མིག་བཅུ་གཉིས་པ་ཞེས་བྱ་བའི་མདོ
ชื่อสันสกฤต (อักษรทิเบต ตามตัวบท) དྭཱི་ད་ཤ་ལོ་ཙ་ན་ནཱ་མ་སཱུ་ཏྲ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๗๖ · หน้า 277b
༄༅༅། །རྒྱ་གར་སྐད་དུ། དྭཱི་ད་ཤ་ལོ་ཙ་ན་ནཱ་མ་སཱུ་ཏྲ། བོད་སྐད་དུ། མིག་བཅུ་གཉིས་པ་ཞེས་བྱ་བའི་མདོ། གྲུབ་པར་གྱུར་ཅིག་
སངས་རྒྱས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་འོད་མའི་ཚལ་ན་བཞུགས་ཏེ། དེའི་ཚེ་གློག་བྱུང་། སྐར་མདའ་ལྟུང་། གནམ་ལྕགས་བབ་པ་དང་། དེ་ནས་རྒྱལ་པོ་གཟུགས་ཅན་སྙིང་པོ་འཁོར་དང་བཅས་པས་ལྟས་མཁན་བྲམ་ཟེ་རྣམས་བཀུག་ནས་སྨྲས་པ། ཅིའི་རྒྱུ་ཅིའི་
རྐྱེན་གྱིས་གནམ་ཀུན་འཁྲུག་པར་འགྱུར། བྲམ་ཟེ་རྣམས་ཀྱིས་གསོལ་པ། ལྟས་འདི་ལྟ་བུ་དག་མིག་བཅུ་གཉིས་ཞེས་བགྱི་བའི་གཙུག་ལག་ལས་འབྱུང་སྟེ། བདག་གིས་ཁྲེལ་བར་རྔོ་མི་ཐོགས་སོ། །དེ་ནས་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་དེར་སོང་སྟེ་
เล่ม ๗๖ · หน้า 278a
ཞབས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གྱི་དོན་དུ་ཐུགས་བརྩེ་བར་དགོངས་ཏེ། མིག་བཅུ་གཉིས་ཀྱི་ལྟས་ཀྱི་གཙུག་ལག་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་བྱུང་བས་ནི་ཕྱི་རོལ་པ་
འཇིག་རྟེན་གྱི་གཙུག་ལག་འདི་ལྟ་བུ་དག་བཤད་པའི་ཆ་མ་ཡིན་ནོ། །དེ་ནས་ཡང་རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ལ་བསྐྱར་ཏེ་གསོལ་པ། བཅོམ་ལྡན་འདས་བདག་ལ་ཐུགས་བརྩེ་བར་དགོངས་ཏེ་ཐེ་ཚོམ་འདི་དགྲོལ་དུ་གསོལ། དེ་ནས་བཅོམ་ལྡན་འདས་ཀྱིས་
བཤད་པར་གནང་ནས་སྔོན་གྱི་གླེང་གཞི་བཀའ་སྩལ་པ། རྒྱལ་པོ་ཆེན་པོ་སྔོན་འདས་པའི་དུས་ན་གངས་ཀྱི་རི་དྲུང་ན་དྲང་སྲོང་བྷ་ག་བ་ཞེས་བྱ་བ་ཞིག་གནས་པ་དེ་དུས་གཞན་ཞིག་ན་སྟག་མོ་གཞོན་ནུ་ཞིག་འཁྱམ་པ་མཐོང་བ་དང་འདོད་ཆགས་སྐྱེས་ཏེ། དྲང་སྲོང་གིས་འཁྲིག་པའི་ཆོས་
སྤྱད་པ་ལས་ལོ་དུས་སུ་བུ་བཅུ་གཉིས་བྱུང་བར་གྱུར་ཏོ། །བུ་བཙས་ནས་ལོ་བདུན་ལོན་པ་དང་ཕ་མ་གཉིས་ཤི་ནས་ཕྲུ་གུ་རྣམས་ཀྱིས་ལོ་བཅུ་གཉིས་ཀྱི་བར་དུ་ཚངས་པའི་དངོས་གྲུབ་བསྒྲུབས་ནས། བསམ་པ་དང་རེ་བ་བསྐང་བར་གསོལ་བ་དང་། དེ་ནས་ཚངས་པས་སྙིང་རྗེས་
བལྟས་ཏེ། བརྒྱ་བྱིན་ལྷའི་དབང་པོ་དང་། རྒྱལ་པོ་ཆེན་པོ་བཞི་འཁོར་དང་བཅས་པར་འཛམ་བུའི་གླིང་དུ་ལྷགས་ཏེ། དེ་ནས་ཚངས་པས་བྱིས་པ་དེ་རྣམས་ལ་སྨྲས་པ། བུ་ཁྱེད་རྣམས་ཅི་འདོད། དེ་ནས་བྱིས་པ་རྣམས་ཀྱིས་ཚངས་པ་ལ་སྨྲས་པ། ལྷ་བདག་ཅག་རྣམས་ནི་བྱིས་
པའི་རང་བཞིན་ཤིན་ཏུ་བློ་དམན་པ་ལགས་ཏེ། ལེགས་ཉེས་མ་འཚལ་ལགས་ན། ཉི་ཟླ་དང་། གཟའ་དང་། རྒྱུ་སྐར་གྱི་ལྟས་དང་། དཀྱིལ་འཁོར་དང་། གཙུག་ལག་ཇི་ལྟ་བུ་ལགས་པ་བཤད་དུ་གསོལ། དེ་ནས་བརྒྱ་བྱིན་ལྷའི་དབང་པོས་ཚངས་པ་ལ་འདི་སྐད་ཅེས་སྨྲས་སོ། །
ལྷའི་སྟོན་པ་ཁྱོད་ཀྱིས་བྱིས་པ་འདི་རྣམས་ལ་དངོས་གྲུབ་སྩལ་བའི་རིགས་སོ། །དེ་ནས་ཚངས་པས་བྱིས་པ་རྣམས་ལ་སྨྲས་པ། བྱིས་པ་ཉོན་ཅིག །རྒྱུ་སྐར་ཉི་ཤུ་རྩ་བརྒྱད་དང་། སྐར་མ་ཐམས་ཅད་ཀྱི་དཀྱིལ་འཁོར་དང་། ལྟས་དང་། ཉི་ཟླ་དང་། གཟའ་དང་། གནམ་ལྕགས་འབབ་པ་དང་། ས་
เล่ม ๗๖ · หน้า 278b
གཡོ་ཞིང་འགུལ་བ་དང་། ལྟས་ཀྱི་གཙུག་ལག་ཇི་ལྟ་བུ་ཡིན་པ་དག་བསྟན་པར་བྱའོ། །དགུན་ཟླ་ར་བ་ཡར་གྱི་ངོ་དང་། མར་གྱི་ངོ་དང་། ཚེས་བརྒྱད་དང་། བཅུ་བཞི་དང་། བཅོ་ལྔ་ལ་ཉི་མའི་འོད་མུན་པ་འདྲ་བ་ནག་པོར་གྱུར་ན་མི་ཡ་རབས་མཛངས་ཤིང་མཁས་པ་རྣམས་ལ་བགེགས་ཆེན་
པོ་འབྱུང་བར་འགྱུར་རོ། །རྒྱུ་སྐར་ཨ་ཤྭི་ནཱིའི་ཉི་མ་ལ་ཉི་མ་ལས་དུ་བ་འདྲ་བ་བྱུང་སྟེ། འཁོར་ཞིང་འཐུལ་ན་ལོ་བཅུ་གཉིས་ཀྱི་བར་དུ་ཆར་མི་འབབ་པར་འགྱུར་རོ། །རྒྱུ་སྐར་བྷ་ར་ཎཱིའི་ཉི་མ་ལ་ཉི་མ་གསེར་གྱི་མདོག་འདྲ་བར་གྱུར་ན་ཉེ་སྐོར་གྱི་རྒྱལ་ཁམས་ཀྱི་ཡུལ་འཇིག་པ་དང་། དབུས་སུ་མུ་
གེ་ཆེན་པོ་འབྱུང་ངོ་། །དགུན་ཟླ་ཐ་ཆུངས་ཀྱི་ངོ་རྒྱུ་སྐར་ཀཱརྟི་ཀཱའི་ཉི་མ་ལ་ཉི་མ་ལྷག་པར་གསལ་བར་གྱུར་ན་མཐའི་ཡུལ་ཁམས་འཇིག་ཅིང་དབུས་སུ་ཆར་མི་འོང་ངོ་། །དཔྱིད་ཟླ་ར་བའི་ངོ་རྒྱུ་སྐར་ཨཱ་གྲཱའི་ཉི་མ་ལ་ཉི་མ་འཁྱིམས་པ་དང་། ཉི་མ་གཉིས་སུ་སྣང་ན་མི་ནད་འབྱུང་། རྒྱལ་པོ་སྡེ་
གཉིས་ལ་གནོད་པའི་བགེགས་འབྱུང་། དཔྱིད་ཟླ་འབྲིང་པོའི་ངོ་རྒྱུ་སྐར་པུ་ཥྱའི་ཉི་མ་ལ་ཉི་མ་མུན་པ་འདྲ་བར་འགྱུར་ཞིང་ཉི་མ་ནུབ་ཀར་ཁ་དོག་སྐྱ་བོར་གྱུར་ན་རྒྱལ་པོ་ཆེན་པོ་ལ་བགེགས་འབྱུང་། དཔྱིད་ཟླ་ཐ་ཆུངས་ཀྱི་ངོ་རྒྱུ་སྐར་བྷ་ར་ཎཱིའི་དུས་ལ་ཉི་ཟླ་གཟས་ཟིན་ན་བློན་པོས་རྒྱལ་པོ་བསད་
པར་འོང་ངོ་། །དབྱར་ཟླ་ར་བའི་ངོ་རྒྱུ་སྐར་པཱུ་ར་བ་བྷ་དྲ་པཱ་དཱའི་དུས་ལ་ཉི་མ་དམར་པོར་གྱུར་ན། རྒྱལ་པོ་དང་། བློན་པོ་དང་། དེའི་ཡུལ་འཁོར་དུ་གནོད་པའི་བགེགས་ཆེན་པོ་འབྱུང་། དབྱར་ཟླ་འབྲིང་པོའི་ངོ་རྒྱུ་སྐར་བཱུརྦཱ་ཤཱ་ཌྷཱའི་དུས་ལ་ཟླ་བ་ཉ་ལ་གཟས་ཟིན་ན་ཡུལ་འཁོར་འཁྲུག་པ་དང་། མི་ནད་
དང་མུ་གེ་འབྱུང་། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་མཱུ་ལཾའི་དུས་ལ་ཉི་ཟླ་གས་ཤིང་སེར་ག་བྱུང་བར་སྣང་ན་ཡུལ་དེར་གནོད་པ་ཆེན་པོ་འབྱུང་། སྟོན་ཟླ་ར་བའི་ངོ་རྒྱུ་སྐར་ཨ་ཤྭི་ནཱིའི་དུས་ལ་ཉི་ཟླ་དུས་གཅིག་ཏུ་ཤར་ན་ཡུལ་འཁོར་དེར་ཁྲག་འཁྲུག་ཆེན་པོས་ཁྲག་འབབ་པར་འོང་ངོ་། །སྟོན་ཟླ་འབྲིང་
པོའི་ངོ་རྒྱུ་སྐར་ཀཱརྟི་ཀཱའི་དུས་ཟླ་བ་ཉ་ལ་ཟླ་བ་མེའི་ཁ་དོག་འདྲ་བར་གྱུར་ན་ཡུལ་འཁོར་དེར་དགྲའི་དམག་གིས་ཡུལ་འཇིག་པར་འགྱུར། དགུན་ཟླ་ར་བའི་ངོ་རྒྱུ་སྐར་བྷ་ར་ཎཱིའི་ཉི་མ་ལ་རླུང་དམར་ནག་པོ་བྱུང་ལ་ཉི་མ་མི་གསལ་བར་གྱུར་ན། དགྲའི་ཚོགས་ཀྱིས་ཡུལ་འཇིག་པར་འགྱུར་རོ། །དགུན་ཟླ་ཐ་
เล่ม ๗๖ · หน้า 279a
ཆུངས་ཀྱི་ངོ་རྒྱུ་སྐར་པཱུར་བ་ཕལ་གུ་ནཱིའི་ཉི་མ་ལ་ས་བབ་ཅིང་རླུང་དམར་ཆེན་པོ་བྱུང་ན་རྒྱལ་པོ་ཆེན་པོ་ལ་གནོད་པ་འབྱུང་། དཔྱིད་ཟླ་ར་བ་དང་འབྲིང་པོའི་ངོ་རྒྱུ་སྐར་བི་ཤཱ་ཁཱའི་ཉི་མ་ལ་སེར་བ་བབ་ན་ཡུལ་འཁོར་དེར་ཁྲག་ནད་དང་གནོད་པ་འབྱུང་། དཔྱིད་ཟླ་ཐ་ཆུངས་ཀྱི་ངོ་རྒྱུ་སྐར་
ཛྱེཥྛཱའི་ཉི་མ་ལ་ནམ་ལངས་ཀར་སྐར་མ་ཉི་མ་བས་འོད་བཟང་པོར་གསལ་བར་བྱུང་ན་གཟའ་ཐམས་ཅད་ལ་བགེགས་ཆེན་པོ་འབྱུང་། དབྱར་ཟླ་ར་བའི་ངོ་རྒྱུ་སྐར་པཱུརྦཱ་ཤཱ་ཌྷཱའི་ཉི་མ་ལ་ས་བབ་ཅིང་ཉི་མ་མི་གསལ་ན་རྒྱལ་པོ་སྟོང་འཁྲུག་ཅིང་འཐབ་པར་འགྱུར། ཡང་དབྱར་ཟླ་ར་བའི་ངོ་རྒྱུ་སྐར་པཱུརྦཱ་ཤཱ་
ཌྷཱའི་ཉི་མ་ལ་རླུང་ཆེན་པོ་བྱུང་ན་ཆུ་དཀོན། ཁ་ཟས་དང་། འབྲུ་ཟན་མ་རུང་བར་འགྱུར། དབྱར་ཟླ་འབྲིང་པོའི་ངོ་རྒྱུ་སྐར་ཤྲ་བ་ཎཱའི་ཉི་མ་ལ་རླུང་དྲག་པོར་ལངས་ཤིང་ནམ་མཁའ་མུན་པར་གྱུར་ན་ཉེན་ཀོར་གྱི་ཡུལ་ཁམས་གཞན་དུ་འཇིགས་པ་ཆེན་པོ་འབྱུང་། དབྱར་ཟླ་འབྲིང་པོའི་ངོ་རྒྱུ་སྐར་པཱུརྦཱ་བྷ་དྲཱ་
པཱ་དཱའི་ཉི་མ་ལ་སེར་བ་བབ། གནམ་ལྕགས་གྲུམ་ན་ཡུལ་འཁོར་དེར་ནད་དང་མུ་གེ་འབྱུང་། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་པཱུརྦཱ་བྷ་དྲཱ་པཱ་དཱའི་ཉི་མ་ལ་བྱང་ཕྱོགས་ནས་རླུང་དམར་ཆེན་པོ་ལངས་ནས་ལྷ་ཁང་དང་། མཆོད་རྟེན་དང་། ཁང་ཁྱིམ་དང་། ཤིང་སྡོང་པོ་ཆེན་པོ་བསྒྱེལ་ན་ཡུལ་ཁམས་སུ་གནོད་
པ་ཆེན་པོ་འབྱུང་ངོ་། །སྟོན་ཟླ་ར་བའི་ངོ་རྒྱུ་སྐར་ཨཱ་ཤྭི་ནཱིའི་ཉི་མ་ལ་ཐོག་བབ་བམ། སྐར་མདའ་ལྟུང་ངམ། སེར་བ་བབ་ན་ཡུལ་ཁམས་དེར་ཐབ་མོ་ཆེན་པོ་འོང་། དགུན་ཟླ་ར་བའི་ངོ་རྒྱུ་སྐར་མ་གྷཱའི་ཉི་མ་ལ་ཆར་པ་བབ་ན་ཡུལ་ཁམས་ཐམས་ཅད་ཁ་ཟས་མོད་པར་འོང་། དགུན་ཟླ་ཐ་ཆུངས་ཀྱི་ངོ་
རྒྱུ་སྐར་ཨཱ་གྲཱའི་ཉི་མ་ལ་གནམ་མེའི་ཁ་དོག་འདྲ་བར་གྱུར་ན་ལྟས་རབ་ཏུ་ངན་ཏེ། ཡུལ་ཁམས་སུ་མི་བདེ་བ་དང་འཇིགས་པ་ཆེན་པོ་འབྱུང་ངོ་། །དཔྱིད་ཟླ་ཐ་ཆུངས་ཀྱི་ངོ་རྒྱུ་སྐར་བྷ་ར་ཎཱིའི་ཉི་མ་ལ་བྱང་ཕྱོགས་ནས་སྒྲ་ཆེན་པོ་བྱུང་ངམ། གནམ་སེར་པོར་སོང་ན་དགྲ་ཐམས་ཅད་ཀྱིས་ཡུལ་ཁམས་
གཤིག་པར་འགྱུར་རོ། །དཔྱིད་ཟླ་ར་བའི་ངོ་རྒྱུ་སྐར་སྭཱ་ཏཱིའི་ཉི་མ་ལ་ཆར་བབ་ལ་རླུང་མ་ལངས་པར་འཇའ་བྱུང་ན་གྲོང་ཁྱེར་ཆེན་པོ་མེས་ཚིག་པར་འགྱུར་རོ། །དབྱར་ཟླ་ར་བའི་ངོ་རྒྱུ་སྐར་པུ་ཥྱའི་ཉི་མ་ལ་གློག་དང་། སྦུར་མ་དང་། ཉལ་ཉིལ་གྱི་ཆར་བབ་ན་ཡུལ་ཁམས་དེར་མུ་གེ་འབྱུང་། དབྱར་ཟླ་འབྲིང་པོའི་
เล่ม ๗๖ · หน้า 279b
ངོ་རྒྱུ་སྐར་མཱུ་ལཾའི་ཉི་མ་ལ་ཆར་ཆེར་བབ་ལ་འཇའ་བྱུང་ན། རྒྱལ་རིགས་རྣམས་ལ་གནོད་པར་འགྱུར། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་ཨུཏྟ་ར་བྷདྲ་པཱ་དཱའི་ཉི་མ་ལ་ས་ལས་སྒྲ་བྱུང་ངམ། རླུང་ནག་པོ་ལངས་ན་ཡུལ་དེར་མུ་གེ་འབྱུང་། དབྱར་ཟླ་འབྲིང་པོའི་ངོ་ཕྱོགས་མཚམས་དག་ནས་སྒྲ་ཆེན་པོ་བྱུང་ན་
ཡུལ་ཕྱོགས་དེར་ཁྲག་ཁྲུག་ཆེན་པོ་འབྱུང་། སྟོན་ཟླ་ར་བའི་ངོ་རྒྱུ་སྐར་བྷ་ར་ཎཱིའི་ཉི་མ་ལ་གནམ་ལས་སྒྲ་ཆེན་པོ་བྱུང་ན་བཙུན་པ་དང་། དཀའ་ཐུབ་ཅན་རྣམས་ལ་གནོད་པ་འབྱུང་། སྟོན་ཟླ་ར་བའི་ངོ་དབང་པོའི་ཉི་མ་ལ་གནམ་ནས་སྒྲ་བྱུང་ན་མི་ལེ་ལོ་ཅན་དང་། ཕྱུགས་ལ་གནོད་པ་འབྱུང་། སྟོན་ཟླ་ཐ་
ཆུངས་ཀྱི་ངོ་རྒྱུ་སྐར་དྷ་ནི་ཥྠཱའི་ཉི་མ་ལ་གནམ་ལས་རོལ་མོའི་སྒྲ་བྱུང་ན་རྩྭ་དང་། ལོ་ཏོག་ལེགས་པར་འགྱུར། ཆར་དུས་སུ་འབབ། མཇུག་ཏུ་མི་ནད་འབྱུང་། དགུན་ཟླ་ར་བའི་ངོ་རྒྱུ་སྐར་སྭཱ་ཏཱིའི་ཉི་མ་ལ་གནམ་ལས་སྒྲ་ཆེན་པོ་འབྱུང་ཞིང་གནམ་འཁྲུག་ན་ཡུལ་འཁོར་དེར་འཇིགས་པ་ཆེན་པོ་འབྱུང་། དགུན་
ཟླ་ཐ་ཆུངས་ཀྱི་ངོ་རྒྱུ་སྐར་ཛྱེཥྛཱའི་ཉི་མ་ལ་ཚུབ་མ་ལངས་ཤིང་ས་གཡོས་ན་དགེ་སྦྱོང་དང་། བྲམ་ཟེ་རྣམས་ལ་བགེགས་དང་གནོད་པ་འབྱུང་། དཔྱིད་ཟླ་ར་བའི་ངོ་རྒྱུ་སྐར་པཱུརྦཱ་བྷ་དྲཱ་པཱ་དཱའི་ཉི་མ་ལ་ཉིན་པར་ས་གཡོས་ན་ལོ་གཉིས་ཀྱི་བར་དུ་དུས་སུ་ཡུལ་ཁམས་དེར་དམག་འོང་། དཔྱིད་ཟླ་འབྲིང་པོའི་ངོ་རྒྱུ་
སྐར་པཱུརྦཱ་ཤཱཌྷཱའི་ཉི་མ་ལ་ས་འགུལ་ན་བློན་པོས་རྒྱལ་པོ་བསད་པ་དང་། ཡུལ་ཁམས་དེར་འཁྲུག་པ་ཆེན་པོ་འབྱུང་། དབྱར་ཟླ་འབྲིང་པོའི་ངོ་རྒྱུ་སྐར་མཱུ་ལཾ་དབང་བ་ལ་ནུབ་མོ་ས་གཡོས་ན་ཁམས་ཀྱི་དབང་པོ་རྣམས་ལ་གནོད་པ་འབྱུང་། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་རོ་ཧི་ཎཱི་དབང་བ་ལ་ནུབ་མོ་ས་གཡོས་
ཤིང་རླུང་དམར་བྱུང་། ཆར་མ་བབ་ན་འབྲུ་ཟན་མ་རུངས་པར་འགྱུར་ཞིང་དམག་འོང་། སྟོན་ཟླ་འབྲིང་པོའི་ངོ་རྒྱུ་སྐར་ཨུཏྟ་ར་བྷ་དྲཱ་པཱ་དཱའི་ཉི་མ་ལ་ཉིན་པར་ས་གཡོས་ན་ཕ་རོལ་གྱི་དགྲས་རྒྱལ་པོ་དེ་ཕམ་པར་འགྱུར། ཡུལ་ཕྱོགས་ཀྱང་ཆོམ་རྐུན་གྱིས་འཇིགས་པར་འགྱུར། སྟོན་ཟླ་ཐ་ཆུངས་ཀྱི་ངོ་རྒྱུ་སྐར་ཀཱརྟི་
ཀཱའི་ཉི་མ་ལ་ས་གཡོས་ན་གྲོང་ཁྱེར་ཆེན་པོ་དང་། ཁང་ཁྱིམ་འཇིག་ཅིང་མུ་གེ་འབྱུང་། དགུན་ཟླ་ར་བའི་ངོ་རྒྱུ་སྐར་ཨ་ཤྭི་ནཱི་དང་། ཨུཏྟ་ར་ཕལ་གུ་ཎཱི་དབང་བའི་ནུབ་མོ་ས་གཡོས་ན་བྱིས་པ་ཆུང་ངུ་དང་། བུད་མེད་སྦྲུམ་མ་ལ་བགེགས་དང་གནོད་པ་འབྱུང་། དགུན་ཟླ་འབྲིང་པོའི་ངོ་རྒྱུ་སྐར་མྲྀ་ག་ཤི་རཱ་དང་། པཱུརྦཱ་
เล่ม ๗๖ · หน้า 280a
བྷ་དྲཱ་པཱ་དཱའི་ཉིན་པར་ས་གཡོས་ན་རྐང་འགྲོས་ལ་བགེགས་དང་གནོད་པ་འབྱུང་། དབང་པོའམ། མ་གྷཱའི་ཉི་མ་ལ་གཙུག་ལག་ཁང་སྐུ་གཟུགས་གཡོས་ཤིང་འགུལ་ལམ། ས་འཕོས་ན་ཡུལ་ཁམས་དེ་མྱུར་དུ་འཇིག་པར་འགྱུར། གཙུག་ལག་ཁང་གི་སྐུ་གཟུགས་གདན་ལས་འཕོས་
སམ། དངུལ་ལྟ་བུ་བྱུང་ངམ། འགྱེལ་ན་ཡུལ་ཁམས་དེ་རྒྱལ་པོ་དང་བཅས་པར་རྒྱལ་ཁམས་གཞན་གྱི་དབང་དུ་འགྱུར། གཙུག་ལག་ཁང་གི་སྐུ་གཟུགས་འཕོས་སམ། སྤྱན་ནས་མཆི་མ་བྱུང་ན་ཡུལ་ཁམས་དེའི་མི་དཔའ་བོ་གཅེས་པ་བུ་སྨད་དང་བཅས་པར་ཡུལ་བྱུང་བར་འགྱུར། གཙུག་ལག་ཁང་གི་
སྐུ་གཟུགས་གདན་ལས་འཕོས་སམ། འགུལ་ལ་ལྷ་ཁང་ནས་དུད་པ་འདྲ་བ་བྱུང་ན། ཡུལ་ཁམས་དེའི་རྒྱལ་པོ་ལ་གནོད་པར་འགྱུར། གཙུག་ལག་ཁང་ཆེན་པོ་དང་། གནས་ཁང་ལྟ་བུ་གཡོས་ན། གྲོང་ཁྱེར་དེ་ཕྱོགས་རྒྱལ་ཁམས་གཞན་གྱིས་གནངས་སུ་བཅད་པའམ་མེས་ཚིག་པར་འགྱུར། ཟླ་བའི་ཟུར་
ལ་གཟའ་ཕུར་བུ་བྱུང་ན་མི་ཕྱུག་པོ་ལ་རྒྱལ་པོས་ནོར་འཕྲོག་ཅིང་གནོད་པར་འགྱུར། ཉི་ཟླ་དམར་པོར་སོང་ན་ཁམས་ཀྱི་དབང་པོ་ལ་གནོད་པ་འབྱུང་། གཟའ་སྤེན་པ་ཟླ་བའི་སྟེང་དུ་བྱུང་ན་ཡུལ་འཁོར་དེར་འཇིགས་པ་ཆེན་པོ་དང་བགེགས་འབྱུང་། ལྟས་འདི་རྣམས་བྱུང་བའི་དུས་སུ་ཟླ་བ་གཟས་ཟིན་ན་རྒྱལ་པོ་
ཆེན་པོ་རྣམས་ལ་གནོད་པ་དང་བགེགས་འབྱུང་། རྒྱལ་པོ་དང་པོ་སྐྱེས་པའི་རྒྱུ་སྐར་གྱི་སྟེང་དུ་ཟླ་བ་བྱུང་ཞིང་། ཟླ་བའི་སྟེང་དུ་ཡང་གཟའ་མཇུག་རིངས་བྱུང་ན། ཡུལ་ཁམས་དེའི་རྒྱལ་པོ་དང་། རྒྱལ་ཁམས་ཉེ་བ་གཞན་གྱི་རྒྱལ་པོ་དང་འཐབ་མོ་འོང་། གཟའ་སྤེན་པ་རྒྱུ་སྐར་རོ་ཧ་ཎཱི་དང་། ཀཱརྟི་ཀཱའི་དབུས་སུ་ཤར་
ན་རྒྱལ་ཁམས་དེའི་མི་ཐམས་ཅད་ལ་གནོད་པ་ཆེན་པོ་དང་། བགེགས་བྱུང་ནས་མི་སུམ་ཆ་ཅིག་ལུས་པར་འགྱུར། གཟའ་པ་བ་སངས་དང་། རྒྱུ་སྐར་མ་གྷཱ་དང་པཱུརྦ་ཕལ་གུ་ནི་ཟླ་བའི་དབུས་སུ་ཤར་ན་ལོ་ཏོག་ལ་གནོད་པ་འབྱུང་། གཟའ་ཕུར་བུ་དང་། པ་བ་སངས་དང་། སྤེན་པ་རྣམས་དམར་པོར་སོང་ན་ཡུལ་ཁམས་དེར་འཇིགས་
པ་ཆེན་པོ་འབྱུང་། གཟའ་མཇུག་རིངས་རྒྱུ་སྐར་པུཥྱཱའི་སྟེང་དུ་ཤར་ན་རིང་པོ་མི་ཐོགས་པར་ཕྱོགས་བཞི་ནས་དམག་ཆེན་པོ་འབྱུང་། གཟའ་ཕུར་བུ་དང་། མིག་དམར་རྒྱུ་སྐར་ཤྲ་བ་ཎཱའི་སྟེང་དུ་ཤར་ན་ལོ་གསུམ་གྱི་བར་དུ་ཡུལ་ཁམས་དེར་འཇིགས་པ་ཆེན་པོ་དང་གནོད་པ་འབྱུང་། གཟའ་ཕུར་བུ་དང་། སྤེན་པ་རྒྱུ་སྐར་བི་ཤཱ་ཁཱའི་
เล่ม ๗๖ · หน้า 280b
སྟེང་དུ་ཤར་ན་མི་མང་པོ་འཐབ་མོ་ལ་འཆི་བར་འགྱུར་རོ། །ལྷ་ཁང་དང་ཁང་པ་ཆེན་པོའི་སྟེང་དུ་བྱ་རོག་གར་བྱེད་ཅིང་འཕྱང་མོ་ཉུག་ན་ཡུལ་ཁམས་དེར་འཐབ་མོ་ཆེན་པོ་འབྱུང་། བུད་མེད་ལ་མི་མ་ཡིན་པའི་བུ་བྱུང་ངམ། ཡང་ན་ཕྱུགས་ལ་མིའི་བུ་བྱུང་ན་ཡུལ་ཁམས་དེའི་བུད་མེད་ལ་བགེགས་དང་གནོད་པ་ཆེན་པོ་འབྱུང་། མའི་མངལ་ན་
བུ་ཡོད་པ་རྒོད་དམ། སྨྲའམ། ངུ་ན་ཡུལ་ཁམས་དེ་འཇིག་པར་འགྱུར། བུད་མེད་ཀྱི་མངལ་ནས་བུ་རྐང་གཅིག་པའམ། རྐང་གསུམ་པའམ། རྐང་བཞི་པ་བྱུང་ན་ཡུལ་དེའི་རྒྱལ་པོ་ལ་གནོད་པ་འབྱུང་། བུད་མེད་ཀྱི་ལྟོ་ནས་བུ་མ་ནིང་མཚན་གཉིས་པ་བྱུང་ན་ཡུལ་ཁམས་དེའི་རྒྱལ་པོ་འཆི་བར་འགྱུར། བུད་མེད་ལས་བྱོལ་སོང་གི་བུ་
དང་བུ་མགོ་མང་པོ་ཅན་བྱུང་ན་ཡུལ་ཁམས་དེ་འཇིག་པར་འགྱུར། བུད་མེད་ལས་བུ་མགོ་གཅིག་ལ་གདོང་གཉིས་མིག་གསུམ་པ་བྱུང་ན་ཡུལ་ཁམས་དེ་མྱུར་དུ་འཇིག་པར་འགྱུར། བུད་མེད་ལས་བུ་གྲུལ་བུམ་མགོ་བཞི་པ་བྱུང་ན་ཡུལ་འཁོར་དེར་འཇིགས་པ་ཆེན་པོ་འབྱུང་། བུད་མེད་ལས་བུ་ཕག་གི་གདོང་ཅན་བྱུང་ན་ཕྱོགས་བཞི་
ནས་ཡུལ་ཁམས་དེ་འཇིག་པར་འགྱུར། བུད་མེད་ལས་བུ་གདོང་ཉི་མའི་འོད་བཞིན་འབར་བ་བྱུང་ན་ནང་འཁྲུག་གིས་ཡུལ་ཁམས་དེ་འཇིག་པར་འགྱུར། བྱིས་པ་ཚེམ་བུ་ན་གནས་པ་ཆེན་པོ་བཞིན་ཚིག་སྨྲ་ན་ཡུལ་འཁོར་དེ་འཇིག་པར་འགྱུར། མ་ཉིད་ཀྱིས་མ་ཚོར་བར་མངལ་ནས་བུ་བྱུང་ན་ཡུལ་ཁམས་དེར་བགེགས་དང་གནོད་པ་ཆེན་པོ་
འབྱུང་། བུད་མེད་ཀྱི་ལྟོ་ནས་བུ་ཕག་གམ་སྦྲུལ་ལྟ་བུ་བྱུང་ན་འདྲེ་གདོན་དང་། བགེགས་ནད་ཀྱིས་ཡུལ་ཁམས་དེ་འཇིག་ཅིང་འཇིགས་པ་ཆེན་པོ་འབྱུང་། བུད་མེད་ལས་བུ་སྐྱེ་ནུབ་པ་དང་། སོ་སྐྱེས་པ་བྱུང་ན་ཡུལ་ཁམས་དེ་དགོན་པར་འགྱུར་ཏེ། མི་ཐམས་ཅད་ཀྱང་ཕྱོགས་གཞན་དུ་འགྲོ་བར་འགྱུར། བུད་མེད་ལས་བུ་མགོ་མེད་
པ་ལག་པ་གཅིག་པ་བྱུང་ན་ཡུལ་ཁམས་དེར་གནོད་པ་ཆེན་པོ་འབྱུང་། ཡུལ་ཁམས་སུ་མེ་ཏོག་དང་ཤིང་ཏོག་འབྲས་བུ་ལན་གཉིས་འབྱུང་ཞིང་། ཤིང་དང་འབྲས་བུ་ལས་ཁུ་བ་འཛག་ན་རྒྱལ་པོའི་རྒྱལ་ཚབ་ལ་བགེགས་དང་གནོད་པ་འབྱུང་། དུས་མ་ཡིན་པར་བཟའ་ཤིང་ལས་མེ་ཏོག་དང་འབྲས་བུ་སྐྱེ་ན་རྒྱལ་པོ་དང་། ཡུལ་
མིར་བཅས་པས་ཡུལ་བོར་བར་འགྱུར། བཟའ་ཤིང་གི་འབྲས་བུ་ལྷག་པར་མདོག་བཟང་པོར་གྱུར་ཏམ། ཡང་ན་ཁྲག་འདྲ་བ་འཛག་ན་ཡུལ་ཁམས་དེར་འཇིགས་པ་ཆེན་པོ་དང་། ནད་དང་མུ་གེ་འབྱུང་། བསྐྱེད་ཤིང་གི་གྲིབ་མ་མི་འཁོར་བར་ཕྱོགས་གཅིག་ཏུ་འདུག་ན་དགྲའི་དམག་བྱིན་ཆེན་པོས་ཡུལ་ཕྱོགས་དེ་བཅོམ་
เล่ม ๗๖ · หน้า 281a
པར་འགྱུར། བསྐྱེད་ཤིང་འགྲོ་བ་ལྟར་སྣང་ན་ཡུལ་འཁོར་དེར་འཇིགས་པ་ཆེན་པོ་འབྱུང་། བསྐྱེད་ཤིང་ལྷག་པར་བགྱིད་ཅིང་གསལ་བར་སྣང་ན་ཡུལ་ཁམས་དེའི་རྒྱལ་པོ་ཚེ་ཐུང་བར་འགྱུར། འཇིག་རྟེན་པའི་ལྷ་མཆོད་པའི་ཚེ་ལྷ་སྨྲའམ་འཛུམ་ན། རྒྱལ་པོ་ལ་བགེགས་དང་གནོད་པ་འབྱུང་།
མེ་ཏོག་གི་ཆར་འབབ་པའམ། རླུང་དམར་ལངས་ཤིང་གནམ་ལས་སྲིན་བུ་བབ་ན་ཡུལ་ཁམས་དེར་ཆོམ་རྐུན་གྱིས་འཇིག་པར་འགྱུར། འཇིག་རྟེན་པའི་ལྷ་ཁང་དུ་མེ་མ་བུས་པར་དུ་བ་བྱུང་ཞིང་། ལྷ་ཡང་མཚན་དང་ཆོ་འཕྲུལ་སྟོན་ན་རྒྱལ་པོ་ལ་བགེགས་དང་གནོད་པ་འབྱུང་། འཇིག་རྟེན་པའི་ལྷ་ཁང་དུ་མེ་
མར་མ་བུས་པར་མེ་མར་འདྲ་བར་སྣང་ན་རྒྱལ་པོའི་གནང་ཆེན་ལ་བགེགས་དང་གནོད་པ་འབྱུང་། རྒྱལ་པོ་བཙུན་མོའི་འཁོར་དུ་སོང་སྟེ་འདོད་ཆགས་མི་ལྡང་ན་རྒྱལ་པོའི་ཕོ་བྲང་མེས་ཚིག་ཅིང་རྒྱལ་པོ་ལ་མི་དགེ་བ་སྣ་ཚོགས་འབྱུང་། ཆར་པ་དང་སེར་བ་འབབ་ལ། གནམ་ལ་ཁ་དོག་གསལ་བ་དག་བྱུང་ན་ཡུལ་
ཁམས་དེར་འཇིགས་པ་ཆེན་པོ་འབྱུང་། གྲོང་ཁྱེར་ཚུབ་མས་བསྐོར་ཅིང་འགྲོ་བ་དང་། རླུང་དམར་ལངས་ཤིང་ཆར་པ་ཁྲག་འདྲ་བ་བབ་ན་ཡུལ་ཁམས་དེར་འཇིགས་པ་ཆེན་པོ་འབྱུང་། གློག་འབྱུང་ཞིང་ཆར་པ་འབབ་ལ་སྤྲིན་འཁོར་ལིང་འཁོར་ལིང་དུ་ཆད་དེ། སྤྲིན་འཁོར་ལིང་དུ་ཆད་པའི་བར་བར་ན་དྲི་ཟའི་གྲོང་ཁྱེར་
འདྲ་བ་སྣང་ན་ཡུལ་ཁམས་དེར་འཇིགས་པ་ཆེན་པོ་འབྱུང་། ཟླ་བ་དམར་པོར་གྱུར་ན་ཡུལ་ཁམས་དེར་གྲོང་ཁྱེར་མེས་ཚིག་པ་དང་། རིམས་ཀྱིས་མི་ངས་པར་འགྱུར། ཟླ་བ་མཐའ་དམར་ལ་དབུས་ནག་པོར་སོང་ན་ཡུལ་ཁམས་དེར་འཇིགས་པ་ཆེན་པོར་འགྱུར། ཟླ་བའི་ཁ་དོག་བཙག་འདྲ་བར་དམར་པོར་སྣང་ལ་སླར་
ཡང་འཕྲལ་དུ་དཀར་པོའི་རང་བཞིན་དུ་གྱུར་ན་རླུང་མི་ལྡང་བར་དྲག་པོར་འབབ། རི་སྐམ་ལྟ་བུར་ཆུ་མིག་བྱུང་ན་ལོ་ཏོག་ལེགས་པར་འགྱུར། མེ་མ་བུས་པར་ཡུལ་ཁམས་དེར་དུ་བ་བྱུང་ན་ཡུལ་ཁམས་དེར་འཇིགས་པ་ཆེན་པོ་འབྱུང་། མདའ་གཞུ་སྐྱིས་ཀོར་ལ་མེའམ་དུད་པ་བྱུང་ན་ཡུལ་ཁམས་དེར་དགྲའི་འཇིགས་པ་འབྱུང་
ངོ་། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་པ་དང་། རྒྱལ་པོ་གཟུགས་ཅན་སྙིང་པོ་འཁོར་དང་བཅས་པ་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ།། །།མིག་བཅུ་གཉིས་པ་ཞེས་བྱ་བའི་མདོ་རྫོགས་སོ།། །།
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- อักษรทิเบตแสดงด้วยฟอนต์ทิเบตที่ติดมากับเครื่องของผู้อ่าน — ถ้าเห็นเป็นกล่องสี่เหลี่ยม แปลว่าเครื่องนี้ยังไม่มีฟอนต์ทิเบต
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด