ཡང་དག་པར་སྦྱོར་བ་ཞེས་བྱ་བའི་རྒྱུད་ཆེན་པོ
ชื่อสันสกฤต (อักษรทิเบต ตามตัวบท) སྃ་པུ་ཊ་ནཱ་མ་མ་ཧཱ་ཏནྟྲ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๗๙ · หน้า 104a
གཅིག་མཆོག་གི་གནས་སུ་ནི། །ཐབས་དང་ཤེས་རབ་བདག་ཉིད་སྦྱར། །སངས་རྒྱས་གཟུགས་བརྙན་དབང་པོ་དྲུག །བསྟན་བཅོས་ཚད་མ་སློབ་དཔོན་དང་། །ལུང་གི་རྗེས་འབྲངས་དེ་ཉིད་ཤེས། །གསང་དོན་དེ་ཉིད་དངོས་པོ་ཡང་། །དེ་ཉིད་
ལས་ནི་གཅིག་ལས་གཅིག །སྔར་གྱི་མཚན་ཉིད་ཐམས་ཅད་ཀྱིས། །སྟོང་སོགས་དེ་ཉིད་མཚན་ཉིད་ཀྱིས། །ལུས་ཀྱི་དྲི་མ་བཀྲུས་ནས་ནི། །རྫོགས་པའི་བྱང་ཆུབ་རིམ་པར་སྦྱར། །ཟླ་བའི་དཀྱིལ་འཁོར་དབུས་གནས་པར། །ཡེ་ཤེས་སེམས་དཔའ་
བསམ་པར་བྱ། །མདོག་དཀར་ཀུན་ད་ཟླ་བ་ཡི། །འོད་ཟེར་རྣམ་པར་སྤྲོ་བ་ནི། །ཕྱག་གཉིས་སེམས་དཔའི་སྐྱིལ་མོ་ཀྲུང་། །པདྨའི་གནས་ལ་ཡང་དག་བཞུགས། །རྒྱན་རྣམས་ཀུན་གྱིས་རྣམ་པར་བརྒྱན། །སངས་རྒྱས་ལྔ་ཡིས་རྣམ་པར་བརྒྱན། །ཕྱག་རྒྱ་
ཆེན་པོ་ཕྱག་གཉིས་ཀྱིས། །སྙིང་གི་གནས་སུ་གཟིར་བར་མཛད། །གཟུགས་དང་གཟི་བརྗིད་ཡོངས་གང་བ། །ཡེ་ཤེས་སེམས་དཔར་བསྒོམ་པ་ཉིད། །ཆུ་ཤིང་མེ་ཏོག་ལྟ་བུར་ནི། །ལྟེ་བ་རུ་ནི་ཡང་དག་གནས། །ལངས་ནས་སྙིང་གར་ཀུན་ཏུ་གནས། །
སྔར་གྱི་མཚན་ཉིད་ཡོངས་གང་བ། །བཏོན་ནས་དང་པོའི་པདྨ་ནི། །འདབ་མ་བརྒྱད་པ་ཤིན་ཏུ་མཛེས། །ཟེ་བ་དང་ནི་ཟེ་འབྲུར་བཅས། །ཡི་གེ་རྣམ་དགོད་དགོད་པར་བྱ། །དཀྱིལ་འཁོར་དབུས་སུ་གནས་པ་ཡི། །ཕྱག་གཉིས་ཞལ་གཅིག་དཀར་པོ་ནི། །བཟང་
པོ་དྲི་མེད་དབུས་སུ་བསམ། །དེ་ཡི་དབུས་སུ་རྣམ་ཤེས་དང་། །ཡེ་ཤེས་དེ་ཉིད་སྦྱར་བར་བྱ། །དང་པོ་ཤར་གྱི་འདབ་མ་ལ། །བྱམས་པར་ལྡན་པའི་མི་བསྐྱོད་པ། །ལྷོ་ཡི་སྒོར་ནི་སྙིང་རྗེ་ཉིད། །རིན་ཆེན་དེ་ཉིད་ས་བོན་ལས། །ནུབ་ཀྱི་སྒོ་ཡི་འདབ་མ་ལ། །འོད་དཔག་
མེད་པའི་ས་བོན་དགོད། །བྱང་གི་སྒོ་ཡི་གནས་སུ་ནི། །སེམས་ཀྱི་དོན་ཡོད་གཙོ་བོ་ཉིད། །དང་པོའི་དབྱངས་སོགས་ས་བོན་གྱི། །ཟླ་བའི་ཐིག་ལེ་ཇི་བཞིན་རིམ། །ཟླ་བའི་འོད་ཟེར་དཀར་བརྒྱན་པའི། །ཡི་གེ་བཞི་ནི་དགོད་པར་བྱ། །མཚམས་རྣམས་སུ་ནི་མ་
เล่ม ๗๙ · หน้า 104b
ནིང་ཉིད། །རྣམ་པ་བཞི་པོ་སྔར་གསུངས་པ། །དེ་ཡི་དབུས་སུ་དེ་ཡི་སེམས། །ཡི་གེ་ཡིས་ནི་སྦྱར་བར་བྱ། །རྡོ་རྗེ་སྙིང་པོས་གསོལ་པ། །སེམས་ལ་ཐེ་ཚོམ་འཁྲུངས་ལགས་པ། །བཅོམ་ལྡན་བདག་ལ་བཤད་དུ་གསོལ། །སྟོང་པ་མཚོན་དུ་མེད་པ་ལ། །
ཡི་གེའི་རྣལ་འབྱོར་ལ་སོགས་ཅི། །བཅོམ་ལྡན་འདས་ཀྱིས་བཀའ་སྩལ་པ། །དེ་ཉིད་ཇི་ལྟར་རྡོ་རྗེ་ཉོན། །མཚན་གཞི་མཚན་ཉིད་སྟོང་པ་ཉིད། །སྙིང་པོ་མེད་པའི་ཆུ་ཤིང་ལས། །སྙིང་པོ་བདུད་རྩི་འབྲས་འབྱུང་ལྟར། །འབྲས་བུ་རྣམ་ཤེས་ཡེ་ཤེས་ནི། །
གཟུགས་མེད་པ་ལ་ཡེ་ཤེས་གཟུགས། །ཡེ་ཤེས་སྐུ་ནི་སྐྱོན་མེད་པ། །མཚན་ཉིད་མཚོན་དུ་མེད་པ་ཉིད། །དངོས་དང་དངོས་མེད་རྣམ་པར་གྲོལ། །ཡིག་འབྲུ་མེད་ལས་ཡིག་འབྲུའི་གཟུགས། །དེ་དབུས་ངོ་བོ་སྟོང་པ་ཉིད། །དེ་ཉིད་རྣལ་འབྱོར་པ་ཡིས་
གཟུང་། །ཇི་ལྟར་མཚན་ཉིད་ཤེས་ཀྱང་ནི། །མཉམ་ཉིད་ཡེ་ཤེས་སེམས་ཀྱིས་ནི། །དེ་ཡི་རྫོགས་པའི་བྱང་ཆུབ་ལམ། །མྱུར་བ་ཉིད་དུ་མཐོང་བར་འགྱུར། །བླ་མའི་མན་ངག་ལམ་གྱིས་ནི། །ཡེ་ཤེས་རྣམ་ཤེས་ངོ་བོ་ལས། །མཚན་ཉིད་བསྟན་
བཅོས་མདོར་བསྡུས་པ། །དེ་ཉིད་དཔའ་བོ་སྟོན་པ་པོ། །འདི་ཡི་བསྒོམ་པ་ཐམས་ཅད་ཀྱི། །འོད་ཟེར་དཀར་པོས་རྣམ་པར་བརྒྱན། །ལྕགས་སྒྲོག་ལྔ་པོ་མཆོད་རྟེན་གྱི། །བདུད་རྩིའི་ས་བོན་བསམས་ནས་ནི། །ཁ་དོག་དཀར་པོ་འོད་གསལ་བ། །བདུད་
རྩིའི་རྒྱུན་ནི་འཛག་པར་འགྱུར། །སྙིང་གི་ས་བོན་པད་དབུས་སུ། །མཐེ་བོང་ཡོངས་ཀྱི་དཀྱིལ་འཁོར་འདི། །དེ་ཡི་དབུས་སུ་ས་བོན་ནི། །ཨཱ་ལི་ཀཱ་ལི་ཡོངས་བཏུས་པ། །ཁ་དོག་དཀར་པོ་ཤིན་ཏུ་མཛེས། །ཟླ་བའི་འོད་ཟེར་འཕྲོ་བ་ནི། །དེ་ཡི་དབུས་
སུ་སྒོ་རྣམས་ཀྱི། །ཐིག་ལེ་བསམ་པར་རབ་ཏུ་གྲགས། །སྐྲ་ཡི་རྩེ་མོ་བརྒྱ་ཆར་ནི། །ཕྲ་རབ་གཟུགས་སུ་ཡང་དག་གནས། །རྣམ་པར་ཤེས་པའི་རང་བཞིན་ལས། །ཡེ་ཤེས་ཅན་གྱི་མཚན་ཉིད་མཚོན། །གོ་འཕང་གནས་ཀྱི་ཐིག་ལེ་ལྟོས། །སེམས་ཀྱི་མཚན་
เล่ม ๗๙ · หน้า 105a
ཉིད་ཐམས་ཅད་ཤེས། །སྙིང་ལ་ཚངས་པའི་སྒོ་ཡི་ནི། །ཐིག་ལེ་སྒོ་ཡི་ལམ་ལས་ནི། །བླ་མའི་མན་ངག་བརྩོན་པ་ཡིས། །རྣམ་ཤེས་ཡེ་ཤེས་ཀྱི་ཡང་བླང་། །ལམ་གྱི་ཕྱི་རོལ་བསྟན་བཅོས་ཀྱང་། །མ་ཡིན་རིང་བར་འགྱུར་བ་ཡིན། །བསྟན་བཅོས་
རྣམས་ནི་རྙེད་སླ་ཡང་། །སྦྱོར་བ་དེ་ལ་རྙེད་པར་དཀའ། །རྣལ་འབྱོར་པ་ཡི་ཐབས་ཀྱིས་ནི། །བླ་མ་གསོལ་བ་འདེབས་ལ་བརྩོན། །བླ་མའི་མན་ངག་ལམ་གྱིས་ནི། །རྣམ་པར་མཁས་པས་མཐོང་བར་འགྱུར། །མཉམ་གཞག་དངོས་པོའི་རང་བཞིན་གྱིས། །
གཡོ་བ་མེད་ཅིང་འཚེ་བ་མེད། །ཡིད་ནི་ཆོས་རྣམས་སྔོན་དུ་འགྲོ། །ཡིད་ནི་དག་ཅིང་ཡིད་ལྟར་མགྱོགས། །ཡིད་ཀྱི་རྒྱལ་པོའི་བཀའ་དྲིན་གྱིས། །སྨྲ་བ་དང་ནི་བྱེད་པར་འགྱུར། །དེ་ཕྱིར་ཡིད་ཀྱི་བདག་ཉིད་ཀུན། །ཡིད་ལ་བྱུང་བར་བློ་ལྡན་པས། །སྙིང་གར་སེམས་
བསྒོམ་སྡོམ་པ་ནི། །གལ་ཏེ་འདོད་ན་ཡོ་གིས་བཟླས། །རྒྱུ་རུ་གྱུར་པའི་ས་བོན་ཏེ། །དེ་ཉིད་དཔྱད་པས་མ་ཡིན་ནོ། །འབྲས་བུ་རྒྱུ་ཡི་ས་བོན་ཏེ། །དེ་ཉིད་མཐོང་བ་མ་ཡིན་ནོ། །གཟུགས་སོགས་སྲིད་པའི་ལོངས་སྤྱོད་ཀྱིས། །དམིགས་པའི་ས་བོན་རྣམ་པ་ལྔ། །
སྤྱི་བོ་སྤྱི་མེད་ཡང་དག་གནས། །ཀུན་ནས་ཀུན་དུ་འབབ་པར་འགྱུར། །རྟག་ཏུ་རྩ་བའི་ས་བོན་གྱི། །ཡེ་ཤེས་རྣམ་ཤེས་ས་བོན་ལས། །ཐིག་ལེ་སྒྲ་དང་ཡང་དག་ལྡན། །འཁོར་བའི་ལོངས་སྤྱོད་འདོད་པ་ཡིས། །ཡིད་ཀྱི་བཟླས་པ་ཡང་དག་ལྡན། །ཡི་གེ་ངག་ནི་རྣམ་
པར་སྤངས། །ངེས་པར་རྟག་ཏུ་གོ་འཕང་གནས། །རྟག་པ་དང་ནི་ཆོས་ཀྱི་དབྱིངས། །རྟག་ཏུ་ཕྲ་ཞིང་སྐྱོན་མེད་པ། །ཡེ་ཤེས་ལ་ནི་རྣམ་ཤེས་ནུབ། །ཡེ་ཤེས་དངོས་པོས་རྣམ་ཤེས་ཀྱི། །རྫོགས་པའི་བྱང་ཆུབ་རིམ་མཐོང་འགྱུར། །དང་པོར་མཚན་མ་ཐམས་
ཅད་ཀྱི། །མར་མེའི་རྣམ་པ་མཐོང་བར་འགྱུར། །གཉིས་པ་མཚན་མོ་མེ་ཁྱེར་གྱི། །རྣམ་པའི་རྡུལ་ནི་མཚོན་པར་བྱེད། །རྡུལ་དཀར་ཙ་ན་ཀ་དབྱིབས་སུ། །ཕྱོགས་བཅུར་དེ་བཞིན་མཐོང་བར་འགྱུར། །གསུམ་པར་ཉོན་མོངས་བཅོམ་པ་ནི། །རྣལ་འབྱོར་པ་ཡིས་
เล่ม ๗๙ · หน้า 105b
རྣམ་པར་བརྟགས། །ལྷ་ཡི་ལོངས་སྤྱོད་འདོད་པ་ཡང་། །བཞི་པར་ཡང་ནི་བསྟན་པའོ། །ལྷ་ཡི་གཟུགས་ནི་ཐམས་ཅད་ཀྱང་། །ལྔ་པར་སེམས་ཀྱིས་བརྟག་པར་བྱ། །དྲུག་པ་གཟུགས་ནི་མེད་པའི་ཆ། །བདུན་པ་ཆོས་ཀྱི་དབྱིངས་ཉིད་དེ། །བརྒྱད་པར་
རང་འདོད་རྣལ་འབྱོར་པའི། །སངས་རྒྱས་རྣམས་ཀྱི་འབྲས་བུའི་དོན། །རྡོ་རྗེ་སེམས་དཔའ་སྙིང་རྗེ་ཆེ། །ཡིད་ནི་གཅིག་ཏུ་གྱུར་པས་ཉོན། །ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱིས་ནི་རེ་རེར་དབྱེ་བ་ཡིས། །ལྷ་རྣམས་ཀྱི་ནི་
བརྗོད་པར་བྱ། །ལུས་ཅན་རྣམས་ཀྱི་ཕུང་པོ་དང་། །ཁམས་རྣམས་དང་ནི་སྐྱེ་མཆེད་རྣམས། །རང་བཞིན་གྱིས་ནི་རྣམ་པར་དག །ཉོན་མོངས་མི་ཤེས་སྒྲིབ་སྦྱང་བྱ། །རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཡུལ་གྱི་དངོས་
པོ་དག་པའི་ཕྱིར། །རང་གིས་རིག་པའི་བདེ་བ་མཆོག །གཟུགས་ལ་སོགས་པའི་ཡུལ་གང་དང་། །གཞན་ཡང་རྣལ་འབྱོར་པ་སྣང་བ། །དེ་ཀུན་རང་བཞིན་དག་པ་སྟེ། །དེ་ཕྱིར་སངས་རྒྱས་སྣ་ཚོགས་དངོས། །ཀྱེ་བཅོམ་ལྡན་འདས་རྣམ་པར་མ་དག་པ་
གང་ལགས། །བཅོམ་ལྡན་འདས་ཀྱིས་བཀའ་སྩལ་པ། གཟུགས་ལ་སོགས་པའོ། །དེ་ཅིའི་སླད་དུ་ཞེ་ན། གཟུང་བ་དང་འཛིན་པའི་ཕྱིར་རོ། །གསོལ་པ། གཟུང་བ་དང་འཛིན་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། མིག་གིས་
གཟུགས་ནི་གཟུང་བར་བྱ། །སྒྲ་ནི་རྣ་བས་མཉན་པར་བྱ། །དྲི་ནི་སྣ་ཡིས་ཚོར་བར་བྱ། །ལྕེ་ཡིས་རོ་ནི་རིག་པར་བྱ། །ལུས་ཀྱིས་དངོས་པོ་རིག་པར་བྱ། །ཡིད་ཀྱིས་བདེ་སོགས་ཐོབ་པ་ནི། །དག་པས་དུག་མེད་བྱས་ནས་ནི། །བསྟེན་བྱ་འདི་དག་བསྟེན་པར་བྱ། །
གཟུགས་ནི་སངས་རྒྱས་རྣམ་སྣང་མཛད། །ཚོར་བ་རྡོ་རྗེ་ཉི་མ་སྟེ། །འདུ་ཤེས་པདྨ་གར་དབང་ཕྱུག །དེ་བཞིན་འདུ་བྱེད་རྡོ་རྗེ་རྒྱལ། །རྣམ་ཤེས་རྡོ་རྗེ་སེམས་དཔའ་ཉིད། །ཀུན་གྱི་ངོ་བོ་ཧེ་རུ་ཀ། །མིག་ལ་གཏི་མུག་རྡོ་རྗེ་བཤད། །ཞེ་སྡང་རྡོ་རྗེ་མངོན་ཐོས་
เล่ม ๗๙ · หน้า 106a
པ། །ཕྲག་དོག་རྡོ་རྗེ་དེ་བཞིན་སྣ། །ཁ་ནི་འདོད་ཆགས་རྡོ་རྗེར་བཤད། །རེག་ལ་སེར་སྣ་རྡོ་རྗེ་མ། །ཁམས་དང་སྐྱེ་མཆེད་ཐམས་ཅད་ནི། །དམ་པའི་དབང་ཕྱུག་ཧེ་རུ་ཀ། །ས་ཡི་ཁམས་ནི་ལྟུང་བྱེད་མ། །ཆུ་ཁམས་གསོད་པར་བྱེད་མར་བརྗོད། །མེ་
ཡི་ཁམས་ནི་འགུགས་བྱེད་མ། །དེ་བཞིན་རླུང་ནི་གར་དབང་ཕྱུག །ནམ་མཁའི་ཁམས་སུ་བརྗོད་པ་ནི། །པདྨ་འབར་བ་འཁྱིལ་པ་ཉིད། །འདི་ལྟར་ལུས་ཅན་རྣམས་ཀྱི་ལུས། །ཕུང་པོ་ལ་སོགས་ལྷ་བདག་ཉིད། །བདེ་དང་སྡུག་བསྔལ་དེ་བཞིན་ལས། །ཉོན་
མོངས་ལ་སོགས་དེས་བསྐྱེད་པའི། །བསྐྱེད་པའི་ཆ་ལ་ལེགས་གནས་པས། །སྲིད་དང་མྱ་ངན་འདས་པ་ཐོབ། །ཕུང་པོ་དང་སྐྱེ་མཆེད་རྣམ་པར་དག་པ་སྟེ་ལྔ་པ་ལས་རབ་ཏུ་བྱེད་པ་གཉིས་པའོ།། །།དེ་ནས་སྤྱོད་པས་རྟོག་པ་རྣམས། །འཇིག་པར་
བྱེད་པ་བཤད་པར་བྱེད། །ཆོས་རྣམས་ཀུན་ལ་མཉམ་བྱུང་བ། །དེ་ཉིད་སྤྱོད་པ་གོང་ན་མེད། །སངས་རྒྱས་སྲས་ལ་ཕན་པའི་ཕྱིར། །རྫོགས་པའི་བྱང་ཆུབ་རྣམ་གནས་པ། །གང་ཞིག་ཡང་ནི་དེ་ཉིད་ལས། །རྡོ་རྗེ་ཡན་ལག་མེད་པ་ཡི། །ཤེས་རབ་ཕ་རོལ་ཕྱིན་པ་
མཆོག །སྐྱེ་བའི་རྒྱ་མཚོ་འཇིགས་ཆེན་པོར། །རྒ་བའི་རླབས་ཀྱིས་འཁྲུགས་པ་ལས། །སེམས་ཅན་ཐམས་ཅད་སྒྲོལ་བར་བྱེད། །ཚོང་པ་དགེ་བར་འགྲོ་བ་དང་། །མྱུར་དུ་དངོས་གྲུབ་གསལ་བྱེད་ཅིང་། །སྙིང་པོའི་ཡོན་ཏན་ཀུན་གྱི་གནས། །སེམས་ཀྱི་རིན་
ཆེན་ལས་བྱུང་བ། །འདོད་དོན་རབ་ཏུ་སྒྲུབ་པར་བྱེད། །རྡོ་རྗེ་འཛིན་པས་རབ་བསྔགས་པའི། །ལོངས་སྤྱོད་རྫོགས་པའི་ཡོན་ཏན་ཀུན། །ལུས་བྱུང་འདི་ལས་མ་གཏོགས་པར། །དགའ་བའི་དངོས་གྲུབ་འབྱུང་མི་འགྱུར། །མཁས་མཆོག་སྤྱོད་པ་མཚུངས་མེད་འདི། །
གྲོལ་བར་འདོད་པས་སྤྱད་པར་གྱིས། །ལྷ་ཡི་དགྲ་དང་བརྒྱ་བྱིན་དང་། །གྲོང་ཁྱེར་སུམ་བརྩེགས་དགྲ་བོ་དང་། །ནོར་སྦྱིན་ཚངས་པ་ལ་སོགས་པས། །ཞབས་ཀྱི་འདམ་སྐྱེས་མཆོད་པ་ཡིས། །སྡིག་པ་འཇིག་བྱེད་འདི་ལ་སྤྱོད། །མྱུར་དུ་དེ་བཞིན་གཤེགས་པ་ཡི། །
เล่ม ๗๙ · หน้า 106b
གནས་ཀྱི་མཆོག་ནི་ཐོབ་པར་འགྱུར། །དཔལ་ལྡན་རྡོ་རྗེ་སེམས་དཔས་ནི། །གང་ཞིག་འགྲོ་ལ་ཕན་པར་ནི། །ཀུན་འདར་གྱི་ནི་སྤྱོད་པ་གསུངས། །དེ་ལྟར་མཆོག་ཏུ་བསམ་ཡས་གནས། །ཤིན་ཏུ་གསང་བ་ཡོ་གིས་བསྒོམ། །རྟོག་པ་ཐམས་ཅད་བྲལ་བར་
ནི། །དམ་ཚིག་ལ་ནི་སྤྱད་པར་བྱ། །རྒྱུ་མཐུན་འབྲས་བུ་རང་བཞིན་ལས། །དང་པོའི་རྩོམ་པར་ཡོ་གི་གནས། །དེ་ནས་བསྒོམས་པས་དུབ་པ་ན། །བསྡུས་ནས་བྱིས་པའི་རྩེ་བར་བྱ། །སྣ་ཚོགས་གདུལ་བྱའི་འཇིག་རྟེན་ལ། །འཇམ་པའི་གཟུགས་ཅན་རང་ཉིད་
བསྒོམ། །གྲུབ་པར་གྲགས་པ་མ་ལུས་པ། །ཅི་གསུངས་རྣམ་པ་སྣ་ཚོགས་པའི། །སྤྱོད་པས་བླ་ན་མེད་པ་ཡི། །ཀུན་བཟང་མཚུངས་པ་མེད་འགྲུབ་པས། །སྤྱོད་པ་ངེས་རིག་རྡོ་རྗེ་ཅན། །བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ལྡན་སློབ་དཔོན་
རྡོ་རྗེ་ཅན། །ཀུན་གྱི་མགོན་ལ་ཕྱག་འཚལ་ལོ། །གསང་བའི་སྤྱོད་པས་གནས་ནས་ནི། །བློ་གྲོས་ཆེན་པོ་བྱ་བ་བྱས། །དེ་ནས་རང་གི་འདོད་སྒྱུར་བས། །སྦྱོར་བ་ཀུན་ལ་ཁ་ཕྱིར་བལྟས། །ཀུན་ཏུ་སེང་གེ་ལྟ་བུར་ནི། །དེ་ཉིད་ལྡན་པས་བདག་གིས་སྤྱད། །
ཇི་ལྟར་བྱུང་དོན་ཡང་དག་རིག །འགྲོ་བ་འདོན་པའི་བསམ་པ་ཡིས། །ཡང་དག་ལྟ་བ་རབ་སྒྱུར་བདག །བརྟན་པའི་སེམས་ནི་གནས་མེད་པས། །ཕུང་པོ་ཁམས་སོགས་མཚན་ཉིད་ནི། །ཐམས་ཅད་རྨི་ལམ་སྒྱུ་མ་ལྟར། །ཁམས་གསུམ་འདི་དག་ཐམས་
ཅད་ནི། །མདོར་བསྡུས་ནས་ནི་འདིར་ཤེས་བྱ། །སྒྲིབ་པ་ཀུན་ལས་རྣམ་པར་གྲོལ། །འཚོ་བར་དབང་ཕྱུག་འདུ་བ་དང་། །དེ་བཞིན་འཇིག་རྟེན་ཆོས་བརྒྱད་ནི། །ཐམས་ཅད་ཤིན་ཏུ་རིང་དུ་སྤངས། །རྟག་ཏུ་རྟོག་པ་མེད་གྱུར་པས། །གཉིས་སུ་མེད་པར་ངེས་
བྱས་ནས། །ཕ་རོལ་ཕྱིན་དྲུག་རྣལ་འབྱོར་གྱིས། །སངས་རྒྱས་དངོས་གྲུབ་རབ་གྲུབ་ཕྱིར། །སེམས་ཅན་དོན་ལ་ལེགས་ནུས་ཀྱང་། །སེམས་ཅན་ཡོངས་སུ་བརྟག་མི་བྱ། །བྱང་ཆུབ་ལ་ནི་སེམས་བཞག་ནས། །ཕྱོགས་ལས་རྒྱལ་བའི་སྤྱོད་པ་བརྩམ། །ཐབས་
เล่ม ๗๙ · หน้า 107a
དང་ཤེས་རབ་ལྡན་པའི་བདག །སྦྱོར་བ་ཀུན་ལ་རྒྱབ་ཀྱིས་ཕྱོགས། །དེ་ཉིད་གོམས་པར་རབ་བྱས་པས། །སྐྱེ་བ་འདིར་ནི་འགྲུབ་པར་འགྱུར། །རྟོག་པ་ཀུན་ལས་རྣམ་པར་གྲོལ། །སེམས་ཅན་བསམ་པའི་ཁྱད་པར་ལས། །སྒྱུ་མ་ལྟར་
སོགས་རྣལ་འབྱོར་གྱིས། །ཐམས་ཅད་ཉིད་ནི་བཟའ་བར་བྱ། །ཆོས་ཀྱི་དབྱིངས་ལས་ཡང་དག་བྱུང་། །གང་ཡང་ཀུན་ཏུ་ལམ་གྲོགས་མེད། །དོགས་པ་མེད་པའི་སེམས་ཀྱིས་ནི། །ཇི་ལྟར་འདོད་པར་རབ་ཏུ་བཟའ། །ལོངས་སྤྱོད་རྫོགས་དོན་འདི་དག་
ཀུན། །ཁམས་གསུམ་དག་ནི་མ་ལུས་པ། །སྒྲུབ་པ་པོ་ལ་ཕན་པའི་ཕྱིར། །རྡོ་རྗེ་སེམས་དཔས་རྣམ་པར་སྤྲུལ། །ཡེ་ཤེས་མཐའ་ཡས་ཐོབ་པ་ཡིས། །དེ་བཞིན་གཤེགས་ཕྱག་མི་བྱ་ན། །རྟག་ཏུ་སྒོམ་པ་ལྡན་པ་ཡིས། །དབང་བསྐུར་མེད་
སོགས་སྨོས་ཅི་དགོས། །བྱང་ཆུབ་སེམས་ཀྱི་རང་བཞིན་ལས། །དངོས་པོ་ཀུན་གྱི་རང་བཞིན་འདི། །དེ་ཉིད་བཅོམ་ལྡན་རྡོ་རྗེ་ཅན། །དེ་ཕྱིར་དེ་ཉིད་ལྷ་རྣམས་ཉིད། །དཀྱིལ་འཁོར་སྨྱུང་བ་མི་བྱ་ཞིང་། །ཕྱག་རྒྱ་མཆོད་རྟེན་ལས་མི་བྱ། །དཔལ་ལྡན་རྡོ་རྗེ་མགོན་
པོས་ནི། །གང་ཡང་གཞན་དུ་བསྟན་པ་རྣམས། །ལྷག་པར་མོས་པས་གནས་གང་ཡང་། །དེ་རྣམས་ཀྱིས་ཀྱང་དེ་ཉིད་རིག །ཇི་ལྟར་བདུད་རྩིའི་དོན་གཉེར་བས། །སྙིང་པོ་བླངས་ནས་དོར་བ་སྤོང་། །དེ་ལྟར་ཆོས་ཀྱི་སྙིང་པོ་ནི། །ཐོབ་ནས་རྟོག་པ་ཐམས་ཅད་སྤངས། །
རྟོག་མེད་གང་ཚེ་བློ་ལྡན་པས། །དོགས་པ་སྤངས་ཤིང་གནས་མེད་པ། །ཐུགས་ཀྱི་རྡོ་རྗེ་ཅི་གསུངས་བཞིན། །དེ་ཚེ་འགྲུབ་འགྱུར་ཐེ་ཚོམ་མེད། །རྟོག་པས་དམྱལ་བར་འགྲོ་འགྱུར་ཏེ། །འགྲོ་བ་དྲུག་གི་འཁོར་བ་ཡི། །རྒྱ་མཚོ་རུ་ནི་འཁོར་བར་འགྱུར། །རྟོག་པ་
མེད་ན་གྲོལ་འགྱུར་ཞིང་། །གནས་ནི་དྲི་མེད་ཞི་བ་ཉིད། །དེ་ཕྱིར་རྟོག་པའི་དགྲ་གཞོམ་ཕྱིར། །དམ་ཚིག་སངས་རྒྱས་མཛད་པ་གང་། །དེ་ནི་རྟག་ཏུ་གོམས་པར་བྱ། །གང་གིས་དམ་ཚིག་གནས་གྱུར་པ། །སྔགས་ཤེས་བསམ་པའི་ནུས་པས་བྱ། །དངོས་
เล่ม ๗๙ · หน้า 107b
པོ་ཀུན་ལ་བལྟ་བར་བྱ། །ངེས་པར་ཐམས་ཅད་མ་སྐྱེས་པའི། །རྣམ་པ་ཡི་ནི་རྣལ་འབྱོར་གྱིས། །ཁྱི་དང་བོང་བུ་རྔ་མོ་དང་། །གླང་པོ་ལ་སོགས་ཁྲག་འཐུངས་ནས། །ཤ་ཡང་རྟག་ཏུ་བཟའ་བ་ཉིད། །ཤ་ཆེན་ཁྲག་གིས་བསྒོས་པ་ནི། །ཐམས་ཅད་ཁྱད་
པར་དུ་ནི་བལྟ། །དམན་པའི་ཤ་ནི་ཐམས་ཅད་དང་། །སྲོག་ཆགས་འབུམ་ཕྲག་བརྒྱ་ལྡན་བཟའ། །རྣམ་སྣང་ཤིན་ཏུ་རུལ་བ་ཡི། །སྲིན་བུ་བརྒྱ་ཕྲག་ཟི་ཟིར་ལྡན། །ཁྱི་དང་མི་སྐྱུགས་བསྲེས་ནས་ནི། །ཤ་ནི་རྡོ་རྗེའི་ཆུས་གོས་ལྡན། །རྣལ་འབྱོར་
པས་ནི་སྤྲོ་བ་ཡིས། །རྣམ་སྣང་བསྲེས་ནས་བཟའ་བར་བྱ། །རྡོ་རྗེའི་ཆུ་ནི་བཏུང་བར་བྱ། །གང་གི་ཚེ་འགའ་ཞིག་ཏུ་ཤའི་བཟའ་བ་མ་རྙེད་ན་བཟའ་བའི་དོན་དུ་ཤའི་གཟུགས་སུ་རྣམ་པར་བརྟགས་ཏེ་བཟའོ། །གང་ཞིག་གཞན་པའི་འཇིག་རྟེན་ཟ་བ་དེ་བཟའ་
བར་བྱའོ། །དེ་ཁོ་ནའི་སྒྲུབ་པ་པོའི་དབང་པོ་གང་ཞིག་བགྲོད་པར་བྱ་བ་མ་ཡིན་པ་དེ་ལ་བགྲོད་པར་བྱ་བ་དང་། གང་ཞིག་བྱ་བ་མ་ཡིན་པ་དེ་ནི་དེའི་བྱ་བ་དང་། བགྲོད་པ་དང་བགྲོད་པར་བྱ་བ་མ་ཡིན་པར་རྣམ་པར་རྟོག་པ་དང་། བཟའ་བ་དང་བཟའ་བར་བྱ་བ་མ་ཡིན་
པ་དང་། སྡུག་པ་དང་མི་སྡུག་པ་དང་། བཏུང་བ་དང་བཏུང་བ་མ་ཡིན་པར་སྔགས་པས་མི་བྱ་སྟེ། སྐུ་དང་། གསུང་དང་། ཐུགས་མཉམ་པར་གཞག་པར་འགྱུར་རོ། །ཇི་ལྟར་ཡང་སེམས་འཁྲུལ་པ་མ་ཡིན་པ་དེ་ལྟར་ཆང་རྣལ་འབྱོར་པས་རྟག་ཏུ་བཏུང་བར་བྱ་བ་
དང་། དམན་པས་ཤིན་ཏུ་སྒེག་པ་དང་། རིགས་དང་བཅས་པ་དང་། རིགས་མེད་པ་དང་། སྡུག་ཅིང་ཕོངས་པའི་སེམས་ཅན་ཐམས་ཅད་ལ་གཅིག་པའི་ཚུལ་གྱིས་རྒྱལ་བ་ལྟ་བུར་བལྟ་བ་དང་། གླེགས་བམ་བཀླག་པར་གསུངས་པ་མི་བྱ་བ་དང་། དཀྱིལ་འཁོར་དང་
མེ་ཏོག་བསྡུ་བར་མི་བྱ་བ་དང་། སྔགས་ཀྱི་བཟླས་པ་མི་བྱ་བ་དང་། ལྷ་དང་དབང་བསྐུར་བ་ལ་སོགས་པ་ལ་ཕྱག་མི་བྱ་བ་དང་། བརྫུན་དུ་སྨྲ་བ་དང་། ཕ་རོལ་གྱི་བུད་མེད་སྐལ་བ་བཟང་མོ་བསྟེན་པར་བྱ་བ་དང་། གདུག་པ་ཅན་ལ་བྱམས་པ་མི་བྱ་བར་གསུངས་པ་དང་།
เล่ม ๗๙ · หน้า 108a
སངས་རྒྱས་དང་སྲོག་ཆགས་གསད་པ་དང་། རྒྱལ་བས་མཆོད་པའི་སློབ་དཔོན་དང་། ཡེ་ཤེས་ཀྱི་དམ་ཚིག་ནི་སེམས་ཅན་དེ་དམ་ཚིག་གིས་རྟག་ཏུ་དངོས་གྲུབ་སྣ་ཚོགས་སྦྱིན་པར་བྱེད་དེ། བློ་དང་ལྡན་པ་ལ་ཕྱོགས་བཅུར་རྣམ་པར་བཞུགས་པ་མཆོད་
པར་བྱེད་དོ། །གང་གི་ཕྱིར་རྫོགས་པའི་སངས་རྒྱས་དང་བྱང་ཆུབ་སེམས་དཔའི་བསོད་ནམས་གང་ཞིག་སློབ་དཔོན་གྱི་བ་སྤུའི་ཁུང་བུའི་རྩེ་མོ་ལ་མཐོང་བ་དེའི་ཕྱིར་བྱང་ཆུབ་སེམས་དཔས་སློབ་དཔོན་ལ་སངས་རྒྱས་ཀྱིས་མཆོད་པ་བྱེད་པ་མཐོང་ངོ་། །ངེས་པར་
རང་གི་དམ་ཚིག་སངས་རྒྱས་འདོད་པས་དངོས་གྲུབ་སྦྱིན་པར་བྱེད་པས་བླ་མ་དམ་པ་ལ་སྨད་པར་མི་བྱ་བ་དང་། རྡོ་རྗེ་སྤུན་ལ་མི་གུས་པར་མི་བྱ་བ་དང་། གང་ཞིག་བྱིན་པ་དེ་བཟུང་ནས་མཆོད་རྟེན་ལ་ཕྱག་མི་བྱ་བ་དང་། སྤུན་དང་། བུ་དང་། ཕ་དང་། རྒྱལ་
སྲིད་ཀྱི་ལོངས་སྤྱོད་དང་། གཏེར་དང་། ནོར་དང་། འབྲུ་ཐམས་ཅད་ལ་རྩྭ་ལྟ་བུར་མཐོང་ནས་ཁམས་གསུམ་གྱི་རྒྱལ་པོ་བསྒྲུབ་པར་བྱའོ། །འཁྱུད་པའི་སྤྱོད་པ་སྟེ་ལྔ་པ་ལས་རབ་ཏུ་བྱེད་པ་གསུམ་པའོ།། །།དེ་ནས་ཡང་དག་རབ་བཤད་བྱ། །
སྤྱོད་པ་ཕ་རོལ་ཕྱིན་མཚན་ཉིད། །གང་གི་རིང་ནས་ཤེས་པ་དེ། །རྡོ་རྗེ་ཡོ་གིར་ཐེ་ཚོམ་མེད། །མཁའ་འགྲོ་མ་སོགས་གཏོར་མ་ནི། །ཇི་ལྟར་རྙེད་དང་བཟའ་བཏུང་ནི། །དེ་བཞིན་རྣལ་འབྱོར་པ་ཡིས་བཟའ། །རོ་ཡི་དཀྲིས་མའི་གོས་བཟང་དང་། །རོ་བསྲེགས་
ཐལ་བས་རྣམ་པར་བརྒྱན། །ཕྲུ་ཆག་ཤིན་ཏུ་གསང་བར་ནི། །མཚན་མོའི་དུས་སུ་རྒྱུ་བར་བྱ། །བཞི་མདོ་དང་ནི་རི་བོ་དང་། །ཤིང་གཅིག་གམ་ནི་དུར་ཁྲོད་དང་། །བཞིར་ནི་དེ་ནས་སྔགས་པ་ཡིས། །བསྒོམ་པ་བཟང་པོ་བྱ་བར་བརྗོད། །མ་མོའི་ཁྱིམ་
དང་མཚན་མོ་དང་། །ཡང་ན་དབེན་པའམ་བས་མཐར་ནི། །ཅུང་ཟད་དྲོད་ནི་ཐོབ་པ་ཡིས། །གལ་ཏེ་སྤྱོད་པ་བྱེད་འདོད་ན། །བདག་ཉིད་གལ་ཏེ་འགྲུབ་འདོད་པས། །བྱིས་པ་བཞིན་དུ་སྤྱད་ནས་ནི། །སེམས་ཅན་རྗེས་སུ་གཟུང་བའི་རྒྱུར། །བློ་ལྡན་ཆེན་
เล่ม ๗๙ · หน้า 108b
པོས་རྒྱུ་བར་བྱ། །ཞེན་པ་མེད་པའི་སེམས་ཀྱིས་ནི། །ཁ་དོག་ཅན་གྱི་རྟག་སྒྲིབ་པ། །བ་སྤུའི་ཁུང་བུའི་བུ་ག་ནས། །ཕྱོགས་བཅུ་རྣམས་སུ་དབྱུང་བར་བྱ། །འཇམ་པའི་རྡོ་རྗེར་རང་གྱུར་ནས། །དཀྱིལ་འཁོར་པར་ནི་རབ་ཏུ་བརྟག །པདྨའི་ཚལ་ནི་ཉམས་དགའ་
བར། །ཆུ་བོ་འདུས་པ་རྣམས་སུ་ཡང་། །དེར་གནས་རྣལ་འབྱོར་པས་བསྒོམས་ན། །དངོས་གྲུབ་མྱུར་དུ་ཐོབ་པར་འགྱུར། །ཕུག་གམ་རི་ཡི་རྩེ་མོར་ནི། །ཤིན་ཏུ་མཉམ་པར་བཞག་པས་གནས། །ཇི་ལྟར་རྙེད་པ་བཞིན་དུ་བཟའ། །ཟོས་ཤིང་ཟོས་ནས་
གཏོར་མ་སྦྱིན། །འབྲས་བུ་སྣ་ཚོགས་དོ་ཤལ་སོགས། །འོལ་མ་ཟི་སོགས་དེ་བཞིན་སྤྲས། །སྲོག་ཆགས་ཡན་ལག་གོས་གྱོན་ཞིང་། །བདེ་དོན་གཉེར་ལ་བདེ་བ་སྦྱིན། །རེས་འགའ་ལེགས་སྦྱར་ཟུར་ཆག་ནི། །བཟློག་པ་ཡིས་ནི་འདོན་པར་བྱེད། །
བཟའ་དང་བཟའ་མིན་ཅི་སྙེད་པ། །སྨྱོན་པའི་སྦྱོར་བས་བཟའ་བར་བྱ། །གཞན་པའི་ཡུལ་འཁོར་གྲུབ་པ་དང་། །རི་ཡི་ཕུག་དང་ཚང་ཚིང་དང་། །གདོད་ནས་གྲུབ་པའི་དུར་ཁྲོད་ཆེ། །རྒྱ་མཚོ་ཆེན་པོའི་འགྲམ་དུ་ཡང་། །དེར་གནས་ཤེས་རབ་ཅན་གྱིས་བསྒོམ། །
སྐྲག་པ་ཐམས་ཅད་རྣམ་སྤངས་ཏེ། །དེ་ལྟར་བྱས་ནས་རྣལ་འབྱོར་པས། །ཡང་ནི་ཕྱོགས་ལས་རྣམ་རྒྱལ་བརྩམ། །སྒྲིབ་པ་ཀུན་ལས་རྣམ་པར་གྲོལ། །ཕྱོགས་བཅུར་རྣམ་པར་གནས་པ་ཡི། །སྐྱེ་བའི་སྒྲིབ་པས་བསྒྲིབས་པ་ཡི། །ཀུན་གྱི་བསམ་པ་
འགེངས་པར་བྱེད། །གཟུང་བ་དང་ནི་འཛིན་པ་ཀུན། །བསྒོམ་པས་སྤངས་ཤིང་རྣམ་པར་སྤངས། །འདིས་ནི་བསྒོམས་པ་ཐམས་ཅད་ཀྱིས། །ཕྱོགས་ལས་རྣམ་རྒྱལ་མངོན་པར་བརྗོད། །དེ་ལྟར་རེ་ཞིག་གནས་བྱས་ནས། །དེ་ཉིད་མི་ཤིགས་རྣལ་འབྱོར་
པས། །རིག་མའི་ལྷ་མོ་འདོད་པ་ཡི། །ཤིན་ཏུ་གཟུགས་ཅན་བསྡུས་ནས་བྱ། །ཆུས་བྱུང་ཡིད་འོང་རིན་ཆེན་དང་། །རིག་པ་འཛིན་པའི་ཉམས་དགའ་འམ། །ལྷ་ཡི་བུ་མོ་གནོད་སྦྱིན་མོ། །ཡང་ན་ཀླུ་མོ་རྐང་འོག་ཏུ། །གནས་པ་དང་ནི་ལྷ་མིན་མོ། །འདི་
เล่ม ๗๙ · หน้า 109a
ནང་ཡོ་གིས་རིག་མ་གཅིག །རང་གི་སེམས་ལ་མངོན་འདོད་པ། །ལྕགས་ཀྱུ་ཞགས་པའི་རབ་སྦྱོར་བས། །རྣལ་འབྱོར་པ་ཡིས་བཀུག་ནས་བསྒྲུབ། །ཉེ་བར་དགོས་པ་རྒྱས་པ་ཀུན། །མ་བསླངས་པར་ནི་ལྷ་ཡིས་སྟེར། །རྒ་དང་ནད་ལས་རྣམ་
པར་གྲོལ། །གཉིས་མེད་གནས་གསུམ་སྡིག་པ་མེད། །ལུས་ཀྱིས་སྦྱིན་པ་བྱིན་ནས་ནི། །ཕྱིས་ནི་སྤྱོད་པ་ཡང་དག་བརྩམ། །སྐལ་དང་སྐལ་མེད་རྣམ་དཔྱང་པས། །དེ་ཕྱིར་སྦྱིན་པ་སྦྱིན་མི་བྱ། །བཟའ་བཅའ་དེ་བཞིན་བཏུང་བ་ཉིད། །ཇི་ལྟར་རྙེད་པ་བཟའ་བར་
བྱ། །ཡིད་འོང་མི་འོང་རྣམ་རྟོག་ཕྱིར། །ཞེན་པ་ཙམ་དུ་མི་བྱའོ། །བསླབ་དང་དབང་ལས་རྣམ་པར་གྲོལ། །དེ་བཞིན་ངོ་ཚའི་བྱ་བ་ཉིད། །དངོས་པོ་ཀུན་གྱི་རང་བཞིན་གྱིས། །ཡོ་གིས་རྣམ་དཔྱད་སྙིང་རྗེ་ཆེ། །མཆོད་སྦྱིན་སྦྱིན་སྲེག་དཀའ་ཐུབ་འདས། །
སྔགས་དང་བསམ་གཏན་རྣམ་པར་སྤངས། །དམ་ཚིག་སྡོམ་ལས་རྣམ་པར་གྲོལ། །ཤིན་ཏུ་རྣལ་འབྱོར་ལྡན་སྤྱོད་ཀྱིས། །ངེས་པར་སྔོན་དུ་ལྷ་མིན་གང་། །བརྒྱ་བྱིན་ལྟ་བུ་ཡིན་ན་ཡང་། །དེ་ལ་འཇིགས་པར་མི་བྱ་སྟེ། །སེང་གེའི་གཟུགས་ཀྱིས་རྣམ་པར་
རྒྱུ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་སྙིང་རྗེས་བཏུང་བར་བྱ། །རྣལ་འབྱོར་བཏུང་དགའ་རྣལ་འབྱོར་པ། །གཞན་གྱི་བཏུང་བས་བཟི་བ་མེད། །ཡང་ན་དཔལ་ལྡན་རྒྱལ་ཚབ་ཆེའི། །བརྟུལ་ཞུགས་སྤྱོད་པ་བསྒྲག་པར་བྱ། །གང་གིས་དངོས་གྲུབ་
མཐར་འགྲོ་བ། །སེམས་ཅན་ཀུན་གྱི་དོན་གྱི་ཕྱིར། །སྒོམ་པ་པོ་ཡིས་རྣམ་གཟུང་བ། །རྣ་བ་དག་ལ་རྣ་ཆ་བཟང་། །སྤྱི་བོར་འཁོར་ལོ་རྣམ་པར་འཛིན། །ལག་པ་དག་ལ་ལག་གདུབ་ཉིད། །རྐེད་པ་ལ་ནི་སྐ་རགས་ཉིད། །རྐང་པར་དེ་བཞིན་རྐང་གདུབ་བོ། །
དཔུང་པའི་རྩ་བར་དཔུང་རྒྱན་ཉིད། །མགྲིན་པ་ལ་ནི་ནོར་བུ་སྟེ། །བགོ་བ་སྟག་གི་པགས་པ་ཉིད། །བཟའ་བ་མི་འཆི་བཅུ་ཕྱེད་དེ། །ཧེ་རུ་ཀ་སྦྱོར་སྐྱེས་བུ་ཉིད། །མཉམ་པར་གཞག་པས་གནས་པར་བྱ། །ཤིན་ཏུ་བཞིན་བཟང་མིག་ཡང་སམ། །རང་གིས་དབང་
เล่ม ๗๙ · หน้า 109b
བསྐུར་སྙིང་རྗེ་ཅན། །རྡོ་རྗེའི་བུ་མོ་འདི་ཁྱེར་ནས། །སྤྱོད་པ་བརྟུལ་ཞུགས་རྟོགས་པར་བྱ། །རྡོ་རྗེའི་རིགས་ཀྱི་དངོས་མེད་ན། །གང་ཞིག་རང་གི་འདོད་པའི་ལྷའི། །རིགས་ཀྱིས་ཀྱང་ནི་བྱ་བའོ། །ཡང་ན་གཞན་གྱི་རིགས་བྱུང་བ། །བྱང་ཆུབ་ས་བོན་བཅུག་པ་
ཡིས། །སྦྱང་བ་བྱས་ཏེ་ཁྱེར་ནས་ནི། །གང་ཚེ་རྡོ་རྗེ་མཆོག་ལྡན་པར། །དེ་ཚེ་གླུ་ནི་བླང་བར་བྱ། །གང་ཚེ་དགའ་བ་སྐྱེས་པ་ན། །ཐར་པའི་རྒྱུར་ནི་གར་བྱ་སྟེ། །དེ་ཚེ་རྡོ་རྗེ་རྐང་པས་གར། །རྟག་ཏུ་རྣལ་འབྱོར་པ་ཡིས་བྱ། །འཁོར་ལོའི་གཟུགས་ཀྱིས་མི་བསྐྱོད་
པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བར་རིན་ཆེན་བདག །ལག་པར་རྣམ་པར་སྣང་མཛད་བརྗོད། །སྐ་རགས་ལ་ནི་དོན་ཡོད་གནས། །ཤེས་རབ་ཁ་ཊྭཱྃ་ག་གཟུགས་ཅན། །ཐབས་ཀྱི་གཟུགས་ཀྱིས་ཅང་ཏེའུ། །སྨན་ནི་རྣམ་པར་བཟའ་
བར་བྱ། །ཆུ་ནི་རྟག་ཏུ་བཏུང་བྱ་སྟེ། །རྒ་ཤིས་ཟིལ་གྱིས་མི་ནོན་ཅིང་། །ཀུན་ཏུ་བསྲུང་བར་གྱུར་པ་དེའི། །རྐུན་མའི་སྐྲས་ཀྱང་ཅོད་པན་བྱ། །དེ་ལ་ཧཱུྃ་བྱུང་སྦྱར་བར་བྱ། །སངས་རྒྱས་ལྔ་ཡི་ཐོད་པ་རྣམས། །རྣལ་འབྱོར་སྤྱོད་པས་རྣམ་པར་འཛིན། །
སོར་ལྔའི་དུམ་བུར་བྱས་ནས་ནི། །ཅོད་པན་ལ་ནི་རྣམ་པར་འཛིན། །ཐབས་དང་ཤེས་རབ་རང་བཞིན་ལས། །སྐྲ་ཡི་སྐ་རགས་ཉིས་སྐོར་ཉིད། །ཐལ་བ་སྐྲ་ཡི་མཆོད་ཕྱིར་ཐོགས། །རྣལ་འབྱོར་པ་ཡི་སྤྱོད་པས་འཛིན། །ཅང་ཏེའུའི་སྒྲ་ནི་བཟླས་པ་སྟེ། །སེམས་
ཅན་ཐམས་ཅད་མགྲོན་གཉེར་བའོ། །ཁ་ཊྭཱཾ་ག་ནི་ཤེས་རབ་སྟེ། །རྡོ་རྗེ་བཟླས་དང་བསྒོམ་པ་ཡིན། །ཐོད་པ་ཅན་དུ་རང་གྱུར་པ། །བརྐམ་དང་རྨོངས་དང་དེ་བཞིན་འཇིགས། །ཁྲོ་དང་ངོ་ཚའི་བྱ་བ་ནི། །རྟག་ཏུ་རྣམ་པར་སྤང་བར་བྱ། །ཧེ་རུ་ཀ་བདག་རྣལ་འབྱོར་
པ། །རིགས་ལྔ་ལ་ནི་གནས་པར་བྱ། །རིགས་ལྔ་དག་དང་མཉམ་པར་ལྡན། །རིགས་ནི་གཅིག་ཏུ་རྣམ་པར་བརྟག །རིགས་གཅིག་དུ་མ་ཉིད་ཀྱིས་ནི། །གང་ཕྱིར་དབྱེ་བས་བསྐྱེད་མི་བྱ། །བདག་ཉིད་ཀྱིས་ནི་གཉིད་སྤངས་ནས། །ཐེ་ཚོམ་མེད་པར་སྤྱོད་པ་བྱ། །
เล่ม ๗๙ · หน้า 110a
དཔལ་ཡང་དག་པར་སྦྱོར་བ་ལས་བྱུང་བ་ལས། སྤྱོད་པའི་བརྟག་པ་སྟེ་ལྔ་པའོ།། །།ལྷ་ལགས་ཉན་པར་འཚལ་ལགས་ན། །རང་བྱིན་བརླབ་པའི་རིམ་ཅི་ལགས། །གསང་བ་ལ་སོགས་དགོངས་པ་ཅི། །རྡོ་རྗེ་སེམས་དཔའ་
སྙིང་རྗེ་ཆེ། །ཡིད་ནི་གཅིག་ཏུ་གྱུར་པས་ཉོན། །ཐམས་ཅད་རྒྱུད་ཀྱི་གཏན་ཕབ་པ། །མདོར་བསྡུས་ནས་ནི་བསྒྲག་པར་བྱ། །ཨེ་ཡི་རྣམ་པ་གང་གསུངས་པ། །གནས་ཀྱི་མཚན་ཉིད་མི་གསལ་བར། །འགྲོ་དང་རྗེས་སུ་འོང་བ་ཉིད། །ཁམས་དང་
སེམས་ཀྱི་རྟག་འགྲོ་བའོ། །ཁམས་ཞེས་བྱ་བའི་སྒྲ་དུ་ལགས། །བཅོམ་ལྡན་འདས་ཀྱིས་བཀའ་སྩལ་པ། །འདི་ལྟར་གསང་བའི་ཡི་གེ་བཅུ་དྲུག་བརྗོད་པར་བྱ་སྟེ། །ར་ཡི་རྣམ་པ་ཁྲག་གི་ཁམས། །ཧ་ནི་དེ་བཞིན་རེག་བྱ་ཉིད། །སྱེ་ནི་བད་ཀན་ཞེས་བྱར་
གསུངས། །པ་ཡི་རྣམ་པ་སེམས་ཉིད་དང་། །ར་ཡི་རྣམ་པ་རོ་ཉིད་དེ། །མེ་ནི་དེ་བཞིན་ལྟ་ཚིལ་དག །ར་ནི་མེ་ཉིད་དུ་ནི་གསུངས། །མེ་ཡི་རྣམ་པ་ཤ་རུ་གསུངས། །ས་ཡི་རྣམ་པ་བཤང་བར་གསུངས། །རྦཱ་ཡི་རྣམ་པས་དེ་བཞིན་ཚིལ། །སྨན་པགས་པ་
ཉིད་དུ་གསུངས། །ནི་ཡི་རྣམ་པས་རུས་པ་ཉིད། །ས་ནི་གཅི་བ་ཉིད་དུ་གསུངས། །དཱ་ཡི་རྣམ་པས་གློ་བ་ཉིད། །སྠི་ནི་པདྨ་ཉིད་དུ་གསུངས། །ཤིན་ཏུ་མཛེས་པའི་རྫས་དང་ལྡན། །ཏ་ཡི་རྣམ་པས་ཁུ་བ་ནི། །བྱང་ཆུབ་སེམས་ལས་བྱུང་བ་ཡིན། །རྩ་ཡི་
སྒྲ་ཡི་རང་བཞིན་ལས། །དེ་ལྟར་ལྷ་མོ་བསྒྲགས་པ་ཡིན། །བྱང་ཆུབ་སེམས་ཀྱི་རང་བཞིན་ལས། །ཆ་ཡི་བདག་ཉིད་འགྱུར་བ་ཉིད། །ར་ནི་མེ་ཞེས་བྱ་བར་གསུངས། །ཁྲག་ལས་མཁྲིས་པ་ཡང་དག་ལངས། །མཚན་ཉིད་གཅིག་འདོད་བད་ཀན་ལས། །རྡུལ་
དང་ཆུ་རྒྱུས་ཡང་དག་བྱུང་། །དེ་ཡི་མགོན་པོར་བརྗོད་པའི་རླུང་། །ཧ་ནི་ཀུན་དུ་འགྲོ་བར་གསུངས། །རུས་པའི་མཚམས་ནི་འདི་རྣམས་སུ། །ས་བོན་ལྔ་ནི་ཡང་དག་བཏབ། །རྐན་དུ་ར་དང་ཐམས་ཅད་དུ། །ས་བོན་བཞི་ནི་དམ་པ་ཉིད། །དང་པོའི་རེའུ་མིག་
เล่ม ๗๙ · หน้า 110b
གནས་དེར་ནི། །ས་བོན་ལྔ་ནི་མཛེས་པ་ཉིད། །ཧ་ནི་དབྱངས་ཀྱི་དྲུག་ལྡན་པ། །རྣམ་པར་ཤེས་པར་ཡོངས་སུ་གྲགས། །ཧ་ཡི་རྣམ་པས་ཐམས་ཅད་དུ། །སངས་རྒྱས་ཀུན་དང་མཉམ་པར་སྦྱོར། །སྒྲ་ཡི་ཚུལ་ལས་བྱུང་བཏོན་ཞིང་། །དམ་ཚིག་སྤྱོད་པའི་
སྤྱོད་ཡུལ་ཉིད། །འཇིག་རྟེན་གསུམ་དུ་རྙེད་དཀའ་བ། །ཐོག་མ་དབུས་མཐའ་ཡང་དག་གནས། །བསྲུབ་དང་སྲུབ་བྱེད་སྦྱོར་བ་ལས། །ཇི་ལྟ་བ་ནི་དེ་བཞིན་ནོ། །སྔགས་བཟླས་བསམ་གཏན་ལ་སོགས་ལྡན། །རྒྱུད་ལས་གསུངས་པ་མཉན་པར་གྱིས། །
རྩ་གཉིས་སྐྱེ་གནས་དབུས་སུ་ནི། །གཡོན་དང་གཡས་སུ་དེ་བཞིན་དུ། །གཡོན་དུ་ཁུ་བ་རྣམ་ཤེས་བྱ། །གཡས་པ་ལ་ནི་ཁྲག་ཉིད་དེ། །དེ་ཡི་ཕན་ཚུན་བསྡུ་བ་ཡང་། །ཆོས་ཀྱི་དབྱིངས་ནི་སྡུད་པ་ཡིན། །སྙིང་སྟོབས་སྐུ་དང་རྡུལ་དག་བཅས། །མུན་
པ་སེམས་ཀྱི་རང་བཞིན་ལས། །སྙི་སྟོབས་ཁུ་བ་རིན་ཆེན་རྡུལ། །མུན་པ་སྐྱེད་པར་བྱེད་པ་ཉིད། །རྡོ་རྗེ་པད་མོ་མཉམ་སྦྱོར་བས། །དངོས་དང་དངོས་མེད་རོ་གཅིག་འགྱུར། །བཤང་བ་གཅི་བ་བད་ཀན་དང་། །ཁྲག་དང་ལྔ་པ་ཁུ་བ་ཉིད། །བདུད་རྩི་
ལྔ་ཡི་གོང་བུའི་དངོས། །དེ་ཕྱིར་རྡོ་རྗེ་ཅན་དུ་བརྗོད། །རུས་པ་རྐང་དང་ཁུ་བ་ནི། །ཕ་ལས་སྐྱེས་པར་དེ་བཞིན་གསུངས། །པགས་པ་དང་ནི་ཤ་དང་ཁྲག །མ་ལས་སྐྱེས་པ་ཞེས་བྱར་བསྒྲགས། །གོང་བུའི་བསྡུ་བ་རྣམས་ཀྱི་ཡང་། །ཚད་ནི་འདི་དག་གསུངས་
པ་སྟེ། །གོང་བུ་གཅིག་པུ་གཉིས་སུ་འགྱུར། །གཉིས་སུ་གྱུར་པ་དུ་མ་རྣམས། །གཅིག་པུ་དུ་མའི་རང་བཞིན་གྱིས། །དེ་ཕྱིར་རྡོ་རྗེ་ཅན་འདིར་གསུངས། །རྩ་ཡི་ཀུན་སྤྱོད་ཉིད་གསུངས་པ། །དེ་ཡི་སྒོ་ཡང་དེ་གཉིས་ལ། །དེ་རྣམས་འདུ་བའི་དུས་སུ་ནི། །ལྷ་ནི་
དམིགས་པར་འགྱུར་བ་ཡིན། །སྟེང་གི་སྒོ་དང་འོག་ཉིད་དེ། །འོག་གི་སྒོ་ནི་རྣམ་པར་ཤེས། །སྟེང་གི་སྒོ་ནི་དབྱིངས་ཉིད་དོ། །རྩ་ནི་ཐམས་ཅད་མཉམ་སྦྱོར་བས། །རྣལ་འབྱོར་པས་ནི་འཇུག་པར་བསམ། །དེ་ཡི་ལུས་ཀྱི་སྟེང་སྒོ་ལའང་། །རྡོ་རྗེ་ཅན་གྱི་རྟག་
เล่ม ๗๙ · หน้า 111a
རྒྱུན་བཞུགས། །སྟེང་གི་སྒོར་ནི་སྦྱོར་བ་གསུམ། །སྒོ་དགུ་རྣམས་ཀྱིས་ཡོངས་སུ་བསྐོར། །ཀྱེ་བཅོམ་ལྡན་འདས་སྦྱོར་བ་གསུམ་ནི་ཅི་ཞེས་བཤད། །ཇི་ལྟར་གང་གི་རྣམ་པ་ཡིས། །སེམས་ཀྱི་རྟག་ཏུ་འགྲོ་བ་ལགས། །བཅོམ་ལྡན་འདས་
ཀྱིས་བཀའ་སྩལ་པ། །གསུམ་ཉིད་སྦྱོར་བ་སྦྱོར་བ་གསུམ། །རྣམ་གསུམ་དབྱེ་བས་རྣམ་པར་གནས། །སྐུ་གསུང་ཐུགས་ཀྱི་རང་བཞིན་གྱིས། །ཐ་མ་འབྲིང་པོ་དམ་པ་ཉིད། །ཀ་བ་གཅིག་དང་སྒོ་དགུ་པ། །སྦོམ་པོ་ལྔ་ནི་ལྷག་པའི་ལྷ། །བུག་པ་དགུར་ནི་སོན་
པའི་སྒོ། །དགུ་ཡི་རྣམ་པར་ཡོངས་སུ་གྲགས། །ཐ་མའི་སྒ་ནི་སྐུར་ལྡན་པ། །སྦོམ་པོ་ལྷ་ཡི་སྤྲུལ་པའོ། །སེམས་དང་སྐྱེས་བུ་སྐྱེས་བུ་ཅན། །ཁྱད་པར་རྣལ་འབྱོར་པ་ཡི་དོན། །རྟག་པར་ཀུན་དུ་དུས་སུ་ནི། །འགྲོ་དང་འོང་བའི་ཁྱད་པར་ལས། །རྐང་མེད་རྐང་
གཅིག་རྐང་གཉིས་དང་། །རྐང་བཞི་ལ་ནི་སོགས་པ་ཡི། །རླུང་ལ་སོགས་པས་རབ་དབྱེ་བས། །རྟག་ཏུ་འགྲོ་བ་རླུང་རྣམ་བཞི། །སེམས་ཀྱི་གནས་པ་རྣམ་པ་གཉིས། །ནུབ་དང་རབ་རྒྱུའི་ཆོ་ག་ཡིས། །རྟག་ཏུ་ནུབ་དང་རབ་རྒྱུ་བ། །སེམས་ཅན་ཀུན་ལ་འགྲོ་བའོ། །
དེ་ལྟར་གང་ཞིག་མི་རིག་པ། །སེམས་མེད་སྐྱེད་བུ་མེད་པ་དང་། །ཡིད་དང་ལྡན་པ་མེད་པ་དང་། །རྣལ་འབྱོར་པ་ཡི་དོན་མེད་པ། །མེ་ཉིད་གང་དང་རླུང་དང་ནི། །དབང་ཆེན་དང་ནི་དེ་བཞིན་ཆུ། །འཁོར་ལོར་སེམས་ཀྱི་ཀུན་སྤྱོད་པ། །སྟེང་དང་ངོས་དང་བྲང་འོག་
འགྲོ། །ཟླ་བ་ཉི་མའི་རབ་དབྱེ་བས། །གསུམ་པའི་སྒོ་ནི་ཡིད་དང་བཅས། །རྔུབ་དང་དབྱུང་བ་གཉིས་ཀ་ཡང་། །སྒོ་ཡི་དམ་པ་ཉིད་ཡིན་ཏེ། །གཙོ་བོ་དམ་པ་ཡི་ནི་སྒོ། །སྟེང་དང་འོག་ཏུ་རབ་ཏུ་གྲགས། །འོག་གི་སྒོས་ནི་རྣམ་པར་ཤེས། །སྟེང་གི་སྒོས་ནི་
དབྱིངས་ཉིད་དེ། །རྣམ་སྣང་ལ་སོགས་སངས་རྒྱས་རྣམས། །སྟེང་གི་སྒོར་ནི་གཡོ་ཞིང་གནས། །དེ་རྣམས་འོག་ཏུ་རྣམ་པར་གནས། །སྟེང་གིས་གཤེགས་སུ་གསོལ་བ་ཉིད། །སྤྱན་དྲངས་གཤེགས་སུ་གསོལ་བ་ཡི། །ཚུལ་གྱི་སེམས་ཀྱིས་རྟག་ཏུ་
เล่ม ๗๙ · หน้า 111b
འགྲོ། །དུས་གསུམ་སངས་རྒྱས་ཐམས་ཅད་དང་། །མཁའ་འགྲོ་རྣལ་འབྱོར་མ་མོ་རྣམས། །འཇུག་པ་དང་ནི་ལྡོག་པ་ལ། །ཡོན་ཏན་སྐྱོན་ནི་རབ་བརྗོད་པས། །བདེ་དང་སྡུག་བསྔལ་རང་བཞིན་གྱིས། །ལྷན་ཅིག་སྐྱེས་པ་གྲུབ་པའི་གནས། །རྡོ་རྗེ་སེམས་
དཔའ་བདེ་ཆེན་པོ། །བཅོམ་ལྡན་རྡོ་རྗེ་ཅན་གྱིས་གསུངས། །དེ་ནས་བཅོམ་ལྡན་ལྷ་མོས་ནི། །བོལླ་ཀཀྐོ་ལར་བཅུག་ནས། །སེམས་དཔའ་ཆེན་པོ་མཉེས་བྱས་ཏེ། །ཚིག་ནི་འདི་དག་ཡང་དག་གསོལ། །དཔྱིད་ཅེས་བགྱི་བ་ཇི་ལྟར་ལགས། །ཐིག་ལེ་བགྱི་བ་
ཇི་ལྟར་ལགས། །མི་ཕྱེད་ལ་སོགས་ཇི་ལྟར་གནས། །དེ་ཡི་གནས་ནི་ཇི་ལྟར་ལགས། །པུལླཱི་ར་སོགས་ཅི་གསུངས་དང་། །འཁོར་ལོ་དགོད་པ་དེ་བཞིན་གཞན། །ཇི་ལྟར་རྩ་ཡི་རྫོགས་པ་ཡི། །དེ་ཡི་དབྱེ་བ་བདག་ལ་གསུངས། །བཅོམ་ལྡན་འདས་
ཀྱིས་བཀའ་སྩལ་པ། །ལྷ་མོ་བཤད་པར་བྱ་ཡིས་ཉོན། །གསང་བ་ལས་ནི་ཆེས་གསང་མཆོག །རྩའི་རང་བཞིན་དང་། གནས་ལ་སོགས་པ་དང་། ས་བཅུ་དང་། ཕ་རོལ་ཏུ་ཕྱིན་པའི་སྐུ་དང་། གསུང་དང་། ཐུགས་ཀྱི་འཁོར་ལོར་སོན་པ་གནས་ཀྱི་ནང་
གི་རབ་ཏུ་དབྱེ་བས་ཉི་ཤུ་རྩ་བཞིར་གསུངས་པ། སྤྱི་བོ་མཱ་ལ་ཡ་ཡི་ཡུལ། །དེ་བཞིན་སྤྱི་གཙུག་འབར་བ་འཛིན། །དེ་བཞིན་དུ་ནི་ཨོ་ཌྱན་ཉིད། །རྣ་བ་གཡས་པ་ཉིད་དུ་བརྗོད། །རྩིབ་མའི་རྒྱབ་ནི་ཨརྦུ་ད། །བཞི་ནི་གནས་ཤེས་བྱ་བའོ། །རྣ་བ་གཡོན་པའི་
རང་བཞིན་ནི། །དེ་བཞིན་གོ་དཱ་བ་རིར་ཤེས། །དགའ་བའི་དབང་ཕྱུག་བཤད་པ་ནི། །སྨིན་མའི་དབུས་གནས་རབ་ཏུ་བསྐུལ། །དེ་བཞིན་མིག་དག་ལྷ་མོའི་མཁར། །ལག་པའི་རྩ་བར་མ་ལ་བ། །དེ་ལྟར་ཉེ་བར་གནས་ཉིད་དེ། །ཐུགས་ཀྱི་འཁོར་ལོར་རྣམ་
པར་གནས། །གནས་ཀྱི་ཁྱད་པར་རང་བཞིན་གྱི། །མཁའ་སྤྱོད་རྣམས་ཀྱི་ཡང་དག་བཤད། །མཆན་ཁུང་ཀཱ་མ་རཱུ་པ་ཉིད། །ནུ་མ་ཨོ་དྲར་རབ་ཏུ་གྲགས། །འདི་དག་ཞིང་དུ་ཡང་དག་བརྗོད། །ལྟེ་བ་ཏྲི་ཤ་ཀུ་ནིར་བརྗོད། །སྣ་ཡི་རྩེ་མོར་ཀོ་ཤ་ལཱ། །ཉེ་བའི་
เล่ม ๗๙ · หน้า 112a
ཞིང་དུ་བརྗོད་པའོ། །ཁ་ནི་ཀ་ལིང་ཀ་རུ་བརྗོད། །མགྲིན་པ་ལམ་པ་ཀ་རུ་གསུངས། །ཚན་དོ་ཧ་ཞེས་རྣམ་པར་བཤད། །སྙིང་གི་ཀཱཉྩིར་བརྗོད་པ་སྟེ། །དབང་པོ་ཧི་མ་ལ་ཡ་ཉིད། །ཉེ་བ་ཡི་ནི་ཚན་དོར་བརྗོད། །དེ་ལྟར་ཡུལ་རྣམས་ཐམས་ཅད་
དུ། །གསུང་གི་འཁོར་ལོར་རྣམ་པར་གནས། །གནས་ཀྱི་ཁྱད་པར་ཡུལ་གྱི་ནི། །ས་སྤྱོད་རྣམས་ཀྱི་ཡང་དག་བཤད། །རྟགས་ལ་ཡི་དགས་ལྷག་པར་གནས། །གསང་བ་ལ་ནི་ཁྱིམ་གྱི་ལྷ། །འདི་དག་འདུ་བར་བརྗོད་པའོ། །བརླ་ནི་སཽ་རཱཥྚ་རུ་བརྗོད། །
རྗེ་ངར་གཉིས་ནི་གསེར་གླིང་གི། །རང་གི་ངོ་བོར་རྣམ་པར་བཤད། །ཉེ་བ་ཡ་ནི་འདུ་བ་ཉིད། །སོར་མོ་ནཱ་གར་རུ་བརྗོད། །རྐང་པའི་རྒྱབ་ནི་སིན་དྷུར་ངེས། །དུར་ཁྲོད་དུ་ནི་ཡང་དག་བརྗོད། །མཐེ་བོང་ལ་ནི་མ་རུ་ཟེར། །པུས་མོ་ཀུ་ལ་དཱ་རུ་བརྗོད། །འདི་
དག་ཉེ་བའི་དུར་ཁྲོད་ཉིད། །མཁའ་འགྲོ་མར་ནི་གསུངས་པའོ། །འདི་དག་ཡུལ་དང་རང་ལུས་སྐྱེས། །རང་གི་ནང་དང་ཕྱི་རོལ་གནས། །སྐུ་གསུང་ཐུགས་ཀྱི་འཁོར་ལོ་ལ། །ཉི་ཤུ་རྩ་བཞིར་ཕྱེ་བ་ཡིས། །མཁའ་འགྲོ་མ་ནི་ཀུན་གྱི་གནས། །ཐམས་
ཅད་དུ་ནི་ཡང་དག་བཤད། །འདི་རྣམས་གནས་སུ་མཁའ་འགྲོ་མ། །རྩ་ཡི་གཟུགས་ཀྱིས་ཡང་དག་གནས། །དྲུག་པ་ལས་རབ་ཏུ་བྱེད་པ་དང་པོའོ།། །།དེ་ནས་གཞན་ཡང་དམ་པའི་དེ་བཞིན་གཤེགས་པའི་སྐུ་ཇི་ལྟར་གནས་སུ་སོན་པའི་རྩའི་འཁོར་ལོ་
བཤད་པར་བྱའོ། །སྙིང་གི་ནང་སོང་པདྨ་ནི། །འདབ་མ་བརྒྱད་པ་སྙིང་པོར་བཅས། །དེ་ཡི་ནང་དུ་སོན་པའི་རྩ། །མར་མེའི་རང་གི་ངོ་བོ་ཅན། །ཆུ་ཤིང་གི་ནི་མེ་ཏོག་ལྟར། །བརྐྱང་ཞིང་ཁ་ནི་འོག་ཏུའོ། །དེ་ཡི་ནང་གནས་དཔའ་བོ་ནི། །ཡུངས་ཀར་གྱི་ནི་སྦོམ་ཕྲ་
ཙམ། །མི་ཤིགས་ཧཱུྃ་གི་ས་བོན་ནི། །ཁ་བ་ལྟ་བུར་འཛག་པ་ཉིད། །ལུས་ཅན་རྣམས་ཀྱི་སྙིང་དགའ་བ། །དཔྱིད་ཅེས་བྱ་བར་རྣམ་པར་བཤད། །རྒོད་མའི་མེ་ཡི་གཟུགས་ཀྱིས་ནི། །བདག་མེད་མ་ནི་ཐིག་ལེར་བརྗོད། །ལས་ཀྱི་རླུང་གིས་བསྐུལ་བ་ཡིས། །
เล่ม ๗๙ · หน้า 112b
ལྟེ་བའི་དཀྱིལ་འཁོར་དུ་ནི་འབར། །དཔྱིད་ཐོབ་པ་ཡི་ཆོག་ཤེས་པས། །སྙོམས་པར་འཇུག་པས་རྣམ་པར་གནས། །དཔའ་བོ་ཤྲཱི་ནི་ཧེ་རུ་ཀ། །འདི་ནི་དཔྱིད་ཀྱི་ཐིག་ལེར་བརྗོད། །རྣལ་འབྱོར་མ་ཡི་གཟུགས་འཛིན་མ། །རྒྱུ་དང་མི་རྒྱུ་བཅས་པར་གནས། །
སྐུ་གསུང་ཐུགས་ཀྱི་དབྱེ་བས་ནི། །སྒོ་ནི་རྣམ་གསུམ་འབྱུང་བ་ལས། །འགྲོ་བ་དང་ནི་འོང་བར་བྱེད། །འདི་ནི་ཀུན་གྱི་ལུས་ལ་གནས། །ལྟེ་བར་ཨ་ཡི་གཟུགས་ཀྱིས་ནི། །ཐུང་ངུ་རུ་ནི་རབ་ཏུ་གྲགས། །སྙིང་ལ་ཡང་ནི་ཧཱུྃ་ཉིད་ནི། །རིང་པོ་མ་མོ་གཉིས་དང་
གནས། །མགྲིན་པ་ཨོྃ་གྱི་གཟུགས་ཀྱིས་ནི། །མ་མོ་གསུམ་བརྗོད་པ་ལུ་ཏ། །དཔྲལ་བར་ཧྃ་གི་རྣམ་པ་འདི། །སྒྲ་དང་ཐིག་ལེ་མི་ཤིགས་པ། །འཁོར་ལོ་པ་ཞི་ཡི་རབ་དབྱེ་བས། །ས་སོགས་འབྱུང་བ་ཆེན་པོ་དང་། །ཐུན་བཞིར་བྱིན་གྱིས་བརླབས་པ་དང་། །
པདྨ་བཞི་ལས་བྱུང་བ་དང་། །དགའ་བ་བཞི་ཡི་ངོ་བོ་ཡིས། །རྣལ་འབྱོར་བཞི་ནི་མངོན་དུའོ། །མཆོག་ཏུ་དགའ་བའི་ངོ་བོ་ཡིས། །བྱ་དང་བྱེད་པའི་དངོས་པོ་ལས། །རྡོ་རྗེ་སེམས་དཔའི་གཟུགས་ཀྱིས་ནི། །འདི་ནི་ཇི་ལྟར་བདེ་བར་རོལ། །འདབ་མ་རྣམས་ཀྱི་
བཞི་ལ་ཡང་། །འབྱུང་བ་བཞི་ཡི་རྩ་རྣམས་ནི། །མར་མེའི་རང་བཞིན་ལྟ་བུར་ནི། །ཕྱོགས་བཞི་ལ་ནི་རྣམ་པར་གནས། །རྩ་རྣམས་བཞི་ཡང་མཚམས་རྣམས་སུ། །རྣམ་པར་གནས་ཤིང་དེར་སོན་པའང་། །བདུད་རྩི་ལྔ་ནི་འབབ་པ་སྟེ། །དེ་མཆོད་རང་གི་གཟུགས་
གནས་པས། །དེ་ཡི་དངོས་པོའི་ངོ་བོ་ལས། །མཆོད་པ་བཞི་ནི་རྣམ་པར་བཤད། །ལུས་ཀྱི་སྙིང་གི་ནང་དུ་ནི། །རྩ་ལྔ་རྣམས་ནི་རྣམ་པར་གནས། །སྐུ་གསུང་ཐུགས་ཀྱི་དབྱེ་བ་ཡིས། །ཉི་ཤུ་རྩ་བཞི་ཉེ་བར་བརྗོད། །གནས་སོགས་དགྱེ་བ་ལ་གནས་ནས། །གནས་དང་
གནས་ལ་རྣམ་པར་གནས། །སྤྱི་བོར་ཡང་དག་བྱུང་བ་ཡི། །རྩ་ནི་སྤྱི་བོ་སྐྱེས་ཞེས་བརྗོད། །རྡུལ་དང་སྙིང་སྟོབས་མུན་པའི་ཚུལ། །དེ་ཡི་ནང་ན་ཙོ་མོ་ནི། །པུལླཱི་རར་ནི་མི་ཕྱེད་མ། །སོ་དང་སེན་མོ་འབབ་པར་བརྗོད། །འབར་བ་འཛིན་པ་གྲ་གཟུགས་མ། །དེ་
เล่ม ๗๙ · หน้า 113a
བཞིན་སྐྲ་དང་བ་སྤུ་འབབ། །ཨོ་ཌྱཱན་གནས་ནི་ཆེན་པོ་ལ། །རྩེ་བ་མ་ནི་རྣམ་པར་གནས། །རྣ་བ་གཡས་པར་གནས་ནས་ནི། །པགས་པ་དྲི་མ་འབབ་མ་གནས། །ཨུརྦུ་དར་ནི་གཡོན་པ་མ། །མཁའ་འགྲོ་མ་ནི་ཤ་འབབ་མ། །གང་ཞིག་ཆུ་
རྒྱུས་འབབ་པའི་རྩ། །བ་ཡི་མཆོག་སྦྱིན་རྣམ་པར་གནས། །དེ་ནི་སྲ་པའི་ཚུལ་གྱིས་གནས། །ཐུང་དུ་མར་ནི་རྣམ་པར་བཤད། །གང་ཞིག་དགའ་བའི་དབང་ཕྱུག་རྩ། །དེ་བཞིན་རུས་སྦལ་སྐྱེས་མར་གྲགས། །སྲ་བའི་དངོས་པོས་གནས་པའི་ཕྱིར། །རུས་པའི་
ཕྲེང་བ་འཁྲུགས་པར་གནས། །ལྷ་མོའི་མཁར་དུ་གང་ཞིག་རྩ། །འཇམ་པ་སྒོམ་པ་མ་རུ་བརྗོད། །དེ་ནི་རྟག་ཏུ་མཆིན་པ་འབབ། །ཐམས་ཅད་ལུས་ལ་རྟག་པར་གནས། །མཱ་ལ་བར་ནི་དབང་མ་ནི། །རྒྱལ་བའི་དབང་ཕྱུག་སྙིང་ལ་གནས། །རྩ་ནི་གང་
ཞིག་མིག་འབབ་མ། །འདོད་པའི་གཟུགས་སུ་རྣམ་པར་གནས། །གཟུགས་ནི་མཐོང་བར་འདོད་པ་སྟེ། །སྐྱོན་བྲལ་མ་ཞེས་རྣམ་པར་བཤད། །ཨོ་ཌིར་མཁྲིས་པ་འབབ་པའི་རྩ། །གང་ཞིག་འཇུག་མ་ཆེན་མོར་བརྗོད། །ཏྲི་ཤ་ཀུ་ནེར་བྱུང་བ་ནི། །མ་མོ་ངེས་
པར་གློ་བར་བཅས། །ཀོ་ཤ་ལར་ནི་མཚན་མོ་ཉིད། །རྒྱུ་མའི་ཕྲེང་བཟང་ཁྱབ་ཅིང་འབབ། །ཀ་ལིང་ཀར་ནི་བསིལ་སྦྱིན་མ། །ངོས་ཀྱི་ཆུ་རྒྱུས་ཡང་དག་བཤད། །ཚ་བ་མ་ནི་ལྟོ་གནས་ངེས། །ལམ་པཱ་ཀར་ནི་རབ་ཏུ་གྲགས། །འབབ་མ་ཉིད་ནི་ཀཱཉྩིར་གནས། །
ཐམས་ཅད་དུ་ནི་བཤང་བ་འབབ། །མཚམས་ཀྱི་མཐའ་ཡི་ནང་དུ་ཡང་། །ཁ་བའི་གནས་སུ་རངས་མའི་གདོང་། །ཤིན་ཏུ་གཟུགས་ཅན་བད་ཀན་ལྡན། །ཡི་དགས་ལྷ་གནས་ཡང་དག་གནས། །གང་ཞིག་རྟག་ཏུ་རྣག་འབབ་པ། །ཁྱིམ་གྱི་ལྷར་ནི་ཡང་དག་
གནས། །མཁའ་འགྲོ་དམ་པའི་དབང་ཕྱུག་གིས། །སྤྱི་མ་ཉིད་དུ་རྣམ་པར་བཤད། །སོ་རཱཥྚར་ནི་གང་ཞིག་རྩ། །རྒྱུ་སྦྱིན་མ་ནི་དམར་པོ་འབབ། །རྡུལ་ནི་འབབ་པར་གྱུར་པ་ནི། །གསེར་གླིང་དུ་ནི་ཡང་དག་བཤད། །ཡན་ལག་གཟི་བརྗིད་ཀུན་ཁྱབ་མ། །
เล่ม ๗๙ · หน้า 113b
སྦྱོར་བྲལ་མར་ནི་རབ་ཏུ་གྲགས། །ནཱ་ག་རར་ནི་སྡུ་གུ་མ། །ཚིལ་ཅན་སྦོམ་ཞིང་མྱོས་བྱེད་འབབ། །སིན་དྷུར་ཤིན་ཏུ་གྲུབ་པ་ཉིད། །མྱ་ངན་མཆི་མ་འབབ་མར་བརྗོད། །མ་རུར་གནས་མ་ལུད་སྐམ་འབབ། །འཚེད་པ་མ་ཞེས་རྣམ་པར་བསྟན། །གུ་ལུ་ཏྭར་ནི་ཡིད་བཟང་
མ། །ཤ་དང་སྣབས་ནི་འབབ་མའོ། །དྲུག་པ་ལས་ཡུལ་གྱི་དགོད་པ་སྟེ་རབ་ཏུ་བྱེད་པ་གཉིས་པའོ།། །།ལྷ་ལགས་མཉན་པར་འཚལ་ལགས་ན། །ནང་གི་དཀྱིལ་འཁོར་མཆོད་པ་ལ། །སོགས་པའི་ལས་ནི་ཇི་ལྟར་ལགས། །སྦྱིན་སྲེག་ལས་ནི་མི་
འཚལ་བས། །བདེ་བ་ཆེན་པོས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཧེ་རུ་ལ་སོགས་པའི་ལྷ། །རྩ་གཟུགས་མཛེས་པར་ཡང་དག་བྱུང་། །ལུས་ཀྱི་དཀྱིལ་འཁོར་ཉམས་དགའ་བར། །སྒོ་བཞིར་ཇི་སྐད་གསུངས་པའོ། །རང་
གི་ཡན་ལག་བརྒྱད་བྱུང་བས། །ཀ་བ་དེ་ཡིས་བསྐོར་ནས་གནས། །དངོས་པོ་ཀུན་གྱིས་མཉམ་པའི་ཕྱིར། །གྲུ་བཞི་བར་ནི་རབ་ཏུ་གྲགས། །སྐུ་གསུང་ཐུགས་ཀྱི་ངོ་བོས་ནི། །དཀྱིལ་འཁོར་འཁོར་ལོ་གཅིག་ཏུ་གསུངས། །རི་ནི་མགོ་བོའི་ཟེ་འབྲུ་ལ། །ཇི་
ལྟར་རྩོམ་ཆེན་ལ་སོགས་རིམ། །བླ་མའི་དུས་ཐབས་རིམ་ཉིད་ཀྱིས། །དེ་ནི་རྫོགས་པའི་དཀྱིལ་འཁོར་གནས། །རྐང་པའི་མཐིལ་དུ་རྩོམ་ཆེན་རླུང་། །གཞུ་ཡི་དབྱིབས་སུ་རྣམ་པར་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །
ཟླུམ་པོའི་རྣམ་པའི་དབྱིབས་ཀྱིས་ནི། །ཆུ་ནི་ལྟེ་བར་རྣམ་པར་གནས། །སྙིང་གར་ཡང་ནི་ས་ཉིད་དེ། །ཀུན་ནས་གྲུ་བཞི་པ་ཉིད་དོ། །སྒལ་ཚིགས་དབྱུག་གུའི་གཟུགས་ཀྱིས་ནི། །རི་རབ་རི་རྒྱལ་དེ་བཞིན་ནོ། །དེར་ནི་སྤྱི་བོའི་ཆར་གནས། །འདམ་སྐྱེས་འདབ་མ་སུམ་
བཅུ་གཉིས། །དབྱངས་དང་གསལ་བྱེད་མཛེས་པར་གནས། །སུམ་ཅུ་རྩ་གཉིས་བྱང་ཆུབ་འདོད། །པདྨའི་ནང་དུ་སོན་པ་གང་། །དེ་ནི་ཟླ་བའི་དཀྱིལ་འཁོར་བརྗོད། །སྤྱི་བོའི་ནང་དུ་ཀླད་པ་ནི། །གང་ཞིག་གནས་པ་དེ་རུ་གསུངས། །དེ་ནང་ཧྃ་གི་རྣམ་པ་ཉིད། །
เล่ม ๗๙ · หน้า 114a
ཐིག་ལེའི་གཟུགས་ཅན་མི་ཤིགས་པ། །འཇིག་རྟེན་ཀུན་གྱི་རྩ་བ་དེ། །བརྟན་པའི་བདག་ཉིད་གཡོ་བའི་བདག །གསལ་དང་མི་གསལ་གཟུགས་ལས་ནི། །ས་བོན་གཟུགས་ཀྱི་རྣམ་པར་གནས། །ལུས་ཅན་རྣམས་ནི་ཀུན་གྱི་གཟུགས། །
དེ་ཕྱིར་གདོད་ནས་རྫོགས་པ་ཉིད། །བདུད་རྩིའི་གཟུགས་ཀྱིས་འཛག་པར་ནི། །ཉིན་དང་མཚན་དུ་རྣམ་པར་གནས། །དེ་ཉིད་ཀྱིས་ནི་སྒྲ་འབྱེད་ཅིང་། །མེ་ནི་དགའ་བར་བྱེད་པ་སྟེ། །དེས་ནི་གང་བའི་དཀྱིལ་འཁོར་ནི། །ཡིན་པ་ཉིད་དུ་ཐེ་ཚོམ་མེད། །དེ་ཉིད་
དཀྱིལ་འཁོར་ཞེས་བྱར་གསུངས། །དངོས་པོ་རྣམས་ཀྱི་སྙིང་པོ་མཆོག །དེ་ནི་ལེན་ཅིང་གཅོད་པའི་ཕྱིར། །ལུས་ནི་དཀྱིལ་འཁོར་ཉིད་དུ་བརྗོད། །རྩ་ཆེན་སུམ་ཅུ་རྩ་གཉིས་ཀྱི། །འཁོར་ལོར་ཡང་ནི་དཀྱིལ་འཁོར་བརྗོད། །བྱང་ཆུབ་སེམས་ནི་རིན་པོ་ཆེ། །
དཀྱིལ་འཁོར་དེ་ཉིད་དཀྱིལ་འཁོར་ཉིད། །ཕྱི་རོལ་བཅས་པའི་ནང་གཟུགས་ཀྱིས། །སྣ་ཚོགས་ཁྱབ་ཅིང་རྣམ་པར་གནས། །ཕྱི་རོལ་གཟུགས་དང་སྒྲ་ལ་སོགས། །དབང་པོ་ཐམས་ཅད་འཇུག་པའོ། །ནང་གི་ཁུ་བ་ལ་སོགས་པ། །གྲུབ་པའི་རྫས་ནི་རྣམ་
པར་གནས། །ཕྱི་རོལ་བཅས་པའི་ནང་ཉིད་ཀྱིས། །རྡོ་རྗེ་ཅན་གྱི་བྱང་ཆུབ་སེམས། །སྦོམ་དང་ཕྲ་བའི་རང་བཞིན་གྱིས། །འགྲོ་བའི་གཉེན་གྱི་རང་བཞིན་ཅན། །སངས་རྒྱས་བྱང་ཆུབ་སེམས་དཔའ་ཡི། །དམ་ཚིག་དོན་དུ་གསུངས་པས་ནི། །དཀྱིལ་འཁོར་གོམས་
པས་སྐྱེ་བ་འདིར། །སངས་རྒྱས་ཉིད་ནི་ཐོབ་པར་འགྱུར། །ཉན་ཐོས་རྣམས་ཀྱི་སངས་རྒྱས་དང་། །དེ་བཞིན་རང་རྒྱལ་རྣམས་ཀྱི་དང་། །ཚངས་པ་ལ་སོགས་ལྷ་རྣམས་ཀྱི། །དཀྱིལ་འཁོར་གོམས་བས་རྫོགས་པ་ཉིད། །ཤེས་རབ་མེ་ནི་ཆེར་འབར་བར། །ནང་གི་
ཁུ་བ་ལ་སོགས་དང་། །དེ་བཞིན་ཕྱི་རོལ་གཟུགས་སོགས་ཀྱི། །བསྲེག་རྫས་ཀྱིས་ནི་སྦྱིན་སྲེག་བྱ། །སྐྱེ་མཆེད་དྲུག་དང་ཁམས་རྣམས་དང་། །ཕུང་པོ་ལ་སོགས་ཁྱད་པར་ལས། །དེ་རྣམས་ཀྱི་ནི་གཟུགས་ཅན་ལྷ། །དེ་བཞིན་མཁའ་འགྲོ་མ་ཉིད་ནི། །དེས་ནི་དེ་
เล่ม ๗๙ · หน้า 114b
མཆོད་གང་གི་ཕྱིར། །རྣལ་འབྱོར་མཆོད་པར་ཡང་དག་བཤད། །ཐོད་པ་འདི་ནི་མགོ་བོ་ཉིད། །བསྲེག་རྫས་ཀྱི་ནོ་སྣོད་དུ་གསུངས། །བླུགས་གཟར་རོ་མར་བཤད་པ་སྟེ། །སྙིང་གི་འཁོར་ལོ་བརྐྱང་མ་དག །དགང་གཟར་ཞེས་བྱར་ཡང་དག་བརྗོད། །ཐབ་
ཁུང་ལྟེ་བའི་དཀྱིལ་འཁོར་དུ། །ལས་ཀྱི་རླུང་གིས་བསྐྱོད་པ་ཡི། །ཚངས་པའི་མེ་ནི་སུམ་མདོར་གནས། །སྒྲ་ནི་སྔགས་ཞེས་བརྗོད་པ་སྟེ། །བཟླས་པ་འཁོར་བར་བྱེད་པ་ཡིན། །བསྒོམ་པ་མཚུངས་པར་སྣང་བ་ཉིད། །དཀྱིལ་འཁོར་གཉིས་མེད་རྣལ་འབྱོར་ཕྱིར། །
ལྷན་ཅིག་སྐྱེས་པ་ཞོན་པ་འདི། །འདི་ནི་རྒྱལ་བའི་དཀྱིལ་འཁོར་གསུངས། །དཀྱིལ་འཁོར་བདག་པོའི་གཟུགས་ཀྱི་ཕྱིར། །སློབ་དཔོན་སེམས་ཀྱི་རྒྱལ་པོ་ཉིད། །དེ་སྐད་ལ་སོགས་ཅི་གསུངས་པ། །རྒྱུད་ནི་ཐམས་ཅད་རྟོགས་པར་བྱ། །ད་དུང་བདག་ལ་ཐེ་
ཚོམ་མཆིས། །ཆོས་དང་ལོངས་སྤྱོད་སྤྲུལ་པ་དང་། །བདེ་བ་ཆེན་པོའི་གཟུགས་ཀྱིས་ནི། །མགོན་པོ་ཇི་ལྟར་རོལ་བར་འགྱུར། །དེ་རྣམས་དབྱེ་བ་མི་འཚལ་བས། །བདེ་བ་ཆེན་པོས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །སྤྱི་བོ་ལྟེར་
སོན་འཁོར་ལོ་ནི། །ཨེ་ཡི་དབྱིབས་སུ་ཡང་དག་གནས། །སྙིང་དང་མགྲིན་པར་ཡང་དག་གནས། །བྃ་གི་རྣམ་པ་ལྟ་བུར་བརྗོད། །ལྟེ་བའི་ནང་གནས་པདྨ་ནི། །འདབ་མ་དྲུག་ཅུ་རྩ་བཞིར་ལྡན། །འདམ་སྐྱེས་འདབ་མ་སུམ་ཅུ་གཉིས། །སྤྱི་བོའི་ནང་དུ་རྣམ་པར་
གནས། །མགྲིན་པའི་ནང་དུ་སོན་པ་ཡང་། །པདྨ་ལོ་མ་བཅུ་དྲུག་ཉིད། །དེ་ཡི་སྙིང་གའི་གནས་སུ་ནི། །པདྨ་འདབ་མ་བརྒྱད་དུ་བརྗོད། །འདབ་མ་དྲུག་ཅུ་རྩ་བཞི་ཉིད། །སྤྲུལ་པ་ལ་ནི་རབ་ཏུ་གྲགས། །པདྨ་ཆེན་པོ་འདབ་བརྒྱད་པར། །ཆོས་ཀྱི་སྐུ་ནི་རབ་ཏུ་བསྐོར། །ལོངས་སྤྱོད་རྫོགས་པ་
བཅུ་དྲུག་རྩིབས། །དེ་བཞིན་འདབ་མ་སུམ་ཅུ་གཉིས། །བདེ་ཆེན་ཡེ་ཤེས་ཆེན་པོ་ལ། །ཀུན་ཏུ་ཡང་དག་རྣམ་པར་གནས། །སྤྲུལ་པའི་འཁོར་ལོའི་དབུས་སུ་ནི། །སྡེ་ཚན་བརྒྱད་ཀྱིས་ཡོངས་སུ་བསྐོར། །ཡིག་འབྲུ་དང་པོའི་ངོ་བོ་ཡིས། །འདི་ནི་ཨ་སྟེ་ཡི་
เล่ม ๗๙ · หน้า 115a
གེ་མཆོག །ཆོས་ཀྱི་འཁོར་ལོར་རྣམ་བཤད་པ། །ཧཱུྃ་ནི་མི་ཤིགས་པ་རུ་བརྗོད། །དབྱངས་ལྔ་དང་ནི་ཡང་དག་ལྡན། །ཡ་ར་ལ་ཝས་རྣམ་པར་བརྒྱན། །ལོངས་སྤྱོད་འཁོར་ལོའི་ནང་གནས་པ། །ཨོཾ་ནི་ཡིག་འབྲུ་གསལ་བར་བྱེད། །ཆ་
ནི་རྣམ་པ་བཞི་རྣམས་ཀྱིས། །ཀུན་ཏུ་ཡོངས་སུ་བསྐོར་བའོ། །བདེ་ཆེན་འཁོར་ལོ་ཆེན་པོ་ལ། །ཧྃ་ནི་ཐིག་ལེའི་གཟུགས་ཅན་ནོ། །གཡོན་དང་གཡས་པའི་ངོས་དག་ལ། །ཟླ་བ་ཉི་མ་རྣམ་པར་བཤད། །མགྲིན་པ་ནས་བརྩམས་གཡོན་པའི་རྩ། །ལོངས་
སྤྱོད་རྫོགས་པའི་སྐུ་ཅན་མ། །ལྟེ་བའི་ནང་དུ་ངལ་སོས་ཤིང་། །ཁ་ནི་འོག་ཏུ་མྱོས་བྱེད་འབབ། །གང་ཞིག་ལྟེ་བ་ལས་སྟེངས་རྩ། །དེ་བཞིན་ཁ་ནི་སྟེང་དུ་འབབ། །མགྲིན་པའི་ནང་དུ་ངལ་སོས་ཤིང་། །ཁྲག་འབབ་པར་ནི་རབ་ཏུ་གྲགས། །མྱོས་བྱེད་ཟླ་བ་ཞེས་
བྱར་བཤད། །ཁྲག་ནི་ཉི་མ་ཞེས་བྱར་གསུངས། །སྒོ་གཉིས་མཉམ་པར་ཞོན་ནས་ནི། །སྟེང་དང་འོག་ཏུ་མཉམ་གནས་པ། །འདི་དག་ཟླ་བ་ཉི་མ་གཉིས། །རྩ་ནི་གཉིས་སུ་རབ་ཏུ་གྲགས། །དཔའ་བོ་རྣམས་དང་མཁའ་འགྲོ་མའི། །འགྲོ་བ་དང་ནི་འོང་བའི་
རྒྱུར། །ནུབ་པ་དང་ནི་འཆར་དོན་དང་། །ལོག་དང་སད་པ་ལྟ་བུར་གསུངས། །གཡོན་དང་གཡས་པའི་ངོས་ལ་ནི། །དབྱངས་ནི་བཅུ་གཉིས་ཡང་དག་གནས། །ཁ་ནི་སྟེང་དུ་ཡང་དག་བཤད། །ཀ་ལ་སོགས་པ་རྣམས་ཀྱིས་བསྐོར། །ཁ་ནི་འོག་གི་གནས་སུ་
གནས། །ལྷག་པར་བྱས་ནས་སྦྱར་བ་ཉིད། །ཀྵ་ནི་སྲིན་པོ་ཉིད་གསུངས་པ། །འོག་གི་ཆར་ནི་རྣམ་པར་གནས། །གང་ཚེ་མགྲིན་པར་ཆགས་ཆེན་གྱི། །གཟུགས་ཀྱི་ཟླ་བ་གནས་པ་ན། །སངས་རྒྱས་རྣམས་ཀྱི་དམ་པའི་སྐུ། །དེ་ཚེ་ལོངས་སྤྱོད་རྫོགས་པར་བཤད། །གང་
ཚེ་རྡོ་རྗེའི་རྩེར་གནས་པ། །དེ་ཚེ་དེ་ནི་སྣ་རྩེར་རོ། །གང་ཚེ་ལོངས་སྤྱོད་རྫོགས་སྐུ་ཡང་། །ནུབ་པར་གནས་པར་གྱུར་པས་ན། །བྷ་གའི་ནང་དུ་སོན་དེ་ཡང་། །ཡུངས་ཀར་ཙམ་དུ་རྣམ་པར་གནས། །ཉི་མའི་གཟུགས་སུ་ཡང་དག་བཤད། །སྤྲུལ་པའི་སྐུར་ནི་བརྗོད་པ་སྟེ། །
เล่ม ๗๙ · หน้า 115b
སངས་རྒྱས་བྱང་ཆུབ་སེམས་དཔའ་ཡི། །སྤྲོས་པ་དེ་ཡིས་བསྐྱེད་པའོ། །པདྨ་གར་དབང་རྒྱལ་པོ་ནི། །འདབ་མ་འབྱེད་པའི་སྦྱོར་བ་ཅན། །སྤྲུལ་པའི་སྐུ་ཡི་གཟུགས་སུ་ནི། །དེར་ནི་ཉི་མ་ནུབ་པ་ན། །གང་ཚེ་རྫོགས་པའི་བྱང་ཆུབ་སེམས། །གོང་བུར་གྱུར་པ་རྙོག་པ་མེད། །
འཁོར་བའི་ལམ་ནི་རྣམ་བཅད་ཅིང་། །སྤྲོས་པ་ཉེར་ཞི་དགེ་བ་སྟེ། །གཉིས་མེད་མཆོག་ཏུ་དག་པ་ཉིད། །དཔལ་ལྡན་རྡོ་རྗེ་སེམས་དཔའི་གཟུགས། །ཤྲཱི་ནི་ཧེ་རུ་ཀ་ཞེས་བརྗོད། །རྒྱུད་ནི་སྲིན་བུའི་གཟུགས་ཅན་ཉིད། །རྒོད་དང་ལྟ་དང་ལག་བཅངས་ཉིད། །རྒྱུད་དུ་དེ་ཉིད་
རྣམ་པར་གནས། །འདོད་ཆགས་ཉིད་དང་ཆགས་བྲལ་ཡང་། །ཟོས་ནས་སྲིན་བུ་གནས་པ་ཉིད། །རྩ་ཐམས་ཅད་ཀྱི་མཉམ་པར་སྦྱོར་བ་མཁའ་འགྲོ་མའི་དྲ་བའི་སྡོམ་པ་སྟེ་དྲུག་པ་ལས་རབ་ཏུ་བྱེད་པ་གསུམ་པའོ།། །།དེ་ནས་བྱང་ཆུབ་སེམས་དཔའ་
ཆེན་པོ་རྡོ་རྗེ་སྙིང་པོ་ལ་སོགས་པ་དང་། །རྣལ་འབྱོར་མ་བདག་མེད་མ་ལ་སོགས་པས་འདི་སྐད་ཅེས་གསོལ་ཏོ། །འཁོར་ལོའི་བསྒོམ་པའི་ལམ་དང་ནི། །ལྷ་རྣམས་ཇི་ལྟར་འབྱུང་བ་དང་། །མཁའ་འགྲོའི་འཁོར་ལོའི་ཁྱད་པར་དང་། །དགོངས་པའི་སྐད་ཀྱི་ཁྱད་པར་ནི། །
བཅོམ་ལྡན་འདས་ཀྱིས་སྔར་གསུངས་ན། །སྡོམ་པའང་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །རྣལ་འབྱོར་མ་ལུས་དབུས་གནས་པར། །ཨ་ཡི་རྣམ་པར་སྡོམ་པའི་གནས། །ཇི་ལྟར་ཕྱི་རོལ་དེ་བཞིན་ནང་། །སྡོམ་པ་དེ་ཉིད་
རབ་ཏུ་ཕྱེ། །བོ་ལའི་བདེ་བ་ཕྱག་རྒྱ་ཆེ། །རྡོ་རྗེ་སྐྱེ་མཆེད་ཐམས་ཅད་ཉིད། །འདིས་ནི་གསང་བའི་སྙོམས་འཇུག་པས། །ཕྱི་རོལ་གཉིས་གཉིས་བསྟན་པ་མེད། །སྐུ་གསུམ་ལུས་ཀྱི་ནང་དུ་ནི། །འཁོར་ལོའི་གཟུགས་ཀྱིས་བརྗོད་པར་བྱ། །སྐུ་གསུམ་ཡོངས་སུ་
ཤེས་པ་ལས། །བདེ་བ་ཆེན་པོའི་འཁོར་ལོར་བརྗོད། །ཆོས་དང་ལོངས་སྤྱོད་སྤྲུལ་པ་དང་། །དེ་བཞིན་བདེ་བ་ཆེན་པོ་ཉིད། །སྐྱེ་གནས་མགྲིན་སྙིང་དབུས་སུ་ནི། །སྐུ་གསུམ་པོ་ནི་རྣམ་པར་གནས། །མ་ལུས་པ་ཡི་སེམས་ཅན་གྱི། །སྐྱེ་བ་གང་ལ་བརྗོད་བྱ་བ། །
เล่ม ๗๙ · หน้า 116a
གང་ཞིག་སྤྲུལ་པ་གནས་བརྟན་ཕྱིར། །དེ་ལ་སྤྲུལ་པའི་སྐུ་ཉིད་ཡིན། །སེམས་ནི་ཆོས་ཀྱི་རང་བཞིན་ཏེ། །ཆོས་ཀྱི་སྐུ་ཡང་སྙིང་གར་ཡིན། །རོ་རྣམས་དྲུག་གི་གཟུགས་ཅན་གྱི། །བཟའ་བ་ངེས་པར་ལོངས་སྤྱོད་བརྗོད། །ཆོས་རྣམས་ཀུན་ལ་
གནས་བརྟན་ཕྱིར། །ཐམས་ཅད་ཡོད་པའི་རང་བཞིན་ཅན། །མགྲིན་པར་ལོངས་སྤྱོད་འཁོར་ལོ་དང་། །བདེ་བ་ཆེན་པོ་སྤྱི་བོར་གནས། །ཨེ་བྃ་རྣམ་པ་རྒྱུ་མཐུན་ཉིད། །རྣམ་སྨིན་ཆོས་ཀྱི་འཁོར་ལོ་ལས། །སྐྱེས་བུ་བྱེད་པ་ལོངས་སྤྱོད་ལ། །བདེ་ཆེན་འཁོར་ལོར་དྲི་
མེད་ཉིད། །རྒྱུ་མཐུན་ལ་སོགས་རབ་དབྱེ་བས། །འབྲས་བུ་རྣམ་པ་བཞི་ཞེས་བརྗོད། །ལས་ཀྱི་རླུང་གིས་བསྐུལ་བ་ཡིས། །ལས་ལ་བཅོམ་ལྡན་ཤེས་རབ་བརྗོད། །གང་ཞིག་སྤྲུལ་པ་གནས་བརྟན་ཕྱིར། །སྤྲུལ་པའི་འཁོར་ལོ་གནས་བརྟན་བརྗོད། །ཆོས་ནི་ངག་
ལས་བྱུང་བའི་ཕྱིར། །འཁོར་ལོ་ཐམས་ཅད་ཡོད་པར་སྨྲ། །གང་ཞིག་མགྲིན་པར་ཀུན་བཀུར་ཕྱིར། །ལོངས་སྤྱོད་འཁོར་ལོར་ཀུན་བཀུར་ཉིད། །གང་ཞིག་བདེ་ཆེན་མགོར་གནས་ཕྱིར། །བདེ་ཆེན་འཁོར་ལོར་དགེ་འདུན་ཆེ། །སྡེ་པ་སྐུ་ཞེས་བརྗོད་པ་སྟེ། །ལྟོ་
བ་གནས་སུ་བརྗོད་པར་བྱ། །སྐྱེ་གནས་འདོད་ཆགས་བྲལ་བ་ཉིད། །མངལ་གྱི་ཕྲུ་མ་ཆོས་གོས་ཏེ། །དེ་བཞིན་མ་ནི་མཁན་པོ་ཉིད། །མགོ་བོར་ཐལ་མོ་སྦྱར་བ་ཕྱག །འགྲོ་བའི་བྱ་བ་ཁྲིམས་ཀྱིས་གནས། །དེ་བཞིན་སྔགས་བཟླས་ཨ་དང་ཧྃ། །སྔགས་འདོན་
སྐྱེས་པ་དགེ་སློང་ཉིད། །གཅེར་བུ་སྐྲ་དང་ཁ་སྤུ་བྲེགས། །འདི་རྣམས་རྐྱེན་གྱིས་སེམས་ཅན་རྣམས། །སངས་རྒྱས་ཉིད་དུ་ཐེ་ཚོམ་མེད། །ཟླ་བ་བཅུ་ཡང་ས་རྣམས་ཏེ། །སེམས་ཅན་ས་བཅུའི་དབང་ཕྱུག་གོ། །བཙུན་མོའི་བྷ་ག་བདེ་ཅན་དུ། །ཁུ་བ་ཞེས་བྱ་རྣམ་པར་
གནས། །དེ་མེད་པས་ན་བདེ་མེད་འགྱུར། །བདེ་བ་སྤངས་ན་དེ་མེད་འགྱུར། །ནུས་པ་མེད་ཕྱིར་ལྟོས་དང་བཅས། །ལྷ་ཡི་རྣལ་འབྱོར་ལས་བདེ་བ། །དེ་ཕྱིར་སངས་རྒྱས་དངོས་པོ་མིན། །དེ་ཉིད་དངོས་མེད་ཚུལ་ཡང་མིན། །ཞལ་ཕྱག་རྣམ་པ་གཟུགས་ཅན་ཉིད། །
เล่ม ๗๙ · หน้า 116b
མཆོག་ཏུ་བདེ་བ་གཟུགས་མེད་པ། །དེ་ཕྱིར་འགྲོ་ཀུན་ལྷན་ཅིག་སྐྱེས། །ལྷན་ཅིག་སྐྱེས་པའི་རང་བཞིན་བརྗོད། །རྣམ་དག་རྣམ་པའི་སེམས་ཀྱིས་ནི། །རང་བཞིན་གྱིས་ནི་མྱ་ངན་འདས། །ཞལ་ཕྱག་ཁ་དོག་དབྱིབས་ལས་ནི། །ལྷ་ཡི་གཟུགས་ཀྱི་རྣལ་
འབྱོར་ནི། །སྐྱེས་པ་ཙམ་གྱིས་རྣམ་པར་གནས། །འོན་ཀྱང་བག་ཆགས་ཕལ་པས་སོ། །ལྷ་མོས་དེ་སྐད་བཤད་པ་ནི། །རྣལ་འབྱོར་ཀུན་གྱི་གོང་ན་མེད། །དེ་ནས་རྣལ་འབྱོར་མ་བདག་མེད་མ་ལ་སོགས་ལྷ་མོ་ཐམས་ཅད་ལ་འདི་ལྟ་སྟེ། སྤྱན་མ་དང་། མཱ་མ་
ཀཱི་དང་། གོས་དཀར་མོ་དང་། སྒྲོལ་མ་དང་། ཁྲོ་གཉེར་ཅན་དང་། སྐུལ་བྱེད་མ་དང་། རི་ཁྲོད་མ་ཤིང་ལོ་ཅན་དང་། འོག་ཞལ་མ་དང་། སྡོམ་པ་མ་དང་། །དེ་དག་ལ་སོགས་པ་རི་རབ་ཀྱི་རྡུལ་ཕྲ་རབ་དང་མཉམ་པའི་རྣལ་འབྱོར་མ་རྣམས་མཆོག་ཏུ་ངོ་མཚར་བར་གྱུར་ཅིང་
བརྒྱལ་བ་དང་། སྐྲག་པར་གྱུར་ཏོ། །དེ་ནས་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱིས་འདི་སྐད་ཅེས་གསོལ་ཏོ། །རྣལ་འབྱོར་མ་ནི་ཀུན་གྱི་ཚོགས། །བཅོམ་ལྡན་འདས་ཀྱིས་བསླང་དུ་གསོལ། །དེ་ནས་བཅོམ་ལྡན་འདས་ཐམས་ཅད་མཁྱེན་
པ་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྣལ་འབྱོར་མ་ཐམས་ཅད་བསླང་བའི་ཕྱིར་འདི་སྐད་ཅེས་བཀའ་སྩལ་ཏོ། །སེམས་ཅན་རྣམས་ནི་སངས་རྒྱས་ཉིད། །འོན་ཀྱང་བློ་བུར་དྲི་མས་བསྒྲིབས། །དེ་བསལ་ནས་ནི་སངས་རྒྱས་
ཉིད། །བཅོམ་ལྡན་འདས་དེ་དེ་བཞིན་ནོ། །རིགས་ཀྱི་བུ། གང་ཞིག་མི་ཤེས་འཇིག་རྟེན་པ། །བཙན་དུག་ཟོས་པས་བརྒྱལ་བར་འགྱུར། །རྨོངས་སྤངས་དེ་ཉིད་ཡིད་ཀྱིས་ནི། །དེ་ཡི་དེ་ཉིད་ཡོངས་སུ་གཅོད། །དུག་གི་དུམ་བུ་གང་ཉིད་ཀྱིས། །སྐྱེ་བོ་ཐམས་
ཅད་འཆི་བར་འགྱུར། །དུག་གི་དེ་ཉིད་ཤེས་པ་དེས། །དུག་གིས་དུག་ནི་འབིགས་པར་བྱེད། །ཇི་ལྟར་རླུང་གིས་ཟིན་དེ་ལ། །མ་ཤའི་བཟའ་བ་སྦྱིན་པར་བྱ། །ལྡོག་པའི་སྨན་ནི་བརྟགས་པ་ལས། །རླུང་གིས་རླུང་ལ་སྣུན་པར་བྱེད། །སོ་སོར་རྟོག་ལས་རྣམ་རྟོག་
เล่ม ๗๙ · หน้า 117a
དང་། །སྲིད་པ་ཉིད་ཀྱིས་སྲིད་དག་བྱེད། །ཇི་ལྟར་རྣ་བར་ཆུ་ཞུགས་པ། །ཆུ་གཞན་གྱིས་ནི་དགུག་པར་བྱ། །དེ་བཞིན་དངོས་པོའི་རྣམ་རྟོག་ཀྱང་། །རྣམ་པར་ངེས་པས་སྦྱང་བར་བྱ། །ཇི་ལྟར་འཚེད་པས་ཚིག་པ་ལ། །ཡང་ནི་མེ་ཡིས་གདུང་བར་བྱ། །
དེ་བཞིན་འདོད་ཆགས་མེས་ཚིག་པ། །འདོད་ཆགས་མེ་ཡིས་གདུང་བར་བྱ། །སྐྱེ་བོ་མི་བཟད་པ་ཡི་ལས། །གང་དང་གང་གིས་འཆིང་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །འདོད་ཆགས་ཀྱིས་ནི་འཇིག་རྟེན་
འཆིང་། །འདོད་ཆགས་ཉིད་ཀྱིས་རྣམ་པར་གྲོལ། །བཟློག་པའི་སྒོམ་པ་འདི་ཉིད་ནི། །སངས་རྒྱས་མུ་སྟེགས་ཀྱིས་མི་ཤེས། །འབྱུང་བ་ལྔ་ཡི་རང་བཞིན་ལས། །ཀུན་དུ་རུ་ལས་ལྔ་རུ་འགྱུར། །དགའ་བ་ཆེན་པོ་གཅིག་ཉིད་ལས། །དབྱེ་བས་ལྔ་རུ་འགྲོ་བར་
འགྱུར། །བོལླ་ཀཀྐོ་ལ་སྦྱོར་བས། །རེག་པ་སྲ་བའི་བག་ཆགས་ཀྱིས། །སྲ་བ་གཏི་མུག་ཆོས་ཡིན་ཕྱིར། །གཏི་མུག་རྣམ་པར་སྣང་མཛད་བརྗོད། །གང་ཕྱིར་བྱང་སེམས་གཤེར་བ་ཉིད། །གཤེར་བ་ཆུ་ཡི་ཁམས་སུ་བརྗོད། ཆུ་ནི་མི་བསྐྱོད་ངོ་བོའི་
ཕྱིར། །ཞེ་སྡང་འདྲེན་པ་མི་བསྐྱོད་པ། །གཉིས་ཀྱི་བསྐྱོད་པའི་སྦྱོར་བ་ལས། །རྟག་ཏུ་དྲོད་ནི་སྐྱེ་བར་འགྱུར། །འདོད་ཆགས་དཔག་མེད་རྡོ་རྗེ་ཡིན། །འདོད་ཆགས་དྲོད་ལས་འབྱུང་བར་འགྱུར། །ཀཀྐོ་ལར་ནི་གང་ཞིག་སེམས། །དེ་ནི་རླུང་གི་རང་བཞིན་ཅན། །
དོན་ཡོད་རླུང་ལས་འབྱུང་བའི་ཕྱིར། །ཕྲག་དོག་དོན་ཡོད་གྲུབ་པ་ཡིན། །བདེ་བ་འདོད་ཆགས་སེམས་ཡིན་ཏེ། །རིན་ཆེན་ཁྲག་དང་འདོད་ཆགས་ཉིད། །སེར་སྣ་ནམ་མཁའ་ལས་བྱུང་བ། །ནམ་མཁའ་སེར་སྣ་རྡོ་རྗེ་ཡིན། །སེམས་ནི་ཆེན་པོ་གཅིག་ཉིད་ལ། །ལྔ་ཡི་
གཟུགས་ཀྱིས་མཚོན་པ་ཉིད། །རིགས་ནི་ལྔ་པོ་སྐྱེས་པ་ལྔ། །དེ་ལ་སྟོང་ཕྲག་དུ་མ་ཉིད། །དེ་ཕྱིར་འདི་དག་རང་བཞིན་གཅིག །བདེ་ཆེན་མཆོག་ཏུ་ཕན་པ་ཉིད། །འདོད་ཆགས་ལ་སོགས་སེམས་ལྔ་ཡིས། །དབྱེ་བས་ལྔ་རུ་འགྲོ་བར་འགྱུར། །གང་གཱའི་ཀླུང་ནི་བཅུ་
เล่ม ๗๙ · หน้า 117b
ཡི་བྱེ་མ་སྙེད། །རིགས་གཅིག་ལ་ནི་དེ་བཞིན་གཤེགས་པའི་ཚོགས། །རིགས་ཆེན་ལྔ་ནི་རིགས་ནི་དུ་མ་རྣམས། །དེ་རྣམས་རིགས་ལས་བརྒྱ་ཕྲག་དུ་མ་རྣམས། །དེ་རྣམས་ལ་ཡང་འབུམ་ཕྲག་རིགས་ཆེན་རྣམས། །བྱེ་བའི་རིགས་ལ་གྲངས་ནི་མེད་པར་འགྱུར། །
དེ་ལ་རིགས་ལ་གྲངས་མེད་རིགས་རྣམས་ཉིད། །མཆོག་ཏུ་དགའ་བའི་རིགས་ལས་བྱུང་བ་རྣམས། །ཞེས་བཀའ་སྩལ་ཏོ། །འདིར་གསོལ་པ། ཅི་གོང་བུའི་གཟུགས་ཅན་འདི་ཙམ་དུའང་ཆུང་བ་དེ་སྙེད་ཀྱི་རང་བཞིན་དུ་འགྱུར་བ་ཅི་ལགས། བཅོམ་ལྡན་འདས་ཀྱིས་
བཀའ་སྩལ་པ། །སྐྲ་ཡི་ཁྱོན་ཙམ་ཕྲ་བ་ལ། །སངས་རྒྱས་ཞིང་ཁམས་དུ་མ་ནི། །གནས་དང་དོག་དང་འཛེར་མིན་པ། །དེ་བཞིན་འདིར་ཡང་བལྟ་བྱ་སྟེ། །སྟོབས་བཅུ་དག་དང་ལྡན་པའི་ལྷ། །བཞེངས་ཤིག་བཞེངས་ཤིག་བདག་གི་ནི། །སྡུམ་པར་སྟོན་མོ་བཞེས་
པར་འཚལ། །རྫུ་འཕྲུལ་སྟོབས་ཀྱིས་རིགས་ཀྱི་བུ། །ཡང་དག་བྱུང་བ་བཀའ་སྩལ་པ། །ཡང་དག་སྦྱོར་བྱུང་མཚན་ཉིད་ནི། །བཤད་པར་བྱ་ཡིས་ལྷ་མོ་ཉོན། །གསང་བ་ལ་ནི་ས་ཡི་ཁམས། །མཆོག་ལ་དེ་བཞིན་དུ་ནི་ཆུ། །དགྱེས་པ་ལ་ནི་མེ་རུ་བཤད། །ཐམས་
ཅད་བདག་ཉིད་རླུང་ལ་གནས། །རྟག་ཏུ་བཞུགས་པར་བརྗོད་པ་འདི། །སངས་རྒྱས་ཀུན་གྱི་སྡོམ་པ་བདག །ཡང་ན་མེ་ལོང་ལྟ་བུའི་ཚུལ། །དེ་བཞིན་དུ་ཡང་མཉམ་པ་ཉིད། །སོ་སོར་རྟོག་པའི་ཆོ་ག་བཞིན། །དེ་བཞིན་བྱ་བ་ནན་ཏན་ལ། །རྟག་ཏུ་བཞུགས་པར་བརྗོད་
པ་འདི། །ཤིན་ཏུ་རྣམ་དག་རང་བཞིན་ཅན། །དེ་བཞིན་རྣམ་པར་སྣང་མཛད་ཉིད། །གཞན་ཡང་མི་བསྐྱོད་པ་ཉིད་དང་། །ཡང་ན་རིན་ཆེན་འབྱུང་གནས་དང་། །ཡང་ན་འོད་དཔག་མེད་པ་ཡིས། །གང་ཚེ་རྟག་བཞུགས་དོན་ཡོད་ལ། །བདུད་རྩི་ལྔ་ཡི་གོང་བུའི་དངོས། །
ཐིག་ལེའི་གཟུགས་ཏེ་ཡིད་ལྟ་བུ། །ཤིན་ཏུ་ཡང་དག་ཡེ་ཤེས་ཆེ། །ལྷ་མོ་ཀུན་གྱི་རང་བཞིན་ཅན། །རྡོ་རྗེ་སེམས་དཔའ་ཞེས་བྱར་བཤད། །བདེ་བ་དམ་པ་རུ་ནི་བརྗོད། །རང་བྱུང་ངོ་བོ་འདི་ཉིད་ནི། །ཆོས་ཀྱི་སྐུར་ནི་རབ་ཏུ་གྲགས། །དེ་ཡི་ཤེས་རབ་ལྷན་ཅིག་སྐྱེས། །དེ་ཕྱིར་
เล่ม ๗๙ · หน้า 118a
གནས་པའི་གཟུགས་ཅན་མ། །ལས་ཀྱི་རླུང་གིས་བསྐུལ་བ་ཡིས། །ལྟེ་བའི་དཀྱིལ་འཁོར་དུ་ནི་འབར། །བདག་མེད་མ་ཞེས་རྣམ་པར་བཤད། །དཔྱིད་ཀྱི་ཐིག་ལེ་ཉིད་དུ་བརྗོད། །སྐྲ་ཡི་རྩེ་མོ་བརྒྱ་སྟོང་ལུས། །གློག་གི་ཟེར་མ་མཉམ་པའི་འོད། །ལྷ་
ཡི་རྣལ་འབྱོར་དུས་སུ་ནི། །བ་སྤུའི་ཁུང་བུའི་རྩེ་བུག་ནས། །ཕྱོགས་བཅུར་རྣམ་པར་ཕྱུང་ནས་ནི། །ཀུན་ཏུ་ལྷ་དང་ལྷ་མིན་བསྡིགས། །སྙིང་ལ་ཆོས་ཀྱི་འཁོར་ལོར་ནི། །བསྲེགས་ནས་ལོངས་སྤྱོད་འཁོར་ལོར་སོང་། །སྣ་ཡི་བུ་ག་གཡས་པ་ནས། །ཐམས་ཅད་
དུ་ནི་ཕྱུང་ནས་ནི། །མཛོད་སྤུར་སོང་བ་དག་གིས་ཀྱང་། །བུག་པ་ངེས་པར་ཕྱོགས་བཅུ་ཡི། །སངས་རྒྱས་བྱང་ཆུབ་སེམས་དཔའ་ཡི། །ཤངས་ཀྱི་བུ་ག་གཡོན་པར་ནི། །ཞུགས་ནས་སྤྱི་གཙུག་འཁོར་ལོར་ནི། །ཀུན་བསྲེགས་རྣམ་པར་ཕྱུང་ནས་ནི། །སྔར་གསུངས་
ཉིད་ཀྱི་བུག་པ་ནས། །ཡང་ནི་སྤྱི་གཙུག་ཞུགས་པར་བྱ། །སངས་རྒྱས་རྣམས་ནི་བསྲེགས་པ་ཡིས། །དགའ་བ་དེ་ནས་བསྐྱེད་པར་བྱ། །ལྟེ་བའི་དཀྱིལ་འཁོར་ཕྱིན་ནས་ནི། །སྔ་མ་བཞིན་དུ་གནས་པར་འགྱུར། །ཡང་དག་པར་སྦྱོར་བ་ལས་བྱུང་བའི་རྒྱུད་ཆེན་པོ་ལས་
དཔྱིད་ཀྱི་ཐིག་ལེ་ཞེས་བྱ་བའི་བརྟག་པའི་རྒྱལ་པོ་སྟེ་དྲུག་པའོ།། །།ངག་གི་ཕྱག་རྒྱའི་མཚན་ཉིད་ནི། །བཅོམ་ལྡན་བདག་ནི་ཉན་པར་འཚལ། །དགོངས་པའི་སྐད་ནི་ཅི་ཞེས་བགྱི། །རྣལ་འབྱོར་མ་ཡི་རྟག་དམ་ཚིག །ཉན་ཐོས་ལ་སོགས་མི་ཤེས་པ། །
རྒོད་དང་ལྟ་བ་དག་གིས་ཀྱང་། །འཁྱུད་དང་དེ་བཞིན་གཉིས་གཉིས་སོགས། །རྒྱུད་ཀྱང་རྣམ་པ་བཞི་རྣམས་ཀྱིས། །དགོངས་པའི་སྐད་ནི་མ་བསྒྲགས་པ། །བཅོམ་ལྡན་ངེས་པར་གསུང་དུ་གསོལ། །དགོངས་པའི་སྐད་ནི་སྐད་ཆེན་པོ། །དམ་ཚིག་བརྡ་ནི་རྒྱས་པ་རུ། །
རྡོ་རྗེ་སྙིང་པོ་ངས་བཤད་ཀྱིས། །དེ་ཉིད་རྩེ་གཅིག་སེམས་ཀྱིས་ཉོན། །མ་ད་ན་ཆང་བ་ལ་ཤ། །འདུ་བ་མ་ལ་ཡ་ཛ་ཉིད། །འགྲོ་བ་ཁེ་ཊ་རོ་ནི་ཤྲ་བ། །རུས་པའི་རྒྱན་ནི་ནི་རཾ་ཤུ། །འོང་བ་ཕྲེཾ་ཀ་ཎ་རུ་བརྗོད། །ཅང་ཏེ་ཀྲི་པྲི་ཏ་རུ་བརྗོད། །སྐལ་མེད་དུ་དུ་ར་ཞེས་བཤད། །
เล่ม ๗๙ · หน้า 118b
སྐལ་ལྡན་ཀཱ་ལིཉྫ་རྃ་བརྗོད། །རེག་མིན་ཌི་ཌི་མ་ཞེས་བརྗོད། །ཐོད་པ་པདྨ་བྷ་ཛ་ནྃ། །བཟའ་བ་ཏི་པྲི་ཏ་ར་ཤེས་བྱ། །ཚོད་མ་མ་ལ་ཏིན་དྷ་ནྃ། །བཤང་བ་ཙ་ཏུསྶ་མྃ་བརྗོད། །གཅི་བ་ཀ་སྟྲུ་རི་ཞེས་བརྗོད། །རང་བྱུང་སིཧླར་ཤེས་པར་བྱ། །ཁུ་བ་ག་བུར་བརྗོད་པར་
བྱ། །ཤ་ཆེན་ཤཱ་ལི་ཛ་ཞེས་བརྗོད། །དབང་པོ་གཉིས་སྦྱོར་ཀུན་དུ་རུ། །རྡོ་རྗེ་བོལླ་ཞེས་བརྗོད་དེ། །པདྨ་ཀཀྐོ་ལ་ཞེས་ཟེར། །མུ་ཁི། སོར་མོ་ཁ་རུ་བཅུག་པ་ནི། །མཁའ་འགྲོ་མ་ཡི་མཚན་མའོ། །གྷོ་གྷུ། ཐལ་མོ་སྤྱི་བོར་ཡང་དག་གཞག །མར་མེ་མ་ཡི་
མཚན་མའོ། །གྷུ་གྷུ། །མཐེ་བོང་རྒན་པོ་བཅངས་པ་ནི། །འཇིབ་བྱེད་མ་ཡི་མཚན་མའོ། །མུ་གྷུ། ལག་པས་རྣ་བ་བརྡེབས་པ་ནི། །གཡོ་ལྡན་མ་ཡི་མཚན་མ་ཉིད། །ལུ་གྷུ། སྣ་རྩེར་ཐལ་མོ་བརྡེབས་པ་ནི། །དགེ་བའི་གཏམ་ནི་འདྲི་བའོ། །དྲཥྚ་རི་དགས་མགོ་
སྟོན་པ། །རྣལ་འབྱོར་མ་ཡི་མཚན་མར་མཚོན། །ཌ་ཞེས་བྱ་བ་སྐྱེས་བུར་ངེས། །ཌཱི་ནི་བུད་མེད་དེ་ནས་བརྗོད། །པུ་ཞེས་བྱ་བར་རེངས་པ་ཉིད། །སུ་ནི་དེ་བཞིན་ཟ་བ་ཉིད། །མ་ཞེས་བྱ་བ་མ་རུ་བརྗོད། །ཡོ་ནི་དེ་བཞིན་ཆུང་མར་ངེས། །བྷི་ཞེས་བྱ་བ་སྲིང་མོ་ཉིད། །
དྷི་ཞེས་བྱ་བ་མཛའ་མོར་བརྗོད། །ལུ་ཞེས་བྱ་བ་བུ་མོར་ངེས། །སྟྲི་ནི་ཁྲག་ཏུ་ཤེས་པར་བྱ། །ས་ནི་ཞི་བའི་བཏུང་བ་ཉིད། །པེ་ཞེས་བྱ་བ་བཏུང་བ་སྟེ། །བི་ཞེས་བྱ་བ་ངེས་པར་ཤ། །བྷ་ཞེས་བྱ་བ་བཟའ་བར་བརྗོད། །བྷུ་ཞེས་བྱ་བ་འདུ་བ་ཉིད། །བི་ཞེས་བྱ་བ་དུར་ཁྲོད་
ཉིད། །བྷུ་ཞེས་བྱ་བ་རོ་རུ་བརྗོད། །ཌཱི་ཞེས་བྱ་བ་རྣལ་འབྱོར་མ། །ག་ནི་དེ་བཞིན་ལཱ་མཱ་ཉིད། །སྟྲི་ཞེས་བྱ་བ་གཟུགས་ཅན་མ། །ཀུ་ཞེས་བྱ་བ་མཁའ་འགྲོ་མ། །ཁ་ཞེས་བྱ་བ་དུམ་སྐྱེས་མ། །ཛ་ཞེས་བྱ་བ་བྱིན་པ་ཟུང་། །ཀེ་ཞེས་བྱ་བ་ལག་པ་གཉིས། །བྷ་ཞེས་
བྱ་བ་ཕྱག་འཚལ་བ། །སྭཱ་ནི་ལེགས་འོངས་བྱ་བ་ཡིན། །འདི་རྣམས་ནི་ཡི་གེ་རེ་རེ་ཞིང་ཡང་བརྡ་སྟེ། དཔའ་བོ་དང་སྲིང་མོར་དེས་ཤེས་པར་བྱའོ། །ཡི་གེའི་དམ་ཚིག་གི་ཕྱག་རྒྱའི་ཡེ་ཤེས་སོ། །རྡོ་རྗེ་སྙིང་པོས་གསོལ་པ། །ངག་གི་བརྡ་ནི་མི་འཚལ་བས། །བདེ་བ་ཆེན་
เล่ม ๗๙ · หน้า 119a
པོས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །མདོར་བསྡུས་ནས་ནི་བཤད་བྱ་བ། །དེ་ནི་ང་ཡིས་བཤད་ཀྱིས་ཉོན། །པོ་ཏྃ་གི་ཞེས་བྱ་བ་ནི་ཕྱག་གོ། །པྲ་ཏི་པོ་ཏྃ་གི་ཞེས་བྱ་བ་ནི་ཕྱག་གི་ལན་ནོ། །ག་མུ་ཞེས་བྱ་བ་ནི་འགྲོ་བ་ཞེས་བརྗོད་
པར་འགྱུར་རོ། །ལུམ་པ་ཞེས་བྱ་བ་ནི་འོང་བ་ཉིད་དོ། །ནི་ག་རཾ་ཞེས་བྱ་བ་ནི་བྱིན་ཅིག་ཅེས་བརྗོད་པར་འགྱུར་རོ། །ཙཊྚུ་ཀ་ཞེས་བྱ་བ་ནི་ཁྱེར་ཅིག་ཅེས་བརྗོད་པ་ཡིན་ནོ། །ཧྲི་ད་ཡ་ཞེས་བྱ་བ་ནི་དཔའ་བོ་ཞེས་བྱ་བ་ཡིན་ནོ། །ཀཽ་ར་བ་ཞེས་བྱ་བ་ནི་གསོད་པ་ཞེས་བརྗོད་པ་ཡིན་ནོ། །
ཀརྞྞི་ཀ་ཞེས་བྱ་བ་ནི་དྲིལ་བུ་ཞེས་བརྗོད་པ་ཡིན་ནོ། །ཨ་ལི་ཀ་ར་ཎ་ཞེས་བྱ་བ་ནི་སྤྱི་བོ་ཞེས་བརྗོད་པ་ཡིན་ནོ། །བ་ར་ཧ་ཞེས་བྱ་བ་ནི་སྐྲ་ཞེས་བརྗོད་པ་ཡིན་ནོ། །ཤྲ་བ་ཎ་ཞེས་བྱ་བ་ནི་རྣ་བའོ། །མནྠཱ་ཞེས་བྱ་བ་ནི་བདུད་རྩིའོ། །ན་ར་ཞེས་བྱ་བ་ནི་མཉམ་པར་སྦྱོར་བ་ཞེས་བརྗོད་
པ་ཡིན་ནོ། །ཏཱ་ལི་ཀཱ་ཞེས་བྱ་བ་ནི་མཁའ་འགྲོ་མའོ། །ནཱ་ར་ཀ་ཞེས་བྱ་བ་ནི་དཀྱིལ་འཁོར་རོ། །ཨ་མུ་ཀྃ་ཞེས་བྱ་བ་ནི་དུར་ཁྲོད་དོ། །ཀཱ་ལི་ལ་ཞེས་བྱ་བ་ནི་སྒོའོ། །སྭ་ས་ཎྃ་ཞེས་བྱ་བ་ནི་བྲམ་ཟེའོ། །པ་རི་དྷི་ནི་རྒྱལ་རིགས་སོ། །བི་ར་ཏི་རི་ནི་རྗེའུ་རིགས་སོ། །ཀྲུ་ར་ཞེས་
བྱ་བ་ནི་དམངས་རིགས་སོ། །ཨནྟ་ནི་གདོལ་པའི་རིགས་སོ། །ཨ་ལི་ཀ་ནི་ཕྱུགས་སོ། །བྷ་གི་ནི་ནི་མཁའ་འགྲོ་མའོ། །མུ་ད་ཀྃ་ནི་ཚིལ་བུའོ། །གྲིཧྣ་ཞེས་བྱ་བ་ནི་ཕྱག་རྒྱའོ། །དནྟ་སྤཪྴ་ཏི་ཛི་ཧྭ་ཞེས་བྱ་བ་ནི་བཀྲེས་སོ་ཞེས་བརྗོད་པ་ཡིན་ནོ། །གྷནྡ་པ་ཧི་ནི་སྲེད་པའོ། །ཨཱ་ག་
མ་ན་ཞེས་བྱ་བ་ནི་གན་དུའོ། །སྠཱ་ན་ཞེས་བྱ་བ་ནི་ཆེ་གེ་མོར་རོ། །ཀི་ར་ཎ་ནི་མེ་ཏོག་གོ། །ལམ་པོ་ནི་འཇིགས་པའོ། །དནྟ་ནི་རྒོད་པ་ཞེས་བརྗོད་པ་ཡིན་ནོ། །ནི་རོ་དྷ་ནི་ཆར་པའོ། །བི་ཛཱཔྟི་ནི་ཆོག་པར་འཛིན་པའོ། །དྷུ་མཱ་ནི་སྤྲིན་ནོ། །དྷུ་མྲ་པྲི་ཡ་དང་། སཱ་ནུ་ནི་རིའོ། །ས་རི་ཏོ་ནི་
ཆུ་བོའོ། །ཨོཾ་གུ་ལྱ་ནི་ཡན་ལག་དང་ཉིང་ལག་གོ། །བ་ད་ནྃ་ནི་ཁའོ། །རཱ་ཛི་ཀ་ནི་ལྕེའོ། །ཨ་ད་ནཱ་ནིའོ། །པྃ་ཀ་ཏི་ནི་རྒྱལ་མཚན་ནོ། །ཙྪན་དོ་ནི་ཕྲེང་བའོ། །ཙ་ལ་ནི་རླུང་ངོ་། །མྲྀ་ཀ་པ་ཏི་ནི་ཕྱུགས་སོ། །མཎྜ་ལ་ནི་མཉམ་པའོ། །སྭཱ་ས་ནི་ལམ་གྱི་བཞི་མདོའོ། །
เล่ม ๗๙ · หน้า 119b
ཕལ་གུ་ཤ་ནི་སྐྱེ་བོའོ། །མ་ཧ་ཀྵ་ར་ནི་ཕྱུགས་ཆེན་པོའོ། །ཙྪ་ནི་རའོ། །ན་ཞེས་བྱ་བ་ནི་སྐྱེས་པའོ། །གོ་ཞེས་བྱ་བ་ནི་བ་གླང་ངོ་། །ཞེས་བྱ་བ་ནི་མ་ཧེའོ། །བྷི་ཞེས་བྱ་བ་ནི་བཟའ་བའོ། །ཧ་ཞེས་བྱ་བ་ནི་རྣམ་གྲངས་སོ། །ཨ་ཕྱ་ཀ་ཞེས་བྱ་བ་ནི་རྒྱལ་པོའི་སྐྱེས་བུའོ། །
སྠ་ཞེས་བྱ་བ་ནི་གནས་སོ། །མུ་ཁ་སྦཪྴ་ན་ནི་ཟོས་སོ་ཞེས་བྱ་བའོ། །དནྟ་སྤཪྴ་ན་ནི་འགྲངས་སོ་ཞེས་བྱ་བའོ། །ཧོ་ཞེས་བྱ་བ་ནི་གང་ཡང་རྣམ་གྲངས་སོ། །ཧྲཱི་ཀ་ནི་ངོ་ཚ་བའོ། །ཤཱུ་ནྱ་སྤརྴ་ནེ་ནི་མཻ་ཐུ་ན་གྱིས་ཤིག་ཅེས་བྱ་བའོ། །ཨུ་རུ་སྤཪྴ་ནེ་ནི་དེ་ལྟ་ད་ལྟར་གྱིས་ཤིག་ཅེས་བྱ་
བའོ། །ངག་གི་བརྡ་ཡི་ཡེ་ཤེས་སོ། །མཉམ་པར་དྲག་ཤུལ་དཔྲལ་བ་ཅན། །རྟག་ཏུ་ལྟུང་བར་བྱེད་པར་བརྗོད། །དབང་གི་ལྟ་སྟངས་གཡོན་ན་གནས། །གཡོན་པ་ན་ནི་གཟུགས་བརྙན་གཉིས། །གཡས་པའི་ཆ་ལ་དགུག་པ་ཉིད། །གཉིས་ནི་སྟེང་དུ་སྦྱར་བར་
བྱ། །དབུ་མ་རེངས་པའི་ལྟ་སྟངས་ཉིད། །སྣ་ཡི་རྩེ་མོའི་དབུས་སུ་གཉིས། །དུད་འགྲོའི་ལྟ་སྟངས་གསད་པ་ལ། །སྣ་ཡི་རྩེ་མོར་གཟུགས་བརྙན་གཉིས། །འབྱུང་བ་ཉིད་ཀྱིས་ལྟུང་བར་བྱེད། །བུམ་པ་ཡིས་ནི་དབང་དུ་བྱེད། །དགང་བ་ཡིས་ནི་འགུགས་པ་ཉིད། །
ཞི་བ་ཉིད་ཀྱིས་རེངས་པར་བྱེད། །རློན་པའི་ཤིང་ལ་ལྟུང་བྱེད་ཉིད། །མེ་ཏོག་ལ་ནི་དབང་དུ་གྲགས། །རྡོ་རྗེ་ཤིང་ལ་དགུག་པ་ཉིད། །གཡོ་བཅས་རྩལ་རེངས་བྱེད་ཉིད། །ཟླ་དྲུག་གོམས་པའི་རྣལ་འབྱོར་གྱིས། །འགྲུབ་འགྱུར་འདི་ལ་ཐེ་ཚོམ་མེད། །འདི་ལ་འཁྲུལ་བར་
མི་བྱ་སྟེ། །སངས་རྒྱས་རྫུ་འཕྲུལ་བསམ་མི་ཁྱབ། །སློབ་དཔོན་གཉིས་ལ་ཕྱག་འཚལ་ནས། །ཤིན་ཏུ་ཕྱག་འཚལ་དཔལ་ལྡན་ནི། །རྡོ་རྗེ་སེམས་སོགས་རྣལ་འབྱོར་གྱིས། །གཡས་པའི་སྨིན་མ་སྒྱུར་ཚུལ་གྱིས། །ནམ་མཁར་འགྲོ་བར་བསྒོམས་པས་ནི། །གང་ཞིག་
གནས་པས་འགྲུབ་པར་འགྱུར། །གཡོན་པའི་སྨིན་སྒྱུར་ཕ་རོལ་གྱི། །སྡེ་ལས་མཆོག་ཏུ་རྒྱལ་བར་འགྱུར། །བདུད་ཀྱི་དཔུང་ནི་གཞོམ་པའི་ཕྱིར། །དེ་ཉིད་ཀྱི་ནི་རྣལ་འབྱོར་གྱིས། །གཡོན་པའི་མིག་བསྒུལ་ཞེས་བྱ་བས། །དཀར་མོ་ལ་སོགས་གཟུགས་བསྒོམས་
เล่ม ๗๙ · หน้า 120a
པས། །དེར་ནི་རྫོགས་ན་འགྲུབ་པར་འགྱུར། །གཡས་པའི་མིག་བསྒུལ་ཞེས་བྱ་བས། །དཔལ་ལྡན་རྡོ་རྗེ་སེམས་སོགས་ཀྱིས། །སྐྱེས་བུའི་གཟུགས་ནི་རྫོགས་པར་འགྱུར། །ངག་གི་ཐ་སྙད་མ་གཏོགས་པར། །འཇིག་རྟེན་རབ་ཏུ་གྲགས་པ་
ཡི། །ཐ་སྙད་དུ་ཡང་འགྲུབ་པར་འགྱུར། །དེ་ལྟར་ཡོ་གིས་འཇིག་རྟེན་དང་། །འཇིག་རྟེན་འདས་པར་བསྡུས་པར་འགྲུབ། །ལེགས་པར་བཤད་པའི་དངོས་གྲུབ་བོ། །ལྟ་སྟངས་ཀྱི་ཕྱག་རྒྱའི་ཡེ་ཤེས་སོ། །དཔལ་ལྡན་རྡོ་རྗེ་སེམས་སྦྱོར་ཞིང་། །ཇི་ལྟར་དབྱིབས་ཀྱི་སྐུ་
ལྡན་པས། །འདིར་ནི་མི་ཡི་ཐོད་པ་ཡི། །ཡུངས་ཀར་ཆོ་ག་བཞིན་དུ་གདབ། །བཙོས་པའི་མར་ཁུ་བཟའ་བྱས་ཤིང་། །མགོ་བོ་འབྲས་བུས་དེ་བཞིན་བྱུགས། །ཕྱོགས་མཚམས་ནམ་མཁའ་ས་བཅིངས་པས། །བསྲུང་བ་ཀུན་གྱི་གོང་ན་མེད། །དཔལ་ལྡན་
རྡོ་རྗེ་སེམས་སྦྱོར་ཞིང་། །ཚེམས་ནི་བསྡམས་ཤིང་ཞལ་བཙུམས་པས། །དཔལ་ལྡན་གཡོན་པ་བསྒྱིངས་འཛིན་ཅིང་། །གཡས་པར་འཁོར་ལོ་ཕྱོགས་ཚུལ་གྱིས། །གསལ་བར་སྟེང་འོག་བྱིན་གྱིས་བརླབ། །ས་ལ་རང་གི་ཕྱག་རྒྱ་བྱ། །སངས་རྒྱས་ཀུན་དངོས་དངོས་
གྲུབ་སྦྱིན། །སྐྱེ་བ་གཉིས་པའི་ཐོད་པར་འདི་བཏབ་ནས། ཕྱི་ནས་ནི་མིའི་ཐོད་པར་རོ། །དེ་ནས་བླངས་ནས་བུད་མེད་དང་། སྐྱེས་པ་དང་། མ་ནིང་ལ་སོགས་པ་དང་། ཁྭ་དང་། འུག་པ་དང་། བྱ་རྒོད་དང་། མཆིལ་པའི་དངོས་གྲུབ་སྣ་ཚོགས་བྱེད་དོ། །འོལ་མ་ཟི་
དཀར་པོ་སྒྲུབ་པའི་ཆོ་གས་ཀྱང་། འདོད་ན་གླང་པོ་དང་། རྟའི་གཟུགས་འཛིན་པར་འགྱུར་བ་དང་། མ་ཧེའི་གཟུགས་འཛིན་པར་འགྱུར་བ་དང་། འདོད་ན་ཁྱི་དང་། བྱི་ལ་དང་། ཅེ་སྤྱང་གི་གཟུགས་འཛིན་པར་འགྱུར་བ་དང་། འདོད་ན་བུད་མེད་དང་། །
སྐྱེས་པའི་གཟུགས་འཛིན་པར་འགྱུར་རོ། །རོའི་ཁའི་བུག་པའི་ནང་དུ་སོན་པའི་བུ་ར་ནག་པོ་རོ་བསྲེགས་པའི་མེས་མར་ངོའི་འབྱུང་པོའི་ཉི་མ་ལ་གདུངས་ཤིང་བདུག་པ་བྱིན་ན་འགྲོ་བ་མ་ལུས་པ་འབེབས་པར་འགྱུར་རོ། །ཀ་ན་ཀའི་འབྲས་བུ་དང་། ཨ་ལོ་ཀ་དང་། མ་ཏུ་ལུང་ག་དང་།
เล่ม ๗๙ · หน้า 120b
ཙི་ཏྲ་ཀ་དང་། བ་ཙ་ཀ་དང་། ཁྱིམ་བྱའི་སྒོ་ང་དང་། ཨརྐའི་འབྲས་བུ་རྣམས་ཐམས་ཅད་བདུག་པ་ལས། རྒྱུ་བ་དང་མི་རྒྱུ་བའི་འཇིག་རྟེན་ཀུན་འབེབས་པར་འགྱུར་རོ། །རྟ་གསོད་པ་སྐྱ་བོའི་རྩ་བ་དང་། ཉི་མའི་ལྗོན་ཤིང་དང་། ཕེ་ཆག་པ་དང་། སྡིག་པའི་རྔ་མ་དང་། དུག་ཏུ་
ངེས་པའི་བརྒྱའི་ཆ་དང་ལྡན་པ། འདིས་དེ་རྣམས་ཆ་བསྙམས་ཏེ་ལག་པ་ལ་བྱུགས་ན་བ་གླང་གི་སྣར་འགྱུར་རོ། །དི་ན་ཀ་རའི་འོ་མས་བ་ན་རི་ཉི་མ་བདུན་དུ་བྱུགས་ནས་ནགས་ཀྱི་མི་ཞག་བདུན་སྤངས་ཏེ། དེ་བཞིན་དུ་ཁ་ཊི་ཀས་བྲིས་པའི་ལག་པ་དག་གིས་རེག་ན་ཀླུའི་དབང་
པོའི་དུག་འབྱིན་པར་འགྱུར་རོ། །འདིའི་ཕྱིར་བཟློག་པ་སྦྱིན་པར་བྱ་སྟེ། མཱ་ལ་ཡ་ལས་བྱུང་བ་དང་། ནཱ་ག་གེ་སར་དང་། ནད་ཀྱི་དབང་པོ་དང་། མ་ད་ན་ཕ་ལ་དང་། ཛཱ་གུའི་ཡུལ་དང་། ཏ་ཀ་ར་དང་ལྡན་པར་འབྲས་ཀྱི་ཆུ་དང་ལྡན་པས་འགྲོ་བའི་དུག་སྣ་ཚོགས་འཇིག་
པར་བྱེད་དོ། །དེའི་ཉིན་པར་སྐྱེས་པའི་བྱིས་པའི་རོ་ཙན་ཏ་ཀ་རའི་སྙིང་པོར་གནས་པའི་རིལ་བུ་ཟོས་ན་ལག་ན་རྡོ་རྗེ་ལྟ་བུར་ཇི་ལྟར་འདོད་པར་དུག་བཏུང་བར་བྱའོ། །སྦལ་པ་དང་། སྦྲུལ་གདོང་གཉིས་པའི་ཚིལ་བསྡུས་ལ་ཤླེཥྨའི་ཤིང་གི་འབྲས་བུ་འདིས་ལག་པ་ལ་བྱུགས་
པས། རེག་ན་དུག་ཞི་བར་བྱེད་དོ། །བའི་མར་དང་། བཛྲི་དང་། བ་ཧིའི་ཁྲག་དང་། སྦྲུལ་མགོ་གཉིས་པའི་ཤ་དང་། སྒལ་ཚིགས་ཀྱིས་ལག་པ་ལ་བྱུགས་ན་གནས་གསུམ་གྱི་ཡང་དུག་མེད་པར་བྱེད་དོ། །གཅེར་བུ་ལ་སོགས་པའི་ཆོ་གས་མཉམ་པར་བཞག་པས།
བཱ་ལ་ཀའི་རྩ་བ་ཆ་བདུན་དུ་བྱས་ནས། འབྱུང་པོའི་ཉི་མ་ལག་པ་ལ་བཅིངས་ན་ཉིན་བཞི་པ་འཇིག་པར་བྱེད་དོ། །ལྟོ་འཕྱེའི་དབང་པོའི་ཤུན་པ་སར་པ་དང་། ལྟོ་འཕྱེའི་དགྲའི་གཤོག་པའི་ཆ་དང་ལྡན་པར་བདུག་པ་དང་ལྡན་པ་ཙམ་གྱིས་འཇིག་རྟེན་གསུམ་པོ་སྡང་བར་བྱེད་དོ། །
ཡང་ན་ཀཱ་གཉིས་དང་ཉིན་མོ་འཇིགས་པའི་གཤོག་པ་དག་ཆོ་ག་བཞིན་དུ་བདུག་པས་ནི་འཕྲོག་བྱེད་མ་སྨད་ཀྱང་འབྱེད་པར་བྱེད་དོ། །གཞན་དུ་ནི་མ་ཡིན་ནོ། །རྟའི་རྨིག་པའི་ཁུང་བུར་སྦྲུལ་གྱི་མགོ་གཞག་ཅིང་གནོད་སྦྱིན་སྨྱོན་པའི་ལྕེ་དང་ལྷན་ཅིག་དགྲའི་གནས་ཀྱི་སྒོར་སྦས་
เล่ม ๗๙ · หน้า 121a
ན། ཉི་མ་བདུན་གྱིས་སྐྲོད་པར་འགྱུར་རོ། །ཧ་ལི་ནི་དང་། ཕག་གི་རྟུག་པ་དང་། རོའི་མགོ་སྐྱེས་དང་། མགྲིན་རིངས་ཀྱི་རུས་པ་རྣམས་གནས་གསུམ་གྱི་སྦྱོར་བའི་མཆོག་སྟེ། ཉི་མ་བདུན་གྱིས་སྐྲོད་པར་བྱེད་དོ། །རྟ་གསོད་པ་དམར་པོའི་མེ་ཏོག་དང་། བྷལླཱ་
ཏ་ཀ་དང་། སྟར་བུ་རྣམས་ཀྱིས་མེ་ལོང་ལ་བསྐུས་ན་རྟ་དང་། བོང་བུ་དང་། རྔ་མོ་ལ་སོགས་པའི་གཟུགས་མཐོང་བར་འགྱུར་རོ། །རྟ་དང་། བ་གླང་དང་། ཕག་དང་། །སྤྲེའུ་དང་། བོང་བུ་དང་། རྔ་མོའི་ལག་སྐྱེས་རྣམས་ཁ་སྦྱོར་དུ་མེས་བསྲེགས་ནས་སྦལ་པའི་ཚིལ་བུ་བསྲེས་
པས། དེ་རྣམས་ཀྱི་གཟུགས་སྔ་མ་བཞིན་དུ་མཐོང་བར་འགྱུར་རོ། །ཨཾ་ཀོ་ཊ་ཀའི་ས་བོན་གྱི་མར་ཁུ་དང་། བའི་འོ་མ་དང་། མིག་སྨན་གྱི་འབྲས་བུས་བྱུགས་ནས་གང་ཞིག་སྲིད་པའི་མཐའི་གཟུགས་རྣམས་མེ་ལོང་གི་དབུས་སུ་མིག་སྨན་གྱིས་བྱུགས་པའི་མིའི་མིག་
གིས་མཐོང་བར་འགྱུར་རོ། །ཏ་ཀ་པའི་འབྲས་བུ་དང་། ཨཾ་ཀོ་ཊའི་འབྲས་བུ་དང་། མར་ཁུའི་ཚིགས་མས་རང་བཞིན་གྱིས་གནས་པའི་སྐྱེས་བུ་བཟང་པོ་མཐོང་བར་འགྱུར་ཏེ། ཏ་ཀ་རའི་མིག་སྨན་གྱིས་བྱུགས་པས་མི་མཐོང་བར་འགྱུར་རོ། །རི་བོང་ཅན་གྱི་ཆུ་དང་། ཛ་ལུ་
ཀ་དང་། སྦལ་པའི་མར་ཁུ་དང་། པཱ་ཊ་ལིའི་རྩ་བས་རྐང་པའི་མཐིལ་བྱུགས་ན། སྐྱེས་བུ་མེ་མ་མུར་གྱི་ཚོགས་ལ་འགྲོ་བར་འགྱུར་རོ། །ཤྲ་མ་ཎི་ཀ་དང་། སྦལ་པའི་ཚིལ་བུ་དང་། ཛ་ལུ་ཀ་དང་། ཟླ་བ་ལས་བྱུང་བ་དང་ལྡན་པས་ལག་པ་དང་། རྐང་པ་བྱུགས་ན་མེ་ཁ་བ་
ལྟར་བསིལ་བར་བྱེད་པར་འགྱུར་རོ། །ཁའི་ནང་དུ་དུནྡུ་བའི་རིན་པོ་ཆེ་བཅུག་སྟེ། ཆུར་ཞུགས་ན་ཤཱཀྱའི་གནས་ཀྱི་ནང་དུ་ཞུགས་པ་ལྟ་བུར་བློ་དང་ལྡན་པར་འདོད་པས་གནས་སོ། །སོ་ན་ཀའི་ས་བོན་གྱིས་རྐང་པའི་ལྷམ་ཟུང་བྱས་ན་ཆུའི་སྟེང་དུ་སྐྱེས་བུ་ཤིན་ཏུ་རྣམ་པར་དག་པ་གྲུ་
ལྟ་བུར་འཆག་ཅིང་འགྲོ་བར་འགྱུར་རོ། །མར་སར་དང་། བཙག་སྐྱ་བོ་དང་། དྲི་ང་བ་དང་། ཉའི་མར་ཁུའི་ཚིགས་མས་བུག་པ་ཐམས་ཅད་བྱུགས་ན། སྐྱེས་པ་བློ་དང་ལྡན་པ་ཆུ་སྲིན་ལྟ་བུར་རྒྱུ་བར་འགྱུར་རོ། །ས་བོན་དང་། ཀ་ན་ཀའི་དྲུངས་པ་ཆེན་པོའི་སྲིན་བུའི་ཕྱེ་མ་དང་
เล่ม ๗๙ · หน้า 121b
ལྡན་པ་དང་། ཀོ་ཀྐི་ལ་རྣམས་ཀྱིས་སྐྱེས་པ་འདྲེར་བྱེད་པར་འགྱུར་རོ། །བུ་རམ་དང་། ཨ་ར་ན་ལ་དག་གིས་ནི་ཕྱིར་ཟློག་པར་བྱེད་དོ། །སྐྱེ་བ་གཉིས་པ་དང་། བྱི་ལ་དང་། སྤྲེའུ་དང་། རང་འཚེད་དང་། ཁྭའི་དགྲ་དང་། སྲེ་མོང་གི་སྤུ་རྣམས་བརྡུངས་ཤིང་། ཙ་ར་མའི་
རྟུག་པའི་ཕྱེ་མས་འཇིག་རྟེན་པ་ཐམས་ཅད་སྨྱོ་བར་བྱེད་དོ། །བ་ལང་ཚེའི་རྔ་མ་དང་། ཀ་གཉིས་པའི་གཤོག་པ་གཡས་པ་དང་ལྡན་པ་མལ་དུ་བཅུག་ན་མྱུར་དུ་དགྲ་བོ་རྗེད་བྱེད་ཀྱིས་འཇིགས་པར་བྱེད་དོ། །ཀ་ན་ཀའི་འབྲས་བུ་དང་། མ་ཏུ་ལུང་ག་དང་། ཕུག་
རན་དང་། རྨ་བྱ་དང་། ཟངས་ཀྱི་གཙུག་པུད་ཅན་གྱིས་ལན་ཅིག་གིས་སྨྱོ་བར་བྱེད་ཅིང་བློ་གྲོས་དང་བྲལ་བར་བྱེད་དོ། །སྐྲའི་ལས་ཀྱི་མཐའ་ཡིན་ནོ། །ཀ་ན་ཀའི་འབྲས་བུ་བླངས་ནས། དམ་ཚིག་ཆེན་པོ་དང་། སྲིན་བུའི་ཕྱེ་མ་དང་བསྲེས་ནས་བཟའ་བ་དང་བཏུང་བ་
ལ་སྦྱར་ན་དེའི་སྐད་ཅིག་ལ་སྨྱོ་བར་འགྱུར་ཏེ། ཉི་མ་བདུན་གྱིས་འཆི་བར་འགྱུར་རོ། །ཚ་བའི་མར་ཁུས་པི་ཙུ་མརྔའི་ཤིང་ལ་གཏོར་ཟན་གྱི་ཚང་བླངས་ཏེ་བྱུགས་ནས། ལག་པ་དེ་ཉིད་ཀྱིས་མ་རེག་པར་དུར་ཁྲོད་དུ་ཤིང་བསྲེགས་པའི་ཐལ་བ་བླངས་ནས་གང་གི་སྤྱི་བོར་
བྱིན་པ་དེ་སྐྲོད་པར་བྱེད་དོ། །ཁྭ་དང་འུག་པའི་གཤོག་པ་དག་དང་། བྲམ་ཟེ་དང་། གཅེར་བུ་པ་དག་གི་སྐྲ་གཅིག་ཏུ་བྱས་ནས་དྷ་དུ་རའི་ཤིང་ལ་མེ་སྦར་ནས། དུ་བ་མེད་པར་བསྲེགས་ཏེ། དེའི་ཐལ་བ་བླངས་ལ་སྐྱེས་པའམ་བུད་མེད་ཀྱི་གནས་མལ་གྱི་འོག་ཏུ་བཅུག་ན་དེའི་
སྐད་ཅིག་ལ་སྡང་བར་འགྱུར་རོ། །རྣམ་པར་ཤེས་པ་དང་ཡེ་ཤེས་སོ། །ཡང་ན་དབང་དུ་བྱ་བར་འདོད་ན་དགའ་བ་དང་བཅས་པ། དཀར་མོའི་སྙིང་པོའི་ནུས་བ་མདའི་རྨ་ཕྱེ་མར་བྱས་ནས། འདོད་པའི་ཕྱེ་མས་རང་གི་ས་བོན་དང་ལྡན་པས་རྒྱལ་ལ་བདག་པོའི་བརྟུལ་ཞུགས་
མའང་དབང་དུ་བྱེད་དོ། །སྐྱེས་མ་སྐལ་བ་ངན་པ་བཟུང་ནས་ན་རའི་ཤིང་གི་ཡལ་གའི་ཚིགས་མ་དང་། གླང་པོ་ཆེའི་ཆང་དང་མཉམ་པར་བུ་མོའི་ལག་པར་བཞག་ན། སྐལ་བ་བཟང་བ་པོ་སྟེང་དུ་འདྲེན་པར་བྱེད་དོ། །བྷུ་ཏ་ཀེ་ཤི་དང་། རུ་དན་ཏི་དང་། དཎྜ་ཨུཏྤ་ལ་དང་། ཧ་
เล่ม ๗๙ · หน้า 122a
ས་དེ་བ་དང་། ཕྱོགས་ཀྱི་ཆུ་དང་། བདག་ཉིད་ཀྱི་མྱོས་བྱེད་དང་བཏགས་པས་སྐད་ཅིག་གིས་བརྐྱང་མ་དབང་དུ་བྱེད་དོ། །བུཏྟཉྫ་རི་དང་། ཨ་པ་ན་ཏ་དང་། རྟག་ཏུ་ངུ་དང་། དཎྜ་ཨུཏྤལ་ལྷན་ཅིག་བཏགས་པའི་ཕྱེ་མ་དང་། ཕྱོགས་ཀྱིས་ཆུས་སམ་རེག་པ་
ཉིད་ཀྱིས་འགྲོ་བའི་ཡན་ལག་མ་དབང་དུ་བྱེད་དོ། །བིཥྜུ་ཀྲཱན་ཏྲ་དང་། སྲ་བན་ཏི་དང་། ལ་ཀྵ་ཎ་དང་། ཨ་བ་ན་ཏ་དང་། མིག་ལས་བྱུང་བ་དང་། ཕྱོགས་ཀྱི་ཆུ་ལྷན་ཅིག་བཏགས་པས་ལྷའི་དབང་པོའི་བརྐྱང་མ་ཡང་སྐད་ཅིག་གིས་དབང་དུ་བྱེད་དོ། །འདི་ན་ཀ་ར་
དཀར་པོའི་ཤིང་གི་རྩ་བ་དང་། མཉྫིཥྚ་དང་། མཆིལ་པ་དང་། ཀུཥྚ་དང་། རང་གི་ཡན་ལག་གི་རྨ་ལས་བྱུང་བ་དང་། དི་ག་དྷ་འདི་རྣམས་ཀྱིས་གནས་གསུམ་པོ་དབང་དུ་བྱེད་དོ། །ར་མ་དུ་ཏཱི་དང་། རུ་དན་ཏི་དང་། ཀྵིར་དྷི་དང་། བདག་གི་མྱོས་བྱེད་དང་བསྲེས་ཤིང་
སེང་ལྡེང་དང་བཏགས་པའི་རིལ་བུ་དང་སོ་རྩི་ལྷན་ཅིག་པས་རང་བྱུང་གི་བརྐྱང་མ་ཡང་སྐད་ཅིག་གིས་དབང་དུ་བྱེད་དོ། །མ་ཧེ་ལ་བཅིངས་པའི་སྣ་ཐག་དང་། ཀ་ན་ཀའི་ཤིང་གིས་རོ་བསྲེགས་པའི་ཐལ་བ་དང་ཡན་ལག་ཅན་ཤི་བའི་རོ་བསྲེགས་པའི་མེ་མདག་ཀ་ན་
ཀའི་ཁུ་བས་བསད་པའི་ཕྱེ་མ་དང་། བདག་གི་མྱོས་བྱེད་ཀྱིས་ལྷའི་བདག་པོའི་བུ་མོ་ཡང་སྐད་ཅིག་གིས་དབང་དུ་བྱེད་དོ། །རེག་པ་ལ་སོགས་པས་བདག་གི་ཡེ་ཤེས་སོ། །ཤྲིཾ་ཁ་དང་། མཁའ་འགྲོའི་བདག་པོའི་འཁོར་ལོ་དང་། ལྷའི་བདག་པོའི་སྦས་པ་དང་།
བ་ལྦ་དང་། བ་ལང་གི་གི་ཝང་དང་། ལྡོང་རོས་དང་ལྡན་པས་དཔྲལ་བར་ཐིག་ལེ་བྱས་ན་སྐད་ཅིག་གིས་དབང་དུ་བྱེད་དོ། །དུརྦ་དཀར་པོ་དང་། རི་དགས་ཀྱི་དུརྦ་དང་། བ་ལང་གི་གི་ཝང་དང་། ལྷན་ཅིག་པས་དཔྲལ་བར་ཐིག་ལེ་བྱས་ཤིང་ལྷན་ཅིག་མཐོང་བས་མིའི་
དབང་པོ་ཡང་དབང་དུ་བྱེད་དོ། །ནམ་མཁའ་ལྡིང་གི་བདག་པོའི་འཁོར་ལོ་དང་། ལྷའི་བདག་པོའི་སྦས་པ་དང་། ཨ་བ་ན་ཏའི་རལ་པ་དང་། དུ་དན་ཏི་དང་། ཕྱོགས་ཀྱི་ཆུ་དང་བཏགས་པའི་ཕྱེ་མས་མིའི་བདག་པོའི་བརྐྱང་མ་ཡང་སྐད་ཅིག་གིས་དབང་དུ་བྱེད་དོ། །སྐྱེས་
เล่ม ๗๙ · หน้า 122b
པ་བག་མ་སར་པ་མངོན་པར་བླངས་པ་ཤི་བའི་མེ་ཏོག་དང་། དབང་ཕྱུག་ཆེན་པོ་ལ་བྷན་དུ་ཀའི་མཆོད་པའི་སྤྱི་བོའི་མེ་ཏོག་དང་། སྐྱེས་པ་ཤི་བ་དང་མཚུངས་པར་གཡོན་པ་བསྲེགས་པའི་ཐལ་བ་དང་། བདག་གི་མྱོས་བྱེད་ལྷན་ཅིག་པས་བསྣུན་པའི་བུད་མེད་ཕྱི་ནས་རྗེས་
སུ་འབྲང་བར་འགྱུར་རོ། །བིཥྞུ་ཀྲཱན་ཏ་དང་ལྷ་ཡི་བདག་པོས་སྦས་པ་དང་། མཚན་ཉིད་དང་། དུ་བ་དང་། ལྟོའི་སྲིན་བུ་དང་། ལྷན་ཅིག་ནམ་མཁའི་ཆུ་དང་བཏགས་པའི་ཕྱེ་མས་སྐད་ཅིག་གིས་དབང་དུ་བྱེད་དོ། །ཨུ་གྲཱ་དང་། ཙྪིནྡ་དང་། རུ་ཧ་དཀར་པོ་དང་། བཾ་སེ་དང་།
ཀན་བྷི་དང་། ཨིནྡྲ་ཡ་བ་མཉམ་པ་འདི་རྣམས་དང་ལྡན་པས་མན་ངག་ལས་ཐིག་ལེ་བྱས་པས་དབང་དུ་བྱེད་དོ། །ཤྲཱི་རིས་ཀ་ལ་དང་། ཨ་ནུ་ཎ་དང་། ཙནྡནདང་། རི་བོང་འཛིན་པ་འདི་རྣམས་ཀྱིས་མཉམ་པར་ཤིན་ཏུ་སྦྱར་བ་དང་། དྲང་སྲོང་གི་བུ་མཁའ་འགྲོ་མའི་ཁྲག་གིས་
བྱུགས་པའི་ཐིག་ལེས་འགྲོ་བ་དབང་དུ་བྱེད་དོ། །ཛ་ཡན་ཏི་དཀར་པོའི་ས་བོན་དང་། དེ་བཞིན་དུ་གི་རི་ཀཱརྞྞི་ཀ་དཀར་པོའི་ས་བོན་དང་། ལྷན་ཅིག་གི་ཝང་དང་དེ་ཡང་ཕག་གི་སོས་བཏགས་ཏེ། རྒྱལ་ལ་དཔྲལ་བར་ཐིག་ལེ་བྱས་ཤིང་རྒྱལ་པོའི་དབང་པོ་ལ་བལྟས་ན་ཁྲོ་བར་མི་
འགྱུར་རོ། །ཐིག་ལེ་འབྱུང་བར་བྱེད་པའི་ཡེ་ཤེས་སོ། །ཡང་ན་རིལ་བུ་བྱ་བར་འདོད་པས་བྱི་ལ་ནག་པོའི་མིག་དང་། བྱ་རོག་ནག་པོའི་མིག་དང་། ཕག་ནག་པོའི་རྣ་བ་གཡོན་པའི་ཁྲག་གིས་མཉེ་ཞིང་བདེ་བར་གཤེགས་པའི་གདུང་གི་དངོས་པོའི་རིལ་བུ་ཉི་མ་དང་། ཟླ་
བ་དང་། མེའི་ནང་དུ་སོན་པར་སོ་སོར་དཀྲིས་པ་རྒྱལ་ལ་བསྒྲུབ་ཅིང་རང་འདོད་པའི་ལྷའི་སྔགས་ཀྱིས་བཟླས་པས་འགྲུབ་པར་འགྱུར་ཏེ། ཁར་བཅུག་ན་དཔལ་དང་ལྡན་པ་གནོད་སྦྱིན་ལྟར་འདོད་པའི་གཟུགས་ཅན་དུ་རྣམ་པར་སྤྱོད་དོ། །ཡང་ན་ངང་མོ་ནག་མོའི་མིག་དང་། བྱ་
རོག་ནག་པོ་དང་། འུག་པ་ནག་པོའི་མིག་དང་། ཁུ་བྱུག་ནག་པོའི་མིག་དང་། བདེ་བར་གཤེགས་པའི་གདུང་དུ་ཡིད་ཆེས་པ་དང་། བཇྲིའི་འོ་མས་རིལ་བུ་བྱས་པ་ཉི་མ་དང་། ཟླ་བ་དང་། མེའི་ནང་དུ་སོན་པར་དཀྲིས་ནས་ཁར་བཅུག་ན་མི་སྣང་བར་བྱེད་དོ། །ཡང་ན་གདུང་གི་
เล่ม ๗๙ · หน้า 123a
དངོས་པོའི་རིལ་བུ་སྐྱེས་པ་ཤི་བ་དང་མཚུངས་པར་བུད་མེད་བསྲེགས་པའི་ཐལ་བ་དང་། ཀ་པིཏྠ་ཡོངས་སུ་སྨིན་པའི་ཕྱེ་མ་དང་། སརྫ་ར་ཛའི་ཁུ་བ་དང་། རྡུལ་དང་། དེ་ཡོངས་སུ་བཏགས་པས་བདེ་བར་གཤེགས་པའི་གདུང་གི་དངོས་པོ་ཡིད་ཆེས་པ་ཉི་མ་
དང་། ཟླ་བ་དང་། མེའི་ནང་དུ་སོན་པར་དེ་ཉིད་ཀྱིས་ཡོངས་སུ་དཀྲིས་ནས་རྒྱལ་ལ་བསྒྲུབ་ཅིང་རིལ་བུ་ཁར་བཅུག་ན་གནོད་སྦྱིན་ལྟ་བུར་འདོད་པའི་གཟུགས་ཅན་དུ་དཔལ་དང་ལྡན་པར་གནས་པར་འགྱུར་རོ། །ཡང་ན་སྲོ་ཏ་ཀ་དང་། རི་བོང་གིས་མཚན་མའི་ཚེར་མ་དང་།
སྦྲང་རྩི་དང་། །སྦྲང་རྩི་ཅན་དང་། དང་པོའི་མེ་ཏོག་དང་ལྡན་པ་དང་། པད་མ་སར་པའི་གེ་སར་དང་ལྡན་པའི་རིལ་བུ་ལྕགས་གསུམ་གྱི་ནང་དུ་གནས་པས་སྦེད་པར་བྱེད་དོ། །ཡང་ན་ཨ་ཤོ་ཀ་སྔོན་པོ་རབ་ཏུ་རྒྱས་པའི་མྱུ་གུ་བུད་མེད་ཀྱི་ཁྲག་གིས་ལན་བདུན་དུ་བྱུགས་ཤིང་
ལྕགས་གསུམ་གྱི་ནང་དུ་བཅུག་པ་ཁར་བཅུག་པས་ནི་འགྲོ་བ་མ་ལུས་པ་སྦེད་པར་བྱེད་དོ། །ཡང་ན་ཏ་ཀ་རའི་བྱང་ཕྱོགས་ཀྱི་རྩ་བ་ཕྱོགས་ཀྱི་གོས་ཀྱིས་གཏུམ་ཞིང་ཟླ་བ་གཟས་ཟིན་པ་ན་རིལ་བུ་ཉི་མ་དང་། ཟླ་བ་དང་། མེའི་ནང་དུ་བཅུག་ན་ཁའི་ནང་དུ་གནས་པས་མི་སྣང་བར་
བྱེད་དོ། །བ་གླང་གི་གི་ཝང་དང་། ཨང་གུ་ཏའི་ཤིང་གི་མེ་ཏོག་དང་། འགགས་ནས་ཤི་བའི་མིག་དང་། ཚིལ་བླངས་ཤིང་ཁ་གཉིས་པས་ཟོས་པའི་ལྷག་མ་དང་ལྡན་པའི་རིལ་བུ་འདི་ནི་བརྟགས་པའི་བརྐྱང་མ་ཞེས་བྱའོ། །ཡང་ན་ཕའི་ཚལ་དུ་ཟླ་མཚན་གྱིས་མྱོས་པའི་བུ་མོ་
མཉེས་པའི་རྫས་དང་། བ་བླ་དང་ལྡན་པས་དཔྲལ་བའི་གནས་ཀྱི་ངོས་ཀྱི་གནས་སུ་ཐིག་ལེ་བྱས་ན་གནས་གསུམ་པོ་སྦེད་པར་བྱེད་དོ། །ཡང་ན་ཨ་ཤོ་ཀ་སྔོན་པོའི་བྱང་གི་ཕྱོགས་སུ་ཁྭའི་ཚང་གི་མྱུ་གུས་དཔྲལ་བའི་འགྲམ་དུ་ཐིག་ལེ་བྱས་ན་རྒྱུ་བ་དང་མི་རྒྱུ་བའི་འཇིག་རྟེན་ཐམས་
ཅད་སྦེད་པར་བྱེད་དོ། །ཕུག་རོན་གྱི་ཁོང་པར་སྲོ་ཏའི་མིག་སྨན་བཅུག་ནས་རོ་སྲེག་གི་མེ་ལ་བསྲེགས་ཏེ། གྲུབ་པའི་མིག་སྨན་བྱི་ལ་དཀར་པོ་མ་ཡིན་པའི་ཁྲག་གིས་བསད་པས་སྦེད་བར་བྱེད་དོ། །ཡང་ན་ཏྲི་ཎཱ་སར་པའི་ཚོགས་ཀྱི་མྱུ་གུས་བཏེག་པའི་ས་དང་། སར་གྷ་དང་།
เล่ม ๗๙ · หน้า 123b
ཏ་ལ་དང་ལྡན་པ་རྒྱལ་ལ་གྲུབ་པས་དཔྲལ་བའི་ངོས་སུ་ཐིག་ལེ་བྱས་ན་སྦེད་པར་འགྱུར་རོ། །ཡང་ན་རིལ་བུ་མཆོག་ཏུ་གྱུར་པ་བ་བླ་དང་། བ་གླང་གི་གི་ཝང་འདི་དག་གོང་གི་བསྟན་པའི་དགོས་པའི་རིལ་བུ་མཆོག་འདི་སྒྲུབ་པའོ། །མི་སྣང་བའི་ཡེ་ཤེས་སོ། །དེ་ནས་མིག་སྨན་
གྱི་སྦྱོར་བ་བཤད་པར་བྱ་སྟེ། ཤཱ་ལི་ཛ་ལས་བྱུང་བའི་མར་ཁུ་དང་ལྷན་ཅིག་དུར་ཁྲོད་ཀྱི་རས་ལས་བྱུང་བའི་སྡོང་བུ་འབྱུང་པོའི་ཉི་མའི་མཚན་མོ་བའི་སྐྱེད་མོས་ཚལ་དུ་སྐྱེས་པའི་ཐོད་པ་གསུམ་གྱི་ནང་དུ་མར་ཁུ་དང་བཅས་པའི་མར་མེའོ། །དེའི་སྟེང་དུ་པདྨའི་འདབ་མ་བཞག་
ནས་དགའ་མའི་ཐོད་པ་ལས་དུ་བ་བླང་བར་བྱའོ། །དེ་ནས་ཉིན་མོ་འཇིགས་པའི་མགོ་བོ་བསྲེགས་ནས་ཙན་དན་དམར་པོ་དང་མང་དུ་བཏགས་ཏེ། དེ་ཉིད་ཀྱི་མཚན་མོ་རྡོའི་གཏན་པ་ལ་ཞིབ་ཏུ་བཏག་ཅིང་ཕྱེ་མར་བྱའོ། །གོང་དུ་བླངས་པའི་དུ་བ་དང་ལྷན་ཅིག་གཅིག་ཏུ་བྱས་
ནས་བྱ་རྒོད་ཀྱི་པགས་པའི་སྣོད་དུ་བཅིངས་ཏེ། བྱ་རྒོད་ཀྱི་རྗེ་ངར་གྱི་རྐང་ངམ། གོང་གི་མིའི་རུས་པའི་ཐུར་མས་སོ། །དེ་ནས་མིག་སྨན་ཇི་ལྟར་བསྒྲུབ་པར་བགྱི། བཀའ་སྩལ་པ། བྷ་གའི་ནང་དུ་སྔགས་པས་ཆོ་གས་བསྒྲུབ་པར་བྱའོ། །གྲུབ་པའི་མིག་སྨན་གྱི་སྦྱོར་
བའི་ཡེ་ཤེས་སོ། །དེ་ནས་ལས་ཀྱི་ཆོ་ག་བཤད། །བཟླས་དང་བསམ་གཏན་རྟག་དགའ་བ། །གང་གིས་སྒྲུབ་པོ་འགྲུབ་འགྱུར་བའི། །བཅུད་ཀྱི་ལས་ཀྱི་ཆོ་ག་བརྗོད། །ཆོ་གའི་དངོས་པོ་མ་གང་ཡང་། །ཕོངས་པའི་སེམས་ཅན་བདེ་བ་འབབ། །རི་དང་རྒྱ་མཚོ་ལས་སྐྱེས་
པ་དུ་མ་དང་། བྱས་པའི་སྐྱུར་པོ་དང་། བུ་དང་། མདུད་པ་དང་། རྡོའི་གཏན་པ་ཚན་དེ་ལ་ཡང་དང་ཡང་མཉེས་ནས། སྣུ་ཧི་དང་། རིའི་ཟེ་འབྲུ་དང་། རོལ་པ་དང་། འདབ་མའི་ཆུ་སིངས་པོ་དང་བཅས་པར་ཟངས་ཀྱི་སྣོད་དུ་བསྐོལ་བར་བྱའོ། །ལྕགས་བླངས་ནས་སྦྱར་བར་བྱ་
ཞིང་། བ་གུ་ལ་དང་། ཨུཏྤ་ལ་ཆེན་པོའི་ཆ་དང་ལྡན་པར་ཇི་སྲིད་དུ་མར་སར་བྱུང་བ་དེ་སྲིད་དུ་མཉེ་བར་བྱའོ། །དེ་མ་ཐག་ཏུ་རྡོ་རྗེ་ཅན་གྱི་འོ་མས་བཏགས་ནས་སིན་དུ་དང་ཚྭ་ལས་ཁུ་བར་འགྱུར་བ་སྟེ། ཟངས་དང་། དངུལ་གྱི་ཆ་དང་གསེར་ལྷན་ཅིག་པའི་ཆ་ཁྱོར་གུབ་བཀབ་པར་
เล่ม ๗๙ · หน้า 124a
བཞུ་ཞིང་། དེ་ནས་བྲིའི་རྡོ་བ་ཕྱེད་ཙམ་དུ་སྦྱིན་པར་བྱས་ལ་གསེར་ཕྱེད་ཀྱི་ཚད་གཞུག་པར་བྱའོ། །བཅུད་ཀྱི་ཡེ་ཤེས་སོ། །དེ་ནས་བཅུད་ལེན་བཤད་པར་བྱ། །ཐམས་ཅད་སྙིང་པོ་ཀུན་བསྡུས་པ། །དུས་ཀྱི་འཆིང་བར་གནས་ནས་ནི། །རྣལ་འབྱོར་ཕྱག་རྒྱ་
བསྒྲུབ་པར་བྱ། །གཞི་མཉམ་ཉིད་དང་གླ་རྩི་དང་། །ཙན་དན་དམར་པོ་ག་བུར་ཉིད། །སཱ་ལུ་སྐྱེས་དང་སི་ཧླ་དང་། །ཀུན་དུ་རུ་དང་ཀཀྐོ་ལ། །དེ་བཞིན་རྐང་གི་སྙིང་པོ་ཉིད། །འདི་རྣམས་སྨན་ནི་ཆེན་པོ་ཉིད། །དུས་ནི་དྲུག་ཏུ་འོད་ཟེར་ཅན། །དཔྱིད་དང་སོ་ག་ཉིད་དང་ནི། །
དེ་བཞིན་དུ་ནི་དབྱར་ཉིད་དང་། །སྟོན་གྱི་དུས་དང་དགུན་སྟོད་དང་། །དེ་བཞིན་གཞན་ཡང་དགུན་སྨད་དོ། །དཔྱིད་ལ་ཆོ་ག་ཉི་ཤར་ན། །སོ་ག་མཁས་པས་ཉིན་ཕྱེད་ན། །དབྱར་ལ་ཉི་མ་བསྙུར་བ་ན། །སྟོན་ནི་དེ་བཞིན་ཉི་ནུབ་ན། །དགུན་སྟོད་ལ་ནི་ནམ་ཕྱེད་ན། །
དགུན་སྨད་ལ་ནི་ཐོ་རངས་སོ། །དུས་ཀྱི་སྦྱོར་བ་མཆོག་འདི་ནི། །ཞལ་མཆོག་མ་ནི་ཁྱོད་ལ་བཤད། །དགུན་སྟོད་དུས་སུ་ནམ་ཕྱེད་ན། །མེ་ཏོག་ཏུ་ནི་གསུངས་པ་ཉིད། །དཔྱིད་ལ་ཡང་ནི་བཞི་མཉམ་ཉིད། །ཉི་ཤར་དེ་བཞིན་དངོས་གྲུབ་སྟེར། །དབྱར་ལ་ཉི་མ་
བསྙུར་བ་ན། །གླ་རྩི་ཡིད་དུ་འོང་བ་ཉིད། །སོ་གར་དོན་ཀུན་གྲུབ་པ་པོས། །ཉི་མ་ཕྱེད་ན་རྐང་སྐྱེས་ཉིད། །སྟོན་ཀ་པདྨ་སྣུམ་པ་ཉིད། །སྲོད་ལ་དངོས་གྲུབ་བྱེད་པ་ཉིད། །དགུན་སྨད་ལ་ནི་ཐོ་རངས་ན། །ཁྱད་པར་དུ་ནི་ག་བུར་ཉིད། །རྣལ་འབྱོར་མཆོག་རབ་འདི་ཉིད་
ནི། །ཤིན་ཏུ་མཉམ་པར་གཞག་པར་བྱེད། །རྒ་དང་འཆི་ལས་རྣམ་གྲོལ་བར། །འགྱུར་བ་འདི་ལ་ཐེ་ཚོམ་མེད། །བུ་དང་གྷན་དྷ་ག་ཉིད་དང་། །མཆོག་དང་ཡང་དག་ལྡན་པར་ནི། །མར་གྱིས་ཁྱབ་པར་བྱས་ནས་ནི། །ལས་རྣམས་ཀུན་ལ་སྦྱར་བར་བྱ། །རྫས་ནི་བཅུ་
བཞི་བླངས་ནས་ནི། །དགུ་དང་འབད་པས་བཟའ་བར་བྱ། །ཟླ་བ་ཉི་མའི་རྣམ་པའི་ཆས། །ཇི་ལྟར་འདོད་པའི་ལས་རྣམས་བྱ། །ཉི་མ་བདུན་ཕྲག་གསུམ་གྱིས་འགྲུབ། །སོ་དང་སེན་མོ་སྐྲ་ལྟུང་ཞིང་། །ཡང་ནི་ཉེ་བར་སྐྱེ་བར་འགྱུར། །གྲུབ་ན་ཁམས་རྣམས་ཐམས་ཅད་ནི། །
เล่ม ๗๙ · หน้า 124b
གསེར་གྱི་དངོས་པོར་བྱེད་པར་འགྱུར། །དེ་ནས་འབྲུ་མར་གྱི་ཆོ་ག་བཤད་པར་བྱ་སྟེ། པདྨ་ལས་སྐྱེས་པ་དང་། བོ་ལ་ལས་སྐྱེས་པའི་མར་ཁུ་ཉིད་དང་། བཞི་མཉམ་འདི་དག་མཉམ་ཞིང་མཉམ་པར་ལྡན་པ་དང་། ཡུང་བ་དཀར་པོ་མ་ཡིན་པའི་ཚིགས་མ་དང་། བོ་ལའི་ཆུ་དང་
བཅས་པ་དང་། གུ་ཌཱུ་ཙིའི་སྙིང་པོ་བླངས་ནས་ཐམས་ཅད་དུ་བ་ལང་གི་འོ་མས་བྱའོ། །དེ་ནས་ཆ་བཤད་པར་བྱ་སྟེ། ཕྱེ་མ་སྲང་སུམ་ཅུ་རྩ་གཉིས་བླངས་ནས་ཆུ་ཉིས་འགྱུར་དང་། ཇི་སྲིད་ཁམ་ཕོར་བཞི་ཆ་ལུས་པ་དེ་སྲེད་དུ་བསྐོལ་བར་བྱའོ། །བོ་ལ་གསུམ་དང་། ཇི་ལྟར་རྗེས་སུ་
རིམ་པས་ལན་གསུམ་དུ་བསྒྲུབ་པར་བྱའོ། །འབྲུ་མར་བཞི་འགྱུར་གྱི་འོ་མ་དང་། གུ་ཌཱུ་ཅི་ཏ་དེའི་ཕྱེད་དང་། དེའི་ཕྱེད་ཀྱི་ཚིགས་མར་གྱུར་བ་དང་། གོང་དུ་གསུངས་པའི་རྫས་དང་ལྷན་ཅིག་གཅིག་ཏུ་བྱས་ནས་ཞེན་པས་བཙོ་བར་བྱའོ། །གལ་ཏེ་འདི་དེའི་ཚེ་འབྲིང་པོ་ལ་ནི་
གུ་ཌཱུ་ཙི་ཕྱི་རོལ་དུ་གནས་སོ། །མགོ་བྱུག་པ་ལ་ནི་དྲག་པོར་གསུངས་ཏེ། བཙོ་བ་གསུམ་ནི་མཆོག་ཏུ་འདོད་དོ། །སྣར་བླུགས་པ་ལ་ནི་སྲང་བཅུའོ། །བཏུང་བ་ལ་ནི་སྲང་བརྒྱར་གསུངས་སོ། །བྱུག་པ་ལ་ནི་རྣལ་འབྱོར་པ་ཤིན་ཏུ་མཉམ་པར་བཞག་པས་བརྒྱ་རྩ་བརྒྱད་
དུ་བྱའོ། །སྣར་བླུགས་པས་ནི་ལོ་སྟོང་ཐུབ་པར་འགྱུར་རོ། །བཏུང་བ་ལ་ནི་དེ་བཞིན་དུ་ལྔ་བརྒྱའོ། །མགོ་བོ་བྱུག་པ་ལ་ནི་སུམ་བརྒྱའོ། །ངའི་ཚིག་ལ་ཐེ་ཚོམ་མེད་དེ་ལྷའི་གཟུགས་སུ་འགྱུར་བ་དང་། དབྱངས་སྙན་པར་འགྱུར་བ་དང་། རྟག་ཏུ་སྡུག་པར་འགྱུར་ཞིང་བསྟན་བཅོས་
ཐམས་ཅད་རྒྱས་པར་ཤེས་ཤིང་ལུས་གསལ་ཞིང་གཟི་བརྗིད་ཆེ་བ་དང་། བགེགས་ཐམས་ཅད་འཇོམས་པར་བྱེད་དོ། །བཞི་མཉམ་བླངས་ནས་བསྐམ་པར་བྱས་ནས་འོ་མ་དང་ལན་མང་དུ་བཏགས་པར་བྱའོ། །བ་གླང་གི་ལྕི་བའི་མེས་མི་སྣང་བར་བསྲེགས་ནས་འབྲུ་མར་བླངས་ཏེ་འབྲུ་མར་
ནག་པོ་གཉིས་དང་། མར་ཁུ་བཅུ་གཉིས་དང་། འབྲུ་མར་གྱི་ཉིས་འགྱུར་གྱི་འོ་མ་དང་ལྷན་ཅིག་གཅིག་ཏུ་བྱས་ནས་ཆོ་ག་བཞིན་དུ་བྱས་པས་རྣལ་འབྱོར་པས་བཙོ་བར་བྱའོ། །གསེར་བཞི་དང་། འབྲས་བུ་གསུམ་དང་། ནྲྀ་བ་དང་། ཙི་ཏི་དང་། ཏ་ལ་དང་། འདི་རྣམས་ཀྱིས་
เล่ม ๗๙ · หน้า 125a
རིམ་པ་འཕེལ་བའི་ཚིགས་མར་བརྗོད་པ་དང་། མཚན་མོ་དང་། བ་ཀུ་ཙི་དཀར་པོ་དང་། ཨུཏྤ་ལའི་སྙིང་པོ་དང་། ལྕགས་ཀྱི་དྲི་མ་དང་། དྲིའི་རྡོ་དང་། གུ་གུལ་དང་། སརྫ་ར་ས་དང་། ག་བུར་དང་། རི་དགས་ལས་སྐྱེས་པའི་ཆང་དང་། རྫས་འདི་
རྣམས་དང་། མར་ཁུས་བཙོས་པས་ནད་མེད་ཅིང་ཚེ་རིང་བར་འཕེལ་བར་བྱེད་དོ། །མགོ་བོ་ལ་བྱུགས་ན་གཉེར་མ་དང་སྐྲ་དཀར་སེལ་བར་བྱེད་ཅིང་ནད་ཐམས་ཅད་འཇོམས་པར་འགྱུར་བ་ཉིད་དུ་ཐེ་ཚོམ་མེད་དོ། །དེ་ནས་ལུས་ཀྱི་བྱུག་པའི་འབྲུ་མར་གྱི་ཆོ་ག་བཤད་པར་བྱའོ། །
དེ་ཉིད་ཀྱིས་འབྲུ་མར་དེ་འོན་ཀྱང་ཁྲག་སེལ་བར་བྱེད་པ་དང་། གསེར་གྱི་ཤིང་དང་། བརྟན་པར་རབ་ཏུ་སྐྱེས་པ་དང་། སིན་དྷུ་བཱ་རཻ་དང་། ལྷན་ཅིག་གོང་དུ་གསུངས་པའི་ཆོ་གས་སྔགས་པས་ཆུ་བསྒྲུབ་པར་བྱའོ། །དེའི་རྗེས་སུ་ཤྱཱ་མ་དང་། པྲི་ཡ་དང་། ཀེ་ཤ་རི་དང་།
བ་ཀུ་ལ་དང་། རིག་པ་འཛིན་མ་དང་། ནཱ་ག་དང་། འཁོར་ལོ་འཐག་པ་དང་། མཚན་མོ་རྒྱུ་བ་དང་། ཀ་ན་ཀ་དང་། ཤི་ཁི་དང་། པྲ་པར་དང་། བྷུ་ཏཱ་རི་དང་། པ་ར་ཧྲི་ད་དང་། བལླ་བྷི་དང་། གྲོལ་བ་དང་། ལག་པའི་རྩིབས་དང་། མཉྫ་རི་དང་། གསེར་
ཤིང་དང་། བ་ཙཱ་དང་། བ་ཀུ་ཙ་དང་། སྤྲིན་གྱི་ཤིང་དང་། ཡུང་བ་དང་། མཉྫིཥྛ་དང་། ནད་ཀྱི་དབང་པོ། གླང་པོའི་སྟོབས་འདི་དག་གིས་ནི་ནད་ཐམས་ཅད་འཇོམས་པར་བྱེད་དོ། །ཙནྡན་གཉིས་དང་། རི་དགས་ཀྱི་ཆང་དང་། ག་བུར་དང་། ཤ་ལ་ཀི་
དང་། ན་ཁ་དང་། བུ་རམ་དང་མཉམ་པར་ལྡན་པའི་བདུག་པ་ནི་འདོད་པའི་དོན་ཐམས་ཅད་སྒྲུབ་པར་བྱེད་དོ། །གཡན་པ་དང་། ཤུ་བ་དང་། ཟ་འབྲུམ་དང་། ཡན་ལག་ལས་སྐྱེས་པའི་དུག་ཐམས་ཅད་འཇིག་པར་བྱེད་དེ། ལྷ་མོ་ངས་གསུངས་པ་ལ་ཐེ་ཚོམ་མི་
བྱའོ། །ཡུང་བ་དང་། སྲིད་པའི་རྡུལ་དང་། སིན་དུ་བཱ་ར་དང་། ལྷ་ཁང་གི་སོ་ཕག་གི་རྡུལ་དང་། ཀ་ན་ཀའི་འདབ་མའི་ཚིགས་མ་དང་། གླ་རྩི་དང་། བཞི་མཉམ་འདི་དག་མཉམ་པ་དང་། རྐུན་མ་དང་། ཀེྃ་སུ་དང་། ལྷན་ཅིག་པས་ནད་རྣམ་པ་སྣ་ཚོགས་པ་
เล่ม ๗๙ · หน้า 125b
སྲིན་བུ་དང་། མཛེ་དང་། ཡན་ལག་ལས་སྐྱེས་པའི་དུག་ལས་བྱུང་བ་ཡང་འཇིག་པར་བྱེད་ན་ཡང་བཱ་ཀུ་ཅི་དང་ལྷན་ཅིག་པ་ལྟ་སྨོས་ཀྱང་ཅི་དགོས། ལུས་བྱུག་པའི་ཆོ་གའོ། །དེ་ནས་བསྐ་བ་གསུམ་དང་བཞི་མཉམ་ལྷན་ཅིག་ཕྱེ་མར་བྱས་ནས། གླ་རྩི་གྲང་མོ་དང་
ལྷན་ཅིག་ལོ་གཅིག་ཏུ་བརྟུལ་ཞུགས་ཅན་གྱིས་བཏུང་བར་བྱའོ། །དེ་ལྟར་ཁོང་དུ་སོང་བའི་ནད་རྣམ་པ་སྣ་ཚོགས་པ་བད་ཀན་ལ་སོགས་པ་ལྟུང་བར་བྱེད་དོ། །ཞུ་ན་སྔགས་པའི་སྐྲ་དཀར་པོ་ལ་སོགས་པ་འཇིག་པར་བྱེད་དེ། གཞན་དུ་ནི་མ་ཡིན་ནོ། །ཡང་ན་བཞི་
མཉམ་བླངས་ནས་ཞིབ་པར་ཕྱེ་མར་བྱས་ནས་འབྲས་བུ་གསུམ་དང་ལྷན་ཅིག་མར་དང་སྦྲང་རྩིས་བརྫིས་ནས་ཞོ་གཉིས་བཟའ་བར་བྱའོ། །དེ་ནས་གཟུགས་བཟང་པོར་འགྱུར་ཞིང་ལོ་སུམ་བརྒྱ་འཚོ་བར་འགྱུར་རོ། །དེ་ནི་རློན་པས་ཀྱང་ཡིན་མོད་ཀྱི་འོན་ཀྱང་མར་དང་སྦྲང་
རྩི་དང་བྲལ་བའོ། །ཡང་ན་བསྐ་བ་གསུམ་བླངས་ནས་ཕྱེ་མ་ཞིབ་མོར་བྱའོ། །བྱི་ལའི་རྐང་རྗེས་ཙམ་ལས་རིམ་པས་འཕེལ་བས་གླ་རྩི་འབྲིང་པོ་ཤིན་ཏུ་བསིལ་བར་བྱས་ནས་རྣལ་འབྱོར་པས་བདག་གི་ནུས་པ་ཉེ་བར་བརྟགས་ནས་བཏུང་བར་བྱས་ན་རླུང་དང་། བད་ཀན་
འཇོམས་པ་དང་། སྐྲ་དཀར་སེལ་བར་བྱེད་ལ་དྲོན་མོས་ནི་སྐྲ་དཀར་བྱེད་པ་ཡིན་ནོ། །ཡང་ན་འབྲས་བུ་གསུམ་བླངས་ནས་འོ་མ་དང་ཆུར་བཅོ་བར་བྱ་སྟེ་མགོ་བོ་བསྐུ་བར་བྱའོ། །དབང་པོའི་སྟན་དང་། འབྲས་སཱ་ལུ་དམར་པོ་དང་ལྷན་ཅིག་བཏགས་པར་བྱས་ལ་ཁུར་བ་བྱས་ཏེ་
མར་གྱིས་བཙོས་ནས་སྦྲང་རྩི་དང་ལྷན་ཅིག་བཟའ་བར་བྱའོ། །དེ་ནས་ཟླ་བ་གསུམ་ན་ནད་ཐམས་ཅད་དང་། ཁྱད་པར་དུ་སྐྲ་དཀར་འཇོམས་སོ། །ཟླ་བ་དྲུག་ཏུ་སྦྱོར་བ་གོམས་པས་རྣལ་འབྱོར་པ་ཤིན་ཏུ་དབྱངས་སྙན་པར་འགྱུར་བ་དང་། ཚིལ་བུ་དང་ལྡན་པར་འགྱུར་རོ། །
ཟླ་བ་དགུ་ན་ལུས་བཟང་པོ་དང་། ཡིད་ལྟར་མགྱོགས་པ་དང་། ཐོས་པ་འཛིན་པར་འགྱུར་རོ། །ལོ་གཅིག་ན་ནི་གླང་པོའི་སྟོབས་ཉིད་དང་། ལོ་སུམ་བརྒྱ་འཚོ་བར་འགྱུར་རོ། །ཡང་ན་ནཱ་ག་མཱུ་ལ་དང་། བ་ལ་ཤ་དང་། ཀུཥྛ་ཆ་གསུམ་དང་། མཱ་ག་དྷ་བཅུའི་ཆ་གཅིག་
เล่ม ๗๙ · หน้า 126a
དང་ཆ་མཉམ་པའི་ཕྱེ་མ་དང་། བའི་འོ་མ་དང་ཕྱེ་ཞོ་གཉིས་བསྲེས་ནས་ཡང་དག་པར་བརྫིས་ཏེ། འདི་ཉི་མ་རེ་རེ་ལ་རྣལ་འབྱོར་པ་མཁས་པས་བཟའ་བར་བྱའོ། །རྣལ་འབྱོར་པས་ལོ་བརྒྱར་བྲག་སྟོང་པ་ལ་སོགས་པར་གནས་ན་ངེས་པར་ཤིན་ཏུ་ཡོངས་སུ་ཚིམ་པ་
དང་། བཀྲེས་པ་དང་། སྐོམ་པ་ལས་རྣམ་པར་གྲོལ་བར་འགྱུར་བས་སྨན་འདི་དང་ལྡན་པས་བྲག་སྟོང་པ་ལ་སོགས་པ་ལ་གནས་པར་བྱའོ། །སྦྱོར་བ་གཞན་ནི་རྒན་པོ་ལྟ་བུར་དོན་མེད་པའོ། །སྦྱོར་བ་མེད་པས་རྣལ་འབྱོར་པ་ཀུན་རྫོབ་ཀྱི་བདེན་པའི་གནས་བྲག་འབབ་ཆུ་དང་བཅས་
པ་དེའི་གནས་སུ་བསྒོམ་པར་བྱའོ། །དུས་ཀྱི་འཆི་བ་མི་རིག་པར། །གང་ཞིག་རྣལ་འབྱོར་བར་འདོད་པ། །མཁའ་ལ་ཁུ་ཚུར་བསྣུན་པ་དང་། །སྨིག་རྒྱུའི་ཆུ་ནི་འཐུང་བ་དང་། །བཀྲེས་ཕྱིར་ཕུབ་མ་རྡུང་བ་ལྟར། །དེ་ནི་ངལ་བ་དོན་མེད་ཅིང་། །དེ་ཉིད་འབྲས་བུ་འཐོབ་མི་
འགྱུར། །ཡོ་གི་ཤིན་ཏུ་མཉམ་གཞག་པ། །དེ་ལྟར་ཆོ་ག་ང་ཡིས་བསྔགས། །ཡེ་ཤེས་ཐམས་ཅད་འབྱུང་བ་ཞེས་བྱ་བ། ཚེ་རིང་བའི་རིག་པ་སྟེ་བདུན་པ་ལས་རབ་ཏུ་བྱེད་པ་དང་པོའོ།། །།བཅོམ་ལྡན་འདས་བདག་ནི་ཉན་པར་འཚལ། །བཟླས་
སོགས་སྦྱིན་སྲེག་ཇི་ལྟར་ལགས། །ཞི་རྒྱས་དབང་དང་མངོན་སྤྱོད་དང་། །གཏོར་མ་མཆོད་སོགས་ཇི་ལྟར་ལགས། །སྦྱིན་སྲེག་ལ་སོགས་མཚན་ཉིད་ནི། །ཇི་ལྟར་དེ་ཉིད་རྡོ་རྗེ་ཉོན། །དང་པོར་སྔགས་པས་འབུམ་བཟླས་བྱ། །ཕྱི་ནས་ལས་ནི་ཡང་དག་བརྩམ། །གཡས་
བརྐྱང་བ་དང་གཡོན་བརྐྱང་ཉིད། །མཉམ་སྟོབས་བི་ཤཱ་ཁི་ལྃ་ནི། །དེ་ལྟར་བྱས་ནས་རྣལ་འབྱོར་པས། །ཡང་ན་ཕྱི་ནས་རིག་མ་གཞུག །བྲམ་ཟེ་མོ་དང་རྒྱལ་རིགས་ཉིད། །རྗེའུ་རིགས་དེ་བཞིན་དམངས་མོ་ནི། །དེ་ལྟར་ཆོ་ག་སྣ་ཚོགས་ཉིད། །དེ་ཚེ་སྦྱིན་སྲེག་ཡང་
དག་བརྩམ། །ཞི་བ་ཐབ་ཁུང་ཟླུམ་པོ་ཉིད། །ཁྲུ་གང་ཚད་ཙམ་ཐིག་གདབ་བྱ། །བཏབ་ནས་ཁྲུ་ཕྱེད་བརྐོས་ནས་ནི། །འོག་ཏུ་ས་ལ་མཐོ་གང་ཁུང་། །ཙནྡན་དཀར་པོས་ངོས་དག་བྱུག །དེ་ཡི་ཕྱི་རོལ་ཟླུམ་པོར་ས། །སོར་བཞི་པ་ཡི་མུ་རན་ཡིན། །རྒྱས་པའི་
เล่ม ๗๙ · หน้า 126b
ཐབ་ཁུང་གྲུ་བཞི་སྟེ། །ཁྲུ་གཉིས་ཚད་དུ་རྣམ་པར་རྒྱས། །འོག་ཏུ་ཁུང་བུ་ཁྲུ་གང་བ། །མུ་རན་ལ་ནི་སོར་བརྒྱད་ཉིད། །མེ་ཏོག་སེར་པོས་བརྒྱན་པ་དང་། །དྲི་ནི་སེར་པོས་རྗེས་སུ་བྱུག །མངོན་སྤྱོད་ཐབ་ཁུང་གྲུ་གསུམ་པ། །རྒྱར་ནི་སོར་མོ་ཉི་ཤུ་སྟེ། །འོག་གི་འཕང་
དུ་སོར་མོ་བཅུ། །མུ་རན་ལ་ནི་སོར་མོ་གསུམ། །དུར་ཁྲོད་སོལ་བས་བྱུག་པར་བྱ། །དབང་དང་དགུག་པ་ཐུན་མོང་སྟེ། །ཐབ་ཁུང་གཅིག་པའི་མཚན་ཉིད་གསུངས། །དགུག་པ་ཟླ་བ་ཕྱེད་པའི་དབྱིབས། །ཐབ་ཚད་ཁུང་བུ་ཐབ་ཁུང་ཕྱེད། །ཚད་གཟུགས་མུ་རན་བྱས་
ནས་ནི། །དྲི་ནི་དམར་བོས་བྱུག་པར་བྱ། །ཞི་ལ་ཁ་དོག་དཀར་པོ་ཡིན། །རྒྱས་ལ་དེ་བཞིན་སེར་པོ་ཉིད། །དབང་ལ་དེ་བཞིན་དམར་པོ་ཡིན། །ཇི་ལྟར་དབང་ལ་དེ་བཞན་དགུག །ཇི་ལྟར་གསད་ལ་དེ་བཞིན་སྡང་། །ཕྱོགས་ཀྱི་ཆ་ནི་
བཤད་པར་བྱ། །ཤར་གྱི་ཕྱོགས་སུ་ཞི་བ་ཡིན། །ལྷོ་ཡི་ཕྱོགས་སུ་མངོན་སྤྱོད་ཉིད། །ནུབ་ཏུ་དབང་དང་དགུག་པ་སྟེ། །བྱང་དུ་རྒྱས་པའི་ཐབ་ཁུང་ཉིད། །གོང་གི་ལས་ལ་ལྟོས་ནས་ནི། །རྡུལ་ཚོན་རྣམས་ནི་བཤད་པར་བྱ། །ཐབ་ཁུང་བརྐོ་བའི་བྱ་བའོ། །དེ་ནས་
འབྲུ་སྣ་ཚོགས་ཀྱི་ཆོ་ག་བཤད་པར་བྱ་སྟ། འབྲས་སཱ་ལུ་དང་། སོ་བ་དང་། ཏིལ་དཀར་པོ་དང་། ནས་དང་། འབྲས་བུ་དང་། དཱུར་བ་དང་། འོ་མ་དང་། མར་དང་། སྦྲང་རྩི་དང་ལྷན་ཅིག་ཏུ་བདུད་རྩི་ལྔ་དང་བསྲེས་ལ། འོ་མ་ཅན་གྱི་ཤིང་ལྔ་ལས་སྐྱེས་པའི་རློན་པའི་ཤིང་
ཡལ་ག་དང་བཅས་པ་རྩེ་མོའི་ཆར་གནས་པ་འདི་སྦྲང་རྩི་དང་། འོ་མ་དང་། མར་ལ་གཉིས་ཀྱི་རྩེ་མོ་བཏགས་ཏེ་སྲེག་བླུགས་བྱའོ། །ཨུ་དུ་མ་བཱ་ར་དང་། བླ་ཀྵ་ལས་བསྐྱེད་པའི་མེ་རབ་ཏུ་སྦར་ལ་ཞི་བར་འདོད་པས་དུས་གསུམ་དུ་ཁ་ཤར་དུ་བལྟ་ཞིང་གནས་ནས་སྲེག་བླུགས་
བརྒྱ་རྩ་བརྒྱད་བྱའོ། །དེ་ལ་དཀྱིལ་འཁོར་པ་ཡང་ཞི་བར་འགྱུར་རོ། །དེ་ནས་རྒྱས་པར་བྱ་བར་འདོད་ན་ཏིལ་ནག་པོ་དང་། མོན་སྲན་གྲེའུ་དང་། སཱ་ལི་དམར་པོ་དང་། ནས་ལ་སོགས་པ་དང་། དེ་ཉིད་ཀྱིས་ཡམ་ཤིང་དུ་བརྗོད་པ་སྟེ། འོན་ཀྱང་ཁུ་ཚུར་གྱི་ཚད་དང་། ཁྲུ་གང་གི་
เล่ม ๗๙ · หน้า 127a
ཚད་འོ་མ་དང་མར་ལ་བཏགས་ཏེ། གུར་གུམ་གྱི་དྲིའི་ཆུས་གཏོར་ནས་མངར་གསུམ་དང་། ཞོ་དང་། ཟན་མཆོག་དང་། སྦྲང་རྩི་དང་། མར་དང་ལྡན་པ་དང་། མེ་ཏོག་བརྒྱ་བ་དང་། བིལ་བའི་འབྲས་བུ་དང་། པདྨ་དང་། ནཱ་ག་གེ་སར་དང་། འབྲུ་རྣམས་
དང་། །དེ་ནས་ཨུ་དུམ་བཱ་རའི་ཤིང་ལ་མེ་སྦར་ལ་ལས་ཀྱི་རྗེས་སུ་ལྷའི་རྣལ་འབྱོར་དམིགས་ཏེ། ཁ་བྱང་དུ་བལྟ་ཞིང་གནས་ནས་ཐུན་གསུམ་དུ་ཤིན་ཏུ་མཉམ་པར་གཞག་པས་སྟོང་ཕྲག་གཅིག་སྲེག་བླུགས་བྱའོ། །ཉི་མ་བདུན་གང་བ་ན་ནོར་གྱི་བདག་པོ་ཆེན་པོར་འགྱུར་རོ། །
དེ་ནས་དབང་དུ་བྱ་བར་འདོད་ན་ཏིལ་དམར་པོ་དང་། ནག་པོ་དང་། པྲི་ཡང་ཀུ་དང་། ནཱ་ག་གེ་སར་དང་། ཙམ་པ་ཀ་དང་། ཨ་ཤོ་ཀ་དང་། བ་ཀུ་ལ་དང་། པཱ་ཎ་དང་། མེ་ཏོག་བརྒྱ་པ་རྣམས་དྲི་དང་། མར་དང་། སྦྲང་རྩི་དང་སྦྱར་ཞིང་། ལྷའི་ཤིང་དང་། བྷ་ཊ་དང་།
པིཔྤ་ལི་དང་། ཨུ་དུམ་བཱ་ར་ལ་སོགས་པའི་ཤིང་རྣམས་ལས་བྱུང་བ་སོར་བརྒྱད་པ་དང་། ཤལླ་ཀི་དང་། གུ་གུལ་གྱི་ཤིང་དག་དང་། སེང་ལྡེང་ཉིད་དང་། དྲི་བཟང་པོ་ལ་སོགས་པ་དང་། དེ་ནས་སྐྱེས་པ་དང་བུད་མེད་ཀྱི་རྡོ་རྗེའི་ཆུ་དང་ལྷན་ཅིག་བསྲེས་པས་གཟུགས་
དམར་པོར་དམིགས་ནས་ཁ་ནུབ་ཏུ་བལྟས་ཏེ་གང་གི་མིང་ནས་སྲེག་བླུགས་བྱས་པ་དེ་ཞག་བདུན་གྱིས་དབང་དུ་བྱེད་དེ། ཇི་སྲིད་འཚོའི་བར་དུ་སྤོང་བར་མི་འགྱུར་རོ། །དེ་ནས་མངོན་སྤྱོད་བྱ་བར་འདོད་པས་ཏིལ་ནག་པོ་དང་། མོན་སྲན་གྲེའུ་ལ་སོགས་པ་དང་། བྷ་ལ་ཏ་ཀའི་འབྲས་
བུ་དང་། ནག་པོར་གྱུར་པ་དང་། ཡུངས་ཀར་གྱི་མར་ཁུས་བསྐུས་ནས་ཁྲག་དང་བསྲེས་པས་ལྷན་ཅིག་ཤིང་ནག་པོ་འཁྱོར་པོ་ལས་སྐྱེས་པའི་ཚེར་མ་དང་། ཚ་བ་དང་། ཁ་བ་ལ་སོགས་པའི་ཤིང་ཐམས་ཅད་ལས་སྐྱེས་པའི་སོར་བཅུ་པ་དང་། སྐྱེས་པའི་རུས་བ་དང་།
རྣམ་པར་སྣང་མཛད་དང་། བོང་བུའི་སྦངས་དང་། སྤུ་དང་། ཁྱིའི་རྟུག་པ་དང་། སྤུ་དང་། སེན་མོ་དང་བཅས་པར་ཐམས་ཅད་འབྲུ་མར་གྱིས་ཡང་དག་པར་བྱུགས་ནས་རོ་བསྲེགས་པའི་མེ་ལ་མཉམ་པར་གཞག་པས་ཁ་ལྷོར་བལྟས་ཏེ། གང་གི་མིང་ནས་བརྒྱ་རྩ་བརྒྱད་
เล่ม ๗๙ · หน้า 127b
སྲེག་བླུགས་བྱས་ན་ཉི་མ་གསུམ་གྱིས་འཆི་བར་འགྱུར་རོ། །མ་ཤི་ན་མཐར་གཅིག་ཏུ་གནས་ནས་མེའི་ཐབ་ཁུང་གྲུ་གསུམ་བྱས་ཏེ། གོང་དུ་གསུངས་པའི་རྫས་དེ་ཉིད་གདོལ་པའི་མེ་ལ་སྲེག་བླུགས་བྱས་ན་དེ་ཉིད་ཀྱི་རྣལ་འབྱོར་གྱིས་མཐར་བྱེད་ཀྱི་གནས་སུ་ཁྱེར་བར་འགྱུར་ཏེ་འདི་
ལ་ཐེ་ཚོམ་མི་བྱའོ། །ཡང་ན་བསྐྲད་པར་བྱ་བར་འདོད་པས་ཡུངས་ཀར་དང་། ཁྲེ་དང་། མོན་སྲན་གྲེའུ་དང་། རྐང་རྗེས་ཀྱི་རྡུལ་བསྲེས་ནས་ཁྲག་དང་། ཡུངས་མར་གྱིས་བསྐུས་ཏེ་དེ་ཉིད་ལ་བྱའོ། །གསེར་ཤིང་ལ་ཁྭའི་ཚང་དང་ལྷན་ཅིག་སྦྱར་བས་གང་གི་མིང་ནས་སྲེག་
བླུགས་བྱས་ན་དེ་སྐད་ཅིག་ལ་སྐྲོད་པར་བྱེད་དོ། །ཡང་ན་ཁྭའི་ཤིང་དང་། རྔ་མོའི་རྟུག་པ་དང་། ལྷན་ཅིག་ཆང་དང་ལྡན་པར་སྐྲ་གྲོལ་ཞིང་གཅེར་བུར་གྱུར་པས་གང་གི་མིང་གིས་རོ་བསྲེགས་ཀྱི་མེ་ལ་སྲེག་བླུགས་བྱས་ན་དེའི་སྐད་ཅིག་ལ་སྐྲོད་པར་བྱེད་དོ། །ཡང་ན་རེངས་པར་
འདོད་པས་ཉ་དང་ཤ་ལ་སོགས་པའི་རྫས་དང་། བག་ཕྱེ་དང་ལྷན་ཅིག་འབྲུ་དང་། ཁྲག་དང་། སྦྲང་རྩི་བསྐུས་ནས་ཁྭའི་གཤོག་པ་དང་སྦྱར་ཞིང་ཁྭའི་ཁྱིམ་གྱི་ཤིང་ལ་སོགས་པ་དང་། ལྷག་མ་དང་སོ་ཤིང་ལྷན་ཅིག་ཐབ་ཁུང་གྲུ་བཞི་པར་གང་གི་མིང་ནས་སྲེག་བླུགས་བྱས་
ན་དེ་བྱ་བ་ཀུན་ལ་རེངས་པར་བྱེད་དོ། །ཡང་ན་ཡུང་པ་དང་། ལྡོང་རོས་དང་། བ་བླ་དང་། གི་ཝང་དང་ལྷན་ཅིག་ཁ་བྱང་དུ་བལྟས་ཏེ་གནས་ནས་གང་གི་མིང་ནས་སྲེག་བླུགས་བྱས་པ་དེ་རེངས་པར་འགྱུར་རོ། །ཁྱི་དང་ཁྱིམ་བྱའི་ཤ་དང་། །རྔ་མོའི་རྟུག་པ་བྱི་ལའི་ཁྲག་
གིས་བྱུགས་པས་པི་ཅུ་མ་རྔའི་ཤིག་གིས་མེ་སྤར་ལ་གང་གི་གྲོང་གི་མིང་ནས་སྲེག་བླུགས་བྱས་པ་དེ་གྲོང་སྟོར་པར་འགྱུར་རོ། །དམ་ཚིག་ཆེན་པོ་ཆང་གིས་བྱུགས་པས་ཇི་སྲིད་བརྒྱ་རྩ་བརྒྱད་ཀྱི་བར་དུ་ཐུན་གསུམ་གྱི་བར་དུ་སྲེག་བླུགས་བྱས་ན་ཟླ་བ་དྲུག་གིས་ཡུལ་གྱི་བདག་
པོར་འགྱུར་རོ། །ཝའི་ཤའི་སྲེག་རྫས་ཀྱིས་སྲེག་བླུགས་བརྒྱ་བྱས་ན་ཟླ་བ་གསུམ་ལོན་ནས་དབུལ་པོ་སྐད་ཅིག་གིས་འཇིག་པར་བྱེད་དོ། །བ་གླང་གི་ཤ་ཁྲག་གིས་བསྒོས་པས་སྲེག་བླུགས་སྟོང་བྱས་ན་དབང་དུ་བྱེད་དོ། །ཇི་སྲིད་འཚོའི་བར་དུ་ཐེ་ཚོམ་མེད་དོ། །དེ་ཉིད་
เล่ม ๗๙ · หน้า 128a
ཀྱི་ཤ་ཆང་གིས་བྱུགས་ནས་ལག་པ་གཡོན་པས་སྲེག་བླུགས་སྟོང་བྱས་ན་སངས་རྒྱས་ཀྱང་དབང་དུ་བྱེད་ན་དམན་པའི་མི་ལྟ་སྨོས་ཀྱང་ཅི་དགོས། ཡང་ན་ནཱི་ཥྛ་བ་ནྃ་གི་སོ་ཤིང་དང་། དེ་བཞིན་དུ་རང་གི་ལུས་དྲིལ་བ་དང་། ཆང་གིས་བྱུགས་པའི་སྦྱིན་
སྲེག་དག་གིས་དབང་དུ་བྱེད་པར་ཐེ་ཚོམ་མེད་དོ། །ཁྱིམ་གྱི་མེ་ཏོག་ཟོས་ནས་སྐྱུགས་པ་དང་། མིའི་སྐྲ་དང་ལྡན་པའི་སྦྱིན་སྲེག་གིས་རྟག་ཏུ་མཆོག་ཏུ་འགུགས་པར་བྱེད་པ་ཡིན་ནོ། ཁྭའི་གཤོག་པ་ཡུངས་མར་གྱིས་བྱུགས་ནས་དྷ་དུ་རའི་མེ་ལ་གང་གི་མིང་གིས་
སྲེག་བླུགས་བྱས་ན་འཕྲལ་དུ་སྐྲོད་པ་དང་། གསོད་པར་བྱེད་དོ། །ལྷག་པར་གྲོལ་བ་དང་། ཀུཥྨཱ་ཎྡ་དང་། ཁྲེ་དང་། མོན་སྲན་གྲེའུ་དང་། ཥ་ན་དང་། སྐྱུགས་པ་དང་། སྐེ་ཚེ་དང་། །ཁྱིམ་གྱི་མེ་ཏོག་དང་། འདབ་མ་ལྷན་ཅིག་སྦྱིན་སྲེག་བྱས་ན་ཁ་འཆིང་བར་བྱེད་
པ་འདི་ལ་ཐེ་ཚོམ་མེད་དོ། །ཁྱིའི་ཤ་དང་རྡོ་རྗེའི་ཆུ་ལྷན་ཅིག་གང་གི་མིང་ནས་སྲེག་བླུགས་བྱས་ན་དེ་ཉི་མ་བདུན་གྱིས་དབང་དུ་བྱེད་པར་འགྱུར་རོ། །རྟའི་ཤ་དང་ལྷན་ཅིག་རྣམ་པར་སྣང་མཛད་ཀྱིས་སྲེག་བླུགས་བྱས་ན་ཉི་མ་བདུན་གྱིས་མིའི་བདག་པོ་དབང་དུ་བྱེད་དོ། །
གླང་པོའི་ཤ་དང་། ཁུ་བས་ལྷན་ཅིག་སྲེག་བླུགས་བྱས་ན་གྲོང་ཁྱེར་དབང་དུ་བྱེད་དོ། །ཉ་དང་། ཤ་ཆང་དང་ལྷན་ཅིག་ཇི་སྲིད་དུ་སྲེག་བླུགས་བརྒྱ་རྩ་བརྒྱད་བྱས་ན་བུད་མེད་ཐམས་ཅད་དབང་དུ་བྱེད་དོ། །ཡང་ན་ཁྭའི་ཤ་འབའ་ཞིག་གང་གི་མིང་ནས་ཇི་སྲིད་སྟོང་དུ་སྲེག་
བླུགས་བྱས་ན་ཉི་མ་གསུམ་གྱིས་རྡོ་རྗེ་སེམས་དཔའ་ཡང་འབྲོས་ན། ཡང་དམན་པའི་མི་ལྟ་ཅི་སྨོས། ཁྭ་དང་། ཁྲའི་ཤ་གང་གི་མིང་གིས་དྷ་དུ་རའི་ཤིང་གི་མེ་ལ་སྲེག་བླུགས་བྱས་ན་དེ་སྐྲོད་པར་བྱེད་དོ། །ཤ་ཆེན་དང་། བྱ་རྒོད་ཀྱི་ཤ་གང་གི་མིང་གིས་སྲེག་བླུགས་བྱས་
ན་སྨྱོ་བར་འགྱུར་རོ། །དེ་རྣམས་མེ་ལ་སྲེག་བླུགས་བྱས་ན་སོས་པར་འགྱུར་རོ། །དེ་ལྟར་ལས་རྣམས་བྱ་བ་ནི། །ངེས་པར་འགྲུབ་ན་བྱ་བ་ཉིད། །གང་གཞན་དཔྱ་བར་འགྱུར་བ་སྟེ། །གང་ལའང་བྱེ་བ་སྦྱིན་མི་བྱ། །བྱེ་བར་གྱུར་ན་མི་འགྲུབ་ཅིང་། །བདེ་བ་མི་ཡིས་རྙེད་མི་
เล่ม ๗๙ · หน้า 128b
འགྱུར། །དེ་ཕྱིར་སྔགས་པས་གང་ལ་ཡང་། །ལས་རྒྱས་དང་པོར་གང་བྱ་མིན། །གལ་ཏེ་བྱེད་པར་འདོད་ན་ནི། །དེ་ཚེ་གཅིག་པུ་གཉིས་མེད་བྱ། །དེ་ཚེ་སྔགས་པས་ལས་ཀུན་འགྲུབ། །བདུན་པ་ལས་སྦྱིན་སྲེག་གི་ཆོ་ག་སྟེ་རབ་ཏུ་བྱེད་པ་གཉིས་པའོ།། །།
ལྷ་ལགས་ཉན་པར་འཚལ་ལགས་ན། །སྔགས་བཏུའི་ཆོ་ག་ཇི་ལྟར་ལགས། །དེ་རྣམས་དབྱེ་བ་མི་འཚལ་བས། །བདེ་བ་ཆེན་པོས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ལྷ་མོ་ཤེས་རབ་ཆེན་མོ་ཉོན། །དེ་ཡི་སྔགས་ནི་ཁྱོད་ལ་བཤད། །
གྲུ་གསུམ་དཀྱིལ་འཁོར་ཉམས་དགའ་བར། །གསང་བའི་པདྨ་མཱ་མ་ཀཱི། །པདྨ་འདབ་མ་བརྒྱད་བྱས་ནས། །ལྟེ་བ་སྦས་པའི་སྤྱོད་ཡུལ་དུ། །འདོད་པའི་དོན་ཀུན་སྒྲུབ་བྱེད་པ། །དེར་གནས་དཔའ་བོ་བཏུ་བར་བྱ། །ཨ་ལ་སོགས་པའི་རབ་དབྱེ་བས། །སྔགས་ཀྱི་སྡེ་
ཚན་དབང་ཕྱུག་མཆོག །དང་པོ་ཡི་ནི་གཉིས་པ་དང་། །སྟོང་པས་སྟོང་པ་མནན་པ་ཉིད། །བདུན་པ་ཡི་ནི་གསུམ་པ་ལ། །བཅྭ་ལྔ་ཟླ་བ་ཕྱེད་བས་བརྒྱན། །བྱང་ཆུབ་ས་བོན་དེ་ནས་བླངས། །བཅྭ་ལྔ་ཡིས་ནི་རྣམ་པར་མཆོད། །འདི་དག་སྙིང་པོར་ཡང་དག་གསུངས། །
ཉེ་སྙིང་ཁྱོད་ལ་བཤད་པར་བྱ། །བདུན་པ་ཡི་ནི་གཉིས་པ་ནི། །རྡོ་རྗེ་མཁའ་འགྲོ་མ་དང་ལྡན། །ཉིས་འགྱུར་ཨུཥྨ་རྣམས་ཀྱི་ནི། །གསུམ་པ་བླངས་ནས་དྲུག་པ་ཡི། །གཉིས་ལྡན་དབྱངས་ཀྱི་ལྔ་པས་ནི། །སྦྱར་ཞིང་གང་ཞིག་མཐར་གནས་པའི། །གཉིས་པར་
ལྔ་པ་སྟན་དུ་བྱ། །གསུམ་པ་ཡི་ནི་གསུམ་པ་ལ། །ཉི་ཤུ་རྩ་དགུ་པ་ཡི་གདན། །གང་ཞིག་བདུན་པའི་གསུམ་པ་དང་། །ལྔ་པ་ཡི་ནི་དང་པོ་ཉིད། །དབྱངས་ཀྱི་གསུམ་པས་སྦྱར་བར་བྱ། །བརྒྱད་པ་ཡི་ནི་གཉིས་པ་ལ། །བཅུ་གཉིས་པ་ཡིས་སྟན་དུ་བྱ། །སུམ་
ཅུ་རྩ་གཉིས་བླངས་ནས་ནི། །དཀར་མོ་དེ་ལ་སྦྱར་བར་བྱ། །གང་ཞིག་ལྔ་པའི་གསུམ་པ་ལ། །དེ་ཉིད་བཞི་པ་འོག་ཏུ་སྦྱིན། །མཐར་གནས་གསུམ་པ་བླངས་ནས་ནི། །གྷསྨ་རཱི་ཡིས་མཆོག་ཏུ་མཛེས། །གསུམ་པའི་དང་པོའི་ས་བོན་དང་། །ལྔ་པ་ཡི་
เล่ม ๗๙ · หน้า 129a
ཡང་ལྔ་པ་ལ། །ཆོམ་རྐུན་མ་ནི་མཆོག་ཏུ་འདོད། །སངས་རྒྱས་རྣམས་ཀྱི་ཞི་བ་སྐྱེད། །ལས་རྣམས་ཐམས་ཅད་སྒྲུབ་པར་བྱེད། །ཤི་བ་སློང་བར་བྱེད་པར་གསུངས། །རྡོ་རྗེ་དམ་ཚིག་སྐུལ་བར་བྱེད་པ་ཞེས་བྱ་བ་ཡང་བཀའ་སྩལ་པ། ཨོཾ་བཛྲ་བཻ་ལོ་
ཅེ་ནི་སྭཱ་ཧཱ། །གཉིས་པའི་བཞི་པ་ཆུ་མས་བརྒྱན། །དེ་ནས་ཉེ་བའི་སྙིང་པོ་བཀའ་སྩལ་པ། །ཨུཥྤའི་དང་པོའི་ས་བོན་ནི། །མཁའ་སྤྱོད་མ་ཡིས་སྟེང་དུ་བརྒྱན། །གཉིས་པ་ཡི་ནི་དང་པོ་དང་། །བདུན་པ་ཡི་ནི་གཉིས་པ་ལ། །ཆོམ་རྐུན་མ་ཡིས་དེ་བཞིན་སྦྱར། །
བརྒྱད་པ་ཡི་ནི་དང་པོ་ཉིད། །རྡོ་རྗེ་མ་ནི་མཆོག་ཏུ་འདོད། །ཡི་གེ་ཉི་ཤུ་བཟུང་ནས་ནི། །ལྔ་པ་ཡིས་ནི་སྟན་དུ་བྱ། །དཀར་མོ་ཡིས་ནི་མཛེས་པར་གསུངས། །གཉིས་པ་ཡི་ནི་དང་པོ་དང་། །ཉི་ཤུ་རྩ་བདུན་བླངས་ནས་ནི། །དེ་ཉིད་ཆོམ་རྐུན་མ་ཡིས་བརྟག །
གཉིས་པ་ཡི་ནི་བཞི་པ་ལ། །རྡོ་རྗེ་མཁའ་འགྲོ་མ་ཡི་སྟན། །གསུམ་པའི་དང་པོ་ཉིས་འགྱུར་ཉིད། །གང་ཞིག་གཉིས་པའི་བཞི་པ་ནི། །རྡོ་རྗེ་མཁའ་འགྲོ་མ་ཡིས་སྦྱར། །ཡི་གེ་བཅུ་གཅིག་པ་བླངས་ནས། །དབྱངས་ཀྱི་གསུམ་པས་ཕྱེ་བ་ཉིད། །ལྔ་པ་
ཡི་ནི་ལྔ་པ་ལ། །དེ་ཉིད་ལ་ནི་དཀར་མོར་སྦྱར། །གཉིས་པ་ཡི་ནི་བཞི་པ་ལ། །རྡོ་རྗེ་མ་ཡི་སྙིང་པོ་མཆོག །བཅུ་དྲུག་དེ་ནས་བླངས་ནས་ནི། །དེ་བཞིན་ཉི་ཤུ་རྩ་དྲུག་ཉིད། །ཉིས་འགྱུར་དང་ནི་གཉིས་པ་ཡི། །བཞི་པ་དབྱངས་ཀྱི་ལྔ་པས་བརྒྱན། །གང་ཞིག་
བཞི་པའི་དང་པོ་ལ། །དཀར་མོ་ལྷན་ཅིག་སྙོམས་པར་འཇུག །ལྔ་པ་ཡི་ནི་ལྔ་པ་ལ། །དེ་ཉིད་ལ་ནི་དཀར་མོ་སྦྱར། །རྡོ་རྗེ་བསྲུང་བའི་སྦྱོར་བ་ལ། །རྟག་ཏུ་ལས་ནི་རབ་ཏུ་སྒྲུབ། །རྡོ་རྗེ་ཆེན་པོ་འཇིགས་དོན་དུ། །དེ་ཡི་སྟོབས་ནི་བྱེད་པར་བརྗོད། །ཅེས་བཀའ་
སྩལ་ཏོ། །ཨོཾ་ཛྭ་ལ་ཛྭ་ལ་བྷྱོ་ཧཱུྃ་ཕཊ་སྭཱ་ཧཱ། གཉིས་པ་ཡི་ནི་དང་པོ་དང་། །བཞི་པ་ནི་ནི་དང་པོ་ལ། །ཆོམ་རྐུན་མས་ནི་མཛེས་པར་གསུངས། །བདུན་པ་ཡི་ནི་བཞི་པ་ལ། །སྟེང་དུ་དཀར་མོས་བརྒྱན་པ་ཉིད། །གཉིས་པ་ཡ་ནི་དང་པོ་དང་། །བཅུ་གཅིག་པ་ནི་དེ་
เล่ม ๗๙ · หน้า 129b
ནས་གཟུང་། །ཆོམ་རྐུན་མས་ནི་སྤྱི་བོར་མཛེས། །ལྔ་པ་ཡི་ནི་ལྔ་པ་ལ། །དབྱངས་ཀྱི་གསུམ་པས་སྦྱར་བར་བྱ། །གཉིས་པ་ཡི་ནི་དང་པོ་དང་། །གང་ཞིག་བཞི་པའི་དང་པོ་ལ། །ཆོམ་རྐུན་མ་ནི་མཆོག་ཏུ་འདོད། །གཉིས་པ་ཡི་ནི་དང་པོ་དང་། །བཞི་པའི་
དང་པོར་མཁའ་སྤྱོད་མ། །སྤྱི་བོ་རུ་ནི་རྣམ་པར་མཛེས། །གཉིས་པ་ཡི་ནི་དང་པོ་དང་། །བཅུ་གཅིག་པ་ལ་ཆོམ་རྐུན་མ། །ལྷན་ཅིག་ཏུ་ནི་སྙོམས་པར་ཞུགས། །རྟག་ཏུ་ཆོས་ནི་རྒྱས་པའི་སྟོབས། །དེ་བཞིན་མཛོད་ནི་ཆེན་པོར་གནས། །གསུང་གི་རྡོ་རྗེས་གསུངས་
པ་བཞིན། །སྔགས་ཀྱི་བཟླས་པ་བྱེད་པར་འགྱུར། །ཨོཾ་བཛྲ་དྷརྨཱ་ཧྲཱིཿསྭཱ་ཧཱ། དེ་ནས་བཅུ་དྲུག་བླངས་ནས་ནི། །རྡོ་རྗེ་མ་ནི་མཆོག་ཏུ་མཛེས། །མཐར་གནས་པ་ཡི་གཉིས་པ་ཉིད། །དེ་ཉིད་ལ་ནི་ཆོམ་རྐུན་སྦྱར། །དེ་ནས་ལྔ་པ་བླངས་ནས་ནི། །མཁའ་འགྲོ་མ་ནི་
བརྒྱན་པར་བརྗོད། །དེ་ནས་བཅུ་དྲུག་པ་བཟུང་ནས། །ལྔ་པའི་དང་པོ་སྟན་དུ་བྱ། །རྡོ་རྗེ་མ་ནི་དེ་ལ་སྦྱར། །ཡི་གེ་ཉི་ཤུ་བདུན་པ་གཟུང་། །ཆོམ་རྐུན་མ་ནི་མཉམ་པར་བསྒོམ། །གང་ཞིག་ལྔ་པའི་དང་པོ་ལ། །མཁའ་འགྲོ་འོག་གི་ཆ་ལ་སྦྱར། །གང་ཞིག་བདུན་
པའི་གཉིས་པ་ལ། །ཆོམ་རྐུན་སྙིང་པོ་འོད་གསལ་བ། །སངས་རྒྱས་རྡོ་རྗེ་སྡེ་ཆེན་དང་། །སེམས་ཅན་ཁམས་ནི་ཐམས་ཅད་གཅིག །བྲན་ཁོལ་ལྟ་བུར་ཐམས་ཅད་ནི། །ངེས་པར་དབང་དུ་བྱེད་པར་འགྱུར། །དེའི་སྐད་ཅིག་ལ་བཅོམ་ལྡན་འདས་རྡོ་རྗེ་འཛིན་པ་ཆེན་
པོས་བཀའ་སྩལ་ཏོ། །ཨོཾ་ནི་ཐམས་ཅད་གསལ་བར་བྱེད། །མཐར་ནི་སྭཱ་ཧཱ་སྔགས་བཏུ་བྱ། །དེ་བཞིན་གཤེགས་པས་གསུངས་པ་བཞིན། །འདོད་པའི་དངོས་གྲུབ་ཐམས་ཅད་སྟེར། །ཨོཾ་ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲ་ས་ཡ་ཧྲཱ་ས་ཡ། ཀྵོ་བྷ་ཡ་
ཀྵོ་བྷ་ཡ། ཧྲཽཾ་ཧྲཽཾ། ཧྲཿཧྲཿ། ཕཻཾ་ཕཻཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷཀྵ་བྷཀྵ་བ་ས་རུ་དྷི་རཱནྟྲ་མཱ་ལཱ་བ་ལྃ་བི་ནི། གྲྀཧྞ་གྲྀཧྞ་ས་པྟ་པཱ་ཏཱལ་ག་ཏ་བྷུ་ཛངྒ་སརྦྦྃ་པཱ་ཏརྫྫ་ཡ་ཏརྫྫ་ཡ། ཨཱ་ཀཌྜྷྱ་ཨཱ་ཀཌྜྷྱ། ཧྲཱིཾ་ཧྲཱིཾ། ཛྙཽཾ་ཛྷཽཾ། ཀྵྨཱྃ་ཀྵྨཱྃ། ཧཱྃ་ཧཱྃ། ཧཱིཾ་ཧཱིཾ། ཧཱུྃ་ཧཱུྃ། ཀི་ལི་ཀི་ལི།
เล่ม ๗๙ · หน้า 130a
ཤི་ལི་ཤི་ལི། ཙི་ལི་ཙི་ལི། དྷི་ལི་དྷི་ལི། ཧཱུྃ་ཧཱུྃ་ཕཊ་ཕཊ་སྭཱ་ཧཱ། རིག་པའི་རྒྱལ་པོ་ཡི་ནི་སྔགས། །ལས་རྣམས་ཐམས་ཅད་སྒྲུབ་པའོ། །དང་པོར་རྣམ་པར་སྣང་མཛད་སྦྱིན། །ཨུཥྨཱ་རྣམས་ཀྱི་བཞི་པ་ལ། །པུཀྐ་སཱིས་མཛེས་སྟོང་པས་མནན། །མཐར་
ནི་སྭཱ་ཧཱ་སྦྱར་བར་བྱ། །འདི་ནི་འབུམ་དུ་བཟླས་པ་ཡིས། །འགྲོ་བ་རྟག་ཏུ་རེངས་པར་བྱེད། །དང་པོར་ཡིག་འབྲུའི་བདག་པོ་སྦྱིན། །དེ་ནས་དེ་རྗེས་མཁའ་སྤྱོད་མ། །མཐར་ནི་སྭཱ་ཧཱ་སྦྱར་བྱས་པས། །སངས་རྒྱས་རྣམས་ཀྱང་དབང་དུ་བྱེད། །རིག་བྱེད་ཀྱི་ནི་དང་པོ་
སྦྱིན། །གཉིས་པའི་གཉིས་པ་བཟུང་ནས་ནི། །སྟོང་པས་མནན་ཅིང་མཐར་སྭཱ་ཧཱ། །སངས་རྒྱས་ཀྱང་སྐྲོད་ཤེས་རབ་ཅན། །དང་པོར་རྣམ་པར་སྣང་མཛད་སྦྱིན། །གསུམ་པ་ཡི་ནི་གསུམ་པ་ལ། །མ་ནིང་དང་ནི་ཆུ་མས་བརྒྱན། །སྟོང་བཅས་མཐར་ནི་སྭཱ་ཧཱ་
ནི། །སྡང་བར་བྱེད་པ་ཉིད་དུ་བརྗོད། །དང་པོར་ཡིག་འབྲུའི་དབང་ཕྱུག་སྦྱིན། །བདུན་པ་ཡི་ནི་བཞི་པ་ལ། །སྟོང་པ་རྡོ་རྗེ་མཁའ་འགྲོར་ལྡན། །མཐར་ནི་སྭཱ་ཧཱ་མངོན་སྤྱོད་ཉིད། །ཡང་ནི་ཡིག་འབྲུའི་དབང་ཕྱུག་སྦྱིན། །ཧུྃ་ནི་དམར་པོ་འདྲ་བ་ཉིད། །མཐར་ནི་
སྭཱ་ཧཱ་ཐིག་ལེ་མཆོག །དགའ་བཟང་ལ་སོགས་འགྲོ་རྟག་འགུགས། །གཏི་མུག་རིགས་ནི་དང་པོར་སྦྱིན། །གྷུཿནི་ཡང་དག་རབ་ཏུ་སྦྱར། །ཡང་ནི་སྭཱ་ཧཱ་བྱས་ནས་ནི། །ལྷ་དང་མི་ནི་གསོད་པར་བྱེད། །བརྒྱད་པ་གཉིས་ཀྱི་ནང་དུ་ནི། །བརྒྱད་ཀྱི་བརྒྱད་པས་རྣམ་
པར་བརྒྱན། །གཏི་མུག་རིགས་ནི་དང་པོར་སྦྱིན། །ཆ་མེད་མཐར་ནི་སྭཱ་ཧཱ་སྦྱར། །ལས་ཀྱི་ས་བོན་དེ་ནས་གཟུང་། །རྣམ་སྣང་མཐར་ནི་སྭཱ་ཧཱ་སྦྱར། །ཐམས་ཅད་དུ་ནི་སྒོ་སྲུང་ལ། །མ་ནིང་བཞི་ཡི་ས་བོན་དང་། །དེ་བཞིན་དབྱངས་ཀྱི་ལྷག་མ་ཉིད། །རིག་བྱེད་རྣམས་
ཀྱི་དང་པོ་སྦྱིན། །མཐར་ནི་སྭཱ་ཧཱ་གདོན་པར་བྱ། །མེ་ཏོག་མ་དང་བདུག་པ་མ། །དྲི་དང་དེ་བཞིན་མར་མེ་ཉིད། །གླིང་བུ་མ་དང་པ་ཝང་མ། །མུ་ཀུན་ད་དང་རྫ་རྔ་མ། །དེ་ལྟར་ཆོ་ག་སྣ་ཚོགས་ཀྱིས། །ཚོགས་ཀྱི་དཀྱིལ་འཁོར་བརྟག་པར་བྱ། །དེ་ནས་ལས་རྣམས་
เล่ม ๗๙ · หน้า 130b
ཀུན་བྱེད་པའི། །སྒྲོལ་མའི་འབྱུང་བ་བཤད་པར་བྱ། །ཨུཏྤ་ལ་ནི་ཁ་བཞི་དང་། །མཚམས་སུ་རྣམ་པར་གནས་པ་ཡིན། །ཏཱྃ་ནི་གསུམ་གྱིས་མཚན་པ་དང་། །དེ་ཡི་ལྟེ་བར་ཆོ་ག་ཡིས། །ཀུན་ནས་ཟླུམ་པོའི་རྣམ་པར་ནི། །སྔགས་པ་ཡིས་ནི་བྲི་བར་བྱ། །
འདི་ལྟ་སྟེ། ཨོཾ་པྲ་སནྣ་ཏཱ་རེ། ཨ་མྲྀ་ཏ་མུ་ཁི། ཨ་མྲྀ་ཏ་ལོ་ཙ་ནེ། སརྦྦཱ་རྠ་སྭ་དྷ་ནི། སརྦྦ་ས་ཏྭ་བ་ཤངྐ་རི་སྟྲཱི་བཱ་པུ་རུ་ཥོ་བཱ་རཱ་ཛཱ་ནོ་བཱ་བ་ཤྃ་ཀུ་རུ་ཏྃ་སྭཱ་ཧཱ། དེའི་དབུས་སུ་འཁོར་ལོ་རྩིབས་བརྒྱད་པ་ཡི་གེ་དང་ལྡན་པ་བྱ་བ་ཡིན་ནོ། །དེའི་ལྟེ་བ་ལ་ལྔ་པའི་དང་པོ་ཟླ་བ་ཕྱེད་པ་
དང་ཐིག་ལེས་བརྒྱན་པའོ། །དེ་ནས་ཕྲེང་བའི་དབྱིབས་སུ་བསྐོར་ཞིང་མཐར་སྭཱ་ཧཱ་དང་། ཟེའུ་འབྲུ་ལ་ནི་ཧྲཱིཿནང་དུ་ཆུད་པར་བྱའོ། །སྔགས་པས་འཁོར་ལོ་གཉིས་ཆོ་ག་བཞིན་དུ་བྱས་ན་ཉི་མ་བདུན་གྱིས་མིའི་དབང་པོ་ཡང་དབང་དུ་བྱེད་དོ། །ཡང་ན་འཁོར་ལོ་རྩིབས་བཅུ་
པར་པདྨའི་དབུས་སུ་སྔགས་ཀྱི་ཡི་གེ་བཅུའི་རིག་པ་དང་ལྟེ་བ་ལ་བསྒྲུབ་བྱ་ནང་དུ་ཆུད་པར་བྱས་ན་ཇི་སྲིད་འཚོའི་བར་དུ་དབང་དུ་བྱེད་པར་ཐེ་ཚོམ་མི་ཟའོ། །འཁོར་ལོ་རྩིབས་དྲུག་པ་བྲིས་ནས་སྔགས་ཀྱི་ཡི་གེ་དྲུག་རིག་པ་དང་དབུས་སུ་ཧྲཱིཿབ་ཤྃ་ཀུ་རུ་ཧྲཱིཿསྭཱ་ཧཱ་སྦྱར་བར་བྱ་སྟེ། །
བ་གླང་གི་གི་ཝང་དང་། ཨ་ལ་ཀ་ཏ་དང་། ཙན་དན་དམར་པོ་དང་། རང་གི་ཁྲག་ལྷན་ཅིག་པས་གྲོ་ག་ལ་བྲིས་ནས་གང་ཞིག་འཛིན་པར་བྱེད་པས་ལྷ་ལ་སོགས་པའང་དབང་དུ་བྱེད་ན་ཡང་དམན་པའི་མི་ལྟ་ཅི་སྨོས། ཆུའི་དཀྱིལ་འཁོར་གྱི་དབུས་སུ་རྡོ་རྗེ་དཀར་པོ་རྩེ་གསུམ་
པ་གདོང་བཞི་པ་བྲི་བར་བྱའོ། །དེའི་ལྟེ་བ་ལ་བསྒྲུབ་བྱའི་མིང་ནང་དུ་ཆུད་པར་བྱ་སྟེ། ཁམ་ཕོར་གཉིས་སུ་ཆོ་ག་བཞིན་དུ་ཁ་ཊི་ཀ་ཡིས་བྲིས་ན་རེངས་པར་བྱེད་དོ། །འཁོར་ལོ་རྩིབས་བརྒྱད་པོ་པདྨའི་རྣམ་པར་ཀུན་ནས་གྱུར་པ་ལ་ཡི་གེའི་རྣམ་པ་དགོད་པར་བྱ་སྟེ། གཿའི་
ཚོགས་ནང་དུ་ཆུད་པར་བྱའོ། །པདྨའི་ལྟེ་བར་གཿབརྒྱད་ཀྱིས་བརྒྱན་ཏེ་དབུས་སུ་གཿསྭཱ་ཧཱ་གཿབསྒྲུབ་བྱ་ནང་དུ་ཆུད་པར་བྱས་ནས་ཡུང་བའི་ཁུ་བས་རྡོ་བའི་གཏན་པ་ལ་འདི་དག་བྲིས་ནས་ཁས་བུབ་སྟེ་གཞག་པར་བྱས་ན་ཤིན་ཏུ་རེངས་པར་འགྱུར་ཏེ། གཞན་དུ་མ་ཡིན་ནོ། །
เล่ม ๗๙ · หน้า 131a
འཁོར་ལོ་ནི་དེ་ཉིད་དེ། འོན་ཀྱང་ཧཱུྃ་དང་ཕཊ་ནང་དུ་ཆུད་པར་བྱའོ། །དུག་དང་། ཁྲག་དང་། སྐེ་ཚེ་ལྷན་ཅིག་ཏུ་མིའི་རུས་པས་ཐོད་པ་ལ་བྲིས་ཏེ་དུར་ཁྲོད་དུ་གཞག་ན་འཆི་བར་འགྱུར་རོ། །དེ་ཉིད་ཡིན་མོད་ཀྱི་ཨོྃ་ནང་དུ་ཆུད་པར་བྱས་ནས་གུར་གུམ་གྱིས་གྲོ་
ག་ལ་བྲིས་ཏེ་མེ་ཏོག་སེར་པོས་མཆོད་པར་བྱའོ། །ཡང་ན་མཆོད་པ་ལྔ་དང་ལྷན་ཅིག་པས་ཉི་མ་བདུན་གྱིས་རྒྱས་པར་འགྱུར་རོ། །དེ་ཉིད་ཀྱི་ཡི་གེ་དང་སྭཱ་ཧཱ་ནང་དུ་ཆུད་པར་བྱས་ནས་བསྲུང་བར་འགྱུར་རོ། །སྔགས་ཀྱི་ཡི་གེའི་རིག་པ་བཅུ་པོ་དེ་ཉིད་ཨ་ནང་དུ་ཆུད་པར་
བྱས་ནས། ཙནྡན་དཀར་པོས་མིང་བྲིས་ཏེ། ཁམ་ཕོར་ལ་མེ་ཏོག་དཀར་པོ་དྲི་བཟང་པོས་ཇི་ལྟར་ནུས་པས་མཆོད་ཅིང་མཆོད་ནས་ཐུན་གསུམ་དུ་ཆོ་ག་བཞིན་དུ་བརྒྱ་རྩ་བརྒྱད་བཟླས་ན་ཉི་མ་བདུན་གྱིས་ཞི་བར་འགྱུར་རོ། །ཨེའི་དབུས་སུ་ཨཱ་ཆེ་གེ་མོ་ཞེས་བྲི་བར་བྱ་ཞིང་། །དེའི་
སྟེང་དང་། ངོས་དག་དང་། འོག་ཏུ་ཧཱུྃ་དང་། མཚམས་སུ་བྃ་དང་། ཕྱི་རོལ་དུ་རི་མོ་གསུམ་བསྐོར་ནས་བ་ལང་གི་གི་ཝང་གིས་གྲོ་ག་ལ་བྲིས་ཏེ་མར་དང་སྦྲང་རྩིའི་ནང་དུ་གཞག་པར་བྱས་ན་ཉི་མ་བདུན་གྱིས་དབང་དུ་བྱེད་དོ། །འདབ་མ་བཞི་ལ་ཧྲཱིཿདང་ལྡན་ཞིང་
དབུས་སུ་ཧྲཱིཿལྷ་སྦྱིན་ཞེས་བྱ་བ་དང་། ཕྱི་རོལ་དུ་དེ་ནས་ཧཱུྃ་བཞི་བྲི་བར་བྱ་སྟེ། ཙནྡན་དམར་པོས་ཁམ་ཕོར་སོ་མ་བཏང་བ་ལ་མིང་བྲིས་ན་ཁྲོས་པ་ཞི་བར་འགྱུར་ཏེ། འདི་ལ་ཐེ་ཚོམ་མེད་དོ། །གུར་གུམ་དང་། བ་ལང་གི་གི་ཝང་ངམ། ཡང་ན་ཨ་ལ་ཀ་ཏའི་ཁུ་བས་
གྲོག་ལ་འཁོར་ལོ་བྲིས་ནས་གཅིག་འཛིན་པར་བྱེད་ཅིང་འཁོར་ལོ་གཞན་མར་དང་སྦྲང་རྩིའི་ནང་དུ་བཅུག་སྟེ། །གང་ལ་ཁ་བལྟས་པ་དེ་སྡུག་པར་འགྱུར་རོ། །ཐ་དད་པའི་སྔགས་ནི། ཨོཾ་སརྦྦ་མོ་ཧ་ནི་ཏ་རེ་ཏུཏྟ་རེ་ཏུ་རེ་སརྦ་དུཥྚཱ་ནཱྃ་མོ་ཧ་ཡ་མོ་ཧ་ཡ་བྷ་ག་ཝ་ཏི་སརྦྦ་དུཥྚཱ་ནཱྃ་བནྡྷ་བནྡྷ་
ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། གོས་ཀྱི་མཐའ་མ་ལ་མདུད་པ་བྱས་ནས་ལམ་དུ་འགྲོ་བ་ན་ཆོམ་རྐུན་གྱིས་མི་ཚུགས་སོ། །ཨུཏྤ་ལ་ལ་ལན་བདུན་དུ་མངོན་པར་བསྔགས་པ་བྱས་ནས་གང་ལ་བྱིན་པ་དེ་དབང་དུ་འགྱུར་རོ། །ཨུཏྤལ་ལས་མཚན་པའི་འཁོར་ལོའོ། །པདྨ་
เล่ม ๗๙ · หน้า 131b
འདབ་མ་བརྒྱད་པར་གྱུར་པ་ལས་ཧྲཱིཿདང་ཤྲཱི་མཆོག་དང་ལྡན་ཞིང་། ལྟེ་བ་ལ་ཧྲཱིཿལྷ་སྦྱིན་ཤྲཱི་བ་ལང་གི་གི་ཝང་གིས་གྲོ་ག་ལ་བྲིས་ནས་འཛིན་པར་བྱེད་ན་ཐམས་ཅད་དུ་སྐལ་བ་བཟང་པོར་འགྱུར་རོ། །པདྨ་འདབ་མ་བརྒྱད་པ་བྱས་ནས་གཏི་མུག་གི་རིགས་ཀྱི་སྔགས་བཏུ་བར་
བྱ་ཞིང་ཕྱི་རོལ་དུ་རི་མོ་ཡོངས་སུ་ཟླུམ་པོར་བསྐོར་ཏེ། རྡོ་རྗེ་རྩེ་གསུམ་པ་བརྒྱད་ཀྱིས་བསྐོར་ཏེ། དེ་ལྟར་ཆོ་གས་གུར་གུམ་གྱིས་བྲིས་ནས་དཔུང་པ་ལ་བཅིངས་ཏེ་གདགས་པ་བྱས་ན་ཐམས་ཅད་དུ་བསྲུང་བར་འགྱུར་རོ། །དེའི་འཁོར་ལོ་ནི་དེ་ཉིད་དེ། འོན་ཀྱང་རྡོ་རྗེ་དང་བྲལ་
བའོ། །ལྟེ་བའམ་ཡང་ན་ཕྱི་རོལ་དུ་འདི་ལྟ་སྟེ། ཨོྃ་ཧཱུྃ་ཧཱུྃ་བུདྡྷྱ་བུདྡྷྱ། ཁཱ་ད་ཁཱ་དང་། ཚིནྡ་ཚིནྡ། དྷུ་ན་དྷུ་ན། མ་ཐ་མ་ཐ། བྃ་དྷ་བྃ་དྷ། ཨ་མུ་ཀྃ་ཨ་མུ་ཀེ་ན། ས་ཧ་པི་དྭེ་ཥ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྔང་བར་བྱེད་པ་འདི་ནི་རྟ་མགྲིན་གྱིའོ། །མངོན་སྤྱོད་ཀྱི་རྫས་ནི་
མ་ཧེ་དང་། རྟའི་རྨིག་པའི་ནང་དུ་བྲིས་ན་སྐད་ཅིག་གིས་འཕྲོག་པ་དང་། བགྲོད་པར་དཀའ་བ་ལྷན་ཅིག་པ་ཡང་སྡང་བར་བྱེད་ན། ཡང་དམན་པའི་མི་ལྟ་ཅི་སྨོས། མེའི་དཀྱིལ་འཁོར་གཉིས་བྲིས་ནས་སྟེང་དང་འོག་དང་མཚམས་ཟུང་གི་ཆོ་གས། ཧཱུྃ་གཿཧཱུྃ་ཧཱུྃ་གཿཧཱུྃ་
དེ་རྣམས་ནི་སྟེང་དུའོ། །ཧཱུྃ་ཧཱུྃ་ཧཱུྃ་ཕཊ་འོག་གི་ཆ་ལའོ། །ཧཱུྃ་གཿཧཱུྃ་ཧཱུྃ་གཿཧཱུྃ་འདི་དག་ཕྱི་རོལ་གྱི་སྤྱི་བོར་བྲིའོ། །དབུས་སུ་ནི་ཧཱུྃ་གཿཧཱུྃ་ཧཱུྃ་གཿཧཱུྃ་སྟེ། དུག་དང་། ཁྲག་དང་། སྐེ་ཚེ་དང་། དུར་ཁྲོད་ཀྱི་སོལ་བ་དང་། ནིམ་པའི་ལོ་མའི་ཁུ་བ་དང་། རྡོ་རྗེའི་ཆུས་དུར་ཁྲོད་ཀྱི་
རས་སམ། སྨྱོན་པའི་རས་ལ་བྲིས་ནས་སྟོབས་པོ་ཆེའི་སྔགས་ཀྱིས་བསྐོར་ནས་འབར་བའི་མེའི་སྟེང་དུ་གཞག་ན་དགྲ་བོ་རེངས་པར་བྱེད་དོ། །དབང་ཆེན་གྱི་དཀྱིལ་འཁོར་དུ་གནས་པའི་ཨོྃ་གནས་བརྒྱད་དུ་བྲིས་པའི་དབུས་སུ་པདྨ་ངེས་པར་བཞག་ནས་ཨ་བརྒྱད་ཀྱིས་བརྒྱན་ནོ། །
ལྟེ་བའི་ནང་དུ་བསྒྲུབ་བྱ་གནས་པར་བྱས་ལ། ཧཱུྃ་བཞི་ཡིས་སྤྲས་པར་ཁམ་ཕོར་ཁ་སྦྱར་གྱི་ནང་དུ་གནས་པའི་སྤྱི་བོར་རྡོ་རྗེ་འཛིན་པས་མནན་ཅིང་སྐུལ་བར་བྱེད་པའི་སྔགས་ཀྱི་རྐང་པ་བཟླས་ཤིང་བསྒོམས་ནས་རྡོ་རྗེའི་སྐུད་པས་ཀུན་ཏུ་དཀྲིས་ན། འདིས་མི་ཐམས་ཅད་དང་།
เล่ม ๗๙ · หน้า 132a
ལྷ་རྣམས་དང་། སྐུ་གསུམ་ལས་སྐྱེས་པ་རྣམས་རེངས་པར་བྱེད་དོ། །དབང་ཆེན་གྱི་དཀྱིལ་འཁོར་དུ་རྡོ་རྗེ་རྩེ་གསུམ་པ་བརྒྱད་ཀྱིས་མཚན་ཅིང་། དེའི་དབུས་སུ་དཀྱིལ་འཁོར་གྲུ་བཞི་པ་ལ་འདི་ལྟ་སྟེ། ཨོྃ་པཱ་ཏ་པཱ་ཏ་ནི་སྭཱ་ཧཱ། ཤར་དུའོ། །ཨོྃ་ཛམྦྷ་
ཛམྦྷ་ནི་སྭཱ་ཧཱ། །གཡས་སུའོ། །ཨོཾ་མོ་ཧ་མོ་ཧ་ནི་སྭཱ་ཧཱ། །ནུབ་ཏུའོ། ཨོྃ་སྟྃ་བྷ་སྟྃ་བྷ་ནི་སྭཱ་ཧཱ། བྱང་དུའོ། །ཡང་དཀྱིལ་འཁོར་གྲུ་བཞི་པ་དེའི་སྟེང་དུ་དབང་ཆེན་གྱི་དཀྱིལ་འཁོར་གྱི་དབུས་སུ་ཆེ་གེ་མོ་རེངས་པར་མཛོད་ཅིག་ཅེས་བྱ་བ་འདི་ཉིད་ཀྱི་སྔགས་གྲོ་ག་ལ་ཡུང་
བའི་ཁུ་བས་བྲིས་ནས་སྦལ་པའི་ཁར་བཅུག་སྟེ། དེའི་ཁ་མྱོས་བྱེད་ཀྱི་ཚེར་མས་ཕུག་ནས་སྟེང་གི་སྦལ་པའི་ཡ་མགལ་དེ་ཡང་སྤང་ལེབ་ལ་འོག་ཏུ་སྦྱར་ཏེ་གཞག་པར་བྱས་ན་དེའི་སྐད་ཅིག་གིས་ཕ་རོལ་གྱི་དཔུང་རེངས་པར་བྱེད་དོ། །འཁོར་ལོ་ཟླུམ་པོའི་རྣམ་པར་
གྱུར་པ་ལ་རྡོ་རྗེ་རྩེ་ལྔ་པ་མཚམས་སུ་རྣམ་པར་གནས་པའོ། །དེའི་རྭ་དབུས་མའི་སྟེང་གི་མགོ་བོ་ལ་ཧཱུྃ་བཞིའོ། །དེའི་ལྟེ་བ་ལ་ཡང་སྔགས་བྲི་བར་བྱ་བ་ནི་འདི་ལྟ་སྟེ། ཨོཾ་བ་དཱ་ཀྲ་མ་སི། པ་རཱ་ཀྲ་མ་སི། ཨུ་ད་ཡ་མ་སི། ནེ་ར་མ་སི། ཨརྐ་མ་སི། མརྐ་མ་སི།
ཨུར་མ་མ་སི། བ་ནམ་སི། གུལྨ་མ་སི། ཙཱི་བ་ར་མ་སི། མ་ཧཱ་ཙཱི་བ་ར་མ་སི། ཨནྟ་རྡྡཱ་ན་མ་སི་སྭཱ་ཧཱ། ཨོྃ་ནི་ཐམས་ཅད་དུའོ། །དེའི་དབུས་སུ་རྡོ་རྗེ་རྩེ་གསུམ་པ་ཁ་ཕྱོགས་སུ་གནས་པའོ། །ཨོྃ་བཏྟཱ་ལི། ཨོཾ་བ་ར་ལི། ཨོྃ་བཱ་རཱ་ཧ་མུ་ཁི། དེ་བཞིན་དུ་གཡས་
དང་གཡོན་དུའོ། །དེ་ལྟར་རྩེ་མོ་ཐམས་ཅད་ཀྱི་མགོར་རིམ་པས་བྲི་བར་བྱའོ། །ཨོྃ་མཱ་རཱི་ཙྱཻ་ནི་དབང་ལྡན་ལ་སོགས་པའི་མཚམས་སུའོ། །དེ་ལྟར་དབུས་སུ་ནི། ཨོྃ་བ་རཱ་ལི། ཨོྃ་བ་ཏཱ་ལི། ཨོྃ་བཱ་རཱ་ཧ་མུ་ཁི། སརྦྦ་དུཥྚ་པྲ་དུ་ནཱྃ། ཀཱ་ཡ་ཝཱ་ཀ་ཙིཏྟ་མུ་ཁྃ། ཛམྦྷ་ཡ།
སྟམྦྷ་ཡ། དེའི་དབུས་སུ་མཱྃ་མོ། །དེའི་དབུས་སུ་ལྷ་སྦྱིན་རཀྵ་རཀྵའོ། །མཱྃ་གྱི་ཕྱི་རོལ་དུ་ནི། ཨོྃ་མཱ་རཱི་ཙྱཻ་ལྷ་སྦྱིན་ཞེས་བྱའོ། །འཁོར་ལོ་འདི་གྲོ་ག་ལ་གུར་གུམ་གྱིས་བྲིས་ནས་གཟུང་བར་བྱས་ན་ཐམས་ཅད་བསྲུང་བར་འགྱུར་རོ། །སྐྱེས་བུ་ཕྱོགས་ཀྱི་གོས་ཅན་སྐྲ་གྲོལ་བ་དང་།
เล่ม ๗๙ · หน้า 132b
རྣ་བར་རྣ་ཆ་གཉིས་དང་། སྤྱི་གཙུག་གི་སྟེང་དུ་རྡོ་རྗེ་རྩེ་གསུམ་པ་གནས་ཞིང་ཧྃ་དང་ལྡན་པ་དང་། དཔྲལ་བའི་སྟེང་དུ་ལྃ་ལྃ་དང་། གཡས་པའི་ཀོས་ཀོ་ནས་བརྩམས་ཏེ། གང་ཞིག་བདག་གི་སེམས་ལ་སྣུན་པར་བྱེད་པ་དེ་ལ་ལྟུང་བ་དང་། རིག་སྔགས་ཕྱིར་ཟློག་
པར་མཛོད་ཅིག །དེའི་ལྟེ་བ་ལས་སྟེང་དུ་ཁའི་བར་དུ་མཆོད་རྟེན་གྱི་དབྱིབས་སུ་བྲི་བར་བྱའོ། །དེའི་སྟེང་དུ་གནས་པར་རྡོ་རྗེ་རྩེ་ལྔ་པ་བྲི་བར་བྱ་ཞིང་། མཆོད་རྟེན་གྱི་སྙིང་པོ་དང་། གཡས་པ་དང་། བྲང་དང་། གཡོན་པ་དང་། འོག་གི་བར་ཇི་སྙེད་པ་འདིར་གནས་ཏེ། ཡེ་
དྷརྨཱ་ཕྲེང་བའི་དབྱིབས་སུ་བྲི་བར་བྱའོ། །དེའི་མགྲིན་པར་ཧཱུྃ་ཁ་འོག་ཏུ་བལྟས་པའོ། །དེའི་དབུས་སུ་རྡོ་རྗེ་རྩེ་ལྔ་པ་ཁ་སྟེང་དུ་བལྟས་བ་བྲི་ཞིང་ངོས་དག་ཏུ་ཧཱུྃ་བཅུ་གཉིས་སོ། །དེ་ནས་མཆོད་རྟེན་གྱི་བང་རིམ་ལ་དབྱངས་མ་ནིང་དང་བྲལ་བའོ། །སྐྱེས་བུའི་སྙིང་གར་རིག་
སྔགས་ཕྱིར་ཟློག་ཅིང་ལྟུང་བར་བྱེད་པ་གོང་མ་བཞིན་དུ་སྟེ། འོན་ཀྱང་ཚར་དུའོ། །ཡང་བྱིན་པ་དང་། ཕོ་མཚན་དང་། རྟགས་ལ་ཚར་དུའོ། །པུྃ་ཡུྃ་རྃ་ཡན་ལག་བརྒྱད་པའོ། །རྟྃ་རྟྃ་རོལ་པ་དང་བཅས་པའི་དབྱིག་པ་ལའོ། །བྲྃ་རྃ་རྐང་པ་དག་ལའོ། །སྐར་མ་རྒྱལ་
ལ་དུག་དང་། ལན་ཚ་དང་། སྐེ་ཚེ་དང་། ནིམ་པའི་ལོ་མ་དང་། སྨྱོ་བྱེད་ཀྱི་ཁུ་བ་དང་། དུར་ཁྲོད་ཀྱི་སོལ་བ་དང་། ལྷན་ཅིག་པས་སྐྱེས་བུ་འདི་འདྲི་རུ་གཞུག་པར་བྱའོ། །རྡོ་རྗེའི་ལྟེ་བའི་དབུས་སུ། ཙནྡན་དཀར་པོས་ལྷ་སྦྱིན་ནང་དུ་ཆུད་པར་བྱ་ཞིང་། ཙནྡན་དཀར་པོས་རྗེ་
བཙུན་མཆོད་རྟེན་བྲི། །གུར་གུམ་གྱིས་རྡོ་རྗེ་བྲིས་པ་འདི་ཡི་རིག་པ་འཛིན་པར་བྱེད་ན། དེའི་ཐམས་ཅད་དུ་བསྲུང་བ་ཆེན་པོར་འགྱུར་རོ། །རི་རབ་ཟུར་བརྒྱད་པ་རྡོ་རྗེ་རྩེ་གསུམ་པས་མཚན་ཅིང་མཚམས་ཀྱི་ནང་དུ་ནི་ནཱྃ་གི་རྣམ་པ་བྲི་བར་བྱའོ། །ཧཱུྃ་གཉིས་ཀྱིས་བསྐོར་བ་དང་། །
ཨ་ལ་ཀ་ཏཱ་ཀ་པཱ་པ་མྃ་སྃ་གྲྭ་གཉིས་ཀྱི་ནང་དུ་དབང་ལྡན་གྱི་ཕྱོགས་ནས་བརྩམས་ནས་བྲི་བར་བྱ་ཞིང་། ཕྱི་རོལ་དུ་རི་མོ་ཟླུམ་པོས་བསྐོར་བར་བྱའོ། །དེའི་དབུས་སུ་ཚོགས་ཀྱི་བདག་པོ་བྲི་བར་བྱ་སྟེ། གར་གྱི་དབང་ཕྱུག་གི་ཚུལ་དུ་ལ་དུའི་སྣོད་དང་། གཡས་པར་བགྲང་ཕྲེང་
เล่ม ๗๙ · หน้า 133a
དང་། གཡོན་ན་རྡོ་རྗེ་རྩེ་གསུམ་དང་། ལ་ཕུག་ལོ་མ་དང་བཅས་པར་བྱི་བ་ལ་ཞོན་ཞིང་པདྨ་ལ་གནས་པ་དགོད་པར་བྱའོ། །ཧཱུྃ་གཿཧཱུྃ་ཧཱུྃ་གཿགཿཧཱུྃ་བྲྀཥྚི་ཀུ་རུ་ཧཱུྃ་གཿགཿཧཱུྃ། གླང་པོའི་དཔྲལ་བ་དང་། སྙིང་ག་དང་། ཕོ་བ་དང་། ལྟེ་བའི་སྟེང་དུ་བྲི་བར་བྱ་སྟེ།
ཚ་བ་གསུམ་དང་། སྲིན་ལག་གི་ཁྲག་ལྷན་ཅིག་པས་ཁམ་ཕོར་སོ་མ་བཏང་བ་ལ་འདི་བྲིས་ནས་སེང་ལྡེང་གི་མེ་ལ་གདུང་བར་བྱས་ན་ངེས་པར་ཆར་འབབ་པར་འགྱུར་ཏེ། གཞན་དུ་ནི་མ་ཡིན་ནོ། །ལྡོང་རོས་ཀྱིས་དེ་ཉིད་ཀྱི་གདོང་གི་ནང་དུ་བྲིས་ནས་མེ་ལ་གདུངས་ན་སྤྲིན་རེངས་
ཤིང་ཆར་འཆད་པར་འགྱུར་རོ། །འཁོར་ལོ་རྩིབས་བརྒྱད་པ་བྲིས་ནས་གཿབརྒྱད་ཀྱིས་བརྒྱན་ཅིང་དེའི་དབུས་སུ་ཆོ་གས་བསྒྲུབ་བྱ་ནང་དུ་ཆུད་པར་བྱ་སྟེ། དུར་ཁྲོད་ཀྱི་རས་སམ་མཚོན་གྱིས་བསྣུན་པའི་རས་ལ་ལྡོང་རོས་དང་ཡུང་བའི་ཁུ་བས་བྲི་བར་བྱའོ། །སཱ་ལུ་བཏགས་
པ་ལ་ཚོགས་ཀྱི་བདག་པོ་བྱས་ནས་དེའི་སྙིང་གར་འཁོར་ལོ་འདི་བཅུག་སྟེ། ཁམ་ཕོར་ཤིན་ཏུ་ཚོས་པ་ཁ་སྦྱར་དུ་བཞག་ནས་སྐུད་པ་སེར་པོས་དཀྲིས་ཤིང་། མེ་ཏོག་སེར་པོས་མན་ངག་ཇི་ལྟ་བས་མཆོད་པར་བྱའོ། །ལྷ་མོ་དེ་ལྟར་བཤད་པ་ནི་རྒྱལ་པོ་རེངས་པར་བྱེད་པའི་
མཆོག་གོ། །མཱྃ་གི་ནང་དུ་འདི་ཉིད་ཀྱི་སྔགས་བྲི་བར་བྱ་སྟེ། ཨོྃ་བཏྟཱ་ལི། བ་རཱ་ལི། བ་རཱ་ཧ་མུ་ཁི་སརྦྦ་དུཥྚ་པྲ་དུཥྚ་ནཱྃ་མུ་ཁྃ་སྟམྦྷ་ཡ། ཡུང་བའི་ཁུ་བས་སོ་ཕག་གཉིས་ལ་ཡང་དག་པར་བྲིས་ནས་ཁ་སྦྱོར་བྱས་ཏེ་ལེགས་པར་འཁྲུལ་འཁོར་བྱས་ནས་ས་ལ་སྦས་ན། གདུག་
པ་ཐམས་ཅད་རེངས་པར་བྱེད་དོ། །གཞན་དུ་ནི་མ་ཡིན་ནོ། །དེ་ནས་ས་ལ་འཁྲུལ་འཁོར་བྲི་བར་བྱ་སྟེ། བྷ་གའི་ནང་དུ་ལིང་ག་དང་བཅས་པར་དེར་མིང་བྲི་བར་བྱའོ། །གཅིག་པུ་གཉིས་སུ་མེད་པར་བདག་ཉིད་གཅི་བ་བྱས་ན་ཇི་སྲིད་ཉི་མ་བདུན་གྱིས་གང་ཞིག་བུད་མེད་
འདོད་པ་དེ་ཧྲིཿའི་ཞགས་པས་བསྐོར་བའི་ཆོ་གས་འགུགས་པར་བྱེད་དོ། །ཟླ་བའི་དཀྱིལ་འཁོར་གྱི་དབུས་སུ་འཁོར་ལོ་རྩིབས་བརྒྱད་པ་གནས་པ་བྲི་བར་བྱ་སྟེ། རྡོ་རྗེ་དང་། རྒྱལ་མཚན་དང་། དགྲ་སྟ་དང་། རྩེ་གསུམ་པ་དང་། ཞགས་པ་དང་། སྣ་ཚོགས་རྡོ་རྗེ་དང་།
เล่ม ๗๙ · หน้า 133b
ཁ་ཊྭ་ག་དང་། དེ་བཞིན་དུ་ལྕགས་ཀྱུ་ཉིད་དེ་ལྟར་མདོར་བསྡུས་ནས་བྲི་བར་བྱའོ། །དེའི་དབུས་སུ་ཟླ་བའི་དཀྱིལ་འཁོར་གང་བའི་ནང་དུ་ཆེ་གེ་མོ་དང་ཆེ་གེ་མོས་བུ་རྙེད་པར་གྱུར་ཅིག་ཅེས་བྱ་བ་དང་འཁོར་ལོའི་ལྟེ་བར་སྔགས་བྲི་བར་བྱ་སྟེ། འདི་ལྟ་སྟེ། ཨོཾ་མ་ཎི་དྷ་རི་
བཛྲི་ཎི་མ་ཧཱ་པྲ་ཏི་སཱ་རེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་ཟླ་བའི་དཀྱིལ་འཁོར་གྱི་དབུས་སུ་སྔགས་འདི་བྲི་བར་བྱ་སྟེ། ཨོྃ་ཨྀ་མྲ་ཏ་བི་ལོ་ཀི་ནི། གརྦྷ་སཾ་རཀྵ་ཎི་ཨཱ་ཀརྵ་ཎི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྐར་མ་རྒྱལ་ལ་གུར་གུམ་དང་། བ་ལང་གི་གི་ཝང་གིས་གྲོ་ག་ལ་བྲིས་ནས་
འཛིན་པར་བྱེད་ན་བུ་རྙེད་པར་འགྱུར་རོ། །འཁོར་ལོ་བུམ་པའི་དབྱིབས་སུ་གྱུར་པའི་མགྲིན་པ་རིང་པོའི་མགྲིན་པར། ཡཿདེ་ཡཿབ་ཡཿད་ཡཿཏྟ་ཡཿམུ་ཡཿཙྪཱ་ཡཿཊ་ཡཿཡ་ཡཿ དེ་ལྟར་ཆོ་གས་བྲི་བར་བྱ་སྟེ། དབང་ཕྱུག་གི་གནས་ཀྱི་རྒྱལ་མཚན་གྱི་རས་ལ་ཁྭའི་ཁྲག་
གིས་གང་གི་མིང་ནས་མངོན་པར་བྲིས་ནས་ཁྭ་གསོན་པོའི་མགྲིན་པ་ལ་བཏགས་ཏེ། རླུང་གི་ཕྱོགས་སུ་བཏང་ན་མྱུར་དུ་སྐྲོད་པར་བྱེད་དོ། །ཉི་མའི་དཀྱིལ་འཁོར་གྱི་དབུས་སུ་གནས་པར་འཁོར་ལོ་རྩིབས་བརྒྱད་པ་བྲི་བར་བྱ་སྟེ། ཧཱུྃ་གི་དེ་ཁོ་ན་ཉིད་ཀྱི་ས་བོན་སྙིང་པོར་
ཆུད་པར་བྱས་ནས་རྡོ་རྗེས་མཚན་པ་རྣམ་པར་བསམས་ཤིང་ཕྱིས་བསྒྲུབ་བྱ་ནང་དུ་ཆུད་པར་བྱས་ཏེ། གུར་གུམ་དང་། བ་ལང་གི་གི་ཝང་གིས་གྲོ་ག་ལ་ཆོ་ག་བཞིན་དུ་བྲིས་ནས་འཛིན་ན། རྣལ་འབྱོར་པ་དེའི་རྟག་ཏུ་བསྲུང་བར་འགྱུར་རོ། །པདྨ་འདབ་མ་ཉི་ཤུ་རྩ་བཞི་
པར་གྱུར་པ་ཀུན་ཏུ་རི་མོ་གསུམ་བར། ཨོྃ་ཧྲཱིཾཿཀླཱིཾཿ། འདིས་ཆོ་ག་བཞིན་དུ་སྐར་མ་རྒྱལ་ལ་བྲིས་ཏེ། ལག་པས་འཛིན་པས་དེས་རེག་ན་བྲན་བཞིན་དུ་བྱེད་དེ། འཁོར་ལོ་རྫ་རྔའི་དབྱིབས་སུ་གྱུར་པ་རྡོ་རྗེ་དང་པདྨས་མཚན་པ། སྐུ་རྡོ་རྗེ་ལ་སོགས་པ་མདོར་བསྡུས་
ནས་ཕྱི་རོལ་དུ་རི་མོ་གསུམ་གྱིས་བསྐོར་ཏེ། ལས་ཀྱི་རྡོ་རྗེ་རབ་ཏུ་བསྒོམས་པས་དགྲ་ཐམས་ཅད་ངེས་པར་གནོན་ཅིང་། ལས་ཀྱི་ཆོ་ག་མཐོང་བས་སྔགས་ཀྱིས་ལས་ཐམས་ཅད་བྱེད་པར་འགྱུར་རོ། །དེའི་སྔགས་བཀའ་སྩལ་པ། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ།
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- อักษรทิเบตแสดงด้วยฟอนต์ทิเบตที่ติดมากับเครื่องของผู้อ่าน — ถ้าเห็นเป็นกล่องสี่เหลี่ยม แปลว่าเครื่องนี้ยังไม่มีฟอนต์ทิเบต
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด