་མར་བསྐོལ་བ། །སྙིང་ནད་རྩིབ་ལོགས་གཟེར་སྐྲན་འཇོམས། །ཞེས་བྱ་བ་ལ། བཅའ་སྒ་ལ་སོགས་པའི་སྨན་ལྡེ་གུར་བྱས་པ་འདིར་མ་སྨོས་སུ་ཟིན་ཀྱང་མར་གྱི་བཞི་འགྱུར་གྱི་ཆུ་དང་བསྐོལ་ལ། དེའི་ཁུ་བ་དང་མར་བསྐོལ་བའི་སྨན་

མར་དེ་ཟོས་ན་ཡང་སྙིང་ནད་ལ་སོགས་པ་སེལ་བར་འགྱུར་རོ། །ཁ་རུ་ཚ་ནི་སྲང་གཉིས་དང་། །ཨ་རུ་ར་ནི་ལྔ་བཅུ་དང་། ཞུན་མར་བྲེ་གང་བསྐོལ་རྩིབ་ལོགས། །སྙིང་ནད་སྐྲན་དབུགས་མི་བདེ་སེལ། །ཞེས་བྱ་བ་ལ། ཁ་རུ་ཚ་སྲང་གཉིས་དང་ཨ་རུ་རྡོག་མ་ལྔ་བཅུ་ལྡེ་གུར་བྱས་

པ་ཆུ་བྲེ་བཞིའི་ནང་དུ་བསྐོལ་ལ་དེའི་ཁུ་བ་དང་མར་བྲེ་གང་བསྐོལ་བའི་སྨན་མར་གྱིས་ནི་རྩིབ་ལོགས་ཀྱི་ནད་དང་སྙིང་ནད་ལ་སོགས་པ་འཇོམས་པར་བྱེད་དོ། །སེའུ་འབྲུ་བཅའ་སྒ་ཁ་རུ་ཚ། །ཤིང་ཀུན་སྟར་བུ་ཕྱེ་མར་སྦྱར། །རླུང་ནད་གཞན་དབང་ཅན་སྙིང་ནད། །དབུགས་མི་བདེ་བ་སེལ་

Vol. 201 · folio 259b

མཆོག་ཡིན། །ཞེས་བྱ་བ་ལ། སེའུ་འབྲུ་ལ་སོགས་པའི་སྨན་ལྔ་ཕྱེ་མར་སྦྱར་བས་རླུང་ནད་གཞན་དབང་ཅན་ལ་སོགས་པ་སེལ་བར་བྱེད་པའི་མཆོག་ཡིན་ཏེ། རླུང་ནད་གཞན་དབང་ཅན་ནི་འོག་ནས་བཤད་དོ། །གང་དུ་ཚད་ནི་མ་བཤད་པར། །ཆ་ནི་མཉམ་པོར་བཏགས་

པར་བྱ། །ཞེས་བྱ་བའི་ཚིག་སྨན་གྱི་ཁུ་བ་བསྐོལ་བ་དང་ལྡེ་གུ་དང་ནས་ཐུག་སྦྲུས་པ་དང་ཕྱེ་མ་ལ་སོགས་པ་དྲན་པར་བྱའོ། །མ་ནུ་ཟུར་པ་བཅའ་སྒ་དང་། །སྐྱུར་རྩི་ཆེ་རྩ་ཨ་རུ་རའི། །ལྡེ་གུ་ཡ་བཀྵ་ར་དང་། །མངར་སྐྱུར་ལན་ཚྭ་ལྡན་པ་འཐུངས། །བཅད་སྙམ་སེམས་པའི་གཟེར་

འཇོམས་བྱེད། །ཅེས་བྱ་བ་ལ། མ་ནུ་ཞེས་བྱ་བ་པུཥྐར་མཱུ་ལ་ལ་སོགས་པའི་སྨན་བཏབ་སྟེ་ལྡེ་གུར་བྱས་ཏེ་ཡ་བཀྵ་ར་ལ་སོགས་པ་དང་བཅས་པ་ནི་སྙིང་བཅད་ཅིང་གཏུབ་པ་སྙམ་དུ་སེམས་པའི་ནད་འཇོམས་པར་བྱེད་དོ། །སྐྱུར་རྩི་ཆེན་པོའི་རྩ་བ་ནི་མ་དུ་ལུང་གའི་རྩ་བ་སྟེ། བི་ཛ་པུ་

རའི་རྩ་བའོ། །ཡ་བཀྵ་ར་ནི་ནས་ཚིག་འཁུས་པའི་ཐལ་བའོ། །རྒྱམ་ཚ་ལ་ལ་ཕུད་ཀྵ་ར། །ཤུ་དག་གོ་སྙོད་བཅའ་སྒ་དང་། །ཐང་ཤིང་སྐྱུར་རྩི་ཆེན་པོ་དང་། །ཟུར་པ་མ་ནུ་པ་ལ་ཤ །བསྐོལ་ཁུ་འཇམ་འཐུངས་ཡོན་ཏན་མཚུངས། །ཞེས་བྱ་བ་ལ། རྒྱམ་ཚ་ལ་སོགས་པ་སྨན་

གྱི་ལྡེ་གུ་བསྐོལ་བ་དྲོ་འཇམ་ཙམ་འཐུངས་ན་ཡང་ཡོན་ཏན་གོང་མ་དང་འདྲ་སྟེ་སྙིང་བཅད་པ་སྙམ་དུ་སེམས་པའི་གཟེར་འཇོམས་པ་ཡིན་ནོ། །ཚ་ལྔ་ཟུར་པ་ཨ་རུ་ར། །བུ་རམ་མ་ནུ་སྐྱུར་རྩི་ཆེ། །ཆང་བཏགས་ལྡེ་གུ་མར་ཏིལ་མར། །བརྔོས་ཏེ་རྒྱམ་ཚར་ལྡན་འཐུངས་ན། །སྙིང་

ནད་རྩིབ་ལོགས་མོ་མཚན་ཟུག །སྐྲན་དང་དམུ་རྫིང་ནད་རྣམས་སེལ། །འདི་ལ་སྣུམ་གྱིས་དུགས་བྱས་ཕན། །སྨན་མར་གྱི་ནི་སྦྱོར་བ་ཕན། །ཞེས་བྱ་བ་ལ། རླུང་ལས་གྱུར་པའི་སྙིང་ནད་འདི་ལ་ནི་སྣུམ་གྱིས་དུགས་བྱ་བ་དང་སྨན་མར་གྱི་སྦྱོར་བ་ཕན་ནོ། །སྐོམ་ལ་རྩ་བ་ཆུང་ངུ་

ལྔའམ། །བཅའ་སྒ་དང་ནི་བསྐོལ་བའི་ཆུའམ། །ཆང་གི་དྭངས་མ་ཞོ་ག་ཆུ། །འབྲས་བུའི་རང་སྐྱུར་བླུད་པར་བྱ། །ཞེས་བྱ་བ་ལ། སྐོམ་པ་དང་བཅས་པའི་སྙིང་ནད་ལ་རྩ་བ་ཆུང་ངུ་ལྔ་བསྐོལ་བའི་ཆུ་བླུད་པའམ། བཅའ་སྒ་དང་བསྐོལ་བའི་ཆུ་དྭངས་མའམ་ཞོག་ཆུའམ། འབྲས་བུ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words