འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ

ชื่อสันสกฤต (อักษรทิเบต ตามตัวบท) ཨཱརྱཱ་མོ་གྷ་བཱ་ཤ་ཀལྤ་རཱ་ཛཱ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๙๒ · หน้า 88a

གདུ་བུ་གཞག་པར་བྱའོ། །ཙནྡན་དང་། གུར་གུམ་དང་། གླ་རྩི་དང་། ག་བུར་གྱི་ཆུ་དང་། པོག་ཕོར་བཞི་གཞག་ཅིང་། ཨ་ག་རུའི་བདུག་པས་བདུག་གོ། །ཚོན་སྣ་ལྔའི་རས་ཀྱི་སྲད་བུ་མཆོད་ཕྱིར་གྱི་སྲད་བུ་ཚད་དུ་བྱས་ལ། གསེར་གྱི་ཡང་མིག་རྩེ་གསུམ་ཅན་

གདགས་པར་བྱ་ཞིང་། ཐོར་ཏོ་གཅིག་ཏུ་མེ་ཏོག་པདྨའི་གདུབ་ཀོར་དང་མུ་ཏིག་དང་རིན་པོ་ཆེས་སྤྲས་པ། ཟླུམ་པོར་བསྐྱིལ་ལ་བུམ་པའི་སྟེང་དུ་བཞག་ལ་མཆོད་པ་དང་། བསྙེན་བཀུར་བྱས་ཏེ་ཡུངས་ཀར་ལ་དོན་ཡོད་པའི་ཞགས་པའི་སྙིང་པོ་ལན་སྟོང་རྩ་བརྒྱད་བཟླས་ཏེ། དེ་ལ་

གདབ་པར་བྱའོ། །ཙནྡན་དང་། ག་བུར་དང་། གླ་རྩིའི་ཕྱེ་མས་བསྒོས་ལ་བསྒོ་བར་བྱའོ། སྒོ་བཞིའི་གནས་སུ་དྲི་ཆབ་ཀྱིས་བཀང་བའི་བུམ་པ་དང་། ཟས་དཀར་གསུམ་གྱི་གཏོར་མ་གཞག་པར་བྱ་ཞིང་གསེར་དངུལ་གྱི་མཆོད་ཡོན་གྱི་སྣོད་སུམ་ཅུ་རྩ་གཉིས་དང་། སྤོས་ཆུས་བཀང་

བ་བརྒྱད་དང་། སྤོས་ཆུ་དཀར་པོས་བཀང་བ་བརྒྱད་གཞག་པར་བྱའོ། །རོ་དང་དྲི་སྣ་ཚོགས་ཀྱིས་བཀང་བ་བརྒྱད་དང་། ཞོ་དང་། འོ་མ་དང་། སྤོས་ཆུས་བཀང་བ་བརྒྱད་དང་། གཏོར་མ་ལ་སོགས་པ་དབུལ་བ་སྣ་བརྒྱད་དང་། དབུལ་བ་སྣ་དྲུག་ཅུ་རྩ་བཞི་བ་རྣམས་ཤ་དང་། ཁྲག་

དང་། ཀུན་དོང་དང་། ཀེའུ་དང་། ཁ་ཟས་ངན་པ་དང་། བཏུང་བ་ངན་པ་སྤངས་ཏེ། གཙང་མས་གཙང་མ་སྦྱར་བར་བྱའོ། །མེ་ཏོག་སྣ་ཚོགས་ཀྱི་གཅལ་དགྲམ་པར་བྱ་ཞིང་། གདུགས་དང་། རྒྱལ་མཚན་དང་། ལྡ་ལྡི་དང་། བ་དན་གྱིས་བརྒྱན་པར་བྱ། པོག་ཕོར་སུམ་ཅུ་རྩ་གཉིས་

གཞག་པར་བྱ་ཞིང་། བདུག་སྤོས་སྣ་ཚོགས་མང་པོས་བདུག་པར་བྱ། སྤོས་སྣ་བརྒྱ་རྩ་བརྒྱད་དང་ལྡན་པའི་ཏིལ་མར་གྱི་མར་མེ་བལྟམ་པར་བྱ། དཀྱིལ་འཁོར་གྱི་ཁོར་ཡུག་ཏུ་པདྨའི་ཕྲེང་བ་བྲི་བར་བྱའོ། །རིག་སྔགས་འཆང་གཙང་མས་གོས་གཙང་མ་བགོ་བར་བྱ་ཞིང་། དུས་

གསུམ་དུ་ཁྲུས་བྱས་ལ་གོས་གསུམ་བགོ་བར་བྱ། གྲོགས་གཙང་མ་བསྒྲུབ་པར་བྱའོ། །འཇུག་པའི་ཆོ་ག་བྱས་པ་ནས་དོན་ཡོད་པའི་ཞགས་པའི་སྙིང་པོས་དབང་བསྐུར་བའི་བར་ཙམ་གྱིས་སངས་རྒྱས་ཐམས་ཅད་ཀྱིས་ཡོངས་སུ་གཟུང་ཞིང་། འཇིག་རྟེན་མགོན་པོས་བྱིན་གྱིས་བརླབས་པ་

เล่ม ๙๒ · หน้า 88b

དང་། པདྨའི་རིགས་པདྨ་འཆང་བའི་དཀྱིལ་འཁོར་ཆེན་པོ་དོན་ཡོད་པའི་ཞགས་པའི་སྙིང་པོའི་དངོས་གྲུབ་ལ་མངོན་དུ་ཕྱོགས་པར་འགྱུར་རོ། །གང་བསམས་པ་ཐམས་ཅད་དེ་ཁོ་ན་བཞིན་བྱེད་པར་འགྱུར་རོ། །དམ་ཚིག་ཐམས་ཅད་ལ་དོན་ཡོད་པར་འཇུག་གོ། །ཆོས་ཉིད་ཐམས་ཅད་ཀྱིས་

རྣམ་པར་གྲོལ་བའི་དཀྱིལ་འཁོར་གྱི་ཆོས་ལ་དམ་ཚིག་གྲུབ་པར་འགྱུར་རོ། །ལས་ཀྱི་སྒྲིབ་པ་ཐམས་ཅད་ལས་རྣམ་པར་གྲོལ་བ་དང་། བདེ་བ་ཐམས་ཅད་ཀྱི་རྗེས་སུ་འགྲོ་ཞིང་ལྷ་དང་མིའི་དཔལ་ཐམས་ཅད་མྱོང་བར་འགྱུར་རོ། །ལྷ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོའི་ཚོགས་

ཀྱི་བགོ་སྐལ་ལ་དབང་བར་འགྱུར་རོ། །རྣལ་འབྱོར་གྱི་དཀྱིལ་འཁོར་དང་གསང་སྔགས་ལ་བརྟེན་པར་འགྱུར་རོ། །བརྡེག་པ་དང་། སྤྱོ་བ་དང་ཕུར་བུས་གདབ་པ་དང་། བསྲེག་པ་དང་བསྡིགས་པ་དང་གཡེང་བ་དང་། གསད་པ་དང་། དབང་དུ་བྱ་བས་མི་ཚུགས་སོ། །གང་དག་དེ་ལྟ་བུ་

བྱེད་པ་དེ་ཉིད་ཀྱི་ལུས་སམ། མགོ་ལ་བརྒྱ་ཕྲག་སྟོང་གྱུར་དུ་འབབ་པར་འགྱུར་ཞིང་། གཞན་གྱིས་ཕྱིར་བཟླས་ཤིང་དགྲོལ་བར་མི་ནུས་ཏེ། རིག་སྔགས་འཆང་དེས་དགྲོལ་བར་བྱའོ། །དེ་ནས་རིག་སྔགས་འཆང་དེས་རི་མོའི་གཟུགས་དེ་དཀྱིལ་འཁོར་ལ་མངོན་དུ་ཕྱོགས་པར་བཞག་ནས། དོན་

ཡོད་པའི་ཞགས་པའི་སྙིང་པོ་སྟོང་རྩ་བརྒྱད་བཟླས་ལ། དོན་ཡོད་པའི་ཞགས་པའི་ཕྱག་རྒྱ་ལན་བརྒྱ་རྩ་བརྒྱད་བཅིང་བར་བྱ་ཞིང་། ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་བཟླས་པར་བྱའོ། །དེའི་འོག་ཏུ་དཀྱིལ་འཁོར་གྱི་ལྷ་རྣམས་ལས་འོད་ཟེར་ཁ་དོག་སྣ་ཚོགས་འབྱུང་བར་འགྱུར་རོ། །བུམ་

པ་དེ་ཡང་འབར་ལ། རས་ཀྱི་སྐུ་གཟུགས་དེ་ཡང་ཁ་དོག་སྣ་བདུན་དུ་འབར་ཞིང་། ཤས་ཆེར་འགུལ་བར་འགྱུར་ཏེ། ཁྲོ་བོའི་རིག་སྔགས་འཆང་སྙིང་དགའ་བར་འགྱུར་ཞིང་། རས་ཀྱི་སྐུ་གཟུགས་ལས་ལེགས་སོ་ཞེས་བྱ་བའི་སྒྲ་འབྱུང་བར་འགྱུར་ཏེ། རིག་སྔགས་འཆང་ལེགས་

སོ་ལེགས་སོ། །ཁྱོད་ཀྱིས་འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པའི་སྙིང་པོ་གྲུབ་ཅིང་། ཁྱོད་ཀྱིས་ཞགས་པ་འདི་ཡང་གྲུབ། ཁྱོད་ཀྱིས་ཡིད་བཞིན་གྱི་ནོར་བུའི་ཞགས་པའི་མཆོག་འདི་ཡང་གྲུབ་ཀྱིས། ཁྱོད་ཀྱིས་ལས་ཐམས་ཅད་བྱོས་ཤིག །དེ་དཀྱིལ་

เล่ม ๙๒ · หน้า 89a

འཁོར་གྱི་ཆོ་ག་རྒྱས་པ་མཆོག་གྲུབ་ནས། བུམ་པ་སྤོས་ཆུས་བཀང་བདེ་བླངས་ལ་ལན་བརྒྱ་རྩ་བརྒྱད་བཟླས་ཏེ། རྒྱུ་སྐར་རྒྱལ་ལ་ཁྲུས་བྱ་བའམ་ཟླ་བ་ཡར་གྱི་ངོའི་ཚེས་གྲངས་ཤིས་པ་ལ་ཁྲུས་བྱས་པ་ཙམ་གྱི་མོད་ལ། ལུས་ཐམས་ཅད་དྲི་མ་མེད་ཅིང་ཡོངས་སུ་དག་པ་

འཐོབ་པར་འགྱུར་ཞིང་། དངོས་པོ་ལྔའི་བདག་ཉིད་ཡོངས་སུ་དག་པར་འགྱུར་ཏེ། རྣ་བ་ལྔ་ཡོངས་སུ་དག་པ་དང་། མིག་ལྔ་ཡོངས་སུ་དག་པ་དང་། སྣ་ལྔ་ཡོངས་སུ་དག་པ་དང་། ལྕེ་ལྔ་ཡོངས་སུ་དག་པ་དང་། རྣམ་པར་ཤེས་པ་ལྔ་ཡོངས་སུ་དག་པ་དང་། དབང་པོ་ལྔ་ཡོངས་སུ་

དག་པ་ཐོབ་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་རྟག་ཏུ་མཆོག་སྦྱིན་པར་འགྱུར་ཞིང་། རྟག་ཏུ་སྐུ་སྟོན་བཞེད་པར་ཡང་འགྱུར་རོ། །དེ་བཞིན་གཤེགས་པ་ཐམས་ཅད་ཞལ་སྟོན་པར་འགྱུར་རོ། །རྟག་ཏུ་བྱང་ཆུབ་སེམས་དཔའ་ཐམས་ཅད་དགོངས་པར་འགྱུར་རོ། །ལྷ་

ཐམས་ཅད་ཀྱང་དེ་ལ་སྲུང་བ་དང་སྐྱོབ་པ་དང་སྦ་བ་བྱེད་པར་འགྱུར་རོ། །བརྒྱ་བྱིན་དང་ཚངས་པ་ལ་སོགས་པ་དག་ཀྱང་འོང་བར་འགྱུར་རོ། །རྒྱལ་པོ་ཆེན་པོ་བཞི་དཔུང་གི་འཁོར་དང་བཅས་ཏེ་སའི་ཕྱོགས་དེར་འོང་བར་འགྱུར་ཞིང་། རྟག་ཏུ་རྒྱུན་མི་འཆད་པར་སྲུང་བ་དང་སྐྱོབ་པ་དང་སྦ་བ་བྱེད་པར་

འགྱུར་རོ། །སྲེད་མེད་ཀྱི་བུ་དང་། དབང་ཕྱུག་ཆེན་པོ་དང་། ནོར་བུ་བཟང་པོ་དང་། གསང་བ་པ་བརྒྱ་སྟོང་ཕྲག་དུ་མ་སྲུང་བ་དང་སྐྱོབ་པ་དང་སྦ་བ་བྱེད་པར་འགྱུར་ཞིང་། ཞི་བ་དང་བདེ་ལེགས་སུ་བྱེད་པར་འགྱུར་རོ། །ཤེས་པ་དོན་ཡོད་པ་དང་། ཤེས་རབ་དོན་ཡོད་པ་དང་། ཐོས་པ

དང་། ཚུལ་ཁྲིམས་དང་། བརྩོན་འགྲུས་འཐོབ་པར་འགྱུར་ཞིང་། སྦྱིན་པ་དོན་ཡོད་པའི་སྦྱིན་པར་འགྱུར་རོ། །བསོད་ནམས་ཀྱི་ཕུང་པོ་དོན་ཡོད་པ་དང་ལྡན་པར་འགྱུར་ཞིང་འདི་ལྟ་སྟེ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །རྫུ་འཕྲུལ་དཔག་ཏུ་མེད་པ་ལ་མཁས་

པར་ཡང་འགྱུར་རོ། །རིག་སྔགས་འཆང་གི་ཆོ་ག་ཞིབ་མོ་ཡང་འགྲུབ་པར་འགྱུར་རོ། །སྟོབས་དང་བརྩོན་འགྲུས་དང་ཕ་རོལ་གནོན་པ་དོན་ཡོད་པར་འགྱུར་རོ། སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཐོབ་པར་འགྱུར་རོ། །དེ་བཞིན་གཤེགས་པ་གང་གཱའི་

เล่ม ๙๒ · หน้า 89b

ཀླུང་གི་བྱེ་མ་སྙེད་ས་ཡ་བརྒྱ་ཕྲག་བརྒྱད་སྟོང་དྲུག་ཅུ་རྩ་བཞིའི་དགེ་བའི་རྩ་བ་ཡོངས་སུ་རྫོགས་པར་ཡང་དག་པར་གཟུང་བར་འགྱུར་རོ། །སེམས་ཅན་ཐམས་ཅད་ཀྱིས་ཀྱང་མཆོད་པ་དང་བཀུར་སྟི་བྱ་བར་འགྱུར་ཞིང་ཐམས་ཅད་དབང་དུ་འགྱུར་རོ། །མཆོད་རྟེན་གྱི་སྙིང་པོ་དང་འདྲ་བར་ཕྱག་

བྱ་བའི་འོས་སུ་འགྱུར་རོ། །དཀྱིལ་འཁོར་གྱི་ཆོ་ག་ཞིབ་མོའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་དགུ་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་སྟན་ལས་ལངས་ནས། བླ་

གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ངས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་བཏུད་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས། བཅོམ་

ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་པདྨའི་རིགས་ལ་རྣམ་པར་གྲོལ་བའི་དཀྱིལ་འཁོར་གྱི་ཆོ་ག་རིག་སྔགས་ཆེན་པོའི་རིམ་པར་ཕྱེ་བ་ཆོ་ག་ཞིབ་མོ་དོན་ཡོད་པའི་ཞགས་པའི་སྙིང་པོ། རིག་སྔགས་ཀྱི་རྒྱལ་པོ་ཆེན་པོ་མཆིས་ཏེ། བཅོམ་ལྡན་འདས་

ཀྱི་སྤྱན་སྔར་དེ་བདག་གིས་ཡོངས་སུ་བསྒྲག་པར་བགྱིའོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་བཞིན་འཛུམ་པས། བཅོམ་ལྡན་འདས་ལ་ལྟ་བཞིན་དུ་དོན་ཡོད་པའི་ཞགས་པའི་སྙིང་པོ་འདི་སྨྲས་སོ། །ན་མ་སྟྲཻ་ཡད་དྷྭཱ་ནུ་ག་ཏ་པྲ་ཏིཥྛི་ཏི་བྷྱཿ སརྦ་

བུད་དྷ་བོ་དྷི་ས་ཏྭེ་བྷྱཿ ན་མཿཔྲ་ཏྱེ་ཀ་བུདྡྷཱརྱ་ཤྲཱ་བ་ཀ་སཾ་གྷེ་བྷྱཿ ཨ་ཏཱི་ཏཱ་ནུ་ག་ཏཱ་པྲ་ཏྱུད་པནྣེ་བྷྱཿ ནམཿསམྱཀ་ག་ཏཱ་ནཱཾ། ན་མཿས་མྱ་ཀ་པྲ་ཏི་པནྣཱ་ནཱཾ། ན་མཿཤཱ་ར་དྭ་ཏི་སཱུ་ཏཱ་ཡ། མ་ཧཱ་མ་ཏ་ཡེ། ན་མཿཨཱརྱ་མཻཏྲེ་ཡ་པྲ་མུ་ཁེ་བྷྱོ། མ་ཧཱ་བོ་དྷི་སཏྭ། ཨཱརྱ་ག་ཎ་བ་རེ་བྷྱཿན་མ་ཨཱརྱ་ཨ་མི་ཏཱ་བྷཱ་

ཡ། ཏ་ཐཱ་ག་ཏཱ་ཡ། ཨརྷ་ཏེ་ས་མྱ་ཀ་སམ་བུད་དྷཱ་ཡ། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བྷོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏེ་བྷྱོ་མ་ཧཱ་རྀ་ཥི་ཨཱརྱ་ག་ཎ་བ་རེ་བྷྱོ་ན་མ་སྐྲྀ་ཏྭཱ་ཨི་དཾ་ཨཱརྱཱ་བ་ལོ་ཀི་ཏེ་ཤྭ་ར་མུ་ཁོང་གཱིརྞྞཾ་ཨ་མོ་གྷ་རཱ་ཛ་ན་ནཱ་མ་ཧྲྀ་ད་ཡན། ཏ་ཐཱ་ག་ཏཱ་སཾ་མུ་ཁཾ་བྷཱ་ཤི་ཏཾ་མ་ཧཱ་

เล่ม ๙๒ · หน้า 90a

ཏཾ་པར་ཥཾ་མ་དྷྱེ་ཨ་ཧ་མི་དཱ་ནཱི་མཱ་བརྟྟ་ཡིཥྱཱ་མི། སི་དྷྱཾ་ཏུ་མེ་མནྟྲ་པ་དཱཿསརྦ་ཀཱ་རྱཱ་ཎི། སརྦ་བྷ་ཡེ་བྷྱོ་མ་མ་སརྦ་སཏྭཱ་ནཱཉྩ་རཀྵ་བྷ་བ་ཏུ། ཏདྱ་ཐཱ། ཨོཾ་ཙ་ར་ཙ་ར། ཙི་རི་ཙི་རི། ཙུ་རུ་ཙུ་རུ། མ་ཧཱ་ཀཱ་རུ་ཎི་ཀ །བི་རི་བི་རི། པི་རི་པི་རི། ཙི་རི་ཙི་རི། པ་ར་མ་མ་ཧཱ་ཀཱ་རུ་ཎི་ཀ །སི་རི་

སི་རི། པི་རི་པི་རི། ཙི་རི་ཙི་རི། མ་ཧཱ་པདྨ་ཧ་སྟེ། ཀ་ལ་ཀ་ལ། ལི་ཀི་ལི་ཀི། ཀུ་ལུ་ཀུ་ལུ། མ་ཧཱ་ཤུད་དྷ་ས་ཏྭ། ཨེ་ཧྱེ་ཧི། བུ་དྷེ་བུ་དྷེ། དྷཱ་བ་དྷཱ་བ། ཀ་ཎ་ཀ་ཎ། ཀི་ཎི་ཀི་ཎི། ཀུ་ཎུ་ཀུ་ཎུ། པ་ར་མ་ཤུད་དྷ་སཏྭ། ཀ་ར་ཀ་ར། ཀི་རི་ཀི་རི། ཀུ་རུ་ཀུ་རུ། མ་ཧཱ་སྠཱ་མ་པྲཱ་བྷ། ཙ་ལ་ཙ་ལ།

སཉྩ་ལ་སཉྩ་ལ། བི་ཙ་ལ་བི་ཙ་ལ། ཨེ་ཊ་ཊ་ཨེ་ཊ་ཊ། བྷ་ར་བྷ་ར། བྷི་རི་བྷི་རི། བྷུ་རུ་བྷུ་རུ། ཨེ་ཧྱེ་ཧི། མ་ཧཱ་ཀཱ་རུ་ཎི་ཀ །མ་ཧཱ་པ་ཤུ་པ་ཏི། བེ་ཥ་དྷ་ར། དྷ་ར་དྷ་ར། ས་ར་ས་ར། ཙ་ར་ཙ་ར། ཧ་ར་ཧ་ར། ཧ་ཧཱ་ཧ་ཧཱ། ཧི་ཧཱི་ཧི་ཧཱི། ཧུ་ཧཱུ་ཧུ་ཧཱུ། ཨོཾ་ཀཱ་ར་མ་ཧཱ་བྲཧྨ། བེ་ཥ་དྷ་ར། དྷ་ར་དྷ་ར།

དྷི་རི་དྷི་རི། དྷུ་རུ་དྷུ་རུ། ཏ་ར་ཏ་ར། ས་ར་ས་ར། པ་ར་པ་ར། ཙ་ར་ཙ་ར། བ་ར་བ་ར། བ་ར་ད། རཤྨི་ཤ་ཏ་ས་ཧ་སྲེ་པྲ་ཏི་མཎྜི་ཏ་ཤ་རཱི་ར། ཛྭ་ལ་ཛྭ་ལ། ཏ་པ་ཏ་པ་བྷ་ག་བཱ་ན། སཽ་མ་ཨཱ་དི་ཏྱ། ཡ་མ། པ་རུ་ཎ། ཀུ་བེ་རེ། བྲཧྨེན་དྲ། རྀ་ཥི་ག་ཎ། ཨ་བྷྱ་རྩི་ཏ་ཙ་ར་ཎ། སུ་རུ་སུ་རུ། ཙུ་རུ་ཙུ་རུ། པུ་

རུ་པུ་རུ། མུ་རུ་མུ་རུ། ས་ནད་ཀུ་མཱ་ར། འུ་དྲ། བཱ་ས་བ། བིཥྞུ་དྷ་ན་ད། དེ་བ་རྀ་ཥི་ནཱ་ཡ་ཀ་བ་ཧུ་བི་བིདྷ་བེ་ཥ་དྷ་ར། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཏ་ར་ཏ་ར། ཐ་ར་ཐ་ར། གྷ་ར་གྷ་ར། ཡ་ར་ཡ་ར། ལ་ར་ལ་ར། ཧ་ར་ཧ་ར། མ་ར་མ་ར། པ་ར་པ་ར། བ་ར་བ་ར། བ་ར་དཱ་ཡ། ཀ་ས་མན་ཏ།

ཨ་བ་ལོ་ཀི་ཏ། ལོ་ཀེ་ཤྭ་ར་མ་ཧེ་ཤྭ་ར། མུ་ཧུ་མུ་ཧུ། མུ་རུ་མུ་རུ། མུ་ཡ་མུ་ཡ། མུཉྩ་མུཉྩ། བྷ་ག་བཱ་ན། ཨཱརྱཱ་བ་ལོ་ཀི་ཏེ་ཤྭ་ར། རཀྵ་རཀྵ། མཱཾ་སརྦྦ་སཏྭཱཾཤྩ་སརྦྦ་བ་ཡེ་བྷྱཿ སརྦྦོ་བ་སརྒེ་བྷྱཿ སརྦྦ་གྲ་ཧེ་བྷྱཿ སརྦྦ་བྱཱ་དྷི་བྷྱཿ སརྦྦ་ཛྭ་རེ་བྷྱཿ ཨེ་ཝཾ། བདྷ། བཾ་དྷ་ན། ཏཱ་ཌ་ན། ཏ་རྫ་ན།

རཱ་ཛ་ཙཽ་ར་ཏ་སྐ་ར། ཨག་ནི། ཨུད་ཀ །བི་ཥ། ཤུསྟྲ། པ་རི་མོ་ཙ་ཀ །ཀ་ཎ་ཀ་ཎ། ཀི་ཎི་ཀི་ཎི། ཀུ་ཎུ་ཀུ་ཎུ། ཙ་ར་ཙ་ར། ཨིན་དྲི་ཡ། བ་ལ་བོ་དྷྱཾ་ག །ཙ་ཏུ་རཱ་རྱ་སཏྱ་སམ་པྲ་ཀཱ་ཤ་ཀ །ཏ་མ་ཏ་མ། ད་མ་ད་མ། ས་མ་ས་མ། མ་ས་མ་ས། མ་ཧཱ་ཏ་མོ྅ནྡྱ་ཀ་ར། བི་དྷ་མན། བི་དྷ་

เล่ม ๙๒ · หน้า 90b

མན། ཥ་ཊ་པཱར་མི་ཏཱ། པ་རི་པཱུ་ར་ཀ །མི་ལི་མི་ལི། ཊ་ཊ་ཊ་ཊ། ཋ་ཋ་ཋ་ཋ། ཊི་ཊི་ཊི་ཊི། ཊུ་ཊུ་ཊུ་ཊུ། ཨེ་ནེ་ཡ་ཙརྨྨ་ཀྲི་ཏ་པ་རི་ཀ་ར། ཨེ་ཧྱེ་ཧི་ཨཱི་ཤྭ་ར། མ་ཧེ་ཤྭ་ར་མ་ཧཱ་བྷཱུ་ཏ་ག་ན་བཱཉྫ་ཀ །ཀུ་རུ་ཀུ་རུ། པ་ར་པ་ར། ཀ་ཊ་ཀ་ཊ། མ་ཊ་མ་ཊ། བི་ཤུད་དྷ། བི་ཥ་ཡ། ནི་བཱ་སིན། མ་ཧཱ་

ཀཱ་རུ་ཎི་ཀ །ཤྭེ་ཏ་ཡཛྙོ་པ་བཱི་ཏ་རཏྣ་མུ་ཀུ་ཊ། མཱ་ལཱ་དྷ་ར། སརྦྦ་ཛྙཱ་ཤི་ར་སི་ཀྲྀ་ཏ་མ་ཀུ་ཊ། མ་ཧཱད་བྷཱུ་ཏ་ཀ་མ་ལཱ་ལཾ་ཀྲྀ་ཏ། ཀ་ར་ཏ་ལ། དྷྱ་ན་ས་མཱ་དྷི་བི་མོཀྵ་ཨ་པྲ་ཀམ་པྱ། བ་ཧུ་ས་ཏྭ་ས་ན་ཏ་ཏི་པ་རི་པཱ་ཙ་ཀ །མ་ཧཱ་ཀཱ་རུ་ཎི་ཀ །སརྦྦ་ཀརྨྨ་ཨཱ་བ་ར་ཎི། བི་ཤོ་དྷ་ཀ །སརྦ་བྱཱ་དྷི་ཕྲ་མོ་ཙ་ཀ །སརྦ་

ཨཱ་ཤཱ་པ་རི་པཱུ་ར་ཀ །སརྦྦ་སཏྭཱ་ས་མཱ་ཤྭཱ་ས་ཀན་མོ་སྟུ་ཏེ་སྭཱ་ཧཱ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་དོན་ཡོད་པའི་ཞགས་པའི་སྙིང་པོ་འདི་བཤད་པ་ཙམ་གྱིས་འཁོར་མང་པོ་རི་དང་ནགས་ཚལ་དང་བཅས་པ་འདི་རྣམ་པ་དྲུག་ཏུ་

གཡོས་སོ། །འཇིག་རྟེན་དུ་སྣང་བ་ཆེན་པོ་བྱུང་བར་གྱུར་ཏོ། ལྷའི་མེ་ཏོག་ཨུཏྤལ་དང་། པདྨ་དང་། ཀུ་མུ་ད་དང་། པུ་ཎ་ཌ་རཱི་ཀ་དང་། མན་དཱ་ར་བའི་མེ་ཏོག་གི་ཆར་ཆེན་པོས་པུས་མོ་ནུབ་པ་ཙམ་བབ་པར་གྱུར་ཏོ། །སིལ་སྙན་དང་ཕེག་རྡོབ་པའི་སྒྲ་དག་ཀྱང་བྱུང་བར་གྱུར་ཏོ། །མཐོ་རིས་

ཀྱི་ལྷ་དག་གིས་ཀྱང་ནམ་མཁའ་ལས། བཅོམ་ལྡན་འདས་ལ་རྒྱན་དང་ལྷབ་ལྷུབ་དག་གི་ཆར་ཕབ་བོ། །འཁོར་གྱི་དཀྱིལ་འཁོར་ན་གནས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་།

གཙང་མ་དེ་དག་ཐམས་ཅད་ཀྱིས་ལེགས་སོ་ཞེས་བྱ་བ་བྱིན་ཏེ། སེམས་ཅན་དག་པ་ཆེན་པོ་ལེགས་སོ་ལེགས་སོ། །ཡིད་བཞིན་གྱི་ནོར་བུ་ཆེན་པོ་དོན་ཡོད་པའི་ཞགས་པའི་སྙིང་པོ་མཆོག་ཏུ་རྙེད་པར་དཀའ་བ་འདི་བཤད་ཅིང་དངོས་གྲུབ་མཆོག་གི་ཆོ་ག་ཞིབ་མོའི་རྒྱལ་པོ་འདི་བཤད་པས་རིན་

པོ་ཆེའི་ཆར་ཆེན་པོ་འབབ་པོ་ཞེས་ཟེར་རོ། །དེ་ནས་དེའི་ཕྱིར་དུས་གསུམ་དུ་བཟླས་བརྗོད་བྱ་ཞིང་གཙང་མས་གོས་གཙང་མ་བགོས་ཏེ། དུས་གསུམ་དུ་ཁྲུས་བྱ་ཞིང་ཟས་དཀར་གསུམ་ཟ་བས་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར། དཔལ་ལྷ་མོ་བཞག་སྟེ་མཆོད་པ་

เล่ม ๙๒ · หน้า 91a

བྱས་ལ། ཡུངས་ཀར་འབྲུ་རེ་རེ་ལ་ལན་བརྒྱ་རྩ་བརྒྱད་བཟླས་ནས། དཔལ་ལྷ་མོ་ལ་བསྣུན་པ་བྱས་ན་ཚེས་བཅུ་བཞི་ནས་བཅྭ་ལྔའི་བར་དུ་དཔལ་ལྷ་མོ་འོང་བར་འགྱུར་རོ། །མཚམས་མེད་པ་ལྔ་འབྱང་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་སྐུ་སྟོན་པར་

འགྱུར་རོ། །སྡིག་པ་ཐམས་ཅད་བྱང་བར་འགྱུར་རོ། །མཚམས་བཅད་པ་དང་ཞི་བར་བྱ་བ་ལ། ཨ་ག་རུ་དང་ཙནྡན་གྱི་བདུག་སྤོས་བསྲེགས་ལ། ཐལ་བ་དང་། ཡུངས་ཀར་དང་སེང་ལྡེང་གི་ཕུར་བུ་གདབ་པར་བྱའོ། །རིམས་ཐམས་ཅད་ལ་བུ་མོ་གཙང་མས་བཀལ་བའི་སྲད་བུ་ལ། མདུད་

པ་ཉི་ཤུ་རྩ་གཅིག་བོར་ལ་ལན་ཉི་ཤུ་རྩ་གཅིག་བཟླས་ཏེ་བཏགས་ན། རིམས་ཐམས་ཅད་ལས་ཐར་བར་འགྱུར་རོ། །ནད་ཐམས་ཅད་ལ་མར་དང་ཏིལ་མར་ལ་བཟླས་ཏེ། ཟངས་ཀྱི་སྣོད་དུ་སངས་རྒྱས་ལ་ཕུལ་བའི་སྣ་མའི་མེ་ཏོག་རྙིང་པ་དང་པདྨ་ཟེ་བ་དང་བཅས་པ་བཏབ་སྟེ་བཙོས་པ་འདི་ནི་གྲུབ་པ་

ཡིན་ཏེ། ཟས་དང་སྐོམ་དང་། བསྐུ་བ་དང་སྣ་ནས་བཏང་བའི་ལས་བྱ་སྟེ། ཉི་ཤུ་རྩ་གཅིག་བཟླས་པས་ནད་ཐམས་ཅད་ལས་ཐར་བར་འགྱུར་རོ། ཁྱད་གཅད་ན་མར་དང་སྦྲང་རྩི་ལ་ལན་ཉི་ཤུ་རྩ་གཅིག་བཟླས་ཏེ་ལུས་ལ་བསྐུ་ཞིན་ཚིགས་མས་དྲིལ་ལ། ལུས་ཀྱི་དྲི་མ་ཕྱིན་པར་བྱས་ཏེ། གོང་

བུ་ལས་གཟུགས་བརྙན་བྱས་ལ་ལན་བདུན་བཟླས་ཏེ། མཚོན་གྱིས་བཏབ་ན་དུག་སྦྱར་མ་དང་བྱད་དང་གསང་སྔགས་ཐམས་ཅད་བཅད་པར་འགྱུར་ཞིང་། ནད་ཐམས་ཅད་ལས་ཐར་བར་འགྱུར་རོ། །བྱད་ཆེན་པོ་འཇིག་པར་འགྱུར་རོ། །བསྲུང་བའི་སྐུད་པ་ལ་ལན་ཉི་ཤུ་རྩ་གཅིག་བཟླས་ཏེ། དེ་

བཞིན་དུ་མདུད་པ་བོར་བ་བྱས་ན་སྲུང་བ་ཆེན་པོ་བྱས་པར་འགྱུར་རོ། །འཇིགས་པ་དང་སྐྲག་པ་དང་། དངང་བ་ཐམས་ཅད་དང་འབྱུང་པོའི་འཇིགས་པ་ཐམས་ཅད་ཀྱིས་མི་ཚུགས་སོ། །ལྟོ་ན་བ་ལ་ཚྭ་ཆུ་འཇམ་ཙམ་ལ་ལན་བདུན་བཟླས་ཏེ་བྱིན་ན་ལྟོ་བའི་ནད་འཇིག་པར་འགྱུར་རོ། །དུག་

གསད་ན་ཆུ་ལ་ལན་བདུན་བཟླས་ཏེ་བྱིན་ན་དུག་ཐམས་ཅད་འཇིག་པར་འགྱུར་ཞིང་མི་གདུག་པར་འགྱུར་རོ། །མིག་ན་བ་ལ་སྲད་བུ་དཀར་པོ་རྣ་བ་ལ་བཏགས་ན། །མིག་ནད་ཐམས་ཅད་འཇིག་པར་འགྱུར་རོ། །སྡང་བའི་དུག་མི་བཟད་པ་ལ་འཇིམ་པ་ལ་བཟླས་ཏེ་བྱུགས་ན་དུག་མེད་པར་

เล่ม ๙๒ · หน้า 91b

འགྱུར་རོ། །སོ་ན་བ་ལ་ཀ་ར་བཱི་རའི་སོ་ཤིང་ངམ་སྣ་མའི་སོ་ཤིང་ངམ་ཤིང་བ་ཀུའི་སོ་ཤིང་ལ་བཟླས་ཏེ་ཐོས་ན་སོ་ནད་ཞི་བར་འགྱུར་རོ། །མཚམས་གཅད་པ་ཐམས་ཅད་ལ་ནི་ཚོན་སྣ་ལྔའི་སྲད་བུ་བྱས་ལ་ལན་ཉི་ཤུ་རྩ་གཅིག་བཟླས་ཏེ། སེང་ལྡེང་གི་ཕུར་པ་བཞི་ལ་བཏགས་ཏེ། ཕྱོགས་

བཞིར་བཙུགས་ན། མཚམས་མེད་པོ་བཅད་པར་འགྱུར་རོ། །གདོན་ཐམས་ཅད་ལ་ཚོན་སྣ་ལྔའི་སྲང་བུ་ལ། ལན་ཉི་ཤུ་རྩ་གཅིག་བཟླས་ན། གདོན་ཐམས་ཅད་དེ་ལས་ཐར་བར་འགྱུར་རོ། །སྲོག་ཆགས་ཀཱི་ཊ་དང་། ལྷོག་པ་དང་། མགུལ་བ་འགགས་པ་ལ་སྦྲང་རྩི་

དང་། པི་པི་ལིང་ལྡན་པར་བྱས་ཏེ་བྱུག་གོ། །མགུལ་འགགས་པ་ལ་གདགས་པ་བྱས་ན་མགུལ་འགགས་པ་ཐམས་ཅད་ལས་ཐར་བར་འགྱུར་རོ། །མིག་ནད་ལ་སྤོས་ཆུ་དང་ཤིང་པ་ལ་ཤའི་ཆུ་དང་པ་ལ་ཤའི་མེ་ཏོག་གིས་བཀྲུ་བར་བྱ་བའམ་ཤིང་མངར་གྱི་ཆུ་ལ་ལན་བདུན་བཟླས་ཏེ།

བཀྲུས་ན་མིག་ནད་ཐམས་ཅད་ལས་ཐར་བར་འགྱུར་རོ། །རྣ་བ་ན་བ་ལ་ཏིལ་མར་དང་ཤུ་ཏི་ཟངས་ཀྱི་སྣོད་དུ་བཙོས་པས་རྣ་བ་བཀང་ན་རྣ་ནད་ལས་ཐར་བར་འགྱུར་རོ། །འཐབ་པ་དང་རྩོད་པ་དང་ཁྲག་ཁྲུག་དང་། མི་སྙན་པ་ཐམས་ཅད་ལ་ཆུ་ལ་ལན་བདུན་བཟླས་ཏེ། གདོང་བཀྲུ་བ་བྱས་ན་ཐམས་

ཅད་ལས་རྒྱལ་བར་འགྱུར་རོ། །དཔུང་དང་སྟོབས་དང་ཡུལ་དང་ཡུལ་འཁོར་དང་། ཕྱིར་རྒོལ་བ་དང་མི་མཛའ་བ་ཐམས་ཅད་དང་། གཡུལ་ངོ་ཐམས་ཅད་དུ་བ་ལང་གི་ལྕི་བས་དཀྱིལ་འཁོར་བྱས་ལ་བུམ་པ་གང་བ་བཞི་བཞག་སྟེ། གཙང་མས་གོས་གཙང་མ་བགོས་ལ། ཨ་ག་རུའི་

བདུག་པ་དབུལ་བར་བྱ་ཞིང་། འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱས་ནས། དོན་ཡོད་པའི་ཞགས་པའི་སྙིང་པོའི་མདོ་འདི་མཆོད་དེ། བཀླགས་པ་བྱས་ན་ཞི་བ་ཆེན་པོར་འགྱུར་ཏེ། ཐམས་ཅད་བྱམས་པའི་སེམས་དང་བྱམས་པའི་ཡིད་དུ་འགྱུར་ཞིང་། ཐམས་

ཅད་དུ་རྒྱལ་བ་ཐོབ་པར་འགྱུར་རོ། །ཞི་བ་ཆེན་པོར་འགྱུར་རོ། །ཆུ་དེས་བདག་ཉིད་ལ་ཀུན་ཏུ་གཏོར་ཏེ། ཙནྡན་ལ་ལན་ཉི་ཤུ་རྩ་གཅིག་བཟླས་ཏེ་སྙིང་གར་ཐིག་ལེ་བྱས་ཏེ། རྟག་ཏུ་དྲན་པར་བྱས་ན་མཚམས་མེད་པ་ཐམས་ཅད་ཟད་པར་འགྱུར་རོ། །ཁྱིམ་ཐམས་ཅད་བསྲུང་ན། པདྨ་དང་། ན་ཀུ་

เล่ม ๙๒ · หน้า 92a

ལེ་དང་ཤིང་ཨརྐའི་མེ་ཏོག་མར་དང་བསྲེས་པ་ལས་སྦྱིན་སྲེག་བྱས་ན། ཁྱིམ་བསྲུང་བ་ཆེན་པོ་བྱས་པར་འགྱུར་རོ། །འབྱུང་པོའི་གདོན་ཐམས་ཅད་ལས་བསྲུང་བ་བྱས་པར་འགྱུར་རོ། །ཡང་ལས་ཐམས་ཅད་ལ་ནོར་བུ་སྒྲུབ་པའི་རྫས་འདི་དག་བསོགས་ལ་ཆ་མཉམ་པར་

བྱས་ཏེ། གཙང་མས་གོས་གཙང་མ་བགོས་ལ། སྙིང་པོ་བརྒྱ་རྩ་བརྒྱད་བཟླས་པས་ལས་ཐམས་ཅད་བྱའོ། །ཛ་ཡ་དང་། བི་ཛ་ཡཱ་དང་། མཱ་གུ་ལི་དང་། གན་དྷ་ནཱ་དང་། བཱ་རུ་ཎཱི་དང་། ཏཱ་ན་ཏྲ་བ་རུ་ཎཱི་དང་། གན་དྷ་བྲི་ཡང་ཀུ་དང་། ཏ་ག་ར་དང་། ཙ་ཀྲ་དང་། མ་ཧཱ་ཙ་ཀྲ་དང་།

སོ་མ་རཱ་ཛཱི་དང་། སུ་མན་ད་རྣམས་ཕྱེ་མ་ཞིབ་མོར་བྱས་ཏེ། ཆར་པའི་ཆུས་སྦྲུས་ལ། ཙནྡན་དང་། གུར་གུམ་སྦྱར་བའི་ཆུས་བརླན་ཏེ་བརྒྱ་རྩ་བརྒྱད་བཟླས་ལ། འཕགས་པ་སྤྱན་རས་གཟིགས་ཀྱི་སྤྱན་སྔར་ནོར་བུར་བྱས་ཏེ། ཡང་ལན་ཉི་ཤུ་རྩ་གཅིག་བཟླས་ནས་ཨ་ག་རུའི་བདུག་

པས་བདུགས་ལ། དེ་ཉིད་བཅོམ་ལྡན་འདས་ཀྱི་ཞབས་དྲུང་དུ་བཞག་སྟེ། རས་ཀྱིས་གཡོགས་ལ་གྲིབ་མར་བསྐམས་ཏེ། བླངས་ལ་ཡང་དོན་ཡོད་པའི་ཞགས་པའི་སྙིང་པོ་ལན་བདུན་བཟླས་པར་བྱ་ཞིང་། ཁྲོ་བོའི་རྒྱལ་པོ་ལན་གསུམ་བཟླས་བརྗོད་བྱས་ཏེ། མགོ་བོར་བཟུང་

ན། རྒྱལ་པོ་བཙུན་མོ་འཁོར་དང་བཅས་པས་མཆོད་པར་འགྱུར་ཞིང་ཐམས་ཅད་དབང་དུ་འགྱུར་རོ། །རིགས་བཞིའི་འཇིག་རྟེན་ཐམས་ཅད་དབང་དུ་འགྱུར་རོ། །བླ་མ་གཅིག་པུར་འགྱུར་རོ། །ལྷ་ཐམས་ཅད་ཀྱང་གཟི་བྱིན་འཇུག་པར་འགྱུར་རོ། །འཕགས་པ་སྤྱན་རས་གཟིགས་

དབང་ཕྱུག་ཀྱང་རྟག་ཏུ་གཟིགས་པར་འགྱུར་རོ། །ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ཡང་རྟག་ཏུ་ཕྱི་བཞིན་འབྲང་བར་འགྱུར་ཞིང་། དུས་ཐམས་ཅད་དུ་མཆོག་སྦྱིན་པར་འགྱུར་རོ། །ཕྱིར་རྒོལ་བ་དང་མི་མཛའ་བ་ཐམས་ཅད་ཀྱང་རྟག་ཏུ་མཐུན་པར་བྱེད་ཅིང་དབང་

དུ་འགྱུར་རོ། །བྱད་མི་བཟད་པ་དང་། དུག་སྦྱར་མ་དང་། ཕྱེ་མའི་དུག་དང་། གསང་སྔགས་དང་། གཡེངས་བྱེད་ཀྱིས་མི་ཚུགས་ཤིང་། ཐམས་ཅད་འཇིགས་པར་འགྱུར་རོ། །རྟག་ཏུ་དཔལ་དང་། གཟི་བྱིན་དང་། བསོད་ནམས་དང་། བཀྲ་ཤིས་དང་། དགེ་བའི་

เล่ม ๙๒ · หน้า 92b

ཚོགས་དང་ལྡན་པར་འགྱུར། དེ་བཞིན་གཤེགས་པ་ཐམས་ཅད་དེ་ལ་གཟིགས་པར་འགྱུར་རོ། །རྟག་ཏུ་སྟོན་པ་བཞེད་པར་འགྱུར་རོ། །ཐམས་ཅད་དུ་དུས་ཐམས་ཅད་ན་རྒྱལ་བ་ཐོབ་པར་འགྱུར་རོ། །སྐལ་བ་བཟང་པོ་ཐོགས་པ་མེད་པ་ཡང་འཕེལ་བར་འགྱུར་རོ། །དཔུང་པ་ལ་

བཏགས་ན་གླང་པོ་ཆེ་ཆེན་པོའི་སྟོབས་དང་ལྡན་པར་འགྱུར་རོ། །འགྱེད་པ་དང་དམག་ཐམས་ཅད་ལས་རྒྱལ་བ་ཆེན་པོར་འགྱུར་རོ། །སྟོབས་དང་བརྩོན་འགྲུས་དང་ཕ་རོལ་གནོན་པ་ཆེན་པོར་འགྱུར་རོ། །རིག་སྔགས་འཆང་གི་ཆོ་ག་ཞིབ་མོ་ཆེན་པོ་འགྲུབ་པར་འགྱུར་རོ། །གནོད་སྦྱིན་དང་།

སྲིན་པོ་དང་། འབྱུང་པོ་དང་། ཤ་ཟའི་གདོན་དང་། བརྗེད་བྱེད་ཀྱིས་མི་ཚུགས་པར་འགྱུར་རོ། །ནམ་ཡང་དེ་ལ་རྨི་ལམ་ངན་པ་དང་། ལྟས་ངན་པ་འབྱུང་བར་མི་འགྱུར་རོ། །བྱིས་པ་རྣམས་ལ་མགུལ་དུ་བཏགས་ན་གདོན་ཐམས་ཅད་དང་། རིམས་ནད་ཐམས་ཅད་དང་། ནད་ཐམས་ཅད་

དང་། བཙས་པ་འཕྲོག་པ་ཐམས་ཅད་ཀྱིས་མི་ཚུགས་སོ། །ནག་པོ་ཆེན་པོ་མ་མོའི་ཚོགས་ཀྱི་འཁོར་དང་བཅས་པ་རྟག་ཏུ་རྒྱུན་མི་འཆད་པར་ཕྱི་བཞིན་འབྲང་ཞིང་བསྲུང་བ་དང་། བསྐྱབ་པ་དང་། སྦ་བ་བྱེད་པར་འགྱུར། ཡུན་རིང་དུ་འཚོ་བར་འགྱུར་ཚེ་རིང་བར་འགྱུར་རོ། །བུད་མེད་

རྣམས་ལ་སྐ་རགས་སར་པ་བཏགས་ཏེ་ཁྲུས་བྱས་ནས། གོས་སར་པ་གཙང་མ་བགོས་ཏེ། འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱས་ན། སྐལ་བ་བཟང་པོ་མཆོག་དང་ལྡན་པར་བྱེད་ཅིང་། བཀྲ་མི་ཤིས་པ་ཐམས་ཅད་རབ་ཏུ་ཞི་བར་བྱེད། ཁྱིམ་ཐབ་དང་རྟག་ཏུ་

རྗེས་སུ་མཐུན་པར་འགྱུར། ཁྱེའུ་དང་བུ་མོ་ཡོད་པར་འགྱུར། ཤེས་རབ་མཆོག་ཏུ་འགྱུར། ཐམས་ཅད་དགའ་བས་ལྟ་བར་འགྱུར། དེ་ལ་བུད་མེད་ཀྱི་སྐྱོན་ཡང་འབྱུང་བར་མི་འགྱུར་ཕྱི་མ་ལ་དེ་ལྟ་བུའི་བུད་མེད་ཀྱི་ལུས་མི་ཐོབ་པར་ཤེས་པར་བྱ་སྟེ། ཤི་ནས་བདེ་བ་ཅན་གྱི་འཇིག་རྟེན་

གྱི་ཁམས་སུ་སྐྱེ་བར་འགྱུར་རོ། །ནོར་བུ་འདི་བཏགས་ན་ཐམས་ཅད་དུ་བསྲུང་བ་བྱས་པར་འགྱུར་ཞིང་། དུག་དང་། མཚོན་དང་། མེས་མི་ཚུགས་སོ། །དུག་བྱས་པ་ཡང་སྐྱེ་བར་མི་འགྱུར་རོ། །ནོར་བུ་འདི་བཏགས་པས་དུག་མེད་པར་འགྱུར་ཞིང་མྱུར་དུ་ཞི་བར་འགྱུར་རོ། །ཚོར་བ་

เล่ม ๙๒ · หน้า 93a

སྐྱེ་བར་མི་འགྱུར་ཞིང་། བདེ་བར་ཞི་བར་འགྱུར་རོ། །རླུང་དང་སྤྲིན་དང་སེར་བ་གནོན་ན། ཆུ་ལ་ལན་བདུན་བཟླས་ཏེ། ནམ་མཁའ་ལ་གཏོར་ན་རླུང་དང་སྤྲིན་དང་སེར་བ་ཐམས་ཅད་མནན་པར་འགྱུར་རོ། །བཟློག་པར་བྱ་ན་བལ་པོ་སེའུའི་ལྕུག་མས་བཟློག་པར་

བྱའོ། །དྲན་པ་བསྐྱེད་ནས་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་མི་སྨྲ་བར་དོན་ཡོད་པའི་ཞགས་པའི་སྙིང་པོ་ལན་བདུན་བཟླས་ཏེ། ནོར་བུ་ཆུ་དྲོན་ལས་བཏང་བ་བྱས་ན་བཀླགས་པ་ཙམ་གྱིས་ཚིགས་སུ་བཅད་པ་སྟོང་འཛིན་པར་འགྱུར་ཞིང་། ཐོས་པ་མང་པོ་རྒྱ་མཚོ་བསགས་

པར་འགྱུར་རོ། །རྒྱལ་སྲིད་དང་། ཡུལ་འཁོར་དང་། བཙུན་མོ་འཁོར་དང་བཅས་པ་དབང་དུ་བྱ་བར་འདོད་ན་ལུས་བསྐུ་བ་བྱས་ན་གང་དུ་ཞུགས་པ་དེར་ཐམས་ཅད་དབང་དུ་འགྱུར་རོ། །པུས་མོ་གཉིས་ལ་བྱུགས་ན་ཆུ་ཀླུང་ཆེན་པོ་པུས་མོ་ནུབ་ཙམ་གྱིས་ཕ་རོལ་ཏུ་རྒལ་བར་འགྱུར་རོ། །རྒྱལ་

མཚན་གྱི་རྩེ་མོ་ལ་བཏགས་ཏེ། དམག་གམ། གཡུལ་ངོའམ་ཚོགས་པའི་ནང་ངམ། རི་ཁྲོད་དང་ཚང་ཚིང་དང་རི་སུལ་དང་དགོན་པར་ཕྱིན་པ་ན། བསྒྲེང་བ་བྱས་ན། བདེ་བ་དང་བདེ་ལེགས་སུ་རྒལ་བར་འགྱུར་ཞིང་ཆོམ་པོ་དང་། གཡོན་ཅན་དང་། རྐུན་པོ་དང་། གཅན་གཟན་

གཏུམ་པོའི་འཇིགས་པས་མི་ཚུགས་པར་འགྱུར་ཞིང་བལྟར་མེད་པར་འགྱུར་རོ། །བཙོན་ར་ཐམས་ཅད་དུ་སོང་བ་ན་བྱུགས་པ་བྱས་ན། ཤིང་སྒྲོག་དང་། ཁོང་སྒྲིལ་དང་། ལྕགས་སྒྲོག་གིས་བཅིངས་པ་ཐམས་ཅད་ཆག་གྲུགས་སུ་འགྱུར་རོ། །བདག་ཉིད་ལ་བསྐུས་ན་མཚོན་ཆ་མི་སྣང་

བར་འགྱུར་རོ། །མིག་གཉིས་ལ་བསྐུས་ན་གཉིད་ལོག་པའི་ཚེ་རྨི་ལམ་ཆེན་པོ་རྨི་བར་འགྱུར་ཞིང་ཅི་ལྟར་བསམས་ཤིང་སྨོན་པ་སྣང་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་སྐུ་སྟོན་པར་མཛད་ཅིང་ཐམས་ཅད་བཀའ་སྩོལ་བར་འགྱུར་རོ། །དེ་ལ་མིག་ནད་ཐམས་ཅད་

ཀྱིས་མི་ཚུགས་སོ། །ཁའི་ནང་དུ་བཞག་ན། གང་བླངས་པ་སྦྱིན་པར་བྱེད་ཅིང་དབང་དུ་འགྱུར་རོ། །གདོན་གྱིས་ཟིན་པ་ལ་དཔྲལ་བར་བྱུག་པ་བྱས་ན་བྱུགས་པ་ཙམ་གྱིས་འབབ་པར་འགྱུར་ཏེ། ཐམས་ཅད་སྨྲ་བར་འགྱུར་རོ། །ལག་མཐིལ་དུ་བསྐུས་ནས། གླང་པོ་ཆེ་ལ་རེག་ན་

เล่ม ๙๒ · หน้า 93b

དབང་དུ་འགྱུར་ཞིང་གར་བཏང་བ་དེར་འགྲོ་བར་འགྱུར་རོ། །དཔྲལ་བའི་དབུས་སུ་ཐིག་ལེ་བྱས་ན་འཇིག་རྟེན་ཐམས་ཅད་ཀྱིས་ཆེར་མཆོད་པར་འགྱུར་རོ། །མིད་པ་ལ་བྱུགས་ན་མགྲིན་སྔོན་བཞིན་དུ་བྲམ་ཟེ་ཐམས་ཅད་དབང་དུ་འགྱུར་ཞིང་བགྱི་བ་ཅི་མཆིས་ཞེས་བྲན་བཞིན་དུ་འགྱུར་རོ། །འོ་

མ་དང་སྦྱར་ཏེ་མིག་ལ་བསྐུས་ན་མཚན་མོ་ཡང་ཉིན་མོ་བཞིན་དུ་སྣང་བར་འགྱུར་རོ། །གནོད་སྦྱིན་དང་སྲིན་པོའི་གནས་ཐམས་ཅད་ཀྱི་སྒོ་ཕྱེ་བར་འགྱུར་ཞིང་། གཏེར་ཐམས་ཅད་འབྱུང་བར་འགྱུར་རོ། །ཐམས་ཅད་བྲན་བཞིན་བྱེད་པར་འགྱུར་ཀླུའི་གནས་ཀྱི་མཚོར་བོར་ན་ཀླུ་ཆེན་པོས་ཆར་

གྱི་རྒྱུན་གཏོང་བར་འགྱུར་རོ། །ཆར་ཧ་ཅང་ཆེ་བའི་ཚེ་ཆུ་དང་བསྲེས་ཏེ་ནམ་མཁའ་ལ་གཏོར་ན་ཞི་བར་འགྱུར་རོ། །སྤྲིན་ལ་བལྟས་ཏེ་སེར་བའི་རྒྱུན་ལ་གཏོར་ན་སེར་བ་འབབ་པར་མི་འགྱུར་རོ། །ལག་པ་ལ་བཏགས་ན་གང་ལ་རེག་པ་དེ་ཟད་མི་ཤེས་པར་འགྱུར་རོ། །རྐང་པའི་རྗེ་ངར་

ལ་བཏགས་ཏེ་མེའི་ནང་དུ་ཞུགས་ན་མེས་མི་ཚུགས་ཤིང་ཙནྡན་བཞིན་དུ་བསིལ་བར་འགྱུར་རོ། །རལ་གྲི་ལ་བྱུགས་ནས་གཡུལ་ངོར་སོང་ན་ལུས་ཐམས་ཅད་གཅིག་ཏུ་འབར་བར་གྱུར་ནས་ཕ་རོལ་གྱི་དཔུང་ཐམས་ཅད་འབྱེར་བར་འགྱུར་ཞིང་ཐམས་ཅད་དུ་རྒྱལ་བར་འགྱུར་རོ། །ནད་ཆེན་པོས་ཐེབས་

པའི་ནད་པ་ཚབས་པོ་ཆེ་ལ་ཕྱེ་མ་བྱིན་ན་ནད་ཚབས་ཆེན་པོ་ལས་ཐར་བར་འགྱུར་རོ། །ཕོ་བ་ན་བ་ལ་ཆུ་དྲོན་ལས་བཏང་ན་མོད་ལ་ཡོངས་སུ་ཐར་བར་འགྱུར་རོ། །རྩིབ་ལོགས་ན་བ་ལ་དར་བ་ལས་བཏང་ན་ཞི་བར་འགྱུར་རོ། །ནད་ཐམས་ཅད་ལ་ནི་ཞུན་མར་དང་ཏིལ་མར་ལས་སྦྱར་ཏེ་བསྐུམ་ཉེ་

དང་། བཟའ་བ་དང་། བཏུང་བའི་ནད་དང་། སྣར་བླུགས་པ་དང་། བྱུག་པ་བྱས་ན་ནད་ཐམས་ཅད་འཇིག་པར་འགྱུར་ཞིང་ནམ་ཡང་འབྱུང་བར་མི་འགྱུར་རོ། །ཕུག་གི་སྒོར་ཁོར་ཡུག་ཏུ་བྱུགས་ལ་སྙིང་པོ་ལན་བདུན་བཟླས་ཏེ། དོན་ཡོད་པའི་ཞགས་པའི་ཕྱག་རྒྱ་བྱས་ལ། ཁྲོ་བོའི་རྒྱལ་

པོའི་གསང་སྔགས་ལན་ཅིག་བཟླས་བརྗོད་བྱས་ནས་ཞུགས་ན། ཕུག་གི་སྒོ་ཆག་སྟེ་རང་གི་ཁྱིམ་དུ་འགྱུར་ཞིང་སྡང་བ་ཐམས་ཅད་བཟློག་པར་འགྱུར་རོ། །བགེགས་དང་ལོག་འདྲེན་ཐམས་ཅད་མི་སྣང་བར་འགྱུར་རོ། །ཁར་བཅུག་སྟེ་མི་སྨྲ་བར་སྙིང་པོའི་མདོ་བརྗོད་པར་བྱས་ན། ལན་བརྒྱ་

เล่ม ๙๒ · หน้า 94a

ཕྲག་སྟོང་བཟླས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བ་དང་ལྡན་པར་འགྱུར་རོ། །ཤིང་རྟའི་སྲོག་ཤིང་ལ་བྱུགས་ན་གཡུལ་ངོ་ཐམས་ཅད་དུ་རྒྱལ་བ་ཐོབ་པར་འགྱུར་རོ། །ཟོང་ལ་གཏོར་ན་རིན་ཆེན་པོས་ཉོ་བར་འགྱུར་རོ། །བུ་མོའི་གདོང་

བཀྲུས་ན་མགོ་ཡང་བར་འགྱུར་རོ། །སྙིང་གར་ཐིག་ལེ་བྱས་ན་ཐམས་ཅད་དུ་བལྟར་མེད་པར་འགྱུར་རོ། །ཐམས་ཅད་དུ་འདོད་པ་ཐམས་ཅད་སྦྱིན་པ་ལས་ཐམས་ཅད་བྱེད་པ་བདག་སྲུང་བ། གཞན་སྲུང་བའི་ནོར་བུ་གང་དང་གང་ལ་སྦུར་ཞིང་བཟླས་པས། ཐམས་ཅད་དུ་བལྟར་མེད་པར་འགྱུར་རོ། །

བགེགས་དང་ལོག་འདྲེན་རྣམས་ལ་ཏིལ་དང་ཆུ་ལ་ལན་བདུན་བཟླས་ཏེ་བྱིན་ན། བགེགས་དང་ལོག་འདྲེན་ཐམས་ཅད་ཞི་བར་འགྱུར་རོ། །བྱུར་ངན་པ་མེད་པར་བྱ་ན་རས་ལ་དཀྱིལ་འཁོར་ཟླུམ་པོ་བྲིས་ལ་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་མི་སྨྲ་བར་བཟླས་བརྗོད་སྟོང་རྩ་བརྒྱད་

བཟླས་ལ། མཆོད་པ་རྒྱ་ཆེན་པོ་བྱས་ཏེ། གཙང་མས་གོས་གཙང་མ་བགོས་ཏེ། ཨ་ག་རུའི་བདུག་སྤོས་བདུག་པར་བྱ་ཞིང་། སྤོས་དང་ལྡན་པའི་ཏིལ་མར་གྱི་མར་མེ་བལྟམ་པར་བྱས་ན། བཟླས་བརྗོད་བྱས་པ་ཙམ་གྱི་མོད་ལ་བྱུར་ངན་པ་ཐམས་ཅད་མེད་པར་འགྱུར་རོ། །དབུལ་བ་ཉམས་

པའི་དོན་དང་། མ་གྲུབ་པ་དང་། སྡིག་པ་དང་རྨི་ལམ་ངན་པ་དང་། ལྟས་ངན་པ་དང་། སྒྲིབ་པ་བསལ་ན་གསེར་རམ་དངུལ་གྱི་བུམ་པ་སྤོས་ཆུས་བཀང་བ་ལ་ལན་བརྒྱ་རྩ་བརྒྱད་བཟླས་ཏེ། བླུགས་ན་དེ་དག་ཐམས་ཅད་འཇིགས་པར་འགྱུར་ཞིང་། འཇིག་རྟེན་པའི་དཔལ་ཆེན་པོ་ཉམས་སུ་མྱོང་

བར་འགྱུར་རོ། །གདོན་ཐམས་ཅད་ཚར་བཅད་ན་ཏིལ་དང་འབྲས་སོ་བའི་སྦྱིན་སྲེག་གིས་སོ། །ནད་དང་གནོད་པ་ཐམས་ཅད་བསལ་ན་ཆུ་ལ་བཟླས་པས་སོ། །དུས་མ་ཡིན་པར་འཆི་བ་ཞི་བར་བྱ་ན། དུས་གསུམ་དུ་ལན་གསུམ་གསུམ་དུ་རྟག་ཏུ་བཟླས་པས་དུས་མ་ཡིན་པར་འཆི་བ་ཞི་

བར་འགྱུར་རོ། །བཅིངས་པ་དང་ལྕགས་སྒྲོག་དང་ཁོང་སྒྲིལ་གཞོམ་ན་ཉིན་རེ་ཞིང་བརྒྱ་རྩ་བརྒྱད་བཟླས་པས་སོ། །རྒྱལ་པོ་དབང་དུ་བྱ་ན་ལམ་པོ་ཆེར་བརྒྱ་རྩ་བརྒྱད་བཟླས་ན་རྒྱལ་པོ་འཁོར་དང་བཅས་པ་དབང་དུ་འགྱུར་རོ། །ཆོམ་པོ་དང་རྐུན་པོ་རེངས་པར་བྱ་ན། རཱ་ཛཱ་ཀོ་ཤཱ་ཀའི་ས་བོན་གྱི་སྦྱིན་

เล่ม ๙๒ · หน้า 94b

སྲེག་གིས་སོ། །མེ་རེངས་པར་བྱ་ན་སེང་ལྡེང་གི་ཤིང་ལ་བཟླས་ཏེ་མེར་བཅུག་ནས་བཟླས་ན་མེ་རེངས་པར་བྱེད་པར་འགྱུར་རོ། །ཆུ་རེངས་པར་བྱ་ན་ཀ་ལ་ཀིའི་ས་བོན་ཆུའི་ནང་དུ་བཏབ་ན་ཆུ་རེངས་པར་བྱས་པར་འགྱུར་རོ། །དུག་གཞོམ་ན་རྨ་བྱའི་སྒྲོ་ཡིས་སོ། །མཚོན་རེངས་པར་བྱ་ན་ཤིང་གནམ་

ལྕགས་ཀྱིས་ཚིག་པའི་ཐལ་བ་ལ་བཟླས་ཏེ་གཏོར་ན་མཚོན་ཆ་ཐམས་ཅད་རེངས་པར་འགྱུར་རོ། །ཏིང་ངེ་འཛིན་བསྒྲུབས་ན་ཏིང་ངེ་འཛིན་གྱི་ཕྱག་རྒྱ་བཅིངས་ཏེ་བཟླས་ན་ཏིང་ངེ་འཛིན་སྟོང་ཐོབ་པར་འགྱུར་རོ། །ཕ་རོལ་ཏུ་ཕྱིན་པ་དྲུག་རྫོགས་པར་འདོད་པའི་རིག་སྔགས་འཆང་དགེ་སློང་ངམ། དགེ་

སློང་མའམ། དགེ་བསྙེན་ནམ། དགེ་བསྙེན་མ་དེས་བ་ལང་གི་ལྕི་བས་དཀྱིལ་འཁོར་གྲུ་བཞི་བ་ཆ་ཤིན་ཏུ་མཛེས་པ་བྱས་ཏེ། ཙནྡན་གྱིས་མཆོད་པར་བྱ་ཞིང་། གུར་གུམ་དང་། གླ་རྩི་དང་། ག་བུར་གྱིས་མཆོད་ནས་མེ་ཏོག་སྣ་ཚོགས་བཀྲམ་སྟེ། འཕགས་པ་སྤྱན་རས་གཟིགས་

དབང་ཕྱུག་མངོན་དུ་ཕྱོགས་པར་བཞག་ནས། བུམ་པ་སྤོས་ཆུས་བཀང་བ་བཞི་བཞག་ལ། མཆོད་ཡོན་གྱི་སྣོད་བཞི་དང་པོག་ཕོར་བཞི་སྤོས་ཆུའི་བུམ་པའི་དབུས་སུ་གཞག་པར་བྱ་ཞིང་། ཨ་ག་རུའི་བདུག་པ་དབུལ་བར་བྱའོ། །བུམ་པའི་སྟེང་དུ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་

ཕྱིན་པ་གཞག་པར་བྱ། རྒྱན་ཐམས་ཅད་ཀྱིས་བརྒྱན་པར་བྱ་ཞིང་སྤོས་ཀྱི་མར་མེ་བཞི་བལྟམ་པར་བྱ། མཆོད་པ་རྒྱ་ཆེན་པོ་བྱ། བ་དན་གྱིས་བརྒྱན་པར་བྱ་ཞིང་དཀྱིལ་འཁོར་བྱས་ལ་དཀྱིལ་འཁོར་གྱི་དབུས་སུ་སྐྱིལ་མོ་ཀྲུང་དུ་འདུག་སྟེ། བཟླས་བརྗོད་སྟོང་རྩ་བརྒྱད་བྱ། ཁྲོ་བོའི་རྒྱལ་པོ་ལན་

བརྒྱ་རྩ་བརྒྱད་བཟླས་བརྗོད་བྱས་ན་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་ཞིང་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྐུ་སྟོན་པར་འགྱུར་རོ། །དགེ་བའི་རྩ་བའི་ཚོགས་ཐམས་ཅད་ཡོངས་སུ་རྫོགས་པར་འགྱུར་རོ། །སེམས་ཅན་བརྒྱ་སྟོང་མང་པོ་གདུལ་ན་རིའི་རྩེ་མོར་སྟོང་

རྩ་བརྒྱད་བཟླས་པས་སོ། །སྡང་བ་ཐམས་ཅད་གཞོམ་པར་འདོད་པས་རྡོ་རྗེའམ་མདུང་རྩེ་གསུམ་ལ་ལན་སྟོང་རྩ་བརྒྱད་བཟླས་ཏེ། དོན་ཡོད་པའི་ཞགས་པའི་ཕྱག་རྒྱས་ཚམ་ངམ་བྱ་ཞིང་ཁྲོ་བོའི་རྒྱལ་པོའི་བསྡིགས་པའི་ཕྱག་རྒྱ་བཅིངས་ཏེ་ཁྲོས་པས་ལན་བརྒྱ་རྩ་བརྒྱད་བཟླས་ནས།

เล่ม ๙๒ · หน้า 95a

གསོར་ཏེ་ནམ་མཁའ་ལ་འཕངས་ན་བདུད་ལ་སོགས་པ་སྡང་བ་ཐམས་ཅད་བཅོམ་པར་འགྱུར་རོ། །ལས་ཐམས་ཅད་གྲུབ་བ་དང་གསང་སྔགས་ཐམས་ཅད་འགྲུབ་པ་དང་བསམ་པ་ཐམས་ཅད་འགྲུབ་ཅིང་ཡོངས་སུ་རྫོགས་པར་འདོད་པས་དོན་ཡོད་པའི་ཞགས་པའི་ཕྱག་རྒྱ་

བཅིངས་ཏེ་སྟོང་ཉི་ཤུ་བཟླས་ན་གྲུབ་པ་ཆེན་པོར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བར་འདོད་པས་སྟོང་ཕྲག་སུམ་ཅུ་རྩ་གཉིས་བཟླས་ན། དེ་བཞིན་གཤེགས་པ་ཐམས་ཅད་དབང་བསྐུར་བར་འགྱུར་ཏེ། དེ་བཞིན་དུ་སྤོས་ཆུའི་བུམ་པས་དབང་བསྐུར་བར་

བྱའོ། །དེ་བཞིན་གཤེགས་པའི་གཟུགས་བརྙན་སྐུ་གདུང་དང་བཅས་པ་ལ་མིག་གཏད་དེ་ཁྲི་བཟླས་ན་དེ་བཞིན་གཤེགས་པ་ཉིད་འཐོབ་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་ཞབས་མནན་ཏེ་ཁྲི་བཟླས་ན་སྤྱན་རས་གཟིགས་དབང་ཕྱུག་དང་འདྲ་བར་འགྱུར་

རོ། །ཕྱག་ན་རྡོ་རྗེ་སྤྱན་དྲང་བར་འདོད་པས། ཕྱག་ན་རྡོ་རྗེའི་ཞབས་མནན་ཏེ་བཟླས་བརྗོད་ལན་སྟོང་བྱས་ནས། གུ་གུལ་གྱི་བདུག་པ་དབུལ་བ་བྱས་ན། འཕགས་པ་ཕྱག་ན་རྡོ་རྗེ་རང་གི་སྐུ་གཟུགས་ཀྱིས་མདུན་ན་འདུག་པར་འགྱུར་རོ། །ཐམས་ཅད་དུ་ཁྲོ་བོའི་རྒྱལ་པོ་དྲན་པར་བྱ་ཞིང་

ཐམས་ཅད་དུ་དོན་ཡོད་པའི་ཞགས་པའི་ཕྱག་རྒྱ་བཅིང་བ་བྱས་ན། མ་བསྒྲུབས་མ་བཀླགས་པར་འགྲུབ་ཅིང་ཆོ་ག་ཞིབ་མོ་མཐའ་ཡས་པ་འགྲུབ་པར་འགྱུར་རོ། །སྙིང་རྗེ་དང་། དགའ་བ་དང་། བཏང་སྙོམས་དང་། ངོ་ཚ་སེས་པ་དང་། བརྩེ་བ་དང་། བྱམས་པ་དང་། ཤེས་རབ་

དང་ལྡན་པས་འདི་འགྲུབ་པར་བསྟན་ཏོ། །གོ་ཆ་བགོས་པ་འགྲུབ་པ་མཆོག་ཐམས་ཅད་གྲུབ་པ་ཐོབ་ཅིང་བསོད་ནམས་ཀྱི་ཕུང་པོས་འབར་བར་འགྱུར་རོ། །ཐོག་མར་ཁྲོ་བོའི་རྒྱལ་པོ་བཟླས་པས་རྟག་ཏུ་མཚམས་བཅད་པ་དང་ཕྱོགས་བཅིང་བ་དང་ཡུལ་བཅིང་བ་བྱས་ཏེ་སྲུང་བ་མཆོག་ཏུ་

དཀོན་པའོ། །དེ་བཞིན་གཤེགས་པ་དང་རྒྱལ་བའི་བདག་ཉིད་སྐྱེས་པ་ཐམས་ཅད་ཀྱིས་དབང་བསྐུར་བར་འགྱུར་ཞིང་། གོ་ཆ་བགོས་པར་འགྱུར་རོ། །གལ་ཏེ་དབང་བསྐུར་བར་འདོད་ན་ཡང་རྒྱལ་བ་ཐམས་ཅད་ཀྱིས་དབང་བསྐུར་བར་འགྱུར་རོ། །དེ་བཞིན་གཤེགས་པས་བདེན་པ་

เล่ม ๙๒ · หน้า 95b

སྟོན་པར་འགྱུར་རོ། །དོན་ཡོད་པའི་རྒྱལ་པོའི་ཆོ་ག་ཞིབ་མོ་མཆོག་ལས་ཁྲོ་བོའི་རྒྱལ་པོ་བཤད་པར་བྱ་སྟེ། གཙང་མས་གོས་གཙང་མ་བགོས་ལ། ཤེས་རབ་དང་བྱང་ཆུབ་ཀྱི་ཐབས་དང་ལྡན་པས་འདི་འགྲུབ་པར་དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་ཏོ། །ནམཿསརྦ་

ཏ་ཐཱ་ག་ཏ། ཨཱརྱཱ་པ་ལོ་ཀི་ཏེ་ཤྭ་ར་བཛྲ་དྷ་རེ་བྷྱཿ ཨོཾ་ཙ་ར་ཙ་ར། ཙུ་རུ་ཙུ་རུ། མ་ཧཱ་ཀཱ་རུ་ཎི་ཀ །ཙི་རི་ཙི་རི། བི་རི་བི་རི། མ་ཧཱ་པདྨ་ཧ་སྟ། ཀ་ལ་ཀ་ལ། ཀུ་ལུ་ཀུ་ལུ། མ་ཧཱ་སྠཱམ་པྲཱ་པ་ཏ། ཙ་ར་ཙ་ར། ཙ་ཙ་རི་ཏ། ཙ་རེ་ཤྭ་ར། ཨེ་ཧྱེ་ཧི། སིདྷྱ་སིདྷྱ། བུདྷྱ་བུདྷྱ། དྷཱ་བ་དྷཱ་བ། ཀི་ཎི་

ཀི་ཎི། པར་མ་ཤུད་དྷ་ས་ཧྭ། ཀ་ར་ཀ་ར། ཀི་རི་ཀི་རི། ཀུ་རུ་ཀུ་རུ། མ་ཧཱ་པ་ཤུ་པ་ཏི་བེ་ཥ་དྷ་ར། ཧ་ཧཱ་ཧི་ཧཱི་ཧུ་ཧཱུ། ཨོཾ་ཀཱ་ར་མ་ཧཱ་བྲཧྨ་བེ་ཥ་དྷ་ར། ཙ་ར་ཙ་ར། བ་ར་བ་ར། ས་སྨི་ཤ་ཏ་ས་ཧ་སྲ་པྲ་ཏི་མཎྜི་ཏ་ཤ་རཱི་ར། ཛྭ་ལ་ཛྭ་ལ། ཏ་པ་ཏ་པ། བྷ་ག་བཱ་ན། སཽ་མཱ་དི་ཏྱ། ཡ་མ་བ་རུ་

ཎ། ཀུ་བེ་ར། བྲཧྨེན་དྲ། རྀ་ཥི་ག་ཎ། དེ་བག་ཎཱ་བྷྱརྩི་ཏ་ཙ་ར་ཎ། སུ་རུ་སུ་རུ། མུ་རུ་མུ་རུ། ས་ནད་ཀུ་མཱ་ར། རུ་དྲ། བིཥྞུ་བཱ་ས་བ། དྷ་ན་དཱ། དེ་བ་རྀ་ཥི་ནཱ་ཡ་ཀ །བ་ཧུ་བི་བི་དྷ་བེ་ཥ་དྷ་ར། དྷ་ར་དྷ་རས་མན་ཏྲ་བ་ལོ་ཀཱ། བི་ལོ་ཀི་ཏེ། ལོ་ཀེ་ཤྭ་ར། མུ་ཡ་མུ་ཡ། མུཉྩ་མུཉྩ། བན་

དྷ་བན་དྷ་ན། ཏཱ་ཌ་ན། ཏ་རྫ་ན། རཱ་ཛ་ཏ་སྐ་ར། ཨག་ནི། ཨུ་དཀ །བི་ཥ་ཤ་སྟྲ་པ་རི་མོ་ཙ་ཀ །ཀ་ཎ་ཀ་ཎ། བ་ལ་བོ་དྷྱཾ་ག་ཙ་རུ་ཏཱ་རྱ་ས་ཏྱ་ས་མ་པྲ་ཀཱ་ཤ་ཀ །ཏ་མ་ཏ་མ། ས་མ་ས་མ། མ་ཧཱ་ཙི་ཏྱན་དྷྱ་ཀཱ་ར་པྲ་ཤ་མན་མི་ལི་མི་ལི། ཨེ་ཎེ་ཡ་ཙརྨ་ཀྲྀ་ཏ་པ་རི་ཀ་ར། ཨེ་ཧྱེ་ཧི། མ་ཊ་མ་ཊ།

བི་ཤུད་དྷ་བི་ཥ་ཡ་ནི་བཱ་སི་ནམ་ཧཱ་ཀཱ་རུ་ཎི་ཀ །ཤྭེ་ཏ་ཡཛྙོ་བ་བཱི་ཏ། རཏྣ་མ་ཀུ་ཊ་མཱ་ལཱ་དྷ་ར། སརྦ་ཛྙཱ་ཤི་ར་སི་ཀྲྀ་ཏ། ཀ་ར་པུ་ཊ་དྷ་ན། ས་མཱ་དྷི། བི་མོ་ཀྵ་ཨ་པྲ་ཀཾ་པྱ། ཥཊ་པཱ་ར་མི་ཏཱ་པ་རི་པཱུ་ར་ཀ །བ་ཧུ་སཏྭ་སན་ཏ་ཏི་བ་རི་པཱ་ཙ་ཀ །སརྦ་མཱ་རཱ་དི་པྲ་དུཥྚ་པྲ་མཪྡཀ །སརྦ་སིང་དྷྱཱ་ཤཱ་པའི་

པཱུ་ར་ཀ །ཨ་བྷི་ཥིཉྩ་སརྦ་ཏ་ཐཱ་ག་ཏ། ཨ་བྷི་ཥེ་ཀཻ་ར། བྷ་ག་བཱ་ན་ཏ། ཨ་མོ་གྷ་རཱ་ཛ་ཧཱུཾ་ཕཊ། ན་མོ་སྟུ་ཏེ་སྭཱ་ཧཱ། གསང་སྔགས་ཀྱི་ཆོ་ག་སྔ་མ་དེ་ལྟ་བུས་ལས་ཐམས་ཅད་པ་དོན་ཡོད་པའི་ཞགས་པ་ཁྲོ་བོ་ཞེས་བྱ་བ་གྲུབ་པ་མཆོག་ལས་ཐམས་ཅད་པའོ། །ན་མོ་རཏྣ་ཏྲ་ཡཱ་ཡ། ན་མ་

เล่ม ๙๒ · หน้า 96a

ཨཱརྱ་ཨ་མི་ཏཱ་བྷཱ་ཡ་ཏ་ཐཱ་ག་ཏཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་ཏྭཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨ་མོ་གྷ་བ་ར་ད་པ་ཤ་ཧ་སྟཱ་ཡ། མ་ཧཱ་ཤུད་དྷ་ས་ཏྭཱ་ཡ། ཨཱ་གཙྪ། བྷ་ག་བཱ་ན། བྷ་བ་བཱན། པདྨ་ཧ་སྟ། བ་ར་ད་ཀ་རཱཾ་གུ་ལེ། པདྨ་བྷུ་ཛཻ། མ་ཧཱ་

པ་ཤུ་པ་ཏི། བེ་ཥ་དྷ་རེ། པྲ་སཱི་ཏ་ཤཱི་གྷ་མཱ་གཙྪ། མ་ཧཱ་བི་ག །བི་བྷ་ཥི་ཏ་རཥྨི། ཧ་ས་ཧ་ས། ཨ་མོ་གྷ་ཤུད་དྷེ། ས་ཧ་ས་ཧ། ཙ་ལ་ཙ་ལ། ཨཱ་གཙྪ། ཨཱ་གཙྪ། བྷ་ག་བཱ་ན། ཨ་བ་ལོ་ཀི་ཏེ་ཤྭ་རེ། མ་མ་གན་དྷ་པུཥྤ་ས་མ་མརྫ་ནི། ཨ་མ་པྲ་ཏཱིཙྪ། ཏྲི་རཏྣ་ས་ཏྱེ་ན། ཨ་མོ་གྷ་སིད་

དྷེ་སྭཱ་ཧཱ། འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་ན་གནས་པ་ཐམས་ཅད་དགུག་པ་ཨ་ག་རུའི་བདུག་པ་ལ་ལན་ཉི་ཤུ་རྩ་གཅིག་བཟླས་པ་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སརྦ་

གན་དྷཱ་དྷི་བ་སི་ཏ། ཨ་མོ་གྷ་བྷུ་ཛ། བ་ར་དཱ་ཡ། སརྦ་གན་དྷ་མཱ་ལྱ། བི་བྷཱུ་ཥི་ཏ་པྲི་ཡེ། ཙཎ་ཌརྡྷཱ་ཤི་ར་སི་པྲི་ཡེ། གན་དྷ་ག་ན་དྷཱ་ནུ་ལེ་པ་ན་སཱ་མ་མ་པྲ་ཏཱིཙྪ། བ་ར་བ་ར་བ་ར་དཱ་ཡ་སྭཱ་ཧཱ། ལན་བདུན་བཟླས་ཏེ་དབུལ་བར་བྱའོ། །ན་མོ་རཏྣ་ཏྲ་ཡཱ་ཡ། ན་མཿཨཱརྱ་ཡ་བ་ལོ་ཀི་ཏེ་ཤྭ་ཏཱ་ཡ།

བོ་དྷི་སཏྭ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཧི་ལི་ཧི་ལི། མི་ལི་མི་ལི། མ་ཧཱ་པྲ་བྷ། སུ་བི་མ་ལེ། བྲཧྨ་བི་ཥ་དྷ་རེ་ས་མ་ཏི་བ་ར་ཏེ། ཏུ་རུ་ཏུ་རུ། པི་ཙི་ཏྲ་པུཥྤ་མཱ་ལྱ་བྷི་བྷུ་ཥི་ཏེ། ཧ་ར་ཧ་ར། མ་ར་མ་ར། ཏུ་རུ་ཏུ་རུ། ཨ་མོ་གྷ་ཧྲྀ་ད་ཡ། པྲ་མོ་ད་ན་ཀུ་རུ་པྲ་པྲ་ཏཱིཙྪ་མ་

མུ་བུཥྤ་བ་རེ་སྭཱ་ཧཱ། མེ་ཏོག་ལ་ལན་བདུན་བཟླས་ཏེ་དབུལ་བར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། མ་ཧཱ་བོ་དྷི་ས་ཏྭཱ་བ་ར་དེ། སྨ་ར་སྨ་ར། བྷ་ག་བཱ་ན། ས་མ་ཡ་སརྦ་ཏ་ཐཱ་ག་ཏ་ཤཱ་སི་ཏེ། བྷ་ག་

བཱ་ན། ཨ་བ་ལོ་ཀཱ་ཡ། སརྦ་ས་ཏྭཱ་ཨ་བ་ལོ་ཀ་ནི། ཨ་མོ་གྷ་བ་ཏི་པྲ་ཤ་ཧ་སྟེ། སིད་དྷེ་སིད་དྷེ་སིད་དྷེ་བ་ར་དེ། སིད་དྷྱན་ཏུ་ཏེ། བུད་དྷ་དྷརྨ་སཾ་གྷ་ས་ཏྱེ་ན་ཏུ་རུ་ཏུ་རུ་ས་ཏྱ་ས་མ་ཡ་པཱ་ལཱ་ཡ་སྭཱ་ཧཱ། འཕགས་པ་སྤྱན་རས་གཟིགས་དབང་ཕྱུག་དྲན་པར་བྱ་བའི་རིག་སྔགས་སོ། །ན་མོ་

เล่ม ๙๒ · หน้า 96b

རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། དྷུ་རེ་དྷུ་རེ་བཛྲ་དྷར་པདྨ་ཛ་བེ། བི་ག་ཏཱ་བ་ར་དེ་བེ་ག་བེ་ག །དྷུ་ཊུ་དྷུ་ཊུ། སརྦ་བཱི་ཛ་པྲི་ཡེ། བུད་དྷ་དྷརྨ་སཾ་གྷ་ས་ཏྱེ་ན། མི་ལི་མི་ལི་སྭཱ་ཧཱ། གཏོར་མའི་སྔགས་

ཏེ་ལན་བདུན་བཟླས་ཏེ་སྦྱིན་ནོ། །ན་མོ་རཏྣ་ཏྲ་ཡཱ་ཡ། ན་མོ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀུ་རུ་ཎི་ཀཱ་ཡ། ཨ་པྲ་ཏི་ཧ་ཏ། ཏ་ཐཱ་ག་ཏ་ཛྙཱ་ན་ཀཱ་ཡ། བྷ་ག་བཱ་ན། ཨཱ་ཧ་ར་ཨཱ་ཧ་ར་པདྨཱ་ས་ན་པདྨ་བྷུ་ཛེ། ཤྭེ་ཏཾ་གེ་ཤྭེ་ཏ་སུ་ཛེ་ཤྭེ་ཏ་མཱ་ལྱ་བི་བྷཱུ་ཥི་ཏེ། དྷུ་མ་དྷུ་མ་

ཛྭ་ལ་བུ་དྷ་དྷ་རྨ་སཾ་གྷ་ས་ཏྱེ་ན་སྭཱ་ཧཱ། མར་མེའི་རིག་སྔགས་ཏེ་ལན་བདུན་བཟླས་པས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་བི་རི་བི་རི། པདྨ་པཱ་ཎི་ཨ་ག་མཱ་ག་མ་ཨ་མོ་གྷ་ཏ་ཏཱ་སིད་དྷི་

སརྦ་ཏ་ཐཱ་ག་ཏ་ག་ག་ན་རཤྨི་སཉྩོ་དི་ཏེ། སརྦ་བི་དྱཱ་དྷ་ར་བི་ཤོ་དྷ་ནི། ཨ་མོ་གྷ་སིད་དྷི་སྭཱ་ཧཱ། སྤོས་ཆུའི་དྲི་ཞིམ་པོའི་བུམ་པ་ལ་ལན་བདུན་བཟླས་ཏེ་ཁྲུས་བྱའོ། །ཁྲུས་ཀྱི་རིག་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་

ཀཱ་རུ་ཎི་ཀཱ་ཡ། ཏདྱ་ཐཱ། དྷུ་མེ་དྷུ་མེ་དྷུ་དྷུ་མེ་པདྨེ་པདྨ་ནི་ར་བྷཱ་སེ། ཤུད་དྷ་ཤུད་དྷ་ཀ་བ་ཙ་ན་པྲ་བྷཱ་ས་བི་མ་ལེ། ཤུད་དྷ་རཱ་ཤི །ཤུ་ཙི་ཤུ་ཙི་ཤུ་ཙི་གོ་ཙ་ར་སིད་དྷི་པདྨ་མཱཾ་ག་བ་ཏི། པྲ་བ་ར་ཎི་སྭཱ་ཧཱ། གོས་ཀྱི་རིག་སྔགས་ཏེ་ལན་བདུན་བཟླས་པས་སོ། །ན་མོ་རཏྣ་ཏྲ་ཡཱ་ཡ། ན་མ་

ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཤཱ་མེ་ཤཱ་མ་ཡ་ཤཱ་ན་ཏེ་མེ། མ་མ་སྦ་སྟྱ་ནཾ་ཀུ་རུ་ཤཱ་ན་ཏོ་སི་མི་སརྦ་པཱ་པ། ཤཱན་ཏ་ཤུད་དྷ་ཀ་ལྱཱ་ཎ་བེ་ར་ཛེ། ཤཱན་ཏི་བི་ཛ་ཡེ། ཛ་ཡ་སིད་དྷེ་བྷ་ག་བཱ་ན་ཨཱརྱ་ཨ་བ་ལོ་ཀི་ཏེ་ཤྭ་ར་ས་ར་སྭཱ་ཧཱ།

མལ་ཆ་ལ་བསྔགས་ཏེ་ཉལ་ན་རྨི་ལམ་ངན་པ་དང་། ལྟས་ངན་པ་ཐམས་ཅད་མི་མཐོང་ངོ་། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ནཱ་ག་པྲཱ་ཀ་ར་ཥ་ཎེ། དི་པྱ་ཛ་ལ། ཛ་ལཱ་བ་ཧེ། ཛ་ལ་སཾ་ཀྵོ་

เล่ม ๙๒ · หน้า 97a

བྷ་ཡཾ་ནཱ་ག་ཛ་ལ་སཾ་ཤོ་དྷ་ནི་པདྨ་ས་རེ། པདྨ་བི་ཤུདྡྷེ། པཱ་ཎི་ཛ་ལི་སཾ་ཤོདྷ་ཡ། ཨཱཏྨ་ནཾ་དྷ་ར་དྷ་ར་ས་ལི་ལེ་སྭཱ་ཧཱ། ཆུའི་སྔགས་ཏེ་ཁྲུས་དང་དབང་བསྐུར་བའི་ཆུ་བླངས་ལ་ལན་བདུན་བཟླས་ཏེ་སྤྱད་དོ། །ན་མོ་རཏྣ་ཏྲ་ཡཱ་ཡ། ནམ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ།

མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སརྦ་ས་ཏྭཱྃ་ཧི་ཏཾ་ཀ་རཱ་ཡ། ཨ་མོ་གྷ་བར་པྲ་དཱ་ཡ། སརྦ་ས་ཏྭཱྃ་མན་ན་པཱ་ན་པྲ་དཱ་ཡ། དེ་བ་ནཱ་བཱ་ད་ཡཱ་བྷོ་ཛྱ་བི་དྷི་དྷ་ར་མ་ནུ་པྲ་དཱ་ཡ། ས་ཀ་ལ་བྷུ་བ་ནེ། བྷུ་བ་ན་བི་ཤོ་དྷ་ནི། སན་ཏརྦ་ཡ་པྲ་བྷ་ར་བི་ཤུད་དྷེ་སྭཱ་ཧཱ། དབུལ་བའི་སྔགས་སོ། །ན་མོ་

རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སརྦ་དེ་བཱ་སུར་ན་མ་སྐྲྀ་ཏེ། ས་མས་མན་ཏ་པྲ་པཱུ་ར་ཎེ། ས་མ་གན་དྷཱ་བ་བྷཱ་སི་ཏེ། ག་ག་ན་བི་ཤུད་དྷེ། མུག་ཏི་པྲ་བྷེ། ཛ་ཡེ་བི་ཛ་ཡེ། ཛ་ཡ་ནིར་མཱ་ལྱོ་པན་ཡ་ཏི། བུཥྤ་

མཱ་ལྱ་གན་དྷ་བི་ཤོ་དྷ་ན། བི་ཤོ་དྷ་ཡ། སརྦ་ཏ་ཐཱ་ག་ཏ་བི་ཤུད་དྷེ་པདྨ་བི་ཤོ་དྷ་ནི་སྭཱ་ཧཱ། མེ་ཏོག་ཉིད་དོར་བའི་རིག་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། དྷ་ར་ཎི་ན་དྷ་རེ་དྷ་ར་ཎི་བན་དྷེ། བན་དྷ་

བན་དྷ་ཤུ་ཀྲ་བི་ཤོ་དྷ་ནི། ཤུ་ཀྲ་མཱ་ལ་ལིང་གི་ཏི། ཤུ་ཀྲ་བི་ཤོ་དྷ་ནི། ཤུད་དྷ་བི་མ་ལེ་སྭཱ་ཧཱ། རྩྭ་ཀུ་ཤའམ་རས་ཀྱི་སྲད་བུའམ། བུ་མོ་གཙང་མས་བཀལ་བའི་སྲད་བུ་ལ་ལན་ཉི་ཤུ་རྩ་གཅིག་བཟླས་ཏེ། མདུད་པ་ཉི་ཤུ་རྩ་གཅིག་བོར་བ་བྱས་ན། ཁུ་ཆུ་འགགས་པར་འགྱུར་རོ། །ན་མོ་

རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཛྭ་ལེ་ཛྭ་ལེ། བི་མ་ལེ་ཛྭ་ལེ། པྲ་བྷ་སི་བི་ར་ཛ། སཱུརྱ་བ་ཏི་ཛ་ཡ་པདྨ། མཱ་ལ་དྷ་རེ་སྭཱ་ཧཱ། མེའི་སྦྱིན་སྲེག་གི་ཐལ་བ་ལ་ལན་བདུན་བཟླས་ཏེ་ཀུན་དུ་གཏོར་ན། བགེགས་

དང་ལོག་འདྲེན་ཐམས་ཅད་ཀྱིས་ནམ་ཡང་མི་ཚུགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ་མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཛ་ལེ་ཛ་ལེ། ཛ་ལ་བ་ཏི། ཛ་ལ་པྲ་བྷ་བ་ནི། ནཱ་ག་སྲ་བ་ཎི་དི་པྱ་བཱ་རི་ཎི། མི་ལི་མི་ལི་སྭཱ་ཧཱ། ཉེ་རེག་

เล่ม ๙๒ · หน้า 97b

གི་རིག་སྔགས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོདྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། རི་ཎི་ཧ་རི་ཎི་པིང་ག་ལེ་པིང་ག་ལེ། ཧི་རི་ཧི་རི། བྷ་ག་བཱན། ནི་ཙ་ལ་པྲ་ཙ་ལ། པྲ་ཏི་ཏིཥྛ་མཱཾ་རཀྵ་མ་མ་བུད་དྷ་དྷརྨ་སང་གྷ་ས་ཏྱེ་

ན་སྭཱ་ཧཱ། སྟེགས་བུའམ་རྩྭ་ཀུ་ཤ་བཏིང་བ་ལན་བདུན་སྔགས་སོ། །སྟན་གྱི་རིག་སྔགས་སོ། །ན་མོ་རཏྣ་ཏྲ་ཡཱ་ཡ། ན་མཿསརྦ་མཎྜ་ལ་ནི་བ་སིན་དེ་བ་ཏཱ་ནཱཾ་མོ་བིདྱཱ་དེ་བ་ཏཱ་ནཱཾ། སརྦ་ཀལ་བ་སིད་དྷཱ་ནཱཾ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་

ཧཱ་ཀཱ་རུ་ཎི་ཀཱ་ཡ། ཨེ་ཧྱེ་ཧི་བྷ་ག་བ་ཏེ་པདྨ་སུན་ད་རི། མ་ཧཱ་བིདྱཱ་དེ་བ་ཏི། ཙ་ལ་ཙ་ལ། པདྨ་སུན་དྷ་རི། བེ་ག་བ་ཏི། སུ་རུ་སུ་རུ་སྭཱ་ཧཱ། ཉིན་རེ་ཞིང་མེ་ཏོག་དང་། བདུག་པ་དང་། གཏོར་མ་དང་། སྤོས་ཆུས་ཕོ་ཉ་མོ་པདྨའི་རིགས་མཛེས་པ་དང་གནོད་སྦྱིན་མོ་རལ་པ་གཅིག་མ་

མཆོད་ནས། བཟླས་བརྗོད་ལན་བདུན་བྱས་ན། ནམ་ཡང་བགེགས་ཐམས་ཅད་ཀྱིས་མི་ཚུགས་སོ། །ན་མོ་རཏྣ་ཏྲ་ཡཱ་ཡ། ན་མཿཀྲོ་དྷ་རཱ་ཛཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ནམཿསརྦ་བིདྱཱ་ཀུ་ལ་བཾ་ཤ་སྱ། ཏདྱ་ཐཱ།

ཨོཾ་ཨ་མོ་གྷ་ཧྲྀ་ད་ཡ་པྲ་བྷ་བི་ནི། སརྦ་བི་གྷྣཾ་པྲ་ཤ་མ་ནི། ཨཱ་ཧ་ར། སཾ་ཧ་ར། པདྨ་པཱི་ཐོ྅་བ་བིཥྚེ། མ་ཎི་ཀ་ཎ་ཀ་བི་བྷཱུ་ཥི་ཏ། ཀ་མ་ལ་བྷུ་ཛེ། ཏ་ར་ཏ་ར་ཏཱ་རཱ་ཡ་བར་མ། ཨ་མོ་གྷ་ཧྲྀ་ད་ཡ། ཛ་ཡེ་ཏྲི་ནེ་ཏྲེ། བར་ད་བྷུ་ཛེ། སྨ་ར་སྨ་ར། བྷ་ག་བཱ་ན། སརྦ་ཏ་ཐཱ་ག་ཏ་ས་མ་ཡ། བྷ་ར་

བྷ་ར། བྷུ་རུ་བྷུ་རུ། བྲཧྨ་བྷེ་ཥ་དྷ་ར་བི་བྷུ་ཥི་ཏ་ཏ་ནུ། མ་ཧཱ་བྷ་ཡ་ཧ་རེ། ཨཱ་ལོ་ཀ་ཡ། བི་ལོ་ཀ་ཡ། སརྦ་ས་ཏྭཱ་བ་ལོ་ཀི་ནི། བར་བར་དེ་སྭཱ་ཧཱ། ལས་ཐམས་ཅད་བའི་རིག་སྔགས་ཏེ། ཁྱད་པར་དུ་ནི་རིག་སྔགས་འདིས་དཀྱིལ་འཁོར་གྱི་གནས་ན་འཁོད་པའི་ལས་མི་རྣམས་བསྲུང་བར་

བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་ར་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། པ་ར་པ་ར། མ་ར་མ་ར། ས་ར་ས་ར། བན་དྷ་བན་དྷ། ས་མན་ཏེ་ན། ཨ་མོ་གྷ་བཱ་ཤ་ཧ་སྟེ། ཨ་མོ་གྷ་བཱ་ཤ་ཧ་སྟེ། ཏིཥྛ་ཏིཥྛ། བུད་དྷ་དྷརྨ་སཾ་གྷ་ས་ཏྱེ་ན་སྭཱ་ཧཱ། ཐལ་

เล่ม ๙๒ · หน้า 98a

བ་ལ་ལན་ཉི་ཤུ་རྩ་གཅིག་བཟླས་ཏེ་དོན་ཡོད་ཞགས་པའི་ཕྱག་རྒྱས་ཡུལ་བཅིང་ངོ་། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། དི་ཤཱ་བན་དྷ་ན། ཨ་མོ་གྷེ། ཨ་པྲ་ཏི་ཧ་ཏེ། མུ་རུ་མུ་རུ། སུ་རུ་

སུ་རུ། ཏུ་རུ་ཏུ་རུ། སརྦ་བི་གྷཾ་བི་ནཱ་ཤ་ནི། པདྨ་ས་ར་བི་བྷཱུ་ཥི་ཏེ། བུད་དྷ་དྷརྨ་སཾ་གྷ་ས་ཏྱེ་ན་པན་དྷ། ཨ་ཛི་ཏ་བར་དེ་སྭཱ་ཧཱ། སྤྱན་དྲངས་ཏེ་ཕྱི་ནས་ཕྱོགས་བཅིང་བར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ།

ཏདྱ་ཐཱ། ཧི་ལི་ཧི་ལི། མི་ལི་མི་ལི། སི་རི་སི་རི། པི་རི་པི་རི། བ་ར་བ་ར། པྲ་བར་བི་མཱ་ན་དྷ་ར། ད་ར་ད་ར། གཙྪ་གཙྪ་བྷ་ག་བཱ་ན། ཨཱརྱ་ཨ་བ་ལོ་ཀི་ཏེ་ཤྭ་ར་ཤཱུ། བྷ་ག་བཱན། ཏུ་རུ་ཏུ་རུ། ཨ་མོ་གྷ་པདྨེ་སྭཱ་ཧཱ། མེ་ཏོག་ཅི་སྙེད་པ་ལ་ལན་ཉི་ཤུ་རྩ་གཅིག་བཟླས་ཏེ་སཱིམ་བ་ནས་ཕུལ་

ན་སླར་གཤེགས་སུ་གསོལ་བར་འགྱུར་རོ། །རིག་སྔགས་ཀྱི་ཆོ་ག་ཞིབ་མོ་རིམ་པར་ཕྱེ་བའི་ཆོ་གའོ།། །།དེ་ནས་དོན་ཡོད་པའི་ཞགས་པའི་རྒྱལ་པོ་ཁྲོ་བོ་ཆེན་པོའི་སྙིང་པོའི་མཆོག་བསྒྲུབས་ན། བསྒྲུབ་སླ་བའི་རས་ཀྱི་སྐུ་གཟུགས་ཀྱི་ཆོ་ག་བཤད་པར་བྱའོ། །ཆོ་ག་ཞིབ་གྲུབ་གྲུབ་པ་ཆེ། །

ཁྲོ་བོའི་རྒྱལ་གྲུབ་གྲུབ་པ་མཆོག །དོན་ཡོད་པ་ནི་གྲུབ་པའི་མཆོག །རིག་སྔགས་འདི་ནི་བཤད་པར་བྱའོ། །དོན་ཡོད་རྒྱལ་པོ་ཁྲོ་ཆེན་གྱི། །སྙིང་པོ་དམ་པ་སྒྲུབ་པ་ནི། །ཆོ་ག་ཞིབ་གྲུབ་གྲུབ་པ་ཆེ། །ཁྲོ་བོའི་རྒྱལ་པོ་གྲུབ་པ་མཆོག །གྲུབ་པའི་མཆོག་སྟེ་དོན་ཡོད་པ། །རིག་སྔགས་

འདི་ནི་བཤད་པར་བྱ། །གང་བརྗོད་པ་ཙམ་གྱིས་ཆོ་ག་ཞིབ་མོའི་མཆོག་འགྲུབ་པ། སངས་རྒྱས་བྱེ་བ་བརྒྱ་ཕྲག་སྟོང་གིས་གཟིགས་པར་འགྱུར་བ། རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་བརྒྱ་སྟོང་མཐོང་བར་འགྱུར་རོ། དེ་བཞིན་གཤེགས་པ་འབུམ་ལ་དགེ་བའི་རྩ་བ་བསྐྱེད་

པར་འགྱུར་བ། བསོད་ནམས་ཀྱི་ཕུང་པོ་བླ་ན་མེད་པ། སྡིག་པ་ཐམས་ཅད་རབ་ཏུ་ཞི་བར་འགྱུར་བ། སྟོབས་དང་བརྩོན་འགྲུས་བསྐྱེད་པ། ཆོ་ག་ཞིབ་མོ་ཐམས་ཅད་དོན་ཡོད་པ། དེ་ཁོ་ན་ཉིད་སྒྲུབ་པ་འགྲུབ་པ། དྲན་པ་ཙམ་གྱི་མོད་ལ་ནི། །ས་གཞི་ཡང་ནི་གཡོ་འགྱུར་ལ། །

เล่ม ๙๒ · หน้า 98b

སུམ་ཅུའི་ལྷ་རྣམས་གཡོ་འགྱུར་ཞིང་། །ལྷར་བཅས་རྒྱ་མཚོ་ལྷུན་པོར་བཅས། །ཀླུ་རྣམས་འདར་ནི་ཡེད་ཡེད་ཅིང་། །གནོད་སྦྱིན་སྲིན་པོ་འབྲོས་འགྱུར་བ། །ལྷ་དང་ལྷ་མིན་གཡུལ་འགྱེད་ཚེ། །རིག་སྔགས་རྒྱལ་པོ་བླ་མེད་ཀྱིས། །ཕྱག་ན་རྡོ་རྗེ་གནོད་སྦྱིན་བཅས། །དཔུང་དང་

བཅས་ཤིང་བཞོན་བཅས་པའི། །ལུས་སྐྱེས་འབར་བའི་ཕྲེང་ཅན་ཀུན། །འདར་ཞིང་ཀུན་དུ་འདར་ཡེད་ཡེད། །རྒྱལ་པོ་ཆེན་པོ་བཞི་པོ་ཡི། །གནས་མཆོག་དག་ནི་གཡོ་འགྱུར་ཞིང་། །དེ་དག་ཐམས་ཅད་འདུས་འགྱུར་ནས། །འཇིག་རྟེན་དབང་ལ་སྐྱབས་དོང་ཞིང་། །བཅོམ་ལྡན་

མགོན་པོ་བསྐྱབ་ཏུ་གསོལ། །ཐུགས་རྗེའི་བདག་ཉིད་བསྐྱབ་ཏུ་གསོལ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག །བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་

འདས་བདག་ལ་གྲུབ་པ་དོན་ཡོད་པའི་སྙིང་པོའི་རིག་སྔགས་རྒྱལ་པོའི་སྙིང་པོ་འདི་གང་གིས་བཀླགས་པ་ཙམ་གྱིས་དོན་ཡོད་པའི་ཞགས་པའི་སྙིང་པོ་མྱུར་དུ་རབ་ཏུ་འགྲུབ་ཅིང་། དྲན་པ་ཙམ་གྱིས་འཕགས་པ་སྤྱན་རས་གཟིགས་དབང་ཕྱུག་ལྷའི་ལུས་ཀྱིས་ལུས་སྟོན་པར་འགྱུར་བ། དངོས་གྲུབ་

དང་མཆོག་ཐམས་ཅད་སྦྱིན་པར་འགྱུར་བ་མཆིས་ཏེ། བཅོམ་ལྡན་འདས་དེ་བདག་གིས་བཅོམ་ལྡན་འདས་ཀྱི་སྤྱན་སྔར། འཁོར་གྱི་དཀྱིལ་འཁོར་འདིའི་ནང་དུ་བསྒྲགས་པར་བགྱིའོ། །ན་མོ་རཏྣ་ཏྲ་ཡཱ་ཡ། ན་མཿཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ།

བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་པདྨེ་པདྨེ། པདྨ་དྷ་ར་བི་བྷཱུ་ཥི་ཏ། བྷུ་ཛེ། ཙ་ར་ཙ་ར། བྲཧྨ་བེ་ཥ་དྷ་ར། བྷ་ར་དྷ་ར། བི་ཙི་ཏྲ་མཽ་ལ་དྷ་ར། མ་ཎི་ཀ་ན་ཀ་བཛྲ་བཻ་ཌཱུརྱཱ་ལཾ་ཀྲི་ཏ་ཤ་རཱི་ར། ཏ་ར་ཏ་ར། ཏ་རཱ་ཡ་ཏ་རཱ་ཡ། བྷ་ག་བ་ཏེ་པཱ་ར་ཎ། དྷུ་རུ་

དྷུ་རུ། ཨ་མོ་གྷ་པཱ་ཤ་ཧ་སྟེ། བ་ར་བ་ར་བ་ར་དཱ་ཡ་ཀ །ས་མན་ཏ་ཨ་བ་ལོ་ཀི་ཏེ། མ་ཧཱ་བོ་དྷི་ས་ཏྭ་བར་ད་པདྨཱ་སན་པདྨ་གཽར། ཛྭ་ལ་ཛྭ་ལ་སརྦ་ཏ་ཐཱ་ག་ཏ་ཨ་བྷི་ཥེ་ཀ །ཨ་བྷི་ཥེ་ཀ་ཏེ་མ་ཧཱ་ཀཱ་རུ་ཎི་ཀཱ་ཡ། བ་ལ་བ་ལ། མ་ཧཱ་བེ་ག་དྷ་ར་བི་ཀྲྀ་ཏ་ན་ཡན། དཾ་ཥྜཱ་ཀ་རཱ་ལ་མ་ཧཱ་ཏེ་ཛཿ

เล่ม ๙๒ · หน้า 99a

དྷ་ར་དྷ་ར་བི་པུ་ལ་ཛ་ན་བ་ད་མ་ཧཱ་ཀཱ་རུ་ཎི་ཀཱ་ཡ། མ་ཧཱ་པ་ཤུ་པ་ཏི་བེ་ཥ་དྷ་ར། ས་ར་ས་ར། པྲ་བར་པུ་ཎྱ་སམ་བྷཱ་ར། སུ་ག་ཏ་དྷྱཱ་ན་ས་མཱ་དྷི། ས་མན་ཏ་ཨ་བ་ལོ་ཀི་ཏ། ཨཱི་ཤྭ་ར་མ་ཧེ་ཤྭ་ར། དུཥྚ་ད་མ་ཀ །རཽ་དྲ་པྲ་ལ་ཡ་དམ་ཀ །ཀྲོ་དྷ་རཱ་ཛ་མ་ཧཱ་བེ་ག་དྷ་ར། ས་མ་

ས་མ་མ་ཧཱ་སྟྲཱ་མ་པྲཱ་པྟ། ཙནྡྲ་སཱུརྱ་ཨ་ཏི་རེ་ཀ་པྲ་བྷ་མ་ལ་མ་ལ་སརྦ་མ་ལ་བི་ཤོ་དྷ་ཀ་སརྦ་རྀ་ཥི་ག་ན་སན་ཏ་ཏི་མ་ཧཱ་མ་ཧེ་ཤྭ་ར་རཱུ་པ་དྷ་ར། ཨ་མི་ཏཱ་བྷ་ཛི་ནཱ་ལང་ཀྲྀ་ཏ་ཛ་ཊ། དཀྵི་ན་ཙནྡྲཱ་ལཾ་ཀྲྀ་ཏ་ཤི་རཿ། མ་ཐ་མ་ཐ། སརྦ་ཡཀྵ་རཱཀྵ་བྷཱུ་ཏ་ག་ཎ་བྷཉྫ་ཀ་ཏ་ར། ཏ་ར་ཏ་ར་ག་ཎ་ས་མཱ་ལཾ་ཀྲྀ་ཏ། ནཀྵ་

ཏྲ་མཱ་ལ་སརྦ་བི་གྷྣཱ་ན་བི་ནཱ་ཤ་ན་ཀ་ར། པ་ར་མཻ་ཏྲི་ཙིཏྟ་མ་ཧཱ་ཀཱ་རུ་ཎི་ཀཱ། བ་ར་པ་ར། པ་རི་པཱུ་རྣ་མཎྜལ་སཽ་མྱ་མུ་ཁ། ཥ་ཊ་བཱ་ར་མི་ཏཱ། པ་རི་པཱུ་ར་ཀ །མི་ལི་མི་ལི། ཨེ་ཎེ་ཡ་ཙརྨ་ནི་བཱ་ས་ན། བཱ་གྷྲ་ཙརྨོ་ཏ་ཏ་རི་ཡ། དྷ་ར་དྷ་ར། སརྦ་ཏ་ཐཱ་ག་ཏ་ཨ་བ་ལོ་ཀི་ཏ། ཏྲི་ནེ་ཏྲ་ཏྲི་ཤཱུ་ལ་དྷ་ར།

བཛྲ་ཛྭ་ལ་དྷ་ར། ཨ་མོ་གྷ་པྲ་ཤ་ཧ་སྟེ། ཡ་མ་བ་རུ་ཎ་ཀུ་བེ་ར་རཱུ་པ་དྷ་ར། ནཱ་གེ་ན་དྲ་རཱུ་པ་དྷ་ར། བི་མ་ལ་བི་ཤུད་དྷ་དེ་ཧ་སརྦ་པཱ་བ་ཤ་མ་ཀ་སརྦཱ་བ་ར་ཎི་བི་ཤོ་དྷ་ཀ །སརྦ་ཀི་ལི་བི་ཥ་ནཱ་ཤ་ཀ །སྟྲཻ་ལོ་ཀྱ་བ་ཤཾ་ཀ་ར། སརྦ་ས་ཏྭཱ་བི་ཤོ་དྷ་ཀ །བོ་དྷི་ས་ཏྭཱ་བ་ར་ད། སརྦ་ཏ་ཐཱ་ག་ཏ། ཨ་

དྷིཥྛི་ཏེ། ཨོཾ་པདྨ་བི་བྷཱུ་ཥཻ་ཏ། ཤུད་དྷེ་དྷི་རི་དྷི་རི། ཨ་བ་ལོ་ཀི་ཡ་མཱ་ན། ས་མ་ས་མ། སརྦ་ཀརྨ་མེ་སཱ་དྷ་ཡ། ཨ་མོ་གྷ་པྲ་ཤ་ཧྲྀ་ད་ཡ་སིད་དྷེ། གུ་ཧྱ་ནི་བ་སི་ནི་བར་ད་ཧཱུཾ་ཕཊ། ན་མོ་སྟུ་ཏེ་སྭཱ་ཧཱ། གྲུབ་པ་དོན་ཡོད་པ་རིག་སྔགས་ཀྱི་རྒྱལ་པོ་འདི་བཤད་མ་ཐག་ཏུ་འབྱུང་པོའི་

ཚོགས་དང་། གནོད་སྦྱིན་དང་། སྲིན་པོ་དང་། བགེགས་དང་། ལོག་འདྲེན་དེ་དག་ཐམས་ཅད་ཁ་བུ་བ་ཏུ་འགྱེལ་ཏེ། གཅིག་ཏུ་འབར་བར་གྱུར་ཅིང་གནས་ཀྱང་འབར་བར་གྱུར་པ་དང་། དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེ་དགའ་བས་བ་སྤུ་ལངས་ཏེ། སྐྲག་པར་

གྱུར་པའི་ལྷ་ཚོགས་ཐམས་ཅད་དང་། བརྒྱ་བྱིན་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། རྒྱལ་པོ་ཆེན་པོ་བཞི་དང་། སྒྲག་པར་འགྱུར་བའི་ལྷ་དང་། ལྷ་མ་ཡིན་དང་། དྲང་སྲོང་སྤ་གོང་བ་ཐམས་ཅད་དང་། རྒྱ་མཚོ་ན་གནས་པའི་ཀླུའི་རྒྱལ་པོ་

เล่ม ๙๒ · หน้า 99b

ཐམས་ཅད་དང་། ཆུ་བྲན་ཐམས་ཅད་དང་། ལྷ་དང་། ཀླུ་གང་དག་ཆུ་ན་གནས་པ་ཐམས་ཅད་དང་། རྒྱ་མཚོ་ཆེན་པོའི་ལྷ་དང་། ལྷ་གང་དག་ལང་ཀའི་གྲོང་ཁྱེར་ན་གནས་པ་ཐམས་ཅད་དང་། རིག་སྔགས་འཆང་འཁོར་ལོས་སྒྱུར་བ་ཐམས་ཅད་དང་། གང་དག་གནས་གཙང་

མའི་རིས་ཀྱི་ལྷ་རྣམས་དང་། ནམ་མཁའི་ལྷ་ཐམས་ཅད་འཁྲུགས་པར་གྱུར་ནས་ནམ་མཁའ་ལས་བབས་ཏེ། བཅོམ་ལྡན་འདས་ལ་མཆོད་པའི་ལས་དང་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དེ་ལ་ཡང་མཆོད་པའི་ཕྱིར། ལྷའི་མེ་ཏོག་རྣམ་པ་སྣ་ཚོགས་

པདྨ་དང་། ཀུ་མུ་ད་དང་། ཨུཏྤལ་དང་། པུཎ་ཌ་རཱི་ཀ་དང་། མན་དཱར་བ་དང་། མན་དཱ་ར་བ་ཆེན་པོའི་ཆར་དང་། ལྷའི་རྒྱན་དང་ལྷབ་ལྷུབ་ཀྱི་ཆར་པུས་མོ་ནུབ་ཙམ་རི་བོ་པོ་ཊ་ལར་ཕབ་སྟེ། ལྷའི་སིལ་སྙན་དང་། གླུ་དབྱངས་ལེན་ཅིང་ཧ་ཧ་ཞེས་ཅ་ཅོ་དང་ག་ཞའི་སྒྲ་བཏོན་ནས། བཅོམ་

ལྡན་འདས་འཕགས་པ་སྤྱན་རས་གཟིགས་དབང་ཕྱུག་གིས་སེམས་ཅན་ཐམས་ཅད་ཀྱི་དོན་དུ་རིག་སྔགས་འཆང་ཆེན་པོ་འདི་བཤད་དོ་ཞེས་ཆེད་དུ་རྗོད་པ་ཆེད་དུ་བརྗོད་དོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་

རས་གཟིགས་དབང་ཕྱུག་གང་ན་བ་དེར་སོང་སྟེ། ལན་གསུམ་བསྐོར་བ་བྱས་ནས་མཆོད་པའི་ཕྱིར་མུ་ཏིག་གི་དོ་ཤལ་བརྒྱ་སྟོང་རི་བ་ཕུལ་ཏེ། བཅོམ་ལྡན་འདས་ཀྱིས་རིག་སྔགས་ཆེན་པོའི་ཆོ་ག་ཞིབ་མོ་ཐམས་ཅད་ཀྱི་མཆོག་བཤད་དོ། །དོན་ཡོད་པའི་ཞགས་པའི་རྒྱལ་པོ་རིག་སྔགས་ཆེན་པོའི་

སྙིང་པོ་འཇིག་རྟེན་མགོན་པོ་ཐུབ་པ་ཆེན་པོས་བཤད་དུ་གསོལ། བཅོམ་ལྡན་འདས་ཆོ་ག་ཞིབ་མོ་མཐའ་དག་དོན་ཡོད་པའི་རྒྱལ་པོ་གྲུབ་པའི་མཆོག་ལས་ཐམས་ཅད་གྲུབ་པ་བཤད་དུ་གསོལ། དེ་ནས་དེའི་དོན་དུ་འཕགས་པ་སྤྱན་རས་གཟིགས་དབང་ཕྱུག་གི་དོན་ཡོད་པའི་ཞགས་པའི་

སྙིང་པོ་ཆོ་ག་ཞིབ་མོ་གྲུབ་པ་དོན་ཡོད་པ། རིག་སྔགས་ཀྱི་རྒྱལ་པོ་རས་ཀྱི་སྐུ་གཟུགས་བསྒྲུབ་པའི་མཆོག །ཆོ་ག་དང་ཡོ་བྱད་དུ་བཅས་པ་བཤད་པ། རས་གྲུ་བཞི་པ་ཀུན་ནས་ཆ་ལེགས་པར་ཕྱེ་བ། ཁ་ཚར་མ་བཅད་པ་སྐྲ་མེད་པ། རི་མོ་མཁན་གཙང་མ་ཁྲུས་བྱས་པས་གོས་གཙང་

เล่ม ๙๒ · หน้า 100a

མ་བགོས་ལ་གསོ་སྦྱོང་དང་ལྡན་པར་བྱས་པས། ཚོན་ལྷག་མ་མ་ཡིན་པ་སྣོད་སར་པར་བཞག་ལ་བྲི་བར་བྱ་སྟེ། དབུས་སུ་འཕགས་པ་སྤྱན་རས་གཟིགས་དབང་ཕྱུག་རལ་པའི་ཐོར་ཚུགས་ཀྱིས་བཞུགས་ཤིང་། རྒྱལ་བ་འོད་དཔག་མེད་ཀྱིས་བརྒྱན་པ་ཐོར་ཚུགས་ཀྱི་

གཡས་སུ་ཟླ་ཚེས་ཀྱིས་བརྒྱན་པ། རི་དགས་ཨེ་ནེ་ཡའི་པགས་པ་གྱོན་པ། ཕྱུགས་བདག་གི་ཆུ་ལུགས་འཆང་བ། རྒྱན་ཐམས་ཅད་ཀྱིས་བརྒྱན་པ། དབུ་གསུམ་སྤྱན་གསུམ་ཕྱག་བཞི་པ། རིའི་སྟེང་ན་པདྨའི་གདན་ལ་བཞུགས་པ། ཞལ་དབུས་མ་ཞི་བའི་ཞལ་བཞིན་འཛུམ་པ།

ཞལ་གཡས་པ་འཇིགས་སུ་རུང་བ་ཁྲོ་གཉེར་ཅན། ཐོར་ཚུགས་འོད་དཔག་མེད་ཀྱིས་བརྒྱན་པ། དབུ་ཟླ་ཚེས་ཀྱིས་བརྒྱན་པ། ཞལ་གཡོན་པ་འཇིགས་སུ་རུང་བ་བཞིན་བསྒྱུར་ཅིང་མཆེ་བ་གཙིགས་པ། རྒྱལ་བ་འོད་དཔག་མེད་དབུལ་བཞུགས་པ། ཕྱག་གཅིག་ན་པདྨ་ཐོགས་པ། གཉིས་པ་རྩེ་གསུམ་ཐོགས་པ།

གསུམ་པ་དོན་ཡོད་ཞགས་པ་སྐུའི་ཕྱེད་ན་འཛིན་པ་ལ། བཅོམ་ལྡན་འདས་ཞལ་ཁྲོ་གཉེར་ཅན་དོན་ཡོད་ཞགས་པའི་ཕྱག་རྒྱ་བཅིངས་པའི་ཕྱག་ལ་སྤྱན་གཏོད་པར་བྱ་ཞིང་། བཞི་བ་དབུགས་འབྱིན་པའི་ཕྱག་ཏུ་བྱ་ཞིང་འོད་འདོམ་གང་བ་ཁོར་ཡུག་འབར་བ་དང་ལྡན་པར་བྱའོ། །གཡས་ཕྱོགས་ན་ལྷ་མོ་

སྒྲོལ་མ་འགྱིང་བག་དང་བཅས་ཤིང་ལུས་བཏུད་པར་མཆོག་སྦྱིན་པའི་ཕྱག་ལ་མིག་གཏོད་པར་བྱའོ། །གཡོན་དུ་པདྨའི་རིགས་མཛེས་མ་འཛེམ་བག་དང་བཅས་པ་གསང་སྔགས་ཀྱི་ཚུལ་དང་རྗེས་སུ་མཐུན་ཞིང་དོན་ཡོད་པའི་ཞགས་པ་ལ་མིག་གཏོད་པར་བྱའོ། །ལྷ་མོ་སྒྲོལ་མའི་བར་དུ་གནོད་

སྦྱིན་མོ་རལ་པ་གཅིག་མ་བྱའོ། །པདྨའི་རིགས་མཛེས་མའི་བར་དུ་ཁྲོ་གཉེར་ཅན་བྱའོ། །ཕྱོགས་གཉིས་པར་ལྷ་མོ་དཀར་མོ་ལག་ན་པདྨ་ཐོགས་པ་བྱའོ། །པདྨའི་རིགས་མཛེས་མའི་འོག་ཏུ་ཕོ་ཉ་མོ་གསང་སྔགས་ཀྱི་རྗེས་སུ་འབྲང་བར་བྱའོ། །རལ་གཅིག་མའི་འོག་ཏུ་ལྷ་མོ་ཆེན་མོ་

འཇིགས་བྱེད་མ་བྱའོ། །གང་དུ་གནས་གཙང་མའི་རིགས་ཀྱི་ལྷའི་བུ་དང་བརྒྱ་བྱིན་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་མེ་ཏོག་སྣ་ཚོགས་ཐོགས་ཏེ་བཅོམ་ལྡན་འདས་ལ་མཆོད་པ་བྱེད་པར་བྱའོ། །འོག་ཏུ་རྒྱལ་པོ་ཆེན་པོ་བཞི་བྱའོ། །འཕགས་པ་སྤྱན་རས་གཟིགས་

เล่ม ๙๒ · หน้า 100b

དབང་ཕྱུག་གི་འོག་ཏུ་འཕགས་པ་ཕྱག་ན་རྡོ་རྗེ་འཇིགས་སུ་རུང་བ་གད་རྒྱངས་ཅན་ཁྲོ་བོ་དོན་ཡོད་པའི་རྒྱལ་པོ་དང་སྨྲ་བ་བྱའོ། །རས་ཀྱི་སྐུ་གཟུགས་འདི་མཐོང་བ་ཙམ་གྱིས་འཕགས་པ་སྤྱན་རས་གཟིགས་དབང་ཕྱུག་རི་བོ་པོ་ཊ་ལ་ན་གཞལ་མེད་ཁང་དང་བཅས་པ་མངོན་སུམ་དུ་མཐོང་བར་

རིག་པར་བྱའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་པ། མཐོང་བ་ཙམ་གྱིས་སེམས་ཅན་དམྱལ་བ་ཆེན་པོ་བརྒྱད་ལས་ཐར་བར་འགྱུར། འཇིགས་པ་ཆེན་པོ་བརྒྱད་ལས་ཡོངས་སུ་གྲོལ་བར་འགྱུར། མཚམས་མེད་པ་ལྔ་

བྱེད་པ་ཡོངས་སུ་ཐར་བར་འགྱུར། དམ་པའི་ཆོས་སྤོང་བ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤོང་བས་མཐོང་བ་ཙམ་གྱི་མོད་ལ་རྣམ་པར་དག་པར་འགྱུར། མནར་མེད་པ་ལ་གཞོལ་བའི་མཐར་ཐུག་པ་ཡང་ཡོངས་སུ་གྲོལ་བར་འགྱུར་རོ། །ཚངས་པ་ཆེན་པོའི་བསོད་ནམས་

བརྒྱ་སྟོང་གི་དགེ་བའི་རྩ་བ་བསྐྱེད་པར་འགྱུར། འཇིག་རྟེན་པ་ཐམས་ཅད་ཀྱི་དགེ་བའི་རྩ་བ་མཆོག་ཐོབ་པར་འགྱུར། འཆི་བའི་དུས་ན་འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་སྟོན་པར་འགྱུར་ཞིང་དབུགས་འབྱིན་པར་འགྱུར། ཤི་ནས་བདེ་བ་ཅན་གྱི་འཇིག་རྟེན་གྱི་

ཁམས་སུ་སྐྱེ་བར་འགྱུར། སྒྲིབ་པ་ཐམས་ཅད་དང་བྲལ་ནས་ཚེ་རབས་བརྒྱ་སྟོང་ཕྲག་ལྔ་བཅུ་རྗེས་སུ་དྲན་པར་འགྱུར་རོ། །བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་སྐྱེ་བ་འདི་ཐ་མ་ཡིན་ཏེ། འདི་མཐོང་བ་ཙམ་གྱིས་བསོད་ནམས་ཀྱི་ཕུང་པོ་དང་ལྡན་པར་འགྱུར་ན། །ལྷག་པར་མང་དུ་

བྱེད་པ་ལྟ་ཅི་སྨོས་ཏེ། དེ་ནི་ཕྱིར་མི་ལྡོག་པར་འགྱུར། བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །གལ་ཏེ་རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རྒྱལ་པོ་དང་།

བློན་པོ་དང་། བཙུན་མོའི་འཁོར་དང་བཅས་པའམ། བཙུན་མོ་དམ་པ་གང་ལ་ལ་ཞིག་གིས་རས་ཀྱི་སྐུ་གཟུགས་བསྒྲུབ་པར་བྱ་བ་དེའི་སྤྱན་སྔར། དོན་ཡོད་པའི་ཞགས་པའི་སྙིང་པོ་དྲན་པར་བྱེད་ཅིང་། འཕགས་པ་སྤྱན་རས་གཟིགས་དབང་ཕྱུག་དེ་ལ་ཡང་མཆོད་པར་བྱེད་ན། དེས་ན་ཁྱོད་

เล่ม ๙๒ · หน้า 101a

ཀྱིས་འདི་ལྟར་རིག་པར་བྱ་སྟེ། དོན་ཡོད་པའི་ཞགས་པའི་སྙིང་པོ་སྟོང་ཕྲག་བརྒྱ་འགྱུར་དུ་བཟླས་ཤིང་བཟླས་བརྗོད་ཀྱི་ཆོ་ག་ཆེན་པོ་བྱས་པ་ཡིན་ནོ། །གང་ཞིག་ཁྲོ་བོ་དོན་ཡོད་པའི་ཞགས་པ། བཅོམ་ལྡན་འདས་ཀྱི་སྤྱན་སྔར་མི་སྨྲ་བར་ལན་གསུམ་བཟླས་བརྗོད་བྱ་

སྟེ། ཆུས་དབང་བསྐུར་ན་དེས་ན་ཁྱོད་ཀྱིས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་དབང་བསྐུར་བར་འགྱུར་རོ། །སྙམ་དུ་དེ་ལྟར་ཤེས་པར་བྱའོ། །གང་གིས་དོན་ཡོད་པར་གྲུབ་པའི་ཆོ་ག་ཞིབ་མོ་

ཆེན་པོའི་གཟུངས། འཕགས་པ་སྤྱན་རས་གཟིགས་དབང་ཕྱུག་རས་ཀྱི་སྐུ་གཟུགས་ཀྱི་སྤྱན་སྔར་མངོན་སུམ་དུ་ཐལ་མོ་སྦྱར་ཏེ་འདུག་ནས་ལན་གསུམ་བཟླས་ཏེ། བསྐོར་བ་ལན་བདུན་བྱས་ལ་ཆུའི་ནང་དུ་མཆོད་ཡོན་དང་། ལྷ་བཤོས་དང་། བདུག་སྤོས་དང་། མེ་ཏོག་ཕུལ་ནས་

ཕྱག་འཚལ་ལོ་ཞེས་སྨྲས་ན། དེས་ཁྱོད་ཀྱིས་འདི་ལྟར་ཤེས་པར་བྱ་སྟེ། གཟུངས་ཐམས་ཅད་སོ་སོར་ལན་སྟོང་ཕྲག་བརྒྱ་བཟླས་པར་འགྱུར་ཞིང་། དོན་ཡོད་པའི་ཞགས་པའི་སྙིང་པོ་རྣམ་པར་གྲོལ་བའི་དཀྱིལ་འཁོར་གྱི་ཆོས་ཀྱི་རྣམ་གྲངས་ཆེན་པོ་འདི་ལན་སྟོང་ཕྲག་བརྒྱ་བཟླས་པར་འགྱུར་རོ། །

དོན་ཡོད་པའི་ཞགས་པའི་ཕྱག་རྒྱ་བྱས་ལ་འཕགས་པ་སྤྱན་རས་གཟིགས་དབང་ཕྱུག་གི་ཞལ་ལ་མིག་གཏད་དེ་ལག་པ་གཡས་གཡོན་གཉིས་སྦྱར་ལ། སྙིང་གར་གཞག་ཅིང་ཚུལ་འདིས་ཕྱག་རྒྱ་རེ་རེ་ནས་ལན་སྟོང་ཕྲག་བརྒྱ་བྱས་པར་འགྱུར་རོ། །བཅོམ་ལྡན་འདས་རིགས་ཀྱི་བུའམ་

རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རྒྱལ་པོ་དང་། རྒྱལ་པོའི་བཙུན་མོ་དམ་པ་གང་ལ་ལ་ཞིག་འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པའི་སྙིང་པོ་འདི་བརྒྱ་སྟོང་ཕྲག་ཁྲི་བཟླས་བརྗོད་བྱ་བར་འདོད་

པ་དང་། དེ་བཞིན་གཤེགས་པ་བརྒྱ་སྟོང་ཕྲག་ཁྲིས་དབང་བསྐུར་བར་འདོད་པ་དང་རྣམ་པར་གྲོལ་བའི་དཀྱིལ་འཁོར་མཐའ་དག་གི་ཆོ་ག་ཞིབ་མོ་འདི་རྫོགས་པར་ལན་བརྒྱ་སྟོང་ཁྲི་བཟླས་པར་འདོད་པ་དང་། དོན་ཡོད་པའི་ཞགས་པའི་ཕྱག་རྒྱ་འདི་ལན་བརྒྱ་སྟོང་ཕྲག་ཁྲི་བྱ་བར་འདོད་

เล่ม ๙๒ · หน้า 101b

པ་དེས་རས་ཀྱི་སྐུ་གཟུགས་ལ་བརྩོན་པར་བྱ་སྟེ། རས་ཀྱི་སྐུ་གཟུགས་སྔོན་དུ་བཞག་ནས་གནས་གཙང་ཞིང་དབེན་པར་གནས་སམ། འཆགས་འམ་དགོན་པའི་གནས་སམ། ཕུག་གམ། རིའི་རྩེ་མོའམ། གཙུག་ལག་ཁང་ངམ། ཁང་པར་གཙང་སྦྲ་དང་བྱི་དོར་བྱ་སྟེ། བསེར་མོའི་ལྕི་

བ་ལེགས་པར་མཉེས་ལ། བ་ལས་བྱུང་བ་ལྔ་དང་བསྲེས་ཏེ་བསྐུས་ལ་སྤོས་སྣ་ཚོགས་ཀྱི་བྱུག་པས་བྱུགས་ནས་རས་ཀྱི་སྐུ་གཟུགས་ཀྱི་སྤྱན་སྔར་ཙནྡན་དཀར་པོའི་དཀྱིལ་འཁོར་བྱས་ཏེ། གུར་གུམ་གྱིས་ཁྲུ་དོའི་ཚད་ཙམ་བྲིས་ལ་གླ་རྩི་དང་ག་བུར་གྱིས་མཆོད་པར་བྱའོ། །དྲི་ཆབ་ཀྱི་བུམ་པ་དྲི་

རྣམ་པ་སྣ་ཚོགས་ཀྱིས་བཀང་སྟེ། རས་ཀྱི་མགུལ་ཆིངས་ཀྱིས་བཅིངས་ལ། དཀྱིལ་འཁོར་གྱི་དབུས་སུ་གཞག་པར་བྱ། མེ་ཏོག་དང་བདུག་སྤོས་དྲི་ཞིམ་པོ་དང་། མེ་ཏོག་གི་ཕྲེང་བ་ཉི་ཤུ་རྩ་གཅིག་གཞག་པར་བྱ། དྲི་ཆབ་ཀྱིས་བཀང་བ་བརྒྱད་ཕྱོགས་བཞིར་གཞག་པར་བྱ། འོ་

མས་བཀང་བའི་སྣོད་བརྒྱད་གཞག་པར་བྱ། སྟེགས་བུའི་དྲུང་དུ་འོ་མས་བཀང་བའི་སྣོད་གཞག་པར་བྱ། འོ་ཐུག་དང་། སྦྱར་ཐུག་དང་། ཁཎྜ་ཁ་དྱ་དང་། འབྲས་ཆན་དང་། ལག་པན་དང་། བུ་རམ་དང་ཤ་ཁར་དང་། ཞུན་མར་གྱིས་བཀང་བའི་སྣོད་གཞག་པར་བྱ། ཨ་ག་རུ་

ནག་པོ་དང་ཙནྡན་དཀར་པོ་དང་། ག་བུར་དང་། ཀུན་དུ་རུ་དང་། ཤི་རིབཱ་ས་ཀ་དང་། ཅུང་པེང་རྣམས་སྣོད་དང་བཅས་པ་བཞག་ནས། ཨ་ག་རུའི་ཡམ་སྲེག་ཤིང་གིས་སྦྱིན་སྲེག་བྱ། མེ་ཏོག་སྣ་ཚོགས་ཀྱིས་བརྒྱན་པར་བྱ། མར་གྱི་མར་མེ་སུམ་ཅུ་རྩ་གཉིས་བལྟམ་པར་བྱའོ། །དེ་ནས་

རིག་སྔགས་འཆང་གཙང་མས་གོས་གཙང་མ་བགོས་ཤིང་ཁྲུས་ལེགས་པར་བྱས་པས་ཚེས་བཅུ་བཞི་ནས་བཅྭ་ལྔའི་བར་དུ་འཕགས་པ་སྤྱན་རས་གཟིགས་དབང་ཕྱུག་གི་རས་ཀྱི་སྐུ་གཟུགས་ལ་མཆོད་པར་བྱའོ། །དེའི་འོག་ཏུ་རིག་སྔགས་འཆང་གིས་ཁྲོ་བོའི་རྒྱལ་པོ་ལན་བདུན་བཟླས་ཏེ། དྲི་ཆབ་

ཀྱིས་དབང་བསྐུར་བར་བྱ། དོན་ཡོད་པའི་ཞགས་པའི་སྙིང་པོ་ལན་ཉི་ཤུ་རྩ་གཅིག་བྱ། དེ་ནས་མི་སྨྲ་བར་སྐྱིལ་མོ་ཀྲུང་དུ་འདུག་སྟེ་བཟླས་བརྗོད་ཀྱི་ཕྱག་རྒྱ་བཅིངས་ལ་དོན་ཡོད་པའི་ཞགས་པའི་སྙིང་པོ་ལན་བརྒྱ་རྩ་བརྒྱད་བཟླས་པར་བྱ་དེའི་འོག་ཏུ་དོན་ཡོད་པར་གྲུབ་པའི་རིག་སྔགས་ཀྱི་རྒྱལ་

เล่ม ๙๒ · หน้า 102a

པོ་སྟོང་རྩ་བརྒྱད་བཟླས་པར་བྱས་ན། དེ་ནས་རས་ཀྱི་སྐུ་གཟུགས་ལས་འོད་ཟེར་བདུན་བྱུང་ནས་ཀུན་ཏུ་སྣང་བར་བྱས་ཏེ། ལན་གསུམ་བསྐོར་བ་བྱས་ནས་འཕགས་པ་སྤྱན་རས་གཟིགས་དབང་ཕྱུག་གི་དཔྲལ་བའི་སྤྱན་དུ་ཞུགས་པར་འགྱུར་རོ། །ཞུགས་པ་ཙམ་གྱི་མོད་ལ་

ས་ཆེན་པོ་གཡོ་བར་འགྱུར་ཞིང་རིག་སྔགས་འཆང་ཡང་སྙིང་དགའ་ཞིང་བ་སྤུ་ལྡང་བར་འགྱུར། མདོག་མདངས་ཡོངས་སུ་དག་པར་འགྱུར། འཕགས་པ་སྤྱན་རས་གཟིགས་དབང་ཕྱུག་གི་མཆོག་སྦྱིན་པའི་ཕྱག་གི་སོར་མོ་ལས་ལྷའི་ཆུ་འཛག་པར་འགྱུར། ཞབས་གཉིས་ལས་འོ་མ་འཛག་པར་འགྱུར།

དོན་ཡོད་པའི་ཞགས་པའི་ཕྱག་འབར་བར་འགྱུར། ཕྱག་ན་པདྨའི་པདྨ་ལོ་མ་གཡོ་བར་འགྱུར། རྩེ་གསུམ་གཡོ་བར་འགྱུར་ཞིང་ལེགས་སོ་ཞེས་བྱ་བའི་སྒྲ་འབྱུང་བར་འགྱུར་ཏེ། རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་གྲུབ་ཀྱིས་ལས་

ཐམས་ཅད་བྱོས་ཤིག་ཁྱོད་ཀྱིས་དོན་ཡོད་གྲུབ་པའི་ཆོ་ག་ཞིབ་མོའི་རྒྱལ་པོ་ཆེན་པོའི་དམ་པ་གྲུབ་པོ་ཞེས་ནས། དེ་ནས་འཕགས་པ་སྤྱན་རས་གཟིགས་དབང་ཕྱུག་རང་གིས་གཟུགས་སྟོན་པར་འགྱུར་རོ། །འདོད་པ་ཐམས་ཅད་ཀྱི་མཆོག་སྦྱིན་པར་མཛད་དོ། །འདི་ནི་གྲུབ་པའི་མཆོག་

བླ་ན་མེད་པ་སྟེ། མ་བསྒྲུབས་པར་ལས་བྱེད་པའོ། །དེ་ནས་དབང་དུ་བྱ་བར་འདོད་པས་མེ་ཏོག་པདྨ་ལ་ལན་བརྒྱ་རྩ་བརྒྱད་བཟླས་ལ་འཕགས་པ་སྤྱན་རས་གཟིགས་དབང་ཕྱུག་ལ་ཕུལ་ཏེ། གང་གི་མིང་ནས་བརྗོད་པ་དེ་དབང་དུ་འགྱུར་རོ། །སྣ་མའི་མེ་ཏོག་ལ་ལན་བརྒྱ་རྩ་བརྒྱད་བཟླས་

ཏེ། འཕགས་པ་སྤྱན་རས་གཟིགས་དབང་ཕྱུག་ལ་ཕུལ་ལ། ཡང་ལན་བདུན་བཟླས་ནས་མེ་ཏོག་སྙིང་པོ་བླངས་ནས་གང་ལ་བྱིན་པ་དེ་དབང་དུ་འགྱུར་རོ། །གདོན་གྱིས་ཟིན་པ་ལ་བྱིན་ན་གདོན་ཐམས་ཅད་ལས་ཡོངས་སུ་གྲོལ་བར་འགྱུར་རོ། །ནད་ཀྱིས་ཐེགས་པ་ལ་བྱིན་ན་ནད་

ཐམས་ཅད་ཡོངས་སུ་གྲོལ་བར་འགྱུར་རོ། །རྒྱལ་པོའི་སྒོར་གཏོར་ན་རྒྱལ་པོ་བཙུན་མོའི་འཁོར་དང་བཅས་པ་དབང་དུ་འགྱུར་རོ། །མི་རོ་བསྲེགས་པའི་སའི་སྟེང་དུ་གཏོར་ན། སེམས་ཅན་དེ་སེམས་ཅན་དམྱལ་བ་ལས་ཡོངས་སུ་གྲོལ་བར་འགྱུར་རོ། །མནར་མེད་པ་ན་གནས་

เล่ม ๙๒ · หน้า 102b

པའི་སེམས་ཅན་ལ་གཏོར་ན་སྐད་ཅིག་དེ་ལ་ཡོངས་སུ་གྲོལ་བར་འགྱུར། ཉལ་བའི་སྔས་སུ་བཞག་ན་རྨི་ལམ་ཆེན་པོ་མཐོང་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་སྐུ་སྟོན་པར་མཛད་ཅིང་ཡིད་དུ་འོང་བ་ཐམས་ཅད་གསུང་བར་འགྱུར་རོ། །སྐྱེས་པའམ་བུད་མེད་གང་གི་སྟེང་དུ་

གཏོར་བ་དེ་དབང་དུ་འགྱུར་ཞིང་གྲིབ་མ་བཞིན་ཕྱི་བཞིན་འབྲང་བར་འགྱུར་རོ། །རྒྱལ་པོའི་སྟེང་དུ་གཏོར་ན་དེ་བཞིན་དུ་འགྱུར་རོ། །ལྷའི་གཟུགས་བརྙན་གྱི་སྟེང་དུ་བཞག་ན་འགུགས་པར་འགྱུར་ཞིང་ལས་ཐམས་ཅད་བྱེད་པར་འགྱུར་རོ། །མིག་སྨན་སྒྲུབ་པར་འདོད་པས་རས་ཀྱི་སྐུ་གཟུགས་

ཀྱི་སྤྱན་སྔར་མིག་སྨན་ལྡོང་རོས་ལ་སྟོང་རྩ་བརྒྱད་བཟླས་ནས་གྲུབ་པའི་རྟགས་གསུམ་སྟོན་པར་འགྱུར་ཏེ། འབར་བ་དང་དབུ་བ་འབྱུང་བ་དང་། དུད་པ་འབྱུང་བར་འགྱུར་ཏེ། དེས་མིག་ལ་བསྐུས་ན་མི་སྣང་བར་འགྱུར་རོ། །གཏེར་ཐམས་ཅད་མཐོང་བར་འགྱུར་རོ། །གནོད་སྦྱིན་གྱི་གནས་

ཐམས་ཅད་མཐོང་བར་འགྱུར་རོ། །དཔྲལ་བར་ཐིག་ལེ་བྱས་ན་ཕུགས་ཐམས་ཅད་དུ་འཇུག་པར་འགྱུར། སྒོ་ཐམས་ཅད་དང་འཁྲུལ་འཁོར་ཐམས་ཅད་འབྱེ་བར་འགྱུར། ཡན་ལག་དང་ཉིང་ལག་ལ་བསྐུས་ན་ནམ་མཁའ་ལ་འགྲོ་བར་འགྱུར། སྤྱི་བོར་ཐིག་ལེ་བྱས་ན་འཕགས་པ་སྤྱན་

རས་གཟིགས་དབང་ཕྱུག་རྟག་ཏུ་མཆོག་སྦྱིན་པར་འགྱུར་རོ། །མིག་ལ་བྱུགས་ན། ཁྱབ་འཇུག་དང་དབང་ཕྱུག་ཆེན་པོ་ལ་སོགས་པ་ལྷ་རྣམས་རྟག་ཏུ་ཕྱི་བཞིན་འབྲང་བར་འགྱུར་ཞིང་། དགོས་པ་ཐམས་ཅད་འགྲུབ་པར་བྱེད་དོ། །མཚན་མོ་མིག་ལ་བསྐུས་ན་ཉིན་མོ་བཞིན་དུ་མཐོང་བར་

འགྱུར་ཞིང་། གཏེར་ཐམས་ཅད་འབྱུང་བར་འགྱུར་ཏེ། ཁ་ཕུག་ནས་དོར་བར་བྱའོ། །རང་གི་ལུས་ལ་བྱུགས་ན་ཇི་སྲིད་འཚོའི་བར་དུ་གོ་ཆ་བགོས་པའི་ལུས་སུ་འགྱུར། གནོད་སྦྱིན་དང་སྲིན་པོ་ལ་སོགས་པས་མི་མཐོང་བར་འགྱུར་ཞིང་ལས་ཐམས་ཅད་བྱེད་པར་འགྱུར་ཏེ། ཚེ་

བསྐལ་པ་སྟོང་ཐུབ་པར་འགྱུར་རོ། །ཡང་ན་བཟའ་བ་དང་སྙིང་གར་བསྐུ་བ་བྱས་ན་ནག་པོ་ཆེན་པོའི་གཟུགས་སུ་འགྱུར་ཞིང་ལྷ་ཐམས་ཅད་ཀྱི་གཟུགས་སྟོན་པར་འགྱུར་བ་ནས། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོའི་གཟུགས་དང་སྣ་ཚོགས་མང་

เล่ม ๙๒ · หน้า 103a

པོ་སྟོན་པར་འགྱུར། ཟླ་བ་དང་ཉི་མ་སྟོན་པར་འགྱུར་རོ། །ལྡོང་རོས་དང་། གི་ཝཾ་དང་། སཽ་བི་རཱ་ཀ་དང་། གུར་གུམ་དང་། ཀྲ་ཀུ་དྷ་ལ་དོན་ཡོད་པར་གྲུབ་པ་ཁྲི་བཟླས་དོན་ཡོད་པའི་ཞགས་པའི་སྙིང་པོ་སྟོང་རྩ་བརྒྱད་བཟླས་ཁྲོ་བོའི་རྒྱལ་པོ་བརྒྱ་རྩ་བརྒྱད་བཟླས་པ་

བྱས་ཏེ། ཐམས་ཅད་དུ་མི་སྨྲ་བར་བྱ་ཞིང་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་བཏགས་ལ། རས་ཀྱི་སྐུ་གཟུགས་ལ་མངོན་དུ་ཕྱོགས་ཏེ། གཙང་མས་གོས་གཙང་མ་བགོས་ལ་ཚེས་བཅྭ་ལྔ་ཉ་ལ་ཉིན་ཞག་གཅིག་སྨྱུང་བ་བྱས་ནས་ཕྱེ་མ་ཞིབ་ཏུ་བཏགས་ཏེ། ཡང་

དོན་ཡོད་པའི་ཞགས་པའི་སྙིང་པོ་དང་། ཁྲོ་བོའི་རྒྱལ་པོ་དང་། དོན་ཡོད་པའི་གྲུབ་པའི་རིག་སྔགས་ཀྱི་རྒྱལ་པོ་ལན་བརྒྱ་རྩ་བརྒྱད་བཟླས་བརྗོད་བྱས་ལ། འཕགས་པ་སྤྱན་རས་གཟིགས་དབང་ཕྱུག་གི་ཕྱག་ཏུ་བཞག་སྟེ། མཆོད་པ་ཆེན་པོ་བྱས་ནས་རས་ཀྱི་སྐུ་གཟུགས་ལ་མཆོད་པ་བྱས་

ལ་ཉིན་ཞག་གཅིག་སྨྱུང་བ་བྱས་ཏེ། རས་ཀྱི་སྐུ་གཟུགས་ཀྱི་སྤྱན་སྔར་སྐྱིལ་མོ་ཀྲུང་དུ་འདུག་པ་ལ་དོན་ཡོད་པའི་ཞགས་པའི་ཕྱག་རྒྱ་ལན་ཉི་ཤུ་རྩ་གཅིག་བྱ། དོན་ཡོད་པའི་ཞགས་པའི་སྙིང་པོ་ལན་ཉི་ཤུ་རྩ་གཅིག་བཟླས་པར་བྱ་སྟེ། བཟླས་བརྗོད་ཀྱི་ཕྱག་རྒྱ་བྱས་ལ་ཁྲོ་བོའི་གསང་སྔགས་

ལན་བདུན་བཟླས་ཏེ། དེའི་འོག་ཏུ་མིག་ལ་བསྐུས་ནས་དོན་ཡོད་པར་གྲུབ་པའི་གཟུངས་བཟླས་པར་བྱས་ན། བསྐུས་པ་ཙམ་གྱིས་འཕགས་པ་སྤྱན་རས་གཟིགས་དབང་ཕྱུག་རི་བོ་པོ་ཊ་ལ་དང་བཅས་གཞལ་མེད་ཁང་དང་བཅས་བྱང་ཆུབ་སེམས་དཔའི་ཚོགས་གཞལ་མེད་ཁང་དང་བཅས་པའི་

རི་བོ་པོ་ཊ་ལ་ན་གནས་པ་མཐོང་བར་འགྱུར་རོ། །བདེ་བ་ཅན་གྱི་འཇིག་རྟེན་གྱི་ཁ་མས་མཐོང་བར་འགྱུར་ཞིང་དེ་བཞིན་གཤེགས་པ་འོད་དཔག་མེད་ཆོས་འཆད་པ་མཐོང་བར་འགྱུར། ཆོས་བཤད་པ་དེ་ཡང་ཐོས་པར་འགྱུར་རོ། །ཕྱོགས་བཅུའི་དེ་བཞིན་གཤེགས་པ་བྱང་ཆུབ་སེམས་དཔའི་

ཚོགས་དང་བཅས་ཉན་ཐོས་ཀྱི་དགེ་འདུན་དང་བཅས་སངས་རྒྱས་ཀྱི་ཞིང་གཞལ་མེད་ཁང་དང་བཅས་པ་མཐོང་བར་འགྱུར་ཞིང་ཆོས་འཆད་པའི་གསུང་གི་སྒྲ་དེ་ཡང་ཐོས་པར་འགྱུར་རོ། །འདི་ལྟར་རིགས་ངན་གྱི་རིགས་སུ་སྐྱེས་པ་དང་། མནར་མེད་པ་ལ་གཞོལ་བ་དང་། མཚམས་མེད་པ་

เล่ม ๙๒ · หน้า 103b

ལྔ་བྱེད་པ་གང་ཡིན་པ་ཐམས་ཅད་ཀྱང་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་དང་འཕགས་པ་སྤྱན་རས་གཟིགས་དབང་ཕྱུག་གི་ཐུགས་རྗེ་དགོངས་པར་འགྱུར་ཞིང་རྨི་ལམ་དུ་སྟོན་པར་མཛད་དོ། །སྡིག་པ་དང་སྒྲིབ་པ་ཐམས་ཅད་རྣམ་པར་སྦྱོང་བར་འགྱུར། མཆོག་ཐམས་

ཅད་སྦྱིན་པར་འགྱུར། དོན་ཡོད་པའི་ཞགས་པའི་སྙིང་པོའི་དངོས་གྲུབ་སྦྱིན་པར་འགྱུར། ལྷའི་ལོ་སྟོང་དུ་འཚོ་བར་འགྱུར་ཞིང་ལྷའི་བདེ་བ་ཉམས་སུ་མྱོང་བར་འགྱུར། ནད་ཀྱིས་ཐེབས་པ་ཐམས་ཅད་ལ་མིག་སྨན་འདིས་བསྐུས་ན་ནད་ཐམས་ཅད་ཞི་བར་འགྱུར། རིམས་ཐམས་ཅད་སེལ་

བར་འགྱུར་རོ། །དུག་ཐམས་ཅད་ལ་བསྐུས་པ་ཙམ་གྱིས་དུག་མེད་པར་འགྱུར་རོ། །འཇིགས་པ་ཐམས་ཅད་ལ་མིག་ལ་བསྐུས་ན་མི་མཐོང་བར་འགྱུར། ཕྱིར་རྒོལ་བ་དང་དགྲ་བོ་དང་གཡོ་ཅན་དང་ཆོམ་པོ་དང་རྐུན་པོ་ཐམས་ཅད་ཀྱིས་མི་མཐོང་བར་འགྱུར་རོ། །མཚོན་གདབ་པའི་འཇིགས་

པ་འབྱུང་བར་མི་འགྱུར། འཐབ་པ་དང་རྩོད་པ་དང་ཁྲག་ཁྲུག་ལ་མིག་ལ་བསྐུས་ན་ཐམས་ཅད་ལས་རྒྱལ་ཞིང་ལན་ཐེབས་པར་འགྱུར་རོ། །གཡུལ་ངོ་ཐམས་ཅད་དུ་མིག་ལ་བསྐུས་ན་གཡུལ་འགྱེད་པ་ལས་རྒྱལ་བར་འགྱུར་ཞིང་དཔུང་གི་མཆོག་རྒྱལ་བར་འགྱུར་རོ། །རྒྱལ་པོའི་ཕོ་

བྲང་དུ་འགྲོ་བའི་ཚེ་མིག་ལ་བསྐུས་ན་རྒྱལ་པོ་བཙུན་མོའི་འཁོར་དང་བཅས་པ་དབང་དུ་འགྱུར་རོ། །མི་སྨྲ་བར་གྲོང་ཁྱེར་དུ་སོང་ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་གྲོང་ཁྱེར་ན་གནས་སོ་ཅོག་ཐམས་ཅད་དབང་དུ་འགྱུར་རོ། །མིག་གཡས་པ་ལ་བསྐུས་ན་རིགས་བཞིའི་

འཇིག་རྟེན་གང་མཐོང་བ་དེ་ཐམས་ཅད་དབང་དུ་འགྱུར་རོ། །མིག་གཡོན་པ་ལ་བསྐུས་ན་རིགས་ངན་ཐམས་ཅད་དབང་དུ་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་ཕྱག་གཡས་པ་ནས་བཟུང་སྟེ། དོན་ཡོད་པ་གྲུབ་བའི་རིག་སྔགས་ཀྱི་རྒྱལ་པོ་ལན་སྟོང་རྩ་བརྒྱད་བཟླས་

བརྗོད་བྱ་སྟེ། འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱེད་ན་དེ་ནས་དོན་ཡོད་པའི་ཞགས་པའི་སྙིང་པོ་དང་། ཁྲོ་བོའི་རྒྱལ་པོ་དང་། གཟུངས་ཐམས་ཅད་སོ་སོར་ལན་སྟོང་ཕྲག་བརྒྱ་བརྒྱ་བཟླས་པར་འགྱུར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

เล่ม ๙๒ · หน้า 104a

སངས་རྒྱས་བྱེ་བ་སྟོང་ཕྲག་དྲུག་ཅུའི་དྲུང་དུ་དགེ་བའི་རྩ་བ་བསྐྱེད་པར་འགྱུར་ཐམས་ཅད་ཀྱིས་མིང་བཟུང་བ་བྱས་པར་འགྱུར། དེ་བཞིན་གཤེགས་པ་སྟོང་མཉེས་པར་བྱས་པར་འགྱུར། དེ་བཞིན་གཤེགས་པ་སྟོང་ཕྲག་དྲུག་ཅུ་རྩ་བཞི་མངོན་སུམ་དུ་མཐོང་བ་ཐོབ་པར་འགྱུར།

འཇིག་རྟེན་པའི་དོན་ཐམས་ཅད་འགྲུབ་པར་འགྱུར། སྔོན་གྱི་སྒྲིབ་པས་མནར་མེད་པའི་གནས་སུ་འགྲོ་བ་ཡོངས་སུ་དག་པར་འགྱུར། ནམ་ཡང་ངན་སོང་དུ་འགྲོ་བར་མི་འགྱུར། ཚེ་རབས་ཚེ་རབས་སུ་སྐྱེ་བ་དྲན་པར་འགྱུར། ལྷ་ཐམས་ཅད་ཀྱང་མཆོག་སྦྱིན་པར་འགྱུར་ཞིང་རྟག་ཏུ་

བསྲུང་བ་དང་། བསྐྱབ་པ་དང་། སྦ་བར་བྱེད་པར་འགྱུར་རོ། །ཕྱག་གཡོན་པ་མནན་ཏེ་ལན་སྟོང་རྩ་བརྒྱད་བཟླས་བརྗོད་བྱས་ན་བཟླས་པ་ཙམ་གྱི་མོད་ལ་ལྷ་དང་། ཀླུ་དང་། གནོད་སྦྱིན་དང་། སྲིན་པོ་ལ་སོགས་པ་བཀུག་པར་འགྱུར་ཞིང་ཐམས་ཅད་དབང་དུ་འགྱུར་ཏེ་གནས་སོ། །གང་གི་

ཚེ་དགོས་པ་བྱུང་བ་དེའི་ཚེ་དོན་ཡོད་པར་གྲུབ་པའི་རིག་སྔགས་ཀྱི་རྒྱལ་པོ་ལན་བདུན་བཟླས་པ་བྱས་ན་ལྷ་དང་ཀླུ་ལ་སོགས་པ་ཐམས་ཅད་ཀྱང་ལས་ཐམས་ཅད་བྱེད་ཅིང་རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་འགྱུར་རོ། །ལྟེ་བའི་གནས་སུ་མནན་ཏེ་ཀླུ་ལ་སོགས་པ་ཐམས་ཅད་ཆར་གྱི་རྒྱུན་

འབེབས་པར་འགྱུར་རོ། །འཛམ་བུའི་གླིང་མཐའ་དག་ཚིམ་པར་བྱེད་པར་འགྱུར་རོ་སྙམ་དུ་ལན་བརྒྱ་རྩ་བརྒྱད་བཟླས་ན་གང་དང་གང་དུ་སོང་བ་དེར་སྐྱེས་པའམ། བུད་མེད་དམ། རྒྱལ་པོའམ། རྒྱལ་མོའམ། དགེ་སྦྱོང་ངམ། བྲམ་ཟེའམ། དགེ་བསྙེན་ནམ། དགེ་བསྙེན་མ་ལ་

གང་བསམས་པ་དང་གང་བཅོལ་བ་དང་། སྨྲས་པའི་ལས་དེ་ཐམས་ཅད་བསྒྲུབ་པར་འགྱུར་རོ། །དབུ་ནས་བཟུང་སྟེ་བཟླས་ནས་ཚངས་པའི་འཇིག་རྟེན་གྱི་བར་དུ་དབང་དུ་བྱས་པར་འགྱུར་ཏེ། ཐམས་ཅད་ལ་དབང་བསྒྱུར་ཞིང་བསྒོ་བ་བཞིན་བྱེད་པར་འགྱུར་རོ། །ཐོག་མར་བཟླས་བརྗོད་

སྟོང་རྩ་བརྒྱད་བྱས་ནས་བཟླས་པར་བྱའོ། །ཞབས་གཉིས་མནན་ཏེ་སྟོང་ཕྲག་བཅུ་བཟླས་པ་བྱས་ན་སའི་འོག་ཡན་ཆད་དབང་དུ་བྱས་པར་འགྱུར་ཞིང་ལས་ཐམས་ཅད་བྱེད་པར་འགྱུར་ཏེ། མངག་གཞུག་ཐམས་ཅད་བྱེད་པར་འགྱུར་རོ། །པདྨ་ལ་སྟོང་རྩ་བརྒྱད་བཟླས་ནས་པདྨའི་

เล่ม ๙๒ · หน้า 104b

མཚེའུར་བོར་ན་པདྨ་ཟད་མི་ཤེས་པར་འབྱུང་ཞིང་པདྨ་དུས་ཐམས་ཅད་པར་འགྱུར་རོ། །ཨུཏྤལ་ལ་ལན་སྟོང་རྩ་བརྒྱད་བཟླས་ནས་ཨུཏྤ་ལའི་མཚེ་འུར་བོར་ན་ཨུཏྤ་ལ་སྔོན་པོ་ཟད་མི་ཤེས་པ་འབྱུང་བར་འགྱུར་ཞིང་ནམ་ཡང་ཉམས་པར་མི་འགྱུར་ཏེ། དུས་ཐམས་ཅད་དུ་མེ་ཏོག་འབྱུང་

བར་འགྱུར་རོ། །དེ་བཞིན་དུ་སྣ་མའི་མེ་ཏོག་དང་གན་དྷ་བཱརྵི་ཀ་དང་། ཡཱུ་ཐི་ཀ་དང་། ན་བ་མཱ་ལཱའི་མེ་ཏོག་རྣམས་ཀྱང་དུས་ཐམས་ཅད་དུ་མེ་ཏོག་འབྱུང་བར་འགྱུར་ཞིང་ཟད་མི་ཤེས་པར་འགྱུར་རོ། །འབྲས་བུ་དང་། མེ་ཏོག་ལ་ལན་བརྒྱ་རྩ་བརྒྱད་བཟླས་ཏེ་སྐྱེད་མོས་ཚལ་ལམ་

ནགས་ཚལ་གྱི་ནང་དུ་གཏོར་ན་མེ་ཏོག་དང་འབྲས་བུ་ཟད་མི་ཤེས་ཤིང་དུས་ཐམས་ཅད་པར་འགྱུར་རོ། །དཔལ་ཆེན་མོ་དགུག་པར་འདོད་པས་སྤྲ་ཚིལ་ལས་ལྷ་མོ་དཔལ་ཆེན་མོ་སྐྱིལ་མོ་ཀྲུང་ཕྱེད་དུ་འདུག་པ་རྒྱན་ཐམས་ཅད་ཀྱིས་བརྒྱན་པ་ལུས་བཏུད་པ་ལག་པ་ན་པདྨ་ཐོགས་པ་བྲང་རྒྱས་པ་

བྱས་ལ་འབྲས་བུ་དང་། མེ་ཏོག་དགྲམ་པར་བྱ་ཞིང་ག་བུར་དང་། གླ་རྩི་དང་། ཙནྡན་དཀར་པོས་མཆོད་པ་བྱས་ལ་རས་ཀྱི་སྐུ་གཟུགས་ཀྱི་སྤྱན་སྔར་གཞགས་པར་བྱ་ཞིང་སྔར་ཙནྡན་དཀར་པོ་ལས་བྱས་པའི་དཀྱིལ་འཁོར་གྱི་ཆོ་ག་བཞིན་བྱས་ལ་འཕགས་པ་སྤྱན་རས་གཟིགས་དབང་ཕྱུག་རས་ཀྱི་

སྐུ་གཟུགས་ལ་ཨ་ག་རུའི་བདུག་པ་དབུལ་བར་བྱ། དཔལ་ལྷ་མོ་ཆེན་མོ་ལ་ཙནྡན་དཀར་པོའི་བདུག་པ་དབུལ་བར་བྱ་ཞིང་གཉིས་ཀ་ལ་མཆོད་པ་དང་བསྙེན་བཀུར་བྱ་གཏོར་མ་དཀར་པོ་དང་དྲི་ཆབ་དབུལ་བར་བགྱི། མཆོད་ཡོན་སྟོང་དབུལ་བར་བྱ་སྟེ། རིག་སྔགས་འཆང་གཙང་

མས་དུས་གསུམ་དུ་ཁྲུས་བྱས་ཤིང་གོས་གཙང་མ་བགོས་པས་མངོན་དུ་ཕྱོགས་ཏེ། སྐྱིལ་མོ་ཀྲུང་དུ་འདུག་ནས་དོན་ཡོད་པའི་ཞགས་པའི་ཕྱག་རྒྱ་ལན་བདུན་བྱས་ལ་ཇི་སྙེད་པའི་དྲི་དང་ཕྲེང་བ་དང་མེ་ཏོག་ལ་དོན་ཡོད་པའི་ཞགས་པའི་སྙིང་པོ་ལན་བརྒྱ་རྩ་བརྒྱད་བཟླས་ཏེ། དཔལ་ལྷ་མོ་

ཆེན་མོའི་མགོ་ལ་གདགས་པར་བྱ། མེ་ཏོག་གཞན་གྱིས་མཆོད་པ་བྱ་ཞིང་ཙནྡན་དཀར་པོ་ལ་ལན་བརྒྱ་རྩ་བརྒྱད་བཟླས་པའི་བདུག་སྤོས་དབུལ་བར་བྱའོ། །དེ་ནས་རིག་སྔགས་འཆང་གིས་དོན་ཡོད་པའི་ཞགས་པའི་སྙིང་པོ་ལན་སྟོང་རྩ་བརྒྱད་བཟླས་པར་བྱ་ཞིང་ཡུངས་ཀར་རེ་རེ་ཞིང་

เล่ม ๙๒ · หน้า 105a

བཟླས་ལ་དཔལ་ལྷ་མོ་ཆེན་མོ་ལ་བསྣུན་པར་བྱས་ཏེ། སྟོང་རྩ་བརྒྱད་ཚང་བ་དང་། དཔལ་ལྷ་མོ་ཆེན་མོ་འབར་བར་འགྱུར་ཞིང་འཕགས་པ་སྤྱན་རས་གཟིགས་དབང་ཕྱུག་གི་དཔྲལ་བ་ནས་འོད་ཟེར་འབྱུང་བར་འགྱུར་རོ། །དཀྱིལ་འཁོར་གྱི་ཡོ་བྱད་གང་ཡིན་པ་ཐམས་ཅད་

གསེར་དུ་སྣང་བར་འགྱུར་རོ། །དཔལ་ལྷ་མོ་ཆེན་མོ་བཀུག་པར་འགྱུར་ཞིང་ཇི་སྲིད་འཚོའི་བར་དུ་འདའ་བར་མི་འགྱུར་རོ། །ལྷའི་དཔལ་རྗེས་སུ་སྤྱོད་པར་འདོད་ན་ཉིན་རེ་ཞིང་འཕགས་པ་སྤྱན་རས་གཟིགས་དབང་ཕྱུག་དང་དཔལ་ལྷ་མོ་ཆེན་མོ་ལ་དུས་གསུམ་དུ་མཆོད་པ་བྱ་ཞིང་མཆོད་ཡོན་

གྱི་སྣོད་ཀྱང་གཞག་པར་བྱ། དཀོན་མཆོག་གསུམ་མཆོད་པར་བྱ་སྦྱིན་པར་བྱ། ལོངས་སྤྱད་པར་བྱ། བསོད་ནམས་ཀྱང་བྱ་ཞིང་དཔལ་ལྷ་མོ་ཆེན་མོ་ལ་དུས་གསུམ་དུ་མཆོད་པར་བྱའོ། །དཔལ་ལྷ་མོ་ཆེན་མོ་རང་གི་གཟུགས་ཀྱིས་གནས་པར་འདོད་པས་དོན་ཡོད་པའི་རྒྱལ་པོ་ཁྲོ་བོའི་

སྙིང་པོ་སྟོང་རྩ་བརྒྱད་བཟླས་པར་བྱ་ཞིང་ཙནྡན་གྱི་རིལ་བུ་སྟོང་རྩ་བརྒྱད་ཀྱིས་ལུས་བདུག་པར་བྱ། ཡུངས་ཀར་སྟོང་རྩ་བརྒྱད་ཀྱིས་བསྣུན་པར་བྱ་སྟེ། ཡུངས་ཀར་སྟོང་རྩ་བརྒྱད་ཚང་བ་དང་། དཔལ་ལྷ་མོ་ཆེན་མོ་རྒྱན་ཐམས་ཅད་ཀྱིས་བརྒྱན་པ་ལྷའི་ནོར་བུ་དང་གསེར་དང་མུ་ཏིག་གི་རྒྱན་གྱིས་

བརྒྱན་པའི་ལུས་སྣང་ལ་ཞལ་པདྨ་ཁ་ཕྱེ་བ་ལྟ་བུ་སྤྱན་ཨུཏྤལ་སྔོན་པོ་ལྟར་གསལ་བ་པདྨ་བསྣམས་པ་གདན་པདྨ་ནོར་བུ་དང་། རིན་པོ་ཆེ་དང་། གསེར་མང་པོའི་པདྨའི་ཆར་འབེབས་པ་རིན་པོ་ཆེ་འབར་བའི་བུམ་པ་སྟོང་ཕྲག་བརྒྱ་ཐོགས་པ་ལྷའི་བུ་མོ་དང་གནོད་སྦྱིན་གྱི་བུ་མོ་བརྒྱ་སྟོང་མང་པོ་

ཐམས་ཅད་ལྷའི་རྒྱན་གྱིས་བརྒྱན་པས་ལུས་གསལ་ཞིང་འབར་ལ་མཛེས་པ་མང་པོས་ཡོངས་སུ་བསྐོར་བ་མདུན་དུ་འཁོད་པར་འགྱུར་ཏེ། རིག་སྔགས་འཆང་གི་འཇིགས་པར་མི་བྱ་ཞིང་སེམས་དགའ་བར་བྱས་ལ་གསང་སྔགས་འདི་ལན་བདུན་བཟླས་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་

ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བྷོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། མ་ཧཱ་ཨ་མོ་གྷ་བ་ར་དཱ་ཡ། ཏདྱ་ཐཱ། ཨོཾ་པདྨི་ནི་པདྨ་ནེ་ཏྲ་པདྨཱཾ་གེ །པདྨ་དྷ་རེ་པདྨ་བྷ་ཏེ། པདྨ་པྲི་ཡེ་པདྨ་གཽ་རཱི་པདྨཱ་པྲ་བྷེ་པདྨཱ་ས་ན་པྲ་ཏིཥྛི་ཏེ། ཨ་བ་ལོ་ཀི་ཏ་པྲི་ཡེ་བ་ར་དེ་བ་ར་དཱ་ཡི་ནི་པྲ་སི་ཏ་པྲ་སཱ་དྷ་ཡ་

เล่ม ๙๒ · หน้า 105b

ཀུ་རུ་ཀུ་རུ། ཨཱརྱ་ཨ་བ་ལོ་ཀི་ཏེ་བར་དེ་ཧུ་རུ་ཧུ་རུ་བ་ར་ང་གི་ནི་ཙ་ལ་ཙ་ལ་པདྨ་བི་བྷུ་ཥི་ཏེ་པདྨ་པྲི་ཡེ་པདྨ་གཽ་རི་པི་ཅི་ཏྲ་བི་མ་ན་དྷ་རེ་བྷ་ར་བྷ་ར་སམ་བྷ་ར་སྨ་རས་མ་ཡ། ཨརྱ་ཨ་བ་ལོ་ཀི་ཏེ་ཤྭ་རས་མེ་སཏྱ་ཨ་དྷིཥྛི་ཏ་དེ་བི་ཨ་མོ་གྷ་བ་ཤ་བར་དེ་ཧཱྃ། ན་མོ་སྟུ་ཏེ་སྭཱ་ཧཱ། ལན་བདུན་བཟླས་པ་ཙམ་

གྱིས་ལྷ་མོ་དཔལ་ཆེན་མོ་ཕྱག་བརྐྱང་སྟེ། རིག་སྔགས་འཆང་གི་སྤྱི་བོར་འཇོག་པར་འགྱུར་ཞིང་འདི་སྐད་ཅེས་ཀྱང་གསུང་བར་འགྱུར་རོ། །རིགས་ཀྱི་བུ་ཚུར་ཤོག །ཐུགས་ལས་སྐྱེས་པ་གསུང་ལས་སྐྱེས་པ་ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་ཁྲོ་བོ་དང་བཅས་པ་གྲུབ་ཀྱིས་དོན་ཡོད་

པའི་ཞགས་པས་པདྨ་དྲི་མ་མེད་པའི་དཔལ་ཞེས་བྱ་བའི་གཟུངས་ལ་ཞུགས་ཤིག་ངའི་གནས་ལ་རང་གི་ཁྱིམ་བཞིན་དུ་ལས་སུ་བྱ་བ་ཐམས་ཅད་བྱོས་ཤིག །དེ་ནས་རིག་སྔགས་འཆང་གིས་ཡང་རིག་སྔགས་དང་གསང་སྔགས་དང་གཟུངས་སྔགས་འདི་ལན་གསུམ་བཟླས་བརྗོད་བྱའོ། །

ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་བྷ་ག་བ་ཏི་མཱ་ཏྲྀ་ཛ་ནི་ཏྲི་བར་བར་ཨ་བ་ལོ་ཀི་ཏ་བ་ར་དེ་ཀྵི་རི་ནི་སྭ་བ་ཏུ། ཨམྦ་ཨམྦ་བི་པུ་ལ་ཀཱིརྟི་ཀ་རེ་པྲ་བ་ར་བྷུ་ཛེ་ཨ་མོ་གྷ་པཱ་ཤ་ཧ་སྟེ་སྭཱ་ཧཱ། དེའི་འོག་

ཏུ་ལྷ་མོ་དཔལ་ཆེན་མོའི་ནུ་མ་གཉིས་ལས་འོ་མའི་རྒྱུན་འབྱུང་བར་འགྱུར་ཏེ། འོ་མའི་རྒྱུན་དེ་ཁས་ཟེད་དེ་འཐུངས་པ་ཙམ་གྱི་མོད་ལ་ལྷའི་མེ་ཏོག་པདྨ་དང་ཀུ་མུ་ད་ལྟར་འཇམ་པའི་ལྷའི་ལུས་སུ་འགྱུར་སྐྲ་ཅུང་ཟད་འཁྱིལ་ཅིང་འཁྱིལ་ལ་མིག་ཨུཏྤལ་སྔོན་པོ་ལྟ་བུ་དང་ཚིག་གསལ་ཞིང་མི་འམ་

ཅིའི་སྒྲ་དབྱངས་དང་ལྡན་པར་འགྱུར། དོན་ཡོད་པའི་རྒྱ་མཚོའི་ནོར་བུ་ཆེན་པོ་པདྨ་ལ་རྣམ་པར་བལྟ་བའི་དཔལ་དྲི་མ་མེད་པ་ཞེས་བྱ་བའི་ཆོ་ག་ཞིབ་མོའི་རྒྱལ་པོ་མངོན་སུམ་དུ་འགྱུར། ཆོ་ག་ཞིབ་མོ་མང་པོ་འགྲུབ་པར་འགྱུར་ཚེ་ལོ་སྟོང་ཕྲག་བཅུ་ཐུབ་པར་འགྱུར། རྒྱལ་བ་འོད་དཔག་མེད་བྱང་

ཆུབ་སེམས་དཔའི་ཚོགས་དང་བཅས་པ་ཐབས་ཅིག་ཏུ་གཞལ་མེད་ཁང་མཆོག་ན་ཆོས་བགྲོ་བ་མཐོང་བར་འགྱུར། རྫུ་འཕྲུལ་གྱིས་ནམ་མཁའ་ལ་འགྲོ་བར་འགྱུར། ནོར་བུ་ཆེན་པོ་པདྨ་ལ་ལྟ་བ་ཞེས་བྱ་བ་དོན་ཡོད་པའི་ཞགས་པ་ཆེན་པོའི་འཁོར་ལོས་སྒྱུར་བར་འགྱུར། རིག་སྔགས་

เล่ม ๙๒ · หน้า 106a

འཆང་ཐམས་ཅད་ཀྱིས་འཁོར་ལོས་སྒྱུར་བའི་གཙོ་བོ་གཅིག་པུར་འགྱུར། འཕགས་པ་སྤྱན་རས་གཟིགས་དབང་ཕྱུག་གི་སྲས་སུ་འགྱུར། དེ་བཞིན་གཤེགས་པ་ཐམས་ཅད་ཀྱི་སྲས་གཅིག་པུར་འགྱུར། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་

དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་རྣམས་ཀྱི་བུའི་གཙོ་བོ་གཅིག་པུར་འགྱུར་རྒྱལ་པོ་ཆེན་པོ་བཞིའི་བུ་གཅིག་པུར་འགྱུར། ཐམས་ཅད་དུ་སྟོབས་དང་། ཕ་རོལ་གནོན་པ་དང་། བརྩོན་འགྲུས་ཐོགས་པ་མེད་པ་དང་ལྡན་པར་འགྱུར། དེ་བཞིན་གཤེགས་པ་

ཐམས་ཅད་ཀྱི་ཕྱག་རྒྱ་དང་དཀྱིལ་འཁོར་རིམ་པ་ཕྱེ་བ་རིག་སྔགས་ཀྱི་རྒྱལ་པོ་གསང་བའི་གཟུངས་ཀྱི་རྒྱལ་པོ་ཆོ་ག་ཞིབ་མོ་ཟབ་པ་དག་མངོན་སུམ་དུ་འགྱུར། ལྷ་ཐམས་ཅད་ཀྱི་གནས་དང་། ཀླུ་ཐམས་ཅད་ཀྱི་གནས་དང་། མི་འམ་ཅི་ཐམས་ཅད་ཀྱི་གནས་དང་། ཕུག་དང་ཁུང་གི་གནས་

ཐམས་ཅད་སྒོ་འབྱེ་བར་འགྱུར། གནོད་སྦྱིན་དང་སྲིན་པོའི་གནས་ཐམས་ཅད་སྒོ་འབྱེ་བར་འགྱུར་རོ། ཐམས་ཅད་དབང་དུ་འགྱུར་ཞིང་བགྱི་བ་ཅི་མཆིས་ཞེས་བྱ་བ་བྱེད་ཅིང་འདུག་པར་འགྱུར། འཇིག་རྟེན་ཐམས་ཅད་ཀྱི་སྟོན་པ་བླ་མ་གཅིག་པུ་འཇིག་རྟེན་མགོན་པོ་དང་འདྲ་བར་མཆོད་པའི་གནས་སུ་འགྱུར།

འཇིག་རྟེན་པ་དང་འཇིག་རྟེན་ལས་འདས་པའི་གསང་སྔགས་དང་དཀྱིལ་འཁོར་ཐམས་ཅད་གྲུབ་པ་ཆེན་པོར་འགྱུར། དཔལ་ལྷ་མོ་ཆེན་མོ་འཁོར་དང་བཅས་པ་ལ་སྦྱིན་སྲེག་བྱས་ན་རིག་སྔགས་འཆང་དེ་ལ་བུ་བཞིན་དུ་བྱམས་པས་རང་ཉིད་བསྙེན་བཀུར་ཡོངས་སུ་སྤྱད་བས་ཡོངས་སུ་སྤྱོད་དོ། །

འདོད་པ་ཐམས་ཅད་དང་ཡིད་དུ་འོང་བ་ཐམས་ཅད་ཀྱི་དགོས་པ་བྱེད་པར་འགྱུར་རོ། །ནོར་དང་། འབྲུ་དང་། དབྱིག་དང་། གསེར་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། ཤང་ཁ་ཤི་ལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། ལྷའི་ནོར་བུ་ཆེན་པོ་རིན་པོ་ཆེའི་བར་ཐམས་ཅད་

སྦྱིན་པར་བྱེད་དོ། །ཡུལ་ཀ་ཤི་ཀའི་གོས་བཟང་པོ་མང་པོ་སྦྱིན་པར་བྱེད་ཅིང་ལྷའི་བཟའ་བ་དང་། བཏུང་བའི་བར་དང་བདུད་རྩིའི་རོའི་བར་དུ་སྦྱིན་པར་བྱེད་དོ། །གནས་ཐམས་ཅད་དུ་སོང་བ་ན་ཡང་རྟག་ཏུ་རྒྱུན་མི་འཆད་པར་བུ་ལ་བྱམས་པའི་ཚུལ་གྱིས་རྟག་ཏུ་ཕྱི་བཞིན་འབྲང་ཞིང་འགྲོ་བར་

เล่ม ๙๒ · หน้า 106b

འགྱུར་རོ། །རིག་སྔགས་འཆང་གི་རང་གི་ཁྱིམ་ཡང་རྒྱལ་པོའི་ཕོ་བྲང་ལྕང་ལོ་ཅན་ཇི་ལྟ་བ་བཞིན་དུ་རིག་སྔགས་འཆང་གི་གཞལ་མེད་ཁང་མཆོག་ཏུ་འགྱུར་རོ། །རྣམ་ཐོས་ཀྱི་བུའི་གནས་ན་འབྱོར་པ་ཇི་ལྟ་བ་བཞིན་རྒྱས་པར་འགྱུར་རོ། །ཚངས་པ་དང་། ཁྱབ་འཇུག་དང་། དབང་

ཕྱུག་ཆེན་པོ་དུས་ཀུན་ཏུ་འོང་བར་འགྱུར་རོ། །གནོད་སྦྱིན་གྱི་སྡེ་དཔོན་ཆེན་པོ་རྡོ་རྗེ་འཆང་ཡང་རིག་སྔགས་འཆང་གི་ཚོགས་ཐམས་ཅད་དང་། གནོད་སྦྱིན་ཆེན་པོ་གསང་བ་པའི་འཁོར་རྣམས་དང་རྟག་ཏུ་རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་བ་བྱེད་པར་འགྱུར་རོ། །

དེ་བཞིན་དུ་དཔལ་ལྷ་མོ་ཆེན་མོ་འཁོར་དང་བཅས་པ་དང་རྣམ་ཐོས་ཀྱི་བུ་གནོད་སྦྱིན་བྱེ་བས་ཡོངས་སུ་བསྐོར་བས་ཉིན་མཚན་དུ་བསྲུང་བ་དང་། བསྐྱབ་པ་དང་། སྦ་བ་བྱེད་པར་འགྱུར་རོ། །དེ་ནས་དོན་ཡོད་པའི་རྒྱ་མཚོ་ནོར་བུ་ཆེན་པོ་པདྨ་ལ་ལྷའི་དཔལ་དྲི་མ་མེད་པ་ཞེས་བྱ་བ་དོན་ཡོད་པའི་

ཞགས་པའི་སྙིང་པོའི་ཆོ་ག་ཞིབ་མོའི་རྒྱལ་པོ་བཀླགས་པས་འགྲུབ་པར་འགྱུར་ཞིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བཞིའི་རྡུལ་ཕྲ་མོ་སྙེད་ལས་དགེ་བའི་རྩ་བ་བསྐྱེད་པར་འགྱུར།

བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་གིས་ལྷའི་ནོར་བུ་རིན་པོ་ཆེ་ཆེན་པོ་དང་ནོར་བུ་རིན་པོ་ཆེ་ཆེན་པོ་སྣ་བདུན་དང་། ལྷའི་གསེར་དང་།

གསེར་གྱི་མེ་ཏོག་དང་། དངུལ་གྱི་མེ་ཏོག་མང་པོ་དང་། ལྷའི་གོས་དང་། ལྷའི་རྒྱན་དང་། ལྷའི་དྲི་དང་། མེ་ཏོག་དང་། མེ་ཏོག་ཕྲེང་དང་། བྱུག་པ་རྣམས་རེ་རེ་ཞིང་འཕང་དུ་རིའི་རྒྱལ་པོ་རི་རབ་ཙམ་གྱི་ཕུང་པོ་བྱས་ནས། དེ་དག་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་

བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བཞིའི་རྡུལ་ཕྲ་མོ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དེ་བཞིན་གཤེགས་པ་རེ་རེ་ལ་ཚུལ་དེ་ལྟ་བུས་སོ་སོར་དེ་བཞིན་གཤེགས་པ་ཐམས་ཅད་ལ་ཉིན་རེ་ཞིང་། ལོ་གཅིག་གི་བར་དུ་འབུལ་བར་

เล่ม ๙๒ · หน้า 107a

བྱེད་མཆོད་པ་དང་བསྙེན་བཀུར་བྱེད་ཅིང་དེ་བཞིན་གཤེགས་པ་རེ་རེའི་སྤྱན་སྔར་དྲི་ཞིམ་པོ་དང་ལྡན་པའི་ཏིལ་མར་རྒྱ་མཚོ་ཙམ་གྱིས་བཀང་བའི་མར་མེ་བལྟམ་པར་བྱེད་པའི་བསོད་ནམས་ཀྱི་ཕུང་པོ་དང་ལྡན་པར་འགྱུར། དགེ་བའི་རྩ་བ་ཆེན་པོ་ཡོངས་སུ་བཟུང་བར་འགྱུར་རོ། །

གལ་ཏེ་དོན་ཡོད་པའི་རྒྱ་མཚོའི་ནོར་བུ་ཆེན་པོ་པདྨ་ལ་རྣམ་པར་བལྟ་བའི་དཔལ་དྲི་མ་མེད་པ་དོན་ཡོད་པའི་ཞགས་པའི་སྙིང་པོ་འདི་ཀློག་པ་དང་བཟླས་བརྗོད་བརྒྱ་རྩ་བརྒྱད་བྱེད་པ་འདི་ནི་བསོད་ནམས་ཀྱི་ཕུང་པོ་དེ་དང་ལྡན་པར་འགྱུར་ཞིང་། དགེ་བའི་རྩ་བ་ཆེན་པོ་དང་ལྡན་པར་འགྱུར། །དེ་བཞིན་

གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་འགྱུར། དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་གཟུང་བར་འགྱུར། དེ་བཞིན་གཤེགས་པ་ཐམས་ཅད་སྐུ་སྟོན་པར་འགྱུར། དེ་བཞིན་གཤེགས་པ་ཐམས་ཅད་ཀྱིས་ལུང་སྟོན་པར་འགྱུར། དཔལ་ལྷ་མོ་ཆེན་མོ་དེ་ཡང་མཆོག་

ཐམས་ཅད་སྦྱིན་པར་འགྱུར། དུས་ཀུན་ཏུ་དེའི་ཁྱིམ་དུ་དཔལ་གནས་པར་འགྱུར་ཏེ། །གང་ན་དཔལ་ལྷ་མོ་ཆེན་མོ་གནས་པ་དེར་དེ་བཞིན་གཤེགས་པ་གང་གཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བཞིའི་རྡུལ་ཕྲ་མོ་དང་མཉམ་པས་ཕྱོགས་དེ་ཉིད་དུ་གནས་པར་འགྱུར་ཏེ། དཔལ་

ལྷ་མོ་དེ་བཞིན་གཤེགས་པ་ཐམས་ཅད་ཀྱི་ཡུམ་ཡིན་པའི་ཕྱིར་རོ། །ལྷ་དང་། ཀླུ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོའི་གསང་སྔགས་དང་། ཆོ་ག་ཞིབ་མོ་དང་། ཕྱག་རྒྱ་དང་། དཀྱིལ་འཁོར་དང་། ཞི་བ་དང་། རྒྱས་པ་དང་། དྲག་ཤུལ་སྤྱོད་པ་དང་། ལས་སྣ་

ཚོགས་གཞན་དག་པས་དཔལ་ལྷ་མོ་ཆེན་མོའི་ལས་མཆོག་ཏུ་སྟོན་ཏོ། །དཔལ་ལྷ་མོ་ཆེན་མོ་ནི་བྱང་ཆུབ་སེམས་དཔའ་ཐམས་ཅད་ཀྱི་ཡུམ་ཡིན་ནོ། །དཔལ་ལྷ་མོ་ཆེན་མོ་ནི་དོན་ཡོད་པའི་མཆོག་སྦྱིན་པའོ། །དོན་ཡོད་པའི་ཞགས་པ་སྦྱིན་པའོ། །དོན་ཡོད་པའི་གྲགས་པ་རྒྱ་ཆེན་པོ་སྦྱིན་པའོ། །

དོན་ཡོད་པའི་ནམ་མཁའི་གཞལ་མེད་ཁང་འཆང་བའོ། །དོན་ཡོད་པའི་ཡོན་ཏན་བསྒྲགས་པའི་མཆོག་སྦྱིན་པའོ། །དཔལ་ལྷ་མོ་ཆེན་པོ་ནི་དོན་ཡོད་པའི་ཟླ་བ་དང་། ཉི་མའི་འོད་བྱེད་པ་གནས་སུམ་ཅུ་རྩ་གཉིས་ཀྱི་ནང་ན་དཔལ་ལྷ་མོ་ཆེན་མོ་མཆོག་ཏུ་བསྟན་ཏོ། །དེ་ནས་རིག་སྔགས་

เล่ม ๙๒ · หน้า 107b

འཆང་གཙང་མས་ཁྲུས་ལེགས་པར་བྱས་པ་དྲི་ཆུས་བསངས་ཤིང་བ་ལས་བྱུང་བ་ལྔས་བྱུགས་པ། གོས་གཙང་མ་བགོས་པས་ཁ་ཟས་གཙང་མ་བཟའ་བར་བྱ་ཞིང་ཆང་དང་། ཤ་དང་བིག་བཙོང་དང་། སྒོག་སྐྱ་དང་ཀེའུ་རྣམས་དང་། འདྲེས་པ་དང་། འབགས་པ་རྣམས་ཡོངས་སུ་སྤང་

བར་བྱ། ཁ་ཟས་ངན་པ་དང་། བཏུང་བ་ངན་པ་དང་། གོས་ངན་པ་དང་། དྲི་མ་ཅན་ཡོངས་སུ་སྤང་བར་བྱ། སེམས་ཅན་ངན་པ་དང་། རྟེན་པ་དང་། ངན་གཡོ་ཅན་དང་། གསོད་སྐྱེན་ཅན་དང་། སྐྱེ་བོ་ངན་པ་ཅན་དང་། ཁྲེལ་མེད་པ་དང་། སྙིང་རྗེ་མེད་པ་དང་། བྱམས་པ་དང་བྲལ་བ་དང་།

ཐུབ་ཆོད་ཅན་གྱི་སྐྱེ་བོ་ངན་པ་ཡོངས་སུ་སྤང་བར་བྱའོ། །གནས་ངན་པ་དང་། གནས་རྟེན་ངན་པ་དང་། བགོ་མཉེས་དང་། བཟའ་ཉེས་དང་། གྲིབ་མ་ངན་པ་ཡོངས་སུ་སྤང་བར་བྱ། གཅིག་གིས་གཅིག་འབགས་པའི་ཁ་ཟས་ངན་པ་ཡོངས་སུ་སྤང་བར་བྱ་ཞིང་དྲི་དང་བདུག་

སྤོས་ཀྱིས་བསངས་ཏེ་མི་སྨྲ་བར་བཟླས་བརྗོད་བྱ། བྱམས་པ་དང་། སྙིང་རྗེ་དང་། དགའ་བའི་སེམས་དང་ཡིད་བདེ་བར་བྱ། བཀྲ་ཤིས་ཚང་བར་བྱ་ཞིང་སྙིང་དགའ་བ་དང་། མགུ་བ་དང་། རབ་ཏུ་དགའ་བའི་སེམས་སུ་བྱས་ནས་བཟླས་བརྗོད་བྱའོ། །འཕགས་པ་སྤྱན་རས་

གཟིགས་དབང་ཕྱུག་ལ་ཨ་ག་རུའི་བདུག་པ་དབུལ་བར་བྱ། དེ་བཞིན་གཤེགས་པ་ཐམས་ཅད་ལ་ཏུ་རུ་སྐའི་བདུག་པ་དབུལ་བར་བྱ། དཔལ་ལྷ་མོ་ཆེན་མོ་ལ་ཙནྡན་གྱི་བདུག་སྤོས་དབུལ་བར་བྱ་ཞིང་དུས་ཇི་ལྟ་བའི་མེ་ཏོག་དབུལ་བར་བྱ་སྟེ། གསང་སྔགས་འདི་ལན་ཉི་ཤུ་རྩ་གཅིག་བཟླས་

ཏེ་ཐམས་ཅད་ལ་དབུལ་བར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་པུཥྤ་བི་ལོ་ཀི་ཏེ་གན་དྷ་ས་རེ། ཨ་མོ་གྷ་ཛ་ལ་སམ་བྷ་ར་ཎི་པདྨེ་ས་མ་བྷཱུ་རི་ཏ་ར་ཏ་ར་མུ་དེ་ཏེ་བྷཱུཾ་སྭཱ་ཧཱ། ལན་ཉི་ཤུ་རྩ་

གཅིག་བཟླས་ཏེ་མེ་ཏོག་དང་བདུག་སྤོས་དང་དྲི་དང་མཆོད་ཡོན་དབུལ་ལོ། །འཕགས་པ་སྤྱན་རས་གཟིགས་དབང་ཕྱུག་གི་ཞབས་དྲུང་དུ་སྟོང་རྩ་བརྒྱད་བཟླས། དོན་ཡོད་པའི་ཞགས་པའི་སྙིང་པོ་ལན་བདུན་བཟླས། ཁྲོ་བོའི་རྒྱལ་པོ་ལན་གསུམ་བཟླས་ལ་ཨ་ག་རུའི་བདུག་སྤོས་དབུལ་

เล่ม ๙๒ · หน้า 108a

བར་བྱ་ཞིང་ཅི་སྙེད་པའི་མེ་ཏོག་དབུལ་བར་བྱ། སྤོས་དང་ལྡན་པའི་ཏིལ་མར་གྱི་མར་མེ་བལྟམ་པར་བྱ་ཞིང་དེ་ཉིད་ཀྱི་ཞབས་དྲུང་དུ་སྐྱིལ་མོ་ཀྲུང་དུ་འདུག་ལ་འཕགས་པ་སྤྱན་རས་གཟིགས་དབང་ཕྱུག་ལ་བལྟས་ལ་སྙིང་པོའི་གཟུངས་ལན་བརྒྱ་རྩ་བརྒྱད་བཟླས་ལ་བཟླས་བརྗོད་ཀྱི་ཕྱག་

རྒྱ་བྱས་ཏེ། དོན་ཡོད་པའི་ཞགས་པའི་ཕྱག་རྒྱ་ལན་བདུན་བཅིང་བ་བྱས་ན། བཅིངས་བ་ཙམ་གྱི་མོད་ལ་སྐུ་གཟུགས་གཡོ་བར་འགྱུར་ཞིང་སྐུ་ཐམས་ཅད་འབར་བར་འགྱུར་རང་གི་ལུས་སྤུ་ཟིང་ཞེས་བྱེད་པར་འགྱུར། ཐོ་རངས་འཕགས་པ་སྤྱན་རས་གཟིགས་དབང་ཕྱུག་སྐུ་སྟོན་པར་འགྱུར་

ཏེ། ཡིད་ལ་བསམས་པ་ཐམས་ཅད་བཀའ་སྩོལ་བར་འགྱུར། མཆོག་ཐམས་ཅད་སྦྱིན་པར་འགྱུར། འདོད་པའི་མཆོག་ཐམས་ཅད་སྦྱིན་པར་འགྱུར། དབུགས་ཀྱང་འབྱིན་པར་འགྱུར། ཡིད་དུ་འོང་བ་ཐམས་ཅད་ཡོངས་སུ་རྫོགས་པར་བྱེད། ཚེ་འདི་ཉིད་ལ་ནད་ཐམས་ཅད་དང་བྲལ་བར་

འགྱུར་རོ། །དགེ་བའི་རྩ་བའི་ཚོགས་ཐམས་ཅད་དང་ལྡན་པར་འགྱུར། སྒྲིབ་པ་དང་སྡིག་པ་ཐམས་ཅད་ཟད་ཅིང་མཐར་ཐུག་པར་འགྱུར། ཉོན་མོངས་པ་ཐམས་ཅད་ལས་ཡོངས་སུ་གྲོལ་བར་འགྱུར། ཕས་ཀྱི་རྒོལ་བ་དང་། དགྲ་བོ་ཐམས་ཅད་འཇིག་བར་འགྱུར་ཞིང་མི་ཚུགས་པར་འགྱུར་

གཡུལ་ངོར་འཇུག་པའི་ཚེ་རིག་སྔགས་ཀྱི་རྒྱལ་པོ་འདི་ཡུངས་ཀར་ལ་ལན་ཉི་ཤུ་རྩ་གཅིག་བཟླས་ནས་དམག་གི་ནང་དུ་གཏོར་བ་བྱས་ན་ཐམས་ཅད་རེངས་པར་བྱས་པ་དང་རྨུགས་པར་བྱས་པར་འགྱུར་རོ། །འདིའི་སྙིང་པོ་དང་གསང་སྔགས་ནི་འདི་ཡིན་ནོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་

ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་མོ་གྷ་བཱ་ཤ་ཧྲྀ་ད་ཡ་པདྨེ་ནི་བ་ར་དེ་ཛྭ་ལ་ཛྭ་ལ་པྲ་ས་རི་ཏ་པདྨ་བྷུ་ཛེ་སྭཱ་ཧཱ། སྙིང་པོའི་རིག་སྔགས་སོ། །ཨོཾ་ཨ་བ་ལོ་ཀི་ཏེ་པདྨེ་ནི་བ་རཱང་གི་ནི་ཏུ་རུ་ཏུ་རུ་ཧཱུཾ་སྭཱ་ཧཱ། ཉེ་བའི་སྙིང་པོའི་

གཟུངས་སོ། །དོན་ཡོད་པའི་རྒྱ་མཚོའི་ནོར་བུ་པདྨེ་རྣམ་པར་བལྟ་བའི་དཔལ་དྲི་མ་མེད་པ་དོན་ཡོད་པའི་ཞགས་པའི་སྙིང་པོའི་ཆོ་ག་ཞིབ་མོའི་གཟུངས་འདི་རྟག་ཏུ་བཟླས་བརྗོད་བྱས་ན་མཚམས་མེད་པ་ལྔ་ཟད་པར་འགྱུར། དཔལ་ལྷ་མོ་ཆེན་མོ་རྟག་ཏུ་རྒྱུན་མི་འཆད་པར་མཆོག་སྦྱིན་པར་

เล่ม ๙๒ · หน้า 108b

འགྱུར། འཕགས་པ་སྤྱན་རས་གཟིགས་དབང་ཕྱུག་དུས་ཀུན་ཏུ་སྐུ་སྟོན་པར་བཞེད་པར་འགྱུར། དེའི་ལུས་ལ་དུག་ཐམས་ཅད་ཀྱིས་མི་ཚུགས་པར་འགྱུར། འཇིགས་པ་ཆེན་པོ་མི་བཟད་པ་བརྒྱད་ལས་ཡོངས་སུ་གྲོལ་བར་འགྱུར། རིམས་ཐམས་ཅད་དང་ནད་ཐམས་ཅད་ཀྱིས་

མི་ཚུགས་པར་འགྱུར་རོ། །གདོན་ཐམས་ཅད་ལ་ཚོན་སྣ་ལྔའི་སྲད་བུ་ལ་ལན་ཉི་ཤུ་རྩ་གཅིག་བཟླས་ཏེ། མདུད་པ་ཉི་ཤུ་རྩ་གཅིག་པོར་ལ་གུ་གུལ་གྱིས་བདུགས་ཏེ། མགུལ་དུ་བཏགས་ན་གདོན་ཐམས་ཅད་ལས་ཡོངས་སུ་གྲོལ་བར་འགྱུར་རོ། །གལ་ཏེ་ནག་པོ་ཆེན་པོ་དང་མ་

མོའི་ཚོགས་འོངས་ཏེ་རྒྱས་བཏབ་པ་གང་ཡིན་པའང་གདོན་ཐམས་ཅད་ལས་ཡོངས་སུ་ཐར་བར་འགྱུར་རོ། །སྐུད་པ་ནག་པོས་རིམས་ཉིན་གཅིག་པ་ལས་ཡོངས་སུ་གྲོལ་བར་འགྱུར། གཞན་དག་ལ་ནི་ཐམས་ཅད་དུ་སྲད་བུ་དཀར་པོས་བསལ་བར་བྱའོ། །འཐབ་པ་དང་། རྩོད་པ་

དང་། ཁྲག་ཁྲུག་ཐམས་ཅད་ལ་གི་ཝང་ལ་ལན་ཉི་ཤུ་རྩ་གཅིག་བཟླས་ཏེ། ཐིག་ལེ་བྱས་ན་ཐམས་ཅད་དུ་ཐོགས་པ་མེད་པར་འགྱུར་རོ། །སྙིང་གར་ཐིག་ལེ་བྱས་ན་གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་ལ་སོགས་པ་ཐམས་ཅད་ཀྱིས་མི་མཐོང་བར་འགྱུར་རོ། །

ལག་མཐིལ་ལ་ཐིག་ལེ་བྱས་ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་གང་ལ་རེག་པ་དབང་དུ་འགྱུར་རོ། །སྨིན་མཚམས་སུ་ཐིག་ལེ་བྱས་ན་རྒྱལ་པོ་བཙུན་མོའི་འཁོར་དང་བཅས་པ་དབང་དུ་འགྱུར་རོ། །མགུལ་བར་བྱུགས་ན་རྗེའུ་རིགས་ཐམས་ཅད་དབང་དུ་འགྱུར་རོ། །

དཔུང་པ་གཉིས་ལ་བྱུགས་ན་རྒྱལ་རིགས་ཐམས་ཅད་དབང་དུ་འགྱུར་རོ། །དཔྲལ་བའི་སྐྲ་མཚམས་སུ་ཐིག་ལེ་བྱས་ན་བྲམ་ཟེ་ཐམས་ཅད་དབང་དུ་འགྱུར་རོ། །ལྟེ་བའི་གནས་སུ་ཐིག་ལེ་བྱས་ན་དམངས་རིགས་ཐམས་ཅད་དབང་དུ་འགྱུར་རོ། །རྐང་པའི་རྗེ་ངར་ལ་བྱུགས་ན་དཔག་ཚད་བརྒྱར་

ངལ་བ་མེད་པར་འགྲོ་ཞིང་སླར་ཡང་འོང་བར་འགྱུར་རོ། །རྐང་མཐིལ་ལ་བསྐུས་ན། ཆུ་ཀླུང་ཆེན་པོའི་ཕ་རོལ་ཏུ་ཕྱིན་པར་འགྱུར་ཞིང་རྒྱ་མཚོའི་བར་དུ་རྒལ་བར་འགྱུར་རོ། །དཔུང་པ་གཉིས་ལ་བྱུགས་ན། གྱད་ཀྱིས་མི་ཐུབ་པར་འགྱུར་རོ། །པུས་མོ་གཉིས་ལ་བྱུགས་ན་མེའི་ཕུང་པོ་འབར་ཞིང་

เล่ม ๙๒ · หน้า 109a

རབ་ཏུ་འབར་བར་ཞུགས་ན་ཙནྡན་དང་པུ་ཤེལ་ཙེ་བཞིན་དུ་བསིལ་བར་འགྱུར་རོ། །བ་སེར་སྐྱའི་འོ་མ་དང་སྦྱར་ཏེ་མིག་ལ་བསྐུས་ན་མཚན་མོ་ཡང་ཉིན་མོ་བཞིན་དུ་སྣང་བར་འགྱུར་རོ། །གཏེར་ཐམས་ཅད་འབར་བར་འགྱུར་ཞིང་གལ་ཏེ་བསྐལ་པ་སྟོང་དུ་བཞག་པ་ཞིག་ནའང་འབྱུང་བར་འགྱུར་

རོ། །དེ་བཞིན་དུ་ལྟོ་བར་བསྐུས་ན་ཇི་སྲིད་དུ་ལྟོ་ཆུས་མ་བཀྲུས་པ་དེ་སྲིད་དུ་ཁ་ཟས་དང་བཏུང་བ་མི་འདོད་པར་འགྱུར་རོ། །ཕོ་མཚན་ལ་བསྐུས་ན་ཁུ་བ་འགགས་པར་འགྱུར་རོ། །བ་ལས་བྱུང་བ་ལྔ་དང་བསྲེས་ཏེ་འཐུངས་ན་ལུས་དག་ཅིང་དྲི་མ་མེད་ལ་གཙང་ཞིང་སྤྱོད་པ་གཙང་བ་དང་ལྡན་པར་འགྱུར་

རོ། །བགོ་ཉེས་དང་། བཟའ་ཉེས་དང་། གྲི་བམ་ངན་པ་དང་། བལྟ་ཉེས་སུ་མི་འགྱུར། འཇིགས་པ་ཐམས་ཅད་ལས་ཡོངས་སུ་གྲོལ་བར་འགྱུར། སྡིག་པ་དང་སྒྲིབ་པ་ཐམས་ཅད་ལས་ཡོངས་སུ་གྲོལ་བར་འགྱུར། རྨི་ལམ་ངན་པ་དང་། ལྟས་ངན་པ་དང་། བཀྲ་མི་ཤིས་པའི་དངོས་པོ་

ཐམས་ཅད་འཇིག་པར་འགྱུར། དུག་དང་དབྱིག་དུག་དང་བྱད་ཐམས་ཅད་འཇིག་པར་འགྱུར། གསང་སྔགས་དང་སྦྱོར་བ་དང་གཏོར་མ་རྣམས་འཇིག་པར་འགྱུར། འཐབ་པ་དང་རྩོད་པ་དང་ཁྲག་ཁྲུག་རྣམས་ཀྱི་ལན་ཐེབས་པར་འགྱུར་ཞིང་ཐམས་ཅད་དུ་རྒྱལ་བར་འགྱུར། ཕས་ཀྱི་

རྒོལ་བ་དང་། མི་མཛའ་བ་དང་། ཕ་རོལ་གྱི་དཔུང་གི་འཇིགས་པ་ཐམས་ཅད་འབྱུང་བར་མི་འགྱུར་རོ། །ཞུན་མར་དང་། སྦྲང་རྩི་དང་ལྷན་ཅིག་སྦྱར་ཏེ་ཐོ་རངས་ཀྱི་དུས་སུ་མི་སྨྲ་བར་བྱས་ནས། ཟོས་ན་བཀླགས་པས་ཚིགས་སུ་བཅད་པ་སྟོང་འཛིན་པར་འགྱུར་རོ། །སྦྱོར་བ་ཞག་བདུན་དུ་བྱས་

ན་བསྟན་བཅོས་ཐམས་ཅད་ལ་མངོན་དུ་འགྱུར་རོ། །ཞག་ཉི་ཤུ་རྩ་གཅིག་ཏུ་སྦྱོར་བ་བྱས་ན་གསང་སྔགས་ཀྱི་ཆོ་ག་ཞིབ་མོ་དང་དཀྱིལ་འཁོར་དང་གསང་སྔགས་དང་ཕྱག་རྒྱ་རིམ་པར་ཕྱེ་བ་ཐམས་ཅད་འགྲུབ་པར་འགྱུར། ཟླ་བ་གཅིག་ཏུ་སྦྱོར་བ་བྱས་ན་ཐོས་པ་མང་པོ་རྒྱ་མཚོ་བསགས་པར་འགྱུར་

རོ། །སྦྱོར་བ་ལོ་གཅིག་གི་བར་དུ་བྱས་ན་ཚེ་ལོ་སྟོང་ཐུབ་པར་འགྱུར་རོ། །འཇིག་རྟེན་ཐམས་ཅད་ན་བླ་མ་གཅིག་པུར་འགྱུར་ཞིང་དགེ་བ་དང་ཚིག་བཙུན་པར་ཡང་འགྱུར་རོ། །ཏིལ་མར་དང་ལྷན་ཅིག་བསྐོལ་ནས་མགོ་ལ་བསྐུས་ན་སྐྲ་ཅུང་ཟད་འཁྱིལ་ཅིང་ལྕང་ལོ་ཅན་དུ་འགྱུར་རོ། །བཞིན་གྱི་

เล่ม ๙๒ · หน้า 109b

དཀྱིལ་འཁོར་ལ་བསྐུས་ན་སྟོན་ཀའི་ཟླ་བ་ཉ་བ་དང་མཚུངས་པར་འགྱུར་ཞིང་མེ་ཏོག་པདྨ་དང་ཀུ་མུ་ད་ལྟར་འཇམ་པར་འགྱུར་ལུས་ཐམས་ཅད་ལ་བྱུགས་ན་མར་དང་འདྲ་བར་འཇམ་པོར་འགྱུར་ཞིང་རྐང་ལག་ཤིན་ཏུ་གཞོན་ཤ་ཅན་དུ་འགྱུར། རྣ་བ་ལ་བྱུགས་ན་རྣ་བ་ཇི་ཙམ་འདོད་པ་སྐྱེ་བར་འགྱུར།

སྣ་ནས་བཏང་ན་ཀླད་པའི་ནད་དོ་ཅོག་འཇིག་པར་འགྱུར་ཞིང་སྣ་བས་དང་མཆིལ་མ་འབྱུང་བར་མི་འགྱུར། ལྷའི་སྤོས་ཀྱི་དྲི་མནམ་པར་འགྱུར་ཞིང་ནམ་ཡང་ཡིད་དུ་མི་འོང་བའི་དྲི་མནམ་པར་མི་འགྱུར། གཉེར་མ་དང་སྐྲ་དཀར་སྤང་བར་འགྱུར། སོ་རྒལ་བ་ཡང་གསར་དུ་སྐྱེ་བར་འགྱུར། ལྕེ་

པདྨའི་ལོ་མ་ལྟར་འཇམ་པར་འགྱུར། མིད་པའི་ནད་དང་སྐེ་འགགས་པ་ཐམས་ཅད་ལས་ཡོངས་སུ་གྲོལ་བར་འགྱུར། འཇམ་ཙམ་དུ་བྱས་ཏེ་རྣ་བ་བཀང་ན་སིམ་པར་བྱེད་ཅིང་ལྷའི་རྣ་བ་དང་ལྡན་པར་འགྱུར། སྒྲ་ཡིད་དུ་འོང་བ་དང་བཀྲ་ཤིས་པའི་སྒྲ་ཐོས་པར་འགྱུར་རོ། །དེ་ལྟ་བས་ན་

གི་ཝང་གི་ཆོ་ག་ཆེན་པོ་བསྒྲུབ་པར་བྱའོ། །དེ་ནས་ལེགས་པར་གྲུབ་པ་མཆོག་ཏུ་དགེ་བ། དགེ་བར་འགྲོ་བ་མིག་རྐང་ཞེས་བྱ་བ་བཤད་པར་བྱ་སྟེ། དོན་ཡོད་པའི་ཞགས་པའི་སྙིང་བོ་འདི་ལན་ཉི་ཤུ་རྩ་གཅིག་བཟླས་ཏེ། ཁྲོ་བོའི་རྒྱལ་པོ་ལན་བདུན་བཟླས་ནས་དོན་ཡོད་པའི་རྒྱ་མཚོའི་

ནོར་བུ་པདྨ་ལ་རྣམ་པར་བལྟ་བའི་དཔལ་དྲི་མ་མེད་པ་དོན་ཡོད་པའི་ཞགས་པའི་སྙིང་པོ་འདི་ལན་སྟོང་རྩ་བརྒྱད་བཟླས་ཏེ། གཙང་མས་གོས་གཙང་མ་བགོས་ཤིང་ཁྲུས་ལེགས་པར་བྱས་པས་ཁ་ཟས་དཀར་པོ་ཟོས་ལ་མིག་རྐང་གི་རིལ་བུ་ཁར་བཅུག་ན་ཇི་སྙེད་བཤད་པ་དང་བཀླགས་པ་འཛིན་

པར་འགྱུར། ལྕེ་པདྨ་དང་ཀུ་མུ་དའི་ལོ་མ་ལྟར་འཇམ་པར་འགྱུར། མི་འམ་ཅིའི་སྒྲ་དབྱངས་དང་ལྡན་པར་འགྱུར། དེ་ལས་ལྷའི་སྒྲ་ཡང་འབྱུང་བར་འགྱུར། གང་ལ་སྨྲས་པ་དེ་དག་བྲན་ཕོ་དང་བྲན་མོ་བཞིན་དུ་གནས་པར་འགྱུར། གང་ལ་དྲི་མནམ་པ་དེ་ཡང་དབང་དུ་འགྱུར། ཐ་ན་དུད་

འགྲོའི་སྐྱེ་གནས་སུ་གྱུར་པ་ཡང་དབང་དུ་བྱེད་དོ། །འབྱུང་པོ་དང་། གནོད་སྦྱིན་དང་། སྲིན་པོ་དང་། གནོད་སྦྱིན་མོ་དང་། ཡི་དགས་དང་། ཤ་ཟ་ལ་སོགས་པ་ཐམས་ཅད་དང་། བརྗེད་བྱེད་དང་། སྡང་བ་དང་རབ་ཏུ་སྡང་བ་དང་། མི་མ་ཡིན་པ་ཐམས་ཅད་དྲི་དེས་འབྱེར་བར་འགྱུར་ཞིང་

เล่ม ๙๒ · หน้า 110a

ཕྱོགས་བཞིར་དཔག་ཚད་བརྒྱར་བྱེར་ནས་ཐག་རིང་པོ་ན་འཁོད་པར་འགྱུར་རོ། །ཕྱིར་རྒོལ་བ་དང་སྡང་བ་དང་རབ་ཏུ་སྡང་བའི་སེམས་དང་ལྡན་པ་ཐམས་ཅད་དྲི་དེས་འབྱེར་བར་འགྱུར་ཞིང་བྱམས་པའི་སེམས་ཀྱིས་དབང་དུ་འགྱུར་རོ། །དཔུང་པ་གཡས་པ་ལ་བཏགས་ན་ལག་པས་གླང་པོ་

ཆེ་གནོན་པར་འགྱུར་རོ། །སྟོབས་དང་བརྩོན་འགྲུས་དང་ཕ་རོལ་གནོན་པ་ཆེན་པོར་འགྱུར་རོ། །གྱད་ཀྱིས་མི་ཐུབ་པར་འགྱུར་རོ། །རྡོ་རྗེ་འཆང་དང་འདྲ་བའི་མཐུ་སྟོབས་སྟོན་པར་འགྱུར་རོ། །མགུལ་དུ་བཏགས་ཏེ་གཡུལ་ངོར་སོང་ན་གཅིག་པུས་དཔུང་གི་ཚོགས་ཡན་ལག་བཞི་ལས་རྒྱལ་བར་

འགྱུར་ཞིང་སླར་ཡང་འོང་བར་འགྱུར་རོ། །སྤྱི་བོར་བཞག་སྟེ་རྒྱལ་པོའི་ཕོ་བྲང་དུ་སོང་ན་རྒྱལ་པོའི་བཙུན་མོའི་འཁོར་དང་བཅས་པ་དང་བློན་པོ་དང་བློན་པོ་ཆེན་པོ་དང་བྲམ་ཟེའི་མདུན་ན་འདོན་པ་དང་བཅས་པ་དབང་དུ་འགྱུར་ཞིང་སྤྱི་བོ་ལ་དབང་བསྐུར་བར་འགྱུར། ཐམས་ཅད་དུ་ཐོགས་པ་མེད་པ་དང་ལྡན་

པར་འགྱུར། ལག་པ་ལ་བཏགས་ན་གང་ལ་རེག་པ་དེ་ཐམས་ཅད་དབང་དུ་འགྱུར། ནོར་དང་འབྲུ་དང་། དབྱིག་དང་ནོར་བུ་དང་མུ་ཏིག་དང་། གསེར་ལ་རེག་པ་ཙམ་གྱིས་ཟད་མི་ཤེས་པར་འགྱུར། ས་བོན་གདབ་པ་དང་བརྔ་བ་བྱས་ན་ཟད་མི་ཤེས་པར་འཕེལ་བར་འགྱུར་རིན་པོ་ཆེའི་ལག་

པ་དང་འདྲ་བར་འགྱུར། འབྲུའི་ཕུང་པོ་འཕེལ་བར་འགྱུར་རོ། །ཉི་མ་རེ་རེ་ཟོས་ན་དྲན་པ་དང་། བློ་ཆེན་པོ་འཕེལ་བར་འགྱུར། སྡིག་པ་ཐམས་ཅད་དང་བྲལ་བར་འགྱུར། ནད་ཐམས་ཅད་དང་བྲལ་བར་འགྱུར། རིམས་ཐམས་ཅད་སེལ་བར་འགྱུར། འབྲས་དང་མཛེ་དང་ལྷོག་པ་དང་

ལུའུ་ཏ་དང་ཤུ་བ་དང་གཡན་པ་དང་གཡའ་བ་དང་། ཕོལ་མིག་ལ་བྱུགས་པ་ཙམ་གྱིས་འཇིག་པར་འགྱུར་ཞིང་ནམ་ཡང་ཚུགས་པར་མི་འགྱུར་རོ། །སྦྱོར་བཟླ་བ་གཅིག་ཙམ་དུ་བྱས་ན་ཆོ་ག་ཞིབ་མོ་དང་། གསང་སྔགས་རིམ་པར་ཕྱེ་བ་དང་། ཕྱག་རྒྱ་དང་། དཀྱིལ་འཁོར་གྱི་མཆོག་

འགྲུབ་པར་འགྱུར་རོ། །དུས་ཀུན་ཏུ་ལུས་ལ་ཐོགས་ན་མཚོན་གཟས་པས་ལུས་ལ་མི་ཚུགས་སོ། །ཆོམ་རྐུན་དང་གཡོ་ཅན་ཐམས་ཅད་ཀྱིས་གླགས་རྙེད་པར་མི་འགྱུར་རོ། །ཐམས་ཅད་དུ་ཐོགས་པ་མེད་པར་འགྱུར། ཏིལ་མར་དང་ལྷན་ཅིག་བསྐོལ་ཏེ་ཀླད་པ་ན་བ་དང་རྣ་བ་ན་བ་དང་

เล่ม ๙๒ · หน้า 110b

སོ་ན་བ་དང་མིག་ན་བ་དང་། ཀླད་པ་ཕྱེད་ན་བ་ལ་འཇམ་ཙམ་བླུགས་པ་ཙམ་གྱིས་སྡུག་བསྔལ་ཐམས་ཅད་རབ་ཏུ་ཞི་བར་འགྱུར་ཞིང་ཕྱིན་ཅད་ནད་གང་ཡང་འབྱུང་བར་མི་འགྱུར། །གདོན་སྟོང་ཕྲག་དྲུག་ཅུ་རྩ་བརྒྱད་ལ་ཞུན་མར་དང་ཡུངས་ཀར་བསྲེས་ཏེ་བདུགས་ན་འདུས་ནས་ཕྱོགས་བཅུར་འབྱེར་ཞིང་

ནམ་ཡང་གནས་ཀྱི་ས་ཕྱོགས་དེར་འོང་བར་མི་འགྱུར་རོ། །རང་གི་ཡིད་ལ་འདོད་པའི་དགོས་པ་གཞན་ཐམས་ཅད་ཀྱང་བྱེད་པར་འགྱུར་རོ། །དེ་ནས་ལྷ་ཐམས་ཅད་འགུགས་པ་དང་བྱང་ཆུབ་སེམས་དཔའ་ཐམས་ཅད་སྤྱན་འདྲེན་པ། དེ་བཞིན་གཤེགས་པ་ཐམས་ཅད་སྐུལ་བ། རིག་

སྔགས་འཆང་ཐམས་ཅད་ཀྱི་གྲུབ་པའི་མཐའ། གནོད་སྦྱིན་དང་། སྲིན་པོ་རྣམས་དང་། འབྱུང་པོའི་གདོན་རྣམས་དང་། བརྗེད་བྱེད་དང་། གནོད་སྦྱིན་མོ་རྣམས་དང་། ཡི་དགས་དང་། ཤ་ཟ་དང་། སྐེམ་བྱེད་ཐམས་ཅད་འབྱེར་བར་བྱེད་པ་དང་སྡང་བའི་བདུད་རྣམས་གསོད་པ་

ནད་ཐམས་ཅད་ཟློག་པ་གདུག་པའི་དུག་རྣམས་བཟློག་པ་མཆེ་བའི་དུག་དང་གནས་པའི་དུག་དང་། འགྲོ་བའི་དུག་ཐམས་ཅད་ལ་ཐོགས་པ་མེད་པར་འགྲུབ་པ་རིམས་ཐམས་ཅད་འཇོམས་པ་ཁྱད་པར་དུ་རིམས་ཉིན་བཞི་པ་འཇོམས་པ། བཞིན་དང་བར་བྱེད་པའི་གཙོ་བོ་གོས་བདུག་

པའི་མཆོག་གསང་སྔགས་དང་བྱད་ཐམས་ཅད་དབང་དུ་བྱེད་པའི་མཆོག་གང་ལ་རྒྱལ་པོ་ཁྲོས་ནས་གཤེད་མས་མཚོན་གཟས་པ་ཡང་བདུག་པ་འདིས་བདུགས་ན་དེ་ཐམས་ཅད་ཞི་བར་འགྱུར་རོ། །དུག་དང་དུག་སྦྱར་མ་དང་སྲོག་ཆགས་ལུའུ་ཏ་དང་། སྦྲུལ་གྱིས་ཟིན་པ་དང་། སྲོག་

ཆགས་གོན་སེ་དང་གཞན་ཡང་སྲོག་ཆགས་སྣ་ཚོགས་དུག་དང་བཅས་པ་མཆོག་ཏུ་མི་བཟད་པ་རྣམས་དང་གལ་ཏེ་ཀླུ་འཇོག་པོས་ཟིན་ན་ཡང་བདུགས་པ་ཙམ་གྱིས་དུག་ཐམས་ཅད་མེད་པར་འགྱུར་རོ། །ནད་ཀུན་འཕྲོག་པ་གྲུབ་པ་སྟེ། །སྡིག་པ་ཐམས་ཅད་འཇིག་བྱེད་པ། །བསོད་

ནམས་ཕུང་པོ་ཆེ་དང་མཉམ། །གྲུབ་པ་ལྷ་རྣམས་ཀུན་གྱིས་མཆོད། །བརྒྱ་བྱིན་སུམ་ཅུའི་ལྷ་དང་ནི། །ལྷ་མིན་ལྷན་ཅིག་གཡུལ་འགྱེད་ཚེ། །བདུག་པ་འདི་ཡིས་བདུགས་པ་དང་། །ལྷ་མིན་དེ་བཞིན་པ་མ་པར་འགྱུར། །དྲག་པོ་ཡིས་ནི་སུམ་བརྩེགས་བསྲེགས། །ཁྱབ་འཇུག་

เล่ม ๙๒ · หน้า 111a

གིས་ནི་བ་ལཱི་བཅིངས། །མིའུ་ཐུང་གིས་ནི་ས་གཞི་མནན། །ལྷ་མིན་དབང་པོས་ཉི་ཟླ་དང་། །གཟའ་རྣམས་ཕམ་བྱས་འཁྲུགས་པར་འགྱུར། །བདུག་པའི་རྒྱལ་པོའི་ཁྱད་པར་གྱིས། །མིའུ་ཐུང་ནི་ཀུན་ལས་རྒྱལ། །སྒྱུ་མ་བྱེད་པ་སྟོང་ཕྲག་བརྒྱ། །རྟག་ཏུ་

རྣམ་པར་རྒྱས་པར་བྱེད། །བདུག་པའི་རྒྱལ་པོས་སྐྱ་བསེང་རྣམས། །རྣམ་པར་ཕམ་པར་ཐེ་ཚོམ་མེད། །བདུང་ནི་བྱེ་བ་སྟོང་ཕྲག་བརྒྱ། །འདྲེན་པས་བྱམས་པའི་སྟོབས་ཀྱིས་བཏུལ། །བདུད་ནི་བྱེ་བ་སྟོང་ཕྲག་བརྒྱ། །བདུག་པའི་རྒྱལ་པོའི་མཐུ་སྟོབས་ཀྱིས། །སྡང་བའི་

བདུད་ནི་ཡང་དག་ཟད། །རྒྱ་མཚོ་རྣམ་པར་དཀྲུག་བྱས་པས། །རྒྱ་མཚོ་གནས་ཀུན་གཅེར་བུར་འགྱུར། །སྣོད་གཅིག་གི་ནི་སུམ་ཆ་སྐམས། །ཡིད་བཞིན་ནོར་བུ་ཆུད་ཟོས་པས། །དོན་ཀུན་གྲུབ་པ་བདག་ཉིད་ཆེས། བདུག་སྤོས་འདི་ཡིས་བདུགས་བྱས་ནས། །སླར་ཡང་རང་གི་

ཁྱིམ་འོངས་པས། །རྟག་ཏུ་རྒྱལ་མཚན་རྩེར་བཏགས་ན། །བདུག་པ་འདི་ཡིས་བདུག་བྱས་ཤིང་། །ཉིན་མཚན་བདུན་གྱི་བར་དུ་ནི། །རིན་ཆེན་བདུན་གྱི་ཆར་པ་ཕབ། །དེ་ལྟར་བདུག་པ་སྟོབས་ལྡན་ཡིན། །ལས་ཀྱི་དོན་ཀུན་སྒྲུབ་པར་བྱེད། །གཡུལ་ཆེན་པོ་ལྷུང་བའི་ཀླུའི་མཚོར།

དགའ་བོ་དང་། ཉེ་དགའ་བོས་རྒྱ་མཚོ་ཆེན་པོ་ལ། ལྷུན་པོ་ཆེན་པོའི་རི་རབ་ཀྱིས་བསྲུབས་པས། དུག་འཛགས་པ་མགྲིན་སྔོན་གྱིས་དུག་འཐུངས་པས་བདུག་པའི་རྒྱལ་པོས་བསྐོར་བས་དུག་མེད་པར་བྱས་སོ། །བདུག་པའི་རྒྱལ་པོ་འདིའི་མཐུས་བདུད་རྩིར་ཡོངས་སུ་བྱས་སོ། །དེ་ལྟར་

བདུག་པའི་རྒྱལ་པོས་དུག་ཐམས་ཅད་འཇོམས་པར་ཐེ་ཚོམ་མེད་དོ། །གླིང་བཞི་པ་ཡི་དྲང་སྲོང་གིས། །དེས་ནི་མཎྜལ་ཕམ་པར་བྱས། །སྟན་ཕྱེད་ལ་ནི་ལོངས་སྤྱོད་པའི། །སྐྲ་ཅན་དབང་པོས་ལྟུང་བར་བྱས། །བདུག་པའི་རྒྱལ་པོ་བསམས་པ་ཡིས། །བརྫུན་དུ་སྨྲ་བ་དེ་རྣམས་ཉམས།

དེ་ཕྱིར་བདེན་པར་སྨྲ་བའི་ཕྱིར། །བདུག་པ་འདི་ནི་བདེན་པ་ལྡན། །བདེན་པའི་རྒྱལ་པོས་རབ་ཏུ་བསྒྲགས། །བདེན་པའི་ཆོས་དང་བདེན་པར་སྨྲ། །མཐའ་དག་བསྡུས་ལས་བྱམས་པའི་སེམས། །འཇིག་རྟེན་ཀུན་ལ་རྟག་ཏུ་བྱམས། །སྙིང་རྗེ་དང་ནི་དགའ་བ་ཉིད། །བདུག་པ་

เล่ม ๙๒ · หน้า 111b

གཞན་གྱིས་བདུགས་པ་འདི། །མཚོན་ཆ་ཐམས་ཅད་འཇོམས་པར་བྱེད། །བདེན་པས་བྱིན་གྱིས་བརླབས་པའི་བདུག་པ་འདི་དེ་བཞིན་གཤེགས་པ་ཐམས་ཅད་ཀྱིས་གསུངས་པ། འཇིག་རྟེན་དབང་ཕྱུག་མགོན་པོ་འཇིག་རྟེན་པའི་རྟག་ཏུ་བླ་མར་གྱུར་པའོ། །སེམས་ཅན་ཐམས་

ཅད་ལ་ཕན་པའི་དོན་དུ་རིག་སྔགས་འཆང་རྣམས་ཀྱི་ཁྱད་པར་དུ་དམྱལ་བ་བཅུ་དྲུག་གི་འཇིགས་པ་མི་བཟད་པ་དང་། འཇིགས་པ་ཆེན་པོས་སྡུག་བསྔལ་གྱི་ཚོར་བ་མྱོང་བར་འགྱུར་བ་དང་། ཡི་དགས་ཀྱི་སྡུག་བསྔལ་གྱི་འཇིག་པ་ཆེན་པོ་ཆེར་མི་བཟད་པ། རྟག་ཏུ་བཀྲེས་པ་དང་

སྐོམ་པས་ཉེན་པ། ཀྱི་ཧུད་ཞེས་སྒྲ་སྒྲོགས་པར་བྱེད་པའི་སྐྲག་པ་དེ་ལ་སྐྱབས་མེད་དོ། །སེམས་ཅན་ཐམས་ཅད་རྗེས་སུ་བརྩེ་བས་བརྟན་པར་ཀུན་ཏུ་བལྟ་བར་བྱའོ། །འཇིག་རྟེན་ཐམས་ཅད་ཀྱི་སྐྱབས་སུ་གསུངས་པ་ནི་བདུག་པའི་རྒྱལ་པོ་བླ་ན་མེད་པའོ། །བདུག་པ་འདིས་བདུགས་

ཏེ། གང་གི་དོན་དུ་མིང་ནས་སྨོས་པ་ཡང་། མ་རུངས་པའམ། ཡང་ན་བྱམས་པ་ཡང་རུང་སྟེ། ཡིད་ལ་བསམས་པ་རྣམས་སྒྲུབ་པར་བྱེད་དོ། །འདིས་བདུགས་ཏེ་བརྗོད་པ་ཙམ་གྱི་མོད་ལ། འདི་རྣམས་ཐམས་ཅད་རྟག་ཏུ་འགྲུབ་པར་བྱེད་དེ་སྤྱན་རས་གཟིགས་དབང་ཕྱུག་གི་གསུང་

དགེ་བའོ། །གཟའ་ཟླ་བའམ། གཟའ་ཉི་མ་རྒྱུ་སྐར་ཉམ་ང་བ་ལ་གནས་པ། སྒྲ་གཅན་གྱིས་ཟོས་པ་རྣམས་དང་མི་གང་ཡིན་པ་སྐྱེ་བའི་གནོད་པ་དང་། རྒྱལ་པོའམ། ཡང་ན་བུད་མེད་དམ། བློན་པོ་ཆེན་པོ་དང་། བློན་པོ་དང་། བཀྲབས་པ་དང་། མདུན་ན་འདོན་དང་།

རྒྱལ་རིགས་དང་། བྲམ་ཟེ་དང་། དམངས་རིགས་དང་། རྗེ་རིགས་དང་། སྐྱེ་བོ་གཞན་དང་འགྲོགས་པས་གནོད་པ་དང་། འཐབ་པ་ཉིད་དང་། སྡུག་བསྔལ་མི་བཟད་པས་ཉེ་བར་འཚེ་བ་ལ་བདུག་སྤོས་རྒྱལ་པོས་བདུགས་པས་དེའི་སྐད་ཅིག་ལ་དེ་དག་ཐམས་ཅད་མི་འབྱུང་ངོ་། །

བཟའ་བ་དང་བཏུང་བ་ཤིན་ཏུ་ཞིམ་པོ་ཐོབ་སྟེ། གོས་མེད་པའི་སྐྱེ་བོས་གོས་དང་། རྒྱན་དང་། ལྷ་རྫས་ཀྱི་དྲི་དང་། ཕྲེང་བ་དང་། བྱུག་པ་དང་། གོས་དང་། བཞོན་པ་དང་། ཁྲི་དང་། ཉེ་བར་བསྟེན་པ་དང་། ལྷབ་ལྷུབ་ཐམས་ཅད་སྐད་ཅིག་གིས་འབྱུང་སྟེ། གལ་ཏེ་ཡང་དག་

เล่ม ๙๒ · หน้า 112a

པར་སྦྱར་བ་ཡིན་ནའོ། །བསམས་པ་དང་། རེ་བ་དང་། ཡིད་ཀྱི་ཤིང་རྟ་ཐམས་ཅད་མངོན་པར་སྨྲས་པས་འགྲུབ་པར་བྱེད་དོ། །འཇིག་རྟེན་དབང་ཕྱུག་གི་གསུང་སྟེ། རྟག་ཏུ་འདི་དག་ཐམས་ཅད་འགྲུབ་བོ། །ཡི་དགས་རྣམས་ཀྱིས་ཟས་རྙེད་ཅིང་། ལྷ་རྫས་

ཀྱི་གོས་དང་རྒྱན་མཆོག་རབ་ཏུ་འགྱུར་རོ། །བདག་གི་སྡིག་པ་ཐམས་ཅད་རྟག་ཏུ་གྲོལ་བས་དམྱལ་བ་ལས་གྲོལ་ཏེ། དམྱལ་བ་མི་བཟད་པ་ཐམས་ཅད་ལས་གྲོལ་ལོ། །སྡུག་བསྔལ་ཐམས་ཅད་ལས་གྲོལ་ཏེ། སྐྱེ་བོ་བདེ་བ་ལ་རྩེ་བར་བྱེད་དོ། །བདེ་ཞིང་བདེ་འགྲོར་འགྲོ་ལ་བདེ་

བ་ཐམས་ཅད་དུ་ཐོབ་པར་བྱེད་དོ། །བདུག་སྤོས་འདིས་བདུགས་པས་མཆོག་གི་དྲི་སྣོམ་པར་བྱེད་དེ། རྡུལ་དང་མུན་པ་ཅན་ཐམས་ཅད་བདུག་པ་བསྣམས་པས་སངས་པར་བྱེད་དེ། དཔེར་ན་ཉི་མ་ཤར་བས་འཇིག་རྟེན་གྱི་མུན་པ་རྣམ་པར་སངས་པར་བྱེད་པ་བཞིན་ནོ། །བདུག་པའི་

རྒྱལ་པོ་འདིས་སྡུག་བསྔལ་ཐམས་ཅད་རྣམ་པར་ཉམས་པར་བྱེད་ཅིང་། དམྱལ་བ་ཐམས་ཅད་དང་སྡིག་པ་དང་འཇིགས་པ་ཐམས་ཅད་ལས་གྲོལ་ཏེ། ས་བཅུ་པོ་ཐོབ་ཅིང་བདེ་འགྲོའི་ལམ་བཟང་པོ་བསྟན་པ་དེའི་ཕྱིར་འབད་པ་ཐམས་ཅད་ཀྱིས་བདུག་པའི་རྒྱལ་པོ་འདི་སྦྱར་བར་བྱའོ། །

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བདུག་པ་ཆེན་པོའི་རྒྱལ་པོ་ཆེན་པོ་ཆོ་ག་ཞིབ་མོ་དང་རྗེས་སུ་མཐུན་པ་འདི་གསུངས་སོ། །འཇིག་རྟེན་མགོན་པོའི་སྤྱན་སྔར། མཆོད་རྟེན་ལ་སའི་ཕྱོགས་གང་དུ་བདུག་པ་འདིས་

བདུག་པ་བྱ་སྟེ། དེ་བཞིན་གཤེགས་པའི་གནས་རྟག་ཏུ་བྱིན་གྱིས་བརླབས་པ་དང་། ཐམས་ཅད་དུ་རྒྱལ་བ་དང་། དེ་བཞིན་དུ་ལུང་བསྟན་པའི་སའི་ཕྱོགས་དེར་གང་གཱའི་བྱེ་མ་བྱེ་བ་ཁྲག་ཁྲིག་སྟོང་ཕྲག་སྙེད་ཀྱི་སངས་རྒྱས་རྣམས་བཞུགས་པ་དེར་རིག་སྔགས་འཆང་གིས་གང་དུ་

བདུག་སྤོས་ཀྱིས་བདུགས་པས་རྡོ་རྗེ་འཆང་བྱེ་བ་བརྒྱ་སྟོང་ཕྲག་རྣམས་དང་། རྒྱལ་པོ་ཆེན་པོ་བཞི་དཔུང་དང་བཅས། བཞོན་པ་དང་བཅས་པ་དང་། རྟག་ཏུ་རི་གངས་ལྡན་དང་། དེ་བཞིན་དུ་ནོར་བུ་བཟང་པོ་དང་། ལྔས་རྩེན་དང་། གང་བ་བཟང་པོ་དང་། ཀི་ལཱི་ཀཱི་ལ་དང་། གནོད་སྦྱིན་

เล่ม ๙๒ · หน้า 112b

ཆེན་པོ་ཡང་དག་ཤེས་དང་། མི་ལ་ཞོན་པ་དང་། སངས་རྒྱས་སྟོབས་དང་། སྟོབས་པོ་ཆེ་དང་། སྒྲ་སྒོ་སྐྱོང་དང་། ནད་ཀཱུ་པེ་ར་དང་། རབ་འཇོམས་དང་། ཛྱ་ཊ་བ་ཀ་དང་། སྟོབས་ཀྱི་ལྷ་དང་། རྫུ་འཕྲུལ་ཆེན་པོ་སྟེ་འདི་རྣམས་སྡེ་དང་བཅས། དཔུང་དང་བཅས། བཞོན་པ་དང་བཅས་

པས་ཉིན་མཚན་རྟག་ཏུ་གནས་ནས་དེ་བཞིན་ཉིད་དུ་སྲུང་བར་བྱེད་པར་བྱེད་དོ། །བདག་གི་དཔལ་ས་གསུམ་གྱི་ལྷ་མོ་རྟག་ཏུ་མཆོད་པར་བྱེད་དོ། །རྟག་དུ་ས་གཞི་གང་དུ་བདུག་པ་རབ་ཏུ་བདུག་པར་བྱ་སྟེ། རྡོ་རྗེ་འཛིན་པ་དང་། དེ་བཞིན་ཉིད་དུ་གསང་བ་བ་དང་བཅས་པ་དང་། ཆོས་འཛིན་པ་ལ་

མཁས་པ་རྣམས་རྟག་ཏུ་སྲུང་བར་བྱེད་ཅིང་། དེ་བཞིན་ཉིད་དུ་ཚངས་པ་དང་། དྲག་པོ་ལྟའི་བུ་རྣམས་དང་བཅས་པ་དང་། དེ་བཞིན་དུ་ཁྱབ་འཇུག་དང་། ལྷའི་རིས་སུམ་ཅུ་རྩ་གཉིས་པོ་ཐམས་ཅད་དུ་དུས་རྟག་ཏུ་ཡང་སྲུང་བར་བྱེད་དོ། །ཟླ་བ་དང་། ཉི་མ་དང་། དེ་བཞིན་ཉིད་སྒྲ་

གཅན་དང་། རྒྱུ་སྐར་དང་། སྐར་མའི་ཚོགས་དང་། མཚན་མོའི་ལྷ་རྣམས་ཀྱིས་དུས་རྟག་ཏུ་སྲུང་བར་བྱེད་དོ། །འཇིགས་མ་དང་། དཔལ་མོ་དང་། དུང་ཅན་མའི་ལྷ་རྣམས་དང་། དབྱངས་ཅན་མ་དང་། ས་འཛིན་གྱི་ལྷ་རྣམས་དང་། ཆུ་ལྷ་དང་། ལྗོན་པ་དང་། ནགས་ཀྱི་རྩེ་

མོའི་ལྷ་དང་། རིའི་ལྷ་དང་། ཆུ་ཀླུང་དང་། ལྟེང་ཀའི་ལྷ་དང་། གཤིན་རྗེ་དང་། ཆུའི་ལྷ་དང་། ལུས་ངན་གྱི་ལྷ་དང་། གཞོན་ནུའི་ལྷ་དང་། ལྷའི་དྲང་སྲོང་བདག་ཉིད་ཆེ་བ་དང་། ལྟེང་ཀའི་ལྷ་དང་། ཆུ་ཀླུང་དང་། ལྟེང་ཀ་དང་། ལྷ་མ་ཡིན་དང་བཅས་པའི་ལྷ་རྣམས་དང་། ཟླ་བ་

དང་། ཉི་མ་དང་། དེ་བཞིན་དུ་ལྷ་རྣམས་ཀྱིས་རྟག་ཏུ་སྲུང་བར་བྱེད་དོ། །རྟག་ཏུ་རྗེས་སུ་འབྲང་ཞིང་། ཉིན་མཚན་རྟག་ཏུ་རྒྱུན་མི་འཆད་པར་རྗེས་སུ་འབྲང་སྟེ། སའི་ཕྱོགས་གང་དུ་བདུག་སྤོས་འདིས་བདུགས་པའི་ས་ཕྱོགས་སུ་རྟག་ཏུ་ལྷའི་གནས་སུ་བྱིན་གྱིས་བརླབས་སོ། །འཇིག་

རྟེན་དབང་ཕྱུག་དང་། མགོན་པོ་དང་། བླ་མ་དང་། རྣམ་པར་འདྲེན་པ་དང་། འཇིག་རྟེན་གྱི་སྐྱབས་དང་། མཆོག་སྦྱིན་པར་དེ་བཞིན་ཉིད་དུ་རྟག་ཏུ་རྒྱུན་མི་འཆད་པར་གནས་སོ། །གནས་དེར་བདུག་སྤོས་གང་ཡིན་པ་དེ་དག་གིས་མཆོག་ཏུ་བདུག་པར་བྱའོ། །དྲི་མནམས་པ་

เล่ม ๙๒ · หน้า 113a

ཙམ་གྱིས་མྱུར་དུ་སངས་རྒྱས་ཉིད་ཐོབ་བོ་ཞེས་སོ། །སེམས་ཅན་ཀུན་ལ་ཕན་དོན་ཕྱིར། །སྡུག་བསྔལ་ཐམས་ཅད་ལྡོག་བྱེད་པའི། །རྫས་ཀྱི་མིང་རྣམས་བཤད་བྱ་ཡི། །ལྷ་དང་མི་རྣམས་མཉན་པར་གྱིས། །ཨ་ག་རུ་དང་རྒྱ་སྤོས་ཉིད། །དེ་བཞིན་ཙནྡན་སེར་མོར་

བཅས། །སྤྲྀ་ཀ་ཉིད་དང་གི་ཝང་དང་། །ཀུན་ཏུ་རུ་བཅས་མ་ཧེའི་མིག །རོ་དང་སྲ་རྩི་པོག་ཉིད་དང་། །དེ་བཞིན་གུར་གུམ་ན་ལནྡ། །ཨ་རུ་ར་བཅས་དཔལ་བསྐོར་བ། །སཱ་མ་ཀཾ་དང་སྤང་སྤོས་བཅས། །པྲི་ཡང་ཀུ་བཅས་ཏུ་རུ་སྐ། །ཀ་ཡསྠ་དང་བ་ཡསྠ། །ན་མེ་རུ་དང་གླ་

སྒང་བཅས། །རུ་རྟ་ཨ་ག་རུ་ནག་ཉིད། །ག་པུར་དང་ནི་གླ་རྩི་ཉིད། །ལངྐ་གསེར་ཤིང་འབྲས་བུ་དང་། །ཨརྒའི་འོ་མ་གསེར་འོ་མ། །སྣུ་ཧའི་འོ་མ་ཉིད་དང་ནི། །ཐོད་པ་སྐལ་བ་ལྡན་ཉིད་དང་། །སོ་མ་རཱ་ཛ་ཁྱབ་འཇུག་གནོན། །ཤིང་དགའ་རྒྱལ་དང་རྣམ་རྒྱལ་ཉིད། །ནཱ་

ཀུ་ལཱི་དྲི་ནཱ་ཀུ་ལཱི། །ཚངས་པའི་བུ་དང་ཀུ་མུ་དང་། །པདྨའི་ཆུ་བ་སྦྲང་རྩི་དང་། །བུ་རམ་དཀར་པོའི་ཁུ་བ་དང་། །འདི་རྣམས་ལྷན་ཅིག་སྦྱར་བ་ཡི། །བདུག་པའི་མཆོག་འདི་བསྒྲུབ་པར་བྱ། །མཁས་པས་ལེགས་པར་ཁྲུས་བྱས་ཏེ། །གཙང་མས་གཙང་མའི་གོས་བགོས་

ཤིང་། །ཟླ་བ་ཉ་འམ་བཅུ་བཞི་ལ། །བཅུ་གསུམ་པའམ་ཚེས་བརྒྱད་ལ། །རྟག་ཏུ་སྦྱར་བྱ་ཉིན་མཚན་གཟུང་། །སྔགས་ལ་མཁས་པས་བདུག་སྤོས་འདི། །སོ་སོ་སོ་སོར་ཀུན་སྦྱར་ནས། ཕྱག་རྒྱ་དཀྱིལ་འཁོར་གསང་སྔགས་དང་། །མེ་ཏོག་བདུག་སྤོས་དྲི་རྒྱ་ཆེན། །

མཆོད་པའི་ཆོ་ག་འདི་ཡིས་དང་། །གཏོར་མའི་ལས་ལ་མཁས་པ་དང་། །མཆོད་ཡོན་སྣོད་ནི་གང་བ་དང་། །མགོ་ལའང་དྲི་དང་ཏིལ་མར་གྱི། །མར་མེ་ལེགས་གྲུ་གནས་སུ་ནི། །ལེགས་སྦས་གཙང་མར་གནས་དེ་སྒྲུབ། །ལེགས་སྦས་གཙང་མར་གནས་པ་ཡི། །སློབ་མ་

མཆོག་གི་གྲོགས་ཀྱིས་ནི། །དོན་ཡོད་ཞགས་པའི་སྤྱན་སྔ་རུ། །འདུག་ནས་ཡོངས་སུ་དག་པའི་ལུས། །སྡོམ་དང་བྱམས་པའི་སེམས་གཞག་ནས། །སེམས་ཅན་ཀུན་ལ་སྙིང་རྗེའི་བདག །སངས་རྒྱས་རྗེས་སུ་དྲན་སྒོམ་ཞིང་། །གསང་སྔགས་བཟླས་པ་མཆོག་གྱིས་ཤིག །

เล่ม ๙๒ · หน้า 113b

དེ་བཞིན་གཤེགས་པ་ཐམས་ཅད་ལ་དམིགས་ཏེ་འཇིག་རྟེན་དབང་ཕྱུག་གི་ཞལ་ནས་བྱུང་བ་དོན་ཡོད་པའི་ཞགས་པའི་སྙིང་པོ་སྟོང་རྩ་བརྒྱད་ཁྲོ་བོའི་རྒྱལ་པོ་སྟོང་རྩ་བརྒྱད་དོན་ཡོད་པ་གྲུབ་པའི་བརྒྱ་རྩ་བརྒྱད་ཚིག་དང་ཡི་གེ་ཤིན་ཏུ་གསལ་བར་བཟླས་ནས་དོན་ཡོད་པའི་རྒྱ་མཚོའི་ནོར་བུ་པདྨ་ལ་རྣམ་པར་

བལྟ་བའི་དཔལ་དྲི་མ་མེད་པ་དོན་ཡོད་པའི་ཞགས་པའི་སྙིང་པོ་སྟོང་ཕྲག་བཅུ་བཟླས་ཏེ། དེ་ནས་གསང་སྔགས་འདི་སྟོང་ཕྲག་བརྒྱ་བཟླས་སོ། །ཨོཾ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨ་མོ་གྷ་ཧྲྀ་ད་ཡན། ཙ་ར་ཙ་ར་མ་ཧཱ་ཀཱ་རུ་ཎི་ཀཱ་ཡ་སཱ་དྷ་ཡ་ཧཱུཾ། ཨ་བྷི་ཥིཉྩ་ཡ་ཨ་མོ་གྷ་བཱ་ཤ་ཧ་སྟེ་སྭཱ་ཧཱ། དེ་ནས་

གསང་སྔགས་བཟླས་བརྗོད་བྱས་ཏེ་མཉམ་པར་གཞག་ལ། ལས་ཐམས་ཅད་ལ་མཁས་པས་བདུག་སྤོས་ཀྱི་མཆོག་ལ་བཟླས་པ་ཙམ་གྱི་མོད་ལ་བདུག་སྤོས་ཀྱི་རྒྱལ་པོ་ལ་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པར་འགྱུར་རོ། །དོན་ཡོད་པའི་ཞགས་པ་

སྣང་བ་རྒྱ་ཆེ་བ་ནོར་བུ་ཆེན་པོའི་སྤྲིན་དྲི་མ་མེད་པ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱིས་རྣམ་པར་གཟིགས་པ་འཕགས་པ་སྤྱན་རས་གཟིགས་དབང་ཕྱུག་གི་མཆོག་སྦྱིན་པའི་འཁོར་ལོས་སྒྱུར་བ་ཞེས་བྱ་བའི་བདུག་པའི་རྒྱལ་པོ་ཡིན་ཏེ། ཐོག་མར་དེ་བཞིན་གཤེགས་པ་ཐམས་ཅད་

ལ་སྔགས་འདི་ལན་བདུན་བཟླས་ཏེ་བདུག་པ་དབུལ་བར་བྱའོ། །ཨོཾ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་མ་ཧཱ་ཨ་མོ་གྷ་ཛ་ཡ་ཛ་ཡ་སྭཱ་ཧཱ། དེའི་འོག་ཏུ་བདག་རང་ལ་བདུགས་ན་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་

པོ་འཕགས་པ་སྤྱན་རས་གཟིགས་དབང་ཕྱུག་མཆོག་སྦྱིན་པ་བདུགས་པ་ཙམ་གྱི་མོད་ལ་འཕགས་པ་སྤྱན་རས་གཟིགས་དབང་ཕྱུག་གི་སྐུ་སྟོན་པར་འགྱུར་རོ། །དགེ་སྦྱོང་དང་བྲམ་ཟེའི་གཟུགས་ཀྱིས་དེ་དང་ལྷན་ཅིག་སྨྲ་བར་བྱེད་དེ། གང་ལ་སྨྲས་པ་དང་གང་ལ་གཏམ་བྱས་པ་དེ་ཐམས་

ཅད་ཚེ་འདི་ལ་ཐམས་ཅད་འགྲུབ་པར་འགྱུར་རོ། །དེའི་འོག་ཏུ་མཚན་མོ་རང་གི་གཟུགས་སྟོན་པར་འགྱུར་ཞིང་མཆོག་སྦྱིན་པར་མཛད་དོ། །དོན་ཡོད་པའི་ཞགས་པའི་ཡེ་ཤེས་ཐོབ་པར་འགྱུར། འཇིགས་པ་ཆེན་པོ་བརྒྱད་ལས་ཡོངས་སུ་གྲོལ་བར་འགྱུར། སྔོན་གྱི་སྒྲིབ་པ་དང་

เล่ม ๙๒ · หน้า 114a

སྡིག་པ་དམྱལ་བའི་ཚོར་བ་མྱོང་བར་འགྱུར་བ་ཟད་ཅིང་མཐར་ཐུག་པར་འགྱུར་རོ། །གང་དག་གི་ལུས་ལ་བདུགས་པ་ཙམ་དང་མཐོང་བ་ཙམ་གྱི་མོད་ལ་ཐམས་ཅད་དབང་དུ་འགྱུར་རོ། །ཡུལ་འཁོར་དང་གྲོང་ཁྱེར་དང་གྲོང་རྡལ་དང་ལྗོངས་དང་རྒྱལ་པོའི་བཙུན་མོའི་འཁོར་

དང་བཅས་པ་དང་། བློན་པོ་དང་། བློན་པོ་ཆེན་པོ་དང་། བཀྲབས་པ་དང་། བྲམ་ཟེ་མདུན་ན་འདོན་དང་བཅས་པ་དབང་དུ་འགྱུར་ཞིང་ཐམས་ཅད་བགྱི་བ་ཅི་མཆིས་ཞེས་བྱ་བ་བྱེད་པར་འགྱུར་རོ། །རིགས་བཞིའི་འཇིག་རྟེན་དབང་དུ་འགྱུར་རོ། །ཚེས་བཅུ་བཞི་དང་བཅྭ་ལྔ་དང་ཚེས་བརྒྱད་

ལ་ཁྲུས་ལེགས་པར་བྱ་སྟེ། གོས་གཙང་མ་བགོས་ལ་བ་ལས་བྱུང་བ་ལྔས་བྱུགས་པས་ཁྱིམ་གྱི་ཕུགས་སུ་དཀྱིལ་འཁོར་བྱས་ལ། མེ་ཏོག་དང་མཆོད་ཡོན་གྱི་སྣོད་གཞག་པར་བྱ། གཏོར་མ་དཀར་པོ་ཉེ་བར་གཞག་པར་བྱ། དེ་བཞིན་གཤེགས་པ་ཐམས་ཅད་ལ་དམིགས་ལ་

བྱང་ཆུབ་སེམས་དཔའ་ཐམས་ཅད་ལ་དམིགས་ཏེ། ཕྱོགས་བཞིར་ཕྱག་བྱས་ལ་བདུག་པའི་རྒྱལ་པོ་འདིས་བདུག་པར་བྱས་ན། བདུགས་པ་ཙམ་གྱི་མོད་ལ་ཕྱོགས་བཅུ་མཐའ་ཡས་མུ་མེད་པའི་སངས་རྒྱས་ཀྱི་ཞིང་རྣམས་ཀྱི་རྡུལ་ཕྲ་མོ་སྙེད་ཀྱི་དེ་བཞིན་གཤེགས་པས་ཡོངས་སུ་གང་བ་ལ་

འདི་ལྟ་སྟེ། སངས་རྒྱས་ཀྱི་ཞིང་རེ་རེར་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་སྟོང་ཕྲག་བརྒྱ་ལ་བདུག་པའི་སྤྲིན་འཁྲིགས་པ་ལྷའི་སྤོས་ཀྱིས་བསྒོས་པ་མི་མཉམ་པ་དང་མཉམ་པའི་བདུག་སྤོས་ཆེན་པོ་ཙནྡན་སྦྲུལ་གྱི་སྙིང་པོ་དང་། གོར་ཤིརྵ་དང་། ཏ་མ་

ལའི་ལོ་མ་དང་། བདུག་སྤོས་མང་པོ་ནམ་མཁའི་ངོས་ཁེབས་པས་མཆོད་པར་འགྱུར་རོ། །བྱང་ཆུབ་སེམས་དཔའི་འཁོར་རྣམས་དང་སུམ་ཅུ་རྩ་གསུམ་ན་གནས་པའི་ལྷ་བརྒྱ་བྱིན་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་སོགས་པ་འོག་མིན་གྱི་གནས་

ན་གནས་པའི་ལྷའི་བར་དུ་ཐམས་ཅད་བདུག་པའི་དྲིས་རབ་ཏུ་དགའ་བར་འགྱུར་རོ། །རྒྱུ་སྐར་དང་། སྐར་མའི་ཚོགས་དང་། ཉི་མ་དང་ཟླ་བ་ཐམས་ཅད་དགའ་བར་འགྱུར་ཏེ། འདི་ལ་ཐེ་ཚོམ་མི་བྱ་ཞིང་ཡིད་གཉིས་བསྐྱེད་པར་མི་བྱའོ། །སྐད་ཆེན་པོས་དོན་ཡོད་པའི་ཞགས་པའི་སྙིང་པོ་

เล่ม ๙๒ · หน้า 114b

བཟླས་པ་བྱས་ན། དེས་ན་སངས་རྒྱས་ཀྱི་ཞིང་ཐམས་ཅད་ན་བཞུགས་པའི་དེ་བཞིན་གཤེགས་པས་ལེགས་སོ་ཞེས་བྱ་བའི་སྒྲ་འབྱིན་པར་འགྱུར་ཞིང་རིག་སྔགས་འཆང་དེ་ལ་ཡང་དེ་བཞིན་གཤེགས་པས་བྱིན་གྱིས་རློབ་པར་འགྱུར། དུས་ཀུན་ཏུ་དགོངས་པར་འགྱུར། ཡང་དང་ཡང་དུ་

གཟིགས་པའི་ཕྱིར་བྱོན་པར་འགྱུར་རོ། །བདེ་བ་ཅན་ན་བཞུགས་པའི་དེ་བཞིན་གཤེགས་པ་ཚེ་དཔག་མེད་དང་། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་ལ་སོགས་པ་བྱང་ཆུབ་སེམས་དཔའ་ཐམས་ཅད་ཐུགས་རབ་ཏུ་དགྱེས་པར་འགྱུར།

རིག་སྔགས་འཆང་ལ་དོན་ཡོད་པ་ཆེན་པོའི་དངོས་གྲུབ་སྩོལ་བར་མཛད་གཟིགས་བཞེད་པར་འགྱུར་རོ། །ཀླུ་ཐམས་ཅད་ལ་བདུགས་པ་ཙམ་གྱིས་དབང་དུ་འགྱུར་ཞིང་ཧ་ཅང་ཆར་ཆེས་ན་གཅོད་པར་བྱེད་ཅིང་ཆར་མི་འབབ་ན་འབེབས་པར་བྱེད་དོ། །རླུང་དང་སེར་བ་དང་སྤྲིན་ཐམས་ཅད་གཅོད་པར་

བྱེད་བདུགས་པ་ཙམ་གྱིས་གདོན་ཐམས་ཅད་འཇིག་པར་བྱེད་བགེགས་དང་ལོག་འདྲེན་ཐམས་ཅད་ཕྱོགས་བཅུར་དཔག་ཚད་སྟོང་དུ་འབྲོས་པར་འགྱུར། མ་མོའི་གནས་སུ་བདུགས་ན་རླུང་དང་སེར་བ་དང་སྤྲིན་ཐམས་ཅད་གཅོད་པར་བྱེད་མ་མོའི་ཚོགས་དང་ནག་པོ་ཆེན་པོ་ལ་སོགས་པ་འགུགས་

པར་འགྱུར་ཞིང་དབང་དུ་གྱུར་ནས་འདུག་པར་འགྱུར་བྱ་བ་ཐམས་ཅད་བྱེད་པར་འགྱུར་རོ། །གཡུལ་འགྱེད་པའི་ཚེ་བདུགས་ན་དཔུང་གི་ཚོགས་ཡན་ལག་བཞི་པའི་དཔུང་ལས་རྒྱལ་བར་འགྱུར། ཐམས་ཅད་དུ་བདུགས་པ་ཙམ་གྱིས་རྒྱལ་བར་འགྱུར། ཐམས་ཅད་དུ་སྦྱར་བར་བྱས་ན་

ཀུན་ཏུ་གྲུབ་པ་ཆེན་པོར་འགྱུར་རོ། །བདུག་པའི་ཆོ་གའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་གཅིག་པ། དེ་ནས་རིག་སྔགས་འཆང་རྣམས་ལ་ཕན་པ་དང་བདེ་བའི་ཕྱིར་ཐིག་ལེ་བྱ་བ་དང་། གདོང་བཀྲུ་བ་དང་

ལུས་བསྐུ་བ་བྱས་ན་ཡ་ལད་དང་། གོ་ཆ་བགོས་པ་དང་འདྲ་བར་འགྱུར་བ་བཤད་པར་བགྱི་ཡིས་བཅོམ་ལྡན་འདས་གསན་དུ་གསོལ། དོན་ཡོད་པའི་ནོར་བུ་རྒྱ་ཆེན་པོ་རྡོ་རྗེའི་ཞགས་པ་ཞེས་བྱ་བའི་ནོར་བུ་གང་སྦྱོར་བ་བྱས་པ་ཙམ་གྱིས་ཐམས་ཅད་འགྲུབ་པ་བླ་ན་མེད་པ་མཁས་པས་མཛོད་

เล่ม ๙๒ · หน้า 115a

སྤུ་རྣམས་སུ་ཐིག་ལེ་བྱས་ན་ཚོགས་ཀྱི་ནང་དང་སྐྱེ་བོ་མང་པོའི་ནང་དང་ཚོགས་པའི་ནང་དང་དགེ་འདུན་གྱི་ནང་དང་དེ་བཞིན་དུ་རིགས་བྱེད་ཀྱི་ཚོགས་བཞིའི་ནང་དུ་སྐར་མའི་ཚོགས་ཀྱི་ནང་དུ་ཟླ་བ་ཚེས་པ་བཞིན་དུ་མཛེས་ཤིང་འཇིགས་པ་མེད་དོ། །ལྷ་རྣམས་ཐམས་ཅད་ཡ་

མཚན་སྐྱེ། །དྲག་པོ་ཡི་ནི་ཅོད་པན་འཆང་། འཇིག་རྟེན་མགོན་པོའི་གཡས་ཀྱི་དབུའི། །དབུ་རྒྱན་རྩེ་ཕྲན་ཟླ་ཚེས་བཞིན། །གདོང་བཀྲུ་བ་ནི་མཆོག་ཡིན་ནོ། །ཟླ་བ་ཉ་བའི་འོད་དང་མཚུངས། །སྨིན་མ་རྣ་བ་དཔྲལ་བ་དང་། །པདྨ་དཀར་ཤམ་ཤིན་ཏུ་འཇམ། །མིག་གཉིས་

ཨུཏྤལ་སྔོན་པོ་འདྲ། །སེམས་ཅན་ཐམས་ཅད་དགའ་བས་བལྟ། །དགའ་ཞིང་རྟག་ཏུ་ཚིག་བཙན་འགྱུར། །དེ་ཡི་མིག་གིས་གང་མཐོང་བ། །ཐམས་ཅད་དབང་དུ་གྱུར་པར་འགྱུར། །སྐྱེས་པ་དག་ལ་བསྐུ་བྱས་ན། །རྟག་ཏུ་རིག་སྨྲ་བློ་ཆེ་ཞིང་། །རྟག་ཏུ་ཡ་ལ་གོ་བགོས་པའི། །

འཇིགས་པ་མེད་པའི་ལུས་སུ་འགྱུར། །འབྱུང་པོ་རྣམས་ནི་མི་བཟོད་ཅིང་། །གནོད་སྦྱིན་འབྱུང་པོ་གསང་བ་པས། །རྟག་ཏུ་ཐུབ་པར་མི་འགྱུར་རོ། །སྟོབས་ཆེན་ཕ་རོལ་གནོན་པ་དང་། །རྟག་ཏུ་སྲེད་མེད་སྟོབས་ལྡན་ཞིང་། །གླང་ཆེན་སྟོབས་ཀྱི་སྟོབས་ལྡན་འགྱུར། །ལྷ་རྣམས་འདར་ནི་ཡེད་ཡེད་

ཅིང་། །ཀླུ་རྣམས་མཚོན་སྐྲག་པར་བྱེད། །གལ་ཏེ་རིག་སྔགས་སྨྲ་བ་ཡིས། །རེག་ན་རི་རབ་ལྷུན་པོ་ཡང་། །གཡོ་བར་འགྱུར་བར་ཐེ་ཚོམ་མེད། །རྟག་ཏུ་སྲེད་མེད་སྟོབས་ལྡན་ཞིང་། །སྟོབས་དང་གཟུགས་དང་རྩལ་ལྡན་འགྱུར། །ནོར་བུ་རྒྱལ་པོ་བླ་ན་མེད། །འདི་ནི་ཐོས་པ་

ཙམ་གྱིས་ཀྱང་། །སྡིག་པ་ཀུན་ལས་ངེས་གྲོལ་ཞིང་། །དུག་རྣམས་ཐམས་ཅད་འཇོམས་པར་བྱེད། །དཔལ་དང་སྐལ་བཟང་རྟག་ཐོབ་འགྱུར། །གང་གི་ལག་ཏུ་ཐོགས་གྱུར་པ། །སྒྲིབ་བ་ཀུན་ལས་ངེས་གྲོལ་ཞིང་། །དེ་བཞིན་འཇིག་རྟེན་དགའ་བར་འགྱུར། །དེ་ནི་དེ་བཞིན་

གཤེགས་ཀུན་གྱི། །ཐུགས་སྐྱེས་གསུང་སྐྱེས་སྲས་སུ་འགྱུར། །འཕགས་པ་སྤྱན་རས་གཟིགས་དབང་ཕྱུག །བླ་མ་རྟག་ཏུ་རྗེས་འབྲང་ཞིང་། །རིག་སྔགས་སྨྲ་བ་དབུགས་འབྱུང་ཕྱིར། །དེ་བཞིན་དུ་ནི་བསྲུང་བ་དང་། །རྟག་ཏུ་མཆོག་ནི་སྦྱིན་པར་འགྱུར། །འཇིག་རྟེན་མགོན་

ที่มาและสัญญาอนุญาต

ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด