དཔལ་གདན་བཞི་པའི་རྣམ་པར་བཤད་པའི་རྒྱུད་ཀྱི་རྒྱལ་པོ་ཞེས་བྱ་བ
ชื่อสันสกฤต (อักษรทิเบต ตามตัวบท) ཤྲཱི་ཙ་ཏུ་རྭཱི་ཋ་བི་ཁྱྭ་ཧ་ཏནྟྲ་རཱ་ཛ་ནཱ་མ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๘๐ · หน้า 292a
བཞིན་ལུས་ནི་རང་འདོད་མཚོན་གྱི་གཙོ། །འཕོ་བ་སྦྱང་བའི་ལེའུ་ཞེས་བྱ་སྟེ་བདུན་པའོ།། །།དེ་ནས་གཞན་ཡང་བཤད་བྱ་བ། །འབྱིན་བྱེད་ཚོགས་ནི་དགུ་པ་ཉིད། །ཕྲ་བའི་རྣམ་པར་བཤད་པ་ཉིད། །རླུང་གི་དཀྱིལ་འཁོར་
གྱིས་བསྐོར་བའོ། །བཅུ་གཉིས་དགུ་ཡི་རིམ་པ་ནི། །དགུ་ཡི་སྦྱོར་བ་ལ་རབ་བརྟེན། །འདི་ཡི་དགུ་ཡི་རླུང་ཇི་བཞིན། །རྣམ་ཤེས་རླུང་གི་དཀྱིལ་འཁོར་ལ། །རླུང་གི་དབུས་སུ་མེ་ཡི་དབྱིབས། །མེ་ཡི་དུ་བའི་ཡིག་དེ་བཞིན། །ཨུ་ནི་རེ་ཕར་ཡང་དག་ལྡན། །
སྨྲ་ནི་རྒྱ་མཚོར་བཤད་པའོ། །དེ་བཞིན་ཐིག་ལེ་ཡེ་ཤེས་གནས། །སྒྲ་དང་སྒྲ་ཡིས་བསྒོམ་པའོ། །བཤང་བའི་སྒོ་ནས་དེ་བཞིན་དུ། །སྲིད་པའི་ཉེས་ལས་ཡང་དག་འཕོ། །སྣ་དང་རྣ་བ་མིག་ལས་མི། །མི་རྣམས་ཀྱི་ནི་རྒྱལ་པོར་འགྱུར། །ལྟེ་བའི་ཐིག་ལེ་
དེ་བཞིན་སྟེང་། །གོང་གི་གནས་ནི་ཤེས་པར་བྱ། །སེམས་ཀྱི་རྩ་དང་འདྲ་བ་ཡི། །སྙིང་གར་དེ་བཞིན་སྦྱོང་བའོ། །འཕྱར་བར་རླུང་གི་ས་བོན་ནི། །མཉམ་པའི་གནས་སུ་ཤེས་པར་བྱ། །དེ་ལྟར་ང་ཡིས་མཚན་ཉིད་བཤད། །གཞན་དུ་བླ་མ་སྟོན་པའོ། །སྟེང་
དུ་ཚངས་པའི་སྒོ་འདི་ནི། །མོད་ལ་འཕོ་བའི་མིང་དུ་བཤད། །ཇི་ལྟར་བུང་བ་མེ་ཏོག་བུ་གར་ནི། །རྒྱགས་པས་མྱོས་ནས་སེམས་ནི་ཞུ་བ་ལྟར། །དེ་བཞིན་ཡེ་ཤེས་དབང་ཕྱུག་སྒོར་གནས་པ། །ཨུད་ཏྲན་ཏྲ་ཡི་མནན་པས་འཇིག་པའོ། །ཨེ་མའོ་ཆོས་ནི་མཆོག་གི་
ལམ། །ཨེ་མའོ་འཁོར་བ་གཅོད་བྱེད་པ། །ཨེ་མའོ་གྲོལ་བའི་གོ་འཕང་གནས། །ཨེ་མའོ་ཡེ་ཤེས་ངོ་མཚར་ཆེ། །འཕོ་བ་སྦྱོར་བའི་ལེའུ་ཞེས་བྱ་སྟེ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །སྔོན་དུ་གསུངས་པའི་མཚན་ཉིད་
ལྡན། །དང་པོར་གཟུགས་ནི་སྦྱང་བར་བྱ། །བདག་ཉིད་མདུན་དུ་ཡང་དག་གནས། །བདག་ཉིད་ལྷ་དང་དེ་བཞིན་གཞན། །ཤེས་པ་གཞན་ལ་རྨོངས་པ་རྣམས། །མིང་གི་ཡི་གེ་མཉམ་པོར་དྲང་། །འདི་ཡི་ཡེ་ཤེས་དབང་ཕྱུག་ལྷ། །སྒོང་སྐྱེས་ཀྱི་ནི་
เล่ม ๘๐ · หน้า 292b
དབུས་སུ་ཐིམ། །ཡེ་ཤེས་ལུས་ལ་བསྒོམ་བྱས་པས། །བློ་ལྡན་ལུས་ནི་རྣམ་པར་འཕོ། །སྔོན་དུ་རྔུབ་ཅིང་འབྱིན་པ་ཡིས། །སྔོན་བཞིན་ལྷན་ཅིག་འཕོ་བའོ། །སྡིག་བྲལ་སྤྱོད་པ་མེད་པ་ཉིད། །སྡིག་སྤངས་སྤྱོད་པས་ཡང་དག་གནས། །ཉོན་མོངས་རྒྱ་
མཚོའི་སྡིག་པ་སྦྱོང་། །སྡིག་སྤོང་དེ་བཞིན་རྨོངས་པ་དང་། །སྦྱོར་བ་ཡིས་ནི་སྡིག་པ་སྦྱོང་། །སྤྱོད་མེད་སྡིག་པ་སྦྱོང་བའོ། །རྟག་ཏུ་སྡིག་སྦྱོང་ལམ་ལ་གནས། །སྦྱོར་བའི་ལུས་ནི་སྐྱོན་མེད་པའོ། །དབུགས་ཀྱི་མཐར་ནི་གནས་པ་ཡིས། །འདི་ཡིས་སྟེང་དུ་གོལ་
བར་གནས། །དབུགས་ནི་ལྟེ་བར་གཏོང་བ་ཡིས། །སེམས་ནི་གཟུགས་མེད་སྲིད་པར་རོ། །སྡིག་པ་ཀུན་ནས་མི་གནས་པའོ། །ཉེས་པ་ཀུན་གྱི་གོས་པ་ནི། །འཕོ་བར་སྦྱོར་བ་སྦྱར་བར་གྲོལ། །ཕ་དང་མ་ནི་གསད་བྱ་ཞིང་། །རྒྱལ་པོ་དང་ནི་གཙང་སྦྲ་གཉིས། །
ཡུལ་འཁོར་བཅས་པ་བཅོམ་བྱས་ན། །མི་དེ་དག་པ་ཞེས་སུ་བརྗོད། །དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ཇི་སྲིད་ཡུན་རིང་འཚོ་ཞིང་ཆོས་སྤྱོད་པ། །དེ་སྲིད་དགེ་བའི་རྒྱུན་ནི་འཕེལ་བའོ། །ཇི་ལྟར་བུམ་པ་མཁན་ནི་མཁས་
པ་ཡིས། །ལོ་ཟླས་གནས་ནི་སྣོད་ནི་དུ་མས་འགེངས། །མིག་དང་དབྱིབས་མེད་འཁོར་ལོ་འཇི་བའང་མེད། །རྣམ་ཤེས་ཡེ་ཤེས་རྣམ་པ་ཀུན་དུ་བརྟག །ལུས་ཡང་དག་པར་འཕོ་བའི་ལེའུ་ཞེས་བྱ་སྟེ་དགུ་པའོ།། །།དེ་ནས་གཞན་ཡང་
བཤད་བྱ་བ། །སྦྱོར་བའི་བསྟན་བཅོས་སྒྲུབ་པ་པོས། །རྔུབ་པའི་བདག་ཉིད་དབྱེ་བ་ནི། །སོར་བཞི་ལས་ནི་ནམ་མཁའོ། །ནམ་མཁའ་ལས་ནི་སྐར་མ་དང་། །གོང་བུ་མེ་ཡི་ཕུང་པོ་ཉིད། །མེ་ཡི་དབུས་སུ་ཡི་གེ་ཨ། །ནམ་མཁའ་དང་ནི་ཟླ་བ་འདི། །
དབུས་སུ་བདུད་རྩིའི་ཐིགས་པའོ། །འཁོར་ལོ་ཉི་མའི་དྲ་བ་ཅན། །བདུད་རྩིའི་ཐིགས་པ་རྣམ་པར་འབྱིན། །ས་བོན་འབར་ཞིང་འབར་བ་ཡིས། །དབུས་སུ་བདུད་རྩིའི་ཡི་གེའོ། །དབུས་སུ་ཨ་ཡིག་སྔོན་པོའོ། །འོད་ཟེར་ལྔ་ནི་དེ་བཞིན་ཕྱོགས། །རི་རབ་
เล่ม ๘๐ · หน้า 293a
དབུས་སུ་འབར་བ་ནི། །ཐིག་ལེའི་སྒོ་རུ་སྣང་བའོ། །ཨ་ཡིག་རྣམ་པའི་བདུད་རྩིའི་ཆུ། །ཁ་དོག་གཉིས་པའི་ལྷ་ཉིད་དོ། །ཇི་ལྟར་བུག་པ་སྟོང་པ་ཉིད། །རྟག་ཏུ་སྟོང་པའི་ལྷ་ཉིད་དོ། །སྣ་བུག་ཇི་ལྟར་བཟེད་པ་ཡིས། །ལྕེ་ཡི་ཡང་ནི་བདུད་
རྩིའོ། །ཡི་གེ་གསུམ་ནི་སྦྱར་བར་བྱ། །རྨོངས་པ་མགྲིན་པ་དབྱངས་ཡིག་སྦྱར། །ཨུ་ནི་རྣམ་པ་རིམ་བཞིན་མཆོག །ཀུན་ནས་ཉོན་མོངས་ལྷག་པར་སེལ། །ཧཱུྃ་གི་ཡི་གེ་དབང་ཕྱུག་མཆོག །སྔོན་དུ་པདྨ་མཉམ་པ་ཉིད། །སྒོང་སྐྱེས་སྔོན་དུ་བཟོད་པའོ། །དེའི་
ལྷ་ནི་ལྷག་པར་རྫོགས། །འོད་ཟེར་བྱེ་བ་རྣམ་མང་པོ། །དེ་ཡི་ཡེ་ཤེས་དབང་ཕྱུག་རྒྱལ། །དབུགས་མི་གཡོ་བར་བསྒོམ་པར་བྱ། །སྟོབས་འཇིགས་པ་ཡི་དབྱུག་པ་ཅན། །ཧུྃ་གི་རྣམ་པ་མངའ་བདག་དབང་། །ལྟེ་བར་ཇི་ལྟར་གཙོ་བོ་ཉིད། །ཨེ་ཡི་རྣམ་པ་བརྡ་
ཡི་ལུས། །ཀུན་ནས་དགོད་པ་རྣམ་པར་བཤད། །བདག་ཉིད་ལྷ་དང་ལྷ་གཞན་ནི། །བདག་ཉིད་ལྷ་ནི་མཆོག་ཡིན་ནོ། །བདག་ཉིད་གདན་དུ་གྲགས་པ་ཡིས། །བདག་ཉིད་ལྷ་ནི་མཆོད་པར་བྱ། །བདག་གི་གདན་གྱི་ལེའུ་བྱ་བ་སྟེ་བཅུ་པའོ།། །།དེ་ནས་གཞན་ཡང་
བཤད་བྱ་བ། །འོད་ཟེར་གྱི་ནི་མཚན་ཉིད་དག །རྡོ་རྗེ་ལྕགས་སྒྲོག་གི་ཕྱག་རྒྱས། །ས་ནི་སྦྱང་བར་བྱ་བའོ། །ཧཱུྃ་གི་རྣམ་པས་པདྨ་བསྒྱུར། །ཉི་མའི་དཀྱིལ་འཁོར་གཞི་ལ་ནི། །ཅོད་པན་རབ་ཏུ་དགོད་པར་བྱ། །གལ་ཏེ་བདག་ཉིད་ལྷར་འདོད་པས། །
དབུགས་ལས་ལྷ་ནི་དབྱུང་བར་བྱ། །གཟུགས་རྫོགས་ཡིད་དུ་འོང་བ་ཉིད། །མཆོག་གི་གོ་འཕང་བསྒོམ་པར་བྱ། །གནས་བརྒྱད་སོ་སོ་ལྷ་ལ་ནི། །ཕྱག་རྒྱ་བརྒྱད་ནི་བསྟན་པར་བྱ། །ལས་དང་ལས་ཀྱི་ཁྱད་པར་ལ། །སྔགས་པས་འདི་ཡི་ས་བོན་བཟླས། །
ས་ཡི་རྣམ་བཞི་པ་ཉིད། །དེ་བཞིན་ཀྵ་ཡི་རྣམ་པས་རྒྱས། །དབང་ལ་ཡྃ་གི་ཡི་གེ་ཤིས། །ཧ་ཡི་རྣམ་པ་མངོན་པར་སྤྱོད། །མཆོད་པ་ཆོག་ཀུན་རྫོགས་པ། །གཞན་དུ་བལྟས་ནས་ཤེས་པར་བྱ། །ཕྱིས་ནི་ལས་ལ་རབ་ཏུ་འཇུག །རང་གི་ལུས་ལ་ཐིམ་པར་བྱ། །
เล่ม ๘๐ · หน้า 293b
གཞན་གྱི་གདན་གྱི་ལེའུ་ཞེས་བྱ་བ་སྟེ་བཅུ་གཅིག་པའོ།། །།དེ་ནས་གཞན་ཡང་རབ་བཤད་པ། །སྟོང་ཕྲག་བདུན་ཅུ་རྩ་གཉིས་ཉིད། །ལུས་ཀྱི་རྩར་ནི་རབ་ཏུ་ངེས། །སྟོང་ཕྲག་དགུ་ཡི་གྲངས་ལས་ནི། །བྱེ་བ་བརྒྱ་སོགས་དགའ་བར་གནས། །
