འཕགས་པ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཏིང་ངེ་འཛིན་གྱི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ
ชื่อสันสกฤต (อักษรทิเบต ตามตัวบท) ཨཱརྱ་སརྦ་དྷརྨ་སྭ་བྷཱ་བ་ས་མ་ཏཱ་བི་པཉྩི་ཏ་ས་མཱ་དྷི་རཱ་ཛ་ནཱ་མ་མ་ཧཱ་ཡཱ་ན་སཱུ་ཏྲ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๕๕ · หน้า 57b
པའི་མི་དབང་སྤྱན། །ཚངས་པའི་སྒྲ་དབྱངས་ཡན་ལག་ཚངས་པས་བྱིན། །གཟི་བརྗིད་སྟོབས་དང་གཟི་ལྡན་གཟི་བརྗིད་མཆོག །གཟི་བརྗིད་དབང་ཕྱུག་གཟི་བརྗིད་མངོན་པར་འཕགས། །གཟི་བརྗིད་ཁྱབ་དང་གཟི་བརྗིད་ཤིན་ཏུ་ངེས། །གཟི་བརྗིད་སྒྲ་དབྱངས་ཤིན་ཏུ་རྣམ་གྲགས་གཟི། །
འཇིགས་བཙན་སྟོབས་དང་འཇིགས་བཙན་བློ་གྲོས་དང་། །ཤིན་ཏུ་འཇིགས་བཙན་འཇིགས་ཞལ་འཇིགས་བཙན་འཕགས། །འཇིགས་བཙན་འོད་འཕྲོ་འཇིགས་མཆོག་འཇིགས་པའི་དབྱངས། །འཇིག་རྟེན་རྣམ་འདྲེན་རྒྱལ་བ་འདི་དག་བྱུང་། །སྒྲ་དབྱངས་ཟབ་མོ་དང་ནི་དཔལ་འཛིན་དང་། །
རྣམ་དག་སྒྲ་ཡི་དབང་ཕྱུག་ཚངས་པའི་དབྱངས། །མཐའ་ཡས་དབྱངས་དང་ཤིན་ཏུ་རྣམ་གྲོལ་དབྱངས། །བདུད་ཀྱི་སྟོབས་དང་བདུད་རྣམས་སྐྲག་བྱེད་དང་། །སྤྱན་བཟངས་དང་ནི་ཞལ་གཙང་སྤྱན་དག་དང་། །རྣམ་པར་དག་པའི་སྤྱན་དང་མཐའ་ཡས་སྤྱན། །ཀུན་ནས་སྤྱན་དང་རྣམ་པར་
གྲགས་པའི་སྤྱན། །སྤྱན་གྱིས་ཟིལ་གྱིས་གནོན་དང་མ་སྨད་སྤྱན། །དུལ་མཆོག་དུལ་དང་ཤིན་ཏུ་དུལ་བའི་སེམས། །དུལ་རབ་ཞི་བའི་དབང་པོ་ཞི་བའི་ཡིད། །ཞི་བའི་བླ་མ་ཞི་དཔལ་རབ་ཏུ་ཞི། །ཞི་བའི་ཕ་རོལ་ཕྱིན་དང་ཞི་བར་དཔའ། །བླ་མར་གནས་པ་ཞི་བ་དུལ་བར་སེམས། །
ཤིན་ཏུ་དུལ་དང་ཞི་དབང་ཞི་བའི་ཡིད། །ཞི་བའི་བླ་མ་ཞི་བའི་དཔལ་འབར་བ། །ཞི་བ་རབ་ཞི་དབང་ཕྱུག་ཞི་བར་དཔའ། །ཚོགས་དབང་ཚོགས་གཙོ་ཚོགས་ཀྱི་དབང་ཕྱུག་དང་། །ཚོགས་རྣམས་ཟིལ་གནོན་ཚོགས་བཟང་ཡེ་ཤེས་གཙང་། །ཚོགས་ཀྱི་དབང་ཆེན་ཚོགས་དབང་དཔའ་
བོ་དང་། །གཞན་ཡང་ཚོགས་བཟང་རབ་ཏུ་རྣམ་པར་འབྱེད། །ཆོས་ཀྱི་རྒྱལ་མཚན་དེ་བཞིན་ཆོས་ཀྱི་ཏོག །ཆོས་ཀྱི་བླ་མ་ཆོས་ཀྱི་རང་བཞིན་འཕགས། །ཆོས་ཀྱི་སྟོབས་ལྡན་ཆོས་བཟང་དཔའ་བོ་དང་། །རང་བཞིན་ཆོས་ཀྱི་བླ་མ་ངེས་པ་བྱུང་། །རང་བཞིན་ཆོས་ཀྱི་བླ་མ་ངེས་
པར་ནི། །མཚན་གཅིག་པ་ཡང་བྱེ་ཕྲག་བརྒྱད་ཅུ་སྟེ། །བསྐལ་པ་གཉིས་ལ་འདྲེན་པ་འདི་དག་བྱུང་། །བྱང་ཆུབ་ཕྱིར་ནི་འདི་དག་ངས་མཆོད་དེ། །རང་བཞིན་ཆོས་ཀྱི་བླ་མ་ངེས་པ་ཡི། །རྒྱལ་བའི་མཚན་རྣམས་གང་དག་ཉན་བྱེད་ཅིང་། །ཐོས་ནས་རྣམ་པར་གྲགས་པའི་མཚན་
เล่ม ๕๕ · หน้า 58a
འཛིན་ན། །དེ་དག་མྱུར་དུ་ཏིང་འཛིན་འདི་ཐོབ་འགྱུར།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། །བམ་པོ་དྲུག་པ། དེ་ནས་བཅོམ་ལྡན་འདས་ཀྱིས་སངས་རྒྱས་མང་པོའི་ཏིང་ངེ་འཛིན་གྱི་སྒོ་སྔོན་བྱུང་བའི་ལེའུ་འདི་ཟླ་འོད་གཞོན་ནུར་གྱུར་པ་ལ་རྒྱ་ཆེར་
རྒྱས་པར་རབ་ཏུ་བསྟན་ཏོ། །སངས་རྒྱས་འདི་དག་གི་ཡང་ཕ་རོལ་ན། །བསྐལ་པ་བསམ་ཡས་དཔག་ཏུ་མེད་པའི་ཚེ། །ལྷ་མིས་མཆོད་པ་སངས་རྒྱས་གཞན་ཞིག་བྱུང་། །དེ་ཡི་མཚན་ནི་མི་དབང་དབྱངས་ཞེས་བྱ། །དེ་བཞིན་གཤེགས་པ་མི་དབང་དབྱངས་ཀྱི་ནི། །ཚེ་ཚད་ལོ་གྲངས་
བདུན་ཁྲི་དྲུག་སྟོང་སྟེ། །ཉན་ཐོས་དག་ནི་བྱེ་བ་བརྒྱ་ཕྲག་གསུམ། །དེ་ཡི་འདུས་པ་དང་པོར་གྱུར་པ་ཡིན། །མངོན་ཤེས་དྲུག་ལྡན་གསུམ་རིག་དབང་པོ་ཐུལ། །མཐུ་ཡང་ཆེ་ཞིང་རྫུ་འཕྲུལ་ཆེན་པོ་སྟེ། །ཟག་པ་ཟད་པ་ཐ་མའི་ལུས་འཛིན་པ། །འོད་མཛད་ཀྱི་ནི་དགེ་འདུན་དེ་ཚེ་བྱུང་། །
བྱེ་བ་ཁྲག་ཁྲིག་སྟོང་ཕྲག་བརྒྱད་ཅུ་ཡི། །བྱང་ཆུབ་སེམས་དཔའ་རྣམས་ཀྱི་ཚོགས་བྱུང་སྟེ། །བློ་གྲོས་ཟབ་ཅིང་གྲགས་པ་ཤིན་ཏུ་ཆེ། །མཐུ་ཡང་ཆེ་ཞིང་རྫུ་འཕྲུལ་ཆེ་བར་གྱུར། །མངོན་པར་ཤེས་པ་ཐོབ་ཅིང་སྤོབས་པར་ལྡན། །སྟོང་པ་ཐམས་ཅད་རྟོགས་པར་ཁོང་དུ་ཆུད། །ཞིང་ནི་
བྱེ་བར་དེ་ལས་ལྷག་པར་ཡང་། །གང་གཱའི་བྱེ་མ་སྙེད་དུ་འཕྲུལ་གྱིས་འགྲོ །རྐང་གཉིས་གཙོ་ལ་དྲི་བ་དྲིས་ནས་ནི། །ཕྱིར་ཡང་རྒྱལ་བ་དེ་ཡི་དྲུང་དུ་འོང་། །མདོ་སྡེ་སྒྲུབ་པའི་ངེས་པའི་ཚིག་ལ་མཁས། །སྣང་བར་གྱུར་པ་ས་ཡི་སྟེང་ན་རྒྱུ། །སེམས་ཅན་དོན་ཕྱིར་སྤྱད་པ་རྣམ་སྤྱོད་དེ། །
བདེ་བར་གཤེགས་པའི་སྲས་པོ་མཐུ་ཆེན་ནི། །འདོད་པའི་རྐྱེན་གྱིས་སྡིག་པ་མི་བྱེད་དེ། །དེ་དག་ལ་ནི་ལྷ་ཡང་སྨོན་པ་སྐྱེད། །སྲིད་པའི་འགྲོ་བར་མི་གནས་དོན་མི་གཉེར། །མཉམ་གཞག་བསམ་གཏན་གནས་པའི་སྤྱོད་ཡུལ་ཅན། །རྣམ་པར་ངེས་པའི་དོན་ལྡན་འཇིགས་མེད་
པ། །དྲི་མ་མེད་པར་རྟག་ཏུ་ཚངས་པར་སྤྱོད། །ཚིག་ཀྱང་རྒྱུན་མི་འཆད་ཅིང་སྤོབས་པར་ལྡན། །ངེས་ཚིག་བསྟན་པའི་ཚིག་གི་དོན་ལ་མཁས། །སངས་རྒྱས་སྲས་པོ་ཀུན་ཏུ་ཡང་དག་སྟོན། །དགེ་བའི་ལས་རྣམས་ཀྱིས་ཀྱང་ཡོངས་སུ་བཟུང་། །བསྐལ་པ་མཐའ་ཡས་པར་
เล่ม ๕๕ · หน้า 58b
ནི་སྤྱོད་པས་འཕགས། །འདྲེན་པ་དག་གིས་རྟག་ཏུ་བསྟོད་ཅིང་བསྔགས། །རྣམ་པར་ཐར་དང་དོན་ཚིག་ཡང་དག་སྟོན། །ཚུལ་ཁྲིམས་ཤིན་ཏུ་དག་ཅིང་ཉོན་མོངས་མེད། །ཆུ་ཡིས་པད་མ་བཞིན་དུ་མི་ཆགས་ཏེ། །ཁམས་གསུམ་ལས་ནི་རྣམ་གྲོལ་བག་ཡོད་པ། །འཇིག་རྟེན་ཆོས་
བརྒྱད་དག་གིས་མི་གོས་ཤིང་། །ལུས་ཀྱང་རྣམ་དག་ལས་ཀྱང་ཡོངས་སུ་དག །འདོད་པ་ཉུང་ཞིང་ཆོག་ཤེས་མཐུ་ཡང་ཆེ། །ཆགས་པ་མེད་ཅིང་སངས་རྒྱས་ཡོན་ཏན་གནས། །སེམས་ཅན་ཀུན་གྱི་རྟེན་དང་དཔུང་གཉེན་ཏེ། །ཚིག་ཙམ་མ་ཡིན་ནན་ཏན་སྙིང་པོར་བྱེད། །གང་ལ་གནས་
པ་དེ་ཉིད་གཞན་ལ་སྟོན། །སངས་རྒྱས་ཐམས་ཅད་ཀྱིས་ཀྱང་ཡོངས་སུ་བཟུང་། །རྒྱལ་བ་རྣམས་ཀྱི་མཛོད་འཛིན་ཐུགས་བརྟན་པ། །ཁམས་གསུམ་ཐམས་ཅད་ལ་ཡང་སྐྲག་པའི་ཡིད། །རབ་ཏུ་སེམས་ཞི་རྟག་ཏུ་དགོན་པར་སྤྱད། །འཇིག་རྟེན་འདྲེན་པ་རྣམས་ཀྱིས་བྱིན་བརླབས་པས། །
མདོ་སྡེ་བྱེ་བ་ཕྲག་སྟོང་འཆད་པར་བྱེད། །འཆད་པ་དེ་ཡང་སངས་རྒྱས་རྣམས་ཀྱིས་བསྔགས། །འཇིག་རྟེན་དག་གི་ཚིག་ཀུན་རྣམ་སྤངས་ཏེ། །སྟོང་པ་ཉིད་ལ་མོས་ཤིང་དོན་དམ་སྟོན། །བསྔགས་པ་མཐའ་ཡས་ཡོན་ཏན་རྒྱ་མཚོ་བཞིན། །མང་དུ་ཐོས་ཤིང་མཁས་པ་ཤེས་རབ་ལྡན། །
གཞོན་ནུ་བསྐལ་པ་བྱེ་བ་མང་པོར་ནི། །རྒྱུན་ཆད་མེད་པར་བསྔགས་པ་རབ་བརྗོད་ཀྱང་། །དེ་ནི་ཅུང་ཟད་ཙམ་ཞིག་བརྗོད་པར་འགྱུར། །རྒྱ་མཚོ་ལས་ནི་ཆུ་ཐིགས་གཅིག་པོ་བཞིན། །དེ་ཚེ་མི་ཡི་དབང་པོའི་དབྱངས་དེ་ནི། །ཏིང་འཛིན་ཞི་བ་མཐོང་དཀའ་འདི་སྟོན་ཏེ། །སྟོང་གསུམ་
ཆེན་པོའི་འཇིག་རྟེན་ཁམས་འདི་ཡང་། །ལྷ་དང་ཀླུ་རྣམས་ཀྱིས་ནི་གང་བར་གྱུར། །དེ་ཡིས་ཏིང་འཛིན་ཞི་བ་འདི་བཤད་ཚེ། །ས་ཡང་རྣམ་པ་དྲུག་ཏུ་རབ་ཏུ་གཡོས། །ལྷ་དང་མི་རྣམས་གང་གཱའི་བྱེ་མ་སྙེད། །སངས་རྒྱས་ཡེ་ཤེས་ལ་ནི་མི་ལྡོག་གནས། །དེར་ཡང་མི་དབང་
རྒྱལ་པོ་བྱུང་བ་ནི། །དཔལ་གྱི་སྟོབས་ཞེས་བྱ་བ་མཐུ་ཆེ་བ། །དེ་ལ་བུ་ཡང་བརྒྱ་ཕྲག་ལྔ་ཡོད་དེ། །བྱད་བཞིན་བཟང་ཞིང་མཛེས་ལ་བལྟ་ན་སྡུག །རྒྱལ་པོ་དེ་ཡི་བཙུན་མོའི་འཁོར་ཀྱང་ནི། །བུད་མེད་བྱེ་བ་བརྒྱ་ཕྲག་བརྒྱད་ཅུ་ཡོད། །ས་བདག་རྒྱལ་པོ་དེ་ཡི་བུ་མོ་ཡང་། །
เล่ม ๕๕ · หน้า 59a
བྱེ་བ་སྟོང་ཕྲག་བཅུ་བཞིར་ཚང་བ་བྱུང་། །དེ་ཡང་སྟོན་ཟླ་ཐ་ཆུངས་ཉ་བ་ལ། །ཡན་ལག་བརྒྱད་ལྡན་གསོ་སྦྱོང་བཟུང་ནས་ནི། །བྱེ་བ་ཁྲག་ཁྲིག་བརྒྱད་ཅུ་ལྷན་ཅིག་ཏུ། །འཇིག་རྟེན་གཙོ་བོའི་དྲུང་དུ་ཉེ་བར་འོངས། །རྐང་གཉིས་གཙོ་བོའི་ཞབས་ལ་ཕྱག་འཚལ་ཏེ། །རྒྱལ་
བ་དེ་ཡི་སྤྱན་སྔར་རྒྱལ་པོ་འདུག །རྒྱལ་པོ་དེ་ཡི་ལྷག་པའི་བསམ་མཁྱེན་ནས། །ཏིང་འཛིན་འདི་ནི་རྐང་གཉིས་དབང་པོས་བཤད། །ཏིང་འཛིན་འདི་ནི་རྒྱལ་པོ་དེས་ཐོས་ནས། །རྒྱལ་སྲིད་མཆིལ་མ་བཞིན་དུ་ཀུན་སྤངས་ཏེ། །གཉེན་དང་རྩ་ལག་སྡུག་པ་ཡོངས་བཏང་ནས། །རྒྱལ་བ་དེ་
ཡི་དྲུང་དུ་རབ་ཏུ་བྱུང་། །བུ་ཡང་བརྒྱ་ཕྲག་ལྔ་དག་རབ་བྱུང་སྟེ། །དེ་བཞིན་བཙུན་མོའི་འཁོར་དང་སྲས་མོ་དང་། །གཉེན་བཤེས་རྩ་ལག་མང་པོ་གཞན་དག་ཀྱང་། །བྱེ་བ་ཁྲག་ཁྲིག་བདུན་ཅུ་རྩ་དྲུག་བྱུང་། །བུ་དང་ཆུང་མར་བཅས་པ་རབ་བྱུང་ནས། །ཁ་ཟས་སྒྲུབ་པའི་ས་ཡང་བོར་ནས་
ནི། །རྒྱུན་མ་ཆད་པར་ལོ་བརྒྱད་བར་དུ་བཅགས། །འཆག་ཅིང་འགྲེང་བཞིན་འཆི་བའི་དུས་ཀྱང་བྱས། །རྒྱལ་པོའི་གླང་པོ་ཏིང་འཛིན་སེམས་དཔའ་དེ། །རྟག་པར་རབ་ཏུ་མཉམ་གཞག་དུས་བྱས་པས། །དེ་ཡང་རྒྱལ་པོའི་ཕོ་བྲང་དེར་སྐྱེས་ཏེ། །མངལ་གྱི་དྲི་མས་མ་གོས་བརྫུས་ཏེ་
བྱུང་། །དེ་ཡི་ཕ་ནི་བརྟན་པའི་སྟོབས་ཞེས་བྱ། །བློ་གྲོས་ཆེ་ཞེས་བྱ་བ་མར་གྱུར་ཏེ། །གཞོན་ནུ་བཙས་མ་ཐག་ཏུ་ཚིག་སྨྲ་བ། །འཇིག་རྟེན་མགོན་པོ་དེ་ཉིད་བཞུགས་སམ་གེ། །འཇིག་རྟེན་མགོན་པོས་བདག་གི་སེམས་མཁྱེན་ནས། །དེ་ཕྱིར་བདག་ལ་ཞི་བའི་ཏིང་འཛིན་བཤད། །
རྐྱེན་རྣམས་མེད་ཅིང་རྐྱེན་དང་བྲལ་བ་ཡང་། །སྲིད་པའི་འགྲོ་བ་རྣམས་ནི་གཅིག་ཏུ་བསྟན། །ཆོས་རྣམས་ཀུན་གྱི་རང་བཞིན་ཕྱག་རྒྱ་གང་། །མདོ་སྡེ་བྱེ་བ་ཁྲག་ཁྲིག་བྱུང་བ་དག །བྱང་ཆུབ་སེམས་དཔའི་ནོར་ནི་བླ་མེད་པ། །ཏིང་འཛིན་འདི་ནི་རྒྱལ་བས་བཤད་མཛད་དམ། །ལུས་ཀྱང་
གཙང་ཞིང་དེ་བཞིན་ངག་གཙང་བ། །སེམས་གཙང་དེ་བཞིན་ལྟ་བ་གཙང་མ་དང་། །དམིགས་པ་རྣམས་ལས་ཡང་དག་འདའ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཆུད་མི་ཟ་བའི་འབྲས་བུ་ཆོས་བསྟན་པ། །ལམ་མཆོག་ཡན་ལག་བརྒྱད་ལྡན་སྒོམ་པ་སྟེ། །དེ་བཞིན་
เล่ม ๕๕ · หน้า 59b
གཤེགས་དང་ཕྲད་ཅིང་ཤེས་རབ་རྣོ། །བདེན་ལ་འཇུག་དང་རྟག་ཏུ་ཆོས་ཤེས་པ། །ཕུང་པོ་ཡོངས་ཤེས་ཁམས་རྣམས་མཉམ་པ་ཉིད། །སྐྱེ་མཆེད་རྣམ་པ་ཀུན་ཏུ་བསལ་བ་སྟེ། །སྐྱེ་བ་མེད་པ་མངོན་སུམ་འཇུག་པ་དག །ཏིང་འཛིན་དེ་ནི་རྒྱལ་བས་བཤད་མཛད་དམ། །སོ་སོ་ཡང་དག་
རིག་པ་བཞི་ལ་འཇུག །ཡི་གེ་ཐམས་ཅད་དབྱེ་བའི་ཡེ་ཤེས་དང་། །དངོས་པོར་འཇུག་པ་ལས་ནི་འདའ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །དབྱངས་རྣམས་ཡོངས་སུ་ཤེས་ཤིང་དགའ་བ་ཐོབ། །བདེ་གཤེགས་བསྔགས་པ་ལ་ཡང་དགར་གྱུར་ཅིང་། །འཕགས་པ་
དག་གི་ཚུལ་འཇམ་དྲང་པོ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །དེས་པ་ནམ་ཡང་ཁྲོ་གཉེར་མི་བྱེད་ཅིང་། །མཉེན་ཞིང་འཇམ་པ་བཞིན་ཡང་འཛུམ་པ་སྟེ། །སེམས་ཅན་མཐོང་ནས་སྔོན་དུ་སྨྲ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ལེ་ལོ་མེད་ཅིང་བླ་
མའི་རི་མོ་བྱེད། །སྲི་ཞུ་ཆེ་བས་ཕྱག་འཚལ་སྡུག་པར་ལྟ། །སྐྱེ་བ་དག་གིས་ཆོག་ཤེས་དཀར་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །འཚོ་བ་དག་ཅིང་དེ་བཞིན་དགོན་གནས་དང་། །སྦྱངས་པ་དག་ལ་གནས་ཤིང་དྲན་མི་ཉམས། །ཕུང་པོ་དང་ནི་ཁམས་ལ་མཁས་པ་
ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །སྐྱེ་མཆེད་མཁས་ཤིང་མངོན་ཤེས་ཡེ་ཤེས་དང་། །ཉོན་མོངས་བསལ་བ་དུལ་བའི་ས་རྣམས་དང་། །གསང་སྔགས་མང་པོ་ཐམས་ཅད་འཆད་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །སྲིད་པའི་འགྲོ་བ་ཀུན་
ལས་འདའ་བ་དང་། །སྐྱེ་བ་དྲན་ཞིང་ཆོས་ལ་ནེམ་ནུར་མེད། །ཆོས་ལ་སེམས་ཤིང་ཐོས་པ་ཚོལ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཁྱད་པར་འགྲོ་ཞིང་རྟག་ཏུ་སྒོམ་ལ་འཇུག །ལྟུང་བ་དག་ལ་མཁས་ཤིང་འབྱུང་བར་གནས། །དེ་ལ་གནས་པས་བག་ལ་
ཉལ་བ་སེལ། །ཏིང་འཛིན་དེ་ནི་རྒྱལ་བས་བཤད་མཛད་དམ། །གང་ལས་ཡེ་ཤེས་རྣོ་བའི་མཆོག་འབྱུང་བ། །མི་གཡོ་རི་བོ་བཞིན་དུ་མི་སྒུལ་བ། །ཕྱིར་མི་ལྡོག་པའི་མཚན་དང་གཟུངས་ཀྱི་སྒོ། །ཏིང་འཛིན་དེ་ནི་རྒྱལ་བས་བཤད་མཛད་དམ། །རྟག་ཏུ་དཀར་པོའི་ཆོས་རྣམས་
เล่ม ๕๕ · หน้า 60a
ཡོངས་ཚོལ་ཞིང་། །སྡིག་པའི་ཆོས་རྣམས་ཁོར་མོར་རྣམ་པར་སྤོང་། །རྟག་ཏུ་ཉོན་མོངས་ཕྱོགས་རྣམས་རྒྱུ་བ་མེད། །ཏིང་འཛིན་དེ་ནི་རྒྱལ་བས་བཤད་མཛད་དམ། །བསླབ་པ་ཀུན་ལ་རྟོགས་པར་ཁོང་དུ་ཆུད། །མཁས་པ་ཏིང་འཛིན་གནས་པ་རྟོགས་པར་རིག །སེམས་ཅན་
དག་གི་བསམ་པ་ཤེས་པས་སྐུལ། །སངས་རྒྱས་བྱང་ཆུབ་མཆོག་ཏུ་ཆོས་ཀྱང་སྟོན། །ཁྱད་པར་ཤེས་པ་སྐྱེ་བ་ཤེས་པ་དང་། །མཐའ་ཡས་ཤེས་པ་ཤིན་ཏུ་རྫོགས་པར་ཤེས། །འགྲོ་བ་ཀུན་ཏུ་མཚམས་སྦྱོར་ཤེས་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཁྱིམ་གྱི་གནས་
སྤངས་རབ་ཏུ་འབྱུང་བའི་སེམས། །ཁམས་གསུམ་ལ་ཡང་མི་དགའ་མི་འཛིན་ཅིང་། །སེམས་རྣམས་རབ་ཏུ་འཛིན་ཅིང་དགའ་བྱེད་པ། །ཆོས་རྣམས་རྐང་གཉིས་གཙོ་བོ་སྟོན་མཛད་པ། །སྐྱོབ་པ་ཆོས་རྣམས་ལ་ཡང་མ་ཆགས་ཤིང་། །རྟག་ཏུ་ཆོས་ཀྱི་མཆོག་ཀྱང་ཡོངས་སུ་འཛིན། །
ལས་ཀྱི་རྣམ་པར་སྨིན་ལ་བརྟན་མོས་པ། །ཆོས་རྣམས་རྐང་གཉིས་གཙོ་བོ་སྟོན་པ་མཛད། །འདུལ་བ་ལ་ཡང་མཁས་ཤིང་རྣམ་སྨིན་ཤེས། །དེ་བཞིན་འཐབ་ཅིང་རྩོད་པ་ཉེ་བར་ཞི། །འཐབ་པ་མེད་ཅིང་རྩོད་པ་མེད་པའི་ས། །ཆོས་རྣམས་རྐང་གཉིས་གཙོ་བོ་སྟོན་པ་མཛད། །བཟོད་པ་
ཡང་དག་འཛིན་ཅིང་ཁྲོ་མེད་གནས། །ཆོས་ལ་རྣམ་པར་ངེས་ཤིང་རྟག་ཏུ་མཁས། །ཚིག་རྣམས་རབ་ཏུ་འབྱེད་ལ་ཡེ་ཤེས་མཐོང་། །ཐུགས་རྗེ་བསྐྱེད་ནས་ཆོས་རྣམས་སྟོན་པ་མཛད། །སྔོན་གྱི་མཐའ་ཤེས་ཕྱི་མའི་མཐའ་ཤེས་ཏེ། །བདེ་གཤེགས་བསྟན་ལས་དུས་གསུམ་མཉམ་པ་
ཉིད། །འཁོར་གསུམ་དག་ནི་ཡོངས་སུ་ཆད་པར་གསུངས། །རྒྱལ་བ་ཆོས་ཀྱི་བདག་པོ་དེ་སྐད་སྟོན། །སེམས་ཀྱང་རབ་ཏུ་གནས་ཤིང་རྩེ་གཅིག་དང་། །ལུས་ཀྱང་རྣམ་པར་གནས་དང་འཕགས་པའི་ས། །སྤྱོད་ལམ་དག་ཀྱང་རྟག་ཏུ་བསྲུང་བ་ཡི། །ཆོས་ནི་སྐྱེས་བུ་ཁྱུ་མཆོག་
ཐུབ་པ་སྟོན། །ཁྲེལ་ཡོད་ངོ་ཚ་ཤེས་ཤིང་མཛེས་པ་དང་། །འཇིག་རྟེན་ཤེས་པ་རིགས་པའི་ཚིག་རྣམས་གསུང་། །ཆོས་རྣམས་འབྱུང་བ་སྲོག་ཆགས་རང་བཞིན་དང་། །བྱང་ཆུབ་དམ་པ་མཆོག་གི་ཆོས་ཀྱང་སྟོན། །རྗེས་སུ་ཕན་གདགས་པ་དང་ཁྲེལ་ཡོད་དང་། །མི་དགེ་བ་ཡི་སེམས་
เล่ม ๕๕ · หน้า 60b
ལ་སྨོད་པ་དང་། །སྦྱངས་པ་རྗེས་སུ་མི་གཏོང་བསོད་སྙོམས་སྦྱོང་། །ཆོས་རྣམས་རྐང་གཉིས་གཙོ་བོ་སྟོན་པ་མཛད། །ཁྲེལ་ཡོད་ངོ་ཚ་ཤེས་པ་རྟག་ཏུ་སྤྱོད། །བླ་མ་ལ་ཡང་གུས་སྨྲ་ལྡང་བ་དང་། །ཐོག་མ་ཉིད་ནས་ང་རྒྱལ་ཚར་བཅད་པར། །ཆོས་རྣམས་རྒྱལ་བ་ཆོས་རྗེ་དེ་ལྟར་སྟོན། །
སེམས་ནི་ལྡང་བ་ནས་ཀྱང་སེམས་དགེ་སྟེ། །ཡེ་ཤེས་ཁོང་དུ་ཆུད་ཅིང་རྟོགས་པར་བྱེད། །མི་ཤེས་ཕྱོགས་རྣམས་རྟག་ཏུ་རྣམ་པར་སྤོང་། །བྱང་ཆུབ་མཆོག་གི་ཆོས་རྣམས་སྟོན་པ་མཛད། །སེམས་ལ་འཇུག་པ་དང་ནི་སྒྲ་ཤེས་པ། །ངེས་པའི་ཚིག་ལ་འཇུག་ཅིང་དོན་རྟོགས་དང་། །གནོད་
པ་ཐམས་ཅད་རྟག་ཏུ་རྣམ་སྤང་པར། །རྒྱལ་བ་ཆོས་ཀྱི་བདག་པོ་དེ་ལྟར་སྟོན། །སྐྱེས་བུ་དམ་པ་རྟག་ཏུ་ཡང་དག་བསྟེན། །སྐྱེས་བུ་ངན་པ་དག་ནི་རྣམ་པར་སྤང་། །རྒྱལ་བ་ལ་ཡང་རྟག་ཏུ་དད་ཅིང་དགའ། །ཆོས་མཆོག་རྒྱལ་བ་དེ་ལྟར་སྟོན་པ་མཛད། །བཏགས་པ་དང་ནི་བརྡ་དང་ཐ་སྙད་
དང་། །འཁོར་བའི་སྡུག་བསྔལ་རྣམས་ནི་རྟག་པར་སྤང་། །རྙེད་དང་མ་རྙེད་པ་ལ་ཞུམ་པ་མེད། །ཆོས་ཀྱི་དམ་པ་རྒྱལ་བས་དེ་ལྟར་བསྟན། །བཀུར་སྟི་རྙེད་ཀྱང་མཚར་དུ་མི་བཟུང་ཞིང་། །བཀུར་སྟི་མ་བྱས་ན་ཡང་བཏང་སྙོམས་བཞག །ཡང་དག་བསྔགས་པས་ནམ་ཡང་རློམ་སེམས་
མེད། །འཇིག་རྟེན་ཕན་པའི་བསྟན་པ་འདི་འདྲའོ། །གཤེ་ཞིང་སྨོད་པ་ཐམས་ཅད་བཟོད་པར་བྱ། །ཁྱིམ་པ་ཀུན་དང་ལྷན་ཅིག་མི་བསྟེན་ཅིང་། །རབ་ཏུ་བྱུང་བ་དང་ཡང་འགྲོགས་མི་བྱ། །རྒྱལ་བ་ཆོས་ཀྱི་བདག་པོ་དེ་སྐད་སྟོན། །སྤྱོད་ཡུལ་མ་ཡིན་ཐམས་ཅད་རྣམ་སྤངས་ནས། །
སངས་རྒྱས་སྤྱོད་ཡུལ་ལ་ནི་རབ་ཏུ་གནས། །སྤྱོད་པ་ཕུན་སུམ་ཚོགས་ཤིང་དུལ་བའི་སེམས། །ཆོས་ཀྱི་ཚུལ་འདི་བདེ་བར་གཤེགས་པས་བཤད། །བྱིས་པའི་ཆོས་རྣམས་རྟག་ཏུ་རྣམ་པར་སྤང་། །རིགས་སུན་པ་ཡང་ཐམས་ཅད་སྤང་བར་བྱ། །སངས་རྒྱས་བསྟན་པ་རྟག་པར་
ཡོངས་སུ་བསྲུང་། །ཆོས་ཀྱི་བདག་པོ་རྒྱལ་བ་དེ་སྐད་སྟོན། །སྨྲ་བ་ཉུང་ཞིང་རབ་ཏུ་འབྲེལ་ལ་སྙན། །གཞན་དག་ལ་ཡང་ཚིག་འཇམ་དགེ་བར་སྨྲ། །ཕས་ཀྱི་རྒོལ་བ་ཆོས་དང་ལྡན་པས་འདུལ། །རྒྱལ་བའི་རྗེས་སུ་བསྟན་པ་འདི་འདྲའོ། །དུས་སུ་འགྲོ་སྟེ་དུས་ལ་མ་བབ་མིན། །
เล่ม ๕๕ · หน้า 61a
སོ་སོའི་སྐྱེ་བོ་ཀུན་ལ་ཡིད་མི་བརྟན། །སྡུག་བསྔལ་རེག་ཀྱང་ཡི་མུག་མེད་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །དབུལ་པོ་མཐོང་ན་ནོར་དང་ལྡན་པར་བྱ། །ཚུལ་ཁྲིམས་འཆལ་པ་མཐོང་ན་བརྩེ་བ་བསྐྱེད། །ཕན་པའི་དངོས་ལ་རྟག་ཏུ་གདམས་
པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །ཆོས་ཀྱིས་སེམས་ཅན་རྣམས་ལ་ཕན་གདགས་ཤིང་། །འཇིག་རྟེན་ཟང་ཟིང་རྟག་ཏུ་གཏང་བར་བྱ། །བསགས་པར་མི་བྱ་སྤུང་བར་མི་བྱ་སྟེ། །རྒྱལ་བའི་རྗེས་སུ་བསྟན་པ་འདི་འདྲའོ། །ཚུལ་ཁྲིམས་བསྔགས་ཤིང་ཚུལ་ཁྲིམས་
འཆལ་པ་སྨད། །གཡོ་སྒྱུ་མེད་ཅིང་ཚུལ་ཁྲིམས་ལྡན་ལ་སྟེན། །ནོར་ལ་མི་གནས་བདོག་པ་ཐམས་ཅད་གཏོང་། །རྒྱལ་བའི་རྗེས་སུ་བསྟན་པ་འདི་འདྲའོ། །ལྷག་པའི་བསམ་པས་བླ་མ་གཉེར་བ་དང་། །ཇི་སྐད་སྨྲས་པ་དེ་བཞིན་ཐམས་ཅད་བྱ། །ཆོས་སྨྲ་བ་ཡང་མི་འཆད་བསྟེན་
པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །རི་མོར་བཅས་ཤིང་རྟག་ཏུ་ཡིད་དགར་བྱ། །ཞི་བའི་ལྟ་བས་ཁོར་མོར་གནས་པར་བྱ། །སྔོན་སྤྱོད་རྣམས་ལ་རྟག་པར་ཤིན་ཏུ་ངེས། །རྒྱལ་བའི་རྗེས་སུ་བསྟན་པ་འདི་འདྲའོ། །དགེ་བའི་སྤྱོད་པར་རྟག་ཏུ་སྔོན་དུ་འགྲོ། །འདུ་
ཤེས་བཟློག་དང་དངོས་པོའི་མཚན་ཉིད་དང་། །མཚན་མ་སྤང་བ་ལ་ཡང་ཐབས་མཁས་པ། །རྒྱལ་བའི་རྗེས་སུ་བསྟན་པ་འདི་འདྲའོ། །མདོ་སྡེ་སྒྲུབ་པའི་ཚིག་ལ་མཁས་པ་དང་། །བདེན་པ་བསྟན་པའི་ཚིག་ལ་གདོན་མི་ཟ། །རྣམ་པར་གྲོལ་བའི་ཡེ་ཤེས་མངོན་དུ་བྱེད། །རྒྱལ་
བའི་རྗེས་སུ་བསྟན་པ་འདི་འདྲའོ། །མགོ་གཅིག་ཏུ་ནི་ཚིག་རྣམས་བརྗོད་པར་བྱ། །ཇི་ལྟ་བཞིན་དུ་མཐོང་ཞེས་རྟོགས་པར་མཁས། །རྟག་ཏུ་ཚིག་ལ་ཐེ་ཚོམ་མེད་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །སྟོང་པ་ཉིད་ཀྱི་ཆོས་ཀྱང་རྟག་ཏུ་བསྟེན། །འཇིགས་པ་མེད་
ཅིང་ཚུལ་ཁྲིམས་སྟོབས་ལ་གནས། །ཏིང་འཛིན་གནས་ཀྱིས་མཉམ་པར་འཇུག་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །ཤེས་ཀྱི་ཁེ་འདོད་ཕྱིར་ནི་ཡོང་མི་བསྟན། །སེམས་ཀྱང་གྱ་གྱུ་ཅན་དུ་མི་བྱ་སྟེ། །བལྟ་བར་བྱས་པ་ཐམས་ཅད་རྣམ་པར་སྤང་། །རྒྱལ་བའི་
เล่ม ๕๕ · หน้า 61b
རྗེས་སུ་བསྟན་པ་འདི་འདྲའོ། །སྤོབས་པ་མཆོག་དང་གཟུངས་ཀྱང་དམ་པ་སྟེ། །ཡེ་ཤེས་སྣང་བ་ཕ་རོལ་མཐའ་མ་མེད། །གསང་སྔགས་བྱིན་བརླབས་རིགས་པར་སྤོབས་པ་ནི། །རྒྱལ་བའི་རྗེས་སུ་བསྟན་པ་འདི་འདྲའོ། །ལམ་འདི་སྒོམ་པ་དག་ནི་ཚུལ་གྱི་སྒོ། །བསྟན་པ་འདི་ལ་སྤྱད་
ནས་ནན་ཏན་དང་། །ཚུལ་དང་གདམས་པ་རྗེས་སུ་བསྟན་པ་བཟང་། །རྒྱལ་བའི་རྗེས་སུ་བསྟན་པ་འདི་འདྲའོ། །རྗེས་སུ་འཐུན་པའི་བཟོད་པ་སངས་རྒྱས་བསྔགས། །བཟོད་ལ་གནས་པས་ཉེས་པ་རྣམ་པར་སྤང་། །ཡེ་ཤེས་ལ་ཡང་གནས་ནས་མི་ཤེས་སྤང་། །རྒྱལ་བའི་རྗེས་སུ་བསྟན་
པ་འདི་འདྲའོ། །ཡེ་ཤེས་རྟེན་ཡིན་དེ་བཞིན་རྣལ་འབྱོར་ས། །བྱང་ཆུབ་ཞུགས་པའི་རྣལ་འབྱོར་དབང་ཕྱུག་སྟེ། །སྐྱེས་བུ་དམ་པ་རྟག་པར་བསྟེན་པ་ནི། །རྒྱལ་བའི་རྗེས་སུ་བསྟན་པ་འདི་འདྲའོ། །མི་རིགས་བརྩོན་པ་ཁོར་མོར་རྣམ་པར་སྤང་། །སངས་རྒྱས་ས་ནི་དེ་བཞིན་གཤེགས་
པས་བཤད། །མཁས་པ་ཀུན་གྱིས་རྗེས་སུ་ཡི་རང་བ། །རྒྱལ་བའི་རྗེས་སུ་བསྟན་པ་འདི་འདྲའོ། །བྱིས་པ་མི་ཤེས་པས་ནི་སྤངས་པ་སྟེ། །འདི་ནི་ཉན་ཐོས་མང་པོའི་ས་མ་ཡིན། །བྱང་ཆུབ་སེམས་དཔའ་དག་གིས་རྟག་ཏུ་བཟུང་། །རྒྱལ་བའི་རྗེས་སུ་བསྟན་པ་འདི་འདྲའོ། །འདི་ནི་དེ་
བཞིན་གཤེགས་པའི་རྗེས་སུ་འབྲང་། །ལྷ་རྣམས་ཀྱིས་ཀྱང་མཆོད་ཅིང་རི་མོར་བྱས། །ཚངས་པ་བྱེ་བ་ཕྲག་སྟོང་ཡི་རང་བ། །ཏིང་འཛིན་དེ་ནི་རྒྱལ་བ་སྟོན་མཛད་དམ། །ནམ་མཁའ་ལྡིང་དང་གནོད་སྦྱིན་མི་འམ་ཅི། །ཀླུ་ཡང་སྟོང་གིས་རྟག་ཏུ་ཕྱག་བྱས་པ། །བྱང་ཆུབ་དམ་པ་
རྒྱལ་བས་གསུངས་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཤིན་ཏུ་མཁས་པས་རྟག་ཏུ་ཡོངས་ཐོབ་སྟེ། །ནོར་མཆོག་དམ་པ་ཡང་ནི་ལེགས་པར་རྙེད། །ཟང་ཟིང་མེད་པའི་ཡེ་ཤེས་གསོ་བ་མཆོག །ཏིང་འཛིན་དེ་ནི་རྒྱལ་བས་བཤད་མཛད་དམ། །ཡེ་ཤེས་མཛོད་
ཡིན་སྤོབས་པ་མི་ཟད་པ། །འདི་ནི་མདོ་སྡེ་བྱེ་བར་འཇུག་པ་སྟེ། །ཁམས་གསུམ་ཡོངས་ཤེས་ཡང་དག་ཤེས་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །གང་ལ་ཏིང་འཛིན་ཞི་བ་འདི་བཤད་པ། །འདི་ནི་ཕ་རོལ་འགྲོ་བའི་གཟིངས་སུ་བསྟན། །འདི་ནི་ཆུ་བོ་རྒལ་བའི་
เล่ม ๕๕ · หน้า 62a
གྲུ་ཡིན་ཏེ། །འདི་ནི་སྙན་གྲགས་བསྔགས་ཕྲེང་འཕེལ་བར་བྱེད། །གང་གིས་ཏིང་འཛིན་ཞི་བ་འདི་བཤད་པ། །དེ་བཞིན་གཤེགས་པ་རྣམས་ལ་བསྟོད་པ་ཡིན། །སྐྱེས་བུ་ཁྱུ་མཆོག་ལ་ཡང་བསྔགས་པ་སྟེ། །བྱང་ཆུབ་སེམས་དཔའི་མི་ཟད་ཡོན་ཏན་ཚུལ། །གང་
དག་ལ་ནི་ཏིང་འཛིན་འདི་བཤད་པ། །འདི་ནི་ཞེ་སྡང་ཞི་བར་བྱམས་པ་བསྟན། །འདི་ནི་སྙིང་རྗེ་ཅན་གྱི་བཏང་སྙོམས་ས། །འདི་ནི་གྲགས་པ་ཆེན་པོའི་དབུགས་འབྱིན་པ། །སེང་གེའི་སྒྲ་སྒྲོགས་རྣམས་ཀྱི་ནན་ཏན་ཏེ། །འདི་ལས་སངས་རྒྱས་ཡེ་ཤེས་མཆོག་ཀྱང་འབྱུང་། །ཆོས་རྣམས་
ཀུན་གྱི་རང་བཞིན་ཕྱག་རྒྱ་སྟེ། །ཏིང་འཛིན་འདི་ནི་འདྲེན་པ་དག་གིས་བཤད། །ཏིང་འཛིན་ཞི་བ་རྒྱལ་བས་བཤད་པ་འདི། །ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད། །འདི་ནི་བྱང་ཆུབ་རབ་ཞུགས་སྤྱོད་པ་སྟེ། །བདུད་ཀྱི་སྡེ་རྣམས་ཤིན་ཏུ་སྐྲག་པར་བྱེད། །རྒྱལ་བས་ཏིང་འཛིན་
ཞི་བ་འདི་བཤད་པ། །སྐྱོབ་པ་ཆོས་ལ་གནས་པའི་རིག་སྔགས་འདི། །དགྲ་ཡི་ནང་དུ་སྲུང་བ་དམ་པ་སྟེ། །ཕས་ཀྱི་རྒོལ་བ་ཆོས་ཀྱིས་ཚར་གཅོད་པ། །ཏིང་འཛིན་ཞི་བ་འདི་ལ་བསྟེན་བྱས་ན། །འདི་ནི་སྤོབས་པའི་སར་ཡང་རབ་ཏུ་བསྟན། །སྟོབས་དང་རྣམ་ཐར་དེ་བཞིན་དབང་པོ་
དང་། །སངས་རྒྱས་ཆོས་རྣམས་བཅྭ་བརྒྱད་བྱེ་བྲག་འཕགས། །སྟོབས་བཅུ་རྣམས་ཀྱང་ཡོངས་སུ་ཚོལ་བ་སྟེ། །སངས་རྒྱས་ཡེ་ཤེས་ཀྱི་ཡང་སྔ་ལྟས་སོ། །སྐྱེས་མཆོག་འཇིག་རྟེན་ཕན་ཞིང་ཐུགས་བརྩེ་བས། །སངས་རྒྱས་ཆོས་རྣམས་རབ་ཏུ་བསྟན་པའང་ཡིན། །སངས་
རྒྱས་དག་གི་སྲས་ཀྱིས་འདི་བཟུང་སྟེ། །འདི་ནི་རྣམ་ཐར་འདོད་པའི་ལམ་དུ་བསྟན། །ཏིང་འཛིན་ཞི་བ་མཐོང་དཀའ་འདི་ཐོས་ནས། །དེ་ལ་བདེ་གཤེགས་སྲས་པོ་དགའ་བར་འགྱུར། །སངས་རྒྱས་ཡེ་ཤེས་ཡོངས་སུ་རྫོགས་པ་དང་། །བྱང་ཆུབ་སེམས་དཔའ་མཁས་པ་ཚོལ་
བ་འདི། །རྣམ་དག་སེམས་གཙང་ཉོན་མོངས་མེད་པ་ཡིས། །ཏིང་འཛིན་ཞི་བ་འདི་ལ་བསྟེན་པར་གྱིས། །རྒྱལ་བ་བཞིན་དུ་དེ་ཡི་ལུས་དག་སྟེ། །རྣམ་པར་ཐར་དང་ཡེ་ཤེས་རྣམ་གྲོལ་མཐོང་། །འདོད་ཆགས་འཆིང་བས་རྟག་ཏུ་ཉོན་མི་མོངས། །ཏིང་འཛིན་བཟང་པོ་འདི་
เล่ม ๕๕ · หน้า 62b
ལ་བསྟེན་པར་གྱིས། །ཞེ་སྡང་ས་མིན་གཏི་མུག་བྲལ་བ་སྟེ། །བདེ་བ་འདོད་པའི་ཡེ་ཤེས་འབྱུང་བ་ཡིན། །རིག་པ་སྐྱེ་ཞིང་མ་རིག་འཇིག་པ་སྟེ། །ཏིང་འཛིན་ཞི་བ་འདི་ལ་བསྟེན་པར་གྱིས། །རྣམ་གྲོལ་སྙིང་པོར་བྱེད་པ་ངོམས་པར་བཤད། །བསམ་གཏན་པ་ལ་ཏིང་འཛིན་ཞི་
འདི་བསྟན། །སངས་རྒྱས་མ་སྨད་པ་ཡི་སྤྱན་ཡིན་ཏེ། །ཏིང་འཛིན་ཞི་བ་འདི་ལ་བསྟེན་པར་གྱིས། །འདི་ནི་ཞིང་མང་སྟོན་པའི་མངོན་པར་ཤེས། །སངས་རྒྱས་མཐའ་ཡས་སྟོན་པའི་རྫུ་འཕྲུལ་ཏེ། །ཏིང་འཛིན་འདི་ཉིད་སྒོམ་པར་བྱེད་པ་ལ། །གཟུངས་དེ་རྣམས་ཀྱང་རྙེད་པར་
དཀའ་མི་འགྱུར། །བྱང་ཆུབ་ཕྱིར་ནི་དབང་པོ་ཞི་བའི་གནས། །འདི་ནི་བྱིན་རླབས་མཐའ་ཡས་སྟོན་པ་སྟེ། །ཏིང་འཛིན་འདི་ནི་བསྙེན་པར་བྱེད་པ་ཡི། །ཡེ་ཤེས་ཕྲ་ཞིང་ཡངས་པ་རྣམ་པར་དག །གང་གིས་ཏིང་འཛིན་ཞི་བ་འདི་མ་ཐོས། །མི་རིགས་བརྩོན་པས་འདི་ནི་རྟོགས་མི་འགྱུར། །
ཡི་གེ་ཐམས་ཅད་རྣམ་པར་བཟློག་པ་སྟེ། །དབྱངས་ཀྱིས་རྣམ་པར་གོ་བར་ནུས་མ་ཡིན། །བྱང་ཆུབ་སེམས་དཔའ་རིག་པས་འདི་ཤེས་ཏེ། །ཆོས་ཀྱི་བདག་པོས་ཇི་ལྟར་གང་བཤད་པ། །ཏིང་འཛིན་འདི་ལ་སྟེན་པར་བྱེད་པ་ཡི། །ཞི་བ་དག་དང་སྨད་པ་མེད་པས་རྟོགས། །
བརྩོན་འགྲུས་བརྩམས་པས་རབ་ཏུ་འདི་བཟུང་སྟེ། །བསྙེན་བཀུར་བྱས་ཤིང་རྟག་ཏུ་ལེགས་པར་བཅངས། །ཏིང་འཛིན་འདི་ལ་བསྙེན་པར་བྱེད་པ་ནི། །སྡུག་བསྔལ་ཟད་ཅིང་སྐྱེ་བ་འགོག་པ་ཤེས། །ཆོས་རྣམས་ཀུན་གྱི་སྐྱེ་བ་མེད་པ་བསྟན། །དེ་ལྟར་སྲེད་པའི་འགྲོ་བ་ཐམས་
ཅད་ན། །སངས་རྒྱས་གྲགས་ཆེན་དག་གི་ཡེ་ཤེས་མཆོག །ཏིང་འཛིན་དེ་ནི་རྒྱལ་བས་བཤད་མཛད་དམ། །གཞོན་ནུ་དེ་ཡིས་ཚིགས་བཅད་འདི་ཐོས་ནས། །ཁྲག་ཁྲིག་སྟོང་ཕྲག་བརྒྱད་ཅུ་རྩ་བརྒྱད་རྣམས། །དབྱངས་ཀྱི་རྗེས་འགྲོ་བཟོད་པ་དེར་ཐོབ་སྟེ། །སངས་རྒྱས་ཡེ་ཤེས་
ལས་ནི་མི་ལྡོག་གནས། །བརྟན་པའི་སྟོབས་ཀྱིས་གཞོན་ནུ་དེ་ལ་སྨྲས། །ད་དུང་འཇིག་རྟེན་མགོན་པོ་དེ་བཞུགས་སོ། །ཁྱེའུ་ཁྱོད་ལ་ནི་དོན་འདི་དྲི་བར་བྱ། །ཏིང་འཛིན་འདི་ནི་ཁྱོད་ཀྱིས་སུ་ལས་ཐོས། །གཞོན་ནུས་སྨྲས་པ་རྒྱལ་པོ་གསན་དུ་གསོལ། །བདག་གིས་
เล่ม ๕๕ · หน้า 63a
བསྐལ་པ་གཅིག་ལ་སངས་རྒྱས་ནི། །བྱེ་བ་ཁྲག་ཁྲིག་མཐོང་སྟེ་རི་མོར་བགྱིས། །ཏིང་འཛིན་ཞི་བ་འདི་ཡང་བདག་གིས་དྲིས། །གཞན་ཡང་བསྐལ་པ་དགུ་བཅུ་རྩ་དགུ་དང་། །བསྐལ་པ་བྱེ་བ་ཁྲག་ཁྲིག་ཕྲག་སྟོང་དུ། །དེ་དང་དེར་བདག་སྐྱེ་བ་དྲན་པར་གྱུར། །ནམ་ཡང་
མངལ་དུ་སྐྱེས་པར་མ་གྱུར་ཏོ། །དེ་ནས་བདག་གིས་ཏིང་འཛིན་འདི་བསྒོམས་ཏེ། །རྒྱལ་བ་དེ་དག་འཆད་པ་དག་པར་ཐོས། །ཐོས་ནས་བཤད་པ་ལ་ཡང་མོས་བསྐྱེད་དེ། །ནེམ་ནུར་མེད་པས་བྱང་ཆུབ་རེག་པར་བགྱི། །དགེ་སློང་སུ་དག་བདག་ལ་ཀུན་འདྲི་ཞིང་། །ཏིང་འཛིན་འདི་ལ་
ཡོངས་སུ་ཆུད་བགྱིད་པ། །དེ་ལ་བདག་ནི་གུས་པར་རི་མོར་བགྱིད། །འཇིག་རྟེན་དོན་མཛད་དག་ལ་བགྱི་བ་བཞིན། །སུ་ལས་བདག་གིས་ཚིགས་བཅད་གཅིག་ཙམ་ཡང་། །ལུང་མནོས་རྗེས་འཐུན་སྤྱད་པ་སྤྱོད་པའི་ཚེ། །དེ་དག་ལ་ཡང་བདག་ནི་སྟོན་པ་སྙམ། །སངས་རྒྱས་
བཞིན་དུ་གུས་པས་རི་མོ་བགྱིད། །ཏིང་འཛིན་ཡོངས་སུ་ཆུབ་པར་བགྱིད་པ་འདི། །སུ་དག་ལ་ལ་བདག་ལ་འདྲི་བ་ཡང་། །འཇིག་རྟེན་འདྲེན་པ་རྒྱལ་བར་མི་འགྱུར་བར། །རྨི་ལམ་ན་ཡང་བདག་ལ་ཐེ་ཚོམ་མེད། །དགེ་སློང་རྒན་རབས་བར་མ་གཞོན་ནུ་ལ། །བདག་ནི་རི་མོ་
གུས་དང་ལྡན་པར་བགྱིད། །རི་མོར་ལྡན་པས་བདག་གི་སྙན་པ་དང་། །དེ་བཞིན་བསོད་ནམས་གྲགས་པ་ཡོན་ཏན་འཕེལ། །འཐབ་ཅིང་རྩོད་པ་དག་ལ་བརྩོན་མི་བགྱིད། །དེ་ཚེ་བདག་ནི་བརྩོན་པ་ཆུང་བར་འགྱུར། །སྡིག་པ་བགྱིས་པས་འགྲོ་བ་གཞན་དུ་འགྱུར། །དགེ་བ་བགྱིས་
པས་འགྲོ་བ་གཞན་དུ་འགྱུར། །མི་རིགས་བརྩོན་པར་སྦྱོར་ཞིང་མ་བསྡམས་པ། །དེ་དག་གི་ནི་མི་སྙན་ཚིག་ཐོས་ནས། །དེ་ཚེ་བདག་གིར་བགྱི་བ་ལས་སུ་འཛིན། །ལས་རྣམས་བགྱིས་པ་རྣམ་པར་ཆུད་མི་ཟ། །དེ་ལ་ཁྲོ་བའི་དབང་དུ་མི་འགྱུར་ཏེ། །སངས་རྒྱས་བསྔགས་པའི་
བཟོད་པའི་སྟོབས་འཛིན་ཏེ། །འདྲེན་པ་དག་གིས་རྟག་ཏུ་བཟོད་པ་བསྔགས། །བཟོད་པ་བསྒོམས་ན་བྱང་ཆུབ་རྙེད་མི་དཀའ། །བདག་ཀྱང་རྟག་ཏུ་ཚུལ་ཁྲིམས་ལྡན་པར་འགྱུར། །ཚུལ་ཁྲིམས་ལ་ཡང་གཞན་དག་རབ་ཏུ་འགོད། །ཚུལ་ཁྲིམས་བསྔགས་པ་རྟག་ཏུ་བདག་
เล่ม ๕๕ · หน้า 63b
བརྗོད་དེ། །དེ་ན་བདག་གི་ཚིག་ཀྱང་བཙུན་པར་གྱུར། །དགོན་པའི་བསྔགས་པ་དག་ཀྱང་རྟག་ཏུ་བརྗོད། །ཚུལ་ཁྲིམས་ལ་ནི་རྟག་པར་རབ་གནས་ཏེ། །རྟག་ཏུ་གསོ་སྦྱོང་དག་ཀྱང་འཛིན་དུ་སྩལ། །དེ་དག་བྱང་ཆུབ་ལ་ཡང་ཡང་དག་བཙུད། །དེ་དག་ཚངས་པའི་སྤྱོད་པ་ཡང་དག་
བསྟབས། །ཆོས་དང་དོན་རྣམས་ལ་ཡང་རབ་ཏུ་གནས། །གང་ལ་མཐའ་དང་ཆགས་པ་འདི་མེད་པ། །བྱང་ཆུབ་ལམ་ལ་དེ་དག་སད་པར་བགྱིས། །བདག་དྲན་བསྐལ་པ་འདས་པའི་དུས་ཤིག་ན། །རྒྱལ་བ་སྒྲ་ཡི་ཡན་ལག་དབྱངས་བྱུང་སྟེ། །དེ་ཡི་སྤྱན་སྔར་བདག་གིས་དམ་བཅས་
པ། །བདག་ནི་རྟག་ཏུ་བཟོད་པའི་སྟོབས་ལྡན་བགྱི། །ཡི་དམ་བཅས་པ་དེ་ལ་གནས་ནས་ནི། །ལོ་གྲངས་བྱེ་བ་བརྒྱད་ཅུ་ཕྲག་བཞིར་ཡང་། །བདག་ལ་བདུད་ཀྱིས་ཤིན་ཏུ་སྨད་ཅིང་སྤྱོས། །འོན་ཀྱང་བདག་གི་སེམས་ནི་ཡོང་མ་འཁྲུགས། །དེར་ནི་བདུད་ཀྱིས་བགམས་ཤིང་སད་
ན་ཡང་། །བདག་གི་བྱམས་བཟོད་བརྟན་པ་འཚལ་ནས་ནི། །སེམས་དང་བདག་གི་རྐང་ལ་ཕྱག་འཚལ་ཏེ། །ལྔ་བརྒྱ་བྱང་ཆུབ་མཆོག་ལ་རབ་ཏུ་ཞུགས། །བདག་ནི་རྟག་ཏུ་སེར་སྣ་མེད་པར་གྱུར། །གཏོང་བའི་བསྔགས་པ་དག་ཀྱང་ཁོར་མོར་འཆད། །ཕྱུག་ཅིང་ནོར་
ལྡན་བདག་ཉིད་ཆེན་པོར་གྱུར། །མུ་གེའི་ཚེ་ཡང་བདག་ཉིད་སྦྱིན་བདག་གྱུར། །དགེ་སློང་སུ་དག་ཏིང་འཛིན་འདི་འཛིན་ཅིང་། །སུ་དག་ཀློག་ཅིང་སུ་དག་ལུང་ནོད་པ། །དེ་དག་ལ་ནི་བདག་ཀྱང་བསྙེན་བཀུར་བགྱིད། །དེ་དག་ཐམས་ཅད་མི་ཡི་མཆོག་ཏུ་འགྱུར། །བདག་ནི་
བླ་ན་མེད་པའི་ལས་དེ་ཡིས། །སངས་རྒྱས་འཇིག་རྟེན་མགོན་པོ་མང་པོ་མཐོང་། །རྒྱལ་བའི་བསྟན་པ་ལ་ཡང་རབ་བྱུང་སྟེ། །རྟག་ཏུ་ཆོས་སྨྲ་བ་ནི་མཁས་པར་གྱུར། །སྦྱངས་པ་ལ་ཡང་རྟག་ཏུ་བདག་བརྩོན་ཏེ། །བས་མཐའ་དགོན་པ་ལ་ཡང་ཁོར་མོར་གནས། །ཁ་ཟས་ཕྱིར་ནི་
ཚུལ་འཆོས་མི་བགྱིད་དེ། །ངན་ངོན་ཙམ་དག་གིས་ཀྱང་ཆོག་ཤེས་གྱུར། །བདག་ནི་རྟག་ཏུ་ཕྲག་དོག་མ་མཆིས་ཏེ། །བདག་ནི་ཁྱིམ་ལའང་ཆགས་པར་མི་འགྱུར་རོ། །ཁྱིམ་ལ་ཆགས་པ་དག་ནི་ཕྲག་དོག་སྐྱེ། །ཕྲག་དོག་མ་མཆིས་ནགས་དགོན་དགའ་བར་བགྱིད། །བདག་
เล่ม ๕๕ · หน้า 64a
ནི་རྟག་ཏུ་བྱམས་ལ་གནས་པར་གྱུར། །གཤེ་ཞིང་སྡིགས་ཀྱང་ཁྲོ་བ་མི་སྐྱེད་དེ། །བྱམས་པ་ལ་ཡང་གནས་པ་དེས་པ་ཡི། །སྙན་པའི་ཕྲེང་བ་ཕྱོགས་བཞིར་རབ་ཏུ་མཆེད། །རྟག་ཏུ་ཆོག་ཤེས་འདོད་པ་ཉུང་བར་གྱུར། །དགོན་པར་གནས་ཤིང་སྦྱངས་པའི་ཡོན་
ཏན་བརྩོན། །བསོད་སྙོམས་ལེན་པ་དག་ཀྱང་མི་གཏོང་སྟེ། །སྦྱངས་པ་ལ་ཡང་ཡི་དམ་བརྟན་པར་གྱུར། །རྟག་ཏུ་དང་བར་བཅས་ཤིང་དད་པར་གྱུར། །ཁོར་མོར་སངས་རྒྱས་བསྟན་ལ་དད་པ་མང་། །དད་པ་མང་བའི་ཕན་ཡོན་འདི་ལགས་ཏེ། །བྱད་བཞིན་བཟང་ཞིང་དབང་པོ་
མ་ཉམས་གྱུར། །གང་དག་འཆད་པ་དེ་ལ་བདག་གནས་ཏེ། །བདག་ནི་རྟག་ཏུ་ནན་ཏན་སྙིང་པོར་བགྱིད། །ནན་ཏན་སྙིང་པོར་བགྱིད་ལ་ལྷ་ཀླུ་ཡང་། །རབ་ཏུ་དང་བའི་སེམས་ཀྱིས་རི་མོར་བགྱིད། །ཡོན་ཏན་ཇི་སྙེད་བརྗོད་པ་འདི་དག་དང་། །གཞན་ཡང་རྣམ་པ་དུ་མ་མང་པོ་ཡོད། །
སངས་རྒྱས་བྱང་ཆུབ་རྟོགས་པར་སུ་འདོད་པ། །མཁས་པ་འདི་དག་རྟག་ཏུ་བསླབ་པར་བགྱི། །འདི་བས་ཆེས་མང་དཀའ་བ་སྤྱད་པ་ནི། །སྔོན་གྱི་བསྐལ་པ་དུ་མར་མང་སྤྱད་དྲན། །ད་ལྟར་དེ་དག་བརྗོད་པར་མི་ནུས་ཀྱིས། །བདེ་བར་གཤེགས་པའི་དྲུང་དུ་ད་མཆིའོ། །བྱང་ཆུབ་སེམས་
དཔའ་ཤེས་རབ་རྣོ་མཁས་དེས། །དེ་ཡི་མོད་ལ་མངོན་ཤེས་ལྔ་ཐོབ་ནས། །དེ་ཡང་སྲོག་ཆགས་བྱེ་བ་བརྒྱད་ཅུ་དང་། །རྫུ་འཕྲུལ་གྱིས་ནི་རྒྱལ་བའི་དྲུང་དུ་སོང་། །བརྟན་པའི་སྟོབས་ཀྱང་མཆོག་ཏུ་དགའ་རངས་ནས། །དེ་ཚེ་བྱེ་བ་བརྒྱ་ཕྲག་དྲུག་ཅུ་དང་། །དེ་བཞིན་གཤེགས་པའི་དྲུང་
དུ་ཉེར་ལྷགས་ཏེ། །ཞབས་ལ་ཕྱག་འཚལ་ནས་ནི་སྤྱན་སྔར་འདུག །རྒྱལ་པོ་དེ་ཡི་ལྷག་པའི་བསམ་མཁྱེན་ནས། །རྐང་གཉིས་དབང་པོས་ཏིང་འཛིན་འདི་བཤད་དེ། །རྒྱལ་པོ་དེས་ཀྱང་ཏིང་འཛིན་འདི་ཐོས་ནས། །རྒྱལ་སྲིད་བཏང་སྟེ་མ་ཆགས་རབ་ཏུ་བྱུང་། །རབ་ཏུ་བྱུང་ནས་ཏིང་
འཛིན་འདི་ལ་སྒོམ། །ཀློག་ཅིང་འཆད་དེ་རབ་ཏུ་སྟོན་པར་བྱེད། །བསྐལ་པ་དྲུག་ཅུ་འདས་པའི་འོག་ཏུ་དེ། །པད་མ་བླ་མ་ཞེས་བྱ་རྒྱལ་བར་གྱུར། །རྒྱལ་པོ་ལྷན་ཅིག་རྒྱལ་བའི་དྲུང་འོངས་པ། །བྱེ་བ་བརྒྱ་ཕྲག་དྲུག་ཅུ་མི་ཉུང་བ། །དེ་དག་ཀྱང་ནི་ཏིང་འཛིན་འདི་ཐོས་ནས། །དེ་ཚེ་
เล่ม ๕๕ · หน้า 64b
དགའ་ཞིང་མགུ་བས་རབ་ཏུ་བྱུང་། །དེ་དག་རབ་ཏུ་བྱུང་ནས་ཏིང་འཛིན་འདི། །བཟུང་ཞིང་བཀླགས་ཏེ་རབ་ཏུ་སྟོན་པར་བྱེད། །བསྐལ་པ་ཁྲག་ཁྲིག་དྲུག་ཅུ་འདས་ནས་ནི། །བསྐལ་པ་གཅིག་ལ་བྱང་ཆུབ་མཆོག་རེག་སྟེ། །མཚན་ནི་ཡེ་ཤེས་བླ་མ་མཐའ་ཡས་པ། །ལྷ་མིས་མཆོད་པའི་
སངས་རྒྱས་རྣམས་སུ་གྱུར། །དེ་ལ་རྐང་གཉིས་གཙོ་བོ་རེ་རེས་ཀྱང་། །སེམས་ཅན་གང་གཱའི་བྱེ་སྙེད་གྲོལ་བར་བྱས། །བྱང་ཆུབ་སྤྱོད་པ་མཆོག་འདི་སྤྱོད་པ་ན། །ང་ནི་རྒྱལ་པོ་དཔལ་གྱི་སྟོབས་སུ་གྱུར། །ང་ཡི་བུ་དག་ལྔ་བརྒྱ་ཡོད་པ་ཡང་། །རྗེས་སུ་ཆོས་རྣམས་སྐྱོང་བ་འདི་དག་ཡིན། །
དེ་ཚེ་གང་སུ་ང་ཡི་མར་གྱུར་པ། །དེ་ནི་ལྷ་མོ་སྒྱུ་འཕྲུལ་ཉིད་ཡིན་ཏེ། །བྱེ་བ་སྟོང་ཕྲག་བཅུ་བཞིར་ཚང་བ་ཡི། །ང་ཡི་བུ་མོ་དེ་ཀུན་མྱ་ངན་འདས། །སྟོབས་བརྟན་ཞེས་བྱ་རྒྱལ་པོ་གང་བྱུང་བ། །རབ་ཏུ་མཛོད་མང་འཁོར་ལོས་སྒྱུར་བའི་མཆོག །དེ་ཚེ་རྒྱལ་པོ་ཟས་གཙང་དེ་ཡིན་ཏེ། །དེ་
དང་དེར་ཡང་ང་ཡི་ཡབ་ཏུ་གྱུར། །དེ་ལྟར་ངས་ནི་བསྐལ་པ་བྱེ་སྟོང་དུ། །ལེ་ལོ་མེད་ཅིང་བརྩོན་འགྲུས་བརྩམས་པ་ཡིས། །བྱང་ཆུབ་མཆོག་འདི་ཡང་དག་སྒྲུབ་པ་ན། །ཏིང་འཛིན་ཡོངས་སུ་ཚོལ་བ་རྣམ་པར་དག །གཞོན་ནུ་དེ་ཕྱིར་བྱང་ཆུབ་སེམས་དཔའ་གང་། །ཏིང་འཛིན་འདི་
ལ་སྒོམ་པར་འདོད་པ་དག །བརྩོན་འགྲུས་བརྩམས་ཤིང་སྲོག་ལ་མི་ལྟ་བར། །གཞོན་ནུ་རྟག་པར་ང་ཡི་རྗེས་སུ་སློབས། །སངས་རྒྱས་མང་པོའི་ཏིང་ངེ་འཛིན་གྱི་སྒོའི་ལེའུ་ཞེས་བྱ་བ་སྟེ་བཅུ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་
པ་ལ་བཀའ་སྩལ་པ། །གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཏིང་ངེ་འཛིན་འདི་འཛིན་པ་དང་ཀུན་ཆུབ་པར་བྱེད་པ་དང་འཆང་བ་དང་ཀློག་པ་དང་རབ་ཏུ་འདོན་པ་དང་ལུང་ནོད་པ་དང་ཁ་ཏོན་བྱེད་པ་དང་གཞན་ལ་ཡང་རྒྱ་ཆེར་རབ་ཏུ་སྟོན་པ་དེ་ལ་ཡོན་ཏན་གྱི་ཕན་ཡོན་
བཞིར་རིག་པར་བྱ་སྟེ། བཞི་གང་ཞེ་ན། འདི་ལྟ་སྟེ། བསོད་ནམས་ཟིལ་གྱིས་མི་ནོན་པར་འགྱུར། ཕས་ཀྱི་རྒོལ་བ་རྣམས་ཀྱིས་མི་རྫི་བར་འགྱུར། ཡེ་ཤེས་དཔག་ཏུ་མེད་པར་འགྱུར། སྤོབས་པ་མཐའ་ཡས་པར་འགྱུར་ཏེ། གཞོན་ནུ་བྱང་ཆུབ་སེམས་དཔའ་སེམས་དཔའ་
เล่ม ๕๕ · หน้า 65a
ཆེན་པོ་གང་ལ་ལ་ཏིང་ངེ་འཛིན་འདི་འཛིན་པ་དང་། ཀུན་ཆུབ་པར་བྱེད་པ་དང་འཆང་བ་དང་ཀློག་པ་དང་རབ་ཏུ་འདོན་པ་དང་ལུང་ནོད་པ་དང་ཁ་ཏོན་བྱེད་པ་དང་གཞན་ལ་ཡང་རྒྱ་ཆེར་རབ་ཏུ་སྟོན་པ་དེ་ལ་ཡོན་ཏན་གྱི་ཕན་ཡོན་འདི་བཞི་ཡོད་པར་རིག་པར་བྱའོ། །དེ་ནས་བཅོམ་ལྡན་
འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་ཀུན་གྱི་སྤྱོད་ཡུལ་བ། །ཏིང་འཛིན་ཞི་བ་འདི་བཟུང་ན། །རྟག་པའི་དུས་སུ་བསོད་ནམས་ཀྱང་། །ཤིན་ཏུ་ཟིལ་གྱིས་མ་ནོན་འགྱུར། །བྱང་ཆུབ་སྤྱོད་པ་བྱེ་བྲག་འཕགས། །མཆོག་ཏུ་དག་པ་སྤྱོད་པ་ན། །དཔའ་
བོ་རྟག་པའི་དུས་སུ་ཡང་། །བསོད་ནམས་དག་གིས་བསྲུང་བར་འགྱུར། །དེ་ལ་ཕས་ཀྱི་རྒོལ་བ་དག །སུ་ཡང་འཚེ་བར་ཡོང་མི་བྱེད། །རྟག་པའི་དུས་སུ་སངས་རྒྱས་ཀྱིས། །ཡོངས་སུ་གཟུང་བར་འགྱུར་བ་ཡིན། །རྟག་པའི་དུས་སུ་ཡེ་ཤེས་ཀྱང་། །དཔག་ཏུ་མེད་པར་འགྱུར་བ་ཡིན། །
ཞི་བའི་རྟེན་འདི་འཛིན་པ་ནི། །སྤོབས་པ་དག་ཀྱང་མཐའ་ཡས་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །རྟག་ཏུ་བསོད་ནམས་ཕུང་པོ་ཟིལ་མི་ནོན། །བྱང་ཆུབ་སྤྱད་པ་དམ་པ་སྤྱོད་པ་ན། །ཕས་ཀྱི་རྒོལ་བ་མེད་ཅིང་མི་ཚུགས་འགྱུར། །དེ་ཡི་ཡེ་ཤེས་ཡངས་ཤིང་རྣོ་བར་
འགྱུར། །དེ་བཞིན་སྤོབས་པ་དག་ཀྱང་མཐའ་ཡས་འགྱུར། །མིག་ཀྱང་དག་འགྱུར་རྟག་ཏུ་མཁས་པ་དེ། །དྲན་པའི་སྟོབས་དང་གཟུངས་ཀྱི་སྟོབས་ཀྱང་འབྱུང་། །དོན་གྱི་ཚིག་རྣམས་རབ་ཏུ་སྟོན་བྱེད་ན། །མཁས་པ་དག་གི་ཤིན་ཏུ་ཡིད་འོང་འགྱུར། །ཏིང་འཛིན་ཞི་མཆོག་འདི་ནི་
རབ་བཤད་ན། །ཤེས་རབ་ལྡན་པ་སྐྱེ་བོ་མང་པོས་རིག །ཏིང་འཛིན་ཞི་བ་མཆོག་འདི་རབ་བཟུང་ན། །ཆོས་གོས་དམ་པ་མཆོག་དང་མལ་ཆ་དང་། །མགྲོན་དུ་གཉེར་དང་བཟའ་ཞིང་བཅའ་བའང་རྙེད། །ཤིན་ཏུ་གཞོན་ཞིང་བལྟ་ན་སྡུག་པར་འགྱུར། །ཏིང་འཛིན་ཞི་བ་
མཆོག་འདི་ཚོལ་བ་ན། །སངས་རྒྱས་འཇིག་རྟེན་མགོན་པོ་མང་པོ་མཐོང་། །འདྲེན་པ་དག་ལ་མཚུངས་མེད་མཆོད་པ་བྱེད། །དེ་ལ་བར་ཆད་དག་ཀྱང་འབྱུང་མི་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །སེམས་དགའ་ཚིགས་བཅད་སྙན་པ་བརྒྱ་དག་གིས། །འཇིག་
เล่ม ๕๕ · หน้า 65b
རྟེན་མགོན་པོའི་སྤྱན་སྔར་བསྟོད་འགྱུར་ཏེ། །དེ་ནི་ཉམས་པར་ནམ་ཡང་ཡོང་མི་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །དེ་ཡི་མདུན་དུ་འཇིག་རྟེན་མགོན་པོ་ནི། །མཚན་དང་དཔེ་བྱད་མཛེས་པའི་སྐུ་བཞུགས་ཏེ། །དེ་ཡི་ཡེ་ཤེས་ཉམས་པར་ཡོང་མི་འགྱུར། །ཏིང་འཛིན་
ཞི་བ་མཆོག་འདི་རབ་བཟུང་ན། །ནམ་ཡང་ཞུམ་པའི་སེམས་སུ་མི་འགྱུར་ཏེ། །རྟག་ཏུ་ཕྱུག་ཅིང་དབུལ་པོ་མ་ཡིན་འགྱུར། །སེམས་ཀྱང་འཛིན་ཅིང་ཆགས་པར་ཡོང་མི་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །མི་ཁོམ་པར་ཡང་གནས་པར་མི་འགྱུར་ཏེ། །ས་བདག་
འཁོར་ལོས་སྒྱུར་བའི་རྒྱལ་པོར་འགྱུར། །དེ་ཡི་རྒྱལ་སྲིད་རྟག་ཏུ་བདེ་བར་འོང་། །བསྐལ་པ་བརྒྱར་ནི་བཤད་ཀྱང་མི་ཟད་དེ། །ཡེ་ཤེས་ཡངས་པ་དེ་ལ་ཐེ་ཚོམ་མེད། །ཏིང་འཛིན་ཞི་བའི་ས་འདི་ཐོས་ནས་ནི། །བརྟན་པ་ཇི་ལྟར་བསྟན་པ་དེ་བཞིན་གནས། །བསྐལ་པ་བྱེ་བ་མཐའ་
ཡས་དཔག་མེད་དུ། །སྟོབས་བཅུས་དེ་ཡི་ཕན་ཡོན་བརྗོད་ན་ཡང་། །ཆ་ཙམ་དུ་ནི་ཡོངས་སུ་བརྗོད་མི་འགྱུར། །རྒྱ་མཚོ་ལས་ནི་ཆུ་ཐིགས་བླངས་པ་བཞིན། །དེ་ཚེ་གཞོན་ནུ་དེ་ཡང་རབ་དགའ་བས། །ལངས་ནས་རབ་ཏུ་ཐལ་སྦྱར་ཕྱག་འཚལ་ཏེ། །མགུ་རངས་སྟོབས་བཅུ་
ཡི་ནི་མངོན་སུམ་འདུག །ཚིག་རབ་མཆོག་གིས་ཆེད་དུ་རྗོད་པ་བརྗོད། །འཇིག་རྟེན་མགོན་པོ་འོད་མཛད་པ། །མི་གཙོས་འདི་དག་ཇི་ཙམ་དུ། །ཕན་ཡོན་ལེགས་པར་རབ་བཤད་པ། །དཔའ་བོ་ཆེན་པོ་བསམ་མི་ཁྱབ། །ཕྱི་མའི་དུས་ན་སུ་དག་ནི། །མདོ་སྡེ་འདི་ལ་
ཉན་པར་འགྱུར། །ཕན་པར་དགོངས་ཤིང་ཐུགས་བརྩེ་བ། །དཔའ་བོ་ཆེན་པོ་བདག་ལ་གསུངས། །ཀ་ལ་པིང་ཀའི་སྒྲ་དབྱངས་ཀྱིས། །སྟོན་པས་དེ་ལ་བཤད་མཛད་དེ། །བཅོམ་ལྡན་ཆགས་མེད་ཡེ་ཤེས་ཅན། །ཚིག་ཀྱང་འདི་སྐད་རབ་ཏུ་གསུང་། །སུ་དག་ཆོས་ཀྱི་
རྗེས་སློབ་ཅིང་། །མདོ་སྡེ་འདི་ནི་ཉན་འགྱུར་བ། །ནན་ཏན་བླ་ན་མེད་པ་ཡང་། །གཞོན་ནུ་བཤད་ཀྱིས་མཉན་པར་གྱིས། །སངས་རྒྱས་ཡེ་ཤེས་རབ་ཚོལ་བས། །མི་དབང་དག་ལ་མཆོད་བྱེད་ཅིང་། །བྱམས་པའི་སེམས་ལ་སྙེན་བྱེད་པ། །མདོ་སྡེ་འདི་ནི་ཉན་པར་འགྱུར། །
เล่ม ๕๕ · หน้า 66a
སྦྱངས་པའི་ཡོན་ཏན་ཡོ་བྱད་བསྙུངས། །ཡོན་ཏན་མཆོག་ལ་བསྙེན་བྱས་ཤིང་། །ནན་ཏན་ལ་ཡང་གནས་ནས་སུ། །མདོ་སྡེ་འདི་ནི་ཉན་པར་འགྱུར། །འཇིག་རྟེན་མགོན་པོའི་བསྟན་པ་ལ། །གང་གིས་ཚུལ་ཁྲིམས་བཤིག་པ་དང་། །སྡིག་པ་བྱེད་པའི་
ལག་ནས་ནི། །མདོ་སྡེ་འདི་ཡང་ཐོས་མི་འགྱུར། །དཔའ་བོ་ཚངས་པར་སྤྱོད་པ་དང་། །གང་གི་སེམས་ཀྱང་མི་བརྐམ་ཞིང་། །སངས་རྒྱས་དག་གིས་བྱིན་བརླབས་པ། །དེ་དག་ལག་ནས་ཐོས་པར་འགྱུར། །གང་གིས་སྔོན་གྱི་སངས་རྒྱས་དག །འཇིག་རྟེན་མགོན་པོ་རི་མོར་
བྱས། །དེ་དག་ལ་གནས་མདོ་སྡེ་འདི། །ཕྱི་མའི་དུས་ན་ཐོས་པར་འགྱུར། །གང་དག་ཚེ་རབས་སྔ་མ་ལ། །མུ་སྟེགས་ཅན་དུ་གྱུར་པ་ནི། །དེ་དག་མདོ་སྡེ་འདི་ཐོས་ན། །ཡིད་ནི་དགའ་ཞིང་བདེར་མི་འགྱུར། །ང་ཡི་བསྟན་པ་འདི་ལ་ནི། །འཚོ་བ་འདོད་ཕྱིར་རབ་བྱུང་ནས། །
རྙེད་དང་བཀུར་སྟིས་ཟིལ་གྱིས་ནོན། །གཅིག་ལ་གཅིག་ཀྱང་སྨོད་པར་བྱེད། །དགེ་སློང་དབང་པོ་མ་བསྡམས་པ། །གཞན་གྱི་བུད་མེད་རབ་སྙེགས་ཤིང་། །ཚུལ་ཁྲིམས་འཆལ་པ་རྙེད་པ་འདོད། །མདོ་སྡེ་འདི་ལ་དད་མི་བྱེད། །སངས་རྒྱས་བརྙེས་པའི་བསོད་ནམས་དང་། །
བསམ་གཏན་ཐོབ་པར་མི་འདོད་ཅིང་། །བདག་ཏུ་འདུ་ཤེས་གནས་པ་དག །མདོ་སྡེ་འདི་ལ་དད་མི་བྱེད། །ཕྱི་མའི་དུས་ན་འབྱུང་བ་ནི། །འཇིག་རྟེན་བསམ་གཏན་འབྲས་བུར་འཛིན། །དགྲ་བཅོམ་བསོད་སྙོམས་ཟོས་ནས་ཀྱང་། །སངས་རྒྱས་བྱང་ཆུབ་སྨོད་པར་བྱེད། །
འཛམ་བུ་ཡི་ནི་གླིང་འདི་ནི། །མཆོད་རྟེན་ཅི་ཡོད་ཀུན་བཤིག་པས། །གང་གིས་མདོ་སྡེ་འདི་སྤངས་ན། །སྡིག་པ་འདི་ནི་ཁྱད་པར་ཆེ། །གང་གིས་གང་གཱའི་བྱེ་སྙེད་ཀྱི། །དགྲ་བཅོམ་དག་ནི་བསད་པ་བས། །གང་གིས་མདོ་སྡེ་འདི་སྤངས་ན། །སྡིག་པ་འདི་ནི་ཁྱད་པར་ཆེ། །
མི་བཟད་པ་ཡི་ཕྱི་དུས་ལ། །དམ་པའི་ཆོས་ནི་འཇིག་པའི་ཚེ། །མདོ་སྡེ་འདི་ནི་རབ་བཤད་པར། །ཁྱེད་ལ་སུ་དག་སྤྲོ་བ་ཡོད། །དེ་ཚེ་གཞོན་ནུ་ལངས་ནས་ནི། །ངུ་ཞིང་རྒྱལ་ལ་འདི་སྐད་གསོལ། །སངས་རྒྱས་ཐུགས་ཀྱི་སྲས་པོ་ཡིས། །འདི་སྐད་སེང་གེའི་སྒྲ་ཡང་
เล่ม ๕๕ · หน้า 66b
བསྒྲགས། །རྫོགས་པའི་སངས་རྒྱས་མྱ་ངན་འདས། །མི་བཟད་པ་ཡི་ཕྱི་དུས་ལ། །ལུས་དང་སྲོག་ཀྱང་རབ་བཏང་སྟེ། །བདག་གིས་མདོ་སྡེ་རྒྱས་པར་བགྱི། །བྱིས་པ་རྣམས་ཀྱི་མི་བདེན་པ། །བརྒྱད་ཅིང་སྤྱོས་པ་བཟོད་པར་བགྱི། །གཤེ་བ་དང་ནི་བསྡིགས་པ་ཡང་། །འདྲེན་
པ་དང་དུ་བླང་བར་བགྱི། །བྱང་ཆུབ་སེམས་དཔའ་གཞན་དག་ལ། །ངན་སེམས་དག་ནི་བསྐྱེད་པ་འམ། །གང་སྔོན་བདག་གིས་སྡིག་པ་ཡི། །ལས་རྣམས་བགྱིས་པ་བྱང་བར་བགྱི། །སྤྱི་བོ་ལ་ནི་ཕྱག་བཞག་སྟེ། །སངས་རྒྱས་གསེར་གྱི་མདོག་འདྲ་བ། །དེ་བཞིན་གཤེགས་
པ་འཇམ་པའི་དབྱངས། །ཟླ་འོད་ལ་ནི་སྟོན་པ་གསུང་། །གཞོན་ནུ་ཕྱི་མའི་དུས་དག་ལ། །ཁྱོད་ཀྱིས་ཚངས་པར་སྤྱོད་པ་དང་། །སྲོག་གི་བར་ཆད་མི་འབྱུང་བར། །ཁྱོད་ལ་བྱིན་གྱིས་བརླབ་པར་བྱ། །ཆོས་སྨྲ་བ་ནི་གཞན་དག་ཀྱང་། །བརྒྱད་བརྒྱ་པོ་དག་ལངས་ནས་ནི། །ཕྱི་མའི་
དུས་ལ་བདག་ཅག་ཀྱང་། །མདོ་སྡེ་འདི་ནི་འཛིན་པ་ལགས། །ལྷ་དང་ཀླུ་དང་གནོད་སྦྱིན་ཡང་། །བྱེ་བ་བརྒྱད་ཅུ་ཉེར་ལྷགས་ཏེ། །གཞན་ཡང་ཁྲག་ཁྲིག་དྲུག་ཅུ་རྣམས། །འཇིག་རྟེན་མགོན་ལ་འདི་སྐད་སྨྲ། །དགེ་སློང་དག་ནི་འདི་རྣམས་ལས། །དེ་རིང་སུ་དག་ལངས་པ་རྣམས། །ཕྱི་དུས་
དེ་ཚེ་བདག་ཅག་གིས། །འདྲེན་པ་རབ་ཏུ་བསྲུང་བར་བགྱི། །མདོ་སྡེ་འདི་ནི་བཤད་པའི་ཚེ། །སྟོན་པ་ཡི་ནི་བྱིན་རླབས་ཀྱིས། །གང་གཱའི་བྱེ་མ་མཉམ་པ་ཡི། །སངས་རྒྱས་ཞིང་རྣམས་རབ་ཏུ་གཡོས། །ཞིང་རྣམས་ཇི་སྙེད་རབ་གཡོས་པས། །ཀུན་ཏུ་སངས་རྒྱས་སྤྲུལ་པ་དག །
འཇིག་རྟེན་མགོན་པོས་རབ་བཀྱེ་སྟེ། །དེ་དག་གིས་ཀྱང་ཆོས་རབ་བསྟན། །ཞིང་དེ་སོ་སོ་རེ་རེར་ཡང་། །སེམས་ཅན་བྱེ་བ་བསམ་མི་ཁྱབ། །དེ་ཚེ་དེ་འདྲའི་ཆོས་ཐོས་ནས། །སངས་རྒྱས་ཀྱི་ནི་ཡེ་ཤེས་བཀོད། །སངས་རྒྱས་ཀྱི་ཡང་ཞིང་འདི་ནས། །སེམས་ཅན་བྱེ་བ་དགུ་བཅུ་
རྣམས། །བྱང་ཆུབ་ཀྱི་ནི་སེམས་བསྐྱེད་དེ། །སངས་རྒྱས་ལ་ཡང་མེ་ཏོག་འཐོར། །བསྐལ་པ་བྱེ་བ་བརྒྱད་ཅུ་ན། །བསྐལ་པ་གཅིག་ལ་ཐམས་ཅད་ཀྱང་། །རྣམ་པར་འདྲེན་པ་ཉིད་འགྱུར་ཞེས། །དེ་དག་མི་གཙོས་ལུང་བསྟན་ཏོ། །དགེ་སློང་དང་ནི་དགེ་སློང་མ། །དགེ་བསྙེན་
เล่ม ๕๕ · หน้า 67a
ཕ་དང་དགེ་བསྙེན་མ། །སྲོག་ཆགས་བྱེ་བ་བདུན་ཅུ་དྲུག །གང་དག་མདོ་སྡེ་འདི་ཐོས་པ། །དེ་དག་མི་གཙོས་ལུང་བསྟན་ཏེ། །བྱང་ཆུབ་སྤྱོད་པ་རབ་སྤྱོད་ཅིང་། །གང་གཱའི་བྱེ་མ་མཉམ་པ་ཡི། །འཇིག་རྟེན་འདྲེན་པ་མཐོང་བར་འགྱུར། །སངས་རྒྱས་ཡེ་ཤེས་རབ་
ཚོལ་བས། །ཐམས་ཅད་ལ་ཡང་མཆོད་པ་བྱེད། །མདོ་སྡེ་བླ་ན་མེད་པ་འདི། །དེ་དང་དེར་ཡང་ཐོས་པར་འགྱུར། །བྱམས་པ་ཡི་ནི་སངས་རྒྱས་ལ། །བླ་ན་མེད་པའི་མཆོད་བྱས་ཏེ། །དམ་པའི་ཆོས་མཆོག་བཟུང་ནས་ནི། །བདེ་བ་ཅན་དུ་འགྲོ་བར་འགྱུར། །གང་ན་སངས་རྒྱས་
རྡུལ་བྲལ་བ། །ཚེ་དཔག་མེད་པ་དེ་བཞིན་གཤེགས། །དེ་ལ་བྱང་ཆུབ་མཆོག་གི་ཕྱིར། །མཆོད་པ་དག་ཀྱང་བྱེད་པར་འགྱུར། །མདོ་སྡེ་དམ་པ་འདི་ཐོས་ན། །མ་འོངས་པ་ཡི་བསྐལ་པར་ནི། །གྲངས་མེད་བདུན་ཅུ་རྩ་གསུམ་དུ། །ངན་འགྲོ་རྣམས་སུ་ཡང་མི་འགྲོ། །ཕྱི་མའི་
དུས་ལ་སུ་དག་ནི། །མདོ་སྡེ་དམ་པ་ཉན་འགྱུར་ཞིང་། འཆང་ངམ་ཀློག་པར་བྱེད་པ་ཡང་། །དེ་དག་ཀུན་གྱིས་ང་ལ་མཆོད། །ཇི་སྙེད་མདུན་ན་འདུག་པ་རྣམས། །ཐམས་ཅད་ལ་ཡང་བསྒོ་བྱ་སྟེ། །ངས་ནི་དཀའ་བས་ཐོས་པ་ཡི། །བྱང་ཆུབ་འདི་ཡང་ཡོངས་སུ་གཏད། །ཏིང་ངེ་
འཛིན་རྗེས་སུ་གཏད་པའི་ལེའུ་སྟེ་བཅྭ་བརྒྱད་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་
འཛིན་ལས་ཡོན་ཏན་གྱི་ཕན་ཡོན་བསམ་གྱིས་མི་ཁྱབ་ཅིང་དཔག་ཏུ་མེད་པ་ཐོས་ནས་མི་སྐྲག་པར་འདོད་པ་དང་མི་དངང་བར་འདོད་པ་དང་དངང་བར་མི་འགྱུར་བར་འདོད་པས་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་མཁས་པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མོས་
པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་དྲི་བ་ལ་མཁས་པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་བཙལ་བ་ལ་མཁས་པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོས་ནས་མི་སྐྲག །མི་དངང་དངང་བར་མི་འགྱུར་བར་བྱའོ། །དེ་སྐད་ཅེས་བཀའ་
เล่ม ๕๕ · หน้า 67b
སྩལ་པ་དང་། ཟླ་འོད་གཞོན་ནུར་གྱུར་པས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་ཇི་ལྟ་བུར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་
མཁས་པ་ལགས། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མོས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་འདྲི་བ་ལ་མཁས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོས་ན་མི་སྐྲག་མི་དངང་དངང་བར་མི་འགྱུར་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་
འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཉན་ཅིང་ཐོས་ནས་ཀྱང་འཛིན་པ་དང་ཀུན་ཆུབ་པར་བྱེད་པ་དང་འཆང་བ་དང་ཀློག་པ་དང་
རབ་ཏུ་འདོན་པ་དང་ཉོན་མོངས་པ་མེད་པར་བསྒོམ་པས་སྒོམ་པར་བྱེད་པ་དང་། མང་དུ་བྱེད་པ་དང་། གཞན་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ན་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་མཁས་པར་འགྱུར་རོ། །སངས་
རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མོས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་འདྲི་བ་ལ་མཁས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོས་ན་མི་སྐྲག་མི་དངང་དངང་བར་མི་འགྱུར་རོ། །ཡང་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་
ངེ་འཛིན་ལས་ཡོན་ཏན་གྱི་ཕན་ཡོན་བསྒྲུབ་པའི་ཚིག་འདི་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་ངེས་པར་བསྟན་པ་ན་ཟླ་འོད་གཞོན་ནུར་གྱུར་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་ཡོན་ཏན་གྱི་ཕན་ཡོན་བསྒྲུབ་པའི་ཚིག་དཔག་ཏུ་མེད་པ་
བསམ་གྱིས་མི་ཁྱབ་པ་བཅོམ་ལྡན་འདས་ལས་ཐོས་ནས་དེའི་ཚེ་ཟླ་འོད་གཞོན་ནུར་གྱུར་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་གྱི་རྒྱལ་པོ་འདི་རབ་ཏུ་ཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཡང་མངོན་པར་ཤེས་
เล่ม ๕๕ · หน้า 68a
པ་ཆེན་པོ་ཐོབ་པར་གྱུར་ཏོ། །སེམས་ཅན་དཔག་ཏུ་མེད་པ་ཡང་སྙིང་རྗེ་ཆེན་པོར་འཇུག་པ་ལ་མངོན་དུ་ཕྱོགས་པའི་སེམས་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས། །རབ་ཏུ་གཡོས། ཀུན་ཏུ་རབ་ཏུ་གཡོས། འགུལ་
རབ་ཏུ་འགུལ་ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག་ཀུན་ཏུ་རབ་ཏུ་ལྡེག །འཁྲུགས་རབ་ཏུ་འཁྲུགས་ཀུན་ཏུ་རབ་ཏུ་འཁྲུགས། ཆེམ་ཆེམ་རབ་ཏུ་ཆེམ་ཆེམ་ཀུན་ཏུ་རབ་ཏུ་ཆེམ་ཆེམ། འུར་འུར་རབ་ཏུ་འུར་འུར་ཀུན་ཏུ་རབ་ཏུ་འུར་འུར། ཤར་ཕྱོགས་དམའ་ན་ནུབ་ཕྱོགས་མཐོ། ནུབ་
ཕྱོགས་དམའ་ན་ཤར་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། མཐའ་དམའ་ན་དབུས་མཐོ། དབུས་དམའ་ན་མཐའ་མཐོ་ཞིང་། སྣང་བ་དཔག་ཏུ་མེད་པ་ཡང་འཇིག་རྟེན་དུ་བྱུང་། ལྷའི་སྤོས་ཀྱི་ཆར་ཆེན་པོ་ཡང་མངོན་པར་བབ་བོ། །
ལྷ་དང་ལྷའི་བུ་ཇི་སྙེད་ཆོས་མཉན་པའི་ཕྱིར་འདུས་ཏེ་ལྷགས་པ་དེ་དག་ནམ་མཁའ་ལ་མངོན་པར་འཕགས་ནས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་ཡོན་ཏན་གྱི་ཕན་ཡོན་གྱི་ཚིག་དཔག་ཏུ་མེད་པ་འདི་དག་ཐོས་ནས་ལྷ་དང་ལྷའི་བུ་དེ་དག་ཐམས་ཅད་དགའ་མགུ་ཡི་
རངས་ཏེ། རབ་ཏུ་དགའ་བ་དང་ཚིམ་པ་དང་ཡིད་བདེ་བ་སྐྱེས་ནས་ཨ་ལ་ལ་ཞེས་ག་ཞ་སྒྲོགས་པའི་སྒྲ་བྱེད་དོ། །ལྷའི་མེ་ཏོག་རྣམ་པ་སྣ་ཚོགས་ཀྱི་མེ་ཏོག་གི་ཆར་ཆེན་པོ་འབེབས་སོ། །ལྷའི་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དུ་མ་ཡང་རབ་ཏུ་རྡུང་ངོ་། བརྗོད་པ་གཅིག་པའི་དབྱངས་ཀྱིས་ཚིག་
འདི་སྐད་ཅེས་འཛེར་ཏོ། །ཨ་ལ་ལ་བདག་ཅག་གིས་ནི་རྙེད་པ་ལེགས་པར་རྙེད་དེ། འདི་ལྟར་བདག་ཅག་གིས་བཅོམ་ལྡན་འདས་ལས་ཡོན་ཏན་གྱི་ཕན་ཡོན་བསྒྲུབ་པའི་ཚིག་དཔག་ཏུ་མེད་པ་འདི་དག་ཐོས་ནས་བཅོམ་ལྡན་འདས་བདག་ཅག་ཐམས་ཅད་ཀྱང་ཅིག་ཆར་འཐུན་པར་བྱང་ཆུབ་སེམས་
དཔའ་སེམས་དཔའ་ཆེན་པོ་ཟླ་འོད་གཞོན་ནུར་གྱུར་པས་ཇི་ལྟར་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཐོབ་པ་དེ་བཞིན་དུ། བཅོམ་ལྡན་འདས་བདག་ཅག་ཐམས་ཅད་ཀྱིས་ཀྱང་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་
เล่ม ๕๕ · หน้า 68b
ཐོབ་པར་བགྱིའོ། །དེ་ནས་དེའི་ཚེ་བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་འཁོར་རྒྱ་མཚོའི་ནང་ན་ཆོས་སྟོན་པ་ལ་དྲི་ཟའི་བུ་གཙུག་ཕུད་ལྔ་ཅན་ཞེས་བྱ་བ་རིམ་གྲོ་དང་བསྙེན་བཀུར་བྱ་བའི་ཕྱིར་སིལ་སྙན་ལྔ་བརྒྱ་དང་བཅས་ཏེ་ནམ་མཁའ་ལས་བབས་ནས་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་
ནས་དྲི་ཟའི་བུ་གཙུག་ཕུད་ལྔ་ཅན་འདི་སྙམ་དུ་སེམས་ཏེ། བདག་ཅག་གིས་སུམ་ཅུ་རྩ་གསུམ་པའི་ལྷ་རྣམས་དང་ལྷའི་དབང་པོ་བརྒྱ་བྱིན་གྱི་ལྷའི་མདུན་ས་ཆོས་བཟང་ན་ཇི་ལྟ་བ་བཞིན་དུ་རིམ་གྲོ་དང་བསྙེན་བཀུར་བྱའོ། །གླུ་དབྱངས་དག་ཇི་ལྟར་ལེན་པ་དེ་བཞིན་དུ་དེང་ལྷའི་ལྷ་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ལ་ཡང་མཆོད་པའི་ཕྱིར་གླུ་དབྱངས་རབ་ཏུ་སྦྱར་རོ། །དེ་ནས་དྲི་ཟའི་བུ་གཙུག་ཕུད་ལྔ་ཅན་སིལ་སྙན་ཐོགས་པ་ལྔ་བརྒྱ་པོ་དེ་དག་དང་སྒྲ་གཅིག་ཏུ་སྦྱར་ཏེ། པི་བང་གི་ཁོག་པ་བཻ་དཱུརྱ་ལས་བྱས་པ་དག་ཀྱང་ཐོགས་ནས་བཅོམ་ལྡན་འདས་ཀྱི་སྤྱན་སྔར་
བླངས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་འདུ་བྱས་པས་ཟླ་འོད་གཞོན་ནུར་གྱུར་པ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ངེས་པར་རྟོགས་པ་ལ་མཁས་པ་འཐོབ་པ་དང་། ཆོས་ཐམས་ཅད་ཀྱི་རང་བཞིན་མཉམ་པ་ཉིད་
རྣམ་པར་སྤྲོས་པའི་ཏིང་ངེ་འཛིན་ལས་མི་གཡོ་བ་དང་། དྲི་ཟའི་བུ་གཙུག་ཕུད་ལྔ་ཅན་ལ་ཡང་རྒྱུད་ཀྱི་སྒྲ་དང་གླུའི་སྒྲ་ལ་མཁས་པ་བསྟན་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་ངས་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་
པར་འདུ་མཛད་དེ། སངས་རྒྱས་ཀྱི་མཐུས་སིལ་སྙན་ལྔ་བརྒྱ་པོ་ཤིན་ཏུ་ལེགས་པར་སྦྱར་བ། ལེགས་པར་བླངས་པ་དེ་དག་ལས་བསམ་གྱིས་མི་ཁྱབ་པའི་དོན་དང་ལྡན་པ་ཆོས་ཉིད་དང་ལྡན་པའི་སྒྲ་བྱུང་ངོ་། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ངེས་པར་རྟོགས་པའི་ཚིགས་སུ་
བཅད་པ་འདི་དག་ཀྱང་བྱུང་ངོ་། །སྐྲ་གཅིག་ཁྱོན་ལ་སངས་རྒྱས་མང་པོ་ནི། །གང་གཱའི་ཀླུང་གི་བྱེ་མ་ཅི་ཡོད་སྙེད། །རྒྱལ་བ་དེ་དག་ཞིང་ཡང་དེ་སྙེད་དེ། །དེ་དག་མཚན་ཉིད་མི་འདྲ་སྐལ་མི་མཉམ། །སྐྲ་ཡི་ཁྱོན་ལ་འགྲོ་བ་ལྔ་རྣམས་ཏེ། །སེམས་ཅན་དམྱལ་དང་དུད་འགྲོར་
เล่ม ๕๕ · หน้า 69a
འགྲོ་བ་དང་། །གཤིན་རྗེའི་འཇིག་རྟེན་ལྷ་དང་མི་རྣམས་ཞུགས། །འདྲེས་པ་མེད་ཅིང་གནོད་པར་འགྱུར་བའང་མེད། །དེ་ཡི་གནས་སུ་མཚོ་དང་རྒྱ་མཚོར་བཅས། །ཆུ་ཀླུང་དེ་བཞིན་མཚེའུ་དང་ལྟེང་ཀ་རྣམས། །འདྲེས་པ་མེད་ཅིང་གནོད་པར་མི་འགྱུར་ཏེ། །དེ་ལྟར་རྒྱལ་
བའི་ཆོས་ནི་བསམ་མི་ཁྱབ། །དེ་ཡི་གནས་སུ་རི་བོ་དུ་མ་སྟེ། །ཁོར་ཡུག་དང་ནི་ལྷུན་པོ་རབ་ལྷུན་དང་། །བཏང་བཟུང་དང་ནི་བཏང་བཟུང་ཆེན་པོ་དང་། །འབིགས་བྱེད་བྱ་རྒོད་ཕུང་པོ་གངས་ཀྱི་རི། །གནས་དེར་སེམས་ཅན་དམྱལ་བ་མི་བཟད་པ། །ཚ་དང་རབ་ཏུ་ཚ་བ་ཉམས་མི་དགའ། །
དེ་ན་སེམས་ཅན་དམྱལ་སྐྱེས་ཚོར་བ་ཡི། །སྡུག་བསྔལ་དེ་དག་རྗེས་སུ་མྱོང་བར་བྱེད། །དེ་ཡི་གནས་ན་ལྷ་ཡི་གཞལ་མེད་ཁང་། །དེ་དག་དཔག་ཚད་བཅུ་གཉིས་དབྱངས་དགའ་བ། །ལྷ་རྣམས་སྟོང་ཕྲག་མང་པོ་དེ་དག་ཀྱང་། །ལྷ་ཡི་དགའ་བ་ཤིན་ཏུ་བདེ་བ་མྱོང་། །དེ་ཡི་གནས་སུ་
སངས་རྒྱས་རྣམས་སྐྱེ་ཞིང་། །འཇིག་རྟེན་རིག་པའི་བསྟན་པ་འབར་བ་སྣང་། །གང་གིས་རྣམ་དག་སྤྱོད་པ་མ་སྦྱངས་པ། །ཡེ་ཤེས་བྲལ་བ་དག་གིས་དེ་མི་མཐོང་། །དེ་ཡི་གནས་ཉིད་ན་ཡང་ཆོས་ནུབ་ཅིང་། །འདྲེན་པ་མྱ་ངན་འདས་པའི་སྒྲ་ཡང་ཐོས། །དེ་ཡི་གནས་ཉིད་ན་ཡང་ལ་ལ་ཡིས། །
འདྲེན་པ་བཞུགས་ཏེ་ཆོས་ཀྱང་སྟོན་ཅེས་ཐོས། །དེ་ཡི་གནས་ཉིད་ན་ཡང་ལ་ལ་དག །ཚེ་ཚད་ལོ་ནི་བསམ་ཡས་བཞུགས་སྙམ་འཛིན། །དེ་ཡི་གནས་ནའང་འཆི་བའི་དུས་བྱེད་ཅིང་། །རིང་དུ་མི་འཚོ་ཞེས་ནི་སྒྲ་ཡང་ཐོས། །གནས་དེར་ལ་ལ་འདི་སྙམ་འདུ་ཤེས་ཏེ། །ཡིད་ཀྱི་འདུ་ཤེས་དང་ནི་
འཛིན་པ་ཡིས། །བདེ་གཤེགས་མཐོང་མཆོད་སངས་རྒྱས་མཉེས་བྱས་སྙམ། །སྐྱེས་པ་མེད་ཅིང་མཆོད་པ་བྱས་པའང་མེད། །མི་དག་བདག་གི་ཁྱིམ་ན་རྨི་ལམ་བཞིན། །འདོད་པའི་ཡོན་ཏན་དག་ལ་དགའ་མྱོང་ནས། །ཕྱིར་སད་ནས་ཀྱང་དེ་ཡིས་གདོད་མ་མཐོང་། །དེ་ནི་རྨི་ལམ་
ཡིན་པར་དེ་ཡིས་ཤེས། །དེ་བཞིན་མཐོང་ཐོས་རིག་དང་བྱེ་བྲག་ཕྱེད། །འདི་དག་ཐམས་ཅད་མི་བདེན་རྨི་ལམ་བཞིན། །གང་གིས་ཏིང་འཛིན་འདི་ཡང་ཐོབ་གྱུར་པ། །དེས་ནི་ཆོས་ཀྱི་རང་བཞིན་འདི་དག་ཤེས། །སུ་ལའང་སྡུག་དང་མི་སྡུག་མེད་པ་ནི། །མི་དེ་འཇིག་རྟེན་ན་ཡང་བདེ་
เล่ม ๕๕ · หน้า 69b
སྐྱིད་རྟག །སུ་དག་ནགས་ཁྲོད་མངོན་པར་དགའ་བ་ཡི། །དགེ་སྦྱོང་དེ་ནི་ཤིན་ཏུ་བདེ་བ་མྱོང་། །སུ་དག་ཅི་ལའང་བདག་གིར་བྱ་བ་མེད། །ཡོངས་སུ་འཛིན་པ་རྣམ་པ་ཀུན་ཏུ་སྤངས། །བསེ་རུ་བཞིན་དུ་འཇིག་རྟེན་འདི་ན་གནས། །ནམ་མཁའ་ལ་ནི་རླུང་དག་རྒྱུ་བ་བཞིན། །ལམ་
རྣམས་བསྒོམས་ཤིང་ཡེ་ཤེས་རབ་ཏུ་ཞུགས། །ཆོས་རྣམས་ཐམས་ཅད་སྟོང་པ་བདག་མེད་པར། །ཆོས་རྣམས་འདི་དག་གང་གིས་རབ་བསྒོམས་པ། །དེ་ཡི་སྤོབས་པ་དག་ནི་མཐའ་ཡས་འགྱུར། །སུ་དག་འཇིག་རྟེན་ན་ནི་ཡིད་ཆགས་མེད། །དེ་དག་སེམས་ནི་རྟག་ཏུ་རླུང་དང་འདྲ། །སྡུག་
དང་མི་སྡུག་ལ་ཡང་ཆགས་པ་མེད། །འཇིག་རྟེན་ན་ནི་མི་དེ་ཤིན་ཏུ་སྐྱིད། །མི་སྡུག་པ་དང་འགྲོགས་པ་སྡུག་བསྔལ་ཏེ། །སྡུག་པ་དང་ཡང་བྲལ་བ་སྡུག་བསྔལ་ཡིན། །མཐར་བྱས་འདི་གཉིས་རབ་ཏུ་སྤངས་ནས་ནི། །མི་གང་ཆོས་ལ་དགའ་བ་དེ་དག་སྐྱིད། །གང་ཞིག་ཆོས་འདི་
ཐོས་ནས་ཆགས་བྱེད་ཅིང་། །ཆོས་མ་ཡིན་པ་ཐོས་ནས་ཁོང་ཁྲོ་བྱེད། །ང་རྒྱལ་རྒྱགས་པས་བཅོམ་པ་ལོག་པ་དེ། །ང་རྒྱལ་དབང་གིས་སྡུག་བསྔལ་རྗེས་སུ་མྱོང་། །སུ་དག་མཉམ་པ་ཉིད་ལ་རབ་གནས་ཏེ། །རྟག་ཏུ་ཁེངས་པ་མེད་ཅིང་འདུད་པ་མེད། །སྡུག་དང་མི་སྡུག་པ་
ལས་རབ་གྲོལ་བ། །དེ་དག་རྟག་ཏུ་གྲོལ་ཡིད་ལེགས་པར་གནས། །ཚུལ་ཁྲིམས་ཡོངས་སུ་དག་པར་རབ་གནས་ཏེ། །བསམ་གཏན་བསམ་མི་ཁྱབ་ལ་རྟག་གནས་ཤིང་། །སུ་དག་ནགས་ཁྲོད་ཞི་བར་དགའ་བ་ནི། །དེ་དག་ནམ་ཡང་ཡིད་གཉིས་ཡོང་མི་འགྱུར། །མི་བདེན་
པ་ལ་སུ་དག་རབ་ཞུགས་ཤིང་། །བྱིས་པ་འདོད་པའི་ཡོན་ཏན་རྟག་ཏུ་དགའ། །བྱ་རྒོད་དག་ནི་རོ་ལ་མོས་པ་བཞིན། །དེ་དག་རྟག་པར་བདུད་ཀྱི་དབང་དུ་འགྲོ། །ཡང་པི་བང་གི་སྒྲ་དེ་ལས་ཚིགས་སུ་བཅད་པ་མངོན་པར་བསྒྲུབ་པ་འདི་བྱུང་ནས་ཟླ་འོད་གཞོན་ནུར་གྱུར་པས་སངས་རྒྱས་
ཀྱི་ཆོས་བསམ་གྱིས་མི་ཁྱབ་པ་ཟབ་མོ་ངེས་པར་རྟོགས་པ་ལ་མཁས་པ་རྗེས་སུ་ཐོབ་བོ། །དྲི་ཟའི་བུ་གཙུག་ཕུད་ལྔ་ཅན་ཡང་སྒྲའི་རྗེས་སུ་འགྲོ་བའི་བཟོད་པ་ཐོབ་པར་གྱུར་ཏོ། །ལྷ་དང་མི་ཡི་སྐྱེ་དགུ་སེམས་ཅན་དཔག་ཏུ་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
เล่ม ๕๕ · หน้า 70a
སྐྱེས་སོ། །སེམས་ཅན་དཔག་ཏུ་མེད་པ་རྣམས་ཀྱི་ཡང་དོན་བྱས་པར་གྱུར་ཏོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ངེས་པར་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ།
གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་དགེ་བའི་རྩ་བ་དང་བསླབས་པ་དང་ཡོན་ཏན་གྱི་ཚོགས་
ཐམས་ཅད་གདོན་མི་ཟ་ཞིང་ཚུལ་ཁྲིམས་ཤིན་ཏུ་ཡོངས་སུ་དག་པར་བྱའོ། །འདུ་འཛི་མེད་པ་མང་ཞིང་སྡིག་པའི་གྲོགས་པོ་ཡོངས་སུ་སྤོང་བ་དང་དགེ་བའི་བཤེས་གཉེན་ལ་རྟེན་པ་དང་ཡོངས་སུ་འདྲི་བའི་རང་བཞིན་ཅན་དང་ཆོས་ཚོལ་བ་ལ་བརྩོན་པ་དང་ཆོས་ལ་དོན་དུ་གཉེར་བ་དང་ཆོས་འདོད་པ་དང་
ཆོས་ལ་དགའ་བ་དང་ཆོས་ཡོངས་སུ་འཛིན་པ་དང་ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་གཞོན་ནུ་སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །གཞན་ཡང་
གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་འདོད་པ་དང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བརྩོན་འགྲུས་བརྩམས་ཤིང་ལུས་དང་སྲོག་ལ་མི་ལྟ་བར་བྱ་སྟེ། གང་སྙིང་རྗེ་
ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་སྟོན་པའི་དགེ་བའི་བཤེས་གཉེན་དེ་དག་རྒྱུན་མི་ཆད་པར་ཡོངས་སུ་བཙལ་བར་བྱ། གཡོ་མེད་པས་བསྙེན་པར་བྱ། བསྟེན་པར་བྱ། རིམ་གྲོར་བྱ་སྟེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་བཤེས་གཉེན་
དག་ལྷག་པའི་བསམ་པས་ཡོངས་སུ་བཙལ་ནས་ཀྱང་དེ་དག་ལས་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། ཀླག་པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་
เล่ม ๕๕ · หน้า 70b
མེད་པར་བསྒོམ་པས་བསྒོམ་པར་བྱ། མང་དུ་བྱ་གཞན་དག་ལ་ཡང་རྒྱ་ཆེར་རབ་ཏུ་བསྟན་པར་བྱའོ། །གང་ལས་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་ཐོས་པ་དེ་ལ་དགའ་བ་དང་གུས་པས་སྟོན་པར་འདུ་ཤེས་བསྐྱེད་པར་བྱའོ། །གཞོན་ནུ་ནམ་བྱང་ཆུབ་སེམས་དཔའ་སེམས་
དཔའ་ཆེན་པོ་དགེ་བའི་བཤེས་གཉེན་ཡོངས་སུ་ཚོལ་བ་དང་སྲི་ཞུ་བྱ་བ་དང་གཡོག་བྱ་བ་ལ་ཡིད་མི་སྐྱོ་བར་གྱུར་པ་དེའི་ཚེ་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བདེ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བདེ་བར་སྙིང་རྗེ་
ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་འཐོབ་བོ། །གཞོན་ནུ་དེ་ལྟ་བས་ན་མགོ་དང་གོས་ལ་མེ་འབར་བ་བཞིན་དུ་བྱས་ཏེ་རྟག་པར་དགེ་བའི་བཤེས་གཉེན་ཡོངས་སུ་བཙལ་བར་བྱ། གཡོ་མེད་པས་བསྟེན་པར་བྱ། བསྙེན་པར་བྱ། རིམ་གྲོར་བྱའོ། །དེ་ཅིའི་ཕྱིར་ཞེ་ན།
གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་དགེ་བའི་བཤེས་གཉེན་གྱི་ཁར་ལས་ན། སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་ལྟ་ཅི་སྨོས། གཞོན་ནུ་དེ་ལྟ་བས་ན་ཁྱོད་ཀྱིས་དགེ་བའི་བཤེས་
གཉེན་ཡོངས་སུ་བཙལ་བ་དང་སྲི་ཞུ་བྱ་བ་དང་གཡོག་བྱ་བ་ལ་ཡིད་ཡོངས་སུ་མི་སྐྱོ་བར་བྱའོ་ཞེས་གཞོན་ནུ་ཁྱོད་ཀྱིས་རྟག་ཏུ་དེ་ལྟར་བསླབ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་ཉིད་ཤིན་ཏུ་བརྗོད་པའི་ཕྱིར་ཟླ་འོད་
གཞོན་ནུར་གྱུར་པ་ལ་སྔོན་བྱུང་བ་བསྟན་པ་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །འདས་པའི་བསྐལ་པ་བྱེ་བ་མང་པོ་སྟེ། །དཔག་ཏུ་མེད་ཅིང་གཞལ་མེད་བསམ་མི་ཁྱབ། །དེ་ཚེ་དབང་ཏོག་རྒྱལ་མཚན་རྒྱལ་པོ་ཞེས། །འདྲེན་པ་རྐང་གཉིས་
གཙོ་བོ་བྱུང་བར་གྱུར། །དེས་ནི་ཏིང་འཛིན་ཞི་བ་འདི་བཤད་དེ། །དེ་ལ་མི་དང་སྲོག་དང་གང་ཟག་མེད། །སྒྱུ་མ་ཆུ་བུར་སྨིག་རྒྱུ་གློག་འདྲ་ཞིང་། །ཆོས་རྣམས་ཐམས་ཅད་ཆུ་ཡི་ཟླ་བ་བཞིན། །ཤི་ནས་འཇིག་རྟེན་ཕ་རོལ་འགྲོ་བ་ཡི། །སེམས་ཅན་ཤེད་ལས་སྐྱེས་པ་མི་
เล่ม ๕๕ · หน้า 71a
དམིགས་ཀྱང་། །ལས་རྣམས་བྱས་པ་མེད་པར་མི་འགྱུར་ཏེ། །དཀར་གནག་ཇི་བཞིན་འབྲས་བུ་སྨིན་པར་བྱེད། །རིགས་པའི་ཚུལ་གྱི་སྒོ་འདི་བཟང་པོ་སྟེ། །ཕྲ་ཞིང་མཐོང་དཀའ་རྒྱལ་བའི་སྤྱོད་ཡུལ་ཡིན། །གང་ལ་ཡི་གེའི་ཚིག་ཀྱང་མི་དམིགས་པ། །སངས་རྒྱས་
བྱང་ཆུབ་ཉིད་ནི་བཅོམ་ལྡན་མཁྱེན། །ཡངས་པའི་གཟུངས་དང་ཡེ་ཤེས་བསགས་པ་སྟེ། །མདོ་སྡེ་བྱེ་བ་ཁྲག་ཁྲིག་རྣམས་ཀྱང་འབྱུང་། །སངས་རྒྱས་བྱེ་བ་ཁྲག་ཁྲིག་སྤྱོད་ཡུལ་ཏེ། །ཏིང་འཛིན་འདི་ནི་བཅོམ་ལྡན་རབ་ཏུ་འཆད། །འདི་ནི་ན་བ་ནད་ལས་ཐར་བྱེད་པ། །བྱང་ཆུབ་
སེམས་དཔས་བསྒྲུབས་པའི་ནོར་ཡིན་ཏེ། །སངས་རྒྱས་ཀུན་གྱིས་བསྟོད་ཅིང་རབ་ཏུ་བསྔགས། །བྱེ་བ་ཁྲག་ཁྲིག་ལྷ་ཡིས་རབ་ཏུ་མཆོད། །སྐྱེ་བོ་བྱིས་པ་ཀུན་ལ་ཡང་དག་སྟོན། །མུ་སྟེགས་ཅན་གྱིས་རྟག་པར་ཡོངས་སུ་སྤངས། །ཚུལ་ཁྲིམས་ནོར་ནི་མཆོག་ཏུ་སངས་རྒྱས་
གསུངས། །ནམ་མཁའ་ལ་ནི་གློག་བཞིན་ཆགས་མི་འགྱུར། །གང་གིས་རྒྱལ་བ་བྱེ་བ་རབ་མཆོད་ཅིང་། །སྦྱིན་དང་ཚུལ་ཁྲིམས་སྤྱད་པ་མཁས་པ་དང་། །སྔན་ཆད་སྡིག་པའི་གྲོགས་པོ་སྤངས་པ་དག །དེ་དག་གི་ནི་བླ་མེད་ཕ་རོལ་ནོར། །དེ་ན་དགེ་སློང་ཆོས་སྨྲ་འདུག་པ་དག །
ཚངས་པར་སྤྱོད་པ་བདེ་གཤེགས་ཐུགས་ཀྱི་སྲས། །རྗེས་སུ་འཐུན་པའི་ཆོས་འདི་ཐོས་ནས་ནི། །འཇིག་རྟེན་འདྲེན་པར་སེམས་ཀྱང་བསྐྱེད་པར་གྱུར། །འདྲེན་པ་དབང་ཏོག་རྒྱལ་མཚན་རྒྱལ་པོ་ཡིས། །ཆོས་སྨྲ་དེ་ལ་ཡང་ནི་ཚིག་གསུངས་པ། །དགེ་སློང་དངོས་པོ་མཆོག་
ཏུ་བྱ་དཀའ་ཡིས། །བྱང་ཆུབ་དམ་པ་མཆོག་ལ་སེམས་སྐྱེད་ཅིག །ནོར་བུ་རིན་ཆེན་འདྲ་བར་ཚུལ་ཁྲིམས་སྲུངས། །རྗེས་སུ་འཐུན་པའི་གྲོགས་ལ་རྟག་པར་སྟེན། །སྡིག་པའི་གྲོགས་ལ་ནམ་ཡང་མ་བསྟེན་དང་། །སངས་རྒྱས་ཡེ་ཤེས་རིང་པོར་མི་ཐོགས་འཐོབ། །དབང་པོ་ཏོག་
གི་རྒྱལ་མཚན་རྒྱལ་བའི་དྲུང་། །གང་གིས་བྱང་ཆུབ་སེམས་མཆོག་བསྐྱེད་པ་ནི། །དེ་དག་ཐམས་ཅད་ཆོས་སྨྲར་རབ་འགྱུར་ཏེ། །ཚངས་པར་སྤྱོད་པ་བདེ་གཤེགས་ཐུགས་ཀྱི་སྲས། །དབང་པོའི་ཏོག་གི་རྒྱལ་མཚན་གྱི་རྒྱལ་པོའི་ལེའུ་སྟེ་ཉི་ཤུ་པའོ།། །།
เล่ม ๕๕ · หน้า 71b
འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བདུན་པ། དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་རྩ་བ་དང་བསླབ་པ་དང་ཡོན་ཏན་གྱི་ཆོས་ཐམས་
ཅད་ལ་གདོན་མི་ཟ་བར་བྱའོ། །འདུ་འཛི་མང་བ་མ་ཡིན་པར་བྱའོ། །སྡིག་པའི་གྲོགས་པོ་ཡོངས་སུ་སྤངས་ཤིང་དགེ་བའི་བཤེས་གཉེན་ལ་རྟེན་པ་དང་ཡོངས་སུ་དྲི་བའི་རང་བཞིན་ཅན་དང་ཆོས་ཡོངས་སུ་ཚོལ་བ་ལ་བརྩོན་པ་དང་ཆོས་ལ་དོན་དུ་གཉེར་བ་དང་ཆོས་འདོད་པ་དང་ཆོས་ལ་
དགའ་བ་དང་ཆོས་ཡོངས་སུ་འཛིན་པ་དང་ཆོས་དང་ཆོས་ཀྱི་རྗེས་སུ་འཐུན་པ་ལ་ཞུགས་པར་བྱའོ། །དེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་བསྐྱེད་པར་བྱའོ། །གང་ལས་ཆོས་ཀྱི་རྣམ་གྲངས་འདི་ཐོས་པ་དེ་ལ་ཡང་དེས་དགའ་བ་དང་གུས་པས་སྟོན་པར་
འདུ་ཤེས་བསྐྱེད་པར་བྱའོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དགེ་བའི་རྩ་བ་དང་བསླབ་པ་དང་ཡོན་ཏན་གྱི་ཆོས་ཐམས་ཅད་གདོན་མི་ཟ་བའི་ཆོས་ཀྱི་རྣམ་གྲངས་འདི་ཡང་དག་པར་བླངས་ཏེ་གནས་ན་དེ་མྱུར་དུ་སྤོབས་པ་རྒྱུན་མི་འཆད་པ་ལས་ངེས་པར་འབྱུང་བར་
འགྱུར་རོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མོས་པར་འགྱུར་རོ། །སངས་རྒྱས་ཀྱི་ཆོས་ཟབ་མོ་ལ་ངེས་པར་རྟོགས་པར་འགྱུར་རོ། །ལྷར་བཅས་པའི་འཇིག་རྟེན་གྱི་ནེམ་ནུར་དང་ཡིད་གཉིས་དང་ཐེ་ཚོམ་གྱི་མུན་པ་སེལ་བའི་ཕྱིར་སྣང་བ་ལྟ་བུར་འགྱུར་རོ། །དེ་ནས་
བཅོམ་ལྡན་འདས་ཀྱིས་དེའི་ཚེ་དགེ་བའི་རྩ་བ་དང་བསླབ་པ་དང་ཡོན་ཏན་གྱི་ཆོས་ཐམས་ཅད་ངེས་པར་བསྟན་པའི་ཆོས་ཀྱི་རྣམ་གྲངས་འདི་བརྗོད་པའི་ཕྱིར་ཟླ་འོད་གཞོན་ནུར་གྱུར་པ་ལ་སྔོན་བྱུང་བའི་གཏམ་གྱི་རྒྱུད་ཚིགས་སུ་བཅད་པའི་དབྱངས་ཀྱིས་ཡང་དག་པར་རབ་ཏུ་བསྟན་པ། སྔོན་
བྱུང་འཛམ་བུའི་གླིང་ཞེས་བྱ་བ་འདིར། །གཡེལ་བ་མེད་པའི་ཁྱེའུ་མཆོག་གཉིས་བྱུང་སྟེ། །བདེ་བར་གཤེགས་པའི་བསྟན་ལ་རབ་བྱུང་ནས། །བསེ་རུ་བཞིན་དུ་ནགས་ཁྲོད་སྟུག་པོར་གནས། །རྫུ་འཕྲུལ་ལྡན་ཞིང་བསམ་གཏན་བཞི་རྣམས་ཐོབ། །སྙན་དངགས་བསྟན་
เล่ม ๕๕ · หน้า 72a
བཅོས་མཁས་ཤིང་རྫོགས་པ་སྟེ། །བར་སྣང་གི་ནི་རྗེས་དང་ས་ཡང་རིག །དེ་དག་ནམ་མཁའ་ལ་ཡང་ཐོགས་མེད་འགྲོ། །དེ་དག་ནགས་ཁྲོད་སྟུག་པོ་བསིལ་བ་དེར། །མེ་ཏོག་སྣ་ཚོགས་ཡིད་དུ་འོང་བས་གང་། །བྱ་ཡང་སྣ་ཚོགས་མང་
པོས་བསྙེན་པ་དེར། །ཕན་ཚུན་དུ་ནི་གཏམ་དག་རབ་ཏུ་སྨྲ། །རྒྱལ་པོ་རི་དགས་འཆོར་ཞིང་སོང་སོང་ན། །སྒྲ་གྲགས་ནས་ནི་ནགས་ཚལ་དེར་འོངས་ཏེ། །རྒྱལ་པོས་ཆོས་སྨྲ་དེ་གཉིས་མཐོང་ནས་ནི། །དེ་ལ་མཆོག་ཏུ་དགའ་བ་ཉེ་བར་བཞག །དེ་དང་རྗེས་སུ་འཐུན་པའི་
གཏམ་བྱས་ནས། །དེ་དག་རྒྱལ་པོའི་མདུན་དུ་འདུག་པ་དང་། །རྒྱལ་པོ་དེ་ཡི་དམག་མང་མཐའ་ཡས་པ། །བྱེ་བ་ཁྲག་ཁྲིག་དྲུག་ཅུ་ཉེ་བར་ལྷགས། །དེ་ནས་ཆོས་སྨྲ་དེ་དག་སོ་སོ་ནས། །རྒྱལ་པོ་དེ་ལ་སྨྲས་པ་རྒྱལ་རིགས་ཉོན། །སངས་རྒྱས་འབྱུང་བ་མཆོག་ཏུ་རྙེད་པར་དཀའ། །
ས་ཡི་བདག་པོ་རྟག་ཏུ་བག་ཡོད་གྱིས། །ཚེ་ནི་རྟག་ཏུ་འགྲོ་ཞིང་མི་གནས་ཏེ། །རི་ཡི་ཆུ་བོ་བཞིན་དུ་མྱུར་དུ་འགྲོ། །ནད་དང་མྱ་ངན་རྒ་བས་གཟིར་བ་ལ། །ཁྱོད་ལ་དགེ་བའི་ལམ་འདྲ་སྐྱབས་གཞན་མེད། །རྒྱལ་པོའི་གླང་པོ་ཆོས་རྣམས་བསྐྱང་བར་གྱིས། །སྟོབས་བཅུ་ལྡན་པའི་
བསྟན་པ་འདི་ཡང་སྲུངས། །ཟད་པའི་དུས་ལ་ཤིན་ཏུ་འཇིག་པའི་ཚེ། །རྒྱལ་པོའི་གླང་པོ་ཆོས་ཀྱི་ཕྱོགས་གནས་གྱིས། །དེ་ལྟར་དེ་ཚེ་མཁས་པ་དེ་དག་གིས། །རྣམ་པ་དུ་མར་མི་དབང་གདམས་པ་བྱས། །རྒྱལ་པོ་ཁྲག་ཁྲིག་དྲུག་ཅུར་བཅས་པ་ཡིས། །དེ་ཚེ་བྱང་ཆུབ་ཏུ་ནི་
སེམས་བསྐྱེད་དོ། །དེ་ཚེ་རྒྱལ་པོའི་གླང་པོ་ཆོས་ཐོས་ནས། །དེས་ཤིང་དགེ་བའི་ཆོས་རྣམས་སྨྲ་བ་ལ། །རངས་ཤིང་ཡིད་བདེ་དགའ་བ་རབ་སྐྱེས་ནས། །རྐང་པ་ལ་ཡང་ཕྱག་འཚལ་དེ་ནས་སོང་། །རྒྱལ་པོ་དེ་ཡི་དགེ་སློང་མང་པོ་དག །རྙེད་པ་འདོད་ཅིང་དེ་ཡི་ཁྱིམ་དུ་འཇུག །
དེ་དག་དེ་མི་འདྲ་བའི་སྤྱོད་མཐོང་ནས། །དེ་ལ་རྒྱལ་པོ་དེ་ལྟར་རི་མོ་མེད། །བསྟན་པ་དེ་ཡང་སྟོན་པ་འདས་པ་ཡི། །དེ་ཚེ་ལོ་ཡི་ཐ་མར་གྱུར་པ་སྟེ། །འཛམ་བུའི་གླིང་ན་སྣོད་གྱུར་རབ་ཏུ་ཉུང་། །མ་བསྡམས་པ་དག་ཤིན་ཏུ་མང་པོ་བྱུང་། །དེ་ནས་དགེ་སློང་མང་པོ་བརྐམ་ཞིང་ཆགས། །
เล่ม ๕๕ · หน้า 72b
རྙེད་པ་འདོད་ཅིང་དམིགས་པའི་ལྟ་བ་ཅན། བདེ་གཤེགས་བསྟན་པ་རབ་ཏུ་ཞིག་པའི་ཚེ། །རྒྱལ་པོ་དེ་ཡང་བསྒྱུར་ཅིང་བྱེད་དུ་བཅུག །ཆོས་སྨྲ་གཉིས་པོ་འདི་ནི་གསད་པར་གྱིས། །འདི་དག་མུ་སྟེགས་ཆད་པར་སྨྲ་བ་སྟེ། །ཡུན་རིང་སྤྱོད་པར་ཡང་དག་འཛུད་བྱེད་ཀྱང་། །
དེ་དག་གང་དུའང་མྱ་ངན་འདའ་མི་སྟོན། །ལས་ཀྱང་འཇིག་ཅིང་རྣམ་པར་སྨིན་པ་འཇིག །ཚུལ་འཆོས་འདི་དག་ཕུང་པོ་མེད་ཅེས་སྨྲ། །རྒྱལ་པོ་འདི་དག་ཡུལ་ནས་སྤངས་ནས་ནི། །འདིར་ཡང་ཆོས་ནི་ཡུན་རིང་གནས་པར་འགྱུར། །དེ་དག་གི་ནི་ཚིག་ཐོས་དེ་ཡི་ཚེ། །རྒྱལ་པོའི་གླང་
པོ་ཐེ་ཚོམ་བྱུང་བར་གྱུར། །ཆོས་སྨྲ་གཉིས་པོ་འདི་ནི་གསད་པར་བྱ། །བཏང་སྙོམས་བཞག་ན་གནོད་པར་འགྱུར་སྲིད་སྙམ། །རྒྱལ་པོ་དེ་ཕྱིར་འབྲང་བ་ལྷ་མོ་ཞིག །ཚེ་རབས་སྔ་མར་ལྷན་ཅིག་སྤྱོད་པ་སྤྱད། །ཡུན་རིང་དུས་ནས་ཕན་འདོད་མཁས་པ་སྟེ། །དེ་ཡིས་རྒྱལ་པོ་དེ་ལ་འདི་སྐད་
སྨྲས། །རྒྱལ་རིགས་སྡིག་པའི་གྲོགས་པོའི་ཚིག་དག་གིས། །འདི་ལྟ་བུ་ཡི་སེམས་ནི་མ་སྐྱེད་ཅིག །དགེ་སློང་ཆོས་སྨྲ་མཁས་པ་གཉིས་པོ་འདི། །སྡིག་པའི་གྲོགས་པོའི་ཚིག་གིས་མ་སྤོང་ཤིག །དེ་དག་གིས་ནི་ནགས་ཁྲོད་ཅི་བཤད་པ། །ཤིན་ཏུ་འཇིགས་པ་མི་བཟད་དུས་
ཀྱི་ཚེ། །རྒྱལ་པོའི་གླང་པོ་ཆོས་ཀྱི་ཕྱོགས་གནས་ཀྱིས། །མི་ཡི་བདག་པོ་ཅུང་ཟད་མི་དྲན་ནམ། །རྒྱལ་པོ་ཡང་དག་ཚིག་གིས་བསྐུལ་བ་ཡིས། །དེ་ནི་རྒྱལ་བའི་བསྟན་པ་མི་གཏོང་གྱུར། །དེ་ཚེ་རྒྱལ་པོའི་ནུ་བོ་མ་རུངས་པ། །ཉེན་ཀོར་རྒྱལ་པོ་བྱེད་པ་དེས་རྦད་དེ། །རྒྱལ་པོ་ཁྱོད་
ཀྱི་གཅེན་ནི་སྡིག་པ་ཅན། །བདག་གི་སྲོག་ཀྱང་ནམ་དུ་འདོད་མི་བྱེད། །དགེ་སློང་གཉིས་པོ་རིག་སྔགས་དྲག་ལྡན་པ། །དེ་དག་ནམ་མཁའ་ལ་ཡང་སྔགས་ཀྱིས་འགྲོ། །དེ་ཐོས་ནས་ནི་ཁྱོད་ཀྱི་དྲུང་དུ་འོང་། །ཐམས་ཅད་འདུས་ཏེ་གསོལ་བ་འདེབས་པ་ནི། །རིག་སྔགས་དྲག་ལྡན་
འདི་གཉིས་མྱུར་དུ་སོད། །ཕྱིས་གདོད་འགྱོད་པར་གྱུར་ན་མ་ལེགས་སོ། །དེ་ཚེ་རྒྱལ་པོའི་གླང་པོ་གོ་བགོས་ནས། །སྡིག་པའི་གྲོགས་ཀྱི་ཚིག་གིས་དེར་ཆས་ཏེ། །རྒྱལ་པོ་དམག་སྡེ་ཀུན་གྱིས་ཡོངས་བསྐོར་ནས། །ནགས་ནས་དགེ་སློང་གང་ན་ཡོད་པར་ལྷགས། །རྒྱལ་པོ་མི་ཟད་
เล่ม ๕๕ · หน้า 73a
དྲག་ཤུལ་སེམས་རིག་ནས། །ཀླུ་དང་གནོད་སྦྱིན་ནགས་དེར་གནས་པ་ཡིས། །རྡོ་དང་སོ་ཕག་ཆར་ཕབ་ཕྱིར་བསྐྲད་དེ། །དེས་ནི་རྒྱལ་པོ་སྡེ་དང་བཅས་པ་བཏགས། །ལྟོས་ཤིག་སྡིག་པའི་གྲོགས་ཀྱི་ཚིག་གིས་ནི། །དེ་ཚེ་མ་རུངས་རྒྱལ་པོ་འཆི་དུས་བྱས། །ཆོས་
སྨྲ་དག་ལ་ཁྲོ་བ་བྱས་པས་ན། །དེར་ནི་ཚེ་རབས་དྲུག་ཅུར་མནར་མེད་སོང་། །རྒྱལ་རིགས་རྒྱལ་པོ་གང་གིས་རྦད་པ་ཡི། །དགེ་སློང་དམིགས་ལྟ་མང་པོ་དེ་དག་ཀྱང་། །ཚེ་རབས་བྱེ་བ་བརྒྱ་ཕྲག་བསམ་ཡས་སུ། །སེམས་ཅན་དམྱལ་བའི་སྡུག་བསྔལ་མྱོང་བར་གྱུར། །ལྷ་མོ་
གང་གིས་རྒྱལ་པོ་བསྐུལ་བསྟན་ཅིང་། །གང་གིས་ཆོས་སྨྲ་དེ་དག་བསྲུངས་པ་ནི། །སངས་རྒྱས་གང་གཱའི་བྱེ་མ་མཉམ་པ་མཐོང་། །སྤྱད་པ་སྤྱོད་ཅིང་དེ་དག་མཆོད་པ་བྱས། །བྱེ་བ་ཁྲག་ཁྲིག་དྲུག་ཅུ་མཐའ་ཡས་པས། །རྒྱལ་པོ་དང་ནི་ལྷན་ཅིག་ཆོས་ཐོས་ཤིང་། །བྱང་ཆུབ་ཏུ་
ནི་སེམས་མཆོག་བསྐྱེད་པ་དག །འཇིག་རྟེན་ཁམས་མང་དུ་ཡང་སངས་རྒྱས་གྱུར། །དེ་དག་ཚེ་ཚད་བསྐལ་པ་བྱེ་བ་མང་། །དེ་དག་ཡེ་ཤེས་གཞལ་མེད་བསམ་མི་ཁྱབ། །དེ་དག་ཀུན་གྱིས་ཏིང་འཛིན་བཟང་པོ་འདི། །བཤད་ནས་རྐང་གཉིས་གཙོ་བོ་མྱ་ངན་འདས། །
ཚུལ་ཁྲིམས་ཚངས་པ་ཡོན་ཏན་ཡེ་ཤེས་བསགས། །བླ་ན་མེད་པའི་ཚིག་འདི་ཐོས་ནས་ནི། །གཡེང་བ་མེད་པར་བག་ཡོད་སྤྱོད་ཅིག་དང་། །སངས་རྒྱས་ཡེ་ཤེས་རིང་པོར་མི་ཐོགས་འཐོབ། །ཕྱོགས་བཅུ་དག་གི་དེ་བཞིན་གཤེགས་པ་རྣམས། །སེམས་ཞི་སྙིང་རྗེ་བྱམས་
པའི་སྤྱན་མངའ་བ། །འཇིག་རྟེན་ཀུན་གྱི་སྐྱབས་དང་དཔུང་གཉེན་མཐོང་། །འཇིག་རྟེན་ཀུན་ཏུ་ཆོས་ཀྱི་ཆར་འབེབས་འགྱུར། །གཞོན་ནུ་ཁྱེའུ་མཆོག་གཉིས་པོ་བྱུང་བ་ཡང་། །གཞན་ཡིན་སྙམ་ན་དེ་ལྟར་མི་བལྟ་སྟེ། །མར་མེ་མཛད་ནི་དེ་ན་གཅིག་ཏུ་གྱུར། །དེ་ཚེ་
ཆོས་སྨྲ་གཉིས་པ་ང་ཡིན་ནོ། །གང་གིས་རྗེས་སུ་འཐུན་པའི་ཆོས་ཐོས་པ། །རྒྱལ་པོ་དེར་ཡང་བྱམས་པ་དེ་ཚེ་གྱུར། །ལྷ་མོ་ཕན་འདོད་མཁས་པ་གང་བྱུང་བ། །གཞོན་ནུ་ཁྱོད་ནི་དེ་ཚེ་དེར་གྱུར་ཏོ། །རྒྱལ་པོ་དེ་ཡི་ནུ་བོ་གང་བྱུང་བ། །དགེ་སློང་ཆོས་སྨྲ་འདི་གཉིས་སོད་ཅིག་ཅེས། །
เล่ม ๕๕ · หน้า 73b
དགེ་སློང་རྙེད་པ་འདོད་པས་རྦད་པ་ནི། །ལྷ་སྦྱིན་དེ་ཡི་ཚེ་ན་དེར་གྱུར་ཏོ། །སྔོན་བྱུང་བའི་ལེའུ་ཞེས་བྱ་སྟེ་ཉི་ཤུ་གཅིག་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་
པོ་ཏིང་ངེ་འཛིན་འདི་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ལུས་དང་སྲོག་ལ་མ་ཆགས་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་དང་སྲོག་ལ་ཆགས་པའི་ཕྱིར་སེམས་ཅན་རྣམས་མི་དགེ་བའི་ལས་མངོན་
པར་འདུ་བྱེད་པར་འགྱུར་རོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་དང་སྲོག་ལ་མ་ཆགས་པ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་རྙེད་པར་མི་དཀའ་ན་ཏིང་ངེ་འཛིན་འདི་ལྟ་ཅི་སྨོས། གཞོན་ནུ་དེ་ལྟ་བས་ན་ལུས་དང་སྲོག་ལ་ཡང་མ་ཆགས་པར་བྱའོ། །
ཞེས་དེ་ལྟར་ཁྱོད་ཀྱིས་བསླབ་པར་བྱའོ། །དེ་ལ་འདི་སྐད་ཅེས་བྱ་སྟེ། རྟག་ཏུ་ཁོར་མོར་རྣག་གི་ལུས་འདི་ལ། །བྱིས་པ་རྣམས་ནི་རབ་ཏུ་ཆགས་བྱེད་དེ། །སྲོག་ལ་འཇུ་ཞིང་བདེ་བ་འདོད་པའི་ཕྱིར། །མི་མཁས་པ་དག་རྟག་ཏུ་སྡིག་པ་བྱེད། །སུ་དག་སྙིང་པོ་མེད་པའི་ལུས་སྲོག་ལ། །
ལྷག་པར་ཆགས་པ་ཡོད་པ་མ་ཡིན་པ། །དེ་དག་གིས་ནི་བདུད་ཀྱི་སྡེ་བཅོམ་སྟེ། །བྱང་ཆུབ་ཤིང་དྲུང་བྱང་ཆུབ་རབ་ཏུ་རྟོགས། །སུ་དག་བདག་མེད་སྟོང་པའི་ལུས་རྣམས་དང་། །སྲོག་ཀྱང་རྨི་ལམ་གཡོ་བ་ཟིལ་པ་འདྲ། །འདི་གཉིས་ལ་ནི་ཆགས་པར་བྱེད་འགྱུར་བ། །དེ་དག་ཤི་
འཕོས་སེམས་ཅན་དམྱལ་བར་འགྲོ། །ལུས་ངེས་པར་བསྟན་པའི་ལེའུ་སྟེ་ཉི་ཤུ་གཉིས་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་པ་དང་
མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་དེ་བཞིན་གཤེགས་པ་ནི་གཟུགས་ཀྱི་སྐུར་མི་བལྟའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་སྐུས་རབ་ཏུ་ཕྱེ་བ་ཡིན་ཏེ། གཟུགས་ཀྱི་སྐུས་རབ་
เล่ม ๕๕ · หน้า 74a
ཏུ་ཕྱེ་བ་མ་ཡིན་ནོ། །གཞོན་ནུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྐུ་ལ་སྨོན་པར་འདོད་པ་དང་། དེ་བཞིན་གཤེགས་པའི་སྐུ་ཤེས་པར་འདོད་པས་ཏིང་ངེ་འཛིན་འདི་གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ།
རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། བསྒོམ་པར་བྱ་བསྒོམ་པའི་སྦྱོར་བ་ལ་རྗེས་སུ་བརྩོན་པར་བྱ། གཞན་དག་ལ་ཡང་རྒྱ་ཆེར་རབ་ཏུ་བསྟན་པར་བྱའོ། །གཞོན་ནུ་དེ་བཞིན་གཤེགས་པའི་སྐུ་ནི་བསོད་ནམས་བརྒྱ་པ་ལས་སྐྱེས་པའི་བློ་དང་དོན་གཅིག་ཏུ་བསྟན་པ་ཡིན་
ཏེ། ཆོས་ལས་སྐྱེས་པ། མཚན་མ་མེད་པ། མཚན་མ་ཐམས་ཅད་དང་བྲལ་བ། ཟབ་པ་ཚད་མེད་པ་ཚད་མེད་པའི་ཆོས་མཚན་མ་མེད་པའི་ངོ་བོ་ཉིད་མཚན་མ་ཐམས་ཅད་རྣམ་པར་བཤིག་པ། མི་གཡོ་བ་མི་གནས་པ་ཤིན་ཏུ་ནམ་མཁའི་ངོ་བོ་ཉིད། མི་སྣང་བ་མིག་གི་ལམ་ལས་
ཡང་དག་པར་འདས་པ་ནི་ཆོས་ཀྱི་སྐུར་རབ་ཏུ་ཤེས་པར་བྱ་སྟེ། བསམ་གྱིས་མི་ཁྱབ་པ། བསམ་པའི་ས་དང་བྲལ་བ། བདེ་བ་དང་སྡུག་བསྔལ་གྱིས་མི་སྐྱོད་པ། སྤྲོས་པ་ཐམས་ཅད་ལས་ཡང་དག་པར་འདས་པ། གནས་མེད་པ། སངས་རྒྱས་ཀྱི་ཡེ་ཤེས་ལ་སྨོན་པར་འདོད་པ་
རྣམས་ཀྱི་སྒྲ་ལས་ཤིན་ཏུ་འདས་པའི་སྙིང་པོ་སྟེ་འདོད་ཆགས་ལས་ཡང་དག་པར་འདས་པ། དབྱེར་མི་ཕྱེད་པ་སྟེ་ཞེ་སྡང་ལས་ཡང་དག་པར་འདས་པ་བརྟན་པ་སྟེ། གཏི་མུག་ལས་ཡང་དག་པར་འདས་པ་སྟོང་པ་ཉིད་དུ་བསྟན་པས་ངེས་པར་བསྟན་པ་མ་སྐྱེས་པ་སྐྱེ་བ་ལས་ཡང་དག་པར་འདས་
པ། ཐ་སྙད་དུ་བརྟགས་པ། མྱ་ངན་ལས་འདས་པ་བྱེ་བྲག་མེད་པ། སྒྲས་མྱ་ངན་ལས་འདས་པ་དབྱངས་ཀྱིས་ཞི་བ། བརྡས་མཚུངས་པར་གྱུར་པ། དོན་དམ་པས་བརྡར་གྱུར་པ། ཡང་དག་པ་ཇི་ལྟ་བའི་ཚིག་གིས་དོན་དམ་པ། ཡོངས་སུ་གདུང་བ་མེད་པས་བསིལ་བ།
གནས་མེད་པ། གཞལ་དུ་མེད་པ། ཁ་དོག་བསྟན་པས་མུ་མེད་པ། མངོན་པར་ཤེས་པ་ཆེན་པོ་ཡོངས་སུ་སྦྱང་བ་ལས་བྱུང་བ་སྟེ། གཞོན་ནུ་དེ་ནི་དེ་བཞིན་གཤེགས་པའི་སྐུ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འདི་
เล่ม ๕๕ · หน้า 74b
འདྲའི་འཇིག་རྟེན་མགོན་པོའི་སྐུ། །སུ་དག་ཤེས་པར་འདོད་པ་ནི། །ཏིང་འཛིན་འདི་ནི་སྒོམ་གྱིས་དང་། །སངས་རྒྱས་སྐུ་ནི་ཤེས་པར་འགྱུར། །སངས་རྒྱས་སྐུ་ནི་དག་པ་སྟེ། །བསོད་ནམས་བརྒྱ་སྐྱེས་འོད་ཀྱང་གསལ། །དེ་ནི་བར་སྣང་མཚུངས་པ་སྟེ། །དེ་ལ་ཐ་དད་བྱ་བ་མེད། །
སངས་རྒྱས་བྱང་ཆུབ་ཅི་འདྲ་བ། །མཚན་རྣམས་ཀྱང་ནི་དེ་འདྲ་སྟེ། །དེ་ཡི་མཚན་རྣམས་ཅི་འདྲ་བ། །དེ་ཡི་སྐུ་ཡང་དེ་འདྲའོ། །སྐུ་ནི་བྱང་ཆུབ་མཚན་ཉིད་དེ། །སངས་རྒྱས་ཞིང་ཡང་དེ་འདྲ་ཞིང་། །སྟོབས་དང་རྣམ་ཐར་བསམ་གཏན་ཡང་། །དེ་དག་ཐམས་ཅད་མཚན་ཉིད་གཅིག །
དེ་ལྟར་སངས་རྒྱས་འབྱུང་འགྱུར་ཏེ། །འཇིག་རྟེན་མགོན་པོའི་དེ་འདྲ་བས། །སུས་ཀྱང་ཤ་ཡི་མིག་གིས་ནི། །ནམ་ཡང་མཐོང་བར་མི་ནུས་སོ། །མང་པོ་དག་ཀྱང་འདི་སྐད་སྨྲ། །ངས་ནི་འཇིག་རྟེན་འདྲེན་པ་མཐོང་། །སྐུ་ཡང་གསེར་གྱི་ཁ་དོག་ལ། །འཇིག་རྟེན་ཐམས་ཅད་སྣང་
བར་མཛད། །སངས་རྒྱས་དག་གི་བྱིན་རླབས་དང་། །མཐུ་དང་རྣམ་པར་སྤྲུལ་པ་ཡིས། །དེ་ལྟར་མཚན་གྱིས་སྤྲས་པ་ཡི། །སྐུ་དག་ཤིན་ཏུ་སྣང་བ་ཡིན། །བོངས་ཚོད་ཁྲུན་དང་སྦོམས་སུ་ཡང་། །སངས་རྒྱས་སྐུ་ནི་བཤད་མོད་ཀྱིས། །སྐུ་ཡི་ཚད་ནི་མ་རྙེད་དེ། །དེ་ཕྱིར་བསམ་གྱིས་མི་
ཁྱབ་བོ། །སངས་རྒྱས་སྐུ་ནི་འདི་ཙམ་ཞེས། །གལ་ཏེ་ཚད་ཀྱང་རྙེད་གྱུར་ན། །ལྷ་དག་དང་ནི་མི་རྣམས་དང་། །སྟོན་པ་བྱེ་བྲག་མེད་པར་འགྱུར། །མཉམ་པར་གཞག་པའི་སེམས་ཀྱི་ནི། །རྣམ་པར་སྨིན་པའང་དེ་ཡི་མཚན། །མིང་དང་གཟུགས་ཀྱང་དེ་འདྲ་མཚན། །རྣམ་པར་
དག་ཅིང་འོད་གསལ་འགྱུར། །ཇི་ལྟར་འཇིག་རྟེན་མགོན་པོ་ཡིས། །བསྐལ་པ་བྱེ་བར་བསྙེན་པ་ལྟར། །སུས་ཀྱང་ཏིང་འཛིན་ཞི་བ་འདི། །ནམ་ཡང་གོམས་པར་མ་བྱས་སོ། །དཀར་པོའི་ཆོས་ནི་མང་པོ་ཡིས། །ཏིང་འཛིན་འདི་ནི་བསྐྱེད་པ་སྟེ། །ཏིང་འཛིན་འདི་ནི་རྒྱ་ཆེ་བས། །
ང་ཡི་ལུས་ཀྱང་མི་སྣང་ངོ་། །གང་གི་སེམས་ནི་ཅི་འདྲ་བ། །མིང་དང་གཟུགས་ཀྱང་དེ་འདྲ་སྟེ། །རང་བཞིན་མེད་པའི་སེམས་ཀྱི་ནི། །མིང་དང་གཟུགས་ཀྱང་མཚན་དེ་འདྲ། །མིང་དང་གཟུགས་ལ་གང་གི་ནི། །འདུ་ཤེས་རགས་པ་འཇུག་པ་ཡང་། །སྐལ་པ་མི་མཉམ་འདུ་ཤེས་
เล่ม ๕๕ · หน้า 75a
ཀྱིས། །རགས་པའི་སེམས་ཀྱང་སྐྱེ་བར་འགྱུར། །མིང་དང་གཟུགས་ལ་སུ་དག་གི། །འདུ་ཤེས་ཕྲ་མོ་འཇུག་པ་ནི། །མིང་དང་གཟུགས་ལ་མ་ཆགས་པས། །སེམས་ནི་རབ་ཏུ་འོད་གསལ་འགྱུར། །ངས་དྲན་སྔོན་གྱི་ཚེ་རབས་ནི། །གྲངས་མེད་པ་དག་བདུན་དུ་ཡང་། །
སྡིག་པའི་འདུ་ཤེས་གསུམ་པོ་དག །ནམ་ཡང་སྐྱེས་པར་མ་གྱུར་ཏོ། །ང་ཡི་སེམས་ནི་ཟག་མེད་དེ། །བསྐལ་པ་བྱེ་བ་བསམ་ཡས་སུ། །སེམས་ཅན་རྣམས་ཀྱི་དོན་བྱེད་ཀྱང་། །ང་ཡི་ལུས་ནི་མི་སྣང་ངོ་། །ཇི་ལྟར་གང་གི་དངོས་པོ་ལས། །ཡིད་ཀྱང་རྣམ་པར་གྲོལ་གྱུར་པ། །དེ་དག་
དེ་ཡི་དངོས་པོ་དང་། །ཕྱིར་ཡང་ཕྲད་པར་མི་འགྱུར་རོ། །དངོས་པོ་ཀུན་ལས་རྣམ་པ་ཀུན། །ང་ཡི་རྣམ་ཤེས་རྣམ་གྲོལ་ཏེ། །སེམས་ཀྱི་རང་བཞིན་ཤེས་པས་ན། །ཕྱིར་ཡང་ཡེ་ཤེས་འབྱུང་བར་འགྱུར། །ཞིང་རྣམས་བྱེ་བ་ཕྲག་སྟོང་དུ། །ང་ཡི་སྤྲུལ་པ་དག་ཀྱང་འགྲོ། །སེམས་ཅན་
རྣམས་ཀྱི་དོན་ཀྱང་བྱེད། །དེ་ལ་ལུས་ཀྱང་རྙེད་མི་འགྱུར། །མཚན་ཉིད་མེད་ཅིང་མཚན་མ་མེད། །ཇི་ལྟར་ནམ་མཁའ་དེ་བཞིན་དུ། །ང་ཡི་སྐུ་ཡང་བརྗོད་མེད་ཅིང་། །ཤེས་པར་དཀའ་བར་རབ་ཏུ་བསྟན། །དཔའ་བོ་ཆེན་པོ་ཆོས་ཀྱི་སྐུ། །སྐུ་ནི་ཆོས་ལས་སྐྱེས་པ་སྟེ། །གཟུགས་
ཀྱི་སྐུར་ནི་ནམ་དུ་ཡང་། །རྒྱལ་བ་གདགས་པར་ཡོང་མི་ནུས། །ཇི་ལྟར་བཤད་པ་འདི་དག་ཀྱང་། །ཐོས་ནས་དགའ་བར་འགྱུར་བ་ནི། །དེ་ལ་སྡིག་ཅན་བདུད་ཀྱིས་ཀྱང་། །ཀླན་ཀ་རྙེད་པར་མི་འགྱུར་རོ། །ཟབ་མོ་ཡི་ནི་ཆོས་ཐོས་ནས། །དེ་ལ་སྐྲག་པ་མི་འབྱུང་སྟེ། །དེ་ནི་སྲོག་
གི་ཕྱིར་དུ་ཡང་། །སངས་རྒྱས་བྱང་ཆུབ་སྤོང་མི་བྱེད། །མདོ་སྡེ་བྱེ་བ་ཕྲག་སྟོང་གི། །ཡང་དག་བསྟན་པ་ཤེས་པར་འགྱུར། །གང་དང་གང་དུ་སོང་བར་ཡང་། །འཇིག་རྟེན་དག་ལ་སྣང་བར་འགྱུར། །གཞོན་ནུ་དེ་ལ་དེ་བཞིན་གཤེགས་པའི་སྐུ་ནི་མཚན་མ་དང་ལས་ཀྱིས་ཀྱང་ཤེས་
པར་སླ་བ་མ་ཡིན་ཏེ། སྔོན་པོའམ་ཁ་དོག་སྔོན་པོའམ། སྔོན་པོ་ལྟ་བུར་སྟོན་པའམ། འོད་སྔོན་པོ་འབྱུང་བའམ། སེར་པོའམ། ཁ་དོག་སེར་པོའམ། སེར་པོ་ལྟ་བུར་སྟོན་པའམ། འོད་སེར་པོ་འབྱུང་བའམ། དམར་པོའམ། ཁ་དོག་དམར་པོའམ། དམར་པོ་ལྟ་བུར་
เล่ม ๕๕ · หน้า 75b
སྟོན་པའམ། འོད་དམར་པོ་འབྱུང་བའམ། དཀར་པོའམ། ཁ་དོག་དཀར་པོའམ། དཀར་པོ་ལྟ་བུར་སྟོན་པའམ། འོད་དཀར་པོ་འབྱུང་བའམ། ལེ་བརྒན་ནམ། ཁ་དོག་ལེ་བརྒན་ནམ། ལེ་བརྒན་ལྟ་བུར་སྟོན་པའམ། འོད་ལེ་བརྒན་འབྱུང་བའམ། ཤེལ་ལམ། ཤེལ་གྱི་ཁ་
དོག་གམ། ཤེལ་ལྟ་བུར་སྟོན་པའམ། ཤེལ་གྱི་འོད་འབྱུང་བའམ། མེའམ། མེའི་ཁ་དོག་གམ། མེ་ལྟ་བུར་སྟོན་པའམ། མེའི་འོད་འབྱུང་བའམ། མར་གྱི་སྙིང་པོའམ། མར་གྱི་ཁ་དོག་གམ། མར་ལྟ་བུར་སྟོན་པའམ། མར་གྱི་འོད་འབྱུང་བའམ། གསེར་རམ། གསེར་གྱི་
ཁ་དོག་གམ། གསེར་ལྟ་བུར་སྟོན་པའམ། གསེར་གྱི་འོད་འབྱུང་བའམ། བཻ་དཱུརྱའམ། བཻ་དཱུརྱའི་ཁ་དོག་གམ། བཻ་དཱུརྱ་ལྟ་བུར་སྟོན་པའམ། བཻ་དཱུརྱའི་འོད་འབྱུང་བའམ། གློག་གམ། གློག་གི་ཁ་དོག་གམ། གློག་ལྟ་བུར་སྟོན་པའམ། གློག་གི་འོད་འབྱུང་བའམ། ཚངས་
པའམ། ཚངས་པའི་ཁ་དོག་གམ། ཚངས་པ་ལྟ་བུར་སྟོན་པའམ། ཚངས་པའི་འོད་འབྱུང་བའམ། ལྷའམ། ལྷའི་ཁ་དོག་གམ། ལྷ་ལྟ་བུར་སྟོན་པའམ། ལྷའི་འོད་འབྱུང་བའོ། །ཞེས་ཤེས་པར་སླ་བ་མ་ཡིན་ནོ། །གཞོན་ནུ་དེ་ལྟར་དེ་བཞིན་གཤེགས་པའི་སྐུ་ནི་དག་པ་སྟེ། མཚན་
མ་དག་གིས་བསམ་པར་བྱ་བ་མ་ཡིན་པ། བསམ་གྱིས་མི་ཁྱབ་པར་བསྟན་པ། མཚན་མ་ཐམས་ཅད་ཀྱིས་ཀྱང་བསྟན་པར་བྱ་བ་མ་ཡིན་པ། བསམ་གྱིས་མི་ཁྱབ་པར་བསྟན་པ་སྟེ། རྣམ་པ་ཐམས་ཅད་བསམ་གྱིས་མི་ཁྱབ་ཅིང་དཔག་ཏུ་མེད་པ་ཞེས་བྱ་བ་མ་གཏོགས་པར་ལྷ་དང་བཅས་
པའི་འཇིག་རྟེན་གྱིས་ཀྱང་གཟུགས་ཀྱི་སྐུ་ཡོངས་སུ་རྫོགས་པས་སྐུའི་ཚད་གཟུང་བར་སླ་བ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་ཁམས་ཀྱི་རྡུལ་ཕྲན་དང་། །རྡུལ་དུ་མིང་ཡང་སྟོན་པ་དང་། །མཚེའུ་དང་རྫིང་དང་
ལྟིང་ཀ་དང་། །རྒྱ་མཚོ་ན་ཡང་ཇི་སྙེད་ཆུ། །འདི་སྙེད་རྡུལ་ཕྲན་ཡོད་དོ་ཞེས། །དེ་དག་ལ་ནི་མཐའ་མི་རྙེད། །རྒྱ་མཚོ་ལ་ནི་སྐྲ་རྩེ་ཡིས། །ཆུ་ཐིགས་གཞལ་བར་ནུས་ཀྱང་ནི། །འཇིག་རྟེན་མགོན་པོའི་དཔེ་ཉིད་དུ། །ཡང་དག་བསྟན་པར་མི་རུང་ངོ་། །ཆུ་ཡི་ཐིགས་པ་
เล่ม ๕๕ · หน้า 76a
དཔག་མེད་ཅིང་། །དེ་བཞིན་རབ་ཏུ་ཕྲ་བའི་རྡུལ། །དེ་བས་སེམས་ཅན་གཅིག་གི་ཡང་། །ཤིན་ཏུ་མང་དུ་ངས་མཐོང་སྟེ། །མོས་པ་དང་ནི་སེམས་བསྐྱེད་པ། །དུ་མ་དག་ནི་ཤེས་མི་སླ། །ངས་ནི་སྐུ་ཡི་ཡོན་ཏན་དག །ཡང་དག་པ་ནི་གང་བསྟན་པ། །སེམས་
ཅན་ཀུན་གྱི་མོས་པ་ཡང་། །དེ་དག་དཔེ་རུ་བཟོད་མི་འགྱུར། །མཚན་མ་དང་ནི་ལས་རྣམས་དང་། །ཁ་དོག་སྣང་བ་འདི་འདྲ་ཞེས། །སངས་རྒྱས་ཀྱི་ནི་ཤེས་མི་ནུས། །ང་ཡི་བྱེ་བྲག་དེ་འདྲའོ། །སངས་རྒྱས་མཚན་མ་བྲལ་བ་སྟེ། །ཆོས་ཀྱི་སྐུ་ཡིས་རབ་ཏུ་ཕྱེ། །ཟབ་ཅིང་
དཔག་ཏུ་མེད་པ་སྟེ། །དེ་ཕྱིར་སངས་རྒྱས་བསམ་མི་ཁྱབ། །སངས་རྒྱས་བསམ་དུ་མེད་པ་ཡི། །སངས་རྒྱས་སྐུ་ཡང་བསམ་དུ་མེད། །སྐུ་དེ་བསམ་དུ་མེད་པ་ཡི། །ཆོས་ཀྱི་སྐུ་ཡིས་རབ་ཏུ་ཕྱེ། །སངས་རྒྱས་སྐུ་ནི་སེམས་ཀྱིས་ཀྱང་། །བསམ་པར་བཟོད་པ་མ་ཡིན་ཏེ། །
དེ་ལྟར་དེ་ཡི་སྐུ་ལ་ཡང་། །ཚད་ཀྱང་ཉེ་བར་མི་དམིགས་སོ། །ཆོས་རྣམས་དེ་དག་དཔག་ཏུ་མེད། །བསྐལ་པ་བྱེ་བར་བསྙེན་པས་ན། །དེ་ཕྱིར་ང་ཡི་ལུས་ཀྱང་ནི། །འོད་གསལ་བསམ་དུ་མེད་པ་གྲུབ། །སེམས་ཅན་ཀུན་གྱིས་གཟུང་དུ་མེད། །ཚད་ཀྱིས་གཟུང་བྱ་མ་ཡིན་
ཏེ། །དེ་ལྟ་སངས་རྒྱས་སྐུ་དག་ནི། །ཚད་མེད་བསམ་གྱིས་མི་ཁྱབ་པ། །ཚད་མེད་པ་ཡི་ཆོས་དག་གིས། །དེ་ལ་ཚད་ནི་བརྟག་ཏུ་མེད། །མ་བརྟགས་པ་ཡི་ཆོས་དག་གིས། །དེ་ལྟར་སངས་རྒྱས་མ་བརྟགས་སོ། །རྟོག་པ་དག་ནི་ཚད་དུ་བསྟན། །རྟོག་པ་
མེད་པ་ཚད་མེད་ཡིན། །མི་རྟོག་རྟོག་དང་བྲལ་བས་ན། །དེ་ཕྱིར་སངས་རྒྱས་བསམ་དུ་མེད། །ཇི་ལྟར་ནམ་མཁའ་ཚད་མེད་ལ། །སུས་ཀྱང་གཞལ་དུ་མི་ནུས་པ། །དེ་བཞིན་སངས་རྒྱས་སྐུ་དག་ཀྱང་། །ནམ་མཁའ་ཉིད་དང་འདྲ་ཞིང་མཚུངས། །སངས་རྒྱས་སྐུ་ནི་
དེ་ལྟ་བུར། །གང་གིས་རིག་པ་རྒྱལ་བའི་སྲས། །དེ་དག་བསམ་གྱིས་མི་ཁྱབ་པ། །སངས་རྒྱས་འཇིག་རྟེན་མགོན་པོར་འགྱུར། །དེ་བཞིན་གཤེགས་པའི་སྐུ་ངེས་པར་བསྟན་པའི་ལེའུ་སྟེ་ཉི་ཤུ་གསུམ་པའོ།། །།དེ་ནས་ཡང་བཅོམ་ལྡན་འདས་
เล่ม ๕๕ · หน้า 76b
ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཅི་ནས་ཀྱང་བདག་གིས་སོ་སོ་ཡང་དག་པར་རིག་པ་བཞི་མངོན་སུམ་དུ་བྱ་བར་འདོད་དེ། བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་ཆོས་
སོ་སོ་ཡང་དག་པར་རིག་པ་དང་ངེས་པའི་ཚིག་སོ་སོ་ཡང་དག་པར་རིག་པ་དང་སྤོབས་པ་སོ་སོ་ཡང་དག་པར་རིག་པ་འདི་བཞི་མངོན་སུམ་དུ་བྱའོ་སྙམ་ན། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཏིང་ངེ་འཛིན་འདི་གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་
པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་མེད་པར་བསྒོམ་པས་བསྒོམ་པར་བྱ། གཞན་ལ་ཡང་རྒྱ་ཆེར་རབ་ཏུ་བསྟན་པར་བྱ། བསྒོམ་པའི་རྣལ་འབྱོར་ལ་རྗེས་སུ་བརྩོན་པར་བྱའོ། །གཞོན་ནུ་དེ་ལ་ཆོས་སོ་སོ་ཡང་དག་པར་རིག་པ་གང་ཞེ་ན།
གཞོན་ནུ་གཟུགས་སུ་བརྗོད་པ་ཇི་སྙེད་ཡོད་པ་གཞོན་ནུ་དེ་བཞིན་གཤེགས་པའི་བསྔགས་པ་བརྗོད་པ་ཡང་དེ་སྙེད་དོ། །དེ་བཞིན་དུ་ཚོར་བ་དང་འདུ་ཤེས་དང་འདུ་བྱེད་རྣམས་ཇི་སྙེད་པ་དང་གཞོན་ནུ་རྣམ་པར་ཤེས་པའི་བརྗོད་པ་ཇི་སྙེད་པ་དེ་བཞིན་གཤེགས་པའི་བསྔགས་པ་བརྗོད་པ་ཡང་
དེ་སྙེད་དེ། གཞོན་ནུ་དེ་ལྟར་གཟུགས་སུ་བརྗོད་པ་མཐའ་ཡས་མུ་མེད་བསམ་གྱིས་མི་ཁྱབ་པ་དེ་བཞིན་དུ་དེ་བཞིན་གཤེགས་པའི་བསྔགས་པ་བརྗོད་པ་ཡང་བསམ་གྱིས་མི་ཁྱབ་སྟེ། དེ་བཞིན་དུ་ཚོར་བ་དང་འདུ་ཤེས་དང་འདུ་བྱེད་རྣམས་དང་གཞོན་ནུ་འདི་ལྟར་རྣམ་པར་ཤེས་པའི་བརྗོད་པ་
མཐའ་ཡས་མུ་མེད་དེ། བསམ་གྱིས་མི་ཁྱབ་པ་དེ་བཞིན་དུ་དེ་བཞིན་གཤེགས་པའི་བསྔགས་པ་བརྗོད་པ་ཡང་བསམ་གྱིས་མི་ཁྱབ་པོ། །གཞོན་ནུ་དེ་ལྟར་འདུས་བྱས་ལ་འང་ཉེས་པ་གྲངས་མེད། མྱ་ངན་ལས་འདས་པ་ལ་ཡང་ཕན་ཡོན་གྲངས་མེད་དེ། དེ་བཞིན་གཤེགས་པའི་
བསྔགས་པ་ཡང་གྲངས་མེད་དོ། །གཞོན་ནུ་འདི་ལྟར་མྱ་ངན་ལས་འདས་པའི་མིང་ཇི་སྙེད་ཡོད་པའི་དེ་བཞིན་གཤེགས་པའི་བསྔགས་པ་ཡང་དེ་སྙེད་དོ། །གཞོན་ནུ་འདི་ལྟར་མྱ་ངན་འདས་པའི་མིང་གྲངས་མེད་དེ། དེ་བཞིན་གཤེགས་པའི་བསྔགས་པ་ཡང་གྲངས་མེད་དོ། །
เล่ม ๕๕ · หน้า 77a
གཞོན་ནུ་འདི་བཞི་ནི་དེ་བཞིན་གཤེགས་པའི་བསྔགས་པ་བརྗོད་པ་བསམ་གྱིས་མི་ཁྱབ་པར་བརྗོད་པ་སྟེ། དེ་དག་མཐར་ཕྱིན་པའི་གནས་སུ་བསྟན་པར་སླ་བ་ནི་མ་ཡིན་ནོ། །བཞི་གང་ཞེ་ན། འདི་ལྟ་སྟེ། འདུ་བྱེད་བརྗོད་པ་བསམ་གྱིས་མི་ཁྱབ་པ་དང་དབྱངས་
བརྗོད་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་བརྗོད་པ་བསམ་གྱིས་མི་ཁྱབ་པ་དང་རྣམ་པར་བྱང་བ་བརྗོད་པ་བསམ་གྱིས་མི་ཁྱབ་པ་སྟེ། གཞོན་ནུ་དེ་དག་ནི་དེ་བཞིན་གཤེགས་པའི་བསྔགས་པ་བརྗོད་པ་བསམ་གྱིས་མི་ཁྱབ་པ་བརྗོད་པ་བཞིའོ། །གཞོན་ནུ་འདི་བཞི་ནི་
དེ་བཞིན་གཤེགས་པའི་བརྗོད་པ་བསམ་གྱིས་མི་ཁྱབ་པ། བསམ་གྱིས་མི་ཁྱབ་པར་བསྟན་པ་སྟེ། དེ་དག་ནི་མཐར་ཕྱིན་པའི་གནས་སུ་བསྟན་པར་སླ་བ་མ་ཡིན་ནོ། །བཞི་གང་ཞེ་ན། བཞི་པོ་དེ་དག་ཉིད་དེ། དེ་བཞིན་དུ་རྒྱས་པར་བསྟན་པར་བྱའོ། །གཞོན་ནུ་འདི་
དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་བཞི་སྟེ། བཞི་གང་ཞེ་ན། འདུ་བྱེད་ཀྱི་ཚུལ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ཚུལ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་ཚུལ་བསམ་གྱིས་མི་ཁྱབ་པ་དང་རྣམ་པར་བྱང་བའི་ཚུལ་བསམ་གྱིས་
མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རིགས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་རིགས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་རིགས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་
རིགས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་རིགས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྒོ་བཞི་སྟེ། བཞི་གང་ཞེ་ན། འདུ་བྱེད་ཀྱི་སྒོ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྒོ་
བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་སྒོ་བསམ་གྱིས་མི་ཁྱབ་པ་དང་རྣམ་པར་བྱང་བའི་སྒོ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ངེས་པར་བསྟན་པ་བཞི་སྟེ། བཞི་གང་ཞེ་ན། འདུ་བྱེད་ངེས་
เล่ม ๕๕ · หน้า 77b
པར་བསྟན་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་ངེས་པར་བསྟན་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་ངེས་པར་བསྟན་པ་བསམ་གྱིས་མི་ཁྱབ་པ་དང་རྣམ་པར་བྱང་བ་ངེས་པར་བསྟན་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་
འདི་དག་ནི་བྱང་ཆུབ་སེམས་དཔའ་རྣམས་ཀྱི་སྒྲ་བཞི་སྟེ། བཞི་གང་ཞེ་ན། འདུ་བྱེད་ཀྱི་སྒྲ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྒྲ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་སྒྲ་བསམ་གྱིས་མི་ཁྱབ་པ་དང་རྣམ་པར་བྱང་བའི་སྒྲ་བསམ་གྱིས་མི་ཁྱབ་པ་
དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚིག་བཞི་སྟེ། བཞི་གང་ཞེ་ན། འདུ་བྱེད་ཀྱི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བའི་
ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚིག་གི་ལམ་བཞི་སྟེ། བཞི་གང་ཞེ་ན། འདུ་བྱེད་ཀྱི་ཚིག་གི་ལམ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ཚིག་གི་ལམ་བསམ་གྱིས་མི་ཁྱབ་པ་དང་ཀུན་ནས་
ཉོན་མོངས་པའི་ཚིག་གི་ལམ་བསམ་གྱིས་མི་ཁྱབ་པ་དང་རྣམ་པར་བྱང་བའི་ཚིག་གི་ལམ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགོངས་ཏེ་བཤད་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་དགོངས་ཏེ་བཤད་པ་བསམ་གྱིས་
མི་ཁྱབ་པ་དང་འདུ་བྱེད་ཡོངས་སུ་བཤད་པའི་དགོངས་ཏེ་བཤད་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་དགོངས་ཏེ་བཤད་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་དགོངས་ཏེ་བཤད་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་
སེམས་དཔའ་རྣམས་ཀྱི་ལྷ་ལ་ངེས་པར་རྟོག་པ་བཞི་སྟེ། བཞི་གང་ཞེ་ན། འདུ་བྱེད་ལྷ་ལ་རྟོག་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་ལྷ་ལ་རྟོག་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་ལྷ་ལ་རྟོག་པ་བསམ་གྱིས་མི་ཁྱབ་པ་དང་རྣམ་པར་བྱང་བ་
เล่ม ๕๕ · หน้า 78a
ལྷ་ལ་རྟོག་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མི་ལ་རྟོག་པ་བཞི་སྟེ། བཞི་གང་ཞེ་ན། འདུ་བྱེད་མི་ལ་རྟོག་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་མི་ལ་རྟོག་པ་བསམ་གྱིས་མི་ཁྱབ་
པ་དང་ཀུན་ནས་ཉོན་མོངས་པ་མི་ལ་རྟོག་པ་བསམ་གྱིས་མི་ཁྱབ་པ་དང་རྣམ་པར་བྱང་བ་མི་ལ་རྟོག་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མིང་ལ་རྟོག་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་མིང་ལ་རྟོག་པ་བསམ་གྱིས་མི་
ཁྱབ་པ་དང་འདུ་བྱེད་ཡོངས་སུ་བཤད་པའི་མིང་ལ་རྟོག་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་མིང་ལ་རྟོག་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་མིང་ལ་རྟོག་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་
ཀྱི་འཇུག་པ་བཞི་སྟེ། བཞི་གང་ཞེ་ན། འདུ་བྱེད་ལ་འཇུག་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་ལ་འཇུག་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་ལ་འཇུག་པ་བསམ་གྱིས་མི་ཁྱབ་པ་དང་རྣམ་པར་བྱང་བ་ལ་འཇུག་པ་བསམ་གྱིས་མི་ཁྱབ་
པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྒྲོལ་བ་བཞི་སྟེ། བཞི་གང་ཞེ་ན། འདུ་བྱེད་ཀྱི་སྒྲོལ་བ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྒྲོལ་བ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་སྒྲོལ་བ་བསམ་
གྱིས་མི་ཁྱབ་པ་དང་རྣམ་པར་བྱང་བའི་སྒྲོལ་བ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྡོ་རྗེའི་ཚིག་བཞི་སྟེ། བཞི་གང་ཞེ་ན། འདུ་བྱེད་ཀྱི་རྡོ་རྗེའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་
རྡོ་རྗེའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་རྡོ་རྗེའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བའི་རྡོ་རྗེའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གསང་སྔགས་ཀྱི་ཚིག་བཞི་སྟེ།
เล่ม ๕๕ · หน้า 78b
བཞི་གང་ཞེ་ན། འདུ་བྱེད་གསང་སྔགས་ཀྱི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་གསང་སྔགས་ཀྱི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་གསང་སྔགས་ཀྱི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བའི་གསང་སྔགས་ཀྱི་ཚིག་བསམ་གྱིས་མི་
ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྒྲུབ་པ་བཞི་སྟེ། བཞི་གང་ཞེ་ན། འདུ་བྱེད་སྒྲུབ་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་སྒྲུབ་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་སྒྲུབ་པ་བསམ་གྱིས་མི་ཁྱབ་པ་དང་
རྣམ་པར་བྱང་བ་སྒྲུབ་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མདོ་སྡེའི་ཚིག་བཞི་སྟེ། བཞི་གང་ཞེ་ན། འདུ་བྱེད་མདོ་སྡེའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་མདོ་སྡེའི་ཚིག་བསམ་གྱིས་མི་ཁྱབ་པ་
དང་ཀུན་ནས་ཉོན་མོངས་པ་མདོ་སྡེའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་མདོ་སྡེའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བཏགས་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་བཏགས་པའི་ཚིག་
བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་བཏགས་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་བཏགས་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་བཏགས་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་
བྱང་ཆུབ་སེམས་དཔའ་རྣམས་ཀྱི་སྣང་བའི་ཚིག་བཞི་སྟེ། བཞི་གང་ཞེ་ན། འདུ་བྱེད་སྣང་བའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་སྣང་བའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་སྣང་བའི་ཚིག་བསམ་གྱིས་མི་ཁྱབ་པ་དང་རྣམ་པར་
བྱང་བ་སྣང་བའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གསལ་བའི་ཚིག་བཞི་སྟེ། བཞི་གང་ཞེ་ན། འདུ་བྱེད་གསལ་བའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་གསལ་བའི་ཚིག་
เล่ม ๕๕ · หน้า 79a
བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་གསལ་བའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་གསལ་བའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚིག་བཞི་སྟེ། བཞི་གང་ཞེ་ན།
འདུ་བྱེད་ཀྱི་སྤྱོད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་སྤྱོད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་སྤྱོད་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་སྤྱོད་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་
ཆུབ་སེམས་དཔའ་རྣམས་ཀྱི་སྤྱད་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་ཀྱི་སྤྱད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་སྤྱད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་སྤྱད་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་སྤྱད་པའི་ཚིག་
བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསམ་གྱིས་མི་ཁྱབ་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་བསམ་གྱིས་མི་ཁྱབ་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་བསམ་གྱིས་མི་ཁྱབ་པའི་
ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་བསམ་གྱིས་མི་ཁྱབ་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་བསམ་གྱིས་མི་ཁྱབ་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མཐའ་ཡས་པའི་ཚིག་བཞི་
སྟེ། བཞི་གང་ཞེ་ན། འདུ་བྱེད་མཐའ་ཡས་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་མཐའ་ཡས་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་མཐའ་ཡས་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་མཐའ་ཡས་པའི་ཚིག་བསམ་གྱིས་མི་
ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྒྱུ་བ་མེད་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་རྒྱུ་བ་མེད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་རྒྱུ་བ་མེད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་རྒྱུ་བ་མེད་
เล่ม ๕๕ · หน้า 79b
པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་རྒྱུ་བ་མེད་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མུ་མེད་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་མུ་མེད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་
སུ་བཤད་པ་མུ་མེད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་མུ་མེད་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་མུ་མེད་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གཞལ་དུ་མེད་པའི་ཚིག་
བཞི་སྟེ། བཞི་གང་ཞེ་ན། འདུ་བྱེད་གཞལ་དུ་མེད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་གཞལ་དུ་མེད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་གཞལ་དུ་མེད་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་གཞལ་དུ་མེད་པའི་ཚིག་
བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གྲངས་མེད་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་གྲངས་མེད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་གྲངས་མེད་པའི་ཚིག་བསམ་གྱིས་མི་ཁྱབ་
པ་དང་ཀུན་ནས་ཉོན་མོངས་པ་གྲངས་མེད་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་གྲངས་མེད་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དཔག་ཏུ་མེད་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་
དཔག་ཏུ་མེད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་དཔག་ཏུ་མེད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་དཔག་ཏུ་མེད་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་དཔག་ཏུ་མེད་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །
གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚད་མེད་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་ཚད་མེད་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་ཚད་མེད་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་ཚད་མེད་པའི་ཚིག་
เล่ม ๕๕ · หน้า 80a
བསམ་གྱིས་མི་ཁྱབ་པ་དང་རྣམ་པར་བྱང་བ་ཚད་མེད་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་པའི་ཚིག་བཞི་སྟེ། བཞི་གང་ཞེ་ན། འདུ་བྱེད་ཤེས་པའི་ཚིག་བསམ་གྱིས་མི་ཁྱབ་པ་དང་འདུ་བྱེད་ཡོངས་
སུ་བཤད་པ་ཤེས་པའི་ཚིག་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་ཤེས་པའི་ཚིག་བསམ་གྱིས་མི་ཁྱབ་པ་དང་རྣམ་པར་བྱང་བ་ཤེས་པའི་ཚིག་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་པ་བསགས་པ་བཞི་སྟེ། བཞི་
གང་ཞེ་ན། འདུ་བྱེད་ཀྱི་ཤེས་པ་བསགས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ཤེས་པ་བསགས་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་ཤེས་པ་བསགས་པ་བསམ་གྱིས་མི་ཁྱབ་པ་དང་རྣམ་པར་བྱང་བ་ཤེས་པ་བསགས་པ་བསམ་གྱིས་མི་ཁྱབ་པ་དང་འདི་
བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་པའི་རིགས་བཞི་སྟེ། བཞི་གང་ཞེ་ན། འདུ་བྱེད་ཀྱི་ཤེས་པའི་རིགས་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་ཤེས་པའི་རིགས་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་ཤེས་པའི་རིགས་
བསམ་གྱིས་མི་ཁྱབ་པ་དང་རྣམ་པར་བྱང་བ་ཤེས་པའི་རིགས་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་བསགས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་སྤོབས་པ་བསགས་པ་བསམ་གྱིས་མི་ཁྱབ་པ་དང་འདུ་
བྱེད་ཡོངས་སུ་བཤད་པའི་སྤོབས་པ་བསགས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་སྤོབས་པ་བསགས་པ་བསམ་གྱིས་མི་ཁྱབ་པ་དང་། རྣམ་པར་བྱང་བའི་སྤོབས་པ་བསགས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་
དཔའ་རྣམས་ཀྱི་མདོ་སྡེ་བཞི་སྟེ། བཞི་གང་ཞེ་ན། འདུ་བྱེད་ཀྱི་མདོ་སྡེ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་མདོ་སྡེ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་མདོ་སྡེ་བསམ་གྱིས་མི་ཁྱབ་པ་དང་རྣམ་པར་བྱང་བའི་མདོ་སྡེ་བསམ་གྱིས་མི་ཁྱབ་པ་དང་
เล่ม ๕๕ · หน้า 80b
འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མདོ་སྡེ་བསགས་པ་བཞི་སྟེ། བཞི་གང་ཞེ་ན། །འདུ་བྱེད་ཀྱི་མདོ་སྡེ་བསགས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་མདོ་སྡེ་བསགས་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་
པའི་མདོ་སྡེ་བསགས་པ་བསམ་གྱིས་མི་ཁྱབ་པ་དང་། རྣམ་པར་བྱང་བའི་མདོ་སྡེ་བསགས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མང་དུ་ཐོས་པ་བཞི་སྟེ། བཞི་གང་ཞེ་ན། འདུ་བྱེད་མང་དུ་ཐོས་པ་བསམ་གྱིས་མི་ཁྱབ་
པ་དང་འདུ་བྱེད་ཡོངས་སུ་བཤད་པའི་མང་དུ་ཐོས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པ་མང་དུ་ཐོས་པ་བསམ་གྱིས་མི་ཁྱབ་པ་དང་རྣམ་པར་བྱང་བ་མང་དུ་ཐོས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་
ནོར་བཞི་སྟེ། བཞི་གང་ཞེ་ན། འདུ་བྱེད་ཀྱི་ནོར་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ནོར་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་ནོར་བསམ་གྱིས་མི་ཁྱབ་པ་དང་རྣམ་པར་བྱང་བའི་ནོར་བསམ་གྱིས་མི་ཁྱབ་པ་དང་འདི་བཞིའོ། །གཞོན་
ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསླབ་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་བསླབ་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་བསླབ་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་བསླབ་པ་བསམ་གྱིས་མི་ཁྱབ་པ་དང་རྣམ་
པར་བྱང་བའི་བསླབ་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་བཞི་སྟེ། བཞི་གང་ཞེ་ན། འདུ་བྱེད་ཀྱི་སྤྱོད་ཡུལ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྤྱོད་ཡུལ་བསམ་གྱིས་མི་ཁྱབ་པ་དང་།
ཀུན་ནས་ཉོན་མོངས་པའི་སྤྱོད་ཡུལ་བསམ་གྱིས་མི་ཁྱབ་པ་དང་རྣམ་པར་བྱང་བའི་སྤྱོད་ཡུལ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལས་བཞི་སྟེ། བཞི་གང་ཞེ་ན། འདུ་བྱེད་ཀྱི་ལས་བསམ་གྱིས་མི་ཁྱབ་པ་དང་འདུ་
เล่ม ๕๕ · หน้า 81a
བྱེད་ཡོངས་སུ་བཤད་པའི་ལས་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་ལས་བསམ་གྱིས་མི་ཁྱབ་པ་དང་རྣམ་པར་བྱང་བའི་ལས་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་བཞི་སྟེ། བཞི་གང་ཞེ་ན།
འདུ་བྱེད་ཀྱི་སྤོབས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྤོབས་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་སྤོབས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་སྤོབས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་
རྣམས་ཀྱི་ལམ་བསྒོམ་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་ལམ་བསྒོམ་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ལམ་བསྒོམ་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་ལམ་བསྒོམ་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་ལམ་
བསྒོམ་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ནས་ཉོན་མོངས་པའི་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀུན་ནས་ཉོན་མོངས་པ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པ་ཀུན་ནས་ཉོན་མོངས་པ་
ཤེས་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པ་ཀུན་ནས་ཉོན་མོངས་པ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བ་ཀུན་ནས་ཉོན་མོངས་པ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འབྲས་བུ་ཡོད་པའི་ཤེས་པ་བཞི་སྟེ། བཞི་
གང་ཞེ་ན། འདུ་བྱེད་ཀྱི་འབྲས་བུ་ཡོད་པའི་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་འབྲས་བུ་ཡོད་པའི་ཤེས་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་འབྲས་བུ་ཡོད་པའི་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་འབྲས་བུ་ཡོད་པའི་ཤེས་
པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མ་རིག་པ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་མ་རིག་པ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་མ་རིག་པ་ཤེས་པ་བསམ་གྱིས་མི་ཁྱབ་པ་དང་། ཀུན་
เล่ม ๕๕ · หน้า 81b
ནས་ཉོན་མོངས་པའི་མ་རིག་པ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་མ་རིག་པ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་སྡུག་བསྔལ་
ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྡུག་བསྔལ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་སྡུག་བསྔལ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་སྡུག་བསྔལ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་
ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡིད་མི་བདེ་བ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་ཡིད་མི་བདེ་བ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ཡིད་མི་བདེ་བ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་ཡིད་མི་
བདེ་བ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་ཡིད་མི་བདེ་བ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབུལ་པོ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་དབུལ་པོ་ཤེས་པ་བསམ་གྱིས་མི་
ཁྱབ་པ་དང་འདུ་བྱེད་ཡོངས་སུ་བཤད་པའི་དབུལ་པོ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་དབུལ་པོ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་དབུལ་པོ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་
སེམས་དཔའ་རྣམས་ཀྱི་སྐྱེ་བ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་སྐྱེ་བ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྐྱེ་བ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་སྐྱེ་བ་ཤེས་པ་བསམ་གྱིས་མི་ཁྱབ་པ་དང་རྣམ་པར་
བྱང་བའི་སྐྱེ་བ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ནང་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་ནང་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ནང་ཤེས་པ་བསམ་གྱིས་
เล่ม ๕๕ · หน้า 82a
མི་ཁྱབ་པ་དང་། ཀུན་ནས་ཉོན་མོངས་པའི་ནང་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་ནང་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཕྱི་རོལ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་ཕྱི་
རོལ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ཕྱི་རོལ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་ཕྱི་རོལ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་ཕྱི་རོལ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་
སེམས་དཔའ་རྣམས་ཀྱི་ངོ་ཚ་ཤེས་པའི་ཡེ་ཤེས་བཞི་སྟེ། བཞི་གང་ཞེ་ན། འདུ་བྱེད་ཀྱི་ངོ་ཚ་ཤེས་པའི་ཡེ་ཤེས་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་ངོ་ཚ་ཤེས་པའི་ཡེ་ཤེས་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་ངོ་ཚ་ཤེས་པའི་ཡེ་ཤེས་བསམ་གྱིས་
མི་ཁྱབ་པ་དང་རྣམ་པར་བྱང་བའི་ངོ་ཚ་ཤེས་པའི་ཡེ་ཤེས་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བདེན་པ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་བདེན་པ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་
པའི་བདེན་པ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་བདེན་པ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་བདེན་པ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྲིད་པ་ཤེས་པ་བཞི་སྟེ།
བཞི་གང་ཞེ་ན། འདུ་བྱེད་ཀྱི་སྲིད་པ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་སྲིད་པ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་སྲིད་པ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་སྲིད་པ་ཤེས་པ་བསམ་གྱིས་མི་ཁྱབ་པ་དང་འདི་
བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དངོས་པོ་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་དངོས་པོ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་དངོས་པོ་ཤེས་པ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པའི་
เล่ม ๕๕ · หน้า 82b
དངོས་པོ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་དངོས་པོ་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གང་ཟག་ཤེས་པ་བཞི་སྟེ། བཞི་གང་ཞེ་ན། འདུ་བྱེད་ཀྱི་གང་ཟག་ཤེས་པ་བསམ་གྱིས་མི་ཁྱབ་པ་དང་འདུ་བྱེད་
ཡོངས་སུ་བཤད་པའི་གང་ཟག་ཤེས་པ་བསམ་གྱིས་མི་ཁྱབ་པ་དང་ཀུན་ནས་ཉོན་མོངས་པའི་གང་ཟག་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་གང་ཟག་ཤེས་པ་བསམ་གྱིས་མི་ཁྱབ་པ་དང་འདི་བཞིའོ། །གཞོན་ནུ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་དམིགས་པ་
ཤེས་པ་བསམ་གྱིས་མི་ཁྱབ་པ་བསམ་གྱིས་མི་ཁྱབ་པར་བསྟན་པ་བཞི་སྟེ། མཐར་ཕྱིན་པའི་གནས་སུ་བསྟན་པར་སླ་བ་མ་ཡིན་ནོ། །བཞི་གང་ཞེ་ན། འདུ་བྱེད་ཀྱི་དམིགས་པ་ཤེས་པ་བསམ་གྱིས་མི་ཁྱབ་པ་དང་འདུ་བྱེད་ཡོངས་སུ་བཤད་པའི་དམིགས་པ་ཤེས་པ་བསམ་གྱིས་
མི་ཁྱབ་པ་དང་། ཀུན་ནས་ཉོན་མོངས་པའི་དམིགས་པ་ཤེས་པ་བསམ་གྱིས་མི་ཁྱབ་པ་དང་རྣམ་པར་བྱང་བའི་དམིགས་པ་ཤེས་པ་བསམ་གྱིས་མི་ཁྱབ་པ་དང་། འདི་དག་ནི་བྱང་ཆུབ་སེམས་དཔའ་རྣམས་ཀྱི་དམིགས་པ་ཤེས་པ་བསམ་གྱིས་མི་ཁྱབ་པ་བསམ་གྱིས་མི་ཁྱབ་པར་
བསྟན་པ་བཞི་སྟེ། དེ་དག་ནི་མཐར་ཕྱིན་པའི་གནས་སུ་བསྟན་པར་སླ་བ་མ་ཡིན་ནོ། །གཟུངས་བཞི་སྟེ། བཞི་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་མཐའ་ཡས་པར་བཤད་པ་བརྗོད་པ་དེ་ལ་གང་ཤེས་པ་འདི་ནི་གཟུངས་དང་པོའོ། །དབྱངས་མཐའ་ཡས་པར་
བཤད་པ་བརྗོད་པ་དེ་ལ་གང་ཤེས་པ་འདི་ནི་གཟུངས་གཉིས་པའོ། །ཀུན་ནས་ཉོན་མོངས་པ་མཐའ་ཡས་པར་བཤད་པ་བརྗོད་པ་དེ་ལ་གང་ཤེས་པ་འདི་ནི་གཟུངས་གསུམ་པའོ། །རྣམ་པར་བྱང་བའི་ཡོན་ཏན་གྱིས་ཕན་ཡོན་མཐའ་ཡས་པར་བཤད་པ་བརྗོད་པ་དེ་ལ་གང་ཤེས་
པ་འདི་ནི་གཟུངས་བཞི་པ་སྟེ། གཟུངས་བཞི་པོ་ནི་འདི་དག་གོ། །གཞོན་ནུ་འདི་ལྟར་གཟུངས་གང་ཡིན་པ་དེ་ནི་ཤེས་པའོ། །དེ་ནི་ཆོས་སོ། །འདི་ལྟར་ཆོས་ཤེས་པས་ཆོས་སོ་སོ་ཡང་དག་པར་རིག་པའོ། །ཆོས་ཤེས་པ་ལ་དོན་གང་ཡིན་པ་དེ་ནི་དོན་སོ་སོ་ཡང་དག་
เล่ม ๕๕ · หน้า 83a
པར་རིག་པ་ཞེས་བྱའོ། །ཆོས་ཤེས་པ་ལ་འདུན་པ་གང་ཡིན་པ་དེ་ནི་ངེས་པའི་ཚིག་སོ་སོ་ཡང་དག་པར་རིག་པ་ཞེས་བྱའོ། །ཆོས་ཤེས་པ་ལ་ཐ་སྙད་དུ་སྟོན་པ་དང་འཆད་པ་དང་འདོགས་པ་དང་རབ་ཏུ་སྟོན་པ་དང་རབ་ཏུ་འགོད་པ་དང་འབྱེད་པ་དང་རྣམ་པར་འབྱེད་པ་དང་གསལ་
བར་བྱེད་པ་དང་ཚིག་ཐོགས་པ་མེད་པ་དང་ཚིག་མི་འདོར་ཞིང་མ་ལྐུགས་མི་དིག་པ་དང་། ཚིག་ཞུམ་པ་མེད་པ་འདི་ནི་གཞོན་ནུ་སྤོབས་པ་སོ་སོ་ཡང་དག་པར་རིག་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་ཡེ་ཤེས་
ཇི་སྙེད་པ། །གཟུགས་སུ་བརྟགས་པའང་དེ་སྙེད་དེ། །གཟུགས་སུ་བརྟགས་པ་ཇི་སྙེད་པ། །གཟུགས་སུ་བརྗོད་པ་འང་དེ་སྙེད་དོ། །གཟུགས་སུ་བརྗོད་པ་ཇི་སྙེད་པ། །ཚུལ་ཁྲིམས་མིང་ཡང་དེ་སྙེད་དོ། །ཚུལ་ཁྲིམས་མིང་ཡང་ཇི་སྙེད་པ། །སངས་རྒྱས་མིང་ཡང་དེ་སྙེད་
དོ། །སངས་རྒྱས་མིང་ནི་ཇི་སྙེད་པ། །སེམས་ཅན་མིང་ཡང་དེ་སྙེད་དོ། །སེམས་ཅན་གཅིག་གི་མིང་ཡང་ནི། །དེ་སྙེད་དུ་ནི་ངས་བཤད་དོ། །མིང་དང་བརྗོད་པ་མཐའ་ཡས་པ། །གང་དག་ངས་ནི་སྔར་བཤད་རྣམས། །ཚུལ་ཁྲིམས་མིང་དང་སངས་རྒྱས་མིང་། །སེམས་
ཅན་མིང་དང་དེ་དག་མཚུངས། །འདུས་བྱས་ཉེས་པ་ཇི་སྙེད་པ། །མྱ་ངན་འདས་བསྔགས་དེ་སྙེད་དེ། །སངས་རྒྱས་ཀྱི་ནི་བསྔགས་པ་དང་། །དཔེ་ཡང་དེ་སྙེད་ངས་བཤད་དོ། །ཇི་སྙེད་སེམས་ཅན་ཐམས་ཅད་ཀྱི། །སེམས་རྣམས་སྐྱེ་བ་ངེས་བསྟན་པ། །འཇིག་རྟེན་མགོན་པོའི་
སྤུ་གཅིག་ནས། །འོད་ཟེར་དག་ཀྱང་དེ་སྙེད་འབྱུང་། །སེམས་ཅན་ཀུན་གྱི་མོས་པ་དང་། །མིང་རྣམས་ཇི་སྙེད་ཡོད་པ་བས། །དེ་བས་མི་ཡི་དབང་པོ་ཡི། །དབྱངས་ཀྱི་ཡན་ལག་བསྔགས་པ་མང་། །སེམས་ཅན་ཀུན་གྱིས་མིང་ཡོད་པ། །དེ་དག་སེམས་ཅན་གཅིག་ལ་བསྟན། །
སེམས་ཅན་གཅིག་མིང་ཇི་སྙེད་པ། །སེམས་ཅན་ཀུན་གྱི་མིང་དུ་བསྟན། །སོ་སོ་ཡང་དག་རིག་འཇུག་པ། །འདི་ནི་སངས་རྒྱས་བསྟན་པ་སྟེ། །བྱང་ཆུབ་སེམས་དཔའི་ཕྱིར་ཡང་ནི། །མིང་རྣམས་མཐའ་ཡས་ངེས་པར་བསྟན། །མདོ་སྡེ་བྱེ་བ་བསམ་ཡས་རྣམས། །ཇི་ལྟར་
เล่ม ๕๕ · หน้า 83b
བཤད་སྙམ་གང་སེམས་པ། །མདོ་སྡེ་འདི་ནི་རབ་བརྗོད་ལ། །ཞུམ་པ་མེད་པར་བཤད་པར་གྱིས། །འཁོར་གྱི་ནང་དུ་ཐོགས་མེད་པར། །མདོ་སྡེ་བྱེ་བ་རབ་ཏུ་འཆད། །ཇི་ལྟར་ནམ་མཁའ་མཐའ་མེད་པ། །དེ་བཞིན་དེ་ལའང་ཆོས་རྣམས་སྟོན། །དེ་ལྟར་བྱང་ཆུབ་སེམས་དཔའ་
དག །སེམས་ཅན་དག་པ་སྐྱོབ་པ་རྣམས། །མདོ་སྡེ་འདི་དག་བཟུང་ནས་ནི། །ཡེ་ཤེས་ཕུན་སུམ་ཚོགས་པར་འགྱུར། །དད་པས་ཇི་ལྟ་ཇི་ལྟ་བུར། །ཚུལ་འདི་རབ་ཏུ་སྟོན་བྱེད་པ། །དེ་བཞིན་དེ་ཡི་ཡེ་ཤེས་འཕེལ། །གངས་རི་ལ་ནི་སྡོང་པོ་བཞིན། །དེ་བཞིན་གཤེགས་པ་
བསམ་གྱིས་མི་ཁྱབ་པའི་ལེའུ་སྟེ་ཉི་ཤུ་བཞི་པའོ།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བརྒྱད་པ། གཞོན་ནུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་ཆོས་སོ་སོ་ཡང་དག་པར་རིག་པ་ལ་སྤྱོད་ན་ཆོས་ལ་ཆོས་ཀྱི་རྗེས་སུ་ལྟ་ཞིང་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་སྒྲུབ་པར་འགྱུར་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་རྣམས་ལ་ཆོས་ཀྱི་རྗེས་སུ་ལྟ་བས་གཟུགས་ལས་གཞན་དུ་བྱང་ཆུབ་ཡང་དག་པར་རྗེས་སུ་མི་མཐོང་། གཟུགས་ལས་གཞན་དུ་
ཡང་བྱང་ཆུབ་ལ་མི་སྤྱོད། གཟུགས་ལས་གཞན་དུ་ཡང་བྱང་ཆུབ་ཡོངས་སུ་མི་ཚོལ། གཟུགས་ལས་གཞན་དུ་ཡང་བྱང་ཆུབ་ཡང་དག་པར་མི་སྒྲུབ། གཟུགས་ལས་གཞན་དུ་ཡང་སེམས་ཅན་རྣམས་བྱང་ཆུབ་ལ་ཡང་དག་པར་མི་འཛུད། གཟུགས་ལས་གཞན་དུ་ཡང་
དེ་བཞིན་གཤེགས་པ་མི་མཐོང་སྟེ། གཟུགས་ཀྱི་མི་འཇིགས་པའི་ངོ་བོ་ཉིད་དེ་བཞིན་གཤེགས་པའོ་ཞེས་དེ་བཞིན་གཤེགས་པར་ལྟའོ། །གཟུགས་ཀྱང་གཞན་གཟུགས་ཀྱི་ངོ་བོ་ཉིད་ཀྱང་གཞན་ནོ་ཞེས་དེ་ལྟར་མི་ལྟའོ། །གཟུགས་ཀྱི་ངོ་བོ་ཉིད་ཀྱང་གཞན་དེ་བཞིན་གཤེགས་
པ་ཡང་གཞན་ནོ་ཞེས་དེ་ལྟར་ཡང་མི་ལྟའོ། །གཟུགས་ཀྱིས་ངོ་བོ་ཉིད་གང་ཡིན་པ་དང་དེ་བཞིན་གཤེགས་པ་གང་ཡིན་པ་དེ་ནི་གཉིས་སུ་མེད་པའི་ཆོས་ཉིད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ལྟ་ན་ཆོས་སོ་སོ་ཡང་དག་པར་རིག་པ་ལ་སྤྱོད་དོ། །དེ་བཞིན་དུ་
เล่ม ๕๕ · หน้า 84a
ཚོར་བ་ལས་གཞན་དུ་མ་ཡིན། འདུ་ཤེས་ལས་གཞན་དུ་མ་ཡིན། འདུ་བྱེད་རྣམས་ལས་གཞན་དུ་མ་ཡིན་ཏེ། རྣམ་པར་ཤེས་པ་ལས་གཞན་དུ་བྱང་ཆུབ་མི་མཐོང་། རྣམ་པར་ཤེས་པ་ལས་གཞན་དུ་ཡང་བྱང་ཆུབ་ལ་མི་སྤྱོད། རྣམ་པར་ཤེས་པ་ལས་གཞན་དུ་ཡང་
བྱང་ཆུབ་ཡོངས་སུ་མི་ཚོལ། རྣམ་པར་ཤེས་པ་ལས་གཞན་དུ་ཡང་བྱང་ཆུབ་ཡང་དག་པར་མི་སྒྲུབ། རྣམ་པར་ཤེས་པ་ལས་གཞན་དུ་ཡང་སེམས་ཅན་རྣམས་བྱང་ཆུབ་ལ་ཡང་དག་པར་མི་འཛུད། རྣམ་པར་ཤེས་པ་ལས་གཞན་དུ་ཡང་དེ་བཞིན་གཤེགས་པ་མི་མཐོང་སྟེ། རྣམ་
པར་ཤེས་པའི་མི་འཇིགས་པའི་ངོ་བོ་ཉིད་དེ་བཞིན་གཤེགས་པའོ་ཞེས་དེ་བཞིན་གཤེགས་པར་བལྟའོ། །རྣམ་པར་ཤེས་པ་ཡང་གཞན། རྣམ་པར་ཤེས་པའི་ངོ་བོ་ཉིད་ཀྱང་གཞན་ནོ་ཞེས་དེ་ལྟར་མི་ལྟའོ། །རྣམ་པར་ཤེས་པའི་ངོ་བོ་ཉིད་ཀྱང་གཞན་དེ་བཞིན་གཤེགས་པ་ཡང་གཞན་
ནོ་ཞེས་དེ་ལྟར་ཡང་མི་ལྟའོ། །རྣམ་པར་ཤེས་པའི་ངོ་བོ་ཉིད་གང་ཡིན་པ་དང་། དེ་བཞིན་གཤེགས་པ་གང་ཡིན་པ་དེ་གཉིས་སུ་མེད་པའི་ཆོས་ཉིད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ལྟ་ན་ཆོས་སོ་སོ་ཡང་དག་པར་རིག་པ་ལ་སྤྱོད་དོ། །དེ་ནས་བཅོམ་ལྡན་འདས་
ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །གཟུགས་ཀྱིས་ཀྱང་ནི་བྱང་ཆུབ་བསྟན། །བྱང་ཆུབ་ཀྱིས་ཀྱང་གཟུགས་བསྟན་ཏེ། །མི་མཚུངས་པ་ཡི་སྒྲ་རྣམས་ཀྱིས། །ཆོས་ཀྱི་བླ་མ་རབ་ཏུ་བསྟན། །སྒྲ་ཡིས་གཟུགས་ཀྱི་བླ་མ་སྟེ། །ངོ་བོ་ཉིད་ཀྱིས་ཟབ་པ་དག །
གཟུགས་དང་བྱང་ཆུབ་མཉམ་པ་སྟེ། །ཐ་དད་བྱ་བ་དེ་མི་རྙེད། །མྱ་ངན་འདས་པ་ཟབ་པར་ཡང་། །སྒྲ་ཡིས་རབ་ཏུ་བསྟན་པ་ལྟར། །མྱ་ངན་འདས་པ་མི་རྙེད་དེ། །དེ་ཡི་སྒྲ་ཡང་མི་རྙེད་དོ། །སྒྲ་དང་མྱ་ངན་འདས་པ་ནི། །གཉི་ག་རྙེད་པར་མི་འགྱུར་ཏེ། །དེ་བཞིན་སྟོང་པའི་
ཆོས་རྣམས་ལ། །མྱ་ངན་འདས་པ་རབ་ཏུ་བསྟན། །མྱ་ངན་འདས་དང་འདའ་བར་ནི། །མྱ་ངན་འདས་པ་མི་རྙེད་དེ། །འདི་ནི་ཆོས་རྣམས་འཇུག་མེད་པ། །ཕྱིས་ནི་ཅི་འདྲ་དེ་བཞིན་སྔོན། །ཆོས་རྣམས་ཐམས་ཅད་རང་བཞིན་གྱིས། །མྱ་ངན་འདས་དང་མཚུངས་མཉམ་
เล่ม ๕๕ · หน้า 84b
པར། །སངས་རྒྱས་བསྟན་ལ་བརྩོན་པ་ཡི། །འབྱུང་བ་ལྷུར་བྱེད་རྣམས་ཀྱིས་རིག །སངས་རྒྱས་ཀྱི་ནི་སྐུ་མཐོང་ནས། །འདྲེན་པ་མཐོང་ཞེས་སྨྲ་མོད་ཀྱི། །ང་ནི་གཟུགས་ཀྱི་སྐུ་ལུས་སུ། །སུས་ཀྱང་བལྟ་བར་མི་ནུས་སོ། །གཟུགས་ཀྱི་མཚན་ཉིད་ཅི་འདྲ་བར། །གཟུགས་ཀྱི་
ངོ་བོ་ཉིད་ཤེས་ཏེ། །གཟུགས་ཀྱི་ངོ་བོ་ཉིད་ཤེས་ན། །ང་ཡི་སྐུ་ཡང་ངེས་པར་བསྟན། །དེ་བཞིན་ཕུང་པོ་ལྔ་རྣམས་ཀྱི། །ཆོས་ཀྱི་མཚན་ཉིད་ངས་ཤེས་ཏེ། །ཆོས་ཀྱི་རང་བཞིན་ཤེས་ནས་ནི། །ཆོས་ཀྱི་སྐུ་ལ་རབ་ཏུ་གནས། །ཆོས་ཀྱི་སྐུ་ལ་རབ་གནས་ནས། །སེམས་ཅན་རྣམས་ལ་
ཆོས་སྟོན་ཏོ། །ཆོས་ཀྱི་སྐུ་ལ་མི་རྟེན་པར། །སེམས་ཅན་རྣམས་ལ་ཆོས་སྟོན་ཏོ། །སངས་རྒྱས་དག་གི་ཆོས་རྣམས་ནི། །ཚིག་གིས་བཤད་པར་མི་ནུས་ཏེ། །འདི་འདྲའི་ཚུལ་རྣམས་མི་ཤེས་པས། །སངས་རྒྱས་ཀྱི་ནི་སྒྲ་ཐོས་ནས། །ཚིག་ཙམ་གྱིས་ནི་འདི་སྐད་སྨྲ། །ངས་ནི་
འདྲེན་པ་མཐོང་ཞེས་ཏེ། །འདུ་ཤེས་ཐམས་ཅད་སྤངས་པ་ལ། །སྲིད་པར་འདུ་ཤེས་མེད་པར་འགྱུར། །སྒྲར་ནི་འདུ་ཤེས་འཛིན་པ་ལ། །ནམས་ཀྱང་སྟོན་པ་མཐོང་བ་མེད། །འདི་ལྟ་བུ་ཡི་གཟུགས་ཀྱི་མཚན། །སྟོང་པ་ཉིད་ནི་སུས་ཤེས་པ། །གཟུགས་ཀྱི་རང་བཞིན་གཞན་
ཡིན་ལ། །སྟོང་ཉིད་གཞན་དུ་མ་གསུངས་ཏེ། །གང་གིས་གཟུགས་རྣམས་རབ་ཤེས་པ། །དེས་ནི་སྟོང་ཉིད་རབ་ཏུ་ཤེས། །གཟུགས་ཀྱི་མཚན་ཉིད་འདི་འདྲ་བར། །སྟོང་པ་གང་གིས་རབ་ཤེས་པ། །དེས་ནི་བདུད་རྣམས་བྱེ་བ་སྙེད། །ཟིལ་གྱིས་མནན་ཏེ་ཕམ་བྱེད་ནུས། །
གང་གིས་གཟུགས་རྣམས་རབ་ཤེས་པ། །དེས་ནི་སྟོང་པ་ཉིད་ཀྱང་ཤེས། །གང་གིས་སྟོང་ཉིད་རབ་ཤེས་པ། །དེས་ནི་མྱ་ངན་འདས་པ་ཤེས། །རྣམ་པ་འདི་ནི་མི་ཤེས་པས། །དམིགས་པ་ཅན་རྣམས་རབ་ཏུ་བརླག །དངོས་པོ་མེད་ལ་དངོས་འཛིན་ཅིང་། །དངོས་མེད་
ལ་ཡང་དངོས་སུ་འཛིན། །ཤེས་ཀྱི་ཁེ་ཡིས་བསླུས་པ་དག །ང་ཡི་བསྟན་ལས་ཤིན་ཏུ་འཁྱམས། །འབྲས་བུར་འདུ་ཤེས་གནས་པ་ལ། །དགེ་སྦྱོང་ནོར་ནི་གསོག་ཏུ་གྱུར། །བརྩོན་འགྲུས་ཉམས་པ་ལེ་ལོ་ཅན། །ཚུལ་ཁྲིམས་ཕུང་པོར་མི་གནས་པ། །ཀུན་
เล่ม ๕๕ · หน้า 85a
ནས་ལངས་པས་སྨྲ་བ་ནི། །འདི་ནི་སངས་རྒྱས་བཤད་མ་ཡིན། །ལ་ལ་དག་ནི་འདི་སྐད་དུ། །བདག་ཅག་བྱང་ཆུབ་ཞུགས་ཞེས་ཟེར། །མ་དུལ་ཞིང་ནི་མ་བྱང་བ། །གཅིག་ལ་གཅིག་ཀྱང་རི་མོ་མེད། །ཆོས་དག་ལ་ཡང་མི་གནས་ཤིང་། །སྒྲ་འདོད་པ་དག་
འབྱུང་བར་འགྱུར། །དེ་ལྟ་བུ་ནི་དེ་མོས་ཏེ། །ཤེས་ཀྱི་ཁེ་ནི་ཚོལ་བའི་ཕྱིར། །འདུས་པ་དག་ལ་སེམས་བྱེད་ཅིང་། །རྙེད་པ་འདོད་པ་འབྱུང་བར་འགྱུར། །རྒྱགས་དང་བག་མེད་ཟིལ་ནོན་པས། །རྙེད་དང་བཀུར་སྟི་དོན་དུ་གཉེར། །བཀུར་སྟི་རྙེད་ལ་བརྟེན་ནས་ནི། །ཤེས་ཀྱི་
ཁེ་རྣམས་ཚོལ་བ་དག །གཙུག་ལག་ཁང་དང་མཆོད་རྟེན་བྱེད། །ཁྱིམ་མི་མོ་ལ་ཆགས་ཤིང་མོས། །དམིགས་པ་དག་ལ་རྟེན་བྱེད་ཅིང་། །འདོད་པའི་སྲེད་ལ་ཤིན་ཏུ་གནས། །བདུད་ཀྱི་ཡུལ་དུ་གནས་ནས་ནི། །ཁྱིམ་པ་དག་གི་ལས་བྱེད་འགྱུར། །འདོད་པ་མེ་ལྕེ་འདྲ་
བ་ནི། །ཁྱིམ་པ་དག་ལ་སྟོན་པར་འགྱུར། །དེ་དག་གི་ཡང་ཁྱིམ་ཞུགས་ནས། །དེ་ཡི་རིགས་ཀྱང་སུན་བྱེད་འགྱུར། །དེ་དག་ལ་ནི་ཁྱིམ་པ་རྣམས། །སྟོན་པ་ཉིད་དུ་འདུ་ཤེས་འགྱུར། །རབ་ཏུ་གནས་བཅས་དེ་དག་གི། །བུ་དང་ཆུང་མ་སུན་པར་བྱེད། །སུ་དག་དེ་ལ་ཟས་སྐོམ་
གྱིས། །ཕན་འདོགས་པ་ནི་བྱེད་པར་འགྱུར། །དེ་ཡི་བུ་མོ་བུད་མེད་ལ། །ཆུང་མ་ཉིད་དུ་འདུ་ཤེས་འགྱུར། །དེ་དག་འདིར་ནི་རབ་བྱུང་ནས། །ཇི་ལྟར་གཞན་གྱི་བུད་མེད་ཆགས། །ཁྱིམ་པ་བདག་གི་ཆུང་མ་ལ། །དེ་ལྟར་མོས་ཤིང་ཆགས་མི་འགྱུར། །ཁྱིམ་པ་སྐྱ་བོའི་
གོས་གྱོན་ལ། །ངས་ནི་བསླབ་པ་གང་བཤད་པ། །དེ་ཚེ་དགེ་སློང་དེ་དག་ལ། །བསླབ་པ་དེ་ཡང་མེད་པར་འགྱུར། །དེ་དག་རྔ་དུང་རྫ་རྔ་ཡིས། །ང་ལ་མཆོད་པ་བྱེད་འགྱུར་ཏེ། །མཆོད་པའི་དམ་པ་གང་ཡིན་པ། །ནན་ཏན་འདི་ནི་མེད་པར་འགྱུར། །དེ་དག་བདག་ཉིད་
ཚུལ་ཁྲིམས་འཆལ། །ཚུལ་ཁྲིམས་གནས་པ་མཐོང་ནས་ནི། །ཕན་ཚུན་དུ་ཡང་འདི་སྐད་དུ། །འདི་དག་ངེད་དང་འདྲ་ཞེས་སྨྲ། །སྡིག་པའི་སྤྱོད་ཡུལ་ཚུལ་ཁྲིམས་འཆལ། །དེ་དག་ཚུལ་ཁྲིམས་བསྔགས་ཐོས་ནས། །ཀུན་ནས་ལངས་པ་འདི་སྐད་དུ། །སངས་རྒྱས་
เล่ม ๕๕ · หน้า 85b
མཁྱེན་པ་འདི་མིན་སྨྲ། །དེ་དག་ལ་ནི་ངོ་ཚ་མེད། །དགེ་སྦྱོང་གི་ནི་ནོར་སྟོར་ཏེ། །མི་བདེན་ཚིག་གིས་རྩོད་བྱེད་ཅིང་། །སངས་རྒྱས་བྱང་ཆུབ་རབ་ཏུ་སྤོང་། །ངན་སེམས་ལྡན་པ་དེ་དག་ནི། །སངས་རྒྱས་བསྟན་པ་འདི་བོར་ཏེ། །ཆོས་རྣམས་རབ་ཏུ་སྤངས་ནས་ནི། །མནར་
མེད་པར་ཡང་གནས་པར་འགྱུར། །གང་དག་སྤྱོད་པ་དེ་འདྲ་བ། །ངས་ནི་མ་ཐོས་མ་མཐོང་སྟེ། །བྱིས་པའི་ཆོས་ལ་གནས་པ་རྣམས། །སངས་རྒྱས་ཡེ་ཤེས་ཐོབ་མི་འགྱུར། །དེ་དག་གི་ཡང་ཚུལ་འཆོས་དང་། །དེ་ལ་གཡོ་ཡང་ཅི་ཡོད་པ། །ཐམས་ཅད་དེ་བཞིན་ངས་ཤེས་
ཏེ། །དེ་ལ་ང་ཡི་ཡེ་ཤེས་འཇུག །དེ་ཡི་འཁྲུལ་པ་མང་པོ་ནི། །གལ་ཏེ་བསྐལ་པར་རབ་བཤད་ཀྱང་། །བྱང་ཆུབ་སེམས་དཔར་ཁས་འཆེ་ཡི། །ཅུང་ཟད་ཙམ་ཞིག་བརྗོད་པར་འགྱུར། །གཞོན་ནུར་གྱུར་པ་དེ་དག་ནི། །སྡིག་པ་མི་བྱེད་ཡོང་མེད་དེ། །ཕྱི་མའི་དུས་ལ་
དེ་དག་དང་། །ཁྱོད་ནི་སྟོན་པར་མ་བྱེད་ཅིག །སྨྲ་བ་དང་ནི་གཏམ་གྱིས་ལ། །དེ་དག་ལ་ནི་རི་མོར་གྱིས། །བྱང་ཆུབ་དམ་པའི་དོན་གྱི་ཕྱིར། །ཞུམ་པ་མེད་པར་བཀུར་སྟི་གྱིས། །ལོ་གྲངས་དུ་ལོན་ཀུན་དྲིས་ལ། །དེ་དག་རྒན་པར་གྱུར་ན་ཡང་། །དེ་ལ་རི་མོ་ལེགས་
གྱིས་ལ། །རྐང་པ་ལ་ཡང་མགོས་ཕྱག་འཚོལ། །བྱང་ཆུབ་སྙིང་པོ་རྣམས་མཐོང་ན། །དེ་དག་འཁྲུལ་པ་མི་བལྟའོ། །དེ་ལ་ཁོང་ཁྲོ་མི་བསྐྱེད་ཅིང་། །རྟག་ཏུ་བྱམས་པའི་སེམས་སུ་བྱ། །གང་གི་འཁྲུལ་པ་ཅི་མཐོང་ཡང་། །དེ་དག་གི་ནི་ཉེས་མི་བརྗོད། །ཅི་འདྲ་
བ་ཡི་ལས་བྱས་པ། །འབྲས་བུ་དེ་འདྲ་ཐོབ་པར་འགྱུར། །བཞིན་གྱི་ཟླ་བ་འཛུམ་བཞིན་དུ། །རྒན་རབས་དང་ནི་གསར་བུ་ལ། །རྟག་ཏུ་གསོང་པོར་སྨྲ་བ་དང་། །དེས་ཤིང་ང་རྒྱལ་བཅོམ་པར་བྱ། །ཆོས་གོས་དང་ནི་བསོད་སྙོམས་ཀྱིས། །དེ་དག་ལ་ནི་ཕན་གདགས་
ཤིང་། །འདི་དག་ཐམས་ཅད་འདྲེན་འགྱུར་ཞེས། །དེ་ལྟར་ཁྱོད་ཀྱི་སེམས་ཞོག་ཤིག །གལ་ཏེ་ཆོས་ཀྱི་སྦྱིན་པའི་ཕྱིར། །དེ་དག་ཁྱོད་ལ་གསོལ་འདེབས་ན། །དང་པོར་ཚིག་ནི་འདི་སྐད་སྨྲོས། །ཁོ་བོས་མཚུངས་མེད་མ་བསླབས་སོ། །འདི་སྐད་དུ་ནི་ཚིག་བརྗོད་དེ། །
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด