འདུལ་བ་ཕྲན་ཚེགས་ཀྱི་གཞི
ชื่อสันสกฤต (อักษรทิเบต ตามตัวบท) བི་ན་ཡ་ཀྵུ་དྲ་ཀ་བསྟུ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๑๑ · หน้า 1a
༄༅། །འདུལ་བ་ད་བ་བཞུགས་སོ། །
เล่ม ๑๑ · หน้า 1b
༄༅༅། །འདུལ་བ་ཕྲན་ཚེགས་ཀྱི་གཞི། བམ་པོ་ཉི་ཤུ་བརྒྱད་པ། ཁྱོད་ཀྱི་འདོད་པ་གནས་བཟང་པོར་སྐྱེས་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དང་ཕྲད་པར་
བདག་གིས་བྱའོ། །དེས་དེ་རྒྱལ་པོ་ཤར་བ་དང་ལྷན་ཅིག་ཕྲད་པར་བྱས་ཏེ། ནོར་ལྷས་བྱིན་དེ་དང་ལྷན་ཅིག་ཤིན་ཏུ་ཆགས་པར་གྱུར་པ་དང་། གསེར་ཕྲེང་ཅན་གྱིས་སྦྱོར་བ་འཆང་ལ་ལྷ་ནི་
གསོན་ཏེ། རྒྱལ་པོ་གཏུམ་པོ་རབ་སྣང་གི་སྲས་མོ་ནོར་ལྷས་བྱིན་ལ་གླང་པོ་ཆེའི་ཆོ་ག་སློབ་བོ་ཞེས་སྤྲིང་ངོ་། །དེས་ཀྱང་རྒྱན་ལྔ་མི་མངོན་པར་བྱས་ནས་བདག་ཉིད་གོས་ཧྲུལ་པོ་བགོས་ཏེ་མིང་
དཔྱིད་ལྡན་ཞེས་བྱ་བར་བཏགས་ནས་སྨྱོན་པའི་ཆ་ལུགས་ཀྱིས་འཕགས་རྒྱལ་དུ་སོང་ངོ་། །དེ་དེར་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་དག་ཏུ་རྒྱུག་མཆོང་རྒལ་ཞིང་
དཔྱིད་ལྡན་དགའོ་ཞེས་སྨྱོན་ཚིག་ཀྱང་སྨྲའོ། །གང་དག་གིས་འདི་སྦྱོར་བ་འཆང་བ་ཡིན་ནོ་ཞེས་དེ་ངོ་ཤེས་པ་དེ་དག་ལ་ནི་དེས་རྒྱན་བྱིན་པ་དང་། དེ་དག་གིས་དེ་བླངས་ནས་ཅང་མི་ཟེར་བར་
เล่ม ๑๑ · หน้า 2a
འགྲོའོ། །གང་དག་མི་ཤེས་པ་དེ་དག་ནི་འདི་སྨྱོན་པ་ཞིག་གོ་ཞེས་ཡལ་བར་གཏོང་སྟེ། དེ་རྒྱལ་པོའི་ཕོ་བྲང་འཁོར་དང་ཁྱིམ་བཟང་པོ་གང་དུ་ཞུགས་པ་དེར་བཟའ་བ་དང་། མེ་ཏོག་དང་གོས་དག་ཀྱང་རྙེད་ཅིང་ཤར་བ་དང་ལྷན་ཅིག་
གསང་སྟེ་གྲོས་གཅིག་གོ། །ཇི་ཙམ་དུས་གཞན་ཞིག་ན་ནོར་ལྷས་བྱིན་གྱིས་རྒྱལ་པོ་ཤར་བའི་བུ་ལ་སྨྲས་པ། ལྷ་གལ་ཏེ་ན་བདག་གི་ཕས་ཚོར་དུ་མཆིས་ཚུར་སྤྱོན་འབྲོས་སོ། །དེས་སྨྲས་པ། ལྷ་མོ་གལ་ཏེ་དེ་ལྟ་ན་སོང་ལ་ཕ་ལ་འདི་སྐད་ཅེས་ཡབ་བདག་
གིས་གླང་པོ་ཆེའི་ཆོ་ག་ནི་ལོབས་ན་འོན་ཀྱང་ལས་སུ་བགྱི་བ་མ་མཐོང་སྟེ། དེའི་སླད་དུ་ལྷས་བདག་ལ་གླང་པོ་ཆེ་མོ་བཟང་ལྡན་ཅི་བདེར་བགྱིད་དུ་སྩོལ་ཅིག་དང་དེ་ལ་འཚལ་ནས་ལས་དག་བལྟ་བར་བགྱིའོ་ཞེས་གྱིས་ཤིག །དེ་སོང་ནས་རྒྱལ་པོ་ལ་དེ་བཞིན་
སྨྲས་པ་དང་། རྒྱལ་པོ་གཏུམ་པོ་རབ་སྣང་གིས་ཀྱང་གླང་པོ་ཆེའི་རྫི་རྣམས་ལ་ཤེས་ལྡན་དག་གླང་པོ་ཆེ་མོ་བཟང་ལྡན་བུ་མོ་ནོར་ལྷས་བྱིན་ལ་ཅི་བདེར་གྱིས་ལ། དེ་ལ་ཞོན་ནས་ལས་དག་བལྟར་ཆུག་ཤིག་ཅེས་བསྒོའོ། །དེ་དག་གིས་དེ་ལ་གླང་པོ་ཆེ་མོ་བཟང་
ལྡན་ཅི་བདེར་བྱས་པ་དང་། དེ་རྒྱལ་པོ་ཤར་བའི་བུ་དང་ལྷན་ཅིག་དེ་ལ་ཞོན་ནས་འབྲོས་པའི་ཐབས་ཤོམ་པར་རྩོམ་སྟེ། རེས་འགའ་ནི་སྔ་དྲོ་སོང་ཞིང་ཉི་མ་ཕྱེད་ན་སླར་འོང་། རེས་འགའ་ནི་ཉི་མ་ཕྱེད་ན་སོང་ཞིང་ཕྱི་དྲོ་སླར་འོང་། རེས་འགའ་ནི་ཕྱི་དྲོ་སོང་ནས་
དགོངས་སུ་སླར་འོང་། རེས་འགའ་ནི་དགོངས་སོང་ནས་མཚན་མོ་ནམ་ཕྱེད་ན་སླར་འོང་། རེས་འགའ་ནི་འཇིང་ལ་སླར་འོང་། རེས་འགའ་ནི་ལྔ་ཚིགས་ལ་སླར་འོང་། རེས་འགའ་ནི་ནམ་ཆུང་ན་སླར་འོང་། རེས་འགའ་ནི་སྐྱ་རེངས་ཤར་ན་སླར་འོང་ངོ་། །
เล่ม ๑๑ · หน้า 2b
ཤར་བས་སྦྱོར་བ་འཆང་ལ་འབྲོས་པའི་ཐབས་སྨྲས་པ་དང་། དེས་གླང་པོ་ཆེའི་ལྕི་བ་དག་ཕྱིར་དབྱུང་བར་བརྩམས་སོ། །ཆབ་སྒོ་བ་དག་གིས་སྨྲས་པ། དཔྱིད་ལྡན་འདི་ཅི་ཡིན། དེས་སྨྲས་པ། ཤེས་ལྡན་དག་རྒྱལ་པོའི་བཤོས་སུ་བྱས་ཏེ་འདི་དག་དེར་ལ་དུར་འགྱུར་རོ་ཞེས་བྱས་པ་
དང་། དེ་དག་གིས་བགད་ནས་འདི་ནི་སྨྱོན་པའོ་སྙམ་ནས་ཅང་མི་སྨྲ་བར་འདུག་གོ། །དེས་ཀྱང་དེ་དག་ཁྱེར་ཏེ་ཀཽ་ཤཱམྦཱིའི་ལམ་གྱི་བར་བར་དུ་ཤིང་གི་ཡལ་ག་ལ་དཔྱངས་སོ། །ཡང་གླང་པོ་ཆེའི་གཅིན་དག་གིས་བུམ་པ་བཀང་སྟེ་བཀུར་བར་བརྩམས་པ་དང་། སྒོ་བ་དག་གིས་དེ་
བཞིན་དུ་དྲིས་པ་དང་། དེས་སྨྲས་པ། ཤེས་ལྡན་དག་རྒྱལ་པོའི་བཤོས་སུ་བྱས་ཏེ་འདི་ནི་དེར་སྐྱེམས་སུ་འགྱུར་རོ་ཞེས་བྱས་པ་དང་། དེ་དག་དེ་བཞིན་དུ་འདི་ནི་སྨྱོན་པ་ཡིན་ནོ་སྙམ་ནས་བགད་དེ་འཁོད་དོ། །དེས་ཀྱང་དེ་ཁྱེར་ཏེ་ཀཽའུ་ཤཱམྦཱིའི་ལམ་གྱི་བར་བར་དུ་ཤིང་གི་ཡལ་ག་ལ་
དཔྱངས་སོ། །རྒྱལ་པོ་ཤར་བ་དང་། སྦྱོར་བ་འཆང་དང་། གསེར་ཕྲེང་ཅན་གྱིས་ཉི་མ་ཆེ་གེ་མོ་ཞིག་ལ་ཕྱོགས་ཆེ་གེ་མོ་ཞིག་ཏུ་ཐམས་ཅད་འདུ་བར་བྱའོ་ཞེས་དུས་བཏབ་ནས་རྒྱལ་པོ་ཤར་བའི་བུ་དང་། ནོར་ལྷས་བྱིན་གླང་པོ་ཆེ་མོ་བཟང་ལྡན་ལ་ཞོན་ནས་ཕྱོགས་དེར་སོང་སྟེ།
སྦྱོར་བ་འཆང་དང་། གསེར་ཕྲེང་ཅན་ཡང་དེ་ཉིད་ལ་ཞོན་ཏེ། དེ་རྣམས་པི་བང་སྙན་པ་ལེན་ཞིང་དོང་བ་ན། རྒྱལ་པོ་ཤར་བའི་བུས་པི་བང་སྙན་པ་བླངས་པ་དང་། སྦྱོར་བ་འཆང་དགའ་བ་སྐྱེས་ཏེ་གླུ་བླངས་པ། བཟང་ལྡན་མ་དང་དབྱངས་སྙན་དང་། །ནོར་ལྷས་བྱིན་དང་ཤར་བ་
དང་། །གསེར་ཕྲེང་ཅན་དང་དཔྱིད་ལྡན་དང་། །འདི་དག་དོན་མཐུན་འདོང་བ་ཡིན། །དུས་གང་དུ་དེ་དག་སླར་འོང་བའི་དུས་དེ་ཡང་མྱུར་དུ་ཐལ། དུས་ཐ་མ་གང་ཡིན་པ་དེ་ཡང་ཐལ་ནས་རྒྱལ་པོ་གཏུམ་པོ་རབ་སྣང་གིས་གསོས་པ་ལ་སྨྲས་པ། གསོས་པ་ནོར་ལྷས་བྱིན་
དེང་ཐོགས་ན་འདི་ཅི་ལས་གྱུར་ཅེས་བྱས་པ་དང་། གསོས་པས་བཙལ་བར་བརྩམས་པ་ལས་མ་རྙེད་ནས། དེས་རྒྱལ་པོ་ལ་སྨྲས་པ། རྒྱལ་པོ་ཤར་བའི་བུས་གླང་པོ་ཆེ་མོ་བཟང་ལྡན་ལ་འཚལ་ཏེ། ནོར་ལྷས་བྱིན་ཁྲིད་ནས་བྲོས་ལགས་སོ། །རྒྱལ་པོ་སྔངས་ནས་སྨྲས་པ། གསོས་
เล่ม ๑๑ · หน้า 3a
པ་མྱུར་དུ་སོང་ལ་གླང་པོ་ཆེ་འདམ་བུའི་རི་ལ་ཞོན་ཏེ་ཤར་བ་དང་། ནོར་ལྷས་བྱིན་ཁྲིད་དེ་ཤོག་ཤིག །དེ་རིངས་པ་རིངས་པར་གླང་པོ་ཆེ་འདམ་བུའི་རི་ལ་ཞོན་ནས་བསྙགས་སོ། །དེས་བསྙགས་ཏེ་སླེབས་ལ་ཐུག་ནས་སྦྱོར་བ་འཆང་གིས་གླང་པོ་ཆེའི་ལྕི་བའི་
ཐུམ་པོ་བཤིག་པ་དང་། འདམ་བུའི་རིས་དེ་བསྣམ་པར་བརྩམས་སོ། །ཇི་སྲིད་སྣོམ་པ་དེའི་བར་དུ་གླང་པོ་ཆེ་མོ་བཟང་ལྡན་གྱིས་དཔག་ཚད་བཅུ་འདས་སོ། །ཡང་འདམ་བུའི་རིས་སླེབས་ལ་ཐུག་ནས་སྦྱོར་བ་འཆང་གིས་གཅིན་གྱི་བུམ་པ་གཅིག་པ་དང་འདམ་བུའི་རིས་
དེ་བསྣམས་པར་བརྩམས་སོ། །ཇི་སྲིད་སྣོམ་པ་དེའི་བར་དུ་གླང་པོ་ཆེ་མོ་བཟང་ལྡན་གྱིས་དཔག་ཚད་གཞན་བཅུ་འདས་ཏེ། གཞན་གྱི་ཡུལ་དུ་ཕྱིན་པར་གྱུར་པ་དང་། གསོས་པས་བསམས་པ་འདི་ནི་གཞན་གྱི་ཡུལ་ཡིན་པས་གླང་པོ་ཆེ་འདམ་བུའི་རི་ཡང་ཤོར་དུ་འོང་གིས་ལྡོག་
གོ་སྙམ་ནས་དེ་རེ་ཐག་ཆད་དེ་སླར་ལོག་གོ། །རྒྱལ་པོ་གཏུམ་པོ་རབ་སྣང་གིས་སྨྲས་པ། གསོས་པ་ཅི་གྲག །དེས་སྨྲས་པ། ལྷ་ཅི་ཞིག་གདའ་བྲོས་ལགས་མོད་ཅེས་བྱས་པ་དང་། རྒྱལ་པོ་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་གོ། །རྒྱལ་པོ་ཤར་
བའི་བུ་ཡང་སྲོག་སྟོར་བ་ལས་སླར་རྙེད་དེ། ཀཽ་ཤཱམྦཱིར་འོངས་ནས་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་དང་། མཛའ་བོ་དང་། ཕུ་ནུ་དང་། གཉེན་རྣམས་ལ་སྦྱིན་པ་དག་བྱིན་ཞིང་དགའ་སྟོན་ཆེན་པོ་བྱས་ནས་ནོར་ལྷས་བྱིན་དང་ལྷན་ཅིག་རྩེ་བར་བྱེད། དགའ་
བར་བྱེད། དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་ཁང་བཟངས་ཀྱི་ཐོག་ཏུ་བྱུང་ནས་ནོར་ལྷས་བྱིན་དང་ལྷན་ཅིག་ཏུ་བྲེ་མོ་གཏམ་དག་ཟེར་ཞིང་འཁོད་པ་ལས་སྨྲས་པ། ལྷ་མོ་ཁྱོད་ཀྱང་ངས་དེ་ལྟར་སྒྱུས་ཕྲོགས་པ་ཡིན་ནོ། །དེས་སྨྲས་པ། ལྷ་ཁྱོད་ཀྱང་དེ་བཞིན་
དུ་བདག་གི་ཕས་ཐབས་ཀྱིས་བཟུང་སྟེ་བཞག་པ་ལགས་སོ། །དེས་སྨྲས་པ། ལྷ་མོ་ཅི་སྟེ་ཁྱོད་ཀྱི་ཕ་འདིར་བཀུག་སྟེ་ཐག་པའི་ལས་སློབ་ཏུ་མ་བཅུག་ན། ང་རྒྱལ་པོ་ཤར་བའི་བུ་མ་ཡིན་དུ་ཟད་ཅེས་བྱས་པ་དང་། དེ་ཁྲོས་བཞིན་དུ་ཅང་མི་སྨྲ་བར་འདུག་གོ། །རྒྱལ་པོ་ཤར་བས་
เล่ม ๑๑ · หน้า 3b
སྦྱོར་བ་འཆང་ལ་སྨྲས་པ། ངའི་མི་དགའ་བ་ཁྱོད་ཀྱིས་བསལ་བར་ནུས་སམ། ལྷ་ཅི་ཞིག་བགྱི། རྒྱལ་པོ་གཏུམ་པོ་རབ་སྣང་མགུལ་པ་ནས་ཐོགས་ཏེ་འདིར་ཁུག་ལ་ཐག་པའི་ལས་སློབ་ཏུ་ཆུག་ཤིག །དེས་སྨྲས་པ། ལྷ་གང་གི་ཚེ་ཁྱོད་ཀྱིས་ནོར་ལྷས་བྱིན་དང་གླང་པོ་ཆེ་མོ་བཟང་
ལྡན་ཕྲོགས་པའི་ཚེ་དོན་གྱིས་ན་ཁྱོད་ཀྱི་མི་དགྱེས་པ་བསལ་ལགས་མོད་ཀྱི། འོན་ཀྱང་གལ་ཏེ་རྔོ་ཐོག་ཀྱང་གདས་བསམས་ཏེ་བགྱིའོ་ཞེས་བྱས་ཏེ། དེས་འཕགས་རྒྱལ་དུ་འགྲོ་བའི་ཟོང་དག་སྟ་གོན་བྱས་ནས་དེད་དཔོན་སྤྲོ་བ་བསྐྱེད་དེ། སྨད་འཚོང་མ་གཟུགས་དང་ན་ཚོད་དང་ལྡན་
པ་རྒྱན་སྣ་ཚོགས་ཀྱིས་བརྒྱན་པ་ཞིག་ཀྱང་དེད་དཔོན་གྱི་ཆུང་མར་བྱས་ནས་དེ་རིམ་གྱིས་གྲོང་དང་། གྲོང་ཁྱེར་དང་། ཡུལ་འཁོར་དང་། རྒྱལ་པོའི་ཕོ་བྲང་རྣམས་སུ་ཚོང་དུས་དག་ལྟ་ཞིང་འཕགས་རྒྱལ་དུ་ཕྱིན་ཏོ། །རྒྱལ་པོ་གཏུམ་པོ་རབ་སྣང་གིས་ནོར་མང་པོ་དང་ལྡན་པའི་དེད་དཔོན་
ཞིག་འོངས་སོ་ཞེས་ཐོས་སོ། །དེས་ཐོས་ནས་ཀྱང་བདག་ཉིད་ནོར་རྩིར་སོང་སྟེ་དེས་འགྲོན་པོ་དེ་དག་ལ་དྲིས་པ། ཤེས་ལྡན་དག་དེད་དཔོན་གྱི་ཁྱིམ་གང་ཡིན། དེ་དག་གིས་དེད་དཔོན་གྱི་ཁྱིམ་ནི་འདི་ཡིན་ནོ་ཞེས་བྱས་པ་དང་། རྒྱལ་པོ་དེར་སོང་སྟེ་སྒོར་འདུག་ནས་དེད་དཔོན་
གང་ན་འདུག་ཅེས་དྲིས་པ་དང་། དེ་རྣམས་ཀྱིས་སྨྲས་པ། སྒོར་བྱུང་སྟེ་སོང་ངོ་། །དེས་སྨྲས་པ། འདི་ན་སུ་འདུག་དེ་རྣམས་ཀྱིས་སྨྲས་པ། དེད་དཔོན་གྱི་ཆུང་མ་མཆིས་སོ། །དེས་སྒོ་གཏན་ཕྱེ་སྟེ་ནང་དུ་ཞུགས་པ་དང་ཇི་ཙམ་ན་དེད་དཔོན་གྱི་ཆུང་མ་གཟུགས་དང་ན་ཚོད་
བཟང་བས་འཕགས་རྒྱལ་ན་གནས་པའི་བུད་མེད་ཐམས་ཅད་ཟིལ་གྱིས་གནོན་པ་ཞིག་མཐོང་ངོ་། །དེས་དེ་མཐོང་ནས་ཀྱང་རབ་ཏུ་ཆགས་པར་གྱུར་ཏེ་སྨྲས་པ། བཟང་མོ་ང་དང་ལྷན་ཅིག་དགའ་མགུར་སྤྱད་ན་དེད་དཔོན་གྱི་ཤོ་གམ་གཏང་ངོ་། །དེས་སྨྲས་པ། གལ་ཏེ་དེ་ལྟ་ན་མལ་འདིར་
འདུག་ཤིག་ཅེས་བྱས་པ་དང་། འདོད་ཆགས་ཀྱིས་ལོག་པར་གྱུར་པས་ནི་མི་བྱ་བ་ཅི་ཡང་མེད་པའི་ཕྱིར་དེ་དེར་འདུག་པ་དང་། རྒྱལ་པོའི་མི་རྣམས་ཀྱིས་སྒོ་བཅད་དེ་ཁྱོགས་སུ་བཅུག་ནས་མི་བཞིས་བཏེག་སྟེ་གླུ་ལེན་ཅིང་སྒོ་གཅིག་ནས་འཕགས་རྒྱལ་དུ་ཞུགས་སོ། །དེ་ན་ཁ་ཅིག་ནི་
เล่ม ๑๑ · หน้า 4a
ཐལ་མོ་རྡོབ། ཁ་ཅིག་ནི་རྒོད། ཁ་ཅིག་ནི་འདི་སྐད་དུ་གླུ་ལེན་ཏེ། སྦྲང་མ་དག་གིས་ཟླ་བ་ཟོས། །རྣམ་ཐོས་བུ་ནི་གཉེར་པས་དེད། །ས་གཞི་ནགས་བཅས་མཁའ་ལ་འཕགས། །སྨད་འཚོང་མས་ནི་རབ་སྣང་ཁྲིད། །ཅེས་བྱས་པ་དང་། འཕགས་
རྒྱལ་ན་གནས་པ་རྣམས་ཀྱིས་བསམས་པ། ཅིའི་ཕྱིར་ཚོང་པ་འདི་དག་དེ་སྐད་ཅེས་ཟེར་སྙམ་པ་ལས། དེ་རྣམས་སྒོ་གཞན་དུ་བྱུང་སྟེ། སྨྱགས་བཅད་དེ་བྲོས་ཏེ་སོང་ངོ་། །གསོས་པ་ཡང་ཕན་ཚུན་དུ་རྒྱལ་པོ་ཚོལ་ཞིང་དེ་རིམ་གྱིས་ཀཽ་ཤཱམྦཱིར་སོང་ངོ་། །བློན་པོ་དག་
གིས་རྒྱལ་པོ་ཤར་བ་ལ་སྨྲས་པ། ལྷ་དགྱེས་པར་མཛད་དུ་གསོལ། རྒྱལ་པོ་རབ་སྣང་ནི་འདིར་ཁུགས་ལགས་སོ་ཞེས་བྱས་པ་དང་། རྒྱལ་པོ་ཤར་བས་སྨྲས་པ། ཤེས་ལྡན་དག་དེང་ལ་དེ་ཐོགས་ཏེ་ཐག་པའི་ལས་སློབ་ཏུ་ཆུག་ཤིག །རྒྱལ་པོ་རབ་སྣང་འདིར་འོངས་པར་ནོར་
ལྷས་བྱིན་ལ་སུ་ཡང་མ་ཟེར་ཅིག་པར་ཁྲིམས་སུ་ཡང་ཆོས་ཤིག་ཅེས་བསྒོའོ། །ཇི་ཙམ་དུས་གཞན་ཞིག་ན་རྒྱལ་པོ་ཤར་བའི་བུ་ནོར་ལྷས་བྱིན་དང་ལྷན་ཅིག་ཏུ་ཁང་བཟངས་ཀྱི་སྟེང་དུ་བྱུང་སྟེ་འདུག་པ་ན་རྒྱལ་པོ་གཏུམ་པོ་རབ་སྣང་ཐགས་ཀྱི་གྲ་ཁང་ནས་བྱ་བ་ཞིག་གི་ཕྱིར་སྒོར་
བྱུང་བ་དང་རྒྱལ་པོ་ཤར་བས་དེ་མཐོང་ནས། དེས་ནོར་ལྷས་བྱིན་ལ་སྨྲས་པ། མི་འོ་ནི་སུ་ཡིན་ཁྱོད་ཀྱིས་ཤེས་སམ། དེས་ཀྱང་རིང་ཞིག་དུ་བརྟགས་པ་དང་། རྒྱལ་པོ་དེ་སྤྱི་གཅེར་ཡིན་པས་ངོ་ཤེས་ནས་དེ་མཆི་མས་བརྣངས་བཞིན་དུ་འདུག་སྟེ་དེས་བསམས་པ། རྒྱལ་པོ་
ངན་པ་འདིས་ངའི་ཕ་འདི་འདྲ་བའི་གནས་སྐབས་སུ་བྱས་ཀྱིས་གལ་ཏེ་རྒྱལ་པོ་ངན་པ་འདི་མ་བསད་ན་ནོར་ལྷས་བྱིན་མ་ཡིན་དུ་ཟད། ཇི་ལྟར་བསད་པ་ཡང་བདག་ཉིད་ཀྱིས་མི་ཚོར་བ་དེ་ལྟར་གསད་དོ་སྙམ་མོ། །རྒྱལ་པོ་དེ་ཡང་ཡིད་རྣོ་བ་ཞིག་པས་དེ་ཁྲོས་པར་ཤེས་ནས་དེས་སྦྱོར་
བ་འཆང་ལ་བསྒོ་བ། སྦྱོར་བ་འཆང་དགྲ་ལ་ཤ་ལོན་ཟིན་གྱིས་སོང་ལ་རྒྱལ་པོ་གཏུམ་པོ་རབ་སྣང་ཁྲོལ་ཏེ་ཁྲུས་གྱིས་ཟན་བྱིན་ལ་བཀུར་སྟི་ཆེན་པོས་འཕགས་རྒྱལ་དུ་སྐྱོལ་ཅིག་ཅེས་བསྒོ་བ་དང་། དེས་ཀྱང་ཇི་ལྟར་བསྒོ་བ་བཞིན་དུ་འཕགས་རྒྱལ་དུ་བསྐྱལ་ཏོ། །ནོར་ལྷས་བྱིན་
เล่ม ๑๑ · หน้า 4b
གྱིས་བསམས་པ། གལ་ཏེ་བདག་གིས་འདི་ང་ཉིད་གསད་པའི་ཐབས་བརྩམས་ན་གཡོན་ཅན་འདིས་འཕྲིགས་པར་འོང་བས་དུས་ཆུང་ཞིག་གིས་བར་དུ་བྲིད་དོ་སྙམ་ནས། དེས་དེ་ལ་རེ་ཞིག་ཅུང་ཟད་ཅིག་བགད་པ་དང་། དགའ་བ་དང་། རྩེ་བ་དང་། དགའ་མགུར་སྤྱད་པ་དག་
གིས་བྲིད་དོ། །དེ་ནས་དེ་གོས་དྲི་མ་ཅན་གྱོན་ཏེ་ཁྲིའུ་དྲ་བ་ཅན་ལ་ཉལ་ཞིང་འདུག་པ་དང་། རྒྱལ་པོ་ཤར་བའི་བུས་སྨྲས་པ། ལྷ་མོ་འདི་ཅིའི་ཐ་ཚིག །དེས་སྨྲས་པ། ལྷ་ལྷ་རྣམས་འཁྲུགས་ལགས་སོ། །དེས་སྨྲས་པ། ལྷ་མོ་མི་བདོག་གམ། ཅི་ཇི་ལྟར་དམ་བཅས་པ་
གཞན་གྱིས་ཤིག །དེས་སྨྲས་པ། ལྷ་གང་བདག་གིས་དམ་བཅས་པ་དེ་མི་འགྲུབ་ལགས་མོད། རྒྱལ་པོས་སྨྲས་པ། ཁྱོད་ཀྱིས་དམ་ཅི་བཅས། གང་གིས་ན་ཁྱོད་མི་དགའ་བར་གྱུར་པ་སྨྲོས་ཤིག་དང་ཐམས་ཅད་ཡོངས་སུ་རྫོགས་པར་བྱས། ཁྱོད་མི་དགའ་
བར་མ་བྱེད་ཅིག །དེས་སྨྲས་པ། གང་གི་ཚེ་བདག་གི་ཕས་ལྷ་བཟུང་སྟེ་བཞག་པ་དེའི་ཚེ་བདག་གིས་ལྷ་ལ་འདི་སྐད་དུ་ཅི་སྟེ་ལྷ་དང་བདག་ལྷན་ཅིག་བདེ་ལེགས་སུ་ཀཽ་ཤཱམྦཱིར་ཕྱིན་ན། དེར་ལྷ་དང་བདག་ལྷན་ཅིག་ཉིན་ཞག་བདུན་གྱི་བར་དུ་ཟས་མི་བཟའ་ཞིང་ཞག་བདུན་
འདས་ནས། ལྷ་ནི་མེ་ཏོག་གི་ཕྲེང་བས་རྐང་པའི་རྩེ་མོ་ནས་སྤྱི་བོའི་བར་དུ་དཀྲིས་ཏེ་ར་བའི་ཁར་འདུག་པར་བྱའོ། །བདག་ནི་དཀའ་ཐུབ་རྫོགས་ནས་བྲམ་ཟེ་སྟོང་ལ་ཟན་བྱིན་ལ་མཆོད་པ་དང་བཀུར་སྟི་ཆེར་བྱའོ་ཞེས་དམ་བཅས་ན་ད་ལྟ་བཙུན་མོའི་འཁོར་རྒྱ་ཆེ་བར་གྱུར་པས་ཅིའི་སླད་
དུ་འདི་ལྟ་བུ་མཛད་པར་འགྱུར་སྙམ་དུ་བདག་དེ་སེམས་ཤིང་མཆིས་ཏེ། མདོར་ན་གུམ་ལགས་སུ་བས་སོ། །རྒྱལ་པོས་སྨྲས་པ། ལྷ་མོ་ཁྱོད་ཀྱིས་ལྷ་ལ་གསོལ་བ་བཏབ་པ་ཡང་དོན་གྱིས་ན་ངའི་ཆེད་ཁོ་ན་ཡིན་པས་ལོངས་ཤིག་དང་ཐམས་ཅད་བསྒྲུབ་པར་བྱའོ་ཞེས་བྱས་པ་དང་།
དེ་ལངས་ཏེ་དེས་ཁྱི་གུ་གཉིས་ཤིག་ར་བའི་དྲུང་དུ་བཏགས་ཏེ་བཞག་ནས། དེ་ཇི་ཙམ་མི་ཙམ་གྱི་ཤ་ཟ་ནུས་པ་དེ་ཙམ་དུ་ཤ་གོང་ནས་གོང་དུ་བསྐྱེད་དེ་བྱིན་ནོ། །གང་གི་ཚེ་ཁྱི་གུ་དེ་གཉིས་ཤ་དེ་ཙམ་ཟ་ནུས་པ་དེའི་ཚེ་རྒྱལ་པོ་དང་ལྷན་ཅིག་ཉིན་ཞག་བདུན་གྱི་བར་དུ་འདུག་ཅིང་དེ་ནི་མཚན་མོ་ཟ།
เล่ม ๑๑ · หน้า 5a
རྒྱལ་པོ་ཤར་བ་ནི་ཆུང་མ་དེ་ལ་ཆགས་པས་ཉིན་ཞག་བདུན་གྱི་བར་དུ་མ་ཟོས་པས་དེ་ལུས་སྐྱ་བོ་བསེང་བསེང་པོར་གྱུར་ཅིང་ཤ་བྲི་ངན་པ་དང་། ཉམ་ཆུང་བ་དང་། རྨྱ་བར་གྱུར་ཏོ། །ཞག་བདུན་ལོན་པ་དང་། ནོར་ལྷས་བྱིན་གྱིས་མེ་ཏོག་ཕྲེང་རྒྱུད་མཁན་རྣམས་
ལ་ཡང་རྒྱུས་པ་དག་གིས་མེ་ཏོག་དྲི་ཞིམ་པོ་དག་རྒྱུས་ལ་མྱུར་དུ་ཁྱེར་ཏེ་ཤོག་ཤིག་ཅེས་བསྒོའོ། །སྦྱོར་བ་འཆང་ལ་ཡང་དེང་དུ་ལྷའི་དཀའ་ཐུབ་རྫོགས་ཀྱིས་ཁྱོད་ཀྱིས་གྲོང་ཁྱེར་མཛེས་པར་གྱིས་ལ་བྲམ་ཟེ་སྟོང་དང་། རྒྱལ་པོ་བཙུན་མོའི་འཁོར་དང་། གཞོན་ནུ་དང་། བློན་
པོ་དང་། གྲོང་ཁྱེར་གྱི་སྐྱེ་བོའི་ཚོགས་དང་བཅས་པའི་ཟན་སྦྱོར་ཅིག་ཅེས་བསྒོའོ། །བློན་པོ་གཞན་དག་ནི་མི་ཚོར་བར་བྱ་བའི་ཕྱིར་གནས་གཞན་དང་གཞན་དག་ཏུ་ལས་སུ་བསྐོས་སོ། །སྦྱོར་བ་འཆང་ཡང་རྒྱལ་པོ་ལ་སྙིང་ཉེ་ཞིང་རྗེས་སུ་ཆགས་པས་གྲོང་ཁྱེར་དེ་རྡོ་དང་། གསེག་མ་དང་།