སྟོང་པའི་དབྱིབས་ནི་སྔོན་འགྲོ་བས། །བློ་དང་ལྡན་པས་ས་བོན་བསྐྲུན། །ཟག་པའི་ལུས་ནི་བཅོམ་ནས་ཀྱང་། །དེ་ཡི་སྙིང་གར་པདྨ་ཉིད། །སྒོང་སྐྱེས་སྟོང་པ་ཡི་ནི་གཞི། །དེ་ལྟར་གནས་ལ་མཉམ་སྦྱོར་བས། །དེ་ཡི་གནས་སུ་ཤེས་པར་བྱ། །ཉི་མ་འཆར་བའི་
འོད་ཟེར་གྱིས། །ཕྲ་རབ་རྡུལ་བཞིན་གནས་པ་ཉིད། །པདྨའི་རྩ་ནི་སོ་སོར་བསྡམ། །དེ་བཞིན་འོད་ཟེར་འབར་བ་དང་། །ཀུན་ཏུ་རྫོགས་པའི་ལུས་པོ་འབྱུང་། །ཀུན་ཏུ་རྫོགས་པ་ལྷ་ཡི་སྐུ། །རྣལ་འབྱོར་པ་ཡི་ཀུན་དུ་བལྟ། །འདོད་ཁམས་སྲིད་པའི་གཟུགས་ཅན་སོགས། །
རྒྱུན་དུ་རྣལ་འབྱོར་ལ་བརྟེན་པས། །རྟེན་གྱི་ཡེ་ཤེས་དེས་མཐོང་ངོ་། །རླུང་གི་དཀྱིལ་འཁོར་དབུས་གནས་པར། །མེ་ཡི་དཀྱིལ་འཁོར་འདྲ་བའོ། །མེ་ཡི་དཀྱིལ་འཁོར་དབུས་གནས་པར། །ཉི་མའི་དཀྱིལ་འཁོར་འདྲ་བའོ། །ཉི་མའི་དཀྱིལ་འཁོར་དབུས་གནས་པར། །
ཟླ་བའི་དཀྱིལ་འཁོར་མཚུངས་པའོ། །དེ་དབུས་ཇི་སྐད་གསུངས་པ་ཡི། །སྦྱོར་བའི་གདན་ཞེས་བྱ་བའི་མིང་། །དངོས་པོ་མི་གཡོ་བར་བསྒོམས་པས། །ཉོན་མོངས་སྲིད་པའི་རྒྱ་མཚོ་ཟད། །ཡེ་ཤེས་ཉོན་མོངས་ཀྱིས་བསྒྲིབས་པས། །དེ་ཡི་ཡེ་ཤེས་དེ་དབང་ཕྱུག །
ཇི་ལྟར་བྱིས་པ་ཕ་མའི་གནས་སུ་རྩེ་བ་ནི། །ཚེག་ཉིད་དང་ནི་ལུས་ནི་འབར་ཞིང་གཡོ་བ་ཡིས། །ཕྱི་ནས་འདི་ཡི་ཡེ་ཤེས་དེ་ནི་ཤིན་ཏུ་བསྒྲིམ། །དེ་ལྟར་རྣལ་འབྱོར་བླ་མས་བསྟན་པ་བདེ་ཡང་། །སྦྱོར་བའི་གདན་གྱི་ལེའུ་ཞེས་བྱ་བ་སྟེ་བཅུ་གཉིས་པའོ།། །།
དེ་ནས་གཞན་ཡང་བཤད་བྱ་བ། །སྦྱོར་བ་མཆོག་ནི་མཉམ་བཤད་པ། །རང་བཞིན་མེད་པ་བྱ་བའི་ཚིག །ལྷག་པའི་གནས་སུ་ལུས་བྲལ་བ། །ཕྲ་བའི་དངོས་པོ་གོས་པ་མེད། །རྒྱས་པའི་སྒོ་ནི་བསྡམ་པར་བྱ། །དེ་བཞིན་མཆོད་རྟེན་དབང་ཕྱུག་གོ། །ཆུ་མིན་ནས་ནི་
เล่ม ๘๐ · หน้า 294a
གྱེན་དུ་དབུགས། །དེ་བཞིན་ལྟོ་བ་རླུང་གིས་གང་། །ཡེ་ཤེས་ཐིག་ལེ་གནས་ནས་གནས། །རྣམ་པར་ཤེས་པ་ངེས་པར་ཐིམ། །འཇིག་པ་མེད་ཅིང་འཚེ་མེད་པར། །མཉམ་པར་གཞག་པའི་ངོ་བོས་སྒོམ། །རླུང་གི་དཀྱིལ་འཁོར་རྔུབས་པ་ཡིས་
དབུས་སུ་ཡེ་ཤེས་སྐྱོན་མེད་པའོ། །བླ་མས་བཤད་པའི་ལམ་གྱིས་ནི། །རྟག་ཏུ་ངེས་པར་བལྟ་བའོ། །ཇི་ལྟར་བུ་མོ་གཞོན་ནུ་གཏམ་གྱིས་རྨོངས་ནས་སུ། །གཉི་ག་འཐམ་པ་སྲད་ནས་གཏམ་གྱིས་སྨྲས་པ་དང་། །ལམ་ནི་ཇི་ལྟར་བསྟན་ཀྱང་བཟུང་པར་མི་ནུས་པ། །
ལྟར་རྣལ་འབྱོར་བ་ནི་ལམ་ངན་བསྟན་པ་བཞིན། །གསང་བའི་གདན་གྱི་ལེའུ་ཞེས་བྱ་བ་སྟེ་བཅུ་གསུམ་པའོ།། །།དེ་ནས་གཞན་ཡང་བཤད་བྱ་བ། །མ་བསྒྲལ་བ་རྣམས་བསྒྲལ་བར་བྱ། །མ་གྲོལ་བ་རྣམས་བདག་གིས་དགྲོལ། །དེ་ལྟར་རྗེས་སུ་
བརྩེ་བའི་ཕྱིར། །བདག་གི་སྦྱོར་བའི་བསམ་གཏན་བྱ། །ལུས་ནི་རྣམ་པ་གསུམ་ཉིད་དང་། །ངག་གི་ཡང་ནི་རྣམ་པ་བཞི། །ཡིད་ཀྱི་རྣམ་པ་གསུམ་ཉིད་ནི། །ལུས་ཀྱིས་བསྲུང་ཞིང་རབ་ཏུ་བསྡམ། །གཉིས་ཀྱི་གནས་ནི་མངོན་པར་སྤང་། །ཡེ་ཤེས་ཅན་གྱིས་ཐར་
པ་བསྟེན། །སྐད་ཅིག་ལོངས་སྤྱོད་དེ་བཞིན་སྡུག །གཉིས་མེད་ལྷན་ཅིག་བསྟན་པར་བྱ། །ཚེ་འདི་ཉིད་ལ་སེམས་ཅན་རྣམས། །སྐད་ཅིག་ཕུན་ཚོགས་སྐད་ཅིག་རྐུད། །དེ་བཞིན་རྨོངས་པའི་ལོངས་སྤྱོད་ནི། །རྣལ་འབྱོར་པ་ཡིས་ལྟོས་མི་བྱ། །དེ་ཕྱིར་ཉེས་པ་
ཡི་ནི་གནས། །འགྲོ་བའི་ཉེས་པ་སྲིད་པའི་དངོས། །ལོངས་སྤྱོད་ལྷག་པའི་གནས་གཅིག་གི། །འབྲས་བུ་འདོད་པ་གོ་བཟློག་པའོ། །སེམས་ཅན་སྦྱིན་ལ་སྲེད་པ་ཡི། །ལོངས་སྤྱོད་ཀྱི་ནི་གནས་སུ་བརྗོད། །དེ་ཕྱིར་གཉིས་པའི་ལམ་སྤངས་ལ། །རྣལ་འབྱོར་
བ་ཡིས་དེ་བཞིན་དབུས། །སྦྱོར་བའི་ཆོས་ནི་མཉམ་དམིགས་པས། །སྤྱོད་པའི་ཆོས་ཞི་སྐྱོན་མེད་པའོ། །བདག་མེད་ལུས་ནི་ཡང་དག་གནས། །བདག་མེད་ལ་ནི་མཉམ་པར་བརྟེན། །བསླབ་བྱ་རྟོགས་པའི་ལེའུ་ཞེས་བྱ་བ་སྟེ་བཅུ་བཞི་པའོ།། །།དེ་ནས་གཞན་ཡང་
เล่ม ๘๐ · หน้า 294b
བཤད་བྱ་བ། །སྙིང་གར་ཟླ་བ་གཞག་བྱས་ལ། །དེ་དབུས་བདུད་རྩི་ཡི་གེ་ནི། །རྣམ་པ་ཀུན་ཏུ་བདུད་རྩི་སྔགས། །འོད་ཟེར་འབར་བ་བསྒོམ་པར་བྱ། །ཞི་བའི་གནས་སུ་སྦྱར་བ་ཡིས། །རྣལ་འབྱོར་པར་ནི་ཡོངས་སུ་གྲགས། །ཇི་ལྟར་དེ་ཡི་ཟླ་བ་ཉིད། །ཅི་ཙའི་ཡི་གེས་རྣམ་པར་
བརྒྱན། །གསེར་གྱི་མདོག་ལྟར་ཡིད་འོང་གཟུགས། །འོད་ཟེར་སྣ་ཚོགས་བསྒོམ་པ་ཡིས། །དོན་འདོད་པ་ཡི་རྣལ་འབྱོར་པས། །དེ་ལྟར་སངས་རྒྱས་སྦྱོར་བའོ། །ཧཱུྃ་གི་རྣམ་པ་དབང་གི་དངོས། །ཉི་མའི་དཀྱིལ་འཁོར་ལ་བརྟེན་པ། །འོད་ཟེར་དུ་མའི་ཆོ་ག་ཉིད། །དབང་
ཉིད་དུ་ནི་ཡོངས་སུ་གྲགས། །རླུང་གི་དཀྱིལ་འཁོར་དབུས་སུ་ནི། །རླུང་གི་དཀྱིལ་འཁོར་མཉམ་པའི་གཞི། །ཇི་བཞིན་འོད་ཟེར་སྔོན་པོ་འབར། །མངོན་པར་སྤྱོད་པར་རབ་ཏུ་གྲགས། །ལས་ཀྱི་ལེའུ་ཞེས་བྱ་སྟེ་བཅྭ་ལྔ་པའོ།། །།དེ་ནས་གཞན་ཡང་བཤད་བྱ་བ། །སྦྱོར་
པའི་ཟས་སྨན་ཞེས་བྱ་ཡོད། །འདབ་མ་འོ་མ་འཛག་པ་དང་། །དེ་བཞིན་མེ་ཏོག་ཨ་ཛ་ག། །དྲི་ནི་དྲི་ཞིམ་རྣམ་པར་འབྱེད། །མདོག་ནི་ལྗང་དང་སེར་བ་ཉིད། །རྩ་བ་གཅིག་གི་དབང་ཉིད་དང་། །ཇི་ལྟར་མེ་བཞིན་འཚེར་བའོ། །བདུད་རྩིའི་ཡི་གེ་སྒོམ་པ་ཡིས། མཆོད་དང་བཟླས་
པའི་ཚ་གར་སྦྱར། །མར་དང་སྦྲང་རྩི་མཉམ་པའི་ཆར། །སྲང་ནི་རེ་རེ་བཟའ་བ་ཉིད། །བརྒྱ་དང་དེ་བཞིན་བརྒྱད་ཅུ་ཉིད། །མཁས་པ་ཡིས་ནི་བཟའ་བར་བྱ། །རྣལ་འབྱོར་པ་ཡིས་ལོ་བརྒྱ་རུ། །དབེན་པའི་རི་ལ་གནས་ན་ནི། །ཡེ་ཤེས་ཅན་གྱིས་ཡེ་ཤེས་ལུས། །ངེས་པར་ཡོངས་
སུ་རྒྱས་པར་འགྱུར། །དབང་པོ་རྣམས་ཀྱི་སྲེད་པ་དང་། །བཀྲེས་པ་ལ་སོགས་མེད་པར་འགྱུར། །གནས་ནི་ངེས་པ་ཉིད་ཀྱི་མཆོག །རྩ་བ་རྣལ་འབྱོར་སྦྱོར་བར་བཅས། །དེ་ལྟར་ཐོས་པའི་བདག་ཉིད་ཆེ། །སྦྱོར་བའི་བསྟན་བཅོས་སྐྱོན་མེད་པའོ། །ཐ་མལ་འགྲོ་བར་ངེས་པ་
ནི། །བདེ་བར་གཤེགས་པའི་གོ་འཕང་འཛིན། །དེ་ནི་ཡང་སོས་རྣལ་འབྱོར་པ། །ཡེ་ཤེས་ཅན་གྱིས་ཡེ་ཤེས་རྟོག །ལྔ་པའི་ལྔ་པ་ཞེས་བྱ་བའི་ལེའུ་སྟེ་བཅུ་དྲུག་པ་རྫོགས་སོ།། །།མཁའ་འགྲོ་མ་ལ་ཕྱག་འཚལ་ལོ། །དཔལ་ལྡན་ཤེས་རབ་དབང་པོ་
เล่ม ๘๐ · หน้า 295a
སྦས་པ་ཉི་མའི་འོད་ཀྱིས་འཇིག་རྟེན་ཁམས་སུ་སྣང་བར་མཛད། །དངོས་པོ་དུ་མའི་ཁྱད་པར་བསགས་པའི་རབ་རིབ་གང་གི་མཐུ་ཡིས་འཇིག་མཛད་པ། །རྟག་ཏུ་ཀུན་ནས་རྔུབས་པའི་ང་རྒྱལ་མི་མཐུན་དགྲ་ནི་དུས་དང་དུས་སུ་གཡུལ་འགྱེད་པའོ། །ཆགས་མེད་ཡེ་ཤེས་རི་བོ་
མཉམ་ཉིད་མཉམ་པའི་ས་བོན་ཆེན་པོ་གཅིག་གིས་མཛད། །ཧཱུྃ་གི་རྣམ་པ་འབྱིན་བྱེད་དངོས། །ཧཱུྃ་གི་རྣམ་པ་མཆོག་གི་ལྷ། །ཧཱུྃ་གི་རྣམ་པ་སྟོང་གྱུར་པ། །ཡི་གེ་ཧཱུྃ་ལ་ཕྱག་འཚལ་བསྟོད། །ཡི་གེ་བརྒྱད་ཀྱིས་ངོ་བོ་ཉིད། །སྤྱོད་བཅས་མི་སྤྱོད་གསང་པ་དང་། །ཆུ་དང་མེ་
དང་དེ་བཞིན་རླུང་། །ས་ནི་མིག་གི་ཡི་གེའོ། །སྒོ་བཞི་དང་ནི་ཕུང་པོ་བཞི། །སྒོང་སྐྱེས་ཛ་ལར་གནས་པ་ཉིད། །བཞི་བོ་ཉོན་མོངས་མིང་དང་ནི། །ཡི་གེ་བཞི་པ་དེ་བཞིན་དུ། །རྨོངས་པས་ས་དང་ཉོན་མོངས་དང་། །སྔོན་དུ་ཕྱུགས་ན་མཉམ་པ་དང་། །ཆུ་ཤིང་མེ་ཏོག་པདྨ་
ནི། །འདི་ཡིས་སྟོང་སྐྱེས་སྟན་ཉིད་དོ། །བ་ལང་རྨིག་པའི་སྟེང་དུ་ནི། །བདུད་རྩི་བརྒྱན་ཀྱིས་རྣམ་པར་དབྱེ། །ཤེལ་བཞིན་དུ་ནི་དག་པ་ཡི། །སྙིང་པོ་ཡི་ནི་སྙིང་པོའི་མཆོག །ལྕེ་ལ་ཆུ་ནི་འདི་ཉིད་དང་། །ནམ་མཁའ་རྣ་བ་སྣ་དག་ལའོ། །ས་ནི་མིག་ལ་སྦྱར་བྱ་སྟེ།།
ཚངས་པར་མེ་ནི་དེ་བཞིན་འབར། །རྨོངས་པ་ཡིས་ནི་མགྲིན་པར་རོ། །གཡོ་བའི་སྙིང་ལ་གནས་པ་དང་། །ཐམས་ཅད་ཉོན་མོངས་བྲང་དང་ནི། །ཕྱུགས་ནི་ལྟེ་བའི་རྩ་བར་རོ། །ཡན་ལག་བརྒྱད་ལ་དགོད་པ་ཡིས། །འདི་ཡིས་ལྷ་ཉིད་ཡང་ངག་ཤེས། །ཡི་གེ་
བརྒྱད་ཀྱི་སྔགས་འདི་ནི། །ཕྱག་རྒྱ་བརྒྱད་དུ་རབ་ཏུ་གྲགས། །དཀར་དང་སེར་དང་དེ་བཞིན་དམར། །གནག་ཅིང་འབར་བའི་ལས་ལ་ནི། །ལས་རྣམས་བཞི་ལ་ལྷ་མོ་ཡིས། །མཁས་པས་འབུམ་ཕྲག་གསུམ་དུ་བཟླས། །ཡེ་ཤེས་དབང་ཕྱུག་སྙིང་པོ་ཉིད། །
མཆོག་ཏུ་རྟག་ཅིང་ཞི་བ་དང་། །ཕྲ་ཞིང་རགས་པའི་འགྲོ་བ་ཀུན། །ལས་དང་ལས་ཀྱི་རྣམ་པར་གྲོལ། །ཐམས་ཅད་ཆུ་ཡི་དབྱིབས་དང་ནི། །མཉམ་པར་འཇིག་བྱེད་མེ་དང་ཡང་། །ཇི་ལྟར་རྟག་པ་རླུང་དག་དང་། །དད་པའི་དོན་དངས་དབང་པོ། །ལྷག་མས་
เล่ม ๘๐ · หน้า 295b
བཞིན་བརྩེགས་པ་ནི། །བཞི་པ་ཡི་གེ་དྲུག་པའོ། །འགྲོ་བའི་དོན་ཕྱིར་ཡི་གེ་བརྒྱད། །ལྷ་བརྒྱད་དུ་ནི་ཡོངས་སུ་གྲགས། །མཉམ་གཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་ཚོམ་མེད། །བ་དན་གསུམ་པའི་ཕྱག་རྒྱ་ཡིས། །སྔོན་དུ་རེག་ཅིང་རེག་པ་
ཉིད། །འཇིག་རྟེན་འདིར་ན་བདེ་བ་དང་། །རྟག་ཏུ་མཆོད་པ་རྙེད་པར་འགྱུར། །འཆི་བའི་དུས་སུ་ཡེ་ཤེས་ནི། །གཟུགས་མེད་སྲིད་པར་རབ་ཏུ་གནས། །བདག་གི་དེ་ཉིད་མནན་པ་ཡིས། །ཇི་ལྟར་སྔགས་འདི་འགྲུབ་པར་འགྱུར། །དེ་ཕྱིར་ནན་ཏན་ཐམས་ཅད་ཀྱིས། །སྦྱོར་
པའི་བསྟན་བཅོས་རྟོགས་པར་བྱ། །དྲི་ཞིམ་རབ་གྲགས་མེ་ཏོག་ཀུན་ནས་གནས་པ་དང་། །ནག་པོའི་ཨ་ཀ་རུ་དང་གུ་གུལ་མར་མེ་དང་། །གཉིས་མེད་གཏོར་མ་གཅིག་གིས་ཡིད་ནི་ལྡན་པ་ཡིས། །ལྷ་མོ་མ་མོ་རྣམ་པ་ཀུན་ནས་རབ་ཏུ་མཆོད། །ཡི་གེ་བརྒྱད་པའི་ལེའུ་ཞེས་བྱ་སྟེ་དང་
པོའོ།། །།དེ་ནས་གསང་བའི་ཡན་ལག་གི། །ཐིག་ལེ་ལ་ནི་བདག་ཕྱག་འཚལ། །ཁམས་གསུམ་སྐྱེས་པ་ཟད་བྱས་ནས། །ཡེ་ཤེས་དངོས་པོ་གནས་པ་བཞིན། །ལྷ་ཡི་དངོས་པོ་དབྱེར་མེད་པས། །སྟེང་དང་འོག་དང་དབུས་སུ་ནི། །ཐམས་ཅད་ཀུན་ནས་སྟོང་པ་ཉིད། །རི་རབ་གླིང་གཞན་
བདེ་བྱས་ནས། །མཉམ་ཉིད་སྦྱོར་བ་ཀུན་དུ་བསམ། །ཐམས་ཅད་སྡེམ་པའི་དབྱེ་བ་ཡིས། །དེ་ཡིས་མེ་ཏོག་ཐིག་ལེ་ཡི། །ཐིག་ལེའི་དབུས་སུ་གསལ་བའོ། །ཡེ་ཤེས་རྔུལ་ནི་རྣམ་པར་ཐིམ། །ཡེ་ཤེས་བློ་དང་ལྡན་པས་ཤེས། །ཁ་དོག་མེད་ཅིང་མཚོན་ཀུན་དངོས། །གཟུགས་མེད་
ཡེ་ཤེས་གཟུགས་བཞིན་ནོ། །རིང་བ་མ་ཡིན་ཐུང་བ་མིན། །མི་ལྡན་པ་དང་ལྡན་པ་ཉིད། །གཟུགས་དང་སྟོང་པའི་དེ་བཞིན་དབུས། །ལྷན་ཅིག་ཡེ་ཤེས་གཟུང་བར་བྱ། །ཉོན་མོངས་དེ་བཞིན་མུན་པ་ནི། །རྣམ་ཤེས་ལྷན་ཅིག་སྣང་བའོ། །ཡེ་ཤེས་རྡོ་རྗེ་བཅོམ་བྱས་ནས། །སྣང་བའི་
དངོས་གྲུབ་ཐོབ་པར་འགྱུར། །རླུང་གི་དཀྱིལ་འཁོར་དབུས་སུ་ནི། མེ་ཡི་དཀྱིལ་འཁོར་འདྲ་བའོ། །མེ་ཡི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་འདྲ་བའོ། །ཉི་མའི་དཀྱིལ་འཁོར་དབུས་སུ་ནི། །ཟླ་བའི་དཀྱིལ་འཁོར་བསྒོམ་པར་བྱ། །དེ་དབུས་ཇི་
เล่ม ๘๐ · หน้า 296a
སྐད་གསུངས་པ་ཡི། །ཡེ་ཤེས་དང་ནི་རྣམ་ཤེས་སེམས། །འཇིག་པ་མེད་ཅིང་འཚེ་མེད་པར། །དངོས་པོས་དངོས་པོ་བསྒོམ་པར་བྱ། །ཡེ་ཤེས་ཀྱི་ཐིག་ལེའི་སྦྱོར་བའི་ལེའུ་ཞེས་བྱ་སྟེ་གཉིས་པའོ།། །།ཀ་པ་གཅིག་དང་སྒོ་གསུམ་གྱིས། །ཡེ་
ཤེས་དབུས་སུ་ཐིམ་པ་ཉིད། །བཟློག་པར་བྱ་བའི་ས་བོན་ཉིད། །སྦྱང་བྱའི་ཡི་གེ་ཕྱེད་དང་གཉིས། །བརྒྱད་ཀྱི་མཐའ་ལ་གསུམ་པས་དྲང་། །ས་བོན་འདི་ནི་དྲག་པོའི་མེ། །རླུང་གི་དཀྱིལ་འཁོར་ལ་བརྟེན་པ། །སྔོན་གསུངས་མཚན་ཉིད་དང་ལྡན་པས། །སྔོན་དུ་ལྷན་ཅིག་བསྒོམས་
པ་ཡིས། །དཀར་པོས་ལུས་ནི་བསྡམ་པར་བྱ། །མཉམ་པའི་གནས་སུ་འབར་བ་ཡིས། །ཇི་སྐད་སྔོན་དུ་གསུངས་པའི་རླུང་། །དབུས་སུ་མཆོད་རྟེན་སྦྱང་བར་བྱ། །རླུང་དང་མེ་ཡི་མདུན་དོན་ལ། །རྡོ་རྗེའི་ས་བོན་བསྒོམ་བྱས་ལ། །སྒྲ་དང་ཐིག་ལེས་རྣམ་པར་བརྒྱན། །ཆར་གྱི་
རྒྱུན་ནས་བཤད་པ་ཡིན། །རྒྱས་པ་ལྔ་ཡི་སྒོ་ཉིད་ལ། །ཁ་དོག་དཀར་པོ་བསྒོམ་པར་བྱ། །སྒོ་གཉིས་མངོན་པར་བསྟན་པ་ནི། །དེ་བཞིན་ཆུ་དང་ཆུ་མིན་གཉིས། །ཡི་གེ་ཉིས་འགྱུར་ཐིགས་པ་དང་། །རྩ་བར་སྒྲ་ནི་སྦྱར་བར་བྱ། །འདི་ཡིས་ལུས་ནི་བསྡམ་བྱ་ཞིང་། །མེ་ནི་སྒོ་
རུང་སམ་པར་བྱ། །སེམས་འདི་ཡིས་ནི་དམིགས་པར་བྱ། །སྟེང་དུ་ཚངས་པའི་སྒོ་འདི་ནི། །ཚིགས་དགུ་ཡི་ནི་མཆོག་གི་གདན། །ལུས་མེད་སེམས་ཀྱི་ངོ་བོ་ཡིས། །དངོས་པོས་དངོས་པོ་བསྒོམ་པར་བྱ། །དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་
པ་ཉིད། །སྡིག་གིས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་སྒྲོལ། །འཕོ་བར་སྦྱོར་བའི་ལེའུ་ཞེས་བྱ་བ་སྟེ་གསུམ་པའོ།། །།སྔོན་གསུངས་མཚན་ཉིད་ལྡན་པར་ནི། །སྔོན་དུ་སྟོང་པའི་མཚན་ཉིད་ཀྱིས། །དེ་ཡི་ལུས་ནི་སྦྱང་བར་བྱ། །སྦྱོར་བས་བསྒོམ་
པའི་ལུས་ཅན་ནི། །དངོས་པོ་མེད་པར་བསྒོམ་པའི་དངོས། །གང་ཞིག་དངོས་པོ་རྣམ་རྟོག་པའི། །དངོས་པོར་བསྒོམ་པའི་ས་བོན་གྱིས། །སྟེང་པའི་དབུས་སུ་བསྒོམ་པར་བྱ། །དགོང་བྱའི་ཡི་གེ་རྣམ་བཀོད་པ། །སངས་རྒྱས་ལྔ་ཡིས་མངོན་པར་བརྒྱན། །དབྱིག་པ་འཇིག་རྟེན་དབང་ཕྱུག་གིས། །ཞབས་སྐྱེད་ཕྱག་ན་རྡོ་
เล่ม ๘๐ · หน้า 296b
རྗེ་དང་། །ལུས་ནི་དྲིལ་བུ་འཇམ་པའི་དབྱངས། །དེ་བཞིན་མགོ་ནི་བྱམས་པ་དང་། །མ་ཡི་རྣམ་པ་སྟེང་འབར་བ། །འཁོར་བ་རྣམ་པར་གྲོལ་བར་མཛད། །འོད་ཟེར་འབར་བ་རྣམ་མང་པོར། །ཀུན་ནས་སྟོང་པའི་དབུས་སུ་བསམ། །རྣམ་ཤེས་ཡེ་ཤེས་ས་བོན་གྱིས། །དབུས་དང་དབུས་སུ་རྣམ་
པར་དཀྲིས། །བཟླས་དང་བསམ་གཏན་མཆོག་བརྩོན་པས། །རླུང་གི་སྟེང་དུ་བསམ་པར་བྱ། །དང་པོ་དཀར་པོ་ཀུན་ནས་བསམ། །གཉིས་པད་བཞིན་སེར་པོའོ། །གསུམ་པར་གང་ཞིག་དམར་པོ་དང་། །བཞི་པ་ལ་ནི་སྔོན་པོ་ཉིད། །མཉམ་བཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་
ཚོམ་མེད། །སྦྱོར་བའི་གདན་གྱི་མིང་ཞེས་པ། །གསང་ཞིང་གསང་བ་གསང་ཆེན་པོ། །བདག་གི་གདན་གྱི་ལེའུ་ཞེས་བྱ་སྟེ་བཞི་པའོ།། །།དེ་ནས་གཞན་ཡང་བཤད་བྱ་བ། །ཚ་བའི་ས་བོན་བྱེ་བྲག་ནི། །ལྟོ་བའི་ཐབ་ཁུང་འདི་ཡི་མེ། །ལྟོ་བའི་མེ་རུ་ཤེས་པར་བྱ། །ཤར་གྱི་ཆ་
ནི་དཀར་པོའོ། །བྱང་གི་དེ་བཞིན་སེར་པོ་ཉིད། །ནུབ་ཀྱི་ཕྱོགས་སུ་དམར་པོ་སྟེ། །ལྷོ་ཕྱོགས་སུ་ནི་ནག་པོར་གྲགས། །དབུས་སུ་མཉམ་པའི་ཁ་དོག་ཉིད། །མེ་ལྔ་རུ་ནི་བསམ་པར་བྱ། །རྡོ་རྗེ་མཁའ་འགྲོའི་མིང་ཞེས་པ། །ཤར་གྱི་མེར་ནི་རབ་ཏུ་བརྟག །དྲག་མོ་མཁའ་འགྲོ་ཞེས་བྱ་བ། །
བྱང་གི་ཕྱོགས་སུ་རྣམ་པར་བརྟག །རོ་ལངས་མ་ཞེས་བཤད་པ་ནི། །ནུབ་ཀྱི་ཕྱོགས་སུ་རབ་ཏུ་དགོད། །མཁའ་འགྲོ་གཏུམ་མོ་ཞེས་བྱའི་མིང་། །ལྷོ་ཕྱོགས་ཀྱི་ནི་མེ་ཡི་མིང་། །དབུས་སུ་ཡེ་ཤེས་མེ་འདི་ནི། །ཡེ་ཤེས་མཁའ་འགྲོ་ཞེས་བྱའི་མིང་། །པདྨའི་གདན་ལ་བཞུགས་པ་
ནི། །ཉི་མའི་དཀྱིལ་འཁོར་གྱིས་བརྒྱན་ཅིང་། །ལག་ན་རྡོ་རྗེ་ཁ་ཊྭཱྃ་དང་། །མེ་འབར་བ་དང་མཉམ་པའི་འོད། །གཟུགས་ནི་མཐེ་བོའི་རྣམ་པ་ཙམ། །ཁྲོ་བོའི་གཟུགས་སུ་བསྒོམ་པར་བྱ། །ན་ལི་ལས་ནི་ཡི་གེ་བརྒྱད། །འཕྱང་པ་པོ་ཡི་སྒོར་ནི་ཐིམ། །མཁས་པས་ཕྱིས་ནི་བདག་
ཉིད་ལྔས། །གནས་ལྔ་རུ་ནི་སྦྱིན་སྲེག་བྱ། །སེམས་ཀྱིས་དབུགས་ནི་རབ་བསྡམས་ནས། །དངོས་པོས་དངོས་པོ་བསྒོམ་པར་བྱ། །གང་ཞིག་ཅུང་ཟད་བཟའ་བཏུང་རྣམས། །སྦྱིན་སྲེག་ཏུ་བརྟགས་བཟའ་བར་བྱ། །དང་པོ་སྒྲ་ཡི་ཡི་གེ་དང་། །དེ་བཞིན་གཉིས་པ་གཉིས་
เล่ม ๘๐ · หน้า 297a
འགྱུར་གཉིས། །གསུམ་པ་གློ་རུ་རེ་ཕ་དང་། །བཞི་པའི་སྟེང་དུ་ཐིག་ལེར་བཅས། །ལྔ་པ་སྟེང་དུ་འབར་བ་ཉིད། །ས་བོན་ལྔ་ལ་བཟླས་ཤིང་བསྲེག །དེ་ལྟར་བསྒོམས་པའི་བདག་ཉིད་ཀྱིས། །རྒྱས་པའི་སྦྱོར་བར་གྲགས་པའོ། །སྦྱིན་སྲེག་གི་ལེའུ་སྟེ་དང་
པོའོ།། །།དེ་ནས་དག་པ་རྣམ་གསུམ་བྱ། །སྭ་བྷཱ་བ་ཤུདྷཱཿསརྦ་དྷརྨཱཿསྭབྷཱ་བ་ཤུདྡྷོ྅ཧཾ། བཛྲ་ཤུདྡྷཱཿསརྦདྷརྨཱ་བཛྲ་ཤུདྡྷོ྅ཧཾ། ཨོ་ག་ཤུདྡྷཱཿསརྦ་དྷརྨཱ་ཡོ་ག་ཤུདྡྷོ྅ཧཾ། དེ་ལྟར་སྤྱོད་པའི་སྦྱོར་བས་ནི། །ཡིད་ནི་དག་པར་བྱེད་པའོ། །ཐམས་ཅད་ཀུན་ནས་སྟོང་ཉིད་ཀྱིས། །དེར་ནི་ཆུ་འདི་བསམ་པར་བྱ། །ཀུན་
ནས་ཆུ་ཡི་གཟུགས་དང་ནི། །དེ་ཡི་དབུས་སུ་པདྨ་ནི། །རྒྱ་ཆེན་ཡིད་ལ་འདོད་བཞིན་དུ། །གསེར་གྱི་གྲོང་ཁྱེར་འབྱུང་བ་ནི། །རིན་ཆེན་བདུན་གྱིས་རྣམ་པར་བརྒྱན། །སེང་གེ་གདན་གྱིས་གདན་གྱི་ནི། །ཉི་མའི་དཀྱིལ་འཁོར་གྱིས་བརྒྱན་པ། །དབུས་སུ་ཡེ་ཤེས་བསམ་པ་ནི། །ཡེ་ཤེས་མཁའ་འགྲོའི་
མིང་ཉིད་དེ། །ཁ་ཊྭཱྃ་ག་དང་རྣལ་འབྱོར་སྣོད། །རབ་ཏུ་བཞད་པས་འཇིགས་པར་བྱེད། །ན་བཟའ་དམར་པོ་གཙིགས་པའོ། །དབུ་སྐྲ་སིལ་བུར་ཏུ་དྲག །ཡེ་ཤེས་མཁའ་འགྲོ་ཞེས་བྱའི་མིང་། །སེམས་དཔའི་སྐྱིལ་མོ་ཀྲུང་གིས་བཞུགས། །ཇི་སྐད་གསུངས་པའི་ཕྱིར་རོལ་དུ། །དེ་ཡི་གཟུགས་ཀྱི་ལོགས་
གཉིས་སུ། །ཇི་ལྟར་ཕྱོགས་ཀྱི་མདོག་ཉིད་ནི། །ཀུན་ནས་དེ་ཡི་ཕྱག་རྒྱ་རིགས། །ལྔ་པའི་བདག་ཉིད་བསྒོམས་ནས་ནི། །རྟག་ཏུ་མཆོད་དང་གཏོར་མ་དབུལ། །ཆུ་ཉ་ཡི་ནི་བདག་ཉིད་རྣམས། །ཆུ་དང་མེ་དང་དེ་བཞིན་གཡོ། །ཇི་ལྟར་རླུང་དུ་དུ་བ་བཟུང་། །ཡེ་ཤེས་རྡོ་རྗེས་དཀྲིས་པ་ནི། །ལྔ་པའི་
ལྷ་ཉིད་འབྱུང་བ་ནི། །ལྔ་པ་ཉིད་དུ་བསྒོམ་པར་བྱ། །གི་ཝང་གཉིས་ནི་མཱ་མ་ཀཱི། །དེ་ཡི་གཅིག་ནི་བདུད་རྩིའོ། །ཨཱ་ལི་ཀཱ་ལིར་བ་སྦྱོར་བས། །གཉིས་ཀྱི་དེ་ཉིད་རབ་ཏུ་བྱ། །ཨཱ་ལི་ཞེས་བྱ་བུང་བར་གསུངས། །ཀཱ་ལི་དེ་བཞིན་གཤེགས་མ་ཉིད། །ཇི་ལྟར་སྡེ་ཚན་གསུམ་པ་ཡི། །ཡི་གེ་
གསུམ་པ་གཟུང་བྱས་ཏེ། །རྡོ་རྗེ་ཡིས་ནི་དབྱུག་པ་ཉིད། །འོག་པག་སོགས་པས་དཀྲི་བར་བྱ། །ས་བོན་ཏེ་ནི་མཆོག་བསམ་པ། །རྣལ་འབྱོར་པ་ཡིས་སྡིག་པ་གཅོད། །པདྨའི་དབང་ཕྱུག་སྐུ་ནི་གསེར་གྱི་མདོག །དྲི་ཡི་ངོ་བོ་ཤིན་ཏུ་སྣང་མཛད་དང་། །རོ་ནི་རྡོ་རྗེ་དབང་ཕྱུག་
เล่ม ๘๐ · หน้า 297b
རྡོ་རྗེའི་ཕྱག །ལྷ་གསུམ་དག་གི་ཆོག་ཤེས་པར་བྱ། །ཧ་ཞེས་བྱ་བས་ཁ་དོག་འཕྲོག །ཧོ་ཞེས་བྱ་བས་དྲི་མེད་ཅིང་། །དཔའ་བོ་ཧྲཱིཿཡིས་འཇོམས་པ་ནི། །རིམ་པ་འདི་བཞིན་ཤེས་པར་བྱ། །ཐབས་ཤེས་སྦྱོར་བའི་ལེའུ་སྟེ་གཉིས་པའོ།། །།དེ་ནས་གཞན་ཡང་
གཞན་གྱི་གདན། །དང་པོར་རེ་ཞིག་མཚན་ཉིད་ཀྱིས། །བདག་ཉིད་རབ་ཏུ་སྦྱར་བར་བྱ། །ཇི་ལྟར་མེ་ཡིས་ཐམས་ཅད་མཉམ་པར་བསྲེག་པ་དང་། །ཇི་ལྟར་ཉི་མས་ཁྱབ་པར་འཆར་བར་སྟོན་པ་དང་། །ཇི་ལྟར་རླུང་གིས་དྲི་ནི་མཉམ་ཕར་ལེན་པ་ལྟར། །རྣམ་རྟོག་རིང་དུ་སྤངས་
པའི་རྣལ་འབྱོར་པས། །སྔོན་གསུངས་མཚན་ཉིད་ལྡན་པར་ནི། །ཉི་མའི་དབུས་སུ་ཆུ་དཀྱིལ་འཁོར། །ཆུ་ཡི་དབུས་སུ་པདྨ་ནི། །རབ་འདོད་པདྨ་བསམ་པར་བྱ། །གཞལ་ཡས་ཁང་ནི་མཛེས་པའི་དངོས། །རིན་ཆེན་བདུན་གྱིས་རྣམ་པར་བརྒྱན། །སེང་གེའི་གདན་གྱི་
གདན་ལ་ནི། །ཉི་མའི་དཀྱིལ་འཁོར་གྱིས་བརྒྱན་པའོ། །ན་བཟའ་སྣ་ཚོགས་རབ་ཏུ་འཕྱང་། །གདུགས་དཀར་པོ་ཡིས་མངོན་པར་གཡོགས། །དགོད་བྱའི་ཡི་གེ་རྣམ་པར་བཀོད། །ཉི་མའི་དཀྱིལ་འཁོར་དབུས་སུ་ཡང་། །དབུས་སུ་ཡེ་ཤེས་རྣམ་ཤེས་ནི། །གཟུགས་
ལ་ཡོན་ཏན་དབང་པོས་བརྒྱན། །དང་པོའི་སྒྲ་ཡིག་དང་པོ་དང་། །དེ་བཞིན་གཉིས་པར་ཉིས་འགྱུར་ཉིད། །གསུམ་ལ་ལོགས་སུ་རེ་ཕ་དང་། །བཞི་པའི་སྟེང་དུ་ཐིག་ལེར་བཅས། །ཕྱོགས་ཀྱི་མདོག་ཏུ་དགོད་པ་ནི། །འོད་ཟེར་འབར་བ་རྣམ་མང་པོ། །མཚམས་
སུ་ཡི་དགས་གདན་ལ་ནི། །མ་ནིང་ཡི་གེ་བཞི་པ་ཉིད། །དབང་ལྡན་སེང་གེ་ཞེས་བྱ་བ། །དེ་བཞིན་མེ་རུ་སྟག་མོ་དང་། །བདེན་བྲལ་འུག་པ་ཧཱུྃ་སྒྲོགས་པ། །ཅེ་སྤྱང་རླུང་དུ་དགོད་པར་བྱ། །དབུགས་ཀྱིས་དངོས་པོ་ཐམས་ཅད་དང་། །དེ་ཡི་ཕྱག་རྒྱའང་བརྟག་པར་
བྱ། །དངོས་པོས་དངོས་པོ་བསྒོམ་པ་ཡིས། །མཁའ་འགྲོ་བརྒྱད་ཀྱིས་རྣམ་པར་བསྐོར། །ལོགས་སུ་ལྔ་བའི་བདག་ཉིད་དང་། །དབུས་སུའང་ཡེ་ཤེས་རྣམ་པར་དགོད། །བདག་ཉིད་ལུས་ཀྱི་ལུས་ཅན་ནི། །གཉིས་མེད་མཆོད་པས་མཆོད་པར་བྱ། །
เล่ม ๘๐ · หน้า 298a
ཡིད་ཀྱི་མེ་ཏོག་དགྲམ་པ་དང་། །ཡིད་ཀྱི་བདུག་པས་བདུག་པ་དང་། །ཡིད་ཀྱི་བྱུག་པས་མངོན་པར་བྱུག །ཡིད་ཀྱི་མར་མེ་སྤར་བར་བྱ། །སྔོན་དུ་རྫས་ནི་ལྔ་པ་ལ། །སངས་རྒྱས་ལྔ་ཡིས་བྱིན་གྱིས་བརླབས། །སྔོན་དུ་གསུངས་པའི་
བདུད་རྩི་ནི། །དཔའ་བེའི་ལུས་ལ་གཟུང་བར་བྱ། །ལྕགས་ཀྱུས་ལྷ་རྣམས་ཐམས་ཅད་ནི། །བདུད་རྩིའི་ཡི་གེ་ཚིམ་པར་བྱ། །ཨཱ་ལི་ཀཱ་ལི་རབ་སྦྱོར་ལས། །དཔའ་བོའི་དབུས་སུ་བྱིན་གྱིས་བརླབས། །ཨཱ་ལིར་ཤེས་པ་མཱ་མ་ཀཱི། །སྐྱེས་བུ་རྡོ་རྗེ་འཇིགས་བྱེད་དོ། །
ལྷ་མོ་གཡོན་པ་ལ་བརྟེན་ཅིང་། །སྐྱེས་བུའི་རྐང་པ་ཧཱུྃ་བྱས་པ། །དེ་ཡི་རྫས་ནི་རབ་བསྟན་པས། །དཔའ་བོས་ཐམས་ཅད་བྱིན་གྱིས་བརླབས། །བདག་ཉིད་ལྔ་ཡི་ལུས་ལ་ནི། །མཁའ་འགྲོ་ལྔ་ནི་རྣམ་པར་ཐིམ། །འདོད་ལ་དགའ་ཉིད་མ་ཡིན་ཞིང་། །ལོངས་སྤྱོད་
ཕྱིར་ཡང་བརྟེན་མི་བྱ། །གཉིས་མེད་གཏོར་མ་ལྡན་པ་ཡིས། །དུས་ཀུན་ཏུ་ནི་མཆོད་པར་བྱ། །གཞན་གྱི་གདན་ཞེས་བྱ་བའི་ལེའུ་སྟེ་གསུམ་པའོ།། །།དེ་ནས་ཕྱི་ཡི་གཏོར་མ་བཤད། །སྙིང་པོའི་གནས་སུ་མཁའ་འགྲོ་མ། །དེ་བཞིན་བྱང་དུ་
འབར་བྱེད་མ། །འཇིབ་བྱེད་མ་ནི་ནུབ་ཏུ་གསུངས། །ངག་འཕྲོག་ལྷོ་ཕྱོགས་རྣལ་འབྱོར་མ། །རྣལ་འབྱོར་ཕོ་ཉ་བཞི་པོ་ནི། །དྲག་པོའི་གཟུགས་སུ་བསྒོམ་པར་བྱ། །བདུད་རྩི་ལྔ་ནི་སྦྱིན་བྱ་ཞིང་། །དམ་པའི་སྤྱོད་པས་མཆོད་པར་བྱ། །མཉམ་ཉིད་ལྟ་བའི་ཡེ་ཤེས་
ཀྱིས། །མཁས་པས་གཏོར་མ་སྦྱིན་པར་བྱ། །རྡོ་རྗེ་ཁུ་ཚུར་གཉིས་བཅིངས་ནས། །རྒྱབ་དང་རྒྱབ་ཏུ་སྦྱར་བར་བྱ། །མཐེའུ་ཆུང་གཉིས་ནི་སྦྲེལ་བྱས་ནས། །སྡིགས་མཛུབ་གཉིས་ནི་བསྒྲེང་བྱས་ནས། །འདི་ལྟར་གསང་བའི་ཕྱག་རྒྱ་སྟེ། །མཁའ་འགྲོ་ལྔ་ནི་ཀུན་
གྱིའོ། །བ་དན་གསུམ་པའི་སྙིང་གར་སྦྱིན། །སྟེང་དུ་ཁུ་ཚུར་ཐམས་ཅད་བཅས། །འདི་ནི་ཕོ་ཉའི་ཕྱག་རྒྱའོ། །བརྒྱད་མཐའ་དང་པོའི་ས་བོན་དང་། །དགུ་ཡི་མཐའ་ནི་བྱང་དུ་ཤར། །ཤར་དང་ནུབ་ཀྱི་ས་བོན་དང་། །ལྷོ་ཡི་གསུམ་པར་མངོན་པར་གཟུང་། །ཕོ་ཉ་བཞི་
เล่ม ๘๐ · หน้า 298b
ཡི་ས་བོན་འདི། །སྒྲ་དང་ཐིག་ལེར་སྦྱར་བར་བྱ། །ཤར་དུ་བདུད་རྩི་དྲག་པོ་ཡི། །ས་བོན་དབུས་སུ་སྦྱར་བར་བྱ། །ཇི་ལྟར་ལས་ལ་སོགས་སྦྱར་བ། །འབུམ་ཕྲག་གསུམ་གྱིས་མངོན་པར་འགྲུབ། །ཚེས་གྲངས་མེད་ཅིང་རྒྱུ་སྐར་མེད། །སྨྱུང་བར་གནས་པའང་མེད་
པའོ། །ཡིད་དུ་འོང་བའི་ས་ཕྱོགས་སུ། །རྟག་ཏུ་འབད་པས་མཆོག་ཏུ་བསྒྲུབ། །དམ་ཚིག་ལ་གནས་དཔའ་བོ་ཆེ། །འདོད་ཆགས་ལ་སོགས་ཉོན་མོངས་བཅོམ། །དག་པའི་ཆོས་ལ་དམིགས་པ་ཡི། །དག་པའི་དབྱངས་ནི་ལམ་པོ་ཆེ། །ཆོས་ཆེན་པོ་ནི་ལེགས་
པར་འོངས། །རོ་མཆོག་མཆོག་ཏུ་ཞིམ་པའོ། །སྲིད་པའི་མགོན་པོ་རྒྱ་ཆེ་བ། །སངས་རྒྱས་གང་ལ་ཕྱག་འཚལ་ལོ། །ཚིགས་བཅད་འདི་ཡིས་དབུལ་བར་བྱ། །སྦྱོར་བའི་གདན་གྱི་བདག་ཉིད་ལྷ་ལ་ཕྱག་འཚལ་འདུད། །འདི་ཉིད་ཚེ་ལ་འཁོར་བ་གཅོད་ལ་ཕྱག་
འཚལ་ལོ། །ཚིགས་བཅད་འདི་ཡིས་བླང་བྱ་ཞིང་། །ཚིགས་བཅད་འདི་ཡིས་རབ་ཏུ་ཟེད། །པདྨར་བསྒྱུར་བའི་གདན་ལ་ནི། །སྟེང་དུ་རྡོ་རྗེ་བསྟན་པར་བྱ། །དབུས་སུ་བདུད་རྩི་རི་རབ་ཀྱིས་བསྲུབས་ནས། །མཐེ་མཛུབ་གཉིས་ནིས་ཡི་སྟེང་དུ་འཐོབ་འཐུང་དབུལ། །
རྒྱས་པའི་མཆོད་རྟེན་ལྔ་ལ་རོ་ཡིས་ལན་ལྔ་རུ། །བདུད་རྩི་ཆུ་ཡིས་མཆོད་རྟེན་དབུས་སུ་བསམ་པར་བྱ། །གཞན་གྱི་གདན་གྱིས་བདག་ཉིད་དབྱེ་བའི་ལེའུ་ཞེས་བྱ་བ་སྟེ་བཞི་པའོ།། །།གཞན་ཡང་གཏོར་མའི་ལས་བཤད་པ། །ལོགས་སུ་གྲུ་གསུམ་བྱ་བ་ནི། །ཁྲག་
སོགས་ཀྱིས་ནི་བྱ་བའམ། །གཡོན་པ་ཁུ་ཆུར་བཅིངས་བྱས་ལ། །དབུ་མ་ཁྲོ་བོ་བརྐྱང་པར་བྱ། །དབུས་མ་ཡི་ནི་གསུམ་པ་ལ། །སྡིགས་མཛུབ་བཀུག་ལ་སྦྱར་བར་བྱ། །དུ་པའི་ལྕགས་ཀྱུའི་ཕྱག་རྒྱས་སྤྱན་དྲང་པར་བྱའོ། །ཨོཾ་ཨཱ་ཀརྵ་ཡ། ཨཱ་ཀརྵ་ཡ། མ་ཧཱ་
པཱུ་ཛ་བྷ་ཀྵ་བྷ་ཀྵ། ཧཱུྃ་ཧཱུྃ་ཧཱུྃ་སྭཱ་ཧཱ། སྤྱན་དྲང་བའི་སྔགས་དང་ཕྱག་རྒྱའོ། །ཀུན་ནས་གཏོར་མ་རྫོགས་བྱས་ལ། །ལྔ་བའི་རྫས་ཀྱིས་སྦྱར་བར་བྱ། །ཨོཾ་ཤིང་གཅིག་དང་ནི་དུར་ཁྲོད་དང་། །རི་དང་བྲག་དང་ཕུག་གིས། །ཡུལ་གྱི་མདོ་དང་ལམ་དང་ཞིང་། །ཁྱད་པར་དུ་ནི་
เล่ม ๘๐ · หน้า 299a
ཁྱིམ་སྟོང་ཉིད། །ཤིང་ཆེན་ཤིང་གི་བདག་པོ་དང་། །ཁྱད་པར་དུ་ནི་ཆུ་མི་གཉིད། །སྣོད་དང་ཐང་དང་ས་སྟོང་དང་། །ཁྱད་པར་ས་སྟེང་གདོལ་ཁྱིམ་གནས། །ནག་པོ་དྲག་པོ་དྲག་ཆེན་པོ། །ལྷ་སྦྱིན་མཉམ་དུ་བསྟེན་པ་དང་། །ནག་པོ་གཙིགས་བྱེ་
འཇིགས་བྱེད་པ། །དགའ་ལས་འདས་པ་བགེགས་རྒྱལ་པོ། །རྒན་བྱེད་མོ་དང་དྲག་མོ་དང་། །འཇིགས་བྱེད་མ་དང་ཨུ་མས་བསྟོད། །རྒྱལ་མོ་རྣམ་པར་རྒྱལ་མོ་དང་། །ཐུབ་ཆེན་གཞན་གྱིས་མི་ཐུལ་མ། །ནག་མོ་བཟང་མོ་ནག་ཆེན་མོ། །ནག་མོ་ནག་མོ་རྣལ་འབྱོར་མ། །
དབང་བྱེད་མ་དང་ཟླ་བ་མོ། །དྲག་མོ་སྔང་བའི་ལམ་པ་ཀི། །འཕྲོག་བྱེད་མ་དང་མེ་མར་མ། །འཇིབ་བྱེད་ཡུལ་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་པོ། །མཆེ་བ་གཙིགས་དང་ཐོད་ཅན་མ། །ཐོད་ཕྲེང་ཐོད་པའི་ཕྲེང་ཅན་མ། །ཁ་ཊྭཱྃ་ག་མ་རྫུ་འཕྲུལ་ཆེ། །
རལ་གྲི་དགྲ་སྟའི་ལག་པ་དང་། །རྡོ་རྗེ་དེ་བཞིན་གཞུ་ལག་མ། །མཁའ་འགྲོ་མ་ལྔའི་དེ་ཉིད་ཆེ། །ལས་ཀུན་རྗེས་སུ་སྒྲུབ་བྱེད་པའི། །སྦྱོར་བའི་དཀྱིལ་འཁོར་རྒྱལ་ཆེན་པོ། །རྡོ་རྗེ་དབང་ཕྱུག་དེ་བཞིན་གཙོ། །དེ་བཞིན་གཤེགས་པའི་སྐུ་ཆེན་མོ། །གོས་མེད་སྦྱར་བའི་ལྷ་བྱེད་མ། །
རྡོ་རྗེ་དབང་ཕྱུག་མ་ཀ་ཡིས། །ཐམས་ཅད་ཐམས་ཅད་འགུགས་པའོ། །ཨོཾ་ཨཱ་ཀརྵ་ཡ། ཨཱ་ཀརྵ་ཡ། སརྦ་དེ་བ་ལོ་ཀི་ནི་ན་ཀཀྐ་ཀ་ཌ་ནི། ཁཁྑ་ཁ་ཌ་ནི། བབྦ་བནྡྷ་ནི་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཤ་ད་ད་ཉ་ཡིས་སྦྱར་བ་ཡིས། །ཨོྃ་གྱིས་སྤྱན་དྲངས་གཏོར་མ་སྦྱིན། །ཇི་
ལྟར་ལས་ལ་སོགས་བརྩམ་པ། །བཅྭ་ལྔ་དང་ནི་བཅུ་བཞི་དང་། །ཁྱད་པར་དུ་ནི་ཚེས་བརྒྱད་ལའོ། །དངོས་གྲུབ་འདོད་པའི་རྣལ་འབྱོར་པས། །ནན་ཏན་དུ་ནི་གཏོར་མ་སྦྱིན། །ཡེ་ཤེས་ཅན་གྱི་དཔལ་འདོད་པས། །ལྷག་མའི་གཏོར་མ་སྦྱིན་པར་བྱ། །ཨོྃ་ཧི་ལི་ཧི་ལི་
བཛྲཱི། མ་ཐ་མ་ཐ་ཡོ་གི་ནཱི་ཧཱུྃ་ཛཿ། གཞན་གྱི་གདན་གྱི་ལེའུ་ཞེས་བྱ་བ་སྟེ་ལྔ་པའོ།། །།སྔགས་ཀྱི་ཡི་གེ་ཡི་གེ་ནི། །ཡིད་ཀྱི་སྤྲུལ་པས་བསྒྲུབ་པར་བྱ། །སྙིང་པོའི་སེམས་ནི་རྣམ་སྤངས་ནས། །ཉམས་པའི་གཟུགས་བརྙན་རྣམ་པར་བསྒོམ། །སྔགས་
เล่ม ๘๐ · หน้า 299b
ནི་ངུར་ངུར་ཞེས་བརྗོད་པ། །ཨེ་མ་སེམས་ཅན་ཉོན་རེ་མོངས། །དེས་ན་ཡིད་ལ་མངོན་འདོད་པའི། །སྔགས་ཀྱི་ཡི་གེ་མཆོག་ཉིད་ནི། །འགྲོ་བ་རྨོངས་པས་དེ་ཉིད་མེད་སྔགས་དང་། །ལོག་པར་སྨྲ་ཞིང་གཟུགས་བརྙན་སེམས་དང་བྲལ། །སྔགས་ཀྱི་བདག་ཉིད་
བློ་ལྡན་གྱིས་ཤེས་བྱ། །ལས་བཞིའི་རྣམ་པར་ཡོངས་སུ་གྲགས་པ་ཉིད། །སྐྱེས་པ་དུ་མའི་གཟུགས་དང་རྣམ་པ་སྣ་ཚོགས་པ། །ནུས་མཐུའི་མཚན་ཉིད་ཀུན་ནས་ཐམས་ཅད་ནི། །གཡོ་ཞིང་འཐབ་པ་ཕྲ་ཞིང་གོས་པ་མེད། །སྔགས་དང་རྒྱུད་ཀྱི་བདག་ཉིད་མཆོག་
གི་ཡི་གེའོ། །གཟུགས་ལ་སོགས་པ་ཀུན་འཇིག་པས། །ཐམས་ཅད་ནམ་མཁའི་བསྒོམ་པོའོ། །ཁམས་དྲུག་དང་ནི་དབང་པོ་དྲུག །དབུས་མའི་ཁམས་ཉིད་འཇིག་པ་དང་། །སྟོང་པ་བཅྭ་བརྒྱད་བློ་ལྡན་གྱིས་བསྒོམ་པ། །སེམས་ཅན་བསྒོམ་པའི་དངོས་
པོ་ཡིས། །སྟོང་པས་ཐམས་ཅད་འཇིག་པའོ། །ཤར་དུ་ཁ་དོག་དཀར་པོ་དང་། །བྱང་ཕྱོགས་སུ་ནི་སེར་པོའོ། །རིན་ཆེན་ཉི་མ་ལའི་འོད་འབར་བ། །ལྷོ་ཕྱོགས་སུ་ནི་སྔོན་པོ་ཉིད། །དབུས་སུ་མཉམ་པའི་གནས་སུ་ཡང་། །མཁས་པ་ཡིས་ནི་བསྒོམ་པར་བྱ། །ཨཱ་ལི་
ཀཱ་ལིར་རབ་སྦྱོར་བ། །དེ་ཡི་ས་བོན་དབྱུང་བར་བྱ། །ནམ་མཁའི་དབུས་ནི་མཆོག་ཉིད་དུ། །གང་ཞིག་དབུས་སུ་ཟླ་བ་དང་། །ཟླ་བའི་དབུས་སུ་ས་བོན་ནི། །འོད་ཟེར་འབར་བ་བསྒོམ་པར་བྱ། །ཚོན་སྣ་བདུན་ནི་སྣ་ཚོགས་པ། །འོད་ཟེར་འབར་པ་མཉམ་པའི་འོད། །
གོང་དུ་བླ་མའི་ཡི་གེ་དང་། །ཐ་མ་བསྲེག་པའི་ཡི་གེ་དང་། །དབུས་སུ་ས་བོན་གཞག་བྱས་པ། །མཉམ་བཞག་བཟླས་སུ་འོང་བ་ཡིས། །འབུམ་ཕྲག་གསུམ་དུ་མཁས་པས་བཟླ། །སྦྱོར་བའི་གདན་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་སྦྱོར་བ་ཞེས་བྱ་བ་
པ་ལེའུ་དང་པོའོ།། །།སྔོན་གསུངས་མཚན་ཉིད་དང་ལྡན་པས། །སྔོན་བཤད་སྟོང་པ་ཉིད་ཀྱི་གཞི། །ཡེ་ཤེས་ཅན་གྱིས་མཉམ་བཞག་པས། །གཟུགས་ལ་སོགས་པ་གཞིག་པར་བྱ། །ཀུན་ནས་སྟོང་པའི་དབུས་སུ་ནི། །མཁས་
เล่ม ๘๐ · หน้า 300a
པ་ཡིས་ནི་བལྟ་བར་བྱ། །འཁོར་ལོ་ཉི་མ་འདྲ་བ་བཞིན། །འོད་ཟེར་ཀུན་ནས་ཡང་དག་གནས། །ཕྱོགས་བཅུ་འཇིག་རྟེན་ཁམས་ཀུན་ཏུ། །དཔག་ཏུ་མེད་པར་གཞག་པར་བྱ། །ཐིག་ལེ་ཐིག་ལེ་ཕྲ་བའི་གནས། །འཇིག་རྟེན་
འཇིག་རྟེན་ཀུན་མཁྱེན་བཅས། །རླུང་གི་དཀྱིལ་འཁོར་དབུས་སུ་ནི། །མེ་ཡི་དཀྱིལ་འཁོར་འདྲ་བའོ། །མེ་ཡི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་འདྲ་བའོ། །ཉི་མའི་དཀྱིལ་འཁོར་དབུས་སུ་ནི། །ཟླ་བའི་དཀྱིལ་འཁོར་བསམ་པར་
བྱ། །དེ་དབུས་ཇི་སྐད་གསུངས་པ་ཡི། །རྣམ་ཤེས་ཡེ་ཤེས་སེམས་དཔའོ། །སྤྱི་བོར་ཐམས་ཅད་བསམ་པའོ། །ཡི་གེ་ཡི་གེ་སྟེང་དུ་བཅས། །སྨྲ་བའི་ས་བོན་ཐམས་ཅད་ནི། །དེ་ནི་རྒྱལ་པོ་ཞེས་སུ་བརྗོད། །ཡེ་ཤེས་དང་ནི་རྣམ་ཤེས་དབྱིབས། །
རླུང་གི་དབུས་སུ་བཏུང་བར་བྱ། །ས་བོན་དེ་ཡི་སྦྱར་བྱ་བ། །སྒྲ་ནི་སྟེང་དང་སྟེང་དུའོ། །དེ་ལྟར་ས་བོན་མཆོག་བསམ་པ། །ཡེ་ཤེས་རྣམ་ཤེས་མིང་ཉིད་དོ། །འོད་ཟེར་འབར་བ་རྣམ་དམར་པོ། །ཟླ་བའི་དབུས་སུ་བསྒོམ་པར་བྱ། །བདུན་པའི་མཐའ་ནི་ཡང་དག་
བླང་། །གང་གིས་བདུད་རྩི་ས་བོན་བཞིན། །གང་ཞིག་བཟླས་པས་དཀྲིས་པ་ནི། །ཁ་དོག་དཀར་པོར་བསམ་པར་བྱ། །སྒྲ་ཡིག་དང་པོ་བླང་བྱས་ལ། །ཉི་མའི་དཀྱིལ་འཁོར་གྱིས་དཀྲིས་པའོ། །དགུ་མཐའི་ས་བོན་ཡི་གེ་ནི། །ལོགས་སུ་མེ་ཡིས་སྦྱར་བར་བྱ། །
གཞན་དུ་རླུང་གི་ས་བོན་དང་། །རླུང་གི་ངོས་སུ་མངོན་པར་བསམ། །ཐམས་ཅད་ཀུན་ནས་བསྒོམ་པ་ནི། །ཡེ་ཤེས་ཐིག་ལེ་ཞེས་བྱའི་མིང་། །སྡིག་བྱེད་བླུན་པོའི་སེམས་ཅན་རྣམས། །སྦྱོར་བ་འདི་ཡིས་དག་པར་བྱ། །ས་བོན་ལས་ནི་རྡོ་རྗེ་བསྐྱེད། །དེ་བཞིན་རྡོ་རྗེའི་
མཚན་ཉིད་ཤེས། །དབུས་སུ་རྣམ་པར་སྣང་མཛད་ལུས། །རབ་ཏུ་མཛེས་པའི་ན་བཟས་བརྒྱན། །འདི་ནི་བསྒོམས་པ་ཙམ་གྱིས་ནི། །ཏིང་འཛིན་ཀུན་ནས་ཡང་དག་གནས། །དབུས་སུ་འདི་གཟུགས་བསམ་པར་བྱ། །རིན་ཆེན་འབར་བས་འབིགས་པ་ཡི། །མགྲིན་
เล่ม ๘๐ · หน้า 300b
པར་རེ་བའི་ཐིག་ལེ་དང་། །བསྒྲུབ་བྱའི་མདུན་དུ་བསྒོམ་བྱ་བ། །ལན་བདུན་པ་ཡིས་འབྱེད་པ་ནི། །མདའ་ཡི་རྩེ་མོར་ས་བོན་བསམ། །ཁ་དོག་དཀར་པོ་ཀ་ཤ་བཞིན། །མདའ་འདྲེན་པ་ཡིས་དབྱིག་པ་ཡིས། །སྔགས་པས་ས་བོན་བཟླས་པར་བྱ། །ཕྱག་རྒྱའི་རྣམ་པ་
བཅིང་བ་དང་། །ས་བོན་སེམས་ཀྱིས་བཟླ་བར་བྱ། །འབུམ་ཕྲག་གཅིག་བཟླས་རྣལ་འབྱོར་པས། །དེ་བཞིན་མྱུར་དུ་མངོན་པར་འགུགས། །ཡི་གེ་གཉིས་འགྱུར་ཐིག་ལེ་དང་། །རྩ་བ་རང་རོ་སྦྱར་བར་བྱ། །དེ་ནི་བདུད་རྩི་ཡིད་འོང་མིང་། །འབུམ་ཕྲག་གཅིག་གིས་འགྲུབ་
པར་འགྱུར། །འབྱུང་པོ་བཞིན་དུ་དྲི་ཟ་དང་། །མཁའ་འགྲོ་གནོད་སྦྱིན་མ་བཤད་པ། །གནོད་སྦྱིན་ཡི་དགས་གྲུལ་བུམ་དང་། །རྡོ་རྗེ་ལྷ་མོ་རྣལ་འབྱོར་མ། །གལ་ཏེ་འདོད་ན་ཕྲན་ཚེགས་མི། །སྦྱོར་བས་མྱུར་དུ་འགུགས་པར་བྱེད། །སྦྱོར་བའི་གད་ལས་དམར་པོ་ཆེན་
པོས་ཀུན་ཏུ་རྨོངས་པ་ཞེས་བྱ་བའི་ཏིང་ངེ་འཛིན་གྱི་ལེའུ་སྟེ་གཉིས་པའོ།། །།གཟུགས་ཀུན་ཟད་པར་བྱས་ནས་ནི། །གཟུགས་ནི་མི་གནས་ཟད་པར་འགྱུར། །སྐར་མའི་རྣམ་པའི་དབྱིབས་སུ་ནི། །དང་པོར་སྟོང་པ་མངོན་བསམ་བྱ། །མཉམ་ཉིད་
ལྟ་བ་བསྐྱེད་བྱས་ནས། །རླུང་གི་དཀྱིལ་འཁོར་དབུས་སུ་ནི། །དབྱུག་པ་འཇིག་རྟེན་དབང་ཕྱུག་མགོན། །གུ་གུལ་ཕྱག་ན་རྡོ་རྗེ་དང་། །ཡན་ལག་འཇམ་དབྱངས་དྲིལ་བུ་མཆོག །བྱམས་བཟླ་བའི་རི་མོ་ཉིད། །མ་ཞེས་བྱ་བ་སྟེང་འབར་བ། །རྣམ་པར་འཁོར་བ་
སྒྲོལ་བར་མཛད། །ས་བོན་འདི་ཡིས་འབྲས་བུ་ནི། །ཉི་མའི་དཀྱིལ་འཁོར་དབུས་སུ་ཡང་། །འོད་ཟེར་འབར་བ་རྣམ་མང་པོར། །ལྷ་ཉིད་ལྔ་ནི་བསྒོམ་པར་བྱ། །རི་རབ་རྩེ་རུ་གཞལ་ཡས་ཁང་། །རིན་ཆེན་ཀུན་གྱིས་རྣམ་པར་བརྒྱན། །གདན་དུ་མེ་ཏོག་སྔོན་པོ་འདི། །
བུང་བའི་ཟས་སུ་ཟ་བ་ཉིད། །མེ་ཏོག་མྱུར་དུ་ཟ་བ་རྣམས། །སྦྲང་རྩི་མཉམ་པའི་གནས་ཉིད་དོ། །སྟེང་དུ་འཕྲོ་བའི་ཡི་གེ་ནི། །སངས་རྒྱས་ཀུན་དུ་འཐོན་པའོ། །ཆུ་དང་ནམ་མཁའ་རླུང་གི་ནི། །ས་བོན་བཞི་ཡིས་ལྷ་ཉིད་དོ། །དབྱིབས་ནི་བན་དུ་ཀ་ལྟར་གྱིས། །ཁ་དོག་
เล่ม ๘๐ · หน้า 301a
ལི་ཁྲིའི་སེམས་ཀྱིས་ནི། །ལྷ་མོ་མཱ་མ་ཀཱིར་སྦྱོར་བས། །རི་རབ་རྩེ་མོར་བསམ་པར་བྱ། །དཔའ་བོ་རྡོ་རྗེ་དབང་ཕྱུག་མགོན། །ལྷ་རྣམས་ཀུན་གྱི་བདག་ཉིད་དོ། །ཕྱག་རྒྱ་གཉིས་དང་མངོན་ལྡན་པའི། །རྩེ་མོ་གསུམ་གྱིས་ཀུན་འཇིག་པའོ། །ས་
ནི་གནས་སུ་གནོན་པ་ནི། །རྐང་པ་གཉིས་ཀྱིས་རྣམ་པར་མནན། །ཚེམས་ཀྱི་མ་མ་མུ་བཅིར་ནས་ནི། །གཟུགས་དང་གཟུགས་ལ་ལྟ་བ་ཉིད། །ཧཱུྃ་གི་གླུ་ཡི་རྣམ་པ་དང་། །སྒྲ་ཡང་དེ་རུ་སྦྱར་བར་བྱ། །བདུད་རྩི་རེ་པ་ཐིག་ལེ་དང་། །ལྕགས་ཀྱུ་ཡིས་ནི་རྩེ་བར་བྱ། །ལྷ་མོ་སྔགས་ཀྱི་
ཀུན་ནས་ཟློས། །རྡོ་རྗེ་ཅན་དང་པདྨའི་གདན། །ཇི་ལྟར་སྡེ་ཚན་གསུམ་པ་ཡི། །ཡི་གེ་གསུམ་པ་བཟུང་བྱས་ལ། །གླུ་རུ་རྡོ་རྗེ་དབྱུག་པ་དང་། །གཉིས་པར་འོག་པག་གིས་ནི་དཀྲི། །སྔགས་པ་མཆོག་གི་ས་བོན་འདི། །ཀུན་ནས་བཟླ་ཞིང་སྔོན་དུ་གཟུང་། །ལྷ་རྣམས་
ཀུན་ནས་མཉེས་བྱས་ནས། །འདི་ཡི་རྫས་ནི་བཟའ་བར་བྱ། །རྒྱལ་པོས་སྤྲོ་ཞིང་བརྟེན་པ་ཡིས། །དབང་གི་ལས་ནི་མངོན་དུ་བརྩམ། །རབ་མིན་དམན་པའི་རིགས་ལ་ནི། །མངོན་དུ་ལས་ནི་སྦྱར་བར་བྱ། །མཉམ་པའི་རིགས་ཀྱེ་མེ་ཏོག་ལ། །རྒྱས་པའི་
ལས་ནི་བྱ་བར་བྱ། །བྲམ་ཟེ་དང་ནི་རྒྱལ་རིགས་ཀྱིས། །ཞི་བའི་ལས་ནི་དེ་ལས་མཆོག །ལས་བཞི་མངོན་པར་སྦྱོར་བ་ཡིས། །རིགས་ཀྱི་བྱེ་བྲག་བརྩམ་པར་བྱ། །བདུད་རྩིའི་གསང་བའི་རྣལ་འབྱོར་པས། །རྫས་གཞན་དག་ནི་བསྒོམ་པར་བྱ། །དབང་པོའི་
ལག་པ་ཤུ་དག་རུ་རྟ་དང་། །རྨོངས་བྱེད་དང་ནི་དེ་བཞིན་གུར་གུམ་དང་། །ཀུ་ཏན་ཙ་རི་ཟླ་བ་དུང་ཉིད་ཀྱིས། །འདི་ཉིད་ཀྱིས་ནི་རབ་ཏུ་སྦྱར་བར་བྱ། །དཀོན་མཆོག་གསུམ་ལ་གནོད་པ་ལ། །གཉིས་མེད་གཏོར་མ་སྦྱིན་པར་བྱ། །སྡུག་པོངས་ལ་ནི་རྗེས་བརྩེ་བས། །སེམས་
ཅན་དོན་དུ་ལས་བརྩམ་བྱ། །འདོད་ལ་དགའ་ཉིད་མ་ཡིན་ཏེ། །ལོངས་སྤྱོད་ཕྱི་རུ་བསྟེན་པ་མིན། །ཁྲོ་མེད་རྨོངས་པ་མེད་པ་ཡིས། །སེམས་ཅན་དོན་དུ་སྦྱང་བར་བྱ། །སྦྱོར་བའི་གདན་ལས་དབང་དུ་བྱེད་པ་ཞེས་བྱ་བ་སྟེ་ལེའུ་གསུམ་པའོ།། །།ལྕེ་ལ་ཆུ་ནི་རྣམ་པར་སྦྱར། །ནམ་
เล่ม ๘๐ · หน้า 301b
མཁའ་རྣ་བ་སྣ་གཉིས་ལ། །ས་ནི་ཆུ་ལ་ཡང་དག་གསུངས། །མགྲིན་པར་རྨོངས་པའི་ས་དང་ནི། །གཡོ་བ་སྙིང་ལ་གནས་པའོ། །ཉོན་མོངས་ཀུན་ནས་ཐོང་ཀ་དང་། །ཕྱུགས་ནི་སྟེ་བའི་རྩ་བར་རོ། །ཡན་ལག་བརྒྱད་ལ་དགོད་པ་ནི། །ལྷ་ཉིད་དང་ནི་སྦྱར་བར་བྱ། །ཡེ་ཤེས་མཁའ་འགྲོ་
བསམ་བྱ་བ། །རྒྱན་ཀུན་གྱིས་ནི་རབ་ཏུ་བརྒྱན། །ལུས་ཀྱི་ས་སོགས་རབ་སྦྱར་བ། །ཁ་དོག་གཅིག་པའི་རྣམ་པར་བྱ། །མཐེབ་མོ་སུམ་ཅུ་རྩ་གཉིས་ཚང་། །རྣམ་པར་ཤེས་པའི་ནང་དུ་འཕོ། །ཕྱི་རོལ་ཉིས་འགྱུར་ས་དག་ལ། །དབུགས་ཀྱི་ལས་ལ་སོགས་པ་བྱ། །ལྟེ་བར་མེ་ཡི་ལྷ་
བསམ་པ། །ཡེ་ཤེས་མཁའ་འགྲོའི་མིང་ཉིད་དོ། །དབུགས་ལ་བདུད་རྩི་ཡང་དག་ཐིམ། །ཀུན་ནས་སྔོན་གྱི་མཚན་ཉིད་ཀྱིས། །ལྷ་རྣམས་ལ་ནི་སྲེག་བླུགས་དབུལ། །རླུང་གི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་རྣམ་པར་བརྒྱན། །མཆོག་གི་
དབུས་ནས་ས་བོན་ནི། །ཨཱ་ལི་ཀཱ་ལི་ལས་བྱུང་བ། །ཁ་དོག་དམར་པོ་འོད་འབར་བ། །ས་ལ་སོགས་པའི་ཕྱི་རོལ་དུ། །འབྱུང་དང་འཇུག་པའི་དབུགས་ཀྱིས་ནི། །སྦྱོར་བ་གཉི་གའི་ཕྱི་རོལ་དུ། །ས་བོན་མདའ་ཡི་རྩེ་མོར་བསམ། །ཁ་དོག་ནག་པོ་འོད་འབར་
བ། །སྔོན་གྱི་ཀ་ཤའི་ས་བོན་ནི། །ཨོྃ་དང་རེ་པའི་ཐིག་ལེ་ཅན། །མདའ་ལ་གོམས་པས་བ་རྡེག་པར་བྱ། །ས་བོན་དབུས་སུ་སོན་བྱས་ནས། །བདུད་རྩིར་དབུགས་ནི་འཕྲོག་པར་བྱ། །བདུད་རྩི་ཡི་གེར་སྦྱར་བྱས་ལ། །འཇིགས་པ་མེད་ཅིང་འཚེ་མེད་པར། །
དངོས་པོས་དངོས་པོ་བསྒོམ་པར་བྱ། །ཕྱི་ནས་བདག་གི་ལས་ལ་ནི། །ཡེ་ཤེས་མཁའ་འགྲོའི་སྦྱོར་བ་བཞིན། །ཨོྃ་ཨཱ་ཀརྵ་དཾ་ཧཱུྃ་སྭཱ་ཧཱ། རྒྱུད་ཆེན་པོ་ཡི་ས་བོན་བཟླས། །འཇིག་རྟེན་གསུམ་པོ་འཕྲལ་དུ་བསྒྲུབ། །སྦྱོར་བའི་གདན་ལས་འབྱུང་བ་དང་། །འཇུག་
པའི་ལེའུ་ཞེས་བྱ་བ་སྟེ་བཞི་པའོ།། །།ཡོངས་རྫོགས་གཟུགས་ནི་འོད་ཟེར་བཅས། །དཔྲལ་བར་ཟླ་བ་བསམ་པར་བྱ། །དབུས་སུ་ས་བོན་ཧཱུྃ་རང་བཞིན། །ཁ་དོག་དཀར་པོ་རབ་མཛེས་པ། །རྒྱ་མཚོ་ལྟ་བུར་རབ་ཏུ་འཇིགས། །ཁ་དོག་བདུན་པ་རྒྱ་ཆེན་པོ། །ཕྱོགས་
เล่ม ๘๐ · หน้า 302a
བཅུ་འཇིག་རྟེན་ཁམས་ཀུན་གྱི། །གཟུགས་རྣམས་ཐམས་ཅད་བཅོམ་ནས་སུ། །བདག་ཉིད་ནམ་མཁའི་ནམ་མཁའ་ཉིད། །དབྱིབས་དང་གཟུགས་ནི་ཐམས་ཅད་པ། །སྔོན་གྱི་མཚན་ཉིད་ཀུན་གྱིས་སོ། །ཆུ་ཡི་དབུས་སུ་པདྨའོ། །གཞལ་ཡས་ཁང་པ་བསམ་པར་བྱ། །
རིན་ཆེན་བདུན་གྱིས་མངོན་པར་མཛེས། །ཟླ་བའི་དཀྱིལ་འཁོར་དབུས་གནས་པར། །ཧཱུྃ་གི་རྣམ་པ་མེ་བཞིན་འབར། །སྤྱི་བོའི་སྟེང་དུ་རྫོགས་པར་བྱ། །བྲང་དུ་དྲི་མེད་ཟླ་བ་དང་། །དྲིལ་བུ་སྙིང་གི་ངོས་ཉིད་དུའོ། །ལྟེ་བར་དབྱུག་པ་གསང་བ་འཛིན། །གྱ་གྱུ་རྐང་པའི་གདན་ཉིད་དུ། །པདྨའི་གདན་
ལ་རྣམ་པར་སྦྲུལ། །གཟུགས་རྫོགས་པ་ལས་རྡོ་རྗེ་ནི། །རྡོ་རྗེ་སེམས་དཔའ་བདག་ཅེས་བརྗོད། །དར་གྱིས་བཅིངས་ཤིང་ཅོད་པན་ཅན། །སངས་རྒྱས་ལྔ་ཡིས་མངོན་པར་བརྒྱན། །ཁ་དོག་དཀར་པོ་མཆོག་ཏུ་འབར། །རྒྱན་ཀུན་གྱིས་ནི་རྣམ་པར་བརྒྱན། །ན་བཟའ་སྔོན་པོ་རབ་ཏུ་མཛེས། །
རྡོ་རྗེ་དྲིལ་བུ་ཕྱག་གཉིས་ན། །དེ་ལྟར་བསམས་པ་ཙམ་གྱིས་ནི། །རྡོ་རྗེ་སེམས་དཔའ་བདག་ཅེས་བརྗོད། །བརྒྱད་ཀྱི་མཐའ་ལ་རྩ་བར་རླུང་། །དེ་བཞིན་རྩ་བར་རེ་ཕ་སོགས། །གསུམ་པ་ཡིས་ནི་རྣམ་པར་འདྲེན། །སྟེང་དུ་ཐིག་ལེའི་ས་བོན་གྱིས། །འདི་ཡི་འཇིག་རྟེན་གསུམ་པོ་སྐྲག །
རྡོ་རྗེའི་ས་བོན་རྣལ་འབྱོར་བས། །ཁམས་གསུམ་ཐམས་ཅད་འདྲེན་པ་དང་། །རླུང་གི་བདག་ཉིད་ཐམས་ཅད་པའོ། །ས་བོན་དབུས་སུ་གནོད་སྦྱིན་མིང་། །དེ་བཞིན་ལྷ་ཡི་མིང་ཉིད་དོ། །ས་བོན་དབུས་སུ་མིང་རྣམས་ནི། །ཐམས་ཅད་མེ་ཡི་དབང་ཕྱུག་ཉིད། །འབུམ་ཕྲག་གསུམ་
བཟླས་རྣལ་འབྱོར་པས། །རྒྱས་པར་ཡོངས་སུ་གྲགས་པ་ཉིད། །མཉམ་གཞག་བཟླས་པའི་ངོ་བོ་ཡིས། །འགྲུབ་པར་འདི་ལ་ཐེ་ཚོམ་མེད། །ཕྱག་འཚལ་བསྲེག་པ་མཐར་བཞག་པ། །སྔོན་དུ་བསྙེན་པའི་རྣམ་པ་བྱ། །གསང་བའི་གདན་ཞེས་བྱ་བ་རྒྱས་པར་བཤད་པའི་ལེའུ་སྟེ་དང་
པའོ།། །།སོར་བཞི་པར་ནི་ནམ་མཁའོ། །གང་ཕྱིར་ནམ་མཁར་སྐར་མ་ཉིད། །ཀུན་ནས་འབར་བའི་འོད་ཟེར་མེས། །ཕྱོགས་བཅུའི་འཇིག་རྟེན་ཁམས་ཀུན་དང་། །ཁམས་གསུམ་སྐྱེས་པ་ཟད་བྱས་ནས། །ཐམས་ཅད་ཀུན་ནས་འབར་བ་ཡི། །མེ་ཡི་གཟུགས་ཀྱང་དེ་བཞིན་
เล่ม ๘๐ · หน้า 302b
ཟད། །དེ་ཉིད་ལྔ་ཡི་ཁྱད་པར་ཉིད། །ཤར་དུ་རྡོ་རྗེ་དཀར་པོའོ། །སེར་པོ་རྡོ་རྗེ་བྱང་དུའོ། །ནུབ་ཏུ་རྡོ་རྗེ་དམར་པོ་ཉིད། །ལྷོ་རུ་སྔོན་པོའི་རྡོ་རྗེ་ཅན། །ཀུན་ནས་རྡོ་རྗེ་འབར་བའི་འོད། །དབུས་སུ་མཉམ་པའི་ཁ་དོག་ཉིད། །ཐམས་ཅད་ཀུན་ནས་སྔོན་པོ་ཡི། །དབང་པོའི་གཟུགས་ནི་རྡོ་རྗེ་འཛིན། །
སོར་བཞི་པ་ཡི་ནམ་མཁར་ནི། །སྒྲོལ་མ་ཡི་ནི་མཚན་ཉིད་ནི། །ཨཱ་ལི་ཀཱ་ལིར་རབ་སྦྱོར་བའི། །དེ་ཡི་ས་བོན་འབྱུང་བའོ། །དབུས་སུ་སྒྲོལ་མ་གཞག་བྱ་བ། །ཕྱག་རྒྱ་འདི་ཡིས་མཆོད་པར་བྱ། །ཆུ་ཤིང་མེ་ཏོག་ལྟེ་བར་གནས། །སྙིང་གར་འགྲེང་བར་གནས་པ་ཉིད། །རྟག་ཏུ་བཞི་མར་
ཕྱོགས་པ། །མཁས་པ་ཡིས་ནི་རྒྱས་པར་བྱ། །རྟག་ཏུ་འདབ་མ་བརྒྱད་པར་འགྱུར། །གསུངས་པའི་གེ་སར་གྱིས་ནི་བརྒྱན། །དེ་དབུས་ཟླ་བ་དཀར་པོ་ནི། །འོ་མ་ཟླ་བ་དེ་ཡི་དབུས། །འདི་ལྟར་ཤེས་པའི་རྣལ་འབྱོར་པ། །གསང་བའི་གདན་གྱི་མིང་ཉིད་ཡིན། །གཟུགས་ལ་
སོགས་པ་ཡི་གཟུང་ཞིང་། །སྟོང་པའི་སེམས་ཀྱང་མ་ཡིན་ནོ། །གཟུགས་དང་སྟོང་པ་དེ་བཞིན་དབུས། །ཡེ་ཤེས་ཅན་གྱིས་དེ་བཞིན་གཟུང་། །མཉམ་ཉིད་ཡེ་ཤེས་ཐམས་ཅད་ཀྱིས། །ཀུན་ནས་བལྟ་བ་ཐམས་ཅད་རིག །བླ་མས་བསྟན་པའི་ལམ་གྱིས་ནི། །རྟག་ཏུ་ངེས་པར་
བལྟ་བར་བྱ། །ཇི་ལྟར་བུ་མོ་གཞོན་ནུ་གཏམ་གྱིས་རྨོངས་ནས་སུ། །གཉིས་ཀ་འཐབས་པ་ཕྲད་ཅིང་གཏམ་ནི་སྨྲས་པ་དང་། །ལམ་ནི་ཇི་ལྟར་བསྟན་ཀྱང་གཟུང་བར་མི་ནུས་པ། །དེ་བཞིན་རྣལ་འབྱོར་པ་ནི་གཞོན་ནུས་བསྟན་པ་བཞིན། །རྣལ་འབྱོར་པ་ཡིས་ཐོས་ཙམ་གྱིས། །ཉོན་
མོངས་རིང་དུ་སྤོང་པར་བྱེད། །གང་ཞིག་སྦྱོར་བ་བསྟེན་པ་ཡིས། །སངས་རྒྱས་འབྲས་བུ་མྱུར་དུ་འཐོབ། །གང་གིས་སྣ་ཚོགས་བསྟེན་པ་ཡིས། །དེ་ཡིས་ལས་ནི་འགྲུབ་པར་འགྱུར། །ཐམས་ཅད་རྒྱུད་དུ་བཤད་པ་ནི། །རྣམ་ཤེས་ལྷན་ཅིག་སྤྲད་པར་བྱེད། །ཇི་ལྟར་
སེམས་ཀྱིས་ཀུན་ནས་ནི། །ནན་ཏན་གྱིས་ནེ་ཡེ་ཤེས་སྦྱར། །གསང་བའི་གདན་གྱི་ལེའུ་གཉིས་པ་ཞེས་བྱ་བའོ།། །།ཟླ་བའི་དཀྱིལ་འཁོར་དབུས་གནས་པར། །རྡོ་རྗེ་སེམས་དཔའ་མངོན་པར་སྤྲུལ། །དེ་ཡི་སྙིང་གར་ཡི་གེ་ཧཱུྃ། །ཁ་དོག་དཀར་པོ་
เล่ม ๘๐ · หน้า 303a
བསམ་པར་བྱ། །བདུད་རྩི་རེ་པ་ཐིག་ལེ་དང་། །དེ་ཡི་ས་བོན་སྦྱར་བར་བྱ། །ཞི་བར་རྒྱལ་ཞིང་མཆོག་ཏུ་བརྩོན། །ཞི་བའི་དུས་ལ་བབ་ནས་ནི། །བདག་ཉིད་སྦྱིན་སྲེག་རབ་ཏུ་བྱ། །ཞི་བའིའོ། །སྙིང་ག་དཀྱིལ་འཁོར་དབུས་སུ་ནི། །ཁ་དོག་ཞི་བར་མཚུངས་པའོ། །བདུད་རྩི་
ཀུན་ནས་རིག་པ་ཡི། །ཟླ་བའི་དབུས་སུ་བསྒོམ་པར་བྱ། །དེ་ལྟར་བསྒོམས་པའི་རྣལ་འབྱོར་པའི། །རྒྱས་པར་ཡོངས་སུ་གྲགས་པ་ཉིད། །སྙིང་གར་ཉི་མའི་དཀྱིལ་འཁོར་ལ། །རྐེད་པར་རེ་པ་ཐིག་ལེ་ཅན། །དམར་ཞིང་དམར་བར་བསམས་པ་ཡིས། །དབང་ཉིད་དུ་ནི་ཡོངས་སུ་
གྲགས། །སྙིང་གའི་དཀྱིལ་འཁོར་དབུས་སུ་ཡང་། །རླུང་གི་དཀྱིལ་འཁོར་ཀུན་ནས་བསམ། །དངོས་སུ་རླུང་གི་ས་བོན་ནི། །དབུས་སུ་དགྲ་ཡི་མིང་ཉིད་ཀྱང་། །ཇི་ལྟར་དུ་བ་དུ་བའི་མདོག །མངོན་སྤྱོད་པར་ནི་རབ་ཏུ་གྲགས། །ཀུན་ནས་ཐམས་ཅད་སྟོང་པ་ཉིད། །སྔོན་གྱི་མཚན་
ཉིད་སྦྱར་བར་བྱ། །རླུང་གི་དཀྱིལ་འཁོར་དབུས་སུ་ནི། །ཉི་མའི་དཀྱིལ་འཁོར་བསྒོམ་པར་བྱ། །དེ་དབུས་ཧཱུྃ་གི་རྣམ་པ་ནི། །འབར་བའི་ཕྲེང་བ་མཉམ་པའི་འོད། །རླུང་གི་ས་བོན་གྱིས་ནི་དཀྲི། །དབུས་སུ་མིང་ཉིད་སྦྱར་བྱས་ལ། །རླུང་གིས་བསྐྱོད་པའི་ལུས་སུ་ནི། །སྒྲུབ་པ་པོ་
ཡིས་བསམ་པར་བྱ། །གང་བསམས་དེ་ནི་བསྐྲད་པར་འགྱུར། །རླུང་གི་དཀྱིལ་འཁོར་དབུས་སུ་ནི། །མཁའ་འགྲོ་དྲག་མོ་བསམ་པར་བྱ། །སྔོན་གྱི་མཚན་ཉིད་ཀུན་རིག་པས། །གཟུགས་དང་དབྱིབས་བཞིན་བསྒོམ་པར་བྱ། །མེ་འབར་བ་དང་མཉམ་པའི་འོད། །མདུན་དུ་ཟློས་
ཤིང་ཀུན་དུ་བསམ། །བསྒྲུབ་བྱ་ཡི་ནི་ལུས་ཀྱི་ཁར། །རླུང་གི་ས་བོན་གྱིས་ནི་གཙོ། །མཐར་ནི་འཇོམས་པའི་ཡི་གེ་དང་། །སྔོན་བཞིན་མེ་ཡི་ཡི་གེ་ཉིད། །དབུས་སུ་བསྒྲུབ་བྱའི་མིང་འདི་ནི། །འབུམ་ཕྲག་གཅིག་ཏུ་བཟླས་པ་ཡིས། །གང་ཕྱིར་སྦྱོར་བ་བསྙེན་པ་ཡིས། །ལུས་
ནི་ཀུན་ནས་སྡོམ་པའོ། །རླུང་གི་དཀྱིལ་འཁོར་དབུས་སུ་ཡང་། །གཏུམ་མོའི་རྣལ་འབྱོར་བསྟེན་པར་བྱ། །ཁ་དོག་སྔོན་པོ་འཇིགས་ཆེན་པོ། །ཤིན་ཏུ་བཞད་པས་འཇིགས་པར་བྱེད། །ལག་ན་ལྷུང་བཟེད་ཁ་ཊྭཱྃ་ག། །རྒྱན་ཀུན་གྱིས་ནི་རྣམ་པར་བརྒྱན། །དགྲ་
เล่ม ๘๐ · หน้า 303b
ཡིས་ཀུན་ནས་གདན་དུ་ནི། །བདག་ཉིད་རྐང་པས་མནན་པར་བྱ། །རྡོ་རྗེའི་ས་བོན་རེ་ཕ་ལ། །ལྕགས་ཀྱུའི་ཡི་གེས་སྦྱར་ནས་ནི། །མཐའ་རུ་འཇོམས་པའི་ཡི་གེ་ནི། །འབུམ་ཕྲག་གཅིག་གིས་འགྲུབ་པར་འགྱུར། །གསང་བའི་གདན་གྱི་
ལེའུ་གསུམ་པ་ཞེས་བྱ་བའོ།། །།ཇི་ལྟར་ལུས་ལས་བྱུང་བ་ཡི་ནི་པདྨ་ལ། །བུང་བ་གཉིས་ཀྱིས་བདུད་རྩི་ཟ་བའི་སེམས་དང་ཡང་། །ཡང་དག་སྦྱོར་བས་བྱང་ཆུབ་ཡན་ལག་ལྡན་པ་ཡི། །མཆོག་གི་ཆོས་གསུམ་ཕ་
རོལ་ཕྱིན་ལ་ཕྱག་འཚལ་ལོ། །སྲིན་མོ་དང་ནི་རོ་ལངས་མ། །མི་མེད་དུར་ཁྲོད་གནས་སུ་ནི། །ཡི་དགས་ཚེས་དང་སྐར་མ་ལ། །བརྟན་པའི་སེམས་ཀྱིས་བསྒྲུབ་པར་བྱ། །ར་ནག་པོ་ཡི་པགས་པ་བླང་། །མཚོན་གྱིས་མ་བསྣུན་སྦྱར་བར་བྱ། །
རས་ནི་བརྐྱང་ལ་ཐིག་གིས་གདབ། །རྫས་ལྔ་དང་ནི་ཡང་དག་ལྡན། །གཉིས་མེད་གཏོར་མ་བྱིན་གྱིས་བརླབ། །ལྕགས་ཀྱུ་ལྔ་དང་ལྡན་པ་ཡི། །སྔོན་དུ་གསུངས་བཞིན་དབུལ་བར་བྱ། །མཁའ་འགྲོའི་གཏོར་མ་བྱིན་བརླབས་ནས། །དེ་ཡི་ར་ཡི་ཤ་ཡིས་ནི། །སྦྱིན་སྲེག་
བརྒྱ་རྩ་བརྒྱད་དུ་བྱ། །བྲིས་སྐུ་གནས་སུ་གཟུང་བྱས་ལ། །གཏོར་མས་མཆོད་ལ་བྲི་བར་བྱ། །ཁ་དོག་ནག་པོ་འཇིགས་ཆེན་པོ། །རོལ་བའི་འཕེན་པས་ཡང་དག་གནས། །ཡན་ལག་བརྒྱད་དུ་ཀུན་གྱིས་བརྒྱན། །སྐྲ་ནི་དགྱེས་པས་རྣམ་པར་བརྒྱན། །སྤྱན་གསུམ་ཁྲོ་
བོ་མཆེ་བ་ཅན། །ཕྱག་བཞི་ཡིས་ནི་རྣམ་པར་སྤྲས། །ཁ་ཊྭཱྃ་ག་དང་རྡོ་རྗེའི་ལག །དེ་བཞིན་རལ་གྲི་ཐོད་པ་དང་། །གླང་པོའི་པགས་པས་མངོན་པར་བགོས། །སྟག་གི་པགས་པའི་ཤམ་ཐབས་ཅན། །དེ་ལྟར་སྲིན་མོ་རོ་ལངས་མ། །རྣལ་འབྱོར་མཆོག་ཏུ་བརྩོན་
པས་བྲི། །ཀུན་ནས་གཏོར་མ་ཡང་དག་ལྡན། །མི་མེད་དུར་ཁྲོད་གནས་སུ་ནི། །ནག་པོའི་ར་ཡི་ཤ་དང་ནི། །ཞོ་དང་མར་དུ་མངོན་པར་སྦྱར། །བརྒྱ་རྩ་བརྒྱད་དུ་བསྲེག་བྱས་པས། །ཕོ་ཉ་རོ་ལངས་མ་རབ་འགྲུབ། །མགོ་ལ་ཧཱུྃ། སྤྱི་བོར་ཧ།
เล่ม ๘๐ · หน้า 304a
མིག་ལ་ཧྲཱི། སྣ་ལ་ཧེ། རྣ་བ་ལ་ཧཾ། ལྕེ་ལ་ཧོ། །སྙིང་གར་ཧཱུྃ། ཡན་ལག་དྲུག་ཏུ་བཀོད་པའི་སྔགས་སོ། །ཨོཾ་ཧྲཱིཿཧ་ན་ཧ་ན། སརྦ་ཤ་ཏྲཱུྃ་མ་ཐ་མ་ཐ། བནྡྷ་བནྡྷ་ཧཱུྃ་ཨ་མུ་ཀ། སང་གྷཱ་ཏ་ཡ་གྷ་ཏ་ཡ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཕུ་ཕུ། འདི་ནི་བསྒྲུབ་
པ་ཐམས་ཅད་ཀྱི་སྔགས་སོ། །བ་དན་གསུམ་པའི་ཕྱག་རྒྱས་ནི། །ཡན་ལག་དྲུག་ཏུ་དགོད་པར་བྱ། །བ་དན་གསུམ་པས་སྙིང་གར་སྦྱིན། །དཔུང་པ་ཀུན་ནས་བརྐྱང་བྱས་ལ། །སེ་གོལ་གྱི་ནི་སྒྲ་དང་ནི། །ཧཱུྃ་གི་རྣམ་པ་ལྷན་ཅིག་སྦྱར། །གཡས་བརྐྱང་བ་
ཡིས་ཡང་དག་གནས། །འདིར་ནི་མཆོག་གི་ཕྱག་རྒྱའོ། །སློབ་དཔོན་ལ་ནི་དམོད་པ་དང་། །དམ་ཚིག་སྤྱོད་ལ་འཕྱ་བ་དང་། །དཀོན་མཆོག་གསུམ་ལ་གནོད་བྱེད་པ། །སྡིག་གིས་གོས་པར་མི་འགྱུར་རོ། །སྐྱེ་བ་བྱེ་བ་བརྒྱ་སྟོང་དུ། །སངས་རྒྱས་
ཡེ་ཤེས་ཀྱིས་བསྐུལ་ཞིང་། །དགེ་བའི་བཤེས་གཉེན་བསྟེན་པ་ཡིས། །རྣལ་འབྱོར་གཙུག་ལག་ཕྲད་པའོ། །སེམས་ཅན་ཐམས་ཅད་སྐྱོན་མེད་ཅིང་། །སེམས་ཅན་ཐམས་ཅད་བདེ་གྱུར་ཅིག །གང་གིས་ལམ་ནས་འགྲོ་བ་ཡིས། །
སངས་རྒྱས་ཉིད་དུ་གྲུབ་གྱུར་ཅིག །མ་བསྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་བདག་གིས་དགྲོལ། །དེ་ལྟར་རྗེས་སུ་བརྩེ་བའི་ཕྱིར། །རྣལ་འབྱོར་བསྟན་བཅོས་འདི་བགྱིས་སོ། །གདན་བཞི་པ་ལས་སྦྱོར་བའི་རབ་
ཏུ་བྱེད་པ་གདན་བཞིའི་ལེའུ་ཞེས་བྱ་བ་རྫོགས་སོ།། །།དཔལ་གསང་བ་ཐམས་ཅད་ཀྱི་རྒྱུད་ཅེས་བྱ་བ་འདི་ནི། པཎྜི་ཏ་སྨྲྀ་ཏི་ཛྙཱ་ན་ཀཱིརྟིས་གསར་དུ་བསྒྱུར་ནས་བཤད་ཅིང་གཏན་ལ་ཕབ་པ། དེ་ལྟར་ན་རྒྱུད་འདིའི་ལེའུ་སིལ་བུ་རྣམས་ཕྱོགས་གཅིག་ཏུ་བསྡོམས་ན་
ལེའུ་བརྒྱ་དང་བཞི་བཞུགས་སོ། །སླད་ནས་བུ་སྟོན་ཐམས་ཅད་མཁྱེན་པའི་ཐུགས་དམ་རྒྱུད་འབུམ་དང་དཔེ་དཔང་རྙིང་པ་དག་དང་ཡང་གཏུགས་ཏེ། སྡེབས་ཞུས་དང་བཅས་པ་ཆེས་ཤིན་ཏུ་དག་པར་བགྱིས་སོ།། །།
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด