དཀར་ཆག
ชื่อนี้มาจากชื่อไฟล์ของเล่มในต้นทาง
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๑๐๓ · หน้า 65a
དུ་རྒྱལ་པོ་གོ་ཌ་འཕེལ་བྱེད་ཅེས་བྱ་བ་བྱུང་སྟེ། གཙུག་ལག་ཁང་ཉམས་པ་དེ་དག་གསོས་ནས་ཆོས་གཞི་རྒྱས་པར་བྱས། གནས་བརྟན་བསམ་རྫོགས་ཞེས་བྱ་བས་ཀྱང་ཉན་ཐོས་ཀྱི་སྡེ་སྣོད་གསལ་བར་མཛད་ཅིང་མ་ག་དྷཱར་ཆོས་གཞི་དྲུག་ཅུ་
ཙམ་བཙུགས་ཏེ་འདི་སྐབས་ཤེད་དུ་སློབ་དཔོན་ཀླུ་སྒྲུབ་ཀྱང་འདས་པར་སྣང་ངོ༌། །དེ་ནས་གྲོང་ཁྱེར་བཱ་ག་དར་ཏ་ཟིག་གི་རྒྱལ་པོ་ཧ་ལ་མུ་ཞེས་པ་འཕགས་ཡུལ་དུ་ཀླ་ཀློའི་ཐོག་མ་ཡིན་པ་དེ་བྱུང་ངོ༌། །ཤར་ཕྱོགས་ཀྱི་བྲམ་ཟེ་ཀཱ་ཤི་ཛཱ་ཏས་ཆོས་སྨྲ་བ་རྣམས་ལྷག་པར་
མཆོད་ནས་བསྟན་པ་ཉམས་པ་རྣམས་སྔར་བཞིན་གསོས་པའང་འདིའི་དུས་སོ། །སློབ་དཔོན་ཀླུ་སྒྲུབ་ཀྱི་རྗེས་ནས་བསྟན་པ་སྐྱོང་བའི་མཆོག་ནི་སློབ་དཔོན་ཨཱརྱ་དེ་བ་ཡིན་ཏེ། དེ་ནི་སིངྒྷ་ལའི་གླིང་གི་རྒྱལ་པོ་པཉྩ་ཤྲི་གའི་སྲས། མཁན་པོ་ཧེ་མ་དེ་ཝ་ལས་
རབ་ཏུ་བྱུང་ཞིང་བསྙེན་པར་རྫོགས་པ། སྡེ་སྣོད་གསུམ་ལ་མཁས་པ་ཞིག་ཕྱིས་དཔལ་གྱི་རིར་སློབ་དཔོན་ཀླུ་སྒྲུབ་བརྟེན་ནས་དངོས་གྲུབ་མང་པོ་ཐོབ་པར་མཛད་ཅིང་སྙིང་པོ་དོན་གྱི་བསྟན་པའང་གཏད་དོ། །སློབ་དཔོན་འདས་ནས་ལྷོ་ཕྱོགས་ཀྱི་རྒྱུད་རྣམས་སུ་
བསྒོམས་པ་དང་བཤད་ཉན་གྱིས་ཀྱང་སེམས་ཅན་གྱི་དོན་རྒྱ་ཆེན་པོ་མཛད། ཤིང་གི་ལྷ་ལ་སོགས་པ་ལས་ཡོ་བྱད་བཞེས་ནས་གཙུག་ལག་ཁང་ཉི་ཤུ་རྩ་བཞི་བཞེངས། དེ་སོ་སོར་ཐེག་ཆེན་གྱི་ཆོས་བཞི་རེའང་བཙུགས་སོ། །ཤར་ཕྱོགས་ན་ལི་ནཱིའི་ཡུལ་
གྱི་བྲམ་ཟེ་མ་ཁོལ་པས་ཕྱོགས་ཕྱོགས་ཀྱི་སངས་རྒྱས་པ་མང་པོ་རྩོད་པས་ཕམ་པར་བྱས་ཏེ་ན་ལནྡར་རྩོད་པའི་ཕྱིར་འོངས་པ་དང་།་ཆོས་སྐྱོང་གིས་བསྐུལ་ཏེ་དཔལ་གྱི་རི་ནས་ན་ལནྡར་ཐུན་ཚོད་གཅིག་གི་ཡུན་ཙམ་གྱིས་གཤེགས་ནས་རྩོད་པས། མུ་སྟེགས་ཅན་
ལན་གསུམ་དུ་ཚར་གཅད་ཅིང་ཕམ་པར་བྱས། སྔགས་ཀྱི་མཐུས་ནམ་མཁའ་ལ་འགྲོ་བར་བརྩམས་ཀྱང་སླར་རིག་སྔགས་ཀྱིས་བཅིངས་ཏེ་བཞག །ཕྱིས་རང་ཉིད་ལུང་བསྟན་པའི་མདོ་སྡེ་མཐོང་བས་དད་ཅིང་ནོངས་པ་བཤགས་ནས་བསྟན་པ་ལ་ཞུགས་ཏེ་སྡེ་སྣོད་
เล่ม ๑๐๓ · หน้า 65b
གསུམ་འཛིན་པར་གྱུར་ཏོ། །དེ་ལ་སོགས་པ་ཕྲིན་ལས་རྒྱ་ཆེན་པོ་མཛད་ནས། དམངས་རིགས་ལས་རབ་ཏུ་བྱུང་ཞིང་དངོས་གྲུབ་ཆེན་པོ་བརྙེས་པ་སྒྲ་གཅན་འཛིན་བཟང་པོ་ལ་སྙིང་པོའི་བསྟན་པ་གཏད་ནས་གཤེགས་སོ། །བོད་སློབ་དཔོན་དེ་དང་དུས་མཚུངས་སུ་ཀླུ་སྒྲུབ་
ཀྱི་སློབ་མ་ནཱ་གཱ་ཧཱ་སྟེ་ཀླུས་བོས་ཞེས་པ་ཀླུའི་འཇིག་རྟེན་དུ་ལན་བདུན་བྱོན་པར་གྲགས་པ་དེས་ཐེག་པ་ཆེན་པོའི་མདོ་སྡེ་དུ་མ་རྣམ་པར་འགྲེལ་བར་མཛད་ཅིང་། ཁྱད་པར་དེ་བཞིན་གཤེགས་པའི་སྙིང་པོ་སྟོན་པའི་མདོ་སྡེ་རྣམས་ཡོངས་སུ་རྒྱས་པར་མཛད་པས་ཕྱི་ནས་
མདོའི་ཚིགས་བཅད་རྣམས། གྲོང་ཁྱེར་པའི་ཁྱེའུ་བུ་མོ་ཚུན་གྱིས་གླུར་ལེན་པ་བྱུང་། ན་ལནྡའི་མཁན་པོའང་ཡུན་རིང་དུ་མཛད་དོ། །གཞན་ཡང་ཀླུ་སྒྲུབ་ཀྱི་སློབ་མ་ཕྱག་རྒྱ་ཆེན་པོའི་དངོས་གྲུབ་བརྙེས་པ་ཀླུའི་བྱང་ཆུབ་དང་། ཤྲྀངྒ་པ་སོགས་ཤིན་ཏུ་མང་པོས་
བསྟན་པ་ལ་བྱ་བ་ལྷག་པར་བྱས་སོ། །དེ་ནས་ཡུལ་མ་གོ་རར་རྒྱལ་པོ་ཟླ་སྦས་ཀྱི་བུ་སྙིང་པོ་ཐིག་ལེ་ཞེས་པ་རྒྱལ་སྲིད་བྱེད་པའི་ཚེ་སློབ་དཔོན་མ་ཁོལ་བ་བསྟན་པའི་རྩ་ལག་ཆེན་པོར་གྱུར་ཏེ་གྲོང་ཁྱེར་མེ་ཏོག་ཅན་དུ། མེ་ཏོག་གིས་བརྒྱན་པའི་གཙུག་ལག་ཁང་དུ་
བཞུགས་ནས་ཐེག་པ་ཆེ་ཆུང་གཉི་གའི་བསྟན་པ་ཡ་ཆེས་དར་བར་མཛད་དོ། །སློབ་དཔོན་འདི་ནི་རྒྱལ་བས་བསྟོད་པ་བྱེད་པར་ལུང་བསྟན་ཅིང་། དང་པོར་ནང་པའི་བསྟན་པ་ལ་ཞུགས་ཙམ་གྱི་ཚེའང་བྲམ་ཟེ་རྣམས་ཀྱི་ཕུལ་དུ་གྱུར་པ་འདི་ལྟ་བུའང་རང་གི་ལུགས་བོར་
ནས་ནང་པ་ལ་ཞུགས་ན། བདག་ཅག་རྣམས་ལྟ་ཅི་སྨོས་ཞེས་བྲམ་ཟེ་མཁས་པ་སྟོང་ཕྲག་མང་པོའང་བསྟན་པ་ལ་ཞུགས་པ་དང་། ཕྱིས་ནས་ཤེས་ཕྱིན་བསྡུས་པ་སོགས་བསྟན་བཅོས་མང་པོ་མཛད་ཅིང་། ཆོས་དང་ཟང་ཟིང་གཉི་གས་གདུལ་བྱ་རྣམས་ལ་ཕན་
བཏགས་པས་རྒྱལ་བའི་བསྟན་པ་ཉིན་མོ་ལྟར་གསལ་བར་མཛད་དེ། མདོར་ན་འདིས་མཛད་པའི་བསྟོད་པ་རྣམས་གླུ་གར་མཁན་རྣམས་ཀྱིས་ཀྱང་འདོན་པ་དེ་ཙམ་དུ་དར་བར་གྱུར་ནས། དེ་དག་ཐོས་པ་ཁོ་ནས་སངས་རྒྱས་ཀྱི་བསྟན་པ་ལ་ཞུགས་པའང་བགྲང་
เล่ม ๑๐๓ · หน้า 66a
དུ་མི་སྤྱོད་པར་ཡོད་དོ། །བོད་འདིར་ཁ་ཅིག་གིས། སློབ་དཔོན་འདིས་སྟག་མོ་ལ་ལུས་བྱིན་ཅིང་སྐྱེས་རབས་བརྒྱ་རྩ་རྩོམ་འཕྲོར་ལུས་པ་སོགས་བཤད་མོད་ཀྱི། དེ་ནི་སློབ་དཔོན་འདིའི་མཚན་གྱི་རྣམ་གྲངས་སུ་ཆོས་
ལྡན་རབ་འབྱོར་དབྱངས་ཞེས་གྲགས་པས། དེ་དང་གཞན་ལ་ཕན་པའི་དབྱངས་དགོན་པ་བ་ཞེས་པ་སྨོན་ལམ་བདུན་ཅུ་པ་རང་གི་ཁྲག་གིས་བྲིས་ཏེ་སྟག་མོ་ལ་ལུས་སྦྱིན་པ་པོ་དེ་གཉིས་འཁྲུལ་པ་ཡིན་ནམ་སེམས་སོ། །གཞན་ལ་ཕན་པའི་དབྱངས་
ཉིད་སློབ་དཔོན་དཔའ་བོའོ་ཟེར་ན་ཅུང་མི་འཐད་དེ། འཕགས་ཡུལ་གྱི་གཏམ་ཁུངས་མ་རྣམས་སུ་དེ་དཔའ་བོ་ལས་ཕྱིས་བྱོན་པར་བཤད་པའི་ཕྱིར་རོ། །རྒྱལ་པོ་སྙིང་པོ་ཐིག་ལེའི་བུ་ཤྲཱི་ཙནྡྲིས་རྒྱལ་སྲིད་བྱེད་པའི་ཚེ་སྤྱན་རས་གཟིགས་ཀྱི་ལྷ་
ཁང་ཞིག་བཞེངས་ནས་དེར་ཐེག་པ་ཆེན་པོའི་ཆོས་སྨྲ་བ་ཉིས་སྟོང་ལ་འཚོ་བ་སྦྱར། འདི་སྐབས་ན་ལནྡའི་མཁན་པོ་འཕགས་པ་ལྷའི་སློབ་མ་སྒྲ་གཅན་འཛིན་བཟང་པོས་མཛད་དེ་དེར་དྲི་གཙང་ཁང་བཅུ་བཞི་བཞེངས། ཆོས་གཞི་མི་འདྲ་བ་བཅུ་
བཞི་བཙུགས། ནུབ་ཕྱོགས་ཊི་ལི་དང་མལླ་བ་ཡི་ཡུལ་དུ་རྒྱལ་པོ་ཀ་ནིཥྐ་ཞེས་པ་རིན་པོ་ཆེའི་འབྱུང་ཁུངས་ཉི་ཤུ་རྩ་བརྒྱད་རྡོལ་བ་སོགས་ཀྱི་འབྱོར་པ་ཆེན་པོས་རྒྱལ་སྲིད་བྱེད་པའི་ཚེ་སློབ་དཔོན་དཔའ་བོ་སྤྱན་དྲངས་ཀྱང་བགྲེས་པས་འབྱོན་མ་ཐུབ་
སྟེ་སྤྲིན་ཡིག་མཛད་ནས་ཆོས་ལ་བཀོད་པས། གཙུག་ལག་ཁང་མང་པོ་བཞེངས་པ་དང་། ཐེག་པ་ཆེ་ཆུང་གི་དགེ་སློང་སུམ་ཁྲི་རེ་རྟག་ཏུ་མཆོད་པ་སོགས་བསྟན་པ་ལ་བྱ་བ་བྱས་སོ། དེ་ནས་རྒྱལ་པོ་ཤྲཱི་ཙནྡྲའི་བུ་དྷརྨ་ཙནྡྲའི་རིང་ལ་ཏུ་
རུཥྐའི་དམག་བྱུང་ནས་མ་ག་དྷཱ་བཅོམ། གཙུག་ལག་ཁང་མང་པོ་བཤིག །ན་ལནྡར་ཡང་གནོད་པ་ཆེར་བྱུང་། རབ་ཏུ་བྱུང་བ་རྣམས་རིང་དུ་བྲོས་སོ། །རྒྱལ་པོ་དྷརྨ་ཙནྡྲ་ཤི་ནས་ཚ་བོ་ཞིག་ཡོད་ཀྱང་གར་ལོག་གི་འོག་ཏུ་སོང་བས་དབང་
เล่ม ๑๐๓ · หน้า 66b
མེད་ཅིང་། དེའི་ཚེ་ཝཱ་རཱ་ཎ་སཱི་ན་དྷརྨ་ཙནྡྲའི་ཞང་པོའི་བུ་རྒྱལ་པོ་སངས་རྒྱས་ཕྱོགས་ཞེས་བྱ་བས་རྒྱ་ཡུལ་དུ་མདོ་སྡེ་སྨྲ་བའི་སློབ་དཔོན་འགའ་ཞིག་བརྫངས་པའི་དྲིན་ལན་དུ་གསེར་མི་ཁུར་བརྒྱ་ལ་སོགས་པ་མི་སྟོང་ཕྲག་བཅུས་ཁུར་བའི་ཡོ་བྱད་
བསྐུར་བ་དེས། དབུས་དང་ནུབ་ཕྱོགས་ཀྱི་རྒྱལ་ཕྲན་གཙོ་བོ་གཙོ་བོ་དག་མགུ་བར་བྱས་པ་དང་དེ་དག་གིས་གྲོགས་བྱས་ནས། ཏ་ཟིག་གི་རྒྱལ་པོ་ཁུ་ནི་མ་སྟ་དང་གཡུལ་བཀྱེ་བས། རྒྱལ་པོ་དེ་ལ་སོགས་པ་ཏུ་རུཥའི་དཔའ་བོ་རྣམས་
བསད་ནས་ནུབ་ཕྱོགས་ཀྱི་རྒྱལ་ཁམས་ཐམས་ཅད་ལ་དབང་བསྒྱུར་ཏེ་ལྷ་ཁང་དང་ཆོས་གཞི་ཉམས་པ་ཐམས་ཅད་གསོས། དགེ་འདུན་རྣམས་སྤྱན་དྲངས་ནས་ན་ལེནྡར་ཆོས་གཞི་བརྒྱད་ཅུ་རྩ་བཞི་བཙུགས། སློབ་དཔོན་དཔའ་བོ་ལའང་མཚན་
དེ་ལྟ་བུ་ཡོད་ཀྱང་དེ་མ་ཡིན་པའི་མ་ཏི་ཙ་ཏྲ་ཕྱི་མ་ཞིག་བྱུང་བ་བླ་མར་བཀུར་ནས་བསྟན་པ་ཤིན་ཏུ་དར་བར་བྱས་སོ། །དེ་ནས་ལྷོ་ཕྱོགས་ཀྱི་རྒྱུད་ཀྲྀཥཱ་རཱ་ཛའི་ཡུལ་དུ་སློབ་དཔོན་མཱ་ལི་ཀ་བུདྡྷ་ཞེས་བྱ་བས་ཤེས་རབ་ཀྱི་ཕ་རོལ་ཏུ་ཕྱིན་པ་ལྷག་པར་རྒྱས་པར་བྱས་
ཤིང་མཆོད་རྟེན་དང་ལྷ་ཁང་སྟོང་ཕྲག་ཙམ་བཞེངས་པ་དང་། ཆོས་གཞི་ཉི་ཤུ་རྩ་གཅིག་ཀྱང་བཙུགས། མཐར་ཏུ་རུཥའི་ཆོམ་པོས་བཀྲོངས་པའི་ཚེ་ཁྲག་འོ་མར་ཟག་པ་དང་། ཁོག་པ་ནས་མེ་ཏོག་དམར་པོ་དཔག་ཏུ་མེད་པ་ཐོན་ཏེ་བར་སྣང་
ཁེངས་པ་སོགས་བྱུང་ངོ༌། །ཡང་ཡུལ་དེ་ཉིད་དུ་སློབ་དཔོན་མུ་དི་ཏཱ་བ་བྷ་དྲ་ཞེས་པ་མང་དུ་ཐོས་ཤིང་སྦྱངས་ཡོན་ལ་གནས་པ། མི་སྐྱེ་བའི་ཆོས་ལ་བཟོད་པ་ཐོབ་པ་ཞིག་བྱུང་སྟེ། དེས་སྔར་གྱི་མཆོད་རྟེན་ཞིག་པ་ཐམས་ཅད་གསོས་ནས་སླར་
ཡང་མཆོད་རྟེན་རེ་རེ་ལ་བཅུ་བཅུས་བསྐོར། ཡུལ་དེ་དང་ཡུལ་དབུས་སུའང་བསྟན་པ་ཆེས་གསལ་བར་མཛད། ཆད་པ་ཁས་མི་ལེན་པའི་བསླབ་པ་འཆལ་བ་མང་པོ་གནས་ནས་ཕྱུངས་པའི་རྐྱེན་གྱིས་དེ་དག་སློབ་དཔོན་དེ་ལ་ཤིན་ཏུ་སྡང་བས་ཐུགས་
เล่ม ๑๐๓ · หน้า 67a
སྐྱོ་སྟེ་འཕགས་པ་ཀུན་ཏུ་བཟང་པོ་ལ་བདག་སེམས་ཅན་གྱི་དོན་གང་དུ་འབྱུང་བ་དེར་འཁྲིད་པར་ཞུ་ཞེས་ཞུས་པས་ནམ་མཁའ་ལ་བྱོན་ནས་ན་བཟའ་ལ་འཇུས་ཤིག་གསུངས། འཇུས་མ་ཐག་ལི་ཡུལ་དུ་སླེབས་ཏེ་དེར་བསྟན་པ་ལ་བྱ་བ་
ལྷག་པར་མཛད་དོ། །དེ་ལྟར་ཡུལ་དབུས་སོགས་སུ་ཆོས་ཤིན་ཏུ་དར་བའི་སྐབས་ཤིག་ན། ན་ལེནྡར་བློན་པོ་ཀ་ཀུ་ཏ་སིདྷའི་ལྷ་ཁང་ཞལ་བསྲོའི་ཚེ་མུ་སྟེགས་ཀྱི་སྤྲང་པོ་གཉིས་ཤིག་སློང་བ། དགེ་ཚུལ་གཏུམ་པོ་དག་གིས་གཙེས་པས་འཁྲུགས་པར་གྱུར་ནས་གཅིག་གིས་
འཚོ་བ་སྦྱངས་ཤིང་། ཅིག་ཤོས་ཀྱིས་སའི་དོང་གཏིང་རིང་བར་ལོ་བཅུ་གཉིས་སུ་ཉི་མ་བསྒྲུབས་པས་གྲུབ་སྟེ་ཐལ་བ་ལ་སྔགས་བཟླས་ནས་གཏོར་བས་མེ་འབར་བར་གྱུར་ཏེ་ན་ལེནྡྲའི་ལྷ་ཁང་བརྒྱད་ཅུ་རྩ་བཞི་པོ་པ་ཐམས་ཅད་བསྲེགས་སོ། ཁྱད་པར་དུ་གཙུག་ལག་ཁང་དེ་དག་གི་གཙོ་བོ་
རཏྣ་སཱ་ག་ར། རཏྟཱོ་ད་དྷི། རཏྣ་རཎྜ་ཀ་སྟེ་གསུམ་དུ་ཐེག་པ་ཆེན་པོའི་མདོ་རྒྱུད་ཀྱི་གླེགས་བམ་ཐམས་ཅད་བཞུགས་པས་དྷརྨ་གཉྫར་གྲགས་པ་དེ་དག་བསྲེགས་པས། རཏྟཱ་ད་དྷིའི་གཙུག་ལག་ཁང་དགུ་ཐོག་ཡོད་པའི་སྟེང་མ་ན་གླེགས་བམ་འགའ་ཞིག་ལས་ཆུའི་
རྒྱུན་ཆེན་པོ་བབས་པས་ཆུ་རྒྱུན་དེས་ཁྱབ་ཚད་ཀྱི་པུསྟ་ཀ་རྣམས་མ་ཚིག་པར་ལུས་སོ། །མུ་ཏོ་བ་དེ་གཉིས་ཀྱང་རྒྱལ་པོའི་ཆད་པར་སྐྲག་ནས་བྱང་ཕྱོགས་ཧ་སཱ་མའི་ཡུལ་དུ་བྲོས་པས། དེར་སྡིག་པའི་ལས་ཀྱིས་ལུས་ལ་མེ་རང་འབར་བས་ཚིག་སྟེ་ཤིའོ། །དེ་ནས་ཕྱོགས་
ཕྱོགས་ཀྱི་མང་དུ་ཐོས་པ་དང་ཐོས་པ་འཛིན་པ་རྣམས་འདུས་ནས། རང་རང་གིས་བཟུང་བ་རྣམས་དང་ཕྱོགས་གཞན་དུ་གླེགས་བམ་ན་ཡོད་པ་རྣམས་ཡི་གེར་སྤེལ་ཞིང་ཉམས་པ་གསོས་ཀྱང་སྔར་དགྲ་ལན་གཉིས་བྱུང་བའི་རྐྱེན་གྱིས་ཀྱང་འགའ་ཞིག་ནུབ་ལ། འགའ་ཞིག་
རང་བཞིན་གྱིས་ནུབ་པ་དང་། མེ་ཡི་དགྲ་འདིས་འདུས་པ་ཆེན་པོ་ལེའུ་སྟོང་ལས་ལེའུ་དགུ་ལུས་པ་ལྟ་བུ་ཐེག་ཆེན་གྱི་སྡེ་སྣོད་ཆ་བཅོ་ལྔར་བཏང་བའི་ཆ་གཅིག་ཙམ་ལས་མ་ལུས་པར་གྲགས་སོ། །ལྷ་ཁང་དང་ཆོས་གཞི་རྣམས་ཀྱང་རྒྱལ་པོ་སངས་རྒྱས་ཕྱོགས་དང་། བྲམ་
เล่ม ๑๐๓ · หน้า 67b
ཟེ་ཤངྐུ་རྒྱུ་སོགས་འབྱོར་ལྡན་དད་པ་ཅན་མང་པོས་གསོས་ཏེ་སྔ་མ་བཞིན་དུ་གྱུར་ཏོ། དེ་ནས་སངས་རྒྱས་ཕྱོགས་ཀྱིས་ཉིད་ཀྱི་སྐུ་ཚེའི་སྨད་ལ་ཤར་ཕྱོགས་ཨོ་ཌི་བི་ཤིའི་ཡུལ་དུ་རིན་ཆེན་རི་བོའི་གཙུག་ལག་ཁང་བཞེངས་པར་བཀའ་དང་བསྟན་བཅོས་མཐའ་དག་ཚར་གསུམ་
བཞེངས་ནས་བཞུགས་སུ་གསོལ། དེར་ཆོས་གཞི་ཆེན་པོ་བརྒྱ་དང་དགེ་སློང་ལྔ་བརྒྱ་ཚོགས་པར་བྱས། དེ་བཞིན་དུ་བྷངྒ་ལ་དང་ཉེ་བའི་རྒྱ་མཚོའི་འགྲམ་ཞིག་ཏུ་ལྷའི་རི་བོ་ཞེས་བྱ་བའི་གཙུག་ལག་ཁང་བཞེངས་ནས། བཙུན་མོ་དང་བྲམ་ཟེ་ཤངྐུ་གཉིས་སོགས་ཀྱིས་ཀྱང་
ཆོས་གཞི་དང་དགེ་འདུན་སོགས་སྔ་མ་དང་མཚུངས་པར་བསྒྲུབས་སོ། །བྲམ་ཟེ་ཤངྐུ་གཅིག་ནི་ཀླུ་འདུལ་བའི་རིག་སྔགས་གྲུབ་པས་ལྷོ་ཕྱོགས་ཁ་གེནྡྲའི་ཡུལ་དུ་ནམ་མཁའ་ལྡིང་གི་མཆོད་སྡོང་འཛུགས་པ་པོ་དེའོ། །ཅིག་ཤོས་ནི་ཀུ་རུ་ཀུལླའི་རིག་སྔགས་གྲུབ་སྟེ་རྒྱལ་པོ་
སངས་རྒྱས་ཕྱོགས་ལ་ཀླུའི་རྒྱལ་པོ་རཀྵ་ཀ་སྟོན་པར་རྩོམ་པ་པོ་དེའོ། །རྒྱལ་པོ་སངས་རྒྱས་ཕྱོགས་ཀྱི་རྗེས་ནས་རྒྱལ་པོ་ཀརྨ་ཙནྡྲ་ཞེས་བྱ་བའི་ཚེ་སློབ་དཔོན་དགའ་བྱེད་སྙན་པ་དང་། །སྒྲ་གཅན་འཛིན་བཤེས་གཉེན་དང་། དེའི་སློབ་མ་ཀླུའི་བཤེས་གཉེན་སོགས་ཀྱིས་བསྟན་
པ་བསྐྱངས་ཤིང་ཐེག་པ་ཆེན་པོ་རྒྱས་པར་མཛད། དེ་ཙམ་ན་སྔོན་ཆོས་ཀྱི་རྒྱལ་པོ་ཏུ་རུཥ་ཞེས་པ་ལོ་མང་དུ་འཚོ་བ་ཞིག་བྱུང་བ། དེའི་བུ་ཏུ་རུཥྐ་མང་པོས་བཀུར་བ་ཞེས་པ་ཁ་ཆེར་རྒྱལ་སྲིད་བྱེད་དེ། དེས་ཡུལ་ཕྱོགས་དེ་དང་། ག་ཛ་ནི། ཐོ་གར་རྣམས་སུའང་དབང་བསྒྱུར་
ནས་ག་ཛ་ནིར་སྟོན་པའི་ཚེམས་བཞུགས་པའི་མཆོད་རྟེན་བཞེངས་ནས་དེ་མཆོད་པའི་སླད་དུ་དགེ་སློང་ཕ་མ་སྟོང་ཕྲག་རེ་དང་དགེ་བསྙེན་ཕ་མ་སྟོང་ཕྲག་རེ་རྣམས་ཀྱང་བསྐོས། སྐུ་གཟུགས་ཀྱི་ཁྱད་པར་ཡང་དཔག་ཏུ་མེད་པ་བཞེངས། ཁྱད་པར་ཡུལ་དེར་དགེ་སློང་འཚོ་བྱེད་
དང་། དགེ་བསྙེན་ཆོས་འཕེལ་ཞེས་བྱ་བ་སོ་སོར་འཁོར་ལྔ་སྟོང་ལྔ་སྟོང་དང་བཅས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་སྒོམ་པ་གཙོ་བོར་བྱེད་པས་རྒྱལ་བ་མཉེས་པར་བྱེད་པ་བྱུང་ཞིང་དེས་ཆོས་བསྟན་པས་ཀྱང་དགེ་སློང་དང་དགེ་བསྙེན་པ་སོགས་རྫུ་འཕྲུལ་ཅན་མང་དུ་བྱུང་ངོ༌། །
เล่ม ๑๐๓ · หน้า 68a
དེ་ནས་སློབ་དཔོན་ཨདྷ་ཏ་ཞེས་པས་གཏེར་གྱི་བུམ་པ་བསྒྲུབས་ནས་དགེ་འདུན་ཁྲི་ཕྲག་མང་པོའི་འཚོ་བ་སྦྱོར་བ་བྱུང་ཞིང་སློབ་དཔོན་ཆེན་པོ་ཐོགས་མེད་ཡབ་སྲས་ཀྱང་འདི་སྐབས་བྱུང་སྟེ། དེ་ལ་ཐོགས་མེད་ནི་བྲམ་ཟེ་མོ་པྲ་ཀཱ་ས་ཤཱི་ལཱ་ཞེས་པའི་སྲས་ཏེ་
ཆུང་ངུ་ནས་རིག་པའི་གནས་ལྔ་ལ་མཁས་པར་གྱུར་ཅིང་། རབ་ཏུ་བྱུང་ནས་ཀྱང་ཐེག་པ་ཆེ་ཆུང་གི་སྡེ་སྣོད་ཐམས་ཅད་ལ་ཤིན་ཏུ་མཁས་ཀྱང་ཤེས་ཕྱིན་ཅུང་ཟད་རྟོགས་དཀའ་བར་བྱུང་ནས་ལོ་བཅུ་གཉིས་སུ་རི་བོ་བྱ་རྐང་ཅན་དུ་བྱམས་པ་བསྒྲུབས་ནས་ཕྱིས་དངོས་སུ་ཞལ་མཐོང་
བ་ཙམ་ཡ་གྱིས་ཆོས་རྒྱུན་གྱི་ཏིང་ངེ་འཛིན་ཐོབ། ན་བཟའ་ལ་འཇུས་ནས་དགའ་ལྡན་དུ་བྱོན་མི་ལོ་ཉེར་ལྔར་ཆོས་གསན་ནས་སླར་མི་ཡུལ་དུ་འགྲོ་དོན་མཛད། མངོན་པར་ཤེས་པ་སོགས་ཡོན་ཏན་བསམ་གྱིས་མི་ཁྱབ་པའི་བདག་ཉིད་ཆེན་པོར་གྱུར་ཏེ་ས་གསུམ་པའི་རྟོགས་
པ་བརྙེས་པར་གྲགས། སློབ་དཔོན་འདིས་དང་པོར་མ་ག་དྷ་བཏང་བྲང་གི་ཚལ་དུ་གཙུག་ལག་ཁང་མཛད་དེ། དེར་མང་དུ་ཐོས་པ་བརྒྱད་ལ་ཟབ་མོའི་དོན་བཀྲོལ་ཞིང་བསྟན་པས་ཐམས་ཅད་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར། བྱམས་པའི་ཆོས་ལྔའང་ཡི་
གེར་བཀོད། སྡོམ་རྣམ་གཉིས་དང་ས་སྡེ་ལྔ་སོགས་བསྟན་བཅོས་དུ་མ་མཛད། ཁྱད་པར་ནུབ་ཕྱོགས་གྲོང་ཁྱེར་སཱ་ག་རི་ཞེས་བྱ་བར་ཨུ་པུ་རིའི་གཙུག་ལག་ཁང་དུ་རྒྱལ་པོ་ཟབ་མོའི་ཕྱོགས་ཀྱིས་སྦྱིན་བདག་བྱས་ཏེ་ཕྱོགས་བཞིའི་དགེ་སློང་ཐམས་ཅད་འདུས་པ་
ལ་ཉན་ཐོས་ཀྱི་སྡེ་སྣོད་ཐམས་ཅད་དང་། ཐེག་པ་ཆེན་པོའི་མདོ་སྡེ་ལྔ་བརྒྱ་ཙམ་བཤད་པས་ཐམས་ཅད་ཐེག་པ་ཆེན་པོར་རིགས་སད་ཅིང་ཡང་དག་པའི་དོན་ལ་བཀོད། ཐེག་ཆེན་གྱི་མདོ་སྡེ་ལ་མི་འཇིགས་པར་སྨྲ་བའང་སྟོང་ལྷག་པ་བྱུང་ངོ༌། ཁྱད་པར་ཐེག་པ་
ཆེན་པོའི་མངོན་པའི་སྡེ་སྣོད་ཤེས་པ་སུའང་མེད་པ་ལ་འདིས་ཤིན་ཏུ་གསལ་བར་མཛད། རྒྱལ་པོ་ཟབ་མོའི་ཕྱོགས་ཀྱང་ལྷག་པར་དད་པར་མཛད་ནས་ཐེག་ཆེན་གྱི་ཆོས་གཞི་ཉི་ཤུ་རྩ་ལྔ་བྱེད་དུ་བཅུག །ཡུལ་ཀྲྀཥྛ་རཱ་ཛ་དང་ཨོ་ཌྱན་གཉི་གར་ཐེག་ཆེན་ཆེས་དར་བར་
เล่ม ๑๐๓ · หน้า 68b
མཛད་ཅིང་མཆོད་རྟེན་དང་ལྷ་ཁང་མང་པོ་བཞེངས། ཉིད་ཀྱིས་ཐེག་ཆེན་གྱི་ཆོས་གཞི་བརྒྱར་ལོངས་པ་བཙུགས། སྤྱིར་སློབ་མའི་ཚོགས་བགྲང་བར་མི་སྤྱོད་ཅིང་། ཁྱད་པར་ཐེག་ཆེན་གྱི་དགེ་སློང་ཁྲི་ཕྲག་གཉིས་གསུམ་ཙམ་བྱུང་བར་གྲགས་པས་ཐེག་པ་ཆེན་པོའི་
བསྟན་པའི་བདག་པོ་ཟླ་མེད་པར་གྱུར་ཏེ། སྔོན་ཀླུ་སྒྲུབ་སོགས་ཀྱི་དུས་ཀྱང་ཐེག་ཆེན་ཤིན་ཏུ་དར་བ་ཡིན་མོད་ཀྱི། ཐེག་ཆེན་པའི་དགེ་སློང་ཁྲིར་ལོངས་པ་མ་བྱུང་བར་བཤད་པའི་ཕྱིར་རོ། །སྐུ་ཚེའི་མཐར་ཉེ་བ་ན་ན་ལེནྡྲར་བསྟན་པ་ལོ་བཅུ་གཉིས་སུ་བསྐྱངས་ཤིང་། མུ་
སྟེགས་པ་རྩོད་པའི་ཕྱིར་འོངས་པ་ཁོ་ནའང་སྟོང་ཙམ་ཞིག་བསྟན་པ་ལ་བཅུག་ནས། གྲོང་ཁྱེར་རྒྱལ་པོའི་ཁབ་ཏུ་སྐུ་ཐིམ་མོ། །དེའི་སློབ་མའི་མཆོག་ནི་ཉིད་ཀྱི་གཅུང་དབྱིག་གཉེན་ཡིན་ཞིང་། འདིའང་ན་ལེནྡྲར་རབ་ཏུ་བྱུང་ཞིང་། རྟོག་གེ་དང་མུ་སྟེགས་
ཀྱི་གཞུང་ལུགས་མཐའ་དག་དང་། ཉན་ཐོས་ཀྱི་སྡེ་སྣོད་གསུམ་ལ་ཤིན་ཏུ་བྱང་བ་ཞིག་ཡིན་པ་གཅེན་གྱིས་བཏུལ་ནས་ཐེག་པ་ཆེན་པོའི་མདོ་སྡེ་མཐའ་དག་བསྟན་པས་གསན་པ་ཙམ་གྱིས་ཐུགས་སུ་ཆུད། གསང་བའི་བདག་པོའི་རིག་སྔགས་གྲུབ། ཏིང་ངེ་འཛིན་ཁྱད་
པར་ཅན་མང་པོ་མངའ་བས་སྟོན་པའི་བཀའ་མི་ཡུལ་དུ་སྣང་བ་ཐམས་ཅད་ཐུགས་སུ་བལྟམས་པར་གྱུར་ཏེ། སྟོན་པ་མྱ་ངན་ལས་འདས་པའི་འོག་ཏུ་སློབ་དཔོན་འདི་ལྟ་བུའི་མང་དུ་ཐོས་པ་མ་བྱུང་བར་གྲགས། གཅེན་སྐུ་འདས་ནས་ན་ལེནྡའི་མཁན་པོ་མཛད་དེ་བཀའི་དགོངས་
འགྲེལ་སོགས་གཞན་འགྲེལ་གྱི་བསྟན་བཅོས་ལྔ་བཅུ་ཙམ་དང་། རང་རྐང་དུ་པྲ་ཀ་ར་ན་སྡེ་བརྒྱད་ཀྱི་བསྟན་བཅོས་བརྩམས། མུ་སྟེགས་ཀྱི་རྒོལ་བ་ལྔ་བརྒྱ་སུན་ཕྱུང་། ན་ལནྡ་སོགས་མ་ག་དྷཱའི་ཕྱོགས་ཐམས་ཅད་དུ་ཆོས་གཞིས་ཁྱབ་པར་མཛད། །ཨོ་ཌི་ཤ་
དང་གོ་ཌའི་ཡུལ་དུའང་ཆོས་གཞི་བརྒྱ་རྩ་བརྒྱད་རེ་བཙུགས། སྤྱིར་ཆོས་གཞི་དྲུག་བརྒྱ་ལྔ་བཅུ་རྩ་བཞི་བཙུགས་ཤིང་། འདི་སྐབས་ཡུལ་ཐ་དད་ཀྱི་ཐེག་ཆེན་གྱི་དགེ་སློང་ཡང་གཅེན་པོའི་དུས་ལས་མང་སྟེ་དྲུག་ཁྲིར་ལོངས་པར་གྲགས་ཤིང་། ཕྱིས་བལ་ཡུལ་དུ་
เล่ม ๑๐๓ · หน้า 69a
ཕེབས་ནས་སྐུ་འདས་པའི་ཚེ་རེ་ཞིག་ཆོས་ཀྱི་ཉི་མ་ནུབ་པ་ལྟར་གྱུར་ཏོ། སློབ་དཔོན་དབྱིག་གཉེན་གྱི་སྐུ་ཚེའི་སྨད་ལ་མ་རུའི་ཡུལ་དུ་སྟོབས་དང་ལྡན་པའི་རྒྱལ་པ་པོའི་ཤཱི་ཧཪྵ་ཞེས་བྱ་བ་ཞིག་གིས་བསྟན་པ་ལ་མཆོད་ཅིང་སློབ་དཔོན་ཡོན་ཏན་འོད་བླ་མར་བཀུར་རོ། །
དེའི་ཚེ་ཤར་ཕྱོགས་ན་སློབ་དཔོན་བློ་གྲོས་བརྟན་པ་དང་ཕྱོགས་ཀྱི་གླང་པོས་འགྲོ་དོན་མཛད། ནུབ་ཕྱོགས་སུ་ཐོགས་མེད་ཀྱི་སློབ་མ་སངས་རྒྱས་འབངས་དང་ཡོན་ཏན་འོད་ཀྱིས་འགྲོ་དོན་མཛད། སློབ་དཔོན་ཆོས་འབངས་ནི་ཡུལ་ཐམས་ཅད་དུ་གཤེགས་ནས་ཆོས་སྟོན། ལྷོ་
ཕྱོགས་ཀྱི་རྒྱུད་དུ་སངས་རྒྱས་བསྐྱངས་བྱོན་ཞིང་། ལེགས་ལྡན་དང་རྣམ་གྲོལ་སྡེ་གཉིས་ཀྱི་སྐུ་ཚེའི་སྟོད་ཙམ་ཡིན་ནོ། །འདི་སྐབས་ཤྲཱི་ཧཪྵས་གཡོ་ཐབས་ཀྱིས་ཀླ་ཀློ་སྟོང་ཕྲག་བཅུ་གཉིས་བསྲེགས་པས། ལོ་བརྒྱ་ཙམ་དུ་དེའི་ཆོས་ལུགས་ཤིན་ཏུ་ཉུང་བར་གྱུར། འོན་
ཀྱང་ཡུལ་ཁོ་ར་ས་ཎར་ཀླ་ཀློ་ཐ་ག་པ་གཅིག་ལུས་པ་ལས་ལུགས་དེ་ཕྱིས་མཆེད་པར་གྲགས། རྒྱལ་པོས་དེའི་སྡིག་སྦྱོང་དུ་གཙུག་ལག་ཁང་ཆེན་པོ་ལྔ་བཞེངས་ནས་དགེ་སློང་ཁྲི་ཕྲག་རེའི་འཚོ་བ་སྦྱར་ནས་ཆེས་དར་བར་བྱས་སོ། །སློབ་དཔོན་ཡོན་ཏན་འོད་ནི་དབྱིག་གཉེན་
གྱི་སློབ་མར་གྱུར་ཅིང་སྡེ་སྣོད་གསུམ་ལ་མཁས་པར་སྦྱངས་ནས། བསྟན་པ་ཐམས་ཅད་གསལ་བར་མཛད། ཁྱད་པར་འདུལ་བའི་བསྟན་པ་དར་བར་མཛད་དེ་འདུལ་བ་འབུམ་སྡེ་ཐོན་པའི་སློབ་མ་ཁོ་ན་ལྔ་བརྒྱ་ཙམ་བྱུང་ངོ་། །སློབ་དཔོན་དབྱིག་གཉེན་གྱི་སློབ་མ་བློ་
བརྟན་གྱིས། དཀོན་བརྩེགས་འདུས་པ་ཞེ་དགུ་བ་དང་དབུ་མ་རྩ་བའི་འགྲེལ་པ་སོགས་བསྟན་བཅོས་མང་པོ་མཛད། སློབ་དཔོན་གཤེགས་ནས་མུ་སྟེགས་བིཊྚི་པཱ་ལ་སོགས་ཀྱི་རྒོལ་བ་མང་པོ་བཟློག །འདི་སྐབས་སྔར་གྱི་ཆོས་གཞི་རྣམས་ཆེར་མེད་པས་ཆོས་གཞི་
བརྒྱ་རྩའང་བཙུགས་སོ། ཕྱོགས་ཀྱི་གླང་པོའང་སིངྒ་པཀྟྲའི་བྲམ་ཟེ་མུ་སྟེགས་ཀྱི་གྲུབ་མཐར་ཤིན་ཏུ་མཁས་པ་ཞིག་གནས་མ་བུའི་སྡེ་པའི་མཁན་པོ་ནཱ་ག་དཏྟ་ལས་རབ་ཏུ་བྱུང་བ་ཡིན་ཞིང་། ཕྱིས་དབྱིག་གཉེན་ལ་བརྟེན་ནས་ཐེག་པ་ཆེ་ཆུང་གི་སྡེ་སྣོད་ཐམས་ཅད་ལ་
เล่ม ๑๐๓ · หน้า 69b
མཁས་པར་གྱུར། རིག་སྔགས་གྲུབ་པས་འཇམ་དཔལ་ལ་དངོས་སུ་ཆོས་གསན། ན་ལནྡར་མུ་སྟེགས་ཀྱི་རྒོལ་བ་མང་པོ་སུན་ཕྱུངས་ནས་བསྟན་པ་ལ་བཀོད། དེར་མདོ་སྡེ་དུ་མ་རྣམ་པར་བཤད་ཅིང་ཆོས་མངོན་པའང་རྒྱས་པར་མཛད། ཐུན་མོང་མིན་པའི་རང་
སྟོབས་ཁོ་ནས་རྟོག་གེའི་བསྟན་བཅོས་ཐོར་བུ་མང་དུ་བརྩམས་པ་ཕྱིས་ཕྱོགས་གཅིག་ཏུ་བསྡུ་བར་བཞེངས་ནས་མཆོད་བརྗོད་བྲིས་པའི་ལྟས་ཀྱིས་བྲམ་ཟེ་ནག་པོ་ཞེས་བྱ་བ་བསྐུལ་བ་དང་རྩོད་པས་ཕམ་པར་བྱས་ཏེ་སླར་ཚང་བར་བརྩམས་པ་ཚད་མ་མདོ་སོགས་སྔ་ཕྱིར་བསྟན་
བཅོས་ཀྱང་བརྒྱུར་ལོངས་པ་མཛད། ལྷོ་ཕྱོགས་ཀྱི་རྒྱུད་ཐམས་ཅད་དུ་མུ་སྟེགས་ཀྱི་རྒོལ་བ་རྣམས་ཚར་བཅད། ཆོས་གཞི་ཉམས་པ་རྣམས་གསོས། །ཨོ་ཌི་བི་ཤའི་རྒྱལ་པོའི་བློན་པོ་བྷ་དྲ་པཱ་ལི་ཏ་བསྟན་པ་ལ་བཅུག་ནས་དེས་གཙུག་ལག་ཁང་བཅུ་དྲུག །དེ་རེ་རེ་དགེ་
འདུན་གྱི་སྡེ་ཆེན་པོ་རེ་རེ། དེ་རེ་རེ་ལ་ཆོས་གཞི་མང་པོ་བཅས་བསྒྲུབས། མདོར་ན་རྩོད་པའི་ཁྱུ་མཆོག་ཆེན་པོར་གྲགས་ཤིང་ལོག་སྨྲ་ཕལ་ཆེར་ཚར་བཅད། སློབ་མའི་ཚོགས་ཀྱིས་ཕྱོགས་བཀང་སྟེ་བསྟན་པ་གསལ་བར་མཛད་ནས་ཨོ་ཌི་བི་ཤའི་ཡུལ་གྱི་ཚལ་
དབེན་པ་ཞིག་ཏུ་སྐུ་འདས། ཡང་དབྱིག་གཉེན་གྱི་སློབ་མ་དགེ་འདུན་འབངས་ཀྱིས་ཀྱང་རྡོ་རྗེ་གདན་དུ་འདུལ་མངོན་གྱི་ཆོས་གཞི་ཉི་ཤུ་རྩ་བཞི་བཙུགས། ཁ་ཆེར་ཏུ་རུཥྐ་མང་པོ་བཀུར་བས་སྦྱིན་བདག་བྱས་ཏེ་རིན་ཆེན་སྦས་པའི་གཙུག་ལག་ཁང་དང་ཀུལླ་ཀུཎྜ་ལིའི་གཙུག་ལག་ཁང་གཉིས་བཞེངས་
ནས་ཐེག་ཆེན་གྱི་བསྟན་པ་ཤིན་ཏུ་དར་བར་མཛད་ཐོགས་མེད་སྐུ་མཆེད་གཉི་གའི་སློབ་མ་ཆོས་འབངས་ཀྱིས་ཕྱོགས་ཕྱོགས་སུ་འཇམ་དཔལ་གྱི་ལྷ་ཁང་མང་པོ་བཞེངས་ཤིང་ས་འགྲེལ་སོགས་བསྟན་བཅོས་ཀྱང་མང་པོ་མཛད། སློབ་དཔོན་སངས་རྒྱས་བསྐྱངས་ཀྱིས་སློབ་དཔོན་
ཀླུའི་བཤེས་གཉེན་གྱི་སློབ་མ་དགེ་འདུན་སྲུང་ལས་ཀླུ་སྒྲུབ་ཀྱི་གཞུང་ལུགས་ཐམས་ཅད་གསན་ནས་མཁས་པར་གྱུར། ཡེ་ཤེས་ཀྱི་མཆོག་བརྙེས་ལྷོ་ཕྱོགས་དཎྜ་པུ་རིའི་གཙུག་ལག་ཁང་དུ་བཞུགས་ནས་འཕགས་པ་ཡབ་སྲས་ཀྱིས་མཛད་པ་སོགས་བསྟན་བཅོས་མང་
เล่ม ๑๐๓ · หน้า 70a
པོ་ལ་རྣམ་བཤད་མཛད། །སློབ་དཔོན་ལེགས་ལྡན་བྱེད་ཀྱང་དགེ་འདུན་སྲུང་ལས་ཀླུ་སྒྲུབ་ཀྱི་ལུགས་ནོས་ཤིང་དགེ་སློང་སྟོང་ཕྲག་མང་པོ་སྐྱོང་བར་མཛད། མདོ་འགྲེལ་གྱི་བསྟན་བཅོས་འགའ་ཞིག་མཛད། སློབ་དཔོན་འདི་གཉི་ག་མཐར་རིལ་བུའི་དངོས་
གྲུབ་གྲུབ་ནས་རིག་འཛིན་གྱི་གནས་སུ་གཤེགས་སོ། འདི་སྐབས་ཙམ་ནས་ཐེག་ཆེན་དབུ་མ་པ་རྣམས་ཀྱང་ཚན་གཉིས་སུ་གྱེས་པ་ཡིན་ཏེ། སློབ་དཔོན་འདི་གཉིས་ཀྱི་དགོངས་གཞི་ཞིག་གིས་ཐོགས་མེད་སེམས་ཙམ་པ་ཁོ་ན་ཡིན་ཞིང་དབུ་མ་པ་གཏན་མ་ཡིན་
པར་བསྒྲུབས་པའི་ཕྱིར་རོ། །འོན་ཀྱང་ཐོགས་མེད་ཞབས་ཀྱི་རྗེས་འབྲངས་ཕྱོགས་གླང་སོགས་ཀྱིས་རྣམ་རིག་སྨྲ་བའི་གྲུབ་མཐའ་ཇི་བཞིན་དུ་བཀྲལ་བ་ཡིན་ཞིང་། འཕགས་པ་ཉིད་ཀྱིས་རྣམ་རིག་སྨྲ་བ་རྣམས་དྲང་བའི་ཕྱིར་དེ་དང་ཕྱོགས་མཐུན་ཙམ་ཞིག་བསྟན་པ་ལས།
དོན་དུ་དབུ་མ་ཉིད་ཞལ་གྱིས་བཞེས་པར་དེས་མཛད་པའི་བསྟན་བཅོས་རྣམས་སུ་གསལ་ལོ། །དེ་ལྟ་མ་ཡིན་ན་ཀླུ་སྒྲུབ་དང་ཐོགས་མེད་གཉི་ག་འཕགས་པའི་ས་ལ་གནས་པར་ནི་རྩོད་པ་མེད་ལ། འཕགས་པ་ནང་འགལ་ཅན་ཡང་སྲིད་པར་ཐལ་པའི་ཕྱིར་རོ། །ཀླུ་སྒྲུབ་
ཀྱི་གཞུང་ལུགས་ལའང་སངས་རྒྱས་བསྐྱངས་འདས་ནས་དེའི་བསྟན་བཅོས་ལ་ལེགས་ལྡན་གྱིས་དགག་པ་བརྗོད་ན་སྔ་མའི་རྗེས་འབྲངས་ལ་ཐལ་འགྱུར་བ་དང་། ཕྱི་མའི་རྗེས་འབྲངས་ལ་རང་རྒྱུད་པ་ཞེས་ཚན་གཉིས་སུ་གྱེས་སོ། །སློབ་དཔོན་དབྱིག་གཉེན་གྱིས་ཤིས་
ཕྱིན་གྱི་གཞུང་བཤད་ཅིང་། དགེ་འདུན་སྲུང་གིས་མན་ངག་ཕོག་པའི་སློབ་མ་རྣམ་གྲོལ་སྡེས་ཀྱང་བྱམས་པས་ལུང་བསྟན་པ་ལྟར། དགེ་བསྙེན་ཞི་བའི་གོ་ཆས་ཉི་ཁྲི་ལེ་བརྒྱད་མའི་དཔེ་པོ་ཊ་ལ་ནས་སྤྱན་དྲངས་པ་དང་། ཝཱ་རཱ་ཎ་སཱིར་འཛོམ་པས་དེར་ཐེ་ཚོམ་ཐམས་
ཅད་ཆོད་ནས་ཉི་ཁྲི་རྒྱན་དང་སྦྱར་བའི་འགྲེལ་པ་བརྩམས་སོ། །དབྱིག་གཉེན་དང་ཕྱོགས་གླིང་སོགས་མཁས་པ་མང་པོའི་སློབ་མ་སྨྲ་བའི་དབང་ཕྱུག་ཆེན་པོ་དཀོན་མཆོག་གསུམ་གྱི་འབངས་ཀྱིས་བརྒྱད་སྟོང་དོན་བསྡུས་སོགས་བསྟན་བཅོས་མང་པོ་མཛད། དྲ་བ་ལིའི་ཡུལ་
เล่ม ๑๐๓ · หน้า 70b
དུ་ཆོས་གཞི་ཆེན་པོ་ལྔ་བཅུ་བཙུགས་ནས་བསྟན་པ་ཡུན་རིང་དུ་གསལ་བར་མཛད་དོ། །ཡོན་ཏན་འོད་ཀྱི་སྐུ་ཚེའི་མཇུག་ཙམ་དུ། རྒྱལ་པོ་ཤྲི་ཧཪྵའི་བུ་ངང་ཚུལ་ཞེས་བྱ་བ་གྲོང་ཁྱེར་ལཱ་ཏིར་ལོ་བརྒྱར་རྒྱལ་སྲིད་བྱེད་ཅིང་ཕྱོགས་བཞིའི་དགེ་འདུན་ཞལ་ཟས་བཟང་པོས་མཆོད་
པ་ཞིག་བྱུང་སྟེ། འདི་དུས་སྒྲོལ་མ་གྲུབ་པའི་སློབ་དཔོན་ཉི་མ་སྦས་པ་བྱུང་། དེས་སློབ་དཔོན་ཀླུ་སྒྲུབ་དང་ཐོགས་མེད་གཉིས་ཀྱི་བཞེད་པ་གཅིག་ཏུ་བསྒྲུབས། མ་ག་དྷཱར་ཆོས་གཞི་བཅུ་གཉིས་བཙུགས་པ་སོགས་བསྟན་པ་ལ་ཕན་པར་མཛད། དགེ་འདུན་འབངས་
ཀྱི་སློབ་མ། གསང་བས་བྱིན་དང་། ཆོས་འབངས་ཀྱི་སློབ་མ་རཏྣ་མ་ཏི་གཉིས་ཀྱིས་སྟོན་པའི་ཚེམས་མཆེ་བ་ལ་མཆོད་པ་བྱེད་ཅིང་འཁོར་མང་པོ་ལ་ཆོས་བསྟན། ཁྱད་པར་ལྷོ་ཕྱོགས་ས་མནྟར་འཇམ་དཔལ་དབྱངས་ཀྱིས་བྱིན་གྱིས་བརླབས་པ་སློབ་དཔོན་ཆེན་པོ་ཟླ་
བ་གྲགས་པ་བྱོན་ཏེ། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྷི་ལ་ཀླུ་སྒྲུབ་ཀྱི་གཞུང་ལུགས་མན་ངག་མཐའ་དག་གསན། སྔ་ཕྱིར་སྡེ་སྣོད་ཐམས་ཅད་ལ་སྦྱངས་པས་མཁས་པ་ཆེན་པོར་གྱུར་ཏེ་ན་ལནྡའི་མཁན་པོ་མཛད་དེ་རྩ་འཇུག་བཞི་གསུམ་དང་། རིགས་པ་
དྲུག་ཅུ་པའི་འགྲེལ་པ་སོགས་བསྟན་བཅོས་མང་པོ་བརྩམས། མུ་སྟེགས་ཀྱི་རྒོལ་བ་མང་པོ་ཚར་གཅད། ལྷོ་ཕྱོགས་ཀོདྐུ་ནའི་ཡུལ་གྱི་བྲམ་ཟེ་དང་། ཁྱིམ་བདག་ཕལ་ཆེར་བསྟན་པ་ལ་བཀོད་ནས་ཆོས་གཞི་མང་ཏུ་བཏབ་པ་སོགས་ངོ་མཚར་གྱི་མཛད་པ་མང་
པོས་བསྟན་པ་ཆེས་གསལ་བར་མཛད་ནས་སྔགས་ལམ་ལ་བརྟེན་ནས་སྒྱུ་མའི་སྐུ་བསྒྲུབས་ཏེ་གཤེགས་པར་གྲགས་སོ། སློབ་དཔོན་ཙནྡྲ་གོ་མིའང་ཚེ་རབས་སུ་སྤྱན་རས་གཟིགས་ཀྱིས་བྱིན་གྱིས་བརླབས་ཤིང་ཆུང་ངུ་ནས་སྒྲ་དང་རྟོག་གེ་སོགས་ཐུན་མོང་གི་རིག་གནས་རྣམས་
མ་བསླབས་པར་ཤེས་པ་ཞིག་སློབ་དཔོན་བློ་གྲོས་བརྟན་པ་ལས་མདོ་སྡེ་དང་མངོན་པའི་སྡེ་སྣོད་ཕལ་ཆེར་ལན་ཅིག་ཉན་པ་ཙམ་གྱིས་ཤེས། སྔགས་ཀྱང་གྲུབ་ནས་ས་སྟེང་གི་མཁས་པ་ཟླ་མེད་པར་གྱུར་ཏེ་རྟེན་གོ་མིའི་དགེ་བསྙེན་དུ་བཞུགས། གླིང་ཕྲན་རྣམས་སུ་བྱོན་
เล่ม ๑๐๓ · หน้า 71a
ནས་བཟོ་དང་སྨན་དཔྱད་སོགས་རིག་གནས་དཔག་ཏུ་མེད་པ་སྤེལ་བས་ལྷག་པར་ཕན་བཏགས། དེ་དག་ཏུ་ཐེག་པ་ཆེན་པོའང་ཅི་རིགས་པར་དར་བར་མཛད། ན་ལནྡར་བྱོན་ཏེ་ཟླ་གྲགས་དང་ཆོས་ཀྱི་བགྲོ་གླེང་གི་བརྒལ་བརྟག་ལོ་བདུན་དུ་མཛད་པས།
དེ་བལྟ་བའི་ཕྱིར་སྐྱེ་བོ་མང་པོ་རྟག་ཏུ་འདུས་ཏེ། གྲོང་པའི་ཁྱེའུ་དང་བུ་མོ་ཚུན་ཆད་ཀྱིས་ཀྱང་ཕྱོགས་ཙམ་རིག་ནས། ཀྱེ་མ་འཕགས་པ་ཀླུ་སྒྲུབ་གཞུང་། །ལ་ལའི་སྨན་ལ་ལ་ལའི་དུག །མི་ཕམ་འཕགས་པ་ཐོགས་མེད་གཞུང་། །སྐྱེ་བོ་ཀུན་ལ་བདུད་རྩི་ཉིད། །ཞེས་
གླུར་ལེན་པ་བྱུང་ངོ༌། །སློབ་དཔོན་འདིས་བསྟོད་པ་བརྒྱ་དང་བརྒྱད། ནང་རིག་པའི་བསྟན་བཅོས་བརྒྱ་དང་བརྒྱད། ཕྱི་རོལ་ཐུན་མོང་གི་རིག་གནས་ཀྱི་བསྟན་བཅོས་བརྒྱ་དང་བརྒྱད། བཟོ་གནས་བརྒྱ་དང་བརྒྱད། ཕྲ་མོ་ཐོར་བུ་བ་བཞི་བརྒྱ་དང་སུམ་ཅུ་རྩ་གཉིས་
བརྩམས་པ་སོགས་རྒྱལ་བའི་བསྟན་པ་མཆོག་ཏུ་གསལ་བར་མཛད་ནས་པོ་ཊ་ལར་གཤེགས་ཏེ་ད་ལྟའང་བཞུགས་སོ། །གཞན་ཡང་འདི་སྐབས་སྔ་ཕྱི་ཅི་རིགས་པར་རྣམ་གྲོལ་སྡེའི་སློབ་མ་མཆོག་སྡེ་དང་། ཡོན་ཏན་འོད་ཀྱི་སློབ་མ་འཕགས་པ་ཟླ་བའི་ནོར་བུ་དང་། དགེ་འདུན་
འབངས་ཀྱི་སློབ་མ་འཕགས་པ་ས་ག་ལྷ་སོགས་མང་པོས་བསྟན་པ་རྒྱས་པར་མཛད་ཅིང་། ནུབ་ཕྱོགས་མ་ལ་བའི་རྒྱལ་པོ་གཡོ་བས་ཀྱང་བསྟན་པ་ལ་ལྷག་པར་མཆོད་དོ། །དེ་དང་དུས་མཉམ་ལས་ཅུང་ཟད་འཕྱི་བ་ཙམ་ན། ཤར་ཕྱོགས་སུ་རྒྱལ་པོ་སེང་གེ་ལྔ་བ་དང་།
ལྷོ་ཕྱོགས་ཀྱི་རྒྱལ་པོ་མེ་ཏོག་དང་། མ་ག་དྷཱའི་རྒྱལ་པོ་གསལ་བ་སོགས་ཀྱིས་བསྟན་པ་ལ་གུས་པས་མཆོད་པའི་ཚེ་མཆོག་སྡེའི་སློབ་མ་འདུལ་བའི་ལྷ་དང་མ་ག་དྷཱར་བཙུན་པ་གྲོལ་སྡེ་དང་། ཡོན་ཏན་འོད་ཀྱི་སློབ་མ་མངོན་པ་བ་ཡོན་ཏན་བློ་གྲོས་དང་། སློབ་དཔོན་
ཆོས་སྐྱོང་དང་། དབང་ཕྱུག་སྡེ་སོགས་ཀྱིས་འགྲོ་དོན་མཛད་པ་ཡིན་ཞིང་། དེ་ལས་ཁྱད་པར་ཡོན་ཏན་བློ་གྲོས་ཀྱིས་དབུ་མ་རྩ་བའི་འགྲེལ་པ་སོགས་བརྩམས། ལེགས་ལྡན་གྱི་སློབ་མ་སཾ་པྲ་དྷུ་ཏི་དང་བརྩད་པས་རྒྱལ་བར་གྲགས། སློབ་དཔོན་ཆོས་སྐྱོང་
เล่ม ๑๐๓ · หน้า 71b
ནི་ལྷོ་ཕྱོགས་ཀྱི་སྙན་ངག་མཁན་ཆེན་པོ་ཞིག་སྟེ། ཆོས་འབངས་ལས་རབ་ཏུ་བྱུང་ཞིང་འདུལ་བ་ཉན། ཕྱོགས་གླང་ལས་སྡེ་སྣོད་གསུམ་ག་མཉན་ཏེ་ཟླ་མེད་པའི་མཁས་པ་ཆེན་པོར་གྱུར། རྡོ་རྗེ་གདན་དུ་ལོ་སུམ་ཅུ་ལྷག་ཅིག་ཏུ་ཆོས་བསྟན། ཟླ་གྲགས་ཀྱི་
རྗེས་སུ་ན་ལེནྡྲའི་མཁན་པོ་མཛད། དབུ་མ་བཞི་བརྒྱ་བ་རྣམ་རིག་ཏུ་བཀྲལ་བའི་འགྲེལ་པ་སོགས་བསྟན་བཅོས་མང་པོ་མཛད་ཅིང་མཐར་ལྷ་གནས་སུ་གཤེགས། འདིའི་རྗེས་སུ་རྒྱལ་བའི་ལྷས་ན་ལེནྡྲའི་མཁན་པོ་མཛད་དེ། དེའི་སློབ་མ་ཞི་བ་ལྷ་དང་དཔལ་ལྡན་
ཆོས་སྐྱོང་རྣམས་ཡིན་ནོ། །དེ་ལ་ཞི་བ་ལྷ་ནི་སོ་རཥྚའི་རྒྱལ་པོའི་སྲས། ཚེ་རབས་སུ་འཇམ་དཔལ་གྱིས་རྗེས་སུ་བཟུང་བ་ཞིག་སྟེ། ན་ལནྡར་རྒྱལ་བའི་ལྷ་ལས་རབ་ཏུ་བྱུང་ཞིང་མཁན་པོ་དང་། གཙོ་བོར་འཇམ་དཔལ་ཉིད་ལས་ཆོས་གསན་པས་མཁས་
པ་ཆེན་པོར་གྱུར་ཀྱང་གཞན་སྣང་དུ་བྷུ་སུ་ཀུའི་སྤྱོད་པས་གནས། བསླབ་བཏུས། མདོ་བཏུས། སྤྱོད་འཇུག་སོགས་བརྩམས། ཨུཙྪསྨའི་སྤྱོད་པས་ཡུལ་ཐ་དད་དུ་གཤེགས་ནས། ངོ་མཚར་གྱི་མཛད་པ་མང་པོ་བསྟན་པ་སོགས་ཀྱིས་
སྟོན་པའི་བསྟན་པ་གསལ་བར་མཛད་དོ། །དཔལ་ལྡན་ཆོས་སྐྱོང་གིས་ཀྱང་ན་ལནྡར་བསྟན་པའི་བྱ་བ་མཛད་ཅིང་སྔགས་གྲུབ་ནས་སྤྱོད་པ་ལ་གཤེགས་སོ། །འདི་སྐབས་ཉི་མ་སྦས་པའི་སློབ་མ་ཐམས་ཅད་མཁྱེན་པའི་བཤེས་གཉེན་གྱིས་ཀྱང་
བསྟན་པ་ལ་སྨན་པར་མཛད་དོ། །དེའི་ཕྱི་ནས་སློབ་དཔོན་ཆོས་ཀྱི་གྲགས་པ་སོགས་ཀྱིས་བསྟན་པ་བསྐྱངས་ཏེ། དེའང་རྒྱལ་པོ་གསལ་བའི་བུ་རབ་གསལ་སོགས་རྒྱལ་སྲིད་བྱེད་པའི་ཚེ། མུ་སྟེགས་བྱེད་ཆེན་པོ་སངྒ་བྷ་ཊྚ་
ཨཱ་ཙརྱ་དང་། ཀུ་མཱ་ལ་ལི་ལ་སོགས་ཀྱིས་ནང་པའི་བསྟན་པ་མང་པོ་ཉམས་པར་བྱས་པའི་སྐབས་ཤིག་ན། ཏྲི་མ་ལ་ཡའི་ཡུལ་དུ་དཔལ་ལྡན་ཆོས་ཀྱི་གྲགས་པ་བྱུང་སྟེ། ཆུང་ངུ་ནས་ཐུན་མོང་གི་རིག་གནས་རྣམས་དང་། རིག་བྱེད་ཡན་
เล่ม ๑๐๓ · หน้า 72a
ལག་དང་བཅས་པ་དང་། མུ་སྟེགས་པའི་གྲུབ་མཐའ་ལ་ཤིན་ཏུ་མཁས་པ་ཞིག་སློབ་དཔོན་ཆོས་སྐྱོང་ལས་རབ་ཏུ་བྱུང་། སྡེ་སྣོད་གསུམ་ལ་མཁས་པར་སྦྱངས། ཕྱོགས་གླང་གི་སློབ་བུ་དབང་ཕྱུག་སྡེ་ལས་ཚད་མ་ཉན་
པས་ཕྱོགས་གླང་དང་མཉམ་པར་གྱུར། དཔལ་ཧེ་རུ་ཀས་ཕྱོགས་ལས་རྣམ་རྒྱལ་གྱི་དངོས་གྲུབ་སྩལ། སྔར་བཤད་པའི་མུ་སྟེགས་བྱེད་རྩོད་པའི་ཁྱུ་མཆོག་ཏུ་གྲགས་པ་དེ་དག་དང་། གཞན་ཡང་མུ་སྟེགས་བྱེད་དང་། བྲམ་ཟེ་བསམ་གྱིས་
མི་ཁྱབ་པ་རྣམས་རྩོད་པས་ཕམ་པར་བྱས་ཏེ་ཐམས་ཅད་བསྟན་པ་འདི་ལ་བཅུག །ཡུལ་ཐམས་ཅད་དུ་ཆོས་གཞི་དང་། དགེ་འདུན་གྱི་སྡེས་ཁྱབ་པར་མཛད། །ཚད་མ་སྡེ་བདུན་སོགས་ཀྱི་བསྟན་བཅོས་ཀྱང་མང་དུ་བརྩམས་ཏེ། མདོར་ན་
ཆོས་ཀྱི་གྲགས་པ་ཉིད་ཀྱིས། གལ་ཏེ་ཆོས་ཀྱི་གྲགས་པ་ཡི། །སྨྲ་བའི་ཉི་མ་ནུབ་པ་ན། །ཆོས་རྣམས་གཉིད་ལོག་ཡང་ན་ཤི། །ཆོས་མ་ཡིན་རྣམས་ད་གདོད་ལང་། །ཞེས་གསུངས་པ་ལྟར། དུས་དེ་ཙམ་ན་བསྟན་པའི་རྩ་ལག་གཅིག་པུ་
པ་ཡིན་ནོ། །དེ་ལྟར་སློབ་དཔོན་ཀླུ་སྒྲུབ། ཐོགས་མེད། ཕྱོགས་གླང་གསུམ་ནི་གཞུང་བྱེད་པ་པོ་དང་། ཨཱརྱ་དེ་ཝ། དབྱིག་གཉེན། ཆོས་ཀྱི་གྲགས་པ་གསུམ་ནི་འགྲེལ་པ་བྱེད་པ་པོ་སྟེ། འཛམ་གླིང་མཛེས་པར་བྱེད་པའི་རྒྱན་དྲུག་ཏུ་གྲགས་
པའོ། གཞན་ཡང་འདི་སྐབས་སཾ་པྲ་རཱུ་ཏའི་སློབ་མ་དབུ་མ་པ་དཔལ་སྦས་དང་། སྤྱན་རས་གཟིགས་ཀྱིས་རྗེས་སུ་བཟུང་བ་ཀ་མ་ལ་གོ་མི་དང་། མངོན་པ་བ་དབྱིག་བཤེས་དང་། པཎྜི་ཏ་ཨ་མཱ་ར་སིདྷ་སོགས་ཀྱིས་ཀྱང་བསྟན་པ་གསལ་བར་མཛད་དོ། །
དེ་འོག་ཙནྡྲའི་རིགས་ཀྱི་རྒྱལ་པོ་རྫོགས་མཚམས་ཤིག་ཏུ་ན་ལེནྡྲར་སློབ་དཔོན་དུལ་བའི་ལྷ་བྱུང་སྟེ། དེས་སྡེ་བདུན་ལ་འགྲེལ་པ་བྱས། སློབ་དཔོན་ཤུ་བྷ་མི་ཏྲ་དང་། ཚུལ་ཁྲིམས་བསྐྱངས་དང་། ཤཱནྟི་སཽ་མ་སོགས་ཀྱིས་རྣམ་རིག་གི་གྲུབ་མཐའ་བཟུང་
เล่ม ๑๐๓ · หน้า 72b
ནས། མདོ་སྡེ་དང་། འདུལ་བ་དར་བར་བྱས། དཔལ་སྦས་ཀྱི་སློབ་མ་སློབ་དཔོན་ཡེ་ཤེས་སྙིང་པོ་དང་། སློབ་དཔོན་ཙམ་ལ་པ་སོགས་ཀྱིས་ཀླུ་སྒྲུབ་ཀྱི་ལུགས་བསྐྱངས། བྷངྒ་ལའི་བྱེ་བྲག་ཧ་ཙི་པུ་ར་ཞེས་པར་བཙུན་པ་ངོ་བོ་ཉིད་མེད་པ་བྱོན་ཏེ། ཐོགས་མེད་
ལུགས་ཀྱི་དབུ་མ་རྒྱ་ཆེར་བཤད། ཐོ་གར་གྱི་ཡུལ་དུ་བྱེ་སྨྲའི་སློབ་དཔོན་འདུལ་བ་འཛིན་པ་ཆོས་ཀྱི་བཤེས་གཉེན་བྱོན། མ་རུའི་ཡུལ་དུ་འདུལ་འཛིན་བསོད་ནམས་གྲགས་དང་། ཙི་ཏ་བ་རའི་ཡུལ་དུ་འདུལ་འཛིན་ཞི་བ་འོད་དང་། ཁ་ཆེར་འདུལ་
འཛིན་མ་ཁོལ་བ་རྣམས་ཀྱིས་བསྟན་པ་སྤེལ་ལོ། །འདི་ཕྱིན་ཅད་དུ་རྒྱན་དྲུག་ལྟ་བུའི་བསྟན་པའི་གསལ་བྱེད་ཆེན་པོ་མང་དུ་མ་བྱོན་ཅིང་། འགའ་ཞིག་བྱོན་དུ་ཟིན་ཀྱང་དུས་དབང་གིས་བསྟན་པ་སྔ་མ་རྣམས་ཀྱིས་ལྟར་གསལ་བར་མ་ནུས་ཤིང་།
སྔར་ཐེག་ཆེན་གྱི་དགེ་སློང་ལས་ཉན་ཐོས་ཀྱི་དགེ་སློང་ལྷག་པར་མང་བ་འདི་ཙམ་ནས་རྒྱལ་པོ་སོགས་དབང་ཆེ་བ་རྣམས་ཀྱིས་ཐེག་ཆེན་ཁོ་ན་མཆོད་པ་ཤས་ཆེ་བས། ཉན་ཐོས་པ་རྣམས་ཇེ་ཉུང་དུ་སོང་བའི་རྒྱུས་ཐེག་ཆེན་པ་མང་བར་བྱུང་ངོ༌། །དེ་ནས་པཱ་
ལའི་མིང་ཅན་གྱི་རྒྱལ་པོ་རྣམས་ཀྱི་ཐོག་མ་བྷངྒ་ལའི་ཡུལ་དུ་ཙུནྡའི་རིག་སྔགས་གྲུབ་ཅིང་ཀླུ་མོ་གདུག་པ་ཅན་བཏུལ་ནས། རྒྱལ་པོར་གྱུར་པ་གོ་པཱ་ལ་ཞེས་བྱ་བས། ཨོ་ཏནྟ་པུ་རི་དང་ཉེ་བར་ནཱ་ལེནྡྲ་ཞེས་བྱ་བའི་གཙུག་ལག་ཁང་བཞེངས། བྷངྒ་
ལ་དང་མ་གདྷཱ་གཉིས་སུ་དབང་བསྒྱུར་ནས་དེ་དག་ཏུ་དགེ་འདུན་གྱི་སྡེ་མང་དུ་བཙུགས། བསྟན་པ་ལ་མཆོད་པ་རྒྱ་ཆེན་པོ་བྱས་སོ། །འདི་སྐབས་ཞི་བ་འོད་དང་། བསོད་ནམས་གྲགས་ཀྱི་སློབ་མ་ཤཱཀྱ་འོད་དང་། དཱ་ན་ཤཱི་ལ་དང་། བཤེས་
གཉེན་དང་། ཤེས་རབ་གོ་ཆ་དང་། འདུལ་འཛིན་དཔའ་བོ་རྣམས་ཀྱིས་འགྲོ་དོན་མཛད། །ཤར་ཕྱོགས་སུ་སློབ་དཔོན་ཡེ་ཤེས་སྙིང་པོའང་བཞུགས། ཤཱཀྱ་བློ་གྲོས་དང་། ངང་ཚུལ་བཟང་པོ་དང་། རྒྱལ་པོའི་སྲས་གྲགས་པའི་
เล่ม ๑๐๓ · หน้า 73a
བཤེས་གཉེན་དང་། པཎྜི་ཏ་སའི་རྩ་ལག་རྣམས་ཀྱང་འདི་དུས་བྱུང་ངོ༌། །རྒྱལ་པོ་འདི་དང་། དེ་ཝ་པཱ་ལའི་མཚམས་སུ་མུ་སྟེགས་ཀྱི་སྔགས་པ་ནཱ་ར་ད་ཞེས་བྱ་བས་རོ་ལངས་ཀྱི་དངོས་གྲུབ་བསྒྲུབས་པའི་ཚེ་ནང་པའི་དགེ་བསྙེན་
ཨུ་རྒྱ་ཨུ་པཱ་སི་ཀ་ཞེས་པ་ཞིག་གིས་དེའི་སྒྲུབ་གཡོག་བྱས་པས། རོའི་ལུས་གསེར་དུ་གྱུར་པ་ཐོབ་པའི་གསེར་ལ་བརྟེན་ཏེ། མ་ག་དྷཱའི་ཕྱོགས་གཅིག་ཏུ་ཨོ་ཏནྟ་པུ་རིའི་གཙུག་ལག་ཁང་རི་རབ་གླིང་བཞིའི་ཚུལ་དུ་བཞེངས། དགེ་སློང་ལྔ་བརྒྱ་དང་དགེ་
བསྙེན་ལྔ་བརྒྱའི་འཚོ་བ་སྦྱར། རྒྱལ་པོ་དེ་ཝ་པཱ་ལ་རྒྱལ་པོ་སྔ་མ་ལས་དབང་ཆེ་བར་གྱུར་ཏེ། ཤར་ཕྱོགས་ཝ་རེནྡྲའི་ཡུལ་དུ་སོ་མ་པུ་རིའི་གཙུག་ལག་ཁང་བཞེངས། རྣལ་འབྱོར་པ་ཤི་རོ་མ་ཎིས་བསྐུལ་ཅིང་ནག་པོ་ཆེན་པོས་ལུང་བསྟན་ནས།
མཐའ་སྐོར་ནས་རོལ་མོ་བྱས་པ་ཙམ་གྱིས་མུ་སྟེགས་ཀྱི་གནས་གཞི་ཆེན་པོ་བཞི་བཅུ་ཙམ་བཤིག ཨོ་ཊི་བི་ཤར་བྱེ་མའི་ཕུང་པོ་བསལ་བའི་འོག་ནས་རྡོའི་ལྷ་ཁང་ངོ་མཚར་ཅན་ཞིག་ཀྱང་བྱུང་བ་ཚ་བ་གསུམ་གྱི་ལྷ་ཁང་དུ་གྲགས། འདི་སྐབས་སློབ་དཔོན་
ཤཱཀྱ་འོད་ཀྱི་སློབ་མ་ཤཱཀྱ་བཤེས་གཉེན་བྱུང་། གཞན་ཡང་འདུལ་འཛིན་དགེ་ལེགས་བཤེས་གཉེན། བློ་བཟང་ངང་ཚུལ། དཾཥྚྲསེ་ན། ཡེ་ཤེས་ཟླ་བ་སོགས་ཀྱིས་བསྟན་པ་གསལ་བར་མཛད། ལྷོ་ཕྱོགས་ཀྱི་རྒྱུད་དུ་བཙུན་པ་སྤྱན་རས་
གཟིགས་བརྟུལ་ཞུགས་དང་། ཁ་ཆེའི་ཡུལ་དུ་དྷ་ན་མི་ཏྲའང་བྱུང་། ཁྱད་པར་དུ་བོད་ཡུལ་འདིར་བཀའ་དྲིན་ཆེ་བའི་ཨཱ་ཙརྱ་བོ་དྷི་ས་ཏུས་འགྲོ་དོན་བསྐྱངས་པའི་དུས་སོ། །དེ་ནས་རྒྱལ་པོ་དྷརྨ་པཱ་ལ་ཞེས་པ་སྔ་མ་རྣམས་ལས་ཀྱང་ཤིན་ཏུ་མངའ་ཐང་ཆེ་བ་དེ་
བྱུང་སྟེ། དེས་སློབ་དཔོན་སེང་གེ་བཟང་པོ་དང་། སངས་རྒྱས་ཡེ་ཤེས་ཞབས་གཉིས་བླ་མར་བརྟེན་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་བསྟན་པས་ཕྱོགས་ཐམས་ཅད་ཁྱབ་པར་བྱས། ཤེས་ཕྱིན་འཆད་པའི་ཆོས་གཞི་སུམ་ཅུ་རྩ་ལྔས་
เล่ม ๑๐๓ · หน้า 73b
གཙོས་པའི་སྤྱིར་ཆོས་གཞི་ལྔ་བཅུ་ཙམ་བཙུགས། ཁྱད་པར་དུ་མ་ག་དྷཱའི་བྱང་ངོས་གདྷཱའི་འགྲམ་དུ་རི་དེའུ་ཞིག་གི་རྩེ་ལ་དབུས་སུ་བྱང་ཆུབ་ཆེན་པོ་དང་མཉམ་པའི་སྟོན་པའི་སྐུ་བརྙན་བཞུགས་པའི་ལྷ་ཁང་། མཐའ་སྐོར་དུ་གསང་སྔགས་ནང་གི་ལྷ་
ཁང་ཆུང་ངུ་ལྔ་བཅུ་ང་གསུམ། ལྷ་ཁང་གཞན་ལྔ་བཅུ་ང་བཞི། ཐམས་ཅད་ཀྱི་ཕྱི་ནས་ལྕགས་རིས་བསྐོར་བ་བཞེངས་ཏེ་བི་ཀྲ་མ་ལ་ཤཱི་ལའི་གཙུག་ལག་ཁང་དུ་གྲགས། དེར་གཉུག་མར་གནས་པའི་པཎྜི་ཏ་བརྒྱ་དང་བརྒྱད། གཏོར་མ། སྦྱིན་
སྲེག་རབ་གནས་ཏེ་སྔགས་ཀྱི་སློབ་དཔོན་གསུམ། བྱི་བ་དང་། ཕུག་རོན་སྲུང་བ་གཉིས། ལྷ་འབངས་ཀྱི་གཉེར་བྱེད་པ་གཅིག་སྟེ། དེ་རྣམས་ལ་ཡོ་བྱད་ཟླ་མེད་པས་མཆོད་ཅིང་། ཆོས་ཉན་པ་རྣམས་ལའང་དུས་སྟོན་དང་། རྟག་རེས་
འཁོར་གྱི་སྟོན་མོ་དང་། ཡོན་སོགས་ཀྱིས་མཉེས་པར་བྱེད། པཎྜི་ཏ་རེ་རེས་ཆོས་སྣ་རེ་རེ་རྒྱུན་ཏུ་གསུངས་པས། ཆོས་གཞི་བརྒྱ་རྩ་བརྒྱད་དང་མཉམ་པར་གྱུར། འདིའི་མཁན་པོས་ན་ལེནྡྲའང་མཉམ་དུ་བསྐྱངས་པར་གྲགས། འདི་
སྐབས་རྣམ་སྣང་མཛད་བཟང་པོ་ལ་ཤེས་ཕྱིན་གསན་ཅིང་། འཕགས་པ་བྱམས་པས་བྱིན་གྱིས་བརླབས་པའི་སློབ་དཔོན་སེང་གེ་བཟང་པོས་ཏྲི་ཀ་ཊུ་ཀའི་ལྷ་ཁང་དུ་སྐྱེ་བོ་སྟོང་ཕྲག་མང་པོ་ལ་ཤེས་ཕྱིན་གྱི་ཆོས་བསྟན། བརྒྱད་སྟོང་འགྲེལ་ཆེན་
སོགས་བསྟན་བཅོས་མང་པོ་མཛད་དེ། ཐེག་ཆེན་གྱི་བསྟན་པ་ལྷག་པར་བསྐྱངས་ཤིང་ཉིད་ཀྱི་སློབ་མའི་མཆོག་སངས་རྒྱས་ཡེ་ཤེས་ཞབས་ཀྱིས་ཀྱང་བསྟན་པའི་བྱ་བ་རྒྱ་ཆེན་པོ་མཛད་དོ། །གཞན་ཡང་འདི་དུས་རྟོག་གེ་བ་ཆེན་པོ་དགེ་སྲུང་དང་།
མཛེས་བཀོད་དང་། རྒྱ་མཚོའི་སྤྲིན་དང་། འོད་ཟེར་འབྱུང་གནས་དང་། གང་བ་སྤེལ་དང་། ཀ་མ་ལ་ཤཱི་ལ་དང་། ཁ་ཆེ་བ་པདྨ་འབྱུང་གནས་དབྱངས་སོགས་ཀྱིས་ཀྱང་བསྟན་བཅོས་རྩོམ་པ་དང་འཆད་ཉན་སོགས་ཀྱི་སྒོ་ནས་བསྟན་པ་སྤེལ་བར་མཛད་དོ། །སངས་
เล่ม ๑๐๓ · หน้า 74a
རྒྱས་ཡེ་ཤེས་ཀྱི་སློབ་མ་རབ་ཞི་བཤེས་གཉེན་གྱིས་ན་ལནྡའི་ལྷོ་ཕྱོགས་སུ་བདུད་རྩི་འབྱུང་གནས་ཞེས་བྱ་བའི་གཙུག་ལག་ཁང་བཞེངས་སོ། །དེ་ནས་རྒྱལ་པོ་མ་སུ་རཀྵི་ཏ་སོགས་ཀྱི་རིང་ལ་སློབ་དཔོན་རྟོག་གེ་བ་ཆོས་མཆོག་དང་། དྷརྨ་མི་ཏྲ་དང་། བི་མ་ལ་མི་
ཏྲ། དྷརྨ་ཀ་ར་རྣམས་བྱུང་། དེ་ནས་རྒྱལ་པོ་མ་ཧི་པཱ་ལའི་ཚེ་རྟ་དབྱངས་ཕྱི་མ་ཞིག་དང་། སློབ་དཔོན་གཞན་ལ་ཕན་པ་དང་། ཟླ་བ་པདྨ་དང་། ཡེ་ཤེས་བྱིན་དང་། ཡེ་ཤེས་གྲགས་པ་དང་། ཁ་ཆེར་འདུལ་བ་འཛིན་པ་ཛི་ན་མི་ཏྲ་དང་། སརྦ་ཛྙ་དེ་ཝ་
དང་། དཱ་ན་ཤི་ལ་སོགས་ཀྱིས་མདོའི་བསྟན་པའི་སྲོག་འཛིན་པར་མཛད་དོ། །དེའི་འོག་ཏུ་རྒྱལ་པོ་མ་ཧཱ་པཱ་ལས་ཨོ་ཏནྟ་པུ་རིར་ཉན་ཐོས་ཀྱི་དགེ་འདུན་གཙོ་བོར་མཆོད་ཅིང་། དགེ་སློང་ལྔ་བརྒྱ་དང་ཆོས་སྟོན་པ་ལྔ་བཅུ་ལ་འཚོ་བ་སྦྱོར། ཨུ་རུ་བཱ་སའི་གཙུག་ལག་ཁང་
བཞེངས་ཏེ། དེར་ཡང་ཉན་ཐོས་སེནྡྷ་པ་ལྔ་བརྒྱ་ལ་འཚོ་བ་སྦྱར། བི་ཀྲ་མ་ལར་ཡང་སྔར་བཞིན་མཆོད། ན་ལནྡར་ཡང་ཆོས་གཞི་འགའ་རེ་བཙུགས། ན་ལནྡ་དང་། ཁྲི་ཀ་ཊུ་ཀ་དང་། སཽ་མ་པུ་རི་སོགས་སུའང་ཆོས་གཞི་མང་པོ་བཙུགས། འདི་སྐབས་རྟོག་གེ་པ་ཤེས་
འབྱུང་སྦས་པ་དང་། ཛེ་ཏཱ་རི་ཆེན་པོ་སོགས་ཀྱིས་བསྟན་བཅོས་རྩོམ་པ་སོགས་བསྟན་པ་ལ་བྱ་བ་ལྷག་པར་མཛད། ཁྱད་པར་ཕྱི་མ་ནི་འཇམ་དཔལ་དབྱངས་ཀྱིས་རྗེས་སུ་བཟུང་བས་སྨྲ་བའི་དབང་ཕྱུག་ཆེན་པོར་གྱུར་ཏེ། མདོ་སྔགས་ཀྱི་བསྟན་བཅོས་བརྒྱ་རྩ་བརྒྱད་མཛད་
པར་གྲགས་སོ། དེའི་འོག་ཏུ་རྒྱལ་པོ་དྷེ་ཡ་པཱ་ལ་ལོ་ཆུང་བས་དེའི་ཞང་པོ་ཙ་ན་ཀ་རྒྱལ་སྲིད་བྱེད་པའི་ཚེ་བསྟན་པའི་གསལ་བྱེད་ཆེས་མང་པོ་དང་ཁྱད་པར་བི་ཀྲ་མ་ལ་ཤཱི་ལའི་མཁས་པ་སྒོ་དྲུག་ཏུ་གྲགས་པའང་བྱུང་སྟེ། ཤར་སྒོ་སྲུང་བ་རྩོད་དུས་ཀྱི་ཐམས་ཅད་མཁྱེན་པར་རནྟཱ་ཀ་ར་ཤཱནྟི་
པ་ལྷོ་སྒོ་སྲུང་བ་ཤེས་རབ་འབྱུང་གནས། ནུབ་སྒོ་སྲུང་བ་ངག་གི་དབང་ཕྱུག་གྲགས་པ། བྱང་སྒོ་སྲུང་བ་ནཱ་རོ་པ། དབུས་ཀྱི་ཀ་ཆེན་དང་པོ་བྲམ་ཟེ་རིན་ཆེན་རྡོ་རྗེ་དང་། གཉིས་པ་ཛྙཱ་ན་ཤྲཱི་མི་ཏྲ་རྣམས་སོ། །དེ་དྲུག་པོ་སོ་སོར་ཟླ་མེད་པའི་མཁས་པ་ཆེན་པོར་གྱུར་ཏེ། མུ་
เล่ม ๑๐๓ · หน้า 74b
སྟེགས་ཀྱི་རྒོལ་བ་མཐའ་དག་བཟློག་པ་དང་། མདོ་སྔགས་ཀྱི་བསྟན་བཅོས་མང་པོ་བརྩམས་པ་དང་། ཆེས་ངོ་མཚར་བའི་མཛད་པ་མང་པོས་དེ་སྐབས་ཀྱི་སྐྱེ་བོ་དག་ཆོས་ལ་བཙུན་དེ་བདེ་བར་གཤེགས་པའི་བསྟན་པ་སྤྱི་དང་ཁྱད་པར་ཐེག་པ་ཆེན་པོའི་བསྟན་པ་ཉི་
མ་ལྟར་གསལ་བར་མཛད་པ་ཡིན་ནོ། །འདི་སྐབས་རྡོ་རྗེ་གདན་གྱི་གནྡྷོ་ལ་ལ་མེའི་གནོད་པའང་བྱུང་མོད་ཀྱི་ལྷ་ཁང་དང་སྐུ་གཟུགས་མ་ཞིག་ཅིང་ཤིང་ཚིག་པ་དང་རི་མོ་ཟུབ་པ་སོགས་སྐྱོན་ཕྲན་བུ་རྣམས་སླར་གསོས་ཏེ། མ་ག་དྷཱ་ལ་སོགས་པའི་ཡུལ་མང་པོར་གཙུག་ལག་
ཁང་དང་ཆོས་གཞི་རྙིང་གསོ་གསར་བཞེངས་དུ་མའང་བྱུང་ངོ༌། །དེ་འོག་རྒྱལ་པོ་བྷེ་ཡ་བཱ་ལའི་ཚེ་ཇོ་བོ་རྗེ་དཱི་པཾ་ཀ་ར་ཤྲཱི་ཛྙཱ་ནས་བི་ཀྲ་མ་ལ་དང་། ཨོ་ཏནྟ་པུ་རིར་གཙོ་བོར་བསྟན་པ་བསྐྱངས་ཏེ་འདི་ནི་གཙོ་བོར་གསེར་གླིང་པ་བརྟེན་ནས་བྱང་ཆུབ་ཀྱི་སེམས་ལྷག་པར་བསྒོམས་པ་
ཞིག་ཡིན་ལ་མཁས་གྲུབ་ཀྱི་ཡོན་ཏན་དང་བསྟན་པ་སྤེལ་བའི་མཛད་པ་ནི་སློབ་དཔོན་སྔ་མ་རྣམས་ལས་མི་དམན་པར་གྲགས་སོ། དེ་དག་གི་ཕྱི་ཞིག་ན་ཨ་གྲ་པཱ་ལས་རྒྱལ་སྲིད་བྱེད་པའི་ཚེ་རཏྟཱ་ཀ་ར་གུ་པས་རྡོ་རྗེ་གདན་དུ་བསྟན་པ་སྐྱོང་བར་མཛད་དོ། །གཞན་ཡང་འདི་སྐབས་
རྒྱལ་རབས་འགའ་ཞིག་གི་ཚེ་དཱི་པཾ་ཀ་རའི་སློབ་མ་པི་ཊོ་བ་ཆེན་པོ་སོགས་ཐུགས་སྲས་ལྔ་དང་། ཛྙཱ་ན་ཤྲཱི་མི་ཏྲ་སོགས་པཎྜི་ཏ་སུམ་ཅུ་རྩ་བདུན་གྱིས་འགྲོ་དོན་མཛད་དོ། །ཁྱད་པར་པཎྜི་ཏ་ར་སྠཱི་ར་བཱ་ལ་མཚན་གཞན་འབུམ་ཕྲག་གསུམ་པར་གྲགས་པ་དེས། བི་ཀྲ་མ་ལར་ཤེས་
ཕྱིན་བཤད་པས་བསྟན་པ་ལ་མཆོག་ཏུ་ཕན་པར་མཛད། དེའི་འོག་ཏུ་རཱ་མ་པཱ་ལ་སྟེ་དགའ་བ་སྐྱོང་རྒྱལ་པོར་གྱུར་བའི་ཚེ་ཨོ་ཌི་བི་ཤར་སྐུ་འཁྲུངས་པའི་སློབ་དཔོན་ཆེན་པོ་ཨ་བྷ་ཡ་ཀ་ར་གུཔ་སྤྱན་དྲངས་ཏེ་རྡོ་རྗེ་གདན་གྱི་མཁན་པོ་མཛད། ཕྱི་ནས་བི་ཀྲ་མ་ལ་ཤཱི་ལ་དང་། ན་
ལནྡར་ཡང་མཁན་པོ་མཛད་དེ། དུས་དེ་ཙམ་ན་འགྲན་དུ་མེད་པའི་བསྟན་པའི་བདག་པོ་ཆེན་པོར་གྱུར། དི་སྐབས་སྔོན་དང་མི་འདྲ་བར་བི་ཀྲ་མ་ལ་ཤཱི་ལར་ཡང་ཆོས་སྨྲ་བའི་པཎྜི་ཏ་ཁོ་ན་བརྒྱ་དྲུག་ཅུ་ཙམ་དང་། གཉུག་མར་གནས་པའི་དགེ་སློང་སྟོང་རེ་ཡོད་པ་བྱུང་། རྡོ་
เล่ม ๑๐๓ · หน้า 75a
རྗེ་གདན་དུ་ཐེག་ཆེན་པ་བཞི་བཅུ་རེ་དང་། ཉན་ཐོས་ཀྱི་དགེ་སློང་ཉིས་བརྒྱ་རེ་རྟག་ཏུ་བཞུགས། དུས་དུས་སུ་ཉན་ཐོས་པའི་དགེ་སློང་ཁྲི་ཕྲག་རེ་འདུ་བ་བྱུང་། ཨོ་ཏནྟ་པུ་རིར་ཡང་དགེ་སློང་སྟོང་ཕྲག་རེ་གཉུག་མར་གནས། དུས་དུས་སུ་ཐེག་པ་ཆེ་ཆུང་གི་དགེ་
སློང་སྟོང་ཕྲག་བཅུ་གཉིས་རེ་འདུས་པའང་བྱུང་། མདོར་ན་ཐེག་པ་ཆེ་ཆུང་གི་བསྟན་པ་ཐམས་ཅད་དང་། ཁྱད་པར་ཤེས་ཕྱིན་གྱི་ཆོས་ཚུལ་ཤིན་ཏུ་རྒྱས་པར་མཛད་དེ་རྒྱན་དྲུག་གི་དུས་ཡོལ་ནས་མཁས་པ་སྒོ་དྲུག་གི་ཡ་གྱལ་རིན་འབྱུང་ཞི་བ་དང་། སློབ་དཔོན་འདི་གཉིས་
ལས་བསྟན་འགྲོའི་དོན་རྒྱ་ཆེ་བ་མ་བྱུང་བར་གྲགས་སོ། །འདིས་མཛད་པའི་བསྟན་བཅོས་རྣམས་ནི་ཕྱི་རབས་པ་དག་ལ་སྲོག་ཆད་ཀ་མའི་བདུད་རྩི་ལྟ་བུར་གྱུར་པ་ཡིན་ཏེ་འདི་ལས་ཕྱིས་འདི་དང་མཉམ་པའི་བསྟན་པའི་གསལ་བྱེད་མཁས་པ་ཆེན་པོའང་མ་བྱུང་བར་གྲགས་པ་དང་།
དེ་ལྟར་མི་འབྱུང་བར་ཡང་མཁྱེན་ནས་མི་གསལ་བ་རྣམས་གསལ་བར་འགྲེལ་ཞིང་། འཐོར་བ་རྣམས་བསྡུ་བ་དང་། འཁྲུགས་པ་གོ་རིམས་སུ་བསྡེབས་པ་སོགས་ཀྱིས་ལེགས་པར་བཤད་པའི་བསྟན་བཅོས་རྣམས་ཕྱི་རབས་པ་དག་ལ་དག་ལོན་ལྟ་བུར་བཞག་པ་ཡིན་པའི་
ཕྱིར་རོ། །གཞན་ཡང་རྒྱལ་པོ་རཱ་མ་པཱ་ལ་དེ་ཉིད་དང་། ཡཀྵ་པཱ་ལ། ལ་ཝ་སེ་ན་སོགས་ཀྱི་སྐབས་ཨ་བྷ་ཡའི་སློབ་མ་ཙཱ་མི་སངས་རྒྱས་གྲགས་དང་། ཤུ་བྷཱ་ཀ་ར་གུཔྟ། ཝཱ་གཱི་ཤྭ་ར་གུ་པ། ར་བི་ཤྲཱི་ཛྙཱ་ན། བི་ཁྱཱ་ཏ་དེ་བ། བྷསྐ་ར་གུཔྟ། ནི་ཀྵ་ལངྐ།
ནཱ་ཡ་ཀ་པཱ་ད། དྷརྨ་ཀ་ར་གུཔྟ་སོགས་ཀྱིས་བསྟན་པ་གསལ་བར་མཛད་དོ། །དེ་འོག་རྒྱལ་པོ་རཱ་ཐི་ཀ་སེ་ནའི་དུས་སུ་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲ་བསྟན་པའི་བདག་པོ་ཆེན་པོར་གྱུར། གཞན་ཡང་བལ་པོ་བུདྡྷ་ཤྲཱི་དང་། སློབ་དཔོན་ཆེན་པོ་རཏྣ་རཀྵི་ཏ། མཁས་
པ་ཆེན་པོ་ཛྷཱ་ནཱ་ཀ་ར་གུསྟེ། མཁས་པ་ཆེན་པོ་བུདྡྷ་ཤྲཱི་མི་ཏྲ། མཁས་པ་ཆེན་པོ་སཾ་ག་མ་ཛྷཱ། ར་བི་ཤྲཱི་བྷ་དྲ། ཙནྡྲ་ཀ་ར་གུསྟ་སོགས་སྡོམ་བརྩོན་གསུང་རབ་རྒྱ་མཚོའི་ཕ་རོལ་དུ་སོན་པ་མང་པོ་བསྟན་འགྲོའི་དཔལ་དུ་བྱོན་ཏོ། །དེ་ལས་ཤཱཀྱ་ཤྲཱི་བྷ་དྲ་ནི། བི་ཀྲ་མ་ལ་ཤཱི་ལ་
เล่ม ๑๐๓ · หน้า 75b
དང་། ན་ལནྡྲའི་མཁན་པོ་མཛད་ནས་ཕྱོགས་བཞིའི་མུ་སྟེགས་ཀྱི་རྒོལ་བ་མང་པོ་རྩོད་པས་ཕམ་པར་མཛད་ནས་བསྟན་ལ་བཅུག དགེ་འདུན་སྟོང་ཕྲག་མང་པོ་ལ་ཆོས་གསུངས། ཨོ་ཏནྟ་པུ་རིའི་དགེ་འདུན་ཁྲི་ཉིས་སྟོང་གིས་ཀྱང་བླ་མར་བཀུར། བསྟན་
བཅོས་མང་དུ་བརྩམས་པ་སོགས་བསྟན་པ་ལ་ཕྱག་རྗེས་ཤིན་ཏུ་ཆེ། བལ་པོ་བུདྡྷ་ཤྲཱིས་ཀྱང་བལ་ཡུལ་དུ་ཕར་ཕྱིན་སོགས་རྒྱས་པར་བྱས། རཏྣ་རཀྵི་ཏས་བི་ཀྲ་མ་ལ་ཤཱི་ལར་སྔགས་ཀྱི་སློབ་དཔོན་མཛད་པ་སོགས་ཐམས་ཅད་ཀྱིས་བསྟན་པ་ལ་མཆོག་ཏུ་ཕན་པར་
མཛད་ཅིང་མ་ཧཱནྟ་ཉི་ཤུ་རྩ་བཞིར་གྲགས་པའང་འདི་སྐབས་སོ། །དུས་འདི་ཙམ་ན་མ་ག་དྷཱར་ཡང་རྡོ་རྗེ་གདན་དུ་ཐེག་ཆེན་གྱི་ཆོས་གཞི་ནི་མེད་ཅིང་། དབྱར་གནས་ལ་ཉན་ཐོས་སེནྡྷ་པ་ཁྲི་ཙམ་འདུ། ཆོས་གཞི་གཞན་རྣམས་ཀྱང་མེད་པ་ལྟར་སོང་། ན་ལནྡྲ་
དང་བི་ཀྲ་མ་ལ་ཤཱི་ལར་ཨ་བྷ་ཡའི་དུས་དང་མཚུངས་ཀྱང་། སྤྱིར་མུ་སྟེགས་ཇེ་འཕེལ་ལ་སོང་ཞིང་། མུ་སུརྨ་སྟེ་ཀླ་ཀློའི་གྲུབ་མཐའ་འཛིན་པའང་མང་དུ་བྱུང་། བི་ཀྲ་མ་ལ་ཤཱི་ལ་དང་ཨོ་ཏནྟ་པུ་རིར་ཡང་རྒྱལ་པོས་རྫོང་བརྩིགས་ཏེ་དམག་མི་འགའ་ཞིག་བཞག་ནས་
བསྲུང་དགོས་པ་ཡོད་དོ། །དེ་ལས་དེ་འོག་རྒྱལ་པོ་ལ་ཝངྒ་སེ་ནའི་དུས་ཨནྟཪྵི་དིའི་ཡུལ་དུ་ཏུ་རུ་ཥྐའི་རྒྱལ་པོ་ཟླ་བ་ཞེས་པ་བྱུང་སྟེ། །དགེ་སློང་གི་ཕོ་ཉའི་འགྲུལ་གྱིས་རྐྱེན་བྱས་ནས་རྒྱལ་པོ་དེ་དང་གར་ལོག་གི་རྒྱལ་ཕྲན་གཞན་མང་པོ་འགྲིལ་ནས་མ་ག་དྷའི་ཡུལ་ཐམས་ཅད་བཅོམ།
ཨོ་ཏནྟ་པུ་རི་དང་བི་ཀྲ་མ་ལ་གཉིས་ཅར་བཤིག །ཁྱད་པར་ཨོ་ཏནྟ་པུ་རིའི་རབ་བྱུང་མང་པོ་བསད་ཅིང་བི་ཧ་རིའི་ཤུལ་ཏ་ཟིག་གི་རྫོང་བཅས། པཎྜི་ཏ་ཤཱཀྱ་ཤྲཱི་ཤར་ཕྱོགས་ཨོ་ཌི་བི་ཤའི་ཡུལ་ཛ་གདྡ་ལར་བྱོན། དེར་ལོ་གསུམ་བཞུགས་ནས་བོད་དུ་བྱོན། རཏྣ་རཀྵི་ཏས་
བལ་ཡུལ་དུ་བྱོན། ཛྙཱ་ནཱ་ཀ་ར་གུཔྟ་སོགས་པཎ་ཆེན་འགའ་ཞིག་དང་། པཎ་ཆུང་བརྒྱ་ཙམ་ལྷོ་ནུབ་ཕྱོགས་སུ་བྱོན། བུདྡྷ་ཤྲཱི་མི་ཏྲ་དང་། བཛྲ་ཤྲཱི་སོགས་ལྷོ་ཕྱོགས་ཐག་རིང་པོར་བྱོན། སངྒ་མ་ཤྲཱི་ཛྙཱ་ན་དང་། ར་བི་ཤྲཱི་བྷ་དྲ་དང་། ཙནྡྲ་ཀ་ར་གུཔ་སོགས་མ་ཧཱནྟ་
เล่ม ๑๐๓ · หน้า 76a
བཅུ་དྲུག་ཙམ་དང་། པཎ་ཆུང་གཉིས་བརྒྱ་ཙམ་ར་ཤང་དང་། མུ་ཉང་། ཀཾ་བོ་ཛ་སོགས་ཤར་ཕྱོགས་ཐག་རིང་པོ་རྣམས་སུ་བྲོས་ནས་དབུས་འགྱུར་འཆང་དུ་བསྟན་པའི་དངོས་གཞི་ནུབ་བོ། །འོན་ཀྱང་གོ་རཀའི་རྗེས་འབྲང་ན་ཌེ་ཤཱ་རའི་སྡེ་ཉུང་ངུ་ཞིག་ནང་པ་
ཉིད་དུ་ལུས་པ་དང་། ནང་པའི་ལྷ་རྟེན་སོགས་ལུས་པ་རྣམས་ལ་ལ་ཝཾ་ག་སེ་ནའི་རྒྱུད་དུ་ཏུ་རུཥ་ལ་ལུང་ལེན་དགོས་པའི་རྒྱལ་ཕྲན་འགའ་ཞིག་བྱུང་བས་ཀྱང་རང་སྟོབས་ལ་དཔག་པས་མཆོད་ཅིང་ཁྱད་པར་རྒྱལ་པོ་བུདྡྷ་སེ་ནའི་དུས། མ་ཧཱ་པཎྜི་ཏ་རཱ་ཧུ་ལ་ཤྲཱི་བྷ་དྲ་ན་ལནྡྲར་བཞུགས་
ཤིང་ཆོས་ཉན་པའང་བདུན་ཅུ་ཙམ་ཡོད་པར་གྲགས། གཞན་ཡང་དེའི་རྗེས་སུ་ཅི་རིགས་པར་བྷཱུ་མི་ཤྲཱི་བྷ་དྲ་དང་། ཀ་རུ་ཎཱ་ཤྲཱི་བྷ་དྲ་སོགས་ཀྱིས་ཀྱང་བརྩོན་པ་ཆེན་པོས་བསྟན་པ་བསྐྱངས་པར་གྲགས་སོ། །དེའི་རྗེས་ཕྱི་མོ་ཞིག་ཏུ་གྷཾ་ག་ལའི་རྒྱལ་པོ་ཙ་ག་ལ་རཱ་ཛ་ཞེས་པ་
སྟོབས་ཆེན་པོས་ཏུ་རུཥ་རྣམས་ལ་དབང་བསྒྱུར་བ་དེས་རྡོ་རྗེ་གདན་དུ་ཆོས་གཞི་བཙུགས་ནས་དེར་པཎྜི་ཏ་ཤཱ་རི་པུ་ཏྲས་ཆོས་བཤད་དོ། །ཡང་དེ་རྗེས་ཕྱི་མོ་ཞིག་ན་རྒྱལ་པོ་མུ་ཀུནྡ་དེ་བ་ཞེས་པས་མ་ག་དྷཱར་ཆོས་གཞི་བཙུགས། ཨི་ཌི་བི་ཤར་ཡང་ལྷ་ཁང་དང་ཆོས་གཞི་འགའ་
རེ་བྱས་པའི་གཏམ་སྣང་ཞིང་། འདི་སྐབས་རྡོ་རྗེ་གདན་གྱི་མཁན་པོ་སྒྲ་གཅན་འཛིན་དཔལ་བཟང་པོ་དང་། པཎྜི་ཏ་དཔལ་ལྡན་ཡིད་ཀྱི་ཤིང་རྟ་གཉིས་ཀྱང་བྱུང་བར་སྣང་ངོ༌། །དེང་སང་ནི་རྡོ་རྗེ་གདན་དུ་སནྡྲ་ཤཱི་ཞེས་པ་དཏྟ་ཏྲིའི་སློབ་མ་དག་གིས་བཟུང་ནས་ཡུལ་དབུས་སུ་ནང་
པ་ནི་འགའ་ཡང་མེད་དོ། །རྒྱ་གར་གྱི་ཤར་དང་། བྱང་ཤར་ར་ཁཾ་དང་། མུ་ཏཾ། ཙགླ་དང་། ཀཾ་བོ་ཛ་སོགས་ཀོ་ཀིའི་ཡུལ་དུ་གྲགས་པའི་མཐའ་འདི་དག་ཏུ་སྔོན་རྒྱལ་པོ་མྱ་ངན་མེད་ཀྱི་དུས་ཙམ་ནས་བཟུང་སྟེ་བསྟན་པ་དར་བ་དབྱིག་གཉེན་མ་བྱོན་ཕན་ཆད་ཉན་
ཐོས་པ་ཁོ་ན་ཡིན་ལ། དེ་ནས་དབྱིག་གཉེན་གྱི་སློབ་མ་འགའ་ཞིག་གིས་ཐེག་ཆེན་དར་བར་བྱས་ཏེ། སེན་བཞིའི་དུས་སུ་ལྷག་པར་དར་ཞིང་ཡུལ་དེའི་རྒྱལ་པོ་ཤོ་བྷ་ཛ་ཏ་དང་། །སིདྷ་ཛ་ཊི་སོགས་ཀྱིས་ལྷ་ཁང་དང་ཆོས་གཞི་མང་པོ་བཏབ་ནས་བསྟན་པ་ཤིན་ཏུ་དར་བ་དེང་སང་
เล่ม ๑๐๓ · หน้า 76b
དུའང་མ་ནུབ་པར་ཡོད་པ་ཐོས་སོ། རྒྱ་གར་ལྷོ་ཕྱོགས་ཀྱི་རྒྱུད་ཐག་རིང་པོར་མ་ག་དྷཱ་ཏུ་རོཥས་བཅོམ་ཕྱིན་ཆད་ནས། བིཅུ་ནཱ་ག་ར། ཀརྐུ་ན། མ་ལུ་ར། ཀ་ལིངྒ་རྣམས་སུ་ཆོས་གཞི་ཆུང་ངུ་མང་པོ་རྒྱས། ལྷོ་ནུབ་ཕྱོགས་སུ། མ་རུ། མེ་ཝ་ར། ཙི་ཏ་
ཝ་ར། པི་ཧུ་བ། ཨ་བྷུ། སཽརཥྚ། གུ་ཛི་ར་ཐ་སོགས་སུ་ཆོས་གཞི་མང་པོ་དར། །ཁྱད་པར་ཁ་གེནྡྲ་ལ་སོགས་པའི་ཡུལ་དུ་གྲུབ་ཆེན་ཞི་བ་སྦས་པ་སོགས་ཀྱིས་བསྟན་པ་བསྐྱངས་ནས། དེང་སང་དུའང་ནང་པའི་སྡེ་འགའ་ཞིག་དར་བར་ཡོད་པར་ཐོས་སོ། །
གཞན་ཡང་སིངྒྷ་ལའི་གླིང་དང་། ནས་གླིང་དང་། ཟངས་གླིང་དང་། དྷ་ན་ཤྲཱིའི་གླིང་དང་། པ་ཡི་གུ་ཞེས་པའི་གླིང་སྟེ། གླིང་ཕྲན་དེ་དག་ཏུ་སྔོན་ནས་བསྟན་པ་ཆེར་དར་བ་ད་ལྟའང་མ་ནུབ་པར་ཡོད་པ་ཡུལ་དེ་དག་ཏུ་ཕྱིན་པའི་མིའི་གཏམ་ལས་མངོན་སུམ་དུ་ཐོས་སོ། །
ཁྱད་པར་སིངྒྷ་ལའི་གླིང་དུ་ནི་ཐེག་ཆེན་པ་ཉུང་ཤས་ཙམ་དང་། ཉན་ཐོས་པ་ཤིན་ཏུ་མང་ཞིང་དྷ་ན་ཤྲཱི་དང་། པ་ཡི་གུ་གཉིས་ནའང་ཐེག་ཆེན་པ་ཅུང་ཟད་དང་གཞན་རྣམས་ཉན་ཐོས་པ་ཁོ་ནའོ། ལི་ཡུལ་ནི་དཔལ་དུས་ཀྱི་འཁོར་ལོ་ནས་གསུངས་པའི་ཡུལ་དྲུག་གི་ནང་ཚན་
བོད་རྒྱའི་མཚམས་སུ་ཡོད་པ་སྟེ། དེར་ཆོས་རྒྱལ་མྱ་ངན་མེད་ཀྱི་བཙུན་མོ་ལ་སྲས་བྱུང་བ་ས་ནུར་གྲགས། དེས་ཡུལ་དེ་བཟུང་ནས་ཡུན་རིང་ལོན་པ་རྒྱལ་པོ་བི་ཛ་ཡ་སམྦྷ་ཝའི་རིང་ལ། དགེ་སློང་བཻ་རོ་ཙ་ན་སོགས་ཀྱིས་བསྟན་པ་སྤེལ་ཏེ། གཙུག་ལག་ཁང་དང་། མཆོད་
རྟེན་བཞེངས་པའང་མང་དུ་བྱུང་། དེའི་རྗེས་སུ་རྒྱལ་པོ་པི་ཛ་ཡ་བི་གླུའི་ཚེ་འཕགས་ཡུལ་ནས་དགྲ་བཅོམ་པ་བཞི་ཕེབས། སངས་རྒྱས་འོད་སྲུང་གི་མཆོད་རྟེན་ལ་དགྲ་བཅོམ་རྣམས་ཀྱིས་ངོ་སྤྲད། སྒེའུ་དོ་ཤན་གྱི་གཙུག་ལག་ཁང་བརྩིགས། དེ་བཞིན་དུ་ཉན་ཐོས་དགྲ་བཅོམ་པ་
དང་། བྱང་ཆུབ་སེམས་དཔའ་མང་པོ་གཤེགས་ཏེ་ཐེག་པ་ཆེ་ཆུང་གཉི་གའི་བསྟན་པ་སྤེལ་བར་མཛད་དེ། གཙུག་ལག་ཁང་དང་དགེ་འདུན་གྱི་སྡེས་ཁྱབ་པར་གྱུར་མོད། ད་ལྟ་ནི་གཟུགས་བརྙན་ཙམ་ལས་བསྟན་པ་རྣལ་མ་ཡོད་པར་མི་གཤའོ། །རྒྱ་ཡུལ་དུ་ནི་སྟོན་
เล่ม ๑๐๓ · หน้า 77a
པ་མྱ་ངན་ལས་འདས་ནས་ལོ་བརྒྱ་དང་བཅུ་ལོན་པ་ན། ཧན་གྱི་རྒྱུད་ལས། ཧན་མིན་ཏི་ཞེས་བྱ་བའི་རྒྱལ་པོའི་ཚེ་སྔོན་ཅིའུའི་རྒྱུད་ལས། ཅིའུ་ཇིའུ་ཝང་ཞེས་པའི་རྒྱལ་པོའི་རྨི་ལམ་གྱི་ལྟས་རྡོ་རིངས་ལ་བྲིས་པ་དང་མཐུན་པར། །འཕགས་ཡུལ་ནས་
པཎྜི་ཏ་གྲོལ་བ་དང་འབར་བ་ཟེར་བ་བདེན་པ་མཐོང་བ་གཉིས་ཤིག་གིས་ཐེག་པ་ཆུང་ངུའི་སྡེ་སྣོད་ཆོས་ཀྱི་རྣམ་གྲངས་ལྔ་བཅུ་རྩ་གཉིས་དང་། ཨུ་ད་ཡ་ནས་བཞེངས་པའི་ཐུབ་པའི་བྲིས་སྐུ་རྟ་དཀར་པོ་ཞིག་ལ་བཀལ་ནས་འོངས་པས་བསྟན་པའི་གཞི་བཏིང་། སའི་བའི་ག་སི་
ཞེས་པའི་གཙུག་ལག་ཁང་ཐོག་མར་བཞེངས། པཎྜི་ཏ་གཉིས་ཀྱིས་ཀྱང་དགྲ་བཅོམ་ཐོབ། ཟིན་ཤིང་རྣམས་བཏུལ། དད་པས་རབ་ཏུ་བྱུང་བ་མང་པོ་བྱུང་སྟེ། དགེ་འདུན་གྱི་སྡེ་ཤིན་ཏུ་འཕེལ་བར་གྱུར། ཡོང་ཕྱི་ཞིག་ན་པཎྜི་ཏ་ཀུ་མཱ་ར་སྤྱན་དྲངས་ནས་དེས་ཀྱང་བསྟན་
པ་སྤེལ། །ཐང་གི་རྒྱུད་པའི་རིང་ལ་ཐང་ཛང་ཛང་ཞེས་པ་སློབ་དཔོན་དབྱིག་གཉེན་གྱི་སློབ་མར་གྱུར་ནས་ཐེག་པ་ཆེ་ཆུང་གི་ཆོས་དཔག་ཏུ་མེད་པ་བསྒྱུར། འདིའི་གོང་དུ་ཆོས་བསྒྱུར་ནུས་པའི་རྒྱའི་ལོ་ཙཱ་བ་ཉིས་བརྒྱ་ཙམ་བྱུང་ཞེས་གྲགས་ཤིང་། དེ་དག་གིས་ཀྱང་ཆོས་མང་དུ་བསྒྱུར་
བ་ཡོད་པས་བསྟན་པ་ཤིན་ཏུ་དར་ཞིང་དགྲ་བཅོམ་པའང་མང་དུ་བྱོན། དེ་ནས་མི་ཉག་དང་ཧོར་གྱི་རྒྱལ་པོ་བྱུང་གི་བར་དུ་རྒྱ་ནག་གི་རྒྱལ་པོ་རབས་མང་པོའི་ཚེ་དང་། དེ་ནས་ཀྱང་ད་ལྟའི་བར་བསྟན་པ་གནས་བཞིན་ལ། མི་ཉག་གི་རྒྱལ་པོ་ཐའི་ཧུས་ཆོས་རྗེ་དུས་གསུམ་མཁྱེན་
པ་སྤྱན་དྲངས་ཀྱང་མ་བྱོན་པར་གཙང་པོ་བ་བཏང་བ་ལ་ཆོས་ཉན་པ་དང་། ཧོར་ཡུལ་དུ་ཧོར་གྱི་རྒྱལ་པོ་ཇིང་གི་སྨན་གྱི་ཚེ་ཞང་ཚལ་པའི་སློབ་མ་གཙང་པ་དུང་ཁུར་བས་ཧོར་ཡུལ་དུ་བྱོན་པས་གནམ་མཆོད་ལ་དད་པ་བསྐྱེད་པ་ཙམ་མཛད། །རྗེས་ནས་མི་ཉག་ཀྱང་ཧོར་གྱིས་
དབང་དུ་བསྡུས། ཕྱི་ཞིག་ན་རྒྱལ་པོ་གོ་དན་གྱིས་ས་སྐྱ་པཎྜི་ཏ་སྤྱན་དྲངས། དེའི་རྗེས་སུ་ཆོས་རྗེ་རིན་པོ་ཆེ་འཕགས་པའང་སྤྱན་དྲངས་ནས། གོ་བེ་ལ་ལ་དབང་བསྐུར་བ་སོགས་ཀྱིས་བསྟན་པ་གསལ་བར་མཛད། མོ་གོར་གན་གྱིས་ཀརྨ་པ་ཤཱི་སྤྱན་དྲངས་པ་སོགས་བོད་
เล่ม ๑๐๓ · หน้า 77b
ཡུལ་གྱི་བསྟན་པ་འང་ཅི་རིགས་པར་མཆོད་པ་བྱུང་། རྒྱ་ནག་ཕྱི་མ་ལ་མིན་གྱི་རྒྱུད་ཐའི་ཛུ་རྒྱལ་པོས་བིརཱུ་བ་དང་། གནས་བརྟན་བཅུ་དྲུག་སྤྱན་དྲངས་པ་དང་། ཏཱ་མིན་གཡུང་ལོས་ཆོས་རྗེ་དེ་བཞིན་གཤེགས་པ་སྤྱན་དྲངས་པ་སོགས་བསྟན་པ་ལ་གུས་པས་མཆོད་པའི་རྒྱལ་
པོ་ཁོ་ན་བྱུང་ཞིང་། ད་ལྟ་ཚིན་གྱི་བརྒྱུད་པ་འདིར་ཡང་ཤུན་ཅི་རྒྱལ་པོས་ངག་དབང་བློ་བཟང་རྒྱ་མཚོ་སྤྱན་དྲངས་པ་སོགས་ནས་ད་ལྟའི་བར་བསྟན་པ་ལ་གུས་པས་མཆོད་བཞིན་པའོ། །འོན་ཀྱང་རྒྱ་ཡུལ་དུ་ཆོས་རྒྱལ་འཕགས་པས་སེ་ཆེན་རྒྱལ་པོར་དགྱེས་པ་རྡོ་རྗེའི་དཀྱིལ་
འཁོར་དུ་དབང་བསྐུར་བ་དང་། དེ་བཞིན་གཤེགས་པས་ཏཱ་མིན་རྒྱལ་པོར་ཐུགས་རྗེ་ཆེན་པོ་རྒྱལ་བ་རྒྱ་མཚོའི་དབང་བསྐུར་ཞིང་ཁྲིད་བཏབ་པ་སོགས་སྐལ་ལྡན་རེ་གཉིས་ཀྱིས་གསང་སྔགས་སྤྱོད་པ་སྲིད་མོད། བོད་ལྟ་བུར་ཐུན་མོང་དུ་གསང་སྔགས་ཀྱི་བསྟན་པ་དར་བ་ནི་མ་བྱུང་
བར་སྣང་ཞིང་། དེ་མཐུན་རྒྱ་ཡུལ་གྱི་གསུང་རབ་རྣམས་སུའང་བྱ་རྒྱུད་ཀྱི་གཟུངས་ཕྲན་འགའ་ཞིག་ལས་སྔགས་རྒྱུད་དངོས་གཞི་མི་བཞུགས་སོ། །མདོ་ཕྱོགས་ལས་ཀྱང་དེང་སང་ནི་ཐེག་ཆེན་ཁོ་ན་སྤྱོད་ཆེ་བར་སྣང་ཞིང་། དེ་ལས་ཀྱང་འཁོར་ལོ་ཐ་མའི་མདོ་རྣམས་གཙོ་བོར་
དར་བ་ཞིག་སྣང་ངོ༌། །གཉིས་པ་དེ་དག་ཏུ་གསང་སྔགས་རྡོ་རྗེ་ཐེག་པའི་བསྟན་པ་ཇི་ལྟར་བསྐྱངས་པའི་ཚུལ་ནི། རྒྱུད་སྡེ་ཆེན་པོ་བཞི་ལས་བྱ་བ་དང་། སྤྱོད་པའི་རྒྱུད་ནི། བཅོམ་ལྡན་འདས་ཀྱིས་ཛམྦུའི་གླིང་འདི་ཉིད་དུ་མི་རྣམས་ལ་བསྟན་པ་དང་།
གཞན་དུ་ལྷ་དང་གནོད་སྦྱིན་སོགས་ལ་བསྟན་པ་དག་ལས་ཅི་རིགས་པར་དུས་དེ་ཉིད་ནས་བཟུང་སྟེ་འཕགས་པའི་ཡུལ་ལ་སོགས་པར་སྐལ་བ་ཅན་རྣམས་ཀྱིས་གསང་ཞིང་སྤྱད་པས་སྔགས་ཀྱི་དངོས་གྲུབ་ཆེན་པོ་འགྲུབ་པར་གྱུར་པ་ཡ་མང་དུ་བྱུང་ཞིང་ལྷག་པར་ཐེག་ཆེན་དར་བ་ནས་བརྩམས་
ཏེ་རྒྱས་པར་གྱུར་ཏོ། །དེ་ཙམ་ན་རྣལ་འབྱོར་དང་། རྣལ་འབྱོར་བླ་མེད་གཉིས་ནི་གདུལ་བྱ་མཆོག་གི་སྐལ་བ་ཅན་དག་ལ་ཐོད་རྒལ་དུ་སྣང་བ་ཙམ་ལས་རྒྱུན་ཆགས་པར་གནས་པ་ཞིག་ནི་མེད་པར་མངོན་པས། ཕྱིས་སློབ་དཔོན་ཆེན་པོ་བྲམ་ཟེ་མདའ་བསྣུན་ཞབས་སོགས་ཀྱི་
เล่ม ๑๐๓ · หน้า 78a
དུས་ནས་རྒྱས་ཤིང་རྒྱུན་ཆགས་སུ་གནས་པ་ཡིན་ནོ། །དེའང་བཅོམ་ལྡན་འདས་ཉིད་བཞུགས་པའི་དུས་མཉན་ཡོད་ནས་ནུབ་ཏུ་དཔག་ཚད་ལྔ་བརྒྱ་རྒལ་བ་ནི། ནུབ་ཕྱོགས་ཨོ་རྒྱན་གྱི་ཡུལ་དུ་རྒྱལ་པོ་ཨིནྡྲ་བྷཱུ་ཏི་ཞེས་བྱ་བ་ཡོད་པ་དེས་བཅོམ་ལྡན་
འདས་ཀྱི་མཚན་ཐོས་པས་དད་དེ་ཕྱག་འཚལ་ཞིང་ཡིད་ཀྱིས་གསོལ་བ་བཏབ་པས་བཅོམ་ལྡན་འདས་བྱོན་ཏེ། གསང་བ་འདུས་པ་མི་བསྐྱོད་པའི་དཀྱིལ་འཁོར་དུ་སྤྲུལ་ཏེ། རྒྱལ་པོ་འཁོར་བཅས་ལ་དབང་བསྐུར་ཞིང་། འདོད་ཡོན་མི་སྤོང་བར་ལམ་དུ་བྱེད་པའི་ཐབས་
ཁྱད་པར་ཅན་སྟོན་པའི་རྒྱུད་བསྟན་ནས་རྗེས་སུ་གདམས་པར་མཛད་དོ། །རྒྱལ་པོས་ཀྱང་དོན་དེ་ཐམས་ཅད་ཁོང་དུ་ཆུད་ནས་སྤྲོས་བཅས་ཀྱི་སྤྱོད་པ་རྒྱ་ཆེན་པོ་བརྩམས་པས་འཁོར་བཅས་ཀྱིས་རིག་པ་འཛིན་པའི་གནས་བརྙེས་ཏེ་ཡུལ་དེ་ལན་ཅིག་སྟོངས་སོ་ཞེས་གྲགས་ཤིང་།
དེ་མ་ཐག་ལྷོ་ཕྱོགས་ཀྱི་མཚོ་ཞིག་ཡོད་པ་འཕེལ་ཏེ་ཀླུ་མང་པོ་དང་བཅས་པས་ཡུལ་དེ་གང་བར་གྱུར་ཏོ། །ཀླུ་དེ་རྣམས་ལ་ལག་ན་རྡོ་རྗེས་རྒྱུད་ཀྱི་གླེགས་བམ་གཏད་ཅིང་ཀླུ་རྣམས་ཀྱིས་ཀྱང་མིར་བསྒྱུར་ནས་མཚོ་དེའི་འགྲམ་དུ་གྲོང་ཁྱེར་བྱས་ཏེ་ཁོད་ཅིང་། ལམ་ཉམས་
སུ་བླངས་པས་ཕལ་ཆེར་གྱིས་གྲུབ་པར་གྱུར་ཏོ། །གྲུབ་པ་མ་ཐོབ་པ་རྣམས་ཀྱང་མིར་གྱུར་ནས་དེ་སྐྱོང་བའི་རྒྱལ་པོ་རྣམས་ཀྱང་ཆོས་དང་ལྡན་པ་ཤ་སྟག་ཏུ་གྱུར་པ་དང་། སྤྱི་ཡུལ་དེ་ལ་ཨོ་རྒྱུན་མཁའ་འགྲོའི་གླེང་ཞེས་གསང་སྔགས་རྡོ་རྗེ་ཐེག་པའི་འབྱུང་ཁུངས་ཆེན་
པོར་འགྱུར་བའི་རྟེན་འབྲེལ་གྱི་སྒོ་མཆོག་ཏུ་འགྲིགས་པར་གྱུར་ཏོ། །ཡང་ཤམྦྷ་ལ་ན་གསང་བའི་བདག་པོ་ཟླ་བ་བཟང་པོས་སྤྱིར་རྒྱུད་ཐམས་ཅད་ཉེ་བར་བསྡུས་ཤིང་། ཁྱད་པར་དུས་ཀྱི་འཁོར་ལོའི་རྩ་རྒྱུད་ཀྱི་འགྲེལ་ཆེན་སྟོང་ཕྲག་དྲུག་ཅུ་པ་མཛད། གྲོང་བྱེ་
བ་ཕྲག་དགུ་བཅུ་རྩ་དྲུག་གི་སྐྱེ་བོ་སྐལ་ལྡན་རྣམས་ལ་དབང་བསྐུར་ཞིང་རྒྱུད་བཤད། ཀ་ལཱ་པའི་གྲོང་གི་ལྷོ་ཕྱོགས་མ་ལ་ཡའི་སྐྱེད་མོས་ཚལ་དུ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་ཆེན་པོ་བཞེངས། སྲས་ལྷ་དབང་སེང་གེའི་ཁྲི་ལ་ཆོས་སྟོན་
เล่ม ๑๐๓ · หน้า 78b
པར་དབང་བསྐུར། བྱང་ཆུབ་སེམས་དཔའ་རྡོ་རྗེ་སྙིང་པོས་དགྱེས་པ་རྡོ་རྗེའི་འགྲེལ་པ་མཛད་དེ་རྒྱལ་བའི་སྲས་པོ་རྣམས་ལ་བསྟན། ལྷ་དབང་གིས་ལོ་བརྒྱར་རྩ་རྒྱུད་བསྟན་ནས་གཟི་བརྗིད་ཅན་དབང་བསྐུར་བ་སོགས་རིམ་བཞིན་ཆོས་རྒྱལ་བདུན་དང་། དེ་ནས་འཇམ་དཔལ་
གྱི་སྤྲུལ་པའི་སྐུ་གྲགས་པས་རིགས་བཞི་རྡོ་རྗེའི་རིགས་གཅིག་ཏུ་བྱས་ཏེ་དྲང་སྲོང་ཉི་མའི་ཤིང་རྟ་ལ་སོགས་པ་ཚངས་པའི་དྲང་སྲོང་བྱེ་བ་ཕྲག་ཕྱེད་དང་བཞི་སོགས་ཤམྦྷ་ལའི་སྐྱེ་བོ་ཐམས་ཅད་ལ་དཀྱིལ་འཁོར་གཅིག་ཏུ་དབང་བསྐུར་ཞིང་རྒྱུད་བསྟན་པས་འདི་ཕྱིན་རིགས་ལྡན་དུ་གྲགས།
ཉི་མའི་ཤིང་རྟས་ཞུས་པའི་ངོར་རྩ་རྒྱུད་ལས་བསྡུས་རྒྱུད་བཏུས། དེ་རྗེས་རིགས་ལྡན་པདྨ་དཀར་པོས་བསྡུས་རྒྱུད་ཀྱི་རྒྱས་འགྲེལ་དྲི་མེད་འོད་དང་། །དོན་དམ་བསྙེན་པ་སོགས་མཛད་དེ་རིམ་བཞིན་རིགས་ལྡན་རྣམས་བྱོན་ཟིན་པ་དང་འབྱོན་པར་འགྱུར་བ་སྟེ། མ་འོངས་
པ་ནི་ཀླ་ཀློས་འཛམ་གླིང་ཆུང་ངུ་འདི་ཕལ་ཆེར་དབང་སྒྱུར་བའི་ཚེ་རིགས་ལྡན་དྲགས་པོ་འཁོར་ལོས་སྤྲུལ་པའི་དམག་གིས་བཏུལ་ཏེ་ལས་ས་དུམ་བུ་བཅུ་གཉིས་སུ་གསང་ཆེན་རྡོ་རྗེ་ཐེག་པའི་བསྟན་པ་འཇོག་པར་འགྱུར་བའང་ལུང་ལས་ངེས་པ་ཡིན་ནོ། །སྟོན་པ་མྱ་ངན་ལས་
འདས་ནས་ལོ་སུམ་བརྒྱ་ཙམ་འདས་པ་ཤམྦྷ་ལར་ཆོས་རྒྱལ་ཟླ་བས་བྱིན་ལོངས་སྐུར་གཤེགས་ཀ་ཙམ་གྱི་དུས་སུ་ལཱ་ཌའི་ཡུལ་དུ་བྲམ་ཟེ་ཆེན་པོ་སྒྲ་གཅན་འཛིན་བྱུང་། སློབ་དཔོན་རྣམ་པར་མི་རྟོག་པ་དང་། ཨོ་ཌི་བི་ཤའི་རྒྱལ་པོ་བི་སུ་ཀལྤ་ཞེས་བྱ་བ་ཨོ་རྐྱེན་དུ་བྱོན་ནས་ཀླུ་
ལས་གྱུར་བའི་རྣལ་འབྱོར་མས་གསང་བ་འདུས་པའི་དབང་བསྐུར་ཏེ་གྲུབ་པ་ཐོབ་པ་དེ་སོགས་བླ་མ་མང་པོ་དང་། ཁྱད་པར་གསང་བའི་བདག་པོ་སོགས་ལྷག་པའི་ལྷ་རྣམས་ལས་དངོས་སུ་རྒྱུད་མང་པོ་གསན་ནས་མཆོག་གི་དངོས་གྲུབ་བརྙེས་ཏེ་སྤྱོད་པ་སྐྱོང་བའི་ཚེ་ས་ར་ཧིར་གྲགས། །
ཨོ་རྒྱུན་ནས་སངས་རྒྱས་ཐོད་པ་སོགས་རྒྱུད་སྡེ་རྒྱ་མཚོའི་གླེགས་བམ་མང་པོའང་སྤྱན་འདྲེན་པར་མཛད་དོ། །དེའི་ཚེ་ཤར་ཕྱོགས་བྷངྒ་ལར་རྒྱལ་པོ་ཧ་རི་ཙནྡྲ་ཞེས་པ་ཙནྡྲའི་རིགས་ཀྱི་ཐོག་མ་དེ་བྱུང་ནས། སྔགས་ཀྱི་ལམ་ལ་བརྟེན་ཏེ་སྔགས་ཀྱི་མཐུས་མངོན་པར་བསྒྲུབས་པའི་
เล่ม ๑๐๓ · หน้า 79a
ལོངས་སྤྱོད་ཆེན་པོ་ལ་རོལ་བཞིན་འཁོར་སྟོང་དང་བཅས་ཏེ་རིག་པ་འཛིན་པའི་གནས་ཐོབ་བོ། །བྲམ་ཟེ་ཆེན་པོས་ཀྱང་ཀླུ་སྒྲུབ་ལ་དབང་བསྐུར་བ་དང་། རྒྱུད་བཤད་པ་དང་། མན་ངག་སྦྱིན་པ་ལ་སོགས་པ་གསང་སྔགས་ཀྱི་བསྟན་པ་གཏད་པ་དང་།
ཀླུ་སྒྲུབ་ཉིད་ཀྱིས་ལྷག་པའི་ལྷ་སོགས་ལས་གསན་ཏེ་གསང་སྔགས་ཀྱི་བསྟན་པ་ཡོངས་སུ་གསལ་བར་མཛད་དོ། །སློབ་དཔོན་འདི་གཉིས་ཀྱིས་སྔ་མོས་སངས་རྒྱས་ཐོད་པའི་དཀའ་འགྲེལ་སོགས་དང་། ཕྱི་མས་གསང་འདུས་ཀྱི་སྒྲུབ་ཐབས་གཉིས་སོགས་སྔགས་ཀྱི་བསྟན་
བཅོས་ཀྱང་མང་དུ་མཛད་པར་སྣང་ངོ་། །དང་པོ་ཐེག་ཆེན་དང་ཙམ་ནས་འདིའི་བར་དུ་བྱ་སྤྱོད་ཀྱི་སྔགས་གྲུབ་པ་ཤས་ཆེ་བའི་སྔགས་ཀྱི་རིག་པ་འཛིན་པ་སྟོང་ཕྲག་བརྒྱ་བྱུང་བར་གྲགས་ཏེ། གཤིན་རྗེ་གཤེད་ཀྱི་སྔགས་སོགས་བླ་མེད་ལ་བརྟེན་པའང་མང་དུ་ཡོད་དོ། །ཀླུ་སྒྲུབ་ཀྱི་
གྲོགས་པོ་བྲམ་ཟེ་མཆོག་སྲེད་ཀྱིས་སྔགས་གྲུབ་སྟེ། ནག་པོ་ཆེན་པོ་མངག་གཞུག་པར་གྱུར་ནས་གྲུབ་ཆེན་བརྒྱད་པོ་རེ་རེས་ཀྱང་སྐྱེ་བོ་སྟོང་ཕྲག་རེ་རེའི་དོན་མཛད་ཅིང་། གྲུབ་པ་ཐོབ་པ་སྟོང་ཕྲག་བརྒྱད་བྱུང་ངོ༌། །དེ་ནས་སློབ་དཔོན་འཕགས་པ་ལྷས་ཀྱང་། སྤྱོད་
བསྡུས་སྒྲོན་མ་སོགས་སྔགས་ཀྱི་བསྟན་བཅོས་མང་དུ་མཛད་ཅིང་རྒྱུད་བཤད་པས་སྐལ་ལྡན་མང་པོ་སྨིན་པར་མཛད་དོ། །སློབ་དཔོན་ཀླུའི་བྱང་ཆུབ་ཀྱིས་དཔལ་གྱི་རིར་ཕུག་ཟབ་མོ་ཞིག་ཏུ་ལོ་བཅུ་གཉིས་བསྒོམས་པས་ཕྱག་རྒྱ་ཆེན་པོ་མཆོག་གྲུབ་ཅིང་ཚེའང་ཉི་ཟླ་དང་
མཉམ་པར་གྱུར་པ་ལ་ཀླུ་སྒྲུབ་ཀྱིས་སྔགས་ཀྱི་བསྟན་པ་ཐམས་ཅད་གཏད་པ་ལྟར་མཛད་ནས་འགྲོ་དོན་བསྐྱངས་པ་དང་། །གྲུབ་ཐོབ་ཤྲིངྒ་བ་དང་། ཤ་བ་རི་པ་སོགས་ཀྱང་བྱུང་ཞིང་འགྲོ་དོན་མཛད་དོ། །དེས་ན་མདའ་བསྣུན་ཞབས་ནས་བཟུང་འདི་དག་གི་བར་དུ་ཉེ་
བར་གདམས་པའི་གསང་སྔགས་ནི། གཙོ་བོར་གསང་འདུས་པ། འཁོར་ལོ་སྡོམ་པ། །གདན་བཞི། སངས་རྒྱས་ཐོད་པ་སོགས་ཡིན་པར་མངོན་ནོ། །སྐབས་འདིར། རྒྱ་ནག་ཏུ་འཁྲུངས་པའི་གཤིན་རྗེ་གཤེད་དང་། རྟ་མགྲིན་གྱི་གྲུབ་ཐོབ་
เล่ม ๑๐๓ · หน้า 79b
སློབ་དཔོན་རྟ་མཆོག་ཏུ་གྲགས་པའང་བྱོན་ཏེ། དེས་ཨཽ་རྒྱན་ནས་འཇམ་དཔལ་རྩ་བའི་རྒྱུད་སྒྱུ་འཕྲུལ་དྲ་བ་ཁྲི་དྲུག་སྟོང་པ་སོགས་སྤྱན་དྲངས། གྲུབ་པའི་དབང་ཕྱུག་ལུ་ཡི་པའང་འདི་སྐབས་བྱུང་སྟེ། དེ་ནི་བྲམ་ཟེ་ཆེན་པོས་འཁོར་ལོ་སྡོམ་པའི་དཀྱིལ་འཁོར་དུ་དབང་
བསྐུར་རྒྱུད་གཏད་པས་འཁོར་ལོ་སྡོམ་པ་གཙོ་བོར་གྱུར་པའི་མ་རྒྱུད་ཀྱི་བསྟན་པའི་བདག་པོ་ལྟ་བུར་གྱུར། ཨོ་ཌི་བི་ཤའི་ཡུལ་དུ་རྒྱལ་པོ་བི་མ་ལ་ཙནྡྲ་འཁོར་བཅས་བཏུལ་ནས་བདེ་མཆོག་གི་དབང་བསྐུར་གདམས་ངག་ཕོག་པ་ས་ལོ་བཅུ་གཉིས་སུ་རྟོགས་པ་བསྐྱངས་ཏེ།
གྲུབ་པ་ཐོབ་པ་རྒྱལ་པོ་དཱ་རི་ཀ་པ། བློན་པོ་ཌཾ་གི་པ། སྨད་འཚོང་མ་སུ་ཁ་དྷ་རི་སོགས་ཡིན་ཞིང་། གཞན་ཡང་ཡུལ་དེར་བུད་མེད་སྟོང་ཕྲག་བཅུ་བཞི་ལ་སོགས་པ་སྐྱེ་བོའི་ཚོགས་ཐམས་ཅད་གྲོལ་ལོ་ཞེས་གྲགས་སོ། སློབ་དཔོན་འདི་དག་གིས་མཛད་པའི་སྔགས་
ཀྱི་བསྟན་བཅོས་དང་རྡོ་རྗེའི་གླུ་ལ་སོགས་པའང་ཡོང་དེ། །སློབ་དཔོན་ཐོགས་མེད་སོགས་རྒྱན་དྲུག་གཞན་དག་ཀྱང་སྔགས་ཀྱི་དངོས་གྲུབ་ཆེན་པོ་ས་བརྙེས་པ་ཤ་སྟག་ཡིན་མོད་ཀྱི་ཡོངས་གྲགས་སུ་རྐང་ཚུགས་པའི་སྔགས་ཀྱི་བསྟན་པ་འདི་ལྟ་བུ་ཞིག་གསལ་བར་བྱས་སོ་ཞེས་པའི་
གཏམ་དེང་སང་ནི་མི་སྣང་ངོ༌། །སློབ་དཔོན་ཟླ་བ་གྲགས་པས་མ་ནུ་གྷོ་གའི་རིར་སྔགས་ཀྱི་དངོས་གྲུབ་བརྙེས་པས་ཟག་མེད་ཀྱི་སྐུར་གྱུར། འདུས་པའི་རྒྱན་གྱི་འགྲེལ་པ་སོགས་བརྩམས་ཏེ་ཕ་རྒྱུད་ཀྱི་བསྟན་པ་སྤེལ་བར་མཛད། དེ་འོག་ན་ལེནྡྲའི་མཁན་པོ་རྒྱལ་བའི་ལྷའི་
སློབ་མ་བི་རཱུ་པ་བྱུང་སྟེ་སློབ་དཔོན་ཀླུའི་བྱང་ཆུབ་ལ་གཤིན་རྗེ་གཤེད་ཀྱི་དབང་དང་གདམས་ངག་ཞུས་ཏེ་བསྒོམས་པས་གྲུབ། བདག་མེད་ལྷ་མོ་བཅོ་ལྔའི་དཀྱིལ་འཁོར་དངོས་སུ་བྱོན་ནས་དབང་བསྐུར་བས་རིམ་གྱིས་ས་དྲུག་པ་བརྙེས། ཝཱ་རཱ་ཎ་སཱིའི་མུ་སྟེགས་ཀྱི་རྒྱལ་པོ་
སོགས་མུ་སྟེགས་བྱེད་མང་པོ་རྫུ་འཕྲུལ་གྱིས་བཏུལ། ཨཽཌྱན་ནས་གཤིན་རྗེ་གཤེད་དམར་པོའི་རྒྱུད་སྤྱན་དྲངས། དེའི་སྒྲུབ་ཐབས་སོགས་བརྩམས་ཏེ་འགྲོ་དོན་དང་བསྟན་པ་ལ་བྱ་བ་བླ་ལྷག་ཏུ་མཛད་ནས་སྤྱོད་པ་ལ་གཤེགས། ཁྱད་པར་དུས་འདི་ཙམ་གྱི་སྔ་ཕྱི་ཅི་རིགས་པར་གྲུབ་པའི་
เล่ม ๑๐๓ · หน้า 80a
སློབ་དཔོན་ཆེན་པོ་མང་དུ་བྱོན་པ་ལས། །སློབ་དཔོན་ས་རོ་རུ་ཧ་སྟེ་མཚོ་སྐྱེས་ནི་ཀུ་ཀུ་ར་ཛ་ར་ཡང་གྲགས་ཤིང་ཁྱིའི་རྣམ་པ་ཅན་ཀྱི་དཔའ་བོ་དང་རྣལ་འབྱོར་མ་མང་པོ་དང་ལྷན་ཅིག་ཚོགས་ཀྱི་འཁོར་ལོ་སོགས་དམ་ཚིག་གི་སྤྱོད་པ་མཛད་པ་ཟླ་གསང་ཐིག་ལེའི་རྒྱུད་
ལ་བརྟེན་ནས་གྲུབ་པ་ཐོབ་པ་དེས་ཨོ་རྒྱུན་ནས་དགྱེས་པ་རྡོ་རྗེའི་རྒྱུད་སྤྱན་དྲངས། སྒྲུབ་ཐབས་སོགས་བསྟན་བཅོས་ཀྱང་མཛད། ནང་རྒྱུད་སྡེ་ལྔ་དང་། རྣལ་འབྱོར་རྒྱུད་རྒྱ་ཆེར་བཤད་ཅིང་སྔགས་ཀྱི་བསྟན་པ་རྒྱས་པར་མཛད། །སློབ་དཔོན་ལ་ལི་ཏ་བཛྲ་ནི་རྡོ་རྗེ་རོ་
ལངས་མས་ཞལ་མངོན་སུམ་དུ་བསྟན་ནས་གཤིན་རྗེ་གཤེད་ཀྱི་དཀྱིལ་འཁོར་དུ་དབང་བསྐུར། མན་ངག་བསྒོམས་པས་དྲོད་ཐོབ། རིག་པ་བརྟུལ་ཞུགས་ཀྱི་སྤྱོད་པ་མཛད། ཨོ་ཌྱན་གྱི་ཡུལ་དུ་སྔར་མཚོ་ཡོད་པ་དེ་བསྐམས་ནས་དེའི་ཤུལ་དུ་དྷརྨ་གཉྫ་སྟེ་སྔགས་ཀྱི་རྒྱུད་
ཐམས་ཅད་བཞུགས་པའི་ཕོ་བྲང་ལ་རིག་པ་འཛིན་པའི་དཔའ་བོ་དང་རྣལ་འབྱོར་མ་དུ་མ་གནས་པའི་གྲོང་ཁྱེར་གྱིས་བསྐོར་བ་ཡོད་པ་དེར་བྱོན་ཏེ། སྐུ་གསུང་ཐུགས་ཀྱི་གཤིན་རྗེ་གཤེད་ནག་པོའི་རྒྱུད། སྡོམ་པ་གསུམ་པ། རྟོག་བདུན་སོགས་མང་པོ་ཐུགས་ལ་
བཟུང་ནས་བྱོན། འཕགས་པའི་ཡུལ་སོགས་སུ་དེ་དག་གསལ་བར་མཛད། མངོན་སྤྱོད་ཀྱི་ཕྲིན་ལས་ཀྱིས་བསྟན་ལ་སྡང་བའི་མུ་སྟེགས་དང་ཏ་ཟིག་སོགས་མང་པོ་ཚར་བཅད་ནས་བསྟན་པ་བསྐྱུངས་སོ། དེའི་སློབ་མ་ལཱི་ལ་བཛྲ་གྱིས་ཀྱང་བསྟན་པ་དེའི་རྒྱུན་
བསྐྱངས་ཤིང་། བི་རཱུ་པའི་སློབ་མ་ཀོ་མཁན་ལས་གྲུབ་པ་བརྙེས་པ་ཌ་བྷི་པས་ཀྱང་ཤར་ཕྱོགས་རྒྱལ་པོ་སེ་ན་ར་བཏུལ། ཡུལ་ཁམས་དེའི་མི་ཕྱུགས་ཐམས་ཅད་གྲོལ་ནས་མཁའ་སྤྱོད་གྲུབ། ཨོ་ཌུན་ནས་ཀུ་རུ་ཀུ་ལླེའི་རྟོག་པ་དང་། ཨཱ་ར་ལླིའི་རྒྱུད་གཉིས་
སྤྱན་དྲངས། མངོན་ཤེས་ཀྱིས་རྒྱུད་དོན་གཟིགས་པའི་ཕྱིར་ཡེ་ཤེས་མཁའ་འགྲོ་མ་རྣམས་དང་བཀའ་བགྲོས་ནས། དགྱེས་པ་རྡོ་རྗེའི་རྒྱུད་ཀྱི་སྙིང་པོ་བླངས་ཏེ་བདག་མེད་མའི་སྒྲུབ་ཐབས་དང་། ལྷན་ཅིག་སྐྱེས་སྒྲུབ་སོགས་བསྟན་བཅོས་ཀྱང་མང་དུ་མཛད། ཌོ་བྷི་
เล่ม ๑๐๓ · หน้า 80b
ཧེ་རུ་ཀས་ཨོ་རྱན་གྱི་ཡུལ་དུ་ཆང་འཚོང་མ་བི་ནས་བཏུལ་ནས། དེས་ལ་བ་པ་ལ་དབང་བསྐུར་ཅིང་རྒྱུད་མཐའ་དག་གཏད། ལོ་བཅུ་གཉིས་མན་ལ་འོད་གསལ་དུ་ལོག་པས་མཆོག་གྲུབ། ཨོ་ཌྱན་ནས་དགྱེས་པ་རྡོ་རྗེའི་རྒྱུད་སྤྱན་དྲངས། སཱ་སཾ་བེ་ད་པྲ་ཀྲྀ་ཏ་
ཞེས་བྱ་བ་རྫོགས་རིམ་གཙོ་བོར་སྟོན་པ་སོགས་བསྟན་བཅོས་མང་དུ་བརྩམས། ཨཽ་ཌྱན་གྱི་རྒྱལ་པོ་ཨིནྡྲ་བུ་དྷི་བར་པ་དད་པར་བྱས་ཏེ་མཆོག་གི་གྲུབ་པ་ལ་བཀོད་དོ། །སློབ་དཔོན་ལ་བ་པ་དང་། ལ་ལི་ཏ་བཛྲ་གཉིས་ཀྱིས་ཨིནྡྲ་བུ་དྷི་བར་པ་དེ་ཐུན་མོང་གི་གྲུབ་
པ་ཙམ་ཞིག་ཐོབ་པའི་སྐབས་སུ་དེར་བྱོན་ནས་རྫུ་འཕྲུལ་བསྟན་པས་རྒྱལ་པོའི་ང་རྒྱལ་བཅག །སློབ་དཔོན་གཉིས་རང་ལམ་གར་རྫུ་འཕྲུལ་འགྲན་པས་ལ་ལི་ཏས་ལ་བ་པ་ལ་ཕྱག་བྱས་པའི་གཏམ་རྒྱུད་ཀྱང་ཡོད་དོ། །ཤེས་ཕྱིན་ཚུལ་བརྒྱ་ལྔ་བཅུ་བའི་འགྲེལ་པ་
ལས་འབྱུང་བའི་ཟ་ཧོར་གྱི་ཡུལ་དུ་སངས་རྒྱས་མཉམ་སྦྱོར་ལ་སོགས་པའི་རྒྱུད་སྡེ་བཅྭོ་བརྒྱད་བྱོན་པ་ཡུལ་དེའི་རྒྱལ་པོ་ཨིནྡྲ་བུ་དྷི་ལ་སློབ་དཔོན་ཀུ་ཀུ་རཱ་ཛས་བཀྲོལ་ཏེ་བཤད་ཅིང་རྒྱལ་པོ་འཁོར་བཅས་ཀྱིས་རྡོ་རྗེ་དབྱིངས་ཀྱི་ས་དཀྱིལ་འཁོར་ལྟར་བྱས་ནས་བསྒོམས་པས་ཐམས་
ཅད་ཀྱིས་མཆོག་གྲུབ་པ་དང་། དེའི་སྲས་ཤཱཀྱ་པྲ་བུ་དྷི་འཁོར་བཅས་ཀྱིས་ཀྱང་དེ་བཞིན་དུ་བསྒོམས་པས་གྲུབ་པ་དང་། དེའི་སྲས་མོ་གོ་མ་དེ་བཱི་འཁོར་བཅས་ཀྱང་གྲུབ་པ་ཐོབ་པ་སོགས་ཀྱི་ཡོ་གའི་ལོ་རྒྱུས་འདི་ནི། བོད་འགའ་ཞིག་གིས་བཅོམ་ལྡན་འདས་
བཞུགས་དུས་ཀྱི་ཨིནྡྲ་བྷཱུ་ཏི་དེའི་དུས་སུ་འཆད་པ་དང་། འགའ་ཞིག་གིས་རབ་གསལ་ཟླ་བ་དང་སྦྱར་བ་དང་། འགའ་ཞིག་གིས་ཨིནྡ་བུ་དྷི་བར་པ་འདི་དང་སྦྱར་བ་སོགས་སྣང་ཡང་། །སྤྱིར་ཨཽ་ཌྱན་གྱི་ཡུལ་དུ་རྒྱལ་པོ་ཨིནྡྲ་བུ་དྷིའི་མཚན་ཅན་མང་པོ་
ཞིག་བྱོན་པར་བཤད་པ་མཐོང་ཡང་གོང་གི་ཀུ་ཀུ་རཱ་ཛ་དེ་ཨོ་རྒྱུན་དུ་བྱོན་པ་དེའི་དུས་ཀྱི་གཏམ་ཡིན་པར་སྣང་ངོ༌། །ལྷན་ཅིག་སྐྱེས་གྲུབ་ཅིག་ཤོས་ཀྱི་གཞུང་རྩོམ་མཁན་གྱི་ཨིནྡྲ་བུ་དྷི་དེ་ནི་ཨིནྡྲ་བུདྷི་བར་པའི་རྗེས་སུ་བྱུང་བས་དབང་པོའི་བློ་ཆུང་བར་གྲགས་པ་སྟེ་ཕྱིས་
เล่ม ๑๐๓ · หน้า 81a
རབ་ཏུ་བྱུང་ནས་གྲུབ་པ་བརྙེས་པའི་ཚེ་ལ་བ་པར་ཡང་གྲགས་སོ། །དེའང་ལྷན་ཅིག་སྐྱེས་གྲུབ་ཀྱི་འགྲེལ་པ་ལས། སྔོན་ཚེ་ཨཽ་ཌྱན་དུ་ལག་ན་རྡོ་རྗེའི་སྤྲུལ་པ་དྲང་སྲོང་འགྲོ་བ་དབུགས་འབྱིན་གྱིས་རྒྱལ་པོའི་བུ་མོ་རོལ་པ་མོ་འཁོར་བུ་མོ་ལྔ་བརྒྱ་དང་བཅས་
པ་རྗེས་སུ་བཟུང་། རོལ་མོས་ཨཽ་ཌྱན་གྱི་རྒྱལ་པོ་དཔའ་བོ་རྡོ་རྗེ་རྗེས་སུ་བཟུང་། དེས་མདུན་ན་འདོན་དམ་ཚིག་རྡོ་རྗེ། །དེས་ཞིང་པ་པདྨའི་རྡོ་རྗེ། དེས་ཆང་འཚོང་མ་ལྷན་ཅིག་སྐྱེས་པའི་རྡོ་རྗེ། དེས་ཐ་ག་པ་དགའ་བའི་རྡོ་རྗེ། དེས་བྲམ་ཟེ་མོ་རྡོ་རྗེ། དེས་
འབྲེག་མཁན་གྲུབ་པའི་རྡོ་རྗེ། དེས་དཔལ་ཀུན་འགྲོའི་མགོན་པོ། དེས་ཐུགས་ཀྱི་རྡོ་རྗེ། དེས་ལྕམ་ལཀྵྒི། དེས་རྒྱལ་པོ་ཨིནྡྲ་བུ་རྙི་གྲོལ་བར་མཛད་དེ། དེས་དུར་ཁྲོད་དུ་བསྒོམས་པའི་ཚེ། བཙུན་མོ་སྔགས་འཆང་མ་རྣམས་ཀྱིས་བགམ་པའི་ཚེ་ལ་བར་སྣང་
བས་མཚན་དེ་ལྟར་གྲགས་སོ་ཞེས་བྱུང་ངོ༌། གྲུབ་ཆེན་དཱ་རི་ཀ་པས་འཁོར་ལོ་སྡོམ་པའི་དཀྱིལ་འཁོར་དུ་དབང་བསྐུར་ཅིང་རྒྱུད་བསྟན་པའི་གྲུབ་པའི་དབང་ཕྱུག་ཆེན་པོ་རྡོ་རྗེ་དྲིལ་བུ་པས་ཨོ་ཌི་བི་ཤའི་རྒྱལ་པོ་རྫུ་འཕྲུལ་སྤྱི་གྱིས་བཏུལ། འཁོར་ལོ་སྡོམ་པའི་ཕྱི་དཀྱིལ་དང་།
ལུས་དཀྱིལ་རིམ་པ་ལྔ་བ་སོགས་མཛད། དེས་རུས་སྦལ་ཞབས། དེས་ཛ་ལནྡྷ་རི་པ། དེས་ནག་པོ་པ་སོགས་རིམ་བཞིན་གྲུབ་པའི་གནས་སུ་བཀོད་ཅིང་ཐམས་ཅད་ཀྱིས་རྡོ་རྗེ་ཐེག་པའི་བསྟན་པ་སྤྱི་དང་བྱེ་བྲག་ཏུ་བདེ་མཆོག་སྐོར་གྱི་སྒྲུབ་པའི་རྒྱུན་མཆོག་ཏུ་གསལ་བར་མཛད་
དོ། །ཁྱད་པར་ནག་པོ་ཞབས་ཀྱིས་ཡི་དམ་གྱིས་ལུང་བསྟན་པ་ལྟར་ནག་པོ་གཞུང་དྲུག་ཏུ་གྲགས་པ་འདི་བརྩམས་ཏེ་སྐུ་དྲིན་མཆོག་ཏུ་ཆེའོ། །དེའི་འོག་ཏུ་རྒྱ་གར་ཤར་ཕྱོགས་ཀྱི་ཡུལ་བྷཾ་ག་ལར་ཙནྡྲའི་རིགས་ཀྱི་རྒྱལ་ཕྲན་པྲ་ཀཱ་ཤ་ཙནྡྲར་གྲགས་པ་དེ་ལག་ན་རྡོ་རྗེས་དངོས་སུ་
བྱིན་གྱིས་བརླབས་པས་གྲུབ་པ་ཐོབ་པར་གྱུར་ཏེ་རྣལ་འབྱོར་རྒྱུད་རྒྱ་ཆེར་བཤད་དོ། །འདི་ནི་ཡོ་ག་པ་རྣམས་ཀྱིས་སྡོམ་པའི་རྒྱུད་ཕྱི་མ་ཞེས་བྱ་བ་ལས་རྒྱལ་པོ་ཙ་ཞེས་བྱ་བ་ཞིག་འབྱུང་བར་ལུང་བསྟན་ཏོ་ཞེས་ཟེར་བ་དེ་ཡིན་པ་སྙམ་ཡང་ལུང་འདྲེན་གྱི་ཚིགས་བཅད་དེ་ལས་འབྱུང་བའི་
เล่ม ๑๐๓ · หน้า 81b
དུས་དང་ནི་མི་འབྱོར་པར་སྣང་ངོ༌། །དེའི་འོག་ཏུ་བི་རཱུ་པ་ཆུང་བ་བྱོན་ཏེ། ནུབ་ཕྱོགས་ཀཙྪའི་ཡུལ་གྱི་རྒྱལ་པོ་བི་དྷ་རཊྚ་ཞེས་པའི་ལྷ་ཁང་རབ་གནས་ལ་སྤྱན་དྲངས་པའི་ཚེ་སྔགས་སྤྱོད་ངོ་མཚར་བས་ཕྱི་རོལ་པར་མོས་པ་པའི་བློན་པོ་སོགས་དད་པར་བྱས། བསམ་མི་ཁྱབ་
མཛད་མཁན་གྱི་ཏོག་ཙེ་བ་ཆེ་བའང་འདི་དུས་བྱུང་བར་སྣང་ངོ༌། །གཞན་ཡང་འདི་སྐབས་སུ་གྲུབ་པ་ཐོབ་པའི་རྣལ་འབྱོར་པ་བསམ་གྱིས་མི་ཁྱབ་པ་བྱོན་ཞིང་། རེ་རེས་འགྲོ་བ་སྨིན་གྲོལ་དུ་བཀོད་པའི་གྲངས་ཀྱང་གཞལ་བར་མི་ནུས་པ་ཡིན་ན། ཐམས་ཅད་ཀྱི་ཕྲིན་
ལས་ལ་ནི་སུ་ཞིག་གིས་གཞལ་བར་ནུས། དེ་ནས་རྒྱལ་པོ་དེ་ཝ་པཱ་ལའི་རིང་ལ་ནག་པོ་སྤྱོད་པ་ཆུང་བ་བྱོན་ཏེ། དེ་ནི་ནག་པོ་པས་བྱིན་གྱིས་བརླབས་པ་བདེ་མཆོག་ལ་བརྟེན་ནས་དངོས་གྲུབ་བརྙེས་ཤིང་སྡོམ་པ་བཤད་པ་ལ་སོགས་པའི་བསྟན་བཅོས་མཛད། གཞན་
ཡང་ཤཱཀྱ་བཤེས་གཉེན་དང་། རྡོ་རྗེ་མཚོན་ཆ་དང་། འཇམ་དཔལ་གྲགས་པ་དང་། བཛྲ་དེ་ཝ་སོགས་བྱོན་ཏེ། སྔགས་ལམ་གསལ་བར་མཛད་ཅིང་། ཁྱད་པར་ཤཱཀྱ་བཤེས་གཉེན་གྱིས་ཡོ་ག་དེ་ཉིད་བསྡུས་པའི་འགྲེལ་པ་ཀོ་ས་ལའི་རྒྱན་སོགས་
མཛད་པས་རྣལ་འབྱོར་རྒྱུད་ལ་ཕྱག་རྗེས་ཆེ། འཇམ་དཔལ་གྲགས་པའང་མཚན་བརྗོད་རྣལ་འབྱོར་རྒྱུད་དུ་བཀྲལ་བའི་འགྲེལ་ཆེན་མཛད་པ་པོ་སྟེ། ཆོས་དབྱིངས་གསུང་དབང་གི་དཀྱིལ་འཁོར་མངོན་སུམ་དུ་གཟིགས་ནས་དངོས་གྲུབ་བརྙེས་པ་ཞིག་གོ། །དེ་ནས་
ཨོ་ཌི་ཡ་ནའི་སློབ་དཔོན་སྒེག་པའི་རྡོ་རྗེ་བྱོན་ཏེ། ན་ལེནྡྲར་གསང་སྔགས་ཀྱི་བསྟན་པ་རྒྱ་ཆེར་སྤེལ། མཚན་བརྗོད་འགྲེལ་པ་སོགས་བསྟན་བཅོས་མང་པོ་བརྩམས། ཨོ་རྔུན་དུའང་འགྲོ་དོན་དཔག་མེད་མཛད་ནས་མཐར་འཇའ་ལུས་སུ་གཤེགས་སོ། །འདི་
སྐབས་གདོལ་པའི་བུ་ཞིག་གིས་དག་སྣང་དུ་ཨཱརྱ་དེ་ཝ་མཇལ་ཏེ་བྱིན་གྱིས་བརླབས་པས་ཆོས་གཏོལ་ཤེས་སུ་བྱུང་། བསྒོམས་པས་གྲུབ་པ་ཐོབ། ཀླུ་སྒྲུབ་ཡབ་སྲས་ཀྱི་སྔགས་གཞུང་མཐའ་དག་སྐལ་བ་ལྟ་བུར་རྙེད་ནས་ཅི་རིགས་པར་བཤད་པས་བསྟན་པ་སྤེལ་ལོ། །
เล่ม ๑๐๓ · หน้า 82a
ཡང་ཀོངྐ་ནའི་སློབ་དཔོན་སྲུང་བའི་ཞབས་ཀྱིས་ཟླ་གྲོགས་དང་མཇལ་ནས་སྒྲོན་གསལ་གྱི་གླེགས་བམ་ཡང་རྙེད་དོ། །ཡང་པཎྜི་ཏ་སྒྲ་ཅན་འཛིན་གྱིས་ཀླུའི་བྱང་ཆུབ་དང་མཇལ་ཏེ་ཀླུ་སྒྲུབ་ཡབ་སྲས་ཀྱི་སྔགས་ཀྱི་མན་ངག་ཐམས་ཅད་ནོས་པར་ཡང་གྲགས་
ཏེ། མདོར་ན་འདི་དུས་ཙམ་ནས་འདུས་པ་འཕགས་སྐོར་ཐོག་མར་དར་བ་ཡིན་ནོ། །དེ་འོག་རྒྱལ་པོ་དྷརྨ་པཱ་ལའི་ཚེ་ཤར་ཕྱོགས་བྷངྒ་ལའི་ཡུལ་དུ་གྲུབ་ཆེན་ཀུ་ཀུ་རཱི་པ་བྱུང་སྟེ། འདིས་ཨོ་སྐྲུན་ནས་མ་ཧཱ་མཱ་ཡཱའི་རྒྱུད་སྤྱན་དྲངས་ནས་ཀུ་ཀུ་རི་པའི་ཆོས་བདུན་དུ་གྲགས་པ་
ལས་དྲུག་མཛད། །སེང་གེ་བཟང་པོའི་སློབ་མ་སངས་རྒྱས་ཡེ་ཤེས་ཞབས་ཀྱིས་ཨཽ་ཌྱན་དུ་བྱོན་ནས། ལ་ཀྵྨཱི་ཆེན་མོ་མཉེས་པར་བྱས། གཞན་ཡང་སྲུང་བའི་ཞབས་དང་འཇམ་དཔལ་བཤེས་གཉེན་སོགས་ལས་གསང་བ་འདུས་པའི་དབང་རྒྱུད་མན་ངག་དང་བཅས་པ་
ནོས་ནས་བསྒོམས་པས་ཀྱང་གྲུབ་སྟེ། བི་ཀྲ་མ་ལ་ཤི་ལར་སྔགས་ཀྱི་རྡོ་རྗེ་སློབ་དཔོན་ཆེན་པོ་མཛད་དེ་ཀྲི་ཡོ་ག་སྡེ་གསུམ་དང་། ནང་རྒྱུད་སྡེ་ལྔ་སྟེ། འདུས་པ། སྒྱུ་འཕྲུལ་དྲ་བ། སངས་རྒྱས་མཉམ་སྦྱོར། ཟླ་གསང་ཐིག་ལེ། འཇམ་དཔལ་ཁྲོས་པ་
རྣམས་དང་། ཁྱད་པར་གསང་བ་འདུས་པའི་རྒྱུད་གཙོ་བོར་བཤད་པས་རྡོ་རྗེ་ཐེག་པའི་བསྟན་པ་རྒྱ་ཆེར་རྒྱས་པར་མཛད། སྒྲུབ་ཐབས་ཀུན་བཟང་ལ་སོགས་པའི་གཞུང་བཅུ་བཞི་དང་། གཞན་ཡང་གཞུང་མང་པོ་བརྩམས་སོ། །སློབ་མ་ཤིན་ཏུ་མང་ཡང་
གཙོ་བོ་མཆོག་བཅོ་བརྒྱད་བྱུང་ཞིང་དེ་ལས་ཀྱང་མར་མེ་མཛད་བཟང་པོ། རབ་ཞི་བཤེས་གཉེན། སྒྲ་གཅན་འཛིན་བཟང་པོ། རྡོ་རྗེ་བདེ་བ་ཆེན་པོ་སྟེ་བཞིས་རིག་པ་འཛིན་པའི་གནས་གྲུབ་པར་གྲགས་སོ། །དེ་ལས་རབ་ཞི་བཤེས་གཉེན་གྱིས་གནོད་སྦྱིན་བཀོལ་ནས་
ན་ལནྡའི་ལྷོ་ཕྱོགས་སུ་བདུད་རྩི་འབྱུང་བའི་གཙུག་ལག་ཁང་བཞེངས། རྒྱལ་རིགས་སྒྲ་གཅན་འཛིན་བཟང་པོས་འགྲོ་ལྡིང་གི་ཡུལ་དུ་གསང་སྔགས་ཀྱི་རྒྱུད་སྡེ་མང་པོ་དར་བར་མཛད། དེར་ཀླུ་ལས་ནོར་བླངས་ཏེ་གསང་བ་འདུས་པའི་ལྷ་ཁང་ཆེན་པོ་བཞེངས། ཀླུ་རྣམས་
เล่ม ๑๐๓ · หน้า 82b
འདུལ་བའི་ཕྱིར་ཀླུའི་གནས་སུ་གཤེགས་ཏེ་ད་ལྟའང་བཞུགས་པར་གྲགས། ཡང་ཡེ་ཤེས་ཞབས་ཀྱི་སློབ་མ་སངས་རྒྱས་གསང་བ་དང་། སངས་རྒྱས་ཞི་བ་གཉིས་ནི་རྡོ་རྗེ་འཛིན་པ་གཞན་དག་ལས་ཀྱང་གསང་སྔགས་མང་དུ་གསན་པས། །སྔགས་སྤྱི་དང་། ཁྱད་
པར་བྱ་སྤྱོད་རྣལ་འབྱོར་གསུམ་ལ་མཁས་ཤིང་། གྲུབ་པ་ཐོབ་པ་ཡིན། ཁྱད་པར་སངས་རྒྱས་གསང་བས། ཀྲི་ཡོ་ག་སྡེ་གསུམ་གྱི་བསྟན་པ་རྒྱས་པར་མཛད་ཅིང་། རྣམ་སྣང་མངོན་བྱང་གི་བསྡུས་འགྲེལ། བསམ་གཏན་ཕྱི་མའི་རྒྱས་འགྲེལ། །
རྡོ་རྗེ་དབྱིངས་ཀྱི་སྒྲུབ་ཐབས་སོགས་བརྩམས། དེའི་འོག་ཏུ་མ་ག་དྷཱའི་སློབ་དཔོན་ཀུན་དགའ་སྙིང་པོ་བྱུང་སྟེ། གྷཾ་ག་ལ་ན་རབ་གསལ་ཟླ་བའི་སློབ་མ་རབ་འབྱོར་བསྐྱངས་སོགས་མང་པོ་ལ་གཏུགས་ནས། རྣལ་འབྱོར་རྒྱུད་མཐའ་དག་ལ་མཁས་པར་མཛད། །
བསྒོམས་པས་རྡོ་རྗེ་དབྱིངས་ཀྱི་དཀྱིལ་འཁོར་གཟིགས་ཤིང་བསྟན་བཅོས་རྩོམ་པར་ལུང་བསྟན་ཐོབ། དཔལ་མཆོག་དང་པོ་དང་། དེ་ཉིད་བསྡུས་པ་སོགས་ཡོ་གའི་རྒྱུད་མང་པོ་ལ་འགྲེལ་པ་བརྩམས་ཤིང་བཤད། གཞན་ཡང་གསང་བ་འདུས་པ་སོགས་རྒྱུད་
མང་པོའི་འགྲེལ་པ་མཛད་དེ་སྔགས་སྤྱི་དང་ཁྱད་པར་ཡོ་གའི་སྲོལ་ཤིན་ཏུ་རྒྱ་ཆེན་པོར་ཕྱེས་སོ། སློབ་དཔོན་ཡེ་ཤེས་བྱིན་དང་ཡེ་ཤེས་གྲགས་པ་སོགས་ཀྱིས་ཀྱང་བསྟན་པ་ལ་བྱ་བ་མཛད་དོ། །འདི་ཙམ་ན་སིངྷ་ལར་ལངྐ་རྒྱལ་བ་བཟང་པོའང་བྱོན་ཏེ། འདིས་ལྷོ་
ཕྱོགས་ཀོངྐ་ནར་དཔལ་རེག་པ་མེད་པའི་མཆོད་རྟེན་ཡོད་པའི་སར། སྔགས་ཀྱི་ཐེག་པ་མང་དུ་བཤད། འཁོར་ལོ་སྡོམ་པའི་རྒྱུད་འགྲེལ་སོགས་བསྟན་བཅོས་མང་པོ་བརྩམས། བི་ཀྲ་མ་ལར་སྔགས་ཀྱི་སློབ་དཔོན་ཆེན་པོ་མཛད་དོ། །ཁྱད་པར་འདི་སྐབས་ཤར་
ཕྱོགས་ཛ་གོའི་ཡུལ་དུ་རྣལ་འབྱོར་གྱི་དབང་ཕྱུག་ཆེན་པོ་ཏི་ལླི་པ་བྱོན་ཏེ། དེས་ཙནྡྲ་པ་སོགས་བཀའ་བབས་བཞིའི་བླ་མ་བསྟེན། སྔགས་རྒྱུད་སྤྱི་དང་ཁྱད་པར་བླ་མེད་ཀྱི་སྐོར་ཡོད་དོ་ཅོག་གི་དབང་རྒྱུད་མན་ངག་ཐམས་ཅད་ཡོངས་སུ་རྫོགས་ནས་བྷངྒ་ལར་ལོ་བཅུ་གཉིས་སུ་ཏིལ་
เล่ม ๑๐๓ · หน้า 83a
བརྡུང་བའི་སྤྱོད་པ་སྤྱད་པས་མཆོག་གི་དངོས་གྲུབ་མངོན་དུ་མཛད། གཙོ་བོར་ལྷག་པའི་ལྷ་ཤྲཱི་ཧེ་རུ་ཀ་ཉིད་ལས་དངོས་སུ་རྡོ་རྗེ་ཐེག་པ་མཐའ་དག་གསན་ཅིང་གཞན་ལ་བསྟན་པས་བྷ་ག་ལའི་རྒྱལ་ཁམས་ཁོ་ན་ལན་གསུམ་དུ་སྟོངས་པར་གྲགས། མདོར་ན་
སྙིང་པོའི་ངེས་གསང་གི་བསྟན་པ་ཉིན་མོ་ལྟར་གསལ་བར་མཛད་དོ། །གཞན་ཡང་སྔོན་ཚེ་ཁ་ཆེའི་པཎྜི་ཏ་ཟབ་པའི་རྡོ་རྗེ་ཞེས་བྱ་བས་དུར་ཁྲོད་བསིལ་ཚལ་དུ་སངས་རྒྱས་མཉམ་སྦྱོར་གྱི་རྒྱུད་ལ་བརྟེན་ནས་རྡོ་རྗེ་ཉི་མ་སྒྲུབ་པའི་ཚེ་རྡོ་རྗེ་བདུད་རྩིའི་དཀྱིལ་འཁོར་གཟིགས་ནས་
ལུང་བསྟན་པ་བཞིན་ཨོ་རྒྱན་རྒྱུ་མ་རར་བྱོན་ཏེ། །དེར་མཁའ་འགྲོ་མ་ཞིག་གིས་བདུད་རྩི་བཞིའི་དཀྱིལ་འཁོར་དུ་དབང་བསྐུར། རྒྱུད་བཤད། གླེགས་བམ་གཏོད། ཧེ་རུ་ཀ་བསྒོམས་པས་མཆོག་གི་དངོས་གྲུབ་ཐོབ། ཕྱིས་མ་ལ་བར་སྐལ་ལྡན་གྱི་སྤྲང་པོ་
བརྒྱད་ལ་དབང་བསྐུར་བས་གྲུབ་པ་ཆེན་པོ་རེ་རེ་ཐོབ་པ་བྱུང་། ཁོ་ཡང་ཕྱི་ཞིག་ན་སློབ་དཔོན་བདུད་རྩི་གསང་བ་རྗེས་སུ་བཟུང་ནས་དབང་བསྐུར། རྒྱུད་བཤད། མན་ངག་བྱིན་ནས་ལྷ་ཡུལ་དུ་འགྲོ་དོན་ལ་གཤེགས། བདུད་རྩི་གསང་བས་ཀྱང་མཆོག་གྲུབ་སྟེ།
སློབ་དཔོན་ཀུན་སྙིང་སོགས་བྱོན་པའི་དུས་ཙམ་ལ་སློབ་དཔོན་བྷ་གོ་རྗེས་སུ་བཟུང་། དེས་རོ་ལངས་དང་གཏེར་གྱི་བུམ་པ་བསྒྲུབས་ཏེ་འགྲོ་དོན་མཛད། ཁྱད་པར་པྲ་ཀ་དང་ཉེ་བར་རིགས་ལྔའི་ལྷ་ཁང་ཆེན་པོ་དང་། ལྷོ་ཕྱོགས་ཀརྨ་ཊར་རྡོ་རྗེ་བདུད་རྩིའི་ལྷ་ཁང་ཆེན་པོ་
བཞེངས་ནས་པཎྜི་ཏ་དྲི་མེད་བཟང་པོ་སོགས་ལ་རྒྱུད་བཤད་པས་འཕགས་ཡུལ་སོགས་སུ་ལེགས་པར་དར་བ་ཡིན་ནོ། །རྒྱལ་པོ་དྷརྨ་པཱ་ལའི་རིང་ལ་བྲམ་ཟེའི་སློབ་དཔོན་དཔལ་འཛིན་བྱུང་ཞིང་། དེས་ཡེ་ཤེས་ཞབས་ཀྱི་སློབ་རྒྱུད་འགའ་རེ་བསྟེན་ནས་གསང་འདུས་
དང་། གཤིན་རྗེ་གཤེད་ཀྱི་སྐོར་ཐམས་ཅད་ཐུགས་སུ་ཆུད། བསྒོམས་པས་གྲུབ་པ་བརྙེས། ལྷོ་ཕྱོགས་ཀྱི་རྒྱུད་བེདརྦྤ་སོགས་སུ་ནུས་པ་བསྟན་པས་སངས་རྒྱས་པ་དར་བར་མཛད། །རྒྱལ་པོ་མ་ཧཱི་པཱ་ལའི་ཚེ་བི་ཀྲ་མའི་སྔགས་ཀྱི་སློབ་དཔོན་ཡང་མཛད་དོ། །
เล่ม ๑๐๓ · หน้า 83b
དེ་ནས་བྷ་ཝ་བྷ་ཊ་བྱོན་ཏེ་དེའང་རྒྱུད་སྡེ་ལྔ་བཅུ་ཙམ་མཁྱེན་པའི་མཁས་པ་ཆེན་པོར་གྲགས། དེ་ནས་སྐལ་ལྡན་གྲགས་པ་བྱོན་ཏེ་རྒྱུད་སྡེ་རྒྱ་མཚོའི་ཕ་རོལ་དུ་སོན། གཞན་ཡང་རིམ་པས་ལཱི་ལ་བཛྲ་དང་། མི་ཐུབ་ཟླ་བ་དང་། ཏ་ཐཱ་ག་ཏ་རཀྱི་ཏ་རྣམས་ཀྱང་བདེ་
མཆོག་དང་། གཤིན་རྗེ་གཤེད་སོགས་ཀྱི་སྒོ་ནས་གྲུབ་པ་བརྙེས་པའི་སྔགས་ཀྱི་སློབ་དཔོན་ཆེན་པོ་ཡིན་ཏེ་ཐམས་ཅད་ཀྱིས་བི་ཀྲ་མ་ལར་ཡང་བསྟན་པ་བསྐྱངས་སོ། །རྒྱལ་པོ་མ་ཧཱི་པཱ་ལའི་སྐུ་ཚེའི་སྨད་ཙམ་ལ་ཤར་ཕྱོགས་ཨོ་ཟི་སར་ཙི་ལུ་པའམ་པི་ཊོ་ཨཱ་ཙཱརྨ་ཆེ་བ་
བྱོན་ཏེ། མཁས་པ་ཆེན་པོར་གྱུར་པ་དེས་ན་ལནྡ་དང་བི་ཀྲ་མ་ལ་ཤཱི་ལ་དང་། རིན་ཆེན་རི་བོའི་གཙུག་ལག་ཁང་དུ་སྡེ་སྣོད་དང་རྒྱུད་ཀྱི་གླེགས་བམ་མཐའ་དག་གཟིགས་པའི་ཚེ། སྔགས་ཀྱི་སྦས་དོན་མཐར་ཐུག་འབྱེད་པ་ལ་བྱང་ཆུབ་སེམས་འགྲེལ་དགོས་པས། དེ་
ཤམྦྷ་ལ་ན་སྤྲུལ་པའི་རྒྱལ་པོས་སྟོན་པ་ཡོད་ཅེས་འདུག་པ་གཟིགས་པ་དང་། ལྷག་ལྷས་ཀྱང་བསྐུལ་ནས་ཤམྦྷ་ལར་བྱོན་པར་དགོངས་ཏེ་བྱོན་པའི་ལམ་ཁར་རིགས་ལྡན་གྱིས་སྤྲུལ་པའི་དགེ་སློང་གི་ཚུལ་དུ་བྱོན་ནས་བྱིན་གྱིས་བརླབས་ཤིང་། །དུས་ཀྱི་འཁོར་
ལོའི་དབང་རྒྱུད་འགྲེལ་མན་ངག་དང་བཅས་གནང་བ་མཐའ་དག་ཐུགས་ལའང་ཟིན་ནས་ཐུགས་ཚིམ་སྟེ་སླར་ལོག ཝརེནྡྲར་པི་ཌོ་བ་ཆུང་བ་རྗེས་སུ་བཟུང་ནས་དབང་རྒྱུད་སོགས་མཐའ་དག་གནང་། འདིས་དམག་གི་གནོད་པ་བྱུང་བའི་ཚེ་རྒྱུད་འགྲེལ་རྣམས་
སྦས་པ་ལས་ཕྱིས་རྩ་རྒྱུད་རྩ་འགྲེལ་མ་ཚང་བ་ཡིན་ནོ། །ཁྱད་པར་ཝ་རེནྡྲར་དུས་ཞབས་པ་ཆེན་པོར་གྲགས་པ་བྱོན་ཏེ། དེས་ཙི་ལུ་པ་ཆུང་བ་ལ་ཐུག །དེས་ཀྱང་ཐུགས་མ་ཚིམ་པར་ཤ་བྷ་ལར་བྱོན་པའི་ལམ་ཁར་རིགས་ལྡན་རྣམ་འཕྲུལ་ཞིག་དང་མཇལ་ཏེ།
དེས་དབང་བསྐུར། མན་ངག་བསྟན། བསྒོམས་པས་གྲུབ་སྟེ་ཤཾ་བྷ་ལ་ཉིད་དུ་བརྟོལ། རིགས་ལྡན་ཉིད་ལས་དབང་རྒྱུད་འགྲེལ་མན་ངག་དང་བཅས་པ་དངོས་སུ་ཐོབ། ཚུར་བྱོན་ནས་འཕགས་ཡུལ་དུ་སེམས་འགྲེལ་སྐོར་ཆེས་དར་བར་མཛད་དོ། །འདི་སྐབས་
เล่ม ๑๐๓ · หน้า 84a
སློབ་དཔོན་ཀ་མ་ལ་རཀྵི་ཏས་བི་ཀྲ་མ་ལའི་སྔགས་ཀྱི་སློབ་དཔོན་མཛད་དེ། གསང་བ་འདུས་པ་དང་གཤིན་རྗེ་གཤེད་ལ་མཁས། མངོན་སྤྱོད་ཀྱི་ལས་ཤིན་ཏུ་མང་བ་ཞིག་མཛད་པས་མཁའ་སྤྱོད་དུ་འབྱོན་རྒྱུ་ལ་ཅུང་ཟད་བསྒྲིབས་པར་གྲགས་
སོ། གཞན་ཡང་སློབ་དཔོན་པདྨ་ལྕགས་ཀྱུས་ཀྱང་ཡོ་གའི་བསྟན་པ་གསལ་བར་མཛད། རང་ཉིད་ཀྱི་ཡབ་བྲམ་ཟེ་སྙིང་པོའི་ཞབས་ལས་བདེ་དགྱེས་གསང་གསུམ་སོགས་གསན། འཇམ་དཔལ་དབྱངས་གྲུབ་
པས་རིག་པའི་གནས་ཐམས་ཅད་ལ་ཟླ་མེད་པའི་མཁས་པ་ཆེན་པོར་གྱུར། །བི་ཀྲ་མར་ཆོས་བཤད་ཅིང་མདོ་སྔགས་ཀྱི་བསྟན་བཅོས་བརྒྱ་རྩ་བརྒྱད་མཛད་པར་གྲགས། །སངས་རྒྱས་ཡེ་ཤེས་ཀྱི་བརྒྱུད་འཛིན་ནག་པོ་དམ་ཚིག་རྡོ་རྗེས་ཀྱང་སྔགས་གྲུབ་ནས་བསྟན་པའི་
བྱ་བ་མཛད། འདི་སྐབས་ཀྱི་སྔ་ཕྱི་ཅི་རིགས་པར་གྲུབ་ཆེན་ཐ་ག་ན་དང་བྲམ་ཟེ་ཡེ་ཤེས་ཞབས་ཀྱང་བྱུང་། རྒྱལ་པོ་ཙ་ན་ཀའི་རིང་ལ་བི་ཀྲ་མ་ལ་ཤཱི་ལའི་བྱང་སྒོ་སྲུང་བའི་པཎྜི་ཏ་ནཱ་རོ་པ་ནི་ཕྱི་ནང་གི་མཁས་པ་སུས་ཀྱང་རྩོད་པར་མི་ནུས་པས་རྩོད་མེད་དེ། དེས་
དཀའ་ཐུབ་ཆེན་པོས་གྲུབ་ཆེན་ཏི་ལླི་པ་མཉེས་པར་བགྱིས། གཞན་ཡང་དུས་འཁོར་ཞབས་སོགས་བླ་མ་མང་པོ་བསྟེན་ནས་རྒྱུད་སྡེ་རྒྱ་མཚོའི་དབང་ཕྱུག་ཏུ་གྱུར་ཏེ་གྲུབ་པ་བརྙེས། དབང་མདོར་བསྟན་དང་དགྱེས་རྡོར་གྱི་འགྲེལ་པ་སོགས་སྔགས་ཀྱི་
བསྟན་བཅོས་མང་པོ་བརྩམས། རྡོ་རྗེ་ཐེག་པ་ཉིན་མོ་ལྟར་གསལ་བར་མཛད་ནས་སྤྱོད་པ་ལ་གཤེགས་སོ། །ཤར་སྒོ་སྲུང་བ་རནྣ་ཀ་ར་ཤཱནྟི་ཡང་ནཱ་རོ་པ་ལས་དབང་རྒྱུད་མན་ངག་ཤིན་ཏུ་མང་པོས་ཡང་ཡང་དུ་ནོས། བསྒོམས་པས་གྲུབ་པ་བརྙེས། སྔགས་
གཞུང་མང་པོའང་མཛད་དེ་བསྟན་པའི་སྒྲོན་མེར་གྱུར་ཏོ། ནུབ་སྒོ་སྲུང་བ་ངག་དབང་གྲགས་པས་ཀྱང་འཁོར་ལོ་སྡོམ་པའི་རྒྱུད་ལ་བསྟེན་ནས་དངོས་གྲུབ་བརྙེས། བི་ཀྲ་མ་ལ་ཤཱི་ལར་ཚོགས་བདག་ལས་ནོར་བླངས་ཏེ། གསང་འདུས། བདེ་མཆོག །
เล่ม ๑๐๓ · หน้า 84b
དགྱེས་རྡོར། གདན་བཞི་རྣམས་ལ་མཆོད་པའི་ཆོས་གཞི་རེ་རེ་བཙུགས། ཕྱིས་བལ་པོར་ཕེབས་ཏེ་ཤཱནྟ་པུ་རིར་བདེ་མཆོག་གི་ལྷ་ཁང་བཞེངས། དེར་རབ་གནས་ཀྱི་མཇུག་ཏུ་འཁོར་ལོ་སྡོམ་པ་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་དུ་སྤྲུལ་པ་དེ་མ་བསྡུས་
པར་ད་ལྟ་འང་བཞུགས་པར་གྲགས་སོ། དབུས་ཀྱི་བྲམ་ཟེ་རིན་ཆེན་རྡོ་རྗེའང་འཁོར་ལོ་སྡོམ་པའི་སྒོ་ནས་གྲུབ་པ་བརྙེས་ཏེ་བི་ཀྲ་མ་ལར་གསང་སྔགས་ཀྱང་བཤད། ཁྱད་པར་ཁ་ཆེར་བྱོན་ཏེ་གསང་བ་འདུས་པ་འཆད་པའི་གྲྭ་བཙུགས་སོ། །ཕྱིས་ཨཽ་རྒྱན་
དུ་བྱོན་པའི་ཚེ། ཁ་ཆེའི་ཡུལ་གྱི་མུ་སྟེགས་བྱེད་མཁས་པ་ཞིག་ཁོང་རང་གི་ལྷས་བསྐུལ་ནས་ཨཽ་ཌྱན་དུ་ཕྱིན། དེ་དང་རྩོད་པས་སློབ་དཔོན་རྒྱལ་ནས་མུ་སྟེགས་དེ་ནང་པའི་ཆོས་སྒོར་ཞུགས། །སྔགས་ནོས་པས་གྲུབ་པ་ཐོབ། །མཚན་གུ་ཧྱ་པྲཛྙཱར་
གྲགས་ཏེ་བོད་དུ་བྱོན་པའི་ཨཱ་ཙཱརྱ་དམར་པོ་ཞེས་པ་དེའོ། །རིན་ཆེན་རྡོ་རྗེའི་སྲས་མ་ཧཱ་ཛ་ན། དེའི་སྲས་སཛྫྜནའོ། །དབུས་ཀྱི་ཀ་ཆེན་ཅིག་ཤོས་ཛྙཱ་ན་ཤྲཱི་མི་ཏྲའང་སྔགས་ཀྱི་རྣལ་འབྱོར་པ་ཆེན་པོ་སྟེ། མཐའ་གཉིས་སེལ་བ་སོགས་སྔགས་ཀྱི་
བསྟན་བཅོས་མང་པོ་མཛད་དོ། །དེ་ཙམ་ན་བྷཾ་ག་ལར་ཇོ་བོ་རྗེ་ཨ་ཏི་ཤའང་བྱོན་ཏེ། དེས་ནི་ནཱ་རོ་པ། ཌོཾ་བྷི་པ། ཤཱནྟི་པ། བ་ལིང་ཨཱ་ཙཱརྱ་སོགས་བླ་མ་མང་པོ་བསྟེན། གསང་སྔགས་ཀྱི་རྒྱུད་སྡེ་མཐའ་དག་ལ་མཁས་པར་གྱུར། མཐོང་
ལམ་གྱི་རྟོགས་པ་བརྙེས། སློབ་མ་རྡོ་རྗེ་འཛིན་པའང་མང་དུ་བྱུང་། མཻ་ཏྲཱི་པ་ནི་ནཱ་རོ་པའི་སློབ་མ་ཡིན་ལ་ཕྱིས་དཔལ་གྱི་རིར་གཤེགས་ཏེ་ཤ་བ་རི་པ་དང་མཇལ། དབང་བསྐུར། བྱིན་གྱིས་བརླབས། བདེ་དགྱེས་གསང་གསུམ། མཚན་བརྗོད།
རྙོག་མེད་སོགས་གསན། ཁྱད་པར་གྲུབ་སྙིང་ཨ་མ་ན་སིའི་སྐོར་ཡོངས་སུ་རྫོགས་པར་གསན་ནས་བསྒོམས་པས་གྲུབ་པ་བརྙེས། བི་ཀྲ་མ་ལ་སོགས་སུ་གསང་སྔགས་ཀྱི་བསྟན་པའང་སྐྱོང་བར་མཛད་དོ། །གཞན་ཡང་དེའི་འོག་ཏུ་ནཱ་རོ་པ་ལ་སོགས་
เล่ม ๑๐๓ · หน้า 85a
པའི་བླ་མ་བསྟེན་ནས་སྔགས་ཀྱི་དངོས་གྲུབ་བརྙེས་པར་གྱུར་པ་རྡོ་རྗེ་གདན་པ་ཆེན་པོ། ཨ་མོ་གྷ་བཛྲ། དེ་བ་ཨཱ་ཀ་ར་ཙནྡྲ། པྲཛྙཱ་ར་ཏ་སོགས་ཀྱིས་ཕྲིན་ལས་བསྐྱངས་ཤིང་། ཁྱད་པར་པྲཛྙཱ་རཀྵི་ཏས་ནི་ལོ་བཅུ་གཉིས་སུ་ནཱ་རོ་པ་བསྟེན།
བླ་མེད་ཀྱི་རྒྱུད་མང་དུ་གསན། ཁྱད་པར་མ་རྒྱུད་དང་ཡང་སྒོས་འཁོར་ལོ་བདེ་མཆོག་ལ་མཁས་པར་གྱུར། འགྲེལ་པ་ལུགས་བཞི་དང་། མན་ངག་མཐའ་ཡས་པ་ཐུགས་སུ་ཆུད། བདེ་མཆོག་རིགས་ཀྱི་དབང་བསྐུར་རང་ཡང་བདུན་ཅུ་ཙམ་མངའ་བར་
གྲགས། ལོ་ལྔར་བསྒྲུབས་པས་དངོས་གྲུབ་ཆེན་པོ་བརྙེས་ཏེ་སྡོམ་པའི་ཆོས་གཙོ་བོར་བཤད་པས་འགྲོ་དོན་དཔག་མེད་མཛད་དོ། །དཔལ་མཆོག་ཌོཾ་བྷི་པ་ནི་བ་ལང་རྫིའུ་ཞིག་ནཱ་རོ་པས་སྐལ་ལྡན་དུ་མཁྱེན་ནས། ཆང་ཐོད་ཕོར་གང་གནང་བ་ཙམ་
གྱིས་བྱིན་རླབས་ཞུགས་ཏེ་ཅིག་ཅར་དུ་ཆོས་ཐམས་ཅད་ཁོང་དུ་ཆུད་ནས་དངོས་གྲུབ་ཐོབ་སྟེ་འདིས་ཇོ་བོ་ཨ་ཏི་ཤའང་བྱིན་གྱིས་བརླབས་སོ། །ཀ་སོ་རི་པ་དང་། རི་རི་པ་དང་། ནི་རི་པ་རྣམས་ཀྱང་ནཱ་རོ་པས་རྗེས་སུ་བཟུང་ཞིང་སྡོམ་པ་ཡབ་ཡུམ་ལ་བརྟེན་ནས་
གྲུབ་པ་ཐོབ་པ་སྟེ། །ཚེ་འདི་དག་གིས་ཀྱང་སྙིང་པོའི་བསྟན་པ་ལ་བྱ་བ་ཆེར་མཛད་དོ། །སློབ་དཔོན་དཔེ་མེད་འཚོ་ཞེས་སྦྱོར་དྲུག་ལུགས་གཅིག་གི་ཁུངས་འདེད་ས་དེའང་འདི་སྐབས་བྱོན། ཁྱད་པར་ནཱ་རོ་པའི་ལྕམ་ནི་གུ་མ་ནི་སྔར་མིང་པོས་སྔགས་ལམ་དུ་སྨིན་
པར་བྱས་ཟིན་པ་ཞིག། ཕྱིས་བཛྲ་དྷ་རས་དངོས་སུ་རྗེས་བཟུང་ནས་མཆོག་གི་གྲུབ་པ་བརྙེས་པའོ། དེ་ནས་སློབ་དཔོན་ཆེན་པོ་བི་རཱུ་པ་དང་། ནཱ་རོ་པ་དང་། ལྕམ་ནི་གུ་མ་སྟེ། འདི་དག་ལས་བྱུང་བའི་ཆོས་དྲུག་ལུགས་གཉིས་པོ་
ལ་སོགས་པ་རྣམས་ནི། བླ་མེད་ཀྱི་རྒྱུད་སྡེ་ཐམས་ཅད་ཀྱི་ཟབ་མོའི་ཉམས་ལེན་གཙོ་ཆེ་བ་རྣམས་མདོར་བསྡུས་པ་ཡིན་གྱི་ཕྱོགས་གཅིག་ཏུ་ཆད་པའི་རྒྱུད་སྡེ་རེ་རེའི་ཉམས་ལེན་གྱི་སྲོལ་རྐང་ཚུགས་པ་ཞིག་ནི་མ་ཡིན་ནོ། །འདི་སྐབས་རྟོག་གེ་པ་ཡ་མཱ་
เล่ม ๑๐๓ · หน้า 85b
རིའང་བྱུང་སྟེ་ནོར་རྒྱུན་མའི་སྔགས་གྲུབ་པོ། །གཞན་ཡང་མི་ན་ཀ་ཤཱི། ཁ་ཆེ་བ་བྱང་ཆུབ་བཟང་པོ། སྒྲ་གཅན་འཛིན་བཤེས་གཉེན། རྒྱ་གར་དཱ་རེ་ཀ་བ། བལ་པོ་ཕང་སྟེང་པ་སྐུ་མཆེད། རྒྱ་གར་ཕྱག་ན་སོགས་ཀྱིས་ཀྱང་སྔགས་ཀྱི་བསྟན་པ་གསལ་
བར་མཛད་དོ། །དེ་འོག་ཨ་བྷ་ཨཱ་ཀ་ར་གུསྟེ་རྒྱུད་སྡེ་རྒྱ་མཚོའི་དབང་ཕྱུག་ཏུ་གྱུར་ཏེ། རྡོ་རྗེ་རྣལ་འབྱོར་མས་བྱིན་གྱིས་བརླབས། སཾ་པུ་ཊའི་འགྲེལ་པ་མན་སྙེ་དང་། དཀྱིལ་ཆོག་རྡོ་རྗེ་ཕྲེང་བ་སོགས་གསང་སྔགས་ཀྱི་བསྟན་བཅོས་ཀྱང་ཟབ་ཅིང་རྒྱ་ཆེ་
བ་དུ་མ་མཛད། དགུང་ལོ་བརྒྱ་ཉི་ཤུ་རྩ་གཅིག་གི་བར་དུ་བསྟན་པ་བསྐྱངས་ཏེ་བར་དོར་མཆོག་གི་དངོས་གྲུབ་བརྙེས་སོ། འདི་སྐབས་ན་ལནྡ་པའམ། དུས་འཁོར་ཞབས་ཆུང་བ་བྱུང་སྟེ། དེས་དུས་ཞབས་པ་ཆེ་བ་ལ་བརྟེན་ནས་དབང་རྒྱུད་འགྲེལ་ཡོངས་སུ་
རྫོགས་པར་གསན། ན་ལནྡའི་གཙུག་ལག་ཁང་གི་སྒོ་ཁང་དུ་རྣམ་བཅུ་དབང་ལྡན་གྱི་ཡི་གེ་དང་། དེའི་གཤམ་དུ་དུས་འཁོར་མ་ཤེས་ན་གསང་སྔགས་ཐམས་ཅད་ཤེས་པར་མི་འགྱུར་བའི་སྒྲུབ་བྱེད་བཀོད་པས་ཨ་བྷ་ཡ། ཙཱ་མི། ཨ་བྷི་ཡུཀྟ། ཁ་
ཆེ་ཟླ་མགོན། དཱ་ན་ཤྲི་སོགས་པཎྜི་ཏ་ལྔ་བརྒྱ་ཙམ་གྱིས་གཟིགས་པས་ཐུགས་མ་རངས་ཏེ་རྩོད་པ་ན་དུས་འཁོར་ཞབས་རྒྱལ། པཎྜི་ཏ་ཐམས་ཅད་ཀྱིས་གུས་པས་བཏུད་དེ་ཆོས་ཉན་པའི་སློབ་མར་གྱུར་ཏོ། །ཨ་བྷ་ཡའི་སློབ་མ་ཤུ་བྷཱ་ཀ་ར་གུ་སྟ་དང་། ནིཥྐ་
ལངྐ་དེ་བ་སོགས་རྡོ་རྗེ་འཛིན་པ་མང་དུ་བྱོན་ཏེ། སློབ་དཔོན་དེའི་མན་ངག་དང་བཤད་སྲོལ་ཤིན་ཏུ་རྒྱས་པར་གྱུར་ཏོ། དེ་ལས་ཁྱད་པར་དུ་གྲུབ་པ་བརྙེས་པ་རཏྣ་རཀྵི་ཏས་བི་ཀྲ་མ་ལ་ཤཱི་ལར་སྔགས་ཀྱི་དཔོན་ཆེན་པོ་མཛད། སྡོམ་འབྱུང་གི་འགྲེལ་པ་སོགས་
བརྩམས་ནས་སྙིང་པོའི་བསྟན་པའི་བདག་པོར་གྱུར་ཏོ། །བི་ཁྱཱ་ཏ་དེ་ཝ་ཆོས་འབྱུང་ཞི་བས་ཀྱང་ཨ་བྷ་ཡ་བརྟེན་ནས་གྲུབ་པ་བརྙེས། རྡོ་རྗེ་གདན་གྱི་མཁན་པོ་མཛད། དེ་རྗེས་མ་ཧཱནྟ་ཉི་ཤུ་རྩ་བཞིར་གྲགས་པ་སོགས་བྱིན་རླབས་དང་ནུས་པ་ཕུལ་བྱུང་མངའ་བས་
เล่ม ๑๐๓ · หน้า 86a
བསྟན་པ་སྐྱོང་བར་མཛད་པ་མང་དག་ཅིག་བྱུང་བ་ཐམས་ཅད་སྔགས་ཀྱི་རྡོ་རྗེ་འཛིན་པ་ཆེན་པོ་ཤ་དག་ཡིན་ནོ། །ཕྱི་མོ་ཞིག་ན་པཎ་ཆེན་པ་ན་རཏྣའང་རྒྱ་གར་ཤར་ཕྱོགས་སུ་བྱོན་ཏེ་གྲུབ་ཐོབ་ཆེན་པོ་ཤ་བ་རི་དབང་ཕྱུག་གིས་རྗེས་སུ་བཟུང་བས་
གསང་སྔགས་ཀྱི་གྲུབ་པའི་དབང་ཕྱུག་རྡོ་རྗེའི་སློབ་དཔོན་ཆེན་པོར་གྱུར་པ་ཞིག་སྟེ། བོད་ཡུལ་འདིར་ཡང་གསང་སྔགས་ཀྱི་ཚུལ་ལ་ཤིན་ཏུ་བཀའ་དྲིན་ཆེའོ། །དེ་འོག་འཕགས་ཡུལ་ལྷོ་ཕྱོགས་སུ། ཁ་གེནྡྲར་རྡོ་རྗེ་སློབ་དཔོན་ཞི་བ་སྦས་པའང་བྱོན་ཏེ། དེས་
ཡུལ་ཕྱོགས་ཀྱི་རྒྱུད་དེ་དག་དང་ཀོ་ཀིའི་ཡུལ་སོགས་སུ་གསང་སྔགས་ཀྱི་བསྟན་པ་ཤིན་ཏུ་གསལ་བར་མཛད་དོ། །དེ་བཞིན་དུ་ཕྱིས་རྒྱ་གར་ལྷོ་ཕྱོགས་དང་། ཤར་ཕྱོགས་ཀོ་ཀིའི་ཡུལ་སོགས་སུ་གསང་ཆེན་རྡོ་རྗེ་ཐེག་པའི་བསྟན་པ་ཤིན་ཏུ་དར་བར་ཡོད་པ་ལས།
དེང་སང་གི་གནས་སྐབས་སུ་ཇི་ལྟར་གྱུར་པའི་ཁུངས་གསལ་ཀ་ནི་མ་ཐོས་སོ། །ཁྱད་པར་འགྲོ་ལྡིང་གི་ཡུལ་དུ་ཐོག་མར་སློབ་དཔོན་པདྨ་འབྱུང་གནས་ཀྱིས་སྔགས་ཀྱི་བསྟན་པ་ཆེས་དར་བར་མཛད་དེ། མར་མེ་མཛད་བཟང་པོས་ཀྱང་བྱོན་པས་འཕགས་ཡུལ་དུ་ཕྱིས་
མི་བཞུགས་པའི་རྒྱུད་མང་པོའང་དེར་ས་བཞུགས་པར་གྲགས་ཤིང་ད་ལྟའང་སྔགས་ཀྱི་བསྟན་པ་དར་བཞིན་པ་ཡིན་ནོ།། །།གཉིས་པ་བོད་ཡུལ་དུ་བདེ་བར་གཤེགས་པའི་བསྟན་པ་ཇི་ལྟར་བྱོན་པའི་ཚུལ་ལ་མདོ་སྔགས་གཉིས་ལས། །དང་པོ་ལའང་
འདུལ་བ། མངོན་པ། མདོ་སྡེའི་བསྟན་པ་ཇི་ལྟར་ཕེབས་ཤིང་བསྐྱངས་པའི་ཚུལ་གསུམ་མོ། །དེ་ལ་དང་པོ་བསྟན་པའི་གཞི་མ་འདུལ་བ་ཇི་ལྟར་དར་བའི་ཚུལ་ནི། སྔོན་བོད་ཀྱི་ཡུལ་འདིར་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས་ཟ་ཧོར་ཀྱི་མཁན་པོ་བོ་
དྷི་ས་ཏུའམ་ཤཱནྟ་རཀྵི་ཏ་བལ་ཡུལ་དུ་བཞུགས་པ་གསན་ནས་རྦ་གསལ་སྣང་ཕོ་ཉར་བཏིང་སྟེ་སྤྱན་དྲངས། གུས་པ་ཆེན་པོས་ཉེ་བར་བསྙེན། འཕགས་ཡུལ་ནས་ཡོད་སྨྲའི་དགེ་སློང་བཅུ་གཉིས་ཀྱང་སྤྱན་དྲངས། སྐབས་ཤིག་བོད་ཀྱི་མི་ལ་རབ་བྱུང་བཏུབ་བམ་
เล่ม ๑๐๓ · หน้า 86b
མི་བཏུབ་སད་པའི་ཕྱིར། ཞང་བློན་དད་པ་ཅན་རྦ་ཁྲི་གཟིགས་རབ་ཏུ་བྱུང་བར་རྒྱལ་པོས་གསོལ་པས། བོ་དྷི་ས་ཏཱས་མཁན་པོ་མཛད་དེ། རབ་ཏུ་བྱུང་ཞིང་བསྙེན་པར་རྫོགས། མཚན་དཔལ་དབྱངས། བཙན་པོས་བསྔགས་པས་རྦ་རཏྟར་ཡང་གྲགས།
བསྒོམས་པས་མངོན་ཤེས་ལྔའང་གྲུབ་པར་གྱུར་ཏོ། །དེ་ནས་རིམ་བཞིན་རྦ་གསལ་སྣང་དང་། པ་གོར་བི་རོ་ཙ་ན། ངན་ལམ་རྒྱལ་བ་མཆོག་དབྱངས། །རྨ་རིན་ཆེན་མཆོག །འཁོན་ཀླུའི་དབང་པོ་སྲུང་བ། ལག་སུམ་རྒྱལ་བ་བྱང་ཆུབ་རྣམས་རབ་ཏུ་
བྱུང་ཞིང་། མིང་ཡེ་ཤེས་དབང་པོ་སོགས་སུ་སྤོས། བསྙེན་པར་རྫོགས། དེ་བདུན་ལ་སད་མི་བདུན་དུ་གྲགས། དེ་ནས་རྒྱལ་པོས་ཀྱང་བོད་ལ་རབ་བྱུང་བཏུབ་པར་དགོངས་ནས། ཞང་བློན་དྲ་མ་དང་། འབངས་བློ་གསལ་བ་སུམ་བརྒྱ་ཙམ་རབ་ཏུ་བྱུང་།
སྐྱེ་བོ་ཐམས་ཅད་ཀྱིས་རྗེའི་བཀའ་ཉན་ཅིང་། རྗེ་འབངས་ཐམས་ཅད་ཀྱིས་རབ་ཏུ་བྱུང་བ་དབུའི་མཆོད་གནས་སུ་ཕྱུང་ནས།ཕྱག་མཆོད་བཀུར་སྟི་བྱ་བའི་ཆོས་ཀྱི་བཀའ་ཁྲིམས་ཆེན་པོ་བཅས། བཀའ་གཙིགས་ཀྱི་རྡོ་རིངས་བཙུགས། སྐ་ཅོག་སོགས་ཀྱིས་འདུལ་
བ་ལུང་སྡེ་བཞི་བསྒྱུར་ཏེ། མདོར་ན་མཁན་སློབ་དེ་དག་གིས། གཞི་ཐམས་ཅད་ཡོད་པར་སྨྲ་བའི་འདུལ་བའི་བཤད་པ་དང་། ལག་ལེན་མཐའ་དག་ཐོག་མར་གསལ་བར་མཛད་དེ། བསྟན་པའི་གཞི་བཏིང་བར་གྲགས་སོ། །ཤཱནྟ་རཀྵི་ཏ་ནས་རིམ་བཞིན་
རྦ་རཏཱ། །སངས་རྒྱས་ཡེ་ཤེས། སྐབ་འོད་མཆོག་གྲགས། དེའི་མཁན་བུ་སྨར་གཡོ་གཙང་གསུམ་སྟེ། འདི་གསུམ་གྱིས་གླང་དར་མས་བསྟན་པ་བསྣུབས་པའི་ཚེ། འདུལ་བ་དྲེལ་ཁལ་གཅིག་བཀལ་ནས། གར་ལོག་དང་ཧོར་ཡུལ་དུ་ཕྱིན་ཀྱང་
བསྟན་པ་སྤེལ་མ་བཏུབ་སྟེ་ཁམས་སུ་བྱོན། རྨ་ལུང་རྡོ་རྗེའི་བྲག་ར་ཨན་ཆུང་གནམ་རྫོང་དང་། དན་ཏིག་ཤེལ་གྱི་ཡང་དགོན་དུ་བསྒོམ་ཞིང་བཞུགས་པའི་ཚེ། དམུ་གཟུགས་ལ་འབར་གྱིས་བལྟར་ཕྱིན་པས་དད་དེ། རབ་ཏུ་དབྱུང་བར་ཞུས་པ་ལ། སྨར་གྱིས་
เล่ม ๑๐๓ · หน้า 87a
མཁན་པོ་དང་གཡོས་སློབ་དཔོན་བྱས་ཏེ་རབ་ཏུ་བྱུང་། མིང་ཤཱཀྱ་དགེ་བ་རབ་གསལ་དུ་བཏགས། བསྙེན་རྫོགས་ཞུས་པས་དགེ་སློང་ལྔ་མ་ཚང་བ་དང་། འདན་དུ་ལྷ་ལུང་དཔལ་རྡོར་བཞུགས་པ་བཙལ་ཀྱང་ཁོ་བོས་རྒྱལ་པོ་སྡིག་ཅན་བསད་པས་ཁ་སྐོང་མི་འོང་གི་འོན་ཀྱང་གཞན་
བཙལ་ནས་བཏང་ངོ་ཞེས་རྒྱའི་ཧྭ་ཤང་ཀེ་ཝང་དང་། གྱི་ཕན་གཉིས་མངག་སྟེ་ལྔའི་ཚོགས་ཀྱིས་བསྙེན་པར་རྫོགས། མཁན་སློབ་རྣམས་ལས་འདུལ་བ་ལོ་བཅོ་ལྔར་ཉན། བླ་ཆེན་ཤཱཀྱ་དགེ་བ་རབ་གསལ་གྱིས་བསྙེན་པར་རྫོགས་ནས་ལོ་ལྔ་ལོན་པ་དང་། དབུས་གཙང་མི་བཅུས་ཁམས་སུ་
འོངས་པ་ལ་སྟན་ཐོག་གཅིག་ཏུ་ཚིགས་གསུམ་རིམ་ནོད་ཀྱིས་ཆིག་རྫོགས་སུ་བསྙེན་པར་རྫོགས་ཏེ། འདི་ལྟ་བུའི་ཆིག་རྫོགས་མཛད་པ་དང་། བསྟན་པའི་ཡན་ལག་ལོ་བཅུ་མ་ཚང་བ་སོགས་ནི་བླ་ཆེན་འདི་བྱང་སེམས་མོས་སྤྱོད་པར་གྲགས་ཤིང་། །དེ་སྐབས་སྨར་གཡོ་གཙང་གསུམ་གྱིས་གང་ཟག་
ཁྱད་པར་ཅན་ཡིན་པ་དང་། །བསྟན་པའི་འཕེལ་འགྲིབ་མཚམས་སུ་ཐུག་པའི་དགོས་གལ་ཆེ་བ་ལ་ནི་དེ་ལྟར་རུང་ངོ་ཞེས་གནང་བ་བྱིན་པས་སྐྱོན་མེད་དོ་ཞེས་བླ་མ་ཁ་ལ་ཅིག་གསུངས་ལ། འགའ་ཞིག་ནི་འདུལ་བའི་ལག་ལེན་རྩིང་གེར་སྤྱད་པས་ནོངས་སོ་ཞེས་ཟེར་རོ། །དབུས་གཙང་མི་བཅུས་ཡར་བྱོན་
ཏེ་བསྟན་པའི་མེ་རོ་བསླང་བར་མཛད་པ་ཡིན་ནོ། །སྨད་འདུལ་འདིའི་བཤད་རྒྱུན་ནི། འཕགས་ཡུལ་གྱི་སློབ་དཔོན་དཱ་ན་ཤཱི་ལ་དང་། ཛི་ན་མི་ཏྲ་གཉིས་ལ་ཅོག་རོ་ཀླུའི་རྒྱལ་མཚན་གྱིས་གསན། དེ་ནས་རིམ་བཞིན་སྨར་གཡོ་གཙང་གསུམ། བླ་ཆེན། གྲུམ་ཡེ་ཤེས་རྒྱལ་མཚན། ཀླུ་མེས་ཚུལ་
ཁྲིམས་དབང་ཕྱུག །གཟུས་རྡོ་རྗེ་རྒྱལ་མཚན་ཏེ། འདི་ནས་སྟོད་འདུལ་གྱི་བཤད་རྒྱུན་དང་གཅིག་ཏུ་འདྲེས་སོ། །སྟོད་འདུལ་དུ་གྲགས་པ་ནི་གླང་དར་མས་བསྟན་པ་བསྣུབས་པའི་རྗེས་བོད་སིལ་བུར་འཐོར་ཡང་། སྟོད་མངའ་རིས་སུ་ཆོས་རྒྱལ་གྱི་གདུང་ལས་ཆབ་སྲིད་ཞྭ་ཙམ་ཞིག་ཆགས་པའི་
སྐབས་བསྟན་པ་ཕྱི་དར་གྱི་འགོ་རྩོམ་པའི་དུས་སུ། ལྷ་བླ་མ་ཡེ་ཤེས་འོད་ཀྱིས་འཕགས་ཡུལ་ནས་པཎྜི་ཏ་དྷརྨ་པཱ་ལ་སྤྱན་དྲངས་ནས་པཱ་ལ་གསུམ་སོགས་མང་པོ་རབ་ཏུ་བྱུང་ཞིང་བསྙེན་པར་རྫོགས་སུ་བཅུག །དེ་ལས་པྲཛྙཱ་པཱ་ལའི་མཁན་བུ་ཞང་ཞུང་རྒྱལ་བའི་ཤེས་རབ། དེས་པཎྜི་ཏ་མང་པོ་ལ་
เล่ม ๑๐๓ · หน้า 87b
གཏུགས་ཤིང་། ཁྱད་པར་བལ་པོའི་འདུལ་འཛིན་སྦེ་ཏ་ཀ་ལས་འདུལ་བའི་ལག་ལེན་ཐམས་ཅད་ལ་མཁས་པར་སྦྱངས། ཁ་ཆེ་ཛྷཱ་ན་ཤི་ལས་སོ་ཐར་མདོའི་འགྲེལ་པ་འདུལ་བ་བསྡུས་པ་དང་། ཁ་ཆེ་ཐི་སུ་བྷཱུ་ཏི་ཤཱནྟ་ལས་སུམ་བརྒྱ་བ་རྩ་འགྲེལ། ས་མནྟ་ཤྲཱི་ཛྙཱ་ན་ལས་ཀཱ་རི་ཀ་ལྔ་བཅུ་བ་དང་ལོ་
དྲི་བ་གཉིས་སོགས་ལེགས་པར་མཉན་ནས་འགྱུར་བཅོས་དང་བསྒྱུར་ཅིང་བཤད་པ་སོགས་ཀྱིས་ལེགས་པར་གཏན་ལ་ཕབ། ཞང་ཞུང་པའི་སློབ་མ་ལོ་ཙཱ་བ་དཔལ་འབྱོར་གྱིས་བལ་པོ་ཛ་ཡ་ཀ་ར་ལས་དགེ་སློང་གི་ཀཱ་རི་ཀཱ་དང་། ཁ་ཆེ་པར་ཧི་ཏ་དང་མཧཱཛ་ན་ལས་དགེ་ཚུལ་གྱི་བསླབ་པའི་གཞི་མདོ་
རྣམས་གསན་ཅིང་དེ་དག་ལས་རིམ་པར་བརྒྱུད་དེ་དར་བ་ཡིན་ནོ། །འདིའི་བཤད་རྒྱུན་ནི། ཛི་ན་དཱ་ན་གཉིས་ལས་ཤཱཀྱ་སེ་ན། དྷརྨ་པཱ་ལ། ཀླུབས་ལོ་ཙཱ་དང་། སྐྱོགས་འདུལ་འཛིན་གཉིས། དེ་གཉིས་ལ་གཟུས་ཀྱིས་ཐུག་སྟེ། དེ་ནས་སྟོད་སྨད་ཀྱི་བཤད་རྒྱུན་གཅིག་འདྲེས་དེ་ཉིད་གཟུས་ཀྱི་བུ་བཞིར་
གྲགས་པ། འཛིམ་པ་ཤེས་རབ་འོད་དང་སྣེ་སོ་གྲངས་པ་རྒྱལ་མཚན་ཏེ་གཙང་གི་བུ་གཉིས། སྦོ་ཆུང་ཚུལ་ཁྲིམས་བླ་མ་དང་གླན་ཚུལ་བྱང་སྟེ་དབུས་ཀྱི་བུ་གཉིས་རྣམས་ལས་རྒྱ་ཆེར་འཕེལ་བ་ཡིན་ནོ། །བཤད་རྒྱུན་འདི་ལས་ཕྱིས་མཚོ་སྣ་པ་ཆེན་པོ་བྱོན་ཏེ་མནལ་ལམ་དུ་ཡོན་ཏན་འོད་ལས་མདོ་རྩ་
གསན། མགོན་པོ་ཏྲ་ཀྵད་ཀྱིས་བསྐུལ་ནས་འདུལ་པའི་རྣམ་བཤད་ཉི་མའི་འོད་ཟེར་སོགས་བརྩམས་ཏེ་འདུལ་བའི་བསྟན་པ་གཞི་བཞེངས་སུ་བཏིང་བ་ཡིན་ནོ། །དེ་བཞིན་དུ་གཞན་ཡང་བྱ་འདུལ་བ་འཛིན་པ་སོགས་འདུལ་བའི་བསྟན་འཛིན་མང་དུ་བྱུང་ངོ་། །ཁྱད་པར་ཁ་ཆེ་པཎ་ཆེན་ཤཱཀྱ་ཤྲཱི་ཁྲོ་ཕུ་
ལོ་ཙཱ་བས་བོད་དུ་སྤྱན་དྲངས། དབུས་སུ་ཕེབས་པའི་ཚེ་ཆུ་ཤུལ་སྲོག་མ་དགོན་དུ་མི་བཅུ་གཅིག་གིས་བསྙེན་རྫོགས་ཉིན་གཅིག་ལ་བསྒྲུབས་པའི་ནང་ནས་ཁེར་གདེ་བྱང་ཆུབ་དཔལ་དང་གཙང་པ་རྡོ་རྗེ་དཔལ་གཉིས་ཀྱི་རྒྱུན་ལས་དེང་སང་གི་བར་དུ་ས་དགེ་དཀར་གསུམ་སོགས་ཐམས་ཅད་
ལ་སྡོམ་རྒྱུན་འདིས་ཁྱབ་པ་ཡིན་ནོ། །པཎ་ཆེན་འདིས་སྣར་ཀླས་མོ་ཆེར་དབྱར་གནས་མཛད་སྐབས། ས་གའི་ལྷས་མཛད་པའི་འདུལ་བ་མེ་ཏོག་ཕྲེང་རྒྱུད་གསུངས་པ། སེང་གེ་ཟིལ་གནོན་དང་ཤང་པ་ཇོ་སྟན་གཉིས་ཀྱིས་གསན་ནས་སོ་སོས་ཊཱིཀ་བྱས། སྔ་མ་ལ་ཚད་མའི་སྐྱེས་བུས་གསན།
เล่ม ๑๐๓ · หน้า 88a
དེ་ལ་བུ་སྟོན་གྱིས་གསན་ཏེ་ཊཱིཀ་ཆེན་ཡང་བརྩམས་མོད་ཀྱི་ཅང་དར་ཆེ་བ་མ་བྱུང་ཞིང་། འདུལ་བའི་བསྟན་བཅོས་ཀྱི་ནང་ནས་གཙོ་བོར་མདོ་རྩ་འགྲེལ་བཅས་ཉིད་བསྟན་པ་སྔ་དར་ནས་བརྩམས་ཏེ་ད་ལྟའི་བར་ཤིན་ཏུ་དར་རོ། །འདི་དག་ཏུ་སྤྲུལ་པའི་ལོ་ཙཱ་བ་མང་པོས་འདུལ་བའི་
བསྟན་བཅོས་མང་དུ་བསྒྱུར་བ་དེང་སང་བསྟན་འགྱུར་གྱི་ཁྲོད་དུ་པུ་སྟི་ཀ་བཅོ་བརྒྱད་ཙམ་བཞུགས་པ་འདི་དག་གོ། །གཉིས་པ་ཐེག་པ་ཆེ་ཆུང་གི་མངོན་པའི་སྡེ་སྣོད་ཇི་ལྟར་དར་བའི་ཚུལ་ནི། སྔོན་བསྟན་པ་སྔ་དར་གྱི་ཚེ་པཎྜི་ཏ་ཛི་ན་མི་ཏྲ་དང་། ལོ་ཙཱ་བ་སྐ་བ་དཔལ་བརྩེགས་སོགས་ཀྱིས་གདགས་
པའི་བསྟན་བཅོས་ལས། འཇིག་རྟེན་གདགས་པ། རྒྱུ་གདགས་པ། ལས་གདགས་པ་གསུམ་དང་། ཐོགས་མེད་ཀྱིས་མཛད་པའི་ཐེག་ཆེན་གྱི་མངོན་པ་ཀུན་ལས་བཏུས་པ་དང་། དབྱིག་གཉེན་གྱིས་མཛད་པའི་ཉན་ཐོས་པར་གྲགས་པའི་མངོན་པ་མཛོད་ཀྱི་གཞུང་། དེའི་རང་འགྲེལ་དང་འགྲེལ་
པ་རྒྱལ་སྲས་མ་སོགས་བསྒྱུར་ནས་བཤད། དེ་དག་གི་སློབ་མ་སྣ་ནམ་ཟླ་བའི་རྡོ་རྗེ་དང་། ལྷ་ལུང་དཔལ་གྱི་རྡོ་རྗེ། དབས་ཡེ་ཤེས་རྒྱལ་བ་གསུམ་ལས། ཕྱི་མས་ཁམས་སུ་བྱོན་ནས་གྲུམ་རྒྱལ་བའི་ཡེ་ཤེས་ལ་བཤད་པ་སོགས་ནས་མངོན་པའི་འཆད་ཉན་གངས་རིའི་རྒྱུན་འདིར་ད་ལྟའི་བར་
ཤིན་ཏུ་དར་བར་བྱུང་ངོ༌། །འགོས་ལོ་སོགས་ཀྱིས་བརྒྱུད་པ་འདི་ནས་དར་བ་ནི་མངོན་པ་གོང་མ་ཁོ་ན་ཡིན་ལ། མཛོད་ཀྱི་བཤད་སྲོལ་ལ་བརྒྱུད་པ་བསྟར་ཆགས་འདེད་རྒྱུ་མེད་པར་སྨྲས་ཀྱང་། བཤད་སྲོལ་འདི་ལས་ཀུན་བཏུས་གཙོ་ཆེར་དར་བ་ནི་བྱུང་སྲིད་མོད་ཀྱི། མཛོད་འགྲེལ་པ་དང་
བཅས་པའང་འདི་ལས་ངེས་པར་བྱུང་དགོས་ཏེ། ཀུན་མཁྱེན་བུ་སོགས་མཁས་པ་ཐམས་ཅད་ཀྱིས་བརྒྱུད་ཁུངས་འདི་ཉིད་གཙོ་བོར་སྨོས་པའི་ཕྱིར་རོ། །ཡང་ནཱ་རོ་པའི་སློབ་མ་པཎྜི་ཏ་སྨྲི་ཏི་ཛྙཱ་ན་བོད་དུ་བྱོན་ནས་ཁམས་ཀྱི་འདན་ཀློང་ཐང་དུ་མངོན་པ་མཛོད་ཀྱི་བཤད་པ་མཛད་པའི་ཚེ་མཁས་བཙུན་
མང་དུ་འདུས་པས་མངོན་པ་འོག་མའི་བསྟན་པ་གཞི་བཞེངས་སུ་བཏང་སྟེ། དེའི་སློབ་མ་གཡས་ཆེན་པོ་ཤེས་རབ་གྲགས་སོགས་གྱིས་དབུས་གཙང་ཁམས་གསུམ་དུ་སྤེལ་བས་མཛོད་ཀྱི་བཤད་པ་གཙོ་བོར་དར་བ་འདི་ལས་བྱུང་བ་ཡིན་ནོ། །ཡང་པཎ་ཆེན་ཤཱཀྱ་ཤྲཱིས་ས་སྐྱ་པཎ་ཆེན་ལ་མཛོད་
เล่ม ๑๐๓ · หน้า 88b
ཀྱི་བཤད་པ་གནང་ཞིང་། ས་པཎ་གྱིས་མནལ་ལམ་དུ་དབྱིག་གཉེན་ལས་ཟླ་གཅིག་བར་དུ་གསན་པའི་ཐུགས་ཉམས་བྱུང་བས་བརྒྱུད་པ་འདི་ལས་བྱུང་བའི་བཤད་སྲོལ་ཡང་ཁྱད་པར་དུ་འཕགས་པ་ཞིག་གོ །བོད་ཡུལ་འདིར་མཁས་པ་དང་མི་མཁས་པ་སྣ་ཚོགས་ཞིག་གིས་མངོན་པ་
གོང་འོག་གི་ས་འགྲེལ་པ་བརྩམས་པ་ཤིན་ཏུ་མང་ཞིང་། སྔ་ཕྱིར་ལོ་ཙཱ་བ་རྣམས་ཀྱིས་བསྒྱུར་བའི་བསྟན་བཅོས་མངོན་པ་གོང་མ་ལ་པུསྟི་གཉིས་ཙམ་ཞིག་དང་འོག་མ་ལ་པུསྟི་དགུ་ཡོད་དོ།། །།གསུམ་པ་མདོ་སྡེའི་བསྟན་པ་ཇི་ལྟར་ཕེབས་པའི་ཚུལ་ལ་གསུམ་ལས། འཁོར་ལོ་དང་པོར་གཏོགས་པ་
འདུལ་བ་དང་མངོན་པ་འོག་མའི་ཕྱོགས་ནི་བཤད་ཟིན་ལ། །མདོ་སྡེའི་ཕྱོགས་ལས་སྔོན་འཕགས་ཡུལ་དུ་བཀའ་བསྡུ་དང་པོའི་ཚེ་བསྡུས་པ་རྣམས་རིམ་གྱིས་ཉམས་པས། སློབ་དཔོན་དབྱིག་གཉེན་གྱི་སྐབས་ན་ཉན་ཐོས་པ་རྣམས་ལ་གྲགས་པའང་ཕལ་ཆེ་བ་ཞིག་ནུབ་ཟིན་པར་གསལ་ཏེ་རྣམ་བཤད་
རིགས་པ་ལས། བླ་མ་ཀུན་དགའ་འོད་སེལ་དང་། །སྡུག་བསྔལ་ཕུང་སྟོན་ས་སྟོན་དང་། །འཆར་ཀ་སྟོང་ཉིད་ཆུ་ལས་སྐྱེས། །གང་པོ་ས་འཚོ་ཆུ་ཤིང་དང་། །མྱ་ངན་འདས་དང་ཡུལ་འཁོར་སྐྱོང་། །འགྲོ་བའི་མདོ་དང་དེ་བཞིན་གཞན། །ཡང་དག་བསྡུས་པའི་གཞི་ཉམས་ཕྱིར། །མཐའ་དག་མིན་པར་རྟོགས་
པ་ཡིན། །ཞེས་བཤད་པའི་ཕྱིར་དང་། དེ་སྐབས་ཡོད་པ་རྣམས་ལས་ཀྱང་ཕྱིས་ཇེ་ཉུང་དུ་སོང་ཞིང་། དེ་ལས་ལྷག་པར་བོད་དུ་སྔ་ཕྱི་ཅི་རིགས་པར་འགྱུར་བ་ནི་ཉུང་ཤས་ཙམ་དུ་མངོན་ཏེ་མདོ་སྡེ་ལས་བརྒྱ་བ་སོགས་སོ། །འོན་ཀྱང་འདི་དག་ལ་བཀླག་ལུང་གི་རྒྱུན་ཙམ་མ་གཏོགས་བཤད་སྲོལ་བྱུང་བ་འདི་
ལོ་རྒྱུས་ནི་མ་མཐོང་ངོ་། འཁོར་ལོ་བར་བ་ཤེས་ཕྱིན་སྐོར་ནི་འཕགས་ཡུལ་ན་བཞུགས་པའི་མདོ་ཐམས་ཅད་བོད་དུ་བྱོན་པ་ཡིན་ཏེ། །བསྟན་པ་སྔ་དར་གྱི་དུས་སུ་རླངས་ཁམས་པ་གོ་ཆས་འཕགས་ཡུལ་དུ་བྱོན་ཏེ་ཤེས་ཕྱིན་འབུམ་པ་ཐུགས་ལ་བཟུང་ནས་བོད་དུ་ལེགས་པར་བསྒྱུར། རྒྱལ་པོ་ཁྲི་སྲོང་
ལྡེའུ་བཙན་གྱིས་ཐེག་ཆེན་གྱི་ཆོས་ལ་གུས་པ་ཆེན་པོས་ཉིད་ཀྱི་མཚལ་ཁྲག་དང་ར་དཀར་མོའི་འོ་མ་སྦྱར་ནས་བྲིས་པས་དུམ་པ་བཞི་བྱུང་བ་རེག་ཟིག་དམར་པོར་གྲགས་ཏེ། ལྷ་ས་གོང་གི་སོ་ཕག་མཆོད་རྟེན་གྱི་ནང་དུ་བཞུགས་ཡོད་པར་བཤད་དོ། །ཡང་དབས་མཉྩ་ཤྲཱི། ཉང་ཨིནྡྲ་ཝ་རོ་གཉིས་
เล่ม ๑๐๓ · หน้า 89a
ཀྱིས་རྒྱ་གར་ནས་དཔེ་བླངས་ཏེ་བསྒྱུར་བ། བཙན་པོའི་དབུ་སྐྲའི་གཞོབ་རམས་དང་ར་དཀར་མོའི་འོ་མ་ལ་སྦྱར་ནས་བྲིས་པ་རེག་ཟིག་སྔོན་པོར་གྲགས་པ་པོད་བཞི་མ་ཞིག་ཀྱང་བྱུང་བར་གྲགས། དེ་ལྟར་རེག་ཟིག་སྔོ་དམར་གཉིས་པོ་ནི་འགྲེས་རྐང་ཐམས་ཅད་མི་རྒྱས་པས། པ་གོར་བཻ་
རོ་ཙ་ནས་སླར་ཡང་ཞུ་ཆེན་མཛད་དེ་འགྲེས་རྐང་ཆད་པ་སོགས་བསབས། ཚིག་སྣ་བསྲིངས་ཏེ་བརྗོད་བདེ་བར་བསྒྱུར། འདི་དུས་ལོ་ཙཱ་ཆེན་པོ་ཉིད་ཀྱིས་ཕྱག་བྲིས་མཛད་དེ་བཞུགས་སྣོད་ལས་འབུམ་ཤ་སྒྲོ་ཅན་དུ་གྲགས་པ་ད་ལྟའང་འཆིམས་ཕུ་ན་བཞུགས། གཞན་ཡང་འགྱུར་མི་འདྲ་བ་འགའ་
ཞིག་བྱུང་བར་གྲགས་ཤིང་ཉི་ཁྲི་དང་བརྒྱད་སྟོང་པ་སོགས་ཀྱང་བསྒྱུར། འགྲེལ་པའི་སྐོར་ཡང་དཾ་ཥྚྲ་སེ་ནའི་འབུམ་ཊིཀ་དང་། ཡུམ་རྒྱས་འབྲིང་བསྡུས་གསུམ་གྱི་གཞུང་འགྲེལ་ཡུམ་གསུམ་གནོད་འཇོམས་སུ་གྲགས་པ་དབྱིག་གཉེན་གྱིས་མཛད་པ་སོགས་བསྒྱུར། བཤད་པ་དང་ཉམས་ལེན་
གཉི་གའི་རྒྱུན་ཡང་རྒྱ་ཆེར་བྱུང་མོད་ཀྱི་བར་སྐབས་སུ་དབུས་གཙང་དུ་ཉམས་པར་གྱུར། བསྟན་པ་ཕྱི་དར་ལ་ལོ་ཆེན་རིན་ཆེན་བཟང་པོས་འཕགས་ཡུལ་དུ་བྱོན་ཏེ་པཎྜི་ཏ་གུ་ཎ་མི་ཏྲ་ལས་མངོན་རྟོགས་རྒྱན་འགྲེལ་པ་དང་བཅས་པ་གསན། དེས་ཤར་ཕྱོགས་པ་ཟླ་བ་བཟང་པོ། དེས་སློབ་དཔོན་
བརྟེན་སྐྱོང་། དེས་རྔོག་ལོ་ཙཱ་བ་བློ་ལྡན་ཤེས་རབ་ལ་བརྒྱུད་དེ། ཤེས་ཕྱིན་གྱི་མདོའི་སྦས་དོན་མངོན་རྟོགས་ཀྱི་རིམ་པ་གསལ་བར་བྱེད་པའི་གཞུང་འགྲེལ་རྣམས་ཀྱི་འཆད་ཉན་ཆེས་དར་བར་གྱུར་ཏོ། །ཡང་ཇོ་བོ་རྗེ་དཔལ་ལྡན་ཨ་ཏི་ཤས་འབྲོམ་སྟོན་རྒྱལ་བའི་འབྱུང་གནས་ལ་ཕར་ཕྱིན་གྱི་བཤད་པ་
ལེགས་པར་སྩལ། ཨ་ཏི་ཤ་དང་ལོ་ཆེན་རིན་བཟང་གཉིས་ཀྱིས་འགྲེལ་བཤད་རྟོགས་དཀའི་སྣང་བ་བསྒྱུར། བརྒྱད་སྟོང་པ་དང་། ཉི་སྣང་དང་། བརྒྱད་སྟོང་འགྲེལ་ཆེན་སོགས་སྔར་བསྒྱུར་བ་མང་པོ་ལ་ཞུ་དག་མཛད། འབྲོམ་སྟོན་གྱིས་འབྲོམ་སྟོང་བཙན་ནམ་མགོ་བླ་མ་ལ་བཤད་པ་སོགས་ཀྱིས་
བཤད་སྲོལ་ཆེ་བ་ཞིག་བྱུང་བ་ཡིན་ནོ། །ཡང་ཇོ་བོ་རྗེ་ནས་ཁུ་ཆེན་པོ་ལྷ་སྡིངས་པ་སོགས་བརྒྱུད་པའི་བཤད་སྲོལ་ཅིག་ཀྱང་བྱུང་ངོ༌། །ཡང་ཇོ་བོས་ཕྱྭ་དར་སྟོན་ལ་བཤད་པས་ཕར་ཕྱིན་ཁམས་ལུགས་སུ་གྲགས་པའང་དར། དེ་དག་ལས་བློ་ལྡན་ཤེས་རབ་ཀྱིས་བལ་ཡུལ་ཕམ་ཐིང་གི་གཙུག་ལག་
เล่ม ๑๐๓ · หน้า 89b
ཁང་ན་བཞུགས་པའི་འབུམ་ལས་ཏིང་ངེ་འཛིན་གྱི་མིང་ཆད་པ་བསབས་པ་སོགས་འགྱུར་བཅོས་ཀྱང་མཛད། མངོན་རྟོགས་རྒྱན་རྩ་འགྲེལ་འགའ་ཞིག་ཀྱང་འགྱུར་བཅོས་དང་གསར་འགྱུར་ཅི་རིགས་པར་མཛད་དེ་དེ་དག་གི་བཤད་པའང་དཔྱིས་ཕྱིན་པར་གཏན་ལ་ཕབ། དེ་ནས་དགེ་བཤེས་འབྲོ་ཤེས་
རབ་འབར་གྱིས་བསྟན་པ་སྔ་དར་གྱི་བཤད་རྒྱུན་ཁམས་སུ་འཕོས་པ་ལས་བྱུང་བའི་རྒྱུན་དང་། །ཇོ་བོ་དང་རིན་བཟང་གི་བཤད་རྒྱུན་རྣམས་གཅིག་དྲིལ་གྱི་བཤད་སྲོལ་ཆེན་པོ་བཏོད་པ་ཨར་བྱང་ཆུབ་ཡེ་ཤེས་ཀྱིས་བཟུང་སྟེ་བསྟན་པ་འདི་ལ་བྱ་བ་ཆེ་ཐང་དུ་མཛད། དེ་ནས་བཟུང་སྟེ་ད་ལྟའི་བར་
འཆད་ཉན་མ་ནུབ་པར་ཡོད་པ་འདི་ལགས་ཤིང་། བོད་ཡུལ་དུ་ཤེར་ཕྱོགས་ཀྱི་བསྟན་བཅོས་རྩོམ་མཁན་ཡང་ཤིན་ཏུ་མང་བར་བྱུང་ངོ་། །ཡང་རྔོག་ལོའི་སློབ་མ་གྲོ་ལུང་པ་བློ་གྲོས་འབྱུང་གནས་ཀྱི་བཤད་སྲོལ་ལ་བརྟེན་ནས་ཕྱིས་དགེ་བཤེས་ཕྱྭ་པས་ཀྱང་སྤེལ་ལོ། །ཕར་ཕྱིན་གྱི་དངོས་བསྟན་
སྟོང་ཉིད་ཀྱི་རིམ་པ་བཤད་པ་དང་། ཉམས་སུ་ལེན་པ་དག་ལ་དབུ་མ་པར་གྲགས་པས་དེ་ནི་དང་པོར་པཎྜི་ཏ་ཛྙཱ་ན་གརྦྷ་དང་། ཅོག་རོ་ཀླུའི་རྒྱལ་མཚན་གྱིས་དབུ་མ་རྩ་བའི་ཤེས་རབ་དང་། དེའི་འགྲེལ་པ་ཤེས་རབ་སྒྲོན་མ་སོགས་ཀྱི་གཞུང་བསྒྱུར་བཤད་མཛད་པ་སོགས་ནས་དེར་ཡང་། ཕྱི་
དར་ལ་ལོ་ཙཱ་བ་བློ་ལྡན་ཤེས་རབ་ཀྱིས་ཤེས་རབ་སྒྲོན་མ་གཙོ་བོར་གྱུར་པའི་གཞུང་ལ་འཆད་ཉན་མཛད་ནས་ཆེས་དར་བ་ཡིན་ཞིང་། །ཁྱད་པར་པ་ཚབ་ལོ་ཙཱས་ཁ་ཆེར་བྱོན་ནས། སཛྫ་ནའི་སྲས་གཉིས་སོགས་ལ་བསྟེན་ཏེ་ལོ་ཉི་ཤུ་རྩ་གསུམ་དུ་སྦྱངས་པ་མཛད་ནས། བོད་དུ་རྩ་འཇུག་
བཞི་གསུམ་སོགས་ཀྱི་འགྲེལ་པ་ཟླ་བས་མཛད་པའི་རིགས་རྣམས་བསྒྱུར། འཆད་ཉན་གྱི་སྒོ་ནས་ལེགས་པར་གཏན་ལ་ཕབ། དེའི་སློབ་མ་གཙང་པ་སར་སྦོས་དང་། རྨ་བྱ་བྱང་བརྩོན་སོགས་མང་པོས་དབུས་གཙང་དུ་སྤེལ་བས་དབུ་མའི་བཤད་རྒྱུན་རྒྱ་ཆེར་དར་བ་དེང་སང་ཡང་ཡོད་དོ། །
དེའི་ཉམས་ལེན་གྱི་རྒྱུན་ཡང་ཇོ་བོ་རྗེ་ནས་འབྲོམ་རྒྱུད་གཙོ་བོར་བཀའ་གདམས་རིན་པོ་ཆེ་ལ་དར་ཞིང་། དེ་ལྟའི་བཤད་སྒྲུབ་ཀྱི་རྒྱུན་གཉི་གའང་རང་སྟོང་སྨྲ་བའི་ལུགས་དང་། དེ་ལས་ཀྱང་ཐལ་འགྱུར་བའི་ཕྱོགས་ཏེ་འདི་ལ་བོད་ཀྱི་སློབ་དཔོན་ཊཱིཀ་བྱེད་པའང་མང་ཞིག་བྱུང་ངོ༌། །དེའི་གསེབ་ཏུ་རང་
เล่ม ๑๐๓ · หน้า 90a
རྒྱུད་ཀྱི་གྲུབ་མཐའ་སྨྲ་བ་འང་ཐར་ཐོར་བྱུང་མོད་ཀྱི་དེ་དག་གི་བཤད་སྲོལ་གྱི་རྒྱུན་ཆེན་པོ་ཚུགས་པ་ཞིག་ནི་མ་བྱུང་བར་མངོན་ནོ། །འཁོར་ལོ་ཐ་མའི་མདོ་སྡེ་རྣམས་ནི་ཤིན་ཏུ་རྒྱ་ཆེ་ནའང་། ཕྱི་ནས་འཕགས་ཡུལ་དུའང་ཆེར་མི་བཞུགས་པ་གོང་དུ་སྨོས་ཟིན་པ་ལྟར་ལ། དེ་ལས་བོད་དུ་
བྱོན་པ་ནི། ཕལ་པོ་ཆེ་དང་། དཀོན་བརྩེགས་དང་། ལང་གཤེགས་སོགས་ཕྱིས་རྒྱ་གར་དུ་གང་བཞུགས་ལས་ཀྱང་ཕལ་ཆེ་བ་ཞིག་ཡིན་གྱི་ཡོངས་སུ་རྫོགས་པར་བསྒྱུར་བ་ནི་མ་ཡིན་ཏེ། རྒྱ་གཞུང་རྣམས་སུ་ལུང་ཁུངས་སྨོས་པ་རྣམས་ལས་མང་པོ་འདིར་མི་བཞུགས་པའི་ཕྱིར་རོ། །དེའང་བདེ་
བར་གཤེགས་པའི་སྙིང་པོ་སྟོན་པའི་མདོ་ཕལ་ཆེ་བ་ཞིག་བསྟན་པ་སྔ་དར་གྱི་སྐབས་སུ་བསྒྱུར་བ་ཡིན་ཞིང་། ཕྱི་འགྱུར་ཡང་ཅི་རིགས་པར་ཡོད་ལ། དེ་དག་གི་དགོངས་འགྲེལ་གྱི་བསྟན་བཅོས་ཀྱང་སྔ་དར་ཕྱི་དར་གཉི་ག་ལ་ཅི་རིགས་པར་བསྒྱུར་བ་ཡིན་ཞིང་། དེ་དག་གི་བཤད་སྲོལ་ཡང་
མང་དུ་ཡོད་པ་ལས། གཙོ་བོར་ནི་ཕྱིས་ལོ་ཙཱ་བ་བློ་ལྡན་ཤེས་རབ་ཀྱིས་སློབ་དཔོན་སཛྫ་ན་ལས་མདོ་སྡེ་རྒྱན་དང་རྒྱུད་བླ་མ། ཆོས་ཉིད་རྣམ་འབྱེད། དབུས་མཐའ་རྣམ་འབྱེད་རྣམས་ཀྱི་གཞུང་འགྲེལ་བཤད་པ་དང་བཅས་པ་གསན་ནས་སློབ་མ་རྣམས་ལ་བསྟན་པས་རྒྱ་ཆེར་འཕེལ་ཏེ། ཕྱིས་
གཙང་ནག་པ་དང་། ཀུན་མཁྱེན་རང་བྱུང་ཞབས་དང་། ཇོ་མོ་ནང་པ་སོགས་ཀྱིས་རྩལ་དུ་བཏོན་ནས་བཤད་པས་འཁོར་ལོ་མཐའ་མའི་སྙིང་པོའི་དོན་ཆེས་ཆེར་གསལ་བར་གྱུར་པ་ཡིན་ནོ། །དེས་ན་འདི་དག་ནི་དབུ་མ་གཞན་སྟོང་གི་སྲོལ་ལེགས་པར་འཛིན་པ་པོ་ཡིན་ཞིང་། སྲོལ་འདི་ལས་
ཊིཀ་ཆེན་མཛད་པོའང་མང་དུ་བྱོན་ཏེ། ཁ་ཅིག་ལུགས་འདི་ལ་སེམས་ཙམ་པར་འཆད་པ་ནི་ཤིན་ཏུ་ནོར་རོ། །ཡང་གྲྭ་པ་མངོན་ཤེས་ཀྱི་མཁན་བུ་བཙན་ཁ་བོ་ཆེས་སཛྫ་ན་ལས་རྒྱུད་བླ་སོགས་ཞུས། ལྕང་ར་བ་སོགས་སློབ་མ་རྣམས་ལ་བཤད་ནས། ཕྱི་མོ་བར་དུ་བཤད་སྲོལ་བྱུང་བ་ནི་
སེམས་ཙམ་གྱི་གྲུབ་མཐའ་སྨྲ་བའི་ལུགས་སུ་ངེས་ཏེ། ལུགས་དེའི་ཡིག་ཆ་རྣམས་སུ་གཉིས་སྟོང་གི་ཤེས་པ་རང་རིག་རང་གསལ་བདེན་གྲུབ་པ་དེ་སངས་རྒྱས་ཀྱི་རྒྱུ་གྲུངས་པོར་ཁས་བླངས་པའི་ཕྱིར་རོ། །གཉིས་པ་གསང་སྔགས་རྡོ་རྗེ་ཐེག་པ་ཇི་ལྟར་བྱོན་པའི་ཚུལ་ནི། །བསྟན་པ་སྔ་
เล่ม ๑๐๓ · หน้า 90b
དར་གྱི་དུས་སུ་ཆོས་རྒྱལ་ཐོ་ཐོ་རི་སྙན་ཤལ་གྱི་དུས་སུ་དཔང་སྐོང་ཕྱག་བརྒྱ་པ། མདོ་ཟ་མ་ཏོག །ཙིནྡྷ་མཎིའི་གཟུགས་ཀྱི་བཀོལ་ཕོར་སོགས་ཡུམ་བུ་བླ་མཁར་གྱི་རྩེར་བབས་པ་དེར་གཉེན་པོ་གསང་བ་ཞེས་པའི་མཚན་གསོལ་ནས་མཆོད་པ་བྱེད་པ་ཙམ་བྱུང་བས་དམ་བ་ཆོས་ཀྱི་དབུ་
བརྙེས། དེ་ནས་སྲོང་བཙན་སྒམ་པོའི་དུས་རྒྱ་གར་གྱི་སློབ་དཔོན་ཀུ་ས་ར་དང་། བྲམ་ཟེ་ཤངྐ་ར། བལ་པོ་ཤི་ལ་མཉྫ་སོགས་བྱོན་ཏེ་ལོ་ཙཱ་བ་ཐོན་མི་སཾ་བྷོ་ཊ་སོགས་ཀྱིས་བྱས་ནས་སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་སོགས་བསྒྱུར། སློབ་མ་སྐལ་ལྡན་རྣམས་ལ་རྒྱལ་པོ་ཉིད་ཀྱིས་དེ་
དང་འཚམ་པའི་ཡི་དམ་ལྷའི་དཀྱིལ་འཁོར་སྤྲུལ་ནས་དབང་བསྐུར་མན་ངག་ཕོག་པས་གྲུབ་པ་ཐོབ་པའང་མང་དུ་བྱུང་བར་གྲགས། དེ་ནས་བཙན་པོ་ཁྲི་སྲོང་ལྡེའུ་བཙན་གྱིས་སློབ་དཔོན་སངས་རྒྱས་གསང་བ་སྤྱན་འདྲེན་དུ་དབས་མཉྫ་ཤྲཱི་སོགས་བཏང་ཡང་མ་བྱོན་པར་ཀྲི་ཡོག་སྡེ་གསུམ་
བཤད་པ་ཉན། ཉིད་ཀྱི་འགྲེལ་པ་རྣམས་གནང་བ་ཁྱེར་ཏེ་སླར་འོངས་ནས་བཙན་པོ་ལའང་ཕུལ། སློབ་མ་རྣམས་ལའང་བཤད་པས་དར་བར་གྱུར། ཁྱད་པར་སློབ་དཔོན་ཆེན་པོ་པད་མ་འབྱུང་གནས་སྤྱན་དྲངས་ཏེ། དེས་བོད་ཀྱི་ལྷ་སྲིན་གདུག་པ་ཅན་རྣམས་བཏུལ། ཟན་ཡང་ལྷུན་གྱིས་གྲུབ་པའི་
གཙུག་ལག་ཁང་བཞེངས་པ་ལ་རབ་ཏུ་གནས་པ་མཛད། ཆོས་གཏེར་དང་ནོར་གཏེར་དཔག་ཏུ་མེད་པ་སྦས། སྔགས་ཀྱི་རྒྱུད་སྡེ་བཞི་དང་ཁྱད་པར་བླ་མེད་ཀྱི་རྒྱུད་རྣམས་བཤད་པ་དང་། དབང་བསྐུར་མན་ངག་སྦྱིན་པ་སོགས་གསང་སྔགས་ཀྱི་བསྟན་པ་ཉིན་མོ་ལྟ་བུར་མཛད། གཞན་ཡང་སློབ་དཔོན་
ཤཱནྟི་གགྷ་དང་སྔགས་འཆང་དྷརྨ་ཀཱིརྟི་སོགས་ཀྱིས་ཀྱང་སྔགས་རྒྱུད་བསྒྱུར་ཞིང་བདུད་འདུལ་སྔགས་པ་གླིང་དུ་དབང་བསྐུར་བ་དང་རྒྱུད་བཤད་པ་སོགས་མཛད། བཙན་པོས་ཡེར་པ་དང་། ཆུ་བོ་རི་སོགས་ལ་བསྒོམ་གྲྭ་ཆེན་པོ་བཙུགས། དབྱིག་རྡོ་རྗེ་རྒྱལ་མཚན། གནུབས་ནམ་མཁའི་སྙིང་པོ། བཙུན་
པ་དཔལ་དབྱངས། ངན་ལམ་རྒྱལ་བ་མཆོག་དབྱངས། མྱང་ཏིང་འཛིན་བཟང་པོ་སོགས་སྐྱེས་བུ་དམ་པ་བརྒྱ་རྩ་བརྒྱད་ཀྱིས་གྲུབ་པ་ཐོབ་པར་གྲགས། རྗེ་འབངས་ཉེར་ལྔའང་དེ་དག་གི་གཙོ་བོར་གྱུར་པ་རྣམས་སོ། །བོན་པོ་དང་བརྩད་པས་བོན་པོ་ཕམ་སྟེ་དྲན་པ་ནམ་མཁའ་སོགས་ཆོས་ལ་བཅུག ཕྱིས་
เล่ม ๑๐๓ · หน้า 91a
བསྒོམས་པས་གྲུབ་པ་ཐོབ་པའང་མང་ཞིག་བྱུང་། དེ་དག་གི་དུས་སུ་གཙོ་བོར་དར་བའི་རྒྱུད་སྡེ་རྣམས་ནི་གསང་བ་འདུས་པ་ལ་སོགས་པ་ཏ་ནྟ་ཆེན་པོ་སྡེ་བཅོ་བརྒྱད་དུ་གྲགས་པ་དག་གོ། །དེ་ལས་སྒྲུབ་པ་བཀའ་བརྒྱད་དུ་གྲགས་པ་རྣམས་ནི་རྟ་མགྲིན་དང་ཕུར་པའི་སྐོར་པདྨ་སཾ་བྷ་བས་དར་
བར་མཛད། དེ་བཞིན་དུ་ཤཱནྟི་གརྦྷས་འཇམ་དཔལ་སྐུ་དང་། ཧཱུྃ་ཀཱ་རས་ཡང་དག་ཐུགས། དྲི་མེད་བཤེས་གཉེན་གྱིས་བདུད་རྩི་ཡོན་ཏན་གྱི་དབང་། རྒྱུད་ཉམས་ལེན་དང་བཅས་པ་དར་བར་མཛད། མ་མོ་སོགས་འཇིག་རྟེན་པའི་སྡེ་གསུམ་ཡང་། སློབ་དཔོན་པདྨས་བོད་ཡུལ་སོགས་
ཀྱི་ལྷ་འདྲེ་གདུག་པ་ཅན་རྣམས་དམ་ལ་བཏགས། སྲོག་སྙིང་ཕུལ། དཀྱིལ་འཁོར་དུ་བཅུག་ནས་དབང་བསྐུར་ཏེ། སོ་སོའི་སྡེ་ཚན་དུ་བསྡུས་ནས་རིག་སྔགས་བསྒྲུབ་པའི་ཆོ་ག་མཛད་པ་ཡིན་ནོ། །ཁྱད་པར་རྫོགས་ཆེན་ལ་སེམས་ཀློང་མན་ངག་སྡེ་གསུམ་ལས། དང་པོ་བེ་རོ་ཙ་ན་རཀྵི་ཏས།
གཉིས་པའང་དེ་ཉིད་ཀྱིས། གསུམ་པ་བི་མ་ལ་མི་ཏྲེས་སྤེལ་བར་བྱས་པ་ཡིན། དེར་མ་གཏོགས་པའི་འདུས་པ་མདོ་ནི་མདོ་དགོངས་འདུས་སུ་གྲགས་པ་སྟེ། བྲུ་ཤའི་སློབ་དཔོན་ཆེ་བཙན་སྐྱེས་དང་། གནུབས་སངས་རྒྱས་ཡེ་ཤེས་གཉིས་ཀྱིས་བསྒྱུར་བཤད་མཛད་དེ་དར། སྒྱུ་འཕྲུལ་
རྒྱུད་ཀྱི་སྐོར་ནི། གསང་བ་སྙིང་པོ་སོགས་རྩ་འགྲེལ་དང་བཅས་རྣམས་ཏེ། ཐོག་མར་བི་མ་ལ་དང་རྨ་རིན་ཆེན་མཆོག་གིས་བསྒྱུར་ཅིང་བཤད་དེ། དེ་ནས་རིམ་བཞིན་བཤད་ཉན་བསྒོམ་བསྒྲུབ་ཀྱི་རྒྱུན་དར་བ་ཡིན་ནོ། །དེ་དག་གི་སྐབས་སུ་སློབ་དཔོན་གྱིས་གཏེར་དུ་སྦས་པ་རྣམས་ཕྱི་
ནས་ཆོས་དེ་དང་དེའི་གདུལ་བྱར་གྱུར་པ་དག་བྱུང་བའི་ཚེ་སྤྲུལ་པའི་གཏེར་སྟོན་རྣམས་ཀྱིས་ཕྱུང་སྟེ་འགྲོ་དོན་མཛད་པ་ཡིན་ནོ། །དེ་ལྟར་བསྟན་པ་སྔ་དར་གྱི་ཚེ་བྱུང་བའི་གསང་སྔགས་རྣམས་ལ་ནི་གསང་སྔགས་སྔ་འགྱུར་དུ་གྲགས་ཏེ་ད་ལྟའི་བར་དུ་སྲོལ་དེའི་བཀའ་གཏེར་གཉི་གའི་དབང་རྒྱུད་
མན་ངག་སོགས་ཅི་རིགས་པར་སྣང་ངོ༌། །བསྟན་པ་ཕྱི་དར་གྱི་ཚེ་བྱ་བའི་རྒྱུད་དང་སྤྱོད་པའི་རྒྱུད་གཉིས་ལ་བརྟེན་པའི་དབང་བཀའ་དང་། རྗེས་གནང་དང་། རིག་གཏད་ཙམ་དང་ལུང་སྦྱིན་པ་སོགས་ལས་འཆད་ཉན་གྱི་སྲོལ་ནི་མ་བྱུང་བར་མངོན་ལ། བླ་མ་ཁ་ཅིག་གིས་དཔུང་བཟང་
เล่ม ๑๐๓ · หน้า 91b
སོགས་ལ་བཤད་པ་བྱས་པར་གྲགས་པའང་རྩལ་བཤད་བྱས་པ་ཉིད་དུ་ཟད་ཀྱི་བཤད་རྒྱུན་འདེད་རྒྱུ་ཡོད་པ་མ་མཐོང་ངོ་། །རྣལ་འབྱོར་རྒྱུད་ནི་ལོ་ཆེན་རིན་ཆེན་བཟང་པོ་ཁ་ཆེར་བྱོན་ཏེ་བླ་མ་མང་པོ་བསྟེན། རྒྱུད་དང་གདམས་ངག་མང་པོ་ཉན་ནས། གསང་སྔགས་སྤྱི་དང་ཁྱད་
པར་ཡོ་ག་ལ་ཤིན་ཏུ་མཁས། བོད་དུ་རྣལ་འབྱོར་གྱི་རྒྱུད་རྣམས་ཕལ་ཆེར་སྔར་ནས་ཡོད་མོད་ཀྱི་འགྲེལ་པ་དང་བསྟུན་ནས་གསར་དུ་བསྒྱུར། འགྲེལ་པའང་དེ་ཉིད་བསྡུས་པའི་འགྲེལ་པ་དེ་ཉིད་སྣང་བ་སོགས་བསྒྱུར་ནས་འཆད་ཉན་གྱིས་ལེགས་པར་གཏན་ལ་ཕབ། ཕྱག་
ལེན་ངེས་ཏིག་མཛད་དེ། རྔོག་ལེགས་ཤེ་སོགས་ཐུགས་སྲས་བཞི་གཙོ་བོར་གྱུར་པའི་སློབ་མ་མང་པོ་ལ་གནང་སྟེ། འཆད་ཉན་གྱིས་བརྒྱུད་པ་ཟིན་པ་ཤིན་ཏུ་མང་བར་བྱུང་། དེ་ལས་ཕོ་བྲང་ཞི་བ་འོད་ཀྱིས་པཎྜི་ཏ་མནྟཱ་ཀ་ལཱ་ཤ་སོགས་སྤྱན་དྲངས་ཏེ། འགྱུར་མང་དུ་
མཛད་ཅིང་ཁྱད་པར་དཔལ་མཆོག་གི་ཧོར་ཀོང་བསབས། བཤད་རྒྱུད་རྡོ་རྗེ་རྩེ་མོ་སོགས་སློབ་མ་མང་པོ་ལ་བཤད། ཟངས་དཀར་ལོ་ཙཱས་ཀྱང་ཡོ་གའི་སྐོར་ལ་གསན་པ་རྒྱ་ཆེན་པོ་མཛད་ནས། སྨད་འགྲེལ་དུམ་བུ་གསུམ་ཡང་རྫོགས་པར་བསྒྱུར། ཟངས་དཀར་
གྱི་བུ་བཞིར་གྲགས་པ་སོགས་ལ་བཤད་པས་ཆེས་དར་བར་གྱུར་པ་ཡིན་ནོ། །དེ་དག་ལས་བརྒྱུད་དེ་ཕྱིས་བུ་སྟོན་རིན་པོ་ཆེ་ལ་དབང་དང་རྒྱུད་འགྲེལ་གྱི་བཤད་པ་ཐམས་ཅད་ཡོངས་སུ་རྫོགས་པར་བྱུང་བ་དེས་རྣལ་འབྱོར་རྒྱུད་ཀྱི་བསྟན་པ་རྨང་ནས་གསོ་བ་ལྟ་བུར་མཛད་པ་ཡིན་ཞིང་།
དེང་སང་ནི་རྒྱུད་རྣམས་ཀྱི་བཀླག་ལུང་ཙམ་དང་། དབང་བཀའ་འགའ་ཞིག་ལས་རྒྱུད་འགྲེལ་གྱི་བཤད་པ་སོགས་ཕལ་ཆེར་མི་བཞུགས་སོ། །རྣལ་འབྱོར་བླ་མེད་རྒྱུད་ལས་ཕ་རྒྱུད་ཀྱི་གཙོ་བོ་གསང་བ་འདུས་པ་ནི། འཕགས་ལུགས་དང་ཡེ་ཤེས་ཞབས་ལུགས་གཉིས་
ལས་སྔ་མ་ནི་དང་པོར་ལོ་ཆེན་རིན་ཆེན་བཟང་པོས་འདུས་པའི་རྒྱུད་ཉིད་དང་། དེའི་འགྲེལ་པ་སྒྲོན་གསལ་སོགས་གཞུང་ཆེ་ཕྲ་མང་པོ་བསྒྱུར། དེ་དག་གི་དབང་དང་བཤད་པ་སོགས་ཀྱང་དཔྱིས་ཕྱིན་པར་གསན། །གཞན་ཡང་ཕྱི་ནས་ལོ་ཙཱ་བ་མང་པོས་འཕགས་ཡུལ་ནས་མཉན་
เล่ม ๑๐๓ · หน้า 92a
ཏེ་བསྒྱུར་བཤད་ཅི་རིགས་པར་མཛད་མོད་ཀྱི་གཙོ་བོར་མར་འགོས་ཀྱི་ལུགས་གཉིས་སུ་གྲགས་ཆེ། དེའང་འགོས་ལུགས་ནི་ལོ་ཙཱ་བ་ཆེན་པོ་འགོས་ཞུག་པ་ལྷ་བཙས་ཀྱིས་སློབ་དཔོན་ཆེན་པོ་དཱི་པཾ་ཀ་ར་དང་། དེ་ཝཱ་ཀ་ར་ཙནྡཱ་དང་། བིརྱ་བྷ་དྲ་སོགས་པཎྜི་ཏ་བདུན་ཅུ། མཁའ་འགྲོ་མ་
གཉིས་རྣམས་ལས་གསང་བ་འདུས་པའི་དབང་རྒྱུད་འགྲེལ་མན་ངག་དང་བཅས་པ་གསན། བོད་དུ་སྔར་བསྒྱུར་བའི་རྒྱུད་འགྲེལ་ཕྲན་དང་བཅས་པ་རྣམས་ལ་འགྱུར་བཅོས་དང་ཞུས་དག་སོགས་ཤིན་ཏུ་ལེགས་པར་མཛད། སློབ་མ་རྣམས་ལ་རྒྱ་ཆེར་བསྟན་པ་ལས་མངར་བ་སེང་གེ་རྒྱལ་མཚན་སོགས་
སློབ་མའི་མཆོག་དྲུག་བྱུང་། དེ་དག་ལས་ཉེ་བར་བརྒྱུད་དེ་འདུས་པའི་སྐོར་ཤིན་ཏུ་དར་བར་བྱུང་བ་ཡིན་ཏེ་འགོས་ལུགས་སུ་གྲགས་སོ། །མར་པ་ལོ་ཙཱ་ཆོས་ཀྱི་བློ་གྲོས་ཀྱིས་སློབ་དཔོན་ནཱ་རོ་པ་དང་ཡེ་ཤེས་སྙིང་པོ་ལ་སོགས་པ་བསྟེན་ནས་གསང་བ་འདུས་པའི་སྐོར་རྣམས་ཞུས། བོད་དུ་སློབ་མ་
རྣམས་ལ་བསྟན་པ་ལས་སློབ་མའི་མཆོག་ཏུ་གྱུར་པ་ཀ་ཆེན་བཞི་ལས་ཁྱད་པར་དུ་མཚུར་སྟོན་དབང་ངེ་ལ་འདུས་པའི་སྐོར་ཡོངས་སུ་རྫོགས་པར་གནང་། དེས་ཁམས་པ་རོ་མཉམ་རྡོ་རྗེ་ལ་གནང་སྟེ། རོ་མཉམ་རྡོ་རྗེས་རྒྱ་གར་དུ་འདུས་པ་ཉན་པ་ལ་བྱོན་པའི་ཚེ་ལམ་དུ་རྒྱ་གར་བ་གཉིས་
མར་པ་ལ་འདུས་པ་ཉན་དུ་འོངས་པ་དང་འཕྲད་ནས་ཚུལ་བྱོན། མར་པ་གཤེགས་ཟིན་པས་མཚུར་སྟོན་ལ་འདུས་པ་གསན་པ་སོགས་ནས་ཉེ་བར་བརྒྱུད་དེ་མར་ལུགས་སུ་གྲགས་སོ། །འོན་ཀྱང་ཇོ་བོ་རྗེ་ཨ་ཏི་ཤས་ནག་ཚོ་ལ་གསུངས། དེས་རོང་པ་ཕྱག་སོར་བ་ལ་བཤད་པ་སོགས་
ནས་ཇོ་བོ་ལུགས་སུ་གྲགས་པ་བྱུང་ངོ་། །ཡང་ཆག་ཆོས་རྗེ་དཔལ་གྱིས་པཎྜི་ཏ་ར་ཝེནྡྲ་པ་སོགས་བསྟེན་ནས་འདུས་པ་གསན་པ། འུ་ཡུག་ཀུང་ར་བ་བླ་མ་དཔལ་སོགས་ལ་བཤད་པ་ནས་ཉེ་བར་བརྒྱུད་དེ་ཆག་ལུགས་སུ་གྲགས་པ་བྱུང་ངོ༌། །ཡང་ཁ་ཆེ་པཎ་ཆེན་གྱིས་ས་སྐྱ་པཎྜི་ཏ་
དང་། དཔྱལ་ཆོས་ཀྱི་བཟང་པོ་སོགས་ལ་གནང་བ་ནས་པཎ་ཆེན་ལུགས་སུ་གྲགས་པའང་བྱུང་ངོ༌། །གཞན་ཡང་བཤད་སྲོལ་ཅུང་ཟད་འདྲ་མིན་ཡོད་པའི་རྒྱུན་སྣ་ཚོགས་ཞིག་བྱུང་འདུག་ཀྱང་བྲིས་པས་མི་ལང་ངོ༌། །ཕྱི་མ་ཡེ་ཤེས་ཞབས་ལུགས་ནི་དང་པོར་ལོ་ཆེན་རིན་བཟང་ལས་རྐྱང་
เล่ม ๑๐๓ · หน้า 92b
པོ་ཆོས་བློ་སོགས་ལ་དར་ཞིང་སྨྲ་ཏི་ཛྙཱ་ནས་ཀྱང་ཁམས་སུ་བཤད་པ་ཁམས་ལུགས་སུ་གྲགས་པ་བྱུང་། པཎྜི་ཏ་སུ་ན་ཡ་ཤྲཱི་དང་གཉན་ལོ་ནས་བརྒྱུད་པ་ས་སྐྱ་པ་རྣམས་ལ་གྲགས་ཆེ་བས་ས་ལུགས་སུ་གྲགས་པ་དང་། པཎྜི་ཏ་པུཎྱ་ཤྲཱི་སོགས་ལས་རྭ་ལོ་
ཙཱ་བས་གསན་ནས་དར་བ་རྭ་ལུགས་དང་། ཡང་གཉོས་འབྱུང་པོས་བ་ལིང་ཨཱ་ཙཱརྱ་བསྟེན་ཏེ་འདུས་པ་ཉན་པ་ནས་གཉོས་ལུགས་སུ་གྲགས་པ་སོགས་བྱུང་ངོ༌། །དེ་ལྟར་ལུགས་སྔ་ཕྱི་གཉི་གའི་ཕྱོགས་ལ་བོད་ཡུལ་འདིར་ཊཱིཀ་དང་། སྒྲུབ་ཐབས་
དཀྱིལ་ཆོག་དང་མན་ངག་གི་ཡི་གེ་སོགས་རྩོམ་མཁན་ནི་ཤིན་ཏུ་མང་བ་ཞིག་བྱུང་སྣང་ངོ༌། །ཡང་ཕ་རྒྱུད་ལས་གཤེད་སྐོར་ནི། ཕྱི་དར་ལ་དང་པོར་ཅོག་གྲུ་ལོ་ཙཱ་བ་ཤེས་རབ་བླ་མས། གཤིན་རྗེ་གཤེད་ནག་གི་རྒྱུད་དང་། འཇིགས་བྱེད་རྟོག་
བདུན་གཉིས་དང་། འཇིགས་བྱེད་ཞེ་དགུ་མའི་སྒྲུབ་ཐབས་སོགས་བསྒྱུར། དགྲ་གདོང་འཇིགས་གསུམ་གྱི་དབང་དང་བཤད་པའང་དར་བར་མཛད། ནག་ཚོ་ལོ་ཙཱས་ཀྱང་ཇོ་བོ་དང་དམ་ཚིག་རྡོ་རྗེ་སོགས་ལས་གསན་ཏེ་རྒྱུད་འགྲེལ་བསྒྱུར། དབང་
བསྐུར་བ་དང་རྒྱུད་བཤད་པ་སོགས་ལས་ཀྱང་མང་དུ་མཆེད། །རོང་ཟོམ་ཆོས་བཟང་གིས་ཨུ་པཱ་ཡ་ཤྲཱི་མི་ཏྲ་ལ་བསྟེན་ཏེ་ནག་འཇིགས་ཀྱི་རྒྱུད་སོགས་བསྒྱུར་ཏེ་བཤད་པའང་མཛད་དོ། །གཞན་ཡང་གཉོས་དང་རྭ་ལོ་དང་ཤུད་ཀེ་ལོ་ཙཱ་སོགས་མང་པོས་དམར་
ནག་འཇིགས་གསུམ་སོགས་ཀྱི་རྒྱུད་གཞུང་མན་ངག་མང་དུ་གསར་དུ་བསྒྱུར་བ་དང་། འགྱུར་བཅོས་མཛད་པ་སོགས་ཤིན་ཏུ་མང་ཞིང་ཁྱད་པར་སྲོལ་ཆེར་བཏོད་པ་པོ་ནི་དཔྱལ་ལོ་སོགས་བཞི་དང་། རྭ་སྐྱོ་ཞང་གསུམ་དང་། གཉོས་ཏེ་བརྒྱད་ཡིན་པ་
ལས། སྔ་མ་ནི་གཤེད་དམར་གྱི་སྐོར་ཏེ་དཔྱལ་ལོ་ཆོས་དཔལ་བཟང་པོས་ནིཥྐ་ལངྐ་ལ་ཞུས་ནས་བོད་དུ་དར་བ་དང་། དཱ་ན་ཤཱི་ལས་ས་སྐྱ་པཎ་ཆེན་ལ་གནང་བ་དང་། ཆག་ལོས་ཀྱང་བིརཱུ་པའི་གཞུང་སོགས་བསྒྱུར་ཅིང་བསྟན་པ་དང་། གློ་བོ་ལོ་ཙཱས་
เล่ม ๑๐๓ · หน้า 93a
དརྦ་ན་ཨཱ་ཙཱརྱ་སོགས་ལས་གསན་ཅིང་སྤེལ་བ་རྣམས་ཏེ། དེ་དག་གི་རྒྱུན་ལས། གཤེད་དམར་གྱི་སྐོར་རྣམས་ཀྱི་དབང་ཁྲིད་མན་ངག་དང་བཅས་པ་བྱུང་བ་ཡིན་ནོ། །རྭ་ལུགས་ནི། རྭ་ལོ་རྡོ་རྗེ་གྲགས་ཀྱི་བལ་པོ་འབའ་རོ་ཕྱག་
རྡུམ་དང་། མེ་ཙ་ལིང་པ་གཉིས་བསྟེན་ནས། རྡོ་རྗེ་འཇིགས་བྱེད་ཀྱི་དབང་རྒྱུད་མན་ངག་དང་བཅས་པ་གསན། ཁྱད་པར་བལ་པོ་ཐུགས་རྗེ་ཆེན་པོ་ལ་དགྲ་གདོང་འཇིགས་གསུམ་སོགས་ཀྱི་སྐོར་རྫོགས་པར་ས་ལ་གསན། བོད་དུ་ཆོས་འཁོར་ཆེན་པོ་
མཛད་ཅིང་། གཤེད་སྐོར་གནང་བའི་སློབ་མ་ཁོ་ནའང་ཉིས་སྟོང་ལྷག་བྱུང་བར་གྲགས། གཙོ་བོར་རྭ་ཆོས་རབ་སོགས་ཏེ། དེ་དག་ལས་མཆེད་པའི་ཚུལ་ནི་སྨོས་ཀྱིས་མི་ལང་ངོ༌། །སྐྱོ་ལུགས་སུ་གྲགས་པ་ནི། བླ་མ་སྐྱེས་ཨ་མོ་གྷ་བཛྲ་སོགས་
ལས། རྡོ་རྗེ་འཇིགས་བྱེད་ཀྱི་སྐོར་རྣམས་གསན་ནས་དར་བར་མཛད་པ་ཡིན་ཞིང་། ཞང་ལུགས་ནི། གོང་གི་ཅོག་གྲུ་ལོ་ཙཱ་བ་དེས་དེ་ཝཱ་ཀ་ར་ཙནྡྲ་ལ་ནག་འཇིགས་གཉིས་གསན་པ་ནས་ཉེ་བར་བརྒྱུད་པ་རྣམས་ཀྱི་སྲོལ་ཡིན་ནོ། །གཉོས་ལུགས་ནི། གཉོས་
ལོ་ཙཱས་བ་ལིང་ཨཱ་ཙཱརྱ་སོགས་ལས། ནག་པོ་སྐོར་གསུམ་གསན་པ་ནས་མཆེད་པ་དག་གོ། །མ་རྒྱུད་ཀྱི་ཕྱོགས་ལས། །རྡོ་རྗེ་གདན་བཞི་བའི་དབང་ཁྲིད་བཤད་པ་མན་ངག་དང་བཅས་པ་རྣམས། །ལོ་ཆེན་རིན་བཟང་དུས་སུའང་ཅུང་ཟད་བྱུང་ཞིང་། ག་ཡ་དྷ་
ར་དང་། འབྲོག་མི་དཔོན་སློབ་སོགས་ཀྱིས་བསྒྱུར་བཤད་མཛད་པ་དང་། མར་འགོས་གཉིས་ཀྱིས་བཤད་སྒྲུབ་ཀྱི་སྲོལ་ཆེར་བཏོད་པ་ཡིན་ནོ། །སྒྱུ་འཕྲུལ་ཆེན་མོའང་དེ་དང་མཚུངས་ཤིང་། སངས་རྒྱས་ཐོད་པ་ལ་གྱི་ཇོ་ཟླ་བའི་འོད་ཟེར་སོགས་ཀྱིས་རྒྱུད་
འགྲེལ་བསྒྱུར་བཤད་མཛད་པ་དང་། མར་འགོས་སོགས་ལས་ཀྱང་དར་རོ། །བདེ་མཆོག་གི་སྐོར་ནི། ཕྱི་དར་གྱི་ཐོག་མར་ཇོ་བོ་རྗེས་ལོ་ཆེན་རིན་བཟང་དང་། རོང་པ་མགར་དགེ་སོགས་ལ་གནང་ཞིང་། པཎྜི་ཏ་མང་པོ་ལ་བསྟེན་ནས་ལོ་ཆེན་དང་། འགོས་
เล่ม ๑๐๓ · หน้า 93b
སོགས་ཀྱིས་རྒྱུད་དང་། སྒྲུབ་ཐབས། འགྲེལ་པ་སོགས་བདེ་མཆོག་སྐོར་གྱི་གཞུང་མང་དུ་བསྒྱུར། ཕྱིས་ཇོ་བོས་ནག་ཚོ་ལོ་ཙཱ་སོགས་ལའང་གནང་བ་ནས་དར་བ་དང་། གློག་སྐྱ་ཤེས་རབ་བརྩེགས་ཀྱིས། །བལ་པོར་ཕམ་ཐིང་པ་སྐུ་མཆེད་ལ་བདེ་མཆོག་
གི་སྐོར་རྣམས་གསན་ནས། མལ་ལོ་སོགས་ལ་གནང་བ་དང་། མལ་ལོ་ཉིད་ཀྱིས་ཕམ་ཐིང་པ་སྐུ་མཆེད་སོགས་མང་པོ་བསྟེན་ནས་ཞུས་པས། བདེ་མཆོག་སྐོར་ལ་མཁས་པར་གྱུར་པ་དེ་ལ་ས་ཆེན་གྱིས་གསན་པ་སོགས་ནས། ས་སྐྱ་པ་ཡབ་
སྲས་བརྒྱུད་པ་དང་བཅས་པ་རྣམས་ལ་ཆེས་དར་བ་ཡིན་ནོ། །མར་པ་ལོ་ཙཱས་ནཱ་རོ་པ་ལ་བདེ་མཆོག་གི་སྐོར་རྣམས་ཀྱི་ངེས་གསང་བླ་ན་མེད་པ་གསན་ནས། ཕྱིས་བོད་དུ་སློབ་མ་རྣམས་ལ་གདམས་པ་ལས། དབང་དང་ཁྲིད་ཀྱི་སྲོལ་ཁྱད་པར་བ་མང་པོ་མར་མིའི་
བཀའ་རྒྱུད་རྣམས་ལ་དར་བར་སྣང་ཞིང་། ཁྱད་པར་མར་པ་དོ་པས། ནཱ་རོ་པའི་སློབ་མ་མ་ན་ཀ་ཤཱི་སོགས་བླ་མ་མང་པོ་བསྟེན་ནས། ན་རོའི་ལུགས་ཀྱི་བདེ་མཆོག་གི་དབང་། རྒྱུད་བཤད་པ་མན་ངག་དང་བཅས་པ་གསན་ཏེ། བདེ་མཆོག་གི་ཆོས་
སྐོར་ལས་འགྱུར་ཡང་མང་པོ་མཛད། བོད་དུ་སློབ་མའང་མང་དུ་ཚང་ཞིང་། ཁྱད་པར་གཙང་གི་མཁས་པ་རྒྱ་ནམ་དོའི་གཟེ་བ་བློ་ལྡན་སོགས་ཀྱིས་ཆོས་རྒྱུད་ལེགས་པར་གཟུང་སྟེ། འདི་ལས་གྱེས་པའི་བཤད་སྲོལ་དང་། སྒྲུབ་རྒྱུན་ཤིན་ཏུ་འཕེལ་བ་
ཡིན་ནོ། །ཡང་ཕམ་ཐིང་པ་སྐུ་མཆེད་གསུམ་སོགས་ལས་པུ་རོང་ལོ་ཆུང་དང་གཉོས་ལོ་སོགས་ཀྱིས་གསན་ནས། རྒྱུན་བྱུང་བའང་ཅི་རིགས་པར་ཡོད་ཅིང་། དེ་ལས་ཁྱད་པར་པུ་རོང་ལོ་ཆུང་ནས་བརྒྱུད་པ་རྣམས་ཀྱི་བཤད་སྲོལ་བཟང་ལ་ཡུན་རིང་བར་བྱུང་བ་
ཡིན་ནོ། །དེར་མ་ཟད་སུམྦྷ་ལོ་ཙཱ་དྷརྨ་ཡོན་ཏན་གྱིས་པཎྜི་ཏ་ཛ་ཡ་སེ་ན་བསྟེན་ཏེ། བདེ་མཆོག་མཁའ་འགྲོ་རྒྱ་མཚོའི་རྒྱུད་འགྲེལ་ཡན་ལག་དང་བཅས་པ་གསན་ནས་འགྱུར་ཡང་མཛད་དེ། བོད་ཡུལ་དུ་དེ་དག་གི་དབང་བཀའ་དང་།བཤད་དཀའ་
เล่ม ๑๐๓ · หน้า 94a
སོགས་ཆེས་དར་བར་གྱུར་པ་ཡིན་ནོ། །དེའི་ཡུམ་བཀའ་རྡོ་རྗེ་ཕག་མོའི་སྐོར་ཡང་། ལྷ་སོ་བདུན་མར་གྲགས་པའི་དབང་བསྐུར་དང་། བསྙེན་བསྒྲུབ་ཀྱི་རྒྱུན་ཙམ་ཞིག་དར་བར་སྣང་ཞིང་། ཁྱད་པར་ཕག་མོ་གཞུང་དྲུག་ཏུ་གྲགས་པ་ནི་བལ་པོ་
བ་རེནྡྲ་རུ་ཙི་ལ་གཞུང་དྲུག་བྱིན་བརླབས་དང་བཅས་པ་ཞུས། དེ་བཞིན་དུ་རྔོག་ལོ་ཆེན་པོ་དང་། སྣུབས་སྟོན་དང་། ཁུ་ནེ་ཙོ་སོགས་ཀྱིས་ཀྱང་གསན་ནས། དེ་དག་སོ་སོ་ལས་བརྒྱུད་དེ་ཆེས་དར་ཞིང་། རྭ་ལོས་པཎྜི་ཏ་ཨ་བྷི་ཡུལྟ་ལ་གསན་ནས་
ཀྱང་མཆེད་པ་ཡིན་ནོ། །ཡང་མར་ལོས་ནཱ་རོ་པ་སོགས་ལས་གསན་ཏེ་མཆེད་པའི་ལུགས་ཀྱང་ཡོད་དོ། །དཔལ་དགྱེས་པ་རྡོ་རྗེ་ཡབ་ཡུམ་གྱི་སྐོར་ལ། འབྲོག་མི་ལོ་ཙཱ་སོགས་ཀྱིས་རྒྱུད་འགྲེལ་ཕྲན་དང་བཅས་པ་རྣམས་བསྒྱུར་བཤད་མཛད་དེ་དར་བ་
ཡིན་ཞིང་། །དེ་ལས་ཁྱད་པར་འབྲོག་མིས་པཎྜི་ཏ་ག་ཡ་དྷ་ར་ལ་སོགས་བསྟེན་ནས། དབང་རྒྱུད་བཤད་པ་མན་ངག་དང་བཅས་པ་གསན་ནས་ཉེ་བར་བརྒྱུད་དེ། རྗེ་བཙུན་ས་སྐྱ་པ་ཡབ་སྲས་སོགས་ལ་རྒྱ་ཆེར་མཆེད་པ་དང་། འགོས་ལོས་བྲམ་ཟེ་
ནག་པོའི་ཞབས་སོགས་ལས་གསན་ནས་དར་བ་དང་། ཁྱད་པར་མེར་པ་ལོ་ཙཱས་ནཱ་རོ་པ་བསྟེན་ནས་གསན་པ། མེས་རྫོག་གཉིས་ལས་བཤད་སྒྲུབ་ཀྱི་རྒྱུན་ཆེས་ཆེར་དར་བ་དང་། སེ་ཙ་བསོད་ནམས་རྒྱལ་མཚན་གྱིས། ཕམ་ཐིང་པ་ལས་ན་རོའི་
ལུགས་གསན་ནས་དར་བ་སོགས་སོ། །ཁྱད་པར་རྒྱུད་སྡེ་ཐམས་ཅད་ཀྱི་ཡང་རྩེ་དཔལ་དུས་ཀྱི་འཁོར་ལོ་ནི། ཐོག་མར་པཎྜི་ཏ་ཤྲཱི་བྷ་དྲ་བོ་དྷི་དང་། གྱི་ཇོ་ལོ་ཙཱས་རྒྱུད་འགྲེལ་བསྒྱུར་ནས། དབང་བཤད་མན་ངག་གི་སྲོལ་བཏོད་པ་པོམ་ལོ་ཙཱ་སོགས་ལས་
བརྒྱུད་པ་གྱི་ཇོ་ལུགས་དང་། འབྲོ་ལོ་ཙཱས་ཁ་ཆེ་ཟླ་བ་མགོན་པོ་བསྟེན་ནས། མཆོག་མི་འགྱུར་གྱི་ལེའུ་མ་གཏོགས་རྒྱུད་འགྲེལ་རྫོགས་པར་བསྒྱུར། དབང་བཤད་མན་ངག་དང་བཅས་པ་མནོས། ཕྱིས་པཎྜི་ཏས་མཆོག་མི་འགྱུར་ལ་རང་འགྱུར་མཛད།
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด