๑๐. อุทกทายิกาเถริยาปทาน เล่ม ๓๓

๑๕๐|๑๕๐.๑๑๖| นคเร พนฺธุมติยา อาสึ อุทกหาริกา อุทหาเรน ชีวามิ เตน โปเสมิ ทารเก ฯ |๑๕๐.๑๑๗| เทยฺยธมฺโม จ เม นตฺถิ ปุญฺญกฺเขตฺเต อนุตฺตเร โกฏฺฐกํ อุปสงฺกมฺม อุทกํ ปฏฺฐเปสหํ ฯ |๑๕๐.๑๑๘| เตน กมฺเมน สุกเตน ตาวตึสํ อคญฺฉหํ ตตฺถ เม สุกตํ พฺยมฺหํ อุทหาเรน นิมฺมิตํ ฯ |๑๕๐.๑๑๙| อจฺฉรานํ สหสฺสสฺส อหํ หิ ปวรา ตทา ทสฏฺฐาเนหิ ตา สพฺพา อภิโภมิ ตทา อหํ ฯ |๑๕๐.๑๒๐| ปญฺญาสํ เทวราชูนํ มเหสิตฺตมการยึ วีสติจกฺกวตฺตีนํ มเหสิตฺตมการยึ ฯ |๑๕๐.๑๒๑| ทุเว ภเว สํสรามิ เทวตฺเต อถ มานุเส ทุคฺคตึ นาภิชานามิ อุทกทานสฺสิทํ ผลํ ฯ |๑๕๐.๑๒๒| ปพฺพตคฺเค ทุมคฺเค วา อนฺตลิกฺเข จ ภูมิยํ ยทา อุทกมิจฺฉามิ ขิปฺปํ ปฏิลภามหํ ฯ |๑๕๐.๑๒๓| อวุฏฺฐิกา ทิสา อตฺถิ สนฺตตฺตา ขุปฺปิตา หิ เม มม สงฺกปฺปมญฺญาย มหาเมโฆ ปวสฺสติ ฯ |๑๕๐.๑๒๔| กทาจิ นียมานาย ญาติสงฺเฆน เม ตทา ยทา อิจฺฉามหํ วสฺสํ มหาเมโฆ อชายถ ฯ |๑๕๐.๑๒๕| อุณฺหํ วา ปริฬาโห วา สรีเร เม น วิชฺชติ กาเย จ เม รโช นตฺถิ อุทกทานสฺสิทํ ผลํ ฯ |๑๕๐.๑๒๖| วิสุทฺธมนสา อชฺช อเปตมนปาปิกา สพฺพาสวปริกฺขีณา นตฺถิ ทานิ ปุนพฺภโว ฯ |๑๕๐.๑๒๗| เอกนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ อุทกทานสฺสิทํ ผลํ ฯ |๑๕๐.๑๒๘| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๕๐.๑๒๙| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๕๐.๑๓๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อุทกทายิกา ภิกฺขุนี อิมา คาถาโย อภาสิตฺถาติ ฯ อุทกทายิกาเถริยา อปทานํ สมตฺตํ ฯ อุทฺทานํ สุเมธา เมขลททา มณฺฑปสงฺกมนฺตถา นฬมาลินี ปิณฺฑททา กฏจฺฉุอุปฺปลปฺปทา ฯ ทีปอุทกทายี จ คาถาโย คณิตาวิห เอกคาถา สตญฺเจว สตฺตรสํ ตทุตฺตริ ฯ สุเมธาวคฺโค ปฐโม ฯ ----------------