ཆོས་མངོན་པ་མཛོད་ཀྱི་བཤད་པའི་རྒྱ་ཆེར་འགྲེལ་པ

Sanskrit title (Tibetan script, as in the text) ཨ་བྷི་དྷརྨྨ་ཀ་ཥོ་བྷཱ་ཥྱ་ཊཱི་ཀཱ་ཏ་ཏྭཱརྠ་ནཱ་མ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 210 · folio 59b

ནི་རེ་ཞིག་ཏུའོ། །གཏན་པ་མེད་པས་ནི་གཏན་དུའོ། །དེའི་ཕྱིར་དུས་རེ་ཞིག་ཏུ་ཉེས་པར་སྤྱད་པའི་དྲི་མ་སྤངས་པའི་ཕྱིར་དང་། ཟག་པ་མེད་པ་དོན་དམ་པའི་གཙང་བྱེད་འདྲེན་པར་བྱེད་པའི་ཕྱིར་ཟག་པ་དང་བཅས་པས་ཀྱང་གཙང་བྱེད་ཅེས་བྱ་བ་འཐོབ་པོ། །ལོག་

པར་ཐུབ་པ་དང་གཙང་སྦྲ་ལ་མོས་པ་རྣམས་ཞེས་བྱ་བ་ལ། གང་དག་མི་སྨྲ་བ་དང་། ཕྱི་རོལ་གྱི་དྲི་མ་སྤངས་པས་མཐོ་རིས་དང་བྱང་གྲོལ་འཐོབ་བོ་ཞེས་བྱ་བ་དེ་ལྟར་ལྟ་བ་དེ་དག་ནི་ལོག་པའི་ཐུབ་པ་དང་། གཙང་སྦྲ་ལ་མོས་པའོ། །དགར་བ་ནི་ལྟ་བ་དང་བྲལ་བའོ། །ལུས་

ཀྱི་ལས་སོགས་པ་མི་དགེ་བ། ཉེས་པར་སྤྱད་པ་གསུམ་དུ་འདོད། ལུས་དང་ངག་གིས་ལས་མི་དགེ་བ་སྦྱོར་བ་དང་དངོས་དང་མཇུག་ཅེས་བྱ་བ་དང་། མི་དགེ་བའི་སེམས་གང་ཅུང་ཟད་ཅིག་ཡིན་པ་དེ་ནི་གོ་རིམས་བཞིན་དུ་ལུས་དང་ངག་གི་དང་། ཡིད་གཉིས་ཀྱིས་ཉེས་

པར་སྤྱད་པ་ཡིན་ནོ། ཆེད་དུ་བསམ་པ་བྱ་བའི་མདོ་ལས་ཞེས་བྱ་བ་ནི། དགེ་སློང་དག་ཇི་ལྟར་ཆེད་དུ་བསམ་པར་བྱ་བའི་ལས་བྱས་ཤིང་བསགས་པ་ཡིན་ཞེ་ན་དགེ་སློང་དག་འདི་ན་ལ་ལ་ཆེད་དུ་བསམས་ནས་ལུས་ཀྱིས་ལས་རྣམ་པ་གསུམ་བྱེད་ཅིང་བསགས་པ་ཡིན་ལ།

ངག་གི་རྣམ་པ་བཞི་དང་ཡིད་ཀྱིས་རྣམ་པ་གསུམ་ཞེས་བྱ་བ་རྒྱས་པར་གསུངས་ནས་བཀའ་སྩལ་པ། དགེ་སློང་དག་ཇི་ལྟར་ཡིད་ཀྱིས་ཆེད་དུ་བསམ་པར་བྱ་བའི་ལས་རྣམ་པ་གསུམ་བྱས་ཤིང་བསགས་པ་ཡིན་ཞེ་ན། འདི་ལྟ་སྟེ། འདི་ནས་དགེ་སློང་ལ་ལ་བརྣབ་

སེམས་དང་ལྡན་པ་ཡིན། གནོད་སེམས་ཅན་གྱི་སེམས་སུ་གྱུར་པ་ཡིན། ལོག་པར་ལྟ་བ་ཞེས་འབྱུང་བའོ། །དཔེས་སྟོན་པ་རྣམས་ན་རེ། བརྣབ་སེམས་ལ་སོགས་པ་མ་གཏོགས་པའི་ཡིད་ཀྱི་ལས་གཞན་མ་བཤད་དེ། དེའི་ཕྱིར་བརྣབ་སེམས་ལ་སོགས་

པ་དག་ཁོ་ན་ཡིད་ཀྱི་ལས་ཡིན་ནོ་ཞེས་ཟེར་རོ། །དེ་ལྟ་ན་ནི་ལས་དང་ཉོན་མོངས་པ་དག་གཅིག་ཏུ་འགྱུར་རོ། །འདི་ནི་འདོད་པ་ཡང་མ་ཡིན་ནོ། །མདོ་ལས་གསུམ་གྱི་རྒྱུ་དང་ཀུན་འབྱུང་བ་ཞེས་གསུངས་པའི་ཕྱིར་སྙམ་དུ་བསམས་པའོ། །ཅི་འབྱུང་ཞེས་བྱ་བ་ནི་ཉེས་པ་ཅི་

Vol. 210 · folio 60a

འགྱུར་ཞེས་བྱ་བའོ། །དེ་ནི་མེད་དེ། ཅིའི་ཕྱིར་ཞེ་ན། མདོ་དང་འགལ་བའི་ཕྱིར་ཏེ། སེམས་པའི་ལས་དང་བསམས་པའི་ཞེས་གསུངས་པའི་ཕྱིར་རོ། །དེའི་ཕྱིར་ཉོན་མོངས་པ་ལས་མ་ཡིན་ནོ་ཞེས་བྱ་བར་ངེས་སོ། །གལ་ཏེ་ཉོན་མོངས་པ་ལས་

ཉིད་དུ་མི་འདོད་ན་དེ་ལྟ་ཆེད་དུ་བསམ་པར་བྱ་བའི་མདོ་དང་འགལ་ལོ་ཞེ་ན། མདོ་ལས་ནི་ཞེས་བྱ་བ་རྒྱས་པར་འབྱུང་ངོ་། །དེའི་སྒོ་ནས་ནི་ཞེས་བྱ་བའི་བརྣབ་སེམས་ལ་སོགས་པའི་སྒོ་ནས་སེམས་པ་ཞུགས་པ་དེའི་ཕྱིར་བརྣབ་སེམས་ལ་སོགས་པ་དེ་དག་གིས་སེམས་པ་དེར་སྟོན་པར་བྱེད་

དེ། གཞན་དུ་ན་མདོ་དང་འགལ་བར་འགྱུར་རོ། །བྱེ་བྲག་ཏུ་སྨྲ་བ་རྣམས་ན་རེ་ཡིད་ཀྱི་ལས་ཀྱི་ཚོགས་ཡིན་པའི་ཕྱིར་དེ་དག་ལ་འདི་སྐད་དུ་བསྙད་དེ། དོར་བའི་སྤང་བར་བྱ་བ་ལ་ཟག་པར་བསྟན་པ་བཞིན་ནོ་ཞེས་ཟེར་རོ། །སྨད་པ་ནི་ཞེས་བྱ་བ་ནི་དམ་པ་དག་གིས་སྨད་

པ་ཞེས་བྱ་བའི་དོན་ཏོ། །བཟློག་པ་ལེགས་པར་སྤྱད་པ་ཡིན་པ་ཞེས་བྱ་བ་ལ་ལུས་དང་ངག་གིས་ལས་དགེ་བ་སྦྱོར་བ་དང་དངོས་དང་མཇུག་ཅེས་བྱ་བ་དང་། དགེ་བའི་ལས་སེམས་དང་། །བརྣབ་སེམས་དང་། གནོད་སེམས་དང་། ལོག་པར་ལྟ་བ་དག་ལ་སོགས་

པ་གང་ཅུང་ཟད་ཅིག་ཡིན་པ་དེ་ནི་ཉེས་པར་སྤྱད་པ་ལས་བཟློག་པའི་སྒོ་ནས་ལུས་དང་ངག་དང་ཡིད་ཀྱིས་ལེགས་པར་སྤྱད་པ་བརྗོད་པར་བྱའོ། །དགེ་བའི་རྩ་བ་ཡིན་པའི་ཕྱིར་རོ་ཞེས་བྱ་བ་ལ། ཕ་རོལ་ལ་ཕན་འདོགས་པའི་བསམ་པའི་རྩ་བ་ཡིན་པའི་ཕྱིར་ན་ཡང་དག་

པའི་ལྟ་བ་དགེ་བ་ཉིད་ཡིན་ལ། གཞན་ལ་གནོད་པར་བྱ་བའི་བསམ་པའི་རྩ་བ་ཡིན་པའི་ཕྱིར་ན་ལྟ་བ་མི་དགེ་བ་ཉིད་ཡིན་ནོ། །དེ་ལས་ཆེ་ལོང་བསྡུས་པ་ནི་ཞེས་བྱ་བ་ལ་ཆེ་ལོང་ནི་ཆེན་པོའོ། །ཅི་རིགས་པར་ཞེས་བྱ་བ་སྨོས་པ་ནི། གོ་རིམས་ཇི་ལྟ་བ་བཞིན་ཡིན་པ་བསམ་

པའི་ཕྱིར་ཏེ། དེ་ལྟ་མ་ཡིན་ན་མི་དགེ་བ་སྤྱད་པ་དག་ལས་དགེ་བ་དང་། ལེགས་པར་སྤྱད་པ་ལས་མི་དགེ་བའོ་ཞེས་བྱ་བར་ཐལ་བར་འགྱུར་རོ། །ཉོན་མོངས་པ་ཅན་གཞན་ཡང་ཞེས་བྱ་བ་ནི། བརྡེག་པ་དང་འཆིང་བ་དང་འདྲེན་པ་ལ་སོགས་པའོ། །མྱོས་པར་འགྱུར་བ་

Vol. 210 · folio 60b

ལ་སོགས་པ་སྤོང་བ་དང་། སྦྱིན་པ་དང་མཆོད་སྦྱིན་པ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲ་སྔ་མས་བརྡེག་པ་དང་འཆིང་བ་ལ་སོགས་པ་སྤང་བ་བསྡུའོ། །སོགས་པ་ཞེས་བྱ་བ་གཉིས་པས་ནི་ཁྲུས་བྱེད་པ་དང་། ལུས་བསྐུད་པ་དང་། སྔོན་དུ་ལྡང་བ་ལ་སོགས་པ་

བསྡུའོ། །སྙན་པར་སྨྲ་བ་ལ་སོགས་པ་ཞེས་བྱ་བ་ལ། འདིར་ཡང་སོགས་ཞེས་བྱ་བའི་སྒྲས་ཆོས་སྟོན་པ་ལ་སོགས་པ་དག་བསྡུའོ། །ཡང་ཅི་འདིར་ལས་ཀྱི་ལམ་རྣམ་པར་རིག་བྱེད་ཡིན་ནམ། འོན་ཏེ་རྣམ་པར་རིག་བྱེད་མ་ཡིན་པ་ཡིན་ནམ། དེ་སྟེ་གཉི་ག་ཡིན་ཞེ་ན། རེ་

ཤིག་རང་བྱེད་པ་མ་ཡིན་པ་ལ་ནི། མི་དགེ་དྲུག་ནི་རྣམ་རིག་མིན་ཞེས་བྱ་བ་རྒྱས་པར་འབྱུང་སྟེ། དངོས་ཀྱི་རྣམ་པར་རིག་བྱེད་མེད་པའི་ཕྱིར་རོ། །འདིར་ལུང་བསྒོ་བའི་རྣམ་པར་རིག་བྱེད་གང་ཡིན་པ་དེ་ནི་སྦྱོར་བ་ཁོ་ན་ཡིན་གྱི་དངོས་ནི་མ་ཡིན་ནོ། །དུས་དེའི་ཚེ་ཤི་ན་ཞེས་བྱ་

བ་ལ། རྣམ་པར་རིག་བྱེད་ཀྱི་དུས་མ་གཏོགས་པ་ཕྱིས་ཤི་ན་ནི་རྣམ་པར་རིག་བྱེད་སྦྱོར་བ་ཁོ་ན་ཡིན་པས་ལས་ཀྱི་ལམ་རྣམ་པར་རིག་བྱེད་མ་ཡིན་པ་ཁོ་ན་ཡིན་ནོ། །ཡང་དག་པར་རིག་བྱེད་ལས་བླངས་བའི་ཚུལ་ཁྲིམས་ནི་ཞེས་བྱ་བ་ལ། ཡང་དག་པར་བླངས་པ་ཞེས་

བྱ་བ་སྨོས་པ་ནི་ཆོས་ཉིད་ཀྱིས་ཚུལ་ཁྲིམས་ལས་ཁྱད་པར་དུ་བྱ་བའི་ཕྱིར་རོ། །དེ་ནི་སེམས་ལ་རག་ལས་པ་ཁོ་ན་ཡིན་གྱི། རྣམ་པར་རིག་བྱེད་ལ་རག་ལས་པ་ནི་མ་ཡིན་ཏེ། དེ་ནི་བསམ་གཏན་གྱི་སྡོམ་པ་དང་། ཟག་པ་མེད་པའི་སྡོམ་པའོ། །སེམས་ཙམ་ལ་རག་

ལས་པའི་ཕྱིར་ཞེས་བྱ་བའི་ཙམ་ཞེས་བྱ་བའི་སྒྲ་ནི་ཡང་དག་པར་བླངས་པའི་ཚུལ་ཁྲིམས་བསལ་བར་བྱ་བའི་ཕྱིར་རོ། །ལྷུར་ལེན་པ་ཆེན་པོས་ཞེས་བྱ་བ་ནི་ཤུགས་དྲག་པོས་སོ། །འདིར་རབ་སྡོགས་ཀྱི་སྒྲས་ནི་སྦྱོར་བ་ཁོ་ན་བརྗོད་དེ། བཟློག་པ་མཇུག་ཡིན་ནོ་ཞེས་

འབྱུང་བའི་ཕྱིར་རོ། །དེའི་རྗེས་སུ་མཐུན་པའི་ཆོས་ཞེས་བྱ་བ་ནི། ལས་ཀྱི་ལམ་དང་རྗེས་སུ་འཚམ་པར་བྱེད་ན་ཞེས་བྱ་བའི་དོན་ཏོ། །ལས་ཀྱི་ལམ་སྦྱོར་བ་དང་དངོས་དང་མཇུག་དང་བཅས་པ་དག་བཤད་ན། དེ་དག་གི་སྦྱོར་བ་ལ་སོགས་པའི་རྣམ་པར་གཞག་པ་ནི་མ་

Vol. 210 · folio 61a

བཤད་པས་ཡང་ཇི་ཙམ་གྱིས་ན་ཞེས་བྱ་བ་རྒྱས་པར་དྲིས་སོ། །སྦྱོར་བ་དང་འབྲས་བུ་ཡོངས་སུ་རྫོགས་པས་སོ་ཞེས་བྱ་བ་ལ། སྦྱོར་བའི་འབྲས་བུ་ཡོངས་སུ་རྫོགས་པ་ནི་གཞན་གྱིས་སྲོག་གཅོད་པའོ། །འདི་སྐད་བཤད་པར་འགྱུར་ཏེ། སྦྱོར་

བ་ཙམ་དང་། གཞན་གྱི་སྲོག་བཅད་ཉིད་ཀྱིས་ནི། སྲོག་གཅོད་པའི་ཁ་ན་མ་ཐོ་བས་རེག་པར་མི་འགྱུར་གྱི། འོ་ན་ཅི་ཞེ་ན། གལ་ཏེ་གཞན་གྱི་སྲོག་བཅད་པའི་ཕྱིར་སྦྱོར་བ་དང་བཅས་པའོ། །དེ་ཕྱིན་ཆད་ཅེས་བྱ་བ་ནི་བཅད་ཕན་ཆད་དོ། །དེ་བཞིན་དུ་གཞན་དྲུག་ལ་ཡང་ཅི་

རིགས་པར་སྦྱར་བར་བྱས་སོ་ཞེས་བྱ་བ་འབྱུང་སྟེ། དེ་ལ་མ་བྱིན་པར་ལེན་པ་ལ་ནི་ཇི་ལྟར་རྐུན་པོ་ཁྲི་ལས་ལྡང་བར་བྱེད། མཚོན་ཆ་ལེན་པར་བྱེད། གཞན་གྱི་ཁྱིམ་དུ་འགྲོ་བར་བྱེད། གཉིད་ལོག་གམ་འོན་ཏེ་མ་ལོག་ཅེས་ཉན་པར་བྱེད། འབུགས་པར་བྱེད། འཇུག་

པར་བྱེད། གཞན་གྱི་ནོར་གཞོམ་པར་བྱེད་པ་ནས་ཇི་སྲིད་དུ་གནས་ནས་མ་སྤགས་པ་དེ་སྲིད་དུ་སྦྱོར་བ་ཡིན་ནོ། །སྐད་ཅིག་གང་ལ་གནས་ནས་སྤོགས་པར་བྱེད་པ་དེའི་ཚེ་རྣམ་པར་རིག་བྱེད་དང་། དེའི་སྐད་ཅིག་རྣམ་པར་རིག་བྱེད་མ་ཡིན་པ་དེ་ནི་ལས་ཀྱི་ལམ་དངོས་

ཡིན་ནོ། །རྒྱུ་གཉིས་ཀྱིས་ནི་མ་བྱིན་པར་ལེན་པའི་ཁ་ན་མ་ཐོ་བས་རེག་པར་འགྱུར་ཏེ། སྦྱོར་བ་དང་དེའི་འབྲས་བུ་ཡོངས་སུ་རྫོགས་པས་སོ། །དེ་ཕྱིན་ཆད་ཀྱི་རྣམ་པར་རིག་བྱེད་མ་ཡིན་པའི་སྐད་ཅིག་མ་རྣམས་ནི་མཇུག་ཡིན་ནོ། །ཇི་སྲིད་དུ་གཞན་གྱི་ནོར་དེ་འགེང་

པའམ་འཚོང་བ་ལས་སྦེད་པ་དང་རྗེས་སུ་སྒྲོག་པ་དེ་སྲིད་དུ། དེའི་རྣམ་པར་རིག་བྱེད་ཀྱི་སྐད་ཅིག་མ་ཡང་མཇུག་ཡིན་ནོ་ཞེས་བྱ་བ་ལྟ་བུ་སྟེ་དེ་བཞིན་དུ་གཞན་ལ་ཡང་བརྗོད་པར་བྱའོ། །དེ་བཞིན་དུ་གཞན་གྱི་ཆུང་མ་ལ་བགྲོད་པར་འདོད་པས་ཁྲི་ལས་ལྡང་བར་བྱེད་པ་དང་།

གོས་དང་སོ་རྩི་ལེན་པར་བྱེད་པ་དང་། གཞན་གྱི་ཁྱིམ་དུ་འཇུག་པར་བྱེད་པ་དང་། གཉིད་ལོག་གམ་འོན་ཏེ་མ་ལོག་ཅེས་ཉན་པར་བྱེད་པ་དང་། གཞན་གྱི་བུད་མེད་ལ་ནོམ་པར་བྱེད་པ་ན། ཇི་སྲིད་དུ་རྨའི་ནང་དུ་ཡན་ལག་གི་རྣམ་པ་འཇུག་པར་མི་བྱེད་པ་དེ་

Vol. 210 · folio 61b

སྲིད་དུ་འདི་ནི་སྦྱོར་བའོ། །སྐད་ཅིག་གང་དེ་ལ་རྨའི་ནང་དུ་ཡན་ལག་གི་རྣམ་པ་འཇུག་པར་བྱེད་པའམ་ནོམ་པར་བྱེད་པའི་རྣམ་པར་རིག་བྱེད་དང་དེའི་སྐད་ཅིག་གི་རྣམ་པར་རིག་བྱེད་མ་ཡིན་པ་འདི་ནི་ལས་ཀྱི་ལམ་དངོས་གཞིའོ། །གཞན་དག་ན་རེ་མི་གཙང་བ་འདོར་

བའི་དུས་ཀྱི་རྣམ་པར་རིག་བྱེད་དང་། རྣམ་པར་རིག་བྱེད་མ་ཡིན་པ་གང་ཡིན་པ་དེ་ནི་ལས་ཀྱི་ལམ་དངོས་གཞིའོ་ཞེས་ཟེར་རོ། །ལས་ཀྱི་ལམ་རྣམ་པར་གཞག་པ་རྣམ་པ་གཞན་དང་ལྟུང་བ་རྣམ་པར་གཞག་པ་རྣམ་པ་གཞན་ཡིན་པ་དེའི་ཕྱིར་དེ་ཕན་ཆད་

འཁྱུད་པ་ལ་སོགས་པ་དེ་དང་རྗེས་སུ་འབྲེལ་པའི་རྣམ་པར་རིག་བྱེད་མ་ཡིན་པ་ནི་མཇུག་ཡིན་ནོ། །དེ་བཞིན་དུ་ཡུལ་གཞན་དུ་ཕྱིན་ནས་བརྫུན་དུ་སྨྲ་བར་འདོད་པས་ཁྲི་ལས་ལྡང་བ་ལ་སོགས་པ་ཇི་ལྟར་རིགས་པར་བརྗོད་པར་བྱ་སྟེ། གང་གིས་དོན་མངོན་པར་དགེ་བར་བརྗོད་

པའི་སྐད་ཅིག་མ་དེའི་རྣམ་པར་རིག་བྱེད་མ་ཡིན་པ་ནི་ལས་ཀྱི་ལམ་དངོས་གཞིའོ། །དེ་ནས་དེའི་རྒྱུས་རྙེད་པ་དང་། ཡོངས་སུ་ལོངས་སྤྱོད་པ་དང་། དེ་དང་རྗེས་སུ་འབྲེལ་པ་རྣམ་པར་རིག་བྱེད་མ་ཡིན་པ་ནི་མཇུག་གོ། །དེ་བཞིན་དུ་ཕྲ་མས་དབྱེ་བའི་བསམ་པས་

མངགས་པ་དང་བརྟེན་པ་དང་གཞན་དངོས་སུ་བྱེད་པ་ལ་སོགས་པ་ནི་སྦྱོར་བའོ། །ཕྲ་མའི་བསམ་པས་ཚིག་བརྗོད་པའི་སྐད་ཅིག་གི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ནི་ལས་ཀྱི་ལམ་དངོས་གཞིའོ། །ཁ་ཅིག་ན་རེ་དེའི་འོག་ཏུ་ཉེ་བར་མ་

གྱུར་པ་ནི་ཕྱེ་བའོ་ཞེས་ཟེར་རོ། །འཕགས་པའི་གང་ཟག་ནི་དགོངས་པ་བརྟེན་པ་དེ་རྣམས་བྱེ་བར་འགྱུར་རོ། །སྔོན་ཉིད་དང་ཕྱིས་བྱེ་བར་བརྟེན་པར་བྱ་བའི་ཕྱིར་དེའི་རྗེས་ཐོགས་ཀྱིས་རྣམ་པར་རིག་བྱེད་མ་ཡིན་པ་ནི་མཇུག་གོ། །ཚིག་རྩུབ་ལ་ཡང་ལག་པ་ཉེད་པ་

དང་རྐང་པ་བསྐྱོད་པ་དང་རྡུལ་འཛག་པ་དང་མིག་བསྒྱུར་བ་ལ་སོགས་པ་ནི་སྦྱོར་བའོ། །ཕྱི་རོལ་ལ་ཚིག་རྩུབ་སྨྲ་བའི་དེའི་སྐད་ཅིག་མའི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ནི་ལས་ཀྱི་ལམ་དངོས་གཞིའོ། །དེ་ཕན་ཆད་གཞན་དང་སྔར་སྨྲ་བའི་ཐ་སྙད་

Vol. 210 · folio 62a

འདི་དང་འདི་སྨྲའོ་ཞེས་དེ་དང་རྗེས་སུ་འབྲེལ་བའི་རྣམ་པར་རིག་བྱེད་མ་ཡིན་པ་ནི་མཇུག་གོ། །བརྣབ་སེམས་ལ་སོགས་པ་རྣམས་ནི་སེམས་ཀྱི་མི་དགེ་བ་ཡིན་པས་སྦྱོར་བ་དང་མཇུག་གི་རྣམ་པར་གཞག་པ་མེད་དོ་ཞེས་གཞན་དག་ནི་ཟེར་རོ། །

གལ་ཏེ་འཆི་བའི་སྲིད་པ་ལ་གནས་པ་ཡིན་ན་ནི་ཞེས་བྱ་བ་ནི། སྲོག་ཆགས་དེ་མ་ཤི་བའི་ཚེ་ཁོ་ན་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ལས་ཀྱི་ལམ་ཡིན་ནའོ། །དེ་ལྟར་ན་ལྷན་ཅིག་ཤི་བ་ཡང་ཞེས་བྱ་བ་རྒྱས་པར་འབྱུང་སྟེ། གསོད་པའི་རྣམ་པར་རིག་

བྱེད་དང་རྣམ་པར་རིག་བྱེད་མ་ཡིན་པ་དང་། གསོད་དུ་འཇུག་པའི་རྣམ་པར་རིག་བྱེད་མ་ཡིན་པ་ཉིད་ལས་ཀྱི་ལམ་དངོས་སུ་འགྱུར་རོ། །གྲུབ་པའི་མཐའ་ལས་ནི་དེ་སྐད་མི་འབྱུང་ཞེས་བྱ་བ་འབྱུང་ངོ་། །འོ་ན་གྲུབ་པའི་མཐའ་གང་ཡིན་ཞེ་ན། སྔ་དང་མཉམ་

དུ་ཤི་བ་ལ། །ལུས་གཞན་སྐྱེས་ཕྱིར་དངོས་གཞི་མེད། །ཅེས་བྱ་བའོ། །འོན་ཏེ་ཤི་བ་ཡིན་པ་ན་ནི་སྲིད་པ་བར་མ་ལ་སོགས་པ་གནས་སྐབས་ཡིན་ནའོ། །དེ་བརྗོད་པར་མི་བྱའོ་ཞེས་བྱ་བ་འབྱུང་སྟེ། ཅིའི་ཕྱིར་ཞེ་ན། བསྣུན་པ་རྣམ་པར་རིག་བྱེད་ཅེས་བྱ་བ་

དེས་ཤི་བ་ནི་མ་ཡིན་ནོ། །སྲོག་གཅོད་པར་བྱེད་པ་ཞེས་བྱ་བ་རྒྱས་པར་འབྱུང་ངོ་། །གང་ཡང་བསྟན་བཅོས་ལས་ཞེས་བྱ་བ་རྒྱས་པར་འབྱུང་བ་ནི་སྐྱོན་གཞན་ཡིན་ནོ། །བྱེ་བྲག་ཏུ་སྨྲ་བའི་དོན་ནི་འགལ་ཏེ་ཞེས་བྱ་བ་ལ། བྱེ་བྲག་ཏུ་སྨྲ་བའི་རྣམས་ཀྱི་འདིར་མཇུག་

སྦྱོར་བའི་སྒྲར་གསུངས་སོ་ཞེས་བསྟན་བཅོས་ཀྱི་དོན་བཤད་པ་གང་ཡིན་པ་དེ་འགལ་ལོ། །ཅིའི་ཕྱིར་ཞེ་ན། དེའི་ཚེ་དངོས་ཁོ་ན་མ་འགལ་བའི་ཕྱིར་རོ། །སྲོག་གལ་ཏེ་སྲོག་ཆགས་ཤི་བའི་ཚེ་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་གང་དག་

ཡིན་པ་དེ་ལས་ཀྱི་ལམ་དངོས་ཡིན་ན་ནི། དེ་ལྟ་ན་སྦྱོར་བ་མེད་པར་མ་གྱུར་པ་ཞེས་བྱ་བ་འདིར་དངོས་ཁོ་ན་སྦྱོར་བའི་སྒྲར་གསུངས་ཀྱི་མཇུག་ནི་མ་ཡིན་ནོ་ཞེས་བྱ་བར་ཤེས་སོ། །ཇི་ལྟར་ཉེས་པ་མེད་པ་དེ་ལྟ་བུ་ཡིན་ནོ་ཞེས་བྱ་བ་ནི་ཆོས་མངོན་པའོ། །ཇི་ལྟར་ན་

Vol. 210 · folio 62b

ཉེས་པ་མེད་པ་ཞེས་བྱ་བ་ནི་སློབ་དཔོན་ནོ། །དངོས་ཁོ་ན་སྦྱོར་བའི་སྒྲར་ཞེས་བྱ་བ་ལ་སོགས་པ་ནི་བྱེ་བྲག་ཏུ་སྨྲ་བ་དག་སྟེ། དེ་ལྟ་ན་སྔ་དང་མཉམ་དུ་ཤི་བ་ལ། དངོས་མེད་ལུས་གཞན་སྐྱེས་ཕྱིར་རོ་ཞེས་བྱ་བ་དང་མི་འགལ་ལོ། །འོ་ན་དེའི་ཚེ་རྣམ་པར་རིག་བྱེད་

ཅེས་བྱ་བ་ནི་སློབ་དཔོན་ནོ། །ཅི་ལྟར་ན་མི་འགྱུར་ཞེས་བྱ་བ་ནི་བྱེ་བྲག་ཏུ་སྨྲ་བས་སློབ་དཔོན་གྱི་བསམ་པ་དགྲོལ་བའི་ཕྱིར་རོ། །མི་ནུས་པའི་ཕྱིར་རོ་ཞེས་བྱ་བ་ནི་སློབ་དཔོན་གྱི་རང་བཞིན་བསམ་པ་དགྲོལ་བའི་ཕྱིར་སྨོས་ཏེ། སྲོག་ཆགས་ཤི་ཟིན་ན་ནི་ཡང་དེ་

འཆི་བར་བྱ་བ་ལ་ནུས་པ་ཡོད་པར་མི་འགྱུར་རོ། །ད་ནི་རྣམ་པར་རིག་བྱེད་མ་ཡིན་པ་ཇི་ལྟར་འགྱུར་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་ཀྱིས་ནུས་པ་མེད་ཀྱང་ལས་ཀྱི་ལམ་མོ་སྙམ་དུ་བསམས་པའོ། །དེའི་ཕྱིར་ཞེས་བྱ་བ་རྒྱས་པར་འབྱུང་སྟེ། སྦྱོར་བའི་འབྲས་

བུ་ནི་སྲོག་བཅད་པ་སྟེ། སྦྱོར་བ་ནི་དེའི་དོན་དུ་ཡིན་པའི་ཕྱིར་རོ། །དེ་ཡོངས་སུ་རྫོགས་པའི་དུས་ནི་ཤི་བའི་དུས་སོ། །དེ་གཉི་ག་ཞེས་བྱ་བ་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་སྟེ། མི་ནུས་ཀྱང་ལས་ཀྱི་ལམ་ཡིན་ནོ་སྙམ་དུ་བསམས་པའོ། །

དེ་ལྟ་ཡིན་ན་དང་སྦྱོར་བའི་འབྲས་བུ་ལ་བལྟོས་ནས་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ཡང་ལས་ཀྱི་ལམ་དུ་བརྗོད་ཀྱི། ནུས་པ་ལ་བལྟོས་ནས་ནི་མ་ཡིན་པས་ཉེས་པ་མེད་དོ། །དེ་བཞིན་དུ་གཞན་དག་ལ་ཡང་ཅི་རིགས་པར་སྦྱར་བར་

བྱའོ་ཞེས་བྱ་བ་ནི། དཔེར་ན་གཞན་གྱི་ནོར་རྐུ་བར་འདོད་པ་དོན་གྲུབ་པར་བྱས་པའི་ཕྱིར་གཞན་གྱི་ནོར་འཕྲོགས་ནས་ཕྱུགས་དེས་གཏོར་མ་བྱེད་པ་དང་། དེ་ཉིད་ཀྱིས་དེ་འཕྲོག་ཏུ་གཞུག་པའི་ཕྱིར་དེའི་ཆུང་མ་ལ་ཉལ་པོ་བྱེད་པ་དང་། དེ་ལ་གང་དག་ཡོངས་

སུ་སྐྱོབ་པར་འགྱུར་བའི་མཛའ་བོ་ལ། བརྫུན་དང་ཕྲ་མ་དང་ཚིག་རྩུབ་པོ་དང་ཚིག་ཀྱལ་པ་དག་གིས་དབྱེན་བྱེད་པ་དང་། དེའི་ནོར་ལ་བརྣབ་སེམས་བྱེད་པ་དང་། ནོར་དེའི་བདག་པོ་ལ་གནོད་སེམས་བྱེད་པ་དང་ལོག་པར་ལྟ་བ་འཕེལ་བར་བྱེད་པ་ལྟ་བུ་

Vol. 210 · folio 63a

སྟེ། དེ་བཞིན་དུ་འདོད་པས་ལོག་པར་གཡེམ་པ་ལ་སོགས་པ་དག་ལ་ཡང་ཅི་རིགས་པར་བརྗོད་པར་བྱའོ། །དེའི་ལུས་ཀྱི་ཡན་ལག་གི་ཕྱིར་རམ་ཞེས་བྱ་བ་ནི། རྔ་མ་དང་སོ་དང་པགས་པ་ལ་སོགས་པའི་ཕྱིར་རོ། །ནོར་གྱི་ཕྱིར་རམ་ཞེས་

བྱ་བ་ནི་རིན་གྱི་ཕྱིར་རམ། དེའི་ནོར་བདག་གིར་བྱ་བའི་ཕྱིར་རོ། །ཕ་དང་མ་རྒས་སམ་ནད་ཚབས་ཆེན་པོས་ཐེབས་ན་ཞེས་བྱ་བ་ནི། དེ་དག་གིས་དེ་ནས་གཞན་གྱི་ཚེ་དབང་པོ་སར་པ་དང་། ཤིན་ཏུ་དད་པ་རྙེད་པར་འགྱུར་ཏེ། དེས་ན་མ་བསད་པ་བྱའོ་ཞེས་

གྲག་གོ། །གང་ཡང་ལོག་པར་ལྟ་བས་རབ་ཏུ་བཅུག་པ་ཞེས་བྱ་བ་ནི། ཇི་ལྟར་ལེགས་པར་སྤྱད་པ་དང་། དེའི་རྣམ་པར་སྨིན་པ་མེད་དོ་ཞེས་བྱ་བ་ལྟ་བ་དེས་གསོད་པ་ལ་རབ་ཏུ་བཅུག་པའོ། །ཆོ་ག་ཅན་གྱི་ཆུ་བཏུང་ངོ་ཞེས་བྱ་བ་རྒྱས་པར་འབྱུང་སྟེ། ཆོ་ག་ཅན་

གྱི་ཆུ་དང་རྩྭ་དག་ཡོངས་སུ་ལོངས་སྤྱད་ཅེས་བྱ་བའི་ཐ་ཚིག་གོ། །བཞད་གད་ལྡན་དང་ཞེས་བྱ་བ་ནི་ཀུ་རེའི་བསམ་པ་དང་ལྡན་པ་ཞེས་བྱ་བའི་དོན་ཏོ། །བརྫུན་དུ་སྨྲ་བ་ལ་སོགས་པ་ཆགས་པ་ལས་སྐྱེས་པ་ནི་སྔ་མ་བཞིན་ནོ་ཞེས་བྱ་བ་ལ། ཆགས་པ་ལས་སྐྱེས་པ་

ནི་ནོར་དང་བཀུར་སྟི་དང་བདག་དང་མཛའ་བོ་ཡོངས་སུ་བསྐྱབ་པའི་དོན་དུའོ། །ཞེ་སྡང་ལས་སྐྱེས་པ་ནི་ཁོ་ཚར་ཕྱིན་པར་བྱ་བའི་ཕྱིར་རོ། །གཞན་དག་ན་རེ་འཇིག་རྟེན་ཕ་རོལ་མེད་དོ་ཞེས་བྱ་བ་ལ་སོགས་པ་དང་ལྡན་པའི་ཚིག་ཀྱང་ལོག་པར་ལྟ་བའི་འདུ་ཤེས་ཀྱིས་རབ་

ཏུ་བཅུག་པའི་བརྫུན་དུ་སྨྲ་བའོ་ཞེས་ཟེར་རོ། །འདི་ལྟ་སྟེ་དགེ་ཚུལ་ཞེས་བྱ་བ་ལ། འདི་ལྟ་སྟེ་ཞེས་བྱ་བའི་སྒྲས་ནི་སྦྱོར་བའི་ཆོ་ག་གཞན་ཡང་བསྟན་པར་བྱ་བའི་ཕྱིར་རོ། །གནས་སྣ་ཚོགས་ནི་ཚོམས་ཆེན་པོ་སྟེ། དཀྱིལ་འཁོར་ཞེས་བྱ་བའི་དོན་ཏོ། །འདིར་དགེ་

སློང་སྣ་ཚོགས་གནས་པས་ན་གནས་སྣ་ཚོགས་སོ། དེའི་འོག་ཏུ་ཞེས་བྱ་བ་ནི་དངོས་ཀྱི་ལས་ལམ་གྱི་འོག་ཏུ་སྟེ། བསླབ་པའི་གཞི་རྣམས་བླངས་ནས་ཇི་སྲིད་དུ་ཇི་སྐད་བཤད་པའི་ཆོ་གས་གནས་སྒོ་བ་དང་སྟེ། དེ་དག་ནི་ཆོས་གོས་དང་བསོད་སྙོམས་དང་གནས་མལ་

Vol. 210 · folio 63b

དང་ན་བའི་རྐྱེན་སྨན་རྣམས་སོ། །དེའི་རྟེན་ཞེས་བྱ་བ་ནི་གནས་ཀྱི་རྟེན་ནོ། །ཡོངས་སུ་དོར་བའི་སེམས་ཀྱིས་གསོད་པ་མཐར་ཕྱིན་པར་བྱེད་ལ། གཞན་ནི་རྩུབ་པའི་སེམས་ཀྱིས་རྫོགས་པར་བྱེད་དེ། དེའི་ཕྱིར་གསོད་པ་དང་གནོད་སེམས་དང་ཚིག་རྩུབ་པོ་

རྣམས་ནི་གཅིག་ཏུ་ཞེ་སྡང་གིས་མཐར་ཕྱིན་པར་བྱེད་དོ། །ཆེར་རྨོངས་པར་གྱུར་ན་ཞེས་བྱ་བ་ནི། གང་ཞིག་རྒྱུ་དང་འབྲས་བུས་འབྲེལ་པའི་ཆོས་ཉིད་ལ་རྨོངས་པས་དེ་ནི་རྫོགས་པར་བྱེད་དེ། གཏི་མུག་ཁོ་ནས་ལོག་པར་ལྟ་བ་མཐར་ཕྱིན་བྱེད་དོ། །ལྷག་མ་གསུམ་

གྱིས་རྫོགས་པར་འདོད་ཅེས་བྱ་བ་ལ། ཆགས་པ་ལས་སྐྱེས་པའི་བརྫུན་དུ་སྨྲ་བ་ནི་ཆགས་པ་ཁོ་ན་མཐར་ཕྱིན་པར་བྱེད་ལ། དེ་བཞིན་དུ་ཞེ་སྡང་ལས་སྐྱེས་པ་དང་། གཏི་མུག་ལས་སྐྱེས་པ་ཡང་ཞེ་སྡང་དང་གཏི་མུག་གིས་མཐར་ཕྱིན་པར་བྱེད་དོ། །དེ་བཞིན་དུ་གཞན་

གཉིས་ལ་ཡང་བརྗོད་པར་བྱའོ། །གཞན་དག་ན་རེ་བརྣབ་སེམས་ལ་སོགས་པ་ཆགས་པ་དང་ཞེ་སྡང་དག་གིས་མཐར་ཕྱིན་པར་བརྗོད་པར་བྱ་བ་མ་ཡིན་ཏེ། དེ་མཐར་ཕྱིན་པའི་དུས་སུ་དེ་ལ་ཐ་དད་པའི་ཆགས་པ་དང་ཞེ་སྡང་མེད་པའི་ཕྱིར་དེ་ཉིད་ཀྱིས་མཐར་ཕྱིན་པ་མ་ཡིན་ནོ་ཞེས་ཟེར་རོ། །

དེའི་ཕྱིར་གཏི་མུག་གིས་བརྣབ་སེམས་ལ་སོགས་པ་མཐར་ཕྱིན་པར་བརྗོད་པར་བྱ་སྟེ། གཏི་མུག་ལས་དེ་སྐྱེས་པའི་ཕྱིར་རོ། །འདིར་ལན་སྨྲས་པ། གང་གི་ཕྱིར་དེ་ཉིད་ཀྱིས་དེ་བསྟན་པར་མི་འགྱུར་ཏེ། རྟེན་མ་ཡིན་པས་འདི་དེ་ལྟར་བརྟགས་པས་དགེ་བའི་རྩ་

བ་རྣམས་ལས་གཞན་པ་སྲིད་པ་ཡོད་དོ་ཞེས་ཅིས་མི་འདོད། དེ་ལྟ་ན་འོ་ན་ལས་ཀྱི་ལམ་ཐམས་ཅད་ཀྱང་ངེས་པར་གཏི་མུག་དང་ལྷན་ཅིག་འབྱུང་བའི་ཕྱིར་གཏི་མུག་ཁོ་ནས་རྫོགས་པར་ཐལ་བར་འགྱུར་རོ་ཞེ་ན་མི་འགྱུར་རོ། །ཆགས་པ་དང་ཞེ་སྡང་དག་གི་དེར་

གཙོ་བོ་ཡིན་པའི་ཕྱིར་རོ། །དེ་བཞིན་དུ་ལོག་པར་ལྟ་བ་ཡང་གཏི་མུག་གིས་ཡོངས་སུ་རྫོགས་པ་མ་ཡིན་ཏེ། དེར་དེ་གཙོ་བོ་ཡིན་པའི་ཕྱིར། གཙོ་བོ་ཉིད་དེ་ལས་གཞན་པའི་དགེ་བའི་རྩ་བ་ཡོད་པའི་ཕྱིར། ལོག་པར་ལྟ་བ་དགེ་བའི་རྩ་བའི་བདག་ཉིད་མ་ཡིན་

Vol. 210 · folio 64a

ནོ། །འོ་ན་བརྣབ་སེམས་ལ་སོགས་པ་གཏི་མུག་གིས་མཐར་ཕྱིན་པར་མི་རུང་ངོ་ཞེ་ན། དེ་དག་མི་དགེ་བའི་རྩ་བ་ཉིད་ཀྱི་ཕྱིར་དང་། གཏི་མུག་དེར་གཏི་མུག་གཙོ་བོ་མ་ཡིན་པའི་ཕྱིར་རོ། །མཐར་ཕྱིན་པའི་དོན་ནི་དེར་གཙོ་བོ་ཡིན་པ་སྟེ།

དེ་ལྟར་ན་འདིར་སྐྱོན་མེད་དོ། །ཆ་བཞིར་བཤད་པ་ཞེས་བྱ་བ་ནི་ཚད་བཞིར་རོ། །ཐུན་མོང་དུ་སྲོག་གཅོད་པ་ལ་སོགས་པ་ནི་ཞེ་སྡང་གིས་མཐར་ཕྱིན་པར་བྱེད་དོ། །ཚན་གཅིག་དང་འདྲ་བར་གཞན་ལ་ཡང་བརྗོད་པར་བྱའོ། །སྲོག་གཅོད་པ་ལ་སོགས་པའི་གཞི་

ནི་སེམས་ཅན་ཡིན་ནོ་ཞེས་བྱ་བ་ནི་ཚོགས་པ་ལས་ལས་ཀྱི་ལམ་དེ་སྐྱེ་བའི་ཕྱིར་ཏེ། སེམས་ཅན་དུ་སྟོན་པ་མ་ཡིན་པ་དག་ལས་ནི་སྐྱེ་བ་མི་སྲིད་དོ། །གལ་ཏེ་དེ་དག་གི་རྟེན་ནི་མིང་དང་གཟུགས་ཀྱང་ཡིན་པར་རིག་པ་མ་ཡིན་ནམ་ཞེ་ན། ཕུང་པོ་ཚོགས་པ་ཁོ་ན་ལ་

བལྟོས་ནས་གསོད་པ་ལ་སོགས་པ་དག་འབྱུང་གི། ཕུང་པོའི་ཕྱོགས་གཅིག་ལ་བལྟོས་ནས་ནི་མ་ཡིན་ལ། ཕུང་པོ་གཅིག་དང་སྐད་ཅིག་མ་ལ་ཡང་མིང་དང་གཟུགས་ཞེས་བྱ་བ་ནི། ཕུང་པོ་སྐད་ཅིག་དང་སྐད་ཅིག་མ་གཅིག་ལ་ནི་གསོད་པ་ལ་སོགས་པ་དག་འཇུག་

པ་མེད་དོ། །དེའི་ཕྱིར་དེ་དག་གི་རྟེན་མིང་དང་གཟུགས་ཡིན་པར་མི་འདོད་དོ། །གཞན་གྱི་བུད་མེད་ཀྱི་གན་དུ་འགྲོ་བ་ལ་སོགས་པའི་གཞི་ནི་ལོངས་སྤྱོད་ཡིན་ནོ། །ལོངས་སྤྱོད་ལ་བརྟེན་ནས་ལས་ཀྱི་ལམ་འབྱུང་བའི་ཕྱིར། སེམས་ཅན་གཞན་གྱི་ལོངས་སྤྱོད་

རང་བཞིན་ལོངས་སྤྱོད་དུ་ཉེ་བར་སྙོན་པར་བྱེད་པའོ། །ལས་ཀྱི་ལམ་འབྱུང་བའི་རྒྱུ་ཉིད་དུ་འགྱུར་བ་དེས་ན། གཞན་གྱི་བུད་མེད་ཀྱི་གན་དུ་འགྲོ་བ་ལ་སོགས་པའི་གཞི་ནི་ལོངས་སྤྱོད་ཡིན་ནོ་ཞེས་བྱའོ། །གཞི་སེམས་ཅན་མ་ཡིན་ཡང་རུང་སྟེ་ཡོངས་སུ་ལོངས་སྤྱོད་

པའི་ཐབས་ལ་ནི་སེམས་ཅན་རྣམས་ལས་ཀྱི་ལམ་འབྱུང་བས་དེ་དག་ལོངས་སྤྱོད་ཀྱི་གཞི་ཉིད་དུ་བརྟག་གོ། །ལོག་པར་ལྟ་བའི་གཞི་ནི་མིང་དང་གཟུགས་ཡིན་ཏེ། མིང་གི་དབང་དུ་བྱས་ནས་དེ་ལ་སྐུར་པ་འདེབས་པ་འཇུག་པའི་ཕྱིར་རོ། །དེའི་སྦྱོར་བས་འཆི་བའི་

Vol. 210 · folio 64b

ཕྱིར་དང་དེའི་ཚེ་ལུས་གཞན་སྐྱེས་པའི་ཕྱིར་ཐེ་ཚོམ་ཟ་བས། གང་ཞིག་གིས་ཕ་རོལ་འཆི་བར་ངེས་པར་བྱས་ནས་ཞེས་བྱ་བ་རྒྱས་པར་དྲིས་སོ། །དངོས་མེད་ཅེས་བྱ་བ་ནི་དངོས་སྔོན་དུ་འགྲོ་བས་མཇུག་ཀྱང་མེད་དོ་ཞེས་བསྟན་པར་འགྱུར་རོ། །ལུས་གཞན་སྐྱེས་

ཕྱིར་རོ་ཞེས་བྱ་བ་ནི་རིས་མཐུན་པ་གང་ལ་གནས་པས་དེའི་སྦྱོར་བ་བྱས་པ་དེ་ཁོ་ན་དེའི་འབྲས་བུ་རྫོགས་པ་ལས་ཀྱི་ལམ་དུ་འགྱུར་གྱི། རིས་མཐུན་ཐ་དད་པའི་ལུས་ལ་ནི་མ་ཡིན་ཏེ། དེ་སྦྱོར་བ་པོ་མ་ཡིན་པའི་ཕྱིར་རོ། །དོན་གྱིས་ཕན་ཚུན་དུ་སྦྱོར་བར་བྱེད་

པ་ཡིན་ནོ་ཞེས་བྱ་བ་ནི་ཚིག་གི་སྦྱོར་བས་བྱེད་པ་པོ་མ་ཡིན་ཀྱང་། སྲོག་གཅོད་པ་ནི་བསམས་བཞིན་དུ་མ་ནོར་བར་ནི་གཞན་གསོད་པའོ་ཞེས་བྱ་བ་ལ་སྲོག་གཅོད་པ་ནི་རྣམ་པ་གཉིས་ཏེ། བསམས་བཞིན་པ་དང་བསམ་བཞིན་པ་མ་ཡིན་པའོ། །བསམས་

བཞིན་པ་ཡང་རྣམ་པ་གཉིས་ཏེ་ནོར་བ་དང་མ་ནོར་བའོ། །མ་ནོར་བ་དེ་ལ་རྣམ་པ་གཉིས་ཏེ། བདག་དང་གཞན་གསོད་པ་སྟེ། དེའི་ཕྱིར་རྣམ་པར་གཅད་པར་བྱ་བའི་ཕྱིར་ཁྱད་པར་རྣམ་པ་གསུམ་བརྩམས་སོ། །ཡང་ཅིའི་ཕྱིར་མ་བསམས་པ་ནོར་བ་དང་།

བདག་སྲོག་གཅོད་པ་མི་འདོད་ཅེ་ན། སྦྱོར་བ་མི་སྲིད་པའི་ཕྱིར་དང་། བསོད་ནམས་དང་བསོད་ནམས་མ་ཡིན་པ་དག་བདག་གི་རྟེན་ས་ན་མི་སྲིད་པའི་ཕྱིར་རོ། །དེ་ལྟར་བཤད་དང་། གལ་ཏེ་སྲོག་ཆགས་གཞན་ཡིན་པ་དང་། འདི་གསད་པར་བྱའོ་ཞེས་

དེ་ལ་སྦྱོར་བ་བྱས་པ་དང་གང་ལ་སྦྱོར་བ་བྱས་པ་དེ་ཉིད་གསོད་པར་བྱེད་ཀྱི་གཞན་མ་ཡིན་ན། དེ་ལྟ་ན་དེ་ལས་སྲོག་གཅོད་པའི་ཁ་ན་མ་ཐོ་བས་རེག་པར་འགྱུར་གྱི་གཞན་དུ་ནི་མ་ཡིན་ནོ། །དེས་ན་འདོར་བའི་སེམས་སུ་བྱས་པ་ནི་གང་ལ་སྦྱོར་བ་བྱས་པ་དང་། གང་

ལ་ཐེ་ཚོམ་ན་བདེ་གཉིས་ཀ་དེས་ཡོངས་སུ་དོར་བ་ཡིན་ནོ། །ཇི་ལྟར་ཕུང་པོ་སྐད་ཅིག་བདག་ལ་སྲོག་གཅོད་པར་འགྱུར། ཇི་ལྟ་མི་འགྱུར། འདི་ལྟར་ཕུང་པོ་སྐད་ཅིག་མ་ད་ལྟར་བ་ནི་སྲོག་གཅོད་པའི་སྦྱོར་བས་མི་གསོད་དེ། །རང་ཉིད་འཇིག་པ་ལ་མངོན་དུ་

Vol. 210 · folio 65a

ཕྱོགས་པའི་ཕྱིར་རོ། །དེ་ལྟ་མ་ཡིན་ན་ཡང་སྐད་ཅིག་མ་འཇིག་པ་ལ་གནོད་པར་འགྱུར་རོ། །མ་འོངས་པ་ཡང་མ་ཡིན་ཏེ། གསད་པར་མི་ནུས་པའི་ཕྱིར། བདག་མེད་ན་གསད་པར་བྱ་བ་མེད་པའི་ཕྱིར་ཡང་སྲོག་གཅོད་པ་མི་

སྲིད་པའི་ཕྱིར། བདག་བསད་པས་སྲོག་གཅོད་པར་འགྱུར་བ་ནི་མ་ཡིན་ཏེ། ད་ལྟར་བའི་ཕུང་པོ་འགགས་པས་སྲོག་གཅོད་པར་འགྱུར་བ་ནི་མ་ཡིན་གྱི། འོ་ན་ཅི་ཞེ་ན། སྲོག་ཅེས་བྱ་བ་ནི་ཞེས་བྱ་བ་རྒྱས་པར་འགྱུར་རོ། །ཇི་ལྟར་རླུང་སེམས་ལ་

བརྟེན་ཅེ་ན། སེམས་ལ་རག་ལས་འཇུག་པའི་ཕྱིར་ཏེ། འདི་ལྟར་འགོག་པ་དང་འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་དང་ཤི་བ་ལ་མི་འབྱུང་བའི་ཕྱིར་རོ། །དེ་གཅོད་པར་བྱེད་དོ་བྱེད་པ་ནི། དེའི་རྒྱུན་དང་འགལ་བའི་ཕྱིར་གཅོད་དོ་ཞེས་བྱ་བ་སྟེ། འདི་

ལྟར་སྲོག་གི་མཚན་ཉིད་མ་འོངས་པ་སྐྱེ་བ་དང་འགལ་བའི་རྐྱེན་ཉེ་བར་སྐྱོབ་པར་སྲོག་གི་སྐད་ཅིག་ད་ལྟར་བ་འགགས་པ་ལ་མངོན་དུ་ཕྱོགས་པ་ནི། སྲོག་གི་སྐད་ཅིག་མ་འོངས་པ་སྐྱེ་བའི་ཆོས་ཅན་སྐྱེ་བ་ལ་རྒྱུར་མི་འགྱུར་བས་རྒྱུན་འཆད་པར་འགྱུར་ལ།

དེ་སྐྱེ་བ་དང་འགག་པའི་རྐྱེན་སྒྲུབ་པར་བྱེད་པ་པོ་ཡང་སྲོག་གཅོད་པའི་ཁ་ན་མ་ཐོ་བས་རེག་པར་འགྱུར་རོ། །དཔེར་ན་མར་མེའམ་དྲིལ་བུའི་སྐད་འགག་པར་བྱེད་པ་དང་འདྲའོ་ཞེས་བྱ་བ་ལ། མར་མེའི་སྐད་ཅིག་མ་ད་ལྟར་བ་འགགས་པས་མར་མེ་འགག་པར་

བྱེད་པ་ནི་མ་ཡིན་ཏེ། འོ་ན་ཅི་ཞེ་ན། མ་འོངས་པའི་སྐད་ཅིག་མ་སྐྱེ་བར་འདོད་པ་ལ་སྐྱེ་བའི་གེགས་བྱེད་པས་ཡིན་ཏེ། དྲིལ་བུའི་སྐད་དང་། སྲོག་གི་དབང་པོ་ལ་ཡང་དེ་བཞིན་དུ་བརྗོད་པར་བྱའོ། །སྲོག་དེ་གང་གིས་ཡིན་ཞེས་བྱ་བ་ནི། སྲོག་དེ་བདག་

གི་ཡིན་ཡིད་དང་འབྲེལ་བས་དེ་ཉིད་གསོན་ནོ་ཞེས་བྱ་བ་ཡིན་ནོ། །དེ་མེད་ན་སྲོག་དེ་གང་གིས་ཡིན་ཞེས་བྱ་བའོ། །དེའི་ཕྱིར་དབང་པོ་དང་བཅས་པའི་ལུས་ལ་སོན་ཞེས་བྱའི་བདག་ནི་མ་ཡིན་ཏེ། དེའི་ཕྱིར་སྲོག་གི་དབང་པོ་ནི་དེའི་ཡིན་གྱི་བདག་གི་ནི་མ་

Vol. 210 · folio 65b

ཡིན་ནོ། །བློ་སྔ་ནས་བཏང་བའི་སྲོག་བཅད་པས་ཞེས་བྱ་བ་རྒྱས་པར་འབྱུང་བ་ལ། ཀྱང་ཞེས་པའི་སྒྲ་ནི་བློ་སྔར་བཏང་བཏང་བ་འབའ་ཞིག་ཏུ་མ་ཟད་པའོ། །དཔེར་ན་མེ་དང་རེག་པ་ལས་ཚིག་པར་འགྱུར་བ་ཞེས་བྱ་བ་ནི། བློ་སྔར་བཏང་ངམ་མ་བཏང་ཡང་བླ་སྟེ།

རེག་པ་རྣམས་འཚིག་སྟེ། དེའི་འབྲས་བུ་ཅན་ཡིན་པའི་ཕྱིར་རོ། །སྲོག་ཆགས་གསོད་པ་ལ་ཡང་དེ་བཞིན་དུ་བརྗོད་པར་བྱའོ། །དེ་དག་གི་ལྟར་ན་གཞན་གྱི་ཆུང་མ་མཐོང་བ་དང་རེག་པ་ལ་ཡང་དེ་ལྟར་ཐལ་བར་འགྱུར་ཏེ། ཇི་ལྟར་གཞན་གྱི་ཆུང་མ་

མཐོང་བ་དང་རེག་ནས་འདོད་ཆགས་ཅན་རྣམས་ལ་ཆོས་མ་ཡིན་པར་འགྱུར་བ་དེ་བཞིན་དུ་གཞན་ཕ་དང་བུ་ལ་སོགས་པ་འདོད་ཆགས་དང་བྲལ་བ་བློ་སྔར་མ་བཏང་བ་རྣམས་ལ་ཡང་ཆོས་མ་ཡིན་པར་འགྱུར་རོ། །དེ་གཅེར་བུར་སྐྲ་འབལ་བ་དང་ཁྲོས་པ་ན་

བསོད་ནམས་འདོད་པ་ཡང་ཆོས་མ་ཡིན་པ་དང་འབྲེལ་པར་འགྱུར་རོ། །དཀའ་ཐུབ་དྲག་པོའི་ལུང་འབོགས་པ་ན་དོན་མ་ཡིན་པ་འདོད་པ་ལྟར་དེ་ལ་ཕན་པ་འདོགས་པའི་སྟོན་པའམ། གཞན་ཡང་སྡིག་པ་དང་འབྲེལ་པར་འགྱུར་རོ། །དེ་དག་གསུད་

དེ་ཤི་ན་ཞེས་བྱ་བ་ནི་གཅེར་བུ་པ་གསུད་དེ་ཤི་ན་དེ་ལ་གནོད་པ་བྱ་བའི་ཕྱིར་དུག་དང་བཅས་པའི་ཟས་སྦྱིན་པར་བྱེད་པ་ལྟར། དེ་ལ་ཕན་པར་བྱ་བའི་ཕྱིར་སྦྱིན་པར་བྱེད་པ་བསོད་ནམས་འདོད་པ་ཡང་ཁ་ན་མ་ཐོ་བ་དང་ལྡན་པར་འགྱུར་རོ། །མ་དང་བུ་ལྟོ་ན་ཡོད་པ་

དག་ཀྱང་སྡིག་པ་དང་འབྲེལ་པར་ཐལ་བར་འགྱུར་ཏེ། ཕན་ཚུན་སྡུག་བསྔལ་གྱི་རྒྱུ་མཚན་དུ་གྱུར་པའི་ཕྱིར་རོ། གལ་ཏེ་མེའི་དཔེས་བློ་སྔར་མ་བཏང་བའི་སྲོག་བཅད་པས་ཀྱང་སྡིག་པ་ཡིན་པར་འདོད་ན་ནི། དེ་ལྟ་ན་གསད་པར་བྱ་བ་ཡང་དེའི་བྱ་བ་དང་འབྲེལ་

པའི་ཕྱིར་ཏེ། གསོད་པའི་བྱ་བ་འབྲེལ་པའི་ཕྱིར་ཆོས་མ་ཡིན་པ་ཅན་དུ་ཐལ་བར་འགྱུར་ཏེ། མེ་རང་གིས་རྟེན་སྲེག་པ་བཞིན་ནོ། །མེ་ནི་སྔར་རང་གི་རྟེན་སྲེག་ལ་ཕྱིས་གཞན་སྲེག་པར་བྱེད་དེ། དེ་བཞིན་དུ་འཆི་བ་ཡང་སྔར་རང་གི་རྟེན་གསད་པར་བྱ་བ་ཆོས་མ་

Vol. 210 · folio 66a

ཡིན་པ་དང་སྦྱོར་བར་བྱེད་ལ། ཕྱིས་ནི་གསོད་པ་པོ་སྦྱོར་བར་བྱེད་པར་འགྱུར་རོ། །ཅི་སྟེ་གསད་བྱ་ལ་མི་འདོད་ན། གསད་བྱ་དང་གསོད་བྱེད་དག་རྒྱུ་མཚན་མཚུངས་པའི་ཕྱིར། འདི་ལ་ངེས་པ་ཅི་ཞིག་བྱས། དེ་བཞིན་དུ་གཞན་གྱི་

ཆུང་མ་མཐོང་བ་དང་རེག་པ་ལ་སོགས་པ་རྣམས་ལ་ཡང་བརྗོད་པར་བྱ་སྟེ། མེའི་དཔེས་རང་གི་རྟེན་སྲེག་པར་བསྒྲུབ་པའི་ཕྱིར་རོ། །གཞན་ཡང་མེའི་ཆོས་ཁས་བླངས་པའི་ཕྱིར་བྱེད་དུ་འཇུག་པ་ལ་ཡང་སྡིག་པར་ཐལ་བར་མི་འགྱུར་ཏེ་ཞེས་བྱ་བ་རྒྱས་པར་འབྱུང་

སྟེ། སྡིག་པ་ཁས་བླངས་པའི་རྒྱུ་མཚན་ཙམ་དུ་གྱུར་པའི་ཕྱིར་རོ། །ཤིང་ལ་སོགས་པ་སེམས་མེད་པ་རྣམས་ཀྱང་ཞེས་བྱ་བ་རྒྱས་པར་འབྱུང་བ་ནི། ཤིང་དང་སྨྱུག་མ་དང་སོ་ཕག་ལ་སོགས་པ་རྣམས་ཏེ། ཁྱིམ་རྡིབ་ན་སྲོག་ཆགས་འཆི་བའི་ཕྱིར་དེའི་ཁོངས་སུ་

གཏོགས་པ་ཤིང་ལ་སོགས་པ་རྣམས་ལ་ཡང་སྡིག་པར་ཐལ་བར་འགྱུར་རོ། །ཡང་ན་གཏན་ཚིགས་མེད་པར་དཔེ་ཙམ་གྱིས་ནི་འགྲུབ་པར་མི་འགྱུར་ཏེ། ཇི་སྐད་བཤད་པའི་སྐྱོན་དུ་ཐལ་བའི་ཕྱིར་རོ། །ཁ་ཅིག་ཡོངས་སུ་གཟུང་བ་མེད་པས་མཆོད་རྟེན་

ལས་འཕྲོག་པ་ལ་མ་བྱིན་པའི་ལེན་པར་མི་འགྱུར་རོ་ཞེས་བྱ་བ་དེ་ལྟར་སེམས་པ་དེའི་ཕྱིར་རོ། །སངས་རྒྱས་ལས་མ་བྱིན་པར་བླངས་པའི་ཡིན་ཏེ་ཞེས་བྱ་བ་སྨོས་སོ། །ཡོངས་སུ་མྱ་ངན་ལས་འདས་པ་ལ་ཡོངས་སུ་འཛིན་པ་མི་སྲིད་པའི་ཕྱིར་ཇི་ལྟར་

སངས་རྒྱས་ལས་མ་བྱིན་པར་བླངས་ཤེ་ན། དེའི་ཕྱིར་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་ཚེ་དེ་དག་ཐམས་ཅད་ཡོངས་སུ་གཟུང་བའི་ཕྱིར་རོ་ཞེས་བྱ་བ་སྨོས་ཏེ། སྐྱེ་བོ་སྦྱིན་པ་པོ་རྗེས་སུ་གཟུང་བའི་ཕྱིར་རོ། །གཞན་དག་ན་རེ་དེ་བརྐུས་

པ་གང་དག་ཡིན་པ་དེ་དག་ལས་མ་བྱིན་པར་བླངས་སོ་ཞེས་ཟེར་ཏེ། དེ་ལྟར་ན་ཁ་ན་མ་ཐོ་བ་དང་བཅས་པ་ཆེན་པོར་མི་འགྱུར་རོ། །བདག་པོ་མེད་པའི་ཞེས་བྱ་བ་ནི། བུ་མེད་པའི་གཏེར་ཏེ་ཡུལ་གྱི་བདག་པོ་ལས་མ་བྱིན་པར་བླངས་སོ། །ཤི་བའི་

Vol. 210 · folio 66b

ནོར་ནི་དགེ་སློང་ཤི་བའི་ཡོ་བྱད་ཆོས་གོས་ལ་སོགས་པའོ། །སྦྲུམ་མའི་གན་དུ་འགྲོ་ན་དེའི་ལྟོ་ན་འདུག་པ་ལ་གནོད་པར་འགྱུར་རོ། །ནུ་ཞོ་འཐུང་བའི་གན་དུ་འགྲོ་ན་ནི་ནུ་ཞོས་བྱིན་པ་རྒྱས་པར་མི་བྱེད་དོ། །ཡུལ་གྱི་བདག་པོ་ལས་ཏེ་ཞེས་བྱ་བ་རྒྱས་པར་འབྱུང་ངོ་། །

དེ་ནི་དགེ་སློང་མའི་གན་དུ་འགྲོ་བ་ན་འདོད་པས་ལོག་པར་གཡེམ་པར་འགྱུར་ཏེ། དེའི་ཕྱིར་རང་གི་ཆུང་མ་ངེས་པ་དང་བཅས་པ་བཞིན་དུ་བགྲོད་པར་བྱ་བ་མ་ཡིན་པ་ཡང་ཡིན་ནོ། །ཐ་ན་རྒྱལ་པོ་ལས་སོ་ཞེས་བྱ་བ་ནི་གལ་ཏེ་གཞན་མེད་ན་སྟེ་ནངས་ཀྱི་ཐ་ན་རྒྱལ་པོ་ལས་ཏེ་

དེས་ནི་མི་བཟོད་པར་བྱ་བ་ཡིན་ནོ། །བརྫུན་ཚིག་འདུ་ཤེས་གཞན་བསྒྱུར་བའི་ཞེས་བྱ་བ་རྒྱས་པར་འབྱུང་སྟེ། སྨྲ་བ་པོ་དང་ཉན་པ་པོའི་དབང་གིས་རྫུན་དུ་སྨྲ་བའི་ལས་ཀྱི་ལམ་སྐྱེའི་གཞན་དུ་ནི་མ་ཡིན་ནོ། །དེ་ཉིད་བསྟན་པའི་ཕྱིར་དོན་སྨྲ་བ་གང་ཡིན་པ་ཞེས་བྱ་བ་

རྒྱས་པར་འབྱུང་ངོ་། །མངོན་པར་མ་གོ་ན་ཚིག་ཀྱལ་པར་འགྱུར་ཏེ། ཉོན་མོངས་ཅན་ཀུན་ཀྱལ་པ་ཉིད་ཅེས་འབྱུང་བའི་ཕྱིར་རོ། །དཔེར་ན་བ་ལང་ཞེས་བྱ་བ་ལྟ་བུ་དག་ཡི་གེ་གཅིག་པ་ཡང་ཡོད་དེ། དེ་ལ་དཔྱད་པ་འདི་མི་རུང་ངོ་ཞེ་ན། དེའི་ཕྱིར་རེས་འགའ་ཡི་

གེ་མང་པོ་ཞིག་ལ་ཞེས་བྱ་བ་ལ་སོགས་པ་སྨོས་སོ། །ཐ་མ་རྣམ་པར་རིག་བྱེད་མ་ཡིན་པ་དང་བཅས་པའོ་ཞེས་བྱ་བ་ལ། དེར་ནི་གདོན་མི་ཟ་བར་དོན་མངོན་གོ་བར་འགྱུར་བའི་ཕྱིར་དེ་སྐད་བཤད་དེ། ཡི་གེ་སྔ་མ་རྣམས་ནི་སྦྱོར་བ་ཡིན་ནོ། །མཇུག་ནི་རྣམ་པར་རིག་

བྱེད་མ་ཡིན་པའོ། །ཡང་ན་གང་ལས་དོན་གོ་བར་གྱུར་པ་སྟེ་ཞེས་བྱ་བ་ནི། སྨྲ་བ་པོས་ཐམས་ཅད་དུ་འདུ་ཤེས་གཞན་དུ་བསྒྱུར་བར་ཁྱད་པར་མེད་ཀྱང་ཉན་པོས་དོན་དེ་རྟོགས་པ་ལ་བལྟོས་ནས་དངོས་ཀྱི་ལས་ཀྱི་ལམ་དུ་རྣམ་པར་གཞག་གོ་ཞེས་བྱ་བ་འདི་སྟོན་

པའོ། །འདིར་ཡི་གེ་སྔ་མ་རྣམས་ནི་སྦྱོར་བ་ཡིན་ལ། ཕྱི་མ་རྣམ་པར་རིག་བྱེད་མ་ཡིན་པ་དང་བཅས་པ་ནི་མཇུག་ཡིན་ནོ། །ཡིད་ཀྱི་རྣམ་པར་ཤེས་པའི་ཡུལ་ཡིན་པའི་ཕྱིར་དང་ཞེས་བྱ་བ་རྒྱས་པར་འབྱུང་བ་ནི། རྣ་བའི་རྣམ་པར་ཤེས་པ་ནི་སྒྲའི་རང་གི་ངོ་

Vol. 210 · folio 67a

བོ་ཙམ་གྱི་ཡུལ་ཅན་ཡིན་པའི་ཕྱིར་དང་རྣམ་པར་རྟོག་པ་མེད་པའི་ཕྱིར་ལ། མིང་ལ་བྱ་བ་ཡང་ཚིག་རྟོགས་པ་ལ་བལྟོས་ནས་དོན་དེ་གོ་བས་ཚིག་གི་དོན་ནི་ཡིད་རྣམ་པར་ཤེས་པའི་ཡུལ་ཁོ་ན་ཡིན་གྱི། རྣ་བའི་རྣམ་པར་ཤེས་པའི་ཡུལ་ནི་

མ་ཡིན་ནོ། །རྣ་བའི་རྣམ་པར་ཤེས་པ་ད་ལྟར་བས་སྒྲ་ད་ལྟར་བ་འཛིན་པས་དེའི་གཟུང་བར་བྱ་བ་དག་གིས་རྣམ་པར་རིག་བྱེད་གང་ཡིན་པ་ནི་རྣ་བའི་རྣམ་པར་ཤེས་པ་དང་ལྷན་ཅིག་འགགས་པའི་ཕྱིར་རྣམ་པར་རིག་བྱེད་མ་ཡིན་པ་ཁོ་ན་ལས་ཀྱི་ལམ་དུ་འགྱུར་གྱི། རྣམ་

པར་རིག་བྱེད་ནི་མ་ཡིན་ཏེ། དེ་ལྟ་ཡིན་ན། དེ་དག་ཀྱང་བྱེད་ན། རྣམ་པ་གཉིས་སུ་འགྱུར་རོ་ཞེས་གང་བཤད་པ་དེ་དང་འགལ་ལོ། །སྐད་བྱ་བ་མིང་དང་མིང་ཅན་གྱི་འབྲེལ་པ་བྱ་བ་ཞེས་བྱ་བའི་ཐ་ཚིག་གོ། །ལུང་དུ་མ་བསྟན་པའི་ཕྱིར་ཤི་བ་དང་འདྲ་སྟེ་ཞེས་བྱ་བ་ལ། ཁ་

ཅིག་ན་རེ་གཟུགས་དང་སྒྲ་དང་ཆོས་རྣམས་ནི་དགེ་བ་དང་། མི་དགེ་བ་དང་ལུང་དུ་མ་བསྟན་པའི་ཡིན་ལ། དྲི་དང་རོ་དང་རེག་བྱ་དག་ནི་གཅིག་ཏུ་ལུང་དུ་མ་བསྟན་པ་ཡིན་པའི་ཕྱིར་ཤི་བ་དང་འདྲའོ་ཞེས་ཟེར་རོ། །ཁ་ཅིག་ན་རེ་ཤི་བ་ལ་ནི་འདི་ན་དགེ་བ་དང་མི་དགེ་

བའི་ཆོས་རྗེས་སུ་འཇུག་པ་མེད་ལ། ལུང་དུ་མ་བསྟན་ཆོས་རྗེས་སུ་འཇུག་པ་ནི་ཡོད་དེ། དེའི་ཕྱིར་མ་བསྒྲིབས་ལ་ལུང་དུ་མ་བསྟན་པ་ཡིན་པའི་ཕྱིར་ཤི་བ་དང་འདྲའོ་ཞེས་ཟེར་རོ། །གཞན་དག་ན་རེ་དབང་པོ་གསུམ་ནི་ཡུལ་ཕྲད་པ་ཡིན་པའི་ཕྱིར་ལ། ཕྲད་པ་ལ་

ཡང་རྟོགས་པར་མ་བཏགས་པའི་ཕྱིར་ཡུལ་གསུམ་ལ་རྟོགས་པ་ཞེས་བྱའོ་ཞེས་ཟེར་རོ། །སྣ་དང་ལྕེ་དང་ལུས་ཀྱི་རྣམ་པར་ཤེས་པ་བདག་ཉིད་ཉམས་སུ་མྱོང་བ་ནི་རྟོགས་པ་ཡིན་ནོ་ཞེས་བྱ་བ་འདི་ལ་ཁུངས་ཅི་ཡོད་ཅེ་ན། བྱེ་བྲག་ཏུ་སྨྲ་བ་རྣམས་ན་རེ། མདོ་དང་རིགས་པ་ཡོད་

དོ་ཞེས་ཟེར་རོ། །དེའི་ཕྱིར་ཡུལ་གསུམ་པོ་གཟུགས་དང་སྒྲ་དང་ཆོས་གང་ལ་གོ་རིམས་བཞིན་དུ་མཐོང་བ་དང་ཐོས་པ་དང་རྣམ་པར་ཤེས་པའི་སྒྲ་བསྙད་པས་དེའི་བར་ན་འདུག་པ་དྲི་དང་རོ་དང་རེག་བྱ་དག་ལ་རྟོགས་པ་ཞེས་བྱ་བར་ཁོང་དུ་ཆུད་དོ། །དེ་ལྟར་མི་འདོད་ན་

Vol. 210 · folio 67b

ཞེས་བྱ་བ་ནི། དྲི་ལ་སོགས་པ་དག་ལ་རྟོགས་པ་ཞེས་བྱ་བར་མི་འདོད་ནའོ། །མཐོང་བ་ལ་སོགས་པའི་དངོས་པོའི་ནང་དུ་མ་གཏོགས་པའི་ཕྱིར་ཞེས་བྱ་བ་ལ། གཟུགས་དང་སྒྲ་དང་ཆོས་དག་ལ་མཐོང་བ་དང་ཐོས་པ་དང་རྣམ་པ་ཞེས་པའི་སྒྲ་བཀོད་པའི་ཕྱིར་

དང་། གཟུགས་དང་སྒྲ་དང་ཆོས་དང་མཚན་ཉིད་མི་མཚུངས་པའི་ཕྱིར་དྲི་དང་རོ་དང་རེག་བྱ་རྣམས་མཐོང་བ་ལ་སོགས་པའི་དངོས་པོའི་ནང་དུ་མ་གཏོགས་པ་ཡིན་ཏེ། དེའི་ཕྱིར་དྲི་ལ་སོགས་པ་དག་ལ་ཐ་སྙད་འདོགས་པར་མི་འགྱུར་ན་དྲི་ལ་སོགས་པ་དག་

ལ་ཐ་སྙད་འདོགས་པར་མཐོང་བ་ཡང་ཡིན་ནོ། །དེའི་ཕྱིར་དེ་དག་ལ་རྟོགས་པ་ཞེས་བྱའོ་ཞེས་བྱ་བར་ངེས་སོ། །རེ་ཞིག་མདོ་ནི་དོན་གཞན་ཡིན་པའི་ཕྱིར་ཁུངས་མ་ཡིན་ཏེ་ཞེས་བྱ་བ་འདིར་དོན་ནི། ཇི་ལྟར་ཁྱོད་ལ་དུས་གསུམ་དུ་ཡང་གཟུགས་ལ་སོགས་པ་

རྣམས་ལ་མཐོང་བ་ནས་རྣམ་པར་མ་ཤེས་པའི་བར་གྱི་ཕྱིར་དང་། དེ་དག་དོན་དུ་མ་པའི་ཕྱིར་དེ་དག་གི་ཡུལ་ཅན་གྱི་འདུན་པའི་འདོད་ཆགས་ལ་སོགས་པ་དག་སྐྱེས་པ་དང་། སྐྱེ་བ་དང་། སྐྱེ་བར་འགྱུར་བ་མ་ཡིན་ནོ། །དེ་བཞིན་དུ་དེ་ཙམ་ཞིག་ངེས་

པར་འཛིན་པའི་ཕྱིར་མཐོང་བ་དག་ལས་རྣམ་པར་ཤེས་པའི་བར་དག་ལ་ཡང་དེ་དག་གི་ཡུལ་ཅན་གྱི་འདུན་པའི་འདོད་ཆགས་སྐྱེས་པ་དང་། སྐྱེ་བ་དང་། སྐྱེ་བར་འགྱུར་བ་མ་ཡིན་ཏེ། དེ་དག་ནི་ཡང་དག་པ་མ་ཡིན་པའི་རྣམ་པར་རྟོག་པ་ལས་འབྱུང་བའི་ཕྱིར་

རོ་ཞེས་བྱ་བ་འདི་ཡིན་ནོ། །དེ་ཉིད་བསྟན་པའི་ཕྱིར། འོ་ན་ཇི་ལྟ་བུ་ཞེ་ན། འདིར་ནི་ཁྱོད་ཡུལ་རྣམ་པ་དྲུག་པོ་འདི་ལ་ཞེས་བྱ་བ་རྒྱས་པར་སྨོས་སོ། །གལ་ཏེ་མདོ་འདི་མཐོང་བ་ལ་སོགས་པའི་ཐ་སྙད་སྟོན་པ་ལྷུར་བྱེད་པ་མ་ཡིན་ནོ། །དེས་ན་འོ་ན་མཐོང་བ་ཅི་ཞིག་

ཡིན་པ་ནས་རྣམ་པར་ཤེས་པའི་བར་ཅི་ཡིན་པ་བརྗོད་པར་བྱ་དགོས་སོ་ཞེ་ན། མཐོང་བ་ལ་སོགས་པ་དངོས་པོའི་ནང་དུ་མ་གཏོགས་པའི་ཕྱིར་དྲི་ལ་སོགས་པ་ཐ་སྙད་གདགས་པར་མི་འགྱུར་ཏེ་ཞེས་གང་སྨྲས་པ་དེའི་ལན་ནི་ཡུལ་ལྔ་པོ་འདི་དག་རེ་རེ་ལ་ཡང་ཞེས་

Vol. 210 · folio 68a

རྒྱས་པར་སྨོས་སོ། །དྲུག་པ་ལ་ནི་མཐོང་བ་མ་གཏོགས་ཏེ་ཞེས་བྱ་བ་ནི། དབང་པོ་ལྔས་མངོན་སུམ་བྱ་བ་ནི་མཐོང་བ་ཡིན་པའི་ཕྱིར་རོ། །ཕ་རོལ་ལས་འོངས་པའི་ཡུལ་ཡུལ་དྲུག་ཚན་གང་ཡིན་པ་དེ་ནི་ཐོས་པའོ། །རིག་པས་རྗེས་སུ་

དཔག་པ་ནི་མི་འཁྲུལ་པའི་རྗེས་སུ་དཔག་པ་སྟེ། དྲུག་ཚན་གྱི་ཡུལ་འདི་ཡི་སྤྱོད་ཡུལ་ལོ། །སྔོན་གྱི་སློབ་དཔོན་རྣམས་ནི་རྣལ་འབྱོར་སྤྱོད་པ་རྣམས་སོ། །མིག་གིས་ཞེས་བྱ་བ་ནི་དབང་པོ་གཞན་གྱི་མ་ཡིན་པའོ། །དེ་ལྟར་ན་ལུགས་སྔ་མ་ལས་ཁྱད་པར་དུ་སྨྲས་པ་

འགྱུར་རོ། །བདག་ཉིད་ཀྱི་རྣ་བས་ཐོས་པ་དང་ཕ་རོལ་ལས་འོངས་པ་གང་ཡིན་པ་དེ་ནི་ཐོས་པའོ། །བདག་ཉིད་ཀྱིས་བསམས་པ་གང་ཡིན་པ་དེ་ནི་རྟོགས་པའོ་ཞེས་བྱ་བ་ནི་ལུང་དང་རིག་པས་སོ། །དེ་ལྟར་ན་ཐ་སྙད་འདི་ཉིད་ནི་ཡུལ་དྲུག་ཅར་དང་སྦྱར་རོ། །བདག་

ཉིད་ཀྱིས་སོ་སོར་ཡང་དག་པར་རིག་པ་དང་རྟོགས་པ་གང་ཡིན་པ་དེ་ནི་རྣམ་པར་ཤེས་པའོ་ཞེས་བྱ་བ་ལ། སོ་སོར་ཡང་དག་པར་རིག་པ་དེ་ནི་བདེ་བ་ལ་སོགས་པ་དང་རྟོགས་པ་ནི་འཇིག་རྟེན་པའི་ལམ་གྱི་མངོན་པར་ཤེས་པ་ལ་སོགས་པའོ། །འདིར་འཇིག་རྟེན་ལས་

འདས་པའི་ལམ་གྱིས་རྟོགས་པ་ནི་མི་གཟུང་སྟེ་འཇིག་རྟེན་པའི་ཐ་སྙད་ཀྱི་སྐབས་ཡིན་པའི་ཕྱིར་རོ། །གཞན་དག་ན་རེ། དྲུག་པ་ཁོ་ན་ལ་རྟོགས་པ་དང་མཐོང་བ་འཐད་ཀྱི། སྒྲ་ལ་སོགས་པ་རྣམས་ལ་མ་ཡིན་ནོ་ཞེས་ཟེར་རོ། །དེ་བཞིན་དུ་རིག་པ་ཡང་འདས་པ་མཐོང་

བའི་བློ་ཡིས་དེ་བཞིན་དུ་མ་འོངས་པ་མཐོང་ཞེས་བྱ་སྟེ། འདས་པ་དང་མ་འོངས་པ་དག་ནི་ཡིད་ཀྱི་རྣམ་པར་ཤེས་པ་ཁོ་ནའི་ཡུལ་ཡིན་ནོ། །བཅོམ་ལྡན་འདས་ཀྱི་གསུང་རབ་གང་དུ་ཡང་རྣ་བས་སྒྲ་མཐོང་བ་དང་སྣ་ལ་སོགས་པས་དྲི་ལ་སོགས་པ་རྣམས་མཐོང་ཞེས་གསུངས་

པ་འགའ་ཡང་མེད་དོ། །གང་གི་ཕྱིར་མཐོང་བ་ཞེས་བྱ་བ་འདིས་ཡུལ་ལྷན་ཅིག་རྟོགས་པར་བྱེད་པ་ལ་རིག་པ་འདིར་ཅི་ཞིག་ཡོད། དབང་པོ་ལས་མངོན་སུམ་དུ་མཐོང་གི་ཡིད་ཀྱིས་མངོན་སུམ་དུ་མ་ཡིན་ནོ་ཞེ་ན། དེ་ལྟ་བུའི་རྣལ་འབྱོར་སྤྱོད་པ་པའི་འདོད་པ་སྟེ། གཟུགས་

Vol. 210 · folio 68b

རྣམ་པ་བཞི་དག་ཏུ་ཐ་སྙད་གདགས་པ་སྟེ་ལྷག་མ་ནི་ཡུལ་ལྔ་རྣམས་སོ། །མཐོང་བ་ལས་མ་གཏོགས་པ་དེའི་ཕྱིར་དྲི་ལ་སོགས་ལ་ཐ་སྙད་འདོགས་པ་མེད་པར་ཐལ་བར་འགྱུར་བ་ཡང་མེད་དོ། །གཞན་དག་ན་རེ་མཐོང་བ་ལ་སོགས་པས་སོ་སོ་རང་རིག་པའི་ཞེས་བྱ་བ་

སྟེ། ཁྱད་པར་ལས་བྱུང་བའི་དོན་ཅན་ནོ་ཞེས་ཟེར་རོ། །རྟོགས་པ་དང་རྣམ་པར་ཤེས་པ་དག་ལ་ཁྱད་པར་མེད་དོ། །དེ་ཡང་ཡིད་ཀྱིས་མངོན་སུམ་དུ་རྟོགས་པ་ནི་ཡིད་ཀྱི་དབང་པོའི་བདག་ཉིད་སོ་སོ་རང་གིས་རིག་པ་སྟེ། ཡིད་ཀྱི་ཡུལ་ཉིད་ཀྱི་ཕྱིར་རྟོག་གེའི་

རིག་པ་རྣམས་ཞེས་བྱའོ། །གང་ཞིག་ལུས་ཀྱིས་དོན་གཞན་གོ་བར་བྱེད་ན་ཞེས་བྱ་བ་ནི་བརྫུན་དུ་སྨྲ་བ་དག་གིས་ཡིན་པའི་ཕྱིར་དྲིས་པའོ། །ངག་གིས་བྱེད་པར་གྱུར་ནའོ་ཞེས་བྱ་བ་འདིར་ནི་རྣམ་པར་རིག་བྱེད་མ་ཡིན་པ་ཁོ་ན་དངོས་ཀྱི་ལས་ཀྱི་ལམ་ཡིན་གྱི་རྣམ་

པར་རིག་བྱེད་ནི་མ་ཡིན་ནོ། །ལུས་ཀྱིས་བྱེད་པར་གྱུར་ནའོ་ཞེས་བྱ་བ་འདིར་ཡང་རྣམ་པར་རིག་བྱེད་མ་ཡིན་པ་ཁོ་ན་དངོས་ཀྱི་ལས་ཀྱི་ལམ་ཡིན་ནོ་ཞེས་གཞན་དག་ཟེར་རོ། །དྲང་སྲོང་རྣམས་ཡིད་རབ་ཏུ་ཁྲོས་པས་ཞེས་བྱ་བ་ལ། དེ་དག་ལུས་དང་ངག་གཉིས་ཀས་མི་བྱེད་

ཀྱང་ཁ་ན་མ་ཐོ་བ་དང་ལྡན་པར་འགྱུར་རོ། །གསོ་སྦྱོང་དཔེར་བྱའོ་ཞེས་བྱ་བ་ལ་གསོ་སྦྱོང་གི་ལས་ལ་ཁ་ན་མ་ཐོ་བ་འཆབ་པའི་ཕྱིར་གཉིས་གས་བྱས་པ་མེད་ཀྱང་བརྫུན་དུ་སྨྲ་བའི་ཁ་ན་མ་ཐོ་བར་རེག་པར་འགྱུར་རོ། །མི་བྱེད་ན་ཞེས་བྱ་བ་ནི་མི་རྩོལ་ཞིང་མི་སྦྱོར་ནའོ་ཞེས་བྱ་

བའི་བར་དུ་བཤད་པར་འགྱུར་རོ། །དེ་ལྟར་ན་བསམ་གཏན་དང་ཟག་པ་མེད་པའི་སྡོམ་པ་བཞིན་དུ་ལས་ཀྱི་ལམ་སེམས་ཙམ་ལ་རག་ལས་པ་ཉིད་དུ་ཐལ་བར་འགྱུར་ན། འདོད་པ་ན་སྤྱོད་པའི་རྣམ་པར་རིག་བྱེད་མ་ཡིན་པ་རྣམ་པར་རིག་བྱེད་མེད་པ་ཅན་ནི་ཡོད་པ་

ཡང་མ་ཡིན་ནོ། །འདོད་པ་ན་སྤྱོད་པ་ཞེས་བྱ་བ་ནི་བསམ་གཏན་དང་ཟག་པ་མེད་པའི་རྣམ་པར་རིག་བྱེད་མ་ཡིན་པ་ལས་ཁྱད་པར་དུ་བྱེད་པའོ། །དེ་དག་ཅེས་བྱ་བ་ནི་དྲང་སྲོང་དང་དགེ་སློང་དག་གོ། །སློབ་དཔོན་འདུས་བཟང་ནི་དྲང་སྲོང་དག་ནི་དོན་གྱིས་

Vol. 210 · folio 69a

ན་རྣམ་པར་རིག་བྱེད་བྱེད་པ་ཡིན་ཏེ། མི་མ་ཡིན་པ་རྣམས་ཀྱིས་དེ་དག་གི་མི་དགེ་བའི་བསམ་པ་སེམས་ཅན་ཡོངས་སུ་འདོར་བ་ཞུགས་པ་རྟོགས་ནས་དེ་དག་ལ་དད་པ་རྣམས་གང་གིས་ན་དྲང་སྲོང་དེ་དག་ལ་ལས་ཀྱི་ལམ་སྐྱེ་བ་

ལུས་ཀྱི་བྱེད་པའོ། །གཞན་ཡང་ཁྲོས་པ་ལ་ནི་དེའི་ཚེ་གདོན་མི་ཟ་བར་ལུས་དང་ངག་གི་གཡོ་བ་ཡོད་ཅིང་དམོད་པ་འདོར་བར་འགྱུར་བས་འགལ་བ་མེད་དོ། །གསོ་སྦྱོང་ལ་ཡང་ཇི་ལྟར་ཚིག་གིས་གོ་བར་བྱ་བའི་དོན་ལ་ལུས་ཀྱི་གཡོ་བ་ཡང་ངག་གི་ལས་ཀྱི་ལམ་སྐྱེ་བ་དེ་བཞིན་

དུ་བདག་ཅག་གིས་ཚེ་དང་ལྡན་པ་དག་ཡོངས་སུ་དག་གོ་སྙམ་དུ་རིག་པར་བྱའི་སྙམ་དུ་ཅང་མི་སྨྲ་བས། མི་གཡོ་བ་ལ་ཡང་ཡིན་པས་ཚིག་གིས་གོ་བར་བྱ་བའི་དོན་ལ་ཅང་མི་སྨྲ་བ་ལ་ཡང་དག་གི་ལས་ཀྱི་ལམ་སྐྱེ་བར་འགྱུར་ཏེ། དེ་ནི་ཡོངས་སུ་མ་དག་བཞིན་དུ་ཅང་མི་སྨྲ་བས་

བདག་ཉིད་དག་པར་གོ་བར་བྱེད་དོ་ཞེས་ཟེར་རོ། །གཞན་ནི་འདོད་པའི་ཁམས་ཀྱི་རྣམ་པར་རིག་བྱེད་མ་ཡིན་པ་ཐམས་ཅད་རྣམ་པར་རིག་བྱེད་ལ་རག་ལས་པར་ངེས་པར་ཡང་མ་ཡིན་ཏེ། ལྔ་སྡེ་ལ་སོགས་པ་འབྲས་བུ་ཐོབ་པའི་མོད་ལ་སོ་སོར་ཐར་པའི་སྡོམ་པ་སྐྱེ་བ་སྲིད་པའི་

ཕྱིར་རོ། །དེ་ལྟ་བས་ན་མི་དགེ་བ་ཡང་དེ་ལྟ་བུ་འགའ་ཞིག་རྣམ་པར་རིག་བྱེད་མེད་པར་ཡང་འགྱུར་རོ་ཞེས་ཟེར་ཏེ། །འདི་ལ་འབགས་པར་བྱ་སྟེ་ལན་གདབ་དགོས་སོ་ཞེས་བྱའོ། །ཕྲ་མ་ཕ་རོལ་དབྱེ་བའི་ཕྱིར་ཉོན་མོངས་པ་ཅན་གྱི་ཞེས་བྱ་བ་ལ། ཕྲ་མའི་དངོས་པོ་ནི་ཕྲ་

མའོ། །དེ་དག་གང་ཞེ་ན། ཕ་རོལ་དབྱེ་བའི་ཕྱིར་ཚིག་སྟེ། དེ་དང་ལྡན་པས་དེ་ཡང་འདྲེས་མ་ཅན་ཞེས་བྱའོ། །ཉོན་མོངས་ཅན་གྱི་སེམས་ཀྱི་ཞེས་བྱ་བ་ནི་དེ་ལ་ཕན་པའི་ཕྱིར་མ་ཡིན་པའོ། །ཁ་གསག་བྱེད་པ་ཞེས་བྱ་བ་ལ། ཁ་གསག་ཅེས་བྱ་བ་ནི་རྙེད་པ་

འདོད་པའི་སྙན་པར་སྨྲ་བའོ། །ལས་ཀྱི་ལམ་ནི་མ་ཡིན་ནོ་ཞེས་བྱ་བ་འབྱུང་ངོ་། །ཡང་ཀྱལ་པ་ཡིན་ལ་ལས་ཀྱི་ལམ་མ་ཡིན་པ་ཇི་ལྟར་ཞེ་ན། དེའི་ཚེ་སེམས་ཅན་རྣམས་འདོད་ཆགས་ཤས་ཆུང་བ་ཡིན་པའི་ཕྱིར་རྣམ་པར་རིག་བྱེད་དེས་རྣམ་པར་རིག་བྱེད་མ་

Vol. 210 · folio 69b

ཡིན་པ་འདྲེན་པར་ནུས་པར་མི་འགྱུར་ལ། རྣམ་པར་རིག་བྱེད་མ་ཡིན་པ་མེད་པ་ཅན་གྱི་ལས་ཀྱི་ལམ་ཡང་ཡོད་པ་མ་ཡིན་ནོ། །ཉོན་མོངས་ཅན་ཀུན་ཀྱལ་པ་ཉིད་ཅེས་བྱ་བ་ནི། ཉོན་མོངས་པ་ཅན་གཞན་འབའ་ཞིག་ཏུ་མ་ཟད་ཀྱི། བརྫུན་དུ་སྨྲ་བ་ལ་སོགས་པ་

གསུམ་ཡང་ཡིན་ན། དེ་ལྟར་བྱས་ན་བརྫུན་དུ་སྨྲ་བ་དེས་ནི་ཚིག་ཀྱལ་པ་ཡང་ཡིན་ལ། ཁ་གསག་ལ་སོགས་པ་ནི་ཚིག་ཀྱལ་པ་ཁོ་ན་ཡིན་གྱི་བརྫུན་དུ་སྨྲ་བ་མ་ཡིན་ནོ། །དེ་བཞིན་དུ་གཞན་ལ་ཡང་བརྗོད་པར་བྱའོ། །ཀྱལ་པ་རྣམས་ནི་ཚིག་ཀྱལ་པ་ཅན་

ཡིན་ལ། དེའི་དངོས་པོ་ནི་ཚིག་ཀྱལ་པ་ཅན་ཉིད་དོ། །ལོག་པས་གཞན་གྱི་ནོར་ལ་ཆགས་ཞེས་བྱ་བ་ནི། མི་རིགས་པར་ཆགས་ཏེ། དེ་ཉིད་ཀྱི་ཕྱིར་འགྲེལ་པ་ལས་ལོག་པར་མི་རིགས་པ་ཞེས་བྱ་བ་སྨོས་སོ། །དེ་འཇིག་རྟེན་ན་བརྣབ་སེམས་སྤངས་ཏེ་ཞེས་

བྱ་བ་ནི། འདོད་པ་ལ་འདུན་པ་སྤངས་ཏེ་ཞེས་བྱ་བའི་དོན་ཏོ། །འདི་ག་ལས་ཤེ་ན། དེ་ཉིད་ཀྱི་མཇུག་ཐོགས་སུ་གནོད་སེམས་ལ་སོགས་པ་སྤངས་པ་བསྟན་པའི་ཕྱིར་ཏེ། དེ་འཇིག་རྟེན་ན་བརྣབ་སེམས་སྤངས་ཏེ། བརྣབ་སེམས་དང་བྲལ་བའི་སེམས་

ཀྱིས་ལན་མང་དུ་གནས་ཤིང་འཇིག་རྟེན་ན་གནོད་སེམས་དང་རྨུགས་པ་དང་གཉིད་དང་རྒོད་པ་དང་འགྱོད་པ་དང་ཐེ་ཚོམ་སྤངས་ཏེ་དོགས་པ་ལས་བརྒལ་ཞིང་ཐེ་ཚོམ་ལས་བརྒལ་ནས་ཆོས་དགེ་བ་རྣམས་ལ་ནེམ་ནུར་མེད་པར་གྱུར་པ་ཡིན། དེ་སྒྲིབ་པ་ལྔ་སྤངས་

ནས་ཞེས་བྱ་བ་དེ་ལྟ་བུ་ལ་སོགས་པ་གསུངས་པའི་དེའི་ཕྱིར་འདོད་པ་ན་སྤྱོད་པའི་སྲེད་པ་ཐམས་ཅད་བརྣབ་སེམས་ཡིན་ནོ་ཞེས་བྱ་བར་ཤེས་སོ། །ལས་དང་འབྲས་བུ་དང་འཕགས་པ་ལ་སྐུར་པ་འདེབས་པ་འདི་རིལ་གྱིས་ལོག་པར་ལྟ་བ་ཡིན་ནོ་ཞེས་བྱ་

བ་འབྱུང་སྟེ། དེ་ལ་སྦྱིན་པ་མེད་དོ་མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ་ཞེས་བྱ་བ་འདི་ནི་ལས་ལ་སྐུར་པ་འདེབས་པའོ། །ལེགས་པར་སྤྱད་པ་དང་ཉེས་པར་སྤྱད་པའི་ལས་ཀྱི་འབྲས་བུ་

Vol. 210 · folio 70a

རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །སེམས་ཅན་བརྫུས་ཏེ་སྐྱེ་བ་མེད་དོ་ཞེས་བྱ་བ་འདི་ནི་འབྲས་བུ་ལ་སྐུར་པ་འདེབས་པའོ། །ཡང་རྒྱུ་དང་འབྲས་བུ་གང་ཡང་རུང་བ་ལ་སྐུར་པ་

འདེབས་པའི་ཕྱིར་གཉི་ག་ལ་སྐུར་པ་འདེབས་པ་ཡིན་ནོ། །དགེ་སྦྱོང་དང་བྲམ་ཟེ་དང་དགྲ་བཅོམ་པ་མེད་དོ་ཞེས་བྱ་བ་ནི་འཕགས་པ་ལ་སྐུར་པ་འདེབས་པ་ཡིན་ནོ། །དེ་དག་གི་རྒྱུ་བས་རྒྱུ་སྟེ་ཞེས་བྱ་བ་ནི། བརྣབ་སེམས་ལ་སོགས་པ་གོ་

རིམས་བཞིན་དུ་ཆགས་པ་དང་མི་མཐུན་པ་དང་། ལོག་པའི་ངེས་པར་རྟོག་པའི་རྣམ་པ་ཅན་དེ་དག་གི་དབང་གིས་དེ་དག་དང་མཐུན་པར་སེམས་པས་སེམས་པར་བྱེད་ཅིང་མངོན་པར་འདུ་བྱེད་དེ། དེའི་ཕྱིར་དེ་དག་གི་རྒྱུ་བས་རྒྱུ་བ་ཡིན་ནོ། །དེ་

དག་གི་འགྲོས་ཀྱིས་འགྲོའོ་ཞེས་བྱ་བ་ནི། ཕྱི་མ་སྔ་མའི་བཤད་པ་ཡིན་པར་དགོངས་ཏེ་སྨོས་པའོ། །ལས་དང་ལམ་ཞེས་བྱ་བ་ལ། སེམས་པ་ཞེས་བྱ་བ་ནི་ལས་མིན་ནོ་ཞེས་བྱ་བ་ནི་ལས་ཡིན་ནོ་ཞེས་བྱ་བའོ། །དེ་དག་ཀུན་ནས་སློང་བའི་སེམས་པ་ཞེས་བྱ་བ་ནི། སྲོག་གཅོད་

པ་ལ་སོགས་པ་དེ་དག་སེམས་པ་གང་གིས་ཀུན་ནས་སློང་བ་སྟེ་འཇུག་པར་བྱེད་ཅེས་བྱ་བའི་ཐ་ཚིག་གོ། །དེ་དག་ལ་བརྟེན་ནས་འཇུག་པའི་ཕྱིར་རོ་ཞེས་བྱ་བ་ནི། དེ་དག་ལ་དམིགས་ནས་འཇུག་པའི་ཕྱིར་རོ། །ལས་ཀྱི་ལམ་དང་ཞེས་བྱ་བ་ནི་

བརྣབ་སེམས་ལ་སོགས་པ་གསུམ་མོ། །སྲོག་གཅོད་པ་ལ་སོགས་པ་བདུན་ནི་ལུས་དང་ངག་གི་རང་བཞིན་ཡིན་པའི་ཕྱིར་ལས་དང་ལས་ཀྱི་ལམ་ཡང་ཡིན་ནོ། །དེ་དག་ཀུན་ནས་སློང་བའི་སེམས་པ་ནི་དེ་དག་ལ་བརྟེན་ནས་འཇུག་པའི་ཕྱིར་རོ། །

མི་འདྲ་བ་རྣམས་ལ་ཡང་གཅིག་ཡིན་པར་གྲུབ་པའི་ཕྱིར་རོ། །གང་མི་མངོན་པ་ནི་ཡོན་ཏན་ནོ་ཞེས་བྱ་བ་འདི་ལྟར་དེ་དག་ནི་དེའི་རྩ་བ་ཅན་དུ་འཇུག་པ་ཡིན་ནོ་ཞེས་བྱ་སྟེ། སྦྱོར་བ་འཇུག་པ་ནི་དངོས་ཀྱི་ལས་ཀྱི་ལམ་གྱི་དོན་དུའོ། །མཇུག་འཇུག་

Vol. 210 · folio 70b

པ་ནི་ལས་ཀྱི་ལམ་གྱི་རྩ་བ་ཅན་ཡིན་ནོ། །ལས་ཀྱི་ལམ་ཡང་ལས་ཀྱི་ལམ་གྱི་སྦྱོར་བ་དང་མཇུག་ཏུ་འགྱུར་རོ་ཞེ་ན། དེ་ནི་དངོས་གཞི་ཁོ་ན་ཡིན་གྱི་ལས་ཀྱི་ལམ་གྱི་སྦྱོར་བ་དང་མཇུག་མ་ཡིན་ནོ། །འཇིག་རྟེན་ན་གང་དག་ཅེས་རྒྱས་པར་འབྱུང་བ་

སྟེ། དེ་ལྟར་ཡང་ཐམས་ཅད་བདག་པོ་རྒྱུ་མཐུན་དང་། རྣམ་སྨིན་འབྲས་བུ་འབྱིན་པར་འདོད། ཕྱི་ནས་བཤད་པར་བྱའོ། །ཡང་ན་གཅིག་གིས་འདྲེན་པས་ན་ཞེས་བྱ་བ་ནི་བརྣབ་སེམས་དང་གནོད་སེམས་དང་ལོག་པར་ལྟ་བ་འདྲེན་པར་

བྱེད་དོ། །གཞན་དག་ལ་ཡང་དེ་དང་འདྲ་བར་བརྗོད་པར་བྱའོ། །དེ་ལྟར་ན་དེ་དག་ནི་ཡིད་ཀྱི་ལས་ཡིན་པས་ལས་ཀྱང་ཡིན་ལ་ལམ་ཡང་ཡིན་པས་ལས་ཀྱི་ལམ་ཡིན་ནོ། །ཀུན་ཏུ་སྤྱོད་པ་དང་འགལ་བ་ཡིན་ལ་ཞེས་བྱ་བ་ནི། དགེ་བ་དང་མི་དགེ་བ་དག་

ཅིག་ཅར་ཀུན་ཏུ་སྤྱོད་པ་མེད་པའི་ཕྱིར་ཡིན་གྱི་ལོག་པར་ལྟ་བ་བཞིན་དུ་ལྡན་པ་དང་འགལ་བ་ནི་མ་ཡིན་ནོ་ཞེས་བཤད་པར་འགྱུར་རོ། །ཆེན་པོ་ཡོངས་སུ་རྫོགས་པས་ཞེས་བྱ་བ་ནི། ཆེན་པོ་ཉིད་ཀྱིས་ཡོངས་སུ་རྫོགས་པ་སྟེ། ཆེན་པོའི་ཆེན་

པོས་ཞེས་བྱ་བ་དོན་གང་ཡིན་པའོ། །གཞན་དག་ན་རེ། ཆེན་པོས་ཡོངས་སུ་རྫོགས་པས་ཀྱང་ངོ་ཞེས་ཟེར་རོ། །བི་པྲ་ཏི་པ་ར་ལ་སོགས་པས་མ་བཅོམ་པའི་ཕྱིར་ཡོངས་སུ་རྫོགས་པའོ། །ལོག་པར་ལྟ་བ་མི་དགེ་བའི་རྩ་བས་དྲངས་པའི་

ཕྱིར་ཞེས་བྱ་བ་ལ། དེའི་མཇུག་གིས་དེ་བསྐྱེད་པའི་ཕྱིར་དང་དེའི་སྟོབས་ཀྱིས་དགེ་བའི་རྩ་བ་གཅོད་པའི་ཕྱིར་མི་དགེ་བའི་རྩ་བས་དྲངས་པས་ཞེས་བརྗོད་དོ། །མི་དགེའི་རྩ་བ་ཆེན་པོས་དྲངས་པའི་ལོག་པར་ལྟ་བས་དགེ་བའི་རྩ་བ་གཅོད་པའི་ལས་ཀྱང་

དེ་འདྲེན་པར་བྱེད་པ་ཡིན་པའི་ཕྱིར་མི་དགེ་བའི་རྩ་བ་དག་ཁོ་ན་ལ་བརྟེན་པས་བསྟན་བཅོས་དང་འགལ་བ་མེད་དོ། །དགེ་བའི་རྩ་བ་དག་ནི་རྣམ་པ་དྲུག་སྟེ། ཁམས་གསུམ་པོ་རེ་རེ་ལ་སྐྱེས་ནས་ཐོབ་པ་དང་སྦྱོར་བ་ལས་བྱུང་བ་ཡོད་པས་

Vol. 210 · folio 71a

དེ་དག་གང་དག་ཡིན་པ་མི་ཤེས་པ་དེའི་ཕྱིར། དགེ་བའི་རྩ་བ་གང་དག་གཅིག་ཅེས་བྱ་བ་རྒྱས་པར་སྨོས་སོ། །གཟུགས་དང་གཟུགས་མེད་པ་ན་སྤྱོད་པ་དག་དང་མི་ལྡན་པའི་ཕྱིར་རོ་ཞེས་བྱ་བ་ནི། ལྡན་པ་གཅོད་པ་ལས་

དགེ་བའི་རྩ་བ་གཅོད་པར་འདོད་ན། གཟུགས་དང་གཟུགས་མེད་པ་ན་སྤྱོད་པ་དག་དང་ནི་སྔ་ནས་མི་ལྡན་པས་དེ་གཅོད་པ་མི་སྲིད་དོ། །ཡང་ཇི་ལྟར་ན་དེའི་ཐོབ་པ་ཐག་སྲིང་བར་བྱེད་ཅེ་ན། རྒྱུད་དེའི་སྣོད་མ་ཡིན་པ་ཉིད་དུ་བྱེད་པའི་ཕྱིར་རོ། །སྔར་རྒྱུད་དེ་

དག་གི་ཐོབ་པ་རྣམས་ཀྱི་སྣོད་དུ་གྱུར་པ་ལས་དགེ་བའི་རྩ་བ་བཅད་ནས་སྣོད་མ་ཡིན་པ་སྟེ་སྐལ་བ་མེད་པ་ཉིད་དུ་བྱས་པ་དེའི་ཕྱིར། དེ་དག་གིས་ཐོབ་པ་ཐག་སྲིང་བ་བྱེད་པ་ལས་དེ་དག་ཀྱང་བཅད་པ་ཡིན་ནོ་ཞེས་བརྗོད་པས་འགལ་བ་མེད་དོ། །སྦྱོར་བ་ལས་བྱུང་

བ་དག་ལས་ནི་ཞེས་བྱ་བ་རྒྱས་པར་འབྱུང་སྟེ། སྦྱོར་བ་ལས་བྱུང་བ་ནི་ཐོས་པ་དང་བསམ་པ་དག་སྟེ། ལོག་པར་ལྟ་བ་འབྱུང་བའི་སྔར་ཆུང་ངུའི་ཆུང་ངུའི་གནས་སྐབས་ཁོ་ནར་དགེ་བའི་རྩ་བ་དག་གིས་ཐོབ་པ་ཆོད་པས་དེའི་ཕྱིར་དེ་དག་ལོག་པར་ལྟ་བས་མི་གཅོད་དོ། །

འདི་ལྟར་སྡིག་པའི་བསམ་པ་དང་ལྡན་པ་ལྟ་ཅི་སྨོས་སོ། །སྡིག་པའི་གྲོགས་པོ་དང་ལྡན་པ་གང་ཡིན་པ་དེ་ཉིད་ཀྱང་སྡིག་པའི་བསམ་པ་རྒྱས་པར་འཕེལ་བ་དེའི་རྐྱེན་ཉེ་བར་བསྒྲུབ་པ་ནས་དགེ་བའི་རྩ་བ་འགྲིབ་པར་འགྱུར་ལ། མི་དགེ་བའི་རྩ་བ་རྣམས་འཕེལ་

བར་འགྱུར་རོ། །དེའི་ཕྱིར་ཉིད་ཀྱིས་རིམ་གྱིས་དགེ་བ་འགྲིབས་ཤིང་མི་དགེ་བའི་རྩ་བ་འཕེལ་བར་གྱུར་པ་ལས། དེ་ལས་དུས་ཤིག་ཏུ་རྒྱུ་དང་འབྲས་བུ་ལ་སྐུར་པ་འདེབས་པའི་ལོག་པར་ལྟ་བ་སྐྱེའོ། །དེ་ལོག་པར་ལྟ་བ་དེས་དགེ་བའི་ཆོས་ཐམས་ཅད་

གཏུགས་པར་འགྱུར་ཞིང་དེའི་རྒྱུད་ལ་དགེ་བ་མི་གནས་པར་འགྱུར་ཏེ། འདི་ཙམ་གྱིས་དགེ་བ་ཆད་པ་ཞེས་བྱ་བའི་གྲངས་སུ་འགྲོའོ། །བར་ཆད་མེད་པའི་ལམ་དང་རྣམ་པར་གྲོལ་བའི་ལམ་ལྟ་བུ་ཡིན་ནོ་ཞེས་བྱ་བ་ལ་རྒྱུ་ལ་སྐུར་པ་འདེབས་པ་ནི་བར་ཆད་མེད་

Vol. 210 · folio 71b

པའི་ལམ་ལྟ་བུ་ཡིན་ཏེ། དེ་དང་ལྷན་ཅིག་དགེ་བའི་རྩ་བའི་ཐོབ་པ་དགག་པའི་ཕྱིར་རོ། །འབྲས་བུ་ལ་སྐུར་པ་འདེབས་པ་ནི་རྣམ་པར་གྲོལ་བའི་ལམ་ལྟ་བུ་ཡིན་ཏེ། དེ་དང་ལྷན་ཅིག་དེ་ལ་སྐུར་པ་འདེབས་པའི་ཐོབ་པ་སྐྱེ་བའི་ཕྱིར་རོ། །དམིགས་པའི་

དབྱེ་བས་ལོག་པར་ལྟ་བ་རྣམ་པ་གཉིས་ཡིན་པ་དེའི་ཕྱིར་ཟག་པ་དང་བཅས་པ་ལ་དམིགས་པ་ཁོ་ནས་ཡིན་གྱི་ཞེས་བྱ་བ་སྨོས་ཏེ། སྡུག་བསྔལ་བ་དང་ཀུན་འབྱུང་བ་ལ་དམིགས་པ་ཞེས་བྱ་བའི་ཐ་ཚིག་གོ། །ཟག་པ་མེད་ལ་དམིགས་པས་མེད་པ་མ་ཡིན་ནོ་ཞེས་བྱ་

བ་ནི། དེ་ལ་འགོག་པ་དང་ལམ་ལ་དམིགས་ནས་རྒྱུ་དང་འབྲས་བུ་ལ་སྐུར་པ་འདེབས་པ་མེད་པའི་ཕྱིར་རོ། །ཟག་པ་དང་བཅས་པ་ལ་དམིགས་པ་ཡང་སྐལ་བ་མཉམ་པ་དང་སྐལ་བ་མི་མཉམ་པའི་ཁམས་ལ་དམིགས་པས་རྣམ་པ་གཉིས་ཡིན་པ་དེའི་ཕྱིར་

སྐལ་བ་མཉམ་པའི་ཁམས་ལ་དམིགས་པ་ཁོ་ན་ཡིན་གྱི་ཞེས་བྱ་བ་སྨོས་ཏེ། འདོད་པའི་ཁམས་ལ་དམིགས་པ་ཁོ་ནས་ཡིན་ནོ་ཞེས་བྱ་བའི་དོན་ཏོ། །སྐལ་བ་མི་མཉམ་པའི་ཁམས་ལ་དམིགས་པ་ནི་མ་ཡིན་ཏེ་ཞེས་བྱ་བ་ནི་གཟུགས་དང་གཟུགས་མེད་པའི་

ཁམས་ལ་དམིགས་པ་མ་ཡིན་ནོ། །ཡང་ཅིའི་ཕྱིར་གང་ཟག་པ་མེད་པ་ལ་དམིགས་པ་དང་། སྐལ་བ་མི་མཉམ་པའི་ཁམས་ལ་དམིགས་པས་དགེ་བའི་རྩ་བ་རྣམས་ཀུན་ཏུ་མི་གཅོད་ཅེ་ན། དེའི་ཕྱིར་མཚུངས་པར་ལྡན་པ་ཙམ་གྱི་སྒོ་ནས་རྒྱས་པར་ཉམ་

ཆུང་བའི་ཕྱིར་རོ་ཞེས་བྱ་བ་སྨོས་ཏེ། ཟག་པ་མེད་པ་དང་གོང་མའི་ཡུལ་ཅན་གྱི་ལོག་པར་ལྟ་བ་ནི་སེམས་ལས་བྱུང་བ་གང་དག་དང་མཚུངས་པར་ལྡན་པ་དེ་དག་ཁོ་ན་ལ་རྒྱས་པར་གྱུར་གྱི་དམིགས་པ་དེ་ནི་མ་ཡིན་ནོ། །ཙམ་ཞེས་བྱ་བའི་སྒྲ་ནི་དམིགས་པའི་སྒོ་ནས་རྒྱས་

པར་འགྱུར་གྱི་བར་བསལ་བའི་ཕྱིར་རོ། །འདི་སྐད་དུ་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་སོ། །ཀུན་གྱི་ཞེས་བྱ་བ་ནི་ཟག་པ་དང་བཅས་པ་དང་ཟག་པ་མེད་པ་ལ་དམིགས་པས་དང་། སྐལ་བ་མཉམ་པ་དང་མི་མཉམ་པའི་ཁམས་ལ་དམིགས་པས་སོ། །རྣམ་པ་དགུ་ཆར་ཡང་

Vol. 210 · folio 72a

ཞེས་བྱ་བ་རྒྱས་པར་འབྱུང་སྟེ། ཆུང་ངུ་དང་འབྲིང་དང་ཆེན་པོ་རྣམས་ལས་རེ་རེ་ལ་ཆུང་ངུ་དང་འབྲིང་དང་ཆེན་པོར་ཕྱེ་བས་རྣམ་པ་དགུ་ཡིན་ནོ། །ཇི་ལྟར་མཐོང་བས་སྤང་བར་བྱའི་ཉོན་མོངས་པ་རྣམ་པ་དགུ་ཆར་ཡང་སྡུག་བསྔལ་ལ་ཆོས་ཤེས་པའི་བཟོད་

པ་ལ་སོགས་པ་དག་གིས་ཅིག་ཅར་སྤོང་བ་དེ་བཞིན་དུ། དགེ་བའི་རྩ་བ་རྣམ་པ་དགུ་ཆར་ཡང་ལོག་པར་ལྟ་བ་ཆེན་པོས་ཅིག་ཅར་ཀུན་ཏུ་གཅོད་དོ་ཞེས་བྱེ་བྲག་ཏུ་སྨྲ་བ་རྣམས་དེ་སྐད་ཅེས་ཟེར། དེ་ལྟར་ན་གཞུང་འདི་སྐྱབས་པ་ཡིན་ནོ་ཞེས་བྱ་བ་ནི། གལ་ཏེ་བསྒོམ་

པས་སྤང་བར་བྱ་བའི་ཉོན་མོངས་པ་ལྟར་རིམ་གྱིས་ཀུན་ཏུ་འཆད་ཀྱི་གཞན་དུ་ནི་མ་ཡིན་ནོ། །འོ་ན་མི་དགེ་བའི་རྩ་བའི་ཆེན་པོས་ཞེས་བྱ་བ་ནི་གལ་ཏེ་རིམ་གྱིས་ཡིན་ནའོ། །གཞུང་འདི་ལས་ནི་མི་དགེ་བའི་རྩ་བ་ཆེན་པོ་དག་གིས་དགེ་བའི་རྩ་བ་ཀུན་ཏུ་གཅོད་པར་གསུངས་ལ།

དེ་ཡང་བསྒོམ་པས་སྤང་བར་བྱ་བའི་ཉོན་མོངས་པ་བཞིན་དུ་རིམ་གྱིས་ཀུན་ཏུ་གཅོད་པ་ལ་འགལ་བ་མེད་དོ། །འདི་སྐད་དུ་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་སོ། །གཉི་གར་ཞེས་བྱ་བ་ནི་ལངས་པ་དང་མ་ལངས་པར་རོ། །སྔར་སྡོམ་པ་སྤོང་ལ་ཞེས་བྱ་བ་ནི་སྦྱོར་བ་

ལས་བྱུང་བའི་སེམས་ཀྱི་འབྲས་བུ་ཡིན་པའི་ཕྱིར་རོ། །ཕྱིས་དགེ་བའི་རྩ་བ་རྣམས་ཀུན་ཏུ་གཅོད་དོ་ཞེས་བྱ་བ་ནི་སྐྱེས་ནས་ཐོབ་པ་རྣམས་ཁོ་ན་ཀུན་ཏུ་འཆད་པའི་ཕྱིར་རོ། །འདི་སྐད་ཅེས་བྱ་བ་བྱེ་བྲག་ཏུ་སྨྲ་བ་རྣམས་སོ། །སྡོམ་པ་སེམས་གང་གི་འབྲས་བུ་ཡིན་

པ་ཞེས་བྱ་བ་རྒྱས་པར་འབྱུང་ངོ་། །སེམས་ནི་རྣམ་པ་གཉིས་ཏེ་སྐྱེས་ནས་ཐོབ་པ་དང་སྦྱོར་བ་ལས་འབྱུང་བའོ། །དེ་རེ་རེ་ལ་ཡང་རྣམ་པ་དགུ་སྟེ། དེ་ལ་སྡོམ་པ་སེམས་གང་གི་འབྲས་བུ་ཡིན་པ་དེ་སྤངས་པས། དེའི་འབྲས་བུ་སྡོམ་པ་ཡང་གཏོང་ངོ་། །དེ་ལ་

གལ་ཏེ་སྐྱེས་ནས་ཐོབ་པའི་སེམས་ཆུང་ངུའི་ཆུང་ངུས་སྡོམ་པ་མནོས་ན་ནི། དེའི་ཕྱིར་ཅིག་ཅར་དགེ་བའི་རྩ་བ་ཀུན་ཏུ་འཆད་པ་དང་སྡོམ་པ་གཏོང་བ་ཡིན་ནོ། །གལ་ཏེ་གཞན་དག་གིས་མནོས་ན་ནི་དེའི་ཕྱིར་སྔར་སྡོམ་པ་གཏོང་ལ། ཕྱིས་དགེ་བའི་རྩ་བ་

Vol. 210 · folio 72b

ཀུན་ཏུ་ཆད་པས་འཐའ་གཅིག་ཏུ་སྨྲ་བར་མི་རིགས་སོ། །ཤེས་རབ་ཉོན་མོངས་པ་ཅན་མ་ཡིན་པ་དག་མི་བརྟན་པའི་ཕྱིར་རོ་ཞེས་བྱ་བ་ནི། སྡུག་བསྔལ་གྱི་ཚོར་བ་དྲག་པོས་ཉེན་པའི་ཕྱིར་དམྱལ་བ་དང་ཡི་དགས་དག་ན་ཡང་མི་བརྟན་པ། གཏི་མུག་ཤས་ཆེ་བའི་

ཕྱིར་དུད་འགྲོ་དག་ན་ཡང་མ་བསྟན་ནོ། །ལས་ཀྱི་འབྲས་བུ་མངོན་སུམ་དུ་གྱུར་པའི་ཕྱིར་རོ་ཞེས་བྱ་བ་ནི་ལྷའི་བུ་སྐྱེས་ནས་རིང་པོ་མ་ལོན་པ་ལ་བདག་གང་ནས་ཤི་འཕོས། གང་དུ་ནི་སྐྱེས་ལས་ནི་གང་ཞིག་གིས་སྐྱེས་སྙམ་པའི་སེམས་གསུམ་ཀུན་ཏུ་འབྱུང་ལ།

དེ་ཡང་ཐམས་ཅད་ཤེས་པ་ཡིན་ནོ། །བྱང་གི་སྒྲ་མི་སྙན་རང་བཞིན་གྱིས་བསམ་པ་བཟང་བའི་ཕྱིར་སྡིག་པའི་བསམ་པ་མེད་དོ། །འཛམ་བུའི་གླིང་ཁོ་ན་ན་ཡོད་དོ་ཞེས་བྱ་བ་ནི་འཛམ་བུའི་གླིང་པ་རྣམས་ཁྱད་པར་དུ་རྟོག་གེ་པ་ཡིན་པའི་ཕྱིར་རོ། །ཐམས་ཅད་

ལས་ཉུང་ན་དབང་པོ་བརྒྱད་དང་ཞེས་བྱ་བ་ནི། ལུས་དང་ཚོར་བ་རྣམས་དང་སྲོག་དང་ཡིད་དང་ལྡན་ནོ། །འདུན་པ་དང་བརྩོན་འགྲུས་དང་ཤེས་རབ་ཞན་པའི་ཕྱིར་ཞེས་བྱ་བ་ནི། བློ་འདོད་ཆགས་ཀྱིས་ཆེར་ཟིལ་གྱིས་མནན་པའི་ཕྱིར་རོ། །དེ་ནི་གདོན་

མི་ཟ་བར་དབང་པོ་བརྒྱད་རྣམས་དང་ལྡན་ཞེས་བྱ་བ་ནི། སྔར་བཤད་པ་རྣམས་ལས་ཡིད་མི་བདེ་བའི་དབང་པོ་བོར་ཏེ། མིའི་དབང་པོ་བཅུག་པ་རྣམས་དང་ངོ་། །སྡིག་པའི་བསམ་པ་བསྟན་པ་དང་མཁྱུད་པ་ཅན་ཡིན་པའི་ཕྱིར་རོ་ཞེས་བྱ་བ་ལ། སྡིག་པའི་བསམ་

པ་སྟེ་བརྣག་པའོ། །དེ་ཡང་རྒྱུན་ཆགས་སུ་ངེས་པར་རྟོག་པས་རྒྱུན་གཅད་པར་དཀའ་བའི་ཕྱིར་བསྟན་པའོ། །ལྟ་བ་རིང་དུ་རྗེས་སུ་འབྲེལ་པའི་ཕྱིར་འཆབ་པས་ན་མཁྱུད་པའོ། །མཚམས་མེད་པ་བྱེད་པ་འདི་ལ་མིན། དེ་ནི་རྐྱེན་གྱི་སྟོབས་ཀྱིས་སྐྱེས་པའི་ལོག་

པར་ལྟ་བ་ཡང་མི་གཏོང་སྟེ། ལས་དང་འབྲས་བུའི་འབྲེལ་པ་ལ་འཇིག་པའི་ཕྱིར་རོ། །གང་ཞིག་རྒྱུའི་སྟོབས་ཀྱིས་ཞེས་བྱ་བ་རྒྱས་པར་འབྱུང་སྟེ། གང་ཞིག་བདག་ཉིད་ལོག་པར་ལྟ་བ་འདོད་པ་དེ་ནི་རྒྱུའི་སྟོབས་ཀྱིས་ཀུན་ཏུ་སྤྱོད་པའོ། །འདི་ལྟར་གང་དག་གཞན་ལས་ཐོས་

Vol. 210 · folio 73a

ནས་འདོད་པ་དེ་ནི་རྐྱེན་གྱི་སྟོབས་ཀྱིས་གཅོད་པའོ། །དེ་བཞིན་དུ་གང་ཞིག་རང་གི་སྟོབས་ཀྱིས་ཞེས་བྱ་བ་ནི་རང་གི་རྟོགས་པའི་སྟོབས་ཀྱིས་སོ། །གཞན་གྱི་སྟོབས་ཀྱིས་ཞེས་བྱ་བ་ནི། གཞན་གྱིས་ཐོས་པ་ཙམ་གྱི་སྟོབས་ཀྱིས་སོ། །བསམ་པ་ཉམས་པས་ཞེས་བྱ་བ་ནི་ལོག་པར་

ལྟ་བ་མངོན་སུམ་དུ་གྱུར་པས་བསམ་པ་ཉམས་པའོ། །བསམ་པ་དང་སྦྱོར་བ་ཉམས་པ་ནི་ལོག་པར་ལྟ་ཞིང་མཚམས་མེད་པ་བྱེད་པའོ། །ལྟ་བ་ཉམས་པ་གང་ཡིན་པ་དང་ཞེས་བྱ་བ་རྒྱས་པར་འབྱུང་སྟེ། གང་ཞིག་ལྟ་བ་ཉམས་པས་དགེ་བའི་རྩ་བ་ཀུན་ཏུ་གཅོད་པར་བྱེད་པ་དེ་ནི་མཐོང་བའི་

ཆོས་ཁོ་ན་ལ་ཉིང་མཚམས་སྦྱོར་བར་འགྱུར་རོ། །གང་ཞིག་ལྟ་བ་དང་ཚུལ་ཁྲིམས་ཉམས་པས་གཅོད་པར་བྱེད་པ་དེ་ནི་ལུས་ཞིག་ནས་སོ། །མུ་དང་པོ་ནི་རྫོགས་བྱེད་ལ་སོགས་པའོ་ཞེས་བྱ་བ་ནི་ལྟ་བ་ཉམས་པའི་ཕྱིར་རོ། །གཉིས་པ་ནི་མ་སྐྱེས་དགྲའོ་ཞེས་བྱ་བ་ནི་མཚམས་མེད་

པ་བྱེད་པའི་ཕྱིར་རོ། །གསུམ་པ་ནི་ལྷས་སྦྱིན་ནོ་ཞེས་བྱ་བ་ནི་ལྟ་བ་ཉམས་པའི་ཕྱིར་དང་མཚམས་མེད་པ་བྱེད་པའི་ཕྱིར་རོ། །ལས་ཀྱི་ལམ་དུ་ཞིག་དང་སེམས་པ་ལྷན་ཅིག་འབྱུང་བ་ཞེས་བྱ་བ་རྒྱས་པར་འབྱུང་སྟེ། ལས་ཀྱི་ལམ་དགེ་བ་དང་མི་དགེ་བ་དུ་དག་གཅིག་དང་།

སེམས་པ་དགེ་བའམ་མི་དགེ་བ་འམ། ལུང་དུ་མ་བསྟན་པ་ཡང་རུང་བ་ལྷན་ཅིག་འབྱུང་ཞེས་བྱའོ། །གཞན་མེད་པར་ཞེས་བྱ་བ་ལ། ལས་ཀྱི་ལམ་གཞན་མཐར་ཕྱིན་པ་ན་ཡང་བརྣབ་སེམས་ལ་སོགས་པ་དག་ཡོད་པས་དེའི་ཕྱིར་གཞན་མེད་པར་ཞེས་བྱ་བ་སྨོས་

སོ། །སེམས་པ་ཉོན་མོངས་པ་ཅན་མ་ཡིན་པ་ཅན་ཞེས་བྱ་བ་ནི། སེམས་པ་དགེ་བ་དང་ལུང་དུ་མ་བསྟན་པའོ། །ང་རྒྱལ་དང་ཐེ་ཚོམ་ལ་སོགས་པ་ཉོན་མོངས་པ་ཅན་གྱི་སེམས་པ་ཡང་དེར་སྦྱོར་བར་བྱེད་པ། གཟུགས་ཅན་རྣམས་ལས་གང་ཡང་རུང་བ་མཐར་ཕྱིན་

པར་འགྱུར་བ་ལ། ལས་ཀྱི་ལམ་སེམས་པ་གཅིག་དང་ལྷན་ཅིག་འཇུག་གོ། །གཞན་དག་ན་རེ་མྱུར་བར་བགྲོད་པའོ་ཞེས་ཟེར་རོ། །གཟུགས་ཅན་རྣམས་ལས་ཞེས་བྱ་བ་ནི་འདོད་པས་ལོག་པར་གཡེམ་པ་མ་གཏོགས་པ་རྣམས་སོ། །གནོད་སེམས་སུ་གྱུར་པ་སྲོག་

Vol. 210 · folio 73b

གཅོད་པ་ཞེས་བྱ་བ་ནི་ཞེ་སྡང་གིས་སྲོག་གཅོད་པ་མཐར་ཕྱིན་པས་དེའི་ཚེ་གདོན་མི་ཟ་བར་སྲོག་གཅོད་པ་དང་གནོད་སེམས་དང་སེམས་པ་ལྷན་ཅིག་འབྱུང་ངོ་། །བརྣབ་སེམས་དང་ལྡན་པ་ཞེས་བྱ་བ་ནི་མ་བྱིན་པར་ལེན་པ་དང་ལོག་པར་གཡེམ་པ་གཉིས་ཆགས་པས་མཐར་

ཕྱིན་པར་བྱེད་པའི་ཕྱིར་གཉིས་དང་སེམས་པ་ལྷན་ཅིག་འབྱུང་སྟེ། བརྣབ་སེམས་དང་མ་བྱིན་པར་ལེན་པའམ། འདོད་པས་ལོག་པར་གཡེམ་པ་དང་ངོ་། །ཚིག་ཀྱལ་པ་མཐར་ཕྱིན་པ་ན་ཡང་བརྣབ་སེམས་ལ་སོགས་པ་གང་ཡང་རུང་བ་ཡོད་པ་ཡིན་ནོ། །དེ་ལྟར་རེ་

ཞིག་རང་གིས་བྱེད་པ་དང་གཞན་གྱིས་བྱེད་པ་ལ་ཡང་ངོ་། །བརྣབ་སེམས་ལ་སོགས་པ་གང་ན་ཡང་རུང་བའི་སེམས་ཀྱིས་དེ་རྫོགས་པར་བྱེད་པ་ལ་ནི་སེམས་པ་གཉིས་དང་ལྷན་ཅིག་འཇུག་གོ། །གནོད་སེམས་སུ་གྱུར་པ་སྲོག་གཅོད་པ་དང་བརྣབ་སེམས་དང་ལྡན་པ་མ་བྱིན་

པར་ལེན་པ་ཞེས་བྱ་བ་ནི་ཁྱད་པར་གསལ་བའི་དོན་ཅན་ནོ། །ཁ་ཅིག་ནི་ལས་ཀྱི་ལམ་གྱི་རང་བཞིན་བསྟན་པའི་དོན་དུ་དེ་ལྟར་བཤད་ཀྱི་རྣམ་པར་བཅད་པའི་དོན་མ་ཡིན་ནོ། །ཅིག་ཅར་དུ་ཞེས་བྱ་བ་ནི་གནས་ནས་བསྐྱོད་བཞིན་པ་ན་གསོད་པ་སྟེ། དེ་ལྟར་ན་གནོད་

སེམས་དང་སྲོག་གཅོད་པ་དང་མ་བྱིན་པར་ལེན་པ་དང་གསུམ་ལྷན་ཅིག་འབྱུང་བ་ཡིན་ནོ། །ངེས་པ་ནི་སེམས་གཞན་དང་མི་ལྡན་པའི་ཞེས་བྱ་བ་ལ། ངེས་པ་ནི་གཞན་གྱི་ནོར་འཕྲོག་པའི་སེམས་དང་ལྡན་པ་ཁོ་ན་ལ་བཤད་པར་བྱ་སྟེ། འདིར་ནི་འདི་ལ་སྲོག་ཆགས་

གསད་པར་བྱའོ་སྙམ་པའི་སེམས་གཞན་ཡང་ཡོད་པས་དེའི་ཕྱིར་འགལ་བ་མེད་དོ། །རྣམ་པ་གཞན་དུ་ཡང་གསུམ་དང་ལྷན་ཅིག་འབྱུང་བ་ནི། བདག་ཉིད་འདོད་པས་ལོག་པར་གཡེམ་པ་ལ་སྦྱོར་བ་དེའི་སྦྱོར་བས་སྲོག་གཅོད་པ་ལ་སོགས་པ་གང་ཡང་རུང་བ་

མཐར་ཕྱིན་པར་བྱེད་པའོ། །དེ་བཞིན་དུ་བདག་ཉིད་སྲོག་གཅོད་པ་ལ་སོགས་པ་ལ་འཇུག་པ་ལ་ཡང་སྦྱར་བར་བྱ་སྟེ། འགྲེལ་པ་ལས་ནི་དཔེར་བརྗོད་པ་ཙམ་ཞིག་བཤད་པའོ། །དེ་ལ་ནི་ཡིད་ཀྱི་གཅིག་ཡིན་ལ་ཞེས་བྱ་བ་ནི། བརྣབ་སེམས་ལ་སོགས་པ་གང་

Vol. 210 · folio 74a

ཡང་རུང་བའོ། །ངག་གི་ནི་གསུམ་ཡིན་ནོ་ཞེས་བྱ་བ་ནི། བརྫུན་གྱི་ཚིག་སྨྲ་ན་ནི་བརྫུན་དུ་སྨྲ་བ་དང་། དབྱེན་དང་། ཚིག་ཀྱལ་པའོ། །ཚིག་རྩུབ་པོ་སྨྲ་ན་ནི་ཚིག་རྩུབ་པོ་དང་། ཕྲ་མ་དང་ཚིག་ཀྱལ་པའོ། །འདི་ནི་ཉོན་མོངས་

ཅན་ཀུན་ཀྱལ་པ་ཉིད་ཅེས་བྱ་བའི་དབང་དུ་བྱས་ནས་བཤད་དེ། གང་གི་ཚེ་དེ་ལས་གཞན་ཉོན་མོངས་ཅན་ཞེས་བྱ་བ་ཁས་བླངས་ནས་འཆད་ན་ནི་དེའི་ཚེ་གསུམ་ཁོ་ན་དང་། ལྷན་ཅིག་འབྱུང་བ་ནི་དབྱེན་བྱ་བའི་བསམ་པ་དང་ལྡན་པ་བརྫུན་གྱི་ཚིག་གམ། །ཚིག་

རྩུབ་མོ་སྨྲ་ན་སྟེ་ཞེས་བརྗོད་པར་བྱའོ། །ཡང་ན་བརྣབ་སེམས་ལ་སོགས་པར་གྱུར་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲ་ནི། གནོད་སེམས་དང་ལོག་པར་ལྟ་བ་དང་སྦྱར་རོ། །ལྔ་དང་དྲུག་དང་བདུན་དང་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་ནི། བརྣབ་

སེམས་ལ་སོགས་པར་གྱུར་པ་དེའི་སྦྱོར་བས་བཞི་དང་ལྔ་དང་དྲུག་ཅིག་ཅར་མཐར་ཕྱིན་པར་བྱེད་ན། ལྔ་དང་དྲུག་དང་བདུན་དང་སེམས་པ་ལྷན་ཅིག་འབྱུང་ངོ་། །དྲུག་ལ་སྦྱོར་བ་བྱས་ནས་ཞེས་བྱ་བ་ནི། འདོད་པས་ལོག་པར་གཡེམ་པ་མ་གཏོགས་པ་

ལའོ། །འདོད་པས་ལོག་པར་གཡེམ་པ་བདག་ཉིད་ཀྱིས་བྱེད་པ་ཞེས་བྱ་བ་ནི། དེ་གཞན་གྱིས་ཡོངས་སུ་རྫོགས་པ་མེད་པའི་ཕྱིར་རོ། །འདིར་ནི་བརྣབ་སེམས་བརྒྱད་པར་འགྱུར་རོ། །ཡང་ཅིའི་ཕྱིར་དགུའམ་བཅུ་དང་ལྷན་ཅིག་མི་འབྱུང་ཞེ་ན།

བརྣབ་སེམས་ལ་སོགས་པ་རྣམས་ལ་ཕན་ཚུན་མཚུངས་པར་ལྡན་པ་མེད་པའི་ཕྱིར་རོ། །ཡང་ཅིའི་ཕྱིར་མི་ཚངས་པར་སྤྱོད་པ་ནི་བདག་ཉིད་ཁོ་ནས་མཐར་ཕྱིན་པར་བྱེད་ལ། སྲོག་གཅོད་པ་ལ་སོགས་པ་མ་ཡིན་ནོ་ཞེ་ན། སེམས་ཉོན་མོངས་པ་ཅན་མ་

ཡིན་པའི་གསོད་པ་ལ་སོགས་པ་དང་མཚུངས་པར་ལྡན་པ་མེད་ལ། མི་ཚངས་པར་སྤྱོད་པ་དེ་ཉོན་མོངས་པ་ཅན་གྱི་སེམས་དང་མཚུངས་པར་ལྡན་པས་བུའམ་བུ་མོ་ཉོན་མོངས་པའི་རང་བཞིན་གང་ཡིན་པ་དེས་འཇོམས་པར་བྱེད་དོ། །དེའི་རང་བཞིན་

Vol. 210 · folio 74b

གཞན་དང་མི་ལྡན་པས་ནི་དེའི་རིགས་ཀྱིས་རང་ཉིད་ལ་ལོག་པར་མ་སྒྲུབ་ལ། དེའི་རིགས་ཉིད་ཀྱིས་གཞན་ལ་ལོག་པར་སྒྲུབ་པར་བྱེད་དོ། །བགྲོད་བྱ་མ་ཡིན་པ་ལ་བགྲོད་པ་སྤངས་པ་ལ་བདག་པོ་བུ་མོས་བྱིན་ན། འདི་བགྲོད་བྱ་མ་ཡིན་པ་ལ་

བགྲོད་པར་མི་འགྱུར་རོ། །སྲོག་གཅོད་པ་སྤངས་པ་གཞན་གྱི་སྲོག་གཅོད་པ་དང་ལྡན་ན་སྲོག་ཆགས་གསོད་པ་པོར་འགྱུར་རོ། །ཡང་ཅིའི་ཕྱིར་སྲོག་ཆགས་གསོད་པ་སྤོང་བ་གཞན་ལས་ཡང་དག་པར་བླངས་པས་སྲོག་ཆགས་གསོད་པ་སྤོང་བ་

ཐོབ། སྲོག་ཆགས་གསོད་པ་ལ་ངེས་པར་སྦྱར་བས་སྲོག་ཆགས་གསོད་པར་འགྱུར་བ་དེ་ཡང་གསོད་པའི་སེམས་མེད་པར་གཞན་ལས་མ་ཡིན་ནོ། །སྤོང་བའི་སེམས་མེད་པར་ཡང་སྲོག་གཅོད་པ་སྤོང་བ་ཡང་དག་པར་ལེན་པར་

བྱེད་དེ། གཞན་ལས་ཚུལ་ཁྲིམས་ཡང་དག་པར་ལེན་པ་བཞིན་ནོ། །འདི་ནི་མི་མཚུངས་ཏེ། རང་གི་རྟེན་ལས་ཚུལ་ཁྲིམས་དང་གཞན་གྱི་རྟེན་ལས་ཚུལ་ཁྲིམས་འཆལ་པ་སྟེ། དེའི་ཕྱིར་ཚུལ་ཁྲིམས་འཆལ་པ་ཡང་དག་པར་ལེན་པ་བཅུག་པས་

ཚུལ་ཁྲིམས་འཆལ་བ་དང་། ཚུལ་ཁྲིམས་ཡང་དག་པར་ལེན་དུ་བཅུག་པས་ཚུལ་ཁྲིམས་དང་ལྡན་པ་སྟེ། རྟེན་ཅིང་འབྲེལ་པར་འབྱུང་བ་རྣམ་པར་བགྱི་བའོ། །དེ་བཞིན་དུ་སྲོག་ཆགས་གསོད་པ་ལ་སྦྱར་བས་ཤི་བ་ནི་སྲོག་གཅོད་པ་པོར་འགྱུར་

རོ། བྱེ་བ་དང་མ་བྱེ་བ་དག་ལ་ཕྲ་མ་ཡང་དེ་བཞིན་ནོ། །ཚུལ་ཁྲིམས་ཡང་དག་པར་བླངས་པས་ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་ཡང་དག་པར་བླངས་པ་ལས་ཚུལ་ཁྲིམས་འཆལ་པར་འགྱུར་བ་དེ་ལ་ཡང་སྲོག་ཆགས་གསོད་

དུ་བཅུག་པས་ནི་སྲོག་གཅོད་པ་པོར་འགྱུར་གྱི། མི་ཚངས་པར་སྤྱོད་པ་བྱེད་དུ་བཅུག་པས་ནི་མི་ཚངས་པར་སྤྱོད་པར་མི་འགྱུར་རོ། །གཅིག་དང་ལྔ་དང་བརྒྱད་དང་མིན་ཞེས་བྱ་བ་ལ། རེ་ཞིག་གཅིག་དང་ལྷན་ཅིག་འབྱུང་བ་ནི་མ་ཡིན་ཏེ། བརྣབ་སེམས་མེད་པ་དང་གནོད་

Vol. 210 · folio 75a

སེམས་མེད་པ་གཉིས་ཕན་ཚུན་འཁྲུལ་པ་མེད་པའི་ཕྱིར་དང་། ཡང་དག་པའི་ལྟ་བ་ཁོ་ན་དེ་དག་ལ་དེ་འཁྲུལ་པའི་ཕྱིར་དང་། སྤོང་བ་གཅིག་གི་བདག་ཉིད་སྡོམ་པ་མེད་པའི་ཕྱིར་རོ། །བརྒྱད་དང་ལྷན་ཅིག་འབྱུང་བ་ཡང་མ་ཡིན་

ཏེ། སྤོང་བ་ལྔ་ཡང་དྲུག་གམ་བརྒྱད་ཀྱི་བདག་ཉིད་ཀྱི་སྡོམ་པ་མེད་པའི་ཕྱིར་རོ། །ལྔ་དང་ལྷན་ཅིག་འབྱུང་བ་ཡང་མ་ཡིན་ཏེ། སྤོང་བ་གཉིས་དང་། །གསུམ་དང་། ལྔའི་བདག་ཉིད་ཀྱི་སྡོམ་པ་མེད་པའི་ཕྱིར་རོ། །དགེ་བའི་རྣམ་པར་ཤེས་པ་ལྔ་ལ་གནས་པ་

ཞེས་བྱ་བ་ནི། དེ་ན་ཡང་དག་པའི་ལྟ་བ་མེད་པས་བརྣབ་སེམས་མེད་པ་དང་། གནོད་སེམས་མེད་པ་གཉིས་དང་ལྷན་ཅིག་འབྱུང་ངོ་། །དགེ་བའི་སེམས་ཐམས་ཅད་དགེ་བ་གསུམ་དང་མཚུངས་པར་ལྡན་པའི་ཕྱིར་གཟུགས་མེད་པའི་ཞེས་བྱ་བ་ལ། གཟུགས་

མེད་པ་སྨོས་པ་ནི་བསམ་གཏན་གྱི་སྙོམས་པར་འཇུག་པ་ལ་བསམ་གཏན་གྱི་སྡོམ་པ་ཡོད་པ་རྣམ་པར་གཅད་པར་བྱ་བའི་ཕྱིར་རོ། །ཟད་པ་དང་མི་སྐྱེ་བའི་ཤེས་པ་དག་པའི་ལྟ་བའི་བདག་ཉིད་མ་ཡིན་པའི་ཕྱིར་བརྣབ་སེམས་མེད་པ་དང་། གནོད་སེམས་མེད་པ་

གཉིས་ཁོ་ན་དང་སེམས་པ་ལྷན་ཅིག་འབྱུང་ངོ་། །ཡིད་ཀྱི་གསུམ་ཁོ་ན་དང་ལྷན་ཅིག་འབྱུང་བའི་ནི་སྡོམ་པ་བླངས་པར་མ་གྱུར་པ་ཡང་དག་པའི་ལྟ་བ་དང་མཚུངས་པར་ལྡན་པའི་ཡིད་ཀྱི་རྣམ་པར་ཤེས་པ་ལ་གནས་པའོ། །བཞི་དང་ལྷན་ཅིག་འབྱུང་བ་ནི་མི་

དགེ་བའི་ལུང་དུ་མ་བསྟན་པའི་སེམས་དང་ལྡན་པ་ཞེས་བྱ་བ་རྒྱས་པར་འབྱུང་སྟེ། དེ་ལ་ནི་བརྣབ་སེམས་མེད་པ་ལ་སོགས་པ་ཡིད་ཀྱི་ཡོད་པ་མ་ཡིན་ལ། དགེ་བསྙེན་དང་དགེ་ཚུལ་གྱི་སྡོམ་པ་དག་ཀྱང་སྤོང་བ་བཞིའི་བདག་ཉིད་ཡིན་པའི་ཕྱིར་རོ། །དེ་ཡང་དག་

པར་ལེན་པ་ནའོ་ཞེས་བྱ་བ་ནི། དགེ་བསྙེན་དང་། དགེ་ཚུལ་གྱི་སྡོམ་པ་ཡང་དག་པར་ལེན་པར་ན་སྟེ། དགེ་བའི་རྣམ་པར་ཤེས་པའི་ཚོགས་ལྔ་ལ་གནས་པ་ལ་ནི་ཡང་དག་པའི་ལྟ་བ་མེད་པས་དྲུག་དང་ལྷན་ཅིག་འབྱུང་ངོ་། །བདུན་དང་ལྷན་ཅིག་འབྱུང་བ་ནི་

Vol. 210 · folio 75b

དགེ་བའི་ཡིད་ཀྱི་རྣམ་པར་ཤེས་པ་ལ་གནས་ཏེ་ཞེས་བྱ་བ་ནི། དེ་ལས་ཡང་དགེ་བའི་ལྟ་བ་བླ་ལྷག་ཏུ་བསྣན་ཏེ་བདུན་དང་ལྷན་ཅིག་འབྱུང་ངོ་། །མི་དགེ་བ་དང་ལུང་དུ་མ་བསྟན་པའི་སེམས་དང་ལྡན་པ་ཞེས་བྱ་བ་རྒྱས་པར་འབྱུང་སྟེ། དེ་ལ་ནི་ཡིད་ཀྱི་བརྣབ་

སེམས་མེད་པ་ལ་སོགས་པ་མེད་ལ། དགེ་སློང་གི་སྡོམ་པ་ཡང་སྤོང་བ་བདུན་གྱི་བདག་ཉིད་ཡིན་པའི་ཕྱིར་བདུན་ཁོ་ན་དང་སེམས་པ་ལྷན་ཅིག་འབྱུང་ངོ་། །དགུ་དང་ལྷན་ཅིག་འབྱུང་བ་ནི་དགེ་བའི་རྣམ་པར་ཤེས་པ་ལྔ་ལ་གནས་པ་ན་ཞེས་བྱ་བ་ནི། དགེ་སློང་

གི་སྡོམ་པས་བསྡུས་པ་སྤོང་བ་བདུན་དང་། བརྣབ་སེམས་མེད་པ་དང་། གནོད་སེམས་མེད་པ་དང་ཡིན་ཏེ། དེ་ལ་ཡང་དག་པའི་ལྟ་བ་མེད་པའི་ཕྱིར་རོ། །ཟད་པ་དང་མི་སྐྱེ་བ་ཤེས་པས་བསྡུས་པའི་ཡིད་ཀྱི་རྣམ་པར་ཤེས་པ་ལ་གནས་པ་དགེ་སློང་གི་

སྡོམ་པ་ཡང་དག་པར་ལེན་པ་ན་དགུ་དང་སེམས་པ་ལྷན་ཅིག་འབྱུང་ངོ་ཞེས་བྱ་བར་སྐབས་དང་སྦྱར་ཏེ། དེ་ལ་ནི་དགེ་སློང་གི་སྡོམ་པས་བསྡུས་པས་གཟུགས་ཅན་བདུན་དང་། བརྣབ་སེམས་མེད་པ་དང་། གནོད་སེམས་མེད་པ་འབྱུང་ངོ་། །དེ་ཉིད་ཀྱི་ཕྱིར་དེ་ཉིད་བསམ་

གཏན་གྱིས་བསྡུས་པ་ཞེས་བྱ་བ་སྨོས་སོ། །ཟད་པ་དང་མི་སྐྱེ་བ་ཤེས་པ་དང་མཚུངས་པར་ལྡན་པའི་ཡིད་ཀྱི་རྣམ་པར་ཤེས་པའི་བསམ་གཏན་གྱིས་བསྡུས་པའི་ལ་གནས་པ་ནི་དགུ་དང་ལྷན་ཅིག་འབྱུང་སྟེ། དགེ་སློང་གི་སྡོམ་པ་ཡང་དག་པར་ལེན་པ་མེད་ཀྱང་སྙམ་དུ་

དགོངས་སོ། །དེ་ལ་ནི་ཟག་པ་མེད་པའི་སྡོམ་པས་བསྡུས་པའི་བདུན་དང་བརྣབ་སེམས་མེད་པ་ལ་སོགས་པ་ཡོད་དོ། །བསམ་གཏན་གྱིས་བསྡུས་པའི་ཞེས་བྱ་བ་ནི། གཟུགས་མེད་པས་བསྡུས་པ་ལས་ཁྱད་པར་དུ་བྱ་བའི་ཕྱིར་རོ། །བཅུ་དང་ལྷན་ཅིག་འབྱུང་བའི་

ནི་དེ་ལས་གཞན་ཞེས་བྱ་བ་ནི། ཟད་པ་དང་མི་སྐྱེ་བ་ཤེས་པ་དང་མཚུངས་པར་ལྡན་པ་ལས་གཞན་པའི་དགེ་བ་ཡིད་ཀྱི་རྣམ་པར་ཤེས་པའོ། །ཅི་ཐམས་ཅད་ཀྱི་ཚེ་འདོད་པར་གཏོགས་པ་དང་གཟུགས་སུ་གཏོགས་པ་ལ་གནས་པ་བཞི་བཅུ་དང་ལྷན་ཅིག་འབྱུང་ངམ་

Vol. 210 · folio 76a

ཞེ་ན་མ་ཡིན་ནོ། །འོ་ན་ཅི་ཞེ་ན་དགེ་སློང་གི་སྡོམ་པ་ཡང་དག་པར་ལེན་པ་ཁོ་ནའོ། །ཟད་པ་དང་མི་སྐྱེ་བ་ཤེས་པ་དག་མ་གཏོགས་པ་ཞེས་བྱ་བ་ནི་དགུ་དང་ཞེས་དེ་དག་གི་ཚུལ་ནི་བཤད་ཟིན་པའི་ཕྱིར་རོ། །བསམ་གཏན་དང་ཟག་པ་མེད་པའི་སྡོམ་པ་

གཞན་ལྷན་ཅིག་འབྱུང་བའི་སེམས་པ་ཐམས་ཅད་ཅེས་བྱ་བ་ནི་བཅུ་དང་ལྷན་ཅིག་གོ་ཞེས་བྱ་བར་སྐབས་དང་སྦྱར་རོ། །རེ་ཞིག་འདི་སྡོམ་པས་བསྡུས་པ་ལས་ཀྱི་ལམ་རྣམས་ཀྱིས་ངེས་པ་ཡིན་ནོ། །སེམས་གཞན་དང་ལྡན་པ་ཞེས་བྱ་བ་ནི། མི་དགེ་བ་དང་ལུང་དུ་མ་བསྟན་

པའི་སེམས་དང་ལྡན་པའོ། །སྤོང་བའི་ཡན་ལག་གཅིག་ཡང་དག་པར་ལེན་ནའོ་ཞེས་བྱ་བ་ནི། སྲོག་གཅོད་པ་འམ་མ་བྱིན་པར་ལེན་པའི་ཡན་ལག་གཅིག་སྤོང་བ་ཡང་དག་པར་ལེན་པ་ན་གཅིག་ཁོ་ན་དང་སེམས་པ་ལྷན་ཅིག་འབྱུང་ངོ་། །གཉིས་དང་ལྔ་ཡང་དག་པར་ལེན་པ་

ནའོ་ཞེས་བྱ་བ་ལ། ཡན་ལག་གཉིས་ཡང་དག་པར་ལེན་པ་ན་ནི་ལྔ་དང་ལྷན་ཅིག་འབྱུང་སྟེ། ཡིད་ཀྱི་གསུམ་དང་ལུས་དང་ངག་གི་གཉིས་དང་ངོ་། །ཡན་ལག་ལྔ་ཡང་དག་པར་ལེན་པ་ན་ནི་བརྒྱད་དང་ལྷན་ཅིག་ཅིག་ཅར་འབྱུང་སྟེ། དེ་ལ་ནི་གཟུགས་ཅན་ལྔ་དང་ཡིད་ཀྱི་གསུམ་འབྱུང་ངོ་། །ཕན་ཚུན་

བརྒྱད་བཀག་བྱེད་པའི་ཕྱིར་ཚིག་རྩུབ་མོ་ཡིན་ནོ་ཞེས་བྱ་བ་ནི། སྡུག་བསྔལ་གྱིས་ཉམ་ཐག་པའི་དམྱལ་བ་རྣམས་དམྱལ་སྲུང་དག་ལ་སྤྱོ་བར་བྱེད་ལ། དམྱལ་སྲུང་དག་ཀྱང་དམྱལ་བ་རྣམས་ལ་སྤྱོ་བའམ། དམྱལ་བ་རྣམས་ཁོ་ན་ཕན་ཚུན་སྤྱོ་བའོ། །རྒྱུད་རྩུབ་པོས་ཞེས་བྱ་བ་ནི།

སྡུག་བསྔལ་གྱི་ཚོར་བས་ཟིལ་གྱིས་ནོན་པའི་ཕྱིར་ཏེ། ཡིད་དུ་འོང་བའི་དངོས་པོ་མེད་པའི་ཕྱིར་རོ། །ཆགས་པར་བྱ་བའི་དངོས་པོ་མེད་པའི་ཕྱིར་མངོན་དུ་གྱུར་པའི་སྒོ་ནས་བརྣབ་སེམས་ཀུན་ཏུ་སྤྱོད་པ་མེད་དོ། །ལས་ཀྱི་འབྲས་བུ་མངོན་སུམ་དུ་གྱུར་པའི་ཕྱིར་ལོག་པར་ལྟ་

བ་མེད་དོ། །འདུ་ཤེས་རྒུད་པའི་ཕྱིར་བརྫུན་དུ་སྨྲ་བ་མེད་དོ། །དེ་དག་རྟག་པ་ཁོ་ན་འདུ་ཤེས་པས་དེ་ན་བརྫུན་དུ་སྨྲ་བ་མེད་དོ་ཞེས་གཞན་དག་ཟེར་རོ། །དེ་ཉིད་ཀྱི་ཕྱིར་ཞེས་བྱ་བ་ནི། དགོས་པ་མེད་པའི་ཕྱིར་ཕྲ་མ་མེད་པའོ། །རྟག་ཏུ་བྱེ་ཟིན་པའི་ཕྱིར་ཞེས་བྱ་བས་ནི་དེ་ན་ཡུལ་མེད་པའི་

Vol. 210 · folio 76b

ཕྱིར་ཕྲ་མ་མེད་དོ་ཞེས་བསྟན་ཏོ། །ང་ཡིར་འཛིན་པ་མེད་པའི་ཕྱིར་བརྣབ་སེམས་མངོན་དུ་གྱུར་པའི་སྒོ་ནས་མེད་དོ། །འཇམ་པའི་ཕྱིར་དང་ཀུན་ནས་མནར་སེམས་ཀྱི་དངོས་པོ་མེད་པའི་ཕྱིར་གནོད་སེམས་མེད་དེ། གནོད་སེམས་ནི་རྒྱུའི་སྟོབས་དང་རྐྱེན་གྱི་སྟོབས་

ཀྱིས་སྐྱེ་ན་དེ་གཉི་ག་ཡང་དེ་ན་མེད་དོ། །དེའི་ཕྱིར་གནོད་སེམས་མངོན་དུ་གྱུར་པ་མེད་དོ། །སྡིག་པ་ཅན་གྱི་བསམ་པ་མེད་པའི་ཕྱིར་སྲོག་གཅོད་པ་ལ་སོགས་པ་དྲུག་ཀྱང་ལྡན་པའི་སྒོ་ནས་མེད་ཅིང་མངོན་དུ་གྱུར་པའི་སྒོ་ནས་ཀྱང་མེད་དོ། །འདོད་པ་ན་གཟུགས་ཀྱི་སྔར་ནི་སྐྱེ་བ་མེད་ཅེས་ངེས་

པའི་ཕྱིར་རོ། །གཞན་ཡང་ཚེ་ངེས་པའི་ཕྱིར་སྲོག་གཅོད་པ་མེད་དོ། །རྫས་དང་བུད་མེད་ཡོངས་སུ་གཟུང་བ་མེད་པའི་ཕྱིར་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་དག་མེད་དོ། །དགོས་པ་མེད་པའི་ཕྱིར་བརྫུན་དུ་སྨྲ་བ་དང་། ཕྲ་མ་དང་ཚིག་རྩུབ་མོ་

དག་མེད་དོ། །ཇི་ལྟར་འདི་དག་མི་ཚངས་པར་སྤྱོད་པ་ཡིན་ཞེས་བྱ་བ་ནི། གལ་ཏེ་བུད་མེད་ཡོངས་སུ་གཟུང་བ་མེད་ན་སྙམ་དུ་བསམས་པའོ། །མངོན་སུམ་དུ་གྱུར་པའི་སྒོ་ནས་ཀྱང་ཞེས་བྱ་བ་ལ། ཀྱང་ཞེས་བྱ་བའི་སྒྲས་ནི་ལྡན་པའི་སྒོ་ནས་ཀྱང་མེད་ཅེས་བྱ་བར་སྦྱོར་རོ། །

དུད་འགྲོ་དང་ཡི་དགས་དང་ལྷ་དག་གི་ནང་ན་ནི་སྡོམ་པ་མ་ཡིན་པ་མ་གཏོགས་སོ་ཞེས་བྱ་བ་ནི། འདི་ལྟར་མི་རྣམས་ཁོ་ན་ལ་སྡོམ་པ་མ་ཡིན་པ་འདོད་ཀྱི་གཞན་ནི་མ་ཡིན་ནོ། །མི་དག་གི་ནང་ན་ནི་སྡོམ་པ་མ་ཡིན་པས་བསྡུས་པ་ཡང་ཡོད་དོ་ཞེས་བྱ་བའོ། །སོགས་པ་

ཞེས་བྱ་བའི་སྒྲས་ནི་སྡོམ་པ་མ་ཡིན་པ་མ་གཏོགས་པ་ཡང་ཡོད་དོ། །མགོ་དང་རྐེད་པ་བཅད་ན་འཆིའོ་ཞེས་བྱ་བ་འདིས་ནི་ལྷས་ཀྱང་ལྷ་གསོད་དོ་ཞེས་བསྟན་ཏོ། །ལྡན་པའི་སྒོ་ནས་ཡོད་དོ་ཞེས་བྱ་བ་ནི། གཟུགས་མེད་པའི་དག་ནི་གཟུགས་མེད་པའི་ཕྱིར་མངོན་དུ་གྱུར་པའི་

སྒོ་ནས་མེད་དོ། །འདུ་ཤེས་མེད་པའི་སེམས་ཅན་རྣམས་ལ་ནི་བསམ་གཏན་དུ་སྐྱེས་པ་ཡིན་ཡང་བསམ་གཏན་གྱི་སྡོམ་པ་མངོན་སུམ་དུ་གྱུར་པའི་སྒོ་ནས་ཡོད་པ་མ་ཡིན་ཏེ། བསམ་གཏན་གྱི་སྡོམ་པ་ནི་སེམས་ཀྱི་རྗེས་སུ་འཇུག་པའི་ཕྱིར་དང་། དེ་དག་གི་སེམས་རིམ་འགགས་

Vol. 210 · folio 77a

ཕའི་ཕྱིར་རོ། །གལ་ཏེ་གཟུགས་མེད་པ་དག་ན་གཟུགས་པས་མངོན་དུ་མེད་ན། དེས་ན་འོ་ན་ནི་གཟུགས་མེད་པར་སྐྱེས་པ་གང་དག་ཅིག་ལ་ལྡན་པ་བརྗོད་དགོས་སོ་ཞེ་ན། དེའི་ཕྱིར་གཟུགས་མེད་པར་སྐྱེས་པའི་འཕགས་པ་རྣམས་ལ་ཞེས་བྱ་

བ་རྒྱས་པར་སྨོས་སོ། །འཕགས་པས་ས་གང་ལ་བརྟེན་པ་ཅན་གྱི་ཞེས་བྱ་བ་ལ། ས་གང་དུ་སྐྱེས་པས་ཟག་པ་མེད་པའི་ཚུལ་ཁྲིམས་གང་བསྐྱེད་པ་དེ་ནི། ས་དེ་ལ་བརྟེན་པ་ཅན་ཡིན་ནོ། །སྐྱེ་བའི་ས་ལྔ་རྣམས་ཏེ་འདོད་པའི་ཁམས་དང་བསམ་གཏན་བཞིའོ། །

གལ་ཏེ་ས་གཅིག་ལ་བརྟེན་པ་ཅན་སྐྱེད་དེ་འགགས་པ་ནས། དེ་བཞིན་དུ་ས་ལྔ་ལ་བརྟེན་པ་ཅན་གྱི་བར་བསྐྱེད་དེ་འགགས་ན་ནི་གཟུགས་མེད་པ་དག་ན་འདས་པ་དེ་དང་ལྡན་པར་འགྱུར་རོ། །ས་ལྔ་ཆར་ལ་བརྟེན་ཅན་དང་ནི་མ་འོངས་པ་དང་ལྡན་ནོ་ཞེས་བྱ་བ་ནི།

གང་དུ་སྐྱེས་པའམ་གང་དུ་མ་སྐྱེས་པ་དེ་དག་ལ་བརྟེན་པ་ཅན་དང་ལྡན་ནོ། །ཅིའི་ཕྱིར་ཞེ་ན་ངེས་པ་མེད་པའི་ཕྱིར་རོ། །འདི་ལྟར་གང་མ་འོངས་པ་རྣམས་གྲངས་ཀྱིས་ས་ལྔ་ཆར་ལ་བརྟེན་ནས་སྐྱེ་བ་སྲིད་པ་ནི་ཡོད་པ་མ་ཡིན་ཏེ། དེའི་ཕྱིར་གང་དུ་སྐྱེ་བ་དེ་འགགས་

པ་དེ་ནི་སྐྱེས་པ་ཟིན་པའི་ཕྱིར་ས་ཁོ་ན་བསྐྱེད་ལ། གང་མ་སྐྱེས་པ་དེ་ནི་ངེས་པ་མེད་པའི་ཕྱིར་ས་ལྔ་ཆར་ལ་རྣམ་པར་གཞག་གོ། །སོ་སོ་སྐྱེ་བོའམ་འཕགས་པ་གཟུགས་མེད་པར་སྐྱེས་པ་ནི་བསམ་གཏན་གྱི་སྡོམ་པ་དང་ག་ལ་ལྡན་ཏོ། གཟུགས་མེད་པར་སྐྱེས་

པས་དེ་དོར་བའི་ཕྱིར་རོ། །ལྷག་བྱས་ན་ཞེས་བྱ་བ་ལ། ག་ལས་ལྷག་མར་བྱས་ཤེ་ན། གཟུགས་མེད་པ་དང་། འདུ་ཤེས་མེད་པའི་སེམས་ཅན་དང་གཉིས་ལས་སོ། །གཟུགས་མེད་པའི་ཁམས་སུ་ལྡན་པ་ངེས་པར་བཤད་པ་དང་། འདོད་པའི་ཁམས་དང་

གཟུགས་ཀྱི་ཁམས་སུ་ལྡན་པ་དང་མངོན་དུ་གྱུར་པ་ངེས་པར་བརྗོད་པར་བྱའོ། །དེའི་ཕྱིར་ཁམས་སུ་ཞེས་བྱ་བ་རྒྱས་པར་སྨོས་ཏེ། དམྱལ་བ་དང་བྱང་གི་སྒྲ་མི་སྙན་པ་མ་གཏོགས་པ་ཞེས་བྱ་བ་ནི། དེ་ན་ཡང་དག་པར་བླངས་པའི་ཚུལ་ཁྲིམས་མེད་པའི་ཕྱིར་རོ། །གཞན་

Vol. 210 · folio 77b

ན་ནི་གཉི་ག་ཡོད་དོ་ཞེས་བྱ་བ་ནི་འདོད་པའི་ཁམས་ཀྱི་ལྷ་དག་དང་། བྱང་གི་སྒྲ་མི་སྙན་པ་མ་གཏོགས་པའི་མི་དག་གི་ནང་ན་ནི། སྡོམ་པས་བསྡུས་པ་དང་སྡོམ་པ་མ་གཏོགས་པ་ཡོད་དོ། །ཚིག་ཀྱལ་པ་ནི་ཚིག་གཟུང་བར་མི་འོས་པར་འགྱུར་རོ་ཞེས་བྱ་བ་ནི་ཚིག་མི་བརྩུན་པའོ། །

དེ་ལ་ནི་གཏི་མུག་ཤས་ཆེ་བའི་ཕྱིར་ཞེས་བྱ་བ་ནི། འདི་ཤིན་ཏུ་རྨོངས་པ་ཡང་དག་བླངས་པར་བརྗོད་པར་བྱའོ་ཞེས་སློབ་དཔོན་འདུས་བཟང་ཟེར་རོ། །རང་དབང་མ་ཡིན་པའི་ཕྱིར་དེ་དང་མཚུངས་པར་ལྡན་པའི་རྨོངས་པ་ནི་ལོག་པར་ལྟ་བ་ཉིད་དེ། དེའི་ཚོགས་སུ་གྱུར་པ་ཡང་

དག་པར་བླངས་པས་རྨོངས་པའོ། །བརྣབ་སེམས་དང་གནོད་སེམས་དག་དེར་གྱུར་པས་རྨོངས་པ་ཞེས་བརྗོད་དོ། །ལོག་པར་ལྟ་བའི་སྒོ་ནས་མ་ཡིན་ནོ། །འདི་ལྟར་གཏི་མུག་གི་སྟོབས་ཀྱིས་མེད་པའི་རྣམ་པས་འཇུག་པ་ལོག་པར་ལྟ་བ་ཤས་ཆེ་བ་འདི་ནི་རྨོངས་པའོ་ཞེས་

སོ། །དེའི་གཞི་མི་མཐོང་བའི་ཕྱིར་བཤད་པ། འདི་ནི་དེའི་རྒྱུ་མཐུན་པའི་འབྲས་བུ་ཡིན་ནོ། །འདི་རྒྱུ་མཐུན་པའི་སྒྲས་བཤད་པ་ཅིའི་ཕྱིར་ཞེ་ན། བདག་པོའི་འབྲས་བུ་ཁོ་ན་ཉེ་བ་ཉིད་དུ་ཤེས་པར་བྱེད་པའི་ཕྱིར་རོ། །གཉིས་ཀ་བདག་པོའི་འབྲས་བུ་ཞེས་བརྗོད་པར་བྱ་བ་ལ་

དེ་དག་ཉེ་བ་དང་རིང་བ་ཉིད་དུ་ཉེ་བར་མ་བསྟན་པར་འགྱུར་རོ། །ཅིག་ཤོས་ལུང་མ་བསྟན་པའི་མི་དགེ་བ་བསྒོམས་པས་སྤང་བར་བྱ་བའི་རྒྱུ་མཐུན་པར་བརྗོད་པར་ན་ཇི་ལྟར་སྐྱོན་ཅན་དུ་མི་འགྱུར་ཞེ་ན། དེའི་ཕྱིར་སྲོག་གཅོད་པ་ནི་ཚེ་དེའི་བར་ཆད་བྱེད་པའི་རྒྱུ་ཡིན་ཞེས་བྱ་བ་རྒྱས་

པར་སྨོས་ཏེ། དུག་དང་གནམ་ལྕགས་དང་མཚོན་ཆ་ལྷག་པ་ལ་སོགས་པ་གང་དག་ཡིན་པ་དེ་དག་ནི་སྲོག་གཅོད་པ་རྣམས་ཀྱི་ཚེ་དགེ་བའི་ལས་ཀྱིས་འཕངས་པ་འབྱུང་བ་ལ་གེགས་བྱེད་པར་ནུས་པ་ཡིན་ཏེ་གཞན་དུ་ནི་མ་ཡིན་ནོ། །དེའི་ཕྱིར་བར་ཆད་བྱེད་པའི་རྒྱུ་ནི་འགྲོ་བའི་ཚེ་

ལ་གེགས་སྐྱེད་པར་ནུས་པ་ཡིན་ནོ། །གཞན་དུ་མ་ཡིན་ནོ་ཞེས་བྱ་བ་ནི། དེའི་ཕྱིར་སྲོག་གཅོད་པ་ནི་ཚེ་དེའི་བར་ཆད་བྱེད་པའི་རྒྱུ་ཡིན་ནོ་ཞེས་བྱའོ། །གཞན་དག་ན་རེ། ཚེ་དེ་སྲོག་གཅོད་པའི་རྣམ་པར་སྨིན་པའི་འབྲས་བུ་ཞེས་མི་བརྗོད་ཀྱི། དེ་ནི་ཆེས་ཉེ་བར་བདག་པོའི་

Vol. 210 · folio 78a

འབྲས་བུའོ་ཞེས་ཟེར་རོ། །མི་རྣམས་ཀྱི་ཚེ་ནི་དགེ་བའི་ལས་ཀྱིས་འཕངས་པ་སྟེ། སྲོག་གཅོད་པའི་དབང་གིས་ནི་ཚེ་ཟད་པ་མངོན་པར་འགྲུབ་པ་བྱེད་དོ། །གཟི་མཐུ་ཆུང་བ་ནི་ནུས་པ་ཆུང་བའོ། །སེར་བ་ནི་རྡོ་ཆར་དང་གཞན་དག་ན་རེ་

འཁྱགས་པའི་ཆར་རོ་ཞེས་ཟེར་རོ། །རྡུལ་ནི་འགྱུར་བྱེད་ཀྱི་ཆུའི་ཆར་རོ། །གཞན་དག་ན་རེ་རྡུལ་གྱི་ཆར་ཏེ་དེས་ལོ་ཏོག་བརླག་པར་བྱེད་པའོ་ཞེས་ཟེར་རོ། །རྡུལ་གྱིས་འཁྲིགས་པར་འགྱུར་ཞེས་བྱ་བ་ནི། རྡུལ་ལྷགས་སྤུ་ངན་པར་འགྱུར་བའོ། །ས་ཚྭ་སྒོ་ཅན་

ཞེས་བྱ་བ་ནི། འབྲུ་དག་མི་སྐྱེ་བའི་སའོ། །དགོན་དུང་ནི་ཆུ་མེད་པ་སྟེ་མྱ་ངམ་ལྟ་བུའོ། །ཐ་ཆད་ནི་དམན་ཞིང་སྨད་པ་སྟེ། ཀླ་ཀློ་ལ་སོགས་པའི་ས་དག་གོ། །སྡིག་པ་ཅན་གྱི་ས་ནི་རི་དགས་དང་ཕག་གིས་ཉེ་བར་གཅེས་པའི་ཞིང་དག་གོ། །དུས་ལོག་པ་ཅན་ནི་འདི་དག་

ལ་དུས་ལོག་པ་ཡོད་པ་སྟེ། དུས་བཞིན་དུ་གྲང་བ་དང་དྲོ་བ་དང་ཆར་འབབ་པར་མི་འགྱུར་ཞེས་བྱ་བའི་དོན་ཏོ། །འབྲས་བུ་ཕྲ་མོ་ནི་འབྲས་བུ་མ་རིགས་པའོ། །འབྲས་བུ་ཁ་བ་ཞེས་བྱ་བ་ནི་སྨིན་པ་མི་སྙོམས་ཞེས་བྱ་བའི་དོན་ཏོ། །ཅི་ལས་དེ་ཁོ་ནས་ཞེས་བྱ་བ་ནི། གང་གིས་

དམྱལ་བ་དག་ཏུ་སྐྱེས་པའོ། །དེར་ནི་སྦྱོར་བས་ཡིན་ལ་ཞེས་བྱ་བ་ནི། སྦྱོར་བ་རྒྱུན་ཆགས་པ་ཡིན་པའི་ཕྱིར་དང་། སྡུག་བསྔལ་དྲག་པོ་རྒྱུ་ཡིན་པའི་ཕྱིར་རོ། །དངོས་ནི་སྐད་ཅིག་མ་གཅིག་ཡིན་པའི་ཕྱིར་དང་། ཚོར་བ་ཆུང་བའི་ཕྱིར་འདིར་དངོས་ཀྱིས་ཚེ་ཐུང་བ་ཡིན་ནོ་ཞེས་བྱ་བར་

རིགས་སོ། །གལ་ཏེ་སྦྱོར་བས་དམྱལ་བ་དག་ཏུ་སྐྱེ་ན། འོ་ན་མདོ་ལས་སྲོག་གཅོད་པ་ཀུན་ཏུ་བསྟེན་པ་དང་། གོམས་པར་བྱས་པ་དང་། ལན་མང་དུ་བྱས་པས་དམྱལ་བ་དག་གི་ནང་དུ་སྐྱེ་བར་འགྱུར་རོ་ཞེས་གསུངས་པ། དེ་ཇི་ལྟར་ཞེ་ན། དེའི་ཕྱིར་འཁོར་དང་བཅས་

པ་སྨོས་པའི་ཕྱིར་ཞེས་བྱ་བ་རྒྱས་པར་སྨོས་སོ། །སྦྱོར་བ་ནི་སྲོག་གཅོད་པའི་འཁོར་ཡིན་ཏེ། དེར་སྦྱོར་བ་ལ་སྲོག་གཅོད་པ་བཏགས་ནས་དེ་སྐད་ཅེས་བཤད་དོ། །རྒྱུ་མཐུན་པའི་འབྲས་བུར་བཤད་པ་གང་ཡིན་པ་དེ་ཡང་རྣམ་པར་སྨིན་པའི་འབྲས་བུ་དང་གཉིས་ལས་མི་འདའི། འདྲ་བའི་

Vol. 210 · folio 78b

ཁྱད་པར་ལས་དེ་སྐད་བཤད་པར་ཟད་དོ་ཞེས་བྱ་བ་ནི། ཡིད་དུ་འོང་བའི་སྲོག་གཅོད་པ་ལ་སོགས་པ་དང་འདྲ་བ་ལས་རྒྱུ་མཐུན་པའི་འབྲས་བུ་ཡིན་ནོ་ཞེས་བཤད་པར་ཟད་དོ། །བདག་པོའི་འབྲས་བུ་ལས་འདས་པར་མི་རིགས་ཤིང་རྣམ་པར་སྨིན་པའི་འབྲས་བུ་ལ་ཇི་ལྟར་

ཡིན་མི་འདའ་སྟེ། སྲིད་པ་བརྗོད་པའི་ཕྱིར་འགལ་བ་མེད་དོ། །དགེ་བའི་ལས་ཀྱི་འབྲས་བུ་ནི་འགའ་ཡང་རྣམ་པར་སྨིན་པ་ལས་མི་འདའ་སྟེ། དེ་ལྟར་ཡང་གལ་ཏེ་འདི་ཉིད་དུ་མི་རྣམས་དང་སྐལ་བ་མཉམ་པ་ཉིད་དུ་གྱུར་ན་ཚེ་རིང་བར་འགྱུར་རོ། །གཟི་བྱིན་མེད་པར་བྱས་པ་

ཡིན་ཞེས་བྱ་བ་ལ། གཟི་བྱིན་ནི་སྙིང་གའི་ཕྱོགས་ན་ཡོད་པའོ། །གཞན་དག་ལ་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་ནི། མ་བྱིན་པར་ལེན་པ་བྱེད་པས་ནི་རྫས་ཀྱི་བདག་པོ་ལ་སྡུག་བསྔལ་བསྐྱེད་པ་དང་། ལོངས་སྤྱོད་ཀྱིས་ཕོངས་པར་བྱས་པ་དང་། གཟི་བྱིན་མེད་པར་

བྱས་པ་ཡིན་ཏེ། རྫས་ཀྱི་དབང་གིས་གཟི་བྱིན་ཅན་དུ་འགྱུར་ན་དེའི་རྒྱུ་མེད་པར་བྱས་པའི་ཕྱིར་ཏེ། ལོངས་སྤྱོད་ཀྱིས་ཕོངས་པར་བྱས་པས་དེ་ལ་གནོད་པའི་ཕྱིར་རོ། །གཞན་གྱི་ཆུང་མ་ལ་ཉལ་པོ་བྱེད་པས་ནི་གཞན་ལ་སྡུག་བསྔལ་སྐྱེད་པ་དང་། དགྲ་དང་བཅས་པའི་ཆུང་

མ་ཅན་དུ་བྱས་པ་དང་། འཇིག་རྟེན་ན་གཟི་བྱིན་གང་། གང་གིས་གཟི་དང་བཅས་པའོ་ཞེས་ངེས་པར་བརྗོད་པའི་གཟི་བྱིན་མེད་པར་བྱས་པ་ཡིན་ནོ། །དེ་བཞིན་དུ་གཞན་དག་ལ་ཡང་སྲིད་ཚད་དུ་སྦྱར་བར་བྱ་སྟེ། འདི་ནི་ཕྱོགས་ཡིན་ནོ། །ཐམས་ཅད་མི་དགེ་བ་ལས་

བཟློག་སྟེ་སྦྱར་བར་བྱའོ་ཞེས་བྱ་བ་ནི། སྲོག་གཅོད་པ་སྤངས་པས་གཞན་ལ་སྡུག་བསྔལ་མ་སྐྱེད་པ་དང་། བསད་པ་དང་། གཟི་བྱིན་མེད་པར་མ་བྱས་པས་དེའི་ཕྱིར་དེ་ལ་འབྲས་བུ་རྣམ་པ་གསུམ་འབྱུང་ངོ་། །དེ་བཞིན་དུ་མ་བྱིན་པར་ལེན་པ་སྤངས་པས་རྫས་ཀྱི་བདག་པོ་ལ་སྡུག་བསྔལ་མ་

སྐྱེད་པ་དང་ལོངས་སྤྱོད་ཀྱིས་ཕོངས་པར་མ་བྱས་པ་དང་། གཟི་བྱིན་མེད་པར་མ་བྱས་པ་དེའི་ཕྱིར་དེ་ལ་འབྲས་བུ་རྣམ་པ་གསུམ་འབྱུང་སྟེ། འདོད་པས་ལོག་པར་གཡེམ་པ་སྤངས་པས། གཞན་ལ་སྡུག་བསྔལ་མ་སྐྱེད་པ་དང་། དགྲ་བཅས་པའི་ཆུང་མ་ཅན་དུ་མ་བྱས་པ་དང་གཟི་བྱིན་མེད་པར་

Vol. 210 · folio 79a

མ་བྱས་པ་དེའི་ཕྱིར་དེ་ལ་འབྲས་བུ་རྣམ་པ་ནི་གསུམ་འབྱུང་སྟེ། གཞན་ལ་ཡང་དེ་བཞིན་དུ་སྦྱར་བར་རོ། །ལས་ཀྱི་སྐབས་སུ་འདི་ཡང་སྤྱོད་པར་བྱ་སྟེ། བཅོམ་ལྡན་འདས་ཀྱིས་ཞེས་བྱ་བ་རྒྱས་པར་འབྱུང་ངོ་། །དེ་གཉིས་ལས་ལོགས་ཤིག་སྟོན་ཏོ་ཞེས་བྱ་བ་ནི་

ལོག་པར་འཚོ་བ་ནི་ལོག་པའི་ངག་དང་ལས་ཀྱི་མཐའ་གཉིས་ལས་སོ། །དེ་ལྟར་བཤད་ན་ཆགས་པ་ལས་སྐྱེས་པའི་ལུས་དང་ངག་གི་ལས་གང་དག་ཡིན་པ་དེ་དག་ནི་ལོག་པའི་ངག་དང་ལས་ཀྱི་མཐའ་ཡང་ཡིན་ལ་ལོག་པའི་འཚོ་བ་ཡང་ཡིན་ཏེ། ཞེ་སྡང་དང་གཏི་མུག་གིས་ཀུན་ནས་བསླང་བ་

གང་དག་ཡིན་པ་དེ་དག་ནི་ལོག་པའི་ངག་དང་ལས་ཀྱི་མཐའ་ཁོ་ན་ཡིན་ནོ། །ཆགས་པའི་ཆོས་ནི་འཕྲོག་པར་བྱེད་པ་ཡིན་པས་ཞེས་བྱ་བ་ལ། ཆགས་པའི་ཆོས་ནི་ཕྲ་མོ་ཡིན་པས་ན་དེ་འཕྲོ་བར་བྱེད་པ་ཡིན་ནོ། ཤིན་ཏུ་མཁས་པ་རྣམས་ཀྱིས་ཀྱང་བསྲུང་བར་སླ་བ་མ་ཡིན་པའི་ཕྱིར་སྤྱད་དཀའ་

བའོ། །ཁྱིམ་པས་ལྟ་བ་སྦྱང་བ་དཀའ་བ་ཅིའི་ཕྱིར་ཞེ་ན། རྟག་ཏུ་ལྟ་བ་སྣ་ཚོགས་པའི་ཕྱིར་ཏེ། ངོ་མཚར་དང་། བཀྲ་ཤིས་དང་། གཟའ་དང་། རྒྱུ་སྐར་དང་། ཡུད་ཙམ་ལ་སོགས་པའི་ལྟ་བ་ཅན་ཡིན་ཞེས་པའི་ཐ་ཚིག་གོ། །གཞན་ལ་འཚོ་བ་རག་ལུས་པའི་ཞེས་བྱ་བ་ནི་དགེ་སློང་

གི་ལུས་གནས་པའི་ཆོས་གོས་དང་བསོད་སྙོམས་དང་། མལ་སྟན་ལ་སོགས་པ་རྣམས་ནི་གཞན་ལ་རག་ལུས་པས་དགེ་སློང་རྣམས་ཀྱི་འཚོ་བ་སྦྱང་བར་དཀའོ། །འཚོ་བར་བྱ་བ་མ་ཡིན་པས་ན་ལོག་པའི་འཚོ་བ་ལྔ་རྣམས་ཏེ། ཚུལ་འཆོས་དང་ཁ་གསག་དང་གཞོགས་སློང་དང་ཐོབ་ཀྱིས་

འཇལ་བ་དང་རྙེད་པས་རྙེད་པ་འདོད་པ་རྣམས་སོ། །ལོག་པའི་ཡུལ་ལ་ཡོངས་སུ་ལོངས་སྤྱོད་པའི་ཕྱིར་རོ་ཞེས་བྱ་བ་ནི། མ་གནང་བའི་ཡུལ་ལ་ཡོངས་སུ་ལོངས་སྤྱོད་པའི་ཕྱིར་རོ། །ལས་ཀྱི་སྐབས་སུ་ལས་སུ་གཏོགས་པ་ཐམས་ཅད་བརྗོད་པར་བྱ་དགོས་པས་དེའི་ཕྱིར། གོང་དུ་

འབྲས་བུ་ལྔ་བཤད་པ་གང་དག་ཡིན་པ་ཞེས་བྱ་བ་སྨོས་ཏེ། བདག་པོའི་འབྲས་བུ་དང་། སྐྱེས་བུ་བྱེད་པའི་འབྲས་བུ་དང་། རྒྱུ་མཐུན་པའི་འབྲས་བུ་དང་། རྣམ་པར་སྨིན་པའི་འབྲས་བུ་དང་། བྲལ་བའི་འབྲས་བུའོ། །དྲི་བཅས་སྤོང་བའི་ལམ་དག་གི་ཞེས་བྱ་བ་ལ། སྤོང་བའི་ལམ་

Vol. 210 · folio 79b

ནི་ཟག་པ་དང་བཅས་པ་དང་ཟག་པ་མེད་པའི་རྣམ་པ་གཉིས་ཡིན་ཏེ། དེའི་ཕྱིར་དྲི་བཅས་ཞེས་བྱ་བ་སྨོས་སོ། །སྤོང་བའི་ཕྱིར་ལམ་ཡིན་པའམ་ཞེས་བྱ་བ་འབྱུང་སྟེ། །སྤང་བ་ནི་སོ་སོར་བརྟགས་པའི་འགོག་པའོ། །འདིས་ཉོན་མོངས་པ་སྤོང་བར་བྱེད་པས་ན་ཞེས་བྱ་བ་ནི་ཐོབ་པ་

གཅོད་པའི་ཕྱིར་ཏེ། འདིར་ཚིག་རྣམ་པར་སྤང་བས་བྱས་པའི་ཁྱད་པར་ཡོད་ཀྱི་དོན་གྱིས་བྱས་པ་ནི་མེད་དེ་གཉི་གར་ཡང་བར་ཆད་མེད་པའི་ལམ་དང་སྦྱར་བའི་ཕྱིར་རོ། །རང་གི་སར་གཏོགས་པའི་རྣམ་པར་སྨིན་པ་ཡིད་དུ་འོང་བ་ཡིན་ནོ་ཞེས་བྱ་བ་ལ་རྣམ་པར་སྨིན་པའི་འབྲས་བུ་ནི་བར་ཆད་

མེད་པའི་ལམ་ཟག་པ་དང་བཅས་པའི་ལས་གང་ཡིན་པ་དེའི་ས་གང་ཡིན་པ་དེར་ངེས་པ་ཁོ་ནའོ། །ཏིང་ངེ་འཛིན་ལས་སྐྱེས་པའི་ཆོས་འདྲ་བ་ཕྱི་མ་རྣམས་སོ་ཞེས་བྱ་བ་ལ། རྒྱུ་མཐུན་པའི་འབྲས་བུ་ནི་ཆོས་འདྲ་བ་མཉམ་པ་དང་ལྡན་པ་དེའི་ཕྱིར་ནས་སྐྱེས་པ་རྣམས། སྐྱེས་བུ་བྱེད་པའི་འབྲས་

བུ་ནི་ཆོས་གང་དག་དེའི་སྟོབས་ཀྱིས་སྐྱེས་པ་རྣམས་སོ། །སྤངས་པ་དེ་ཡང་ཡིན་ནོ་ཞེས་བྱ་བ་ནི་དེའི་སྟོབས་ཀྱིས་སྤངས་པ་ཐོབ་པའི་ཕྱིར་སྤངས་པ་ཡང་སྐྱེས་བུ་བྱེད་པའི་འབྲས་བུར་རྣམ་པར་གཞག་གོ །གཞན་དག་ན་རེ་སྤངས་པ་ཡང་ལམ་གྱི་བདག་པོའི་འབྲས་བུར་རིགས་ཏེ་དེའི་དབང་

པོས་དེ་མངོན་དུ་བྱེད་པའི་ཕྱིར་རོ་ཞེས་ཟེར་རོ། །རྣམ་པར་སྨིན་པའི་འབྲས་བུ་མ་གཏོགས་སོ་ཞེས་བྱ་བ་ནི་ཟག་པ་མེད་པ་ལ་རྣམ་པར་སྨིན་པའི་འབྲས་བུ་མེད་པའི་ཕྱིར་རོ། །རྒྱུ་མཐུན་པའི་འབྲས་བུ་ནི་ཏིང་ངེ་འཛིན་ལས་སྐྱེས་པའི་ཆོས་ཕྱི་མ་རྣམས་སོ། །བྲལ་བའི་འབྲས་བུ་ནི་བྲལ་བ་ཁོ་ནའོ། །

སྐྱེས་བུ་བྱེད་པའི་འབྲས་བུ་ནི་དེས་དྲངས་པའི་ཆོས་འདི་ལྟ་སྟེ། རྣམ་པར་གྲོལ་བའི་ལམ་དང་། དེ་དང་ལྷན་ཅིག་འབྱུང་བ་དང་། གང་ཡང་མ་འོངས་པ་ཐོབ་པ་དེ་དང་སྤང་བ་དེ་ཡང་ཡིན་ནོ། །བདག་པོའི་འབྲས་བུ་ནི་སྔར་བྱུང་བ་རྣམས་རྟོགས་པ་རང་གི་ངོ་བོ་ལས་གཞན་པའི་འདུ་བྱེད་ཐམས་

ཅད་དོ། །སྤོང་བའི་ལམ་ལས་གཞན་པ་གཞན་པའི་ལམ་ཞེས་བྱ་བ་ནི་སྦྱོར་བ་དང་། རྣམ་པར་གྲོལ་བ་དང་། ཁྱད་པར་གྱི་ལམ་གྱིས་བསྡུས་པ་དང་། སྦྱིན་པའི་སེམས་པ་ལ་སོགས་པ་གང་ཡིན་པ་དང་མི་དགེ་བ་གང་ཡིན་པའོ། །བྲལ་བའི་འབྲས་བུ་མ་གཏོགས་སོ་ཞེས་བྱ་བ་ནི། དེས་ཉོན་

Vol. 210 · folio 80a

མོངས་པ་སྤང་བ་ནི་མ་ཡིན་ཏེ་བར་ཆད་མེད་པའི་ལམ་ཁོ་ན་བྲལ་བའི་འབྲས་བུ་དང་འབྲེལ་བའི་ཕྱིར་རོ། །དེའི་རྣམ་པར་སྨིན་པའི་འབྲས་བུ་ནི་རང་གི་སར་གཏོགས་པའི་རྣམ་པར་སྨིན་པ་ཡིད་དུ་འོང་བ་དང་ཡིད་དུ་མི་འོང་བ་ཡིན་ཏེ། དགེ་བ་ཟག་པ་དང་བཅས་པ་ཡིན་

པའི་ཕྱིར་དང་མི་དགེ་བ་ཡིན་པའི་ཕྱིར་རོ། །རྒྱུ་མཐུན་པའི་འབྲས་བུ་ནི་ཆོས་འདུ་བ་མཉམ་པ་དང་ལྷག་པ་ཕྱི་ནས་སྐྱེས་པ་རྣམས་སོ། །སྐྱེས་བུ་བྱེད་པའི་འབྲས་བུ་ནི་དེ་དང་ལྷན་ཅིག་འབྱུང་བ་དང་དེའི་སྟོབས་ཀྱིས་སྐྱེས་པ་གང་ལས་ཡིན་པ་དེ་དག་གོ །བདག་པོའི་འབྲས་བུ་ནི་སྔར་བྱུང་བ་མ་

གཏོགས་པ་རང་གི་ངོ་བོ་ལས་གཞན་པའི་འདུ་བྱེད་ཐམས་ཅད་དོ། །ཟག་པ་མེད་པའི་ལྷག་མ་དང་ཞེས་བྱ་བ་ནི་སྦྱོར་བ་རྣམ་པར་གྲོལ་བ་དང་། ཁྱད་པར་གྱི་ལམ་གྱིས་བསྡུས་པའོ། །དེ་ནི་བར་ཆད་མེད་པའི་ལམ་མ་ཡིན་པའི་ཕྱིར་བྲལ་བའི་འབྲས་བུ་ཡང་མེད་ལ་ཟག་པ་མེད་པ་ཡིན་

པའི་ཕྱིར་དང་། ལུང་དུ་མ་བསྟན་པའི་ཕྱིར་རྣམ་པར་སྨིན་པའི་འབྲས་བུ་ཡང་མེད་དེ། འདིར་ཡང་རྒྱུ་མཐུན་པ་དང་སྐྱེས་བུ་བྱེད་པ་དང་བདག་པོའི་འབྲས་བུ་དག་ནི་གོང་མ་བཞིན་དུ་བརྗོད་པར་བྱའོ། །ལས་དགེ་བའི་འབྲས་བུ་ཆོས་དགེ་བ་བཞིན་ཏེ་ཞེས་བྱ་བ་ནི། རིགས་ཡོངས་སུ་གཟུང་སྟེ་དེ་

སྐད་བཤད་དེ་བྲལ་བ་ནི་དགེ་བ་ཐམས་ཅད་ཀྱི་འབྲས་བུ་མ་ཡིན་པའི་ཕྱིར་རོ། །བྲལ་བ་ནི་རྒྱུ་མཐུན་པའི་འབྲས་བུ་འམ་བདག་པོའི་ཡང་མ་ཡིན་ལ། དགེ་བ་འདུས་བྱས་རྣམས་ཀྱང་བྲལ་བའི་འབྲས་བུ་མ་ཡིན་ཏེ། བྲལ་བ་འདུས་མ་བྱས་ཡིན་པའི་ཕྱིར་རོ། །རྣམ་པར་སྨིན་པ་ནི་ལུང་དུ་མ་

བསྟན་པའི་ཕྱིར་རྣམ་པར་སྨིན་པའི་འབྲས་བུ་མ་གཏོགས་སོ་ཞེས་བྱ་བ་སྨོས་སོ། །མི་དགེ་བ་གཉིས་ཏེ། སྐྱེས་བུ་བྱེད་པ་དང་བདག་པོའི་འབྲས་བུ་དང་གཉིས་སོ། །དེ་ལ་སྐྱེས་བུ་བྱེད་པའི་འབྲས་བུ་ནི་གང་དག་དེའི་སྟོབས་ལས་སྐྱེས་པའོ། །བདག་པོའི་འབྲས་བུ་ནི་སྔར་བྱུང་བ་མ་གཏོགས་པ་

མི་དགེ་བའི་ཆོས་ཐམས་ཅད་ཉིད་དོ། །རྒྱུ་མཐུན་པའི་འབྲས་བུ་ནི་མེད་དེ་མི་འདྲ་བའི་ཕྱིར་རོ། །རྣམ་པར་སྨིན་པའི་འབྲས་བུ་ཡང་མེད་དེ་ཉོན་མོངས་པ་ཅན་ཡིན་པའི་ཕྱིར་རོ། །བྲལ་བའི་འབྲས་བུ་ཡང་མེད་དེ་འདུས་བྱས་ཡིན་པའི་ཕྱིར་དང་ཉོན་མོངས་པ་ཅན་ཡིན་པའི་ཕྱིར་རོ། །ལུང་དུ་མ་བསྟན་

Vol. 210 · folio 80b

པ་གསུམ་སྟེ་རྒྱུ་མཐུན་པ་དང་བྲལ་བའི་འབྲས་བུ་མ་གཏོགས་སོ། །འདི་ལྟར་ལུང་དུ་མ་བསྟན་པ་རྣམས་ནི་དགེ་བ་དང་འདྲ་བ་མ་ཡིན་པས་རྒྱུ་མཐུན་པའི་འབྲས་བུ་མེད་ལ་བྲལ་བའི་འབྲས་བུ་ནི་དགེ་བ་འདུས་མ་བྱས་ཡིན་པའི་ཕྱིར་རོ། །རྣམ་པར་སྨིན་པའི་འབྲས་བུ་ནི་རང་གི་སར་

གཏོགས་པའི་རྣམ་པར་སྨིན་པ་ཡིད་དུ་འོང་བའོ། །སྐྱེས་བུ་བྱེད་པའི་འབྲས་བུ་ནི་གང་དག་དེའི་སྟོབས་ཀྱིས་སྐྱེ་བ་འདི་ལྟ་སྟེ་མཇུག་ཐོགས་སུ་འབྱུང་བ་རྣམས་སོ། །བདག་པོའི་འབྲས་བུ་ནི་སྔར་བྱུང་བ་མ་གཏོགས་པ་ལུང་དུ་མ་བསྟན་པ་ཐམས་ཅད་ཁོ་ནའོ། །ལས་དགེ་བའི་འབྲས་བུ་

ཞེས་བྱ་བ་རྒྱས་པར་འབྱུང་སྟེ། སྐྱེས་བུ་བྱེད་པའི་འབྲས་བུ་ནི་དེའི་མཇུག་ཐོགས་སུ་འབྱུང་བའི་ཆོས་དགེ་བ་རྣམས་སོ། །བདག་པོའི་འབྲས་བུ་ནི་སྔར་སྐྱེས་པ་མ་གཏོགས་པའི་དགེ་བའི་ཆོས་ཐམས་ཅད་ཁོ་ནའོ། །རྒྱུ་མཐུན་པའི་འབྲས་བུ་མེད་དེ་མི་འདྲ་བའི་ཞིང་དེར་རྣམ་པར་སྨིན་པ་

ལུང་དུ་མ་བསྟན་པ་ཡིན་པས་རྣམ་པར་སྨིན་པའི་འབྲས་བུ་ཡང་མེད་དོ། །བྲལ་བའི་འབྲས་བུ་ཡང་མེད་དེ་འདུས་བྱས་ཡིན་པའི་ཕྱིར་རོ། །མི་དགེ་བའི་ནི་གསུམ་སྟེ། སྐྱེས་བུ་བྱེད་པའི་འབྲས་བུ་ནི་དེ་དང་ལྷན་ཅིག་འབྱུང་བ་དང་དེའི་མཇུག་ཐོགས་སུ་སྐྱེས་པའོ། །བདག་

པོའི་འབྲས་བུ་ནི་སྔར་བྱུང་བ་མ་གཏོགས་པ་མི་དགེ་བ་ཐམས་ཅད་དོ། །སྔར་སྐྱེས་པའི་རྒྱུ་མཐུན་པའི་འབྲས་བུ་ནི་རིགས་མཐུན་པ་ཁྱད་པར་དང་བཅས་པ་རྣམས་སོ། །རྣམ་པར་སྨིན་པའི་འབྲས་བུ་འམ་བྲལ་བའི་འབྲས་བུ་ནི་མེད་དེ་ཉོན་མོངས་པ་ཅན་ཡིན་པའི་ཕྱིར་དང་འདུས་མ་བྱས་

ཡིན་པའི་ཕྱིར་རོ། །ལུང་དུ་མ་བསྟན་པར་ནི་བཞི་སྟེ་ཞེས་བྱ་བ་ནི་བྲལ་བའི་འབྲས་བུ་ནི་མ་གཏོགས་པ་སྟེ་བྲལ་བ་ནི་དགེ་བ་རྟག་པ་ཡིན་པའི་ཕྱིར་རོ། །རྣམ་པར་སྨིན་པའི་ཕྱིར་འབྲས་བུ་ནི་རང་གི་སར་གཏོགས་པའི་རྣམ་པར་སྨིན་པ་ཡིད་དུ་མི་འོང་བའོ། །གལ་ཏེ་ཆོས་

འདྲ་བ་རྣམས་ཁོ་སྔར་སྐྱེས་པ་དག་གི་རྒྱུ་མཐུན་པའི་འབྲས་བུ་ཡིན་པར་བོར་ནས། ལུང་དུ་མ་བསྟན་པ་མི་འདྲ་བ་རྣམས་མི་དགེ་བ་དག་གི་རྒྱུ་མཐུན་པའི་འབྲས་བུ་ཇི་ལྟར་བརྗོད་ཅེ་ན་དེའི་ཕྱིར་ལུང་དུ་མ་བསྟན་པ་ཞེས་བྱ་བ་རྒྱས་པར་སྨོས་སོ། །རྒྱུ་མཐུན་པའི་འབྲས་བུ་ནི་ཀུན་ཏུ་

Vol. 210 · folio 81a

འགྲོ་བ་དང་སྐལ་བ་མཉམ་པའི་རྒྱུ་དག་གི་ཡིན་པར་རྣམ་པར་གཞག་སྟེ་དེ་ལ་འཇིག་ཚོགས་དང་མཐའ་འཛིན་པར་ལྟ་བ་དག་ནི་ལུང་དུ་མ་བསྟན་པ་ཡིན་དུ་ཟིན་ཀྱང་། ཉོན་མོངས་པ་ཅན་ཉིད་དང་སྡུག་བསྔལ་མཐོང་བས་སྤང་བར་བྱ་བ་ཉིད་དང་འདྲ་བའི་ཕྱིར།

སྡུག་བསྔལ་མཐོང་བས་སྤང་བར་བྱ་བ་ཀུན་ཏུ་འགྲོ་བའི་རྒྱུ་དང་། སྡུག་བསྔལ་མཐོང་བས་སྤང་བར་བྱ་བ་སྐལ་བ་མཉམ་པའི་རྒྱུའི་རྒྱུ་མཐུན་པའི་འབྲས་བུ་རྣམ་པར་གཞག་པས་འགལ་བ་མེད་དོ། །ལུང་དུ་མ་བསྟན་པའི་ཞེས་བྱ་བ་རྒྱས་པར་འབྱུང་སྟེ། སྐྱེས་བུ་བྱེད་པའི་འབྲས་བུ་

ནི་དགེ་བའི་ཆོས་གང་དག་དེའི་མཇུག་ཐོགས་སུ་འབྱུང་བ་དེ་དག་གོ །བདག་པོའི་འབྲས་བུ་ནི་སྔར་བྱུང་བ་མ་གཏོགས་པ་དགེ་བའི་ཆོས་ཐམས་ཅད་དོ། །རྒྱུ་མཐུན་པའི་འབྲས་བུ་ནི་མེད་དེ་མི་འདྲ་བའི་ཕྱིར་རོ། །རྣམ་པར་སྨིན་པའི་འབྲས་བུ་ཡང་མེད་དེ་དགེ་བ་ཡིན་པའི་ཕྱིར་རོ། །

བྲལ་བའི་འབྲས་བུ་ཡང་མེད་དེ་འདུས་མ་བྱས་ཡིན་པའི་ཕྱིར་རོ། །མི་དགེ་བ་ནི་གསུམ་སྟེ་ཞེས་བྱ་བ་ནི་རྒྱུ་མཐུན་པའི་འབྲས་བུ་བཅུག་སྟེའོ། །མི་དགེ་བ་ཡང་ལུང་དུ་མ་བསྟན་པ་རྣམས་ཀྱིས་རྒྱུ་མཐུན་པའི་འབྲས་བུ་ཡིན་པ་ནི་ཡོད་དོ། །དཔེར་ན་ཆོས་མི་དགེ་བ་རིས་ལྔ་པ་རྣམས་འཇིག་

ཚོགས་དང་མཐར་འཛིན་པར་ལྟ་བ་གཉིས་པའི་འབྲས་བུ་བཅུག་སྟེའོ། །མི་དགེ་བ་ཡང་ལུང་དུ་མ་བསྟན་པ་རྣམས་ཀྱི་འབྲས་བུ་ཡིན་པ་བཞིན་ནོ། །ལུང་དུ་མ་བསྟན་པའི་ཆོས་ནི་གསུམ་སྟེ། དེ་དག་ཁོ་ན་ཡིན་ནོ་ཞེས་བྱ་བ་ལ་སྐྱེས་བུ་བྱེད་པའི་འབྲས་བུ་ནི་ལྷན་ཅིག་འབྱུང་བ་དང་།

མཇུག་ཐོགས་སུ་འབྱུང་བ་དག་གོ །བདག་པོའི་འབྲས་བུ་ནི་སྔར་བྱུང་བ་མ་གཏོགས་པ་ཐམས་ཅད་དོ། །རྒྱུ་མཐུན་པའི་འབྲས་བུ་ནི་ཆོས་འདྲ་བ་ཕྱིས་སྐྱེས་པ་རྣམས་སོ། །རྣམ་པར་སྨིན་པ་དང་བྲལ་བའི་འབྲས་བུ་དག་ནི་མེད་དེ་ལུང་དུ་མ་བསྟན་པ་རྣམས་ལ་རྣམ་པར་སྨིན་པའི་འབྲས་བུ་

མེད་པའི་ཕྱིར་དང་ཉོན་མོངས་པའི་གཉེན་པོ་མ་ཡིན་པའི་ཕྱིར་རོ། །འདས་པའི་ཐམས་ཅད་བཞིའི་ཡིན་ནོ་ཞེས་བྱ་བ་འབྱུང་སྟེ། འདིར་རིགས་ཡོངས་སུ་གཟུང་བས་དེ་སྐད་དུ་བཤད་ཀྱི་འདས་པ་ཐམས་ཅད་འདས་པ་ཐམས་ཅད་ཀྱི་འབྲས་བུ་རྣམ་པ་བཞི་ནི་མ་ཡིན་ནོ། །བྲལ་བའི་འབྲས་

Vol. 210 · folio 81b

བུ་མ་གཏོགས་སོ་ཞེས་བྱ་བ་ནི་དེ་འདུས་མ་བྱས་ཡིན་པ་ཉིད་ཀྱིས་དུས་སུ་མ་གཏོགས་པའི་ཕྱིར་རོ། །ལས་དགེ་བ་ཟག་པ་དང་བཅས་པ་དང་། མི་དགེ་བ་འདས་པ་རྣམས་ཀྱི་རྣམ་པར་སྨིན་པའི་འབྲས་བུ་ནི་རྣམ་པར་སྨིན་པ་འདས་པའོ། །སྐྱེས་བུ་བྱེད་པའི་འབྲས་བུ་ནི་འདས་པའི་

ལས་དང་ལྷན་ཅིག་འབྱུང་བ་དེའི་སྟོབས་ཀྱིས་སྐྱེས་པའི་ཆོས་འདས་པ་རྣམས་སོ། །བདག་པོའི་འབྲས་བུ་ནི་དེའི་རང་གི་ངོ་བོ་མ་གཏོགས་པ་དེ་དག་དང་ལྷན་ཅིག་འབྱུང་བ་དང་ཕྱིས་འབྱུང་བ་འདས་པ་རྣམས་སོ། །རྒྱུ་མཐུན་པའི་འབྲས་བུ་ནི་འདྲ་བ་ཕྱིས་འབྱུང་བ་འདས་པ་རྣམས་ཁོ་ནའོ། །

དེ་བཞིན་དུ་འབྲས་བུ་ད་ལྟར་བ་ཡང་བཞི་སྟེ་འདས་པའི་རྣམ་པར་སྨིན་པའི་འབྲས་བུ་ནི་རྣམ་པར་སྨིན་པའི་ད་ལྟར་བའོ། །རྒྱུ་མཐུན་པའི་འབྲས་བུ་ནི་སྔར་མ་བྱུང་བའི་ཆོས་འདྲ་བ་ད་ལྟར་བ་རྣམས་སོ། །སྐྱེས་བུ་བྱེད་པའི་འབྲས་བུ་ནི་ཆོས་ད་ལྟར་བ་འདས་པའི་ལས་ཀྱི་སྟོབས་ཀྱིས་སྐྱེས་པ་

རྣམས་སོ། །བདག་པོའི་འབྲས་བུ་ནི་ད་ལྟར་བ་ཐམས་ཅད་ཁོ་ནའོ། །མ་འོངས་པ་དག་ཀྱང་དེ་དང་འདྲ་བར་བརྗོད་པར་བྱ་སྟེ། །འདས་པའི་རྣམ་པར་སྨིན་པའི་འབྲས་བུ་ནི་སྨིན་པ་མ་འོངས་པའོ། །རྒྱུ་མཐུན་པའི་འབྲས་བུ་ནི་ཆོས་འདྲ་བ་མ་འོངས་པ་རྣམས་སོ། །སྐྱེས་བུ་བྱེད་པའི་འབྲས་བུ་ནི་

གང་དག་དེའི་སྟོབས་ཀྱིས་སྐྱེ་བར་འགྱུར་བ་རྣམས་སོ། །བདག་པོའི་འབྲས་བུ་ནི་ཐམས་ཅད་ཁོ་ནའོ། །བར་མ་ནི་མ་འོངས་པའོ་ཞེས་བྱ་བ་ནི་འབྲས་བུ་བཞི་སྟེ་ཞེས་བྱ་བར་སྦྱར་རོ། །དེའི་སྐྱེས་བུ་བྱེད་པའི་འབྲས་བུ་ནི་དེའི་མཇུག་ཐོགས་སུ་སྐྱེ་བ་མ་འོངས་པ་རྣམས་སོ། །བདག་པོའི་འབྲས་བུ་ནི་

མ་འོངས་པ་ཐམས་ཅད་ཁོ་ནའོ། །རྣམ་པར་སྨིན་པའི་འབྲས་བུ་ནི་དེའི་རྣམ་པར་སྨིན་པ་མ་འོངས་པའོ། །རྒྱུ་མཐུན་པའི་འབྲས་བུ་ནི་དེ་དང་འདྲ་བ་མ་འོངས་པ་རྣམས་སོ། །ད་ལྟར་བྱུང་བའི་ལས་ཀྱི་ད་ལྟར་བ་ནི་གཉིས་ཏེ་སྐྱེས་བུ་བྱེད་པ་དང་བདག་པོའི་འབྲས་བུ་དག་གོ་ཞེས་བྱ་བ་ལ། དེའི་སྐྱེས་བུ་

བྱེད་པའི་འབྲས་བུ་ནི་ལྷན་ཅིག་འབྱུང་བ་ལྷན་ཅིག་སྐྱེས་པ་ཡིན་ནོ། །བདག་པོའི་འབྲས་བུ་ནི་དེ་དག་གཞན་དུས་མཉམ་དུ་སྐྱེས་པ་ཡིན་ནོ། །ད་ལྟར་བའི་རྒྱུ་མཐུན་པའི་འབྲས་བུ་དང་རྣམ་པར་སྨིན་པའི་འབྲས་བུ་ད་ལྟར་བ་ནི་མེད་དེ། དེར་རྒྱུ་དང་འབྲས་བུ་དག་དུས་སྔ་ཕྱིར་ངེས་པའི་ཕྱིར་རོ། །

Vol. 210 · folio 82a

མ་སྐྱེས་པའི་འབྲས་བུ་མ་འོངས་པ་གསུམ་ཡིན་ནོ་ཞེས་འབྱུང་སྟེ། སྐྱེས་བུ་བྱེད་པའི་འབྲས་བུ་ནི་གང་དག་དེའི་སྟོབས་ལ་རག་ལས་ཏེ་འབྱུང་བ་དེ་དག་གོ །བདག་པོའི་འབྲས་བུ་ནི་རང་གི་ངོ་བོ་མ་གཏོགས་པ་ཐམས་ཅད་དོ། །རྣམ་པར་སྨིན་པའི་འབྲས་བུ་ནི་

དགེ་བ་ཟག་པ་དང་བཅས་པ་དང་མི་དགེ་བ་རྣམས་ཀྱི་རྣམ་པར་སྨིན་པ་མ་འོངས་པའོ། །མ་སྐྱེས་པ་རྣམས་ནི་སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུ་ཉིད་མ་ཡིན་པས་རྒྱུ་མཐུན་པའི་འབྲས་བུ་མ་འོངས་པ་མེད་དོ། །བྲལ་བའི་འབྲས་བུ་ཡང་མེད་དེ་དུས་སུ་མ་གཏོགས་པའི་ཕྱིར་རོ། །

རང་གི་ས་པ་བཞིན་ཡིན་ནོ་ཞེས་བྱ་བ་ལ། འདི་ཡང་སྲིད་ཚད་ཀྱི་དབང་དུ་བྱས་ནས་བཤད་ཀྱི། རང་གི་ས་པ་ཐམས་ཅད་ཀྱི་འབྲས་བུ་རང་གི་ས་པའི་ཆོས་བཞི་པ་ཐམས་ཅད་ནི་མ་ཡིན་ནོ། །ཟག་པ་མེད་པ་ལ་ཡང་རྣམ་པར་སྨིན་པའི་འབྲས་བུ་མེད་མོད་ཀྱི། རང་གི་ས་པའི་ཆོས་འདོད་

པ་ན་སྤྱོད་པ་ནས་སྲིད་པའི་རྩེ་མོའི་བར་ཅི་རིགས་པ་ལས་ཟག་པ་དང་བཅས་པ་དང་ཟག་པ་མེད་པའི་འབྲས་བུ་བཞིར་འགྱུར་རོ། །བྲལ་བའི་འབྲས་བུ་མ་གཏོགས་སོ་ཞེས་བྱ་བ་ནི་བྲལ་བ་སས་མ་བསྡུས་པའི་ཕྱིར་རོ། །དེ་ལ་རང་གི་ས་པའི་ཆོས་ཟག་པ་དང་བཅས་པ་རྣམས་ནི་ལས་ཟག་

པ་དང་བཅས་པའི་འབྲས་བུ་བཞི་ཡིན་ལ། ཟག་པ་མེད་པ་རྣམས་ནི་སྐྱེས་བུ་བྱེད་པའི་འབྲས་བུ་དང་བདག་པོའི་འབྲས་བུ་ཡིན་ནོ། །ཟག་པ་མེད་པ་རྣམས་ནི་ཟག་པ་མེད་པའི་འབྲས་བུ་གསུམ་ཡིན་ཏེ་རྣམ་པར་སྨིན་པ་དང་བྲལ་བའི་འབྲས་བུ་མ་གཏོགས་སོ། །ཟག་པ་དང་བཅས་

པ་ན་གཉིས་ཡིན་ཏེ། རྣམ་པར་སྨིན་པ་དང་། རྒྱུ་མཐུན་པ་དང་བྲལ་བའི་འབྲས་བུ་མ་གཏོགས་སོ། །དེ་ལྟར་ན་རང་གི་ས་པའི་ཆོས་ཟག་པ་དང་བཅས་པ་དང་ཟག་པ་མེད་པ་རྣམས་ནི་མདོར་བསྡུས་ཏེ་ལས་ཟག་པ་དང་བཅས་པ་དང་ཟག་པ་མེད་པའི་འབྲས་བུ་བཞིར་འགྱུར་རོ། །གཞན་

གྱི་ས་པ་གསུམ་དང་གཉིས་ཞེས་བྱ་བ་ལ། ཟག་པ་དང་བཅས་པ་དང་ཟག་པ་མེད་པའི་དབྱེ་བས་ཕྱེ་ནས་བསྟན་ཏེ། ཟག་པ་མེད་པའི་ལས་ཀྱི་འབྲས་བུ་ཟག་པ་མེད་པའི་ཆོས་གཞན་གྱི་ས་པའི་གསུམ་སྟེ། སྐྱེས་བུ་བྱེད་པ་དང་། བདག་པོ་དང་རྒྱུ་མཐུན་པའི་འབྲས་བུ་རྣམས་སོ། །

Vol. 210 · folio 82b

ས་དགུའི་ལམ་ནི་ཕན་ཚུན་དུ་མཉམ་དང་ཁྱད་པར་ཅན་གྱི་ཡིན་ཞེས་འབྱུང་བས། སྐལ་བ་མཉམ་པའི་རྒྱུ་ཡིན་པས་ཟག་པ་མེད་པའི་ཆོས་མཉམ་པ་དང་། ཁྱད་པར་ཅན་རྣམས་གཞན་གྱི་ས་ལ་ཡིན་དུ་ཟིན་ཀྱང་། གཞན་གྱི་ས་པའི་ལས་ཟག་པ་མེད་པའི་རྒྱུ་མཐུན་པའི་འབྲས་བུ་ཡིན་ནོ། །

ཁམས་སུ་མ་གཏོགས་པའི་ཕྱིར་རོ་ཞེས་བྱ་བ་ནི་ཟག་པ་མེད་པའི་ལས་ནི་ཁམས་སུ་མ་གཏོགས་པའི་ཕྱིར་རྣམ་པར་སྨིན་པའི་འབྲས་བུ་མི་སྲིད་དོ། །བྲལ་བ་ཡང་ཁམས་སུ་མ་གཏོགས་པའི་ཕྱིར་གཞན་གྱི་ས་པ་ཉིད་མི་སྲིད་དོ། །གཞན་གྱི་ས་པའི་ཆོས་ཟག་པ་དང་བཅས་པ་རྣམས་ནི་དེ་

ཉིད་ཀྱི་གཉིས་ཡིན་ཏེ། སྐྱེས་བུ་བྱེད་པ་དང་བདག་པོའི་འབྲས་བུ་དག་གོ །དེ་བཞིན་དུ་གཞན་གྱི་ས་པའི་ཆོས་ཟག་པ་དང་བཅས་པ་དང་། ཟག་པ་མེད་པ་རྣམས་ཀྱང་ཟག་པ་དང་བཅས་པའི་ལས་གཉིས་ཡིན་ཏེ། སྐྱེས་བུ་བྱེད་པ་དང་བདག་པོའི་འབྲས་བུ་དག་གོ །རྣམ་པར་སྨིན་པ་དང་བྲལ་

བའི་འབྲས་བུ་མ་གཏོགས་སོ་ཞེས་བྱ་བ་འབྱུང་སྟེ། སློབ་པའམ་མི་སློབ་པའི་ནི་རྣམ་པར་སྨིན་པའི་འབྲས་བུའམ་བྲལ་བའི་འབྲས་བུ་མེད་དོ། །སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་ཞེས་བྱ་བ་རྒྱས་པར་འབྱུང་སྟེ། སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་ཆོས་དག་ནི་ཟག་པ་དང་

བཅས་པ་དང་འདུས་མ་བྱས་ཡིན་ནོ་ཞེས་བཤད་དོ། །དེ་ལ་སློབ་པའི་ལས་རྣམ་པར་སྨིན་པའི་འབྲས་བུ་ནི་མེད་དེ་སྲིད་པས་མ་བརླན་པའི་ཕྱིར་རོ། །འཇིག་རྟེན་པའི་རྒྱུ་མཐུན་པའི་འབྲས་བུ་ཡང་མེད་དེ་མི་འདྲ་བའི་ཕྱིར་རོ། །བྲལ་བའི་འབྲས་བུ་ནི་སློབ་པ་ཡང་མ་ཡིན་མི་སློབ་པ་ཡང་

མ་ཡིན་ནོ། དེ་ཡང་སློབ་པའི་ལས་ལ་ཡོད་པ་གསུམ་ཡིན་ནོ། །སློབ་པའི་མཇུག་ནི་གཅིག་སྟེ་བདག་པོའི་འབྲས་བུའོ། །རྒྱུ་མཐུན་པའི་འབྲས་བུ་ནི་མེད་དེ་དམན་པའི་ཕྱིར་རོ། །ལྷན་ཅིག་དང་མཇུག་ཐོགས་སུ་སྐྱེ་བ་མེད་པའི་ཕྱིར་སྐྱེས་བུ་བྱེད་པའི་འབྲས་བུ་ཡང་མེད་དོ། །མི་སློབ་

པའི་མཇུག་ཐོགས་སུ་སློབ་པ་ནི་མི་འབྱུང་སྟེ། ཡོངས་སུ་ཉམས་པའི་ཚེ་ན་ཡང་ཉོན་མོངས་པ་ཀུན་ཏུ་འབྱུང་བས་བར་དུ་ཆོད་པའི་ཕྱིར་རོ། །རྣམ་པར་སྨིན་པའི་འབྲས་བུ་དང་། བྲལ་བའི་འབྲས་བུ་ནི་སློབ་པ་ཡང་མ་ཡིན་མི་སློབ་པ་ཡང་མ་ཡིན་ནོ། །མི་སློབ་པ་ནི་གསུམ་སྟེ།

Vol. 210 · folio 83a

རྣམ་པར་སྨིན་པའི་འབྲས་བུ་དང་། བྲལ་བའི་འབྲས་བུ་དག་མ་གཏོགས་སོ་ཞེས་བྱ་བ་ལ། དེ་དག་ནི་སློབ་པ་ཡང་མ་ཡིན་མི་སློབ་པ་མ་ཡིན་པ་ཉིད་ཡིན་པས་གསལ་ཏོ། །སློབ་པ་ཡང་མ་ཡིན་མི་སློབ་པ་ཡང་མ་ཡིན་པ་ནི་ཞེས་བྱ་བ་རྒྱས་པར་འབྱུང་སྟེ། སྐྱེས་བུ་

བྱེད་པའི་འབྲས་བུ་ནི་དེའི་སྟོབས་ཀྱིས་སྐྱེས་པ་རྣམས་སོ། །བདག་པོའི་འབྲས་བུ་ནི་སྔར་བྱུང་བ་མ་གཏོགས་པ་ཐམས་ཅད་དོ། །བྲལ་བའི་འབྲས་བུ་ནི་བར་ཆད་མེད་པའི་ཡིན་ན། མི་སློབ་པ་ལ་ནི་བར་ཆད་མེད་པའི་ལམ་མེད་པས་མི་སློབ་པ་རྣམས་ལ་བྲལ་བའི་འབྲས་བུ་མེད་དོ། །དེ་ལས་

གཞན་པའི་འབྲས་བུ་ནི་ཞེས་བྱ་བ་རྒྱས་པར་འབྱུང་སྟེ། སློབ་པ་ཡང་མ་ཡིན་མི་སློབ་པ་ཡང་མ་ཡིན་ལ་རྒྱུ་མཐུན་པའི་འབྲས་བུ་སློབ་པ་ནི་མེད་དེ། མི་འདྲ་བའི་ཕྱིར་རོ། །རྣམ་པར་སྨིན་པའི་འབྲས་བུ་ཡང་མེད་དེ་ཁམས་སུ་མ་གཏོགས་པའི་ཕྱིར་རོ། །བྲལ་བའི་འབྲས་བུ་ཡང་མེད་དེ། །

འདུས་བྱས་ཡིན་པའི་ཕྱིར་རོ། །རྣམ་པར་སྨིན་པའི་འབྲས་བུ་དག་མ་གཏོགས་པ་ཞེས་བྱ་བ་ནི་རྣམ་པར་སྨིན་པའམ། བྲལ་བ་ནི་མཐོང་བས་སྤང་བར་བྱ་བ་ཡོད་པ་མ་ཡིན་པས་སེལ་བར་བྱེད་དོ། །བྲལ་བའི་འབྲས་བུ་མ་གཏོགས་ཞེས་བྱ་བ་ནི་བྲལ་བ་བསྒོམ་པས་སྤང་བར་བྱ་བ་ཡོད་པས་མ་

ཡིན་པའི་ཕྱིར་རོ། །ཀུན་ཏུ་འགྲོ་བ་དང་མཚུངས་པར་ལྡན་པའི་ལས་ཀྱིས་རྒྱུ་མཐུན་པའི་འབྲས་བུ་ནི་བསྒོམ་པས་སྤང་བར་བྱ་བའི་ཆོས་ཉོན་མོངས་པ་ཅན་རྣམས་སོ། །རྣམ་པར་སྨིན་པ་ནི་ཉོན་མོངས་པ་ཅན་མ་ཡིན་པའི་ཕྱིར་བསྒོམ་པས་སྤང་བར་བྱ་བ་ཡིན་པས། མཐོང་བས་སྤང་བར་བྱ་

བའི་ཉོན་མོངས་པ་མི་དགེ་བ་དག་དང་མཚུངས་པར་ལྡན་པའི་ལས་ཀྱི་རྣམ་པར་སྨིན་པའི་འབྲས་བུ་ནི་བསྒོམ་པས་སྤང་བ་བྱ་བ་ཡིན་ནོ། །གཅིག་སྟེ་བདག་པོའི་འབྲས་བུའོ་ཞེས་བྱ་བ་ལ་དེའི་སྟོབས་ཀྱིས་མི་སྐྱེ་བའི་ཕྱིར་སྐྱེས་བུ་བྱེད་པའི་འབྲས་བུ་ནི་མེད་དེ་བསྒོམ་པས་སྤང་བར་བྱ་བའི་ལས་ཀྱི་ཞེས་བྱ་

བའི་རྒྱས་པར་འབྱུང་སྟེ། རྒྱུ་མཐུན་པའི་འབྲས་བུ་ནི་མེད་དེ་ཀུན་ཏུ་འགྲོ་བ་མ་ཡིན་པའི་ཕྱིར་རོ། །རྣམ་པར་སྨིན་པའི་འབྲས་བུ་ཡང་མེད་དེ་རྣམ་པར་སྨིན་པ་མཐོང་བས་སྤང་བར་བྱ་བ་མེད་པའི་ཕྱིར་རོ། །བྲལ་བའི་འབྲས་བུ་ཡང་མེད་དེ་བྲལ་བ་ནི་སྤང་བར་བྱ་བ་མ་ཡིན་པའི་

Vol. 210 · folio 83b

ཕྱིར་རོ། །རྣམ་པར་སྨིན་པ་དང་རྒྱུ་མཐུན་པའི་འབྲས་བུ་མ་གཏོགས་སོ་ཞེས་བྱ་བ་ནི། སྤང་བར་བྱ་བ་མ་ཡིན་པའི་ཕྱིར་དང་མི་འདྲ་བའི་ཕྱིར་རྣམ་པར་སྨིན་པ་དང་རྒྱུ་མཐུན་པའི་འབྲས་བུ་ཉིད་ཡིན་པ་སེལ་བར་བྱེད་དོ། །སྤང་བར་བྱ་བ་མ་ཡིན་པའི་ལས་ཀྱི་འབྲས་བུ་ཞེས་བྱ་བ་རྒྱས་

པར་འབྱུང་བ་ལ། སྤང་བར་བྱ་བ་མ་ཡིན་པའི་ལས་ཀྱི་མཇུག་ཐོགས་སམ། ལྷན་ཅིག་མཐོང་བས་སྤང་བར་བྱ་བ་སྐྱེ་བ་ནི་ཡོད་པ་མ་ཡིན་པས་སྐྱེས་བུ་བྱེད་པའི་འབྲས་བུ་མེད་དོ། །བསྒོམ་པས་སྤང་བར་བྱ་བའི་སེམས་ནི་སྤང་བར་བྱ་བ་མ་ཡིན་པའི་ལས་ཀྱི་མཇུག་ཐོགས་སུ་འབྱུང་བས་

སྐྱེས་བུ་བྱེད་པ་དང་བདག་པོའི་འབྲས་བུ་ཡང་བསྒོམ་པས་སྤང་བར་བྱ་བ་ཡིན་ནོ། །རྣམ་པར་སྨིན་པའི་འབྲས་བུ་མ་གཏོགས་སོ་ཞེས་བྱ་བ་ནི་རྣམ་པར་སྨིན་པ་སྤང་བར་བྱ་བ་མ་ཡིན་པ་མེད་པས་མ་གཏོགས་སོ། །དབུས་སུ་ཡང་ཐོག་མ་དང་ཐ་མ་གཞན་ཤེས་པར་བྱ་བའི་ཕྱིར་ཏེ་ཞེས་བྱ་བ་ནི་མ་

སྨོས་ཀྱང་དབུས་སུ་ཡང་གོ་རིམས་བཞིན་ཞེས་བྱ་བའི་སྒྲ་ཅི་ནས་ཀྱང་ཤེས་པར་བྱ་བའི་ཕྱིར་རོ། །ཇི་ལྟར་ཞེ་ན། དེའི་ཕྱིར་དེ་ནི་མཐུན་པར་སྦྱར་བའི་ཆོས་ཡིན་ནོ་ཞེས་སྨོས་ཏེ་དེ་ནི་མདོར་བསྡུས་པའི་ཚུལ་ཡིན་ནོ། །མི་དགེའི་དགེ་སོགས་གཉིས་དང་ནི། །གསུམ་དང་བཞི་སྟེ་གོ་རིམས་

བཞིན། །ཞེས་ཐོག་མར་ཡང་གོ་རིམས་བཞིན་ཞེས་བྱ་བའི་སྒྲར་སྦྱར་ལ། སྤང་བྱ་མིན་པའི་དེ་དག་གཅིག་གཉིས་དང་བཞི་སྟེ་གོ་རིམས་བཞིན་ཞེས་ཐ་མར་ཡང་སྦྱར་བ་ཡིན་ནོ། །ཚུལ་བཞིན་མ་ཡིན་པ་ཡིད་ལ་བྱེད་པ་ལས་འབྱུང་བའི་ཕྱིར་རོ་ཞེས་བྱ་བ་ལ། ཡིད་ལ་བྱེད་པས་ན་ཡིད་ལ་

བྱེད་པ་སྟེ་ཡིད་ཡུལ་དག་རངས་པར་བྱེད་ཅེས་བྱ་བའི་ཐ་ཚིག་གོ །ཚུལ་ནི་ཐབས་སོ། །ཚུལ་བཞིན་དུ་མ་ཡིན་པ་ནི་ཚུལ་བཞིན་མ་ཡིན་པ་སྟེ། ཚུལ་བཞིན་མ་ཡིན་ཞིང་ཐབས་བཞིན་མ་ཡིན་པ་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ། །གཞན་དག་ན་རེ་ཆོ་ག་ཉམས་པ་ཡང་ཡིན་ཏེ་ཞེས་

བྱ་བ་ནི་ཉོན་མོངས་པ་ཅན་འབའ་ཞིག་ཏུ་མ་ཟད་པའོ། །ཆོ་ག་ཉམས་པ་གང་ཡིན་པ་དེ་ཡང་རིག་པ་མ་ཡིན་པས་བསྐྱེད་པ་ཡིན་ཏེ་མི་རིགས་པ་བྱེད་པའི་ཕྱིར་རོ། །སོགས་པ་ཞེས་བྱ་བའི་སྒྲ་ནི་ངག་གི་ལས་མ་བསྒྲིབས་ལ་ལུང་དུ་མ་བསྟན་པ་རྟགས་དང་དུས་དང་། བྱེད་པ་མི་མཐུན་པའི་ཕྱིར་མི་

Vol. 210 · folio 84a

རིག་པར་བྱས་པས་རིག་པ་མ་ཡིན་པས་སྐྱེད་པ་དང་ཆོ་ག་ཉམས་པ་པའི་ལུས་དང་ངག་གི་ལས་ཀུན་ནས་སློང་བར་བྱེད་པའི་ཡིད་ཀྱི་ལས་རིག་པ་མ་ཡིན་པས་བསྐྱེད་པ་བསྡུའོ། །རིག་པ་མ་ཡིན་པས་བསྐྱེད་པ་འདི་ནི་བརྡར་བཏགས་པ་པ་ཡིན་

གྱི། དོན་དམ་པར་རིག་པས་བསྐྱེད་པ་ནི་དགེ་བའི་ལས་ཡིན་ལ། རིག་པ་མ་ཡིན་པས་བསྐྱེད་པ་ནི་ཉོན་མོངས་པ་ཅན་ཡིན་ཞིང་། དེ་གཉི་ག་དང་བྲལ་བ་ནི་མ་བསྒྲིབས་ལ་ལུང་དུ་མ་བསྟན་པ་ཡིན་ནོ། །ཅི་ལས་གཅིག་གི་སྐྱེ་བ་གཅིག་ཁོ་ནར་འཕེན་ནམ་ཞེས་བྱ་བ་ལ་སོགས་པ་འབྱུང་

སྟེ། རྒྱུའི་དངོས་པོར་གནས་སམ་ཞེས་བྱ་བའི་ཐ་ཚིག་གོ །གལ་ཏེ་ལས་དུ་མས་སྐྱེ་བ་གཅིག་འཕེན་པ་དང་གཅིག་གིས་དུ་མ་འཕངས་ན་ཅིར་འགྱུར་ཞེ་ན། རེ་ཞིག་དང་པོ་ལྟར་ན་རིས་མཐུན་པ་དུ་མ་འཕེན་པས་སྐྱེ་བ་གཅིག་ཁོ་ན་ལ་ལས་ཀྱི་འབྲས་བུ་གཅིག་ཟད་ཅིང་ལས་གཞན་གྱི་འབྲས་བུ་སྐྱེ་བ་ན་

འཆི་འཕོ་བ་དང་སྐྱེ་བར་ཐལ་བར་འགྱུར་བའི་ཕྱིར་སྔོན་གྱི་དུས་ཀྱི་སྲིད་པ་ཁོ་ན་ལ་འཆི་བ་དང་སྐྱེ་བའི་སྲིད་པ་ལན་ཅིག་མ་ཡིན་པར་ཡོད་པར་འགྱུར་རོ། །ཤིན་ཏུ་སྨྲས་པར་གྱུར། ཡོངས་སུ་མྱ་ངན་ལས་འདས་པ་མེད་པ་ཡིན། ཨ་ཏྱནྟཾ་བཱ་ཙ་སྱད་པ་རི་ནིརྦཎཾ་ན་ཧི་ཨ་ཏཱ་ཀཱ་ར་ཎ་མ་ཏི་ཡ་

དེ་ཀ་ག་ཏི་བེ་ད་ནཱི་ཡ་སྱ་ཀརྨ་ཎ་ཀ་སྱ་ཙིཏྭ་ལོཏྭ་ཙྷཽ་ཙྱུ་ཏྱུ་བ་བིཏྟ་བྷྱ་པ་ཏཿཀ་སྱ་ཙི་ནེ་ཏི། ཡ་ཏི་ཙས་མ་ན་ག་ཏི་ཀ་སྱ་ཀརྨ་ཎཿཕ་ལོཏྤ་ཏྟཽ་ཙྱུཏྱུ་བ་པཏྟེ་ནཥྱེ་ཏེ། བྷི་ན་ག་ཏི་ཀ་སྱ་བི་ནཥྚེ་བྱཿབི་ཤི་ཥ་ཧེ་ཏྭཱ་བྷ་བ་ཏ། གཅིག་གིས་དུ་མ་འཕེན་པ་ཡང་མ་ཡིན་ཏེ། དེ་ལྟར་ན་ནི་ལས་གཅིག་ཁོ་ན་

སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་ཡང་འགྱུར་ན། དེ་ནི་འདོད་པ་ཡང་མ་ཡིན་ཏེ་ལས་གནས་སྐབས་ངེས་པ་ཡིན་པའི་ཕྱིར་རོ། །དེའི་ཕྱིར་ལས་གཅིག་ཁོ་ནས་སྐྱེ་བ་གཅིག་འཕེན་གྱི་དུ་མ་ནི་མ་ཡིན་ནོ་ཞེས་བྱ་བ་དེ་འགྲུབ་བོ། །དེ་བསོད་སྙོམས་ལ་

བསྟན་ཏེ་ཞེས་བྱ་བ་རྒྱས་པར་འབྱུང་སྟེ། དེ་ཉིད་ཀྱི་ཕྱིར་བསོད་སྙོམས་གཅིག་པ་འདིའི་རྣམ་པར་སྨིན་པས་ཞེས་བྱ་བ་བརྗོད་དེ། དེའི་ཕྱིར་རྣམ་པར་སྨིན་པ་གཅིག་ནི་མ་ཡིན་པས། བསོད་སྙོམས་ནི་སེམས་པ་དེ་རྣམས་ཀྱིས་སྟོན་པར་བྱེད་དོ། །རྣམ་པར་སྨིན་པ་དང་བཅས་པ་

Vol. 210 · folio 84b

གཞན་ཡིན་ནོ་ཞེས་བྱ་བ་ནི་ལས་དང་འབྲས་བུ་གཅིག་པའི་ཚོགས་པ་ཐམས་ཅད་དོ། །འཕེན་བྱེད་མ་ཡིན་ཞེས་བྱ་བ་རྒྱས་པར་འབྱུང་སྟེ་ལས་དང་ལྷན་ཅིག་འབྱུང་བའི་ཕྱིར་དང་ལས་རྣམས་ཀྱི་འབྲས་བུ་དུ་མ་ཡིན་པའི་ཕྱིར་རོ། །ལས་ཉིད་སྒྲིབ་པ་ཡིན་པས་ལས་ཀྱི་སྒྲིབ་པའོ། །ཉོན་

མོངས་པ་དང་རྣམ་པར་སྨིན་པའི་སྒྲིབ་པ་ཡང་དེ་དང་འདྲ་བར་རིག་པར་བྱའོ། །དེ་ལ་དྲག་པོ་རྒྱུན་ཏུ་འབྱུང་བ་གང་ཡིན་པ་དང་། ཡང་ཡང་རྒྱུན་ཏུ་འབྱུང་བ་གང་ཡིན་པ་དེ་ནི་རྣམ་པ་གཉི་ག་ཡང་སྒྲིབ་པ་ཡིན་ནོ། །འཕགས་པའི་ལམ་ལ་སྦྱོར་བར་བྱེད་པ་ཞེས་བྱ་བ་ནི། མི་སྡུག་པ་དང་

དབུགས་དབྱུང་བ་དང་རྔུབ་པ་དྲན་པ་དང་དྲོ་བར་གྱུར་པ་ལ་སོགས་པ་རྣམས་སོ། །ངན་སོང་ལ་སོགས་པར་ངེས་པར་འགྱུར་བ་ཞེས་བྱ་བ་ནི། དམྱལ་བ་དང་ཡི་དགས་དང་དུད་འགྲོར་ངེས་པར་འགྱུར་བའོ། །སོགས་པ་ཞེས་བྱ་བའི་སྒྲས་ནི་འདུ་ཤེས་མེད་པ་དང་ཚངས་པ་ཆེན་པོར་ངེས་

པར་འགྱུར་བའི་ལས་ཀྱང་བསྡུ་ལ། ཟ་མ་དང་མ་ནིང་དང་མཚན་གཉིས་པར་འགྱུར་བ་ལ་ཡང་བརྗོད་པར་བྱའོ། །ངེས་པ་གང་གིས་གཟུགས་དང་གཟུགས་མེད་པའི་ཁམས་ཀྱི་གནས་གཅིག་ཏུ་སྐྱེ་བ་གཞན་གཉིས་འཕེན་པ་རྒོལ་བ་མ་ཡིན་ཏེ། འདི་ཐམས་ཅད་བདེན་པ་རྣམས་སུ་བལྟ་

བར་བྱའོ། །སྒོ་ང་ལས་སྐྱེ་བར་འགྱུར་བ་དང་། དྲོད་གཤེར་ལས་སྐྱེ་བར་འགྱུར་བ་དང་། བུད་མེད་ཉིད་དུ་འགྱུར་བ་དང་། སྲིད་པ་བརྒྱད་པར་ངེས་པར་འགྱུར་བ་གཞན་དང་གཞན་དག་ཀྱང་ཞེས་བྱ་བ་ནི་འཕགས་པའི་རྒྱུད་ལ་སྒོ་ང་ལས་སྐྱེ་བ་དང་དྲོད་གཤེར་ལས་སྐྱེ་བ་དང་། བུད་མེད་ཉིད་

རྣམ་པར་མི་སྨིན་པ་ཡིན་གྱི། སྒོ་ང་ལས་སྐྱེས་པ་ལ་སོགས་པ་རྣམས་ཀྱིས་བདེན་པ་མཐོང་བ་ནི་མི་འགལ་ལོ། །བདེན་པ་མཐོང་བ་ནི་ལྷའམ་མི་དག་གི་ནང་དུ་སྲིད་པ་བརྒྱུད་པར་ཉིང་མཚམས་སྦྱོར་བ་ཡང་མ་ཡིན་ནོ། །བསྟན་པར་སླ་བ་ནི་གཞན་དག་ལའོ། །གདགས་པར་

སླ་བ་ནི་བདག་ཉིད་ཀྱིས་ཏེ་གདགས་པར་ནུས་པའི་ཕྱིར་རོ། །ཡང་ན་བསྟན་པར་སླ་བའི་རྣམ་གྲངས་སུ་བརྗོད་པར་བྱའོ། །གཞི་དང་ཞེས་བྱ་བ་ནི་གཞི་སྟེ། མཚམས་མེད་པ་གསུམ་གྱི་གཞི་ནི་སྲོག་གཅོད་པའི་ལས་ཀྱི་ལམ་ཡིན་ནོ། །བཞི་པའི་གཞི་ནི་བརྫུན་དུ་སྨྲ་བའོ། །ལྔ་

Vol. 210 · folio 85a

པའི་གཞི་ནི་སྲོག་གཅོད་པའི་སྦྱོར་བ་ཡིན་ནོ། །གཞན་དག་གཞི་ནི་ཕྱི་མོའོ་ཞེས་ཟེར་རོ། །འབྲས་བུ་ནི་འབྲས་བུ་སྟེ། མཚམས་མེད་པ་ཐམས་ཅད་ཀྱི་འབྲས་བུ་ནི་ཡིད་དུ་མི་འོང་བ་ཡིན་པའི་ཕྱིར་རོ། །འགྲོ་བ་ནི་འགྲོ་བ་སྟེ། དེའི་རྣམ་པར་སྨིན་པ་ནི་

དམྱལ་བའི་འགྲོ་བ་ཁོ་ནར་ཉམས་སུ་མྱོང་བར་འགྱུར་རོ། །སྐྱེ་བ་ནི་སྐྱེ་བ་སྟེ་སྐྱེས་པའི་མཇུག་ཐོགས་ཁོ་ནར་མྱོང་བར་འགྱུར་བ་ཡིན་པའི་ཕྱིར་རོ། །གང་ཟག་ནི་གང་ཟག་གིས་ཏེ་མངོན་སུམ་དུ་མཐོང་བའི་ཚུལ་དུ་འདི་ནི་ཕ་གསོད་པར་བྱེད་པ་ཡིན་ནོ། །འདི་ནི་མ་གསོད་པར་བྱེད་པ་ཡིན་

ནོ། །ཞེས་བྱ་བ་ལ་སོགས་པར་རོ། །ངན་སོང་ལ་སོགས་པར་ངེས་པར་འགྱུར་བ་ནི་དེ་ལྟར་མ་ཡིན་པས་མ་བཤད་དོ། །ཉོན་མོངས་པ་དང་ལས་ཀྱི་སྒྲིབ་པ་གཉིས་ཀྱིས་ནི་ཚེ་ཕྱི་མར་ཡང་གསོ་མི་རུང་བར་འགྱུར་གྱི་རྣམ་པར་སྨིན་པའི་སྒྲིབ་པས་ནི་མ་ཡིན་ནོ། །གཞན་དག་ན་རེ་ཐ་ཤལ་

ཉིད་དོ་ཞེས་ཟེར་རོ། །ཕྱི་མ་ཕྱི་མ་འདྲེན་པའི་ཕྱིར་རོ་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་ནི་ཉོན་མོངས་པ་དག་གིས་ལས་འདྲེན་པ་ལས་ཀྱིས་སྐྱེ་བ་འདྲེན་པ་དེའི་ཕྱིར་ཉོན་མོངས་ལས་ཀྱི་སྒྲིབ་པ་དག་ཁོ་ན་ཐ་ཤལ་ཡིན་ནོ་ཞེས་ཟེར་རོ། །དགེ་སྦྱོང་གི་ཚུལ་བཞིན་ནོ་ཞེས་བྱ་བ་ནི། །དགེ་སྦྱོང་ཚུལ་

ནི་དྲི་མེད་ལམ་ཞེས་བྱུང་བས་ན་ཟག་པ་མེད་པའི་ལམ་དང་ལྡན་པའི་ཕྱིར་ན་དེ་དགེ་སྦྱོང་དུ་འགྱུར་བ་དེ་བཞིན་དུ་དེ་ཡང་མ་གསོད་པ་ལ་སོགས་པ་དང་ལྡན་པས་དམྱལ་བར་སྐྱེ་བར་འགྱུར་བ་ལ་བར་མེད་པ་ཡིན་པས་མ་གསོད་པ་ལ་སོགས་པའི་ལས་ལ་མཚམས་མེད་པ་ཞེས་བྱའོ། །བྱང་གི་སྒྲ་

མི་སྙན་དང་ཞེས་བྱ་བ་ནི་མཚམས་མེད་པ་མེད་དེ་རང་བཞིན་བཟང་བའི་ཕྱིར་དང་། ཆ་ངེས་པའི་ཕྱིར་དང་། དོན་བསྟན་པ་མེད་པའི་ཕྱིར་རོ། །འགྲོ་བ་གཞན་ན་ཡང་མེད་ཅེས་བྱ་བ་ནི་དམྱལ་བ་དང་། ཡི་དྭགས་དང་། དུད་འགྲོ་དག་ནའོ། །ཁམས་གཞན་ན་ལྟ་སྨོས་ཀྱང་ཅི་

དགོས་ཞེས་བྱ་བ་ནི་གཟུགས་མེད་པའི་ཁམས་ནའོ། །ཟ་མ་ལ་སོགས་མི་འདོད་དོ་ཞེས་བྱ་བ་ནི། ཟ་མ་དང་མ་ནིང་དང་མཚན་གཉིས་པ་རྣམས་ལའོ། །སྡོམ་པ་མེད་པའི་གཏན་ཚིགས་གང་ཡིན་པ་དེ་ཉིད་ཀྱི་ཕྱིར་རོ་ཞེས་བྱ་བ་ནི། ངོ་ཚ་ཤེས་པ་དང་། ཁྲེལ་ཡོད་པ་མེད་པ་དང་།

Vol. 210 · folio 85b

ལུས་ཞིང་ཚྭ་སྒོ་ཅན་དང་འདྲའོ། །གལ་ཏེ་ལུས་མ་ཚང་བའི་རྒྱུ་ཡིན་པའི་ཕྱིར་ཕན་པ་ཆུང་བ་ཉིད་ཡིན་ན་དམུས་ལོང་ལ་སོགས་པ་དག་ལ་ཡང་མཚམས་མེད་པ་མེད་པར་འགྱུར་རོ་ཞེ་ན། ཟ་མ་ལ་སོགས་པའི་ལུས་ནི་རྟོགས་པ་དང་འགལ་བའི་ཕྱིར་མཚང་བར་འདོད་ཀྱི་གཞན་དུ་ནི་མ་ཡིན་

ནོ། །དེ་ཉིད་ཀྱི་ཕྱིར་ཞེས་བྱ་བ་ནི་ཡི་དགས་དང་དུད་འགྲོ་རྣམས་ལ་ཡང་ཕན་པ་དང་ངོ་ཚ་ཆུང་བའི་ཕྱིར་མི་འདོད་དོ། །ཇི་ལྟར་ཕན་པ་ཆུང་བ་ཉིད་ཡིན་ཞེ་ན་འགྲོ་བ་ངན་པས་བསྡུས་པའི་ལུས་ཀྱི་རྒྱུ་ཡིན་པའི་ཕྱིར་རོ། །རྟ་ཅང་ཤེས་བཞིན་ནོ་ཞེས་བྱ་བ་ནི་རྟ་ཁ་ཅིག་ཅང་ཤེས་ཡིན་པའི་ཕྱིར་

མ་ལ་མི་རྒོལ་ལོ་ཞེས་གྲག་གོ །མིའི་ཡང་ཕ་མ་མི་མ་ཡིན་པ་ཞེས་བྱ་བ་ནི་ཕན་པ་དང་ངོ་ཚ་ཆུང་བ་ཉིད་ཀྱི་ཕྱིར་ཏེ། མི་མ་ཡིན་པས་ནི་མི་དང་མཐུན་པའི་ཕན་པ་བྱེད་པར་མི་ནུས་ལ། ཕ་མ་མི་མ་ཡིན་པ་དག་གིས་གམ་དུ་མི་ལ་ངོ་ཚ་ཤེས་པ་དང་ཁྲེལ་ཡོད་པ་ཤས་ཆེན་པོ་ཡང་ནས་ཡང་དུ་

གནས་པ་ཡང་མ་ཡིན་ནོ། །སྒྲ་མི་སྙན་པ་རྣམས་དང་འདུ་ཤེས་མེད་པའི་སེམས་ཅན་རྣམས་ནི་བདེན་པ་དག་མཐོང་བར་མི་ནུས་པས་རྣམ་པར་སྨིན་པའི་སྒྲིབ་པ་ཡིན་ནོ། །གླིང་གསུམ་གྱི་ཟ་མ་ལ་སོགས་པའི་རྟེན་ཡང་འཕགས་པའི་ལམ་གྱི་སྣོད་མ་ཡིན་པ་ཉིད་ཀྱི་ཕྱིར་རྣམ་པར་སྨིན་

པའི་སྒྲིབ་པ་མ་ཡིན་ནམ་ཞེ་ན། ཟ་མ་དང་མ་ནིང་ལ་སོགས་པའི་རྟེན་དེ་ཉིད་ཀྱིས་འཕགས་པའི་ལམ་རྟོགས་པར་ནུས་པ་མེད་དོ། །ངན་སོང་རྣམས་དང་བྱང་གི་སྒྲ་མི་སྙན་པ་འདུ་ཤེས་མེད་པའི་སེམས་ཅན་རྣམས་ཀྱིས་ཀྱང་མི་ནུས་ཏེ་འཁྲུལ་པའི་ཕྱིར་རོ། །འདི་ཉིད་རྣམ་པར་སྨིན་པའི་

སྒྲིབ་པའོ། །ངན་སོང་ཉིད་ལ་སོགས་པའི་སོ་སོ་སྐྱེ་བོའི་ས་རྣམས་རྣམ་པར་སྨིན་པའི་སྒྲིབ་པ་ཉིད་ཀྱིས་བརྗོད་དོ། །གཞན་ནི་འཕགས་པའི་གང་ཟག་དང་ཐུན་མོང་བའི་ས་ཡིན་པས་རྣམ་པར་སྨིན་པའི་སྒྲིབ་པ་ཉིད་དུ་མ་བཤད་དོ་ཞེས་གཞན་དག་ཟེར་རོ། །དེ་བཞིན་གཤེགས་པ་རྣམས་

ནི་ཉེ་བར་མི་བརྫི་བའི་ཆོས་ཅན་ཡིན་ནོ་ཞེས་བྱ་བ་ནི། རབ་འགྲོངས་པའི་ཕྱིར་དེ་དག་ལ་གཞན་དག་གིས་མི་བརྫིའོ། །རྒྱུ་ལ་འབྲས་བུ་བཏགས་པ་ཞེས་བྱ་བ་ནི་བརྫུན་དུ་སྨྲ་བ་དགེ་འདུན་གྱི་དབྱེན་གྱི་རྒྱུ་ཡིན་ཏེ། རྒྱུ་དེ་ལ་འབྲས་བུ་བཏགས་པའི་ཕྱིར་དགེ་འདུན་དབྱེན་མཚམས་མེད་

Vol. 210 · folio 86a

པར་བཤད་དོ། །འདིས་འབྱེད་པར་བྱེད་པས་ན་ཞེས་བྱ་བ་འདི་ནི་དངོས་ཁོ་ནར་དགེ་འདུན་གྱི་དབྱེན་ཡིན་ནོ་ཞེས་སྟོན་ཏོ། །དེ་ཇི་ལྟར་མཚམས་མེད་པར་འགྱུར་ཞེས་བྱ་བ་ནི་མཚམས་མེད་པ་ནི་མི་དགེ་བ་ཡིན་ལ། དགེ་འདུན་གྱི་དབྱེན་ནི་མ་བསྒྲིབས་ལ་ལུང་དུ་མ་

བསྟན་པ་ཡིན་ནོ་སྙམ་དུ་སེམས་པའོ། །འབྱེད་པ་པོ་ནི་མཚམས་མེད་པ་དང་ལྡན་གྱི། འབྱེད་པ་པོ་ཕྱེ་བ་དང་ནི་མི་ལྡན་པས་དགེ་འདུན་གྱི་དབྱེན་མཚམས་མེད་པ་མ་ཡིན་ནོ། །བར་གྱི་བསྐལ་པ་ཞེས་བྱ་བ་ནི་བསྐལ་པ་ཆེན་པོ་མ་ཡིན་ཏེ། འདོད་པའི་ཁམས་ན་ཚེའི་ཚད་དེ་ཙམ་མེད་པའི་

ཕྱིར་རོ། །ཡང་གང་གིས་མཚམས་མེད་པ་མང་པོ་བྱས་པ་ཡིན་ལ་ཞེས་བྱ་བ་རྒྱས་པར་འབྱུང་བ་ནི་དངོས་པོ་ཁོ་ནས་དམྱལ་བ་དག་ཏུ་སྐྱེ་བ་འཕངས་པས་ཇི་ལྟར་གཞན་དག་དོན་མེད་པར་མི་འགྱུར་སྙམ་དུ་བསམས་པའོ། །དོན་མེད་པ་སྟེ་གང་གི་ཕྱིར་གཅིག་གིས་སྐྱེ་བ་འཕངས་པ་ལས།

ལྷགས་པས་གནོད་པ་ལྷགས་པར་འགྱུར། །ཆེན་པོ་ཞེས་བྱ་བ་ནི་ཆེས་ཆེ་བའོ། །གང་ཡང་མཚམས་མེད་པའི་ལས་གཞན་གྱི་དམྱལ་བར་སྐྱེ་བར་སོ་སོར་ངེས་པར་གྱུར་པ་ལས། ཕྱིས་མཚམས་མེད་པས་ཇི་ལྟར་མཚམས་མེད་པར་འགྱུར། མཚམས་མེད་པ་ལས་གྲོལ་ཏེ་ལས་ཀྱིས་

དམྱལ་བར་སྐྱེ་བ་འཕངས་པ་ནི་དེ་སྲིད་མཚམས་མེད་པ་བྱས་པས་ཀྱང་སྟེ་དེ་ནི་སྔ་མ་བཞིན་དུ་མེད་པར་འགྱུར་རོ། །དཔེར་ན་མཚམས་མེད་ལ་གཞན་གྱིས་འཕངས་པའི་མཚམས་མེད་པ་བཞིན་ནོ། །གཞན་དག་ན་རེ་འཕེན་པར་བྱེད་པའི་ལས་ཀྱི་རྣམ་པར་སྨིན་པ་སྨིན་པར་བྱེད་པ་མ་ཡིན་ནོ་

ཞེས་ཟེར་རོ། །ཁྱིམ་པ་ཡང་མ་ཡིན་ལ་དགེ་སློང་མ་ལ་སོགས་པ་ཡང་མ་ཡིན་ནོ་ཞེས་བྱ་བ་ནི་དེ་དག་གི་ལུས་མི་གཉན་པའི་ཕྱིར་རོ། །དེ་ཡང་ལྟ་བ་སྤྱད་པ་ཁོ་ནས་ཞེས་བྱ་བ་ནི་སྡིག་པའི་བསམ་པ་བརྟན་པ་དང་མཁྱུད་པ་ཅན་ཡིན་པའི་ཕྱིར་རོ། །སྲེད་པ་སྤྱད་པས་ནི་མ་ཡིན་ནོ་ཞེས་བྱ་བ་

ནི་ཀུན་ནས་ཉོན་མོངས་པ་དང་རྣམ་པར་བྱང་བའི་ཕྱོགས་དག་ལ་བསམ་པ་མི་བརྟན་པའི་ཕྱིར་རོ། །བཟོད་པར་དཀའ་བའི་ཕྱིར་ཞེས་བྱ་བ་ནི་ཟིལ་གྱིས་མནན་པར་དཀའ་བའི་ཕྱིར་རོ། །ཆོས་མངོན་སུམ་དུ་གྱུར་པའི་ཕྱིར་རོ་ཞེས་བྱ་བ་ནི་ལུང་དང་རྟོགས་པའི་ཆོས་སུ་དག་མངོན་སུམ་དུ་བྱས་

Vol. 210 · folio 86b

པའི་ཕྱིར་དང་དད་པ་མི་ཕྱེད་པ་དང་ལྡན་པའི་ཕྱིར་རོ། །བཟོད་པ་ཐོབ་པ་རྣམས་ནི་མ་ཡིན་ནོ་ཞེས་བྱ་བ་ནི་བཟོད་པ་ཆེན་པོ་ཐོབ་པ་རྣམས་ཏེ། མཐོང་བའི་ལམ་ཉེ་ཞིང་ངེས་པ་ལ་མངོན་དུ་ཕྱོགས་པའི་ཕྱིར་རོ། །ལམ་འཇུག་པའི་གེགས་སུ་གྱུར་པའི་ཕྱིར་ཞེས་བྱ་བ་ནི་དགེ་འདུན་

བྱེ་བ་ལམ་འཇུག་པའི་གེགས་ཉིད་དུ་གྱུར་ཏེ། དམ་པ་མ་ཡིན་པའི་ལམ་གཞན་ཞུགས་པས་དམ་པར་གྱུར་པའི་ལམ་འཇུག་པའི་གེགས་སུ་གྱུར་པའི་ཕྱིར་གེགས་ཉིད་དུ་འགྱུར་རོ་ཞེས་བྱ་བའི་ཐ་ཚིག་གོ །ལྷས་བྱིན་གྱིས་ནི་ངེས་པར་འབྱུང་བར་བྱ་བའི་ཕྱིར་ལམ་གཞི་ལྔ་པ་བསྟན་ཏེ།

འོ་མ་མི་སྤྱད་པ་དང་། ཤ་སྤང་བ་དང་། ལན་ཚྭ་ཉེ་བར་ལོངས་མི་སྤྱད་པ་དང་། གོས་མ་དྲས་པ་བགོས་པ་དང་། གྲོང་གི་ནང་གི་གཙུག་ལག་ཁང་དུ་འདུག་པའོ། །གླིང་གཞན་ནི་མེད་དོ་ཞེས་བྱ་བ་ནི་སངས་རྒྱས་འབྱུང་བའི་ས་ངེས་པ་ཡིན་ནོ། །གང་ན་སྟོན་པ་བཞུགས་པ་དེ་ན་སྟོན་

པའི་འགྲན་ཟླ་གནས་ཀྱི་གཞན་དུ་ནི་མ་ཡིན་ནོ། །གདོན་མི་ཟ་བར་དགེ་འདུན་ཕྱོགས་གཉིས་སུ་གནས་པར་འགྱུར་བ་ཞེས་བྱ་བ་ལ། འདིར་བཞི་སྡེ་ལ་དགེ་འདུན་དུ་མངོན་པར་འདོད་དོ། །བརྒྱད་དག་དང་ལྷགས་པ་དག་གིས་ཀྱང་ཡིན་ཏེ་བྱེད་པ་པོ་མེད་པའི་ཕྱིར་རོ། །དང་པོ་ཞེས་བྱ་བ་ནི་

དེའི་ཚེ་སྔར་མེད་པའི་ཆོས་བྱུང་བ་ལ་དགའ་བ་དང་རབ་ཏུ་དགའ་བ་སྐྱེ་བས་ཐམས་ཅད་བསམ་པ་དགེ་བའི་ཕྱིར་ཤ་གཅིག་པ་ཡིན་ནོ། །མཐར་ཡང་སྟོན་པ་དང་བྲལ་བར་འགྱུར་རོ་སྙམ་སྟེ། སྐྱོ་བའི་ཕྱིར་ཤ་གཅིག་པ་ཡིན་ནོ། །དེའི་ཚེ་བསྟན་པ་འཕེལ་ཞིང་རྒྱས་པར་གནས་པ་མེད་པའི་ཡང་ཕྱིར་རོ། །ཤ་

གཅིག་ཅེས་བྱ་བ་ནི་བློ་གཅིག་ཅིང་མི་མཐུན་པ་མེད་ཅེས་བྱ་བའི་དོན་ཏེ། དགེ་སློང་གི་དགེ་འདུན་མཐུན་པ་ན་སངས་རྒྱས་རྣམས་ཡོངས་སུ་མྱ་ངན་ལས་འདའ་བའི་ཕྱིར་རོ། །གཞན་དག་ན་རེ་ཆོས་ཉིད་ཀྱི་ངེས་པས་འཁོར་རྣམས་སྐྱོ་བ་ལ་སོགས་པའི་ཕྱིར་མཐའ་མ་ཡིན་ཞེས་ཟེར་རོ། །བར་

དུ་ཡང་སྐྱོན་མ་བྱུང་བའི་སྔ་རོལ་དུ་ཞེས་བྱ་བ་ནི་ལྟ་བ་དང་ཚུལ་ཁྲིམས་རྣམ་པར་འགྱུར་བ་དམིགས་པས་འབྱེད་པ་པོའི་ཚིག་གི་གླགས་ཡོད་པར་འགྱུར་རོ། །དེ་ལ་ལྟ་བའི་སྐྱོན་ནི་ཇི་སྐད་དུ་བདག་གིས་བཅོམ་ལྡན་འདས་ཀྱིས་བཤད་པའི་དོན་འཚལ་བ་ལྟར་ན། བཅོམ་ལྡན་འདས་ཀྱིས་གང་

Vol. 210 · folio 87a

ཞིག་བར་དུ་གཅོད་པའི་ཆོས་སུ་བཀའ་སྩལ་པ་དེ་དག་ནི་བརྟེན་ན་བར་དུ་གཅོད་པར་མི་འགྱུར་ལགས་སོ་ཞེས་བྱ་བ་དང་། དེ་བཞིན་དུ་སེམས་དེ་ཉིད་ཀུན་ཏུ་རྒྱུག་འཁོར་བར་འགྱུར་ལགས་སོ་ཞེས་བྱ་བ་ལ་སོགས་པ་བཤད་པ་ལྟ་བུའོ། །ལས་ལ་རག་ལས་

པའི་ཕྱིར་ཞེས་བྱ་བ་ནི་གང་གིས་སློབ་མ་དབྱེ་བར་འགྱུར་བའི་ལས་བྱས་པ་དེ་ཁོ་ནའི་དབྱེ་བར་འགྱུར་གྱི་གཞན་དུ་ནི་མ་ཡིན་ནོ། །བཅོམ་ལྡན་འདས་ཤཱཀྱ་ཐུབ་པས་ཀྱང་བྱང་ཆུབ་སེམས་དཔར་གྱུར་པ་ན། དྲང་སྲོང་མངོན་པར་ཤེས་པ་ལྔ་དང་ལྡན་པ་ཞིག་གིས་འཁོར་ཕྱེ་སྟེ། དེས་ན་

འདིར་དགེ་འདུན་ལྷས་བྱིན་གྱིས་ཕྱེའོ་ཞེས་གྲག་གོ །འོ་ན་ཕ་དང་མ་གང་དག་ལྟོ་ན་གནས་པ་ཉིད་གསོད་པ་བཞུགས་པ་དང་། སྐྱེས་མ་ཐག་ཏུ་ཁྱི་དང་ཅེ་སྦྱངས་སྲིགས་པའི་ལམ་པོ་ཆེར་བོར་བ་དེ་དག་ཇི་ལྟར་ཕན་འདོགས་པ་ཉིད་ཡིན་ཞེ་ན། དེའི་ཕྱིར་དེ་ལས་ལུས་སྐྱེས་པའི་ཕྱིར་རོ་ཞེས་བྱ་བ་

སྨྲོས་སོ། །དེ་དག་ཀྱང་འཚོ་བ་མེད་པ་ལ་སོགས་པའི་འཇིགས་པས་དེ་ལྟར་ཞུགས་ཀྱི་བྱམས་པས་མེད་པའི་ནི་མ་ཡིན་ཏེ། དེ་དག་ཀྱང་བྱམས་པ་དང་རྗེས་སུ་བརྩེ་བས་ཡོངས་སུ་བོར་བ་དེ་དག་གི་ཡུལ་ལ་ལན་གཅིག་མ་ཡིན་པར་རྣམ་པར་ཤེས་པ་སྐྱེའོ། །གང་གི་ཕྱིར་དེ་བསལ་

བས་མཚམས་མེད་པའི་ཁ་ན་མ་ཐོ་བ་ཆུང་ངུས་རེག་པར་འགྱུར་རོ། །ཕན་འདོགས་པ་དང་ཡོན་ཏན་གྱི་ཞིང་གསལ་བར་རྟོགས་པའི་ཕྱིར་ཞིང་ཉིད་ནི་དེ་ལྟ་བུའི་རང་བཞིན་ནོ། །དེ་ལ་གནོད་པ་བྱས་པས་ཀྱང་འཚོ་བའི་བར་ཆད་དུ་གྱུར་ནས་མཚམས་མེད་པའི་ཁ་ན་མ་ཐོ་བས་རེག་པར་འགྱུར་

རོ། །བྷཱ་ག་ཝནྣ་སྟག་ལུང་རྒྱ་དཔེར་བྷ་ག་ཝཱན་ཧི་དྷརྨེ་ཥུ་ཏཱ་ཡཱི་ཏཱི་ཝ་རྞྱ་ཡིན་ཏེ་ཞེས་ཟེར་རོ། །བཅོམ་ལྡན་འདས་ནི་ཆོས་རྣམས་ལ་འདྲེན་པ་ལགས་སོ་ཞེས་བསྔགས་པར་བྱེད་དོ། །ཧི་དྷརྨེ་ཥུ་ནཱ་ཡཱི་ཏི་ཝརྣ་ཡ་ནྟི། ལུས་གཅིག་པ་དེ་ལ་ནི་ཞེས་བྱ་བ་ནི་རྟེན་གཅིག་པའི་ཕྱིར་སྐྱེ་བ་གཞན་

དག་སྨྲས་པའོ། །འདི་ཏཱི་ཀཱ་ཡིན་བྱེད་དོའི་ཕྱིར་རོ། །རྡུལ་ཕྲ་རབ་རྣམས་བསམས་པའི་ཕྱིར་དང་རྣམ་པའི་ཕྱིར་ན་ཁ་ཅིག་ནི་འདིར་མཚམས་མེད་པས་བསྡུས་པ་ཡིན་ལ། ཁ་ཅིག་ནི་སྲོག་གཅོད་པའི་རྣམ་པར་རིག་བྱེད་ཀྱིས་བསྡུས་པ་ཡིན་ནོ། །རྟོགས་པ་བརྗོད་

Vol. 210 · folio 87b

པ་འདི་ཇི་ལྟར་དྲང་ཞེ་ན་ཞེས་བྱ་བ་ནི། གྲོང་ཁྱེར་སྒྲ་སྒྲོགས་སུ་རྒྱལ་པོ་གཙུག་ཕུད་ཅན་གྱིས་རང་གི་ཕ་དགྲ་བཅོམ་པ་བསད་པས་ན། སོང་ལ་གཙུག་ཕུད་ཅན་ལ་སྨྲོས་ཤིག་ཅེས་བྱ་བ་འདི་བཀའ་སྩལ་ཏོ། །སྒོ་གཉིས་ནས་ཞེས་བྱ་བ་ནི། ཕ་ཡིན་པའི་སྒོ་ནས་དང་དགྲ་བཅོམ་པ་

ཡིན་པའི་སྒོ་ནས་ཀྱང་སྤྱོས་སོ་ཞེས་བྱ་བའི་དོན་ཏོ། །སངས་རྒྱས་བརྡེགས་པར་སེམས་ལ་མིན། །ཞེས་བྱ་བ་ནི་བརྡེག་པར་སེམས་པ་ཡང་ངན་སེམས་ཡིན་མོད་ཀྱི། ཡོངས་སུ་བོར་བའི་སེམས་པ་མེད་པའི་ཕྱིར་མཚམས་མེད་པར་མི་རུང་ངོ་། །རྟེན་དེ་དང་འགལ་བའི་ཕྱིར་རོ་ཞེས་བྱ་བ་ནི་

བདེན་པ་མཐོང་བ་ནི་ལས་ཀྱི་ལམ་གྱིས་བསྡུས་པའི་ཁ་ན་མ་ཐོ་བས་རེག་པར་མི་འགྱུར་རོ། །ཡང་ཅི་གང་གིས་ན་དེ་ཡང་མ་བཟློག་པར་ཞེས་དེ་སྐད་དུ་བརྗོད་པ་མཚམས་མེད་པའི་སྦྱོར་བ་ཡང་བཟློག་གམ་ཞེ་ན། ཁ་ཅིག་ན་རེ། ལྡོག་སྟེ་སོར་མོའི་ཕྲེང་བ་བཞིན་ནོ་ཞེས་ཟེར་རོ། །དཔལ་

སྦས་ཀྱི་དཔེ་ཡང་བསྟན་བཅོས་དང་འགལ་བ་ཡོད་པ་མ་ཡིན་ནོ། །གང་ཞིག་མཚམས་མེད་པ་དང་ལྡན་པ་མཚམས་མེད་པས་དུས་བྱས་ཏེ་དེ་དམྱལ་བ་རྣམས་སུ་སྐྱེའོ། །གང་ཞིག་སྦྱོར་བ་སྦྱངས་པ་དེ་བསྟན་བཅོས་ཀྱི་སྐབས་ཉིད་དུ་མཚམས་མེད་པའི་སྦྱོར་བ་ཇི་ལྟ་བར་མཚམས་མེད་

པ་ཉིད་དུ་འགྱུར་རོ། །མི་ལྡོག་ཅེས་ཀྱང་བྱ་སྟེ། བསྟན་བཅོས་ལས་སྲོག་ཆགས་བསྣུན་པ་ཡང་སྲོག་གཅོད་པ་དང་མི་འགལ་བས་དེའི་ལས་ཀྱི་རྣམ་པར་སྨིན་པ་ངེས་པས་དམྱལ་བ་རྣམས་སུ་སྐྱེའོ། །ཇི་ལྟར་དེ་མཚམས་མེད་པའི་སྦྱོར་བ་དང་ལྡན་པ་མཚམས་མེད་པས་དུས་བྱས་

པའི་ཕྱིར་ཞེས་པའོ། །སོར་མོའི་ཕྲེང་བས་ནི་མ་གསོད་པའི་སེམས་ཙམ་ཞིག་བསྐྱེད་པ་ཉིད་ལས་སྦྱོར་བ་ནི་མེད་ལ། བཅོམ་ལྡན་འདས་འགྲོངས་པའི་ཕྱིར་སྦྱོར་བ་དུ་མ་བྱས་ཏེ། འོན་ཀྱང་ཉེ་བར་གྱུར་ནས་མཚོན་གདབ་པོ་སྙམ་དུ་སེམས་པར་གྱུར་པ་ལ། བཅོམ་ལྡན་འདས་

ཀྱིས་དེའི་ལས་ཀྱི་སྒྲིབ་པ་ཡོངས་སུ་སྤང་བའི་ཕྱིར་ཇི་སྲིད་སེམས་དང་བར་མ་གྱུར་གྱི་བར་དུ་དེ་སྲིད་དུ་ཉེ་བར་མ་མཛད་དོ། །དཔལ་སྦས་ཀྱིས་ཀྱང་བཅོམ་ལྡན་འདས་ཡོངས་སུ་བཏང་བ་ཉིད་མ་ཡིན་ཏེ། གལ་ཏེ་ཐམས་ཅད་མཁྱེན་པ་ཡིན་ན་རང་ཉིད་ཀྱིས་མཁྱེན་པ་འགྱུར་རོ་སྙམ་དུ་བསམ་

Vol. 210 · folio 88a

པའི་ཕྱིར་རོ། །སློབ་དཔོན་འདུས་བཟང་ན་རེ། མཚམས་མེད་པའི་སྦྱོར་བ་ནི་རྣམ་པ་གཉིས་ཏེ་ཉེ་བ་དང་རིང་བའོ། །དེ་ལ་ཉེ་བ་དེ་ཡང་བཟློག་པ་ཉིད་དོ་ཞེས་ཟེར་རོ། །དེ་ཉིད་ཀྱང་གཞུང་གི་དབང་དུ་བྱས་པས་འགལ་བ་མེད་དོ། །མཚམས་མེད་པ་རྣམས་ཁོ་ན་བཟློག་ན་

ཡང་དེའི་སྦྱོར་བ་ཅི་ཞེ་ན། མདོ་སྡེ་པ་རྣམས་ན་རེ། མཚམས་མེད་པའི་ལས་སྔར་གསུངས་པ་གང་ཡིན་པ་བསགས་པས་མཚམས་མེད་པར་དམྱལ་བ་རྣམས་སུ་སྐྱེའོ་ཞེས་གཅིག་ཚིག་གིས་རྟོགས་པར་བྱ་སྟེ། དེ་ལྟ་མ་ཡིན་ན་གཅིག་གི་ཚིག་དོན་མེད་པར་འགྱུར་རོ་ཞེས་ཟེར་རོ། །

འདིར་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་པ་ལྟར་ཞེས་གསུངས་པའི་ཕྱིར་ངེས་པར་གཟུང་བས་རྟོགས་པར་གསུངས་སོ། །ལས་ཐམས་ཅད་བཟློག་པས་མཆོད་རྟེན་བྱེད་པ་པོ་རྣམས་ཐམས་ཅད་མཐོ་རིས་སུ་སྐྱེ་བར་ལུང་བསྟན་པའི་ཕྱིར་རོ། །དགེ་བའི་

རྩ་བ་ཆད་པའི་ལྷས་བྱིན་ཡང་གོང་དུ་ཐེ་ཚོམ་མེད་པར་ལུང་བསྟན་པའི་ཕྱིར། ཉོན་མོངས་པའི་སྒྲིབ་པ་བཞིན་ལས་ཀྱི་སྒྲིབ་པ་ཡང་བཟློག་པར་མི་འགལ་ལོ། །གང་དུ་ཆེས་ཤིན་ཏུ་ཕྲ་ཞིང་མཆོག་ཏུ་ཞིབ་པའི་སྲིད་པའི་རྩེ་མོའི་སེམས་པ་ཡང་བཟློག་ལ། དེ་ལ་མཚམས་མེད་པ་

རྣམས་ནི་བཟློག་པར་སོ་སོར་ངེས་པའི་གོ་སྐབས་མེད་དོ། །ཆོས་དང་ཆོས་མ་ཡིན་པ་ཤེས་བཞིན་དུ་ཞེས་བྱ་བ་ལ། གང་ཞིག་འདི་ནི་ལེགས་པར་བཤད་པ་ཡིན་གྱི་མུ་སྟེགས་པ་རྣམས་ཀྱི་ནི་མ་ཡིན་ནོ་སྙམ་དུ་དེ་བཞིན་གཤེགས་པའི་ཆོས་ཤེས་པ་ནི་ཆོས་དང་ཆོས་མ་ཡིན་པ་ཤེས་

སོ། །ལོག་པར་སྟོན་པའི་ཕྱིར་ཞེས་བྱ་བ་ལ། ལེགས་པར་བཤད་པ་ལ་ཉེས་པར་བཤད་པ་སྟོན་པའི་ཕྱིར་དང་ཉེས་པར་བཤད་པ་ལ་ལེགས་པར་བཤད་པར་སྟོན་པའི་ཕྱིར་ལོག་པར་སྟོན་པའོ། །དེ་ལས་རྣམ་པ་གཞན་དུ་བསྟན་པས་ནི་བརྫུན་སྨྲ་བར་འགྱུར་གྱི་དགེ་འདུན་གྱི་དབྱེན་ནི་

མ་ཡིན་ནོ། །འདི་ལྟར་དགེ་འདུན་དབྱེན་སོ་སོའི་སྐྱེ་བོ་རྣམས་ངེས་པ་ལ་མི་འཇུག་གོ། །ངེས་པ་ལ་ཞུགས་པ་རྣམས་འབྲས་བུ་གཞན་མི་འཐོབ་པོ། །འབྲས་བུ་ཐོབ་པ་རྣམས་ཀྱིས་འདོད་ཆགས་དང་བྲལ་བ་མི་འཐོབ་པོ། །འདོད་ཆགས་དང་བྲལ་བ་རྣམས་ཀྱིས་ཟག་པ་ཟད་པ་ལ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words