No title in the text — opening words: སཾགྷཿཤུ བྷཱམིཏཧེཏུ ནོདྷཱདཱཤཡསརྦཔཱུརྞཾཀལྤདྲུམོ
No translation — Tibetan only: there is no translation we are licensed to publish (84000’s translations are no-derivatives, non-commercial)
Vol. 207 · folio 353b
༄༅།། སཾགྷཿཤུ བྷཱམིཏཧེཏུ ནོདྷཱདཱཤཡསརྦཔཱུརྞཾཀལྤདྲུམོ། །ཛྙཱནཤྩཀཱརུཎཔལླཧིཏསོོཁྱབེེཔཱཀྱམྨཉྫརཱི།
དགེ་ཚོགས་དཔག་ཏུ་མེད་པའི་རྒྱུས་བསྐྱེད་བསམས་ཀུན་རྫོགས་པའི་དཔག་བསམ་ཤིང་། །མཁྱེན་དང་བརྩེ་བའི་ཡལ་འདབ་རབ་རྒྱས་ཕན་བདེའི་སྙེ་མ་གཡུར་དུ་ཟ། །
Vol. 207 · folio 354a
སརྔསྱལོཀརཐཱདྷམུཀྟཱནཱཾཔརིཔཱརཎོནྣཾསཾབུདྦྷཏཱ། །མནྡཱརབརྵཔྲཝེཤཡཱདྱཱཏྲཾཀུསུམཱཿཤུབྷཾཤྲེཡཱམྨདྒལཾ། །
འཇིག་རྟེན་ཀུན་ཀྱི་པོས་བའི་ཤིང་རྟ་ཕྱུར་བུར་འགེངས་པའི་རྫོགས་སངས་རྒྱས། །དེང་འདིར་དགེ་ལེགས་ཤིས་པའི་མེ་ཏོག་མནྡཱ་ར་བ་ཆར་དུ་བསྙིལ།།
Vol. 207 · folio 354b
མིང་ཚིག་ཡི་གེ་ཚོགས་པའི་རྗོད་བྱེད་ལུང་གི་ཁྲུང་ཁྲུང་སྒྲ་སྙན་འབྱེན། །བརྗོད་པར་བྱ་བ་དོན་བཟང་གསེར་གྱི་བྱེ་མ་འདྲེན་ཅིང་ཁམས་གསུམ་གྱི། །འགྲོ་བའི་ཉོན་མོངས་དྲི་མ་སྦྱོང་བྱེད་བསིལ་བ་དམ་པའི་ཟླ་གཟུགས་ཀྱང་། །
གསལ་བར་སྣང་བའི་ཆོས་ཀྱི་རྒྱུན་གསུམ་བྱང་ཆུབ་ལང་ཚོ་བརྟས་པའི་བཅུད། །ཐུབ་པའི་མགྲིན་ལས་བབ་པའི་བདུད་རྩིས་རྟོགས་པའི་ལུས་སྟོབས་མཆོག་ཏུ་རྒྱས། །བསླབ་གསུམ་གསེར་གྱི་དྲ་བས་གདོང་མཛེས་ཆོས་ཀུན་རྣམ་
འབྱེད་མཆེ་བ་རྣོ། །མཐའ་མེད་འགྲོ་བ་སྲིད་ལས་གདོན་པའི་གཡར་དམ་ཁུར་ནི་ཁྱེར་བ་པོ། །རིག་དང་ཞབས་ལྡན་འཕགས་པའི་དགེ་འདུན་ས་སྲུང་ཕྲེང་བ་བྱང་ཆུབ་གྲོགས། །སྣ་ཚོགས་ལས་ཀྱི་ལག་པས་མ་བདར་མཁྱེན་པའི་
དཀྱིལ་འཁོར་རྣམ་པར་གསལ། །གཞན་གྱི་འབངས་སུ་བསྐོས་པ་མིན་པར་ཐུགས་རྗེའི་གཟིགས་པ་འགྲོ་ལ་འཇུག །བཅུ་དྲུག་ལང་ཚོ་དར་ལ་བབ་ཀྱང་རྒྱལ་བ་མ་ལུས་སྐྱེད་པའི་ཡབ། །འཇམ་པའི་དབྱངས་ཉིད་སྐྱེ་བར་
དགེ་བའི་བཤེས་སུ་གསོལ་བའི་ཐལ་མོ་སྦྱར། །བཻ་ཌཱུརྱ་ཡི་རྒྱུད་མངས་སྙན་པར་འཁྲོལ་བའི་སྒྲ་དང་བསྲེས་པའི་གསུང་། །ཡན་ལག་དྲུག་ཅུ་རྫོགས་པའི་གདངས་ལས་ཤེས་བྱ་ཐམས་ཅད་སྙན་པའི་གླུར། །འདྲེན་པ་དེ་ཡིས་སྐྱེ་
Vol. 207 · folio 355a
འཕགས་སྙིང་གི་བརྟན་པ་འཕྲོག་པའི་མཚོ་བྱུང་མ། །མགྲིན་པ་པདྨའི་རྫིང་དུ་འཇུག་ཕྱིར་སྙན་པའི་ཚིག་གི་མཆོད་སྤྲིན་སྤྲོ། །རིང་ནས་ཐུབ་པའི་བསྟན་ལ་ཕན་པའི་སྨོན་ལམ་ཕོ་ཉས་བོས་
པའི་མགྲོན། །མི་བདག་ཆེན་པོ་རིགས་མཆོག་སཱ་ལའི་རྐང་འཐུང་ཕྲེང་བར་བཅས་པ་ཡིས། །སྙིང་སྟོབས་བླ་ནས་བླ་མར་འཕགས་པས་བདེ་གཤེགས་བཀའ་ཡི་དགོངས་འགྲེལ་ཆེ། །གངས་ཅན་བརྡ་རུ་འགྱུར་རོ་
འཚལ་རྣམས་མི་ཟད་མ་མོ་ཉིད་དུ་བསྐྲུན། །ཨེ་མ་སྙིང་སྟོབས་ལྡན་པའི་སྙིང་སྟོབས་མཆོག་གི་རྩོམ་པ་འདི་འདྲ་སྔོན། །མིག་གི་དབང་པོས་ལོངས་སུ་མ་སྤྱད་དེ་བཞིན་རྣ་ལུང་ཡངས་པོ་ན། །ལྷུང་བ་མེད་
པ་དེ་ནི་ཅི་ཞེས་ཕྱོགས་ཀྱི་དགའ་མ་ཁེངས་ལྡན་དག །ཕན་ཚུན་འདྲི་དང་ལན་ལྡོན་མཆིད་ཀྱི་རྔ་ནི་ལྷང་ལྷང་བརྡུང་བ་བཞིན། །ཚུལ་འདི་བསྒྲུབ་ལ་ཞིང་དང་དམིགས་པ་སྦྱོར་བ་རྣམ་པར་དག་པ་ལས། །བྱུང་བའི་
རྣམ་དཀར་དགེ་བ་གང་དེ་གལ་ཏེ་གཟུགས་སུ་འགྱུར་སྲིད་ན། །ལམ་གསུམ་ཁོངས་སུ་མི་ཆུད་དོགས་པས་འཇིག་རྟེན་ཀུན་གྱི་བྱེད་པ་པོས། །མི་མཇེད་ཅེས་སུ་གྲགས་པའི་སྣོད་འདི་ཆེད་དུ་ཡངས་པར་སྤྲུལ་
Vol. 207 · folio 355b
ལམ་སྙམ། །དེ་ལྟ་ན་ཡང་བྱང་ཆུབ་མཆོག་གི་ས་བོན་བསྒྱུར་མིན་དེ་སྲིད་དུ། །གནས་སྐབས་མཐོ་རིས་འབྲས་བུ་ཞིག་གམ་སྡིག་པས་ཀྱང་ནི་མཐར་གཏུགས་བྱེད། །དེས་ན་འཁོར་གསུམ་དམིགས་པའི་དུག་མེད་རབ་ཏུ་ཞི་བའི་དབྱིངས་
ཉིད་དུ། །རྨི་ལམ་སྒྱུ་མའི་རྩེ་འཇོ་ལ་རོལ་མཉམ་པར་འཇོག་པའི་བསྔོ་བ་བགྱི། ༧།ནམ་མཁའི་མཐས་གཏུགས་ཕྱོགས་དང་ཕྱོགས་བྲལ་དང་། །སྟེང་འོག་དག་ན་རྒྱ་མཚོའི་རྡུལ་སྙེད་ཀྱི། །ཞིང་ཁམས་རྣམས་སུ་བྱོན་དང་
འབྱོན་འགྱུར་དང་། །ད་ལྟར་འཚོ་ཞིང་གཞེས་པའི་ཆོས་རྔ་ཆེ།༡༠ །དེ་དག་རེ་རེ་ལ་ཡང་གདུང་འཚོབ་ཀྱི། །རྒྱལ་བའི་སྲས་དང་སློབ་མ་བྱེ་བ་ཕྲག །བགྲང་ལས་འདས་པའི་འཁོར་གྱིས་བསྐོར་བ་དག །སྨོན་ལམ་དོན་ཡོད་བྱེད་
པའི་དཔང་པོར་བལྟ།༡༡ །གསང་གསུམ་མི་ཟད་རྒྱན་གྱི་འཁོར་ལོའི་མཛོད། །བརྙེས་པ་གང་གི་ཡོན་ཏན་ཕྱོགས་རེའི་འཕྲིན། །ཡིད་ཀྱི་ངོས་སུ་གསལ་བར་བྲིས་ནས་ནི། །གྲངས་མེད་ལུས་རབ་བཏུད་པའི་ཕྱག་བགྱིའོ། ༡༢།
བློ་ཡི་བང་མཛོད་ཕྱེ་བ་ལས་བླངས་པའི། །ཉེ་བར་སྤྱོད་པ་རྣམས་དང་རིན་ཆེན་བདུན། །འདོད་ཡོན་མ་ཚང་མེད་པའི་སྟོང་གཟུགས་སྤྲིན། །མཆོད་འོས་ཀུན་གྱི་སྤྱན་ལམ་འབྱུང་གྱུར་ཅིག །༡༣ །ཆགས་སྡང་རྨོངས་པའི་དགྲ་ཡིས་
Vol. 207 · folio 356a
རབ་བདས་པས། །བསླབ་གསུམ་བཅས་པའི་དབང་གི་རྒྱལ་པོ་དག །ཉེས་ལྷུང་འདམ་གྱི་ནང་དུ་བསྐྱུར་བའི་དྲི། །གཉེན་པོ་སྟོབས་བཞིས་བཤགས་པའི་ཆབ་ཀྱིས་འཁྲུད། ༡༤།
འཕགས་བཞི་སོ་སྐྱེས་བསགས་པ་དགེ་བའི་མཚོ། །ཕན་དང་བདེ་བའི་རླབས་ཕྲེང་གཡོ་བ་དེར། །ཕྲག་དོག་རྡུལ་གྱི་འཚུབ་མ་མི་འཐོར་བར །ཡི་རང་འཛུམ་པའི་ཟླ་འོད་དཀར་པོས་བྲན།༡༥ །འགྲོ་
འདུལ་ཁ་ལོ་སྒྱུར་བ་ཁྱེད་རྣམས་ལ། །སྐྱོ་ཞིང་དུབ་པའི་ནོངས་པ་མི་མངའ་ཡང་། །འཇིག་རྟེན་མཐུན་པར་བཏང་སྙོམས་མི་བཞུགས་པར། །ཟབ་དང་རྒྱ་ཆེའི་ཆོས་འཁོར་བསྐོར་བར་བསྐུལ།༡༦ །སྣ་
ཚོགས་སྤྲོས་པའི་གཞའ་རིས་མྱ་ངན་ལས། །བརྒལ་བའི་དགོན་པར་གཞོལ་བར་མི་མཛད་པར། །སྔོན་གྱི་སྨོན་ལམ་ལ་དགོངས་བསྐལ་པ་ནི། །གྲངས་མེད་སྲིད་དུ་བཞུགས་པར་གསོལ་བ་འདེབས། ༡༧།
དེ་ལྟར་བགྱིས་པའི་ལེགས་བྱས་དེ་ཡིས་བདག །སེམས་ཅན་མོས་པའི་མཁའ་ལ་བགྲོད་མཁས་པའི། །ཀུན་མཁྱེན་ཆོས་ཀྱི་ཉི་མ་མངོན་གྱུར་ནས། །འཇིག་རྟེན་དགེ་བའི་སྣང་བས་འགེངས་པར་ཤོག །༡༨།
Vol. 207 · folio 356b
དེ་འདྲའི་བྱང་ཆུབ་འདོད་པའི་ཀོ་ཀི་ལས། །གཞི་ལམ་འབྲས་བུའི་དགེ་ལེགས་ཡིད་གཅུགས་གྲོགས། །འགུགས་པའི་ཆེད་དུ་སྙན་པའི་མིང་བཟུང་ནས། །བསྔོ་སྨོན་ཚིག་གི་རྒྱང་གླུས་འབོད་ལ་དགོངས།༡༧ །དེ་བཞིན་གཤེགས་པ་རྣམས་དང་བྱང་ཆུབ་སེམས། །རྐྱེན་གཅིག་
རྟོགས་དང་ཉན་ཐོས་སོ་སྐྱེ་ཡིས། །དུས་གསུམ་རྗེས་སུ་འབྲེལ་པར་སྒོ་གསུམ་གྱིས། །ལེགས་པར་སྤྱད་པའི་དགེ་ཚོགས་གང་ཡིན་དང་། ༢༠།ཆོས་ཚུལ་འདི་ཡི་ཆེད་དུ་གཏོང་བའི་ཕྱག །འདོད་ལྡན་ཡོངས་ཀྱི་དཔག་བསམ་བརྐྱང་བ་ལས། །མཁོ་དགུ་མ་ཚང་མེད་པའི་མཆོད་སྦྱིན་དང་། །
སྒོ་གསུམ་ཐང་རེར་འབད་པའི་དགེ་བར་བཅས། ༢༡།དེང་འདིར་གཅིག་ཏུ་བསྡམས་པའི་གངས་ཀྱི་རི། །འཁོར་གསུམ་དམིགས་པ་མེད་པའི་འོད་པོ་ཆེས། །ཞི་བསིལ་དམ་པའི་རྒྱུན་དུ་བསྒྱུར་བའི་ཀླུང་།།བྱང་ཆུབ་མཆོག་གི་རྒྱ་མཚོར་རོ་གཅིག་ཤོག །༢༢།དེ་ཡི་རྟེན་འབྲེལ་སྣང་བ་མ་
འགགས་གདངས། །ངོ་མཚར་སྒྱུ་མའི་མཆོད་སྤྲིན་བདག་ཅག་གི །སྨོན་ལམ་འགྲུབ་པའི་བདེན་དཔང་མཆོད་པའི་འོས། །བཞུགས་སོ་འཚལ་གྱི་སྤྱན་ལམ་འབྱུང་གྱུར་ཅིག །༢༣།གང་ཞིག་ཐོས་ན་སྡུག་བསྔལ་རྒྱུར་བཅས་ལས། །སྐྱོབ་ཅིང་མཆོག་གི་གོ་འཕང་སྦྱིན་པའི་ཆོས། །ཕན་
བདེའི་གཟི་བྱིན་འཇིག་རྟེན་གསུམ་གྱི་བླར། །རབ་ཏུ་འབར་ཞིང་ཡུན་དུ་བརྟན་གྱུར་ཅིག །༢༩།ཡོངས་རྫོགས་བསྟན་པའི་དགོངས་དོན་མ་ནོར་གཏམ། །ཚོ་བའི་བློ་དང་ངག་གི་བང་མཛོད་དེ། །འཇམ་དཔལ་གཞོན་ནུས་བྱིན་པ་ས་སྐྱ་པའི། །བསྟན་པ་ཐུབ་པས་བསྔགས་པ་རྒྱལ་གྱུར་ཅིག །༢༥ །
ཐམས་ཅད་མཁྱེན་པའི་གསུང་གི་ཏསྲུ་རས། །བསྟན་ལ་མཁས་པའི་བྱ་བ་བགྱིས་མཐའ་རུ། །འཚང་རྒྱ་འགྱུར་བའི་ལུང་བསྟན་ཀུན་དགའ་བཟང་། །དེ་ཡི་ལུགས་མཆོག་ཀུན་དུ་དར་གྱུར་ཅིག །༢༦།དཔལ་ལྡན་རྒྱལ་བའི་ཕྲིན་ལས་རྒྱ་མཚོ་ལས། །རྣམ་པར་འཕྲུལ་པའི་སྨྲ་མཆོག་ཉིན་མོའི་
མགོན། །ཡོངས་རྫོགས་ཆོས་ཀྱི་རྒྱལ་སྲིད་སྐྱོང་བའི་སླད། །ཞབས་པད་རྡོ་རྗེའི་ཁྲི་ལ་བརྟན་གྱུར་ཅིག །༡༧ །སོ་སོ་ཐར་པ་འདུལ་བའི་གཞུང་བཞིན་བཅའ། །བྱང་སེམས་བསླབ་པ་མདོ་སྡེའི་ལུགས་སུ་བཤད། །གསང་སྔགས་རྒྱུད་སྡེ་ཟབ་མོའི་དོན་བཞིན་གདམས། །འཆད་མཁས་
Vol. 207 · folio 357a
མང་པོས་བསྟན་པ་སྐྱོང་གྱུར་ཅིག །སྒྲ་ཚད་རིག་པའི་མདའ་གཞུའི་འཁྲུལ་འཁོར་གྱིས། །སྨྲ་ངན་བདེན་པ་བྲལ་བའི་ཕྱོགས་ཀུན་ལས། །རྣམ་རྒྱལ་གྲགས་པའི་སཱི་ཏ་འཕྲོག་བྱེད་པའི། །རྩོད་མཁས་མང་པོའི་ལོག་རྟོགས་ཆོམ་གྱུར་ཅིག །༢༧ །སྡེ་སྣོད་གསུམ་གྱིས་
བརྗོད་པར་བྱ་བའི་དོན། །བཅད་ལྷུག་སྤེལ་མའི་རྗོད་བྱེད་མེ་ན་ཀས། །སྒྲ་དོན་རྒྱན་གྱི་གླིང་བུ་འབུམ་བསྒྱུར་བའི། །རྩོམ་མཁས་མང་པོའི་བསྟན་པ་གསལ་གྱུར་ཅིག །༣༠ །བསྟན་པའི་རྩ་ལག་དགེ་འདུན་འདུས་པའི་སྡེས། །བཤད་དང་སྒྲུབ་པས་ས་སྟེང་ཡོམ་ཡོམ་དུ། །བགྱིད་པ་དེ་ལ་སྐྲག་
ནས་མེ་ཏོག་གཞུ། །སྟོང་པའི་བརྫུ་ལ་ཞུགས་སྙམ་བྱེད་གྱུར་ཅིག །༣༡ །ཐུབ་ཆེན་རང་གི་ལུང་རྟོགས་དམ་པའི་ཆོས། །དར་ཞིང་རྒྱས་པའི་གནས་སུ་རབ་བསྔགས་པ། །བོད་ཆེན་སྡེ་བཞི་དགེ་བཅུའི་འབྱོར་པ་ཅན། །ས་ཕྱོགས་འདིས་མཚོན་ཡངས་པའི་རྒྱལ་ཁམས་སུ། །བསྟན་ལ་དགའ་
བའི་ལྷ་རྣམས་ནམ་མཁའ་ལ། །དུས་སུ་ལྷགས་ནས་སྤྲིན་གྱི་འཐོར་ཡབ་བཟུང་། །སྭ་སྟེ་དབྱངས་སུ་ལེན་ཅིང་ཆུ་གཙང་གི། །ཨནྡྷ་རྙིལ་གྱི་སིལ་མ་འབེབས་གྱུར་ཅིག །༣༣ །དེ་ཚེ་གསེར་ལྡན་དགའ་མ་རང་གི་ལུས། །སྔོ་བསངས་མཛེས་པའི་མེ་ཏོག་རྒྱན་དང་བཅས། །རྩ་ལྡུམ་ལོ་འདབ་མྱུ་གུ་
འབྲས་བུའི་ཚོགས། །སྨིན་པའི་དགའ་སྟོན་ཅི་ཡང་ངོམ་གྱུར་ཅིག །ཡངས་པའི་འཇིག་རྟེན་ཁམས་ཀྱི་ལུས་ཅན་རྣམས། །ཀུན་འབྱུང་ལས་ཀྱི་སྤྲུལ་པ་སྒྱུ་མའི་ལུས། །ཉམས་དང་དུས་མིན་འཇིག་བྱེད་ནད་ཀྱི་རིགས། །མུན་ནང་སྒྲོན་མེ་བཏེག་བཞིན་ཡལ་གྱུར་ཅིག །༣༥ །ཟག་བཅས་
སྡུག་བསྔལ་ཉིད་དུ་བསྟན་པའི་འཕྲིན། །ལོ་ཟླ་ཞག་དུས་རུང་བ་མིན་པའི་སྐེག །སྲི་དང་གཞན་གྱི་བྱད་ཁ་སྦོད་གཏོད་དག །འབྲས་བུ་འབྱིན་པའི་ནུས་པ་བྲལ་གྱུར་ཅིག །༣༤ །ལས་དང་སྨོན་ལམ་ལོག་པའི་ཆུ་ཀླུང་གིས། །དབང་མེད་བདས་ཏེ་ལེགས་པའི་གེགས་བྱེད་ཅིང་། །ཉེས་པར་སྦྱོར་
བའི་གདོན་བགེགས་འབྱུང་པོ་རྣམས། །བྱམས་པ་ཆེན་པོས་འཁྱུད་བཞིན་གནས་གྱུར་ཅིག །༣༧ །ཁྲོས་པས་གཙུབས་པའི་མིག་བསྒྱུར་སྨིན་མ་འཁྱོག །ཁྲག་གིས་བསྒོས་པའི་མཚོན་ཆར་འབེབས་པ་ཡིས། །ཕན་ཚུན་གཅོད་དང་འབིགས་པའི་མི་སྲུན་ཚོགས། །སེམས་རྒྱུད་སྙིང་རྗེ་བས་
Vol. 207 · folio 357b
ཀྱང་མཉེན་གྱུར་ཅིག །༣༨ །བཀྲེས་པའི་ཉེན་པས་ལུས་སྟོབས་ཆེས་དམན་ཞིང་། །བཟའ་བཏུང་མིང་ནས་འཛེར་བའི་སྐད་ཀྱིས་སྨོན། །རྡུལ་གྱིས་གཡོགས་པའི་སྐྲ་སྤུ་གཟིངས་བྱེད་པའི། །བཀྲེས་ཕོངས་བསྐལ་པ་མིང་ཡང་མི་གནས་ཤོག །༣༧ །ཕན་ཚུན་བརྐུ་དང་འཕྲོག་སོགས་ལུས་མེད་
ནི། །ལག་པའི་བརྫུ་ལ་ཞུགས་འདྲའི་ལོག་འཚོ་དག །ཡོངས་སུ་སྤངས་ནས་རང་རང་ལོངས་སྤྱོད་ཀྱིས། །ཆོག་ཤེས་མི་ཟད་གཏེར་ལ་སྤྱོད་གྱུར་ཅིག །༤༠ །མཛའ་བར་གྱུར་པའི་འགྲོ་བ་ཕན་ཚུན་དག །མཐོང་ན་བྱམས་པ་ཆེན་པོས་ཛྲེལ་བའི་འཛུམ། །སོ་ཕྲེང་དཀར་བའི་འོད་ཟེར་སྔོན་འགྲོ་
མས། །མདུན་ནས་བསུ་བ་བྱེད་བཞིན་གནས་གྱུར་ཅིག །༤༡ །འཆི་བ་མེད་པའི་ཚེ་དང་བསོད་ནམས་སྟོབས། །ཆོས་མཐུན་འབྱོར་པ་རྣམས་ནི་གངྒཱའི་རྒྱུན། །དཀར་ཕྱོགས་ཟླ་བ་ཉིན་མོར་བྱེད་པའི་འོད། །དབྱར་གྱི་ཆུ་གཏེར་རྣམས་སུ་འགྲན་པར་ཤོག །༤༢ །རྒྱལ་བ་གཉིས་པའི་ཆོས་ཀྱི་རྒྱལ་སྲིད་
ལ། །མགྲིན་པའི་བཀྲ་ཤིས་ཆོས་དུང་འཁྱེལ་པ་ལས། །འཆད་རྩོད་རྩོམ་པའི་སྒྲ་དབྱངས་ལྡིར་དེ་ཡི། །བཞེད་པའི་དོན་ཀུན་ལྷུན་གྱིས་གྲུབ་གྱུར་ཅིག ༤༣ །བསྟན་པ་དམ་པའི་ལྷ་གནས་སྙིང་གི་སྟོབས། །རྨད་བྱུང་ཕྲག་པར་འདེགས་པའི་ས་འཛིན་དེས། །ཚེ་རབས་དུ་མའི་རིང་ནས་
སྨོན་པའི་གནས། །ཐམས་ཅད་མཁྱེན་པའི་ས་ལ་རེག་གྱུར་ཅིག ༤༤ །ལས་དབང་གསེར་གྱི་འཁོར་ལོ་སྔོན་འགྲོ་མས། །ཡངས་པའི་ཆབ་སྲིད་རི་གླིང་རྒྱ་མཚོར་བཅས། །རང་དབང་བྱེད་པའི་ཕོ་ཉ་དང་པོའི་འཕྲིན། །བླ་མ་ཆེ་ཞེས་ཕྱོགས་ཀྱི་བུ་མོས་སྨྲ། ༤༥ །ཀུན་དགའི་དཔལ་སྟེར་ལུང་དང་
རྟོགས་པའི་བསྟན། །བླ་ན་འདེགས་པའི་ཕྲིན་ལས་རྒྱ་མཚོའི་གོས། །ཡོངས་སུ་ཁྱབ་པའི་སྡེ་བཞི་ལྡན་པ་གང་། །འགྲོ་བའི་བསོད་ནམས་ཁྲི་འཕང་བརྟན་གྱུར་ཅིག ༤༦ །གང་གི་བགྲོད་བྱེད་ཟུང་གི་ཆུ་ལས་སྐྱེས། །རབ་དམར་དབང་གི་རྡུལ་ཕྲེང་སྒྱུགས་པ་དེ། །ཁེངས་ལྡན་ཕྱོགས་ཀྱི་
ས་འཛིན་བྱེ་བའི་གཙུག །ཀུན་ལས་རྣམ་པར་རྒྱལ་བར་བརྟན་གྱུར་ཅིག ༤༧ །འཕེལ་ཞིང་རྒྱས་པར་གྱུར་ཅིག་འཆི་མེད་ཚེ། །རྒུད་པ་མེད་པའི་ཆབ་སྲིད་མངའ་ཐང་དཔལ། །རྣམ་པར་གནོན་དུ་མེད་པའི་འཁོར་དང་སྟོབས། །ནུབ་པ་མེད་པར་གྲགས་པའི་ཡི་གེ་རྣམས། ༤༨ །རིགས་དང་སྟོབས་
Vol. 207 · folio 358a
དང་དཔུང་ཚོགས་འབྱོར་པ་ཡིས། །ཁེངས་པས་དྲེགས་པ་རྣམས་ཀྱང་རང་དབང་དུ། །རྩེ་གཅིག་འདུན་པའི་དམར་མདངས་མཁུར་ཚོས་པ། །འཕོས་པའི་མཛེས་པ་ཅི་ཡང་འབྱུང་གྱུར་ཅིག །༤༩ །ཆོས་དང་སྲིད་ཀྱི་ཕྲིན་ལས་ནམ་མཁའི་མཐའ། །རྟོགས་ཕྱིར་རིང་དུ་སོ་
སྙམ་བགྱིད་པ་དེར། །གེགས་བྱེད་མི་དང་མི་མིན་གནོད་པ་རྣམས། །ནམ་ཡང་འཇུག་པའི་གོ་སྐབས་མ་གྱུར་ཅིག ། ༥༠ །ཚུལ་གནས་ཐོས་བསམ་བསྒོམ་པའི་འཁོར་ལོ་ཡིས། །ལུང་དང་རྟོགས་པའི་རྒྱལ་སྲིད་ཆེན་པོ་ལ། །དབང་མཛད་ཆོས་ཀྱི་རྒྱལ་པོ་མངོན་གྱུར་ནས། །ས་གསུམ་བསྟན་
པའི་རྒྱལ་རྔ་བརྡུང་བར་ཤོག ༥༡ །དེ་ལྟའི་བྱང་ཆུབ་སྒྲུབ་པ་ལ་སྡང་བའི། །སྡིག་པས་སྙིང་ནས་བཟུང་འདྲའི་གདུག་ཅན་རྣམས། །སྐད་ཅིག་གསོན་དུ་རུང་ན་སྲུང་མའི་ཚོགས། །དཀར་ཕྱོགས་དགའ་བའི་རུ་མཚོན་ཅི་སྟེ་སྒྲེང་། ༥༢།ལུགས་བརྒྱ་དཔྱོད་པའི་བློ་གྲོས་བ་ཀུ་ལ། །འཇམ་དཔལ་བྱིན་
རླབས་སྒེག་མོའི་འགྲམ་ཆང་གིས། །ཕྱེ་བ་གང་དེའི་སྐུ་ཚེ་ལས་དབང་དང་། །ཡོན་ཏན་རྒྱ་མཚོའི་དཔལ་ལ་སྤྱོད་གྱུར་ཅིག། །ལུས་ཅན་ཡོངས་ཀྱི་བསོད་ནམས་ཁང་པ་རུ། །བདེ་སྐྱིད་མགྲོན་དུ་ཁུགས་པའི་འཆི་མེད་མགོན། །བསྟན་སྲིད་ལྷ་ཡི་གཞལ་མེད་ཡངས་པོ་ན། །མཁྱེན་པའི་མིག་
སྟོང་འཛུམ་པར་མ་གྱུར་ཅིག །༥༩ །ས་སྤྱོད་མཆོག་གི་བསོད་ནམས་གཡབ་མོ་ཡིས། །བོས་བཞིན་བྱོན་པའི་ཆོས་བློན་ཆེན་པོ་རྣམས། །དགེ་བ་བཅུ་དང་མཐུན་པའི་བཀའ་ཁྲིམས་ཀྱིས། །ཁམས་གསུམ་འགྲོ་བ་བདེ་ལ་དགོད་གྱུར་ཅིག །༥༥།ཆོས་སྦྱིན་འདི་ཡི་ལས་བྱེད་མགོ་འདྲེན་དུ། །འོས་པའི་
ཡི་གེ་དམ་པ་གང་གི་གཙུག །བབ་པ་དེ་ཡང་སྐྱེ་ནས་སྐྱེ་བ་རུ། །རྒྱལ་བའི་གསུང་རབ་ཀུན་ལ་དབང་འབྱོར་ཤོག །༥༦ །རྟགས་གསུམ་སྔོན་རྗེས་འཇུག་དང་བྱ་བྱེད་ལས། །དུས་གསུམ་རྣམ་དབྱེ་འབྱེད་པའི་བློ་གྲོས་ཀྱིས། །བརྡ་དག་བྱེད་པ་རྣམས་ནི་བྱང་ཆུབ་བར། །མཆོག་གི་བསྟན་ལ་བྱ་བ་བྱེད་
གྱུར་ཅིག །༥༧ །བཟོ་གནས་སྦྱངས་པའི་མཐར་སོན་སྐུ་གཟུགས་དང་། །ཡི་གེའི་རིག་བྱེད་འདྲི་འདོན་རྐོ་བ་སོགས། །སྒོ་གསུམ་ལས་ཀྱི་འབྲེལ་ཐོགས་ཐམས་ཅད་ཀྱང་། །ཚོགས་གཉིས་རྫོགས་པའི་འབྲས་བུ་མངོན་གྱུར་ཅིག །བདག་ཀྱང་བྱང་ཆུབ་བར་གྱི་སྐྱེ་བའི་ཕྲེང་། །རྣམ་གསུམ་
Vol. 207 · folio 358b
ཚུལ་ཁྲིམས་དག་ཅིང་ལུང་རིགས་དང་། །གདམས་པ་མི་ཟད་རིན་ཆེན་མཛོད་བཟུང་ནས། །བསྟན་དང་འགྲོ་བའི་དོན་ཆེན་བྱེད་གྱུར་ཅིག །༥༧ །ཡོངས་རྫོགས་བསྟན་པའི་གླེགས་བམ་ཕྲེང་བ་དག །གང་དུ་བཞུགས་དང་གང་གིས་སྤྱན་འདྲེན་མཛད། །ཉན་དང་ཀློག་དང་མཆོད་སྦྱིན་བྱེད་པ་དེར། །ཐོག་
མཐའ་བར་དུ་དགེ་བའི་བདེན་པས་སྐྱོང་། །མདོར་ན་སྤྱི་དང་བྱེ་བྲག་འགྲོ་བ་ཡི། །མཚན་ནས་སྨོས་དགུ་ཐམས་ཅད་མཐོང་བའི་ཆོས། །ཕྱི་མར་བཅས་ལ་མི་བསླུ་ངེས་པའི་སྐྱབས། །དཀོན་མཆོག་གསུམ་དང་བྲལ་བར་མ་གྱུར་ཅིག །༦༡ །མངོན་པར་མཐོ་དང་ངེས་ལེགས་བསྒྲུབ་པའི་རྟེན། །
དལ་བརྒྱད་འབྱོར་པ་བཅུ་དང་མི་འབྲལ་ཞིང་། །གང་དེ་འཇིག་པའི་ཆོས་སུ་ཤེས་ནས་ནི། །དགེ་བའི་སྙེང་པོ་ཅན་དུ་བྱེད་གྱུར་ཅིག༦༢ །སྲིད་པར་འཆིང་བའི་འཁྱུད་པོ་ཁྱོད་ཉིད་ཅེས། །བདག་དོན་ཞེན་ལ་རྣམ་པ་བརྒྱས་སྨད་ཅིང་། །གཞན་དོན་བྱང་ཆུབ་མཆོག་ཏུ་སྨོན་པ་དང་། །འཇུག་པའི་
བསམ་པ་རྣམ་པར་དག་གྱུར་ཅིག །༦༣ །ཉམ་ཐག་དབུལ་བའི་ཚོར་བ་དབུགས་འབྱིན་སླད། །གཏོང་ཕོད་ཕྱག་གི་དཔག་བསམ་བརྐྱང་བ་ལས། །ལན་དང་རྣམ་སྨིན་རེ་བའི་འདོགས་ཐག་གིས། །བཅིང་བ་མེད་པའི་སྦྱིན་པ་མཐར་ཕྱིན་ཤོག །༦༩ །སྲིད་པའི་འདུན་པས་དབེན་པ་གཞན་དོན་དུ། །
བྱང་ཆུབ་འདོད་པའི་མཁུར་ཚོས་འཛུམ་བསུ་བའི། །བག་ཡོད་སྡོམ་པའི་ཀཱ་ཤི་མཛེས་དགའ་མར། །རྣམ་གསུམ་ཚུལ་ཁྲིམས་རྒྱན་གྱིས་བཀླུབ་པར་ཤོག །ཐོས་བསམ་བསྒོམ་པའི་དཀའ་ཐུབ་གདུང་བ་དང་། །གཤེ་དང་བརྡེག་སོགས་གཞན་གྱིས་གཙེས་པ་རྣམས། །ཆུ་ལ་བྲིས་པའི་
རི་མོ་ཇི་བཞིན་དུ། །མ་རྨས་བཟོད་པའི་གཡར་དམ་བརྟན་པར་ཤོག །༦༦།བསྲེག་ཟ་རབ་ཏུ་འབར་བ་བུད་ཤིང་གིས། །ཚིམ་པ་མེད་ལྟར་རྒྱལ་སྲས་སྤྱོད་པའི་ཁུར། །ཇི་ཙམ་ལྕི་ལ་ཕྱིར་ཞིང་སྤྲོ་བ་ཡིས། །དེ་ལ་འཇུག་པའི་བརྩོན་འགྲུས་རྩོམ་པར་ཤོག །༦༧ །འགྲོ་ལ་སྙིང་རྗེ་ཤིན་ཏུ་མཉེན་ལྡན་
གྱིས། །ལན་བརྒྱར་དཀྲིས་ནས་བདག་གི་བདེ་དགེ་དང་། །གཞན་གྱི་སྡུག་བསྔལ་མཉམ་དང་བརྗེ་སེམས་ཀྱིས། །རང་ཉིད་གཅེས་པའི་མགོ་བོ་གནོན་པར་ཤོག །༦༨ །མཚན་རྟོག་ཚེར་མ་མེད་པའི་ཞི་གནས་དང་། །གནས་ལུགས་བརྗོད་བྲལ་རྟོགས་པའི་ལྷག་མཐོང་དག །ཡ་བྲལ་མེད་པའི་
Vol. 207 · folio 359a
རྩེ་གཅིག་རྣལ་འབྱོར་གྱིས། །བདག་ཏུ་འཛིན་པ་དྲུང་ནས་འབྱིན་པར་ཤོག །སྣ་ཚོགས་ཐབས་ལ་མཁས་པའི་དཔུང་ཚོགས་ཀྱིས། །ཆོས་ཀུན་བདག་མེད་རྣམ་པར་འབྱེད་པའི་མཚོན། །གདེངས་པ་ཙམ་གྱིས་ཉོན་མོངས་དགྲ་བོ་ཆེ། །གཞོམ་པའི་ཤེས་རབ་ཕ་རོལ་ཕྱིན་
པར་ཤོག །༧༠ །ཕོངས་ཕོངས་དབུགས་རབ་འབྱེན་པ་ལག་པའི་མཐིལ། །དམར་དམར་བརྩེ་བའི་ཚོན་ཀྱིས་བྱུགས་འདྲ་ལས། །ལྷུག་ལྷུག་སྩལ་བའི་ཟང་ཟིང་སྦྱིན་པ་ཡིས། །མང་མང་སྐྱེ་བོ་འཁོར་དུ་སྡུད་པར་ཤོག །༧༡ །དེ་མཐོང་དགའ་བའི་འཛུམ་དཀར་ཡིད་འོང་མས། །བལྟས་ཏེ་ཆོས་དང་
ཐར་པའི་ཕན་ཡོན་དག །མཆིད་དུ་སྙན་པར་སྨྲ་བས་ཐམས་ཅད་ཀྱང་། །དགེ་བའི་ཕྱོགས་སུ་སྤྲོ་བ་བསྐྱེད་པར་ཤོག །༧༢ །ཞུམ་ལ་གཟེངས་བསྟོད་རྒོད་ལ་སྐྱོ་བ་བསྐྱེད། །རྨུགས་པ་ངོ་མཚར་གཏམ་གྱིས་བྲིད་བྱས་ནས། །དོན་སྤྱོད་པ་ཡིས་རང་རང་མོས་པ་དང་། །འཚམ་པའི་ཆོས་ལ་ལེགས་
པར་སྦྱར་བར་ཤོག༧༣ །ལམ་ལ་ཞུགས་པའི་གང་ཟག་དགེ་བའི་བློ། །བརྟན་ལྡན་བྱ་བའི་ཆེད་དུ་རང་ཉིད་ཀྱང་། སྦྱིན་སོགས་བརྩོན་པའི་དོན་མཐུན་བྱ་བ་ཡིས། །སེམས་ཅན་ཡོངས་སུ་སྨིན་པར་བྱེད་པར་ཤོག །༧༤ །བསྐལ་པ་གྲངས་མེད་གསུམ་གྱི་ཚོགས་ཟུང་གི། །རྒྱ་མཚོ་བསྲུབས་པའི་སྙིང་
པོ་ས་ལམ་དང་། །འབྲས་བུའི་ཡོན་ཏན་ཆ་རྫོགས་རྒྱུ་སྐར་བདག །མདའ་ལྔའི་མུན་པ་ཀུན་ལས་རྒྱལ་བར་ཤོག །༧༥ །སྒྲིབ་གཉིས་ཟད་པའི་འཁོར་ཚོགས་གྲངས་མེད་དབུས། །སྐུ་གཉིས་ཟུང་འཇུག་ལོངས་སྤྱོད་རྫོགས་པའི་དཔལ། །བདེན་གཉིས་ཟུང་འཇུག་འདོམས་པའི་ཆོས་རྔ་ཆེ། །
དོན་གཉིས་མཐའ་རུ་ཕྱིན་པ་མངོན་གྱུར་ཅིག །༧༦ །ཟླ་བ་གཅིག་ལས་ཇི་སྙེད་ཆུ་ཡི་སྣོད། །དེ་སྙེད་གཟུགས་སུ་འགོག་མེད་སྟོན་བཞིན་དུ། །གང་དེ་ཉིད་ལས་མཆོག་གི་སྤྲུལ་པའི་སྐུ། །འབད་མེད་འཇིག་རྟེན་ཀུན་དུ་སྣང་བྱེད་ཤོག །༧༧།གསང་གསུམ་ཡོན་ཏན་མི་ཟད་ཡིད་བཞིན་གྱི། །
ནོར་བུ་བུམ་པ་བཟང་དང་དཔག་བསམ་ལྟར། །མཆོག་དམན་བར་མའི་གདུལ་བྱ་ཇི་སྙེད་ཀྱི། །རེ་བའི་ཤིང་རྟ་ཀུན་ནས་འགེངས་པར་ཤོག །༧༨ །འཇིག་རྟེན་གསུམ་ན་མི་བསླུ་ངེས་པའི་སྐྱབས། །དཀོན་མཆོག་གསུམ་འདྲ་མི་སྲིད་གཏམ་གྱི་རྔ། །བདེན་མཐའ་གསལ་བས་ལྷང་ལྷང་བརྡུང་དེ་
Vol. 207 · folio 359b
ཡིས། །བདག་གི་སྨོན་ལམ་སྙིང་པོས་ལྕི་གྱུར་ཅིག །༧༦།བདག་ཅག་མོས་པའི་ཁང་བཟངས་ཡངས་པར་དད་པའི་སྤོས་ཆུས་ཀུན་ནས་བྲན་པའི་གནས་འདི་རུ། །དཀར་ཕྱོགས་ལྷ་རྣམས་རིན་ཆེན་གདུགས་དང་རྒྱལ་མཚན་ཐོགས་ནས་མེ་ཏོག་སིལ་མས་མཆོད་པའི་དབུས། །རྒྱལ་བ་སྲས་
དང་བཅས་པ་མགྲིན་བསྒྲིགས་སྭ་སྟེ་ཛ་ཡ་སྙན་པའི་གླིང་བུ་འབུམ་བསྒྱུར་ནས། །བསྟན་པ་དྲི་མེད་ཡུན་དུ་གནས་ཤིང་འཇིག་རྟེན་བདེ་བའི་ཤིས་པ་ཀུན་གྱིས་སྐྱོང་གྱུར་ཅིག །༨༠།དགའ་ལྡན་ལྷ་ཡི་གཞལ་མེད་ནས་འཕོས་འཛམ་བུའི་གླིང་འདི་དམ་པའི་སྙིང་པོས་ཕྱི་བའི་བེེད། །ལྷུམས་སུ་ཞུགས་
དང་པདྨ་ལྟར་འཁྲུངས་གཞོན་ནུ་རོལ་རྩེད་མཛད་དང་བཙུན་མོའི་འཁོར་གྱིས་བསྐོར། །ངེས་པར་འབྱུང་དང་དཀའ་བ་རབ་སྤྱད་བྱང་ཆུབ་མཆོག་བརྙེས་བདུད་ལས་རྣམ་རྒྱལ་ཆོས་རབ་སྟོན། །ས་གསུམ་ཆོས་ཀྱི་སྣང་བས་ཁྱབ་པའི་བཀྲ་ཤིས་དམ་པས་འདི་ན་ཤིས་པའི་འབབ་སྟེགས་མཛོད། ༨༡།
ཕྱོགས་བཅུ་རབ་འབྱམ་མུ་དང་མཐའ་ཡིས་ཐུག་པ་མེད་པའི་ཞིང་ན་རབ་གཤེགས་སྟོབས་བཅུ་པའི། །མཆུ་སྒྲོས་མཚོ་སྐྱེས་དམར་པོའི་འདབ་མ་འཛུམ་ལས་འཕོས་པའི་ཚངས་དབྱངས་རྐང་དྲུག་གླུ་དང་བཅས། །འགྲོ་ཁམས་མོས་པར་མི་འཚམ་མེད་པའི་ཟབ་དང་རྒྱ་ཆེ་ལེགས་གསུངས་
སྦྲང་རྩིའི་དགའ་སྟོན་གྱིས། །རྣམ་གྲོལ་སྲོག་གི་ཀ་བ་ཚུགས་པའི་བཀྲ་ཤིས་དམ་པས་སྐྱེ་དགུ་ཐམས་ཅད་བདེ་གྱུར་ཅིག ༨༢།དེ་སྐད་བདག་གིས་སྨྲས་པའི་འབྲས་བུ་མི་བསླུ་ངེས་པར་གསུང་གི་རྡོ་རྗེ་གྲུབ་པ་མིན། །འཆི་མེད་དྲང་སྲོང་བདེན་ཚིག་གྲུབ་པའི་ངག་གི་མཚོན་ཆ་སྟོར་བ་རྙེད་པ་ཉིད་ཀྱང་
མིན། །འོན་ཏེ་སྔོན་གྱི་འཇམ་དཔལ་ལ་སོགས་རྒྱལ་སྲས་སྤྱོད་པའི་སྨོན་ལམ་རྒྱ་མཚོའི་རྗེས་ཞུགས་ནས། །དགེ་རྩ་བྱང་ཆུབ་ཆེན་པོར་སྨིན་བྱས་ཇི་ལྟར་སྨོན་པ་ནམ་ཡང་དོན་མེད་མ་གྱུར་ཅིག ༨༣།དེ་ལྟར་ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་མ་
ལུས་པ་རྣམ་པར་འགྲེལ་པའི་བསྟན་བཅོས་འགྱུར་རོ་འཚལ་གྱི་ཆོས་སྦྱིན་རྒྱུན་མི་འཆད་པའི་ངོ་མཚར་འཕྲུལ་གྱེ་ཕྱི་མོ་རྫོགས་ལྡན་བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པ་ཞེས་བྱ་བའི་གླེགས་བམ་གྱི་ཕྲེང་བ་བརྒྱ་ཕྲག་གཉིས་ལ་བཀྲ་ཤིས་པའི་རྟགས་ཀྱིས་ཉེ་བར་ལྷག་པ་འདི་
Vol. 207 · folio 360a
ནི། བཅོམ་ལྡན་འདས་ཐུབ་པའི་དབང་པོའི་མགུར་གྱི་བུམ་པ་བཟང་པོ་ལས། ལུང་བསྟན་གྱི་བདུད་རྩི་ནོད་པའི་རྒྱལ་ཚབ་ཀྱི་སྐྱེས་བུ་ཆེན་པོ། མཁྱེན་རབ་རྒྱལ་བ་ཉིད་ལས་དམིགས་སུ་མེད་པའི་བདག་ཉིད་ཆེན་པོ་དཔལ་རྡོ་རྗེ་འཆང་ཀུན་དགའ་བཟང་པོ་ཞེས་ཕྱོགས་
ཐམས་ཅད་དུ་ཡོངས་སུ་གྲགས་པ་དེ་ཉིད་ཀྱི་ཞབས་སྟེགས་མི་འཇིགས་གདོང་ལྔའི་དབང་པོ་རྣམ་པར་བསྒྱིངས་པའི་ཁྲི་འཕང་མཐོན་པོ་ག་ལ་བ་དེར། འཁོར་ལོས་མཚན་པའི་ཞབས་ཟུང་ཉེ་བར་བཀོད་ནས། རྣམ་པར་དཀར་བའི་ཕྲིན་ལས་ཀྱི་འཁོར་ལོས་འཆི་མེད་ལམ་གྱི་མུ་མཐའ་གཞལ་བ་
སྙམ་བྱེད་པ་གང་གི་མཚན་ནས་སྨོས་ན་མཁན་ཆེན་འཇམ་པའི་དབྱངས་བཀྲ་ཤིས་ལྷུན་གྲུབ་གྲགས་པའི་རྒྱལ་མཚན་དཔལ་བཟང་པོ་པའི་ཞལ་སྔ་ནས་ཀྱིས། ཡོངས་རྫོགས་བསྟན་པའི་དགོངས་འགྲེལ་ཆེན་པོ་འདི་དག་པར་དུ་བརྐོ་བ་ཅིག་བྱུང་ན། རྒྱལ་བའི་བསྟན་པ་རིན་པོ་ཆེ་
འཇིག་རྟེན་གྱི་ཁམས་སུ་ཡུན་རིང་པོར་གནས་པའི་རྒྱུར་འགྱུར་བ་སོགས་ཕན་ཡོན་དཔག་ཏུ་མེད་པས་སྔོན་དྲངས་པའི་བཀའ་བྱེད་ཕེབས་པར་བརྟེན། ཀུན་མཁྱེན་བུ་རམ་ཤིང་པའི་རིང་ལུགས་དྲི་མ་མེད་པ་ཡོངས་སུ་དར་བའི་ཡུལ་གྲུ་ཆེན་པོ་ཉིད་དུ་ཆེས་ཆེར་བསྔགས་པ་རྣམས་ཀྱི་ནང་གསེས་
བོད་ཆེན་པོར་གྲགས་པའི་སའི་སྟེང་གི་དཀྱིལ་འཁོར་ཕལ་ཆེ་བ་དག །ཆོས་ཚུལ་དགེ་བ་བཅུ་དང་མཐུན་པའི་ཕྲིན་ལས་དང་སྟོབས་ཀྱི་འཁོར་ལོས་མངའ་སྒྱུར་ཞིང་ཁྱད་པར་གནམ་གྱིས་བསྐོས་པ་ཤར་ཕྱོགས་གོང་མ་ཆེན་པོའི་ལས་ལུང་གིས་བོད་ཆེན་ལྗོངས་ཀྱི་སྐྱེ་འགྲོ་སྤྱིའི་རྗེ་བོར་མངའ་
གསོལ་བའི་སྡེ་དགེ་ས་སྤྱོད་ཆེན་པོ་བསྟན་པ་ཚེ་རིང་ཞེས་གྲགས་པའི་རྔ་གསང་ཕྱོགས་ཀྱི་ཁོ་ར་ཁོར་ཡུག་དག་ཏུ་ཁྱབ་པ་དེ་ཉིད་ཀྱིས། ཡ་རབས་དམ་པའི་སྤྱོད་ཚུལ་བསྔགས་པར་འོས་པ་རྣམས་ཀྱི་ནང་ནས་ཀྱང་བླ་མའི་བཀའ་ཚུལ་བཞིན་དུ་བསྒྲུབ་པ་དེ་ནི་ཆེས་མཆོག་ཏུ་གྱུར་པའི་ལུང་རིགས་
ཀྱི་ནོར་བུ་དམ་པར་ཐུགས་ལ་བཅང་ནས། མཁན་ཆེན་དམ་པའི་བཀའ་སྩལ་ཇི་ལྟར་ཕེབས་པ་དེ་ལྟར་བསྒྲུབ་པར་ཞལ་གྱིས་འཆེས་ཏེ། དམར་སེར་ཞེས་པ་མེ་སྦྲུལ་གྱི་ལོའི་ཟླ་ཚེས་དགེ་བ་ནས་ལས་ཀྱི་དབུ་ཚུགས་པར་མཛད། དེ་ནས་བརྩམས་ཏེ་སྙིང་སྟོབས་རྨད་དུ་བྱུང་བའི་ཁུར་གྱིས་བྱ་བ་འདི་
Vol. 207 · folio 360b
ཉིད་ཀྱི་ཐོག་མཐའ་བར་གསུམ་དུ་འགྲུབ་པར་བྱེད་པའི་བདག་པོའི་རྐྱེན་ནི་གང་དེའི་རིགས་སྲས་དྲི་མ་མེད་པ་བོད་ཆེན་ལྗོངས་ཀྱི་སྐྱེ་འགྲོ་སྤྱིའི་བསོད་ནམས་དང་དབང་ཐང་གི་རིན་ཆེན་ཕུང་པོ་གཅིག་ཏུ་སྲུངས་པའི་ཁྲི་འཕང་མཐོན་པོ་ལ། ལྷ་དང་མིའི་མཆོད་པའི་བྱེ་བྲག་བསམ་གྱིས་མི་ཁྱབ་པ་
དང་བཅས་པས་ཕྱོགས་ཐམས་ཅད་ལས་རྣམ་པར་རྒྱལ་བར་མངའ་གསོལ་བའི་ཚེ་ན་ཆོས་དང་སྲིད་ཀྱི་ཕྲིན་ལས་འཁོར་ལོ་རྩིབས་སྟོང་དང་ལྡན་པ་ཕྱོགས་ཀྱི་མཐར་བགྲོད་པ་ཅན་སྡེ་དགེ་བླ་མ་ཀུན་དགའ་ཕྲིན་ལས་རྒྱ་མཚོའི་སྡེ་ཞེས་ཡོངས་སུ་གྲགས་པ་འདི་ཉིད་ཀྱི་ལས་དབང་དང་བསོད་
ནམས་གཞལ་དུ་མེད་པའི་གསེར་ལྡན་དགའ་མའི་ལྟོ་བ་ཡངས་པར། སྔོན་ཆད་གང་གིས་བསྐྲུན་པར་མ་ནུས་པའི་ལེགས་བྱས་ཀྱི་རྒྱ་མཚོ་ཆེན་པོ་འདི་ཉིད་ཀྱི་ཁུར་ཡོངས་སུ་འཛིན་པ་ལ་སྤྲོ་བ་མཆོག་གི་རྩེ་མོར་འཛེག་པར་གྱུར་ཏེ། བཞེད་པ་ཚུལ་བཞིན་དུ་སྒྲུབ་པའི་ཕྲིན་ལས་ཀྱི་ཁ་
ལོ་སྒྱུར་ཞིང་། ལས་བྱེད་རྣམས་ཀྱི་མགོ་འཛིན་པར། ཕྱག་མཛོད་འགུ་རུ་བཀྲ་ཤིས་དང་། གཉེར་པ་ཨ་ཟློས་དང་། དགེ་སློང་ཚུལ་ཁྲིམས་རབ་བརྟན།པར་དཔོན་གཟུངས་སྐྱབས་རྣམས་དང་། ཞུས་དག་པ་བདག་དང་། དེའི་གྲོགས་ལྡན་པ་རྨུགས་སངས་སྦྱིན་པ་རྒྱ་
མཚོ། སྤོ་ལུའི་དྲུང་ཡིག་བློ་གྲོས་རྒྱལ་མཚནསྐེ། ལྕགས་རའི་དགེ་བཤེས་བསྟན་འཛིན་ལྷུན་གྲུབ། འཛོམ་ཐོག་པ་ཨོ་རྒྱན་བཀྲ་ཤིས་རྣམས་དང་བཅས་ཏེ། ཕྱི་མོ་ཁུངས་ཐུབ་རྒྱས་བསྡུས་ཆ་གསུམ་ཙམ་དང་ཞིབ་པར་གཏུགས་ནས་ཞུ་དག་ནན་ཆེར་བགྱིས་ནས་སྟོད་སྨད་ཕྱོགས་ཀྱི་
སྨྱུག་འཛིན་པ་བརྒྱད་ཅུ་ཁ་ཡར་དང་། པར་མཁན་བརྒྱ་ཕྲག་ལྔ་ཙམ་བསགས་ནས། རྔ་ཆེན་ཞེས་པ་ཆུ་ཕོ་ཁྱེའི་གནམ་ལོ་གསར་དུ་ཤར་བའི་ཟླ་ཚེས་དགེ་བར།མཁས་ཤིང་གྲུབ་པའི་སྐྱེས་ཆེན་བགྲང་བ་ལས་འདས་པ་བྱོན་པ་དང་འབྱོན་པ་དང་འབྱོན་འགྱུར་བའི་གདན་ས་ཆེན་པོ་
དཔལ་སྡེ་དགེ་ལྷུན་གྲུབ་སྟེང་གི་རྒྱལ་ཁབ་ཆེན་པོར་ལེགས་པར་གྲུབ་པར་བགྱིས་པ་ཕྱོགས་ཐམས་ཅད་དུ་དར་ཞིང་རྒྱས་པར་གྱུར་ཅིག །ཅེས་པ་ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་སྤྱི་དང་བྱེ་བྲག་གི་དགོངས་པ་མ་ལུས་པ་རྣམ་པར་འགྲེལ་པའི་བསྟན་བཅོས་འགྱུར་
Vol. 207 · folio 361a
རོ་འཚལ་གྱི་ཆོས་སྦྱིན་རྒྱུན་མི་འཆད་པའི་ཕྱི་མོ་རྫོགས་ལྡན་བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པ་འདི་དག་ཡོངས་སུ་རྫོགས་པར་གྲུབ་པའི་བསྔོ་བ་སྨོན་ལམ་གྱི་
ཚིགས་སུ་བཅད་པ་གཞི་ལམ་འབྲས་བུའི་དགེ་ལེགས་ཡིད་གཅུགས་མཛའ་བོ་འགུགས་པའི་རྒྱང་གླུ་ཞེས་བྱ་བ་པར་བྱང་མདོར་བསྡུས་ཙམ་དང་བཅས་པ་འདི་ནི། ཞུ་དག་པ་བནྡེ་ཚུལ་ཁྲིམས་རིན་
ཆེན་ནམ། འབྱུང་དུ་རུང་བའི་ཡོན་ཏན་ལ་སྨོན་པའི་ཐ་སྙད་དུ་ངག་གི་དབང་པོ་འཇིགས་བྲལ་ཕྱོགས་ལས་རྣམ་པར་རྒྱལ་བའི་ལྷ་དབྱངས་ཅན་སྙེམས་པའི་ལང་ཚོའི་སྡེ་ཞེས་བཏགས་པའི་སྙོམ་
ལས་པ་དེས། ནམ་མཁའ་ལྡིང་གི་འཕུར་ལྡིང་ལ་བུང་བ་གཞོན་ནུས་འགྲན་པ་བཞིན་དུ་སྨྲས་པ་དགེ་ལེགས་འཕེལ་བར་གྱུར་ཅིག། །།ཡང་སྨྲས་པ། ལྷུང་ལྷུང་སྙན་པའི་སྒྲར་བཅས་འབབ་
པའི་ཀླུང་། །དྲང་སྲོང་ཁྲོས་པའི་དམོད་པས་མ་བཅིངས་ན། །སྐལ་ལྡན་ཤིང་རྟའི་རེ་བ་རྫོགས་བྱེད་པའི། །ལམ་གསུམ་དྲི་མ་སྦྱོང་བྱེད་དེ་རྨད་བྱུང་། །ཞེས་སོ། །སརྦ་མངྒ་ལོ།། །།
Source and licence
Text: Esukhia’s Derge Tengyur e-text (Esukhia/derge-tengyur · commit 17465313) · public domain
Licence Public Domain · Evidence
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
No translation — Tibetan only: there is no translation we are licensed to publish (84000’s translations are no-derivatives, non-commercial)
- Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
- The Tibetan text is not in the collection search yet — the available tokenizer drops Tibetan vowel signs and would match the wrong words