ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ

Sanskrit title (Tibetan script, as in the text) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 202 · folio 29b

འཛིན་ཅིང་མི་བརྗེད་པར་འགྱུར་རོ། །ནི་ལི་ཏ་ཀའི་ཚིལ་སྦྲང་རྩི། །ཛཱ་ཏིའི་ཁུ་བ་མར་བཅས་པའམ། །སེང་ལྡེང་ཨ་ས་ནའི་ཆུར་བཅས། །དབང་བོ་བསྡམས་བརྟན་མཛེ་ནད་འཇོམས། །ཞེས་བྱ་བ་ལ། དབང་པོ་བསྡམས་ཤིང་ཡུལ་ཐུབ་པ་དང་ནི་ལི་ཀའི་ཚིལ་སྦྲང་རྩི་དང་མེ་

ཏོག་ཛཱ་ཏིའི་ཁུ་བ་དང་བཅས་པ་ཟོས་ན་མཛེ་ནད་འཇོམས་པར་འགྱུར་རོ། །ཡང་ན་ནི་ལི་ཏ་ཀའི་ཚིལ་མར་དང་ཆ་སྙོམས་པ་ཟོས་ན་ཡང་མཛེ་ནད་འཇོམས་པར་འགྱུར་རོ། །ཡང་ན་ནི་ལི་ཏ་ཀའི་ཚིལ་དང་སེང་ལྡེ་ང་དང་ཨ་ས་ན་བསྐོལ་བའི་ཆུ་དང་བཅས་པ་བླུད་ན་ཡང་མཛེ་ནད་འཇོམས་པར་

འགྱུར་རོ། །སཱ་ལུ་ནས་དང་གྲོ་དང་ནི། ཅི་ཚེ་ཁྲེ་དང་མུདྒ་དང་། །སྲན་ཆུང་དང་ནི་ཏུ་ཀ་རའི། །ཚོད་མ་ཁ་བོ་སྐམ་སའི་ཤ། །འབྲས་བུ་གསུམ་དང་པ་ཏོ་ལ། །སེང་ལྡེང་ནིམ་པ་གོ་བྱེ་སྦྱར། །ཆང་ནི་སྨན་དང་སྦྱར་བ་དང་། །དར་བ་སར་པ་ར་དང་བཅས། །བཟའ་དང་བཏུང་

བ་མཛེ་ལ་ཕན། །སྐྱུར་ཚ་ལན་ཚྭ་ཅན་རྣམས་གནོད། །ཅེས་བྱ་བ་ལ། སཱ་ལུ་ནི་སཱ་ལུ་རྩ་སྣར་ལ་སོགས་པ་སྟེ། དེ་དང་ནས་དང་སྐམ་སའི་ཤའི་བར་གྱི་ཁ་ཟས་འབྲས་བུ་ལ་སོགས་པ་དང་སྦྱར་བ་བཟའ་བར་བྱ་བ་དང་། །དེ་བཞིན་དུ་བཏུང་བར་ནི་ཆབ་ཀྱི་ནང་དུ་སྨན་བཅུག་པ་ལ་སོགས་

པ་བླུད་ན་ཕན་ནོ། །སྐྱུར་བ་དང་ཚ་བ་དང་ལན་ཚྭའི་བག་དང་ལྡན་པའི་བཟའ་བ་དང་། བཏུང་བ་ནི་དེ་གནོད་པ་ཡིན་པར་ཤེས་པར་བྱའོ། །ཞོ་དང་འོ་མ་རླན་ཅན་ཤ། །བུ་རམ་མ་ཤ་ཏིལ་མར་སྤང་། །ཞེས་བྱ་བ་ལ། ཞོ་ལ་སོགས་པ་ནི་མཛེ་ཅན་གྱིས་ཤིན་ཏུ་སྤང་བར་བྱའོ། །པ་ཏོ་ལའི་

རྩ་འབྲས་བུ་གསུམ། །པི་ཤ་ལ་ནི་རེ་རེ་ནི། །ཆ་གསུམ་གྱིས་དབྲི་ཞོ་ཕྱེད་གསུམ། །ཀྱི་ལྕེ་བ་དང་པུ་ཙེ་ཤེལ། །ཞོ་ཕྱེད་དོང་གྲ་བཞི་ཆར་བཅས། །དེ་ལྟར་སྲང་གཅིག་བརྡུངས་པ་དག །བསྐོལ་བའི་ཆུ་ནི་འཐུངས་གྱུར་ན། །ནད་ཀྱི་ཚོགས་ནི་སྦྱོང་བར་བྱེད། །སྨན་དེ་ཞུ་ནས་

སྐམ་ས་ཡི། །རི་དགས་བྱ་ཡི་ཤ་ཁུ་དག །འབྲས་རྙིང་ཆན་དང་སྦྱར་བ་བཟའ། །སྦྱོར་འདི་ཞག་དྲུག་བསྟེན་ན་ནི། །མཛེ་ནད་ཀུན་དང་སྐྲངས་པའི་ནད། །ཕོ་བའི་ནད་དང་གཅིན་སྲི་དང་། །གཟུགས་འཁུམས་གསོ་དཀའི་ནད་རྣམས་དང་། །སྙིང་ནད་ཆུ་སོར་གཟིར་རིམས་

Vol. 202 · folio 30a

སེལ། །ཞེས་བྱ་བ་ལ། པ་ཏོ་ལའི་རྩ་བ་ལ་སོགས་པའི་སྨན་སྣ་རེ་ཞིང་སུམ་ཆ་སུམ་ཆ་དབྲི་བའི་ཞོ་ཕྱེད་སུམ་ཆ། དེས་ན་སྨན་ལྔ་པོ་དག་སྣ་རེ་ཞིང་ཆ་གསུམ་པས་ཕྲི་བའི་ཞོ་ཕྱེད་དང་གཉིས་ཏེ། དེ་ལ་ད་ན་དྲུག་ལ་ཞོ་ཕྱེད་ཡོད་པས་དེ་ལ་པ་ཏོ་ལ་ཞོ་ཕྱེད་དང་

གཉིས། དེ་ལས་ཞོ་ཕྱེད་ཀྱི་སུམ་ཆ་ད་ན་གཉིས་ཀྱིས་དབྲི། དེས་ན་པ་ཏོ་ལ་ད་ན་བཅོ་བརྒྱད་ལས་བཅུ་དྲུག་ཏུ་བྱ། དེ་བཞིན་དུ་ཨ་རུ་ར་དང་། སྐྱུ་རུ་ར་དང་། བ་རུ་ར་དང་བི་ཤ་ལ་ཡང་ད་ན་ཞོ་གཉིས་བྲི་སྟེ། ད་ན་བཅུ་དྲུག་བཅུ་དྲུག་བྱ། དེ་ལྟར་བཅུ་དྲུག་ཕྲག་ལྔ་པ་ད་ན་

བརྒྱད་ཅུ་ཡོད་ལ། ཀྱི་ལྕེ་བ་དང་པུ་ཙེ་ཤེལ་གཉིས་ཆ་གཅིག་གིས་བསྐྱེད་པ་དང་དོང་གྲ་བཞི་ཆ་དང་བཅས་པ་དེ་ལྟར་སྦྱར་ན་ཀྱི་ལྕེ་བ་ཞོ་ཕྱེད་དེ། ད་ན་དྲུག་པུ་ཙེ་ཤེལ་ཡང་ཞོ་ཕྱེད་དེ། ད་ན་དྲུག་དང་གྲ་བཞི་ཆ་སྟེ། ད་ན་བཞི་སྟེ་སྤྱིར་ད་ན་དགུ་བཅུ་རྩ་དྲུག་ལ་སྤྱིར་སྲང་དྲུག་ཡོད་དོ། སྨན་

གཅིག་པ་དེ་བརྡུངས་ལ་ཕྱེ་མར་བྱས་ཏེ་བསྐོལ་བའི་ཆུ་འཐུངས་ན་ནད་ཀྱི་ཚོགས་སྦྱོང་ཞིང་དག་པར་བྱེད་ལ་སྨན་དེ་ཞུ་ནས་སྐམས་རི་དགས་དང་བྱའི་ཤ་ཁུ་དང་འབྲས་རྙིང་པའི་ཆན་ཟོས་ཤིང་སྤྱོད་ལ་སྤྱོད་ལ་སྦྱོར་བ་འདི་ཞག་དྲུག་གི་བར་བསྟེན་ཞིང་ལོངས་སྤྱད་པར་གྱུར་ན་མཛེ་ནད་ལ་སོགས་པ་སེལ་བར་འགྱུར་རོ།

དེ་བཞིན་དུ་རྟག་པའི་རིམས་ལ་སོགས་པའི་རིམས་ཐམས་ཅད་ཀྱང་སེལ་བར་འགྱུར་རོ། །བྱི་དང་ག་ཡི་སྙིང་པོ་དང་། །ཨ་རུ་ར་དང་སྐྱུ་རུ་ར། །སྲང་རེ་དན་ད་སྲང་གསུམ་དང་། །བུ་རམ་སྲང་ནི་བཅུ་གཉིས་དག །རི་ལུར་བྱས་འདི་བྱིན་གྱུར་ན། །མཛེ་དང་ཤ་བཀྲ་དབུགས་མི་བདེ།

ལུད་པ་དམུ་རྫིང་གཞང་འབྲུམ་དང་། །གཅིན་ནད་མཆེར་པའི་རྨེན་བུའི་ནད། །ཐོར་བུ་སྲིན་ནད་སྐྲན་རྣམས་འཇོམས། །གྲུབ་པའི་སྦྱོར་འདི་གནོད་སྦྱིན་ནི། །ནོར་བུ་བཟང་པོས་དགེ་སློང་ཞིག །སྲོག་འདོར་ཉིད་ལ་བཤད་ཅེས་གྲགས། །ཞེས་བྱ་བ་ལ། བྱི་དང་གའི་སྙིང་པོ་ལ་

སོགས་སྤྱིར་སྲང་རེ་རེ་སྲང་གསུམ། །དན་ད་གཅིག་པུ་སྲང་གསུམ། བུ་རམ་སྲང་བཅུ་གཉིས་ཏེ། དེ་དག་སྤྱིར་རི་ལུ་བྱས་པ་དབང་པོ་ཐུལ་ཞིང་བསྡམས་པའི་ནད་ལ་བྱིན་ན། མཛེ་ནད་ལ་སོགས་པ་སེལ་བར་བྱེད་དོ། །སྦྱོར་བ་འདི་ནི་རབ་ཏུ་གྲུབ་པར་གྲགས་པ་ཡིན་ནོ། །གནོད་སྦྱིན་

Vol. 202 · folio 30b

ནོར་བུ་བཟང་པོས་དགེ་སློང་ཞིག་སྲོག་འདོར་དུ་ཉེ་བའི་ཚེ་སྦྱོར་བ་འདི་བཤད་ཅིང་བསྟན་ཏོ་ཞེས་གྲགས་ཏེ། གྲགས་ཞེས་བྱ་བ་ནི་དེ་སྐད་ཟེར་རོ། །ཞེས་ལུང་ལས་འབྱུང་བ་སྟོན་པ་ཡིན་ནོ། །ཐོར་བུ་ནི་ཚོགས་དག་ཏུ་རྩ་བ་ཆེར་འཆོས་པའི་འབྲས་ནད་ལ་བྱའོ། །ཏིག་ཏ་ནིམ་པ་འབྲས་བུ་

གསུམ། །ཤུག་པ་བོང་ང་པི་པི་ལིང་། །མུར་བ་དང་ནི་པ་ཏོ་ལ། །སེར་པོ་རྣམ་གཉིས་པུ་ཙེ་ཤེལ། །ཤུ་དག་ཨིནྡྲ་བ་རུ་ནི། །དུག་མོ་ཡུངས་བཅས་ཆ་སྙོམས་པ། །དན་ད་དུར་བྱིད་བྲ་མ་ཤ་མི། །ཕྱི་མ་བཞིན་དུ་ཉིས་འགྱུར་བྱས། །ཕྱེ་མ་སྦྲང་རྩི་མར་བཅས་ཟོས། །མཛེ་

དང་ཟ་གུ་ཚོར་བ་ཆུང་། །སེལ་བའི་སྨན་གྱི་མཆོག་ཡིན་ནོ། །ཞེས་བྱ་བ་ལ། ཏིག་ཏ་ལ་སོགས་པའི་སྨན་ཆ་མཉམ་པོར་བྱས་ལ། དན་ད་དང་དུར་བྱིད་དང་བྲ་མ་ཤ་མི་ཞེས་བྱ་བ་ཕྱི་མ་བཞིན་ཉིས་འགྱུར་དུ་བྱས་ཏེ། དེས་ན་གལ་ཏེ་ཏིག་ཏ་ཞོ་གཅིག་བྱེད་ན་དན་ད་ཞོ་གཉིས་དུར་བྱིད་ཞོ་

བཞི་བྲམ་ཤ་མི་ཞོ་བརྒྱད་དང་སྦྱར་རོ། །སྨན་དེ་དག་ཕྱེ་མར་ཞིབ་ཏུ་བཏགས་པ་སྦྲང་རྩི་དང་སྦྱར་བ་རྟག་ཏུ་ཟོས་ན་མཛེ་ནད་ལ་ཕན་ནོ། །འབྲས་བུ་གསུམ་དང་པི་པི་ལིང་། །བྱི་དང་ག་དང་སྦྲང་རྩི་ནི། །ཏིལ་མར་མར་སྦྱར་ལྡེ་གུའམ། །ཞེས་བྱ་བ་ལ། འབྲས་བུ་གསུམ་ལ་

སོགས་པའི་ལྡེ་གུ་སྦྱར་བ་ཟོས་ན་ཡང་མཛེ་ནད་ལ་ཕན་ནོ། །ཀ་ཀ་ཨུ་དུམྦཱ་ར་དང་། །ནིམ་པ་གླ་སྒང་བྱི་དང་ག །ཚ་བ་གསུམ་གྱི་ལྡེ་གུ་ནི། །དུག་མོ་ཡུངས་ཀྱི་ཁུ་བར་བཅས། །བླུད་ན་ལྤགས་ནད་ཐམས་ཅད་འཇོམས། །ཞེས་བྱ་བ་ལ། །ཀ་ཀ་ཨུ་དུམྦཱ་ར་ལ་སོགས་པའི་ལྡེ་

གུ་དུག་མོ་ཡུངས་བསྐོལ་བའི་ཁུ་བ་དང་སྦྱར་ཏེ། བླུད་ན་མཛེ་ནད་དུ་གཏོགས་པའི་བགས་པའི་སྐྱོན་ཐམས་ཅད་སེལ་བར་བྱེད་དོ། །ཀ་ཀ་ཨུ་དུམྦཱ་ར་ནི་ཕལ་གུ་སྟེ། ཕྲེད་དུ་ཞེས་བྱའོ། །དུག་མོ་ཡུངས་དང་ཙི་ཏྲ་ཀ །ནིམ་པ་ཐང་ཤིང་སེང་ལྡེང་དང་། །ལོ་མ་བདུན་པ་ཨ་ས་ན། །

ཁུ་བ་སྐོལ་མར་དང་ཨ་རུ་ར། །སྦྲང་རྩི་ལྡན་ཟོས་མཛེ་ནད་འཇོམས། །ཞེས་བྱ་བ་ལ། དུག་མོ་ཡུངས་ལ་སོགས་པའི་སྨན་བསྐོལ་བའི་ཁུ་བའི་ནང་དུ་ཨ་རུ་ར་དང་སྦྲང་རྩི་དང་མར་བཏབ་སྟེ་ཟོས་ན་མཛེ་ནད་ཐམས་ཅད་སེལ་བར་འགྱུར་རོ། །སེང་ལྡེང་ནིམ་པ་སླེ་ཏྲེས་དང་། །པ་ཏོ་ལ་

Vol. 202 · folio 31a

དང་བྱི་ཚེར་བསྐོལ། །སེང་ལྡེང་ལ་སོགས་ལྔ་པ་སྟེ། །ཁྱབ་འཇུག་གིས་ནི་ལྷ་མིན་བཞིན། །མཛེ་ནད་འཕྲལ་དུ་འཇོམས་པར་བྱེད། །ཅེས་བྱ་ལ། སེང་ལྡེང་ནས་བྱི་ཚེར་བར་སྨན་ལྔ་པོ་བསྐོལ་བའི་ཁུ་བ་ནི་སེང་ལྡེང་ལྔ་པ་ཞེས་བྱ་སྟེ། དེས་ནི་མཛེ་

ནད་ཀྱི་རྣམ་པ་འཕྲལ་དུ་འཇོམས་ཤིང་སེལ་བར་བྱེད་དོ། །དཔེར་ན་ལྷ་ཆེན་པོ་ཁྱབ་འཇུག་གིས་ལྷ་མ་ཡིན་རྨེག་མེད་པར་བྱེད་པ་དང་འདྲའོ། །སྐྱེར་པ་ནིམ་པ་སེང་ལྡེང་གི །ཤུན་ལྤགས་བསྐོལ་བས་མཛེ་ནད་སེལ། །ཞེས་བྱ་བ་ལ། སྐྱེར་པ་ལ་སོགས་པ་བསྐོལ་བའི་ཁུ་བ་བླུད་

པས་ཀྱང་མཛེ་ནད་སེལ་བར་བྱེད་དོ། །སྐྱེར་པ་ནིམ་པ་འབྲས་བུ་གསུམ། །པ་ཏོ་ལའི་རྩ་པུ་ཙེ་ཤེལ། །ཤུ་དག་བཅོད་ནི་བསྐོལ་བ་ཡིས། །དམ་ཆོས་ལ་བརྟེན་འཁོར་བ་ལྟར། །ཁྲག་མཁྲིས་ལས་གྱུར་མཛེ་ནད་གཅོད། །སྨན་འདི་ཉིད་དང་བ་ཡི་མར། །བསྐོལ་བས་རླུང་གྱུར་མཛེ་

ནད་རྣམས། །མཆོག་ཏུ་སེལ་བར་བྱེད་པ་ཡིན། །ཞེས་བྱ་བ་ལ། སྐྱེར་བ་ལ་སོགས་པ་སྨན་བསྐོལ་བའི་ཁུ་བ་བླུད་ན་ཡང་ཁྲག་དང་མཁྲི་པ་ལས་གྱུར་པའི་མཛེ་ནད་སེལ་བར་བྱེད་དོ། །དཔེར་ན་དམ་པའི་ཆོས་ལ་ལེགས་པར་བརྟེན་ཅིང་བསྒོམས་པས་འཁོར་བའི་འཆིང་བ་གཅོད་པ་དང་འདྲའོ། །

ཡང་སྐྱེར་པ་ལ་སོགས་པའི་སྨན་འདི་དག་ཉིད་དང་བའི་མར་བསྐོལ་བའི་སྨན་མར་བླུད་ན་རླུང་ལས་གྱུར་པའི་མཛེ་ནད་སེལ་བར་གྱུར་རོ། །སེང་ལྡིང་ནིམ་པ་སྐྱེར་པ་དང་། །སླེ་ཏྲེས་ཐང་ཤིང་སྣ་རེར་བསྐོལ། །ཞེས་བྱ་བ་ལ། དེ་བཞིན་དུ་སེང་ལྡེང་ལ་སོགས་པའི་སྨན་སྣ་རེ་རེ་བསྐོལ་བའི་ཁུ་

བའམ་སྨན་དེ་དག་མར་དུ་བསྐོལ་བ་བླུད་ན་ཡང་མཛེ་ནད་ལ་ཕན་ནོ། །པ་ཐ་སྐྱེར་པ་ཙི་ཏྲ་ཀ །དན་ད་དུག་ཡུངས་པུ་ཙེ་ཤེལ། །བ་གཅིན་ཡང་ན་ཆུ་དྲོན་བཅས། །ཟླ་བ་གཅིག་བླུད་མཛེ་ནད་དང་། །གཞང་འབྲུམ་ཟ་ཁུ་སྐྲན་ནད་དང་། །སྐྱ་རྦབ་མ་ཞུ་སྲིན་ནད་འཇོམས། །ཞེས་བྱ་བ་ལ།

པ་ཏོ་ལ་ལ་སོགས་པའི་སྨན་གྱི་ལྡེ་གུ་བ་གཅིན་དང་སྦྱར་བའམ། ཆུ་དྲོན་དང་སྦྱར་སྟེ་ཟླ་བ་གཅིག་གི་བར་དུ་བླུད་ན་མཛེའི་ནད་ལ་སོགས་པ་འཇོམས་པར་བྱེད་དོ། །རྒྱ་སྐྱེགས་དན་དའི་འབྲས་བུ་གསུམ། །མུར་བ་པ་ཏ་ཙི་ཏྲ་ཀ །ཨ་པ་མར་ག་བྱི་དང་ཀ །ལོ་མ་བདུན་པ་ཚ་བ་གསུམ། །བཙོད་

Vol. 202 · folio 31b

དང་སྐྱེར་པ་བ་ཤ་ཀ །ནིམ་པ་ཐང་ཤིང་རྩ་བ་ལྔ། །གཉིས་པོ་ཕྱེ་མ་བ་གཅིན་སྦྱར། །ཟླ་བ་གཅིག་འཐུངས་ཕན་ཟས་བཟའ། །མཛེ་ཡི་ནད་ཀུན་འཇོམས་པར་བྱེད། །ཅེས་བྱ་བ་ལ། རྒྱ་སྐྱེགས་ལ་སོགས་པ་ནས་རྩ་བ་ཆེན་པོ་ལྔ་དང་། ཆུང་ངུ་ལྔ། གཉིས་པོའི་བར་ཕྱེ་མར་བྱས་པ་དང་

བ་གཅིན་དུ་སྦྱར་ཏེ་ཟླ་བ་གཅིག་གི་བར་དུ་བླུད་ཅིང་ཕན་ཞིང་འཕྲོད་པའི་ཟས་ཟོས་ནས་མཛེའི་ནད་ཐམས་ཅད་སེལ་བར་བྱེད་དོ། །སྐྱེར་པ་པི་པི་ལིང་དོང་གྲ། །བྱི་དང་ག་དང་དོ་བ་རི། །ཙི་ཏྲ་ཀ་དང་ཏ་བྱ་རྣམས། །གོ་རིམས་བཞིན་དུ་ཆ་རེས་བསྐྱེད། །བ་གཅིན་སྦྱར་བའམ་རི་ལུ་ནི། །བྱིན་

ན་མི་བཟད་མཛེ་ཡང་འཇོམས། །ཞེས་བྱ་བ་ལ། སྐྱེར་པ་ལ་སོགས་པ་གོ་རིམས་བཞིན་དུ་ཆ་རེས་བསྐྱེད་པའི་ཕྱེ་མ་བ་གཅིན་དང་སྦྱར་ཏེ་བླུད་པའམ། ཡང་ན་བསྐོལ་ཏེ་རི་ལུར་བྱས་པ་བྱིན་ན་མཛེ་ནད་གསོ་དཀའ་བའམ་མི་བཟད་པ་ཡང་འཇོམས་ཤིང་སེལ་བར་བྱེད་དོ། །ཚ་བ་གསུམ་དང་

འབྲས་བུ་གསུམ། །ཏིལ་དང་གོ་བྱེའི་ཕྱེ་མ་ནི། །མར་དང་སྦྲང་རྩི་ཁ་རར་སྦྱར། །རི་ལུར་བྱས་པ་ཆ་བདུན་པས། །མཛེ་ཡི་ནད་རྣམས་འཇོམས་བྱེད་ཅིང་། །བཅུད་ཀྱིས་ལན་དང་རོ་ཙར་འགྱུར། །ཞེས་བྱ་བ་ལ། ཚ་བ་གསུམ་ཆ་གཅིག །འབྲས་བུ་གསུམ་ཆ་གཉིས་པ།

ཏིལ་གསུམ་པ། གོ་བྱེ་བཞི་པ། མར་ལྔ་པ། སྦྲང་རྩི་དྲུག་པ། ཁ་ར་བདུན་པ་སྟེ། དེ་ལྟ་བུའི་ཆ་བདུན་མཉམ་པོར་བྱས་པའི་སྨན་འདིས་ནི་མཛེའི་ནད་ཐམས་ཅད་འཇོམས་པར་བྱེད་ཅིང་བཅུད་ཀྱིས་ལེན་དུ་འགྱུར་ཞིང་རོ་ཙ་བ་དང་སྟོབས་སྐྱེད་པར་འགྱུར་བ་ཡིན་ནོ། སོ་མ་ར་ཛ་ཙི་

ཏྲ་ཀ །སྐྱེར་པ་དུ་བ་རའི་རུས་པ། །གོ་བྱེ་སྲིན་སྨན་འབྲས་བུ་གསུམ། །བསྟེན་ན་མཛེ་ནད་མ་ལུས་འཇོམས། །ཞེས་བྱ་བ་ལ། སོ་མ་ར་ཛ་ལ་སོགས་པའི་སྨན་བུ་རམ་དང་རི་ལུར་བྱས་པ་བསྟེན་ཞིང་ཟོས་ན་མཛེ་ནད་མ་ལུས་པར་འཇོམས་ཤིང་སེལ་བར་བྱེད་དོ། །སོ་མ་ར་ཛ་བྱི་དང་

ག །གོ་བྱེ་ཙི་ཏྲ་བ་ར་ཧི། །ཨ་རུ་ར་དང་ལང་ག་ལི། །ཏིལ་ནག་པོ་དང་པི་པི་ལིང་། །བུ་རམ་དང་ནི་རི་ལུར་བྱས། །མཛེ་ཡི་ནད་རྣམས་འཇོམས་པར་བྱེད། །ཅེས་བྱ་བ་ལ། སོ་མ་ར་ཛ་ལ་སོགས་པའི་ཕྱེ་མ་གཅིག་ཏུ་བསྡུས་ཏེ་བུ་རམ་དང་རི་ལུར་བྱས་པ་གང་ཡིན་པ་དག་གིས་

Vol. 202 · folio 32a

ཀྱང་མཛེའི་ནད་རྣམས་འཇོམས་པར་བྱེད་དོ། །འདིས་སོ་མ་ར་ཛ་ལ་སོགས་པའི་ཕྱེ་མ་ཇི་སྙེད་ཡོད་པའི་བུ་རམ་ཉིས་འགྱུར་དང་རི་ལུར་བྱས་ཏེ། དེ་ཡང་། ཚད་ནི་རྣམ་པར་མ་བཤད་པར། །ཕྱེ་མ་བུ་རམ་ཉིས་འགྱུར་གཞུག །ཅེས་སྨོས་པ་ཡིན་ནོ། །

ལང་ག་ལི་ནི་བི་ཤ་ལའོ། །སོ་མ་ར་ཛ་པི་པི་ལིང་། །དེ་ཡི་རྩ་བ་བྱི་དང་ག །སྙིང་པོ་ལྕགས་རྐྱག་སྐྱུ་རུ་ར། །ཏིལ་མར་ལྡེ་གུས་མཛེ་ནད་འཇོམས། །ཞེས་བྱ་བ་ལ། སོ་མ་ར་ཛ་ལ་སོགས་པ་དང་ཏིལ་མར་དང་བུ་རམ་རི་ལུ་བྱས་པ་བྱིན་ན་ཡང་ཕན་ནོ། །ཨ་རུ་ར་དང་

གོ་བྱེ་ཏིལ། །བུ་རམ་རི་ལུས་མཛེ་ནད་འཇོམས། །ཞེས་བྱ་བ་ལ། ཡང་ན་ཨ་རུ་ར་ལ་སོགས་པའི་རི་ལུ་བྱིན་ན་ཡང་མཛེ་ནད་ལ་ཕན་ནོ། །སོ་མ་ར་ཛ་བྱི་དང་ག །བུ་རམ་རི་ལུར་བྱས་པའང་ཕན། །ཞེས་བྱ་བ་ལ། སོ་མ་ར་ཛ་དང་བུ་རམ་རི་ལུར་བྱས་ན་ཡང་ཕན་ནོ། །སེང་ལྡེང་

བྲག་ཞུན་བྱི་དང་ག །སྦྲང་རྩི་མར་དང་ལྡན་ཟ་ཞིང་། །ཕན་དང་རན་པར་ཟོས་ན་ནི། །འབྲུམ་ཕྲན་ཤ་བཀྲ་ཤུ་བ་འཇོམས། །ཞེས་བྱ་བ་ལ། སེང་ལྡེང་གི་ཕྱེ་མ་དང་བྲག་ཞུན་དང་བྱི་དང་ག་མར་དང་སྦྲང་རྩི་དང་སྦྱར་བ་ཟ་ཞིང་མཛེ་ལ་ཕན་པའི་ཁ་ཟས་འབྲུམ་ཕྲན་ལ་སོགས་པ་འཇོམས་པར་

བྱེད་པ་ཟོས་ན་ཡང་མཛེ་ནད་ལ་ཕན་ནོ། །ཁ་ར་ལྕགས་ཕྱེ་བྱི་དང་ག །ཙི་ཏྲ་ཀ་དང་སྐྱུ་རུ་ར། །པི་པི་ལིང་གི་ལྡེ་གུ་ཡིས། །མཛེ་ནད་ཤིན་ཏུ་གསོ་དཀའ་འཇོམས། །ཞེས་བྱ་བ་ལ། ཁ་ར་ལ་སོགས་པའི་སྨན་གྱི་ལྡེ་གུ་བྱིན་ན་ཡང་ཤིན་ཏུ་གསོ་དཀའ་ཞིང་ལྕི་བའི་མཚན་ཉིད་འཇོམས་སོ། །

གླ་སྒང་ཚ་གསུམ་འབྲས་བུ་གསུམ། །རྩ་བ་ལྔ་ཉིད་ཐང་ཤིང་བཙོད། །ནིམ་པ་ཤིང་ཚ་ལོ་མ་བདུན། །ཤིང་ཚ་ཙི་ཏྲ་ཀ་དང་ནི། །མུར་བ་པི་ཤ་ལའི་ཕྱེ་མ། །ནས་ཕྱེ་དགུ་ཆ་སྦྲང་རྩི་ནི། །ཆ་གཅིག་སྦྱར་བ་འདི་རྟག་ཏུ། །འཐུངས་ན་མཛེ་ནད་འཇོམས་བྱེད་ཅིང་། །འོར་ནད་སྐྱ་རྦབ་

ཤ་བཀྲར་བཅས། །ཕོ་ནད་གཞང་འབྲུམ་རྒྱུ་རླུགས་དང་། །མཚན་བར་རྡོལ་དང་འབྲུམ་ཕྲན་དང་། །གཡན་པ་ཤུ་བ་ནད་རྣམས་འཇོམས། །ཞེས་བྱ་བ་ལ། གླ་སྒང་ལ་སོགས་པའི་སྨན་ཕྱེ་མར་བཏགས་པ་ནས་ཕྱེ་དགུ་ཆ་དང་། སྦྲང་རྩི་ཆ་གཅིག་ཏུ་སྦྱར་ཏེ་སྐྱོ་མར་བྱས་པ་འཐུངས་ན་

Vol. 202 · folio 32b

མཛེ་ནད་འཇོམས་པར་བྱེད་པ་ཡིན་ནོ། །ཏུ་པ་ར་ཡི་རུས་པའམ། །གོ་བྱེ་སོ་མ་ར་ཛ་དང་། །ཙི་ཏྲ་ཀ་དང་བྲག་ཞུན་རྣམས། །བཅུད་ལེན་ཆོ་ག་ལྟར་བསྟེན་ཕན། །ཞེས་བྱ་བ་ལ། ཏུ་པ་རའི་ནང་གི་རུས་པ་བཅུད་ལེན་གྱི་ཆོ་ག་ལས་བཤད་པའི་ཚུལ་ལྟར་བསྟེན་ན་ཡང་ཕན་ནོ། །དེ་

བཞིན་དུ་གོ་བྱེ་དང་། སོ་མ་ར་ཛ་དང་། ཙི་ཏྲ་ཀ་དང་། བྲག་ཞུན་རྣམས་རེ་རེ་ཞིང་བཅུད་ཀྱི་ལེན་གྱི་ཆོ་ག་ལྟར་བསྟེན་ན་ཡང་མཛེའི་ནད་ལ་ཕན་ནོ། །དེ་ལྟར་ནད་བསལ་ནང་གི་ནི། །ནད་སྦྱངས་ནས་ནི་ཕྱི་རོལ་གྱི། པགས་པར་གནས་ལ་སྨན་བྱུགས་ཕན། །ནད་ཀྱི་དྲི་མ་མ་

དག་ལ། །སྨན་རྣོན་བྱུགས་ན་མཛེ་ནད་ནི། །བསླངས་པས་སླར་ནི་འཕེལ་བར་འགྱུར། །ཞེས་བྱ་བ་ལ། ཚུལ་དེ་ལྟར་མཛེའི་ནད་ནང་དུ་སྦྱངས་ཤིང་བསལ་ནས་པགས་པར་གནས་པའི་ནད་ལ་ནི་སྨན་གྱི་ཕྱི་རོལ་ནས་བསྐུ་བ་ལ་སོགས་པ་ཕན་ཏེ། གང་གི་ཕྱིར་དྲི་མ་ཅན་གྱི་ལུས་མ་

དག་བར་གྱུར་པ་ལས་སྨན་རྣོན་པོས་བྱུགས་ཤིང་བསྐུས་ན་ནད་དེ་བསླངས་པས་སླར་ཞིག་འཕེལ་བར་འགྱུར་བས་ན་དང་པོར་ནང་གི་སྦྱངས་ནས་གཟོད་བསྐུ་བར་བྱའོ། །གཏིང་ཟུག་སྲ་ཞིང་ཀོར་ཀོར་པོའི། །མཛེ་ལ་དུགས་བྱ་སྙི་བ་དང་། །འབུར་བར་གྱུར་ནས་མཚོན་གྱིས་ནི། །ཞལ་ཞལ་

གདབ་ཅིང་བྱུག་པར་བྱ། །ཞེས་བྱ་བ་ལ། མཛེའི་ནད་གཏིང་ཟུག་ཅིང་ཞེན་པ་དང་། སྲ་ཞིང་མཁྲང་བ་དང་། ཟླུམ་བོ་ཀོར་ཀོར་བོའམ་ཏིལ་ཏིལ་དུ་ཆགས་པ་ལ་ནི་སྨན་རྣོ་བ་ལ་སོགས་པས་དུགས་བྱ་ཞིང་དཀྲིས་ལ་འབུར་ཞིང་མཐོ་བར་གྱུར་པ་དང་མཚོན་གྱིས་དྲིལ་ཞིང་ཞལ་ཞལ་བྱས་ལ་སྨན་

གྱིས་བྱུག་ཅིང་བསྐུ་བར་བྱའོ། །གང་ཞིག་པགས་པ་ཀུན་ཉམས་ཤིང་། །མཚོན་གྱིས་གདབ་ཏུ་མི་རུང་བ། །དེ་ལ་ཁྲག་ནི་ཕྱུང་ནས་སུ། །ཐལ་སྨན་རྣོན་པོས་བསྐུ་བར་བྱ། །ཞེས་བྱ་བ་ལ། མཛེ་ནད་གང་པགས་པ་ཀུན་ཉམས་ཤིང་ཞིག་སྟེ། མཚོན་གྱིས་གདབ་ཏུ་མི་རུང་བ་དེ་ལ་

ནི་ནད་ཀྱི་ཁྲག་ཕྱུང་ཞིང་བསལ་ལ་ཐལ་སྨན་རྣོན་པོས་བསྐུ་བར་བྱའོ། མཛེ་ནད་རབ་སྲ་རྩུབ་པ་དང་། །ཚོར་བ་མེད་བརྟན་ཡུན་རིང་ལོན། །སྔགས་བཅས་དུག་ཁུ་བླུད་པ་དང་། །དུག་གི་སྨན་ནི་རྗེས་སུ་བསྐུ། །ཞེས་བྱ་བ་ལ། མཛེའི་ནད་སྲ་ཞིང་རྩུབ་པར་གྱུར་པ་དང་། ཚོར་བ་མེད་

Vol. 202 · folio 33a

ཅིང་བེམ་བེམ་པོར་གནས་པ་དང་། བརྟན་ཞིང་འགྱུར་བ་མེད་པ་དང་། ཡུན་རིང་ཞིང་ལོ་མང་ཞིག་ལོན་པ་ལ་དུག་གིས་བྱུག་ཅིང་བླུད་པར་བྱ་བ་དེ་ཡང་སྔགས་ཀྱིས་བཏབ་པས་བྱུག་ཅིང་བསྐུ་བར་བྱ་བ་ལ། དེའི་འོག་ཏུ་དུག་གི་སྨན་རྗེས་སུ་སྦྱར་ཞིང་བླུད་པར་བྱའོ། །

མཛེ་ནད་རེངས་ཤིང་ཚོར་བ་མེད། །རྔུལ་མི་འབྱུང་ཞིང་གཡའ་བ་ལ། །ལྕི་སྐམ་རྒྱ་མཚོའི་དབུ་བའམ། །མཚོན་གྱིས་བདར་ལ་ལྡེ་གུས་བྱུག །ཅེས་བྱ་བ་ལ། མཛེ་ནད་གང་ལུས་རེངས་ཤིང་འགྱུར་མི་ཤེས་པ་དང་། ཤིན་ཏུ་ཚོར་བ་མེད་ཅིང་བེམ་བེམ་པོར་འདུག་པ་

དང་། འབྱུང་མི་ཤེས་པ་དང་། གཡའ་བ་དང་ལྡན་པའི་མཛེ་ནད་ལ་ནི་ལྕི་བ་སྐམ་པོའམ། རྒྱ་མཚོ་དབུ་བའམ་མཚོན་གྱི་བདར་ཞིང་དྲུད་ལ་དེའི་འོག་ཏུ་ལྡེ་གུས་བསྐུ་བར་བྱའོ། །གླ་སྒང་དོང་གྲ་འབྲས་བུ་གསུམ། །པོ་སོན་ཆ་དང་ཀ་རཉྫ། །ལོ་མ་བདུན་པ་དུག་མོ་ཡུངས། །

རུ་རྟ་སྐྱེར་བ་པྲི་ཡང་ཀུ། །ཡུངས་ཀར་སྦྱོར་བས་ལུས་བཀྲུ་ཞིང་། །ལྡེ་གུས་སློན་སྨན་བཀྲུ་སྨན་དང་། །བཞར་ཞིང་ལུས་ནི་བསྐུས་གྱུར་ན། །པགས་པའི་ནད་དང་མཛེ་ནད་དང་། །སྐྲངས་ནད་སྐྱ་རྦབ་མཛེ་ནད་འཇོམས། །ཞེས་བྱ་བ་ལ། གླ་སྒང་ལ་སོགས་པའི་ལྡེ་གུས་ནི་དོན་

ཐམས་ཅད་གྲུབ་བའི་ལྡེ་གུ་སྟེ། དེ་ལ་ལུས་ཁྲུས་བྱས་པ་དང་། ཡང་དེས་སློན་སྨན་དང་། བཀྲུ་སྨན་གྱི་སྦྱོར་བ་བྱས་པ་དང་། བཞར་བའི་རྗེས་ལ་བསྐུས་ན་པགས་པའི་ནད་ལ་སོགས་པ་སེལ་བ་ཡིན་ནོ། །ཀ་ར་བཱི་ར་ནིམ་པ་དང་། །དུག་མོ་ཡུངས་དང་དོང་ག་དང་། །ཙི་ཏྲ་ཀའི་རྩ་བ་གཅིན་

བསྐོལ། །བསྐུས་ནས་མཛེ་ནད་འཇོམས་པར་བྱེད། །ཅེས་བྱ་བ་ལ། ཀ་ར་བཱི་ར་ལ་སོགས་པའི་སྨན་བ་གཅིན་དང་བསྐོལ་བ་གཟར་བུ་ལ་ཆགས་པ་ཙམ་ཞིག་བླུད་ན་ཡང་མཛེ་ནད་ལ་ཕན་ནོ། །ཀ་ར་བཱི་ར་ཀར་རྩ་བ། །དུག་མོ་ཡུངས་དང་ཀ་རཉྫའི། །བྲས་བུ་སྐྱེར་པའི་ཤུན་ལྤགས་

ནི། །སོ་མ་ན་ཡི་མྱུ་གུར་བཅས། །བསྐུས་ན་མཛེ་འཇོམས་གྲུབ་པ་ཡིན། །ཞེས་བྱ་བ་ལ། ཀ་ར་བཱི་ར་དཀར་པོའི་རྩ་བ་དང་། དུག་མོ་ཡུངས་དང་། ཀ་རཉྗའི་འབྲས་བུ་དང་། སྐྱེར་པའི་ཤུན་ལྤགས་དང་། སོ་མ་ན་ཞེས་བྱ་བ་ཛཱ་ཏིའི་མྱུ་གུ་དང་བཅས་པ་བཏགས་པའི་ལྡེ་གུས་བསྐུས་ན་

Vol. 202 · folio 33b

ཡང་མཛེ་ནད་འཇོམས་པར་མངོན་སུམ་དུ་གྲུབ་ཅིང་མཐོང་བས་ཡིད་ཆེས་པ་ཡིན་ནོ། །ཤྲི་ཤའི་ཤུན་པ་རས་བལ་གྱི། །མེ་ཏོག་དོང་གའི་ལོ་མདང་། །མོན་སྡེའུ་དམར་རུ་བཞི་པོ་ནི། །བཏགས་པའི་ལྡེ་གུས་མཛེ་ནད་འཇོམས། །ཞེས་བྱ་བ་ལ། ཤིང་ཤྲི་ཤའི་ཤུན་ལྤགས་དང་། རས་

བལ་གྱི་ས་བོན་གྱི་མེ་ཏོག་དང་། དོང་གའི་ལོ་མ་དང་། མོན་སྲན་སྔེའུ་དམར་རུ་ཀ་ཀ་མ་ཙི་ཞེས་བྱ་བའི་རྩ་བ་དང་ལོ་མར་བཅས་པ་སྟེ་རྣམ་པ་བཞི་པོ་དེ་དག་བཏགས་པའི་ལྡེ་གུས་བསྐུས་ན་ཡང་མཛེའི་ནད་རྣམས་འཇོམས་ཤིང་སེལ་བར་བྱེད་དོ། །ནིམ་པ་སེར་པོ་རྣམ་པ་གཉིས། །བྱེའུ་རུག་པ་དང་

པ་ཏོ་ལ། །རུ་རྟ་ཨ་ཤྭ་གནྡྷ་དང་། །ཐང་ཤིང་ཤི་ཀྲུ་ཡུངས་ཀར་དང་། །གཡེར་མ་འུ་སུ་གླ་བ་དང་། །ཙ་རོང་ཆ་སྙོམས་ཕྱེ་མར་བཅས། །དར་བ་སྦྱར་བ་ཏིལ་མར་གྱིས། །བསྐུས་པའམ་ལུས་བྱུག་དྲིལ་གྱུར་ན། །མཛེ་ནད་གཡེན་པ་འདུམ་པོར་བཅས། །འབྲུམ་ཕྲན་སྐྲང་

པའི་ནད་རྣམས་སེལ། །ཞེས་བྱ་བ་ལ། ནིམ་པ་ལ་སོགས་པའི་སྨན་ཆ་མཉམ་པོར་ཕྱེ་མར་བྱས་ལ། ཕྱེ་མ་དེ་དག་དར་བ་དང་བསྲེས་ནས་དང་པོར་ལུས་ཏིལ་མར་གྱིས་བསྐུས་ལ་བྱུགས་ཏེ། དེའི་འོག་ཏུ་ལྡེ་གུ་དེས་བསྐུ་ཞིང་དྲེལ་ཕྱིས་བྱས་ནས་མཛེའི་ནད་ལ་སོགས་པ་སེལ་བར་

བྱེད་དོ། གླ་སྒང་དངུལ་རྡོ་དང་ནི་སྐྱེར་བ་དང་། །ནག་ཚུར་ཀ་མ་བི་ལྱ་དང་རུ་རྟ་དང་། །སེང་ཕྲོམ་མུ་ཟི་པོག་ཀར་བྱི་དང་ག །ལྡོང་རོས་བ་བླ་ཀ་ར་བཱི་རའི་ཤུན། །ཕྱེ་མར་བྱས་པ་ཏིལ་མར་གྱིས་བསྐུས་པའི། །སྟེང་དུ་ཕྱེ་མའི་དོང་དུ་འདི་བླུགས་ན། །ཤུ་བ་གཡན་པ་འབྲུམ་བུ་

ཕྲ་མོ་དང་། །རྐང་ཤུ་ལ་སོགས་འབྱུང་བར་མི་འགྱུར་རོ། །ཞེས་བྱ་བ་ལ། ཡང་སྔར་ཏིལ་མར་གྱིས་བསྐུས་པའི་ལུས་ལ་གླ་སྒང་ལ་སོགས་པའི་སྨན་ཕྱེ་མར་བྱས་པ་ཞིབ་ཏུ་བཏགས་པས་ལུས་ཀྱི་སྟེང་དུ་གཏོར་ཞིང་བླུགས་པར་གྱུར་ན་ཤུ་བ་དང་། གཡན་པ་ལ་སོགས་པའི་མཛེ་ནད་ཀྱི་

རྣམ་པ་འབྱུང་བར་མི་འགྱུར་རོ། །སྐམ་པི་ལྱ་ནི་ར་ཛ་ན་གའོ། །མུ་ཟི་ནི་གནྡྷ་པ་ཤ་ན་སྟེ་རྡོ་དྲི་ཅན་ནོ། །ཀ་ར་བཱི་རའི་ཤུན་ལྤགས་ནི་ཨ་ཤྭ་མ་རའི་ཤུན་ལྤགས་སོ། །ཡུངས་ཀར་སྣུ་ཧའི་ཤིང་དུམ་བཏགས། །ལྡེ་གུ་མེ་མ་མུར་བཙོས་ཏེ། །འདོད་ཆགས་ཤུགས་ཀྱི་ངོ་ཚ་བཞིན། །བསྐུས་

Vol. 202 · folio 34a

ན་གླང་ཤུ་འཇིག་པར་བྱེད། །ཅེས་བྱ་བ་ལ། ཡུངས་ཀར་དང་སྣུ་ཧེའི་ཤིང་གི་དུམ་བུའི་ནང་བསྐོལ་བ་བཏགས་པའི་ལྡེ་གུས་སྨན་གྱི་ཕུར་མ་བཙོ་བའི་ཚུལ་དུ་མེ་མ་མུར་གྱི་ནང་དུ་བཙོས་ཏེ་བསྐུས་ན་གླང་ཤུའི་ནད་འཇིག་ཅིང་སེལ་བར་བྱེད་དོ། །ཇི་ལྟར་འདོད་ཆགས་ཀྱི་

ཤུགས་བདོ་བར་གྱུར་ན་ངོ་ཚ་འཇིག་པར་བྱེད་པ་བཞིན་དུ་ལྡེ་གུས་གླང་ཤུ་འཇིག་པར་བྱེད་དོ། །ལྡོང་རོས་བ་བླ་ན་ལེ་ཤམ་ཏིལ་མར། །ཨ་རྐའི་འོ་མའི་ལྡེ་གུས་མཛེ་འཇོམས་བྱེད། །ཅེས་བྱ་བ་ལ། ལྡོང་རོས་ལ་སོགས་པའི་སྨན་ཏིལ་མར་ཨ་རྐའི་འོ་མ་དང་ལྡེ་གུས་བྱས་པ་བསྐུས་ན་

ཡང་ཕན་ནོ། །དེ་བཞིན་ཙི་ཏྲ་མར་ད་ཀ་རཉྫ། །རུ་རྟར་བཅས་པ་བ་གཅིན་བཏག་པའང་ཕན། །ཞེས་བྱ་བ་ལ། ཙི་ཏྲ་མར་ད་དང་། ཀ་ར་ཉྫའི་ས་བོན་དང་། རུ་རྟ་དང་བཅས་པ་བ་གཅིན་དང་བཏགས་ཏེ་བསྐུས་ན་ཡང་མཛེ་ནད་སེལ་བར་བྱེད་དོ། །གུ་གུལ་ཡུངས་ཀར་

ན་ལེ་ཤམ། །ནག་ཚུར་དང་ནི་བྱི་དང་ག །ཤྲཱི་པེ་ཥྚ་དང་སྲ་རྩི་པོག །གླ་སྒང་ལྡོང་རོས་མུ་ཟི་དང་། །རུ་རྟ་དང་ནི་ཀ་མྦི་ལྱཻ། །སེར་པོ་གཉིས་དང་བཅས་པ་ནི། །འཁོར་ལོས་བཙིར་བའི་ཏིལ་མར་བསྲེས། །འདི་ནི་མཚོན་གྱིས་བཞར་ཏེ་བསྐུས། །ཉི་མར་བསྲེགས་ན་མཛེ་ནད་

སེལ། །ཞེས་བྱ་བ་ལ། གུ་གུལ་ལ་སོགས་པའི་སྨན་འཁོར་ལོས་བཙིར་བའི་ཏིལ་མར་བསྲེས་པ་མཚོན་ཆ་ལ་སོགས་པས་བཞར་ཞིང་བདར་བ་ལུས་ལ་བསྐུས་ནས་ཉི་མའི་འོད་ལ་བསྲེགས་ན་མཛེ་ནད་དེའི་མོད་ལ་སེལ་བར་བྱེད་དོ། །ཏ་མ་ལའི་ལོ་མ་ན་ལེ་ཤམ། །རུ་རྟ་ལྡོང་རོས་ནག་

ཚུར་བཅས། །ཟངས་ཀྱི་སྣོད་དུ་ཏིལ་མར་དུ། །ཞག་བདུན་ལེགས་པར་སྦངས་པ་དེས། །ཞག་བདུན་བསྐུ་ཞིང་ཉི་མས་བསྲེག །ཤ་བཀྲ་འཇོམས་པར་བྱེད་པ་ཡིན། །ཤ་བཀྲ་སར་པར་ཟླ་བ་གཅིག །བསྟེན་ཞིང་སྦྱངས་པ་བྱས་ན་སེལ། །ཞེས་བྱ་བ་ལ། ཏ་མ་ལའི་ལོ་མ་ལ་

སོགས་པ་ཟངས་ཀྱི་སྣོད་དུ་བཅུག་ལ་ཏིལ་མར་གྱི་ནང་དུ་ཞག་བདུན་སྦངས་པ་དེས་བསྐུ་ཞིང་བྱུགས་ནས་ཉི་མའི་ཐན་པ་ལ་བསྲེགས་ན་ཤ་བཀྲ་ཟླ་བ་གཅིག་གིས་སེལ་བར་བྱེད། དེ་ཡང་སྐྱུག་སྨན་དང་བཀྲུ་སྨན་གྱི་སྦྱང་བ་བྱས་ན་དེ་སེལ་ཞིང་འཇོམས་པར་འགྱུར་རོ། །ཨ་པ་མརྒའི་ཐལ་བའི་ཆུ། །ལན་

Vol. 202 · folio 34b

བདུན་ལེགས་པར་གཟགས་པ་རུ། །པྲི་ཡང་ཀུ་ཡི་མར་བསྐོལ་བ། །བསྐུས་ན་ཤ་བཀྲ་སེལ་བར་བྱེད། །ཅེས་བྱ་བ་ལ། ཨ་པ་མརྒའི་ཐལ་བའི་ཆུ་ལན་བདུན་གྱི་བར་དུ་ལེགས་པར་གཟགས་ཤིང་འཁུས་པར་བྱས་ལ། དེའི་ནང་དུ་པྲི་ཡང་ཀུའི་མར་བསྐོལ་བས་བསྐུས་ན་ཡང་ཤ་བཀྲའི་ནད་

སེལ་པར་ཡང་འགྱུར་རོ། །ཀ་ཀ་ཛང་གི་རྩ་བ་དང་། །རས་བལ་ས་བོན་འདམ་མ་དང་། །ལ་ཕུག་ས་བོན་དར་བར་སྦྱར། །མིག་དམར་གཟའ་ལ་བསྐུས་ན་ནི། །ཤ་བཀྲ་སེལ་བར་གྲུབ་པ་ཡིན། །ཞེས་བྱ་བ་ལ། ཀ་ཀ་ཛའི་རྩ་བ་ལ་སོགས་པའི་སྨན་དར་བ་དང་སྤྱར་བ་གཟའ་མིག་དམར་ལ་

བབས་པའི་ཞག་ལ་བསྐུས་ན་ཡང་ཤ་བཀྲ་སེལ་བར་བྱེད་ཅིང་མངོན་སུམ་དུ་མཐོང་བས་ཡིད་ཆེས་པ་ཡིན་ནོ། །ཛི་བན་ཏི་དང་སྐྱེར་བ་བཙོད། །ཀམྦི་ལྱེེ་དང་སྤངས་མ་ནི། །འོ་མ་མར་དང་ཏིལ་མར་བསྐོལ། །སྲ་རྩི་ཕོག་དང་སྤྲ་ཚིལ་ནི། །བཏབ་པ་བསྐུས་ན་དེ་ཡིས་ནི། །རྐང་ལག་

ཞིག་པ་སེལ་བར་བྱེད། །པགས་པ་གཅིག་པའི་མཛེ་དང་ནི། །འབྲུམ་ཕྲན་འབྲས་ནི་འབྱེར་བ་ཡི། །མཛེ་ནད་འཇིག་པར་བྱེད་པ་ཡིན། །ཞེས་བྱ་བ་ལ། ཛི་བན་ཏི་ལ་སོགས་པའི་ལྡེ་གུར་བྱས་ལ་འོ་མ་བཞིན་འགྱུར་བཅུག་སྟེ། མར་དང་ཏིལ་མར་དང་ཇི་སྐད་སྨོས་པ་ལྟར་བསྐོལ་ལ་དེའི་ནང་དུ་

སྲ་རྩི་ཕོག་སར་ཛ་ར་ན་ཞེས་བྱ་བ་དང་སྤྲ་ཚིལ་བརྟབ་སྟེ་བསྐུས་ན་རྐང་ལག་ཞིག་ཅིང་འབྲུལ་བ་རྣམས་སེལ་བར་བྱེད་ལ་པགས་པ་གཅིག་པའི་མཛེ་ནད་རྣམས་འཇིག་པར་བྱེད་དོ། །ལོ་མ་བདུན་པའི་རྩ་བ་དང་། །ཤྲཱི་ཤ་ཡི་ནི་ཤུན་ལྤགས་དང་། །སུ་མ་ན་དང་ཙི་ཏྲ་ཀ །ཐལ་ཏྲེས་ནིམ་པའི་ཤུན་པ་

དང་། །ཀ་རཉྫ་དང་ཡུངས་ཀར་དང་། །ཙི་ཏྲ་མར་དང་འབྲས་བུ་གསུམ། །བྱི་དང་ག་དང་ཚ་བ་གསུམ། །སེར་པོ་རྣམས་གཉིས་ཏིལ་མར་དང་། །བ་གཅིན་བཅས་པར་བསྐོལ་བས་ནི། །པགས་པའི་ནད་དང་རྨ་འགྲམས་དང་། །རླུང་དང་བད་ཀན་ལས་གྱུར་པའི། །མཛེ་ཡི་ནད་

ནི་སེལ་བྱེད་དེ། །འདི་ནི་རྡོ་རྗེ་འདྲ་བས་ན། །རྡོ་རྗེ་ཅན་ཞེས་བྱ་བ་ཡིན། །ཞེས་བྱ་བ་ལ། ལོ་མ་བདུན་པའི་རྩ་བ་དང་། ཤྲི་ཤ་ལ་སོགས་པའི་ཤུན་ལྤགས་དང་། ཀ་རཉྫ་ལ་སོགས་པའི་ས་བོན་དང་། འབྲས་བུ་གསུམ་ལ་སོགས་པའི་སྨན་ལྡེ་གུར་བྱས་ལ་བ་གཅིན་བཞི་འགྱུར་དང་ཏིལ་

Vol. 202 · folio 35a

མར་དང་བཅས་པར་བསྐོལ་ན་པགས་པའི་ནད་ལ་སོགས་པ་སེལ་ཞིང་འཇོམས་པར་བྱེད་དོ། །དེས་ན་འདི་ནི་རྡོ་རྗེ་དང་འདྲ་བས་ན་མིང་རྡོ་རྗེ་ཅན་ཞེས་བྱའོ། །ཨེ་རཎྜ་དང་དངུལ་རྡོ་དང་། །གླ་སྒང་ནིམ་པ་ཀ་དང་ནི། །ག་བྲའི་རྩ་བ་ཀ་མྦི་ལྱཻ། །བྱི་དང་ག་དང་ནི་རྒུན་ཐི། །གོ་བྱེ་

ཨིཎྜ་པ་རུ་ནི། །ཐང་ཤིང་ཁྲོན་བུ་གུ་གུལ་དང་། །ལྡོང་རོས་ཤྲི་པི་རུ་རྟ་དང་། །ལན་ཚྭ་ཏ་ལ་བཅའ་སྒ་རྣམས། །ཆ་སྙོམས་སྣུ་ཧའི་འོ་མ་དང་། །ཨརྐ་ཏིལ་མར་ལྷན་ཅིག་བསྐོལ། །ལྡེ་གུ་རྡོ་རྗེ་ཆེན་པོ་སྟེ། །རྡོ་རྗེ་ཅན་པས་ཡོན་ཏན་ལྷག །ཤ་བཀྲ་དང་ནི་གཞང་འབྲུམ་དང་། །འབྲས་

ཀྱི་ཕྲེང་བ་འཇོམས་པར་བྱེད། །ཅེས་བྱ་བ་ལ། ཨེ་རཎྜ་ལ་སོགས་པའི་སྨན་ཆ་མཉམ་དང་ཏིལ་མར་བསྐོལ་ལ་ཨརྒ་དང་སྣུ་ཧའི་འོ་མ་ཏིལ་མར་དང་ཆ་མཉམ་པར་བྱས་ཏེ། དེ་དག་ལྷན་ཅིག་བསྐོལ་བའི་སྨན་མར་ནི་རྡོ་རྗེ་ཆེན་པོ་ཞེས་བྱ་སྟེ། སྔར་གྱི་རྡོ་རྗེ་ཅན་གྱི་ཡོན་ཏན་པས་ཡོན་ཏན་ཆེས་ལྷག་

ཅིང་ཆེ་བ་ཡིན་ལ། ཁྱད་པར་དུ་ཡང་ཤ་བཀྲ་ལ་སོགས་པའི་ནད་སེལ་བར་བྱེད་པ་ཡིན་ནོ། །རུ་རྟ་ཀ་ར་བཱི་ར་དང་། །བྲིང་ག་ར་ཛ་ཨརྐ་དང་། །ཤུ་དག་ཤི་ར་རྒྱམ་ཚ་གཅིན། །ཏིལ་མར་བསྐོལ་བར་དུག་བཅུག་པ། །བསྐུ་བ་མཛེ་ནད་སེལ་བའི་མཆོག །ཅེས་བྱ་བ་ལ། རུ་རྟ་ལ་སོགས་པའི་

སྨན་ལྡེ་གུར་བྱས་པའམ། བ་གཅིན་དང་མར་བསྐོལ་ཏེ་དེའི་ནང་དུ་དུག་བཅུག་པས་བསྐུས་ན་མཛེ་ནད་སེལ་བའི་མཆོག་ཡིན་ནོ། །སྤྲ་ཚིལ་ལི་ཁྲི་གུ་གུལ་དང་། །སྦངས་མ་དངུལ་རྡོ་ཡུངས་ཀར་བསྐོལ། །གཡན་པ་གླང་ཤུ་མྱུར་དུ་སེལ། །ཞེས་བྱ་བ་ལ། །སྤྲ་ཚིལ་ལ་སོགས་པའི་སྨན་

ལྡེ་གུར་བྱས་པ་དང་ཡུངས་ཀར་གྱི་མར་བསྐོལ་བས་ནི་གཡན་པ་ལ་སོགས་པ་སེལ་བར་བྱེད་དོ། །རྒྱ་སྐྱེགས་ཙི་ཏྲ་མར་ད་དང་། །ཤི་བེ་ཤྲི་ཏ་ཚ་བ་གསུམ། །རུ་རྟ་ཡུངས་ཀར་ལ་ཕུག་གི །ས་བོན་སེར་པོ་རྣམ་གཉིས་ཀྱི། །ལྡེ་གུ་དར་བར་སྦྱར་བསྐུས་ན། །ཤུ་བ་ཐམས་ཅད་སེལ་བར་

བྱེད། །ཅེས་བྱ་བ་ལ། རྒྱ་སྐྱེགས་ལ་སོགས་པའི་ལྡེ་གུ་དར་བ་དང་སྦྱར་ཏེ་བསྐུས་ན་ཤུ་བའི་ནད་ཐམས་ཅད་སེལ་ཏོ། །ཞེས་དྲང་སྲོང་རྣམས་ཀྱིས་བཤད་དོ། །ཙི་ཏྲ་ཀ་དང་ཤི་ཀྲུའམ། །སླེ་ཏྲེས་ཐང་ཤིང་ཨ་བ་མར། །སེང་ལྡེང་དྷ་བའི་ལྡེ་གུའམ། །དུར་བྱིད་དན་ད་ཏྲ་བན་ཏི། །རྒྱ་

Vol. 202 · folio 35b

སྐྱེགས་དངུལ་རྡོ་སུག་སྨེལ་ལམ། །པུ་རྞ་རྣ་པའི་ལྡེ་གུ་སྟེ། །ཚིག་རྐང་དྲུག་བཤད་ལྡེ་གུ་དྲུག །ཞོ་ག་ཆུ་དང་སྦྱར་བ་ཡིས། །བསྐུས་ན་བད་ཀན་རླུང་ལས་ནི། །གྱུར་པའི་མཛེ་ནད་སེལ་བར་བྱེད། །ཅེས་བྱ་བ་ལ། ཙི་ཏྲ་ཀ་དང་ཤི་ཀྲུ་ཞེས་བྱ་བའི་པི་པི་ལིང་དཀར་པོ་ཞོ་ག་ཆུ་དང་སྦྱར་

བའི་ལྡེ་གུ་བསྐུས་ན་ཡང་བད་ཀན་དང་རླུང་ལས་གྱུར་པའི་མཛེ་ནད་སེལ་བར་བྱེད་དོ། །དེ་བཞིན་དུ་སླེ་ཏྲེས་དང་ཨ་བ་མརྒ་དང་ཐང་ཤིང་ཞོ་ག་ཆུ་དང་སྦྱར་བའི་ལྡེ་གུ་ཡང་སེང་ལྡེང་དང་། དྷ་བ་བཏགས་པའི་ལྡེ་གུ་དང་། དུར་བྱིད་དང་དན་ད་དང་ཏྲ་བན་ཏིའི་ལྡེ་གུའམ། རྒྱ་སྐྱེགས་

སམ། །དངུལ་རྡོ་དང་སུག་སྨེ་ལ་སྦྱར་བའི་ལྡེ་གུའམ་པུ་རྞ་རྣ་བ་གཅིག་པུའི་ལྡེ་གུ་སྟེ། དེ་ལྟར་ཚིག་རྐང་པ་རེ་རེས་བཤད་པའི་ལྡེ་གུ་དྲུག་པོ་དེ་དག་གང་ཡང་རུང་བ་ཞོ་ག་ཆུ་དང་སྦྱར་བ་དེ་བསྐུས་ན་རླུང་དང་བད་ཀན་ལས་གྱུར་པའི་ནད་སེལ་བར་བྱེད་དོ། །བ་ལ་ཀ་དང་མ་ནུ་དང་། །ཨ་གར་

ནཱ་ག་གེ་སར་དང་། །གནྡྷ་བྷ་དྲ་གླ་བ་དང་། །ཙནྡན་དང་ནི་པུ་ཤེལ་ཙེ། །ཆ་རེས་བསྐྱེད་པའི་ལྡེ་གུ་ཡིས། །བད་མཁྲིས་མཛེ་ནད་སེལ་བར་འགྱུར། །ཞེས་བྱ་བ་ལ། བ་ལ་ཀ་ལ་སོགས་པའི་སྨན་ཆ་བརྒྱད་པོ་ཆ་རེས་བསྐྱེད་པའི་ལྡེ་གུས་བསྐུས་ན་བད་ཀན་དང་མཁྲི་པ་ལས་གྱུར་པའི་

མཛེ་ནད་སེལ་བར་བྱེད་པ་གྲུབ་ཅིང་མངོན་དུ་གྱུར་པ་ཡིན་ནོ། །དེ་ལ་བ་ལ་ཀ་ཞོ་གཅིག །མ་ནུ་ཞོ་གཉིས། །ཨ་རུ་ར་ཞོ་གསུམ། ནཱ་ག་གེ་སར་ཞོ་བཞི། གནྡྷ་བྷ་དྲ་ཞོ་ལྔ། གླ་བ་ཞེས་བྱ་བ་ནི་པེ་ལ་ཞོ་དྲུག །ཙནྡན་ཞོ་བདུན། པུ་ཤེལ་ཙི་ཞེས་བྱ་བ་ཨུ་ཤི་ར་ཞོ་བརྒྱད་སྦྱར་བར་བྱའོ། །ཏིག་

ཏའི་སྨན་མར་བརྒྱ་བཀྲུས་མར། །བསྐུས་ན་མཛེ་ཡི་ཚ་བ་སེལ། །ཞེས་བྱ་བ་ལ། མཛེ་ནད་སེལ་བར་བྱེད་པ་ཚ་བ་དང་སྦྱར་བ་ལ་ནི་སྔར་བཤད་པའི་ཏིག་ཏིའི་སྨན་མར་ཆུའི་ནང་དུ་ལན་དུ་མ་བསྐུས་ན་ཕན་ནོ། །ཏིལ་མར་ཙནྡན་ཤིང་མངར་དང་། །སྟག་ཚེར་བ་དང་ཨུཏྤལ། །བཅས་པ་

བསྐུས་ན་ཕན་པ་ཡིན། །ཞེས་བྱ་བ་ལ། ཡང་ཚ་བ་དང་ལྡན་པའི་མཛེ་ནད་དེ་ལ་ཏིལ་མར་ཙནྡན་དང་ཤིང་མངར་དང་སྟག་ཚེར་བ་ཞེས་བྱ་བ་པྲ་པུ་ཎྜ་རཱི་ཀ་དང་ཨུཏྤ་ལ་སྦྱར་བའི་ལྡེ་གུས་བསྐུས་ན་དེ་ལ་ཕན་ཞིང་སེལ་བར་བྱེད་དོ། །རྣགས་ཤིང་ཡན་ལག་འདྲུལ་བ་དང་། །ལུས་ཚ་འབྲུམ་བུ་ཕྲ་མོ་འབྱུང་། །

Vol. 202 · folio 36a

པགས་པ་མྱགས་དང་བཅས་པ་ལ། །བསིལ་བའི་སྨན་ཆུས་བླུགས་ཤིང་བྱུགས། །གཏར་ག་བཀྲུ་སྨན་བཏང་བ་དང་། ཏིག་ཏའི་སྨན་མར་བྱིན་ན་ཕན། །ཞེས་བྱ་བ་ལ། རྣགས་ཤིང་རུལ་བར་གྱུར་པས་ཡན་ལག་དང་ཉིང་ལག་འདྲུལ་བར་གྱུར་པ་དང་། ལུས་ཚ། འབྲུམ་

བུ་ཕྲ་མོ་ཙག་ཙག་བྱུང་བ་དང་། པགས་པ་མྱགས་ཤིང་ཞིག་པར་གྱུར་པ་ལ་ནི་སྨན་བསིལ་བ་ཅན་ལ་སོགས་པའི་ཆུས་ལུས་ལ་བླུགས་པ་དང་ལྡེ་གུས་བྱུགས་པ་ཕན་ནོ། །དེ་བཞིན་དུ་ནད་དེ་ལ་ནི་གཏར་ག་གདབ་ཅིང་ཁྲག་དབྱུང་བ་དང་། བཀྲུ་སྨན་སྦྱིན་པ་དང་། ཏིག་ཏའི་སྨན་མར་བཟའ་བ་དང་།

བཏུང་བ་དང་། བླུགས་པ་དང་། བསྐུ་བའི་དོན་དུ་སྦྱར་བ་ཕན་ནོ། །སེང་ལྡེང་ནིམ་པ་བ་ཤ་ཀ །དུག་མོ་ཡུངས་དང་འབྲས་བུ་གསུམ། །བྱི་དང་ག་དང་སླེ་ཏྲེས་དང་། །པ་ཏོ་ལ་དང་བ་གཅིན་སྦྱར། །ཕྱི་དང་ནང་ནས་བཏང་གྱུར་ན། །སྲིན་བུ་ལས་གྱུར་མཛེ་ནད་འཇོམས། །ཞེས་

བྱ་བ་ལ། སེང་ལྡེང་ལ་སོགས་པའི་སྨན་བ་གཅིན་དང་སྦྱར་བ་ཕྱི་ནས་བླུགས་པ་དང་། ནང་ནས་བཏུང་བར་སྦྱར་ན་སྲིན་བུ་ལས་གྱུར་པའི་མཛེ་ནད་སེལ་བར་བྱེད་དོ། །རླུང་ཤས་ཆེ་ལ་ཐོག་མར་ནི། །མར་བཏང་བད་ཀན་ཤས་ཆེ་ལ། །སྐྱུག་སྨན་མཁྲིས་པ་ལས་གྱུར་ལ། །གཏར་ག་

གདབ་ཅིང་བཀྲུ་སྨན་གཏང་། །ཞེས་བྱ་བ་ལ། རླུང་གི་ཤས་ཆེ་བའི་མཛེ་ནད་ལ་ནི་དང་པོ་ཁོ་ནར་ཞུན་མར་སྦྱིན་པར་བྱའོ། །བད་ཀན་ཤས་ཆེ་བའི་མཛེ་ནད་ལ་ནི་དང་པོ་ཁོ་ནར་སྐྱུག་སྨན་གཏང་བར་བྱའོ། །མཁྲིས་པ་རྒྱས་པར་གྱུར་བའི་མཛེ་ནད་ལ་ནི་དང་པོར་གཏར་གས་ཁྲག་དབྱུང་ལ་བཀྲུ་སྨན་