གྱོ་མོ་ནི་མེད་པར་བྱས། ཙན་དན་གྱི་ཆུས་ནི་ཆག་ཆག་བཏབ། བདུག་པ་དྲི་ཞིམ་པོའི་པོག་ཕོར་ནི་བཞག །རྒྱལ་མཚན་དང་། བ་དན་དག་ནི་བསྒྲེང་། མུ་ཏིག་དང་། དར་གྱི་ཆུན་པོ་དང་། ལྡ་ལྡི་ནི་དཔྱངས། མེ་ཏོག་རྣམ་པ་སྣ་ཚོགས་ནི་བཀྲམ་སྟེ་ལྷ་རྣམས་ཀྱི་སྐྱེད་
མོས་ཚལ་དགའ་བའི་ཚལ་བཞིན་དུ་དགའ་དགའ་ལྟར་བྱས་ནས་གནས་དང་གནས་རྣམས་སུ་རོལ་མོའི་སྒྲ་སྣ་ཚོགས་ནི་བསྒྲགས། གར་མཁན་དང་། སྙན་དངགས་མཁན་དང་། འཇོ་ཚར་ཅན་གྱི་བྲོ་མཁན་རྣམས་ཀྱིས་ནི་བྲོ་གར་བྱ་བར་བརྩམས་སོ། །ཅ་ཅོ་ཆེན་པོ་བྱུང་བ་
དེའི་ཚེ་ནོར་ལྷས་བྱིན་གྱིས་རྒྱལ་པོ་ཤར་བའི་བུ་ར་བའི་ཁར་རྐང་པའི་རྩེ་མོ་ནས་སྤྱི་བོའི་བར་དུ་མེ་ཏོག་གིས་དཀྲིས་ནས་བསྙལ་ལོ། །དེ་ནས་ར་བའི་ཁ་ནས་ཕུལ་ནས་ལྷུང་མ་ཐག་ཏུ་གསོན་པོར་ཁྱི་དག་གིས་རུས་གོང་འབའ་ཞིག་ལུས་པར་བྱས་ཏེ། བྱ་རོག་དང་། བྱ་རྒོད་དང་། ཝ་
དང་། མི་རོ་ལ་ཟ་བའི་སྲོག་ཆགས་གཞན་དག་ཀྱང་འཐབ་པར་གྱུར་ཏོ། །ཀཽ་ཤཱམྦཱིར་ལྷ་ར་བའི་ཁ་ནས་གྲོང་ཁྱེར་མཛེས་པ་ལྟ་བ་ལས་ལྷུང་སྟེ། ཁྱི་དག་གིས་ཟོས་སོ་ཞེས་ཀུ་ཅོའི་སྒྲ་ཆེར་གྱུར་པ་དང་། དེ་ན་ཁ་ཅིག་ནི་ངུ་། ཁ་ཅིག་ནི་དགའ། ཁ་ཅིག་ནི་ཐ་མལ་པར་འདུག །
เล่ม ๑๑ · หน้า 5b
ཁ་ཅིག་ནི་འཕྲོག་རློམ་བྱེད་པར་གྱུར་ཏོ། །ཀུ་ཅོ་ཆེན་པོ་བྱུང་བ་དེའི་ཚེ་ཀཽ་ཤཱམྦཱི་ན་གནས་པའི་དགེ་སློང་དག་སོ་སོར་བྲོས་ནས་ཁ་ཅིག་ནི་མཉན་ཡོད་དུ་སོང་ངོ་། །ཁ་ཅིག་ནི་གནས་གཞན་དང་གཞན་དུ་སོང་ངོ་། སྐབས་དེར་སྦྱོར་བ་འཆང་བ་དང་། བློན་པོ་གཞན་རྣམས་དང་།
ཀཽ་ཤཱམྦཱི་ན་གནས་པའི་མིའི་གཙོ་བོ་དང་། བྲམ་ཟེ་དང་། ཁྱིམ་བདག་རྣམས་ཀྱིས་ཀུ་ཆོ་ཞི་བར་བྱས་ཏེ་དེ་ནས་སྦྱོར་བ་འཆང་གིས་ཇི་ལྟར་རྒྱལ་པོ་ར་བའི་ཁར་སོང་ངོ་། །ཇི་ལྟར་ར་བའི་དྲུང་ན་ཁྱི་འདུག་པར་གྱུར་ཅེས་ཀུན་ཏུ་བརྟག་པར་བརྩམས་སོ། །དེས་དེ་ལྟར་བརྟགས་
པ་དང་། ནོར་ལྷས་བྱིན་གྱིས་ཇི་ལྟར་ཐབས་ཀྱིས་བསད་པ་རྩད་ཆོད་དེ་དེ་ཁྲོས་ནས་ནོར་ལྷས་བྱིན་རྒྱ་སྐྱེགས་ཀྱི་ཁང་པར་བཅུག་སྟེ་བསྲེགས་སོ། །དགེ་སློང་དག་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པར་མཛད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་
པ་རྒྱལ་པོ་ཤར་བའི་བུས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཁྱི་དག་གིས་འཚལ་ཏེ་དུས་ལས་འདས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་ཤར་བའི་བུ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ་འོང་
བ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་ཏེ། དགེ་སློང་དག་རྒྱལ་པོ་ཤར་བའི་བུས་ལས་བྱས་ཤིང་བསགས་པ་དག་གཞན་སུས་སོ་སོར་ཉམས་སུ་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་རྣམས་ནི་ཕྱི་རོལ་
གྱི་སའི་ཁམས་ལ་སྨིན་པར་མི་འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་དགེ་བ་དང་མི་དགེ་བའི་ལས་བྱས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་ཏེ།
བསྐལ་པ་བརྒྱ་ཕྲག་རྣམས་སུ་ཡང་། ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག་སྔོན་བྱུང་བ་རི་འོར་ཞིག་ན་བྲམ་ཟེ་མདུན་ན་འདོན་ཞིག་འདུག་གོ། །སངས་རྒྱས་འབྱུང་བ་མེད་པ་ན་རང་
เล่ม ๑๑ · หน้า 6a
སངས་རྒྱས་ཕོངས་པ་དང་། དམན་པ་ལ་ཐུགས་བརྩེ་བ། བས་མཐའི་གནས་མལ་དག་ལ་དགའ་བ། སྦྱིན་གནས་གཅིག་པུར་གྱུར་པ་དག་འཇིག་རྟེན་དུ་འབྱུང་བས་རང་སངས་རྒྱས་ཤིག་ལྗོངས་རྒྱུ་བ་རྒྱུ་ཞིང་རི་འོར་དེར་ཕྱིན་པ་དང་། ཕྱོགས་ཞིག་ཏུ་ནུབ་མོ་
གནས་སོ། །དེ་ཕྱི་དེ་ཉིན་སྔ་དྲོ་ཤམ་ཐབས་དང་ཆོས་གོས་བགོས་ལྷུང་བཟེད་ཐོགས་ནས་རི་འོར་གྱི་གྲོང་དེར་བསོད་སྙོམས་ལ་ཞུགས་པ་དང་། མདུན་ན་འདོན་དེ་ཡང་ཁྱི་ཁྲིད་ནས་ཕྱིར་བྱུང་སྟེ། དེས་རང་སངས་རྒྱས་བདག་ཉིད་ཆེན་པོ་ཉེས་པ་མེད་ཅིང་གནོད་པ་མི་བྱེད་པ་དེ་ལ་
ཁྱི་སྦད་དོ། །དགེ་སློང་དག་ཇི་སྙམ་དུ་སེམས། མདུན་ན་འདོན་གང་ཡིན་པ་དེ་ནི་རྒྱལ་པོ་ཤར་བའི་བུ་འདི་ཡིན་ཏེ། འདིས་དེའི་ཚེ་དེའི་དུས་ན་རང་སངས་རྒྱས་ཉེས་པ་མེད་ཅིང་གནོད་པ་མི་བྱེད་པ་ལ་ཁྱི་སྦད་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ཚེ་རབས་ལྔ་བརྒྱར་ཁྱིས་
ཟོས་ནས་དུས་ལས་འདས་ཏེ། ད་ལྟར་གྱི་བར་དུ་ཡང་ཁྱིས་ཟོས་ཏེ་དུས་ལས་འདས་པར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་གཅིག་ཏུ་དཀར་བ་རྣམས་ཀྱི་ཡང་གཅིག་ཏུ་དཀར། འདྲེན་མ་རྣམས་
ཀྱི་ཡང་འདྲེན་མ་སྟེ། དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་། འདྲེན་མ་རྣམས་སྤངས་ནས་ལས་གཅིག་ཏུ་དཀར་བ་དག་ཁོ་ན་ལ་བརྩལ་བར་བྱས་ཏེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་
ནས། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །རྒྱལ་པོ་ཤར་བའི་བུ་དུས་ལས་འདས་ནས་རྒྱལ་པོ་གཏུམ་པོ་རབ་སྣང་འགྲན་ཟླ་མེད་པར་རྒྱལ་པོ་བྱེད་པར་གྱུར་ཏོ། །དེ་དུས་གཞན་ཞིག་ན་ཁང་བཟངས་ཀྱི་སྟེང་དུ་བྱུང་ནས་བློན་
པོའི་ཚོགས་ཀྱིས་བསྐོར་ཏེ་གཏམ་བཟང་པོ་མ་ཡིན་པ་དག་ཟེར་ཞིང་འཁོད་དེ། ཤེས་ལྡན་དག་གྲོང་དང་གྲོང་ཁྱེར་དང་གནས་གང་ན་སྨད་འཚོང་མ་བཟང་མོ་ཡོད། །བློན་པོ་རྣམས་ཀྱིས་སྨྲས་པ། ལྷ་རྡོ་འཇོག་ན་སྨད་འཚོང་མ་བཟང་མོ་ཞེས་བགྱི་བ་གཟུགས་དང་ན་ཚོད་དང་།
เล่ม ๑๑ · หน้า 6b
ལྡན་པ་སྒྱུ་རྩལ་དྲུག་བཅུ་རྩ་བཞི་ལ་མཁས་པ་ཞིག་མཆིས་ཏེ། མཐོང་མ་ཐག་ཏུ་ཆགས་པར་མི་འགྱུར་བའི་མི་གང་ལགས་པ་དེ་ནི་སའི་སྟེང་ན་འགའ་ཡང་མ་མཆིས་སོ། །རྒྱལ་པོ་གཏུམ་པོ་རབ་སྣང་གིས་དེའི་གཟུགས་དང་ན་ཚོད་དང་ལྡན་པ་ཐོས་ནས་ཐོས་མ་ཐག་ཏུ་
ཆགས་པར་གྱུར་ཏེ་སྨྲས་པ། གསོས་པ་ཅི་བྱས་ཀྱང་མི་ཕན་དེ་ལྟ་བུའི་བུད་མེད་ལ་དགའ་མགུར་སྤྱད་དགོས་པས་རྡོ་འཇོག་ཏུ་སོང་སྟེ་དེ་དང་ལྷན་ཅིག་དགའ་མགུར་སྤྱད་པར་བྱའོ། །དེས་སྨྲས་པ་ལྷ་རྒྱལ་པོ་པད་མའི་སྙིང་པོ་ཅན་ནི་ཡུན་རིང་པོ་ནས་ཁྱོད་ཀྱི་གཤེད་མར་གྱུར་
པ། ཕྱིར་རྒོལ་བར་གྱུར་པ། མི་མཛའ་བར་གྱུར་པ་ལགས་ལ། དེ་ནི་རྟག་ཏུ་རྡོ་འཇོག་ན་མཆིས་ལགས་པས་ཅི་སྟེ་ལྷ་རྡོ་འཇོག་ཏུ་གཤེགས་ན་གདོན་མི་འཚལ་བར་དེས་ལྷ་བརླག་པར་བགྱིད་ལགས་སོ། །དེས་སྨྲས་པ། མི་རྣམས་ཀྱི་ནང་ན་མི་གཟུ་ལུམས་ཅན་
དག་ལྟ་ཡོད་མོད་ཀྱི། འོན་ཀྱང་ཁྱོད་ནི་འདི་ལ་འདུག་ཤིག །ང་ནི་འགྲོའོ། །དེས་སྨྲས་པ། ཅི་སྟེ་ལྷ་དེ་ལྟ་བུར་དགྱེས་ན་ལྷ་ཉིད་མཁྱེན་མོད་གྱི། འོན་ཀྱང་བག་མཛད་པའི་རིགས་སོ། །རྒྱལ་པོ་རབ་སྣང་བུད་མེད་ལ་བརྐམ་ཆགས་ཅན་ཡིན་པས་དེས་དེའི་ཚིག་མ་མཉན་
ནས་གླང་པོ་ཆེའི་གཙོ་བོ་འདམ་བུའི་རི་ལ་ཞོན་ཏེ་རྡོ་འཇོག་ཏུ་སོང་ངོ་། །དེ་རིམ་གྱིས་སོང་ནས་གཏུན་ཤིང་རི་ལ་ཕྱིན་པ་དང་། དེས་དེར་གླང་པོ་ཆེའི་གཙོ་བོ་འདམ་བུའི་རི་བཞག་ནས་རྡོ་འཇོག་ཏུ་སོང་ངོ་། །དེ་ནས་མུ་ཏིག་གི་དོ་ཤལ་སྲང་བརྒྱ་སྟོང་རི་བ་མགུལ་ནས་བཀྲོལ་ཏེ་བཟང་
མོ་གཟུགས་ཀྱིས་འཚོ་བའི་གན་དུ་སོང་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །འཕགས་རྒྱལ་ན་གནས་པའི་བྲམ་ཟེ་དང་ཁྱིམ་བདག་དག་ཤེས་ལྡན་དག་རྒྱལ་པོ་མི་སྣང་ན་གར་བཞུད་ཅེས་དཔྱོད་པ་ལ་ཞུགས་པ་དང་། དེ་ན་
ཁ་ཅིག་གིས་སྨྲས་པ། དེ་ཅི་མི་ཕལ་པ་ཡིན་ནམ། དེས་ན་མི་མངོན་མངོན་པར་འགྱུར་དུ་ཟད་ཀྱི། དེ་གར་ཡང་ནི་མ་བཞུད་དོ། །གཞན་དག་གིས་སྨྲས་པ། དེ་ནི་བཙུན་མོའི་འཁོར་རྒྱ་ཆེ་བ་ཡིན་པས་ཅིའི་ཕྱིར་ཕྱི་རོལ་དུ་འབྱུང་སྟེ། བཙུན་མོའི་འཁོར་ཉིད་ན་དགའ་
เล่ม ๑๑ · หน้า 7a
བ་དང་རྩེད་མོ་སོ་སོར་ཉམས་སུ་མྱོང་བར་བྱེད་དོ། །ཁ་ཅིག་གིས་སྨྲས་པ། འདི་ལ་ཐེ་ཚོམ་བྱར་ཅི་ཡོད། ཚུར་ཤེག་གསོས་པ་ལ་འདྲིར་འདོང་ངོ་། །ཁ་ཅིག་གིས་ལེགས་ཀྱིས་དེ་ལྟར་བྱའོ་ཞེས་སྨྲས་ནས་དེ་དག་ཐམས་ཅད་འདུས་ཏེ་གསོས་པའི་དྲུང་
དུ་དོང་ནས་སྨྲས་པ། གསོས་པ་ལྷ་མི་སྣང་ན་ག་ཤེད་དུ་མ་བཞུད་གྲང་། དེས་སྨྲས་པ། ཤེས་ལྡན་དག་ཅི་རིངས་མཐོང་བར་འགྱུར་རོ། །དེ་དག་གིས་སྨྲས་པ། གསོས་པ་ཇི་སྲིད་ན་མཐོང་བར་འགྱུར། དེས་སྨྲས་པ། ལོ་བཅུ་གཉིས་ལོན་ནས་སོ། །དེ་དག་ཁྲོས་
ནས་སྨྲས་པ། གསོས་པ་གང་གི་ཕྱིར་དེ་སྐད་སྨྲ་བ་ལས་ན་གདོན་མི་ཟ་བར་ཁྱོད་ཀྱིས་ལྷ་བསད་ནས་བདག་ཉིད་རྒྱལ་སྲིད་བྱེད་པར་འདོད་དོ། །དེའི་ཕྱིར་རེ་ཞིག་གལ་ཏེ་ཞག་བདུན་ན་ལྷ་ལྟར་ཡོད་ན་དེ་ལྟ་ན་ལེགས་ཇི་སྟེ་མེད་ན་ནི་ངེད་ཀྱིས་གཞན་ཞིག་རྒྱལ་པོར་དབང་བསྐུར་བར་བྱའོ་ཞེས་
བྱས་པ་དང་། དེ་ཅང་མི་ཟེར་བར་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་པ་བ་ལང་སྐྱོང་གི་མ་ཞི་བས་ཐོས་ནས་བོས་ཏེ་དྲིས་པ། གསོས་པ་ཁྱོད་ཅིའི་ཕྱིར་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག །དེས་སྨྲས་པ། ལྷ་མོ་
བྲམ་ཟེ་དག་འདི་སྐད་ཅེས་མཆི་ན་ཇི་ལྟར་སེམས་ཁོང་དུ་ཆུད་ཅིང་མི་མཆིས། དེས་སྨྲས་པ། གསོས་པ་གལ་ཏེ་དེ་ལྟ་ན་སོང་ལ་ནས་ཀྱི་ཆས་མར་དང་སྦྲང་རྩིས་བསྐུས་པ་གསེར་སྣོད་ཀྱི་ནང་དུ་ལུགས་ཏེ། རྟ་མང་ལག་ལ་རྒྱུས་པ་གང་ཡིན་པ་དེའི་མདུན་དུ་ཞོག་ལ་འདི་
སྐད་ཅེས་གང་ཞིག་ངེད་ཉིད་རྡོ་འཇོག་ཏུ་འགྲོ་བར་སྤྲོ་བ་དེ་ནས་ཀྱི་ཆས་མར་དང་སྦྲང་རྩིས་བསྐུས་པ་འདི་དག་ཟོ་ཤིག་ཅེས་སྨྲོས་ལ་དེ་ལྟར་བྱ་སྟེ་རྟ་བཟང་པོ་གང་གིས་ཟོས་པ་ངེད་ལ་སྦྲོན་ཅིག །གསོས་པས་ཇི་ལྟར་བསྒོ་བ་བཞིན་དུ་བྱས་ན་འགའ་ཡང་ཟ་བར་སྤྲོ་བ་མེད་དོ། །ཕྱོགས་
གཞན་ཞིག་ན་རྟ་རིད་རྐེ་བ་ལུས་རྨྱ་བར་གྱུར་པ། ངན་མ་ཟ་བ། དབུགས་རྒོད་པ། རྣ་བ་ཆག་པ་ཞིག་འདུག་པ་དེའི་དྲུང་དུ་དེ་སོང་སྟེ་མདུན་དུ་འདུག་ནས། གང་ཞིག་ངེད་ཉིད་རྡོ་འཇོག་ཏུ་འགྲོ་བར་སྤྲོ་བ་དེ་ནས་ཀྱི་ཆས་མར་དང་སྦྲང་རྩིས་བསྐུས་པ་འདི་དག་ཟོ་ཤིག་ཅེས་སྨྲས་པ་དང་།
เล่ม ๑๑ · หน้า 7b
དེས་དེ་དག་ཟོས་སོ། །གསོས་པ་སོང་ནས། བ་ལང་སྐྱོང་གི་མ་ཞི་བ་ལ་ཇི་ལྟར་གྱུར་པ་སྨྲས་པ་དང་། དེས་སྨྲས་པ། གསོས་པ་སོང་ལ་སྟོད་ཅིག །གལ་ཏེ་སྟོད་པའི་ཚེ་མི་སྲུན་བྱེད་ན་ཁྱོད་ཀྱིས་མ་འཇིགས་པར་དཔུང་སྐྱེད་ཅིག །སེམས་སྟོབས་དང་ལྡན་པ་ལ་ནི་
སུས་ཀྱང་མི་རྫིའོ། །དེ་སོང་ནས་དེ་བསྟད་པར་བརྩམས་པ་དང་། དེ་སྟོད་པའི་ཚེ་རབ་ཏུ་འཇིགས་པ་ཆེན་པོའི་གཟུགས་སུ་བདག་ཉིད་སྤྲུལ་ནས། ཀྭའི་མི་ཁྱོད་ཀྱིས་སྔོན་ཆད་འདི་ལྟ་བུའི་རྟ་མཐོང་བ་འགའ་ཡོད་དམ་ཞེས་སྨྲས་སོ། །དེས་རལ་གྲི་ཤུབས་ནས་ཕྱུང་སྟེ་བསྡིགས་
ནས་ཀྭའི་རྟའི་སྲིན་པོ་ཁྱོད་ཀྱིས་སྔོན་ཆད་རྟ་ཞོན་པ་སུ་ལ་ཡང་ལྕག་འདི་ལྟ་བུ་མཐོང་བ་ཡོད་དམ་ཞེས་སྨྲས་པ་དང་། དེས་སྨྲས་པ། ཀྱེ་མི་སྔོན་མ་མཐོང་ངོ་། །དེས་ཀྱེ་རྟའི་སྲིན་པོ་གལ་ཏེ་རེ་ཞིག་མི་སྲུན་མི་བྱེད་ན་དེ་ལྟ་ན་ལེགས། ཅི་སྟེ་བྱེད་ན་མགོ་དྲུངས་ནས་བཅད་དེ་
ས་ལ་དོར་བར་བྱའོ། །དེས་སྨྲས་པ། ཀྱེ་མི་ཅི་སྟེ་དེ་ལྟ་ན་གལ་ཏེ་བདག་ཕྱིར་འདིར་ཁྲིད་དེ་མི་འོང་བར་དམ་འཆའ་ན་འགྲོའོ། །དེས་སྨྲས་པ། ལེགས་ཀྱིས་དེ་བཞིན་དུས་བྱས་འདོད་དོ་ཞེས་སྨྲས་ནས། དེས་དེ་ལ་ཞོན་ཏེ་སོང་ནས་རིམ་གྱིས་རྡོ་འཇོག་ཏུ་ཕྱིན་ཏོ། །རྒྱལ་པོ་
གཏུམ་པོ་རབ་སྣང་གིས་མཐོང་ནས་སྨྲས་པ། གསོས་པ་འོངས་སམ། དེས་སྨྲས་པ། ལྷ་མཆིས་སོ། །དགོས་པ་ཅི་ཞིག་གི་ཕྱིར་ཞེས་བྱས་པ་དང་། དེས་ཇི་ལྟར་གྱུར་པ་རྣམས་བརྗོད་དོ། །རྒྱལ་པོས་སྨྲས་པ། གསོས་པ་རེ་ཞིག་ཞག་བདུན་གྱི་བར་དུ་རྩེས་ལ་ཞག་
བདུན་འདས་པ་དང་དུས་ཤེས་པར་བྱའོ། །ཞེས་བྱས་ནས་ཞག་བདུན་གྱི་བར་དུ་གཟུགས་ཀྱིས་འཚོ་བ་བཟང་མོ་དང་ལྷན་ཅིག་དགའ་མགུར་སྤྱད་དེ་ཞག་བདུན་འདས་ནས་སོང་ངོ་། །གཏུན་ཤིང་རིར་ཕྱིན་ནས་བདག་ཉིད་ཀྱིས་གླང་པོ་ཆེའི་གཙོ་བོ་འདམ་བུའི་རི་བསྟད་པར་
བརྩམས་པ་དང་། དེས་བསྟད་པ་ན་སྐད་ཕྱུང་བ། དེ་དང་མི་རིང་བ་ཞིག་ན་བྲམ་ཟེ་ལྟས་མཁན་ལོང་བ་ཞིག་གནས་པ་དེས་ཐོས་ནས། དེས་སྨྲས་པ། གླང་པོ་ཆེའི་གཙོ་བོ་འདིའི་སྐད་དང་སྦྱར་ན། འདི་ནི་འདི་ནས་དཔག་ཚད་བརྒྱར་སོང་ནས་ལྷོ་ཕྱོགས་ཀྱི་རྒྱ་མཚོ་ཆེན་པོ་
เล่ม ๑๑ · หน้า 8a
ལས་ཆུ་འཐུང་བར་འགྱུར་རོ། །དེ་ནས་རྒྱལ་པོ་རབ་སྣང་དང་གསོས་པ་གླང་པོ་ཆེའི་གཙོ་བོ་འདམ་བུའི་རི་ལ་ཞོན་ཏེ་སོང་ངོ་། །རེ་ཞིག་ཅིག་ན་ཕྱོགས་ཞིག་ན་རྫ་མཁན་ཞིག་འདུག་པ་དེའི་སྣོད་སོ་མ་བཏང་བ་དག་ཅིག་འདམ་བུའི་རིའི་རྐང་པས་བརྫིས་ནས་རྫ་མཁན་གྱིས་མྱ་
ངན་བྱ་བར་བརྩམས་པ་དང་། གསོས་པས་སྨྲས་པ། གང་དག་སས་འཚོ་བ་དེ་དག་ནི་འདི་ལྟར་འགྱུར་རོ། །རྒྱལ་པོ་རྣམས་ནི་ཁྭ་བཞིན་ཁུ་འཕྲིག་ཟ་བ་ཡིན་པས་རྒྱལ་པོ་རབ་སྣང་གིས་བསམས་པ། གསོས་པ་འདི་བདག་ལ་ཟུར་ཟ་སྟེ། དེ་ཅི་བདག་གཅིག་པུ་སས་འཚོ་བ་ཡིན་ནམ་མཇལ་
ཏོ་སྙམ་དུ་བསམས་ནས་ཅང་མི་ཟེར་བར་སོང་ངོ་། །ཡང་ཕྱོགས་ཞིག་ན་ཐིང་རིལ་གྱིས་ལམ་ཀར་ཚང་བཅས་པ་དེའི་སྒོ་ང་དག་འདམ་བུའི་རིའི་རྐང་པས་བཅོམ་ནས་དེས་ཀྱང་མྱ་ངན་བྱ་བར་བརྩམས་པ་དང་། གསོས་པས་སྨྲས་པ། གང་དག་སྤྱོད་ཡུལ་མ་ཡིན་པར་སྤྱོད་པ་དེ་དག་ནི་འདི་ལྟར་
འགྱུར་རོ། །རྒྱལ་པོ་རབ་སྣང་དེ་བཞིན་དུ་རྟོག་པ་སྐྱེས་ནས་བསམས་པ། ཡང་འདི་བདག་ལ་ཟུར་ཟ་སྟེ། ཅི་སྨད་འཚོང་མ་བདག་གི་སྤྱོད་ཡུལ་མ་ཡིན་ནམ་མཇལ་ཏོ་སྙམ་དུ་བསམས་ནས་ཅང་མི་ཟེར་བར་སོང་ངོ་། །ཡང་འདམ་བུའི་རི་ཤིང་དྲུང་ན་མར་སོང་བ་དང་། ཤིང་དེའི་ཡལ་ག་ལ་
སྦྲུལ་ཞིག་གནས་པ་དེས་བསྙབས་ནས་རྒྱལ་པོ་རབ་སྣང་བཟའ་བར་བརྩམས་སོ། །རེ་ཞིག་ན་གསོས་པས་མཐོང་ནས་དེས་དེ་རལ་གྲི་ཤུབས་ནས་ཕྱུང་སྟེ་དུམ་བུ་དུམ་བུར་གཏུབས་ནས་ས་ལ་བོར་བ་དང་གཡོ་ཞིང་འགུལ་བ་གསོས་པས་བལྟས་ཏེ་སྨྲས་པ། གང་དག་དོན་དུ་གཉེར་བར་
བྱ་བ་མ་ཡིན་པ་དོན་དུ་གཉེར་བ་དེ་དག་ནི་འདི་ལྟར་འགྱུར་རོ། །རྒྱལ་པོ་རབ་སྣང་དེ་ཁོ་ན་བཞིན་དུ་རྟོག་པ་སྐྱེས་ནས་བསམས་པ། འདི་བདག་ལ་ལན་གསུམ་གྱི་བར་དུ་ཟུར་ཟ་སྟེ། ཅི་སྨད་འཚོང་མ་བདག་གིས་དོན་དུ་གཉེར་བར་བྱ་བ་མ་ཡིན་ནམ་མཇལ་ཏོ་སྙམ་དུ་བསམས་ནས་ཅང་མི་ཟེར་བར་སོང་ངོ་། །
དུས་གཞན་ཞིག་ན་འདམ་བུའི་རི་བང་ཐེག་སྟེ་སོང་ནས། རྒྱལ་པོས་དེ་བཟུང་བ་དང་མ་ཐུབ་ནས་གསོས་པས་སྨྲས་པ། ལྷ་བྲམ་ཟེ་ལྟས་མཁན་གྱིས་འདི་དཔག་ཚད་བརྒྱར་སོང་ནས་ལྷོ་ཕྱོགས་ཀྱི་རྒྱ་མཚོ་ཆེན་པོ་ལས་ཆུ་འཐུང་བར་འགྱུར་རོ་ཞེས་ལུང་བསྟན་གྱི་དེའི་སླད་དུ་མྱུར་དུ་ཤིང་གི་ཡལ་ག་ལ་འཇུས་
เล่ม ๑๑ · หน้า 8b
ཏེ་གླང་པོ་ཆེ་ཐོང་ཤིག་ཅེས་བྱས་པ་དང་། དེས་མྱུར་བ་མྱུར་བར་ཤིང་གི་ཡལ་ག་ལ་འཇུས་སོ། །གསོས་པས་ཀྱང་ཤིང་གི་ཡལ་ག་ལ་འཇུས་པ་དང་འདམ་བུའི་རི་འདས་ཏེ་སོང་ངོ་། །རྒྱལ་པོས་གསོས་པ་ལ་སྨྲས་པ། གསོས་པ་སོང་ལ་མ་ཚོར་བར་ཞི་བ་ལ་ལྷ་ནི་བྱོན་ནས་སྐྱེད་མོས་ཚལ་ན་བཞུགས་སོ། །
ཞེས་གྱིས་ཤིག །དེ་སོང་ནས་དེ་ལ་བརྗོད་པ་དང་། དེ་དགའ་བ་སྐྱེས་ནས་ཅང་མི་ཟེར་བར་འདུག་གོ། །རྒྱལ་པོས་ཀྱང་སྟོར་ཁུང་ནས་འཛུལ་བར་བརྩམས་པ་ལས། རེ་ཞིག་ན་བུ་མོ་གཉིས་ཤིག་བཤང་སར་བྱུང་བ་དང་། དེ་ན་གཅིག་གིས་སྨྲས་པ། གྲོགས་མོ་ལྷ་འོངས་སོ་ཞེས་གྲག་གོ། །ཅིག་ཤོས་
ཀྱིས་དེ་སྟོར་ཁུང་ནས་འཛུལ་ལོ་ཞེས་སྨྲས་པ་དང་། རྒྱལ་པོས་ཐོས་ནས་དེས་བསམས་པ། གསོས་པ་ལ་བདག་གིས་ཁྱོད་ཀྱིས་མ་ཚོར་བར་ཞི་བ་ལ་སྨྲོས་ཤིག་ཅེས་བསྒོ་ན་དེས་ཁྱིམ་ན་འདུག་པ་རིལ་ལ་སྨྲས་སོ་སྙམ་དུ་བསམས་ཏེ་དེ་ཁྲོས་ནས་དེས་གསོས་པ་ལ་ཇི་ལྟར་གྱུར་པ་དྲན་པར་བྱས་ནས་ཀླན་ཀ་བཙལ་
བ། གསོས་པ་ཁྱོད་ཀོ་ང་ལ་གནོད་པ་བྱེད་པར་ཞུགས་པ་ལྟ་ང་གཅིག་པུ་སས་འཚོ་བ་ཡིན་ནམ། ཅི་ན་གང་གི་ཕྱིར་ཁྱོད་ང་ལ་ཕྱོགས་ཆེ་གེ་མོ་ཞིག་ཏུ་གང་དག་སས་འཚོ་བ་དེ་དག་ནི་འདི་ལྟར་འགྱུར་རོ་ཞེས་ཟུར་ཟ། སྨད་འཚོང་མ་ངའི་སྤྱོད་ཡུལ་མ་ཡིན་ནམ་ཅི་ན་ཡང་ཕྱོགས་ཞིག་ཏུ་གང་དག་སྤྱོད་ཡུལ་མ་ཡིན་
པར་སྤྱོད་པ་དེ་དག་ནི་འདི་ལྟར་འགྱུར་རོ་ཞེས་ཟུར་ཟ། སྨད་འཚོང་མ་ངས་དོན་དུ་གཉེར་བར་བྱ་བ་མ་ཡིན་ནམ་ཅི་ན་ཡང་ཕྱོགས་ཞིག་ཏུ་ཡང་གང་དག་དོན་དུ་གཉེར་བར་བྱ་བ་མ་ཡིན་པ་དོན་དུ་གཉེར་བ་དེ་དག་འདི་ལྟར་འགྱུར་རོ་ཞེས་ཟུར་ཟ། ད་གཟོད་ཀྱང་ང་སྐྱེད་མོས་ཚལ་ན་འདུག་པས་ཁྱོད་སོང་ལ་མ་ཚོར་བར་ཞི་བ་
ལ་ལྷ་བྱོན་ཏེ་སྐྱེད་མོས་ཚལ་ན་བཞུགས་སོ་ཞེས་གྱིས་ཤིག་ཅེས་བསྒོ་བསྒོ་ན། ཁྱོད་ཀྱིས་ཁྱིམ་ན་འདུག་པ་རིལ་ལ་སྨྲས་པས་ཁྱོད་ནི་ང་ལ་གནོད་པ་བྱེད་པར་ཞུགས་སོ། །དེ་དོགས་ཤིང་མི་དགའ་ནས་ཡིད་ཆེས་པར་བྱ་བའི་ཕྱིར་སྨྲས་པ། ལྷ་སྡིག་པས་ནི་བརླག་སྟེ་བདག་གིས་ལྷ་ལ་ཟུར་བགྱིས་པ་མ་མཆིས་སོ། །
བདག་གིས་ལྷ་ལ་ཇི་ལྟར་ཟུར་བགྱིས། ལྷ་འདི་སྐད་དུ་གནས་ཆེ་གེ་མོ་ཞིག་ཏུ་ཁྱོད་ཀྱིས་ང་ལ་གང་དག་སས་འཚོ་བ་དེ་དག་ནི་འདི་ལྟར་འགྱུར་རོ་ཞེས་ཟུར་བྱས་སོ་ཞེས་གསུང་བ་གང་ལགས་པ་ནི་ཕྱོགས་དེར་རྫ་མཁན་གྱི་སྣོད་སོ་མ་བཏང་བ་དག་ཅིག་འདམ་བུའི་རིའི་རྐང་པས་བརྫིས་ནས་རྫ་མཁན་དེས་མྱ་ངན་
เล่ม ๑๑ · หน้า 9a
བགྱི་བར་བརྩམས་པ་དང་། བདག་གིས་དེ་ལས་བསམས་ནས། འདི་སྐད་དུ་གང་དག་སས་འཚོ་བ་དེ་དག་ནི་འདི་ལྟར་འགྱུར་རོ་ཞེས་བགྱིས་པར་བས་སོ། །ཕྱོགས་ཆེ་གེ་མོ་ཞིག་ཏུ་ཁྱོད་ཀྱིས་ང་ལ་གང་དག་སྤྱོད་ཡུལ་མ་ཡིན་པར་སྤྱོད་པ་དེ་དག་ནི་འདི་ལྟར་འགྱུར་རོ་ཞེས་ཟུར་བྱས་སོ་
ཞེས་གསུང་བ་གང་ལགས་པ་ནི་ཕྱོགས་དེར་སྲོག་ཆགས་ཐིང་རིལ་གྱི་སྒོ་ང་དག་ཅིག་འདམ་བུའི་རིའི་རྐང་པས་བཅོམ་ནས་དེ་ཡང་མྱ་ངན་བྱེད་པར་བརྩམས་པ་དང་། བདག་གིས་དེ་ལས་བསམས་ནས་འདི་སྐད་དུ་གང་དག་སྤྱོད་ཡུལ་མ་ཡིན་པར་སྤྱོད་པ་དེ་དག་ནི་འདི་ལྟར་འགྱུར་རོ་ཞེས་བགྱིས་
པར་བས་སོ། །ཕྱོགས་ཆེ་གེ་མོ་ཞིག་ཏུ་ཁྱོད་ཀྱིས་ང་ལ་གང་དག་དོན་དུ་གཉེར་བ་མ་ཡིན་པ་དོན་དུ་གཉེར་བ་དེ་དག་ནི་འདི་ལྟར་འགྱུར་རོ་ཞེས་ཟུར་བྱས་སོ་ཞེས་གསུང་བ་གང་ལགས་པ་ནི་ཕྱོགས་དེར་ཤིང་གི་ཡལ་ག་ལ་སྦྲུལ་ཞིག་གནས་པ་དེས་བསྙབས་ནས་ལྷ་བཟའ་བར་བརྩམས་པ་དང་།
བདག་གིས་རལ་གྲི་ཤུབས་ནས་ཕྱུང་སྟེ་དུམ་བུ་དུམ་བུར་བཅད་ནས་དེ་ས་ལ་ལྷུང་བ་དང་། བདག་གིས་དེ་ལས་བསམས་ནས། འདི་སྐད་དུ་གང་དག་དོན་དུ་གཉེར་བར་བྱ་བ་མ་ཡིན་པ་དོན་དུ་གཉེར་བ་དེ་དག་ནི་འདི་ལྟར་འགྱུར་རོ་ཞེས་བགྱིས་པར་བས་སོ། །ངས་ཁྱོད་ལ་མ་ཚོར་བར་ཞི་
བ་ལ་ལྷ་སྐྱེད་མོས་ཚལ་ན་བཞུགས་སོ་ཞེས་གྱིས་ཤིག་ཅེས་བྱས་ན་ཁྱོད་ཀྱིས་ཁྱིམ་ན་གནས་པ་རིལ་ལ་སྨྲས་སོ་ཞེས་གསུང་བ་གང་ལགས་པ་དེ་ཡང་བདག་གིས་མ་ཚོར་བ་ཁོ་ནར་ཞི་བ་ལ་བགྱིས་ན་བདག་ཇི་ལྟར་ལྷ་ལ་གནོད་པ་བགྱིད་པར་ཞུགས་པ་ལགས། རྒྱལ་པོས་སྨྲས་པ། གསོས་པ་ཁྱོད་
ཀྱིས་ང་ལ་ལན་ཐམས་ཅད་ལེགས་པར་གླན་ན། ད་གཟོད་ང་སྟོར་ཁུང་ནས་འཛུལ་བ་ན་ང་བདག་ཉིད་ཀྱིས་བུད་མེད་གཉིས་ཤིག་ལས་གཅིག་གིས་གྲོགས་མོ་ལྷ་བྱོན་ཏོ་ཞེས་གྲག་གོ་ཞེས་བྱས་པ་དང་། ཅིག་ཤོས་ན་རེ་དེ་སྟོར་ཁུང་ནས་འཛུལ་ལོ་ཞེས་ཟེར་བ་ཐོས་ན་དེ་སུས་བྱས་ཞིག་གུ་ལྷ་དེ་དག་
ནི་ཕྲ་མེན་མ་ལགས་ན་ལགས་ཀྱང་འཚལ་མོད། དེར་ཡང་བདག་གིས་ལྷ་ལ་གནོད་པ་མ་བགྱིས་སོ། །རྒྱལ་པོས་སྨྲས་པ། གསོས་པ་ཁྱོད་ཀྱིས་ཇི་སྐད་སྨྲས་པ་དེ་དེ་ལྟ་ཡིན་མོད་ཀྱི་ངས་ཁྱོད་བགམས་པར་ཟད་ཀྱིས་མི་དགའ་བར་མ་བྱེད་ཅིག །འོན་ཀྱང་ང་རྡོ་འཇོག་ཏུ་སོང་བའི་ཚེ་བྲམ་ཟེ་གང་དག་
เล่ม ๑๑ · หน้า 9b
གིས་གཞན་ཞིག་རྒྱལ་པོར་དབང་བསྐུར་བར་བརྩམས་པ་དེ་དག་ཐག་གཞུག་པའི་དུས་འདི་ཡིན་པས་དེ་རྣམས་གསད་པར་བྱའོ། །དེས་སྨྲས་པ། ལྷ་བྲམ་ཟེ་རྣམས་རེ་ཞིག་གཞག་ཏུ་གསོལ། ཕྲ་མན་མ་དེ་རྣམས་ཇེ་དགུམ་པར་བགྱིའོ། །རྒྱལ་པོས་སྨྲས་པ། གསོས་པ་དེ་རྣམས་ཇི་ལྟར་གསད་
པར་ནུས། ལྷ་བདག་གིས་དེ་རྣམས་ཁུམས་པའི་ཐབས་ཞིག་བགྱིའོ། །གསོས་པ་ལེགས་ཀྱིས་དེ་བཞིན་དུ་གྱིས་ཤིག་ཅེས་བྱས་པ་དང་། གསོས་པས་མདུན་ན་འདོན་གྱི་ཁྱེའུ་རིག་སྔགས་སྨྲ་བ་མཁས་པ་ཞིག་ཡོད་པ་དེའི་དྲུང་དུ་སོང་ནས་བུ་ཕྲ་མེན་མ་འདི་དག་སྐྱེ་བོ་མང་པོ་གསོད་པར་བྱེད་ན།
དེ་དག་གཟུང་བར་བྱ་བའི་ཐབས་དེ་འགའ་ཡོད་དམ་ཞེས་སྨྲས་པ་དང་། དེས་སྨྲས་པ། ཡབ་ཅི་བགྱིར་མཆིས་བདག་གིས་གཟུང་བར་བས་སོ། །བུ་ལེགས་སོ་ཞེས་བྱས་པ་དང་། དེས་མིའི་ལག་པ་ལས་ཨུཏྤལ་འདྲ་བར་བསྒྱུར་ནས་མིའི་ལག་ཏུ་བསྐུར་ཏེ་སྨྲས་པ། ཀྱེ་མི་ཁྱོད་སོང་ལ་སྲང་དུ་ཕྱིན་
ནས་འདུག་ལ། སུ་རིན་གྱིས་ཉོ་བ་དེ་ལ་མ་སྦྱིན་པར་གང་ཞིག་མཐོང་ན་དགོད་པ་དེའི་མིང་དྲིས་ཏེ་གླེགས་བུ་ལ་བྲིས་ཤིག །དེས་དེ་ཐོགས་ཏེ་འདུག་ནས་གང་ཞིག་རིན་གྱིས་ཉོ་བ་དེ་ལ་མི་སྟེར། གང་ཞིག་མཐོང་ནས་དགོད་པ་དེའི་མིང་ནི་དྲིས་ནས་གླེགས་བུ་ལ་འདྲི་བར་བྱེད་དེ། དེས་དེ་ལྟར་འཕགས་
རྒྱལ་གྱི་ཕྲ་མེན་མ་ལྔ་བརྒྱའི་མིང་དྲིས་ནས་བྲིས་སོ། །དེ་ནས་གསོས་པ་ལ་བསྟན་ནས་གསོས་པས་ཀྱང་རྒྱལ་པོ་ལ་བསྟན་པ་དང་། རྒྱལ་པོས་སྨྲས་པ། གསོས་པ་ཕྲ་མེན་མ་མང་པོ་འདི་དག་ཅི་ལྟར་ཁ་བཏག །དེས་སྨྲས་པ། ལྷ་དེ་རྣམས་ཇི་ལྟར་དགུམ་པའི་ཐབས་བདག་ལ་འཚལ་གྱིས་
ལྷ་ཐུགས་ཁྲལ་བསྐྱུད་དུ་གསོལ། དེས་སྨྲས་པ། གསོས་པ་ལེགས་ཏེ་ཁྱོད་ཉིད་ཤེས་སོ། །དེས་འཕགས་རྒྱལ་གྱི་ཕྱོགས་ཞིག་ཏུ་འཁོར་གྱི་ཁྱམས་ཞིག་བྱས་ནས། དེས་ལྷ་ནི་མའི་དམ་ཚིག་ལ་འཇུག་གིས་འཕགས་རྒྱལ་ན་སྲིན་མོ་ཇི་སྙེད་གནས་པ་ཐམས་ཅད་འཁོར་གྱི་ཁྱམས་སུ་འདུ་བར་
གྱིས་ཤིག་ཅེས་དྲིལ་བསྒྲགས་པ་དང་། དེ་དག་གིས་བསམས་པ། ལྷ་འཁོར་གྱི་ཁྱམས་སུ་མའི་དམ་ཚིག་ལ་འཇུག་པ་དེར་བདག་ཅག་ལ་རྫས་བཟང་པོ་མང་དུ་སྟེར་གྱིས་འགྲོ་བར་བྱའོ་སྙམ་ནས་གང་དག་མི་མངོན་པར་འདུག་འདུག་པ་དེ་དག་ཀྱང་རྙེད་པ་ལ་ཆགས་པས་བདག་ཉིད་ཉེ་བར་བསྟན་ཏེ་སྲིན་མོ་
เล่ม ๑๑ · หน้า 10a
ལྔ་བརྒྱ་ལྷག་ཙམ་འཁོར་གྱི་ཁྱམས་སུ་ལྷགས་སོ། །དེ་ནས་མདུན་ན་འདོན་གྱི་བུ་དེས་དེ་དག་ཐམས་ཅད་རིག་སྔགས་ཀྱི་ཞགས་པས་བཅིངས་པ་དང་། གསོས་པས་ཀྱང་དེ་རྣམས་ཁ་བཏག་གོ། །རྒྱལ་པོས་འཕགས་རྒྱལ་ན་གནས་པའི་བྲམ་ཟེ་རྣམས་བོས་ནས་ཤེས་
ལྡན་དག་གིས་ཕྲ་མེན་མ་འདི་སྙེད་ཅིག་བསད་པས་བསོད་ནམས་མ་ཡིན་པ་མང་པོ་བསྐྱེད་ཀྱིས། ཁྱོད་ཀྱིས་བདག་འཁོར་བའི་དགོན་པ་དེ་ལས་དབྱུང་བའི་ཕྱིར་ཉིན་གཅིག་བཞིན་འཁོར་གྱི་ཁྱམས་སུ་འདུ་ཞིང་ཟན་ཟོ་ཤིག་ཅེས་བསྒོ་བ་དང་། དེ་རྣམས་ཀྱིས་ཤིས་པ་བརྗོད་པ་བྱས་ནས་
ཁས་བླངས་སོ། །རྒྱལ་པོ་རབ་སྣང་གིས་སྒོ་བ་ལ་བསྒོ་བ། ཀྱེ་སྐྱེས་བུ་བྲམ་ཟེ་ཇི་སྙེད་ཅིག་འཁོར་གྱི་ཁྱམས་སུ་ཟན་ཟོས་ནས་འགྲོ་བ་དེ་དག་ཐམས་ཅད་ཁྱོད་ཀྱིས་ལེགས་པར་གྲོངས་ཏེ་ང་ལ་སྙོད་ཅིག །དེས་སྨྲས་པ། ལྷ་དེ་ལྟར་བགྱི་སྟེ་གསོལ་བར་འཚལ་ལོ། །རྒྱལ་པོས་
བློན་པོ་རྣམས་ལ་ཡང་བསྒོ་བ་ཤེས་ལྡན་དག་འཕགས་རྒྱལ་ན་གནས་པའི་བྲམ་ཟེ་ཇི་སྙེད་ཅིག་འཁོར་གྱི་ཁྱམས་སུ་ཟན་ཟ་བ་ཐམས་ཅད་ལ་ཁ་ཟས་བསོད་པ་ཕལ་ཆེར་བྱིན་ཅིག །བྲམ་ཟེ་རྣམས་ནི་ཕལ་ཆེར་ལྟོ་མདུན་ཅན་ཡིན་པས་རྒྱལ་པོ་དེས་དེ་ལྟར་བྱེད་དུ་བཅུག་གོ་ཞེས་ཐོས་ནས་
ཐམས་ཅད་ལྷགས་ནས་ཟན་བཟའ་བར་བརྩམས་སོ། །དེ་རྣམས་ཟན་ཟོས་ནས་འཁོར་གྱི་ཁྱམས་ནས་ཕྱིར་བྱུང་བ་དང་། སྒོ་བས་བགྲངས་ན་ལྷག་ཆད་མེད་པར་བྲམ་ཟེ་བརྒྱད་ཁྲི་བྱུང་སྟེ། དེས་རྒྱལ་པོ་ལ་ལྷ་ལྷག་ཆད་མ་མཆིས་པར་བྲམ་ཟེ་བརྒྱད་ཁྲི་མཆིས་སོ་ཞེས་གསོལ་ཏོ། །
རྒྱལ་པོས་གང་གིས་ན་འདི་རྣམས་དུས་གཅིག་ཏུ་མགོ་བཅད་པའི་ཐབས་དེ་གང་ཡིན་སྙམ་དུ་བསམས་ནས་དེས་ཞོ་ཤས་འཚོ་བ་རྣམས་ལ་བསྒོ་བ། བྲམ་ཟེ་ཟན་ཟ་བ་རེ་རེའི་རྒྱབ་ཏུ་གཤེད་མ་མི་རལ་གྲི་ཐོགས་པ་རེ་རེ་ཞོག་ལ། གང་གི་ཚེ་ངས་ཞོ་འོན་ཅིག་ཅེས་སྨྲས་པ་དེའི་ཚེ་ཐམས་ཅད་
ཀྱི་མགོ་ཆོད་ཅིག །རྒྱལ་པོ་གཏུམ་པོ་རབ་སྣང་གིས་དེ་ལྟར་བྱས་པ་དང་། འཕགས་རྒྱལ་ན་གནས་པའི་བྲམ་ཟེ་རྣམས་ལས་འཆི་བདག་གི་ཞགས་པས་ཟིན་པ་བརྒྱད་ཁྲི་ཐམ་པ་འཁོར་གྱི་ཁྱམས་སུ་འདུས་པ་དེ་དག་སྦྱོར་བ་དེས་ཅིག་ཅར་མགོ་བཅད་དོ། །དེ་ན་འཕགས་རྒྱལ་ན་གནས་པའི་
เล่ม ๑๑ · หน้า 10b
བྲམ་ཟེ་ལས་བྲམ་ཟེ་བརྒྱད་ཁྲི་རྒྱལ་པོ་རབ་སྣང་གིས་བསད་དོ། །དེས་དེ་དག་བསད་ནས་ནུབ་མོ་མལ་ཆེན་པོར་ཉལ་བ་ན་རྨི་ལམ་དུ་ས་བླའི་སྒྲ་དྲུག་དང་། བར་སྣང་གི་སྒྲ་དྲུག་ནི་ཐོས། རྨི་ལམ་རྣམ་པ་བརྒྱད་ནི་མཐོང་ངོ་། །ས་བླའི་སྒྲ་དྲུག་གང་ཞེ་ན། འདི་ལྟ་སྟེ། དྲུག །མེད། བདག །
ངན། སེམས། བདག་ཅག་འདི་རྣམས་ཞེས་བྱ་བ་སྟེ། འདི་དག་ནི་འདིར་ཚིགས་སུ་བཅད་པ་དྲུག་གི་ཡི་གེ་དང་པོ་ཡིན་ནོ། །དེ་ལ་དྲུག་ཅེས་བྱ་བ་ལས་ཚིགས་སུ་བཅད་པ་ནི། ལོ་ནི་སྟོང་ཕྲག་དྲུག་བཅུ་དང་། །ལོ་ནི་བརྒྱ་ཕྲག་དྲུག་བཅུ་རུ། །སེམས་ཅན་དམྱལ་བར་འཚེད་རྣམས་
ཀྱི། །ནམ་ཞིག་མཐར་ནི་ཕྱིན་པར་འགྱུར། །མེད་ཅེས་བྱ་བ་ལས་ཚིགས་སུ་བཅད་པ་ནི། མཐའ་མེད་མཐའ་ལྟ་ག་ལ་ཡོད། །ང་དང་ཁྱེད་ཅག་ཉིད་ཀྱིས་ནི། །མཐའ་ཉིད་དམིགས་པར་མི་འགྱུར་བ། །དེ་ལྟར་སྡིག་པའི་ལས་བྱས་སོ། །བདག་ཅེས་བྱ་བ་ལས་ཚིགས་སུ་བཅད་པ་ནི།
བདག་ཅག་གིས་ནི་ལོངས་སྤྱོད་དག །མཐུན་དང་མི་མཐུན་པས་བསྒྲུབས་པ། །གཞན་དག་བདེ་བས་དགའ་བྱེད་ཀྱི། །བདག་ཅག་སྡུག་བསྔལ་སྐལ་ཅན་གྱུར། །ངན་ཞེས་བྱ་བ་ལས་ཚིགས་སུ་བཅད་པ་ནི། འདི་ན་བདག་ཅག་འཚོ་བ་ངན། །བདག་ཅག་གང་བདོག་དེ་མ་བཏང་། །
ལོངས་སྤྱོད་དག་ནི་ཡོད་པའི་ཚེ། །བདག་ཉིད་ལ་ནི་ཕན་མ་བྱས། །སེམས་ཞེས་བྱ་བ་ལས་ཚིགས་སུ་བཅད་པ་ནི། སེམས་ཀྱིས་སུ་ནི་བསླུས་གྱུར་ཅིང་། །མི་ཤེས་པས་ནི་བདས་གྱུར་པ། །སེམས་ཅན་དམྱལ་བར་སྐྱེས་རྣམས་ཀྱིས། །གཉའ་ནི་སུ་ཞིག་བྱེད་པར་གྱུར། །བདག་
ཅག་འདི་རྣམས་ཞེས་བྱ་བ་ལས་ཚིགས་སུ་བཅད་པ་ནི། བདག་ཅག་འདི་རྣམས་བདེ་འགྲོ་རུ། །སོང་སྟེ་དགེ་བ་མང་བྱས་ནས། །དེ་ནས་བསོད་ནམས་བྱས་གྱུར་ཅིང་། །ཤིས་པས་བྱས་རྣམས་མཐོ་རིས་འདོང་། །བར་སྣང་གི་སྒྲ་དྲུག་གང་ཞེ་ན། འདི་ལྟ་སྟེ། ཐམས་ཅད། སུ། གང་།
ད་ནི། དེ་རྣམས། འདི་དག་ཅེས་བྱ་བ་སྟེ། འདི་དག་ནི་ཚིགས་སུ་བཅད་པ་དྲུག་གི་ཡི་གེ་དང་པོ་ཡིན་ནོ། །དེ་ལ་ཐམས་ཅད་ཅེས་བྱ་བ་ལས་ཚིགས་སུ་བཅད་པ་ནི། ཐམས་ཅད་གསོག་ཏུ་ཕྱུང་ཟིན་ཏེ། །འདི་ལ་སྙིང་པོ་ཙམ་ཞིག་ལུས། །རྒྱལ་པོ་སྲིན་ཏེ་སྙིང་པོ་ལ། །དགའ་བ་མེད་པས་
เล่ม ๑๑ · หน้า 11a
རེ་བ་བོར། །སུ་ཞེས་བྱ་བ་ལས་ཚིགས་སུ་བཅད་པ་ནི། སུ་ཞིག་གཉེར་ལེན་ཚུལ་ངན་པོའི། །མིག་ཡ་གཅིག་ཀྱང་འཇོར་བྱེད་པ། །དེས་ནི་བདག་གི་བུ་ཚ་དང་། །བདག་ཀྱང་སྡུག་བསྔལ་ལས་ཐར་བྱས། །གང་ཞེས་བྱ་བ་ལས་ཚིགས་སུ་བཅད་པ་ནི། རྫིང་འདི་
ཉ་དང་རུས་སྦལ་ནི། །མང་པོ་དག་གིས་གང་བ་ལས། །ད་ནི་སྦལ་བས་འཚོ་མོད་ཀྱི། །བདག་གིས་གནས་ནི་མི་འདོར་རོ། །ད་ནི་ཞེས་བྱ་བ་ལས་ཚིགས་སུ་བཅད་པ་ནི། གང་ཞིག་རི་བོ་གཏུམ་ལྡན་ལ། །བདག་ལ་རྐང་པས་ནོམ་བྱེད་པའི། །ལོང་བ་ཉོན་མོངས་དེ་དག་ནི། །
ད་ནི་མགོན་ཡང་མེད་པར་གྱུར། །དེ་རྣམས་ཞེས་བྱ་བ་ལས་ཚིགས་སུ་བཅད་པ་ནི། དེ་རྣམས་མཚོ་ནི་བཟང་པོ་ལས། །ཆུ་ནི་བསིལ་ཞིང་ཞིམ་པ་དག །བདེ་བླག་ཉིད་དུ་རྙེད་པར་འགྱུར། །བདག་ཀྱང་ད་ལྟར་དེར་དགའོ། །འདི་དག་ཅེས་བྱ་བ་ལས་ཚིགས་སུ་བཅད་པ་ནི། འདི་དག་
ཁྲུས་བྱས་ཟོས་ནས་ནི། །ཕྱོགས་དང་ཕྱོགས་སུ་འགྲོ་བར་བྱེད། །བདག་ནི་རྙི་ཡིས་བཟུང་གྱུར་པ། །སྔོན་གོ་སྡིག་པ་ཅི་ཞིག་བྱས། །རྨི་ལམ་བརྒྱད་ཅེས་བྱ་བ་གང་ཞེ་ན། འདི་ལྟ་སྟེ། ཙན་དན་དཀར་པོས་ལུས་བྱུགས་པ་དང་། ཙན་དན་དམར་པོས་གཏོར་བ་དང་། ཀླད་ལ་མེ་འབར་
བ་དང་། མཆན་ཁུང་གཉིས་ནས་སྦྲུལ་གཉིས་འཕྱང་བ་དང་། རྐང་པ་གཉིས་ལ་ཉ་ཁར་བ་གཉིས་ལྡག་པ་དང་། ངང་པ་གཉིས་ནམ་མཁའ་ལ་འཕུར་བ་དང་། རི་ནག་པོ་ཞིག་མདུན་ན་ཚུར་འོང་བ་དང་། ཆུ་སྐྱར་དག་མགོ་ལ་རྟུག་པས་འཐོར་བ་མཐོང་ངོ་། །དེ་གཉིད་སད་ནས་
འཇིགས་པར་གྱུར། བག་ཚ་བར་གྱུར་ཅིང་སྤུ་ཟིང་ཞེས་བྱེད་ནས་གཞི་འདི་ལས་བདག་རྒྱལ་སྲིད་ལས་ཉམས་པའམ། སྲོག་གི་བར་ཆད་དུ་མི་འགྱུར་གྲང་སྙམ་མོ། །དེས་རྨི་ལམ་དེ་དག་བྲམ་ཟེ་རྨི་ལམ་གྱི་དཔྱད་ཤེས་པ་གང་དག་ཡིན་པ་དེ་དག་བོས་ཏེ་བསྙད་པ་དང་། དེ་དག་གིས་བསམས་
པ། ལྷས་རྨི་ལམ་དེ་དག་བཟང་པོ་ཞིག་མཐོང་མོད་ཀྱི་འོན་ཀྱང་བསྔགས་པར་ནི་མི་བྱ་སྟེ། གལ་ཏེ་བསྔགས་ན་འདི་ཇི་ལྟ་བ་ངན་པར་གྱུར་ནས་བྲམ་ཟེ་ལྷག་མ་གང་དག་ཡིན་པ་དེ་དག་ཀྱང་མ་ལུས་པར་བྱེད་པར་འོང་ངོ་སྙམ་དུ་རིག་ནས་གྲོས་བྱས་ཏེ་སྨྲས་པ། ལྷ་རྨང་ལམ་ནི་མི་བཟང་བ་དག་
เล่ม ๑๑ · หน้า 11b
ཅིག་གོ། །དེས་སྨྲས་པ། ཤེས་ལྡན་དག་འབྲས་བུ་ཅིར་འགྱུར། དེ་དག་གིས་སྨྲས་པ། གཞི་དེ་ལས་ལྷ་རྒྱལ་སྲིད་ལས་ཉམས་པའམ། སྲོག་གི་བར་ཆད་དུ་འགྱུར་རོ། །རྒྱལ་པོས་སྨྲས་པ། ཤེས་ལྡན་དག་གང་གིས་ང་རྒྱལ་སྲིད་ལས་ཀྱང་ཉམས་པར་མི་འགྱུར་ཞིང་སྲོག་
གི་བར་ཆད་དུ་ཡང་མི་འགྱུར་བའི་ཐབས་དེ་ལྟ་འགའ་ཡོད་དམ། དེ་དག་གིས་སྨྲས་པ། ལྷ་ཁྱོད་ཀྱིས་སྡིག་ཆེན་པོ་བྱས་ཏེ་བྲམ་ཟེ་བརྒྱད་ཁྲི་བསད་པས་དེའི་སླད་དུ་གལ་ཏེ་སྤྱོད་ན་ཐབས་གཅིག་ཅིག་མཆིས་སོ། །དེ་བྲམ་ཟེ་བསད་པ་དྲན་ནས་སྙིང་ཀུན་ཏུ་འདར་ཏེ་སྨྲས་པ། ཤེས་ལྡན་དག་
ཅི་བྱ་སྨྲོས་ཤིག །དེ་དག་གིས་སྨྲས་པ། ལྷ་སྐྱེད་མོས་ཚལ་དུ་རྫིང་བུ་རྐོར་སྩལ་ཏེ། །བརྐོས་ནས་རྡོ་ཐལ་གྱི་ཉུག་ཏུ་སྩོལ་ཅིག །དེ་ནས་དེར་ཡན་ལག་གི་མཆོག་ལྔ་པོ་གསོས་པ་དང་། མདུན་ན་འདོན་དང་། བ་ལང་སྐྱོང་གི་མ་ཞི་བ་དང་། སྐྱ་བསེང་གི་བུ་མོ་སྒྲོལ་མ་དང་།
གཞོན་ནུ་བ་ལང་སྐྱོང་རྣམས་བསད་དེ་བཅུག་ལ་དེ་རྣམས་ཀྱི་ཁྲག་གིས་ཁྲུས་མཛད་དེ་རྫིང་བུ་ནས་བྱུང་ལ་པུས་མོ་གཉིས་ས་ལ་བཙུགས་ནས་བྲམ་ཟེ་རྣམས་ཀྱི་རྐང་པ་ལ་ལྕེས་བལྡགས་ནས། དེ་ལྟ་ན་ཁྱོད་རྒྱལ་སྲིད་ལས་ཀྱང་ཉམས་པར་མི་འགྱུར་ཞིང་། སྲོག་གི་བར་ཆད་དུ་ཡང་མི་འགྱུར་
རོ། རྒྱལ་པོས་བསམས་པ། གལ་ཏེ་བདག་གིས་ཡན་ལག་གི་མཆོག་ལྔ་པོ་གསོས་པ་དང་། མདུན་ན་འདོན་དང་། བ་ལང་སྐྱོང་གི་མ་ཞི་བ་དང་། སྐྱ་བསེང་གི་བུ་མོ་སྒྲོལ་མ་དང་། གཞོན་ནུ་བ་ལང་སྐྱོང་རྣམས་བསད་ན་བདག་རྒྱལ་པོ་བྱས་ཏེ་ཡང་ཅི་རུང་སྙམ་དུ་བསམས་ནས་བྲམ་ཟེ་
རྣམས་ལ་སྨྲས་པ། ཤེས་ལྡན་དག་ཁྱེད་ཀྱིས་གང་སྨྲས་པ་དེ་ངས་ཐོས་ཀྱིས་དེང་ཤིག་དང་རེ་ཞིག་བསམས་ཏེ་བྱའོ། །བྲམ་ཟེ་རྣམས་དོང་བ་དང་དེ་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་པ་བ་ལང་སྐྱོང་གི་མ་ཞི་བས་མཐོང་སྟེ་དེས་སྨྲས་པ། ལྷ་ཅིའི་སླད་དུ་ཕྱག་འགྲམ་
པ་ལ་གཏད་དེ་སེམས་ཁོང་དུ་ཆུད་ཅིང་བཞུགས། དེས་ཇི་ལྟར་གྱུར་པ་ཐམས་ཅད་དེ་ལ་བསྙད་པ་དང་། དེས་སྨྲས་པ། ལྷ་བྲམ་ཟེ་དེ་དག་ནི་རྟག་ཏུ་མི་རིགས་པ་བསྟེན་པ་ལགས་པས་དེ་དག་ཅི་འཚལ། བཞུད་ལ་འཕགས་པ་ཀ་ཏྱའི་བུ་ཆེན་པོ་ལ་ཞུས་ཤིག །དེས་སྨྲས་པ། ཞི་བ་ལེགས་
เล่ม ๑๑ · หน้า 12a
སོ་ལེགས་སོ། །ཁྱོད་ཀྱིས་དུས་སུ་འཕགས་པ་ཀ་ཏྱའི་བུ་ཆེན་པོ་ལ་གཏད་པས་འགྲོའོ་ཞེས་ཚེ་དང་ལྡན་པ་ཀ་ཏྱའི་བུ་ག་ལ་བ་དེར་སོང་ངོ་། །དེར་སོང་སྟེ་སོང་ནས་ཚེ་དང་ལྡན་པ་ཀ་ཏྱའི་བུ་ཆེན་པོའི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་
གཅིག་ཏུ་འདུག་ནས་རྒྱལ་པོ་གཏུམ་པོ་རབ་སྣང་གིས་ཚེ་དང་ལྡན་པ་ཀ་ཏྱའི་བུ་ཆེན་པོ་ལ་འདི་སྐད་ཅེས་སྨྲས་སོ། །སློབ་དཔོན་ཀ་ཏྱའི་བུ་ཆེན་པོ་འདི་ན་བདག་མཚན་མོ་མལ་ཆེན་པོ་ཞིག་ན་ཉལ་ཞིང་མཆིས་པའི་ཚེ་རྨི་ལམ་དུ་ས་བླའི་སྒྲ་དྲུག་དང་། བར་སྣང་གི་སྒྲ་དྲུག་ནི་ཐོས། རྨི་ལམ་
བརྒྱད་ནི་མཐོང་སྟེ། ས་བླའི་སྒྲ་དྲུག་གང་ཞེ་ན། འདི་ལྟ་སྟེ། དྲུག །མེད། བདག །ངན། སེམས། བདག་ཅག་འདི་རྣམས་ཞེས་བྱ་བ་སྟེ། འདི་དག་ནི་འདིར་ཚིགས་སུ་བཅད་པ་དྲུག་གི་ཡི་གེ་དང་པོ་ལགས་སོ། །དེ་ལ་དྲུག་ཅེས་བྱ་བ་ལས་ཚིགས་སུ་བཅད་པ་ནི། ལོ་ནི་སྟོང་
ཕྲག་དྲུག་བཅུ་དང་། །ལོ་ནི་བརྒྱ་ཕྲག་དྲུག་བཅུ་རུ། །སེམས་ཅན་དམྱལ་བར་འཚེད་རྣམས་ཀྱི། །ནམ་ཞིག་མཐར་ནི་ཕྱིན་པར་འགྱུར། །མེད་ཅེས་བྱ་བ་ལས་ཚིགས་སུ་བཅད་པ་ནི། མཐའ་མེད་མཐའ་ལྟ་ག་ལ་ཡོད། །ང་དང་ཁྱེད་ཅག་ཉིད་ཀྱིས་ནི། །མཐའ་ཉིད་དམིགས་པར་མི་
འགྱུར་བ། །དེ་ལྟར་སྡིག་པའི་ལས་བྱས་སོ། །བདག་ཅེས་བྱ་བ་ལས་ཚིགས་སུ་བཅད་པ་ནི། བདག་ཅག་གིས་ནི་ལོངས་སྤྱོད་དག །མཐུན་དང་མི་མཐུན་པས་བསྒྲུབས་པ། །གཞན་དག་བདེ་བས་དགའ་བྱེད་ཀྱི། །བདག་ཅག་སྡུག་བསྔལ་སྐལ་ཅན་གྱུར། །ངན་ཞེས་བྱ་བ་
ལས་ཚིགས་སུ་བཅད་པ་ནི། འདི་ན་བདག་ཅག་འཚོ་བ་ངན། །བདག་ཅག་གང་བདོག་དེ་མ་བཏང་། །ལོངས་སྤྱོད་དག་ནི་ཡོད་པའི་ཚེ། །བདག་ཉིད་ལ་ནི་ཕན་མ་བྱས། །སེམས་ཞེས་བྱ་བ་ལས་ཚིགས་སུ་བཅད་པ་ནི། སེམས་ཀྱིས་སུ་ནི་བསླུས་གྱུར་ཅིང་། །མི་ཤེས་པས་ནི་
བདས་གྱུར་པ། །སེམས་ཅན་དམྱལ་བར་སྐྱེས་རྣམས་ཀྱི། །གཉའ་ནི་སུ་ཞིག་བྱེད་པར་འགྱུར། །བདག་ཅག་འདི་རྣམས་ཞེས་བྱ་བ་ལས་ཚིགས་སུ་བཅད་པ་ནི། བདག་ཅག་འདི་རྣམས་བདེ་འགྲོ་རུ། །སོང་སྟེ་དགེ་བ་མང་བྱས་ནས། །དེ་ནས་བསོད་ནམས་བྱས་གྱུར་ཅིང་། །ཤིས་
เล่ม ๑๑ · หน้า 12b
པ་བྱས་རྣམས་མཐོ་རིས་འདོང་། །བར་སྣང་གི་སྒྲ་དྲུག་གང་ཞེ་ན། འདི་ལྟ་སྟེ། ཐམས་ཅད། སུ། གང་། ད་ནི། དེ་རྣམས། འདི་དག་ཅེས་བྱ་བ་སྟེ། འདི་དག་ནི་ཚིགས་སུ་བཅད་པ་དྲུག་གི་ཡི་གེ་དང་པོ་ལགས་སོ། །དེ་ལ་ཐམས་ཅད་ཅེས་བྱ་བ་ལས་ཚིགས་སུ་བཅད་པ་ནི། ཐམས་ཅད་
གསོག་ཏུ་ཕྱུང་ཟིན་ཏེ། །དེ་ལ་སྙིང་པོ་ཙམ་ཞིག་ལུས། །རྒྱལ་པོ་སྲིན་ཏེ་སྙིང་པོ་ལ། །དགའ་བ་མེད་པས་རེ་བ་བོར། །སུ་ཞེས་བྱ་བ་ལས་ཚིགས་སུ་བཅད་པ་ནི། སུ་ཞིག་གཉེར་ལེན་ཚུལ་ངན་པོའི། །མིག་ཡ་གཅིག་ཀྱང་འཇོར་བྱེད་པ། །དེས་ནི་བདག་གི་བུ་ཚ་དང་། །བདག་ཀྱང་
སྡུག་བསྔལ་ལས་ཐར་བྱས། །གང་ཞེས་བྱ་བ་ལས་ཚིགས་སུ་བཅད་པ་ནི། རྫིང་འདི་ཉ་དང་རུས་སྦལ་ནི། །མང་པོ་དག་གིས་གང་བ་ལས། །ད་ནི་སྦལ་བས་འཚོ་མོད་ཀྱི། །བདག་གིས་གནས་ནི་མི་འདོར་རོ། །ད་ནི་ཞེས་བྱ་བ་ལས་ཚིགས་སུ་བཅད་པ་ནི། གང་ཞིག་རི་བོ་གཏུམ་
ལྡན་ལ། །བདག་ལ་རྐང་པས་ནོམ་བྱེད་པའི། །ལོང་བ་ཉོན་མོངས་དེ་དག་ནི། །ད་ནི་མགོན་ཡང་མེད་པར་འགྱུར། །དེ་རྣམས་ཞེས་བྱ་བ་ལས་ཚིགས་སུ་བཅད་པ་ནི། དེ་རྣམས་མཚོ་ནི་བཟང་པོ་ལས། །ཆུ་ནི་བསིལ་ཞིང་ཞིམ་པ་དག །བདེ་བླག་ཉིད་དུ་རྙེད་པར་འགྱུར། །བདག་ཀྱང་ད་
ལྟར་དེར་དགའོ། །འདི་དག་ཅེས་བྱ་བ་ལས་ཚིགས་སུ་བཅད་པ་ནི། འདི་དག་ཁྲུས་བྱས་ཟོས་ནས་ནི། །ཕྱོགས་དང་ཕྱོགས་སུ་འགྲོ་བར་བྱེད། །བདག་ནི་རྙི་ཡིས་བཟུང་གྱུར་པ། །སྔོན་གོ་སྡིག་པ་ཅི་ཞིག་བྱས། །རྨི་ལམ་བརྒྱད་ཅེས་བྱ་བ་གང་ཞེ་ན། འདི་ལྟ་སྟེ། ཙན་དན་དཀར་པོས་
ལུས་བྱུགས་པ་དང་། ཙན་དན་དམར་པོས་གཏོར་བ་དང་། ཀླད་ལ་མེ་འབར་བ་དང་། མཆན་ཁུང་གཉིས་ནས་སྦྲུལ་གཉིས་འཕྱང་བ་དང་། རྐང་པ་གཉིས་ལ་ཉ་ཁར་བ་གཉིས་ལྡག་པ་དང་། ངང་པ་གཉིས་ནམ་མཁའ་ལ་འཕུར་བ་དང་། རི་ནག་པོ་ཞིག་མདུན་ནས་ཚུར་འོང་བ་དང་། ཆུ་སྐྱར་
དག་མགོ་ལ་རྟུག་པས་འཐོར་བ་མཐོང་སྟེ། གཉིད་སད་ནས་འཇིགས་པར་གྱུར། བག་ཚ་བར་གྱུར་ཅིང་སྤུ་ཟིང་ཞེས་བགྱིད་ནས། གཞི་འདི་ལས་བདག་རྒྱལ་སྲིད་ལས་ཉམས་པའམ། སྲོག་གི་བར་ཆད་དུ་མི་འགྱུར་གྲང་སྙམ་བགྱིད་དོ། །འཕགས་པ་ཀ་ཏྱའི་བུ་ཆེན་པོ་ལ་བདག་དོན་འདི་
เล่ม ๑๑ · หน้า 13a
ཞུ་ན། གཞི་འདི་ལས་བདག་རྒྱལ་སྲིད་ལས་ཉམས་པའམ། སྲོག་གི་བར་ཆད་དུ་མི་འགྱུར་བ་ལགས་གྲང་། ཚེ་དང་ལྡན་པ་ཀ་ཏྱའི་བུ་ཆེན་པོས་སྨྲས་པ། རྒྱལ་པོ་ཆེན་པོ་ཁྱོད་ཀྱིས་སྒྲ་དེ་དག་དང་། རྨི་ལམ་དེ་དག་གཞན་འགའ་ཞིག་ལ་བསྙད་དམ། དེས་སྨྲས་པ། འཕགས་
པ་བསྙད་དོ། །སུ་ཞིག་ལ། བྲམ་ཟེ་རྣམས་ལའོ། །དེ་དག་གིས་ཁྱོད་ལ་ཇི་སྐད་དུ་ལུང་བསྟན། དེས་ཇི་ལྟར་གྱུར་པ་རྒྱས་པར་བསྙད་པ་དང་། དེས་སྨྲས་པ། རྒྱལ་པོ་ཆེན་པོ་དེ་དག་ནི་རྟག་ཏུ་འདོད་པ་ལ་ལོངས་སྤྱོད་པ་དང་། ལྷའི་འཇིག་རྟེན་མངོན་པར་འདོད་པ་ཡིན་ཏེ། དེ་དག་
ཅི་ཤེས། ཁྱོད་ཀྱིས་སྒྲ་བཟང་པོ་དག་ཅིག་ཀྱང་ཐོས། རྨི་ལམ་བཟང་པོ་དག་ཅིག་ཀྱང་མཐོང་གིས། ཁྱོད་མ་འཇིགས་ཤིག་དང་། གཞི་དེ་ལས་ཁྱོད་རྒྱལ་སྲིད་ལས་ཉམས་པར་ཡང་མི་འགྱུར། སྲོག་གི་བར་ཆད་དུ་ཡང་མི་འགྱུར་རོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཁྱོད་ཀྱིས་
རྨི་ལམ་ན་ས་བླའི་སྒྲ་དྲུག་ཐོས་པ་གང་ཡིན་པ་དེ་གང་གི་ལྟས་ཡིན་ཞེ་ན། ཁྱོད་ཀྱི་མདུན་རོལ་གྱི་རྒྱལ་པོ་དྲུག་ཅིག་གིས་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་པས་ལུས་ཞིག་ནས་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་སོ།། །།འདུལ་བ་ཕྲན་ཚེགས་ཀྱི་གཞི། བམ་
པོ་ཉི་ཤུ་དགུ་པ།། །།དེ་ན་གཅིག་གིས་སེམས་ཅན་དམྱལ་བའི་སྡུག་བསྔལ་གྱིས་ཉེན་ནས་ཚིགས་སུ་བཅད་པ། ལོ་ནི་སྟོང་ཕྲག་དྲུག་བཅུ་དང་། །ལོ་ནི་བརྒྱ་ཕྲག་དྲུག་བཅུ་རུ། །སེམས་ཅན་དམྱལ་བར་འཚེད་རྣམས་ཀྱི། །ནམ་ཞིག་མཐར་ནི་ཕྱིན་པར་འགྱུར། །ཞེས་བྱ་བ་སྨྲས་
སོ། །གཉིས་པས་ཚིགས་སུ་བཅད་པ། མཐའ་མེད་མཐའ་ལྟ་ག་ལ་ཡོད། །ང་དང་ཁྱེད་ཅག་གཉིས་ཀྱིས་ནི། །མཐའ་ཉིད་དམིགས་པར་མི་འགྱུར་བ། །དེ་ལྟར་སྡིག་པའི་ལས་བྱས་སོ། །ཞེས་བྱ་བ་སྨྲས་སོ། །གསུམ་པས་ཚིགས་སུ་བཅད་པ། བདག་ཅག་གིས་ནི་
ལོངས་སྤྱོད་དག །མཐུན་དང་མི་མཐུན་པས་བསྒྲུབས་པ། །གཞན་དག་བདེ་བས་དགའ་བྱེད་ཀྱི། །བདག་ཅག་སྡུག་བསྔལ་སྐལ་ཅན་གྱུར། །ཅེས་བྱ་བ་སྨྲས་སོ། །བཞི་པས་ཚིགས་སུ་བཅད་པ། འདི་ན་བདག་ཅག་འཚོ་བ་ངན། །བདག་ཅག་གང་བདོག་དེ་མ་བཏང་། །ལོངས་སྤྱོད་
เล่ม ๑๑ · หน้า 13b
དག་ནི་ཡོད་པའི་ཚེ། །བདག་ཉིད་ལ་ནི་ཕན་མ་བྱས། །ཞེས་བྱ་བ་སྨྲས་སོ། །ལྔ་པས་ཚིགས་སུ་བཅད་པ། སེམས་ཀྱིས་སུ་ནི་བསླུས་གྱུར་ཅིང་། །མི་ཤེས་པས་ནི་བདས་གྱུར་པ། །སེམས་ཅན་དམྱལ་བར་སྐྱེས་རྣམས་ཀྱི། །གཉའ་ནི་སུ་ཞིག་བྱེད་པར་འགྱུར། །ཞེས་བྱ་བ་སྨྲས་སོ། །
དྲུག་པས་ཚིགས་སུ་བཅད་པ། བདག་ཅག་འདི་རྣམས་བདེ་འགྲོ་རུ། །སོང་སྟེ་དགེ་བ་མང་བྱས་ནས། །དེ་ནས་བསོད་ནམས་བྱས་གྱུར་ཅིང་། །ཤིས་པ་བྱས་རྣམས་མཐོ་རིས་འདོང་། །ཞེས་བྱ་བ་སྨྲས་ཏེ། དེ་དག་ནི་དེའི་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་བར་སྣང་ལས་སྒྲ་དྲུག་ཐོས་
པ་གང་ཡིན་པ་དེ་གང་གི་ལྟས་ཡིན་ཞེ་ན། ཁྱོད་ཀྱི་ཁྱིམ་གྱི་གདུང་མ་དེ་ལ་སྲིན་བུ་ཞིག་གནས་པ་དེས་དེའི་སྙིང་པོ་མ་ཡིན་པ་ཐམས་ཅད་ཟོས་ནས་སྙིང་པོ་ཉི་ཚེ་ལུས་པ་དང་། དེ་དེར་མངོན་པར་མི་དགའ་ནས་ཚིགས་སུ་བཅད་པ། ཐམས་ཅད་གསོག་ཏུ་ཕྱུང་ཟིན་ཏེ། །འདི་ལ་སྙིང་པོ་ཙམ་ཞིག་
ལུས། །རྒྱལ་པོ་སྲིན་དེ་སྙིང་པོ་ལ། །དགའ་བ་མེད་པས་རེ་བ་བོར། །ཞེས་སྨྲས་སོ། །ནམ་མཁའི་སྒྲ་དང་པོ་ནི་དེ་ཡིན་ཏེ། དེ་བས་ན་ཁྱོད་ཀྱིས་ཕྱུང་ལ་གདུང་གཞན་ཞིག་ཆུག་ཤིག །རྒྱལ་པོ་ཆེན་པོ་གཞན་ཡང་ཁྱོད་ཀྱི་རྟ་རྫི་གཉར་ལེན་ཞེས་བྱ་བ་དེས་བྱ་རོག་མོའི་སྒོ་ང་བྱུང་ཞིང་བྱུང་བ་རྣམས་
བཅོམ་པ་དང་། དེ་བུ་དང་བྲལ་བས་ཡིད་མི་བདེ་བ་སྐྱེས་ཏེ། སྙིང་རྗེ་རྗེ་སྐད་དུ་ངུ་ཞིང་དལ་བུས་ཚིགས་སུ་བཅད་པ། སུ་ཞིག་གཉེར་ལེན་ཚུལ་ངན་པོའི། །མིག་ཡ་གཅིག་ཀྱང་འཇོར་བྱེད་པ། །དེས་ནི་བདག་གི་བུ་ཚ་དང་། །བདག་ཀྱང་སྡུག་བསྔལ་ལས་ཐར་བྱས། །ཞེས་བྱ་བ་
སྨྲས་ཏེ། ནམ་མཁའི་སྒྲ་གཉིས་པ་ནི་དེ་ཡིན་གྱིས། །ཁྱོད་ཀྱིས་དེ་འཇོམས་སུ་མ་གཞུག་ཤིག །གཞན་ཡང་ཁྱོད་ཀྱི་ཁྱིམ་ན་རྩེ་བའི་རྫིང་བུ་བྱ་རོག་གིས་བཏུང་སླེབས་ཙམ་དུ་ཆུས་ཁ་ད་ཆད་དུ་གང་བ་ཉ་དང་། རུས་སྦལ་དང་། སྦལ་བ་མང་པོ་གནས་པ་དེ་ན་ཆུ་སྐྱར་གཅིག་ཅིག་
ཉ་དག་ཟ་ཞིང་འདུག་པ་ལས་དེང་སྐམས་ཏེ་ཆུ་མེད་པར་གྱུར་པ་དང་། ཆུ་སྐྱར་དེས་དེ་ལྟ་བུ་དེ་མཐོང་ནས་མི་དགའ་སྟེ་ཚིགས་སུ་བཅད་པ། རྫིང་འདི་ཉ་དང་རུས་སྦལ་ནི། །མང་པོ་དག་གིས་གང་བ་ལས། །ད་ནི་སྦལ་བས་འཚོ་མོད་ཀྱི། །བདག་གིས་གནས་ནི་མི་འདོར་རོ། །ཞེས་བྱ་
เล่ม ๑๑ · หน้า 14a
བ་སྨྲས་ཏེ། ནམ་མཁའི་སྒྲ་གསུམ་པ་ནི་དེ་ཡིན་གྱིས་ཁྱོད་ཀྱིས་དེ་ཆུས་ཁོང་ཤིག །གཞན་ཡང་ཁྱོད་ཀྱི་ཡུལ་ན་རི་བོ་གཏུམ་ལྡན་ཞེས་བྱ་བ་དེ་ལ་གླང་པོ་ཆེ་དང་གླང་པོ་ཆེ་མོ་དམུས་ལོང་ཞིག་གནས་ཏེ། དེ་གཉིས་ལ་བུ་གཅིག་ཡོད་པ་དེ་དེ་དག་གི་རིམ་གྲོ་བྱེད་དོ། །
དེ་དེ་གཉིས་ཀྱི་ཟས་ཀྱི་ཕྱིར་སོང་བ་ན་གླང་པོ་ཆེ་མོ་ཞིག་དང་ལྷན་ཅིག་འདུས་པར་གྱུར་པ་ལས། དེ་ཁྱོད་ཀྱིས་ཐབས་ཀྱིས་བྲོངས་ཏེ་ཁྲིད་དེ་འོངས་ནས་བཏགས་ཏེ་བཞག་པ་དང་། དེ་མ་དང་ཕའི་རྗེས་སུ་མྱ་ངན་བྱེད་ཅིང་རྩྭ་ཡང་མི་ཟ་ཆུ་ཡང་མི་འཐུང་བར་དེ་དག་རྗེས་སུ་དྲན་ཞིང་མི་དགའ་
བར་གྱུར་ནས་ཚིགས་སུ་བཅད་པ། གང་ཞིག་རི་བོ་གཏུམ་ལྡན་ལ། །བདག་ལ་རྐང་པས་ནོམ་བྱེད་པའི། །ལོང་བ་ཉོན་མོངས་དེ་དག་ནི། །ད་ནི་མགོན་ཡང་མེད་པར་གྱུར། །ཅེས་བྱ་བ་སྨྲས་ཏེ། ནམ་མཁའི་སྒྲ་བཞི་པ་ནི་དེ་ཡིན་གྱིས། ཕ་མའི་གྲོགས་བྱེད་པ་ཤི་ན་མི་
རུང་བས་ཁྱོད་ཀྱིས་དེ་ཐོང་ཤིག །གཞན་ཡང་ཁྱོད་ཀྱི་ཁྱིམ་ན་རི་དགས་ཞིག་བཟུང་སྟེ་འདུག་པ་དེ་ཁྱུ་དང་བྲལ་བས་དགོན་པའི་རི་དགས་རྣམས་དྲན་ནས་ཚིགས་སུ་བཅད་པ། དེ་རྣམས་མཚོ་ནི་བཟང་པོ་ལས། །ཆུ་ནི་བསིལ་ཞིང་ཞིམ་པ་དང་། །བདེ་བླག་ཉིད་དུ་རྙེད་པར་
འགྱུར། །བདག་ཀྱང་ད་ལྟར་དེར་དགའོ། །ཞེས་བྱ་བ་སྨྲས་ཏེ། བར་སྣང་གི་སྒྲ་ལྔ་པ་ནི་དེ་ཡིན་གྱིས་ཁྱོད་ཀྱིས་དེ་ཐོང་ཤིག །གཞན་ཡང་ཁྱོད་ཀྱི་ཁྱིམ་ན་ངང་པ་དག་ཅིག་བཟུང་སྟེ་འདུག་པ་དེ་དག་གིས་ངང་པ་གནམ་ལ་འཕུར་བ་དག་མཐོང་ནས་མི་དགའ་སྟེ་ཚིགས་སུ་བཅད་པ།
འདི་དག་ཁྲུས་བྱས་ཟོས་ནས་ནི། །ཕྱོགས་དང་ཕྱོགས་སུ་འགྲོ་བར་བྱེད། །བདག་ནི་རྙི་ཡིས་བཟུང་གྱུར་པ། །སྔོན་གོ་སྡིག་པ་ཅི་ཞིག་བྱས། །ཞེས་བྱ་བ་སྨྲས་ཏེ། ནམ་མཁའི་སྒྲ་དྲུག་པ་ནི་དེ་ཡིན་པས་དེ་དག་ཀྱང་ཁྱོད་ཀྱིས་གཏང་བར་བྱ་སྟེ་དེ་ནི་དེ་དག་གི་ལྟས་ཡིན་ནོ། །རྒྱལ་
པོ་ཆེན་པོ་ཁྱོད་ཀྱིས་རྨི་ལམ་བརྒྱད་མཐོང་བ་གང་ཡིན་པ་དེ་ཅིའི་སྔ་ལྟས་ཡིན་ཞེ་ན། རེ་ཞིག་ཙན་དན་དཀར་པོས་ལུས་བྱུགས་པར་མཐོང་བ་གང་ཡིན་པ་ནི་ཁྱོད་ལ་ལུས་འཕགས་ཀྱི་རྒྱལ་པོས་གོས་བེའུ་རས་ཡུག་པོ་ཆེ་ཞིག་སྐྱེས་སུ་བསྐུར་བ་ལམ་དུ་ཞུགས་ཤིང་འདུག་སྟེ་དེ་ཞག་བདུན་ན་
เล่ม ๑๑ · หน้า 14b
ཕྱིན་པར་འགྱུར་བས་ཁྱོད་ཀྱི་རྨི་ལམ་དང་པོ་ནི་དེའི་སྔ་ལྟས་ཡིན་ནོ། །ཁྱོད་ཀྱིས་ལུས་ལ་ཙན་དན་དམར་པོས་གཏོར་བར་མཐོང་བ་གང་ཡིན་པ་ནི་ཁྱོད་ལས་འཛིན་གྱི་རྒྱལ་པོས་ལ་བ་རིན་པོ་ཆེ་ཞིག་སྐྱེས་སུ་བསྐུར་བ་ལམ་དུ་ཞུགས་ཤིང་འདུག་སྟེ། དེ་ཡང་ཞག་བདུན་ན་ཕྱིན་པར་འགྱུར་བས་རྨི་
ལམ་གཉིས་པ་ནི་དེའི་སྔ་ལྟས་ཡིན་ནོ། །ཁྱོད་ཀྱིས་ཀླད་པ་ལ་མེ་འབར་བར་མཐོང་བ་གང་ཡིན་པ་ནི་ཁྱོད་ལ་ཡུལ་ཡ་བ་ནའི་རྒྱལ་པོས་གསེར་གྱི་ཕྲེང་བ་ཞིག་སྐྱེས་སུ་བསྐུར་བ་ལམ་དུ་ཞུགས་ཤིང་འདུག་སྟེ། དེ་ཡང་ཞག་བདུན་ན་ཕྱིན་པར་འགྱུར་བས་རྨི་ལམ་གསུམ་པ་ནི་དེའི་སྔ་ལྟས་ཡིན་
ནོ། །ཁྱོད་ཀྱིས་མཆན་ཁུང་གཉིས་ནས་སྦྲུལ་གཉིས་འཕྱང་བ་མཐོང་བ་གང་ཡིན་པ་ནི་ཁྱོད་ལ་རྒྱའི་རྒྱལ་པོས་རལ་གྲི་ཟུང་ཅིག་སྐྱེས་སུ་བསྐུར་བ་ལམ་དུ་ཞུགས་ཤིང་འདུག་སྟེ། དེ་ཡང་ཞག་བདུན་ན་ཕྱིན་པར་འགྱུར་བས་ཁྱོད་ཀྱི་རྨི་ལམ་བཞི་པ་ནི་དེའི་སྔ་ལྟས་ཡིན་ནོ། །ཁྱོད་ཀྱིས་
རྐང་པ་གཉིས་ལ་ཉ་ཁར་བ་གཉིས་ལྡག་པ་མཐོང་བ་གང་ཡིན་པ་ནི་ཁྱོད་ལ་སིང་ག་ལའི་རྒྱལ་པོས་ནོར་བུའི་ལྷམ་ཟུང་ཅིག་སྐྱེས་སུ་བསྐུར་བ་ལམ་དུ་ཞུགས་ཤིང་འདུག་སྟེ་དེ་ཡང་ཞག་བདུན་ན་ཕྱིན་པར་འགྱུར་བས་ཁྱོད་ཀྱི་རྨི་ལམ་ལྔ་པ་ནི་དེའི་སྔ་ལྟས་ཡིན་ནོ། །ཁྱོད་ཀྱིས་ངང་པ་གཉིས་ནམ་
མཁའ་ལ་འཕུར་བ་མཐོང་བ་གང་ཡིན་པ་ནི་ཁྱོད་ལ་བྷཾ་ག་ལའི་རྒྱལ་པོས་རྟ་གཉིས་ཞིག་སྐྱེས་སུ་བསྐུར་བ་ལམ་དུ་ཞུགས་ཤིང་འདུག་སྟེ་དེ་ཡང་ཞག་བདུན་ན་ཕྱིན་པར་འགྱུར་བར་ཁྱོད་ཀྱི་རྨི་ལམ་དྲུག་པ་ནི་དེའི་སྔ་ལྟས་ཡིན་ནོ། །ཁྱོད་ཀྱིས་རི་ནག་པོ་ཞིག་མདུན་ནས་ཚུར་འོང་བ་མཐོང་བ་
གང་ཡིན་པ་ནི་ཁྱོད་ལ་ཀ་ལིང་ཀའི་རྒྱལ་པོས་གླང་པོ་ཆེའི་གཙོ་བོ་ཞིག་སྐྱེས་སུ་བསྐུར་བ་ལམ་དུ་ཞུགས་ཤིང་འདུག་སྟེ་དེ་ཡང་ཞག་བདུན་ན་ཕྱིན་པར་འགྱུར་བས་ཁྱོད་ཀྱི་རྨི་ལམ་བདུན་པ་ནི་དེའི་སྔ་ལྟས་ཡིན་ནོ། །ཁྱོད་ཀྱིས་ཆུ་སྐྱར་དག་མགོ་ལ་རྟུག་པས་འཐོར་བ་མཐོང་བ་གང་ཡིན་པ་དེ་ནི་ཁྱོད་
དང་བ་ལང་སྐྱོང་གི་མ་ཞི་བ་ཤེས་པར་འགྱུར་རོ། །ཁྱོད་ཀྱིས་བྲམ་ཟེ་རྣམས་ལ་ཡང་ངན་སེམས་བསྐྱེད་པར་མི་བྱའོ། །དེ་སྐད་ཅེས་སྨྲས་པ་དང་། རྒྱལ་པོ་རབ་སྣང་སྲོག་སྟོར་བ་ལས་ཕྱིར་རྙེད་པ་བཞིན་དུ་དགའ་བ་དང་། མགུ་བ་དང་། རབ་ཏུ་དགའ་བ་དང་། རངས་པ་དང་།
เล่ม ๑๑ · หน้า 15a
བདེ་བ་དང་། ཡིད་བདེ་བ་སྐྱེས་ནས་ཚེ་དང་ལྡན་པ་ཀ་ཏྱའི་བུ་ཆེན་པོས་བཤད་པ་ལ་རྗེས་སུ་ཡི་རངས་ནས་རྐང་པ་ལ་མགོ་བོས་ཕྱག་འཚལ་ཏེ་སྟན་ལས་ལངས་ཏེ་སོང་ངོ་། །དེ་རང་གི་ཁྱིམ་དུ་སོང་ནས་ཚེ་དང་ལྡན་པ་ཀ་ཏྱའི་བུ་ཆེན་པོས་ཇི་སྐད་སྨྲས་པ་དེ་ཐམས་ཅད་བསྒྲུབས་ཏེ་
གདུང་མ་ཡང་གཞན་ཞིག་བཅུག །རྟ་རྫི་གཉེར་ལེན་ཡང་དེ་ལྟར་བྱེད་དུ་མ་བཅུག །རྫིང་བུ་ཡང་ཆུས་བཀང་། གླང་པོ་ཆེ་དང་། རི་དགས་དང་། ངང་པ་རྣམས་ཀྱང་བཏང་ངོ་། །ཞག་བདུན་ན་དེའི་སྐྱེས་ཇི་སྐད་བསྟན་པ་ཐམས་ཅད་ཀྱང་ཕྱིན་ནས་དེ་ནོར་རྙེད་པས་ཡིད་བདེ་བ་
སྐྱེས་ནས། ཚེ་དང་ལྡན་པ་ཀ་ཏྱའི་བུ་ཆེན་པོ་ལ་ཇེ་སེམས་མངོན་པར་དད་པར་གྱུར་ཏེ་བསམས་པ། བདག་གི་ཁྱིམ་ན་དཔལ་དང་དབང་ཐང་ཕུན་སུམ་ཚོགས་པ་གང་ཅུང་ཟད་ཡོད་པ་དེ་ཐམས་ཅད་ནི་འཕགས་པ་ཀ་ཏྱའི་བུ་ཆེན་པོ་ལ་བརྟེན་ནས་བྱུང་བ་ཡིན་ནོ། །དེའི་ཕྱིར་རེ་ཞིག་གོས་བེའུ་
རས་ཡུག་པོ་ཆེ་འདི་བསྐུར་ལ་ཕྱིས་རྒྱལ་སྲིད་བསྟབས་པར་བྱའོ་སྙམ་དུ་རིག་ནས་མི་ཞིག་ལ་སྨྲས་པ། ཀྱེ་སྐྱེས་བུ་ཁྱོད་ཚུར་གོས་བེའུ་རས་ཡུག་པོ་ཆེ་འདི་ཁྱེར་ལ་འཕགས་པ་ཀ་ཏྱའི་བུ་ཆེན་པོ་ལ་ཕུལ་ཅིག་ཅེས་བྱས་པ་དང་། དེས་གོས་བེའུ་རས་ཡུག་པོ་ཆེ་དེ་ཁྱེར་ནས་འཕགས་པ་
ཀ་ཏྱའི་བུ་ཆེན་པོ་ལ་བྱིན་ནོ། །དེ་ནས་བ་ལང་སྐྱོང་གི་མ་ཞི་བ་དང་། སྐྱ་བསེང་གི་བུ་མོ་སྒྲོལ་མ་དང་། གཞོན་ནུ་བ་ལང་སྐྱོང་དང་། གསོས་པ་དང་། མདུན་ན་འདོན་ལ་སྨྲས་པ། ཤེས་ལྡན་དག་ང་ལ་ཡུལ་སྣ་ཚོགས་ལ་དབང་བའི་རྒྱལ་པོ་རྣམས་ཀྱིས་སྐྱེས་འདི་དག་བསྐུར་གྱིས་
ཁྱེད་གང་ཇི་ལྟར་འདོད་པ་བཞིན་ཁྱེར་ཅིག །དེ་ནས་བ་ལང་སྐྱོང་གི་མ་ཞི་བས་ནི་གསེར་གྱི་ཕྲེང་བ་ཁྱེར། སྐྱ་བསེང་གི་བུ་མོ་སྒྲོལ་མས་ནི་ལ་བ་རིན་པོ་ཆེ། གཞོན་ནུ་བ་ལང་སྐྱོང་གིས་ནི་རྟ་གཉིས། གསོས་པས་ནི་རལ་གྲི་ཟུང་ཅིག །མདུན་ན་འདོན་གྱིས་ནི་ནོར་བུའི་ལྷམ་ཟུང་
ཅིག་ཁྱེར་ཏེ་གླང་པོ་ཆེའི་གཙོ་བོ་ལུས་པ་དེ་རྒྱལ་པོས་ཁྱེར་རོ། །དེ་ནས་རྒྱལ་པོ་རབ་སྣང་ཡན་ལག་གི་མཆོག་ལྔ་ལ་རིན་པོ་ཆེ་དག་གི་བགོ་བཤའ་བྱས་ནས་ཚེ་དང་ལྡན་པ་ཀ་ཏྱའི་བུ་ཆེན་པོ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀ་ཏྱའི་བུ་ཆེན་པོའི་རྐང་པ་ལ་མགོ་བོས་ཕྱག་འཚལ་ཏེ་
เล่ม ๑๑ · หน้า 15b
ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་པོ་རབ་སྣང་གིས་ཚེ་དང་ལྡན་པ་ཀ་ཏྱའི་བུ་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་སྨན་འདོགས་ཤིང་གཅེས་སྤྲས་མཛད་པ་ལགས་ཏེ། དེའི་སླད་དུ་བདག་འཕགས་པ་ལ་རྒྱལ་སྲིད་སྟོབས་ན་ཐུགས་
བརྩེ་བ་ཉེ་བར་བཟུང་སྟེ་རྒྱལ་སྲིད་བཞེས་སུ་གསོལ། ཚེ་དང་ལྡན་པ་ཀ་ཏྱའི་བུ་ཆེན་པོས་སྨྲས་པ། རྒྱལ་པོ་ཆེན་པོ་བཅོམ་ལྡན་འདས་ཀྱིས་དགེ་སློང་ལ་རྒྱལ་སྲིད་བྱེད་པ་བཀག་གོ། །རྒྱལ་པོས་སྨྲས་པ། འཕགས་པ་གལ་ཏེ་དེ་ལྟར་ན་འདོད་པ་ཐམས་ཅད་སྟོབས་ན། འདོད་པ་
ཐམས་ཅད་ཡོངས་སུ་སྤྱད་དུ་གསོལ། དེས་སྨྲས་པ། རྒྱལ་པོ་ཆེན་པོ་བཅོམ་ལྡན་འདས་ཀྱིས་འདོད་པ་ཐམས་ཅད་ཀྱང་བཀག་གོ། །རྒྱལ་པོས་སྨྲས་པ། འཕགས་པ་གལ་ཏེ་དེ་ལྟ་ན་ལོངས་སྤྱོད་དང་། ལོངས་སྤྱོད་ཀྱི་མཆོག་རྣམས་སྟོབས་ན་ཡོངས་སུ་སྤྱད་དུ་གསོལ།
དེས་སྨྲས་པ། རྒྱལ་པོ་ཆེན་པོ་རེ་ཞིག་བཅོམ་ལྡན་འདས་ལ་ཞུས་ཏེ་བྱའོ། །རྒྱལ་པོས་སྨྲས་པ། འཕགས་པ་དེ་ལྟར་མཛོད་ཅིག་དེའི་ཚེ་ན་བཅོམ་ལྡན་འདས་ནི་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སྐབས་དེ་ལྟ་བུ་ལ་
སངས་རྒྱས་བཅོམ་ལྡན་འདས་རྣམས་ལ་མི་མཁྱེན་པ་དང་། མི་གཟིགས་པ་དང་། མི་རིག་པ་དང་། རྣམ་པར་མི་རིག་པ་ཅུང་ཟད་ཀྱང་མི་མངའ་སྟེ། བཅོམ་ལྡན་འདས་ཀྱིས་དགོངས་པ། དགེ་སློང་ཀ་ཏྱའི་བུ་ཆེན་པོ་ལོངས་སྤྱོད་དང་ལོངས་སྤྱོད་ཀྱི་མཆོག་རྣམས་དོན་དུ་གཉེར་བ་མ་
ཡིན་མོད་ཀྱི་འོན་ཀྱང་སྐྱེ་བོ་ཕྱི་མ་རྣམས་ལ་ཕན་གདགས་སོ་སྙམ་དུ་དགོངས་ནས་འཇིག་རྟེན་པའི་ཐུགས་བསྐྱེད་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་དེའི་ཚེ། སྲོག་ཆགས་གྲོག་སྤུར་རྣམས་ཀྱིས་ཀྱང་བཅོམ་
ལྡན་འདས་ཀྱི་ཐུགས་སེམས་ཀྱིས་ཤེས་སོ། །གང་གི་ཚེ་འཇིག་རྟེན་ལས་འདས་པའི་ཐུགས་བསྐྱེད་པ་དེའི་ཚེ་ནི་ཉན་ཐོས་དང་། རང་སངས་རྒྱས་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་མི་ཤེས་ན། བྱོལ་སོང་གི་སྐྱེ་གནས་སུ་སོང་བ་རྣམས་ཀྱིས་ལྟ་སྨོས་ཀྱང་
เล่ม ๑๑ · หน้า 16a
ཅི་དགོས། དོན་འདི་ལ་ནི་བཅོམ་ལྡན་འདས་དང་། ཚེ་དང་ལྡན་པ་ཀ་ཏྱའི་བུ་ཆེན་པོའི་ཐུགས་དང་སེམས་སུ་འཕྲོད་པའི་འཇིག་རྟེན་པའི་ཐུགས་བསྐྱེད་དོ། །དེ་ནས་བཅོམ་ལྡན་འདས་དང་། ཚེ་དང་ལྡན་པ་ཀ་ཏྱའི་བུ་ཆེན་པོས་ལྷའི་མིག་དང་ལྷའི་རྣ་བ་མངོན་པར་
བསྒྲུབས་ནས་ཕན་ཚུན་ལྟ་བ་དང་ཉན་པར་ཡང་ཞུགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀ་ཏྱའི་བུ་ཆེན་པོས་འདི་སྐད་ཅེས་གསོལ་ཏོ། །བཙུན་པ་དགེ་སློང་གིས་དགེ་འདུན་གྱི་ཆེད་དུ་ལོངས་སྤྱོད་དང་ལོངས་སྤྱོད་ཀྱི་མཆོག་དག་བླང་དུ་རུང་ལགས་སམ། བཅོམ་ལྡན་
འདས་ཀྱིས་བཀའ་སྩལ་པ། ཀ་ཏྱའི་བུ་ཆེན་པོ་སྐྱེ་བོ་ཕྱི་མ་རྣམས་ལ་སྙིང་བརྩེ་བའི་ཕྱིར་དང་། སྦྱིན་པ་པོ་རྣམས་ཀྱི་ལོངས་སྤྱོད་འཕེལ་བར་བྱེད་པའི་ཕྱིར་རུང་སྟེ། དེ་ལྟ་བས་ན་དགེ་འདུན་ལ་ལོངས་སྤྱོད་དང་ལོངས་སྤྱོད་ཀྱི་མཆོག་རྣམས་གནང་གི་གང་ཟག་ལ་ནི་མ་ཡིན་ནོ། །དེ་ལ་
ལོངས་སྤྱོད་ནི་འདི་དག་ཡིན་ཏེ། གྲོང་དང་། ཞིང་རྣམས་སོ། །ལོངས་སྤྱོད་ཀྱི་མཆོག་ནི་བ་ལང་དང་། མ་ཧེ་དང་། ར་དང་། ལུག་རྣམས་སོ། །དེ་ནས་ཚེ་དང་ལྡན་པ་ཀ་ཏྱའི་བུ་ཆེན་པོས་བཅོམ་ལྡན་འདས་ལ་ཞུས་ནས་རྒྱལ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་
པོ་བཅོམ་ལྡན་འདས་ཀྱིས་སྐྱེ་བོ་ཕྱི་མ་རྣམས་ལ་སྙིང་བརྩེ་བའི་ཕྱིར་དང་། སྦྱིན་བདག་རྣམས་ཀྱི་ལོངས་སྤྱོད་འཕེལ་བར་བྱ་བའི་ཕྱིར་དགེ་འདུན་ལ་ལོངས་སྤྱོད་དང་ལོངས་སྤྱོད་ཀྱི་མཆོག་རྣམས་གནང་ངོ་། །དེ་ནས་རྒྱལ་པོ་རབ་སྣང་གིས་ཚེ་དང་ལྡན་པ་ཀ་ཏྱའི་བུ་ཆེན་པོ་ལས་བརྟེན་ནས་
ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་བཅུག་སྟེ། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་ནས་ལོངས་སྤྱོད་དང་ལོངས་སྤྱོད་ཀྱི་མཆོག་རྣམས་ཀྱང་ཕུལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་དགེ་
བསྙེན་ངའི་ཉན་ཐོས་དགེ་འདུན་ལ་ཐོག་མར་འདོད་པ་ཐམས་ཅད་སྟོབས་པ་རྣམས་ཀྱི་ནང་ན་མཆོག་ནི་འདི་ལྟ་སྟེ། འཕགས་རྒྱལ་གྱི་རྒྱལ་པོ་རབ་སྣང་འདི་ཡིན་ནོ། །དགེ་སློང་དག་ངའི་དགེ་བསྙེན་ངའི་ཉན་ཐོས་དགེ་འདུན་ལ་ཐོག་མར་བཤོས་འབུལ་བ་རྣམས་ཀྱི་ནང་ན་མཆོག་ནི་འདི་ལྟ་སྟེ།
เล่ม ๑๑ · หน้า 16b
རྒྱལ་པོའི་ཁབ་ཀྱི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་འདི་ཡིན་ནོ། །དགེ་སློང་དག་ངའི་དགེ་བསྙེན་ངའི་ཉན་ཐོས་དགེ་འདུན་ལ་ཐོག་མར་གནས་མལ་འབུལ་བ་རྣམས་ཀྱི་ནང་ན་མཆོག་ནི་འདི་ལྟ་སྟེ། མཉན་ཡོད་ཀྱི་ཁྱིམ་བདག་མགོན་མེད་ཟས་སྦྱིན་འདི་ཡིན་ནོ། །དགེ་སློང་དག་
ངའི་དགེ་བསྙེན་ངའི་ཉན་ཐོས་དགེ་འདུན་ལ་ཐོག་མར་གཙུག་ལག་ཁང་བྱེད་པ་རྣམས་ཀྱི་ནང་ན་མཆོག་ནི་འདི་ལྟ་སྟེ། ཡུལ་བཱ་རཱ་ཎ་སཱིའི་ཁྱིམ་བདག་བཟང་ལྡན་འདི་ཡིན་ནོ།། །།བར་སྡོམ་ནི། འདོད་པ་ཀུན་གྱི་རབ་སྣང་སྟེ། །དགེ་འདུན་བཤོས་ཀྱི་བཟོ་སྦྱངས་ཡིན། །གནས་
མལ་མགོན་མེད་ཟས་སྦྱིན་ཏེ། །གཙུག་ལག་ཁང་གི་བཟང་ལྡན་ནོ། །རྒྱལ་པོ་རབ་སྣང་བཙུན་མོའི་འཁོར་དུ་རེས་ཀྱིས་ཟན་ཟ་སྟེ། ཉི་མ་གཅིག་ནི་བ་ལང་སྐྱོང་གི་མ་ཞི་བའི་དྲུང་དུ། གཅིག་ནི་སྐྱ་བསེང་གི་བུ་མོ་སྒྲོལ་མའི་དྲུང་དུའོ། །དེ་དུས་གཞན་ཞིག་ན་དགོངས་པ། བ་
ལང་སྐྱོང་གི་མ་ཞི་བའི་ཐད་དུ་ཟན་ཟ་བ་ན་རྒྱལ་པོ་དེ་ཞོ་ལ་དགའ་བས་བ་ལང་སྐྱོང་གི་མ་ཞོའི་ཕོར་བ་ཐོགས་ཏེ་དེ་ཟན་ཟ་བའི་མདུན་ན་འདུག་གོ། །ཇི་ཙམ་ན་ཕྱོགས་དེར་སྐྱ་བསེང་གི་བུ་མོ་སྒྲོལ་མ་སོང་སྟེ། དེས་ལ་བ་རིན་པོ་ཆེ་བགོས་པ་དང་། དེས་གློག་བྱུང་བ་ལྟ་བུར་རྒྱལ་པོ་དེ་བ་ལང་
སྐྱོང་གི་མ་ཞི་བ་དང་བཅས་ཏེ་སྣང་བར་བྱས་སོ། །ཞི་བས་སྣང་བ་དེ་མཐོང་ནས་ཡ་མཚན་སྐྱེས་ཏེ་སྨྲས་པ། ལྷ་འདི་ཅི་ལགས། གློག་ཅིག་གློ་བུར་དུ་བྱུང་ངམ། འགའ་ཞིག་གིས་ཞུགས་མར་འཚལ། དེས་སྨྲས་པ། ཞི་བ་འདི་ནི་གློག་གི་འོད་ཀྱང་མ་ཡིན། མར་
མེའི་ཡང་མ་ཡིན་གྱི། འོན་ཀྱང་སྐྱ་བསེང་གི་བུ་མོ་སྒྲོལ་མ་ཕྱོགས་འདི་ནས་སོང་སྟེ། དེས་ལ་བ་རིན་པོ་ཆེ་བགོས་པས་འདི་ནི་དེའི་འོད་ཡིན་ནོ། །ཁྱོད་ཀྱིས་ལ་བ་རིན་པོ་ཆེ་དེ་ལྟ་བུ་བཏང་སྟེ་གསེར་གྱི་ཕྲེང་བ་བླངས་པ་ནི་ཁྱོད་བླུན་ནོ། །ཇི་བདག་གི་ཁྱིམ་ན་གསེར་གྱི་ཕྲེང་བ་མེད་དམ།
ཉིས་ན་རིགས་ངན་པ་ལས་སྐྱེས་པ་དེ་ཐེ་གིའོ། །དེས་སྨྲས་པ། ལྷ་དེ་ལ་དེ་ལྟ་བུའི་ཤེས་རབ་ག་ལ་མཆིས། གདོན་མ་འཚལ་བར་ཁྱོད་ཉིད་ཀྱིས་ལ་བ་རིན་པོ་ཆེ་ལོང་ཤིག་ཅེས་བསྟན་ཏེ་དེས་ན་དེས་བླངས་ལགས་མོད། རྒྱལ་པོས་སྨྲས་པ། ངས་དེ་ལ་མ་སྨྲས་ཏེ་དེས་རང་གི་
เล่ม ๑๑ · หน้า 17a
བློས་བླངས་སོ། །ཁྱོད་ཀྱིས་སྨྲས་སོ། །ངས་མ་སྨྲས་སོ་ཞེས་དེ་གཉིས་འཐབས་པར་གྱུར་ནས། ཞི་བས་དེའི་མགོར་ཞོའི་ཕོར་བས་བསྣུན་པ་དང་། རྒྱལ་པོ་དེ་སྤྱི་གཅེར་ཞིག་པས་དེའི་ཀླད་པ་ཞོམ་མོ། །དེས་ལག་པས་མནམས་ཏེ་བསམས་པ། བདག་གི་ཀླད་
པ་ཡང་ཞོམ། བདག་གི་ཀླད་རྒྱས་ཀྱང་ལུག་པས་འདིས་ཡེ་བདག་བསད་ཀྱིས་ཇི་སྲིད་སྲོག་དང་མ་བྲལ་གྱི་བར་དུ་ཇེ་འདི་བསད་དོ་སྙམ་ནས། དེས་གསོས་པ་ལ་བསྒོ་བ། གསོས་པ་ངས་བ་ལང་སྐྱོང་གི་མ་ཞི་བ་ཡོངས་སུ་བཏང་གིས་སོད་ཅིག །གསོས་པས་བསམས་པ། དེ་འདི་
ལ་ཤིན་ཏུ་འཕངས་ན་འདི་ཁྲོས་པའི་ཀུན་ནས་དཀྲིས་པས་འདི་སྐད་དུ་ཟེར་བར་ཟད་པས་འཕྲལ་ལ་གསད་པར་མི་བྱའི་ཀུན་ནས་དཀྲིས་པ་དང་བྲལ་ནས་བསམ་པ་ཤེས་པར་བྱ་སྟེ་གསད་ཀྱིས་རེ་ཞིག་གནས་དབེན་པ་ཞིག་ཏུ་གཞག་གོ་སྙམ་དུ་རིག་ནས། སྨྲས་པ། ལྷ་དེ་ལྟར་འཚལ་ཏེ་དགུམ་མོ་
ཞེས་བྱས་ནས། དེས་དེ་གནས་དབེན་པ་ཞིག་ཏུ་བཞག་གོ། །རྒྱལ་པོས་ཀུན་ནས་དཀྲིས་པ་དང་བྲལ་ནས་སྨྲས་པ། གསོས་པ་བ་ལང་སྐྱོང་གི་མ་ཞི་བ་ག་རེ། དེས་སྨྲས་པ། ལྷ་ཁྱོད་ཀྱིས་ངས་བ་ལང་སྐྱོང་གི་མ་ཞི་བ་ཡོངས་སུ་བཏང་གིས་སོད་ཅིག་ཅེས་བཀའ་སྩལ་པས་བདག་
གིས་དེ་ལྷའི་བཀའ་བཞིན་དུ་བཀུམ་ལགས་སོ། །དེས་སྨྲས་པ། གསོས་པ་ལེགས་སོ། །ད་ནི་ང་དང་། སྐྱ་བསེང་གི་བུ་མོ་སྒྲོལ་མ་དང་། གཞོན་ནུ་བ་ལང་སྐྱོང་དང་། མདུན་ན་འདོན་ཀྱང་སོང་ལ་ཁྱོད་ཉིད་ཅོད་པན་ཆིངས་ཏེ་རྒྱལ་སྲིད་བྱེད་ལ་རག་གོ། །ངས་ཀོ་དེས་ང་ལ་མ་གུས་པ་བྱས་
པས་ངས་དེ་ནན་ཐུར་བྱས་ལ་ཕྱིས་དགའ་བར་བྱའོ་སྙམ་དུ་བསམ་བསམ་ན་ཁྱོད་ཀྱིས་མོད་ཁོ་ན་ལ་བསད་པ་ལྟ་ཞིག །དེས་སྨྲས་པ། ལྷ་འདི་ན་སྐྱེས་བུ་མཁས་པ་ཁ་ཅིག་སྨྲས་པའི་དོན་དཔེས་ཀྱང་ཀུན་འཚལ་བར་འགྱུར་བས་རེ་ཞིག་དཔེ་གསན་དུ་གསོལ། བསྡུས་པའི་སྡོམ་ནི། ཁྲ་
བོ་དང་ནི་སྒྲེན་མོ་དང་། །རྙེད་པར་དཀའ་དང་སླུ་བ་དང་། །མི་ངོམས་པ་དང་གཉིད་གཏོགས་པར། །བསྡུས་པའི་སྡོམ་དུ་ཡང་དག་བསྡུས། །སྡོམ་ནི། ཁྲ་བོ་སྤྲེའུ་དང་འཇིག་རྟེན་ན། །ལོང་བ་དག་སྟེ་ཐ་མ་ཡིན། །རྒྱལ་པོ་ཆེན་པོ་སྔོན་བྱུང་བ་རིའི་ཕྱོགས་མི་འདུ་བ་དང་འཇིགས་པ་མ་
เล่ม ๑๑ · หน้า 17b
མཆིས་པ་ཤིང་སྣ་ཚོགས་ཀྱི་ཚལ་གྱིས་བརྒྱན་པ། སེང་གེ་དང་། སྟག་དང་། དྲེད་དང་། བྱི་ལ་དང་། རི་དགས་དང་། ཕག་རྒོད་རྒྱུ་བ། བྱའི་ཚོགས་སྣ་ཚོགས་ཀྱིས་བསྟེན་པ་གཅིག་ཅིག་ཏུ་སྲོག་ཆགས་ཐི་བས་ཤིང་ཆེན་པོ་ཞིག་གི་ཁར་ཚང་བཅས་ཏེ། དེས་དེ་འབྲས་བུ་སྨིན་པ་
རྣམས་ཀྱིས་བཀང་ནས་ཆུང་མ་ལ་སྨྲས་པ། བཟང་མོ་ཁྱོད་ཀྱིས་འབྲས་བུ་འདི་དག་བཟའ་བར་མི་བྱ་སྟེ། ད་ལྟ་ནི་གང་ཡང་རུང་བས་བདག་ཉིད་འཚོ་བར་བྱའོ། །ནམ་རླུང་དང་། ཡུལ་ངན་བྱུང་བ་དེའི་ཚེ་འདི་དག་བཟའ་བར་བྱའོ། །དེས་སྨྲས་པ། ལེགས་ཏེ་དེ་བཞིན་བྱའོ། །ཇི་
ཙམ་ན་རླུང་དང་ཉི་མས་ཕོག་པས་འབྲས་བུ་རྣམས་སྐམས་ཏེ་ཚང་དེ་འགྲིབས་པར་གྱུར་པ་དང་། ཐི་བས་སྨྲས་པ། བཟང་མོ་ངས་ཁྱོད་ལ་ཁྱོད་ཀྱིས་འབྲས་བུ་འདི་དག་བཟའ་བར་མི་བྱ་སྟེ། རླུང་ངམ་ཡུལ་ངན་བྱུང་བའི་ཚེ་བཟའ་བར་བྱའོ་ཞེས་མ་བཀག་གམ། འོ་ན་ཅིའི་ཕྱིར་ཁྱོད་
ཀྱིས་ཟོས། དེས་སྨྲས་པ། བདག་གིས་མ་ཟོས་སོ། །དེས་སྨྲས་པ། ངས་ཚང་འདི་བཀང་སྟེ་བཞག་ན། གལ་ཏེ་ཁྱོད་ཀྱིས་མ་ཟོས་ན་འོ་ན་ཚང་འདི་ཅིའི་ཕྱིར་འགྲིབས་པར་གྱུར། དེས་སྨྲས་པ། ཚང་འདི་ཅིའི་ཕྱིར་འགྲིབས་མ་ཤེས། བདག་གིས་ནི་འདི་ལས་འབྲས་བུ་ཅིག་
ཀྱང་མ་ཟོས་སོ། །ཁྱོད་ཀྱིས་ཟོས་སོ་ངས་མ་ཟོས་སོ་ཞེས་དེ་གཉིས་ལན་དང་ཡང་ལན་འདེབས་པ་ན་ཐབ་མོ་བྱུང་སྟེ་དེས་ཐི་བ་མོ་དེ་མཆུས་བསྣུན་ནས་སྲོག་དང་བྲལ་ཏེ་དེ་དེ་ཉིད་ན་འཕྱང་ཞིང་འདུག་གོ། །རེ་ཞིག་ཅིག་ན་དུས་མ་ཡིན་པའི་ཆར་ཆེན་པོ་བབ་པ་དང་། ཡང་ཚང་དེ་དེ་ཁོ་ན་
བཞིན་དུ་འབྲས་བུ་དེ་དག་གིས་གང་ནས་དེས་བསམས་པ། ཚང་འདི་འབྲས་བུ་དག་གིས་ཡང་གང་བ་ལས་ན་དེས་འདི་དག་མ་ཟོས་སོ་སྙམ་ནས། དེས་དེ་ལ་བཟོད་པ་གསོལ་བར་བརྩམས་པ། ཁྲ་མོ་སྡུག་པ་ལོངས་ཤིག །འདི་དག་ཁྱོད་ཀྱིས་མ་ཟོས་ཏེ་བདག་གི་ཚང་འདི་གང་གིས་
ཉེས་པ་ཅིག་བཟོད་པར་མཛོད་ཅིག་ཅེས་བྱས་པ་དང་། ལྷས་ཚིགས་སུ་བཅད་དེ་སྨྲས་པ། ནགས་ཚལ་རྒྱུ་བའི་ཐི་བ་ནི། །འདབ་མ་ཁྲ་བོ་མིག་དམར་བ། །རང་གིས་སྡུག་མ་བསད་ནས་ནི། །བློ་ངན་ཅི་ཞིག་མྱ་ངན་བྱེད། །ཇི་ལྟར་ཐི་བ་བབ་ཅོལ་སྤྱོད་པ་ཡིས། །འདི་ན་སྡུག་པ་
เล่ม ๑๑ · หน้า 18a
ཉེས་མེད་བསད་ནས་ནི། །བློ་རྨོངས་མྱ་ངན་བྱེད་ཅིང་བཟང་མོ་ཞེས། །དེ་ལ་བཞམས་ཏེ་ཉེས་ཅིག་བཟོད་གསོལ་བ། །དེ་བཞིན་རྒྱལ་པོ་གཟུ་ལུམས་སྤྱོད་པ་ཡིས། །ཞི་བ་ཡིད་དང་འཐད་པ་འདིར་བསད་ནས། །བློ་རྨོངས་མྱ་ངན་བྱེད་ཅིང་བཟང་མོ་ཞེས། །དེ་ལ་བཞམས་
ཏེ་ཉེས་ཅིག་བཟོད་པ་གསོལ། །ཞེས་བགྱི་བ་ལགས་ཏེ། ལྷ་ཁྱོད་ཀྱིས་གསུངས་པའི་དོན་ནི་བདག་དཔེ་དེ་དང་འདྲ་བ་སྙམ་བགྱིད་དོ། །ལྷ་གཞན་ཡང་ཁྱིམ་བདག་ཅིག་དབྱར་འདས་པ་དང་སྟོན་གྱི་དུས་སུ་སྲན་མའི་ཁུར་འཚལ་ནས་ཞིང་ཐོག་ཏུ་ཆས་སོ། །དེས་སྲན་མའི་
ཁུར་དེ་ཤིང་དྲུང་ཞིག་ཏུ་བཞག་ནས་ཕ་ཟད་དུ་བཤང་བའི་སར་མཆིས་པ་དང་། ཇི་ཙམ་ན་སྤྲེའུ་ཞིག་ཤིང་དེ་ལས་བབས་ནས་སྲན་མ་ལས་སྤར་གང་བླངས་ཏེ་ཡང་ཤིང་དེ་ལས་འཛེགས་སོ། །དེ་འཛེག་པ་ན་སྲན་མ་འབྲུམ་བུ་གཅིག་ཤོར་དེ་ས་ལ་ལྷུང་ནས་དེས་སྲན་མ་སྤར་གང་པོ་དེ་
བོར་ཏེ། སྲན་མ་འབྲུམ་བུ་ཅིག་པོ་དེ་བཙལ་བར་བརྩམས་པ་ན། ཁྱིམ་བདག་དེས་དེ་ལ་བོང་བ་ཅིག་བསྣུན་ཏེ་དེ་དུས་ལས་འདས་པ་དང་ལྷས་ཚིགས་སུ་བཅད་དེ་སྨྲས་པ། སྲན་མ་སྤར་གང་བོར་ནས་སུ། །གང་ཞིག་འབྲས་བུ་གཅིག་ཚོལ་བ། །ཤིན་ཏུ་ཚོགས་མང་ལྡན་པ་ཡི། །
སྤྲེའུ་འདི་ཀྱེ་མ་རེ་མི་མཛངས། །ཞེས་བགྱི་བ་ལགས་ཏེ་ལྷས་གསུངས་པའི་དོན་གང་ཞིག་བ་ལང་སྐྱོང་གི་མ་བཀུམ་ནས། ཡང་བཟོད་པ་གསོལ་བར་བཞེད་པ་ནི་བདག་དཔེ་དེ་དང་འདྲ་བ་སྙམ་བགྱིད་དོ། །རྒྱལ་པོས་སྨྲས་པ། གསོས་པ་ཁྱོད་ཀྱིས་ཚིག་ཅིག་ཁོ་ནའི་ཁ་ལ་བ་ལང་
སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། སྟོན་པ་གང་ཟག་ཟླ་མེད་པ། །གཅིག་པུ་ཚིག་ནི་གཅིག་གསུང་སྟེ། །གསུང་བ་དེ་ནི་ངེས་ལགས་པས། །འདི་ལ་བདག་བློ་འགྱུར་མ་མཆིས། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་
གང་གི་ཕྱིར་བ་ལང་སྐྱོང་གི་མ་ཞི་བ་བསད་པས་ང་ལོང་བར་བྱས་སོ། །དེས་སྨྲས་པ། ལྷ། ལྷ་དང་མིར་བཅས་འཇིག་རྟེན་འདིར། །ལོང་བ་གཉིས་ནི་ངེས་གྲུབ་པ། །རང་བཞིན་གྱིས་ནི་དམུས་ལོང་དང་། །གང་ཡང་ཆོས་ལ་མི་གནས་པའོ། །འཇིག་རྟེན་འདི་དང་ཕ་
เล่ม ๑๑ · หน้า 18b
རོལ་དུ། །གཞན་ཡང་ལོང་བ་གཉིས་ལགས་ཏེ། །གང་ལ་སྡིག་ལྟ་དེ་ཡོད་དམ། །གང་ཞིག་ཁྲིམས་ལ་མི་བརྟེན་པའོ། །ཞེས་བགྱི་བ་ཁྱོད་ཀྱིས་མ་གསན་ཏམ། །སྡོམ་ནི། སྒྲེན་མོ་ཅིར་ཡང་མི་རུང་དང་། །མ་སྤྱད་གཏུན་དང་ལན་གཅིག་དང་། །ནད་དང་བག་ཚ་བརྙས་
པ་དང་། །དེ་བཞིན་དུ་ནི་བགས་ཀྱིས་སོ། །བྱིས་པ་དང་ནི་བཤེས་དག་དང་། །སྐྱེས་བུ་ཐ་ཤལ་ཉིད་དང་ནི། །ཤིང་རྟ་ཡིས་ནི་འཁོར་ལོ་དང་། །གཡོ་གཏོགས་པར་ནི་ཡོངས་སུ་རྫོགས། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་
བསད་པས་ང་སྒྲེན་མོར་བྱས་སོ། །དེས་སྨྲས་པ། ལྷ་སྒྲེན་མོ་གསུམ་གྱི་མི་མཛེས་པ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གསུམ་གང་ཡིན། ལྷ། ཀླུང་ནི་ཆུ་མེད་སྒྲེན་མོ་སྟེ། །ཡུལ་འཁོར་འགྲོན་མེད་སྒྲེན་མོའོ། །གལ་ཏེ་མིང་པོ་བཅུ་ཡོད་
ཀྱང་། །ཁྱོ་མེད་བུད་མེད་སྒྲེན་མོའོ། །ཞེས་བགྱི་བ་ལགས་སོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་ཅིར་ཡང་མི་རུང་བར་བྱས་སོ། །དེས་སྨྲས་པ། ལྷ་འཇིག་རྟེན་ན་ཅིར་ཡང་མི་རུང་བ་གསུམ་མཆིས་པར་
ཁྱོད་ཀྱིས་མ་གསན་ཏམ། དེས་སྨྲས་པ། གསོས་པ་གསུམ་གང་ཡིན། ལྷ། རྟ་བོ་ཐལ་ཀར་བང་བུལ་དང་། །སྟོན་མོ་བྱ་ན་མེད་པ་དང་། །བུད་མེད་གང་ཞིག་ཁྱིམ་སུན་འབྱིན། །འདི་གསུམ་ཅིར་ཡང་མི་རུང་བའོ། །རྒྱལ་པོས་སྨྲས་པ། གསོས་པ་བ་
ལང་སྐྱོང་གི་མ་ཞི་བ་ལོངས་མ་སྤྱད་པར་ཁྱོད་ཀྱིས་བསད་དོ། །དེས་སྨྲས་པ། ལྷ། སོལ་བ་བྱེད་པའི་གོས་དང་ནི། །བཀྲུ་བཤལ་བྱེད་པའི་ལྷམ་དག་དང་། །རྒྱལ་པོའི་བཙུན་མོའི་འཁོར་རྣམས་ནི། །ལོངས་མ་སྤྱད་པར་དེངས་པར་འགྱུར། །ཞེས་བགྱི་བ་ཁྱོད་ཀྱིས་
མ་གསན་ཏམ། ལྷ་དེ་དག་འབའ་ཞིག་ཏུ་མ་བས་གཞན་ཡང་གསུམ་སྟེ། ནགས་ཀྱི་ཤིང་གི་མེ་ཏོག་དང་། །དཀའ་ཐུབ་ཅན་གྱི་ལང་ཚོ་དང་། །ཤིང་རྟ་མཁན་གྱི་ཆུང་མ་དག །ལོངས་མ་སྤྱད་པར་དེངས་པར་འགྱུར། །རྒྱལ་པོས་སྨྲས་པ། གསོས་པ་གང་གི་
เล่ม ๑๑ · หน้า 19a
ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་གཏུན་གྱིས་བརྡེག་པའི་རྒྱུའོ། །དེས་སྨྲས་པ། ལྷ། ཤིང་མཁན་རྩང་རྩིང་འཇོག་པ་དང་། །བཟང་མཁན་སྐུད་པ་རིང་པོ་དང་། །ཁ་ལོ་སྒྱུར་བ་མིག་རྒྱང་ཐུང་། །དེ་གསུམ་གཏུན་གྱིས་བརྡེག་རྒྱུའོ། །ཞེས་
བགྱི་བ་ཁྱོད་ཀྱིས་མ་གསན་ཏམ། ལྷ་དེ་དག་འབའ་ཞིག་ཏུ་མ་བས། གཞན་ཡང་གསུམ་སྟེ། ཕོ་ཉའི་ཕོ་ཉ་གང་ཡིན་དང་། །མངག་གཞུག་པ་ཡི་མངག་གཞུག་དང་། །བུད་མེད་འཕྱོན་མ་བྱེད་པ་གང་། །དེ་གསུམ་བཏུན་གྱིས་བརྡེག་རྒྱུའོ། །ལྷ་དེ་དག་འབའ་ཞིག་ཏུ་མ་བས་
གཞན་ཡང་གསུམ་སྟེ། གནག་རྫི་གྲོང་ན་རྒྱུ་བ་དང་། །འབྲེག་མཁན་ནགས་ན་རྒྱུ་བ་དང་། །མག་པ་རྟག་ཏུ་འོང་བྱེད་པ། །དེ་གསུམ་གཏུན་གྱིས་བརྡེག་རྒྱུའོ། །རྒྱལ་པོས་སྨྲས་པ། གསོས་པ་ཁྱོད་ཀྱིས་བ་ལང་སྐྱོང་གི་མ་ཞི་བ་ལན་གཅིག་གིས་བསད་དོ། །དེས་སྨྲས་པ། ལྷ།
རྒྱལ་པོ་སྨྲ་བ་ལན་གཅིག་སྟེ། །བུ་མོ་སྦྱིན་པ་ལན་གཅིག་གོ། །འཕགས་པའི་གཟིགས་པ་ལན་གཅིག་སྟེ། །དེ་གསུམ་ལན་རེ་ལན་རེའོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་
ཁྱོད་ནི་རང་གིས་ནད་བསླངས་སོ། །དེས་སྨྲས་པ། ལྷ། སྡར་མ་སྣ་ཚོགས་གོ་གྱོན་དང་། །རྩྭ་མཇིང་ཆུང་ངུ་ནོར་མང་དང་། །རྒན་པོ་ཆུང་མ་གཞོན་ལེན་པ། །དེ་དག་རང་གིས་ནད་བསླངས་སོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་
ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་ནི་ཁྱོད་ལ་བག་ཚའོ། །དེས་སྨྲས་པ། ལྷ། དཀའ་ཐུབ་ཅན་ནི་བླུན་མཐོང་དང་། །དཔའ་བོ་རྨ་མཚན་མེད་པ་དང་། །བུ་མོ་ཆེན་མོ་མཐོང་ནས་ནི། །སྙིང་ལ་བག་ཚ་སྐྱེ་བར་འགྱུར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་
པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་བརྙས་སོ། །དེས་སྨྲས་པ། ལྷ། ཅལ་ལེ་ཅོལ་ལེ་སྨྲ་བ་དང་། །གཉིས་པ་གོས་ངན་གྱོན་པ་དང་། །སྐྲུ་ཞིང་ཟ་བ་གང་ཡིན་པ། །དེ་གསུམ་བརྙས་པར་བྱ་བ་ཡིན། །ཞེས་བགྱི་བ་ཁྱོད་ཀྱིས་
เล่ม ๑๑ · หน้า 19b
མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ངས་ཁྱོད་དགྲ་ཞིག་བགས་ཀྱིས་སྤེལ་ཏོ། །དེས་སྨྲས་པ། ལྷ། ཉ་ནི་བགས་ཀྱིས་བཟའ་བར་བྱ། །རི་བོ་ལ་ནི་བགས་ཀྱིས་གཟེག །དོན་རྣམས་བགས་ཀྱིས་
བསྒྲུབ་བྱ་སྟེ། །འདི་གསུམ་བགས་ཀྱིས་བགས་ཀྱིས་བྱ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བྱིས་པའོ། །དེས་སྨྲས་པ། ལྷ། མ་འདྲིས་པ་ལ་ཡིད་རྟོན་དང་། །མ་
རུངས་པ་ལ་སྟེན་པ་དང་། །གྱ་ཙོམ་དུ་ནི་ཡོངས་གཏོང་བ། །བྱིས་པའི་མཚན་ཉིད་རྣམ་གསུམ་མོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བཤེས་པ་འབྱེད་པ་ཡིན་ནོ། །
དེས་སྨྲས་པ། ལྷ། བཤེས་རྣམས་ལ་ནི་མི་སྟེན་དང་། །གཉིས་པ་ཧ་ཅང་སྟེན་པ་དང་། །དུས་མ་ཡིན་པར་སློང་བྱེད་པ། །དེས་ནི་བཤེས་རྣམས་འབྱེད་པར་བྱེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་
ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སྐྱེས་བུ་ཐ་ཤལ་ཡིན་ནོ། །དེས་སྨྲས་པ། ལྷ། རྟག་ཏུ་གཞན་གྱི་ནོར་དང་ནི། །བདག་ཉིད་འདོད་པ་རྣོག་བྱེད་དང་། །དེ་བཞིན་སྡུག་བསྔལ་ལ་དགའ་བ། །དེ་གསུམ་སྐྱེས་བུ་ཐ་ཤལ་ཡིན། །ཞེས་བགྱི་བ་ཁྱོད་ཀྱིས་མ་
གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་ཤིང་རྟའི་འཁོར་ལོས་གསད་རྒྱུ་ཡིན་ནོ། །དེས་སྨྲས་པ། ལྷ། རི་མོ་མཁན་ནི་ཚོན་གཏོང་མི་ཤེས་དང་། །འཁྲུལ་འཁོར་མཁན་ནི་འབྱོར་ཀ་མི་ཤེས་དང་། །གྱད་གྱི་བུ་
ནི་དོར་ཐབས་མི་ཤེས་པ། །གསད་བྱ་གསད་པར་རྟག་ཏུ་བཟློག་པ་མེད། །ཅེས་བགྱི་བ་ལྷས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་གཡོ་ཅན་ཡིན་ནོ། །དེས་སྨྲས་པ། ལྷ། བུད་མེད་ཁྱོ་གསུམ་
เล่ม ๑๑ · หน้า 20a
བརྒྱུད་པ་དང་། །དགེ་སློང་ཕྱིར་ནི་འོངས་པ་དང་། །བྱ་ནི་རྒྱ་ལས་ཤོར་དང་གསུམ། །གཡོ་ཅན་ནང་ན་དེ་གཡོ་ངན། །ཞེས་བགྱི་བ་ཁྱོད་ཀྱིས་མ་གསན་ཏམ། སྡོམ་ནི། རྙེད་པར་དཀའ་དང་གཞན་དང་གཅིག །བསགས་དང་དེ་བཞིན་མི་མཐུན་དང་། །བརྡུངས་
དང་མེད་པ་ཉིད་དང་ནི། །མི་འཚམ་པ་ནི་དོན་མེད་དོ། །གསོས་པ་ཁྱོད་ཀྱིས་བ་ལང་སྐྱོང་གི་མ་རྙེད་དཀའ་བ་བསད་དོ། །དེས་སྨྲས་པ། ལྷ། རི་བོང་རྭ་ཅན་རྙེད་པར་དཀའ། །རུ་སྦལ་སྤུ་ཅན་རྙེད་པར་དཀའ། །སྨད་འཚོང་གཅིག་པུ་འདུག་པ་དང་། །གཟུ་བོ་དྲང་པོར་སྨྲ་རྙེད་
དཀའ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་གཞན་གྱི་ཆེད་དུ་བ་ལང་སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། གཏམས་པ་ལེན་དང་གཉའ་བོ་དང་། །གཡོན་ཅན་གྱི་ནི་ཆེ་བཞི་དང་། །སྨྱན་བྱེད་བློ་ཞན་བཞི་པོ་དག །གཞན་
གྱི་དོན་དུ་མ་རུང་འགྱུར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་གཅིག་པུར་བྱས་སོ། །དེས་སྨྲས་པ། ལྷ། སྐྱེ་བ་ན་ཡང་འདི་གཅིག་སྐྱེ་བར་འགྱུར། །དེ་བཞིན་འཆི་བ་ན་ཡང་འདི་
གཅིག་འཆི། །སྐྱེ་བོ་གཅིག་པུས་འདི་ན་སྡུག་བསྔལ་མྱོང་། །འཁོར་བ་ལ་ནི་གྲོགས་ཡོད་མ་ཡིན་ནོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་བ་ལང་སྐྱོང་གི་མ་ཞི་བ་ཚོགས་བསགས་པ་བསད་དོ། །དེས་སྨྲས་པ། ལྷ། ཉ་སྒོང་ཨ་མྲའི་
མེ་ཏོག་དང་། །སྡུག་བསྔལ་གྱུར་པའི་དོན་གཉེར་བ། །དཔེར་ན་སྟོན་ཀའི་སྤྲིན་བཞིན་དུ། །བསགས་པ་རྣམས་ཀྱང་དོན་མེད་འགྱུར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་མི་
མཐུན་པ་ཡིན་ནོ། །དེས་སྨྲས་པ། ལྷ། ཉི་མ་གྲིབ་མར་མི་མཐུན་ཞིང་། །སྣང་བ་དང་ནི་མུན་པ་དང་། །ཉིན་པར་མཚན་མོར་མི་མཐུན་ཏེ། །ཆོས་དང་ཆོས་མིན་རྟག་མི་མཐུན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་
เล่ม ๑๑ · หน้า 20b
སྐྱོང་གི་མ་ཞི་བ་བསད་པས་ཁྱོད་ནི་བརྡུང་རྒྱུའོ། །དེས་སྨྲས་པ། ལྷ། གོས་རྣམས་བརྡུངས་ན་འཇམ་པོ་དག་ཏུ་འགྱུར། །བོང་བུ་བརྡུངས་ན་དེ་དག་མགྱོགས་པར་འགྱུར། །བུད་མེད་རྣམས་ནི་བརྡུངས་ན་དབང་དུ་འགྱུར། །རྔ་དག་མ་བརྡུངས་སྒྲ་འབྱིན་མི་འགྱུར་རོ། །ཞེས་བགྱི་བ་ཁྱོད་
ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་མེད་པར་བྱ་བ་ཡིན་ནོ། །དེས་སྨྲས་པ། ལྷ། རླུང་གིས་སྦུན་པ་མེད་པར་བྱེད། །སྐྱེ་བོའི་སྒྲ་ཡིས་གླུ་དེ་བཞིན། །སྐྱེས་བུ་ངན་པ་བསྟེན་པ་དང་། །མི་མཛེས་ཡོན་
ཏན་མེད་པར་བྱེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་འཚམ་པ་མ་ཡིན་ནོ། །དེས་སྨྲས་པ། ལྷ། རྒྱལ་པོ་བརྫུན་དུ་སྨྲ་བ་དང་། །སྨན་པ་གསུང་དང་དགེ་སྦྱོང་འཁྲུག །
བློ་དང་ལྡན་པ་ཀུན་རྨོངས་པ། །བཞི་ནི་འཚམ་པ་མ་ཡིན་ནོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་དོན་མེད་པར་བ་ལང་སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། ཉིན་པར་མར་མེ་བུས་པ་དོན་མེད་དོ། །རྒྱ་མཚོར་
ཆར་པ་བབ་པ་དོན་མེད་དོ། །འགྲངས་ལ་སྟོན་མོ་བྱིན་པ་དོན་མེད་དོ། །སྐྱེས་བུ་ངན་པ་བསྟེན་པ་དོན་མེད་དོ། །ཞེས་བགྱི་བ་ཁྱོད་ཀྱིས་མ་གསན་ཏམ། སྡོམ་ནི། སླུ་དང་བལྟ་དང་མ་ལེགས་དང་། །བསྐྲད་དང་འཇིགས་དང་མི་དགའ་གཏང་། །སྲེད་དང་མ་བསམས་
མྱ་ངན་གཏོགས། །དེ་ནི་ཚོགས་སུ་ཡང་དག་བསྒྲགས། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སླུ་བ་ཡིན་ནོ། །དེས་སྨྲས་པ། ལྷ། སླུ་བ་བཞི་མཆིས་པར་ཁྱོད་ཀྱིས་མ་གསན་ཏམ། བཞི་གང་ཡིན། ལྷ། མི་
འདོད་པ་ལ་འདོམས་པ་དང་། །གཉིད་ཀྱིས་དུབ་ལ་འཆད་པ་དང་། །དོན་དུ་གཉེར་མིན་དོན་གཉེར་དང་། །སྟོབས་དང་ལྡན་རྣམས་འགྱེད་པའོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བལྟ་བར་བྱ་བ་ཡིན་ནོ། །དེས་སྨྲས་པ།
เล่ม ๑๑ · หน้า 21a
ལྷ། གཡུལ་ངོར་དཔའ་བོ་བལྟ་བྱ་སྟེ། །མི་བཟད་དུག་ལ་གསང་སྔགས་བལྟ། །བཟའ་བཏུང་ཚེ་ན་ཉེ་དུ་སྟེ། །དོན་རྟོགས་བྱ་ལ་མཁས་པ་བལྟ། །ཞེས་བགྱི་བ་ཁྱོད་ཀྱིས་མ་གསན་ཏམ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་
ཀྱིས་བ་ལང་སྐྱོང་གི་མ་ཞི་བ་བསད་པས་མ་ལེགས་པ་བྱས་སོ། །དེས་སྨྲས་པ། ལྷ། ཁྱིམ་པ་ལེ་ལོ་མ་ལེགས་ཆགས་མ་ལེགས། །རབ་བྱུང་ཡང་དག་སྡོམ་པ་མིན་མ་ལེགས། །རྒྱལ་པོ་གཟུ་ལུམས་སྤྱོད་པའང་མ་ལེགས་ཏེ། །མཁས་གང་འཁྲུག་བྱེད་དེ་
ཡང་མ་ལེགས་སོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་བསྐྲད་པར་བྱ་བ་ཡིན་ནོ། །དེས་སྨྲས་པ། ལྷ། མི་མཁས་ཤིང་རྟ་གཅོག་པ་དང་། །ཁལ་ཆེན་འགེལ་
བས་གླང་གསོད་དང་། །ཧ་ཅང་བཞོས་པས་བེའུ་གསོད་དང་། །ཉེ་དུའི་ཁྱིམ་འདུག་ཆུང་མ་བསྐྲད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་མཐོང་ན་ང་འཇིགས་སོ། །
དེས་སྨྲས་པ། ལྷ། འུར་པ་དང་ནི་ཆུ་སྐྱར་དང་། །གསུམ་པ་ཕྱག་དར་སྲིན་བུ་དང་། །བཞི་པ་ལྷམ་བུ་ཆུ་གཤེར་ནི། །འཇིགས་བྱ་མིན་ལ་འཇིགས་པར་བྱེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་བ་ལང་སྐྱོང་གི་མ་ཞི་བ་མེད་པས་
མི་དགའོ། །དེས་སྨྲས་པ། ལྷ། སྤྲེའུ་ནི་གྲོང་ན་མི་དགའ་སྟེ། །ཆུ་སྲིན་བྱིས་པ་གསོད་རི་ལ། །ཆོམ་རྐུན་དགེ་སྦྱོང་ཁྱིམ་དུ་སྟེ། །བྱི་པོ་རང་གི་ཁྱིམ་མི་དགའ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་
བ་ལང་སྐྱོང་གི་མ་ཞི་བ་བསད་པས་ཁྱོད་ནི་གཏང་བར་བྱ་བ་ཡིན་ནོ། །དེས་སྨྲས་པ། ལྷ། རིགས་ཀྱི་ཕྱིར་ནི་གཅིག་གཏང་སྟེ། །གྲོང་གི་ཕྱིར་ནི་རིགས་གཏང་ངོ་། །ཡུལ་གྱི་ཕྱིར་ནི་གྲོང་གཏང་སྟེ། །བདག་གི་ཕྱིར་ནི་ཡུལ་གཏང་ངོ་། །ཞེས་བགྱི་བ་ཁྱོད་ཀྱིས་མ་གསན་
เล่ม ๑๑ · หน้า 21b
ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ངའི་སྲེད་པ་འཆད་དུ་མི་བཏུབ་པོ། །དེས་སྨྲས་པ། ལྷ། རྩ་མེད་གཞན་གྱི་བུད་མེད་དང་། །ལག་པ་གཅིག་གིས་ཆུ་འཐུང་དང་། །གཞན་གྱིས་ཆང་བླུད་གང་ཡིན་པ། །
དེ་དག་སྲེད་པ་འཆད་པ་མེད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་མ་བསམས་པ་ཁོ་ནར་བ་ལང་སྐྱོང་གི་མ་ཞི་བ་བསད་དོ། །དེས་སྨྲས་པ། ལྷ། རྒྱལ་པོ་རྒྱལ་པོའི་མཛོད་ནི་མ་བསམས་པར། །ལམ་དུ་ཞུགས་ལ་ཆོམ་
པོར་མ་བསམས་པར། །ཁྱིམ་ན་བུད་མེད་ཐབ་མོ་མ་བསམས་པར། །རབ་ཏུ་བྱུང་བའི་རྙེད་པ་མ་བསམས་པར། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་མྱ་ངན་བྱ་བ་ཡིན་ནོ། །དེས་
སྨྲས་པ། ལྷ། ཆགས་ཅན་རྒས་པའང་མྱ་ངན་བྱ་བ་སྟེ། །མི་བཟང་པོར་མོའང་མྱ་ངན་བྱ་བ་ཡིན། །སྨད་འཚོང་རྒས་པའང་མྱ་ངན་བྱ་བ་སྟེ། །རབ་བྱུང་གཏུམ་པོའང་མྱ་ངན་བྱ་བ་ཡིན། །སྡོམ་ནི། བལྟ་བས་མི་ངོམས་ཡིད་འཐད་དང་། །བརྩེ་བར་མི་བྱ་ནོར་དང་ནི། །སྨྲ་བར་
མི་བྱ་རབ་སྡང་དང་། །མགོན་མེད་བཤེས་དང་ཡིད་བརྟན་པའོ། །རྒྱལ་པོས་སྨྲས་པ། གསོས་པ་ཁྱོད་ཀྱིས་ངའི་བ་ལང་སྐྱོང་གི་མ་ཞི་བ་བལྟ་བས་མི་ངོམས་པ་བསད་དོ། །དེས་སྨྲས་པ། ལྷ། གླང་པོའི་གཙོ་དང་རྒྱལ་པོ་དང་། །རྒྱ་མཚོ་དང་ནི་རི་རབ་དང་། །སངས་རྒྱས་སྨྲ་བ་
རྣམས་ཀྱི་མཆོག །བལྟ་བ་ཡིས་ནི་མི་ངོམས་ཡིན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་བ་ལང་སྐྱོང་གི་མ་ཞི་བ་ངའི་ཡིད་དང་འཐད་པ་བསད་དོ། །དེས་སྨྲས་པ། ལྷ། གཟུགས་བཟང་མོ་དང་རིགས་ལྡན་དང་། །དེས་དང་
རིགས་ནི་འཕེལ་བྱེད་པ། །དར་ལ་བབ་དང་བུད་མེད་ལྔ། །རྒྱལ་ཆེན་ཡིད་དང་འཐད་པ་ཡིན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་དང་ལྷན་ཅིག་རྩེ་བར་མི་བྱ་བ་ཡིན་ནོ། །དེས་
เล่ม ๑๑ · หน้า 22a
སྨྲས་པ། ལྷ། བྱིས་པ་སྦྲུལ་དང་སྦལ་བ་དང་། །གང་གི་མ་ནི་གཡེམ་པ་དང་། །མི་གང་མཛའ་ནི་མི་རྟག་དང་། །ལྷན་ཅིག་རྩེ་བར་མི་བྱའོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་
མ་ཞི་བ་བསད་པས་ཁྱོད་ཀྱིས་ནོར་འཕྲོག་པ་བྱས་སོ། །དེས་སྨྲས་པ། ལྷ། རོལ་མོ་མཁན་དང་དམག་མི་དང་། །སྨན་པ་ཆོམ་རྐུན་བཙོན་རྫི་སྟེ། །དེ་དག་ཉམ་ཐག་གྱུར་པ་ལའང་། །ནོར་ནི་འཕྲོག་པར་བྱེད་པ་ཡིན། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་
པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སྨྲ་བར་བྱ་བ་མ་ཡིན་ནོ། །དེས་སྨྲས་པ། ལྷ། ཧ་ཅང་ཕྱུག་དང་ཧ་ཅང་དབུལ། །དམའ་དང་ཧ་ཅང་མཐོ་གང་དང་། །ཧ་ཅང་རིང་དང་ཧ་ཅང་ཉེ། །དེ་དྲུག་སྨྲ་བར་བྱ་བ་མིན། །ཞེས་བགྱི་
བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སེམས་རབ་ཏུ་སྡང་བ་ཡིན་ནོ། །དེས་སྨྲས་པ། ལྷ། སྦྱིན་པ་མི་སྣང་མི་མཐུན་བྱེད་པ་དང་། །མཐུན་པར་མི་བྱེད་ཉེས་སྤྱོད་སྒྲོགས་པ་དང་། །
སྦྱིན་པ་བྱིན་ནས་རིམ་གྱིས་ལྡོག་བྱེད་པ། །དེ་དག་རབ་ཏུ་སྡང་བའི་རྟགས་ཡིན་ནོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་མགོན་མེད་པར་གྱུར་ཏོ། །དེས་སྨྲས་པ། ལྷ།
གནས་བརྟན་རྒྱལ་པོ་རྒན་པོ་དང་། །ཚུལ་མེད་བཀའ་བློ་མི་བདེ་དང་། །བླ་མ་ལ་ནི་གནོད་བྱེད་གང་། །དེ་དྲུག་མགོན་ནི་མེད་པར་བཤད། །ཅེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་ཁྱོད་ཀྱིས་གང་གི་ཕྱིར་བ་ལང་སྐྱོང་གི་མ་ཞི་བ་བསད་
པས་ཁྱོད་དང་ལྷན་ཅིག་བཤེས་པར་བྱ་བ་མ་ཡིན་ནོ། །དེས་སྨྲས་པ། ལྷ། བཞད་གད་མཁན་དང་གར་མཁན་དང་། །ཕོ་ཉ་སྨད་འཚོང་ཆང་དད་ཅན། །མ་ནིང་དེ་བཞིན་གཞུང་ངན་པ། །དེ་དག་དང་ནི་བཤེས་མི་བྱ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་
เล่ม ๑๑ · หน้า 22b
སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་ཡིད་བརྟན་པར་བྱ་བ་མ་ཡིན་ནོ། །དེས་སྨྲས་པ། ལྷ། སྐེ་ཙམ་ནུབ་པའི་ཆུ་དང་རྟ་དང་ནི། །གླང་པོ་ཆེ་དང་སྤྲེའུ་དང་སྦྲུལ་ནག་དང་། །སྤུ་འགྲེང་བ་དང་གདོང་གཉེར་གང་བ་དང་། །ཁ་སྤུ་ཉུང་
ལ་ཡིད་ནི་བརྟན་མི་བྱ། །ཞེས་བགྱི་བ་ཁྱོད་ཀྱིས་མ་གསན་ཏམ། སྡོམ་ནི། གཉིད་མེད་འདོད་པ་མ་ཡིན་དང་། །ཀུན་ནས་མནར་སེམས་དངོས་པོ་དང་། །དེ་བཞིན་སྙིང་རྗེ་ཁྭ་དང་ནི། །ཟློག་ཐབས་ཐ་མ་སྟོབས་ཡིན་ནོ། །རྒྱལ་པོས་སྨྲས་པ། གསོས་པ་གང་གི་ཕྱིར་
ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་གཉིད་མེད་དོ། །དེས་སྨྲས་པ། ལྷ། གཡེམ་དང་སྐེམ་ནད་ཅན་དང་ནི། །ཆམ་པས་ཐེབས་དང་སྡུག་བསྔལ་དང་། །དོན་སེམས་ཁྲོས་དང་བརྩོན་པ་དང་། །འཇིགས་པ་དེ་ནི་རྣམ་ཀུན་ཏུ། །གཉིད་མི་འོང་སྟེ་འཇིག་རྟེན་ན། །
བརྒྱད་ནི་རང་བཞིན་སྡུག་བསྔལ་ལོ། །ཞེས་བགྱི་བ་ཁྱོད་ཀྱིས་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ང་འདོད་པ་མ་ཡིན་ནོ། །དེས་སྨྲས་པ། ལྷ། འདོད་པ་མ་ཡིན་པའི་དངོས་པོ་བརྒྱད་ཅེས་བགྱི་
བ་ཁྱོད་ཀྱིས་མ་གསན་ཏམ། གསོས་པ་བརྒྱད་གང་ཡིན། །ན་དང་རྒ་དང་འཆི་བ་དང་། །སྡུག་བྲལ་མི་སྡུག་ཕྲད་པ་དང་། །སེར་བ་ཐོག་ཏོག་མི་རྟག་ཉིད། །བརྒྱད་ནི་འཇིག་རྟེན་འདོད་མིན་རབ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་
སྐྱོང་གི་མ་ཞི་བ་བསད་པས་ང་ཁྱོད་ལ་ཀུན་ནས་མནར་སེམས་སྐྱེས་སོ། །དེས་སྨྲས་པ། ལྷ། ཀུན་ནས་མནར་སེམས་དགུ་འདུལ་བ་ཞེས་བགྱི་བ་ཁྱོད་ཀྱིས་མ་གསན་ཏམ། གསོས་པ་དགུ་གང་ཡིན། ལྷ་འདི་ནི་བདག་ལ་གནོད་པར་འདོད་པ་ཕན་པ་མ་ཡིན་པར་འདོད་པ་བདེ་
བ་མ་ཡིན་པར་འདོད་པ་རེག་པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ་སྟེ། འདིས་བདག་ལ་འདོད་པ་བྱས་སོ་བྱེད་དོ་བྱེད་པར་འགྱུར་རོ་སྙམ་མོ། །ཡང་དེ་འདི་སྙམ་དུ་སེམས་ཏེ། གཞན་ལས་བདག་གི་འདི་ལྟར་གྱུར་ན་མི་རུང་བས་བདག་གི་འདི་
เล่ม ๑๑ · หน้า 23a
ཁོ་ན་ལྟར་འགྱུར་བར་བྱའོ་ཞེས་བྱ་བ་འདི་འགྲུབ་པར་ག་ལ་འགྱུར་སྙམ་ནས། དེ་དེ་ལ་ཀུན་ནས་མནར་སེམས་སྐྱེས་པ་སེལ་བར་བྱེད་དོ། །འདི་ནི་གང་ཞིག་བདག་ལ་གནོད་པར་འདོད་པ་ཕན་པ་མ་ཡིན་པར་འདོད་པ། བདེ་བ་མ་ཡིན་པར་འདོད་པ། རིག་
པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ། དེ་ལ་གནོད་པར་འདོད་པ། ཕན་པ་མ་ཡིན་པར་འདོད་པ། བདེ་བ་མ་ཡིན་པར་འདོད་པ། རེག་པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ་སྟེ། འདིས་དེ་ལ་གནོད་པ་
བྱས་སོ་བྱེད་དོ་བྱེད་པར་འགྱུར་རོ་སྙམ་མོ། །ཡང་དེ་འདི་སྙམ་དུ་སེམས་ཏེ། གཞན་ལས་བདག་གི་འདི་ལྟར་གྱུར་ན་མི་རུང་བས་བདག་གིས་འདི་ཁོ་ན་ལྟར་འགྱུར་བར་བྱའོ་ཞེས་བྱ་བ་འདི་འགྲུབ་པར་ག་ལ་འགྱུར་སྙམ་ནས། དེ་དེ་ལ་ཀུན་ནས་མནར་སེམས་སྐྱེས་པ་སེལ་བར་
བྱེད་དོ། །འདི་ནི་གང་ཞིག་བདག་ལ་གནོད་པར་འདོད་པ། ཕན་པ་མ་ཡིན་པར་འདོད་པ། བདེ་བ་མ་ཡིན་པར་འདོད་པ། རེག་པ་མ་ཡིན་པར་འདོད་པ། གྲུབ་པ་དང་བདེ་བ་མ་ཡིན་པར་འདོད་པ། དེ་ལ་དོན་དུ་འདོད་པ། ཕན་པར་འདོད་པ། བདེ་བར་འདོད་པ། རེག་
པར་འདོད་པ། གྲུབ་པ་དང་བདེ་བར་འདོད་པ་སྟེ། འདིས་དེ་ལ་ཕན་པར་བྱས་སོ་བྱེད་དོ་བྱེད་པར་འགྱུར་རོ་སྙམ་མོ། །ཡང་དེ་འདི་སྙམ་དུ་སེམས་ཏེ། གཞན་ལས་བདག་གིས་འདི་ལྟར་གྱུར་ན་མི་རུང་བས་བདག་གིས་འདི་ཁོ་ན་ལྟར་འགྱུར་བར་བྱའོ་ཞེས་བྱ་བ་འདི་གྲུབ་པར་
ག་ལ་འགྱུར་སྙམ་ནས། དེ་དེ་ལ་ཀུན་ནས་མནར་སེམས་སྐྱེས་པ་སེལ་བར་བྱེད་དོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་སྙིང་རྗེ་མེད་པ་ཡིན་ནོ། །དེས་སྨྲས་པ། ལྷ། ཁྱོད་ཀྱིས་སྙིང་རྗེ་མེད་པ་བཅུ་པོ་ཤན་པ་དང་།
བྱ་གག་འཚོང་པ་དང་། ཕག་འཚོང་པ་དང་། ཉ་པ་དང་། རི་དགས་ཀྱི་རྔོན་པ་དང་། བྱ་བ་དང་། རི་བོང་རྒྱས་འཆོར་བ་དང་། ཆོམ་རྐུན་པ་དང་། གཤེད་མ་པ་དང་། བ་ལང་གསོད་པ་ལགས་པར་མ་གསན་ཏམ། རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་
เล่ม ๑๑ · หน้า 23b
ལང་སྐྱོང་གི་མ་ཞི་བ་བསད་པས་ཁྱོད་ནི་ཁྭ་ལྟ་བུ་ཡིན་ནོ། །དེས་སྨྲས་པ། ལྷ། ཡན་ལག་བཅུ་དང་ལྡན་ན་ཁྭ་ལྟ་བུ་ལགས་སོ་ཞེས་བགྱི་བ་ཁྱོད་ཀྱིས་མ་གསན་ཏམ། གསོས་པ་བཅུ་གང་ཡིན། ལྷ། གཅོར་བ་དང་། མུ་ཅོར་སྨྲ་བ་དང་། ཐུབ་ཆོད་བྱེད་པ་དང་། འཁུ་བ་དང་།
བྱས་པ་མི་གཟོ་བ་དང་། སྙིང་རྗེ་མེད་པ་དང་། མ་བྱིན་པར་ལེན་པ་དང་། བསོགས་པ་དང་། དགང་དཀའ་བ་དང་། འཆལ་པ་ལགས་སོ། །རྒྱལ་པོས་སྨྲས་པ། གསོས་པ་གང་གི་ཕྱིར་ཁྱོད་ཀྱིས་བ་ལང་སྐྱོང་གི་མ་ཞི་བ་བསད་པས་ཁྱོད་ནི་ཟློག་ཐབས་ཅན་ཡིན་ནོ། །དེས་
སྨྲས་པ། ལྷ། ཟློག་ཐབས་ཅན་བཅུ་ཞེས་བགྱི་བ་ཁྱོད་ཀྱིས་མ་གསན་ཏམ། གསོས་པ་བཅུ་གང་ཡིན། ལྷ། ཉི་མ་ཟློག་ཐབས་ཅན་དང་། ཟླ་བ་ཟློག་ཐབས་ཅན་དང་། མེ་ཟློག་ཐབས་ཅན་དང་། ཆུ་ཟློག་ཐབས་ཅན་དང་། གཞོན་ནུ་མ་ཟློག་ཐབས་ཅན་དང་། བུད་མེད་
ཟློག་ཐབས་ཅན་དང་། བྲམ་ཟེ་ཟློག་ཐབས་ཅན་དང་། གཅེར་བུ་པ་ཟློག་ཐབས་ཅན་དང་། དགེ་སློང་ཟློག་ཐབས་ཅན་དང་། སླད་ས་ཟློག་ཐབས་ཅན་ལགས་སོ། །དེ་ལ་ཉི་མ་ཟློག་ཐབས་ཅན་ནི་ཉི་མ་ནི་དགུན་གློ་ནས་མཆི་ན་དྲོ་བར་ཡང་མི་འགྱུར་ལ། སོ་ག་ཐག་རིང་པོ་ནས་
མཆི་ན་འོན་ཀྱང་དྲོ་བར་འགྱུར་ཏེ། འདི་ནི་ཉི་མ་ཟློག་ཐབས་ཅན་ཞེས་བགྱིའོ། །ཟླ་བ་ཟློག་ཐབས་ཅན་གང་ཞེ་ན། ཟླ་བ་ནི་གང་གི་ཚེ་ཤས་ཆུང་བ་དེའི་ཚེ་སྐྱེ་བོ་ཐམས་ཅད་ཀྱིས་ཕྱག་བྱ་བར་འགྱུར་ལ། གང་གི་ཚེ་རྣམ་པ་ཐམས་ཅད་ཡོངས་སུ་རྫོགས་པར་གྱུར་པ་དེའི་ཚེ་སུ་
ཡང་ཕྱག་མི་འཚལ་ཏེ། འདི་ནི་ཟླ་བ་ཟློག་ཐབས་ཅན་ཞེས་བགྱིའོ། །མེ་ཟློག་ཐབས་ཅན་གང་ཞེ་ན། མེ་ནི་ཚིག་པ་མེ་ཉིད་དུ་སྲེག་སྟེ། འདི་ནི་མེ་ཟློག་ཐབས་ཅན་ཞེས་བགྱིའོ། །ཆུ་ཟློག་ཐབས་ཅན་གང་ཞེ་ན། ཆུ་ནི་དགུན་རྫིང་ན་བསིལ་ན་འོན་ཀྱང་བཏུང་དུ་མི་རུང་
གི། ཁྲོན་པ་ན་དྲོ་ན་འོན་ཀྱང་བཏུང་དུ་རུང་ལ། སོ་གར་རྫིང་ན་དྲོ་ན་འོན་ཀྱང་བཏུང་དུ་རུང་ལ། ཁྲོན་པ་ན་བསིལ་ན་འོན་ཀྱང་བཏུང་དུ་མི་རུང་སྟེ། འདི་ནི་ཆུ་ཟློག་ཐབས་ཅན་ཞེས་བགྱིའོ། །གཞོན་ནུ་མ་ཟློག་ཐབས་ཅན་གང་ཞེ་ན། གཞོན་ནུ་མ་ནི་གང་གི་ཚེ་མ་བྱིན་པ་
เล่ม ๑๑ · หน้า 24a
དེའི་ཚེ་གྱོས་པོའི་ཁྱིམ་ལ་དགའ་ལ། གང་གི་ཚེ་གྱོས་པོའི་ཁྱིམ་དུ་ཁྱེར་བ་དེའི་ཚེ་ཁྱིམ་ལ་ཁོང་དུ་ཡང་དགའ་ལ་ངུ་བར་བྱེད་དེ། འདི་ནི་གཞོན་ནུ་མ་ཟློག་ཐབས་ཅན་ཞེས་བགྱིའོ། །བུད་མེད་ཟློག་ཐབས་ཅན་གང་ཞེ་ན། བུད་མེད་ནི་གང་གི་ཚེ་གཞོན་ཞིང་བལྟ་
ན་ཡིད་དུ་འོང་བ་དེའི་ཚེ་ལུས་བཀབ་སྟེ་འགྲོ་ལ། གང་གི་ཚེ་རྒས་ཤིང་ཡིད་དུ་མི་འོང་བ་དེའི་ཚེ་ཕྱེ་ནས་འགྲོ་སྟེ། འདི་ནི་བུད་མེད་ཟློག་ཐབས་ཅན་ཞེས་བགྱིའོ། །བྲམ་ཟེ་ཟློག་ཐབས་ཅན་གང་ཞེ་ན། བྲམ་ཟེ་ནི་གང་གི་ཚེ་བྱིས་པ་སྟེ་འདོད་པའི་འདོད་ཆགས་མ་སྐྱེས་པ་དེའི་ཚེ་
ཚངས་པར་སྤྱད་པ་སྤྱོད་པ་ལ་གང་གི་ཚེ་དར་ལ་བབ་སྟེ་འདོད་པའི་འདོད་ཆགས་སྐྱེས་པ་དེའི་ཚེ་འདོད་པ་དག་སྟེན་པར་བྱེད་དེ། འདི་ནི་བྲམ་ཟེ་ཟློག་ཐབས་ཅན་ཞེས་བགྱིའོ། །གཅེར་བུ་པ་ཟློག་ཐབས་ཅན་གང་ཞེ་ན། གཅེར་བུ་པ་ནི་གང་གི་ཚེ་ཁྱིམ་ན་འདུག་པ་དེའི་ཚེ་གོས་གྱོན་
ཞིང་འདུག་ལ་གང་གི་ཚེ་སྤྱོད་ཡུལ་དུ་འགྲོ་བ་དེའི་ཚེ་ནི་གཅེར་བུར་འགྲོ་སྟེ། འདི་ནི་གཅེར་བུ་པ་ཟློག་ཐབས་ཅན་ཞེས་བགྱིའོ། །དགེ་སློང་ཟློག་ཐབས་ཅན་གང་ཞེ་ན། དགེ་སློང་ནི་གང་གི་ཚེ་གཞོན་ནུ་ལང་ཚོ་ལ་བབ་ཅིང་ཟོས་པ་དང་འཐུངས་པ་དང་། འཆོས་པ་དང་མྱངས་པ་
རྣམས་འཇུ་བར་ནུས་པ་དེའི་ཚེ་དེ་དག་མི་རྙེད་ལ། གང་གི་ཚེ་རྒས་ཏེ་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་འཇུ་བར་མི་ནུས་པ་དེའི་ཚེ་དེ་དག་རྙེད་དེ། འདི་ནི་དགེ་སློང་ཟློག་ཐབས་ཅན་ཞེས་བགྱིའོ། །སླད་ས་ཟློག་ཐབས་ཅན་གང་ཞེ་ན། སླད་ས་
ནི་གང་གི་ཚེ་གཤེར་བ་དེའི་ཚེ་ཆུའི་སྟེང་ན་འཕྱོ་ལ། གང་གི་ཚེ་སྐམས་པ་དེའི་ཚེ་འབྱིང་སྟེ། འདི་ནི་སླད་ས་ཟློག་ཐབས་ཅན་ཞེས་བགྱིའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་པ། རྒྱལ་པོས་སྨྲས་པ། གསོས་པ་ཐམས་ཅད་གོ་སྟེ་ཆོག་
གོ། །འདི་དྲིས་དྲང་པོར་སྨྲོས་ཤིག །ཁྱོད་ཀྱིས་སྟོབས་གང་གིས་བ་ལང་སྐྱོང་གི་མ་ཞི་བ་བསད་དེས་སྨྲས་པ། ལྷ་བདག་ལ་གང་གིས་ན་བ་ལང་སྐྱོང་གི་མ་ཁུམས་པའི་སྟོབས་ག་ལ་མཆིས། ལྷ་འོན་ཀྱང་འཕགས་པ་ཀ་ཏྱའི་བུ་ཆེན་པོ་འདི་གང་གི་ཉན་ཐོས་ལགས་པ་དེ་ནི་དེ་
เล่ม ๑๑ · หน้า 24b
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི། ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་ལགས་ཏེ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཐོགས་པ་མི་མངའ་བའི་སྟོབས་ཀྱིས་འཁོར་ལོས་སྒྱུར་བ་དེ་ལ་གང་དག་དང་ལྡན་ན་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་
ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་པ་སྟོབས་བཅུ་མངའོ། །བཅུ་གང་ལགས་ཞེ་ན། ལྷ་དེ་ནི་གནས་ལ་ཡང་གནས་སུ། གནས་མ་ཡིན་པ་ལ་ཡང་གནས་མ་ཡིན་པར་ཡང་དག་པར་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ལྷ་འདི་ནི་དེའི་སྟོབས་དང་པོ་
ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སེམས་ཅན་རྣམས་ཀྱི་ལས་དང་ཆོས་ཡང་
དག་པར་བླངས་པ་འདས་པ་དང་། མ་འོངས་པ་དང་། ད་ལྟར་བྱུང་བ་རྣམས་ལ་གནས་དང་། གཞི་དང་། རྒྱུ་དང་། རྣམ་པར་སྨིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེས་སེམས་ཅན་རྣམས་ཀྱི་ལས་དང་ཆོས་ཡང་དག་པར་བླངས་པ་འདས་པ་
དང་། མ་འོངས་པ་དང་། ད་ལྟར་བྱུང་བ་རྣམས་གནས་དང་། གཞི་དང་། རྒྱུ་དང་། རྣམ་པར་སྨིན་པར་ཡང་དག་པར་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་གཉིས་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་
རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ། གཞན་ཡང་དེས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་
เล่ม ๑๑ · หน้า 25a
ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་རྣམ་པར་གཞག་པ་དང་། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ཀྱི་ཀུན་
ནས་ཉོན་མོངས་པ་དང་། རྣམ་པར་བྱང་བ་རྣམ་པར་གཞག་པ་དང་། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་གསུམ་པ་ལགས་ཏེ། སྟོབས་དེ་དང་ལྡན་པས་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་
ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་ན་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སེམས་ཅན་གཞན་རྣམས་དང་གང་ཟག་གཞན་རྣམས་ཀྱི་དབང་པོ་མཆོག་དང་། མཆོག་མ་ཡིན་པ་ཉིད་ཡང་དག་པ་ཇི་ལྟ་བ་བཞིན་དུ་རབ་
ཏུ་མཁྱེན་ཏོ། །དེས་སེམས་ཅན་གཞན་རྣམས་དང་གང་ཟག་གཞན་རྣམས་ཀྱི་དབང་པོ་མཆོག་དང་། མཆོག་མ་ཡིན་པ་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་དེའི་སྟོབས་བཞི་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་
གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སེམས་ཅན་གཞན་རྣམས་དང་། གང་ཟག་གཞན་རྣམས་ཀྱིས་མོས་པ་སྣ་ཚོགས་ཉིད་ཡང་དག་པ་
ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེས་སེམས་ཅན་གཞན་རྣམས་དང་། གང་ཟག་གཞན་རྣམས་ཀྱི་མོས་པ་སྣ་ཚོགས་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་ལྔ་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་
པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་འཇིག་རྟེན་ཁམས་སྣ་ཚོགས་པ་དང་། ཁམས་དུ་མ་པའོ་ཞེས་བགྱི་བར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །
เล่ม ๑๑ · หน้า 25b
དེས་འཇིག་རྟེན་ཁམས་སྣ་ཚོགས་པ་དང་། ཁམས་དུ་མ་པའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་སྟོབས་དྲུག་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་
བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་ཀུན་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེས་ཀུན་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་གང་ལགས་པ་འདི་ནི་ལྷ་དེའི་
སྟོབས་བདུན་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེས་སྔོན་གྱི་གནས་རྣམ་པ་དུ་མ་རྗེས་སུ་དགོངས་
ཏེ། འདི་ལྟ་སྟེ། ཚེ་གཅིག་ཀྱང་དགོངས། ཚེ་གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། ཚེ་བརྒྱ་དང་། ཚེ་སྟོང་དང་། ཚེ་བརྒྱ་སྟོང་དང་།
ཚེ་བརྒྱ་ཕྲག་དུ་མ་དང་། ཚེ་སྟོང་ཕྲག་དུ་མ་དང་། ཚེ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་
པ་དང་འཆགས་པའི་བསྐལ་པ་དུ་མ་ཡང་རྗེས་སུ་དགོངས་ཏེ། གང་དུ་བདག་གི་མིང་ནི་འདི་ཞེས་བྱ། རིགས་ནི་འདི་ལྟ་བུ། རུས་ནི་འདི་ལྟ་བུ། ཁ་ཟས་ནི་འདི་ལྟ་བུ་ཟ་ཟ། བདེ་བ་དང་སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང་། ཚེ་ནི་འདི་ཙམ་ཐུབ། ཡུན་ནི་འདི་
སྲིད་ཅིག་གནས་གནས། ཚེའི་མཐའ་ནི་འདི་སྲིད་ཅིག་ཡིན་པར་གྱུར་པ་ན་སེམས་ཅན་ནི་དེ་དག་བྱུང་ངོ་། །བདག་གནས་དེ་ནས་ཤི་འཕོས་ནས་ནི་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་ནི་འདིར་སྐྱེས་སོ་ཞེས་སྔོན་གྱི་གནས་རྣམ་པ་དུ་མ་རྣམ་པ་དང་བཅས། ཡུལ་
เล่ม ๑๑ · หน้า 26a
ཕྱོགས་དང་བཅས་པར་རྗེས་སུ་དགོངས་སོ། །དེས་སྔོན་གྱི་གནས་རྣམ་པ་དུ་མ་རྗེས་སུ་དགོངས་ཏེ། འདི་ལྟ་སྟེ། ཚེ་གཅིག་ཀྱང་དགོངས་པ་ནས། འདིར་སྐྱེས་ཞེས་བྱ་བའི་བར་སྔོན་གྱི་གནས་རྣམ་པ་དུ་མ་རྣམ་པ་དང་བཅས། ཡུལ་ཕྱོགས་དང་
བཅས་པར་རྗེས་སུ་དགོངས་པ་གང་ལགས་པ་འདི་ནི་ལྷ་དེའི་སྟོབས་བརྒྱད་པ་ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་
མཛད་དོ། །ལྷ་གཞན་ཡང་དེས་ལྷའི་སྤྱན་རྣམ་པར་དག་པ་མིའི་ལས་འདས་པས་སེམས་ཅན་འཆི་འཕོ་བ་དང་། སྐྱེ་བ་དང་། ཁ་དོག་བཟང་པོ་དང་། ཁ་དོག་ངན་པ་དང་། དམན་པ་དང་། གྱ་ནོམ་པ་རྣམས་ཀྱང་གཟིགས་ལ་སེམས་ཅན་ལས་ཇི་ལྟ་བ་བཞིན་དུ་ཉེ་བར་འགྲོ་
བ་བདེ་འགྲོ་དང་། ངན་འགྲོར་འགྲོ་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན་པ། ངག་དང་། ཡིད་ཀྱི་ཉེས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་འདེབས་པ། ལོག་པར་
ལྟ་བ་ཅན་ཡིན་ཏེ་ལོག་པར་ལྟ་བའི་ལས་དང་ཆོས་ཡང་དག་པར་བླངས་པའི་ཕྱིར་རྒྱུ་དེ་དང་རྐྱེན་དེས་ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་གི་ནང་དུ་སྐྱེ་བར་འགྱུར་རོ། །སེམས་ཅན་འདི་དག་ནི་ལུས་ཀྱི་ལེགས་པར་སྤྱོད་པ་
དང་ལྡན་པ། ངག་དང་ཡིད་ཀྱི་ལེགས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་མི་འདེབས་པ། ཡང་དག་པའི་ལྟ་བ་ཅན་ཏེ། ཡང་དག་པའི་ལྟ་བའི་ལས་དང་ཆོས་ཡང་དག་པར་བླངས་པའི་རྒྱུས་རྒྱུ་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་སུ་ལྷ་
དག་གི་ནང་དུ་སྐྱེ་བར་འགྱུར་རོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ལྷའི་སྤྱན་ཞེས་བྱ་བ་ནས། བདེ་འགྲོ་མཐོ་རིས་སུ་ལྷ་དག་གི་ནང་དུ་སྐྱེ་བར་འགྱུར་རོ་ཞེས་བྱ་བའི་བར་སྔ་མ་བཞིན་ནོ། །འདི་ནི་ལྷ་དེའི་སྟོབས་དགུ་པ་ལགས་ཏེ། སྟོབས་དེ་དང་
เล่ม ๑๑ · หน้า 26b
ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །ལྷ་གཞན་ཡང་དེ་ཟག་པ་རྣམས་ཟད་པའི་ཕྱིར་མཐོང་བའི་ཆོས་ཁོ་ན་ལ་ཟག་པ་མེད་པའི་
སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་རང་གི་མངོན་པར་ཤེས་པས་མངོན་སུམ་དུ་བྱས་ནས་རྫོགས་པར་བྱས་ཏེ། བདག་གི་ཟག་པ་ཟད་དོ། །ཚངས་པར་སྤྱོད་པ་བསྟན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་གསུང་
ངོ་། །དེ་ཟག་པ་རྣམས་ཟད་པའི་ཕྱིར་མཐོང་བའི་ཆོས་ཁོ་ན་ལ་ཟག་པ་མེད་པའི་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་ཞེས་བྱ་བ་ནས། འདི་ལས་སྲིད་པ་གཞན་མི་ཤེས་སོ་ཞེས་བྱ་བའི་བར་སྔ་མ་བཞིན་ནོ། །ལྷ་འདི་ནི་དེའི་སྟོབས་བཅུ་པ་
ལགས་ཏེ། སྟོབས་དེ་དང་ལྡན་པས་དེ་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར་བར་མཛད། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་དོ། །དེ་སྐད་ཅེས་སྨྲས་པ་དང་། རྒྱལ་པོ་རབ་སྣང་སྤོབས་པ་མེད་ནས་
ཅང་མི་ཟེར་བར་འདུག་གོ། །གསོས་པས་བསམས་པ། ལྷ་ནི་སྤོབས་པ་མེད་དེ་ཅང་མི་ཟེར་བར་འདུག་ན་འདི་དང་བ་ལོང་སྐྱོང་གི་མ་ཞི་བ་ཇི་སྲིད་མཐོ་བཙམ་སྙམ་ནས་དེས་དེ་ངོམ་ཟུང་གནག་བཞིན་ཁྲིད་ནས་རྒྱལ་པོའི་རྐང་པ་གཉིས་ལ་ཕྱག་འཚལ་ཏེ། རྒྱལ་པོ་ལ་བཟོད་
པ་གསོལ་བར་ཞུགས་པ། ལྷ། མི་ཡི་དབང་པོས་འདིར་རྟག་ཆོས་ཀྱི་ཚུལ། །བགྲོད་ཅིང་རྗེས་སུ་བགྲོད་པ་ཡང་དག་གཟིགས། །བཟོད་པ་རྒྱལ་པོ་རྣམས་ཀྱི་ཆོས་གཙོ་ལྷ། །བ་ལང་སྐྱོང་གི་མ་ཡི་ནོངས་བཟོད་མཛོད། །འཇིག་རྟེན་བལྟ་བྱ་ལེགས་གསུངས་རིན་པོ་ཆེ། །
ཇི་སྟེ་གཟིགས་པར་མ་གྱུར་གསན་མ་གྱུར། །ཁྱོད་ཀྱིས་གླང་པོ་ཆེ་ཡང་གདུལ་བར་སྤྱོད་ལགས་ན། །ཅུང་ཟད་ནོངས་བགྱིད་བུད་མེད་སྨོས་ཅི་འཚལ། །ཁྱོད་ལས་མི་འཕྱོ་གཟུགས་དང་ཡོན་ཏན་ལྡན། །སྔོན་དང་ཕྱིས་ཀྱང་དེ་བཞིན་བཙུན་མོ་ལགས། །རྗེ་སླད་ཁོ་ནར་
เล่ม ๑๑ · หน้า 27a
ལྷ་གཅིག་བ་ལང་མའི། །ཐམས་ཅད་བཟོད་པ་མཛོད་ཅེས་དེ་སྐད་མཆིའོ། །རྒྱལ་པོས་ཀྱང་གསོས་པ་ལ་ཚིགས་སུ་བཅད་དེ་སླར་སྨྲས་པ། རབ་སྨྲས་ལེགས་པར་སྨྲས་འདི་ཁྱོད་ཀྱིས་ནི། །ང་ལ་སྙིང་ཉེ་བསྐྱེད་དེ་སྨྲས་པ་ཡིན། །དེ་ལྟས་ཁྱོད་ལ་ཀ་ནྱཱ་
ཀུབ་ཛ་སྦྱིན། །ང་ཡིས་ཞི་བ་ལ་ཡང་སྙིང་ནས་བཟོད། །གསོས་པའི་ལན་རྫོགས་སྟོ།། །།སྡོམ་ནི། དྲག་ཤུལ་ཅན་གྱིས་གསེར་སྣོད་དང་། །འོད་བཟངས་མ་དང་དགོན་པ་པ། །འཚོ་བྱེད་དང་ནི་འབྲས་སྨན་དང་། །འཁོར་ནི་མང་པོ་སུན་བྱེད་པའོ། །
སངས་རྒྱས་བཅོམ་ལྡན་འདས་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟངས་ན་བཞུགས་སོ། །དེའི་ཚེ་བྲམ་ཟེ་དང་ཁྱིམ་བདག་མང་པོ་དཔོང་ས་ན་འདུས་ཤིང་འཁོད་པ་དག་བར་སྐབས་ཀྱི་གཏམ་འདི་ལྟ་བུ་དག་གླེང་སྟེ། ཤེས་ལྡན་དག་
དགེ་སྦྱོང་གཽ་ཏ་མ་དང་དེའི་ཉན་ཐོས་རྣམས་ཀྱང་འདོད་ཆེན་ཆེ་བའོ། །མུ་སྟེགས་ཅན་དག་ནི་དེ་ལྟ་མ་ཡིན་ནོ་ཞེས་ཟེར་རོ། །དེའི་ཚེ་ཁྱིམ་བདག་དྲག་ཤུལ་ཅན་འཁོར་དེ་ཉིད་དུ་འདུས་ནས་འདུག་པར་གྱུར་ཏོ། །དེ་ནས་ཁྱིམ་བདག་དྲག་ཤུལ་གྱིས་ཡངས་པ་ཅན་གྱི་བྲམ་ཟེ་
དང་ཁྱིམ་བདག་མང་པོ་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་རེ་ཞིག་སྡོད་ཅིག་དང་། ངས་བཅོམ་ལྡན་འདས་འདོད་ཆེན་ཆེའམ། འདོད་ཆེན་ཆུང་བ་དང་། དེའི་ཉན་ཐོས་འདོད་ཆེན་ཆེའམ། འདོད་ཆེན་ཆུང་བ་དག་ཁྱེད་ཀྱིས་མངོན་སུམ་དུ་བྱའོ་
ཞེས་བྱས་ནས། དེ་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་དག་བསྡོགས་ནས། སངས་རྒྱས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དང་ལྷན་ཅིག་མངོན་སུམ་དུ་ཡང་དག་པར་དགའ་བ་དང་། ཡང་དག་པར་མགུ་བའི་
གཏམ་རྣམ་པ་སྣ་ཚོགས་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཆོས་ཀྱི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་ལེན་དུ་འཇུག་པར་མཛད། ཡང་དག་པར་
เล่ม ๑๑ · หน้า 27b
གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་མཐུན་པའི་གཏམ་གྱིས་ཡང་དག་པར་བསྟན། ཡང་དག་པར་ལེན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་བར་
བཞུགས་སོ། །དེ་ནས་ཁྱིམ་བདག་དྲག་ཤུལ་ཅན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་
ཅིག་ཏུ་བདག་གི་སྡུམ་པར་སང་གདུགས་ཚོད་གསོལ་བར་ཅི་གནང་ཞེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་དྲག་ཤུལ་ཅན་གྱིས་བཅོམ་ལྡན་འདས་ཅང་མི་གསུང་བར་གནང་བར་རིག་ནས།
བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་ཅིང་རྗེས་སུ་ཡི་རངས་ནས་སྟན་ལས་ལངས་ཏེ་སོང་ངོ་། །དེས་མུ་སྟེགས་ཅན་རྣམས་ལ་ཡང་ཤེས་ལྡན་དག་སང་བདག་གི་ཁྱིམ་དུ་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་གདུགས་ཚོད་ལ་
སྤྱན་དྲངས་ཀྱིས་ཁྱེད་ཀྱང་དེ་ཉིད་དུ་ཟན་ལ་ཤོག་ཤིག་ཅེས་མགྲོན་དུ་བོས་སོ། །ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ལ་ཡང་ཤེས་ལྡན་དག་བདག་གིས་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དང་། མུ་སྟེགས་ཅན་རྣམས་སང་
བདག་གིས་ཁྱིམ་དུ་གདུགས་ཚོད་ལ་སྤྱན་དྲངས་ཀྱིས་ཁྱེད་ཀྱང་དེའི་ཚེ་གྲོགས་བྱེད་དུ་ཤོག་ཤིག་ཅེས་བསྒོའོ། །དེ་ནས་རང་གི་ཁྱིམ་དུ་སོང་སྟེ་ཞོ་ཤས་འཚོ་བ་རྣམས་ལ་བསྒོ་བ་ཤེས་ལྡན་དག་ཞལ་ཟས་གཙང་ཞིང་བསོད་པ་མང་པོ་དག་སྟ་གོན་གྱིས་ཤིག །དེ་དག་གིས་ཞལ་
ཟས་གཙང་ཞིང་བསོད་པ་མང་པོ་དག་སྟ་གོན་བྱས་སོ། །དེ་ནས་ཁྱིམ་བདག་དྲག་ཤུལ་ཅན་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་སྦྱར་ལགས་ཏེ། ད་དེའི་དུས་ལ་བབ་ན་བཅོམ་ལྡན་འདས་
เล่ม ๑๑ · หน้า 28a
ཀྱིས་དེའི་དུས་ལ་བབ་པར་དགོངས་སུ་གསོལ་ཞེས་གདུགས་ཚོད་གདས་པར་གསོལ་ཏོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་མནབས་ལྷུང་བཟེད་བསྣམས་ཏེ། ཁྱིམ་བདག་དྲག་ཤུལ་ཅན་གྱི་བཀད་ས་གང་ན་བ་དེར་གཤེགས་
ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་དྲག་ཤུལ་ཅན་ཡུལ་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་དང་ལྷན་ཅིག་ཏུ་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་རྣམས་སངས་རྒྱས་
ལ་སོགས་པ་དགེ་སློང་གི་དགེ་འདུན་རྣམས་ལ་འབྲིམ་པར་ཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ཁྱིམ་བདག་དྲག་ཤུལ་ཅན་ནི་བརྟག་པའི་བསམ་པས་གསེར་དང་། དངུལ་དང་།
བཻ་ཌཱུརྱ་དང་། ཤེལ་གྱི་སྣོད་རྣམས་འབྲིམ་གྱིས་དགེ་སློང་ཁྱེད་ཅག་སུ་ཡང་མ་ལེན་ཅིག་བར་སྒོ་ཤིག་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོས་བཙུན་པ་དེ་ལྟར་འཚལ་ལོ་ཞེས་བཅོམ་ལྡན་འདས་ཀྱི་ལྟར་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་
བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་བགམ་པའི་བསམ་པས། གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་རྣམས་འབྲིམ་གྱིས་དགེ་སློང་ཁྱེད་ཅག་སུ་ཡང་མ་ལེན་ཅིག་ཅེས་བཀའ་སྩལ་ཏོ། །ཞེས་བསྒོ་བ་དང་། བཙུན་པ་ཀུན་དགའ་བོ་བཅོམ་
ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་དུ་མི་བླང་བར་བགྱིའོ་ཞེས་སྨྲས་ནས་དེ་དག་གིས་མ་བླངས་སོ། །དེ་ནས་ཁྱིམ་བདག་དྲག་ཤུལ་ཅན་གྱིས་ཟངས་ལས་བྱས་པ་དང་། ཁར་བ་ལས་བྱས་པའི་སྣོད་རྣམས་བྲིམས་ཏེ། སངས་རྒྱས་ལ་སོགས་པ་དགེ་སློང་གི་དགེ་འདུན་
རྣམས་བདེ་བར་བཞུགས་པར་རིག་ནས་རང་གིས་ལག་དར་ཏེ་བཟའ་བ་དང་བཅའ་བ་གཙང་ཞིང་བསོད་པས་ཡང་དག་པར་ཚིམ་པར་བྱེད། ཡང་དག་པར་སྟོབས་པར་བྱེད་དོ། །རྣམ་གྲངས་དུ་མར་རང་གིས་ལག་དར་ཏེ་བཟའ་བ་དང་བཅའ་བ་གཙང་ཞིང་བསོད་པས་ཡང་དག་པར་
เล่ม ๑๑ · หน้า 28b
ཚིམ་པར་བྱས། ཡང་དག་པར་བསྟབས་ནས། བཅོམ་ལྡན་འདས་བཤོས་གསོལ་ཏེ་ཕྱག་བཅབས་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བཏིང་ནས་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་
དྲག་ཤུལ་ཅན་ལ་ཆོས་དང་མཐུན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་ལེན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་མཐུན་པའི་གཏམ་གྱིས་
ཡང་དག་པར་སྟོན་པར་མཛད། ཡང་དག་པར་ལེན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་ནས་ཡོན་བསྔོ་བ་བརྗོད་ནས་གདན་ལས་བཞེངས་ཏེ་གཤེགས་སོ། །དེ་ནས་མུ་སྟེགས་ཅན་མ་དུལ་བའི་ཆ་བྱད་
ཅན་དག་བབ་བབ་ཏུ་ཅ་ཅོ་ཟེར་ཞིང་འདུག་པ་དང་། ཁྱིམ་བདག་དྲག་ཤུལ་ཅན་གྱིས་སྒོ་བའི་མི་ལ། ཀྱེ་ནང་རྗེ་གལ་ཏེ་མུ་སྟེགས་ཅན་འགའ་ཞིག་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པའི་སྣོད་རྣམས་ཁྱེར་ཏེ་སྒོར་
འགྲོ་ན་མ་སྦྱིན་ཅིག །ཇི་སྟེ་ངེད་ལ་ཁྱིམ་བདག་གིས་བྱིན་ནོ་ཞེས་ཟེར་དང་། ཀྱེ་ཁྱེད་ལ་ཁྱིམ་བདག་གིས་ཟན་གྱི་ཕྱིར་ཡིན་གྱི་གཏན་ནི་མ་བྱིན་ནོ་ཞེས་བྱོས་ཤིག །དེ་སྟེ་ཡང་མི་སྟེར་ན་རྒྱོབ་ལ་ཕྲོགས་ཤིག་ཅེས་བསྒོ་བ་དང་། ཁྱིམ་བདག་དེ་ལྟར་འཚལ་ལོ་ཞེས་མི་དེས་ཁྱིམ་
བདག་དྲག་ཤུལ་ཅན་གྱི་ལྟར་མཉན་ནོ། །དེ་ནས་ཁྱིམ་བདག་དྲག་ཤུལ་ཅན་གྱིས་མུ་སྟེགས་ཅན་རྣམས་ལ་གསེར་དང་། དངུལ་དང་། བཻ་ཌཱུརྱ་ལས་བྱས་པའི་སྣོད་རྣམས་བྲིམ་པར་བརྩམས་པ་དང་། སྒྲ་མཐོན་པོ་དང་། སྒྲ་མང་པོ་བཏོན་ནས་ལ་ལ་ན་རེ་ཁྱིམ་བདག་
བདག་ལ་གསེར་ལས་བྱས་པ་བྱིན་ཅིག་ཅེས་ཟེར། ལ་ལ་ནི་བདག་ལ་དངུལ་ལས་བྱས་པ་བྱིན་ཅིག་ཅེས་ཟེར་ཞིང་དེ་ལྟར་དེ་དག་ཀུ་ཅོ་འདོན་པ་དེའི་ཚེ་འཐབ་མོ་བྱུང་ནས་ཕན་ཚུན་དུ་ཁུ་ཚུར་དང་། ཐལ་ལྕག་དང་། དབྱུག་པ་དང་། ལྟག་དབྱུག་དང་། རྡོག་པས་བརྡེག་པར་
เล่ม ๑๑ · หน้า 29a
བརྩམས་པ་དང་། དེ་དག་ཁྱིམ་བདག་དྲག་ཤུལ་ཅན་གྱིས་བསྡིགས་པ་དང་། གཞོམ་པ་དང་། དབྱེ་བའི་སྦྱོར་བས་ནན་གྱི་ཟན་ཟར་བཅུག་གོ། །གང་གིས་སྣོད་གང་དུ་ཟན་ཟོས་པ་དེས་དེ་ཉིད་ཁྱེར་ཏེ་འགྲོ་བར་བརྩམས་པ་དང་། སྒོ་བས་གཟུང་བར་བརྩམས་
སོ། །དེ་རྣམས་ཀྱིས་སྨྲས་པ། ཀྱེ་ནང་རྗེ་ཁྱིམ་བདག་གིས་ངེད་ལ་བྱིན་ན་ཅིའི་ཕྱིར་བཟུང་། དེས་སྨྲས་པ། ཁྱིམ་བདག་གིས་ཁྱེད་ཅག་ཟན་གྱི་ཕྱིར་བྱིན་གྱི་གཏན་ནི་མ་བྱིན་ནོ་ཞོག་ལ་དེང་ཤིག །དེ་དག་གིས་མ་བཞག་པ་དང་། སྒོ་བས་དེ་དག་བརྡེགས་ནས་ཀུ་ཅོ་རབ་ཏུ་ཆེ་
བར་གྱུར་པ་དང་། ཡངས་པ་ཅན་ན་གནས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཞེས་བྱ་བ་སྐྱེ་བོའི་ཚོགས་ཆེན་པོ་ཐམས་ཅད་འདུས་པར་གྱུར་ཏོ། །ཁྱིམ་བདག་དྲག་ཤུལ་ཅན་གྱིས་མི་སྡུག་པ་དེ་དག་མཐོང་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་
རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཀྱིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དང་དེ་དག་གི་ཁྱད་པར་མཐོང་ངམ། དེ་དག་གིས་སྨྲས་པ། ཁྱིམ་བདག་མཐོང་ངོ་། །དེས་སྨྲས་པ། ཤེས་ལྡན་དག་དེ་ལྟར་ན་བཅོམ་ལྡན་འདས་ཀྱང་
བཞེད་ཆེན་ཆུང་ལ། དེའི་ཉན་ཐོས་དག་ཀྱང་འདོད་ཆེན་ཆུང་གིས་མུ་སྟེགས་ཅན་ཉེས་པར་བཤད་པའི་ཆོས་འདུལ་བ་ཅན་འདི་དག་ནི་དེ་ལྟ་མ་ཡིན་ནོ། །དེ་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་མངོན་པར་མ་དད་པ་མང་པོ་ནི་མངོན་པར་དད་པར་གྱུར་ཏོ། །
བར་མ་རྣམས་ལས་ཀྱང་ཁ་ཅིག་ནི་བཅོམ་ལྡན་འདས་ལ་དད་པར་གྱུར་ཏོ། །དེ་ནས་བཅོམ་ལྡན་འདས་གཙུག་ལག་ཁང་དུ་གཤེགས་ནས་ཞབས་བཀྲུས་ཏེ། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་ཀྱང་བཅོམ་ལྡན་
འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན། ཚོད་རིག་པ་ལ་ཕན་ཡོན་དེ་དང་གཞན་དག་ཀྱང་ཡོད་པས་དེའི་ཕྱིར་དགེ་སློང་གིས་གསེར་དང་། དངུལ་དང་། བཻ་ཌཱུརྱ་དང་། ཤེལ་ལས་བྱས་པ་ལ་སོགས་པ་རིན་པོ་ཆེའི་སྣོད་དུ་བཟའ་བར་མི་བྱ་
เล่ม ๑๑ · หน้า 29b
སྟེ། ཟ་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་གསེར་དང་། དངུལ་དང་། བཻ་ཌཱུརྱ་དང་། ཤེལ་ལ་སོགས་ཏེ་རིན་པོ་ཆེའི་སྣོད་དུ་བཟའ་བར་མི་བྱའོ་ཞེས་བཀའ་སྩལ་པ་དང་། དགེ་སློང་སྐྱོན་དང་བྲལ་བ་གཞན་དག་ཅི་ཡོད་པ་དེ་
དག་གི་དབང་གིས་སོ་སོའི་སྐྱེ་བོ་དག་ལྷའི་གནས་དང་། ཀླུའི་གནས་སུ་སོང་བ་ལས་དེར་དེ་དག་ཟན་ལ་བོས་པ་དང་། དེ་དག་གི་ཁྱིམ་ན་རང་གི་བསོད་ནམས་ལས་གྲུབ་པའི་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་སྣོད་ཡོད་ཀྱི་གཞན་མེད་པས་དེ་དག་དེར་
འགྱོད་དེ་ཟན་མ་ཟོས་སོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་གང་དུ་སྣོད་གཞན་རྙེད་པ་མེད་པ་དེར་ནི་གསེར་དང་། དངུལ་དང་། བཻ་ཌཱུརྱ་དང་། ཤེལ་ལ་
སོགས་པའི་སྣོད་དུ་ཟ་བར་གནང་གིས་འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་
བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །
དེ་དང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་དེ་ལ་སེམས་ཅན་ཞུགས་པར་གྱུར་ཏོ། །གང་གི་ཉིན་མོ་དེ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉིན་མོ་ནས་མདངས་བཟང་བར་གྱུར་ཏོ། །དེ་ཟླ་བ་བརྒྱད་
དམ་དགུ་འདས་ནས་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །དེ་བཙས་པའི་ཚེ་དེའི་ཁྱིམ་ཉི་མའི་འོད་བཞིན་དུ་སྣང་བར་གྱུར་ནས་མཉན་ཡོད་ཀུན་དུ་ཁྱིམ་བདག་ཆེ་གེ་མོ་ཞིག་གི་བུ་མོ་
เล่ม ๑๑ · หน้า 30a
གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །དེ་བཙས་པའི་ཚེ་དེའི་ཁྱིམ་ཉི་མའི་འོད་བཞིན་དུ་སྣང་བར་གྱུར་ཏོ་ཞེས་སྒྲ་དེ་གྲགས་པ་དང་། སྲོག་ཆགས་བརྒྱ་སྟོང་ཕྲག་མང་པོ་ངོ་མཚར་དུ་གྱུར་ནས་ཁྱིམ་
བདག་དེའི་ཁྱིམ་དུ་འདུས་སོ། །རེ་ཞིག་ན་བྲམ་ཟེ་ལྟས་མཁན་ཞིག་ཡུལ་གཞན་ནས་འོངས་པ་དེ་ཡང་ངོ་མཚར་གྱི་ཕྱིར་དེ་ཉིད་དུ་འདུས་ཏེ་དེས་དེ་ལ་ཕན་ཚུན་དུ་བལྟས་ནས་སྐྱེ་བོའི་ཚོགས་ལ་སྨྲས་པ། ཤེས་ལྡན་དག་ཁྱེད་ཀྱིས་བུ་མོ་འདི་མཐོང་ངམ། དེ་དག་གིས་སྨྲས་པ་མཐོང་ངོ་། །ཤེས་ལྡན་
དག་བུ་མོ་འདི་ནི་ཅི་ནས་ཀྱང་སྐྱེས་བུ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་འགྱུར་རོ། །དེ་དག་གིས་སྨྲས་པ། བྲམ་ཟེ་འདིའི་གཟུགས་འདི་ལྟར་མཛེས་པ་དང་སྦྱར་ན་འདི་ནི་གདོན་མི་ཟ་བར་སྐྱེས་པ་ལྔ་བརྒྱ་དང་དགའ་མགུར་སྤྱོད་པར་འགྱུར་རོ། །མཉན་ཡོད་ཐམས་
ཅད་དུ་ཡང་ཁྱིམ་བདག་ཅིག་གི་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་ཏེ། དེ་བཙས་པའི་ཚེ་དེའི་ཁྱིམ་དེ་ཉི་མའི་འོད་བཞིན་དུ་སྣང་བར་གྱུར་ཏོ། །དེ་ལ་མཚན་མཁན་གྱིས་བུ་མོ་འདི་ནི་སྐྱེས་
པ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་ལུང་བསྟན་ཏོ་ཞེས་སྒྲ་གྲགས་ནས་གང་གིས་སྒྲ་ཐོས་པ་དེ་ཡང་དེར་འོང་བར་གྱུར་ཏོ། །ཞག་བདུན་གསུམ་ཉི་ཤུ་རྩ་གཅིག་ཏུ་དེ་བཙས་པའི་བཙས་སྟོན་རྒྱ་ཆེན་པོ་བྱས་ནས་མིང་འདོགས་པར་བྱེད་དེ། བུ་མོ་འདིའི་མིང་ཇི་སྐད་དུ་
གདགས། ཉེ་དུ་དག་གིས་སྨྲས་པ། བུ་མོ་འདི་བཙས་པའི་ཚེ་ཁྱིམ་ཉི་མའི་འོད་བཞིན་དུ་སྣང་བར་གྱུར་པས། དེའི་ཕྱིར་བུ་མོའི་མིང་འོད་བཟང་མ་ཞེས་གདགས་སོ་ཞེས་དེའི་མིང་འོད་བཟང་མ་ཞེས་བྱ་བར་བཏགས་སོ། །འོད་བཟང་མ་མ་མ་བརྒྱད་པོ་པང་ན་འཚོ་བའི་མ་མ་གཉིས་
དང་། ནུ་ཞོ་ལྡུད་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་གཏད་དེ། དེ་མ་མ་བརྒྱད་ཀྱིས་འོ་མ་དང་། ཞོ་དང་། མར་སར་དང་། མར་ཀར་དང་། མར་གྱི་སྙིང་གུ་དང་། གཞན་ཡང་ཡོ་བྱད་ཀྱི་ཁྱད་པར་གཙོ་བོ་གཙོ་བོ་
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด