๘. ชาติปุปผิยเถราปทาน เล่ม ๓๓

๔๘|๔๘.๔๙| ปรินิพฺพุเต ภควติ ปทุมุตฺตเร มหายเส ปุปฺผจงฺโกฏเก คเหตฺวา สรีรํ อภิโรปยึ ฯ |๔๘.๕๐| ตตฺถ จิตฺตํ ปสาเทตฺวา นิมฺมานํ อคมาสหํ เทวโลกํ คโต สนฺโต ปุญฺญกมฺมํ จรามหํ ฯ |๔๘.๕๑| อมฺพรา ปุปฺผวสฺโส เม สพฺพกาลํ ปวสฺสติ สมฺภวามิ มนุสฺเส เว ราชา โหมิ มหายโส ฯ |๔๘.๕๒| ตหึ กุสุมวสฺโส เม อภิวสฺสติ สพฺพทา กาเยสุ ปุปฺผปูชาย วาหสา สพฺพทสฺสิโน ฯ |๔๘.๕๓| อยํ ปจฺฉิมโก มยฺหํ จริโม วตฺตเต ภโว อชฺชาปิ ปุปฺผวสฺโส เม อภิวสฺสติ สพฺพทา ฯ |๔๘.๕๔| สตสหสฺเส อิโต กปฺเป ยํ ปุปฺผํ อภิโรปยึ ทุคฺคตึ นาภิชานามิ เทหปูชายิทํ ผลํ ฯ |๔๘.๕๕| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๔๘.๕๖| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๘.๕๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ชาติปุปฺผิโย เถโร อิมา คาถาโย อภาสิตฺถาติ ฯ ชาติปุปฺผิยตฺเถรสฺส อปทานํ สมตฺตํ ฯ