གཏང་བར་བྱའོ། ནང་སྦྱངས་ཁྲག་ནི་ཕྱུང་བ་དང་། །གནས་ནི་དག་པར་གྱུར་པ་ལ། །བསྐུ་བ་གང་ཞིག་བྱས་གྱུར་པ། །དེ་ནི་མོད་ལ་བྱང་བར་འགྱུར། །ཞེས་བྱ་བ་ལ། མཛེའི་ནད་གང་ཞིག་ལ་ནང་གི་ནད་བཀྲུ་སྨན་ལ་སོགས་པས་བསལ་ཞིང་ཁྲག་ཕྱུང་ནས་ལུས་ཀྱི་གནས་དག་པར་

བྱས་པ་ལ་ཇི་སྐད་སྨོས་པའི་ལྡེ་གུས་བསྐུས་ན་འཕྲལ་དུ་དེ་ནད་མེད་པར་འགྱུར་རོ། །ནད་གཞི་བསལ་ཞིང་ཁྲག་ནི་ཕྱུང་བ་དང་། །ཕྱི་དང་ནང་ནས་ཞི་བའི་གསོ་བ་བྱས། །སྨན་མར་ཡང་ནི་དུས་སུ་བྱིན་གྱུར་ན། །མཛེ་ཡི་ནད་ནི་གསོ་སླ་ཉིད་དུ་འགྱུར། །ཞེས་བྱ་བ་ལ། མཛེ་ནད་གཞི་

Vol. 202 · folio 36b

སྦྱངས་ཞིང་བསལ་བ་ལ་སོགས་པ་བྱས་པར་གྱུར་ན་མཛེའི་ནད་དེ་གསོ་སླ་ཞིང་བདེ་བླག་ཁོ་ནར་འབྱུང་དུ་རུང་བར་འགྱུར་རོ། །མཛེ་ཅན་ནད་ནི་ལན་མང་སྦྱངས་གྱུར་པ། །དེ་ཡི་སྲོག་བསྲུང་ལན་མང་འབད་བྱ་སྟེ། །ནད་ནི་ལྷག་པར་མང་དུ་ཕྱུང་བས་ཉམ་ཆུང་བ། །རླུང་ལྡོང་མྱུར་དུ་གསོད་པར་བྱེད་པར་

འགྱུར། །ཞེས་བྱ་བ་ལ། མཛེའི་ནད་དང་ལྡན་པ་གང་ཞིག་ནད་ལན་མང་དུ་སྦྱངས་ཤིང་དག་པར་གྱུར་པ་དེའི་ལ་སྲོག་བསྲུང་ཞིང་གནོད་པར་མི་འགྱུར་བར་སྨན་པས་འབད་པར་བྱ་སྟེ། དེ་ཅིའི་ཕྱིར་ཞེ་ན། ནང་གི་ནད་ལྷག་པར་མང་དུ་ཕྱུང་བར་གྱུར་པ་ལ། ཉམས་སྟོབས་ཤིན་ཏུ་བྲི་ཞིང་ཆུང་བར་

གྱུར་པ་ལ། རླུང་གི་ནད་ལངས་ནས་མྱུར་བ་ཁོ་ནར་གསོད་པའི་སྐྱོན་ཡོད་པའི་ཕྱིར་རོ། །ཟླ་བ་ཕྱེད་ཅིང་སྐྱུག་སྨན་བཏང་བ་དང་། །ཟླ་བ་རེ་རེ་ནས་ནི་བཀྲུ་སྨན་གཏང་། །མགོ་བོ་སྦྱང་བ་ཞག་ནི་གསུམ་གསུམ་དང་། །ཟླ་བ་དྲུག་དྲུག་ནས་ནི་གཏར་ག་བྱ། །ཞེས་བྱ་བ་ལ། མཛེ་ཅན་ལ་

ཟླ་བ་ཕྱེད་ཕྱེད་འདས་པ་དང་སྐྱུག་སྨན་བཏང་ཞིང་སློན་དུ་གཞུག་པ་དང་། ཟླ་བ་རེ་རེ་འདས་ནས་བཀྲུ་སྨན་བཏང་ཞིང་འཁྲུར་གཞུག་པ་དང་། ཞག་གསུམ་གསུམ་འདས་པ་དང་མགོ་བའི་བཀྲུ་སྨན་ཇི་སྐད་སྨོས་པ་བཞིན་དུ་བྱ་བ་དང་ཟླ་བ་དྲུག་དྲུག་ནས་གཏར་ག་བྱ་ཞིང་ནད་ཁྲག་དབྱུང་བར་བྱའོ། །

གང་ཞིག་སློན་དང་འཁྲུ་བ་དཀའ་འགྱུར་ཏེ། །མཛེ་ཅན་ནད་ཤས་ཆེ་བས་ཁྱབ་གྱུར་པ། །དེ་ནི་ངེས་པར་གསོ་དཀའ་ཉིད་འགྱུར་བས། །དེ་བས་ནད་ནི་མ་ལུས་དབྱུང་བར་བྱ། །ཞེས་བྱ་བ་ལ། མཛེ་ཅན་གང་ཞིག་སྐྱུག་སྨན་བྱིན་ཡང་སློན་པར་དཀའ་ཞིང་དེ་བཞིན་དུ་བཀྲུ་སྨན་བྱིན་ཡང་

འཁྲུས་པར་དཀའ་བར་གྱུར་པའམ། ཡང་ན་ཅུང་ཟད་ཙམ་ཞིག་སློན་ཞིང་འཁྲུས་ནས་ནད་འཐོན་པར་མ་གྱུར་པའི་མཛེ་ཅན་དེ་ནད་ཀྱི་ཤས་ཆེ་བས་ཁྱབ་པར་གྱུར་པ་ཡིན་ལ། དེ་ལྟ་བུ་དག་ནི་ངེས་པར་གསོ་དཀའ་བའམ། གསོར་མི་རུང་བའི་མཛེ་ནད་དུ་འགྱུར་བས་དེ་བས་ན་མཛེ་ནད་དེའི་ནད་

ཅི་ནས་ཀྱང་མ་ལུས་པར་དབྱུང་བར་བྱ་ཞིང་གཏིང་ཕྱིན་པར་བྱ་བའི་ནད་ཅུང་ཟད་འབྲི་བ་ཙམ་གྱིས་གསོ་བར་ནི་མི་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས་གསོ་བའི་གནས་ལེའུ་བཅུ་དགུ་པའི་

Vol. 202 · folio 37a

རྣམ་པར་འགྲེལ་པའོ།། །།དེ་ནས་ཤ་བཀྲ་དང་སྲིན་བུའི་ནད་གསོ་བ་བཤད་པར་བྱའོ། །ཞེས་བྱ་བ་ལ། སྔར་ནས་གཞི་བཤད་པའི་གོ་རིམས་ཀྱིས་གསོ་བ་ཡང་དེ་ལྟར་བཤད་དགོས་པའི་ཕྱིར་སྐབས་འདིར་ལེའུ་བརྩམས་པ་ཡིན་ནོ། །གང་ཞིག་མཛེ་ནད་པས་

ཀྱང་འཇིགས་འགྱུར་ཞིང་། །མྱུར་དུ་གསོ་དཀའ་ཉིད་དུ་འགྱུར་བས་ན། །ཁང་པ་འབར་བར་གྱུར་པ་ལྟ་བུར་ནི། །ཤ་བཀྲའི་ནད་ཞི་བ་ལ་འབད་པར་བྱ། །ཞེས་བྱ་བ་ལ། ཤ་བཀྲའི་ནད་ལ་ནི་མཛེའི་ནད་པས་ཀྱང་འཇིགས་པར་གྱུར་པ་ཡིན་པས་དེ་ནི་མ་བཅོས་ན་མྱུར་དུ་གསོ་དཀའ་

བ་ཉིད་དུ་འགྱུར་ཏེ། རྒྱུ་དེ་བས་ན་ཤ་བཀྲའི་ནད་དེའི་གསོ་བའི་སྦྱོར་བ་ལ་འབད་ཅིང་བརྩོན་པར་བྱ་སྟེ། དཔེར་ན་ཁང་པའི་མེ་འབར་བར་གྱུར་པ་ལ་གྱུར་པ་ལ་མྱུར་དུ་ཞི་ཞིང་བསིལ་བར་དགོས་པ་དང་འདྲའོ། །ཁྱད་པར་དུ་ནི་དང་པོར་ལུས་ལ་ནི། །སྦྱང་བ་བྱ་བ་ཉེ་བར་སྦྱང་བར་བྱ། །ཞེས་བྱ་བ་ལ། ཤ་

བཀྲའི་ནད་ཐམས་ཅད་ལ་ནི་གསོ་བ་གཞན་པས་ཁྱད་པར་དུ་དང་པོ་ཁོ་ནར་ལུས་ཀྱི་ནད་སྦྱང་བའི་ཆོ་ག་འོག་ནས་སྨོས་པ་ཉེ་བར་སྦྱར་པར་བྱའོ། །ཤ་བཀྲ་ལ་ནི་སོ་མ་ར་ཛའི་ཁུ། བུ་རམ་ཆང་ངམ་ཤ་ཁུ་བཀྲུ་སྨན་ནི། །སྣུ་ཧའི་འོ་མར་བཅས་པ་བླུད་པར་བྱ། །དེ་འཐུངས་ནས་ནི་ལུས་བཀྲུས་ཉམས་

སྟོབས་དག །ཅི་ཡོད་པ་ལས་ཉིན་མཚན་བསྟེན་པར་བྱ། །སྐོམ་དང་སྐྱེས་ན་ཞག་གསུམ་ཐུག་པ་བླུད། །ཅེས་བྱ་བ་ལ། ཤ་བཀྲའི་ནད་ལ་སོ་མ་ར་ཛ་བསྐོལ་བའི་ཁུ་བ་བུ་རམ་དང་ཆང་སྦྱར་ཏེ་བླུད་པ་འམ། ཡང་ན་སོ་མ་ར་ཛ་བསྐོལ་བའི་ཁུ་བ་ཤ་ཁུ་དང་སྦྱར་ལ་བླུད་པར་བྱ་སྟེ། དེ་ནི་བཀྲུ་སྨན་

གྱི་དམ་པའམ། མཆོག་ཡིན་པར་འདོད་ལ། དེ་བས་ན་སོ་མ་ར་ཛའི་ཁུ་བ་དེ་འཐུང་ནས་ལུས་བསྐུས་ཏེ་ཉམས་སྟོབས་ཀྱིས་ཇི་ཙམ་བཟོད་པར་ཉི་ཚན་ལ་བསྟན་ཅིང་འདུག་པར་བྱའོ། །དེས་ཤ་བཀྲ་ཅན་དེ་བཀྲུས་པར་གྱུར་པ་དང་། སྐོམ་དང་སྐྱེད་ན་ཞག་གསུམ་གྱི་བར་དུ་ཐུག་པ་རྐྱང་

རྐྱང་པོ་བླུད་པར་བྱའོ། །ཤ་བཀའི་ལུས་ལ་ཆུ་བུར་བྱུང་གྱུར་ན། །དེ་ནི་ཚེར་མ་དག་གིས་བརྟོལ་བར་བྱ། །ཞེས་བྱ་བ་ལ། གོང་གི་སྨན་དེས་བསྐུས་ནས་ཉི་མ་ལ་འདུག་པ་ན་ཤ་བཀྲ་ཅན་གྱི་ལུས་དེ་ལས་འབྲུམ་བུ་འམ་ཆུ་བུར་བྱུང་བར་གྱུར་ན་ཆུ་བུར་དེ་ཚེར་མས་བརྟོལ་ལ་ཆུ་གཟགས་པར་བྱའོ། །

Vol. 202 · folio 37b

ཆུ་བུར་གཟགས་པར་བྱས་ནས་ནང་རེ་ཞིང་། །སོ་མ་ར་ཛ་དང་ནི་ཨ་ས་ན། །པྲི་ཡང་ཀུ་དང་ཤུ་ཏི་ཆུར་བསྐོལ་བླུད། །ཅེས་བྱ་བ་ལ། དེ་ལྟར་ཆུ་བུར་དེ་བརྟོལ་ཏེ་ཆུ་གཟགས་པའི་འོག་ཏུ་ཉི་མ་རེ་རེ་ཞིང་ནང་པར་གྱི་དུས་སུ་སོ་མ་ར་ཛ་ལ་སོགས་པའི་སྨན་ཆུར་བསྐོལ་བ་བླུད་པར་བྱའོ། །རྒྱ་

སྐྱེགས་ཤིང་ཐལ་བུ་རམ་ཕྲན་སྦྱར་བའི། །ཆུ་ནི་ཉམས་སྟོབས་ཅི་ཡོད་པ་ལ་བླུད། །ཅེས་བྱ་བ་ལ། ཡང་ན་ཆུ་བུར་གཟགས་པའི་འོག་ཏུ་རྒྱ་སྐྱེགས་ཀྱི་ཤིང་པ་ལ་ཤ་ཞེས་བྱ་བའི་ཐལ་བ་དང་། །བུ་རམ་ཕྲ་མོ་ཕ་ནི་རྟ་ཞེས་བྱ་བ་སྦྱར་བའི་ཆུ་ནད་པའི་ཉམས་སྟོབས་ཅི་ཡོད་པ་ལས་ཟླ་བ་ཕྱེད་ཀྱི་

བར་དུ་ནང་རེ་བླུད་པར་བྱའོ། །བལ་གུ་སྐྱུ་རུ་རའི་ཤུན་དུག་མོ་ཡུངས། །ཁུ་བ་སོ་མ་ར་ཛར་བཅས་པ་བླུད། །དྲོ་བར་འདུག་ནས་ཆུ་བུར་བྱུང་བ་ན། །ལན་ཚྭ་མེད་ཟས་དར་བར་བཅས་པར་སྦྱིན། །ཞེས་བྱ་བ་ལ། སོ་མ་ར་ཛའི་ལྡེ་གུ་ཤིང་བལ་གུ་དང་སྐྱུ་རུ་ར་ལ་སོགས་པའི་ཤུན་པ་

བསྐོལ་བའི་ཁུ་བ་དང་སྦྱར་ཏེ་བླུད་ནས་ཤ་བཀྲ་ཅན་དེ་ཉི་ཚན་དྲོ་བ་ལ་འདུག་ཏུ་བཅུག་ནས་ཆུ་བུར་བྱུང་བར་གྱུར་པ་དང་། ཚྭ་མེད་པའི་ཟས་དར་བ་དང་བཅས་པ་སྦྱིན་པར་བྱའོ། །བ་གཅིན་ཙི་ཏྲ་ཀ་དང་ཚ་བ་གསུམ། །སྦྲང་རྩིར་སྦྱར་བ་མར་གྱི་སྣོད་དུ་གཞག །ཟླ་ཕྱེད་ལོན་ནས་ཤ་བཀྲ་ཅན་

ལ་བླུད། །འདི་ལ་མཛེ་ནད་གསོ་བའི་ཆོ་གའང་བྱ། །ཞེས་བྱ་བ་ལ། བ་གཅིན་དང་། ཙི་ཏྲ་ཀ་དང་། ཚ་བ་གསུམ་སྦྱར་བའི་ནང་དུ་སྦྲང་རྩི་བཏབ་ལ་རྫ་མར་བཅུག་པའི་སྣོད་ཀྱི་ནང་དུ་ཟླ་བ་ཕྱེད་ཀྱི་བར་དུ་བཞག་ལ། དེའི་འོག་ཏུ་བླུད་པར་བྱ་ཞིང་ཡང་ཤ་བཀྲའི་ནད་ཀྱིས་བཏབ་པ་འདི་ལ་མཛེའི་

ནད་ཀྱི་གསོ་བའི་ཆོ་ག་ཇི་སྐད་བཤད་པ་བྱས་ན་ཡང་ཕན་ནོ། །ཡང་ན་བྲིང་ག་ར་ཛ་ལྕགས་སྣོད་བཅུག །ཏིལ་མར་ནང་དུ་བརྔོས་པ་སྦྱིན་བྱ་ཞིང་། །ཨ་ས་ན་ཡི་ས་བོན་འོ་མར་བསྐོལ། །དེ་རྗེས་བླུད་ན་ཤ་བཀྲ་འཇོམས་པར་བྱེད། །ཅེས་བྱ་བ་ལ། ཡང་ཤ་བཀྲའི་ནད་ཀྱིས་བཏབ་པ་

ལ། བྲིང་ག་ར་ཛ་ལྕགས་ཀྱི་སྣོད་ཀྱི་ནང་དུ་བཅུག་སྟེ། ཏིལ་མར་གྱིས་བརྔོས་པ་བྱིན་ནས། དེའི་རྗེས་ལ་ཨ་ས་ནའི་ས་བོན་ལོ་མར་བསྐོལ་བ་བླུད་ན་ཤ་བཀྲའི་ནད་འཇོམས་པར་བྱེད་དོ། །དོང་ག་ཨརྐ་པུ་ཏི་ཀ་ར་ཉྫ། །སྣུ་ཧ་ཛཱ་ཏིའི་ལོ་མ་བ་གཅིན་བཏགས། །ལྡེ་གུ་བསྐུས་ན་ཤ་བཀྲ་གཞང་

Vol. 202 · folio 38a

འབྲུམ་དང་། །ཤུ་བ་གཡན་པ་རྨ་འགྲམས་སེལ་བར་བྱེད། །ཅེས་བྱ་བ་ལ། དོང་ག་ནས་སྣུ་ཧ་དང་ཛཱ་ཏིའི་བར་གྱི་ལོ་མ་བ་གཅིན་དང་ལྷན་ཅིག་ཞིབ་ཏུ་བཏགས་པའི་ལྡེ་གུས་བསྐུས་ན་ཤ་བཀྲ་ལ་སོགས་པའི་ནད་སེལ་བར་བྱེད་དོ། གླང་ཆེན་གཟིག་གི་པགས་བསྲེགས་

ཏིལ་མར་དང་། །སྦྱར་བ་བསྐུས་ན་ཤ་བཀྲ་སེལ་མཆོག་ཡིན། །ཞེས་བྱ་བ་ལ། གླང་པོ་ཆེའི་པགས་པ་དང་། །གཟིག་གི་པགས་པ་མེའི་ནང་དུ་བསྲེགས་པ་ལ་ཏིལ་མར་དང་བཅས་པའི་ལྡེ་གུས་བསྐུས་ན་ཡང་ཤ་བཀྲའི་ནད་སེལ་བའི་མཆོག་དམ་པ་ཡིན་ནོ། །སྦུར་བ་དྲི་ངན་དོང་གའི་འོ་མ་དང་། །

སྦྱར་ཏེ་བསྐུས་པ་གཅིག་པུས་ཤ་བཀྲ་སེལ། །ཞེས་བྱ་བ་ལ། སྦུར་བ་དྲི་ང་ཞིང་གནག་པ་གང་ཡིན་པ་དེ་དོང་གའི་ཤིང་གི་འོ་མ་དང་སྦྱར་ཏེ་ཤ་བཀྲ་ལ་བསྐུས་ན་རྫས་ཀྱི་སྦྱོར་བ་གཞན་དང་མ་འདྲེས་པ་གཅིག་པུ་དེས་ཀྱང་ཤ་བཀྲའི་ནད་སེལ་བར་བྱེད་དོ། ཆུ་བུར་བསྐྱེད་ཕྱིར་གོ་བྱེ་ཆམ་ཆོམ་

བརྡུངས། །ནུབ་མོ་བ་གཅིན་ལ་སྦངས་ཉི་གྲིབ་བསྐོམ། །དེ་ལྟར་ལན་གསུམ་བྱས་ཏེ་ཞིབ་ཏུ་བཏགས། །སྣུ་ཧའི་འོ་སྦྱར་བསྐུས་ན་ཤ་བཀྲ་འཇོམས། །ཞེས་བྱ་བ་ལ། ཤ་བཀྲ་ལས་ཆུ་བུར་བསྐྱེད་ཅིང་འབྱུང་བར་བྱ་བའི་ཕྱིར་གོ་བྱེ་ཞེས་བྱ་བ་བསེ་ཤིང་གི་འབྲས་བུ་ཆམ་ཆོམ་བརྡུངས་ཏེ་ནུབ་མོ་བ་

གཅིན་གྱི་ནང་དུ་སྦངས་ནས་ཉིན་པར་གྲིབ་མ་ལ་བསྐམས་ཏེ་ཚུལ་དེ་ལྟར་ལན་གསུམ་སྦངས་ཤིང་བསྐམས་ནས་དེའི་འོག་ཏུ་དེ་ཞིབ་པར་བཏགས་ལ། ལྡེ་གུ་སྦྱར་ཏེ། ཤིང་སྣུ་ཧ་ཞེས་བྱ་བ་ཤཱི་ཁཎྜ་འབྱུང་བའི་འོ་མ་དང་སྦྱར་ཏེ་བསྐུས་ན་ཤ་བཀྲའི་ནད་འཇོམས་ཤིང་སེལ་བར་བྱེད་དོ། །སྦྲུལ་ནག་བསྲེགས་

པ་ལས་བྱུང་སྣག་ཚ་ནི། །བ་རུ་ར་ཡི་མར་དང་སྦྱར་ཏེ་བསྐུ། །ཞེས་བྱ་བ་ལ། སྦྲུལ་ནག་པོ་སྣོད་ཁ་སྦྱར་བའི་ནང་དུ་དུ་བ་མ་ཤོར་བར་བསྲེགས་པའི་ཐལ་བ་སྣག་ཚ་ལྟར་གྱུར་པ་དེ་བ་རུ་རའི་ཚི་གུ་བཙིར་བའི་ཁུ་བ་མར་དང་སྦྱར་ཏེ་བསྐུས་ན་ཡང་ཤ་བཀྲ་སེལ་བར་བྱེད་དོ། །དེ་བཞིན་རྨ་བྱའི་མཁྲིས་པ་

བསྲེགས་པ་འམ། །བ་ལ་ཀ་བསྲེགས་རྨ་བྱའི་མཁྲིས་བསྲེགས་ཕན། །ཞེས་བྱ་བ་ལ། རྨ་བྱའི་མཁྲིས་པ་བསྲེགས་པ་བསྐུས་པ་འམ། བ་ལ་ཀ་བསྲེགས་པའི་ཐལ་བ་འམ། རྨ་བྱའི་མཁྲིས་པ་བསྲེགས་ཏེ་བསྐུས་ན་ཡང་ཤ་བཀྲའི་ནད་ལ་ཕན་ནོ། །སོ་མ་ར་ཛའི་ས་བོན་ཕུལ་གང་དང་། །

Vol. 202 · folio 38b

བ་བླ་བཞི་ཆ་དག་ནི་བསྲེགས་ནས་སུ། །པ་ཡི་གཅིན་དང་སྦྱར་ཏེ་བཏགས་བསྐུས་ན། །ཤ་བཀྲ་ལྤགས་མདོག་འདྲ་བར་བྱེད་པའི་མཆོག །ཅེས་བྱ་བ་ལ། སོ་མ་ར་ཛའི་ས་བོན་ལས་ཕུལ་གང་སྟེ་སྲང་བཞི། བ་བླ་དེའི་བཞི་ཆ་སྟེ། སྲང་གཅིག་གཅིག་ཏུ་བསྲེས་ནས་བའི་གཅིན་དང་སྦྱར་ཏེ་

བསྐུས་ན་ཡང་ཤ་བཀྲའི་ནད་དེ་པགས་པ་གཞན་དང་མདོག་འདྲ་བར་བྱེད་པའི་མཆོག་ཡིན་ནོ། །གླང་ཆེན་རྟུག་པ་ལེགས་བསྲེགས་ཐལ་བ་ནི། །གླང་ཆེན་གཅིན་དང་བསྲེས་ཏེ་གཟགས་གྱུར་པ། །བྲེ་བཅུ་དྲུག་དང་སོ་མ་ར་ཛ་ཡི། །ས་བོན་བཅུ་ཆས་བཏབ་བསྐོལ་སྦྱིན་བག་གྱུར། །མང་དུ་

བདར་བ་དེ་ཡིས་བསྐུས་ན་ནི། །ཤ་བཀྲའི་ནད་ནི་རྣམ་པར་འཇོམས་འགྱུར་ཞིང་། །མཛེའི་ནད་དམ་སྨེ་བ་ནག་པོའམ། །ཤ་ལྷག་སྐྱེས་པའི་རྨ་ནི་སྦྱོང་བར་བྱེད། །ཅེས་བྱ་བ་ལ། གླང་པོ་ཆེའི་རྟུག་པ་ལེགས་པར་བསྲེགས་པའི་ཐལ་བ་ཡང་། གླང་པོ་ཆེའི་གཅིན་དང་ལྷན་ཅིག་ཏུ་བསྲེས་

པ་ལན་མང་དུ་གཟགས་པའི་ཁུ་བ་བྲེ་བཅུ་དྲུག་ཙམ་གྱི་ཚད་ལ་སོ་མ་ར་ཛའི་ས་བོན་བཅིན་ཁུའི་བཅུ་ཆ་བཏབ་སྟེ་བསྐོལ་ལ་དེ་ཚོས་ནས་སྦྱིན་བག་འབྱར་བ་གཅན་དུ་གྱུར་པ་དང་། ཤ་བཀྲའི་ནད་ལྕི་བ་སྐམ་པོ་ལ་སོགས་པས་མང་དུ་བདར་ཏེ། ལྡེ་གུ་དེས་བསྐུས་ན་ཤ་བཀྲའི་ནད་འཇོམས་པར་

འགྱུར་ལ། དེ་བཞིན་དུ་མཛེ་ནད་ལ་སོགས་པའི་ནད་ལ་ཡང་དང་པོར་བདར་ཏེ་དེས་བསྐུས་ན་སྦྱོང་ཞིང་སེལ་བར་བྱེད་དོ། །གོ་བྱེ་ཙི་ཏྲ་ཀ་དང་སྣུ་ཧ་དང་། ཨརྐའི་རྩ་བ་དང་ནི་འོལ་མ་སེ། །དེ་བཞིན་ཚ་བ་གསུམ་དང་དུང་དང་ནི། །སྤངས་མ་རུ་རྟར་བཅས་དང་ལན་ཆྭ་ལྔ། །ཐལ་བ་གཉིས་དང་ལངྒ་

ལི་བཏགས་ཕྱེ། །སྣུ་ཧ་ཨརྐའི་འོ་མར་བསྐོལ་ནས་ནི། །སྐ་བར་གྱུར་བ་ལྕགས་ཀྱི་ནང་དུ་གཞག དེ་ནི་ཐུར་མས་བསྐུས་ན་མཛེ་ནད་དང་། །ཤ་བཀྲ་སྨེ་བ་ནག་པོར་གྱུར་པ་དང་། །མཛེར་བ་གཞང་འབྲུམ་པགས་པའི་རྨེན་བུ་སེལ། །ཞེས་བྱ་བ་ལ། ཤིང་སྣུ་ཧ་དང་ཨརྒའི་འོ་མའི་ནང་དུ་

གོ་བྱེ་ལ་སོགས་པའི་སྨན་ཕྱེ་མར་བྱས་ཏེ་བསྐོལ་ནས་འོ་མ་དེ་སྐ་བར་གྱུར་པ་དང་དེ་ཐུར་མས་བླངས་ནས་བསྐུས་ན་མཛེ་ནད་ལ་སོགས་པ་སེལ་བར་བྱེད་དོ། །སྦྱང་བྱས་གཏར་ག་གདབ་པ་དང་། །རྩུབ་ཆོས་ཕྱེ་ཟན་ཟོས་གྱུར་པས། །སྡིག་པ་ཟད་པར་གྱུར་པ་ཡི། །འགའ་ཞིག་གིས་ནི་ཤ་

Vol. 202 · folio 39a

བཀྲ་འབྱུང་། །ཞེས་བྱ་བ་ལ། ཤ་བཀྲའི་ནད་སྐྱེས་པར་གྱུར་ནས་སྐྱུག་སྨན་དང་བཀྲུ་སྨན་གྱིས་སྦྱང་བ་བྱས་པ་དང་། གཏར་ག་གདབ་ཅིང་ཁྲག་དབྱུང་བ་དང་། རྩུབ་ཆོས་ཀྱི་རྣམ་པ་ཁ་བ་དང་། ཕྱེ་ཟན་ཟོས་པར་གྱུར་པ་ལ་ནི་སྡིག་པ་ཟད་ཅིང་བསོད་ནམས་དང་ལྡན་པའི་

མི་འགའ་ཞིག་གིས་ཤ་བཀྲ་འབྱང་བར་འགྱུར་གྱི་ཐམས་ཅད་ནི་མ་ཡིན་ནོ། །ཁོང་པའི་སྲིན་ཡོད་སྣུམ་དུགས་བྱེད། །བུ་རམ་འོ་མ་ཉ་སོགས་ཀྱིས། །བད་ཀན་སྲིན་བུ་བསླངས་ནས་ནི། །ནུབ་མོ་དེ་ནི་བདེ་བར་གནས། །བྱེའུ་རུག་སོགས་སྡེ་བ་གཅིན་དང་། །ཆུ་ཕྱེད་བཅས་པ་བསྐོལ་ནས་ནི། །

ཁུ་བ་དེའི་ནང་པི་པི་ལིང་། །པོ་སོན་ཆ་དང་བྱི་དང་ག །ཏིལ་མར་སྭ་རྫི་ཀྴ་རར་བཅས། །མས་གཏོང་བས་ནི་གཏང་བར་བྱ། །ཞེས་བྱ་བ་ལ། སྲིན་བུ་ཁོང་པ་ན་ཡོད་པའི་ནད་པ་ལ་ནི་སྣུམ་གྱིས་ཤེས་པར་བྱས་ལ། དེའི་འོག་ཏུ་དུགས་བྱས་ནས་བུ་རམ་དང་འོ་མ་དང་ཉའི་ཤ་ལ་སོགས་པས་བད་ཀན་

དང་སྲིན་བུ་བསླངས་ཤིང་གནས་ལ་བཀོད་ལ་ནུབ་མོ་དེ་བདེ་བར་གནས་ཤིང་གཉིད་ལོག་ལ། ནད་པར་བྱེའུ་རུག་པ་ལ་སོགས་པའི་སྡེ་ཚན་བ་གཅིན་དང་ཆུ་བ་གཅིན་ཕྱེད་བླུགས་པའི་ནང་བསྐོལ་ལ། ཁུ་བའི་ནང་དུ་པི་པི་ལིང་ལ་སོགས་པའི་ལྡེ་གུ་བཏབ་ལ་ཏིལ་མར་དང་སྭ་རྗི་ཀ་ཀྵ་ར་དང་བཅས་པའི་ནས་

གཏོང་བའི་བཀྲུ་སྨན་གཏང་བར་བྱའོ། །དེ་ཉིད་དེ་ལ་དེ་ཉིད་དམ། །དུར་བྱིད་ལྡེ་གུ་པོ་སོན་ཆ། །པི་པི་ལིང་ནི་ཁུ་བར་བསྲེས། །བཀྲུ་སྨན་དེ་ལ་བླུད་པར་བྱ། །ཞེས་བྱ་བ་ལ། དེའི་འོག་ཏུ་ཉིན་ཞག་དེ་ཉིད་ལ། ལྟོ་ན་སྲིན་བུ་ཡོད་པའི་ནད་པ་དེ་ལ་ནི་རུ་ཧ་མས་གཏོང་བ་དེ་ཉིད་བླུད་པར་བྱ་བའམ། དུར་

བྱིད་དང་ལྡེ་གུ་པོ་སོན་ཆ་དང་པི་པི་ལིང་བསྐོལ་པའི་ཁུ་བ་དང་བསྲེས་པའི་བཀྲུ་སྨན་བླུད་པར་བྱའོ། །དེ་ལྟར་སྟེང་འོག་སྦྱང་བྱས་ནས། །ཚ་བ་ལྔར་ལྡན་ཐུག་སོགས་བླུད། །ཚ་དང་ཁ་དང་བསྐ་བ་ཡི། །སྨན་བསྐོལ་ཆུ་ནི་བླུད་པར་བྱ། །ཞེས་བྱ་བ་ལ། དེ་ལྟར་སྟེང་དང་འོག་དང་འོག་ནས་སྦྱང་བར་བྱས་པའི་རྗེས་ལ་

ནད་པ་དེ་ལ་ཚ་བ་ལྔ་དང་ལྡན་པའི་ཐུག་པ་ལ་སོགས་པའི་རིམ་པ་བླུད་པར་བྱའོ། །དེ་བཞིན་དུ་སྨན་ཚ་བ་དང་། ཁ་བ་དང་བསྐ་བ་དང་ལྡན་པའི་སྨན་ཆུ་བསྐོལ་བ་བླུད་པར་བྱའོ། །དུས་སུ་བྱི་དང་གའི་ཏིལ་མར། །འཇམ་རྩེ་དེ་ལ་གཏང་བར་བྱ། །ཞེས་བྱ་བ་ལ། བཀྲུ་སྨན་དང་སྐྱུག་སྨན་བཏང་བའི་

Vol. 202 · folio 39b

རྗེས་ལ། སྲིན་བུ་ཡོད་པའི་ནད་པ་དེ་ལ་འཇམ་རྩི་གཏང་བར་འོས་པའི་དུས་སུ་བྱི་དང་གའི་ཏིལ་མར་གྱི་འཇམ་རྩི་མས་གཏོང་བར་བྱའོ། །མགོ་ཡི་སྲིན་བུར་མགོ་ནད་ནི། །གསོ་བར་བྱ་བའི་རིམ་པ་བྱ། །ཚ་དང་ཁ་བ་ཤས་ཆེ་ཞིང་། །སྣུམ་ཉུང་ཁ་ཟས་སྦྱིན་པར་བྱ། །ཞེས་བྱ་བ་ལ། མགོ་

བོ་ལ་བརྟེན་ཞིང་གནས་པའི་སྲིན་བུ་ཡོད་པ་ལ་ནི་མགོ་བོའི་ནད་གསོ་བ་ལས་བཤད་པའི་སྨན་གྱིས་གསོ་བའི་རིམ་པ་བྱ་ཞིང་ཁ་ཟས་ཚ་བ་དང་ཁ་བའི་ཤས་ཆེ་ཞིང་དེ་ལྟ་བུ་ལས་གཞི་བླངས་པ་སྦྱིན་ཞིང་སྣུམ་ཆུང་བའི་ཁ་ཟས་སྦྱིན་པར་བྱའོ། །བྱི་དང་ག་དང་པི་པི་ལིང་། །པི་པི་ལིང་རྩ་ན་ལེ་ཤམ། །ན་

ལེ་ཤམ་ནི་དཀར་པོ་དང་། སྭ་རྫི་ཀ་ནི་ཐལ་བར་བཅས། །ནས་ཐུག་དར་བ་བཙོས་པ་བླུད། །ཅེས་བྱ་བ་ལ། བྱི་དང་ག་ལ་སོགས་པའི་སྨན་དང་བཅས་པའི་ནས་ཐུག་དར་བར་བཙོས་པ་བླུད་པར་བྱའོ། །གི་རི་ཀར་ནི་ཤི་ཤ་ཀ །པ་རི་པ་ཏྲ་ཀེ་དུ་ཀ། །པ་ལ་ཤའི་འབྲས་བ་ཏུ་ར། །སུ་ཏི་ཀ་ནི་སོ་སོར་

བསྐོལ། །ཁུ་བ་སྦྲང་རྩི་བཅས་པའམ། །ཞེས་བྱ་བ་ལ། གི་རི་ཀར་ནི་ལ་སོགས་པའི་སྨན་སྣ་གང་ཡང་རུང་བ་སོ་སོར་བསྐོལ་བའི་ཁུ་བ་དང་། བྱིའུ་རུག་པ་དང་སྦྲང་རྩིེར་སྦྱར་བ་བླུད་པར་བྱའོ། །བྱིའུ་རུག་པ་སོགས་སྦྲང་རྩི་སྦྱར། །ཞེས་བྱ་བ་ལ། ཡང་ན་བྱིའུ་རུག་པ་ལ་སོགས་པ་

སྟེ། བྱིའུ་རུག་པ་གཉིས་དང་ཕ་ནི་ཏ་ཞེས་བྱ་བ་ལ་སོགས་པའི་སྨན་སྣ་རེ་རེ་སྦྲང་རྩི་དང་སྦྱང་བའི་ལྡེ་གུ་སྦྱིན་པར་བྱའོ། །རྟ་སྦངས་ཕྱེ་མ་བྱི་དང་ག །བསྐོལ་བའི་ནང་སྦངས་མང་དུ་བཟའ། །སྦྲང་རྩིར་བཅས་པའི་ལྡེ་གུའམ། །འབྲས་བུ་གསུམ་ཁུར་སྦངས་པ་སྦྱིན། །མགོ་བོའི་སྲིན་བུའི་

ནད་ལ་ནི། །དེ་ཡི་ཕྱེ་མ་བུང་པར་བྱ། །ཞེས་བྱ་བ་ལ། ཡང་ན་རྟ་སྦངས་ཀྱི་ཕྱེ་མ་བྱི་དང་ག་དང་བསྐོལ་བའི་ནད་དུ་སྦྱངས་ཤིང་བསྲེས་པ་ལན་མང་དུ་བཟའ་བ་འམ། ཡང་ན་རྟ་སྦངས་ཀྱི་ཕྱེ་མ་སྦྲང་རྩི་དང་བཅས་པའི་ལྡེ་གུའམ། འབྲས་ཀྱི་ཁུ་བ་དང་སྦྱར་བ་སྦྱིན་པར་བྱ་སྟེ། ཡང་ན་མགོ་

བོ་སྲིན་བུ་ཡོད་པའི་ནད་པ་ལ་ནི་རྟ་སྦངས་ཀྱི་ཕྱེ་མ་སྣའི་སྒོ་ནས་བུས་ལ་བཏང་ན་ཡང་ཕན་ནོ། །མུ་ཤ་ཀརྞའི་འདབ་མ་ནི། །ཞིབ་ཏུ་བཏགས་བ་འབྲས་ཕྱེར་བཅས། །བཙོས་པའི་ཁུ་བ་སྦྱིན་པར་བྱ། །དེ་ཡི་རྗེས་ལ་རང་སྐྱུར་རམ། །དར་བ་སླ་བ་ཚ་བ་ལྔ། །ལན་ཚྭར་བཅས་པ་

Vol. 202 · folio 40a

བླུད་པར་བྱ། །ཞེས་བྱ་བ་ལ། མུ་ཤ་ཀརྞ་ཞེས་བྱ་བ་ཨ་ཁུ་ཀརྞའི་འདབ་མ་བྱི་བའི་རྣ་བ་འདྲ་བ་ཞིན་ཏུ་བཏགས་ལ། འབྲས་སཱ་ལའི་ཕྱེ་མ་དང་སྦྱར་ཏེ་འདབ་མ་ལ་བཙོས་པའི་སྐྱ་ཁུར་བྱིན་ན་དེའི་འོག་ཏུ་འབྲས་ཀྱི་ཁུ་ལེའི་རང་སྐྱུར་ཀན་ཛེ་ཞེས་བྱ་བ་ལ། ཚ་བ་ལྔ་དང་ལན་

ཚྭར་བཅས་པ་བླུད་པ་འམ། དར་བ་སླ་བ་ཚ་བ་ལྔ་དང་བཅས་པ་བླུད་བར་བྱའོ། །ནིམ་པ་ཨ་པ་མརྒ་དང་། །ནི་རྒུན་ཐི་ལོའང་དེ་བཞིན་བྱ། །ཞེས་བྱ་བ་ལ། ནིམ་པ་དང་ཨ་པ་མརྒ་དང་། ནི་རྒུན་ཐའི་ལོ་མ་ལ་ཡང་མུ་ཤ་ཀ་རྞའི་སྐབས་སུ་བཤད་པའི་ཆོ་ག་དེ་བཞིན་དུ་བྱས་པའི་ཁུ་བ་

སྦྱིན་པར་བྱའོ་ཞེས་སྦྱར་རོ། །བྱི་དང་ག་ཡི་ཕྱེ་མ་དང་། །བསྲེས་པའི་འབྲས་ཕྱེའི་ཁུར་བ་སྦྱིན། །གོ་བྱེའི་མར་ནི་རྙིང་པ་ལ། །བྱི་དང་ག་ཡི་ཤུན་པ་བསལ། །ཆ་ཕྱེད་བཅུག་སྟེ་ཉི་མར་གཞག །བཏུང་དང་འཇམ་རྩིར་སྦྱར་བར་བྱ། །ཐང་ཤིང་ཤྲི་བེཥྚ་ཡི་སྣུམ། །སོ་སོར་དེ་

བཞིན་སྦྱར་བར་བྱ། །ཞེས་བྱ་བ་ལ། ཡང་ན་བྱི་དང་གའི་ཕྱེ་མ་དང་བསྲེས་པའི་འབྲས་ཀྱི་ཕྱེའི་ཁུ་བ་སྦྱིན་པར་བྱ་བའམ། གོ་བྱེ་བཙིར་བའི་མར་གྱི་ནང་དུ་བྱི་དང་ག་ཤུན་པ་དྲུས་པ་མར་དེའི་ཆ་ཕྱེད་བཅུག་ལ་ཉི་མ་ལ་བཞག་སྟེ་བཏུང་བ་དང་འཇམ་རྩིར་སྦྱར་ན་ཡང་སྲིན་བུའི་ནད་སེལ་ཏོ། །

ཐང་ཤིང་དང་ཤྲི་བེཥྚ་ཞེས་བྱ་བ་ས་ར་ལའི་ཤིང་གི་སྣུམ་ཁུ་སོ་སོར་སྔ་མ་བཞིན་དུ་བྱི་དང་ག་སྣུན་བ་ཆ་ཕྱེད་བཅུག་སྟེ། བཏུང་པ་དང་འཇམ་རྩིར་སྦྱར་ན་ཡང་ཕན་ནོ། །བཤང་བར་སྐྱེས་ལ་ལྷག་པར་ཡང་། །བཀྲུ་སྨན་དང་ནི་འཇམ་རྩི་གཏང་། །ཞེས་བྱ་བ་ལ། བཤང་བ་ལས་སྐྱེས་པའི་

སྲིན་བུ་ལ་ཁྱད་པར་དུ་ཡང་སྲིན་བུ་འཇོམས་པར་བྱེད་པའི་སྨན་དང་སྦྱར་ཏེ། བཀྲུ་སྨན་དང་འཇམ་རྩི་གཏང་བར་བྱའོ། །བད་ཀན་ལས་གྱུར་མགོ་བའི་ནད། །བཀྲུ་སྨན་སློན་དང་ཞི་སྨན་གཏང་། །ཞེས་བྱ་བ་ལ། བད་ཀན་ལས་གྱུར་པའི་སྲིན་བུ་ལ་ནི་མགོ་བའི་བཀྲུ་སྨན་དང་སློན་སྨན་

ཞི་བའི་སྨན་བཏང་བས་བསལ་བར་བྱའོ། །ཁྲག་ལས་གྱུར་པའི་སྲིན་བུ་ལ། །གསོ་བ་མཛེ་ཡི་ཚུལ་དུ་བྱ། །ཞེས་བྱ་བ་ལ། ཁྲག་ལས་གྱུར་པའི་སྲིན་བུ་ལ་ནི་མཛེ་ནད་གསོ་བའི་ཆོ་ག་ཇི་སྐད་སྨོས་པ་བཞིན་བྱའོ། །སྤུ་འབྱི་བྱེད་ལ་གསོ་བ་ནི། །ཨིནྡྲ་ལུབ་ཏའི་ཆོ་ག་བྱ། །

Vol. 202 · folio 40b

ཞེས་བྱ་བ་ལ། ཁྲག་ལས་གྱུར་པའི་སྲིན་བུ་སྤུ་ཟ་ཞིང་འབྱིན་པར་བྱེད་པ་ལ་ནི། དེའི་གསོ་བ་ཨིནྡྲ་ལུབ་ཏ་ཞེས་བྱ་བའི་ནད་གསོ་བའི་ཆོ་ག་རྒྱུད་ཕྱི་མ་ལས་མགོ་ན་བའི་སྐབས་སུ་བཤད་པ་གང་དག་ཡིན་པ་དེ་བྱའོ། །འོ་མ་ཤ་དང་མར་དང་བུ་རམ་དང་། །ཞོ་དང་འདབ་མ་ཅན་གྱི་ཚོད་མ་

དང་། །མདོར་ན་མངར་དང་སྐྱུར་བའི་ཁུ་བ་རྣམས། །སྲིན་བུ་གཞོམ་པར་འདོད་པས་ཡོངས་སུ་སྤང་། །ཞེས་བྱ་བ་ལ། མིའི་སྲིན་བུའི་ནད་གཞོམ་ཞིང་བསལ་བར་འདོད་པས་འོ་མ་ལ་སོགས་པ་སྤང་བར་བྱ་བའམ། དེ་བཞིན་དུ་འདབ་མ་ཅན་གྱི་ཚོད་མ་སྟེ་རྒྱ་སྣེའུ་དང་། ལྕམ་པ་ལ་

སོགས་པའི་ཚོད་མ་སྤང་བ་དང་། མདོར་བསྡུ་ན་མངར་བ་དང་སྐྱུར་བའི་བག་ཐམས་ཅད་ཡོངས་སུ་སྤང་ཞིང་དོར་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས་གསོ་བའི་གནས་

ལེའུ་ཉི་ཤུ་པའི་རྣམ་པར་འགྲེལ་པའོ། །།དེ་ནས་རླུང་ནད་གསོ་བ་བཤད་པར་བྱའོ། །ཞེས་བྱ་བ་ལ། གོ་རིམས་འདི་ཉིད་ལ་བབ་པས་འདིའི་གསོ་བ་བསྟན་པའི་ཕྱིར་བརྩམས་པ་ཡིན་ནོ། །མ་འདྲེས་རླུང་ལས་དང་པོར་ནི། །མར་དང་རྐང་དང་ཚིལ་དང་ནི། །ཏིལ་མར་

བླུད་ཅིང་སྣུམ་གྱི་ནི། །སྦྱོར་བས་ལེགས་པར་གསོ་བར་བྱ། །ཞེས་བྱ་བ་ལ། རླུང་གི་ནད་མ་འདྲེས་པ་དེས། བད་ཀན་དང་མཁྲིས་པའི་ནད་མེད་པ་ལ་ནི་དང་པོར་མར་ལ་སོགས་པའི་སྣུམ་བླུད་ཅིང་བསྐུ་བ་དང་དུགས་ལ་སོགས་པ་སྣུམ་གྱི་སྦྱོར་བས་གསོ་བར་བྱའོ། །དེ་ནས་སྣུམ་ཞེན་

ངལ་བསོས་སྟེ། །འོ་མས་སླར་ཡང་སྣུམ་ཆོས་བྱ། །རླན་ཅན་གྲོང་དང་ཆུ་ལ་གནས། །ཤ་ཁུ་སྣུམ་དང་ལྡན་པ་གཏང་། །འོ་ཐུག་ཀྲི་སར་སྐྱུར་དང་བཅས། །ལན་ཚྭར་ལྡན་བླུད་འཇམ་རྩི་གཏང་། །སྣ་སྨན་སྐྱོ་བྱས་ཁ་ཟས་ནི། །སྣུམ་བྱས་བྱིན་ཞིང་དུགས་བྱས་ལ། །ལེགས་བསྐུས་

སྣུམ་དང་ལྡན་པ་ལ། །གསེག་མ་ལ་སོགས་དུགས་བྱའོ། །ཞེས་བྱ་བ་ལ། དེ་ནས་དེའི་འོག་ཏུ་རླུང་ནད་ཀྱིས་ཞེན་པའི་ནད་པ་ལ་སྣུམ་གྱི་ཆོ་ག་བྱས་པས་དུབ་པར་གྱུར་པ་དེ་ལ། གསོ་ཞིང་དུབ་བརྟས་ཏེ་འོ་མ་བླུད་ཅིང་སྣུམ་གྱི་ཆོ་ག་བྱ་བའམ། རླན་ཅན་གྱི་སྲོག་ཆགས་ལ་སོགས་པའི་

Vol. 202 · folio 41a

ཤ་ཁུ་གང་ཡང་རུང་བ་བླུད་ཅིང་འོ་ཐུག་དང་ཀྲིས་རའི་ཐུག་པ་སྐྱུར་དང་ལན་ཚྭ་དང་ལྡན་པ་བླུད་པ་འམ། འཇམ་རྩི་མས་གཏོང་བ་དང་། སྣ་ནས་སྨན་གྱི་སྦྱོར་བ་བཏང་བ་དང་། སྐྱོ་མ་ལ་སོགས་པའི་སྨན་ཁ་ཟས་སྣུམ་ཅན་བྱིན་ལ་བརྟ་བར་བྱས་ལ། དེའི་འོག་དུ་ལེགས་

པར་སྣུམ་གྱིས་ཞེན་པ་དང་གསེག་མ་ལ་སོགས་པའི་དུགས་ཀྱི་ལེའུ་ལས་བཤད་པ་རྣམས་སྣུམ་དང་ལྡན་པས་དུགས་བྱའོ། །སྣུམ་གྱིས་ཞེན་བྱས་དུགས་བྱས་པས། །གཡོ་ཞིང་རེངས་དང་གཟེར་བཅས་པས། །ཞེས་བྱ་བ་ལ། སྣུམ་གྱིས་ལེགས་པར་ཞེན་པར་བྱས་པ་དང་། དུགས་

ལེགས་པར་བྱས་པ་ནི་ལུས་རླུང་ནད་ཀྱིས་གཡོ་ཞིང་སྒུལ་བ་ལྟར་རེངས་པ་དང་། གཟེར་དང་བཅས་པ་ལྷང་ལྷང་པོར་ན་བ་དག་ཀྱང་ཇི་ལྟར་འདོད་པ་བཞིན་དུ་འགུགས་ཤིང་ལུས་སྡུད་པར་བདེ་བླག་ཁོ་ནར་ནུས་པར་འགྱུར་རོ། །ཇི་ལྟར་འདོད་བཞིན་འགུགས་པ་ནི། །བདེ་བླག་ཉིད་དུ་ནུས་

པར་འགྱུར། །ཇི་ལྟར་ཤིང་སྐམ་དག་ཀྱང་ནི། །སྣུམ་བསྐྲུས་བསྲོས་པར་གྱུར་ན་ནི། །ལས་སུ་བྱ་བར་རུང་གྱུར་ན། །སྲོག་བཅས་ལུས་ནི་སྨོས་ཅི་དགོས། །ཞེས་བྱ་བ་ལ། དེ་ཡང་དཔེར་ན། ཤིང་སྐམ་པར་གྱུར་པ་དག་ཀྱང་སྣུམ་གྱིས་བསྐྲུས་ཤིང་མེ་ལ་བསྲོས་པར་གྱུར་ན་དགུག་

པ་ལ་སོགས་པ་ལས་སུ་བྱ་བ་ཇི་ལྟར་འདོད་པ་ལྟར་བྱར་རུང་བ་ཡིན་ན། འཚོ་བའི་དང་པོ་སྲོག་དང་བཅས་པའི་ལུས་ལ་སྣུམ་དང་དུགས་ཀྱིས་བདེ་བླག་ཏུ་མནོས་པ་ལྟ་སྨོས་ཀྱང་ཅི་དགོས་ཏེ་ངེས་པར་ནུས་སོ་ཞེས་བྱ་བའི་དོན་ཏོ། །སྦུ་བརྩེ་གཟེར་ན་སྙོམ་པ་དང་། །ལུས་སྐེམ་རེངས་པའི་ནད་

ལ་སོགས། །དུགས་བྱས་མྱུར་དུ་ཞི་འགྱུར་ཞིང་། །མཉེན་པ་ཉིད་དུ་འང་འགྱུར་བ་ཡིན། །ཞེས་བྱ་བ་ལ། སྣུམ་དང་དུགས་བྱས་པའི་རླུང་ནད་ཅན་གྱི་བ་སྤུ་བརྩེ་བ་ལ་སོགས་པའི་ནད་མྱུར་དུ་ཞི་བར་འགྱུར་བ་དང་། མཉེན་ཞིང་འཇམ་པ་ཉིད་དུ་ཡང་འགྱུར་བ་ཡིན་ནོ། །སྣུམ་བཏང་བས་

ནི་ལུས་ཟུངས་རྣམས། །བསྐམས་པ་མྱུར་དུ་རྒྱས་པར་བྱེད། །ཉམས་སྟོབས་མེ་དྲོད་འཕེལ་འགྱུར་ཞིང་། །དེ་ཡི་སྲོག་ཀྱང་རིང་ནས་བྱེད། །ཅེས་བྱ་བ་ལ། རླུང་གི་ནད་ཀྱིས་ཉམ་ཐག་པ་དེ་ལ་སྣུམ་གྱི་སྦྱོར་བ་བཏང་བས། དངས་མ་ལ་སོགས་པའི་ལུས་ཟུངས་བསྐམས་པ་རྒྱས་ཤིང་འཕེལ་

Vol. 202 · folio 41b

བ་ལ་སོགས་པའི་ཡོན་ཏན་སྐྱེད་པར་བྱེད་པ་ཡིན་ནོ། །ལན་མང་སྣུམ་དང་དུགས་ཀྱི་ནི། །ཆོ་ག་ལེགས་པར་སྦྱར་བར་བྱ། །དེ་ལྟར་སྣུམ་གྱིས་མཉེན་བྱས་ལྟོར། །རླུང་གི་ནད་ནི་གནས་མི་འགྱུར། །ཞེས་བྱ་བ་ལ། ཡང་རླུང་ནད་ཅན་དེ་ལ་ཡང་དང་ཡང་དུ་སྣུམ་གྱི་སྦྱོར་བ་ལ་སོགས་པ་

བྱས་ན་རླུང་ནད་དེ་ངེས་པ་སེལ་བར་འགྱུར་བ་ཡིན་ནོ། །གལ་དེ་ནད་གཞན་བཅོས་པའི་ཕྱིར། ལས་འདིས་ཞི་བར་མ་གྱུར་ན། །འཇམ་ཞིང་སྣུམ་དང་ལྡན་པ་ཡི། །སྣུམ་གྱིས་དེ་ནི་སྦྱང་བར་བྱ། །ཞེས་བྱ་བ་ལ། གལ་ཏེ་བཤད་མ་ཐག་པའི་སྦྱོར་བ་འདིས་རླུང་ནད་བད་ཀན་ལ་སོགས་པའི་

ནད་གཞི་གཞན་དང་འདྲེས་པའི་ཕྱིར་བྱང་བར་མ་གྱུར་ན་སྣུམ་ཅན་གྱི་སྐྱུག་སྨན་ནམ་བཀྲུ་སྨན་གྱིས་ཅི་རིགས་པར་སྦྱར་བར་བྱའོ། །ཞུན་མར་སེང་ཕྲོམ་བཙོས་པ་འམ། །སཔྟ་ལ་དང་བསྐོལ་བའམ། །འོ་མ་ཨེ་རཎྚ་ཡི་མར། །བསྐོལ་བ་ནད་སེལ་དགེ་བ་བླུད། །ཅེས་བྱ་བ་ལ། སྤྱང་བ་

དེ་ཡང་སེང་ཕྲོམ་གྱི་མར་ལ་སོགས་པ་གསུམ་ལས་གང་ཡང་རུང་བ་བླུད་པར་བྱའོ། །སྣུམ་སྐྱུར་དྲོད་དང་ལན་ཚྭ་སོགས། །ཟས་ཀྱིས་དྲི་མ་སོགས་གྱུར་ནས། །བུ་ག་འགགས་ཏེ་རླུང་འགགས་པས། །དེ་ཕྱིར་དེ་ནི་བདེ་རྒྱུ་བྱ། །ཞེས་བྱ་བ་ལ། སྣུམ་སེལ་བའི་ཟས་སྣུམ་པ་དང་སྐྱུར་བ་ལ་སོགས་པས་

བཤང་བ་ཞེས་བྱ་བའི་དྲི་མ་སོགས་ཤིང་འཕེལ་བར་གྱུར་པས་རླུང་རྒྱུ་བའི་བུ་ག་འགགས་པར་བྱེད་པ་ཡིན་པས་དེའི་ཕྱིར་དེ་བཀྲུ་སྨན་གྱིས་སྦྱངས་ལ་བདེ་བར་རྒྱུ་བར་བྱའོ། །ཉམ་ཆུང་བཀྲུ་སྨན་བྱར་འོས་པས། །དེ་ལ་དྲོད་སྐྱེད་སྨིན་བྱེད་པའོ། །ཁ་ཟས་སྨིན་པའང་དེ་བཅས་པའི། །མས་གཏོང་བཀྲུ་

སྨན་སྦྱར་བར་བྱ། །ཞེས་བྱ་བ་ལ། རླུང་ནད་ཅན་གང་ཞིག་ལུས་ཀྱི་ཉམ་སྟོབས་ཆུང་བར་གྱུར་ཀྱང་བཀྲུ་སྨན་གཏོང་བར་འོས་པ་ཡིན་ན་དེ་ལ་དྲོད་སྐྱེད་ཅིང་སྨིན་པར་བྱེད་པའི་སྨན་དང་། ཁ་ཟས་སྦྱིན་པར་བྱ་བའམ། དྲོད་སྐྱེད་པ་དང་སྨིན་པར་བྱེད་པ་དང་བཅས་པའི་མས་གཏོང་བའི་ནི་རུ་ཧ་གཏང་

བར་བྱའོ། །སྦྱངས་ཤིང་མེ་དྲོད་བསྐྱེད་གྱུར་ནས། །སླར་ཡང་སྣུམ་དང་དུགས་བྱས་ཕན། །ཞེས་བྱ་བ་ལ། དེ་ལྟར་སྦྱང་བ་བྱས་ན་མེ་དྲོད་ཀྱང་ལེགས་པར་སྐྱེད་པར་གྱུར་བ་དང་དེའི་འོག་ཏུ་སླར་ཡང་སྣུམ་དང་དུགས་ཀྱི་ཆོ་ག་བྱས་ན་རླུང་ནད་བདེ་བར་འབྱང་བར་འགྱུར་རོ། །མ་ཞུའི་

Vol. 202 · folio 42a

གནས་སུ་ཞུགས་པའི་རླུང་། །སློན་བྱས་ཟས་རིམ་བྱིན་ནས་ནི། །བ་ར་ཎ་སོགས་དྲུག་པའམ། །ཤུ་དག་སོགས་ཆུ་དྲོ་སྦྱར་བླུད། །ཅེས་བྱ་བ་ལ། མ་ཞུ་བའི་གནས་ཕོ་བ་ཡན་ཆད་དུ་ཞུགས་པའི་རླུང་དང་པོར་སྐྱུག་སྨན་གྱིས་སློན་བྱས་ལ་ཐུག་པ་ལ་སོགས་པའི་

ཁ་ཟས་ཀྱི་རིམ་པ་ཚུལ་བཞིན་དུ་བྱིན་པའི་འོག་ཏུ་བ་ར་ཎ་ལ་སོགས་པའི་སྨན་གྱི་སྦྱོར་བ་དྲུག་གི་ཕྱེ་མ་བ་ར་ཎ་དྲུག་པ་མཛེ་ནད་ཀྱི་སྐབས་ནས་བཤད་པའམ། ཤུ་དག་ལ་སོགས་པ་སྐྱུག་སྨན་གྱི་སྡེ་ཚན་གྱི་སྐབས་སུ་བཤད་པ་ཆུ་དྲོན་དང་སྦྱར་ཏེ་བླུད་པར་བྱའོ། །མེ་དྲོད་བསྐྱེད་ནས་དེ་འོག་ཏུ། །རླུང་

ཅན་གཅིག་པུའི་གསོ་བ་བྱ། །ཞེས་བྱ་བ་ལ། ཐུག་པའི་རིམ་པ་ལ་སོགས་པའི་སྦྱོར་བས་ཁོང་པའི་མེ་དྲོད་བསྐྱེད་ཅིང་སྦར་ནས་དེ་ཡི་འོག་ཏུ་རླུང་ནད་མ་འདྲེས་པ་དང་ལྡན་པ་ལ་རླུང་ནད་གཅིག་པུའི་གསོ་བ་ཇི་སྐད་སྨོས་པ་བྱའོ། །ལྟེ་བའི་ཕྱོགས་ཞུགས་བིལ་བ་ནི། །གཞོན་དང་ཉ་

ཤས་གཡོས་བྱས་སྦྱིན། །ཞེས་བྱ་བ་ལ། རླུང་གི་ནད་ལྟེ་བའི་ཕྱོགས་སུ་ཞུགས་ཤིང་བརྟེན་པ་ལ་ནི་བིལ་བའི་འབྲས་བུ་མ་སྨིན་པ་གཞོན་ནུ་དང་། ཉའི་ཤ་བཙོས་པ་སྦྱིན་པར་བྱའོ། །ལྟེ་བའི་འོག་ཞུ་འཇམ་རྩི་དང་། །ཟས་ཀྱི་སྔོན་དུ་སྣུམ་བཏང་ཕན། །ཞེས་བྱ་བ་ལ། ལྟེ་བའི་

འོག་ཞུ་བའི་གནས་སུ་བརྟེན་པའི་རླུང་ལ་ནི་སྣུམ་གྱི་འཇམ་རྩི་མས་གཏོང་བ་དང་། དེ་བཞིན་དུ་ཁ་ཟས་མ་ཟོས་བའི་སྔོན་དུ་མར་རམ། ཏིལ་མར་སྦྱིན་ན་ཕན་ནོ། །ཁོང་པར་ཞུགས་ལ་ཐལ་སྨན་སོགས། །ཕྱེ་མ་དྲོད་བསྐྱེད་སྨན་བྱིན་ཕན། །ཞེས་བྱ་བ་ལ། རླུང་ལྟོ་བའི་ནང་དུ་

ཞུགས་པ་ལ་ནི་ཐལ་སྨན་རྣོན་པོ་ལ་སོགས་པ་དང་སྦྱར་བའི་སྨན་གྱི་ཕྱེ་མ་ཕན་ནོ། །སྙིང་གནས་ས་ལ་པརྞི་དག །འོ་མ་དང་ནི་བསྐོལ་བ་ཕན། །ཞེས་བྱ་བ་ལ། སྙིང་ལ་གནས་པའི་རླུང་ལ་ནི་སལ་པརྞི་ཞེས་བྱ་བ་སྨན་སྠིར་དང་བསྐོལ་བའི་འོ་མ་སྦྱིན་ན་ཡང་ཕན་ནོ། །མགོ་བོར་གནས་

ལ་མགོ་སྣུམ་བསྐུ། །སྣ་སྨན་དུད་བརྔུབ་སྣུམ་ཅན་དང་། །རྣ་བ་སོགས་ལ་བརྟ་བྱས་ཕན། །ཞེས་བྱ་བ་ལ། མགོ་བོ་ལ་བརྟེན་པའི་ནད་ལ་ནི། མགོ་བོ་སྣུམ་གྱིས་བསྐུ་བའི་སྦྱོར་བས་གསོ་བ་དང་། སྣ་ནས་སྨན་སྣུམ་ཅན་བཏང་བ་དང་། དུད་པ་སྣུམ་ཅན་བརྔུབ་པར་བྱ་

Vol. 202 · folio 42b

བ་དང་། རྣ་བ་དང་མིག་ལ་སོགས་པ་ལ་ཡང་བརྟ་ཞིང་སྣུམ་གྱིས་དགང་བ་དག་ཀྱང་བྱས་ན་ཕན་ནོ། །པགས་པར་གནས་ལ་བསྐུ་བྱུག་དུགས། །རླུང་མེད་གནས་སུ་གནས་པ་དང་། །ཁ་ཟས་ཡི་ག་འབྱེད་པ་ཕན། །ཞེས་བྱ་བ་ལ། པགས་པ་ལ་བརྟེན་པའི་ནད་ལ་ནི་སྣུམ་གྱིས་

བསྐུས་པ་དང་། དུགས་བྱ་བ་དང་། རླུང་མེད་ཅིང་སེར་བུས་མི་འཕོག་པའི་གནས་ཁང་པ་ལ་སོགས་པར་གནས་པ་དང་། ཁ་ཟས་ཞིམ་ཞིང་བསོད་པ་ཕན་ནོ། །ཁྲག་གནས་བསིལ་སྨན་བསྐུ་བ་དང་། །བཀྲུ་སྨན་ཁྲག་ནི་དབྱུང་བ་ཕན། །ཞེས་བྱ་བ་ལ། ཁྲག་ལ་གནས་པའི་རླུང་ལ་

ནི་ཙནྡན་ལ་སོགས་པའི་སྨན་བསིལ་བས་བསྐུ་བ་དང་། བཀྲུ་སྨན་བྱ་ཞིང་སྦྱང་བ་དང་། གཏར་ག་གདབ་ཅིང་ཁྲག་དབྱུང་བ་ཕན་ནོ། །ཤ་ཚིལ་བརྟེན་ལ་བཀྲུ་སྨན་དང་། །མས་གཏོང་དྲག་དང་ཞི་བྱའི་སྨན། །ཞེས་བྱ་བ་ལ། ཤ་དང་ཚིལ་ལ་གནས་པའི་རླུང་ལ་ནི། བཀྲུ་སྨན་དང་མས་

གཏོང་བའི་བཀྲུ་སྨན་ནི་རུ་ཧས་སྦྱང་པ་བྱས་པ་དང་། ཕྱི་དང་ནང་ནས་ཞི་བར་བྱ་བའི་སྨན་བསྟེན་པ་དག་ཕན་ནོ། །རུས་པ་རྐང་ལ་གནས་པ་ལ། །ཕྱི་དང་ནང་ནས་སྣུམ་གྱིས་གསོ། །ཞེས་བྱ་བ་ལ། རུས་པ་དང་རྐང་ལག་ལ་གནས་པའི་རླུང་ལ་ནི་ཕྱི་དང་ནང་ནས་སྣུམ་གྱི་སྦྱོར་བ་བྱ་བས་བསལ་

བར་བྱའོ། །ཁུ་ཆུར་གནས་ལ་སེམས་དགའ་དང་། །ཁ་ཟས་སྟོབས་སྐྱེད་རོ་ཙ་ཕན། །ཞེས་བྱ་བ་ལ། ཁུ་ཆུ་ལ་གནས་པའི་རླུང་ལ་ནི། སེམས་དགའ་བར་བྱ་བ་དང་། ལུས་ཀྱི་སྟོབས་སྐྱེད་ཅིང་རོ་ཙ་ལ་ཁུ་བ་འཕེལ་བར་བྱེད་པའི་ཁ་ཟས་སྦྱིན་པར་བྱའོ། །ཁུ་བ་རྒྱུ་བ་འགགས་གྱུར་ན། །

བཀྲུ་སྨན་བཏང་བས་གསོ་བར་བྱ། །ཞེས་བྱ་བ་ལ། ཁུ་བ་རྒྱུ་བ་འགགས་ཤིང་རྒྱུ་མི་ཤེས་པར་གྱུར་ན། བཀྲུ་སྨན་གྱི་སྦྱང་བས་གསོ་བར་བྱའོ། །འཁྲུས་ཤིང་ཟས་རིམ་བསྟེན་གྱུར་ནས། །སྔར་ཤེས་པ་ཡི་གསོ་བ་བྱ། །ཞེས་བྱ་བ་ལ། དང་པོར་བཀྲུ་སྨན་གྱིས་འཁྲུས་པར་གྱུར་

ཅིང་དེ་ཡི་འོག་ཏུ་ཐུག་པ་ལ་སོགས་པའི་ཟས་ཀྱི་རིམ་པ་བསྟེན་པར་གྱུར་ནས་སྔར་བཤད་མ་ཐག་པའི་སྦྱོར་བས་གསོ་བར་བྱའོ། །རླུང་ལས་མངལ་ཆགས་བསྐམས་གྱུར་དང་། །བྱིས་པ་སྐེམས་པར་གྱུར་པ་ལ། །ཁ་ར་ཏང་པལ་ཤིང་མངར་རྣམས། །འོ་མར་སྦྱར་བསྐོལ་བླུད་པ་ཕན། །ཞེས་

Vol. 202 · folio 43a

བྱ་བ་ལ། རླུང་ནད་ཀྱི་ཤས་ཆེ་བའི་ཁུ་བ་ལས་མངལ་དུ་སེམས་ཅན་ཆགས་པར་གྱུར་ནས་དེའི་ལུས་བསྐམས་པར་གྱུར་པ་དང་། དེ་བཞིན་དུ་བཙས་ནས་བྱིས་པའི་ལུས་དེ་སྐམ་པོར་གྱུར་པ་ལ་ནི་ཁ་ར་དཀར་པོ་དང་ཏང་པལ་ཤིང་མངར་འོ་མའི་ནང་དུ་བསྐོལ་བ་

བླུད་ལ་བརྟ་ཞིང་ཤ་སྐྱེད་པ་ཕན་ནོ། །རྒྱུས་པ་ཚིལ་དང་རྩར་ཞུགས་ལ། །སྣུམ་ཚ་དཀྲི་བའི་དུགས་བྱས་ཕན། །ཞེས་བྱ་བ་ལ། རྒྱུས་པ་ལ་སོགས་པར་ཞུགས་པའི་རླུང་ལ་ནི་སྣུམ་ཚ་བ་དང་དཀྲི་བའི་དུགས་ཇི་སྐད་བཤད་པ་བྱས་ན་ཕན་ནོ། །ཡན་ལག་འཁུམས་ལ་མ་ཤ་དང་། །རྒྱམ་

ཚ་ཏིལ་མར་བསྐོལ་བས་བསྐུ། །ཞེས་བྱ་བ་ལ། ཡན་ལག་གི་གཟུགས་འཁུམས་ཤིང་འཇས་པ་ལ་ནི་མ་ཤ་ཞེས་བྱ་བ་མོན་སྲན་གྲེའུ་དང་རྒྱམ་ཚ་དང་བསྐོལ་བའི་ཏིལ་མར་བསྐུས་ན་ཕན་ནོ། །ཁྲག་གཟགས་དྲགས་ལ་ཡན་ལག་ནི། །ཚོར་བ་མེད་ལ་ཁྱིམ་དུད་པ། །རྒྱམ་ཚ་ཏིལ་མར་

སྦྱར་བ་བསྐུ། །དཀྲི་བའི་དུགས་ནི་སྦྱར་བར་བྱ། །ཞེས་བྱ་བ་ལ། ཁྲག་གཟགས་ཤིང་ཕྱུང་དྲགས་པ་ལས་ཡན་ལག་ཚོར་བ་མེད་ཅིང་བེམ་བེམ་པོར་གྱུར་པ་ལ་ནི་ཁྱིམ་གྱི་དུད་པ་དང་། རྒྱམ་ཚ་དང་ཏིལ་མར་བཏགས་པའི་ལྡེ་གུས་བསྐུས་ན་ཕན་ནོ། །དེ་བཞིན་དུ་དཀྲི་བའི་དུགས་བྱས་ན་

ཡང་ཕན་ནོ། །གཞན་དབང་ཅན་གྱིས་གཟིར་གྱུར་ཅིང་། །མིག་འགྱུར་མི་ཤེས་འདར་བ་མེད། ཕོ་མཚན་མི་ལྡང་རྔུལ་མི་འབྱུང་། །ཕྱི་རོལ་རྩོལ་བ་མེད་གྱུར་བ། །ཁྲི་ཡི་བཅིངས་པས་མ་ནེན་པ། །དེ་ལ་མྱུར་དུ་གསོ་དཔྱད་བྱ། །ཞེས་བྱ་བ་ལ། གཞན་དབང་ཅན་ཞེས་བྱ་བའི་

རླུང་གི་ནད་ཡོད་དེ། །དེས་གཟིར་བར་གྱུར་ཅིང་མིག་གི་འབྲས་བུ་འགྱུར་མི་ཤེས་པ་དང་། །འདར་ཞིང་གཡ་ོབ་མེད་པ་དང་། །ཕོ་མཚན་ལྡང་ཞིང་ལས་སུ་མི་རུང་བ་དང་། །རྔུལ་འབྱུང་མི་ཤེས་པ་དང་། །ཕྱི་རོལ་གྱི་རྩོལ་བ་འགྱུར་ལྡོག་མེད་པ་དང་། །ཁྲིའི་བཅིངས་པས་བསྡམས་ནས་མནོན་

པ་དེ་ལྟ་བུ་དེ་ལ་ནི་གསོ་དཔྱད་ཤིན་ཏུ་གསར་ཏེ་བྱའོ། །དེར་ནི་ཐོག་མར་སྣུམ་ཞེན་བྱ། །དུགས་བྱས་སྣ་སྨན་རྣོན་པོས་ནི། །བུག་སྦྱང་ཕྱིར་བཏང་བ་དང་། །བི་ད་ར་ཡི་སྡེ་བསྐོལ་དང་། །ཞོ་དང་འོ་མ་ཤ་ཁུ་དང་། །མར་བསྐོལ་བ་ཡི་དངས་མ་བླུད། །ཅེས་བྱ་བ་ལ། གཞན་

Vol. 202 · folio 43b

དབང་ཅན་གྱི་ནད་ཀྱིས་བཏབ་པ་དེ་དེ་ལ་ཐོག་མ་ཁོ་ནར་སྣུམ་གྱིས་ལེགས་པར་ཞེན་པར་བྱ་བ་དང་། དུགས་ཀྱིས་བརླན་པར་བྱས་ནས་སྣ་སྨན་རྣོན་པོ་བཏང་ཞིང་སྤྱི་བོ་བཀྲུ་སྨན་གྱིས་སྦྱང་བར་བྱ་ཞིང་། ཚ་བ་གསུམ་དང་། བྱི་དང་ག་དང་། པི་པི་ལིང་དཀར་པོ་ལ་སོགས་པ་བཏང་ཞིང་བུ་གའི་

རྒྱུན་དག་པར་བྱའོ། །དེ་ལྟར་སྣ་སྨན་བཏང་ནས་དེ་ལ་བི་ད་རི་ལ་སོགས་པའི་སྡེ་ཚན་བསྐོལ་བ་དང་། ཞོ་དང་འོ་མ་དང་ཤ་ཁུ་དང་འོ་མ་ཆ་མཉམ་བསྐོལ་བའི་མར་གྱི་དངས་མ་བླུད་པར་བྱའོ། །དེས་ནི་རླུང་ནད་ཚབས་ཆེ་བ་འམ། །འཕྲལ་དུ་ཁྱབ་པར་མི་འགྱུར་རོ། །ཞེས་བྱ་བ་ལ།

དེ་ལྟར་བྱས་པར་གྱུར་ན་རླུང་ནད་ཚབས་པོ་ཆེས་འདེབས་པར་མི་འགྱུར་བའམ། འཕྲལ་དུ་ལུས་ལ་ཁྱབ་ཅིང་འབྱེར་བར་མི་འགྱུར་རོ། །རྒྱ་སྲན་ནག་དང་རྒྱ་ཤུག་སོགས། །ཐང་ཤིང་ལ་སོགས་སྡེ་ཚན་ནི། །རླན་ཅན་ཤ་ནི་བསྐོལ་བ་དང་། །སྐྱུར་དང་འོ་མ་དག་དང་ནི། །མངར་བའི་

སྡེ་ཚན་བཏབ་པ་ཡི། །སྣུམ་ཆེན་དག་ནི་བསྐོལ་བ་ཡིས། །བླུགས་དང་བསྐུ་དང་ལུས་སྦྱིན་དང་། །བཏུང་དང་སྣ་སྨན་འཇམ་རྩི་བྱ། །སྣུམ་དང་དུགས་ནི་ལེགས་སྦྱར་བ། །དེ་དང་དེས་ནི་རླུང་ནད་འཇོམས། །ཞེས་བྱ་བ་ལ། རྒྱ་སྲན་ཀུ་ལད་ཐ་ལ་སོགས་པ་དང་དེ་བཞིན་དུ་ཐང་ཤིང་ལ་སོགས་པའི་སྡེ་ཚན་སྐྱུག་

སྨན་ལ་སོགས་པའི་སྡེ་ཚན་ལས་བཤད་བའི་རླུང་འཇོམས་བའི་སྨན་སྡེ་དང་། རླན་ཅན་ན་གནས་པའི་སྲོག་ཆགས་ཀྱི་ཤ་ཁུ་བསྐོལ་བའི་ཆོ་གས་བསྐོལ་བའི་ཁུ་བ་དང་། དེ་བཞིན་དུ་རང་སྐྱུར་ལ་སོགས་པའི་སྐྱུར་དང་། སྣུམ་ཆེན་པོ་མར་དང་། ཏིལ་མར་དང་། རྐང་དང་། ཚིལ་ཞེས་བྱ་བ་དང་། འོ་མ་

དང་མངར་བའི་སྡེ་ཚན་གྱི་སྨན་བསྐོལ་བ་བྱས་ལ། དེ་ལྟ་བུའི་སྣུམ་ཆེན་པོ་དེས་ནི་ལུས་ལ་བླུགས་པ་ལ་སོགས་པ་བྱས་ན་རླུང་འཇོམས་པར་བྱེད་ལ། དེ་བཞིན་དུ་སྣུམ་དང་དུགས་ཀྱི་ལེའུ་ལས་བཤད་པའི་སྦྱོར་བ་དེ་དང་དེ་དག་ལེགས་པར་སྦྱར་ཞིང་བཏང་ན་དེས་རླུང་ནད་འཇོམས་པར་བྱེད་དོ། །ནད་

ཤུགས་པར་མ་དག་ལ་ནི། །བད་ཀན་སེལ་ཞིང་རྣོ་བ་ཡི། །སྤྱི་ཡི་བཀྲུ་སྨན་ལན་མང་གཏང་། །བུད་ཅིང་བཏང་བར་བྱས་པ་ཡིས། །དབུགས་རྒྱུའི་གནས་ནི་དག་གྱུར་ན། །དེས་ནི་དྲན་པ་རྙེད་པར་འགྱུར། །ཞེས་བྱ་བ་ལ། གཞན་དབང་ཅན་གྱི་རླུང་ནད་ཀྱིས་བཏང་བའི་ཤུགས་དང་པོ་ལས།

Vol. 202 · folio 44a

གཞན་པའི་ཤུགས་བར་མའི་གནས་སྐབས་སུ་སྤྱིའི་བཀྲུ་སྨན་བད་ཀན་སེལ་ཞིང་འཇོམས་པར་བྱེད་པའི་མགོ་བོའི་བཀྲུ་སྨན་ཡང་དང་ཡང་དུ་གཏང་པར་བྱ་བ་དང་། སྣ་སྨན་གྱི་ཕྱེ་མ་བུད་ཅིང་གཏང་བར་བྱ་བ་དང་། དེ་ལྟར་བྱས་པས་དབུགས་རྒྱུ་བའི་བུ་གའི་གནས་དག་པར་གྱུར་

ནས་སྐྱེས་བུ་དེ་དྲན་པ་རྙེད་པར་འགྱུར་རོ། །ཁ་རུ་ཚ་དང་ཨ་རུ་ར། །ཚ་བ་གསུམ་བསྐོལ་རླུང་ཆེན་སེལ། །ཞེས་བྱ་བ་ལ། རླུང་གི་ཤས་ཆེ་བར་གྱུར་པ་ལ་ནི་ཁ་རུ་ཚ་ལ་སོགས་པ་བསྐོལ་བའི་མར་བླུད་ན་ཕན་ནོ། །སེང་ཕྲོམ་སྲང་བརྒྱད་འབྲས་བུ་གསུམ། བྲེ་གང་རྩ་བ་ཆེན་པོ་ལྔ།

ཨེ་རཎྜ་དང་བྲི་ཧ་ཏི། དུར་བྱིད་སྲང་རེ་ཆུ་བྲེ་ནི། །བཅུ་དྲུག་ནང་དུ་བསྐོལ་ནས་ནི། །བཞི་ཆ་ལུས་པ་དེ་དང་ནི། །མར་བྲེ་གང་དང་ཞོ་བྲེ་བཞི། །ནས་ཚིག་འཁུས་ཐལ་སྲང་གསུམ་བསྐོལ། །དེ་བསྟེན་རླུང་ནད་མ་རུངས་པ། །ཡན་ལག་ཕྱོགས་གཅིག་ཀུན་ལ་ཞུགས། །མངལ་

གྱི་ནད་དང་རྒྱུ་རླུགས་དང་། །སྐྲན་དང་དམུ་རྫིང་འཇོམས་པར་བྱེད། །ཅེས་བྱ་བ་ལ། སེང་ཕྲོམ་ཞེས་བྱ་བ་རོ་ཧ་སྲང་བརྒྱད། འབྲས་བུ་གསུམ་བྲེ་གང་། རྩ་བ་ལྔ་ཆེན་པོ་སྣ་རེ་ཞིང་སྲང་རེ་རེ། ཨེ་རཎྜ་དང་། བྲི་ཧ་ཏི་དང་། དུར་བྱིད་ཀྱང་སྲང་རེ་རེ་ཆུ་བྲེ་བཅུ་དྲུག་གི་ནང་དུ་བསྐོལ་

ལ་སྨན་གྱི་ཁུ་བ་བཞི་ཆ་ལུས་པ་དང་། མར་བྲེ་གང་དང་། ཞོ་བྲེ་བཞི་ནས་ཚིག་འཁུས་པའི་ཐལ་བ་སྲང་གསུམ་གྱི་ལྡེ་གུ་དང་ཡང་བསྐོལ་ལ་སྨན་མར་དེ་བསྟེན་ཞིང་གོམས་པར་བྱས་ན་རླུང་ནད་ཤིན་ཏུ་མ་རུངས་ཤིང་གསོ་དཀའ་བ་ལུས་ཀྱི་ཕྱོགས་གཅིག་གམ། ཡན་ལག་ཀུན་ལ་ཞུགས་པའི་

ནད་ལ་སོགས་པ་འཇོམས་པར་བྱེད་དོ། །རམ་ཉེ་བ་དང་ཨ་ཤོ་ཀ ཆོ་ག་སེང་ཕྲོམ་ལྟ་བུར་བྱ། །ཞེས་བྱ་བ་ལ། རམ་ཉེ་བ་དང་། ཨ་ཤོ་ཀ །ཆོ་ག་ཡང་སེང་ཕྲོམ་དང་འདྲ་བར་ཤེས་པར་བྱ་སྟེ། ཇི་ལྟར་སེང་ཕྲོམ་ལས་སྲང་བརྒྱད་བཅུག་སྟེ། འབྲས་བུ་གསུམ་ལ་སོགས་

པའི་ཚད་གང་དུ་ཇི་སྐད་བཤད་པ་དང་། སྨན་མར་སྦྱོར་བ་ལྟར་འདི་ཡང་དེ་ལྟར་ཤེས་པར་བྱའོ། །གསོ་བ་འདི་ནི་གཞན་དབང་ཅན། །རླུང་ནད་མ་འདྲེས་པ་ལ་བྱ། །ཞེས་བྱ་བ་ལ། འདས་མ་ཐག་པའི་གསོ་བ་འདི་ནི་གཞན་དབང་ཅན་གྱི་ནད་ནད་གཞི་གཞན་དང་མ་འདྲེས་པ་ལ་བྱ་བ་

Vol. 202 · folio 44b

ཡིན་ནོ། །ནད་གཞི་འདྲེན་མར་འདྲེན་མས་བྱ། །ཞེས་བྱ་བ་ལ། རླུང་ནད་གཞན་དབང་ཅན་དེ་ཉིད་བད་ཀན་ནམ་འཁྲིས་པ་དང་འདྲེས་པར་གྱུར་ན་གསོ་བ་ཡང་འདྲེན་མར་བྱའོ། །བད་ཀན་བཅས་པའི་གཞན་དབང་ཅན། །སྙིང་ག་རྩིབ་ལོགས་ན་བ་ལ། །གཡེར་མ་ཤིང་ཀུན་ཨ་རུ་

ར། །མ་ནུ་དང་ནི་ལན་ཚྭ་གསུམ། །ནས་བསྐོལ་ཁུ་བར་སྦྱར་བ་བླུད། །ཅེས་བྱ་བ་ལ། བད་ཀན་དང་འདྲེས་པའི་གཞན་དབང་ཅན་གྱི་རླུང་ནད་སྙིང་ག་དང་རྩིབ་ལོགས་ན་བ་དག་ལ་ནི། གཡེར་མ་ལ་སོགས་པའི་སྨན་གྱི་ཕྱེ་མས་བསྐོལ་བའི་ཁུ་བ་དང་སྦྱར་བ་བླུད་པར་བྱའོ། །ཤིང་

ཀུན་བཅའ་སྒ་རྩབས་རུ་ཚ། །སེའུ་འབྲུ་སྟར་བུ་བཅས་པ་བླུད། །ཅེས་བྱ་བ་ལ། ཡང་ན་གཞན་དབང་ཅན་གྱི་ནད་སྙིང་ག་དང་རྩིབ་ལོགས་ན་བ་ལ་ཤིང་ཀུན་ལ་སོགས་པའི་སྨན་བསྐོལ་བའི་ཁུ་བ་དང་བླུད་པར་བྱའོ། །བད་ཀན་རླུང་ནི་འདེས་པ་ལ། །སྙིང་ནད་གསོ་བའི་སྐབས་བཤད་

ཕན། །ཞེས་བྱ་བ་ལ། བད་ཀན་དང་རླུང་འདྲེས་པའི་ནད་ལ་ནི། སྙིང་ནད་གསོ་བའི་སྐབས་སུ་བཤད་པའི་སྦྱོར་བ་གང་ཡིན་པ་ཕན་ནོ། ད་རྒན་ཕྱིར་དགྱེ་ནང་གུག་གཉིས། །གླད་པ་གཞོགས་ཕྱེད་ན་ལྟར་གསོ། །ཏོལ་མར་གྱིས་བཀང་སྣོད་དུ་བསྙལ། །འདིར་ནི་ནང་གུག་རབ་

གསོ་དཀའ། །ཞེས་བྱ་བ་ལ། ད་རྒན་གྱི་ནང་ཕྱིར་དགྱེ་བ་དང་། ནང་དུ་གུག་པ་གཉིས་ལ་ཡང་བླུད་པ་གཞོགས་ཕྱེད་ན་བའི་གསོ་བ་ཇི་སྐད་སྨོས་པ་དག་བྱས་ན་ཕན་ནོ། །དེ་བཞིན་དུ་ཏིལ་མར་གྱིས་སྣོད་ཆེན་པོ་བཀང་བའི་ནང་དུ་འུས་བཅིངས་ཀྱིས་ཉལ་བ་ཡང་ཕན་ནོ། །དེ་ལྟར་ཕྱིར་དགྱེ་བ་དང་ནང་དུ་གུག་

པའི་ནད་འདི་ཉིད་ལས་ནང་དུ་གུག་པའི་ད་རྒན་གང་ཡིན་པ་དེ་ནི་ཤིན་ཏུ་གསོ་དཀའ་ཞིང་མི་བཟད་པའི་ནད་ཡིན་ནོ། །སོ་དང་བཞིན་གྱི་མདོག་ཉམས་ཤིང་། །ཡན་ལག་ལྷོད་ཅིང་དྲན་པ་ཉམས། །རབ་ཏུ་རྔུལ་བ་གཞུ་རེངས་ཡིན། །དེ་ནི་ཞག་བཅུ་ལས་མི་འཚོ། །ཞེས་བྱ་བ་ལ། གཞུ་ལྟར་རེངས་པ་ཞེས་བྱ་བའི་ད་རྒན་

གྱི་ནད་སོ་དང་བཞིན་རས་ཀྱི་མདོག་ཉམས་པ་དང་། ལུས་ཀྱི་ཡན་ལག་ལྷོད་ཅིང་ཞིགས་པ། དྲན་པ་སྟོང་ཞིང་ཉམས་པ། རྔུལ་ཤས་ཆེར་འབྱུང་བ་དེ་ནི་ཞག་བཅུ་ལས་མི་འཚོ་སྟེ། དེ་ལས་མི་ཐུབ་པོ། དེ་ལས་གཞན་ཤུགས་སྨན་གྱུར་འཚོ། །ལུས་སྒུབ་དང་འོན་གླེན་དང་། །འཐེང་དང་ཞ་བོ་

Vol. 202 · folio 45a

གཞོགས་ཕྱེད་ཉམས། །འཕྱེ་བོ་འམ་དབང་པོ་མ་ཚང་འགྱུར། །ཞེས་བྱ་བ་ལ། གལ་ཏེ་གཞུ་ལྟར་རེངས་པའི་ད་རྒན་དེ་ལྟར་བཤད་པ་ལས་གཞན་དུ་ཤུགས་དམན་ཞིང་ཞན་པར་འགྱུར་བས་ཞག་བཅུས་འཆི་སྟེ། གལ་ཏེ་འཚོ་བར་གྱུར་ན་ལུས་སྒུ་ཞིང་སྒུར་བ་དང་།

འོན་ཞིང་རྣ་བའི་དབང་པོ་ཉམས་པ་དང་། འཐེང་ཞིང་རྐང་གིས་འགྲོ་མི་ཤེས་པ་དང་། ཞ་ཞིང་ལག་པས་བྱ་བ་མི་ནུས་པ་དང་། ལུས་ཀྱི་གཞོགས་ཕྱེད་ཉམས་ཤིང་བསྐམས་པ་དང་། འཕྱེ་བོ་སྟེ་བརླ་གཉིས་ཀྱིས་འགྲོ་བར་འགྱུར་བ་འམ། ཡང་ན་དབང་པོ་མ་ཚང་བ་སྟེ་འོན་པ་དང་

ལོང་བ་ལ་སོགས་པར་འགྱུར་རོ། །འགྲམ་པ་ཉམས་པར་འགྲམ་པ་སྣུམ། །དུགས་བྱས་ནས་ནི་རང་གནས་གཞུག །ཁ་གདངས་པ་ལ་ཀོ་སྐོ་ནི། །བཏེག་སྟེ་མཁས་པས་གཞུག་པར་བྱ། །འཐམས་པར་གྱུར་པ་ལྷག་མ་ལ། །ཕྱོགས་གཅིག་གུས་པ་ལྟ་བུར་གསོ། །ཞེས་

བྱ་བ་ལ། འགྲམ་པ་གནས་ལས་བསྐྱོད་ཅིང་འཆུས་ཏེ་ཉམས་པར་གྱུར་པའི་ནད་ལ་ནི་སྣུམ་གྱིས་བསྐུ་ཞིང་དུགས་བྱས་ནས་རང་རང་གི་གནས་སུ་གཞུག་པར་བྱ་བ་དང་། ཡང་ཁ་གདངས་པར་གྱུར་པའི་རླུང་གི་ནད་ལ་ཀོ་སྐོའི་ཕྱོགས་ནས་ལེགས་པར་བཏེག་སྟེ་རང་གི་གནས་སུ་གཞུག་པར་བྱ་ལ།

འཐམས་པར་གྱུར་པའི་ནད་ལྷག་མ་ལ་ནི་ཕྱོགས་གཅིག་ཏུ་གུག་པའི་ད་རྒན་ཇི་ལྟ་བ་བཞིན་དུ་གསོ་བའོ། །ལྕེ་ལྡིབས་གནས་སྐབས་ཇི་བཞིན་དུ། །རླུང་ནད་ཀྱི་ནི་གསོ་བ་བྱ། །ཞེས་བྱ་བ་ལ། ལྕེ་ལྡིབས་པའི་རླུང་ནད་ལ་ནི་རླུང་ནད་ཀྱི་གསོ་བ་ཇི་སྐད་བཤད་པ་དག་ནད་ཀྱི་གནས་

ཇི་ལྟ་བ་ལས་བརྟགས་ཏེ་སྦྱར་བར་བྱའོ། །གླད་པ་གཞོགས་ཕྱེད་ན་བ་ལ། །སྣ་སྨན་སྤྱི་བོར་ཏིལ་མར་དང་། །མིག་དང་རྣ་བ་དགང་བར་བྱ། །ཞེས་བྱ་བ་ལ། གླད་པའི་གཞོགས་ཕྱེད་ན་བའི་རླུང་གི་ནད་ལ་ནི་སྨན་སྣ་ནས་བཏང་བ་དང་། སྤྱི་བོར་ཏིལ་མར་བསྐུ་བའི་སྦྱོར་བ་དང་།

མིག་དང་རྣ་བ་དགང་བའི་སྦྱོར་བ་ཇི་སྐད་སྨོས་པ་དག་བྱའོ། །སྐྲང་ལ་སྐྱུག་སྨན་གཏང་བར་བྱ། །ཚ་ཞིང་དམར་བཅས་གཏར་ག་གདབ། །ཅེས་བྱ་བ་ལ། གླད་པའི་གཞོགས་ཕྱེད་ན་བ་དང་། སྐྲང་བ་དང་བཅས་པ་ལ་ནི་སྐྱུག་སྨན་གཏང་བར་བྱའོ། །ཡང་ན་ཀླད་ནད་དེ་ཚ་ཞིང་དམར་བ་དང་

Vol. 202 · folio 45b

བཅས་པ་ལ་ནི་གཏར་ག་གདབ་པས་གསོ་བར་བྱའོ། །གཞོགས་ཕྱེད་བསྐམས་ལ་སྣུམ་ཆོས་དང་། །སྣུམ་དང་ལྡན་པའི་བཀྲུ་སྨན་གཏང་། །ཞེས་བྱ་བ་ལ། གཞོགས་ཕྱེད་བསྐམས་པའི་ཕྱོགས་གཅིག་པའི་རླུང་ནད་ལ་ནི་སྣུམ་གྱི་ཆོ་ག་ལ་སོགས་པ་བྱའོ། །དཔུང་བ་འཇས་ལ་སྣ་

སྨན་དང་། །ཟས་ཀྱི་རྗེས་ལ་སྣུམ་སྦྱིན་བྱ། །ཞེས་བྱ་བ་ལ། དཔུང་པ་འཇས་པའི་རླུང་ནད་ལ་ནི་སྨན་སྣ་ནས་གཏང་བ་ལ་སོགས་པ་བྱའོ། །བརླ་རེངས་པ་ལ་སྣུམ་ཆོས་དང་། །སྦྱང་བྱས་ཕན་པ་མ་ཡིན་ཏེ། །བད་ཀན་མཞུ་ཚིལ་མང་བས། །དེ་ཕྱིར་དེ་ལ་རྩུབ་ཆོས་ཀྱི། །ཟད་

པར་བྱ་བས་གསོ་བར་བྱ། །ཞེས་བྱ་བ་ལ། བརླ་རེངས་ཀྱི་རླུང་ནད་ལ་ནི་སྣུམ་གྱི་ཆོ་ག་དང་སྦྱང་བ་བྱ་བ་བཀྲུ་སྨན་དང་། སློན་སྨན་དང་། མས་གཏོང་བ་དང་གཏར་ག་གདབ་པ་ཕན་པ་མ་ཡིན་ཏེ། ཅིའི་ཕྱིར་ཞེ་ན། བད་ཀན་དང་མ་ཞུ་བ་དང་། ཆིལ་མང་བའི་རྒྱུ་ལས་བྱུང་བའི་ཕྱིར་ཏེ། དེ་ལ་ནི་སྐྱུག་སྨན་

ལ་སོགས་པ་གནོད་པ་ཡིན་ཏེ། དེ་བས་ན་དེ་ལ་རྩུབ་པའི་ཆོ་ག་བྱས་པ་དག་གིས་བད་ཀན་ལ་སོགས་པ་དེ་དག་ཟད་ཅིང་བསྐམས་པས་གསོ་བར་བྱའོ། །ནས་དང་ཁྲེ་དང་ཁྲེ་རྒོད་སྦྱིན། །ཚོད་མ་ལན་ཚྭ་མེད་པ་ནི། །ཏིལ་མར་ཅུང་ཟད་ཆུར་བསྐོལ་བའམ། །སྐམ་སའི་ཤ་ནི་མར་མེད་དང་། །

སྦྲང་རྩི་ཆུ་དང་ཆང་རྙིང་སྦྱིན། །ཞེས་བྱ་བ་ལ། རྩུབ་པའི་ཆོ་ག་བྱ་བ་དེ་ཡང་ནས་ལ་སོགས་པའི་ཁ་ཟས་སྦྱིན་ཞིང་ཚོད་མ་ཡང་ལན་ཚྭ་མེད་པ་ཏིལ་མར་ཅུང་ཟད་བཏབ་ནས་ཆུའི་ནང་དུ་བསྐོལ་བ་སྦྱིན་ལ། གཞན་ཡང་སྐམ་སའི་ཤ་མར་མེད་པ་ལ་སོགས་པ་སྦྱིན་པར་བྱའོ། །ཕྱུག་པོའི་རླུང་

ལ་དུག་མོ་ཡུངས། །ཡུང་བའི་སྡེ་ཚན་ཤུ་དག་སོགས། །བསྐོལ་ལ་རྒྱམ་ཚར་བཅས་པའམ། །བ་ར་ཎ་སོགས་ཕྱེར་སྦྱར་བླུད། །ཅེས་བྱ་བ་ལ། ཕྱུག་པོའི་རླུང་ནད་ཅེས་བྱ་བའི་བརླ་རེངས་ཀྱི་ནད་ལ་ནི་དུག་མོ་ཡུངས་ལ་སོགས་པའི་སྡེ་ཚན་ནམ། ཤུ་དག་གི་སྡེ་ཚན་ནམ། ཡུང་

བའི་སྡེ་ཚན་གང་ཡང་རུང་བ་བསྐོལ་བའི་ནང་དུ་རྒྱམ་ཚ་བཏབ་པའི་ཆུ་དྲོ་འཇམ་ཙམ་གདབ་པར་བྱའོ། །ཡང་ན་བར་ཎ་ལ་སོགས་པའི་ཕྱེ་མ་བ་ར་ཎ་དྲུག་པ་ཞེས་བྱ་བའི་ཕྱེ་མ་ཆུ་དྲོ་འཇམ་ཙམ་དང་སྦྱར་ཏེ་བླུད་པར་བྱའོ། །ཡང་ན་དབྱི་མོ་འབྲས་བུ་གསུམ། །པུ་ཙེ་ཤེལ་དང་པི་པི་ལིང་། །སྦྲང་

Vol. 202 · folio 46a

རྩིར་སྦྱར་བའི་ལྡེ་གུ་སྦྱིན། །ཞེས་བྱ་བ་ལ། ཡན་ན་དབྱི་མོ་ལ་སོགས་པའི་སྨན་སྦྱང་རྩི་དང་སྦྱར་བའི་ལྡེ་གུ་སྦྱིན་པར་བྱའོ། །ཡང་ན་དབྱི་མོ་ཨ་རུ་ར། །ཙི་ཏྲ་ཀ་དང་ཐང་ཤིང་དང་། །སྦྲང་རྩིར་སྦྱར་བའི་ལྡེ་གུ་སྦྱིན། །ཞེས་བྱ་བ་ལ། ཡང་ན་དབྱི་མོ་དང་། ཨ་

རུ་ར་ལ་སོགས་པའི་ལྡེ་གུ་སྦྱིན་པར་བྱའོ། །གུ་གུལ་བྲག་ཞུན་ཨ་རུ་ར། །བ་གཅིན་དང་ནི་སྦྱར་བ་བླུད། །ཅེས་བྱ་བ་ལ། ཡང་ན་བ་གཅིན་དང་གུ་གུལ་ལམ། བྲག་ཞུན་ནམ། ཨ་རུ་ར་གང་ཡང་རུང་བ་བླུད་པར་བྱའོ། །གླ་སྒང་ཙི་ཏྲ་ཚ་བ་གསུམ། །འབྲས་བུ་གསུམ་དང་བྱི་དང་

ག །གུ་གུལ་ཆ་མཉམ་ཕྱེ་མ་སྦྱིན། །ཚིལ་དང་བད་ཀན་མ་ཞུ་ལས། །གྱུར་པའི་ནད་རྣམས་ཐམས་ཅད་སེལ། །ཞེས་བྱ་བ་ལ། གླ་སྒང་དང་ཙི་ཏྲ་ཀ་ལ་སོགས་པའི་སྨན་ཆ་མཉམ་པའི་ཕྱེ་མ་བྱིན་ན་ཚིལ་ལ་སོགས་པ་ལས་གྱུར་པའི་རླུང་ནད་ཐམས་ཅད་སེལ་བར་འགྱུར་རོ། །དེ་ལྟར་

བད་ཀན་ཤས་ཆེ་ཞིང་། །ཚིལ་བཅས་རླུང་ནི་ནད་སེལ་བྱེད། །ཅེས་བྱ་བ་ལ། དེ་ལྟར་སྔར་བཤད་པའི་གསོ་བའི་རིམ་པ་ཉེ་བར་སྦྱར་བར་གྱུར་པས་བད་ཀན་གྱི་ཤས་ཆེ་ཞིང་ཚིལ་ལས་གྱུར་པའི་རླུང་གི་ནད་སེལ་ཞིང་འཇོམས་པར་བྱེད་དོ། །ཐལ་སྨན་བ་གཅིན་སྦྱར་དུགས་དང་། །

བླུགས་དང་ལུས་ལ་དྲིལ་བའང་བྱ། །ཞེས་བྱ་བ་ལ། བརླ་རེངས་ཀྱི་ནད་དེ་ལ་ཐལ་སྨན་དང་བ་གཅིན་སྦྱར་བའི་དུགས་བྱ་བ་དང་། ལུས་ལ་བླུགས་པ་དང་། བསྐུ་ཞིང་དྲིལ་ཕྱིས་ཀྱང་ཐལ་སྨན་དང་བ་གཅིན་སྦྱར་བར་བྱའོ། །ཡུངས་ཀར་ཀ་རཉྫའི་འབྲས་བུ། །བ་གཅིན་སྦྱར་བས་

བསྐུ་བ་བྱ། །ཞེས་བྱ་བ་ལ། །ཕྱི་རོལ་ནས་ཀྱང་བད་ཀན་ཟད་པར་བྱ་བའི་ཕྱིར། ཀ་རཉྫ་འབྲས་བུ་དང་ཡུངས་ཀར་བ་གཅིན་མང་པོ་དང་སྦྱར་བའི་ལྡེ་གུས་བསྐུ་བར་བྱའོ། །ཨརྐ་ཨག་ནི་མན་ཐ་དང་། ནིམ་པའི་རྩ་བ་ཐང་ཤིང་དང་། བོང་བ་དང་ནི་གྲོག་མཁར་ས། །ཡུངས་

ཀར་སྦྲང་རྩིར་བཅས་པ་བསྐུ། །ཞེས་བྱ་བ་ལ། དེ་བཞིན་དུ་བད་ཀན་ཟད་པར་བྱ་བའི་ཕྱིར་ཨརྐ་དང་། ཨག་ནི་མན་ཐ་དང་། ནིམ་པ་གསུམ་གྱི་རྩ་བ་ཐང་ཤིང་ཡུངས་ཀར་བཏགས་ཏེ་སྦྲང་རྩི་དང་སྦྱར་བ་བསྐུ་བར་བྱའོ། །གྲོག་མཁར་ཞེས་བྱ་བ་ནི་གྲོག་མས་བརྐོས་པ་ལས་

Vol. 202 · folio 46b

བཏོན་པའི་སའོ། །བད་ཀན་ཟད་ཕྱིར་དྲག་ཤུལ་ནི། །བཟོད་ན་དེ་ལ་བརྟེན་པར་བྱ། །ཞེས་བྱ་བ་ལ། བརླ་རེངས་ཀྱི་ནད་དང་ལྡན་པ་དེ་ལ་བད་ཀན་ཟད་པར་བྱ་བའི་ཕྱིར་དྲག་ཤུལ་གྱི་རྩོལ་བས་ལུས་དུབ་པར་བྱེད་པ་དག་བཟོད་ཅིང་ནུས་ན་དེ་ལ་བརྟེན་ཞིང་གནས་པར་བྱའོ། །དེ་ཡང་

འདི་ལྟ་སྟེ། ཐང་ལ་མཆོང་དང་ཅི་ནུས་ཀྱི། །ཉལ་པོ་དག་ཀྱང་ཡོངས་སུ་བརྟེན། །ཞེས་བྱ་བ་ལ། གཞི་མཉམ་པའི་ས་གཞི་ལ་མཆོད་ཞིང་བརྒལ་བ་དང་། དེ་བཞིན་དུ་ལུས་ཀྱི་ཉམས་སྟོབས་ལས་དཔགས་ཏེ་བུད་མེད་ལ་བརྟེན་ཞིང་ཉལ་པོ་བྱའོ། །ཆུ་མིག་གཡོ་དང་ལྡེང་ཀ་

དང་། །ཆུ་རྒྱུན་བཟློག་པས་ཆུ་བོ་བརྒལ། །ཞེས་བྱ་བ་ལ། དེ་བཞིན་དུ་ཆུ་མི་གཡོ་ཞིང་བརྟན་པར་གནས་པ་ལ། ཅི་བདེར་གནས་པ་དང་། དེ་བཞིན་ཆུའི་རྒྱུན་བཟློག་ཅིང་གྱེན་དུ་བརྒལ་བར་བྱའོ། །འདིར་ནི་ཚིལ་དང་བད་ཀན་དག །ཟད་ནས་སྣུམ་ལ་སོགས་པ་གཏང་།

ཞེས་བྱ་བ་ལ། བརླ་རེངས་ཀྱི་ནད་འདི་ལ་ཚིལ་དང་བད་ཀན་གཉིས་ཟད་ཅིང་བྲི་བར་གྱུར་ནས་སྣུམ་ལ་སོགས་པ་རླུང་གི་གསོ་བར་བཤད་པ་གཏང་བར་བྱའོ། །གནས་དང་ལུས་ཟུངས་སོགས་བརྟགས་ལ། །ལྷག་མ་རྣམས་ཀྱང་གསོ་བར་བྱ། །ཞེས་བྱ་བ་ལ། རླུང་ནད་ལྷག་

མ་གཟུགས་འཁུམས་པ་ནས་རྐང་པ་ཚ་བའི་བར་གྱི་རླུང་ནད་ལ་གནས་དང་ལུས་ཟུངས་ཉམས་སྟོབས་དང་དུས་ལ་སོགས་པ་ལ་བརྟགས་ཏེ། ཅི་རིགས་པར་གསོ་བར་བྱའོ། །ས་ཧ་ར་ཛ་ཐང་ཤིང་དང་། །དོང་གྲ་བསྐོལ་བ་ཏིལ་མར་སྦྱར། །རླུང་གིས་ལུས་གཟེར་ལ་བླུད་ན། །ཅི་འདོད་

ཐོགས་པ་མེད་འགྲོ་ནུས། །ཞེས་བྱ་བ་ལ། ས་ཧ་ར་ཛ་ཐང་ཤིང་དང་། དོང་གྲ་བསྐོལ་བའི་ཆུ་ཏིལ་མར་དང་སྦྱར་ཏེ། རླུང་གིས་ལུས་གཟིར་ཅིང་ཉེན་པ་ལ་བླུད་ན་ཅི་འདོད་པ་བཞིན་དུ་ཐོགས་པ་མེད་པར་འགྲོ་ནུས་པར་འགྱུར་རོ། །ར་སྣ་དོང་གྲ་ཙི་ཏྲ་ཀ །ཟུར་པ་མ་ནུ་པི་པི་ལིང་། །བཏགས་

པའི་ཕྱེ་མ་མར་བསྐོལ་བ། རླུང་ནད་སེལ་བར་བྱེད་པའི་མཆོག །ཅེས་བྱ་བ་ལ། ར་སྣ་ལ་སོགས་པའི་སྨན་བཏགས་པའི་ཕྱེ་མ་མར་དང་བསྐོལ་ན་རླུང་ནད་སེལ་བར་བྱེད་པའི་ཆོ་ག་ཡིན་ནོ། །ནིམ་པ་སླེ་ཏྲེས་བ་ཤ་ཀ །ཀནྜ་ཀ་རི་པ་ཏོ་ལ། །སྲང་ནི་བཅུ་བཅུ་ཚད་བྱས་པ། །ཆུ་བྲེ་བཅུ་

Vol. 202 · folio 47a

དྲུག་ནང་དུ་བསྐོལ། །ཁུ་བ་བརྒྱད་ཆ་ལུས་པ་དེར། །མར་ནི་བྲེ་གང་བཅུག་སྟེ་བསྐོལ། །པ་ཏ་ཐང་ཤིང་བྱི་དང་ག །དོང་གྲ་ཧ་ཏི་པི་པི་ལིང་། །སྐྱེར་བ་ཤུ་ཏི་དབྱི་མོ་དང་། །ཏེ་ཛོ་བ་ཏ་ན་ལེ་ཤམ། །རུ་རྟ་དང་ནི་དུག་མོ་ཡུངས། །ཐལ་སྨན་རྣམས་པ་གཉིས་པོ་དང་། །ཏི་མུ་ས་དང་ཀྲུ་ཏྲུག་ཏྲེས། །བསེ་ཤིང་

འབྲས་བུ་པུ་ཙེ་ཤེལ། །ཤུ་དག་པི་པི་ལིང་རྩ་བ། །བཙོད་དང་བོང་ང་ལ་ལ་ཕུད། །ཞོ་ནི་གཉིས་གཉིས་ཚད་བྱས་པ། །གུ་གུལ་སྦྱར་བ་སྲང་ལྔ་དང་། །ལྡེ་གུ་བཏབ་སྟེ་བསྐོལ་བའི་མར། །བླུད་ན་རླུང་ནི་ཚབས་ཆེ་བ། །རུས་ཚིགས་རྐང་ལ་ཞེན་པའང་འཇོམས། །མཛེ་ནད་དེ་འདྲའང་སེལ་བར་བྱེད། །བུ་ག་རྨ་དང་ལྦ་བ་

དང་། །མཚན་བར་རྡོལ་དང་འབྲས་ཀྱི་ཕྲེང་། །ནམ་ཚོང་ཡན་ཆད་ནད་ཀུན་དང་། །སྐྲན་དང་གཞང་འབྲུམ་ཟ་ཁུ་དང་། །གཅོང་ཆེན་དབུགས་ནི་མི་བདེ་དང་། །ཡི་ག་འཆུས་དང་ཆམ་པ་དང་། །ལུས་པ་འོར་ནད་སྙིང་ནད་དང་། །སྐྱ་རྦབ་མྱོས་དང་ཁོང་འབྲས་དང་། །རླུང་དང་ཁྲག་གི་ནད་རྣམས་འཇོམས། །ཞེས་བྱ་བ་ལ། ནིམ་

པ་ལ་སོགས་པའི་སྨན་སྲང་བཅུ་བཅུའི་ཚད་དུ་བྱས་པ་ཇི་སྐད་སྨོས་པ་བཞིན་བསྐོལ་ཏེ། དེ་ལས་སྨན་ཁུ་བྲེ་དོ་ལུས་པ་ལ་མར་བྲེ་གང་བཅུག་སྟེ། པ་ཐ་ལ་སོགས་པ་ཞོ་གཉིས་གཉིས་ཀྱི་ལྡེ་གུར་བྱས་པ་དང་། གུ་གུལ་དག་ཅིང་དྲི་མ་མེད་པར་བྱས་པ་སྲང་ལྔ་ཡང་བཅུག་སྟེ་ལྡེ་གུར་བྱས་པ་དང་བསྐོལ་བའི་མར་བླུད་ན་

རླུང་ནད་ཤིན་ཏུ་ཚབས་ཆེ་བར་འཁྲུགས་ཤིང་རུས་པ་དང་། ཚིགས་དང་རྐང་པ་ལ་ཡང་ཞེན་པ་འཇོམས་པར་བྱེད་ལ། དེ་བཞིན་དུ་མཛེ་ནད་རུས་པ་དང་། རྐང་པ་ལ་ཞེན་པ་ཡང་སེལ་བར་བྱེད་པ་དང་། བུ་གའི་ནང་གི་རྨ་དང་ལྦ་བ་ལ་སོགས་པའི་ནད་འཇོམས་པར་བྱེད་པ་ཡིན་ནོ། །ཐལ་སྨན་གཉིས་ནི་ཡ་བཀྵ་ར་དང་།

སྭ་རྫི་ཀྵ་རའོ། །བིལ་བ་གཞོན་ནུའི་འོ་མ་དང་། །མར་གྱི་ཉིང་ཁུ་བསྐོལ་ནས་ནི། །དེ་ལས་སྲང་ནི་གཅིག་གམ་ཕྱེད། །སྣ་སྨན་བྱས་མགོའི་རླུང་ནད་སེལ། །ཞེས་བྱ་བ་ལ། བིལ་བ་གཞོན་ནུ་དང་། འོ་མ་བསྐོལ་བ་དང་། མར་གྱི་ཉིང་ཁུ་ཞེས་བྱ་བ་མར་ཁུའི་སྟེང་གི་ཆའི་དངས་མ་བསྐོལ་ལ་དེ་ལས་སྲང་གཅིག་གམ་སྲང་ཕྱེད་

ཙམ་སྣ་སྨན་དུ་བཏང་ན་མགོ་བོའི་རླུང་ནད་ཐམས་ཅད་སེལ་བར་བྱེད་དོ། །དེ་བཞིན་ཆུ་སྲིན་ནག་ཁྲ་དང་། །ཉ་དང་རུས་སྦལ་འུག་པའི་ཚིལ། །བསྐོལ་བ་མ་འདྲེས་རླུང་ལ་ནི། །ཁྱད་པར་དུ་ནི་གཏང་བར་བྱ། །ཞེས་བྱ་བ་ལ། ཆུ་སྲིན་ལ་སོགས་པའི་ཤིང་ངམ་སྔ་མ་བཞིན་དུ་བིལ་བ་གཞོན་ནུ་དང་བསྐོལ་བ་ཡང་རླུང་གི་ནད་

Vol. 202 · folio 47b

གཞན་དང་མ་འདྲེས་པ་ལ་ཕན་ནོ། །ཏིལ་གྱི་ཚིགས་མ་རྙིང་པ་དང་། །རྩ་བ་ལྔ་པོ་སོ་སོར་བསྐོལ། །གཅིག་ཏུ་བསྲེས་པ་ཏིལ་མར་ནི། །འོ་མ་བརྒྱད་ཆའི་ནང་དུ་བསྐོལ། །བླུད་ན་རླུང་དང་བད་ཀན་དང་། །འདྲེས་པའི་ནད་ནི་མཆོག་ཏུ་འཇོམས། །ཞེས་བྱ་བ་ལ། ཏིལ་གྱི་ཚོགས་མ་འབའ་ཆ་རྙིང་པ་དང་། རྩ་བ་ལྔ་བ་ཆེན་པོ་སྟེ། དེ་གཉིས་

སྨན་བསྐོལ་བའི་ཆོ་གས་སོ་སོར་བསྐོལ་ལ། དེ་གཉིས་གཅིག་ཏུ་བསྲེས་པ་ཏིལ་མར་འོ་མ་བརྒྱད་ཆའི་ནང་དུ་བསྐོལ་ལ། ཏིལ་མར་བླུད་ན་རླུང་དང་བད་ཀན་འདྲེས་པའི་ནད་གང་དག་ཡིན་པ་དེ་སེལ་ཞིང་འཇོམས་པར་བྱེད་དོ། །པྲ་ས་ར་ནི་སྲང་བརྒྱད་བསྐོལ། །ཏིལ་མར་འོ་མ་བྲེ་རེ་དང་། །མེ་ད་གཉིས་དང་ཤ་པུ་ཥྲ། །བཙོད་དང་རུ་

རྟ་ར་སྣ་དང་། །ཙནྡན་དམར་པོ་ཛི་བ་ཀ །ར་སྣ་རམ་ཉེ་བ་གཉིས་དང་། །ཐང་ཤིང་བཏགས་པའི་ལྡེ་གུ་དང་། །བསྐོལ་བླུད་རླུང་ནད་ཐམས་ཅད་སེལ། །ཞེས་བྱ་བ་ལ། སྨན་པྲ་ས་ར་སྲང་བརྒྱད་བསྐོལ་བའི་ཁུ་བའི་ནང་དུ་ཏིལ་མར་བྲེ་གང་འོ་མ་བྲེ་གང་བསྲེས་ལ་མེ་ད་གཉིས་ལ་སོགས་པའི་སྨན་ལྡེ་གུའི་ཚུལ་དུ་བཏགས་ལ་བསྐོལ་

བའི་ཏིལ་མར་དེས་ནི་རླུང་ལ་སོགས་པའི་ནད་ཇི་སྙེད་པ་ཐམས་ཅད་སེལ་ཞིང་འཇོམས་པར་བྱེད་དོ། །ས་ཧ་ར་ཛའི་རྩ་བ་ཡལ་གར་བཅས། །སྲང་བརྒྱ་རྩ་བ་བཅུ་ནི་དེ་དང་མཉམ། །ཉེའུ་ཤིང་སྲང་ནི་ལྔ་བཅུ་ཆུ་བྲེ་དྲུག་ཅུ་ནི། །རྩ་བཞིའི་ནང་བསྐོལ་བཞི་ཆ་ལུས་བ་དེར། །ཆུ་སྲིན་སེན་མོ་རུ་རྟ་བུ་ཤེལ་ཙེ། །ཙནྡན་སུག་སྨེལ་པྲི་ཀ་པྲི་

ཡང་ཀུ། །ན་ལི་ཀ་དང་རྡོ་དྲེག་བ་ལེ་ཀ །སྤང་སྤོས་ཐང་ཤིང་བཙོད་དང་ཨ་ཀ་རུ། ཙ་རོང་ཤུ་ཏི་རྒྱ་སྤོས་དུ་རུ་ཀ །སྲང་རེ་ཆ་མཉམ་འོ་མར་བཅས་པ་ནི། །ཏིལ་མར་བྲེ་བཞི་ལྷན་ཅིག་བསྐོལ་བ་བླུད། །རླུང་ནད་གསོ་དཀའ་དག་ཀྱང་འཇོམས་པར་བྱེད། །ལུས་འདར་ལུས་ལ་རླུང་འཇུག་ལུས་རངས་དང་། །ལུས་བསྐམས་པ་ཡིས་

ཤིན་ཏུ་གཟིར་ལ་སོགས། །སྐྲན་དང་སྨྱོ་བྱེད་ཆམ་པ་མངལ་ནད་འཇོམས། །ཞེས་བྱ་བ་ལ། སྨན་ས་ཧ་ར་ཛའི་རྩ་བ་དང་ཡལ་ག་སྲང་བརྒྱ་རྩ་བཅུ་ཡང་དེ་དང་མཉམ་པ་སྟེ། སྤྱིར་སྲང་བརྒྱ། ཉེའུ་ཤིང་སྲང་ལྔ་བཅུ་ཆུ་བྲེ་དྲུག་ཅུ་རྩ་བཞིའི་ནང་དུ་བསྐོལ་སྨན་གྱི་ཁུ་བ་བཞི་ཆ་ལུས་པ་དེར་ཆུ་སྲིན་སེན་མོ་ལ་སོགས་པ་སྨན་སྣ་རེ་ཞིང་སྲང་རེ་འོ་མ་བྲེ་

བཅུ་དྲུག་དང་། ཏིལ་མར་བྲེ་བཞི་ལྷན་ཅིག་བསྐོལ་ཏེ་ཏིལ་མར་ལུས་པ་བླུད་ན་རླུང་གི་ནད་ཤིན་ཏུ་གསོ་བར་དཀའ་བ་དང་། ལུས་འདར་བ་ལ་སོགས་པ་འཇོམས་པར་བྱེད་དོ། །པྲི་ཀ་ནི་བ་ལི་ཏ་སྟེ་འ་བུ་སུག་ཧང་ངོ་། །ན་ལི་ཀ་ནི་བི་རུ་མ་ལ་ཏའོ། །བ་ལ་ཀ་ནི་ཨམ་བུའོ། །རྡོ་དྲེག་ནི་ཤིལ་པུས་པའོ། །ཙ་རོང་ནི་ཙནྡན་ནོ། །ས་ཧ་ར་ཛ་སྲང་བརྒྱ་ཡི། །

Vol. 202 · folio 48a

ཁུ་བར་ཏིལ་མར་བྲེ་བཞི་བསྐོལ། །དེ་རྩ་ལྡེ་གུ་སྲང་བཅུ་དང་། །འོ་མ་བཞི་འགྱུར་བཅུག་སྟེ་བསྐོལ། །ཡང་ན་རྒྱ་སྤོས་ཤུ་དག་དང་། །སྤྲི་ར་རུ་རྟ་ཤུ་དག་དང་། །སུག་སྨེལ་རྡོ་དྲེག་སྤང་སྤོས་དང་། །ཤུ་ཏི་ཙནྡན་དམར་པོ་གཞུག །བསྐོལ་བ་དེ་ནི་ཁ་རའི་ཆུ། །སྲང་ནི་བཅོ་བརྒྱད་གཞུག་པར་བྱ། །ཏིལ་མར་སྨན་མར་ཡིན་པར་

བཤད། །དེས་ནི་རླུང་ནད་མ་ལུས་དང་། །རླུང་ནད་འཁྱིལ་དང་སྨྱོ་བྱེད་དང་། །སྐྲན་དང་རླིག་རླུགས་ལ་སོགས་སེལ། །ཞེས་བྱ་བ་ལ། ས་ཧ་ར་ཛ་སྲང་བརྒྱ་སྨན་ཁུ་བསྐོལ་བའི་སྦྱོར་བས་བསྐོལ་ལ། ཁུ་བ་དེའི་ནང་དུ་ཏིལ་མར་བྲེ་བཞི་དང་བསྲེས་ཏེ། ས་ཧ་ར་ཛའི་ལྡེ་གུ་སྲེང་བཅུ་དང་འོ་མ་ཏིལ་མར་གྱི་བཞི་འགྱུར་བཅུག་ལ་བསྐོལ་

ཏེ་སྨན་མར་བྱ་བའམ། ཡང་ན་ས་ཧ་ར་ཛའི་རྩ་བ་སྲང་བཅུ་པོ་མི་གཞུག་པར་རྒྱ་སྤོས་ལ་སོགས་པ་སྲང་བཅུ་བཅུག་ལ་བསྐོལ་བར་བྱས་ཏེ། ཏིལ་མར་གཉིས་གང་བྱས་ཀྱང་རུང་སྟེ། དེ་བསྐོལ་བའི་ནང་དུ་ཁ་ར་དཀར་པོའི་ཕྱེ་མ་སྲང་བཅོ་བརྒྱད་གཞུག་པར་བྱའོ། །དེ་ལྟ་བུའི་ཏིལ་མར་གྱི་སྨན་མར་བླུད་ན་དེས་རླུང་ནད་གསོ་

དཀའ་བ་མ་ལུས་པ་དང་། རླུང་ནད་འཁྱིལ་པ་ལ་སོགས་པ་སེལ་བར་བྱེད་དོ། །བ་ལ་སྲང་བརྒྱ་སླེ་ཏྲེས་ནི། །ཆུ་བྲེ་བཞི་བརྒྱའི་ནང་དུ་བསྐོལ། །ཁུ་བ་བརྒྱད་ཆ་ལུས་པ་དང་། །ཞོ་དང་ཞོ་ག་ཆུ་བུ་རམ། །ཤིང་ཁུ་ཚྭ་དང་ཏིལ་མར་དང་། བྲེ་ནི་བཞི་བཞི་བསྐོལ་ནས་ནི། །ར་ཡི་འོ་མ་ཆ་ཕྱེད་དང་། །ཟུར་པ་

སྐྱེར་པ་ས་ར་ལ། །སུག་སྨེལ་བཙོད་དང་ཨ་ཀ་རུ། ཙནྡན་ཨ་ཏི་བ་ལ་དང་། །ཤུག་པ་གླ་སྒང་མུདྒའི་ལོ། །ཧ་རེ་ཎུ་ཀ་ཤིང་མངར་དང་། བྱ་གྲི་ན་ག་བྱེའུ་རུག་པ། །ཟངས་རྩི་བ་དང་ཛི་བ་ཀ །གླ་རྩི་ལྕེ་ཕོག་པ་ལ་ཤ། །ཛཱ་ཏི་ཤོ་ཀ་ན་ལི་ཀ །གུར་གུམ་རྡོ་དྲེག་པྲི་ཀ་དང་། །ཛཱ་ཏི་ཕ་ལ་ཀད་པ་ལ། །བ་ལི་ཀ་དང་ཤིང་ཚ་དང་། །

ཀུན་ཏུ་རུ་དང་ག་ཕུར་དང་། །ཤི་རི་བ་ས་དུ་རུ་ཀ །ལི་ཤི་ཆུ་སྲིན་སེན་མོ་དང་། །རུ་རྟ་སྤང་སྤོས་ཀ་ཀོ་ལ། །པྲི་ཡང་ཀུ་དང་སྟོ་ནེ་ཡ། །རྒྱ་སྤོས་ཤུ་དག་བྱ་མ་ཀ །མ་ད་ན་ག་བླ་བ་དང་། །ནཱ་ག་གེ་སར་སྲང་རེ་དང་། །བསྐོལ་ཏེ་བཙགས་པར་གྱུར་པ་རུ། །གནྡྷ་བྷ་དྲའི་ལྡེ་གུ་ནི། །ཆོ་ག་བཞིན་དུ་བཅུག་པ་དེས། །ལུད་པ་དབུགས་མི་བདེ་དང་རིམས། །

བརྒྱལ་དང་སློན་སྐྲན་ཟད་བྱེད་དང་། །གློ་འགྲམས་མཆེར་ནད་སྐེམས་པ་དང་། །བརྗེད་བྱེད་བཀྲ་མི་ཤིས་པ་སེལ། །བ་ལི་ཏིལ་མར་བཟང་པོ་ནི། །རླུང་ག་ནད་ནི་འཇོམས་བྱེད་ཡིན། །ཞེས་བྱ་བ་ལ། སྨན་བ་ལ་སྲང་བརྒྱ། སླེ་ཏྲེས་བཞི་ཆ་སྟེ་སྲང་ཉི་ཤུ་རྩ་ལྔ། ར་སྣ་བརྒྱད་ཆ་སྟེ་སྲང་ཕྱེད་དང་བཅུ་གསུམ། ཆུ་བྲེ་བཞི་བརྒྱ་ཆ་སྟེ་ཆུ་སྲང་ཁྲི་ཉིས་

Vol. 202 · folio 48b

སྟོང་དགུ་བཅུ་རྩ་དགུ་དང་བསྐོལ་བ་ལ། དེ་ལ་ཆུ་བྲེ་བརྒྱད་ཆ་སྟེ་བྲེ་བཞི་ལུས་པར་གྱུར་པ་དང་ཞོ་དང་ཞོ་ག་ཆུ་དང་བུ་རམ་ཤིང་གི་ཁུ་བ་དང་། ཚ་བྲེ་བཞི་བཞི་ཏིལ་མར་བྲེ་བཞི་དང་བསྐོལ་ནས་རའི་འོ་མ་ཆ་ཕྱེད་དེ་བྲེ་དོ་བཅུག་ལ་ཟུར་པ་ལ་སོགས་པའི་སྨན་སྣ་རེ་ཞིང་སྲང་རེའི་ལྡེ་གུ་བཅུག་པ་བསྐོལ་ལ་ཚོས་པ་དང་ཕབ་སྟེ་བཙགས་པའི་

ནང་དུ་གནྡྷ་བྷ་དྲའི་ལྡེ་གུ་སྲང་གཅིག་ཙམ་མམ། ཡང་ན་ཅི་རན་གཞུག་པར་བྱའོ། །དེ་ནས་ཏིལ་མར་དེ་ཆོ་ག་བཞིན་དུ་བཅུག་ན་ལུད་པ་དང་དབུགས་མི་བདེ་བ་ལ་སོགས་པ་སེལ་བར་བྱེད་དོ། །བ་ལའི་ཏིལ་མར་འདི་ནི་སྨན་གྱི་མཆོག་དམ་པ་ཡིན་པས་རླུང་གི་ནད་ཐམས་ཅད་འཇོམས་པར་བྱེད་པ་ཡིན་ནོ། །མུདྒའི་འོ་མ་

ནི་མུདྒ་པ་རྞིའོ། །ཧ་རེ་ཎུ་ཀ་ནི་ཀོན་ཏིའོ། །ལྕེ་པོག་ནི་བོ་ལའོ། །པ་ལ་ཤིང་ནི་རྒྱ་སྐྱེགས་ཤིང་པོ། །ཛཱ་ཏི་ཀ་ཤ་ནི་ཛཱ་ཏི་པ་ཏྲའོ། །ན་ལི་ཀ་ནི་བེ་དྲུ་མ་ག་ཏའོ། །ཛཱ་ཏི་ཕ་ལ་ནི་ལིག་ཤི་ལྦེར་རོ། །བ་ལ་ཀ་ནི་ཨ་མ་ནུའོ། །ཀ་ཀོ་ལ་ནི་བ་ཧུའི་ཛ་ག་སྟེ་ས་བོན་མང་པོ་ཅན་ནོ། །སྟོ་ན་ཡ་ནི་ཏྲེ་ལ་པ་ཏྲི་ཀའོ། །བྱ་མ་ཀ་ནི་ད་བ་ད་གི་ཐའོ། །མ་

དན་ཀ་ནི་མ་ནམ་ཐའོ། །བླ་བ་ནི་ཀུན་ཏན་ན་ཐའོ། །བཏུང་དང་སྣ་སྨན་བསྐུ་དང་འཇམ་རྩི་ནི། །སྣུམ་གྱི་སྦྱོར་བའང་དུས་སུ་ལེགས་བསྟེན་ན། །དེས་ནི་མ་རུངས་རླུང་ནད་མྱུར་ཞི་བྱེད། །བུད་མེད་མོ་གཤམ་བུ་ཡི་སྣོད་བྱེད་འགྱུར། །ཞེས་བྱ་བ་ལ། སྨན་འདི་བཏུང་བ་དང་། སྨན་ལ་སོགས་པ་སྦྱོར་བ་བཞི་ལ་སྣུམ་གྱིས་

སྦྱོར་བར་དུས་དང་རྗེས་སུ་མཐུན་པར་བསྟེན་ཅིང་གོམས་པར་བྱས་ནས་རླུང་ནད་ཤིན་ཏུ་མི་བཟད་པ་དག་ཞི་ཞིང་སེལ་བར་བྱེད་ལ། དེ་བཞིན་དུ་བུད་མེད་མོ་གཤམ་བུ་མེད་པ་དག་ཀྱང་བུའི་སྣོད་ཉིད་དུ་འགྱུར་ཞིང་བུ་སྐྱེད་པར་བྱེད་པའི་དོན་ནོ། །གང་ཚེ་བད་ཀན་མཁྲིས་པ་ནི། །ཞུ་བའི་གནས་འདུག་སྣུམ་དུགས་ཀྱིས། །ཞུ་ནས་མཁྲིས་

པར་སྣང་གྱུར་པ། །དེ་ལ་འཇམ་རྩིས་བསལ་བར་བྱ། །ཞེས་བྱ་བ་ལ། སྣུམ་དང་དུགས་ཀྱི་སྦྱོར་བ་བྱས་པས་གང་གི་ཚེ་བད་ཀན་ཞུ་བའི་གནས་ན་འདུག་ཅིང་ཞུ་ཞིང་མཁྲིས་པའི་ཚུལ་དུ་སྣང་བར་གྱུར་པའམ། ཡང་ན་མཁྲིས་པ་ཞུ་བའི་གནས་ན་འདུག་པ་དེ་སྣུམ་དང་དུགས་ཀྱི་ཞུ་ནས་མཁྲིས་པའི་ཚུལ་དུ་

སྣང་བར་གྱུར་ན་དེ་གཉིས་ཀ་ལ་འཇམ་རྩི་བཏང་བས་བསལ་ཞིང་སྦྱང་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས་གསོ་བའི་གནས་ལེའུ་ཉི་ཤུ་རྩ་གཅིག་པའི་རྣམ་པར་འགྲེལ་བའོ།། །།

Vol. 202 · folio 49a

དེ་ནས་དྲེག་ནད་གསོ་བ་བཤད་པར་བྱའོ། །ཞེས་བྱ་བ་ལ། བསྟེན་པ་ཇི་ལྟ་བ་བཞིན་དུ་བཤད་པ་ཡང་དེ་ལྟ་བུར་བྱས་པའི་ཚུལ་གྱིས་རིམས་ལ་སོགས་པའི་གསོ་བ་རྣམ་པར་དགོད་པ་ཡིན་པས་དྲེག་ནད་གསོ་བ་སྐབས་འདིར་བརྩམས་པ་ཡིན་ནོ། །དྲེག་ནད་

ཅན་ནི་སྣུམ་ཆོས་བྱས། །རླུང་བསྲུབས་ནད་གཞི་ཉམས་སྟོབས་ལས། དཔགས་ཏེ་ཁྲག་ནི་ཅུང་ཟད་ཙམ། །ལན་མང་དུ་ནི་དབྱུང་བར་བྱ། །ཞེས་བྱ་བ་ལ། དྲེག་ནད་ཀྱིས་བཏབ་པའི་མི་ལ་ནི་དང་པོར་སྣུམ་བཅོས་བྱས་ནས་དེའི་རྗེས་ལ་ཁྲག་དབྱུང་ཞིང་གཏར་ག་བྱ་ལ། དེ་ཡང་ནད་

གཞིའི་ཚུལ་དང་ལུས་ཀྱི་ཉམས་སྟོབས་ཅི་ཡོད་པ་ལས་དཔག་ཅིང་རླུང་མི་ལྡང་བར་བསྲུངས་ལ་ཁྲག་ཉུང་ཟད་ཉུང་ཟད་ལན་མང་དུ་བསྟུད་མར་དབྱུང་བར་བྱའོ། །དམར་གཟེར་ན་ཞིང་ཚ་བ་ལ། །སྲིན་བུ་པད་པས་ཁྲག་དབྱུང་ངོ་། །གཡའ་ཞིང་ན་ལ་ཙག་ཙག་ཚ། །ཤས་ཆེར་ཚ་ལ་རྔབས་རྭས་

དབྱུང་། །ཞེས་བྱ་བ་ལ། དྲེག་ནད་མདོག་དམར་བ་ལ་སོགས་པར་སྣང་བར་གྱུར་པ་ལ་ནི་སྲིན་བུ་པད་པས་འཇིབས་པས་ཁྲག་དབྱུང་ཞིང་གདོན་པར་བྱའོ། །དེ་བཞིན་དུ་གཡའ་བ་དང་ལྷང་ལྷང་པོར་ན་བ་དང་། ཡུངས་ཀར་གྱི་ལྡེ་གུས་བསྐུས་པ་ལྟར་ཙག་ཙག་པོར་ཚ་བ་དང་། ཤས་ཆེར་ཚ་ཞིང་

ཚ་བ་འུར་འུར་པོར་ཁྱབ་པ་ལ་ནི་རེ་འམ་ཀུ་བས་ཁྲག་དབྱུང་བར་བྱའོ། །གནས་ནས་གནས་སུ་འཕོས་པ་ལ། །གཏར་ག་འམ་ཞལ་ཞལ་གྱིས་ཁྲག་དབྱུང་། །ཞེས་བྱ་བ་ལ། ནད་ཁྲག་ལུས་ཀྱི་གནས་ཀྱི་ཕྱོགས་གཅིག་ནས་གཅིག་ཏུ་འཕོས་ཤིང་འགྲོ་བ་ལ་ནི་གཏར་ག་གདབ་པའམ། ཞལ་ཞལ་བྱ་ཞིང་

ཁྲག་དབྱུང་བར་བྱའོ། །དེ་ཡང་ཉུང་ཤས་ཉུང་ཤས་ལན་མང་དུ་དབྱུང་བར་བྱའོ། །ལུས་ཞུམ་པ་དང་ཁོང་རྩུབ་ཅིང་། །རླུང་ཤས་ཆེ་ལ་ཁྲག་མི་དབྱུང་། །ཞེས་བྱ་བ་ལ། །ལུས་ཞུམ་ཞིང་སྙིང་ལ་ཉམ་ཆུང་བ་དང་། ཁོང་རྩུབ་ཅིང་རླུང་ནད་ཀྱི་ཤས་ཆེ་བར་གྱུར་པའི་དྲེག་ནད་ལ་ནི་ཁྲག་དབྱུང་

བར་མི་བྱའོ། །ཁྲག་ཟད་པ་ལ་རླུང་གིས་ནི། །སྐྲངས་བ་གཏིང་ཟབ་རེངས་པ་དང་། །འདར་ཞིང་རྩ་རྒྱུས་ན་དང་ཞུམ། །རླུང་ནད་གཞན་ཡང་སྐྱེད་པར་བྱེད། །ཅེས་བྱ་བ་ལ། ཁྲག་གཏར་དྲགས་པ་ལས་ཟད་པར་གྱུར་ནས་རྒྱུ་དེས་རླུང་ནད་ལྡང་ཞིང་འཁྲུགས་པར་གྱུར་པ་ལ། དྲེག་ནད་ཀྱིས་སྐྲངས་པ་

Vol. 202 · folio 49b

འདི་ཟབ་ཅིང་མི་མངོན་པ་དང་། ལུས་ཤིང་ལྟར་རེངས་པ་དང་། འདར་ཞིང་གཡོ་བ་དང་། རྩ་དང་རྒྱུས་པ་ལྷང་ལྷང་པོར་ན་བ་དང་། རྐང་ལག་ཞུམ་ཞིང་རྙིད་པ་དང་། །དེ་བཞིན་དུ་རླུང་ལས་གྱུར་པའི་ནད་མི་བཟད་པ་གཞན་ཡང་སྐྱེད་པར་བྱེད་དོ། །སྣུམ་ཆོས་བྱས་ལ་བཀྲུ་སྨན་ནི།

སྣུམ་དང་ལྡན་པས་འཁྲུ་རུ་གཞུག །ཅེས་བྱ་བ་ལ། རླུང་ལས་གྱུར་པའི་དྲེག་ནད་ཅན་དེ་ལ་དང་པོར་སྣུམ་ཆོས་ལེགས་པར་བྱས་ལ། དེའི་འོག་ཏུ་སྣུམ་དང་ལྡན་པའི་བཀྲུ་སྨན་བྱིན་ལ་འཁྲུར་གཞུག་པར་བྱའོ། །རླུང་ཤས་ཆེ་བའི་དྲེག་ནད་ལ། །མར་ནི་རྙིང་པ་བླུད་པར་བྱ། །ཞེས་བྱ་བ་ལ། རླུང་གི་

ཤས་ཆེ་བའི་རླུང་ཁྲག་འདྲེས་པའི་དྲེག་ནད་ལ་མར་རྙིང་པ་བླུད་པར་བྱའོ། །རམ་ཉེ་བ་དང་སྲ་མན་ནི། །པ་ཡས་སྱེ་དང་ཛི་བ་ཀ །ཟངས་རྩི་བ་རྣམས་ཆ་སྙོམས་ཏེ། །འོ་མ་མར་བསྐོལ་དྲེག་ནད་འཇོམས། །ཞེས་བྱ་བ་ལ། རམ་ཉེ་བ་ལ་སོགས་པའི་སྨན་གྱི་ལྡེ་གུར་བྱས་པ་དེ་དང་འོ་མར་

བཅས་པ་བསྐོལ་ཏེ་བླུད་ན་དྲེག་ནད་འཇོམས་པར་འགྱུར་རོ། །རྒུན་འབྲུམ་མ་དུ་ཀ་བསྐལ་བའི། །ཁུ་བ་ཁ་ར་མར་བཅས་པ་འམ། །དེ་བཞིན་སླེ་ཏྲེས་ཁུ་བར་ནི། །འོ་མ་བསྐོལ་བ་བླུད་པར་བྱ། །ཞེས་བྱ་བ་ལ། རྒུན་འབྲུམ་དང་མ་དུ་ཀ་གཉིས་བསྐལ་བའི་ཁུ་བའི་ནང་དུ། ཁ་ར་དཀར་པོ་

བཅུག་པ་དང་བསྐོལ་བ་བླུད་པ་སྦྱར་བའི་མར་དང་། དེ་བཞིན་དུ་སླེ་ཏྲེས་བསྐོལ་བའི་ཁུ་བ་དང་འོ་མ་གཉིས་བསྐོལ་བའི་ནང་དུ་ཁ་ར་བཏབ་པ་བླུད་པར་བྱའོ། །ཏིལ་མར་འོ་མ་ཁ་རར་བཅས། །ལེགས་པར་བསྲེས་ལ་བླུད་པར་བྱ། །པ་ལ་ཉེ་ཤིང་ར་སྣ་དང་། །པི་ལུ་རྩ་བ་བཅུ་པར་བཅས། །དུར་བྱིད་

སྟི་ར་ཨེ་རཎྜ། །བསྐོལ་བའི་འོ་མ་རླུང་དྲེག་སེལ། །བ་གཅིན་འོ་མ་བཞོས་མ་ཐག །བཅས་པའང་ནད་ནི་དེ་འབྱུང་བྱེད། །ཅེས་བྱ་བ་ལ། །བ་གཅིན་དང་བ་འམ་རའི་འོ་མ་བཞོས་མ་ཐག་སྦྱར་བ་བླུད་ན་ཡང་ནད་འཁྱིལ་བ་བདེ་བར་འབྱུང་བར་བྱེད་དོ། །མཁྲིས་པར་ཉེའུ་ཤིང་པུ་ཙེ་ཤེལ། །པ་ཏོ་

ལ་ཡི་རྩ་འབྲས་གསུམ། །སླེ་ཏྲེས་དང་ནི་སྨན་མངར་ཁ། །འོ་མ་འམ་མར་དང་བསྐོལ་ལ་བླུད། །ཅེས་བྱ་བ་ལ། མཁྲེས་པ་ལས་གྱུར་པའི་དྲེག་ནད་ལ་ནི། ཉེའུ་ཤིང་ལ་སོགས་བ་བསྐོལ་བའི་ཁུ་བ་བླུད་པར་བྱ་བའམ། ཡང་ན་སྨན་མངར་བ་དང་ཁ་བ་བསྐོལ་བའི་འོ་མ་འམ། མར་བླུད་པར་བྱའོ། །

Vol. 202 · folio 50a

ནད་གཞི་ཤས་ཆེར་བཀྲུ་སྨན་ཕྱིར། །ཨེ་རཎྜའི་མར་འོ་མར་སྦྱར། །སྦྱོར་བ་ཇི་བཞིན་བླུད་པར་བྱ། །ཞུ་ནས་འོ་མ་འབྲས་ཆན་སྦྱིན། །ཞེས་བྱ་བ་ལ། དྲེག་ནད་ནད་གཞི་མང་པོ་དཀྱེལ་ཆེ་བ་ལས་གྱུར་པ་ལ་ནི་བཀྲུ་སྨན་གྱི་དོན་དུ་ཨེ་རཎྜའི་མར་

འོ་མ་དང་སྦྱར་བ་སྦྱོར་བ་ལས་ཇི་སྐད་བཤད་པའི་རིགས་པས་བཤད་པར་བྱ་ལ། དེ་ཞུ་ནས་འོ་མ་དང་འབྲས་ཆན་སྦྱར་བ་སྦྱིན་པར་བྱའོ། །ཨ་རུ་ར་ནི་མར་བརྔོས་པ། །ཁུ་བ་བླུད་པར་བྱ་བའམ། །ཞེས་བྱ་བ་ལ། ཡང་ན་ཨ་རུ་ར་མར་དུ་བརྔོས་པ་བསྐོལ་བའི་ཁུ་བ་བླུད་པར་བྱའོ། །དུར་

བྱིད་ཕྱེ་མ་རྒུན་ཆུ་འམ། །འོ་མར་སྦྱར་བ་བླུད་པར་བྱ། །ཞེས་བྱ་བ་ལ། ཡང་ན་དུར་བྱིད་ཀྱི་ཕྱེ་མ་རྒུན་ཆུ་དང་སྦྱར་བ་འམ། འོ་མ་དང་སྦྱར་བ་དེ་ལ་བླུད་པར་བྱའོ། །ཡང་ན་དེ་ཡི་ནད་གཞི་ནི། །འཇམ་རྩི་འོ་མ་མར་བཅས་སྦྱར། །ཞེས་བྱ་བ་ལ། ཡང་དྲེག་ནད་ཅན་དེའི་ནད་

གཞི་གང་དག་ཡོད་པ་འཇམ་རྩི་འོ་མ་དང་མར་དུ་བཅས་པ་མས་གཏོང་བས་སྐྱང་བར་བྱའོ། །རླུང་དང་ཁྲག་ནད་གསོ་བ་ལ། །འཇམ་རྩི་ལས་ལྷག་གང་ཡང་མེད། །མཆོག་ཏུ་གཞང་དང་རྩིབ་ལོགས་བརླ། །ཚིགས་ནད་དམུ་རྫིང་ཉམ་ཐག་སེལ། །ཞེས་བྱ་བ་ལ། གང་གི་ཕྱིར་

རླུང་དང་ཁྲག་འཛག་བ་དྲེག་ནད་ཀྱི་གསོ་བ་ལ་ནི་འཇམ་རྩི་མས་གཏོང་བ་ལས་མཆོག་ཏུ་གྱུར་པའི་སྨན་གང་ཡང་ཡོད་པ་མ་ཡིན་ལ། དེ་ལས་ཁྱད་པར་དུ་གཞང་ལ་སོགས་པ་ན་བའི་དྲེག་ནད་ལ་ནི་འཇམ་རྩི་ལས་ལྷག་པ་གང་ཡང་མེད་དོ། །བད་ཀན་ཤས་ཆེ་གླ་སྒང་དང་། །རྒུན་འབྲུ་སྐྱེར་པ་

བསྐོལ་བ་དང་། །འབྲས་བུ་གསུམ་བསྐོལ་སྦྲང་རྩིར་བཅས། །ཡང་ན་སླེ་ཏྲེས་ཅི་རིགས་བླུད། །ཅེས་བྱ་བ་ལ། བད་ཀན་གྱི་ཤས་ཆེ་བ་ལས་གྱུར་བའི་དྲེག་ནད་ལ་ནི་གླ་སྒང་ལ་སོགས་པ་བསྐོལ་བའི་ཁུ་བ་དང་། སྦྲང་རྩིར་བྱས་པ་འམ། འབྲས་བུ་གསུམ་བསྐོལ་བའི་ཁུ་བ་སྦྲང་རྩི་

དང་བཅས་པ་བླུད་པར་བྱ་བའམ། །ཡང་ན་སླེ་ཏྲེས་ཁུ་བར་བསྐོལ་བ་འམ། ལྡེ་གུར་བྱས་པའི་མར་དང་བསྐོལ་བའི་སྦྱོར་བས་ཇི་ལྟར་འཚམ་པར་བྱའོ། །ཇི་ལྟར་འཚམ་པར་སྣུམ་བླུད་དེ། །སློན་བྱས་ནས་ནི་རྩུབ་ཆོས་བྱ། །ཞེས་བྱ་བ་ལ། བད་ཀན་གྱི་ཤས་ཆེ་བར་གྱུར་པའི་དྲེག་ནད་

Vol. 202 · folio 50b

དང་ལྡན་པར་གྱུར་པ་ལ་ནི་ཇི་ལྟར་འཚམ་པ་བཞིན་དུ་སྣུམ་བླུད་དེ། དེའི་འོག་ཏུ་སྐྱུག་སྨན་གྱིས་སློན་དུ་བཅུག་ལ། དེའི་འོག་ཏུ་རྩུབ་པའི་སྦྱོར་བས་གསོ་བར་བྱའོ། །འབྲས་བུ་གསུམ་དང་ཚ་བ་གསུམ། །གནྡྷ་བྷ་དྲ་ཤིང་ཚ་དང་། །ཅུ་གང་ཁ་ར་ཙི་ཏྲ་ཀ །པི་པི་ལིང་རྩ་བྱི་དང་

ག །སྤང་སྤོས་བ་ཤ་ཀའི་ཤུན་ཕྲགས། །རིད་དི་དབྱི་མོ་ལང་ག་ལི། །ཆ་མཉམ་ལྡེ་གུར་བྱས་པ་ལས། །ནང་པར་ལྕགས་སྣོད་བསྐྲུས་ཏེ་བཞག །ཉི་མ་ཕྱེད་དུས་དེ་ཟོས་ན། །ནད་གཞི་ཀུན་གྱུར་དྲེག་ནད་ནི། །གཟེར་དང་ལྡན་ལ་མཆོག་ཏུ་ཕན། །ཞེས་བྱ་བ་ལ།

འབྲས་བུ་གསུམ་ལ་སོགས་པའི་སྨན་ཆ་མཉམ་པ་བཏགས་པ་ལྡེ་གུར་བྱས་ལ་ནད་པར་གྱི་དུས་སུ་ལྕགས་ཀྱི་སྣོད་དུ་བསྐུས་ཏེ་བཞག་ལ། དེའི་འོག་ཏུ་ཉི་མ་ཕྱེད་ཀྱི་དུས་སུ་བཀོགས་ཏེ། ཟོས་ན་ལྡེ་གུ་འམ་ཕྱེ་མ་དེ་ནི་ནད་གཞི་ཀུན་ལས་གྱུར་པ་སྟེ། མཁྲིས་པ་ལས་གྱུར་པའི་དྲེག་ནད་

གཟེར་དང་ལྡན་པ་ལ་ཁྱད་པར་དུ་ཕན་པ་ཡིན་ནོ། །ཀོ་ཀི་ལ་ཀྵ་བསྐོལ་བའི་ཁུ། །བླུད་ཅིང་དེ་ཡི་ཚོད་མ་ཟོས། །སྙིང་རྗེ་གོམས་པའི་སྐྱེས་བུ་ལྟར། །དྲེག་ནད་སེལ་བར་བྱེད་པ་ཡིན། །ཞེས་བྱ་བ་ལ། ཀོ་ཀི་ལཀྵ་བསྐོལ་བའི་ཁུ་བ་བླུད་ཅིང་ཀོ་ཀི་ལཀྵའི་ཚོད་མ་དང་བཅས་

པའི་ཁ་ཟས་ཟོས་ན་དྲེག་ནད་སེལ་བར་བྱེད་དེ། དཔེར་ན་སྙིང་རྗེ་ལ་གོམས་པའི་སྐྱེས་བུས་འགྲོ་བ་ལ་ཞེ་སྡང་བ་སེལ་ཅིང་སྤོང་བར་བྱེད་པ་དང་འདྲའོ། །རྩ་བ་ལྔ་འམ་སྐྱུ་རུ་རའི། །ཁུ་བ་ལི་ལི་ཏ་ཡི་ཞག །འཁྲིག་པ་སྤོང་ཞིང་འཐུངས་ན་ནི། །དྲེག་འཐེང་ཤིན་ཏུ་གཏིང་ཟུག་

སེལ། །ཞེས་བྱ་བ་ལ། རྩ་བ་ལྔ་པ་ཆེན་པོ་བསྐོལ་བའི་ཁུ་བ་འམ། སྐྱུ་རུ་ར་བསྐོལ་བའི་ཁུ་བ་སྲོག་ཆགས་ལི་ལི་ཏ་ཞེས་བྱ་བའི་ཞག་དང་བཅས་པར་འཐུང་ཞིང་ཉལ་བའི་ལས་འཁྲིག་པ་སྤང་ཞིང་ཚངས་པར་སྤྱོད་པ་དང་ལྡན་པས་བསྟེན་ན་དྲེག་ནད་ཀྱིས་འཐེང་བར་གྱུར་ཅིང་།

ལུས་ལ་ཤིན་ཏུ་གཏིང་ཟུག་པར་ཞེན་པ་ཡང་སེལ་བར་བྱེད་དོ། །དེ་ལྟར་ནང་གི་བསྟན་ནས་ནི། །དེ་འོག་ཕྱི་རོལ་གསོ་བ་བཤད། །ཅེས་བྱ་བ་ལ། དེ་ལྟར་བཤད་མ་ཐག་པའི་ཚུལ་གྱིས་ནང་གི་གསོ་བའི་ཆོ་ག་བསྟན་ནས། འདི་མན་ཆད་ནི་ཕྱི་རོལ་ནས་ཇི་ལྟར་གསོ་བ་བཤད་པར་

Vol. 202 · folio 51a

བྱའོ། །རང་སྐྱུར་བྲེ་བཞིར་ཏིལ་མར་དང་། །སྲ་རྩི་པོག་ནི་བཞི་ཆར་བསྐོལ། །ཆུ་ནང་གཟར་བུས་མང་དུ་དཀྲུགས། །རིམས་ཚ་ནད་གཟིར་སེལ་མཆོག་ཡིན། །ཞེས་བྱ་བ་ལ། རང་སྐྱུར་ཀན་ཛི་ཞེས་བྱ་བ་བྲེ་བཞིའི་ནང་དུ་ཏིལ་མར་དང་། སྲ་རྩི་པོག་

དེའི་བཞི་ཆ་བཅུག་སྟེ་བསྐོལ་བ་གཟར་བུས་དཀྲུགས་ནས་ལྡེ་གུར་བྱས་པ་ཕྱི་རོལ་ནས་བསྐུས་ན་རིམས་དང་། ཚ་བ་ལ་སོགས་པའི་ནད་ཀྱིས་གཟིར་བ་སེལ་ཞིང་འཇོམས་པའི་མཆོག་དམ་པ་ཡིན་ནོ། །ཏིལ་མར་བཙོད་དང་སྦྲང་རྩི་དང་། །སྲ་རྩི་པོག་དང་ཐལ་ཏྲེས་བཅས། །

ཏིལ་མར་སྐ་བས་ལུས་བསྐུས་ན། །དྲེག་ནད་སེལ་བའི་དམ་པ་ཡིན། །ཞེས་བྱ་བ་ལ། ཏིལ་མར་བཙོད་ལ་སོགས་པ་དང་བཅས་པ་བསྐོལ་ཏེ། །གོང་པོར་གྱུར་བའི་སྐ་བས་བསྐུས་ན་དྲེག་ནད་སེལ་པར་བྱེད་པ་ཡིན་ནོ། །རྩ་བ་བཅུ་དང་འོ་མ་བསྐོལ། །ཡང་ན་ལྡེ་གུ་ཆུ་

དྲོན་སྦྱར། །བླུགས་ན་རླུང་ཤས་ཆེ་བ་ཡི། །གཟེར་ནད་འཕྲལ་དུ་སེལ་བྱེད་ཡིན། །ཞེས་བྱ་བ་ལ། རྩ་བ་བཅུ་དང་བསྐོལ་བའི་འོ་མ་བླུགས་ན་རླུང་ཤས་ཆེ་བར་གྱུར་པའི་དྲེག་ནད་གཟེར་དང་བཅས་པ་འཕྲལ་དུ་སེལ་བར་བྱེད་པ་ཡིན་ནོ། །ཡང་ན་རྩ་བ་བཅུའི་ལྡེ་གུ་དྲོ་འཇམ་

ཙམ་དང་སྦྱར་ཏེ་བླུགས་ན་ཡང་དེ་དང་འདྲའོ། །ལུས་འཇུག་རེངས་དང་གཟེར་གྱིས་ཉེན། །སྣུམ་བཞི་པོ་ནི་མངར་པའི་སྨན། །དྲོ་འཇམ་སྦྱར་བ་བླུགས་བར་བྱ། །ཞེས་བྱ་བ་ལ། ལུས་ལ་འཇུག་པའི་རླུང་ནད་ལ་སོགས་པས་ཉེན་ཅིང་གཟིར་པའི་ནད་པ་ལ་སྣུམ་བཞི་པོ་ཞུན་

མར་དང་། རྐང་དང་ཚིལ་དང་ཏིལ་མར་དང་། །རྒུན་འབྲུ་ལ་སོགས་པ་མངར་བའི་སྨན་དང་སྦྱར་བ་དྲོ་འཇམ་ཙམ་ལུས་ལ་བྱུག་པར་བྱའོ། །ཚ་བར་གྱུར་ལ་གྲོང་མོ་བླུགས། །ཞེས་བྱ་བ་ལ། གལ་ཏེ་ལུས་ལ་འཇུག་པ་ལ་སོགས་པའི་དྲེག་ནད་དེ་ཚ་བ་ཡིན་ན་ནི་སྣུམ་བཞི་

བོ་དང་མངར་པའི་སྨན་བསྐོལ་བ་བསྒྲངས་པ་བླུགས་པར་བྱའོ། །དེ་བཞིན་ར་ལུག་བ་ཡི་ནི། །འོ་མ་ཏིལ་མར་སྦྱར་བའམ། །ཞེས་བྱ་བ་ལ། དེ་བཞིན་དུ་ར་ལ་སོགས་པའི་འོ་མ་ཏིལ་མར་དང་སྦྱར་བ་ཡང་དྲོ་འཇམ་ཙམ་དུ་བྱས་ཏེ་ལུས་ལ་བྱུག་པ་དང་རེངས་པ་ལ་སོགས་

Vol. 202 · folio 51b

པ་དང་གཟེར་གྱིས་ཉེན་པར་གྱུར་པའི་རླུང་ལས་གྱུར་པའི་དྲེག་ནད་ལ་བླུགས་པར་བྱའོ། །དྲེག་ནད་ཚ་བ་ལ་ནི་འོ་མ་འདི་དག་དང་ཏིལ་མར་སྦྱར་བ་གྲང་མོ་བླུགས་པར་བྱའོ། །འཚོ་བྱེད་སྡེ་ཚན་བསྐོལ་བའམ། །རྩ་བ་ཆུང་ངུ་ལྔ་བསྐོལ་བླུགས། །ཞེས་བྱ་བ་ལ། འཚོ་བྱེད་ཀྱི་

སྡེ་ཚན་བསྐོལ་བའི་ཁུ་བའམ། །རྩ་བ་ཆུང་ངུ་ལྔ་བསྐོལ་བའི་ཁུ་བ་དྲོ་འཇམ་ཙམ་ལུས་ལ་འཇུག་པ་ལ་སོགས་པའི་ནད་ཀྱིས་ཉེན་པ་ལ་བླུགས་པར་བྱ་བ་ལ། །ཚ་བ་ལ་ནི་གྲང་མོ་བླུགས་པར་བྱའོ། །རྒུན་ཆུ་བུ་རམ་ཤིང་ཁུ་ཆང་། །རང་སྐྱུར་ཞོ་དང་ཞོ་ག་ཆུ། །འབྲས་

བཀྲུས་ཆུ་དང་སྦྲང་རྩིའི་ཆུ། །ཁ་རའི་ཆུ་ནི་བླུགས་ནའང་ཕན། །ཞེས་བྱ་བ་ལ། །དྲེག་ནད་ཚ་བ་དང་ལྡན་པ་ལ་ནི་རྒུན་ཆུ་འམ་བུ་རམ་ཤིང་གི་ཁུ་བ་ལ་སོགས་པ་བླུད་ན་ཕན་ནོ། །བུད་མེད་གཟུགས་སྡུག་སྙན་པར་སྨྲ། །ལག་པ་ནུ་མ་ཙནྡན་བསྐུས། །རེག་ན་བསིལ་

ཞིང་བདེ་བ་ཡིས། །ཚ་དང་ན་དང་རྨྱ་བ་སེལ། །ཞེས་བྱ་བ་ལ། །བུད་མེད་གཟུགས་སྡུག་ཅིང་ཡིད་དུ་འོང་ལ་སྙན་པར་སྨྲ་བ། །ལག་པ་དང་ནུ་མ་ཙནྡན་གྱིས་བསྐུས་པ་རེག་ན་བསིལ་ཞིང་བདེ་བ་སྐྱེད་པར་བྱེད་པ་ལ་འཁྱུད་པས་ལུས་ཚ་བ་དང་ན་བ་དང་རྨྱ་ཞིང་དུབ་པ་སིལ་བར་

བྱེད་དོ། །མདོག་དམར་ཚ་དང་ནད་བཅས་ལ། །ཁྲག་ཕྱུང་ནས་ནི་ལྡེ་གུས་བསྐུ། །སྟག་ཚེར་བ་དང་ཤིང་མངར་བཙོད། །སྐྱེར་པ་ཙནྡན་ཁ་ར་དཀར། །ཨེ་རཎྜ་ཡི་ས་བོན་ཕྱེ། །སྲན་ཆུང་ཤུག་པ་པུ་ཤེལ་ཙེ། །ལྡེ་གུས་ཚ་ན་ཤུ་བ་མཆེད། །ན་ཞིང་མདོག་དམར་

སྐྲངས་བ་སེལ། །ཞེས་བྱ་བ་ལ། །སྟག་ཚེར་པ་ཞེས་བྱ་བ། །བྲ་ཕུཎྜ་རཱི་ཀ་ཙ་ལ་སོགས་པའི་ལྡེ་གུས་བསྐུས་ན་མདོག་དམར་ཞིང་ཚ་བ་ལ་སོགས་པའི་ནད་སེལ་བར་བྱེད་དོ། །ཀྲི་ས་ར་ནི་རླུང་འཇོམས་སྨན། །སྣུམ་བཅས་བསྐོལ་བ་འམ་མུ་དག་དང་། །འོ་ཐུག་ཡུངས་

ཀར་ཏིལ་ཚིགས་མ། །གླན་ཞིང་དཀྲིས་པས་གཟེར་འཇོམས་བྱེད། །ཅིས་བྱ་བ་ལ། ཀྲི་སར་ནི་ཏིལ་དང་མོན་སྲན་སྡེའུ་ལ་སོགས་པ་ལས་བྱས་པའི་ཐུག་པ་སྟེ། །དེ་རླུང་འཇོམས་པའི་སྨན་གྱི་ཁུ་བ་དང་། །སྣུམ་དང་བཅས་པ་བསྐོལ་བའི་ལྡེ་གུ་ལྟ་བུས་བསྐུས་ལ་དཀྲིས་

Vol. 202 · folio 52a

པ་འམ་དེ་བཞིན་དུ་མུད་ག་ཞེས་བྱ་བ་མོན་སྲན་སྔེའུ་དང་འོ་ཐུག་གམ་ཡུངས་ཀར་དང་ཏིལ་གྱི་ཚིགས་མ་རླུང་འཇོམས་པའི་སྨན་དང་སྣུམ་བསྐོལ་བས་གླན་ཞིང་དཀྲིས་པས་ཀྱང་དྲེག་ནད་གྱི་གཟེར་འཇོམས་པར་བྱེད་དོ། །ཆུར་གནས་རླན་ཅན་མཐུ་རྩལ་གྱིས། །གཟས་

ཚོལ་ཤ་བཏགས་གཡོས་ལེགས་པ། །འཚོ་བྱེད་སྨན་དང་སྣུམ་བཅས་པས། །གླན་ཞིང་དཀྲི་བ་བྱས་གྱུར་ན། །སྲ་ཞིང་གཟེར་ལ་ན་བ་དང་། །སྐྲངས་དང་གཡན་པ་འཇོམས་པར་བྱེད། །ཅེས་བྱ་བ་ལ། །སྲོག་ཆགས་ཆུ་ན་གནས་པ་དང་། །རླན་ཅན་དང་མཐུ་རྩལ་

གྱིས་གཟས་ཚོལ་བའི་ཤ་ཞིབ་ཏུ་བཏགས་ཏེ། །ཚ་ལ་སོགས་པས་གཡོས་ལེགས་པར་བྱས་པ་དང་། །འཚོ་བྱེད་ཀྱི་སྨན་གྱི་སྡེ་ཚན་དང་སྣུམ་དང་བཅས་པས་གླན་ཞིང་དཀྲིས་པས་ཀྱང་དྲེག་ནད་སྲ་ཞིང་རེངས་ལ་གཟེར་བ་ལ་སོགས་པ་འཇོམས་པར་བྱེད་དོ། །འཚོ་བྱེད་སྨན་དང་

བསྐོལ་བ་ཡི། །འོ་མ་ཞག་གིས་བསྐུས་ན་འང་ཕན། །ཞེས་བྱ་བ་ལ། །ཡང་ན་སྲ་བ་ལ་སོགས་པའི་ནད་ལ་འཚོ་བྱེད་ཀྱི་སྡེ་ཚན་དང་བསྐོལ་བའི་འོ་མ་འམ་ཞག་གིས་བསྐུས་ན་ཡང་དེ་ལ་ཕན་ནོ། །ས་ཧ་ར་ཛའི་རྩ་བ་དང་། །ཛི་བན་ཏའི་མར་རའི་འོ་མ། ལྡེ་གུས་བསྐུས་

པ་འམ་དེ་བཞིན་དུ། ཏིལ་བཏགས་བརྔོས་པའི་འོ་མར་སྦྱར། ཞེས་བྱ་བ་ལ། །ས་ཧ་ར་ཛའི་ཁུ་བ་ལ་སོགས་པ་མར་དང་བསྐོལ་བའམ། །རའི་འོ་མ་དང་ལྡེ་གུས་སྦྱར་བ་འམ་ཏིལ་བཏགས་པ་བརྔོས་པ་འོ་མ་དང་སྦྱར་བའི་ལྡེ་གུས་བསྐུས་ན་ཡང་ཕན་ནོ། །ཟར་མ་འོ་མར་

སྦྱར་བའམ། །ཨེ་རཎྜ་ཡི་འབྲས་བུ་ནི། །འོ་མ་དག་དང་སྦྱར་བ་འམ། །ཤུ་ཏིའི་འོ་མར་སྤྱར་བ་ནི། །རླུང་ཤས་ཆེ་བའི་གཟེར་འཇོམས་བྱེད། །ཅེས་བྱ་བ་ལ། །འོ་མ་དང་ཟར་མའི་ས་བོན་བཏབ་པ་འམ། ཡང་ན་ཨེ་རཎྜའི་འབྲས་བུ་འོ་མ་དང་བཏགས་པ་འམ།

ཡང་ན་ཤུ་ཏིའི་འོ་མ་དང་སྦྱར་བའི་ལྡེ་གུས་བསྐུས་ན་རླུང་གི་ཤས་ཆེ་བའི་དྲེག་ནད་ཀྱིས་གཟེར་བའི་ནད་འཇོམས་པས་བྱེད་དོ། །བ་གཅིན་ཐལ་སྨན་ཆང་དང་བསྐོལ། །མར་གྱིས་བསྐུས་ནའང་དེ་ལ་ཕན། །ཞེས་བྱ་བ་ལ། ཡང་ན་བ་གཅིན་ལ་སོགས་པ་དང་བསྐོལ་བའི་མར་གྱིས་

Vol. 202 · folio 52b

བསྐུས་ན་ཡང་རླུང་ཤས་ཆེ་བའི་དྲེག་ནད་འཇོམས་པར་བྱེད་དོ། །བད་ཀན་ཤས་ཆེར་རྒུན་ཚ་དང་། །བསྐོལ་བའི་མར་བསྐུ་བླུགས་པ་ཕན། །ཞེས་བྱ་བ་ལ། དྲེག་ནད་བད་ཀན་གྱི་ཤས་ཆེ་བ་ལ་ནི། རྒུན་ཆང་གི་ཚ་དང་བསྐོལ་བའི་མར་བསྐུ་བ་དང་བླུགས་པ་ཕན་ནོ། །

ཤུ་དག་རུ་རྟ་ཁྱིམ་དུད་པ། །ཤུ་ཏི་སེར་པོ་རྣམ་གཉིས་ཀྱི། །ལྡེ་གུས་བསྐུས་ན་དྲེག་ནད་ནི། །རླུང་དང་བད་ཀན་ཤས་ཆེ་སེལ། །ཞེས་བྱ་བ་ལ། །རླུང་དང་བད་ཀན་ཤས་ཆེ་བའི་དྲེག་ནད་ལ་ནི་ཤུ་དག་ལ་སོགས་པ་བཏགས་པའི་ལྡེ་གུས་བསྐུས་ན་ཕན་ནོ། །ཤུ་ཏི་

ཤ་ཏ་ནི་པུས་པའོ། །སེར་པོ་རྣམ་གཉིས་ནི་ཡུང་བ་དང་སྐྱེར་པའོ། །དེ་བཞིན་ཤི་ཀྲུའི་ས་བོན་ནི། །འབྲས་ཀྱི་ཁུ་བའི་རང་སྐྱུར་ནི། །ཡུད་ཙམ་བཏགས་ནས་སྐྱུར་གྱུར་པ། །བླུགས་ན་བད་རླུང་ཤས་ཆེ་སེལ། །ཞེས་བྱ་བ་ལ། །མ་དུ་ཤི་ཀྲུའི་ས་བོན་འབྲས་ཀྱི་ཁུ་བའི་རང་

སྐྱུར་དང་བཏགས་པ་དེས་ཡུད་ཙམ་བསྐུས་ལ་དེའི་འོག་ཏུ་ཚ་ལ་སོགས་པ་སྐྱུར་པོ་བླུགས་ན་བད་ཀན་དང་རླུང་ཤས་ཆེ་བའི་དྲེག་ནད་སེལ་བར་བྱེད་དོ། །རྟོགས་པར་སླ་ལ་བྱུགས་དང་བསྐུ། །བླུགས་དང་ལུས་ནི་བཅིང་བས་བསལ། །རྟོགས་དཀའ་མས་གཏོང་དྲག་པོ་དང་། །བཀྲུ་སྨན་

སྣུམ་གྱིས་བླུད་པས་གསོ། །ཞེས་བྱ་བ་ལ། །དྲེག་ནད་རྟོགས་པར་སླ་བ་མཐོན་པོར་བསྟེན་ན་གནས་པ་ནི་སྨན་གྱི་ལྡེ་གུས་བྱུགས་པ་ལ་སོགས་པས་གསོ་བར་བྱའོ། །དྲེག་ནད་རྟོགས་པར་དཀའ་བ་ཞེས་བྱ་བ་མི་མངོན་ཞིང་ཁོང་བར་གཏིང་ཟུག་པར་ན་ན། ནི་རུ་ཧ་ལ་སོགས་པས་

གསོ་བར་བྱའོ། །བད་རླུང་ཤས་ཆེར་དྲོ་འཇམ་སྦྱར། །དེ་བྱུགས་ལ་སོགས་གྲང་མོ་ཡིས། །ལུས་ན་ཚ་ཞིང་གཡའ་ཞིང་སྐྲང་། །སྲ་བ་རྣམ་པར་འཕེལ་བར་འགྱུར། །ཞེས་བྱ་བ་ལ། བད་ཀན་དང་རླུང་ཤས་ཆེ་བའི་དྲེག་ནད་ལ་ནི་བསྐུ་བ་ལ་སོགས་པ་དྲོ་འཇམ་ཙམ་

བཏང་ན་ཕན་གྱི། །དེར་བསྐུ་བྱུག་ལ་སོགས་པ་གྲང་མོ་བྱས་ན་ནི་ལུས་ཚ་བ་ལ་སོགས་པ་འཕེལ་བར་འགྱུར་རོ། །ཁྲག་མཁྲིས་ཤས་ཆེའི་དྲེག་ནད་ལ། །བྱུགས་པ་ལ་སོགས་བསིལ་བས་བྱ། །དྲོ་བས་ཚ་ཞིང་ན་ལ་དམར། །རྡུལ་འབྱུང་གས་བ་འབྱུང་བར་འགྱུར། །

Vol. 202 · folio 53a

ཞེས་བྱ་བ་ལ། ཁྲག་དང་མཁྲིས་པ་ཤས་ཆེ་བ་ལ་ནི་བྱུག་པ་ལ་སོགས་པ་བསིལ་བ་ཕན་གྱི། བྱུག་པ་ལ་སོགས་པ་དྲོ་བ་བཏང་ན་ཚ་བ་ལ་སོགས་པ་འབྱུང་བར་འགྱུར་རོ། །ཤིང་མངར་སྲང་བརྒྱ་བསྐོལ་བ་ཡི། །ཁུ་བ་བཞི་ཆ་ལུས་པར་ཏིལ་མར་བྲེ་བཞི་འོ་མ་མཉམ། །

ཏིར་མར་བྲེ་བཞིའོ་མ་མཉམ། །ཏི་ར་མུར་བ་ཏ་མ་ལ། །ཉེའུ་ཤིང་ཨ་གར་པ་ཡ་སྱ། །ཙནྡན་ཧཾ་ས་བ་ཏི་དང་། །སྤང་སྤོས་སླེ་ཏྲེས་མེ་ད་གཉིས། །རམ་ཉེ་བ་གཉིས་ཤུ་ཏེ་དང་། །ཤུག་པ་རྣམ་གཉིས་ཛི་བན་ཏི། །ཛི་བ་ཀ་དང་རི་ཤ་བ། ཤིང་ཚ་གནྡྷ་བྷ་དྲ་དང་། །

ཆུ་སྲིན་སེན་མོ་བ་ལེ་ཀ །བཙོད་དང་པྲ་པུཎྜ་རཱི་ཀ །ཤ་རི་བ་དང་བི་ཤ་ལ། །ཀུ་ཏན་ན་ཏ་སྲང་རེ་ཡི། །ལྡེ་གུར་བཅས་པ་བསྐོལ་བར་བྱ། །སྦྱོར་བ་བཞི་བོས་དྲེག་ནད་ཀྱི། །མཁྲིས་པའི་ཚ་བ་རིམས་ནད་སེལ། །ཞེས་བྱ་བ་ལ། ཤིང་མངར་སྲང་བརྒྱ་ཁུ་བ་

བསྐོལ་པའི་ཆོ་གས་བསྐོལ་ལ། དེའི་སྨན་ཁུ་བཞི་ཆ་ལུས་པར་ཏིལ་མར་བྲེ་བཞི་སྲང་བརྒྱ་ཉི་ཤུ་རྩ་བརྒྱད་དང་། །འོ་མ་བྲེ་བཞི་བསྲེས་ལ་སྠི་ར་ལ་སོགས་པའི་སྨན་སྣ་རེ་སྲང་རེར་བྱས་པ་ལྡེ་གུར་བྱས་བ་དང་། བསྐོལ་བའི་སྦྱོར་བ་བཞི་པོ་དེ་བླུད་པ་དང་། །སྣ་ནས་བཏང་བ་དང་། །འཇམ་

རྩི་དང་བསྐུ་བའི་སྦྱོར་བ་བཞི་པོ་བྱས་ན་དྲེག་ནད་ཀྱི་ཚ་བ་ལ་སོགས་པ་སེལ་བར་བྱེད་དོ། །སྠི་ར་ནི་ས་ལ་པར་ཎའོ། །ཏ་མ་ལ་ཀ་ནི་བུ་ད་ཏྲིའོ། །པ་ཡས་སྱ་ནི་ཨར་ག་པུས་པའོ། །ཨ་ཀ་རུ་ནི་ཨ་ཀ་རུ་ནག་པོའོ། །ཧཾ་ས་པ་ཏི་ནི་ཏྲི་པ་དི་དང་ཀྲི་མི་མར་ཞིས་བྱ་བའོ། །མེད་གཉིས་

ནི་མེ་ད་དང་མ་ཧཱ་མེ་དའོ། །བི་ཤ་ལ་ནི་ཨིན་དྲའོ། །ཀུ་ཏན་ན་ཏ་ནི་པ་རི་པེར་ལའོ། །བ་ལའི་ཁུ་བའི་ལྡེ་གུ་དང་། །ཏིལ་མར་འོ་མ་ཆ་མཉམ་བསྐོལ། །ལན་བརྒྱའི་བར་དུ་བསྐོལ་བ་དེས། །དྲེག་ནད་རླུང་ཅན་སེལ་བར་བྱེད། །བཅུད་ཀྱིས་ལེན་གྱི་དམ་པ་སྟེ། །དབང་པོ་

གསལ་བར་བྱེད་པ་ཡིན། །ཚེ་རིང་ལུས་འཕེལ་སྐད་སྙན་དང་། །ཁུ་ཆུ་ཁྲག་གི་ནད་སེལ་བྱེད། །ཅེས་བྱ་བ་ལ། །སྨན་པ་ལ་བསྐོལ་བའི་ཁུ་བའམ་བཏགས་པའི་ལྡེ་གུ་ཏིལ་མར་དང་འོ་མ་ཆ་མཉམ་པོར་བསྐོལ་ལ། ཏིལ་མར་དེ་ལན་བརྒྱ་ཕྲག་མང་པོའི་བར་དུ་བསྐོལ་བ་དེས་ནི་རླུང་

Vol. 202 · folio 53b

ལས་གྱུར་པའི་དྲེག་ནད་སེལ་བར་བྱེད་པ་ཡིན་ལ། །དེ་བཞིན་དུ་བཅུད་ཀྱིས་ལེན་གྱི་ཡང་མཆོག་ཡིན་ཞིང་མིག་ལ་སོགས་པའི་དབང་པོ་གསལ་བ་དང་། །ཚེ་རིང་ཞིང་སྲོག་འཛིན་པ་དང་། །ལུས་འཕེལ་ཞིང་རྒྱས་པ་དང་། །གདངས་སྙན་པ་དང་། །ཁུ་བ་དང་ཁྲག་གི་ནད་གང་དག་

ཡིན་པ་སེལ་ཞིང་འཇོམས་པ་ཡིན་ནོ། །རྒྱུ་བའི་ལམ་འགགས་འཁྲུགས་གྱུར་པས། །ཚིལ་ལམ་བད་ཀན་ཤིན་ཏུ་ནི། །འཕེལ་བར་གྱུར་པའི་རླུང་ནད་ལ། །སྣུམ་བརྟས་དང་པོ་ཕན་པ་ཡིན། །ཞེས་བྱ་བ་ལ། །རླུང་གི་རྒྱུ་བའི་ལམ་འགགས་པར་གྱུར་པའི་རྒྱུ་ཚིལ་ལྷག་

པར་འཕེལ་བ་འམ། །བད་ཀན་ལྷག་པར་འཕེལ་བར་གྱུར་པ་ལ་དང་པོར་སྣུམ་པ་དང་བརྟ་བར་བྱ་བའི་སྨན་གྱི་སྦྱོར་བ་བྱས་བས་ནི་ཕན་པ་ཡིན་ནོ། །དེར་ནི་ཕྱུག་པོའི་རླུང་ནད་ཀྱི། །གསོ་བ་དྲེག་ནད་གསོ་བར་བྱ། །ཁྲག་ནི་དངས་པར་བྱེད་པ་ཡི། །སྣུམ་དང་སྨན་གྱི་སྦྱོར་

བ་བྱ། །ཞེས་བྱ་བ་ལ། །ཚིལ་ལམ་བད་ཀན་འཕེལ་བར་གྱུར་པའི་ནད་དེ་ལ་ནི་ཕྱུག་པོའི་རླུང་ནད་ཅེས་བྱ་བའི་ཚིལ་དབྲི། །གསོ་བའི་སྦྱོར་བ་གང་དག་ཡིན་པས་རླུང་གི་དྲེག་ནད་དེ་གསོ་བར་བྱས་ལ་དེའི་འོག་དུ་དྲེག་ནད་གསོ་བའི་སྦྱོར་བ་ཇི་སྐད་སྨོས་བ་བྱ་ཞིང་ཁྲག་ནད་མེད་པར་བྱ་བའི་སྦྱོར་བ་

གང་དག་ཡིན་པ་དེ་ཡང་བྱའོ། །དྲེག་ནད་ཀྱི་གསོ་བ་བཤད་ཟིན་ནས་དེའི་ཞར་ལ་སྲོག་ཅེས་བྱ་བའི་རླུང་ལ་སོགས་པ་རླུང་ལྔ་པོའི་གསོ་བ་སྨྲས་པ་ནི། སྲོག་སོགས་རླུང་ནི་ཅིག་ཅར་འཁྲུགས། །ཇི་སྐད་བསྟན་དང་ནད་གཞི་བཞིན། །ཇི་ལྟར་ཉེ་བར་སྨན་རྣམས་ནི། །ནད་ཚུལ་ཇི་

བཞིན་སྦྱིན་པར་བྱ། །ཞེས་བྱ་བ་ལ་སོགས་པ་ཡིན་ཏེ། སྲོག་ལ་སོགས་བའི་རླུང་ལྔ་པོ་ཅིག་ཅར་དུས་གཅིག་ཏུ་འཁྲུགས་ཤིང་ལྡང་བར་གྱུར་པ་ལ་ནི། །རླུང་གི་ནད་གསོ་བའི་མཚན་ཉིད་ཇི་སྐད་བསྟན་པ་དང་མི་འགལ་ཞིང་སྲོག་ལ་སོགས་པའི་ནད་ལྡང་བ་ལས་གྱུར་པའི་ཚད་ཀྱི་

ཚུལ་ཇི་ལྟ་བུ་དང་སྲོག་ལ་སོགས་པའི་གནས་གང་དག་ཡིན་པ་དང་། ཇི་ལྟར་ཉེ་བའི་ཚུལ་དང་མི་འགལ་བར་ནད་གང་ཡིན་པ་ལ་སྲོག་ཅེས་བྱ་བའི་རླུང་ལ་སོགས་པ་ལ་གང་ཞིག་ཕན་པར་གྱུར་པའི་སྨན་ནད་ཀྱི་ཚུལ་ལས་བརྟགས་ཏེ་སྦྱིན་ཞིང་གསོ་བར་བྱའོ། །དེ་ལྟར་ན་འདིར་སྨན་ཅི་

Vol. 202 · folio 54a

རིགས་པར་བློས་བརྟགས་ཏེ་སྦྱིན་པར་བྱ་བའི་དོན་ཡིན་ནོ། །མ་ཞུ་བཅས་ལ་དུགས་དང་སྨྱུང་། །སྨིན་བྱ་རྩུབ་སྨན་བྱུག་པ་དང་། །རླུང་སོགས་ཀྱིས་ནི་མ་ཞུ་བསལ། །བྱས་ལ་མ་འདྲེས་རླུང་གསོ་བྱ། །ཞེས་བྱ་བ་ལ། མ་ཞུ་བ་དང་བཅས་པའི་རླུང་ནད་ལ་ནི་

དུགས་དང་། །སྨྱུང་བ་ལ་སོགས་པས་སྨིན་ཅིང་མ་ཞུ་བ་མེད་པར་བྱས་ལ། དེའི་འོག་ཏུ་མ་འདྲེས་པའི་རླུང་ནད་ཉི་ཚེ་བའི་གསོ་བ་ཇི་སྐད་སྨོས་པ་དག་བྱའོ། །སྐེམ་དང་བྱ་རྨྱང་ཡན་ལག་འཁུམས། །རེངས་དང་འདར་བུ་ཚོར་བ་མེད། །འགྲམ་ཉམས་ཁ་ཡོ་འཐེང་པོ་དང་། །

ཞ་བོ་དྲེག་ནད་ཀྱིས་འཐེང་དང་། །ཚིགས་འཁྲུལ་གཞོགས་ཕྱེད་ན་བ་དང་། །ཚིགས་དང་རྐང་རུས་ལ་ཞུགས་ནད། འདི་དག་གནས་ནི་གཏིང་རིང་བས། །དེ་བས་འདི་དག་གསར་བཏབ་དང་། །བླ་བརྣན་མེད་ཅིང་ཉམས་སྟོབས་ལྡན། །འབད་ན་འཚོ་ཡི་གཞན་དུ་མིན། །

ཞེས་བྱ་བ་ལ། །སྐེམ་བའི་ལུས་ནི་རིད་ཅིང་སྐམ་པར་འགྱུར་རོ། །བྱ་རྨྱང་ནི་ལུས་འགྱུར་ཞིང་གཅུ་བའོ། །ཡན་ལག་འཁུམས་པ་ནི་ལུས་ཀྱི་ཡན་ལག་འདུས་ཤིང་ཞུམ་པའོ། །རེངས་བ་ནི་ཤིང་ལྟར་རེངས་པའོ། །འདར་བ་ནི་ལུས་འདར་བའོ། །ཚོར་བ་མེད་པ་ནི་བེམ་བེམ་

པོར་གྱུར་པའོ། །འགྲམ་པ་ཉམས་པ་ནི་འགྲམ་པ་གཉིས་གནས་ལས་འཆུགས་ཤིང་ཉམས་པའོ། །ཁ་ཡོ་བ་ནི་རླུང་གིས་ཁ་ཕྱེད་ཡོན་པར་གཅུས་པའོ། །འཐེང་པོ་ནི་རྐང་བའི་གཟུགས་ཕྱེད་ཉམས་པའོ། །ཞ་བོ་ནི་ཡན་ལག་འཇས་པའོ། །དྲེག་ནད་ཀྱིས་འཐེང་བ་དེ་ནི་རླུང་དང་

ཁྲག་གི་ནད་ཀྱིས་འཐེང་པར་འགྱུར་བའོ། །ཚིགས་འཁྲུལ་པ་ནི་རང་གི་གནས་འཆུགས་པའོ། །གཞོགས་ཕྱེད་ན་བ་ནི་ལུས་ཀྱི་གཞོགས་ཕྱེད་ལྷག་པར་ན་བའོ། གཞན་ཡང་ཚིགས་ལ་སོགས་པ་ལ་གནས་ཤིང་གཏིང་དུ་ཞེན་པའི་ནད་འདི་དག་ནི་གནས་གཏིང་རིང་ཞིང་བརྟག་དཀའ་བར་

ཞེན་པ་ཡིན་པས་དེའི་ཕྱིར་ནད་འདི་དག་ནི་ནད་ཀྱིས་གསར་དུ་བཏབ་ཅིང་ནད་བྱུང་ནས་རིང་པོ་མ་ལོན་པ་དང་། བླ་བརྣན་གྱི་ནད་གཞན་མེད་ཅིང་ནད་པ་ཉམས་སྟོབས་དང་ལྡན་པ་དག་ལ་སྨན་པས་འབད་པ་དང་བཅས་ཏེ་གསོས་ན་འཚོས། གཞན་དུ་ནི་འཚོ་བར་མ་འགྱུར་བར་གསར་དུ་བཏབ་པ་དང་བླ་

Vol. 202 · folio 54b

བརྣན་མེད་པའི་སྐབས་སུ་འབད་དེ་གསོ་བར་བྱའོ། །མཁྲིས་འདྲེས་རླུང་ལ་གྲང་དྲོ་བའི། །གསོ་བའི་རིམ་གྱིས་མང་དུ་བྱས། །འཚོ་བྱེད་སྡེ་དང་བསྐོལ་བ་ཡི། །སྨན་མར་དག་ཀྱང་བླུད་པར་བྱ། །ཞེས་བྱ་བ་ལ། །མཁྲིས་པ་དང་འདྲེས་པའི་རླུང་ནད་ནི་གྲང་བ་དང་དྲོ་བའི་

གསོ་བའི་རིམ་གྱིས་སྤོང་མང་དུ་བྱས་པ་ལ། དེ་བཞིན་དུ་འཚོ་བྱེད་ཀྱི་སྡེ་ཚན་དང་བསྐོལ་བའི་སྨད་མར་དག་ཀྱང་ནད་པ་དེ་ལ་བླུད་པར་བྱའོ། །སྐམ་སའི་ཤ་དང་སཱ་ལུ་ནས། །བཀྲུ་སྨན་འོ་མར་བཅས་འཇམ་གཏང་། །ཞེས་བྱ་བ་ལ། མཁྲིས་བ་དང་འདྲེས་ཤིང་མཁྲིས་པ་

བསྒྲིབས་པའི་རླུང་གི་ནད་འདི་ལ་སྐམ་སའི་སྲོག་ཆགས་ཀྱི་ཤ་དང་འབྲས་སཱ་ལུ་དང་ནས་ཀྱི་ཁ་ཟས་སྦྱིན་ཞིང་བཀྲུ་སྨན་འོ་མ་དང་སྦྱར་བའི་འཇམ་པོ་གཏང་བར་བྱའོ། །རྩ་བ་ལྔ་དང་བ་ལར་བསྐོལ། །འོ་མའི་མས་གཏོང་སྦྱོར་བ་བྱ། །ཞེས་བྱ་བ་ལ། མཁྲིས་པ་དང་འདྲེས་པའི་རླུང་

འདི་ལ་མས་གཏོང་བའི་སྨན་རྩ་བ་ལྔ་ཆེན་པོ་དང་བ་ལ་བསྐོལ་བའི་ཁུ་བ་དང་ལྷན་ཅིག་བསྐོལ་བའི་མས་གཏོང་བའི་སྦྱོར་བ་དག་གཏང་བར་བྱའོ། །སྨན་མར་བསྐོལ་བའི་ཏིལ་མར་གྱི། །འཇམ་རྩི་དུས་སུ་གཏང་བར་བྱ། །ཞེས་བྱ་བ་ལ། ཡང་དེ་འཇམ་རྩི་བཏང་བའི་དུས་ལ་བབ་

པ་ན་སྨན་མངར་བའི་སྡེ་ཚན་དང་བསྐོལ་བའི་ཏིལ་མར་གྱི་སྣུམ་གྱི་འཇམ་རྩི་མས་གཏོང་བར་བྱའོ། །ཤིང་མངར་བ་ལ་ཏིལ་མར་དང་། །མར་དང་འོ་མར་བསྐོལ་བ་བླུགས། །རྩ་བ་ལྔ་ཡི་ཁུ་བ་འམ། །ཆུ་ནི་གྲང་མོ་ཉིད་བླུགས་བྱ། །ཞེས་བྱ་བ་ལ། ཡང་ན་དེ་ལ་ཤིང་མངར་བསྐོལ་

བའི་ཏིལ་མར་འོ་མ་དང་མར་དུ་བསྐོལ་བ་བླུད་ན་ཡང་ཕན་ནོ། །ཡང་ན་རྩ་བ་ལྔ་བསྐོལ་བའི་ཁུ་བ་བླུགས་པ་འམ། ཡང་ན་གྲང་མོ་བླུགས་ན་ཡང་མཁྲིས་པ་དང་འདྲེས་པའི་རླུང་ལ་ཕན་ནོ། །བད་ཀན་བཅས་ལ་ནས་ཀྱི་ཟན། །སྐམ་སའི་རི་དགས་བྱ་ཡི་ཤ། །དུགས་དང་མས་གཏོང་བཀྲུ་

སྨན་ནོ། །སློན་སྨན་བཀྲུ་སྨན་བཅས་པ་གཏང་། །མར་རྙིང་ཏིལ་མར་ཡུངས་ཀར་ལས། །བྱུང་བའི་མར་ནི་བླུད་ན་ཕན། །ཞེས་བྱ་བ་ལ། །བད་ཀན་བཅས་ཤིང་འདྲེས་བའི་རླུང་ལ་ནི་ནས་ཀྱི་ཟན་དང་། །སྐམ་ས་ན་གནས་པའི་རི་དགས་དང་བྱའི་ཤ་དང་། དུགས་བྱ་བ་དང་།

Vol. 202 · folio 55a

ནི་རུ་ཧ་རྣོན་པོ་གཏང་བ་དང་། སློན་སྨན་དང་བཀྲུ་སྨན་བཏང་པ་དག་ཕན་ལ། དེ་བཞིན་དུ་མར་རྙིང་དང་། ཡུངས་ཀར་གྱི་མར་བླུད་ན་ཕན་ནོ། །བད་ཀན་མཁྲིས་པ་འདྲེས་པ་ལ། །དང་པོར་མཁྲིས་པ་འདྲེས་པ་གསོ་བར་བྱ། །ཞེས་བྱ་བ་ལ། བད་

ཀན་དང་མཁྲིས་པ་གཉིས་འདྲེས་པའི་རླུང་ནད་ལ་ནི་དང་པོ་ཁོ་ནར་མཁྲིས་པ་གསོས་ལ། དེའི་རྗེས་ལ་བད་ཀན་དང་འདྲེས་པའི་རླུང་ནད་བསལ་པར་བྱའོ། །ཁྲག་དང་འདྲེས་ལ་དྲེག་ནད་ཀྱི། །གསོ་བ་ཇི་སྐད་བཤད་བར་བྱ། །ཞེས་བྱ་བ་ལ། ཁྲག་དང་འདྲེས་པའི་རླུང་ནད་

ནི་དྲེག་ནད་ཀྱི་གསོ་བ་གོང་དུ་ཇི་སྐད་སྨོས་པ་དག་བྱའོ། །དུགས་བསྐུ་ཤ་ཁུ་འོ་མ་དང་། །སྣུམ་དང་བཅས་པས་ཤ་བཀྲ་སེལ། །ཞེས་བྱ་བ་ལ། ཤ་ལ་གནས་ཤིང་དེའི་ནང་དུ་ཞུགས་པའི་རླུང་ལ་ནི་དུགས་ལ་སོགས་ཅི་རིགས་སུ་སྦྱར་རོ། །ཕྱུག་པོའི་རླུང་ལ་གཅིན་སྙི་དང་། །ཚལ་

དང་རླུང་འཇོམས་སྨན་གྱིས་གསོ། །ཞེས་བྱ་བ་ལ། །ཕྱུག་པོའི་རླུང་ནད་ཚིལ་དང་རླུང་དུ་འདྲེས་པ་ལ་གཅིན་སྙི་བ་ཟ་གུའི་ནད་འཇོམས་པ་དང་། །ཚིལ་འཇོམས་པའི་སྨན་གང་དག་ཡིན་པས་གསོ་བར་བྱའོ། །རུས་པ་རྐང་གནས་སྣུམ་ཆེན་གྱིས། །ཁུ་ཚུར་གནས་ལ་སྔར་བཤད་

པའི། །ཞེས་བྱ་བ་ལ། །རུས་པ་དང་རྐང་ལ་གནས་པའི་རླུང་ལ་ནི་སྣུམ་ཆེན་པོ་བཞིའི་སྦྱོར་བས་གསོ་བར་བྱའོ། །ཁུ་ཚུར་གནས་པའི་རླུང་ནད་ལ་ནི་སྔར་རླུང་ནད་ཀྱི་གསོ་པའི་སྐབས་སུ་ཁུ་ཆུ་ལ་གནས་པའི་རླུང་ལ་ཕན་པའི་སྨན་གྱིས་གསོ་བར་བྱའོ། །ཟས་དང་འདྲེས་ལ་

འཇུ་བྱེད་དང་། །དོད་སྐྱེད་སྐྱུག་སྨན་ཡང་བ་བཏང་། །ཞེས་བྱ་བ་ལ། །ཟས་དང་འདྲེས་བ་ལས་གྱུར་པའི་རླུང་ནད་ལ་ནི་འཇུ་བར་བྱེད་པའི་སྨན་དང་། དེ་བཞིན་དུ་དྲོད་སྐྱེད་པ་དང་སྐྱུག་སྨན་གྱི་སློན་པ་དང་། །རང་བཞིན་དང་ཚད་ཀྱིས་ཡང་བར་གྱུར་བའི་སྨན་གང་དག་ཡིན་པ་

བཏང་བས་གསོ་བར་བྱའོ། །གཅིན་འདྲེས་གཅིན་ནི་འཕེལ་བ་དང་། །དུགས་དང་འཇམ་རྩི་གོང་མས་གསོ། །ཞེས་བྱ་བ་ལ། །གཅིན་དང་འདྲེས་པའི་རླུང་ལ་ནི་གཅིན་འཕེལ་བར་བྱེད་པའི་སྨན་ག་གོན་དང་། གཟེ་མ་ལ་སོགས་པའི་སྨན་བྱིན་ན་ཕན་པ་དང་དེ་བཞིན་དུ་དུགས་དང་

Vol. 202 · folio 55b

མཚན་གྱི་སྒོ་ནས་འཇམ་རྩི་བཏང་བས་གསོ་བར་བྱའོ། །བཤང་འདྲེས་ཨེ་རཎྜའི་མར་དང་། །འཇམ་རྩི་སྣུམ་ནི་འཁྲུ་བྱེད་ཕན། །ཞེས་བྱ་བ་ལ། །བཤང་བ་ལ་གནས་ཤིང་དེ་དང་འདྲེས་པའི་རླུང་ལ་ནི་ཨེ་རཎྜའི་ཏིལ་མར་དང་འཇམ་རྩི་དང་སྣུམ་འཁྲུ་བར་བྱེད་པ་བྱིན་ན་

ཕན་ནོ། །ལུས་ཟུངས་ཀུན་ཞུགས་རླུང་ནད་ལ། །བད་ཀན་མཁྲིས་པར་མི་གནོད་དང་། །གང་ཡང་རླུང་ནི་བདེར་རྒྱུ་བའི། །སྨན་དེ་རླུང་ནད་དེ་ལ་གཏང་། །ཞེས་བྱ་བ་ལ། ལུས་ཐམས་ཅད་ལ་ཞུགས་ཤིང་བརྟེན་པའི་རླུང་ནད་ལ་ནི་སྨན་གང་བད་ཀན་དང་མཁྲིས་པ་ལ་

གནོད་པ་མི་སྐྱེད་ཅིང་། ལྡང་བར་མི་འགྱུར་བ་རླུང་ལ་ནི་བདེ་བར་རྒྱུ་བར་བྱེད་པའི་སྨན་དེ་གཏང་བར་བྱའོ། །འཁྲུ་བར་མི་བྱེད་སྣུམ་པ་དང་། །རྩ་རྒྱུན་སྦྱོང་བར་བྱེད་པ་དང་། །མས་གཏོང་བ་ནི་མངར་བ་དང་། །སྣུམ་གྱི་འཇམ་རྩིས་གསོ་བར་བྱ། །ཉམས་སྟོབས་ཅི་ཡོད་

བརྟགས་ནས་ནི། །བཀྲུ་སྨན་འཇམ་པོ་གཏང་བར་བྱ། །བཅུད་ཀྱིས་ལེན་ནི་ཐམས་ཅད་ཀྱི། །སྦྱོར་བ་དག་ཀྱང་བསྔགས་པ་ཡིན། །མཆོག་ཏུ་བྲག་ཞུན་སྦྱོར་བ་དང་། །དེ་བཞིན་གུ་གུལ་ཉི་ཚེ་འམ། །ཁ་ར་སྲང་སྟོང་ཆིག་བརྒྱར་བཅས། །པ་བ་སངས་བཤད་ལྡེ་གུའང་

ཕན། །ཞེས་བྱ་བ་ལ། ལུས་ཟུངས་ཐམས་ཅད་ལ་གནས་པའི་རླུང་ནད་དེ་ལ་ནི་ཡང་འཁྲུ་བར་མི་བྱེད་པའི་སྣུམ་དང་། །བུ་གའི་རྩ་རྒྱུན་སྦྱོང་ཞིང་དག་པར་བྱེད་པའི་ཟས་དང་སྐོམ་དང་སྨན་ཐམས་ཅད་གཏང་བར་བྱའོ། །དེ་བཞིན་དུ་ཕལ་ཆེར་མངར་བ་དང་སྦྱོར་བའི་འཇམ་རྩི་མས་

གཏོང་བ་དང་། སྣུམ་གྱི་འཇམ་རྩི་དག་གིས་གསོ་བར་བྱ་བ་དང་། ནད་བའི་ཉམས་སྟོབས་ལས་དཔགས་ཏེ་བཀྲུ་སྨན་འཇམ་པོ་བཏང་བ་དང་། བཅུད་ཀྱིས་ལེན་གྱི་སྦྱོར་བ་ཇི་སྐད་སྨོས་པ་དག་བསྟེན་ན་ཕན་པ་དང་། ཁྱད་པར་རམ་མཆོག་ཏུ་བྲག་ཞུན་གྱི་སྦྱོར་བ་ལན་མང་དུ་བསྟེན་

ན་ཕན་པ་དང་། །དེ་བཞིན་དུ་གུ་གུལ་ཉི་ཚེའི་སྦྱོར་བ་བཏང་ན་ཕན་པ་དང་། །པ་པ་སངས་ཀྱིས་བཤད་པའི་བཅུད་ཀྱིས་ལེན་པའི་སྦྱོར་བ་ཇི་སྐད་བཤད་པ་དག་ཀྱང་ཕན་ཏེ། དེ་ནི་ཁ་ར་སྲང་སྟོང་ཆིག་བརྒྱ་དང་བཅས་པའི་ལྕགས་ཕྱེའི་སྦྱོར་བ་ལས་བྱེད་པ་ཡིན་ནོ། །ཐུར་སེལ་འདྲེས་ལ་དྲོད་

Vol. 202 · folio 56a

སྐྱེད་དང་། །འཁྲུ་གཅོད་རླུང་ནི་བདེར་རྒྱུ་བྱེད། །གཅིན་གྱི་གནས་ནི་སྦྱོང་བྱེད་པའི། །སྨན་རྣམས་དེ་ལ་གཏང་བར་བྱ། །ཞེས་བྱ་བ་ལ། །ཐུར་དུ་སེལ་བ་ཞེས་བྱ་བའི་རླུང་གང་དང་འདྲེས་ཀྱང་རུང་སྟེ། དེ་ལ་ནི་ཕོ་བའི་མེ་དྲོད་སྐྱེད་པར་བྱེད་པ་

དང་། །འཁྲུ་བ་གཅོད་པར་བྱེད་པ་དང་། །རླུང་བདེ་བར་རྒྱུ་ཞིང་འབྱུང་བར་བྱེད་པ་དང་། གཅིན་གྱི་གནས་ལྒང་བ་སྦྱོང་བར་བྱེད་པའི་སྨན་གང་དག་ཡིན་པ་དེ་ཐམས་ཅད་གཏང་བར་བྱའོ། །དེ་ལྟར་སྲོག་ལ་སོགས་པ་ཡི། །འདྲེས་པའི་གསོ་བ་མདོར་བཤད་ཡིན། །སྨན་

པས་དེ་གསོ་རྒྱས་པར་ནི། །བློ་ཡིས་བརྟགས་ཏེ་ཅི་རིགས་བྱ། །ཞེས་བྱ་བ་ལ། །དེ་ལྟར་བཤད་མ་ཐག་བའི་ཚུལ་གྱིས་སྲོག་ཅེས་བྱ་བ་ལ་སོགས་པའི་རླུང་དང་ནད་གཞན་འདྲེས་པའི་གསོ་བ་མདོ་ཙམ་དུ་བསྟན་པ་ཡིན་གྱི། སྲོག་ལ་སོགས་པའི་རླུང་ལྔ་པོ་དེ་དག་གི་གསོ་བ་རྒྱ་

ཆེར་ནི་སྨན་པས་བློས་ལེགས་པར་བརྟགས་ལ་ཇི་ལྟར་འོས་པ་དང་ཅི་རིགས་པར་སྦྱར་བར་བྱའོ། །སྟོད་དུ་རྒྱུ་བའི་སྤྱི་བོར་བསྡུ། །ཐུར་སེལ་དེ་ལས་བཟློག་པར་བྱ། །མེ་དང་མཉམ་གནས་མཉམ་པར་བྱ། །ཁྱབ་བྱེད་གསུམ་དུ་སྦྱར་བར་བྱ། །ཞེས་བྱ་བ་ལ། །སྟོད་དུ་རྒྱུ་བའི་

རླུང་ནི་སྤྱི་བོར་དྲང་ཞིང་བསྡུ་བར་བྱ་ལ། ཐུར་དུ་སེལ་བའི་རླུང་ནི་དེ་ལས་གོ་བཟློག་པ་སྟེ། ཅི་ནས་ཀྱང་ཐུར་དུ་རྒྱུ་ཞིང་འགྲོ་བར་བྱ་ལ། མེ་དང་མཉམ་དུ་གནས་པ་ནི། ཆ་མཉམ་པ་ཉིད་དུ་བྱས་ཏེ། སྟེང་དུ་དྲང་བར་ཡང་མི་བྱ་ལ། འོག་ཏུ་དྲང་བར་ཡང་མི་བྱའོ། །

ཅི་ནས་ཀྱང་དེ་ཉིད་དུ་མཉམ་པར་གནས་པར་བྱའོ། །ཁྱབ་བྱེད་ཅེས་བྱ་བའི་རླུང་ནི་སྟེང་དང་འོག་དང་བར་གསུམ་ཆར་དུ་གནས་པར་བྱའོ། །བཞི་པོ་བས་ཀྱང་སྲོག་བསྲུང་སྟེ། །དེ་གནས་ན་ནི་ལུས་གནས་འགྱུར། །ཞེས་བྱ་བ་ལ། སྟོད་དུ་རྒྱུ་བ་ལ་སོགས་པའི་

རླུང་བཞི་པོ་བས་ཀྱང་། རྣམ་པ་ཐམས་ཅད་དུ་འབད་དེ་སྲོག་ཅེས་བྱ་བའི་རླུང་ལྷག་པར་བསྲུང་བར་བྱ་སྟེ། གང་གི་ཕྱིར་སྲོག་ཅེས་བྱ་བའི་རླུང་དེ་གནས་ན་ལུས་གནས་ཤིང་མི་འཇིག་པར་འགྱུར་བ་ཡིན་ནོ། །དེ་ལྟར་རླུང་ནི་ལམ་གཞན་ཞུགས། །རང་རང་གི་ནི་གནས་

Vol. 202 · folio 56b

སུ་གཞག །ཅེས་བྱ་བ་ལ། དེ་ལྟར་ཚུལ་འདིས་ན་ལམ་གཞན་དུ་ཞུགས་པའི་རླུང་ཐམས་ཅད་རྣམ་པ་སྣ་ཚོགས་ཀྱིས་དེ་ལས་བཟློག་ཅིང་རང་གི་གནས་སུ་གཞག་ཅིང་བསྡུ་ཞིང་གཞག་པར་བྱའོ། །ཁྲག་མཁྲིས་འདྲེས་པ་མ་གཏོགས་པ། །འདྲེས་པའི་ནད་ནི་ཐམས་ཅད་

ལ། །བཅུད་ཀྱིས་ལེན་གྱི་ཆོ་ག་བཞིན། །སྒོག་སྐྱ་བསྟེན་ན་སེལ་པར་བྱེད། །ཅེས་བྱ་བ་ལ། རླུང་ནད་གཞན་དང་འདྲེས་པ་སྔར་བཤད་པ་ཐམས་ཅད་ལ་ཁྲག་དང་འདྲེས་པ་མཁྲིས་པ་དང་འདྲེས་པ་མ་གཏོགས་པར་གཞན་ཐམས་ཅད་ལ་བཅུད་ཀྱིས་ལེན་གྱི་ཆོ་ག་ཇི་སྐད་བཤད་པ་

བཞིན་དུ་སྒོག་སྐྱ་བསྟེན་ན་ཡང་ནད་དེ་ཐམས་ཅད་སེལ་བར་བྱེད་དོ། །མཁྲིས་པ་འདྲེས་ལ་མཁྲིས་སེལ་བས། །རླུང་ནི་བདེ་བར་རྒྱུ་བར་བྱ། །ཞེས་བྱ་བ་ལ། མཁྲིས་པ་དང་སྟོད་དུ་རྒྱུ་བ་ལ་སོགས་པ་འདྲེས་པ་ནི་མཁྲིས་པ་སེལ་བར་བྱེད་པའི་སྨན་གང་དག་ཡིན་པ་དང་། དེ་

བཞིན་དུ་རླུང་བདེ་བར་རྒྱུ་བ་གང་དག་ཡིན་པ་དེ་བྱའོ། །ཁྲག་དང་འདྲེས་ལ་དེ་ཉིད་དང་། །འཐེང་པའི་ནད་བཤད་སྨན་བྱའོ། །ཞེས་བྱ་བ་ལ། སྟོད་དུ་རྒྱུ་བ་ལ་སོགས་པ་ཁྲག་དང་འདྲེས་པ་ལ་ནི་མཁྲིས་པའི་སྨན་དང་རླུང་བདེ་བར་རྒྱུ་བ་སྔ་མ་དེ་ཉིད་དང་། །རླུང་ནད་འཐེང་པའི་སྨན་གང་

དག་ཡིན་པ་དེ་བྱའོ། །ཁྲག་མཁྲིས་རླུང་ནི་སེལ་བ་ཡི། །བཅུད་ཀྱིས་ལེན་ནི་སྣ་ཚོགས་སྦྱར། །ཞེས་བྱ་བ་ལ། ཡང་ན་ནད་དེ་ལ་ནད་གཞི་དང་། ལུས་ཟུངས་ལ་སོགས་པ་ཁྲག་དང་འདྲེས་པ་ལ་ནི་ལེགས་པར་བརྟགས་ལ་ཁྲག་ལ་སོགས་པ་སེལ་པའི་བཅུད་ཀྱིས་ལེན་པ་སྣ་ཚོགས་

དང་ཅི་རིགས་པར་སྤྱར་བར་བྱའོ། །ནད་གཞི་ཇི་ལྟར་བསྟན་པ་བཞིན། །གསོ་བ་དེ་ལྟར་ཡང་དག་བཤད། །ཉམ་ཐག་འཕྲལ་དུ་སེལ་བ་འདི། །ཚེ་ཡི་རིག་བྱེད་གནས་འབྲས་བུ། །ཞེས་བྱ་བ་ལ། ནད་གཞི་སྔར་ཇི་སྐད་བསྟན་པ་བཞིན་དུ་གསོ་བའི་བཤད་པ་ཡང་དེ་ལྟར་བཀོད་ཅིང་

བཤད་དེ་ཚུལ་དེ་ལྟར་ལེའུ་ཉི་ཤུ་རྩ་གཉིས་ཀྱི་གསོ་བ་ཡང་དག་པར་བཤད་པ་ཡིན་ནོ། །གསོ་བའི་གནས་འདི་ནི་ནད་ཀྱིས་ཉམ་ཐག་པ་ཉིད་འཕྲལ་དུ་དེའི་མོད་ལ་སེལ་ཞིང་འཇིག་པར་བྱེད་པའི་རྒྱུས་ན་ཚེའི་རིག་བྱེད་ཀྱི་གནས་མ་ལུས་པའི་འབྲས་བུར་གྱུར་པ་ཡིན་ནོ། །གསོ་བ་ཕན་པ་གནོད་སེལ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words